ཕམ་པར་འགྱུར་བ་རྣམས་འཆད་པ།
རྒྱ་གར་སྐད་དུ། བི་ན་ཡ་ཨུ་ཏྟ་ར་གྲནྠ། བོད་སྐད་དུ། འདུལ་བ་གཞུང་དམ་པ། བཀྲ་ཤིས་ཐམས་ཅད་མཁྱེན་པ་ལ་ཕྱག་འཚལ་ལོ། །བམ་པོ་དང་། པོ། མདོར་ན། བྱོལ་སོང་གསུམ་དང་ལམ་གསུམ་དང་། །གཤེག་དང་བཅད་དང་རྣམ་པ་གཉིས། །འཛིན་པ་དང་ཡང་བལྟབ་པ་དང་། །སོ་དང་མ་རེག་ཕག་མོ་བཞིན། །དེ་ནས་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། དགེ་སློང་གིས་མིའི་བུད་མེད་སྨན་ནམ། སྔགས་ཀྱིས་བྱོལ་སོང་གི་སྐྱེ་གནས་སུ་སྐྱེས་པར་བསྒྱུར་ཏེ་མི་ཚངས་པར་སྤྱོད་པར་བགྱིད་ན། ཅིར་འགྱུར། མཐར་འགྱུར་རོ། །བཙུན་པ། དགེ་སློང་གིས་སྔགས་སམ། སྨན་གྱིས་བདག་ཉིད་བྱོལ་སོང་གི་སྐྱེ་གནས་སུ་སྐྱེས་པར་བསྒྱུར་ཏེ་མིའི་བུད་མེད་དང་ལྡན་ཅིག་ཏུ་མི་ཚངས་པར་སྤྱོད་པ་བགྱིད་ན། ཅིར་འགྱུར། དེ་སྟེ་དགེ་སློང་དུ་འདུ་ཤེས་ཡོད་ན། འཁྲིག་པར་སྦྱོར་བ་བྱ་བ་ཡིན་པས་མཐར་འགྱུར་རོ། །དེ་སྟེ་དགེ་སློང་དུ་འདུ་ཤེས་མེད་ན། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་སྔགས་སམ། སྨན་གྱིས་བདག་དང་མིའི་བུད་མེད་གཉིས་བྱོལ་སོང་གི་སྐྱེ་གནས་སུ་སྐྱེས་པར་བསྒྱུར་ཏེ། གཅིག་ལ་གཅིག་མི་ཚངས་པར་སྤྱོད་པ་བགྱིད་ན། ཅིར་འགྱུར། དེ་སྟེ་དགེ་སློང་དུ་འདུ་ཤེས་ཡོད་ན། འཁྲིག་པར་སྦྱོར་བར་བྱ་བ་ཡིན་པས་མཐར་འགྱུར་རོ། །དགེ་སློང་དུ་འདུ་ཤེས་མེད་ན། ཉེས་པ་སྦོམ་པོར་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། བཅོམ་ལྡན་འདས་ཀྱིས་བཅུག་མ་ཐག་ཏུ་མཐར་འགྱུར་རོ། །ཞེས་གསུངས་ན། ཇི་ཙམ་གྱིས་ན། ཁར་བཅུག་པ་ཞེས་བགྱི། ཨུ་པ་ལི། སོ་ལས་དཀྲེ་འདས་ནའོ། །ཇི་ཙམ་གྱིས་ན། བཤང་བའི་ལམ་དུ་བཅུག་པ་ཞེས་བགྱི། རྐུབ་ཁར་དཀྲེ་འདས་ནའོ། །ཇི་ཙམ་གྱིས་ན། གཅི་བའི་ལམ་དུ་བཅུག་པ་ཞེས་བགྱི། ཁ་ཤུན་ལས་དཀྲེ་འདས་ནའོ། །བཙུན་པ། བུད་མེད་ཕྱེད་དུ་གཤེག་པར་གྱུར་ལ། སྒོ་གསུམ་གྱི་བུ་གུ་ཡང་ཉམས་པར་གྱུར་པ་དེ། དགེ་སློང་གིས་ཕྱེད་ཚལ་གྱིས་ཕྱེད་ཚལ་ལ་སྦྱར་ཏེ་མི་ཚངས་པར་སྤྱོད་པ་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་བུད་མེད་རྐེད་དུ་བཅད་པར་
གྱུར་པ་ཞིག་།སྒོ་གསུམ་གྱི་བུ་གུ་ལས། སྒོའི་བུ་གུ་གང་ཡང་རུང་སྟེ་མ་ཉམས་པར་གྱུར་པ་དེར་མི་ཚངས་པར་སྤྱོད་པ་བགྱིད་ན། ཅིར་འགྱུར། མཐར་འགྱུར་རོ། །བཙུན་པ། མགོ་བཅད་པའི་བུད་མེད་ལ་མི་ཚངས་པར་སྤྱོད་ན། ཅིར་འགྱུར། བཤང་བའི་ལམ་མམ། གཅི་བའི་ལམ་དུ་བྱེད་ན། མཐར་འགྱུར་རོ། །འོན་ཏེ་ཁའི་ལམ་མམ། སྦུ་གུའམ། སྒྲོག་རུས་ཀྱི་བུ་གུར་བྱེད་ན། ཉེས་པ་སྦོམ་པོར་འགྱུར་རོ། །བཅོམ་ལྡན་འདས་ཀྱིས་མི་མ་ཡིན་པའི་བུད་མེད་དང་ལྷན་ཅིག་ཏུ་མི་ཚངས་པར་སྤྱོད་པ་འཁྲིག་པའི་ཆོས་བྱེད་ན། མཐར་འགྱུར་རོ། །ཞེས་གསུངས་ན། མི་མ་ལགས་པར་ཇི་ལྟ་བུ། ཡན་ལག་ཐམས་ཅད་དང་མཉམ་པར་གྱུར་པའོ། །དེ་བཞིན་དུ་བྱོལ་སོང་དུ་གྱུར་པ་རྣམས་ལ་ཡང་ཤེས་པར་བྱའོ། བཙུན་པ། བལྟབ་སྟེ་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་སོའི་ཕྱི་རོལ་མཆུ་ནང་དུ་མི་ཚངས་པར་སྤྱོད་པ་བགྱིད་ན། ཅིར་འགྱུར་ལགས། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་བཤད་བའི་ལམ་མ། གཅི་བའི་ལམ་མ། ཁའི་ལམ་རྣམས་སུ་མ་རེག་པར་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ཕག་མོའི་རོ་བསྲེགས་པ་སྤུ་མེད་པ་ལ་མི་ཚངས་པར་སྤྱོད་པ་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་ཏེ། བྱོལ་སོང་གི་སྐྱེ་གནས་ཐམས་ཅད་ལ་ཡང་འདི་བཞིན་དུ་བརྗོད་པར་བྱའོ། །མདོར་ན། གཞན་གྱི་ཡན་ལག་སྐྱེས་པ་དང་། སྤྱིལ་པོ་གཉིས་ཀྱང་དེ་བཞིན་ཏེ། །ཉམས་པ་གཉིས་དང་དཀྲིས་པ་དང་། །བཞི་པ་གཉིས་དང་བདུན་པའོ། །བཙུན་པ། དགེ་སློང་གིས་གཞན་གྱི་མོ་མཚན་དུ་གཞན་གྱི་ཕོ་མཚན་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་ཞིག་དགེ་སློང་གཅིག་པུ་མི་ཚངས་པར་སྤྱོད་པའི་སླད་དུ་སྤྱིལ་པོར་ཞུགས་ན། མཐར་འགྱུར་བར་མཆིས་སམ། ཨུ་པ་ལི། ཡོད་དེ། ཇི་ལྟར་མཚན་རིང་ངམ། རྒྱབ་མཉེན་ལྟ་བུའོ། །བཙུན་པ། དགེ་སློང་སྦྲང་སྐྱབས་ཀྱི་སྤྱིལ་བུར་ཞུགས་པ་ལས། བུད་མེད་དེའི་ཕྱི་ན་འདུག་པ་ལ་དེ་ན་འདུག་བཞིན་དཀྲིས་ནས་ལོག་པར་སྤྱད་ན། ཅིར་འགྱུར། མཐར་འགྱུར་རོ། །བཙུན་པ། བཅོམ་ལྡན་འདས་ཀྱིས་གསོན་པོར་ཉམས་པའོ་ཞེས་
གསུངས་ན། ཇི་ཙམ་གྱིས་ན་གསོན་པོར་ཉམས་པ་ཞེས་བགྱི། ཇི་ལྟར་རྨ་བྱུང་བའམ། རུལ་བའམ། ཞིག་པའམ། སྲོག་ཆགས་ཀྱིས་ཟོས་པར་གྱུར་པ་དེ་ཙམ་གྱིས་ན། དེ་དག་གསོན་པོར་ཉམས་པ་ཞེས་བྱའོ། །ཇི་ཙམ་གྱིས་ན་གསོན་པོར་མ་ཉམས་པ་ཞེས་བགྱི། ཇི་ལྟར་དེའི་མི་གཉིས་ཀ་མཉམ་པར་གྱུར་པ་ནི། མ་ཉམས་པ་སྟེ། ཤི་བ་ལ་ཡང་དེ་བཞིན་དུ་བརྗོད་པར་བྱའོ། །དེ་བཞིན་དུ་མི་མ་ཡིན་པ་དང་། བྱོལ་སོང་གི་སྐྱེ་གནས་སུ་སྐྱེས་པར་གྱུར་པ་དང་། སྐྱེས་པ་དང་། མ་ནིང་དང་། མ་ནིང་ཕོ་རྣམས་ལ་ཡང་དེ་བཞིན་དུ་བརྗོད་པར་བྱའོ། །དཀྲིས་ཏེ་བཅུག་ན། མཐར་མི་འགྱུར་རོ། །ཞེས་བཙུན་པ་བཅོམ་ལྡན་འདས་ཀྱིས་གསུངས་ན། དགེ་སློང་དག་གིས་ཕྱིང་བུའམ། གྲོ་ག་སྟུག་པོ་ཞིག་གིས་དཀྲིས་ཏེ་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དེ་སྟེ་སེང་རས་སམ། དར་ལའམ། གོས་སྲབ་མོ་རྣམས་ཀྱིས་དཀྲིས་ཏེ་བཅུག་ན། ཅིར་འགྱུར། མཐར་འགྱུར་རོ། །བཙུན་པ། དགེ་སློང་གིས་ལམ་ལ་ལམ་དུ་འདུ་ཤེས་ཏེ་བཅུག་ན། ཅིར་འགྱུར། མཐར་འགྱུར་རོ། །ལམ་ལ་ལམ་མ་ལགས་པར་འདུ་ཤེས་ཏེ་བཅུག་ན། ཅིར་འགྱུར། མཐར་འགྱུར་རོ། །ལམ་ལགས་པ་ལ་ལམ་མ་ལགས་པར་འདུ་ཤེས་ཏེ་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །ལམ་མ་ལགས་པ་ལ་ལམ་དུ་འདུ་ཤེས་ཏེ་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་གིས་དཀྲིས་པ་ལ་དཀྲིས་པར་འདུ་ཤེས་ཏེ་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དཀྲིས་པ་ལ་མ་དཀྲིས་པར་འདུ་ཤེས་ཏེ་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མ་དཀྲིས་པ་ལ་དཀྲིས་པར་འདུ་ཤེས་ཏེ་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མ་དཀྲིས་པ་ལ་མ་དཀྲིས་པར་འདུ་ཤེས་ཏེ་བཅུག་ན། ཅིར་འགྱུར། མཐར་འགྱུར་རོ། །བཙུན་པ། བསྙེན་པར་མ་རྫོགས་པ་ན་མི་ཚངས་པར་སྤྱད་པར་བཤམས་ནས་བསྙེན་པར་མ་རྫོགས་པར་བཅུག་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པ་ན་བཤམས་ནས་བསྙེན་པར་རྫོགས་ཀར་བཅུག་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་
པར་བཤམས་ནས་བསྙེན་པར་རྫོགས་ཏེ་བཅུག་ན་ཅིར་འགྱུར། མཐར་འགྱུར་རོ། །བསྙེན་པར་རྫོགས་ཀར་བཤམས་ནས་བསྙེན་པར་རྫོགས་ཀར་བཅུག་ན། ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ནས་བསྙེན་པར་རྫོགས་ཏེ་བཅུག་ན། ཅིར་འགྱུར། མཐར་འགྱུར་རོ། །བསྙེན་པར་རྫོགས་པ་ནས་བཤམས་ལ་བསྙེན་པར་རྫོགས་ནས་བཅུག་ན། ཅིར་འགྱུར། མཐར་འགྱུར་རོ། །བསྙེན་པར་རྫོགས་ནས་བཤམས་ཏེ་བསྙེན་པར་མ་རྫོགས་པར་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་ལྟར་དགེ་སློང་གིས་མི་ཚངས་པར་སྤྱད་པའི་རྒྱུ་རྐྱེན་གྱིས་མཐར་གྱུར་པ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་མཐར་འགྱུར་རོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་ལ་ནི། ཉེས་བྱས་སོ། །མདོར་ན། བརྒྱད་ཅུའི་སྡེ་དང་མཚན་མ་དང་། །མི་མཉམ་རིན་ཐང་འོན་ཏེ་མཚན། །བསྙེན་པར་རྫོགས་པ་བདུན་པ་བྱས། ཤོ་གམ་བཅུ་གཅིག་དེ་བཞིན་ནོ། །བཙུན་པ། དགེ་སློང་གིས་བརྒྱད་བཅུའི་སྡེ་གཉིས་ཀར་བདག་ཉིད་གཏོགས་པར་བགྲང་དུ་བཅུག་ན། ཅིར་འགྱུར། ཉེས་བྱས་སོ། །དེ་ལ་ཆོས་དང་ལྡན་པའི་སྐལ་པ་གང་ལགས། དང་པོའོ། །དེ་སྟེ་བླངས་ནས་བཅབས་ན། ཤེས་བཞིན་གྱི་བརྫུན་དུ་སྨྲས་པས་ལྟུང་བའོ། །ནམ་གྲུབ་པར་གྱུར་པ་ན། རིན་ཐང་བརྩི་བར་བྱའོ། །བཙུན་པ། མི་རྣམས་ཀྱི་མཚན་མ་བཙུགས་ཏེ་བཞག་པ་དེ་ལས། དགེ་སློང་གིས་རིན་ཆེ་བའི་མཚན་མ་རིན་ཆུང་བའི་གནས་སུ་བསྐྱེད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དེ་སྟེ་རིན་ཆུང་བའི་མཚན་མ་རིན་ཆེན་པོའི་གནས་སུ་བསྐྱོད་ན། ཅིར་འགྱུར། མཐར་འགྱུར་རོ། །བཙུན་པ། ཇི་ལྟར་དགེ་སློང་གིས་རིན་ཐང་མ་མཆིས་པའི་དངོས་པོ་ཞིག་བརྐུས་ན། ཅིར་འགྱུར། མཐར་འགྱུར་རོ། །རིན་ཐང་མེད་པའི་དངོས་པོ་གང་ཞེ་ན། རིན་ཆེན་པོར་གྱུར་པས་དེ་ལ་རིན་ཐང་གཅད་དུ་མི་ཆོད་པའོ། །དེ་སྟེ་རིན་ཐང་མ་མཆིས་པའི་དངོས་པོ་ཞིག་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །རིན་ཐང་མེད་པའི་དངོས་པོ་གང་ཞེ་ན་གང་ཆུང་བར་གྱུར་པས་རིན་གཅད་
དུ་མི་ནུས་པའོ། །བཙུན་པ་དགེ་སློང་གིས་གཞལ་དུ་མི་རུང་བའི་དངོས་པོ་ཞིག་བརྐུས་ན། ཅིར་འགྱུར། མཐར་འགྱུར་རོ། །དེ་སྟེ་གཞལ་དུ་རུང་བའི་དངོས་པོ་ཞིག་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་བརྐུ་བའི་ཕྱིར་བཤམས་པ་ལས་མཚན་འཕོས་ཏེ། དགེ་སློང་མར་གྱུར་ནས་བརྐུས་ན། ཅིར་འགྱུར། མཐར་འགྱུར་རོ། །བཙུན་པ། དགེ་སློང་མས་བརྐུ་བར་བཤམས་པ་ལས་མཚན་འཕོས་ཏེ་དགེ་སློང་དུ་གྱུར་ན། ཅིར་འགྱུར། མཐར་འགྱུར་རོ། །བཙུན་པ། བསྙེན་པར་མ་རྫོགས་པར་བརྐུ་བར་བཤམས་ནས་བསྙེན་པར་མ་རྫོགས་པར་བརྐུས་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྐུ་བར་བཤམས་ནས་བསྙེན་པར་རྫོགས་ཀར་བརྐུས་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྐུ་བར་བཤམས་ཏེ་བསྙེན་པར་རྫོགས་ནས་བརྐུས་ན། ཅིར་འགྱུར། མཐར་འགྱུར་རོ། །བསྙེན་པར་རྫོགས་ཀར་བརྐུ་བར་བཤམས་ནས་བསྙེན་པར་རྫོགས་ཀར་བརྐུས་ན། ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བརྐུ་བའི་སླད་དུ་བཤམས་ནས་བསྙེན་པར་རྫོགས་ཏེ་བརྐུས་ན། ཅིར་འགྱུར། མཐར་འགྱུར་རོ། །བཙུན་པ། དགེ་སློང་གིས་བསྙེན་པར་རྫོགས་ཏེ་བརྐུ་བར་བཤམས་ལ་བསྙེན་པར་རྫོགས་ནས་བརྐུས་ན། ཅིར་འགྱུར། མཐར་འགྱུར་རོ། །བསྙེན་པར་རྫོགས་ནས་བརྐུ་བར་བཤམས་ཏེ་བསྙེན་པར་མ་རྫོགས་པར་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ནམ་མཁའ་ལས་ཤོ་གམ་བཟླས་ན། ཅིར་འགྱུར། དངོས་པོ་ཇི་ལྟ་བ་བཞིན་ནོ། །འོན་ཏེ་རྫུ་འཕྲུལ་གྱིས་བཟླས་ན། ཉེས་པ་མེད་དོ། །བཙུན་པ། དགེ་སློང་གིས་ལམ་མ་ལགས་པ་ནས་ཤོ་གམ་བཟླས་ན། ཅིར་འགྱུར། དེ་སྟེ་དེའི་ས་ལས་འདས་ན། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ཚོང་པ་རྣམས་ལ་འགྲོའོ། །ཞེས་སྨྲས་ན། ཅིར་འགྱུར། །ཉེས་བྱས་སོ། །བཙུན་པ། འདི་ལྟར་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་མ་ཕྱིན་པར་ཚོང་པ་རྣམས་ཀྱིས་དགེ་སློང་ལ། འཕགས་པ། ཤོ་གམ་གྱི་གནས་ལས་བསྒྲལ་ཏེ་སྩོལ་ཅིག་།ཅེས་སྨྲས་པ་ལས། དེ་དགེ་སློང་གིས་བཟླས་ན། ཅིར་འགྱུར། ཉེས་བྱས་སོ། །བཙུན་པ། འདི་ལྟར་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་མ་ཕྱིན་པར་ཚོང་པ་དག་གིས་དགེ་སློང་ལ་འཕགས་པ་ཤོ་གམ་གྱི་གནས་
ལས་བསྒྲལ་ཏེ་སྩོལ་ཅིག་།དེའི་ཤོ་གམ་ཅི་མཆིས་པའི་ཕྱེད་ནི། ཁྱེད་སྣོམས་ཤིག་།ཅེས་དེ་སྐད་སྨྲས་པ་ལས། དེ་དགེ་སློང་གིས་བཟླས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་མ་ཕྱིན་པར་ཚོང་པ་རྣམས་ཀྱིས་དགེ་སློང་ལ། འཕགས་པ། ཤོ་གམ་གྱི་གནས་ལས་བསྒྲལ་ཏེ་སྩོལ་ཅིག་།དེ་ལ་ཤོ་གམ་ཅི་མཆིས་པ་ཁྱོད་ཉིད་སྣོམས་ཤིག་།ཅེས་དེ་སྐད་སྨྲས་པ་ལས། དེ་དགེ་སློང་གིས་བཟླས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་ཤོ་གམ་གྱི་སར་མ་ཕྱིན་པར་དགེ་སློང་གིས་ལམ་གཞན་དུ་བསྟན་ན། ཅིར་འགྱུར། ཉེས་བྱས་སོ། །བཙུན་པ། འདི་ལྟར་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་ཕྱིན་ནས་ཚོང་པ་རྣམས་ཀྱིས་དགེ་སློང་ལ། འཕགས་པ། ཤོ་གམ་གྱི་གནས་ལས་སྒྲོལ་ཅིག་།ཅེས་དེ་སྐད་སྨྲས་པ་ལས། དེ་དགེ་སློང་གིས་བཟླས་ན། ཅིར་འགྱུར། ཉེས་བྱས་སོ། །བཙུན་པ། ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་ཕྱིན་ནས་ཚོང་པ་རྣམས་ཀྱིས་དགེ་སློང་ལ། འཕགས་པ། ཤོ་གམ་གྱི་གནས་ལས་བསྒྲལ་ཏེ་སྩོལ་ཅིག་དང་། འདིར་ཤོ་གམ་ཇི་སྙེད་པའི་ཕྱེད་ཁྱོད་སྣོམས་ཤིག་།ཅེས་དེ་སྐད་སྨྲས་པ་ལས། དགེ་སློང་གིས་དེ་བཟླས་ན། ཅིར་འགྱུར། ཤོ་གམ་གྱི་རིན་ཐང་བརྩི་བར་བྱའོ། །བཙུན་པ། ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་རྣམས་ཤོ་གམ་གྱི་སར་ཕྱིན་ནས་ཚོང་པ་རྣམས་ཀྱིས་དགེ་སློང་ལ། འཕགས་པ། ཤོ་གམ་གྱི་གནས་ལས་བསྒྲལ་ཏེ་སྩོལ་ཅིག་དང་། འདིར་ཤོ་གམ་ཇི་སྙེད་པ་དེ་ཐམས་ཅད་ཁྱོད་སྣོམས་ཤིག་།ཅེས་དེ་སྐད་སྨྲས་པ་ལས། དེ་དགེ་སློང་གིས་བཟླས་ན། ཅིར་འགྱུར། ཤོ་གམ་གྱི་རིན་ཐང་བརྩི་བར་བྱའོ།། །།མདོར་ན།
ཆོས་གོས་གདང་ཤིང་བཞི་པ་དང་། །བརྐུ་བ་པ་ཎ་གསུམ་པ་དང་། །སྦྱོར་བ་གསུམ་དང་ཐེ་ཚོམ་དང་། །གླིང་དང་གཞན་ཕྱིར་མི་མ་ཡིན། །བཙུན་པ། དགེ་སློང་གིས་དང་པོར་བརྐུ་སེམས་ཀྱིས་ཆོས་གོས་ཀྱི་གདང་ཤིང་གི་ཐོག་མ་བཅད་དེ་ཕྱི་མ་ལ་བདག་གིར་འདུ་ཤེས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་དང་པོར་ཆོས་གོས་ཀྱི་གདང་ཤིང་གཅོད་པའི་ཚེ་བདག་གིར་འདུ་ཤེས་ལ། ཕྱིས་བརྐུ་བར་འདུ་ཤེས་ན། ཅིར་འགྱུར། རིན་ཐང་བརྩི་བར་བྱའོ། །བཙུན་པ། དགེ་སློང་གིས་ཆོས་གོས་ཀྱི་གདང་ཤིང་བརྐུ་སེམས་ཀྱིས་བརྐུས་པ་ལས། ཆོས་གོས་ཀྱི་གདང་ཤིང་དེ་ལ་ཆོས་གོས་བཀལ་ཅིང་མཆིས་པ་དང་། ཆོས་གོས་དང་བཅས་ཏེ་བརྐུས་ན། ཅིར་འགྱུར། ཆོས་གོས་ཀྱི་གདང་ཤིང་གི་རིན་ཐང་བརྩི་བར་བྱའོ། །བཙུན་པ། ཆོས་གོས་ཀྱི་གདང་ཤིང་ལ་ཆོས་གོས་བཀལ་ཏེ་བཞག་པ་དེ། དགེ་སློང་བཞིའམ་དེ་བས་མང་བས་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །འོན་ཏེ་སོ་སོར་བགོས་པ་ལས། རེ་རེ་ལ་ཡང་མ་ཤ་ལྔ་ཐོབ་ན། མཐར་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། རྐུ་བ་ལ་རྣམ་པ་དུ། ཨུ་པ་ལི། དྲུག་སྟེ། སྒྱུས་རྐུ་བ་དང་། མཐུས་རྐུ་བ་དང་། བསྐྱིས་པ་ལས་བརྣོགས་ཏེ་རྐུ་བ་དང་། གཏམས་པ་ལས་བརྣོགས་ཏེ་རྐུ་བ་དང་། སྐྱོང་ཞིང་རྐུ་བ་དང་། ཆོས་རྐུ་བའོ། །བཙུན་པ། བཅོམ་ལྡན་འདས་ཀྱིས་རྐུ་བ་རྣམ་པ་དྲུག་གསུངས་ན། རྐུ་བ་གང་གིས་མཐར་འགྱུར། ཆོས་རྐུ་བ་མ་གཏོགས་པའི་ལྷག་མ་རྣམས་ཀྱིས་མཐར་འགྱུར་རོ། །བཙུན་པ། བཅོམ་ལྡན་འདས་ཀྱིས་མ་ཤ་ལྔ་བརྐུས་ན། མཐར་འགྱུར་རོ། །ཞེས་གསུངས་ན། བཙུན་པ། དགེ་སློང་གིས་མ་ཤ་གསུམ་བརྐུས་པས་མཐར་འགྱུར་བ་མཆིས་སམ། ཨུ་པ་ལི། ཡོད་དེ། མ་ཤ་གསུམ་གྱི་བཞི་ཆ་གཅིག་ཏུ་གྱུར་པའོ། །བཙུན་པ། དགེ་སློང་གིས་མ་ཤ་ལྔ་བརྐུས་ཀྱང་མཐར་མི་འགྱུར་བ་མཆིས་སམ། ཡོད་དེ། མ་ཤ་ལྔ་ལས་ལྷག་པས་བཞི་ཆ་གཅིག་ཏུ་གྱུར་པའོ། །བཙུན་པ་བཅོམ་ལྡན་འདས་ཀྱིས་
མ་ཤ་ལྔ་བརྐུས་ཀྱང་མཐར་མི་འགྱུར་རོ། །ཞེས་གསུངས་ན། ན་ན་ཀ་ཇི་ལྟ་བུའི་མ་ཤ་ལྔ་བརྐུས་ན། མཐར་འགྱུར། ན་ན་ཀ་མ་ཤ་ཀ་ཉི་ཤུ་པའོ། །མ་ཤ་ཀ་ཇི་ལྟ་བུ། ཀ་ཀ་ནི། བཞི་པའོ། །ཀརྴ་པ་ཎ་ཇི་ལྟ་བུ། རྒྱན་ཐམས་ཅད་ཀྱིས་བྱས་པའོ། །བཙུན་པ། བཅོམ་ལྡན་འདས་ཀྱིས་མ་ཤ་ལྔ་བརྐུས་ཀྱང་མཐར་མི་འགྱུར་རོ། །ཞེས་གསུངས་ན། བཙུན་པ། དགེ་སློང་གིས་ཀརྴ་པ་ཎ་སྟོང་བརྐུས་ཀྱང་མཐར་མི་འགྱུར་བ་མཆིས་སམ། ཡོད་དེ། བོར་བར་འདུ་ཤེས་ནས་བླངས་པའོ། །བཙུན་པ། བཅོམ་ལྡན་འདས་ཀྱིས་མ་ཤ་ལྔ་བརྐུས་པས་མཐར་འགྱུར་རོ། །ཞེས་གསུངས་ན། བཙུན་པ། དགེ་སློང་གིས་མ་ཤ་ལྔ་བརྐུས་ཀྱང་མཐར་མི་འགྱུར་བ་མཆིས་སམ། ཡོད་དེ། འདི་ལྟར་རེ་རེའམ། གཉིས་གཉིས་སམ། གསུམ་གསུམ་མམ། བཞི་བཞི་བརྐུས་ཀྱི། ནམ་ཡང་ལྔར་མ་ཚང་ནའོ། །བཙུན་པ། དགེ་སློང་གིས་ཡོ་བྱད་ཆེན་པོ་བདག་གིར་འདུ་ཤེས་པས་བླངས་ལ། རྐུ་སེམས་ཀྱིས་སྦས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དེ་སྟེ་རྐུ་སེམས་ཀྱིས་བླངས་ལ། བདག་གིར་འདུ་ཤེས་པས་སྦས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ཅི་འདི་དེའི་འམ་ཞེས་ཐེ་ཚོམ་དང་ཡིད་གཉིས་ཀྱིས་དེ་བརྐུས་སམ། དེ་འདི་ཡིན་ནམ། དེ་འདི་མ་ཡིན་ཞེས་དེ་ཡང་བརྐུས་ན། ཅིར་འགྱུར། དངོས་པོ་ཇི་ལྟ་བ་བཞིན་ནོ། །བཙུན་པ། དགེ་སློང་གིས་ནུབ་ཀྱི་བ་ལང་སྤྱོད་ཀྱི་གླིང་དུ་མ་སྩལ་བར་བརྐུས་ན། ཅིར་འགྱུར། དེ་སྟེ་དེ་དག་གི་གྲངས་ལྟར་མ་ཤ་ལྔ་བརྐུས་ན། མཐར་འགྱུར་རོ། །བཙུན་པ། ཤར་གྱི་ལུས་འཕགས་གླིང་དུ་མ་སྩལ་པར་བརྐུས་ན། ཅིར་འགྱུར། དེ་སྟེ་དེ་དག་གི་གྲངས་ལྟར་མ་ཤ་ལྔ་བརྐུས་ན། མཐར་འགྱུར་རོ། །བཙུན་པ། བྱང་གི་སྒྲ་མི་སྙན་གྱི་གླིང་དུ་མ་སྩལ་བར་བརྐུས་ན། ཅིར་འགྱུར། ཨུ་པ་ལ། དེ་མ་བྱིན་པར་ལེན་པ་མེད་དེ། དེ་སྟེ་རྐུ་སེམས་བསྐྱེད་ན། ཉེས་པ་སྦོམ་པོར་འགྱུར་རོ། །བཙུན་པ།དགེ་སློང་གིས་གཞན་གྱི་སླད་དུ་མ་སྩལ་བར་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དེ་སྟེ་དེའི་ཡོན་ནོ། །སྙམ་དུ་སེམས་ན་ཉེས་པ་མེད་དོ། །བཙུན་པ་དགེ་སློང་
གིས་མི་མ་ལགས་པ་ལ་མི་མ་ལགས་པར་འདུ་ཤེས་ནས་མ་སྩལ་བར་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ཡིན་པ་ལ་མིར་འདུ་ཤེས་ན། ཉེས་པ་སྦོམ་པོར་འགྱུར་རོ། །མི་ལ་མི་མ་ཡིན་པར་འདུ་ཤེས་ན། ཉེས་པ་སྦོམ་པོར་འགྱུར་རོ། །མི་ལ་མིར་འདུ་ཤེས་ན། མཐར་འགྱུར་རོ།། །།མདོར་ན། མཆོད་རྟེན་རིང་བསྲེལ་གླེགས་བམ་དང་། དགེ་འདུན་བསྔོས་དང་གཅིག་ནས་གཅིག་།འདུ་ཤེས་གཉིས་དང་དེ་ལྟར་གནས། མ་རྙེད་ཁྱིམ་ནི་ཐ་མའོ། །བཙུན་པ། དགེ་སློང་གིས་མཆོད་རྟེན་དང་མཆོད་རྟེན་གྱི་ཉེ་འཁོར་གྱི་རྒྱན་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་གིས་རིང་བསྲེལ་བརྐུས་ན། ཅིར་འགྱུར། མཐར་འགྱུར་རོ། །བཙུན་པ། དགེ་སློང་གིས་གླེགས་བམ་བརྐུས་ན། ཅིར་འགྱུར། གླེགས་བམ་གྱི་རིན་ཐང་བརྩི་བར་བྱའོ། །བཙུན་པ། དགེ་སློང་གིས་ཕྱོགས་བཞིའི་དགེ་འདུན་གྱི་མ་སྩལ་བར་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་གང་ཟག་མང་པོ་རྣམས་ཀྱི་མ་སྩལ་བར་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་ཏེ། དེ་ལས་སོ་སོའི་སྐལ་པ་ལ་མ་ཤ་ལྔ་བྱུང་བ་བརྐུས་ན། མཐར་འགྱུར་རོ། །བཙུན་པ། དགེ་སློང་གིས་བསྔོས་པ་ལས་མ་སྩལ་བར་བརྐུས་ན། ཅིར་འགྱུར། མཐར་འགྱུར་རོ། །བཙུན་པ། དགེ་སློང་མང་པོས་གཅིག་ནས་གཅིག་ཏུ་བརྒྱུད་དེ་མ་སྩལ་བར་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །འོན་ཏེ་སོ་སོར་བགོས་ནས་ཇི་སྙེད་ཀྱིས་བདག་གིར་བྱས་པ་དེ་སྙེད་ལ་རིན་ཐང་བརྩི་བར་བྱའོ། །བཙུན་པ། དགེ་སློང་གིས་གཞན་གྱི་ལགས་པར་འདུ་ཤེས་ཏེ་མ་སྩལ་བར་བརྐུས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ཡོངས་སུ་བཟུང་བ་ལ་ཡོངས་སུ་བཟུང་བར་འདུ་ཤེས་ཏེ་མ་སྩལ་བར་བརྐུས་ན། ཅིར་འགྱུར། མཐར་འགྱུར་རོ། །ཡོངས་སུ་མ་བཟུང་བ་ལ་ཡོངས་སུ་མ་བཟུང་བར་འདུ་ཤེས་ཏེ་མ་སྩལ་བར་བརྐུས་ན་ཅིར་འགྱུར། ཉེས་པ་སྦོམ་པོར་འགྱུར་རོ། །ཡོངས་སུ་བཟུང་བ་ལ་མ་བཟུང་བར་འདུ་ཤེས་ཏེ་མ་སྩལ་བར་བླངས་ན་ཅིར་འགྱུར། ཉེས་པ་སྦོམ་
པོར་འགྱུར་རོ། །ཡོངས་སུ་བཟུང་བ་ལ་ཡོངས་སུ་མ་བཟུང་བར་འདུ་ཤེས་ན། ཉེས་པ་མེད་དོ། །བཙུན་པ། བཅོམ་ལྡན་འདས་ཀྱིས་ཡོ་བྱད་ཆེན་པོ་མ་བྱིན་པར་བརྐུས་ན། མཐའ་འགྱུར་རོ། །ཞེས་གསུངས་ན། བཙུན་པ། དགེ་སློང་གིས་ཡོ་བྱད་ཆེན་པོ་མ་སྩལ་བར་བརྐུས་ན། མཐར་མི་འགྱུར་བ་མཆིས་སམ། ཡོད་དེ། གནས་གང་དུ་བཞག་པར་གྱུར་པའི་གནས་དེ་ཉིད་ནས་བརྐུས་པའོ། །བཙུན་པ། དགེ་སློང་གིས་རྙེད་པ་མི་དབང་བར་དེ་བདག་ཉིད་དབང་ངོ་། །ཞེས་དེ་སྐད་མཆིས་ན། ཅིར་འགྱུར། དེ་ཤེས་བཞིན་དུ་རྫུན་སྨྲས་པའི་ལྟུང་བའོ། །དེ་སྟེ་སེམས་ཉེ་བར་བཞག་པ་ཡིན་ན་ནི། ཉེས་པ་སྦོམ་པོར་འགྱུར་རོ། །མངོན་དུ་གྲུབ་ན། རིན་ཐང་བརྩི་བར་བྱའོ། །བཙུན་པ། དགེ་སློང་གཅིག་པུ་ཁྱིམ་དུ་ཞུགས་པ་ལས་མ་སྩལ་བར་བླངས་པའི་སླད་དུ་མཐར་འགྱུར་བ་མཆིས་སམ། ཨུ་པ་ལི། ཡོད་དེ། ཇི་ལྟར་དགེ་སློང་གིས་མ་བྱིན་པར་བླངས་པའི་རྐྱེན་གྱིས་བརྐུ་བའི་ཕྱིར་བཤམས་ནས་ནང་དུ་ཞུགས་སམ། ནང་དུ་ཞུགས་ཏེ་བཤམས་ན། མཐར་འགྱུར་རོ། །དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་མཐར་འགྱུར་རོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ནི། ཉེས་བྱས་སོ། །མདོར་ན། བྱོལ་སོང་གསུམ་དང་ལས་སྲིད་དང་། །སྲེད་པ་མ་དང་བཞི་པ་དང་། །མངལ་གཉིས་དང་ནི་གསོ་བ་དང་། །འདུ་ཤེས་དང་ནི་བཞི་པའོ། །བཙུན་པ། དགེ་སློང་གིས་སྔགས་སམ། སྨན་གྱིས་མི་བྱོལ་སོང་གི་སྐྱེ་གནས་སུ་བསྒྱུར་ཏེ་འཚོ་བ་དང་ཕྲལ་ན། ཅིར་འགྱུར། མཐར་འགྱུར་རོ། །བཙུན་པ། དགེ་སློང་གིས་སྔགས་སམ། སྨན་གྱིས་བདག་ཉིད་བྱོལ་སོང་གི་སྐྱེ་གནས་སུ་བསྒྱུར་ཏེ་མིའི་འཚོ་བ་དང་ཕྲལ་ན། ཅིར་འགྱུར། དེ་སྟེ་དགེ་སློང་དུ་འདུ་ཤེས་ཡོད་ན་མི་ཆགས་པར་བྱ་བ་ལ་ངེས་བྱེད་པས་ན། མཐར་འགྱུར་རོ། །དགེ་སློང་དུ་འདུ་ཤེས་མེད་ན། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་ཕ་དང་མ་འཚོ་བ་དང་ཕྲལ་ན། མཐར་ཡང་མི་འགྱུར་ལ། མཚམས་མེད་པའི་ཁ་ན་མ་ཐོ་བར་ཡང་མི་འགྱུར་བ་མཆིས་སམ། ཡོད་དེ། གང་གི་ཕ་མ་བྱོལ་སོང་གི་སྐྱེ་གནས་སུ་གྱུར་པའོ། །བཙུན་པ་དགེ་སློང་གིས་ཕ་བཀུམ་ཡང་མཐར་ཡང་
མི་འགྱུར་ལ་མཚམས་མེད་པའི་ཁ་ན་མ་ཐོ་བར་ཡང་མི་འགྱུར་བ་མཆིས་སམ། ཨུ་པ་ལི། ལས་ཀྱི་སྲིད་པ་ནི། མངོན་པར་སྐྱེད་པའི་ཕྱིར་ཕ་ཞེས་བྱ་བས་ན། དེ་སྟེ་ཟག་པ་དང་བཅས་པའི་ལས་ཀྱི་སྲིད་པ་བསད་པར་གྱུར་པའོ། །དགེ་སློང་གིས་མ་བཀུམ་ན། མཐར་ཡང་མི་འགྱུར་ལ། མཚམས་མེད་པའི་ཁ་ན་མ་ཐོ་བར་ཡང་མི་འགྱུར་བ་མཆིས་སམ། ཨུ་པ་ལི། སྲེད་པ་ནི། སྐྱེད་པའི་ཕྱིར་མ་ཞེས་བྱ་བས་ན། སྲེད་པ་བསད་པར་གྱུར་པའོ། །བཙུན་པ། དགེ་སློང་གིས་མ་དགུམ་པར་འཚལ་བ་ལས། བུད་མེད་གཞན་བཀུམ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་བུད་མེད་གཞན་དགུམ་པར་འཚལ་བ་ལས་མ་བཀུམ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་མ་དགུམ་པར་བཤམས་པ་ལས་བུད་མེད་གཞན་འཚོ་བ་དང་ཕྲལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་གིས་བུད་མེད་གཞན་དགུམ་པར་བཤམས་པ་ལས་མིའི་འཚོ་བ་དང་ཕྲལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་མའི་བུད་མེད་ཀྱི་མངལ་དུ་བྱོལ་སོང་གི་སྐྱེ་གནས་བཀུམ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་བྱོལ་སོང་མའི་མངལ་དུ་མི་བཀུམ་ན། ཅིར་འགྱུར། དེ་སྟེ་མངལ་ན་མིར་འདུ་ཤེས་ན་ནི། མཐར་འགྱུར་རོ། །དེ་སྟེ་མ་ཡིན་ན། ལྟུང་བའོ། །བཙུན་པ། མ་ནི། སྐྱེད་པ་ལགས་ལ། གཞན་ནི། གསོ་བ་ལགས་ན། དེ་གཉིས་གང་འཚོ་བ་དང་བྲལ་ན། མཐར་ཡང་འགྱུར་ལ། མཚམས་མེད་པའི་ཁ་ན་མ་ཐོ་བར་ཡང་འགྱུར། གང་གིས་བསྐྱེད་པའོ། །བཙུན་པ། དགེ་སློང་གིས་མི་ལ་མིང་འདུ་ཤེས་ཏེ་བཀུམ་ན། ཅིར་འགྱུར། མཐར་འགྱུར་རོ། །མི་ལ་མི་མ་ལགས་པར་འདུ་ཤེས་ཏེ་བཀུམ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་ཏེ་བཀུམ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མི་མ་ལགས་པར་འདུ་ཤེས་ཏེ་བཀུམ་ན། ཅིར་འགྱུར། ཉེས་པ་སྦོམ་པོར་འགྱུར་རོ།། །།མདོར་ན། ཐེ་ཚོམ་རྣམ་པ་གཉིས་པ་དང་། །བདག་དང་དགྲ་བཅོམ་གཉིས་དེ་བཞིན། །
རྐུན་པོ་གཉིས་དང་གཞན་འདུ་ཤེས། །བདུན་པ་དང་ཡང་ཐ་མའོ། །བཙུན་པ། དགེ་སློང་གིས་དེ་འདི་ཡིན་ནམ། དེ་འདི་མ་ཡིན་ཞེས་ཡིད་གཉིས་དང་ཐེ་ཚོམ་འཚལ་བཞིན་དེ་ཡང་འཚོ་བ་དང་ཕྲལ་ན། ཅིར་འགྱུར། མཐར་འགྱུར་རོ། །བཙུན་པ། དགེ་སློང་གིས་བདག་ཉིད་འཚོ་བ་དང་ཕྲལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ཕ་དང་མ་དགུམ་པར་བཤམས་ནས་བདག་ཉིད་བཀུམ་ན། ཅིར་འགྱུར། དེ་སྟེ་ཕ་དང་མ་སྔར་དུས་བྱས་ན་མཐར་ཡང་འགྱུར་ལ་མཚམས་མེད་པའི་ཁ་ན་མ་ཐོ་བར་ཡང་འགྱུར་རོ། །འོན་ཏེ་དེ་ཉིད་སྔར་དུས་བྱས་ན། ཉེས་པ་སྦོམ་པོར་འགྱུར་ཏེ། མཚམས་མེད་པའི་ཁ་ན་མ་ཐོ་བར་ཡང་མི་འགྱུར་རོ། །བཙུན་པ། དགེ་སློང་གིས་དགྲ་བཅོམ་པ་དགུམ་པར་འཚལ་བ་ལས་སོ་སོའི་སྐྱེ་བོ་ཞིག་བཀུམ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་སོ་སོའི་སྐྱེ་བོ་ཞིག་དགུམ་པར་འཚལ་བ་ལས་དགྲ་བཅོམ་པ་ཞིག་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་དགྲ་བཅོམ་པ་དགུམ་པར་བཤམས་ནས་སོ་སོའི་སྐྱེ་བོ་ཞིག་བཀུམ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་སོ་སོའི་སྐྱེ་བོ་ཞིག་དགུམ་པར་བཤམས་པ་ལས་དགྲ་བཅོམ་པ་འཚོ་བ་དང་ཕྲལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། རྐུན་པོ་ཞིག་དགུམ་པར་དཀྲི་བ་ལས་བྲོས་ཏེ། དེ་ལ་གྲོང་གི་སྙེགས་མའམ། རྒྱལ་པོའི་སྙེགས་མ་ཡང་རུང་། ཕྱི་བཞིན་དུ་སྙེགས་པ་དང་། དགེ་སློང་ཞིག་ཤུལ་གྱི་མདུན་ནས་མཆི་བ་དེ་ལ། དེ་དག་གིས་ཁྱོད་ཀྱིས་རྐུན་པོ་ཞིག་བྲོས་པ་མཐོང་ངམ་ཞེས་དྲིས་པ་དང་། དགེ་སློང་དེས་རྐུན་པོ་དེ་ལ་གསོད་སེམས་ཉེ་བར་གནས་པར་གྱུར་ནས་དེས་དེ་དག་ལ་བསྟན་ན། ཅིར་འགྱུར། མཐར་འགྱུར་རོ། །བཙུན་པ། རྐུན་པོ་ཞིག་དགུམ་པར་དཀྲི་བ་ལས་བྲོས་ཏེ། དེ་ལ་གྲོང་གི་སྙེགས་མའམ། རྒྱལ་པོའི་སྙེགས་མ་ཡང་རུང་། ཕྱི་བཞིན་དུ་བསྙེགས་པ་དང་། དགེ་སློང་ཞིག་ཀྱང་ཤུལ་གྱི་མདུན་ནས་མཆི་བ་དེ་ལ་དེ་དག་གིས་ཁྱོད་ཀྱིས་རྐུན་པོ་ཞིག་བྲོས་པ་མཐོང་ངམ་ཞེས་དྲིས་པ་དང་། དགེ་
སློང་དེས་རྐུན་པོ་དེ་ལ་ཡང་གསོད་སེམས་ཉེ་བར་གནས་པར་གྱུར་ཏེ། དེས་དེ་དང་མ་བསྟན་ནས་དེ་དག་གི་འཚོ་བ་དང་ཕྲལ་ན། ཅིར་འགྱུར། ཉེས་བྱས་སོ། །བཙུན་པ། གཉིས་ལྷན་ཅིག་མཆིས་པ་ལ་གཞན་དགུམ་མོ། །སྙམ་པ་ལས་གཞན་བཀུམ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་མ་རྫོགས་པར་དགུམ་པར་བཤམས་ཏེ་བསྙེན་པར་རྫོགས་པར་བཀུམ་ན། ཅིར་འགྱུར། ཉེས་བྱས་སོ་།བསྙེན་པར་མ་རྫོགས་པར་དགུམ་པར་བཤམས་པ་ལས། བསྙེན་པར་རྫོགས་ཀར་བཀུམ་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་དགུམ་པར་བཤམས་པ་ལས་བསྙེན་པར་རྫོགས་ཏེ་བཀུམ་ན། ཅིར་འགྱུར། མཐར་འགྱུར་རོ། །བསྙེན་པར་རྫོགས་ཀར་དགུམ་པར་བཤམས་ཏེ་བསྙེན་པར་རྫོགས་ཀར་བཀུམ་ན། ཅིར་འགྱུར། །ཉེས་བྱས་སོ། །བསྙེན་པར་རྫོགས་ཀར་དགུམ་པར་བཤམས་ཏེ་བསྙེན་པར་རྫོགས་ནས་བཀུམ་ན། ཅིར་འགྱུར། མཐར་འགྱུར་རོ། །བསྙེན་པར་རྫོགས་ནས་དགུམ་པར་བཤམས་པ་ལས། བསྙེན་པར་རྫོགས་ནས་བཀུམ་ན། ཅིར་འགྱུར། མཐར་འགྱུར་རོ། །བསྙེན་པར་རྫོགས་ནས་དགུམ་པར་བཤམས་པ་ལས། བསྙེན་པར་མ་རྫོགས་པར་བཀུམ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གཅིག་པུ་འཚོ་བ་དང་དབྲལ་བའི་སླད་དུ་ཁྱིམ་དུ་ཞུགས་ན། མཐར་འགྱུར་བ་མཆིས་སམ། ཨུ་པ་ལི། ཡོད་དེ། ཇི་ལྟར་དགེ་སློང་དེས་གསད་པར་བཤམས་ནས་ནང་དུ་ཞུགས་པའོ། །ཇི་ལྟར་དགེ་སློང་གིས་འཚོ་བ་དང་ཕྲལ་བའི་རྐྱེན་གྱིས་མཐར་གྱུར་པ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་མཐར་འགྱུར་རོ། །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ལ་ཉེས་བྱས་སོ། །མདོར་ན། དག་དང་སྟོན་པ་རྣམ་པར་གཟིགས། །མི་སློབ་སློབ་དཔོན་ཉོན་མོངས་དང་། །ཉམས་དང་གྲོལ་དང་འཇིགས་པ་དང་། སྐྱེ་དང་རྙེད་དང་འདི་འདྲ་བའོ། །བཙུན་པ། དགེ་སློང་གིས་འདི་སྐད་དུ་བདག་ནི། དག་པའོ། །ཞེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་འདི་
སྐད་དུ་བདག་ནི། སྟོན་པའོ། །ཞེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ་བདག་ནི། རྣམ་པར་གཟིགས་དང་། སྤྱི་ཏོར་དང་། གསོད་སྐྱབས་དང་། ལོག་པ་དང་སེལ་དང་། གསེར་ཐུབ་དང་། འོད་སྲུང་རྣམས་ཀྱི་ཉན་ཐོས་པའོ། །ཞེས་མཆི་ན། ཅིར་འགྱུར། དེ་སྟེ་སྔོན་གྱི་གནས་སུ་ལུང་སྟོན་ན་ནི། མཐར་འགྱུར་རོ། །འོན་ཏེ་དེས་འདི་སྐད་དུ་གང་གི་ཚེ་ཤཱཀྱ་ཐུབ་པ་ལ་སྐྱབས་སུ་སོང་བ་ནས་བཟུང་སྟེ་ཡང་དག་པར་རྫོགས་པའི་སངས་རྒྱས་ཐམས་ཅད་ལ་སྐྱབས་སུ་སོང་ངོ་། །ཞེས་སྨྲས་ན། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ་བདག་ནི། མི་སློབ་པའོ། །ཞེས་མཆི་ན། ཅིར་འགྱུར། དེ་སྟེ་ཉོན་མོངས་པ་སྤངས་པར་ལུང་སྟོན་ན། མཐར་འགྱུར་རོ། །འོན་ཏེ་དེ་འདི་སྐད་དུ་བདག་བཟོ་གང་ཡང་མི་སློབ་པའོ། །ཞེས་སྨྲས་ན། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ་བདག་ནི། སློབ་པའོ། །ཞེས་མཆི་ན། ཅིར་འགྱུར། དེ་སྟེ་སློབ་པའི་སྤྱོད་པར་ལུང་སྟོན་ན། མཐར་འགྱུར་རོ། །འོན་ཏེ་དེ་འདི་སྐད་དུ་མཚུངས་པར་སྤྱོད་པ་ལ་སློབ་བོ། །ཞེས་སྨྲས་ན། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ་བདག་ལ་ཉོན་མོངས་པ་མེད་དོ། །ཞེས་མཆི་ན། ཅིར་འགྱུར། དེ་སྟེ་ཉོན་མོངས་པ་སྤངས་པར་ལུང་སྟོན་ན། མཐར་འགྱུར་རོ། །འོན་ཏེ་འདི་སྐད་དུ་བདག་ལ་ལྷུང་བཟེད་དམ། ཆོས་གོས་སམ། དགེ་སློང་གི་འཚོ་བའི་ཡོ་བྱད་གང་ཡང་རུང་བ་རྣམས་མེད་དོ། །ཞེས་སྨྲས་ན། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ་བདག་ནི། ཉམས་པའོ། །ཞེས་མཆི་ན། ཅིར་འགྱུར། དེ་སྟེ་འདི་སྐད་དུ་དགེ་སྦྱོང་གི་འབྲས་བུ་ལས་ཉམས་པའོ། །ཞེས་སྨྲས་ན། མཐར་འགྱུར་རོ། །བཙུན་པ། དགེ་སློང་གིས་འདི་སྐད་དུ་བདག་ནི། གྲོལ་བའོ། །ཞེས་མཆི་ན། ཅིར་འགྱུར། དེ་སྟེ་འདི་སྐད་དུ་བདག་ནི། སྦྱོར་བ་དང་། བཅིངས་པ་དང་། བག་ལ་ཉལ་བ་དང་། ཉེ་བའི་ཉོན་མོངས་པ་དང་། ཀུན་ནས་དཀྲིས་ཏེ་འདས་པ་ལས་གྲོལ་ལོ།། ཞེས་སྨྲས་ན། མཐར་འགྱུར་རོ། །བཙུན་པ། དགེ་སློང་གིས་འདི་སྐད་དུ་བདག་ལ་འཇིགས་པ་མེད་དོ་ཞེས་མཆི་ན་ཅིར་འགྱུར།
དེ་སྟེ་འཇིགས་པ་སྤངས་པར་ལུང་སྟོན་ན། མཐར་འགྱུར་རོ། །དེ་སྟེ་འཇིག་རྟེན་པས་ཅུང་ཟད་ཀྱང་མི་འཇིགས་སོ། །ཞེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ་འདི་ནི། བདག་གི་སྐྱེ་བ་ཐ་མའོ། །ཞེས་མཆི་ན། ཅིར་འགྱུར། དེ་སྟེ་སྐྱེ་བ་ཟད་པར་ལུང་སྟོན་ན། མཐར་འགྱུར་རོ། །འོན་ཏེ་དེ་འདི་སྐད་དུ་སྐྱེ་བ་ཟད། འགགས། བྲལ། རྣམ་པར་བྲལ་བ་སྟེ། དེ་ལྟར་འདི་ནི། སྐྱེ་བའི་ཐ་མའོ། །ཞེས་སྨྲས་ན། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ་བདག་གིས་རབ་ཏུ་ཐོབ་བོ། །ཞེས་མཆི་ན། ཅིར་འགྱུར། དེ་སྟེ་དགེ་སློང་གི་འབྲས་བུ་ཐོབ་བོ། །ཞེས་སྨྲས་ན། མཐར་འགྱུར་རོ། །འོན་ཏེ་འཇིག་རྟེན་གྱི་དངོས་པོར་ལུང་སྟོན་ན། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ། ཨེ་མའོ། །བདག་ཅི་འདྲ་བ་དེ་འདྲ་བར་ཁྱོད་གྱུར་པ་ངོ་མཚར་ཆེའོ། །ཞེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མདོར་ན། མ་སྨིན་བཟོད་དང་རང་བྲིས་དང་། །སྤངས་དང་འབྲས་བུ་གཉིས་པ་དང་། འདུ་ཤེས་བཞི་དང་ཐོབ་བྱ་དང་། །འཇིག་རྟེན་གྱི་ནི་ཐ་མའོ། །བཙུན་པ། དགེ་སློང་གིས་དེ་ལ་ཚེ་དང་ལྡན་པ་ཁྱོད་ཟག་པ་ཟད་པའི་འབྲས་བུ་ཡོད་དམ་ཞེས་དྲིས་པ་དང་། དེས་ཀྱང་ཞིབ་ཏུ་ཤིང་ཐོག་མ་སྨིན་པ་ཞིག་བཅངས་པར་གྱུར་ནས་དེ་འདི་སྐད་དུ་མ་སྨིན་ཏོ། །ཞེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ་རྒྱུན་དུ་ཞུགས་པའི་འབྲས་བུ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། མཆོག་གི་འབྲས་བུ་བདག་གིས་ཐོབ་བོ། །ཞེས་མཆི་ན། ཅིར་འགྱུར། མཐར་འགྱུར་རོ། །བཙུན་པ། དགེ་སློང་གིས་བདག་ཉིད་ཀྱིས་བྲིས་ལ་འདི་སྐད་དུ་བདག་དགྲ་བཅོམ་པའོ། །ཞེས་འདི་སུས་བྲིས་ཞེས་མཆིས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་ལ་ཁྱིམ་བདག་ཅིག་གིས་ཁྱོད་ཀྱིས་འབྲས་བུ་ཐོབ་བོ། །ཞེས་དྲིས་པ་དང་། དེས་ཀྱང་མེ་ཏོག་དང་འབྲས་བུ་སྨིན་པ་རྣམས་བཅངས་ནས་དེ་འདི་སྐད་དུ་མ་སྨིན་ནོ་ཞེས་མཆི་ན་ཅིར་འགྱུར། ཉེས་པ་སྦོམ་པོར་འགྱུར་རོ། །
བཙུན་པ་དགེ་སློང་གིས་འདི་སྐད་དུ་བདག་ནི། ཉམས་སོ། །ཞེས་མཆི་ན། ཅིར་འགྱུར། དེ་སྟེ་ཐོབ་པ་ལས་ཉམས་པར་ལུང་སྟོན་ན། མཐར་འགྱུར་རོ། །བཙུན་པ། དགེ་སློང་གིས་བདག་ནི། རྒྱུན་ཏུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་རྣམས་མ་ཡིན་ནོ། །ཞེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འགྲོ་བ་ཞེས་བྱ་བའི་རི་ལ་རྒྱུན་ཏུ་ཞུགས་པའི་འབྲས་བུ་ཐོབ་བོ། །རི་དགུ་པོ་ཞེས་བྱ་བའི་ངོས་ལ་ལན་གཅིག་ཕྱིར་འོང་བའི་འབྲས་བུ། བྱ་རྒོད་སྤུངས་པ་ཞེས་བྱ་བ་ལ་ཕྱིར་མི་འོང་བའི་འབྲས་བུ། འོད་མའི་ཚལ་དུ་མཆོག་གི་འབྲས་བུ་ཐོབ་བོ། །ཞེས་མཆི་ན། ཅིར་འགྱུར། མཐར་འགྱུར་རོ། །བཙུན་པ། དགེ་སློང་གིས་མི་ལ་མི་མ་ལགས་པར་འདུ་ཤེས་ཏེ་མི་ལས་བླ་མར་གྱུར་པའི་ཆོས་ཤིག་ལུང་སྟོན་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ཡིན་པ་ལ་མིར་འདུ་ཤེས་ན། ཉེས་པ་སྦོམ་པོར་འགྱུར་རོ། །མི་མ་ཡིན་པ་ལ་མི་མ་ཡིན་པར་འདུ་ཤེས་ན། ཉེས་པ་སྦོམ་པོར་འགྱུར་རོ། །མི་ལ་མིར་འདུ་ཤེས་ན། མཐར་འགྱུར་རོ། །བཙུན་པ། དགེ་སློང་གིས་འདི་སྐད་དུ་ཉན་ཐོས་ཀྱིས་ཐོབ་པར་བྱ་བ་གང་ཡིན་པ་དེ། བདག་གིས་ཐོབ་བོ། །ཞེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ་དེང་བདག་གིས་འཇིག་རྟེན་གྱི་བསམ་གཏན་ལ་སྙོམས་པར་མ་ཞུགས་ཏེ། སྲོད་ལ་ནི། མ་ཡིན། དེ་ཕན་ཆད་མ་ཡིན་ནོ། །ཞེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་སྐད་དུ། ལུང་བསྟན་གྱི། ཚུར་ཤོག་ཅེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མདོར་ན། འཕྲིན་པ་སྤྲིང་ཡིག་ལག་བརྡ་དང་། །གཞན་ཞིག་ཟེར་དང་གཅིག་ནས་གཅིག་།སྨྱོན་པ་གང་དང་སེམས་འཁྲུགས་དང་། །ན་བ་འོན་པ་གླེན་པ་འོ། །བཙུན་པ། དགེ་སློང་གིས་ཕོ་ཉ་ལས་མི་ལས་བླ་མར་གྱུར་པའི་ཆོས་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ལ་བསྒོ་བ་དང་། གཅིག་ནས་གཅིག་ཏུ་བརྒྱུད་ན། ཐམས་ཅད་ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་སྨྱོན་པ་ཞིག་ལ་
མི་ལས་བླ་མར་གྱུར་པའི་ཆོས་སྨྲས་ནས། ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། འོན་པ་དང་། གླེན་པ་ཐམས་ཅད་ལ་ཉེས་པ་སྦོམ་པོར་འགྱུར་རོ། །མདོར་ན། གཉིད་ལོག་ར་རོ་རབ་མྱོས་དང་། །སྙོམས་ཞུགས་འགྲོ་བ་དེ་བཞིན་ཏེ། །སྐད་དང་ལུས་དང་དབེན་པ་སྔགས། །གཞན་གྱིས་གཞན་ལ་ཐ་མའོ། །བཙུན་པ། དགེ་སློང་གིས་གཉིད་ཀྱིས་ལོག་པ་ཞིག་གི་དྲུང་དུ་མི་ལས་བླ་མར་གྱུར་པའི་ཆོས་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་ར་རོ་བ་དང་། མྱོས་པ་དང་། འགྲོ་བ་གཞན་དུ་གྱུར་པ་རྣམས་ཀྱི་དྲུང་དུ་སྨྲས་པ་ཐམས་ཅད་ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འཕགས་པས་འཕགས་པའི་སྐད་དུ་དགེ་སློང་ཞིག་ལ་མི་ལས་བླ་མར་གྱུར་པའི་ཆོས་སྨྲས་ན། དགེ་སློང་དེས་ཀྱང་འཕགས་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །འཕགས་པ་ཞིག་གིས་མཐའ་འཁོབ་པའི་སྐད་དུ་སྨྲས་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པ་ཞིག་གིས་མཐའ་འཁོབ་པའི་སྐད་དུ་སྨྲས་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པ་ཞིག་གིས་འཕགས་པའི་སྐད་དུ་མི་ལས་བླ་མར་གྱུར་པའི་ཆོས་སྨྲས་པ་དང་། དགེ་སློང་དེས་ཀྱང་འཕགས་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ལུས་ཀྱི་དམིགས་བས་མི་ལས་བླ་མར་གྱུར་པའི་ཆོས་སྟོན་ན། ཅིར་གྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་དབེན་པ་ལ་མི་དབེན་པར་འདུ་ཤེས་ཏེ་མི་ལས་བླ་མར་གྱུར་པའི་ཆོས་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་སྔགས་སམ། སྨན་གྱིས་བདག་ཉིད་མི་སྣང་བར་བགྱིས་ཏེ་མི་ལས་བླ་མར་གྱུར་པའི་ཆོས་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་གཞན་ལས་མི་ལས་བླ་མར་གྱུར་པའི་ཆོས་སྨྲས་ན། ཅིར་འགྱུར་ཉེས་པ་སྦོམ་པོར་འགྱུར་རོ། །བཙུན་པ་དགེ་
སློང་གིས་གཞན་ཞིག་གི་སླད་དུ་མི་ལས་བླ་མར་གྱུར་པའི་ཆོས་སྨྲས་ན་ཅིར་འགྱུར། ཉེས་བྱས་སོ། །ཇི་ལྟར་དགེ་སློང་གིས་སྨྲས་པའི་རྐྱེན་གྱིས་མཐར་གྱུར་པ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་རྣམས་ཀྱི་ཡང་མཐར་འགྱུར། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཉེས་བྱས་སོ། །ཨུ་པ་ལིས་ཞུས་པའི་ནང་ནས་ཕས་ཕམ་པ་དང་ལྡན་པ་རྫོགས་སོ།། །།