བསྙེན་པར་རྫོགས་པའི་དངོས་པོ་བཤད་པ།
མདོར་ན། དབྱིབས་དང་ཁ་དོག་བར་ཆད་དང་། །མཁན་པོ་གཉིས་དང་སུན་ཕྱུང་དང་། །གནས་དང་གང་ཟག་གླིང་རྣམས་དང་། །ས་དང་མཚམས་དང་བསྙེན་པར་རྫོགས། །ལྔ་པ་དང་ནི་ལས་གསུམ་དང་། །ཁྱིམ་པ་མཐའ་འཁོབ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། བཅོམ་ལྡན་འདས་ཀྱིས་སྐྱེས་པ་བུད་མེད་འདྲ་བ་རབ་ཏུ་འབྱུང་ཞིང་བསྙེན་པར་རྫོགས་པར་མ་བྱེད་ཅིག་།ཅེས་གསུངས་ན། བཙུན་པ། སྐྱེས་པ་མདོག་བུད་མེད་འདྲ་བ། མཚན་མ་བུད་མེད་འདྲ་བ། སྐད་བུད་མེད་འདྲ་བ། དབྱིབས་བུད་མེད་འདྲ་བ་ཞིག་དགེ་སློང་གི་དངོས་པོར་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། བུད་མེད་གཅིག་མདོག་སྐྱེས་པ་དང་འདྲ་བ། །མཚན་མ་སྐྱེས་པ་དང་འདྲ་བ། སྐད་སྐྱེས་པ་དང་འདྲ་བ། དབྱིབས་སྐྱེས་པ་དང་འདྲ་བ་ཞིག་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། བར་ཆད་ཀྱི་ཆོས་དང་ལྡན་པ་ཞིག་བདག་བར་ཆད་ཀྱི་ཆོས་དང་ལྡན་ནོ། །ཞེས་སྨྲ་བའི་གང་ཟག་དེ། དགེ་སློང་རྣམས་ཀྱིས་དགེ་སློང་གི་དངོས་པོར་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ།བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བར་ཆད་ཀྱི་ཆོས་རྣམས་དང་ལྡན་པ་ཞིག་།བདག་ནི། བར་ཆད་ཀྱི་ཆོས་དང་མི་ལྡན་ནོ། །ཞེས་སྨྲ་བའི་གང་ཟག་དེ། དགེ་སློང་རྣམས་ཀྱིས་
དགེ་སློང་གི་དངོས་པོར་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བར་ཆད་ཀྱི་ཆོས་རྣམས་མི་ལྡན་པ་ལ་བདག་ནི། ལྡན་ནོ། །ཞེས་སྨྲ་བའི་གང་ཟག་དེ། དགེ་སློང་དག་གིས་དགེ་སློང་གི་དངོས་པོར་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བར་ཆད་ཀྱི་ཆོས་རྣམས་དང་མི་ལྡན་པ་ཞིག་།བདག་ནི། མི་ལྡན་ནོ། །ཞེས་སྨྲ་བའི་གང་ཟག་དེ། དགེ་སློང་རྣམས་ཀྱིས་དགེ་སློང་གི་དངོས་པོར་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པར་མི་འགྱུར་རོ། །བཙུན་པ། བསྙེན་པར་རྫོགས་པར་བགྱིད་པས་བར་ཆད་ཀྱི་ཆོས་རྣམས་མ་དྲིས་པར་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པར་འགྱུར་རོ། །བཙུན་པ། ལོ་ཉི་ཤུ་མ་ལགས་པ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། ཤེས་པར་ནུས་པ་མ་གཏོགས་པར་ལྷག་མ་རྣམས་ནི། བསྙེན་པར་རྫོགས་པ་ཞེས་བྱའོ། །བཙུན་པ། ལྷུང་བཟེད་མ་མཆིས། ཆོས་གོས་མ་མཆིས་པར་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། ཕ་དང་མས་མ་གནང་བ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། ཕ་དང་མས་མ་གནང་བ་བསྙེན་པར་རྫོགས་པར་བགྱིས་ཀྱང་ནོངས་པར་མི་འགྱུར་བ་མཆིས་སམ། ཨུ་པ་ལི། ཡོད་དེ། དེའི་ཕ་དང་། མ་དུས་ལས་འདས་པར་གྱུར་ཏམ། བྱོལ་
སོང་དུ་གྱུར་ཏམ། ཇོ་བོས་གནང་བར་གྱུར་པའོ། །བཙུན་པ། བུ་སྐལ་ཞིག་ན། དེ་གང་ལ་གསོལ་བར་བྱ། གང་གི་བུ་ཡིན་པར་ཁས་བླངས་པའོ། །བཙུན་པ། བྲན་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། བརྐུས་པ་དང་། རྙེད་བཙོན་དང་། རྒྱལ་པོ་ལ་གཙེས་པ་དང་། རྒྱལ་པོ་དང་འཁོན་པ་དང་། རྒྱལ་པོ་ལ་གནོད་པའི་ལས་བྱེད་པ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། ཟ་མ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ཡང་འདས་པ་དང་བཅས་པའོ། །བཙུན་པ། མ་ནིང་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། དགེ་སློང་མ་སུན་ཕྱུང་བ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། ཁ་ཅིག་ནི། བསྙེན་པར་རྫོགས་པ་ཞེས་བྱའོ། །ཁ་ཅིག་ནི། བསྙེན་པར་མ་རྫོགས་པ་སྟེ། གང་གིས་དགེ་སློང་མ་ལ་མི་ཚངས་པར་སྤྱད་པས་སུན་ཕྱུང་བར་གྱུར་པ་འདི་ནི། བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་བྱོས་ཤིག་།གང་གིས་དགེ་སློང་མ་ལུས་ལ་རེག་པ་ཙམ་གྱིས་སུན་ཕྱུང་བར་གྱུར་པ་ནི། བསྙེན་པར་རྫོགས་པ་ཞེས་བྱ་སྟེ། མ་བསྐྲད་ཅིག་།བཙུན་པ། མ་བསད་པའི་གང་ཟག་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། ཁ་ཅིག་ནི། བསྙེན་པར་རྫོགས་པ་ཞེས་བྱའོ། །ཁ་ཅིག་ནི།བསྙེན་པར་མ་རྫོགས་པ་སྟེ། གང་གིས་གཞན་དུ་འདུ་ཤེས་ནས་མ་འཚོ་བ་དང་བྲལ་བར་གྱུར་ཏམ། གཞན་དུ་སྦྱོར་བ་ཡང་རུང་སྟེ།
འདི་ནི། བསྙེན་པར་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་མ་བྱེད་ཅིག་།གང་གིས་ཤེས་བཞིན་དུ་མའི་འཚོ་བ་དང་བྲལ་བར་གྱུར་བ་འདི་ནི། བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ན་མིག་ལམ་ན་སྣང་བར་མ་བྱེད་ཅིག་།ཇི་ལྟར་མ་བསད་པ་དེ་བཞིན་དུ་ཕ་བསད་པ་དང་། དགྲ་བཅོམ་པ་བསད་པ་ལ་ཡང་བརྗོད་པར་བྱའོ། །བཙུན་པ། དགེ་འདུན་གྱིས་དབྱེན་བགྱིས་པའི་གང་ཟག་གིས་བསླབ་པ་ཕུལ་ཏེ་ཉམས་པར་བགྱིས་པ་དང་། དེས་སླར་ཡང་ལེགས་པར་གསུངས་པའི་ཆོས་འདུལ་བ་ལ་དད་དེ་རབ་ཏུ་བྱུང་ནས་བསྙེན་པར་རྫོགས་ཏེ་དགེ་སློང་གི་དངོས་པོར་འཚལ་བ་དེ། དགེ་སློང་གིས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པར་ཞེས་བགྱིའམ། ཨུ་པ་ལི། ཁ་ཅིག་ནི། བསྙེན་པར་རྫོགས་པ་ཞེས་བྱའོ། །ཁ་ཅིག་ནི། བསྙེན་པར་མ་རྫོགས་པ་སྟེ། གང་གིས་ཆོས་མ་ཡིན་པར་འདུ་ཤེས་པས་དགེ་འདུན་ཕྱེ་བར་གྱུར་པ་འདི་ནི། བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་བྱོས་ཤིག་།གང་གིས་ཆོས་སུ་འདུ་ཤེས་ཏེ་དགེ་འདུན་ཕྱེ་བར་གྱུར་པ་འདི་ནི། བསྙེན་པར་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལ་མན་མི་སྣང་བར་མ་བྱ་ཞིག་།བཙུན་པ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། ཁ་ཅིག་ནི། བསྙེན་པར་རྫོགས་པ་ཞེས་བྱའོ། །ཁ་ཅིག་ནི། བསྙེན་པར་མ་རྫོགས་པ་ཞེས་བྱ་སྟེ། གང་གིས་དེ་བཞིན་གཤེགས་པ་ལ་ཤེས་བཞིན་དུ་ངན་སེམས་ཀྱིས་ཁྲག་ཕྱུང་བར་གྱུར་པ་འདི་ནི། བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ནའང་མིག་ལམ་ན་ཡང་མི་སྣང་བར་བྱོས་ཤིག་།གང་གིས་དེ་བཞིན་གཤེགས་པ་ལ་ཤེས་བཞིན་མ་ཡིན་པར་ངན་སེམས་མེད་པས་ཁྲག་ཕྱུང་བར་གྱུར་པ་འདི་ནི། བསྙེན་པར་རྫོགས་པ་ཞེས་བྱ་སྟེ། ཉེ་བར་གནས་ནའང་མིག་ལམ་ན་མི་སྣང་བར་མ་བྱེད་ཅིག་།བཙུན་པ། མུ་སྟེགས་ཅན་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཁ་ཅིག་ནི། བསྙེན་
པར་རྫོགས་པ་ཞེས་བྱའོ། །ཁ་ཅིག་ནི། བསྙེན་པར་མ་རྫོགས་པ་སྟེ། གང་དེས་ལྟ་བ་མ་སྤངས་པ་འདི་ནི། བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ནའང་མི་ལམ་ན་མི་སྣང་བར་བྱོས་ཤིག་།དེ་སྟེ་དེས་ལྟ་བ་སྤངས་ན། བསྙེན་པར་རྫོགས་པ་ཞེས་བྱ་སྟེ། ཉེ་བར་གནས་ན་མིག་ལམ་ན་མི་སྣང་བར་མ་བྱ་ཞིག། བཙུན་པ། མུ་སྟེགས་ཅན་དུ་སོང་བའི་གང་ཟག་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཁ་ཅིག་ནི། བསྙེན་པར་རྫོགས་པ་ཞེས་བྱའོ། །ཁ་ཅིག་ནི། བསྙེན་པར་མ་རྫོགས་པ་ཞེས་བྱ་སྟེ། གང་གིས་བསླབ་པ་མ་ཕུལ་བར་མུ་སྟེགས་ཅན་གྱི་རྒྱལ་མཚན་བཟུང་བར་གྱུར་ལ། དེའི་ལྟ་བ་ལ་ཡང་དགའ་བ་དེ་ནི། བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ནའང་མིག་ལམ་ན་ཡང་མི་སྣང་བར་བྱོས་ཤིག་།གང་གིས་བསླབ་པ་ཕུལ་ལ་མུ་སྟེགས་ཀྱི་རྒྱལ་མཚན་བཟུང་བར་གྱུར་ནས་ཀྱང་དེའི་ལྟ་བ་ལ་མི་དགའ་བར་གྱུར་པ་དེ་ནི། བསྙེན་པར་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་མ་བྱ་ཞིག་།བཙུན་པ། རྐུ་ཐབས་སུ་གནས་པ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཁ་ཅིག་ནི། བསྙེན་པར་མ་རྫོགས་པའོ། །ཁ་ཅིག་ནི། བསྙེན་པར་རྫོགས་པ་ཞེས་བྱ་སྟེ། གང་གིས་རྐུ་སེམས་ཀྱིས་རང་གི་མཚན་མ་བླངས་ཏེ་ལན་གཉིས་ལན་གསུམ་དུ་གསོ་སྦྱོང་གི་ལས་མྱོང་བར་འགྱུར་བ་འདི་ནི། བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་བྱོས་ཤིག་།གང་གིས་རྐུ་སེམས་ཀྱིས་རབ་ཏུ་མ་བྱུང་ལ། གསོ་སྦྱོང་གི་ལས་ལན་གཅིག་མྱོང་ངམ། མ་མྱོང་བར་གྱུར་པ་འདི་ནི། བསྙེན་པར་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་མ་བྱ་ཞིག་།བཙུན་པ། སོ་སོར་གནས་པའི་གང་ཟག་བསླབ་པ་ཕུལ་ནས་ཁྱིམ་པའི་དངོས་པོར་མཆིས་པ་ལས་དེ་སླར་ལེགས་པར་གསུངས་པའི་ཆོས་འདུལ་བ་ལ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་མི་བྱ་སྟེ། བསྙེན་པར་རྫོགས་པར་བྱེད་པ་ནི་འདས་
པ་དང་བཅས་པའོ། །བཙུན་པ། སྔར་ནོངས་པ་བྱུང་བ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པའང་འདས་པ་དང་བཅས་པའོ། །བཙུན་པ། ཇི་ཙམ་གྱིས་ན་སྔར་ནོངས་པ་བྱུང་བ་ཞེས་བགྱི། ཨུ་པ་ལི། གང་གིས་སྔར་རབ་ཏུ་བྱུང་ལ་བསླབ་པ་མ་ཕུལ་བར་ཕས་ཕམ་པ་བཞི་ལས་གང་ཡང་རུང་བའི་ཕས་ཕམ་པ་བྱུང་བར་གྱུར་པ་དང་། དེས་བསླབ་པ་ཕུལ་ནས་ཁྱིམ་པའི་དངོས་པོར་སོང་བ་ལས། དེས་སླར་ཡང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བསྙེན་པར་རྫོགས་ནས་དགེ་སློང་གིས་དངོས་པོར་འདོད་པ་འདི་ནི། སྔོན་ཉེས་པ་བྱུང་བའི་གང་ཟག་ཅེས་བྱའོ། །བཙུན་པ། བཅོམ་ལྡན་འདས་ཀྱིས་སྔོན་ནོངས་པ་བྱུང་བའི་གང་ཟག་བསྙེན་པར་རྫོགས་པར་མ་བྱ་ཞིག་།ཅེས་གསུངས་ན། བཙུན་པ། སྔོན་ནོངས་པ་བྱུང་བའི་གང་ཟག་བསྙེན་པར་རྫོགས་པར་བགྱིས་ན། བསྙེན་པར་རྫོགས་པར་འགྱུར་བ་མཆིས་སམ། ཨུ་པ་ལི། ཡོད་དེ། འདི་ལྟར་ཡང་དེས་དགེ་སློང་མའི་ཐུན་མོང་མ་ཡིན་པའི་ཕས་ཕམ་པར་གྱུར་པ་དང་། དེས་བསླབ་པ་ཕུལ་ཏེ་ཁྱིམ་པའི་དངོས་པོར་སོང་བ་ན། དེར་མཚན་འཕོས་ཏེ་སྐྱེས་པར་གྱུར་ནས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་གི་དངོས་པོར་འདོད་པ་དང་། དགེ་སློང་གིས་བསྙེན་པར་རྫོགས་པར་བྱས་ན། འདི་ནི། བསྙེན་པར་རྫོགས་པ་ཞེས་བྱའོ། །བཙུན་པ། བཅོམ་ལྡན་འདས་ཀྱིས་དགེ་སློང་མ་ལན་གཅིག་སླར་བབས་པ་རབ་ཏུ་དབྱུང་ཞིང་བསྙེན་པར་རྫོགས་པར་མ་བྱ་ཞིག་།ཅེས་གསུངས་ན། དེ་སྟེ་བཙུན་པ། བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ཡང་འདས་པ་དང་བཅས་པའོ། །བཙུན་པ། སྔར་འཁྲུགས་པའི་གང་ཟག་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཁ་ཅིག་ནི་བསྙེན་པར་རྫོགས་པ་ཞེས་བྱ། ཁ་ཅིག་ནི། བསྙེན་པར་མ་རྫོགས་པ་ཞེས་
བྱ་སྟེ། གང་གིས་ལོ་ཉི་ཤུ་མ་ལོན་པར་ཤེས་པ་དང་། དེས་ཆོས་དང་འདུལ་བ་འདི་ཡིན་ཞེས་ཁས་བླངས་པའི་གང་ཟག་དེ། དགེ་སློང་དག་གིས་བསྙེན་པར་རྫོགས་པར་བྱས་ན། འདི་ནི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་དེ་ནི། འདས་པ་དང་བཅས་པར་མི་འགྱུར་རོ། །བཙུན་པ། ཉེ་བར་ཕྱོགས་པས་བསླབ་པ་ཕུལ་ཏེ་ཁྱིམ་པའི་དངོས་པོར་མཆིས་ནས་ལེགས་པར་གསུངས་པའི་ཆོས་འདུལ་བ་ལ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། བསླབ་པ་སྩལ་པས་བསླབ་པ་ཕུལ་ཏེ་ཁྱིམ་པའི་དངོས་པོར་མཆིས་པ་ལས་དེ་སླར་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་གི་དངོས་པོར་འཚལ་བ་དང་། དགེ་སློང་གིས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། བུ་ལོན་ཆགས་པ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། ནད་པ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། མཁན་པོ་མ་མཆིས་པར་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པར་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། བསྙེན་པར་རྫོགས་ཀར་མཁན་པོ་སྤོང་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། ཁ་ཅིག་ནི། བསྙེན་པར་རྫོགས་པ་ཞེས་བྱའོ། །ཁ་ཅིག་ནི། བསྙེན་པར་མ་རྫོགས་པ་ཞེས་བྱ་སྟེ། གང་གིས་དགེ་སློང་ཉིད་ལ་མི་རིགས་
པའོ། །ངོ་ཚ་མེད་པའོ། །འཛེམ་པ་མེད་པའོ། །ཞེས་སྨོད་ཅིང་། མཁན་པོ་སྦོང་བ་འདི་ནི། བསྙེན་པར་མ་རྫོགས་པ་ཞེས་བྱའོ། །གང་གིས་མཁན་པོ་ལ་མི་རིགས་པའོ། །ངོ་ཚ་མེད་པའོ། །ཞེས་སྨོད་ཀྱི་དགེ་སྦྱོང་ཉིད་ལ་མ་ཡིན་པར་མཁན་པོ་སྦོང་བ་འདི་ནི། བསྙེན་པར་རྫོགས་པ་ཞེས་བྱའོ། །བཙུན་པ། བཅོམ་ལྡན་འདས་ཀྱིས་འཁོར་སུན་འབྱིན་པའི་གང་ཟག་རབ་ཏུ་དབྱུང་ཞིང་བསྙེན་པར་རྫོགས་པར་མ་བྱ་ཞིག་།ཅེས་གསུངས་ན། བཙུན་པ། དེས་དེ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། འཁོར་སུན་འབྱིན་པ་བཞི་སྟེ། སྔར་འཁྲུགས་པ་མ་གཏོགས་པའི་ལྷག་མ་རྣམས་ནི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། ལས་བགྱིད་པ་ཕྱོགས་གཅིག་ཏུ་མཆིས་ལ། གནས་བཞིར་གང་ཟག་བཞི་བསྙེན་པར་རྫོགས་པར་བགྱིད་དུ་གནང་ངམ། གནང་སྟེ། དེ་ཡང་འདི་ལྟར་ལས་བྱེད་པའི་དགེ་སློང་གནས་བཞི་ཆར་གྱི་མཚམས་སུ་ཤིང་ངམ། འཁར་བའམ། རེ་ལྡེ་རྣམས་ཀྱིས་མནན་ཏེ་རེ་རེ་ནས་སམ། གཉིས་གཉིས་ནས་སམ། གསུམ་གསུམ་ནས་བསྙེན་པར་རྫོགས་པར་བྱ་སྟེ། བཞིར་མཚང་ནའོ། །བཙུན་པ། ལས་གཅིག་གིས་གཉིས་སམ་གསུམ་བསྙེན་པར་རྫོགས་པར་གནང་ངམ། ཨུ་པ་ལི། གནང་ངོ་། །བཙུན་པ། ལས་བགྱིད་པའི་དགེ་སློང་ཕྱོགས་གཅིག་ཏུ་མཆིས་ན། གསོལ་བ་གཅིག་དང་ལས་གཅིག་གིས་གང་ཟག་བཞི་བསྙེན་པར་རྫོགས་པར་བགྱིས་ན། ལས་ཀྱང་བགྱིས་ལ། དགེ་སློང་དེ་དག་ཀྱང་འདས་པ་དང་བཅས་པར་མི་འགྱུར་བ་མཆིས་སམ། ཨུ་པ་ལི། ཡོད་དེ། འདི་ལྟར་ཡང་ལས་བྱེད་པའི་དགེ་སློང་གིས་མཚམས་མནན་ཏེ་མཚམས་སུ་གནས་སམ། མཚམས་སུ་འགྲེང་ངམ། མཚམས་སུ་འདུག་ནས་གཉིས་ནི། མཚམས་ཀྱི་ནང་དུ་བཞག་།གཉིས་ནི། མཚམས་ཀྱི་ཕྱི་རོལ་ཏུ་བཞག་སྟེ་ལས་བྱེད་པའོ། །བཙུན་པ། ནུབ་ཀྱི་བ་ལང་སྤྱོད་པའམ། ཤར་གྱི་ལུས་འཕགས་ཀྱི་གང་ཟག་བསྙེན་པར་རྫོགས་པར་བགྱིས་ན།བསྙེན་པར་རྫོགས་
པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི། འདས་པ་དང་བཅས་པའོ། །བཙུན་པ། བྱང་གི་སྒྲ་མི་སྙན་གྱི་གང་ཟག་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་མི་བྱ་སྟེ། བསྙེན་པར་རྫོགས་པར་བྱེད་པའང་འདས་པ་དང་བཅས་པའོ། །བཙུན་པ། དོགས་ལ་མཆིས་པས་གྲངས་སུ་བསྐང་སྟེ་ནམ་མཁའ་ལ་མཆིས་པ་བསྙེན་པར་རྫོགས་པར་གནང་ངམ། ཨུ་པ་ལི། མི་གནང་ངོ་། །བཙུན་པ། ནམ་མཁའ་ལ་མཆིས་པས་གྲངས་སུ་བསྐང་སྟེ་དོགས་ལ་མཆིས་པ་བསྙེན་པར་རྫོགས་པར་གནང་ངམ། ཨུ་པ་ལི། མི་གནང་ངོ་། །བཙུན་པ། ལས་བགྱིད་པ་དོགས་ལ་མཆིས་པས་ནམ་མཁའ་ལ་མཆིས་པའི་ལས་བགྱིད་པར་གནང་ངམ། ཨུ་པ་ལི། མི་གནང་ངོ་། །བཙུན་པ། ནམ་མཁའ་ལ་མཆིས་པའི་ལས་བགྱིད་པས་དོག་ས་ལ་མཆིས་པའི་ལས་བགྱིད་དུ་གནང་ངམ། ཨུ་པ་ལི། མི་གནང་ངོ་། །དེ་བཞིན་དུ་མཚམས་ཀྱི་ནང་ན་འདུག་པ་དང་། མཚམས་ཀྱི་ཕྱི་རོལ་ན་འདུག་པའང་བཞིར་བྱའོ།། །།འདུལ་བ་གཞུང་དམ་པ་བམ་པོ་བཅུ་དྲུག་པ། བཙུན་པ། བཅོམ་ལྡན་འདས་ཀྱིས་ལྗོངས་མཐའ་འཁོབ་ཏུ་འདུལ་བ་འཛིན་པ་དང་ལྔས་བསྙེན་པར་རྫོགས་པར་བྱོས་ཤིག་།ཅེས་གསུངས་ན། བཙུན་པ། བཅུར་ཡང་མཆིས་ལ་མཆིས་བཞིན་དུ་འདུལ་བ་འཛིན་པ་དང་བཞིས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །བཙུན་པ། བཅོམ་ལྡན་འདས་ཀྱིས་ལྗོངས་ཀྱི་དབུས་སུ་འདུལ་བ་འཛིན་པ་དང་གྲངས་བཅུས་ལྷག་པའང་རུང་པས་བསྙེན་པར་རྫོགས་པར་འགྱུར་རོ། །ཞེས་གསུངས་ན། བཙུན་པ། གྲངས་ཉི་ཤུའམ། ལྷག་པར་ཡང་རུང་སྟེ། མཆིས་བཞིན་པ་ལས་གྲངས་ཉི་ཤུ་ལས་ཉུང་བས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་
པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །བཙུན་པ། བཅོམ་ལྡན་འདས་ཀྱིས་རྣམ་པ་ལྔས་ན། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་འདོད་པའི་མིང་ནས་བརྗོད་ནས་ལས་མི་ཉམས་པར་བྱེད་པའི་བར་དུའོ། །ཞེས་གསུངས་ན། བཙུན་པ། ལས་བགྱིད་པས་བསྙེན་པར་རྫོགས་པར་བགྱིད་པ་ན། བསྙེན་པར་རྫོགས་པའི་མིང་ནས་མ་བརྗོད་ལ་མཁན་པོའི་མིང་ནས་བརྗོད། དགེ་འདུན་གྱི་མིང་ནས་བརྗོད། གསོལ་བའང་བགྱིས། ལས་ཀྱང་མ་ཉམས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད། དགེ་འདུན་གྱི་མིང་ནས་བརྗོད་ལ་མཁན་པོའི་མིང་ནས་མ་བརྗོད། གསོལ་བའང་བགྱིས། ལས་ཀྱང་མ་ཉམས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས། པ་དང་བཅས་པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད། མཁན་པོའི་མིང་ནས་ཀྱང་བརྗོད་ལ། དགེ་འདུན་གྱི་མིང་ནས་ནི། མ་བརྗོད་ལ། གསོལ་བ་ནི། བགྱིས། ལས་ཀྱང་མ་ཉམས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད། མཁན་པོའི་མིང་ནས་བརྗོད། དགེ་འདུན་གྱི་མིང་ནས་ཀྱང་བརྗོད། གསོལ་བ་ནི། མ་བགྱིས་ལ། ལས་ཀྱང་མ་ཉམས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད། མཁན་པོའི་མིང་ནས་བརྗོད། དགེ་འདུན་གྱི་མིང་ནས་བརྗོད། གསོལ་བའང་བགྱིས་ལ། ལས་ནི་ཉམས་ན་བསྙེན་པར་རྫོགས་པ་ཞེས་
བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བཙུན་པ། དགེ་ཚུལ་ཕ་དགེ་སློང་མའི་ལས་ཀྱིས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །བཙུན་པ། དགེ་སློང་མ་དགེ་སློང་གི་ལས་ཀྱིས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །བཙུན་པ། ལས་བགྱིད་པ་བསྙེན་པར་རྫོགས་པར་བགྱིད་པའི་ཚེ་དུས་འདས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། དེ་སྟེ་ལས་མང་དུ་བྱས་པར་གྱུར་ན་ནི། བསྙེན་པར་རྫོགས་པ་ཞེས་བྱའོ། །བཙུན་པ། བསྙེན་པར་རྫོགས་ཀར་ངག་གཅོད་ཅིང་བདག་བསྙེན་པར་རྫོགས་པར་མ་བགྱི་ཞིག་ཅེས་སླར་སྨྲ་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བཙུན་པ། བསྙེན་པར་རྫོགས་ཀར་ཁྱིམ་པ་ལགས་པར་འཚལ་ན། བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །བཙུན་པ། མཐའ་འཁོབ་པས་འཕགས་པའི་སྐད་དུ་བསྙེན་པར་རྫོགས་པར་བགྱིས་པ་དང་མཐའ་འཁོབ་པ་དེས་ཀྱང་འཕགས་པའི་སྐང་མ་འཚལ་ན། བསྙེན་པར་རྫོགས་པ་ཞེས་བགྱིའམ། དེ་སྟེ་གསུང་རབ་འདི་དང་ལྡན་ཞིང་རབ་ཏུ་ལྡན་ལ་ཁས་ལེན་པའི་སེམས་ཡོད་ན། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། མི་བྱ་བ་མངོན་པར་སྤྱད་དེ་བསྙེན་པར་རྫོགས་པར་བྱས་པས་འདས་པ་དང་བཅས་པར་འགྱུར་རོ། མདོར་ན། སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། སྙོམས་པར་ཞུགས་དང་འགྲོ་བ་མཚན། །
བཙུན་པ། སྨྱོན་པ་བསྙེན་པར་རྫོགས་པར་བགྱིས་ན། བསྙན་པར་རྫོགས་པ་ཞེས་བགྱིའམ། ཨུ་པ་ལི། དེ་སྟེ་བསྙེན་པར་རྫོགས་པའི་འདུས་ཤེས་ཡོད་ལ། ལུས་སམ་ཚིག་གི་དམིགས་པས་ཁས་བླངས་ན། བསྙེན་པར་རྫོགས་པ་ཞེས་བྱའོ། །ཇི་ལྟར་སྨྱོན་པ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ཀྱང་རྒྱས་པར་བརྗོད་པར་བྱའོ། །བཙུན་པ། གཉིད་ལོག་པ་བསྙེན་པར་རྫོགས་པར་བགྱིད་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། དེ་སྟེ་ལུས་དང་ཚིག་གིས་དམིགས་ལ་གསོལ་བ་དང་། ལས་བྱེད་པའི་ཚེ་གཉིད་ཀྱིས་ལོག་ཀྱང་བསྙེན་པར་རྫོགས་པ་ཞེས་བྱའོ། །ཇི་ལྟར་གཉིད་ཀྱིས་ལོག་པ་དེ་བཞིན་དུ་ར་རོ་བ་དང་། སྙོམས་པར་ཞུགས་པ་རྣམས་ལའང་བརྗོད་པར་བྱའོ། །བཙུན་པ། འགྲོ་བ་གཞན་དུ་གནས་པ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །བཙུན་པ། བསྙེན་པར་རྫོགས་ཀར་མཚན་འཕོས་ན། བསྙེན་པར་རྫོགས་པ་ཞེས་བགྱིའམ། བསྙེན་པར་རྫོགས་པ་ཞེས་བྱ་སྟེ། དགེ་སློང་མའི་ནང་དུ་སྤོས་ཤིག་།མདོར་ན། སྨྱོན་པར་གྱུར་དང་སེམས་འཁྲུགས་དང་། །ན་བ་འོན་པ་གླེན་པ་དང་། །ཁྱིམ་པ་དག་ལ་སོགས་པ་རྣམས། །བསླབ་པ་བྱིན་དང་དེ་ལྟར་མཚན། །བཙུན་པ། ལས་བགྱིད་པ་སྨྱོན་པས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། གལ་ཏེ་ལས་བྱེད་པའི་དགེ་སློང་གིས་དགེ་སློང་གི་འདུ་ཤེས་དང་ལྡན་ཞིང་གསོལ་བ་བྱས་ལ། ལས་ཀྱང་མཉམས་ན། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། ལྐུགས་པ་དང་། འོན་པ་དང་། དེ་བཞིན་དུ་ར་རོ་བ་རྣམས་ལ་ཡང་བརྗོད་པར་བྱའོ། །བཙུན་པ། ལས་བགྱིད་པ་ཁྱིམ་པས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པར་ཞེས་བགྱིའམ། ཨུ་པ་ལི་བསྙེན་པར་
མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །དེ་བཞིན་དུ་མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་། མ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། མི་གནས་པ་དང་། སོ་སོར་གནས་པ་དང་། སྔར་ཉེས་པ་བྱུང་བ་དང་། སྔར་འཁྲུགས་པས་ལས་བགྱིས་ཏེ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བཙུན་པ། ལས་བགྱིད་པ་ཟ་མས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བཙུན་པ། ལས་བགྱིད་པ་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་པ་རྣམས་ཀྱིས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །བཙུན་པ། ལས་བགྱིད་པ་འགྲོ་བ་གཞན་དུ་གནས་པས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །བཙུན་པ། བསྙེན་པར་རྫོགས་པར་བགྱིད་པ་ན་ལས་བགྱིད་པའི་མཚན་འཕོས་ན་བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །མདོར་ན། སྤྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་པར་ཞུགས་དང་འགྲོ་བ་མཚན། །ཁྱིམ་བ་དག་ལ་སོགས་པ་རྣམས། །བསླབ་པ་བྱིན་པ་ཐ་མའོ། །བཙུན་པ། མཁན་པོ་སྨྱོན་པས་བསྙེན་པར་རྫོགས་པར་བགྱིས་
ན་བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །དེ་བཞིན་དུ་མཁན་པོ་སེམས་འཁྲུགས་པ་དང་། ནད་ཀྱིས་གཟིར་བ་དང་། སྙོམས་པར་ཞུགས་པ་རྣམས་སོ། །བཙུན་པ། མཁན་པོ་འགྲོ་བ་གཞན་དུ་གནས་པས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །བཙུན་པ། དགེ་ཚུལ་ཕ་བསྙེན་པར་རྫོགས་པར་བགྱིད་པ་ན་མཁན་པོའི་མཚན་འཕོས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་བ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །བཙུན་པ། མཁན་པོ་ཁྱིམ་པས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །དེ་བཞིན་དུ་མཁན་པོ་ཟ་མ་དང་། མ་ནིང་ནས་རྒྱས་པར་བསླབ་པ་སྩལ་པའི་བར་དུ་དེ་རྣམས་ཀྱིས་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པ་ལི། བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི། འདས་པ་དང་བཅས་པའོ། །འདུལ་བ་གཞུང་དམ་པ་ལས། བསྙེན་པར་རྫོགས་པའི་དངོས་པོ་རྫོགས་སོ།། །།