འདུལ་བ་གཞུང་དམ་པ་ལས།

འདུལ་བར་བྱེད་པ་བཤད་པ། སྨད་ཆ།

---

^{[མ་དཔེ་གཟིགས་ན་འདིར་གནོན།]}

འདུལ་བ་གཞུང་དམ་པ། བམ་པོ་ཉི་ཤུ་གསུམ་པ། མདོར་ན། ཁྱེའུ་གཉིས་རྒལ་གསུམ་པ་དང་། །ཕྲིན་པ་དག་དང་དགེ་འདུན་ཞིང་། །ཡོ་བྱད་རྣམས་དང་ཕུར་པ་དང་། །ཤིང་དང་བྱ་ཚང་རྣམ་གཉིས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་ཁྱིམ་བདག་མགོན་མེད་པ་ལ་ཟས་སྦྱིན་གྱི་བུ་རྣམས་ཐར་བར་བྱས་པ་ནི་རྒྱས་པར་རྣམ་པར་འབྱེད་པ་ལས་ཇི་སྐད་འབྱུང་བ་་་བཞིན་ནོ། །ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་གདུགས་ཚོད་ལ་སྤྱན་དྲངས་ནས། སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་ནི་བྱོན་གྱི་དགེ་སློང་ཞིག་གཙུག་ལག་ཁང་ན་འདུག་སྟེ་བསོད་སྙོམས་མནོས་སོ། །དེ་ན་ཁྱིམ་བདག་མགོན་མེད་པ་ལ་ཟས་སྦྱིན་གྱི་ཁྱེའུ་རྣམས་ཛེ་ཏའི་ཚལ་ན་རྩེ་བ་ལས་གཡོན་ཅན་དག་གིས་བརྐུས་པ་དགེ་སློང་་་དེས་ཐོས་ཏེ། དེས་སྔགས་བསླབས་ནས་རིང་པོ་མ་ལོན་པར་དེས་འདི་སྙམ་དུ་མ་ལ་བདག་གིས་སྔགས་འདིས་སད་དོ་སྙམ་དུ་བསམས་ནས་དེས་སྔགས་དེ་བརྗོད་པ་དང་། གཡོན་

---

^{[མ་དཔེ་གཟིགས་ན་འདིར་གནོན།]}

ཅན་དེ་དག་དཔུང་གི་ཚོགས་བཞིས་བསྐོར་བར་གྱུར་ནས་དེ་དག་གིས་ཁྱེའུ་དེ་རྣམས་བོར་ཏེ་བྲོས་སོ། །དེ་ལྟར་གྱུར་པ་དགེ་སློང་དག་གིས་ཐོས་ནས་དེ་ལ་དགེ་སློང་དག་གིས་འདི་ནི་ཕས་ཕམ་པའི་ཉེས་པ་བྱུང་ངོ་ཞེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་་་བཀའ་སྩལ་པ། དགེ་སློང་ཁྱོད་ཀྱིས་ཇི་ལྟར་བསམས་ཏེ་ཁྱེའུ་རྣམས་ཐར་བར་བྱས་ཞེས་སྨྲས་པ་དང་། སྔགས་སད་པར་བསམས་སོ་ཞེས་གསོལ་ནས་བཅོམ་ལྡན་འདས་ཀྱིས་བཀའ་སྩལ་པ། སྔགས་བརྗོད་པ་ལ་ཉེས་པ་མེད་དོ། །ལྗོངས་ཀོ་ས་ལར་དགེ་འདུན་གྱི་ཆོས་གོས་བགོས་པ་དང་། དགེ་སློང་གཞི་པ་ཞིག་གྲོང་གཞན་དུ་སོང་ནས་དེ་ལ་ལྷན་ཅིག་སྤྱོད་པ་གཉིས་ཤིག་ཡོད་དེ་དེ་གཉིས་ཀྱིས་མཁན་པོའི་གོས་སོ་སོར་མནོས་སོ། །དེ་གཉིས་ཀྱིས་མནོས་ཏེ་དོང་བ་དང་། གཅིག་ལ་གཅིག་མཁན་པོའི་གོས་ཁྱོད་ཀྱིས་མནོས་སམ་ཞེས་དྲིས་སོ། །ཁྱོད་ཀྱིས་ཀྱང་མནོས་ཁོ་བོས་ཀྱང་མནོས་ན་གང་གིས་མི་དབང་བར་མནོས་པས་ཕས་ཕམ་པ་བྱུང་བ་ནི་མི་ཤེས་སོ་ཞེས་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། མནོས་པ་ལ་ཉེས་པ་མེད་དེ་འོན་ཀྱང་གཞན་ཤེས་པར་བྱོས་ཤིག །གཞོངས་ཀོ་ས་ལར་དགེ་འདུན་གྱིས་གོས་བགོས་པ་དང་། དགེ་སློང་གཞི་བ་ཞིག་གྲོང་་་གཞན་དུ་སོང་ནས། དགེ་སློང་དེའི་མཛའ་བོ་ཞིག་ཡོད་དེ། དེས་དེའི་གོས་མནོས་ནས་དེས་འོངས་པ་དང་། འདི་སྐད་དུ་ཚེ་དང་ལྡན་པ་འདི་ནི་ཁྱོད་ཀྱི་གོས་ཡིན་ཏེ་ཁོ་བོས་མནོས་ནས་འོངས་སོ་ཞེས་སྨྲས་པ་དང་། ངས་ཁྱོད་ལ་མ་བཅོལ་ཏོ་ཞེས་སྨྲས་ནས། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་

---

^{[མ་དཔེ་གཟིགས་ན་འདིར་གནོན།]}

ཉེས་པ་མེད་དེ་མ་བཅོལ་བར་རྙེད་པ་མ་མནོད་ཅིག །མནོས་ན་ནི་ཉེས་བྱས་སུ་འགྱུར་རོ། །གཞོངས་ཀོ་ས་ལར་གོས་རྣམས་བགོས་པའི་ཚེ་དགེ་སློང་ཞིག་ན་བ་དང་དེའི་ནད་གཡོག་གིས་གོས་མནོས་ནས་དེས་ཁྱེར་ཏེ་སོང་བ་དང་། དགེ་སློང་དེ་ཡང་དུས་ལས་འདས་ཏེ་དགེ་སློང་དེས་ཇི་ལྟར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་སྔར་དུས་ལས་འདས་ལ་ཕྱིས་མནོས་ན་ནི་དེ་ཉིད་དུ་སླར་ཕུལ་ཅིག །འོན་ཏེ་སྔར་མནོས་ལ་ཕྱིས་དུས་ལས་འདས་ན་ནི་ཡོ་བྱད་གཞན་ཇི་ལྟ་བ་དེ་ལྟར་བྱོས་ཤིག །དགེ་སློང་ཞིག་གིས་དགེ་སློང་ཞིག་ལ་ཚེ་དང་ལྡན་པ་ཚུར་ཤོག །ཆུང་ངུ་ཆུང་ངུ་ནས་མ་བྱིན་པར་བླངས་པ་དང་ཉེས་པར་མི་འགྱུར་རོ་ཞེས་སྨྲས་པ་དང་། དགེ་སློང་དག་གིས་ཐོས་ནས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། སྦྱོར་བ་གཅིག་གིས་རིན་ཐང་བརྩི་བར་བྱའོ། །ཁྱིམ་བདག་ཅིག་དགེ་འདུན་གྱི་ཞིང་རྨེད་པ་དང་། དེ་ལ་དགེ་སློང་གཞི་བ་ཞིག་འོངས་ནས་འདི་སྐད་དུ་ཁྱིམ་བདག་ཡང་ན་ཤས་བྱིན་ཅིག །ཡང་ན་ཞིང་མ་རྨེད་ཅིག་ཅེས་སྨྲས་ཀྱང་དེས་མ་མཉན་ཏེ་རྨོས་པ་དང་། དགེ་སློང་དེས་ཐོང་བའི་རྩེ་མོར་ཉལ་ལོ། །དེ་ནས་ཁྱིམ་བདག་དེས་ཐོང་བ་བོར་ནས་འདི་སྐད་དུ་དགེ་སྦྱོང་འདི་ལྟ་བུ་དང་བྲལ་བར་ཤོག་ཤིག་ཅེས་འཕྱ་ཞིང་སྤོང་སྟེ་མི་སྙན་པར་ཟེར་བ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཕྱིན་ཆད་དགེ་སློང་གིས་འདི་ལྟར་ལུས་མི་སྡུག་པར་མ་བྱེད་ཅིག །དགེ་སློང་ཞིག་གིས་དགེ་སློང་ཞིག་ལ་འདི་སྐད་དུ་ཚེ་དང་ལྡན་པ་ཚུར་ཤོག་མཆོད་རྟེན་གྱི་ནོར་བརྐུས་ཀྱང་བདག་ཅག་གཉིས་ལ་ཉེས་པར་མི་འགྱུར་རོ་ཞེས་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མཆོད་རྟེན་གྱི་ཡོ་བྱད་སྲུང་མ་ཡོད་པ་ལས་ནི་དེ་སྟེ་རིན་ཐང་ཚང་ན་་་ཕས་ཕམ་པར་འགྱུར་རོ། །དགེ་སློང་གཞི་བ་ཞིག་དགེ་འདུན་གྱི་ཞིང་རྨེད་དུ་བཅུག་པ་དང་། དེ་ནས་ཤིན་ཏུ་མི་རིང་བ་ཞིག་ན་ཁྱིམ་བདག་ཅིག་ཀྱང་ཞིང་རྨེད་དེ། ཁྱིམ་བདག་དེ་འོངས་ནས་བཙུན་པ་ཁོ་བོའི་ཞིང་མ་རྨོ་ཤིག་ཅེས་སྨྲས་པ་དང་། འདི་ཁྱོད་

---

^{[མ་དཔེ་གཟིགས་ན་འདིར་གནོན།]}

ཀྱི་མ་ཡིན་ཏེ་དགེ་འདུན་གྱི་ཞིང་ངོ་། །བཙུན་པ་ཁོ་བོའི་དབང་དུ་མི་མ་ཡིན་པ་བསྟན་ཏོ་ཞེས་སྨྲས་ནས། ཁྱིམ་བདག་དེས་སྔོན་མཚམས་སུ་ཕུར་པ་བཏབ་པ་དེ་བརྐོས་སོ། །དེ་བརྐོས་ནས་བསྟན་པ་དང་དེས་ཐོང་བ་བོར་ནས་ཁྱིམ་བདག་དེ་སོང་བའི་འོག་ཏུ་དེས་དེའི་ཕུར་པ་ནང་དུ་བསྣུར་ཏེ་ཞིང་རྨེད་པ་དང་། ཁྱིམ་བདག་དེ་སླར་འོངས་ནས། བཙུན་པ་ད་གཟོད་ཀྱང་ཁོ་བོ་རྒྱལ་ན་ཅིའི་ཕྱིར་ད་དུང་ཡང་ཞིང་རྨེད་ཅེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་དངོས་པོ་ཚང་ན་ཕས་ཕམ་པར་འགྱུར་རོ། །དགེ་སློང་ཞིག་གིས་ཁྱིམ་བདག་གི་མེ་ཏོག་གི་ཤིང་ཞིག་མ་བྱིན་པར་བླངས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་དངོས་པོ་ཚང་ན་ཕས་ཕམ་པར་འགྱུར་རོ། །འབྲས་བུའི་ཤིང་ཡང་དེ་བཞིན་ནོ། །དགེ་སློང་གི་འཆག་སར་ཤིང་ཞིག་སྐྱེས་ཏེ། དེ་ལ་འོལ་བའི་ཚང་འཆས་ནས་དེས་དེ་དག་འཆག་པ་ལ་ཤིང་འདོར་ཞིང་སྐད་འབྱིན་པ་དང་། དེས་དེའི་ཚང་བཤིག་ནས་དེ་སྐད་འབྱིན་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགའ་བོ་ལ་དགའ་བོ་འོལ་བ་ཅིའི་ཕྱིར་སྐད་འབྱིན་ཅེས་རྨས་པ་དང་། དགེ་སློང་དག་གིས་འོལ་བའི་ཚང་བཤིག་པའི་སླད་དུའོ། །འོལ་བའི་ཚང་མ་གཞིག་ཅིག །སུས་བཤིག་པ་དེ་ལ་ཉེས་བྱས་སུ་འགྱུར་རོ། །དགེ་སློང་གིས་འོལ་བའི་ཚང་བཤིག་ནས་ཚོན་བསྐོལ་བ་དེ་ཡང་རྒྱས་པར་དེ་བཞིན་ནོ། །མདོར་ན། ལ་ཕུག་སྡོང་བུ་འབྲས་བུ་དང་། །འདབ་མ་མེ་ཏོག་རྣམ་གསུམ་དུ། །རྟ་དང་རྟ་ཞོན་རྐུ་བ་དང་། །གྲུ་རྒལ་བ་དང་ནོར་བུ་འོ། །མཉན་དུ་ཡོད་པ་ན་ཁྱིམ་བདག་ཅིག་ལ་ལ་ཕུག་གི་ར་བ་ཞིག་ཡོད་དེ་དེར་དགེ་སློང་ཞིག་སོང་ནས་འདི་སྐད་དུ་ལ་ཕུག་སློང་ཞེས་སྨྲས་པ་དང་། བཙུན་པ་རིན་སྩོལ་ཅིག །རིན་མེད་དོ། །རིན་མེད་པར་ཇི་ལྟར་གསོལ། ཆོས་ཀྱི་ཕྱིར་རིན་མེད་པར་བྱིན་ཅིག །བཙུན་པ་དེ་སྟེ་འདིར་འོངས་སོ་ཅོག་ལ་རིན་མེད་པར་བྱིན་ན་ཁོ་བོ་ཅག་གི་ཟས་དང་གོས་ཅུང་ཟད་ཀྱང་མེད་པར་འགྱུར་རོ་ཞེས་སྨྲས་པ་དང་། ཅི་ཅུང་ཟད་ཀྱང་

---

^{[མ་དཔེ་གཟིགས་ན་འདིར་གནོན།]}

མི་སྦྱིན་ནམ། ཅུང་ཟད་ཀྱང་མི་གསོལ་ལོ་ཞེས་སྨྲས་ནས། དེས་ལ་ཕུག་གི་ར་བ་དེ་སྔགས་ཀྱིས་བསྐམས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་མོད་ཀྱི་ཉེས་པ་སྦོམ་པོར་འགྱུར་རོ། །ལ་ཕུག་གི་ར་བ་ཇི་ལྟ་བ་བཞིན་དུ་སྡོང་བུའི་ར་བ་དང་། ལོ་མའི་ར་བ་དང་། འབྲས་བུའི་ར་བ་རྣམས་ཀྱང་དེ་བཞིན་ནོ། །རྟ་ཞིག་རྩྭ་ཟ་ཞིང་འདུག་་་པ་དང་། དགེ་སློང་ཞིག་གིས་རྩྭ་ཆང་བ་གང་བླངས་ནས་རྟའི་མདུན་དུ་་་་བསྒྲེངས་པ་དང་། དེ་ཡང་དེའི་ཕྱི་བཞིན་དུ་འོང་བར་གྱུར་ནས། དགེ་སློང་དེས་འདི་ལྟར་བརྐུ་བར་བྱའོ་སྙམ་སྟེ་ལུས་རྣམ་པར་བསྒྱུར་བ་དང་། དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི་མེད་ཀྱི་ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་ཚོང་པ་་་འགྲོན་པ་མང་པོ་དག་ཅིག་དང་ལྷན་ཅིག་གཞོངས་ཀོ་ས་ལར་དོང་ནས་མྱ་་ངན་གྱི་ལམ་ཞིག་ཏུ་ཕྱིན་པ་དང་། ཚོང་པ་དེ་རྟ་ལ་ཞོན་ནས་དེ་དག་གིས་བཙུན་པ་མྱ་ངན་གྱི་ལམ་འདི་ནི་འཇིགས་པ་དང་བཅས་ཀྱིས་རྟ་ལ་བཅིབས་ལ་མྱུར་དུ་བཞུད་དོ་ཞེས་སྨྲས་པ་དང་། དགེ་སློང་དག་གིས་རྟ་ལ་ཞོན་ཏེ་དེ་དག་གིས་དེར་འདི་ལྟར་བརྐུ་བར་བྱའོ་སྙམ་ནས་ལུས་རྣམ་པར་བསྒྱུར་བ་དང་། དགེ་སློང་དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི་མེད་དེ་ཉེས་པ་སྦོམ་པོར་འགྱུར་རོ། །དགེ་སློང་ཞིག་རིན་པོ་ཆེས་གང་བའི་གྲུ་དང་ལྷན་ཅིག་རྒལ་བ་ལས་དེས་དེར་འདི་ལྟར་བརྐུ་བར་བྱའོ་སྙམ་ནས་ལུས་རྣམ་པར་བསྒྱུར་བ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི་མེད་དེ་ཉེས་པ་སྦོམ་པོར་འགྱུར་རོ། །ཚོང་པ་ཞིག་གི་གྲུ་རིན་པོ་ཆེས་གང་བ་ཆུར་བྱིང་བ་དང་། དེ་བྲེལ་བ་དང་རིན་པོ་ཆེའི་སྒྲོམ་ཆུས་ཁྱེར་ཏེ་དགེ་སློང་དག་ཅིག་འོག་ན་ཆུ་ལ་འཁྲུ་ཞིང་འདུག་པ་དེ་དག་གིས་རིན་པོ་ཆེའི་སྒྲོམ་མཐོང་ནས་དེ་དག་གིས་དེ་ཕྱུང་བ་དང་། ཚོང་པ་དེས་མཐོང་སྟེ། བཙུན་པ་དག་རིན་པོ་ཆེའི་སྒྲོམ་འདི་ནི་བདག་གི་ལགས་སོ་ཞེས་སྨྲས་པ་དང་། འདི་ཆུས་ཁྱེར་བ་ལས་ངེད་ཀྱིས་རྙེད་དོ། །བཙུན་པ་དག་བདག་གིས་གྲུ་རིན་པོ་ཆེས་

---

^{[མ་དཔེ་གཟིགས་ན་འདིར་གནོན།]}

གང་བ་ཆུར་བྱིང་སྟེ། དེ་ནས་ཁོ་བོ་བྲེལ་བ་དང་། རིན་པོ་ཆེའི་སྒྲོམ་བུ་འདི་ཆུས་ཁྱེར་ཏེ། རིན་པོ་ཆེའི་སྒྲོམ་འདི་ནི་བདག་གི་ལགས་སོ་ཞེས་སྨྲས་པ་དང་། དེ་སྟེ་ཁྱོད་ཀྱི་ཡིན་ན་ཁྱེར་ཅིག །དགེ་སློང་དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་གཞི་བ་ཞིག་གིས་ཕྱོགས་བཞིའི་དགེ་འདུན་གྱི་ཡོ་བྱད་རྐུ་སེམས་ཀྱིས་གནས་ནས་གནས་སུ་སྤོས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །རྐུན་པོ་དག་ཅིག་གིས་བ་ཞིག་ཁྲིད་དེ་དགོན་པའི་གནས་སུ་འཛེགས་ནས་དེ་དག་གིས་དེར་བཏགས་ཏེ་དོང་བ་་་དང་། གནས་དེར་དགེ་སློང་དག་ཉིན་པར་སྤྱོད་པའི་ཕྱིར་དོང་བ་དང་། དེ་དག་གིས་བ་དེ་མཐོང་ནས་དེ་དག་གིས་སྙིང་རྗེ་སྟེ་བཏང་བ་དང་། དེ་དག་་་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་བྱས་སུ་འགྱུར་རོ། །མདོར་ན། རོ་དང་གསེར་གྱི་ཕྲེང་བ་དང་། །བྱན་ལག་བྱི་བ་རྣམ་པ་གཉིས། །རི་དགས་གསུམ་དང་ཀོག་ཚེ་གཉིས། །རྙི་དང་བྱ་རྒྱ་བྱ་ཚང་ངོ་། །མཉན་དུ་ཡོད་པ་ན་གཞན་དག་རོ་ལ་གསོལ་བ་འདེབས་ཏེ། ཁྱིམ་བདག་དེས་ཀྱང་དགོས་པ་ཞིག་གསོལ་ནས། དེའི་དགོས་པ་དེ་གྲུབ་པ་དང་། དེས་དེ་ལ་རས་དཀར་པོ་ཞིག་གིས་གཡོགས་ཏེ་བཞག་པ་ལ་དགེ་སློང་ནག་པོ་དགའ་བོ་ཞེས་བྱ་བ་དེ་དེར་སོང་ནས་རས་དེ་བླངས་པ་དང་། དེ་ལ་དགེ་སློང་རྣམས་ཀྱིས་ཁྱོད་ལ་ཕས་ཕམ་པའི་ཉེས་པ་བྱུང་ངོ་། །དངོས་པོ་གང་གི་ཕྱིར། ཁྱོད་ཀྱིས་རོའི་རས་མ་བྱིན་པར་བླངས་པའི་ཕྱིར་རོ་ཞེས་སྨྲས་པ་དང་། དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །གྲོང་ཁྱེར་ཡངས་པ་ཅན་ན་རོ་གསེར་གྱི་ཕྲེང་བ་བཏགས་པ་ཞིག་རང་ལ་བསྲུང་ཞིང་འདུག་གོ་ཞེས་དགེ་སློང་ནག་པོ་དགའ་བོ་ཞེས་བྱ་བ་དེས་ཐོས་ཏེ་དེ་དེར་སོང་ནས། རོ་དེ་ལ་འཐོག་པ་ལས་རོ་དེ་སྨྲ་བ་དང་། དེ་དཔའ་བ་ལ་ནུས་

---

^{[མ་དཔེ་གཟིགས་ན་འདིར་གནོན།]}

པས་ན་དེས་གསེར་གྱི་ཕྲེང་བ་ཕྲོགས་ཏེ་ཁྱེར་བ་དང་། དགེ་སློང་རྣམས་ཀྱིས་ཐོས་ནས་དེ་ཡང་དེ་བཞིན་དུ་རྒྱས་པར་རོ། །བུད་མེད་མང་ཞིག་ཆུ་བོ་མ་ཛི་ར་བ་ཏིའི་ངོགས་སུ་གོས་དང་རྒྱན་རྣམས་བཞག་སྟེ་ཁྲུས་བྱེད་པ་ན། སྤྲེའུ་ཞིག་ཤིང་ལས་བབས་ནས་རྒྱན་རྣམས་ཁྱེར་ཏེ་ཤིང་ལ་སླར་འཛེགས་པ་དང་། དེ་དག་སླར་བྱུང་ནས་གོས་རྣམས་བགོས་ཏེ་རྒྱན་རྣམས་ཐོགས་ཞེས་བྱས་ན་མུ་ཏིག་གི་དོ་ཤལ་མེད་ནས་གང་གི་ཚེ་མ་རྙེད་པ་དེའི་ཚེ་དོང་ངོ་། །དེ་ནས་སྤྲེའུ་དེས་མུ་ཏིག་གི་དོ་ཤལ་དེ་དེ་ཉིད་དུ་སླར་བོར་བ་དང་། དགེ་སློང་དག་ཅིག་ཤིན་ཏུ་མི་རིང་བ་ཞིག་ན་འཆག་ཅིང་འཁོད་པ་དེ་དག་གིས་མུ་ཏིག་གི་དོ་ཤལ་དེ་་་མཐོང་ནས་བླངས་ཏེ་བུད་མེད་དེ་དག་ལ་བྱིན་ནོ། །བུད་མེད་དག་ན་རེ་ཁྱོད་ཀྱིས་མུ་ཏིག་གི་དོ་ཤལ་འདི་བརྐུས་སོ་ཞེས་སྨྲས་པ་དང་། འདི་ངེད་ཅག་གིས་མ་བརྐུས་ཀྱིས་ཁྱེད་ཅག་ཁྲུས་བྱེད་པ་ན་སྤྲེའུ་ཞིག་ཤིང་ལས་བབས་ནས་མུ་ཏིག་གི་དོ་ཤལ་འདི་བླངས་ཏེ་སླར་ཤིང་ལ་འཛེགས་སོ། །གང་གི་ཚེ་ཁྱོད་ཀྱིས་བཙལ་ཏེ་མ་རྙེད་ནས་དོང་བ་དེའི་ཚེ་སླར་བབས་ཏེ་དེ་ཉིད་དུ་བཞག་གོ །དགེ་སློང་དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་གིས་བྱན་ལག་གི་ཚང་བཤིག་སྟེ་སྒོ་ང་བླངས་པ་དང་། བྱན་ལག་དེ་སྒྲ་འབྱིན་ཏེ་དེ་བཞིན་རྒྱས་པར་རོ། །དགེ་སློང་མང་ཞིག་གཙུག་ལག་ཁང་ཞིག་ན་འཁོད་པ་དང་བྱི་བ་དག་ཅིག་བྱི་ཁུང་ནས་བྱུང་སྟེ་ནོར་དང་ཟས་བརྐུས་ཤིང་བྱི་ཁུང་དུ་སླར་སོང་བ་དང་། དེ་དག་འདི་སྙམ་དུ་གྱུར་ཏོ། །བདག་ཅག་གི་ལ་རྐུ་བ་དེ་སུ་ཞིག་སྙམ་དུ་བསམས་ཏེ། དགེ་སློང་དག་གིས་བསོད་སྙོམས་ལས་བསྐོར་ནས་གདུགས་ཚོད་ལ་སྡོད་ཅིང་འདུག་པ་དང་། བྱི་བ་དེ་ཡང་ཁུང་བུ་ནས་བྱུང་སྟེ། ཁ་ཟས་ཁྱེར་ནས་དེ་བཞིན་དུ་བྱི་ཁུང་དུ་སླར་སོང་བ་དང་། དགེ་སློང་དེ་དག་འདི་སྙམ་དུ་བདག་ཅག་ལ་རྐུ་བ་ནི་འདི་ཡིན་ནོ་སྙམ་དུ་བསམས་ཏེ། དེ་དག་གིས་དེ་བཟུང་ནས་དགེ་སློང་དག་ལ་བསྟན་ཏེ་བདག་ཅག་ལ་རྐུ་བ་ནི་འདི་ཡིན་ནོ་ཞེས་སྨྲས་པ་དང་། དགེ་སློང་དེ་དག་གིས་སྨྲས་པ་ཁྱེད་ལ་ཕས་ཕམ་པའི་ཉེས་པ་བྱུང་ངོ་། །དངོས་པོ་གང་ལས་ཁྱེད་ཀྱིས་བྱི་བ་ལ་མ་

---

^{[མ་དཔེ་གཟིགས་ན་འདིར་གནོན།]}

བྱིན་པར་བླངས་པས་སོ་ཞེས་སྨྲས་པ་དང་། དགེ་སློང་དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་ཀྱིས་དགེ་སློང་རྣམས་ཀྱི་གང་ཡིན་པ་དེ་ལོང་ཤིག །བྱི་བའི་གང་ཡིན་པ་དེ་ནི་མི་བླང་བར་བྱའོ། །བྱི་བས་བཅའ་བ་དང་བཟའ་བའི་རྣམས་ཁྱེར་ཏེ་འོངས་ཤིང་དགེ་སློང་ཞིག་གི་མལ་སྟན་གྱི་འོག་ཏུ་བཞག་པ་དང་། དགེ་སློང་དེས་ནང་པར་སྔར་སོ་ཤིང་ཟོས་གདོང་བཀྲུས་ནས་བྱིན་ལེན་བྱས་ཏེ། དེ་ཟོས་པ་དང་དགེ་སློང་དག་གིས་ཚེ་དང་ལྡན་པ་ཁྱོད་རྟག་པར་ལག་པ་དང་། རྐང་པ་ལེགས་པར་བཀྲུས་ཀྱང་བསོད་སྙོམས་ལ་གྲོང་དུ་མི་འཇུག་ན། དེ་ཅིའི་ཕྱིར་ཞེས་སྨྲས་པ་དང་། བདག་ནི་བྱི་བས་བཅའ་བ་དང་བཟའ་བ་ཁྱེར་ཏེ་འོངས་ཤིང་མལ་སྟན་གྱི་འོག་ཏུ་འཇོག་སྟེ་བདག་གིས་སྔར་བྱིན་ལེན་བྱས་ནས་ཟོས་སོ་ཞེས་སྨྲས་པ་དང་། ཚེ་དང་ལྡན་པ་ཁྱོད་ནི་ཕས་ཕམ་པའི་ཉེས་པ་བྱུང་ངོ་། །དངོས་པོ་གང་གི་ཕྱིར། ཁྱོད་ཀྱིས་བྱི་བའི་བཅའ་བ་དང་བཟའ་བ་མ་བྱིན་པར་བླངས་པའི་ཕྱིར་རོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དེ་ནི་ཚེ་སྔ་མ་ལ་བྱི་བའི་ཕ་ཡིན་ཏེ། དེ་ཕ་ལ་བྱམས་པས་ན་དགེ་སློང་དེ་ལ་ཁ་ཟས་ཁྱེར་ཏེ་འོངས་ཤིང་བྱིན་པས་ཉེས་པ་མེད་དོ། །རི་དགས་ཤིག་རྔོན་པས་བསྙགས་ནས་གཙུག་ལག་ཁང་དུ་འོངས་པ་དང་རྔོན་པ་དེ་དག་གིས་བདག་ཅག་གི་རི་དགས་དེ་ནི་བསྙགས་ཏེ་གཙུག་ལག་ཁང་དུ་སོང་གིས་སླར་བྱིན་ཅིག་ཅེས་སྨྲས་པ་དང་། དེ་དག་གིས་གང་གི་ཚེ་མ་ཐོབ་པ་དེའི་ཚེ་བོར་ཏེ་དོང་བ་དང་། དགེ་སློང་དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །རྔོན་པས་རི་དགས་མདས་ཕོག་པ་དེ་ཡང་དེ་བཞིན་དུ་རྒྱས་པར་བྱའོ། །རྔོན་པས་རི་དགས་ཤིག་མདའ་དུག་ཅན་གྱིས་ཕོག་པ་གཙུག་ལག་ཁང་དུ་འོངས་པ་དང་། རྔོན་པ་དེ་དག་གིས་བདག་ཅག་གིས་རི་དགས་འདི་མདའ་དུག་ཅན་གྱིས་ཕོག་སྟེ། གདོན་མི་ཟ་བར་འཆིས་སླར་བྱིན་ཅིག་ཅེས་སྨྲས་པ་དང་། དགེ་སློང་དེ་དག་གིས་སླར་མ་བྱིན་ནས་དེ་དག་གིས་བོར་ཏེ་དོང་ངོ་། །དེ་

---

^{[མ་དཔེ་གཟིགས་ན་འདིར་གནོན།]}

དག་དོང་བའི་འོག་ཏུ་རི་དགས་དེ་ཡང་དུས་ལས་འདས་ནས་དགེ་སློང་དེ་དག་གིས་ཇི་ལྟར་བྱ་མི་ཤེས་ནས། བཅོམ་ལྡན་འདས་་ཀྱིས་བཀའ་སྩལ་པ། རྔོན་པ་དེ་དག་ལ་སླར་བྱིན་ཅིག །དགེ་སློང་གིས་རྔོན་པ་ལ་གནོད་པར་བྱ་བའི་ཕྱིར་ཀོག་ཚེ་བཅད་ན་ཉེས་པ་སྦོམ་པོར་འགྱུར་རོ། །སྙིང་རྗེ་བས་བཅད་ན་ཉེས་བྱས་སུ་འགྱུར་རོ། །དེ་བཞིན་དུ་བྱའི་རྙི་ཡང་གནོད་པར་བྱ་བའི་ཕྱིར་བཅད་ན་ཉེས་པ་སྦོམ་པོར་འགྱུར་རོ། །སྙིང་རྗེ་བར་བསམས་ཏེ་བཅད་ན་ཉེས་བྱས་སུ་འགྱུར་རོ། །དགེ་སློང་གིས་བྱ་རྒྱ་གནོད་པར་བྱ་བའི་ཕྱིར་བཅད་ན་ཉེས་པ་སྦོམ་པོར་འགྱུར་རོ། །སྙིང་རྗེ་བར་བསམས་ཏེ་བཅད་ན་ཉེས་བྱས་སུ་འགྱུར་རོ། །བྱ་ཚང་ཡང་དེ་བཞིན་ནོ། །མདོར་ན། གོས་འཚོང་བ་དང་ཚོང་འདུས་པ། །བཅའ་བ་གྲུ་གསུམ་ཐུག་པ་དང་། །ཟོང་དང་དངོས་པོ་ཆོས་གོས་སོ། །དགེ་སློང་ཞིག་གིས་གོས་་་འཚོང་བ་ར་རོ་བ་ཞིག་གིས་རས་ཞིག་བླངས་ནས་ཁྱེར་ཏེ་སོང་བ་དང་། གོས་་་འཚོང་བས་མཐོང་ནས་དེས་དེ་ལ་རས་མ་རྐུ་ཞེས་སྨྲས་པ་དང་། བསྟན་ནས་ཁྱེར་ཏེ་འོང་ངོ་ཞེས་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི་མེད་དེ་ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་ཚོང་འདུས་པ་ལ་སྐྱིན་པོར་མང་ཞིག་བླངས་པ་དང་། དེས་སྐྱིན་པ་བདས་ན་དེས་འདི་སྙམ་དུ་འདི་ལ་མི་སྦྱིན་ནོ་སྙམ་བསམས་པ་དང་། དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ་ཉེས་པ་སྦོམ་པོར་འགྱུར་རོ། །དགེ་སློང་ཞིག་ན་བ་དང་དེ་ཁུར་བ་གྲུ་གསུམ་དང་། ཐུག་པ་ལ་དད་ནས་དེས་འདི་སྙམ་དུ་ཁུར་བ་གྲུ་གསུམ་དང་། ཐུག་པ་བྱས་ཏེ་དགེ་འདུན་ལའང་གསོལ། བདག་ཀྱང་བཟའོ་སྙམ་སྟེ། དེས་ནད་གཡོག་རྣམས་ལ་དགེ་འདུན་ལའང་གསོལ། ཁོ་བོ་ཡང་བཟས་ཁུར་བ་གྲུ་གསུམ་དང་། ཐུག་པ་ཡང་སྦྱོར་ཅིག་ཅེས་སྨྲས་ནས། དེས་དེ་ལ་རིན་བྱིན་པ་དང་དེ་དག་གིས་འདི་སྙམ་དུ་བདག་ཅག་ལ་ཁུར་བ་གྲུ་་་གསུམ་དང་། ཐུག་པ་ཅི་དགོས་ཀྱིས་འདི་གཅིག་པུ་ལ་ཁུར་བ་གྲུ་གསུམ་དང་། ཐུག་པ་བྱིན་ལ་རིན་དེ་བགོའོ་སྙམ་

---

^{[མ་དཔེ་གཟིགས་ན་འདིར་གནོན།]}

བསམས་ནས་དེ་དག་གིས་དེ་ལ་ཁུར་བ་གྲུ་གསུམ་དང་། ཐུག་པ་བྱིན་ཏེ་རིན་བགོས་པ་དང་། དགེ་སློང་དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་ནད་པ་ཞིག་ཡོད་དེ། དེ་ལ་ཟོང་མང་དུ་ཡོད་པས་དེས་འདི་སྙམ་དུ་འདི་དག་ནི་བདག་ཤི་བ་དང་དགེ་འདུན་གྱིས་་བགོས་སོ་སྙམ་དུ་བསམས་ནས། དེས་ནད་གཡོག་རྣམས་ལ་ཚེ་དང་ལྡན་པ་དག་ཁོ་བོ་ལ་སྲན་ཆུང་གི་ཚོད་མ་ཞིག་བྱིན་ཅིག་ཅེས་སྨྲས་ནས་དེ་དག་གིས་དེ་ལ་སྲན་ཆུང་གི་ཚོད་མ་ཞིག་བྱས་ཏེ་བྱིན་པ་དང་། ནད་གཡོག་དེ་དག་བྲེལ་བར་གྱུར་ནས། དེས་ཟོང་དང་སྲན་ཆུང་གི་ཚོད་མར་བསྲེས་ནས་འཐུངས་པ་དང་། དེ་ཁ་ཟས་ལྕི་བས་དུས་ལས་འདས་ཏེ་དགེ་སློང་དེ་དག་འདུས་ནས་དུར་ཁྲོད་དུ་བོར་རོ། །དེ་དག་གིས་དེ་བོར་ནས་ནད་གཡོག་རྣམས་ལ་དགེ་སློང་དེའི་ཟོང་མང་པོ་བགོ་བར་བྱས་ཁྱེར་ཏེ་ཤོག་ཅེས་སྨྲས་པ་དང་། དགེ་སློང་དག་གིས་བཙལ་ནས་མ་རྙེད་དེ། དེ་དག་སྟན་ལས་ལངས་ཏེ་དོང་ངོ་། །དགེ་སློང་དེ་གཅན་གཟན་གྱིས་ལྟོ་དྲལ་ཏེ་རྒྱུ་མ་དྲངས་སོ། །རྒྱུ་མ་དྲངས་པ་དང་ཟོང་རྣམས་ས་ལ་བྱུང་ཞིང་འདུག་གོ །དགེ་སློང་ཞིག་དུར་ཁྲོད་དུ་མི་རོ་ལ་རྟོག་ཏུ་སོང་བ་དང་། དེས་ཟོང་དེ་མཐོང་ནས་དེ་དག་ཁྱེར་ཏེ་དགེ་འདུན་ལ་ཕུལ་བ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ནད་པ་ཞིག་ཡོད་དེ་དེ་ལ་ཤིང་གི་དངོས་པོ་མང་དུ་ཡོད་པ་དང་། དེས་ནད་གཡོག་རྣམས་ལ་ཚེ་དང་ལྡན་པ་དག་དགེ་སློང་རྣམས་བོས་ཤིག །དགེ་འདུན་ལ་འབུལ་ལོ། །མཆོད་རྟེན་ལ་འབུལ་ལོ། །གང་ཟག་རྣམས་ལ་འབུལ་ལོ་ཞེས་སྨྲས་པ་དང་། ནད་གཡོག་རྣམས་འདི་སྙམ་དུ་དགེ་འདུན་དང་མཆོད་རྟེན་ལ་ཕུལ་ན་བདག་ཅག་གིས་ཅུང་ཟད་ཀྱང་མི་ཐོབ་བོ་སྙམ་ནས། དེ་དག་གིས་དགེ་སློང་མ་བོས་སོ། །དགེ་སློང་དེ་ཡང་དུས་ལས་འདས་ནས་དེ་དག་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ནད་པ་དང་མི་མཐུན་པར་ནད་གཡོག་གིས་མ་བྱེད་ཅིག །ནད་

---

^{[མ་དཔེ་གཟིགས་ན་འདིར་གནོན།]}

པས་ཇི་ལྟར་བསྒོ་བ་བཞིན་དུ་དེ་དག་གིས་བསྒྲུབ་པར་བྱའོ། །འོན་ཏེ་རྣམ་གྲངས་གཞན་ཞིག་ཏུ་འགོད་པར་གྱུར་ན་ཡང་ཇི་ལྟར་ནད་པས་བསྒོ་བ་དེ་ལྟར་བྱོས་ཤིག །དགེ་སློང་ནད་པ་ཞིག་ཡོད་དེ། དེ་ལ་ལྷུང་བཟེད་དང་ཆོས་གོས་མང་དུ་ཡོད་པ་དང་། དེས་ནད་གཡོག་རྣམས་ལ་དགེ་སློང་རྣམས་བོས་ཤིག་མཆོད་རྟེན་ལ་འབུལ་ལོ། །དགེ་འདུན་ལ་འབུལ་ལོ། །གང་ཟག་ལ་འབུལ་ལོ་ཞེས་སྨྲས་པ་དེ་ཡང་དེ་བཞིན་དུ་རྒྱས་པར་བརྗོད་པར་བྱའོ། །མདོར་ན། ཙན་ད་ལ་ཀ་སོ་ད་ཡི། །སྦྱར་མ་དང་ནི་བརྙ་བ་དང་། །སུ་ཤི་མ་དང་བཟང་སྦྱིན་དང་། །རང་གིར་འདུ་ཤེས་ལྷུང་བཟེད་བླངས་པ་དང་། །ཨ་ཛི་ཏ་དང་ཤ་ཤི་གུབ་ཏ་དང་། །རང་གི་གོས་རྣམས་བརྐུས་པ་འོ། །མདོ་ཚིགས་སུ་བཅད་པ་འདི་ནི་ཇི་ལྟར་རྣམ་པར་འབྱེད་པ་ལས་འབྱུང་བ་བཞིན་ནོ། །མདོར་ན། དགེ་སློང་མ་ཡང་གཉིས་ལྡན་དང་། །མཽད་གལ་བུ་དང་གཞན་ཡང་གཉིས། །པི་ལིན་ད་ཡི་གཉིས་པོ་དང་། །ཉེ་དགའ་བོ་དང་སྤོང་བ་པོའོ། །དགེ་སློང་མ་གཉིས་དང་ལྡན་པ་ནི་ཇི་ལྟར་འདུལ་བ་བཞིན་ནོ། །མཉན་དུ་ཡོད་པའི་ཚོང་པ་དག་ཅིག་གྲུ་ཆེན་པོར་ཞུགས་ནས་རྒྱ་མཚོ་མཆིང་རྣམ་རྒལ་ཏེ་དེ་དག་རྒྱ་མཚོ་མཆིང་རྣམ་གྱི་ནང་ནས་དོང་བ་དང་གྲུ་བོ་ཆེ་ཀླུས་བཟུང་ནས་ལྷ་བྲན་རྣམས་ལ་གསོལ་ཀྱང་མ་བཏང་བ་དང་། དེ་ན་ཚེ་དང་ལྡན་པ་མཽད་གལ་གྱི་བུ་ཆེན་པོ་གྲོང་དུ་ཉེ་བར་འགྲོ་བའི་དགེ་བསྙེན་ཞིག་ཡོད་དེ། དེས་འདི་སྙམ་དུ་དེ་སྟེ་འཕགས་པ་མཽད་གལ་གྱི་བུ་ཆེན་པོས་དགོངས་ན་ནི་བཀྲ་ཤིས་པར་གྱུར་ཅིག་ཅེས་བསམས་པ་དང་། གནས་བརྟན་གྱིས་ཀྱང་དགོངས་ཏེ་ཇི་ལྟར་སེམས་སྙོམས་་པར་ཞུགས་པས་བྱའི་རྒྱལ་པོ་ནམ་མཁའ་ལྡིང་དུ་གྱུར་ནས། གྲུའི་དངོར་འདུག་པར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པ་དང་། ཀླུ་དེ་དག་སྐྲག་སྟེ། གྲུ་བོ་ཆེ་དེ་བཏང་ནས་ཚོང་པ་རྣམས་བདེ་བར་མཉན་དུ་ཡོད་པར་ཕྱིན་ཏེ། ཐམས་ཅད་ནི་འཕགས་པ་མཽད་གལ་གྱི་བུའི་མཐུའོ་ཞེས་བརྗོད་ནས། དགེ་སློང་དག་གིས་འདི་ཇི་ལྟ་ཞེས་དྲིས་པ་དང་། དེ་ལྟར་གྱུར་པ་རྒྱས་པར་སྨྲས་ཏེ། དེ་ནས་དགེ་སློང་དེ་དག་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་ནི་ཕས་ཕམ་པའི་ཉེས་པ་བྱུང་ངོ་། །དངོས་པོ་གང་

---

^{[མ་དཔེ་གཟིགས་ན་འདིར་གནོན།]}

གི་ཕྱིར། ཀླུས་གྲུ་ཟིན་པ་མ་བྱིན་པར་བཏང་ངོ་ཞེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་ཁྱོད་ཀྱིས་ཇི་ལྟར་་བསམས་ཏེ་བཏང་ཞེས་སྨྲས་པ་དང་། རྫུ་འཕྲུལ་རྣམ་པར་སྤྲུལ་པར་བསམས་སོ། །མཽད་གལ་གྱི་བུས་རྫུ་འཕྲུལ་གྱིས་བཏང་བ་ལ་ནི་ཉེས་པ་མེད་དོ། །མཉན་དུ་ཡོད་པའི་ཚོང་པ་དག་ནོར་ཁྱེར་ཏེ་ལྗོངས་རྒྱུར་དོང་ནས་དེ་དག་མྱ་ངམ་གྱི་ནང་དུ་ཕྱིན་པ་དང་། འགྲོན་པ་མང་པོ་དེ་དག་རྐུན་པོས་བསྐོར་ནས་དེ་དག་གིས་ལྷ་རྣམས་ལ་གསོལ་ཀྱང་མ་བཏང་བ་དང་། དེ་དག་གི་ནང་ན་ཚེ་དང་ལྡན་པ་མཽད་གལ་གྱི་གྲོང་དུ་ཉེ་བར་འགྲོ་བའི་ཚོང་པ་ཞིག་ཡོད་པ་དེས་འདི་སྙམ་དུ་དེ་སྟེ་གནས་བརྟན་གྱིས་དགོངས་ན་ནི་བཀྲ་ཤིས་པར་གྱུར་ཅིག་ཅེས་བསམས་པ་་་དང་། གནས་བརྟན་གྱིས་ཀྱང་དགོངས་ནས་ཇི་ལྟར་སེམས་སྙོམས་པར་ཞུགས་པས་རྐུན་པོ་རྣམས་དཔུང་གི་ཚོགས་ཡན་ལག་བཞི་པས་བསྐོར་བར་གྱུར་པ་དེ་ལྟ་་བུའི་ཏིང་ངེ་འཛིན་ལ་སྙོམས་པར་ཞུགས་པ་དང་། རྐུན་པོ་དེ་དག་སྐྲག་སྟེ། འགྲོན་པ་མང་པོ་རྣམས་བཏང་སྟེ་བྲོས་པ་དང་། ཚོང་པ་དེ་དག་བཀྲ་ཤིས་ཤིང་བདེ་བར་མཉན་དུ་ཡོད་པར་ཕྱིན་ཏོ། །དེ་དག་གིས་ཇི་ལྟར་གྱུར་པ་དགེ་སློང་རྣམས་ལ་རྒྱས་པར་སྨྲས་ཏེ་སྔ་མ་བཞིན་ནོ། །པི་ལིན་དའི་བུ་གཉིས་ནི་རྒྱས་པར་འདུལ་བ་ལས་ཇི་སྐད་འབྱུང་བ་བཞིན་ནོ། །ཤཱཀྱའི་བུ་ཉེ་དགའ་བོ་དབྱར་གྱི་ཟླ་བ་ཐ་མ་ལ་གང་དུ་དགེ་སློང་ཇི་སྙེད་ཅིག་དབྱར་ཚུལ་དུ་ཞུགས། གང་དུ་དགེ་འདུན་གྱི་རྙེད་པ་ཇི་སྙེད་ཅིག་རྙེད་ཅེས་གཙུག་ལག་ཁང་དུ་རྒྱུ་ཞིང་སྤྱོད་དེ། དེ་གནས་གང་དང་གང་དུ་ཕྱིན་པའི་དགེ་སློང་དེ་དག་གིས་ཚིག་སྙན་པས་བསུ་བ་དང་། ཁྱེད་བདེ་བར་གནས་སམ་ཞེས་དྲིས་ཏེ་འདུག་ནས་དགེ་འདུན་གྱི་རྙེད་པ་ཅི་་་ཡོད་པ་འོན་ཅིག་དང་བགོས་ལ། གང་ཁོ་བོའི་གོས་ཀྱི་སྐལ་པ་དེ་ནི་བཀུར་རོ་ཞེས་སྨྲས་པ་དང་། དེ་དག་གིས་ཁྱེར་ཏེ་འོངས་ནས་དེའི་མདུན་དུ་བཞག་པ་དང་། དེ་བགོས་ནས་དགེ་འདུན་གྱི་གནས་བརྟན་གྱི་གོས་ཀྱི་སྐལ་བ་ཁྱེར་ཏེ་ལངས་པ་་་དང་། དེས་ཡང་གནས་བརྟན་ད་དུང་མ་བཞུད་པར་བཞུགས་ཤིག་ཅེས་སྨྲས་པ་དང་། ཉེ་དགའ་བོ་

---

^{[མ་དཔེ་གཟིགས་ན་འདིར་གནོན།]}

ཡང་གཏམ་སྙན་པ་གཏམ་སྣ་ཚོགས་བདེ་བ་ལ་སྤོབས་པ་དང་ལྡན་ཏེ། རིགས་པ་དང་གྲོལ་བ་ལ་སྤོབས་པས་ན་དེས་ཇི་ལྟར་གནས་བརྟན་ལ་དད་པར་འགྱུར་བ་དེ་ལྟ་བུའི་ཆོས་བཤད་པ་དང་། དེས་བདག་གི་གོས་ཀྱི་སྐལ་བ་ཅི་ཡོད་པ་ཚེ་དང་ལྡན་པ་བཞེས་ཤིག་ཅེས་སྨྲས་པ་དང་། དེ་བཞིན་དུ་གནས་བརྟན་གཉིས་པ་དང་། གནས་བརྟན་གསུམ་པ་དང་དགེ་སློང་དེ་དག་ལས་མང་ཞིག་གིས་གོས་དེ་ལ་བྱིན་ནས། དེས་གོས་དེ་དག་ཁུར་དུ་ཁྱེར་ཏེ་ཛེ་ཏའི་ཚལ་དུ་ཞུགས་པ་དང་། དགེ་སློང་དག་གིས་ཚེ་དང་ལྡན་པ་ཉེ་དགའ་བོ་ལ་གོས་འདི་དག་ག་ལས་བརྙེས་ཞེས་དྲིས་ནས། དེས་དེ་དག་ལ་དེ་ལྟ་བུར་གྱུར་པ་རྒྱས་པར་སྨྲས་སོ། །དེ་ལྟ་བུ་འབྱུང་མོད་ཀྱི། སངས་རྒྱས་བཅོམ་ལྡན་འདས་ཀྱིས་ནི་ད་དུང་བསླབ་པའི་གནས་མ་བཅས་སོ། །རྒན་ཞུགས་གཉིས་ནི་རྒྱས་པར་ཇི་ལྟར་འདུལ་བ་ལས་འབྱུང་བ་བཞིན་ནོ། །དགེ་སློང་གིས་གཞན་གྱི་དབྱར་གྱི་གོས་སྐལ་བ་མ་ལེན་ཅིག །སུས་བླངས་པ་དེ་ཉེས་བྱས་སུ་འགྱུར་རོ། །ཚེ་དང་ལྡན་པ་ཀུན་དགའ་བོའི་ལྷན་ཅིག་སྤྱོད་པ་སྤོང་བ་པོ་ཞེས་བྱ་བ་དེས་པ། ཚུལ་ཁྲིམས་དང་ལྡན་པ་ཞིག་སྟེ། དེ་ཁྱིམ་བདག་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེ་ལ་བུ་གཉིས་ཤིག་ཡོད་དེ་ཁྱིམ་བདག་དེ་ཡང་ནད་ཀྱིས་བཏབ་བོ། །དེ་དེ་ལ་ནད་འདྲིར་སོང་བ་དང་། དེས་དེ་ལ་ནོར་བྱིན་ནོ། །གཉིས་པོས་ནི་ཅི་ཡང་མ་ཐོབ་ནས་དེས་ཚེ་དང་ལྡན་པ་ཀུན་དགའ་བོ་ལ་འཁངས་པ་དང་། ཚེ་དང་ལྡན་པ་ཀུན་དགའ་བོས་སྤོང་བ་པོ་ཆད་པས་བཅད་པ་དང་། དེ་སྔོན་སློབ་མ་ལས་རབ་ཏུ་བྱུང་བས་ན་དེས་སློབ་མ་ལྔ་བརྒྱ་ཙམ་ཞིག་གཟེངས་བསྟོད་དེ་བདག་གི་མཁན་པོ་ལ་བཟོད་པ་གསོལ་ཅིག་ཅེས་སྨྲས་པ་དང་། ཁྱོད་ཀྱི་མཁན་པོ་ལ་བཟོད་པ་ཇི་ལྟར་བྱ། ཁྱོད་ཀྱིས་ཁྱེའུ་རྣམས་ཁྲིད་ལ་མཁན་པོའི་དྲུང་དུ་དེངས་ཤིག་དང་། དེས་ཁྱེད་ཅག་ལ་ཆོས་འཆད་པར་འགྱུར་གྱིས་གང་གི་ཚེ་ཆོས་བཤད་ཟིན་པར་གྱུར་པ་དེའི་ཚེ་ཁྱེའུ་དང་བུ་མོ་རྣམས་བོར་ལ་དེངས་ཤིག་དང་། དེ་དག་ངུས་པས་བུ་མོ་དང་ཁྱེའུ་དེ་དག་ཁྲིད་དེ་དེང་ཞེས་དེ་ཟེར་བ་དང་། དེ་ལ་དེ་སྟེ་སྤོང་བ་པོ་ལ་ཡང་བཟོད་པར་

---

^{[མ་དཔེ་གཟིགས་ན་འདིར་གནོན།]}

མཛད་དམ་ཞེས་སྨྲོས་ཤིག་ཅེས་སྨྲས་པ་དང་། དེ་དག་གིས་ཇི་ལྟར་བསྒོ་བ་བཞིན་་གང་གི་ཚེ་ཆོས་བཤད་ཟིན་པ་དེའི་ཚེ་ཁྱེའུ་དང་བུ་མོ་རྣམས་བོར་ཏེ་དོང་བ་དང་། དེ་དག་རབ་ཏུ་ངུས་ནས་ཚེ་དང་ལྡན་པ་ཀུན་དགའ་བོས་སྨྲས་པ། ཁྱེའུ་དང་བུ་མོ་འདི་དག་ཁྲིད་ལ་དེང་འདི་དག་ཅིའི་ཕྱིར་དོང་ཞེས་སྨྲས་པ་དང་། དེ་དག་གིས་དེ་སྟེ་སྤོང་བ་པོ་ལ་ཡང་བཟོད་པར་མཛད་དམ་ཞེས་སྨྲས་པ་དང་། བཟོད་པར་བྱས། ཉེས་བྱས་ཀྱི་ཉེས་པ་བཤགས་པར་གྱིས་ཤིག། མདོར་ན། ཕག་དང་བུ་རམ་ཤིང་གི་སྡོང་བུ་དང་། །གནག་དགའ་བོ་ཡི་ཆོས་གོས་དང་། །མར་བྲེ་གང་དང་ཨ་ག་རུ། །གཟིག་དང་སེང་གེ་ལྔ་པ་འོ། །ཕག་དང་བུ་རམ་ཤིང་གི་སྡོང་བུ་དང་། གནག་དགའ་བོའི་ཆོས་གོས་རྣམས་ནི་རྒྱས་པར་ཇི་ལྟར་འདུལ་བ་ལས་འབྱུང་བ་བཞིན་ནོ། །དགེ་སློང་བསོད་ནམས་ཆེ་བ་ཚོང་པ་རྣམས་ལ་གྲགས་པ་དེ་ལ་ཚོང་པ་གཞན་ཞིག་གིས་དེ་ལ་ཅི་དགོས་པ་དང་ཅི་མཁོ་བ་རྣམས་བདག་གིས་གསོལ་ལོ་ཞེས་བསྟབས་པ་དང་། དགེ་སློང་དེའི་ནད་གཡོག་དེས་འདི་སྙམ་དུ་ཚོང་པ་དེ་ཡང་དང་ཡང་དུ་སྟོབས་ན་དེ་ལ་བདག་་་གིས་ཇི་ལྟར་སྙིང་ནས་སྟོབས་སམ། ཁ་འགྲོན་ཙམ་དུ་སྟོབས་བགམ་མོ་སྙམ་དུ་བསམས་ནས་དེ་དེའི་དྲུང་དུ་སོང་སྟེ། འདི་སྐད་དུ་མཁན་པོ་ལ་མར་ཞིག་དགོས་སོ་ཞེས་སྨྲས་པ་དང་། དེ་ལ་མར་བྲེ་གང་བྱིན་ནས་ཡང་བཙུན་པ་སྲན་མའི་ཁུ་བའམ་ཤ་ཁུ་འང་རུང་སྟེ་ཅི་དགོས་པ་འདི་ནས་སྣོམས་ཤིག་ཅེས་སྨྲས་པ་དང་། དེ་ལྟར་བགྱིའོ་ཞེས་སྨྲས་ནས་དགེ་སློང་དེས་མར་དེ་དགེ་སློང་དེའི་སྲན་མའི་ཁུ་བ་དང་ཤའི་ཁུ་བ་རྣམས་སུ་ཅུང་ཟད་བླུགས་སོ། །ཇི་ཙམ་ཞིག་ན་ཚོང་པ་དེ་དགེ་སློང་དེ་ལ་འཕགས་པ་ཁོ་བོས་ཁྱོད་ལ་མར་ནི་སྔར་བསྐུར་རོ། །དེ་སྟེ་གཞན་ཡང་སྲན་མའི་ཁུ་བའམ་ཤ་ཁུ་ཡང་རུང་སྟེ། ཅི་དགོས་པ་དེ་དག་ལོང་ཤིག་ཅེས་སྤྲིང་བ་དང་། དགེ་སློང་དེས་ནད་གཡོག་དེ་ལ་ཚོང་པ་འདི་ཞེས་བྱ་བ་ལ་མར་བླངས་སམ་ཞེས་དྲིས་ནས་བླངས་སོ་ཞེས་སྨྲས་པ་དང་། འོ་ན་ཕས་ཕམ་པའི་ཉེས་པ་བྱུང་ངོ་། །མཁན་པོ་ལ་ཚོང་པ་དེ་ཡང་དང་ཡང་དུ་སྟོབས་ནས་བརྟག་ཅིང་བགམ་པའི་ཕྱིར་བདག་གིས་བླངས་ནས་མཁན་པོ་ཡིར་བགྱིས་སོ་ཞེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས།

---

^{[མ་དཔེ་གཟིགས་ན་འདིར་གནོན།]}

བཅོམ་ལྡན་འདས་ཀྱིས་བཀའ་སྩལ་་པ། ཉེས་པ་མེད་དེ་དེ་ནས་འདི་དང་འདི་བླང་ངོ་ཞེས་དྲིས་ཏེ་སོང་ཤིག། མདོར་ན། བདེ་བ་ལྡན་དང་འདུ་ཤེས་དང་། །ཆུང་མ་གཉིས་དང་སྡིག་ཅན་ལྔ། །མངལ་ན་གནས་པ་བཅུར་བྱས་དང་། །དགེ་སློང་མ་ཡིན་གཞན་ཡང་བཅུ། །སངས་རྒྱས་བཅོམ་ལྡན་འདས་ཡུལ་བྲཱི་ཛིའི་ཐང་ཤིང་གི་གནས་ན་བཞུགས་ཏེ། ཀླུང་བདེ་ལྡན་གྱི་ངོགས་ཀྱི་དགེ་སློང་རྣམས་ལ་བསླབ་པའི་གནས་མ་བཅས་པས་ལས་དང་པོ་པ་རྣམས་ལ་ཉེས་པ་མེད་པར་གྱུར་པ་ན་དགེ་སློང་དག་ཐེ་ཚོམ་དང་ཡིད་གཉིས་དང་འགྱོད་པ་རྣམས་སྐྱེས་ཏེ། བདག་ཅག་གིས་བསླབ་པའི་གནས་མ་བཅས་པར་དགེ་སློང་མང་ཞིག་ལ་འཆི་བར་བསྟབས་ན། བདག་ཅག་གི་ལས་དང་པོ་གང་ཡིན་སྙམ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཀླུང་བདེ་ལྡན་གྱི་དྲུང་དུ་དགེ་སློང་དག་གནས་མ་བཅས་པ་ན་འདས་པ་དང་བཅས་པ་ནི་ཐམས་ཅད་དུ་ལས་དང་པོ་པ་སྟེ། ལས་དང་པོ་ལ་ཉེས་པ་མེད་དོ། །དགེ་སློང་གིས་མི་ལ་མི་མ་ཡིན་པར་འདུ་ཤེས་ཏེ་འཚོ་བ་དང་ཕྲལ་བ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། མི་ལ་མི་མ་ཡིན་པར་འདུ་ཤེས་ན་ཉེས་པ་སྦོམ་པོར་འགྱུར་རོ། །མི་མ་ཡིན་པ་ལ་མི་མ་ཡིན་པར་འདུ་ཤེས་ནའང་ཉེས་པ་སྦོམ་པོར་འགྱུར་རོ། །མི་མ་ཡིན་པ་ལ་ཐེ་ཚོམ་ནའང་ཉེས་པ་སྦོམ་པོར་འགྱུར་རོ། །དགེ་སློང་ཞིག་ཡུན་རིང་ཞིག་ཏུ་ནད་ཀྱིས་གཟིར་ནས་དེས་བདག་ལ་འདི་ཅི་དགོས་སྙམ་དུ་བསམས་ནས་དགེ་སློང་དེས་མཛའ་བོའི་དྲུང་དུ་སོང་སྟེ་འདི་སྐད་དུ་གྲི་བྱིན་ཞེས་སྨྲས་པ་དང་། ཁྱོད་ལ་གྲི་ཅིར་དགོས། རེ་ཞིག་བྱིན་ཅིག་ཅེས་སྨྲས་ནས། དེས་བྱིན་པ་དང་། དེ་གནས་ཁང་དུ་ཞུགས་ཏེ་སྒོ་བཅད་དེ་གཏན་པ་བཅུག་སྐྱིལ་མོ་ཀྲུང་བཅས་ཏེ་འདུག་ནས། བདག་ཉིད་ཀྱིས་སྲོལ་ཀོང་བཅད་དོ། །དེ་དེ་ལྟར་གྲི་ལག་ན་ཐོགས་བཞིན་དུ་དུས་ལས་འདས་པ་དང་། དགེ་སློང་དེས་ཉི་མ་གཉིས་སམ་གསུམ་ལོན་ནས་འདི་སྙམ་དུ་དགེ་སློང་དེས་གྲི་ཁྱེར་ཏེ་སོང་གིས་སོང་ལ་་་བལྟའོ། །སྙམ་དུ་བསམས་ནས། དེ་དེའི་གནས་ཁང་དུ་སོང་བ་དང་། དགེ་སློང་དེ་སྐྱིལ་མོ་ཀྲུང་བཅས་ཏེ་སྲོལ་ཀོང་བཅད་དེ་གྲི་ཐོགས་

---

^{[མ་དཔེ་གཟིགས་ན་འདིར་གནོན།]}

བཞིན་དུ་དུས་ལས་འདས་པར་མཐོང་ནས། དགེ་སློང་དེ་འགྱོད་པ་སྐྱེས་ནས། གང་ཅུང་ཟད་འདི་དུས་ལས་འདས་པ་ཐམས་ཅད་ནི་རྒྱུ་བ་དག་ལས་བྱུང་སྟེ། དེ་སྟེ་བདག་གིས་གྲི་མ་བྱིན་པར་གྱུར་ན་ནི་འདི་ཡང་བདག་ཉིད་ཀྱིས་འཚོ་བ་དང་ཕྲལ་བར་མི་འགྱུར་རོ་སྙམ་དུ་བསམས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཕྱིན་ཆད་ནད་པ་ལ་བབ་བབ་ཏུ་གྲི་མ་སྦྱིན་ཅིག །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་སོང་ནས་དེ་གྲོང་དུ་ཕྱིན་པ་དང་། དེའི་བུད་མེད་དེས་བཙུན་པ་ཚུར་སྤྱོན་མི་ཚངས་པར་སྤྱད་དོ་ཞེས་སྨྲས་པ་དང་། དགེ་སློང་གིས་ཁྱོད་ཀྱི་ཁྱོ་དེ་ནི་ཁྲོ་ལ་མི་སྲུན་ནོ་ཞེས་སྨྲས་པ་དང་། དེས་བཙུན་པ་ཇི་ནས་ཁྲོ་ལ་མི་སྲུན་པར་མི་འགྱུར་བ་དེ་ལྟར་བགྱིའོ་ཞེས་སྨྲས་ནས། དེས་དེ་ལ་དུག་བྱིན་པ་དང་། ཁྱིམ་བདག་དེ་དུས་ལས་འདས་སོ། །དགེ་སློང་དེ་ཞག་གཅིག་འདས་པ་དང་ཁྱིམ་དེར་སོང་བ་དང་། བུད་མེད་དེས་བཙུན་པ་ཚུར་སྤྱོན་མི་ཚངས་པར་སྤྱད་དོ་ཞེས་སྨྲས་པ་དང་། སྲིང་མོ་དེ་སྐད་མ་ཟེར་ཅིག །ཁོ་བོ་ནི་ཚངས་པར་སྤྱོད་པ་ཡིན་ནོ། །དེས་བཙུན་པ་གང་གི་ཚེ་ཁོ་མོས་ཁྱོ་འཚོ་བ་དང་ཕྲལ་བ་དེའི་ཚེ་གདོད་ཚངས་པར་སྤྱོད་དམ་ཞེས་སྨྲས་པ་དང་། ཅི་ཁྱོད་ཀྱིས་ཁྱོ་འཚོ་བ་དང་ཕྲོལ་ཅིག་ཅེས་ཁོ་བོས་སྨྲས་སམ། ཁྱོད་ཀྱི་ཁྱོ་འདི་ཁྲོ་ལ་མི་སྲུན་པའོ་ཞེས་མ་སྨྲས་སམ། ཅི་ཁོ་བོས་ཁྱོད་ཀྱི་ཁྱོ་འདི་ཁྲོ་ལ་མི་སྲུན་པའོ་ཞེས་ནི་སྨྲས་ཀྱི། ཁྱོད་ཀྱི་ཁྱོ་འདི་འཚོ་བ་དང་ཕྲོལ་ཅིག་ཅེས་ནི་མ་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་གྲོང་གཞན་དུ་གྲོང་དུ་ཉེ་བར་སོང་ནས་བྱེད་པ་ལས་ཁྱོད་ཀྱི་ཁྱོ་འདི་ནའོ་ཞེས་བྱ་བ་ནི་རྒྱས་པར་རོ། །དགེ་སློང་ཞིག་གིས་གསད་པར་བསམས་ཏེ། བརྡེགས་པ་ལས་དུས་ལས་འདས་ན་ཕས་ཕམ་པར་འགྱུར་རོ། །དུས་ལས་མ་འདས་ན་ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་མ་བསྲུང་བའི་ཕྱིར་མངལ་ན་གནས་པ་མཉེས་པ་ལས་མངལ་ན་གནས་པ་ཤི་ན་ཕས་ཕམ་པར་འགྱུར་རོ། །མ་ཤི་ན་ཉེས་པ་སྦོམ་པོར་འགྱུར་རོ། །གཉིས་ཀ་ཤི་ན་ཕས་ཕམ་པར་འགྱུར་རོ། །གཉིས་ཀ་མ་ཤི་ན་ཉེས་པ་སྦོམ་པོར་འགྱུར་རོ། །མངལ་

---

^{[མ་དཔེ་གཟིགས་ན་འདིར་གནོན།]}

ན་གནས་པའི་མི་ཤི་བ་ཕྱུང་ན་ཉེས་པ་སྦོམ་པོར་འགྱུར་རོ། །བྱོལ་སོང་གི་མངལ་ན་གནས་པ་ཕྱུང་ན་ཡང་ཉེས་པ་སྦོམ་པོར་འགྱུར་རོ། །དེ་ལྟར་དགེ་སློང་མས་བྱས་ནའང་དེ་བཞིན་ནོ།། །།འདུལ་བ་གཞུང་དམ་པ། བམ་པོ་ཉི་ཤུ་བཞི་པ། མདོར་ན། རྩབ་མོ་རྣམ་པ་ལྔ་པ་དང་། །ལས་གསར་དག་དང་རྡོ་བ་དང་། །བ་ལང་རྭ་དང་ཝ་མོ་དང་། །སྟན་དང་སྨྱོན་པར་གྱུར་པ་འོ། །དགེ་སློང་ཞིག་གིས་དགེ་འདུན་ལ་བཏུང་བ་རྩབ་མོ་བྲིམས་པ་དང་། དེར་དགེ་སློང་མང་ཞིག་དུས་ལས་འདས་སོ། །དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་མཛའ་བོ་གཉིས་ཤིག་འཁོད་པ་ལས་གཅིག་ནད་ཀྱིས་བཏབ་སྟེ་ཉལ་ནས། དེས་ནད་གཡོག་ལ་ཚེ་དང་ལྡན་པ་རྩབ་མོ་ཞིག་རྙེད་ན་ནི་ཁོ་བོ་བདེ་བར་འགྱུར་རོ། །ཞེས་སྨྲས་ཏེ། རྒྱས་པར་ནི་འདུལ་བ་ལས་ཇི་སྐད་འབྱུང་བ་བཞིན་ནོ། །བྲམ་ཟེ་ཞིག་གློག་པའི་ནད་ཀྱིས་གཟིར་བ་དང་། དེ་དགེ་སློང་ཞིག་གི་དྲུང་དུ་སོང་སྟེ་འདི་སྐད་དུ་བཙུན་པ་གལ་ཏེ་རྩབ་མོ་ཞིག་རྙེད་ན་ནི་བདེ་བར་འགྱུར་རོ་ཞེས་སྨྲས་པ་དང་། ཁྱོད་བྲམ་ཟེ་ལོག་པར་ལྟ་བ་རྩབ་མོ་ཅིར་དགོས། བཙུན་པ་སྔོན་བདག་ནད་ཀྱིས་བཏབ་པ་ན་ཡང་རྩབ་མོ་ཞིག་འཐུངས་པས་བདག་བདེ་བར་གྱུར་ཏོ། །དགེ་སློང་དེས་རྩབ་མོ་བླུད་པ་དང་། དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་དུར་ཁྲོད་དུ་མི་རོ་ལ་རྟོག་ཏུ་སོང་བ་དང་། དེ་ན་མི་ཞིག་གསལ་ཤིང་ཞིག་བཙུགས་ཤིང་འདུག་པ་དང་། དེས་དགེ་སློང་ལ་བཙུན་པ་དེ་སྟེ་ཁོ་བོ་ལ་རྩབ་མོ་ཞིག་བླུད་ན་ནི་ཁོ་བོ་བདེ་བར་འགྱུར་རོ། །ཞེས་སྨྲས་པ་དང་། དགེ་སློང་དེས་དེ་ལ་རྩབ་མོ་བླུད་ནས་དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །རྐུན་པོ་ལྔ་བརྒྱ་ཞིག་དགེ་སློང་མ་ཞིག་གིས་རྩབ་མོ་བླུད་པ་དང་། དེ་དག་ཀྱང་དུས་ལས་འདས་ཏེ་རྒྱས་པར་ནི་་འདུལ་བ་ལས་ཇི་སྐད་འབྱུང་བ་བཞིན་ནོ། །དགོན་པ་གསར་ཅན་ཞེས་བྱ་བ་ན་གནས་ཁང་སར་པ་ཞིག་རྩིག་པ་ལས་དགེ་སློང་ཞིག་

---

^{[མ་དཔེ་གཟིགས་ན་འདིར་གནོན།]}

གི་ལག་པ་ནས་ཕ་གུ་ཞིག་ལྷུང་བ་དང་། འོག་ན་ལས་བྱེད་པ་ཞིག་འདུག་པ་དེའི་སྟེང་དུ་ལྷུང་ནས་དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། བག་ཡོད་པར་བྱོས་ལ་གྲོགས་གྱིས་ཤིག །དགོན་པ་ལ་དགེ་འདུན་གྱིས་གནས་ཁང་སར་པ་རྩིག་པ་ན་དགེ་སློང་ཞིག་བླ་གབ་མེད་པའི་སྟེང་ན་སོ་ཕག་འཇོག་པའི་ལག་པ་ནས་སྟེའུ་ལྷུང་སྟེ། འོག་ན་རྩི་གུ་མཁན་ལས་བྱེད་པའི་སྟེང་དུ་ལྷུང་ནས་དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། བག་ཡོད་པར་བྱོས་ལ་གྲོགས་གྱིས་ཤིག །དགོན་པར་དགེ་འདུན་གྱི་དུགས་བྱ་བའི་ཁང་པ་ཞིག་རྩིག་སྟེ། དགེ་སློང་དག་གདུང་མ་སྟེང་དུ་འདྲེན་པ་ལས་དགེ་སློང་ཉུང་ལ་ཁུར་ཆེ་ཞིང་ལྕི་བས་དེ་དག་གིས་བཏང་བ་དང་། འོག་ན་ཤིང་མཁན་ཤིང་འཇོག་པའི་སྟེང་དུ་ལྷུང་ནས་དེ་དུས་ལས་འདས་སོ། །དགེ་སློང་དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཉུང་ངུ་མས་ཁུར་ལྕི་བ་མ་འདེགས་ཤིག །སྐས་འདེགས་པའང་དེ་བཞིན་ནོ། །དགོན་པར་དུགས་བྱ་བའི་ཁང་པ་ཞིག་རྩིག་སྟེ། དེ་ན་དགེ་སློང་ཞིག་སེལ་པོའི་ནང་དུ་འཇིམ་པ་སྟེང་དུ་སྐྱེད་པ་ན་ཐག་པ་ངན་ཏེ་ཆད་པས་འོག་ན་རྩིག་གུ་མཁན་ལས་བྱེད་པའི་སྟེང་དུ་འཇིམ་པའི་སེལ་པོ་ལྷུང་ནས་དེ་དུས་ལས་འདས་སོ། །དགེ་སློང་དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་ཀྱིས་བག་ཡོད་པར་བྱོས་ལ་གྲོགས་གྱིས་ཤིག །བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །དགེ་སློང་ཞིག་རིའི་དྲུང་ན་སྐྱིལ་མོ་ཀྲུང་བཅས་ཏེ་འདུག་པ་དང་། དགེ་སློང་ཞིག་གིས་རིའི་རྩེ་མོ་ནས་རྡོ་བ་བསྒྲིལ་བ་དགེ་སློང་དེའི་སྟེང་དུ་ལྷུང་ནས་དགེ་སློང་དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་རྟོགས་ལ་བག་ཡོད་པར་བྱོས་ལ་རྡོ་བསྒྲིལ་བར་བྱའོ། །དགེ་སློང་ཞིག་བ་ལང་གི་ནང་དུ་སོང་བ་དང་། གླང་མི་སྲུན་པ་ཞིག་གིས་བརྡུངས་ནས་ཁྱེའུ་ཞིག་གི་སྟེང་དུ་འགྱེལ་བ་དང་

---

^{[མ་དཔེ་གཟིགས་ན་འདིར་གནོན།]}

ཁྱེའུ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། བག་ཡོད་པར་བྱོས་ལ་བ་ལང་གི་ནང་དུ་སོང་ཤིག །དགེ་སློང་ཞིག་ནད་ཡུན་རིང་པོས་སྒུར་བོར་གྱུར་པ་དང་། དེ་འདི་སྙམ་དུ་བདག་གསོན་ཏེ་ཅི་རུང་གིས་སོང་ལ་བདག་ཉིད་གཡང་ས་ནས་མཆོང་ངོ་སྙམ་དུ་བསམས་ཏེ། དེས་བདག་ཉིད་གཡང་ས་ནས་མཆོངས་པ་དང་། དྲུང་ན་ཝ་མོ་ཞིག་མི་རོ་ལ་ཟ་བ་དེའི་སྟེང་དུ་དགེ་སློང་ལྷུང་ནས་ཝ་མོ་དེ་ནི་དུས་ལས་འདས་སོ། །དགེ་སློང་དེ་ནི་དྲང་པོར་གྱུར་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། དེ་ལྟར་ལུས་ཀྱིས་ལོག་པར་འགྱུར་བ་མ་བྱེད་ཅིག །དགེ་སློང་ནད་པ་ཞིག་སྟན་གྱི་སྟེང་ན་འདུག་པ་ལ་དེའི་ནད་གཡོག་གིས་ཚེ་དང་ལྡན་པ་ལོངས་ཞེས་སྨྲས་པ་དང་། དེས་ཀྱང་ཁོ་བོ་མ་བསླང་ཤིག་ཤིར་འོང་ངོ་ཞེས་སྨྲས་ཀྱང་ཚེ་དང་ལྡན་པ་ལོངས་ཞེས་སྨྲས་ནས། དེ་ལངས་པ་དང་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་གིས་སྨྱོན་པ་ཞིག་ལ་གསོད་སེམས་ཀྱིས་བརྡེགས་ཏེ་དེ་དུས་འདས་ན་ནི་ཕས་ཕམ་པར་འགྱུར་རོ། །དུས་མ་འདས་ན་ནི་ཉེས་པ་སྦོམ་པོར་འགྱུར་རོ། །མདོར་ན། ཡོ་བྱད་མང་དང་མ་ཞུ་དང་། །ཕོལ་མིག་གཉིས་དང་ཟས་མ་ཡིན། །སྨན་དང་ཟས་བཟང་སྤྱོད་ལམ་དང་། །ཉེས་པ་མེད་དེ་གཞན་ཡང་སྦྱར། །དགེ་སློང་ཞིག་ནད་ཡུན་རིང་པོས་གཟིར་ནས་དེའི་ནད་གཡོག་སྐྱོ་སྟེ་དེ་ལ་ཁྱོད་མྱུར་དུ་འཆི་བར་འགྱུར་གྱིས་ནད་གཡོག་མི་བྱའོ་ཞེས་སྨྲས་ཏེ་དེས་ནད་གཡོག་མ་བྱས་པས་དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་སྣོད་སྤྱད་དང་ཡོ་བྱད་མང་བ་ཞིག་ན་བ་དེ་ལ་ཁྱོད་ཀྱི་ནད་གཡོག་མི་བྱའོ། །ཤི་ན་ཡང་དགེ་འདུན་གྱི་བགོ་བ་མང་པོར་འགྱུར་རོ་ཞེས་སྨྲས་ནས། དེས་དེའི་ནད་གཡོག་མ་བྱས་པ་དང་། དེ་དུས་ལས་འདས་སོ། །དགེ་སློང་དེ་

---

^{[མ་དཔེ་གཟིགས་ན་འདིར་གནོན།]}

འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་ཞིག་ཟས་མ་ཞུ་བར་འདུག་པ་དང་། ནད་གཡོག་གིས་རེ་ཞིག་རྐྱོངས་ཤིག་ཞེས་སྨྲས་པ་དང་། དེས་ནད་གཡོག་ལ་ཁོ་བོ་ཤིར་འོང་གིས་མ་བརྐྱང་ཤིག་ཅེས་སྨྲས་པ་དང་། ཚེ་དང་ལྡན་པ་རྐྱོངས་ཤིག་ཅེས་སྨྲས་ནས། དེས་བརྐྱང་བ་དང་། དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་གིས་ཕོལ་མིག་མ་སྨིན་པར་བརྟོལ་ཏེ་དེ་དུས་ལས་འདས་ན་ཉེས་པ་སྦོམ་པོར་འགྱུར་རོ། །སྨིན་པར་བརྟོལ་ན་ཉེས་པ་མེད་དོ། །དགེ་སློང་མས་ཕོལ་མིག་མ་སྨིན་པར་བརྟོལ་ཏེ་དུས་ལས་འདས་ན་ཉེས་པ་སྦོམ་པོར་འགྱུར་རོ། །སྨིན་པར་བརྟོལ་ན་ཉེས་པ་མེད་དོ། །དགེ་སློང་ཞིག་ན་བ་དང་དེ་དང་འཕྲོད་པའི་ཟས་ནི་མ་རྙེད་ནས་དེའི་ནད་གཡོག་གིས་མི་འཕྲོད་་པའི་ཟས་ཤིག་བྱིན་ནས་ཚེ་དང་ལྡན་པ་འདི་ལས་ཅི་ཡོག་པ་ཟོ་ཤིག །དེས་ཟོས་ཏེ་དུས་ལས་འདས་ན་ཉེས་པ་སྦོམ་པོར་འགྱུར་རོ། །དེ་དང་འཕྲོད་པའི་ཟས་ཤིག་བྱིན་པ་ལས་དུས་ལས་འདས་ན་ཉེས་པ་མེད་དོ། །དགེ་སློང་ཞིག་ན་བ་དང་དེ་དང་འཕྲོད་པའི་སྨན་མ་རྙེད་ན་དེའི་ནད་གཡོག་ཀྱང་དེ་བཞིན་ནོ། །དགེ་སློང་ནད་པ་ཞིག་གིས་ནད་གཡོག་ལ་ཚེ་དང་ལྡན་པ་ནད་གཡོག་ཁོ་བོ་གནས་ཁང་ནས་ཕྱིར་ཕྱུང་ཤིག །ཕྱིས་ཤིག །ཁྲུས་ཤིག །ཁོ་བོ་ནང་དུ་ཁྲིད་ཅིག །འདུག་ཏུ་ཆུག་ཅིག་ཅེས་སྨྲས་ནས། འདུག་ཏུ་ཡང་བཅུག །སྙེས་སུ་ཡང་བཅུག་པ་ལས་དུས་ལས་འདས་ན། ཐམས་ཅད་ལའང་ཉེས་པ་མེད་དོ། །མདོར་ན། ཁར་བ་ཕོ་ལོང་ཆུ་རྣམས་དང་། །དགོན་པ་གཉིས་དང་བླ་གཏུན་དང་། །ཁྲོས་པ་ཐལ་མོ་བརྣངས་པ་འོ། །དགེ་སློང་ཞིག་འདུག་པ་ན་ཡུར་ཏེ་དགེ་སློང་གིས་དེ་ལ་ཁར་བས་བསྐྱོད་པ་དང་། དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། དེའི་ཚེ་ན་དེ་ལ་མཚོན་ལྟ་བུ་ཞེས་

---

^{[མ་དཔེ་གཟིགས་ན་འདིར་གནོན།]}

བྱ་བའི་རླུང་བྱུང་ངོ་། །གཞན་ཡང་ཕོ་ལོང་གིས་ཕོག་སྟེ་དུས་ལས་འདས་པ་དང་། གཞན་ཡང་ཆུས་ཕོག་སྟེ་དུས་ལས་འདས་པ་འདི་དག་ཀྱང་དེ་བཞིན་དུ་རྒྱས་པར་བཤད་དོ། །བཅུ་བདུན་སྡེ་རྣམས་ཀྱང་རྒྱས་པར་ནི་རྣམ་པར་འབྱེད་པ་ལས་ཇི་སྐད་འབྱུང་བ་་་བཞིན་ནོ། །ཁྱིམ་བདག་གཞན་ཞིག་གསར་དུ་དད་དེ་དེས་དུས་སར་པའི་འབྲུ་སར་པ་དང་། འབྲས་བུ་སར་པ་དེ་དང་དེ་དག་དགེ་འདུན་ལ་ཕུལ་ཏེ་བདག་ཉིད་ཕྱིས་ཟའོ། །དགོན་པ་པ་གཞན་ཞིག་ཁྱིམ་དེར་སོང་བ་དང་། ཁྱིམ་བདག་དེས་འདི་སྙམ་དུ་ད་ཕྱིན་ཆད་དགེ་འདུན་ལ་མི་དབུལ་བར་དགོན་པ་པ་འདི་ལ་དབུལ་ལོ་སྙམ་བསམས་ནས་དེས་དེ་ལ་བྱིན་ནོ། །དགེ་སློང་དེ་དག་གིས་ཁྱིམ་བདག་དེ་སྔོན་ཆད་ནི་དུས་སར་པའི་འབྲུ་སར་པ་དང་། འབྲས་བུ་སར་པ་དེ་དང་དེ་དག་དགེ་འདུན་ལ་ཕུལ་ནས་ཕྱིས་བདག་ཉིད་ཟ་ན་དེ་ནི་དེས་མ་བྱིན་་་པས་ན་དགེ་སློང་དགོན་པ་པ་ཞིག་ཁྱིམ་དེར་སོང་བ་དེས་བཀག་པར་གྱུར་གྱིས་སོང་ལ་དེ་བོས་ཤིག་ཅེས་སྨྲས་པ་དང་། དེ་དག་གིས་བོས་ནས་དགོན་པ་པ་ཁྱིམ་བདག་དེ་ནི་དུས་སར་པའི་འབྲུ་སར་པ་དང་། འབྲས་བུ་སར་པ་དེ་དང་དེ་དག་དགེ་འདུན་ལ་ཐོག་མར་ཕུལ་ནས་ཕྱིས་བདག་ཉིད་ཟ་ན་ཁྱོད་དེའི་ཁྱིམ་དུ་སོང་ནས་ཁྱོད་ཀྱིས་བཀག་པར་གྱུར་ཏོ་ཞེས་སྨྲས་པ་དང་། བཙུན་པ་མ་བཀག་གོ །མ་བསྒོའོ་ཞེས་སྨྲས་ནས་དེ་དག་གིས་འདི་སྨྲར་མི་བཏུབ་ཀྱིས་ཁྲིད་ལ་དོང་དུ་་ཆུག་ཤིག་ཅེས་སྨྲས་ཏེ། དེ་དག་གིས་དེ་དོང་དུ་བཅུག་པས་དེ་དུས་ལས་འདས་སོ། །དགེ་སློང་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །ཁྱིམ་བདག་གཞན་ཞིག་དགེ་སློང་གི་དགེ་འདུན་དབྱར་གནས་པ་རྣམས་ལ་ཆོས་གོས་་་འབུལ་བ་ལས་དགེ་སློང་དགོན་པ་པ་ཞིག་ཁྱིམ་དེར་འོངས་ནས་ཁྱིམ་བདག་དེ་འདི་སྙམ་དུ་ད་ཕྱིན་ཆད་དགེ་འདུན་ལ་མི་དབུལ་བར་དགོན་པ་པ་འདི་ལ་དབུལ་ལོ་སྙམ་དུ་བསམས་ནས་དེས་དགོན་པ་པ་དེ་ལ་བྱིན་པ་དང་། དགེ་སློང་དེ་དག་འདི་སྙམ་དུ་ཁྱིམ་བདག་དེ་དགེ་སློང་གི་དགེ་འདུན་དབྱར་གནས་པ་རྣམས་ལ་གོས་འབུལ་ན་དགེ་སློང་དགོན་

---

^{[མ་དཔེ་གཟིགས་ན་འདིར་གནོན།]}

པ་པ་ཞིག་དེར་སོང་བ་དེས་བཀག་པར་གྱུར་པ་སྙམ་གྱིས་སོང་ལ་དེ་བོས་ཤིག་ཅེས་སྨྲས་པ་དང་། དེ་དག་གིས་དེ་བོས་ནས་དགོན་པ་པ་ཁྱིམ་བདག་དེ་ནི་དགེ་སློང་གི་དགེ་འདུན་དབྱར་གནས་པ་རྣམས་ལ་གོས་དབུལ་བ་ལས་ད་མི་དབུལ་བ་ནི་ཁྱོད་དེའི་ཁྱིམ་དུ་སོང་ནས་བཀག་པར་མ་་་གྱུར་ཏམ་ཞེས་དྲིས་ན། བཙུན་པ་བདག་གིས་ནི་མ་བཀག་གོ །མ་བསྒོའོ་ཞེས་སྨྲས་པ་དང་། དེ་དག་གིས་འདི་སྨྲར་མི་བཏུབ་ཀྱིས་ཁྲིད་ལ་སྒོ་ལེབ་ཀྱི་བར་དུ་ཚིར་ཅིག་ཅེས་སྨྲས་ནས་དེ་དག་གིས་སྒོ་ལེབ་ཀྱི་བར་དུ་བཙིར་བ་དང་། དེ་དུས་ལས་འདས་སོ། །དགེ་སློང་དེ་དག་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་ཞིག་བསོད་སྙོམས་སྤྱོད་པ་དང་སྒོ་དོག་པ་ཞིག་ན་བླ་གཏུན་ཞིག་བསྒྲེང་ཞིང་འདུག་པ་ལས་དེའི་ཆོས་གོས་ཀྱི་གྲྭས་བསྔོས་པས་ཁྱེའུའི་སྟེང་དུ་་་འགྱེལ་ནས་ཁྱེའུ་དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། བག་ཡོད་པར་བྱོས་ལ་བསོད་སྙོམས་སྤྱོད་ཅིག །བྲམ་ཟེ་ཞིག་གིས་ནང་པར་སྔར་བཀྲ་ཤིས་པ་དང་། ལྟས་བྱས་ནས་ཁྱིམ་གྱི་ནང་ན་འདུག་པ་དང་། དགེ་སློང་ཞིག་ཁྱིམ་དེར་བསོད་སྙོམས་སྤྱོད་པ་ལ་དེ་ཁྲོས་ནས་ཕུལ་བ་དང་། དགེ་སློང་དེ་ཁྱེའུ་ཞིག་གི་སྟེང་དུ་འགྱེལ་ནས་ཁྱེའུ་ཤི་བར་གྱུར་ཏོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཐལ་མོའི་རིག་སྔགས་འདེབས་ཤིང་དེ་ལག་པས་བྱུགས་ཏེ་ཐལ་མོ་ཅིག་བསྣུན་པ་དང་། དེ་དུས་ལས་འདས་སོ། །དགེ་སློང་དེ་དག་འགྱོད་པ་སྐྱེས་ཏེ། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་ནི་མེད་དེ། བག་ཡོད་པར་བྱོས་ལ་ཐལ་་མོ་སྣུན་ཅིག །དགེ་སློང་ཞིག་བརྣངས་ཏེ་ཤི་ལ་ཐུག་པ་དང་དེ་ལ་དགེ་སློང་ཞིག་གིས་ཁུ་ཚུར་ཅིག་བསྣུན་ནས་བརྣངས་པ་དེ་ཁྲག་དང་བཅས་ཏེ་བྱུང་ནས་་་དགེ་སློང་དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ།

---

^{[མ་དཔེ་གཟིགས་ན་འདིར་གནོན།]}

ཕས་ཕམ་པའི་ཉེས་པ་མེད་དེ། ཅི་ནས་ཀྱང་བག་ཡོད་པར་བྱས་ཏེ་བརྣངས་པ་ཡང་བྱུང་བར་གྱུར་ལ་དུས་ལས་ཀྱང་འདས་་་པར་མི་འགྱུར་བ་དེ་ལྟར་བསྣུན་པར་བྱའོ། །མདོར་ན། སྟན་གཉིས་པ་དང་ཕ་གཉིས་དང་། །གཞན་ཡང་བཏང་བ་གཉིས་པ་དང་། །འདྲ་བར་གྱུར་པ་སྤྲེའུ་དང་ནི། །རྐུན་པོ་རྣམས་ལ་བསྡིགས་པ་འོ། །ཚེ་དང་ལྡན་པ་འཆར་ཀ་ནག་པོས་མ་བརྟགས་པར་སྟན་ལ་འདུག་པར་ནི་རྣམ་པར་འབྱེད་པ་ལས་ཇི་སྐད་དུ་རྒྱས་པར་འབྱུང་བ་བཞིན་ནོ། །སྦོམ་མོ་དགའ་ལྡན་མོ་ཡང་དེ་བཞིན་དུ་སྦྱར་རོ། །དགེ་སློང་ཞིག་གིས་ཕ་ལམ་དུ་ཕུལ་ནས་དུས་ལས་འདས་པ་ཡང་རྣམ་པར་འབྱེད་པ་ལས་ཇི་སྐད་འབྱུང་བ་བཞིན་ནོ། །དགེ་སློང་རྒན་ཞུགས་ཕ་སྤད་གཉིས་ཤིག་ལྷན་ཅིག་ཏུ་ཛེ་ཏའི་ཚལ་དུ་དོང་བ་་་ལས་གཙུག་ལག་ཁང་གི་གྲོང་དུ་ཕྱིན་པ་དང་། ཕས་བུ་ལས་འདིར་གཟིག་རྣམས་ཀྱིས་འཇིགས་པར་འགྱུར་གྱི་ནང་དུ་འཁོད་དོ་ཞེས་སྨྲས་པ་དང་། བུས་དེ་ལ་རྒན་ཞུགས་དེང་ཁྱིམ་པ་དང་ལྷན་ཅིག་ཏུ་འཁོད་ན་དེ་དག་དང་བདག་ཅག་ཏུ་བྱེ་བྲག་ཅི་ཡོད་ཅེས་སྨྲས་པ་དང་། བུ་ཁྱོད་ནི་མེལ་ཚེ་བྱོས་ཤིག་ཁོ་བོ་ཉལ་ལོ་ཞེས་སྨྲས་སོ། །དེ་ནས་རྒན་ཞུགས་དེ་ཉལ་བ་དང་། དགེ་སློང་དེ་ཡང་ཉལ་ལོ། །རྒན་ཞུགས་དེ་སྔུར་པ་ཅན་ཞིག་སྟེ། དེའི་སྒྲས་གཟིག་འོངས་ནས་དེས་དེའི་མགོ་བོ་ནས་བཟུང་བ་དང་། དེས་སྒྲ་ཕྱུང་ནས་གཟིག་གིས་བཏང་སྟེ་བྲོས་སོ། །དགེ་སློང་དེས་མེ་མར་བླངས་ནས་བརྟགས་ན་དུས་ལས་འདས་ཏེ་འདི་སྙམ་དུ་དེས་ནང་དུ་འཁོད་དོ་ཞེས་ཟེར་ན་ཡང་བདག་གིས་དེའི་ཚིག་མ་མཉན་པས་གང་ཅུང་ཟད་འདི་དུས་ལས་འདས་པར་གྱུར་པ་དེ་ཐམས་ཅད་ནི་བདག་གིས་ཉེས་སོ་སྙམ་སྟེ། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། མེལ་ཚེ་བྱོས་ཤིག །དགེ་སློང་ཞིག་གིས་གསད་སེམས་ཀྱིས་དགེ་སློང་ཞིག་འཇིགས་པ་དང་བཅས་པའི་གནས་སུ་བཏང་བ་དང་། དེ་དུས་ལས་འདས་ན་ཕས་ཕམ་པར་འགྱུར་རོ། །དུས་ལས་མ་འདས་ན་ཉེས་པ་སྦོམ་པོར་འགྱུར་རོ། །བཅོམ་ལྡན་འདས་གྲོང་ཁྱེར་

---

^{[མ་དཔེ་གཟིགས་ན་འདིར་གནོན།]}

ཡངས་པ་ཅན་ན་བཞུགས་ཏེ། དགེ་སློང་དག་ནགས་ཆེན་པོར་ཉིན་པར་སྤྱོད་དུ་དོང་ངོ་། །དེས་དེར་སྤྲེའུ་ཞིག་བསད་པ་དང་། དགེ་སློང་ཞིག་གིས་ཁྱོད་ལ་ཕས་ཕམ་པའི་ཉེས་པ་བྱུང་ངོ་། །དངོས་པོ་གང་གི་ཕྱིར། མིའི་འཚོ་བ་དང་བྲལ་བ་དང་། མི་དང་འདྲ་བ་འདི་གཉིས་ལ་བྱེ་བྲག་ཅི་ཡོད་ཅེས་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ལྟུང་བར་འགྱུར་རོ། །རྐུན་པོ་བསྡིགས་པ་ཡང་རྒྱས་པར་འདུལ་བ་ལས་ཇི་ལྟར་འབྱུང་བ་བཞིན་ནོ། །མདོར་ན། མགོ་ལྡན་སྔོན་གྱི་སྨན་པ་དང་། །འགེགས་ཏེ་ཤི་བར་གྱུར་པ་དང་། །གྲོང་ཁྱེར་ཡངས་པ་ཅན་གནས་དང་། །འགེག་ཐག་ཆད་དང་བརྒྱུགས་པ་འོ། །མཉན་དུ་ཡོད་པ་ན་ཁྱིམ་བདག་གཞན་ཞིག་ལས་བུ་ཁྱེའུ་ཞིག་བཙས་ཏེ་ཆེན་པོར་གྱུར་པ་དང་། མགོ་བོས་སོ་ཕག་བསྲེགས་པ་ཚོགས་པས་དེའི་མིང་མགོ་ལྡན་དུ་བཏགས་སོ། །དེ་ཇི་ཙམ་ན་རབ་ཏུ་བྱུང་ནས་དེ་དོན་ཅིག་ལ་གྲོང་དུ་ཞུགས་པ་དང་། ཁྱིམ་བདག་གཞན་ཞིག་གི་ཆུང་མ་ཞིག་ཀྱང་ཁྱེའུ་ཞིག་ཁྲིད་དེ་རྗེས་བཞིན་དུ་འོངས་ནས་དེ་ཡང་གློ་གཡས་གཡོན་ལྟ་ཞིང་སོང་ངོ་། །དེ་ལ་ལུག་ཐུག་ཅིག་གིས་སྙོགས་པ་དང་དགེ་སློང་དེས་ཀྱང་མགོ་བོ་བཏུད་དེ་སོང་བ་ལས་དེས་ཀྱང་བདག་ལ་བརྡུངས་པར་ཤེས་ནས་ལུག་ཐུག་དེས་དེ་ལ་བརྡུངས་པ་དང་། དགེ་སློང་དེ་ཁྱེའུའི་སྟེང་དུ་འགྱེལ་ནས་ཁྱེའུ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་ནི་མེད་དེ། དགེ་སློང་སྤྱོད་ལམ་དེ་ལྟ་བུར་མ་འགྲོ་བར་གཉའ་ཤིང་སྲིད་དུ་ལྟོས་ཤིག །སྔོན་སྨན་པ་ལས་རབ་ཏུ་བྱུང་བ་གཞན་ཞིག་གིས་དགེ་སློང་ནད་པ་ཞིག་གི་དྲུང་དུ་འོངས་པ་དང་། དེས་དེ་ལ་གཏར་ཁ་ཐོབ་ཤིག་ཅེས་སྨྲས་ནས། དེས་ཀྱང་དེ་ལ་གཙགས་བུ་ཅིག་བཏབ་སྟེ། གཙགས་བུ་དེ་སླར་ཕྱུང་བ་དང་། དགེ་སློང་དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་ནི་མེད་དེ། ཕྱིན་ཆད་དགེ་སློང་དག་མ་བསླབས་པར་སྨན་དཔྱད་མ་

---

^{[མ་དཔེ་གཟིགས་ན་འདིར་གནོན།]}

བྱེད་ཅིག །དགེ་སློང་ནད་པ་གཞན་ཞིག་ནད་མ་སོས་ནས། དེ་འདི་སྙམ་དུ་བདག་འཚོ་སྟ་ཅི་རུང་གིས་བདག་ཉིད་འཆིའོ་སྙམ་དུ་བསམས་ཏེ། དགེ་སློང་དེས་ནད་གཡོག་ལ་འདི་སྐད་དུ་ཚེ་དང་ལྡན་པ་ཐག་པ་ཞིག་བྱིན་ཅིག་ཅེས་སྨྲས་སོ། །དེས་དེ་ལ་བྱིན་ནས་དེ་འགགས་པ་དང་། དེ་དུས་ལས་འདས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། དགེ་སློང་གིས་བབ་བབ་ཏུ་ནད་པ་ལ་ཐག་པ་མ་སྦྱིན་ཅིག །དགེ་སློང་ཞིག་བསོད་སྙོམས་སྤྱོད་པ་ན་གྲོང་ཁྱེར་ཡངས་པ་ཅན་ན་གནས་པ་དག་ཀྱང་མདའ་དང་། གཞུ་ལག་ན་ཐོགས་པ་འོངས་ནས་དགེ་སློང་དེས་བཞིན་བཟངས་ཁོ་བོ་མ་གསད་པར་འདི་ལ་འཕོངས་ཤིག་ཅེས་སྨྲས་པ་དང་། དེས་མདའ་འཕངས་ནས་དེ་དེར་བསད་དོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། དགེ་སློང་གིས་དེ་སྐད་མ་བསྒོ་ཤིག །དགེ་སློང་ནད་པ་གཞན་ཞིག་ཀྱང་རྒྱས་པར་ནི་སྔ་མ་ཇི་ལྟ་བ་བཞིན་དུ་ཐག་པ་ཁྱེར་ནས་ནགས་ཆེན་པོར་སོང་བ་་་དང་། དེས་དེར་ཤིང་ལ་འཛེགས་ནས་ཐ་གུ་དེས་བཏགས་ཏེ་དེས་ལྐོག་མ་་ཞགས་མིག་ཏུ་བཅུག་ནས་ལུས་མཆོངས་པ་དང་། ཐག་པ་ཆད་ནས་དེའི་འོག་ན་ཁྱི་བུ་བྱུང་བ་ཞིག་འདུག་སྟེ་དེའི་སྟེང་དུ་དགེ་སློང་ལྷུང་བ་དང་། ཁྱི་དེ་བུ་དང་བཅས་ཏེ་དུས་ལས་འདས་ཏེ། དགེ་སློང་དེ་དག་གིས་ཐོས་ནས་རྒྱས་པར་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་སྔ་མ་ནི་ཉེས་པར་འགྱུར་གྱི་ཕྱི་མ་ལ་ཉེས་པ་མེད་དོ། །དགེ་སློང་ལུས་ཀྱིས་འདི་ལྟར་བརྩལ་བ་ནི་མ་བྱེད་ཅིག །བྱས་ན་ཉེས་པ་སྦོམ་པོར་འགྱུར་རོ། །དགེ་སློང་གཞན་ཞིག་གྲོང་དུ་དོན་ཅིག་ཡོད་དེ། དེས་དགེ་སློང་ནད་སོས་ནས་རིང་པོར་མ་ལོན་པ་ཞིག་ཁྲིད་དེ་སོང་བ་དང་། ལམ་དུ་རྐུན་པོས་སྐྲག་ནས་དེས་དེ་ལ་ཚེ་དང་ལྡན་པ་སྐྱེན་པར་འདོང་ཞེས་སྨྲས་པ་དང་། དེས་མི་ནུས་སོ་ཞེས་སྨྲས་ནས། དགེ་སློང་གིས་ཚུར་ཤོག་བཅོམ་མ་རེ་ཞེས་སྨྲས་ནས། དེས་དེ་ལྟར་ཁྲིད་དེ་དེ་ཡང་གྲོང་དུ་ཁྲིད་པ་དང་དུས་ལས་འདས་སོ། །དེ་འདི་

---

^{[མ་དཔེ་གཟིགས་ན་འདིར་གནོན།]}

སྙམ་དུ་དེ་སྟེ་བདག་གིས་དགེ་སློང་དེ་ཁྲིད་དེ་མ་འོངས་ན་ཤི་བར་མི་འགྱུར་རོ་སྙམ་བསམས་ནས་དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཕྱིན་ཆད་དགེ་སློང་གིས་ནད་པ་ཉམ་ཆུང་བར་གྱུར་པ་དེ་ལྟ་བུ་ལམ་དུ་མ་བཀྲི་ཤིག། མདོར་ན། བདེ་ལྡན་འདུ་ཤེས་བསྒོ་བ་དང་། །དགྲ་བཅོམ་བྲམ་ཟེ་དབང་པོ་དང་། །ཆོས་གོས་དག་དང་བསོད་སྙོམས་དང་། །གྲོང་དུ་ཉེར་འགྲོ་རྣམ་པ་གཉིས། །སངས་རྒྱས་བཅོམ་ལྡན་འདས་ཡུལ་བྲཱི་ཛིའི་འོད་མའི་ཚལ་གྱི་གྲོང་ན་བཞུགས་སོ། །ཀླུང་བདེ་ལྡན་གྱི་ངོགས་ན་གནས་པའི་དགེ་སློང་རྣམས་ལ་་་བསླབ་པའི་གནས་མ་བཅས་པས་ལས་དང་པོ་པ་ལ་ཉེས་པ་མེད་དེ། བདག་ཅག་གིས་བསླབ་པའི་གནས་མ་བཅས་པ་ན་མེད་ལ་མེད་བཞིན་དུ་མི་ལས་བླ་མར་གྱུར་པའི་ཆོས་ཤིག་རིགས་མང་པོ་ལ་སྨྲས་ན། བདག་ཅག་གི་ལས་དང་པོ་པ་གང་ཡིན་སྙམ་ནས་དོགས་པ་དང་། འཛེམ་པ་དང་འགྱོད་པ་སྐྱེས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བསླབ་པའི་གནས་མ་བཅས་པ་ན་ཀླུང་བདེ་ལྡན་གྱི་ངོགས་ན་གནས་པའི་དགེ་སློང་རྣམས་ཀྱིས་འདས་པ་དང་བཅས་པ་ནི་ཐམས་ཅད་ལས་དང་པོ་པ་ཡིན་པས། ལས་དང་པོ་པ་ལ་ཉེས་པ་མེད་དོ། །དགེ་སློང་ཞིག་གིས་མི་ལ་མི་མ་ཡིན་པར་འདུ་ཤེས་ཏེ་མེད་ལ་མེད་བཞིན་དུ་མི་་་ལས་བླ་མར་གྱུར་པའི་ཆོས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། མི་ལ་མིར་འདུ་ཤེས་ན་ཕས་ཕམ་པར་་འགྱུར་རོ། །མི་མ་ཡིན་པ་ལ་ཐེ་ཚོམ་ན་ཉེས་པ་སྦོམ་པོར་འགྱུར་རོ། །མི་མ་ཡིན་པ་ལ་མིར་འདུ་ཤེས་ན་ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་ཁྱིམ་བདག་ཅིག་ལ་མེད་ལ་མེད་བཞིན་དུ་མི་ལས་བླ་མར་གྱུར་པའི་ཆོས་སྨྲས་པ་དང་། ཁྱིམ་བདག་དེ་ཡེངས་ནས་བཙུན་པ་ཅི་གསུང་ཞེས་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི་མེད་དེ། ཉེས་པ་སྦོམ་པོར་

---

^{[མ་དཔེ་གཟིགས་ན་འདིར་གནོན།]}

འགྱུར་རོ། །ཁྱིམ་བདག་ཅིག་གིས་དགེ་སློང་ཞིག་ལ་བཙུན་པ་ཁྱོད་དགྲ་བཅོམ་པ་ལགས་ཀྱིས་ཆོས་གོས་དང་། བསོད་སྙོམས་དང་། མལ་སྟན་དང་། ནད་ཀྱི་རྐྱེན་རྩི་དང་། ཡོ་བྱད་ཀྱི་མཆོག་རྣམས་འོས་སོ་ཞེས་སྨྲས་པ་དང་། ཅང་མི་སྨྲ་བས་ཁས་བླངས་པ་ཡིན་ཏེ་ཉེས་པ་སྦོམ་པོར་འགྱུར་རོ། །ཁྱིམ་བདག་ཅིག་གིས་དགེ་སློང་ཞིག་ལ་སྡིག་པ་མེད་པའི་ཆོས་ཚངས་པ་དང་ལྡན་ནམ་ཞེས་སྨྲས་ན་ཅང་མི་སྨྲ་བས་ཁས་བླངས་པ་ཡིན་ཏེ། ཉེས་པ་སྦོམ་པོར་འགྱུར་རོ། །དེ་སྟེ་བཙུན་པ་དགྲ་བཅོམ་པ་ཡིན་ན་བདག་གི་བསོད་སྙོམས་བཞེས་ཤིག་ཅེས་སྨྲས་པ་དང་། དེ་ཅང་མི་སྨྲ་བས་ཁས་བླངས་པ་ཡིན་ཏེ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གཞན་གྱི་གྲོང་དུ་ཉེ་བར་འགྲོ་ཞེས་དེ་སྔ་དྲོའི་དུས་སུ་ཤམ་ཐབས་བགོས་ཏེ་གྲོང་དུ་སོང་བ་དང་། དེ་ལ་ཁྱིམ་བདག་གིས་བཙུན་པ་དེ་སྟེ་དགྲ་བཅོམ་པ་ལགས་ན་ནང་དུ་གཤེགས་ཤིག་ཅེས་སྨྲས་པ་དང་། ཅང་མི་སྨྲ་བར་ནང་དུ་འོངས་ན་ཉེས་པ་སྦོམ་པོར་འགྱུར་རོ། །དེ་བཞིན་དུ་སྟན་ལ་འདུག་ཟན་ལོང་ལ་གསོལ་ཅིག །རྗེས་སུ་ཡི་རང་བ་གྱིས་ཤིག །སླར་བྱུང་ཤིག་ཅེས་སྨྲས་པ་དང་། དེ་ཅང་མི་སྨྲ་ན་ཁས་བླངས་པས་ཉེས་པ་སྦོམ་པོར་འགྱུར་རོ། །དགེ་སློང་ཞིག་གྲོང་གཞན་ཞིག་ན་གྲོང་དུ་ཉེ་བར་འགྲོ་བ་ཡིན་ཏེ། སྔ་དྲོ་ཤམ་ཐབས་བགོས་ནས་གྲོང་དེར་སོང་བ་དང་། ཁྱིམ་བདག་གིས་བཙུན་པ་དེ་སྟེ་དགྲ་བཅོམ་པ་ལགས་ན་ཁྱིམ་གྱི་ནང་དུ་གཤེགས་ཤིག་ཅེས་སྨྲས་པ་དང་། ཁོ་བོ་དགྲ་བཅོམ་པ་ཅུང་ཟད་ཀྱང་མ་ལགས་ན་དེ་སྟེ་ཁྱོད་བཟོད་ན་ནི་ནང་དུ་མཆིའོ་ཞེས་སྨྲས་ན་ཉེས་པ་མེད་དོ། །སྟན་ལ་བཞུགས་བཤོས་དང་སྐྱུ་རུམ་དང་བཅའ་བ་རྣམས་བཞེས་ལ་གསོལ་ཅིག །རྗེས་སུ་ཡི་རང་བར་གྱིས་ཤིག །སླར་བྱུང་ཤིག་ཅེས་སྨྲས་པ་དང་། ཁོ་བོ་ནི་དགྲ་བཅོམ་པ་ཅུང་ཟད་ཀྱང་མ་ལགས་ན་དེ་སྟེ་ཁྱོད་ཀྱིས་བཟོད་ན་ཕྱིར་འབྱུང་ངོ་། །ཞེས་སྨྲས་ན་ཉེས་པ་མེད་དོ། །ཁྱིམ་བདག་གིས་དགེ་སློང་ཞིག་ལ་བཙུན་པ་ཁྱོད་དབང་་པོའི་སྒོ་རྣམས་ནི་ཤིན་ཏུ་བསྡམས་ཤིང་ལེགས་པར་བསྲུངས་པའོ་ཞེས་སྨྲས་པ་དང་། ཅང་མི་སྨྲ་བར་ཁས་བླངས་ན་ཉེས་པ་སྦོམ་པོར་འགྱུར་

---

^{[མ་དཔེ་གཟིགས་ན་འདིར་གནོན།]}

རོ། །སླར་ཕྱུང་ཤིག་ཅེས་སྨྲས་པ་ལས་ཁོ་བོ་དགྲ་བཅོམ་པ་ནི་ཅུང་ཟད་ཀྱང་མ་ལགས་སོ་ཞེས་སྨྲས་ནས་ཕྱིར་བྱུང་ན་ཉེས་པ་མེད་དོ། །མདོར་ན། དྲུག་བྱས་དང་ནི་མངོན་ཤེས་དང་། །མེ་ཡི་ཕུང་པོ་མེད་པ་དང་། །མ་འདའ་གི་ནི་སྒྲ་རྣམས་དང་། །དྲི་ཟ་དང་ནི་ལྷ་མ་ཡིན། །རྫིང་བུ་བརྡུང་དང་འབའ་ལ་ཧ། །དཀའ་ཐུབ་འོག་མ་རྒྱུན་དུ་གཉིས། །འཐབས་པ་གཉིས་དང་ཁྱེའུ་གནས་བདེ་བར་འོངས། །མཛེས་པ་དང་ནི་འདི་གཉིས་དང་། །མདོའི་ཚིགས་སུ་བཅད་པ་གཉིས་པོ་རྒྱས་པར་ཤེས་པར་བྱའོ། །མདོར་ན། འཆར་ཀ་སྦོམ་པོ་ནམ་མཁའ་དང་། །མགོ་ལ་ལག་པ་གཉིས་ཀྱིས་བྱུགས། །སྒྲེ་འུ་དུགས་ཁང་ཁྲུས་ལས་དང་། །གནས་དང་ཚུལ་བཞིན་མ་ཡིན་པའོ། །གླེང་གཞི་ནི་མཉན་དུ་ཡོད་པ་ན་སྟེ། བསླབ་པའི་གནས་མ་བཅས་པ་ལས་དང་པོ་ལ་ཉེས་པ་མེད་པར་གྱུར་པ་ན་ཚེ་དང་ལྡན་པ་འཆར་ཀ་འདི་་་སྙམ་དུ་བདག་གིས་ནི་བསླབ་པའི་གནས་མ་བཅས་པར་ལན་མང་ཞིག་ཏུ་བསམས་བཞིན་དུ་ཁུ་བ་ཕྱུང་ན་བདག་གིས་ལས་དང་པོ་གང་ཡིན་སྙམ་ནས་ཐེ་ཚོམ་དུ་གྱུར་པ་དང་། བཅོམ་ལྡན་འདས་ཀྱིས་བཀའ་སྩལ་པ། བསླབ་པའི་གནས་མ་བཅས་པ་ན་འཆར་ཀས་འདས་པ་དང་བཅས་པ་ནི་ཐམས་ཅད་ཀྱང་ལས་དང་པོ་པ་སྟེ། ལས་དང་པོ་པ་ནི་ཉེས་པ་མེད་དོ། །དགེ་སློང་ཞིག་གིས་སྦུར་བུར་ཕྱུང་ངམ། ནམ་མཁའ་ལ་སྤྱོད་དམ། ནམ་མཁའ་ལ་ཕྱུང་ངམ། ཕོ་མཚན་མནམས་སམ། བཙིར་ཏེ་དགའ་བར་ཚོར་རམ། བཙིར་ཏེ་བཏང་ཕྱུང་ངམ། འཕགས་པ་ལས་བཏང་ངམ། བརྩམས་ནས་སླར་བཏང་ཡང་རུང་སྟེ། ཐམས་ཅད་ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་བརླས་བསྔོས་ཏེ་ཁུ་བ་ཕྱུང་བ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་ལ་བུད་མེད་ཞིག་གིས་ལག་པ་གཉིས་ཀྱིས་རྐང་པ་གཉིས་ལ་ཕྱག་འཚལ་བ་དང་། དེས་ཁུ་བ་ཕྱུང་སྟེ། དགེ་་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །རི་དགས་སྒྲའི་མ་ས་ག་མ་དགེ་སློང་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱི་རྐང་པ་ལ་ཕྱག་འཚལ་ཏེ། དེས་ཚེ་དང་ལྡན་པ་དགའ་བོའི་རྐང་པ་ལ་མགོ་བོས་ཕྱག་འཚལ་བ་དང་། དེས་དེ་ཁུ་བ་ཕྱུང་ནས་རི་དགས་སྒྲའི་མ་ས་ག་མའི་མགོ་བོར་ལྷུང་བ་དང་། དེ་ཕྱོགས་གཅིག་ཏུ་སོང་སྟེ་ལག་པ་གཉིས་མགོ་ལ་བྱུགས་ནས་འདི་སྐད་དུ་ཚངས་པ་མཚུངས་པར་སྤྱོད་པ་དེ་དག་ནི་བཅོམ་ལྡན་འདས་ཀྱི་དྲུང་ན་ཤིན་ཏུ་ཉོན་མོངས་པར་ཚངས་པར་སྤྱད་པ་སྤྱོད་དེ་བདག་གིས་ནི་རྙེད་པ་རབ་ཏུ་རྙེད་དོ་ཞེས་མགུ་བར་བརྗོད་པ་བརྗོད་དོ། །ཚེ་དང་ལྡན་པ་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། སྒྲེའུ་ཆོངས་ཤིག །དགེ་སློང་ཞིག་གིས་སྒྲེའུ་ལ་རེག་སྟེ་ཁུ་བ་ཕྱུང་ངོ་། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་དུགས་ཁང་ན་ལས་བྱེད་པ་ལས་ཁུ་བ་བྱུང་ངོ་། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་གནས་ནས་གནས་སུ་འཆག་པ་ན་དེ་ཁུ་བ་བྱུང་སྟེ། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་ལྷག་མའི་ཉེས་པ་ནི་མེད་ཀྱིས་ཉེས་པ་སྦོམ་པོར་འགྱུར་རོ། །ཚུལ་བཞིན་མ་ཡིན་པ་ཡིད་ལ་བྱེད་པའང་དེ་བཞིན་ནོ། །མདོར་ན། བུད་མེད་རྣམ་པ་ལྔར་བྱས་དང་། །གནོད་པ་ལ་ཡང་རྣམ་པ་ལྔ། །གཟུང་བ་ལ་ཡང་ལྔར་བྱས་ཏེ། །དུར་ཁྲོད་པ་ལ་དྲུག་ཏུ་འོ། །དགེ་སློང་ཞིག་ལ་མ་དང་། སྲིང་མོ་དང་། བུ་མོ་དང་། ཆུང་མ་དང་། མཛའ་ན་མོ་རྣམས་ཀྱིས་འགྲོགས་ནས་རིང་པོར་མ་ལོན་པར་མགུལ་ནས་འཁྱུད་པ་དང་ཁུ་བ་བྱུང་ངོ་། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་གིས་བུད་མེད་མེ་ལས་ཕྱུང་། ཆུ་དང་། གཡང་ས་དང་། མཚོན་དང་། གཅན་གཟན་དང་། མི་མ་ཡིན་པ་རྣམས་ལས་ཐར་བར་བྱས་པ་དང་། དེ་ཁུ་བ་བྱུང་ངོ་། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ལ་བུད་མེད་ཅིག་གིས་རྐང་པས་བཟུང་ངམ། བྱིན་པ་

---

^{[མ་དཔེ་གཟིགས་ན་འདིར་གནོན།]}

དང་། པུས་མོ་དང་། བརླ་དང་། མཛུབ་མོ་རྣམས་ཀྱིས་བཟུང་བ་དང་། དེ་ཁུ་བ་བྱུང་ངོ་། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་གིས་རྣམ་པར་སྔོས་པ་ལས་ཁུ་བ་བྱུང་བ་དང་། བམ་པ་དང་སྦོས་པ་དང་རྣམ་པར་དམར་བ་དང་། རྣམ་པར་ཞིགས་པ་དང་། ཀེང་རུས་ལ་ཁུ་བ་ཕྱུང་ན་ཐམས་ཅད་དགེ་འདུན་གྱི་ལྷག་མར་འགྱུར་རོ། །མདོར་ན། འཕྲུག་པ་འདྲུད་པ་མཛུབ་མོ་དང་། །ཆུ་ལས་སྦྲིད་པར་གྱུར་པ་དང་། །ནང་གི་དགུར་ནི་བྱས་པ་དང་། །སྤྱོད་པ་རྣམ་པ་ཉི་ཤུ་འོ། །དགེ་སློང་ཞིག་གིས་འཕྲུག་པ་ལས་ཁུ་བ་བྱུང་ན་ཉེས་པ་མེད་དོ། །འདྲུད་པའང་དེ་བཞིན་ནོ། །དགེ་སློང་དེས་ཕོ་མཚན་ལས་བཟུང་བ་དང་། ཁུ་བ་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་ཞིག་བསོད་སྙོམས་ལ་སྤྱོད་པ་དེ་ན་ན་ཆུང་གཞོན་ནུ་ཞིག་གདངས་ཏེ་འདུག་་པར་གྱུར་པས་འཕགས་པ་ཚུར་སྤྱོན་ཁོ་མོ་ལ་འདི་དང་འདི་ལྟ་བུ་མཛོད་ཅེས་སྨྲས་ནས་དེས་དེར་མཛུབ་མོ་བཅུག་གོ །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་ཞིག་ཁྲུས་བྱེད་པ་ན་ཕོ་མཚན་ཆུའི་རྒྱུན་དུ་བསྡད་པ་དང་དེ་སྦྲིད་པས་ཁུ་བ་བྱུང་ངོ་། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་མགོ་བོ་དང་། རྣ་བ་དང་། སྣའི་ནང་དུ་ཁུ་བ་ཕྱུང་ན་ཐམས་ཅད་དགེ་འདུན་གྱི་ལྷག་མར་འགྱུར་རོ། །དགེ་སློང་ཞིག་གིས་རྩིབ་ལོགས་དང་། རྒྱབ་དང་། བྲང་དང་། ལྟོ་གཉེར་དང་། སྐྲའི་ནང་དུ་ཁུ་བ་ཕྱུང་ན་ཐམས་ཅད་དགེ་འདུན་གྱི་ལྷག་མར་འགྱུར་རོ། །དགེ་སློང་གིས་ལག་པ་དང་། ཕྲག་པ་དང་། དཔུང་བའི་ནང་དུ་ཁུ་བ་ཕྱུང་ན་ཐམས་ཅད་དགེ་འདུན་གྱི་ལྷག་མར་འགྱུར་རོ། །དགེ་སློང་གིས་རྐེད་པ་དང་། བྱིན་པ་དང་། རྐང་པ་དང་། བརླ་རྣམས་ཀྱི་ནང་དུ་ཁུ་བ་ཕྱུང་ན་ཐམས་ཅད་དགེ་འདུན་གྱི་ལྷག་མར་འགྱུར་རོ། །དགེ་སློང་ཞིག་གིས་ལ་བ་དང་། ཕྱིང་བ་དང་། པར་ཏང་

---

^{[མ་དཔེ་གཟིགས་ན་འདིར་གནོན།]}

དང་། སྔས་རྣམས་སུ་ཁུ་བ་ཕྱུང་ན་ཐམས་ཅད་ཉེས་པ་སྦོམ་པོར་འགྱུར་རོ། །དགེ་སློང་གིས་ཁྲི་དང་། ཁྲིའུ་དང་། ཤིང་སྟན་དང་། ཁྲི་བར་དུ་ཁུ་བ་ཕྱུང་ན་ཐམས་ཅད་ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་བུམ་པ་དང་། བུམ་བུ་དང་། སྐྱོགས་དང་། བུམ་པའི་ནང་དུ་ཁུ་བ་ཕྱུང་ན་ཐམས་ཅད་ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་རྡོ་དང་། ཞལ་ཞལ་བྱས་པ་དང་། ཞལ་ཞལ་བྱས་པའི་ནང་དང་། སྒོ་གཏན་དང་། ཤ་མེར་མེར་པོ་རྣམས་སུ་ཁུ་བ་ཕྱུང་ན་ཐམས་ཅད་ཉེས་པ་སྦོམ་པོར་འགྱུར་རོ། །མདོར་ན། འཆར་ཀ་འདུ་ཤེས་རྐང་པ་ཕྲག་པ་དང་། །མ་དང་སོར་མོ་་མེད་ལས་ཕྱུང་བ་དང་། །རྐང་པ་ལ་སོགས་བཟུང་བ་དང་། །སྔོ་ལ་སོགས་ལས་འཁྱུད་པ་འོ། །ཚེ་དང་ལྡན་པ་འཆར་ཀས་བསླབ་པའི་གནས་མ་བཅས་པ་ན་བདག་གིས་བུད་མེད་མང་པོ་དང་ལྷན་ཅིག་ལུས་ཀྱིས་ཀུན་ཏུ་རེག་པར་གྱུར་ན་དེ་དག་ལ་བདག་གི་ལས་དང་པོ་པ་ནི་གང་ཡིན་སྙམ་དུ་བསམས་པ་དང་། བཅོམ་ལྡན་འདས་ཀྱིས་བཀའ་སྩལ་པ། བསླབ་པའི་གནས་མ་བཅས་པ་ན་འཆར་ཀ་འདས་པ་དང་བཅས་པ་ཐམས་ཅད། ལས་དང་པོ་པ་སྟེ་ལས་དང་པོ་པ་ལ་ཉེས་པ་མེད་དོ། །དགེ་སློང་ཞིག་གིས་ནི་མིའི་བུད་མེད་ལ་མི་མ་ཡིན་པར་འདུ་ཤེས་ཏེ་བཟུང་ངོ་། །དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། མི་ལ་མིར་འདུ་ཤེས་ན་དགེ་འདུན་གྱི་ལྷག་མར་འགྱུར་རོ། །རྒྱས་པར་ནི་རྣམ་པ་བཞིར་ཤེས་པར་བྱའོ། །དགེ་སློང་གིས་བུད་མེད་ཅིག་ལ་རྐང་པས་ཕུལ་ན་ཉེས་བྱས་སུ་འགྱུར་རོ། །བུད་མེད་ཀྱིས་དགེ་སློང་ལ་རྐང་པས་ཕུལ་ན་ཉེས་པ་མེད་དོ། །དགེ་སློང་གིས་བུད་མེད་ལ་ཕྲག་པས་ཕུལ་ན་ཉེས་བྱས་སུ་འགྱུར་རོ། །བུད་མེད་ཀྱིས་དགེ་སློང་ལ་ཕྲག་པས་ཕུལ་ན་ཉེས་པ་མེད་དོ། །དགེ་སློང་ཅིག་གིས་མའི་མགུལ་ནས་འཁྱུད་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་ལ་བུད་མེད་ཀྱིས་སོར་མོས་བཟུང་ངོ་། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་

---

^{[མ་དཔེ་གཟིགས་ན་འདིར་གནོན།]}

སློང་ཞིག་གིས་བུད་མེད་ཅིག་མེ་དང་། ཆུ་དང་། གཡང་ས་དང་། མཚོན་དང་། གཅན་གཟན་དང་། མི་མ་ཡིན་པ་རྣམས་ལས་ཐར་བར་བྱས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ལ་བུད་མེད་ཅིག་གིས་རྐང་པས་བཟུང་། བྱིན་པ་དང་། པུས་མོ་དང་། བརླ་དང་། སོར་མོས་བཟུང་ངོ་། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་གིས་བུད་མེད་ཀྱི་རོ་སྔོན་པོར་གྱུར་པའི་མགུལ་ནས་འཁྱུད། བམ་པ་དང་། རུལ་བ་དང་། རོ་དམར་པོར་གྱུར་པ་དང་། འཐོར་བ་དང་། ཀེང་རུས་རྣམས་ཀྱི་མགུལ་ནས་འཁྱུད་ན་ཐམས་ཅད་ཉེས་པ་སྦོམ་པོར་འགྱུར་རོ། །མདོར་ན། གྲེད་ནས་རྡེག་འཆོས་བུ་མོ་དང་། །མུན་པ་བུད་མེད་ཕྲད་པ་དང་། །བུད་མེད་གཞོན་ནུས་འགྲོང་གདངས་པ། །སྟན་ལྔ་པ་དང་བཅུ་གསུམ་མོ། །བུད་མེད་ཅིག་གྲེད་དེ་རྡེག་འཆོས་པ་དང་། དགེ་སློང་ཞིག་གིས་བསླང་ན་ཉེས་བྱས་སུ་འགྱུར་རོ། །དགེ་སློང་གྲེད་དེ་རྡེག་འཆོས་པ་ལས་བུད་མེད་ཅིག་གིས་བསླང་ན་ཉེས་པ་མེད་དོ། །དགེ་སློང་རྒན་པོ་ཞིག་བུ་མོ་ལ་ལྟར་སོང་ནས་བུ་མོ་དེའི་པང་པར་འདུག་གོ །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་ནམ་ཕྱེད་ན་་གཅིན་གཅི་ཞིང་འདུག་པ་དང་། བུད་མེད་ཅིག་ཀྱང་ཕྱིར་བྱུང་སྟེ་འོང་བ་དང་། མུན་པའི་ནང་དུ་གདོང་ཐུགས་སུ་ཕྲད་དེ་དེ་རྡེག་འཆོས་ནས་དེའི་སྟེང་དུ་འགྱེལ་ཏོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་གྲོང་དུ་བསོད་སྙོམས་ལ་ཞུགས་པ་དང་། ན་ཆུང་གཞོན་ནུ་མ་ཞིག་འགྲོང་གདངས་ཏེ་འདུག་ནས་དེས་འཕགས་པ་ཚུར་སྤྱོན་འདི་དང་འདི་མཛོད་ཅིག་ཅེས་སྨྲས་པ་་་དང་། དེས་དེར་བང་བ་བཅུག །བསོད་སྙོམས་བཅུག་པས་བཙངས། ཁར་བས་བཙོགས་ཤིང་རྡེག་ན་ཐམས་ཅད་ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་བུད་མེད་ལ་ཆོས་བཤད་

---

^{[མ་དཔེ་གཟིགས་ན་འདིར་གནོན།]}

པ་དང་། དེས་དེའི་སྟན་རྐང་པ་དང་། བརླ་དང་། བྱིན་པ་དང་། རྐེད་པ་དང་། རྩིབ་ལོགས་དང་། རྒྱབ་དང་། ལག་པ་དང་། ཕྲག་པ་དང་། མགོ་རྣམས་ཀྱིས་ཕུལ་ན་ཐམས་ཅད་ཉེས་བྱས་སུ་འགྱུར་རོ། །མདོར་ན། འཆར་ཀ་བདེ་དང་འདུ་ཤེས་དང་། །བུང་བུ་གནས་ངན་ལེན་པ་དང་། །སྲིང་མོ་སྤྱོད་པ་ངན་པར་བཅས། །ཁོ་བོས་མཐོང་དང་ཁྱོད་ཀྱི་མདུན། །དེ་དང་དེ་སྟེ་དེ་ཡིད་མགུ། །བསླབ་པའི་གནས་མ་བཅས་པ་ལས་དང་པོ་ལ་ཉེས་པ་མེད་པ་ན། ཚེ་དང་ལྡན་པ་འཆར་ཀས་འདི་ལྟར་བདག་གིས་བུད་མེད་མང་ཞིག་ལ་གནས་ངན་ལེན་གྱི་ཚིག་སྨྲས་ན། བདག་གི་ལས་དང་པོ་གང་ཡིན་སྙམ་ནས་ཐེ་ཚོམ་དུ་གྱུར་པ་ནི་རྒྱས་པར་རོ། །དེས་དེ་ལྟར་གྱུར་པ་དགེ་སློང་རྣམས་ལ་སྨྲས་པ་དང་། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། བསླབ་པའི་གནས་མ་བཅས་པ་ན་འཆར་ཀ་འདས་པ་དང་བཅས་པ་ནི་ཐམས་ཅད་ལས་དང་པོ་པ་སྟེ། ལས་དང་པོ་པ་ལ་ནི་ཉེས་པ་མེད་དོ། །དགེ་སློང་ཞིག་གིས་མིའི་བུད་མེད་ལ་མི་མ་ཡིན་པར་འདུ་ཤེས་ཏེ་གནས་ངན་ལེན་གྱི་ཚིག་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། མི་ལ་མིར་འདུ་ཤེས་ན་ནི་དགེ་འདུན་གྱི་ལྷག་མར་འགྱུར་རོ། །རྒྱས་པར་ནི་དྲི་བར་བྱའོ། །རྫུ་འཕྲུལ་དང་ཆོ་འཕྲུལ་གྱི་ཆོས་སུ་སྨྲ་ན་ནི་ཉེས་པ་སྦོམ་པོར་འགྱུར་རོ། །ཆོ་འཕྲུལ་མེད་པའི་ཆོས་སུ་སྨྲ་ན་ནི་དགེ་འདུན་གྱི་ལྷག་མར་འགྱུར་རོ། །དགེ་སློང་ཞིག་བུད་མེད་ཅིག་གི་དྲུང་དུ་སོང་ནས་འདི་སྐད་དུ་སྲིང་མོ་རྒྱ་རྣ་རུ་ཞིག་བྱིན་ཅིག་ཅེས་སྨྲས་པ་དང་། འཕགས་པ་ཁྱོད་ལ་རྒྱ་རྣ་རུ་ཅི་ཞིག་བགྱི། མོས་གོ་ནས་འཕགས་པ་རྒྱ་རྣ་རུ་སྟ་གོན་བགྱིས་ལགས་སོ། །ཞེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གྲོང་དུ་བསོད་སྙོམས་ལ་སྤྱོད་པ་ན་བུད་མེད་ཅིག་འགྲོང་གདངས་ཏེ་འདུག་ནས་འཕགས་པ་འདི་བཞིན་མཛོད་ཅེས་སྨྲས་པ་དང་། ཁྱོད་ཀྱི་ལུས་སྐལ་བ་འདི་ལྟ་བུ་

---

^{[མ་དཔེ་གཟིགས་ན་འདིར་གནོན།]}

དང་མཐུན་པས་བོང་བུ་དང་འདི་ལྟར་འདི་བཞིན་བྱོས་ཤིག །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ལྷག་མའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་ཞིག་རང་བཞིན་གྱིས་གནས་ངན་ལེན་གྱི་ཚིག་སྨྲ་བ་ཞིག་སྟེ། དེས་བུད་མེད་ཅིག་ལ་གནས་ངན་ལེན་གྱི་ཚིག་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ལྷག་མའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་མ་ཞིག་ནང་པར་སྔར་ལངས་ཏེ། ཁྲུས་བྱས་མིག་སྨན་གྱིས་བསྐུས། མགོ་བཤད་དེ་ཆོས་གོས་རྙིང་ཆགས་བྱས་པ་གྱོན་ནས་མཉན་དུ་ཡོད་པར་སོང་བ་དང་། དགེ་སློང་ཞིག་བསོད་སྙོམས་སྤྱོད་པ་དེས་དེ་མཐོང་ནས་དེས་སྲིང་མོ་ཁྱོད་སྐྱེས་པ་ལ་སྟེག་ཅིང་སྤྱད་པ་སྤྱོད་དོ་ཞེས་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་རྒན་པོ་ཞིག་བུ་མོ་ལྟར་སོང་བ་དང་། དེའི་བུ་མོ་ལོག་པར་སྤྱོད་པ་ཞིག་སྟེ། དེས་བུ་མོ་འདི་ལྟར་ཁྱིམ་གཉིས་འཇིག་པར་མ་བྱེད་ཅིག །དེས་མི་ཐུབ་པ་ན་ཇི་ལྟར་བགྱི་ཞེས་སྨྲས་པ་དང་། དེ་སྟེ་མི་ཐུབ་ན་དེར་མགལ་དུམ་ཆུག་ཤིག་ཅེས་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ལྷག་མའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གྲོང་གཞན་དུ་་གྲོང་དུ་ཉེ་བར་འགྲོ་བ་ཡིན་ཏེ། དེ་སྔ་དྲོ་ཤམ་ཐབས་བགོས་ནས་གྲོང་དེར་སོང་བ་དང་། དེས་ཁྱིམ་བདག་དེའི་ཆུང་མ་ལ་སྲིང་མོ་ཁོ་བོ་ལ་བྱིན་ཅིག་ཅེས་སྨྲས་པ་དང་། འཕགས་པ་ཁྱོད་ལ་ཅི་གསོལ། སྲིང་མོ་ཁོ་བོ་ལ་དེ་བྱིན་ཅིག་ཅེས་སྨྲས་པ་དང་། མོས་གོ་སྟེ་འཕགས་པ་སྟ་གོན་བགྱིས་སོ་ཞེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །སྲིང་མོ་ཁྱོད་ལ་གང་མཐོང་བའོ། །འཕགས་པ་བདག་ལ་ཅི་ཞིག་གཟིགས། སྲིང་མོ་ཁྱོད་ལ་གང་མཐོང་བ་དེ་བྱིན་ཅིག །མོས་གོ་ནས་འཕགས་པ་སྟ་གོན་བགྱིས་སོ་

---

^{[མ་དཔེ་གཟིགས་ན་འདིར་གནོན།]}

ཞེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །སྲིང་མོ་ཁྱོད་ཀྱི་མདུན་ན་ཅི་ཡིན་པ་དེ་བྱིན་བཙུན་པ་བདག་གི་མདུན་ན་ཅི་མཆིས། སྲིང་མོ་ཁྱོད་ཀྱི་མདུན་ན་གང་ཡོད་པ་དེ་བྱིན་ཅིག །མོས་གོ་ནས་འཕགས་པ་སྟ་གོན་བགྱིའོ་ཞེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གྲོང་གཞན་དུ་གྲོང་དུ་ཉེ་བར་འགྲོ་བ་ཡིན་ཏེ། དེ་སྔ་དྲོ་ཤམ་ཐབས་དང་ཆོས་གོས་བགོས་ནས་ལྷུང་བཟེད་ཁྱེར་ཏེ་གྲོང་དེར་སོང་བ་དང་། ཁྱིམ་པ་དེའི་ཆུང་མ་དེ་ལ་སྲིང་མོ་ཁྱོད་ཀྱིས་ཡིད་དུ་འོང་བ་་གང་ཡིན་པ་དེ་བྱིན་ཅིག་ཅེས་སྨྲས་པ་དང་། འཕགས་པ་བདག་ལ་ཡིད་དུ་འོང་བ་ཅི་ཞིག་མཆིས། སྲིང་མོ་ཁྱོད་ཀྱི་ཡིད་དུ་འོང་བ་གང་ཡིན་པ་དེ་བྱིན་ཅིག །མོས་གོ་ནས་འཕགས་པ་སྟ་གོན་བགྱིའོ་ཞེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ལྷག་མའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ།། །།འདུལ་བ་གཞུང་དམ་པ། བམ་པོ་ཉི་ཤུ་ལྔ་པ། མདོར་ན། དགའ་དང་ཡིད་དུ་འོང་བ་དང་། །ཆུ་དང་བཅའ་བ་རྣམས་དང་ཡང་། །ཐུག་པ་དག་དང་བཟའ་བའི་རྣམས། །སྨྲས་པ་དག་ཀྱང་དེ་བཞིན་ནོ། །དགེ་སློང་ཞིག་གྲོང་གཞན་ཞིག་ཏུ་གྲོང་དུ་ཉེ་བར་འགྲོ་བ་ཡིན་ཏེ། ཁྱིམ་བདག་དེས་ཆུང་མ་ལ་དགེ་སློང་དེ་ཅི་དགའ་བ་བྱིན་ཅིག་ཅེས་སྨྲས་ཏེ་སོང་ངོ་། །དགེ་སློང་དེའང་སྔ་དྲོ་ཤམ་ཐབས་དང་ཆོས་གོས་བགོས་ནས་ལྷུང་བཟེད་ཁྱེར་ཏེ་ཁྱིམ་དེར་སོང་བ་དང་། བུད་མེད་དེས་བཙུན་པ་ཁྱིམ་བདག་གི་མཆིད་ནས་དགེ་སློང་དེ་ཅི་དགྱེས་པ་སྩོལ་ཅིག་ཅེས་མཆི་ན། འཕགས་པ་ཁྱོད་ཅི་དགྱེས། སྲིང་མོ་བདག་ནི་ཁྱོད་ཉིད་ལ་དགའོ་ཞེས་སྨྲས་པ་དང་། མོས་ཀྱང་གོ་ནས་འཕགས་པ་སྟ་གོན་བགྱིའོ་ཞེས་སྨྲས་སོ། །དགེ་སློང་དེ་བདག་ལ་དགེ་འདུན་གྱི་ལྷག་མའི་ཉེས་པ་མ་བྱུང་གྲང་སྙམ་དུ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་

---

^{[མ་དཔེ་གཟིགས་ན་འདིར་གནོན།]}

ལྷག་མའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །ཡིད་དུ་འོང་ངོ་ཞེས་བྱ་བའང་དེ་བཞིན་ནོ། །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེ་སྔ་དྲོ་ཤམ་ཐབས་བགོས་ནས་གྲོང་དེར་སོང་བ་དང་། ཁྱིམ་བདག་དེའི་ཆུང་མ་ལ་སྲིང་མོ་བདག་ལ་ཆུ་ལུད་ཅིག་ཅེས་སྨྲས་པ་དང་། བཙུན་པ་ཆབ་བཅུས་ཏེ་མཆིས་གཞེས་ཤིག །སྲིང་མོ་ཁྱོད་ཉིད་ཆུ་ཡིན་ནོ་ཞེས་སྨྲས་པ་དང་། མོས་ཀྱང་གོ་ནས་འཕགས་པ་སྟ་གོན་བགྱིའོ་ཞེས་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །སྲིང་མོ་བདག་ལ་བཅའ་བ་བྱིན་ཅིག །བཙུན་པ་ཆོས་ཀྱི་བར་དུ་གཞེས་ཤིག །སྲིང་མོ་བདག་གི་བཅའ་བ་ཁྱོད་ཉིད་ཡིན་ནོ། །དེས་འཕགས་པ་སྟ་གོན་བགྱིའོ་ཞེས་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །སྲིང་མོ་བདག་ལ་ཐུག་པ་བྱིན་ཅིག །བཙུན་པ་བསྒྲལ་གྱི་བར་དུ་གཞེས་ཤིག །སྲིང་མོ་ཁྱོད་ཉིད་ཁོ་བོའི་ཐུག་པའོ། །དེས་འཕགས་པ་སྟ་གོན་བགྱིའོ་ཞེས་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེ་སྔ་དྲོ་ཤམ་ཐབས་བགོས་ཏེ་གྲོང་དེར་སོང་ནས། དེས་ཁྱིམ་བདག་གི་ཆུང་མ་དེ་ལ་སྲིང་མོ་བདག་ལ་ཟན་བྱིན་ཅིག་ཅེས་སྨྲས་པ་དང་། འཕགས་པ་བསྒྲལ་གྱི་བར་དུ་གཞེས་ཤིག །སྲིང་མོ་ཁྱོད་ཉིད་བདག་གི་ཟན་ནོ། །དེས་གོ་ནས་འཕགས་པ་སྟ་གོན་བགྱིའོ་ཞེས་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་བུད་མེད་ལ་གནས་ངན་ལེན་གྱི་ཚིག་སྨྲས་ན། དེ་མ་གོ་ནས་མོས་བཙུན་པ་དེ་ཇི་སྐད་གསུང་ཞེས་དྲིས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ལྷག་མའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །མདོར་ན། རི་དགས་བུ་དང་

---

^{[མ་དཔེ་གཟིགས་ན་འདིར་གནོན།]}

སྤྲིང་བ་དང་། །མིང་དང་འཕགས་པ་ཆུང་མ་གསུམ། །སྨད་འཚོང་གཉིས་དང་བུད་མེད་དང་། །གཞོན་ནུ་སྐྱེས་པ་ཁུ་ཚུར་རོ། །སངས་རྒྱས་བཅོམ་ལྡན་འདས་ཛེ་ཏའི་ཚལ་མགོན་མེད་པ་ལ་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བསླབ་པའི་གནས་མ་བཅས་ཏེ་ལས་དང་པོ་པ་ལ་ཉེས་པ་མེད་པ་ནི་རི་དགས་ལྟ་བུའི་བུ་ནག་པོ་དེ་འདི་སྙམ་དུ་བསླབ་པའི་་་གནས་མ་བཅས་པར་བདག་གིས་རིགས་མང་ཞིག་ལ་སྨྱན་བྱས་ན་བདག་གི་ལས་དང་པོ་གང་ཡིན་ཞེས་སེམས་ལ་ཐེ་ཚོམ་དང་དོགས་པ་དང་འགྱོད་པ་སྐྱེས་ནས། དེས་དེ་ལྟར་གྱུར་པ་དགེ་སློང་རྣམས་ལ་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། བསླབ་པའི་གནས་མ་བཅས་པ་ན་རི་དགས་ལྟ་་བུའི་བུ་ནག་པོས་འདས་པ་དང་བཅས་པ་ཐམས་ཅད་ལས་དང་པོ་པ་སྟེ་ལས་་་དང་པོ་པ་ལ་ཉེས་པ་མེད་དོ། །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེ་གྲོང་དེར་སོང་བ་དང་། ཁྱིམ་བདག་དེས་སྨྲས་པ། འཕགས་པ་བུད་མེད་འདི་ཞེས་བགྱི་བ་ལ་ཚུར་ཤོག་ཤིག་ཅེས་བགྱི་བར་སྤྱོད་དམ། དེ་ན་རེ་ནུས་ཏེ་ལན་སླར་སྐྱེལ་མ་ནུས་སོ་ཞེས་སྨྲས་པ་དང་། འོ་ན་དྲན་ཏེ་གྲུབ་པར་ཇི་ལྟར་ཤེས་པར་བྱ། གནས་འདི་ཞེས་བྱ་བར་དགེ་སློང་ཞིག་གཞག་གོ །དགེ་སློང་དེ་ཁྱིམ་གཞན་ཞིག་ཏུ་བཏང་སྟེ། དགེ་སློང་དེ་ཡང་སླར་བྱུང་བ་མཐོང་ནས། དེས་དེ་ལ་ཚེ་དང་ལྡན་པ་སྐད་ཅིག་འདི་ན་འདུག་ཤིག་ཅེས་སྨྲས་པ་དང་། དེ་གནས་དེར་འདུག་ནས་ཁྱིམ་བདག་དེ་ཕྱིར་བྱུང་སྟེ། དགེ་སློང་དེ་ལ་བཙུན་པ་ལེགས་སོ་ལེགས་སོ་ཞེས་བྱ་བའི་དོན་དེ་གྲུབ་མོད་ཅེས་སྨྲས་པ་དང་། དེ་ཅི་ཞིག་བརྡའོ་ཞེས་སྨྲས་སོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་གྲོང་གཞན་ཞིག་ཏུ་གྲོང་དུ་ཉེ་བར་འགྲོ་བ་ཡིན་ཏེ། དེ་གྲོང་དེར་ཕྱིན་པ་དང་། ཁྱིམ་བདག་དེས་སྨྲས་པ། དགེ་སློང་དེ་ལ་འཕགས་པ་བུད་མེད་འདི་ཞེས་བགྱི་བ་ལ་འདི་ལྟར་ཚུར་ཤོག་ཅེས་ཕྲིན་བགྱི་བར་སྤྱོད་དམ། དེས་ནུས་སོ་ཞེས་སྨྲས་ནས་སོང་སྟེ་བསྒོ་བ་དང་། བུད་མེད་དེས་བཙུན་པ་ཁོ་

---

^{[མ་དཔེ་གཟིགས་ན་འདིར་གནོན།]}

མོ་ནི་མི་འཚལ་ཏོ་ཞེས་ནས་དེ་དག་གི་དོན་དེ་མ་གྲུབ་བོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ལྷག་མའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །ཁྱིམ་བདག་ཅིག་གི་ཆུང་མས་ཉེས་པ་ཅུང་ཟད་ཅིག་བྱས་ཏེ། དེས་དེ་ལ་རྡོག་པས་བརྡེགས་ནས་བསྐྲད་པ་དང་། དེ་ན་ཡང་དགེ་སློང་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེས་དེ་གཉིས་བསྡུམས་ནས་དེ་གཉིས་དུམ་པར་གྱུར་ཏོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་རྡོ་གསུམ་བོར་བའམ་ཤགས་བཀྱེ་སྟེ་ཆུང་མ་མ་ཡིན་པར་བསྒྲགས་པ་དེ་དག་གིས་སྨྱན་བྱས་ན་ཉེས་པ་སྦོམ་པོར་འགྱུར་རོ། །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེ་གྲོང་དེར་ཕྱིན་པ་དང་། ཁྱིམ་བདག་དེས་སྨྲས་པ། འཕགས་པ་སྨད་འཚོང་མ་འདི་ཞེས་བགྱི་བ་ལ་ཚུར་ཤོག་ཤིག་ཅེས་ཕྲིན་བགྱི་བར་སྤྱོད་དམ། དེས་ནུས་སོ་ཞེས་སྨྲས་ནས་དེར་སོང་སྟེ་མོ་ལ་བསྒོ་བ་དང་། དེ་འདི་སྙམ་དུ་ཕ་གིར་ཉལ་དུ་མི་ཁོམ་གྱིས་ང་ཉལ་ལོ་སྙམ་དུ་བསམས་ནས་དེ་ཉལ་བ་ལས་ནམ་ལངས་ནས་དེ་་་གཉིས་ཀྱི་དོན་དེ་མ་གྲུབ་བོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ལྷག་མའི་ཉེས་པ་ནི་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེ་གྲོང་དེར་ཕྱིན་པ་དང་། ཁྱིམ་བདག་དེས་སྨྲས་པ། བཙུན་པ་སྨད་འཚོང་མ་འདི་ཞེས་བགྱི་བ་ལ་ཚུར་ཤོག་ཅེས་ཕྲིན་བགྱི་བར་སྤྱོད་དམ། དེས་ནུས་སོ་ཞེས་སྨྲས་ནས་དེ་སོང་སྟེ་བསྒོ་བ་དང་། མོ་ཡང་འོང་བ་ལས་བར་དུ་གཞན་གྱིས་ཕྲོགས་ནས་དེ་གཉིས་ཀྱི་དོན་དེ་མ་གྲུབ་བོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེ་གྲོང་དེར་ཕྱིན་པ་དང་། ཁྱིམ་བདག་དེས་སྨྲས་པ། འཕགས་པ་བུད་མེད་འདི་ཞེས་བགྱི་བ་ལ་ཕྲིན་འདི་སྐད་བགྱི་བར་སྤྱོད་དམ། དེས་ནུས་སོ་ཞེས་

---

^{[མ་དཔེ་གཟིགས་ན་འདིར་གནོན།]}

སྨྲས་ཏེ་སོང་ནས་དེ་ལ་བསྒོ་བ་དང་། དེ་ཡང་རྒྱན་ཐོགས་ཏེ་ཆས་མ་ཐག་ཏུ་ཁྱོ་འོངས་ནས་དེ་གཉིས་ཀྱི་དོན་མ་གྲུབ་པོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །ཁྱིམ་བདག་གཉིས་ཤིག་མཛའ་སྟེ་དེ་གཉིས་གྱི་ཆུང་མ་སྦྲུམ་པར་གྱུར་པ་དང་། དེ་སྟེ་ཁྱོད་ལས་བུ་མོ་ཞིག་བཙས་ཏེ་ཁོ་བོ་ལས་ཁྱེའུ་ཞིག་བཙས་ན་ཁྱོད་ཀྱི་བུ་མོ་ཁོ་བོའི་ཁྱེའུ་ལ་་བྱིན་ཅིག །འོན་ཏེ་ཁོ་བོའི་བུ་མོ་ལ་ཁྱོད་ཀྱི་ཁྱེའུ་བཙས་ན་ནི་ཁྱོད་ཀྱི་ཁྱེའུ་ལ་སྦྱིན་ནོ། །དེ་ནས་གཅིག་ལ་ནི་ཁྱེའུ་ཞིག་བཙས། གཅིག་ལ་ནི་བུ་མོ་ཞིག་བཙས་པ་དང་ཁྱིམ་བདག་དེ་དུས་ལས་འདས་སོ། །དེ་དུས་ལས་འདས་པས་ཁྱིམ་སྲིད་ཀྱང་དམས་པར་གྱུར་ཏེ། ཁྱིམ་བདག་དེས་བུ་མོ་མི་སྦྱིན་ནོ་སྙམ་དུ་བསམས་པ་དང་། ཁྱེའུ་དེས་ཐོས་ནས་དེ་ན་དགེ་སློང་ཞིག་གྲོང་གཞན་དུ་ཉེ་བར་འགྲོ་བ་ཡིན་ཏེ། གྲོང་དེར་ཕྱིན་པ་དང་། དེ་ལ་ཁྱེའུས་སྨྲས་པ། འཕགས་པ་བུ་མོ་འདི་ཞེས་བགྱི་བ་ལ་ཁྱོད་བདག་གི་མ་དང་ཕ་གཉིས་ཀྱིས་མ་་་བཙས་པར་བདག་ལ་བྱིན་ན་བདག་ཀྱང་ལས་སྨིན་པས་ལོངས་སྤྱོད་དམས་པར་་་གྱུར་ཏེ། ལོངས་སྤྱོད་ལྟ་ད་རུང་ཡང་རྙེད་པར་འགྱུར་གྱིས་ད་ཡང་ཁོ་བོ་མ་་བཏང་ཤིག་ཅེས་ཕྲིན་བགྱི་བར་སྤྱོད་དམ། དེས་ནུས་སོ་ཞེས་སྨྲས་ནས་དེ་སོང་སྟེ་བསྒོ་བ་དང་། བུ་མོ་དེ་མ་དང་ཕའི་དྲུང་ནས་བྲོས་ཏེ་དེའི་དྲུང་དུ་སོང་ནས་དེ་གཉིས་འདུས་པར་གྱུར་ཏོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ལྷག་མའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །ཁྱིམ་བདག་ཅིག་གིས་བུད་མེད་ལ་ཁོ་མོ་ལ་འདི་བདག་གི་སྐབས་ཕྱེ་ཤིག་ཅེས་སྨྲས་པ་ན། དེས་བདག་མི་ཁོམ་མོ་ཞེས་སྨྲས་པ་དང་། ཁྱོད་ཇི་ཙམ་ན་ཁོམ་པ་བདག་གིས་ཇི་ལྟར་རྟོགས་པར་བྱ། ཁོ་མོ་ལ་གྲོང་དུ་ཉེ་བར་འགྲོ་བའི་དགེ་སློང་ཞིག་ཡོད་ཀྱིས་དེར་རྒྱབ་ཏུ་ཁུ་ཚུར་ཅིག་བརྒྱབ་པ་ན་ཤེས་པར་མཛོད་ཅིག །དགེ་སློང་དེ་ཡང་གྲོང་དེར་འོངས་པ་དང་། བུད་མེད་དེས་སྨྲས་པ། འཕགས་པ་ཁྱིམ་བདག་འདི་ཞེས་བགྱི་བའི་རྒྱབ་ཏུ་ཁུ་ཚུར་ཅིག་མཛད་པར་སྤྱོད་དམ། དེས་ནུས་སོ་ཞེས་སྨྲས་ཏེ་སོང་

---

^{[མ་དཔེ་གཟིགས་ན་འདིར་གནོན།]}

ནས་ཁྱིམ་བདག་དེའི་རྒྱབ་ཏུ་ཁུ་ཚུར་ཅིག་བརྒྱབ་པ་དང་། དེ་བཙུན་པ་དོན་གྲུབ་ཀྱིས་ལེགས་སོ་ལེགས་སོ་ཞེས་སྨྲས་པ་དང་། འདི་ནི་ཅི་ཞིག །དེ་ནི་བརྡའོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ལྷག་མའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །མདོར་ན། གྲོང་དུ་ཉེར་འགྲོ་རྣམ་གཉིས་དང་། །གཞན་ཡང་དགེ་འདུན་རྣམས་ཀྱི་གཉིས། །གོས་དང་ནད་པར་གྱུར་པ་དང་། །གཞོན་ནུ་མ་དང་རྣམ་པ་ལྔ། །དགེ་སློང་ཞིག་གྲོང་གཞན་གྱི་གྲོང་དུ་ཉེ་བར་འགྲོ་བ་ཡིན་ཏེ། དེ་གྲོང་དེར་ཕྱིན་ནས་བུད་མེད་དེས་སྨྲས་པ། འཕགས་པ་ཁྱིམ་བདག་འདི་ཞེས་བྱ་བ་ལ་ཚུར་སྤྱོན་ཞེས་ཕྲིན་བགྱི་བར་སྤྱོད་དམ། དེ་སྟེ་དགེ་འདུན་ལ་བཤོས་སྦྱོར་ནུས་ན་ནི་ནུས་སོ་ཞེས་སྨྲས་པ་དང་། དེས་རྒྱུ་སྦྱིན་ནས་དགེ་སློང་དེས་བཤོས་སྦྱར་ཏེ་ཁྱིམ་བདག་དེ་བོས་པ་དང་། དེ་གཉིས་ཕྲད་པར་གྱུར་ཏོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ལྷག་མའི་ཉེས་པ་ནི་མེད་དེ་ཉེས་པ་སྦོམ་པོར་འགྱུར་རོ། །དེ་ལྟར་ཁྱིམ་བདག་ལ་ཡང་དེ་བཞིན་ནོ། །ཁྱིམ་བདག་གི་ཆུང་མ་གཟུགས་ལེགས་ལ་སྡུག་ཅིང་མཛེས་པ་ཞིག་གཞོངས་གྱད་གནས་ཞེས་བྱ་བའི་བློན་པོ་ཆེན་པོ་གཞན་ཞིག་གིས་བཏུས་ཏེ། དེས་དེ་ལ་ཕྲིན་པ་དུ་མར་བཏང་ཡང་བུད་མེད་དེ་མ་བཏུབ་ནས་ཁྱིམ་བདག་དེ་དུས་ལས་འདས་སོ། །དེ་དུས་ལས་འདས་ནས་ཉེས་པ་ཅུང་ཟད་ཅིག་གི་ཕྱིར་བློན་པོ་ཆེན་པོ་དེས་དེ་ཅི་ནས་ཀྱང་ཕྱིར་ཡང་བདག་ཅག་གནོད་པ་མེད་པར་བདེ་བར་འགྱུར་བའི་ཐབས་ཅུང་ཟད་ཀྱང་མེད་དམ་ཞེས་སྨྲས་པ་དང་། ཐབས་ཤིག་ཡོད་དེ། བློན་པོ་ཆེན་པོ་དེས་ཁོ་མོ་ལ་བདས་ཏེ། དེས་ཕྲིན་པ་ལན་དུ་མར་བཏང་ཡང་ཁོ་མོ་མ་བཏུབ་བོ་ཞེས་ཟེར་རོ། །འོ་ན་བུ་མོ་སྤྲོ་བར་གྱིས་ཤིག་དང་། ཁྱོད་གཅིག་པུའི་མཐུས་སྐྱེ་བོ་འདི་རྣམས་བདེ་བར་འགྱུར་རོ་ཞེས་སྨྲས་པ་དང་། མོས་དེ་ལ་འོ་ན་ད་ཕྲིན་པ་སུ་བཏང་ཞེས་སྨྲས་ནས་བདག་ཅག་ལ་གྲོང་དུ་ཉེ་བར་འགྲོ་བའི་དགེ་སློང་ཡོད་ཀྱིས་དེ་ཕྲིན་པར་བཏང་ངོ་། །དགེ་སློང་དེ་ཡང་གྲོང་དེར་ཕྱིན་ནས་

---

^{[མ་དཔེ་གཟིགས་ན་འདིར་གནོན།]}

ཁྱིམ་བདག་གི་ཆུང་མ་དེས་སྨྲས་པ། འཕགས་པ་བློན་པོ་ཆེན་པོ་འདི་ཞེས་བགྱི་བ་ལ་ཁོ་མོའི་ཁྱིམ་འདི་དང་། ཁོ་མོའི་ནོར་འདི་དང་། རྫས་འདི་དག་ཐམས་ཅད་འབུལ་གྱིས་ཚུར་སྤྱོན་ཞེས་བགྱི་བར་སྤྱོད་དམ། ནུས་སོ་ཞེས་སྨྲས་ཏེ། དེ་སོང་ནས་དེ་ལ་བསྒོ་བ་དང་། དེ་གཉིས་དུམ་པར་གྱུར་ནས་དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །ཁྱིམ་བདག་གི་ཆུང་མ་ཞིག་གིས་དགེ་འདུན་གྱི་གཙུག་ལག་ཁང་ཞིག་བརྩིགས་ཏེ། དེས་དེར་ཆོས་གོས་དང་རྗེས་སུ་ཕན་པའི་སྨན་རྣམས་འབུལ་བ་ལས་ཁྱིམ་བདག་གི་ཆུང་མ་དེ་དུས་ལས་འདས་ནས། དེ་དུས་ལས་འདས་པ་དང་གཙུག་ལག་ཁང་དེར་ཆོས་གོས་དང་རྗེས་སུ་ཕན་པའི་སྨན་རྣམས་འབུལ་བ་སུ་ཡང་མེད་དེ། དགེ་སློང་དག་གིས་ཁྱིམ་བདག་དེའི་དྲུང་དུ་སོང་སྟེ་འདི་སྐད་དུ་ཁྱིམ་བདག་ཁྱོད་ཀྱི་ཆུང་མ་དེས་གཙུག་ལག་ཁང་ཇི་ལྟར་བྱས་པ་དེ་ལྟར་ཁྱོད་ཀྱིས་ཀྱང་ཆོས་གོས་དང་རྗེས་སུ་ཕན་པ་དང་ནད་པའི་སྨན་ཅུང་ཟད་མི་འབུལ་ལམ་ཞེས་སྨྲས་པ་དང་བཙུན་པ་ཆུང་མ་དེ་ནི་བསོད་ནམས་དང་ལྡན་ལ་མཐུ་ཆེན་མོ་ཞིག་སྟེ། གང་ཅུང་ཟད་སྨྲས་པ་དེ་ཐམས་ཅད་དེའི་ཕྱིར་བགྱིད་ན། དེ་སྟེ་བདག་ལ་ཁྱིམ་བདག་འདི་ཞེས་བྱ་བའི་ཆུང་མས་ཟན་བསྐྱལ་བར་བགྱི་ན་དེ་བཞིན་དུ་ད་དུང་ཡང་འབུལ་བར་རྔོ་ཐོག་གོ་ཞེས་སྨྲས་པ་དང་། དགེ་སློང་དེ་དག་ཁྱིམ་བདག་དེའི་ཆུང་མའི་དྲུང་དུ་སོང་ནས་འདི་སྐད་དུ་ཁྱིམ་བདག་གི་ཆུང་མ་ཁྱོད་ཀྱིས་ཁྱིམ་བདག་འདི་ཞེས་བྱ་བ་ལ་་་ཟན་སྦྱིན་པར་ནུས་སམ་ཞེས་སྨྲས་ནས་བཙུན་པ་མི་ནུས་སོ། །ཁོ་མོའི་ཁྱིམ་འདི་ཉིད་ན་བྱ་བ་མང་དུ་ཡོད་པ་དེ་ཉིད་ཀྱང་མི་ནུས་ན་གཞན་ལ་བསྐྱལ་བ་ལྟ་ཅི་སྨོས། དེ་དག་གིས་ཁྱིམ་བདག་གི་ཆུང་མ་སྤྲོ་བར་གྱིས་ཤིག །མཆོད་རྟེན་ལ་འབུལ་ལོ། །དགེ་འདུན་ལ་འབུལ་བར་འགྱུར་རོ་ཞེས་བསྒོ་བ་དང་། ཁྱིམ་བདག་གི་ཆུང་མའང་དད་པ་ཞིག་སྟེ། དེས་དད་དོ་ཞེས་སྨྲས་ནས་དེ་གཉིས་ཡང་དང་ཡང་དུ་འདྲུལ་བ་དང་དུམ་པར་གྱུར་ཏོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །ཁྱིམ་བདག་ཅིག་གིས་དགེ་འདུན་གྱི་གཙུག་ལག་ཁང་ཞིག་བརྩིགས་ཏེ་དེས་དེར་ཆོས་གོས་དང་ན་བའི་སྨན་རྣམས་

---

^{[མ་དཔེ་གཟིགས་ན་འདིར་གནོན།]}

འབུལ་ཞིང་རྗེས་སུ་ཕན་འདོགས་པ་ལས་ཁྱིམ་བདག་དེ་དུས་ལས་འདས་ཏེ། དེ་ཡང་རྒྱས་པར་ནི་དེ་བཞིན་ནོ། །ཁྱིམ་བདག་གི་ཆུང་མ་དེས་དེ་སྟེ་ཁྱིམ་བདག་འདི་ཞེས་བགྱི་བའི་ཕྱིར་ལས་རྣམས་ལ་བཏང་ན་ནི་འདི་བཞིན་དུ་ཡང་འབུལ་བར་ནུས་སོ་ཞེས་སྨྲས་པ་ཡང་རྒྱས་པར་ཏེ། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དོ། །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེ་གྲོང་དེར་ཕྱིན་ནས། ཁྱིམ་བདག་གིས་སྨྲས་པ། འཕགས་པ་མིང་འདི་ཞེས་བགྱི་བའི་ཆུང་མ་ལ་ཚུར་ཤོག་ཅེས་ཕྲིན་བགྱི་བར་སྤྱོད་དམ་ནུས་སོ་ཞེས་སྨྲས་ནས་དེ་སོང་སྟེ་བསྒོ་བ་དང་། བུད་མེད་དེ་ཡང་ནད་ཀྱིས་བཏབ། ཁྱིམ་བདག་དེ་ཡང་ནད་ཀྱིས་བཏབ་པར་གྱུར་ཏེ། དེ་གཉིས་ཀ་ནད་ཀྱིས་བཏབ་ནས་དོན་དེ་མ་གྲུབ་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེ་གྲོང་དེར་ཕྱིན་པ་དང་། བུད་མེད་དེས་སྨྲས་པ། འཕགས་པ་ཁྱིམ་བདག་འདི་ཞེས་བྱ་བ་ལ་ཚུར་སྤྱོན་ཞེས་ཕྲིན་བགྱི་བར་སྤྱོད་དམ། ནུས་སོ་ཞེས་སྨྲས་ནས་དེ་དེར་སོང་སྟེ་དེ་ལ་བསྒོ་བ་དང་། ཁྱིམ་བདག་དེ་ཡང་ནད་ཀྱིས་བཏབ་པར་གྱུར། བུད་མེད་དེ་ཡང་ནད་ཀྱིས་བཏབ་པར་གྱུར་ཏེ། གཉིས་ཀ་ནད་ཀྱིས་བཏབ་པས་དོན་དེ་མ་གྲུབ་བོ། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། དེ་སྔ་དྲོ་ཆོས་གོས་དང་ཤམ་ཐབས་བགོས་ལྷུང་བཟེད་ཁྱེར་ཏེ་གྲོང་དེར་ཕྱིན་པ་དང་། ཁྱིམ་བདག་དེས་སྨྲས་པ། ཁྱིམ་བདག་འདི་ཞེས་བགྱི་བ་ལ་ཁྱོད་ཀྱི་བུ་མོའམ་སྲིང་མོ་ཅིག་བདག་གི་བུ་ལ་སྩོལ་ཅིག་ཅེས་ཕྲིན་བགྱི་བར་སྤྱོད་དམ། ནུས་སོ་ཞེས་སྨྲས་ནས། དེ་སོང་སྟེ་བསྒོ་བ་དང་། ཁྱེའུ་དེ་ནི་དུས་ལས་འདས་བུ་མོ་དེ་སྒུར་མོར་རམ། སྨྱོན་མར་གྱུར་ཏམ། གཞན་ལ་བྱིན་པར་གྱུར་ནས། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་

---

^{[མ་དཔེ་གཟིགས་ན་འདིར་གནོན།]}

འགྱུར་རོ། །དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ། སྔ་དྲོ་ཆོས་གོས་དང་ཤམ་ཐབས་བགོས་ནས་ལྷུང་བཟེད་ཁྱེར་ཏེ་གྲོང་དེར་ཕྱིན་པ་དང་། རྒྱས་པར་འདི་ཡང་དེ་བཞིན་དུ་བྱ་སྟེ། ཁྱེའུ་དེ་ནད་ཀྱིས་བཏབ་པ་དང་བུ་མོ་དེ་ཡང་ནད་ཀྱིས་བཏབ་བམ། སྒུར་མོར་གྱུར་ཏམ། གཞན་ལ་བྱིན་ཡང་རུང་ངོ་། །དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ། །འདུལ་བར་བྱེད་པ་རྫོགས་སྷོ།། །།

གཅིག་ནས་འཛེགས་པ་བཤད་པ།

---

^{[མ་དཔེ་གཟིགས་ན་འདིར་གནོན།]}

འདུལ་བ་གཅིག་ཡན་ཆད་སྒོ་གསུམ་གྱིས་བསྡུས་པའི་མདོ་སྡེ། བཤད་པ་དང་པོ་གཉིས་པོ་དང་། །གསུམ་པོ་ཡང་ནི་དེ་བཞིན་ཏེ། །བརྩོན་པ་ཐ་མར་བྱས་ནས་ནི། །བསྡུས་པ་འདི་ནི་ངེས་པར་སྨྲས། །སྒོ་དང་པོའི་མདོ་བསྡུས་པ་སྟེ། །བཤད་པ་མི་མཁས་གསོལ་བ་དང་། །ཀུན་དཀྲིས་ཉེས་བྱུང་དེ་བཞིན་ཏེ། །མཁས་པ་དང་ནི་བསྒོས་པ་ཡང་། །མང་དུ་ཐོས་པ་ཆོས་སྤངས་པའོ། །བཤད་པ་བསྡུས་པ་སྨོད་པ་དང་། །ལྟ་བ་ཕྱེ་མང་གཉིས་པོ་དང་། །སྐུར་པ་དག་དང་བཞི་པོ་དང་། །གསོ་སྦྱིན་གཉིས་ཀྱང་དེ་བཞིན་ནོ། །འདི་ལྟ་སྟེ། སྡོམ་པ་དང་ལྡན་པའི་རྒྱུ་གཅིག་གིས་ཉེས་པ་ཐམས་ཅད་བརྗོད་པར་འགྱུར་རོ། །འདི་ལྟ་སྟེ། སྡོམ་པ་མེད་པའི་རྒྱུ་གཅིག་གིས་ཉེས་པ་ཐམས་ཅད་མི་བརྗོད་པར་འགྱུར་རོ། །འདི་ལྟ་སྟེ། སྡོམ་པ་མེད་པའི་རྒྱུ་གཅིག་ཏུ་ཉེས་པ་ཐམས་ཅད་མ་འདུས་པར་འགྱུར་རོ། །འདི་ལྟ་སྟེ། སྡོམ་པ་དང་ལྡན་པའི་རྒྱུ་གཅིག་ཏུ་ཉེས་པ་ཐམས་ཅད་འདུས་པར་འགྱུར་རོ། །ངག་ལས་བྱུང་བའི་ཁ་ན་མ་ཐོ་བ་རྣམས་ཀྱི་ནང་ན་དེ་བཞིན་གཤེགས་པ་ལ་མེད་བཞིན་དུ་སྐུར་པ་བཏབ་པ་གཅིག་པུ་ཉེས་པ་ཆེའོ། །ལུས་ལས་བྱུང་བའི་ཁ་ན་མ་ཐོ་བ་ཐམས་ཅད་ཀྱི་ནང་ན་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་གང་ཡིན་པ་དེ་གཅིག་པུ་ཉེས་པ་ཆེའོ། །འདི་ལྟ་སྟེ། ཁ་ན་མ་ཐོ་བ་ཐམས་ཅད་ཀྱི་ནང་ན་དགེ་འདུན་ཕྱེ་བ་གཅིག་པུ་ཉེས་པ་ཆེའོ། །མང་པོ་ལས་བྱུང་བའི་ཁ་ན་མ་ཐོ་བ་ཐམས་ཅད་ཀྱི་ནང་ན་དགེ་འདུན་འབྱེད་པའི་རྗེས་སུ་ཕྱོགས་པ་གཅིག་པུ་ཉེས་པ་ཆེའོ། །ཕྲ་མ་ལས་བྱུང་བའི་ཁ་ན་མ་ཐོ་བ་ཐམས་ཅད་ཀྱི་ནང་ན་གང་དེ་བཞིན་

---

^{[མ་དཔེ་གཟིགས་ན་འདིར་གནོན།]}

གཤེགས་པའི་ཉན་ཐོས་ཀྱི་དགེ་་་འདུན་འབྱེད་པར་བྱེད་པ་གང་ཡིན་པ་དེ་གཅིག་པུ་ཉེས་པ་ཆེའོ། །གང་ཟག་ལས་བྱུང་བའི་ཁ་ན་མ་ཐོ་བ་ཐམས་ཅད་ཀྱི་ནང་ན་མེད་བཞིན་དུ་སྐུར་པ་བཏབ་པ་་་གཅིག་པུ་ཉེས་པ་ཆེའོ། །སྲོག་གཅོད་པ་ལས་བྱུང་བའི་ཁ་ན་མ་ཐོ་བ་ཐམས་ཅད་ཀྱི་ནང་ན་རང་སངས་རྒྱས་འཚོ་བ་དང་ཕྲལ་བ་གཅིག་པུ་ཉེས་པ་ཆེའོ། །མ་བྱིན་པར་ལེན་པ་ལས་བྱུང་བའི་ཁ་ན་མ་ཐོ་བ་ཐམས་ཅད་ཀྱི་ནང་ན་གང་དེ་བཞིན་་གཤེགས་པའི་ཉན་ཐོས་ཀྱི་དགེ་འདུན་མངའ་བ་ལས་བརྐུས་པ་གང་ཡིན་པ་དེ་གཅིག་པུ་ཉེས་པ་ཆེའོ། །མི་ཚངས་པར་སྤྱོད་པ་ལས་བྱུང་བའི་ཁ་ན་མ་ཐོ་བ་ཐམས་ཅད་ཀྱི་ནང་ན་དགྲ་བཅོམ་པ་ཡིན་ལ་མ་ཡང་ཡིན་པ་ལ་མི་ཚངས་པར་སྤྱོད་པ་གཅིག་པུ་ཉེས་པ་ཆེའོ། །བརྫུན་དུ་སྨྲ་བ་ལས་བྱུང་བའི་ཁ་ན་མ་ཐོ་བ་ཐམས་ཅད་ཀྱི་ནང་ན་མེད་པ་ལ་མེད་བཞིན་དུ་མི་ལས་བླ་མར་གྱུར་པའི་ཆོས་སྨྲས་པ། གཅིག་པུ་ཉེས་པ་ཆེའོ། །ཆོས་དང་ལྡན་པའི་གསོ་སྦྱིན་བཞག་པ་གཅིག་ནི་འདི་ལྟ་སྟེ། རྩ་བ་མེད་པའོ། །ཆོས་དང་ལྡན་པའི་གསོ་སྦྱིན་བཞག་པ་གཅིག་ནི་འདི་ལྟ་སྟེ། རྩ་བ་དང་བཅས་པའོ། །གཅིག་པ་རྫོགས་སྷོ།། །།མདོར་ན། མི་མཁས་པ་ལ་གསུམ་དུ་བྱ། །གཞན་ཡང་ལྷག་མར་བཅས་པ་གསུམ། །རྫོགས་པ་མ་ལུས་ཀྱིས་བྱ་དང་། །ངག་གིས་བྱ་དང་ལུང་མི་སྟོན། །ཉེས་པ་གཉིས་ཏེ། མི་དགེ་བ་དང་། ལུང་དུ་མི་སྟོན་པའོ། །མི་དགེ་བ་ལ་ཡང་གཉིས་ཏེ། ལྷག་མ་དང་བཅས་པ་དང་། ལྷག་མ་མ་ལུས་པའོ། །ལུང་དུ་མི་སྟོན་པ་ལ་གཉིས་ཏེ། ལྷག་མ་དང་བཅས་པ་དང་། ལྷག་མ་མ་ལུས་པའོ། །ཉེས་པ་ལ་ཡང་གཉིས་ཏེ། ལྷག་མ་དང་བཅས་པ་དང་། ལྷག་མ་མ་ལུས་་་པའོ། །ལྷག་མ་དང་བཅས་པ་ལ་གཉིས་ཏེ། མི་དགེ་བ་དང་ལུང་དུ་མི་སྟོན་པའོ། །ལྷག་མ་མ་ལུས་པ་ལའང་གཉིས་ཏེ། མི་དགེ་བ་དང་ལུང་དུ་མི་སྟོན་པའོ། །ཉེས་པ་ལ་ཡང་གཉིས་ཏེ། ལུས་ལས་བྱུང་བ་དང་། ངག་ལས་བྱུང་བའོ། །ལུས་ལས་བྱུང་བ་ལའང་གཉིས་ཏེ། ལྷག་མ་དང་བཅས་པ་དང་། ལྷག་མ་མ་ལུས་པའོ། །གཞན་ཡང་

---

^{[མ་དཔེ་གཟིགས་ན་འདིར་གནོན།]}

ལུས་ལས་བྱུང་བ་གཉིས་ཏེ་མི་དགེ་བ་དང་། ལུང་དུ་མི་སྟོན་པའོ། །གཞན་ཡང་ལུས་ལས་བྱུང་བ་གཉིས་ཏེ། དམིགས་པ་དང་། མི་དམིགས་པའོ། །ངག་ལས་བྱུང་བའང་གཉིས་ཏེ། ལྷག་མ་དང་བཅས་པ་དང་། ལྷག་མ་མ་ལུས་པའོ། །གཞན་ཡང་ངག་ལས་བྱུང་བ་གཉིས་ཏེ། མི་དགེ་བ་དང་། ལུང་དུ་མི་སྟོན་པའོ། །གཞན་ཡང་ངག་ལས་བྱུང་བ་གཉིས་ཏེ། དམིགས་པ་དང་། མི་དམིགས་པའོ། །ཉེས་པ་ནི་གཉིས་ཏེ། ལུང་དུ་སྟོན་པ་དང་། ལུང་དུ་མི་སྟོན་པའོ། །གཞན་ཡང་ཉེས་པ་གཉིས་ཏེ། བསྒྲིབས་པ་དང་། མ་བསྒྲིབས་པའོ། །མདོར་ན། གསོལ་བ་གཞག་པར་འོས་པ་དང་། །མ་གཞག་སླར་བསླང་དེ་བཞིན་ཏེ། །དབྱེ་བ་རྣམ་པ་ལྔར་བྱས་ནས། །ནར་མ་དག་དང་སྨྲ་བ་འོ། །ཉེས་པ་གཉིས་ཏེ། གསོལ་བར་བྱ་བ་དང་། གསོལ་བ་མེད་པའོ། །གཞན་ཡང་ཉེས་པ་གཉིས་ཏེ། གཞག་པར་འོས་པ་དང་། མི་གཞག་པར་འོས་པའོ། །གཞན་ཡང་ཉེས་པ་གཉིས་ཏེ། གནང་བའི་ཁ་ན་མ་ཐོ་བ་དང་། མ་གནང་བའི་ཁ་ན་མ་ཐོ་བའོ། །གཞན་ཡང་ཉེས་པ་གཉིས་ཏེ། སླར་བསླང་དུ་ཡོད་པ་དང་། བསླང་དུ་མེད་པའོ། །གཞན་ཡང་ཉེས་པ་གཉིས་ཏེ། འབྱེད་པར་བྱེད་པ་དང་། མི་འབྱེད་པར་བྱེད་པའོ། །འབྱེད་པར་བྱེད་པ་ཡང་གཉིས་ཏེ། ལྷག་མ་དང་བཅས་པ་དང་། ལྷག་མ་མ་ལུས་པའོ། །མི་འབྱེད་པར་བྱེད་པ་ལ་ཡང་གཉིས་ཏེ། མི་དགེ་བ་དང་། ལུང་དུ་མི་སྟོན་པའོ། །གཞན་ཡང་འབྱེད་པར་མི་བྱེད་པ་ཡང་གཉིས་ཏེ། ལྷག་མ་དང་བཅས་པ་དང་། ལྷག་མ་མ་ལུས་པའོ། །གཞན་ཡང་ཉེས་པ་གཉིས་ཏེ། ནར་མ་དང་། སྐད་ཅིག་མའོ། །གཞན་ཡང་ཉེས་པ་གཉིས་ཏེ། སྨྲ་བ་དང་། མི་སྨྲ་བའོ། །མདོར་ན། ཀུན་ཏུ་དཀྲིས་དང་བསྒྲིབས་པ་མེད། །ཐུན་མོང་བ་དང་བདུན་པོ་དང་། །སངས་རྒྱས་དུས་དང་ཡུལ་དག་དང་། །ཤིན་ཏུ་ཆགས་དང་ཕྱོགས་རྣམས་སོ། །ཉེས་པ་གཉིས་ཏེ། ཀུན་ཏུ་དཀྲིས་པ་དང་། མ་དཀྲིས་པའོ། །བསྒྲིབས་པར་འགྲོ་བ་དང་། མ་བསྒྲིབས་པར་འགྲོ་བའོ། །ཐུན་མོང་བ་དང་། ཐུན་མོང་མ་ཡིན་པའོ། །

---

^{[མ་དཔེ་གཟིགས་ན་འདིར་གནོན།]}

དགེ་སློང་མའི་ཐུན་མོང་བ་དང་། དགེ་སློང་གི་ཐུན་མོང་བའོ། །དགེ་སློང་གི་ཐུན་མོང་བ་དང་། དགེ་སློབ་མའི་ཐུན་མོང་བའོ། །དགེ་སློང་གི་ཐུན་མོང་བ་དང་། དགེ་ཚུལ་མའི་ཐུན་མོང་བའོ། །དགེ་སློང་གི་ཐུན་མོང་བ་དང་། དགེ་ཚུལ་ཕའི་ཐུན་མོང་བའོ། །དགེ་སློང་གི་ཐུན་མོང་བ་དང་། དགེ་བསྙེན་ཕའི་ཐུན་མོང་བའོ། །དགེ་སློང་གི་ཐུན་མོང་བ་དང་། དགེ་བསྙེན་མའི་ཐུན་མོང་བའོ། །སངས་རྒྱས་ཀྱི་དུས་དང་། ནར་མའོ། །ཡུལ་ལས་གནང་བ་དང་། ཡུལ་ལས་མི་གནང་བའོ། །ཤིན་ཏུ་ཆགས་པ་དང་། ཤིན་ཏུ་མ་ཆགས་པའོ། །ཕྱོགས་གཅིག་པ་དང་། ཕྱོགས་ཐམས་ཅད་པའོ། །མདོར་ན། ཀློག་པ་སྦོམ་པོར་གཞན་པ་དང་། །ལྕི་བ་རྣམ་སྨིན་དེ་བཞིན་ཏེ། །བསླང་བ་རྣམ་པ་བཞི་པོ་དང་། །བཤགས་པ་རྗེས་སུ་བརྟེན་པ་འོ། །རྣམ་པར་སྨིན་པ་དང་བཅས་པ་དང་། རྣམ་པར་སྨིན་པ་མེད་པའོ། །སླར་བསླང་དུ་རུང་བ་དང་། སླར་བསླང་དུ་མི་རུང་བའོ། །སླར་བསླང་དུ་རུང་བ་ལ་ཡང་གཉིས་ཏེ། བཤགས་པ་དང་། དང་པོ་ནས་སྡོམ་པ་བྱིན་པའོ། །གཞན་ཡང་སླར་བསླང་དུ་རུང་བ་གཉིས་ཏེ། བཏགས་པ་དང་། དོན་དམ་པའོ། །སླར་དབྱུང་དུ་མི་རུང་བ་གཉིས་ཏེ། མ་མཐོང་བ་དང་། མི་འཆགས་པའོ། །བརྟེན་པ་ལ་གཉིས་ཏེ། དགེ་འདུན་ལ་བརྟེན་པ་དང་། གང་ཟག་ལ་བརྟེན་པའོ། །བཤགས་པ་ལ་གཉིས་ཏེ། དགེ་འདུན་དང་། གང་ཟག་ལའོ། །མདོར་ན། མཁས་པ་དག་ནི་གསུམ་དུ་བྱ། །ངོ་ཚ་བ་དང་རྣམ་གཉིས་དང་། །རྒོལ་དང་ཞལ་ནས་གསུངས་པ་དང་། །བརྟན་པ་དང་ནི་གསོལ་བ་འོ། །ཉེས་པ་མ་བྱུང་བ་ལ་ཉེས་པ་མ་བྱུང་བར་མཁས་པ་དང་། ཉེས་པ་བྱུང་བར་མཁས་པའོ། །གཞན་ཡང་མཁས་པ་ལ་གཉིས་ཏེ། ཉེས་པ་བྱུང་བ་སླར་བསླང་བ་ལ་མཁས་པ་དང་། ཉེས་པ་མ་བྱུང་བ་རྣམ་པར་དག་པར་བྱ་བ་ལ་མཁས་པའོ། །ངོ་ཚ་བ་ལ་གཉིས་ཏེ། བག་དང་བཅས་པ་དང་། བག་མེད་པའོ། །རྒོལ་བར་བྱེད་པ་ལ་ཉེས་པར་འགྱུར་བ་གཉིས་ཏེ། དགེ་འདུན་དང་། གང་ཟག་ལས་སོ། །སྨྲ་བ་ལས་བྱུང་བའི་ཉེས་

---

^{[མ་དཔེ་གཟིགས་ན་འདིར་གནོན།]}

པ་གཉིས་ཏེ། ཞལ་ནས་གསུངས་པ་དང་། བཤད་པའོ། །གཞན་ཡང་སྨྲ་བ་ལས་བྱུང་བ་གཉིས་ཏེ། བརྟན་པ་དང་། མི་བརྟན་པའོ། །གཞན་ཡང་སྨྲ་བ་ལས་བྱུང་བ་གཉིས་ཏེ། གསོལ་བ་འདེབས་པ་དང་། གསོལ་བ་མི་འདེབས་པའོ། །མདོར་ན། བསྐོས་དང་སྡོམ་དང་བརྟགས་པ་དང་། །ཉན་པ་ཤིན་ཏུ་སེམས་པ་དང་། །རབ་ཤེས་ཐབ་མོ་མི་མཐུན་དང་། །རང་བཞིན་ངེས་སྨྲ་ཤེས་རབ་བོ། །དགེ་འདུན་གྱི་ཞལ་ཏ་བ་གཉིས་ཏེ། བསྐོས་པ་དང་། མ་བསྐོས་པ་དང་། སྡོམ་པ་དང་། མི་སྡོམ་པ་དང་། བརྟགས་པར་སྨྲ་བ་དང་། མ་བརྟགས་པར་སྨྲ་བ་དང་། ཉན་པ་དང་། སྒྲོགས་པ་དང་། སེམས་པ་དང་། མི་སེམས་པ་དང་། རབ་ཏུ་ཤེས་པ་དང་། རབ་ཏུ་ཤེས་པར་མི་བྱེད་པ་དང་། ཐབ་མོ་བྱེད་པ་དང་། ཐབ་མོ་མི་བྱེད་པ་དང་། མི་མཐུན་པ་དང་། མཐུན་པ་དང་། རང་བཞིན་དུ་གནས་པ་དང་། རང་བཞིན་དུ་གནས་པ་མ་ཡིན་པ་དང་། དེ་བཞིན་དུ་ངེས་པར་སྨྲ་བ་དང་། ངེས་པ་མ་ཡིན་པར་སྨྲ་བ་དང་། ཤེས་རབ་ཅན་དང་། འཆལ་པའི་ཤེས་རབ་ཅན་ནོ། །མདོར་ན། མང་དུ་ཐོས་པ་ཁ་ཏོན་ལོབས། །རྫོགས་དང་ངེས་པར་གྱུར་པ་དང་། །བསྙེན་བཀུར་བྱེད་ངན་བྱས་པ་དང་། །ཆོས་ཤེས་པ་དང་བདུན་པ་འོ། །དགེ་འདུན་གྱི་ཞལ་ཏ་བ་གཉིས་ཏེ། མང་དུ་ཐོས་པ་དང་། ཉུང་ངུ་ཐོས་པ་དང་། ལུང་ཁ་ཏོན་ལོབས་པ་དང་། ལུང་ཁ་ཏོན་མ་ལོབས་པ་དང་། ལུང་རྫོགས་པ་དང་། ལུང་མ་རྫོགས་པ་དང་། ངེས་པ་དང་། ངེས་པ་མ་ཡིན་པ་དང་། བསྙེན་བཀུར་བྱེད་པ་དང་། བསྙེན་བཀུར་མི་བྱེད་པ་དང་། ཆོས་ཤེས་པ་དང་། ཆོས་མི་ཤེས་པ་དང་། དོན་ཤེས་པ་དང་། དོན་མི་ཤེས་པ་དང་། དུས་ཤེས་པ་དང་། དུས་མི་ཤེས་པ་དང་། ཚོད་ཤེས་པ་དང་། ཚོད་མི་ཤེས་པ་དང་། བདག་ཉིད་ཤེས་པ་དང་། བདག་ཉིད་མི་ཤེས་པ་དང་། འཁོར་ཤེས་པ་དང་། འཁོར་མི་ཤེས་པ་དང་། གང་ཟག་དམ་པ་དང་། གང་ཟག་དམ་པ་མ་ཡིན་པ་ཤེས་པ་དང་། གང་ཟག་དམ་པ་དང་། གང་ཟག་དམ་པ་མ་ཡིན་པ་མི་ཤེས་པའོ། །མདོར་ན། ཆོས་དང་འདུལ་བ་ཉེས་པ་དང་། །ལྷག་མར་

---

^{[མ་དཔེ་གཟིགས་ན་འདིར་གནོན།]}

བཅས་དང་ལྕི་བ་དང་། །སྤྱད་པར་སྨྲས་པ་སྨ་བབ་དང་། །བཅས་པ་མ་ཡེངས་ལོག་པར་ལྟུང་། །དགེ་འདུན་གྱི་ཞལ་ཏ་བ་གཉིས་ཏེ། དེ་བཞིན་གཤེགས་པ་ལ་སྐུར་པ་འདེབས་ཤིང་ཤིན་ཏུ་འདའ་བར་བྱེད་པ་གསུངས་པ་བཞིན་མི་སྨྲ་བ། ཆོས་བཞིན་མི་སྨྲ་བ། ཆོས་དང་གཉེར་བའི་ཆོས་ཀྱི་རྗེས་བཞིན་མི་བྱེད་པ་སྟེ། ཆོས་མ་ཡིན་པ་ལ་ཆོས་སུ་བརྗོད་ཆོས་ལ་ཆོས་མ་ཡིན་པར་བརྗོད་ཅིང་། དེ་དག་ལ་་སྨྲས་པའི་ལན་སླར་གློན་པ་ནི་ཆོས་མཐུན་པ་དག་གིས་སྨད་པའི་གནས་སུ་་་འགྱུར་རོ། །དགེ་འདུན་གྱི་ཞལ་ཏ་བ་གཉིས་ཏེ། དེ་བཞིན་གཤེགས་པ་ལ་སྐུར་པ་མི་འདེབས་ཤིང་། ཤིན་ཏུ་འདའ་བར་མི་བྱེད་པ་གསུངས་པ་བཞིན་སྨྲ་བ། ཆོས་ཀྱི་རྗེས་སུ་ཆོས་བཞིན་དུ་བྱེད་དེ། ཆོས་ལ་ཆོས་བཞིན་དུ་བརྗོད། ཆོས་མ་ཡིན་པ་ལ་ནི་ཆོས་མ་ཡིན་པར་བརྗོད་པ། དེ་དག་ལ་སྨྲས་པའི་ལན་སླར་མི་གློན་་པ་ནི་ཆོས་མཐུན་པ་དག་གིས་སྨད་པའི་གནས་སུ་མི་འགྱུར་རོ། །མདོ་བར་མ་སྟེ། སྐུར་པ་འདེབས་པར་བྱེད་པ་དང་། །བསྡིགས་པ་ཉེས་པར་བཅས་པ་དང་། །ཁ་ན་མ་ཐོ་བྱིས་པ་དང་། །བར་མའི་མདོར་ནི་ཡང་དག་བསྡུས། །དགེ་འདུན་གྱི་ཞལ་ཏ་བ་གང་ཆོས་མ་ཡིན་པ་ལ་ཆོས་སུ་བརྗོད། ཆོས་ལ་ཆོས་མ་ཡིན་པར་བརྗོད་པའི་ཆོས་དེ་གཉིས་དང་ལྡན་པ་ནི་བསྡིགས་པར་བྱའོ། །སྨད་པར་བྱའོ། །བསྐྲད་པར་བྱའོ། །སྤང་བར་བྱའོ། །ཕྱོགས་མེད་པར་བྱའོ། །ཞུམ་པར་བྱའོ། །སྤ་གོང་བར་བྱའོ། །དོགས་པ་དང་། ཐེ་ཚོམ་དང་། འགྱོད་པ་རྣམས་བསྐྱེད་པར་བྱའོ། །ནར་བར་བྱ། གནད་དུ་ཕེབས་པར་བྱ། སྐྱོན་ཅན་དུ་བྱའོ། །དགེ་འདུན་གྱི་ཞལ་ཏ་བ་གང་ཆོས་ལ་ཆོས་སུ་བརྗོད། ཆོས་མ་ཡིན་པ་ལ་ཆོས་མ་ཡིན་པར་བརྗོད་པའི་ཆོས་དེ་གཉིས་དང་ལྡན་པ་ནི་བསྡིགས་པར་མི་བྱའོ། །སྨད་པར་མི་བྱའོ། །བསྐྲད་པར་མི་བྱའོ། །སྤང་བར་མི་བྱའོ། །ཕྱོགས་མེད་པར་མི་བྱའོ། །ཞུམ་པར་མི་བྱའོ། །སྤ་གོང་བར་མི་བྱའོ། །དོགས་པ་དང་། ཐེ་ཚོམ་དང་། འགྱོད་པ་རྣམས་བསྐྱེད་པར་མི་བྱའོ། །ནར་བར་མི་བྱའོ། །གནད་དུ་ཕེབས་པར་མི་བྱའོ། །སྐྱོན་

---

^{[མ་དཔེ་གཟིགས་ན་འདིར་གནོན།]}

ཅན་དུ་མི་བྱའོ། །དགེ་འདུན་གྱི་ཞལ་ཏ་བ་གང་གིས་ཆོས་མ་ཡིན་པ་ལ་ནི་ཆོས་སུ་བརྗོད། ཆོས་ལ་ནི་ཆོས་མ་ཡིན་པར་བརྗོད་པའི་ཆོས་དེ་གཉིས་དང་ལྡན་པ་ནི་ཉེས་པ་དང་བཅས་པར་འགྱུར་ཏེ། དོགས་པ་དང་བཅས། ཐེ་ཚོམ་དང་བཅས། འགྱོད་པ་དང་བཅས། བྱ་བ་དང་བཅས་པ་དང་། མི་གཙང་བ་དང་། བསླང་དུ་མེད་པའོ། །དགེ་འདུན་གྱི་ཞལ་ཏ་བ་གང་ཆོས་ལ་ཆོས་སུ་བརྗོད། ཆོས་མ་ཡིན་པ་ལ་ཆོས་མ་ཡིན་པར་བརྗོད་པའི་ཆོས་དེ་གཉིས་དང་ལྡན་པ་ནི་ཉེས་པ་དང་བཅས་པར་མི་འགྱུར་ཏེ། དོགས་པ་དང་བཅས་པ་མ་ཡིན། ཐེ་ཚོམ་དང་བཅས་པ་མ་ཡིན། འགྱོད་པ་དང་བཅས་པ་མ་ཡིན། བྱ་བ་དང་བཅས་པ་མ་ཡིན། གཙང་བ་དང་། བསླང་དུ་རུང་བའོ། །དགེ་འདུན་གྱི་ཞལ་ཏ་བ་གང་གིས་ཆོས་མ་ཡིན་པ་ལ་ནི་ཆོས་སུ་བརྗོད། ཆོས་ལ་ནི་ཆོས་མ་ཡིན་་པར་བརྗོད་པའི་ཆོས་དེ་གཉིས་དང་ལྡན་པ་ནི་ཁ་ན་མ་ཐོ་བ་དང་བཅས་པར་འགྱུར་ཏེ། ཉེ་བའི་ཁ་ན་མ་ཐོ་བ་དང་བཅས་པ་དང་། གནོད་པ་དང་བཅས་པ་དང་། རྗེས་སུ་གདུང་བ་དང་བཅས་པ་དང་། གདུང་བར་བྱ་བ་དང་བཅས་པའོ། །དགེ་འདུན་གྱི་ཞལ་ཏ་བ་གང་གིས་ཆོས་ལ་ཆོས་སུ་བརྗོད། ཆོས་མ་ཡིན་པ་ལ་ནི་ཆོས་མ་ཡིན་པར་བརྗོད་པའི་ཆོས་དེ་གཉིས་དང་ལྡན་པ་ནི་ཁ་ན་མ་ཐོ་བ་དང་བཅས་པར་མི་འགྱུར་ཏེ། ཉེ་བའི་ཁ་ན་མ་ཐོ་བ་དང་བཅས་པ་མ་ཡིན། གནོད་པ་དང་བཅས་པ་མ་ཡིན། རྗེས་སུ་གདུང་བ་དང་བཅས་པ་མ་ཡིན། གདུང་བར་བྱ་བ་དང་བཅས་པ་མ་ཡིན་ནོ། །དགེ་འདུན་གྱི་ཞལ་ཏ་བ་གང་གིས་ཆོས་མ་ཡིན་པ་ལ་ནི་ཆོས་སུ་བརྗོད། ཆོས་ལ་ནི་ཆོས་མ་ཡིན་པར་བརྗོད་པའི་ཆོས་དེ་གཉིས་དང་ལྡན་པ་ནི་བྱིས་པ་གླེན་པ་མི་གསལ་བ་མི་མཁས་པ་སྐྱེས་བུ་་་དམ་པ་མ་ཡིན་པར་རིག་པར་བྱ་སྟེ། བདག་ཉིད་དྲེགས་པ་མ་སྤངས་པས་ཁ་ན་མ་ཐོ་བ་དང་བཅས་པར་འགྱུར་རོ། །ཉེ་བའི་ཁ་ན་མ་ཐོ་བ་དང་བཅས་པ་ཅུང་ཟད་ཙམ་ལ་ཡང་མཁས་པ་རྣམས་ཀྱིས་སྨད་པར་འགྱུར་ཏེ། བསོད་ནམས་མ་ཡིན་པ་མང་པོ་བགྲང་དུ་མེད་ཅིང་གྲངས་མེད་ཚད་མེད་པར་འཕེལ་ནས་ཇི་ལྟར་མདའ་འཕངས་པ་བཞིན་ལུས་འགྱེལ་ནས་ཤི་བའི་

---

^{[མ་དཔེ་གཟིགས་ན་འདིར་གནོན།]}

འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེ་སྟེ། ངན་སོང་དུ་སྐྱེ། ངན་འགྲོར་སྐྱེ། ལོག་པར་ལྟུང་བར་སྐྱེ། ངན་སོང་དུ་འགྲོ། ངན་འགྲོར་འགྲོ། ལོག་པར་ལྟུང་བར་འགྲོ། ངན་སོང་དུ་སྐྱེ། ངན་འགྲོར་སྐྱེ། ལོག་པར་ལྟུང་བར་སྐྱེ་བར་འགྱུར་ཏེ། ཡུན་རིང་པོར་འཕྱན་ཅིང་འཁོར་བར་འཕྱན་པས་ན་འཁོར་བ་ལས་སླར་མི་ལྡོག་གོ །དགེ་འདུན་གྱི་ཞལ་ཏ་བ་གང་གིས་ཆོས་ལ་ཆོས་སུ་བརྗོད་་་ཅིང་། ཆོས་མ་ཡིན་པ་ལ་ནི་ཆོས་མ་ཡིན་པར་བརྗོད་པའི་ཆོས་དེ་གཉིས་དང་ལྡན་པ་ནི་མཁས་པ་གསལ་བ་ཡིད་རྣོ་བ་ཤེས་པ་སྐྱེས་བུ་དམ་པ་ཡིན་པར་རིག་པར་བྱ་སྟེ། བདག་ཉིད་དྲེགས་པ་སྤངས་པས་ཁ་ན་མ་ཐོ་བ་དང་བཅས་པ་མ་ཡིན་པར་འགྱུར། ཉེ་བའི་ཁ་ན་མ་ཐོ་བ་དང་བཅས་པ་མ་ཡིན་པ་ཅུང་ཟད་ཙམ་ཡང་མཁས་པ་རྣམས་ཀྱིས་བསྔགས་པར་འགྱུར་ཏེ། བསོད་ནམས་མང་པོ་བགྲང་དུ་མེད་ཅིང་གྲངས་མེད་ཚད་མེད་པར་འཕེལ་ནས་ཇི་ལྟར་མདའ་འཕངས་པ་བཞིན་འདི་ནས་ལུས་འགྱེལ་ན་ཡང་བདེ་བར་འགྲོ་བ་མཐོ་རིས་ཀྱི་ལྷའི་འཇིག་རྟེན་དུ་སྐྱེ་བར་འགྱུར་ཏེ། ངན་སོང་དུ་མི་སྐྱེ། ངན་འགྲོར་མི་སྐྱེ། ལོག་པར་ལྟུང་བར་མི་སྐྱེ། ངན་སོང་དུ་མི་འགྲོ། ངན་འགྲོར་མི་འགྲོ། ལོག་པར་ལྟུང་བར་མི་འགྲོ། ངན་སོང་དུ་སྐྱེ་བར་མི་འགྱུར། ངན་འགྲོར་སྐྱེ་བར་མི་འགྱུར། ལོག་པར་ལྟུང་བར་མི་འགྱུར། ཡུན་རིང་པོར་འཁོར་བ་ན་མི་འཁྱམ་སྟེ་འཁོར་བ་ལས་ལྡོག་གོ །ཇི་ལྟར་ཆོས་དང་ཆོས་མ་ཡིན་པ་ལ་ནག་པོ་དང་དཀར་པོའི་ཕྱོགས་སུ་རྣམ་གྲངས་ལྔར་སྨྲས་པ་དེ་བཞིན་དུ་འདུལ་བ་དང་འདུལ་བ་མ་ཡིན་པ་ལ་ཡང་ནག་པོ་དང་་དཀར་པོའི་ཕྱོགས་སུ་རྣམ་གྲངས་ལྔར་བརྗོད་པར་བྱའོ། །དེ་བཞིན་དུ་ལྷག་མ་དང་བཅས་པའི་ཉེས་པ་དང་། ལྷག་མ་མ་ལུས་པའི་ཉེས་པ་ཡང་ནག་པོ་དང་དཀར་པོའི་ཕྱོགས་སུ་རྣམ་གྲངས་ལྔར་བརྗོད་པར་བྱའོ། །དེ་བཞིན་དུ་ཉེས་པ་ལྕི་བ་དང་ཉེས་པ་ཡང་བ་ཡང་ནག་པོ་དང་དཀར་པོའི་ཕྱོགས་སུ་རྣམ་གྲངས་ལྔར་་་བརྗོད་པར་བྱའོ། །དེ་བཞིན་དུ་སྨྲས་པ་དང་མ་སྨྲས་པར་བརྗོད་པར་ཡང་ནག་པོ་དང་དཀར་པོའི་ཕྱོགས་སུ་རྣམ་གྲངས་ལྔར་བརྗོད་

---

^{[མ་དཔེ་གཟིགས་ན་འདིར་གནོན།]}

པར་བྱའོ། །དེ་བཞིན་དུ་སྨ་ཕབ་པ་དང་སྨ་མ་ཕབ་པར་བརྗོད་པ་ཡང་ནག་པོ་དང་དཀར་པོའི་ཕྱོགས་སུ་རྣམ་གྲངས་ལྔར་བརྗོད་པར་བྱའོ། །དེ་བཞིན་དུ་བཅས་པ་དང་མ་བཅས་པར་བརྗོད་པ་ཡང་ནག་པོ་དང་དཀར་པོའི་ཕྱོགས་སུ་རྣམ་གྲངས་ལྔར་བརྗོད་པར་བྱའོ། །དེ་བཞིན་དུ་ཕྱུང་བ་དང་མ་ཕྱུང་བར་བརྗོད་པ་ཡང་ནག་པོ་དང་དཀར་པོའི་ཕྱོགས་སུ་རྣམ་གྲངས་ལྔར་བརྗོད་པར་བྱའོ། །ཚུལ་ཁྲིམས་ཉམས་པ་དང་། ལྟ་བ་ཉམས་པ་རྣམས་ཀྱང་རྒྱས་པར་ནག་པོ་དང་དཀར་པོའི་ཕྱོགས་སུ་འདི་ཡང་དེ་བཞིན་དུ་རྣམ་གྲངས་ལྔར་བརྗོད་པར་བྱའོ། །མདོར་ན། བསྡིགས་སྤང་ནན་ཏུར་བྱས་པ་དང་། །དབྱུང་བར་བྱ་བའི་བར་དུ་སྟེ། །བྱ་བ་དག་ལ་གཉིས་སུ་བྱ། །ཉེས་དམིགས་རྩོད་པ་དེ་བཞིན་ནོ། །བསྡིགས་པར་བྱ་བ་ལ་གཉིས་ཏེ། ཆད་པའི་ལས་དང་། དགེ་འདུན་གྱིས་བསྒོ་བའོ། །སྤང་བར་བྱ་བ་ལ་ཡང་གཉིས་ཏེ། ཆད་པའི་ལས་དང་། དགེ་འདུན་གྱིས་བསྒོ་བའོ། །གཞན་ཡང་སྤང་བར་བྱ་བ་ལ་གཉིས་ཏེ། ཆད་པའི་ལས་དང་། དགེ་འདུན་གྱིས་སྤང་བའོ། །བསྙེན་བཀུར་བྱེད་པ་ལ་རྣམ་པ་གཉིས་ཏེ། ཆད་པའི་ལས་དང་། མུ་སྟེགས་ཅན་གྱིས་བསྙེན་བཀུར་བྱེད་པའོ། །གཞན་ཡང་བསྙེན་བཀུར་བྱེད་པ་ལ་རྣམ་པ་གཉིས་ཏེ། ཆད་པའི་ལས་དང་། དངོས་པོ་སྤྱད་པའོ། །ཡིད་མགུ་བར་བྱ་བ་ལ་རྣམ་པ་གཉིས་ཏེ། ཆད་པའི་ལས་དང་། ང་རྒྱལ་སྤང་བའོ། །གཞན་ཡང་ཡིད་མགུ་བར་བྱ་བ་ལ་རྣམ་པ་གཉིས་ཏེ། ཆད་པའི་ལས་དང་། དངོས་པོ་སྤྱོད་པའོ། །གཞི་ནས་བསླང་སྟེ་ཡིད་མགུ་བར་བྱ་བ་ལ་རྣམ་པ་གཉིས་ཏེ། ཆད་པའི་ལས་དང་། སྨད་པའོ། །སྨད་པ་ལ་ཡང་རྣམ་པ་གཉིས་ཏེ། ཆད་པའི་ལས་དང་། སོ་སོར་ཐར་པ་ལ་སྨད་པའོ། །བསྐྲད་པ་ལ་རྣམ་པ་གཉིས་ཏེ། ཆད་པའི་ལས་དང་། དགེ་འདུན་གྱི་འོག་ཁྲིམས་སུ་བཅས་པའོ། །སླར་བསྡུམ་པར་བྱ་བ་ལ་རྣམ་པ་གཉིས་ཏེ། ཆད་པའི་ལས་དང་། དགེ་འདུན་གྱི་འོག་ཁྲིམས་བཅས་པའོ། །བསྐར་བ་ལ་རྣམ་པ་གཉིས་ཏེ། ཆད་པའི་ལས་དང་། དགེ་འདུན་གྱིས་

---

^{[མ་དཔེ་གཟིགས་ན་འདིར་གནོན།]}

མཁྱེན་པའོ། །ཚངས་པ་ལ་རྣམ་པ་གཉིས་ཏེ། ཆད་པའི་ལས་དང་། དགེ་བའི་སེམས་བསྐྱེད་པའོ། །གཞན་ཡང་ཚངས་པ་ལ་རྣམ་པ་གཉིས་ཏེ། ཆད་པའི་ལས་དང་། བསླབ་པ་ཡོངས་སུ་རྫོགས་པའོ། །གང་ཟག་གཉིས་ལ་བསྡིགས་པའི་ལས་བྱ་སྟེ་སྨད་པ་དང་། བསྐྲད་པ་དང་། བསྡུམ་པ་དང་། མ་མཐོང་བའི་ཕྱིར་སྤང་བ་དང་། སླར་ལས་མི་བྱེད་པའི་ཕྱིར་སྤང་བ་དང་། སྡིག་པ་ལ་ལྟ་བ་མ་བཏང་བའི་ཕྱིར་སྤང་བའི་ལས་དང་ཆད་པ་དང་གཞི་ནས་བསླང་བའི་ཆད་པ་དང་། ཡིད་མགུ་བར་བྱ་བ་དང་། གཞི་ནས་བསླང་བའི་ཡིད་མགུ་བར་བྱ་བ་དང་། གཞི་ནས་བསླང་བ་དང་། ཚངས་པར་སྤྱོད་པའི་ལས་རྣམས་བྱའོ། །དགེ་སློང་དང་དགེ་སློང་མ་གཉིས་ལ་བསྡིགས་པའི་ལས་རྣམས་བྱ་སྟེ། སྨད་པ་དང་། བསྐྲད་པ་དང་། སླར་བསྡུམ་པ་དང་། མ་མཐོང་བའི་ཕྱིར་སྤང་བ་དང་། སླར་ལས་མ་བྱས་པ་དང་། ལྟ་བ་མ་བཏང་བས་སྤང་བ་རྣམས་ཀྱི་ལས་བྱའོ། །བསྙེན་པར་རྫོགས་པ་དང་། བསྙེན་པར་མ་རྫོགས་པ་གཉིས་ལ་ཆད་པ་དང་། གཞི་ནས་བསླང་བའི་ཆད་པ་དང་། ཡིད་མགུ་བ་དང་། གཞི་ནས་བསླང་བའི་མགུ་བ་དང་། གཞི་ནས་བསླང་བ་དང་། དབྱུང་བའི་ལས་རྣམས་བྱའོ། །དགེ་སློབ་མ་དང་། དགེ་ཚུལ་ཕ་ཡང་དེ་བཞིན་ནོ། །ཉེས་པ་ལས་བྱུང་བ་ལ་རྣམ་པ་གཉིས་ཏེ། དམིགས་པ་དང་མི་དམིགས་པའོ། །ཉེས་པ་དབྱུང་བ་ལ་རྣམ་པ་གཉིས་ཏེ། དམིགས་པ་དང་། མི་དམིགས་པའོ། །རྩོད་པ་ལ་རྣམ་པ་གཉིས་ཏེ། དགེ་སློང་ཕ་དང་། དགེ་སློང་མའོ། །གཞན་ཡང་རྩོད་པ་ལ་རྣམ་པ་གཉིས་ཏེ། དགེ་སློང་དང་། དགེ་སློབ་མའོ། །གཞན་ཡང་རྩོད་པ་ལ་རྣམ་པ་གཉིས་ཏེ། དགེ་སློང་དང་། དགེ་ཚུལ་མའོ། །གཞན་ཡང་རྩོད་པ་ལ་རྣམ་པ་གཉིས་ཏེ། དགེ་སློང་དང་། དགེ་ཚུལ་ཕའོ། །འདུལ་བ་གཅིག་པོ་ཡན་ཆད་པའི་སྒོ་དང་པོ་རྫོགས་སྷོ།། །།འདུལ་བ་གཞུང་དམ་པ། བམ་པོ་ཉི་ཤུ་དྲུག་པ། དེ་ལ་སྒོ་གཉིས་པའི་མདོར་བསྡུས་པ་སྟེ། ཉེས་པ་གསུམ་དང་མི་རིགས་པར། །བཅས་པ་འདས་པར་བཅས་པ་དང་། །ཆད་པ་དེ་བཞིན་

---

^{[མ་དཔེ་གཟིགས་ན་འདིར་གནོན།]}

ལས་གཉིས་ཏེ། །རྗེས་སུ་བསྟན་དང་དབྱུང་དེ་བཞིན། །མདོར་ན། རྡུལ་གྱི་ཉེས་པ་གསུམ་པོ་དང་། །འདུལ་བ་དག་དང་སྒོ་གསུམ་དང་། །སྡུད་པ་གཉིས་དང་ལས་གཉིས་དང་། །བསླབ་པར་བྱ་བ་རྣམ་པ་གཉིས། །རྡུལ་གསུམ་ལ་འདོད་ཆགས་ཀྱི་རྡུལ་དང་། ཞེ་སྡང་གི་རྡུལ་དང་། གཏི་མུག་གི་རྡུལ་ཏོ། །ལུས་ལས་བྱུང་བའི་ཉེས་པ་གསུམ་སྟེ། འདོད་ཆགས་ལས་བྱུང་བ་དང་། ཞེ་སྡང་ལས་བྱུང་བ་དང་། གཏི་མུག་ལས་བྱུང་བའོ། །ངག་ལས་བྱུང་བའི་ཉེས་པ་གསུམ་སྟེ། འདོད་ཆགས་ལས་བྱུང་བ་དང་། ཞེ་སྡང་ལས་བྱུང་བ་དང་། གཏི་མུག་ལས་བྱུང་བའོ། །འདུལ་བ་མ་ཡིན་པ་ལས་བྱུང་བ་རྣམ་པ་གསུམ་སྟེ། འདོད་ཆགས་ལས་བྱུང་བ་དང་། ཞེ་སྡང་ལས་བྱུང་བ་དང་། གཏི་མུག་ལས་བྱུང་བའོ། །འདུལ་བ་ལ་རྣམ་པ་གསུམ་སྟེ། འདོད་ཆགས་འདུལ་བ་དང་། ཞེ་སྡང་འདུལ་བ་དང་། གཏི་མུག་འདུལ་བའོ། །གནས་གསུམ་དུ་ཉེས་པ་ཐམས་ཅད་འདུས་པར་འགྱུར་ཏེ་བྱུང་བ་དང་། བཅས་པ་དང་། རྣམ་པར་ཕྱེ་བའོ། །ལས་རྣམ་པ་གསུམ་གྱི་ཉེས་པ་ཐམས་ཅད་མཉམ་པར་འཇུག་པར་འགྱུར་ཏེ། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་རྣམས་སོ། །ལས་རྣམ་པ་གསུམ་གྱིས་ན་གཟུ་བོར་བྱེད་དེ། ལས་དང་སོ་སོར་ཐར་པའི་ལས་དང་། ཆད་པའི་ལས་སོ། །བསླབ་པ་ལ་རྣམ་པ་གསུམ་སྟེ། ལྷག་པའི་ཚུལ་ཁྲིམས་ལ་བསླབ་པ་དང་། ལྷག་པའི་སེམས་ལ་བསླབ་པ་དང་། ལྷག་པའི་ཤེས་རབ་ལ་བསླབ་པའོ། །གཞན་ཡང་བསླབ་པ་གསུམ་སྟེ། ཀུན་ཏུ་སྤྱོད་པ་ལ་སློབ་པ་དང་། ལྷག་པའི་འདུལ་བ་དང་། ལྷག་པའི་སོ་སོར་ཐར་པ་ལ་སློབ་པའོ། །མདོར་ན། ཉེས་པར་འགྱུར་བ་གསུམ་པོ་དང་། །རྩོད་པ་ལ་ཡང་རྣམ་པ་གསུམ། །ལས་དང་དགེ་འདུན་འབྱེད་པ་དང་། །ཤིན་ཏུ་བཅས་པའང་དེ་བཞིན་ནོ། །ཉེས་པར་འགྱུར་བའི་ལས་གསུམ་གྱིས་ཉེས་པར་འགྱུར་ཏེ། ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་སོ། །རྩོད་པ་རྣམ་པ་གསུམ་སྟེ། དགེ་བ་དང་། མི་དགེ་བ་དང་། ལུང་དུ་མི་སྟོན་པའོ། །ལས་གསུམ་

---

^{[མ་དཔེ་གཟིགས་ན་འདིར་གནོན།]}

སྟེ། ཆོས་ཀྱི་ལས་དང་། ཆོས་མ་ཡིན་པའི་ལས་དང་། མཐུན་པའི་ལས་སོ། །དགེ་འདུན་འབྱེད་པ་ལ་རྣམ་པ་གསུམ་སྟེ། དགེ་བ་དང་། མི་དགེ་བ་དང་། ལུང་དུ་མི་སྟོན་པའོ། །གནས་གསུམ་གྱིས་ན་བཅས་པས་མི་ཆགས་ཏེ། བྱུང་བ་དང་། བཅས་པ་དང་། རྗེས་སུ་བཅས་པའོ། །མདོར་ན། གནས་པར་མི་རིགས་མི་གནས་དང་། །སོ་སོར་གནས་པའང་དེ་བཞིན་ཏེ། །མཆོད་པ་བསྙེན་བཀུར་ཕྱག་བྱ་དང་། །ལྡང་བར་བྱ་དང་ཐལ་མོ་སྦྱར། །གནས་གསུམ་གྱིས་གནས་པའི་འོས་མ་ཡིན་པར་འགྱུར་ཏེ། ཉེས་པ་དང་། ཉེས་པ་མེད་པ་དང་བཅས་པའོ། །རྣམ་པ་གསུམ་གྱིས་ན་མི་གནས་པར་འགྱུར་ཏེ། ཉེས་པ་དང་། ཉེས་པ་མེད་པ་དང་བཅས་པའོ། །རྣམ་པ་གསུམ་གྱིས་ན་སོ་སོར་གནས་པར་འགྱུར་ཏེ། ཉེས་པ་དང་། ཉེས་པ་མེད་པ་དང་བཅས་པའོ། །མཆོད་པར་འོས་པ་གསུམ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། སློབ་པ་དང་། མི་སློབ་པ་རྣམས་སོ། །གཞན་ཡང་མཆོད་པར་འོས་པ་རྣམ་པ་གསུམ་སྟེ། སློབ་དཔོན་དང་། མཁན་པོ་དང་། ཚངས་པ་མཚུངས་པར་སྤྱོད་པ་ཤིན་ཏུ་རྒན་པ་རྣམས་སོ། །ཇི་ལྟར་མཆོད་པར་འོས་པ་དེ་བཞིན་དུ་བསྙེན་བཀུར་བྱ་བ་དང་། ཕྱག་བྱ་བ་དང་། ལྡང་བ་དང་། ཐལ་མོ་སྦྱར་བའི་འོས་རྣམས་ཀྱང་རིགས་པར་ཤེས་པར་བྱའོ། །མདོར་ན། བཅས་པ་གཉིས་སུ་བྱ་བ་དང་། །སྐབས་དབྱེ་རྣམ་པ་བཞི་པོ་དང་། །སྡོམ་པ་དང་ནི་གྲོགས་པོ་དང་། །བཞག་པ་དེ་ནི་ཐ་མ་འོ། །བཅས་པ་རྣམ་པ་གསུམ་སྟེ། བྱུང་བ་ལས་བཅས་པ་དང་། ཉེས་པ་ལས་བཅས་པ་དང་། རྣམ་པར་དབྱེ་བར་བཅས་པའོ། །གཞན་ཡང་བཅས་པ་རྣམ་པ་གསུམ་སྟེ། རྗེས་སུ་བསྲུང་བར་བཅས་པ་དང་། རྗེས་སུ་བསྟན་པར་བཅས་པ་དང་། རྗེས་སུ་ཕན་པར་བཅས་པའོ། །སྐབས་དབྱེ་བ་རྣམ་པ་གསུམ་སྟེ། སྐབས་དབྱེ་བ་དང་། སོ་སོར་སྐབས་དབྱེ་བའོ། །གཞན་ཡང་སྐབས་དབྱེ་བ་རྣམ་པ་གསུམ་སྟེ། དད་པས་སྐབས་དབྱེ་བ་དང་། ཡོངས་སུ་དག་

---

^{[མ་དཔེ་གཟིགས་ན་འདིར་གནོན།]}

པས་སྐབས་དབྱེ་བ་དང་། ནོར་གྱིས་སྐབས་དབྱེ་བའོ། །གཞན་ཡང་སྐབས་དབྱེ་བ་རྣམ་པ་གསུམ་སྟེ། ལྷུང་བཟེད་ཀྱི་སྐབས་དབྱེ་བ་དང་། ཆོས་གོས་ཀྱི་སྐབས་དབྱེ་བ་དང་། ཟང་ཟིང་གི་སྐབས་དབྱེ་བའོ། །གཞན་ཡང་སྐབས་དབྱེ་བ་རྣམ་པ་གསུམ་སྟེ། སྨན་གྱི་སྐབས་དབྱེ་བ་དང་། དུས་སུ་སྐབས་དབྱེ་བ་དང་། མ་ངེས་པར་སྐབས་དབྱེ་བའོ། །སྡོམ་པ་རྣམ་པ་གསུམ་སྟེ། དགེ་འདུན་གྱི་སྡོམ་པ་དང་། སྦྱིན་བདག་གི་སྡོམ་པ་དང་། སྨན་པའི་སྡོམ་པའོ། །གྲོགས་པོ་རྣམ་པ་གསུམ་སྟེ། ཐ་མ་དང་། འབྲིང་དང་། དམ་པའོ། །གཞག་པ་རྣམ་པ་གསུམ་སྟེ། རྙེད་པ་གཞག་པ་དང་། མཚམས་གཞག་པ་དང་། གང་ཟག་གཞག་པའོ། །མདོར་ན། འདས་དང་བཅས་པ་རྣམ་བཞི་དང་། །ཉེས་པ་རྣམ་པ་གཉིས་པོ་དང་། །བསྒོ་བ་ལ་ཡང་རྣམ་བཞི་དང་། །ཞལ་ཏ་བ་ལ་རྣམ་གཉིས་སོ། །ཕྱག་བྱས་ན་འདས་པ་དང་བཅས་པར་འགྱུར་བ་རྣམ་པ་གསུམ་སྟེ། སྔོན་ཉེས་པ་བྱུང་བ་དང་། རྐུན་གནས་པ་དང་། སོ་སོར་གནས་པ་ལའོ། །གཞན་ཡང་ཕྱག་བྱས་ན་འདས་པ་དང་བཅས་པར་འགྱུར་བ་རྣམ་པ་གསུམ་སྟེ། ངོ་ཚ་བ་མེད་པ་དང་། འཁོན་པ་དང་། རྗེས་སུ་ཕྱོགས་པའོ། །ཕྱག་མ་བྱས་ན་འདས་པ་དང་བཅས་པར་འགྱུར་བ་རྣམ་པ་གསུམ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། བཙུན་པ་རྣམས་དང་། ཚངས་པ་མཚུངས་པར་སྤྱོད་པ་ཤིན་ཏུ་རྒན་པ་ལའོ། །གཞན་ཡང་ཕྱག་མ་བྱས་ན་འདས་པ་དང་བཅས་པར་འགྱུར་བ་རྣམ་པ་གསུམ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། མཁན་པོ་དང་། ཚངས་པ་མཚུངས་པར་སྤྱོད་པ་ཤིན་ཏུ་རྒན་པ་རྣམས་སོ། །ཕྱག་མ་བྱས་ཀྱང་ཉེས་པ་མེད་པ་རྣམ་པ་གསུམ་སྟེ། སྔར་ཉེས་པ་བྱུང་བ་དང་། རྐུན་གནས་དང་། སོ་སོར་གནས་པའོ། །གཞན་ཡང་ཕྱག་མ་བྱས་ཀྱང་ཉེས་པ་མེད་པ་རྣམ་པ་གསུམ་སྟེ། ངོ་ཚ་བ་མེད་པ་དང་། འཁོན་པ་དང་། རྗེས་སུ་ཕྱོགས་པའོ། །བསྒོ་བ་རྣམ་པ་གསུམ་སྟེ། དགེ་འདུན་གྱིས་བསྒོ་བ་དང་། གང་ཟག་གིས་

---

^{[མ་དཔེ་གཟིགས་ན་འདིར་གནོན།]}

བསྒོ་བ་དང་། སོ་སོར་ཐར་པས་བསྒོ་བའོ། །གཞན་ཡང་བསྒོ་བ་རྣམ་པ་གསུམ་སྟེ། དགེ་འདུན་གྱིས་བསྒོ་བ་དང་། སྡེས་བསྒོ་བ་དང་། དགེ་འདུན་གྱི་གནས་བརྟན་གྱིས་བསྒོ་བའོ། །གཞན་ཡང་བསྒོ་བ་རྣམ་པ་གསུམ་སྟེ། སློབ་དཔོན་གྱིས་བསྒོ་བ་དང་། མཁན་པོས་བསྒོ་བ་དང་། དགེ་འདུན་གྱིས་བསྒོ་བའོ། །གཞན་ཡང་བསྒོ་བ་ལ་རྣམ་པ་གསུམ་སྟེ། རྒྱལ་པོས་བསྒོ་བ་དང་། རྐུན་པོས་བསྒོ་བ་དང་། རིགས་པར་བྱེད་པའི་རིགས་ཀྱིས་བསྒོ་བའོ། །དགེ་འདུན་གྱི་ཞལ་ཏ་བ་རྣམ་པ་གསུམ་སྟེ། མཁས་པ་དང་མཁས་པ་བས་ཀྱང་མཁས་པ་དང་མཁས་པ་བས་མཁས་པའི་ཡང་མཁས་པ་རྣམས་སོ། །གཞན་ཡང་དགེ་འདུན་གྱི་ཞལ་ཏ་བ་རྣམ་པ་གསུམ་སྟེ། བསྐོས་པ་དང་། མ་བསྐོས་པ་དང་། གནང་བའོ། །མདོར་ན། ཆད་པ་ཤེས་པ་དབྱུང་བ་དང་། །རྟེན་པ་མཁན་པོ་སྡུད་པ་དང་། །སྨན་གཉིས་སྤང་བར་བྱ་བ་དང་། །རྗེས་སུ་གནང་བ་ཡུལ་དང་ལས། །རྒྱུ་རྣམ་པ་བཞིས་ན་ཆད་པའི་ལས་དང་ཡིད་མགུ་བར་སྤྱོད་པའི་དགེ་སློང་གིས་ཞག་ཏུ་ཆད་པ་བགྲང་བར་བྱ་སྟེ། དྲང་པོར་གནས་པའི་དགེ་སློང་དང་ལྷན་ཅིག་སྐྱ་རེངས་བྱུང་བ་དང་། དགེ་སློང་མེད་པའི་གནས་སུ་སོང་སྟེ་སྐྱ་རེངས་བྱུང་བ་དང་། མ་ཚང་བ་ལ་ཆད་པ་མེད་པ་དང་། ཆད་པ་ཡིད་མགུ་བ་དགེ་སློང་རྣམས་ལ་བརྗོད་པར་མི་འདོད་པ་རྣམས་སོ། །ཤེས་པ་ལ་རྣམ་པ་བཞི་སྟེ། བྱུང་བ་ཤེས་པ་དང་། ཉེས་པ་ཤེས་པ་དང་། ཉེས་པ་མེད་པ་ཤེས་པ་དང་། ལངས་པ་ཤེས་པའོ། །བསླང་བ་ལ་རྣམ་པ་བཞི་སྟེ། མཐོང་བས་བསླང་བ་དང་། བཤགས་པས་བསླང་བ་དང་། སྔ་ནས་མ་བྱས་པས་བསླང་བ་དང་། མཐོལ་བས་བསླང་བའོ། །རྟོན་པ་ལ་རྣམ་པ་བཞི་སྟེ། དོན་ལ་རྟོན་གྱི་ཡི་གེ་ལ་མ་ཡིན་པ་དང་། ཆོས་ལ་རྟོན་གྱི་གང་ཟག་ལ་མ་ཡིན་པ་དང་། ངེས་པའི་དོན་གྱི་མདོ་སྡེ་ལ་རྟོན་གྱི་བཀྲི་བའི་དོན་ལ་མ་ཡིན་པ་དང་། ཡེ་ཤེས་ལ་རྟོན་གྱི་རྣམ་པར་ཤེས་པ་ལ་མ་ཡིན་པའོ། །མཁན་པོ་ལ་རྣམ་པ་བཞི་སྟེ། མཁན་པོ་ཆོས་ཀྱིས་སྡུད་ལ་ཟང་ཟིང་གིས་མ་ཡིན་པ་ཡང་ཡོད། མཁན་པོ་ཟང་ཟིང་གིས་སྡུད་ལ་ཆོས་

---

^{[མ་དཔེ་གཟིགས་ན་འདིར་གནོན།]}

ཀྱིས་མ་ཡིན་པ་ཡང་ཡོད། མཁན་པོ་ཆོས་ཀྱིས་ཀྱང་སྡུད་ཅིང་ཟང་ཟིང་གིས་ཀྱང་སྡུད་པ་ཡང་ཡོད། མཁན་པོ་ཆོས་ཀྱིས་ཀྱང་མི་སྡུད་ཅིང་ཟང་ཟིང་གིས་མ་ཡིན་པ་ཡང་ཡོད་དོ། །དེ་ལ་མཁན་པོ་གང་གིས་ཆོས་ཀྱིས་སྡུད་ལ་ཟང་ཟིང་གིས་མ་ཡིན་པ་དེ་ལྟ་བུའི་མཁན་པོ་ལ་ནི་ཤེས་པར་བྱ་སྟེ་གནས་པར་་་བྱའོ། །དེ་ལ་མཁན་པོ་གང་ཟང་ཟིང་གིས་སྡུད་ལ་ཆོས་ཀྱིས་མ་ཡིན་པ་དེ་ལྟ་བུའི་མཁན་པོ་ལ་ནི་བལྟས་ཏེ་འགྲོ་བར་བྱའོ། །དེ་ལ་མཁན་པོ་གང་ཆོས་ཀྱིས་ཀྱང་སྡུད་ལ་ཟང་ཟིང་གིས་ཀྱང་སྡུད་པ་དེ་ལྟ་བུའི་མཁན་པོ་ནི་གཤེར་ཟིན་ཀྱང་ནམ་་་འཚོའི་བར་དུ་གནས་པར་གྱིས་ཤིག །དེ་ལ་མཁན་པོ་གང་ཆོས་ཀྱིས་ཀྱང་མི་སྡུད་ཟང་ཟིང་གིས་མ་ཡིན་པ་དེ་ལྟ་བུའི་མཁན་པོ་ལ་ནི་མ་འགྲོ་ཞེས་བསྒོ་ཡང་མི་བལྟ་བར་འགྲོ་བར་བྱའོ། །བསྡུ་བའི་དངོས་པོ་བཞི་སྟེ། སྦྱིན་པ་དང་། ཚིག་སྙན་པ་དང་། དོན་སྤྱད་པ་དང་། དོན་མཐུན་པ་རྣམས་སོ། །སྨན་རྣམ་པ་བཞི་སྟེ། སྨན་ཉིད་མི་རུང་ལ་ཉེན་ཀོར་མི་རུང་བ་ཡང་ཡོད། སྨན་ཉིད་མི་རུང་ལ་ཉེན་ཀོར་རུང་བ་ཡང་ཡོད། སྨན་ཉིད་རུང་ལ་ཉེན་ཀོར་མི་རུང་བ་ཡང་ཡོད། སྨན་ཉིད་རུང་ལ་ཉེན་ཀོར་རུང་བ་ཡང་ཡོད་དོ། །དོན་གྱི་མཐུ་བཞི་ལ་བརྟེན་ནས་བཅོམ་ལྡན་འདས་ཀྱིས་དགེ་སློང་རྣམས་ཀྱི་སྨན་གནང་སྟེ། དུས་ཀྱི་མཐུ་དང་། ཡུལ་གྱི་མཐུ་དང་། གང་ཟག་གྱི་མཐུ་དང་། བྱུང་བའི་མཐུའོ། །སྤང་བ་ལ་རྣམ་པ་བཞི་སྟེ། ཁ་ན་མ་ཐོ་བ་དང་། ཆད་པས་གཅད་པ་དང་། ཕན་གདགས་པ་དང་། དམ་པའི་ཆོས་ལ་གནས་པའོ། །རྗེས་སུ་གནང་བ་རྣམ་པ་བཞི་སྟེ། ཁ་ན་མ་ཐོ་བ་མེད་པ་དང་། ཆད་པས་མ་བཅད་པ་དང་། ཕན་གདགས་པ་དང་། བདེ་བར་སྤྱོད་པའོ། །ཡུལ་རྣམ་པ་བཞིར་དེ་བཞིན་གཤེགས་པའི་ཉན་ཐོས་ཀྱི་བསླབ་པ་བཅའ་སྟེ། ཡེ་ཤེས་ཀྱི་ཡུལ་དང་། ཆོས་ཀྱི་ཡུལ་དང་། གང་ཟག་གི་ཡུལ་དང་། ཆོ་འཕྲུལ་གྱི་ཡུལ་ལོ། །ལས་རྣམ་པ་བཞི་སྟེ། ཕན་གདགས་པའི་ལས་དང་། ནན་ཏུར་གྱི་ལས་དང་། ཆད་པའི་ལས་དང་། སྤྱོད་པ་ལ་གནས་པའི་ལས་རྣམས་སོ། །མདོར་ན། ལས་ལ་ཁས་ལེན་དད་པ་དང་། །འཇེབས་

---

^{[མ་དཔེ་གཟིགས་ན་འདིར་གནོན།]}

པར་བཅས་པའི་ལས་ལྔ་དང་། །རྣམ་དག་ལས་དང་འདུལ་བ་དང་། །ནན་ཏུར་ཆད་པ་དེ་བཞིན་ནོ། །ལས་ཁས་བླང་བ་རྣམ་པ་ལྔ་སྟེ། བདག་ཉིད་ཀྱི་ལས་བྱེད་པ་དང་། མངོན་སུམ་དུ་གྱུར་ནས་ཁས་ལེན་པ་དང་། དད་པ་འབུལ་བ་དང་། རང་གི་ལྟ་བ་ཁས་བརྗོད་པ་དང་། ཅང་མི་སྨྲ་བར་ཁས་ལེན་པ་རྣམས་སོ། །མཚམས་ཀྱི་ནང་དུ་མངོན་སུམ་དུ་མི་གནས་པ་ལྔས་དད་པ་བྱིན་པའི་ལས་བྱའི། མང་པོ་མངོན་སུམ་དུ་འདུས་པའི་ནང་དུ་ནི་མ་ཡིན་ཏེ། རྐུན་གནས་དང་། སོ་སོར་གནས་པ་དང་། མི་གནས་པ་དང་། རྗེས་སུ་ཕྱོགས་པ་དང་། དགེ་སློང་མ་སུན་ཕྱུང་བའོ། །མ་བྱས་པར་མི་གནང་བའི་ལས་བྱ་བ་ལྔ་ནི་གནས་འདི་ཞེས་བྱ་བར་ཁྱོད་ལ་བྱའོ། །འདིར་དགེ་འདུན་གྱི་ནང་དུ་ཁྱོད་ལ་བྱའོ། །གནས་གཞན་གྱི་དགེ་འདུན་དག་གི་ནང་དུ་ཁྱོད་ལ་བྱའོ། །ཉེས་པ་དེ་ལྟ་བུ་ཁྱོད་ལ་བྱའོ། །ཞེས་དེས་དེ་ལ་ཉེས་པས་བསྡིགས་ནས་ཉེས་པ་རབ་ཏུ་བཞག་སྟེ། དམ་དེམ་དང་བཅས། འཇེབས་པ་དང་བཅས། གསོབ་ཏུ་དབྱུང་བ་དང་། བཅས་པར་བྱས་ནས་གཏོང་བའོ། །བཤགས་པའི་ལས་དང་། བྱིན་གྱིས་བརླབས་པའི་ལས་དང་། བསྒོ་བའི་ལས་དང་། རྗེས་སུ་གནང་བའི་ལས་དང་། སྤྱོད་པ་ལ་གནས་པའི་ལས་སོ། །རྣམ་པར་དག་པའི་ལས་ལྔ་སྟེ། ཆད་པ་དང་། གཞི་ནས་བསླང་བའི་ཆད་པ་དང་། ཡིད་མགུ་བ་དང་། གཞི་ནས་བསླང་བའི་ཡིད་མགུ་བ་དང་། དབྱུང་བ་རྣམས་སོ། །གདུལ་བའི་དངོས་པོ་ལྔ་སྟེ། བསྡིགས་པ་དང་། སྨད་པ་དང་། བསྐྲད་པ་དང་། སླར་བསྡུམ་པ་དང་། སྤང་བ་རྣམས་སོ། །སྨད་པའི་དངོས་པོ་རྣམ་པ་ལྔ་སྟེ། བསྡིགས་པ་དང་། སྨད་པ་དང་། བསྐྲད་པ་དང་། བསྡུམ་པ་དང་། སྤང་བ་རྣམས་སོ། །ཆད་པའི་ལས་རྣམ་པ་ལྔ་སྟེ། དེ་དག་ནས་སྤང་བའི་བར་དུ་བརྗོད་པར་བྱའོ། །མདོར་ན། དགེ་འདུན་ནང་ན་སྤྱོད་པ་གཉིས། །གནས་བརྟན་བག་མེད་སྒོ་གཉིས་དང་། །ཤེན་དམན་གྱུར་དང་རྩོད་པ་དང་། །བདག་དང་བདག་ཤེས་དེ་བཞིན་ནོ། །དགེ་འདུན་གྱི་ནང་ན་སྤྱོད་པའི་དགེ་སློང་གིས་དགེ་འདུན་གྱི་དྲུང་དུ་འགྲོ་བ་ན་ཆོས་རྣམ་པ་ལྔས་དྲན་པ་ནང་དུ་ཉེ་བར་གཞག་

---

^{[མ་དཔེ་གཟིགས་ན་འདིར་གནོན།]}

སྟེ། དགེ་འདུན་གྱི་ནང་དུ་འགྲོ་བར་བྱའོ། །ལྔ་གང་ཞེ་ན། རིམ་གྲོར་བཅས་པ་དང་། བསྟི་སྟང་དུ་བཅས་པ་དང་། འཇིགས་པའི་དབང་དུ་འགྱུར་བར་བཅས་པ་དང་། དམན་པའི་ཡིད་དུ་བཅས་པ་དང་། ཕྱག་དར་བ་དང་མཉམ་པའི་སེམས་དང་སྟན་ལ་འདུག་པར་མཁས་པའོ། །དགེ་འདུན་གྱི་ནང་ན་སྤྱོད་པའི་དགེ་སློང་གིས་གཞན་ཡང་ཆོས་རྣམ་པ་ལྔས་ནང་དུ་དྲན་པ་ཉེ་བར་གཞག་སྟེ། དགེ་འདུན་གྱི་ནང་དུ་འགྲོ་བར་བྱའོ། །ལྔ་གང་ཞེ་ན། བྱམས་པའི་སེམས་དང་། ཕན་པའི་སེམས་དང་། སྙིང་བརྩེ་བའི་སེམས་དང་། སྙན་པར་སྨྲ་བ་དང་། ཚིག་རྩུབ་པོ་མི་སྨྲ་བ་རྣམས་སོ། །དགེ་འདུན་གྱི་ནང་ན་ཆོས་མ་ཡིན་པར་རྩོད་པའང་ཡོད་དེ། དེ་ལ་དགེ་འདུན་གྱི་ནང་ན་སྤྱོད་པའི་དགེ་སློང་གིས་ཆོས་དང་མཐུན་པའི་ཕྱོགས་ལ་བརྟེན་པར་བྱའོ། །ཡང་ན་རང་གི་ལྟ་བ་བརྗོད་ནས་སྟན་ལས་ལངས་ཏེ་འགྲོ་བར་བྱ་སྟེ། དེའི་གླེང་གཞི་མི་དཀྲུག་པར་རྣལ་འབྱོར་དུ་བརྩོན་པར་གནས་པར་བྱའོ། །ཆོས་རྣམ་པ་ལྔ་དང་ལྡན་པའི་གནས་བརྟན་གྱི་དགེ་སློང་ནི་བསྡིགས་པར་བྱའོ། །ཚར་གཅད་པར་བྱའོ། །སྤང་བར་བྱའོ། །ཕྱོགས་མེད་པར་བྱའོ། །སྨ་དབབ་པར་བྱའོ། །སྤ་གོང་བར་བྱའོ། །དོགས་པ་དང་། ཐེ་ཚོམ་དང་། འགྱོད་པ་རྣམས་སྐྱེ་བར་བྱའོ། །དམ་དེམ་དུ་བཅས། འཇེབས་པར་བཅས། གསོག་ཏུ་དབྱུང་བར་བཅས་པར་བྱ་སྟེ། ལྔ་གང་ཞེ་ན། ཚུལ་ཁྲིམས་ངན་པ་ཡིན། ཚུལ་ཁྲིམས་ལ་ཉེས་པ་བྱུང་ཞིང་ལོག་པར་ལྟ་བ་ཡིན། ཕྱིན་ཅི་ལོག་ཏུ་ལྟ་ཞིང་ངོ་ཚ་མེད་པ་ཡིན། འཁོར་ངོ་ཚ་མེད་ཅིང་རྒོལ་བ་དང་། སླར་རྒོལ་བའི་དགེ་སློང་རྣམས་འཐབ་པ་དང་། མཚང་འདྲུ་བ་དང་། འཁོན་པ་དང་། འཁྲུགས་པ་རྣམས་སུ་བསྐུལ་བ་ཡིན། རྒོལ་བ་དང་། སླར་རྒོལ་བའི་དགེ་སློང་རྣམས་ཆོས་མ་ཡིན་པ་ལ་སྟེན་དུ་འཇུག་པའོ། །ཆོས་རྣམ་པ་ལྔ་དང་ལྡན་པའི་དགེ་སློང་ནི་དགེ་བསྙེན་མ་རྣམས་ཀྱིས་མ་དད་པ་ཚོར་བར་བྱ་བར་རིགས་ཏེ། ལྔ་གང་ཞེ་ན། ཁྱིམ་པ་རྣམས་ལ་ཁ་ཟེར་བ་དང་། ཁྱིམ་པ་རྣམས་ལ་མི་སྙན་པར་སྨྲ་བ་དང་། ཁྱིམ་པ་རྣམས་ཀྱི་སྐྱོན་ནས་བརྗོད་པ་དང་། ཁྱིམ་

---

^{[མ་དཔེ་གཟིགས་ན་འདིར་གནོན།]}

པ་རྣམས་ལ་དོན་མ་ཡིན་པ་དང་། མི་ཕན་པའི་རྙེད་པ་ལ་ཞུགས་པ་ཡིན་ནོ། །གཞན་ཡང་ཆོས་རྣམ་པ་ལྔ་དང་ལྡན་པའི་དགེ་སློང་ནི་དགེ་བསྙེན་ཕས་མ་དད་པ་ཚོར་བར་བྱ་བར་རིགས་ཏེ། ལྔ་གང་ཞེ་ན། སངས་རྒྱས་ལ་ངན་དུ་བརྗོད་པ་དང་། ཆོས་ལ་ངན་དུ་བརྗོད་པ་དང་། དགེ་འདུན་ལ་ངན་དུ་བརྗོད་པ་དང་། མི་སྤྱད་པ་སྤྱོད་པ་དང་། དགེ་སློང་གི་བསླབ་པ་ལ་མ་མོས་པའོ། །ཆོས་རྣམ་པ་ལྔ་དང་ལྡན་པའི་དགེ་བསྙེན་ནི་དགེ་འདུན་གྱི་ལྷུང་བཟེད་ཁས་ཕུབ་པར་འོས་ཏེ། ལྔ་གང་ཞེ་ན། དགེ་སློང་དག་ལ་ཁ་ཟེར་བ་དང་། དགེ་སློང་དག་ལ་མི་སྙན་པར་སྨྲ་བ་དང་། དགེ་སློང་དག་ལ་ངན་དུ་བརྗོད་པ་དང་། དགེ་སློང་རྣམས་ལ་མི་ཕན་པ་དང་། དོན་མ་ཡིན་པར་བྱེད་པ་དང་། རྙེད་་པར་འདོད་པ་དང་། ཞུགས་པ་རྣམས་ཡིན་ནོ། །གཞན་ཡང་ཆོས་རྣམ་པ་ལྔ་དང་ལྡན་པའི་དགེ་བསྙེན་ནི་དགེ་འདུན་གྱི་ལྷུང་བཟེད་ཁས་དབུབ་པར་འོས་ཏེ། ལྔ་གང་ཞེ་ན། སངས་རྒྱས་ལ་ངན་དུ་བརྗོད་པ་དང་། ཆོས་ལ་ངན་དུ་བརྗོད་པ་དང་། དགེ་འདུན་ལ་ངན་དུ་བརྗོད་པ་དང་། མི་སྤྱད་པ་སྤྱོད་པ་དང་། དགེ་བསྙེན་གྱི་བསླབ་པ་ལ་མི་སློབ་པའོ། །ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་རྩོད་པ་ཞི་བར་བྱེད་མི་ནུས་པ་སྟེ། ལྔ་གང་ཞེ་ན། ཤེན་དམན་པར་གྱུར་པ་དང་། ལོག་ཤིག་ཏུ་འགྲོ་བ་དང་། མང་དུ་སྨྲ་བར་གྱུར་པ་དང་། ཚིག་ཀྱལ་བར་སྨྲ་བ་དང་། མི་ཕན་པ་སྡུད་པར་གྱུར་པ་ཡིན་ཏེ། དེ་རྣམ་པ་ལྔ་ལས་དཀར་པོའི་ཕྱོགས་སུ་བཟློག་པ་ཡང་བརྗོད་པར་བྱའོ། །གཞན་ཡང་ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་རྩོད་པ་ཞི་བར་བྱེད་མི་་་ནུས་པ་སྟེ། ལྔ་གང་ཞེ་ན། འཁྲུལ་པ་འཛིན་པ་དང་། གསང་བའི་ཚིག་འཛིན་པ་དང་། ཚིག་མང་པོ་འཛིན་པ་དང་། མ་ངེས་པར་འཛིན་པ་དང་། ལན་གསུམ་གྱི་བར་དུ་དམ་བཅར་མ་བཅུག་པར་མཆོད་པ་ཡིན་ཏེ། དཀར་པོའི་ཕྱོགས་སུ་བཟློག་པར་ཡང་རྣམ་པ་ལྔར་བརྗོད་པར་བྱའོ། །གཞན་ཡང་ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་རྩོད་པ་ཞི་བར་བྱེད་མི་ནུས་ཏེ། ལྔ་གང་ཞེ་ན། བདག་གིས་སྨྲ་བ་མཐར་ཐུག་པར་མི་

---

^{[མ་དཔེ་གཟིགས་ན་འདིར་གནོན།]}

ཤེས་པ་དང་། གཞན་གྱི་ཚིག་མཐར་མི་འབྱིན་པ་དང་། མི་ཉན་པ་དང་། གྲགས་པར་མི་བྱེད་པ་ཡིན་ཏེ། དཀར་པོའི་ཕྱོགས་སུ་ཡང་བཟློག་པ་རྣམ་པ་ལྔར་བརྗོད་པར་བྱའོ། །གཞན་ཡང་ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་རྩོད་པ་ཤིན་ཏུ་ཞི་བར་བྱེད་མི་ནུས་པ་ཡིན་ཏེ། མ་བསྒོ་བ་བསྒོ་བར་མི་བྱེད་པ་ཡིན། ཡང་དག་པར་མ་བསྒོ་བ་ཡང་དག་པར་བསྒོ་བར་མི་བྱེད་པ་ཡིན། མི་སེམས་པ་སེམས་པར་མི་བྱེད་པ་ཡིན། རྒོལ་བ་དང་། སླར་རྒོལ་བའི་དགེ་སློང་རྣམས་འཐབ་པ་དང་། མཚང་འདྲུ་བ་དང་། འཁོན་པ་དང་། རྩོད་པ་རྣམས་སུ་སྐུལ་བ་ཡིན། རྒོལ་བ་དང་སླར་རྒོལ་བའི་དགེ་སློང་རྣམས་ཆོས་མ་ཡིན་པའི་ཕྱོགས་ལ་སྟེན་པ་ཡིན་ཏེ། རྣམ་པ་ལྔ་ལས་དཀར་པོའི་ཕྱོགས་སུ་བཟློག་པར་ཡང་བརྗོད་པར་བྱའོ། །མདོར་ན། རྗེས་སུ་བསྟན་དང་རྩོད་པ་དང་། །ལས་དང་རྒོལ་བ་འཛིན་པ་དང་། །ཆོས་མ་ཡིན་པ་མདོ་སྡེ་འདུལ། །མ་བསྐོས་བྱུང་དང་ཉེས་དེ་བཞིན། །ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་རྗེས་སུ་སྟོན་པར་བྱེད་མི་ནུས་ཏེ། ལྔ་གང་ཞེ་ན། རྗེས་སུ་བསྟན་པའི་ངག་ལྔ་མི་ཤེས་པ་དང་། སླར་རྒོལ་བ་མི་ཤེས་པ་དང་། ཆོས་སུ་རྗེས་སུ་སྦྱོར་བ་མི་ཤེས་པ་དང་། ཆོས་མ་ཡིན་པའི་རྗེས་སུ་སྦྱོར་བ་མི་ཤེས་པ་དང་། ཡི་དམ་མ་བཅས་པ་ཡིན་ཏེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་རྩོད་པ་ཞི་བར་བྱེད་མི་ནུས་པ་ཡིན་ཏེ། ལྔ་གང་ཞེ་ན། རྩོད་པ་མི་ཤེས་པ་དང་། རྩོད་པ་ཅི་ལས་བྱུང་བ་མི་ཤེས་པ་དང་། རྩོད་པ་བསྡུ་བ་མི་ཤེས་པ་དང་། རྩོད་པ་ཞི་བར་བྱ་བ་མི་ཤེས་པ་དང་། རྩོད་པ་ཞི་བར་བྱས་ཀྱང་ཉེས་པ་ཕྱིས་མི་འབྱུང་བ་ལ་མི་མཁས་པ་ཡིན་ཏེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་ལས་བྱེད་མི་ནུས་པ་ཡིན་ཏེ། ལྔ་གང་ཞེ་ན། དེས་དོན་སྦྱིན་པ་ལ་ཤིན་ཏུ་རྣམ་པར་མ་དག་ཅིང་གཅིག་ནས་གཅིག་ཏུ་བསྒོ་བ་ཡིན་ཏེ། ཀུན་དགའ་བོ་དགེ་ཚུལ་གྱི་ཚིག་གིས་བསྒོ་ཞིང་

---

^{[མ་དཔེ་གཟིགས་ན་འདིར་གནོན།]}

མདོ་སྡེའི་ཚིག་མི་ཤེས་པ་ཡིན། གསོལ་བའི་ལས་མི་ཤེས་པ། གསོལ་བ་དང་གཉིས་ཀྱི་ལས་མི་ཤེས་པ། གསོལ་བ་དང་བཞིའི་ལས་མི་ཤེས་པ་ཡིན། བསྒོ་བའི་ལས་མི་ཤེས་པ་དང་། བྱིན་གྱིས་བརླབས་པའི་ལས་མི་ཤེས་པ་སྟེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །ཆོས་རྣམ་པ་ལྔ་དང་ལྡན་ན་རྒོལ་བའི་དགེ་སློང་གིས་ཚིག་མི་གཟུང་བ་ཡིན་ཏེ། ལྔ་གང་ཞེ་ན། དེའི་དོན་སྦྱིན་པ་ཤིན་ཏུ་རྣམ་པར་མ་དག་ཅིང་གཅིག་ནས་གཅིག་ཏུ་བསྒོ་བར་མི་བྱེད་པ་དང་། ཀུན་དགའ་བོའི་དགེ་ཚུལ་གྱི་ཚིག་གིས་སྟོན་པ་དང་། མདོ་སྡེའི་གཞི་མི་ཤེས་པ་དང་། ཇི་ལྟར་གསུངས་པ་མི་མངོན་པའི་གནས་ནས་གསུངས་པ་མི་ཤེས་པ་དང་། གང་ལ་གནས་ནས་རྣམ་པར་སྦྱོང་བ་སྟེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །ཆོས་རྣམ་པ་ལྔ་དང་ལྡན་ན་སླར་རྒོལ་བའི་དགེ་སློང་གི་ཚིག་གཟུང་དུ་མི་རུང་བ་ཡིན་ཏེ། ལྔ་གང་ཞེ་ན། རྒོལ་བའི་དགེ་སློང་གིས་དྲིས་པ་གཞན་ལ་གཞན་གྱི་རྔོད་པ་དང་། གཏམ་རླུང་སྐུར་བ་དང་། དག་པའི་དགེ་སློང་ལ་འཚེ་བ་དང་། ཕྱོགས་ལ་གནས་ནས་ཉེས་པ་ཤེས་ཀྱང་ཉེས་པ་མི་ཤེས་སོ་ཞེས་ཟེར་བ་སྟེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་རྩོད་པ་ཞི་བར་བྱེད་མི་ནུས་པ་ཡིན་ཏེ། ལྔ་གང་ཞེ་ན། རྒོལ་བ་དང་། སླར་རྒོལ་བའི་དགེ་སློང་རྣམས་ཆོས་མ་ཡིན་པའི་ཕྱོགས་ལ་བསྙེན་པར་བྱེད་པ་དང་། རྒོལ་བ་དང་། སླར་རྒོལ་བའི་དགེ་སློང་རྣམས་འཐབ་པ་དང་། མཚང་འདྲུ་བ་དང་། འཁོན་པ་དང་། རྩོད་པ་རྣམས་ལ་སྐུལ་བ་ཡིན། དགེ་སློང་གཟུ་བོ་རྣམས་ཀྱི་མདོ་སྡེའི་ཚིག་མི་ཉན་པ་དང་། དགེ་སློང་གཙོ་བོ་རྣམས་ལ་སྐུར་པ་འདེབས་པ་དང་། རྩོད་པའི་ཐོག་མ་དང་བར་མ་དང་ཐ་མ་ལ་མི་མཁས་པ་ཡིན་ཏེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་མདོ་སྡེའི་ཡོན་ཏན་ཤེས་པར་མི་ནུས་པ་ཡིན་ཏེ། ལྔ་གང་ཞེ་ན། མདོ་སྡེ་ལ་མི་མཁས་པ་ཡིན་

---

^{[མ་དཔེ་གཟིགས་ན་འདིར་གནོན།]}

འདུལ་བ་ལ་མི་མཁས་པ་ཡིན། མ་ལྟ་བུ་ལ་མི་མཁས་པ་དང་། རྣམ་པར་འབྱེད་པ་ལ་མི་མཁས་པ་དང་། ལུང་ཁ་ཏོན་དུ་མ་ལོབས་པ་ཡིན་ཏེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །གཞན་ཡང་ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་མདོ་སྡེའི་ཡོན་ཏན་ཤེས་པར་མི་ནུས་པ་ཡིན་ཏེ། ལྔ་གང་ཞེ་ན། ཉི་ཚེ་བ་དང་། ཐམས་ཅད་དང་ལྡན་པའི་འདུལ་བ་མི་ཤེས་པ་དང་། རེ་ཞིག་པ་དང་། དུས་ཐམས་ཅད་པའི་འདུལ་བ་མི་ཤེས་པ་དང་། ཉེས་པའི་འདུལ་བ་མི་ཤེས་པ་དང་། རྩོད་པའི་འདུལ་བ་མི་ཤེས་པ་དང་། ཉོན་མོངས་པའི་འདུལ་བ་མི་ཤེས་པ་སྟེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པས་མདོ་སྡེའི་ཡོན་ཏན་ཤེས་པར་མི་ནུས་ཏེ། ལྔ་གང་ཞེ་ན། ཉེས་པའི་འདུལ་བ་དང་། རྩོད་པའི་འདུལ་བ་དང་། ཉི་ཚེ་བ་དང་། ཐམས་ཅད་དང་ལྡན་པ་དང་། རེ་ཞིག་པ་དང་། དུས་ཐམས་ཅད་པའི་རྣམས་ལ་ངེས་པར་མ་གྱུར་པ་ཡིན་ནོ། །ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་རྩོད་པ་ཞི་བར་བྱེད་མི་ནུས་པ་ཡིན་ཏེ། ལྔ་གང་ཞེ་ན། མ་བསྐོས་པ་ལས་ཞི་བར་བྱེད་པ་དང་། ཉེས་པ་མི་སྟོན་པ་དང་། ཆད་པའི་ལས་མི་གཅོད་པ་དང་། རྣམ་པར་དག་པ་་ཉེ་བར་མི་སྟོན་པ་དང་། འདིས་དགེ་འདུན་གྱིས་བསྒོ་བ་བཞིན་མ་བྱས་པར་གྱུར་པ་སྟེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པ་ནི་ཉེས་པ་སྟོན་པར་མི་ནུས་ཏེ། ལྔ་གང་ཞེ་ན། ཉེས་པ་མི་ཤེས་པ་དང་། ཉེས་པ་མེད་པ་མི་ཤེས་པ་དང་། ལྕི་བ་མི་ཤེས་པ་དང་། ཡང་བ་མི་ཤེས་པ་དང་། འདིས་སོ་སོར་ཐར་པའི་མདོ་ཁ་ཐོན་མ་ལོབས་པ་ཡིན་ཏེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །གཞན་ཡང་ཆོས་རྣམ་པ་ལྔ་དང་ལྡན་པའི་འདུལ་བ་འཛིན་པས་ཉེས་པ་སྟོན་པར་མི་ནུས་ཏེ། ལྔ་གང་ཞེ་ན། བྱུང་བ་མི་ཤེས་པ་དང་། བཅས་པ་མི་ཤེས་པ་དང་། རྗེས་སུ་བཅས་པ་མི་ཤེས་པ་དང་། སྤང་བ་མི་ཤེས་པ་དང་། རྗེས་སུ་གནང་བ་མི་

---

^{[མ་དཔེ་གཟིགས་ན་འདིར་གནོན།]}

ཤེས་པ་སྟེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །མདོར་ན། ལྡང་དང་ལས་དང་གཡོགས་པ་དང་། །མེ་བྱིན་པ་དང་མལ་སྟན་རྣམས། །སེམས་འཁྲུགས་ཕོ་མཚན་ཁུ་བ་དང་། །གཎྜཱི་དང་ནི་བསྐོས་པ་འོ། །ཉེས་པ་ལྡང་བ་རྣམ་པ་ལྔ་སྟེ། ལྔ་གང་ཞེ་ན། གསོལ་བས་ལྡང་བ་དང་། གསོལ་བ་མི་དགོས་པས་ལྡང་བ་དང་། བརྡས་ལྡང་བ་དང་། དོན་དམ་པས་ལྡང་བ་དང་། དགེ་སློང་མ་དང་ཐུན་མོང་མ་ཡིན་པ་ལས་འདས་ཤིང་མཚན་གྱུར་པའོ། །རྒྱུ་ལྔས་ན་ཆོས་མ་ཡིན་པའི་ལས་དང་འདུལ་བ་མ་ཡིན་པའི་ལས་བྱས་པར་འགྱུར་ཏེ། ལྔ་གང་ཞེ་ན། མངོན་སུམ་དུ་མ་གྱུར་པར་བྱེད་པ་དང་། མ་གླེངས་པ་དང་། དྲན་པར་མ་བྱས་པ་དང་། དངོས་པོ་མེད་པ་དང་། ཡི་དམ་མ་བཅས་པའོ། །རྣམ་པ་ལྔས་ན་ལས་བྱེད་པའི་དགེ་སློང་མདའ་འཕངས་པ་བཞིན་དུ་ལུས་འགྱེལ་ཏི་ཤི་མ་ཐག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེ་སྟེ། ལྔ་གང་ཞེ་ན། འདོད་པའི་ཕྱིར་འགྲོ། ཞེ་སྡང་དང་། གཏི་མུག་དང་། འཇིགས་པའི་ཕྱིར་འགྲོ། ལས་བྱས་པ་དང་། མ་བྱས་པ་མི་ཤེས་པའོ། །རྒྱུ་ལྔས་ན་དགེ་སློང་གི་ཕ་རོལ་ནས་མ་བྱིན་པ་བླངས་ན་ཕས་ཕམ་པའི་ཉེས་པར་འགྱུར་ཏེ། ལྔ་གང་ཞེ་ན། བདག་གི་བར་འདུ་ཤེས་མེད་པར་བླངས་པ་དང་། སྐད་ཅིག་བརྙ་བའི་འདུ་ཤེས་མེད་པར་བླངས་པ་དང་། ཡིད་གཅུགས་པའི་འདུ་ཤེས་མེད་པར་བླངས་པ་དང་། ལེན་པ་ན་གཞན་ཤེས་པར་བྱས་ནས་མ་བླངས་པ་དང་། རྐུ་སེམས་ཉེ་བར་གནས་པ་ཡིན་ཏེ། སླར་དཀར་པོའི་ཕྱོགས་སུ་བཟློག་པའང་རྣམ་པ་ལྔར་བརྗོད་པར་བྱའོ། །མལ་སྟན་མི་སྤྱད་པ་རྣམ་པ་ལྔར་ཤེས་པར་བྱ་སྟེ། ལྔ་གང་ཞེ་ན། དུད་པ་དང་། རྡུལ་ཁྲོད་དང་། ཆུ་དང་། འདྲེན་པ་དང་། དྲུད་པ་དང་ལྔའོ། །རྒྱུ་ལྔས་ན་སེམས་འཁྲུགས་པར་འགྱུར་ཏེ། ལྔ་གང་ཞེ་ན། གཉེན་བཤེས་ཟད་པ་དང་། ལོངས་སྤྱོད་ཟད་པ་དང་། ཁམས་མ་མཉམ་པ་དང་། མི་མ་ཡིན་པས་བརླམས་པ་དང་། སྔོན་གྱི་ལས་ཀྱི་རྣམ་པར་སྨིན་པའོ། །གཞན་ཡང་རྒྱུ་ལྔས་

---

^{[མ་དཔེ་གཟིགས་ན་འདིར་གནོན།]}

ན་སེམས་འཁྲུགས་པར་འགྱུར་ཏེ། ལྔ་གང་ཞེ་ན། རླུང་བསྐྱོད་པ་དང་། མཁྲིས་པ་དང་། བད་ཀན་དང་། འདུས་པ་དང་། སྔོན་གྱི་ལས་ཀྱི་རྣམ་པར་སྨིན་པའོ། །གཞན་ཡང་རྒྱུ་ལྔས་ན་སེམས་འཁྲུགས་ཏེ། ལྔ་གང་ཞེ་ན། མི་མ་ཡིན་པས་བརྡེག་པ་དང་། མི་མ་ཡིན་པས་སེམས་འཁྲུགས་པ་དང་། མི་མ་ཡིན་པས་མདངས་ཕྲོགས་པ་དང་། ཁམས་མ་མཉམ་པ་དང་། སྔོན་གྱི་ལས་ཀྱི་རྣམ་པར་སྨིན་པའོ། །རྒྱུ་ལྔས་འདོད་ཆགས་དང་མ་བྲལ་བའི་ཕོ་མཚན་ལས་སུ་རུང་བར་འགྱུར་ཏེ། བཤང་བ་འགགས་པར་གྱུར་པ་དང་། གཅི་བ་འགགས་པར་གྱུར་པ་དང་། རླུང་འགགས་པར་གྱུར་པ་དང་། སྲོག་ཆགས་ཨུ་ཙ་ཏིང་ཀས་ཟིན་པར་གྱུར་པ་དང་། འདོད་པའི་འདོད་ཆགས་ཀྱིས་ཀུན་ཏུ་དཀྲིས་པར་གྱུར་པ་དང་ལྔའོ། །ཁུ་བ་རྣམ་པ་ལྔ་སྟེ། སྔོན་པོ་དང་། སེར་པོ་དང་། དམར་པོ་དང་། བསྐ་བ་དང་། སླ་བ་དང་ལྔའོ། །གཎྜཱི་བརྡུང་བ་ལ་རྣམ་པ་ལྔ་སྟེ། དགེ་འདུན་ཐམས་ཅད་ཀྱི་གཎྜཱི་དང་། ལས་ཀྱི་གཎྜཱི་དང་། ཤི་བའི་གཎྜཱི་དང་། ཉེས་པའི་གཎྜཱི་དང་། སྤང་བའི་གཎྜཱི་དང་ལྔའོ། །དགེ་འདུན་ཐམས་ཅད་ཀྱི་གཎྜཱི་དེ་ནི་རྒྱུད་གསུམ་དང་དྲག་པོ་གསུམ་མོ། །ལས་ཀྱི་གཎྜཱི་ནི་རྒྱུད་གཉིས་དང་དྲག་པོ་གཅིག་གོ །ཤི་བའི་གཎྜཱི་ནི་རྒྱུད་གཅིག་པའོ། །ཉེས་པའི་གཎྜཱི་ནི་ནམ་ཞི་བར་གྱུར་གྱི་བར་དུའོ། །སྤང་བའི་གཎྜཱི་ནི་ཁར་གསིལ་ལོ། །ཆོས་རྣམ་པ་ལྔ་དང་ལྡན་པའི་དགེ་སློང་གིས་དགེ་སློང་མ་ལ་ལུང་བསྒོ་བར་བྱ་སྟེ། ལྔ་གང་ཞེ་ན། ཚུལ་ཁྲིམས་དང་ལྡན་པར་གྱུར་པ་དང་། མང་དུ་ཐོས་པ་དང་། གནས་བརྟན་རྒྱལ་པོར་གྱུར་པ་དང་། གྲོང་ཁྱེར་གྱི་སྐད་དང་ལྡན་པར་གྱུར་པ་དང་། དེས་དགེ་སློང་མ་ལ་ལུས་ཀྱིས་བསྐྱོད་པས་སུན་མ་ཕྱུང་བར་གྱུར་པའོ། །ཇི་ལྟར་ན་ཚུལ་ཁྲིམས་དང་ལྡན་པ་ཡིན་ཞེ་ན། ཕས་ཕམ་པ་བཞི་ལས་གང་ཡང་རུང་བ་འདས་པར་མ་གྱུར་པའོ། །ཇི་ལྟར་ན་མང་དུ་ཐོས་པ་ཡིན་ཞེ་ན། དེས་སོ་སོར་ཐར་པའི་མདོ་བཤད་པའམ་ཁ་ཏོན་དུ་བྱས་པར་གྱུར་པའོ། །ཇི་ལྟར་ན་གནས་བརྟན་རྒྱལ་པོ་ལྟ་བུར་གྱུར་པ་ཡིན་ཞེ་ན། བསྙེན་པར་རྫོགས་ནས་ལོ་ཉི་ཤུ་ལོན་པར་གྱུར་པའམ། ཡང་

---

^{[མ་དཔེ་གཟིགས་ན་འདིར་གནོན།]}

ན་དེ་ལས་འདས་པའོ། །དེ་སྟེ་དགེ་སློང་མ་ལ་ལུས་ཀྱིས་བསྐྱོད་པས་སུན་ཕྱུང་བར་མ་གྱུར་ཏམ། ཡང་ན་ཉེས་པ་དེ་འདིས་ཇི་ལྟར་ཆོས་བཞིན་དུ་བྱས་པར་གྱུར་པའོ། །སྒོ་གཉིས་པོ་རྫོགས་སྷོ།། །།སྒོ་གསུམ་པོའི་མདོ་བསྡུས་པ་སྟེ། རྩོད་དང་མགུ་བར་བྱེད་པ་དང་། །ནོར་རྙེད་གང་ཟག་དེ་བཞིན་ཏེ། །ཨུ་པཱ་ལི་འདུལ་ཆད་པ་དང་། །རབ་འབྱུང་སྦྱིན་པ་དེ་བཞིན་ནོ། །མདོར་ན། འཁྲུག་པའི་རྩ་བ་བསྒོ་བ་དྲུག །ལས་དང་བསྟན་པའང་དེ་བཞིན་ཏེ། །བསྟབས་པར་བྱ་བ་ཉམས་པ་དང་། །བཟློག་པར་བྱ་བའང་དེ་བཞིན་ནོ། །དགེ་སློང་དག་འདི་ལ་འཁྲུག་པའི་རྩ་བ་ནི་དྲུག་སྟེ། དགེ་སློང་ཁྲོ་ཞིང་འཁོན་པ་ཡང་ཡོད་དེ། དགེ་སློང་དག་དགེ་སློང་ཁྲོ་ཞིང་འཁོན་དུ་འཛིན་པར་གྱུར་པ་གང་ཡིན་པ་དེས་ནི་སྟོན་པ་ལ་བླ་མར་མི་བྱེད། བཀུར་སྟིར་མི་བྱེད། ཕུ་དུད་དུ་མི་བྱེད། མཆོད་པར་མི་བྱེད་དེ། དེས་སྟོན་པ་ལ་བསྟི་སྟང་དུ་མ་བྱས། བླ་མར་མ་བྱས། བཀུར་སྟིར་མ་བྱས། ཕུ་དུད་དུ་མ་བྱས། མཆོད་པར་མ་བྱས་པས་ན་ཆོས་མི་མཐོང་ངོ་། །ཆོས་མ་མཐོང་བས་དགེ་འདུན་ལ་རིམ་གྲོར་བྱེད་པར་མི་སྤྱོད་དོ། །དགེ་འདུན་ལ་རིམ་གྲོ་མེད་པར་སྤྱད་པས་དགེ་སྦྱོང་ཉིད་ལ་བག་མེད་པར་སྤྱོད་དོ། །དགེ་སྦྱོང་ཉིད་ལ་བག་མེད་པར་སྤྱོད་པས་ཇི་ནས་དགེ་འདུན་ལ་འཐབ་པ་དང་། མཚང་འདྲུ་བ་དང་། འཁོན་པ་དང་། རྩོད་པ་དེ་ལྟ་བུ་སྐྱེད་པར་འགྱུར་ཏེ། འཐབ་པ་དང་། མཚང་འདྲུ་བ་དང་། འཁོན་པ་དང་། རྩོད་པ་རྣམས་ནི་སྐྱེ་བོ་མང་པོ་ལ་ཕན་པ་མ་ཡིན་ཏེ། སྐྱེ་བོ་མང་པོའི་དོན་མ་ཡིན་གྱི། སྐྱེ་བོ་མང་པོ་ལ་སྡུག་བསྔལ་བར་བྱེད་དོ། །ལྷ་དང་མི་རྣམས་ལ་ཡང་དོན་མ་ཡིན་པ་དང་། མི་ཕན་པ་དང་། སྡུག་བསྔལ་བར་བྱེད་དོ། །དགེ་སློང་ཁྱེད་རྣམས་ལ་འདི་ལྟ་བུའི་རྩོད་པའི་རྩ་བ་ནང་ངམ་ཕྱི་རོལ་ན་ཡོད་ལ་བདག་ཉིད་ཀྱིས་མ་སྤངས་པར་རྗེས་སུ་མཐོང་བ་དང་། དེ་ལ་ཁྱེད་དང་ལྷན་ཅིག་ཏུ་མཐུན་ཞིང་ཤིན་ཏུ་དགའ་བར་བྱོས་ལ་རབ་ཏུ་དད་པའི་བརྩོན་འགྲུས་དང་བརྩལ་བ་དང་སྤྲོ་བ་སྐྱེད་ཅིག །སྤྲོ་བ་བསྐྱེད་ནས་རྩོད་པའི་རྩ་བ་དེ་མ་བཏང་གི་བར་དུ་དྲན་པ་དང་། ཤེས་པ་མི་གཏང་བར་བརྩོན་

---

^{[མ་དཔེ་གཟིགས་ན་འདིར་གནོན།]}

པར་བྱོས་ཤིག །དེ་བཞིན་དུ་དགེ་སློང་ཁྱེད་ཅག་གིས་རྩོད་པའི་རྩ་བ་ནང་ངམ་ཕྱི་རོལ་ན་ཡོད་པ་མ་སྤངས་པ་མཐོང་ན། དེར་ཁྱེད་དང་ལྷན་ཅིག་ཏུ་མཐུན་ཞིང་དགའ་བར་བྱོས་ལ་སེམས་ཀྱིས་ཤིན་ཏུ་བསྲུང་བའི་དྲན་པས་རྩོད་པའི་རྩ་བ་དེའི་ཉེས་པ་ཟད་པར་མ་གྱུར་གྱི་བར་དུ་བརྩོན་པར་བྱོས་ཤིག་དང་། ཁྱེད་ཀྱི་རྩོད་པའི་རྩ་བ་དེ་ཡང་དག་པར་བཅོམ་ནས་ཕྱིས་ཀྱང་མི་འབྱུང་བར་འགྱུར་རོ། །ཁོན་དུ་འཛིན་པ་ཇི་ལྟ་བ་དེ་བཞིན་དུ་འཆབ་པ་དང་། འཚིག་པ་དང་། ཕྲག་དོག་དང་། འཇུངས་པ་དང་། གཡོ་དང་། སྒྱུ་དང་། ངོ་ཚ་མེད་པ་དང་། མི་འཛེམ་པ་དང་། རང་གི་ལྟ་བ་སྙེམས་པར་གྱུར་པ་རྣམས་ཡིན་ཏེ། བབ་བབ་ཏུ་འཛིན་པ་སྤང་དཀའ་བའི་ཚིག་རྣམས་རྒྱས་པར་བརྗོད་པར་བྱའོ། །བསྒོ་བ་རྣམ་པ་དྲུག་སྟེ། སངས་རྒྱས་ཀྱིས་བསྒོ་བ་དང་། དགེ་འདུན་གྱིས་བསྒོ་བ་དང་། སློབ་དཔོན་གྱིས་བསྒོ་བ་དང་། མཁན་པོས་བསྒོ་བ་དང་། རྒྱལ་པོས་བསྒོ་བ་དང་། རྐུན་པོས་བསྒོ་བའོ། །དགེ་བསྙེན་ཕས་བྱར་མི་རུང་བའི་ལས་དྲུག་སྟེ། སེམས་ཅན་འཚོང་བ་དང་། མཚོན་ཆ་འཚོང་བ་དང་། ཆང་འཚོང་བ་དང་། དུག་འཚོང་བ་དང་། རྒྱ་སྐྱེགས་ཀྱི་ལས་དང་། འབྲུ་མར་བྱེད་པའི་ལས་སོ། །ནག་པོར་བསྟན་པ་དྲུག་སྟེ། འདི་ལྟར་དགེ་སློང་དག་ལ་དགེ་སློང་ཞིག་འདི་སྐད་དུ་ཚེ་དང་ལྡན་པ་ཁོ་བོས་ནི་བཅོམ་ལྡན་འདས་ལས་མངོན་སུམ་དུ་ཐོས། མངོན་སུམ་དུ་བླངས་ཏེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་ཟེར་ན། དགེ་སློང་དེས་སྨྲས་པ་དེ་ལ་སྤྲོ་བར་ཡང་མི་བྱ། སྨད་པར་ཡང་མི་བྱ་སྟེ། སྤྲོ་བར་ཡང་མི་བྱ། སྨད་པར་ཡང་མི་བྱ་བར་ཚིག་དང་དོན་དང་འབྲུ་རྣམས་ཟུང་ལ་མདོ་སྡེ་དང་གཏུགས་ཤིང་འདུལ་བ་ལ་ལྟོས་ཤིག །དེ་སྟེ་མདོ་སྡེ་དང་གཏུགས། འདུལ་བ་ལ་བལྟས་ཀྱང་མདོ་སྡེ་དང་ཡང་མི་མཐུན། འདུལ་བ་ལས་ཀྱང་མི་འབྱུང་ཆོས་ཉིད་དང་ཡང་འགལ་ན་དགེ་སློང་དེ་ལ་འདི་སྐད་དུ་ཇི་་་ལྟར་ཚེ་དང་ལྡན་པ་ཁྱོད་ཀྱི་ཆོས་འདི་ནི་བཅོམ་ལྡན་འདས་ཀྱིས་མ་གསུངས་སོ། །ཡང་ན་ཚེ་དང་ལྡན་པས་ཆོས་འདི་ལོག་པར་བཟུང་ངོ་། །དེ་ལྟ་བས་ན་ཁོ་བོས་ཆོས་འདི་མདོ་སྡེ་དང་ཡང་

---

^{[མ་དཔེ་གཟིགས་ན་འདིར་གནོན།]}

གཏུགས། འདུལ་བ་ལ་ཡང་བལྟས་ན། མདོ་སྡེ་དང་ཡང་མི་མཐུན། འདུལ་བ་ལས་ཀྱང་མི་འབྱུང་། ཆོས་ཉིད་དང་ཡང་འགལ་བས་འདི་ནི་ཆོས་མ་ཡིན། འདི་ནི་འདུལ་བ་མ་ཡིན། འདི་ནི་སྟོན་པས་བསྟན་པ་མ་ཡིན་པར་ཤེས་པར་བྱོས་ལ་བོར་ཅིག་ཅེས་སྒོ་ཤིག །གཞན་ཡང་དགེ་སློང་དག་ལ་དགེ་སློང་ཞིག་འདི་སྐད་དུ་ཚེ་དང་ལྡན་པ་དག་གནས་འདི་ཞེས་བྱ་བ་ན་གནས་བརྟན་དུ་བཅས་སོ་སོར་ཐར་པ་བཅས་པའི་དགེ་སློང་གི་དགེ་འདུན་ཆེན་པོ་དག་གནས་ཏེ། ཚེ་དང་ལྡན་པ་ཁོ་བོས་ནི་དགེ་སློང་གི་དགེ་འདུན་དེ་དག་ལས་མངོན་སུམ་དུ་ཐོས། མངོན་སུམ་དུ་བླངས་པས་འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་ཟེར་ན། དགེ་སློང་དེས་དེ་ལ་སྤྲོ་བ་དང་། སྨད་པར་མི་བྱ་བར་ཚིག་དང་དོན་དང་འབྲུ་རྣམས་ཟུང་ལ་མདོ་སྡེ་དང་གཏུགས་ཤིང་། འདུལ་བ་ལ་ལྟོས་ཤིག །དེ་སྟེ་མདོ་སྡེ་དང་གཏུགས། འདུལ་བ་ལ་བལྟས་ཀྱང་། མདོ་སྡེ་དང་ཡང་མི་མཐུན། འདུལ་བ་ལས་ཀྱང་མི་འབྱུང་ལ། ཆོས་ཉིད་དང་འགལ་ན། དགེ་སློང་དེ་ལ་འདི་སྐད་དུ་ཚེ་དང་ལྡན་པ་ཁྱོད་ཀྱིས་གནས་བརྟན་དང་བཅས། སོ་སོར་ཐར་པ་དང་བཅས་པའི་དགེ་སློང་གི་དགེ་འདུན་གྱི་ཆོས་སུ་འདུ་ཤེས། འདུལ་བར་འདུ་ཤེས་ཏེ་ཆོས་མ་ཡིན་འདུལ་བ་མ་ཡིན་པ་སྨྲས་སོ། །ཡང་ན་ཚེ་དང་ལྡན་པ་ཉིད་ཀྱིས་ཆོས་འདི་ལ་ལོག་པར་བཟུང་ངོ་། །དེ་ལྟ་བས་ན་ཆོས་འདི་དག་ནི་མདོ་སྡེ་དང་ཡང་གཏུགས། འདུལ་བ་ལ་ཡང་བལྟས་ན་མདོ་སྡེ་དང་ཡང་མི་མཐུན། འདུལ་བ་ལས་ཀྱང་མི་འབྱུང་ལ་ཆོས་ཉིད་དང་ཡང་འགལ་བས་ན་འདི་ནི་ཆོས་མ་ཡིན། འདི་ནི་འདུལ་བ་མ་ཡིན། འདི་ནི་སྟོན་པས་བསྟན་པ་མ་ཡིན་པར་ཤེས་པར་བྱོས་ལ་བོར་ཅིག་ཅེས་སྒོ་ཤིག །གཞན་ཡང་དགེ་སློང་ཞིག་འདི་སྐད་དུ་དགེ་སློང་དག་གནས་འདི་ཞེས་བྱ་བ་ན་དགེ་སློང་མདོ་སྡེ་འཛིན་པ། འདུལ་བ་འཛིན་པ། མ་ལྟ་བུ་འཛིན་པ་མང་ཞིག་གནས་ཏེ། ཚེ་དང་ལྡན་པ་དགེ་སློང་དེ་དག་ལ་བདག་གིས་མངོན་སུམ་དུ་ཐོས། མངོན་སུམ་དུ་བླངས་ཏེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་

---

^{[མ་དཔེ་གཟིགས་ན་འདིར་གནོན།]}

པའོ་ཞེས་ཟེར་བ་ནས། དགེ་སློང་དེ་ལ་འདི་སྐད་ཅེས་བྱ་བ་སྨྲོས་ཤིག་ཅེས་བྱ་བའི་བར་དུ་སྔ་མ་དེ་བཞིན་ཏེ། ཇི་ལྟར་ཚེ་དང་ལྡན་པ་དགེ་སློང་དེ་དག་གིས་ནི་ཆོས་སུ་འདུ་ཤེས། འདུལ་བར་འདུ་ཤེས་ཏེ། ཆོས་མ་ཡིན་པ་དང་། འདུལ་བ་མ་ཡིན་པར་སྨྲས་སོ། །ཡང་ན་ཚེ་དང་ལྡན་པ་ཉིད་ཀྱིས་ཆོས་འདི་དག་ལོག་པར་བཟུང་ངོ་། །འདི་ལྟར་ཆོས་འདི་མདོ་སྡེ་དང་གཏུགས། འདུལ་བ་ལ་བལྟས་ན་མདོ་སྡེ་དང་ཡང་མི་མཐུན། འདུལ་བ་ལས་ཀྱང་མི་འབྱུང་། ཆོས་ཉིད་དང་ཡང་འགལ་ཏེ། འདི་ནི་ཆོས་མ་ཡིན། འདུལ་བ་མ་ཡིན། སྟོན་པས་བསྟན་པ་མ་ཡིན་པར་ཤེས་པར་བྱོས་ལ་བོར་ཅིག་ཅེས་སྒོ་ཤིག །གཞན་ཡང་དགེ་སློང་ཞིག་དགེ་སློང་དག་ལ་འདི་སྐད་དུ་ཚེ་དང་ལྡན་པ་གནས་འདི་ཞེས་བྱ་བའི་ནང་ན་དགེ་སློང་གི་གནས་་་བརྟན་གྱི་ནང་ནས་གནས་བརྟན་གང་ཡང་རུང་བ་དང་། གཙོ་བོའི་ནང་ན་གཙོ་བོ་གང་ཡང་རུང་བའི་དགེ་སློང་དག་གནས་ཏེ། ཚེ་དང་ལྡན་པ་དགེ་སློང་དེ་དག་ལས་བདག་གིས་མངོན་སུམ་དུ་ཐོས། མངོན་སུམ་དུ་བཟུང་བས་ན་འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་བྱ་བ་ནས། དགེ་སློང་དེ་ལ་འདི་སྐད་སྨྲོས་ཤིག་ཅེས་བྱ་བའི་བར་དུ་སྔ་མ་བཞིན་ཏེ། ཇི་ལྟར་ཚེ་དང་ལྡན་པ་གནས་བརྟན་གྱི་ནང་ན་གནས་བརྟན་གང་ཡང་རུང་བ་དང་། གཙོ་བོའི་ནང་ན་གཙོ་བོ་གང་ཡང་རུང་བའི་དགེ་སློང་གིས་འདི་ལ། ཆོས་སུ་འདུ་ཤེས་འདི་ལ་འདུལ་བར་འདུ་ཤེས་ཏེ་ཆོས་མ་ཡིན། འདུལ་བ་མ་ཡིན་པར་སྨྲས་སོ། །ཡང་ན་ཚེ་དང་ལྡན་པ་ཉིད་ཀྱིས་ཆོས་འདི་ལོག་པར་བཟུང་ངོ་། །ཞེས་བྱ་བ་ནས་ཤེས་པར་བྱོས་ལ་བོར་ཅིག་ཅེས་བྱ་བའི་བར་དུ་སྔ་མ་བཞིན་ནོ། །གཞན་ཡང་དགེ་སློང་ཞིག་ལ་དགེ་སློང་ཞིག་གིས་འདི་སྐད་ཅེས་སྨྲས་ཏེ། ཚེ་དང་ལྡན་པ་གནས་འདི་ཞེས་བྱ་བ་ན་དགེ་བསྙེན་དད་པ་ཡིད་ཆེས་པ་ཞིག་ཡོད་དེ། ཚེ་དང་ལྡན་པ་ཁོ་བོས་ནི་དགེ་བསྙེན་དེ་ལས་མངོན་སུམ་དུ་ཐོས། མངོན་སུམ་དུ་བླངས་ན་འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་བྱ་བ་ནས། དགེ་སློང་དེ་ལ་འདི་སྐད་ཅེས་སྨྲོས་ཤིག་

---

^{[མ་དཔེ་གཟིགས་ན་འདིར་གནོན།]}

ཅེས་བྱ་བའི་བར་དུ་སྔ་མ་བཞིན་ནོ། །ཇི་ལྟར་ཚེ་དང་ལྡན་པ་ཁྱོད་དགེ་བསྙེན་གྱིས་ཆོས་སུ་འདུ་ཤེས། འདུལ་བར་འདུ་ཤེས་ནས་ཆོས་མ་ཡིན་པ་དང་། འདུལ་བ་མ་ཡིན་པར་སྨྲས་སོ། །ཡང་ན་ནི་ཚེ་དང་ལྡན་པ་ཉིད་ཀྱིས་ཆོས་འདི་དག་ལོག་པར་བཟུང་ངོ་ཞེས་བྱ་བ་་་ནས་ཤེས་པར་བྱོས་ལ་བོར་ཅིག་ཅེས་བྱ་བའི་བར་དུ་སྔ་མ་བཞིན་ནོ། །གཞན་ཡང་དགེ་སློང་དག་ལ་དགེ་སློང་ཞིག་འདི་སྐད་སྨྲས་ཏེ། ཚེ་དང་ལྡན་པ་ཁོ་བོས་ནི་ལྷ་རྣམས་ལས་མངོན་སུམ་དུ་ཐོས་ཏེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་བྱ་བ་ནས། དགེ་སློང་དེ་ལ་འདི་སྐད་སྨྲོས་ཤིག་ཅེས་བྱ་བའི་བར་དུ་སྔ་མ་བཞིན་ཏེ། ཇི་ལྟར་ཚེ་དང་ལྡན་པ་ཁྱོད་ལ་ལྷ་རྣམས་ཀྱིས་ཆོས་སུ་འདུ་ཤེས། འདུལ་བར་འདུ་ཤེས་ནས་ཆོས་མ་ཡིན་པ་དང་། འདུལ་བ་མ་ཡིན་པར་སྨྲས་སོ། །ཡང་ན་ཚེ་དང་ལྡན་པ་ཉིད་ཀྱིས་ཆོས་འདི་དག་ལོག་པར་བཟུང་ངོ་ཞེས་བྱ་བ་ནས་ཤེས་པར་བྱོས་ལ་བོར་ཅིག་ཅེས་བྱ་བའི་བར་དུ་སྔ་མ་བཞིན་ནོ། །བསྟན་པ་ཆེན་པོ་དྲུག་ཅེས་བྱ་བ་ནི་འདི་ལྟར་དགེ་སློང་དག་ལ་དགེ་སློང་ཞིག་འདི་སྐད་དུ་ཚེ་དང་ལྡན་པ་བདག་གིས་བཅོམ་ལྡན་འདས་ལས་མངོན་སུམ་དུ་ཐོས། མངོན་སུམ་དུ་བླངས་ཏེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་ཟེར་ན། དགེ་སློང་དེས་སྨྲས་པ་དེ་ལ་སྤྲོ་བར་ཡང་མི་བྱ་སྨད་པར་མི་བྱ་སྟེ། སྤྲོ་བར་མི་བྱ་སྨད་པར་མི་བྱ་བར་ཚིག་དང་དོན་དང་འབྲུ་རྣམས་བཟུང་སྟེ་མདོ་སྡེ་དང་གཏུགས་པར་བྱའོ། །འདུལ་བ་ལ་བལྟ་བར་བྱའོ། །དེ་སྟེ་མདོ་སྡེ་དང་གཏུགས། འདུལ་བ་ལ་བལྟས་ཀྱང་མདོ་སྡེ་དང་མཐུན། འདུལ་བ་ལས་ཀྱང་འབྱུང་། ཆོས་ཉིད་དང་ཡང་མི་འགལ་ན་དགེ་སློང་དེ་ལ་འདི་སྐད་དུ་སྨྲོས་ཤིག །ཇི་ལྟར་ཚེ་དང་ལྡན་པ་ཆོས་འདི་དག་ནི་བཅོམ་ལྡན་འདས་ཀྱིས་གསུངས་ཏེ། ཚེ་དང་ལྡན་པས་ཀྱང་ཆོས་དེ་དག་ལེགས་པར་བཟུང་ངོ་། །དེ་ལྟ་བས་ན་ཆོས་འདི་དག་མདོ་སྡེ་དང་གཏུགས། འདུལ་བ་ལ་བལྟས་ན་མདོ་སྡེ་དང་ཡང་མཐུན། འདུལ་བ་ལས་འབྱུང་ལ། ཆོས་ཉིད་དང་ཡང་མི་འགལ་བས་ན། འདི་ནི་ཆོས་སོ། །འདི་ནི་འདུལ་

---

^{[མ་དཔེ་གཟིགས་ན་འདིར་གནོན།]}

བའོ། །འདི་ནི་སྟོན་པས་བསྟན་པ་ཡིན་པར་ཤེས་པར་བྱོས་ལ་གཟུང་བར་བྱའོ། །ལུང་བསྒོ་བ་ཆེན་པོ་འདི་དྲུག་རྒྱས་པར་དཀར་པོའི་ཕྱོགས་སུ་ཡང་དེ་བཞིན་དུ་བརྗོད་པར་བྱའོ། །བསྟབས་པ་རྣམ་པ་དྲུག་སྟེ། དགེ་སློང་ལ་བསྟབས་པ་དང་། དགེ་སློང་མ་ལ་བསྟབས་པ་དང་། གཉིས་ཀ་ལ་བསྟབས་པ་དང་། སོ་སོར་བསྟབས་པ་དང་། གང་ཟག་ལ་བསྟབས་པ་དང་། སེམས་བསྐྱེད་པས་བསྟབས་པའོ། །གཞན་ཡང་བསྟབས་པ་དྲུག་སྟེ། དད་པས་བསྟབས་པ་དང་། ཡོངས་སུ་དག་པས་བསྟབས་པ་དང་། ཟང་ཟིང་བསྟབས་པ་དང་། ཡོ་བྱད་བསྟབས་པ་དང་། སྨན་བསྟབས་པ་དང་། དུས་སུ་བསྟབས་པའོ། །ཉམས་པ་དྲུག་སྟེ། བདག་ཉམས་པ་དང་། གཞན་ཉམས་པ་དང་། ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པའོ། །ཕུན་སུམ་ཚོགས་པ་དྲུག་སྟེ། བདག་ཕུན་སུམ་ཚོགས་པ་དང་། གཞན་ཕུན་སུམ་ཚོགས་པ་དང་། ཚུལ་ཁྲིམས་ཕུན་སུམ་ཚོགས་པ་དང་། ལྟ་བ་ཕུན་སུམ་ཚོགས་པ་དང་། སྤྱོད་པ་ཕུན་སུམ་ཚོགས་པ་དང་། འཚོ་བ་ཕུན་སུམ་ཚོགས་པའོ།། །།འདུལ་བ་གཞུང་དམ་པ། བམ་པོ་ཉི་ཤུ་བདུན་པ། མདོར་ན། མགུ་བར་བྱེད་དང་རྐུ་བ་དང་། །མངོན་སུམ་གྱུར་པ་དེ་བཞིན་ཏེ། །ཉམས་པར་གྱུར་དང་མ་གྱུར་དང་། །ལས་རྣམས་དྲུག་དང་བསྟན་པ་འོ། །མགུ་བར་བྱེད་ཅེས་བྱ་བ་ནི་སྟོན་པ་དང་ཚངས་པ་མཚུངས་པར་སྤྱོད་པ་མཁས་པ་རྣམས་ལ་བདག་གི་ལུས་བྱམས་པ་དང་ལྡན་པ་ཉེ་བར་གནས་པར་གྱུར་ཅིག་ཅེས་བྱ་བའི་ཆོས་འདི་ནི་མགུ་བར་བྱེད་པ་སྟེ། དགའ་བར་བྱེད། བླ་མར་བྱེད་པ་ཡིད་དུ་འོང་བ་དགའ་བར་བྱ་བ་དང་། བླ་མར་བྱ་བ་དང་། བཀུར་སྟིར་བྱ་བ་དང་། བསྒོམ་པར་བྱ་བ་དང་། གཟུང་བར་བྱ་བ་དང་། མཐུན་པར་བྱ་བ་དང་། མི་འཁོན་པར་བྱ་བ་དང་། མི་རྩོད་པར་བྱ་བ་དང་། དངོས་པོ་གཅིག་ཏུ་འགྱུར་བའི་ཕྱིར་ངག་གི་ལས་བྱམས་པ་དང་། ཡིད་ཀྱི་ལས་བྱམས་པ་འཇུག་གོ། །གང་ཆོས་

---

^{[མ་དཔེ་གཟིགས་ན་འདིར་གནོན།]}

བཞིན་དུ་ཆོས་ཀྱི་རྙེད་པ་དེ་ཆུང་ངུ་ན་ལྷུང་བཟེད་ཀྱི་ནང་དུ་འོངས་པའམ། ལྷུང་བཟེད་ཀྱི་འཁོར་དུ་གཏོགས་པ་དེ་ལྟ་བུའི་རྙེད་པ་ནི་ཚངས་པ་མཚུངས་པར་སྤྱོད་པ་མཁས་པ་རྣམས་དང་ཐུན་མོང་བར་སྤྱད་པར་བྱའོ་ཞེས་བྱ་བའི་ཆོས་འདི་ནི་མགུ་བར་བྱེད་པའོ། །དངོས་པོ་གཅིག་ཏུ་འགྱུར་བའི་ཕྱིར་འཇུག་གོ་ཞེས་བྱ་བའི་བར་དུ་སྔ་མ་བཞིན་ཏེ། གང་ཚུལ་ཁྲིམས་འདི་དག་མ་རལ་བ། མ་ཞིག་པ། མ་འདྲེས་པ། རྙོག་པ་ཅན་དུ་མ་གྱུར་པ། མ་ཉམས་པ། སྐྱོན་མེད་པ། ལེགས་པར་རྫོགས་པ། ལེགས་པར་མནོས་པ། མཁས་པ་རྣམས་ཀྱིས་བསྟོད་པ་དེ་ལྟ་བུའི་ཚུལ་ཁྲིམས་ལ་ཚངས་པ་མཚུངས་པར་སྤྱོད་པ་མཁས་པ་རྣམས་དང་ལྷན་ཅིག་ཏུ་ཚུལ་ཁྲིམས་ཐུན་མོང་དུ་གྱུར་ཅིག་ཅེས་བྱ་བའི་ཆོས་འདི་ནི་མགུ་བར་བྱེད་པའོ། །གཅིག་ཏུ་འགྱུར་བའི་ཕྱིར་འཇུག་གོ་ཞེས་བྱ་བའི་བར་དུ་སྔ་མ་བཞིན་ཏེ། འཕགས་པ་རྣམས་སྡུག་བསྔལ་ཡང་དག་པར་ཟད་པར་བྱ་བ་དང་། སྡུག་བསྔལ་གྱི་མཐར་ཕྱིན་པར་བྱ་བའི་ཕྱིར་འབྱུང་བར་བྱེད་པ་དང་། ངེས་པར་བྱུང་བའི་ལྟ་བ་གང་ཡིན་པ་དེ་ཚངས་པ་མཚུངས་པར་སྤྱོད་པ་མཁས་པ་རྣམས་དང་ལྷན་་་ཅིག་ཏུ་ལྟ་བ་ལ་ཐུན་མོང་བར་གྱུར་ཅིག་ཅེས་བྱ་བའི་ཆོས་འདི་ནི་མགུ་བར་བྱེད་པ་སྟེ། གཅིག་ཏུ་འགྱུར་བའི་ཕྱིར་འཇུག་གོ་ཞེས་བྱ་བའི་བར་དུ་སྔ་མ་བཞིན་ནོ། །རྐུ་བ་དྲུག་ལ་འཇབ་བུས་རྐུ་བ་དང་། སྒྱུས་རྐུ་བ་དང་། མཐུས་རྐུ་བ་དང་། ཕྱིར་སྦྱིན་ནོ་ཞེས་ནས་རྐུ་བ་དང་། བརྣོགས་ཏེ་རྐུ་བ་དང་། གཞན་ལ་བསྡོས་ནས་རྐུ་བའོ། །གནས་དྲུག་མངོན་སུམ་དུ་གྱུར་པ་ལ་བསྙེན་པར་རྫོགས་པར་བྱ་སྟེ། སྟོན་པ་མངོན་སུམ་དུ་གྱུར་པ་དང་། ཆོས་མངོན་སུམ་དུ་གྱུར་པ་དང་། དགེ་འདུན་མངོན་སུམ་དུ་གྱུར་པ་དང་། ཡོངས་སུ་དག་པ་མངོན་སུམ་དུ་གྱུར་པ་དང་། སློབ་དཔོན་མངོན་སུམ་དུ་གྱུར་པ་དང་། མཁན་པོ་མངོན་སུམ་དུ་གྱུར་པའོ། །ཆོས་དྲུག་ནི་སྟོན་པས་བསྟན་པ་ཉམས་པར་བྱེད་པའི་རྒྱུར་འགྱུར་ཏེ། ལས་ལ་དགའ་བར་གྱུར་པ་དང་། སྨྲ་བ་ལ་དགའ་བར་གྱུར་པ་དང་། ཉལ་བ་ལ་དགའ་བ་དང་། འདུ་འཛིའི་གཏམ་ལ་དགའ་བ་དང་། རྙེད་པ་དང་

---

^{[མ་དཔེ་གཟིགས་ན་འདིར་གནོན།]}

བཀུར་སྟི་དང་གྲགས་པ་མི་སྤོང་བ་ལ་དགའ་ཞིང་མི་སྤོང་བ་ལ་མོས་པས་སྤོང་བ་ལ་མི་དགའ་ཞིང་རྣལ་འབྱོར་དུ་མི་འཇུག་པ་དང་། སྒོམ་པ་ལ་མི་དགའ་ཞིང་སྒོམ་པ་ལ་མི་མོས་པར་གྱུར་པས་སྒོམ་པ་ལ་མི་དགའ་ཞིང་རྣལ་འབྱོར་དུ་མི་འཇུག་པའོ། །ཆོས་དྲུག་ནི་སྟོན་པས་བསྟན་པ་མི་ཉམས་པའི་རྒྱུར་འགྱུར་ཏེ། ལས་ལ་མི་དགའ་བར་གྱུར་པ་དང་། སྨྲ་བ་ལ་མི་དགའ་བ་དང་། ཉལ་བ་ལ་མི་དགའ་བ་དང་། འདུ་འཛིའི་གཏམ་ལ་མི་དགའ་བ་དང་། རྙེད་པ་དང་བཀུར་སྟི་ལ་མི་དགའ་ཞིང་། སྤོང་བ་ལ་དགའ་ཞིང་སྤོང་བ་ལ་མོས་པར་གྱུར་པས་སྤོང་བ་ལ་དགའ་ཞིང་རྣལ་འབྱོར་དུ་འཇུག་པ་དང་། སྒོམ་པ་ལ་དགའ་ཞིང་སྒོམ་པ་ལ་མོས་པར་གྱུར་པས་སྒོམ་པ་ལ་དགའ་ཞིང་སྒོམ་པ་ལ་མོས་ཏེ་རྣལ་འབྱོར་དུ་འཇུག་པའོ། །ཆོས་དེ་དྲུག་ནི་སྟོན་པས་བསྟན་པའི་རྒྱུར་འགྱུར་ཏེ། དགེ་སློང་ཁྱེད་ཅག་གིས་ཤེས་པར་བྱོས་ཤིག །ཆོས་འདི་དག་ནི་ཀུན་ཏུ་འདོད་ཆགས་པའི་རྒྱུར་འགྱུར། ཀུན་ཏུ་ཞེ་སྡང་བ་དང་། ཀུན་ཏུ་གཏི་མུག་པ་དང་། ཀུན་ཏུ་སྦྱོར་བ་དང་། ཀུན་ཏུ་ཉོན་མོངས་པ་དང་། རབ་ཏུ་སྤྲོས་པ་རྣམས་ཀྱི་རྒྱུར་འགྱུར་བ་འདི་ནི་ཆོས་མ་ཡིན། འདི་ནི་འདུལ་བ་མ་ཡིན། འདི་ནི་སྟོན་པས་བསྟན་པ་མ་ཡིན་གྱིས་ཁྱེད་ཀྱིས་རྟོགས་པར་ཤེས་པར་གྱིས་ཤིག །ཆོས་དྲུག་ནི་སྟོན་པས་བསྟན་པའི་རྒྱུར་འགྱུར་ཏེ། དགེ་སློང་དག་ཁྱེད་ཀྱིས་འདི་དག་ཤེས་པར་གྱིས་ཤིག །ཆོས་འདི་དག་ནི་ཀུན་ཏུ་འདོད་ཆགས་པའི་རྒྱུར་མི་འགྱུར། ཀུན་ཏུ་ཞེ་མི་སྡང་བ་དང་། ཀུན་ཏུ་གཏི་མི་མུག་པ་དང་། ཀུན་ཏུ་མི་སྦྱོར་བ་དང་། རྣམ་པར་བྱང་བ་དང་། མ་སྤྲོས་པ་རྣམས་ཀྱི་རྒྱུར་འགྱུར་བ་འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པ་སྟེ་ཁྱོད་ཀྱིས་རྟོགས་པར་བྱོས་ཤིག །གཞན་ཡང་ཆོས་དེ་དྲུག་ནི་སྟོན་པས་བསྟན་པའི་རྒྱུར་འགྱུར་ཏེ། དགེ་སློང་དག་ཁྱེད་ཀྱིས་འདི་དག་ཤེས་པར་གྱིས་ཤིག །ཆོས་འདི་དག་ནི་ཆོག་མི་ཤེས་པའི་རྒྱུར་འགྱུར་ཏེ། མགུ་མི་མྱོང་བ་དང་། དགང་དཀའ་བ་དང་། གསོ་དཀའ་བ་དང་། འདོད་པ་མང་བ་རྣམས་ཀྱི་རྒྱུར་འགྱུར་བ་འདི་ནི་ཆོས་མ་ཡིན། འདི་ནི་འདུལ་བ་མ་ཡིན།

---

^{[མ་དཔེ་གཟིགས་ན་འདིར་གནོན།]}

འདི་ནི་སྟོན་པས་བསྟན་པ་མ་ཡིན་གྱིས་ཁྱོད་ཀྱིས་རྟོགས་པར་ཤེས་པར་གྱིས་ཤིག །ཆོས་དེ་དྲུག་ནི་སྟོན་པས་བསྟན་པའི་རྒྱུར་འགྱུར་ཏེ། དགེ་སློང་དག་ཁྱེད་ཀྱིས་འདི་དག་ཤེས་པར་གྱིས་ཤིག །ཆོས་འདི་དག་ནི་ཆོག་ཤེས་པའི་རྒྱུར་འགྱུར་ཏེ། མགུ་སླ་བ་དང་། གསོ་སླ་བ་དང་། དགང་སླ་བ་དང་། འདོད་པ་མི་མང་བའི་རྒྱུར་འགྱུར་བ་འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པ་སྟེ། ཁྱོད་ཀྱིས་གཏན་ལ་བབ་པར་ཤེས་་་པར་གྱིས་ཤིག། མདོར་ན། ནོར་དང་སྟོབས་དང་ཞི་གནས་དང་། །ཉམས་པ་དག་དང་གོས་རྣམས་དང་། །ཡོན་ཏན་འགྲོ་བར་མི་བྱེད་དང་། །ཆོས་མིན་དགེ་འདུན་སྤྱོད་པ་འོ། །ནོར་བདུན་ཏེ་དད་པའི་ནོར་དང་། ཚུལ་ཁྲིམས་ཀྱི་ནོར་དང་། ཁྲེལ་ཡོད་པའི་ནོར་དང་། འཛེམ་པའི་ནོར་དང་། ཐོས་པའི་ནོར་དང་། གཏོང་བའི་ནོར་དང་། ཤེས་རབ་ཀྱི་ནོར་དང་བདུན་ནོ། །སྟོབས་བདུན་ཏེ། དད་པའི་སྟོབས་དང་། བརྩོན་འགྲུས་ཀྱི་སྟོབས་དང་། དྲན་པའི་སྟོབས་དང་། ཏིང་ངེ་འཛིན་གྱི་སྟོབས་དང་། ཤེས་རབ་ཀྱི་སྟོབས་དང་། ཁྲེལ་ཡོད་པའི་སྟོབས་དང་། འཛེམ་པའི་སྟོབས་སོ། །རྩོད་པ་ཞི་བར་བྱེད་པའི་ཆོས་བདུན་ཏེ། མངོན་སུམ་དུ་འདུལ་བ་དང་། དྲན་པས་འདུལ་བ་དང་། མ་རྨོངས་པས་འདུལ་བ་དང་། ཚུལ་ཤིང་གང་མང་བ་དང་། དེའི་དངོས་པོ་ཉིད་ཚོལ་བ་དང་། དམ་བཅས་འཇུག་པ་དང་། རྩྭ་འདིང་བ་ལྟ་བུ་རྣམས་སོ། །ཉམས་པའི་ཆོས་བདུན་ཏེ། སངས་རྒྱས་ལ་རིམ་གྲོ་མེད་པར་སྤྱོད་པ་དང་། ཆོས་དང་། དགེ་འདུན་དང་། བསླབ་པ་དང་། བག་ཡོད་པ་དང་། གདིང་བ་དང་། ཏིང་ངེ་འཛིན་རྣམས་ལ་རིམ་གྲོ་མེད་པར་སྤྱོད་པའོ། །ཉམས་པ་མེད་པའི་ཆོས་བདུན་ཏེ། སངས་རྒྱས་ལ་རིམ་གྲོ་དང་བཅས་པར་སྤྱོད་པ་དང་། ཆོས་དང་། དགེ་འདུན་དང་། བསླབ་པ་དང་། བག་ཡོད་པ་དང་། གདིང་བ་དང་། ཏིང་ངེ་འཛིན་རྣམས་ལ་རིམ་གྲོ་དང་བཅས་པ་སྤྱོད་པའོ། །གོས་སུ་རུང་བ་བདུན་ཏེ། བལ་དང་། ལྡུམ་བུ་ཤ་ན་ཀ་དང་། རས་བལ་དང་། ཟར་མ་དང་། རྩྭ་དུ་གུ་ལ་ཀ་དང་། རྩྭ་ཀོ་ཊ་བ་ཀ་དང་།

---

^{[མ་དཔེ་གཟིགས་ན་འདིར་གནོན།]}

སྲིན་བལ་རྣམས་སོ། །གོས་སུ་མི་རུང་བ་བདུན་ཏེ། རྔ་མོའི་བལ་དང་། བ་ལང་གི་བལ་དང་། རེའུ་བལ་དང་། རི་དགས་ཀྱི་བལ་དང་། འབྲིའུ་བལ་དང་། འདྲེས་པ་དང་། ཐགས་སུ་མ་བཏགས་པ་རྣམས་སོ། །འདུལ་བ་འཛིན་པའི་གང་ཟག་ལ་ཡོན་ཏན་བདུན་ཡོད་དེ། རྒྱལ་བའི་ནང་གི་མཛོད་སྲུང་བ་ཡིན། རང་གི་ཚུལ་ཁྲིམས་ཀྱི་ཕུང་པོ་ཤིན་ཏུ་བསྲུངས་ཤིང་ཤིན་ཏུ་སྦས་པ་ཡིན། ལུང་ནོད་ཅིང་སྟོན་པའི་རག་གཞན་ལ་མ་ལུས་པ་ཡིན། འཁོར་བཞི་འདུ་བར་གྱུར་པ་ཡིན། ཐེ་ཚོམ་སྐྱེས་པའི་གང་ཟག་རྣམས་ཀྱི་སྐྱབས་སུ་གྱུར་པ་ཡིན། དགེ་འདུན་གྱི་ནང་དུ་འཇིགས་པ་མེད་པར་སྤྱོད་པ་དང་། སེམས་ལ་སྣང་བ་མང་དུ་སྤྱོད་པ་ཡིན་ནོ། །དགེ་སློང་འགྲོ་བར་མི་བྱ་བའི་སྤྱོད་ཡུལ་བདུན་ཏེ། ཤེན་པའི་ཁྱིམ་དང་། རྒྱན་པོ་འགྱེད་པའི་ཁྱིམ་དང་། སྨད་འཚོང་མའི་ཁྱིམ་དང་། ཆང་འཚོང་བའི་ཁྱིམ་དང་། རོལ་མོ་མཁན་གྱི་ཁྱིམ་དང་། རྒྱལ་པོའི་ཕོ་བྲང་དང་། རིགས་ངན་གྱི་ཁྱིམ་མོ། །དམ་པའི་ཆོས་མ་ཡིན་པ་བདུན་ཏེ། ཆོས་མ་ཡིན་པ་མི་ཤེས་པར་གྱུར་པ་དང་། དོན་མི་ཤེས་པ་དང་། དུས་མི་ཤེས་པ་དང་། ཚོད་མི་ཤེས་པ་དང་། བདག་ཉིད་མི་ཤེས་པ་དང་། འཁོར་མི་ཤེས་པ་དང་། གང་ཟག་ཕ་རོལ་དང་ཚུ་རོལ་མི་ཤེས་པར་གྱུར་པའོ། །དགེ་འདུན་གྱི་ནང་ན་སྤྱོད་པའི་དགེ་སློང་ཆོས་བདུན་དང་ལྡན་པ་ནི་དགེ་འདུན་གྱི་ནང་དུ་སྤྱོད་པར་མི་བྱ་སྟེ། སྤྲོ་ཐུང་ཞིང་མི་སྲུན་པར་གྱུར་པ་དང་། མང་དུ་སྨྲ་བར་གྱུར་པ་དང་། ཚིག་ཟློས་ཤིང་སྨྲ་བར་གྱུར་པ་དང་། མ་གཙིགས་པར་སྨྲ་བར་གྱུར་པ་དང་། ཚུ་རོལ་མི་ཤེས་པར་གྱུར་པ་ཡིན་ནོ། །དམ་པའི་ཆོས་བདུན་ཏེ། ཆོས་ཤེས་པར་གྱུར་པ་དང་། དོན་ཤེས་པར་གྱུར་པ་དང་། དུས་ཤེས་པར་གྱུར་པ་དང་། ཚོད་ཤེས་པར་གྱུར་པ་དང་། བདག་ཉིད་ཤེས་པར་གྱུར་པ་དང་། འཁོར་ཤེས་པར་གྱུར་པ་དང་། གང་ཟག་མི་མཛའ་བ་མང་བར་གྱུར་པ་དང་། རྩོད་པའི་ཐོག་མ་དང་བར་མ་དང་ཐ་མ་ལ་མི་མཁས་པར་གྱུར་པ་དང་། འདྲ་བ་དང་མི་འདྲ་བ་མི་ཤེས་པའོ། །བདུན་པོ་རྫོགས་སོ།། །།མདོར་ན། རྙེད་པ་གཏན་པ་དབྱུང་

---

^{[མ་དཔེ་གཟིགས་ན་འདིར་གནོན།]}

བ་དང་། །ལྷམ་བྱ་བ་ཡང་དེ་བཞིན་ཏེ། །འཇིག་རྟེན་གྱི་ནི་ཆོས་བརྒྱད་དང་། །དབྱེན་དང་རྩ་བ་མེད་དེ་བཞིན། །རྙེད་པ་བརྒྱད་ཀྱི་མདོ་བར་མ་སྟེ། མཚམས་དང་བྱ་བ་གནས་དང་ནི། །དབྱར་དང་དགེ་འདུན་ལྔ་པོ་དང་། །གང་ཟག་མངོན་སུམ་གྱུར་པ་དང་། །སོ་སོའི་ཡུལ་གྱི་བརྒྱད་པོ་འོ། །མཚམས་ཀྱི་ནང་དུ་ཕུལ་བའི་རྙེད་པ་དང་། བྱ་བའི་ཚེ་ཕུལ་བའི་རྙེད་པ་དང་། གནས་པའི་ཚེ་ཕུལ་བའི་རྙེད་པ་དང་། དབྱར་གྱི་རྙེད་པ་དང་། དགེ་འདུན་གྱི་བཅས་པའི་རྙེད་པ་དང་། གང་ཟག་གི་བཅས་པའི་རྙེད་པ་དང་། མངོན་སུམ་དུ་གྱུར་པའི་རྙེད་པ་དང་། སོ་སོར་གྱུར་པའི་རྙེད་པ་དང་། བརྒྱད་ཡིན་ནོ། །མ་ལྟ་བུའི་གནས་ལས་གཏན་པ་དབྱུང་བའི་རྒྱུར་འགྱུར་བ་བརྒྱད་དེ་སོང་བ་དང་། འཛིན་པ་དང་། སླར་མི་འོང་སྙམ་པ་དང་། ཆུད་གསན་པ་དང་། ཐོས་པ་དང་། མཚམས་ལས་འདས་པ་དང་། རེ་ཐག་ཆད་པ་དང་། གསོལ་བའི་ལས་དང་བརྒྱད་ཡིན་ནོ། །དགེ་སློང་གིས་བཅང་བར་མི་བྱ་བའི་ལྷམ་བརྒྱད་དེ། རྩྭ་ཀུ་ཤ་ལས་བྱས་པའི་ལྷམ་དང་། མུན་ཙ་ལས་བྱས་པའི་ལྷམ་དང་། བལ་བ་ཛ་ལས་བྱས་པའི་ལྷམ་དང་། འབྲ་གོ་ལས་བྱས་པའི་ལྷམ་དང་། སྨྱུག་མ་ལས་བྱས་པའི་ལྷམ་དང་། སྤའི་ལོ་མ་ལས་བྱས་པའི་ལྷམ་དང་། གྲོ་བའི་ལྷམ་མོ། །གཞན་ཡང་དགེ་སློང་གིས་བཅང་བར་མི་བྱ་བའི་ལྷམ་བརྒྱད་དེ། སྐུད་པ་ལས་བྱས་པའི་ལྷམ་དང་། སྒྲ་དང་བཅས་པའི་ལྷམ་དང་། ཀོ་བ་ལས་བྱས་པའི་ལྷམ་དང་། ཤིང་ལྷམ་དང་། བ་སོ་ལས་བྱས་པའི་ལྷམ་དང་། ལྕགས་ལས་བྱས་པའི་ལྷམ་དང་། རིན་པོ་ཆེ་ལས་བྱས་པའི་ལྷམ་དང་། ཤུན་ཕྲགས་ལས་བྱས་པའི་ལྷམ་རྣམས་སོ། །འཇིག་རྟེན་གྱི་ཆོས་བརྒྱད་དེ། རྙེད་པ་དང་། མ་རྙེད་པ་དང་། གྲགས་པ་དང་། མ་གྲགས་པ་དང་། སྨད་པ་དང་། བསྟོད་པ་དང་། བདེ་བ་དང་། སྡུག་བསྔལ་བ་རྣམས་སོ། །དགེ་འདུན་དབྱེ་བར་འགྱུར་བའི་ཆོས་བརྒྱད་ལ། འདི་ལྟ་སྟེ། ཆོས་སོ། །ཆོས་མ་ཡིན་ནོ་ཞེས་བྱ་བ་དང་། འདུལ་བའོ་འདུལ་བ་མ་ཡིན་ནོ་ཞེས་བྱ་བ་དང་། ལྟུང་བའོ་ལྟུང་བ་མ་ཡིན་

---

^{[མ་དཔེ་གཟིགས་ན་འདིར་གནོན།]}

ནོ་ཞེས་བྱ་བ་དང་། ལྕི་བའོ་ཡང་བའོ་ཞེས་བྱ་བ་དང་། ལྷག་མ་དང་བཅས་པའོ། །ལྷག་མ་མ་ལུས་སོ་ཞེས་བྱ་བ་དང་། མཐོལ་བར་བྱ་བའོ། །བསྡམ་པར་བྱ་བའོ་ཞེས་པ་དང་། འདུལ་བ་ལས་འདས་པའོ། །ལོག་པར་བཤད་པར་འགྲོ་བའོ་ཞེས་བྱ་བ་དང་། མི་དགེ་བའོ། །ལུང་དུ་མི་སྟོན་པའོ་ཞེས་བྱ་བ་རྣམས་སོ། །རྣམ་པ་བརྒྱད་ཀྱིས་ན་རྩ་བ་མེད་པས་སྨད་པར་འགྱུར་ཏེ། འཁོན་པ་དང་། སྤྲོ་ཐུང་བ་དང་། ཁྲོ་བ་དང་། མི་སྲུན་པ་དང་། ཡིད་མི་དགའ་བ་དང་། མགུ་དཀའ་བ་དང་། ཕྲག་དོག་དང་། སེར་སྣའོ། །མདོར་ན། གང་ཟག་བརྟག་པར་བྱ་བ་དང་། །རྒོལ་བ་དང་ནི་སླར་རྒོལ་དང་། །འདུལ་བ་རྡུལ་དང་རྣམ་པ་བརྒྱད། །སོ་སོར་ཐར་པ་གཞག་པ་འོ། །གང་ཟག་བརྟག་པ་རྣམ་པ་བརྒྱད་དེ། སྤྱོད་པ་དང་། སྤྱོད་ཡུལ་དང་། མཛའ་བ་དང་། གྲོགས་དང་། འཚོ་བ་དང་། ཐོས་པ་དང་། ལུས་ཀྱི་ལས་དང་། ངག་གི་ལས་རྣམས་སོ། །གང་ཟག་ཇི་ལྟ་བ་དེ་བཞིན་དུ་རྒོལ་བ་དང་ཕྱིར་རྒོལ་བ་ཡང་ཤེས་པར་བྱའོ། །ཆོས་བརྒྱད་ཀྱིས་འདོད་ཆགས་འདུལ་བའི་མཐར་ཕྱིན་པར་འགྱུར་བ་ནི་འཕགས་པའི་ལམ་ཡན་ལག་བརྒྱད་པ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་རྣམས་སོ། །ཇི་ལྟར་འདོད་ཆགས་འདུལ་བའི་མཐར་ཕྱིན་པར་འགྱུར་བ་དེ་བཞིན་དུ་ཞེ་སྡང་་་འདུལ་བ་དང་། གཏི་མུག་འདུལ་བའི་མཐར་ཕྱིན་པར་འགྱུར་བ་ཡང་དེ་བཞིན་ནོ། །རྡུལ་ལྟ་བུ་བརྒྱད་དེ། བཅའ་བ་རྡུལ་ལྟ་བུ་དང་། བཟའ་བ་རྡུལ་ལྟ་བུ་དང་། བཏུང་བ་རྡུལ་ལྟ་བུ་དང་། བལྡག་པ་རྡུལ་ལྟ་བུ་དང་། བཞིབ་པ་རྡུལ་ལྟ་བུ་དང་། སྨན་རྡུལ་ལྟ་བུ་དང་། རྡུལ་ཉིད་ཀྱི་རྡུལ་དང་བརྒྱད་དོ། །ཆོས་མ་ཡིན་པའི་སོ་སོར་ཐར་པ་གཞག་པ་བརྒྱད་དེ། རྩ་བ་མེད་བཞིན་དུ་བྱས་པའི་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པ་དང་།

---

^{[མ་དཔེ་གཟིགས་ན་འདིར་གནོན།]}

རྩ་བ་མེད་པས་མ་བྱས་པའི་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པ་རྣམས་སོ། །ཆོས་དང་ལྡན་པའི་གསོ་སྦྱིན་གཞག་པ་བརྒྱད་དེ། རྩ་བ་དང་བཅས་པས་བྱས་པའི་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པ་དང་། རྩ་བ་དང་བཅས་པས་མ་བྱས་པའི་ཚུལ་ཁྲིམས་ཉམས་པ་དང་། ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་་་པ་རྣམས་སོ། །མདོར་ན། ཨུ་པཱ་ལི་དང་མ་འགགས་དང་། །གཽ་ཏས་གཽ་ཏ་མཱི་རིད་དེ། །མ་གནས་རིགས་པ་མ་ཡིན་པ། །གནོད་པ་དང་ནི་འདུལ་བ་འོ། །བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བདག་གིས་ཆོས་དང་འདུལ་བ་འཚལ་བར་འགྱུར་བ་དེ་ལྟ་བུའི་ཆོས་བདག་ལ་མདོར་བཤད་ན་ལེགས་སོ་ཞེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཨུ་པཱ་ལི་ལ་འདི་སྐད་ཅེས་བཀའ་སྩལ་ཏོ། །ཨུ་པཱ་ལི་ཆོས་གང་་འཐབ་པའི་རྒྱུར་འགྱུར་བ་དང་། མཚང་འདྲུ་བའི་རྒྱུར་འགྱུར་བ་དང་། འཁོན་པའི་རྒྱུར་འགྱུར་བ་དང་། རྩོད་པའི་རྒྱུར་འགྱུར་བ་དང་། སོ་སོར་སྨྲ་བའི་རྒྱུར་འགྱུར་བ་དང་། མི་མཐུན་པར་སྨྲ་བའི་རྒྱུར་འགྱུར་བ་དང་། མི་སྡུད་པའི་རྒྱུར་འགྱུར་བ་དང་། དྲན་པ་ཉམས་པའི་རྒྱུར་འགྱུར་བ་དང་། དུ་མར་་་འགྱུར་བའི་རྒྱུར་འགྱུར་བ་སྟེ། དེ་ལྟ་བུ་ལ་འདི་ནི་ཆོས་མ་ཡིན། འདི་ནི་འདུལ་བ་མ་ཡིན། འདི་ནི་སྟོན་པས་བསྟན་པ་མ་ཡིན་པར་ཤིན་ཏུ་རྟོགས་པར་གྱིས་ཤིག །ཨུ་པཱ་ལི་ཆོས་གང་མི་འཐབ་པའི་རྒྱུར་འགྱུར་བ་དང་། མཚང་མི་འདྲུ་བ་དང་། མི་འཁོན་པ་དང་། མི་རྩོད་པ་དང་། སོ་སོར་མི་སྨྲ་བ་དང་། མཐུན་པར་སྨྲ་བ་དང་། སྡུད་པ་དང་། དྲན་པ་མ་ཉམས་པ་དང་། དངོས་པོ་གཅིག་ཏུ་འགྱུར་བ་འདི་རྣམས་ལ་འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པ་ཡིན་པར་ཤིན་ཏུ་རྟོགས་པར་གྱིས་ཤིག །ཨུ་པཱ་ལི་བརྒྱད་པོ་ཇི་ལྟ་བ་དེ་བཞིན་ནོ། །མ་འགགས་

---

^{[མ་དཔེ་གཟིགས་ན་འདིར་གནོན།]}

པ་ལ་ཡང་ནག་པོ་དང་དཀར་པོའི་ཕྱོགས་སུ་བརྒྱད་དུ་བརྗོད་པར་བྱའོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་གཽ་ཏ་མཱི་སྐྱེ་དགུའི་བདག་མོ་ཆེན་མོ་བཅོམ་ལྡན་འདས་ག་ལ་བ་་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་་་འཚལ་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་གཽ་ཏ་མཱི་སྐྱེ་དགུའི་བདག་མོ་ཆེན་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཇི་ལྟར་ཆོས་དང་འདུལ་བ་འཚལ་བར་འགྱུར་བ་དེ་ལྟ་བུའི་ཆོས་བདག་ལ་བཤད་ན་ལེགས་སོ་ཞེས་དེ་སྐད་གསོལ་པ་དང་། བཅོམ་ལྡན་འདས་ཀྱིས་གཽ་ཏ་མཱི་སྐྱེ་དགུའི་བདག་མོ་ཆེན་མོ་ལ་འདི་སྐད་ཅེས་བཀའ་སྩལ་ཏོ། །གཽ་ཏ་མཱི་ཆོས་གང་ཀུན་ཏུ་འདོད་ཆགས་པའི་རྒྱུར་འགྱུར་གྱི་ཀུན་ཏུ་འདོད་ཆགས་མེད་པའི་རྒྱུར་མ་ཡིན། ཀུན་ཏུ་ཞེ་སྡང་བའི་རྒྱུར་འགྱུར་གྱི་ཀུན་ཏུ་ཞེ་སྡང་མེད་པའི་རྒྱུར་མ་ཡིན། ཀུན་ཏུ་གཏི་མུག་གི་རྒྱུར་འགྱུར་གྱི་ཀུན་ཏུ་གཏི་མུག་མེད་པའི་རྒྱུར་མ་ཡིན། ཀུན་ཏུ་སྦྱོར་བའི་རྒྱུར་འགྱུར་གྱི་ཀུན་ཏུ་མི་སྦྱོར་བའི་རྒྱུར་མ་ཡིན། ཀུན་ཏུ་ཉོན་མོངས་པའི་རྒྱུར་འགྱུར་གྱི་རྣམ་པར་བྱང་བའི་རྒྱུར་མ་ཡིན། འདོད་ཆེན་ཆེ་བའི་རྒྱུར་འགྱུར་གྱི་འདོད་ཆེན་མི་ཆེ་བའི་རྒྱུར་མ་ཡིན། ཆོག་མི་ཤེས་པའི་རྒྱུར་འགྱུར་གྱི་ཆོག་ཤེས་པའི་རྒྱུར་མ་ཡིན། དགང་དཀའ་བའི་རྒྱུར་འགྱུར་གྱི་དགང་སླ་བའི་རྒྱུར་མ་ཡིན། གསོ་དཀའ་བའི་རྒྱུར་འགྱུར་གྱི་གསོ་སླ་བའི་རྒྱུར་མ་ཡིན་ཏེ། འདི་དག་ནི་ཆོས་མ་ཡིན། འདུལ་བ་མ་ཡིན། སྟོན་པས་བསྟན་པ་མ་ཡིན་པར་ཤིན་ཏུ་རྟོགས་པར་བྱོས་ཤིག །གཽ་ཏ་མཱི་ཆོས་གང་ཀུན་ཏུ་འདོད་ཆགས་མེད་པའི་རྒྱུར་འགྱུར་གྱི་ཀུན་ཏུ་འདོད་ཆགས་ཀྱི་རྒྱུར་མ་ཡིན། ཀུན་ཏུ་ཞེ་སྡང་མེད་པའི་རྒྱུར་འགྱུར་གྱི་ཀུན་ཏུ་ཞེ་སྡང་གི་རྒྱུར་མ་ཡིན། ཀུན་ཏུ་གཏི་མུག་མེད་པའི་རྒྱུར་འགྱུར་གྱི་ཀུན་ཏུ་གཏི་མུག་གི་རྒྱུར་མ་ཡིན། ཀུན་ཏུ་མི་སྦྱོར་བའི་རྒྱུར་འགྱུར་གྱི་ཀུན་ཏུ་སྦྱོར་བའི་རྒྱུར་མ་ཡིན། རྣམ་པར་བྱང་བའི་རྒྱུར་འགྱུར་གྱི་ཀུན་ཏུ་ཉོན་མོངས་པའི་རྒྱུར་མ་ཡིན། འདོད་ཆེན་མི་ཆེ་བའི་རྒྱུར་འགྱུར་གྱི་འདོད་ཆེན་ཆེ་བའི་རྒྱུར་མ་ཡིན། ཆོག་ཤེས་པའི་རྒྱུར་འགྱུར་གྱི་ཆོག་མི་ཤེས་པའི་

---

^{[མ་དཔེ་གཟིགས་ན་འདིར་གནོན།]}

རྒྱུར་མ་ཡིན། དགང་སླ་བའི་རྒྱུར་འགྱུར་གྱི་དགང་དཀའ་བའི་རྒྱུར་མ་ཡིན། གསོ་སླ་བའི་རྒྱུར་འགྱུར་གྱི་གསོ་དཀའ་བའི་རྒྱུར་མ་ཡིན་ཏེ། དེ་དག་ལ་འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་ཤིན་ཏུ་རྟོགས་པར་ཤེས་པར་བྱོས་ཤིག །གཽ་ཏ་མཱིའི་སྐྱེ་དགུའི་བདག་མོ་ཆེན་མོ་ལ་ཇི་སྐད་གསུངས་པ། དེ་བཞིན་དུ་མདོ་བརྗོད་པར་བྱའོ། །བརྒྱད་པ་རྫོགས་སོ།། །།གནས་དགུ་སྟེ། སྟོན་པ་ལ་གནས་པ་དང་། ཆོས་ལ་གནས་པ་དང་། དགེ་འདུན་ལ་གནས་པ་དང་། སློབ་དཔོན་ལ་གནས་པ་དང་། མཁན་པོ་ལ་གནས་པ་དང་། བླ་མ་ལ་གནས་པ་དང་། གནས་ལ་གནས་པ་དང་། གང་ཟག་ལ་གནས་པ་དང་། ཡུལ་ལ་གནས་པའོ། །མི་རིགས་པའི་གནས་དགུ་སྟེ། དགྲ་བཅོམ་པ་ཟག་པ་ཟད་པས་ཤེས་བཞིན་དུ་སྲོག་ཆགས་འཚོ་བ་དང་འབྲལ་་་བར་བྱེད་པ་མི་རིགས་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་་པ་འཁྲིག་པའི་ཆོས་ལ་སྟེན་པ་དང་། ཤེས་བཞིན་དུ་བརྫུན་དུ་སྨྲ་བ་དང་། སྦགས་པ་ལ་ཀུན་ཏུ་སྤྱོད་པར་འདོད་ཅིང་ཟ་བ་དང་། ཤེས་བཞིན་དུ་བསླབ་པ་ལས་འདའ་བར་བྱེད་པ་དང་། བསླབ་པ་ཕུལ་ཞིང་འབབས་པར་བྱེད་པ་དང་། འདི་ལས་ཕྱི་རོལ་གཞན་དུ་སྟོན་པ་ཚོལ་བ་དང་། མོ་དང་ལྟས་ཀྱིས་རྣམ་པར་འདག་པར་ཡིད་ཆེས་ཀྱི་ལས་ཀྱིས་མ་ཡིན་པ་རྣམས་སུ་མི་རིགས་པའོ། །འདོད་པའི་དངོས་པོ་དགུ་སྟེ། འདི་ནི་བདག་ལ་གནོད་པར་འདོད་དོ། །མི་ཕན་པར་འདོད་དོ། །མི་བདེ་བར་འདོད་དོ། །བདེ་བ་དང་ལྡན་པ་འདོད་པ་མ་ཡིན་ནོ། །སྐྱིད་པ་དང་མི་ལྡན་པར་འདོད་པའོ། །འདིས་བདག་ལ་གནོད་པར་བྱས་སོ། །བྱེད་དོ། །བྱེད་པར་འགྱུར་རོ་སྙམ་ནས་དེས་དེ་ལ་གནོད་པར་བྱེད་དོ། །གང་ཡང་བདག་ལ་གནོད་པར་འདོད་པ། མི་ཕན་པར་འདོད་པ། མི་བདེ་བར་འདོད་པ། བདེ་བར་འདོད་པ་མ་ཡིན་ནོ། །སྐྱིད་པ་དང་ལྡན་པར་མི་འདོད་དེ། འདིས་མི་གནོད་པར་འདོད། ཕན་པར་འདོད། བདེ་བར་འདོད། བདེ་བ་དང་ལྡན་པར་འདོད། སྐྱིད་པ་ལ་བདེ་བར་འདོད་དེ། འདིས་དེ་ལ་གནོད་

---

^{[མ་དཔེ་གཟིགས་ན་འདིར་གནོན།]}

པ་མ་བྱས་སོ། །མི་བྱེད་དོ། །བྱེད་པར་མི་འགྱུར་རོ་ཞེས་དེས་དེ་ལ་གནོད་པར་བྱེད་དོ། །སུ་ཞིག་ཡང་བདག་ལ་མི་གནོད་པར་འདོད། ཕན་པར་འདོད་པ། བདེ་བར་འདོད་པ། བདེ་བ་དང་ལྡན་པར་འདོད་པ། སྐྱིད་པ་དང་ལྡན་པར་འདོད་པ་དེ་ལ་འདི་གནོད་པར་འདོད། མི་ཕན་པར་འདོད། མི་བདེ་བར་འདོད། བདེ་བ་དང་མི་ལྡན་པར་འདོད། སྐྱིད་པ་དང་མི་ལྡན་པར་འདོད་ལ་གནོད་པར་བྱེད་དོ། །གནོད་པར་བྱེད་པ་དགུ་འདུལ་བ་སྟེ། འདི་ནི་བདག་ལ་གནོད་པར་འདོད། མི་ཕན་པར་འདོད། མི་བདེ་བར་འདོད། བདེ་བ་དང་མི་ལྡན་པར་འདོད། སྐྱིད་པ་དང་མི་ལྡན་པར་འདོད། འདིས་ནི་བདག་ལ་གནོད་པ་བྱས་སོ། །བྱེད་དོ། །བྱེད་པར་འགྱུར་རོ་སྙམ་ནས་དེས་དེ་ལ་གནོད་པ་སྐྱེད་པ་སླར་འཇིལ་བར་བྱེད་དོ། །གང་ཡང་བདག་ལ་གནོད་པར་འདོད་པ། མི་ཕན་པར་འདོད་པ། མི་བདེ་བར་འདོད་པ། བདེ་བ་དང་མི་ལྡན་པར་འདོད་པ། སྐྱིད་པ་དང་མི་ལྡན་པར་འདོད་པ་དེ་ལ་འདི་གནོད་པར་མི་འདོད། ཕན་པར་འདོད། བདེ་བར་འདོད། བདེ་བ་དང་ལྡན་པར་འདོད། སྐྱིད་པ་དང་ལྡན་པར་འདོད་དེ། དེ་ལ་འདིས་གནོད་པ་མ་བྱས། མི་བྱེད། བྱེད་པར་མི་འགྱུར་རོ་སྙམ་ནས་དེ་འདི་སྙམ་དུ་བདག་འདི་ལྟར་གྱུར་ཅིག །འདི་ལྟར་མ་གྱུར་པར་གཞན་ལས་ཐོབ་པར་ག་ལ་འགྱུར་སྙམ་དུ་བསམས་ནས། དེས་དེ་ལ་གནོད་པ་སྐྱེད་པ་སླར་འཇིལ་བར་བྱེད་དོ། །ཡང་གང་བདག་ལ་མི་གནོད་པར་འདོད་པ། ཕན་པར་འདོད་པ། བདེ་བ་དང་ལྡན་པར་འདོད་པ། སྐྱིད་པ་དང་ལྡན་པར་འདོད་པ་དེ་ལ་འདི་གནོད་པར་འདོད། མི་ཕན་པར་འདོད། བདེ་བ་དང་མི་ལྡན་པར་འདོད། སྐྱིད་པ་དང་མི་ལྡན་པར་འདོད་པ་དེ་ལ་འདིས་གནོད་པ་བྱས། བྱེད་བྱེད་པར་འགྱུར་རོ་སྙམ་པ་ལས་དེ་ཡང་འདི་སྙམ་དུ་བདག་འདི་ལྟར་གྱུར་ཅིག་འདི་ལྟར་མ་གྱུར་ཅིག་པར་གཞན་ལས་ཐོབ་པར་ག་ལ་འགྱུར་སྙམ་དུ་བསམས་ནས། དེས་དེ་ལ་གནོད་པ་སྐྱེད་པ་སླར་འཇིལ་བར་བྱེད་དོ། །དགུ་པ་རྫོགས་སྷོ།། །།མདོར་ན། འདུལ་བ་མ་ཡིན་རྣམ་གཉིས་དང་། །འདུལ་བ་ལ་ཡང་རྣམ་གསུམ་སྟེ། །སྦྱིན་དང་བསྡུ་བར་བྱ་བ་དང་། །

---

^{[མ་དཔེ་གཟིགས་ན་འདིར་གནོན།]}

ཡོན་ཏན་རྣམས་ནི་ཐ་མ་འོ། །འདུལ་བ་མ་ཡིན་པ་བཅུ་ནི་མི་དགེ་བ་བཅུའི་ལས་ཀྱི་ལམ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་མོ་དང་། ཚིག་འཁྱལ་བ་དང་། ངན་དུ་སེམས་པ་དང་། ཆགས་པ་དང་། ལོག་པར་ལྟ་བའོ། །གཞན་ཡང་འདུལ་བ་མ་ཡིན་པ་བཅུ་ནི་ལོག་པའི་ཡན་ལག་བཅུ་སྟེ། ལོག་པར་ལྟ་བ་དང་། ལོག་པར་རྟོག་པ་དང་། ལོག་པར་སྨྲ་བ་དང་། ལོག་པའི་ལས་ཀྱི་མཐའ་དང་། ལོག་པར་འཚོ་བ་དང་། ལོག་པར་རྩོལ་བ་དང་། ལོག་པའི་དྲན་པ་དང་། ལོག་པའི་ཏིང་ངེ་འཛིན་དང་། ལོག་པའི་རྣམ་པར་གྲོལ་བ་དང་། ལོག་པའི་ཡེ་ཤེས་སོ། །འདུལ་བ་བཅུ་ནི་དགེ་བའི་ལས་ཀྱི་ལམ་བཅུ་སྟེ། སྲོག་གཅོད་པ་ལས་སླར་ལྡོག་པ་དང་། མ་བྱིན་པ་ལེན་པ་ལས་སླར་ལྡོག་པ་དང་། འདོད་པས་ལོག་པར་སྤྱོད་པ་ལས་སླར་ལྡོག་པ་དང་། བརྫུན་དུ་སྨྲ་བ་ལས་སླར་ལྡོག་པ་དང་། ཕྲ་མ་ལས་སླར་ལྡོག་པ་དང་། ཚིག་རྩུབ་མོ་སྨྲ་བ་ལས་སླར་ལྡོག་པ་དང་། ཚིག་འཁྱལ་་བ་སྨྲ་བ་ལས་སླར་ལྡོག་པ་དང་། ངན་དུ་སེམས་པ་དང་། ཆགས་པ་དང་། ལོག་པར་ལྟ་བ་རྣམས་ལས་སླར་ལྡོག་པ་རྣམས་སོ། །གཞན་ཡང་འདུལ་བ་བཅུ་ནི་ཡང་དག་པའི་ཡན་ལག་བཅུ་སྟེ། ཡང་དག་པར་ལྟ་བ་དང་། ཡང་དག་པར་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་དང་། ཡང་དག་པའི་རྣམ་པར་གྲོལ་བ་དང་། ཡང་དག་པའི་ཡེ་ཤེས་སོ། །གཞན་ཡང་འདུལ་བ་བཅུ་སྟེ། སངས་རྒྱས་ཀྱི་དུས་སུ་བྱུང་བ་དང་། དུས་ཐམས་ཅད་དུ་བྱུང་བ་དང་། ཉི་ཚེ་བའི་དུས་སུ་བྱུང་བ་དང་། ཐམས་ཅད་དུ་འགྲོ་བ་དང་། དུས་ཀྱི་འདུལ་བ་དང་། ཡུལ་གྱི་འདུལ་བ་དང་། གང་ཟག་གི་འདུལ་བ་དང་། གནས་ཀྱི་འདུལ་བ་དང་། རྩོལ་བའི་འདུལ་བ་དང་། ཉོན་མོངས་པའི་འདུལ་བའོ། །བསྡུ་བ་བཅུ་སྟེ། ལྷུང་

---

^{[མ་དཔེ་གཟིགས་ན་འདིར་གནོན།]}

བཟེད་བསྡུ་བ་དང་། ཆོས་གོས་བསྡུ་བ་དང་། སྨན་བསྡུ་བ་དང་། ཟང་ཟིང་བསྡུ་བ་དང་། མལ་སྟན་བསྡུ་བ་དང་། མདོ་སྡེ་བསྡུ་བ་དང་། འདུལ་བ་བསྡུ་བ་དང་། མ་ལྟ་བུ་བསྡུ་བ་དང་། ཡོངས་སུ་དག་པ་བསྡུ་བ་དང་། ཉེས་པ་ལས་ལྡང་བ་བསྡུ་བའོ། །སྦྱིན་པ་བཅུ་སྟེ། ལྷུང་བཟེད་སྦྱིན་པ་དང་། ཆོས་གོས་སྦྱིན་པ་དང་། སྨན་སྦྱིན་པ་དང་། ཟང་ཟིང་སྦྱིན་པ་དང་། མལ་སྟན་སྦྱིན་པ་དང་། མདོ་སྡེ་སྦྱིན་པ་དང་། འདུལ་བ་སྦྱིན་པ་དང་། མ་ལྟ་བུ་སྦྱིན་པ་དང་། ཡོངས་སུ་དག་པ་སྦྱིན་པ་དང་། ཉེས་པ་ལས་ལྡང་བ་སྦྱིན་པ་སྟེ། འདི་དག་ཀྱང་བསྡུ་བའི་དངོས་པོ་བཅུ་པོར་ཤེས་པར་བྱའོ། །འདུལ་བ་འཛིན་པའི་གང་ཟག་ལ་ཡོན་ཏན་བཅུ་སྟེ། བྱུང་བ་ཤེས་པ་དང་། བཅས་པ་ཤེས་པ་དང་། རྗེས་སུ་བཅས་པ་ཤེས་པ་དང་། མི་གནང་བར་ཤེས་པ་དང་། རྗེས་སུ་གནང་བར་ཤེས་པ་དང་། ངའི་ཕྱོགས་དེར་སྣང་བར་གྲགས་པ་དང་། སྣང་བར་གྱུར་པ་དང་། རབ་ཏུ་སྣང་བར་གྱུར་པ་དང་། ངའི་ཕྱོགས་དེ་མ་སྟོངས་པར་གྲགས་པ་དང་། འདུལ་བ་འཛིན་པའི་གང་ཟག་དེ་ལྟ་བུ་ཕྱོགས་གང་ན་གནས་པ་དེའི་ཕྱོགས་སུ་དེ་བཞིན་གཤེགས་པ་ཕྲིན་ལས་ཆུང་བར་འགྱུར་རོ། །མདོར་ན། ཆད་པའི་ལས་དང་མངོན་སུམ་དུ། །བར་ཆད་བསྙེན་པར་རྫོགས་པ་དང་། །གླེང་བ་དག་དང་བཞི་པ་དང་། །ཡིད་དུ་འོང་དང་རྣམ་དྲུག་གོ །ཆད་པའི་ལས་བཅུ་སྟེ། བསྡིགས་པ་དང་། སྨད་པ་དང་། བསྐྲད་པ་དང་། བསྡུམ་པ་དང་། མ་མཐོང་ཞེས་བྱ་བའི་གཞི་ནས་བསླང་བའི་ཆད་པ་དང་། གནས་ནས་དབྱུང་བ་དང་། གསོ་སྦྱོང་གཞག་པ་དང་། དགག་དབྱེ་གཞག་པ་དང་། གསོལ་བར་བརྗོད་པ་གཞག་པ་དང་། ཡིད་མགུ་བ་དང་བཅུའོ། །མངོན་སུམ་དུ་གྱུར་ནས་བསྙེན་པར་རྫོགས་པར་འགྱུར་བ་བཅུ་སྟེ། སྟོན་པ་མངོན་སུམ་དུ་གྱུར་ནས་བསྙེན་པར་རྫོགས་པར་འགྱུར་བ་དང་། སངས་རྒྱས་མངོན་སུམ་དུ་གྱུར་པ་དང་། ཆོས་མངོན་སུམ་དུ་གྱུར་པ་དང་། མཁན་པོ་མངོན་སུམ་དུ་གྱུར་པ་དང་། སློབ་དཔོན་མངོན་སུམ་དུ་གྱུར་པ་དང་། བསྙེན་པར་རྫོགས་པར་འདོད་པ་མངོན་སུམ་དུ་གྱུར་

---

^{[མ་དཔེ་གཟིགས་ན་འདིར་གནོན།]}

པ་དང་། བསྙེན་པར་རྫོགས་པར་འདོད་པའི་ཡོ་བྱད་མངོན་སུམ་དུ་གྱུར་པ་དང་། ཡོངས་སུ་དག་པ་མངོན་སུམ་དུ་གྱུར་པ་དང་། གསོལ་བ་མངོན་སུམ་དུ་གྱུར་པ་དང་། ལས་མངོན་སུམ་དུ་གྱུར་པ་རྣམས་སོ། །བསྙེན་པར་རྫོགས་པའི་བར་ཆད་དུ་འགྱུར་བ་བཅུ་སྟེ། མ་ནིང་དུ་གྱུར་པ་དང་། དགེ་སློང་མ་སུན་ཕྱུང་བ་དང་། ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པ་དང་། དགེ་འདུན་ཕྱེ་བ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། རྐུན་གནས་དང་། སྔར་ཉེས་པ་བྱུང་བ་དང་། སྔར་འཁྲུགས་པ་དང་། མུ་སྟེགས་ཅན་དུ་སོང་བ་རྣམས་སོ། །བསྙེན་པར་རྫོགས་པ་བཅུ་སྟེ། དེ་བཞིན་གཤེགས་པ་ལས་སློབ་དཔོན་མེད་པར་བསྙེན་པར་རྫོགས་པ་དང་། ཡེ་ཤེས་མངོན་པར་རྟོགས་ནས་བསྙེན་པར་རྫོགས་པ་ལྔ་དང་། འོད་སྲུང་ཆེན་པོས་སྟོན་པ་ལ་ཁས་བླངས་ཏེ་བསྙེན་པར་རྫོགས་པ་དང་། སོ་ད་ཡས་དྲིས་པའི་ལན་ལོན་པར་ཤེས་ནས་བསྙེན་པར་རྫོགས་པ་དང་། གཽ་ཏ་མཱི་སྐྱེ་དགུའི་བདག་མོ་ཆེན་མོ་བླ་མའི་ཆོས་ཁས་བླངས་པས་བསྙེན་པར་རྫོགས་པ་དང་། ཆོས་སྦྱིན་མ་ཕྲིན་པས་བསྙེན་པར་རྫོགས་པ་དང་། མཐའ་འཁོབ་ཏུ་འདུལ་བ་འཛིན་པ་དང་། ལྔས་བསྙེན་པར་རྫོགས་པ་དང་། སློབ་དཔོན་མེད་མཁན་པོ་མེད་པར་བསྙེན་པར་རྫོགས་པ་དང་། དགེ་སློང་ཚུར་ཤོག་ཅེས་གསུངས་པས་བསྙེན་པར་རྫོགས་པ་དང་། གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའོ། །གླེང་བ་ལ་བཅུ་སྟེ། དུས་དང་དུས་མ་ཡིན་པ་དང་། བདེན་པ་དང་། མི་བདེན་པ་དང་། དོན་དང་ལྡན་པ་དང་། དོན་དང་མི་ལྡན་པ་དང་། སྙན་པ་དང་། ཚིག་རྩུབ་མོ་དང་། བྱམས་པར་ལྡན་པ་དང་། ཞེ་སྡང་དུ་ལྡན་པའོ། །ཆོས་བཅུ་དང་ལྡན་པས་གཞན་ལ་གླེང་བར་བྱ་སྟེ། ཚུལ་ཁྲིམས་དང་ལྡན་པར་གྱུར་པ་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། དྲན་པ་ཉེ་བར་གནས་པ་དང་། ཤེས་རབ་དང་ལྡན་པ་དང་། དུས་སུ་གླེང་གི་དུས་ལས་འདས་པར་མ་ཡིན་པ་དང་། བདེན་པ་སྟེ་མི་བདེན་པ་མ་ཡིན་པ་དང་། དོན་

---

^{[མ་དཔེ་གཟིགས་ན་འདིར་གནོན།]}

དང་ལྡན་པ་སྟེ། དོན་དང་མི་ལྡན་པ་མ་ཡིན་པ་དང་། སྙན་པ་སྟེ་ཚིག་རྩུབ་མོ་མ་ཡིན་པ་དང་། བྱམས་པ་དང་ལྡན་པས་ཏེ། ཞེ་སྡང་དང་ལྡན་པ་མ་ཡིན་པའོ། །གཞན་ཡང་ཆོས་བཅུ་དང་ལྡན་པས་གཞན་ལ་གླེང་བར་བྱ་སྟེ། ཚུལ་ཁྲིམས་དང་ལྡན་པར་གྱུར་པ་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། མ་གཡེངས་པ་དང་། ཤེས་རབ་དང་ལྡན་པ་དང་། དུས་སུ་གླེང་གི་དུས་ལས་འདས་པར་མ་ཡིན་པ་དང་། བདེན་པ་སྟེ་མི་བདེན་པ་མ་ཡིན་པ་དང་། དོན་དང་ལྡན་པ་སྟེ་དོན་དང་མི་ལྡན་པ་མ་ཡིན་པ་དང་། སྙན་པ་སྟེ་ཚིག་རྩུབ་པོས་མ་ཡིན་པ་དང་། བྱམས་པ་དང་ལྡན་པ་སྟེ་ཞེ་སྡང་དང་ལྡན་པས་མ་ཡིན་པའོ། །གཞན་ཡང་ཆོས་བཅུ་དང་ལྡན་པས་གཞན་ལ་གླེང་བར་བྱ་སྟེ། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། དྲན་པ་ཉེ་བར་གནས་པ་དང་། སོ་སོར་བརྟགས་པའི་སྟོབས་སུ་གྱུར་པ་དང་། དུས་སུ་གླེང་གི་དུས་ལས་འདས་པར་མ་ཡིན་པ་དང་། བདེན་པ་སྟེ་མི་བདེན་པས་མ་ཡིན་པ་དང་། དོན་དང་ལྡན་པ་སྟེ་དོན་དང་མི་ལྡན་པས་མ་ཡིན་པ་དང་། ངག་སྙན་པ་སྟེ་རྩུབ་པོས་མ་ཡིན་པ་དང་། བྱམས་པ་དང་ལྡན་པ་སྟེ་ཞེ་སྡང་དང་ལྡན་པས་མ་ཡིན་པའོ། །ཆོས་བཅུ་དང་ལྡན་པའི་དགེ་སློང་ནི་ཚངས་པ་མཚུངས་པ་རྣམས་ལ་དགའ་བར་འགྱུར་ཏེ། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། དྲན་པ་ཉེ་བར་གནས་པ་དང་། ཤེས་རབ་དང་ལྡན་པ་དང་། མི་སློབ་པའི་ཚུལ་ཁྲིམས་ཀྱི་ཕུང་པོ་དང་ལྡན་པར་གྱུར་པ་དང་། ཤེས་རབ་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པར་གྱུར་པའོ། །ཇི་ལྟར་དགའ་བར་གྱུར་པ་དེ་བཞིན་དུ་གཉིས་པོ་ཡིད་དུ་འོང་བ་ལ་ཡང་བཅུར་བརྗོད་པར་བྱའོ། །གསུམ་པོ་བླ་མར་བྱས་པ་ཡང་བཅུར་བརྗོད་པར་བྱའོ། །བཞི་པོ་མོས་པར་བྱ་བ་ལ་ཡང་བཅུར་བརྗོད་པར་བྱའོ། །ལྔ་པོ་མཆོད་པ་ལ་ཡང་བཅུར་བརྗོད་པར་བྱའོ། །དྲུག་པོ་བསྟོད་པ་ལ་ཡང་བཅུར་བརྗོད་པར་བྱའོ། །

---

^{[མ་དཔེ་གཟིགས་ན་འདིར་གནོན།]}

མདོར་ན། རབ་ཏུ་བྱུང་དང་བཞི་པོ་སྟེ། །རྣམ་པར་གྲོལ་དང་ཕུན་སུམ་དང་། །ཡོན་ཏན་དེ་བཞིན་སྦྱིན་པ་དང་། །གསོ་སྦྱིན་རྣམས་ཀྱི་གཞག་པ་འོ། །ཆོས་བཅུ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ་སྟེ། བསྙེན་པར་རྫོགས་ནས་ལོ་བཅུ་བཅུ་ལོན་ནམ་དེ་ལས་ལྷག་པ་ཡང་རུང་བ་དང་། ལྷན་ཅིག་སྤྱོད་པ་དང་ཉེ་གནས་རྣམས་ཀྱང་རུང་སྟེ། ནད་གཡོག་བྱེད་དུ་འཇུག་པར་ནུས་པ་དང་། ལྷན་ཅིག་སྤྱོད་པ་དང་ཉེ་གནས་ལ་འགྱོད་པ་སྐྱེས་ན་སླར་སེལ་བའམ་སེལ་བར་བྱེད་དུ་འཇུག་པར་ནུས་པ་དང་། ལྷན་ཅིག་སྤྱོད་པ་དང་ཉེ་གནས་རྣམས་སྡིག་པ་དང་ལྡན་པའི་རྣམ་པ་ཞིག་བྱུང་ན་སླར་གཏོང་ངམ་སླར་གཏོང་དུ་འཇུག་ནུས་པ་དང་། ལྷན་ཅིག་སྤྱོད་པ་དང་ཉེ་གནས་ཡུལ་དེར་གནས་པར་མི་དགའ་ན་ཡུལ་གཞན་དུ་གཏང་བར་ནུས་པ་དང་། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། དྲན་པ་ཉེ་བར་གནས་པ་དང་། ཤེས་རབ་དང་ལྡན་པའོ། །གཞན་ཡང་ཆོས་བཅུ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ་སྟེ། བཅུ་གང་ཞེ་ན། ཉེས་པ་ཤེས་པ་དང་། ཉེས་པ་མེད་པར་ཤེས་པ་དང་། ལྕི་བ་ཤེས་པ་དང་། ཡང་བ་ཤེས་པ་དང་། དེས་སོ་སོར་ཐར་པའི་མདོ་ཁ་ཏོན་དུ་སློབ་པར་གྱུར་པ་དང་། སློབ་པའི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པར་གྱུར་པའོ། །གཞན་ཡང་ཆོས་བཅུ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ་སྟེ། བྱུང་བ་ཤེས། བཅས་པ་ཤེས། རྗེས་སུ་བཅས་པ་ཤེས། མ་གནང་བ་ཤེས། རྗེས་སུ་གནང་བ་ཤེས། བར་ཆད་དུ་འགྱུར་བ་ཤེས། བར་ཆད་དུ་མི་འགྱུར་བ་ཤེས། ལུང་བསྒོ་བ་ཡིན། རྗེས་སུ་སྟོན་པ་ཡིན། གནས་བཅུར་འཇུག་ནུས་པ་ཡིན་ནོ། །གཞན་ཡང་ཆོས་བཅུ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་

---

^{[མ་དཔེ་གཟིགས་ན་འདིར་གནོན།]}

སྦྱིན་པར་བྱ་སྟེ། དད་པ་ཕུན་སུམ་ཚོགས་པ་ཡིན། ཚུལ་ཁྲིམས་ཕུན་སུམ་ཚོགས་པ་ཡིན། ཐོས་པ་ཕུན་སུམ་ཚོགས་པ་དང་། གཏོང་བ་ཕུན་སུམ་ཚོགས་པ་དང་། ཤེས་རབ་ཕུན་སུམ་ཚོགས་པ་དང་། ཚུལ་ཁྲིམས་ཕུན་སུམ་ཚོགས་པ་དང་། ཏིང་ངེ་འཛིན་ཕུན་སུམ་ཚོགས་པ་དང་། ཤེས་རབ་ཕུན་སུམ་ཚོགས་པ་དང་། རྣམ་པར་གྲོལ་བ་ཕུན་སུམ་ཚོགས་པ་དང་། རྣམ་པར་གྲོལ་བའི་ཡེ་ཤེས་མཐོང་བ་ཕུན་སུམ་ཚོགས་པའོ། །ཆོས་བཅུས་ན་རྣམ་པར་གྲོལ་བར་ཡང་དག་པར་འཇུག་པའི་རྒྱུར་འགྱུར་ཏེ། སློབ་པའི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་། མི་སློབ་པའི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོའོ། །ཕུན་སུམ་ཚོགས་པ་བཅུ་སྟེ། སྟོན་པ་ཕུན་སུམ་ཚོགས་པ་དང་། ཆོས་ཕུན་སུམ་ཚོགས་པ་དང་། དགེ་འདུན་ཕུན་སུམ་ཚོགས་པ་དང་། སློབ་དཔོན་ཕུན་སུམ་ཚོགས་པ་དང་། མཁན་པོ་ཕུན་སུམ་ཚོགས་པ་དང་། ཚུལ་ཁྲིམས་ཕུན་སུམ་ཚོགས་པ་དང་། ཐོས་པ་ཕུན་སུམ་ཚོགས་པ་དང་། ཤེས་རབ་ཕུན་སུམ་ཚོགས་པ་དང་། རྣམ་པར་གྲོལ་བ་ཕུན་སུམ་ཚོགས་པ་དང་། རྣམ་པར་གྲོལ་བའི་ཡེ་ཤེས་མཐོང་བ་ཕུན་སུམ་ཚོགས་པའོ། །ཡོན་ཏན་བཅུ་སྟེ། དགེ་འདུན་བསྡུ་བ་དང་། དགེ་འདུན་ལ་དགེ་བ་དང་། དགེ་འདུན་བདེ་བར་སྤྱོད་པ་དང་། ཁྲེལ་མེད་པའི་གང་ཟག་རྣམས་ལ་ནན་ཏུར་བྱ་བ་དང་། ཁྲེལ་ཡོད་པའི་རྣམས་ལ་བདེ་བར་སྤྱོད་པ་དང་། མངོན་པར་མ་དད་པའི་རྣམས་མངོན་པར་དད་པར་བྱ་བ་དང་། མངོན་པར་དད་པའི་རྣམས་ཕྱི་ཕྱིར་དད་པར་བྱ་བ་དང་། ད་ལྟར་གྱི་ཚེ་འདིའི་ཟག་པ་རྣམས་བསྡམ་པ་དང་། ཚེ་ཕྱི་མའི་ཕྱིར་འབྱུང་བའི་རྣམས་རབ་ཏུ་གཞོམ་པ་དང་། ཚངས་པར་སྤྱོད་པས་རྗེས་སུ་ཕན་གདགས་པ་དང་། ཚངས་པར་སྤྱོད་པ་དང་མཐུན་པར་བྱ་བའི་ཕྱིར་ངའི་ཚངས་པར་

---

^{[མ་དཔེ་གཟིགས་ན་འདིར་གནོན།]}

སྤྱོད་པ་རིང་དུ་གནས་པར་འགྱུར་ཞིང་སྐྱེ་བོ་མང་པོ་ལ་ཕན་ཞིང་རྒྱས་པར་ལྷ་དང་མི་རྣམས་ལ་ཡང་དག་པར་བསྟན་པའི་བར་དུ་ཡོན་ཏན་དེ་བཅུ་དེ་བཞིན་གཤེགས་པས་གཟིགས་པས་ཉན་ཐོས་རྣམས་ལ་བསླབ་པའི་གནས་བཅས་སོ། །སྦྱིན་དུ་མི་རུང་བ་བཅུ་སྟེ། གང་ཟག་གང་ཡང་རུང་བ་ཅིག་གིས་གང་ཟག་གཅིག་ལ་སྦྱིན་པ་བྱིན་པ་དེ་གཞན་ལ་ཡང་བྱིན་ན་ཆོས་དང་མི་ལྡན་པ་བྱིན་ལ་ཆོས་དང་མི་ལྡན་་པས་བླངས་ཏེ་མི་རུང་བར་སྤྱོད་པའོ། །གང་ཟག་གཅིག་ལ་སྦྱིན་པ་བྱིན་པ་དགེ་འདུན་ལ་ཡང་དབུལ་ན་ཆོས་དང་མི་ལྡན་པར་བྱིན་ལ་ཆོས་དང་མི་ལྡན་པ་བླངས་པ་སྟེ་མི་རུང་བར་སྤྱོད་་་པའོ། །དེ་བཞིན་དུ་གང་ཟག་གཉིས་ལ་སྦྱིན་པ་བྱིན་ལ་གང་ཟག་གཅིག་ལ་བྱིན་ནམ་མང་པོའམ་དགེ་འདུན་གཉིས་ལ་བྱིན་ན་ཆོས་དང་མི་ལྡན་པར་བྱིན་ལ་་་ཆོས་དང་མི་ལྡན་པར་བླངས་ཏེ་མི་རུང་བར་སྤྱོད་པའོ། །དེ་ལྟར་གང་ཟག་གཅིག་ལ་བྱིན་ནམ། གཉིས་ལའམ། མང་པོའམ། དགེ་འདུན་ལ་ཕུལ་ན་ཆོས་དང་མི་ལྡན་པར་བྱིན་ལ་ཆོས་དང་མི་ལྡན་པར་བླངས་ཏེ་མི་རུང་བར་སྤྱོད་པའོ། །དེ་བཞིན་དུ་དགེ་འདུན་ལ་སྦྱིན་པ་བྱིན་ལ་གཅིག་ལའམ། གཉིས་ལའམ། མང་པོ་ལའམ། དགེ་འདུན་ལ་ཕུལ་ན་ཆོས་དང་མི་ལྡན་པར་བྱིན་ལ་ཆོས་དང་མི་་ལྡན་པར་བླངས་ཏེ། མི་རུང་བར་སྤྱོད་པའོ། །དེ་བཞིན་དུ་དགེ་སློང་གི་དགེ་འདུན་ལ་སྦྱིན་པ་བྱིན་ལ་དགེ་སློང་མའི་དགེ་འདུན་ལ་བྱིན་ནམ། དགེ་སློང་གི་དགེ་འདུན་ལ་སྦྱིན་པ་བྱིན་པ་དགེ་འདུན་གཉིས་ཀ་ལ་ཕུལ་ལམ། དགེ་སློང་མའི་དགེ་འདུན་ལ་སྦྱིན་པ་བྱིན་པ་དགེ་སློང་གི་དགེ་འདུན་ལ་ཕུལ་ལམ། དགེ་སློང་མའི་དགེ་འདུན་ལ་སྦྱིན་པ་བྱིན་པ་དགེ་འདུན་གཉིས་ཀ་ལ་ཕུལ་ལམ། དགེ་འདུན་གཉིས་ཀ་ལ་སྦྱིན་པ་བྱིན་པ་དགེ་འདུན་སྡེ་གཉིས་གཞན་ལ་ཕུལ་ལམ། དགེ་འདུན་ཕྱོགས་དང་གཞན་གྱི་ཕྱོགས་སུ་ཐ་དད་པར་གནས་ལ་ཕྱོགས་གཅིག་ལ་སྦྱིན་པ་བྱིན་པ་ཕྱོགས་གཉིས་པོ་ལ་ཕུལ་ན་ཆོས་དང་མི་ལྡན་པ་བྱིན་ལ་ཆོས་དང་མི་ལྡན་པས་བླངས་པ་སྟེ་མི་རུང་བར་སྤྱོད་པའོ། །དེ་དག་ལས་སླར་བཟློག་ན་སྦྱིན་པར་རུང་བ་བཅུ་དང་དཀར་པོའི་

---

^{[མ་དཔེ་གཟིགས་ན་འདིར་གནོན།]}

ཕྱོགས་སུ་བརྗོད་པར་བྱའོ། །ཆོས་དང་ལྡན་པའི་གསོ་སྦྱིན་གཞག་པ་བཅུ་སྟེ། ཕས་ཕམ་པར་གྱུར་པ་དང་། ཕས་ཕམ་པར་གྱུར་པའི་གཏམ་ལ་ཞུགས་པ་དང་། བསླབ་པ་ཕུལ་བར་གྱུར་པ་དང་། བསླབ་པ་འབུལ་བའི་གཏམ་ལ་ཞུགས་པ་དང་། དགེ་འདུན་ལ་སྨད་པ་དང་། དགེ་འདུན་ལ་སྨད་པའི་གཏམ་ལ་ཞུགས་པར་གྱུར་པ་དང་། ཚུལ་ཁྲིམས་ཉམས་པར་གྱུར་པ་དང་། ལྟ་བ་ཉམས་པར་གྱུར་པ་དང་། སྤྱོད་པ་ཉམས་པར་གྱུར་པ་དང་། འཚོ་བ་ཉམས་པར་གྱུར་པའོ། །མདོར་ན། རྒོལ་བ་རྣམས་དང་སྐབས་དབྱེ་དང་། །གཟུང་བར་བྱ་དང་ཞི་བ་གཉིས། །རྒོལ་བར་བྱེད་དང་ཉེས་པ་དང་། །མངོན་སུམ་བྱུང་བ་ཆད་པ་འོ། །རྒོལ་བའི་དགེ་སློང་གིས་དོན་གཟུང་བར་འདོད་ན་གནས་བཅུར་བསམ་པ་ཤིན་ཏུ་བསམས། དཔྱད་པ་ཤིན་ཏུ་དཔྱད། བརྟག་པ་ཤིན་ཏུ་བརྟགས་ལ་དོན་གཟུང་བར་བྱའོ། །བཅུ་གང་ཞེ་ན། བདག་གིས་དོན་གཟུང་བར་འདོད་པ་དེ་བདེན་པས་དོན་དེ་འཛིན་ཏམ། འོན་ཏེ་མི་བདེན་པས་དོན་དེ་གཟུང་བའི་དུས་ལ་འབབ་བམ། འོན་ཏེ་དུས་ལ་མ་བབ། དོན་གཟུང་བ་དེ་སྐབས་སུ་བབ་བམ། འོན་ཏེ་སྐབས་སུ་མ་བབ། དོན་དེ་གཟུང་བ་དེ་དོན་དང་ལྡན་པའམ་འོན་ཏེ་དོན་དང་མི་ལྡན། དེ་ལ་མཐོང་བའམ། ཐོས་པ་འམ། དོགས་པའམ། ལུས་ཀྱི་ཉེས་པའམ། ངག་གི་ཉེས་པའམ། དེ་དག་གིས་སྨྲ་བར་བྱ། ཚེ་དང་ལྡན་པ་འདི་མི་དགེ་བའི་གནས་ནས་བསླང་སྟེ། དགེ་བའི་གནས་སུ་འཇོག་ནུས་སམ་སྙམ་དུ་བསམས་པའོ། །ལན་འདེབས་པའི་དགེ་སློང་གིས་ཀྱང་གནས་བཅུར་བསམ་པ་ཤིན་ཏུ་བསམས། དཔྱད་པ་ཤིན་ཏུ་དཔྱད། བརྟག་པ་ཤིན་ཏུ་བརྟགས་ལ། སླར་རྒོལ་བའི་དགེ་སློང་ལ་སྐབས་དབྱེ་སྟེ། བཅུ་གང་ཞེ་ན། ཅི་ཚེ་དང་ལྡན་པ་ཚུལ་ཁྲིམས་དང་ལྡན་ནམ་འོན་ཏེ་མ་ཡིན་ཁྲེལ་བ་ཅན་ནམ། འགྱོད་པ་ཅན་ནམ། སྡོམ་པ་ཅན་ནམ། བསླབ་པ་ལ་འདོད་པ་ཅན་ནམ། མང་དུ་ཐོས་པ། ཐོས་པ་འཛིན་པ། འཆང་བ་ཅན་ནམ། འདུལ་བ་དང་ལྷག་པའི་འདུལ་བ་ལ་ཤིན་ཏུ་མཁས་པའམ། ལུང་ཁ་ཏོན་ལོབས་

---

^{[མ་དཔེ་གཟིགས་ན་འདིར་གནོན།]}

པ་ཡིན་ནམ། ཅི་ཚེ་དང་ལྡན་པ་གཟུ་བོའི་དངོས་པོ་ཡོད་དམ་སྙམ་དུ་སེམས་པའོ། །ཨུ་པཱ་ལི་དེ་ལ་འདུལ་བ་འཛིན་པའི་གཟུ་བོས་ཀྱང་གནས་བཅུར་བསམ་པ་ཤིན་ཏུ་བསམས། དཔྱད་པ་ཤིན་ཏུ་དཔྱད། བརྟག་པ་ཤིན་ཏུ་བརྟགས་ལ་རྩོད་པ་གཟུང་བར་བྱའོ། །བཅུ་གང་ཞེ་ན། ཅི་བདག་རྩོད་པ་དེ་ཐོག་མ་བྱུང་བ་ལ་མཁས་སམ། ཅི་བདག་རྩོད་པ་དེ་ཐོག་མ་བྱུང་བའི་ནང་དུ་མ་གཏོགས་སམ། ཅི་བདག་ལ་གཟུ་བོའི་དངོས་པོ་ཡོད་དམ། རྒོལ་བ་དང་ལན་གློན་པའི་དགེ་སློང་དེ་དག་བདག་གིས་ཚིག་ཉན་ཏམ། བདག་གིས་རྒོལ་བ་དང་། ལན་གློན་པའི་དགེ་སློང་དེ་དག་ལ་ཆོས་བཞིན་བསྒོ་བར་ནུས་སམ། བདག་གིས་རྒོལ་བ་དང་ལན་གློན་པའི་དགེ་སློང་དེ་དག་གིས་ལྟུང་བ་རྣམ་པར་སྦྱོང་ནུས་སམ། བདག་གིས་རྒོལ་བ་དང་། ལན་གློན་པའི་དགེ་སློང་དེ་དག་ལ་ནན་ཏུར་བྱ་ནུས་སམ། བདག་གིས་རྩོད་པ་འདི་ཆོས་བཞིན་འདུལ་བ་བཞིན་སྟོན་པས་བསྟན་པ་བཞིན་ཉེ་བར་ཞི་བར་བྱ་ནུས་སམ། བདག་གིས་རྒོལ་བ་དང་། ལན་གློན་པའི་དགེ་སློང་དེ་དག་མི་དགེ་བའི་གནས་ནས་བསླང་སྟེ། དགེ་བའི་གནས་སུ་རབ་ཏུ་གཞོག་ནུས་སམ། བདག་གིས་རྩོད་པ་འདི་ཅི་ནས་ཕྱིན་ཆད་མི་འབྱུང་བར་འགྱུར་བ་དེ་ལྟ་བུར་ཉེ་བར་ཞི་བར་བྱེད་ནུས་སམ་སྙམ་དུ་བསམས་པའོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་རྩོད་པ་གཟུང་བར་འདོད་ན་གནས་བཅུར་བསམ་པ་ཤིན་ཏུ་བསམས། དཔྱད་པ་ཤིན་ཏུ་དཔྱད། བརྟག་པ་ཤིན་ཏུ་བརྟགས་ལ་རྩོད་པ་ཞི་བར་བྱའོ། །བཅུ་གང་ཞེ་ན། བདག་གིས་འདིར་འཆད་པའི་གསུང་སྐད་དུ་སྨྲས་པ་དེ་ཟིན་པའི་མདོ་སྡེ་འཛིན་པ་འདུལ་བ་འཛིན་པ། མ་ལྟ་བུ་འཛིན་པའི་དགེ་སློང་དགེ་འདུན་གྱི་ནང་ན་ཡོད་པར་འགྱུར་རམ། དགེ་འདུན་འདི་དག་གི་ནང་ན་དགེ་སློང་རྩོད་པ་འདི་ཇི་ལྟར་ཆོས་དང་། ཇི་ལྟར་འདུལ་བ་དང་། ཇི་ལྟར་སྟོན་པས་བསྟན་པ་དེ་ལྟར་ཞི་བར་བྱེད་པ་བདག་གི་ཟླ་ཡོད་དམ། དགེ་འདུན་འདི་དག་གི་ནང་ན་དགེ་སློང་རྩོད་པ་འདི་ཕྱི་ཕྱིར་རྣམ་པར་མི་འཕེལ་བར་འགྱུར་བ་བདག་གི་ཟླ་ཡོད་དམ། དགེ་འདུན་འདི་དག་

---

^{[མ་དཔེ་གཟིགས་ན་འདིར་གནོན།]}

གི་ནང་ན་དགེ་སློང་གང་རྩོད་པ་འདི་ཆོས་བཞིན་ཞི་བར་བྱ་སྟེ་ཕྱིན་ཆད་མི་འབྱུང་བར་བྱེད་པའི་བདག་གི་ཟླ་ཡོད་དམ། དགེ་འདུན་འདི་དག་གི་ནང་ན་དགེ་སློང་གང་རྒོལ་བ་དང་ལན་གློན་པའི་དགེ་སློང་འདི་དག་ལ་རྩོད་པ་འདི་རྒྱལ་པོའི་འཁོར་དུ་འགྱེད་པ། ངེས་པའི་རིགས་དེར་འགྱེད་པར་གྱུར་ཅིག་ཅེས་ནས་ཆོས་བཞིན་དུ་བཟློག་པར་བྱའོ་སྙམ་དུ་བསམ་པ་ཡོད་དམ། ཅི་བདག་གིས་རྩོད་པ་འདི་དགེ་འདུན་འདིའི་ནང་དུ་ཞི་བར་བྱེད་ནུས་སམ། བདག་གིས་རྩོད་པ་འདི་ཞི་བར་བྱ་བ་ཕྱི་རོལ་དུ་བཙལ་དགོས་པར་མི་འགྱུར་གྲང་། བདག་གིས་རྩོད་པ་འདི་ལ་རྒོལ་བ་དང་ལན་གློན་པའི་དགེ་སློང་དེ་དག་གནས་ནས་གནས་སུ་འདོང་མི་དགོས་པར་ནུས་པར་འགྱུར་རམ། བདག་གིས་རྩོད་པ་འདི་ཇི་ལྟར་ཕྱིན་ཆད་མི་འབྱུང་བའི་ཆོས་སུ་དེ་ལྟ་བུར་ཞི་བར་ནུས་སམ་སྙམ་དུ་བསམས་པའོ། །ཨུ་པཱ་ལི་ཆོས་བཅུ་དང་ལྡན་པའི་འདུལ་བ་འཛིན་པས་རྩོད་པ་བྱུང་བ་ཞི་བར་བྱེད་ནུས་སོ། །བཅུ་གང་ཞེ་ན། སངས་རྒྱས་ཀྱིས་གསུངས་པའི་མདོ་སྡེ་སྟོན་ནུས་པར་འགྱུར་བ་དང་། ཉན་ཐོས་ཀྱིས་བཤད་པའི་མདོ་སྡེ་འཆད་པ་དང་། སངས་རྒྱས་ཀྱི་དུས་བྱུང་བའི་མདོ་སྡེ་འཆད་པ་དང་། དུས་ཐམས་ཅད་དུ་བྱུང་བའི་མདོ་སྡེ་འཆད་པ་དང་། ཕྱོགས་གཅིག་པའི་མདོ་སྡེ་འཆད་པ་དང་། ནག་པོར་གསུངས་པ་དང་དཀར་པོར་གསུངས་པའི་མདོ་སྡེ་འཆད་པ་དང་། མདོའི་ལུགས་འཚལ་ནས་མདོ་འཆད་པ་ཐམས་ཅད་དུ་འགྲོ་བའི་མདོ་སྡེ་འཆད་པ་དང་། མཐུན་པའི་མདོ་སྡེ་འཆད་པ་དང་། འདུལ་བ་དང་མཐུན་པའི་མདོ་སྡེ་འཆད་ནུས་པའོ། །ཨུ་པཱ་ལི་གཟུ་བོ་འདུལ་བ་འཛིན་པས་རྩོད་པ་བཟུང་ནས་རྣམ་པ་བཅུས་ཉེ་བར་ཞི་བར་བྱའོ། །བཅུ་གང་ཞེ་ན། དགེ་སློང་རྒོལ་བ་ཤེས་པར་བྱ། དགེ་སློང་ལན་འདེབས་པ་ཤེས་པར་བྱ། དགེ་སློང་རྒོལ་བ་དཔྱད་པར་བྱ། ལན་གློན་པའི་དགེ་སློང་དཔྱད་པར་བྱ། རྒོལ་བའི་དགེ་སློང་ཡི་དམ་བཅར་གཞུག །ལན་གློན་པའི་དགེ་སློང་ཡི་དམ་བཅར་གཞུག །རྒོལ་བའི་དགེ་སློང་གཏན་ལ་འབེབས་སུ་གཞུག །ལན་གློན་པའི་དགེ་སློང་གཏན་ལ་འབེབས་སུ་གཞུག །

---

^{[མ་དཔེ་གཟིགས་ན་འདིར་གནོན།]}

རྒོལ་བའི་དགེ་སློང་ལྡང་བར་བྱེད་དུ་གཞུག །ལན་གློན་པའི་དགེ་སློང་ལྡང་བར་བྱེད་དུ་གཞུག་གོ །ཆོས་བཅུ་དང་ལྡན་ན་འདུལ་བ་འཛིན་པ་ཉེས་པ་རྣམ་པར་སྟོན་ནུས་ཏེ། བཅུ་གང་ཞེ་ན། ཉེས་པ་ལྕི་བ་ཤེས། ཡང་བ་ཤེས། ལྷག་མ་དང་བཅས་པ་ཤེས། ལྷག་མ་མེད་པ་ཤེས། གནས་ངན་ལེན་ཤེས། གནས་ངན་ལེན་མ་ཡིན་པ་ཤེས། བཅས་པ་ཤེས། མ་བཅས་པ་ཤེས། བཤགས་པ་ཤེས། བསྡམ་པར་བྱ་བ་ཤེས་པའོ། །ཆོས་བཅུ་དང་ལྡན་པའི་འདུལ་བ་འཛིན་པ་ནི་ལས་བྱེད་ནུས་པ་ཡིན་ཏེ། བཅུ་གང་ཞེ་ན། མངོན་དུ་གྱུར་པའི་ལས་ཤེས། མངོན་དུ་མ་གྱུར་པའི་ལས་ཤེས། སྐབས་མ་བྱེ་བའི་ལས་ཤེས། སྐབས་བྱེ་བའི་ལས་ཤེས། གླེང་བར་རིགས་པ་ཤེས། མི་གླེང་བར་རིགས་པ་ཤེས། དྲན་པར་བྱ་བར་རིགས་པ་ཤེས། མི་དྲན་པར་བྱ་བར་རིགས་པ་ཤེས། གཏན་ཚིགས་སུ་རིགས་པར་ཤེས། གཏན་ཚིགས་སུ་མི་རིགས་པར་ཤེས་པའོ། །ཆོས་བཅུ་དང་ལྡན་པའི་འདུལ་བ་འཛིན་པས་རྩོད་པ་ཞི་བར་བྱེད་ནུས་པ་ཡིན་ཏེ། བཅུ་གང་ཞེ་ན། བྱུང་བ་མ་ནོར་བར་བྱེད་པ་ཡིན། བཅས་པ་མ་ནོར་བར་བྱེད་པ་ཡིན། རྗེས་སུ་བཅས་པ་མ་ནོར་བར་བྱེད་པ་ཡིན། མ་གནང་བ་མ་ནོར་བར་བྱེད་པ་ཡིན། རྗེས་སུ་གནང་བ་མ་ནོར་བར་བྱེད་པ་ཡིན། དགེ་སློང་མི་གཙང་བའི་ཉེས་པ་མི་འཆད་པར་བྱེད་པ་ཡིན། རྒོལ་བ་དང་ལན་གློན་པའི་དགེ་སློང་ལ་ཡི་དམ་བཅའ་བར་བྱེད་པ་ཡིན། མདོ་སྡེའི་ཚིག་ཉེ་བར་སྟོན་པར་བྱེད་པ་ཡིན། རྗེས་སུ་བཅས་པ་ཉམས་པར་མི་བྱེད་པ་ཡིན། འདུལ་བ་ལ་མཐུན་པ་ཡིན། ཆོས་བཞིན་རྩོད་པ་ཞི་བར་བྱེད་པ་ཡིན་ནོ། །ཆོས་བཅུ་དང་ལྡན་ན་འདུལ་བ་འཛིན་པས་ཆད་པའི་ལས་ཀྱིས་གཅོད་ནུས་པ་ཡིན་ཏེ། བཅུ་གང་ཞེ་ན། ཚངས་པའི་ཆད་པ་ཤེས། མི་དགའ་བར་འགྱུར་བའི་ལས་ཤེས། མི་སྤྱོད་པར་འགྱུར་བའི་ལས་ཤེས། མ་རུང་བར་བྱ་བའི་ལས་ཤེས། དེའི་ངོ་བོ་ཉིད་ཚོལ་དུ་གཞུག་པའི་ལས་ཤེས། བཟློག་པའི་ལས་ཤེས། སྤང་བའི་ལས་ཤེས། རྣམ་པར་དག་པའི་ལས་ཤེས། བྱིན་གྱིས་བརླབ་པའི་ལས་ཤེས། རྒོལ་བའི་ལས་ཤེས་པའོ། །འདུལ་བ་དམ་པའི་གཞུང་ལས་གཅིག་ནས་འཛེགས་པ་རྫོགས་སྷོ།། །།

ལྔ་ཚན་སྐོར་བཤད་པ།

---

^{[མ་དཔེ་གཟིགས་ན་འདིར་གནོན།]}

འདུལ་བ་གཞུང་དམ་པ། བམ་པོ་ཉི་ཤུ་བརྒྱད་པ། འདུལ་བ་ལས་ལྔ་པའི་མདོར་བསྡུས་པ་སྟེ། ཉེར་བཞག་འཇིགས་པ་སེལ་བ་དང་། །བྱིན་ལེན་བྱ་བ་རྐུ་བ་དང་། །བསྙེན་པར་རྫོགས་དང་མཚམས་རྣམས་དང་། །ཟས་ཀྱང་དེ་བཞིན་སྐབས་དབྱེ་དང་། །དུགས་ཁང་དང་ནི་ཐ་མ་འོ། །མདོར་ན། ཉེར་བཞག་ཚུལ་ཁྲིམས་བདེན་པ་དང་། །སྨྲ་བར་བྱ་དང་ཕས་ཕམ་དང་། །ཉེས་བྱས་གཉིས་དང་ལྟ་བ་སྟེ། །ཉམས་པ་དང་ནི་ལྕི་བ་དང་། །ཇི་ལྟ་བུར་ནི་རིགས་ཀྱི་བུ། །དེ་མིན་རིམ་པར་བཅས་པ་འོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་གླེང་བ་ཞིག་གིས་གཞན་ལ་གླེང་བར་འཚལ་ན་གནས་དུར་གནས་ཏེ་གླེང་བར་བགྱི། དགེ་སློང་ཡང་སྐབས་འབྱེད་དུ་གཞུག་པར་བགྱི། ཨུ་པཱ་ལི་དགེ་སློང་ཞིག་དགེ་སློང་གཞན་ལ་གླེང་བར་འདོད་པས་གནས་ལྔ་ལ་གནས་ཏེ་གླེང་བར་བྱའོ། །དགེ་སློང་སྐབས་འབྱེད་དུ་གཞུག་པ་ལྔ་གང་ཞེ་ན། སྟོད་གཡོགས་ཕྲག་པ་གཅིག་ཏུ་གཟར་ཏེ་ལྷམ་ཕུད་ལ་རྒན་རིམས་སུ་འདུག་ནས་དགེ་སློང་གི་དགེ་འདུན་ལ་ཐལ་མོ་སྦྱར་བ་བཏུད་དེ་བྱམས་པའི་སེམས་ཉེ་བར་གཞག་ལ་གླེང་བའི་དགེ་སློང་དེ་ལ་སྐབས་འབྱེད་དུ་་་གཞུག །གླེང་བའི་དགེ་སློང་གིས་གཞན་ལ་གླེང་བར་འདོད་པས་ཆོས་ལྔས་ནང་དུ་དྲན་པ་ཉེ་བར་གཞག་ལ་གཞན་ལ་གླེང་བར་བྱའོ། །ལྔ་གང་ཞེ་ན། ཅི་བདག་ཚུལ་ཁྲིམས་དང་ལྡན་ཞིང་སྔོན་རྫོགས་པ་ཡིན་ནམ། ངོ་ཚ་ཞིང་འབྱེད་པ་དང་ལྡན་ནམ། སྡོམ་པས་བསྡམས་པ་བསླབ་པར་འདོད་དམ། མང་དུ་ཐོས་ཤིང་ཐོས་པ་འཛིན། ཐོས་པ་ལ་སོགས་པ་ལུང་ཁ་ཏོན་ལོབས་སམ། ཅི་འདུལ་བ་དང་ལྷག་པའི་འདུལ་བ་ལ་བདག་ཤིན་ཏུ་རྣམ་པར་གདོན་མི་ཟ་བར་གྱུར་ཏམ་སྙམ་དུ་བསམས་ནས་གླེང་བར་བྱེད་པའི་དགེ་སློང་གིས་གཞན་ལ་གླེང་བར་འདོད་ན། དེ་ལྟར་གནས་ལྔས་ནང་དུ་དྲན་པ་ཉེ་བར་གཞག་ལ་གཞན་ལ་གླེང་

---

^{[མ་དཔེ་གཟིགས་ན་འདིར་གནོན།]}

བར་བྱའོ། །གཞན་ཡང་དགེ་སློང་གླེང་བ་ཞིག་གླེང་བར་འདོད་པས་ཆོས་ལྔས་ནང་དུ་དྲན་པ་ཉེ་བར་གཞག་ལ་གླེང་བར་བྱའོ། །ལྔ་གང་ཞེ་ན། འདི་ལྟར་བདག་གཞན་ལ་གླེང་བར་འདོད་པ་དེ་ཅི་བདེན་པས་སམ་འོན་ཏེ་མི་བདེན་པས་དོན་དུ་གཟུང་བ་འདི་དུས་ལས་བབ་བམ་འོན་ཏེ་དུས་ལས་མ་བབ། ཅི་དོན་བཟུང་བ་སྐབས་སུ་བབ་བམ་འོན་ཏེ་སྐབས་སུ་མ་བབ། ཅི་དོན་བཟུང་བ་འདི་དོན་དང་ལྡན་པའམ་འོན་ཏེ་དོན་དང་ལྡན་པ་མ་ཡིན། དེ་ལ་མཐོང་བས་སམ། ཐོས་པས་སམ། དོགས་པས་སྨྲ་བར་བྱའམ་ཞེས་གླེང་བའི་དགེ་སློང་གིས་གཞན་ལ་གླེང་བར་འདོད་པས། ཆོས་དེ་ལྔས་ནང་དུ་དྲན་པ་ཉེ་བར་གཞག་ལ་གཞན་ལ་གླེང་བར་བྱའོ། །གླེང་བར་བྱེད་པའི་དགེ་སློང་གིས་གླེང་བའི་དགེ་སློང་ལ་རྣམ་པ་ལྔས་སྐབས་འབྱེད་དུ་གཞུག་པར་བྱའོ། །ལྔ་གང་ཞེ་ན། འདི་ལྟར་ཁྱོད་ལ་གླེང་གིས་ཤེས་པར་གྱིས་ཤིག །ཚེ་དང་ལྡན་པ་ཁྱོད་ལ་སྨྲའོ། །ཚེ་དང་ལྡན་པ་ཁྱོད་ལ་གླེང་ངོ་། །ཚེ་དང་ལྡན་པ་ཁྱོད་ལ་དྲན་པར་བྱའོ། །ཚེ་དང་ལྡན་པ་ཁྱོད་ཀྱིས་བདག་ལ་སྐབས་དབྱེ་བར་བྱོས་ཤིག །ཕས་ཕམ་པ་དང་། དགེ་འདུན་གྱི་ལྷག་མ་དང་། ལྟུང་བ་དང་། སླར་བཤགས་པ་དང་། ཉེས་བྱས་རྣམས་ལས་གང་ཁྱོད་ལ་སྨྲ། གང་ཁྱོད་ལ་བརྗོད། གང་ཁྱོད་ལ་གླེང་། གང་ཁྱོད་ལ་དྲན་པར་བྱ། གང་ཁྱོད་ལ་སྐབས་སུ་འབྱེད་དུ་གཞུག །ཉེས་བྱས་སུ་གྱུར་ན་ཕས་ཕམ་པ་ལས་བྱུང་བའམ། དགེ་འདུན་གྱི་ལྷག་མ་ལས་བྱུང་བའམ། ལྟུང་བ་ལས་བྱུང་བའམ། སོ་སོར་བཤགས་པ་ལས་བྱུང་བའམ། བསླབ་པ་ལས་བྱུང་བ་རྣམས་གང་ཁྱོད་ལ་བརྗོད་པར་བྱ། བཤགས་པར་བྱ་བའམ། བསྡམ་པར་བྱ་བའམ། འདུལ་བ་ལས་ཤིན་ཏུ་འདས་པའམ། ངན་དུ་སྨྲ་བ་ལས་བྱུང་བའམ། མངོན་དུ་སྤྱོད་པ་རྣམས་ཀྱི་ཉེས་བྱས་གང་ཁྱོད་ལ་བརྗོད་པར་བྱ། ཁྱོད་ལ་མཐོང་བའམ། ཐོས་པའམ། དོགས་པ་གང་སྨྲ་བར་བྱ། ལུས་ཀྱི་འདས་པ་དང་། ངག་གི་འདས་པ་གང་ཁྱོད་ལ་སྨྲ་བར་བྱ། ལྟུང་བ་ལྕི་བའམ། ཡང་བའམ། ལྷག་མ་དང་བཅས་པའམ། ལྷག་མ་མ་ལུས་པའམ། ཐམས་

---

^{[མ་དཔེ་གཟིགས་ན་འདིར་གནོན།]}

ཅད་ལས་འདས་པའམ། ལྟུང་བ་གང་ཁྱོད་ལ་སྨྲ་བར་བྱ། ཚུལ་ཁྲིམས་ཉམས་པའམ། ལྟ་བ་ཉམས་པའམ། འཚོ་བ་ཉམས་པའམ། ཉམས་པ་ཐམས་ཅད་གང་ཁྱོད་ལ་སྨྲ་བར་བྱ། ཁྱོད་འགྲོ་བའམ། འགྲེང་བའམ། འདུག་པའམ། ཉལ་བའམ། འཆག་པའམ། སྤྱོད་ལམ་གང་ཁྱོད་ལ་སྨྲ་བར་བྱ། གྲོང་དུ་བྱས་པའམ། དགོན་པ་ལ་བྱས་པའམ། ལམ་དུ་བྱས་པའམ། ལམ་ལས་གོལ་བར་བྱས་པའམ། དབེན་པར་བྱས་པ་རྣམས་སམ། ས་གང་དུ་བྱས་པས་ཁྱོད་ལ་གླེང་བར་བྱ་ཞེས་དགེ་སློང་གླེང་བར་བྱེད་པས་གླེང་བའི་དགེ་སློང་ལ་རྣམ་པ་འདི་ལྔས་སྐབས་ཕྱེ་ནས་ཡི་དམ་འཆར་་་བཅུག་ལ་གདོད་གླེང་བར་བྱའོ། །དེ་སྟེ་ཁས་མི་ལེན་ན་གླེང་བར་བྱེད་པའི་དགེ་སློང་གིས་བྱམས་པའི་སེམས་དང་། སྙིང་རྗེའི་སེམས་དང་། ཕན་པའི་སེམས་དང་། རྗེས་སུ་བརྩེ་བའི་སེམས་དང་། བསླང་བར་འདོད་པའི་སེམས་ཀྱིས་གླེང་བར་བྱའོ། །ལན་འདེབས་པའི་དགེ་སློང་གིས་ཀྱང་ཕས་གླེང་བར་བྱེད་པའི་ཚེ་གནས་ལྔ་ལ་གནས་ནས་གླེང་བར་བྱེད་པའི་དགེ་སློང་ལ་སྐབས་དབྱེ་བར་བྱའོ། །གནས་ལྔ་གང་ཞེ་ན། སྟན་ལས་ལངས། ལྷམ་ཕུད། སྟོད་གཡོགས་ཕྲག་པ་གཅིག་ཏུ་གཟར་ཏེ། རྒན་རིམས་ལ་ཐལ་མོ་སྦྱར་བ་བཏུད་ནས་བསྟི་སྟང་དུ་བཅས། འཇིགས་པ་དང་བཅས་པའི་དབང་དུ་བྱས་ལ་གླེང་བར་བྱེད་པའི་དགེ་སློང་ལ་སྐབས་དབྱེ་བར་བྱའོ། །གླེང་བའི་དགེ་སློང་གིས་གླེང་བར་བྱེད་པའི་དགེ་སློང་ལ་སྐབས་དབྱེ་བར་འདོད་ན་གླེང་བར་བྱེད་པའི་དགེ་སློང་ལ་གནས་ལྔར་་་བརྟག་པར་བྱའོ། །ལྔ་གང་ཞེ་ན། ཅི་ཚེ་དང་ལྡན་པ་འདི་ཚུལ་ཁྲིམས་དང་ལྡན་ཞིང་སྔོན་རྫོགས་པ་ཡིན་ནམ། ངོ་ཚ་ཞིང་འགྱོད་པ་དང་ལྡན་ནམ། སྡོམ་པས་བསྡམས་ཤིང་སྡོམ་པར་འདོད་དམ། ཅི་ཚེ་དང་ལྡན་པ་མང་དུ་ཐོས་པ། ཐོས་པ་འཛིན་པ། ཐོས་པ་བསགས་པའམ། ལུང་ཁ་ཏོན་ལོབས་སམ། འདུལ་བ་དང་། ལྷག་པའི་འདུལ་བ་དང་། མདོ་སྡེ་ལ་ཤིན་ཏུ་རྣམ་པར་གདོན་མི་ཟ་བ་ཡིན་ནམ་ཞེས་གླེངས་པའི་དགེ་སློང་གིས་གླེང་བར་བྱེད་པའི་དགེ་སློང་ལ་གནས་འདི་ལྔས་

---

^{[མ་དཔེ་གཟིགས་ན་འདིར་གནོན།]}

བརྟགས་ལ་དེའི་འོག་ཏུ་སྐབས་དབྱེ་བར་བྱའོ། །གླེངས་པའི་དགེ་སློང་གིས་གླེང་བར་བྱེད་པའི་དགེ་སློང་ལ་སྐབས་དབྱེ་བར་འདོད་པས་ཆོས་ལྔ་ནང་དུ་དྲན་པ་ཉེ་བར་གཞག་ལ་སྐབས་དབྱེ་བར་བྱའོ། །ལྔ་གང་ཞེ་ན། བདག་ལ་གཞན་གྱིས་གླེང་བ་དེ་བདེན་པས་གླེང་གི་མི་བདེན་པས་མ་ཡིན་པ་དང་། དུས་སུ་གླེང་གི་དུས་ལས་འདས་པར་མ་ཡིན་པ་དང་། དོན་དང་ལྡན་པས་གླེང་གི་དོན་དང་མི་ལྡན་པར་མ་ཡིན་པ་དང་། ཚིག་འཇམ་པོས་གླེང་གི་རྩུབ་པོས་མ་ཡིན་པ་དང་། བྱམས་པ་དང་ལྡན་པས་གླེང་གི་ཞེ་སྡང་དང་ལྡན་པས་མ་ཡིན་པ་འདི་ལྟ་བུ་གཞན་ལས་རྙེད་པར་ག་ལ་འགྱུར་སྙམ་དུ་བསམས་ནས། གླེངས་པའི་དགེ་སློང་གིས་གླེང་བར་བྱེད་པའི་དགེ་སློང་ལ་སྐབས་དབྱེ་བར་འདོད་པས། ཆོས་འདི་ལྔ་ནང་དུ་དྲན་པ་ཉེ་བར་བཞག་ནས་གླེང་བར་བྱེད་པའི་དགེ་སློང་ལ་ཚིག་་་འདི་སྐད་སྨྲོས་ཤིག །ཀྱེ་གླེང་བར་བྱེད་པའི་ཚེ་དང་ལྡན་པ་ཁྱོད་ཤེས་པར་གྱིས་ལ་བདག་ལ་སྨྲོས་ཤིག །ཚེ་དང་ལྡན་པ་ཁྱོད་ཀྱིས་བདག་ལ་སྒོ་ཤིག །ཚེ་དང་ལྡན་པ་ཁྱོད་ཀྱིས་བདག་ལ་གླེངས་ཤིག །ཚེ་དང་ལྡན་པ་ཁྱོད་ལ་སྐབས་དབྱེ་བར་་བྱས་པ་དག་ལ་ཇི་སྐད་དུ་སྨྲ། བདག་ལ་ཇི་སྐད་དུ་བསྒོ། བདག་ལ་ཇི་སྐད་དུ་གླེང་། བདག་ལ་ཇི་ལྟ་བུར་དྲན་པར་བྱ། གང་གི་ཕྱིར་བདག་གིས་སྐབས་དབྱེ་བར་བྱ། ཉེས་པའི་ནང་ནས་ཕས་ཕམ་པའམ། དགེ་འདུན་གྱི་ལྷག་མའམ། ལྟུང་བའམ་སོ་སོར་བཤགས་པ་རྣམས་ལས་གང་སྨྲ་བར་བྱ། ཉེས་བྱས་རྣམས་ལས་ཀྱང་ཕས་ཕམ་པའམ། དགེ་འདུན་གྱི་ལྷག་མ་ལས་བྱུང་བའམ། ལྟུང་བ་ལས་བྱུང་བའམ། སོ་སོར་བཤགས་པ་ལས་བྱུང་བའམ། བསླབ་པ་ལས་བྱུང་བ་རྣམས་སྐབས་དབྱེ་བར་བགྱི། བཤགས་པར་བྱ་བའམ། བསྡམ་པར་བྱ་བའམ། འདུལ་བ་ལས་འདས་པའམ། ངན་དུ་སྨྲ་བ་ལས་བྱུང་བའམ། མངོན་པར་སྤྱད་པ་ལས་བྱུང་བ་རྣམས་ཀྱི་ཉེས་བྱས་གང་གིས་སྐབས་དབྱེ་བར་བྱ། བདག་ལ་མཐོང་ངམ། ཐོས་པའམ། དོགས་པའམ། ལུས་ཀྱི་འདས་པའམ། ངག་གི་འདས་པའམ། བདག་ལ་མངོན་པར་སྤྱད་པ་གང་སྨྲ། བདག་

---

^{[མ་དཔེ་གཟིགས་ན་འདིར་གནོན།]}

ལ་ལྕི་བའམ། ཡང་བའམ། ལྷག་མ་དང་བཅས་པའམ། ལྷག་མ་མ་ལུས་པའམ། ཐམས་ཅད་ལས་འདས་པའམ། བདག་ལ་ཉེས་པ་གང་སྨྲ། ཚུལ་ཁྲིམས་ཉམས་པའམ། ལྟ་བ་ཉམས་པའམ། སྤྱོད་པ་ཉམས་པའམ། འཚོ་བ་ཉམས་པའམ། ཐམས་ཅད་ཉམས་པའམ། ཉམས་པ་གང་སྨྲ། འགྲོ་བ་དང་། འགྲེང་བ་དང་། འདུག་པ་དང་། ཉལ་བ་དང་། མ་ཉལ་བ་རྣམས་སྤྱོད་ལམ་གང་བྱས་པ་ལས་སྨྲ། གྲོང་དུ་བྱས་པའམ། དགོན་པ་ལ་བྱས་པའམ། ལམ་དུ་བྱས་པའམ། ལམ་གོལ་བར་བྱས་པའམ། མཚན་མོ་བྱས་པའམ། ཉིན་པར་བྱས་པ་རྣམས་ལས་བདག་གིས་གང་དུ་བྱས་པ་སྨྲོས་ཤིག །གླེངས་པའི་དགེ་སློང་གིས་གླེང་བར་བྱེད་པའི་དགེ་སློང་ལ་རྣམ་པ་འདི་ལྔས་སྐབས་ཕྱེ་ལ་ཡི་དམ་བཅར་ཆུག་སྟེ་ཚིག་འདི་སྐད་སྨྲོས་ཤིག །གླེང་བར་བྱེད་པ་ཇི་ལྟར་ཡི་དམ་བཅས་པའི་ཉེས་པ་སྨྲོས་ཤིག་ཅེས་བྱའོ། །མདོར་ན། འཇིགས་པར་གྱུར་དང་འཁྲུལ་བ་དང་། །ཚངས་པའི་ཆད་པ་རིམ་གྲོ་མེད། །བསྡིགས་པའི་ཆད་པ་མངོན་སུམ་དང་། །བདེན་པ་རྣམས་ཀྱང་དེ་བཞིན་ནོ། །གང་གི་ཚེ་གླེང་བའི་དགེ་སློང་གིས་སྐབས་ཕྱེ་བར་གྱུར་པ་དེའི་ཚེ་ན་གླེང་བར་བྱེད་པའི་དགེ་སློང་གིས་གནས་ལྔར་ཡིད་བརྟན་པར་བྱ་སྟེ། ཚེ་དང་ལྡན་པ་མ་འཇིགས་ཤིག །ཁྱོད་འཇིགས་པར་མ་བྱེད། ཁྱོད་སྐྲག་པར་མ་བྱེད། ཀུན་ཏུ་མ་སྐྲག་ཤིག །ཀུན་ཏུ་སྐྲག་པར་མ་བྱེད་ཅིག །མ་སྔངས་ཤིག །སྔངས་པར་མ་བྱེད་ཅིག །མ་འཛེམ་ཤིག །འཛེམ་པར་མ་བྱེད་ཅིག །གླེང་བར་བྱེད་པའི་དགེ་སློང་གིས་གླེངས་པའི་དགེ་སློང་ལ་གཞན་ཡང་གནས་ལྔར་ཡིད་བརྟན་པར་བྱ་སྟེ། ཚེ་དང་ལྡན་པ་ཁྱོད་ཀྱི་འཁྲུལ་བ་མི་འཛིན་ཏོ། །ཁྱོད་ཀྱི་སྔངས་པའི་སྐབས་མི་འཛིན་གྱི། ཚེ་དང་ལྡན་པ་ཁྱོད་ལ་གཏན་ལ་བབ་པར་འཛིན་ཏོ། །ཚེ་དང་ལྡན་པ་ལན་གསུམ་གྱི་བར་དུ་དམ་བཅའ་བ་ལ་གཞག་གོ །གླེང་བའི་དགེ་སློང་གིས་གླེང་བར་བྱེད་པའི་དགེ་སློང་ལ་གཞན་ཡང་གནས་ལྔར་་་ཡིད་བརྟན་པར་བྱའོ། །དེ་སྟེ་ཚེ་དང་ལྡན་པ་ཁྱོད་ཚངས་པའི་ཆད་པས་རིགས་པར་

---

^{[མ་དཔེ་གཟིགས་ན་འདིར་གནོན།]}

འགྱུར་ན་ཚངས་པའི་ཆད་པས་བསྒོ་བར་བྱའོ། །དེ་སྟེ་མི་དགའ་བར་ཚོར་བས་འོས་པར་གྱུར་ན་མི་དགའ་བར་འགྱུར་བའི་ལས་བྱའོ། །གླེང་བར་བྱེད་པའི་དགེ་སློང་གིས་གླེངས་པའི་དགེ་སློང་ལ་གཞན་ཡང་གནས་ལྔར་ཡིད་བརྟན་་་པར་བྱའོ། །དེ་སྟེ་ཚེ་དང་ལྡན་པ་ཁྱོད་རིམ་གྲོ་མེད་པར་བྱེད་ན་རིམ་གྲོ་མེད་པའི་ནང་དུ་བགྲང་བར་བྱའོ། །དེ་སྟེ་ཚེ་དང་ལྡན་པ་ཁྱོད་ཉེས་པ་ངོར་བརྗོད་ན་ནི་ཉེས་པ་ངོར་བརྗོད་པའི་ནང་དུ་བགྲང་བར་བྱའོ། །དེ་སྟེ་ཁྱོད་གཞན་ཟེར་རོ་ཞེས་་ཕྱས་ཐོགས་ན་ནི་གཞན་ཟེར་རོ་ཞེས་ཕྱས་ཐོགས་པའི་ནང་དུ་ཁྱོད་བགྲང་བར་བྱའོ། །དེ་སྟེ་བསྒོ་བ་མི་ཉན་ན་ནི་བསྒོ་བ་མི་ཉན་པར་ཁྱོད་བགྲང་བར་བྱའོ། །དེ་སྟེ་ཅང་མི་སྨྲ་བས་བསྒོ་བ་མི་ཉན་ན་ནི་ཡང་ཅང་མི་སྨྲ་བའི་ནང་དུ་ཁྱོད་བགྲང་བར་བྱའོ། །གླེང་བར་བྱེད་པའི་དགེ་སློང་གིས་གླེངས་པའི་དགེ་སློང་ལ་གཞན་ཡང་གནས་ལྔར་ཡིད་བརྟན་པར་བྱ་སྟེ། དེ་སྟེ་ཚེ་དང་ལྡན་པ་ཁྱོད་ལ་བསྡིགས་པའི་ལས་བྱ་བར་འོས་ན་ནི་ཁྱོད་ལ་བསྡིགས་པའི་ལས་བྱའོ། །དེ་སྟེ་ལོངས་སྤྱོད་མི་གཅིག་པར་འོས་ན་ནི་ལོངས་སྤྱོད་མི་གཅིག་པའི་ལས་བྱའོ། །དེ་སྟེ་མིག་ལམ་ན་མི་སྣང་བར་འོས་ན་ནི་ཁྱོད་ལ་མིག་ལམ་ན་མི་སྣང་བའི་ལས་བྱའོ། །དེ་སྟེ་བསྐྲད་པར་འོས་ན་ནི་བསྐྲད་པའི་ལས་བྱའོ། །དེ་སྟེ་སྨད་པའི་ལས་བྱ་བར་འོས་ན་ནི་སྨད་པའི་ལས་བྱའོ། །དེ་སྟེ་སླར་བསྡུམ་པར་འོས་ན་ནི་ཁྱོད་ལ་བསྡུམ་པའི་ལས་བྱའོ། །དེ་སྟེ་སྤང་བར་འོས་ན་ནི་ཁྱོད་ལ་སྤང་བའི་ལས་བྱའོ། །གླེང་བར་བྱེད་པའི་དགེ་སློང་གིས་གླེངས་པའི་དགེ་སློང་ལ་གཞན་ཡང་གནས་ལྔར་ཡིད་་་་་བརྟན་པར་བྱ་སྟེ། དེ་སྟེ་ཚེ་དང་ལྡན་པ་ཁྱོད་ལ་ཆད་པས་གཅད་པར་འོས་ན་ནི་ཁྱོད་ལ་ཆད་པས་གཅད་པར་བྱའོ། །གཞི་ནས་བླངས་ཏེ་ཆད་པས་གཅད་པར་འོས་ན་ནི་ཁྱོད་གཞི་ནས་བསླང་སྟེ་ཆད་པས་གཅད་པར་བྱའོ། །དེ་སྟེ་ཡིད་མགུ་བར་འོས་ན་ནི་ཁྱོད་ཡིད་མགུ་བར་བྱེད་དུ་གཞུག་གོ །དེ་སྟེ་གཞི་ནས་བསླང་སྟེ་ཡིད་མགུ་བར་བྱེད་པར་འོས་ན་ནི་ཁྱོད་གཞི་ནས་བསླང་སྟེ་ཡིད་མགུ་བར་བྱེད་དུ་གཞུག་གོ །དེ་སྟེ་སླར་གཞི་ནས་བསླང་སྟེ་ཆད་པ་བྱེད་དུ་གཞུག་པར་འོས་

---

^{[མ་དཔེ་གཟིགས་ན་འདིར་གནོན།]}

ན་ནི་ཁྱོད་ལ་སླར་གཞི་ནས་བསླང་སྟེ། ཆད་པ་བྱེད་དུ་གཞུག་པའི་ལས་བྱའོ། །དེ་སྟེ་སླར་གཞི་ནས་བསླང་སྟེ་ཡིད་མགུ་བ་བྱེད་དུ་གཞུག་པར་འོས་ན་ནི་ཁྱོད་སླར་གཞི་ནས་བསླང་སྟེ་ཡིད་མགུ་བར་བྱེད་དུ་གཞུག་གོ །གླེང་བར་བྱེད་པའི་དགེ་སློང་གིས་གླེངས་པའི་དགེ་སློང་ལ་གཞན་་ཡང་གནས་ལྔར་ཡིད་བརྟན་པར་བྱ་སྟེ། དེ་སྟེ་ཚེ་དང་ལྡན་པ་ཁྱོད་མངོན་སུམ་གྱིས་འདུལ་བར་འོས་ན་ནི་ཁྱོད་ལ་མངོན་སུམ་དུ་འདུལ་བར་བྱའོ། །དེ་སྟེ་དྲན་པས་འདུལ་བར་འོས་ན་ནི་ཁྱོད་དྲན་པས་འདུལ་བར་བྱའོ། །དེ་སྟེ་མ་རྨོངས་པས་འདུལ་བར་འོས་ན་ནི་ཁྱོད་མ་རྨོངས་པས་འདུལ་བར་བྱའོ། །དེ་སྟེ་དེའི་ངོ་བོ་ཚོལ་བས་འདུལ་བར་འོས་ན་ནི་ཁྱོད་དེའི་ངོ་བོ་ཚོལ་བས་འདུལ་བར་བྱའོ། །དེ་སྟེ་ཚུལ་ཤིང་མང་པོར་བྱ་བར་འོས་ན་ནི་ཁྱོད་ལ་ཚུལ་ཤིང་མང་པོར་བྱ་བར་སྦྱིན་ནོ། །གླེང་བར་བྱེད་པའི་དགེ་སློང་གིས་གླེངས་པའི་དགེ་སློང་ལ་གཞན་ཡང་གནས་ལྔར་ཡིད་བརྟན་པར་བྱ་སྟེ། གླེངས་པ་ཁྱོད་ཉོན་ཅིག །ཁྱོད་ལ་གང་དྲིས་པ་དེ་ལྟ་དེ་ལྟ་བུར་ཁྱོད་ཀྱིས་སྨྲོས་ཤིག །ཇི་ལྟར་བདག་ཉིད་སུན་པར་མི་འགྱུར་བ་དང་། གཞན་ལ་གནོད་པར་མི་འགྱུར་བ་དང་། སྐྱོན་མེད་པའི་དགེ་སློང་རྣམས་ལ་གཙེ་བར་མི་འགྱུར་བ་དང་། མངོན་སུམ་དུ་གྱུར་པའི་དགེ་སློང་རྣམས་ལ་མངོན་སུམ་དུ་མི་སྨོད་པ་དང་། གཟུ་བོའི་དགེ་སློང་རྣམས་ལ་མདོ་སྡེའི་ཚིག་དང་། མི་མཐུན་པར་མ་བྱེད་ཅིག །དེ་ལྟར་བྱས་ན་དགེ་ཞིང་ཤིན་ཏུ་དགེ་བར་འགྱུར་རོ། །མདོར་ན། ཉེས་པ་བྱས་འདོགས་དེ་བཞིན་ཏེ། །ཁས་ལེན་ལྟ་བ་གསོ་སྦྱིན་དང་། །སློབ་དཔོན་དང་ནི་གང་སྤྱོད་དང་། །གནས་འཇིག་པ་དང་བསྐྲད་པ་འོ། །ཉེས་པ་བྱེད་པ་ལྔ་སྟེ། ཁྲེལ་མེད་པ་ལས་ཉེས་པ་བྱུང་བ་དང་། ཐེ་ཚོམ་ལས་བྱུང་བ་དང་། མི་ཤེས་པ་ལས་བྱུང་བ་དང་། བློ་ཞན་པ་ལས་བྱུང་བ་དང་། དྲན་པ་ཉམས་པ་ལས་བྱུང་བའོ། །སྤང་བའི་དངོས་པོ་ལྔ་སྟེ། གསོལ་བ་དང་། འདྲི་བར་བྱེད་པ་དང་། བསྒོ་བ་དང་། ཁ་ཅིག་ལ་སྨྲ་བ་དང་། བརྗོད་པར་བྱ་བའོ། །གསོལ་བ་གང་ཞེ་ན། ཚེ་དང་ལྡན་པ་ཁྱོད་ཀྱིས་དགེ་སྦྱོང་དུ་མི་འགྱུར་བ་ཅུང་ཟད་

---

^{[མ་དཔེ་གཟིགས་ན་འདིར་གནོན།]}

ཀྱང་མ་བྱེད་ཅིག་པར་ཚེ་དང་ལྡན་པ་ཁྱོད་ལ་གསོལ་ལོ། །འདྲི་བར་བྱེད་པ་གང་ཞེ་ན། ཚེ་དང་ལྡན་པ་ཁྱོད་ཀྱིས་དགེ་སྦྱོང་དུ་མི་འགྱུར་བ་ཅུང་ཟད་མ་བྱས་སམ་ཞེས་ཚེ་དང་ལྡན་པ་ཁྱོད་ལ་དྲིའོ། །བསྒོ་བ་གང་ཞེ་ན། ཚེ་དང་ལྡན་པ་ཁྱོད་ཀྱིས་དགེ་སྦྱོང་དུ་མི་འགྱུར་བར་མ་བྱེད་ཅིག་ཅེས་ཁྱོད་ལ་བསྒོ་བར་བྱའོ། །ཁ་ཅིག་ལ་སྨྲ་བ་གང་ཞེ་ན། ཚེ་དང་ལྡན་པ་ཁྱོད་ཀྱིས་ཇི་ལྟར་ཁ་ཅིག་དགེ་སྦྱོང་བྱེད་དུ་མི་འགྱུར་བར་བྱེད་པ་དེ་ལྟར་མ་བྱེད་པར་བག་ཡོད་པར་བསྒྲུབ་པར་གྱིས་ཤིག །བརྗོད་པ་གང་ཞེ་ན། ཚེ་དང་ལྡན་པ་ཁྱོད་དགེ་སྦྱོང་དུ་མི་འགྱུར་བར་མི་བྱ་བའི་ཕྱིར་ཡང་དང་ཡང་བརྗོད་དོ། །ཆོས་བཞིན་མ་ཡིན་པར་ཁས་ལེན་པ་ཡང་ལྔ་སྟེ། རྒྱལ་པོས་འཇིགས་ཏེ་ཁས་ལེན་པ་དང་། རྐུན་པོས་འཇིགས་ཏེ་ཁས་ལེན་པ་དང་། རིགས་པའི་གྲོང་གིས་འཇིགས་ཏེ་ཁས་ལེན་པ་དང་། ཆད་པས་འཇིགས་ཏེ་ཁས་ལེན་པ་དང་། དགེ་སྦྱོང་ཉིད་ལ་ལྟོས་པ་མེད་པར་ཁས་ལེན་པའོ། །ཆོས་བཞིན་ཁས་ལེན་པ་ཡང་ལྔ་སྟེ། དཀར་པོའི་ཕྱོགས་སུ་རྣམ་པ་ལྔར་བཟློག་པར་བྱའོ། །ཆོས་བཞིན་མ་ཡིན་པར་ལྟ་བ་སྨྲ་བ་ལྔ་སྟེ། ལྷག་མ་མ་ལུས་པའི་དངོས་པོ་ལ་ལྟ་བ་སྨྲ་བ་དང་། བཤགས་པའི་དངོས་པོ་ལ་ལྟ་བ་སྨྲ་བ་དང་། ཉེས་པ་གཞན་བྱུང་བར་གྱུར་པ་ལ་ཉེས་པའི་དངོས་པོ་ལ་ལྟ་བ་སྨྲ་བ་དང་། བཤགས་པར་མི་འོས་པའི་དངོས་པོ་ལ་ལྟ་བ་སྨྲ་བ་དང་། མི་ལྡང་བར་འདོད་པ་ལྟ་བ་སྨྲ་བའོ། །ཆོས་བཞིན་དུ་ལྟ་བར་སྨྲ་བ་ལྔ་ཡང་དཀར་པོའི་དགེ་བ་དང་ཚུལ་ནས་བྱུང་བའོ། །སློབ་དཔོན་ལྔ་སྟེ། དགེ་ཚུལ་གྱི་སློབ་དཔོན་དང་། གསང་སྟེ་སྟོན་པ་དང་། ལས་བྱེད་པ་དང་། གནས་བཅའ་བ་དང་། ཀློག་པར་བྱེད་པའོ། །དགེ་ཚུལ་གྱི་སློབ་དཔོན་གང་ཞེ་ན། གང་གིས་དགེ་ཚུལ་གྱི་བསླབ་པའི་གནས་བྱིན་པའོ། །གསང་སྟེ་སྟོན་པའི་སློབ་དཔོན་གང་ཞེ་ན། གང་གིས་བསྙེན་པར་རྫོགས་པའི་ཚེ་གསང་སྟེ་སྟོན་པའོ། །ལས་བྱེད་པའི་སློབ་དཔོན་གང་ཞེ་ན། གང་གིས་བསྙེན་པར་རྫོགས་པའི་ལས་བྱས་པའོ། །གནས་བཅའ་བའི་སློབ་དཔོན་གང་

---

^{[མ་དཔེ་གཟིགས་ན་འདིར་གནོན།]}

ཞེ་ན། གང་ལས་ལན་གསུམ་གྱི་བར་དུ་ནན་ཏན་དུ་མནོས་ཤིང་གནས་བཅས་པའོ། །ཀློག་པའི་སློབ་དཔོན་གང་ཞེ་ན། གང་ལས་བླང་བའི་སེམས་ཀྱིས་ཚིག་གཅིག་ཙམ་ཡང་བླངས་པའོ། །སྤྱོ་བ་རྣམ་པ་ལྔ་སྟེ། མི་སྨྲ་བར་བྱ་བ་དང་། ལུང་མི་སྟོན་པ་དང་། གཅིག་ཏུ་མི་སྤྱོད་པ་དང་། དགེ་བའི་ཕྱོགས་གཅད་པ་དང་། གནས་བཅས་པ་སླར་གཞིག་པ་དང་ལྔའོ། །མི་སྨྲ་བར་བྱ་བ་གང་ཞེ་ན། དེ་ལ་སྨྲ་བར་མི་བྱ་ཀུན་ཏུ་སྨྲ་བར་མི་བྱའོ། །ལུང་མི་སྟོན་པ་གང་ཞེ་ན། དེ་ལ་ལུང་བསྒོ་ཞིང་རྗེས་སུ་མི་སྟོན་པའོ། །བསྟན་པ་མི་སྟོན་པའོ། །གཅིག་ཏུ་མི་སྤྱོད་པ་གང་ཞེ་ན། དེས་བསྙེན་བཀུར་བྱས་པ་བདག་གིར་མི་བྱའོ། །དགེ་བའི་ཕྱོགས་གཅད་པ་གང་ཞེ་ན། དེ་ལ་བཀླག་པ་དང་། རྣལ་འབྱོར་དང་། ཡིད་ལ་བྱ་བ་མི་བསྟན་པའོ། །གནས་བཅས་པ་སླར་གཞིག་པ་གང་ཞེ་ན། གནས་བཅར་མི་གཞུག་པའོ། །རྣམ་པ་ལྔས་ན་གནས་བཅས་པ་བཤིག་པར་འགྱུར་ཏེ། བསྐྲད་པ་དང་། ལངས་ཏེ་འགྲོ་བ་དང་། སླར་འབབ་པ་དང་། ཕྱོགས་ལས་གཞན་གྱི་ཕྱོགས་སུ་འགྲོ་བ་དང་། རེ་བ་མེད་པར་སེམས་བསྐྱེད་པ་དང་ལྔའོ། །ཆོས་ལྔ་དང་ལྡན་ན་གནས་བཅའ་བ་སྦྱིན་ཏེ། ལྔ་གང་ཞེ་ན། དད་པ་ཡིན། རིམ་གྲོར་བཅས་པ་ཡིན། བརྩོན་འགྲུས་བརྩམས་པ་ཡིན། ངག་ཉན་པ་ཡིན། དགེ་བའི་བཤེས་གཉེན་ཡིན་པའོ། །ཆོས་ལྔ་དང་ལྡན་ན་གནས་བཅས་པ་ལས་གཞིག་པར་བྱ་སྟེ། ལྔ་གང་ཞེ་ན། མ་དད་པ་ཡིན། རིམ་གྲོ་མེད་པ་ཡིན། ལེ་ལོ་ཅན་ཡིན། ངག་མི་ཉན་པ་ཡིན། སྡིག་པའི་གྲོགས་པོ་ཡིན་ནོ། །ལྷན་ཅིག་སྤྱོད་པ་དང་ཉེ་གནས་ཆོས་ལྔ་དང་ལྡན་ན་བསྐྲད་པ་ཡིན་ཏེ། ལྔ་གང་ཞེ་ན། མ་དད་པ་ཡིན། རིམ་གྲོ་མེད་པ་ཡིན། ལེ་ལོ་ཅན་ཡིན། ངག་མི་ཉན་པ་ཡིན། སྡིག་པའི་གྲོགས་པོ་ཡིན་ནོ། །ལྷན་ཅིག་སྤྱོད་པ་དང་། ཉེ་གནས་ཆོས་ལྔ་དང་ལྡན་ན་མི་བསྐྲད་པ་ཡིན་ཏེ། ལྔ་པོ་དཀར་པོའི་ཕྱོགས་སུ་སླར་རྣམ་པ་ལྔར་བཟློག་སྟེ་བརྗོད་པར་བྱའོ། །ལྷན་ཅིག་སྤྱོད་པ་དང་ཉེ་གནས་ཆོས་ལྔ་དང་ལྡན་ན་བཟོད་པར་བྱ་བ་མ་ཡིན་ཏེ། མ་དད་པ་ཡིན། རིམ་གྲོ་མེད་པ་ཡིན། ལེ་ལོ་ཅན་ཡིན། ངག་མི་ཉན་པ་ཡིན། སྡིག་པའི་གྲོགས་པོ་ཡིན་ནོ། །ལྷན་ཅིག་སྤྱོད་པ་དང་ཉེ་གནས་ཆོས་ལྔ་དང་

---

^{[མ་དཔེ་གཟིགས་ན་འདིར་གནོན།]}

ལྡན་ན་བཟོད་པར་བྱ་བ་ཡིན་ཏེ། དཀར་པོའི་ཕྱོགས་སླར་རྣམ་པ་ལྔར་བཟློག་སྟེ་བརྗོད་པར་བྱའོ། །མདོར་ན། བྱིན་ལེན་གསུམ་དང་ཞིག་པ་དང་། །ཀླུ་དང་ཉེས་པ་བཤགས་པ་དང་། །མ་ནིང་ཕོ་དང་མ་ནིང་མོ། །རུང་བའི་གནས་དང་རྡུལ་གཉིས་སོ། །བྱིན་ལེན་རྣམ་པ་ལྔ་སྟེ། ལུས་ཀྱིས་ལུས་ལ་བྱ་བ་དང་། ལུས་ཀྱིས་ལུས་ལ་ཟིན་པ་དང་། ལུས་ཀྱིས་ཟིན་པས་ལུས་ལ་བྱ་བ་དང་། ལུས་ཀྱིས་ཟིན་ པས་ལུས་ཀྱི་ཟིན་པ་ལ་བྱ་བ་དང་། བཞག་པའི་བྱིན་ལེན་དང་ལྔའོ། །ཇི་ལྟར་ལུས་ཀྱིས་ལུས་ལ་བྱ་ཞེ་ན། ལག་ནས་བྱིན་ལ་ལག་གིས་བླངས་པའོ། །ཇི་ལྟར་ལུས་ཀྱིས་ལུས་ལ་ཟིན་པ་ཞེ་ན། ལག་ནས་བྱིན་ལ་ལྷུང་བཟེད་དུ་བླངས་པའོ། །ཇི་ལྟར་ལུས་ཀྱིས་ཟིན་པས་ལུས་ལ་བྱ་ཞེ་ན། སྣོད་ཀྱིས་བྱིན་ལ་ལག་ཏུ་བླངས་པའོ། །ཇི་ལྟར་ལུས་ཀྱིས་ཟིན་པས་ལུས་ཀྱིས་ཟིན་པ་ལ་བྱ་ཞེ་ན། སྣོད་ནས་བྱིན་ལ་སྣོད་དུ་བླངས་པའོ། །ཇི་ལྟར་བཞག་པའི་བྱིན་ལེན་བྱ་ཞེ་ན། སྨོད་པ་ཞེས་བྱ་བའི་མི་ཡོད་དེ། དེ་དག་གི་ཕ་དང་ཕུ་བོ་དག་ཀྱང་སྨོད་ན་གཞན་ལ་ལྟ་ཅི་སྨོས་ཏེ། དེ་དག་གི་མདུན་དུ་ལྷུང་བཟེད་བཞག་ནས་འདི་སྐད་ཅེས་སྨྲའོ། །བཞིན་བཟངས་དེ་སྟེ་བཏང་བར་གྱུར་ན་ལྷུང་བཟེད་འོ་ནིའི་ནང་དུ་ལུགས་ཤིག །དེ་དག་གིས་ཀྱང་ལྷུང་བཟེད་དེར་བླུགས་པར་གྱུར་ན་དེ་ནི་བཞག་པའི་བྱིན་ལེན་ཞེས་བྱའོ། །གཞན་ཡང་བྱིན་ལེན་ལྔ་སྟེ། ཁྲིའི་སྟེང་དུ་བྱིན་ལེན་བྱ་བ་དང་། ཁྲིའུ་དང་། ཁྲིའུ་ཆུང་ངུ་དང་། ཐུ་བ་དང་། ལྷུང་བཟེད་ཀྱི་གཞིར་རོ། །རྣམ་པ་ལྔས་ནི་བྱིན་ལེན་བྱས་ཀྱང་བྱིན་ལེན་བྱས་པར་མི་འགྱུར་ཏེ། མ་བཏང་བཞིན་ལེན་པ་དང་། བཟའ་བར་མི་སེམས་པར་ལེན་པ་དང་། གཞན་དུ་འདུ་ཤེས་ཏེ་ལེན་པ་དང་། མདུན་དུ་མ་འདུག་པར་ལེན་པ་དང་། རང་བཞིན་ཅན་མ་ཡིན་པ་ལས་བླངས་པའོ། །རྣམ་པ་ལྔས་བྱིན་ལེན་བྱས་ཀྱང་བྱིན་ལེན་འཇིག་པར་འགྱུར་

---

^{[མ་དཔེ་གཟིགས་ན་འདིར་གནོན།]}

ཏེ། ལྔ་གང་ཞེ་ན། ཕྲོགས་པ་དང་། ཤོར་བ་དང་། བོར་བ་དང་། སླར་བབས་པ་དང་། དུས་བྱས་པའོ། །ཀླུའི་རང་བཞིན་ལྔ་སྟེ། ལྷག་མ་རྣམས་ནི་སྤྲུལ་པ་ཡིན་ཏེ། རང་བཞིན་འབྱུང་བ་དང་། རང་བཞིན་གྱིས་འཆི་བ་དང་། རང་བཞིན་གྱིས་ཉལ་བ་དང་། རང་བཞིན་གྱིས་་ཁྲོ་བ་དང་། རང་བཞིན་གྱིས་མི་ཚངས་པར་སྤྱོད་པ་འཁྲིག་པའི་ཆོས་བྱེད་པའོ། །ཉེས་པ་ལྔ་སྟེ། ཕས་ཕམ་པ་དང་། དགེ་འདུན་གྱི་ལྷག་མ་དང་། ལྟུང་བ་དང་། སོ་སོར་བཤགས་པ་དང་། ཉེས་བྱས་སོ། །ཉེས་པ་བྱུང་བ་རྣམ་པ་ལྔ་སྟེ། ལུས་ལས་ཉེས་པ་འབྱུང་གི་ངག་ལས་མ་ཡིན་པ་ཡང་ཡོད། ངག་ལས་ཉེས་པ་འབྱུང་གི་ལུས་ལས་མ་ཡིན་པ་ཡང་ཡོད། ལུས་དང་སེམས་ལས་ཉེས་པ་འབྱུང་གི་ངག་ལས་མ་ཡིན་པ་ཡང་ཡོད། ངག་དང་སེམས་ལས་ཉེས་པ་འབྱུང་གི་ལུས་ལས་མ་ཡིན་པ་ཡང་ཡོད། ལུས་དང་སེམས་དང་ངག་ལས་ཉེས་པ་འབྱུང་བ་ཡང་ཡོད་དོ། །ཉེས་པ་ལས་འབྱུང་བ་ཡང་ལྔ་སྟེ། མཐོང་བས་འབྱུང་བ་དང་། བསྒྲགས་པས་འབྱུང་བ་དང་། ཐོག་མ་ནས་མ་བྱས་པས་འབྱུང་བ་དང་། བྱིན་གྱིས་བརླབས་པས་འབྱུང་བ་དང་། བཤགས་པས་འབྱུང་བ་དང་ལྔའོ། །མ་ནིང་ཕོ་ལ་རྣམ་པ་ལྔ་སྟེ། རང་བཞིན་གྱི་མ་ནིང་དང་། ཟླ་བ་ཕྱེད་ཀྱི་མ་ནིང་དང་། ཕྲག་དོག་གི་མ་ནིང་དང་། ཆགས་པའི་མ་ནིང་དང་། ཉམས་པའི་མ་ནིང་ངོ་། །རང་བཞིན་གྱི་མ་ནིང་གང་ཞེ་ན། རང་བཞིན་གྱིས་མ་ནིང་དུ་གྱུར་པའོ། །ཟླ་བ་ཕྱེད་ཀྱི་མ་ནིང་གང་ཞེ་ན། ཟླ་བ་ཕྱེད་ནི་ཕོར་འགྱུར། ཟླ་བ་ཕྱེད་ནི་མོར་འགྱུར་བའོ། །ཕྲག་དོག་གི་མ་ནིང་གང་ཞེ་ན། གཞན་ལོག་པར་ཞུགས་པ་མཐོང་ནས་དེ་ཡང་གདོད་ལོག་པ་བྱེད་པར་གྱུར་པའོ། །ཆགས་པའི་མ་ནིང་གང་ཞེ་ན། དེ་ལ་གཞན་གྱིས་སྤྱོད་ཅིང་བཙིར་ན་གདོད་བྱེད་པའོ། །ཉམས་པའི་མ་ནིང་གང་ཞེ་ན། གང་གིས་ཕོ་མཚན་སྲོག་ཆགས་ཀྱིས་ཟོས་པའམ་མཚོན་གྱིས་ཆོད་པའོ། །མ་ནིང་མོ་ཡང་རྣམ་པ་ལྔ་སྟེ། མཚན་གཉིས་ཀ་ཡོད་པ་དང་། སྒོ་གཉིས་འབྲེལ་པ་དང་། རྒྱུན་དུ་ཟག་པ་དང་། ཟླ་

---

^{[མ་དཔེ་གཟིགས་ན་འདིར་གནོན།]}

མཚན་མེད་པ་དང་། མཚན་མ་ཙམ་ཡོད་པའོ། །རུང་བའི་གནས་ལྔ་སྟེ། དངོས་པོ་ཟིན་པ་དང་། དངོས་པོ་མ་ཟིན་པ་དང་། དངོས་པོ་བོར་བ་དང་། སྔ་ནས་ཡོད་པ་དང་། མ་འདུག་པ་དང་ལྔའོ། །རུང་བའི་གནས་དངོས་པོ་ཟིན་པ་གང་ཞེ་ན། དངོས་པོ་དེ་རྣམས་ཐམས་ཅད་ཡོངས་སུ་རྫོགས་པ་ཡིན་ནོ། །གང་བྱིན་གྱིས་བརླབས་པ་རྣམ་པ་གསུམ་གྱིས་བྱིན་གྱིས་བརླབས་ཏེ་སེམས་བསྐྱེད་པ་དང་། གཅིག་ལ་གཅིག་ཏུ་སྨྲས་པ་དང་། གསོལ་བ་བྱས་པའོ། །རུང་བའི་གནས་དངོས་པོ་མ་ཟིན་པ་གང་ཞེ་ན། ཆུང་ངུ་ན་རྨང་རྡོ་ཙམ་ཡང་བརྩིགས་པའོ། །དེ་ཡང་བྱིན་གྱིས་བརླབས་པ་རྣམ་པ་གསུམ་པོ་དེ་བཞིན་བྱིན་གྱིས་བརླབས་པ་ཡིན་ནོ། །རུང་བའི་གནས་དངོས་པོ་བོར་བ་གང་ཞེ་ན། གང་མངོན་དུ་རུང་བའི་གནས་སུ་བྱིན་གྱིས་བརླབས་པ་ལས་བོར་ཏེ། སླར་རུང་བའི་གནས་སུ་བྱིན་གྱིས་བརླབས་པ་རྣམ་པ་གསུམ་པོ་དེས་བྱིན་གྱིས་བརླབས་པ་ཡིན་ནོ། །རུང་བའི་གནས་སྔ་ནས་ཡོད་པ་གང་ཞེ་ན། མུ་སྟེགས་ཅན་ཡ་མཚན་སྣ་ཚོགས་རྣམས་ཐུན་མོང་དུ་གྱུར་པ་སྟེ། དགེ་འདུན་གྱིས་བྱིན་གྱིས་བརླབས་པ་འདི་གསུམ་གྱིས་བྱིན་གྱིས་བརླབས་པ་ཡིན་ནོ། །རུང་བའི་གནས་སུ་མ་འདུག་པ་གང་ཞེ་ན། དེ་ནི་སྔ་ནས་རུང་བའི་གནས་མེད་པ་ལས་རྩིག་པས་བསྐོར་ཏམ། སབ་མོས་བསྐོར་ཏམ། འོབས་ཀྱིས་བསྐོར་ཀྱང་རུང་དེར་དགེ་འདུན་གྱིས་ས་ལ་རི་མོ་བྲིས་སམ། ཕུར་པ་བཏབ་བམ། རྩིག་པས་བསྐོར་ཏམ། མཚན་མ་གཞན་་་ཅི་བཙུགས་ཀྱང་རུང་སྟེ། བྱིན་གྱིས་བརླབས་པ་རྣམ་པ་གསུམ་པོ་དེས་རུང་་་བའི་གནས་སུ་བྱིན་གྱིས་བརླབས་པ་ཡིན་ནོ། །རྡུལ་རྣམ་པ་ལྔ་སྟེ། ཟས་རྡུལ་་དང་། བཏུང་བ་རྡུལ་དང་། དྲི་རྡུལ་དང་། སྨན་རྡུལ་དང་། རྡུལ་ཉིད་རྡུལ་དང་ལྔ་ཡིན་ནོ། །གཞན་ཡང་རྡུལ་རྣམ་པ་ལྔ་སྟེ། བཟའ་བ་རྡུལ་དང་། བཅའ་བ་རྡུལ་དང་། ཐུག་པ་རྡུལ་དང་། བཞིབ་པ་རྡུལ་དང་། བལྡག་པ་རྡུལ་དང་ལྔའོ། །མདོར་ན། རྐུ་བ་དང་ཡང་སྐབས་འབྱེད་པ། །སྦྱིན་པ་དག་དང་གསོ་སྦྱིན་གནས། །བཀའ་

---

^{[མ་དཔེ་གཟིགས་ན་འདིར་གནོན།]}

ལུང་སྟོན་པར་བྱེད་པ་དང་། །གྲོང་དུ་ཉེ་བར་འགྲོ་བ་གཉིས། །རྐུ་བ་རྣམ་པ་ལྔ་སྟེ། སྒྱུས་རྐུ་བ་དང་། མཐུས་རྐུ་བ་དང་། ཕྱིར་སྦྱིན་ནོ་ཞེས་ཟེར་ཞིང་རྐུ་བ་དང་། བརྣོགས་ཏེ་རྐུ་བ་དང་། བསྔོས་ཏེ་རྐུ་བ་དང་ལྔའོ། །གང་ཟག་སྐབས་འབྱེད་པར་མི་བྱ་བ་ལྔ་སྟེ། ངོ་ཚ་བ་མེད་པ་དང་། བར་ཆད་ཡོད་པ་དང་། ཚིག་མི་བརྟན་པ་དང་། རང་བཞིན་དུ་མི་གནས་པ་དང་། ཕས་ཕམ་པ་བྱུང་བ་དང་ལྔའོ། །སྦྱིན་པ་ལྔ་བསོད་ནམས་མ་ཡིན་པར་བགྲང་སྟེ། མཚོན་བྱིན་པ་དང་། ཆང་བྱིན་པ་དང་། དུག་བྱིན་པ་དང་། བུད་མེད་བྱིན་པ་དང་། ཆོས་མ་ཡིན་པ་བྱིན་པ་དང་ལྔའོ། །རྒྱུ་དང་རྐྱེན་ལྔས་གསོ་སྦྱིན་གྱི་གནས་སུ་མ་སོང་ཡང་ཉེས་པར་མི་འགྱུར་ཏེ། རྒྱལ་པོས་བར་ཆད་བྱས་པ་དང་། ཆུས་ཁྱེར་བ་དང་། མེས་ཚིག་པ་དང་། མི་མ་ཡིན་པས་བར་ཆད་དུ་བྱས་པ་དང་ལྔའོ། །བཀའ་ལུང་སྟོན་པ་ལ་རྣམ་པ་ལྔ་སྟེ། སྨྱོན་པ་ཡིན་ཏེ་སེམས་འཁྲུགས་པ་ནད་ཀྱིས་གཟིར་བས་བཀའ་ལུང་སྟོན་པ་དང་། ཚུལ་འཆོས་པ་ཡིན་ཏེ། སྡིག་པ་ལ་དད་པས་ཚུལ་འཆོས་པས་བཀའ་ལུང་སྟོན་པ་དང་། བླུན་པ་ཡིན་ཏེ་བླུན་པ་ཉམ་ཆུང་བ་རྨོངས་པས་བཀའ་ལུང་སྟོན་པ་དང་། མངོན་པའི་ང་རྒྱལ་ཅན་ཡིན་ཏེ། མངོན་པའི་ང་རྒྱལ་གྱིས་བཀའ་ལུང་སྟོན་པ་དང་། ཡང་དག་པར་རྣམ་པར་གྲོལ་བ་ཡིན་ཏེ། ཡང་དག་པར་རྣམ་པར་གྲོལ་བས་བཀའ་ལུང་སྟོན་པའོ། །གྲོང་དུ་ཉེ་བར་འགྲོ་བའི་དགེ་སློང་གྲོང་དུ་སོང་ན་ཉེས་པའི་དམིགས་རྣམ་པ་ལྔར་རིག་པར་བྱ་སྟེ། ལྔ་གང་ཞེ་ན། དགེ་སློང་འཁོད་བཞིན་དུ་ཤེས་པར་མ་བྱས་པར་དུས་མ་ཡིན་པར་གྲོང་གི་ནང་དུ་འགྲོ་བ་དང་། ལེགས་པར་མ་བརྟགས་པར་སྟན་ལ་འདུག་པ་དང་། བུད་མེད་ལ་ཚིག་ལྔ་ལས་ལྷག་པར་ཆོས་འཆད་པ་དང་། བུད་མེད་དང་ལྷན་ཅིག་གཉིས་སུ་སྟན་གཅིག་ལ་འདུག་པ་དང་། སྨེན་ངན་དང་བཅས་པའི་གྲོང་དུ་ནན་གྱིས་སྟན་ལ་འདུག་པའོ། །གྲོང་དུ་ཉེ་བར་འགྲོ་བའི་དགེ་སློང་དྲན་པ་ཉམས་པར་གྲོང་དུ་སོང་ན་གཞན་ཡང་ཉེས་པའི་དམིགས་ལྔར་རིག་པར་བྱའོ། །བུད་མེད་ལ་རྒྱུན་དུ་བལྟ་བ་དང་། བལྟ་ཞིང་གཏམ་ཟེར་བ་དང་།

---

^{[མ་དཔེ་གཟིགས་ན་འདིར་གནོན།]}

གཏམ་ཟེར་བ་ལ་འདྲིས་པ་དང་། འདྲིས་ནས་ཚུལ་བཞིན་མ་ཡིན་པ་ཡིད་ལ་བྱེད་པ་དང་། ཚུལ་བཞིན་མ་ཡིན་པ་ཡིད་ལ་བྱས་ནས་ཚངས་པར་སྤྱོད་པ་ལ་མི་དགའ་བར་འགྱུར་ཞིང་ཉེས་པ་ལྕི་བ་འབྱུང་བའམ། བསླབ་པ་ཕུལ་བའམ། སླར་བབས་པར་འགྱུར་བའི་བར་དུའོ། །མདོར་ན། བསྙེན་རྫོགས་སོ་སོར་ཐར་པ་དང་། །ཡིད་གཅུགས་འདུལ་བ་ཐར་པ་དང་། །གཏན་པ་ལྔ་དང་དམན་པ་དང་། །མ་སྐྱེས་པ་དང་དོགས་པ་འོ། །རྣམ་པ་ལྔའི་ཕྱིར་ན་བསྙེན་པར་རྫོགས་པ་ཞེས་བརྗོད་དེ། མཁན་པོའི་མིང་ནས་འབྱིན་པ་དང་། དགེ་འདུན་གྱི་མིང་ནས་འབྱིན་པ་དང་། བསྙེན་པར་རྫོགས་པར་འདོད་པའི་མིང་ནས་འབྱུང་བ་དང་། གསོལ་བ་བྱེད་པ་དང་། ལས་ཉམས་པར་མི་བྱེད་པ་དང་ལྔའོ། །སངས་རྒྱས་བྱུང་བའི་དུས་ན་བསྙེན་པར་རྫོགས་པ་ལྔ་སྟེ། ཡེ་ཤེས་མངོན་པར་ཆུད་པ་དང་། སྟོན་པར་ཁས་བླངས་པ་དང་། བཙུན་པའི་ཆོས་ཁས་བླངས་པ་དང་། དགེ་སློང་ཚུར་ཤོག་ཅེས་སྨྲ་བ་དང་། སློབ་དཔོན་དང་མཁན་པོ་མེད་པ་སྟེ་དེ་ལྟར་ལྔའོ། །སོ་སོར་ཐར་པ་ཀློག་པ་ལྔ་སྟེ། གསོལ་བ་བྱས་ནས་གླེང་གཞི་བརྗོད་དེ་ལྷག་མ་ཐོས་པའོ། །ཞེས་བསྒྲགས་པ་འདི་ནི་སོ་སོར་ཐར་པ་བསྒྲགས་པ་དང་པོའོ། །གསོལ་བ་བྱས་ཏེ་གླེང་གཞི་དང་ཕས་ཕམ་པ་བཞི་བཀླགས་ཏེ། ལྷག་མ་ཐོས་པའོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་ཀློག་པ་གཉིས་པའོ། །གསོལ་བ་བྱས་ཏེ་གླེང་གཞི་དང་ཕས་ཕམ་པ་བཞི་དང་། དགེ་འདུན་གྱི་ལྷག་མ་བཅུ་གསུམ་བཀླགས་ཏེ། ལྷག་མ་རྣམས་ཐོས་པའོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་ཀློག་པ་གསུམ་པའོ། །གསོལ་བ་བྱས་ཏེ་གླེང་གཞི་དང་ཕས་ཕམ་པ་བཞི་དང་། དགེ་འདུན་གྱི་ལྷག་མ་བཅུ་གསུམ་དང་མི་མངོན་པ་གཉིས་བཀླགས་ཏེ། ལྷག་མ་ཐོས་པའོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་ཀློག་པ་བཞི་པའོ། །མདོ་རྫོགས་པར་ཀློག་པ་དང་ལྔའོ། །ཡིད་གཅུགས་པར་འཛིན་པ་ལྔ་སྟེ། མཛའ་བ་ཡིན་ཏེ་ཡིད་དུ་འོང་བ་དང་། བཟོད་པ་ཡིན་ཏེ་མི་མཐུན་པ་མེད་པ་

---

^{[མ་དཔེ་གཟིགས་ན་འདིར་གནོན།]}

དང་། བླ་མ་ཡིན་ཏེ་བཙུན་པར་བྱ་བ་དང་། གཅུགས་པ་ཡིན་ཏེ་ཅི་འདོད་པ་བཞིན་བྱེད་པ་དང་། འདུག་འཚོ་སྐྱོང་བ་སྟེ་དེ་འདི་སྙམ་དུ་སེམས་སོ། །བླངས་པ་དེ་ཐོས་ན་ཡང་དགའ་བར་འགྱུར་བའོ། །འདུལ་བ་ལྔ་སྟེ། སངས་རྒྱས་ཀྱི་ཚེ་དང་། རྟག་པ་དང་། ཕྱོགས་གཅིག་པ་དང་། ཐམས་ཅད་དུ་འགྲོ་བ་དང་། ཉོན་མོངས་པ་འདུལ་བའོ། །གཞན་ཡང་འདུལ་བ་ལྔ་སྟེ། ཡུལ་འདུལ་བ་དང་། དུས་འདུལ་བ་དང་། གནས་འདུལ་བ་དང་། གང་ཟག་འདུལ་བ་དང་། འཁྲུག་པ་འདུལ་བའོ། །གང་ཟག་ལྔ་ལ་འདུལ་བ་མི་བརྗོད་དེ། སྐབས་ཚོལ་བས་འདྲི་བ་དང་། གཙེ་བར་བསམས་ཏེ་འདྲི་བ་དང་། ཕྱས་གདགས་པར་བསམས་ཏེ་འདྲི་བ་དང་། བགམ་པར་བསམས་ཏེ་འདྲི་བ་དང་། ཉེས་པར་བརྗོད་པར་འདོད་པས་འདྲི་བའོ། །གཏན་པ་ལ་ཡོན་ཏན་ལྔ་སྟེ། ཞག་གཅིག་གིས་འབྲེལ་བར་མི་འགྱུར་བ་དང་། ཞག་བཅུས་མི་འགྱུར་བ་དང་། ཞག་བཅུ་ལས་འདས་ཀྱང་མི་འགྱུར་བ་དང་། མ་བསྔོས་པར་གོས་ལྷག་པར་འཆང་བ་དང་། སྟོད་གཡོགས་དང་མཐང་གོས་ཀྱིས་ལྗོངས་རྒྱུ་ཞིང་སྤྱོད་པའོ། །གཞན་ཡང་གཏན་པ་ལ་ཡོན་ཏན་ལྔ་སྟེ། འདུས་ཏེ་ཟ་བ་མེད། ཡང་ཡང་ཟ་བ་མེད། སྤྱན་མ་དྲངས་པར་འགྲོ་བ་དང་། ཆོས་གོས་ཅི་དགར་ཚོལ་བ་དང་། སྟོན་ཟླ་ཐ་་ཆུངས་ནས་དཔྱིད་ཟླ་ར་བའི་བར་དུ་རྙེད་པ་ཅི་ཡོད་པ་དབྱར་ལྷན་ཅིག་ཏུ་་་་གནས་པའི་དགེ་འདུན་དང་འདྲ་བར་བགོ་བའོ། །གང་ཟག་ལྔ་གཏན་པ་འདིང་བར་མི་བསྐོ་སྟེ། དབྱར་མེད་པ་དང་། དབྱར་ཆད་པ་དང་། དབྱར་ཕྱི་མར་ཞུགས་པ་དང་། གཞན་དུ་དབྱར་ཚུལ་དུ་ཞུགས་པ་དང་། སྤང་བ་བྱས་པའོ། །གཞན་ཡང་གང་ཟག་ལྔ་གཏན་པ་འདིང་བར་མི་བསྐོ་སྟེ། སོ་སོར་གནས་པ་དང་། མི་གནས་པ་དང་། རྗེས་སུ་ཕྱོགས་པ་དང་། བསླབ་པ་བྱིན་པ་དང་། ཞིག་པའོ། །གཞན་ཡང་གང་ཟག་ལྔ་གཏན་པ་འདིང་བར་མི་བསྐོ་སྟེ། མ་མཐོང་བས་སྤང་བར་བྱས་པ་དང་། སླར་ལས་མི་བྱེད་པའི་ཕྱིར་སྤངས་པ་དང་། སྡིག་པར་ལྟ་བ་སླར་མ་གཏང་བ་སྤངས་པ་དང་། རྗེས་

---

^{[མ་དཔེ་གཟིགས་ན་འདིར་གནོན།]}

སུ་ཕྱོགས་པ་དང་། མི་གནས་པའོ། །གཞན་ཡང་གང་ཟག་་ལྔ་གཏན་པ་འདིང་བར་མི་བསྐོ་སྟེ། ཆད་པ་བྱེད་པ་དང་། གཞི་ནས་བསླང་སྟེ་ཆད་པ་བྱེད་པ་དང་། ཡིད་མགུ་བར་བྱེད་པ་དང་། གཞི་ནས་བསླང་སྟེ་མགུ་བར་བྱེད་པ་དང་། ཡིད་མགུ་བར་སྤྱད་པའོ། །གང་ཟག་ལྔ་རྣམས་རྙེད་པ་དབང་ལ་ཡོན་ཏན་མེད་དེ། དབྱར་མེད་པ་དང་། དབྱར་ཆད་པ་དང་། དབྱར་ཕྱི་མར་ཚུལ་དུ་ཞུགས་པ་དང་། དགེ་ཚུལ་ཕ་དང་། བསླབ་པ་བྱིན་པའོ། །གཞན་ཡང་གང་ཟག་ལྔ་རྣམས་རྙེད་པ་དབང་ལ་ཡོན་ཏན་མེད་དེ། མ་མཐོང་བའི་ཕྱིར་སྤངས་པ་དང་། སླར་ལས་མི་བྱེད་པས་སྤངས་པ་དང་། སྡིག་པ་ལ་ལྟ་བ་སླར་མ་བཏང་བས་སྤངས་པ་དང་། ཉེ་བར་ཕྱོགས་པ་དང་། མི་གནས་པའོ། །གང་ཟག་ལྔ་རྣམས་རྙེད་པ་ཡང་མི་དབང་ལ་ཡོན་ཏན་ཡང་མེད་དེ། ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པ་དང་། དགེ་འདུན་གྱི་དབྱེན་བྱས་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའོ། །གཞན་ཡང་གང་ཟག་ལྔ་དག་རྙེད་པ་ཡང་མི་དབང་ལ་ཡོན་ཏན་ཡང་མེད་དེ། མ་ནིང་དང་། དགེ་སློང་མ་སུན་ཕྱུང་བ་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སྔོན་ཉེས་པ་བྱུང་བའོ། །བླ་མར་མི་བྱེད་པའི་ཆོས་ལྔ་སྟེ། མ་དད་པ་ཡིན། ཚུལ་ཁྲིམས་ངན་པ་ཡིན། ཉུང་ངུ་ཐོས་པ་ཡིན། སེར་སྣ་ཅན་ཡིན། ཤེས་རབ་འཆལ་བ་ཡིན་ནོ། །གང་ཟག་ལྔ་ནི་ཆོས་དང་་འདུལ་བ་འདི་ལས་མི་སྐྱེ་བའི་ཆོས་ཅན་ཡིན་ཏེ། ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པ་དང་། དགེ་འདུན་གྱི་དབྱེན་བྱས་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའོ། །གཞན་ཡང་གང་ཟག་ལྔ་ནི་ཆོས་དང་འདུལ་བ་འདི་ལས་མི་སྐྱེ་བའི་ཆོས་ཅན་ཏེ། མ་ནིང་དང་། དགེ་སློང་མ་སུན་ཕྱུང་བ་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སྔོན་ཉེས་པ་བྱུང་བའོ། །ཆོས་ལྔ་དང་ལྡན་པའི་དགེ་སློང་སྡིག་པ་ལ་དོགས་པ་ཅན་ཡིན་ཏེ། གནོད་སྦྱིན་མོ་ལ་སྟེན་པ་དང་། སྨད་འཚོང་མ་

---

^{[མ་དཔེ་གཟིགས་ན་འདིར་གནོན།]}

ལ་སྟེན་པ་དང་། ཡུགས་ས་མོ་ལ་སྟེན་པར་བྱེད་པ་དང་། གཞོན་ནུ་མ་ཆེན་མོ་ལ་སྟེན་པར་བྱེད་པ་དང་། མ་ནིང་མོ་དང་སྟེན་པར་བྱེད་པའོ། །མདོར་ན། མཚམས་གསུམ་ལྷག་མར་བྱས་པ་དང་། །མྱུར་དུ་གནས་པ་འགྲོ་བ་དང་། །གོས་དང་རུང་བས་སྨན་རྣམས་དང་། །ཁབ་རལ་ཡང་ནི་དེ་བཞིན་ནོ། །རྣམ་པ་ལྔས་མཚམས་སླར་ཞིག་པར་འགྱུར་ཏེ། དགེ་འདུན་ཐམས་ཅད་དོང་བ་དང་། དགེ་འདུན་ཐམས་ཅད་བབས་པ་དང་། དགེ་འདུན་ཐམས་ཅད་ཤི་སྟེ་དུས་བྱས་པ་དང་། དགེ་འདུན་ཐམས་ཅད་ཕྱོགས་ཕྱོགས་སུ་དོང་ཞིང་ཆད་པ་དང་། གསོལ་བ་དང་ལས་བྱས་པ་དང་ལྔའོ། །གཞན་ཡང་རྣམ་པ་ལྔས་ན་མཚམས་ཕྱིར་ཞིག་པར་འགྱུར་ཏེ། མཚན་མ་མེད་པ་དང་། དགེ་སློང་མེད་པ་དང་། རེ་བ་མེད་པ་དང་། མཚམས་གཞན་བསྐོར་བ་དང་། གསོལ་བ་དང་ལས་དང་ལྔའོ། །རྣམ་པ་ལྔས་ན་ལྷག་མར་མ་བྱས་པ་ཞེས་བརྗོད་དེ། མངོན་སུམ་དུ་མ་གྱུར་པར་བཟའ་བ་དང་བཅའ་བ་ལྷག་མར་བྱེད་པ་དང་། བྱིན་ལེན་མ་བྱས་པར་བཟའ་བ་དང་བཅའ་བ་ལྷག་མར་བྱེད་པ་དང་། གཞན་ལ་མ་བསྒོ་བར་ལྷག་མར་བྱེད་པ་དང་། བསྙེན་པར་མ་རྫོགས་པའི་མདུན་དུ་ལྷག་མར་བྱེད་པ་དང་། རང་བཞིན་དུ་མི་གནས་པའི་མདུན་དུ་ལྷག་མར་བྱེད་པའོ། །ལྷག་མར་བྱས་པ་དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་དོ། །མྱུར་དུ་སྨྲ་བའི་གང་ཟག་ལ་ཉེས་པའི་དམིགས་རྣམ་པ་ལྔར་རིག་པར་བྱའོ། །ལྔ་གང་ཞེ་ན། ལུས་ངལ་བར་འགྱུར། དྲན་པ་ཉམས་པར་འགྱུར། སེམས་ལ་གནོད་པར་འགྱུར། མིད་པ་འགག་པར་འགྱུར། ཟུར་མི་ཕྱིན་ཅིང་གོ་བར་མི་འགྱུར་ཏེ། མྱུར་དུ་སྨྲ་བའི་གང་ཟག་ལ་ཉེས་པའི་དམིགས་སུ་འགྱུར་རོ། །མྱུར་དུ་མི་སྨྲ་བའི་གང་ཟག་ལ་ནི་ཡོན་ཏན་རྣམ་པ་ལྔར་འགྱུར་ཏེ། དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །གནས་གཅིག་ན་ཡུན་རིང་དུ་གནས་པའི་གང་ཟག་ལ་ཉེས་པའི་དམིགས་རྣམ་པ་ལྔར་འགྱུར་ཏེ། བྱ་བ་མང་པོར་འགྱུར། སྣོད་སྤྱད་མང་དུ་འགྱུར། ཡོ་

---

^{[མ་དཔེ་གཟིགས་ན་འདིར་གནོན།]}

བྱེད་མང་ཞིང་གནས་ལ་སེར་སྣ་ཅན་དུ་འགྱུར། གནས་ལ་ཆགས་ཤིང་ཁྱིམ་ལ་སེར་སྣ་ཅན་དུ་འགྱུར། རིགས་ལ་ཆགས་ཤིང་ཁྱིམ་པ་དང་རབ་ཏུ་བྱུང་བ་དེ་དག་ལྷན་ཅིག་འདྲེས་པར་འགྱུར་རོ། །གནས་གཅིག་ན་ཡུན་རིང་དུ་མི་གནས་པའི་གང་ཟག་ལ་ཡོན་ཏན་ལྔ་སྟེ། དཀར་པོའི་ཕྱོགས་སུ་བཟློག་སྟེ་རྣམ་པ་ལྔར་བརྗོད་པར་བྱའོ། །རྟག་ཏུ་འགྲོ་བ་ལ་ཉེས་པའི་དམིགས་རྣམ་པ་ལྔར་འགྱུར་ཏེ། ཁོང་དུ་མ་ཆུད་པ་ཆུད་པར་མི་འགྱུར་བ་དང་། ཁོང་དུ་ཆུད་པ་རྣམས་ཉམས་པར་འགྱུར་བ་དང་། ཆོས་ཐོས་པ་རྣམས་ཀྱང་བརྗེད་པར་འགྱུར། གནོད་པ་ཆེར་མྱོང་བར་འགྱུར། མཛའ་བོ་དང་ལྡན་པར་མི་འགྱུར་རོ། །རྟག་པར་མི་འགྲོ་བ་ལ་ཡོན་ཏན་ལྔ་སྟེ། དེ་དཀར་པོའི་ཕྱོགས་སུ་བཟློག་སྟེ་རྣམ་པ་ལྔར་བརྗོད་པར་བྱའོ། །རུང་བའི་གོས་ལ་རྣམ་པ་ལྔ་སྟེ། བལ་དང་། རས་བལ་དང་། སྲིན་བལ་དང་། ལྡུམ་བུ་ཤ་ན་དང་། ཟར་མའི་གོས་སོ། །ཆོས་གོས་ལ་རྣམ་པ་ལྔས་ན་ཆོས་གོས་བྱིན་གྱིས་བརླབས་པ་ལས་སླར་ཞིག་པར་འགྱུར་ཏེ། ཕྲོགས་པ་དང་། བཏང་བ་དང་། སླར་ཕྱུང་བ་དང་། བབས་པ་དང་། དུས་བྱས་པའོ། །བསྔོས་པ་ལས་ཀྱང་རྣམ་པ་ལྔས་ན་སླར་ཞིག་པར་འགྱུར་ཏེ། ཕྲོགས་པ་དང་། བྱིན་པ་དང་། སླར་ཕྱུང་བ་དང་། བབས་པ་དང་། དུས་བྱས་པའོ། །དེ་བཞིན་དུ་ལྷུང་བཟེད་བྱིན་གྱིས་བརླབས་པའང་བརྗོད་པར་བྱའོ། །དེ་བཞིན་དུ་སྨན་བྱིན་གྱིས་བརླབས་པ་དང་། སྨན་བསྔོས་པ་ཡང་བརྗོད་པར་བྱའོ། །ཁབ་རལ་གང་ཟག་ལྔའི་དབང་དུ་མི་བྱ་སྟེ། ངོ་ཚ་མེད་པ་དང་། ཁོན་ཡོད་པ་དང་། ཆོག་མི་ཤེས་པ་དང་། དྲན་པ་ཉམས་པ་དང་། རང་བཞིན་དུ་མི་གནས་པའོ། །མདོར་ན། བཟའ་བ་ཕྱི་བཞིན་དགེ་སྦྱོང་དང་། །དགེ་བསྙེན་དང་ནི་ནད་པ་གཉིས། །རབ་ཏུ་འབྱུང་བ་ལྔ་པོ་དང་། །ཡོན་ཏན་མང་པོ་དེ་བཞིན་ནོ། །ཟས་ཚོད་མེད་པ་ལ་ཉེས་པའི་དམིགས་རྣམ་པ་ལྔ་སྟེ། ལུས་ལྕི་བར་འགྱུར། ལས་སུ་མི་རུང་ཞིང་སྤོང་བ་ལ་མི་བཟོད་པ་དང་། དབུགས་ཕྱི་ནང་དུ་རྒྱུ་བ་ལ་མི་བདེ་བ་དང་། བཤང་

---

^{[མ་དཔེ་གཟིགས་ན་འདིར་གནོན།]}

གཅི་མང་དུ་འགྱུར་བ་དང་། སྙོམ་པ་དང་གཉིད་ཀྱིས་སེམས་ཀུན་ཏུ་ནོན་པར་འགྱུར་བ་དང་། སེམས་རྩེ་གཅིག་ཏུ་མི་འགྱུར་ཞིང་གཞན་དུ་འགྱུར་བའོ། །ཟས་ཚོད་ཟིན་པ་ལ་ཡོན་ཏན་ལྔར་འགྱུར་ཏེ། དེ་དཀར་པོའི་ཕྱོགས་སུ་བཟློག་སྟེ་རྣམ་པ་ལྔར་བརྗོད་པར་བྱའོ། །ཆོས་ལྔ་དང་ལྡན་ན་ཕྱི་བཞིན་འབྲང་བའི་དགེ་སྦྱོང་བཀྲི་མི་དགོས་ཏེ། ཤིན་ཏུ་མདུན་དུ་རིང་དུ་འགྲོ་བ་དང་། ཤིན་ཏུ་ཕྱི་ནས་ནུར་ཞིང་འོང་བ་དང་། སྙོགས་ཤིང་འགྲོ་བ་དང་། གཏམ་གྱི་བར་དུ་འཇུག་པ་དང་། རིགས་ཤིང་འོས་པར་རྙེད་པ་རྣམས་ལེན་མི་ནུས་པའོ། །ལྷུང་བཟེད་གཉིས་དང་ལྷུང་བཟེད་དུ་ཐོགས་པ་རྙེད་པ་་བླང་བར་ཡང་དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །ཆོས་ལྔ་དང་ལྡན་པའི་དགེ་བསྙེན་ནི་དགེ་བསྙེན་དྲི་མ་ཅན་ནོ། །དགེ་བསྙེན་སླུ་བའོ། །དགེ་བསྙེན་རུལ་བའོ། །དགེ་བསྙེན་རིགས་ངན་དུ་རིག་པར་བྱ་སྟེ། ཚུལ་ཁྲིམས་ངན་པ་ཅན་ཡིན་ཏེ། བསླབ་པ་ཡོངས་སུ་རྫོགས་པར་མི་བྱེད་པའོ། །ལྟས་དང་བཀྲ་ཤིས་པ་ལ་བརྟེན་པ་ཡིན་ཏེ། ལྟས་དང་བཀྲ་ཤིས་པས་འདག་པར་ཡིད་ཆེས་ཀྱི་ལས་ཀྱིས་མ་ཡིན་པ་དང་། ལོག་པར་ལྟ་བ་ཡིན་ཏེ་ལོག་པར་ལྟ་ཞིང་དགེ་སློང་ལ་མི་དགའ་བ་མང་དུ་ཡིན། གནས་བརྟན་དང་བར་མ་དང་། གསར་བུའི་དགེ་འདུན་ལ་དབང་བཟས་པ་ཡིན་ཏེ། དེས་དེ་ན་འཁོད་པའི་དགེ་སློང་ལ་སྨད་པའོ། །ཆོས་ལྔ་དང་ལྡན་པའི་དགེ་བསྙེན་ནི་དགེ་བསྙེན་པད་མ་ལྟ་བུ། དགེ་བསྙེན་པུ་ཎྜརཱི་ཀ་ལྟ་བུ། དགེ་བསྙེན་དམ་པར་ལྟ་སྟེ། དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །ཆོས་ལྔ་དང་ལྡན་པའི་ནད་པ་ལ་ནད་གཡོག་བྱ་བར་དཀའ་བ་ཡིན་ནོ། །ཚིག་མི་སྲུན་པ་ཚིག་མི་སྲུན་པར་གྱུར་པའི་ཆོས་རྣམས་དང་ལྡན་པ་དང་། ནད་གཡོག་གིས་ལུང་བསྟན་པ་བཞིན་དུ་མི་བཏུབ་པ་དང་། གང་ཕན་པ་དང་གང་མི་ཕན་པ་མི་ཤེས་པ་དང་། སྨན་ལ་མི་སྟེན་པ་ཡིན་ཏེ། གང་བདག་ལ་ཡོ་བྱད་འབྱོར་བ་དེ་ཐམས་ཅད་གཞན་ལ་འཚོ་བ་དང་། ནད་རྣམས་དུབ་པ་དང་མ་དུབ་པ་མི་ཤེས་པའོ། །དེ་ཉིད་ལ་

---

^{[མ་དཔེ་གཟིགས་ན་འདིར་གནོན།]}

དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །ཆོས་ལྔ་དང་ལྡན་ན་ནད་པའི་ནད་གཡོག་དུ་བཅུག་པའི་མི་རིགས་སོ། །ཚིག་མི་སྲུན་པ་ཡིན་ཏེ། ཚིག་མི་སྲུན་པར་གྱུར་པའི་ཆོས་རྣམས་དང་ལྡན་པ་དང་། ནད་པ་ལ་ལུང་བསྟན་པ་བཞིན་མི་བྱེད་པ་དང་། ནད་པ་ལ་ཕན་པ་དང་མི་ཕན་པ་མི་ཤེས་པ་དང་། ནད་པའི་སྨན་སྦྱོར་མི་ནུས་པ་དང་། ནད་པ་ལ་ཁ་ཟས་ཀྱི་ཕྱིར་ནད་གཡོག་བྱེད་ཀྱིས་ཆོས་ཀྱི་ཕྱིར་མ་ཡིན་ཞིང་སྨོད་པ་ཅན་ཡིན་ཏེ། ནད་པ་ལ་རབ་ཏུ་སྨད་ནས་ནད་པའི་བཤང་གཅི་དང་། མཆིལ་མ་དང་། སྐྱུགས་པ་དང་། ཚད་པ་འདོར་དུ་མི་བཏུབ་ཅིང་སྨོད་པའོ། །དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །ཆོས་ལྔ་དང་ལྡན་ཞིང་ལོ་བཅུ་ལོན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ་སྟེ། ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། མདོ་སྡེ་འཛིན་པ་དང་། འདུལ་བ་འཛིན་པ་དང་། མ་ལྟ་བུ་འཛིན་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། མདོ་སྡེ་ལ་མཁས་པ་དང་། འདུལ་བ་ལ་མཁས་པ་དང་། མ་ལྟ་བུ་ལ་མཁས་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། མདོ་སྡེ་རིག་པ་དང་། འདུལ་བ་རིག་པ་དང་། མ་ལྟ་བུ་རིག་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་དང་ལྡན་པར་གྱུར་པ་དང་། མང་དུ་ཐོས་པ་དང་། མདོ་སྡེ་ལ་གསལ་བ་དང་། འདུལ་བ་ལ་གསལ་བ་དང་། མ་ལྟ་བུ་ལ་གསལ་བའོ། །གཞན་ཡང་་རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། ལྷན་ཅིག་སྤྱོད་པ་དང་། ཉེ་གནས་མདོ་སྡེ་དང་། འདུལ་བ་དང་། མ་ལྟ་བུ་སློབ་ཏུ་འཇུག་ནུས་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། ལྷག་པའི་ཚུལ་ཁྲིམས་དང་། ལྷག་པའི་སེམས་དང་། ལྷག་པའི་འདུལ་བ་ལ་བསླབས་པ་ཡིན་ནོ། །གཞན་ཡང་

---

^{[མ་དཔེ་གཟིགས་ན་འདིར་གནོན།]}

རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། བསླབ་པ་ལས་ལྷག་པར་སྤྱོད་པའི་བསླབ་པ་དང་། འདུལ་བ་ལྷག་པ་དང་། སོ་སོར་ཐར་པ་ལྷག་པ་རྣམས་སློབ་པའོ། །གཞན་ཡང་རྣམ་པ་ལྔར་བརྗོད་དེ། དད་པ་དང་ལྡན་པ་ཡིན་ཏེ། ཚུལ་ཁྲིམས་དང་ལྡན་པ་དང་། ཐོས་པ་དང་ལྡན་པ་དང་། གཏོང་བ་དང་ལྡན་པ་དང་། ཤེས་རབ་དང་ལྡན་པར་གྱུར་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་དང་ལྡན་པ་དང་། ཤེས་རབ་དང་ལྡན་པ་དང་། ཏིང་ངེ་འཛིན་དང་ལྡན་པ་དང་། རྣམ་པར་གྲོལ་བ་དང་ལྡན་པ་དང་། རྣམ་པར་གྲོལ་བའི་ཡེ་ཤེས་མཐོང་བ་དང་ལྡན་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། བརྩོན་འགྲུས་རྩོམ་པ་དང་། དྲན་པ་ཉེ་བར་འཇོག་པ་དང་། ཤེས་རབ་ཅན་དུ་གྱུར་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། མཉམ་པར་འཇོག་པ་དང་། ཤེས་རབ་ཅན་དུ་གྱུར་པའོ། །གཞན་ཡང་རྣམ་པ་ལྔར་བརྗོད་དེ། ཚུལ་ཁྲིམས་ཅན་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། ནང་དུ་ཡང་དག་འཇོག་ལ་བརྩོན་པ་དང་། ཤེས་རབ་ཅན་ཡིན་ནོ། །གཞན་ཡང་རྣམ་པ་ལྔར་བརྗོད་དེ། སློབ་པའི་ཚུལ་ཁྲིམས་ཀྱི་ཕུང་པོར་ལྡན་པ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པར་གྱུར་པའོ། །གཞན་ཡང་རྣམ་པ་ལྔར་བརྗོད་དེ། མི་སློབ་པའི་ཚུལ་ཁྲིམས་ཀྱི་ཕུང་པོ་དང་ལྡན་པ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པར་གྱུར་པའོ། །གཞན་ཡང་རྣམ་པ་ལྔར་བརྗོད་དེ། ཉེས་པ་བྱུང་བ་ཤེས། བཅས་པ་ཤེས། རྗེས་སུ་བཅས་པ་ཤེས། གནང་བ་ཤེས། རྗེས་སུ་གནང་བ་ཤེས་པའོ། །གཞན་ཡང་རྣམ་པ་

---

^{[མ་དཔེ་གཟིགས་ན་འདིར་གནོན།]}

ལྔར་བརྗོད་དེ། བར་ཆད་དུ་འགྱུར་བ་ཤེས། བར་ཆད་དུ་མི་འགྱུར་བ་ཤེས། ལུང་བསྟན་པ་དང་། རྗེས་སུ་བསྟན་པ་དང་། གནས་བཅའ་བ་བྱེད་ནུས་པའོ། །གཞན་ཡང་རྣམ་པ་ལྔར་བརྗོད་དེ། ཉེས་པ་ཤེས། ཉེས་པ་མེད་པ་ཤེས། ལྕི་བ་ཤེས། ཡང་བ་ཤེས། དེས་སོ་སོར་ཐར་པའི་མདོ་རྒྱས་པར་གོ་ཞིང་ཁ་ཏོན་དུ་ལོབས་པ་ཡིན་ནོ། །ཆོས་འདི་ལྔ་དང་ལྡན་ན་དེས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། བདག་ཉིད་ཀྱང་གནས་མི་བཅའ་བར་འདུག་པར་བྱ་སྟེ། ཐོག་མའི་ལྔ་པོ་ཉམས་པ་གཉིས་ཏེ། བསྙེན་པར་རྫོགས་ནས་ལོ་བཅུ་ལོན་ནམ་དེ་བས་ལྷག་ཀྱང་རུང་སྟེ། ལྷན་ཅིག་སྤྱོད་པའམ་ཉེ་གནས་ཀྱང་རུང་སྟེ། ནད་པའི་ནད་གཡོག་བྱེད་དམ། ནད་གཡོག་བྱེད་དུ་འཇུག་ནུས་པ་དང་། ལྷན་ཅིག་སྤྱོད་པའམ་ཉེ་གནས་ཀྱང་རུང་སྟེ། ཐེ་ཚོམ་བྱུང་ན་སླར་སེལ་ཏམ་སེལ་དུ་འཇུག་ནུས་པ་དང་། ལྷན་ཅིག་སྤྱོད་པའམ་ཉེ་གནས་སྡིག་པ་ལ་ལྟ་བར་གྱུར་ན། སླར་གཏོང་ངམ་གཏོང་ནུས་པར་གྱུར་པ་དང་། ལྷན་ཅིག་སྤྱོད་པའམ་ཉེ་གནས་གནས་འདི་ན་མི་དགའ་བར་གྱུར་ན། ཡུལ་གུད་དུ་ལེན་དུ་འཇུག་པར་བྱེད་ནུས་པ་ཡིན་ཏེ། ཆོས་འདི་ལྔ་དང་ལྡན་ན་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། བདག་དང་གནས་མི་བཅའ་བར་འདུག་པར་བྱའོ།། །།འདུལ་བ་གཞུང་དམ་པ། བམ་པོ་ཉི་ཤུ་དགུ་པ། ལྔ་པོ་རྣམས་ཀྱི་མདོ་བར་མའི་ཚིགས་སུ་བཅད་པ་བརྗོད་པར་བྱའོ། །ལོ་བཅུ་མདོ་སྡེ་བཞི་པ་དང་། །ལྷག་མར་སྤྱོད་དང་རྫོགས་པ་དང་། །གཉིས་སུ་བྱས་ཏེ་བརྩོན་འགྲུས་བརྩམས། །གཞན་ཡང་གསུམ་པ་ཕུང་པོ་དང་། །བྱུང་བ་ལ་ཡང་གཉིས་སུ་བྱ། །བར་དུ་གཅོད་དང་ཉེས་པ་དང་། །ཐ་མར་བྱས་ནས་སྡེར་བསྡུས་སོ། །འདུལ་བ་མི་འཛིན་པ་ལ་ཉེས་པའི་དམིགས་ལྔ་དང་ལྡན་པ་ནི་ཟབ་པ་དང་། སྤོབས་པ་མེད་པ་དང་། བསམ་པ་མང་བ་དང་། འཇིག་རྟེན་གྱི་ཡི་གེར་ལྡན་པ་དང་། གོ་དཀའ་བའོ། །གང་ཟག་འདུལ་བ་འཛིན་པ་ལ་

---

^{[མ་དཔེ་གཟིགས་ན་འདིར་གནོན།]}

ཡོན་ཏན་རྣམ་པ་ལྔ་སྟེ། རྒྱལ་བའི་ནང་གི་མཛོད་སྲུང་བར་འགྱུར་བ་ཡིན། བདག་གི་ཚུལ་ཁྲིམས་ཀྱི་ཕུང་པོ་སྦས་ཤིང་ཤིན་ཏུ་སྦས་པར་གྱུར་པ་དང་། དེ་ལ་ལུང་བསྒོ་བ་དང་། བསྟན་པ་གཞན་ལ་རག་མ་ལུས་པ་ཡིན། འཁོར་བཞི་འདུ་བར་འགྱུར་བ་ཡིན། མཁས་པ་ཚངས་པ་མཚུངས་པར་སྤྱོད་པའི་གང་ཟག་འགྱོད་པ་སྐྱེས་པ་རྣམས་ཀྱི་སྐྱབས་སུ་གྱུར་པ་ཡིན་ནོ། །གཞན་ཡང་འདུལ་བ་འཛིན་པའི་གང་ཟག་ལ་ཡོན་ཏན་རྣམ་པ་ལྔ་སྟེ། མི་འཇིགས་པར་དགེ་འདུན་གྱི་ནང་དུ་གནས་པ་དང་། དེས་བསླབ་པའི་གནས་ཤིན་ཏུ་ཟིན་པར་གྱུར་པ་དང་། སྟོན་པས་བསྟན་པ་དག་འཕེལ་བར་བྱེད་པ་དང་། ཆོས་ཀྱི་རྗེས་སུ་སྒྲོགས་པར་བྱེད་པ་དང་། འདི་ལྟར་བསླབ་པའི་དབང་དུ་བྱས་ནས་འདི་ལས་ཕྱི་རོལ་པའི་སྤྱི་བོར་བསྒྲུབས་ཏེ་འདུག་པ་ཡིན་ནོ། །གཞན་ཡང་གང་ཟག་འདུལ་བ་འཛིན་པ་ལ་ཡོན་ཏན་རྣམ་པ་ལྔ་སྟེ། འདུལ་བ་འཛིན་པའི་གང་ཟག་ཕྱོགས་གང་ན་གནས་པ་དེར་ང་སྣང་བར་གྱུར་པ་དང་། མངོན་དུ་སྣང་བར་གྱུར་པ་དང་། རབ་ཏུ་སྣང་བར་གྱུར་པ་དང་། ཕྱོགས་དེ་ངས་སྟོངས་པར་མ་གྱུར་པ་དང་། འདུལ་བ་འཛིན་པའི་གང་ཟག་་ཕྱོགས་གང་ན་འདུག་པ་དེའི་ཕྱོགས་སུ་དེ་བཞིན་གཤེགས་པ་ཕྲིན་ལས་ཆུང་བ་་་ཡིན་ནོ། །གཞན་ཡང་འདུལ་བ་འཛིན་པའི་གང་ཟག་ལ་ཡོན་ཏན་རྣམ་པ་ལྔ་སྟེ། བྱུང་བ་ཤེས་པ་དང་། བཅས་པ་ཤེས་པ་དང་། རྗེས་སུ་བཅས་པ་ཤེས་པ་དང་། སྤངས་པ་ཤེས་པ་དང་། རྗེས་སུ་གནང་བ་ཤེས་པའོ། །གཞན་ཡང་འདུལ་བ་འཛིན་པ་ལ་ཡོན་ཏན་རྣམ་པ་ལྔ་སྟེ། ཉེས་པ་ཤེས་པ་དང་། ཤེས་པ་མེད་པ་ཤེས་པ་དང་། ལྕི་བ་ཤེས་པ་དང་། ཡང་བ་ཤེས་པ་དང་། དེས་སོ་སོར་ཐར་པའི་མདོ་ཀློག་ཅིང་རྒྱས་པར་བསྒྲགས་པ་ཡིན་ནོ། །གཞན་ཡང་འདུལ་བ་འཛིན་པའི་གང་ཟག་ལ་ཡོན་ཏན་རྣམ་པ་ལྔ་སྟེ། བར་ཆད་དུ་འགྱུར་བ་ཤེས། བར་ཆད་མ་ཡིན་པ་ཤེས། ལུང་བསྒོ་བ་དང་། རྗེས་སུ་སྟོན་པ་དང་། གནས་བཅར་འཇུག་ནུས་པ་ཡིན་ནོ། །མདོར་ན། སྤངས་པར་གྱུར་དང་གཉིས་པ་དང་། །ཕྱག་

---

^{[མ་དཔེ་གཟིགས་ན་འདིར་གནོན།]}

དེར་ཁྲོད་པ་གཉིས་སུ་བྱ། །རུང་བ་གཉིས་པ་བཟའ་བ་དང་། །བཅའ་བ་བུ་རམ་དེ་བཞིན་ནོ། །རྣམ་པ་ལྔས་ན་སྤངས་པ་ཞེས་བྱ་སྟེ། བཟའ་བར་མངོན་པ་དང་། བཟའ་བ་སྦྱིན་པར་མངོན་པ་དང་། བཟའ་བ་བྱིན་ལེན་བྱེད་པར་མངོན་པ་དང་། བཟའ་བ་སྤོང་བར་མངོན་པ་དང་། སྟན་ལས་ལངས་པར་མངོན་་་་པའོ། །ཇི་ལྟར་ན་བཟའ་བར་མངོན་པ་ཞེ་ན། བཟའ་བ་རྣམ་པ་ལྔ་དང་བཅའ་བ་རྣམ་པ་ལྔ་སླར་སྤོང་བར་བྱེད་པའོ། །ཇི་ལྟར་ན་བཟའ་བ་སྦྱིན་པ་མངོན་པ་ཞེ་ན། སྐྱེས་པ་དང་བུད་མེད་དང་མ་ནིང་དུ་མངོན་པའོ་ཇི་ལྟར་ན་བཟའ་བ་བྱིན་ལེན་བྱེད་པ་མངོན་པ་ཞེ་ན། བཟའ་བ་ལྔ་དང་བཅའ་བ་ལྔ་འབྲིམ་པར་གྱུར་པའོ། །ཇི་ལྟར་ན་བཟའ་བ་སྤོང་བར་མངོན་པ་ཞེ་ན། བཟའ་བ་ལྔ་དང་བཅའ་བ་ལྔ་མི་འདོད་ཅེས་སྤངས་པ་ཡིན། ཇི་ལྟར་ན་སྟན་ལས་ལངས་པར་མངོན་པ་གང་ཞེ་ན། གང་སྟན་ལས་ལངས་པའོ། །རྣམ་པ་ལྔས་ན་མ་སྤངས་པ་ཞེས་བྱ་སྟེ། དེ་ལྟ་བུ་ལས་སླར་བཟློག་པ་རྣམ་པ་ལྔར་བརྗོད་པར་བྱའོ། །གཞན་ཡང་རྣམ་པ་ལྔའི་ཕྱིར་མ་སྤངས་པ་ཞེས་བྱ་སྟེ། མི་རུང་བའི་་བཟའ་བ་བཟའ་བ་དང་བཅའ་བ་བཅའ་བ་མི་རུང་བར་འདྲེས་པས་སྤོང་བ་དང་། བཞག་པའམ་བཞག་པར་འདྲེས་པས་་སྤོང་བ་དང་། མི་ཕན་པའམ་མི་ཕན་པར་འདྲེས་པས་སྤོང་བ་དང་། མི་འདོད་པའམ་མི་འདོད་པར་འདྲེས་པས་སྤོང་བ་དང་། མ་འགྲངས་པའམ་རྫོགས་པར་མ་གྱུར་པའོ། །རྣམ་པ་ལྔས་སྤངས་པ་ཞེས་བྱ་སྟེ། དེ་ལས་སླར་བཟློག་པ་རྣམ་པ་ལྔར་བརྗོད་པར་བྱའོ། །གཞན་ཡང་རྣམ་པ་ལྔས་ལྷག་མ་དང་བཅས་པའི་ཚིག་གིས་སྤངས་པ་ནི་མ་སྤངས་པ་ཞེས་བྱ་སྟེ། རེ་ཞིག་ཆོག་གོ་ཞེས་ཟེར་བ་དང་། རེ་ཞིག་ཞོག་ཅིག་ཅེས་ཟེར་བ་དང་། རེ་ཞིག་བཟའོ་ཞེས་ཟེར་བ་དང་། རེ་ཞིག་མི་དགོས་སོ་ཞེས་ཟེར་བ་དང་། རེ་ཞིག་འགྲངས་སམ་མ་འགྲངས་བལྟའོ་ཞེས་ཟེར་བ་འདི་ལྔ་ནི་མ་སྤངས་པ་ཞེས་བྱའོ། །རྣམ་པ་ལྔའི་ཕྱིར་སྤངས་པ་ཞེས་བྱ་སྟེ། ཆོག་གོ་ཞེས་ཟེར་བ་དང་། ཞོག་ཅིག་ཅེས་ཟེར་བ་དང་། ཟོས་ཟིན་ཏོ་ཞེས་ཟེར་བ་དང་། མི་དགོས་སོ་ཞེས་ཟེར་བ་

---

^{[མ་དཔེ་གཟིགས་ན་འདིར་གནོན།]}

དང་། འགྲངས་སོ་ཞེས་ཟེར་བའི་ཚིག་ལྔ་པོ་ལྷག་མ་མེད་པ་དེ་ལྔ་ནི་སྤངས་པ་ཞེས་བྱའོ། །ཕྱག་དར་ཁྲོད་ཀྱི་གོས་རྣམ་པ་ལྔ་སྟེ། སྲང་གི་ཕྱག་དར་ཁྲོད་ཀྱི་གོས་དང་། ཆུས་ཁྱེར་བ་དང་། ཕྱག་དར་ཁྲོད་པ་དང་། དགོན་པ་ན་འདུག་པ་དང་། མཛོད་རྙིང་ཁྱེར་བ་དང་ལྔའོ། །གཞན་ཡང་ཕྱག་དར་ཁྲོད་ཀྱི་གོས་ལ་རྣམ་པ་ལྔ་སྟེ། བ་ལང་གིས་ཟོས་པ་དང་། བྱི་བས་ཟོས་པ་དང་། བྱེའུས་ཟོས་པ་དང་། མེས་ཚིག་པ་དང་། མ་མས་བོར་བའི་ཕྱག་དར་ཁྲོད་དང་ལྔའོ། །རུང་བར་བྱེད་པ་ལ་རྣམ་པ་ལྔ་སྟེ། མེས་རུང་བར་བྱ་བ་དང་། མཚོན་གྱིས་རུང་བར་བྱ་བ་དང་། སེན་མོས་རུང་བར་བྱ་བ་དང་། ནེ་ཚོས་རུང་བར་བྱ་བ་དང་། རྙིས་པས་རུང་བར་བྱ་བ་དང་ལྔའོ། །གཞན་ཡང་རུང་བ་ལྔ་སྟེ། བཏོན་པ་དང་། བཙལ་བ་དང་། བཅད་པ་དང་། གཤེགས་པ་དང་། ས་བོན་མ་ཡིན་པའི་ཆོས་དང་ལྔའོ། །བཟའ་བ་ལ་རྣམ་པ་ལྔ་སྟེ། འབྲས་ཆན་དང་། ཕྱེ་ཚལ་བཙོས་པ་དང་། ཤ་དང་། ཉ་དང་། ཁུར་བའོ། །བཅའ་བ་ལ་རྣམ་པ་ལྔ་སྟེ། རྩ་བ་བཅའ་བ་དང་། སྡོང་བུ་བཅའ་བ་དང་། ལོ་མ་བཅའ་བ་དང་། མེ་ཏོག་བཅའ་བ་དང་། འབྲུ་བཅའ་བའོ། །གཞན་ཡང་བཅའ་བ་རྣམ་པ་ལྔ་སྟེ། བག་ཙོས་བཅའ་བ་དང་། བརྔོས་པ་བཅའ་བ་དང་། ཁུར་སྐམ་བཅའ་བ་དང་། བུ་རམ་བཅའ་བ་དང་། ཆན་བཅའ་བའོ། །ཉམ་དམའ་བ་ལྔས་ན་བྱིན་གྱིས་བརླབས་པའི་བུ་རམ་བཅའ་བར་བྱ་སྟེ། ཟན་ཆུང་ངུ་ཟོས་པ་དང་། ཟན་མ་ཟོས་པ་དང་། ནད་ཀྱིས་གཟིར་བ་དང་། ལམ་དུ་ཞུགས་པ་དང་། ལས་གསར་དུ་བྱེད་པའོ། །མདོར་ན། དུགས་ཁང་ཚུལ་ཁྲིམས་མི་བཟོད་པ། །དམ་ཆོས་མ་ཡིན་མཛའ་མང་བ། །ལྷུང་བཟེད་དང་ནི་བཟའ་བ་དང་། །གོས་དང་བསོད་སྙོམས་དེ་བཞིན་ནོ། །དུགས་ཁང་ལ་ཡོན་ཏན་རྣམ་པ་ལྔ་སྟེ། ལུས་ཀྱི་དྲི་མ་མེད་པར་བྱེད་པ་དང་། པགས་པ་དང་མདངས་གསལ་བར་བྱེད་པ་དང་། པགས་པའི་ནང་ན་ནད་ཡོད་པ་འབྱིན་པ་དང་། རླུང་དང་བད་ཀན་དང་། མི་མཐུན་པར་བྱེད་པ་དང་།

---

^{[མ་དཔེ་གཟིགས་ན་འདིར་གནོན།]}

དགེ་སློང་དག་གི་ནད་མང་པོ་དུགས་ཁང་གིས་མེད་པར་གྱུར་པ་དང་ལྔའོ། །དགེ་སློང་ཆོས་འདི་ལྔ་དང་ལྡན་ན་དགེ་འདུན་བདེ་བར་གནས་པའོ། །སོ་སོར་ཐར་པའི་སྡོམ་པས་བསྡམས་པ་དང་། སྤྱད་པ་དང་སྤྱོད་ལམ་དུ་ལྡན་པ་དང་། ཁ་ན་མ་ཐོ་བ་རྡུལ་ཙམ་ལ་ཡང་འཇིགས་པར་བྱེད་ཅིང་བསླབ་པའི་གནས་ལ་དམ་བཅའ་སྟེ་བསླབ་པ་དང་། བདག་ལ་ལྟའི་གཞན་ལ་མི་ལྟ་བ་དང་། བཤེས་ཉུང་བ་ཤེས་པ་རབ་ཏུ་ཉུང་བའོ། །དེ་ལ་བཤེས་པ་ཉུང་བ་ནི་ཕྲད་འདོད་པའི་སྡུག་བསྔལ་མེད་པར་འགྱུར་བ་དང་། བདེ་བར་གནས་ཤིང་གཞན་ལ་གནོད་པ་མེད་པས་བདེ་བར་གྱུར་པ་ཡིན། གཞན་གྱིས་མི་སྙན་པར་སྨྲས་པ་དང་། ཚིག་རྩུབ་པོར་སྨྲས་ཀྱང་གཞན་གྱིས་མི་གདུང་ཞིང་མི་བཟོད་པར་མི་འགྱུར་བའོ། །གང་ཟག་མི་བཟོད་པ་ལ་ཉེས་པའི་་་དམིགས་རྣམ་པ་ལྔ་སྟེ། མ་རུང་བ་ཡིན། གཏུམ་པོ་ཡིན། སྐྱེ་བོ་མང་པོ་ལ་མི་སྡུག་པ་ཡིན། ཡིད་དུ་མི་འོང་བ་ཡིན། ཕྱིས་འགྱོད་པ་ཡིན་ནོ། །བཟོད་པའི་སྐྱེས་བུ་གང་ཟག་ལ་ཡོན་ཏན་རྣམ་པ་ལྔ་སྟེ། དེ་ཡང་དཀར་པོའི་ཕྱོགས་སུ་རྣམ་པ་ལྔར་བཟློག་སྟེ་བརྗོད་པར་བྱའོ། །མི་བཟོད་པ་ལ་ཉེས་པའི་དམིགས་རྣམ་པ་ལྔ་སྟེ། དགྲ་མང་དུ་འགྱུར་བ་དང་། སྡུག་བསྔལ་བ་དང་ཡིད་མི་བདེ་བ་མང་དུ་འགྱུར། འབྱེ་བ་མང་དུ་འགྱུར། འགྱོད་བཞིན་དུ་དུས་བྱེད་པར་འགྱུར། ལུས་དང་བྲལ་ཏེ་ཤི་བའི་འོག་ཏུ་ངན་སོང་གི་རྒྱུད་སེམས་ཅན་དམྱལ་བར་སྐྱེ་བར་འགྱུར་བའོ། །བཟོད་པ་ལ་ཡོན་ཏན་རྣམ་པ་ལྔ་སྟེ། དེ་ལས་དཀར་པོའི་ཕྱོགས་སུ་བཟློག་སྟེ་རྣམ་པ་ལྔར་བརྗོད་དོ། །དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་འཇིག་རྟེན་དུ་དམ་པའི་ཆོས་མ་ཡིན་པ་རྣམ་པ་ལྔ་འབྱུང་བར་འགྱུར་ཏེ། ལྔ་གང་ཞེ་ན། དམ་པའི་ཆོས་འཇིག་པ་ན། འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་དགེ་སློང་མ་དད་པ་དང་། ངོ་ཚ་མེད་པ་དང་། ཁྲེལ་མེད་པ་དང་། ལེ་ལོ་ཅན་དང་། དྲན་པ་ཉམས་པ་དང་། སེམས་རྩེ་གཅིག་ཏུ་མི་བཏུབ་ཅིང་སེམས་འཁྲུགས་པར་འགྱུར་ཏེ། དེ་ལྟར་ན་དམ་

---

^{[མ་དཔེ་གཟིགས་ན་འདིར་གནོན།]}

པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པ་དེ་ནི། འཇིག་རྟེན་དུ་དམ་པའི་ཆོས་མ་ཡིན་པ་འབྱུང་བ་དང་པོ་ཡིན་ནོ། །དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་དགེ་སློང་རྣམས་འཐབ་པ་དང་། མཚང་འདྲུ་བ་དང་། འཁོན་པ་དང་། རྩོད་པར་འགྱུར་ཏེ། དེ་ལྟར་ན་དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པ་འདི་ནི། འཇིག་རྟེན་དུ་དམ་པའི་ཆོས་མ་ཡིན་པ་འབྱུང་བ་གཉིས་པ་ཡིན་ནོ། །དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་དགེ་སློང་ཁ་ཅིག་ཚུལ་འཆོས་ཤིང་སྡིག་པ་ལ་ལྟ་བའི་ཆོས་པས་ཞི་གནས་ཙམ་ལ་རྟེན་ཅིང་བཀའ་ལ་ལུང་སྟོན་ཏེ། དེ་ལྟར་ན་དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པ་འདི་ནི་འཇིག་རྟེན་དུ་དམ་པའི་ཆོས་མ་ཡིན་པ་འབྱུང་བ་གསུམ་པ་ཡིན་ནོ། །དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་དགེ་སློང་རྣམས་ཚུལ་ཁྲིམས་ཉམས་བཞིན་དུ་འཆི་བའི་དུས་བྱེད་པ་དང་། ཚུལ་ཁྲིམས་དང་ལྡན་པ་ལ་སྐུར་པ་འདེབས་པ་སྟེ། དེ་ལྟར་ན་དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པ་འདི་ནི་འཇིག་རྟེན་དུ་དམ་པའི་ཆོས་མ་ཡིན་པ་འབྱུང་བ་བཞི་པ་ཡིན་ནོ། །དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པའི་ཚེ་ཁྱིམ་བདག་གིས་རབ་ཏུ་བྱུང་བ་ལ་བྱ་བ་བྱས་པས་དེ་དག་ནི་ལུས་དང་བྲལ་ཏེ་ཤི་ནས་ཡང་བདེ་འགྲོ་མཐོ་རིས་ཀྱི་ལྷར་སྐྱེའོ། །རབ་ཏུ་བྱུང་བ་ནི་མང་དུ་ངན་སོང་དུ་ལྷུང་སྟེ། དེ་ལྟར་ན་དམ་པའི་ཆོས་འཇིག་པ་ན་འཇིག་རྟེན་དུ་དམ་པའི་ཆོས་དང་མི་མཐུན་པར་གྱུར་པ་འདི་ནི་འཇིག་རྟེན་དུ་དམ་པའི་ཆོས་མ་ཡིན་པ་འབྱུང་བ་ལྔ་པ་ཡིན་ནོ། །ཆོས་རྣམ་པ་ལྔ་དང་ལྡན་པའི་གྲོགས་པོ་དང་མི་འགྲོགས་པར་བྱ། མི་བསྟེན་པར་བྱ་སྟེ། ལས་ལ་ཞུགས་པ་དང་། རྩོད་པ་ལ་ཞུགས་པ་དང་། རྒྱུན་དུ་འགྲོ་བ་ལ་ནན་ཏན་བྱེད་པར་གྱུར་པ་དང་། གཅེས་པ་དང་ལྷན་ཅིག་ཏུ་སྔོ་བར་བྱེད་པ་དང་། རྒྱལ་པོའི་འཁོར་དུ་གནས་

---

^{[མ་དཔེ་གཟིགས་ན་འདིར་གནོན།]}

པའོ། །དཀར་པོའི་ཕྱོགས་སུ་བཟློག་སྟེ་རྣམ་པ་ལྔར་བརྗོད་དེ། ཐ་དད་པ་ལྔ་སྟེ། སྟོན་པ་ཐ་དད་པ་དང་། ཆོས་ཐ་དད་པ་དང་། དགེ་འདུན་ཐ་དད་པ་དང་། ལས་ཐ་དད་པ་དང་། ལམ་ཐ་དད་པའོ། །ལྷུང་བཟེད་འདི་ལྔ་མེད་ན་ཡང་མ་ཚོལ་ཅིག །ཡོད་ན་ཡང་བཅའ་བར་མ་བྱེད་ཅིག །ལྔ་གང་ཞེ་ན། ཤེལ་གྱི་ལྷུང་བཟེད་དང་། རྡོའི་ལྷུང་བཟེད་དང་། ཁར་བའི་ལྷུང་བཟེད་དང་། རིན་པོ་ཆེའི་ལྷུང་བཟེད་དང་། ལྷག་པའི་ལྷུང་བཟེད་དོ། །རྣམ་པ་ལྔར་དགེ་སློང་གིས་ཟན་ཟོས་ན་འདས་པ་དང་བཅས་པར་འགྱུར་ཏེ། འདབ་མའི་སྣོད་དུ་ཟན་ཟ་བ་དང་། སྙིམ་པར་ཟན་ཟ་བ་དང་། ལྕེ་ཕྱུང་ལ་ཟན་ཟ་བ་དང་། མཆུས་ལེན་ཅིང་ཟན་ཟ་བ་དང་། ལག་པས་ཕུགས་སུ་ཕུལ་ཏེ་ཟན་ཟ་བའོ། །བརྟད་པའི་གོས་རྣམ་པ་ལྔ་སྟེ། འགྲོ་བས་ན་སྦྱིན་པ་དང་། འགྲོ་བའི་ཕྱིར་སྦྱིན་པ་དང་། ནད་པས་ན་སྦྱིན་པ་དང་། ནད་པའི་ཕྱིར་སྦྱིན་པ་དང་། བརྟད་པ་བྱུང་ནས་སྦྱིན་པའོ། །རིངས་པའི་ཟན་ལ་ལྔ་སྟེ། འགྲོ་བ་དང་། ན་བ་དང་། ནད་གཡོག་དང་། ལས་བྱེད་པ་དང་། ཁང་སྐྱོང་རྣམས་སོ། །སྟན་རྣམ་པ་ལྔའི་སྟེང་དུ་མི་འདུག་པར་བྱ་སྟེ། དེ་བཞིན་གཤེགས་པའི་དང་། དགེ་འདུན་གྱི་གནས་བརྟན་གྱི་དང་། སློབ་དཔོན་གྱི་དང་། མཁན་པོའི་དང་། ཆོས་འཆད་པའིའོ། །འདུལ་བའི་གཞུང་དམ་པ་ལས་ལྔ་པ་རྫོགས་སྷོ།། །།

འདུལ་བ་ལས་བྱུང་བ་རྣམ་པ་བཅུ་དྲུག་བཤད་པ།

---

^{[མ་དཔེ་གཟིགས་ན་འདིར་གནོན།]}

འདུལ་བ་བཅུ་དྲུག་སྟེ། མདོར་ན། སྨྲ་བར་བྱ་དང་རྒོལ་བ་དང་། །ལན་འདེབས་གཟུ་བོ་འཛིན་གཉིས་དང་། །རྗེས་སུ་རིགས་དང་ཡོན་ཏན་དང་། །གནས་དང་བཤད་པ་དེ་བཞིན་ཏེ། །ལྟུང་བ་གཉིས་དང་ཆད་པའི་ལས། །རྣམ་པར་ཞི་གཉིས་བསོད་ནམས་མང་། །ཐ་མར་བྱས་ནས་སྡེར་བསྡུས་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་རྒོལ་བའི་དགེ་སློང་གིས་དོན་གྱིས་རྒོལ་བར་འཚལ་ན་གནས་དུར་ཤིན་ཏུ་བསམ་པ་བསམས། ཤིན་ཏུ་དཔྱད་པ་དཔྱད། ཤིན་ཏུ་བརྟག་པ་བརྟགས་ནས་དོན་གྱིས་རྒལ་བར་བགྱི། ཨུ་པཱ་ལི་རྒོལ་

---

^{[མ་དཔེ་གཟིགས་ན་འདིར་གནོན།]}

བའི་དགེ་སློང་གིས་དོན་གྱིས་བརྒལ་བར་འདོད་ན་གནས་བཅུ་དྲུག་ཏུ་ཤིན་ཏུ་བསམ་པ་བསམས། ཤིན་ཏུ་དཔྱད་པ་དཔྱད། ཤིན་ཏུ་བརྟག་པ་བརྟགས་ལ་དོན་གྱིས་བརྒལ་བར་བྱའོ། །བཅུ་དྲུག་པོ་གང་ཞེ་ན། བདག་དོན་གང་གིས་བརྒལ་བར་འདོད་པའི་དོན་འདི་ཅི་བདེན་པ་ཡིན་ནམ་འོན་ཏེ་བརྫུན། དོན་གྱིས་བརྒལ་བ་དེའི་དུས་ལ་བབ་བམ་འོན་ཏེ་དུས་ལ་མ་བབ། དོན་འདིས་བརྒལ་བའི་སྐབས་སུ་བབ་བམ་འོན་ཏེ་སྐབས་སུ་མ་བབ། དོན་གྱིས་བརྒལ་བ་འདི་དོན་དང་ལྡན་པ་འམ་འོན་ཏེ་དོན་དང་མི་ལྡན། དེའི་འོག་ཏུ་ཡང་བརྟག་པར་བྱ་སྟེ། དེ་ལ་མཐོང་བ་དང་ཐོས་པ་དང་དོགས་པ་གང་གིས་སྨྲ་བར་བྱ། ལུས་ཀྱིས་འདས་པའམ། ངག་གིས་འདས་པའམ། གྲོང་དུ་བྱས་སམ། དགོན་པར་བྱས་སམ། ནུབ་མོ་བྱས་སམ། ཉིན་པར་བྱས་སམ། ལྷག་མ་དང་བཅས་སམ། ལྷག་མ་མེད་དམ། ཚེ་དང་ལྡན་པ་འདི་དགེ་བའི་གནས་ནས་བསླངས་ནས་དགེ་བའི་གནས་སུ་གཞག་པར་ནུས་སམ། ཨུ་པཱ་ལི་དོན་གྱིས་རྒོལ་བའི་དགེ་སློང་གིས་དོན་གྱིས་རྒོལ་བར་འདོད་པས་གནས་བཅུ་དྲུག་པོ་འདི་ལ་ཤིན་ཏུ་བསམ་པ་བསམས། ཤིན་ཏུ་དཔྱད་པ་དཔྱད། ཤིན་ཏུ་བརྟག་པ་བརྟགས་ལ་དོན་གྱིས་བརྒལ་བར་བྱའོ། །ཆོས་རྣམ་པ་འདི་ལྔ་དང་ལྡན་ན་དོན་གྱིས་རྒོལ་བའི་དགེ་སློང་གི་ཚིག་གཟུང་བར་མི་བྱ་སྟེ། ལྔ་གང་ཞེ་ན། དོན་གྱིས་རྒོལ་བ་དེ་རྣམ་པར་དག་པ་མ་ཡིན་པ་དང་། གཅིག་ནས་གཅིག་ཏུ་ཟེར་བ་ལས་རྒོལ་བ་དང་། ཀུན་དགའི་གནས་བྱུང་བ་དང་། དགེ་ཚུལ་ཕའི་ཚིག་ལས་རྒོལ་བ་དང་། ཇི་ལྟར་ངེས་པར་གསུངས་པའི་མདོ་སྡེའི་ཚིག་མི་ཤེས་པ་དང་། གང་ལ་གནས་ནས་རྣམ་པར་སྦྱང་བ་དེའི་གནས་མི་ཤེས་པ་སྟེ། ཨུ་པཱ་ལི་ཆོས་རྣམ་པ་འདི་ལྔ་དང་ལྡན་ན་དོན་གྱིས་རྒོལ་བའི་དགེ་སློང་གི་ཚིག་གཟུང་བར་མི་བྱའོ། །ཨུ་པཱ་ལི་ཆོས་རྣམ་པ་ལྔ་དང་ལྡན་ན་དོན་གྱིས་རྒོལ་བའི་དགེ་སློང་གི་ཚིག་གཟུང་བར་བྱ་སྟེ། དོན་གྱིས་རྒོལ་བ་དེ་རབ་ཏུ་དག་པ་ཡིན། གཅིག་ནས་གཅིག་ཟེར་བས་མི་རྒོལ་བ་དང་།

---

^{[མ་དཔེ་གཟིགས་ན་འདིར་གནོན།]}

ཀུན་དགའ་ནས་བྱུང་བ་ཡིན་པ་དང་། དགེ་ཚུལ་ཕའི་ཚིག་ལས་རྒོལ་བ་མ་ཡིན་པ་དང་། ཇི་ལྟར་ངེས་པར་གསུངས་པའི་མདོ་སྡེའི་ཚིག་ཤེས་པ་དང་། གང་ལ་གནས་ནས་རྣམ་པར་སྦྱང་བ་དེའི་གནས་ཤེས་པ་དེས་ཨུ་པཱ་ལི་ཆོས་རྣམ་པ་དེ་ལྔ་དང་ལྡན་ན་དོན་གྱིས་་་རྒོལ་བའི་དགེ་སློང་གི་ཚིག་གཟུང་བར་བྱའོ། །ཨུ་པཱ་ལི་ལན་གློན་པའི་དགེ་སློང་གནས་བཅུ་དྲུག་ཏུ་ཤིན་ཏུ་བསམ་པ་བསམས། ཤིན་ཏུ་དཔྱད་པ་དཔྱད། ཤིན་ཏུ་བརྟག་པ་བརྟགས་ནས་བརྒལ་བའི་དགེ་སློང་ལ་སྐབས་དབྱེ་བར་གྱིས་་་ཤིག །བཅུ་དྲུག་པོ་གང་ཞེ་ན། ཅི་ཚེ་དང་ལྡན་པ་འདི་ཚུལ་ཁྲིམས་དང་ལྡན་པ་ཡིན་ནམ། ཐོག་མ་ནས་བསྙེན་པར་རྫོགས་པ་ཡིན་ནམ། ངོ་ཚ་ཅན་ནམ། འགྱོད་པ་ཅན་ནམ། སྡོམ་པ་ཅན་ནམ། སློབ་པར་འདོད་པའམ། མང་དུ་ཐོས་པའམ། ཐོས་པ་འཛིན་པའམ། ཐོས་པ་བསགས་པའམ། འདུལ་བའམ། ལྷག་པའི་འདུལ་བ་ལས་ངེས་པར་ཤེས་པའམ། ལུང་ཁ་ཏོན་དུ་ལོབས་པའམ། དེའི་འོག་ཏུ་ཡང་བརྟག་པར་བྱ་སྟེ། བདག་ལ་མཐོང་བས་སམ། ཐོས་པས་སམ། དོགས་པས་སམ། ལུས་ཀྱིས་འདས་པས་སམ། ཚིག་གིས་འདས་པས་སམ། གྲོང་དུ་བྱས་སམ། དགོན་པར་བྱས་སམ། ནུབ་མོ་བྱས་པའམ། ཉིན་པར་བྱས་པའམ། ལྷག་མར་བཅས་པའམ། ལྷག་མ་མེད་པ་གང་གིས་སྨྲ་བར་བྱེད། ཚེ་དང་ལྡན་པ་དེས་བདག་མི་དགེ་བའི་གནས་ནས་་བསླངས་ཏེ། དགེ་བའི་གནས་སུ་འཇོག་པར་ནུས་སམ། ཨུ་པཱ་ལི་ལན་གློན་པའི་དགེ་སློང་གིས་གནས་བཅུ་དྲུག་པོ་འདི་ལ་ཤིན་ཏུ་བསམ་པ་བསམས། ཤིན་ཏུ་དཔྱད་པ་དཔྱད། ཤིན་ཏུ་བརྟག་པ་བརྟགས་ནས་རྒོལ་བའི་དགེ་སློང་ལ་སྐབས་དབྱེ་བར་གྱིས་ཤིག །ཨུ་པཱ་ལི་ཆོས་རྣམ་པ་འདི་ལྔ་དང་ལྡན་ན་ལན་གློན་པའི་དགེ་སློང་གི་ཚིག་གཟུང་བར་མི་བྱ་སྟེ། ལྔ་གང་ཞེ་ན། རྒོལ་བའི་དགེ་སློང་གིས་དྲིས་པ་བཞིན་དུ་ལན་མི་འདེབས་པ་དང་། དྲིས་ནས་བསམ་པ་མ་ཡིན་པ་སྟོན་པ་དང་། གཞན་གྱིས་གཞན་ལ་སྨྲ་བ་དང་། ཕྱི་རོལ་གྱི་གཏམ་སྡུད་པ་དང་། བྱང་བའི་

---

^{[མ་དཔེ་གཟིགས་ན་འདིར་གནོན།]}

དགེ་སློང་མ་རུང་བར་བྱེད་པ་དང་། ཕྱོགས་འཛིན་པ་ལ་བརྟེན་པ་དང་། ཉེས་པ་མི་ཤེས་ཉེས་པ་མེད་པ་མི་ཤེས་པ་སྟེ། ཨུ་པཱ་ལི་ཆོས་རྣམ་པ་འདི་ལྔ་དང་ལྡན་ན་ལན་གློན་པའི་དགེ་སློང་གི་ཚིག་གཟུང་བར་མི་བྱའོ། །ཨུ་པཱ་ལི་ཆོས་རྣམ་པ་འདི་ལྔ་དང་ལྡན་ན་ལན་གློན་པའི་དགེ་སློང་གི་ཚིག་གཟུང་བར་བྱ་སྟེ། ལྔ་གང་ཞེ་ན། རྒོལ་བའི་དགེ་སློང་གིས་དྲིས་པ་བཞིན་དུ་ལན་འདེབས་པ་དང་། དྲིས་པའི་དོན་གཞན་དང་གཞན་དུ་མི་སྨྲ་བ་དང་ཕྱི་རོལ་གྱི་གཏམ་གཞན་མི་སྨྲ་བ་དང་། བྱང་བའི་དགེ་སློང་ལ་མ་རུང་བར་མི་བྱེད་པ་དང་། ཕྱོགས་འཛིན་པ་ལ་མི་བརྟེན་པ་དང་། ཉེས་པ་ཤེས་ཉེས་པ་མེད་པ་ཤེས་པ་སྟེ། ཨུ་པཱ་ལི་ཆོས་རྣམ་པ་འདི་ལྔ་དང་ལྡན་ན་དགེ་སློང་ལན་གློན་པའི་ཚིག་གཟུང་བར་བྱའོ། །ཨུ་པཱ་ལི་དེ་ལ་རྒོལ་བ་དང་ལན་གློན་པའི་དགེ་སློང་དག་རྩོད་པ་ཞི་བར་འདོད་པས་ཆོས་བཅུ་དྲུག་དང་ལྡན་པའི་གཟུ་བོ་འདུལ་བ་འཛིན་པ་ཚོལ་ཅིག །བཅུ་དྲུག་གང་ཞེ་ན། ཚུལ་ཁྲིམས་དང་ལྡན་པ་དང་། ཐོག་མར་བསྙེན་པར་རྫོགས་པ་དང་། ངོ་ཚ་ཅན་དང་། འགྱོད་པ་ཅན་དང་། སྡོམ་པ་ཅན་དང་། སློབ་པ་འདོད་པ་དང་། མང་དུ་ཐོས་པ་དང་། ཐོས་པ་འཛིན་པ་དང་། ཐོས་པ་བསགས་པ་དང་། འདུལ་བ་དང་། ལྷག་པའི་འདུལ་བ་ངེས་པར་ཤེས་པ་དང་། མདོ་སྡེ་དང་། ལུང་ཁ་ཏོན་དུ་ལོབས་པ་དང་། དེ་ལས་ཡང་དེའི་འོག་ཏུ་ཡང་བརྟག་པར་བྱ་སྟེ། ཅི་ཚེ་དང་ལྡན་པ་འདི་ལ་གཟུ་བོའི་དངོས་པོ་ཡོད་དམ། ཅི་ཚེ་དང་ལྡན་པ་འདིས་སྔ་ནས་མ་འདྲེས་པའམ། ཅི་ཚེ་དང་ལྡན་པ་འདི་རྩོད་པ་སྔར་བྱུང་བ་ལ་མཁས་པའམ། ཅི་ཚེ་དང་ལྡན་པ་འདི་ལྷུང་བཟེད་ཀྱི་ཕྱིར་མ་ཡིན་ནམ། ཆོས་གོས་ཀྱི་ཕྱིར་མ་ཡིན་ནམ། ཟང་ཟིང་ཅུང་ཟད་ཙམ་གྱི་ཕྱིར་མ་ཡིན་ནམ། འདོད་པའི་ཕྱིར་འགྲོ་བ་མ་ཡིན་ནམ། ཞེ་སྡང་དང་། གཏི་མུག་དང་། འཇིགས་པས་འགྲོ་བ་མ་ཡིན་ནམ། ཅི་ཚེ་དང་ལྡན་པ་འདི་འདོད་ཆགས་ཀྱིས་གཟིར་བ་མ་ཡིན་ནམ། ཞེ་སྡང་གིས་གཟིར་བ་མ་ཡིན་ནམ། གཏི་མུག་གིས་གཟིར་བ་མ་ཡིན་ནམ། རྒྱལ་བའི་གསུང་

---

^{[མ་དཔེ་གཟིགས་ན་འདིར་གནོན།]}

ལས་འདའ་བར་བྱེད་པ་མ་ཡིན་ནམ། ཅི་ཚེ་དང་ལྡན་པ་འདིས་རིགས་པ་མི་རིགས་པར་མི་བྱེད་དམ། རིགས་པ་གཅོད་པར་མི་བྱེད་དམ། ཅི་ཚེ་དང་ལྡན་པ་འདི་སྟོན་པས་བསྟན་པ་ཆོས་དང་འདུལ་བས་རབ་ཏུ་ཞི་བར་བྱེད་དམ། ཅི་ཚེ་དང་ལྡན་པ་འདིས་ཚེ་དང་ལྡན་པ་འདི་མི་དགེ་བའི་གནས་ནས་བསླངས་ཏེ། དགེ་བའི་གནས་སུ་འཇོག་པར་བྱེད་དམ། ཨུ་པཱ་ལི་རྒོལ་བ་དང་ལན་གློན་པའི་དགེ་སློང་དག་རྩོད་པ་ཞི་བར་འདོད་པས་ཆོས་བཅུ་དྲུག་པོ་དེ་དག་དང་ལྡན་པའི་གཟུ་བོ་འདུལ་བ་འཛིན་པ་བཙལ་བར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་རྩོད་པ་ཞི་བར་བྱེད་མི་ནུས་ཏེ། ལྔ་གང་ཞེ་ན། རྒོལ་བ་དང་ལན་གློན་པའི་དགེ་སློང་ལ་ཆོས་མ་ཡིན་པའི་ཕྱོགས་སུ་འཇུག་པ་དང་། རྒོལ་བ་དང་ལན་གློན་པའི་དགེ་སློང་ལ་འཐབ་པ་དང་། མཚང་འདྲུ་བ་དང་། འཁོན་པ་དང་། རྩོད་པར་སྐུལ་བ་དང་། གཟུ་བོའི་དགེ་སློང་རྣམས་ཀྱི་མདོ་སྡེའི་ཚིག་མི་བརྩན་པར་བྱེད་པ་དང་། དགེ་སློང་གཅེས་པ་རྣམས་ལ་ཕྱས་འདོགས་པ་དང་། རྩོད་པའི་ཐོག་མ་དང་། བར་མ་དང་། ཐ་མ་ལ་མི་མཁས་པར་གྱུར་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བར་བྱེད་ནུས་པར་འགྱུར་རོ། །ལྔ་གང་ཞེ་ན། རྒོལ་བ་དང་ལན་གློན་པའི་དགེ་སློང་ལ་ཆོས་ཀྱི་ཕྱོགས་སུ་འཇུག་པ་དང་། རྒོལ་བ་དང་ལན་གློན་པའི་དགེ་སློང་འཐབ་པ་དང་། མཚང་འདྲུ་བ་དང་། འཁོན་པ་དང་། རྩོད་པར་མི་སྐུལ་བ་དང་། གཟུ་བོའི་དགེ་སློང་རྣམས་ཀྱི་མདོ་སྡེའི་གཞུང་བརྩན་པར་བྱེད་པ་དང་། དགེ་སློང་གཅེས་པ་ལ་ཕྱས་མི་འདོགས་པ་དང་། རྩོད་པའི་ཐོག་མ་དང་བར་མ་དང་ཐ་མ་ལ་མཁས་པར་གྱུར་པའོ། །ཨུ་པཱ་ལི་དེ་ལ་གཟུ་བོ་འདུལ་བ་འཛིན་པ་དེས་རྩོད་པ་རབ་ཏུ་གཟུང་བར་འདོད་ན་གནས་བཅུ་དྲུག་ཏུ་བདག་དང་གཞན་ལ་ཤིན་ཏུ་བརྟགས་ལ་གདོད་རྩོད་པ་གཟུང་བར་བྱ་སྟེ། རྣམ་པ་བརྒྱད་ཀྱིས་ནི་བདག་ཉིད་ཤིན་ཏུ་བརྟག་པར་བྱ། རྣམ་པ་བརྒྱད་ཀྱིས་

---

^{[མ་དཔེ་གཟིགས་ན་འདིར་གནོན།]}

ནི་གཞན་ཤིན་ཏུ་བརྟག་པར་བྱའོ། །བདག་ཉིད་བརྟག་པ་བརྒྱད་གང་ཞེ་ན། ཅི་བདག་རྩོད་པའི་ཐོག་མ་དང་བར་མ་དང་ཐ་མ་ལ་མཁས་པ་ཡིན་ནམ། ཅི་བདག་རྩོད་པ་དེ་ལ་ཐོག་མ་ནས་མ་འདྲེས་སམ། རྒོལ་བ་དང་ལན་གློན་པའི་དགེ་སློང་གི་བདག་གིས་ཚིག་འཛིན་ཏམ། རྒོལ་བ་དང་ལན་གློན་པའི་དགེ་སློང་གི་བདག་གིས་ཚིག་ཉན་ཏམ་རྒོལ་བ་དང་ལན་གློན་པའི་དགེ་སློང་དག་གི་ཉེས་པ་བདག་གིས་རྣམ་པར་སྦྱང་ནུས་སམ། སོ་སོའི་ཕྱོགས་ལ་བདག་གིས་ཆོས་བཞིན་བསྒོ་བར་ནུས་སམ། བདག་གིས་རྩོད་པ་འདི་ལྟར་འདུལ་བ་དང་ཇི་ལྟར་སྟོན་པས་བསྟན་པ་དེ་ལྟར་རྣམ་པར་ཞི་བར་ནུས་སམ། རྒོལ་བ་དང་ལན་གློན་པའི་དགེ་སློང་དག་བདག་གིས་མི་དགེ་བའི་གནས་ནས་བསླངས་ཏེ། དགེ་བའི་གནས་སུ་འཇོག་ནུས་སམ་སྙམ་པ་སྟེ། རྣམ་པ་བརྒྱད་ཀྱིས་བདག་ཉིད་ཤིན་ཏུ་བརྟག་པར་བྱའོ། །གཞན་ལ་བརྟག་པ་རྣམ་པ་བརྒྱད་གང་ཞེ་ན། དགེ་འདུན་དེ་དག་གི་ནང་ན་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་ལྟ་བུ་འཛིན་པའི་དགེ་སློང་ལ་ཇི་ལྟར་བདག་གིས་རྒྱལ་བའི་གསུང་རབ་སྨྲས་པ་ལ་འཛིན་པར་འགྱུར་བ་ཡོད་དམ། དེའི་ཚེ་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་ལྟ་བུ་འཛིན་པའི་དགེ་སློང་གང་གིས་རྩོད་པ་འདི་ཇི་ལྟར་ཆོས་བཞིན་ཇི་ལྟར་འདུལ་བ་བཞིན། ཇི་ལྟར་སྟོན་པས་བསྟན་པ་དེ་ལྟ་བུར་ཞི་བར་བྱ་སྙམ་དུ་སེམས་པ་ཡོད་དམ། དགེ་འདུན་དེ་དག་ལས་དགེ་སློང་གནས་བརྟན་དང་བར་མ་དང་གསར་བུ་དག་གིས། །སོ་སོའི་ཕྱོགས་ཀྱི་དགེ་སློང་དེ་དག་ལ་ཇི་ལྟར་ཆོས་བཞིན་དུ་སླར་བཟློག་པར་བྱའོ་སྙམ་དུ་སེམས་པ་ཡོད་དམ། ཅི་རྩོད་པ་འདི་རྒྱལ་པོའི་ཕོ་བྲང་དུ་འགྱེད་པར་འགྱུར་རམ། རིགས་པའི་རིགས་ལ་འགྱེད་པར་མི་འགྱུར་རམ། ཅི་ཚེ་དང་ལྡན་པ་དེ་དག་རྩོད་པ་ཞི་བར་བྱ་བ་འདི་ལས་ཕྱི་རོལ་ཏུ་མི་ཚོལ་ལམ། ཅི་ཚེ་དང་ལྡན་པ་དེ་དག་དགེ་འདུན་འདི་ཉིད་དུ་རྩོད་པ་ཞི་བར་བྱ་བ་ཚོལ་ལམ་སྙམ་པ་སྟེ། རྣམ་པ་འདི་བརྒྱད་ནི་གཞན་བརྟག་པར་བྱ་སྟེ། ཨུ་པཱ་ལི་དེ་ལྟ་བུར་རྣམ་པ་བཅུ་དྲུག་གིས་བདག་དང་གཞན་བརྟགས་ནས་རྩོད་པ་རབ་ཏུ་གཟུང་བར་བྱའོ། །ཨུ་པཱ་ལི་གཟུ་བོ་འདུལ་བ་

---

^{[མ་དཔེ་གཟིགས་ན་འདིར་གནོན།]}

འཛིན་པ་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བར་བྱེད་མི་ནུས་པར་འགྱུར་རོ། །ལྔ་གང་ཞེ་ན། རྩོད་པ་མི་ཤེས་པ་དང་། རྩོད་པ་འབྱུང་བ་མི་ཤེས་པ་དང་། རྩོད་པ་ཡང་དག་པར་གཟུང་བ་མི་ཤེས་པ་དང་། རྩོད་པ་ཞི་བར་བྱེད་མི་ཤེས་པ་དང་། རྩོད་པ་ཞི་ནས་ཕྱིས་མི་འབྱུང་བར་བྱེད་མི་ཤེས་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་རྩོད་པ་ཞི་བར་བྱེད་མི་ནུས་པ་ཡིན་ནོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བར་བྱེད་ནུས་པ་ཡིན་ནོ། །ལྔ་གང་ཞེ་ན། རྩོད་པ་ཤེས་པ་དང་། རྩོད་པ་བྱུང་བ་ཤེས་པ་དང་། རྩོད་པ་ཡང་དག་པར་གཟུང་བར་ཤེས་པ་དང་། རྩོད་པ་ཞི་བར་བྱ་བ་ཤེས་པ་དང་། རྩོད་པ་ཞི་བར་གྱུར་ནས་ཕྱིས་རྩོད་པ་མི་འབྱུང་བར་བྱེད་ཤེས་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་རྩོད་པ་ཞི་བར་བྱེད་ནུས་པ་ཡིན་ནོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་རྩོད་པ་རབ་ཏུ་བཟུང་ལ་གནས་བཅུ་དྲུག་གིས་རྒོལ་བ་དང་ལན་གློན་པའི་དགེ་སློང་བརྟག་པར་བྱ་སྟེ། རྣམ་པ་བརྒྱད་ཀྱིས་ལན་གློན་པའི་དགེ་སློང་བརྟག་པར་བྱའོ། །རྣམ་པ་བརྒྱད་པོ་གང་གིས་རྒོལ་བའི་དགེ་སློང་བརྟག་པར་བྱ་ཞེ་ན། སྤྱོད་པ་དང་། སྤྱོད་ཡུལ་དང་། མཛའ་བ་དང་། གྲོགས་བྱེད་པ་དང་། ལུས་ཀྱི་ལས་དང་། ངག་གི་ལས་དང་། འཚོ་བ་དང་། མང་དུ་ཐོས་པ་རྣམས་སོ། །དེ་སྟེ་ཨུ་པཱ་ལི་གཟུ་བོ་འདུལ་བ་འཛིན་པའང་འདི་སྙམ་དུ་གྱུར་ཏེ། ཚེ་དང་ལྡན་པ་འདི་ནི་སྡིག་པ་ཅན་ཏེ་སྡིག་པར་སྤྱོད་པ། མཛའ་བ་སྡིག་པ་ཅན། གྲོགས་པོ་སྡིག་པ་ཅན། ལུས་ཀྱི་ལས་སྡིག་པ་ཅན། ངག་གི་ལས་སྡིག་པ་ཅན། འཚོ་བ་སྡིག་པ་ཅན། ཐོས་པ་སྡིག་པ་ཅན་ཏེ། ཚེ་དང་ལྡན་པ་འདིས་ནི་དག་པའི་དགེ་སློང་ལ་མ་རུང་བར་བྱེད་ནུས། དགེ་འདུན་ལ་ཡང་དེ་ལྟ་བུར་རྩོད་པ་འབྱིན་པར་ནུས་ཏེ། དེ་སྐད་དུ་མ་སྨྲ་ཤིག་ཅེས་བསྒོ་ཤིག །དེ་སྟེ་ཨུ་པཱ་ལི་གཟུ་བོ་འདུལ་བ་འཛིན་པས་འདི་སྙམ་དུ་གྱུར་ཏེ། ཚེ་དང་ལྡན་པ་འདི་ནི་དགེ་བ་ཅན་ཏེ།

---

^{[མ་དཔེ་གཟིགས་ན་འདིར་གནོན།]}

སྤྱོད་པ་དགེ། སྤྱོད་ཡུལ་དགེ། མཛའ་བོ་དགེ། གྲོགས་པོ་དགེ། ལུས་ཀྱི་ལས་དགེ། ངག་གི་ལས་དགེ། འཚོ་བ་དགེ། ཐོས་པ་དགེ་བ་ཅན་ཏེ། ཚེ་དང་ལྡན་པ་འདིས་ནི་དག་པའི་དགེ་སློང་ལ་མ་རུང་བར་བྱེད་མི་ནུས་ཏེ། དགེ་འདུན་གྱི་ནང་དུ་ཡང་རྣམ་པ་དེ་ལྟ་བུར་མི་འབྱིན་ཏོ་སྙམ་ནས་དེ་ལྟ་བུ་ལ་ནི་སྨྲོས་ཤིག་ཅེས་བསྒོའོ། །ཨུ་པཱ་ལི་རྣམ་པ་བརྒྱད་པོ་དེ་ལྟ་བུས་རྒོལ་བའི་དགེ་སློང་ལ་བརྟག་པར་བྱའོ། །ལན་གློན་པའི་དགེ་སློང་ལ་རྣམ་པ་འདི་བརྒྱད་ཀྱིས་བརྟག་པར་བྱ་སྟེ། སྤྱོད་པ་དང་། སྤྱོད་ཡུལ་དང་། མཛའ་བ་དང་། གྲོགས་པོ་དང་། ལུས་ཀྱི་ལས་དང་། ངག་གི་ལས་དང་། འཚོ་བ་དང་། མང་དུ་ཐོས་པའོ། །དེ་སྟེ་ཨུ་པཱ་ལི་གཟུ་བོ་འདུལ་བ་འཛིན་པས་འདི་སྙམ་དུ་གྱུར་ཏེ། ཚེ་དང་ལྡན་པ་འདི་ནི་སྡིག་པ་ཅན་ཏེ། སྤྱོད་པ་སྡིག་པ་ཅན། སྤྱོད་ཡུལ་སྡིག་པ་ཅན། མཛའ་བོ་སྡིག་པ་ཅན། གྲོགས་པོ་སྡིག་པ་ཅན། ལུས་ཀྱི་ལས་སྡིག་པ་ཅན། ངག་གི་ལས་སྡིག་པ་ཅན། འཚོ་བ་སྡིག་པ་ཅན། ཐོས་པ་སྡིག་པ་ཅན་ཏེ། ཚེ་དང་ལྡན་པ་འདིས་ནི་རྣམ་པ་འདི་ལྟ་བུའི་གནས་སུ་འཇུག་པར་ནུས་སོ་སྙམ་ནས་དེ་ན་རྒོལ་བའི་དགེ་སློང་ལ་ཚིག་འཇམ་པོར་སྨྲོས་ལ་ལན་གློན་པའི་དགེ་སློང་ལ་ཚིག་འདི་སྐད་དུ་སྨྲོས་ཤིག །ཚེ་དང་ལྡན་པ་ཁྱོད་དེའི་ཚེ་ན་ལུས་ཀྱི་འདུས་བྱས་ཇི་ལྟ་བུར་གྱུར། ངག་གི་འདུས་བྱས་ཇི་ལྟ་བུར་གྱུར། ཡིད་ཀྱི་འདུས་བྱས་ཇི་ལྟ་བུར་གྱུར་ཅེས་ཇི་ལྟ་བུར་ཁས་ལེན་པ་དེ་ལྟ་བུར་བྱེད་དུ་ཆུག་ཅིག །ཨུ་པཱ་ལི་དེ་སྟེ་གཟུ་བོ་འདུལ་བ་འཛིན་པས་འདི་སྙམ་དུ་གྱུར་ཏེ། ཚེ་དང་ལྡན་པ་འདི་ནི་དགེ་བ་ཅན་ཏེ། སྤྱོད་པ་དགེ། སྤྱོད་ཡུལ་དགེ། མཛའ་བོ་དགེ། གྲོགས་པོ་དགེ། ལུས་ཀྱི་ལས་དགེ། ངག་གི་ལས་དགེ། འཚོ་བ་དགེ། ཐོས་པ་དགེ་སྟེ། ཚེ་དང་ལྡན་པ་འདི་ནི་གནས་དེ་ལྟ་བུ་ལ་འཇུག་པར་མི་བྱེད་དོ་སྙམ་ན། ལན་གློན་པའི་དགེ་སློང་ལ་ཚིག་འཇམ་པོར་སྨྲོས་ཏེ། རྒོལ་བའི་དགེ་སློང་ལ་ཆོས་ཉིད་ཀྱིས་ཤེས་པར་བྱོས་ཤིག །རྣམ་པ་འདི་བརྒྱད་ཀྱིས་ནི་གཞན་ལ་བརྟག་པར་བྱོས་ཤིག །

---

^{[མ་དཔེ་གཟིགས་ན་འདིར་གནོན།]}

ཨུ་པཱ་ལི་གཟུ་བོ་འདུལ་བ་འཛིན་པ་ཆོས་་རྣམ་པ་ལྔ་དང་ལྡན་ན་རྩོད་པ་ཞི་བར་བྱེད་མི་ནུས་པ་ཡིན་ནོ། །ལྔ་གང་ཞེ་ན། འཁྲུལ་པ་འཛིན་པ། གསང་བའི་ཚིག་འཛིན་པ། ཚིག་མང་པོ་འཛིན་པ། མ་ངེས་པར་འཛིན་པ། ཇི་ཙམ་ལན་གསུམ་གྱི་བར་དུ་དམ་འཆར་མི་འཇུག་པ་ཡིན་ཏེ། གཟུ་བོ་འདུལ་བ་འཛིན་པ་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བར་བྱེད་མི་ནུས་པར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བར་བྱེད་ནུས་པར་འགྱུར་རོ། །ལྔ་གང་ཞེ་ན། འཁྲུལ་པ་མི་འཛིན་པ། གསང་བའི་ཚིག་མི་འཛིན་པ། ཚིག་མང་པོ་མི་འཛིན་པ། མ་ངེས་པར་མི་འཛིན་པ། ལན་གསུམ་གྱི་བར་དུ་དམ་འཆར་འཇུག་པ་ཡིན་ཏེ། ཨུ་པཱ་ལི་གཟུ་བོ་འདུལ་བ་འཛིན་པ་རྣམ་པ་དེ་ལྔ་དང་ལྡན་ན་རྩོད་པ་ཞི་བར་བྱེད་ནུས་པར་འགྱུར་རོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་གིས་རྒོལ་བ་དང་ལན་གློན་པའི་དགེ་སློང་དག་བརྟགས་ལ་་གནས་བཅུ་དྲུག་ཏུ་རིགས་པས་གཞག་པར་བྱ་སྟེ། བཅུ་དྲུག་པོ་གང་ཞེ་ན། རྒོལ་བའི་དགེ་སློང་དེ་རིགས་པར་བྱ། རྒོལ་བའི་དགེ་སློང་དེ་བརྟག་པར་བྱ། ལན་གློན་པའི་དགེ་སློང་དེ་རིགས་པར་བྱ། ལན་གློན་པའི་དགེ་སློང་དེ་བརྟག་་པར་བྱ། རྒོལ་བའི་དགེ་སློང་ལ་བཟོད་པ་གསོལ་བར་བྱ། ལན་གློན་པའི་དགེ་སློང་ལ་བཟོད་པ་གསོལ་བར་བྱ། རྒོལ་བའི་དགེ་སློང་དེ་གཏོང་དུ་གཞུག །ལན་གློན་པའི་དགེ་སློང་དེ་གཏོང་དུ་གཞུག །རྒོལ་བའི་དགེ་སློང་དེ་དྲི་བར་བྱ། ལན་གློན་པའི་དགེ་སློང་དེ་དྲི་བར་བྱ། རྒོལ་བའི་དགེ་སློང་དེ་བྱེད་དུ་གཞུག །ལན་གློན་པའི་དགེ་སློང་དེ་བྱེད་དུ་གཞུག །རྒོལ་བའི་དགེ་སློང་ཚུགས་པར་བྱེད་དུ་གཞུག །ལན་གློན་པའི་དགེ་སློང་ཚུགས་པར་བྱེད་དུ་གཞུག །རྒོལ་བའི་དགེ་སློང་ཡི་དམ་འཆར་གཞུག །ལན་འདེབས་པའི་དགེ་སློང་ཡི་དམ་འཆར་གཞུག །མདོ་སྡེ་བརྗོད་པར་བྱ། མདོ་སྡེ་བརྗོད་ནས་ཇི་ལྟར་ཆོས་བཞིན་ཇི་ལྟར་འདུལ་བ་བཞིན། ཇི་ལྟར་སྟོན་པས་

---

^{[མ་དཔེ་གཟིགས་ན་འདིར་གནོན།]}

བསྟན་པ་དེ་ལྟར་རྩོད་པ་དེ་ཞི་བར་བྱ་སྟེ། ཨུ་པཱ་ལི་དེ་ལྟར་ན་གཟུ་བོའི་དགེ་སློང་གིས་གནས་བཅུ་དྲུག་ཏུ་རིགས་པས་གཞག་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་རིགས་པའི་གནས་སུ་འཇོག་ནུས་པར་མི་འགྱུར་རོ། །ལྔ་གང་ཞེ་ན། རྗེས་སུ་འབྲང་བའི་ཆོས་ལྔ་མི་ཤེས་པ་སྟེ། ལྔ་གང་ཞེ་ན། རྒོལ་བ་མི་ཤེས་པ། ལན་གློན་མི་ཤེས་པ། ཆོས་བཞིན་མི་ཤེས་པ། ཆོས་བཞིན་མ་ཡིན་པ་མི་ཤེས་པ། ཡི་དམ་མ་བླངས་པར་གྱུར་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་རིགས་པའི་གནས་སུ་འཇོག་མི་ནུས་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་རིགས་པའི་གནས་སུ་་་འཇོག་ནུས་པར་འགྱུར་རོ། །རྗེས་སུ་འབྲང་བའི་ཆོས་ལྔ་ཤེས་པར་འགྱུར་རོ། །ལྔ་གང་ཞེ་ན། རྒོལ་བ་ཤེས་པ། ལན་གློན་ཤེས་པ། ཆོས་བཞིན་ཤེས་པ། ཆོས་བཞིན་མ་ཡིན་པ་ཤེས་པ། ཡི་དམ་བླངས་པར་གྱུར་པའོ། །གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་རིགས་པའི་གནས་སུ་འཇོག་ནུས་་་པར་འགྱུར་རོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པ་རིགས་པའི་གནས་བཅུ་དྲུག་ཏུ་གཞག་ལ་ཡོན་ཏན་བཅུ་དྲུག་མཐོང་ནས་མདོ་སྡེ་བསྒྲག་པར་བྱ་སྟེ། བཅུ་དྲུག་གང་ཞེ་ན། བདག་གིས་མདོ་སྡེ་བསྟན་ཏོ་སྙམ་ནས་མདོ་སྡེ་བསྒྲག་པར་བྱ། བདག་གིས་མདོ་སྡེ་དཔྱད་པར་བྱའོ་སྙམ་ནས། མདོ་སྡེ་བསྒྲག་པར་བྱ། བདག་གིས་འདུལ་བ་རྗེས་སུ་འབྲང་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གི་ཚིག་བརྩན་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གིས་ངོ་ཚ་བ་མེད་པའི་ཕྱོགས་ལ་ཆད་པས་གཅད་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གིས་ཐམས་ཅད་མཁྱེན་པའི་གསུང་ལ་བསྒོ་ནུས་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། དགེ་འདུན་མཐུན་པར་བསྟན་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གིས་གཞན་ལ་བསྒོ་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གི་

---

^{[མ་དཔེ་གཟིགས་ན་འདིར་གནོན།]}

ཚིག་གཞན་གྱིས་གཟུང་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གིས་དགེ་སློང་དག་གདོན་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་གིས་མ་དད་པ་དག་དད་པ་ལ་ཞུགས་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། དད་པ་ལ་སླར་འཕེལ་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། ངོ་ཚ་མེད་པའི་ཕྱོགས་ལ་བདག་གིས་ཆད་པས་གཅད་པར་འགྱུར་རོ་སྙམ་ནས་་་མདོ་སྡེ་བསྒྲག་པར་བྱ། ངོ་ཚ་ཤེས་པའི་ཕྱོགས་ལ་བདག་གིས་གཟུང་བར་་འགྱུར་རོ་སྙམ་ནས་མདོ་སྡེ་བསྒྲག་པར་བྱ། རྩོད་པ་འབྱུང་བ་མི་འབྱུང་བར་་་འགྱུར་རོ་སྙམ་ནས་མདོ་སྡེ་བསྒྲག་པར་བྱ། རྩོད་པ་ཞི་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། རྩོད་པ་ཞི་ནས་ཕྱིས་མི་སྐྱེ་བར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། བདག་ཡུན་རིང་དུ་ཚངས་པར་སྤྱོད་པར་འགྱུར་རོ་སྙམ་ནས་མདོ་སྡེ་བསྒྲག་པར་བྱ། ཨུ་པཱ་ལི་གཟུ་བོ་འདུལ་བ་འཛིན་པས་བདག་གི་ཡོན་ཏན་བཅུ་དྲུག་པོ་འདི་མཐོང་ན་མདོ་སྡེ་བསྒྲག་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་འདི་ལྔ་དང་ལྡན་ན་མདོ་སྡེའི་ཡོན་ཏན་མི་ཤེས་་་པར་འགྱུར་རོ། །ལྔ་གང་ཞེ་ན། མདོ་སྡེ་ལ་མི་མཁས་པ་དང་། འདུལ་བ་ལ་མི་མཁས་པ་དང་། མ་ལྟ་བུ་ལ་མི་མཁས་པ་དང་། རྣམ་པར་འབྱེད་པ་ལ་མི་མཁས་པ་དང་། ལུང་ཁ་ཏོན་དུ་མ་བྱས་པར་གྱུར་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་མདོ་སྡེའི་ཡོན་ཏན་ཤེས་པར་འགྱུར་རོ། །ལྔ་གང་ཞེ་ན། མདོ་སྡེ་ལ་མཁས་པ་དང་། འདུལ་བ་ལ་མཁས་པ་དང་། མ་ལྟ་བུ་ལ་མཁས་པ་དང་། རྣམ་པར་འབྱེད་པ་ལ་མཁས་པ་དང་། ལུང་ཁ་ཏོན་དུ་ལོབས་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་མདོ་སྡེའི་ཡོན་ཏན་ཤེས་པར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པ་གང་གིས་མདོ་སྡེ་ཤེས་པར་ནུས་པ་དེས་ནི་མདོ་སྡེ་འདི་ལས་ཡོན་ཏན་བཅུ་དྲུག་མཐོང་བས་ན་མདོ་སྡེ་བརྗོད་པར་བྱའོ། །གཞན་

---

^{[མ་དཔེ་གཟིགས་ན་འདིར་གནོན།]}

ཡང་གནས་བཅུ་དྲུག་ཏུ་མདོ་སྡེ་བརྗོད་པར་བྱ་སྟེ། བཅུ་དྲུག་པོ་དེ་གང་ཞེ་ན། སངས་རྒྱས་ཀྱིས་གསུངས་པའི་མདོ་སྡེ་བརྗོད་པར་བྱ། ཉན་ཐོས་ཀྱིས་བཤད་པའི་མདོ་སྡེ་བརྗོད་པར་བྱ། སངས་རྒྱས་བྱུང་བའི་དུས་ཀྱི་མདོ་སྡེ་བརྗོད་པར་བྱ། ཕྱོགས་གཅིག་པའི་མདོ་སྡེ་བརྗོད་པར་བྱ། ཐམས་ཅད་དུ་ཡོད་པའི་མདོ་སྡེ་བརྗོད་པར་བྱ། དེ་ཉིད་དང་འདྲ་བའི་མདོ་སྡེ་བརྗོད་པར་བྱ། འདུལ་བ་དང་ལྡན་པའི་མདོ་སྡེ་བརྗོད་པར་བྱ། འདུལ་བ་ལས་ལྷག་པའི་མདོ་སྡེ་བརྗོད་པར་བྱ། མདོ་སྡེའི་ཡོན་ཏན་བཙལ་ལ་མདོ་སྡེ་བརྗོད་པར་བྱ། མདོ་སྡེའི་རྒྱན་བཙལ་ལ་མདོ་སྡེ་བརྗོད་པར་བྱ། མདོ་སྡེའི་གླེང་གཞི་བཙལ་ལ་མདོ་སྡེ་བརྗོད་པར་བྱ། མདོ་སྡེའི་ཆ་ཙམ་བཙལ་ལ་མདོ་སྡེ་བརྗོད་པར་བྱ། མདོ་སྡེའི་སྒྲ་བཙལ་ལ་མདོ་སྡེ་བརྗོད་པར་བྱ། ཨུ་པཱ་ལི་གཟུ་བོ་འདུལ་བ་འཛིན་པས་ཡོན་ཏན་བཅུ་དྲུག་པོ་དེ་མཐོང་ན་མདོ་སྡེ་བརྗོད་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་མདོ་སྡེ་བརྗོད་པར་མི་ནུས་པར་འགྱུར་རོ། །ལྔ་གང་ཞེ་ན། དགེ་སློང་གི་འདུལ་བ་མི་ཤེས་པ། དགེ་སློང་མའི་འདུལ་བ་མི་ཤེས་པ། ཉེས་པ་་འདུལ་བ་མི་ཤེས་པ། རྩོད་པ་འདུལ་བ་མི་ཤེས་པ། ཉོན་མོངས་པ་འདུལ་བ་མི་ཤེས་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་མདོ་སྡེ་བརྗོད་མི་ནུས་པར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་མདོ་སྡེ་བརྗོད་ནུས་པར་འགྱུར་རོ། །ལྔ་གང་ཞེ་ན། དགེ་སློང་གི་འདུལ་བ་ཤེས་པ་དང་། དགེ་སློང་མའི་འདུལ་བ་ཤེས་པ་དང་། ཉེས་པ་འདུལ་བ་ཤེས་པ་དང་། རྩོད་པ་འདུལ་བ་ཤེས་པ་དང་། ཉོན་མོངས་པ་འདུལ་བ་ཤེས་པ་དང་། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་མདོ་སྡེ་བརྗོད་ནུས་པར་འགྱུར་རོ།། །།འདུལ་བ་གཞུང་དམ་པ། བམ་པོ་སུམ་བཅུ་པ། དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་ཏུ་བརྗོད་ནས་གནས་བཅུ་དྲུག་ཏུ་འདུལ་བ་ལ་

---

^{[མ་དཔེ་གཟིགས་ན་འདིར་གནོན།]}

བརྟག་པར་བྱ་སྟེ། བཅུ་དྲུག་གང་ཞེ་ན། ལུང་དང་། ལུང་བསྒོ་བ་དང་། དངོས་པོ་དང་། རྣམ་པར་འབྱེད་པ་དང་། སྤྱོད་པ་དང་། སྤྱོད་ཡུལ་དང་། ཉུང་ངུ་འདོད་པ་དང་། མང་དུ་འདོད་པ་དང་། མགུ་བ་དང་། མི་མགུ་བ་དང་། དགང་དཀའ་བ་དང་། དགང་སླ་བ་དང་། གསོ་དཀའ་བ་དང་། གསོ་སླ་བ་དང་། རབ་ཏུ་གཅེས་པ་དང་། ཆོག་ཤེས་པ་སྟེ། ཨུ་པཱ་ལི་གནས་འདི་བཅུ་དྲུག་གིས་འདུལ་བ་ལ་བརྟག་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་རྣམ་པ་ལྔ་དང་ལྡན་ན་ཉེས་པ་འབྱིན་མི་ནུས་པར་འགྱུར་ཏེ། ལྔ་གང་ཞེ་ན། བྱུང་བ་མི་ཤེས། བཅས་པ་མི་ཤེས། རྗེས་སུ་བཅས་པ་མི་ཤེས། གནང་བར་མི་ཤེས། རྗེས་སུ་གནང་བར་མི་ཤེས་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་ཉེས་པ་འབྱིན་མི་ནུས་པར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཉེས་པ་འབྱིན་ནུས་པར་འགྱུར་ཏེ། ལྔ་གང་ཞེ་ན། བྱུང་བ་ཤེས་པ་དང་། བཅས་པ་ཤེས་པ་དང་། རྗེས་སུ་བཅས་པ་ཤེས་པ་དང་། གནང་བ་ཤེས་པ་དང་། རྗེས་སུ་གནང་བ་ཤེས་པའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་ཉེས་པ་འབྱིན་ནུས་པར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་གིས་འདུལ་བ་ཤེས་པར་བྱས་ལ་གནས་བཅུ་དྲུག་གིས་ཉེས་པ་བརྗོད་པར་བྱ་སྟེ། བཅུ་དྲུག་གང་ཞེ་ན། ལྕི་བ་དང་། ཡང་བ་དང་། ལྷག་མ་ཡོད་པ་དང་། ལྷག་མ་མེད་པ་དང་། གནས་ངན་ལེན་དང་། ལུས་ཀྱི་དང་། ངག་གི་དང་། མི་དགེ་བ་དང་། ལུང་དུ་མི་སྟོན་པ་དང་། བཅས་པ་དང་། མ་བཅས་པ་དང་། མཐོལ་བར་བྱེད་པ་དང་། སྡོམ་པར་བྱེད་པ་དང་། འདུལ་བ་ལས་འདས་པར་བྱེད་པ་དང་། ངན་དུ་སྨྲ་བར་འགྲོ་བ་སྟེ། ཨུ་པཱ་ལི་གནས་བཅུ་དྲུག་པོ་འདིས་འདུལ་བ་ཤེས་པར་བྱས་ལ་གནས་བཅུ་དྲུག་གིས་ཉེས་པ་བརྗོད་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཉེས་པ་བརྗོད་མི་ནུས་པར་

---

^{[མ་དཔེ་གཟིགས་ན་འདིར་གནོན།]}

འགྱུར་ཏེ། ལྔ་གང་ཞེ་ན། ཉེས་པ་མི་ཤེས་པ་དང་། ཉེས་པ་མེད་པ་མི་ཤེས་པ་དང་། ལྕི་བ་མི་ཤེས་པ་དང་། ཡང་བ་མི་ཤེས་པ་དང་། ལུང་ཁ་ཏོན་མི་ཤེས་པར་གྱུར་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་ཉེས་པ་བརྗོད་མི་ནུས་པར་་་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཉེས་པ་བརྗོད་ནུས་པར་འགྱུར་ཏེ། ལྔ་གང་ཞེ་ན། ཉེས་པ་ཤེས་པ་དང་། ཉེས་པ་མེད་པ་ཤེས་པ་དང་། ལྕི་བ་ཤེས་པ་དང་། ཡང་བ་ཤེས་པ་དང་། གཞུང་ཁ་ཏོན་དུ་ཤེས་པར་གྱུར་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་ཉེས་པ་བརྗོད་ནུས་པར་འགྱུར་རོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་པོ་འདི་དག་གིས་ཉེས་པ་བརྗོད་ནས་གནས་བཅུ་དྲུག་གིས་ཆད་པའི་ལས་ཀྱིས་སྨ་དབབ་པར་བྱའོ། །བཅུ་དྲུག་པོ་གང་ཞེ་ན། ཉེས་པ་ངོར་བརྗོད་པ་དང་། དཔྱས་འདོགས་པ་དང་། བསྒོ་བ་བཞིན་དུ་མི་ཉན་པ་དང་། ཅང་མི་ཟེར་ཞིང་མི་ཉན་པ་དང་། བསྡིགས་པ་དང་། དགར་བ་དང་། བསྐྲད་པ་དང་། སླར་བསྡུམ་པར་བྱ་བ་དང་། མ་མཐོང་བའི་ཕྱིར་སྤང་བ་དང་། སླར་ལས་མི་བྱེད་པའི་ཕྱིར་སྤང་བ་དང་། སྡིག་པ་ལ་ལྟ་བ་སླར་མ་བཏང་བའི་ཕྱིར་སྤང་བ་དང་། ཆད་པ་བྱེད་པ་དང་། གཞི་ནས་བསླངས་ཏེ་ཆད་པ་བྱེད་པ་དང་། ཡིད་མགུ་བར་བྱེད་པ་དང་། གཞི་ནས་བསླངས་ཏེ་ཡིད་མགུ་བར་བྱེད་པ་དང་། གཞི་ནས་བསླངས་ཏེ་སྨོས་པའོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་གིས་འདུལ་བ་བརྗོད་ནས་གནས་བཅུ་དྲུག་པོ་འདིས་ཆད་པའི་ལས་ཀྱིས་སྨ་དབབ་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཆད་པའི་ལས་ཀྱིས་སྨ་དབབ་མི་ནུས་པར་འགྱུར་ཏེ། ལྔ་གང་ཞེ་ན། འདོད་པས་འགྲོ་བ་དང་། ཞེ་སྡང་གིས་འགྲོ་བ་དང་། གཏི་མུག་གིས་འགྲོ་བ་དང་། འཇིགས་པས་འགྲོ་བ་དང་། ཆད་པའི་ལས་བྱས་པ་དང་། མ་བྱས་པ་མི་ཤེས་པའོ། །ཨུ་པཱ་ལི་

---

^{[མ་དཔེ་གཟིགས་ན་འདིར་གནོན།]}

གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཆད་པས་གཅད་པའི་ལས་ཀྱིས་སྨ་དབབ་ནུས་པར་འགྱུར་ཏེ། ལྔ་གང་ཞེ་ན། འདོད་པས་མི་འགྲོ་བར་འགྲོ་བ་དང་། ཞེ་སྡང་གིས་མི་འགྲོ་བར་འགྲོ་བ་དང་། གཏི་མུག་གིས་མི་འགྲོ་བར་འགྲོ་བ་དང་། འཇིགས་པས་མི་འགྲོ་བར་འགྲོ་བ་དང་། ཆད་པའི་ལས་བྱས་པ་དང་མ་བྱས་པ་ཤེས་པའོ། །དེ་ལ་གཟུ་བོ་འདུལ་བ་འཛིན་པས་གནས་བཅུ་དྲུག་གིས་ཆད་པས་གཅད་པའི་ལས་ཀྱིས་སྨ་ཕབ་ལ་གཞན་ཡང་གནས་བཅུ་དྲུག་གིས་ཆད་པའི་ལས་ཀྱིས་སྨ་དབབ་པར་བྱ་སྟེ། བཅུ་དྲུག་པོ་གང་ཞེ་ན། ཚངས་པའི་ཆད་པས་བསྡིགས་པར་བྱ་བ་དང་། དད་པར་མི་འགྱུར་བར་ཚོར་བའི་ལས་བྱེད་དུ་གཞུག་པ་དང་། ལོངས་སྤྱོད་མི་མྱོང་བའི་ལས་བྱེད་དུ་གཞུག་པ་དང་། མིག་ལམ་ན་མི་སྣང་བར་བྱ་བའི་ལས་བྱ་བ་དང་། དེའི་ངོ་བོ་ཚོལ་དུ་གཞུག་པ་དང་། གནོད་པར་བྱ་བ་དང་། སྨད་པར་བྱ་བ་དང་། སྤང་བར་བྱ་བ་དང་། ཕྱོགས་མེད་པར་བྱ་བ་དང་། སྤ་གོང་བར་བྱ་བ་དང་། ཞུམ་པར་བྱ་བ་དང་། འགྱོད་པ་བསྐྱེད་པར་བྱ་བ་དང་། རྣམ་པར་འགྱོད་པ་དང་། རྣམ་པར་སླར་འགྱོད་པ་དང་། དམ་དེམ་དུ་གཞག་པ་དང་། གནད་དུ་དབབ་པ་དང་། ཉེས་སོ་ཞེས་བརྗོད་པའོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་གིས་ཆད་པའི་ལས་ཀྱིས་སྨ་དབབ་པར་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཆད་པའི་ལས་ཀྱིས་སྨ་དབབ་མི་ནུས་པར་་་འགྱུར་ཏེ། ལྔ་གང་ཞེ་ན། འདུལ་བའི་དངོས་པོ་ལྔ་མི་ཤེས་པ་སྟེ། ལྔ་གང་ཞེ་ན། བསྡིགས་པ་དང་། སྨད་པ་དང་། བསྐྲད་པ་དང་། སླར་བསྡུམ་པ་དང་། སྤང་བ་དང་ལྔའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་ལྔ་དང་ལྡན་ན་ཆད་པའི་ལས་ཀྱིས་སྨ་དབབ་ནུས་པར་འགྱུར་ཏེ། ལྔ་གང་ཞེ་ན། འདུལ་བའི་དངོས་པོ་ལྔ་ཤེས་པའོ། །ལྔ་གང་ཞེ་ན། བསྡིགས་པ་དང་། སྨད་པ་དང་། བསྐྲད་པ་དང་། སླར་བསྡུམ་

---

^{[མ་དཔེ་གཟིགས་ན་འདིར་གནོན།]}

པ་དང་། སྤང་བ་དང་ལྔའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་ན་ཆད་པས་གཅད་པའི་ལས་ཀྱིས་སྨ་དབབ་ནུས་པར་འགྱུར་རོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་པོ་འདི་དག་གིས་ཆད་པས་གཅད་པའི་ལས་ཀྱིས་སྨ་ཕབ་ནས་གནས་བཅུ་དྲུག་གིས་ལས་བྱའོ། །བཅུ་དྲུག་གང་ཞེ་ན། མངོན་སུམ་དུ་གྱུར་པ་ལ་ལས་བྱ་བ་དང་། མངོན་དུ་མ་གྱུར་ཀྱང་ལས་བྱ་བ་དང་། སྐབས་ཕྱེ་ནས་ལས་བྱ་བ་དང་། སྐབས་མ་ཕྱེ་ཡང་ལས་བྱ་བ་དང་། གླེངས་ལ་ལས་བྱ་བ་དང་། མ་གླེངས་ཀྱང་ལས་བྱ་བ་དང་། དྲན་པར་བྱས་པ་ལ་ལས་བྱ་བ་དང་། དྲན་པར་མ་བྱས་ཀྱང་ལས་བྱ་བ་དང་། དྲིས་ལ་ལས་བྱ་བ་དང་། མ་དྲིས་ཀྱང་ལས་བྱ་བ་དང་། རྗེས་སུ་སྦྱར་བ་ལ་ལས་བྱ་བ་དང་། རྗེས་སུ་མ་སྦྱར་ཀྱང་ལས་བྱ་བ་དང་། སོ་སོར་ཤེས་པ་ལ་ལས་བྱ་བ་དང་། སོ་སོར་མི་ཤེས་ཀྱང་ལས་བྱ་བ་དང་། གཏན་ལ་ཕབ་ལ་ལས་བྱ་བ་དང་། གཏན་ལ་མ་ཕབ་ཀྱང་ལས་བྱ་བ་སྟེ། གནས་བཅུ་དྲུག་པོ་འདི་དག་གིས་ལས་བྱའོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་འདི་ལྔ་དང་ལྡན་ན་ལས་བྱེད་མི་ནུས་པ་ཡིན་ཏེ། ལྔ་གང་ཞེ་ན། གསོལ་བའི་ལས་མི་ཤེས་པ་དང་། གསོལ་བ་དང་གཉིས་ཀྱི་ལས་མི་ཤེས་པ་དང་། གསོལ་བ་དང་བཞིའི་ལས་མི་ཤེས་པ་དང་། བསྒོ་བའི་ལས་མི་ཤེས་པ་དང་། བྱིན་གྱིས་བརླབས་པའི་ལས་མི་ཤེས་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་དེ་ལྔ་དང་ལྡན་ན་ལས་བྱེད་མི་ནུས་པ་ཡིན་ནོ། །ཨུ་པཱ་ལི་གཟུ་བོ་འདུལ་བ་འཛིན་པ་ཆོས་འདི་ལྔ་དང་ལྡན་ན་ལས་བྱེད་ནུས་པ་ཡིན་ཏེ། ལྔ་གང་ཞེ་ན། གསོལ་བའི་ལས་ཤེས་པ་དང་། གསོལ་བ་དང་གཉིས་ཀྱི་ལས་ཤེས་པ་དང་། གསོལ་བ་དང་བཞིའི་ལས་ཤེས་པ་དང་། བསྒོ་བའི་ལས་ཤེས་པ་དང་། བྱིན་གྱིས་བརླབ་པའི་ལས་ཤེས་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་དེ་ལྔ་དང་ལྡན་ན་ལས་བྱེད་ནུས་པ་ཡིན་ནོ། །ཨུ་པཱ་ལི་གཟུ་བོ་འདུལ་བ་འཛིན་པས་གནས་བཅུ་དྲུག་པོ་དེ་དག་གིས་ལས་བྱས་ལ་གནས་བཅུ་དྲུག་གིས་རྩོད་

---

^{[མ་དཔེ་གཟིགས་ན་འདིར་གནོན།]}

པ་ཞི་བར་བྱེད་ན་ཉེས་པར་ཞི་བ་ཡིན་ཏེ། བཅུ་དྲུག་གང་ཞེ་ན། དེས་དགེ་འདུན་ལ་གསོལ་བ་མ་བྱས་པར་གྱུར་པ་དང་། རྒྱལ་བའི་བཀའ་དང་མི་མཐུན་པར་གྱུར་པ་དང་། ཕྱོགས་དང་ཕྱོགས་མ་ཡིན་པའི་དགེ་སློང་རྣམས་ལ་མ་བསྒོ་བར་མ་གྱུར་པ་དང་། རྒོལ་བའི་དགེ་སློང་གི་འདུལ་བ་ཉམས་པར་གྱུར་པ་དང་། མ་དག་པའི་དགེ་སློང་གིས་ཉེས་པ་བཅབས་པར་གྱུར་པ་དང་། བྱུང་བ་མ་རུང་བར་གྱུར་པ་དང་། བཅས་པ་མ་རུང་བར་གྱུར་པ་དང་། རྗེས་སུ་བཅས་པ་མ་རུང་བར་གྱུར་པ་དང་། གནང་བ་མ་རུང་བར་གྱུར་པ་དང་། རྗེས་སུ་གནང་བ་མ་རུང་བར་གྱུར་པ་དང་། རྒོལ་བའི་དགེ་སློང་ཡི་དམ་འཆར་མ་བཅུག་པར་གྱུར་པ་དང་། ལན་གློན་པའི་དགེ་སློང་ཡི་དམ་འཆར་མ་བཅུག་པར་གྱུར་པ་དང་། མདོ་སྡེའི་ཚིག་མ་རུང་བར་གྱུར་པ་དང་། འདུལ་བ་དང་མི་མཐུན་པར་གྱུར་པ་དང་། ཆོས་ཀྱི་མིག་རྒྱས་པར་མ་གྱུར་པ་དང་། ཇི་ལྟར་ཆོས་བཞིན། ཇི་ལྟར་འདུལ་བ་བཞིན། ཇི་ལྟར་སྟོན་པས་བསྟན་པ་དེ་ལྟ་བུར་རྩོད་པ་དེ་ཞི་བར་མ་གྱུར་པ་སྟེ། ཨུ་པཱ་ལི་རྣམ་པ་བཅུ་དྲུག་པོ་དེ་ལྟ་བུས་རྩོད་པ་ཞི་བར་བྱས་པ་ནི་ཉེས་པ་ཞི་བ་ཡིན་ནོ། །ཨུ་པཱ་ལི་ཆོས་རྣམ་པ་འདི་ལྔ་དང་ལྡན་ན་རྩོད་པ་ཞི་བ་ཉེས་པ་ཞི་བར་གྱུར་པ་ཡིན་ཏེ། ལྔ་གང་ཞེ་ན། མ་བསྒོས་པར་ཞི་བར་བྱེད་པ་དང་། ཉེས་པ་མི་བརྗོད་པ་དང་། ཆད་པའི་ལས་ཀྱིས་སྨ་མི་དབབ་པ་དང་། རྣམ་པར་དག་པ་མི་སྟོན་པ་དང་། དེས་དགེ་འདུན་ལ་གསོལ་བ་མ་བྱས་པར་གྱུར་པ་སྟེ། ཨུ་པཱ་ལི་ཆོས་རྣམ་པ་འདི་ལྔ་དང་ལྡན་པས་རྩོད་པ་ཞི་བར་བྱས་ཀྱང་ཞི་བར་བྱས་པ་མ་ཡིན་ནོ། །ཨུ་པཱ་ལི་ཆོས་རྣམ་པ་བཅུ་དྲུག་པོ་འདི་དག་དང་ལྡན་ན་རྩོད་པ་ཞི་བ་ལེགས་པར་ཞི་བ་ཡིན་ཏེ། བཅུ་དྲུག་གང་ཞེ་ན། དེས་དགེ་འདུན་ལ་གསོལ་བ་བྱས་པར་གྱུར་པ་དང་། རྒྱལ་བའི་བཀའ་དང་མཐུན་པར་གྱུར་པ་དང་། ཕྱོགས་དང་ཕྱོགས་མ་ཡིན་པའི་དགེ་སློང་རྣམས་ལ་བསྒོ་བར་གྱུར་པ་དང་། རྒོལ་བའི་དགེ་སློང་དག་གི་འདུལ་བ་མ་ཉམས་པར་གྱུར་པ་དང་། མ་དག་པའི་དགེ་སློང་གིས་ཉེས་པ་མ་བཅབས་

---

^{[མ་དཔེ་གཟིགས་ན་འདིར་གནོན།]}

པར་གྱུར་པ་དང་། བྱུང་བ་མ་རུང་བར་མ་གྱུར་པ་དང་། བཅས་པ་མ་རུང་བར་མ་གྱུར་པ་དང་། རྗེས་སུ་བཅས་པ་མ་རུང་བར་མ་གྱུར་པ་དང་། མི་གནང་བ་མ་རུང་བར་མ་གྱུར་པ་དང་། རྗེས་སུ་གནང་བ་མ་རུང་བར་མ་གྱུར་པ་དང་། རྒོལ་བའི་དགེ་སློང་ལ་ཤིན་ཏུ་ཡི་དམ་འཆར་བཅུག་པ་དང་། ལན་གློན་པའི་དགེ་སློང་ལ་ཤིན་ཏུ་ཡི་དམ་འཆར་བཅུག་པ་དང་། མདོ་སྡེའི་ཚིག་རུང་བར་གྱུར་པ་དང་། འདུལ་བ་དང་མཐུན་པར་གྱུར་པ་དང་། ཆོས་ཀྱི་མིག་རྒྱས་པར་གྱུར་པ་དང་། ཇི་ལྟར་ཆོས་བཞིན། ཇི་ལྟར་འདུལ་བ་བཞིན། ཇི་ལྟར་སྟོན་པས་བསྟན་པ་དེ་ལྟ་བུར་རྩོད་པ་དེ་ཞི་བ་ཡིན་ཏེ། ཨུ་པཱ་ལི་ཆོས་རྣམ་པ་འདི་བཅུ་དྲུག་དང་ལྡན་ན་རྩོད་པ་ཞི་བ་ལེགས་པར་ཞི་བ་ཡིན་ནོ། །ཨུ་པཱ་ལི་ཆོས་རྣམ་པ་འདི་ལྔ་དང་ལྡན་པས་རྩོད་པ་ཞི་ན་ལེགས་པར་ཞི་བ་ཡིན་ཏེ། ལྔ་གང་ཞེ་ན། བསྒོས་ཏེ་ཞི་བར་བྱེད་པ་དང་། ཉེས་པ་བརྗོད་པ་དང་། ཆད་པའི་ལས་ཀྱིས་སྨ་མི་འབེབས་པ་དང་། རྣམ་པར་དག་པ་སྟོན་པ་དང་། དེས་དགེ་འདུན་ལ་གསོལ་བ་བྱས་པར་གྱུར་པ་སྟེ། ཨུ་པཱ་ལི་ཆོས་རྣམ་པ་འདི་ལྔ་དང་ལྡན་པས་རྩོད་པ་ཞི་བ་ལེགས་པར་ཞི་བ་ཡིན་ནོ། །དེ་ལ་ཨུ་པཱ་ལི་གཟུ་བོ་འདུལ་བ་འཛིན་པས་རྣམ་པ་བཅུ་དྲུག་གིས་རྩོད་པ་ཞི་བར་བྱས་ན་བསོད་ནམས་མང་དུ་འཕེལ་བར་འགྱུར་ཏེ། བཅུ་དྲུག་གང་ཞེ་ན། དེས་བདག་ཉིད་ལ་བསོད་ནམས་ཀྱི་ཕུང་པོ་མང་པོས་བསྒོས་པར་གྱུར་པ་དང་། དེས་གཞན་ལ་ཡང་བསོད་ནམས་ཀྱི་ཕུང་པོ་ཆེན་པོས་བསྒོས་པར་གྱུར་པ་དང་། རྒོལ་བ་དང་ཕྱིར་རྒོལ་བའི་དགེ་སློང་དག་གིས་ཉེས་པ་སྦྱངས་པར་གྱུར་པ་དང་། རྒོལ་བ་དང་ཕྱིར་རྒོལ་བ་དག་གི་ཉེས་པ་ཆོམས་པར་གྱུར་པ་དང་། ཕྱོགས་རྣམ་པ་བཞི་པའི་ཉོན་མོངས་པའི་རྒྱུད་རྣམས་ཞི་བར་གྱུར་པ་དང་། དགེ་འདུན་བསྡུ་བའི་ཕྱིར་ཞུགས་པར་གྱུར་པ་དང་། དམ་པའི་ཆོས་གནས་པར་བྱ་བའི་ཕྱིར་ཆོས་ཀྱི་མིག་རྒྱས་པར་གྱུར་པ་དང་། ངོ་ཚ་བ་མེད་པའི་ཕྱོགས་རྣམས་ལ་ནན་ཐུར་བྱས་པར་གྱུར་པ་དང་། ངོ་ཚ་བའི་ཕྱོགས་རྣམས་ཡང་དག་པར་བསྡུས་པར་

---

^{[མ་དཔེ་གཟིགས་ན་འདིར་གནོན།]}

གྱུར་པ་དང་། དམ་པའི་ཆོས་མ་ཡིན་པ་བཟློག་པར་གྱུར་པ་དང་། དམ་པའི་ཆོས་རབ་ཏུ་ཟིན་པར་གྱུར་པ་དང་། ཆོས་ཉིད་བརྗོད་པར་གྱུར་པ་དང་། ཕྱིས་འོང་བའི་སྐྱེ་བོ་རྣམས་ལ་སྣང་བ་སྤྲོས་པར་གྱུར་པ་དང་། དམ་པའི་ཆོས་གནས་པ་དང་། སྐྱེ་བོ་མང་པོ་ལ་ཕན་པའི་ཕྱིར་ཞུགས་པར་གྱུར་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པས་རྣམ་པ་བཅུ་དྲུག་གིས་རྩོད་པ་ཞི་བར་བྱས་ན་བསོད་ནམས་མང་དུ་འཕེལ་བར་འགྱུར་རོ། །ཨུ་པཱ་ལི་གཟུ་བོ་འདུལ་བ་འཛིན་པས་རྣམ་པ་འདི་ལྔ་དང་ལྡན་པས་རྩོད་པ་ཞི་བར་བྱས་ན་བསོད་ནམས་་་མང་དུ་འཕེལ་བར་འགྱུར་ཏེ། ལྔ་གང་ཞེ་ན། ཉེས་པ་ལ་ཉེས་པར་བརྗོད་ཅིང་ཉེས་པ་མེད་པ་ལ་ཉེས་པ་མེད་པར་བརྗོད་པ་དང་། ལྕི་བ་ལ་ལྕི་བར་བརྗོད་ཅིང་ཡང་བ་ལ་ཡང་བར་བརྗོད་པ་དང་། ལྷག་མ་དང་བཅས་པ་ལ་ལྷག་མ་དང་བཅས་པར་བརྗོད་ཅིང་ལྷག་མ་མེད་པ་ལ་ལྷག་མ་མེད་པར་བརྗོད་པ་དང་། ཉེས་པ་མེད་པའི་གང་ཟག་ལ་ཉེས་པ་མེད་པར་བརྗོད་ཅིང་ཉེས་པ་ཡོད་པའི་གང་ཟག་ལ་ཉེས་པ་ཡོད་པར་བརྗོད་པ་དང་། ཉེས་པ་མེད་པའི་གང་ཟག་ལ་ཉེས་པ་མེད་པར་རྟོག་པར་བྱེད་ཅིང་། ཉེས་པ་ཡོད་པའི་གང་ཟག་ལ་ཉེས་པ་ཡོད་པར་རྟོག་པར་བྱེད་པ་སྟེ། ཨུ་པཱ་ལི་གཟུ་བོ་འདུལ་བ་འཛིན་པ་ཆོས་རྣམ་པ་དེ་ལྔ་དང་ལྡན་པས་རྩོད་པ་ཞི་བར་བྱས་ན་བསོད་ནམས་མང་དུ་འཕེལ་བར་འགྱུར་རོ། །ཨུ་པཱ་ལི་དེ་ལྟ་བས་ན་དེ་བཞིན་དུ་བསླབ་པར་བྱ་སྟེ། རྩོད་པ་བྱུང་ཞིང་སྐྱེས་པ་ལ་ཇི་ལྟར་ཆོས་བཞིན། ཇི་ལྟར་འདུལ་བ་བཞིན། ཇི་ལྟར་སྟོན་པས་བསྟན་པ་བཞིན་ཞི་བར་བྱའོ་སྙམ་དུ། ཨུ་པཱ་ལི་ཁྱོད་ཀྱིས་དེ་བཞིན་དུ་བསླབ་པར་གྱིས་ཤིག །འདུལ་བ་ལས་བྱུང་བ་རྣམ་པ་བཅུ་དྲུག་ཅེས་བྱ་བ་རྫོགས་སྷོ།། །།

གླེང་གཞིའི་སྒོ་དང་པོ་བཤད་པ།

---

^{[མ་དཔེ་གཟིགས་ན་འདིར་གནོན།]}

སྒོ་རྣམས་ཀྱི་མདོ་བསྡུས་པ་སྟེ། བསྙེན་པར་རྫོགས་པ་དང་པོ་དང་། །སོ་སོར་ཕྱེ་དང་དཀྱིལ་འཁོར་དང་། །དེ་བཞིན་སྒོ་ལེབ་བྱང་སེམས་ཏེ། །གླེང་གཞི་རྣམས་ནི་འདིར་བསྡུས་སོ། །མདོར་བསྡུས་པ་སྟེ། བསྙེན་པར་རྫོགས་དང་ལྷག་པ་དང་། །ཡོངས་སུ་དག་དང་བསྐོར་བ་ས། །ཕྱེད་དང་

---

^{[མ་དཔེ་གཟིགས་ན་འདིར་གནོན།]}

གསུམ་དང་སྡེ་དག་དང་། །ཆད་པ་དག་ཀྱང་དེ་བཞིན་ནོ། །བླངས་པ་དང་ནི་ཤ་རྗེན་དང་། །བསྡུས་པ་རྣམས་ཀྱི་མདོར་བཤད་པའོ། །མདོར་ན། བསྙེན་པར་རྫོགས་པར་བྱེད་པ་ན། །བུད་མེད་སྐྱེས་པ་མངོན་དུ་གནས། །རབ་ཏུ་མ་བྱུང་བསྙེན་པར་རྫོགས། །བར་ཆད་དག་ཀྱང་རྣམ་པ་བཞི། །མཁན་པོ་མེད་དང་བྱ་རོག་དང་། །དང་པོའི་སྡེར་ཡང་བརྗོད་པ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་་་བཞུགས་པའི་ཚེ་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བསྙེན་པར་རྫོགས་པའི་ཚེ་མཚན་འཕོས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། ཨུ་པཱ་ལི་བསྙེན་པར་ནི་རྫོགས་མོད་ཀྱི་དགེ་སློང་མའི་ནང་དུ་ནི་ཐོང་ཤིག །བཙུན་པ་དགེ་སློང་དག་གིས་བུད་མེད་སྐྱེས་པ་འདྲ་བ་སྐྱེས་པའི་དབྱངས་ཅན། སྐྱེས་པའི་སྐད་དུ་སྨྲ་བ། སྐྱེས་པའི་སྒྲ་ཅན། སྐྱེས་པའི་དབྱིབས་ལྟ་བུ་ཞིག་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པར་འགྱུར་རོ། །བཙུན་པ་སྐྱེས་པ་ཞིག་ལས་བུད་མེད་འདྲ་བ། བུད་མེད་ཀྱི་དབྱངས་ཅན། བུད་མེད་ཀྱི་སྐད་དུ་སྨྲ་བ། བུད་མེད་ཀྱི་སྒྲ་ཅན། བུད་མེད་ཀྱི་དབྱིབས་ལྟ་བུ་ཞིག་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པར་འགྱུར་རོ། །བཙུན་པ་རབ་ཏུ་མ་བྱུང་བར་དགེ་སློང་དག་གིས་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པར་འགྱུར་རོ། །བཙུན་པ་བསྙེན་པར་

---

^{[མ་དཔེ་གཟིགས་ན་འདིར་གནོན།]}

མ་རྫོགས་པར་མཁན་པོ་བགྱིས་ཏེ། དགེ་སློང་དག་གིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པར་འགྱུར་རོ། །བཙུན་པ་བར་ཆད་ཀྱི་ཆོས་དང་ལྡན་ལ་བདག་བར་ཆད་ཀྱི་ཆོས་དང་ལྡན་ནོ་ཞེས་མཆི་བཞིན་དུ་དགེ་སློང་དག་གིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ཡང་མ་རྫོགས་ལ་བསྙེན་པར་རྫོགས་པར་བྱེད་པ་ཡང་འདས་པ་དང་བཅས་པར་འགྱུར་རོ། །བཙུན་པ་བར་ཆད་ཀྱི་ཆོས་དང་མི་ལྡན་ལ་བདག་བར་ཆད་ཀྱི་ཆོས་དང་ལྡན་ནོ་ཞེས་མཆི་བ་ཞིག་དགེ་སློང་དག་གིས་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་དེ་དག་ནི་འདས་པ་དང་བཅས་པར་འགྱུར་རོ། །བཙུན་པ་བར་ཆད་ཀྱི་ཆོས་དང་ཡང་མི་ལྡན་ལ་བདག་བར་ཆད་ཀྱི་ཆོས་དང་མི་ལྡན་ནོ་ཞེས་མཆི་བ་ཞིག་དགེ་སློང་དག་གིས་་་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ཡང་རྫོགས་ལ་བསྙེན་པར་་རྫོགས་པར་བྱེད་པ་ལ་ཡང་འདས་པ་དང་བཅས་པར་མི་འགྱུར་རོ། །བཙུན་པ་མཁན་པོ་མ་མཆིས་བཞིན་དུ་དགེ་སློང་དག་གིས་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་དག་ནི་འདས་པ་དང་བཅས་པར་འགྱུར་རོ། །བཙུན་པ་མཁན་པོ་དང་ལྡན་པར་དགེ་སློང་དག་གིས་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ཡང་རྫོགས་ལ་བསྙེན་པར་རྫོགས་པར་བྱེད་པ་ལ་ཡང་འདས་པ་དང་བཅས་པར་མི་འགྱུར་རོ། །

---

^{[མ་དཔེ་གཟིགས་ན་འདིར་གནོན།]}

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ལོ་བདུན་ལོན་ལ་བྱ་རོག་སྐྲོད་ནུས་ན་རབ་ཏུ་ཕྱུང་ཤིག་ཅེས་་་གསུངས་ན། བཙུན་པ་ལོ་དྲུག་ལོན་པ་དེ་ཡང་དགེ་འདུན་གྱི་སྐོ་སར་བྱ་རོག་ཀྱང་སྐྲོད་ནུས་ན་དེ་རབ་ཏུ་དབྱུང་བར་བགྱིའམ། རབ་ཏུ་མི་དབྱུང་བར་བགྱི། ཨུ་པཱ་ལི་ལོ་བདུན་ལོན་པར་བྱ་བའི་ཕྱིར་ཏེ་རབ་ཏུ་དབྱུང་བར་མི་བྱའོ། །བཙུན་པ་ལོ་བདུན་ནི་ལོན་ལ་དགེ་འདུན་གྱི་སྐོ་ས་ནས་བྱ་རོག་སྐྲོད་མི་ནུས་ན་དེ་ཡང་རབ་ཏུ་དབྱུང་བར་བགྱིའམ། ཨུ་པཱ་ལི་བྱ་རོག་སྐྲོད་ནུས་པར་བྱ་བའི་ཕྱིར་ཏེ། རབ་ཏུ་དབྱུང་བར་མི་བྱའོ། །གླེང་གཞིའི་ནང་ན་སྒོ་ཐོག་མའི་མདོའི་ཚིགས་སུ་བཅད་པ་དང་པོའོ།། །།མདོར་ན། བྲམ་ཟེ་དང་ཡང་ཉིན་པར་དང་། །དཀོར་བ་ཚེས་གྲངས་དེ་བཞིན་ཏེ། །ལྷག་མ་དག་དང་ལོ་དྲུག་དང་། །དྲུག་ཏུ་བྱ་དང་བཅུ་བཞི་དང་། །ཤོལ་བའི་ཟླ་བར་སྦྱར་བ་སྟེ། །འདྲི་བ་རྣམས་ལའང་དེ་བཞིན་བྱ། །དགེ་སློང་འཁོད་པའི་གནས་ན་ནི། །བསླབ་པ་བྱིན་པས་བཀླག་པར་བྱའོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ། བྲམ་ཟེ་དང་ཁྱིམ་བདག་རྣམས་དགེ་སློང་་དག་གི་གན་དུ་འོངས་ནས། འཕགས་པ་དེ་རིང་ཚེས་གྲངས་དུ་ཞེས་དྲིས་པ་དང་། དེ་དག་གིས་སྨྲས་པ་ཀྱེ་མི་ཤེས་སོ། །བྲམ་ཟེ་དང་ཁྱིམ་བདག་དག་གིས་སྨྲས་པ། མུ་སྟེགས་ཅན་གྱིས་ཀྱང་ཚེས་གྲངས་དང་། ཉི་མ་དང་། སྐར་མ་དང་། ཡུད་ཙམ་ཡང་ཤེས་ན། ཁྱེད་ཅག་རབ་ཏུ་བྱུང་ན་ཚེས་གྲངས་ཙམ་ཡང་མི་ཤེས་སམ། དེ་དག་ལན་མེད་ནས་ཅང་མི་ཟེར་བར་འདུག་གོ །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཚེས་གྲངས་བགྲང་བར་ངས་རྗེས་སུ་གནང་ངོ་ཞེས་གསུངས་པ་དང་། དགེ་སློང་ཐམས་ཅད་ཀྱང་བགྲང་བ་ལ་ཞུགས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་

---

^{[མ་དཔེ་གཟིགས་ན་འདིར་གནོན།]}

ལྡན་འདས་ཀྱིས་བཀའ་སྩལ་པ། ཐམས་ཅད་ཀྱིས་མ་བགྲང་བར་དགེ་འདུན་གྱི་གནས་བརྟན་དང་། གཙུག་ལག་ཁང་སྐྱོང་གཉིས་ཀྱིས་གྲོངས་ཤིག །དགེ་འདུན་གྱི་གནས་བརྟན་དང་། ཁང་སྐྱོང་གཉིས་ཀྱིས་ཀྱང་མ་དྲན་ནས་དེ་དག་ཉེས་པའི་དམིགས་སུ་གྱུར་པ་དང་། དེ་ལྟར་གྱུར་པ་དགེ་སློང་དག་གིས། བཅོམ་ལྡན་འདས་ལ་གསོལ་པ་དང་། འཇིམ་པའི་རིལ་བུ་བཅོ་ལྔ་བྱོས་ལ་སྲད་བུ་ལ་བརྒྱུས་ཏེ་ཞོག་ལ་ཉིན་རེ་རེ་ཞིང་དྲང་བར་གྱིས་ཤིག །སྲད་བུ་འཕྱོངས་པར་གྱུར་པ་དང་། བཅོམ་ལྡན་འདས་ཀྱིས་འོད་མའི་བྱང་བུ་བཅོ་ལྔ་བྱོས་ལ་སྲད་བུ་ལ་བརྒྱུས་ཏེ་ཞོག་ལ་དེ་ལ་ཉིན་གཅིག་རེ་རེ་བཞིན་དྲོངས་ཤིག་ཅེས་་་གསུངས་པ་དང་། དགེ་སློང་ཐམས་ཅད་ཀྱིས་དེ་བཞིན་དྲངས་པ་དང་། དྲན་པ་ཉམས་པར་གྱུར་ཏེ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གནས་བརྟན་གྱིས་དྲང་བར་གྱིས་ཤིག །བྲམ་ཟེ་དང་ཁྱིམ་བདག་དག་གིས་ཀྱང་དེར་འོངས་ནས་འཕགས་པ་དེ་རིང་ཚེས་གྲངས་དུ་ཞེས་དྲིས་པ་དང་། དགེ་སློང་དག་གིས་དགེ་འདུན་གྱི་གནས་བརྟན་དང་། ཁང་སྐྱོང་གིས་ཤེས་སོ་ཞེས་དེར་གཏད་པ་དང་། དེ་དག་གིས་སྨྲས་པ། འཕགས་པ་དེ་དག་ཁྱེད་ཀྱི་ཚེས་གྲངས་ཀྱི་མཛོད་པ་ཡིན་ནམ། ཁྱེད་ལ་དྲིས་ན་ཅིའི་ཕྱིར་གཞན་ལ་གཏོད། ཁྱེད་ཅག་ཉིད་ཀྱིས་སྨྲོས་ཤིག །དེ་དག་ལ་ལན་མེད་ནས་ཅང་མི་ཟེར་བར་་་འཁོད་དོ། །བྲམ་ཟེ་དང་ཁྱིམ་བདག་རྣམས་འཕྱ་ཞིང་གཙུག་ལག་ཁང་ནས་བྱུང་སྟེ་དོང་ངོ་། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ། བྲམ་ཟེ་དང་ཁྱིམ་བདག་དག་འཕྱ་བ་ནི་ཡུས་ཏེ། དེ་བས་ན་དགེ་འདུན་གྱི་ནང་དུ་ཚེས་གྲངས་བརྗོད་པར་བྱའོ་སྙམ་དུ་དགོངས་ནས། དགེ་སློང་རྣམས་ལ་བཀའ་སྩལ་པ། བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཀྱིས། དེ་ལྟ་བས་ན་དགེ་འདུན་གྱི་ནང་དུ་ཚེས་གྲངས་བརྗོད་པར་གྱིས་ཤིག །བཅོམ་ལྡན་འདས་ཀྱིས་དགེ་འདུན་གྱི་ནང་དུ་ཚེས་གྲངས་བརྗོད་པར་གྱིས་ཤིག་ཅེས་བཀའ་སྩལ་པ་དང་།

---

^{[མ་དཔེ་གཟིགས་ན་འདིར་གནོན།]}

དགེ་སློང་རྣམས་ཀྱིས་དགེ་འདུན་གྱི་ནང་དུ་ཚེས་གྲངས་བརྗོད་ཀྱིས་ཟླ་བ་ཕྱེད་པོ་འཛིན་པར་མི་བྱེད་དོ། །ཁྱིམ་བདག་དང་བྲམ་ཟེ་དག་གིས་སྨྲས་པ། འཕགས་པ་ཁྱེད་ཀྱིས་ཟླ་བ་ཕྱེད་པོ་གཟུང་བ་ཡང་མི་ཤེས་ཏེ། དེ་ལྟར་མ་བཟུང་ན་ཡར་གྱི་ཟླ་བ་ཕྱེད་དང་། མར་གྱི་ཟླ་བ་ཕྱེད་པོ་ཇི་ལྟ་བུར་ཤེས་པར་འགྱུར། དེ་དག་ལན་མེད་ནས་ཅང་མི་སྨྲ་བར་འཁོད་དོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཟླ་བ་ཕྱེད་པོ་ཟུང་ལ་ཚེས་གྲངས་བརྗོད་པར་བྱའོ། །བརྗོད་པ་ནི་འདི་བཞིན་དུ་བརྗོད་པར་བྱ་སྟེ། དགེ་འདུན་ཐམས་ཅད་འདུས་ཤིང་འཁོད་པ་དང་། དགེ་སློང་གཅིག་གིས་རྒན་རིམས་ཀྱི་དང་པོར་འདུག་ལ་རིམ་གྲོ་དང་བཅས་པས་ཐལ་མོ་སྦྱར་ལ་ཚིག་འདི་་་སྐད་དུ་སྨྲོས་ཤིག །དེ་རིང་ནི་ཟླ་བ་མར་གྱི་ཚེས་གཅིག་སྟེ། གཙུག་ལག་ཁང་གི་བདག་པོ་དང་ལྷ་རྣམས་ཀྱི་ཕྱིར་ཚིགས་སུ་བཅད་པ་རེ་རེ་རྗོད་ཅིག །དགེ་སློང་རྣམས་ཀྱིས་ཚེས་གྲངས་ནི་བརྗོད་ཀྱིས། གཙུག་ལག་ཁང་གི་བདག་པོའི་མིང་ནས་མ་སྨོས་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཙུག་ལག་ཁང་གི་བདག་པོའི་མིང་ནས་ཀྱང་བརྗོད་པར་བྱའོ། །འདི་སྐད་དུ་སྦྱིན་བདག་མིང་འདི་ཞེས་བྱ་བས་སང་དགེ་སློང་གི་དགེ་འདུན་རྣམས་བཤོས་ལ་སྤྱན་དྲངས་་་ཀྱིས། དེ་ལ་བཙུན་པ་རྣམས་ཀྱིས་དགེ་བའི་ཡིད་ཀྱིས་བརྩེ་བར་མཛོད་ཅིག །གཙུག་ལག་ཁང་གི་བདག་པོ་ལ་ཇི་ལྟ་བ་གཞན་ཡང་སྦྱིན་པར་བྱེད་པ་དང་། སྦྱིན་པའི་བདག་པོ་ལ་ཡང་དགེ་བའི་ཡིད་ཀྱིས་བརྩེ་བར་མཛོད་ཅིག །ཇི་ལྟར་དགེ་བའི་ཡིད་ཀྱིས་བརྩེ་བར་མཛད་པས་ན། དེའི་དགེ་བའི་ཆོས་རྣམས་འཕེལ་བར་འགྱུར་གྱིས་འགྲིབ་པར་མི་འགྱུར་རོ། །དེ་བཞིན་དུ་གཞན་ཡང་དེ་ན་རྐྱེན་དུ་གནས་པའི་སེམས་ཅན་ཐམས་ཅད་ལ་ཡང་སོ་སོའི་མིང་ནས་བརྗོད་པར་བྱའོ། །དགེ་སློང་དག་གིས་ཀྱང་ཚིག་ཐམས་ཅད་རྫོགས་པའི་རྗེས་ལ་སོ་སོ་ནས་ཚིགས་སུ་བཅད་པ་རེ་རེ་ལྷོགས་ཤིག །བྲམ་ཟེ་དང་ཁྱིམ་བདག་དག་ཀྱང་དེར་འོངས་ནས། འཕགས་པ་དེ་

---

^{[མ་དཔེ་གཟིགས་ན་འདིར་གནོན།]}

རིང་ཚེས་དུ་ཞེས་དྲིས་པ་དང་། དེ་དག་གིས་སྨྲས་པ། ཀྱེ་དེང་ནི་བཅོ་ལྔའོ། །བྲམ་ཟེ་དང་ཁྱིམ་བདག་གིས་སྨྲས་པ། འཕགས་པ་འཇིག་རྟེན་པ་ཐམས་ཅད་ཀྱི་ནི་དེ་རིང་བཅུ་བཞི་ན་ཁྱེད་ཅག་གི་ཇི་ལྟར་ན་བཅོ་ལྔ། ཅི་ཁྱེད་ཅག་ཞག་འདུམས་པར་མི་བྱེད་དམ། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཞག་འདུམས་པར་ཡང་བྱོས་ཤིག །བཅོམ་ལྡན་འདས་ཀྱིས་ཞག་འདུམས་པར་བྱོས་ཤིག་ཅེས་གསུངས་པ་དང་། དགེ་སློང་དག་ཟླ་བ་ཕྱེད་ཕྱེད་ཅིང་ཞག་་འདུམས་པར་བྱེད་དོ། །བྲམ་ཟེ་དང་ཁྱིམ་བདག་དག་ཀྱང་དེར་ལྷགས་ནས། འཕགས་པ་དེ་རིང་ཚེས་གྲངས་དུ་ཞེས་དྲིས་པ་དང་། དགེ་སློང་དག་གིས་སྨྲས་པ། ཀྱེ་དེ་རིང་ངེད་ཀྱི་བཅུ་བཞིའོ། །དེ་དག་གིས་ཡང་སྨྲས་པ། འཕགས་པ་དེ་རིང་འཇིག་རྟེན་པ་ཐམས་ཅད་ཀྱི་ནི་བཅོ་ལྔ་ན་ཁྱེད་ཅག་གི་ཇི་ལྟར་བཅུ་བཞི། ཅི་ཁྱེད་ཅག་ཟླ་བ་ཕྱེད་ཕྱེད་ཅིང་ཞག་རེ་འདུམས་པར་བྱེད་དམ། དེ་དག་གིས་སྨྲས་པ། འདུམས་པར་བྱེད་དོ། །བྲམ་ཟེ་དང་ཁྱིམ་བདག་དག་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཏེ། དེ་ལྟ་བས་ན་ཟླ་བ་ཕྱེད་ཕྱེད་ཅིང་ཞག་འདུམས་པར་མ་བྱེད་ཅིག །དུས་གཅིག་གི་ཟླ་བ་ཕྱེད་དང་གཉིས་འདས་ཤིང་ཞག་འདུམས་པར་བྱོས་ཤིག །དེ་ལྟར་ན་ལོ་གཅིག་ལ་གསོ་སྦྱིན་བཅུ་བཞི་པ་ནི་དྲུག་གོ །དེའི་ལྷག་མ་རྣམས་ནི་བཅོ་ལྔ་པའོ། །དེ་ནས་ཡང་བྲམ་ཟེ་དང་ཁྱིམ་བདག་རྣམས་ལྷགས་ནས། འཕགས་པ་ད་ལྟར་གྱི་ཟླ་བ་འདི་ཁྱེད་ཀྱི་གང་ཞེས་དྲིས་པ་དང་། དགེ་སློང་དག་གིས་སྨྲས་པ། ཀྱེ་ངེད་ཀྱི་ནི་འདི་དབྱར་ཟླ་ཐ་ཆུངས་སོ། །དེ་དག་གིས་སྨྲས་པ། འཕགས་པ་འཇིག་རྟེན་ཐམས་ཅད་ཀྱི་ནི་ཟླ་བ་འདི་དབྱར་ཟླ་འབྲིང་པོ་ན་ཇི་ལྟར་ན་ཁྱེད་ཀྱི་དབྱར་ཟླ་ཐ་ཆུངས། ཅི་ཁྱེད་ཀྱིས་ཟླ་བ་ཤོལ་མ་བོར་རམ། དེ་དག་གིས་སྨྲས་པ། མ་བོར་རོ། །

---

^{[མ་དཔེ་གཟིགས་ན་འདིར་གནོན།]}

བྲམ་ཟེ་དང་ཁྱིམ་བདག་དག་འཕྱ་བར་གྱུར་ནས། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཀྱིས། དེ་ལྟ་བས་ན་ཟླ་བ་ཤོལ་བོར་ཅིག །བཅོམ་ལྡན་འདས་ཀྱིས་ཟླ་བ་ཤོལ་བོར་ཅིག་ཅེས་གསུངས་པ་དང་། དགེ་སློང་དག་གིས་ལོ་རེ་རེ་ཞིང་ཤོལ་བོར་རོ། །བྲམ་ཟེ་དང་ཁྱིམ་བདག་རྣམས་ཡང་དེར་ལྷགས་ནས། འཕགས་པ་ད་ལྟར་གྱི་ཟླ་བ་འདི་ཁྱེད་ཀྱི་གང་ཞེས་དྲིས་པ་དང་། དགེ་སློང་དག་གིས་སྨྲས་པ། ཀྱེ་ངེད་ཅག་གི་ད་ལྟར་ནི་དབྱར་ཟླ་འབྲིང་པོའོ། །དེ་དག་གིས་ཡང་སྨྲས་པ། འཕགས་པ་འཇིག་རྟེན་པ་ཐམས་ཅད་ཀྱི་ནི་ཟླ་བ་འདི་དབྱར་ཟླ་ཐ་ཆུངས་ན། ཁྱེད་ཅག་གི་ཇི་ལྟར་དབྱར་ཟླ་འབྲིང་པོ། ཅི་ཁྱེད་ཅག་ལོ་རེ་རེ་ཞིང་ཤོལ་འདོར་རམ། དེ་དག་གིས་སྨྲས་པ། འདོར་རོ། །བྲམ་ཟེ་དང་ཁྱིམ་བདག་དག་འཕྱ་ནས་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་་་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱིམ་བདག་དང་བྲམ་ཟེ་རྣམས་འཕྱ་བ་ནི་ཡུས་ཀྱིས་དེ་ལྟ་བས་ན་ལོ་རེ་རེ་ཞིང་ཟླ་བ་ཤོལ་མ་འདོར་བར་ལོ་དྲུག་དྲུག་ཅིང་ཤོལ་བོར་ཅིག །དྲུག་ལྔ་སུམ་བཅུ་སྟེ། དེ་ལྟ་བུར་ཞག་དང་། ཟླ་བ་ཕྱེད་དང་། ཟླ་བ་དང་ལོར་བསྒྲེས་ན་མཉམ་པར་འགྱུར་ཏེ། མུ་སྟེགས་ཅན་གྱིས་གླགས་བཙལ་ཀྱང་གླགས་མི་རྙེད་པར་འགྱུར་རོ། །བཅོམ་ལྡན་འདས་ཀྱིས་ལོ་དྲུག་དྲུག་ཅིང་ཟླ་བ་ཤོལ་བོར་ཅིག་ཅེས་གསུངས་པ་དང་། དགེ་སློང་དག་གིས་ལོ་དྲུག་དྲུག་ཅིང་ཟླ་བ་ཤོལ་འདོར་རོ། །རྒྱལ་པོ་དག་ནི་ལོ་གསུམ་གསུམ་ཞིང་ཤོལ་འདོར་བར་བྱེད་དོ། །དགེ་སློང་དག་གིས་དེ་བཞིན་མ་བྱས་པ་དང་། བློན་པོ་དག་འཕྱ་བར་གྱུར་ནས་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བློན་པོ་རྣམས་འཕྱ་བ་ནི་ཡུས་ཏེ། དེ་ལྟ་བས་ན་རྒྱལ་པོའི་གཞུང་བཞིན་དུ་ཡང་གྱིས་ཤིག །སྐར་མ་མི་མཐུན་པར་

---

^{[མ་དཔེ་གཟིགས་ན་འདིར་གནོན།]}

གྱུར་ཏེ། དགེ་སློང་དག་གིས་དེ་ལྟ་བུར་མི་སྦྱོར་བ་དང་། སྐར་མ་རྩི་བ་ལ་མཁས་པ་དག་དགེ་སློང་དག་ལ་འཕྱ་ནས་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་སྐར་མ་རྩི་བ་དག་འཕྱ་བ་ནི་ཡུས་ཏེ། དེ་ལྟ་བས་ན་སྐར་མ་རྩི་བའི་རྗེས་སུ་ཡང་འཇུག་པར་ཡང་བྱོས་ཤིག །གླེང་གཞིའི་ནང་ནས་སྒོ་དང་པོའི་ཚིགས་སུ་བཅད་པ་གཉིས་པའོ།། །།མདོར་ན། ཡོངས་སུ་དག་པ་གཉིས་བྱ་དང་། །མཚམས་ཀྱང་རྣམ་པ་བཞིར་བྱ་སྟེ། །དེ་བཞིན་དད་པ་ནམ་མཁའ་ལས། །མ་བཀྲོལ་བ་ཡང་སྔ་མ་བཞིན། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མཚམས་ཀྱི་ནང་ན་མཆིས་པས་མཚམས་ཀྱི་སླད་རོལ་ན་མཆིས་པ་རྣམས་ལ། ཡོངས་སུ་དག་པ་སྩལ་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་མཚམས་ཀྱི་སླད་རོལ་ན་མཆིས་པས་མཚམས་ཀྱི་ནང་ན་མཆིས་པ་ལ་ཡོངས་སུ་དག་པ་སྩལ་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་མཚམས་ཀྱི་ནང་ན་མཆིས་པས་མཚམས་ཀྱི་སླད་རོལ་ན་མཆིས་པའི་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་མཚམས་ཀྱི་སླད་རོལ་ན་མཆིས་པས་མཚམས་ཀྱི་ནང་ན་མཆིས་པའི་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ལས་བགྱིད་པ་མཚམས་ཀྱི་ནང་ན་མཆིས་བཞིན་དུ་མཚམས་ཀྱི་སླད་རོལ་ན་མཆིས་པ་རྣམས་ལ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ལས་བགྱིད་པ་མཚམས་ཀྱི་སླད་རོལ་ན་མཆིས་བཞིན་དུ་མཚམས་ཀྱི་ནང་ན་མཆིས་པ་རྣམས་ལ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དད་པ་ལེན་པའི་དགེ་སློང་གིས་དད་པ་བླངས་ནས་ནམ་མཁའ་ལ་མཆིས་ན་དད་པ་བླངས་པ་ཞེས་བགྱིའམ། མ་

---

^{[མ་དཔེ་གཟིགས་ན་འདིར་གནོན།]}

བླངས་པ་ཞེས་བགྱི། ཨུ་པཱ་ལི་མ་བླངས་པ་སྟེ། གདོད་ལོང་ཤིག །བཙུན་པ་མཚམས་སྔ་མ་མ་བཀྲོལ་བར་སླད་མ་དགུམ་དུ་རུང་ངམ། ཨུ་པཱ་ལི་མི་རུང་ངོ་། །གླེང་གཞིའི་ནང་ནས་སྒོ་དང་པོའི་མདོའི་ཚིགས་སུ་བཅད་པ་གསུམ་པའོ།། །།འདུལ་བ་གཞུང་དམ་པ། བམ་པོ་སུམ་བཅུ་རྩ་གཅིག་པ། མདོར་ན། བསྐོར་བ་དང་ནི་འཇིག་པ་དང་། །ཤིང་དང་ས་ཡི་སྐྱེ་བ་དང་། །མི་འབྱུང་བ་དང་འབྱུང་བ་དང་། །འཆི་བ་ཡང་ནི་དེ་བཞིན་ནོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ་ན། སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མཚམས་ལ་མཚམས་ཀྱིས་བསྐོར་དུ་རུང་ངམ། ཨུ་པཱ་ལི་དཀྱིལ་འཁོར་དང་། ཆུས་བསྐོར་བ་དང་། དགེ་སློང་མའི་དབྱར་མོ་ཁང་མ་གཏོགས་པར་གཞན་མི་རུང་ངོ་། །མཚམས་ལ་མཚམས་ཀྱིས་གཞིག་ཏུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་རྣམ་པ་དུས་མཚམས་གཞིག་པར་འགྱུར། །ཨུ་པཱ་ལི་ལྔ་སྟེ། དགེ་འདུན་ཐམས་ཅད་ཀྱིས་བོར་ཏེ་དོང་བ་དང་། དགེ་འདུན་ཐམས་ཅད་མཚན་འཕོས་པ་དང་། དགེ་འདུན་ཐམས་ཅད་སླར་བབས་པ་དང་། དགེ་འདུན་ཐམས་ཅད་དུས་བྱས་པ་དང་། གསོལ་བའི་ལས་དང་ལྔའོ། །བཙུན་པ་ཤིང་གཅིག་ལས་གཙུག་ལག་ཁང་གཉིས་ཀྱི་མཚམས་དགུམ་དུ་རུང་ངམ། ཨུ་པཱ་ལི་རུང་ངོ་། །དེ་བཞིན་དུ་གཙུག་ལག་ཁང་གསུམ་མམ་བཞི་ཡང་རུང་སྟེ། ཤིང་ཉིད་ནི་གཅལ་བར་བྱོས་ཤིག །སངས་རྒྱས་བཅོམ་ལྡན་འདས་གཞོངས་ཀ་ཤིར་སྤྱད་པ་སྤྱོད་པ་ན་གནས་གཞན་ཞིག་ཏུ་འཛུམ་པ་མཛད་དོ། །ཆོས་ཉིད་ཀྱིས་ནམ་སངས་རྒྱས་བཅོམ་ལྡན་འདས་འཛུམ་པ་མཛད་པ་དེའི་ཚེ་འོད་སྔོན་པོ། སེར་པོ། དམར་པོ། དཀར་པོའི་རྣམས་ཞལ་ནས་འབྱུང་སྟེ། ཁ་ཅིག་ནི་འོག་ཏུ་འགྲོ། ཁ་ཅིག་ནི་སྟེང་དུ་འགྲོ། འོག་ཏུ་སོང་བ་དེ་རྣམས་ནི་སེམས་ཅན་དམྱལ་བ་ཡང་འཚོ་དང་། ཐིག་ནག་པོ་དང་། ཀུན་དམྱལ་དང་། འོ་དོད་འབོད་པ་དང་།

---

^{[མ་དཔེ་གཟིགས་ན་འདིར་གནོན།]}

འོ་དོད་འབོད་པ་ཆེན་པོ་དང་། འཚིག་པ་དང་། རབ་ཏུ་འཚིག་པ་དང་། བསྟིར་མེད་པ་དང་། ཆུ་བུར་དང་། རྒྱུན་དུ་ཆུ་བུར་དང་། ཨ་ཏ་ཏ་དང་། ཧ་ཧ་པ་དང་། ཧུ་ཧུ་པ་དང་། ཨུཏྤལ་ལྟ་བུ་དང་། པད་མ་ལྟ་བུ་དང་། པད་མ་ཆེན་པོ་ལྟ་བུ་རྣམས་སུ་ཕྱིན་ནས། གང་ཚ་བའི་སེམས་ཅན་དམྱལ་བ་དེ་དག་ལ་བབ་ན་བསིལ་བར་གྱུར། གྲང་བའི་སེམས་ཅན་དམྱལ་བ་དེ་དག་ལ་བབ་ན་དྲོ་བར་གྱུར་ཏེ། དེས་སེམས་ཅན་དེ་དག་ལ་གནོད་པ་ནི་བདེ་བའི་ཁྱད་པར་དུ་གྱུར་པ་དང་། དེ་དག་འདི་སྙམ་དུ་ཀྱེ་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་བསམས་པ་དང་། དེ་དག་དད་པ་བསྐྱེད་པའི་ཕྱིར་བཅོམ་ལྡན་འདས་ཀྱིས་སྤྲུལ་པ་བཏང་ངོ་། །དེ་དག་གིས་སྤྲུལ་པ་མཐོང་བ་དང་འདི་སྙམ་དུ་ཀྱེ་བདག་ཅག་འདི་ནས་ཤི་འཕོས་པ་ཡང་མེད། གུད་དུ་སྐྱེས་པ་ཡང་མ་ཡིན་གྱི། སྔོན་མ་མཐོང་བའི་སེམས་ཅན་འདིའི་མཐུས་ན། བདག་ཅག་གནོད་པ་ལས་བདེ་བའི་ཁྱད་པར་དུ་གྱུར་ཏོ་སྙམ་བསམས་ནས་དེ་དག་སྤྲུལ་པ་ལ་སེམས་དད་པར་གྱུར་ནས། སེམས་ཅན་དམྱལ་བའི་གནོད་པའི་ལས་མེད་པར་གྱུར་ཏེ། གང་དུ་བདེན་པ་རྣམས་ཀྱི་སྣོད་དུ་གྱུར་པ་དེར་ལྷ་དང་མིའི་ནང་དུ་མཚམས་འཛིན་པར་གྱུར་ཏོ། །གང་སྟེང་དུ་སོང་བ་དེ་ནི་རྒྱལ་ཆེན་བཞིའི་ལྷ་དང་སུམ་བཅུ་རྩ་གསུམ་དང་། མཚེ་མ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་ལྷ་ཉེ་ཕན་དང་། ཚངས་ཆེན་དང་། སྣང་བ་དང་། ཚད་མེད་སྣང་བ་དང་། ཀུན་སྣང་དང་བ་དང་། ཆུང་དགེ་དང་། ཚད་མེད་དགེ་བ་དང་། དགེ་རྒྱས་དང་། སྤྲིན་མེད་དང་། བསོད་ནམས་འཕེལ་དང་། འབྲས་བུ་ཆེ་དང་། མི་ཆེ་བ་དང་། མི་གདུང་བ་དང་། ཤིན་ཏུ་མཐོང་བ་དང་། གྱ་ནོམ་སྣང་བ་དང་། འོག་མིན་ལ་སོགས་པར་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་བརྗོད་ཅིང་ཚིགས་སུ་བཅད་པ་གཉིས་ཀྱང་བརྗོད་དོ། །འབྱུང་བར་བྱ་ཕྱིར་

---

^{[མ་དཔེ་གཟིགས་ན་འདིར་གནོན།]}

བརྩམ་པར་བྱོས། །སངས་རྒྱས་བསྟན་ལ་བརྩོན་པར་བྱོས། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་རྣམས་གཞོམ་པར་བྱོས། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་འབྱིན་པར་འགྱུར། །དེ་ནས་འོད་ཟེར་དེ་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་བསྐོར་་་ནས་སླར་བཅོམ་ལྡན་འདས་ཀྱི་སླད་བཞིན་དུ་འབྲང་ཞིང་དོང་ངོ་། །དེ་སྟེ་བཅོམ་ལྡན་འདས་ཀྱིས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་་་འདས་ཀྱི་སྣམ་ལོགས་སུ་མི་སྣང་བར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་དུ་མི་སྣང་བར་འགྱུར་རོ། །སེམས་ཅན་དམྱལ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་མི་སྣང་བར་འགྱུར་རོ། །བྱོལ་སོང་དུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་རྟིང་པར་མི་སྣང་བར་འགྱུར་རོ། །ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་མི་སྣང་བར་་་འགྱུར་རོ། །མིར་སྐྱེ་བར་ལུང་སྟོན་པར་བཞེད་ན་ནི་པུས་མོ་གཉིས་སུ་མི་སྣང་བར་འགྱུར་རོ། །སྟོབས་ཀྱི་འཁོར་ལོས་སྒྱུར་བར་ལུང་སྟོན་པར་བཞེད་ན་ནི་ཕྱག་གཡོན་པའི་མཐིལ་དུ་མི་སྣང་བར་འགྱུར་རོ། །འཁོར་ལོས་སྒྱུར་བའི་རྒྱལ་པོར་ལུང་སྟོན་པར་བཞེད་ན་ནི་ཕྱག་གཡས་པའི་མཐིལ་དུ་མི་སྣང་བར་འགྱུར་རོ། །ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་མི་སྣང་བར་འགྱུར་རོ། །ཉན་ཐོས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་ཞལ་དུ་མི་སྣང་བར་འགྱུར་རོ། །རང་བྱང་ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་མི་སྣང་བར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་གཙུག་ཏོར་དུ་མི་སྣང་བར་འགྱུར་རོ། །དེ་ནས་འོད་ཟེར་དེ་དག་བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ནས་བཅོམ་ལྡན་འདས་ཀྱི་གཙུག་ཏོར་དུ་མི་སྣང་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་གཉིས་སྦྱར་ཏེ། བཅོམ་ལྡན་

---

^{[མ་དཔེ་གཟིགས་ན་འདིར་གནོན།]}

འདས་ལ་གསོལ་པ། ཁ་དོག་སྣ་ཚོགས་དུ་མ་སྟོང་། །ཞལ་ནས་བྱུང་བ་མང་པོ་སྟེ། །ཕྱོགས་ཀུན་དེས་ནི་སྣང་གྱུར་པ། །ཉི་མ་ཇི་ལྟར་ཤར་བ་བཞིན། །ཚིགས་སུ་བཅད་དེ་ཡང་སྨྲས་པ། རྒོད་དང་ཞུམ་ལས་རྣམ་བྲལ་ང་རྒྱལ་སྤངས། །སངས་རྒྱས་སྐྱེ་བོ་མཆོག་གི་རྒྱུར་གྱུར་པ། །རྐྱེན་མེད་དུང་དང་པད་མོའི་རྩ་ལྟར་དཀར། །རྒྱལ་བ་དགྲ་ཐུལ་འཛུམ་པ་ཉེ་བར་སྟོན་མི་མཛད། །དེ་ཚེ་རང་གིས་མཁྱེན་ཅིང་བློ་བརྟན་པ། །རྒྱལ་དབང་ཉན་པ་ཐོས་སུ་རེ་བའི་རྣམས། །ཐུབ་པའི་ཁྱུ་མཆོག་བརྟན་པའི་གསུང་རབ་ཀྱིས། །ཐེ་ཚོམ་སྐྱེས་པ་དགེ་བས་བསལ་བར་མཛོད། །རྒྱ་མཚོ་ལས་ནི་རི་རྒྱལ་བརྟན་པ་བཞིན། །ཡང་དག་མགོན་པོས་རྒྱུ་མེད་འཛུམ་མི་སྟེན། །བརྟན་པས་གང་ཕྱིར་འཛུམ་པ་ཉེར་བསྟན་པ། །དེ་ནི་སྐྱེ་བོ་མང་པོ་ཐོས་པར་འཚལ། །བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མ་་་མཆིས་རྐྱེན་མ་མཆིས་པར་འཛུམ་པར་མི་མཛད་ན། བཙུན་པ་ཅིའི་རྒྱུ་ཅིའི་རྐྱེན་གྱིས་ན་འཛུམ་པ་མཛད། ཀུན་དགའ་བོ་དེ་ནི་དེ་བཞིན་ནོ། དེ་ནི་དེ་བཞིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱུ་མེད་རྐྱེན་མེད་པར་འཛུམ་པ་མི་མཛད་དོ། །ཀུན་དགའ་བོ་ཕྱོགས་འདིར་ཡང་དག་པར་རྫོགས་པའི་སངས་རྒྱས་འོད་སྲུང་བཞུགས་ནས་ཆོས་བསྟན་ཏོ། །དེ་ནས་ཚེ་དང་ལྡན་པ་ཀུན་དགའ་བོ་རིངས་ཤིང་མྱུར་བར་སྟོད་གཡོགས་བཞི་་་ལྟབ་ཏུ་བལྟབ་སྟེ་བཏིང་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གདན་བཏིང་བ་འདི་ལ་བཞུགས་པར་གསོལ། གནས་འདིར་ཡང་དག་པར་རྫོགས་པའི་སངས་རྒྱས་འོད་སྲུང་དང་། ད་ལྟར་གྱི་བཅོམ་ལྡན་འདས་དང་ཡང་དག་པར་རྫོགས་པའི་སངས་རྒྱས་གཉིས་བཞུགས་པར་འགྱུར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ལེགས་སོ་ཀུན་དགའ་བོ་ངས་མ་སྨྲས་པར་ཁྱོད་ཀྱིས་ཤེས་པ་ནི་ལེགས་སོ་ཞེས་

---

^{[མ་དཔེ་གཟིགས་ན་འདིར་གནོན།]}

གསུངས་ནས་གདན་བཏིང་བ་དེ་ལ་བཞུགས་སོ། །བཞུགས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཕྱོགས་འདི་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་ངོ་། །འདི་ནི་འཆག་སའོ། །འདི་ནི་སྟེགས་བུའོ། །འདི་ནི་སྒོ་ཁང་ངོ་། །འདི་ནི་ཞབས་འཁྲུ་བའི་སའོ། །འདི་ནི་བསྲོ་ཁང་ངོ་། །འདི་ནི་རུང་བའི་ཁང་པའོ། །འདི་ནི་དུགས་ཁང་ངོ་། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་རུང་བའི་ས་ཞེས་ཀྱང་བགྱི་མི་རུང་བའི་ས་ཞེས་ཀྱང་བགྱི་ན། བཙུན་པ་ཇི་ཙམ་གྱིས་ན་རུང་བའི་སར་རིག་པར་བགྱི། ཨུ་པཱ་ལི་དམ་པའི་ཆོས་ཡོད་པའི་ཚེ་རུང་བ་དང་མི་རུང་བར་འགྱུར། དམ་པའི་ཆོས་ཞིག་པར་གྱུར་ན་ཐམས་ཅད་ཀྱང་རུང་བའོ། །བཙུན་པ་ཇི་ཙམ་གྱིས་ན་དམ་པའི་ཆོས་མཆིས་པ་ཞེས་བགྱི། ཇི་ཙམ་གྱིས་ན་ཞིག་པ་ཞེས་བགྱི། ཨུ་པཱ་ལི་ཇི་སྲིད་དུ་ལས་བྱེད་ཅིང་ནན་ཏན་བྱེད་པ་ཡང་ཡོད་པའི་བར་དུ་སྟེ། ལས་བྱེད་ལ་ནན་ཏན་བྱེད་པ་ཡང་ཡོད་ན་དམ་པའི་ཆོས་ཡོད་པ་ཞེས་བྱའོ། །ལས་ཀྱང་མི་བྱེད་ལ་ནན་ཏན་བྱེད་པ་དག་ཀྱང་མེད་ན་དེ་ནི་དམ་པའི་ཆོས་ཞིག་པ་ཞེས་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མཚམས་ཀྱི་ནང་ན་རྒྱལ་བ་བཞུགས་བཞིན་ལས་བགྱིར་རུང་ངམ། ཨུ་པཱ་ལི་རུང་ངོ་། །རྒྱལ་བས་གྲངས་སུ་བསྐངས་ལ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དེ་ཅིའི་ཕྱིར་ཞེ་ན། ཨུ་པཱ་ལི་སངས་རྒྱས་དཀོན་མཆོག་ཀྱང་གཞན། དགེ་འདུན་དཀོན་མཆོག་ཀྱང་གཞན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མི་བསྐྱེད་པའི་མཚམས་བསྐྱེད་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་ཇི་ཙམ་གྱིས་ན་མཚམས་བསྐྱེད་དུ་མི་རུང་བ་ཞེས་བགྱི། ཨུ་པཱ་ལི་གསུམ་གྱིས་ཏེ། དཀྱིལ་འཁོར་དང་། ཆུས་བསྐོར་བ་དང་། མཚམས་ཀྱི་ནང་ངོ་། །བཙུན་པ་ཆུ་ཀླུང་འབབ་པའི་ཕ་རོལ་ཏུ་མཚམས་དགུམ་དུ་དུང་

---

^{[མ་དཔེ་གཟིགས་ན་འདིར་གནོན།]}

ངམ། ཨུ་པཱ་ལི་མི་རུང་ངོ་། །དེ་སྟེ་ཟམ་པ་བརྟན་པོ་ཞིག་ཡོད་ན་རུང་ངོ་། །དེ་སྟེ་བཙུན་པ་ཟམ་པ་ཆད་དམ་ཞིག་པར་གྱུར་ན། ཇི་ཙམ་གྱིས་ན་མི་འཇིག་པ་ཞེས་བགྱི། ཨུ་པཱ་ལི་སླར་ཡང་བཅིང་བར་བྱ་བའི་སེམས་ཡོད་ན་ཞག་བདུན་དུ་འཇིག་པར་མི་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་གིས་མཚམས་འགུམ་པའི་ཚེ་ལས་བྱེད་པའི་དགེ་སློང་གུམ་སྟེ། དུས་བགྱིས་ན་བཀུམ་པ་ཞེས་བགྱིའམ་མ་བཀུམ་པ་ཞེས་བགྱི། ཨུ་པཱ་ལི་མཚན་མ་རྣམས་བརྗོད་ལ་ལས་ཀྱང་མང་དུ་བྱས་ན་བཅད་པ་ཞེས་བྱའོ། །བཟློག་པ་ནི་མ་བཅད་པའོ། །བཙུན་པ་དགེ་སློང་མའི་མཚམས་གཅོད་པའི་ཚེ་ལས་བགྱིད་པའི་དགེ་སློང་མ་གུམ་སྟེ། དུས་བགྱིས་ན་བཀུམ་པ་ཞེས་བགྱིའམ་མ་བཀུམ་པ་ཞེས་བགྱི། དེ་སྟེ་ཨུ་པཱ་ལི་མཚན་མ་རྣམས་བརྗོད་ལ་ལས་ཀྱང་མང་དུ་བྱས་ན་བཅད་པ་ཞེས་བྱའོ། །བཟློག་པ་ནི་མ་བཅད་པ་ཞེས་བྱའོ། །གླེང་གཞིའི་ནང་ནས་སྒོ་དང་པོའི་མདོའི་ཚིགས་་་་སུ་བཅད་པ་བཞིའོ།། །།མདོར་ན། ས་དང་ནམ་མཁར་ལས་བྱ་བ། །མཚམས་དང་ཡོངས་སུ་དག་པ་དང་། །གནས་གཅིག་འདུག་པའི་དགེ་སློང་གིས། །ལས་རྣམས་ཀུན་ལ་བལྟ་བ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ་སངས་རྒྱས་བཅོམ་ལྡན་་་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་ས་ལ་མཆིས་པ་དག་གིས་ས་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་པ་ནི་རུང་སྟེ། དེ་སྟེ་ས་ལ་གནས་པས་གྲངས་སུ་ཚང་ལ་ས་ལ་གནས་པའི་རྣམས་ལས་དད་པ་ཡང་བླངས་པར་གྱུར་པའོ། །བཙུན་པ་ས་ལ་མཆིས་པས་རྩིག་པ་ལ་མཆིས་པ་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་པ་ནི་རུང་སྟེ། དེ་སྟེ་ས་ལ་གནས་པ་དག་མང་པོར་ཚང་ལ་རྩིག་པ་ལ་གནས་པའི་རྣམས་ལས་དད་པ་ཡང་

---

^{[མ་དཔེ་གཟིགས་ན་འདིར་གནོན།]}

བླངས་པར་གྱུར་པའོ། །ས་ལ་མཆིས་པ་དག་གིས་ཤིང་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་པ་ནི་རུང་སྟེ། དེ་སྟེ་ས་ལ་གནས་པ་དག་མང་པོར་ཚང་ལ་ཤིང་ལ་གནས་པ་རྣམས་ལས་དད་པ་ཡང་་བླངས་པར་གྱུར་པའོ། །བཙུན་པ་ས་ལ་མཆིས་པ་དག་གིས་ནམ་མཁའ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་རྩིག་པའི་སྟེང་ན་མཆིས་པ་དག་གིས་རྩིག་པའི་སྟེང་ན་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་ན་རུང་སྟེ། དེ་སྟེ་རྩིག་པའི་སྟེང་ན་གནས་པ་དག་གྲངས་སུ་ཚང་ལ་རྩིག་པའི་སྟེང་ན་གནས་པའི་རྣམས་ལས་དད་པ་ཡང་བླངས་པར་གྱུར་པའོ། །བཙུན་པ་རྩིག་པའི་སྟེང་ན་མཆིས་པ་དག་གིས་ས་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་པ་ནི་རུང་སྟེ། དེ་སྟེ་རྩིག་པའི་སྟེང་ན་གནས་པ་དག་གིས་གྲངས་སུ་ཚང་ལ་ས་ལ་གནས་པའི་རྣམས་ལས་དད་པ་ཡང་བླངས་པར་གྱུར་ནའོ། །བཙུན་པ་རྩིག་པའི་སྟེང་ན་མཆིས་པ་དག་གིས་ཤིང་གི་སྟེང་ན་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་ན་རུང་སྟེ། དེ་སྟེ་རྩིག་པ་ལ་གནས་པ་དག་གྲངས་སུ་ཚང་ལ་ཤིང་གི་སྟེང་ན་གནས་པ་རྣམས་ལས་དད་པ་ཡང་བླངས་པར་གྱུར་པའོ། །བཙུན་པ་རྩིག་པའི་སྟེང་ན་མཆིས་པ་དག་གིས་ནམ་མཁའ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ཤིང་ལ་མཆིས་པ་དག་གིས་ཤིང་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་ན་རུང་སྟེ། དེ་སྟེ་ཤིང་ལ་གནས་པ་དག་གྲངས་སུ་བསྐངས་ལ་ཤིང་ལ་གནས་པའི་རྣམས་ལས་དད་པ་ཡང་བླངས་པར་གྱུར་པའོ། །ཤིང་ལ་མཆིས་པ་དག་གིས་ས་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་

---

^{[མ་དཔེ་གཟིགས་ན་འདིར་གནོན།]}

བྱིན་ན་རུང་སྟེ། དེ་སྟེ་ཤིང་ལ་གནས་པ་དག་གིས་གྲངས་སུ་བསྐངས་ལ་ས་ལ་གནས་པ་རྣམས་ལས་དད་པ་ཡང་བླངས་པར་གྱུར་པའོ། །བཙུན་པ་ཤིང་ལ་གནས་པ་དག་གིས་རྩིག་པ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དེ་སྟེ་ཤིང་ལ་གནས་པ་དག་གིས་གྲངས་སུ་བསྐངས་ལ་ས་ལ་གནས་པའི་རྣམས་ལས་དད་པ་ཡང་བླངས་པར་གྱུར་ནའོ། །བཙུན་པ་ཤིང་ལ་མཆིས་པ་དག་གིས་ནམ་མཁའ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་མཆིས་པ་དག་གིས་ནམ་མཁའ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་མཆིས་པ་དག་གིས་ས་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་མཆིས་པ་དག་གིས་རྩིག་པ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་་་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་མཆིས་པ་དག་གིས་ཤིང་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་འདུལ་བ་འདིའི་དཀྱིལ་འཁོར་ལས་ལས་བརྒྱ་རྩ་གཅིག་ཏུ་གསུངས་པ། བཙུན་པ་ལས་བརྒྱ་རྩ་གཅིག་པ་དེའི་ནང་ནས་ལས་དུས་ན་དད་པ་དང་བཅས་པར་འགྱུར། དུས་ན་དད་པ་མ་མཆིས་པར་འགྱུར། ཨུ་པཱ་ལི་ཐམས་ཅད་ཀྱང་དད་པ་དང་བཅས་པ་སྟེ། མཚམས་བཅད་པ་ནི་མ་གཏོགས་སོ། །བཙུན་པ་རྫུ་འཕྲུལ་ལམ་སྒྱུ་མས་མཚམས་དགུམ་དུ་རུང་ངམ། ཨུ་པཱ་ལི་མི་རུང་སྟེ། དེ་ཅིའི་ཕྱིར་ཞེ་ན། ཨུ་པཱ་ལི་རྫུ་འཕྲུལ་དང་སྒྱུ་མ་ལ་ནི་ཐ་སྙད་དུ་གདགས་པ་མེད་དོ། །བཙུན་པ་གཟའ་དང་། འོད་ཟེར་དང་། ཉི་མ་དང་། ཟླ་བ་དང་། སྐར་མ་རྣམས་ཀྱིས་མཚམས་དགུམ་དུ་རུང་ངམ།

---

^{[མ་དཔེ་གཟིགས་ན་འདིར་གནོན།]}

ཨུ་པཱ་ལི་མི་རུང་སྟེ། དེ་ཅིའི་ཕྱིར་ཞེ་ན། ཨུ་པཱ་ལི་གཟའ་དང་། འོད་ཟེར་དང་། ཉི་མ་དང་། ཟླ་བ་དང་། སྐར་མ་རྣམས་མི་བརྟན་པའི་ཕྱིར་རོ། །བཙུན་པ་ཆུ་རླབས་ཀྱིས་མཚམས་དགུམ་དུ་རུང་ངམ། ཨུ་པཱ་ལི་མི་རུང་སྟེ། དེ་ཅིའི་ཕྱིར་ཞེ་ན། ཨུ་པཱ་ལི་ཆུ་རླབས་ནི་མི་བརྟན་པའི་ཕྱིར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་ཡོངས་སུ་དག་པ་ལེན་པའི་དགེ་སློང་གིས་ཡོངས་སུ་དག་པ་བླངས་ནས་སྟེང་གི་ནམ་མཁའ་ལས་མཆིས་ན་དེས་ཡོངས་སུ་དག་པ་བླངས་པ་ཞེས་བགྱིའམ། ཨུ་པཱ་ལི་མ་བླངས་པ་སྟེ། གདོད་བླང་དགོས་སོ། །བཙུན་པ་ལས་བགྱིད་པ་གཅིག་གིས་ལས་ཀྱི་ཚིག་ཀྱང་གཅིག་གསོལ་བ་ཡང་གཅིག་གིས་གནས་བཞིར་སྡེ་བཞི་ལ་ལས་བགྱིར་རུང་ངམ། ཨུ་པཱ་ལི་རུང་སྟེ། དེ་སྟེ་གནས་བཞིར་དགེ་སློང་གསུམ་གསུམ་གནས་ལ། གསོལ་བ་དང་ལས་ཀྱང་མངོན་དུ་གྱུར་ཅིང་དེར་གསོལ་བར་བྱེད་པའི་དགེ་སློང་གིས་གནས་བཞིའི་མཚམས་སུ་སབ་མོའམ། རེ་ལྡེའམ། ཁྲིའམ། གཞན་དག་ཀྱང་རུང་། དེས་མནན་ཏེ་དེའི་སྟེང་དུ་འདུག་ནས་ལས་བྱའོ། །ལས་བྱེད་པ་དེ་ཉིད་དེ་དག་གི་གྲངས་སུ་སྐོང་བའོ། །བཙུན་པ་དགེ་སློང་གཅིག་གིས་གནས་གཅིག་ཏུ་མཆིས་ལ་གནས་བཞིར་ལས་བགྱིར་རུང་ངམ། ཨུ་པཱ་ལི་རུང་སྟེ། དེ་ཡང་གནས་བཞིར་འདི་ལྟ་སྟེ། བསྡིགས་པའི་ལས་དང་། སྨད་པ་དང་། བསྐྲད་པ་དང་། སླར་བསྡུམ་པ་དང་། མ་མཐོང་བའི་ཕྱིར་སྤང་བ་དང་། སླར་ལས་མི་བྱེད་པས་སྤང་བའི་ལས་དང་། སྡིག་པ་ལ་ལྟ་བ་སླར་མ་བཏང་བས་སྤང་བའི་ལས་དང་། ཆད་པའི་ལས་དེ་རྣམས་ལ་མངོན་དུ་གནས་པར་གྱུར་ལ། ལས་བྱེད་པའི་དགེ་སློང་གིས་གནས་བཞིའི་མཚམས་སབ་མོའམ་རེ་ལྡེས་མནན་ཏེ་འདུག་པའོ། །གླེང་གཞིའི་སྒོ་དང་པོའི་ཚིགས་སུ་བཅད་པ་ལྔ་པའོ།། །།མདོར་ན། ཕྱེད་དང་གསུམ་ལས་འདས་པ་དང་། །ཕྱེད་དང་གསུམ་ཡང་རི་ཡི་སྟེང་། །དགེ་འདུན་བྱེ་བ་སྐྱ་རེངས་དང་། །

---

^{[མ་དཔེ་གཟིགས་ན་འདིར་གནོན།]}

མཚམས་ཀྱི་ནང་དུ་བྱིན་གྱིས་བརླབས། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་མཚམས་ཆེན་པོ་ཆོད་ཅིག་ཅེས་གསུངས་ན། བཙུན་པ་མཚམས་ཆེན་པོ་དེའི་ཚད་ཇི་ཙམ་ལགས། ཨུ་པཱ་ལི་དཔག་ཚད་ཕྱེད་དང་གསུམ་མོ། །བཙུན་པ་ཕྱེད་དང་གསུམ་ཕན་ཆད་ཀྱང་མཚམས་ཞེས་བགྱིའམ། ཨུ་པཱ་ལི་མ་ཡིན་ཏེ། དཔག་ཚད་ཕྱེད་དང་གསུམ་ཚུན་ཆད་མཚམས་སོ། །བཙུན་པ་འོག་གི་ཁམས་ཀྱི་མཚམས་གང་ལགས། ཨུ་པཱ་ལི་ཇི་ཙམ་ཆུ་ལ་ཐུག་པར་གྱུར་པའི་བར་དུའོ། །བཙུན་པ་དཔག་ཚད་ཕྱེད་དང་གསུམ་ལས་འདས་ཏེ། ཆུ་ལ་ཐུག་པར་གྱུར་ན་ཅི་དེ་ཡང་མཚམས་ཞེས་བགྱིའམ། ཨུ་པཱ་ལི་མ་ཡིན་ནོ། །དཔག་ཚད་ཕྱེད་དང་གསུམ་ཚུན་ཆད་ནི་མཚམས་ཡིན་གྱི། དེ་ཕན་ཆད་ནི་མཚམས་མ་ཡིན་ནོ། །བཙུན་པ་སྟེང་གི་ཁམས་སུ་མཚམས་གང་ལགས། ཨུ་པཱ་ལི་ཇི་ཙམ་ཤིང་གི་རྩེ་མོའམ་རྩིག་པའི་སྟེང་ལ་ཐུག་པར་གྱུར་པའི་བར་དུའོ། །བཙུན་པ་དཔག་ཚད་ཕྱེད་དང་གསུམ་ཕན་ཆད་ཀྱི་ཤིང་གི་རྩེ་མོའམ། རྩིག་པའི་སྟེང་དུ་གྱུར་ན་ཅི་དེ་ཡང་མཚམས་ཞེས་བགྱིའམ། ཨུ་པཱ་ལི་མ་ཡིན་ནོ། །ཨུ་པཱ་ལི་དཔག་ཚད་ཕྱེད་དང་གསུམ་ཚུན་ཆད་ནི་མཚམས་སོ། །དེ་ཕན་ཆད་ནི་མཚམས་མ་ཡིན་ནོ། །བཙུན་པ་རིའི་མཚམས་གང་ལགས། ཨུ་པཱ་ལི་ཇི་ཙམ་ཆུས་བསྐོར་བ་ལ་ཐུག་པའི་བར་དུའོ། །བཙུན་པ་དཔག་ཚད་ཕྱེད་དང་གསུམ་ཕན་ཆད་གཅིག་ཏུ་ཆུས་བསྐོར་བར་གྱུར་ན་ཅི་དེ་ཡང་མཚམས་ཞེས་བགྱིའམ། ཨུ་པཱ་ལི་མ་ཡིན་ནོ། །ཨུ་པཱ་ལི་དཔག་ཚད་ཕྱེད་དང་གསུམ་ཚུན་ཆད་ནི་མཚམས་སོ། །དེ་ཕན་ཆད་ནི་མཚམས་མ་ཡིན་ནོ། །བཙུན་པ་དབྱར་གྱི་ནང་དུ་དགེ་འདུན་བྱེ་སྟེ། དེ་ན་དགེ་སློང་ཞིག་ཞག་བདུན་དུ་བྱིན་གྱིས་བརླབས་ཏེ། བདག་ཆོས་ལ་ཕྱོགས་པར་

---

^{[མ་དཔེ་གཟིགས་ན་འདིར་གནོན།]}

བསམས་བཞིན་དུ་ཆོས་མ་ལགས་པའི་ཕྱོགས་ཀྱི་ནང་དུ་མཆིས་ན་དབྱར་ཆད་པ་་་ཞེས་བགྱིའམ། དབྱར་མ་ཆད་པ་ཞེས་བགྱི། ཨུ་པཱ་ལི་དེ་སྟེ་དེ་དག་གིས་ལྟ་བ་ལ་ཡང་དད་ལ་དེར་སོང་ནས། སྐྱ་རེངས་ཤར་ན་དབྱར་ཆད་པ་ཞེས་བྱའོ། །དེ་སྟེ་ལྟ་བ་ལ་ཡང་མ་དད་ལ་དེར་སོང་ནས། སྐྱ་རེངས་མ་ཤར་ན་དེ་དབྱར་མ་ཆད་པ་ཞེས་བྱའོ། །བཙུན་པ་བཅོམ་ལྡན་འདས་ཀྱིས་དབྱར་ཚུལ་ན་གནས་པའི་ཚེ། དགེ་སློང་གིས་ཞག་བདུན་དུ་བྱིན་གྱིས་བརླབས་ཏེ། མཚམས་ཀྱི་སླད་རོལ་དུ་སོང་ཤིག་ཅེས་གསུངས་ན། གང་དུ་བྱིན་གྱིས་བརླབ་པར་བགྱི། ཨུ་པཱ་ལི་མཚམས་ཀྱི་ནང་དུའོ། །ཇི་ལྟ་བུར་བགྱི། དགེ་སློང་གི་མདུན་དུ་འདུག་ནས་ཐལ་མོ་སྦྱར་བ་བྱ་སྟེ། ཚིག་འདི་སྐད་ཅེས་སྨྲོས་ཤིག །དགོངས་ཤིག་ཚེ་དང་ལྡན་པ་བདག་དགེ་སློང་མིང་འདི་ཞེས་བགྱི་བ་མཚམས་ཀྱི་ནང་གནས་འདིར་་་དབྱར་དང་པོའམ་ཐ་མ་ཡང་རུང་སྟེ་ཚུལ་དུ་ཞུགས་པ་ལས། བདག་མིང་འདི་ཞེས་བགྱི་བ་དགེ་འདུན་གྱི་དོན་ལ་མཚམས་ཀྱི་སླད་རོལ་དུ་མཆི་བའི་སླད་དུ་ཞག་བདུན་བྱིན་གྱིས་བརླབས་ཏེ། བདག་དབྱར་འདིར་རོ། །བདག་དབྱར་འདིར་གནས་སོ་ཞེས་ཀུན་རྒྱས་པར་བྱ་སྟེ་སྔ་མ་བཞིན་ནོ། །གླེང་གཞིའི་སྒོ་དང་པོའི་མདོའི་ཚིགས་སུ་བཅད་པ་དྲུག་གོ །། །མདོར་ན། སྡེ་ལྔ་རྣམས་ཏེ་བསམས་བཞིན་དུ། །ཀུན་རྒྱུ་གཉེན་ལའང་དེ་བཞིན་ཏེ། །ལུང་ལ་ཐེ་ཚོམ་བྱུང་བ་དང་། །མ་ཐོབ་ཕྱིར་ཡང་འགྲོ་བ་འོ། །སངས་རྒྱས་བཅོམ་ལྡན་འདས་མཉམ་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་དབྱར་ཚུལ་དུ་འཇུག་པར་གྱིས་ཤིག་ཅེས་གསུངས་ན། གང་དག་ཚུལ་དུ་འཇུག་པར་བགྱི། ཨུ་པཱ་ལི་དེ་ནི་ལྔ་སྟེ། དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མའོ། །ཇི་ལྟར་འཇུག་པར་

---

^{[མ་དཔེ་གཟིགས་ན་འདིར་གནོན།]}

བགྱི། ཐམས་ཅད་ཀྱང་སྔ་མ་བཞིན་དུའོ། །བཙུན་པ་བཅོམ་ལྡན་འདས་ཀྱིས་ཞག་བདུན་དུ་བྱིན་གྱིས་བརླབ་པར་བྱས་ན། དགེ་བསྙེན་གྱི་དོན་ལ་མཚམས་ཀྱི་སླད་རོལ་དུ་སོང་ཤིག་ཅེས་གསུངས་ན། བཙུན་པ་དེ་སྟེ་མུ་སྟེགས་ཅན་ཞིག་མཆིས་ན་དེའི་དོན་ལ་ཡང་མཆི་བར་བགྱིའམ། ཨུ་པཱ་ལི་དེ་སྟེ་སྡིག་པ་ལ་ལྟ་བ་དེ་ལས་དབྲལ་བར་འདོད་ན་འགྲོ་བར་བྱའོ། །བཙུན་པ་གཉེན་ཞིག་མཆིས་ན། དེའི་དོན་ལ་ཡང་མཆི་བར་བགྱིའམ། འགྲོ་བར་བྱའོ། །བཙུན་པ་དགེ་སློང་ཞིག་གཞུང་ལ་ཐེ་ཚོམ་མམ་དོགས་པ་ཞིག་མཆིས་ན། དེ་ཡང་མཆི་བར་བགྱིའམ། ཨུ་པཱ་ལི་དེ་ཡང་འགྲོ་བར་བྱའོ། །བཙུན་པ་དགེ་སློང་གིས་མ་ཐོབ་པ་ལས་ཐོབ་པའི་སླད་དུ། མ་ཆུད་པ་ལས་ཆུད་པའི་སླད་དུ། མངོན་དུ་མ་བགྱིས་པ་ལས་མངོན་དུ་བགྱི་བའི་སླད་དུ། ཐེ་ཚོམ་མམ་དོགས་པ་ཞིག་མཆིས་ན། དེ་ཡང་མཆི་བར་བགྱིའམ། ཨུ་པཱ་ལི་དེ་ཡང་འགྲོ་བར་བྱའོ། །གླེང་གཞིའི་སྒོ་དང་པོའི་མདོའི་ཚིགས་སུ་བཅད་པ་བདུན་ནོ།། །།མདོར་ན། མ་དྲས་གོས་ཀྱང་དེ་བཞིན་ཏེ། །འོན་ཏེ་གྲོང་དུ་འགྲོ་བ་དང་། །ཀུན་ཏུ་རྒྱུ་དང་དེ་བཞིན་པ། །གཏན་ལ་བབ་ན་གོང་ལུགས་སོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མ་དྲས་པའི་གོས་བྱིན་གྱིས་བརླབ་པར་རུང་ངམ། ཨུ་པཱ་ལི་མི་རུང་མོད་ཀྱི་རྣམ་པ་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་པའི་གོས་འཚལ་ནས་གྲོང་དུ་མཆིར་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་པའི་གོས་འཚལ་ཏེ། ཁྱིམ་པའི་ཁྱིམ་དུ་མཆིར་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་པའི་གོས་འཚལ་ཏེ། ཁྱིམ་པའི་ཁྱིམ་དུ་གནས་སུ་མཆིས་སུ་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་པའི་གོས་འཚལ་ཏེ། ཀུན་ཏུ་རྒྱུ་བའི་ཁྱིམ་དུ་མཆིར་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་

---

^{[མ་དཔེ་གཟིགས་ན་འདིར་གནོན།]}

པའི་གོས་འཚལ་ཏེ། ཀུན་ཏུ་རྒྱུ་བའི་གནས་སུ་མཆིས་སུ་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་པའི་གོས་འཚལ་ཏེ། སླད་རོལ་དུ་མཆིར་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཆོས་གོས་ཁྲུ་ཚད་དུ་བྱོས་ཤིག་ཅེས་གསུངས་ན། བཙུན་པ་ལ་ལ་ཞིག་ཁྲུ་ཐུང་ཞིང་ལུས་རིང་ན་དེས་ཀྱང་ཁྲུ་ཚད་དུ་བགྱིའམ། ཨུ་པཱ་ལི་དེ་ནི་ཁྲུ་ཚད་དུ་བྱ་བ་མ་ཡིན་གྱི། དེའི་ལུས་ཀྱི་ཚད་དུ་བྱོས་ཤིག །བཙུན་པ་གང་ལ་ཐབས་ཀྱིས་ཆོས་གོས་མི་ལངས་ན། དེས་ཇི་ལྟར་བགྱི། ཨུ་པཱ་ལི་དེས་གོང་ལུགས་སུ་གྱིས་ལ་ཆོངས་ཤིག །གླེང་གཞིའི་སྒོ་དང་པོའི་མདོའི་ཚིགས་སུ་བཅད་པ་བརྒྱད་པའོ།། །།མདོར་ན། ལྷམ་ལ་རྣམ་པ་ལྔར་བྱ་སྟེ། །སེང་གེ་གཅན་གཟན་མི་སྲུན་དང་། །འདུག་པར་ཡང་ནི་མི་རུང་སྟེ། །པགས་པ་ལ་ནི་ཉལ་མི་བྱའོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་་་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་བལ་གླང་ཅང་ཤེས་ཀྱི་པགས་པ་ལས་བགྱིས་པའི་ལྷམ་མ་འཆང་ཤིག་གསུངས་ན། བཙུན་པ་ཅི་བལ་གླང་ཕལ་གྱི་པགས་པ་ལ་ཡང་ལྷམ་བགྱིས་ཏེ། བཅང་བར་མི་་་བགྱིའམ། ཨུ་པཱ་ལི་དེ་དག་གི་པགས་པ་ལ་ཡང་ལྷམ་བྱས་ཏེ་བཅང་བར་མི་་་བྱའོ། །ཨུ་པཱ་ལི་དེ་ཅིའི་ཕྱིར་ཞེ་ན། དེ་དག་ཀྱང་སྣ་སྟོབས་དང་ལྡན་པ། སོ་སྟོབས་དང་ལྡན་པ། རྐང་སྟོབས་དང་ལྡན་པའོ། །བཙུན་པ་བཅོམ་ལྡན་འདས་ཀྱིས་རྟ་ཅང་ཤེས་ཀྱི་པགས་པ་ལས་བགྱིས་པའི་ལྷམ་མ་འཆང་ཤིག་ཅེས་་་གསུངས་ན། བཙུན་པ་ཅི་རྟ་ཕལ་གྱི་པགས་པའི་

---

^{[མ་དཔེ་གཟིགས་ན་འདིར་གནོན།]}

ལྷམ་ཡང་བཅང་བར་མི་བགྱིའམ། ཨུ་པཱ་ལི་དེའི་པགས་པའི་ལྷམ་ཡང་བཅང་བར་མི་བྱའོ། །དེ་ཅིའི་ཕྱིར་ཞེ་ན། ཨུ་པཱ་ལི་དེ་དག་མགྱོགས་པ་དང་ལྡན། སྟོབས་དང་ལྡན་པའི་ཕྱིར་རོ། །བཙུན་པ་བཅོམ་ལྡན་འདས་ཀྱིས་སེང་གེ་དང་། སྟག་དང་གཟིག་གི་པགས་པ་ལས་བགྱིས་པའི་ལྷམ་མ་འཆང་ཤིག་ཅེས་གསུངས་ན། བཙུན་པ་་་གཅན་གཟན་མི་སྲུན་པ་གཞན་དག་ཀྱང་མཆིས་ན། དེ་དག་གི་པགས་པ་ལས་བགྱིས་པའི་ལྷམ་བཅང་བར་མི་བགྱིའམ། ཨུ་པཱ་ལི་དེ་དག་གི་པགས་པ་ལ་ལྷམ་བྱས་པ་ཡང་མ་འཆང་ཤིག །ཨུ་པཱ་ལི་དེ་ཅིའི་ཕྱིར་ཞེ་ན། དེ་དག་ཀྱང་སེན་མོའི་སྟོབས་དང་ལྡན། མཆེ་བའི་སྟོབས་དང་ལྡན་པའི་ཕྱིར་རོ། །བཙུན་པ་བཅོམ་ལྡན་འདས་ཀྱིས་པགས་པའི་སྟེང་དུ་མ་འདུག་ཤིག་ཅེས་གསུངས་ན། བཙུན་པ་ཇི་ཙམ་གྱིས་ན་པགས་པའི་སྟེང་དུ་མཆིས་པ་ཞེས་བགྱི། ཨུ་པཱ་ལི་དེ་ནི་ཇི་ཙམ་རྐུབ་བཞག་པར་གྱུར་པས་སོ། །བཙུན་པ་བཅོམ་ལྡན་འདས་ཀྱིས་པགས་པའི་སྟེང་དུ་མ་ཉལ་ཅིག་ཅེས་གསུངས་ན། བཙུན་པ་ཇི་ཙམ་གྱིས་ན་པགས་པའི་སྟེང་དུ་ཉལ་བ་ཞེས་བགྱི། དེ་ནི་ཨུ་པཱ་ལི་ཇི་ཙམ་འཕྲེས་པར་གྱུར་པའོ། །གླེང་གཞིའི་སྒོ་དང་པོའི་མདོའི་ཚིགས་སུ་བཅད་པ་དགུ་པའོ།། །།མདོར་ན། ཤ་རྗེན་དང་ནི་རྩབ་མོ་དང་། །ཡོངས་སུ་བཙགས་པར་གྱུར་པ་དང་། །གཞང་འབྲུམ་གཅད་པར་མི་བྱ་སྟེ། །གཙུག་ལག་ཁང་དང་བཅའ་བ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་དགེ་སློང་སེ་ཀ་ཏ་བྲོ་འཚལ་བ་ལ་ཤ་རྗེན་བྱིན་ཅིག་ཅེས་གསུངས་ན། བཙུན་པ་སུ་ལས་བླང་བར་བགྱི། ཨུ་པཱ་ལི་དེ་ནི་ཤ་འཚོང་བ་རྣམ་པ་ལྔ་ལས་སོ། །རྣམ་པ་ལྔ་གང་ཞེ་ན། ཤེན་པ་དང་། ཁྱིམ་བྱ་གསོད་པ་དང་། རི་བྱ་གསོད་པ་དང་། ཕག་གསོད་པ་

---

^{[མ་དཔེ་གཟིགས་ན་འདིར་གནོན།]}

དང་། རི་དགས་གསོད་པ་རྣམས་སོ། །འོ་ན་བཙུན་པ་སུས་བླང་ཞིང་བྱིན་ལེན་བགྱི། ཨུ་པཱ་ལི་དགེ་བསྙེན་དད་པས་སོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་དུས་ན་དགེ་སློང་གཞན་ཞིག་ན་བར་གྱུར་ནས་དེ་སྨན་པའི་དྲུང་དུ་སོང་སྟེ། ནད་མེད་ཅིག་ཅེས་སྨྲས་ནས་བཞིན་བཟངས་བདག་ནད་འདི་དང་འདི་ལྟ་བུ་ཞིག་གིས་བཏབ་ན་དཔྱད་ཅིག་སྟོན་་་ཅིག །དེས་འཕགས་པ་མར་འཐུང་ཤིག་དང་འཚོ་བར་འགྱུར་རོ་ཞེས་སྨྲས་པ་དང་། དེས་བཞིན་བཟངས་བཅོམ་ལྡན་འདས་ཀྱིས་མ་གནང་ངོ་ཞེས་སྨྲས་པ་དང་། སྨན་པས་ཁྱོད་ཀྱི་སྟོན་པ་ནི་ཐུགས་རྗེ་ཅན་ཡིན་གྱིས་གནང་བར་འགྱུར་རོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་སྨན་པས་མར་གྱིས་འཚོ་བར་འགྱུར་ཞེས་བསྒོ་ན་འཐུང་ཤིག །དགེ་སློང་དེས་མར་འཐུངས་ན་སྐོམ་གྱིས་གཟིར་བར་གྱུར་ཏེ། དེས་སྨན་པ་ལ་བཞིན་བཟངས་བདག་ནི་སྐོམ་པས་གཟིར་ཏོ། །དེས་སྨྲས་པ་འཕགས་པ་རྩབ་མོ་སྐྱུར་པོ་འཐུང་ཤིག །དེས་སྨྲས་པ། བཅོམ་ལྡན་འདས་ཀྱིས་དུས་མ་ཡིན་པའི་ཟས་མ་གནང་ན་ཇི་ལྟར་འཐུང་བར་བྱ། སྨན་པས་སྨྲས་པ། འཕགས་པ་ཁྱོད་ཀྱི་སྟོན་པ་ནི་ཐུགས་རྗེ་ཅན་ཡིན་ཏེ་གནང་དུ་གདོན་མི་ཟའོ། །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་ན་རྩབ་མོ་སྐྱུར་པོ་འཐུང་ཤིག་ཅེས་རྗེས་སུ་གནང་བ་དང་། དགེ་སློང་དག་གིས་རྩབ་མོ་སྐྱུར་པོ་ཇི་ལྟར་བཏུང་བ་མི་ཤེས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྩབ་མོ་སྐྱུར་པོ་ནི་རྣམ་པ་འདི་ལྔའོ། །ལྔ་གང་ཞེ་ན། འདི་ལྟ་སྟེ། འབྲས་བུའི་ཆང་ལས་ཚར་གྱུར་པ་དང་། འབྲུའི་ཆང་ལས་ཚར་གྱུར་པ་དང་། ཞོའི་ཆུ་དང་། དར་བ་དང་། རྩབ་མོ་དང་ལྔའོ། །དེ་ལ་འབྲས་བུའི་ཆང་ལས་ཚར་གྱུར་པ་ནི་གང་འབྲས་བུ་རྣམས་ལས་བྱས་པ་དང་། མ་རུང་སྟེ་སྐྱུར་པོར་

---

^{[མ་དཔེ་གཟིགས་ན་འདིར་གནོན།]}

གྱུར་པའོ། །འབྲུའི་ཆང་ལས་ཚར་གྱུར་པ་ནི་གང་འབྲུ་རྣམས་ལས་སྦྱར་ནས་མ་རུང་སྟེ་སྐྱུར་པོར་གྱུར་པའོ། །ཞོའི་ཆུ་ནི་ཞོ་ལས་ཆུ་བྱུང་བའོ། །དར་བའི་ཁུ་བ་ནི་དར་བ་ཞོའི་ཆུ་ལྟ་བུར་གྱུར་པའོ། །རྩབ་མོ་ནི་རྩབ་མོ་ཉིད་ཡིན་ནོ། །དེ་དག་གི་ནང་དུ་ཆུས་བསླད་ལ་རས་ཀྱི་ནང་དུ་བཙགས་ཏེ། ཇི་ལྟར་མདའ་རྒྱུའི་ཁ་དོག་བཞིན་དུ་གྱུར་པ་དེ་ནི་དུས་དང་། དུས་མ་ཡིན་པ་དང་། ན་བ་དང་། མི་ན་བའི་དགེ་སློང་དག་བཏུང་བར་བྱ་སྟེ། དེ་ལ་ཐེ་ཚོམ་ནི་མ་བྱེད་ཅིག། གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་དགེ་སློང་གཞན་ཞིག་གཞང་འབྲུམ་གྱི་ནད་ཀྱིས་བཏབ་ནས་དེས་འབྲུམ་བུ་སེན་མོས་བཅད་པ་དང་། དེ་སླར་སྡུག་བསྔལ་ཞིང་རྩུབ་ལ་ཚ་ཞིང་གནོད་ལ་ན་བར་གྱུར་པ་དང་། དེ་སྡུག་བསྔལ་གྱིས་རབ་ཏུ་གཟིར་ནས་དེས་འདི་སྙམ་དུ་བདག་ལ་བཅོམ་ལྡན་འདས་ཀྱིས་སྡུག་བསྔལ་ཞིང་དོག་པ་དག་ཏུ་གྱུར་ཀྱང་མ་དགོངས་སྙམ་བསམས་པ་་་དང་། དེ་ནས་བཅོམ་ལྡན་འདས་ཀྱི་ཐུགས་རྗེ་ཆེན་པོས་བསྐུལ་ནས་དེའི་གནས་སུ་བྱོན་ཏེ། དགེ་སློང་ཅི་ཉེས་ཞེས་རྨས་པ་དང་། དེ་སྙིང་རྗེ་ཞིང་མི་དགའ་ནས་མིག་མཆི་མས་གང་མཆིལ་མས་བརྣངས་བཞིན་དུ་ཚིག་ངལ་ནས། བཅོམ་ལྡན་འདས་ལ་ཇི་ལྟར་གྱུར་པ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་སྔ་ནས་ཀྱང་གཞང་འབྲུམ་མ་གཅོད་ཅིག་ཅེས་མ་བསྒོའམ། བཅོམ་ལྡན་འདས་ཀྱིས་བཀའ་སྩལ་ལགས་སོ། །འོ་ན་ཁྱོད་ཀྱིས་ཅིའི་ཕྱིར་དེ་ལྟར་བྱ། བཅོམ་ལྡན་འདས་སྡུག་བསྔལ་གྱིས་གཟིར་བའི་སླད་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་དག་དགེ་སློང་འདི་ནི་སྡུག་བསྔལ་གྱིས་གཟིར་བས་ན་ཉེས་པ་མེད་ཀྱིས། ངས་ཡང་འདི་ལྟར་བསྒོ་བ་ནི་དགེ་སློང་དག་གཞང་འབྲུམ་གྱི་ནད་ཀྱིས་གཟིར་ན་སེན་མོ་ལ་སོགས་པས་བདག་ཉིད་ཀྱིས་ཀྱང་མ་གཅད་ཅིག །གཞན་ཡང་གཅོད་དུ་མ་གཞུག་ཤིག །དེ་ལ་དཔྱད་རྣམ་པ་གཉིས་སུ་སྦྱར་ཞིང་བྱ་སྟེ། སྨན་དང་སྔགས་ཀྱིས་སོ། །དགེ་སློང་གཞང་

---

^{[མ་དཔེ་གཟིགས་ན་འདིར་གནོན།]}

འབྲུམ་གྱི་ནད་ཀྱིས་གཟིར་བ་ལ་སེན་མོ་ལ་སོགས་པས་བཅད་དམ། གཅོད་དུ་བཅུག་ན་འདས་པ་དང་བཅས་པར་འགྱུར་རོ། །སངས་རྒྱས་བཅོམ་ལྡན་འདས་ཤཱཀྱའི་གྲོང་འདབ་ཚོང་པ་སྦུ་བུ་ཅན་ཞེས་བྱ་བ་ན་བཞུགས་སོ། །དེའི་ཚེ་ན་ཁྱིམ་བདག་གཞན་ཞིག་བདག་ཉིད་དང་། བདག་ཉིད་མོས། བདག་ཉིད་དགའ་ནས་གཙུག་ལག་ཁང་ཞིག་བརྩིགས་ཏེ། ཚེ་དང་ལྡན་པ་སྒྲ་ཅན་འཛིན་གང་ཟག་གཅིག་པུ་ལ་ཕུལ་ལོ། །དེ་ནས་ཚེ་དང་ལྡན་པ་སྒྲ་ཅན་འཛིན་ཇི་སྲིད་ཅིག་གི་བར་དུ་གཙུག་ལག་ཁང་དེར་གནས་ནས་ལྷུང་བཟེད་དང་ཆོས་གོས་ཁྱེར་ཏེ་གཞོངས་སྤྱོད་དུ་སོང་ངོ་། །ཁྱིམ་བདག་དེས་འཕགས་པ་སྒྲ་ཅན་འཛིན་ཇི་སྲིད་ཀྱི་བར་དུ་གཙུག་ལག་ཁང་དེར་གནས་ནས་་་ལྷུང་བཟེད་དང་ཆོས་གོས་ཁྱེར་ཏེ་གཞོངས་སྤྱོད་དུ་སོང་ཞེས་ཐོས་སོ། །དེ་སྐད་ཅེས་ཐོས་ནས་ཁྱིམ་བདག་དེས་གཙུག་ལག་ཁང་དེ་དགེ་འདུན་ལ་ཕུལ་ལོ། །དེ་ནས་ཚེ་དང་ལྡན་པ་སྒྲ་ཅན་འཛིན་ཇི་སྲིད་དགའ་བའི་བར་དུ་གཞོངས་སྤྱད་ནས་ལྷུང་བཟེད་དང་ཆོས་གོས་ཁྱེར་ཏེ། ཤཱཀྱའི་གྲོང་འདབ་ཚོང་པ་སྦུ་བུ་ཅན་ཞེས་བྱ་བ་གང་ན་བ་དེར་སྤྱོད་ཅིང་སོང་སྟེ། རིམ་བཞིན་དུ་སྤྱོད་པ་སྤྱོད་ཅིང་ཚོང་པ་སྦུ་བུ་ཅན་ཞེས་བྱ་བར་ཕྱིན་པ་དང་། ཚེ་དང་ལྡན་པ་སྒྲ་ཅན་འཛིན་གྱིས་ཁྱིམ་བདག་དེས་གཙུག་ལག་ཁང་དེ་དགེ་འདུན་ལ་ཕུལ་ལོ་ཞེས་ཐོས་སོ། །དེ་སྐད་ཅེས་ཐོས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཚེ་དང་ལྡན་པ་སྒྲ་ཅན་འཛིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འདི་ནི་ཁྱིམ་བདག་གཞན་ཞིག་བདག་ཉིད་དང་། བདག་ཉིད་མོས། བདག་ཉིད་དགའ་ནས་གཙུག་ལག་ཁང་ཞིག་བརྩིགས་ཏེ། བདག་གང་ཟག་གཅིག་པུ་ལ་སྩལ་ནས་གཙུག་ལག་ཁང་དེར་བདག་ཇི་སྲིད་ཅིག་གི་བར་དུ་མཆིས་ཏེ། ལྷུང་བཟེད་དང་ཆོས་གོས་འཚལ་ནས་གཞོངས་སྤྱོད་དུ་མཆིས་པ་དང་། ཁྱིམ་བདག་དེས་

---

^{[མ་དཔེ་གཟིགས་ན་འདིར་གནོན།]}

འཕགས་པ་སྒྲ་ཅན་འཛིན་གཙུག་ལག་ཁང་དེར་ཇི་སྲིད་ཅིག་གི་བར་དུ་འདུག་ནས་ལྷུང་བཟེད་དང་་་ཆོས་གོས་ཁྱེར་ཏེ་གཞོངས་སྤྱོད་དུ་སོང་ངོ་ཞེས་ཐོས་སོ། །དེ་སྐད་ཐོས་པ་དང་། ཁྱིམ་བདག་དེས་ཡང་གཙུག་ལག་ཁང་དེ་དགེ་འདུན་ལ་ཕུལ་ན་བཙུན་པ་དེ་ལ་་་བདག་གིས་ད་ཇི་ལྟར་བགྱི་ཞེས་གསོལ་པ་དང་། སྒྲ་ཅན་འཛིན་ཚུར་ཤོག །ཁྱིམ་བདག་དེ་གང་ན་བ་དེར་སོང་སྟེ་དྲུང་དུ་ཕྱིན་པ་དང་། ཁྱིམ་བདག་དེ་ལ་འདི་སྐད་ཅེས་སྨྲོས་ཤིག །ཁྱིམ་བདག་བདག་གིས་ལུས་དང་ངག་དང་ཡིད་ཀྱིས་ཉེས་པར་གྱུར་པ་ལྟ་ཡོད་དམ་ཞེས་སྨྲོས་ཤིག །བཙུན་པ་དེ་བཞིན་དུ་བགྱིའོ་ཞེས་ཚེ་དང་ལྡན་པ་སྒྲ་ཅན་འཛིན་བཅོམ་ལྡན་འདས་ལས་མཉན་ཏེ། ཁྱིམ་བདག་དེ་གང་ན་བ་དེར་སོང་ནས་ཕྱིན་པ་དང་། ཁྱིམ་བདག་དེ་ལ་འདི་སྐད་ཅེས་སྨྲས་སོ། །ཁྱིམ་བདག་བདག་གིས་ལུས་དང་ངག་དང་ཡིད་ཀྱིས་ཉེས་པར་གྱུར་པ་ལྟ་ཡོད་དམ། འཕགས་པ་སྒྲ་ཅན་འཛིན་གྱིས་ལུས་དང་ངག་དང་ཡིད་ཀྱི་སྒོ་ནས་ཅུང་ཟད་ཙམ་ཡང་ནོངས་པར་གྱུར་པ་མ་མཆིས་སོ། །དེ་ནས་ཚེ་དང་ལྡན་པ་སྒྲ་ཅན་འཛིན་གྱིས་ཁྱིམ་བདག་དེ་ལ་ལེགས་པར་ཤིན་ཏུ་བརྟགས་ཤིང་སྨྲས་ཏེ། བཅོམ་ལྡན་འདས་གང་ན་བ་དེར་སོང་ནས་དྲུང་དུ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གིས་ཁྱིམ་བདག་དེ་ལ་ཁྱིམ་བདག་བདག་གིས་ལུས་དང་ངག་དང་ཡིད་ཀྱིས་ཅུང་ཟད་ཙམ་ཡང་ཉེས་པར་གྱུར་པ་ལྟ་ཡོད་དམ་ཞེས་་་བགྱིས་ན། དེ་འདི་སྐད་ཅེས་འཕགས་པ་སྒྲ་ཅན་འཛིན་ཁྱོད་ཀྱིས་ལུས་དང་ངག་དང་ཡིད་ཀྱི་སྒོ་ནས་ཅུང་ཟད་ཙམ་ཡང་ནོངས་པར་བགྱིས་པ་མ་མཆིས་སོ་ཞེས་མཆིའོ། །དེའི་ཚེ་ན་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་བསིལ་ཡབ་ཐོགས་ཏེ། བཅོམ་ལྡན་འདས་ལ་གཡོབ་ཅིང་འདུག་པ་དང་། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ། ཀུན་དགའ་བོ་སོང་ལ་ཤཱཀྱའི་གྲོང་འདབ་

---

^{[མ་དཔེ་གཟིགས་ན་འདིར་གནོན།]}

ཚོང་པ་སྦུ་བུ་ཅན་ཞེས་བྱ་བ་ན་གནས་ཤིང་འཁོད་པའི་དགེ་སློང་ཐམས་ཅད་འདུན་ཁང་དུ་སྡུས་ཤིག་ཅེས་བཀའ་སྩལ་པ་་་དང་། བཙུན་པ་བཀའ་བཞིན་འཚལ་ལོ་ཞེས་གསོལ་ནས། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལས་མཉན་ཏེ། ཤཱཀྱའི་གྲོང་འདབ་ཚོང་པ་སྦུ་བུ་ཅན་ཞེས་བྱ་བ་ན་དགེ་སློང་ཇི་སྙེད་གནས་ཤིང་འཁོད་པ་དེ་དག་ཐམས་ཅད་འདུན་ཁང་དུ་བསྡུས་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་དུ་བཙུན་པ་བཅོམ་ལྡན་འདས་དུས་ལ་བབ་པར་དགོངས་ན་ཤཱཀྱའི་གྲོང་འདབ་ཚོང་པ་སྦུ་བུ་ཅན་ཞེས་བགྱི་བ་ན། དགེ་སློང་ཇི་སྙེད་གནས་ཤིང་འཁོད་པ་དེ་དག་ཐམས་ཅད་འདུན་ཁང་དུ་འདུས་ནས་མཆིས་སོ་ཞེས་གསོལ་པ་དང་། དེ་ནས་བཅོམ་ལྡན་འདས་འདུན་ཁང་གང་ན་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་མདུན་ན་གདན་བཏིང་བ་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་དག་གང་གིས་གང་ཟག་གཅིག་ལ་སྦྱིན་པ་བྱིན་ཏེ། གཞན་ལ་བྱིན་ན་ཆོས་མ་ཡིན་པར་བྱིན་པ་སྟེ། ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །གཉིས་ལས་མང་བའམ། དགེ་འདུན་ལ་བྱིན་ན་ཡང་ཆོས་མ་ཡིན་པར་བྱིན་པའོ། །ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །དགེ་སློང་དག་གང་གིས་གང་ཟག་གཉིས་ལ་སྦྱིན་པ་བྱིན་པ་གཅིག་ལ་བྱིན་ནམ། གཞན་ལའམ། གཉིས་ལའམ། མང་པོ་ལའམ། དགེ་འདུན་ལ་བྱིན་ན་ཆོས་མ་ཡིན་པར་བྱིན་པའོ། །ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །དགེ་སློང་དག་གང་གིས་གང་ཟག་མང་པོ་ལ་སྦྱིན་པ་བྱིན་ན་གཅིག་ལ་བྱིན་ནམ། གཉིས་ལའམ། མང་པོ་གཞན་ལའམ། དགེ་འདུན་ལ་བྱིན་ན་ཆོས་མ་ཡིན་པར་བྱིན་པའོ། །ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །དགེ་འདུན་ལ་

---

^{[མ་དཔེ་གཟིགས་ན་འདིར་གནོན།]}

བྱིན་ཏེ་གང་ཟག་གཅིག་ལ་བྱིན་ནམ། གཉིས་ལའམ། མང་པོ་ལ་བྱིན་ནམ། དགེ་འདུན་གཞན་ལ་བྱིན་ན་ཆོས་མ་ཡིན་པར་བྱིན་པའོ། །ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །དེ་བཞིན་གཤེགས་པའི་ཉན་ཐོས་ཀྱི་དགེ་འདུན་དག་བྱེ་སྟེ། ཕྱོགས་དང་ཕྱོགས་མ་ཡིན་པར་གནས་པ་ལས་ཕྱོགས་གཅིག་ལ་སྦྱིན་པ་དེ་གཞན་ལ་བྱིན་ན་ཆོས་མ་ཡིན་པར་བྱིན་པའོ། །ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །དགེ་སློང་དག་གང་གིས་གང་ཟག་གཅིག་ལ་སྦྱིན་པ་བྱིན་པ་གཞན་ལ་མ་བྱིན་ན་ཆོས་བཞིན་དུ་བྱིན་པའོ། །ཆོས་བཞིན་དུ་བླངས་པའོ། །རུང་བར་སྤྱོད་པའོ། །གཉིས་ལ་མ་ཡིན། མང་པོ་ལ་མ་ཡིན། དགེ་འདུན་ལ་མ་བྱིན་ན་ཆོས་བཞིན་དུ་བྱིན་པའོ། །རུང་བར་སྤྱོད་པའོ། །དགེ་སློང་དག་གང་གིས་གང་ཟག་གཉིས་ལ་སྦྱིན་པ་བྱིན་པ་དེ་གཅིག་ལ་མ་ཡིན། གཞན་ལ་མ་ཡིན། མང་པོ་ལ་མ་ཡིན། དགེ་འདུན་ལ་མ་བྱིན་ན་ཆོས་བཞིན་དུ་བྱིན་པའོ། །ཆོས་བཞིན་དུ་བླངས་པའོ། །རུང་བར་སྤྱོད་པའོ། །དགེ་སློང་དག་གང་གིས་གང་ཟག་མང་པོ་ལ་སྦྱིན་པ་བྱིན་པ་དེ་གཅིག་ལ་མ་བྱིན་གཉིས་ལའམ། མང་པོ་གཞན་ལའམ། དགེ་འདུན་ལ་མ་བྱིན་ན་ཆོས་བཞིན་དུ་བྱིན་པའོ། །ཆོས་བཞིན་དུ་བླངས་པའོ། །རུང་བར་སྤྱོད་པའོ། །དགེ་སློང་དག་གང་གིས་དགེ་འདུན་ལ་སྦྱིན་པ་བྱིན་པ་དེ་གང་ཟག་གཅིག་ལ་མ་བྱིན། གཉིས་ལའམ། མང་པོའམ། དགེ་འདུན་གཞན་ལ་མ་བྱིན་ན་ཆོས་བཞིན་དུ་བྱིན་པའོ། །ཆོས་བཞིན་དུ་བླངས་པའོ། །རུང་བར་སྤྱོད་པའོ། །ཡང་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་སྟེ། ཕྱོགས་དང་ཕྱོགས་མ་ཡིན་པར་གནས་པ་ལ་ཕྱོགས་གཅིག་ལ་སྦྱིན་པ་བྱིན་པ་དེ་གཞན་ལ་མ་བྱིན་ན་ཆོས་བཞིན་དུ་བྱིན་པའོ་ཆོས་བཞིན་དུ་བླངས་པའོ། །རུང་བར་སྤྱོད་པའོ། །དགེ་སློང་དག་རྒྱལ་པོ་ནི་ས་གཞི་ལ་དབང་ངོ་། །བདག་པོ་ནི་མལ་སྟན་ལ་དབང་ངོ་། །དགེ་སློང་ནི་ལྷུང་བཟེད་དང་ཆོས་གོས་ལ་དབང་ངོ་། །སྦྱིན་

---

^{[མ་དཔེ་གཟིགས་ན་འདིར་གནོན།]}

པ་བྱེད་པ་དང་། སྦྱིན་པའི་བདག་པོ་ནི་བདག་གིས་བྱིན་པའི་ཆོས་རྣམས་ལ་སླར་འཆོས་པའི་རིགས་ཀྱི་གཞན་ལ་སྦྱིན་པར་ནི་མ་ཡིན་ནོ། །དེ་ཅིའི་ཕྱིར་ཞེ་ན། དགེ་སློང་དག་སྦྱིན་པ་ནི་སྔ་མ་ཡིན་ཏེ། ཕྱི་མ་ནི་མ་ཡིན་ནོ། །དེ་བས་ན་སྒྲ་ཅན་འཛིན་ལ་གཙུག་ལག་ཁང་སླར་བྱིན་ཅིག །དགེ་སློང་དག་གང་གིས་སྦྱིན་པ་གཞན་ལ་བྱིན་པ་དེ་ཡང་གཞན་ལ་བྱིན་ན། དེ་ལྟ་བུའི་རྐྱེན་མ་གཏོགས་ཏེ། འདས་པ་དང་བཅས་པར་འགྱུར་རོ། །དགེ་སློང་དག་གིས་ཀྱང་ཚེ་དང་ལྡན་པ་སྒྲ་ཅན་འཛིན་ལ་གཙུག་ལག་ཁང་སླར་བྱིན་ནོ།། །།འདུལ་བ་གཞུང་དམ་པ། བམ་པོ་སུམ་བཅུ་རྩ་གཉིས་པ། གླེང་གཞི་ནི་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་ལོ་ལྔ་པ་དང་། ལོ་དྲུག་པ་དང་། གཙུག་ལག་ཁང་གི་དུས་སྟོན་དང་། དུས་སྟོན་ཆེན་པོ་དག་བྱོས་ཤིག་ཅེས་གསུངས་པ་དང་། བྲམ་ཟེ་དང་ཁྱིམ་བདག་དག་གིས་ཀྱང་དེ་བཞིན་བྱེད་དོ། །དེར་ཡུལ་སོ་སོ་ན་གནས་པའི་དགེ་སློང་དག་ཀྱང་འདུས་ནས་དེ་དག་ལ་བྲམ་ཟེ་་་དང་ཁྱིམ་བདག་དད་པ་ཅན་དག་གིས་བཅའ་བ་མང་དུ་བྱིན་པ་དང་། དེ་དག་གིས་ཅུང་ཟད་ཅིག་ཟོས་ནས་ལྷག་མ་དེ་དགེ་ཚུལ་ཕ་དག་ལ་བྱིན་ནོ། །དེ་དག་གིས་ཀྱང་ཕྱི་དེ་ཉིན་དགེ་སློང་དེ་དག་ལ་དེ་ཉིད་བྱིན་ལེན་བྱས་པ་དང་། དེ་དག་གིས་དགེ་ཚུལ་ཕ་དག་ལ་ཁྱེད་ཅག་གི་བཟའ་བ་འདི་གང་ནས་འོངས་ཞེས་དྲིས་པ་དང་། དེ་དག་གིས་སྨྲས་པ། ཁྱེད་ཅག་གིས་ཁར་རྩང་་བདག་ཅག་ལ་བྱིན་པ་དེ་ཉིད་ལགས་སོ། །དགེ་སློང་རྣམས་ཀྱིས་ངེད་ཀྱིས་འདི་ཁྱེད་ལ་བྱིན་པ་ཡིན་ནོ། །ཞེས་སྨྲས་ཏེ་ཐེ་ཚོམ་དུ་གྱུར་ནས་མི་ལེན་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རེ་བ་ཡོད་བཞིན་དུ་དེས་བྱིན་ལ་རེ་བ་ཡོད་བཞིན་དུ་སླར་ཟོས་ན་དེ་དག་གིས་བྱིན་ན་ནི་ཉེས་བྱས་ཏེ། ཟོས་ན་ལྟུང་བའོ། །རེ་བ་ཡོད་བཞིན་དུ་དེས་བྱིན་ལ་རེ་བ་མེད་བཞིན་དུ་སླར་ཟོས་ན་དེ་དག་གིས་བྱིན་པའི་ཚེ་ནི་ཉེས་བྱས། ཟོས་ན་ཉེས་པ་མེད་དོ། །དེས་རེ་བ་མེད་བཞིན་དུ་བྱིན་ལ་རེ་བ་ཡོད་བཞིན་དུ་

---

^{[མ་དཔེ་གཟིགས་ན་འདིར་གནོན།]}

ཟོས་ན་དེ་དག་གིས་བྱིན་པའི་ཚེ་ནི་ཉེས་པ་མེད། ཟོས་ན་ལྟུང་བའོ། །རེ་བ་མེད་བཞིན་དུ་བྱིན་ལ་རེ་བ་མེད་བཞིན་དུ་ཟོས་ན་དེ་དག་གིས་བྱིན་པའི་ཚེ་ཡང་་་ཉེས་པ་མེད་ལ་ཟ་བའི་ཚེ་ཡང་ཉེས་པ་མེད་དོ། །གླེང་གཞིའི་སྒོ་དང་པོའི་མདོའི་ཚིགས་སུ་བཅད་པ་བཅུ་པ་རྫོགས་ཏེ། སྒོ་དང་པོ་རྫོགས་སྷོ།། །།

གླེང་གཞིའི་སྒོ་གཉིས་པ་བཤད་པ།

---

^{[མ་དཔེ་གཟིགས་ན་འདིར་གནོན།]}

མདོར་བསྡུས་པ་སྟེ། བསྒོ་བ་དང་ཡང་བསྒྲགས་པ་དང་། །མ་བཏིང་བ་ཡང་དེ་བཞིན་ཏེ། །བསླབ་པ་བྱིན་དང་ལས་བྱེད་དང་། །བཟོད་པར་བྱ་དང་བསྐྲད་པ་དང་། །ཆོས་དང་མཉམ་པའི་ཚུལ་བཞིན་ཏེ། །རྩིག་པ་ཆད་པས་གཅད་པ་དང་། །མདོ་རྣམས་བསྡུས་པའི་གཉིས་པ་འོ། །མདོར་ན། བསྒོ་བ་དྲིས་ལ་ལན་གློན་པའི། །དགེ་སློང་དུས་ལས་འདས་པ་སྟེ། །མཉན་དུ་ཡོད་ན་རྩོད་པ་དང་། །དགེ་འདུན་གཉིས་དང་ཆོས་གོས་སོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་དུ་ཡོད་པ་ན་ཁྱིམ་བདག་གཞན་ཞིག་འདུག་པ་དེས་རིགས་མཉམ་པ་ལས་ཆུང་མ་ཞིག་བླངས་ནས་དེ་དེ་དང་ལྷན་ཅིག་ཏུ་རྩེ་་་དགའ་ཡོངས་སུ་སྤྱོད་དོ། །དེ་རྩེ་དགའ་ཞིང་ཡོངས་སུ་སྤྱད་པ་ལས་དེའི་ཆུང་མ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་དང་བུ་ཕོ་ཞིག་བཙས་ཏེ། དེ་ཞག་བདུན་གསུམ་ཉི་ཤུ་རྩ་གཅིག་གི་བར་དུ་བཙས་པའི་བཙས་སྟོན་ཆེན་པོ་རྒྱ་ཆེར་བྱས་ནས་རིགས་དང་མཐུན་པར་མིང་བཏགས་སོ། །དེ་དུས་ཕྱི་ཞིག་ན། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས། དེ་ཡང་དུས་ཕྱི་ཞིག་ན་ནད་ཀྱིས་བཏབ་སྟེ། དུས་ལས་འདས་པ་དང་། དགེ་སློང་དག་གིས་དེ་ལྷུང་བཟེད་དང་། ཆོས་གོས་དང་བཅས་ཏེ་དུར་ཁྲོད་དུ་བོར་བ་བྲམ་ཟེ་དང་ཁྱིམ་བདག་ལམ་དེར་བྱུང་བ་དོང་བ་དེ་དག་གིས་མཐོང་ནས། དེ་དག་གཅིག་ལ་གཅིག་གཏམ་དུ་འཛེར་ཅིང་འདོང་སྟེ། ཀྱེ་བདག་ཅག་ཁྱིམ་པ་ཁྱིམ་ན་གནས་པས་ཐབས་རྣམ་པ་དུ་མས་ནོར་རྫས་དག་བསྒྲུབས་ཀྱང་སྣོད་སྤྱད་དང་གོས་དག་ནི་མི་འདོར་ན་དགེ་སྦྱོང་ཤཱཀྱའི་བུ་འདི་

---

^{[མ་དཔེ་གཟིགས་ན་འདིར་གནོན།]}

དག་ནི་སྒོའི་ཐེམ་པ་བརྒྱ་རྒལ་ཞིང་དཀའ་བཞིན་དུ་ལྟོ་འགེངས་ཤིང་བསོད་སྙོམས་སྒྲུབ་ན་ཅིའི་ཕྱིར་ལྷུང་བཟེད་དང་ཆོས་གོས་འདོར་ཞེས་སྨྲ་བ་ན་དགེ་སློང་དག་ཀྱང་དེའི་མདུན་ནས་ཚུར་འོངས་པ་དང་། དེ་དག་གིས་དེ་དག་ལ་སྨྲས་པ། འཕགས་པ་བདག་ཅག་ཁྱིམ་པ་ཁྱིམ་ན་གནས་ཏེ། ཐབས་རྣམ་པ་དུ་མས་ནོར་རྫས་བསྒྲུབས་ཀྱང་སྣོད་སྤྱད་དང་གོས་མི་འདོར་ན་ཁྱེད་ཅག་སྒོའི་ཐེམ་པ་བརྒྱ་རྒལ་ཞིང་དཀའ་བཞིན་དུ་ལྟོ་འགེངས་པའི་བསོད་སྙོམས་བསྒྲུབས་ཏེ། ལྷུང་བཟེད་དང་ཆོས་གོས་འདི་ག་ལས་འོང་ན་དེ་ཅིའི་ཕྱིར་ཁྱེད་ཀྱིས་དགེ་སློང་འདིའི་ལྷུང་བཟེད་དང་ཆོས་གོས་སུ་བཅས་ཏེ་དུར་་་ཁྲོད་དུ་བོར་ཞེས་སྨྲས་པ་དང་། དེ་དག་གིས་བཅོམ་ལྡན་འདས་ཀྱིས་མ་གནང་ངོ་ཞེས་སྨྲས་པ་དང་། དེ་དག་ཅང་མི་ཟེར་བར་དོང་ངོ་། །དེ་ལྟར་གྱུར་པ་དགེ་སློང་དག་ལ་སྨྲས་པ་དང་། དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་དང་ཆོས་གོས་སུ་བཅས་ཏེ་མ་དོར་ཅིག །བཅོམ་ལྡན་འདས་ཀྱིས་ལྷུང་བཟེད་དང་ཆོས་གོས་སུ་བཅས་ཏེ་མ་དོར་ཅིག་ཅེས་གསུངས་པ་དང་། དགེ་སློང་དག་གིས་གཅེར་བུར་བོར་ནས། བཅོམ་ལྡན་འདས་ཀྱིས་བཀའ་སྩལ་པ། གཅེར་བུར་མ་དོར་བར་སྨད་གཡོགས་དང་རྔུལ་གཟན་གྱིས་དཀྲིས་ཏེ་བོར་ཅིག །དེ་ནས་དགེ་སློང་དག་གིས་གོས་བཟང་པོ་དང་བོར་ནས་བཅོམ་ལྡན་འདས་ཀྱིས་བཟང་པོ་དང་མ་དོར་ཅིག་ཅེས་་་བཀའ་སྩལ་པ་དང་དེ་དག་གིས་ངན་པ་དང་བོར་རོ། །བཅོམ་ལྡན་འདས་ཀྱིས་ངན་པ་ཡང་མ་དོར་བར་འབྲིང་པོ་དང་བོར་ཅིག་ཅེས་བཀའ་སྩལ་ཏོ། །བཅོམ་ལྡན་འདས་ཀྱིས་ལྷུང་བཟེད་དང་ཆོས་གོས་སུ་བཅས་ཏེ་མ་དོར་ཅིག་ཅེས་བཀའ་་་སྩལ་པ་དང་། དགེ་སློང་དག་གིས་ཇི་ལྟར་བྱ་བ་མི་ཤེས་ནས། བཅོམ་ལྡན་འདས་ཀྱིས་དགེ་སློང་གང་ཕོངས་པ་དེ་ལ་བྱིན་ཅིག་ཅེས་བཀའ་སྩལ་ཏོ། །དྲུག་སྡེ་དག་རྟག་ཏུ་ཕོངས་པ་ལྟར་བྱེད་ནས། བཅོམ་ལྡན་འདས་ཀྱིས་དྲུག་སྡེ་དག་ལ་མ་སྦྱིན་པར་ཇི་ལྟར་རྒན་རིམས་བཞིན་དུ་བྱིན་ཅིག་ཅེས་བཀའ་སྩལ་པ་

---

^{[མ་དཔེ་གཟིགས་ན་འདིར་གནོན།]}

དང་། གསར་བུ་དག་མ་ཐོབ་པར་གྱུར་ནས་བཅོམ་ལྡན་འདས་ཀྱིས་དྲིས་པ་ལ་ལན་འདེབས་པའི་དགེ་སློང་གིས་དགེ་འདུན་ལ་བསྒོ་ལ་དགེ་སློང་གི་དགེ་འདུན་ཐམས་ཅད་འདུས་ཤིང་འཁོད་པ་དང་། གཙུག་ལག་ཁང་སྐྱོང་གིས་དགེ་འདུན་གྱི་ནང་དུ་རིན་ཐང་བསྐྱེད་པར་བྱོས་ཤིག་ཅེས་བཀའ་སྩལ་ཏོ། །གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་དགེ་སློང་གཞན་ཞིག་དུས་འདས་ནས་དེའི་ལྷུང་བཟེད་དང་ཆོས་གོས་དགེ་སློང་མ་ཞིག་གི་ལག་ཏུ་བཞག་གོ །དགེ་སློང་དག་གིས་དེའི་རོ་བསྲེགས་ནས་སླར་གཙུག་ལག་ཁང་དུ་ཕྱིན་ནས་ལྷུང་བཟེད་དང་ཆོས་གོས་དག་བཙལ་ན་མ་རྙེད་དེ། དེ་དག་གིས་དགེ་སློང་མའི་དབྱར་མོ་ཁང་ན་དགེ་སློང་མ་མིང་འདི་ཞེས་བྱ་བ་ཞིག་ལ་ཡོད་པར་ཤེས་ནས་དེ་དག་གིས་དགེ་སློང་མའི་དབྱར་མོ་ཁང་དུ་དོང་སྟེ། འཕགས་མ་དགེ་སློང་འདི་ཞེས་བྱ་བ་དུས་འདས་པ་དེའི་ལྷུང་བཟེད་དང་ཆོས་གོས་འདི་ན་་་གཏམས་ཤིང་འདུག་པ་དེ་ཚུར་བྱིན་ཅིག་ཅེས་སྨྲས་པ་དང་། དེས་སྨྲས་པ། འཕགས་པ་དགེ་སློང་དེ་གང་དུ་དུས་འདས་ངེད་ཀྱི་གཙུག་ལག་ཁང་དུ་དུས་ལས་འདས་སོ། །འཕགས་པ་ཁྱེད་ཀྱི་དེ་ན་མཆིས་པ་ནི་ཁྱེད་དབང་། བདག་ཅག་གི་དེ་ན་མཆིས་པ་ནི་བདག་ཅག་དབང་ངོ་། །ཇི་ལྟར་ཞེ་ན། བདག་ཅག་གི་ཡང་ཆོས་ཀྱི་མིང་པོ་ལགས་སོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགེ་སློང་གི་ལྷུང་བཟེད་དང་ཆོས་གོས་ནི་དགེ་སློང་དག་དབང་གིས་དགེ་སློང་མ་དག་མ་་་འཆང་ཤིག་ཅེས་བཀའ་སྩལ་ཏོ། །མཉན་དུ་ཡོད་པ་ན་དགེ་སློང་མ་གཞན་ཞིག་དུས་ལས་འདས་ནས་དེའི་ལྷུང་བཟེད་དང་ཆོས་གོས་དགེ་སློང་ཞིག་ལ་བཞག་གོ །དགེ་སློང་མ་དག་གིས་དེའི་རོ་བསྲེགས་ནས། དགེ་སློང་མའི་དབྱར་མོ་ཁང་དུ་ལྷགས་ཏེ། ལྷུང་བཟེད་དང་ཆོས་གོས་བཙལ་ན་མ་རྙེད་ནས་གཙུག་ལག་ཁང་ཞིག་ན་དགེ་སློང་མིང་འདི་ཞེས་བྱ་བ་ཞིག་ལ་ཡོད་པར་ཤེས་ནས། དེ་དག་གཙུག་ལག་ཁང་དུ་འོངས་ཏེ་དགེ་སློང་དག་

---

^{[མ་དཔེ་གཟིགས་ན་འདིར་གནོན།]}

གི་རྐང་པ་ལ་ཕྱག་འཚལ་ནས། འཕགས་པ་དགེ་སློང་མ་མིང་འདི་ཞེས་བགྱི་བ་དུས་ལས་འདས་ཏེ། དེའི་ལྷུང་བཟེད་དང་ཆོས་གོས་འདི་ན་མཆིས་ན། དེ་བདག་ཅག་འཚལ་གྱིས་སླར་སྩོལ་ཅིག་ཅེས་སྨྲས་པ་དང་། དེས་སྨྲས་པ། དགེ་སློང་མ་དེ་གང་དུ་དུས་ལས་འདས། བདག་ཅག་གི་དབྱར་མོ་ཁང་དུ་དུས་ལས་འདས་སོ། །དེ་ལྟར་ན་འཕགས་མ་ཁྱེད་ཀྱི་དེ་ན་འདུག་པ་ནི་ཁྱེད་དབང་མོད། ངེད་ཀྱི་དེ་ན་ཡོད་པ་ནི་ངེད་དབང་བ་སྟེ། དེ་ཡང་ངེད་ཀྱི་ཆོས་ཀྱི་སྲིང་མོ་ཡིན་ནོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་མ་དག་གིས་དགེ་སློང་དག་ལ་སྨྲས་པ་དང་། དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དེ་སྟེ་དགེ་སློང་མའི་ལྷུང་བཟེད་དང་ཆོས་གོས་ཡིན་ན་དེ་དགེ་སློང་མ་དག་གི་ཡིན་ཏེ། དགེ་སློང་མ་དག་དབང་བས་ན་དགེ་སློང་དག་མ་འཆང་ཤིག་ཅེས་བཀའ་སྩལ་ཏོ། །གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་དགེ་སློང་གཞན་ཞིག་གཞོངས་སྤྱད་པ་སྤྱོད་ཅིང་རི་བྲགས་ཀྱི་གྲོང་གཞན་ཞིག་ཏུ་ཕྱིན་ནས། དེ་ཁྱིམ་པའི་ཁྱིམ་ཞིག་ཏུ་དུས་ལས་འདས་ཏེ། དེ་དེས་དུར་ཁྲོད་དུ་བོར་ནས་ལྷུང་བཟེད་དང་ཆོས་གོས་སྦས་ཏེ་བཞག་གོ །དུས་ཕྱི་ཞིག་ན་དགེ་སློང་མ་མང་ཞིག་གཞོངས་སྤྱད་པ་སྤྱོད་ཅིང་རི་བྲགས་ཀྱི་གྲོང་དེར་ཕྱིན་པ་དང་། ཁྱིམ་བདག་དེས་དེ་དག་མཐོང་སྟེ། འཕགས་མ་བདག་གི་ཁྱིམ་དུ་དགེ་སློང་ཞིག་དུས་ལས་འདས་པའི་ལྷུང་བཟེད་དང་ཆོས་གོས་འདི་ལགས་ཀྱིས་སྣོམས་ཤིག་ཅེས་སྨྲས་པ་དང་། དེ་དག་གིས་སྨྲས་པ། ཁྱིམ་བདག་འདི་ནི་བཅོམ་ལྡན་འདས་ཀྱིས་མ་གནང་བས་དགེ་སློང་དབང་ངོ་། །དེ་ལྟར་གྱུར་པ་དགེ་སློང་མ་དག་གིས་དགེ་སློང་དག་ལ་སྨྲས་སོ། །དགེ་སློང་དག་གིས་བཅོམ་ལྡན་འདས་་་ལ་གསོལ་པ་དང་། བཅོམ་ལྡན་འདས་ཀྱིས་གང་ན་དགེ་སློང་མེད་པ་དེ་དག་ཏུ་་ནི་དགེ་སློང་མ་དག་གིས་བླང་བར་བྱ་སྟེ། དེ་ལ་ཐེ་ཚོམ་མ་བྱེད་ཅིག་ཅེས་་་བཀའ་སྩལ་ཏོ། །གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པར་

---

^{[མ་དཔེ་གཟིགས་ན་འདིར་གནོན།]}

དགེ་སློང་མ་མང་ཞིག་གཞོངས་སྤྱད་པ་སྤྱོད་ཅིང་དོང་བ་ན་དེ་དག་ལས་དགེ་སློང་མ་ཞིག་ན་བར་་གྱུར་ནས། དེ་དལ་བུས་འགྲོ་ཞིང་ཕྱི་ནས་འོང་བ་ལས་དེ་ལམ་སྟོར་ཏེ། རི་་་་བྲགས་ཀྱི་གྲོང་གཞན་ཞིག་ཏུ་ཕྱིན་ནས་དེ་ཁྱིམ་པའི་ཁྱིམ་དུ་དུས་ལས་འདས་སོ། །དེས་དེ་དུར་ཁྲོད་དུ་བོར་ནས་ལྷུང་བཟེད་དང་ཆོས་གོས་སྦས་ཏེ་བཞག་གོ །དེ་ནས་དུས་ཕྱི་ཞིག་ན་དགེ་སློང་མང་ཞིག་གཞོངས་སྤྱད་པ་སྤྱོད་ཅིང་རི་བྲགས་ཀྱི་གྲོང་དེར་ཕྱིན་པ་དང་། ཁྱིམ་བདག་དེས་དེ་དག་མཐོང་ནས་འཕགས་པ་དག་བདག་གི་ཁྱིམ་དུ་དགེ་སློང་མ་ཞིག་དུས་ལས་འདས་ཏེ། དེའི་ལྷུང་བཟེད་དང་ཆོས་གོས་འདི་ལགས་ཀྱིས་སྣོམས་ཤིག་ཅེས་སྨྲས་པ་དང་། དེ་དག་གིས་སྨྲས་པ། ཁྱིམ་བདག་བཅོམ་ལྡན་འདས་ཀྱིས་མ་གནང་སྟེ། འདི་དག་ནི་དགེ་སློང་མ་དབང་ངོ་། །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་གང་ན་དགེ་སློང་མ་མེད་པ་དེར་ནི་དགེ་སློང་རྣམས་ཀྱིས་བླང་བར་བྱ་སྟེ། དེ་ལ་ཐེ་ཚོམ་མ་བྱེད་ཅིག་ཅེས་བཀའ་སྩལ་ཏོ། །གླེང་གཞི་ནི་མཉན་དུ་ཡོད་པ་ན་སྟེ། སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་ཞིག་དུས་ལས་འདས་ཏེ། དེ་དབང་བའི་ལྷུང་བཟེད་དང་ཆོས་གོས་ཁྱིམ་པའི་དེ་ན་མཆིས་ན། དེ་གང་དབང་བཅོམ་ལྡན་འདས་ཀྱིས་གང་དེ་སྔར་འོངས་པ་དབང་ངོ་ཞེས་བཀའ་སྩལ་ཏོ། །གཉིས་མཆིས་ན་གང་དབང་། གང་སྔར་བསླངས་པའོ། །གཉིས་ཀས་བསླངས་ན་གང་དབང་། གང་གིས་སྔར་ཐོབ་པའོ། །གཉིས་ཀས་ཐོབ་ན་གཉིས་ཀ་དབང་ངོ་། །དེ་སྟེ་གཉིས་ཀས་ཐོབ་ན་གང་ལ་ཁྱིམ་གྱི་བདག་པོ་དད་དེ་བྱིན་པ་དེ་དབང་ངོ་། །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་ཛེ་ཏའི་ཚལ་ན་དགེ་སློང་གཉིས་ཤིག་འཐབ་པར་གྱུར་ཏེ། དགེ་སློང་གཞན་དག་གིས་བསྐོར་ཅིང་འཁོད་དོ། །བྲམ་ཟེ་དང་ཁྱིམ་བདག་གིས་དེ་མཐོང་ནས། དེ་དག་གིས་འཕགས་པ་བདག་ཅག་གིས་ཁྱིམ་པ་འཐབ་པ་དག་མཐོང་བ་ཡང་བདག་ཅག་གིས་གཅུགས་

---

^{[མ་དཔེ་གཟིགས་ན་འདིར་གནོན།]}

པར་བྱ་ན་ཁྱེད་ཅག་གིས་ཅི་འདི་མི་གཅུགས་པར་བསྐོར་ཏེ་འཁོད་དམ་ཞེས་སྨྲས་པ་དང་། དེ་ན་གཞན་དག་གིས་སྨྲས་པ། འདི་དག་ཉིད་འཐབ་མོ་བྱེད་པ་ཡིན་ན་ཅིའི་ཕྱིར་གཅུགས་ཞེས་སྨྲས་པ་དང་། དེ་དག་ལན་མེད་ནས་ཅང་མི་ཟེར་བར་འཁོད་དོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དེ་དག་ལ་བསྐོར་ཅིང་མ་འཁོད་པར་གཅུགས་པར་བྱོས་ཤིག་ཅེས་བཀའ་སྩལ་པ་དང་། དེ་དག་གཅུགས་ཀྱང་གཏོང་དུ་མ་བཏུབ་ནས། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དེ་སྟེ་གཅུགས་ཀྱང་མ་བཏུབ་ན་སྤང་བའི་ལས་བྱོས་ཤིག་ཅེས་་་བཀའ་སྩལ་ཏོ། །བཅོམ་ལྡན་འདས་ཀྱིས་སྤང་བའི་ལས་བྱོས་ཤིག་ཅེས་བཀའ་སྩལ་པ་དང་། དུས་ཕྱི་ཞིག་ན་དགེ་སློང་གཉིས་ཤིག་ངེས་པའི་གཏམ་བྱེད་དེ། དེ་གཉིས་ན་རེ་འདི་ནི་འཐོབ་པའོ། །འདི་ནི་འཐོབ་པའོ་ཞེས་ངེས་པའི་གཏམ་སྨྲ་བ་ན་གཅིག་ལ་གཅིག་ངག་རྩུབ་པོ་སྨྲས་པ་དང་། དེ་གཉིས་ཀྱང་དགེ་སློང་དག་གིས་སྤང་བའི་ལས་བྱས་ནས། དེ་གཉིས་ཀྱིས་སྨྲས་པ། ཚེ་དང་ལྡན་པ་དག་བདག་ཅག་ནི་ངེས་པའི་གཏམ་སྨྲ་ན་གཅིག་ལ་གཅིག་ངག་རྩུབ་པོ་སྨྲས་སུ་ཟད་ན། ཅིའི་ཕྱིར་ཁྱེད་ཀྱིས་ངེད་གཉིས་ལ་སྤང་བའི་ལས་ཀྱིས་བཅད་ཅེས་སྨྲས་པ་དང་། དེ་དག་གིས་ཚེ་དང་ལྡན་པ་དག་བཅོམ་ལྡན་འདས་ཀྱིས་འཐབ་པ་རྣམས་ལ་སྤང་བའི་ལས་བྱོས་ཤིག་ཅེས་གསུངས་པས་ན་ངེད་ཀྱིས་ཁྱེད་གཉིས་ལ་སྤང་་་བའི་ལས་བྱས་སོ་ཞེས་སྨྲས་པ་དང་། དེ་དག་ཅང་མི་སྨྲ་བར་འཁོད་དོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་གཉིས་ལ་སྤང་བའི་ལས་མི་བྱ་བར་གཅུགས་པར་བྱོས་ཤིག །དེ་སྟེ་གནས་འཆའ་བ་ཞིག་ན་ནི་དེའི་མཁན་པོ་དང་སློབ་དཔོན་གྱིས་སྒོ་ཤིག །དེ་སྟེ་རྒན་པ་ཞིག་ན་ནི་དེས་དགེ་འདུན་ཐམས་ཅད་འདུས་ལ་རྩོད་པ་ཞི་བར་བྱོས་ཤིག །དེ་སྟེ་དེས་ཀྱང་མ་སློན་ན་སྡོད་དེ་གཉིས་ལ་སྤང་བའི་ལས་བྱོས་ཤིག།

---

^{[མ་དཔེ་གཟིགས་ན་འདིར་གནོན།]}

གླེང་གཞི་ནི་མཉན་དུ་ཡོད་པ་ན་སྟེ། སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མཚམས་ཀྱི་བར་དུ་དགེ་སློང་ཞིག་དུས་ལས་འདས་ན་གུམ་པ་དེའི་ཡོ་བྱད་རྣམས་སུ་དབང་བར་འགྱུར། ཨུ་པཱ་ལི་དེ་ནི་མགོ་གང་ལོགས་སུ་བོར་བའོ། །བཙུན་པ་གཉིས་ཀར་མགོ་བོར་ན། གང་དབང་བར་འགྱུར། ཨུ་པཱ་ལི་དེ་ནི་གཉིས་ཀའོ། །གླེང་གཞིའི་སྒོ་གཉིས་པ་སྟེ་ཚིགས་སུ་བཅད་པ་དང་པོའོ།། །།མདོར་ན། བསྒྲག་པར་བྱ་དང་ཤིང་རྟ་དང་། །དེ་ནས་ཕྲེང་བ་གོས་རྣམས་དང་། །དགེ་འདུན་གོས་ཀྱང་དེ་བཞིན་ཏེ། །ཐེ་ཚོམ་སོ་སོའི་སྐྱེ་བོ་འོ། །སངས་རྒྱས་བཅོམ་ལྡན་འདས་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་དུ་ཡོད་པ་ན་ཡ་མཚན་ཅན་དུ་མ་གནས་ཤིང་འཁོད་དོ། །གང་གི་ཚེ་བཅོམ་ལྡན་འདས་མཉན་དུ་ཡོད་པ་ན་བཞུགས་པ་དེའི་ཚེ་ན་མུ་སྟེགས་ཅན་རྣམས་ཀྱི་མཐུ་ཉམས་ནས་རྙེད་པ་ཆུང་བར་གྱུར་ཏེ། དེ་དག་གིས་ཇི་ཙམ་འདོད་པ་བླངས་ནས་མུ་སྟེགས་སུ་བྱ་བ་བྱ་བར་བརྩམས་པ་དང་། ཁྱིམ་བདག་མགོན་མེད་ཟས་སྦྱིན་པ་ཆོས་ཀྱིས་ནང་པར་སྔར་ལངས་ནས་བཅོམ་ལྡན་འདས་ལ་བལྟ་བའི་ཕྱིར་འགྲོའོ། །ཇི་ཙམ་དུས་ཕྱི་ཞིག་ན་ཁྱིམ་བདག་མགོན་མེད་པ་ལ་ཟས་སྦྱིན་པ་ནང་པར་སྔར་ལངས་ནས་ཛེ་ཏའི་ཚལ་དུ་སོང་བ་དང་། མུ་སྟེགས་ཅན་དག་ཅི་འདོད་པ་བླངས་ཏེ། དེ་དག་གིས་དེ་ཡང་དག་པར་བསྐུལ་ནས་དེས་བསམས་པ་འདི་དག་ནི་ངན་དུ་སྨྲ་བའི་ཆོས་དང་འདུལ་བའི་མུ་སྟེགས་ཅན་དག་སྟེ། ཅི་འདོད་པ་དག་བསླངས་ཏེ་མུ་སྟེགས་ཅན་གྱི་བྱ་བ་བྱེད་དེ། བཅོམ་ལྡན་འདས་ཀྱིས་ཀྱང་མདོ་སྡེ་དེ་དང་དེ་དག་ལས་མ་དད་པ་དག་ནི་དད་པ་ཕུན་སུམ་ཚོགས་པར་ཡང་དག་པར་བསྐུལ་བར་བྱོས་ཤིག །གཞུག་པར་བྱོས་ཤིག །དགོད་པར་བྱོས་ཤིག་ཅེས་གསུངས་ཏེ། བཅོམ་ལྡན་འདས་ཀྱིས་རྗེས་སུ་གནང་ན་ནི་བདག་གིས་སྐྱེ་བོ་མང་པོ་དག་ཀྱང་དགེ་འདུན་ལ་ཡོན་འབུལ་བ་ལ་རབ་ཏུ་་་དགོད་དོ་སྙམ་དུ་བསམས་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་

---

^{[མ་དཔེ་གཟིགས་ན་འདིར་གནོན།]}

བོས་ཕྱག་འཚལ་ནས་ཕྱོགས་གཅིག་ཏུ་་་འདུག་གོ །ཕྱོགས་གཅིག་ཏུ་འདུག་ནས་ཁྱིམ་བདག་མགོན་མེད་ཟས་སྦྱིན་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ངན་དུ་སྨྲ་བའི་ཆོས་དང་འདུལ་བའི་མུ་སྟེགས་ཅན་འདི་དག་ཅི་འདོད་པ་བླངས་ནས་མུ་སྟེགས་སུ་བགྱི་བ་བགྱིད་ན། བཅོམ་ལྡན་འདས་ཀྱིས་གནང་ན་ནི་དེ་དང་དེ་དག་ཏུ་ཞེས་བྱ་བ་ནས་དགེ་འདུན་ལ་ཡོན་འབུལ་བར་དགོད་དོ་ཞེས་བྱ་བའི་བར་དུ་སྔ་མ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་ན་ངས་ཁྱིམ་བདག་རྗེས་སུ་་་་གནང་གིས་ཅི་འདོད་པ་བསླངས་ཏེ། སངས་རྒྱས་དང་ཆོས་དང་དགེ་འདུན་ལ་བྱ་བ་བྱེད་པར་བྱོས་ཤིག །བཅོམ་ལྡན་འདས་ཀྱིས་ཅི་འདོད་པ་བླངས་ཏེ། སངས་རྒྱས་དང་ཆོས་དང་དགེ་འདུན་ལ་བྱ་བ་བྱོས་ཤིག་ཅེས་བཀའ་སྩལ་ནས། ཁྱིམ་བདག་མགོན་མེད་ཟས་སྦྱིན་གྱིས་ཡང་དག་པར་བསྐུལ་བར་བརྩམས་པ་དང་། བྲམ་ཟེ་དང་ཁྱིམ་བདག་དག་གིས་འཕགས་པ་དག་ཀྱང་ཡང་དག་པར་བསྐུལ་ན་ནི་བདག་ཅག་ལ་བསོད་ནམས་དེ་བས་ཀྱང་རབ་ཏུ་མང་བར་འགྱུར་རོ་ཞེས་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་ཀྱང་གྲོགས་གྱིས་ཤིག །བྲམ་ཟེ་དང་ཁྱིམ་བདག་དག་གིས་དེ་སྟེ་བདག་ཅག་གི་མིང་ནས་བརྗོད་ན་ནི་ལེགས་པར་འགྱུར་རོ་ཞེས་སྨྲས་པ་དང་། བཅོམ་ལྡན་འདས་ཀྱིས་སྦྱིན་བདག་གིས་བྱིན་ན་བརྗོད་པར་བྱོས་ཤིག་ཅེས་བཀའ་སྩལ་པ་དང་། ཁྱིམ་བདག་གིས་ཀྱང་བརྗོད་པར་བྱས་ནས་བྲམ་ཟེ་དང་ཁྱིམ་བདག་གིས་དེ་སྟེ་འཕགས་པ་དག་གིས་བརྗོད་ན་ནི་བདག་ཅག་ལ་དེ་བས་ཀྱང་བསོད་ནམས་མང་དུ་འགྱུར་རོ་ཞེས་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་ཀྱང་བརྗོད་པར་བྱོས་ཤིག །བྲམ་ཟེ་དང་ཁྱིམ་བདག་དག་གཙུག་ལག་ཁང་དུ་འོངས་ནས་ཕུལ་བ་དང་། བཅོམ་ལྡན་འདས་ཀྱིས་གཙུག་ལག་ཁང་དུ་ཡང་བརྗོད་པར་བྱོས་ཤིག་ཅེས་བཀའ་སྩལ་ཏོ། །རྗོད་པར་བྱེད་པ་དེ་སྐྱེ་བོ་མང་པོ་དག་གིས་བསྐོར་ནས་མི་སྣང་བར་གྱུར་པ་དང་། བཅོམ་ལྡན་འདས་

---

^{[མ་དཔེ་གཟིགས་ན་འདིར་གནོན།]}

ཀྱིས་ཤིང་རྟའི་སྟེང་དུ་འཛེགས་ལ་བརྗོད་ཅིག་ཅེས་བཀའ་སྩལ་པ་དང་། ཚ་བ་དང་ཆར་པ་དང་རླུང་རྣམས་བྱུང་བར་གྱུར་ནས། བཅོམ་ལྡན་འདས་ཀྱིས་ཁང་བུ་རྩེག་མ་བྱོས་ཤིག་ཅེས་བཀའ་སྩལ་ཏོ། །སྐྱེ་བོ་མང་པོ་དག་གིས་སྒོ་བསྒྲིབས་པས་ན། བཅོམ་ལྡན་འདས་ཀྱིས་བཀའ་སྩལ་པ། སྒོ་བཞི་ཐོད་ལ་བརྗོད་པ་བཞི་ཞོག་ཤིག །དེ་ནས་ཁྱིམ་བདག་མགོན་མེད་ཟས་སྦྱིན་ཅི་འདོད་པ་བླངས་ནས་གོས་ཟུང་མང་པོ་གོས་ཟུང་བརྒྱ་སྟོང་མང་པོ་རྣམས་བསོགས་པ་དང་། དེས་འདི་སྙམ་དུ་གོས་མང་ཞིག་ཚོགས་ཀྱིས་ད་ནི་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་དག་བཤོས་གསོལ་ལ་སངས་རྒྱས་ལ་སོགས་པ་དགེ་སློང་གི་དགེ་འདུན་རྒན་རིམས་སུ་ཡོན་དབུལ་ལོ་སྙམ་བསམས་ནས། དེས་ཛེ་ཏའི་ཚལ་གོས་སྣ་ཚོགས་ཀྱིས་བརྒྱན་ཏེ་གོས་ཀྱི་ཕྲེང་བས་སྟེང་ཀུན་ཏུ་སྦྱངས་ནས་སྲུང་མ་ཡང་་་བཞག་སྟེ། མཛའ་བོ་དང་གཉེན་དང་ཕུ་ནུ་དག་ཀྱང་མགྲོན་དུ་བོས་སོ། །དེ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྦྱར་ནས་བཅོམ་ལྡན་་་འདས་དང་དགེ་སློང་གི་དགེ་འདུན་དུ་བཅས་ཏེ། ཛེ་ཏའི་ཚལ་དུ་བཤོས་ལ་སྤྱན་དྲངས་སོ། །དེ་ནང་པར་སྔར་ལངས་ཏེ་གདན་བཏིང་ནས་བུམ་པ་ཆུས་བཀང་སྟེ་བཞག་ནས། བཅོམ་ལྡན་འདས་དང་ཉན་ཐོས་ཀྱི་དགེ་འདུན་དུ་བཅས་ཏེ་བཤོས་གསོལ་ནས། བཅོམ་ལྡན་འདས་ལ་བཙུན་པ་འཇིག་རྟེན་ན་ཡོན་གནས་སུ་མཆིས་ཞེས་ཞུས་པ་དང་། ཁྱིམ་བདག་གཉིས་ཏེ་སློབ་པ་དང་མི་སློབ་པའོ། །དེ་ལ་ཡང་ཁྱིམ་བདག་སློབ་པ་ལ་རྣམ་པ་བཅྭ་བརྒྱད་ཡོད་དོ། །མི་སློབ་པ་ལ་རྣམ་པ་དགུའོ། །སློབ་པ་རྣམ་པ་བཅྭ་བརྒྱད་པོ་གང་ཞེ་ན། རྒྱུན་དུ་འཇུག་པའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང་། རྒྱུན་དུ་ཞུགས་པ་དང་། ལན་གཅིག་ཕྱིར་འོང་བའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང་། ལན་་་་གཅིག་ཕྱིར་འོང་བ་དང་། ཕྱིར་མི་འོང་བའི་འབྲས་བུ་མངོན་དུ་བྱ་བའི་ཕྱིར་་་ཞུགས་པ་དང་། ཕྱིར་མི་འོང་བ་དང་། དགྲ་བཅོམ་པའི་འབྲས་བུ་མངོན་དུ་བྱ་བའི་ཕྱིར་ཞུགས་པ་དང་། དད་པས་རྗེས་སུ་འབྲང་བ་དང་།

---

^{[མ་དཔེ་གཟིགས་ན་འདིར་གནོན།]}

ཆོས་ཀྱི་རྗེས་སུ་འབྲང་བ་དང་། དད་པས་རྣམ་པར་གྲོལ་བ་དང་། ལྟ་བས་ཐོབ་པ་དང་། གོང་ནས་གོང་དུ་འགྲོ་བ་དང་། ཚེ་གཅིག་གིས་ཐོགས་པ་དང་། བར་མ་དོར་མྱ་ངན་ལས་འདའ་བ་དང་། སྐྱེས་མ་ཐག་ཏུ་མྱ་ངན་ལས་འདའ་བ་མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་དང་། མངོན་པར་འདུས་མ་བྱས་པས་ཡོངས་སུ་མྱ་ངན་ལས་འདའ་བ་དང་། གོང་དུ་འཕར་བ་རྣམས་ཏེ་འདི་དག་ནི་སློབ་པ་བཅྭ་བརྒྱད་ཅེས་བྱའོ། །མི་སློབ་པ་དགུ་གང་ཞེ་ན། ཆོས་འགྲིབས་པ་དང་། ཆོས་མ་འགྲིབས་པ་དང་། གསང་བའི་ཆོས་དང་། རྗེས་སུ་སྲུང་བའི་ཆོས་དང་། མི་གཡོ་བར་འདུག་པ་དང་། སོ་སོར་རྟོགས་ནས་སྐལ་བ་ཅན་དུ་མི་འགྱུར་བ་དང་། མི་བསྐྱོད་པའི་ཆོས་དང་། ཤེས་རབ་ཀྱིས་རྣམ་པར་གྲོལ་བ་དང་། གཉིས་ཀའི་ཆ་ལས་རྣམ་པར་གྲོལ་བ་འདི་དག་ནི་མི་སློབ་པ་དགུ་ཞེས་བྱའོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་སོ། །བདེ་བར་གཤེགས་པས་དེ་སྐད་གསུངས་ནས། སྟོན་པས་ཡང་གསུངས་པ། ལུས་དང་ངག་ཡིད་དྲང་པོར་གྱུར་པ་ཡི། །སློབ་དང་མི་སློབ་འཇིག་རྟེན་འདི་ན་བཞུགས། །དེ་དག་སྦྱིན་ཞིང་མཆོད་པར་འོས་པ་སྟེ། །མཆོད་པའི་ཞིང་རབ་དེར་བྱིན་འབྲས་བུ་ཆེ། །དེ་ནས་ཁྱིམ་བདག་མགོན་མེད་ཟས་སྦྱིན་རྒན་རིམས་་ཀྱི་མདུན་དུ་འདུག་སྟེ། བརྗོད་པ་བསྐོས་ནས་འཕགས་པ་བརྗོད་པའི་ཚེ་འདི་སྐད་དུ་གང་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ལ་སྦྱིན་པར་རིགས་པ། རབ་ཏུ་སྦྱིན་པར་རིགས་པ། ཐལ་མོ་སྦྱར་བར་རིགས་པ། ཕྱག་བྱ་བར་རིགས་པ། བླ་ན་མེད་པའི་བསོད་ནམས་ཀྱི་ཞིང་འཇིག་རྟེན་གྱི་ཡོན་གནས་སུ་གྱུར་པ་གང་ཡིན་པ་དེ་དག་ལ་གོས་འདི་དག་འབུལ་གྱིས་ཅི་བདེར་བཞེས་ཤིག་་ཅེས་གསུང་ཤིག །དེ་ནས་དགེ་སློང་རྗོད་པར་བྱེད་པ་དེས་རྒན་རིམས་ཀྱི་མདུན་དུ་འདུག་ལ་འདི་སྐད་དུ་གསོན་ཅིག །བཙུན་པའི་དགེ་འདུན་རྣམས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་སྦྱིན་པར་རིགས་པ། རབ་ཏུ་སྦྱིན་པར་རིགས་པ། ཐལ་མོ་སྦྱར་བར་རིགས་པ། ཕྱག་བྱ་

---

^{[མ་དཔེ་གཟིགས་ན་འདིར་གནོན།]}

བར་རིགས་པ། བླ་ན་མེད་པའི་བསོད་ནམས་ཀྱི་ཞིང་། འཇིག་རྟེན་གྱི་ཡོན་གནས་གང་ཡིན་པ་དེ་དག་ལ་གོས་རྙེད་པ་འདི་དག་འབུལ་གྱིས་ཅི་བདེར་བཞེས་ཤིག་ཅེས་བརྗོད་དོ། །དེ་ནས་དགེ་སློང་འདོད་ཆགས་དང་བྲལ་བ་ཞེ་སྡང་དང་བྲལ་བ་གཏི་མུག་དང་བྲལ་བ་གང་ཡིན་པ་དེ་དག་ནི་འདི་སྙམ་དུ་གྱུར་ཏོ། །ཁྱིམ་བདག་མགོན་མེད་ཟས་སྦྱིན་ནི་འདི་སྐད་དུ་བརྗོད་དེ། གང་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་སྦྱིན་པར་རིགས་པ། རབ་ཏུ་སྦྱིན་པར་རིགས་པ། ཐལ་མོ་སྦྱར་བར་རིགས་པ། ཕྱག་བྱ་བར་རིགས་པ། བླ་ན་མེད་པའི་བསོད་ནམས་ཀྱི་ཞིང་འཇིག་རྟེན་གྱི་ཡོན་གནས་དེ་དག་ལ་གོས་རྙེད་པ་རྣམས་འབུལ་གྱིས་ཅི་བདེར་བཞེས་ཤིག་ཅེས་བརྗོད་དེ། བདག་ཅག་ནི་བླ་ན་མེད་པ་ཡིན་པས་ན་བདག་གིས་རྙེད་པ་འདི་དབང་མོད་ཀྱིས། བཅོམ་ལྡན་འདས་ཀྱིས་དགེ་སློང་དག་ཁྱེད་ཀྱིས་དགེ་བ་རྣམས་ནི་བཅབ་པར་བྱའོ། །སྡིག་པ་རྣམས་ནི་བསྒྲག་པར་བྱའོ་ཞེས་གསུངས་ན། བདག་ཅག་གོས་རྙེད་པའི་ཕྱིར་བདག་ཉིད་བརྗོད་པ་ལྟ་ག་ལ་རུང་། བདག་ཅག་ནི་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བའོ་ཞེས་སྨྲས་ནས་ཅང་མི་ཟེར་བར་འཁོད་དོ། །ཀུན་ཏུ་སྦྱོར་བའི་ལྷག་མ་དང་བཅས་པ་གང་ཡིན་པ་དེ་དག་ཀྱང་འདི་སྙམ་དུ། བླ་ན་མེད་པ་ལ་བསྔོས་པས་ན་བདག་ཅག་ནི་ཀུན་ཏུ་སྦྱོར་བའི་ལྷག་མ་དང་བཅས་པ་ཡིན་པས་བདག་ཅག་ནི་མི་དབང་ངོ་སྙམ་བསམས་ནས་ཅང་མི་ཟེར་བར་འཁོད་དོ། །བཅིང་བ་ཐམས་ཅད་ཀྱིས་བཅིངས་པ་གང་ཡིན་པ་དེ་དག་ནི་འདི་སྙམ་དུ། བླ་ན་མེད་པ་ལ་དེ་འབུལ་ལོ་སྙམ་དུ་བསམས་ནས་དེ་དག་ཅང་མི་སྨྲ་བར་འཁོད་དོ། །ཀུན་ཏུ་སྦྱོར་བའི་ལྷག་མ་དང་བཅས་པ་དག་ཀྱང་ཅང་མི་ཟེར་བར་འཁོད་དོ། །བདག་ཅག་ནི་བཅིང་བ་ཐམས་ཅད་ཀྱིས་བཅིངས་པས་ན། བདག་ཅག་ནི་ཐམས་ཅད་ཀྱི་ཐམས་ཅད་དུ་མི་དབང་ངོ་སྙམ་དུ་བསམས་ནས་དེ་དག་ཀྱང་ཅང་མི་སྨྲ་བར་འཁོད་དོ། །དེའི་ཚེ་ཁྱིམ་བདག་མགོན་མེད་ཟས་སྦྱིན་གྱིས་གོས་ཕུལ་བ་དེ་དག་དགེ་སློང་གཅིག་

---

^{[མ་དཔེ་གཟིགས་ན་འདིར་གནོན།]}

གིས་ཀྱང་མ་བླངས་པ་དང་། དེ་ཡང་འདི་སྙམ་དུ་བདག་འཕགས་པའི་དགེ་འདུན་དག་གིས་ལྷུང་བཟེད་ཁས་ཕུབ་པར་མ་གྱུར་གྲང་སྙམ་དུ་བསམས་ནས། དེའི་ལུས་སྐྱ་བོ་བསེང་བསེང་པོ་རིད་ཅིང་སྐེམ་ལ་རྨྱ་བར་གྱུར་ནས། བཅོམ་ལྡན་འདས་གང་ན་བ་དེར་སོང་སྟེ་དྲུང་དུ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་སྟེ། ཁྱིམ་བདག་མགོན་མེད་ཟས་སྦྱིན་གྱིས་དོན་དེ་བཅོམ་ལྡན་འདས་ལ་གསོལ་པ་དང་། སངས་རྒྱས་ནི་མཁྱེན་བཞིན་དུ་འདྲི་སྟེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ། ཀུན་དགའ་བོ་ཁྱིམ་བདག་མགོན་མེད་ཟས་སྦྱིན་པས་དགེ་སློང་དག་ལ་གོས་སྦྱར་ཏེ་བྱིན་ན། ཅིའི་ཕྱིར་མ་བླངས་ཞེས་རྨས་པ་དང་། དེས་བཙུན་པ་ཁྱིམ་བདག་མགོན་མེད་ཟས་སྦྱིན་གྱིས། འདི་སྐད་དུ་གང་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་སྦྱིན་པར་རིགས་པ། རབ་ཏུ་སྦྱིན་པར་རིགས་པ། ཐལ་མོ་སྦྱར་བར་བགྱི་བ་ནས་དེ་དག་ཅང་མི་མཆི་བར་མཆིས་སོ་ཞེས་བགྱི་བའི་བར་དུ་སྔ་མ་བཞིན་བརྗོད་དེ། དེ་ལྟར་ན་ཁྱིམ་བདག་མགོན་མེད་ཟས་སྦྱིན་གྱིས་སྩལ་བ་དགེ་སློང་གཅིག་གིས་ཀྱང་མ་བླངས་སོ་ཞེས་གསོལ་པ་དང་། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ཀུན་དགའ་བོ་སོང་ལ་མཉན་དུ་ཡོད་པ་ན་དགེ་སློང་ཇི་སྙེད་་་གནས་ཤིང་འཁོད་པ་དེ་དག་ཐམས་ཅད་འདུན་ཁང་དུ་སྡུས་ཤིག །ཅེས་་བཀའ་སྩལ་པ་དང་། བཙུན་པ་དེ་བཞིན་བགྱིའོ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལས་མཉན་ཏེ། མཉན་དུ་ཡོད་པ་ན་དགེ་སློང་ཇི་སྙེད་གནས་ཤིང་འཁོད་པ་དེ་དག་ཐམས་ཅད་འདུན་ཁང་དུ་བསོགས་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས། བཙུན་པ་བཅོམ་ལྡན་འདས་ད་དུས་ལ་བབ་པར་དགོངས་ཤིག །མཉན་དུ་

---

^{[མ་དཔེ་གཟིགས་ན་འདིར་གནོན།]}

ཡོད་པ་ན་དགེ་སློང་ཇི་སྙེད་གནས་ཤིང་མཆིས་པ་དེ་དག་ཐམས་ཅད་འདུན་ཁང་དུ་འདུས་ཤིང་ཚོགས་སོ་ཞེས་དེ་སྐད་ཅེས་གསོལ་པ་དང་། དེ་ནས་བཅོམ་ལྡན་འདས་འདུན་ཁང་གང་ན་བ་དེར་གཤེགས་ཏེ་བྱོན་པ་དང་། གདན་བཏིང་བ་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་དག་ལ་འདི་སྐད་ཅེས་བཀའ་སྩལ་ཏེ། དགེ་སློང་ཁྱེད་ཁྱིམ་བདག་མགོན་མེད་ཟས་སྦྱིན་གྱིས་གོས་མང་པོ་བསྡུས་ཏེ་བྱིན་ན་ཅིའི་ཕྱིར་མ་བླངས་ཞེས་གསུངས་པ་དང་། དགེ་སློང་རྣམས་ཅང་མི་ཟེར་བར་འཁོད་དོ། །སངས་རྒྱས་བཅོམ་ལྡན་འདས་ནི་མཁྱེན་བཞིན་དུ་འདྲི་བ་སྟེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ཡང་ཀུན་དགའ་བོ་དགེ་སློང་རྣམས་ཅིའི་ཕྱིར་མི་སྨྲ་བར་འཁོད་ཅེས་རྨས་པ་དང་། དེ་ལྟར་གྱུར་པ་བཅོམ་ལྡན་འདས་ལ་ཡང་རྒྱས་པར་གསོལ་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ངའི་དྲུང་དུ་མྱ་ངན་ལས་འདའ་བར་བསམས་ཏེ་རབ་ཏུ་བྱུང་ངམ། བཙུན་པ་དེ་བཞིན་ནོ་ཞེས་གསོལ་ཏོ། །དགེ་སློང་དག་དེ་ལྟ་བས་ན་ངའི་དྲུང་དུ་མྱ་ངན་ལས་འདའ་བར་བསམས་ཏེ་རབ་ཏུ་བྱུང་བ་དེ་ལ་ནི་བ་ན་ཕྲག་སྟོང་རི་བའི་གོས་དང་། མིག་ལྔ་བརྒྱ་ཡོད་པའི་ཁང་པ་བརྩེགས་པ་དང་། རོ་སྣ་བརྒྱ་དང་ལྡན་པའི་ཟས་རྣམས་རྗེས་སུ་གནང་ངོ་། །དགེ་སློང་དག་ཚུལ་ཁྲིམས་ཉམས་པ་དག་ནི་དགེ་འདུན་གྱི་ཀུན་དགའ་ར་བ་ལ་རྐང་པའི་རྟིང་པ་གཅིག་ཙམ་ཡང་ཡོངས་སུ་སྤྱད་པ་མི་གནང་ངོ་། །དེ་ཅིའི་ཕྱིར་ཞེ་ན། ཚུལ་ཁྲིམས་ཉམས་པའི་གང་ཟག་ལ་ནི་ཉེས་པའི་དམིགས་འདི་བཅུ་ཡོད་དེ། བཅུ་གང་ཞེ་ན། ཚུལ་ཁྲིམས་ཀྱིས་བདག་སྨད་པ་དང་། གཞན་དང་ལྷ་དང་སྟོན་པས་སྨད་པ་དང་། ཚངས་པ་མཚུངས་པར་སྤྱོད་པ་མཁས་པ་དང་། ཆོས་ཉིད་ཀྱིས་སྨད་པ་དང་། ཕྱོགས་ཕྱོགས་སུ་སྡིག་པ་མི་སྙན་པའི་སྒྲ་དང་ཚིགས་སུ་བཅད་པས་གྲགས་པར་འགྱུར་བ་དང་། མ་རྟོགས་པ་རྣམས་རྟོགས་པར་མི་འགྱུར་བ་དང་། རྟོགས་

---

^{[མ་དཔེ་གཟིགས་ན་འདིར་གནོན།]}

པ་རྣམས་ཉམས་པ་དང་། སྔོན་ཐོས་པ་རྣམས་བརྗེད་པར་འགྱུར་བ་དང་། རྣམ་པར་འགྱོད་བཞིན་དུ་དུས་བྱེད་པ་དང་། ལུས་དང་བྲལ་ནས་ཤི་བའི་འོག་ཏུ་ངན་འགྲོ་ངན་སོང་དུ་ལོག་པར་ལྟུང་ནས་སེམས་ཅན་དམྱལ་བར་སྐྱེའོ། །འོན་ཀྱང་དགེ་སློང་དག་གིས་སྤྱད་པ་ནི་བཞི་སྟེ། བདག་པོ་མེད་ཅིང་ཡོངས་སུ་སྤྱོད་པ་དང་། བྱིན་པས་ཡོངས་སུ་སྤྱོད་པ་དང་། གནང་བས་ཡོངས་སུ་སྤྱོད་པ་དང་། བུ་ལོན་གྱིས་ཡོངས་སུ་སྤྱོད་པའོ། །དེ་ལས་དགེ་སློང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་བ་དེ་དག་ནི་བདག་པོ་མེད་ཅིང་ཡོངས་སུ་སྤྱོད་པའོ། །ཀུན་ཏུ་སྦྱོར་བའི་ལྷག་མ་དང་བཅས་པ་དག་ནི་བྱིན་པས་ཡོངས་སུ་སྤྱོད་པའོ། །སོ་སོའི་སྐྱེ་བོ་དགེ་བ་ཅན་བསམ་གཏན་དང་ཀློག་པ་ལ་ཞུགས་པ་རྣམས་ནི་གནང་བས་ཡོངས་སུ་སྤྱོད་པའོ། །ལེ་ལོ་ཅན་དག་ནི་བུ་ལོན་གྱིས་ཡོངས་སུ་སྤྱོད་པའོ། །ཚུལ་ཁྲིམས་ཉམས་པ་ནི་ཡོངས་སུ་སྤྱོད་པ་ཐམས་ཅད་མི་གནང་ངོ་། །དེ་ལྟ་བས་ན་རྙེད་པ་ཞིག་ཡོད་ན་དགེ་འདུན་གྱིས་མཉམ་པར་བགོ་བར་བྱའོ། །གླེང་གཞིའི་སྒོ་གཉིས་པའི་མདོའི་ཚིགས་སུ་བཅད་པ་གཉིས་པའོ།། །།མདོར་ན། བཏིང་བ་དང་ནི་མ་བཏིང་བ། །ཕྱུང་བ་དང་ཡང་མ་ཕྱུང་བ། །དེ་བཞིན་མཚམས་ཀྱི་ཕྱི་རོལ་གནས། །ཐོས་པ་ཡི་རང་བསམས་པས་སོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་འདུན་གྱིས་གཏན་པ་བཏིང་བ་དགེ་སློང་གིས་ཤིན་ཏུ་མྱོང་བཞིན་དུ་གཏན་པ་བཏིང་བར་མི་འགྱུར་བར་མཆིས་སམ། ཨུ་པཱ་ལི་ཡོད་དེ་འདི་ལྟ་སྟེ། དགེ་འདུན་གྱི་གཏན་པ་འདིང་བའི་ཚེ་དགེ་སློང་དེས་དད་པ་མ་བྱིན་ལ་གཉིད་ཀྱིས་ལོག་སྟེ། དགེ་འདུན་གྱི་གཏན་པ་བཏིང་བར་འགྱུར་རོ། །ཨུ་པཱ་ལི་དེ་ལྟར་ན་དགེ་སློང་གཏན་པ་ཤིན་ཏུ་མྱོང་བཞིན་གཏན་པ་བཏིང་བར་མི་འགྱུར་རོ། །བཙུན་

---

^{[མ་དཔེ་གཟིགས་ན་འདིར་གནོན།]}

པ་དགེ་འདུན་གྱི་གཏན་པ་ཤིན་ཏུ་མ་མྱོང་བཞིན་དུ་གཏན་པ་་བཏིང་བར་འགྱུར་བ་མཆིས་སམ། ཨུ་པཱ་ལི་ཡོད་དེ། དགེ་སློང་ཞིག་གིས་དགེ་འདུན་གྱི་གཏན་པ་བཏིང་བའི་ཚེ་དད་པ་བྱིན་ལ་ཉལ་ལ་དགེ་འདུན་གྱིས་གཏན་པ་ཡང་བཏིང་བར་འགྱུར་ཏེ། དེ་ལྟར་ན་དགེ་འདུན་གྱི་གཏན་པ་བཏིང་བ་ཤིན་ཏུ་མ་མྱོང་བ་ཡང་གཏན་པ་བཏིང་བར་འགྱུར་རོ། །ཨུ་པཱ་ལི་དེ་བཞིན་དུ་དགེ་སློང་གིས་དགེ་འདུན་གྱི་གཏན་པ་འདིང་བའི་ཚེ་དད་པ་བྱིན་པ་ལ་གཉིད་ཀྱིས་ལོག་གམ་སྙོམས་པར་ཞུགས་པ་སྟེ། ཤིན་ཏུ་མ་མྱོང་ཡང་གཏན་པ་བཏིང་བར་འགྱུར་རོ། །བཙུན་པ་དགེ་སློང་གི་དགེ་འདུན་གྱི་གཏན་པ་འབྱིན་པའི་ཚེ་མྱོང་བར་གྱུར་ཀྱང་གཏན་པ་མ་ཕྱུང་་་བར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟ་སྟེ། དགེ་སློང་གིས་དགེ་འདུན་གྱི་གཏན་པ་འདིང་བའི་ཚེ་དད་པ་མ་བྱིན་ལ་གཉིད་ཀྱིས་ལོག་གམ་སྙོམས་པར་ཞུགས་པ་སྟེ། ཨུ་པཱ་ལི་དེ་ལྟར་ན་དགེ་སློང་གི་དགེ་འདུན་གྱི་གཏན་པ་འབྱིན་པའི་ཚེ་མྱོང་བར་གྱུར་ཀྱང་གཏན་པ་མ་ཕྱུང་བར་འགྱུར་རོ། །བཙུན་པ་དགེ་སློང་ཞིག་གིས་དགེ་འདུན་གྱི་གཏན་པ་འབྱིན་པའི་ཚེ་མྱོང་བར་མ་གྱུར་ཀྱང་གཏན་པ་ཕྱུང་བར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་དགེ་སློང་གི་དགེ་འདུན་གྱིས་གཏན་པ་འབྱིན་པའི་ཚེ་དད་པ་བྱིན་ལ་་་གཉིད་ཀྱིས་ལོག་གམ་སྙོམས་པར་ཞུགས་སམ། མཚམས་ཀྱི་ཕྱི་རོལ་ཏུ་སོང་ཡང་རུང་སྟེ། དགེ་འདུན་གྱིས་གཏན་པ་ཕྱུང་ངོ་ཞེས་ཐོས་ཏེ། ཐོས་ནས་ཀྱང་ལེགས་པར་ཕྱུང་ངོ་། །ཤིན་ཏུ་ཕྱུང་བའོ་ཞེས་རྗེས་སུ་ཡི་རང་བའོ། །གླེང་གཞིའི་སྒོ་གཉིས་པའི་མདོའི་ཚིགས་སུ་བཅད་པ་གསུམ་པའོ།། །།མདོར་ན། བསླབ་པ་བྱིན་དང་ཚུལ་ཤིང་དང་། །གང་ལ་ལས་རྣམས་བྱ་བ་དང་། །བཅུ་གཉིས་རྣམས་ལ་སླར་འཁྱལ་དང་། །མི་གཙང་བ་དང་མི་བརྩན་པ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་

---

^{[མ་དཔེ་གཟིགས་ན་འདིར་གནོན།]}

བསླབ་པ་སྩལ་བས། ཚུལ་ཤིང་བྲིམ་ཞིང་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །མ་ནིང་དང་ཟ་མ་དང་། དགེ་སློང་མ་སུན་ཕྱུང་བ་དང་། ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སོ་སོར་གནས་པ་དང་། མི་གནས་པས་ཚུལ་ཤིང་བྲིམ་ཞིང་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་བཅོམ་ལྡན་འདས་ཀྱིས་གང་ལ་ལས་བྱ་བ་དེ་སླར་འཁྱལ་ཡང་མི་བརྩན་ནོ་ཞེས་གསུངས་ན། བཙུན་པ་གང་ལ་ཆོས་བཞིན་མ་ལགས་པར་ལས་བགྱིས་པ་དེ་ལྟར་འཁྱལ་ན་ཡང་མི་བརྩན་པར་འགྱུར་རམ། ཨུ་པཱ་ལི་དེ་ནི་བརྩན་ནོ། །བཙུན་པ་གང་ཟག་གིས་ལས་བཅུ་གཉིས་བསྐོས་པའི་ཚེ་དེ་དག་འདི་སྐད་དུ་ངེད་ཅག་ལ་མ་་་བསྐོ་ཤིག་ཅེས་མཆི་ན། ཅི་དེ་དག་དེ་ལྟར་འཁྱལ་བ་ཡང་མི་བརྩན་ནམ། ཨུ་པཱ་ལི་བརྩན་ནོ། །དེ་ནི་ངས་ཆད་པས་གནས་པ་རྣམས་ཀྱི་ཕྱིར་བསམས་ཏེ་གསུངས་སོ། །བཙུན་པ་བཅོམ་ལྡན་འདས་ཀྱིས་མི་གཙང་བ་རྣམས་སླར་འཁྱལ་ན་མི་བརྩན་ནོ་ཞེས་གསུངས་ན། བཙུན་པ་ཇི་ཙམ་གྱིས་ན་མི་གཙང་བ་ཞེས་བགྱི། ཨུ་པཱ་ལི་དེ་ནི་གང་ལ་ཕས་ཕམ་པ་བཞིའི་ནང་ནས་གང་ཡང་རུང་བ་ཞིག་བྱུང་བར་གྱུར་པ་སྟེ། དེ་ཙམ་གྱིས་ན་མི་གཙང་བར་འགྱུར་རོ། །གླེང་གཞིའི་སྒོ་གཉིས་པའི་མདོའི་ཚིགས་སུ་བཅད་པ་བཞི་པའོ།། །།མདོར་ན། བསླབ་པ་བྱིན་དང་ལས་བྱེད་དང་། །རྐུན་གནས་ཀྱང་ནི་དེ་བཞིན་ཏེ། །བསྙེན་རྫོགས་མཚམས་ཀྱི་ཕྱི་རོལ་དང་། །མངགས་ཏེ་གཏང་བར་མི་བྱ་བའོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་ལས་བགྱིད་པ་བསླབ་པ་སྩལ་བས་ལས་བགྱིས་ན། བགྱིས་པ་ཞེས་བགྱིའམ། འོན་ཏེ་མ་བགྱིས་པ་ཞེས་བགྱི།

---

^{[མ་དཔེ་གཟིགས་ན་འདིར་གནོན།]}

ཨུ་པཱ་ལི་མ་བྱས་པ་ཞེས་བྱ་སྟེ། སླར་ཡང་བྱ་དགོས་སོ། །དེ་བཞིན་དུ་མ་ནིང་དང་ཟ་མ་དང་མི་གནས་པའི་བར་དུ་སྔ་མ་བཞིན་དུ་བྱའོ། །གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་གཞན་ཞིག་ལ་དགེ་་སློང་ཞིག་བསྙེན་པར་རྫོགས་པར་འདོད་ནས་དེས་བསྙེན་པར་རྫོགས་པར་བྱ་བའི་དགེ་སློང་རྣམས་སྦྲན་ཏེ། དེས་བསྙེན་པར་རྫོགས་པར་བྱ་བའི་ཕྱིར་དེས་དགེ་ཚུལ་ཕ་དེ་ཁྲིད་དེ། དཀྱིལ་འཁོར་དུ་དོང་ནས་དགེ་སློང་དག་དང་ལྷན་ཅིག་ཏུ་དཀྱིལ་འཁོར་དུ་ཕྱིན་ནས། དེ་མཚམས་ཀྱི་ཕྱི་རོལ་དུ་མངགས་ཏེ་བཏང་བ་དང་། དེ་གཉེན་དག་གིས་ཁྲིད་དེ་སོང་ངོ་། །ཚེ་དང་ལྡན་པ་དེ་དག་རབ་ཏུ་འབྱུང་ཞིང་བསྙེན་པར་རྫོགས་ནས་དགེ་སློང་གི་དངོས་པོར་གྱུར་པའི་བར་ཆད་དུ་གྱུར་པ་དང་། དེ་ལྟར་གྱུར་པ་དགེ་སློང་དག་གིས་སངས་རྒྱས་བཅོམ་ལྡན་འདས་ལ་གསོལ་པ་དང་། སངས་རྒྱས་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་བསྙེན་པར་རྫོགས་པར་འདོད་པ་དེ་མཚམས་ཀྱི་ཕྱི་རོལ་དུ་མ་མངགས་ཤིག །འདི་ལྟ་སྟེ། དགེ་སློང་དག་འཁོར་ལོས་སྒྱུར་བའི་རྒྱལ་པོའི་བུ་རབ་དབང་བསྐུར་བའི་རིགས་པ་དབང་མ་བསྐུར་ན་རྒྱལ་་་ཚབ་འཐོབ་པ་དེ་རབ་ཏུ་བསྲུང་བར་བྱ་བ་དང་། རབ་ཏུ་བསྐྱང་བར་བྱ་བ་དེ་བཞིན་དུ་དགེ་སློང་གིས་བསྙེན་པར་རྫོགས་པར་འདོད་པ་དེ་ཡང་རབ་ཏུ་བསྲུང་་་ཞིང་བསྐྱང་བའི་རིགས་སོ། །དེ་ལྟ་བས་ན་དགེ་སློང་དག་གིས་བསྙེན་པར་རྫོགས་པར་འདོད་པའི་དགེ་ཚུལ་པ་དེ་རྣམས་མི་ཐོས་པའི་ཉེ་འཁོར་ཙམ་དུ་་སྤངས་ལ། མཐོང་བའི་ཉེ་འཁོར་ཙམ་དུ་ཐལ་མོ་སྦྱར་ཏེ་མངོན་དུ་ལྟ་བཞིན་ཞོག་ཤིག །དེ་ལྟར་ན་ཉེས་པའི་དམིགས་སུ་མི་འགྱུར་རོ། །གླེང་གཞིའི་སྒོ་གཉིས་པའི་མདོའི་ཚིགས་སུ་བཅད་པ་ལྔ་པའོ།། །།མདོར་ན། བཟོད་པ་གསོལ་བར་བྱེད་དང་མཚམས། །སྤུ་བསྙལ་བ་ཡང་དེ་བཞིན་ནོ། །ཐབ་མོ་རྒོད་པ་བསྡིགས་པ་དང་། །སྨད་པར་བྱ་དང་རིགས་སུན་པའོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་

---

^{[མ་དཔེ་གཟིགས་ན་འདིར་གནོན།]}

ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་བསྡིགས་པའི་ལས་བགྱིས་པས་བཟོད་པ་གསོལ་ཅིག་ཅེས་གསུངས་ན། གང་དུ་བཟོད་པ་གསོལ་བར་བགྱི། ཨུ་པཱ་ལི་དེ་ནི་མཚམས་ཀྱི་ནང་དུའོ། །ཇི་ལྟར་བཟོད་པ་གསོལ་བར་བགྱི། སྤུ་ལངས་ཤིང་རབ་ཏུ་ལངས་པ་ལས་དགེ་འདུན་ལ་སྤུ་ཉལ་བར་བྱེད་པ་བྱུང་བར་སྩོལ། ཕྱག་འཚལ་བ་མངོན་དུ་སྟོན་ཅིང་། ཐབ་མོ་རྒོད་པ་དེ་ཡང་སླར་གཏོང་བའོ། །བཙུན་པ་བཅོམ་ལྡན་འདས་ཀྱིས་ཐབ་མོ་རྒོད་པའི་དགེ་སློང་དག་ལ་བསྡིགས་པའི་ལས་བྱོས་ཤིག་ཅེས་གསུངས་ན། དེ་སྟེ་བཙུན་པ་དེ་ལ་བསྡིགས་པའི་ལས་བགྱིད་པའི་ཚེ་མ་རངས་པར་གྱུར་ན། དེ་ལ་ཐབས་ཇི་ལྟར་བགྱི། ཨུ་པཱ་ལི་དེའི་ཡོ་བྱད་དང་རྫས་ལས་ཁ་ཅིག་གིས་ལྷུང་བཟེད་དང་ཆོས་གོས་ཁྱེར་ཅིག །ཁ་ཅིག་གིས་ནི་བར་བུར་གྱི་སྣོད་དག་ཁྱེར་ལ་ཕྱི་རོལ་དུ་ཕྱུང་སྟེ་བོར་ཅིག །དེ་སྟེ་ཀ་བ་ལ་འཇུས་ན་ཡང་ཀ་བ་ཆོད་ཅིག །དེ་སྟེ་སྒོ་སྐྱེས་ལ་འཇུས་ན་ཡང་སྒོ་སྐྱེས་ཕྱུང་ལ་དེ་ལ་ངོ་ཟློག་མི་ཕོད་པ་མ་བྱེད་ཅིག །དེ་སླར་སུས་བཅོས་པར་བགྱི། དགེ་འདུན་གྱིས་སོ། །སུ་ལ་བཅོས་པའི་ཡོ་བྱད་དགུག །སྦྱིན་བདག་ལ་སློངས་ལ་དེ་སྟེ་མ་འབྱོར་ན་དགེ་འདུན་ཐམས་ཅད་ཀྱི་ནོར་ལས་བྱོས་ཤིག །དེ་ལ་ཐེ་ཚོམ་དུ་མ་བྱེད་ཅིག །དེ་སྟེ་བཙུན་པ་དགེ་སློང་མ་ཞིག་ཐབ་མོ་རྒོད་པར་གྱུར་ན་དེ་ལ་ཡང་བསྡིགས་པའི་ལས་བགྱིའམ། ཨུ་པཱ་ལི་དེ་ལ་ཡང་བསྡིགས་པའི་ལས་བྱའོ། །དེ་སྟེ་མ་རངས་པར་གྱུར་ན་ཞེས་པ་ནས། ཐེ་ཚོམ་མ་བྱེད་ཅིག་ཅེས་བྱ་བའི་བར་དུ་སྔ་མ་བཞིན་ནོ། །བཙུན་པ་དེ་སྟེ་དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་ཞིག་ཐབ་མོ་རྒོད་པར་གྱུར་པ་དང་། དེ་དག་ལ་ཡང་བསྡིགས་པར་བགྱིའམ། དེ་ལ་ཐེ་ཚོམ་དུ་མ་བྱེད་ཅིག་ཅེས་བྱ་བའི་བར་དུ་སྔ་མ་བཞིན་ནོ། །བཙུན་པ་བཅོམ་ལྡན་འདས་ཀྱིས་རིགས་སུན་པའི་དགེ་སློང་ལ་བསྐྲད་པའི་ལས་

---

^{[མ་དཔེ་གཟིགས་ན་འདིར་གནོན།]}

བྱོས་ཤིག་ཅེས་གསུངས་ན། དེ་སྟེ་བཙུན་པ་དེ་ལ་བསྐྲད་པའི་ལས་བགྱིད་པའི་ཚེ་དེ་མ་རངས་པར་གྱུར་ན་དེ་ལ་ཇི་ལྟར་བགྱི། ཨུ་པཱ་ལི་དེ་ལ་ཡོ་བྱད་རྣམས་ཞེས་བྱ་བ་ནས། ཐེ་ཚོམ་མ་བྱེད་ཅིག་ཅེས་བྱ་བའི་བར་དུ་སྔ་མ་བཞིན་ནོ། །དེ་བཞིན་དུ་དགེ་སློང་མས་རིགས་སུན་པ་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་དག་ལ་ཡང་བསྐྲད་པའི་ལས་བགྱིའམ། དེ་ལ་ཐེ་ཚོམ་དུ་མ་བྱེད་ཅིག་ཅེས་བྱ་བའི་བར་དུ་སྔ་མ་བཞིན་ནོ། །གླེང་གཞིའི་སྒོ་གཉིས་པའི་མདོའི་ཚིགས་སུ་བཅད་པ་དྲུག་པའོ།། །།འདུལ་བ་གཞུང་དམ་པ། བམ་པོ་སུམ་བཅུ་རྩ་གསུམ་པ། བཙུན་པ་བཅོམ་ལྡན་འདས་ཀྱིས་ཚུལ་ཁྲིམས་ཉམས་པའི་དགེ་སློང་སྐྲོད་ཅིག་ཅེས་གསུངས་ན། སུས་བསྐྲད་པར་བགྱི། དེ་ནི་དགེ་འདུན་གྱིས་བསྐྲད་པར་བྱའོ། །དེའི་ཡོ་བྱད་ལ་ཁ་ཅིག་གིས་ལྷུང་བཟེད་དང་ཆོས་གོས་ཁྱེར། ཁ་ཅིག་གིས་ནི་བར་བུར་གྱི་སྣོད་དག་ཁྱེར་ཏེ་ཕྱི་རོལ་ཏུ་ཕྱུང་ལ་བོར་ཅིག །དེ་སྟེ་ཀ་བ་ལ་འཇུས་ན་ཀ་བ་ཆོད་ཅིག །སྒོ་སྐྱེས་ལ་འཇུས་ན་སྒོ་སྐྱེས་ཀྱང་ཕྱུང་ལ་དེ་ལ་ངོ་ཟློག་མི་ཕོད་པར་མ་བྱེད་ཅིག །སླར་སུས་བཅོས་པར་བགྱི། དགེ་འདུན་གྱིས་སོ། །འཆོས་པའི་ཡོ་བྱད་སུ་ལ་དགུག །ཡོན་བདག་ལ་བསྐུལ་ལོ། །དེས་ཀྱང་མ་འབྱོར་ན་དགེ་འདུན་ཐམས་ཅད་ཀྱི་ནོར་གྱིས་སླར་བཅོས་པར་བྱ་སྟེ། དེ་ལ་ཐེ་ཚོམ་དུ་མ་བྱེད་ཅིག །ཚུལ་ཁྲིམས་ཉམས་པའི་དགེ་སློང་ལ་ཇི་ལྟ་བར་དགེ་སློང་མ་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་དག་ཀྱང་དེ་བཞིན་ནོ། །བཙུན་པ་བཅོམ་ལྡན་འདས་ཀྱིས་ཁྱིམ་པ་ལ་སྨོད་པར་བྱེད་པའི་དགེ་སློང་དེ་ལ་སླར་བསྡུམ་པའི་ལས་བྱོས་ཤིག་ཅེས་གསུངས་ན། བཙུན་པ་དེ་སྙེ་དགེ་སློང་མས་ཀྱང་ཁྱིམ་པ་ལ་སྨད་པར་གྱུར་ན་དེ་ལ་ཡང་སླར་བསྡུམ་པའི་ལས་བགྱིའམ། ཨུ་པཱ་ལི་དེ་ཡང་སླར་བསྡུམ་པའི་ལས་བྱེད་དུ་ཆུག་ཤིག །དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་ལ་ཡང་དེ་བཞིན་ནོ། །བཙུན་པ་བཅོམ་ལྡན་འདས་ཀྱིས་དགེ་སློང་ཁྱིམ་པ་ལ་སྨོད་ན་

---

^{[མ་དཔེ་གཟིགས་ན་འདིར་གནོན།]}

བསྡུམ་པའི་ལས་བྱེད་དུ་ཆུག་ཤིག་ཅེས་གསུངས་ན། དགེ་སློང་གིས་དགེ་སློང་ལ་སྨོད་ན་དེ་ལ་ཡང་སླར་བསྡུམ་པའི་ལས་བགྱིའམ། ཨུ་པཱ་ལི་དེ་ལ་ཡང་སླར་བསྡུམ་པའི་ལས་བྱའོ། །དགེ་སློང་གིས་དགེ་སློང་མ་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་ཡང་དེ་བཞིན་དུ་བྱའོ། །དགེ་སློབ་མས་དགེ་སློང་མ་དང་། དགེ་སློང་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མ་ལ་ཡང་དེ་བཞིན་དུ་བྱའོ། །དགེ་སློབ་མས་དགེ་སློབ་མ་དང་། དགེ་སློང་དང་དགེ་སློང་མ་དང་། དགེ་ཚུལ་ཕ་དང་། དགེ་ཚུལ་མ་ལ་ཡང་དེ་བཞིན་དུ་བྱའོ། །དགེ་ཚུལ་ཕས་དགེ་ཚུལ་ཕ་དང་། དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་མ་ལ་ཡང་དེ་བཞིན་དུ་བྱའོ། །དགེ་ཚུལ་མས་དགེ་ཚུལ་མ་དང་། དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་ཕ་ལ་ཡང་དེ་བཞིན་དུ་བྱའོ། །དེ་ལྟར་འཁོར་ལོ་བཞིན་དུ་རྒྱས་པར་བརྗོད་དོ། །གླེང་གཞིའི་སྒོ་གཉིས་པའི་མདོའི་ཚིགས་སུ་བཅད་པ་བདུན་པའོ།། །།མདོར་ན། དགེ་ཚུལ་དག་དང་བསྡིགས་པ་དང་། །ལྔ་ལས་ཉུང་བ་མི་གནས་དང་། །ཨུ་པཱ་ལིས་ནི་ཇི་ལྟར་དྲིས། །ནུབ་མོ་ལྔ་ཡང་བྱིན་པ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་གིས་བསྡིགས་པའི་ལས་བགྱིས་པའི་དགེ་ཚུལ་ཕ་བསྙེན་པར་རྫོགས་པར་བགྱིས་ན། དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཟོད་པ་ནི་གསོལ་བ་ཞེས་བྱའོ། །བཙུན་པ་བཅོམ་ལྡན་འདས་ཀྱིས་ལོ་ལྔ་ལོན་ལ་ཆོས་རྣམ་པ་ལྔ་དང་ལྡན་ན་གནས་མ་བཅས་ཀྱང་གཞོངས་སྤྱད་པ་སྤྱོད་དུ་གནང་ངོ་ཞེས་གསུངས་ན། བཙུན་པ་ལོ་བཞི་ལོན་ལ་ཆོས་རྣམ་པ་ལྔ་དང་ལྡན་ན། དེ་

---

^{[མ་དཔེ་གཟིགས་ན་འདིར་གནོན།]}

ཡང་གནས་མ་བཅས་པར་གཞོངས་སྤྱད་པ་སྤྱོད་དུ་གནང་ངམ། ཨུ་པཱ་ལི་མི་གནང་ངོ་། །དེ་ཅིའི་ཕྱིར་ཞེ་ན། ལོ་ལྔ་མ་ལོན་པ་མི་རུང་བའི་ཕྱིར་རོ། །དེ་སྟེ་ལོ་དྲུག་གམ་ལོ་དགུ་ལོན་ལ། དེ་ཡང་ཆོས་ལྔ་དང་མི་ལྡན་ན་དེ་གནས་མ་བཅས་པར་གཞོངས་སྤྱད་པ་སྤྱོད་དུ་གནང་ངམ། ཨུ་པཱ་ལི་མི་གནང་ངོ་། །དེ་ཅིའི་ཕྱིར་ཞེ་ན། ཆོས་ལྔ་དང་ལྡན་པར་བྱ་བའི་ཕྱིར་རོ། །བཙུན་པ་དགེ་སློང་བསྙེན་པར་རྫོགས་ནས་ལོ་གསུམ་ལོན་ལ་དེ་ཡང་སྡེ་སྣོད་གསུམ་དང་ལྡན་པ། རིག་པ་གསུམ་དང་ལྡན་པ་དྲི་མ་གསུམ་དང་བྲན་ན་དེ་ཡང་གཞན་ལ་གནས་་་བཅའ་བར་བགྱིའམ། ཨུ་པཱ་ལི་དེ་ཡང་དེ་བཞིན་ནོ། །དེ་ཅིའི་ཕྱིར་ཞེ་ན། བཅས་པའི་ཚུལ་དུ་བྱ་བའི་ཕྱིར་རོ། །ཇི་སྲིད་དུ་གནས་མ་བཅས་པ་ལ་རྙེད་པ་སྩལ་བར་བགྱི། ཨུ་པཱ་ལི་དེ་མང་ན་ཡང་ཞག་ལྔའི་བར་དུ་སྟེ། དེ་ཡང་གནས་བཅའ་བ་ཚོལ་ཞིང་སྦྱོར་བ་མ་བཏང་བའོ། །གླེང་གཞིའི་སྒོ་གཉིས་པའི་མདོའི་ཚིགས་སུ་བཅད་པ་བརྒྱད་པའོ།། །།མདོར་ན། མཐུན་པ་དག་དང་མི་མཐུན་པ། །ཚད་གཟུང་དུ་ཡང་མེད་པ་དང་། །བཅབས་པ་དང་ནི་མ་བཅབས་པ། །དེ་བཞིན་མིང་དང་རིགས་ཀྱང་ངོ་། །སངས་རྒྱས་བཅོམ་ལྡན་འདས་མཉན་དུ་ཡོད་པ་་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་ནོངས་པ་མཐུན་པ་ཞེས་ཀྱང་བགྱི། མི་མཐུན་པ་ཞེས་ཀྱང་བགྱི་ན། བཙུན་པ་ནོངས་པ་མཐུན་པ་གང་ལགས། མི་མཐུན་པ་གང་ལགས། ཨུ་པཱ་ལི་ཕས་ཕམ་པ་རྣམས་ནི་ཕས་ཕམ་པར་མཐུན་གྱི་གཞན་དང་མི་མཐུན་པའོ། །དགེ་འདུན་གྱི་ལྷག་མ་ནི་དགེ་འདུན་གྱི་ལྷག་མར་མཐུན་ནོ། །ལྟུང་བ་ནི་ལྟུང་བར་མཐུན་ནོ། །སོ་སོར་བཤགས་པ་སོ་སོར་བཤགས་པར་མཐུན་ནོ། །ཉེས་བྱས་ནི་ཉེས་བྱས་སུ་མཐུན་ནོ། །བཙུན་པ་ནོངས་པ་ཚད་དང་ལྡན་པ་ཞེས་ཀྱང་བགྱི། ནོངས་པ་ཚད་དང་མི་ལྡན་པ་ཞེས་ཀྱང་བགྱི་ན། བཙུན་པ་ཚད་དང་ལྡན་པ་ནི་གང་ལགས། མི་ལྡན་པ་ནི་གང་ལགས། ཨུ་པཱ་ལི་གང་ཞག་གི་

---

^{[མ་དཔེ་གཟིགས་ན་འདིར་གནོན།]}

མཐའ་དང་ཉེས་པའི་མཐའ་དྲན་པར་འགྱུར་བ་སྟེ་ཚད་དང་ལྡན་ཞེས་བྱའོ། །གང་ཞག་དང་ཉེས་པའི་མཐའ་མི་དྲན་པར་གྱུར་པ་དེ་ནི་ཚད་དང་མི་ལྡན་ཞེས་བྱའོ། །བཙུན་པ་ནོངས་པ་བཅབས་པ་ཞེས་ཀྱང་བགྱི། མ་བཅབས་པ་ཞེས་ཀྱང་བགྱི་ན། བཙུན་པ་བཅབས་པ་གང་ལགས། མ་བཅབས་པ་གང་ལགས། ཨུ་པཱ་ལི་དེ་ནི་རྣམ་པ་གཉིས་ཀྱིས་བཅབས་པ་སྟེ། སེམས་ཀྱིས་བཅབས་པ་དང་། ཞག་ཏུ་བཅབས་པའོ། །དེ་ལ་ཞག་ཏུ་བཅབས་པ་གང་ཡིན་པ་དེ་ནི་མ་བཅབས་པའོ། །སེམས་ཀྱིས་བཅབས་པ་གང་ཡིན་པ་དེ་ནི་བཅབས་པ་ཞེས་བྱའོ། །བཙུན་པ་ནོངས་པ་རྣམས་ཀྱི་མིང་དང་རུས་ཞེས་བགྱི་བ། བཙུན་པ་མིང་གང་ལགས། རུས་གང་ལགས། ཨུ་པཱ་ལི་ཕས་ཕམ་པ་རྣམས་ནི་མིང་ངོ་། །དེ་ལས་བྱུང་བ་ནི་རུས་སོ། །དགེ་འདུན་གྱི་ལྷག་མ་ཞེས་བྱ་བ་ནི་མིང་ངོ་། །དེ་ལས་བྱུང་བ་ནི་རུས་སོ། །ལྟུང་བ་དང་སོ་སོར་བཤགས་པ་དང་། ཉེས་བྱས་རྣམས་ནི་མིང་ངོ་། །དེ་ལས་བྱུང་བ་ནི་རུས་སོ། །གླེང་གཞིའི་སྒོ་གཉིས་པའི་མདོའི་ཚིགས་སུ་བཅད་པ་དགུ་པའོ།། །།མདོར་ན། གཅིག་ལ་ཆད་པས་བཅད་པ་དང་། །བསླབ་པ་བྱིན་ལ་མི་སྤྱད་དེ། །དེ་དག་ལ་ནི་དད་མི་སྦྱིན། །དགེ་སློང་བྱེད་དམ་མི་ལེན་ཏོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་དགེ་འདུན་གྱི་ལྷག་མ་རྣམས་བྱུང་བར་གྱུར་ནས། དེ་དག་ཆད་པས་བཅད་པ་དང་། དེ་དག་ར་བའི་ནང་དུ་དཀྱིལ་འཁོར་བྱས་ནས་ཆད་པ་བྱེད་དོ། །དེ་དག་ལ་དགེ་སློང་དག་གིས་ཚེ་དང་ལྡན་པ་དག་ཅི་ཞིག་བྱེད་ཅེས་དེ་དག་གིས་སྨྲས་པ་དང་། ཆད་པ་བྱེད་དོ་ཞེས་སྨྲས་པ་དང་། དགེ་སློང་དག་གིས་འདི་ནི་སླར་བཅབས་པ་ཡིན་གྱིས་ཆད་པ་མ་ཡིན་ནོ་ཞེས་སྨྲས་པ་དང་། དེ་དག་སྤ་གོང་ནས་ཅང་མི་ཟེར་བར་འདུག་གོ །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགེ་སློང་དག་གང་ན་

---

^{[མ་དཔེ་གཟིགས་ན་འདིར་གནོན།]}

དགེ་སློང་གཅིག་པུར་གནས་པ་དེར་ཆད་པའི་ལས་མ་བྱེད་ཅིག་ཅེས་བཀའ་སྩལ་ཏོ། །གང་དགེ་སློང་གཉིས་སམ་གསུམ་གནས་པ་དེར་ཡང་དགེ་སློང་དག་གིས་ཆད་པའི་ལས་མ་བྱེད་ཅིག །གང་ན་དགེ་སློང་བཞིའམ། དེ་ལས་ལྷག་པ་ཡང་རུང་བ་གནས་པ་དེར་དགེ་སློང་དག་གིས་ཆད་པ་དང་། གཞི་ནས་བསླང་བའི་ཆད་པ་དང་། གཞི་ནས་སླར་བསླང་བ་དང་། ཡིད་མགུ་བར་བྱ་བ་དང་། གཞི་ནས་བསླང་བའི་ཡིད་མགུ་བར་བྱ་བ་དང་། གཞི་ནས་སླར་བསླང་སྟེ་ཡིད་མགུ་བ་དག་བྱོས་ཤིག །བཅོམ་ལྡན་འདས་ཀྱིས་གང་ན་དགེ་སློང་བཞིའམ་དེ་ལས་ལྷག་པར་གནས་པ་དེ་དག་ཏུ་དགེ་སློང་གིས་ཆད་པ་དང་། གཞི་ནས་བསླང་བའི་ཆད་པ་དང་། གཞི་ནས་སླར་བསླང་བ་དང་། ཡིད་མགུ་བར་བྱ་བ་དང་། གཞི་ནས་བསླང་བའི་ཡིད་མགུ་བར་བྱ་བ་དང་། གཞི་ནས་སླར་བསླང་སྟེ་ཡིད་མགུ་་བ་དག་བྱོས་ཤིག་ཅེས་བཀའ་སྩལ་པ་དང་། དགེ་སློང་ཕ་དག་གིས་བསླབ་པ་བྱིན་པའི་དགེ་སློང་བཞི་ལ་ཆད་པ་བྱེད་པ་དང་། བཅོམ་ལྡན་འདས་ཀྱིས་བཀའ་སྩལ་པ། བསླབ་པ་བྱིན་པའི་དགེ་སློང་བཞི་ལ་ཡང་ཆད་པ་བྱེད་དུ་མི་གནང་ངོ་། །བཅོམ་ལྡན་འདས་ཀྱིས་བསླབ་པ་བྱིན་པའི་དགེ་སློང་བཞི་ལ་ཆད་པ་བྱེད་དུ་མི་གནང་ངོ་ཞེས་བཀའ་སྩལ་པ་དང་། དགེ་སློང་དག་གིས་བསླབ་པ་བྱིན་པ་གསུམ་དང་། ཚུལ་བཞིན་གནས་པ་གཅིག་ལ་བྱེད་དོ། །བསླབ་པ་བྱིན་པ་གཉིས་དང་། ཚུལ་བཞིན་གནས་པ་གཉིས་ལ་བྱེད་དོ། །བསླབ་པ་བྱིན་པ་གཅིག་དང་། ཚུལ་བཞིན་གནས་པ་གསུམ་ལ་ཆད་པ་བྱེད་དོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། བསླབ་པ་བྱིན་པ་བཞི་ལ་ཡང་ཆད་པ་མ་བྱེད་ཅིག །བསླབ་པ་བྱིན་པ་གསུམ་དང་། ཚུལ་བཞིན་གནས་པ་གཅིག་ལ་ཡང་མ་བྱེད་ཅིག །བསླབ་པ་བྱིན་པ་གཉིས་དང་། ཚུལ་བཞིན་གནས་པ་གཉིས་ལ་ཡང་མ་བྱེད་ཅིག །བསླབ་པ་བྱིན་པ་གཅིག་དང་། ཚུལ་བཞིན་གནས་

---

^{[མ་དཔེ་གཟིགས་ན་འདིར་གནོན།]}

པ་གསུམ་ལ་ཡང་ཆད་པ་མ་བྱེད་པར་ཡོངས་སུ་དག་པ་བཞིའམ། དེ་ལས་མང་བ་རྣམས་ལ་ཆད་པ་བྱོས་ཤིག །ཆད་པ་གཅད་པ་ལ་ཇི་ལྟ་བ་་ཆད་པ་གཞི་ནས་བསླང་བ་དང་། གཞི་ནས་སླར་བསླང་བ་དང་། ཡིད་མགུ་བར་བྱེད་པ་དང་། གཞི་ནས་བསླང་སྟེ་ཡིད་མགུ་བར་བྱེད་པ་དང་། གཞི་ནས་སླར་བསླང་བའི་ཡིད་མགུ་བར་བྱེད་པ་རྣམས་ཀྱང་དེ་བཞིན་ནོ། །སངས་རྒྱས་བཅོམ་ལྡན་འདས་ལ་ཨུ་པཱ་ལིས་ཞུས་པ། བསླབ་པ་སྩལ་བ་ལ་དད་པ་སྩལ་དུ་རུང་ངམ། ཨུ་པཱ་ལི་མི་རུང་ངོ་། །ཆོས་ཉིད་ལ་རེག་ན་ནི་རུང་ངོ་། །བཙུན་པ་བསླབ་པ་སྩལ་བ་ལས་དད་པ་བླང་དུ་རུང་ངམ། ཨུ་པཱ་ལི་དེ་ལ་དགེ་སློང་དུ་འདུ་ཤེས་བཞག་ན་གདོད་རུང་ངོ་། །གླེང་གཞིའི་སྒོ་གཉིས་པའི་མདོའི་ཚིགས་སུ་བཅད་པ་བཅུ་པ་རྫོགས་ཏེ་སྒོ་གཉིས་པ་རྫོགས་སྷོ།། །།

གླེང་གཞིའི་སྒོ་གསུམ་པ་བཤད་པ།

---

^{[མ་དཔེ་གཟིགས་ན་འདིར་གནོན།]}

མདོར་བསྡུས་པ་ནི། དཀྱིལ་འཁོར་ལྷུང་བཟེད་དུགས་ཁང་དང་། །དུད་པ་བཏུང་དང་ཁར་ཕོར་དང་། །ལྕགས་སྐྲ་ཤིང་རྟའི་ལྟེ་བ་དང་། །གདང་ཤིང་སྒྲོན་མ་མཆོད་རྟེན་ནོ། །མདོར་ན། དཀྱིལ་འཁོར་ལྷ་ཡི་གནས་དང་ནི། །ཕྱེད་དང་གསུམ་དང་གནས་མི་འཆའ། །ལྷུང་བཟེད་མེད་པར་རབ་ཏུ་བྱུང་། །ལྷུང་བཟེད་ལ་ཡང་མི་བྲི་བའོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་སྐྱབས་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་དག་གིས་གར་བབ་བབ་ཏུ་ལྷུང་བཟེད་བཀྲུས་པ་དང་། ས་ཕྱོགས་དེར་སྦྲང་མ་དག་གིས་གང་སྟེ་མི་སྡུག་པར་གྱུར་པ་བྲམ་ཟེ་དང་ཁྱིམ་བདག་དག་གིས་མཐོང་ནས་ཅི་འཕགས་པ་དག་གིས་ཕྱོགས་འདིར་བཤང་གཅི་བགྱིས་སམ་ཞེས་སྨྲས་པ་དང་། དེ་དག་གིས་བཞིན་བཟངས་འདིར་བཤང་གཅི་དག་ནི་སུས་ཀྱང་མ་བྱས་ཀྱི་ངེད་་ཀྱིས་ལྷུང་བཟེད་བཀྲུས་སོ་ཞེས་སྨྲས་པ་དང་། དེ་དག་གིས་འཕགས་པ་ཁྱེད་ཀྱིས་འདིར་དཀྱིལ་འཁོར་བྱ་བའི་རིགས་སོ་ཞེས་སྨྲས་པ་དང་། དེ་དག་སྤ་གོང་ནས་ཅང་མི་ཟེར་བར་འདུག་གོ །དེ་དག་འཕྱ་སྟེ། དགེ་སྦྱོང་ཤཱཀྱའི་བུ་དག་ནི་མི་གཙང་བ་སྟེ། གར་བབ་བབ་ཏུ་ལྷུང་བཟེད་འཁྲུའོ་

---

^{[མ་དཔེ་གཟིགས་ན་འདིར་གནོན།]}

ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཀྱིས་དེ་བས་ན་གར་བབ་བབ་ཏུ་ལྷུང་བཟེད་མ་འཁྲུ་བར་དགེ་སློང་དག་གིས་ལྷུང་བཟེད་གང་དུ་བཀྲུས་པའི་གནས་དེར་དཀྱིལ་འཁོར་བྱོས་ཤིག་ཅེས་བཀའ་སྩལ་ཏོ། །བཅོམ་ལྡན་འདས་ཀྱིས་དཀྱིལ་འཁོར་བྱོས་ཤིག་ཅེས་གསུངས་ནས་དགེ་སློང་དག་གིས་ལྷུང་བཟེད་བཀྲུས་པའི་གནས་དེར་དཀྱིལ་འཁོར་ཟླུམ་པོར་བྱས་པ་དང་། བྲམ་ཟེ་དང་ཁྱིམ་བདག་དག་གཙུག་ལག་ཁང་དུ་འོངས་ཏེ་གནས་ཀྱི་བར་ན་མར་དཀྱིལ་འཁོར་ཡོད་པ་དག་མཐོང་ནས། ཀྱེ་འདི་ཅི་ཞིག་ཅེས་དྲིས་པ་དང་། ཁ་ཅིག་གིས་ཡང་ཀྱེ་འདི་ལྟ་ལ་ཤེས་པ་བྱར་ཅི་ཡོད། དགེ་སྦྱོང་ཤཱཀྱའི་བུ་དག་ནི་ཉི་མ་ལ་དད་དོ་ཞེས་སྨྲས་སོ། །གཞན་དག་གིས་ཀྱེ་དེ་བཞིན་ཏེ། དགེ་སྦྱོང་ཤཱཀྱའི་བུ་དག་ནི་ཉི་མ་ལ་དད་པ་བདེན་ནོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཉི་མ་འདྲ་བའི་དཀྱིལ་འཁོར་མ་བྱེད་ཅིག །བཅོམ་ལྡན་འདས་ཀྱིས་ཉི་མ་དང་འདྲ་བའི་དཀྱིལ་འཁོར་མ་བྱེད་ཅིག་ཅེས་གསུངས་པ་དང་། དགེ་སློང་དག་གིས་ཟླ་བ་ཁམ་པ་འདྲ་བའི་དཀྱིལ་འཁོར་བྱས་སོ། །དེར་བྲམ་ཟེ་དང་ཁྱིམ་བདག་དག་གིས་ཡང་གཙུག་ལག་ཁང་དུ་ལྷགས་ནས། ཀྱེ་དགེ་སྦྱོང་ཤཱཀྱའི་བུ་དག་ནི་ཟླ་བ་ལ་དད་དོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཟླ་བ་འདྲ་བའི་དཀྱིལ་འཁོར་ཀྱང་མ་བྱེད་ཅིག །དགེ་སློང་དག་གྲུ་བཞིར་བྱེད་པ་ལ་ཞུགས་པ་དང་། གཙུག་ལག་ཁང་དེར་བྲམ་ཟེ་དང་ཁྱིམ་བདག་དག་ཡང་ལྷགས་ནས། ཀྱེ་དགེ་སྦྱོང་ཤཱཀྱའི་བུ་དག་ནི་བ་ལང་ལ་དད་དོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་

---

^{[མ་དཔེ་གཟིགས་ན་འདིར་གནོན།]}

ལྡན་འདས་ལ་གསོལ་པ་ནས། བཅོམ་ལྡན་འདས་ཀྱིས་དེ་ལྟ་བས་ན་དཀྱིལ་འཁོར་གྲུ་བཞི་དང་། རྣམ་པ་གཉིས་ལྟར་མ་བྱེད་པར་མདུང་རྩེ་དང་རྔ་འདྲ་བར་བྱོས་ཤིག་ཅེས་བཀའ་སྩལ་ནས། དགེ་སློང་རྣམས་དེ་ཅིས་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། བ་ལང་གི་ལྕི་བའམ་སའམ་ཆུས་བྱུག་པར་གྱིས་ཤིག །བཅོམ་ལྡན་འདས་ཀྱིས་དཀྱིལ་འཁོར་རྣམ་པ་གཉིས་བྱོས་ཤིག །ཅེས་གསུངས་པ་དང་། དགེ་སློང་དག་གིས་སངས་རྒྱས་དང་ཆོས་དང་དགེ་འདུན་ལ་དེ་འདྲའི་དཀྱིལ་འཁོར་རྣམ་པ་གཉིས་བྱས་ཏེ། དེས་མགུ་བར་གྱུར་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དཀོན་མཆོག་གསུམ་ལ་ནི་ཉི་མའམ། ཟླ་བའམ། ཇི་ལྟར་དད་པ་རྣམ་པ་ཐམས་ཅད་དུ་་བྱས་ཏེ། དེ་ལ་ཐེ་ཚོམ་མ་བྱེད་ཅིག། གླེང་གཞི་ནི་མཉན་དུ་ཡོད་པ་ན་སྟེ། དེ་ནས་བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་དག་སྦྱིན་པར་བྱེད་པ་དང་། སྦྱིན་པའི་བདག་པོས་གཏོར་མ་ལེན་པའི་ལྷ་དག་ལ་རྣམ་པ་གསུམ་གྱིས་དུས་དུས་སུ་ཡང་དག་པར་མགུ་བར་བྱ། ཡང་དག་པར་མཆོད་པར་བྱ། ཡང་དག་པར་བདེ་བར་བྱའོ། །གསུམ་གང་ཞེ་ན། དུས་དུས་སུ་གཙང་མའི་བྱི་བདར་དང་། དུས་དུས་སུ་གཏོར་མའི་ལས་ཀྱང་བྱེད། དུས་དུས་སུ་བྱིན་པའི་ཡོན་ཀྱང་བསྔོའོ། །དགེ་སློང་དག་སྦྱིན་པར་བྱེད་པ་དང་། སྦྱིན་བདག་གིས་གཏོར་མ་ལེན་པའི་ལྷ་དག་ལ་དུས་དུས་སུ་ཡང་དག་པར་མགུ་བར་བྱ། ཡང་དག་པར་མཆོད་པར་བྱ། ཡང་དག་པར་བདེ་བར་བྱས་ན་སྦྱིན་པར་བྱེད་པ་དང་། སྦྱིན་བདག་རྣམས་ལ་ཡིད་དགེ་བས་སླར་བརྩེ་བར་བྱེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བདེ་བར་གཤེགས་པས་དེ་སྐད་གསུངས་ནས་ཡང་སྟོན་པས་གསུངས་པ། སྐྱེས་བུ་གང་ཟག་དད་པ་དག །གང་གིས་ལྷ་རྣམས་མཆོད་བྱེད་པ། །སྟོན་པའི་བཀའ་བཞིན་བྱེད་པ་སྟེ། །སངས་རྒྱས་ཀྱིས་ཀྱང་དེ་ལ་བསྔགས། །

---

^{[མ་དཔེ་གཟིགས་ན་འདིར་གནོན།]}

ས་ཕྱོགས་གང་ན་ཤེས་རབ་ཅན། །མཁས་པ་ཚུལ་ཁྲིམས་ལྡན་འཁོད་པ། །བཤོས་གསོལ་སྦྱིན་རབས་བསྒྲག་པར་བྱ། །དེ་དག་རྗེད་པས་རྗེད་པར་འགྱུར། །མཆོད་པ་བྱས་པས་མཆོད་པར་འགྱུར། །དེ་ནས་འདི་ལ་སྙིང་བརྩེ་བ། །མ་ཡིས་ཇི་ལྟར་བུ་ལ་བཞིན། །ལྷས་རྗེས་བརྩེ་བའི་མི་རྣམས་ཀྱིས། །བདེ་ཞིང་བཟང་པོ་མཐོང་བར་འགྱུར། །བཅོམ་ལྡན་འདས་ཀྱིས་སྐྱེས་བུ་གང་ཟག་དད་པས་ལྷ་རྣམས་ལ་མཆོད་ན་སྟོན་པའི་བཀའ་བཞིན་བྱས་པ་ཡིན་ཏེ། སངས་རྒྱས་དག་གིས་ཀྱང་བསྔགས་སོ་ཞེས་གསུངས་པ་དང་། དྲུག་སྡེ་དག་གིས་ར་བའི་ལྷ་དང་། ནགས་ཀྱི་ལྷ་དང་། བཞི་མདོའི་ལྷ་དང་། སུམ་མདོའི་ལྷ་དང་། འཇིག་རྟེན་གྱི་ལྷ་དག་ལ་སོགས་ཏེ། ཐམས་ཅད་མཆོད་པ་བྱེད་པ་དང་། དད་པའི་བྲམ་ཟེ་དང་ཁྱིམ་བདག་དད་པ་རྣམས་འཕགས་པ་འདི་དག་དགེ་བར་་་གསུངས་པའི་ཆོས་འདུལ་བ་ལ་རབ་ཏུ་བྱུང་ན་འདི་ལྟར་གནོད་པ་ཤ་དང་ཁྲག་་་དང་། རྐང་དང་། ཚིལ་དག་ཟ་ཞིང་གཞན་གྱི་སྲོག་འཕྲོག་པ་དག་ལ་མཆོད་དེ། བདག་ཅག་དགེ་བསྙེན་གྱིས་ཀྱང་རིང་དུ་སྤངས་ན། འདི་དག་ནི་མཆོད་པ་བྱེད་དོ་ཞེས་ཉེས་པ་ངོར་བརྗོད་དཔྱས་འདོགས་ཤིང་མི་སྙན་པར་ཟེར་ནས་དེ་དག་དགེ་སློང་དག་གིས་ཟློག་པ་དང་། ཅིའི་ཕྱིར་ཚེ་དང་ལྡན་པ་དག་བཅོམ་ལྡན་འདས་ཀྱིས་ནི་གང་སྐྱེས་བུ་གང་ཟག་དད་པ་དག་གིས་ལྷ་དག་ལ་མཆོད་པར་བྱས་ན་སྟོན་པའི་བཀའ་བཞིན་དུ་བྱས་པ་ཡིན་ཏེ། སངས་རྒྱས་དག་གིས་ཀྱང་བསྔགས་སོ་ཞེས་མ་གསུངས་སམ། ཅི་ངེད་ཅག་དད་པ་མ་ཡིན་ནམ། ཅིའི་ཕྱིར་ན་མི་མཆོད་ཅེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་ཁྱིམ་པ་ལ་དགོངས་ཏེ་གསུངས་ཀྱིས་དགེ་སློང་དག་ལ་མ་ཡིན་གྱིས་དེ་ལྟ་བས་ན་དགེ་སློང་དག་གིས་ལྷ་རྣམས་ལ་མཆོད་པར་མ་བྱེད་ཅིག །བཅོམ་ལྡན་འདས་ཀྱིས་དགེ་སློང་དག་ལྷ་རྣམས་ལ་མཆོད་པར་མ་བྱེད་ཅིག་ཅེས་གསུངས་པ་དང་། དྲུག་སྡེ་དག་གིས་དེ་དག་ལ་གནོད་པར་བྱེད་པ་ལ་ཞུགས་པ་དང་། དགེ་

---

^{[མ་དཔེ་གཟིགས་ན་འདིར་གནོན།]}

སློང་དེ་དག་གི་རྨི་ལམ་དུ་ངེད་ཀྱི་ཉེས་པ་ཅི་བྱས་ན་ངེད་ལ་གནོད་པར་བྱེད་ཅེས་སྟོན་ཏོ། །བྲམ་ཟེ་དང་ཁྱིམ་བདག་མ་དད་པ་དག་ཀྱང་འཕགས་པ་རྣམས་འདི་དག་གིས་ཁྱེད་ཅག་ལ་གནོད་པ་ཅི་ཞིག་བྱས་ན་འདི་དག་མ་རུང་བར་བྱེད་ཅེས་་་འཕྱའོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དེ་ལ་མཆོད་པར་ཡང་མ་བྱེད་ཅིག །གནོད་པར་ཡང་མ་བྱེད་ཅིག་ཅེས་བཀའ་སྩལ་པ་དང་། དྲུག་སྡེ་དག་ལམ་དུ་ཞུགས་ཏེ། འདོང་བའི་ཚེ་ལྷ་དག་གི་རྟེན་མཐོང་བ་དང་བྱོལ་ཏེ་ལམ་མཐོན་དམན་དང་ཚེར་མ་ཅན་དུ་དོང་བ་དང་། དེ་ན་དགེ་སློང་ཁ་ཅིག་ནི་འཇག་མས་ནོན། ཁ་ཅིག་ནི་ཚེར་མས་ཟུག །ཁ་ཅིག་ནི་དྲེད་ནས་ལྷུང་ངོ་། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལམ་འབྱོལ་ཏེ་མ་འདོང་བར་ལམ་དྲང་པོར་དེང་ལ། ལྷ་དག་གི་རྟེན་ལ་སེ་གོལ་གྱི་སྒྲ་ཕྱུང་ལ་ཞལ་ནས་གསུངས་པའི་ཚིགས་སུ་བཅད་པ་བཀླག་པར་བྱ་སྟེ། དེ་ལ་ཐེ་ཚོམ་མ་བྱེད་ཅིག། གླེང་གཞི་ནི་མཉན་དུ་ཡོད་པ་ན་སྟེ། སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ལྷན་ཅིག་སྤྱོད་པ་དང་། ཉེ་གནས་ཀྱི་དགེ་སློང་གིས་མཁན་པོ་དང་། སློབ་དཔོན་ལ་དུས་གསུམ་དུ་ལྟར་སོང་ཤིག་ཅེས་གསུངས་ལ། མཚམས་ཆེན་པོ་དཔག་ཚད་ཕྱེད་དང་གསུམ་དུ་ཆོད་ཅིག་ཅེས་ཀྱང་གསུངས་ན། བཙུན་པ་དེ་ལྟ་ན་སློབ་་དཔོན་དང་མཁན་པོ་དཔག་ཚད་ཕྱེད་དང་གསུམ་ན་མཆིས་ན་དེ་དག་གིས་ཇི་་ཙམ་ན་བལྟ་བར་བགྱི། ཨུ་པཱ་ལི་དེ་དག་གིས་ཟླ་བ་ཕྱེད་ཕྱེད་ཅིང་ལྟར་སོང་ཤིག །དེ་སྟེ་དེ་དག་རྒྱང་གྲགས་ལྡན་གནས་ན་དེ་དག་གིས་ཞག་བདུན་ནམ་་་བརྒྱད་ན་ལྟར་སོང་ཤིག །དེ་ཚུན་ཆད་ནི་ཇི་ལྟར་དུས་སུ་ལྟར་སོང་ཤིག །འདོམ་ལྔ་བརྒྱ་ན་གནས་ན་ནི་དེ་དག་གིས་དུས་གསུམ་དུ་ལྟར་སོང་ཤིག །དེ་ལྟར་མ་སོང་ན་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་

---

^{[མ་དཔེ་གཟིགས་ན་འདིར་གནོན།]}

པ་ན་སྟེ། ཚེ་དང་ལྡན་པ་ཉེ་དགའ་བོ་ལ་རབ་ཏུ་འབྱུང་བར་འདོད་པ་ཞིག་འོངས་ནས་དེས་དེ་ལྷུང་བཟེད་མེད་པར་རབ་ཏུ་ཕྱུང་་་ངོ་། །དེའི་ཚེ་ན་དགེ་སློང་དག་གིས་ལྷུང་བཟེད་བཀྲུས་ནས་ལྷུང་བཟེད་བཞག་པའི་སར་བཞག་སྟེ། མཆོད་རྟེན་ལ་ཕྱག་བྱས་ནས་བདག་བདག་གི་ལྷུང་བཟེད་བླངས་ཏེ་ཟས་ཟ་བའི་གནས་སུ་འཁོད་དོ། །གང་གི་ཚེ་དགེ་སློང་དག་ཟས་ཟ་བའི་ཚེ་ལྷུང་བཟེད་དག་བཀྲུས་ནས་མཆོད་རྟེན་ལ་ཕྱག་བྱེད་པ་ལ་ཞུགས་པ་་་དང་། གསར་དུ་རབ་ཏུ་བྱུང་བ་དེ་ཡང་དེ་དག་དང་ལྷན་ཅིག་ཏུ་ཕྱག་བྱས་ནས་གང་གི་ཚེ་དགེ་སློང་དག་མཆོད་རྟེན་ལ་ཕྱག་བྱས་ཏེ་ལག་པ་བཀྲུས་པ་དང་། གསར་དུ་རབ་ཏུ་བྱུང་བ་དེས་ཀྱང་གནས་བརྟན་ཀུན་ཤེས་ཀཽཎྜི་ནྱའི་ལྷུང་བཟེད་བླངས་པ་དང་། དེས་སླར་བཟློག་གོ །དེ་ནས་གང་པོ་དང་། མིང་ཆེན་དང་། མ་འགགས་པ་དང་། ཤཱ་རིའི་བུ་དང་། མཽད་གལ་གྱི་བུ་དང་། འོད་སྲུང་དང་། ཀུན་དགའ་བོ་དང་། རེ་བ་ཏི་ལ་སོགས་པའི་ལྷུང་བཟེད་བླངས་ཏེ། དེ་དག་གིས་ཀྱང་སླར་བཟློག་པ་དང་། དེ་མཆི་མས་མིག་གང་བཞིན་དུ་ཕྱོགས་གཅིག་ཏུ་འདུག་གོ །འདོད་ཆགས་དང་མ་བྲལ་བའི་དགེ་སློང་དག་འདི་ལྟར་ལྷུང་བཟེད་དག་མེད་པར་སུས་རབ་ཏུ་ཕྱུང་ཞེས་ཕྱས་འདོགས་སོ། །ཁ་ཅིག་གིས་ནི་ཉེ་དགའ་བོ་ཡིན་ནོ་ཞེས་སྨྲས་ནས། དེ་དག་གིས་ཉེས་པ་སྦོམ་པོ་ལ་སྤྱོད་པ་དེ་མ་གཏོགས་པར་གཞན་སུ་ཞིག་དེ་ལྟར་བྱེད་ཅེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འདི་རྣམས་འཕྱ་བ་ནི་ཡུས་ཏེ། དེ་བས་ན་དགེ་སློང་དག་གིས་ལྷུང་བཟེད་མེད་པར་རབ་ཏུ་མ་དབྱུང་བར་དང་པོར་ལྷུང་་་བཟེད་དག་ཚོལ་ལ་གདོད་རབ་ཏུ་ཕྱུང་ཤིག །དེ་སྟེ་མི་འབྱོར་ན་བདག་གིས་ལྷུང་བཟེད་ཆུང་ངུ་བྱིན་ཅིག །དགེ་སློང་གིས་ལྷུང་བཟེད་མེད་པར་རབ་ཏུ་ཕྱུང་ན་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་མ་འགགས་པ་ལ་ཉེ་གནས་གཞོན་ནུ་ལྷུང་བཟེད་འཛིན་པ་ཞིག་ཡོད་པ་དེས་

---

^{[མ་དཔེ་གཟིགས་ན་འདིར་གནོན།]}

དེའི་ལྷུང་བཟེད་དང་། བདག་གི་ལྷུང་བཟེད་གཉི་ག་བཀྲུས་ཏེ། ལྷུང་བཟེད་དེ་གཉིས་ཀྱང་འདྲ་བ་ཞིག་ནས་བདག་གི་གང་ཡིན། སློབ་དཔོན་གྱི་གང་ཡིན་པ་མི་ཤེས་ནས། ཕྱི་ཞིག་ན་དེས་ཚེ་དང་ལྡན་པ་མ་འགགས་པའི་ལྷུང་བཟེད་ལ་སློབ་དཔོན་མ་འགགས་པའི་ལྷུང་བཟེད་ཅེས་ཡི་གེ་བྲིས་སོ། །དེ་ནས་དུས་ཕྱི་ཞིག་ན་ཁྱིམ་བདག་གཞན་ཞིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་ཁྱིམ་དུ་བཤོས་ལ་སྤྱན་དྲངས་ཏེ། ཁྱིམ་བདག་དེ་ལ་སྔོན་ཡོངས་སུ་སྤྱད་པའི་སྨད་འཚོང་མ་ཞིག་ཡོད་དེ། དེས་དེ་ལ་བཟང་མོ་ངས་སངས་རྒྱས་ལ་སོགས་པ་དགེ་སློང་གི་དགེ་འདུན་དག་བཤོས་ལ་སྤྱན་དྲངས་ཀྱིས་ཁྱོད་ཀྱང་ཚུར་ཤོག་ལ་རང་གི་ལག་གིས་་་ཀྱང་བྲིམ་པར་བྱོས་ཤིག་ཅེས་སྤྲིངས་པ་དང་། དེ་ཡང་བྲེལ་བའི་རྐྱེན་ཅིག་བྱུང་ནས་དེར་མ་འོངས་སོ། །བཅོམ་ལྡན་འདས་དང་ཉན་ཐོས་ཀྱི་དགེ་འདུན་དག་བཤོས་གསོལ། སྦྱིན་རབས་གསུངས་ནས་སླར་བཞུད་པ་དང་། ཚེ་དང་ལྡན་པ་མ་འགགས་པའི་ལྷུང་བཟེད་འཛིན་པ་གཞོན་ནུ་དེ་ཁྱིམ་དེ་ཉིད་དུ་ལྷུང་་་བཟེད་བཀྲུས་ཏེ་འགྲོའོ་སྙམ་དུ་བསམས་ནས་འདུག་པ་དང་། ཁྱིམ་བདག་དེས་འཕགས་པ་ལྷུང་བཟེད་སྐད་ཅིག་གཡར། མཛའ་བ་ཞིག་ལ་ལྷུང་བཟེད་ཀྱི་ལྷག་མ་ཞིག་བསྐུར་རོ་ཞེས་སྨྲས་པ་དང་། དེས་བདག་གི་ནི་མ་བྱིན་གྱི། ཚེ་དང་ལྡན་པ་མ་འགགས་པའི་ལྷུང་བཟེད་བྱིན་པ་དང་། ཁྱིམ་བདག་དེས་དེའི་ནང་དུ་བཟའ་བ་དང་། བཅའ་བ་གཙང་མས་བཀང་ནས་སྨད་འཚོང་མ་དེ་ལ་་་བསྐུར་ཏེ། ཕྲིན་དུ་བཟང་མོ་ངས་ནི་ཁ་ཟས་འདི་ལྟ་བུས་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་ཚིམ་པར་བྱས་ཀྱིས། ཁྱོད་ཀྱིས་དེ་ལ་རྗེས་སུ་ཡི་རང་སྐྱེད་ཅིག་ཅེས་སྤྲིང་ངོ་། །དེས་ཁ་ཟས་དེ་དག་བྱོ་བ་དང་། ལྷུང་བཟེད་ཀྱི་ཞབས་ལ་ཡི་གེ་འདུག་པ་མཐོང་ནས། བུད་མེད་ཀྱི་བུ་ནི་རྣམ་པ་བཅྭ་བརྒྱད་ལ་མཁས་ཏེ། དེས་བཀླགས་པ་དང་། ཚེ་དང་ལྡན་པ་མ་འགགས་པའི་མིང་མཐོང་ནས་དེས་འདི་སྙམ་དུ་བདག་གིས་འཕགས་པ་ལྷ་དང་མིས་མཆོད་པའི་ལྷུང་བཟེད་དེ་འདི་བཞིན་དུ་བསྐུར་བའི་མི་

---

^{[མ་དཔེ་གཟིགས་ན་འདིར་གནོན།]}

རིགས་སོ་སྙམ་དུ་བསམས་ནས་དེས་ལྷུང་བཟེད་དེ་དྲིས་ཕྱིས་ཏེ། དེ་ནས་མེ་ཏོག་བསུང་ཞིམ་པོས་བཀང་ནས་ཁྲིའུ་ཚོན་གྱིས་བྲིས་པའི་སྟེང་དུ་བཞག་སྟེ། དེའི་དྲུང་དུ་བཏུད་ནས་པོག་པོར་གྱིས་བདུག་ཅིང་འདུག་པ་དང་། དེ་ནས་སྐྱེས་པ་གཞན་ཞིག་ཀཱར་ཥཱ་པ་ཎ་ལྔ་བརྒྱ་དང་། དྲི་དང་ཕྲེང་བ་དག་ཁྱེར་ཏེ་དེའི་དྲུང་དུ་འོངས་ནས། བཟང་མོ་ཅི་བྱེད་ཀུན་ཏུ་སྤྱོད་ཀྱིས་འདོང་ངོ་ཞེས་སྨྲས་པ་དང་། ལྷུང་བཟེད་ལ་མཆོད་པ་བྱས་སྐད་ཅིག་སྡོད་ཅིག །དེས་ལྷུང་བཟེད་འདི་གང་ནས་འོངས་སུའི་ཡིན་ཞེས་སྨྲས་པ་དང་། མོས་ཇི་ལྟར་གྱུར་པ་ཞིབ་ཏུ་སྨྲས་སོ། །དེས་ཁྱོད་ཀྱིས་ཡ་མཚན་ཅན་ཐམས་ཅད་དག་ལ་ཡང་སྦྱིན་པ་གཏོང་སྟེ། རབ་ཏུ་བྱུང་བ་དག་ཀྱང་མ་ཤོར་ཏོ་ཞེས་སྨྲས་པ་དང་། དེ་རྣ་བ་བཀབ་ནས་སྡིག་པ་དེ་ལྟ་བུ་མ་བྱས་ཀྱིས་སེམས་ཅན་དམྱལ་བར་འགྲོ་བའི་རྒྱུར་གྱུར་ཏ་རེ་ཞེས་སྨྲས་སོ། །མོས་དེ་སྐད་སྨྲས་ཀྱང་དེས་ལོག་པར་བྱེད་པ་དེ་མ་བཏང་ངོ་། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ། དགེ་སློང་གང་མི་བྲི་བ་བྲིས་པ་དེ་ནི་ཉེས་པའི་དམིགས་སུ་འགྱུར་གྱིས་དེ་བས་ན་དགེ་སློང་དག་མི་བྲི་བ་མ་བྲི་ཤིག །བཅོམ་ལྡན་འདས་ཀྱིས་དགེ་སློང་དག་ལ་མི་བྲི་བ་མ་འདྲི་ཤིག་ཅེས་གསུངས་པ་དང་། དགེ་སློང་དག་གིས་གང་མི་བྲི་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། མི་བྲི་བ་རྣམ་པ་ལྔ་སྟེ། སོ་སོར་ཐར་པ་ཐམས་ཅད་དང་། སོ་སོར་ཐར་པ་དང་ལྡན་པ་དང་། འདུལ་བ་ཐམས་ཅད་དང་། འདུལ་བ་ཐམས་ཅད་དུ་ལྡན་པ་དང་། གང་ཟག་སོ་སོའོ། །མཚན་མ་ཅན་དུ་བྱ་བ་ནི་ཉེས་པ་མེད་དོ། །གླེང་གཞིའི་སྒོ་གསུམ་པའི་མདོའི་ཚིགས་སུ་བཅད་པ་དང་པོའོ།། །།མདོར་ན། དགེ་ཚུལ་གྱིས་ནི་ལྷུང་བཟེད་བཅག །ལྷུང་བཟེད་ཇི་ལྟར་བསྲེག་པར་བྱ། །སྲེག་འགེབས་གནང་བར་བྱ་བ་སྟེ། །དྲང་སྲོང་ཆེན་པོས་རྗེས་སུ་གནང་། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་

---

^{[མ་དཔེ་གཟིགས་ན་འདིར་གནོན།]}

སྐྱབས་མེད་པ་ལ་ཟས་སྦྱིན་པའི་ཀུན་དགའ་ར་བ་ན་བཞུགས་སོ། །དགེ་སློང་གཞན་ཞིག་གིས་དགེ་ཚུལ་ཕ་ལྷུང་བཟེད་འཛིན་པ་དེ་ལ་དེས་ལྷུང་བཟེད་འཁྲུར་བཅུག་པ་དང་། དགེ་ཚུལ་ཕ་དེ་ཡང་དྲན་པ་ཉེ་བར་གནས་པ་མ་ཡིན་པ་ཞིག་ནས་དེའི་ལག་ནས་ལྷུང་སྟེ་ཆག་གོ །དགེ་སློང་དེ་ཕོངས་པར་གྱུར་ཏེ། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ། དགེ་སློང་དག་གང་ཅུང་ཟད་དགེ་སློང་དག་གིས་དགེ་ཚུལ་ཕ་ལ་ལྷུང་བཟེད་འཁྲུར་བཅུག་ན་ཉེས་པའི་དམིགས་སུ་འགྱུར་ཏེ། དེ་བས་ན་དགེ་སློང་དག་གིས་དགེ་ཚུལ་ཕ་དག་ལྷུང་བཟེད་འཁྲུར་མ་གཞུག་ཤིག །བཅོམ་ལྡན་འདས་ཀྱིས་དགེ་སློང་དག་ལྷུང་བཟེད་དགེ་ཚུལ་འཁྲུར་མ་གཞུག་ཤིག་ཅེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུའི་དགེ་ཚུལ་ཕ་ཙུན་ད་ཞེས་བྱ་བ་ལྷུང་བཟེད་འཛིན་ཏེ། དེས་མཁན་པོ་ལྷུང་བཟེད་ཚུར་སྩོལ་ཅིག་བཀྲུའོ་ཞེས་སྨྲས་པ་དང་། དེས་བུ་བཅོམ་ལྡན་འདས་ཀྱིས་བསླབ་པའི་གནས་བཅས་ཏེ། དགེ་སློང་གིས་དགེ་ཚུལ་ཕ་དག་ལ་ལྷུང་བཟེད་འཁྲུར་མ་གཞུག་ཤིག་ཅེས་གསུངས་ཀྱིས་ང་ཉིད་འཁྲུས་ཁྱོད་ཕར་སོང་ཤིག་ཅེས་སྨྲས་པ་དང་། དེས་མཁན་པོ་ཅི་བདག་གིས་ཀྱང་ཉེས་པའི་དམིགས་སུ་འགྱུར་རམ་ཞེས་སྨྲས་པ་དང་། དེས་བུ་སངས་རྒྱས་བཅོམ་ལྡན་འདས་ནི་ཆོས་ཀྱི་བདག་པོ་བས་ན་ངས་ཇི་ལྟར་བྱ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་ཕ་དྲན་པ་ཉེ་བར་གནས་པ་དེ་དག་ལ་ནི་འཁྲུར་གཞུག་སྟེ། དེ་ལ་ཐེ་ཚོམ་དུ་མ་བྱེད་ཅིག། གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་དག་ལྷུང་བཟེད་དུ་ཟན་ཟོས་ནས་དེ་ཡང་མ་བཅོས་པས་བཙས་ཁྱེར་ནས་རྡོལ་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་བསྲེག་པར་བྱོས་ཤིག །བཅོམ་ལྡན་འདས་ཀྱིས་ལྷུང་བཟེད་སྲེགས་ཤིག་ཅེས་གསུངས་ནས། དགེ་

---

^{[མ་དཔེ་གཟིགས་ན་འདིར་གནོན།]}

སློང་དག་གིས་ལྷུང་བཟེད་ཤིང་གིས་བསྲེགས་པ་དང་། ལྷུང་བཟེད་མ་རུང་བར་གྱུར་ནས། བཅོམ་ལྡན་འདས་ཀྱིས་ཤིང་གིས་སྲེག་པར་མ་བྱེད་ཅིག་ཅེས་བཀའ་སྩལ་པ་དང་། དགེ་སློང་དག་གིས་རྩྭ་དང་སོག་མ་དག་གིས་གཡོགས་ཏེ་བསྲེགས་པ་དང་། དེ་ཉིད་ཉེས་པའི་དམིགས་སུ་གྱུར་ནས། བཅོམ་ལྡན་འདས་ཀྱིས་རྩྭ་དང་སོག་མས་གཡོགས་ཏེ་སྲེག་པར་མ་བྱེད་ཅིག་ཅེས་བཀའ་སྩལ་ནས། དགེ་སློང་དག་གིས་ཇི་ལྟར་བསྲེག་པ་མི་ཤེས་ནས། བཅོམ་ལྡན་འདས་ཀྱིས་ལྷུང་བཟེད་ཀྱི་སྲེག་འགེབས་སྦྱོར་ཅིག་ཅེས་བཀའ་སྩལ་པ་དང་། དགེ་སློང་དག་གིས་ལྷུང་བཟེད་ཀྱི་སྲེག་འགེབས་ཇི་ལྟར་སྦྱོར་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། སྲེག་འགེབས་ལ་རྣམ་པ་གཉིས་ཏེ། སློབ་དཔོན་གྱིས་བྱས་པ་དང་། བདག་གིས་བྱས་པའོ། །དེ་ལ་སློབ་དཔོན་གྱིས་བྱས་པ་ནི་བུམ་པ་ལྟ་བུའོ། །བདག་གིས་བྱས་པ་ནི་ཕྲུ་བའམ་རྫ་མ་ཡང་རུང་སྟེ། ཐལ་བས་བཀང་ལ་རྫ་མ་ཇི་ཙམ་རན་པ་ཕྲི་ཤིག་ཅེས་བཀའ་སྩལ་པ་དང་། དགེ་སློང་དག་གིས་གྱོ་མོའི་ནང་དུ་དེ་བཞིན་དུ་བསྲེགས་པས་དེ་ཉིད་ཉེས་པའི་དམིགས་སུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཕྱི་རོལ་དུ་ནི་འཇིམ་པ་དང་ཕུབ་མར་བསྲེས་པས་ཡུགས་ལ་ནང་དུ་ཏིལ་གྱི་ཚིགས་མའམ། བ་ལང་གི་ལྕི་བས་ཡུགས་ཏེ་དེ་སྐམས་པ་དང་། ས་གཞི་བྱི་བདར་གྱིས་ལ་འོག་ཏུ་ཕུབ་མ་དང་། ཏིལ་གྱི་ཚིགས་མ་དང་། གཞན་ཡང་བྱད་བཟང་དུ་འགྱུར་བ་དག་ཐིང་སྟེ། རྩྭ་དང་། ལྕི་བ་དང་། སོག་མ་དག་གིས་གཡོགས་ལ་ཅི་ནས་དུད་པ་མ་ཤོར་བར་བྱོས་ལ་སྲེགས་ཤིག །དེའི་གཡས་གཡོན་ཆག་ཆག་ཐོབ་ལ་སྐྱོང་ནུལ་གྱིས་ཤིག །ཅི་ནས་སྲོག་ཆགས་དག་བདེ་བར་བྱ་བའི་ཕྱིར་རོ། །བསྲེགས་པ་དེ་གྲངས་པ་དང་། ལྷུང་བཟེད་ཕྱུང་ལ་ཁྲུས་ཏེ། ནམ་ཁ་དོག་ཞེན་པར་གྱུར་གྱི་བར་དུ་བསྲེག་པར་བྱོས་ཤིག །དེ་བས་ན་ལྷུང་བཟེད་སྲེག་འགེབས་དང་ཡོ་བྱད་དག་རྗེས་སུ་གནང་ངོ་། །གླེང་གཞིའི་

---

^{[མ་དཔེ་གཟིགས་ན་འདིར་གནོན།]}

སྒོ་གསུམ་པའི་མདོའི་ཚིགས་སུ་བཅད་པ་གཉིས་པའོ།། །།མདོར་ན། གཅིག་ལ་གཅིག་དང་དུགས་ཁང་དང་། །ཁྱིམ་པ་གསུམ་པ་དེ་བཞིན་ཏེ། །གདིང་བ་དང་ནི་དེ་བཞིན་སྐྲ། །ལྕི་བས་བྱས་པ་ཀུན་ཐོས་པའོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་དུ་ཡོད་པ་ན་ཁྱིམ་བདག་གཞན་ཞིག་གིས་དགེ་འདུན་གྱི་ཕྱིར་དུགས་ཁང་ཞིག་བྱས་སོ། །དེ་ནས་དྲུག་སྡེ་དག་གིས་གོས་གཅིག་པུས་སྨད་གཡོགས་བྱས་ཏེ། གཅིག་ལ་གཅིག་ལས་བྱེད་ཅིང་འཁོད་པ་དང་། བྲམ་ཟེ་དང་། ཁྱིམ་བདག་དག་ཕྱོགས་དེར་ལྷགས་པ་དང་། དེ་དག་གིས་དེ་མཐོང་ནས། ཀྱེ་འདི་ལྟ་བུ་དག་ཏུ་བྱེད་པ་སུ་ཞིག་ཅེས་སྨྲས་པ་དང་། དེ་ན་ཁ་ཅིག་གིས་ནི་མུ་སྟེགས་ཅན་དག་ཡིན་ནོ་ཞེས་སྨྲས། ཡང་ཁ་ཅིག་གིས་འདི་དག་ནི་མུ་སྟེགས་ཅན་མ་ཡིན་གྱི། དགེ་སྦྱོང་ཤཱཀྱའི་བུའོ་ཞེས་སྨྲས་པ་དང་། དེ་དག་འཕྱ་བ་ལ་ཞུགས་ཏེ། ཀྱེ་སྟོན་པ་ནི་ངོ་ཚ་བ་དང་ལྡན་ན། ཅིའི་ཕྱིར་འདི་དག་ངོ་ཚ་བ་དང་ཁྲེལ་མེད་ཅེས་སྨྲས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཀྱིས། དེ་ལྟ་བས་ན་དགེ་སློང་དག་དུགས་ཁང་དུ་གོས་གཅིག་པུ་གོན་ཏེ་གཅིག་ལ་གཅིག་ལས་མ་བྱེད་ཅིག །དགེ་སློང་དག་གིས་གོས་གཅིག་པུ་གོན་ཏེ་དུགས་ཁང་དུ་ལས་བྱས་ན་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཁྱིམ་བདག་་གཞན་ཞིག་གིས་དགེ་འདུན་གྱི་ཕྱིར་དུགས་ཁང་ཞིག་བྱས་པ་དང་། དེར་དགེ་སློང་དག་གིས་འབྲུ་མར་གྱིས་བྱུགས་ཏེ། རྐང་པ་ལ་རེག་ནས་མགོ་བོ་ལ་རེག །མགོ་བོ་ལ་རེག་ནས་ཁ་ལ་རེག །ཁ་ལ་རེག་ནས་ལག་པ་དང་རྐང་པ་ལ་རེག །ལག་པ་དང་རྐང་པ་ལ་རེག་ནས་སླར་ཡང་ཁ་ལ་རེག་ཅིང་གོས་ངན་པ་ཞིག་གིས་སྨད་གཡོགས་ཏེ་འདུག་པ་དང་། ཇི་ཙམ་ཞིག་ན་ཁྱིམ་པ་མ་དད་པ་ཞིག་ཕྱོགས་དེར་

---

^{[མ་དཔེ་གཟིགས་ན་འདིར་གནོན།]}

འོངས་ནས། དེས་དགེ་སློང་དག་མཐོང་བ་དང་། དེས་འཕྱ་བ་ལ་ཞུགས་ཏེ། དགེ་སྦྱོང་ཤཱཀྱའི་བུ་དག་ནི་མི་གཙང་བ་སྟེ། རྐང་པ་ལ་རེག་པ་ཁ་ལ་རེག་པར་བྱས་ནས་གོས་ངན་པས་སྨད་གཡོགས་བྱས་ཏེ། གཅེར་བུར་སྐྱེ་བོ་དག་གི་ནང་ན་འདུག་གོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཀྱིས། དེ་བས་ན་དུགས་ཁང་དུ་ཁྱིམ་པ་མ་གཞུག་ཤིག་མ་དད་པ་ཡང་ལས་བྱེད་དུ་མ་གཞུག་ཤིག །དུགས་ཁང་གི་སྒོ་བ་དགེ་སློང་རྣམས་སྐོས་ལ་དེ་དག་གིས་ཁྱིམ་པ་དག་ནང་དུ་མ་གཏང་ཤིག །བཅོམ་ལྡན་འདས་ཀྱིས་དུགས་ཁང་དུ་ཁྱིམ་པ་མ་གཏང་ཤིག །ལས་ཀྱང་བྱེད་དུ་མ་གཞུག་ཤིག་ཅེས་གསུངས་པ་དང་། དེ་ནས་དུས་ཕྱི་ཞིག་ན་་་དུགས་ཁང་དུ་ཞུགས་པའི་ཚེ་ཁྱིམ་བདག་མགོན་མེད་ཟས་སྦྱིན་དེར་འོངས་པ་དང་། དགེ་སློང་སྒོ་བས་སྨྲས་པ། ཁྱིམ་བདག་ནང་དུ་མ་འགྲོ་བར་འདུག་ཤིག །བཅོམ་ལྡན་འདས་ཀྱིས་ཁྱིམ་པ་དུགས་ཁང་དུ་མ་གཏང་ཤིག་ཅེས་བཀའ་སྩལ་ཏོ། །དེས་འཕགས་པ་དག་ཅི་ཁོ་བོ་ཡང་གཞན་དུ་འགྱུར་རམ། ཁོ་བོས་ནི་ངེས་པར་འཕགས་པ་དག་གི་ལས་བྱའོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། གང་དད་པ་དག་ནི་དུགས་ཁང་དུ་ཐོང་། ལས་ཀྱང་བྱེད་དུ་ཆུག་ཤིག །དེ་ལ་ཐེ་ཚོམ་དུ་མ་བྱེད་ཅིག །བཅོམ་ལྡན་འདས་ཀྱིས་དད་པ་དག་ནི་དུགས་ཁང་དུ་ཐོང་ལ་ལས་ཀྱང་བྱེད་དུ་ཆུག་ཤིག་ཅེས་གསུངས་པ་དང་། དེ་ནས་ཁྱིམ་བདག་མགོན་མེད་ཟས་སྦྱིན་ནང་དུ་འགྲོ་བ་ན་དེ་དང་ལྷན་ཅིག་ཏུ་བྲམ་ཟེ་ཞིག་ཀྱང་་་འོངས་ནས་དེ་མ་བཏང་བ་དང་། དེས་འཕགས་པ་ཅིའི་ཕྱིར་ན་ཁྱིམ་བདག་མགོན་མེད་ཟས་སྦྱིན་ནི་ནང་དུ་བཏང་ལ་བདག་ནི་མི་གཏོང་ཞེས་སྨྲས་པ་དང་། དགེ་སློང་གིས་དེ་ལ་སྨྲས་པ། བྲམ་ཟེ་ཁྱིམ་བདག་མགོན་མེད་ཟས་སྦྱིན་ནི་དད་པས་ནང་དུ་

---

^{[མ་དཔེ་གཟིགས་ན་འདིར་གནོན།]}

བཏང་ངོ་། །དེས་སྨྲས་པ། འོ་ན་བདག་ཀྱང་དད་པར་གྱུར་ན་ནང་དུ་གཏོང་ངམ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དེ་སྟེ་དད་པར་གྱུར་ན་ནང་དུ་ཐོང་ཤིག་ཅེས་བཀའ་སྩལ་པ་དང་། དགེ་སློང་དག་གིས་དེ་སྐྱབས་གསུམ་དུ་བཏང་ནས་ནང་དུ་བཏང་ངོ་། །དེས་ཡང་དགེ་སློང་དག་རྐང་པ་ལ་རེག་ནས་ཁ་དང་མགོ་ལ་རེག་ཅིང་གོས་ ངན་པས་སྨད་གཡོགས་ནས་སྒྲེན་མོར་འདུག་པ་་་མཐོང་བ་དང་། དེ་མ་དད་དེ་འཕྱ་བ་ལ་ཞུགས་སོ། །དགེ་སྦྱོང་ཤཱཀྱའི་བུ་ནི་མི་གཙང་བ་སྟེ། རྐང་པ་ལ་རེག་པ་ཁ་དང་མགོ་བོ་ལ་རེག་ཅིང་གོས་ངན་པས་སྨད་གཡོགས་ནས་སྒྲེན་མོར་འདུག་གོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རབ་ཏུ་དད་པ་དག་ནི་དུགས་ཁང་གི་ནང་དུ་ཐོང་ཤིག །དད་པ་ཆུང་བ་ནི་མ་གཏང་ཤིག། །། འདུལ་བ་གཞུང་དམ་པ། བམ་པོ་སུམ་བཅུ་རྩ་བཞི་པ། གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཁྱིམ་བདག་གཞན་ཞིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་དག་དུགས་ཁང་དུ་སྤྱན་དྲངས་ཏེ། དགེ་སློང་དག་ནང་དུ་ཞུགས་པ་དང་། དེ་ན་དགྲ་བཅོམ་པའི་དགེ་སློང་ཞིག་གིས་ཚུལ་ཁྲིམས་ཉམས་པའི་དགེ་སློང་ཞིག་ལ་ལས་བྱེད་ཅིང་འདུག་པ་དང་། བཅོམ་ལྡན་འདས་ཀྱང་ནང་དུ་གཤེགས་ནས་དེས་ལས་བྱེད་པ་གཟིགས་ནས། བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་ཁྱེད་ཅག་གིས་དགེ་སློང་འདི་ལ་དགེ་སློང་འདིས་ལས་བྱེད་པ་མཐོང་ངམ། བཙུན་པ་མཐོང་ངོ་ཞེས་གསོལ་པ་དང་། དགེ་སློང་ལས་བྱེད་པ་འདི་ནི་དགྲ་བཅོམ་པ་ཟག་པ་ཟད་པའོ། །གང་ལ་ལས་བྱ་བ་འདི་ནི་ཚུལ་ཁྲིམས་ཉམས་པ་སྡིག་པའི་ཆོས་ཅན། ཁོང་རུལ་བ། ཟགས་པ། གསོག་ཏུ་གྱུར་པ། དུང་དགྲ་ལྟ་བུར་སྤྱོད་པ། དགེ་སྦྱོང་མ་ཡིན་པ་དགེ་སྦྱོང་དུ་ཡི་དམ་འཛིན་པ། ཚངས་པར་སྤྱོད་པ་མ་ཡིན་པ་ཚངས་པར་སྤྱོད་པར་ཡི་དམ་འཛིན་

---

^{[མ་དཔེ་གཟིགས་ན་འདིར་གནོན།]}

པ་སྟེ། དེ་བས་ན་དགེ་སློང་དག་སེང་གེ་ལྟ་བུས་ཝ་འདྲ་བའི་ལས་མ་བྱེད་ཅིག །བྱས་ན་འདས་པ་དང་བཅས་པར་འགྱུར་རོ། །བཅོམ་ལྡན་འདས་ཀྱིས་སེང་གེ་འདྲ་བས་ཝ་ལྟ་བུའི་ལས་མ་བྱེད་ཅིག་ཅེས་བཀའ་སྩལ་པ་དང་། མཉན་དུ་ཡོད་པ་ན་ཁྱིམ་བདག་གཞན་ཞིག་དེ་དང་རིགས་མཉམ་པ་ལས་ཆུང་མ་ཞིག་བླངས་ཏེ། དེ་དེ་དང་ལྷན་ཅིག་རྩེ་དགའ་ཡོངས་སུ་སྤྱོད་དོ། །དེས་རྩེ་དགའ་ཡོངས་སུ་སྤྱད་པ་ལས་དུས་ཕྱི་ཞིག་ན་ཆུང་མ་སེམས་ཅན་དང་ལྡན་པར་གྱུར་ནས། དེ་ལ་ཟླ་བ་བརྒྱད་དམ་དགུ་འདས་པ་དང་བུ་བཙས་ནས་བུ་ཕོ་ཞིག་བྱུང་སྟེ། དེ་གཟུགས་ལེགས་པ་བལྟ་ན་སྡུག་ཅིང་མཛེས་པ་ཡན་ལག་ཐམས་ཅད་དང་ལྡན་པ་ཞིག་ནས་དེ་བཙས་པའི་བཙས་སྟོན་ཆེན་པོ་བྱས་ནས་མིང་བཏགས་སོ། །དེ་བསྲིངས་བསྐྱེད་ནས་ཆེར་གྱུར་པ་དང་། དེ་དུས་ཕྱི་ཞིག་ན་ཛེ་ཏའི་ཚལ་དུ་སོང་སྟེ། ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་དེ་མཛོད་གསུམ་དང་ལྡན་པར་གྱུར་ཏེ། དེས་འདི་སྙམ་དུ་བཅོམ་ལྡན་འདས་ཀྱིས་དགེ་སློང་དག་བུའི་ཕ་མ་ནི་དཀའ་བར་བྱ་བ་བྱེད་དེ། ཕན་པར་བྱེད་པའོ། །གསོ་བར་བྱེད་པའོ། །སྐྱེད་པར་བྱེད་པའོ། །ནུ་མ་སྣུན་པར་བྱེད་པའོ། །འཛམ་བུའི་གླིང་སྣ་ཚོགས་པ་སྟོན་པར་བྱེད་པ་ཡིན་ཏེ། བུས་ཕྲག་པ་གཅིག་ལ་ནི་མ། གཉིས་པ་ལ་ནི་ཕ་ཁྱེར་ཏེ་ལོ་བརྒྱ་ཚང་གི་བར་དུ་ཁྱེར་རམ། ཡང་ན་ས་གཞི་ཆེན་པོ་ནོར་བུ་དང་། མུ་ཏིག་དང་། བཻ་ཌཱུརྱ་དང་། དུང་དང་། ཤེལ་དང་། གསེར་དང་། དངུལ་དང་། ཨ་སྨ་གར་བ་དང་། སྤུག་དང་། གཡས་ཕྱོགས་སུ་འཁྱིལ་བ་དེ་ལྟ་བུ་དག་གིས་དབང་པོར་བཅུག་གམ་དབང་ཕྱུག་ཏུ་་་བཅུག་ཀྱང་དེས་ནི་ཕ་དང་མ་ལ་བུས་ཕན་བཏགས་པའམ་ཉེ་བར་ཕན་བཏགས་་་པར་མི་འགྱུར་གྱི། གང་གིས་ཕ་མ་དད་པ་མེད་པ་དད་པ་ཕུན་སུམ་ཚོགས་པར་བྱས་སམ། ཡང་དག་པར་བསྐུལ་ཏམ། དུལ་བར་བྱས་སམ། འཇུག་པར་བྱས་སམ། སོ་སོར་བཀོད་དམ། ཚུལ་ཁྲིམས་ངན་པ་ལས་ཚུལ་ཁྲིམས་ཕུན་སུམ་ཚོགས་པར། སེར་སྣ་ཅན་ལས་གཏང་བ་ཕུན་སུམ་ཚོགས་པར།

---

^{[མ་དཔེ་གཟིགས་ན་འདིར་གནོན།]}

ཤེས་རབ་འཆལ་བ་ལས་ཤེས་རབ་ཕུན་སུམ་ཚོགས་པར་ཡང་དག་པར་བསྐུལ། དུལ་བར་བྱས། ཞུགས་པར་བྱས། སོ་སོར་བཀོད་ན་དེ་ལྟ་བུ་ནི་བུས་ཕ་དང་མ་ལ་ཕན་བཏགས་པ་དང་། ཉེ་བར་ཕན་བཏགས་པར་འགྱུར་རོ་ཞེས་གསུངས་སོ་སྙམ་དུ་བསམས་ནས། བདག་གིས་ཀྱང་ཅི་ནས་ཕ་མ་ལ་ཕན་གདགས་པ་ཅུང་ཟད་ཅིག་བྱའོ་སྙམ་ནས་ཇི་སྲིད་དགའ་བའི་བར་དུ་གཞོངས་སྤྱོད་ཅིང་འདུག་ནས་་་མཉན་དུ་ཡོད་པ་གང་ན་བ་དེ་ལོགས་སུ་གཞོངས་སྤྱོད་ཅིང་སོང་ངོ་། །མཐར་གྱིས་སྤྱད་པ་སྤྱོད་ཅིང་མཉན་དུ་ཡོད་པར་ཕྱིན་ཏོ། །དེས་དེ་གཉིས་སྐྱབས་སུ་འགྲོ་བ་དང་། བསླབ་པའི་གནས་ལ་རབ་ཏུ་བཀོད་དོ། །དེ་ནས་དུས་ཕྱི་ཞིག་ན་དེས་ཕའི་དྲུང་དུ་ནོར་ལས་བསོད་ནམས་སུ་བྱ་བའི་དངོས་པོ་བདུན་པོའི་ཡོན་ཏན་རྒྱས་པར་བརྗོད་པ་དང་། དེས་འཕགས་པ་བདག་གིས་ཀྱང་ནོར་སྣ་བདུན་་་ལས་བྱ་བའི་བསོད་ནམས་ཀྱི་དངོས་པོ་ཅུང་ཟད་ཅིག་བྱའོ་ཞེས་སྨྲས་པ་དང་། དེས་བགྲེས་པོ་དེ་བཞིན་ལེགས་ཀྱིས་གྱིས་ཤིག་ཅེས་སྨྲས་པ་དང་། ཅི་ཞིག་བྱ། དུགས་ཁང་ཞིག་གྱིས་ཤིག །དེས་དུགས་ཁང་བྱས་ཏེ། ཁྱིམ་བདག་དེ་རང་གི་དུགས་ཁང་དུ་རང་གིས་ལས་བྱ་བ་ལ་ཞུགས་ཏེ། ཤིན་ཏུ་ངལ་བར་གྱུར་ནས་བཀྲུ་བའི་ཡོ་བྱད་དང་། འབྲུ་མར་དང་ཕྱེ་ལ་སོགས་པ་མང་དུ་ལྷག་གོ །དེ་ནས་དེས་བུ་བདག་རབ་ཏུ་ངལ་བར་གྱུར་གྱིས་ངའི་རྒྱབ་ཅུང་ཞིག་ཉེས་ཤིག་ཅེས་་་སྨྲས་པ་དང་། དེས་ཡབ་བཅོམ་ལྡན་འདས་ཀྱིས་སེང་གེ་ལྟ་བུས་ཝ་ལྟ་བུ་དག་ལ་བསྙེན་བཀུར་མ་བྱེད་ཅིག་ཅེས་བཀའ་སྩལ་ཏེ་མ་གནང་ངོ་། །ཞེས་སྨྲས་པ་དང་། དེས་བུ་སེང་གེ་དང་ཝ་གང་ཞེས་སྨྲས་པ་དང་། ཡབ་བདག་ནི་སེང་གེ་དང་འདྲ། ཁྱོད་ནི་ཝ་དང་འདྲའོ། །བུ་དེ་ཅིའི་ཕྱིར་ཞེས་སྨྲས་པ་དང་། ཡབ་བདག་ནི་ཚུལ་ཁྲིམས་དང་ལྡན་པའོ། །ཁྱོད་ནི་ཚུལ་ཁྲིམས་ངན་པ་དང་ལྡན་པའོ། །བུ་དེ་ལྟར་ཝ་དང་འདྲ་བ་ང་ལྟ་བུ་ལས་སེང་གེ་དང་འདྲ་བ་ཁྱོད་ལྟ་བུ་སྐྱེས་སམ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་

---

^{[མ་དཔེ་གཟིགས་ན་འདིར་གནོན།]}

སྩལ་པ། དགེ་སློང་དག་རིགས་གང་ན་ཕ་མ་ལ་ཡང་དག་པར་མགུ་བར་བྱེད། ཡང་དག་པར་མཆོད་པར་བྱེད། ཡང་དག་པར་བདེ་བར་སྐྱོང་བར་བྱེད་པའི་རིགས་དེ་ནི་ཚངས་པ་དང་བཅས་པའོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཕ་མ་ལ་ཆོས་བཞིན་བྱེད། ཚུལ་བཞིན་བྱེད་པ་ནི་ཚངས་པ་ཞེས་བྱའོ། །དགེ་སློང་དག་རིགས་གང་ན་ཕ་མ་ལ་ཡང་དག་པར་མགུ་བར་བྱེད། ཡང་དག་པར་མཆོད་པར་བྱེད། ཡང་དག་པར་བདེ་བར་བསྙེན་བཀུར་བྱེད་པ་དེ་ནི་སློབ་དཔོན་དང་བཅས་པའོ། །དེ་ཅིའི་ཕྱིར་ཞེ་ན། རིགས་ཀྱི་བུས་ཕ་མ་ལ་ཆོས་བཞིན་བྱས་ན་སློབ་དཔོན་ལྟ་བུར་འགྱུར་རོ། །དགེ་སློང་དག་རིགས་གང་ན་ཕ་མ་ལ་ཡང་དག་པར་མགུ་བར་བྱེད། ཡང་དག་པར་མཆོད་པར་བྱེད། ཡང་དག་པར་བདེ་བར་བསྙེན་བཀུར་བྱེད་པའི་རིགས་དེ་ནི་སྦྱིན་པར་རིགས་པར་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུས་ཕ་མ་ལ་ཆོས་བཞིན་དུ་བྱས་ན་སྦྱིན་པར་རིགས་པའོ། །དགེ་སློང་དག་རིགས་གང་ན་ཕ་མ་ལ་ཡང་དག་པར་མགུ་བར་བྱེད། ཡང་དག་པར་མཆོད་པར་བྱེད། ཡང་དག་པར་བདེ་བར་བསྙེན་བཀུར་བྱེད་ན་རིགས་དེ་ནི་མེ་དང་བཅས་པའོ། །དེ་ཅིའི་ཕྱིར་ཞེ་ན། རིགས་ཀྱི་བུས་ཕ་མ་ལ་ཆོས་བཞིན་དུ་བྱས་ན་མེ་ལྟ་བུའོ། །དགེ་སློང་དག་རིགས་གང་ན་ཕ་མ་ལ་ཡང་དག་པར་མགུ་བར་བྱེད། ཡང་དག་པར་མཆོད་པར་བྱེད། ཡང་དག་པར་བདེ་བར་བསྙེན་བཀུར་བྱེད་ན་རིགས་དེ་ནི་ལྷ་དང་བཅས་པའོ། །དེ་ཅིའི་ཕྱིར་ཞེ་ན། རིགས་ཀྱི་བུས་ཕ་མ་ལ་ཆོས་བཞིན་དུ་བྱས་ན་ལྷ་ལྟ་བུར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བདེ་བར་གཤེགས་པས་དེ་སྐད་གསུངས་ནས་སྟོན་པས་ཡང་གསུངས་པ། ཕ་དང་མ་གཉིས་ཚངས་པ་སྟེ། །སློབ་དཔོན་ལྷ་ཡང་དེ་བཞིན་ནོ། །ཇི་ལྟར་མེ་ཡི་ལྷ་བྲན་བཞིན། །བུ་ཡི་སྦྱིན་པའི་གནས་ཡིན་ནོ། །དེ་བས་དེ་གཉིས་ཕྱག་བྱ་ཞིང་། །ཕྱི་བར་བྱ་ཞིང་བཀྲུ་བ་དང་། །རྐང་པ་གཉིས་ཀྱང་བཀྲུ་བར་བྱ། །དེ་བཞིན་མཁས་པས་བསྙེན་བཀུར་བྱ། །ཡང་ན་

---

^{[མ་དཔེ་གཟིགས་ན་འདིར་གནོན།]}

བཟའ་བ་བཏུང་བ་དང་། །བགོ་བ་མལ་སྟན་དེ་བཞིན་ཏེ། །དེ་གཉིས་ཕ་དང་མ་གཉིས་ལ། །མཁས་པས་བསྙེན་བཀུར་བཅས་བྱེད་ན། །འདིར་ནི་མནར་བར་མི་འགྱུར་ཏེ། །སོང་ནས་མཐོ་རིས་དགའ་བར་འགྱུར། །གང་གི་ཚེ་བཅོམ་ལྡན་འདས་ཀྱིས་མདོ་སྡེ་གསུངས་པ་དེའི་ཚེ་ན་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཕ་དང་མ་དང་། བླ་མ་ལ་ནི་རིམ་གྲོ་བགྱིད་པའི་ཡོན་ཏན་བརྗོད་པ་ནི་ངོ་མཚར་ཆེའོ་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལ་ཅི་ཞིག་ངོ་མཚར་ཆེར་ཡོད། ད་ལྟར་དེ་བཞིན་གཤེགས་པ་འདོད་ཆགས་མེད། ཞེ་སྡང་མེད། གཏི་མུག་མེད། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་དགའ་བ་དང་། འཁྲུག་པ་རྣམས་མེད་བཞིན་དུ་ཕ་མ་ལ་རིམ་གྲོ་བྱ་བའི་ཡོན་ཏན་བརྗོད་པ་པས་སྔོན་འདས་པའི་དུས་ན་ང་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་དགའ་བ་དང་། འཁྲུག་པ་རྣམས་ལས་ཡོངས་སུ་མ་གྲོལ་བ་ན་ཡང་མ་ལ་གནོད་པ་ཅུང་ཟད་ཞིག་བྱས་ནས་སྡུག་བསྔལ་ཆེན་པོ་རྗེས་སུ་མྱོང་ངོ་། །ཕན་པ་ཅུང་ཟད་ཞིག་བྱས་ནས་ཀྱང་བདེ་བ་ཆེན་པོ་རྗེས་སུ་མྱོང་བར་གྱུར་ཏེ། དེ་དག་ལེགས་པར་ཤིན་ཏུ་ཡིད་ལ་བྱོས་ཤིག་དང་བཤད་པར་བྱའོ། །སྔོན་བྱུང་བ་ནི་དགེ་སློང་དག་སྔོན་འདས་པའི་དུས་ན་གྲོང་ཁྱེར་བཱ་རཱ་ཎ་སཱི་ན་དེད་དཔོན་མཛའ་བོ་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ། གནས་རྒྱ་ཆེ་ཞིང་ཡངས་པ་ཞིག་སྟེ། ངལ་བསོ་པོའི་ནོར་དང་འདྲ་བ། ངལ་བསོ་པོའི་ནོར་ལ་འགྲན་པ་ཞིག་ཡོད་དེ། དེས་རིགས་མཉམ་པའི་ཆུང་མ་ཞིག་བླངས་ནས། དེ་དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་ལ་རྩེ་དགའ་ཡོངས་སུ་སྤྱད་པ་ལས་བུ་ཕོ་རྣམས་བྱུང་ཡང་ཤི་ནས་དེ་བུ་མེད་དེ་བུ་

---

^{[མ་དཔེ་གཟིགས་ན་འདིར་གནོན།]}

འདོད་པས་ལྷ་གུ་ལང་དང་། བ་རུ་ཎ་དང་། ངལ་བསོ་པོ་དང་། བ་ས་བ་ལ་སོགས་པ་ལྷ་སྟོང་ལ་གསོལ་ཀྱང་དེའི་བུ་གསོན་པར་མ་གྱུར་ཏེ། དེ་ལ་གཞན་ཞིག་གིས་དེ་སྟེ་ཁྱོད་ལ་བུ་ཕོ་ཞིག་བཙས་ན་བུ་མོའི་མིང་དུ་ཐོགས་ཤིག་དང་ཡུན་རིང་དུ་འཚོ་བར་འགྱུར་རོ་ཞེས་བསྒོའོ། །དེ་དུས་ཕྱི་ཞིག་ན་དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱད་དོ། །དེས་རྩེ་དགའ་ཡོངས་སུ་སྤྱད་པས་དེའི་ཆུང་མ་སེམས་ཅན་དང་ལྡན་པར་གྱུར་ནས། ཟླ་བ་བརྒྱད་དམ་དགུ་ལོན་ནས་ཁྱེའུ་ཞིག་བཙས་ཏེ། དེ་གཟུགས་ལེགས་ཤིང་བལྟ་ན་སྡུག་པ། མཛེས་པ། མདོག་གསེར་གྱི་ཁ་དོག་ལྟ་བུ། མགོ་གདུགས་འདྲ་བ། ལག་པ་རིང་བ། དཔྲལ་བའི་དབྱེས་ཆེ་བ་དང་། ཀོས་ཀོ་རིང་བ། སྨིན་མ་སྙོམས་པ། སྣ་མཐོ་ཞིང་ཡན་ལག་དང་ཉིང་ལག་ཐམས་ཅད་དུ་ལྡན་པ་ཞིག་བཙས་ཏེ། དེ་བཙས་པའི་བཙས་སྟོན་ཆེན་པོ་བྱས་ནས་མིང་གདགས་པར་བརྩམས་ཏེ། མཛའ་བོའི་བུ་་དེ་བུ་མོའི་མིང་དུ་བཏགས་པས་ན་ཁྱེའུ་འདིའི་མིང་བུ་མོ་མཛའ་མོར་གདགས་སོ། །ཅི་ཙམ་ན་ཁྱེའུ་བུ་མོ་མཛའ་མོ་ཞེས་བྱ་བ་དེ་ཆེར་གྱུར་པ་དང་། དེའི་ཕ་ཡང་རྒྱ་མཚོ་ཆེན་པོའི་ནང་དུ་ཞུགས་ཏེ། དེ་དེ་ཉིད་དུ་ཤི་བར་གྱུར་ཏོ། །དེ་ནས་བུ་མོ་མཛའ་མོས། མ་ལ་བདག་གི་ཕ་སྔོན་གྱི་ལས་འབྲས་བུ་གང་གིས་འཚོ། བདག་ཀྱང་ཕྱིས་དེ་བཞིན་དུ་བསྒྲུབ་བོ་ཞེས་སྨྲས་པ་དང་། མས་བསམས་པ། སྔོན་རྒྱ་མཚོ་ཆེན་པོའི་ནང་དུ་འཇུག་པའི་ཚོང་པ་ཡིན་ནོ་ཞེས་འདི་ལ་སྨྲས་ན་ནི་འདི་ཉིད་ཀྱང་རྒྱ་མཚོ་ཆེན་པོའི་ནང་དུ་ཞུགས་ཏེ་དེ་ཉིད་དུ་ཤི་བར་འགྱུར་རོ་སྙམ་དུ་བསམས་ནས། དེས་བུ་ཁྱོད་ཀྱི་ཕ་ནི་སྔོན་འབྲུ་འཚོང་བ་བྱེད་བྱེད་དེ། ཁྱོད་ཀྱང་དགའ་ན་འབྲུ་འཚོང་བ་གྱིས་ཤིག་ཅེས་སྨྲས་པ་དང་། དེས་འབྲུའི་ཚོང་ཁང་བརྩིགས་ཏེ། ཐོག་མའི་ཉིན་པར་ཀཱར་ཥཱ་པ་ཎ་བཞི་རྙེད་དེ། དེས་དེ་དག་མ་ལ་བྱིན་ནོ། །དེ་ནས་དུས་ཕྱི་ཞིག་ན་གཞན་ཞིག་གིས་དེ་ལ་ཁྱོད་ཀྱི་ཕ་ནི་སྔོན་དྲི་འཚོང་བའོ་ཞེས་སྨྲས་པ་དང་། དེས་འབྲུ་འཚོང་བ་བཏང་སྟེ། དྲི་འཚོང་བའི་ཚོང་ཁང་བརྩིགས་སོ། །དེ་ནས་ཉི་མ་

---

^{[མ་དཔེ་གཟིགས་ན་འདིར་གནོན།]}

དང་པོའི་ཚེ་ཀཱར་ཥཱ་པ་ཎ་བརྒྱད་རྙེད་ནས་དེས་ཡང་དེ་དག་མ་ལ་བྱིན་ནོ། །དེ་ནས་དུས་ཕྱི་ཞིག་ན་གཞན་ཞིག་གིས་དེ་ལ་ཁྱོད་ཀྱི་ཕ་ནི་གསེར་འཚོང་བ་ཡིན་ནོ་ཞེས་སྨྲས་པ་དང་། དེས་ཡང་དྲི་འཚོང་བ་བཏང་སྟེ། གསེར་འཚོང་བ་ལ་ཞུགས་པ་དང་། དེའི་ཉི་མ་དང་པོ་ལ་ཀཱར་ཥཱ་པ་ཎ་བཅུ་དྲུག་རྙེད་པ་དང་། དེས་ཡང་དེ་དག་མ་ལ་བྱིན་ནོ། །ཕྱི་དེ་ཉིན་མོ་དེས་ཀཱར་ཥཱ་པ་ཎ་སུམ་བཅུ་རྩ་གཉིས་རྙེད་པ་དང་། དེས་དེ་དག་མ་ལ་བྱིན་ནོ། །དེ་ནས་གསེར་འཚོང་བ་ཕྲག་དོག་ཅན་དག་གིས་གྲོང་ཁྱེར་ཐམས་ཅད་ཀྱི་གསེར་འདིས་བསྡུས་སོ་སྙམ་དུ་བསམས་ནས། བུ་མོ་མཛའ་མོ་ལ་ཁྱོད་འདི་ལྟ་བུ་བྱེད་ཅིང་འཚོ་འཚོ་སྟེ་ཅི་རུང་ཁྱོད་ཀྱི་ཕ་ནི་སྔོན་རྒྱ་མཚོ་ཆེན་པོར་འཇུག་པའི་ཚོང་པ་ཡིན་ན་ཁྱོད་སུས་འདི་འདྲ་བ་ངན་པས་འཚོ་བ་ལ་་འཇུག་ཏུ་བཅུག་ཅེས་སྨྲས་པ་དང་། དེ་གསེར་འཚོང་བ་དག་གི་ཚིག་དེས་བསྐུལ་བས་དེ་མའི་ཐད་དུ་སོང་སྟེ། མ་བདག་གི་ཕ་ནི་འདི་ལྟར་སྔོན་རྒྱ་མཚོ་ཆེན་པོའི་ཚོང་པའོ་ཞེས་ཐོས་ན་རྗེས་སུ་གནོང་ཤིག་དང་། བདག་ཀྱང་རྒྱ་མཚོ་ཆེན་པོའི་ནང་དུ་ཞུགས་ལ་མཆིའོ་ཞེས་སྨྲས་པ་དང་། མས་དེ་ལ་བུ་དེ་ནི་བདེན་མོད་ཀྱི་ཁྱོད་ནི་གཞོན་ལ་བུ་གཅིག་པུ་སྟེ། ཁོ་མོ་བོར་ལ་རྒྱ་མཚོ་ཆེན་པོར་ཞུགས་ཤིང་འདོང་དུ་དད་པ་་་རྣམས་འདོང་ངོ་ཞེས་དེས་བདག་ཉིད་དེད་དཔོན་དུ་བསྒྲགས་སོ། །དེ་ནས་ཚོང་པ་ལྔ་བརྒྱས་བསྐོར་ཏེ་དོང་བ་དང་། དེ་མའི་སྙིང་དུ་སྡུག་པས་དཀྲུགས་ཏེ། མ་མཆི་མས་བརྣངས་བཞིན་རྐང་པ་གཉིས་ལ་བཟུང་སྟེ། བུ་ཁོ་མོ་བོར་ཏེ་རྒྱ་ཆེན་པོའི་ནང་ཞུགས་ཤིང་འདོང་དུ་དད་པ་་་རྣམས་འདོང་ངོ་ཞེས་དེས་བདག་ཉིད་དེད་དཔོན་དུ་བསྒྲགས་སོ། །དེ་ནས་ཚོང་པ་ལྔ་བརྒྱས་བསྐོར་ཏེ་དོང་བ་དང་། དེ་མའི་སྙིང་དུ་སྡུག་པས་དཀྲུགས་ཏེ། མ་མཆི་མས་བརྣངས་བཞིན་རྐང་པ་གཉིས་ལ་བཟུང་སྟེ། བུ་ཁོ་མོ་བོར་ཏེ་རྒྱ་མཚོ་་པོར་ཞུགས་ལ་མ་འགྲོ་ཤིག་ཅེས་བྱས་པ་དང་། དེ་འདི་ལྟར་སྙིང་རྗེ་ཞིང་མི་དགའ་སྟེ། དལ་གྱིས་སྨྲས་པ་ལ་ཁྲོས་ནས་མའི་མགོ་བོ་རྐང་པས་ཕུལ་ཏེ། དེ་འགྲོན་པ་མང་པོ་དང་འགྲོགས་ཏེ་སོང་ངོ་། །མས་བུ་ཁྱོད་ལ་ལས་འདི་རྣམ་པར་སྨིན་པར་མ་གྱུར་ཅིག་ཅེས་སྨྲས་པ་དང་། དེ་ནས་དེ་གྲོང་དང་། གྲོང་ཁྱེར་དང་། རྒྱལ་པོའི་ཕོ་བྲང་འཁོར་རྣམས་ལ་ལྟ་ཞིང་རྒྱ་མཚོ་ཆེན་པོའི་འགྲམ་དུ་ཕྱིན་

---

^{[མ་དཔེ་གཟིགས་ན་འདིར་གནོན།]}

པ་དང་། དེས་དོང་ཚེ་རྙིང་པ་ལྔ་བརྒྱས་གྲུ་བོ་ཆེ་ཉོས་ཏེ། གྲུའི་ནང་དུ་འཇུག་པ་དང་། འབྱིན་པ་དང་། མཉན་པ་དང་། ཉག་ཐག་འཛིན་པ་དང་། ཕྱོགས་རྟོག་པའི་མི་དག་ལ་གླ་བྱས་ནས་དེས་དྲིལ་ཆེན་པོ་ལན་གསུམ་དུ་བསྒྲགས་ནས་རྒྱ་མཚོ་ཆེན་པོའི་ནང་དུ་ཞུགས་ཏེ་སོང་བ་དང་། ཇི་ཙམ་ཞིག་ན་ཆུ་སྲིན་ཉའི་རིགས་ཀྱིས་གྲུ་མ་རུང་བར་བྱས་ནས། བུ་མོ་མཛའ་མོ་གྲུ་ཚལ་ཞིག་ལ་འཇུས་ནས་མཐར་ཕྱིན་ཏོ། །དེ་ནས་སྐམ་ལ་སོང་བ་དང་། དགའ་བ་ཞེས་བྱ་བའི་གྲོང་ཁྱེར་དེ་མཐོང་སྟེ། དེ་དེར་སོང་ནས་དེ་ན་ལྷའི་བུ་མོ་གཟུགས་ལེགས་ཤིང་བལྟ་ན་སྡུག་པ་བཞི་བྱུང་སྟེ། དེར་འོངས་ནས་བུ་མོ་མཛའ་མོ་བདེ་བར་འོངས་སམ། འདི་ནི་བདག་ཅག་གི་ཟས་ཀྱི་ཁང་པ་དང་། བཏུང་བའི་ཁང་པ་དང་། གོས་ཀྱི་ཁང་པ་དང་། ཉལ་བའི་ཁང་པ་དང་། ནོར་བུ་དང་། མུ་ཏིག་དང་། བཻ་ཌཱུརྱ་དང་། དུང་དང་། ཤེལ་དང་། བྱི་རུ་དང་། གསེར་དང་། དངུལ་གྱིས་གང་བ་ཡིན་གྱིས་དེ་བཞེས་ཤིག །ཚུར་སྤྱོན་བདག་ཅག་དང་ལྷན་ཅིག་བཞུགས་སོ་ཞེས་སྨྲས་ནས། དེ་དང་ལྷན་ཅིག་ལོ་དུ་མ། ལོ་བརྒྱ་དུ་མ། ལོ་སྟོང་དུ་མ། ལོ་བརྒྱ་སྟོང་དུ་མར་ཇི་ལྟར་སེམས་ཅན་བསོད་ནམས་བྱས་པ། དགེ་བ་བྱས་པ། རྫུ་འཕྲུལ་ཆེན་པོ། མཐུ་ཆེན་པོས་རང་གི་བསོད་ནམས་ལ་མྱོང་བར་གྱུར་པ་བཞིན་མྱོང་བར་གྱུར་ཏོ། །དེ་དག་གིས་ལྷོ་ཕྱོགས་ཀྱི་ལམ་དུ་མ་འགྲོ་ཤིག་ཅེས་བསྒོ་བ་དང་། དེ་ལྷོ་ཕྱོགས་ཀྱི་ལམ་དུ་མ་བཏང་ཡང་དེར་འགྲོ་བར་འཐེན་ཏེ། དེ་ཕྱི་ཞིག་ན་ལྷོ་ཕྱོགས་སུ་སོང་བ་དང་། དེས་རྟག་ཏུ་ར་རོ་བ་ཞེས་བྱ་བའི་གྲོང་ཁྱེར་མཐོང་ནས་དེའི་སྒོར་ཕྱིན་པ་དང་། དེ་ནས་ཀྱང་ལྷའི་བུ་མོ་དེ་བས་ཀྱང་གཟུགས་ལེགས་པ། དེ་བས་ཀྱང་བལྟ་ན་སྡུག་པ། དེ་བས་ཀྱང་མཛེས་པ་བརྒྱད་བྱུང་སྟེ། དེ་དག་གིས་བུ་མོ་མཛའ་མོ་ཚུར་སྤྱོན་བདེ་བར་བྱོན་ཏམ། བདག་ཅག་གི་ཟས་ཀྱི་ཁང་པ་འདི་དང་། སྐོམ་གྱི་ཁང་པ་དང་། གོས་ཀྱི་ཁང་པ་དང་། ཉལ་བའི་ཁང་པ་དང་། ནོར་བུ་དང་། མུ་ཏིག་དང་། བཻ་ཌཱུརྱ་དང་། དུང་དང་། ཤེལ་དང་། བྱི་རུ་དང་། གསེར་དང་། དངུལ་དག་གིས་གང་བར་ཡོད་ཀྱིས་ཚུར་

---

^{[མ་དཔེ་གཟིགས་ན་འདིར་གནོན།]}

སྤྱོན་ལྷན་ཅིག་བཞུགས་སོ་ཞེས་སྨྲས་ནས། དེ་དག་དང་ལྷན་ཅིག་ལོ་དུ་མ། ལོ་བརྒྱ་དུ་མ། ལོ་སྟོང་དུ་མ། ལོ་བརྒྱ་སྟོང་དུ་མར་ཇི་ལྟར་སེམས་ཅན་བསོད་ནམས་བྱས་པ། དགེ་བ་བྱས་པ། རྫུ་འཕྲུལ་ཆེན་པོ་མཐུ་ཆེན་པོས་མྱོང་བ་བཞིན་མྱོང་བར་གྱུར་ཏོ། །དེ་དག་གིས་ཀྱང་དེ་ལ་ལྷོ་ཕྱོགས་ཀྱི་ལམ་དུ་མ་འགྲོ་ཤིག་ཅེས་བསྒོའོ། །དེ་ལྷོ་ཕྱོགས་ཀྱི་ལམ་དུ་མ་འགྲོ་ཤིག་ཅེས་བསྒོ་ན་ཇེ་ཐུར་འཐེན་ཏེ་འགྲོ་འདོད་ནས་ཇི་ཙམ་ཞིག་ནས་ལྷོ་ཕྱོགས་ཀྱི་ལམ་དུ་སོང་བ་དང་། དགའ་བ་ཅན་ཞེས་བྱ་བའི་གྲོང་ཁྱེར་མཐོང་ནས་དེའི་སྒོར་ཕྱིན་པ་དང་། དེ་ནས་ཡང་ལྷའི་བུ་མོ་དེ་བས་ཀྱང་གཟུགས་ལེགས་པ། དེ་བས་ཀྱང་བལྟ་ན་སྡུག་པ། དེ་བས་ཀྱང་མཛེས་པ་བཅུ་དྲུག་བྱུང་སྟེ། དེ་དག་གིས་བུ་མོ་མཛའ་མོ་བདེ་བར་བྱོན་ཏམ། བུ་མོ་མཛའ་མོ་ཚུར་སྤྱོན། བདག་ཅག་གི་ཟས་ཀྱི་ཁང་པ་འདི་དང་། སྐོམ་གྱི་ཁང་པ་དང་། གོས་ཀྱི་ཁང་པ་དང་། ཉལ་བའི་ཁང་པ་དང་། ནོར་བུ་དང་། མུ་ཏིག་དང་། བཻ་ཌཱུརྱ་དང་། དུང་དང་། ཤེལ་དང་། བྱི་རུ་དང་། གསེར་དང་དངུལ་དག་གིས་གང་བ་ཡོད་ཀྱིས་ཚུར་སྤྱོན་ལྷན་ཅིག་བཞུགས་སོ་ཞེས་སྨྲས་ནས། དེ་དག་དང་ལྷན་ཅིག་ལོ་དུ་མ། ལོ་བརྒྱ་དུ་མ། ལོ་སྟོང་དུ་མ། ལོ་བརྒྱ་སྟོང་དུ་མར་ཇི་ལྟར་སེམས་ཅན་བསོད་ནམས་བྱས་པ། དགེ་བ་བྱས་པ། རྫུ་འཕྲུལ་ཆེན་པོ། མཐུ་ཆེན་པོས་མྱོང་བར་གྱུར་པ་བཞིན་མྱོང་བར་གྱུར་ཏོ། །དེ་དག་གིས་ཀྱང་དེ་ལ་ལྷོ་ཕྱོགས་ཀྱི་ལམ་དུ་མ་འགྲོ་ཤིག་ཅེས་བསྒོའོ། །དེ་ལ་ལྷོ་ཕྱོགས་ཀྱི་ལམ་དུ་མ་འགྲོ་ཤིག་བསྒོ་ཡང་ཇེ་ཐུར་འཐེན་ཅིང་འགྲོ་བར་འདོད་ནས་དེ་ཇི་ཙམ་ཞིག་ན་ལྷོ་ཕྱོགས་ཀྱི་ལམ་དུ་སོང་བ་དང་། བླ་མའི་ཚངས་པ་ཞེས་བྱ་བའི་ཁང་པ་བཟང་པོ་ཞིག་མཐོང་ནས་དེའི་སྒོར་འོངས་པ་དང་། དེའི་ནང་ནས་ལྷའི་བུ་མོ་དེ་བས་ཀྱང་གཟུགས་ལེགས་པ། དེ་བས་ཀྱང་བལྟ་ན་སྡུག་པ། ཤིན་ཏུ་བཟང་མོ་སུམ་བཅུ་རྩ་གཉིས་ཤིག་བྱུང་ནས་དེ་དག་གིས་བུ་མོ་མཛའ་མོ་ཚུར་སྤྱོན། མཛའ་མོ་བདེ་བར་བྱོན་ཏམ། བདག་ཅག་གི་ཟས་ཀྱི་ཁང་པ་འདི་དང་། སྐོམ་གྱི་ཁང་པ་དང་། གོས་ཀྱི་ཁང་པ་དང་། ཉལ་བའི་ཁང་པ་དང་། ནོར་བུ་དང་། མུ་ཏིག་

---

^{[མ་དཔེ་གཟིགས་ན་འདིར་གནོན།]}

དང་། བཻ་ཌཱུརྱ་དང་། དུང་དང་། ཤེལ་དང་། བྱི་རུ་དང་། གསེར་དང་། དངུལ་ལ་སོགས་པ་རྣམ་པ་སྣ་ཚོགས་ཀྱིས་གང་བ་ཡོད་ཀྱིས་ཚུར་སྤྱོན་ལྷན་ཅིག་ཏུ་བཞུགས་སོ་ཞེས་སྨྲས་ནས། དེ་དག་དང་ལྷན་ཅིག་ལོ་དུ་མ། ལོ་བརྒྱ་དུ་མ། ལོ་སྟོང་དུ་མ། ལོ་བརྒྱ་སྟོང་དུ་མར་ཇི་ལྟར་སེམས་ཅན་བསོད་ནམས་བྱས་པ། དགེ་བ་བྱས་པ། མཐུ་ཆེན་པོ། རྫུ་འཕྲུལ་ཆེན་པོས་མྱོང་བ་བཞིན་མྱོང་བར་གྱུར་ཏོ། །དེ་དག་གིས་ཀྱང་ལྷོ་ཕྱོགས་ཀྱི་ལམ་དུ་མ་འགྲོ་ཤིག་ཅེས་བསྒོའོ། །དེ་ལྷོ་ཕྱོགས་ཀྱི་ལམ་དུ་མ་འགྲོ་ཤིག་ཅེས་བསྒོ་ཡང་ཇེ་ཐུར་འཐེན་ཅིང་འགྲོ་བར་འདོད་ནས་ཇི་ཙམ་ཞིག་ན་ལྷོ་ཕྱོགས་ཀྱི་ལམ་དུ་སོང་ནས་དེ་ཕྱི་ཕྱིར་ཞིང་དད་པ་སྐྱེས་ཏེ། དེ་རིམ་གྱིས་ལྷོ་ཕྱོགས་སུ་སོང་བ་དང་། ལྕགས་ལས་བྱས་པའི་གྲོང་ཁྱེར་ཞིག་མཐོང་སྟེ་དེ་དེར་ཞུགས་སོ། །ཞུགས་མ་ཐག་ཏུ་དེའི་སྒོ་ཡང་སླར་བཅད་པར་གྱུར་ཏོ། །དེ་ནས་ཡང་ནང་དུ་སོང་བ་དང་སྒོ་ཡང་དེ་བཞིན་དུ་བཅད་དོ། །དེ་ནས་ཡང་ནང་དུ་སོང་བ་དང་སྒོ་ཡང་བཅད་པར་གྱུར་ཏེ། ཇི་ཙམ་ན་སྐྱེས་བུ་རབ་ཏུ་ལུས་ཆེ་བ་ཞིག་དེ་ནས་བྱུང་སྟེ། དེའི་སྤྱི་བོ་ལ་ལྕགས་ཀྱི་འཁོར་ལོ་འབར་བ། རབ་ཏུ་འབར་བ། ཤིན་ཏུ་འབར་བ། མེ་ལྕེ་གཅིག་ཏུ་གྱུར་པ་ཞིག་འཁོར་ཞིང་འདུག་སྟེ། དེའི་མགོ་ལས་རྣག་ཁྲག་བྱུང་བ་ནི་ཟས་སུ་ཟ་བར་མཐོང་ངོ་། །དེ་ནས་བུ་མོ་མཛའ་མོས་སྐྱེས་བུ་དེ་ལ་ཁྱོད་ཅིའི་ཕྱིར་དེ་ལྟར་གྱུར་ཅེས་དྲིས་པ་དང་། དེས་ངས་ནི་མ་ལ་གནོད་པ་བྱས་པའི་ཕྱིར་རོ། །ཞེས་སྐྱེས་བུ་དེས་དེ་སྐད་དུ་སྨྲས་མ་ཐག་ཏུ་བུ་མོ་མཛའ་མོ་དེའི་ལས་ཀྱང་མངོན་དུ་སྨིན་པར་གྱུར་ཏེ། བདག་གིས་ཀྱང་མ་ལ་གནོད་པ་བྱས་ནས་དེའི་ལས་ཀྱིས་འདིར་ཁྲིད་དེ་འོངས་སོ་སྙམ་དུ་བསམས་པ་དང་། དེ་མ་ཐག་ཏུ་ནམ་མཁའ་ལས་སྒྲ་འདི་སྐད་དུ་གང་བཅིངས་པ་དེ་ནི་ཐར། གང་མ་བཅིངས་པ་དེ་ནི་བཅིངས་པའོ་ཞེས་སྒྲ་དེ་བྱུང་མ་ཐག་ཏུ་་སྐྱེས་བུ་དེའི་སྤྱི་བོ་ན་འཁོར་ལོ་ཡོད་པ་དེ་ནི་མེད་པར་གྱུར། བུ་མོ་མཛའ་མོའི་སྤྱི་བོར་འཁོར་ལོ་བྱུང་ངོ་། །དེ་ནས་བུ་མོ་མཛའ་མོ་རབ་ཏུ་སྡུག་བསྔལ་བར་སྐྱེས་བུ་དེས་མཐོང་ནས་ཚིགས་སུ་བཅད་དེ་སྨྲས་པ། རྟག་ཏུ་དགའ་

---

^{[མ་དཔེ་གཟིགས་ན་འདིར་གནོན།]}

དང་དྲེགས་བྱེད་ཅིང་། །སྐྱིད་པ་བྱེད་པ་བོར་བྱས་ཏེ། །ཚངས་པ་བླ་མའི་ཁང་པ་ནས། །ཅི་ཡི་ཕྱིར་ནི་ཁྱོད་འདིར་འོངས། །བུ་མོ་མཛའ་མོས་སྨྲས་པ། རྟག་ཏུ་དགའ་དང་དྲེགས་བྱེད་ཅིང་། །སྐྱིད་པ་བྱེད་པ་བོར་བྱས་ཏེ། །ཚངས་པ་བླ་མའི་ཁང་པ་ནས། །འདིར་ནི་འོང་བར་འདོད་གྱུར་པ། །ཡུན་རིང་པོ་ཡི་ལས་ཀྱིས་གཉེར། །ལས་ཀྱིས་རིང་ནས་གཉེར་ནས་ཀྱང་། །གང་དུ་ལས་ཀྱིས་གཉེར་བ་དེར། །ལས་ཀྱང་རྣམ་པར་སྨིན་པར་གྱུར། །ལས་གང་རྣམ་པར་སྨིན་པས་ན། །འཁོར་ལོ་འབར་དང་རབ་འབར་བ། །བདག་གི་སྲོག་ལ་གནོད་གྱུར་ཏེ། །ཀླད་ལ་འཁོར་ལོ་འབར་བར་གྱུར། །མི་དེས་སྨྲས་པ། ཁྱོད་ཀྱིས་ངན་པའི་སེམས་བསྐྱེད་དེ། །དཀའ་བ་བྱེད་པའི་མ་ཡི་མགོར། །ཁྱོད་ཀྱིས་རྡོག་པ་བརྒྱབ་པས་ན། །དེ་ཡི་ལས་ཀྱི་འབྲས་བུ་ཡིན། །བུ་མོ་མཛའ་མོས་སྨྲས་པ། འཁོར་ལོ་འབར་བ་རབ་འབར་བ། །བདག་གི་སྲོག་ལ་གནོད་བྱེད་པ། །ལོ་གྲངས་སྟོང་ཕྲག་ཇི་སྲིད་དུ། །ང་ཡི་ཀླད་ན་འཁོར་བར་འགྱུར། །མི་དེས་སྨྲས་པ། ལོ་གྲངས་སྟོང་ཕྲག་དྲུག་བཅུ་དང་། །ལོ་གྲངས་བརྒྱ་ཡི་བར་དུ་ནི། །འབར་བའི་ལྕགས་ཀྱི་འཁོར་ལོས་ཀྱང་། །ཁྱོད་ཀྱི་མགོ་ལ་འཇོག་པར་བྱེད། །དེ་ནས་བུ་མོ་མཛའ་མོ་དེས་མི་དེ་ལ་ཀྱེ་སྐྱེས་བུ་གཞན་དག་ཀྱང་འདིར་འོང་བ་ལྟ་ཡོད་དམ་ཞེས་སྨྲས་པ་དང་། མི་དེས་སྨྲས་པ། གང་གིས་ལས་འདི་ལྟ་བུ་བྱས་པ་དག་ནི་འདིར་འོང་བར་འགྱུར་རོ། །དེ་ནས་བུ་མོ་མཛའ་མོ་སྡུག་བསྔལ་གྱིས་མངོན་དུ་གཟིར་བ་དང་། སེམས་ཅན་རྣམས་ལ་སྙིང་རྗེ་བ་བསྐྱེད་ནས་མི་དེ་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་ངས་སེམས་ཅན་ཐམས་ཅད་ཀྱི་ཕྱིར་འཁོར་ལོ་འདི་མགོ་ལ་བཟོད་པར་བྱས། གཞན་གང་གིས་འདི་འདྲ་བའི་ལས་བྱས་པ་དེ་དག་འདིར་མ་འོང་ཤིག་ཅེས་སྨྲས་མ་ཐག་ཏུ་བུ་མོ་མཛའ་མོ་བྱང་ཆུབ་སེམས་དཔའ་དེའི་མགོ་ལས་འཁོར་ལོ་དེ་ཤིང་ཏ་ལ་བདུན་ཙམ་དུ་ནམ་མཁའ་ལ་་་འཕགས་ནས་འདུག་པ་དང་། དེ་ཡང་དུས་འདས་ཏེ་དགའ་ལྡན་གནམ་གྱི་ལྷའི་ཁམས་སུ་སྐྱེས་སོ་ཞེས་བཅོམ་ལྡན་

---

^{[མ་དཔེ་གཟིགས་ན་འདིར་གནོན།]}

འདས་ཀྱིས་བཀའ་སྩལ་ཏོ། །དགེ་སློང་དག་ཇི་སྙམ་དུ་སེམས། དེའི་དུས་ན་བུ་མོ་མཛའ་མོ་ཞེས་བྱ་བ་དེ་ནི་ང་ཉིད་ཡིན་ཏེ། དེའི་ཚེ་ངས་ཚོང་བྱས་ཏེ། ཀཱར་ཥཱ་པ་ཎ་མ་ལ་བྱིན་པ་དེའི་ལས་ཀྱི་རྣམ་པར་སྨིན་པས་ནི་གྲོང་ཁྱེར་ཆེན་པོ་རྣམ་པ་བཞིར་རབ་ཏུ་བདེ་བ་མྱོང་བར་གྱུར་ཏོ། །དེ་ནས་ངས་མ་ལ་གནོད་པ་ཅུང་ཟད་ཅིག་བྱས་པ་དེའི་ལས་ཀྱི་འབྲས་བུ་རྣམ་་་པར་སྨིན་པས་ནི་རྣམ་པ་འདི་ལྟ་བུའི་སྡུག་བསྔལ་མྱོང་བར་གྱུར་ཏོ། །དེ་ལྟ་བས་ན་དགེ་སློང་དག་དེ་བཞིན་དུ་བསླབ་པར་གྱིས་ཤིག །ཕ་དང་མ་ལ་ཕན་གདགས་པར་བྱའི། གནོད་པ་མ་བྱེད་ཅིག་དང་དེ་ལྟ་བུའི་གནོད་པ་མི་མྱོང་བར་འགྱུར་བ་ནི་ཇི་ལྟར་བུ་མོ་མཛའ་མོ་སོ་སོའི་སྐྱེ་བོའི་ཚེ་ན་མྱོང་བ་བཞིན་ཏེ། ཡོན་ཏན་མང་པོར་ཡང་འགྱུར་ཞིང་དེ་ཡང་དེ་བཞིན་གཤེགས་པ་ཡིན་ཏེ། དགེ་སློང་དག་དེ་བཞིན་དུ་བསླབ་པར་བྱོས་ཤིག །དགེ་སློང་དག་དེ་བས་ན་ཚུལ་ཁྲིམས་རབ་ཏུ་ཉམས་པར་གྱུར་ཀྱང་རྣམ་པ་ལྔ་ལ་ཉེ་གཡོག་བྱ་བར་གནང་སྟེ། ལྔ་གང་ཞེ་ན། ཕ་དང་། མ་དང་། མཁན་པོ་དང་། སློབ་དཔོན་དང་། ནད་པ་རྣམས་སོ། །གླེང་གཞི་ནི་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་དག་ཉི་མ་ནི་ཤར། བྱ་རོག་ནི་ཟེར། ཞིང་པ་ནི་རྨོ་རྐོ་བྱེད། མ་ལུས་པར་རྐུ་བ་རྣམས་ནི་དུའོ། །དགེ་སློང་དག་དེ་ནི་དཔེར་བྱས་ཏེ། དོན་དེ་མི་ཤེས་པའི་ཕྱིར་དོན་དེ་ཡང་བསྟན་པར་བྱ་སྟེ། དགེ་སློང་དག་ཉི་མ་ཤར་ཅེས་བྱ་བ་ནི་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱི་ཚིག་བླ་དགས་སོ། །བྱ་རོག་ཟེར་རོ་ཞེས་བྱ་བ་ནི་ཆོས་ཀྱི་སྣོད་གང་ཟག་རྣམས་ཀྱི་ཚིག་བླ་དགས་སོ། །ཞིང་པ་ཞིང་རྨེད་ཅེས་བྱ་བ་ནི་སྦྱིན་པར་བྱེད་པ་དང་། སྦྱིན་བདག་རྣམས་ཀྱི་ཚིག་བླ་དགས་སོ། །མ་ལུས་པར་རྐུ་བ་རྣམས་ནི་དུའོ་ཞེས་བྱ་བ་ནི་བདུད་ཀྱི་འཁོར་གྱི་ཚིག་བླ་དགས་སོ། །དེ་ལྟ་བས་ན་དགེ་སློང་དག་སྟོན་པ་ནི་ཉན་ཐོས་དག་ལ་ཐུགས་བརྩེ་བས་ཐུགས་རྗེའི་དོན་སྟོན་པ། ཕན་པར་དགོངས་པ། ཐུགས་རྗེ་བཞིན་པས་ན་ཁྱོད་ལ་དོན་བྱས་ཀྱིས་ཁྱོད་ཀྱིས་ད་བྱ་བའི་རིགས་སོ། །དེ་འདི་ལྟར་དགོན་པ་དང་།

---

^{[མ་དཔེ་གཟིགས་ན་འདིར་གནོན།]}

ཤིང་དྲུང་དང་། ཁང་སྟོང་དང་། རི་དང་། གྲོག་པོ་དང་། རི་ཕུག་དང་། སོག་མའི་ཕུང་པོ་དང་། བླ་གབ་མེད་པ་དང་། དུར་ཁྲོད་དང་། ནགས་ཚལ་གྱི་ཕྱོགས་དང་། བས་མཐར་གནས་པར་བྱ་སྟེ། དགེ་སློང་དག་བག་མེད་པར་མ་བྱེད་ཅིག །ཕྱིས་འགྱོད་པར་གྱུར་ཏ་རེ། ངས་བསྟན་པ་འདི་ནི་ངས་རྗེས་སུ་བསྟན་པའོ། །བཅོམ་ལྡན་འདས་ཀྱིས་དགོན་པར་གནས་པར་གསུངས་པས་ན། ཕྱིས་འགྱོད་པར་གྱུར་ཏ་རེ། འདི་ནི་ངས་བསྟན་པའོ་ཞེས་གསུངས་པའི་བར་དུ་སྔ་མ་བཞིན་ནོ། །དགེ་སློང་དག་དགོན་པ་དང་། ནགས་ཚལ་གྱི་ཕྱོགས་དང་། བས་མཐའ་ལ་གནས་ཤིང་བསམ་གཏན་བྱེད་པ་ལ་ཞུགས་སོ། །མཉན་དུ་ཡོད་པ་ན་ཁྱིམ་བདག་གཞན་ཞིག་གིས་དགོན་པ་ལ་གནས་པའི་དགེ་སློང་དག་གི་ཕྱིར་དགོན་པར་ཁྱིམ་བརྩིགས་ཏེ། ཇི་ཙམ་ཞིག་ན་བསོད་སྙོམས་པ་གཞན་ཞིག་གཞོངས་སྤྱད་པ་སྤྱོད་ཅིང་མཉན་དུ་ཡོད་པར་ཕྱིན་ནས་དེ་ཡང་སླར་ཁྱིམ་དུ་འོངས་ཏེ་འདུག་པ་་་དང་། དེ་དུས་ཕྱི་ཞིག་ན་དེའི་སྐྲ་དང་ཁ་སྤུ་རིང་པོར་གྱུར་ནས་སྔ་དྲོའི་དུས་ན་ཤམ་ཐབས་བགོས་ཏེ། ལྷུང་བཟེད་དང་ཆོས་གོས་ཁྱེར་ཏེ་སོང་བ་དང་། དེ་ལ་ཁྱིམ་བདག་དེས་འཕགས་པ་སྐྲ་དང་ཁ་སྤུ་རིང་ངོ་ཞེས་སྨྲས་པ་དང་། དེས་་བཞིན་བཟངས་འབྲེག་མཁན་མེད་དོ་ཞེས་སྨྲས་ནས། ཁྱིམ་བདག་གིས་འཕགས་པ་དེ་ལྟར་ན་བཞུད་ཅིག་དང་། བདག་གིས་འབྲེག་མཁན་གཏང་ངོ་ཞེས་སྨྲས་པ་དང་། དེས་བསོད་སྙོམས་བསླངས་ནས་སླར་སོང་བ་དང་། དེས་འབྲེག་མཁན་ཡང་བཏང་ངོ་། །བསོད་སྙོམས་པ་དེ་རབ་ཏུ་ལེ་ལོ་ཅན་ཞིག་སྟེ། དེ་གདིང་བའི་སྟེང་དུ་འདུག་བཞིན་སྐྲ་བྲེགས་པ་དང་། སྐྲ་ཡང་གདིང་བའི་སྟེང་དུ་ལྷུང་བས་ཟད་པར་འདོར་མ་ནུས་སོ། །ཁྱིམ་བདག་དེས་བསམས་པ། འབྲེག་མཁན་ཁྱོད་སོང་ལ་དགེ་སློང་དེའི་སྐྲ་དང་ཁ་སྤུ་དག་བྲེགས་སམ་མ་བྲེགས་ལྟོས་ཤིག་ཅེས་སྨྲས་པ་དང་། དེ་དེར་སོང་ངོ་། །སོང་ནས་གདིང་བའི་སྟེང་དུ་འདུག་པ་དང་། དེའི་གོས་ལ་སྐྲ་དག་ཆགས་ནས་ཁྱིམ་བདག་དེས་བསོད་་་སྙོམས་པ་དེ་ལ་མགུ་བ་དག་བྱས་ནས་སླར་ཁྱིམ་དུ་སོང་བ་དང་། དེའི་

---

^{[མ་དཔེ་གཟིགས་ན་འདིར་གནོན།]}

ཆུང་མས་ཇོ་བོའི་སྲས་ཅི་ཁྱོད་འབྲེག་མཁན་གྱི་ཁྱིམ་ན་འདུག་འདུག་གམ། དེས་གོས་ལ་བལྟས་ན་སྐྲ་ཆགས་ཤིང་འདུག་པ་མཐོང་ནས་དེས་བསམས་པ། བསོད་སྙོམས་པ་དེ་གདིང་བའི་སྟེང་དུ་འདུག་བཞིན་དུ་སྐྲ་མ་བྲེགས་གྲང་ཞེས་དེ་བལྟར་འགྲོའོ་སྙམ་བསམས་ནས། དེར་སོང་སྟེ་བལྟས་པ་དང་། དེའི་གདིང་བ་སྐྲ་དག་གིས་གང་ཞིང་འདུག་པ་མཐོང་ནས། འཕགས་པ་གདིང་བའི་སྟེང་དུ་སྐྲ་མི་འབྲེག་པ་ཙམ་ཡང་མི་ཤེས་སམ་ཞེས་ཉེས་པ་ངོར་བརྗོད་པ་དང་། བསོད་སྙོམས་པ་དེ་གནོང་ནས་སྤ་གོང་སྟེ་ངོ་ཚ་ནས་ཅང་མི་ཟེར་བར་འདུག་གོ །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱིམ་བདག་དེ་དག་འཕྱ་བ་ནི་ཡུས་ཏེ། དེ་བས་ན་དགེ་སློང་གདིང་བའི་སྟེང་ན་འདུག་ཅིང་སྐྲ་མ་འབྲེག་ཤིག །བཅོམ་ལྡན་འདས་ཀྱིས་དགེ་སློང་དག་གདིང་བའི་སྟེང་ན་འདུག་ཅིང་སྐྲ་མ་འབྲེག་ཤིག་ཅེས་བཀའ་སྩལ་པ་དང་། དགེ་སློང་དག་གིས་གནས་ཁང་དང་། བཀད་ས་དང་། སྒོ་ཁང་དུ་སྐྲ་བྲེགས་ནས་དེ་ཉིད་ཉེས་པའི་དམིགས་སུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གང་དགེ་འདུན་གྱི་ཕྱག་དར་བྱེད་པའི་གནས་དེར་སྐྲ་མ་འབྲེག་ཤིག །བྲེགས་ན་འདས་པ་དང་བཅས་པར་འགྱུར་རོ། །བཅོམ་ལྡན་འདས་ཀྱིས་གང་དགེ་འདུན་གྱི་ཕྱག་དར་བྱ་བའི་གནས་དེར་སྐྲ་མ་་་འབྲེག་ཤིག་ཅེས་གསུངས་པ་དང་། དགེ་སློང་ཁ་ཅིག་རྒས་ཤིང་འཁོགས་ལ་རིད་པར་གྱུར། ཁ་ཅིག་ནི་ན་བར་གྱུར་ཏེ། ཕྱི་རོལ་དུ་འགྲོ་མི་ནུས། མི་ན་བ་དག་ཀྱང་ཚ་ཞིང་ཆར་པ་བབ་པར་གྱུར་པ་དང་། དེ་དག་ཀྱང་ཕྱིར་འབྱུང་མི་ནུས་ནས་གནོད་པར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གང་དགེ་སློང་དག་རྒས་ཤིང་འཁོགས་ལ་རིད་པར་གྱུར་པ་དང་། ན་སྟེ་མི་བདེ་བ་དག་ནི་སྔ་གང་དུ་སྐྲ་བྲེག་པར་གྱིས་ཤིག །མི་ན་བ་དག་ཚ་ཞིང་ཆར་པ་བབ་པར་གྱུར་ཏེ། ཕྱི་རོལ་དུ་འབྱུང་དུ་མི་

---

^{[མ་དཔེ་གཟིགས་ན་འདིར་གནོན།]}

བདེ་ན་དེ་ཡང་སྔ་གང་དུ་སྐྲ་བྲེག་པར་གྱིས་ཤིག །སའི་དངོས་པོ་ཐམས་ཅད་དུ་ཡང་ས་གཞི་བྱི་བདར་བྱ། ཡང་ན་ནི་བྱེད་དུ་ཆུག་ཤིག །སྐྲ་ནི་བསྡུས་ལ་ཕྱག་དར་ཁྲོད་དུ་བོར་ཅིག །སེན་མོ་གཅོད་པ་ཡང་གོ་རིམས་འདི་བཞིན་ནོ། །གང་མི་བདེ་བར་གྱུར་པ་དེ་ལ་རྗེས་སུ་བཅས་ཀྱི་མི་བདེ་བ་མེད་པ་དེ་དག་ནི་དེ་ལྟར་མ་བྱེད་ཅིག །བྱེད་ན་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་དགེ་སློང་ཞིག་ན་བར་གྱུར་ནས་དེས་རྩ་བ་དང་། སྡོང་བུ་དང་། འདབ་མ་དང་། འབྲས་བུ་རྣམས་ཀྱི་སྨན་གྱིས་གསོས་ཀྱང་དེའི་ནད་སོས་པར་མ་གྱུར་ནས། ཇི་ཙམ་ཞིག་ན་སྨན་པ་གཙུག་ལག་ཁང་དུ་འོངས་པ་དང་། དེ་ལ་དགེ་སློང་དག་གིས་བཞིན་བཟངས་དགེ་སློང་འདི་འདྲ་བར་ན་བར་གྱུར་ན་སྨན་དཔྱད་ཀྱི་ཐབས་སྟོན་ཅེས་སྨྲས་པ་་་དང་། དེས་འཕགས་པ་ཕྱི་དྲོ་ཕྱེ་ཟོ་ཤིག་དང་སོས་པར་འགྱུར་རོ་ཞེས་སྨྲས་པ་དང་། དེ་དག་གིས་བཞིན་བཟངས་ཕྱི་དྲོ་ཕྱེ་བཟའ་བར་བཅོམ་ལྡན་འདས་ཀྱིས་མ་གནང་ན་ངེད་ཅག་གིས་ཇི་ལྟར་ཕྱི་དྲོ་ཕྱེ་བཟའ་བར་བྱ་ཞེས་སྨྲས་པ་དང་། དེས་འཕགས་པ་ཁྱེད་ཅག་གི་སྟོན་པ་ནི་ཐུགས་རྗེ་ཅན་ཡིན་གྱིས་གནང་བར་་་འགྱུར་རོ་ཞེས་སྨྲས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བ་ལང་རྒན་པོ་སོ་མེད་པ་དག་གིས་ནས་ཇི་ལྟར་ཟོས་པ་དེ་བཞིན་དུ་འབྱུང་བ་ཡོད་དེ། དེ་ལྟ་བས་ན་རྗེས་སུ་གནང་བ་ནི་བ་ལང་རྒན་པོས་ཟོས་པའི་ནས་ལས་ཕྱེར་ཐོགས་ཏེ་བྱིན་ཅིག །དེ་ལ་ཐེ་ཚོམ་མ་བྱེད་ཅིག །དེ་ལ་ཕྱེ་དེ་བྱིན་ཀྱང་སོས་པར་མ་གྱུར་ནས། དགེ་སློང་དག་གིས་སྨན་པ་ལ་ཞིབ་ཏུ་སྨྲས་པ་དང་། དེས་འཕགས་པ་དག་དེ་ནི་རོ་ཡལ་བས་མི་ཕན་ཏེ། ནས་གཞན་ལས་ཕྱེ་བྱོས་ལ་བྱིན་ཅིག་ཅེས་སྨྲས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་གཞན་གྱིས་མ་ཟོས་པའི་ནས་ལས་ཕྱེར་བྱོས་ཏེ་ཚགས་ཀྱིས་ཚོགས་ལ་བྱིན་

---

^{[མ་དཔེ་གཟིགས་ན་འདིར་གནོན།]}

ཅིག་ཅེས་བཀའ་སྩལ་པ་དང་། དགེ་སློང་དག་གིས་དེ་བཞིན་དུ་བྱིན་ཡང་སོས་པར་མ་གྱུར་ནས། དགེ་སློང་དག་གིས་སྨན་པ་ལ་ཞིབ་ཏུ་སྨྲས་པ་དང་། དེས་འཕགས་པ་འདེ་གུ་བྱོས་ལ་བྱིན་ཅིག་དང་སོས་པར་འགྱུར་རོ་ཞེས་སྨྲས་པ་དང་། དེ་ལྟར་གྱུར་པ་དག་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་སྨན་པས་བསྒོ་ན་ཕྱེ་ལ་འདེ་གུ་བྱོས་ལ་བྱིན་ཅིག །དེ་བཞིན་དུ་ཕྱེ་ལས་ཟན་དུ་བྱས་པ་དང་། དེ་ཉིད་ཀྱང་རུང་སྟེ་ཐམས་ཅད་བྱིན་ཅིག །དེ་ལ་ཐེ་ཚོམ་མ་བྱེད་ཅིག། གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་མཉན་དུ་ཡོད་པ་ན་དགེ་སློང་གཞན་ཞིག་ན་བར་གྱུར་ནས། དེས་རྩ་བ་དང་། སྡོང་བུ་དང་། འདབ་མ་དང་འབྲས་བུའི་སྨན་རྣམས་ཀྱིས་གསོས་ཀྱང་སོས་པར་མ་གྱུར་ནས་ཕྱི་ཞིག་ན་སྨན་པ་གཙུག་ལག་ཁང་དུ་འོངས་པ་དང་། དགེ་སློང་དག་གིས་དྲིས་པ། བཞིན་བཟངས་དགེ་སློང་འདི་ན་བའི་ཐབས་འདི་ལྟ་བུ་ཞིག་ན་སྨན་དཔྱད་སྟོན་ཅིག་་་ཅེས་སྨྲས་པ་དང་། དེས་འཕགས་པ་དག་ཕྱི་དྲོ་ཁུ་ཤ་བྱིན་ཅིག་དང་སོས་པར་འགྱུར་རོ་ཞེས་སྨྲས་པ་དང་། དེ་དག་གིས་བཞིན་བཟངས་ཕྱི་དྲོ་ཟ་བར་བཅོམ་ལྡན་འདས་ཀྱིས་མ་གནང་ན་དེ་ལ་ཕྱི་དྲོ་ཁུ་ཤ་ཇི་ལྟར་བཟའ་ཞེས་སྨྲས་པ་དང་། དེས་འཕགས་པ་དག་ཁྱེད་ཀྱི་སྟོན་པ་ནི་ཐུགས་རྗེ་ཅན་ཡིན་གྱིས་གནང་བར་་་འགྱུར་རོ་ཞེས་སྨྲས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དྲེད་མོ་ཞེས་བྱ་བའི་སྲོག་ཆགས་ཞིག་ཡོད་དེ། དེས་ཤ་ཇི་ལྟར་ཟོས་པ་དེ་བཞིན་དུ་འབྱུང་གིས་དེ་ལྟ་བས་ན་རྗེས་སུ་གནང་བ་ནི་དྲེད་མོས་ཟོས་པའི་ཤ་ལས་ཁུ་ཤར་བྱོས་ཏེ་བྱིན་ཅིག །དེ་ལ་ཐེ་ཚོམ་མ་བྱེད་ཅིག །དེ་དག་གིས་དྲེད་མོས་ཟོས་པའི་ཤ་ལས་ཁུ་ཤར་བྱས་ཏེ་བྱིན་ཡང་སོས་པར་མ་གྱུར་ནས། དགེ་སློང་དག་གིས་སྨན་པ་ལ་ཞིབ་ཏུ་སྨྲས་པ་དང་། དེས་འཕགས་པ་དག་དེ་ནི་རོ་ཡལ་ཟིན་པས་ཤ་སར་པ་ལས་བྱས་པ་བྱིན་ཅིག་དང་སོས་

---

^{[མ་དཔེ་གཟིགས་ན་འདིར་གནོན།]}

པར་འགྱུར་རོ་ཞེས་སྨྲས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་སྨན་པས་ཤ་སར་པ་ལས་ཁུ་ཤར་བྱོས་ལ་བྱིན་ཅིག་ཅེས་བསྒོ་ན་ནི་དེ་ལྟ་བས་ན་རྗེས་སུ་གནང་བ་ནི་ཤ་སར་པ་ལས་ཁུ་ཤར་གྱིས་་ལ་དར་གྱིས་ཚོགས་ཏེ་བྱིན་ཅིག །དགེ་སློང་དག་གིས་དེ་བཞིན་དུ་བྱིན་ཡང་སོས་པར་མ་གྱུར་ནས། དགེ་སློང་དག་གིས་སྨན་པ་ལ་ཞིབ་ཏུ་སྨྲས་པ་དང་། དེས་འཕགས་པ་དག་སྣག་ཚོགས་བྱོས་ལ་བྱིན་ཅིག་ཅེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་སྨན་པས་སྣག་ཚོགས་བྱིན་ཅིག་ཅེས་བསྒོ་ན་ནི་བྱིན་ཅིག །དེ་ལ་སོགས་ཏེ་གཏུབས་པ་དང་། སྐམ་པོ་ཐམས་ཅད་ཀྱང་བྱིན་ཅིག །དེ་ལ་ཐེ་ཚོམ་མ་བྱེད་ཅིག །གླེང་གཞིའི་སྒོ་གསུམ་པའི་མདོའི་ཚིགས་སུ་བཅད་པ་གསུམ་པའོ།། །།མདོར་ན། དུད་པ་བཏུང་དང་སེང་རས་དང་། །སྣར་བླུགས་པ་དང་ཕོར་བུ་དང་། །ཁབ་རལ་དང་ནི་མིག་བྱུག་པ། །དྲང་སྲོང་ཆེན་པོས་གནང་བ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་དུད་པ་བཏུང་བའི་སྦུབ་བུ་ཆོངས་ཤིག་ཅེས་གསུངས་ན། ཇི་ལྟ་བུ་བཅང་བར་བགྱི། ཨུ་པཱ་ལི་རིན་པོ་ཆེ་ལས་བྱས་པ་མ་གཏོགས་སོ། །བཙུན་པ་བཅོམ་ལྡན་འདས་ཀྱིས་སེང་རས་ཆོངས་ཤིག་ཅེས་གསུངས་ན། ཇི་ལྟ་བུ་བཅང་བར་བགྱི། བལ་ལས་བྱས་པ་དང་། ཟར་མ་ལས་བྱས་པ་དང་། རས་ལས་བྱས་པའོ། །བཙུན་པ་བཅོམ་ལྡན་འདས་ཀྱིས་སྣའི་ནང་དུ་བླུགས་པ་ཆོངས་ཤིག་ཅེས་གསུངས་ན་ཇི་ལྟ་བུ་བཅང་བར་བགྱི། ཨུ་པཱ་ལི་རིན་པོ་ཆེ་ལས་བྱས་པ་མ་གཏོགས་སོ། །བཙུན་པ་བཅོམ་ལྡན་འདས་ཀྱིས་རྗེས་བཞིན་བཏུང་བའི་ཕོར་བུ་ཆོངས་ཤིག་ཅེས་གསུངས་ན། ཇི་ལྟ་བུ་བཅང་བར་བགྱི།

---

^{[མ་དཔེ་གཟིགས་ན་འདིར་གནོན།]}

ཨུ་པཱ་ལི་དེ་ནི་རིན་པོ་ཆེ་མ་གཏོགས་པའོ། །བཙུན་པ་བཅོམ་ལྡན་འདས་ཀྱིས་ཁབ་རལ་ཆོངས་ཤིག་ཅེས་གསུངས་ན། ཇི་ལྟ་བུ་བཅང་བར་བགྱི། ཨུ་པཱ་ལི་དེ་ནི་རིན་པོ་ཆེ་ལས་བྱས་པ་མ་གཏོགས་སོ། །བཙུན་པ་བཅོམ་ལྡན་འདས་ཀྱིས་མིག་བྱུག་པའི་སྨན་གྱི་སྣོད་ཆོངས་ཤིག་ཅེས་་་གསུངས་ན། ཇི་ལྟ་བུ་བཅང་བར་བགྱི། ཨུ་པཱ་ལི་དེ་ནི་རིན་པོ་ཆེ་ལས་་་བྱས་པ་མ་གཏོགས་པའོ། །གླེང་གཞིའི་སྒོ་གསུམ་པའི་མདོའི་ཚིགས་སུ་བཅད་་་་པ་བཞི་པའོ།། །།མདོར་ན། ཕོར་བུ་དང་ཡང་སྐུད་རིས་དང་། །རྐང་གནས་པ་དང་རྐང་རྟེན་དང་། །བཀྲུ་སྨན་དག་དང་རྔན་པ་དང་། །ཤི་བར་གྱུར་པའི་ཆོས་གོས་སོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་སྨན་གྱི་ཕོར་བུ་ཆོངས་ཤིག་ཅེས་གསུངས་ན། ཇི་ལྟ་བུ་བཅང་བར་བགྱི། ཨུ་པཱ་ལི་དེ་ནི་རིན་པོ་ཆེ་ལས་བྱས་པ་མ་གཏོགས་པའོ། །བཙུན་པ་བཅོམ་ལྡན་འདས་ཀྱིས་སྐུད་རིས་ཆོངས་ཤིག་ཅེས་གསུངས་ན། ཇི་ལྟ་བུ་བཅང་བར་བགྱི། ཨུ་པཱ་ལི་སྐུད་པ་བདུན་ལས་བྱས་པ་སྟེ། བལ་དང་། ལྡུམ་བུ་ཤ་ན་ཀ་དང་། རས་བལ་དང་། གསོ་མ་དང་། རྩྭ་དུ་གུ་ལ་དང་། ལྡུམ་བུ་ཀོ་ཏམ་པ་དང་། སྲིན་བལ་གྱི་སྐུད་པ་ལས་བྱས་པའོ། །བཙུན་པ་བཅོམ་ལྡན་འདས་ཀྱིས་རྐང་རྟེན་ཆོངས་ཤིག་ཅེས་གསུངས་ན། ཇི་ལྟ་བུ་བཅང་བར་བགྱི། ཨུ་པཱ་ལི་དེ་ནི་རིན་པོ་ཆེ་ལས་བྱས་པ་མ་གཏོགས་པའོ། །བཙུན་པ་བཅོམ་ལྡན་འདས་ཀྱིས་ཁྲི་དང་རྐང་རྟེན་ཆོངས་ཤིག་ཅེས་གསུངས་ན། ཇི་ལྟ་བུ་བཅང་བར་བགྱི། ཨུ་པཱ་ལི་དེ་ནི་རིན་པོ་ཆེ་ལས་བྱས་པ་མ་གཏོགས་པའོ། །གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཁྱིམ་བདག་གཞན་ཞིག་ན་བར་གྱུར་ནས་དེས་སྨན་པ་ལ་དྲིས་པ་བཞིན་བཟངས་བདག་ནད་འདི་་་འདྲ་བ་ཞིག་གིས་བཏབ་ན་སྨན་དཔྱད་ཀྱི་ཐབས་སྟོན་ཅིག་ཅེས་སྨྲས་པ་དང་། དེས་

---

^{[མ་དཔེ་གཟིགས་ན་འདིར་གནོན།]}

ཁྱིམ་བདག་སྣུམ་བག་སྔར་ཟོ་ཤིག་དང་ཕྱིས་བཀྲུ་སྨན་གཏང་ངོ་ཞེས་སྨྲས་པ་དང་། དེ་སྣུམ་བག་ཟ་བ་ལ་ཞུགས་སོ། །ཇི་ཙམ་ཞིག་ན་དེའི་གྲོང་དུ་ཉེ་བར་འགྲོ་བའི་དགེ་སློང་དེར་འོངས་ནས་དེས་ཁྱིམ་བདག་ཅི་བྱེད་ཅིང་འདུག་ཅེས་སྨྲས་པ་དང་། དེས་ཇི་ལྟར་གྱུར་པ་ཞིབ་ཏུ་སྨྲས་སོ། །དེས་ཁྱིམ་བདག་ཁོ་བོ་བཀྲུ་སྨན་གཏོང་བ་རབ་ཏུ་མཁས་ཀྱིས་སྨན་པ་ལ་སྦྱིན་པ་དེ་ཁོ་བོ་ལ་བྱིན་ཅིག་དང་། ངས་ཁྱོད་ལ་བཀྲུ་སྨན་བཏང་ངོ་ཞེས་སྨྲས་པ་དང་། ཁྱིམ་བདག་དེས་ལེགས་ཀྱིས་དེ་བཞིན་དུ་བགྱིའོ་ཞེས་སྨྲས་ནས་དེས་དེ་བཀྲུ་སྨན་བཏང་ནས་གཙུག་ལག་ཁང་དུ་ལངས་ཏེ་སོང་ངོ་། །ཁྱིམ་བདག་དེའི་བཀྲུ་སྨན་མཆོད་ནས་དེའི་ཉེ་དུ་དག་སོང་སྟེ་སྨན་པ་ལ་དྲིས་པ། ཁྱིམ་བདག་དེ་བཀྲུ་སྨན་མཆོད་ན་ཐབས་ཇི་ལྟ་བུར་བགྱི་ཞེས་སྨྲས་པ་དང་། དེ་ལ་བཀྲུ་སྨན་སུས་བླུད། དེ་དག་གིས་འཕགས་པ་འདི་ཞེས་བྱ་བས་བླུད་དོ་ཞེས་སྨྲས་པ་དང་། དེ་ཁྲོས་ནས་དེ་ཉིད་ཀྱི་གན་དུ་སོང་ལ་དྲིས་ཤིག་ཅེས་སྨྲས་སོ། །དེ་དག་གིས་དེ་དེའུ་ཤི་བ་ལས་སོས་ནས་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་རྔན་པ་ལེན་ཅིང་སྨན་མ་གཏོང་ཤིག །དེ་སྟེ་བཀྲུ་སྨན་བཏང་ན་ཡང་གུད་དུ་མ་འགྲོ་ཤིག །དེ་འདྲ་བའི་རྐྱེན་ཅིག་བྱུང་ན་ཡང་སྨན་དཔྱད་སྟོན་ལ་སོང་ཤིག །དེ་བཞིན་དུ་མ་བྱས་པར་སོང་ན་ཡང་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། ནོར་བདག་གིས་ནོར་ཆགས་པ་བཟུང་སྟེ། དེས་དེ་ལ་དུས་འདི་ཙམ་ཞིག་ན་བྱིན་ཅིག་ཅེས་དུས་བཏབ་ནས་བཏང་ངོ་། །དེས་བསམས་པ། དེ་ལྟར་དུས་བཏབ་ཏུ་ཟིན་ཀྱང་ངས་དུས་བཞིན་དུ་གཞལ་བར་མི་ནུས་ཀྱིས་ཇི་ནས་དུས་ལ་བབ་ན་བྲོས་ཏེ་འགྲོའོ་སྙམ་དུ་བསམས་སོ། །ཕྱིས་ཡང་བསམས་པ། ཡུལ་དང་བྲལ་ཏེ་འགྲོ་བ་ཡང་རབ་ཏུ་སྡུག་བསྔལ་གྱིས་ཇི་ནས་ནོར་བདག་དེ་གསད་དོ་སྙམ་བསམས་ནས་དེ་ཛེ་ཏའི་ཚལ་དུ་འགྲོ་བའི་ལམ་དུ་དེས་དེ་བསད་དོ། །ཇི་ཙམ་

---

^{[མ་དཔེ་གཟིགས་ན་འདིར་གནོན།]}

ཞིག་ན་དྲུག་སྡེ་དག་གིས་དེ་མཐོང་ནས་དེ་དག་གིས་བསམས་པ། བདག་ཅག་གིས་ཕྱག་དར་ཁྲོད་ཀྱི་གོས་རྙེད་དོ་སྙམ་བསམས་ནས། དེས་་བཤུ་བར་བརྩམས་པ་དང་། དེའི་གཉེན་དག་གནས་དེར་འོངས་ནས་དེ་དག་གིས་དེ་མཐོང་སྟེ་ངུ་བ་ལ་ཞུགས་ནས་ཁྱེད་ཅག་གིས་བསད་དོ་ཞེས་སྨྲས་པ་་་དང་། དེ་དག་གིས་ངེད་ཀྱིས་ནི་མ་བསད་ཀྱི་གདོན་མི་ཟ་བར་དགྲས་བསད་དོ་ཞེས་སྨྲས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེའི་གཉེན་རྣམས་དོགས་པ་སྐྱེས་པ་ནི་ཡུས་ཏེ། དེ་བས་ན་དགེ་སློང་དག་གིས་དེ་འདྲ་བའི་ཕྱག་དར་ཁྲོད་ནི་མ་ལེན་ཅིག། གང་གི་ཚེ་ན་སྐྱེ་བོ་མང་པོ་དག་གིས་རྟོགས་པར་གྱུར་པ་དེའི་ཚེ་ན་བླང་བར་བྱ་སྟེ། དེ་ལྟར་མ་བྱས་ན་འདས་པ་དང་བཅས་པར་འགྱུར་རོ། །གླེང་གཞིའི་སྒོ་གསུམ་པའི་མདོའི་ཚིགས་སུ་བཅད་པ་ལྔ་པའོ།། །།འདུལ་བ་གཞུང་དམ་པ། བམ་པོ་སུམ་བཅུ་རྩ་ལྔ་པ། མདོར་ན། ལྕགས་ཀྱི་གོང་བུ་གཟར་བུ་དང་། །རྒྱབ་ཁུར་རྐེད་པ་མགོ་བོ་དང་། །ཕ་དང་མ་ལ་གོས་དང་ཟས། །སྤུ་ཅན་ཆོས་གོས་གསུམ་པ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ལྕགས་ཀྱི་གོང་བུ་ལྕགས་ཐག་གིས་ཐོགས་ཤིག་ཅེས་གསུངས་ན། ལྕགས་ཐག་ཇི་ལྟ་བུར་གདགས་པར་བགྱི། ཨུ་པཱ་ལི་དེ་ནི་རིན་པོ་ཆེ་ལས་བྱས་པ་མ་གཏོགས་པའོ། །བཙུན་པ་བཅོམ་ལྡན་འདས་ཀྱིས་སྨན་གྱི་གཟར་བུ་ཆོངས་ཤིག་ཅེས་གསུངས་ན། ཇི་ལྟ་བུ་བཅང་བར་བགྱི། ཨུ་པཱ་ལི་དེ་ནི་རིན་པོ་ཆེ་ལས་བྱས་པ་མ་གཏོགས་པའོ། །བཙུན་པ་བཅོམ་ལྡན་འདས་ཀྱིས་དགེ་སློང་དག་རྒྱབ་དང་རྐེད་པ་དང་མགོ་ལ་ཁུར་མ་ཁྱེར་ཅིག་ཅེས་་་གསུངས་ན། བཙུན་པ་དགེ་སློང་མ་དག་གིས་ཀྱང་རྒྱབ་དང་རྐེད་པ་དང་མགོ་ལ་ཁུར་མི་བཀུར་བར་

---

^{[མ་དཔེ་གཟིགས་ན་འདིར་གནོན།]}

བགྱིའམ། ཨུ་པཱ་ལི་དགེ་སློང་མ་དག་གིས་ཀྱང་རྒྱབ་་་དང་རྐེད་པ་དང་མགོ་ལ་ཁུར་མ་ཁྱེར་ཅིག །དེ་སྟེ་ཁྱེར་ན་འདས་པ་དང་བཅས་་་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཁྱིམ་བདག་གཞན་ཞིག་གིས་རིགས་མཉམ་པ་ལས་ཆུང་མ་ཞིག་བླངས་ཏེ། དེ་དང་ལྷན་ཅིག་རྩེ་དགའ་ཡོངས་སུ་སྤྱོད་དོ། །དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱད་ནས་དུས་ཕྱི་ཞིག་ན་དེའི་ཆུང་མ་སེམས་ཅན་དང་ལྡན་པར་གྱུར་ནས། དེ་ཟླ་བ་་་བརྒྱད་དམ་དགུ་ལོན་པ་དང་། དེ་ལ་བུ་གཟུགས་ལེགས་པ་བལྟ་ན་སྡུག་པ། བཟང་བ། ཡན་ལག་ཐམས་ཅད་དང་ལྡན་པའི་ཁྱེའུ་ཞིག་བཙས་ཏེ། དེ་དག་གིས་སྐྱེས་པའི་སྐྱེས་སྟོན་ཆེན་པོ་བྱས་ནས་མིང་བཏགས་སོ། །དེ་བསྲིངས་བསྐྱེད་དེ་ཆེར་གྱུར་པ་དང་། ཇི་ཙམ་དུས་ཕྱི་ཞིག་ན་ཕ་མ་ལ་མ་གསོལ་བར་་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ངོ་། །དེ་སྔ་དྲོ་ཤམ་ཐབས་བགོས་ནས་ལྷུང་བཟེད་དང་ཆོས་གོས་ཁྱེར་ཏེ་མཉན་དུ་ཡོད་པར་བསོད་སྙོམས་ལ་ཞུགས་པ་དང་། དེའི་ཕ་རྒན་པོས་མཐོང་ནས་བུ་ཁྱོད་རབ་ཏུ་བྱུང་ན་ངེད་ཅག་སུས་གསོ་བར་འགྱུར་ཞེས་སྨྲས་པ་དང་། དེ་སྤ་གོང་ནས་ཅང་མི་སྨྲ་བར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཕ་དང་མ་ནི་བུའི་དཀའ་བ་བྱེད་པ་ཡིན་ཏེ། དེ་ལྟ་བས་ན་བུ་རབ་ཏུ་བྱུང་ཡང་ཕ་མ་གཉིས་ཀྱི་བཟའ་བ་དང་བགོ་བ་དག་སྦྱོར་བར་རྗེས་སུ་གནང་ངོ་། །བཅོམ་ལྡན་འདས་ཀྱིས་རབ་ཏུ་བྱུང་ཡང་ཕ་མ་གཉིས་ཀྱི་བཟའ་བ་དང་བགོ་བ་དག་སྦྱོར་ཅིག་ཅེས་གསུངས་པ་དང་། དགེ་སློང་དག་གིས་ཇི་ལྟར་སྦྱར་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གང་ལྷུང་བཟེད་དང་ཆོས་གོས་ལྷག་པར་གྱུར་པ་དེས་སྦྱར་བར་བྱོས་ཤིག །དེ་སྟེ་མེད་ན་སྦྱིན་བདག་ལས་སློངས་ཏེ་སྦྱོར་ཅིག །དེ་སྟེ་དགེ་འདུན་དུ་གཏོགས་ལ་དགེ་འདུན་གྱི་རྙེད་པ་དབང་བར་གྱུར་ན་དེའི་ཕྱེད་བྱིན་ཅིག །དེ་སྟེ་བསོད་སྙོམས་པ་ཞིག་ན་བསོད་སྙོམས་ཀྱི་ཕྱེད་སྦྱིན་པར་གྱིས་

---

^{[མ་དཔེ་གཟིགས་ན་འདིར་གནོན།]}

ཤིག །དེ་ལྟར་མ་བྱས་ན་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ནས་མི་རིང་བ་ཞིག་ན་རི་བྲགས་ཀྱི་གྲོང་ཞིག་ཡོད་དེ། རི་བྲགས་ཀྱི་གྲོང་དེ་ན་གཙུག་ལག་ཁང་ཞིག་ཡོད་པ་དེའི་ནང་ན་རྒན་ཞུགས་གཞན་ཞིག་གནས་ཏེ། དེ་ནས་དུས་ཕྱི་ཞིག་ན་མཆོད་རྟེན་ལ་ཕྱག་འཚལ་བའི་ཕྱིར་མཉན་དུ་ཡོད་པར་སོང་ངོ་། །དྲུག་སྡེ་རྣམས་ནི་ཆོས་ཀྱིས་ཀྱང་དྲུག་སྡེའི་ནང་ན་གཅིག་གིས་ནི་ཛེ་ཏའི་ཚལ་གྱི་སྒོ་སྲུང་་་བས་ན་ཚེ་དང་ལྡན་པ་ཉེ་དགའ་བོ་སྒོ་ན་འདུག་པ་དེས་མགོ་དཀར་ལ་སྨིན་མ་རིང་བ་ཞིག་རྒྱང་རིང་པོ་ནས་འོང་བ་མཐོང་ནས་དེས་བསམས་པ། དགེ་སློང་གནས་བརྟན་གང་ཞིག་འདིར་འོང་བསུར་འགྲོའམ་སྙམ་བསམས་ཏེ། དེ་སྔར་སོང་བ་དང་། དེས་གནས་བརྟན་བདེ་བར་འོངས་སམ་ཞེས་སྨྲས་སོ། །དེས་སློབ་དཔོན་ཕྱག་འཚལ་ལོ། །ཕྱག་འཚལ་ལོ་ཞེས་སྨྲས་པ་དང་། ཚེ་དང་ལྡན་པ་ཉེ་དགའ་བོས་བསམས་པ། རྒན་ཞུགས་འདིས་སློབ་དཔོན་ཡང་མི་ཤེས། མཁན་པོ་ཡང་མི་ཤེས་པར་རིག་ནས་དེས་རྒན་ཞུགས་ཚུར་ཤོག །གཙུག་ལག་ཁང་དུ་འདོང་ངོ་ཞེས་སྨྲས་སོ། །དེས་གཙུག་ལག་ཁང་དུ་ཁྲིད་ནས་ངལ་བསོར་བཅུག་པ་དང་། དེ་ཅུང་ཟད་ཅིག་འདུག་ནས་སློབ་དཔོན་བདག་ནི་མཆོད་རྟེན་ལ་ཕྱག་འཚལ་དུ་མཆིའོ་ཞེས་སྨྲས་པ་དང་། ཉེ་དགའ་བོས་སྡོད་ཅིག་དང་འདུ་བའི་དུས་ལ་བབ་པ་དང་བྱའོ་ཞེས་སྨྲས་པ་དང་། དེས་སློབ་དཔོན་བདག་གིས་ཆོས་གོས་་་གསུམ་ག་ཡང་ཁྱེར་ཏེ་མ་འོངས་པས་འགྲོའོ་ཞེས་སྨྲས་པ་དང་། ཉེ་དགའ་བོས་རྒན་ཞུགས་སྡོད་ཅིག་དང་། འདིར་ཆོས་གོས་གསུམ་བྱིན་གྱིས་བརླབ་པར་བྱའོ་ཞེས་སྨྲས་ནས། ཇི་ཙམ་ན་འདུས་པར་གྱུར་པ་དང་། དེས་དེ་ལ་པར་ཐང་ནི་མཐང་གོས་སུ་བྱིན་གྱིས་བརླབས། ལ་བ་ནི་སྟོད་གཡོགས་སུ་བྱིན་གྱིས་བརླབས། བེའུ་རས་ནི་སྦྱར་མར་བྱིན་གྱིས་བརླབས་ཏེ། དེ་ནས་ལ་བ་དང་བེའུ་རས་གཉིས་ཕྲག་པ་ལ་བཞག་ནས་པར་ཐང་གིས་དཀྲིས་པའི་སྟེང་དུ་ཐེ་གུས་དཀྲིས་ཏེ་དམ་དུ་བཅིངས་ནས་དེ་ནས་འདུས་པའི་

---

^{[མ་དཔེ་གཟིགས་ན་འདིར་གནོན།]}

ནང་དུ་བཏང་བ་དང་། དགེ་སློང་དག་གིས་མཐོང་ནས། དགེ་སློང་ཀུན་ཏུ་བཅིངས་པ་ཁ་ཅིག་ནི་ཉེས་པ་ངོར་བརྗོད་དོ། །ཁ་ཅིག་གིས་ནི་རྒན་ཞུགས་ཕ་བི་་ཅིའི་ཕྱིར་སྨྱོན་ཐབས་བྱེད་ཅེས་སྨྲས་པ་དང་། དེས་ཚེ་དང་ལྡན་པ་དག་འདི་ནི་ཁོ་བོའི་ཆོས་གོས་གསུམ་ཡིན་ཏེ། ཁོ་བོ་ནི་གློ་བུར་དུ་འོངས་ན་གང་དུ་གཞག་ཅེས་སྨྲས་པ་དང་། དེ་དག་གིས་ཆོས་གོས་གསུམ་དེ་འདྲ་བ་ཡིན་ནམ་ཞེས་སྨྲས་པ་དང་། དེས་གང་ལ་མེད་པ་དེ་ཅི་འདྲ་བར་་་འགྱུར་ཞེས་སྨྲས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གང་ཉེས་པའི་དམིགས་སུ་གྱུར་པ་དེ་ནི་དགེ་སློང་དག་གིས་སྤུ་རིང་པོ་ལས་ཆོས་གོས་གསུམ་དུ་་་བྱིན་གྱིས་བརླབས་པ་སྟེ། དེ་ལྟ་བས་ན་དགེ་སློང་དག་གིས་སྤུ་རིང་པོ་ལས་ཆོས་གོས་གསུམ་དུ་བྱིན་གྱིས་བརླབ་པར་མི་གནང་བར་དགོངས་ནས་བཀའ་སྩལ་པ། དགེ་སློང་དག་དགེ་སློང་རྣམས་ཉེས་པ་ངོར་བརྗོད་པ་ནི་ཡུས་ཏེ། ཉེས་པའི་དམིགས་སུ་གྱུར་པ་དེ་ནི་སྤུ་རིང་པོ་ལས་ཆོས་གོས་གསུམ་དུ་བྱིན་གྱིས་བརླབས་པ་སྟེ། དེ་ལྟ་བས་ན་དགེ་སློང་དག་སྤུ་རིང་པོ་ལས་ཆོས་གོས་གསུམ་བྱིན་གྱིས་མ་བརླབ་ཤིག །དེ་སྟེ་བྱིན་གྱིས་བརླབས་ན་འདས་པ་དང་བཅས་པར་འགྱུར་རོ། །བཅོམ་ལྡན་འདས་ཀྱིས་དགེ་སློང་དག་སྤུ་རིང་པོ་ལས་ཆོས་གོས་གསུམ་དུ་བྱིན་གྱིས་མ་བརླབ་ཤིག་ཅེས་གསུངས་པ་དང་། དད་པའི་བྲམ་ཟེ་དང་ཁྱིམ་བདག་གིས་ལ་བ་དང་ཕྲུག་སྟན་དང་བེའུ་རས་དག་ཕུལ་བ་དང་། དགེ་སློང་དག་ཐེ་ཚོམ་སྐྱེས་ནས་མ་བླངས་པ་དང་། དེས་འཕགས་པ་དག་ནམ་སངས་རྒྱས་བཅོམ་ལྡན་འདས་འཇིག་རྟེན་དུ་མི་འབྱུང་བའི་ཚེ་ན་ནི་མུ་སྟེགས་ཅན་དག་ཡོན་གནས་་་ལགས་ན། ད་ནི་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བས་ཁྱེད་ཅག་ཡོན་གནས་ཡིན་ཏེ། ད་ཁྱེད་ཀྱིས་མ་བླངས་ན་བདག་ཅག་གི་དགེ་བའི་ཟོང་མེད་བཞིན་དུ་འཇིག་རྟེན་ཕ་རོལ་དུ་ཇི་ལྟར་འགྲོ་ཞེས་སྨྲས་པ་དང་། དེ་དག་ཅང་མི་ཟེར་བར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་

---

^{[མ་དཔེ་གཟིགས་ན་འདིར་གནོན།]}

གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དད་པའི་བྲམ་ཟེ་དང་ཁྱིམ་བདག་ཟེར་བ་ནི་བདེན་ཏེ། དེ་ལྟ་བས་ན་ངས་རྗེས་སུ་གནང་གིས་ལོང་ལ་སྤུ་ཐུང་རྣམས་ནི་ལྷག་པའི་གོས་སུ་བྱིན་གྱིས་རློབས་ཤིག། སྤུ་རིང་པོ་རྣམས་ནི་ཡོན་བདག་གིར་བྱིན་གྱིས་རློབས་ལ་བཅང་བར་གྱིས་ཤིག། གླེང་གཞིའི་སྒོ་གསུམ་པའི་མདོའི་ཚིགས་སུ་བཅད་པ་དྲུག་པའོ།། །།མདོར་ན། དབུ་དང་སེན་མོའི་མཆོད་རྟེན་དང་། །ཁ་དོག་དཀར་པོ་མར་མེ་དང་། །ཁྱིམ་དང་མར་མེ་སྣོད་དག་དང་། །བལ་གླང་བཙུན་མོ་རྟ་བབས་སོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་ནི་ཆོས་ཀྱིས་ནང་པར་སྔར་ལངས་ནས། བཅོམ་ལྡན་འདས་དང་དགེ་སློང་གི་དགེ་འདུན་གྱི་ཞབས་ལ་ཕྱག་འཚལ་དུ་འགྲོའོ། །ཇི་ཙམ་དུས་ཕྱི་ཞིག་ན་བཅོམ་ལྡན་འདས་ཀྱིས་སེམས་ཅན་གྱི་བསོད་ནམས་ཀྱི་དོན་བསྟན་པའི་ཕྱིར་འབྲེག་མཁན་བཀུག་ནས་སྐྲ་དང་ཁ་སྤུ་ཡང་བྲེགས་པ་དང་། དེ་ནས་ཁྱིམ་བདག་མགོན་མེད་ཟས་སྦྱིན་ཛེ་ཏའི་ཚལ་དུ་སོང་ནས། བཅོམ་ལྡན་འདས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱིས་རྗེས་སུ་གནང་ན་བདག་གིས་དབུ་སྐྲ་དང་སེན་མོའི་མཆོད་རྟེན་བརྩིག་པར་བགྱི་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་ངས་རྗེས་སུ་གནང་གིས་རྩིགས་ཤིག །དེས་གཞི་ཡངས་པའི་གནས་ཞིག་ཏུ་མཛའ་བོ་དང་། ཕུ་ནུ་དང་། གཉེན་དག་དང་ལྷན་ཅིག་ཏུ་རིམ་གྲོ་ཆེར་བྱས་ནས། བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ཡང་སྐྱེ་བོ་ཐམས་ཅད་ཀྱིས་བལྟ་ན་སྡུག་པ་ཞིག་་་བརྩིགས་ན་རྡོ་ཐལ་གྱིས་མ་བྱུགས་པས་མི་མཛེས་པར་གྱུར་ནས། དེ་ཡང་བཅོམ་ལྡན་འདས་ཀྱི་དྲུང་དུ་སོང་ནས། ཞབས་ལ་མགོ་བོས་ཕྱག་འཚལ་ཏེ་གསོལ་པ། བཅོམ་ལྡན་འདས་བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་

---

^{[མ་དཔེ་གཟིགས་ན་འདིར་གནོན།]}

མཆོད་རྟེན་སྐྱེ་བོ་ཐམས་ཅད་ཀྱིས་བལྟ་ན་སྡུག་པ་ཞིག་བརྩིགས་ན་རྡོ་ཐལ་གྱིས་མ་བྱུགས་ཀྱི་བར་དུ་མི་མཛེས་པར་གྱུར་ན། དེ་ལ་བཅོམ་ལྡན་འདས་ཀྱིས་རྗེས་སུ་གནང་བར་མཛོད་ཅིག་དང་། བདག་གིས་རྡོ་ཐལ་གྱིས་བྱུག་པར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་ངས་རྗེས་སུ་གནང་གིས་རྡོ་ཐལ་གྱིས་སྐུས་ཤིག །དེས་རྡོ་ཐལ་གྱིས་བསྐུས་ནས་དྲི་དང་། བདུག་པ་དང་། མེ་ཏོག་གིས་མཆོད་པ་བྱས་སོ། །མཚན་མོ་མར་མེ་མེད་པས་མི་མཛེས་པར་གྱུར་ནས། དེ་ཡང་བཅོམ་ལྡན་འདས་གང་ན་བ་དེར་སོང་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་རྡོ་ཐལ་གྱིས་བསྐུས་ནས་དྲི་དང་། བྱུག་པ་དང་། མེ་ཏོག་དག་གིས་མཆོད་པ་བགྱིས་ན། མཚན་མོ་ཞུགས་མར་མ་མཆིས་ཏེ་མི་མཛེས་པར་གྱུར་ན། དེ་ལ་བཅོམ་ལྡན་འདས་ཀྱིས་རྗེས་སུ་གནང་ན། བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་མཆོད་པ་བགྱིས་ལ་མཚན་མོ་ཞུགས་མར་གྱི་ཕྲེང་བ་བུད་དོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་ངས་རྗེས་སུ་གནང་གིས་དེ་ལ་མཆོད་པ་གྱིས་ཏེ། ནུབ་མོ་དབུ་སྐྲ་དང་སེན་མོའི་མཆོད་རྟེན་གྱི་སྟེང་དུ་མར་མེའི་ཕྲེང་བ་བུས་ཤིག །དེ་ནས་མར་ཟགས་ནས་མཆོད་རྟེན་གྱི་ཁ་དོག་དཀར་པོ་ཡང་མ་རུང་བར་གྱུར་ཏེ། དེས་བཅོམ་ལྡན་འདས་ལ་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། མར་མེའི་ཕྲེང་བ་འོག་ཏུ་ཞོག་ཤིག །དེས་མར་མེའི་ཕྲེང་བ་འོག་ཏུ་བཞག་པ་དང་། ཁྱིས་མར་མེ་འཐུངས་ནས་སྣོད་ཀྱང་ཁྱེར་རོ། །དེ་ཡང་བཅོམ་ལྡན་འདས་གང་ན་བ་དེར་སོང་ནས་ཞབས་ལ་ཕྱག་འཚལ་ཏེ་གསོལ་པ། བཅོམ་ལྡན་འདས་བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་གྱི་འོག་ཏུ་ཞུགས་མར་གྱི་ཕྲེང་བ་་་བཞག་ན། ཁྱི་དག་གིས་

---

^{[མ་དཔེ་གཟིགས་ན་འདིར་གནོན།]}

མར་འཚལ་ནས་ཞུགས་མར་གྱི་སྣོད་ཀྱང་འཚལ་ཏེ་་་མཆིས་ན། བཅོམ་ལྡན་འདས་ཀྱིས་རྗེས་སུ་གནང་བར་མཛོད་ཅིག་དང་། བདག་གིས་ཞུགས་མར་གྱི་ཁང་བུ་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་བས་ན་ཁྱིམ་བདག་ངས་རྗེས་སུ་གནང་གིས་དེ་ལྟར་བྱོས་ཤིག །དེས་མར་མེའི་ཁང་བུ་དག་ཀྱང་བྱས་སོ། །དབུ་སྐྲ་དང་སེན་མོའི་མཆོད་རྟེན་ལ་བ་ལང་དག་གིས་བསྙོགས་པ་དང་། དེ་ཡང་བཅོམ་ལྡན་འདས་གང་ན་བ་དེར་སོང་ནས་ཞབས་ལ་ཕྱག་བྱས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་བརྩིགས་པ་ལ་བ་ལང་དག་གིས་བསྙོགས་པར་གྱུར་ན། བཅོམ་ལྡན་འདས་ཀྱིས་དེ་ལ་རྗེས་སུ་གནང་བར་མཛོད་ཅིག་དང་། བདག་གིས་སྟེགས་བུས་བསྐོར་བར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་ངས་རྗེས་སུ་གནང་གིས་བསྐོར་བར་བྱོས་ཤིག །དེས་སྟེགས་བུས་བསྐོར་ན་རྟ་བབས་མེད་པ་དང་། མི་མཛེས་པར་གྱུར་ཏེ། དེ་ཡང་བཅོམ་ལྡན་འདས་གང་ན་བ་དེར་སོང་ནས་ཞབས་ལ་ཕྱག་འཚལ་ཏེ་གསོལ་པ། བཅོམ་ལྡན་འདས་བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་གྱི་ཐ་མ་སྟེགས་བུས་བསྐོར་ན་སྟེགས་བུ་དེའི་རྟ་བབས་མ་མཆིས་ཏེ་མི་མཛེས་ན། དེ་ལ་བཅོམ་ལྡན་འདས་ཀྱིས་རྗེས་སུ་གནང་བར་མཛོད་ཅིག་དང་། བདག་གིས་སྟེགས་བུའི་རྟ་བབས་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་ངས་རྗེས་སུ་གནང་གིས་བྱོས་ཤིག་ཅེས་བཀའ་སྩལ་པ་དང་། དེས་རྟ་བབས་བྱས་ཏེ་ཡོ་བྱད་ཐམས་ཅད་བསོགས་ནས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ལ་མཛའ་བོ་དང་ཕུ་ནུ་དང་གཉེན་དག་བསོགས་ནས་མཆོད་པ་ཆེན་པོ་བྱས་སོ། །སྐྱེ་བོ་མང་པོ་དག་དེ་ལྟ་བུ་མཐོང་ནས་རབ་ཏུ་མོས་ཏེ། དེ་དག་དད་པ་སྐྱེས་ནས་དེ་དག་གིས་ཀྱང་རྣམ་པ་

---

^{[མ་དཔེ་གཟིགས་ན་འདིར་གནོན།]}

དེ་ལྟ་བུར་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་དག་་་གནས་གནས་སུ་བརྩིགས་སོ། །དེ་ནས་བཅོམ་ལྡན་འདས་མཉན་དུ་ཡོད་པ་ན་ཇི་སྲིད་དགྱེས་པའི་བར་དུ་བཞུགས་ནས་རྒྱལ་པོའི་ཁབ་གང་ན་བ་དེར་གཞོངས་སྤྱད་པ་སྤྱོད་ཅིང་རྒྱལ་པོའི་ཁབ་ཏུ་བྱོན་ཏོ། །རྒྱལ་པོའི་ཁབ་ཀྱི་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་དབུས་འགྱུར་འཆང་ནས་གཞོངས་སྤྱད་པ་སྤྱོད་ཅིང་རྒྱལ་པོའི་ཁབ་ཏུ་བྱོན་ཏོ། །རྒྱལ་པོའི་ཁབ་ཀྱི་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་པར་ཐོས་ཏེ་ཐོས་ནས་རྒྱལ་པོའི་མཐུ་ཆེན་པོ་དང་། ཡོ་ལང་ཆེན་པོས་ནང་གི་བཙུན་མོ་དང་། གཞོན་ནུ་དང་། བློན་པོ་དང་། ནང་གི་སྐྱེ་བོ་དག་དང་ལྷན་ཅིག་ཏུ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་བ་དང་། ཁམས་དང་། རང་བཞིན་མཁྱེན་ནས་འཕགས་པའི་བདེན་པ་བཞི་རྟོགས་པར་འགྱུར་བའི་ཆོས་དེ་ལྟ་བུ་བཤད་དེ། དེ་ཐོས་པ་དང་རྒྱལ་པོ་གཟུགས་ཅན་སྙིང་པོས་ལྷ་སྟོང་ཕྲག་བརྒྱད་བཅུ་དང་ལྷན་ཅིག་ཏུ་འཇིག་ཚོགས་སུ་ལྟ་བའི་རིའི་རྩེ་མོ་ཉི་ཤུ་་་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་དུ་བྱས་སོ། །དེས་བདེན་པ་མཐོང་ནས་ལྷ་སྟོང་ཕྲག་བརྒྱད་བཅུ་དང་ལྷན་ཅིག་ཏུ་བཅོམ་ལྡན་་་འདས་ལ་དུས་གསུམ་དུ་ལྟར་འདོང་ངོ་། །དེས་དུས་ཕྱི་ཞིག་ན་དཔྱིད་ཀྱི་དུས་ལ་བབ་པས་ཤིང་རྩི་དག་ཀྱང་མེ་ཏོག་རྒྱས། ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། སྐེག་དང་། ཀོ་ཀི་ལ་དང་། ཛི་བ་ཛི་བ་ཀ་ལ་སོགས་པ་ཡང་སྐད་འབྱིན་པར་བྱེད་པའི་ནགས་སྟུག་པོ་དེ་ན་ནང་གི་བཙུན་མོ་དག་གིས་བསྐོར་ཅིང་འདུག་འདུག་པ་ལས། དེ་ལ་ནང་གི་བཙུན་མོ་དག་གིས་གསོལ་པ། ལྷ་བདག་ཅག་གིས་ཉིན་རེ་རེ་ཞིང་བཅོམ་ལྡན་འདས་ཀྱི་ཞལ་ལྟ་ཞིང་མཆི་བར་མི་ནུས་ན་ལྷ་ནང་གི་བཙུན་མོ་དག་གི་དབུས་སུ་དེ་བཞིན་གཤེགས་པའི་དབུ་སྐྲ་དང་སེན་མོའི་

---

^{[མ་དཔེ་གཟིགས་ན་འདིར་གནོན།]}

མཆོད་རྟེན་ཞིག་བརྩིག་པར་མཛོད་ཅིག་དང་། དེ་ལ་བདག་ཅག་གིས་རིམ་གྲོ་བསྐྱེད་དེ་མེ་ཏོག་དང་། དྲི་དང་། བྱུག་པ་དང་། སྤོས་དང་། གདུགས་དང་། རྒྱལ་མཚན་དང་། བ་དན་དག་གིས་མཆོད་པར་བགྱིའོ་ཞེས་གསོལ་པ་དང་། དེས་བཅོམ་ལྡན་འདས་ལ་གསོལ་བ་བཏབ་སྟེ། བཅོམ་ལྡན་འདས་ཀྱི་དབུ་སྐྲ་དང་སེན་མོ་སྩོལ་ཅིག་དང་། བདག་ཅག་གིས་དེ་བཞིན་གཤེགས་པའི་དབུ་སྐྲ་དང་སེན་མོའི་མཆོད་རྟེན་ནང་གི་བཙུན་མོ་་དག་གི་དབུས་སུ་བརྩིག་གོ་ཞེས་གསོལ་པ་དང་། དེ་ནས་བཅོམ་ལྡན་འདས་ཀྱིས་དབུ་སྐྲ་དང་སེན་མོ་སྩལ་ནས་དེས་བསྟི་སྟང་དང་རིམ་གྲོ་ཆེར་བྱས་ཏེ། ནང་གི་བཙུན་མོ་དག་དང་ལྷན་ཅིག་ཏུ་དེ་བཞིན་གཤེགས་པའི་དབུ་སྐྲ་དང་སེན་མོའི་་་མཆོད་རྟེན་ནང་གི་བཙུན་མོའི་དབུས་སུ་བརྩིགས་ནས། དེ་ལ་ནང་གི་བཙུན་མོ་དག་གིས་མར་མེ་དང་། སྤོས་དང་། མེ་ཏོག་དང་། དྲི་དང་། བྱུག་པ་དག་གིས་རབ་ཏུ་མཆོད་པ་བྱས་སོ། །གང་གི་ཚེ་རྒྱལ་པོ་མ་སྐྱེས་དགྲ་ལ་མི་དགེ་བའི་བཤེས་གཉན་ལྷ་སྦྱིན་གྱིས་སྦད་ནས་ཕ་ཆོས་ཅན་ཆོས་བཞིན་དུ་རྒྱལ་པོ་བྱེད་པ་་འཚོ་བ་དང་ཡོངས་སུ་ཕྲལ་ནས་བདག་ཉིད་རྒྱལ་པོར་ཞུགས་སོ། །དེའི་ཚེ་ན་བཅོམ་ལྡན་འདས་ཀྱི་བསྟན་པ་ལ་ཆོས་ཀྱི་སྦྱིན་པ་ཐམས་ཅད་གཅད་པར་ཁྲིམས་བཅས་པས་སུས་ཀྱང་དེ་བཞིན་གཤེགས་པའི་དབུ་སྐྲ་དང་སེན་མོའི་མཆོད་རྟེན་ལ་བྱ་བ་མི་བྱེད་དོ། །གང་གི་ཚེ་བཅོ་ལྔའི་སྐབས་འབྱེད་པའི་དུས་ལ་བབ་པ་དེའི་ཚེ་ན་ཡང་དབུ་སྐྲ་དང་སེན་མོའི་མཆོད་རྟེན་ལ་སུ་ཡང་ཕྱག་དར་དང་། མར་མེ་དང་། མེ་ཏོག་དག་གིས་མཆོད་པ་མི་བྱེད་དོ། །དེ་ནས་བཙུན་མོ་དག་གིས་དབུ་སྐྲ་དང་སེན་མོའི་མཆོད་རྟེན་ལ་རྣམ་པ་དེ་ལྟ་བུ་མཐོང་ནས་རྒྱལ་པོ་་་གཟུགས་ཅན་སྙིང་པོ་དྲན་ཏེ་དེ་དག་མི་དགའ་སྟེ། མྱ་ངན་བྱེད་ཅིང་ཀྱི་ཧུད་ཆོས་ཀྱི་རྒྱལ་པོ་དང་བྲལ་བར་གྱུར་ནས་བདག་ཅག་གི་བསོད་ནམས་ཀྱང་ཟད་པར་གྱུར་ཏོ་ཞེས་ཟེར་ཞིང་ངུ་བར་གྱུར་ཏོ། །དེའི་ནང་ནས་བཙུན་མོ་དཔལ་གྱི་བློ་གྲོས་མ་ཞེས་བྱ་བ་ཞིག་གིས་འཚོ་བ་ལ་མ་བལྟས་པར་སངས་རྒྱས་ཀྱི་ཡོན་ཏན་རྗེས་སུ་དྲན་ནས་དབུ་སྐྲ་དང་

---

^{[མ་དཔེ་གཟིགས་ན་འདིར་གནོན།]}

སེན་མོའི་མཆོད་རྟེན་གྱི་ཕྱག་དར་བྱས་ཏེ་མར་མེའི་ཕྲེང་བ་དག་ཕུལ་ལོ། །ཇི་ཙམ་ན་མ་སྐྱེས་དགྲ་ཁང་སྟེང་དུ་བྱུང་སྟེ་བལྟས་པ་དང་སྣང་བ་ཆེན་པོ་བྱུང་བ་མཐོང་ནས་མ་བི་ཅི་ཞིག་ཅེས་དྲིས་པ་དང་། གཞན་ཞིག་གིས་དཔལ་གྱི་བློ་གྲོས་མས་དབུ་སྐྲ་དང་སེན་མོའི་མཆོད་རྟེན་ལ་ཞུགས་མར་གྱི་ཕྲེང་བ་ཕུལ་ལོ་ཞེས་སྨྲས་པ་དང་། དཔལ་གྱི་བློ་གྲོས་མ་བོས་ནས་ཅིའི་ཕྱིར་རྒྱལ་པོའི་ཁྲིམས་ལས་འགལ་བར་བྱ་ཞེས་སྨྲས་པ་དང་། བཙུན་མོས་ཁོ་མོས་རྒྱལ་པོའི་ཁྲིམས་དང་འགལ་མོད་ཀྱི། འོན་ཀྱང་ཁོ་མོས་ཆོས་ཀྱི་རྒྱལ་པོ་གཟུགས་ཅན་སྙིང་པོའི་ཁྲིམས་ལས་མ་འགལ་ལོ་ཞེས་སྨྲས་པ་དང་། དེ་ཁྲོས་ཏེ་འཁོར་ལོ་འཕངས་ནས་དེ་འཚོ་བ་དང་ཕྲལ་བ་དང་། དེ་བཅོམ་ལྡན་འདས་ལ་སེམས་མངོན་པར་དད་བཞིན་དུ་དུས་ལས་འདས་པ་དང་། སུམ་བཅུ་རྩ་གསུམ་གྱི་ལྷའི་གནས་བཟང་པོར་སྐྱེས་སོ། །དེའི་ཚེ་ན་ལྷ་རྣམས་འདུན་སར་འདུས་སོ། །དེ་ནས་ལྷའི་བུ་མོ་དཔལ་གྱི་བློ་གྲོས་མ་དཔག་ཚད་ཁོ་ར་ཁོར་ཡུག་ཏུ་སྣང་བའི་འོད་ཀྱིས་་་ལུས་བསྐོར་ནས་ལྷའི་འདུན་སར་སོང་ངོ་། །དེ་ནས་བརྒྱ་བྱིན་ལྷའི་དབང་པོས་དཔག་ཚད་ཁོ་ར་ཁོར་ཡུག་ཏུ་རྒྱ་ཆེར་སྣང་བའི་འོད་མཐོང་ནས་དྲིས་པ། གསེར་གྱིས་ལུས་ལ་སུ་ཡིས་བསྐུས། །པད་མོ་ཨུཏྤལ་བཞིན་འདྲ་བ། །དཔལ་ལྡན་མི་མཚུངས་ཅི་ལས་བྱུང་། །ཁྱོད་ལས་འདིར་ནི་འོད་བྱུང་བ། །ཅི་ཕྱིར་ཁྱོད་གདོང་པད་མོ་ཁ་འབུས་འདྲ། །ཁྱོད་ནི་གསེར་གྱི་འོད་འདྲ་བ། །ཅི་ཡི་འབྲས་བུ་ལྷ་མོ་བདག་ལ་སྨྲོས། །གང་གི་ལས་ལ་བྱུང་བ་སྤྱོད། །ལྷ་མོས་སྨྲས་པ། འཇིག་རྟེན་གསུམ་གྱི་མགོན་པོ་ནི། །སྐྱེ་བོ་རྣམས་ཀྱི་མར་མེ་སྟེ། །སངས་རྒྱས་མཆོག་གི་མཚན་མཐོང་བས། །མུན་སེལ་དེ་ལ་མར་མེ་ཕུལ། །ཉོན་མོངས་མུན་པ་སེལ་ལ་ཕུལ། །ཟླ་བའི་འོད་ཟེར་འདྲ་བའི་འོད་མཐོང་ནས། །ཐུབ་པ་གསལ་བའི་དངོས་པོ་སྟེ། །སྟོན་པའི་འོད་མཐུ་མཐོང་བས་ན། །གསུང་བ་མཆོག་ལ་ཕྱག་བྱས་པས། །དེ་ཡི་ལས་ཀྱིས་འདིར་སྐྱེས་ཏེ། །བདག་ལ་རབ་ཏུ་གསལ་ཞིང་མཛེས། །བདག་གདོང་བལྟ་ན་སྡུག་པ་ནི། །པད་མོ་ཟླ་བཞིན་རྣམ་

---

^{[མ་དཔེ་གཟིགས་ན་འདིར་གནོན།]}

པར་དག །བརྒྱ་བྱིན་གྱིས་སྨྲས་པ། ཨེ་མའོ་ཞིང་འདི་ཡོན་ཏན་ཅན། །ཉེས་པ་ཐམས་ཅད་རྣམ་སྤངས་ལ། །མཐོ་རིས་གང་དུ་སྐྱེ་བ་ཡི། །ཁྱོད་ཀྱིས་ས་བོན་དེར་བཏབ་པོ། །གསེར་བཞིན་སྤུངས་ལ་དཀར་བ་ཡི། །རྣམ་པ་མཆོག་ལ་སུས་མི་མཆོད། །སངས་རྒྱས་པད་མོ་ཁ་འབྱེས་བཞིན། །གང་དུ་ལྷག་པས་བསྐྱེད་པ་པད་མོ་སྤྱན། །ཡན་ལག་མཆོག་རྣམས་འབར་བ་སྟེ། །སྤྱན་ནི་མེ་ཏོག་ཀ་མ་ལ་དང་འདྲ། །ཆོས་ཉིད་ཀྱིས་ལྷའི་བུ་ཕོའམ་ལྷའི་བུ་མོ་ཡང་རུང་སྟེ། སུམ་བཅུ་རྩ་གསུམ་དུ་སྐྱེས་ནས་རིང་པོ་མ་ལོན་པར་གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་ཡིན་པས་་སྐྱེས་པ་སྟེ། སེམས་འདི་གསུམ་སྐྱེ་བར་འགྱུར་རོ། །ལྷའི་བུ་མོ་དཔལ་གྱི་བློ་གྲོས་མས་བདག་གང་ནས་ཤི་འཕོས་ཞེས་བལྟས་ན་མི་ལས་སོ། །གང་དུ་སྙམ་པ་དང་། སུམ་བཅུ་རྩ་གསུམ་གྱི་ལྷའི་ཁམས་བཟང་པོར་སྐྱེས་པར་མཐོང་ངོ་། །ལས་གང་ཡིན་ཞེ་ན། བཅོམ་ལྡན་འདས་ལ་སེམས་རབ་ཏུ་དད་པའོ་སྙམ་དུ་སེམས་ནས། དེ་ནས་དཔལ་གྱི་བློ་གྲོས་མས་འདི་སྙམ་དུ་བདག་གིས་ཞག་ལོན་ལ་བཅོམ་ལྡན་འདས་ཀྱི་ཞལ་བལྟ་བར་མི་རིགས་ཀྱི་ཅི་ནས་བདག་གིས་ཞག་མ་ལོན་པར་བཅོམ་ལྡན་འདས་ལ་བལྟ་བའི་ཕྱིར་འགྲོའོ་སྙམ་བསམས་ནས། དེ་ནས་ལྷའི་བུ་མོ་དཔལ་གྱི་བློ་གྲོས་མས་དྲི་་་མ་མེད་པའི་འཚེར་བའི་རྣ་ཆ་ནི་ཐོགས། ལུས་དོ་ཤལ་དང་སེ་མོ་དོས་བརྒྱན་ཏེ། ལྷའི་མེ་ཏོག་ཨུཏྤལ་དང་། པད་མོ་དང་། ཀུ་མུ་ད་དང་། པུཎྜ་རཱི་ཀ་དང་། མན་དཱ་ར་བ་ལ་སོགས་པའི་མེ་ཏོག་དག་གིས་པང་པ་བཀང་ནས་འོད་མའི་ཚལ་བྱ་ཀ་ལན་ད་ཀ་གནས་པ་རྒྱ་ཆེན་པོས་ཐམས་ཅད་འོད་ཀྱིས་སྣང་་་བར་བྱས་ཏེ། བཅོམ་ལྡན་འདས་ལ་མེ་ཏོག་གིས་མངོན་པར་གཏོར་ནས་ཆོས་ཉན་པའི་ཕྱིར་སོང་བ་དང་། བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་བ་དང་། ཁམས་དང་། རང་བཞིན་མཁྱེན་ནས་ཇི་ལྟར་འཕགས་པའི་བདེན་པ་བཞི་རབ་ཏུ་རྟོགས་པར་འགྱུར་བ་དེ་ལྟ་བུའི་ཆོས་བཤད་དེ་ཐོས་ནས། ལྷའི་བུ་མོ་དཔལ་གྱི་བློ་གྲོས་མས་

---

^{[མ་དཔེ་གཟིགས་ན་འདིར་གནོན།]}

འཇིག་ཚོགས་སུ་ལྟ་བའི་རིའི་རྩེ་མོ་ཉི་ཤུ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་དུ་བྱས་སོ། །དེས་བདེན་པ་མཐོང་ནས་བརྗོད་པར་བྱ་བ་རྣམ་གསུམ་བརྗོད་དོ། །བཙུན་པ་་བདག་ལ་འདི་ལྟར་ནི་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷས་ཀྱང་མ་བགྱིས། སྡུག་པས་ཀྱང་མ་བགྱིས། ཕུ་ནུ་དང་གཉེན་གྱིས་ཀྱང་མ་བགྱིས། ཚེ་སྔ་མ་ལ་མ་བགྱིས། བྲམ་ཟེ་དང་དགེ་སྦྱོང་གིས་ཀྱང་མ་བགྱིས་ཏེ། བཅོམ་ལྡན་འདས་ཀྱིས་བདག་གི་མཆི་མ་དང་ཁྲག་གི་རྒྱ་མཚོ་ནི་བསྐམས། རུས་པའི་རི་ལས་ནི་བསྒྲལ། ངན་སོང་གི་སྒོ་ནི་བཀུམ། མཐོ་རིས་དང་ཐར་པའི་སྒོ་ནི་ཕྱེ་སྟེ་བདག་ནི་ལྷ་དང་མིའི་གནས་སུ་གཞག་གོ་ཞེས་་་གསོལ་ཏོ། །སྨྲས་པ། ཁྱོད་ཀྱི་མཐུས་ནི་རབ་གསལ་བ། །ངན་སོང་ལམ་སྟེ་ཉེས་མང་པོ། །མཐོ་རིས་བསོད་ནམས་སྒོ་ཡང་ཕྱེ། །མྱ་ངན་འདས་པའི་ལམ་ཡང་བདག་གིས་ཐོབ། །ཁྱོད་ལ་བརྟེན་ནས་ཉེས་པ་རྣམས་ཀྱང་སྤངས། །བདག་གིས་རྟག་ཏུ་རྣམ་དག་མིག་ཀྱང་ཐོབ། །འཕགས་པ་དགའ་ཞིང་ཞི་བའི་ལམ་ཡང་ཐོབ། །སྡུག་བསྔལ་མཚོ་ལས་ཕ་རོལ་བདག་རྒལ་ནས། །འགྲོ་བ་ན་ཡང་ལྷ་མི་རྣམས་ཀྱིས་མཆོད། །སྐྱེ་རྒ་འཆི་བའི་ཉེས་པ་དང་བྲལ་བ། །སྲིད་པ་སྟོང་དུའང་རབ་ཏུ་མཐོང་བར་དཀའ། །དེ་རིང་ཐུབ་པའི་ཞལ་མཐོང་འབྲས་བུ་ཐོབ། །བཏུང་ནས་སེ་མོ་དོ་ཡང་རབ་ཏུ་འཕྱང་། །ཞབས་གཉིས་ལ་ཡང་ཕྱག་བྱས་དགའ་བ་སྐྱེས། །རྒྱལ་ལ་གཡས་ཀྱི་ཕྱོགས་ནས་བསྐོར་བྱས་ནས། །ལྷ་ཡི་འཇིག་རྟེན་ཁམས་སུ་མངོན་དུ་སོང་། །དེ་ནས་ལྷའི་བུ་མོ་དཔལ་གྱི་བློ་གྲོས་མ་ཚོང་པ་ཁེ་རྙེད་པ་བཞིན། ཞིང་པ་ལོ་ལེགས་པ་བཞིན། དཔའ་བོ་གཡུལ་ལས་རྒྱལ་བ་བཞིན། ནད་པ་ནད་ཐམས་ཅད་ལས་ཐར་བ་བཞིན། ལོངས་སྤྱོད་གང་དང་ལྡན་པས་བཅོམ་ལྡན་འདས་ཀྱི་དྲུང་དུ་འོངས་པའི་ལོངས་སྤྱོད་དེ་ཉིད་་་དང་བདག་གི་གནས་སུ་སོང་ངོ་། །དགེ་སློང་དག་སྲོད་དང་ཐོ་རངས་མི་ཉལ་ཞིང་ཐུབ་པ་ལ་བརྩོན་ཞིང་འཁོད་པ་དང་།

---

^{[མ་དཔེ་གཟིགས་ན་འདིར་གནོན།]}

བཅོམ་ལྡན་འདས་ཀྱི་དེར་འོད་རྒྱ་ཆེར་སྣང་བ་མཐོང་ངོ་། །མཐོང་ནས་བཅོམ་ལྡན་འདས་ལ་ཞུས་པ། ཅི་བཅོམ་ལྡན་འདས་བཅོམ་ལྡན་འདས་ལ་ཞལ་ལྟ་བའི་ཕྱིར་ཚངས་པ་འཁོར་གྱི་བདག་པོའམ། བརྒྱ་བྱིན་ལྷའི་དབང་པོ་འམ། འཇིག་རྟེན་སྐྱོང་བ་བཞིའམ། གང་ཞིག་གིས་བཅོམ་ལྡན་འདས་ཀྱི་ཞལ་ལྟར་མཆིས་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཚངས་པ་འཁོར་གྱི་བདག་པོ་ཡང་མ་ཡིན། བརྒྱ་བྱིན་ལྷའི་དབང་པོ་ཡང་མ་ཡིན། འཇིག་རྟེན་སྐྱོང་བ་བཞི་ལ་སོགས་པ་ལྷགས་པའང་མ་ཡིན་མོད་ཀྱི་རྒྱལ་པོ་གཟུགས་ཅན་སྙིང་པོའི་ཆུང་མ་དཔལ་གྱི་བློ་གྲོས་མ་ཞེས་བྱ་བ་ཞིག་གིས་བདག་གི་འཚོ་བ་ལ་མ་བལྟས་ཏེ། དེ་བཞིན་་་གཤེགས་པའི་དབུ་སྐྲ་དང་སེན་མོའི་མཆོད་རྟེན་ལ་མར་མེའི་ཕྲེང་བ་ཕུལ་བ་་་དང་། དེ་ནས་རྒྱལ་པོ་མ་སྐྱེས་དགྲས་འཁོར་ལོ་འཕངས་ཏེ་འཚོ་བ་དང་ཕྲལ་ལོ། །དེ་ང་ལ་སེམས་མངོན་པར་དད་བཞིན་དུ་དུས་འདས་ནས་སུམ་བཅུ་རྩ་གསུམ་དུ་གནས་བཟང་པོའི་ལྷར་སྐྱེས་སོ། །དེ་ནུབ་མོ་ངའི་དྲུང་དུ་འོངས་ཏེ་དེ་ལ་ངས་ཆོས་བཤད་ནས་དེས་བདེན་པ་མཐོང་སྟེ་བདག་གི་གནས་སུ་སོང་ངོ་། །དེ་ལྟ་བས་ན་དགེ་སློང་དག་བསོད་ནམས་ལ་འཇིགས་པར་མ་བྱེད་ཅིག །དེ་ཅིའི་ཕྱིར་ཞེ་ན། དེ་ནི་བདེ་བའི་ཚིག་བླ་དགས་སོ། །མོས་པ་དང་། སྡུག་པ་དང་། ཤིན་ཏུ་སྡུག་པ་དང་། ཡིད་དུ་འོང་བར་གྱུར་པ་ནི་འདི་ལྟ་སྟེ། བསོད་ནམས་སོ། །དགེ་སློང་དག་ཁྱེད་ཅག་གིས་བསོད་ནམས་མ་ཡིན་པ་ལ་འཇིགས་པར་གྱིས་ཤིག །དེ་ཅིའི་ཕྱིར་ཞེ་ན། དེ་ནི་སྡུག་བསྔལ་གྱི་ཚིག་བླ་དགས་སོ། །མ་མོས་པ་དང་། མི་སྡུག་པ་དང་། ཤིན་ཏུ་མི་སྡུག་པ་དང་། ཡིད་དུ་མི་འོང་བ་ནི་འདི་ལྟ་སྟེ། བསོད་ནམས་མ་ཡིན་པའོ། །དགེ་སློང་དག་ངས་ཡུན་རིང་པོ་ནས་ཀྱང་མངོན་པར་མཐོང་སྟེ། ཡུན་རིང་པོ་ནས་བསོད་ནམས་བྱས་པ། རྣམ་པར་སྨིན་པ་ལ་མོས་པ་དང་། སྡུག་པ་དང་། ཤིན་ཏུ་སྡུག་པ་དང་། ཡིད་དུ་འོང་བ་དག་མྱོང་བར་འགྱུར་

---

^{[མ་དཔེ་གཟིགས་ན་འདིར་གནོན།]}

རོ། །དགེ་སློང་དག་ངས་ལོ་བདུན་གྱི་བར་དུ་བྱམས་པའི་སེམས་བསྒོམས་པས་བསྐལ་པ་འཇིག་པ་དང་རྟས་པ་བདུན་གྱི་བར་དུ་འཇིག་རྟེན་འདིར་མ་འོངས་སོ། །འཇིག་རྟེན་འཇིག་པའི་ཚེ་ཀུན་སྣང་བའི་ལྷའི་རིས་སུ་སྐྱེས་སོ། །རྟས་པའི་ཚེ་ཚངས་པའི་གཞལ་མེད་ཁང་སྟོང་པར་སྐྱེས་ནས་དེར་ཡང་ངས་ཚངས་པ་དང་ཚངས་ཆེན་གྱི་བདག་པོར་གྱུར་ནས་ངས་ཟིལ་གྱིས་གནོན་གྱི་གཞན་གྱིས་མ་ཡིན་ནོ། །སེམས་ཅན་བརྒྱ་ཕྲག་བཅུ་ལ་དབང་སྒྱུར་ཏེ། སེམས་ཅན་གྱི་ནང་ན་མཆོག་ཏུ་བསྔགས་སོ། །སྟོང་ཕྲག་སུམ་བཅུ་རྩ་དྲུག་གི་བར་དུ་བརྒྱ་བྱིན་ལྷའི་དབང་པོར་གྱུར་ཏོ། །བརྒྱ་ཕྲག་གྲངས་མེད་པའི་བར་དུ་འཁོར་ལོས་སྒྱུར་བའི་རྒྱལ་པོར་གྱུར་ཏེ། མཐའ་བཞི་བཏུལ་ནས་རིན་པོ་ཆེ་བདུན་དང་ལྡན་ནོ། །རིན་པོ་ཆེ་སྣ་བདུན་ནི་རྣམ་པ་འདི་ལྟ་བུ་ཡིན་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང་། བལ་གླང་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། ཆུང་མ་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། དམག་མི་རིན་པོ་ཆེ་དང་བདུན་ནོ། །ང་ལ་བུ་ཡང་སྟོང་ཚང་ནས་དེ་དག་ཀྱང་དཔའ་བ་དང་། ནུས་པ་དང་། གཟུགས་སུ་ལྡན་པ། ཕ་རོལ་གྱི་སྡེ་ཚར་གཅོད་པ་སྟེ། དེ་ཡང་ངས་འདི་ལྟར་རྒྱ་མཚོའི་མཐའ་ཚུན་ཆད་ས་ཆེན་པོ་འདི་ཆོས་ཀྱིས་བཏུལ་གྱི། དབྱུག་པ་དང་མཚོན་གྱིས་གནོན་ཅིང་མི་བདེ་བ་མེད་པར་གནས་སོ། །དེའི་ཚེ་ཡང་ང་འདི་སྙམ་དུ་ལས་གང་གི་འབྲས་བུ་རྣམ་པར་སྨིན་པས་བདག་འདིར་མཐུ་ཆེ་རྫུ་འཕྲུལ་ཆེ་བར་གྱུར་སྙམ་བསམས་ནས། ཡང་འདི་སྙམ་དུ་ལས་འདིའི་འབྲས་བུ་གསུམ་དང་ལས་འདིའི་འབྲས་བུ་རྣམ་པར་སྨིན་པ་གསུམ་གྱིས་བདག་་་འདི་ལྟར་མཐུ་ཆེ་རྫུ་འཕྲུལ་ཆེ་བར་གྱུར་ཏེ། གསུམ་གང་ཞེ་ན། འདི་ལྟ་སྟེ། སྦྱིན་པ་དང་། གདུལ་བ་དང་། དུལ་བའོ་སྙམ་དུ་བསམས་ནས། བཅོམ་ལྡན་འདས་ཀྱིས་དེ་སྐད་གསུངས་ནས་ཡང་སྟོན་པས་འདི་སྐད་གསུངས་སོ། །དགེ་ཞིང་བདེ་བར་འདོད་པ་ཡི། །བསོད་ནམས་རྣམ་པར་སྨིན་ལ་ལྟོས། །ལོ་བདུན་བར་དུ་དགེ་སློང་དག །བྱམས་པར་བྱེད་པའི་སེམས་

---

^{[མ་དཔེ་གཟིགས་ན་འདིར་གནོན།]}

བསྒོམས་པས། །བསྐལ་པ་འཇིག་ཅིང་རྟས་འགྱུར་བ། །བདུན་དུ་འཇིག་རྟེན་འདིར་མ་འོངས། །འཇིག་པའི་ཚེ་ན་བདག་ཉིད་ནི། །འཇིག་རྟེན་ཀུན་སྣང་དང་བར་གནས། །རྟས་ནས་ཚངས་པའི་འཇིག་རྟེན་ན། །ཚངས་ཆེན་དབང་སྒྱུར་གནས་སུ་ཡང་། །ལན་བདུན་གྱི་ནི་བར་དུ་གནས། །སུམ་བཅུ་རྩ་དྲུག་བར་དུ་ནི། །ལྷ་ཡི་རྒྱལ་པོ་བྱས་པར་གྱུར། །བརྒྱ་ཕྲག་གྲངས་མེད་བར་དུ་ཡང་། །རྒྱལ་པོ་རབ་ཏུ་འཇིགས་གྲགས་བྱས། །རྒྱལ་རིགས་རྒྱལ་ཐབས་སྤྱི་བོར་བླུགས། །འཛམ་བུ་གནས་ཀྱི་དབང་པོར་གྱུར། །དབྱུག་དང་མཚོན་གྱིས་མ་ཡིན་པར། །འཇིག་རྟེན་འདི་ཡང་ཐུལ་བར་བྱས། །ཆོས་ཉིད་ཀྱིས་ནི་རྐྱེན་མེད་པར། །ཡང་དག་རྗེས་སུ་སློབ་པར་གྱུར། །ཆོས་ཀྱི་འཁོར་ལོ་རབ་བསྐོར་ནས། །ས་ཡི་དཀྱིལ་འཁོར་འདི་དག་ཏུ། །ཕྱུག་ཅིང་ལོངས་སྤྱོད་ཆེ་བ་དེར། །དེ་འདྲའི་རིགས་སུ་ང་ཡང་སྐྱེས། །ནོར་རྫས་ཐམས་ཅད་ཕུན་སུམ་ཚོགས། །རིན་ཆེན་སྣ་བདུན་དེ་བཞིན་ཏེ། །ནོར་དང་ཡོ་བྱད་མང་པོར་ལྡན། །རྒྱལ་པོ་གྲགས་ཤིང་འཇིགས་པར་གྱུར། །མཐུ་ཆེན་དེ་ཡི་རྒྱུ་ཡིས་ནི། །གང་དུ་སྐྱེས་པའི་མཆོག་ཏུ་གྱུར། །སངས་རྒྱས་འཇིག་རྟེན་ཕན་པ་ཅན། །དེ་ཡིས་འདི་ལྟར་བཤད་པ་འོ། །ངོ་མཚར་ཆེ་བ་འདི་ཤེས་པ། །དེ་ཡང་རྫུ་འཕྲུལ་ཆུང་མ་ཡིན། །མཁས་པ་གང་གིས་དད་མི་འགྱུར། །དེ་སྟེ་རིགས་ནི་དམའ་གྱུར་ཀྱང་། །དེ་ལ་ཕན་པར་འདོད་པ་དང་། །མཐུ་རྣམས་ཆེན་པོར་མངོན་འདོད་པ། །དམ་པའི་ཆོས་ལ་བླ་མར་བྱོས། །སངས་རྒྱས་བསྟན་ལ་དྲན་པར་གྱིས། །བཅོམ་ལྡན་འདས་ཀྱིས་དེ་སྐད་གསུངས་པ་དང་། དགེ་སློང་དག་ཡིད་མགུ་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའོ། །གླེང་གཞིའི་ནང་ནས་སྒོ་གསུམ་པའི་མདོའི་ཚིགས་སུ་བཅད་པ་་་བདུན་པའོ།། །།མདོར་ན། ཁྱིམ་རྨང་རྟ་བབས་བཅས་པ་དང་། །བ་གམ་སྟེགས་བུ་བཅས་པ་སྟེ། །ཀ་བ་མཚལ་གྱིས་བྱུགས་པ་དང་། །རྩིག་པ་རྒྱ་སྐྱེགས་རི་མོ་བྲི། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་

---

^{[མ་དཔེ་གཟིགས་ན་འདིར་གནོན།]}

ཚལ་མགོན་མེད་ཟས་་་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་པ་བཅོམ་ལྡན་འདས་གང་ན་བ་དེར་སོང་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་དུ་དེ་སྟེ་བཅོམ་ལྡན་འདས་ཀྱིས་རྗེས་སུ་གནང་ན་བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་་་མཆོད་རྟེན་ལ་མཐའ་མ་དྲི་གཙང་ཁང་གིས་བསྐོར་ལ་རྟ་བབས་ཀྱང་གཟུགས་པར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་རྗེས་སུ་གནང་གིས་བྱོས་ཤིག །ཡང་བཅོམ་ལྡན་འདས་དེ་སྟེ་རྗེས་སུ་གནང་ན་བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ལ་བ་གམ་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དེ་ལྟ་བས་ན་ངས་རྗེས་སུ་གནང་གིས་བྱོས་ཤིག །དེ་ནས་ཡང་བཅོམ་ལྡན་འདས་ཀྱིས་དེ་སྟེ་རྗེས་སུ་གནང་བ་ན་བདག་གིས་བ་གམ་གྱིས་་་བསྐོར་བ་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་ངས་རྗེས་སུ་གནང་གིས་བྱོས་ཤིག །ཡང་བཅོམ་ལྡན་འདས་ཀྱིས་དེ་སྟེ་རྗེས་སུ་གནང་ན་བདག་གིས་ཀ་བ་དག་མཚལ་གྱིས་བྱུག་གོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དེ་ལྟ་བས་ན་རྗེས་སུ་གནང་གིས་བྱོས་ཤིག །ཡང་བཅོམ་ལྡན་འདས་ཀྱིས་དེ་སྟེ་རྗེས་སུ་གནང་ན་བདག་གིས་རྩིག་ངོས་རྒྱ་སྐྱེགས་ཀྱིས་བྲི་བར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དེ་ལྟ་བས་ན་རྗེས་སུ་གནང་གིས་བྲིས་ཤིག །གླེང་གཞིའི་ནང་ནས་སྒོ་གསུམ་པའི་མདོའི་ཚིགས་སུ་བཅད་པ་བརྒྱད་པའོ།། །།མདོར་ན། བ་ལང་སོ་དང་ཐ་གུ་དང་། །ཕྲེང་བ་རིན་ཆེན་ཕྲེང་བ་ཅན། །གཡོག་མ་དང་ནི་སྙིང་པོ་དང་། །སྙིང་པོ་ཡི་ནི་སྒོ་ཡང་ངོ་། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དབུ་སྐྲ་དང་

---

^{[མ་དཔེ་གཟིགས་ན་འདིར་གནོན།]}

སེན་མོའི་མཆོད་རྟེན་ལ་མཆོད་པ་དང་། བཀུར་སྟི་བྱོས་ཤིག་ཅེས་གསུངས་ན། དགེ་སློང་དག་གིས་མཆོད་རྟེན་ལ་མཆོད་པ་བྱེད་པ་ན་ཕུར་བུ་བཏབ་ནས་མེ་ཏོག་གི་ཕྲེང་བ་བཏགས་པ་དང་། བྲམ་ཟེ་དང་ཁྱིམ་བདག་དད་པ་དག་གིས་མཐོང་ནས་ཅིའི་ཕྱིར་འདི་ལྟར་དགེ་སློང་དག་གིས་སྟོན་པའི་མཆོད་རྟེན་་ཕུར་བུ་མེད་པ་ལ་ཕུར་བུ་བཏབ་ཅེས་ཕྱས་འདོགས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་དང་ཁྱིམ་བདག་འཕྱ་བ་ནི་ཡུས་ཏེ། དེ་ལྟ་བས་ན་མཆོད་རྟེན་ལ་ཕུར་བུས་མ་བཏབ་པར་བ་ལང་གི་སོ་ལྟ་བུ་ཆུང་ངུས་ཐོབ་ཤིག །བཅོམ་ལྡན་འདས་ཀྱིས་བ་ལང་གི་སོ་ལྟ་བུ་ཆུང་ངུས་ཐོབ་ཤིག་ཅེས་བཀའ་སྩལ་པ་དང་། དགེ་སློང་དག་གིས་མཆོད་རྟེན་ལ་ཁུང་བུ་བརྐོས་ཏེ་བ་ལང་གི་སོ་ལྟ་བུ་འཛུགས་པ་ལ་ཞུགས་པ་དང་། བཅོམ་ལྡན་འདས་ཀྱིས་མཆོད་རྟེན་ལ་ཁུང་བུ་བརྐོས་ཏེ་བ་ལང་གི་སོ་ལྟ་བུ་མ་གཟུགས་པར་མཆོད་རྟེན་རྩིག་པའི་ཚེ་ན་ཚུགས་ཤིག་ཅེས་བཀའ་སྩལ་ཏོ། །དགེ་སློང་དག་མཆོད་པ་བྱེད་པ་ན་མཆོད་རྟེན་ལ་འཛེགས་ནས་མེ་ཏོག་གི་ཕྲེང་བ་རྣམས་མགུར་ཆུའི་བྲེ་ལ་འདོགས་པ་དང་། བྲམ་ཟེ་དང་ཁྱིམ་བདག་དག་གིས་མཐོང་ནས་ཅིའི་ཕྱིར་འདི་ལྟར་དགེ་སློང་དག་གིས་འདི་ལྟར་སྟོན་པའི་མཆོད་་་རྟེན་ལ་རྡོག་པས་རྫི་ཞིང་འདོང་ཞིང་འདོང་ཞེས་འཕྱས་འདོགས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཏེ། དེ་ལྟ་བས་ན་དགེ་སློང་དག་གིས་སྟོན་པའི་མཆོད་རྟེན་ལ་རྡོག་པས་རྫི་ཞིང་མ་་་འདོང་ཤིག །དེ་སྟེ་མཆོད་པའི་ཕྱིར་ན་ནི་ཁྱིམ་པས་འཛེགས་ཤིག །དེ་མེད་ན་དགེ་ཚུལ་པས་རྐང་པ་གཉིས་ཁྲུས་ལ་དྲིས་བྱུག་གམ་གོས་ཀྱིས་དཀྲིས་ཏེ་འཛེགས་ཤིག །དེ་དག་ཀྱང་མེད་ན་དགེ་སློང་གིས་སྟོན་པར་འདུ་ཤེས་ཞོག་ལ་དུས་ལ་བབ་པར་སོམས་ཏེ་དེ་ལྟར་དེ་བཞིན་དུ་འཛེགས་ལ་དྲིའི་རི་མོ་བྱོས་ཤིག །མཆོད་རྟེན་ཆེ་སྟེ་འཛེག་མི་ནུས་པ་དང་། བཅོམ་ལྡན་འདས་ཀྱིས་བཀའ་

---

^{[མ་དཔེ་གཟིགས་ན་འདིར་གནོན།]}

སྩལ་པ། ཐག་པས་ཐོགས་ཏེ་འཛེགས་ཤིག །དབུ་སྐྲ་དང་སེན་མོའི་མཆོད་རྟེན་ལ་མེ་ཏོག་གི་ཕྲེང་བ་དབུལ་བ་ཕུལ་བ་དང་། དེ་དག་རྙིས་ཏེ་མི་མཛེས་པར་གྱུར་ནས། ཁྱིམ་བདག་སྐྱབས་མེད་ཟས་སྦྱིན་གྱིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ལ་མེ་ཏོག་གི་ཕྲེང་བ་ཕུལ་བ་དང་དེ་དག་རྙིས་ཏེ་མི་་་མཛེས་ནས། དེ་སྟེ་བཅོམ་ལྡན་འདས་ཀྱིས་གནང་ན་ནི་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ལ་རིན་པོ་ཆེའི་ཕྲེང་བ་དབུལ་ལོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་གནང་གིས་ཕུལ་ཅིག །དབུ་སྐྲ་དང་སེན་མོའི་མཆོད་རྟེན་ལ་བྱ་རོག་ལ་སོགས་པ་བྱ་རྣམས་འཁོད་དེ་དེ་དག་གི་རྟུག་པས་མཆོད་རྟེན་མ་རུང་བར་གྱུར་པ་དང་། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ལ་དབུ་སྐྲ་དང་སེན་མོའི་་་མཆོད་རྟེན་ལ་བྱ་རོག་ལ་སོགས་པ་བྱ་རྣམས་མཆིས་ཤིང་རྟུག་པས་མཆོད་རྟེན་མ་རུང་བར་བགྱིས་ན། དེ་སྟེ་བཅོམ་ལྡན་འདས་ཀྱིས་གནང་ན། བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ལ་གཡོག་པའི་སྙིང་པོས་གཡོག་གོ་ཞེས་གསོལ་པ་དང་། བཅོམ་ལྡན་འདས་ཀྱིས་ཁྱིམ་བདག་དེ་ལྟ་བས་ན་གནང་་གིས་གཡོག་པའི་སྙིང་པོས་གཡོགས་ཤིག་ཅེས་བཀའ་སྩལ་པ་དང་། དེས་གཡོག་པའི་སྙིང་པོས་གཡོགས་སོ། །གཡོགས་པ་དེ་དབྱར་འདྲུལ་ཞིང་མུན་པས་མི་སྣང་བར་གྱུར་པ་དང་། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ལ་བདག་གིས་དབུ་སྐྲ་དང་སེན་མོའི་མཆོད་རྟེན་ལ་གཡོག་པའི་སྙིང་པོས་གཡོགས་པ་དེ་ད་ལྟར་དབྱར་གྱི་ཆབ་ཀྱིས་རུལ་ཏེ་མུན་པར་གྱུར་ནས་མི་མངོན་ན་དེ་སྟེ་་་བཅོམ་ལྡན་འདས་ཀྱིས་གནང་ན་བདག་གིས་ཆབ་སྒོ་གདོད་དོ་ཞེས་གསོལ་པ་་་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་གནང་གིས་སྒོ་ཐོད་ཅིག །གླེང་གཞིའི་ནང་ནས་སྒོ་གསུམ་པའི་མདོའི་ཚིགས་སུ་བཅད་པ་དགུ་པའོ་།། །།མདོར་ན། ཁར་བ་ལ་སོགས་མཆོད་རྟེན་བྱ། །གསེར་དང་དངུལ་ལ་སོགས་པ་དང་། །རྒྱལ་མཚན་གྱིས་སུ་འདི་ལ་བསྐོར། །འབྲུ་མར་ལ་སོགས་ཆག་

---

^{[མ་དཔེ་གཟིགས་ན་འདིར་གནོན།]}

ཆག་གདབ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་་་ཅེས་བཅོམ་ལྡན་འདས་ཀྱིས་དེ་སྟེ་གནང་ན་བདག་གིས་བཅོམ་ལྡན་འདས་ཀྱི་་་ཁར་བའི་མཆོད་རྟེན་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དེ་ལྟ་བས་ན་གནང་གིས་བྱོས་ཤིག །ཡང་བཅོམ་ལྡན་འདས་ཀྱིས་དེ་སྟེ་གནང་ན་གསེར་གྱི་མཆོད་རྟེན་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དེ་ལྟ་བས་ན་གནང་གིས་བྱོས་ཤིག །དེ་བཞིན་དུ་དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་རྒྱ་ཆེར་བྱོས་ཤིག །དེ་སྟེ་ཡང་བཅོམ་ལྡན་འདས་ཀྱིས་གནང་ན་བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ལ་རྒྱལ་མཚན་འབུལ་ལོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དེ་ལྟ་བས་ན་གནང་གིས་ཕུལ་ཅིག །བཅོམ་ལྡན་འདས་ཀྱིས་རྒྱལ་མཚན་ཕུལ་ཅིག་ཅེས་གསུངས་པ་དང་། དེས་ཅི་འདྲ་བ་ཞིག་དབུལ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་མཚན་བཞི་སྟེ། སེང་གེའི་རྒྱལ་མཚན་དང་། ཆུ་སྲིན་གྱི་རྒྱལ་མཚན་དང་། ཀླུའི་རྒྱལ་མཚན་དང་། ཁྱུ་མཆོག་གི་རྒྱལ་མཚན་ནོ། །དེ་སྟེ་ཡང་བཅོམ་ལྡན་འདས་ཀྱིས་གནང་ན་བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ལ་འབྲུ་མར་གྱིས་ཆག་་་ཆག་གདབ་བོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་གནང་གིས་ཆག་ཆག་ཐོབ་ཤིག །ཡང་གསོལ་པ། དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ལ་ལྡོང་རོས་ཀྱིས་བྱུག་གོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཁྱིམ་བདག་གནང་གིས་

---

^{[མ་དཔེ་གཟིགས་ན་འདིར་གནོན།]}

ཡུགས་ཤིག །ཇི་ལྟར་ལྡོང་རོས་ཀྱིས་བྱུག་པ་དེ་བཞིན་དུ་ཙན་དན་གྱིས་བྱུག་པ་ཡང་རྒྱ་ཆེར་བྱོས་ཤིག །གླེང་གཞིའི་ནང་ནས་སྒོ་གསུམ་པའི་མདོའི་ཚིགས་སུ་བཅད་པ་བཅུ་པ་སྟེ། གླེང་གཞིའི་ནང་ནས་སྒོ་གསུམ་པ་རྫོགས་སྷོ།། །།

གླེང་གཞིའི་སྒོ་བཞི་པ་བཤད་པ།

---

^{[མ་དཔེ་གཟིགས་ན་འདིར་གནོན།]}

མདོར་བསྡུས་པར་ན། སྒོ་ལེབ་དང་ཡང་དེ་ལྟར་དབྱར། །དྲུག་སྡེ་དག་དང་བཙོ་བླག་མཁན། །གཞོང་པ་གཏན་པ་དེ་བཞིན་ཏེ། །ཀུན་ཏུ་རྒྱུ་དང་སྐྱིན་པོ་དང་། །ཆག་ཆག་བཏབ་པ་རུང་བ་དང་། །དེ་བཞིན་མདོ་རྣམས་བསྡུས་པར་བརྗོད། །མདོར་ན། སྒོ་ལེབ་དང་ནི་པུས་འཁྱུད་དང་། །དྲ་བ་དང་ཡང་གཟུགས་འཁོར་དང་། །ཞིང་དང་འབྲས་དང་སྐྱེ་བ་དང་། །ནོར་ལས་སྐྱེས་དང་གོས་རྣམས་སོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་སྒོ་ལེབ་ལ་ལག་གཟུངས་བྱོས་ཤིག་ཅེས་གསུངས་ན་ཅི་འདྲ་བ་ལས་བགྱི། ཨུ་པཱ་ལི་རིན་པོ་ཆེ་མ་གཏོགས་པའོ། །ཡང་གསོལ་པ། བཙུན་པ་བཅོམ་ལྡན་འདས་ཀྱིས་དགེ་སློང་གིས་པུས་འཁྱུད་ཆོངས་ཤིག་ཅེས་གསུངས་ན། ཇི་ལྟར་བཅང་བར་བགྱི། ཨུ་པཱ་ལི་སྐུད་པ་སྣ་བདུན་ཏེ། བལ་གྱི་དང་། ལྡུམ་བུ་ཤ་ན་ཀའི་དང་། རས་ཀྱི་སྐུད་པ་དང་། ཟར་མའི་དང་། རྩྭ་དུ་གུ་ལའི་དང་། ཀོ་ཏམ་བ་ཀའི་དང་། སྲིན་བལ་རྣམས་སོ། །ཡང་གསོལ་པ། བཙུན་པ་བཅོམ་ལྡན་འདས་ཀྱིས་དྲ་བ་བྱོས་ཤིག་ཅེས་གསུངས་ན་ཇི་ལྟ་བུ་ལས་བགྱི། ཨུ་པཱ་ལི་རྣམ་པ་བཞི་སྟེ། རྩྭ་མུན་ཛའི་དང་། བལ་བ་ཛ་དང་། ཟར་མའི་དང་། རས་ཀྱི་སྐུད་པ་ལས་སོ། །ཡང་གསོལ་པ། བཙུན་པ་བཅོམ་ལྡན་འདས་ཀྱིས་དྲ་བའི་གཟུགས་འཁོར་བྱོས་ཤིག་ཅེས་གསུངས་ན། ཇི་ལྟ་བུ་ལས་བགྱི། ཨུ་པཱ་ལི་རིན་པོ་ཆེ་མ་གཏོགས་པའོ། །གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཁྱིམ་བདག་་གཞན་ཞིག་དད་ཅིང་དེས་ལ་དགེ་བར་སེམས་པ་ཞིག་འདུག་སྟེ། དེ་ན་གཅེར་བུ་པའི་དགེ་བསྙེན་པའི་

---

^{[མ་དཔེ་གཟིགས་ན་འདིར་གནོན།]}

བུ་མོ་ཆུང་མར་བླངས་ཏེ་དེས་དེ་ལ་བཟང་མོ་སངས་རྒྱས་ནི་སྟོན་པ། ཆོས་ནི་རྒྱལ་མཚན། དགེ་སློང་ནི་ཡོན་གནས་ཏེ། དེ་དག་ལ་བྱ་བ་བྱོས་ཤིག་ཅེས་བསྒོ་བ་དང་། དེ་གཡོས་ཀུན་ཏུ་སྤྱོད་དེ་གཡོ་མེད་པ་ལྟར་ཇོ་བོའི་སྲས་ལེགས་ཀྱིས་དེ་བཞིན་དུ་བགྱིའོ་ཞེས་སྨྲས་པ་དང་། ཁྱིམ་བདག་དེའི་ཁྱིམ་དུ་ཉིན་གཅིག་བཞིན་དགེ་འདུན་གྱིས་བསྐོས་པའི་དགེ་སློང་རྣམས་བཤོས་་་གསོལ་ལོ། །དེ་ནས་དུས་ཕྱི་ཞིག་ན་ཁྱིམ་བདག་དེ་རི་བྲགས་ཀྱི་གྲོང་གཞན་ཞིག་ཏུ་དོན་ཅུང་ཟད་ཅིག་ཡོད་པར་གྱུར་ཏེ། དེས་ཆུང་མ་དེ་ལ་བསྒོ་བ། བཟང་མོ་ཁོ་བོ་ཡུལ་འདི་ཞེས་བྱ་བའི་རི་དྲུང་གི་གྲོང་དུ་དོན་ཅུང་ཟད་ཅིག་ཡོད་པར་་་གྱུར་ཏེ་དེར་འགྲོས། ཁྱོད་ཀྱིས་དེ་བཞིན་དུ་སྦྱིན་གནས་རྣམས་ལ་བཤོས་གསོལ་ཅིག་ཅེས་བྱས་པ་དང་། དེ་གཡོས་ཀུན་ཏུ་སྤྱོད་དེ། གཡོ་མེད་པ་ལྟར་ཇོ་བོའི་སྲས་ལེགས་ཀྱིས་བཤོས་གསོལ་ལོ་ཞེས་སྨྲས་སོ། །དེ་སོང་ནས་བདག་གིས་ཆུང་མ་ལ་བསྒོ་ཟིན་ན་དགེ་སློང་ལ་ཡང་བསྒོའོ་སྙམ་དུ་སེམས་ཏེ་དེ་གཙུག་ལག་ཁང་དུ་སོང་ནས། དགེ་སྐོས་ཀྱི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་བདག་ཡུལ་འདི་ཞེས་བྱ་བའི་རི་བྲགས་ཀྱི་གྲོང་དེར་དོན་ཅུང་ཟད་ཅིག་་་མཆིས་པར་གྱུར་ཏེ་བདག་དེར་མཆིས་ཁྱོད་ཀྱིས་དེ་བཞིན་དུ་དགེ་འདུན་གྱིས་བསྐོས་པའི་དགེ་སློང་གཏང་བར་གསོལ། དེས་ཁྱིམ་བདག་དེ་བཞིན་དུ་ལེགས་ཀྱིས་གཏང་ངོ་ཞེས་སྨྲས་སོ། །དེ་ནས་ཁྱིམ་བདག་དེས་སྟོན་པ་དང་། ཆོས་དང་། དགེ་འདུན་ལ་ཕྱག་བྱས་ཏེ་རི་བྲགས་ཀྱི་གྲོང་དེར་སོང་ངོ་། །དགེ་འདུན་གྱིས་བསྐོས་པའི་དགེ་སློང་དག་ཕན་ཚུན་ཚེ་དང་ལྡན་པ་ཁྱིམ་བདག་དེའི་་ཆུང་མ་མ་དད་པས་གདུགས་ཚོད་ལས་སྔ་ཟད་དུ་འདོང་ངོ་ཞེས་གཏམ་བྱས་ན་དེ་དག་གདུགས་ཚོད་ལས་སྔར་དོང་བ་དང་། ཁྱིམ་བདག་དེའི་ཆུང་མས་མཐོང་ནས་འཕགས་པ་ཁྱེད་ཧ་ཅང་སྔར་བྱོན་ཏེ་ཅི་དེ་དག་གི་སུག་ལས་གཞན་མ་་་མཆིས་སམ་ཞེས་ཉེས་པ་ངོར་བརྗོད་པ་དང་། དེ་དག་སྤ་གོང་ནས་ཅང་མི་ཟེར་བར་གདུགས་ཚོད་བབ་ཀྱི་བར་དུ་འཁོད་ནས་ཟན་ཟོས་ཏེ་དོང་ངོ་། །དེས་ཕྱི་དེ་ཉིན་མོ་ཟས་དག་སྔ་ཟད་དུ་སྦྱར་ཏེ་སྟན་བཏིང་ནས་བྱ་ར་བྱེད་ཅིང་འདུག་གོ །དགེ་སློང་དག་གདུགས་ཚོད་བབ་ཁར་དོང་བ་དང་། དེས་མཐོང་ནས་དཔྱས་པ་དང་། དགེ་སློང་དག་

---

^{[མ་དཔེ་གཟིགས་ན་འདིར་གནོན།]}

གཅིག་ལ་གཅིག་ཚེ་དང་ལྡན་པ་གཉིས་ཀར་ཡང་འཕྱས། ཇི་ལྟ་བུ་ཡང་རུང་ཟོས་ལ་དོང་ནས་ཚངས་པ་མཚུངས་པར་སྤྱོད་པ་ལ་བསྒོ་སྟེ་ཕྱིན་ཆད་འདིར་ནི་དགེ་སློང་དག་ཀྱང་མི་འདོང་བར་བྱའོ་ཞེས་སྨྲས་ནས་ཟན་ཟོས་ཏེ་གཙུག་ལག་ཁང་དུ་དོང་ངོ་། །དགེ་སློང་དེ་དག་གིས་ཇི་ལྟ་བུར་གྱུར་པ་བཟླས་པ་དང་། དགེ་སློང་དག་ཕྱིས་དེར་མི་འདོང་བར་གྱུར་ཏོ། །ཇི་ཙམ་ན་ཁྱིམ་བདག་དེ་སླར་འོངས་ནས་བཟང་མོ་ཡོན་གནས་དག་བསྒོ་བ་བཞིན་དུ་བཤོས་གསོལ་ཏམ་ཞེས་དྲིས་པ་དང་། དེས་ཇོ་བོའི་སྲས་ཉི་མ་གཉིས་ཤིག །གཤེགས་ཏེ་བཤོས་གསོལ་ནས་མ་གཤེགས་པར་གྱུར་ཏོ་ཞེས་སྨྲས་པ་དང་། དེ་སྐད་ཐོས་ནས་གཙུག་ལག་ཁང་དུ་སོང་སྟེ། འཕགས་པ་ཅིའི་སླད་དུ་དགེ་འདུན་གྱིས་བསྐོས་པའི་དགེ་སློང་རྣམས་མ་བཏང་ཞེས་སྨྲས་པ་དང་། དེ་དག་གིས་ཇི་ལྟར་གྱུར་པ་ཐམས་ཅད་བཟླས་སོ། །དེས་འཕགས་པ་དེ་ལྟར་ན་བདག་གི་ཞིང་ལས་སྐྱེ་བའི་འབྲས་དེ་འཕགས་པ་རྣམས་ལ་དབུལ་གྱིས་ཁྱེད་འདིར་གསོལ་་ཅིག་ཅེས་སྨྲས་པ་དང་། དེས་ཁྱིམ་བདག་མི་འཚལ་ལོ། །དེ་ཅིའི་ཕྱིར་ཞེ་ན། མ་བཙོས་པའི་འབྲུ་ལེན་པར་བཅོམ་ལྡན་འདས་ཀྱིས་མ་གནང་ངོ་ཞེས་སྨྲས་པ་དང་། དེ་ཅང་མི་ཟེར་བར་འདུག་གོ །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་གནང་གིས་དགེ་འདུན་གྱི་ཕྱིར་འབྲས་ལོང་ལ་ཐེ་ཚོམ་དུ་མ་བྱེད་ཅིག། གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཁྱིམ་བདག་གཞན་ཞིག་གིས་གང་ཟག་གཞན་ཞིག་གི་ཕྱིར་གནས་ཁང་ཞིག་བརྩིགས་ཏེ་བཞག་ནས་དེའི་ནང་དུ་མལ་སྟན་དག་ཀྱང་མང་དུ་ཕུལ་ཏེ་བཞག་པ་དང་། དགེ་སློང་དག་གིས་མཛོད་ཆེན་པོའི་ནང་དུ་གཅིག་ཏུ་བསྡུས་ཏེ་བཞག་གོ །དགེ་སློང་དེས་ཁྱིམ་བདག་དེ་ལ་སྨྲས་པ་དང་། དེས་འཕྱས་འདོགས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱིམ་བདག་དེ་འཕྱ་བ་ནི་ཡུས་ཏེ། དེ་བས་ན་མལ་སྟན་ཇི་ལྟར་བསྔོས་པ་བཞིན་དུ་སྤྱད་པར་བྱ་སྟེ། དེར་གང་དག་གནས་པ་དེ་ཉིད་དབང་ངོ་། །དེ་ནས་ཡང་ཁྱིམ་

---

^{[མ་དཔེ་གཟིགས་ན་འདིར་གནོན།]}

བདག་དེས་གནས་ཁང་དེར་གོས་ཀྱི་རྙེད་པ་མང་ཞིག་ཕུལ་བ་དང་། དེ་ལ་མལ་སྟན་འགེད་པས་དགེ་འདུན་གྱི་རྙེད་པའི་ནང་དུ་བྲུབས་པ་དང་། དགེ་སློང་དེས་ཁྱིམ་བདག་དེ་ལ་སྨྲས་སོ། །དེ་ཡང་འཕྱས་འདོགས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱིམ་བདག་དེ་འཕྱ་བ་ནི་ཡུས་ཏེ། ཡོན་བདག་གི་དབང་དུ་བྱས་ལོང་ལ་དགེ་སློང་དག་ཁྱིམ་གྱི་རྙེད་པ་དེ་ནི་དེར་གང་གནས་པ་དེ་དག་ཉིད་དབང་ངོ་། །དེ་དག་གིས་དགེ་སློང་དེ་ལ་འཐོབ་པ་གཞན་དག་མ་བྱིན་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེར་ཡང་དགེ་འདུན་གྱིར་གཏོགས་པའི་རྙེད་པ་དེ་དག་ལས་ཀྱང་བྱིན་་་ཅིག། དེས་ཀྱང་དེ་ལ་ལོངས་སྤྱོད་དུ་གྱིས་ལ་ཐེ་ཚོམ་དུ་མ་བྱེད་ཅིག། གླེང་གཞིའི་ནང་ནས་སྒོ་བཞི་པའི་མདོའི་ཚིགས་སུ་བཅད་པ་དང་པོའོ།། །།འདུལ་བ་གཞུང་དམ་པ། བམ་པོ་སུམ་བཅུ་རྩ་དྲུག་པ། མདོར་ན། གང་ཞིག་གང་དུ་གནས་པ་དང་། །དགེ་སློང་དེས་ཀྱང་དེ་རུང་བ། །ལས་ཀྱང་སར་པའི་ཡོ་བྱད་དག །ཟས་དང་མར་མེ་རུང་བ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་དུ་ཡོད་པ་ན་ཁྱིམ་བདག་གཞན་ཞིག་གིས་གཙུག་ལག་ཁང་དུ་གནས་ཁང་དག་བརྩིགས་ནས་དེར་མལ་སྟན་ཀྱང་ཕུལ། རྙེད་པ་དག་ཀྱང་བཅས་པ་དང་། དགེ་སློང་དག་མལ་སྟན་དེ་དག་ཀྱང་དགེ་འདུན་གྱི་ནང་དུ་བྲུབས་ཏེ་རྙེད་པ་ཡང་སྤྱིར་བགོས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དངོས་པོ་ངེས་པར་འགྱུར་བ་ལ་མ་བསྐྱོད་ཅིག །དེ་ན་ངེས་པར་གནས་པ་གང་ཡིན་པ་དེ་དག་གིས་སྤྱད་པར་བྱ་སྟེ། རྙེད་པ་ཡང་བདག་གིར་བྱོས་ཤིག །དགེ་སློང་དག་གིས་དེ་ལ་རྙེད་པ་གཞན་མ་བྱིན་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཉི་ག་ཡང་བྱིན་ལ་ཅི་བདེར་སྤྱོད་པར་བྱ་སྟེ། འོན་ཀྱང་དགེ་སློང་རྣམས་ལ་ཇི་ལྟར་རྒན་རིམས་སུ་བསྐོ་བར་བྱའོ། །གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཁྱིམ་བདག་གཞན་ཞིག་

---

^{[མ་དཔེ་གཟིགས་ན་འདིར་གནོན།]}

འདུག་པ་དེའི་དྲུང་དུ་བསོད་སྙོམས་པ་གཞན་ཞིག་དེར་སོང་ནས་་་སྐྱབས་སུ་འགྲོ་བ་དང་། བསླབ་པའི་གནས་ལ་བཞག་གོ །དུས་ཕྱི་ཞིག་ན་ཡང་ནོར་ལས་བསོད་ནམས་སུ་བྱ་བའི་དངོས་པོ་བདུན་པོའི་ཡོན་ཏན་བརྗོད་པ་དང་། ཁྱིམ་བདག་དེ་རབ་ཏུ་དད་པར་གྱུར་ནས། འཕགས་པ་བདག་གིས་ཀྱང་ནོར་ལས་བྱས་པའི་བསོད་ནམས་ཀྱི་དངོས་པོ་ཅུང་ཟད་ཅིག་བགྱིའོ་ཞེས་སྨྲས་པ་དང་། བསོད་སྙོམས་པ་དེས། ཁྱིམ་བདག་དེ་བཞིན་དུ་བྱོས་ཤིག་ཅེས་སྨྲས་པ་དང་། འཕགས་པ་ཅི་ཞིག་བགྱི། དགེ་འདུན་གྱི་གཙུག་ལག་ཁང་བྱོས་ཤིག །འཕགས་པ་བདག་ལ་ཀཱར་ཥཱ་པ་ཎ་ནི་མཆིས་ན། བསོད་ནམས་བྱ་བའི་གྲོགས་དག་མ་མཆིས་སོ། །ཁྱིམ་བདག་ཀཱར་ཥཱ་པ་ཎ་ཁྱེར་ཏེ་ཤོག་ཤིག །ངས་ཁྱོད་ཀྱི་བསོད་ནམས་ཀྱི་གྲོགས་བྱའོ་ཞེས་སྨྲས་པ་དང་། དེས་ཀཱར་ཥཱ་པ་ཎ་རྣམས་བྱིན་ནས་ལས་སར་པ་བྱེད་པ་ཡང་བསྐོས་སོ། །དེས་ཀཱར་ཥཱ་པ་ཎ་རྣམས་གནས་ཁང་གི་ནང་དུ་བཅུག་སྟེ་བཞག་ནས་ལས་ཅུང་ཟད་ཙམ་ཡང་མ་བརྩམས་སོ། །ཁྱིམ་་བདག་དེས་འདི་སྙམ་དུ་བདག་གི་གཙུག་ལག་ཁང་ཅི་ཙམ་ཞིག་བྱས་པ་ལྟར་འགྲོའོ་ཞེས་བསམས་ནས་དེ་དེར་འོངས་ན། ཅུང་ཟད་ཙམ་ཡང་མ་བྱས་པར་མཐོང་ངོ་། །དེས་བསོད་སྙོམས་པ་ལ་འཕགས་པ་ཅིའི་ཕྱིར་ལས་དག་མ་་་བརྩམས་ཞེས་དྲིས་པ་དང་། ལས་སར་པ་བྱེད་པས་འདིར་ཡོ་བྱད་དག་དགོས་སོ་ཞེས་སྨྲས་པ་དང་། ཁྱིམ་བདག་གིས་བདག་གིས་ཀཱར་ཥཱ་པ་ཎ་ཕུལ་བ་དེ་ལ་ལས་སར་པ་བྱ་བའི་ཡོ་བྱད་དག་ཅིའི་ཕྱིར་མི་སྦྱར། དེས་སྨྲས་པ། ཁྱིམ་བདག་ངས་ཕྱོགས་བཞིའི་དགེ་འདུན་གྱི་རྫས་མ་རུང་བར་ཇི་ལྟར་བྱ་ཞེས་སྨྲས་པ་དང་། འཕགས་པ་དེ་ལ་ནོངས་པ་མ་མཆིས་ཀྱིས་གྱིས་ཤིག །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་ཁྱིམ་བདག་གིས་བསྒོ་ན་ལས་སར་པའི་ཡོ་བྱད་དེ་དག་ལས་སྦྱོར་ཅིག །དེ་ལ་ཐེ་ཚོམ་དུ་མ་བྱེད་ཅིག །དེས་དེ་ལས་སར་པའི་ཡོ་བྱད་སྦྱར་ཏེ། བསོད་སྙོམས་པ་དེས་ལས་སར་པ་ཡང་བྱས་ནས་བསོད་སྙོམས་སློང་དུ་སོང་བ་དང་། ཁྱིམ་བདག་དེས་མཐོང་ནས་འཕགས་པ་ཁྱོད་ནི་བསོད་སྙོམས་སྤྱོད་ན་བདག་གི་གཙུག་

---

^{[མ་དཔེ་གཟིགས་ན་འདིར་གནོན།]}

ལག་ཁང་གི་ལས་སར་པ་སུ་བགྱིད་ཅེས་སྨྲས་པ་དང་། ཁྱིམ་བདག་སེམས་ཅན་ཐམས་ཅད་ནི་ཟས་ལ་གནས་ན་ཅི་ང་ལྟོགས་བཞིན་དུ་ཁྱོད་ཀྱི་གཙུག་ལག་ཁང་གི་ལས་སར་པ་བྱེད་དམ། ལོས་ཀྱང་བསོད་སྙོམས་ལ་འཇུག་མོད་ཅེས་སྨྲས་པ་དང་། དེས་འཕགས་པ་དེ་ལྟ་ན་ལས་སར་པའི་རྒྱུ་དེ་ལས་བཤོས་སུ་མཛོད་ཅེས་སྨྲས་པ་དང་། དེས་ཅིའི་ཕྱིར་ན་ངས་ཕྱོགས་བཞིའི་དགེ་འདུན་གྱིར་བསྔོས་པ་བཟའ་ཞེས་སྨྲས་པ་དང་། དེས་འཕགས་པ་དེ་ལ་གནོད་པ་མེད་ཀྱིས་ཟོ་ཤིག་ཅེས་སྨྲས་ནས། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་ཁྱིམ་བདག་གིས་བསྒོ་ན་དེ་ཉིད་ལ་ཟན་དུ་ཟོ་ཤིག །དེ་ལ་ཐེ་ཚོམ་དུ་མ་བྱེད་པར་བཟའ་བར་གྱིས་ཤིག །དེ་ནས་བསོད་སྙོམས་པ་དེ་ཟས་མི་བཟང་བ་ཟོས་པས་གྲམ་པར་གྱུར་པ་དང་། བཅོམ་ལྡན་འདས་ཀྱིས་ཟས་ངན་པ་མ་ཟ་ཤིག་ཅེས་གསུངས་པ་དང་། ཟས་བཟང་དུ་ཟ་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཟས་བཟང་པོར་ཡང་མ་ཟ་བར་ཇི་ལྟར་གཙུག་ལག་ཁང་གཞན་གྱི་བཟའ་བའི་ཐང་དེ་བཞིན་དུ་ཟོ་ཤིག །སྣུམ་བག་མ་རྙེད་ནས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་གཙུག་ལག་ཁང་གཞན་ན་སྣུམ་བག་རྙེད་པ་དེ་ལྟར་བྱ་སྟེ། དེ་ལ་ཐེ་ཚོམ་དུ་མ་བྱེད་ཅིག །བསོད་སྙོམས་པ་དེས་ལས་སར་པའི་ཡོ་བྱད་དག་བལྟ་བའི་ཕྱིར་འབྲུ་མར་བསོད་སྙོམས་སུ་བླངས་པ་་་དང་། བཅོམ་ལྡན་འདས་ཀྱིས་བཀའ་སྩལ་པ། ལས་སར་པའི་རྒྱུ་ལས་འབྲུ་མར་ཉོས་ཤིག །ཡོ་བྱད་གཞན་རྣམས་ཇི་དགོས་པ་ཡང་དེ་ལས་སྦྱར་བར་བྱ་སྟེ། དེ་ལ་ཐེ་ཚོམ་མ་བྱེད་ཅིག །གླེང་གཞིའི་ནང་ནས་སྒོ་བཞི་པའི་མདོའི་ཚིགས་སུ་བཅད་པ་གཉིས་པའོ།། །།མདོར་ན། དགེ་འདུན་རྣམས་ཀྱི་མལ་སྟན་ནི། །བླ་གབ་མེད་པར་མི་བགོ་དང་། །ཚོན་དང་ལྷུང་བཟེད་ལས་བྱེད་མི་བགོ་སྟེ། །སྲོད་འདས་མཚན་མོ་མལ་སྟན་བགོ་མི་བྱ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་དགེ་འདུན་གྱི་མལ་སྟན་བགོས་ནས་ཚོན་

---

^{[མ་དཔེ་གཟིགས་ན་འདིར་གནོན།]}

གྱི་ལས་བྱེད་གོས་འཁྲུ་འཚེད། ལྷུང་བཟེད་ཀྱི་ལས་བྱེད་པས་གོས་རྣམས་མེས་ཚིག །དྲི་མ་ཅན་དུ་ཡང་གྱུར་ཅིང་། ཚོན་གྱིས་ཀྱང་མ་རུང་བར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གོས་གྱོན་ལ་ཚོན་གྱི་ལས་མ་བྱེད་ཅིག །ལྷུང་བཟེད་ཀྱི་ལས་དང་། གཞན་ཡང་ཤིང་གཤེག་པའི་ལས་དག་མ་བྱེད་ཅིག །བྱས་ན་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། ཡང་དྲུག་སྡེ་དག་གིས་དགེ་འདུན་གྱི་གོས་རྣམས་གྱོན་ནས་བླ་གབ་མེད་པར་ཚོན་རྩིའི་ལས་བྱེད་ཅིང་ཆར་བབ་བཞིན་དུ་འདུག་ནས་གོས་མ་རུང་བར་གྱུར་ཏེ། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གོས་རྣམས་གྱོན་ལ་བླ་གབ་མེད་པར་ཆར་བབ་བཞིན་དུ་མ་་་འདུག་ཤིག །འདུག་ན་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། དྲུག་སྡེ་དག་གཞོངས་སྤྱད་པ་སྤྱོད་པ་ལས་རི་བྲགས་ཀྱི་གྲོང་གཞན་ཞིག་ཏུ་མཚན་མོ་སྲོད་འདས་ཏེ་ཕྱིན་པ་དང་། རི་བྲགས་ཀྱི་གྲོང་དེ་ན་གཙུག་ལག་ཁང་ཞིག་ཡོད་པ་དེར་འོངས་ནས་དགེ་སློང་་དག་གིས་སོ་སོར་བཤེས་པའི་གནས་སུ་ངལ་བསོ་བ་ལ་ཞུགས་སོ། །དེ་དག་གིས་སྨྲས་པ། ཚེ་དང་ལྡན་པ་དག་ངལ་བསོ་བ་ནི་ཕྱིས་བྱས། མལ་སྟན་བགེད་པ་བོས་ལ་རྒན་རིམས་བཞིན་དུ་མལ་སྟན་དང་། གནས་ཁང་བགོས་ཤིག །དེ་དག་གིས་ཚེ་དང་ལྡན་པ་དགེ་སློང་ཁ་ཅིག་ཉལ་ནས་སྲོད་ཀྱང་འཁོར་ན་གནོད་་པར་བྱས་ཏེ་ཅི་རུང་གིས། གང་དུ་བཤེས་པའི་གནས་སུ་ཉོལ་ཅིག་དང་། སང་ནམ་ལངས་ནས་གནས་ཁང་དང་མལ་སྟན་བགོ་བར་བྱའོ་ཞེས་སྨྲས་པ་་་དང་། དེ་དག་གིས་ཚེ་དང་ལྡན་པ་དག་སྟོན་པ་བཞུགས་བཞིན་དུ་ཁྱེད་ཀྱིས་བསྟན་པ་དག་ཞིག་པར་བྱའམ། གནས་ཁང་དང་མལ་སྟན་དག་ངེད་ཅག་དང་རྒན་རིམས་སུ་བགོས་ཤིག་ཅེས་སྨྲས་པ་དང་། མལ་སྟན་འགེད་པས་གནས་ཁང་དང་མལ་སྟན་དག་འགེད་པ་ལ་ཞུགས་ནས་གསར་བུ་རྣམས་ལ་མ་བགོས་པར་ནམ་ནངས་ནས་དྲུག་སྡེ་དག་ཅུང་ཟད་ཅིག་ཉལ་ནས། ནང་པར་

---

^{[མ་དཔེ་གཟིགས་ན་འདིར་གནོན།]}

སྔར་ལངས་ཏེ་མལ་སྟན་དག་སླར་ཕུལ་ནས་དོང་བ་དང་། དགེ་སློང་དག་གིས་ཅིའི་ཕྱིར་ན་མལ་སྟན་དག་སླར་ཕུལ། དེ་དག་གིས་ཚེ་དང་ལྡན་པ་དག་ངེད་ཅག་མཆོད་རྟེན་ལ་ཕྱག་འཚལ་དུ་འོངས་ཏེ་ད་ནི་སླར་འདོང་ངོ་ཞེས་སྨྲས་པ་དང་། དེ་དག་གིས་ཚེ་དང་ལྡན་པ་དག་དེ་ལྟར་ན་ཁྱེད་ཅག་གིས་མཚན་རངས་དགེ་སློང་དག་གཙེས་ཏེ་ཅི་བྱ་ཞེས་སྨྲས་པ་དང་། དེ་དག་གིས་ཚེ་དང་ལྡན་པ་དག་བསྟན་པ་བརྟན་པར་བྱ་བའི་ཕྱིར་བྱས་ཀྱི། ངེད་ལ་ཉེས་པ་ཅི་ཡོད་ཅེས་སྨྲས་པ་དང་། དགེ་སློང་དག་གིས་དཔྱས་བཏགས་སོ། །དེ་ལྟར་གྱུར་པ་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་མཚན་མོ་སྲོད་འཁོར་ཕན་ཆད་སྟན་དག་མ་བགོ་ཤིག །དེ་སྟེ་གློ་བུར་དུ་ནུབ་མོ་འོངས་ན་གང་མཛའ་བའི་གནས་སུ་འདུག་ལ། དེ་སྟེ་ནམ་ལངས་་་ནས་ཀྱང་འདུག་པར་གྱུར་ན་གནས་ཁང་་ཡང་བགོས་ཤིག །མལ་སྟན་ཡང་་་བྱིན་ཅིག། གླེང་གཞི་ནི་མཉན་དུ་ཡོད་པ་ན་སྟེ། དྲུག་སྡེ་དག་གཞོངས་སྤྱད་པ་སྤྱོད་ཅིང་དོང་ནས་རི་བྲགས་ཀྱི་གྲོང་གཞན་ཞིག་ཏུ་ཕྱིན་ནས་རི་བྲགས་ཀྱི་གྲོང་དེ་ན་གཙུག་ལག་ཁང་ཞིག་ཡོད་པ་དེར་ཕྱིན་ནས་དགེ་སློང་དག་གིས་གང་མཛའ་བའི་་་གནས་སུ་བཞག་སྟེ། དེ་ནས་མལ་སྟན་བགོ་བར་བྱེད་པ་ན་རྒན་རིམས་ཀྱི་ཁྲིའུའི་་སྟེང་དུ་དེ་དག་ནན་གྱིས་འདུག་ནས་དེ་དག་ལ་རྒན་རིམས་ཀྱིས་ཀྱང་བསླང་བར་་མ་ནུས་སོ། །གང་གི་ཚེ་མལ་སྟན་དག་བགོས་པ་དང་། དེའི་ཚེ་རྒན་རིམས་ཀྱི་ཁྲིའུ་དེ་དག་ལྷན་ཅིག་སྤྱོད་པ་དང་། ཉེ་གནས་རྣམས་ལ་བྱིན་ནས་མལ་སྟན་མ་ཐོབ་པ་རྣམས་འཕྱ་བར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་་སློང་གསར་བུ་རྣམས་འཕྱ་བ་ཡུས་ཏེ། དེ་བས་ན་རྒན་རིམས་ཀྱི་ཁྲིའུ་དག་དང་། ཆུང་ངུ་ན་སྟན་དག་ཀྱང་རྒན་རིམས་སུ་བགོས་ཤིག །གླེང་གཞིའི་ནང་ནས་སྒོ་བཞི་པའི་མདོའི་ཚིགས་སུ་བཅད་པ་གསུམ་པའོ།། །།མདོར་ན། སྣམ་ཕྱི་ས་དང་བཀྲུ་བའི་ས། །གཅི་བའི་ས་དང་རྐང་པ་བཀྲུས། །ཕྱི་བ་སྣོད་དང་གཟར་བུ་དང་། །རྣམ་པ་སྣ་ཚོགས་དེ་བཞིན་ནོ། །སངས་རྒྱས་

---

^{[མ་དཔེ་གཟིགས་ན་འདིར་གནོན།]}

བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་སྣམ་ཕྱི་སའི་སྒོ་ན་འཆག་ཅིང་་་གཏམ་ཟེར་ཞིང་འདུག་ནས། དགེ་སློང་དག་ལ་གནོད་པར་བྱེད་དེ། ཚེ་དང་ལྡན་པ་དག་སྐད་ཅིག་སྡོད་ཅིག །ངེད་ཅག་རྒན་རིམས་སུ་བྱའོ་ཞེས་སྨྲས་ནས་དེ་དག་གིས་དེའི་ཉེ་འཁོར་དུ་སྟོན་ཅིང་ཁ་ཏོན་ཡང་བྱེད། བཙོ་བླག་གི་ལས་ཀྱང་བྱེད་ནས། དགེ་སློང་དག་སྣམ་ཕྱི་སར་འདོང་དུ་ཡང་ངོ་ཚ་ནས་བཤང་གཅི་ལ་སོགས་པ་ཡང་བག་ཡངས་སུ་བྱར་མེད། ཇི་ལྟར་འོངས་པ་བཞིན་ནང་དུ་འཇུག་ཏུ་ཡང་མེད་པར་དེ་དག་གིས་བགགས་པ་དང་། དེ་དག་ཐམས་ཅད་ནད་དུ་གྱུར་ཏེ་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་སྣམ་ཕྱི་སར་སོང་ནས་གཏམ་ཟེར་ཞིང་མ་འདུག་ཤིག །དེའི་ཉེན་ཀོར་དུ་སྟོན་པར་ཡང་མ་བྱེད་ཅིག །ཀློག་པར་ཡང་མ་བྱེད་ཅིག །ཁ་ཏོན་ཡང་མ་བྱེད་ཅིག །བཙོ་བླག་གི་ལས་ཀྱང་མ་བྱེད་ཅིག །དགེ་སློང་དག་གིས་སྣམ་ཕྱི་ས་ན་གཏམ་ཟེར་ཞིང་འདུག་གམ། རིམ་བཞིན་དུ་བྱེད་དམ། དེའི་ཉེན་ཀོར་དུ་སྟོན་ཏམ། ཁ་ཏོན་བྱེད་དམ། ཀློག་གམ། བཙོ་བླག་གི་ལས་བྱེད་ན་འདས་པ་དང་བཅས་པར་འགྱུར་རོ། །དགེ་སློང་དག་བཀྲུས་ན་འཁྲུ་ཞིང་འདུག་པ་མ་ཟིན་པར་དྲུག་སྡེ་དག་གིས་ངེད་རྒན་ནོ་ཞེས་ཟེར་ནས་བསླང་ངོ་། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་བཀྲུ་སར་དགེ་སློང་བཀྲུ་བ་མ་ཟིན་པ་མ་བསླང་ཤིག །བསླང་ན་འདས་པ་དང་བཅས་པར་འགྱུར་རོ། །དགེ་སློང་དག་གཅི་སར་སོང་བ་དང་། ཕྱིས་དྲུག་སྡེ་དག་དེར་འོངས་ཏེ། ངེད་ཅག་རྒན་གྱིས་ཇི་ལྟར་རྒན་རིམས་སུ་འཇུག་གོ་ཞེས་སྨྲས་པ་དང་། དེ་དག་འཕྱ་བར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒན་རིམས་སུ་གཅི་སར་མ་འཇུག་པར་ཇི་ལྟར་འོངས་པའི་རིམ་བཞིན་དུ་ཞུགས་ཤིག །དགེ་སློང་དག་གིས་ཇི་ལྟར་རྒན་རིམས་བཞིན་དུ་འཇུག་

---

^{[མ་དཔེ་གཟིགས་ན་འདིར་གནོན།]}

ན་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་རྐང་པ་འཁྲུ་ཞིང་འདུག་པ་ལ། བཀྲུ་མ་ཟིན་པར་རྐང་པ་འཁྲུ་བའི་འོག་གཞི་རྒན་རིམས་སུ་བྱའོ་ཞེས་ཏེ་ཁྱེར་བ་དང་། དེ་དག་འཕྱ་བར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དགེ་སློང་དག་གི་རྐང་པ་བཀྲུ་མ་ཟིན་པར་རྐང་པ་བཀྲུ་བའི་གཞི་ཇི་ལྟར་རྒན་རིམས་བཞིན་དུ་མ་བཀུར་ཅིག །དགེ་སློང་གིས་དགེ་སློང་གི་རྐང་པ་བཀྲུ་བ་མ་ཟིན་པར་རྐང་པ་བཀྲུ་བའི་གཞི་རྒན་རིམས་བཞིན་དུ་ཁྱེར་ན་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་གདོང་ཕྱི་བས་གདོང་ཕྱིས་མ་ཟིན་པར་རྒན་རིམས་སུ་བྱའོ་ཞེས་ཟེར་ནས་གདོང་ཕྱི་བ་ཁྱེར་བ་དང་། དེ་དག་འཕྱ་བར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དགེ་སློང་དག་གི་གདོང་ཕྱི་བ་མ་ཟིན་པར་རྒན་རིམས་སུ་མ་བཀུར་ཅིག །དགེ་སློང་གིས་དགེ་སློང་དག་གི་གདོང་ཕྱི་བ་མ་ཟིན་པར་གདོང་ཕྱི་བ་རྒན་རིམས་སུ་ཁྱེར་ན་་་འདས་པ་དང་བཅས་པར་འགྱུར་རོ། །དེ་བཞིན་དུ་སྣོད་དང་། གཟར་བུ་དང་། ཁ་གཟར་ལ་སོགས་པ་ཡང་རྒྱས་པར་སྦྱར་བར་བྱའོ། །གླེང་གཞིའི་ནང་ནས་སྒོ་བཞི་པའི་མདོའི་ཚིགས་སུ་བཅད་པ་བཞི་པའོ།། །།མདོར་ན། བུམ་པ་དང་ནི་གཞོང་ཁུང་དང་། །ལྷུང་བཟེད་ནག་པོ་བཏུང་ཕོར་དང་། །སྤུ་གྲིའི་བདར་དང་སེན་བཅད་པ། །སྨང་ཚེར་དང་ནི་རྐང་རྟེན་ནོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་དགེ་སློང་དག་བཙོ་བླག་གི་ལས་བྱེད་པ་མ་ཟིན་པར་དགེ་

---

^{[མ་དཔེ་གཟིགས་ན་འདིར་གནོན།]}

འདུན་གྱི་ཚོན་གྱི་བུམ་པ་རྒན་རིམས་བཞིན་དུ་བྱའོ་ཞེས་ཟེར་ཏེ་ཁྱེར་བ་དང་དེ་དག་འཕྱ་བར་གྱུར་ནས། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་བཙོ་བླག་གི་ལས་བྱེད་པ་མ་ཟིན་པར་དགེ་འདུན་གྱི་ཚོན་གྱི་བུམ་པ་དག་རྒན་རིམས་སུ་མ་བཀུར་ཅིག །དགེ་སློང་གིས་དགེ་སློང་དག་གི་བཙོ་བླག་གི་ལས་བྱེད་པ་མ་ཟིན་པར་དགེ་འདུན་གྱི་ཚོན་གྱི་བུམ་པ་རྒན་རིམས་སུ་ཁྱེར་ན་འདས་པ་དང་བཅས་པར་འགྱུར་རོ། །བུམ་པ་ལ་ཇི་ལྟ་བ་དེ་བཞིན་དུ་གཞོང་ཁུང་ལ་ཡང་དེ་བཞིན་ནོ། །དྲུག་སྡེ་དག་གིས་དགེ་སློང་དག་ཟས་ཟ་བ་མ་ཟིན་པར་ལྷུང་བཟེད་ནག་པོ་རྒན་རིམས་སུ་བྱའོ་ཞེས་ཟེར་ནས་ཁྱེར་བ་དང་དེ་དག་འཕྱ་བར་གྱུར་ནས། དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་དགེ་སློང་དག་ཟན་བཟའ་བ་མ་ཟིན་པར་ལྷུང་བཟེད་ནག་པོ་རྒན་་་རིམས་སུ་མ་བཀུར་ཅིག །དགེ་སློང་གིས་དགེ་སློང་དག་ཟན་བཟའ་བ་མ་ཟིན་པར་ལྷུང་བཟེད་ནག་པོ་རྒན་རིམས་སུ་ཁྱེར་ན་དེ་དག་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་ཟན་ཟ་ཞིང་སྐོམ་ཕྱེད་ཙམ་་་འཐུངས་པ་དང་། བཏུང་བའི་ཕོར་བུ་རྒན་རིམས་སུ་བྱའོ་ཞེས་ཟེར་ནས་ཁྱེར་ཏེ་དེ་དག་འཕྱ་བར་གྱུར་ནས། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དགེ་སློང་དག་ཟན་ཟ་ཞིང་སྐོམ་ཕྱེད་ཙམ་འཐུངས་པ་ལ་བཏུང་བའི་ཕོར་བུ་རྒན་རིམས་སུ་མ་བཀུར་ཅིག །དགེ་སློང་དག་གིས་དགེ་སློང་དག་ཟན་ཟ་ཞིང་སྐོམ་ཕྱེད་ཙམ་འཐུངས་པ་ལ་ཕོར་བུ་རྒན་རིམས་སུ་ཁྱེར་ན་འདས་པ་དང་་་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་སྐྲ་ཕྱེད་ཙམ་བྲེགས་པ་དང་། སྤུ་གྲི་ཡང་རྒན་རིམས་སུ་བྱའོ་ཞེས་ཟེར་ཏེ་ཁྱེར་རོ། །དེ་དག་འཕྱ་བར་གྱུར་ནས་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དགེ་སློང་སྐྲ་དང་ཁ་སྤུ་ཕྱེད་ཙམ་བྲེགས་པ་ལ་སྤུ་གྲི་རྒན་རིམས་སུ་མ་བཀུར་ཅིག །དགེ་སློང་དག་གིས་དགེ་སློང་དག་སྐྲ་དང་ཁ་སྤུ་ཕྱེད་ཙམ་བྲེགས་པ་དང་སྤུ་གྲི་རྒན་རིམས་སུ་ཁྱེར་ན་་་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་སྐྲ་དང་་་ཁ་སྤུ་འབྲེག་པའི་སྤུ་གྲི་རྣོན་པོར་བྱ་བའི་བདར་ལ་ཕྱེད་ཙམ་བདར་བ་དང་། བདར་རྒན་རིམས་སུ་

---

^{[མ་དཔེ་གཟིགས་ན་འདིར་གནོན།]}

བྱའོ་ཞེས་ཟེར་ཏེ་ཁྱེར་བ་དང་། དེ་དག་འཕྱ་བར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དགེ་སློང་དག་གི་སྐྲ་དང་ཁ་སྤུ་འབྲེག་པ་བདར་ལ་ཕྱེད་ཙམ་བདར་ནས་རྒན་རིམས་སུ་མ་བཀུར་་་ཅིག །དགེ་སློང་དག་གིས་དགེ་སློང་དག་སྐྲ་དང་ཁ་སྤུ་འབྲེག་པའི་སྤུ་གྲི་་་བདར་ལ་ཕྱེད་ཙམ་བདར་བ་ལ་རྒན་རིམས་སུ་ཁྱེར་ན་འདས་པ་དང་བཅས་་་པར་འགྱུར་རོ། །དྲུག་སྡེ་དག་གིས་དགེ་སློང་དག་སེན་མོ་ཕྱེད་ཙམ་བཅད་པ་དང་། སེན་མོ་བཅད་པ་རྒན་རིམས་སུ་བྱའོ་ཞེས་ཟེར་ནས་ཁྱེར་རོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་སེན་མོ་ཕྱེད་ཙམ་བཅད་པ་ལ་སེན་མོ་་་གཅོད་པ་རྒན་རིམས་སུ་མ་བཀུར་ཅིག །དགེ་སློང་གིས་དགེ་སློང་དག་གི་སེན་མོ་ཕྱེད་ཙམ་བཅད་པ་ལས་སེན་མོ་གཅོད་པ་རྒན་རིམས་སུ་ཁྱེར་ན་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་སྣ་སྤུ་ཕྱེད་ཙམ་བཏོགས་པ་དང་། སྣ་སྤུ་བཏོག་པའི་སྨང་ཚེར་རྒན་རིམས་སུ་བྱའོ་ཞེས་ཟེར་ཏེ་ཁྱེར་རོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྣ་སྤུ་ཕྱེད་ཙམ་བཏོགས་པ་ལ་སྣ་སྤུ་བཏོག་པའི་སྨང་ཚེར་རྒན་རིམས་སུ་མ་བཀུར་ཅིག །ཁྱེར་ན་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་དགེ་འདུན་གྱི་ཁྲི་རྐང་རྟེན་དུ་བཅས་པ་ལ་ཉལ་ཞིང་འདུག་པ་དང་། རྒན་རིམས་སུ་བྱའོ་ཞེས་ཟེར་ཏེ་ཁྱེར་བ་དང་། དེ་དག་འཕྱ་བར་གྱུར་ནས། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་འདུན་གྱི་ཁྲི་རྐང་རྟེན་ཅན་གྱི་སྟེང་དུ་ཉལ་བ་ལ་རྒན་རིམས་སུ་མ་བཀུར་ཅིག །དགེ་སློང་དག་གིས་དགེ་སློང་དག་ཁྲི་རྐང་རྟེན་ཅན་གྱི་སྟེང་དུ་ཉལ་ཞིང་འདུག་པ་ལ་རྐང་རྟེན་རྒན་རིམས་སུ་ཁྱེར་ན་འདས་པ་དང་བཅས་པར་འགྱུར་རོ། །གླེང་གཞིའི་ནང་ནས་སྒོ་བཞི་པའི་མདོའི་ཚིགས་

---

^{[མ་དཔེ་གཟིགས་ན་འདིར་གནོན།]}

སུ་བཅད་པ་ལྔ་པའོ།། །།མདོར་ན། གཏན་པ་སྐུད་པ་གཉིས་པ་དང་། །གྲི་དང་ཁབ་དང་བླང་བ་དང་། །གཞན་ཡང་འདི་ལྟར་མ་ཟིན་པར། །བསླང་བར་བྱ་བ་མ་ཡིན་པའོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་ཤིང་ལེབ་ཀྱི་སྟེང་དུ་སྦྱར་མ་དང་། སྟོད་གཡོགས་དང་། མཐང་གོས་དག་དགེ་འདུན་གྱི་ཤིང་ལེབ་ཀྱི་སྟེང་དུ་ཕྱེད་ཙམ་བཏིང་བ་དང་། རྒན་རིམས་སུ་བྱའོ་ཞེས་ཟེར་ཏེ་ཁྱེར་རོ། །དེ་དག་འཕྱ་བར་གྱུར་ནས། དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་འདུན་གྱི་ཤིང་ལེབ་ཀྱི་སྟེང་དུ་སྦྱར་མ་དང་སྟོད་གཡོགས་དང་། མཐང་གོས་དག་ཕྱེད་ཙམ་བཏིང་བ་ལ་དགེ་འདུན་གྱི་ཤིང་ལེབ་དེ་རྒན་རིམས་སུ་མ་བཀུར་ཅིག །དགེ་སློང་དག་གིས་དགེ་སློང་གི་དགེ་འདུན་གྱི་ཤིང་ལེབ་ཀྱི་སྟེང་དུ་སྦྱར་མ་དང་། སྟོད་གཡོགས་དང་མཐང་གོས་དག་ཕྱེད་ཙམ་བཏིང་བ་ལ་དགེ་འདུན་གྱི་ཤིང་ལེབ་རྒན་རིམས་སུ་ཁྱེར་ན་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་གི་ཆོས་གོས་དགེ་འདུན་གྱི་སྐུད་པས་ཕྱེད་ཙམ་དྲུབས་པ་དང་རྒན་་རིམས་སུ་བྱའོ་ཞེས་ཟེར་ནས་ཁྱེར་བ་དང་། དེ་དག་འཕྱ་བར་གྱུར་ཏེ། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་དགེ་སློང་དག་གི་ཆོས་གོས་དགེ་འདུན་གྱི་སྐུད་པས་ཕྱེད་ཙམ་བཙེམས་པ་ལས་རྒན་རིམས་སུ་མ་བཀུར་ཅིག །དགེ་སློང་དག་གིས་དགེ་སློང་དག་གི་ཆོས་གོས་དགེ་འདུན་གྱི་སྐུད་པས་ཕྱེད་ཙམ་་་བཙེམས་པ་ལས་རྒན་རིམས་སུ་ཁྱེར་ན་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་གི་ཆོས་གོས་དག་ཚོན་ལས་ཕྱེད་ཙམ་བཙོ་བླག་་་བྱས་ཏེ། དགེ་འདུན་གྱི་བཙོ་བླག་གི་སྲད་བུ་ལ་བྲེས་པ་དང་། རྒན་རིམས་བཞིན་བྱའོ་ཞེས་ཟེར་ཏེ་ཁྱེར་རོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དགེ་སློང་དག་གི་

---

^{[མ་དཔེ་གཟིགས་ན་འདིར་གནོན།]}

གོས་ཕྱེད་ཙམ་བཙོ་བླག་བྱས་ནས། དགེ་འདུན་གྱི་བཙོ་བླག་གི་སྲད་བུ་ལ་བྲེས་པ་རྒན་རིམས་སུ་མ་བཀུར་ཅིག །དགེ་སློང་དག་གིས་དགེ་སློང་དག་གི་གོས་ཕྱེད་ཙམ་བཙོ་བླག་བྱས་པ་དགེ་འདུན་གྱི་བཙོ་བླག་གི་སྲད་བུ་ལ་བྲེས་པ་རྒན་རིམས་སུ་ཁྱེར་ན་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་གི་ཆོས་གོས་དགེ་འདུན་གྱི་གྲིས་ཕྱེད་ཙམ་དྲས་པ་དང་། རྒན་རིམས་སུ་བྱའོ་ཞེས་ཟེར་ཏེ་ཁྱེར་བ་དང་། དེ་དག་འཕྱ་བར་གྱུར་ཏེ། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དགེ་འདུན་གྱི་གྲིས་ཆོས་གོས་ཕྱེད་ཙམ་དྲས་པ་རྒན་རིམས་སུ་མ་བཀུར་ཅིག །དགེ་སློང་དག་གིས་དགེ་སློང་གི་ཆོས་གོས་དགེ་འདུན་གྱི་གྲིས་ཕྱེད་ཙམ་དྲས་པ་རྒན་རིམས་སུ་ཁྱེར་ན་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་ཆོས་གོས་དགེ་འདུན་གྱི་ཁབ་ཀྱིས་ཕྱེད་ཙམ་དྲུབས་པ་ལ་རྒན་རིམས་བཞིན་བྱའོ་ཞེས་ཟེར་ནས་ཁྱེར་བ་དང་། དེ་དག་འཕྱ་བར་གྱུར་ཏེ། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དགེ་སློང་དག་གི་ཆོས་གོས་དགེ་འདུན་གྱི་ཁབ་ཀྱིས་ཕྱེད་ཙམ་དྲུབས་པ་རྒན་རིམས་སུ་མ་བཀུར་ཅིག །དགེ་སློང་དག་གིས་དགེ་་སློང་གི་ཆོས་གོས་དགེ་འདུན་གྱི་ཁབ་ཀྱིས་ཕྱེད་ཙམ་དྲུབས་པ་རྒན་རིམས་སུ་ཁྱེར་ན་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་དགེ་སློང་དག་སྐྲ་ཕྱེད་ཙམ་བྲེགས་པ་དང་། དགེ་འདུན་གྱི་སྐྲ་བཟེད་པའི་རས་རྒན་རིམས་བཞིན་བྱའོ་ཞེས་ཟེར་ཏེ་ཁྱེར་བ་དང་། དེ་དག་འཕྱ་བར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་དགེ་སློང་དག་སྐྲ་ཕྱེད་ཙམ་བྲེགས་པ་དང་། དགེ་འདུན་གྱི་སྐྲ་བཟེད་པའི་རས་རྒན་རིམས་སུ་མ་བཀུར་ཅིག །དགེ་སློང་དག་གིས་དགེ་སློང་དག་སྐྲ་ཕྱེད་ཙམ་བྲེགས་པ་དང་། དགེ་འདུན་གྱི་སྐྲ་བཟེད་པའི་རས་རྒན་རིམས་སུ་ཁྱེར་ན་འདས་པ་དང་བཅས་པར་འགྱུར་རོ། །དྲུག་སྡེ་དག་གིས་

---

^{[མ་དཔེ་གཟིགས་ན་འདིར་གནོན།]}

གང་ཡང་རུང་བའི་གནས་སུ་གཞན་དང་གཞན་གྱི་ལས་མ་ཟིན་པར་དགེ་་་འདུན་གྱི་སྟན་གྱི་སྟེང་ན་འདུག་པ་དང་། རྒན་རིམས་བཞིན་བྱའོ་ཞེས་ཟེར་ནས་བསླང་སྟེ་བཏང་ནས་དེ་དག་འཕྱ་བར་གྱུར་ཏོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་དག་གིས་གང་ཡང་རུང་བའི་གནས་སུ་གཞན་དང་གཞན་གྱི་ལས་མ་ཟིན་པར་དགེ་འདུན་གྱི་སྟན་གྱི་སྟེང་དུ་འདུག་པ་ལ་་་རྒན་རིམས་སུ་བྱའོ་ཞེས་མ་བསླང་ཤིག །དགེ་སློང་དག་གིས་དགེ་སློང་དག་གང་ཡང་རུང་བའི་གནས་སུ་གཞན་དང་གཞན་གྱི་ལས་མ་ཟིན་བཞིན་དུ་དགེ་འདུན་གྱི་སྟན་གྱི་སྟེང་ན་འདུག་པ་ལ་རྒན་རིམས་སུ་བྱའོ་ཞེས་བསླང་སྟེ་བཏང་ན་འདས་པ་དང་བཅས་པར་འགྱུར་རོ། །གླེང་གཞིའི་ནང་ནས་སྒོ་བཞི་པའི་མདོའི་ཚིགས་སུ་བཅད་པ་དྲུག་པའོ།། །།མདོར་ན། མུ་སྟེགས་ཀུན་ཏུ་རྒྱུ་བ་དང་། །མངོན་མཚན་བདག་ཤི་བྱིན་པ་མེད། །ཡིད་ཆེས་པར་ནི་གཟུང་བ་ལྔ། །གཉེར་ཕྱིར་ཉེ་སྤྱོད་དགེ་སློང་མའོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་ཏེ། བཅོམ་ལྡན་འདས་ཀྱིས་གང་གི་ཚེ་ཡུལ་མཉམ་དཀའི་རྒྱལ་པོ་གཟུགས་ཅན་སྙིང་པོ་མཁས་པ་ཅན་ལྷ་སྟོང་ཕྲག་བརྒྱད་བཅུ་དང་། ཡུལ་མཉམ་དཀའི་བྲམ་ཟེ་དང་། ཁྱིམ་བདག་བརྒྱ་ཕྲག་སྟོང་དང་བཅས་ཏེ་བཅོམ་ལྡན་འདས་ཀྱིས་བདེན་པ་ལ་བཀོད་པ་དེའི་ཚེ་ན་རྒྱལ་པོའི་ཁབ་ཏུ་འདི་ལྟར་ཀྱེ་ཁྱེད་ཅག་རྒྱལ་པོའི་ཁབ་ན་གནས་པ་དང་། ཡུལ་སོ་སོ་ནས་ལྷགས་པའི་སྐྱེ་བོ་མང་པོ་དག་ཉོན་ཅིག །རྒྱལ་པོ་ངའི་ཡུལ་ན་སུ་ཡང་རྐུན་པོ་མ་བྱེད་ཅིག །གང་གིས་བྱས་པ་དེ་ངས་ཡུལ་དང་ཕྲལ་ཏེ་གཏང་ངོ་། །ནོར་བདག་ལ་ནི་ང་ཉིད་ཀྱི་མཛོད་དང་བང་བ་ནས་སྦྱིན་ནོ་ཞེས་དྲིལ་ཆེན་བསྒྲགས་སོ། །གང་གི་ཚེ་བཅོམ་ལྡན་འདས་ཀྱིས་ཡུལ་ཀོ་ས་ལའི་རྒྱལ་པོ་གསལ་རྒྱལ་དར་ལ་བབ་པ་ལྟ་བུའི་མདོ་སྡེས་བཏུལ་བ་དེའི་ཚེ་ན་དེས་ཀྱང་མཉན་དུ་ཡོད་པར་འདི་ལྟར་རྒྱལ་པོ་ངའི་ཡུལ་ན་སུ་ཡང་རྐུན་པོ་མ་བྱེད་ཅིག །གང་གིས་ངའི་ཡུལ་དུ་རྐུན་པོ་བྱས་པ་དེ་ཆད་པ་གསད་པས་བཅད་ལ། ནོར་བདག་ལ་ནི་ང་ཉིད་ཀྱི་བང་བ་དང་

---

^{[མ་དཔེ་གཟིགས་ན་འདིར་གནོན།]}

མཛོད་ནས་སྦྱིན་ནོ་ཞེས་དྲིལ་ཆེན་བསྒྲགས་སོ། །དེའི་ཚེ་ན་གང་ཡུལ་མཉམ་དཀའ་ན་གནས་པའི་རྐུན་པོ་རྣམས་དང་གང་ཡུལ་ཀོ་ས་ལ་ན་གནས་པའི་རྣམས་དེའི་ས་མཚམས་ཀྱི་བར་དུ་དོང་ནས་འཁོད་དོ། །ཡུལ་མཉམ་དཀའ་ན་གནས་པའི་རྐུན་པོ་རྣམས་དང་། ཡུལ་ཀོ་ས་ལ་ན་གནས་པའི་རྣམས་ཐམས་ཅད་ས་མཚམས་ཀྱི་བར་དུ་དོང་སྟེ་འཁོད་ནས། འགྲོན་པ་མང་པོ་དག་འཛོམས་སོ་ཞེས་དེ་སྐད་ཀྱི་སྒྲ་ཀུན་དུ་གྲགས་སོ། །དེ་དག་གིས་ཐོས་ནས་ཡུལ་མཉམ་དཀའི་འགྲོན་པ་མང་པོ་བསེལ་དང་ལྷན་ཅིག་ཡུལ་ཀོ་ས་ལར་འདོང་ངོ་། །ཡུལ་ཀོ་ས་ལ་ནས་ཀྱང་ཡུལ་མཉམ་དཀར་དེ་བཞིན་དུ་འདོང་སྟེ། ཇི་ཙམ་དུ་དུས་ཕྱི་ཞིག་ན་ཡུལ་མཉམ་དཀའ་ནས་འགྲོན་པ་མང་པོ་བསེལ་དང་བཅས་ཏེ། ཡུལ་ཀོ་ས་ལར་དོང་བ་དང་། དེ་དག་གང་གི་ཚེ་མཚམས་ལས་འདས་ནས་ཡུལ་ཀོ་ས་ལར་ཕྱིན་པ་དེའི་ཚེ་དེ་ནས་དེད་དཔོན་གྱིས་སྨྲས་པ། ཀྱེ་ཀོ་ས་ལའི་རྒྱལ་པོ་གསལ་རྒྱལ་ནི་མི་སྲུན་ལ་གཏུམ་ཞིང་ཁྲོ་སྟེ་དཔའ་ཞིང་མཐུ་དང་ལྡན་ནོ་ཞེས་གྲག་གིས། གལ་ཏེ་འགྲོན་པ་མང་པོ་དང་བདག་ཅག་རྣམས་བཅོམ་ན་ཡང་བསབ་པར་ནུས་ཀྱིས། བསེལ་བ་དེ་དག་སླར་ཁྱེ་ཤིག་ཅེས་སྨྲས་པ་དང་། འགྲོན་པ་མང་པོ་དག་གིས་སྨྲས་པ། དེ་ལྟར་ན་དེ་བཞིན་དུ་བགྱིའོ་ཞེས་སྨྲས་ནས་བསེལ་དེ་དག་སླར་བཀྱེའོ། །རྐུན་པོ་རྣམས་ཀྱིས་བྱ་ར་བཙུགས་ཏེ་བསྡད་པ་དང་། བྱ་ར་བས་བསེལ་བ་སླར་ལོག་པ་མཐོང་ནས། དེས་ཀྱེ་བསེལ་བ་རྣམས་སླར་ལོག་གིས་འགྲོན་པ་མང་པོ་གཞོམ་མོ་ཞེས་སྨྲས་ནས་འགྲོན་པ་མང་པོ་དེ་དག་ཤིང་སཱ་ལའི་དགོན་པར་ཕྱིན་པ་དང་། བཅོམ་མོ། །དེ་ལ་ཚོང་པ་ཁ་ཅིག་ནི་བསད། ཁ་ཅིག་ནི་བྲོས་སོ། །དེ་ལ་བྲོས་པས་མགོ་རྡུལ་གྱིས་གང་བར་བྱས་ཏེ་རྒྱལ་པོ་གསལ་རྒྱལ་གྱི་དྲུང་དུ་སོང་ནས། ལྷ་ལ་བདག་ཅག་ནི་ཚོང་པ་ལགས་ན། ཁྱེད་ཀྱི་ཡུལ་དུ་ཕྱིན་ན་ཚོང་པ་མ་ལགས་པར་གྱུར་ཏོ། །ཅི་བྱས། ལྷ་བདག་ཅག་ནི་རྐུན་པོས་བཅོམ་མོ། །རྒྱལ་པོ་གསལ་རྒྱལ་གྱིས་འཕགས་སྐྱེས་པོ་ལ་བཀའ་སྩལ་པ། གཞོན་ནུ་མྱུར་དུ་རིངས་པར་སོང་ལ་རྐུན་པོ་དང་ནོར་རྣམས་ཟུང་ལ་འོན་ཅིག་་ཅེས་བསྒོ་བ་དང་། ལྷ་དེ་བཞིན་དུ་བགྱིའོ་

---

^{[མ་དཔེ་གཟིགས་ན་འདིར་གནོན།]}

ཞེས་ནས་དམག་དཔོན་འཕགས་སྐྱེས་པོས་ཡུལ་ཀོ་ས་ལའི་རྒྱལ་པོ་གསལ་རྒྱལ་ལས་མཉན་ཏེ། དཔུང་གི་ཚོགས་ཡན་ལག་བཞི་པ་བལ་གླང་གི་ཚོགས་དང་། རྟའི་ཚོགས་དང་། ཤིང་རྟའི་ཚོགས་དང་། དཔུང་བུ་ཆུང་གི་ཚོགས་རྣམས་གོ་ཆ་བསྐོན་ཏེ་མྱུར་བར་རིངས་སུ་ཤིང་སཱ་ལའི་དགོན་པར་དོང་བ་དང་། རྐུན་པོ་དག་དེའི་བར་དགོན་པ་ན་ཤིང་སཱ་ལ་སྟུག་པོའི་ནང་དུ་ཞུགས་ཏེ་བག་ཡངས་སུ་ནོར་བགོད་ཅིང་འཁོད་པ་དང་། འཕགས་སྐྱེས་པོས་དེའི་སྟེང་དུ་བརྫིས་ཏེ། དེ་དག་གིས་རྐུན་པོ་ཁ་ཅིག་ནི་བསད། ཁ་ཅིག་ནི་བྲོས། ཁ་ཅིག་ནི་གསོན་པོར་བཟུང་ངོ་། །དེ་ནས་རྐུན་པོའི་གཡུལ་ལས་རྒྱལ་ཏེ། རྐུན་པོ་དང་བཅོམ་པའི་ནོར་རྫས་དག་ཁྱེར་ཏེ། རྒྱལ་པོའི་དྲུང་དུ་སོང་སྟེ། རྐང་པ་ལ་གཏུགས་ནས། ལྷ་འདི་དག་ནི་རྐུན་པོའི་ནོར་རོ་ཞེས་སྨྲས་པ་དང་། རྒྱལ་པོས་ཚོང་པ་དག་ལ་ཀྱེ་དེ་དག་བདག་བདག་གི་ནོར་དག་ངོ་ཤེས་པར་བྱོས་ལ་སླར་ཁྱེར་ཅིག་ཅེས་བསྒོ་བ་དང་། དེ་ན་མུ་སྟེགས་ཀུན་དུ་རྒྱུ་བ་དང་། དགེ་སློང་དག་ཀྱང་བཅོམ་པའི་ནང་དུ་གཏོགས་ནས་རྒྱལ་པོས་དེ་ཐམས་ཅད་ཕྲོགས་པའི་ནོར་རྫས་སླར་བྱིན་པ་དང་། ཀུན་དུ་རྒྱུ་བའི་རང་གི་གོས་བཙག་གི་ནང་དུ་བཙོས་པ་དང་། དགེ་སློང་དག་གི་ཡང་ཁྱེར་རོ། །དགེ་སློང་དག་གིས་བདག་ཅག་གི་གོས་བཙག་གི་ནང་དུ་བཙོས་པ་ངོ་མ་ཤེས་ནས་དེ་དག་ཀུན་དུ་རྒྱུ་བ་དང་། ལྷན་ཅིག་ཏུ་ཐབ་མོ་བྱུང་བ་དང་། ཀུན་དུ་རྒྱུ་བ་མང་པོ་དེ་དག་གིས་དེ་དག་ཁྱེར་བ་དང་། རྒྱལ་པོའི་དྲུང་དུ་སོང་སྟེ། ལྷ་བདག་ཅག་གི་གོས་བཙག་གི་ནང་དུ་བཙོས་པ་མུ་སྟེགས་ཅན་ཀུན་དུ་རྒྱུ་བས་འཚལ་ཏེ་སླར་མི་སྟེར་ཏོ་ཞེས་སྨྲས་པ་དང་། རྒྱལ་པོས་མུ་སྟེགས་ཀུན་དུ་རྒྱུ་བ་དེ་དག་བཀུག་སྟེ། ཀཱའི་འཕགས་པ་དག་གི་གོས་དག་ཅིའི་ཕྱིར་བཀུར་གྱིས་སླར་ཕུལ་ཅིག་ཅེས་བསྒོ་བ་དང་། དེ་དག་གིས་ལྷ་བཙག་གི་ནང་དུ་བཙོས་པ་འདི་དག་ནི་བདག་ཅག་གི་གོས་སོ་ཞེས་སྨྲས་པ་དང་། རྒྱལ་པོས་འཕགས་པ་དག་ཁྱེད་ཀྱི་གང་ཡིན་པ་ཤེས་པར་གྱིས་ལ་ཁྱེར་ཅིག་ཅེས་སྨྲས་སོ། །དགེ་སློང་དག་གིས་གཅིག་ནས་གཅིག་ཏུ་ཕྱུང་སྟེ་བལྟས་པ་དང་། ཁ་ཅིག་ངོ་ཤེས་ཏེ་ལྷ་འདི་དག་ནི་བདག་ཅག་གི་གོས་སོ་ཞེས་སྨྲས་པ་

---

^{[མ་དཔེ་གཟིགས་ན་འདིར་གནོན།]}

དང་། རྒྱལ་པོས་མུ་སྟེགས་ཅན་ཀུན་དུ་རྒྱུ་བ་དག་ལ་ཨེ་མའོ་མུ་སྟེགས་ཅན་ཀུན་དུ་རྒྱུ་བ་འཇབ་བུར་རྐུ་བ་རྐུན་མ་ཡིན་ན། ཁྱེད་ཅག་ནི་རྐུན་པོ་ཆེན་པོ་ཡིན་ནོ་ཞེས་སྨྲས་པ་དང་། དེ་དག་ལན་མེད་ནས་ཅང་མི་ཟེར་བར་འཁོད་དོ། །རྒྱལ་པོས་སྨྲས་པ། ཀྱེ་འཕགས་པ་ཁྱེད་ཅག་གིས་ད་ཕན་ཆད་ཆོས་གོས་ལ་མངོན་མཚན་བྱ་བའི་རིགས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོ་དེ་སྐད་ཟེར་བ་ཡུས་ཏེ། དེ་བས་ན་ཆོས་གོས་དག་མངོན་མཚན་ཐོབ་ཤིག །ཁ་ཆག་དང་འོར་ཐབས་སུ་དྲུབས་ཤིག །སྒྲོ་གུ་ཡང་ཐོགས་ཤིག །བཅོམ་ལྡན་འདས་ཀྱིས་མངོན་མཚན་ཐོབ་ཤིག་ཅེས་གསུངས་ན། དགེ་སློང་དག་གིས་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཆོས་གོས་ཀྱི་མཐར་སྣག་ཚའི་ཐིག་ལེ་བྱོས་ཤིག། གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཁྱིམ་བདག་གཞན་ཞིག་གིས་དེའི་རིགས་མཉམ་པ་ཞིག་ལས་ཆུང་མ་ཞིག་བླངས་ནས། དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་པ་ལས་དེ་དུས་ཕྱི་ཞིག་ན་ཆུང་མ་སེམས་ཅན་དང་ལྡན་པར་གྱུར་ནས། དེ་ཟླ་བ་བརྒྱད་དམ་དགུ་འདས་པ་དང་། བུ་ཁྱེའུ་ཞིག་བཙས་ཏེ་ཞག་བདུན་གསུམ་ཉི་ཤུ་གཅིག་གི་བར་དུ་བཙས་པའི་བཙས་སྟོན་ཆེན་པོ་བྱས་སོ། །དེ་རིགས་དང་མཐུན་པར་མིང་ཡང་བཏགས་ནས་དེ་བསྲིངས་བསྐྱེད་དེ་ཆེར་གྱུར་པ་དང་། དུས་ཕྱི་ཞིག་ན་དེའི་མ་དུས་ལས་འདས་སོ། །ཁྱིམ་བདག་དེས་ཀྱང་ཆུང་མ་ཞིག་བླངས་ནས་དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །རྩེ་དགའ་ཡོངས་སུ་སྤྱད་པ་ལས་དུས་ཕྱི་ཞིག་བུ་ཕོ་གསུམ་ཞིག་བཙས་ཏེ། དེ་དག་ཀྱང་རིགས་དང་མཐུན་པར་མིང་བཏགས་སོ། །འདི་ལྟར་དགྲའི་ནང་ན་ཆེན་ཆུན་འཐབ་པ་གཅུགས་ཆེ་སྟེ། མོས་མ་ཤི་བའི་བུ་ཁྱེའུ་ཆེན་པོ་དེ་ལ་རྟག་པར་གཙེས་པ་དང་། དེ་མ་དྲན་ནས་ཡི་ཆད་དེ་ཡུལ་གཞན་དུ་སོང་བ་ལས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ་། །དེ་ནས་དུས་

---

^{[མ་དཔེ་གཟིགས་ན་འདིར་གནོན།]}

ཕྱི་ཞིག་ན་ཁྱིམ་བདག་དེ་ན་བར་གྱུར་ནས། དེ་རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། འབྲས་བུ་དག་གིས་སྨན་བྱས་ཀྱང་དེའི་ནད་ཐ་གི་བར་མ་གྱུར་ནས། དེ་ན་བའི་སྡུག་བསྔལ་གྱིས་རིང་པོ་མི་ཐོགས་པར་དུས་འདའ་བར་ཤེས་ནས། དེས་ཁྱིམ་ཚེས་དག་བསོགས་ཏེ་འདུས་ནས་དེའི་ནང་དུ་བུ་ལ་སྨྲས་པ་བུ་དག་ཁྱེད་ཅག་གི་ཕུ་བོ་ཆེན་པོ་དགེ་སྦྱོང་ཤཱཀྱའི་སྲས་ཀྱི་ནང་དུ་རབ་ཏུ་བྱུང་བ་དེ་ཡང་ཁྱེད་ཀྱིས་ནོར་སྐལ་བྱིན་ཅེས་སྨྲས་ནས། བསགས་པ་ཀུན་མཐའ་ཟད་པར་འགྱུར། །མཐོ་བའི་མཐའ་ནི་འཇིག་པར་འགྱུར། །འདུས་པའི་མཐའ་ནི་འགྱེས་པར་འགྱུར། །ཆོས་ཀྱི་མཐའ་ནི་ཞི་བར་འགྱུར། །དུས་ཀྱི་ཆོས་དང་ལྡན་པར་གྱུར་ཏོ། །དེའི་བུ་ལྗོངས་སྤྱོད་ཅིང་འདུག་པ་དེས་བདག་གི་ཕ་དུས་འདས་སོ་ཞེས་ཐོས་ཏེ། དེ་ཡང་འདི་སྙམ་དུ་བདག་སོང་ལ་མ་ཡར་མོ་དང་ནུ་བོ་དག་གི་མྱ་ངན་བསང་གིས་ཆོས་བཤད་དུ་འགྲོའོ་སྙམ་དུ་སེམས་ནས། དེ་ཇི་ཙམ་དགའ་བའི་བར་དུ་་་་གཞོངས་སྤྱད་དེ། མཉན་དུ་ཡོད་པ་གང་ན་བ་དེ་ལོགས་སུ་གཞོངས་སྤྱོད་ཅིང་སོང་ངོ་། །རིམ་བཞིན་དུ་སྤྱོད་ཅིང་མཉན་དུ་ཡོད་པར་ཕྱིན་ནས་ལམ་གྱི་ངལ་བསོས་ཏེ་བདག་གི་ཁྱིམ་དུ་འོངས་པ་དང་། ནང་གི་སྐྱེ་བོ་དག་གིས་མཐོང་ནས་ངུས་ཏེ་ངུ་བའི་སྒྲ་དག་ཁྱིམ་ཚེས་དག་གིས་ཐོས་ནས་དེ་དག་འདུས་ཏེ་ཁ་ཅིག་ནི་སྐད་ཕྱུང་སྟེ་ངུ་། ཁ་ཅིག་ནི་མིག་མཆི་མས་གང་ཞིང་འདུག་ནས། སོ་སོའི་སྐྱེ་བོ་དག་ནི་འདོད་ཆགས་དང་ལྡན་པས་གཉེན་དང་བྲལ་བར་གྱུར་པས་མྱ་ངན་གྱིས་མིག་མཆི་མས་གང་ངོ་། །དེ་ཡང་ངུ་ག་ཁྱེར་ཞིང་འདུག་གོ །དེ་ན་རྒན་མོ་གཞན་ཞིག་གིས་བུ་ཁྱོད་ཀྱི་ཕས་ནི་ནོར་སྐལ་བྱིན་པར་ངེད་ཀུན་གྱིས་ཀྱང་ཐོས་ན་མ་ངུ་ཤིག །སྐྱེ་བ་ཡོད་ན་འཆི་བར་འགྱུར་རོ་ཞེས་སྨྲས་པ་དང་། དེས་ཅུང་ཟད་ཙམ་ཞིག་གི་བར་དུ་སེམས་ཤིང་འདུག་ནས། དེས་མ་ཡར་མོ་དང་ནུ་བོ་དག་ལ་ཆོས་བཤད་དོ། །དེ་དག་མྱ་ངན་ཅུང་ཟད་སངས་ནས། དེ་དག་གིས་ཁྱོད་ཀྱི་ནོར་སྐལ་དག་ལོང་ཤིག་ཅེས་སྨྲས་པ་དང་། དེས་བསམས་པ། བཅོམ་ལྡན་འདས་ཀྱིས་ང་འདས་ནས་བྱིན་པ་ནི་མེད་དོ་ཞེས་གསུངས་ན། ཇི་ལྟར་བླང་སྙམ་དུ་བསམས་ནས། ཚེ་དང་ལྡན་པ་དག་ང་ནི་རབ་ཏུ་བྱུང་བ་ལ་ནོར་རྫས་ཀྱིས་བྱར་མེད་པའི་སྟེང་དུ་བཅོམ་ལྡན་

---

^{[མ་དཔེ་གཟིགས་ན་འདིར་གནོན།]}

འདས་ཀྱིས་ཀྱང་ང་འདས་ནས་བྱིན་པ་མེད་དོ་ཞེས་གསུངས་ཀྱིས། ཁྱེད་ཅག་ཉིད་ཁྱེར་ཅིག་ཅེས་སྨྲས་པ་དང་། དེ་དག་གིས་ཉེས་པ་ངོར་བརྗོད་པ། འཕགས་པ་ལོང་ལ་སྦྱིན་པ་ཡང་བྱིན་ཅིག །བསོད་ནམས་ཀྱང་བྱོས་ཤིག །དེ་ལ་ཉེས་པ་ཅི་ཞིག་ཡོད་ཅེས་སྨྲས་སོ། །དེ་ལྟར་གྱུར་པ་དགེ་སློང་དག་ལ་སྨྲས་པ་དང་། དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱིམ་པ་ལ་ནི་རེ་བ་ཡོད། རབ་ཏུ་བྱུང་བ་ལ་ནི་རེ་བ་མེད་པའི་ཕྱིར་ཏེ། ཁྱིམ་པ་དག་ལ་ནི་ང་འདས་ན་བྱིན་ཅིག་པ་ནི་ཁྱིམ་བདག་གི་སྟེ་བརྩན་ནོ། །རབ་ཏུ་བྱུང་བ་ལ་ནི་དེ་ལྟ་བུ་མེད་དོ། །དེ་བས་ན་ཁྱིམ་པས་དེ་བུར་བསམས་ཏེ་བྱིན་པ་ལོང་ཤིག །སངས་རྒྱས་དང་ཆོས་དང་དགེ་འདུན་ལ་བྱ་བའི་ཕྱིར་ཏེ་དེ་ལ་ཐེ་ཚོམ་དུ་་མ་བྱེད་ཅིག། གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་དག་ལྕི་བའི་རི་ལུ་དང་། སོ་ཤིང་དང་། བཀྲུ་བའི་ཡོ་བྱད་དང་། བ་ལང་གི་ལྕི་བ་རྣམས་འཆག་ས་དང་ཁྱམས་དང་སྒོ་ཁང་དག་ཏུ་བོར་ནས་ལྗོངས་སྤྱད་པ་སྤྱོད་དུ་འདོང་ངོ་། །དེ་དག་ལ་དགེ་སློང་དག་གིས་ཐེ་ཚོམ་སྐྱེས་ནས་མ་སྤྱད་དོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཡིད་གཅུགས་པ་རྣམ་པ་ལྔ་ལས་ནི་ལོང་ཤིག །མཛའ་བ་དང་། ཡིད་འདྲེས་པ་དང་། བླ་མ་དང་། མི་འགྱུར་བ་དང་། ཐོས་ན་དགའ་བར་འགྱུར་བའི་སྟེ། ཡིད་གཅུགས་པ་རྣམ་པ་དེ་ལྔ་ལ་ནི་སྤྱད་པར་བྱ་སྟེ། དེ་ལ་ཐེ་ཚོམ་དུ་མ་བྱེད་ཅིག། གླེང་གཞི་ནི་མཉན་དུ་ཡོད་པ་ན་སྟེ། མཉན་དུ་ཡོད་པ་ན་ཁྱིམ་བདག་གཞན་ཞིག་འདུག་པ་དེས་རིགས་མཉམ་པ་ལས་ཆུང་མ་ཞིག་བླངས་ནས། དེ་དང་ལྷན་ཅིག་ཏུ་རྩེ་དགའ་ཡོངས་སུ་སྤྱོད་དོ། །དེ་ལ་རྩེ་དགའ་ཡོངས་སུ་སྤྱད་པ་ལས་དུས་ཕྱི་ཞིག་ན་ཆུང་མ་སེམས་ཅན་དང་ལྡན་པར་གྱུར་ནས། དེ་ཟླ་བ་བརྒྱད་དམ་དགུ་འདས་པ་དང་། བུ་མོ་ཞིག་བཙས་ནས་དེ་ཞག་བདུན་གསུམ་ཉི་ཤུ་རྩ་གཅིག་གི་བར་དུ་བཙས་པའི་བཙས་སྟོན་ཆེན་པོ་བྱས་ནས་རིགས་དང་མཐུན་པར་མིང་བཏགས་ཏེ། དེ་བསྲིངས་བསྐྱེད་དེ་ཆེར་གྱུར་པ་དང་། ཁྱིམ་བདག་གཞན་ཞིག་གིས་

---

^{[མ་དཔེ་གཟིགས་ན་འདིར་གནོན།]}

དེ་བསླངས་ཏེ། དེ་རྫངས་ལ་སོགས་པ་བརྫངས་ཏེ་བཏང་ངོ་། །དུས་ཕྱི་ཞིག་ན་ཁྱིམ་པ་དེ་དུས་འདས་ནས་དེ་ཁྱོ་དང་བྲལ་བའི་མྱ་ངན་གྱིས་་་་གདུངས་ནས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ་། །དེ་་དུས་ཕྱི་ཞིག་ན་མུ་གེ་བྱུང་ནས་བསོད་སྙོམས་སློང་ཞིང་འདུག་པ་དང་། དེ་་་བསོད་སྙོམས་སྤྱོད་པ་ལས་སྲང་ཞིག་ཏུ་དེའི་ཕས་མཐོང་ནས། དེས་སྨྲས་པ། བུ་མོ་ད་ལྟར་གང་ན་ཇི་ལྟར་འཚོ་ཞིང་འདུག་ཅེས་སྨྲས་པ་དང་། དེས་ཕ་མུ་གེ་བྱུང་ནས་བདག་རབ་ཏུ་བཀྲེས་ཤིང་འདུག་གོ་ཞེས་སྨྲས་པ་དང་། དེས་བུ་མོ་དེ་ལྟར་ན་ཁྱོད་རབ་ཏུ་མ་བྱུང་ན་ནི་ངས་ཁྱེད་ལ་མི་འདོད་བཞིན་དུ་སྦྱིན་ན། ད་བསོད་སྙོམས་མ་བྱེད་པར་བདག་གི་ཁྱིམ་དུ་ཟན་ཟ་ཞིང་དབྱར་མོ་ཁང་དུ་སོང་་་ཞིག །དེས་ཁས་བླངས་ནས་དེ་གྲོགས་གཅིག་དང་གཉིས་ཀྱིས་ཟོས་ཤིང་དབྱར་མོ་ཁང་དུ་སོང་ངོ་། །ཞག་དུ་མ་ཞིག་གི་བར་དུ་དེར་ཟོས་ནས། བུ་བསོད་སྙོམས་པ་གཉིས་ནི་ཟས་སྦྱིན་པར་མི་ནུས་ཀྱིས། ཁྱོད་གཅིག་པུ་འདིར་ཟན་ཟོས་ཤིང་སོང་ཤིག་ཅེས་སྨྲས་པ་དང་། དེས་ཕ་བཅོམ་ལྡན་འདས་ཀྱིས་གཅིག་པུར་གྲོང་དུ་འགྲོ་བར་མ་གནང་ངོ་ཞེས་སྨྲས་པ་དང་། དེ་ཅང་མི་ཟེར་བར་འདུག་གོ །དེ་ལྟར་གྱུར་པ་དགེ་སློང་མ་དག་ལ་སྨྲས་པ་དང་། དགེ་སློང་མ་དག་གིས་དགེ་སློང་ལ་སྨྲས་ནས། དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་ན་ངས་གནང་གིས་དུས་འདི་འདྲ་བ་ལ་ནི་དགེ་སློང་མས་དགེ་སློང་མའི་དགེ་འདུན་ལ་གཉེན་དང་། ལྷན་ཅིག་འདྲེ་བར་ཉེ་སྤྱོད་ཀྱི་སྡོམ་པ་གསོལ་ཅིག །གསོལ་པ་ནི་འདི་ལྟར་གྱིས་ཤིག །སྟན་བཏིང་བ་ལ་གཎྜཱི་བརྡུངས་ཏེ། དགེ་སློང་མའི་དགེ་འདུན་དག་འདུས་ཤིང་འཁོད་པ་དང་། ཇི་ལྟར་རྒན་རིམས་སུ་ཕྱག་བྱོས་ལ། རྒན་རིམས་ཀྱི་མདུན་དུ་ཕ་གུའམ་སྟན་ནང་ཚངས་ཅན་གྱི་སྟེང་དུ་འདུག་ནས་་་ཐལ་མོ་སྦྱོར་ལ་ཚིག་འདི་སྐད་ཅེས་སྨྲོས་ཤིག །གསོན་ཅིག་འཕགས་མའི་དགེ་འདུན་མ་རྣམས་བདག་མིང་འདི་ཞེས་བགྱི་བས། འདི་འདྲ་བའི་མུ་གེའི་དུས་ལ་བབ་ནས་བསོད་སྙོམས་བསླང་བ་ཡང་མི་ནུས་ན། འཕགས་མའི་དགེ་འདུན་མ་ལ་བདག་མིང་འདི་ཞེས་བགྱི་བ་འཕགས་མའི་དགེ་འདུན་མ་

---

^{[མ་དཔེ་གཟིགས་ན་འདིར་གནོན།]}

ལས་གཉེན་དང་ལྷན་ཅིག་ཏུ་འདྲེ་བར་ཉེ་སྤྱོད་ཀྱི་སྡོམ་པ་གསོལ་ན། འཕགས་མའི་དགེ་འདུན་མ་དག་གིས་བདག་མིང་འདི་ཞེས་བགྱི་བ་ལ་གཉེན་དང་ལྷན་ཅིག་འདྲེ་བར་ཉེ་སྤྱོད་ཀྱི་སྡོམ་པ་གསོལ་ཅིག །བརྩེ་བ་ཅན་བརྩེ་བའི་ཕྱིར་རོ། །དེ་ལྟར་ལན་གཉིས་ལན་གསུམ་དུ་བརྗོད་པར་བྱའོ། །དེའི་འོག་ཏུ་དགེ་སློང་མ་གཅིག་གིས་གསོལ་བ་གྱིས་ལ་ལས་བྱོས་ཤིག །གསོན་ཅིག་འཕགས་མའི་དགེ་འདུན་མ་རྣམས། དགེ་སློང་མ་མིང་འདི་ཞེས་བགྱི་བ་འདི་འདི་ལྟར་མུ་གེའི་དུས་ལ་བབ་སྟེ། འཕགས་མའི་དགེ་འདུན་མ་དག་ལས་གཉེན་དང་ལྷན་ཅིག་ཏུ་འདྲེ་བར་ཉེ་སྤྱོད་ཀྱི་སྡོམ་པ་་་གསོལ་ན། དེ་སྟེ་འཕགས་མའི་དགེ་འདུན་མ་རྣམས་ཀྱིས་དུས་ལ་བབ་ཅིང་བཟོད་ན་འཕགས་མའི་དགེ་འདུན་མ་རྣམས་ཀྱིས་གནོང་ལ། འཕགས་མའི་་དགེ་འདུན་གྱིས་དགེ་སློང་མ་མིང་འདི་ཞེས་བགྱི་བ་འདི་གཉེན་དང་ལྷན་ཅིག་ཏུ་འདྲེ་བར་ཉེ་སྤྱོད་ཀྱི་སྡོམ་པ་སྩོལ་ཅིག །འདི་ནི་གསོལ་བའོ། །ལས་ཀྱང་འདི་བཞིན་དུ་བྱའོ། །གསོན་ཅིག་འཕགས་མའི་དགེ་འདུན་མ་རྣམས། དགེ་སློང་མ་མིང་འདི་ཞེས་བགྱི་བ་འདི་འདི་ལྟར་མུ་གེའི་དུས་ལ་བབ་སྟེ། འཕགས་མའི་དགེ་འདུན་མ་རྣམས་ལ་གཉེན་དང་ལྷན་ཅིག་འདྲེ་བར་ཉེ་སྤྱོད་ཀྱི་སྡོམ་པ་གསོལ་ཏེ། དེ་ལས་འཕགས་མའི་དགེ་འདུན་མ་རྣམས་ཀྱིས་དགེ་སློང་མ་མིང་འདི་ཞེས་བགྱི་བ་འདི་འདི་ལྟར་མུ་གེའི་དུས་ལ་བབ་ན་གཉེན་དང་ལྷན་ཅིག་འདྲེ་བར་ཉེ་སྤྱོད་ཀྱི་སྡོམ་པ་གསོལ་ན། འཕགས་མ་རྣམས་ལས་གང་ལ་དགེ་སློང་མ་མིང་འདི་ཞེས་བགྱི་བ་མུ་གེའི་དུས་ལ་བབ་སྟེ། གཉེན་འདུན་དང་ལྷན་ཅིག་ཏུ་འདྲེ་བར་ཉེ་སྤྱོད་ཀྱི་སྡོམ་པ་སྩལ་བར་བཟོད་པ་ནི་ཅང་མ་གསུང་ཤིག །མི་བཟོད་པ་ནི་སྨྲོས་ཤིག །འཕགས་མའི་དགེ་འདུན་གྱིས་དགེ་སློང་མ་མིང་འདི་ཞེས་བགྱི་བས་གཉེན་དང་ལྷན་ཅིག་ཏུ་འདྲེ་བར་ཉེ་སྤྱོད་ཀྱི་སྡོམ་པ་སྩལ་ཏེ་དེ་དེ་བཞིན་དུ་འཛིན་ཏོ། །དགེ་སློང་མས་གཉེན་དང་ལྷན་ཅིག་ཏུ་འདྲེ་བར་ཉེ་སྤྱོད་ཀྱི་སྡོམ་པ་དགེ་འདུན་མ་དག་གིས་བྱིན་པར་གྱུར་ན། གཅིག་པུ་གཉེན་གྱི་ཁྱིམ་དུ་ཟས་ཟ་བར་གྱིས་ལ་དེ་ལ་ཐེ་ཚོམ་དུ་མ་བྱེད་ཅིག །ནམ་མུ་གེའི་ཚེ་ནི་རྗེས་སུ་གནང་ངོ་། །དེ་མ་ཡིན་པར་མ་གནས་ཤིག །མུ་གེ་མ་

---

^{[མ་དཔེ་གཟིགས་ན་འདིར་གནོན།]}

བྱུང་བར་གནས་ན་འདས་པ་དང་བཅས་པར་འགྱུར་རོ། །གླེང་གཞིའི་ནང་ནས་སྒོ་བཞི་པའི་མདོའི་ཚིགས་སུ་བཅད་པ་བདུན་པའོ།། །།མདོར་ན། བསྐྱི་བ་ལ་ནི་རྣམ་པ་གཉིས། །རས་ལ་ཡང་ནི་རྣམ་གསུམ་སྟེ། །ཉོ་བར་ཡང་ནི་འདོད་པ་དང་། །སྡེར་བསྡུས་པར་ནི་གྱུར་པ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་གཞན་ཞིག་གིས་ཁྱིམ་བདག་ཅིག་ལས་ཀཱར་ཥཱ་པ་ཎ་ཞིག་བསྐྱིས་པ་དང་། དེ་དུས་ཀྱི་མཐའ་ཞིག་ཏུ་ཅི་ཞིག་གིས་དུས་འདས་ནས། དགེ་སློང་དེ་ཇི་ལྟར་དུས་འདས་པ་ཁྱིམ་བདག་དེས་ཐོས་སོ། །དགེ་སློང་དེ་ཇི་ལྟར་དུས་འདས་པ་ཁྱིམ་བདག་དེས་ཐོས་ནས་གཙུག་ལག་ཁང་དུ་སོང་སྟེ་ཤེས་བཞིན་དུ་དགེ་སློང་དག་ལ་དྲིས་པ། འཕགས་པ་འདི་ཞེས་བགྱི་བའི་དགེ་སློང་དེ་གང་ན་མཆིས། དེ་དག་གིས་སྨྲས་པ། བཞིན་བཟངས་དུས་འདས་སོ། །འཕགས་པ་དེས་བདག་གི་ཀཱར་ཥཱ་པ་ཎ་ཞིག་བསྐྱིས་ཏེ་འཚལ་ཏོ། །བཞིན་བཟངས་དེ་ནི་དུར་ཁྲོད་དུ་བསྐྱལ་གྱིས་དེར་སོང་སྟེ་དོས་ཤིག །འཕགས་པ་ཁྱེད་ཀྱིས་དེའི་ལྷུང་བཟེད་དང་། ཆོས་གོས་བགོས་ན་བདག་གིས་ཇི་ལྟར་དུར་ཁྲོད་དུ་སོང་སྟེ་བདའ། ཁྱོད་ཀྱིས་སྩོལ་ཅིག་ཅེས་སྨྲས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱིམ་བདག་དེས་ནི་ལེགས་པར་སྨྲས་ཏེ། དེའི་ནོར་ལས་བསྐྱིས་པ་དགེ་སློང་དག་གིས་བྱིན་ཅིག །དེ་དག་གིས་གང་ནས་སྦྱིན་པ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དེའི་ལྷུང་བཟེད་དང་ཆོས་གོས་ཡོད་པ་ལས་བྱིན་ཅིག །དགེ་སློང་དེ་དག་གིས་ལྷུང་བཟེད་དང་ཆོས་གོས་དེ་དག་བྱིན་པ་དང་། ལྷུང་བཟེད་དང་ཆོས་གོས་དེ་དག་མ་འདོད་ནས། བཅོམ་ལྡན་འདས་ཀྱིས་བཀའ་སྩལ་པ། ཚོངས་ལ་བྱིན་ཅིག །དགེ་སློང་དག་གིས་དེ་དག་ཐམས་ཅད་བྱིན་ནོ། །བཅོམ་ལྡན་འདས་ཀྱིས་བཀའ་སྩལ་པ། ཇི་ཙམ་བླངས་པ་དེ་ཙམ་དུ་བྱིན་ལ་ལྷག་མ་བགོས་ཤིག །མཉན་དུ་ཡོད་པ་ན་དགེ་སློང་གཞན་ཞིག་གིས་ཁྱིམ་བདག་ཅིག་ལས་ཀཱར་ཥཱ་པ་ཎ་ཞིག་བསྐྱིས་པ་

---

^{[མ་དཔེ་གཟིགས་ན་འདིར་གནོན།]}

དང་། དེ་དུས་ཀྱི་མཐའ་ཞིག་ཏུ་ཅི་ཞིག་གིས་འདས་པ་དང་། དགེ་སློང་དེ་དག་གིས་སྔ་མ་བཞིན་དུ་ལྷུང་བཟེད་དང་ཆོས་གོས་བཙོངས་ནས་དེ་ལ་བྱིན་ནོ། །ཁྱིམ་བདག་གིས་སྨྲས་པ། འཕགས་པ་དེར་བདག་ལས་འདི་ཙམ་ཞིག་འཚལ་ཏེ། བདག་ལ་ནི་འདི་ལས་མ་སྩལ་གྱིས། གཞན་ཡང་སྩོལ་ཅིག་ཅེས་སྨྲས་པ་དང་། དེ་ལྟ་བུར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལ་དེའི་ལྷུང་བཟེད་དང་ཆོས་གོས་ནི་འདི་ལས་མེད་དོ་ཞེས་སྒོ་ཤིག །དེ་སྟེ་ཡིད་མི་ཆེས་ན་གོ་བར་གྱིས་ཤིག །གོ་བར་བསྒོ་ཡང་མི་བཏུབ་ན་དེ་ལ་དགེ་འདུན་གྱིའམ། གང་ཟག་གཞན་གྱི་ལས་ནི་མ་སྦྱིན་ཅིག །རིགས་ཀྱི་གཟུ་བོ་རྣམས་ཀྱིས་གོ་བར་བསྒོ་ལ་ཐོང་ཤིག། གླེང་གཞི་ནི་མཉན་དུ་ཡོད་པ་ན། དགེ་སློང་ཞིག་གིས་གོས་འཚོང་བ་ལས་རས་ཤིག་རིན་མ་བྱིན་པར་བླངས་པ་ལས་དགེ་སློང་དེ་དུས་འདས་ནས། དགེ་སློང་དེ་དུས་འདས་སོ་ཞེས་གོས་ཀྱི་བདག་པོ་དེས་ཐོས་ནས། དེ་གཙུག་ལག་ཁང་དུ་འོངས་ཏེ་ཤེས་བཞིན་དུ་དགེ་སློང་རྣམས་ལ་འཕགས་པ་དགེ་སློང་མིང་འདི་་་ཞེས་བགྱི་བ་འདི་ག་ལ་མཆིས་ཞེས་དྲིས་པ་དང་། དེ་དག་གིས་སྨྲས་པ། བཞིན་བཟངས་དུས་འདས་སོ། །འཕགས་པ་དེས་བདག་ལས་རས་ཤིག་རིན་སྦྱིན་པར་བྱས་ཏེ་ཁྱེར་རོ། །བཞིན་བཟངས་དེ་དུར་ཁྲོད་དུ་བསྐྱལ་གྱིས་དེར་སོང་ལ་དོས་ཤིག །འཕགས་པ་དེའི་ཆོས་གོས་དང་ལྷུང་བཟེད་ནི་ཁྱེད་རྣམས་ཀྱིས་བགོས་ན། བདག་ཅིའི་ཕྱིར་དུར་ཁྲོད་དུ་སོང་སྟེ་བདའ། ཁྱེད་རྣམས་ཀྱིས་བྱིན་ཅིག་དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་གོས་འཚོང་བ་འདི་སྨྲ་བ་ནི་བདེན་གྱིས་དེ་ནི་བྱིན་ཅིག །དགེ་སློང་རྣམས་ཀྱིས་དེའི་རས་ཉིད་བྱིན་པ་དང་དེས་འཕགས་པ་རྣམས་བདག་ལ་དེས་རིན་ཐང་འདི་ཙམ་དུ་འཚལ་ཏོ་ཞེས་སྨྲས་པ་དང་། བཅོམ་ལྡན་འདས་ཀྱིས་དེ་ཉིད་ཚོངས་ལ་བྱིན་ཅིག་ཅེས་བཀའ་སྩལ་པ་དང་། དགེ་སློང་རྣམས་ཀྱིས་དེ་བཙོང་བར་བརྩམས་པ་དང་སྔ་མའི་རིན་ཐང་དུ་མ་ལོན་ནས། བཅོམ་ལྡན་འདས་ཀྱིས་

---

^{[མ་དཔེ་གཟིགས་ན་འདིར་གནོན།]}

བཀའ་སྩལ་པ། ལྷག་མ་ནི་ཆོས་གོས་དང་ལྷུང་བཟེད་རྣམས་ཚོངས་ལ་བྱིན་ཅིག། གླེང་གཞི་ནི་མཉན་དུ་ཡོད་པ་ན། དགེ་སློང་ཞིག་གིས་ཐ་ག་པ་ལ་རས་་་འཐག་པའི་ཕྱིར་སྐུད་པ་དང་རྔན་པ་བྱིན་པ་ལས། དགེ་སློང་དེ་དུས་འདས་པ་དང་། དགེ་སློང་རྣམས་ཀྱིས་ཐ་ག་པ་ལ་བོས་ཏེ་བཞིན་བཟངས་ཁྱོད་ལ་དགེ་སློང་མིང་འདི་ཞེས་བྱ་བས་རས་འཐག་པའི་ཕྱིར་སྐུད་པ་དང་རྔན་པ་བྱིན་པ་དེ་་སླར་ཕུལ་ཅིག་ཅེས་སྨྲས་པ་དང་། དེས་འཕགས་པ་རྣམས་བདག་གིས་དེ་ལ་རས་སྦྱིན་པར་བྱས་ཀྱི། སྐུད་པ་དང་རྔན་པ་ནི་མ་ལགས་སོ་ཞེས་སྨྲས་པ་དང་། དགེ་སློང་རྣམས་ཀྱིས་དེ་ཇི་ལྟར་བྱ་བ་མ་ཤེས་ནས། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ་ཐ་ག་པ་སྨྲ་བ་ནི་བདེན་གྱིས་རས་སུ་ལོང་ཤིག་་་ཅེས་བཀའ་སྩལ་པ་དང་། དགེ་སློང་རྣམས་ཀྱིས་ཕྲ་མོ་ལས་བཀུག་པ་དང་། དེ་ལ་འཕགས་པ་རྣམས་བདག་གིས་དེ་ལ་སྦོམ་པོ་སྦྱིན་པར་བྱས་སོ་ཞེས་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དེ་ནི་དུས་འདས་ཀྱིས་ཇི་ལྟར་བྱིན་པ་དེ་ལྟ་བུ་ལོང་ཤིག། གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་ཞིག་གིས་གོས་འཚོང་བ་ལ་ཀཱར་ཥཱ་པ་ཎ་བྱིན་ཏེ། རས་ཤིག་བྱིན་ཅིག་ཅེས་སྨྲས་པ་དང་། དགེ་སློང་དེ་དུས་འདས་ནས་དགེ་སློང་རྣམས་ཀྱིས་གོས་འཚོང་བ་ལ་བོས་ཏེ། བཞིན་བཟངས་ཁྱོད་ལ་དགེ་སློང་མིང་འདི་ཞེས་བྱ་བས་རས་ཀྱི་རིན་ཞིག་བྱིན་པ་དེ་འོན་ཅིག་ཅེས་སྨྲས་པ་དང་། དེས་འཕགས་པ་རྣམས་དེ་ལ་རས་སུ་སྦྱིན་པར་བགྱིས་སོ་ཞེས་སྨྲས་པ་དང་། དགེ་སློང་རྣམས་ཀྱིས་དེ་ལ་ཇི་ལྟར་བྱ་བ་མི་ཤེས་སོ། །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་་་འདས་ཀྱིས་དགེ་སློང་རྣམས་གོས་འཚོང་བ་དེ་སྨྲ་བ་ནི་བདེན་གྱིས། རས་སུ་་་ལོང་ཤིག་ཅེས་སྨྲས་པ་དང་། དགེ་སློང་རྣམས་ཀྱིས་ཕྲ་མོ་བཀུག་ནས་དེས་འཕགས་པ་རྣམས་བདག་གིས་དེ་ལ་སྦོམ་པོ་དབུལ་བར་བགྱིས་སོ་ཞེས་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དེ་ནི་དུས་འདས་ན། ཇི་ལྟ་བུ་བྱིན་པ་དེ་བཞིན་

---

^{[མ་དཔེ་གཟིགས་ན་འདིར་གནོན།]}

ལོང་ཤིག། །། འདུལ་བ་གཞུང་དམ་པ། བམ་པོ་སུམ་བཅུ་རྩ་བདུན་པ། གླེང་གཞི་ནི་མཉན་དུ་ཡོད་པ་ན་སྟེ། དྲུག་སྡེ་རྣམས་འཇིག་རྟེན་པ་ལ་གྲགས་པར་གྱུར་ཏེ། གང་སུ་ཡང་རུང་ཉོ་བ་དང་། བཙོང་བ་དེ་དག་དེ་དག་གི་དྲུང་དུ་དོང་ནས། འཕགས་པ་དངོས་པོ་འདིས་ཅི་རི་ཞེས་འདྲིའོ། །དེ་ནས་མཉན་དུ་ཡོད་པ་ན་ཁྱིམ་བདག་གཉིས་ཤིག་གཅིག་ནི་གོས་ཉོ། གཅིག་ནི་འཚོང་སྟེ། དེ་གཉིས་རིན་ཐང་གི་གཏམ་སྨྲ་ཞིང་འཁོད་པའི་སྟེང་དུ་ཉེ་དགའ་བོ་ཕྱོགས་དེར་འོངས་པ་དང་། དེ་གཉིས་ཀྱིས་འཕགས་པ་ཉེ་དགའ་བོས་བཅད་པ་བརྩན་ནོ། །གཅིག་ན་རེ་ཡང་དེ་བཞིན་དུ་བརྩན་པར་བྱའོ་ཞེས་སྨྲས་ནས། དེ་གཉིས་ཀྱིས་ཚེ་དང་ལྡན་པ་ཉེ་དགའ་བོ་ལ་འཕགས་པ་གོས་འདིའི་རིན་ཇི་ཙམ་ཞེས་སྨྲས་པ་དང་། དེས་གཅིག་ལ་གསང་སྟེ་བཞིན་བཟངས་ཁྱོད་ཉོ་བའམ་འོན་ཏེ་འཚོང་བ་ཞེས་་་དྲིས་སོ། །དེས་བདག་ནི་ཉོ་བའོ་ཞེས་སྨྲས་པ་དང་། ཉེ་དགའ་བོས་འདི་ནི་ཀཱར་ཥཱ་པ་ཎ་ཉི་ཤུ་རིའོ་ཞེས་སྨྲས་ནས། གཉིས་པ་ལ་ཡང་གསང་སྟེ། བཞིན་བཟངས་ཅི་ཁྱོད་ཉོ་བའམ་འོན་ཏེ་འཚོང་བ་ཞེས་དྲིས་པ་དང་། དེས་འཕགས་པ་བདག་ནི་འཚོང་བ་ཞེས་སྨྲས་པ་དང་། ཉེ་དགའ་བོས་འདི་ནི་ཀཱར་ཥཱ་པ་ཎ་བཞི་བཅུ་རིའོ་ཞེས་སྨྲས་པ་དང་། དེ་གཉིས་གསང་སྟེ་བསླུས་ནས་ཡང་གཉི་གའི་མངོན་སུམ་དུ་ཁྱེད་ཅག་ཇི་ལྟ་བུར་ལེགས་པ་དེ་ལྟ་བུར་བྱོས་ཤིག་ཅེས་སྨྲས་སོ། །དེ་ལ་གང་འཚོང་བ་དེས་འདི་ནི་ཀཱར་ཥཱ་པ་ཎ་བཞི་བཅུ་རིའོ་ཞེས་སྨྲས་པ་དང་། གང་ཉོ་བ་དེས་བདག་གིས་དད་པ་དང་ཡིད་ཆེས་པ་ལས་འདི་ནི་ཀཱར་ཥཱ་པ་ཎ་ཉི་ཤུ་རིའོ་ཞེས་སྨྲས་པ་དང་། དེས་སྨྲས་པ། ཁྱོད་ཀྱིས་དད་པ་དང་ཡིད་ཆེས་པ་སུ་ཡིན། འཕགས་པ་ཉེ་དགའ་བོ་ཡིན་ནོ། །བདག་ཅག་གཉིས་ལ་དེས་ཤེས་བཞིན་དུ་གཙེས་ཏེ། བདག་ལ་དེས་ཀཱར་ཥཱ་པ་ཎ་བཞི་བཅུ་རིའོ་ཞེས་སྨྲས་སོ། །དེས་སྨྲས་པ། བདག་ལ་ཡང་དེས་ཤེས་བཞིན་དུ་གཉིས་ཀ་ལ་སླུ་བའི་ཕྱིར་མདོར་ན་དེས་གནས་ངན་ལེན་ལ་མཚུངས་པར་སྤྱོད་ཀྱིས་ཕྱིན་ཆད་དགོས་པ་ཡོད་ན་ཡང་དེ་ལ་མི་འདྲིའོ་ཞེས་སྨྲས་སོ། །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་

---

^{[མ་དཔེ་གཟིགས་ན་འདིར་གནོན།]}

ལྡན་འདས་ཀྱིས་བཀའ་སྩལ་པ། དགེ་སློང་རྣམས་ཁྱིམ་བདག་དེ་གཉིས་འཕྱ་བ་ནི་ཡུས་ཀྱིས། དེ་བས་ན་དགེ་སློང་རྣམས་ཀྱིས་དངོས་པོ་གང་ལ་ཡང་རིན་ཐང་མ་གཅོད་ཅིག །ཁྱིམ་པ་རྩོད་པའི་དྲུང་ན་མ་འདུག་ཤིག །དགེ་སློང་གང་གིས་དངོས་པོ་ལ་གང་ཡང་རིན་བཅད་དམ། ཁྱིམ་པ་རྩོད་པའི་དྲུང་ན་འདུག་ན་འདས་པ་དང་བཅས་པར་འགྱུར་རོ། །བཅོམ་ལྡན་འདས་ཀྱིས་དངོས་པོ་གང་ལ་ཡང་དགེ་སློང་གིས་རིན་ཐང་མ་གཅོད་ཅིག་ཅེས་གསུངས་ན། དགེ་སློང་གིས་ཆོས་གོས་དང་། གོས་ཉོ་བར་འདོད་པའི་ཕྱིར་ཚོང་དུས་སུ་སོང་སྟེ། དེར་ཁྱིམ་པ་དང་ལྷན་ཅིག་ཏུ་ཀཱར་ཥཱ་པ་ཎའམ། པ་ཎ་གཅིག་གམ། པ་ཎ་བཞིའམ། བཞི་ཆའི་ཕྱེད་དམ། བཞི་ཆའི་ཕྱེད་ཀྱི་ཕྱེད་བསྐྱོད་པ་དང་། དེས་ཁྲོས་ཏེ་འཕགས་པ་བདག་ཅག་ནི་སྤོགས་པ་ཡིན་ན། ཁྱེད་ཅག་ཀྱང་ལྷག་པར་སྤོགས་བྱེད་པ་ཆེན་པོའོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ཏེ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་དེ་དག་དེ་སྐད་ཟེར་བ་ནི་ཡུས་ཀྱིས། དེ་ལྟ་བས་ན་དགེ་སློང་རང་གིས་ཉོ་བར་མ་བྱེད་ཅིག་བཅོམ་ལྡན་འདས་ཀྱིས་དགེ་སློང་རང་གིས་ཉོ་བར་མ་བྱེད་ཅིག་ཅེས་གསུངས་པ་དང་། དགེ་སློང་རྣམས་ཀྱིས་ཇི་ལྟར་ཉོ་བར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གཙུག་ལག་ཁང་ན་གནས་པའི་དགེ་བསྙེན་ཕ་ལ་ཚོལ་ཅིག །གཙུག་ལག་ཁང་ན་གནས་པའམ། དགེ་བསྙེན་དད་པ་མེད་ལ་ངེས་པར་ཉོ་བར་འདོད་པར་གྱུར་ན། གཏན་ལ་བབ་པའི་ཚིག་ལན་གཉིས་ལན་གསུམ་དུ་སྨྲ་བར་བྱ་སྟེ། ཀཱར་ཥཱ་པ་ཎ་ལ་སོགས་པའི་ཚུལ་གྱིས་བསྐྱེད་པར་མི་བྱའོ། །དགེ་སློང་གིས་ཉོ་བར་འདོད་ཀྱང་རུང་ཉོ་བར་མི་འདོད་ཀྱང་རུང་སྟེ། ཀཱར་ཥཱ་པ་ཎ་ལ་སོགས་པའི་ཚུལ་གྱིས་ཚིག་ལན་གཉིས་ལན་གསུམ་དུ་འདས་པར་བསྐྱེད་ཅིང་སྨྲ་ན་འདས་པ་དང་བཅས་པར་འགྱུར་རོ། །སངས་རྒྱས་དང་། ཆོས་དང་། དགེ་འདུན་གྱི་ཕྱིར་རིན་ཐང་བསྐྱེད་ཀྱང་ཉེས་པ་མེད་དོ། །གླེང་གཞིའི་སྒོ་བཞི་པའི་མདོའི་ཚིགས་སུ་བཅད་པ་བརྒྱད་པའོ།། །།མདོར་ན། རྩ་བས་འཚོ་བ་་ལས་པར་མི་བྱ་སྟེ། །རྣམ་པ་བཞི་ནི་མི་་བགོ་སྟེ། །བསྲུང་བ་དང་ཡང་

---

^{[མ་དཔེ་གཟིགས་ན་འདིར་གནོན།]}

མང་དུ་བྱ། །ཅ་ཅོ་མང་པོ་འབྱིན་པ་འོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་་་གནས་པ་ན་བཞུགས་སོ། །གང་གི་ཚེ་རྒྱལ་པོ་གཟུགས་ཅན་སྙིང་པོས་དགེ་སློང་གི་དགེ་འདུན་རྣམས་ལ་བཟའ་ཤིང་དྲུང་སྟོང་དང་ལྡན་པའི་ཀུན་དགའི་ར་བ་་་ཞིག་ཕུལ་བ་དེའི་ཚེ་ན། དགེ་སློང་རྣམས་ཀྱིས་འབྲས་བུ་ཟོས་ནས་ཕྱལ་བར་བོར་བས་ན་མདའ་ལྟ་བུའི་ནགས་སུ་གྱུར་ཏོ། །དེ་ནས་དུས་ཕྱི་ཞིག་ན་རྒྱལ་པོ་ལམ་དེ་ཕྱོགས་སུ་ཕྱིན་པ་དང་། དེས་དེ་དག་མཐོང་ནས། དེས་བློན་པོ་རྣམས་ལ་་མདའ་ལྟ་བུའི་ནགས་སུ་གྱུར་པའི་ཀུན་དགའི་ར་བ་འདི་སུའི་ཞེས་སྨྲས་པ་་་དང་། བློན་པོས་ལྷ་བཟའ་ཤིང་དྲུང་སྟོང་དང་ལྡན་པའི་ཀུན་དགའ་ར་བ་དག་ལྷས་འཕགས་པ་རྣམས་ལ་ཕུལ་བ་དེ་ཉིད་འདི་ལགས་ཏེ། དེ་དག་གིས་འབྲས་བུ་ཟོས་ནས་ཕྱལ་བར་བོར་བས་ན་ད་ནི་མདའ་ལྟ་བུའི་ནགས་སུ་གྱུར་ཏོ་ཞེས་སྨྲས་པ་དང་། རྒྱལ་པོས་སྨྲས་པ། ཀྱེ་འཕགས་པ་དེ་དག་འདི་ལ་ཞལ་ཏ་དང་ལས་མི་བྱེད་དམ། དེས་ལྷ་དེ་དག་བསམ་གཏན་དང་ཁ་ཏོན་ལ་ཞུགས་པས་འདིའི་སུག་ལས་དང་ཞལ་ཏ་མི་བགྱིད་དོ་ཞེས་སྨྲས་པ་དང་རྒྱལ་པོ་ཅང་མི་སྨྲ་བར་་འདུག་གོ །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྩ་བས་འཚོ་བ་ལ་ཕྱལ་བར་མ་དོར་བར་ལས་གྱིས་ཤིག །དགེ་སློང་རྣམས་ཀྱིས་སུས་ལས་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་འཆའ་བ་རྣམས་ཀྱིས་བྱོས་ཤིག །དེ་རྒ་བས་ན་དེ་དག་གིས་ལས་བྱ་བར་མི་ནུས་ཏེ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་ཐམས་ཅད་ཀྱིས་ལས་བྱོས་ཤིག །དེ་ལས་ཁ་ཅིག་ནི་རིད་རྒས་འཁོགས། ཁ་ཅིག་ནི་ན་བས་ལས་བྱེད་མི་ནུས། དྲུག་སྡེ་རྣམས་ནི་བྱེད་དུ་མི་བཏུབ་པས་ན་ལས་མ་བྱས་པ་དང་། བཅོམ་ལྡན་འདས་ཀྱིས་བཀའ་སྩལ་པ། འཁོར་རྣམ་པར་དབྱེ་བས་འཁོར་རྣམ་པར་ཕྱེ་ལ་སྐལ་སྐལ་དུ་གོས་ཏེ་ལས་བྱོས་ཤིག །དགེ་སློང་རྣམས་ལུང་ནོད་པ་དང་། ཀློག་པ་དང་། ཁ་ཏོན་བྱེད་པ་དང་། ཚུལ་བཞིན་ཡིད་ལ་བྱེད་

---

^{[མ་དཔེ་གཟིགས་ན་འདིར་གནོན།]}

པ་རྣམས་དང་སྡེ་དེ་ལ་ཞུགས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་འབའ་ཞིག་ལ་ཡང་འཇུག་པར་མི་བྱ་སྟེ། ལ་ལར་སོ་ཤིང་བཟའ་བར་བྱ། ལ་ལར་གདོང་བཀྲུ་བར་བྱ། ལ་ལར་ནི་རྐང་པ་བཀྲུ་བར་བྱ། དགེ་སློང་དེ་དག་གིས་དེ་བཞིན་དུ་ལས་བྱས་ནས་འབྲས་བུ་རྒྱལ་ཏེ་སྨིན་པར་གྱུར་པ་དང་། ཇི་ཙམ་ན་དགེ་སློང་དག་ཅིག་གློ་བུར་དུ་འོངས་པ་དང་། དེ་དག་གིས་འབྲས་བུ་རྒྱལ་ཞིང་སྨིན་པ་དེ་དག་མཐོང་ནས། དེ་དག་གིས་ཚེ་དང་ལྡན་པའི་རྣམས་བདག་ཅག་ཀྱང་ཨ་མྲ་སྨིན་པའི་འབྲས་བུ་བཟའ་བར་བགྱི་ན་ཁོ་བོ་ཅག་ཀྱང་དབང་ངམ་ཞེས་སྨྲས་པ་དང་། དགེ་སློང་རྣམས་ཀྱིས་འདི་དག་ནི་བདག་ཅག་གིས་སྔར་བགོས་ན་བཟར་ག་ལ་ཡོད་ཅེས་སྨྲས་པ་དང་། དེ་དག་འཕྱ་བར་གྱུར་ནས། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། གློ་བུར་དུ་འོངས་པ་རྣམས་ལ་ཡང་བྱིན་ཅིག །དགེ་སློང་རྣམས་ཀྱིས་བགོས་པའི་ལྷག་མ་ལ་བྱིན་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་རྣམ་པ་འདི་བཞི་ནི་མི་བགོ་སྟེ། བཞི་གང་ཞེ་ན། འདི་ལྟ་སྟེ། ཕྱོགས་བཞིའི་དགེ་འདུན་ཐམས་ཅད་དབང་བ་དང་། མཆོད་རྟེན་ཐམས་ཅད་དབང་བ་དང་། ནད་པ་ཐམས་ཅད་ཀྱི་རུང་བ་དང་། རིན་ཐང་ནར་མར་བཟའ་བ་ཐམས་ཅད་དོ། །དེ་བས་ན་དགེ་སློང་རྣམས་ཀྱིས་རྩ་བས་འཚོ་བ་རྙེད་དམ། འབྲས་བུའམ། མེ་ཏོག་ལ་སོགས་པ་གང་ཟག་རྣམས་ཀྱིས་ཡོངས་སུ་སྤྱོད་པ་བཞིན་དུ་ཡོངས་སུ་སྤྱོད་ཅིག །དེ་དག་མངོན་སུམ་དུ་དབང་བ་ཡིན་པས་ན་ཞལ་ཏ་བྱོས་ལ་མེ་ཏོག་དང་འབྲས་བུ་རྣམས་ནི་དགེ་འདུན་ལ་བྲིམས་ཤིག །བཅོམ་ལྡན་འདས་ཀྱིས་མངོན་སུམ་དུ་དབང་བ་ཡིན་པས་སོ་སོར་ཞལ་ཏ་བྱོས་ལ་མེ་ཏོག་དང་འབྲས་བུ་རྣམས་དགེ་འདུན་ལ་བྲིམས་ཤིག་ཅེས་གསུངས་པ་དང་། དགེ་སློང་རྣམས་ཀྱིས་དེ་དག་ཞལ་ཏ་བྱས་པས་མེ་ཏོག་དང་འབྲས་བུ་སྨིན་པ་དང་། དེ་དག་ཡལ་བར་བོར་ནས་མེ་ཏོག་དང་འབྲས་བུ་རྣམས་རྐུན་པོ་རྣམས་ཀྱིས་ཁྱེར་བ་དང་། བཅོམ་ལྡན་འདས་ཀྱིས་སྲུང་མ་ཞོག་ཤིག་ཅེས་གསུངས་ནས། དགེ་

---

^{[མ་དཔེ་གཟིགས་ན་འདིར་གནོན།]}

སློང་རྣམས་ཀྱིས་ཉུང་ངུ་ཞིག་བཞག་སྟེ། དེ་ཉིད་ཉེས་པའི་དམིགས་སུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། མང་དུ་འཁོར་ལ་དེ་དག་ལས་ཕྱེད་ནི་་སྔར་ཟན་ཟོ་ཞིག །བཅོམ་ལྡན་འདས་ཀྱིས་ཤིང་ཐོག་ཨ་མྲའི་འབྲས་བུ་སྨིན་པ་དགེ་འདུན་ལ་བྲིམས་ཤིག་ཅེས་གསུངས་པ་དང་། གང་གི་ཚེ་སྨིན་པར་གྱུར་པ་དེའི་ཚེ་སྲིན་བུས་ཟོས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གནས་འཆའ་བ་རྣམས་ཀྱིས་སོ་སོར་བརྟག་པར་བྱོས་ཤིག་སོ་སོར་བརྟག་པར་བྱེད་པ་དེ་དག་ཅ་ཅོ་ཆེ་ནས་དགེ་སློང་རྣམས་ཀྱིས་དེ་ལས་བཟློག་ཀྱང་དེ་དག་མི་བཏུབ་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། འཕགས་པའི་མི་སྨྲ་བས་སོ་སོར་བརྟག་པར་བྱ་སྟེ་ཅ་ཅོ་མ་སྨྲ་ཤིག །སྨྲ་ན་འདས་པ་དང་བཅས་པར་འགྱུར་རོ། །གླེང་གཞིའི་སྒོ་བཞི་པའི་མདོའི་ཚིགས་སུ་བཅད་པ་དགུ་པའོ།། །།མདོར་ན། རུང་བར་བྱ་དང་དགེ་ཚུལ་ཕ། །བདག་གིས་བྱིན་གྱིས་བརླབས་པ་དང་། །བླངས་ཤིང་བྱིན་ལེན་བྱེད་པ་དང་། །ཡང་ན་དེ་ལྟར་བསྟན་པ་དང་། །མཚམས་བཅིང་བ་དང་སྟོང་པ་དང་། །ཐབ་མོ་དང་ནི་རྫོགས་པ་འོ། །བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །བཅོམ་ལྡན་འདས་ཀྱིས་ཤིང་ཐོག་ཨ་མྲའི་འབྲས་བུ་བྲིམས་ཤིག་ཅེས་གསུངས་པ་དགེ་སློང་རྣམས་སུས་བྲིམ་པ་མི་ཤེས་ནས། བཅོམ་ལྡན་་འདས་ཀྱིས་བཀའ་སྩལ་པ། རུང་བར་བྱེད་པས་བྲིམས་ཤིག །རུང་བར་བྱེད་པ་མེད་ན་དགེ་ཚུལ་ཕས་བྱོས་ཤིག །དགེ་ཚུལ་ཕ་མེད་ན་དགེ་སློང་རང་གིས་ལག་པ་བཀྲུས་ཏེ་བྱིན་ལེན་བྱོས་ལ་སོ་སོར་རུང་བར་་གྱིས་ཏེ་བྲིམ་པར་བྱོས་ཤིག །བཅོམ་ལྡན་འདས་ཀྱིས་དགེ་སློང་རང་གི་ལག་པ་ཁྲུས་ལ་བྱིན་ལེན་བྱོས་ཏེ་སོ་སོར་རུང་བར་བྱོས་ལ་བྲིམས་ཤིག་ཅེས་བཀའ་སྩལ་པ་དང་། འབྲས་བུ་མང་པོས་གང་བའི་སྐོན་བུ་གཅིག་པུས་མ་ཐེག་ནས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པས་ཀྱང་གྲོགས་བྱོས་ལ་གཉི་གས་བྲིམ་པར་བྱ་སྟེ། གང་ཁྱིམ་པས་བྲིམས་པ་དེ་ནི་བྱིན་ལེན་དུ་བྱའོ། །

---

^{[མ་དཔེ་གཟིགས་ན་འདིར་གནོན།]}

གང་དགེ་སློང་གིས་བྲིམས་པ་དེ་ནི་བྱིན་ལེན་བྱ་མི་དགོས་སོ། །ཨ་མྲ་གཞན་ཞིམ་པོར་གྲགས་པ་ཞིག་ཡོད་ན། དེ་དག་བསྲེས་ལ་་རིམ་ལ་བྲིམས་པ་དང་། ཐམས་ཅད་ཐོབ་པར་གྱུར་ནས། བཅོམ་ལྡན་འདས་ཀྱིས་དེ་དག་སོ་སོར་བྲིམས་ཤིག་ཅེས་གསུངས་སོ། །བཅོམ་ལྡན་འདས་ཀྱིས་ཨ་མྲ་གང་ཞིམ་པོར་གྲགས་པ་སོ་སོར་བྲིམས་ཤིག་ཅེས་གསུངས་པ་དང་། དྲུག་སྡེ་རྣམས་ཀུན་དགའི་ར་བར་དོང་ནས་དེ་དག་གིས་ཨ་མྲ་ཞིམ་པོར་གྲགས་པ་དེ་རང་གིས་བླངས་ནས། གཙུག་ལག་ཁང་དུ་འོངས་ཏེ་བྱིན་ལེན་བྱས་ཤིང་ཟོས་པ་དང་། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཨ་མྲ་ཞིམ་པོ་དེ་དག་མ་བྲིམས་ན་ཅིའི་ཕྱིར་ཟད་དམ་ཞེས་དྲིས་པ་དང་། སྲུང་མ་རྣམས་ཀྱིས་དེ་དག་བྲིམ་དུ་ག་ལ་མཆིས། དྲུག་སྡེ་རྣམས་ཀྱིས་བླངས་ཏེ་གཙུག་ལག་ཁང་དུ་དོང་ནས་བྱིན་ལེན་བྱས་ཏེ་ཟོས་སོ་ཞེས་སྨྲས་པ་དང་། དགེ་སློང་རྣམས་འཕྱའོ། །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དགོངས་པ། དགེ་སློང་རྣམས་གང་སུ་ཞིག་སྔར་བླངས་ལ་ཕྱིས་བྱིན་ལེན་བྱེད་ན་ཉེས་པའི་དམིགས་སུ་འགྱུར་ཏེ། དེ་བས་ན་དགེ་སློང་གིས་སྔར་བླངས་པ་ལས་ཕྱིས་བྱིན་ལེན་མི་བྱའོ་སྙམ་དུ་མཁྱེན་ནས། དགེ་སློང་དག་དྲུག་སྡེ་རྣམས་ཀྱིས་ནི་མི་རིགས་པར་བྱས་ཀྱིས་དེ་བས་ན་དགེ་་་སློང་རྣམས་སྔར་བླངས་པ་ལས་ཕྱིས་བྱིན་ལེན་མ་བྱེད་ཅིག །སྔར་བླངས་པ་ཕྱིས་བྱིན་ལེན་བྱས་ན་འདས་པ་དང་བཅས་པར་འགྱུར་རོ། །གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་རྣམས་མེ་ཏོག་དང་། འབྲས་བུ་དང་། བཅའ་བ་དང་། གཞན་ཡང་བཟའ་བ་དང་། བཏུང་བ་འབྲིམ་པ་ལ་མཛུབ་མོས་བསྟན་ཅིང་འདི་བྱིན་ཅིག །འདི་དག་བྱིན་ཅིག་ཅེས་་སྨྲ། དེ་ཡོངས་སུ་ཟོས་པ་དང་། བྲིམ་པ་མ་སྙོམས་པར་གྱུར་ནས། འདོད་ཆགས་དང་མ་བྲལ་བའི་དགེ་སློང་ཁ་ཅིག་གིས་དཔྱས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འཕྱ་བ་ནི་ཡུས་ཏེ། དེ་བས་ན་དགེ་སློང་གིས་མཛུབ་མོས་འདི་བྱིན་ཅིག །འདི་དག་བྱིན་ཅིག་

---

^{[མ་དཔེ་གཟིགས་ན་འདིར་གནོན།]}

ཅེས་བསྟན་ཅིང་བཟའ་བར་མི་བྱའོ། །དགེ་སློང་གིས་མཛུབ་མོས་འདི་བྱིན་ཅིག་འདི་དག་བྱིན་ཅིག་ཅེས་བསྟན་ཅིང་ཟོས་ན་འདས་པ་དང་བཅས་པར་འགྱུར་རོ། །བཏུང་བ་མེད་པ་ནི་དྲོད་ཆུང་བས་སྨིན་པ་འདོད་པ་དང་། དྲོད་ཆེ་བས་མ་སྨིན་པ་འདོད་པའོ། །གླེང་གཞི་ནི་མཉན་དུ་ཡོད་པ་ན་སྟེ། དྲུག་སྡེ་རྣམས་ལྗོངས་སྤྱད་པ་སྤྱོད་པ་ན་རི་བྲགས་ཀྱི་གྲོང་གཞན་ཞིག་གི་གཙུག་ལག་ཁང་ཞིག་ཏུ་ཕྱིན་ན་དེའི་དགེ་་་སློང་དག་ཉིན་པར་སྤྱོད་པའི་ཕྱིར་དོང་སྟེ། གཙུག་ལག་ཁང་དེ་སྟོང་པར་ལུས་པ་དང་། དྲུག་སྡེ་པོ་རྣམས་དགའ་བོ་དང་ཉེ་དགའ་བོ་གཙུག་ལག་ཁང་སྟོང་པ་མཚམས་མ་བཅད་པ་འདིར་བདག་ཅག་རྣམས་ཀྱིས་འདིར་གནས་ན་ཇི་ལྟར་གནས་པར་བྱ། མཚམས་བཅད་ཀྱིས་ཚུར་ཤོག་ཅེས་སྨྲས་ནས། དེ་དག་གིས་ལེགས་ཀྱིས་དེ་བཞིན་དུ་བྱའོ་ཞེས་སྨྲས་ནས། དེ་དག་གིས་མཚམས་བཅད་མ་ཐག་ཏུ་སྔ་ན་གནས་པའི་དགེ་སློང་དག་ལྷགས་པ་དང་། དྲུག་སྡེ་པོ་རྣམས་ཀྱིས་དེ་ལ་ངལ་སོ་ཤིག་ཅེས་བྱས་ན། དེ་དག་གིས་སྨྲས་པ། ཚེ་དང་ལྡན་པ་རྣམས་འདི་ལྟར་ཁྱེད་ཅག་ནི་གློ་བུར་དུ་ལྷགས་པའོ། །ངེད་ནི་སྔ་ནས་གནས་པས་ན་ཁྱེད་ཅག་ལ་བདག་ཅག་གིས་ངལ་སོ་ཤིག་ཅེས་བྱ་བའི་རིགས་སོ་ཞེས་པ་དང་། དྲུག་སྡེ་པོ་རྣམས་ཀྱིས་སྨྲས་པ། ཚེ་དང་ལྡན་པ་དག་བདག་ཅག་གིས་ཀྱང་མཚམས་བཅད་དོ། །དེ་དག་གིས་སྨྲས་པ། བདག་ཅག་གིས་ཀྱང་སྔར་མཚམས་བཅད་དོ་ཞེས་སྨྲས་ནས། དགེ་སློང་དེ་དག་ཅི་མཚམས་སྔ་མ་བརྩན་ནམ། འོན་ཏེ་ཕྱི་མ་བརྩན་ཞེས་ཏེ་ཐེ་ཚོམ་སྐྱེས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གློ་བུར་བ་རྣམས་གཙུག་ལག་ཁང་དུ་ཞུགས་མ་ཐག་ཏུ་སྟོང་པར་མཐོང་ན་ཡང་མཚམས་གཅད་པར་མི་བྱའོ། །ལམ་གྱིས་ངལ་བསོ་སྟེ་ཤིན་ཏུ་བརྟགས་ནས་སྔ་ན་གནས་པ་མེད་ན་གདོད་མཚམས་གཅད་པར་བྱའོ། །གཞན་དུ་ན་གཅད་པར་མི་བྱའོ། །གླེང་གཞི་ནི་མཉན་དུ་ཡོད་པ་ན་སྟེ། ཛེ་ཏའི་ཚལ་གྱི་སྒོར་ཁྱིམ་པ་གཉིས་ཤིག་ཐབ་མོ་བྱུང་སྟེ། དེ་ན་དགེ་སློང་

---

^{[མ་དཔེ་གཟིགས་ན་འདིར་གནོན།]}

གཅིག་འདུས་པ་དེ་ལ་གཅིག་གིས་དབང་བཅུགས་ནས། དེས་དེ་ལ་རྒྱལ་པོའི་ཕོ་བྲང་དུ་ཆེ་བཞི་བྱས་ཏེ་ཅིག་ཤོས་པོ་ཆད་པས་བཅད་པ་དང་། དེས་དེ་ལ་འཕྱའོ། །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱིམ་པ་དེ་འཕྱ་བ་ནི་ཡུས་ཀྱིས། དེ་བས་ན་དགེ་སློང་རྣམས་ཐབ་མོ་བྱེད་པའི་དྲུང་ན་མ་འདུག་པར་ཆེ་བཞི་ཡང་མ་བྱེད་པར་བྱོལ་ཏེ་སོང་ཤིག །དགེ་སློང་ཐབ་མོ་བྱེད་པའི་དྲུང་ན་འདུག་ཅིང་ཆེ་བཞི་བྱེད་ན་འདས་པ་དང་བཅས་པར་འགྱུར་རོ། །གླེང་གཞིའི་སྒོ་བཞི་པའི་མདོའི་ཚིགས་སུ་བཅད་པ་བཅུ་པའོ། །གླེང་གཞིའི་སྒོ་བཞི་པ་རྫོགས་སོ།། །།

གླེང་གཞིའི་སྒོ་ལྔ་པ་བཤད་པ།

---

^{[མ་དཔེ་གཟིགས་ན་འདིར་གནོན།]}

མདོར་བསྡུས་པའོ། །བྱང་ཆུབ་སེམས་དཔའི་གཟུགས་རྣམས་དང་། །ཡུལ་བསྐོར་དང་ནི་ཡོན་གྱི་སྣོད། །ཀུན་འདུས་པ་དང་སྟེགས་བུ་དང་། །རྔ་ཆེན་འཁོར་ལོ་ཐ་མ་འོ། །མདོར་ན། དྲང་སྲོང་ཆེན་པོས་གནང་བར་གསུངས་པ་ནི། །བྱང་ཆུབ་སེམས་དཔའི་སྐུ་གཟུགས་དང་། །སྟེགས་བུ་དང་ནི་རྒྱལ་མཚན་དང་། །བ་དན་ལྕགས་ཀྱི་ཀ་བ་འོ། །གླེང་གཞི་ནི་མཉན་དུ་ཡོད་པ་ན་སྟེ། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱིས་གནང་ན། བདག་གིས་བཅོམ་ལྡན་འདས་བྱང་ཆུབ་སེམས་དཔའི་སྐུ་གཟུགས་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་བྱོས་ཤིག །བཅོམ་ལྡན་འདས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་སེམས་དཔའི་གཟུགས་ལ་རྒྱལ་མཚན་གྱིས་བསྐོར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྐོར་ཅིག །བཅོམ་ལྡན་འདས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་གཟུགས་སྟེགས་བུས་བསྐོར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྟེགས་བུས་བསྐོར་ཅིག །ཡང་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་གཟུགས་ལ་ལྕགས་ཀྱི་ཀ་བས་བསྐོར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྐོར་ཅིག །ཡང་

---

^{[མ་དཔེ་གཟིགས་ན་འདིར་གནོན།]}

དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་ལྕགས་ཀྱི་ཀ་བའི་སྟེང་དུ་བ་དན་གདགས་པར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་ཐོགས་ཤིག །གླེང་གཞིའི་སྒོ་ལྔ་པའི་མདོའི་ཚིགས་སུ་བཅད་པ་དང་པོའོ།། །།མདོར་ན། བྱང་ཆུབ་སེམས་དཔའི་ཡུལ་བསྐོར་དང་། །དེ་བཞིན་རྒྱན་དང་བྱུག་པ་དང་། །ཁྱོགས་དང་ཤིང་རྟ་བ་དན་དང་། །གདུགས་དང་རྒྱལ་མཚན་སྙན་གྱི་རྒྱན། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་སེམས་དཔའི་གཟུགས་ཀྱིས་ཡུལ་བསྐོར་བར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྐོར་ཅིག །བྱང་ཆུབ་སེམས་དཔའི་རྒྱན་མེད་དེ་མི་མཛེས་ནས་ཁྱིམ་བདག་མགོན་མེད་ཟས་་་སྦྱིན་པས་དེ་སྟེ་བཅོམ་ལྡན་འདས་ཀྱིས་གནང་ན། བདག་གིས་བྱང་ཆུབ་སེམས་དཔའི་གཟུགས་ལ་རྒྱན་འབུལ་ལོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་ཕུལ་ལ་རྐང་པའི་རྒྱན་དང་རྣ་བའི་རྒྱན་ལ་སོགས་པ་ཡང་ཕུལ་ཅིག །དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་སེམས་དཔའི་གཟུགས་ལ་དྲིའི་རྒྱན་གྱིས་བརྒྱན་པར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་བརྒྱན་པར་བྱོས་ཤིག །བྱང་ཆུབ་སེམས་དཔའི་གཟུགས་གྲོང་ཁྱེར་དུ་རྐང་པས་ཁྱེར་བ་དང་། ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་སེམས་དཔའི་གཟུགས་ཁྱོགས་ལས་གྲོང་ཁྱེར་དུ་བཀུར་བར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་ཁྱེར་ཅིག །ཁྱོགས་ལས་ཁྱེར་ཡང་མི་མཛེས་པར་གྱུར་ནས་ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་་་འདས་ཀྱིས་གནང་ན་

---

^{[མ་དཔེ་གཟིགས་ན་འདིར་གནོན།]}

བདག་གིས་བྱང་ཆུབ་སེམས་དཔའི་གཟུགས་ཤིང་རྟ་ལས་་་བཀུར་བར་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་དེ་བཞིན་དུ་བྱོས་ཤིག །ཤིང་རྟ་ཡང་བ་དན་དང་་་གདུགས་མེད་པས་མི་མཛེས་པར་གྱུར་ནས། ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་ཤིང་རྟའི་སྟེང་དུ་བ་དན་་དང་གདུགས་དང་རྒྱལ་མཚན་ལ་སོགས་པས་བརྒྱན་པར་བགྱིའོ་ཞེས་གསོལ་པ་་་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་བརྒྱན་པར་བྱོས་ཤིག །བྱང་ཆུབ་སེམས་དཔའི་གཟུགས་ལ་མེ་ཏོག་གིས་སྙན་གྱི་གོང་མ་བརྒྱན་ན་མི་མཛེས་པར་གྱུར་ནས། ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་སེམས་དཔའི་གཟུགས་ཀྱི་དབུའི་སྙན་གྱི་གོང་དུ་མེ་ཏོག་གི་རྒྱན་དབུལ་ལོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་ཕུལ་ཅིག །གླེང་གཞིའི་སྒོ་ལྔ་པའི་མདོའི་ཚིགས་སུ་བཅད་པ་གཉིས་པའོ།། །།མདོར་ན། ཡོན་ཕུལ་བ་དང་ཡོན་དབུལ་བ། །དེ་བཞིན་ཕྲེང་བའི་སྣོད་རྣམས་དང་། །རོལ་མོ་རྣམས་ཀྱང་མི་དགག་ཅིང་། །རྒྱན་ཚོགས་རྣམས་ཀྱང་མི་གཞིག་གོ །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བྱང་ཆུབ་་་སེམས་དཔའི་གཟུགས་ཀྱི་ཞབས་ལ་ཡོན་དབུལ་ལོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་ཕུལ་ཅིག །དེའི་མཆོད་སྟོན་གྱི་ཚེ་ཡུལ་སྣ་ཚོགས་ན་གནས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། གཞན་ཡང་བལྟ་བར་འདོད་པའི་ཕྱིར་ཕལ་མོ་ཆེ་ལྷགས་པ་རྣམས་ཀྱིས་དེ་ལ་ཡོན་དབུལ་བ་མངས་པས་རྙེད་པ་དེ་སུས་བཀུར་བ་དགེ་སློང་རྣམས་ཀྱིས་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་བཀུར་བར་བྱའོ་ཞེས་པ་དང་། དགེ་སློང་གནས་བརྟན་དག་གིས་

---

^{[མ་དཔེ་གཟིགས་ན་འདིར་གནོན།]}

ཁྱེར་བ་དང་མི་དགའ་བ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་བཅའ་བར་བྱེད་པ་དང་། གཞན་ཡང་གཞོན་པ་དང་རྒན་པ་རྣམས་ཀྱིས་བཀུར་བར་བྱའོ། །དགེ་སློང་གནས་བརྟན་དང་། གནས་བརྟན་དག་གིས་ནི་བསྲུང་བར་བྱོས་ཤིག །ཡོན་ཕུལ་བ་དང་། མེ་ཏོག་དང་། གོས་ལ་སོགས་པ་ཤིང་རྟའི་ཐོག་ཏུ་བཞག་པ་དང་། ཁ་ཅིག་་ལྷུང་བ་མ་བྱིན་པར་ལེན་པ་དག་གིས་ཐུགས་ཐུབ་ཏུ་ཁྱེར་ནས། ཁྱིམ་བདག་མགོན་མེད་ཟས་སྦྱིན་གྱིས་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་ཤིང་རྟའི་སྟེང་དུ་ཕྲེང་བའི་སྣོད་བགྱིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་བྱོས་ཤིག །དགེ་སློང་རྣམས་ཀྱིས་རོལ་མོ་རྣམས་ཀྱང་མ་ཞི། སྐྱེ་བོ་རྣམས་ཀྱང་སོ་སོར་མ་གྱེས་པར་གཟུགས་ཀྱི་རྒྱན་རྣམས་སྦས་པ་དང་། བྲམ་ཟེ་དང་ཁྱིམ་བདག་དད་པ་དག་གིས་འཕགས་པ་དག་བདག་ཅག་ཇི་ལྟར་དད་པ་དེ་བཞིན་དུ་མ་དད་པ་ཡང་སྐྱེས་ཏེ། ཀྱེ་མའོ་ཁྱེད་ཀྱིས་རོལ་མོ་རྣམས་ཀྱང་ཞི་ལ། སྐྱེ་བོ་མང་པོ་ཡང་སོ་སོར་གྱེས་ནས་གཟུགས་ཀྱི་རྒྱན་རྣམས་བཀྲོལ་ན་ཅི་ཉེས་ཞེས་དཔྱས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་། ཁྱིམ་བདག་རྣམས་འཕྱ་བ་ནི་ཡུས་ཏེ། དེ་བས་ན་རོལ་མོ་རྣམས་ཀྱང་མ་ཞི། སྐྱེ་བོ་མང་པོ་ཡང་སོ་སོར་མ་གྱེས་པར་དགེ་སློང་རྣམས་ཀྱིས་གཟུགས་ཀྱི་རྒྱན་མ་རྟུལ་ཅིག །བརྟུལ་ན་འདས་པ་དང་བཅས་པར་འགྱུར་རོ། །གླེང་གཞིའི་སྒོ་ལྔ་པའི་མདོའི་ཚིགས་སུ་བཅད་པ་གསུམ་པའོ།། །།མདོར་ན། ཀུན་འདུས་པ་དང་དུས་སྟོན་དང་། །དཔྱིད་ཟླ་ཐ་ཆུངས་ཞལ་བསྲོ་དང་། །ལོ་ལྔ་དང་ནི་དྲུག་བྱས་ལ། །མཆོད་སྟོན་ཆེན་པོ་ཐ་མ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་་་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་གྱིས་ཡུལ་སོ་སོ་ན་གནས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་མཐོང་བ་དང་། ཡིད་དགའ་བ་

---

^{[མ་དཔེ་གཟིགས་ན་འདིར་གནོན།]}

སྐྱེས་ནས་དེས་བསམས་པ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་འདི་ལྟར་དུས་སུ་སྦྱིན་་པ་ནི་རྣམ་པ་ལྔ་སྟེ། ལྔ་གང་ཞེ་ན། གློ་བུར་དུ་འོངས་པ་དང་། འདོད་པ་རྣམས་ལ་སྦྱིན་པ་བྱིན་པ་འདི་ནི་སྦྱིན་པའི་དུས་དང་པོའོ། །ནད་པ་དང་ནད་གཡོག་ལ་སྦྱིན་པ་བྱིན་པ་འདི་ནི་སྦྱིན་པའི་དུས་གཉིས་པའོ། །ལོ་ཉེས་ཤིང་ཕོངས་བྲེལ་བ་ལ་སྦྱིན་པ་བྱིན་པ་འདི་ནི་སྦྱིན་པའི་དུས་གསུམ་པའོ། །གང་སུ་ལ་ཡང་རུང་སྟེ་ལོ་ཐོག་གསར་པ་དང་། འབྲས་བུ་གསར་པ་དང་། གསར་ཐོག་དེ་དག་དེས་ཐོག་མར་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་ལ་བྱིན་ཞིང་། དེའི་འོག་ཏུ་བདག་ཟ་བ་འདི་ནི་སྦྱིན་པའི་དུས་བཞི་པའོ། །གང་སུ་ཡང་རུང་སྟེ། རླུང་ལྡང་བའམ། ཡུལ་རྨུགས་པའམ། ཆར་འབབ་པའམ། གྲང་བ་ལ་སོགས་པ་དེ་ལྟ་བུའི་རྣམ་པས་རླུང་ལྡང་བ་དང་། ཡུལ་རྨུགས་པ་དང་། ཆར་འབབ་པ་དང་། གྲང་བ་ལ་ཟན་ནམ། སྐྱོ་མའམ། ཐུག་པའམ། སྐོམ་ལ་སོགས་པ་དེ་དག་ཕྱིར་བྱུང་སྟེ། དགེ་འདུན་ལ་འབུལ་ཞིང་འཕགས་པ་འདི་ཟོས་ན་ལུས་ཀྱང་མི་གཤེར། ཆོས་གོས་ལ་ཡང་ཆར་གྱིས་མི་ཕོག་སྟེ་བདེ་བ་ལ་རེག་ཅིང་གནས་པར་འགྱུར་རོ་ཞེས་སྦྱིན་པ་འདི་ནི་སྦྱིན་པའི་དུས་ལྔ་པའོ། །དེ་ལྟར་ན་འདི་ནི་ཡུལ་སོ་སོ་ན་གནས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་སོགས་པ་ལམ་གྱི་ངལ་བ་རྣམས་ལ་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་དེ་དག་འདུས་པའི་ཟས་སྦྱར་རོ་སྙམ་དུ་བསམས་ཏེ། བཅོམ་ལྡན་འདས་ག་ལ་བ་དེར་སོང་སྟེ་དྲུང་དུ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གློ་བུར་དུ་མཆི་བ་ཡུལ་སོ་སོ་ན་གནས་པ་ལ་སྦྱིན་པ་བྱིན་པ་འདི་ནི་སྦྱིན་པའི་དུས་དང་པོ་ཞེས་བྱ་བ་ནས། སྔ་མ་ལྟར་བདེ་བ་ལ་རེག་པར་གནས་པར་བྱ་བ་འདི་ནི་དུས་ཀྱི་སྦྱིན་པ་ལྔ་པའོ་ཞེས་བྱ་བའི་བར་དུ་སྦྱིན་པའི་དུས་ལྔར་གསུངས་ན། ད་འདིར་བྱང་ཆུབ་སེམས་དཔའི་མཆོད་པ་ཆེན་པོ་ལ་ཡུལ་སོ་སོ་ནས་མཆིས་པའི་དགེ་

---

^{[མ་དཔེ་གཟིགས་ན་འདིར་གནོན།]}

སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་སོགས་པ་གློ་བུར་དུ་མཆིས་པ་ལམ་གྱིས་ཡོངས་སུ་གདུངས་པ་དེ་རྣམས་ལ་དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་འདུས་པ་དེ་དག་གི་ཟས་སྦྱར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྦྱོར་ཅིག །བཅོམ་ལྡན་འདས་ལ་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཟླ་བ་གང་ལ་བཙས་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དཔྱིད་ཟླ་ཐ་ཆུངས་ལ་བཙས་སོ། །དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བཅོམ་ལྡན་འདས་ཀྱི་ཕོ་བྲང་གི་ཞལ་བསྲོ་བར་སྦྱར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྦྱོར་ཅིག །ཡང་བཅོམ་ལྡན་འདས་ལོ་དུ་ལགས་ནས་དབུ་སྐྲ་བྲེགས་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ལོ་ལྔ་ལོན་པ་ནའོ། །དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་བཅོམ་ལྡན་འདས་ལ་ལོ་ལྔ་ཞིང་ལན་གཅིག་མཆོད་སྟོན་སྦྱར་རོ། །ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྦྱོར་ཅིག །ཡང་བཅོམ་ལྡན་འདས་ཀྱིས་གཙུག་ཕུད་ལོ་དུ་ལགས་ནས་བཞག་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ལོ་དྲུག་ནའོ། །དེ་སྟེ་བཅོམ་ལྡན་འདས་ཀྱིས་གནང་ན་བདག་གིས་གཙུག་ཕུད་ཀྱི་མཆོད་སྟོན་སྦྱར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྦྱོར་ཅིག །ཡང་ཟླ་བ་གང་ལ་བཅོམ་ལྡན་འདས་ཀྱིས་བླ་ན་མེད་པའི་ཡེ་ཤེས་མངོན་དུ་ཆུད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དཔྱིད་ཟླ་ཐ་ཆུངས་ལའོ། །དེ་སྟེ་བཅོམ་ལྡན་འདས་ཀྱིས་གནང་ན་བཅོམ་ལྡན་འདས་འཛམ་བུའི་གྲིབ་མ་ལ་གཟུགས་བཞུགས་པ་ལ་མཆོད་སྟོན་ཆེན་པོ་སྦྱར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་གནང་གིས་སྦྱོར་ཅིག །གླེང་

---

^{[མ་དཔེ་གཟིགས་ན་འདིར་གནོན།]}

གཞིའི་སྒོ་ལྔ་པའི་མདོའི་ཚིགས་སུ་བཅད་པ་བཞི་པའོ།། །།མདོར་ན། རྩྭ་སྟན་དང་ནི་ཐེ་ཚོམ་དང་། །སྔ་ཕྱི་དག་ཏུ་འདུག་པ་དང་། །ཅ་ཅོ་དག་དང་ལམ་རྣམས་དང་། །གཎྜཱི་དུང་དང་རྔ་རྡུང་བའོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའི་ར་བ་ན་བཞུགས་སོ། །བཅོམ་ལྡན་འདས་ཀྱིས་འདུས་པའི་ཟས་སྦྱོར་ཅིག་ཅེས་གསུངས་པ་དང་། དགེ་སློང་མང་པོ་རྣམས་སྟན་མེད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། རྩྭའི་སྟན་སྦྱར་ཏེ་དེར་འདུག་ལ་བཟའ་བར་བྱའོ། །བཅོམ་ལྡན་འདས་ཀྱིས་རྩྭའི་སྟན་ལ་འདུག་པར་བྱའོ་ཞེས་གསུངས་པ་དང་། དགེ་སློང་རྣམས་ཟན་ཟོས་པ་དང་ཐེ་ཚོམ་སྐྱེས་ནས་རྩྭ་སྟན་ཏེ་ཁྱེར་ཏེ་དོང་ནས། བཅོམ་ལྡན་འདས་ཀྱིས་བཀའ་སྩལ་པ། སྟན་ཁྱེར་ཏེ་མ་འདོང་བར་ཕུང་པོར་བྱོས་ཏེ་ཞོག་ལ། གང་གི་ཚེ་དུས་སྟོན་ཡོངས་སུ་རྫོགས་པར་གྱུར་པ་དེའི་ཚེ་ཐམས་ཅད་འོར་ཅིག །དགེ་སློང་རྣམས་སྟོན་མོའི་དུས་ལ་སྔ་ཕྱིར་འདུག་པས་གཞན་ཟན་ཟོས་ཏེ་སོང་བར་གྱུར། གཞན་གདོད་འོངས་པ་མ་ཐོབ་སྟེ་བྲེལ་བར་གྱུར་ནས། བཅོམ་ལྡན་འདས་ཀྱིས་གོ་རིམས་ཇི་ལྟ་བ་བཞིན་དུ་འདུག་ཤིག་ཅེས་གསུངས་སོ། །དགེ་སློང་མང་པོ་འདུས་པ་དང་ཅ་ཅོར་གྱུར་པས་དུས་མ་ཤེས་ནས། བཅོམ་ལྡན་འདས་ཀྱིས་དུས་བརྗོད་པར་བྱོས་ཤིག་ཅེས་གསུངས་པ་དང་། དེ་དག་དེ་ཉིད་དུ་དུས་ལ་བབ་བོ། །དུས་ལ་བབ་བོ་ཞེས་བརྗོད་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཎྜཱི་བརྡུང་བར་བྱོས་ཤིག །དེ་ལྟར་ཡང་གཞན་དག་ལ་གསལ་བར་མ་གྱུར་ནས། དེ་ལ་བཅོམ་ལྡན་འདས་ཀྱིས་སྔར་ནི་གཎྜཱི་ཆུང་ངུ་རྡུངས་ལ། ཕྱིས་གཎྜཱི་རྡུངས་ཤིག་ཅེས་གསུངས་སོ། །དེ་ལྟར་ཡང་གཞན་ཉིན་པར་གནས་པར་སོང་བ་རྣམས་ཀྱིས་མ་ཐོས་ནས། བཅོམ་ལྡན་འདས་ཀྱིས་དུང་ཁ་བསྡོམས་ཏེ་བུས་ལ་རྔ་ཡང་རྡུངས་ཤིག་ཅེས་གསུངས་སོ། །གླེང་གཞིའི་སྒོ་ལྔ་པའི་མདོའི་ཚིགས་སུ་བཅད་པ་ལྔ་པའོ།། །།མདོར་ན། དེར་ནི་རྔ་ཡང་བརྡུང་བར་བྱ། །དེ་ནས་ཤིང་རྟ་དབྱུང་བ་དང་། །དངོས་པོ་བྱུང་དང་རྙེད་པ་དང་། །ཇི་ལྟར་ཚུལ་བཞིན་བསྒོ་བར་བྱའོ། །སངས་རྒྱས་

---

^{[མ་དཔེ་གཟིགས་ན་འདིར་གནོན།]}

བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་བ་ན་བཞུགས་ཏེ། བཅོམ་ལྡན་འདས་ཀྱིས་གཎྜཱི་དང་དུང་ཁ་བསྡོམས་པ་དང་རྔ་རྡུངས་ཤིག་ཅེས་བཀའ་སྩལ་ན། དེ་དག་གིས་གཎྜཱི་བརྡུངས་པའི་རྗེས་བཞིན་བརྡུངས་པ་དང་། ནད་པ་དང་ལས་ལ་གཏོགས་པ་རྣམས་ལ་གནོད་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གང་གི་ཚེ་ནད་པ་རྣམས་ཟས་མནོས་ཟིན་པར་གྱུར་ལ། ལས་བྱེད་པ་རྣམས་ཀྱང་ཟས་ཟོས་ཟིན་པ་དེའི་ཚེ་ན་གཎྜཱི་དང་དུང་ཁ་བསྡོམས་པ་དང་། རྔ་རྡུངས་ཤིག །མཆོད་སྟོན་ཟིན་ཀྱང་སོ་སོ་ན་གནས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་སོགས་པ་སོ་སོར་མ་དོང་བ་དང་། བཅོམ་ལྡན་འདས་ཀྱིས་ཤིང་རྟ་ཕྱུང་ཤིག་དང་དེ་དོང་ནས་རང་འདོང་ངོ་ཞེས་གསུངས་པ་དང་། མཆོད་སྟོན་དེའི་ཚེ་དགེ་སློང་རྣམས་ཀྱིས་རྙེད་པ་གྲུབ་པ་དེ་ཇི་ལྟར་བགོ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་རྒན་རིམས་སུ་མཉམ་པར་གོས་ཤིག །དགེ་སློང་མང་པོ་འདུས་པ་དེ་དག་ཅ་ཅོ་བྱེད་པ་དང་། བཅོམ་ལྡན་འདས་ཀྱིས་བཀའ་སྩལ་པ། བཅུ་ཞིང་གཅིག་ཏུ་བགོ་བར་བྱའོ། །བརྒྱ་ཞིང་གཅིག་ཏུའོ། །དེའི་འོག་ཏུ་སྟོང་ཞིང་གཅིག་ཏུ་རྙེད་པ་བགོ་བར་བྱོས་ཤིག །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་གལ་ཏེ་བཅུའི་ནང་ནས་གཅིག་དུས་ལས་འདས་ན་གུམ་པའི་ཡོ་བྱད་སུ་དབང་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཨུ་པཱ་ལི་དེ་སྟེ་བགོ་བའི་ཚེ་དུས་འདས་ན་ཤི་བའི་ཡོ་བྱད་དགེ་འདུན་འདུས་པ་་་དབང་གིས་སྤྱིར་གོས་ཤིག །འོན་ཏེ་བགོས་ནས་དུས་འདས་ན་ནི་དགུ་པོ་རྣམས་ཀྱིས་འཐོབ་བོ། །དེ་བཞིན་དུ་བརྒྱད་སྟོང་སྡེ་རྣམས་ལ་ཡང་སྦྱར་བར་བྱའོ། །གླེང་གཞིའི་སྒོ་ལྔ་པའི་མདོའི་ཚིགས་སུ་བཅད་པ་དྲུག་པའོ།། །།གླེང་གཞིའི་སྒོ་ལྔ་པ་རྫོགས་ཏེ། གླེང་གཞི་རྣམས་རྫོགས་སྷོ།། །།