དགེ་འདུན་ལྷག་མ་འཆད་པ།
སྡོམ་ལ། མ་ལོག་སྦུབས་དང་དེ་བཞིན་གཡོས། །རྩོལ་བ་མེད་པ་དག་དང་མཚན། །གཞན་གྱི་དག་དང་བཅས་པ་འདིར། །ཚོགས་སུ་ཡང་དག་བཤད་པ་ཡིན། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་ཆེད་དུ་བསམ་ནས་ཁུ་བ་ཕྱུང་ན། རྨི་ལམ་གྱི་མ་གཏོགས་ཏེ། དགེ་འདུན་ལྷག་མ་ཞེས་གསུངས་པ་གང་ལགས་པ། བཙུན་པ། རེ་ཞིག་དགེ་སློང་གིས་གཉིད་མ་ལོག་པའི་གནས་སྐབས་སུ་བརྩམས་ཏེ་གཉིད་ལོག་ནས་ཁུ་བ་ཕྱུང་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་གཉིད་ལོག་པའི་ཚེ་བརྩམས་ཏེ་སད་ནས་ཁུ་བ་ཕྱུང་ན། ཅིར་འགྱུར་ལགས། གལ་ཏེ་རྩོལ་ན། ཉེས་པ་སྦོམ་པོར་འགྱུར་རོ། །འོན་ཏེ་མི་རྩོལ་ན། ལྟུང་བ་མེད་དོ། །བཙུན་པ། རེ་ཞིག་བཅོམ་ལྡན་འདས་ཀྱིས་ཁུ་བ་སྦུབས་སུ་ཕྱིན་པ་ཕྱུང་ན། ཉེས་པ་སྦོམ་པོར་འགྱུར་རོ། །ཞེས་གསུངས་པ་གང་ལགས་པ། ཇི་ཙམ་གྱིས་ན། སྦུབས་སུ་ཕྱིན་པ་ལགས། གནས་ནས་འཕགས་མ་ཐག་ཏུ་སྒུབས་སུ་ཕྱིན་པར་འགྱུར་རོ། །བཙུན་པ། བཅོམ་ལྡན་འདས་ཀྱིས་བསྐྱོད་དེ་བཏང་བ་ལས་ཁུ་བ་ཕྱུང་ན། ཉེས་པ་སྦོམ་པོར་འགྱུར་རོ། །ཞེས་གསུངས་པ་གང་ལགས་པ། ཇི་ཙམ་གྱིས་བསྐྱོད་དེ་བཏང་བ་ལགས་མཇུག་ཐོགས་སུ་གནས་ནས་འཕགས་པ་ལས་བཏང་བ་ཡིན་ནོ། །བཙུན་པ། མ་བརྩལ་བར་ཁུ་བ་ཕྱུང་ན། ཅིར་འགྱུར་ལགས། གལ་ཏེ་བདག་གིར་མི་བྱེད་ན། ལྟུང་བ་མེད་དོ། །འོན་ཏེ་བདག་གིར་བྱེད་ན། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་ཁུ་བ་འབྱིན་པ་ལས་མཚན་གྱུར་ཏེ་དགེ་སློང་མར་རེད་ན། ཅིར་འགྱུར་ལགས། ལྟུང་བྱེད་དུ་འགྱུར་རོ། །བཙུན་པ། རེ་ཞིག་དགེ་སློང་མ་ཁུ་བ་འབྱིན་པ་ལས་མཚན་གྱུར་ཏེ་དགེ་སློང་དུ་རེད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་གིས་གཞན་གྱི་ཟག་བྱེད་ནས་ཁུ་བ་འབྱིན་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་ཆེད་དུ་བསམ་སྟེ་ཁུ་བ་ཕྱུང་ན། དགེ་འདུན་ལྷག་མར་མི་འགྱུར་བ་ལྟ་
མཆིས་ལགས་སམ། ཡོད་དེ། སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློང་མ་སུན་ཕྱུང་བ་ལ་ནི། ཉེས་བྱས་སུ་འགྱུར་རོ། །ཇི་ལྟར་དགེ་སློང་ཁུ་བ་འབྱིན་པ། དགེ་འདུན་ལྷག་མར་འགྱུར་བ་དེ་བཞིན་དུ་བསླབ་པ་བྱིན་པ་ལ་ཡང་དགེ་འདུན་ལྷག་མར་འགྱུར་རོ། །དགེ་སློང་མ་ལ་ནི། གཞི་ཇི་ལྟ་བ་བཞིན་ནོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི། ཉེས་བྱས་སོ། །སྡོམ་ལ། ལུས་དང་ཡིད་གཉིས་སོ་དང་ནི། །རྨ་སྤུ་དེ་བཞིན་སེན་མོ་དང་། །བཞི་པ་གཉིས་སུ་བྱས་ན་ནི། །ཚོམས་སུ་ཡང་དག་བཤད་པ་ཡིན། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་དྲལ་ཞིང་གྱུར་པའི་སེམས་ཀྱིས་བུད་མེད་ཀྱི་ཡུལ་དང་ལྷན་ཅིག་ལུས་ཀྱིས་རེག་པར་བྱེད་ཅིང་། ལག་པ་ནས་བཟུང་ངམ། དཔུང་པ་ནས་བཟུང་ངམ། ལན་བུ་ནས་བཟུང་ངམ། ཡན་ལག་དང་། ཉིང་ལག་གང་ཡང་རུང་བ་ལ་ནོམ་པ་དང་། ཉུག་པ་བདག་གིར་བྱེད་ན། དགེ་འདུན་ལྷག་མའོ། །ཞེས་གསུངས་པ་གང་ལགས་པ། བཙུན་པ། རེ་ཞིག་བུད་མེད་ཀྱི་ལུས་ཀྱི་དབང་པོ་ཉམས་པར་གྱུར་ལ། དགེ་སློང་གིས་དེ་དང་ལྷན་ཅིག་ལུས་ཀྱིས་རེག་པར་གྱུར་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་ལུས་ཀྱི་དབང་པོ་ཉམས་པར་གྱུར་པ་དེས། བུད་མེད་དང་ལྷན་ཅིག་ལུས་ཀྱིས་རེག་པར་བྱེད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དེ་གཉིས་ཀའི་ལུས་ཀྱི་དབང་པོ་ཉམས་པར་གྱུར་ལ། དེ་དག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་བྱས་སོ། །བཙུན་པ། རེ་ཞིག་དགེ་སློང་དེ་འདི་ཡིན་ནམ། དེ་འདི་མ་ཡིན་སྙམ་དུ་སོམ་ཉི་དང་། ཐེ་ཚོམ་འཚལ་བཞིན་དུ་དེ་ཡང་དེ་དང་ལྷན་ཅིག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། དགེ་འདུན་གྱི་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་འདི་བུད་མེད་ཡིན་ནམ། འོན་ཏེ་བུད་མེད་མ་ཡིན་སྙམ་དུ་སོམ་ཉི་དང་། ཐེ་ཚོམ་འཚལ་བཞིན་དུ་དེ་ཡང་དེ་དང་ལྷན་ཅིག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། དངོས་པོ་ཇི་ལྟ་བུ་བཞིན་ནོ། །བཙུན་པ། རེ་ཞིག་སོས་རེག་པར་གྱུར་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་སོ་དག་ལ་རེག་པར་བགྱིད་ན། ཅིར་འགྱུར་ལགས། ཉེས་
པ་སྦོམ་པོར་འགྱུར་རོ། །བཙུན་པ། རེ་ཞིག་རྨས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་རྨ་དག་ལ་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་སྤུས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་སྤུ་དག་ལ་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་སེན་མོས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་སེན་མོ་དག་ལ་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་མིའི་བུད་མེད་ལ་མིར་འདུ་ཤེས་པས་ལུས་ཀྱིས་རེག་པར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །མི་ལ་མི་མ་ལགས་པར་འདུ་ཤེས་པས་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པར་མིར་འདུ་ཤེས་པས་ལུས་ཀྱིས་རེག་པར་བགྱིད་ན། ཅིར་འགྱུར་ལགས་ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མི་ལགས་པར་འདུ་ཤེས་པས་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བར་ཆད་དང་བཅས་པ་ལ་བར་ཆད་དང་བཅས་པར་འདུ་ཤེས་པས་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བར་ཆད་དང་བཅས་པ་ལ་བར་ཆད་མ་མཆིས་པར་འདུ་ཤེས་པས་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བར་ཆད་མ་མཆིས་པ་ལ་བར་ཆད་དང་བཅས་པར་འདུ་ཤེས་པས། ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བར་ཆད་མ་མཆིས་པ་ལ་བར་ཆད་མ་མཆིས་པར་འདུ་ཤེས་པས་ལུས་ཀྱིས་རེག་པར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ།། །།སྡོམ་ལ། འདུ་ཤེས་གཞན་རོ་རུས་པ་དང་། །མཚན་དང་སྐྱེས་པ་མཉེན་པ་དང་། །འཇམ་དྲོ་མ་ནིང་སྨྱོན་པ་དང་། །སྙོམས་འཇུག་
གཉིད་ལོག་འགྲོ་བ་མིན། བཙུན་པ། རེ་ཞིག་དགེ་སློང་བུད་མེད་གཞན་ཞིག་དང་ལྷན་ཅིག་ཆགས་པ་སྐྱེས་པ་ལས། གཞན་ཞིག་དང་ལྷན་ཅིག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ།། བཙུན་པ། རེ་ཞིག་དགེ་སློང་བུད་མེད་ཀྱི་རོ་དང་ལྷན་ཅིག་ཏུ་ལུས་ཀྱིས་རེག་པར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་ཤ་མ་མཆིས་པ་རུས་པའི་རུས་གོང་དང་ལྷན་ཅིག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྤོམ་པོར་འགྱུར་རོ། །བཙུན་པ། རེ་ཞིག་དགེ་སློང་བུད་མེད་དང་ལྷན་ཅིག་ལུས་ཀྱིས་རེག་པར་བགྱིད་པ་ལས། དེའི་མཚན་གྱུར་ཏེ་དགེ་སློང་མར་རེད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་མ་ཞིག་སྐྱེས་པ་དང་ལྷན་ཅིག་ཏུ་ལུས་ཀྱིས་རེག་པར་བགྱིད་པ་ལས། དེའི་མཚན་གྱུར་ཏེ་དགེ་སློང་དུ་རེད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་སྐྱེས་པ་དང་ལྷན་ཅིག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་མཉེན་ནམ་སྙམ་པའི་བསམ་པས་ལུས་ཀྱིས་རེག་པར་བགྱིད་ན། ཅིར་འགྱུར་ལགས་ཉེས་པ་སྦོམ་པོར་འགྱུར་རོ། །འཇམ་པའི་བསམ་པ་དང་། དྲོ་བའི་བསམ་པས་ཀྱང་དེ་དང་འདྲའོ། །བཙུན་པ། རེ་ཞིག་དགེ་སློང་མ་ནིང་དང་ལྷན་ཅིག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མ་ནིང་མོ་དང་ལྷན་ཅིག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་སྨྱོན་པ་དང་ལྷན་ཅིག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་སེམས་རྣམ་པར་འཁྲུགས་པ་དང་ལྷན་ཅིག་ལུས་ཀྱིས་རེག་པར་བགྱེད་ན། ཅིར་འགྱུར་ལགས་ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་བུད་མེད་སྙོམས་པར་ཞུགས་པ་དང་ལྷན་ཅིག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་རེ་ཞིག་དགེ་སློང་བུད་མེད་གཉིས་ཀྱིས་ལོག་པ་དང་ལྷན་ཅིག་ལུས་ཀྱིས་རེག་པར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ།
རེ་ཞིག་དགེ་སློང་འགྲོ་བ་གཞན་པའི་བུད་མེད་དང་ལྷན་ཅིག་ཏུ་ལུས་ཀྱིས་རེག་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་ལུས་ཀྱིས་རེག་པར་བགྱིད་ཀྱང་དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ། ཡོད་དེ། སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློང་མ་སུན་ཕྱུང་བ་ལ་ནི། ཉེས་བྱས་སོ། །ཇི་ལྟར་དགེ་སློང་གིས་ལུས་ཀྱིས་ཀུན་ཏུ་རེག་པར་བྱས་པ་ལས། དགེ་འདུན་ལྷག་མར་འགྱུར་བ་དེ་བཞིན་དུ་བསླབ་པ་བྱིན་པ་ལ་ཡང་དགེ་འདུན་ལྷག་མར་འགྱུར་རོ། །དགེ་སློང་མ་སྐྱེས་པ་དང་ལྷན་ཅིག་ལུས་ཀྱིས་ཀུན་ཏུ་རེག་པར་བྱེད་པ་ལ་ནི། ཕམ་པར་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི། ཉེས་བྱས་སུ་འགྱུར་རོ། །སྡོམ་ལ། སྐད་དང་ལུས་དང་དབེན་སྔགས་དང་། གཞན་ལས་གཞན་ཕྱིར་སྤྲུལ་པ་དང་། །ཕོ་ཉ་ཡི་གེ་ལག་བརྡ་དང་། །གཞན་ལ་སྙད་འདོགས་བརྒྱུད་པ་དང་། །བགོ་བཤའ་མ་ནིང་སྐྱེས་པ་དང་། །མ་ནིང་མོ་མཛེས་སྡིག་ཅན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་ལ་གནས་ངན་ལེན་གྱི་ཚིག་སྡིག་པ་ཅན་ཚོགས་པར་མི་འབྱུང་བ། འཁྲིག་པ་དང་ལྡན་པ། འདི་ལྟར་སྐྱེས་བུས་ན་ཆུང་ལ་བྱ་བ་བཞིན་དུ་ཡང་སྨྲས་ན། དགེ་འདུན་ལྷག་མའོ། །ཞེས་གསུངས་པ་གང་ལགས་པ། བཙུན་པ། རེ་ཞིག་དབུས་པའི་དགེ་སློང་ཞིག་གིས་དབུས་པའི་བུད་མེད་ལ་མཐའ་འཁོབ་པའི་སྐད་དུ་གནས་ངན་ལེན་གྱི་ཚིག་སྨྲས་ལ། དབུས་པའི་བུད་མེད་ཀྱིས་ཀྱང་མཐའ་འཁོབ་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མཐའ་འཁོབ་པ་ཞིག་གིས་མཐའ་འཁོབ་པའི་བུད་མེད་ལ་དབུས་པའི་སྐད་ཀྱིས་གནས་ངན་ལེན་གྱི་ཚིག་སྨྲས་ལ། མཐའ་འཁོབ་པའི་བུད་མེད་ཀྱིས་ཀྱང་ཡུལ་དབུས་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མཐའ་འཁོབ་པ་ཞིག་གིས་དབུས་པའི་བུད་མེད་ལ་མཐའ་འཁོབ་པའི་སྐད་དུ་གནས་ངན་ལེན་གྱི་ཚིག་སྨྲས་ལ། དབུས་པའི་བུད་མེད་ཀྱིས་ཀྱང་མཐའ་འཁོབ་པ
འི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབུས་པ་ཞིག་གིས་མཐའ་འཁོབ་པའི་བུད་མེད་ལ་དབུས་པའི་སྐད་དུ་གནས་ངན་ལེན་གྱི་ཚིག་སྨྲས་ལ། མཐའ་འཁོབ་པའི་བུད་མེད་ཀྱིས་ཀྱང་ཡུལ་དབུས་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་ལ་ལུས་ཀྱི་རྣམ་པར་རིག་བྱེད་ཀྱིས་གནས་ངན་ལེན་གྱི་ཚིག་སྟོན་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་དབེན་པ་ལ་དབེན་པར་འདུ་ཤེས་པས་བུད་མེད་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབེན་པ་ལ་མི་དབེན་པར་འདུ་ཤེས་པས་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབེན་པ་ལ་དབེན་པར་འདུ་ཤེས་པས་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབེན་པ་ལ་མི་དབེན་པར་འདུ་ཤེས་པས་བུད་མེད་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་གིས་སྨན་ནམ་གསང་སྔགས་དག་གིས་བདག་ཉིད་མི་གདའ་བར་བགྱིས་ཏེ། བུད་མེད་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་གཞན་ཞིག་ལས་བུད་མེད་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་གཞན་དག་གི་སླད་དུ་བུད་མེད་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་སྤྲུལ་པ་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་ཕོ་ཉ་ལས་བུད་མེད་ཀྱི་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་ཡི་གེ་དང་། ལག་བརྡ་དང་། གཞན་ལ་སྙད་འདོགས་པ་དང་། བརྒྱུད་དེ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་ལ་བགོ་
བཤའ་གྱིས་ཤིག་ཅེས་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་མ་ནིང་ལ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །སྐྱེས་པ་ལ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མ་ནིང་མོ་ལ་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་ལ་འདི་སྐད་དུ། མཛེས་སོ། །ཞེས་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་ལ་འདི་སྐད་ཅེས། སྡིག་པ་ཅན་ནོ། །ཞེས་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ།། །།སྡོམ་ལ། སྨྱོན་པ་དང་ནི་སེམས་འཁྲུགས་སམ། །ཆོར་བ་འོན་མ་གླེན་མ་དང་། །གཉིད་ལོག་ར་རོ་རབ་མྱོས་དང་། །དགེ་སློང་མ་དང་སྙོམས་པར་ཞུགས། །བཙུན་པ། རེ་ཞིག་དགེ་སློང་གིས་བུད་མེད་སྨྱོན་མ་ཞིག་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་སེམས་འཁྲུགས་པ་དང་། ཚོར་བས་ཉམ་ཐག་པ་དང་། འོན་མ་དང་། གླེན་མ་དང་། གཉིད་ཀྱིས་ལོག་པ་དང་། ཕྱག་ལས་ཁོམ་པ་དང་། རབ་ཏུ་མྱོས་པ་ལ་གནས་ངན་ལེན་གྱི་ཆིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་བུད་མེད་ལ་གནས་ངན་ལེན་གྱི་ཚིག་སྨྲས་པ་ལས། དེའི་མཚན་གྱུར་ཏེ་དགེ་སློང་མར་རེད་ན། ཅིར་འགྱུར་ལགས། ཉེས་བྱས་སུ་འགྱུར་རོ། །བཙུན་པ། རེ་ཞིག་དགེ་སློང་མ་ཞིག་སྐྱེས་པ་ལ་གནས་ངན་ལེན་གྱི་ཚིག་སྨྲས་པ་ལགས། དེའི་མཚན་གྱུར་ཏེ་དགེ་སློང་དུ་རེད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་བུད་མེད་ཀྱི་ཡུལ་ལ་གནས་ངན་ལེན་གྱི་ཆིག་སྨྲས་ན། དགེ་འདུན་ལྷག་མར་འགྱུར་རོ། །ཞེས་གསུངས་པ་གང་ལགས་པ། བཙུན་པ། དགེ་སློང་གིས་བུད་མེད་ཀྱི་ཡུལ་ལ་གནས་ངན་ལེན་གྱི་ཚིག་སྨྲས་ཀྱང་དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ། ཡོད་དེ། གལ་ཏེ་གཞན་གྱི་ཕྱིར་སྨྲས་ན། ཅིར་འགྱུར་ཞེ་ན། ཉེས་བ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་སྙོམས་པར་ཞུགས་པ་ཞིག་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་
ལགས། ཉེས་པ་སྦོམ་པོར་འགྱུར་རོ།། །།སྡོམ་ལ། བཞི་པ་གཉིས་དང་འདུ་ཤེས་གཞན། །གནས་ངན་ལེན་ལ་གང་བསྒྲགས་པ། །བསྙེན་བཀུར་ལ་ཡང་དེ་བཞིན་དུ། །རྒྱས་པར་རབ་ཏུ་བཤད་པར་བྱ། །བཙུན་པ། རེ་ཞིག་དགེ་སློང་གིས་མིའི་བུད་མེད་ལ་མི་མ་ལགས་པར་འདུ་ཤེས་པས། གནས་ངན་ལེན་གྱི་ཚིག་སྨྲས་ན།ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་པས་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མི་མ་ལགས་པར་འདུ་ཤེས་པས་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མིའི་བུད་མེད་ལ་མིར་འདུ་ཤེས་པས་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། དགེ་འདུན་ལྷག་མར་གྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་ལ་བུད་མེད་དུ་འདུ་ཤེས་པས་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བུད་མེད་ལ་སྐྱེས་པར་འདུ་ཤེས་པས་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །སྐྱེས་པ་ལ་བུད་མེད་དུ་འདུ་ཤེས་པས་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །སྐྱེས་པ་ལ་སྐྱེས་པར་འདུ་ཤེས་པས་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་གཞན་དུ་འདུ་ཤེས་པས་བུད་མེད་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བུད་མེད་ཀྱི་ཡུལ་ལ་གནས་ངན་ལེན་གྱི་ཚིག་སྨྲས་ཀྱང་། དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ། ཡོད་དེ། སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློང་མ་སུན་ཕྱུང་བ་ལ་ནི། ཉེས་བྱས་སོ། །ཇི་ལྟར་དགེ་སློང་ལ་གནས་ངན་ལེན་གྱི་ཚིག་སྨྲ་བའི་དགེ་འདུན་ལྷག་མར་འགྱུར་བ་དེ་བཞིན་དུ་བསླབ་པ་བྱིན་པ་ལ་ཡང་དགེ་འདུན་ལྷག་མར་འགྱུར་རོ། །དགེ་སློང་མ་ལ་ནི། ཉེས་པ་སྦོམ་པོར་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི། ཉེས་བྱས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་
འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་གྱི་མདུན་དུ། སྲུ། བསྙེན་བཀུར་རྣམས་ཀྱི་ནང་ན་ནི། འདི་ལྟ་སྟེ། ང་ལྟ་བུའི་དགེ་སློང་ཚུལ་ཁྲིམས་དང་ལྡན་པ། དགེ་བའི་ཆོས་ཅན། ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱེད་པ་འདི་ནི། མཆོག་ཡིན་ནོ། །ཞེས་བདག་ཉིད་ཀྱི་བསྙེན་བཀུར་བསྔགས་པ་བརྗོད་ན། དགེ་འདུན་ལྷག་མའོ། །ཞེས་གསུངས་པ་གང་ལགས་པ་ཞེས་བྱ་བ་སྟེ། གཞུང་ལྷག་མ་ནི། ཇི་ལྟར་གནས་ངན་ལེན་སྨྲ་བ་ལས་བཤད་པ་དེ་བཞིན་དུ་བསྙེན་བཀུར་བསྔགས་པ་ཡང་བརྗོད་པར་བྱའོ། །ཁྱད་པར་ནི། འདི་ཡིན་ཏེ། དགེ་སློང་མས་བསྙེན་བཀུར་བསྔགས་པ་ལ་ནི། ཉེས་བྱས་སུ་བརྗོད་དོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི། ཉེས་བྱས་ཁོ་ནའོ། །སྡོམ་ལ། ཆོས་གཉིས་ལ་ནི་བཞི་ཚན་དྲུག་།དབང་པོ་དང་ནི་ཉོ་བ་གཉིས། །སྦོ་བ་དང་ནི་བཞི་ཚན་གཉིས། །བརྒྱད་པ་དག་ནི་ཐ་མ་ཡིན། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། ཆོས་གང་འདས་པ་ཡང་མ་ལགས། མ་འོངས་པ་ཡང་མ་ལགས། ད་ལྟར་བྱུང་བ་ཡང་མ་ལགས། འགྲོ་བ་དང་ཕྱིར་འོང་བ་ཡང་མ་མཆིས་ལ། ལས་ཀྱི་མཐའི་མཐུག་གི་མཐར་ཕྱིན་པའི་ཆོས་དེ་གང་ལགས། ཉེ་བར་འཁོར། མྱ་ངན་ལས་འདས་པའོ། །བཙུན་པ། ཆོས་གང་འགྲོ་བ་དང་། ཕྱིར་འོང་བ་མཆིས་ལ། ལས་ཀྱི་མཐའི་མཇུག་གི་མཐར་ཕྱིན་པའི་ཆོས་དེ་གང་ལགས། ཉེ་བར་འཁོར། སྨྱན་བྱེད་པའོ། །དེ་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་བུད་མེད་ལ་སྐྱེས་པའི་ཚིག་ཀྱང་རུང་། །སྐྱེས་པ་ལ་བུད་མེད་ཀྱི་ཚིག་ཀྱང་རུང་། ཆུང་མ་ཉིད་དང་། མཛའ་ན་མོ་ཉིང་དུ་སྨྱན་བྱེད་ན། ཐ་ན་དེའི་སྐད་ཅིག་ལ་ཡང་རུང་སྟེ། དགེ་འདུན་ལྷག་མའོ། །ཞེས་གསུངས་པ་གང་ལགས་པ། བཙུན་པ། རེ་ཞིག་དགེ་སློང་གིས་སྨྱོན་པ་ལས་འཕྲིན་བླངས་ནས་སྨྱོན་བ་ལ་སྐྱེལ་ཅིང་། སྨྱོན་པ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་
རོ། །སྨྱོན་པ་ལས་འཕྲིན་བླངས་ནས་སྨྱོན་པ་ལ་སྐྱེལ་ཅིང་རང་བཞིན་དུ་གནས་པ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །སྨྱོན་པ་ལས་འཕྲིན་བླངས་ནས་རང་བཞིན་དུ་གནས་པ་ལ་སྐྱེལ་ཅིང་། སྨྱོན་པ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །སྨྱོན་པ་ལས་འཕྲིན་བླངས་ནས་རང་བཞིན་དུ་གནས་པ་ལ་སྐྱེལ་ཅིང་། རང་བཞིན་དུ་གནས་པ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་རང་བཞིན་དུ་གནས་པ་ལས་འཕྲིན་བླངས་ནས་རང་བཞིན་དུ་གནས་པ་ལ་སྐྱེལ་ཅིང་། རང་བཞིན་དུ་གནས་པ་ལ་སྐྱེལ་བར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །དེ་བཞིན་དུ་རང་བཞིན་དུ་གནས་པ་ལས་འཕྲིན་བླངས་ནས་རང་བཞིན་དུ་གནས་པ་ལ་སྐྱེལ་ཅིང་། སྨྱོན་པ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །རང་བཞིན་དུ་གནས་པ་ལས་འཕྲིན་བླངས་ནས་སྨྱོན་པ་ལ་སྐྱེལ་ཅིང་། རང་བཞིན་དུ་གནས་པ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །རང་བཞིན་དུ་གནས་པ་ལས་འཕྲིན་བླངས་ནས་སྨྱོས་པ་ལ་སྐྱེལ་ཅིང་། སྨྱོན་པ་ལ་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །སྨྱོན་པ་ལ་བཞི་ཚན་གཉིས་པོ་ཇི་ལྟ་བ་བཞིན་དུ་སེམས་འཁྲུགས་པ་ལ་ཡང་བཞི་ཚན་གཉིས། ཚོར་བས་ཉམ་ཐག་པ་ལ་ཡང་བཞི་ཚན་གཉིས་སུ་བྱའོ། །བཙུན་པ། དབང་བ་དང་མི་དབང་བའི་ཁྱིམ་བདག་གཉིས་ལ། རེ་ཞིག་དགེ་སློང་གིས་དབང་བ་ལས་འཕྲིན་བླངས་ནས་དབང་བ་ལ་སྐྱེལ་ཅིང་། དབང་བ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །དབང་བ་ལས་འཕྲིན་བླངས་ནས་དབང་བ་ལ་སྐྱེལ་ཅིང་། མི་དབང་བ་ལ་ཕྱིར་སྐྱལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབང་བ་ལས་འཕྲིན་བླངས་ནས་མི་དབང་བ་ལ་སྐྱེལ་ཅིང་། མི་དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབང་བ་ལས་འཕྲིན་བླངས་ནས་མི་དབང་བ་ལ་སྐྱེལ་ཅིང་། མི་དབང་བ་ལ་ཕྱིར་སྐྱེལ་བར་
བགྱིད་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་མི་དབང་བ་ལས་འཕྲིན་བླངས་ནས་མི་དབང་བ་ལ་སྐྱེལ་ཅིང་། མི་དབང་བ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་བྱས་སུ་འགྱུར་རོ། །མི་དབང་བ་ལས་འཕྲིན་བླངས་ནས་མི་དབང་བ་ལ་སྐྱེལ་ཅིང་། དབང་བ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབང་བ་ལས་འཕྲིན་བླངས་ནས་དབང་བ་ལ་སྐྱེལ་ཅིང་། མི་དབང་བ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབང་བ་ལས་འཕྲིན་བླངས་ནས་དབང་བ་ལ་སྐྱེལ་ཅིང་། དབང་བ་ལ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་ཁྱིམ་བདག་ཅིག་ལ་འདི་སྐད་ཅེས། བུད་མེད་ཉོས་ཤིག་།ཅེས་བགྱིས་ན། ཅིར་འགྱུར་ལགས། ཉེས་བྱས་སུ་འགྱུར་རོ། །བཙུན་པ། རེ་ཞིག་དགེ་སློང་གིས་ཁྱིམ་བདག་ཅིག་ལ་འདི་སྐད་ཅེས། བུད་མེད་ཆེ་གེ་མོ་ཞེས་བྱ་བ་ཉོས་ཤིག་།ཅེས་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་བསྙེན་པར་མ་རྫོགས་པར་སྨྱན་བགྱི་བར་སྦྱོར་བ་བགྱིས་ལ། བསྙེན་པར་མ་རྫོགས་པར་སྐྱེལ་ཅིང་། བསྙེན་པར་མ་རྫོགས་པར་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་བྱས་སོ། །བསྙེན་པར་མ་རྫོགས་པར་སྨྱན་བགྱི་བར་སྦྱོར་བ་བགྱིས་ལ། བསྙེན་པར་མ་རྫོགས་པར་སྐྱེལ་ཅིང་། བསྙེན་པར་རྫོགས་ཀར་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་བྱས་སོ། །བསྙེན་པར་མ་རྫོགས་པར་སྨྱན་བགྱི་བར་སྦྱོར་བ་བགྱིས་ལ། བསྙེན་པར་མ་རྫོགས་པར་སྐྱེལ་ཅིང་། བསྙེན་པར་རྫོགས་ཏེ་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཀར་སྨྱན་བགྱི་བར་སྦྱོར་བ་བགྱིས་ལ།བསྙེན་པར་རྫོགས་ཀར་སྐྱེལ་ཅིང་། བསྙེན་པར་རྫོགས་ཀར་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་བྱས་སུ་འགྱུར་རོ། །བསྙེན་པར་རྫོགས་ཀར་སྨྱན་བགྱི་བར་སྦྱོར་བ་བགྱིས་ལ། བསྙེན་པར་རྫོགས་ཀར་སྐྱེལ་ཅིང་། བསྙེན་པར་རྫོགས་ནས་
ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ནས་སྨྱན་བགྱི་བར་སྦྱོར་བ་བགྱིས་ལ། བསྙེན་པར་རྫོགས་ནས་སྐྱེལ་ཅིང་། བསྙེན་པར་རྫོགས་ནས་ཕྱིར་སྐྱེལ་བར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བསྙེན་པར་རྫོགས་ཏེ་སྨྱན་བགྱིས་ལ། བསྙེན་པར་རྫོགས་ཏེ་སྐྱེལ་ཅིང་། བསྙེན་པར་མ་རྫོགས་པར་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་བྱས་སུ་འགྱུར་རོ། །བཙུན་པ། གང་ཟག་དེ་ཉིད་སྤོ་བ་ཡང་ལགས། དེ་ཉིད་སྤོ་བ་བགྱིས་པ་ཡང་ལགས། དེ་ཉིད་མགུ་བར་བགྱི་བ་སྤྱོད་པ་ཡང་ལགས། དེ་ཉིད་མགུ་བར་བགྱི་བ་སྤྱད་པ་ཡང་ལགས་པ་ལྟ་མཆིས་ལགས་སམ། ཡོད་དེ། འདི་ལྟར་མགུ་བར་བྱ་བ་སྤྱད་པའི་གང་ཟག་ལ་དགེ་འདུན་ལྷག་མའི་ལྟུང་བ་མ་བཅབས་པ་བྱུང་བ་དེ། དགེ་འདུན་གྱི་དྲུང་དུ་སོང་ནས་མགུ་བར་བྱ་བ་གསོལ་བ་ལས། དགེ་འདུན་གྱིས་དེ་ལ་མགུ་བར་བྱ་བ་བྱིན་ནས་དེས་མགུ་བར་བྱ་བ་ཕལ་ཆེར་སྤྱོད་པ་ལས། དགེ་འདུན་ལྷག་མའི་ལྟུང་བ་གཉིས་པོ་གཅིག་ནི། ཞག་གཅིག་བཅབས། གཉིས་པ་ནི། ཞག་གཉིས་བཅབས་པ་བྱུང་ནས་དེ་དགེ་འདུན་གྱི་དྲུང་དུ་སོང་སྟེ་སྤོ་བ་གསོལ་པ་ལས། དགེ་འདུན་གྱིས་དེ་ལ་སྤོ་བ་བྱིན་ན། དེ་ལྟུང་བ་གཅིག་གིས་ནི། སྤོ་བ་བྱས་པ་ཡིན་ནོ། །གཉིས་པས་ནི། སྤོ་བ་ཡིན་ནོ། །གསུམ་པས་ནི། མགུ་བར་བྱ་བ་སྤྱོད་པ་ཡིན་ནོ། །བཞི་པས་ནི། མགུ་བར་བྱ་བ་སྤྱད་པ་ཡིན་ནོ། །བཙུན་པ། རེ་ཞིག་མོ་ཡང་མི་ལགས། ཕོ་ཡང་མི་ལགས་ལ། དགེ་སློང་གིས་དེ་གཉིས་ཀྱི་སྨྱན་བགྱིས་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །མོ་ནི། མི་མ་ལགས། ཕོ་ནི། མི་མ་ལགས་ལ། དེ་གཉིས་ཀྱི་སྨྱན་བགྱིས་ན། ཅིར་འགྱུར་ལགས།ཉེས་པ་སྦོམ་པོར་འགྱུར་རོ། །མོ་ནི། མི་མ་ལགས། ཕོ་ནི། མི་ལགས་ལ། དེ་གཉིས་ཀྱི་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མོ་ཡང་མི་མ་ལགས། ཕོ་ཡང་མི་མ་ལགས་ལ། དེ་གཉིས་ཀྱི་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་མི་དག་ལ་མིར་འདུ་ཤེས་པས་སྨྱན་བགྱིས་ན། ཅིར་འགྱུར་ལགས།
དགེ་འདུན་ལྷག་མར་འགྱུར་རོ། །མི་དག་ལ་མི་མ་ལགས་པར་འདུ་ཤེས་པས་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་དག་ལ་མིར་འདུ་ཤེས་པས་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་དག་ལ་མི་མ་ལགས་པར་འདུ་ཤེས་པས་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་བརྒྱུད་དེ་སྨྱན་བགྱིས་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །སྡོམ་ལ། གཞོན་ནུ་མ་དང་བུད་མེད་མངལ། །ཟ་མ་མ་ནིང་མ་ནིང་མོ། །དགེ་འདུན་ཐམས་ཅད་བརྟུལ་ཞུགས་གནས། །མཚན་གཉིས་དང་ནི་འདྲི་བའོ། །བཙུན་པ། རེ་ཞིག་དགེ་སློང་གིས་གཞོན་ནུ་མ་ལ་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་བུ་མ་མཆིས་པའི་ཁྱིམ་བདག་རྣམས་ཀྱི་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་མངལ་ན་གནས་པ་རྣམས་ཀྱི་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་ཟ་མའི་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མ་ནིང་མོ་རྣམས་ཀྱི་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། དགེ་འདུན་ཐམས་ཅད་འདུས་པའི་དྲུང་དུ་ཁྱིམ་བདག་ཅིག་ཕྱིན་ནས་འདི་སྐད་ཅེས། འཕགས་པ་དག་།བདག་གི་ཚིག་གིས་ཁྱིམ་བདག་ཆེ་གེ་མོ་ཞིག་ལ་འདི་སྐད་ཅེས། བདག་གི་བུ་ལ་བུ་མོའམ། སྲིང་མོའམ། ཚ་མོའམ། ཡང་ཚ་མོ་སྩོལ་ཅིག་།ཅེས་གསུང་སྤྱོད་དམ་ཞེས་བགྱིས་པ་ལས། གལ་ཏེ་དགེ་འདུན་གྱིས་འཕྲིན་བླངས་ནས་སྐྱེལ་ཅིང་། ཕྱིར་སྐྱེལ་བར་བགྱིད་ན། དགེ་འདུན་ཐམས་ཅད་ལ་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །འོན་ཏེ་དགེ་འདུན་ཐམས་ཅད་ཀྱི་འཕྲིན་གྱིས་དགེ་སློང་གཅིག་གིས་སྐྱེལ་ཅིང་ཕྱིར་སྐྱེལ་བར་བགྱིད་ན། དགེ་འདུན་ཐམས་ཅད་ལ་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །འོན་ཏེ་དགེ་སློང་གཅིག་གིས་རང་གི་ཚིག་གིས་སྐྱེལ་ཅིང་ཕྱིར་སྐྱེལ་བར་བགྱིད་ན། ཅིར་འགྱུར་ལགས། ཉེས་པ་སྦོམ་
པོར་འགྱུར་རོ། །དགེ་སློང་མ་དང་། བརྟུལ་ཞུགས་ལ་གནས་པ་ཚངས་པར་སྤྱོད་པ་གཞན་དག་གི་སྨྱན་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་འཕྲིན་ལེན་པ་ལས་བླངས་མ་ཐག་ཏུ་དེའི་མཚན་གྱུར་ཏེ་དགེ་སློང་མར་རེད་ནས་སྐྱེལ་ཅིང་ཕྱིར་སྐྱེལ་བར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་མ་ཞིག། འཕྲིན་ལེན་པ་ལས་བླངས་མ་ཐག་ཏུ་དེའི་མཚན་གྱུར་ཏེ་དགེ་སློང་དུ་རེད་ནས་སྐྱེལ་ཅིང་ཕྱིར་སྐྱེལ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་འཕྲིན་ལེན་བ་ལས་བུད་མེད་དེ་ལ་ནི། ཕོ་མཚན་སྐྱེས། སྐྱེས་པ་ལ་ནི། བུད་མེད་ཀྱི་མོ་མཚན་དོད་པར་གྱུར་ནས་མཚན་འཕོས་བཞིན་དུ་སྐྱེལ་ཅིང་ཕྱིར་སྐྱེལ་བར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། སྐྱེས་པས་བུད་མེད་དང་ལྷན་ཅིག་བརྡ་བགྱིས་པར་གྱུར་ལ། སྐྱེས་པ་དེས་དགེ་སློང་ཞིག་ལ་འདི་སྐད་ཅེས། འཕགས་པས་བུད་མེད་ལྟ་གཟིགས་སམ་ཞེས་བགྱིས་པ་དང་། དགེ་སློང་དེས་འདི་སྐད་ཅེས། དེ་ར་བའི་དྲུང་དུ་འདུག་གོ །ཞེས་བགྱིས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་སྨྱན་བགྱིས་ཀྱང་དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ། ཡོད་དེ། སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློང་མ་སུན་ཕྱུང་བ་ལ་ནི། ཉེས་བྱས་སོ། །ཇི་ལྟར་དགེ་སློང་སྨྱན་བྱས་པས། དགེ་སློང་ལྷག་མར་འགྱུར་བ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་དགེ་འདུན་ལྷག་མར་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་ནི། ཉེས་བྱས་སོ།། །།སྡོམ་ལ། གཞི་གསུམ་དང་ནི་ཚད་མེད་དང་། བདག་དང་གཞན་དང་མ་གཡོགས་པ། བབས་དང་བདུན་ཚན་ཉིད་དང་ནི། །མཚན་ནི་ཐ་མར་གྱུར་པ་ཡིན། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་དགེ་སློང་གིས་བསླངས་པ། བདག་པོ་མེད་པ། བདག་གི་ཕྱིར་ཁང་པ་ཞིག་རྩིག་ཏུ་འཇུག་ན། དགེ་སློང་
དེས་ཁང་པ་ཚད་བཞིན་དུ་རྩིགས་ཤིག་།དེ་ལ་ཁང་པའི་ཚད་ནི། འདི་ཡིན་ཏེ། ནང་གི་སྲིད་དུ་བདེ་བར་གཤེགས་པའི་མཐོ་བཅུ་གཉིས། ཞེང་དུ་མཐོ་བདུན་ནོ། །གཞི་བལྟ་བའི་ཕྱིར་དགེ་སློང་དེས། དགེ་སློང་དག་དཀྲི་བར་བྱའོ། །ཁྲིད་པའི་དགེ་སློང་དག་གིས་ཀྱང་གཞི་རུང་བ་དང་། རྩོད་པ་མེད་པ་དང་། བརྩམ་དུ་རུང་བར་བལྟ་བར་བྱའོ། །གལ་ཏེ་དགེ་སློང་གིས་གཞི་མ་རུང་བའམ། རྩོད་པ་དང་བཅས་པའམ། བརྩམ་དུ་མི་རུང་བར་བདག་གིས་བསླངས་པ། བདག་པོ་མེད་པ། །བདག་གི་ཕྱིར་ཁང་པ་རྩིག་དུ་འཇུག་གམ། གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ། དགེ་སློང་ཁྲིད་པ་དག་ལ་ཡང་གཞི་མི་སྟོན་ཏམ། ཚད་ལས་འདས་ན། དགེ་འདུན་ལྷག་མར་འགྱུར་རོ། །ཞེས་གསུངས་པ་གང་ལགས་པ། བཙུན་པ། རེ་ཞིག་དགེ་སློང་གིས་གཞི་མ་གནང་བར་ཁང་པ་རྩིག་ཏུ་གསོལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །གཞི་བསླངས་ནས་ཁང་པ་རྩིག་ཏུ་སྩོལ་ན། ཅིར་འགྱུར་ལགས། ཉེས་བྱས་སོ། །ཁང་པའི་གནང་བ་སྩོལ་ནས་ཁང་པ་མི་བརྩིགས་ན། ཅིར་འགྱུར་ལགས། ཉེས་བྱས་སོ། །བདག་གིས་བརྩམས་ཏེ་འཕྲོ་བོར་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །གཞན་གྱིས་འཕྲོ་བོར་བ་ལགས་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མ་གཡོགས་པ་རྩིག་ཏུ་སྩལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བརྩམས་ནས་བབས་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་བདག་ཉིད་སྲོག་དང་ཕྲལ་བའམ། ཁྱིམ་པ་ཉིད་དུ་གཡར་གྱིས་འཆེ་བ་དང་། དགེ་སྦྱོང་གི་ཆེད་ཉིད་དང་། ཟ་མ་ཉིད་དང་། མ་ནིང་ཉིད་དང་། དགེ་སློང་མ་སུན་ཕྱུང་བ་ཉིད་དང་། མ་གསོད་པ་ཉིད་དང་། ཕ་གསོད་པ་ཉིད་དང་། དགྲ་བཅོམ་པ་གསོད་པ་ཉིད་དང་། དགེ་འདུན་གྱི་དབྱེན་བྱེད་པ་ཉིད་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་ཉིད་དང་། མུ་སྟེགས་ཅན་ཉིད་དང་། མུ་སྟེགས་ཅན་ཞུགས་པ་ཉིད་དང་། རྐུ་ཐབས་སུ་གནས་པ་ཉིད་དང་། གནས་པར་མི་བྱ་བ་ཉིད་དང་། དང་པོ་མི་མཐུན་པ་ཅན་ཉིད་དང་། ཐ་དད་དུ་གནས་པ་ཉིད་དང་། ཁས་ལེན་པ་ཉིད་དང་། བསླབ་པ་སྩལ་བ་ཉིད་དུ་གཡར་
གྱིས་འཆེ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་མ་རྫོགས་པར་སྦྱོར་བ་བགྱིས་ལ་བསྙེན་པར་མ་རྫོགས་པར་ལགས་པར་བགྱིད་ན། ཅིར་འགྱུར་ལགས། ཉེས་བྱས་སོ།། །།འདུལ་བ་གཞུང་བླ་མ། བམ་པོ་གསུམ་པ། བསྙེན་པར་མ་རྫོགས་པར་སྦྱོར་བ་བགྱིས་ལ། བསྙེན་པར་རྫོགས་ཀར་ལགས་པར་བགྱིད་ན། ཅིར་འགྱུར་ལགས། ཉེས་བྱས་སོ། །བསྙེན་པར་མ་རྫོགས་པར་སྦྱོར་བ་བགྱིས་ལ། བསྙེན་པར་རྫོགས་ནས་ལགས་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཀར་སྦྱོར་བ་བགྱིས་ལ། བསྙེན་པར་རྫོགས་ཀར་ལགས་པར་བགྱིད་ན། ཅིར་འགྱུར་ལགས། ཉེས་བྱས་སོ། །བསྙེན་པར་རྫོགས་ཀར་སྦྱོར་བ་བགྱིས་ལ། བསྙེན་པར་རྫོགས་ནས་ལགས་པར་བགྱིད་ན། ཅིར་འགྱུར་ལགས། ཉེས་པ་སྦོམ་པར་འགྱུར་རོ། །བསྙེན་པར་རྫོགས་ནས་སྦྱོར་བ་བགྱིས་ལ། བསྙེན་པར་རྫོགས་ནས་ལགས་པར་བགྱིད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བསྙེན་པར་རྫོགས་ནས་སྦྱོར་བ་བགྱིས་ལ། བསྙེན་པར་མ་རྫོགས་པར་ལགས་ཕར་བགྱིད་ན། ཅིར་འགྱུར་ལགས། ཉེས་བྱས་སོ། །བཙུན་པ། རེ་ཞིག་དགེ་སློང་ཁང་པ་ཞིག་རྩིག་པར་རྩོམ་པ་ལས་དེའི་མཚན་གྱུར་ཏེ་དགེ་སློང་མར་རེད་ནས་ལགས་པར་བགྱིད་ན། ཅིར་འགྱུར་ལགས། ཉེས་བྱས་སོ། །བཙུན་པ། རེ་ཞིག་དགེ་སློང་མ་ཞིག་ཁང་པ་རྩིག་པར་རྩོམ་པ་ལས། དེའི་མཚན་གྱུར་ཏེ་དགེ་སློང་དུ་རེད་ནས་ལགས་པར་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ཁང་པ་བརྩིགས་ཀྱང་དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ། ཡོད་དེ། སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློང་མ་སུན་ཕྱུང་བ་ལ་ནི། ཉེས་བྱས་སུ་འགྱུར་རོ། །བསླབ་པ་སྩལ་པས་རྩིག་ཏུ་སྩལ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །དགེ་སློང་མ་ཞིག་གིས་རྩིག་ཏུ་སྩལ་ན། ཅིར་འགྱུར་ལགས། ཉེས་བྱས་སོ། །དགེ་སློང་མ་དང་། དགེ་ཚུལ་དང་། དགེ་ཚུལ་མ་ལ་ནི། ཉེས་བྱས་
སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་དགེ་སློང་གིས་བདག་པོ་ཡོད་པ། དགེ་འདུན་གྱི་ཆེད་དུ་གཙུག་ལག་ཁང་ཆེན་པོ་ཞིག་རྩིག་ཏུ་བཅུག་ན། གཞི་བལྟ་བའི་ཕྱིར་དགེ་སློང་དེས་དགེ་སློང་དག་དཀྲི་བར་བྱའོ། །ཁྲིད་པའི་དགེ་སློང་དག་གིས་ཀྱང་གཞི་རུང་བ་དང་། རྩོད་པ་མེད་པ་དང་། བརྩམ་དུ་རུང་བ་བལྟ་བར་བྱའོ། །གལ་ཏེ་དགེ་སློང་གིས་གཞི་མི་རུང་བ་དང་། རྩོད་པ་དང་བཅས་པའམ། བརྩམ་དུ་མི་རུང་བ། བདག་པོ་ཡོད་པར་དགེ་འདུན་གྱི་ཕྱིར་གཙུག་ལག་ཁང་ཆེན་པོ་རྩིག་ཏུ་འཇུག་གམ། གཞི་བ་ལྟ་བའི་ཕྱིར་དགེ་སློང་དག་ཀྱང་མ་ཁྲིད་དམ། དགེ་སློང་ཁྲིད་པ་དག་ལ་ཡང་གཞི་མི་སྟོན་ན། དགེ་འདུན་ལྷག་མའོ། །ཞེས་གསུངས་པ་གང་ལགས་པ་ཞེས་བྱ་སྟེ། ཚད་ལས་འདས་པ་དང་། བསླངས་པ་ཉིད་མ་བཏོགས་པ་གཞུང་ལྷག་མ་ནི། ཁང་པའི་དགེ་འདུན་ལྷག་མ་ལ་བཤད་པ་ཇི་ལྟ་བར་གཙུག་ལག་ཁང་ཆེན་པོ་ལ་ཡང་དེ་བཞིན་དུ་བརྗོད་པར་བྱའོ།། །།སྡོམ་ལ། ཕོ་ཉ་ཡི་གེ་ལག་བརྡ་དང་། །གཞན་ལ་སྙད་འདོགས་བརྒྱུད་པ་དང་། །སྨྱོན་པ་དང་ནི་སེམས་འཁྲུགས་དང་། །ཚོར་བ་འོན་པ་གླེན་པ་དང་། །གཉིད་ལོག་ར་རོ་རབ་ཏུ་མྱོས། །སྙོམས་ཞུགས་འགྲོ་དང་ཕྱི་རོལ་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་ཁྲོས་ཤིང་ཞེ་སྡང་བསམ་མགུ་སྟེ། ཅི་ནས་ཀྱང་འདི་ཚངས་པར་སྤྱོད་པ་དང་དཔྲལ་ལོ། །སྙམ་པས། དགེ་སློང་དག་པ། ལྟུང་བ་མེད་པ་ལ་གཞི་མེད་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་པ་ལས། དེ་དུས་གཞན་ཞིག་ན་དྲིས་ཀྱང་རུང་། མ་དྲིས་ཀྱང་རུང་། རྩོད་པ་དེ་ཡང་གཞི་མེད་པ་ཞིག་ཡིན་པས། དགེ་སློང་ཡང་ཞེ་སྡང་ལ་གནས་པས་ཞེ་སྡང་གིས་སྨྲས་སོ། །ཞེ་ན། དགེ་འདུན་ལྷག་མའོ། །ཞེས་གསུངས་པ་གང་ལགས་པ། བཙུན་པ། རེ་ཞིག་དགེ་སློང་གིས་དགེ་སློང་ལ་གཞི་མ་མཆིས་པར་ཕོ་ཉ་ལས་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་ཡི་གེ་དང་། ལག་བརྡ་དང་། གཞན་ལ་སྙད་འདོགས་པ་དང་། བརྒྱུད་པས་སྐུར་པ་བཏབ་པ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་
པ་རེ་ཞིག་དགེ་སློང་གིས་དགེ་སློང་སྨྱོན་པ་ཞིག་ལ་སྐུར་པ་བཏབ་པ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དེ་བཞིན་དུ་སེམས་འཁྲུགས་པ་དང་། ཚོར་པས་ཉམ་ཐག་པ་དང་། འོན་པ་དང་། གླེན་པ་དང་། གཉིད་ཀྱིས་ལོག་པ་དང་། ཕྱག་ལས་ཁོམ་པ་དང་། རབ་ཏུ་མྱོས་པ་དང་། སྙོམས་པར་ཞུགས་པ་དང་། འགྲོ་བ་གཞན་དུ་གནས་པའི་དགེ་སློང་ལ་གཞི་མ་མཆིས་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་འདི་ལས་ཕྱི་རོལ་པ་གཞན་མུ་སྟེགས་ཅན་དང་། དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་ཏུ་རྒྱུ་རྣམས་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་བྱས་སོ།། སྡོམ་ལ། སྐད་དང་ལུས་དང་དབེན་སྔགས་དང་། །གཞན་གྱིས་གཞན་ཕྱིར་སྐུར་པ་བཏབ། ཁྱིམ་པ་དག་ལ་སོགས་པ་དང་། །མཚན་རྣམས་དང་ནི་བཞི་ཚན་ནོ། །བཙུན་པ། རེ་ཞིག་དབུས་ཀྱི་དགེ་སློང་གིས་མཐའ་འཁོབ་པའི་སྐད་དུ་དབུས་ཀྱི་དགེ་སློང་ཞིག་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ལ། ཡུལ་དབུས་པའི་དགེ་སློང་གིས་ཀྱང་། མཐའ་འཁོབ་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མཐའ་འཁོབ་པས་དབུས་པའི་སྐད་དུ་མཐའ་འཁོབ་པའི་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ལ། མཐའ་འཁོབ་པའི་དགེ་སློང་གིས་ཀྱང་ཡུལ་དབུས་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མཐའ་འཁོབ་པས་མཐའ་འཁོབ་པའི་སྐད་དུ་དབུས་པའི་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་པ་ལ། ཡུལ་དབུས་པའི་དགེ་སློང་གིས་ཀྱང་མཐའ་འཁོབ་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབུས་པས་དབུས་པའི་སྐད་དུ་མཐའ་འཁོར་པའི་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ལ། མཐའ་འཁོབ་པའི་དགེ་སློང་གིས་ཀྱང་དབུས་པའི་སྐད་དེ་མ་འཚལ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་
ཞིག་དགེ་སློང་གིས་ལུས་ཀྱི་རྣམ་པར་རིག་བྱེད་ཀྱིས་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་དབེན་པ་ལ་དབེན་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དབེན་པ་ལ་མི་དབེན་པར་འདུ་ཤེས་པས། གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབེན་པ་ལ་དབེན་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་དབེན་པ་ལ་མི་དབེན་པར་འདུ་ཤེས་པས། གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་གིས་སྨན་ནམ། གསང་སྔགས་ཀྱིས་བདག་ཉིད་མི་གདའ་བར་བགྱིས་ཏེ། དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་གཞན་ལས་དགེ་སློང་ཞིག་ལ་གཞི་མ་མཆིས་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གཞན་རྣམས་ཀྱི་སླད་དུ་གཞི་མ་མཆིས་པར་ཕམ་པའི་ཆོས་ཀྱིས་སྐུར་བ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་ཁྱིམ་པ་ལ་གཞི་མ་མཆིས་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་བྱས་སོ། །ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། མ་གསོད་པ་དང་། ཕ་གསོད་པ་དང་། དགྲ་བཅོམ་པ་གསོད་པ་དང་། མུ་སྟེགས་ཅན་དང་། མུ་སྟེགས་ཅན་ཞུགས་པ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། སྔར་ལྟུང་བ་བྱུང་བ་ལ་གཞི་མ་མཆིས་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ་རེ་ཞིག་དགེ་སློང་གིས་དགེ་སློང་
མ་ལ་གཞི་མ་མཆིས་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་ན་ཅིར་འགྱུར་ལགས། དགེ་འདུན་ལྷག་མར་འགྱུར་རོ། །དགེ་འདུན་གྱི་དབྱེན་བགྱིད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་དང་། གནས་པར་མི་བྱ་བ་དང་། ཐ་དད་དུ་གནས་པ་དང་། ཁས་བླངས་པ་དང་། བསླབ་པ་སྩལ་པའི་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་ཞིག་གིས་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་འདེབས་པ་ལས། དེའི་མཚན་གྱུར་ཏེ་དགེ་སློང་མར་རེད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་མ་ཞིག་གིས་དགེ་སློང་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་འདེབས་པ་ལས། དེའི་མཚན་གྱུར་ཏེ་དགེ་སློང་དུ་རེད་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་པས། གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་པས། གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་པས། གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། རེ་ཞིག་དགེ་སློང་གིས་མིའི་དགེ་སློང་ལ་མིར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །མི་ལ་མི་མ་ལགས་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །མི་ལ་མི་མ་ལགས་པར་འདུ་ཤེས་པས་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་
པས་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མི་མ་ལགས་པར་འདུ་ཤེས་པས། གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །སྡོམ་ལ། དང་པོ་མཐའ་དང་མཚམས་མེད་པ། །ལྷག་མ་དང་ནི་གཅིག་ལ་གཅིག་།བྲིས་པ་དང་ནི་བག་ཙམ་ཉིད། །རྒྱ་ཆེར་བྱ་བ་ཉིད་ཡིན་ནོ། །བཙུན་པ། རེ་ཞིག་དགེ་སློང་བདག་ཉིད་ངས་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ཏོ། །ཞེས་ཁས་ལེན་པ་དེ་ལ་དགེ་སློང་ཞིག་གིས་གཞི་མ་མཆིས་པར་རྐུ་བ་དང་། གསོད་པའམ། བླ་མར་གྱུར་པའི་ཆོས་སྨྲ་བས་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་བདག་ཉིད་ངས་ཡོ་བྱད་ཆེན་པོ་བརྐུས་སོ། །ཞེས་ཁས་ལེན་པ་དེ་ལ་དགེ་སློང་ཞིག་གིས་གཞི་མ་མཆིས་པར་གསོད་པའམ། བླ་མར་གྱུར་པའི་ཆོས་སྨྲའམ། མི་ཚངས་པར་སྤྱོད་པར་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། རེ་ཞིག་དགེ་སློང་བདག་ཉིད་ངས་མི་སྲོག་དང་ཕྲལ་ལོ། །ཞེས་ཁས་ལེན་པ་དེ་ལ། དགེ་སློང་ཞིག་གིས་གཞི་མ་མཆིས་པར་བླ་མར་གྱུར་པའི་ཆོས་སྨྲའམ། མི་ཚངས་པར་སྤྱོད་པའམ། རྐུ་བས་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ།། བཙུན་པ། རེ་ཞིག་དགེ་སློང་བདག་ཉིད་ངས་མིའི་ཆོས་བླ་མར་གྱུར་པ་སྨྲས་སོ། །ཞེས་ཁས་ལེན་པ་དེ་ལ་དགེ་སློང་ཞིག་གིས་གཞི་མ་མཆིས་པར་མི་ཚངས་པར་སྤྱོད་པའམ། རྐུའམ། སྲོག་གཅོད་པར་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །བཙུན་པ། བཅོམ་ལྡན་འདས་ཀྱིས་དགེ་སློང་གིས་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། དགེ་འདུན་ལྷག་མར་འགྱུར་རོ། །ཞེས་གསུངས་པ་གང་ལགས་པ། བཙུན་པ། རེ་ཞིག་དགེ་སློང་གིས་དགེ་སློང་ལ་གཞི་མ་མཆིས་པར་མཚམས་མེད་པས་སྐུར་པ་བཏབ་ན། ཅིར་འགྱུར་ལགས། གལ་ཏེ་མ་དང་། ཕ་དང་། དགྲ་བཅོམ་པ་གསོད་པས་སྐུར་པ་བཏབ་ན། དགེ་འདུན་ལྷག་མར་འགྱུར་རོ། །
འོན་ཏེ་གཞི་མེད་པར་དགེ་འདུན་གྱི་དབྱེན་བྱེད་པ་དང་། ངན་སེམས་ཀྱིས་ཁྲག་འབྱིན་པས་སྐུར་པ་བཏབ་ན་ནི། ཉེས་བྱས་སོ། །དེ་ཅིའི་ཕྱིར་ཞེ་ན། ཉེ་བར་འཁོར། གང་གིས་ཕ་དང་། མ་དང་། དགྲ་བཅོམ་པ་གསོད་པས་སྐུར་པ་བཏབ་པ་དེ་ནི། ཕམ་པའི་ཆོས་ཀྱིས་སྐུར་པ་བཏབ་པ་ཡིན་ནོ། །གང་གིས་དགེ་འདུན་གྱི་དབྱེན་བྱེད་པ་དང་། ངན་སེམས་ཀྱིས་ཁྲག་འབྱིན་པར་སྐུར་པ་བཏབ་པ་དེས་ནི། ཉེས་པ་སྦོམ་པོས་སྐུར་པ་བཏབ་པ་ཡིན་ཏེ། ཉེས་པ་སྦོམ་པོས་ནི། དགེ་སློང་མ་ཡིན་པར་མི་འགྱུར་གྱི། དེ་ནི། བཤགས་པར་འོས་པ་ཡིན་ནོ། །བཙུན་པ། རེ་ཞིག་དགེ་སློང་གིས་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། དགེ་འདུན་ལྷག་མར་འགྱུར་ན། གལ་ཏེ་གཞི་མ་མཆིས་པར་དགེ་འདུན་ལྷག་མའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ལྟུང་བྱེད་དུ་འགྱུར་རོ། །གཞི་མ་མཆིས་པར་སོ་སོར་བཤགས་པར་བགྱི་བ་དང་། ཉེས་བྱས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་བྱས་སོ། །དེ་བཞིན་དུ་གཞི་མ་མཆིས་པར་ཉེས་པ་སྦོམ་པོས་སྐུར་པ་བཏབ་ན། ཅིར་འགྱུར་ལགས། ཉེས་བྱས་སོ། །བཙུན་པ། བཅོམ་ལྡན་འདས་ཀྱིས་དགེ་སློང་གིས་དགེ་སློང་ལ་གཞི་མེད་པར་ཕམ་པའི་ཆོས་ཀྱིས་སྐུར་པ་བཏབ་ན་ནི། དགེ་འདུན་ལྷག་མར་འགྱུར་རོ། །ཞེས་གསུངས་པ་གང་ལགས་པ། བཙུན་པ། རེ་ཞིག་དགེ་སློང་གིས་དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དགེ་སློང་མས་དགེ་སློང་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །དགེ་སློང་མས་དགེ་སློང་ལ་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། དགེ་འདུན་ལྷག་མར་འགྱུར་རོ། །དགེ་སློབ་མས་དགེ་སློང་མ་དང་། དགེ་ཚུལ་དང་། དགེ་ཚུལ་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །དགེ་སློང་མས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་
ཚུལ་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་བྱས་སོ། །དགེ་ཚུལ་གྱིས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་བྱས་སོ། །དགེ་ཚུལ་མས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་དང་། དགེ་ཚུལ་མ་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ན། ཅིར་འགྱུར་ལགས། ཉེས་བྱས་སོ། །བཙུན་པ། རེ་ཞིག་དགེ་སློང་གིས་བདག་ཉིད་ཀྱིས་བྲིས་ནས་འདི་སྐད་ཅེས། ཡི་གེ་འདི་ལས་ནི། འདི་སྐད་དུ་ཁྱོད་མི་ཚངས་པར་སྤྱོད་པའི་ཕམ་པ་བྱུང་ཞེས་ཟེར་རོ། །ཞེས་མཆིན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་དགེ་སློང་ལ་གཞི་མ་མཆིས་པར་ཕམ་པའི་ཆོས་ཀྱིས་སྐུར་པ་བཏབ་ཀྱང་དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ། ཡོད་དེ། སྔར་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་མི་མཐུན་པ་ཅན་དང་། མ་ནིང་དང་། དགེ་སློང་མ་སུན་ཕྱུང་བ་ལ་ནི། ཉེས་བྱས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་ཁྲོས་ཤིང་ཞེ་སྡང་བར་གྱུར་ནས་ཅི་ནས་ཀྱང་འདི་ཚངས་པར་སྤྱོད་པ་དང་དབྲལ་ལོ། །སྙམ་ནས་དགེ་སློང་དག་པ་ལྟུང་བ་མེད་པ་ལ་གཞན་གྱི་ཆ་དང་མཐུན་པ་མ་ཡིན་པ་ཕམ་པར་འགྱུར་བའི་ཆོས་ཀྱི་སྐུར་པ་བཏབ་པ་ལས། དེ་དུས་གཞན་ཞིག་ན། དྲིས་ཀྱང་རུང་། མ་དྲིས་ཀྱང་རུང་རྩོད་པ་དེ་གཞན་གྱི་ཆ་དང་མཐུན་པ་མ་ཡིན་པ་ཡིན་ལ། རྩོད་པ་གཞན་གྱི་ཆ་དང་མཐུན་པ་མ་ཡིན་པས། བག་ཙམ་ལས་བསམ་པ་ཙམ་གྱིས་ཆོས་འགའ་ཞིག་བླངས་པར་གྱུར་ལ། དགེ་སློང་དེ་ཡང་ཞེ་སྡང་ལ་གནས་པས་ཞེ་སྡང་གིས་སྨྲས་སོ། །ཞེ་ན། དགེ་འདུན་ལྷག་མའོ། །ཞེས་གསུངས་པ་གང་ལགས་པ་ཞེས་བྱ་བ་སྟེ། གཞུང་ལྷག་མ་ནི། གཞི་མེད་པ་ཇི་ལྟ་བ་དེ་བཞིན་དུ་བག་ཙམ་ལ་རྒྱ་ཆེར་བརྗོད་པར་བྱའོ།། །།སྡོམ་ལ། བཤེས་པ་དང་ནི་གསོལ་བ་དང་། །གླེན་པ་
དང་ནི་དྲན་པ་གཉིས། །བཞི་པ་འདུག་དང་མ་བསྐོས་དང་། །འདུན་པས་གཅིག་དང་ནམ་མཁའ་ལ། །འདུག་པ་རྒྱས་པ་ཉིད་དུ་བྱ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བར་འཁོར་གྱིས་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་ནས་དགེ་སློང་དེ་ལ། དགེ་སློང་རྣམས་ཀྱིས་འདི་སྐད་ཅེས། ཚེ་དང་ལྡན་པ། ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག་།དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཅིག་།ཚེ་དང་ལྡན་པ། དགེ་འདུན་དང་མཐུན་པར་གྱིས་ཤིག་།དགེ་འདུན་མཐུན། མི་ཕྱེད། ཀུན་ཏུ་དགའ། མི་རྩོད། མཆོག་གཅིག། འདོན་པ་གཅིག་ཅིང་། ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་པ་བདེ་བ་དང་རེག་པར་གནས་པར་འགྱུར་གྱི། ཚེ་དང་ལྡན་པ། ཁྱོད་དགེ་འདུན་འབྱེད་པའི་གཞི་འདི་ལྟ་བུ་འདི་ཐོང་ཞིག་།ཅེས་བསྒོ་བར་བྱའོ། །དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན། གལ་ཏེ་གཞི་དེ་གཏོང་ན། དེ་ལྟ་ན་ལེགས། གལ་ཏེ་མི་གཏོང་ན། གཞི་དེ་གཏོང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན། གཞི་དེ་གཏོང་ན། དེ་ལྟ་ན་ལེགས། གལ་ཏེ་མི་གཏོང་ན། དགེ་འདུན་ལྷག་མའོ། །ཞེས་གསུངས་པ་གང་ལགས་པ། བཙུན་པ། རེ་ཞིག་དགེ་སློང་གིས་བཤེས་པའི་ཚིག་གིས་མ་བསྒོ་བར་གསོལ་པ་དང་བཞིའི་ལས་ཀྱིས་བསྒོ་བར་བགྱིད་ན། བསྒོ་བ་ཞེས་བགྱི་བའམ། འོན་ཏེ་མ་བསྒོ་བ་ཞེས་བགྱི་ལགས། བཀའ་སྩལ་པ། མ་བསྒོ་བ་ཞེས་བྱའོ། །བསྒོ་བ་འཆགས་ལགས་སམ། ཉེ་བར་འཁོར། མི་འཆགས་ཏེ། དགེ་འདུན་ལ་ཡང་དེས་འགལ་ཚབས་ཅན་དུ་འགྱུར་རོ། །བཙུན་པ། བཤེས་པའི་ཚིག་གིས་བསྒོ་ནས་གསོལ་བ་དང་བཞིའི་ལས་ཀྱིས་བསྒོ་ན། བསྒོ་བ་ཞེས་བགྱིའམ། འོན་ཏེ་མ་བསྒོ་བ་ཞེས་བགྱི་ལགས། བཀའ་སྩལ་པ། བསྒོ་བ་ཞེས་བྱའོ། །བསྒོ་བ་འཆགས་ལགས་སམ། ཉེ་བར་འཁོར།
འཆགས་ཏེ། དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །བཙུན་པ། བསྐྲད་པའི་ལས་མ་བགྱིས་པར་བཤེས་པའི་ཚིག་གིས་བསྒོ་བར་བགྱིད་ན། བསྒོ་བ་ཞེས་བགྱིའམ། འོན་ཏེ་མ་བསྒོ་བ་ཞེས་བགྱི་ལགས། བཀའ་སྩལ་པ། མ་བསྒོ་བ་ཞེས་བྱའོ། །བསྒོ་བ་འཆགས་ལགས་སམ། ཉེ་བར་འཁོར། མི་འཆགས་ཏེ། དགེ་འདུན་ལ་ཡང་འགལ་ཚབས་ཅན་དུ་འགྱུར་རོ། །བཙུན་པ། བསྐྲད་པའི་ལས་བགྱིས་ཏེ་བཤེས་པའི་ཚིག་གིས་བསྒོ་བར་བགྱིད་ན། བསྒོ་བ་ཞེས་བགྱིའམ། འོན་ཏེ་མ་བསྒོ་བ་ཞེས་བགྱི་ལགས། བཀའ་སྩལ་པ།བསྒོ་བ་ཞེས་བྱའོ། །བསྒོ་བ་འཆགས་ལགས་སམ། ཉེ་བར་འཁོར། འཆགས་ཏེ། དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །བཙུན་པ། བསྐྲད་པའི་ལས་མ་བགྱིས་པར་དགེ་འདུན་ལ་འདུན་པས་འགྲོ་བའོ། །ཞེས་མཆི་ཞིང་། ཞེ་སྡང་གིས་འགྲོ་བ་དང་། གཏི་མུག་གིས་འགྲོ་བ་དང་། འཇིགས་པས་འགྲོ་བའོ། །ཞེས་མཆི་ན། ཅིར་འགྱུར་ལགས། ཉེས་བྱས་སོ། །བསྒོ་བར་བགྱིའམ། འོན་ཏེ་བསྒོ་བར་མི་བགྱི་ལགས། བཀའ་སྩལ་པ། བསྒོ་བར་མི་བྱའོ། །བསྒོ་བ་འཆགས་སམ། ཉེ་བར་འཁོར། མི་འཆགས་ཏེ། དགེ་འདུན་ལ་ཡང་འགལ་ཚབས་ཅན་དུ་འགྱུར་རོ། །བསྐྲད་པའི་ལས་བགྱིས་ནས་དགེ་འདུན་ལ་འདུན་པས་འགྲོ་བའོ། །ཞེས་མཆི་ཞིང་། ཞེ་སྡང་གིས་འགྲོ་བ་དང་། གཏི་མུག་གིས་འགྲོ་བ་དང་། འཇིགས་པས་འགྲོ་བའོ། །ཞེས་མཆི་ན། ཅིར་འགྱུར་ལགས། ཉེས་བྱས་སོ། །བསྒོ་བར་བགྱིའམ། འོན་ཏེ་བསྒོ་བར་མི་བགྱི་ལགས། བཀའ་སྩལ་པ། བསྒོ་བར་བྱའོ། །བསྒོ་བ་འཆགས་ལགས་སམ། ཉེ་བར་འཁོར། འཆགས་ཏེ། དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ། །བཙུན་པ། རེ་ཞིག་མ་གླེང་དྲན་པར་མ་བགྱིས་པར་བདག་ཉིད་བཀའ་བློ་མི་བདེ་བ་ལ་གནས་པར་བགྱིད་ན། ཅིར་འགྱུར་ལགས། ཉེས་བྱས་སོ། །བསྒོ་བར་བགྱིའམ། འོན་ཏེ་བསྒོ་བར་མི་བགྱི་ལགས། བཀའ་སྩལ་པ། བསྒོ་བར་མི་བྱའོ། །བསྒོ་བ་འཆགས་ལགས་སམ། ཉེ་བར་འཁོར། མི་འཆགས་སོ། །བཙུན་པ། རེ་ཞིག་གླེང་ཞིང་དྲན་པར་བགྱིས་པ་ལས། བདག་ཉིད་བཀའ་བློ་མི་བདེ་བ་ལ་གནས་པར་བགྱིད་ན། ཅིར་འགྱུར་ལགས། ཉེས་བྱས་སོ། །བསྒོ་བར་བགྱིའམ། འོན་ཏེ་
བསྒོ་བར་མི་བགྱི་ལགས། བཀའ་སྩལ་པ། བསྒོ་བར་བྱའོ། །བསྒོ་བ་འཆགས་ལགས་སམ། ཉེ་བར་འཁོར། འཆགས་སོ། །མཚམས་ཀྱི་ནང་ན་མཆིས་པ་དག་གིས་མཚམས་ཀྱི་སླད་རོལ་ན་མཆིས་པ་བསྒོ་ན། བསྒོ་བ་ཞེས་བགྱི་ལགས་སམ།ཉེ་བར་འཁོར། མ་ཡིན་ནོ། །མཚམས་ཀྱི་སླད་རོལ་ན་མཆིས་པ་དག་གིས་མཚམས་ཀྱི་ནང་ན་མཆིས་པ་དག་ལ་བསྒོ་ན། བསྒོ་བ་ཞེས་བགྱི་ལགས་སམ་ཉེ་བར་འཁོར། མ་ཡིན་ནོ། །བཙུན་པ། རེ་ཞིག་དགེ་སློང་ལས་བགྱིད་པ་མཚམས་ཀྱི་ནང་ན་མཆིས་པས། མཚམས་ཀྱི་སླད་རོལ་ན་མཆིས་པ་དག་ལ་བསྒོ་ན། བསྒོ་བ་ཞེས་བགྱི་ལགས་སམ། ཉེ་བར་འཁོར། མ་ཡིན་ནོ། །བཙུན་པ། རེ་ཞིག་དགེ་སློང་ལས་བགྱིད་པ་མཚམས་ཀྱི་སླད་རོལ་ན་མཆིས་པས། མཚམས་ཀྱི་ནང་ན་མཆིས་པ་དག་ལ་བསྒོ་ན། བསྒོ་བ་ཞེས་བགྱི་ལགས་སམ། ཉེ་བར་འཁོར། མ་ཡིན་ནོ། །བཙུན་པ། རེ་ཞིག་དགེ་སློང་ལས་བགྱིད་པས་མཚམས་མནན་ཅིང་། མཚམས་ནོན་པར་བགྱིས་ཏེ། མཚམས་སུ་མཆིས་ནས་བསྒོ་ན། བསྒོ་བ་ཞེས་བགྱིའམ། མ་བསྒོ་བ་ཞེས་བགྱི་ལགས། ཉེ་བར་འཁོར། བསྒོ་བ་ཞེས་བྱའོ། །བསྒོ་བ་འཆགས་ལགས་སམ། ཉེ་བར་འཁོར། འཆགས་སོ། །བཙུན་པ། དགེ་སློང་ལས་བགྱིད་པར་མ་བསྐོས་པ་ཞིག་གིས་མཚམས་ཀྱི་ནང་ན་མཆིས་པའི་གང་ཟག་བཞི་བསྐྲད་ན། བསྐྲད་པ་ཞེས་བགྱི་ལགས་སམ། ཉེ་བར་འཁོར། མ་ཡིན་ནོ། །བཙུན་པ། རེ་ཞིག་དགེ་སློང་ལས་བགྱིད་པར་བསྐོས་པས། མཚམས་ཀྱི་ནང་ན་མཆིས་པའི་གང་ཟག་བཞི་ཞིག་བསྐྲད་ན། བསྐྲད་པ་ཞེས་བགྱི་ལགས་སམ། གལ་ཏེ་དེ་རེ་རེ་དང་། གཉིས་གཉིས་དང་། གསུམ་གསུམ་ནས་བསྐྲད་ཀྱི། བཞིར་མ་ཡིན་ན། བསྐྲད་པ་ཞེས་བྱའོ། །བཙུན་པ། དགེ་སློང་ལས་བགྱིད་པས་མཚམས་ཀྱི་ནང་ཕྱོགས་བཞི་ན་མཚུངས་པར་གནས་པའི་དགེ་སློང་མཆིས་པ་དག་གིས་དགེ་སློང་བཞི་ཞིག་ལ་བསྒོ་ན། བསྒོ་བར་ཡང་ཆུད་ལ། ལྟུང་བ་ཡང་དུ་གང་ཡང་མི་འགྱུར་ཞིང་། །དེས་དགེ་འདུན་མི་མཐུན་པར་ཡང་མི་འགྱུར་བ་ལྟ་མཆིས་ལགས་སམ། ཉེ་བར་འཁོར། གལ་ཏེ་ཕན་ཚུན་འདུན་པ་བྱིན་པས། རེ་རེ་དང་། གཉིས་གཉིས་དང་། གསུམ་གསུམ་ལ་བསྒོའི་བཞི་ལ་མ་ཡིན་ན། ཡོད་དོ། །དེ་ཅིའི་ཕྱིར་ཞེ་ན། ཚོགས་ཀྱིས་ཚོགས་ཀྱི་ལས་
དག་བྱར་མི་རུང་བས་སོ། །ལས་བགྱིད་པ་ཕྱོགས་གཅིག་ན་མཆིས་པས་གནས་བཞིའི་ལས་ཐམས་ཅད་བགྱིར་རུང་ལགས་སམ།ཉེ་བར་འཁོར། འདི་ལྟར་དགེ་སློང་ལས་བྱེད་པས་གནས་བཞི་ཆར་གྱི་མཚམས་ཀྱི་མདོ། ཁྲིའམ། ཁྲིའུའམ། རེ་ལྡེའམ། ལྗོན་རིང་གིས་མནན་ཏེ་འདུག་པར་གྱུར་ལ། གནས་དེ་དག་ན་ཡང་ལས་འདི་ལྟ་བུ་འདི་ལྟ་སྟེ། བཞིའི་ཚོགས་ཀྱིས་བྱ་བའི་ལས་དང་། ལྔའི་ཚོགས་ཀྱིས་བྱ་བའི་ལས་དང་། བཅུའི་ཚོགས་ཀྱིས་བྱ་བའི་ལས་དང་། ཉི་ཤུའི་ཚོགས་ཀྱིས་བྱ་བའི་ལས་ཉེ་བར་གནས་པར་གྱུར་ན། རུང་ངོ་། །དེ་ཅིའི་ཕྱིར་ཞེ་ན། དེ་དེ་དག་ཁ་ཅིག་གི་ནི། ལས་བྱེད་པ་ཡིན་ལ། ཁ་ཅིག་གི་ནི། ཚོགས་སྐོང་བ་ཡིན་ནོ། །ས་ལ་མཆིས་པས་ནམ་མཁའ་ལ་མཆིས་པ་རྣམས་ལ་བསྒོ་ན། བསྒོ་བ་ཞེས་བགྱི་ལགས་སམ། ཉེ་བར་འཁོར། མ་ཡིན་ནོ། །བཙུན་པ། རེ་ཞིག་ལས་བགྱིད་པ་ནམ་མཁའ་ལ་མཆིས་ལ། ས་ལ་མཆིས་པ་རྣམས་ལ་བསྒོ་ན། བསྒོ་བ་ཞེས་བགྱི་ལགས་སམ། ཉེ་བར་འཁོར། མ་ཡིན་ནོ། །ཇི་ལྟར་དགེ་སློང་ལ་དགེ་འདུན་ལྷག་མར་འགྱུར་བ་ཇི་ལྟ་བ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་དགེ་འདུན་ལྷག་མར་འགྱུར་རོ། །དགེ་སློབ་མ་དང་། དགེ་ཚུལ་དང་། དགེ་ཚུལ་མ་རྣམས་ལ་ནི། ཉེས་བྱས་སོས། །སྔར་ལྟུང་བ་བྱུང་བ་ལ་སོགས་པ་ལ་ཡང་ཉེས་བྱས་ཁོ་ན་སྟེ། སྔ་མ་བཞིན་ནོ། །དེ་ལྟར་ན། གཞུང་འདི་ནི། དགེ་འདུན་ལྷག་མ་གསུམ་ལ་ཡང་ཅི་རིགས་པར་བརྗོད་པར་བྱ་བ་ཡིན་ནོ། །ཉེ་བར་འཁོར་གྱིས་ཞུས་པ་ཁ་ཆེ་བ་ལས། དགེ་འདུན་ལྷག་མ་རྫོགས་སོ།། །།