དགེ་འདུན་ལྷག་མ་རྣམས་འཆད་པ།
མདོར་ན། མ་ལོག་སྦུ་བུ་དེ་བཞིན་གཡོས། །མི་རྩོལ་མེད་པ་རྣམས་དང་མཚན། །གཞན་དང་བདུན་ནི་དེ་བཞིན་ཏེ། །སྡེར་བཅས་བསྡུས་པར་གྱུར་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། གཉིད་ཀྱིས་མ་ལོག་པར་བརྩལ་ནས་ལོག་སྟེ་ཁུ་བ་བྱུང་ན། ཅིར་འགྱུར། ཉེས་པ་སྦོམ་པར་འགྱུར་རོ། །བཙུན་པ། གཉིད་ཀྱིས་ལོག་པའི་ཚེ་བརྩལ་ནས་མ་ལོག་པའི་ཚེ་ཁུ་བ་བྱུང་ན། ཅིར་འགྱུར། དེ་སྟེ་བརྩལ་ན། ཉེས་པ་སྦོམ་པོར་འགྱུར་རོ། །མ་བརྩལ་ན། ཉེས་པ་མེད་དོ། །བཙུན་པས་ནི། སྤུ་བུར་འོངས་པའི་ཁུ་བ་ཕྱུང་ན། ཉེས་པ་སྦོམ་པོའོ། །ཞེས་གསུངས་ན། ཇི་ཙམ་གྱིས་ན། སྦུ་བུར་མཆིས་པ་ལགས། གནས་ནས་འཕགས་མ་ཐག་ཏུ་སྦུ་བུར་བཀག་པའོ། །བཙུན་པ། བཅོམ་ལྡན་འདས་ཀྱིས་གཡོས་པ་ལས་བཀག་པའོ། །ཞེས་གསུངས་ཏེ། ཇི་ཙམ་གྱིས་ན་གཡོས་པ་ལས་བཀག་པ་ལགས། གནས་ནས་གཡོས་མ་ཐག་ཏུ་བཀག་པའོ། །བཙུན་པ། མ་བརྩལ་བར་ཁུ་བ་བྱུང་ན། ཅིར་འགྱུར། དེ་སྟེ་དགའ་བར་མ་ཚོར་ན། ཉེས་པ་མེད་དོ། །བཙུན་པ། དགེ་སློང་གིས་ཁུ་བ་འབྱིན་པ་ལས་མཚན་འཕོས་ཏེ་དགེ་སློང་མར་གྱུར་ན། ཅིར་འགྱུར། དགེ་འདུན་གྱི་ལྷག་མ་ལས་བྱུང་བའི་ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་མ་ཞིག་ཁུ་བ་འབྱིན་པ་ལས་མཚན་འཕོས་ཏེ་དགེ་སློང་དུ་གྱུར་ན། ཅིར་འགྱུར། ལྟུང་བ་ལས་བྱུང་བའི་ཉེས་བྱས་སོ། །བཙུན་པ། དགེ་སློང་གིས་གཞན་གྱི་ཕོ་མཚན་ལས་ཁུ་བ་ཕྱུང་ན། ཅིར་འགྱུར། ཉེས་པ་སྦོམ་པར་འགྱུར་རོ། །བཙུན་པ། བསྙེན་པར་མ་རྫོགས་པར་བརྩལ་ནས་བསྙེན་པར་མ་རྫོགས་པར་ཕྱུང་ན། ཅིར་འགྱུར། །ཉེས་བྱས་སོ། །བསྙེན་པར་མ་རྫོགས་པར་བརྩལ་ནས་བསྙེན་པར་རྫོགས་ཀར་
བྱུང་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྩལ་ནས་བསྙེན་པར་རྫོགས་ནས་ཕྱུང་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཀར་བརྩལ་ནས་བསྙེན་པར་རྫོགས་ཀར་ཕྱུང་ན། ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བརྩལ་ནས་བསྙེན་པར་རྫོགས་པ་དང་ཕྱུང་ན། ཅིར་འགྱུར། དགེ་འདུན་ལྷག་མའོ། །བསྙེན་པར་རྫོགས་ཏེ་བརྩལ་ནས་བསྙེན་པར་རྫོགས་ནས་ཕྱུང་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ནས་བརྩམས་ཏེ་བསྙེན་པར་མ་རྫོགས་པར་ཕྱུང་ན། ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་ལྟར་དགེ་སློང་ཁུ་བ་ཕྱུང་བའི་རྐྱེན་གྱིས་དགེ་འདུན་གྱི་ལྷག་མར་གྱུར་པ་དེ་བཞིན་དུ་བསླབ་པ་བྱིན་པ་ལ་ཡང་དགེ་འདུན་གྱི་ལྷག་མའོ། །དགེ་སློང་མ་ལ་ནི་ཇི་ལྟར་དངོས་པོ་བཞིན་ནོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ནི། ཉེས་བྱས་སོ། །མདོར་ན། ལུས་དང་ཐེ་ཚོམ་སོ་དང་ནི། །རྨ་སྤུ་སེན་མོ་དེ་བཞིན་ཏེ། །བཞི་པ་གཉིས་དང་བདུན་པ་རྣམས། །སྡེ་ཚན་དག་ཏུ་བསྡུས་པའོ། །བཙུན་པ། བུད་མེད་ཀྱི་དབང་པོ་ཉམས་པ་དེ་དང་ལྷན་ཅིག་ཏུ་དགེ་སློང་གིས་ལུས་ཀྱིས་ཀུན་ཏུ་རེག་པར་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་ལུས་ཀྱི་དབང་པོ་ཉམས་པར་གྱུར་པ་ཞིག་གིས་བུད་མེད་དང་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིད་ན། ཅིར་འགྱུར་ཉེས་པ་སྦོམ་པོར་འགྱུར་རོ། །བཙུན་པ། གཉིས་ཀའི་ལུས་ཀྱི་དབང་པོ་ཉམས་པར་གྱུར་པ་དེ་གཉིས་གཅིག་ལ་གཅིག་ཀུན་ཏུ་རེག་པར་བགྱིད་ན། ཅིར་འགྱུར། ཉེས་བྱས་སོ། །བཙུན་བ། དགེ་སློང་གིས་འདི་བུད་མེད་ལ་བུད་མེད་མ་ལགས་ཞེས་ཐེ་ཚོམ་དང་། ཡིད་གཉིས་དང་། དོགས་པ་སྐྱེས་བཞིན་དུ་དེ་དེ་དང་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། སོས་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། སོ་ལ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། རྨས་རེག་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་སྤུས་རེག་ན་ཅིར་
འགྱུར། ཉེས་པ་སྦོམ་པོར་འགྱུར་རོ། །བཙུན་པ། སྤུ་ལ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། སེན་མོ་ལ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། སེན་མོས་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་མིའི་བུད་མེད་ལ་མིར་འདུ་ཤེས་ཏེ་རེག་ན། ཅིར་འགྱུར། དགེ་འདུན་གྱི་ལྷག་མའོ། །མི་ལ་མི་མ་ཡིན་པར་འདུ་ཤེས་ཏེ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་ཏེ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མི་མ་ལགས་པར་འདུ་ཤེས་ཏེ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་གཡོགས་པ་ལ་གཡོགས་པར་འདུ་ཤེས་ཏེ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །གཡོགས་པ་ལ་མ་གཡོགས་པར་འདུ་ཤེས་ཏེ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མ་གཡོགས་པ་ལ་གཡོགས་པར་འདུ་ཤེས་ཏེ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མ་གཡོགས་པ་ལ་མ་གཡོགས་པར་འདུ་ཤེས་ཏེ་རེག་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། བསྙེན་པར་མ་རྫོགས་པར་ལུས་ཀྱིས་ཀུན་ཏུ་རེག་པར་བཤམས་ནས་བསྙེན་པར་མ་རྫོགས་པར་རེག་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ལ་བསྙེན་པར་རྫོགས་ཀར་རེག་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ལ་བསྙེན་པར་རྫོགས་པ་དང་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ཀར་རེག་ན། ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ལ་བསྙེན་པར་རྫོགས་ནས་རེག་ན། ཅིར་འགྱུར།ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ནས་བཤམས་ལ་བསྙེན་པར་རྫོགས་པ་ན་རེག་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ནས་བཤམས་ལ་བསྙེན་པར་མ་རྫོགས་པར་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ།། །།མདོར་
ན། གཞན་དུ་འདུ་ཤེས་རོ་རུས་པ། །མཚན་དང་སྐྱེས་པ་མཉེན་པ་དང་། །མ་ནིང་ཕ་དང་མ་ནིང་མ། །སྙོམས་ཞུགས་ཉལ་དང་འགྲོ་བའོ། །བཙུན་པ། དགེ་སློང་གིས་བུད་མེད་གཞན་ཞིག་ལ་ཆགས་པ་ལས་གཞན་དང་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། བུད་མེད་ཀྱི་རོ་དང་ལྷན་ཅིག་ཏུ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། བུད་མེད་ཀྱི་ཀེད་རུས་ཤ་མེད་པ་ལ་རེག་ན། ཅིར་འགྱུར། ཉེས་བྱས་སོ། །བཙུན་པ། དགེ་སློང་གིས་བུད་མེད་དང་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིད་པ་ལས། དེའི་མཚན་འཕོས་ཏེ་དགེ་སློང་མར་གྱུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་མས་སྐྱེས་པ་དང་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིད་པ་ལས། མཚན་འཕོས་ཏེ་དགེ་སློང་ཕར་གྱུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་སྐྱེས་པ་དང་ལྷན་ཅིག་ཏུ་ལུས་ཀྱིས་ཀུན་ཏུ་རེག་པར་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འཇམ་མམ་སྙམ་དུ་བསམ་སྟེ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མཉེན་ནམ། དྲོའམ་སྙམ་དུ་བསམ་པའང་དེ་བཞིན་ནོ། །བཙུན་པ། དགེ་སློང་གིས་མ་ནིང་ཕ་དང་ལྷན་ཅིག་ཏུ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མ་ནིང་མ་དང་ལྷན་ཅིག་ཏུ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་སྙོམས་པར་ཞུགས་པ་མོ་དང་ལྷན་ཅིག་ཏུ་རེག་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། དགེ་སློང་གིས་བུད་མེད་ཉལ་བ་དང་ལྷན་ཅིག་ཏུ་རེག་ན།ཅིར་འགྱུར། དགེ་འདུན་གྱི་ལྷག་མའོ། །བཙུན་པ། དགེ་སློང་གིས་འགྲོ་བ་གཞན་དུ་གནས་པ་མོ་དང་ལྷན་ཅིག་ཏུ་རེག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་ལྟར་དགེ་སློང་གིས་ལུས་ཀྱིས་ཀུན་ཏུ་རེག་པར་བྱས་པ་ལས་དགེ་འདུན་གྱི་ལྷག་མར་གྱུར་པ་དེ་བཞིན་དུ་བསླབ་པ་བྱིན་པ་ལ་ཡང་དགེ་འདུན་གྱི་ལྷག་མར་འགྱུར་རོ། །དགེ་སློང་མ་རྣམས་ལ་ནི། ཕས་ཕམ་པར་འགྱུར་རོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཉེས་བྱས་སོ།། །།མདོར་ན། སྐད་དང་ལུས་དང་
དབེན་སྔགས་དང་། །གཞན་ལས་གཞན་ཕྱིར་སྤྲུལ་པ་དང་། །འཕྲིན་པ་སྤྲིང་ཡིག་ལག་བརྡ་དང་། །གཞན་ཞིག་ཟེར་དང་བདུན་པ་སྟེ། །བསྒོ་བ་མ་ནིང་སྐྱེས་པ་དང་། །མ་ནིང་བཟང་དང་སྡིག་ཅན་ནོ། །བཙུན་པ། དགེ་སློང་འཕགས་པ་ཞིག་གིས་འཕགས་པའི་སྐད་དུ་བུད་མེད་ལ་གནས་ངན་ལེན་གྱིས་ཚིག་སྨྲས་པ་ལས་བུད་མེད་དེས་འཕགས་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །འཕགས་པས་མཐའ་ལ་འཁོབ་པའི་སྐད་དུ་སྨྲས་པ་དང་། བུད་མེད་དེས་ཀྱང་མཐའ་འཁོབ་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པས་མཐའ་འཁོབ་པའི་སྐད་དུ་སྨྲས་པ་དང་། བུད་མེད་ངེས་མཐའ་འཁོབ་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པས་འཕགས་པའི་སྐད་དུ་བུད་མེད་ལ་གནས་ངན་ལེན་གྱི་སྐད་དུ་སྨྲས་པ་དང་། བུད་མེད་ངེས་ཀྱང་འཕགས་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་བུད་མེད་ལ་ལུས་ཀྱི་དམིགས་པས་གནས་ངན་ལེན་པའི་ཚིག་བུད་མེད་ལ་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་དབེན་པ་ལ་དབེན་པར་འདུ་ཤེས་ཏེ་བུད་མེད་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་སྔགས་སམ། སྨན་གྱིས་བདག་ཉིད་མི་སྣང་བར་བགྱིས་ཏེ་བུད་མེད་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར་ཉེས་པོ་སྦོམ་པོར་འགྱུར་རོ། །བཙུན་པ། དགེ་སློང་གིས་བུད་མེད་ལ་གཞན་ཞིག་སྨྲར་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་བུད་མེད་ལ་གཞན་གྱི་སླད་དུ་གནས་ངན་ལེན་གྱི་ཚིག་སྨྲས་ན། ཅིར་འགྱུར།ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་སྤྲུལ་པའི་བུད་མེད་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གི་བུད་མེད་ལ་འཕྲིན་པ་སྨྲས་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་
ཏུ་བརྒྱུད་པ་ཐམས་ཅད་ཉེས་པ་སྦོམ་པོར་འགྱུར་རོ། །བཙུན་པ། བསྙེན་པར་མ་རྫོགས་པས་གནས་ངན་ལེན་གྱི་ཚིག་བཤམས་ལ་བསྙེན་པར་མ་རྫོགས་པར་སྨྲས་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ནས་བསྙེན་པར་རྫོགས་ཀར་སྨྲས་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ནས་བསྙེན་པར་རྫོགས་ཏེ་སྨྲས་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཀར་བཤམས་ནས་བསྙེན་པར་རྫོགས་ཀར་སྨྲས་ན། ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ནས་བསྙེན་པར་རྫོགས་ཏེ་སྨྲས་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ནས་བཤམས་ཏེ་བསྙེན་པར་རྫོགས་པར་སྨྲས་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཏེ་བཤམས་ནས་བསྙེན་པར་མ་རྫོགས་པ་ན་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་བུད་མེད་ལ་འདི་སྐད་དུ་ཆེ་ཞེ། མཉམ་པར་བགོས་ཤིག་།ཅེས་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་མ་ནིང་ལ་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །སྐྱེས་པ་ལ་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མ་ནིང་མོ་ལ་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་བུད་མེད་ལ་འདི་སྐད་དུ་བཟང་ངོ་། །ཞེས་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་བུད་མེད་ལ་འདི་སྐད་དུ་སྡིག་ཅན་ནོ། །ཞེས་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མདོར་ན། སྨྱོན་མ་དང་ཡང་སེམས་འཁྲུགས་སམ། །ན་བ་འོ་ན་མ་གླེན་མ་དང་། གཉིད་ལོག་ར་རོ་མྱོས་མ་དང་། །དགེ་སློང་མ་དང་སྙོམས་ཞུགས་སམ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། དགེ་སློང་གིས་བུད་མེད་སྨྱོན་མ་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་ཏེ། སེམས་འཁྲུགས་པ་དང་། ནད་ཀྱིས་གཟིར་བ་དང་། འོན་མ་དང་། གླེན་མ་དང་།
གཉིད་ལོག་པ་དང་། །ར་རོ་པ་དང་། མྱོས་མ་རྣམས་ལ་ཡང་དེ་བཞིན་ནོ། །བཙུན་པ། དགེ་སློང་གིས་བུད་མེད་ལ་གནས་ངན་ལེན་གྱི་ཚིག་སྨྲ་བ་ན་མཚན་འཕོས་ཏེ་དགེ་སློང་མར་གྱུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་མས་སྐྱེས་པ་ལ་གནས་ངན་ལེན་གྱི་ཚིག་སྨྲ་བ་ན། མཚན་འཕོས་ཏེ་དགེ་སློང་ཕར་གྱུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། བཅོམ་ལྡན་འདས་ཀྱིས་དགེ་སློང་གིས་བུད་མེད་ལ་གནས་ངན་ལེན་གྱི་ཚིག་སྨྲས་ན། དགེ་འདུན་གྱི་ལྷག་མའོ། །ཞེས་གསུངས་ན། དགེ་སློང་གིས་བུད་མེད་ལ་གནས་ངན་ལེན་གྱི་ཚིག་ཏུ་སྨྲ་བ་ལ་དགེ་འདུན་གྱི་ལྷག་མར་མི་འགྱུར་བ་མཆིས་སམ། ཡོད་དེ། དེ་སྟེ་གཞན་གྱི་ཕྱིར་ནའོ། །བཙུན་པ། དགེ་སློང་གིས་སྐྱེས་པ་ལ་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་མ་དང་། དགེ་སློང་མ་དང་། དགེ་ཚུལ་མ་རྣམས་ལ་སྨྲས་ན། ཅིར་འགྱུར། དགེ་འདུན་གྱི་ལྷག་མའོ།། དགེ་སློང་གིས་དགེ་ཚུལ་ལ་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་མས་སྐྱེས་པ་ལ་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་མས་སྐྱེས་པ་དང་། དགེ་སློང་དང་། དགེ་ཚུལ་ཕ་ལ་སྨྲས་ན། ཉེས་བྱས་སུ་འགྱུར་རོ། །དགེ་ཚུལ་མས་སྐྱེས་པ་དང་། དགེ་སློང་དང་། དགེ་ཚུལ་མ་ལ་སྨྲས་ན། ཉེས་བྱས་སུ་འགྱུར་རོ། །དགེ་ཚུལ་ཕས་བུད་མེད་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་སློང་དང་། དགེ་ཚུལ་ཕ་རྣམས་ལ་སྨྲས་ན། ཅིར་འགྱུར། ཉེས་བྱས་སོ། །བཙུན་པ། དགེ་སློང་གིས་སྙོམས་པར་ཞུགས་པའི་བུད་མེད་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མདོར་ན། བཞི་པ་གཉིས་དང་འདུ་ཤེས་གཞན། །གནས་ངན་ལེན་དུ་དེ་དག་བརྗོད། །ཀུན་སྤྱོད་པ་ཡང་དེ་བཞིན་དུ། །རྒྱས་པོར་བསྒྲག་པར་བྱ་བའོ། །བཙུན་པ། དགེ་སློང་གིས་མི་མ་ལགས་པའི་བུད་མེད་ལ་མི་མ་ལགས་པར་འདུ་ཤེས་ཏེ་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་ལ་མི་མ་ལགས་པར་འདུ་ཤེས་ན་ཅིར་འགྱུར།
ཉེས་པ་སྦོམ་པོར་འགྱུར་རོ། །མི་ལ་མིར་འདུ་ཤེས་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། དགེ་སློང་གིས་མིའི་བུད་མེད་ལ་མིའི་བུད་མེད་དུ་འདུ་ཤེས་ཏེ་སྨྲས་ན། ཅིར་འགྱུར། དགེ་འདུན་གྱི་ལྷག་མའོ། །བུད་མེད་ལ་སྐྱེས་པར་འདུ་ཤེས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །སྐྱེས་པ་ལ་བུད་མེད་དུ་འདུ་ཤེས་ན་ཡང་ཉེས་པ་སྦོམ་པོར་འགྱུར་རོ། །སྐྱེས་པ་ལ་སྐྱེས་པར་འདུ་ཤེས་ཏེ་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་གཞན་དུ་འདུ་ཤེས་པ་ལས་བུད་མེད་ཅིག་ལ་གནས་ངན་ལེན་གྱི་ཚིག་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་འདུན་གྱི་ལྷག་མ་གསུམ་པ་དང་། བཞི་པ་རྫོགས་ཏེ། ཇི་ལྟར་གནས་ངན་ལེན་པ་དེ་བཞིན་དུ་ཀུན་ཏུ་སྤྱོད་པ་ལ་ཡང་བྱའོ།། །།འདུལ་བ་གཞུང་དམ་པ་བམ་པོ་གཉིས་པ། མདོར་ན། ཆོས་གཉིས་བཞི་པ་རྣམ་པ་དྲུག། དབང་པོ་ཉེ་བར་བྱ་བ་གཉིས། །བདུན་པ་དང་ཡང་ཆད་པ་དང་། །བཞི་པ་གཉིས་དང་གཅིག་ནས་གཅིག་།སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། ཆོས་གང་འདས་པ་ཡང་མ་ལགས། མ་འོངས་པ་ཡང་མ་ལགས། ད་ལྟར་བྱུང་བ་ཡང་མ་ལགས་ལ། ལས་ཀུན་རྫོགས་པའི་མཐར་ཐུག་པའི་ཆོས་དེ་གང་ལགས། ཨུ་པ་ལི། མྱ་ངན་ལས་འདས་པའོ། །བཙུན་པ། ཆོས་གང་སོང་ཞིང་འོངས་པ་ལས་ཀུན་རྫོགས་པའི་མཐར་ཐུག་པ་དེ་གང་ལགས། ཨུ་པ་ལི། སྨྱན་བྱེད་པའོ། །དེ་བསྐྱལ་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། དགེ་སློང་གིས་སྨྱོན་པ་ཞིག་ལས་འཕྲིན་བླངས་ཏེ་སྨྱོན་པ་ལ་བསྐྱལ་ལ་སྨྱོན་པ་ལ་ལན་སླར་སྩལ་ན་ཅིར་འགྱུར།
ཉེས་པ་སྦོམ་པོར་འགྱུར་རོ། །སྨྱོན་པ་ཞིག་ལས་འཕྲིན་བླངས་ཏེ་སྨྱོན་པ་ལ་བསྐྱལ་ལ་སླར་ལན་རང་བཞིན་དུ་གནས་པ་ཞིག་ལ་སྩལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །སྨྱོན་པ་ལས་འཕྲིན་བླངས་ཏེ་རང་བཞིན་དུ་གནས་པ་ལ་བསྐྱལ་ལ་སྨྱོན་པ་ལ་སླར་ལན་སྩལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །སྨྱོན་པ་ལས་འཕྲིན་བླངས་ཏེ་རང་བཞིན་དུ་གནས་པ་ལ་ལན་སླར་སྩལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་རང་བཞིན་དུ་གནས་པ་ལས་འཕྲིན་བླངས་ཏེ་རང་བཞིན་དུ་གནས་པ་ལ་བསྐྱལ་ལ་རང་བཞིན་དུ་གནས་པ་ལ་ལན་སླར་སྩལ་ན། ཅིར་འགྱུར། དགེ་འདུན་གྱི་ལྷག་མར་འགྱུར་རོ། །རང་བཞིན་དུ་གནས་པ་ལས་འཕྲིན་བླངས་ཏེ་རང་བཞིན་དུ་གནས་པ་ལ་བསྐྱལ་ལ། སྨྱོན་པ་ལ་སླར་ལན་སྩལ་ན། ཅིར་འགྱུར། ཉེས་པ་སྦོམ་པོར་འགྱུར། །རང་བཞིན་དུ་གནས་པ་ལས་འཕྲིན་བླངས་ཏེ་སྨྱོན་པ་ལ་བསྐྱལ་ལ་རང་བཞིན་དུ་གནས་པ་ལ་ལན་སླར་སྩལ་ན། ཅིར་འགྱུར་ཉེས་པ་སྦོམ་པོར་འགྱུར་རོ། །རང་བཞིན་དུ་གནས་པ་ལས་འཕྲིན་བླངས་ཏེ་སྨྱོན་པ་ལ་བསྐྱལ་ལ། སྨྱོན་པ་ལ་ལན་སླར་སྩལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་ལྟར་སྨྱོན་པ་ལ་བཞི་རྒྱུད་གཉིས་པ་དེ་བཞིན་དུ་སེམས་འཁྲུགས་པ་ལའང་བཞི་རྒྱུད་གཉིས་ཏེ། ནད་ཀྱིས་གཟིར་བ་དང་། དབང་བ་དང་། མི་དབང་བ་རྣམས་ལ་ཡང་བཞི་རྒྱུད་གཉིས་པར་བྱའོ། །བཙུན་བ། དགེ་སློང་གིས་དབང་བ་ལས་འཕྲིན་བླངས་ཏེ་དབང་བ་ལ་བསྐྱལ་ལ་དབང་བ་ལ་ལན་སླར་སྩལ་ན། ཅིར་འགྱུར། དགེ་འདུན་གྱི་ལྷག་མའོ། །དབང་བ་ལས་འཕྲིན་བླངས་ཏེ་དབང་བ་ལ་བསྐྱལ་ལ་མི་དབང་བ་ལ་ལན་སླར་སྩལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དབང་བ་ལས་འཕྲིན་བླངས་ཏེ་མི་དབང་བ་ལ་བསྐྱལ་ལ། དབང་བ་ལ་ལན་སླར་སྩལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དབང་བ་ལས་འཕྲིན་བླངས་ཏེ་མི་དབང་བ་ལ་བསྐྱལ་ལ་མི་དབང་བ་ལ་ལན་སླར་སྩལ་ན་ཅིར་འགྱུར།ཉེས་པ་སྦོམ་པོར་འགྱུར་རོ། །བཙུན་པ་དགེ་སློང་གིས་མི་དབང་བ་ལས་འཕྲིན་བླངས་ཏེ་མི་དབང་བ་ལ་བསྐྱལ་ལ། མི་དབང་བ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །མི་དབང་བ་ལས་འཕྲིན་བླངས་ཏེ་མི་དབང་བ་ལ་བསྐྱལ་ལ། དབང་བ་ལ་ལན་སླར་སྩལ་ན། ཅིར་འགྱུར།
ཉེས་པ་སྦོམ་པོར་འགྱུར་རོ། །མི་དབང་བ་ལས་འཕྲིན་བླངས་ཏེ་དབང་བ་ལ་བསྐྱལ་ལ་མི་དབང་བ་ལ་ལན་སླར་སྩལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་དབང་བ་ལས་འཕྲིན་བླངས་ཏེ་དབང་བ་ལ་བསྐྱལ་ལ་དབང་བ་ལ་ལན་སླར་སྩལ་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ཁྱིམ་བདག་ཅིག་ལ་འདི་སྐད་དུ་བུད་མེད་ཉོས་ལ་ཤོག་ཅིག་།ཅེས་སྨྲས་ན། ཅིར་འགྱུར་ཉེས་བྱས་སོ། །བཙུན་པ། དགེ་སློང་གིས་ཁྱིམ་བདག་ཅིག་ལ་འདི་སྐད་དུ་བུད་མེད་འདི་ཞེས་བྱ་བ་ཉོས་ཤིག་།ཅེས་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་མ་རྫོགས་པར་འཕྲིན་བླངས་ཏེ་བསྙེན་པར་མ་རྫོགས་པར་བསྐྱལ་ལ། བསྙེན་པར་རྫོགས་པར་སླར་ལན་བསྐྱལ་ན་ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་འཕྲིན་བླངས་ཏེ་བསྙེན་པར་མ་རྫོགས་པར་བསྐྱལ་ལ། བསྙེན་པར་རྫོགས་ཀར་སླར་ལན་བསྐྱལ་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་འཕྲིན་བླངས་ཏེ་བསྙེན་པར་རྫོགས་ཀར་བསྐྱལ་ལ། བསྙེན་པར་རྫོགས་ཏེ་སླར་ལན་བསྐྱལ་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཀར་འཕྲིན་བླངས་ཏེ་བསྙེན་པར་རྫོགས་ཀར་བསྐྱལ་ལ།། བསྙེན་པར་རྫོགས་ཀར་སླར་ལན་བསྐྱལ་ན། ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་འཕྲིན་བླངས་ཏེ་བསྙེན་པར་རྫོགས་ཀར་བསྐྱལ་ལ། བསྙེན་པར་རྫོགས་ཏེ་སླར་ལན་བསྐྱལ་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་མ་རྫོགས་པས་འཕྲིན་བླངས་ཏེ་བསྙེན་པར་རྫོགས་ཀར་བསྐྱལ་ལ་བསྙེན་པར་རྫོགས་ཏེ་སླར་ལན་བསྐྱལ་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་པས་འཕྲིན་བླངས་ཏེ་བསྙེན་པར་རྫོགས་པས་བསྐྱལ་ལ། བསྙེན་པར་མརྫོགས་པ་ན་སླར་ལན་བསྐྱལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། གང་ཟག་དེ་ཉིད་ཆད་པས་བཅད་པ་ལགས་ལ། དེ་ཉིད་ཀྱིས་ཆད་པ་ཡང་བགྱིད་ཤིང་། དེ་ཉིད་ཡིད་མགུ་བར་སྤྱོད་པ་ཡང་ལགས་ལ། དེ་ཉིད་ཀྱིས་མགུ་བར་བགྱིད་པ་སྤྱད་ལགས་པར་འགྱུར་བ་མཆིས་སམ། ཡོད་དེ། དེ་ནི། འདི་ལྟར་མགུ་བར་སྤྱད་པ་སྤྱད་ཟིན་པའི་གང་ཟག་དེ་ལ་དགེ་འདུན་གྱི་ལྷག་མའི་ཉེས་པ་ཞིག་བྱུང་ནས་མ་བཅབས་པར་དགེ་འདུན་གྱི་དྲུང་དུ་སོང་ནས་ཡིད་དམ་མགུ་བར་བྱ་བ་གསོལ་
བ་དང་། དེས་དགེ་འདུན་གྱི་ཡིད་མགུ་བར་བྱ་བ་བྱིན་ཏེ། དེས་ཡང་མགུར་བར་བྱ་བ་སྤྱང་ཟིན་པ་དང་། དགེ་འདུན་གྱི་ལྷག་མའི་ཉེས་པ་གཉིས་བྱུང་སྟེ། ཉེས་པ་གཅིག་ནི། ཞག་གཅིག་བཅབས། ཉེས་པ་གཅིག་ནི། ཞག་གཉིས་བཅབས་ནས་དེས་དགེ་འདུན་ལ་ཆད་པ་གསོལ་པ་དང་། དེས་དགེ་འདུན་གྱིས་ཀྱང་ཆད་པ་བྱིན་ཏེ། དེས་ཞག་གཅིག་ཆད་པ་བྱས་པས་ཉེས་པ་གཅིག་གི་ཆད་པ་ནི། བྲི། གཉིས་པའི་ཆད་པ་ནི། བྱེད། གསུམ་པ་ནི། ཡིད་མགུ་བར་སྤྱོད་པ། བཞི་པ་ནི། ཡིད་མགུ་བར་སྤྱད་ཟིན་པའོ། །བཙུན་པ། མིའི་བུད་མེད་དང་། མིའི་སྐྱེས་པ་དེ་གཉིས་ཀྱི་སྨྱན་བགྱིད་ན། ཅིར་འགྱུར། དགེ་འདུན་གྱི་ལྷག་མའོ། །མིའི་བུད་མེད་དང་། མི་མ་ལགས་པའི་སྐྱེས་པ་དེ་གཉིས་ཀྱི་སྨྱན་བགྱིས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པའི་བུད་མེད་དང་མིའི་སྐྱེས་པ་དེ་གཉིས་ཀྱི་སྨྱན་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པའི་བུད་མེད་དང་། མི་མ་ལགས་པའི་སྐྱེས་པ་དེ་གཉིས་ཀྱི་སྨྱན་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། མི་ལ་མིར་འདུ་ཤེས་ཏེ་སྨྱན་བགྱིས་ན། ཅིར་འགྱུར། དགེ་འདུན་གྱི་ལྷག་མའོ། །མི་ལ་མི་མ་ལགས་པར་འདུ་ཤེས་ཏེ་སྨྱན་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་ཏེ་སྨྱན་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་གཅིག་ནས་གཅིག་ཏུ་བརྒྱུད་དེ་སྨྱན་བགྱིད་ན། ཅིར་འགྱུར། དགེ་འདུན་གྱི་ལྷག་མའོ། །མདོར་ན། གཞོན་ནུ་མ་དང་བུད་མེད་མངལ། །ཟ་མ་མ་ནིང་མ་ནིང་མོ། །དགེ་འདུན་ཐམས་ཅད་བརྟུལ་ཞུགས་གནས། །མཚན་གཉིས་དང་ནི་འདྲ་བའོ། །བཙུན་པ། གཞོན་ནུའི་སྨྱན་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། ཁྱིམ་བདག་གི་བུ་མ་མཆིས་པར་སྨྱན་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་མངལ་ན་གནས་པའི་སྨྱན་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ་ཟ་མའི་སྨྱན་བགྱིད་ན་ཅིར་འགྱུར། ཉེས་པ་སྦོམ་
པོར་འགྱུར་རོ། །མ་ནིང་དང་མ་ནིང་མོའི་སྨྱན་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་འདུན་ཐམས་ཅད་ཚོགས་པ་དང་། ཁྱིམ་བདག་ཅིག་མཆིས་ནས་འདི་སྐད་དུ། འཕགས་པ་རྣམས་བདག་གི་ཚིག་གིས་ཁྱིམ་བདག་འདི་ཞེས་བགྱི་བ་ལ་སྲིང་མོའམ། ཚ་མོའམ། ཡང་ཚ་མོ་བྱིན་ཅིག་།ཅེས་གསུང་སྤྱོད་དམ་ཞེས་སྨྲས་པ་དང་། གལ་ཏེ་དགེ་འདུན་ཐམས་ཅད་ཀྱིས་འཕྲིན་བླངས་ཏེ་ལན་སླར་བསྐྱལ་ན། དགེ་འདུན་ཐམས་ཅད་ལ་ཅིར་འགྱུར། དགེ་འདུན་གྱི་ལྷག་མའོ། །དེ་སྟེ་དགེ་འདུན་ཐམས་ཅད་བགྲོས་ནས་དགེ་སློང་གཅིག་གིས་བསྐྱལ་ཏེ་ལན་སླར་བསྐྱལ་ན། དགེ་འདུན་ཐམས་ཅད་ལ་ཅིར་འགྱུར། དགེ་འདུན་གྱི་ལྷག་མའོ། །འོན་ཏེ་དགེ་སློང་གཅིག་གིས་རང་གི་བློན་བསྐྱལ་ཏེ་ལན་བྱིན་ན་ཡང་དགེ་འདུན་གྱི་ལྷག་མར་འགྱུར་རོ། །དགེ་སློང་མ་དང་། བརྟུལ་ཞུགས་ལ་གནས་པ་ཚངས་པར་སྤྱོད་པ་གཞན་སྨྱན་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འཕྲིན་བླངས་པ་དང་། དེ་བླངས་མ་ཐག་ཏུ་མཚན་འཕོས་ཏེ་དགེ་སློང་མར་གྱུར་ནས་བསྐྱལ་ཏེ་ལན་སླར་བསྐྱལ་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། དགེ་སློང་མས་འཕྲིན་བླངས་ནས་བསྐྱལ་ཏེ་ལན་སླར་བསྐྱལ་བ་དང་། དེའི་མཚན་འཕོས་ཏེ་དགེ་སློང་ཕར་གྱུར་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། དགེ་སློང་གིས་འཕྲིན་བླངས་ནས་བསྐྱལ་བ་དང་། དེའི་མཚན་འཕོས་བཞིན་དུ་ལན་སླར་བསྐྱལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འཕྲིན་བླངས་པ་དང་། སྐྱེས་པ་དེའི་མཚན་འཕོས་ནས་མཚན་འཕོས་བཞིན་དུ་བསྐྱལ་ཏེ་ལན་སླར་བསྐྱལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འཕྲིན་བླངས་པ་དང་། བུད་མེད་ལ་ནི། སྐྱེས་པའི་མཚན་སྐྱེས། སྐྱེས་པ་ལ་ནི། བུད་མེད་ཀྱི་མཚན་འཕོས་པ་ལ་འཕོས་བཞིན་དུ་བསྐྱལ་ནས་ལན་སླར་བསྐྱལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ་སྐྱེས་པས་བུད་མེད་དང་ལྷན་ཅིག་ཏུ་དུས་བརྡ་
བགྱིས་པར་གྱུར་པ་ལས། སྐྱེས་པས་དགེ་སློང་ཞིག་ལ་འདི་སྐད་དུ། འཕགས་པ། བུད་མེད་ཅིག་གཟིགས་སམ་ཞེས་སྨྲས་པ་དང་། དགེ་སློང་གིས་འཚལ་བཞིན་དུ་འདི་སྐད་དུ། རྩིག་པ་འདིའི་དྲུང་ན་འདུག་གོ །ཞེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དེ་སྟེ་དེས་འདི་སྐད་དུ། འཕགས་པ། བཞུད་ལ་བུད་མེད་དེ་ཚུར་ཤོག་།ཅེས་གསུངས་ཤིག་ཅེས་སྲ་སྤ་དང་། དགེ་སློང་དེ་སོང་སྟེ་དེ་ལ་སྨྲས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་ལྟར་དགེ་སློང་གིས་སྨྱན་བྱས་པས་དགེ་འདུན་གྱི་ལྷག་མར་འགྱུར་བ་དེ་བཞིན་དུ་བསླབ་པ་བྱིན་པ་དང་། དགེ་སློང་མ་ལ་ཡང་དགེ་འདུན་གྱི་ལྷག་མར་འགྱུར་རོ། །དགེ་སློང་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ལ་ནི། ཉེས་བྱས་སུ་འགྱུར་རོ། །མདོར་ན། མ་གནང་བ་དང་ཚད་བྱ་དང་། །བདག་དང་གཞན་དང་མ་གཡོགས་པ། །ཕྱིར་བབས་བདུན་བརྒྱུད་དེ་བཞིན་ཏེ། །མཚན་ནི་ཐ་མར་གྱུར་པའོ། །བཙུན་པ་དགེ་སློང་གིས་དངོས་པོ་མ་གནང་བར་ཁང་བ་བརྩིགས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དངོས་པོ་གསོལ་ནས་ཁང་པ་མ་བརྩིགས་ན། ཅིར་འགྱུར། ཉེས་བྱས་སོ། །ཁང་པ་བརྩིགས་པར་གནང་ནས་ཚད་ལས་འདས་པར་བགྱིས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བདག་གིས་བརྩམས་ནས་མ་ལགས་པར་བོར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། གཞན་གྱིས་མ་ལགས་པ་ལགས་པར་བགྱིས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །སྟེང་མ་གཡོགས་པ་ཞིག་བགྱིས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བརྩམས་ནས་སླར་བབས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་བདག་ཉིད་ཀྱི་འཚོ་བ་དང་ཕྲལ་བ་དང་། དགེ་ཚུལ་ཕར་ཁས་ལེན་པ་ཐམས་ཅད་ཉེས་པ་སྦོམ་པོར་འགྱུར་རོ། །དེ་བཞིན་དུ་མ་ནིང་ལ་སོགས་པ་རྒྱས་པར་ནི། ཇི་ལྟར་བསླབ་པ་ཕུལ་བ་བཞིན་ནོ། །བསྙེན་པར་མ་རྫོགས་པར་བརྩམས་ནས་བསྙེན་པར་མ་རྫོགས་པར་ལགས་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྩམས་
ནས་བསྙེན་པར་རྫོགས་ཀར་ལགས་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བརྩམས་ནས་བསྙེན་པར་རྫོགས་ཏེ་ལགས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་ཀར་བརྩམས་ནས་བསྙེན་པར་རྫོགས་ཀར་ལགས་ན། ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བརྩམས་ནས་བསྙེན་པར་རྫོགས་པ་ན་ལགས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་རྫོགས་པ་ན་བརྩམས་ནས་བསྙེན་པར་རྫོགས་པ་ན་ལགས་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་པ་ན་བརྩམས་ནས་བསྙེན་པར་མ་རྫོགས་པར་ལགས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ཁང་པ་རྩིག་པར་བརྩམས་པ་དང་། དེའི་མཚན་འཕོས་ཏེ་དགེ་སློང་མར་གྱུར་ནས་ལགས་པར་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་མས་ཁང་པ་རྩིག་པར་བརྩམས་པ་དང་། མཚན་འཕོས་ནས་དགེ་སློང་ཕར་གྱུར་ཏེ་ལགས་པར་བགྱིད་ན། ཅིར་འགྱུར། ཉེས་བྱས་སོ། །བསླབ་པ་སྩལ་པས་བགྱིད་ན། ཅིར་འགྱུར། དགེ་འདུན་གྱི་ལྷག་མའོ། །དགེ་སློང་མས་བགྱིད་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་ལ་ཉེས་བྱས་སོ། །གཙུག་ལག་ཁང་ཆེན་པོ་ཡང་དེ་བཞིན་དུ་བྱའོ། །མདོར་ན། འཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་། གཅིག་ནས་གཅིག་། སྨྱོན་པ་སེམས་འཁྲུགས་ན་པ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་ཞུགས་འགྲོ་བ་ཕྱི་རོལ་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། བཅོམ་ལྡན་འདས་ཀྱིས་ཡང་དགེ་སློང་གང་གིས་འཁོན་ཏེ་འཁོན་མ་བཏང་པས། དགེ་སློང་གཙང་མ་ཉེས་པ་མེད་པ་ལ་བྱ་བ་མེད་པར་ཕས་ཕམ་པའི་ཆོས་ཀྱིས་སྐུར་ན། དགེ་འདུན་གྱི་ལྷག་མའོ། །ཞེས་གསུངས་ན། དགེ་སློང་གིས་བྱ་བ་མ་མཆིས་པར་ཕས་ཕམ་པའི་ཆོས་ཀྱིས་སྐུར་ཀྱང་དགེ་འདུན་གྱི་ལྷག་མར་མི་འགྱུར་བ་མཆིས་སམ། ཡོད་དེ། དགེ་སློང་གིས་འཕྲིན་གྱིས་སྐུར་ན། ཉེས་པ་སྦོམ་པོར་འགྱུར་རོ། །དེ་བཞིན་དུ་སྤྲིང་ཡིག་
དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་དེ་སྐུར་ན། ཐམས་ཅད་ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་དགེ་སློང་སྨྱོན་པ་ལ་སྐུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། གཉིད་ལོག་པ་དང་། ར་རོ་བ་དང་། མྱོས་པ་དང་། སྙོམས་པར་ཞུགས་པ་དང་། འགྲོ་བ་གཞན་དུ་གནས་པ་རྣམས་ལ་སྐུར་ནའང་ཐམས་ཅད་ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་འདི་ལས་ཕྱི་རོལ་གྱི་མུ་སྟེགས་ཅན་གཞན་དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་ཏུ་རྒྱུ་བ་རྣམས་ལ་སྐུར་ན། ཅིར་འགྱུར། ཉེས་བྱས་སོ། །མདོར་ན། སྐད་དང་ལུས་དང་དབེན་པ་དང་། །སྔགས་དང་སྨན་གྱིས་གཞན་ལ་བདུན། །ཁྱིམ་པ་ལ་ནི་སོགས་པ་དང་། །མཚན་ཡང་རྣམ་པ་བཞི་རྒྱུད་འགྱུར། །བཙུན་པ། དགེ་སློང་འཕགས་པས་འཕགས་པའི་སྐད་དུ་དགེ་སློང་ལ་སྐུར་པ་དང་། དགེ་སློང་དེས་འཕགས་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །འཕགས་པས་མཐའ་འཁོབ་པའི་སྐད་དུ་སྐུར་བ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པས་ཀྱང་མཐའ་འཁོབ་པའི་སྐད་དུ་སྐུར་པ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མཐའ་འཁོབ་པས་འཕགས་པའི་སྐད་དུ་སྐུར་པ་དང་།དགེ་སློང་དེས་འཕགས་པའི་སྐད་མ་འཚལ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་དགེ་སློང་ལ་ལུས་ཀྱི་དམིགས་པས་སྐུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་དབེན་པ་ལ་དབེན་པར་འདུ་ཤེས་ཏེ་སྐུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་སྔགས་དང་སྨན་གྱིས་བདག་ཉིད་མི་སྣང་བར་བསྒྱུར་ཏེ་དགེ་སློང་ལ་སྐུར་ན་ཅིར་འགྱུར། ཉེས་པ་སྦོམ་
པོར་འགྱུར་རོ། །བཙུན་པ་དགེ་སློང་གིས་དགེ་སློང་ལ་གཞན་ཞིག་སྐུར་པ་འདེབས་སུ་བཅུག་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་དགེ་སློང་ལ་གཞན་གྱི་སླད་དུ་སྐུར་ན་ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། བསྙེན་པར་མ་རྫོགས་པར་སྐུར་པ་གདབ་པར་བཤམས་ནས་བསྙེན་པར་མ་རྫོགས་པར་གྲུབ་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ནས་བསྙེན་པར་རྫོགས་ཀར་གྲུབ་ན། ཅིར་འགྱུར། ཉེས་བྱས་སོ། །བསྙེན་པར་མ་རྫོགས་པར་བཤམས་ནས་བསྙེན་པར་རྫོགས་ཏེ་གྲུབ་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་ཀར་བཤམས་ནས་བསྙེན་པར་རྫོགས་ཀར་གྲུབ་ན། ཅིར་འགྱུར། ཉེས་བྱས་སོ། །བསྙེན་པར་རྫོགས་ཀར་བཤམས་ནས་བསྙེན་པར་རྫོགས་ཏེ་གྲུབ་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་པ་ན་བཤམས་ཏེ་བསྙེན་པར་རྫོགས་པ་ན་གྲུབ་ན། ཅིར་འགྱུར། དགེ་འདུན་གྱི་ལྷག་མའོ། །བསྙེན་པར་རྫོགས་པ་ན་བཤམས་ཏེ་བསྙེན་པར་མ་རྫོགས་པ་ན་བགྱིས་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་ཁྱིམ་པ་ལ་སྐུར་ན། ཅིར་འགྱུར། ཉེས་བྱས་སོ། །དེ་བཞིན་དུ་མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་། མ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། ཀུན་གནས་དང་། སྔར་འཁྲུགས་པ་དང་། སྔར་ཉེས་པ་བྱུང་བ་རྣམས་ལ་སྐུར་ན། ཐམས་ཅད་ཉེས་པ་སྦོམ་པོར་འགྱུར་རོ། །བཙུན་པ། དགེ་སློང་གིས་དགེ་སློང་ལ་སྐུར་ན། ཅིར་འགྱུར། དགེ་འདུན་གྱི་ལྷག་མའོ། །དེ་བཞིན་དུ་དགེ་འདུན་ཕྱེ་བ་དང་། མི་གནས་པ་དང་། རྗེས་སུ་ཕྱོགས་པ་དང་། བསླབ་པ་བྱིན་པའི་དགེ་སློང་རྣམས་ལ་སྐུར་ན། ཐམས་ཅད་དགེ་འདུན་གྱི་ལྷག་མར་འགྱུར་རོ། །བཙུན་པ། དགེ་སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་སྐུར་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ་དགེ་སློང་གིས་དགེ་
སློང་ལ་སྐུར་པ་དང་། དེའི་མཚན་འཕོས་ཏེ་དགེ་སློང་མར་གྱུར་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། དགེ་སློང་མས་དགེ་སློང་མ་ལ་སྐུར་པ་དང་། མཚན་འཕོས་ཏེ་དགེ་སློང་དུ་གྱུར་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། དགེ་སློང་གིས་བསྙེན་པར་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་སྐུར་ན། ཅིར་འགྱུར། དགེ་འདུན་གྱི་ལྷག་མའོ། །དགེ་སློང་གིས་བསྙེན་པར་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ཏེ་སྐུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་རྫོགས་པར་འདུ་ཤེས་ཏེ་སྐུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བསྙེན་པར་མ་རྫོགས་པ་ལ་བསྙེན་པར་མ་རྫོགས་པར་འདུ་ཤེས་ཏེ་སྐུར་ན། ཅིར་འགྱུར། ཉེས་བྱས་སོ། །བཙུན་པ། དགེ་སློང་གིས་མི་ལ་མིར་འདུ་ཤེས་ཏེ་སྐུར་ན། ཅིར་འགྱུར། དགེ་འདུན་གྱི་ལྷག་མའོ། །མི་ལ་མི་མ་ལགས་པར་འདུ་ཤེས་ཏེ་སྐུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མིར་འདུ་ཤེས་ཏེ་སྐུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མི་མ་ལགས་པ་ལ་མི་མ་ལགས་པར་འདུ་ཤེས་ཏེ་སྐུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །མདོར་ན། མཐའ་དང་འོན་ཏེ་མཚམས་མེད་པ། །གསད་པར་མི་བྱ་གཅིག་ལ་གཅིག་།བྲིས་དང་ཆས་སྐུར་དེ་བཞིན་ཏེ། །རྒྱས་པར་བྱེད་དང་དེ་བཞིན་ནོ། །བཙུན་པ། དགེ་སློང་ཞིག་བདག་ཉིད་འདི་སྐད་དུ། བདག་གིས་མི་ཚངས་པར་སྤྱོད་པ་འཁྲིག་པའི་ཆོས་བགྱིས་སོ། །ཞེས་མཆི་བའི་དགེ་སློང་དེ་ལ་དགེ་སློང་གིས་རྩ་བ་མ་མཆིས་པར་རྐུ་བ་དང་། གསོད་པ་དང་། རྫུན་རྣམས་ཀྱིས་སྐུར་ན། ཅིར་འགྱུར། དགེ་འདུན་གྱི་ལྷག་མར་འགྱུར་རོ། །བཙུན་པ། དགེ་སློང་ཞིག་བདག་ཉིད་འདི་སྐད་དུ། བདག་གིས་ཡོ་བྱད་ཆེན་པོ་ཞིག་བརྐུས་སོ། །ཞེས་མཆི་བའི་དགེ་སློང་དེ་ལ་དགེ་སློང་གིས་རྩ་བ་མ་མཆིས་པར་གསོད་པ་དང་། རྫུན་དང་། མི་ཚངས་པར་སྤྱོད་པ་རྣམས་ཀྱིས་སྐུར་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། དགེ་སློང་ཞིག་བདག་ཉིད་འདི་སྐད་དུ།
བདག་གིས་མི་ཞིག་འཚོ་བ་དང་ཕྲལ་ལོ། །ཞེས་མཆི་བའི་དགེ་སློང་དེ་ལ་དགེ་སློང་གིས་རྩ་བ་མ་མཆིས་པར་རྫུན་དང་། མི་ཚངས་པར་སྤྱོད་པ་དང་། རྐུ་བ་རྣམས་ཀྱིས་སྐུར་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། དགེ་སློང་ཞིག་བདག་ཉིད་འདི་སྐད་དུ་བདག་གིས་མི་ལས་བླ་མར་གྱུར་པའི་ཆོས་སྨྲས་སོ། །ཞེས་མཆི་བའི་དགེ་སློང་དེ་ལ་དགེ་སློང་གིས་རྩ་བ་མ་མཆིས་པར་མི་ཚངས་པར་སྤྱོད་པ་དང་། རྐུ་བ་དང་། གསོད་པ་རྣམས་ཀྱི་སྐུར་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། བཅོམ་ལྡན་འདས་ཀྱིས་དགེ་སློང་གིས་དགེ་སློང་ལ་རྩ་བ་མེད་པར་ཕས་ཕམ་པའི་ཆོས་ཀྱིས་སྐུར་ན། དགེ་འདུན་གྱི་ལྷག་མར་འགྱུར་རོ། །ཞེས་གསུངས་ན། བཙུན་པ། དགེ་སློང་གིས་དགེ་སློང་ལ་རྩ་བ་མ་མཆིས་པར་མཚམས་མེད་པས་སྐུར་ན། ཅིར་འགྱུར། དེ་སྟེ་ཕ་དང་། མ་དང་། དགྲ་བཅོམ་པ་བསད་པ་རྣམས་ཀྱིས་སྐུར་ན། དགེ་འདུན་གྱི་ལྷག་མར་འགྱུར་རོ། །གང་ལ་རྩ་བ་མེད་པར་དགེ་འདུན་གྱི་དབྱེན་དང་། ངན་སེམས་ཀྱིས་ཁྲག་ཕྱུང་བས་སྐུར་ན། ཉེས་བྱས་སུ་འགྱུར་རོ། །དེ་ཅིའི་ཕྱིར་ཞེ་ན། ཨུ་པ་ལི། ཕ་དང་། མ་དང་། དགྲ་བཅོམ་པ་བསད་པས་སྐུར་པ་གང་ཡིན་པ་དེ་ནི། ཕས་ཕམ་པས་སྐུར་བའོ། །དགེ་འདུན་གྱི་དབྱེན་དང་། ངན་སེམས་ཀྱིས་ཁྲག་ཕྱུང་བས་སྐུར་པ་གང་ཡིན་པ་དེ་ནི། ཉེས་པ་སྦོམ་པོས་སྐུར་བ་སྟེ། ཉེས་པ་སྦོམ་པོས་ནི། དགེ་སློང་མ་ཡིན་པར་མི་འགྱུར་གྱི། དེ་ནི། བཤགས་པར་འོས་སོ། །དགེ་སློང་གིས་དགེ་སློང་ལ་རྩ་བ་མེད་པར་ཕས་ཕམ་པའི་ཆོས་ཀྱིས་སྐུར་ན། དགེ་འདུན་གྱི་ལྷག་མར་འགྱུར་རོ། །རྩ་བ་མེད་པར་དགེ་འདུན་གྱི་ལྷག་མས་སྐུར་ན། ལྟུང་བར་འགྱུར་རོ། །རྩ་བ་མེད་པར་ལྟུང་བ་དང་། སོ་སོར་མཐོལ་བ་རྣམས་དང་། ཉེས་བྱས་རྣམས་ཀྱིས་སྐུར་ན། ཉེས་བྱས་སུ་འགྱུར་རོ། །དེ་བཞིན་དུ་རྩ་བ་མེད་པར་ཉེས་པ་སྦོམ་པོས་སྐུར་ན་ཡང་ཉེས་བྱས་སུ་འགྱུར་རོ། །བཙུན་པ། དགེ་སློང་གིས་དགེ་སློང་མ་ལ་སྐུར་ན། ཅིར་འགྱུར། དགེ་འདུན་གྱི་ལྷག་མའོ། །བཙུན་པ། བཅོམ་ལྡན་འདས་ཀྱིས་དགེ་སློང་གིས་དགེ་སློང་ལ་སྐུར་ན། དགེ་འདུན་གྱི་ལྷག་མར་འགྱུར་རོ། །ཞེས་གསུངས་ན། དགེ་སློང་གིས་དགེ་སློབ་མ་དང་། དགེ་ཚུལ་ཕ་
དང་། དགེ་ཚུལ་མ་རྣམས་ལ་སྐུར་ན། ཅིར་འགྱུར། ཉེས་པ་སྦོམ་པོར་འགྱུར་རོ། །དགེ་སློང་མས་དགེ་སློང་མ་ལ་སྐུར་ན། ཅིར་འགྱུར། དགེ་འདུན་གྱི་ལྷག་མའོ། །དགེ་སློང་མས་དགེ་སློང་ལ་སྐུར་ན། ཅིར་འགྱུར། དགེ་འདུན་གྱི་ལྷག་མའོ། །དགེ་ཚུལ་ཕས་དགེ་སློབ་མ་དང་། དགེ་ཚུལ་མ་ལ་སྐུར་ན། ཉེས་བྱས་སུ་འགྱུར་རོ། །དགེ་སློང་མས་དགེ་སློང་མ་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ལ་སྐུར་ན། ཉེས་བྱས་སུ་འགྱུར་རོ། །དགེ་ཚུལ་གྱིས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་མ་རྣམས་ལ་སྐུར་ན། ཉེས་བྱས་སུ་འགྱུར་རོ། །དགེ་ཚུལ་མས་དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་རྣམས་ལ་སྐུར་ན། ཉེས་བྱས་སུ་འགྱུར་རོ། །བཙུན་པ། དགེ་སློང་གིས་བདག་ཉིད་ཀྱིས་བྲིས་ལ་འདི་སྐད་དུ། ཡི་གེ་འདི་ནི། འདི་སྐད་ཟེར་ཏེ། ཁྱོད་ནི། མི་ཚངས་པར་སྤྱོད་པའི་ཕས་ཕམ་ཕ་བྱུང་ངོ་། །ཞེས་མཆི་ན། ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་ལྟར་རྩ་བ་མེད་པ་དེ་བཞིན་དུ་ཆས་སྐུར་པའང་དེ་བཞིན་དུ་རྒྱས་པར་བརྗོད་པར་བྱའོ། །མདོར་ན། བསྡུས་པའི་གསོལ་པ་བཏང་སྙོམས་དང་།། གླེན་པ་དྲན་པར་བྱ་བ་དང་། བཞི་པ་འདུག་དང་རྟག་པ་དང་། །དད་དང་གཅིག་བུ་ནམ་མཁའ་དང་། །ཁྱེར་བ་རྒྱས་པར་དེ་བཞིན་བྱ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། དགེ་སློང་སྡུམ་པར་མ་བསྒོས་པར་གསོལ་བ་དང་བཞིའི་ལས་ཀྱིས་བསྒོ་ན། བསྒོ་བ་ཞེས་བགྱིའམ། མ་བསྒོ་བ་ཞེས་བགྱི། བསྒོ་
བ་ཆགས་སམ། མི་འཆགས། ཨུ་པ་ལི། མི་འཆགས་ཏེ། དགེ་འདུན་ལ་ཡང་འདས་པ་དང་བཅས་པར་འགྱུར་རོ། །བཙུན་པ། སྡུམ་པར་བསྒོ་བས་གསོལ་བ་དང་བཞིའི་ལས་ཀྱིས་བསྒོ་ན། བསྒོ་བ་ཞེས་བགྱི་འམ། མ་བསྒོ་བ་ཞེས་བགྱི། བསྒོ་བ་འཆགས་སམ།མི་འཆགས། ཨུ་པ་ལི། འཆགས་ཏེ། དགེ་འདུན་ལ་ཡང་འདས་པ་དང་བཅས་པར་མི་འགྱུར་རོ། །བཙུན་པ། བསྐྲད་པའི་ལས་མ་བགྱིས་པར་སྡུམ་པར་བསྒོ་ན། བསྒོ་བ་ཞེས་བགྱིཨཱམ། མ་བསྒོ་བ་ཞེས་བགྱི། བསྒོ་བ་འཆགས་སམ། མ་འཆགས། ཨུ་པ་ལི། མི་འཆགས་ཏེ། དགེ་འདུན་ལའང་འདས་པ་དང་བཅས་པར་འགྱུར་རོ། །བཙུན་པ། བསྐྲད་པའི་ལས་བགྱིས་ལ་སྡུམ་པར་བསྒོ་ན། བསྒོ་བ་ཞེས་བགྱིའམ། མ་བསྒོ་བ་ཞེས་བགྱི། བསྒོ་བ་འཆགས་སམ། མི་འཆགས། ཨུ་པ་ལི། འཆགས་ཏེ། དགེ་འདུན་ལ་ཡང་འདས་པ་དང་བཅས་པར་མི་འགྱུར་རོ། །བཙུན་པ། བསྐྲད་པའི་ལས་མ་བགྱིས་པར་གསོལ་པ་དང་བཞིའི་ལས་ཀྱིས་བསྒོ་ན། བསྒོ་བ་ཞེས་བགྱི་འམ། མ་བསྒོ་བ་ཞེས་བགྱི། བསྒོ་བ་འཆགས་སམ། མི་འཆགས། ཨུ་པ་ལི། མི་འཆགས་ཏེ། དགེ་འདུན་ལ་ཡང་འདས་པ་དང་བཅས་པར་འགྱུར་རོ། །བཙུན་པ། བསྐྲད་པའི་ལས་བགྱིས་ནས་གསོལ་བ་དང་བཞིའི་ལས་ཀྱིས་བསྒོ་ན། བསྒོ་བ་ཞེས་བགྱིའམ། མ་བསྒོ་བ་ཞེས་བགྱི། བསྒོ་བ་འཆགས་སམ། མི་འཆགས། ཨུ་པ་ལི། མི་འཆགས་ཏེ། དགེ་འདུན་ལའང་འདས་པ་དང་བཅས་པར་འགྱུར་རོ། །བཙུན་པ། བསྐྲད་པའི་ལས་བགྱིས་ནས་གསོལ་བ་དང་བཞིའི་ལས་ཀྱིས་བསྒོ་ན། བསྒོ་བ་ཞེས་བགྱི་འམ། མ་བསྒོ་བ་ཞེས་བགྱི། བསྒོ་བ་འཆགས་སམ། མི་འཆགས། ཨུ་པ་ལི། འཆགས་ཏེ། དགེ་འདུན་ལའང་འདས་པ་དང་བཅས་པར་མི་འགྱུར་རོ། །བཙུན་པ། མ་གླེང་ཞིང་དྲན་པར་མ་བགྱིས་པར་བདག་ཉིད་ཚིག་བཀའ་བློ་མི་བདེ་བ་ལ་གནས་ན། བསྒོ་བར་བགྱིའམ། ཨུ་པ་ལི། མ་ཡིན་ནོ། །བསྒོ་བ་འཆགས་སམ། ཨུ་པ་ལི། མི་འཆགས་སོ། །བཙུན་པ། གླེང་ཞིང་དྲན་པར་བགྱིས་ལ་བདག་ཉིད་ཚིག་བཀའ་བློ་མི་བདེ་བ་ལ་གནས་ན། ཅིར་འགྱུར། ཉེས་བྱས་སོ། །བསྒོ་བ་ཞེས་བགྱིའམ། ཨུ་པ་ལི། བསྒོ་བ་ཞེས་བྱའོ། །བསྒོ་བ་འཆགས་སམ། ཨུ་པ་ལི། འཆགས་སོ། །བཙུན་པ། མཚམས་ཀྱི་ནང་ན་མཆིས་པས་མཚམས་ཀྱི་སླད་རོལ་ན་མཆིས་པ་རྣམས་ལ་བསྒོ་ན། བསྒོ་བ་ཞེས་བགྱིའམ། ཨུ་པ་ལི། མ་ཡིན་ནོ། །མཚམས་ཀྱི་སླད་རོལ་ན་མཆིས་པས་མཚམས་ཀྱི་ནང་ན་མཆིས་པ་རྣམས་ལ་བསྒོ་ན། བསྒོ་བ་ཞེས་བགྱིའམ། ཨུ་པ་ལི། མ་ཡིན་ནོ། །བཙུན་པ། ལས་བགྱིད་པ་མཚམས་ཀྱི་ནང་ན་མཆིས་པས་མཚམས་ཀྱི་
སླད་རོལ་ན་མཆིས་པ་རྣམས་ལ་བསྒོ་ན། བསྒོ་བ་ཞེས་བགྱིའམ། ཨུ་པ་ལི། མ་ཡིན་ནོ། །བཙུན་པ། ལས་བགྱིད་པ་མཚམས་ཀྱི་སླད་རོལ་ན་མཆིས་པས་མཚམས་ཀྱི་ནང་ན་མཆིས་པ་རྣམས་ལ་བསྒོ་ན། བསྒོ་བ་ཞེས་བགྱིའམ། ཨུ་པ་ལི། མ་ཡིན་ནོ། །བཙུན་པ། ལས་བགྱིད་པས་མཚམས་མནན། མཚམས་བཟུང་། མཚམས་སུ་འགྲེང་ངམ་འདུག་སྟེ་བསྒོ་ན། བསྒོ་བ་ཞེས་བགྱིའམ། བསྒོ་བ་འཆགས་སམ། ཨུ་པ་ལི། བསྒོ་བ་ཞེས་བྱ་སྟེ། བསྒོ་བ་འཆགས་སོ། །བཙུན་པ། དགེ་སློང་ལས་བགྱིད་པ་མ་བསྐོས་པས་མཚམས་ཀྱི་ནང་ནས་གང་ཟག་བཞི་ཞིག་སྤངས་ན། སྤངས་ཞེས་བགྱིའམ། ཨུ་པ་ལི། མ་ཡིན་ནོ། །བཙུན་པ། དགེ་སློང་ལས་བགྱིད་པར་བསྒོ་བས་མཚམས་ཀྱི་ནང་ནས་གང་ཟག་བཞི་ཞིག་སྤངས་ན། སྤངས་པ་ཞེས་བགྱིའམ། འོན་ཏེ་རེ་རེ་ནས་སམ། གཉིས་གཉིས་ནས་སམ། གསུམ་གསུམ་ནས་སྤངས་ན། སྤངས་པ་ཞེས་བྱའོ། །བཙུན་པ། མཚམས་གཅིག་པའི་ཕྱོགས་བཞིན་མཚུངས་པར་གནས་པའི་དགེ་སློང་དག་གིས་དགེ་སློང་བཞི་ལ་བསྒོ་ན། བསྒོ་བ་ཞེས་ཀྱང་བགྱི་ལ། ནོངས་པ་ཅུང་ཟད་དུ་ཡང་མི་འགྱུར་ཞིང་། དེས་དགེ་འདུན་མི་མཐུན་པར་ཡང་མི་འགྱུར་བ་མཆིས་སམ། ཨུ་པ་ལི། ཡོད་དེ། གཅིག་ལ་གཅིག་དད་པ་བྱིན་ལ། དེ་སྟེ་རེ་རེའམ། གཉིས་གཉིས་སམ། གསུམ་གསུམ་ལ་བསྒོ་སྟེ། བཞིར་མཚང་ནའོ། །དེ་ཅིའི་ཕྱིར་ཞེ་ན། མང་པོས་མང་པོ་ལ་ལས་བྱར་མི་རུང་ངོ་། །བཙུན་པ། ལས་བགྱིད་པ་ཕྱོགས་གཅིག་ཏུ་མཆིས་པ་གནས་བཞིའི་ལས་ཐམས་ཅད་བགྱི་བ་རུང་ངམ། ཨུ་པ་ལི། རུང་སྟེ། ཇི་ལྟར་དེ་ཡང་དགེ་སློང་ལས་བྱེད་པ་དེས་གནས་བཞི་ཆར་གྱི་མཚམས་ཀྱི་མདོར་ཁྲིའམ། ཁྲིའུའམ། སྨྱུག་མའམ། རེ་ལྡེ་ལ་མནན་ཏེ་འདུག་པར་གྱུར་ལ། གནས་དེ་དག་ཏུ་འདི་ལྟ་སྟེ། བཞི་སྡེས་བྱ་བའི་ལས་སམ། ལྔ་སྡེས་བྱ་བའི་ལས་སམ། བཅུ་སྡེས་བྱ་བའི་ལས་སམ། ཉི་ཤུ་སྡེས་བྱ་བའི་ལས་ཀྱང་རུང་སྟེ། ལས་འདི་ལྟ་བུ་དག་ཉེ་བར་བྱུང་བར་གྱུར་པ་སྟེ། དེ་ཅིའི་ཕྱིར་ཞེ་ན། དེ་ནི། དེ་
དག་གི་ལས་བྱེད་པའོ། །དེ་ནི། དེ་དག་གི་གྲངས་སུ་སྐོང་པའོ། །ས་ལ་མཆིས་པས་ནམ་མཁའ་ལ་མཆིས་པ་རྣམས་ལ་བསྒོ་ན། བསྒོ་བ་ཞེས་བགྱིའམ། ཨུ་པ་ལི། མ་ཡིན་ནོ། །བཙུན་པ། ལས་བགྱིད་པ་ནམ་མཁའ་ལ་མཆིས་ལས་ལ་མཆིས་པ་རྣམས་ལ་བསྒོ་ན། བསྒོ་བ་ཞེས་བགྱིའམ། ཨུ་པ་ལི། མ་ཡིན་ནོ། །དགེ་འདུན་གྱི་ལྷག་མའོ། །བཞི་པོ་ལུས་པ་ལ་ཡང་དེ་བཞིན་དུ་བརྗོད་པར་བྱའོ། །དགེ་སློང་ལ་ཇི་ལྟ་བ་བཞིན་བསླབ་པ་བྱིན་པ་དང་། དགེ་སློང་མ་རྣམས་ལ་ཡང་དགེ་འདུན་གྱི་ལྷག་མར་འགྱུར་རོ། །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་རྣམས་ལ་ཉེས་བྱས་སོ། །ཨུ་པ་ལིས་ཞུས་པའི་ནང་ནས་དགེ་འདུན་གྱི་ལྷག་མ་རྫོགས་སོ།། །།