གླེང་གཞིའི་སྒོ་དང་པོ་བཤད་པ།
སྒོ་རྣམས་ཀྱི་མདོ་བསྡུས་པ་སྟེ། བསྙེན་པར་རྫོགས་པ་དང་པོ་དང་། །སོ་སོར་ཕྱེ་དང་དཀྱིལ་འཁོར་དང་། །དེ་བཞིན་སྒོ་ལེབ་བྱང་སེམས་ཏེ། །གླེང་གཞི་རྣམས་ནི་འདིར་བསྡུས་སོ། །མདོར་བསྡུས་པ་སྟེ། བསྙེན་པར་རྫོགས་དང་ལྷག་པ་དང་། །ཡོངས་སུ་དག་དང་བསྐོར་བ་ས། །ཕྱེད་དང་
གསུམ་དང་སྡེ་དག་དང་། །ཆད་པ་དག་ཀྱང་དེ་བཞིན་ནོ། །བླངས་པ་དང་ནི་ཤ་རྗེན་དང་། །བསྡུས་པ་རྣམས་ཀྱི་མདོར་བཤད་པའོ། །མདོར་ན། བསྙེན་པར་རྫོགས་པར་བྱེད་པ་ན། །བུད་མེད་སྐྱེས་པ་མངོན་དུ་གནས། །རབ་ཏུ་མ་བྱུང་བསྙེན་པར་རྫོགས། །བར་ཆད་དག་ཀྱང་རྣམ་པ་བཞི། །མཁན་པོ་མེད་དང་བྱ་རོག་དང་། །དང་པོའི་སྡེར་ཡང་བརྗོད་པ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་་་བཞུགས་པའི་ཚེ་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བསྙེན་པར་རྫོགས་པའི་ཚེ་མཚན་འཕོས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། ཨུ་པཱ་ལི་བསྙེན་པར་ནི་རྫོགས་མོད་ཀྱི་དགེ་སློང་མའི་ནང་དུ་ནི་ཐོང་ཤིག །བཙུན་པ་དགེ་སློང་དག་གིས་བུད་མེད་སྐྱེས་པ་འདྲ་བ་སྐྱེས་པའི་དབྱངས་ཅན། སྐྱེས་པའི་སྐད་དུ་སྨྲ་བ། སྐྱེས་པའི་སྒྲ་ཅན། སྐྱེས་པའི་དབྱིབས་ལྟ་བུ་ཞིག་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པར་འགྱུར་རོ། །བཙུན་པ་སྐྱེས་པ་ཞིག་ལས་བུད་མེད་འདྲ་བ། བུད་མེད་ཀྱི་དབྱངས་ཅན། བུད་མེད་ཀྱི་སྐད་དུ་སྨྲ་བ། བུད་མེད་ཀྱི་སྒྲ་ཅན། བུད་མེད་ཀྱི་དབྱིབས་ལྟ་བུ་ཞིག་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པར་འགྱུར་རོ། །བཙུན་པ་རབ་ཏུ་མ་བྱུང་བར་དགེ་སློང་དག་གིས་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པར་འགྱུར་རོ། །བཙུན་པ་བསྙེན་པར་
མ་རྫོགས་པར་མཁན་པོ་བགྱིས་ཏེ། དགེ་སློང་དག་གིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པར་འགྱུར་རོ། །བཙུན་པ་བར་ཆད་ཀྱི་ཆོས་དང་ལྡན་ལ་བདག་བར་ཆད་ཀྱི་ཆོས་དང་ལྡན་ནོ་ཞེས་མཆི་བཞིན་དུ་དགེ་སློང་དག་གིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ཡང་མ་རྫོགས་ལ་བསྙེན་པར་རྫོགས་པར་བྱེད་པ་ཡང་འདས་པ་དང་བཅས་པར་འགྱུར་རོ། །བཙུན་པ་བར་ཆད་ཀྱི་ཆོས་དང་མི་ལྡན་ལ་བདག་བར་ཆད་ཀྱི་ཆོས་དང་ལྡན་ནོ་ཞེས་མཆི་བ་ཞིག་དགེ་སློང་དག་གིས་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་དེ་དག་ནི་འདས་པ་དང་བཅས་པར་འགྱུར་རོ། །བཙུན་པ་བར་ཆད་ཀྱི་ཆོས་དང་ཡང་མི་ལྡན་ལ་བདག་བར་ཆད་ཀྱི་ཆོས་དང་མི་ལྡན་ནོ་ཞེས་མཆི་བ་ཞིག་དགེ་སློང་དག་གིས་་་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ཡང་རྫོགས་ལ་བསྙེན་པར་་རྫོགས་པར་བྱེད་པ་ལ་ཡང་འདས་པ་དང་བཅས་པར་མི་འགྱུར་རོ། །བཙུན་པ་མཁན་པོ་མ་མཆིས་བཞིན་དུ་དགེ་སློང་དག་གིས་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ནི་རྫོགས་མོད་ཀྱི་བསྙེན་པར་རྫོགས་པར་བྱེད་པ་དག་ནི་འདས་པ་དང་བཅས་པར་འགྱུར་རོ། །བཙུན་པ་མཁན་པོ་དང་ལྡན་པར་དགེ་སློང་དག་གིས་བསྙེན་པར་རྫོགས་པར་བགྱིས་ན་དེ་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་པཱ་ལི་བསྙེན་པར་ཡང་རྫོགས་ལ་བསྙེན་པར་རྫོགས་པར་བྱེད་པ་ལ་ཡང་འདས་པ་དང་བཅས་པར་མི་འགྱུར་རོ། །
སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ལོ་བདུན་ལོན་ལ་བྱ་རོག་སྐྲོད་ནུས་ན་རབ་ཏུ་ཕྱུང་ཤིག་ཅེས་་་གསུངས་ན། བཙུན་པ་ལོ་དྲུག་ལོན་པ་དེ་ཡང་དགེ་འདུན་གྱི་སྐོ་སར་བྱ་རོག་ཀྱང་སྐྲོད་ནུས་ན་དེ་རབ་ཏུ་དབྱུང་བར་བགྱིའམ། རབ་ཏུ་མི་དབྱུང་བར་བགྱི། ཨུ་པཱ་ལི་ལོ་བདུན་ལོན་པར་བྱ་བའི་ཕྱིར་ཏེ་རབ་ཏུ་དབྱུང་བར་མི་བྱའོ། །བཙུན་པ་ལོ་བདུན་ནི་ལོན་ལ་དགེ་འདུན་གྱི་སྐོ་ས་ནས་བྱ་རོག་སྐྲོད་མི་ནུས་ན་དེ་ཡང་རབ་ཏུ་དབྱུང་བར་བགྱིའམ། ཨུ་པཱ་ལི་བྱ་རོག་སྐྲོད་ནུས་པར་བྱ་བའི་ཕྱིར་ཏེ། རབ་ཏུ་དབྱུང་བར་མི་བྱའོ། །གླེང་གཞིའི་ནང་ན་སྒོ་ཐོག་མའི་མདོའི་ཚིགས་སུ་བཅད་པ་དང་པོའོ།། །།མདོར་ན། བྲམ་ཟེ་དང་ཡང་ཉིན་པར་དང་། །དཀོར་བ་ཚེས་གྲངས་དེ་བཞིན་ཏེ། །ལྷག་མ་དག་དང་ལོ་དྲུག་དང་། །དྲུག་ཏུ་བྱ་དང་བཅུ་བཞི་དང་། །ཤོལ་བའི་ཟླ་བར་སྦྱར་བ་སྟེ། །འདྲི་བ་རྣམས་ལའང་དེ་བཞིན་བྱ། །དགེ་སློང་འཁོད་པའི་གནས་ན་ནི། །བསླབ་པ་བྱིན་པས་བཀླག་པར་བྱའོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ། བྲམ་ཟེ་དང་ཁྱིམ་བདག་རྣམས་དགེ་སློང་་དག་གི་གན་དུ་འོངས་ནས། འཕགས་པ་དེ་རིང་ཚེས་གྲངས་དུ་ཞེས་དྲིས་པ་དང་། དེ་དག་གིས་སྨྲས་པ་ཀྱེ་མི་ཤེས་སོ། །བྲམ་ཟེ་དང་ཁྱིམ་བདག་དག་གིས་སྨྲས་པ། མུ་སྟེགས་ཅན་གྱིས་ཀྱང་ཚེས་གྲངས་དང་། ཉི་མ་དང་། སྐར་མ་དང་། ཡུད་ཙམ་ཡང་ཤེས་ན། ཁྱེད་ཅག་རབ་ཏུ་བྱུང་ན་ཚེས་གྲངས་ཙམ་ཡང་མི་ཤེས་སམ། དེ་དག་ལན་མེད་ནས་ཅང་མི་ཟེར་བར་འདུག་གོ །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་ཚེས་གྲངས་བགྲང་བར་ངས་རྗེས་སུ་གནང་ངོ་ཞེས་གསུངས་པ་དང་། དགེ་སློང་ཐམས་ཅད་ཀྱང་བགྲང་བ་ལ་ཞུགས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་
ལྡན་འདས་ཀྱིས་བཀའ་སྩལ་པ། ཐམས་ཅད་ཀྱིས་མ་བགྲང་བར་དགེ་འདུན་གྱི་གནས་བརྟན་དང་། གཙུག་ལག་ཁང་སྐྱོང་གཉིས་ཀྱིས་གྲོངས་ཤིག །དགེ་འདུན་གྱི་གནས་བརྟན་དང་། ཁང་སྐྱོང་གཉིས་ཀྱིས་ཀྱང་མ་དྲན་ནས་དེ་དག་ཉེས་པའི་དམིགས་སུ་གྱུར་པ་དང་། དེ་ལྟར་གྱུར་པ་དགེ་སློང་དག་གིས། བཅོམ་ལྡན་འདས་ལ་གསོལ་པ་དང་། འཇིམ་པའི་རིལ་བུ་བཅོ་ལྔ་བྱོས་ལ་སྲད་བུ་ལ་བརྒྱུས་ཏེ་ཞོག་ལ་ཉིན་རེ་རེ་ཞིང་དྲང་བར་གྱིས་ཤིག །སྲད་བུ་འཕྱོངས་པར་གྱུར་པ་དང་། བཅོམ་ལྡན་འདས་ཀྱིས་འོད་མའི་བྱང་བུ་བཅོ་ལྔ་བྱོས་ལ་སྲད་བུ་ལ་བརྒྱུས་ཏེ་ཞོག་ལ་དེ་ལ་ཉིན་གཅིག་རེ་རེ་བཞིན་དྲོངས་ཤིག་ཅེས་་་གསུངས་པ་དང་། དགེ་སློང་ཐམས་ཅད་ཀྱིས་དེ་བཞིན་དྲངས་པ་དང་། དྲན་པ་ཉམས་པར་གྱུར་ཏེ། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གནས་བརྟན་གྱིས་དྲང་བར་གྱིས་ཤིག །བྲམ་ཟེ་དང་ཁྱིམ་བདག་དག་གིས་ཀྱང་དེར་འོངས་ནས་འཕགས་པ་དེ་རིང་ཚེས་གྲངས་དུ་ཞེས་དྲིས་པ་དང་། དགེ་སློང་དག་གིས་དགེ་འདུན་གྱི་གནས་བརྟན་དང་། ཁང་སྐྱོང་གིས་ཤེས་སོ་ཞེས་དེར་གཏད་པ་དང་། དེ་དག་གིས་སྨྲས་པ། འཕགས་པ་དེ་དག་ཁྱེད་ཀྱི་ཚེས་གྲངས་ཀྱི་མཛོད་པ་ཡིན་ནམ། ཁྱེད་ལ་དྲིས་ན་ཅིའི་ཕྱིར་གཞན་ལ་གཏོད། ཁྱེད་ཅག་ཉིད་ཀྱིས་སྨྲོས་ཤིག །དེ་དག་ལ་ལན་མེད་ནས་ཅང་མི་ཟེར་བར་་་འཁོད་དོ། །བྲམ་ཟེ་དང་ཁྱིམ་བདག་རྣམས་འཕྱ་ཞིང་གཙུག་ལག་ཁང་ནས་བྱུང་སྟེ་དོང་ངོ་། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ། བྲམ་ཟེ་དང་ཁྱིམ་བདག་དག་འཕྱ་བ་ནི་ཡུས་ཏེ། དེ་བས་ན་དགེ་འདུན་གྱི་ནང་དུ་ཚེས་གྲངས་བརྗོད་པར་བྱའོ་སྙམ་དུ་དགོངས་ནས། དགེ་སློང་རྣམས་ལ་བཀའ་སྩལ་པ། བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཀྱིས། དེ་ལྟ་བས་ན་དགེ་འདུན་གྱི་ནང་དུ་ཚེས་གྲངས་བརྗོད་པར་གྱིས་ཤིག །བཅོམ་ལྡན་འདས་ཀྱིས་དགེ་འདུན་གྱི་ནང་དུ་ཚེས་གྲངས་བརྗོད་པར་གྱིས་ཤིག་ཅེས་བཀའ་སྩལ་པ་དང་།
དགེ་སློང་རྣམས་ཀྱིས་དགེ་འདུན་གྱི་ནང་དུ་ཚེས་གྲངས་བརྗོད་ཀྱིས་ཟླ་བ་ཕྱེད་པོ་འཛིན་པར་མི་བྱེད་དོ། །ཁྱིམ་བདག་དང་བྲམ་ཟེ་དག་གིས་སྨྲས་པ། འཕགས་པ་ཁྱེད་ཀྱིས་ཟླ་བ་ཕྱེད་པོ་གཟུང་བ་ཡང་མི་ཤེས་ཏེ། དེ་ལྟར་མ་བཟུང་ན་ཡར་གྱི་ཟླ་བ་ཕྱེད་དང་། མར་གྱི་ཟླ་བ་ཕྱེད་པོ་ཇི་ལྟ་བུར་ཤེས་པར་འགྱུར། དེ་དག་ལན་མེད་ནས་ཅང་མི་སྨྲ་བར་འཁོད་དོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཟླ་བ་ཕྱེད་པོ་ཟུང་ལ་ཚེས་གྲངས་བརྗོད་པར་བྱའོ། །བརྗོད་པ་ནི་འདི་བཞིན་དུ་བརྗོད་པར་བྱ་སྟེ། དགེ་འདུན་ཐམས་ཅད་འདུས་ཤིང་འཁོད་པ་དང་། དགེ་སློང་གཅིག་གིས་རྒན་རིམས་ཀྱི་དང་པོར་འདུག་ལ་རིམ་གྲོ་དང་བཅས་པས་ཐལ་མོ་སྦྱར་ལ་ཚིག་འདི་་་སྐད་དུ་སྨྲོས་ཤིག །དེ་རིང་ནི་ཟླ་བ་མར་གྱི་ཚེས་གཅིག་སྟེ། གཙུག་ལག་ཁང་གི་བདག་པོ་དང་ལྷ་རྣམས་ཀྱི་ཕྱིར་ཚིགས་སུ་བཅད་པ་རེ་རེ་རྗོད་ཅིག །དགེ་སློང་རྣམས་ཀྱིས་ཚེས་གྲངས་ནི་བརྗོད་ཀྱིས། གཙུག་ལག་ཁང་གི་བདག་པོའི་མིང་ནས་མ་སྨོས་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཙུག་ལག་ཁང་གི་བདག་པོའི་མིང་ནས་ཀྱང་བརྗོད་པར་བྱའོ། །འདི་སྐད་དུ་སྦྱིན་བདག་མིང་འདི་ཞེས་བྱ་བས་སང་དགེ་སློང་གི་དགེ་འདུན་རྣམས་བཤོས་ལ་སྤྱན་དྲངས་་་ཀྱིས། དེ་ལ་བཙུན་པ་རྣམས་ཀྱིས་དགེ་བའི་ཡིད་ཀྱིས་བརྩེ་བར་མཛོད་ཅིག །གཙུག་ལག་ཁང་གི་བདག་པོ་ལ་ཇི་ལྟ་བ་གཞན་ཡང་སྦྱིན་པར་བྱེད་པ་དང་། སྦྱིན་པའི་བདག་པོ་ལ་ཡང་དགེ་བའི་ཡིད་ཀྱིས་བརྩེ་བར་མཛོད་ཅིག །ཇི་ལྟར་དགེ་བའི་ཡིད་ཀྱིས་བརྩེ་བར་མཛད་པས་ན། དེའི་དགེ་བའི་ཆོས་རྣམས་འཕེལ་བར་འགྱུར་གྱིས་འགྲིབ་པར་མི་འགྱུར་རོ། །དེ་བཞིན་དུ་གཞན་ཡང་དེ་ན་རྐྱེན་དུ་གནས་པའི་སེམས་ཅན་ཐམས་ཅད་ལ་ཡང་སོ་སོའི་མིང་ནས་བརྗོད་པར་བྱའོ། །དགེ་སློང་དག་གིས་ཀྱང་ཚིག་ཐམས་ཅད་རྫོགས་པའི་རྗེས་ལ་སོ་སོ་ནས་ཚིགས་སུ་བཅད་པ་རེ་རེ་ལྷོགས་ཤིག །བྲམ་ཟེ་དང་ཁྱིམ་བདག་དག་ཀྱང་དེར་འོངས་ནས། འཕགས་པ་དེ་
རིང་ཚེས་དུ་ཞེས་དྲིས་པ་དང་། དེ་དག་གིས་སྨྲས་པ། ཀྱེ་དེང་ནི་བཅོ་ལྔའོ། །བྲམ་ཟེ་དང་ཁྱིམ་བདག་གིས་སྨྲས་པ། འཕགས་པ་འཇིག་རྟེན་པ་ཐམས་ཅད་ཀྱི་ནི་དེ་རིང་བཅུ་བཞི་ན་ཁྱེད་ཅག་གི་ཇི་ལྟར་ན་བཅོ་ལྔ། ཅི་ཁྱེད་ཅག་ཞག་འདུམས་པར་མི་བྱེད་དམ། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཞག་འདུམས་པར་ཡང་བྱོས་ཤིག །བཅོམ་ལྡན་འདས་ཀྱིས་ཞག་འདུམས་པར་བྱོས་ཤིག་ཅེས་གསུངས་པ་དང་། དགེ་སློང་དག་ཟླ་བ་ཕྱེད་ཕྱེད་ཅིང་ཞག་་འདུམས་པར་བྱེད་དོ། །བྲམ་ཟེ་དང་ཁྱིམ་བདག་དག་ཀྱང་དེར་ལྷགས་ནས། འཕགས་པ་དེ་རིང་ཚེས་གྲངས་དུ་ཞེས་དྲིས་པ་དང་། དགེ་སློང་དག་གིས་སྨྲས་པ། ཀྱེ་དེ་རིང་ངེད་ཀྱི་བཅུ་བཞིའོ། །དེ་དག་གིས་ཡང་སྨྲས་པ། འཕགས་པ་དེ་རིང་འཇིག་རྟེན་པ་ཐམས་ཅད་ཀྱི་ནི་བཅོ་ལྔ་ན་ཁྱེད་ཅག་གི་ཇི་ལྟར་བཅུ་བཞི། ཅི་ཁྱེད་ཅག་ཟླ་བ་ཕྱེད་ཕྱེད་ཅིང་ཞག་རེ་འདུམས་པར་བྱེད་དམ། དེ་དག་གིས་སྨྲས་པ། འདུམས་པར་བྱེད་དོ། །བྲམ་ཟེ་དང་ཁྱིམ་བདག་དག་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཏེ། དེ་ལྟ་བས་ན་ཟླ་བ་ཕྱེད་ཕྱེད་ཅིང་ཞག་འདུམས་པར་མ་བྱེད་ཅིག །དུས་གཅིག་གི་ཟླ་བ་ཕྱེད་དང་གཉིས་འདས་ཤིང་ཞག་འདུམས་པར་བྱོས་ཤིག །དེ་ལྟར་ན་ལོ་གཅིག་ལ་གསོ་སྦྱིན་བཅུ་བཞི་པ་ནི་དྲུག་གོ །དེའི་ལྷག་མ་རྣམས་ནི་བཅོ་ལྔ་པའོ། །དེ་ནས་ཡང་བྲམ་ཟེ་དང་ཁྱིམ་བདག་རྣམས་ལྷགས་ནས། འཕགས་པ་ད་ལྟར་གྱི་ཟླ་བ་འདི་ཁྱེད་ཀྱི་གང་ཞེས་དྲིས་པ་དང་། དགེ་སློང་དག་གིས་སྨྲས་པ། ཀྱེ་ངེད་ཀྱི་ནི་འདི་དབྱར་ཟླ་ཐ་ཆུངས་སོ། །དེ་དག་གིས་སྨྲས་པ། འཕགས་པ་འཇིག་རྟེན་ཐམས་ཅད་ཀྱི་ནི་ཟླ་བ་འདི་དབྱར་ཟླ་འབྲིང་པོ་ན་ཇི་ལྟར་ན་ཁྱེད་ཀྱི་དབྱར་ཟླ་ཐ་ཆུངས། ཅི་ཁྱེད་ཀྱིས་ཟླ་བ་ཤོལ་མ་བོར་རམ། དེ་དག་གིས་སྨྲས་པ། མ་བོར་རོ། །
བྲམ་ཟེ་དང་ཁྱིམ་བདག་དག་འཕྱ་བར་གྱུར་ནས། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྲམ་ཟེ་དང་ཁྱིམ་བདག་རྣམས་འཕྱ་བ་ནི་ཡུས་ཀྱིས། དེ་ལྟ་བས་ན་ཟླ་བ་ཤོལ་བོར་ཅིག །བཅོམ་ལྡན་འདས་ཀྱིས་ཟླ་བ་ཤོལ་བོར་ཅིག་ཅེས་གསུངས་པ་དང་། དགེ་སློང་དག་གིས་ལོ་རེ་རེ་ཞིང་ཤོལ་བོར་རོ། །བྲམ་ཟེ་དང་ཁྱིམ་བདག་རྣམས་ཡང་དེར་ལྷགས་ནས། འཕགས་པ་ད་ལྟར་གྱི་ཟླ་བ་འདི་ཁྱེད་ཀྱི་གང་ཞེས་དྲིས་པ་དང་། དགེ་སློང་དག་གིས་སྨྲས་པ། ཀྱེ་ངེད་ཅག་གི་ད་ལྟར་ནི་དབྱར་ཟླ་འབྲིང་པོའོ། །དེ་དག་གིས་ཡང་སྨྲས་པ། འཕགས་པ་འཇིག་རྟེན་པ་ཐམས་ཅད་ཀྱི་ནི་ཟླ་བ་འདི་དབྱར་ཟླ་ཐ་ཆུངས་ན། ཁྱེད་ཅག་གི་ཇི་ལྟར་དབྱར་ཟླ་འབྲིང་པོ། ཅི་ཁྱེད་ཅག་ལོ་རེ་རེ་ཞིང་ཤོལ་འདོར་རམ། དེ་དག་གིས་སྨྲས་པ། འདོར་རོ། །བྲམ་ཟེ་དང་ཁྱིམ་བདག་དག་འཕྱ་ནས་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་་་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱིམ་བདག་དང་བྲམ་ཟེ་རྣམས་འཕྱ་བ་ནི་ཡུས་ཀྱིས་དེ་ལྟ་བས་ན་ལོ་རེ་རེ་ཞིང་ཟླ་བ་ཤོལ་མ་འདོར་བར་ལོ་དྲུག་དྲུག་ཅིང་ཤོལ་བོར་ཅིག །དྲུག་ལྔ་སུམ་བཅུ་སྟེ། དེ་ལྟ་བུར་ཞག་དང་། ཟླ་བ་ཕྱེད་དང་། ཟླ་བ་དང་ལོར་བསྒྲེས་ན་མཉམ་པར་འགྱུར་ཏེ། མུ་སྟེགས་ཅན་གྱིས་གླགས་བཙལ་ཀྱང་གླགས་མི་རྙེད་པར་འགྱུར་རོ། །བཅོམ་ལྡན་འདས་ཀྱིས་ལོ་དྲུག་དྲུག་ཅིང་ཟླ་བ་ཤོལ་བོར་ཅིག་ཅེས་གསུངས་པ་དང་། དགེ་སློང་དག་གིས་ལོ་དྲུག་དྲུག་ཅིང་ཟླ་བ་ཤོལ་འདོར་རོ། །རྒྱལ་པོ་དག་ནི་ལོ་གསུམ་གསུམ་ཞིང་ཤོལ་འདོར་བར་བྱེད་དོ། །དགེ་སློང་དག་གིས་དེ་བཞིན་མ་བྱས་པ་དང་། བློན་པོ་དག་འཕྱ་བར་གྱུར་ནས་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བློན་པོ་རྣམས་འཕྱ་བ་ནི་ཡུས་ཏེ། དེ་ལྟ་བས་ན་རྒྱལ་པོའི་གཞུང་བཞིན་དུ་ཡང་གྱིས་ཤིག །སྐར་མ་མི་མཐུན་པར་
གྱུར་ཏེ། དགེ་སློང་དག་གིས་དེ་ལྟ་བུར་མི་སྦྱོར་བ་དང་། སྐར་མ་རྩི་བ་ལ་མཁས་པ་དག་དགེ་སློང་དག་ལ་འཕྱ་ནས་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་སྐར་མ་རྩི་བ་དག་འཕྱ་བ་ནི་ཡུས་ཏེ། དེ་ལྟ་བས་ན་སྐར་མ་རྩི་བའི་རྗེས་སུ་ཡང་འཇུག་པར་ཡང་བྱོས་ཤིག །གླེང་གཞིའི་ནང་ནས་སྒོ་དང་པོའི་ཚིགས་སུ་བཅད་པ་གཉིས་པའོ།། །།མདོར་ན། ཡོངས་སུ་དག་པ་གཉིས་བྱ་དང་། །མཚམས་ཀྱང་རྣམ་པ་བཞིར་བྱ་སྟེ། །དེ་བཞིན་དད་པ་ནམ་མཁའ་ལས། །མ་བཀྲོལ་བ་ཡང་སྔ་མ་བཞིན། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མཚམས་ཀྱི་ནང་ན་མཆིས་པས་མཚམས་ཀྱི་སླད་རོལ་ན་མཆིས་པ་རྣམས་ལ། ཡོངས་སུ་དག་པ་སྩལ་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་མཚམས་ཀྱི་སླད་རོལ་ན་མཆིས་པས་མཚམས་ཀྱི་ནང་ན་མཆིས་པ་ལ་ཡོངས་སུ་དག་པ་སྩལ་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་མཚམས་ཀྱི་ནང་ན་མཆིས་པས་མཚམས་ཀྱི་སླད་རོལ་ན་མཆིས་པའི་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་མཚམས་ཀྱི་སླད་རོལ་ན་མཆིས་པས་མཚམས་ཀྱི་ནང་ན་མཆིས་པའི་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ལས་བགྱིད་པ་མཚམས་ཀྱི་ནང་ན་མཆིས་བཞིན་དུ་མཚམས་ཀྱི་སླད་རོལ་ན་མཆིས་པ་རྣམས་ལ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ལས་བགྱིད་པ་མཚམས་ཀྱི་སླད་རོལ་ན་མཆིས་བཞིན་དུ་མཚམས་ཀྱི་ནང་ན་མཆིས་པ་རྣམས་ལ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དད་པ་ལེན་པའི་དགེ་སློང་གིས་དད་པ་བླངས་ནས་ནམ་མཁའ་ལ་མཆིས་ན་དད་པ་བླངས་པ་ཞེས་བགྱིའམ། མ་
བླངས་པ་ཞེས་བགྱི། ཨུ་པཱ་ལི་མ་བླངས་པ་སྟེ། གདོད་ལོང་ཤིག །བཙུན་པ་མཚམས་སྔ་མ་མ་བཀྲོལ་བར་སླད་མ་དགུམ་དུ་རུང་ངམ། ཨུ་པཱ་ལི་མི་རུང་ངོ་། །གླེང་གཞིའི་ནང་ནས་སྒོ་དང་པོའི་མདོའི་ཚིགས་སུ་བཅད་པ་གསུམ་པའོ།། །།འདུལ་བ་གཞུང་དམ་པ། བམ་པོ་སུམ་བཅུ་རྩ་གཅིག་པ། མདོར་ན། བསྐོར་བ་དང་ནི་འཇིག་པ་དང་། །ཤིང་དང་ས་ཡི་སྐྱེ་བ་དང་། །མི་འབྱུང་བ་དང་འབྱུང་བ་དང་། །འཆི་བ་ཡང་ནི་དེ་བཞིན་ནོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ་ན། སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མཚམས་ལ་མཚམས་ཀྱིས་བསྐོར་དུ་རུང་ངམ། ཨུ་པཱ་ལི་དཀྱིལ་འཁོར་དང་། ཆུས་བསྐོར་བ་དང་། དགེ་སློང་མའི་དབྱར་མོ་ཁང་མ་གཏོགས་པར་གཞན་མི་རུང་ངོ་། །མཚམས་ལ་མཚམས་ཀྱིས་གཞིག་ཏུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་རྣམ་པ་དུས་མཚམས་གཞིག་པར་འགྱུར། །ཨུ་པཱ་ལི་ལྔ་སྟེ། དགེ་འདུན་ཐམས་ཅད་ཀྱིས་བོར་ཏེ་དོང་བ་དང་། དགེ་འདུན་ཐམས་ཅད་མཚན་འཕོས་པ་དང་། དགེ་འདུན་ཐམས་ཅད་སླར་བབས་པ་དང་། དགེ་འདུན་ཐམས་ཅད་དུས་བྱས་པ་དང་། གསོལ་བའི་ལས་དང་ལྔའོ། །བཙུན་པ་ཤིང་གཅིག་ལས་གཙུག་ལག་ཁང་གཉིས་ཀྱི་མཚམས་དགུམ་དུ་རུང་ངམ། ཨུ་པཱ་ལི་རུང་ངོ་། །དེ་བཞིན་དུ་གཙུག་ལག་ཁང་གསུམ་མམ་བཞི་ཡང་རུང་སྟེ། ཤིང་ཉིད་ནི་གཅལ་བར་བྱོས་ཤིག །སངས་རྒྱས་བཅོམ་ལྡན་འདས་གཞོངས་ཀ་ཤིར་སྤྱད་པ་སྤྱོད་པ་ན་གནས་གཞན་ཞིག་ཏུ་འཛུམ་པ་མཛད་དོ། །ཆོས་ཉིད་ཀྱིས་ནམ་སངས་རྒྱས་བཅོམ་ལྡན་འདས་འཛུམ་པ་མཛད་པ་དེའི་ཚེ་འོད་སྔོན་པོ། སེར་པོ། དམར་པོ། དཀར་པོའི་རྣམས་ཞལ་ནས་འབྱུང་སྟེ། ཁ་ཅིག་ནི་འོག་ཏུ་འགྲོ། ཁ་ཅིག་ནི་སྟེང་དུ་འགྲོ། འོག་ཏུ་སོང་བ་དེ་རྣམས་ནི་སེམས་ཅན་དམྱལ་བ་ཡང་འཚོ་དང་། ཐིག་ནག་པོ་དང་། ཀུན་དམྱལ་དང་། འོ་དོད་འབོད་པ་དང་།
འོ་དོད་འབོད་པ་ཆེན་པོ་དང་། འཚིག་པ་དང་། རབ་ཏུ་འཚིག་པ་དང་། བསྟིར་མེད་པ་དང་། ཆུ་བུར་དང་། རྒྱུན་དུ་ཆུ་བུར་དང་། ཨ་ཏ་ཏ་དང་། ཧ་ཧ་པ་དང་། ཧུ་ཧུ་པ་དང་། ཨུཏྤལ་ལྟ་བུ་དང་། པད་མ་ལྟ་བུ་དང་། པད་མ་ཆེན་པོ་ལྟ་བུ་རྣམས་སུ་ཕྱིན་ནས། གང་ཚ་བའི་སེམས་ཅན་དམྱལ་བ་དེ་དག་ལ་བབ་ན་བསིལ་བར་གྱུར། གྲང་བའི་སེམས་ཅན་དམྱལ་བ་དེ་དག་ལ་བབ་ན་དྲོ་བར་གྱུར་ཏེ། དེས་སེམས་ཅན་དེ་དག་ལ་གནོད་པ་ནི་བདེ་བའི་ཁྱད་པར་དུ་གྱུར་པ་དང་། དེ་དག་འདི་སྙམ་དུ་ཀྱེ་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་བསམས་པ་དང་། དེ་དག་དད་པ་བསྐྱེད་པའི་ཕྱིར་བཅོམ་ལྡན་འདས་ཀྱིས་སྤྲུལ་པ་བཏང་ངོ་། །དེ་དག་གིས་སྤྲུལ་པ་མཐོང་བ་དང་འདི་སྙམ་དུ་ཀྱེ་བདག་ཅག་འདི་ནས་ཤི་འཕོས་པ་ཡང་མེད། གུད་དུ་སྐྱེས་པ་ཡང་མ་ཡིན་གྱི། སྔོན་མ་མཐོང་བའི་སེམས་ཅན་འདིའི་མཐུས་ན། བདག་ཅག་གནོད་པ་ལས་བདེ་བའི་ཁྱད་པར་དུ་གྱུར་ཏོ་སྙམ་བསམས་ནས་དེ་དག་སྤྲུལ་པ་ལ་སེམས་དད་པར་གྱུར་ནས། སེམས་ཅན་དམྱལ་བའི་གནོད་པའི་ལས་མེད་པར་གྱུར་ཏེ། གང་དུ་བདེན་པ་རྣམས་ཀྱི་སྣོད་དུ་གྱུར་པ་དེར་ལྷ་དང་མིའི་ནང་དུ་མཚམས་འཛིན་པར་གྱུར་ཏོ། །གང་སྟེང་དུ་སོང་བ་དེ་ནི་རྒྱལ་ཆེན་བཞིའི་ལྷ་དང་སུམ་བཅུ་རྩ་གསུམ་དང་། མཚེ་མ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་ལྷ་ཉེ་ཕན་དང་། ཚངས་ཆེན་དང་། སྣང་བ་དང་། ཚད་མེད་སྣང་བ་དང་། ཀུན་སྣང་དང་བ་དང་། ཆུང་དགེ་དང་། ཚད་མེད་དགེ་བ་དང་། དགེ་རྒྱས་དང་། སྤྲིན་མེད་དང་། བསོད་ནམས་འཕེལ་དང་། འབྲས་བུ་ཆེ་དང་། མི་ཆེ་བ་དང་། མི་གདུང་བ་དང་། ཤིན་ཏུ་མཐོང་བ་དང་། གྱ་ནོམ་སྣང་བ་དང་། འོག་མིན་ལ་སོགས་པར་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་བརྗོད་ཅིང་ཚིགས་སུ་བཅད་པ་གཉིས་ཀྱང་བརྗོད་དོ། །འབྱུང་བར་བྱ་ཕྱིར་
བརྩམ་པར་བྱོས། །སངས་རྒྱས་བསྟན་ལ་བརྩོན་པར་བྱོས། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་རྣམས་གཞོམ་པར་བྱོས། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་འབྱིན་པར་འགྱུར། །དེ་ནས་འོད་ཟེར་དེ་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་བསྐོར་་་ནས་སླར་བཅོམ་ལྡན་འདས་ཀྱི་སླད་བཞིན་དུ་འབྲང་ཞིང་དོང་ངོ་། །དེ་སྟེ་བཅོམ་ལྡན་འདས་ཀྱིས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་་་འདས་ཀྱི་སྣམ་ལོགས་སུ་མི་སྣང་བར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་དུ་མི་སྣང་བར་འགྱུར་རོ། །སེམས་ཅན་དམྱལ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་མི་སྣང་བར་འགྱུར་རོ། །བྱོལ་སོང་དུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་རྟིང་པར་མི་སྣང་བར་འགྱུར་རོ། །ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་མི་སྣང་བར་་་འགྱུར་རོ། །མིར་སྐྱེ་བར་ལུང་སྟོན་པར་བཞེད་ན་ནི་པུས་མོ་གཉིས་སུ་མི་སྣང་བར་འགྱུར་རོ། །སྟོབས་ཀྱི་འཁོར་ལོས་སྒྱུར་བར་ལུང་སྟོན་པར་བཞེད་ན་ནི་ཕྱག་གཡོན་པའི་མཐིལ་དུ་མི་སྣང་བར་འགྱུར་རོ། །འཁོར་ལོས་སྒྱུར་བའི་རྒྱལ་པོར་ལུང་སྟོན་པར་བཞེད་ན་ནི་ཕྱག་གཡས་པའི་མཐིལ་དུ་མི་སྣང་བར་འགྱུར་རོ། །ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་མི་སྣང་བར་འགྱུར་རོ། །ཉན་ཐོས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་ཞལ་དུ་མི་སྣང་བར་འགྱུར་རོ། །རང་བྱང་ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་མི་སྣང་བར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་གཙུག་ཏོར་དུ་མི་སྣང་བར་འགྱུར་རོ། །དེ་ནས་འོད་ཟེར་དེ་དག་བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ནས་བཅོམ་ལྡན་འདས་ཀྱི་གཙུག་ཏོར་དུ་མི་སྣང་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་གཉིས་སྦྱར་ཏེ། བཅོམ་ལྡན་
འདས་ལ་གསོལ་པ། ཁ་དོག་སྣ་ཚོགས་དུ་མ་སྟོང་། །ཞལ་ནས་བྱུང་བ་མང་པོ་སྟེ། །ཕྱོགས་ཀུན་དེས་ནི་སྣང་གྱུར་པ། །ཉི་མ་ཇི་ལྟར་ཤར་བ་བཞིན། །ཚིགས་སུ་བཅད་དེ་ཡང་སྨྲས་པ། རྒོད་དང་ཞུམ་ལས་རྣམ་བྲལ་ང་རྒྱལ་སྤངས། །སངས་རྒྱས་སྐྱེ་བོ་མཆོག་གི་རྒྱུར་གྱུར་པ། །རྐྱེན་མེད་དུང་དང་པད་མོའི་རྩ་ལྟར་དཀར། །རྒྱལ་བ་དགྲ་ཐུལ་འཛུམ་པ་ཉེ་བར་སྟོན་མི་མཛད། །དེ་ཚེ་རང་གིས་མཁྱེན་ཅིང་བློ་བརྟན་པ། །རྒྱལ་དབང་ཉན་པ་ཐོས་སུ་རེ་བའི་རྣམས། །ཐུབ་པའི་ཁྱུ་མཆོག་བརྟན་པའི་གསུང་རབ་ཀྱིས། །ཐེ་ཚོམ་སྐྱེས་པ་དགེ་བས་བསལ་བར་མཛོད། །རྒྱ་མཚོ་ལས་ནི་རི་རྒྱལ་བརྟན་པ་བཞིན། །ཡང་དག་མགོན་པོས་རྒྱུ་མེད་འཛུམ་མི་སྟེན། །བརྟན་པས་གང་ཕྱིར་འཛུམ་པ་ཉེར་བསྟན་པ། །དེ་ནི་སྐྱེ་བོ་མང་པོ་ཐོས་པར་འཚལ། །བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མ་་་མཆིས་རྐྱེན་མ་མཆིས་པར་འཛུམ་པར་མི་མཛད་ན། བཙུན་པ་ཅིའི་རྒྱུ་ཅིའི་རྐྱེན་གྱིས་ན་འཛུམ་པ་མཛད། ཀུན་དགའ་བོ་དེ་ནི་དེ་བཞིན་ནོ། དེ་ནི་དེ་བཞིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱུ་མེད་རྐྱེན་མེད་པར་འཛུམ་པ་མི་མཛད་དོ། །ཀུན་དགའ་བོ་ཕྱོགས་འདིར་ཡང་དག་པར་རྫོགས་པའི་སངས་རྒྱས་འོད་སྲུང་བཞུགས་ནས་ཆོས་བསྟན་ཏོ། །དེ་ནས་ཚེ་དང་ལྡན་པ་ཀུན་དགའ་བོ་རིངས་ཤིང་མྱུར་བར་སྟོད་གཡོགས་བཞི་་་ལྟབ་ཏུ་བལྟབ་སྟེ་བཏིང་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གདན་བཏིང་བ་འདི་ལ་བཞུགས་པར་གསོལ། གནས་འདིར་ཡང་དག་པར་རྫོགས་པའི་སངས་རྒྱས་འོད་སྲུང་དང་། ད་ལྟར་གྱི་བཅོམ་ལྡན་འདས་དང་ཡང་དག་པར་རྫོགས་པའི་སངས་རྒྱས་གཉིས་བཞུགས་པར་འགྱུར་རོ་ཞེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ལེགས་སོ་ཀུན་དགའ་བོ་ངས་མ་སྨྲས་པར་ཁྱོད་ཀྱིས་ཤེས་པ་ནི་ལེགས་སོ་ཞེས་
གསུངས་ནས་གདན་བཏིང་བ་དེ་ལ་བཞུགས་སོ། །བཞུགས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཕྱོགས་འདི་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་ངོ་། །འདི་ནི་འཆག་སའོ། །འདི་ནི་སྟེགས་བུའོ། །འདི་ནི་སྒོ་ཁང་ངོ་། །འདི་ནི་ཞབས་འཁྲུ་བའི་སའོ། །འདི་ནི་བསྲོ་ཁང་ངོ་། །འདི་ནི་རུང་བའི་ཁང་པའོ། །འདི་ནི་དུགས་ཁང་ངོ་། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་རུང་བའི་ས་ཞེས་ཀྱང་བགྱི་མི་རུང་བའི་ས་ཞེས་ཀྱང་བགྱི་ན། བཙུན་པ་ཇི་ཙམ་གྱིས་ན་རུང་བའི་སར་རིག་པར་བགྱི། ཨུ་པཱ་ལི་དམ་པའི་ཆོས་ཡོད་པའི་ཚེ་རུང་བ་དང་མི་རུང་བར་འགྱུར། དམ་པའི་ཆོས་ཞིག་པར་གྱུར་ན་ཐམས་ཅད་ཀྱང་རུང་བའོ། །བཙུན་པ་ཇི་ཙམ་གྱིས་ན་དམ་པའི་ཆོས་མཆིས་པ་ཞེས་བགྱི། ཇི་ཙམ་གྱིས་ན་ཞིག་པ་ཞེས་བགྱི། ཨུ་པཱ་ལི་ཇི་སྲིད་དུ་ལས་བྱེད་ཅིང་ནན་ཏན་བྱེད་པ་ཡང་ཡོད་པའི་བར་དུ་སྟེ། ལས་བྱེད་ལ་ནན་ཏན་བྱེད་པ་ཡང་ཡོད་ན་དམ་པའི་ཆོས་ཡོད་པ་ཞེས་བྱའོ། །ལས་ཀྱང་མི་བྱེད་ལ་ནན་ཏན་བྱེད་པ་དག་ཀྱང་མེད་ན་དེ་ནི་དམ་པའི་ཆོས་ཞིག་པ་ཞེས་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མཚམས་ཀྱི་ནང་ན་རྒྱལ་བ་བཞུགས་བཞིན་ལས་བགྱིར་རུང་ངམ། ཨུ་པཱ་ལི་རུང་ངོ་། །རྒྱལ་བས་གྲངས་སུ་བསྐངས་ལ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དེ་ཅིའི་ཕྱིར་ཞེ་ན། ཨུ་པཱ་ལི་སངས་རྒྱས་དཀོན་མཆོག་ཀྱང་གཞན། དགེ་འདུན་དཀོན་མཆོག་ཀྱང་གཞན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མི་བསྐྱེད་པའི་མཚམས་བསྐྱེད་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་ཇི་ཙམ་གྱིས་ན་མཚམས་བསྐྱེད་དུ་མི་རུང་བ་ཞེས་བགྱི། ཨུ་པཱ་ལི་གསུམ་གྱིས་ཏེ། དཀྱིལ་འཁོར་དང་། ཆུས་བསྐོར་བ་དང་། མཚམས་ཀྱི་ནང་ངོ་། །བཙུན་པ་ཆུ་ཀླུང་འབབ་པའི་ཕ་རོལ་ཏུ་མཚམས་དགུམ་དུ་དུང་
ངམ། ཨུ་པཱ་ལི་མི་རུང་ངོ་། །དེ་སྟེ་ཟམ་པ་བརྟན་པོ་ཞིག་ཡོད་ན་རུང་ངོ་། །དེ་སྟེ་བཙུན་པ་ཟམ་པ་ཆད་དམ་ཞིག་པར་གྱུར་ན། ཇི་ཙམ་གྱིས་ན་མི་འཇིག་པ་ཞེས་བགྱི། ཨུ་པཱ་ལི་སླར་ཡང་བཅིང་བར་བྱ་བའི་སེམས་ཡོད་ན་ཞག་བདུན་དུ་འཇིག་པར་མི་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་གིས་མཚམས་འགུམ་པའི་ཚེ་ལས་བྱེད་པའི་དགེ་སློང་གུམ་སྟེ། དུས་བགྱིས་ན་བཀུམ་པ་ཞེས་བགྱིའམ་མ་བཀུམ་པ་ཞེས་བགྱི། ཨུ་པཱ་ལི་མཚན་མ་རྣམས་བརྗོད་ལ་ལས་ཀྱང་མང་དུ་བྱས་ན་བཅད་པ་ཞེས་བྱའོ། །བཟློག་པ་ནི་མ་བཅད་པའོ། །བཙུན་པ་དགེ་སློང་མའི་མཚམས་གཅོད་པའི་ཚེ་ལས་བགྱིད་པའི་དགེ་སློང་མ་གུམ་སྟེ། དུས་བགྱིས་ན་བཀུམ་པ་ཞེས་བགྱིའམ་མ་བཀུམ་པ་ཞེས་བགྱི། དེ་སྟེ་ཨུ་པཱ་ལི་མཚན་མ་རྣམས་བརྗོད་ལ་ལས་ཀྱང་མང་དུ་བྱས་ན་བཅད་པ་ཞེས་བྱའོ། །བཟློག་པ་ནི་མ་བཅད་པ་ཞེས་བྱའོ། །གླེང་གཞིའི་ནང་ནས་སྒོ་དང་པོའི་མདོའི་ཚིགས་་་་སུ་བཅད་པ་བཞིའོ།། །།མདོར་ན། ས་དང་ནམ་མཁར་ལས་བྱ་བ། །མཚམས་དང་ཡོངས་སུ་དག་པ་དང་། །གནས་གཅིག་འདུག་པའི་དགེ་སློང་གིས། །ལས་རྣམས་ཀུན་ལ་བལྟ་བ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ་སངས་རྒྱས་བཅོམ་ལྡན་་་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་ས་ལ་མཆིས་པ་དག་གིས་ས་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་པ་ནི་རུང་སྟེ། དེ་སྟེ་ས་ལ་གནས་པས་གྲངས་སུ་ཚང་ལ་ས་ལ་གནས་པའི་རྣམས་ལས་དད་པ་ཡང་བླངས་པར་གྱུར་པའོ། །བཙུན་པ་ས་ལ་མཆིས་པས་རྩིག་པ་ལ་མཆིས་པ་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་པ་ནི་རུང་སྟེ། དེ་སྟེ་ས་ལ་གནས་པ་དག་མང་པོར་ཚང་ལ་རྩིག་པ་ལ་གནས་པའི་རྣམས་ལས་དད་པ་ཡང་
བླངས་པར་གྱུར་པའོ། །ས་ལ་མཆིས་པ་དག་གིས་ཤིང་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་པ་ནི་རུང་སྟེ། དེ་སྟེ་ས་ལ་གནས་པ་དག་མང་པོར་ཚང་ལ་ཤིང་ལ་གནས་པ་རྣམས་ལས་དད་པ་ཡང་་བླངས་པར་གྱུར་པའོ། །བཙུན་པ་ས་ལ་མཆིས་པ་དག་གིས་ནམ་མཁའ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་རྩིག་པའི་སྟེང་ན་མཆིས་པ་དག་གིས་རྩིག་པའི་སྟེང་ན་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་ན་རུང་སྟེ། དེ་སྟེ་རྩིག་པའི་སྟེང་ན་གནས་པ་དག་གྲངས་སུ་ཚང་ལ་རྩིག་པའི་སྟེང་ན་གནས་པའི་རྣམས་ལས་དད་པ་ཡང་བླངས་པར་གྱུར་པའོ། །བཙུན་པ་རྩིག་པའི་སྟེང་ན་མཆིས་པ་དག་གིས་ས་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་པ་ནི་རུང་སྟེ། དེ་སྟེ་རྩིག་པའི་སྟེང་ན་གནས་པ་དག་གིས་གྲངས་སུ་ཚང་ལ་ས་ལ་གནས་པའི་རྣམས་ལས་དད་པ་ཡང་བླངས་པར་གྱུར་ནའོ། །བཙུན་པ་རྩིག་པའི་སྟེང་ན་མཆིས་པ་དག་གིས་ཤིང་གི་སྟེང་ན་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་ན་རུང་སྟེ། དེ་སྟེ་རྩིག་པ་ལ་གནས་པ་དག་གྲངས་སུ་ཚང་ལ་ཤིང་གི་སྟེང་ན་གནས་པ་རྣམས་ལས་དད་པ་ཡང་བླངས་པར་གྱུར་པའོ། །བཙུན་པ་རྩིག་པའི་སྟེང་ན་མཆིས་པ་དག་གིས་ནམ་མཁའ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ཤིང་ལ་མཆིས་པ་དག་གིས་ཤིང་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་བྱིན་ན་རུང་སྟེ། དེ་སྟེ་ཤིང་ལ་གནས་པ་དག་གྲངས་སུ་བསྐངས་ལ་ཤིང་ལ་གནས་པའི་རྣམས་ལས་དད་པ་ཡང་བླངས་པར་གྱུར་པའོ། །ཤིང་ལ་མཆིས་པ་དག་གིས་ས་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དད་པ་
བྱིན་ན་རུང་སྟེ། དེ་སྟེ་ཤིང་ལ་གནས་པ་དག་གིས་གྲངས་སུ་བསྐངས་ལ་ས་ལ་གནས་པ་རྣམས་ལས་དད་པ་ཡང་བླངས་པར་གྱུར་པའོ། །བཙུན་པ་ཤིང་ལ་གནས་པ་དག་གིས་རྩིག་པ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །དེ་སྟེ་ཤིང་ལ་གནས་པ་དག་གིས་གྲངས་སུ་བསྐངས་ལ་ས་ལ་གནས་པའི་རྣམས་ལས་དད་པ་ཡང་བླངས་པར་གྱུར་ནའོ། །བཙུན་པ་ཤིང་ལ་མཆིས་པ་དག་གིས་ནམ་མཁའ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་མཆིས་པ་དག་གིས་ནམ་མཁའ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་མཆིས་པ་དག་གིས་ས་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་མཆིས་པ་དག་གིས་རྩིག་པ་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་་་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་མཆིས་པ་དག་གིས་ཤིང་ལ་མཆིས་པ་དག་དང་ལྷན་ཅིག་ཏུ་ལས་བགྱིར་རུང་ངམ། ཨུ་པཱ་ལི་མི་རུང་ངོ་། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་འདུལ་བ་འདིའི་དཀྱིལ་འཁོར་ལས་ལས་བརྒྱ་རྩ་གཅིག་ཏུ་གསུངས་པ། བཙུན་པ་ལས་བརྒྱ་རྩ་གཅིག་པ་དེའི་ནང་ནས་ལས་དུས་ན་དད་པ་དང་བཅས་པར་འགྱུར། དུས་ན་དད་པ་མ་མཆིས་པར་འགྱུར། ཨུ་པཱ་ལི་ཐམས་ཅད་ཀྱང་དད་པ་དང་བཅས་པ་སྟེ། མཚམས་བཅད་པ་ནི་མ་གཏོགས་སོ། །བཙུན་པ་རྫུ་འཕྲུལ་ལམ་སྒྱུ་མས་མཚམས་དགུམ་དུ་རུང་ངམ། ཨུ་པཱ་ལི་མི་རུང་སྟེ། དེ་ཅིའི་ཕྱིར་ཞེ་ན། ཨུ་པཱ་ལི་རྫུ་འཕྲུལ་དང་སྒྱུ་མ་ལ་ནི་ཐ་སྙད་དུ་གདགས་པ་མེད་དོ། །བཙུན་པ་གཟའ་དང་། འོད་ཟེར་དང་། ཉི་མ་དང་། ཟླ་བ་དང་། སྐར་མ་རྣམས་ཀྱིས་མཚམས་དགུམ་དུ་རུང་ངམ།
ཨུ་པཱ་ལི་མི་རུང་སྟེ། དེ་ཅིའི་ཕྱིར་ཞེ་ན། ཨུ་པཱ་ལི་གཟའ་དང་། འོད་ཟེར་དང་། ཉི་མ་དང་། ཟླ་བ་དང་། སྐར་མ་རྣམས་མི་བརྟན་པའི་ཕྱིར་རོ། །བཙུན་པ་ཆུ་རླབས་ཀྱིས་མཚམས་དགུམ་དུ་རུང་ངམ། ཨུ་པཱ་ལི་མི་རུང་སྟེ། དེ་ཅིའི་ཕྱིར་ཞེ་ན། ཨུ་པཱ་ལི་ཆུ་རླབས་ནི་མི་བརྟན་པའི་ཕྱིར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་ཡོངས་སུ་དག་པ་ལེན་པའི་དགེ་སློང་གིས་ཡོངས་སུ་དག་པ་བླངས་ནས་སྟེང་གི་ནམ་མཁའ་ལས་མཆིས་ན་དེས་ཡོངས་སུ་དག་པ་བླངས་པ་ཞེས་བགྱིའམ། ཨུ་པཱ་ལི་མ་བླངས་པ་སྟེ། གདོད་བླང་དགོས་སོ། །བཙུན་པ་ལས་བགྱིད་པ་གཅིག་གིས་ལས་ཀྱི་ཚིག་ཀྱང་གཅིག་གསོལ་བ་ཡང་གཅིག་གིས་གནས་བཞིར་སྡེ་བཞི་ལ་ལས་བགྱིར་རུང་ངམ། ཨུ་པཱ་ལི་རུང་སྟེ། དེ་སྟེ་གནས་བཞིར་དགེ་སློང་གསུམ་གསུམ་གནས་ལ། གསོལ་བ་དང་ལས་ཀྱང་མངོན་དུ་གྱུར་ཅིང་དེར་གསོལ་བར་བྱེད་པའི་དགེ་སློང་གིས་གནས་བཞིའི་མཚམས་སུ་སབ་མོའམ། རེ་ལྡེའམ། ཁྲིའམ། གཞན་དག་ཀྱང་རུང་། དེས་མནན་ཏེ་དེའི་སྟེང་དུ་འདུག་ནས་ལས་བྱའོ། །ལས་བྱེད་པ་དེ་ཉིད་དེ་དག་གི་གྲངས་སུ་སྐོང་བའོ། །བཙུན་པ་དགེ་སློང་གཅིག་གིས་གནས་གཅིག་ཏུ་མཆིས་ལ་གནས་བཞིར་ལས་བགྱིར་རུང་ངམ། ཨུ་པཱ་ལི་རུང་སྟེ། དེ་ཡང་གནས་བཞིར་འདི་ལྟ་སྟེ། བསྡིགས་པའི་ལས་དང་། སྨད་པ་དང་། བསྐྲད་པ་དང་། སླར་བསྡུམ་པ་དང་། མ་མཐོང་བའི་ཕྱིར་སྤང་བ་དང་། སླར་ལས་མི་བྱེད་པས་སྤང་བའི་ལས་དང་། སྡིག་པ་ལ་ལྟ་བ་སླར་མ་བཏང་བས་སྤང་བའི་ལས་དང་། ཆད་པའི་ལས་དེ་རྣམས་ལ་མངོན་དུ་གནས་པར་གྱུར་ལ། ལས་བྱེད་པའི་དགེ་སློང་གིས་གནས་བཞིའི་མཚམས་སབ་མོའམ་རེ་ལྡེས་མནན་ཏེ་འདུག་པའོ། །གླེང་གཞིའི་སྒོ་དང་པོའི་ཚིགས་སུ་བཅད་པ་ལྔ་པའོ།། །།མདོར་ན། ཕྱེད་དང་གསུམ་ལས་འདས་པ་དང་། །ཕྱེད་དང་གསུམ་ཡང་རི་ཡི་སྟེང་། །དགེ་འདུན་བྱེ་བ་སྐྱ་རེངས་དང་། །
མཚམས་ཀྱི་ནང་དུ་བྱིན་གྱིས་བརླབས། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་མཚམས་ཆེན་པོ་ཆོད་ཅིག་ཅེས་གསུངས་ན། བཙུན་པ་མཚམས་ཆེན་པོ་དེའི་ཚད་ཇི་ཙམ་ལགས། ཨུ་པཱ་ལི་དཔག་ཚད་ཕྱེད་དང་གསུམ་མོ། །བཙུན་པ་ཕྱེད་དང་གསུམ་ཕན་ཆད་ཀྱང་མཚམས་ཞེས་བགྱིའམ། ཨུ་པཱ་ལི་མ་ཡིན་ཏེ། དཔག་ཚད་ཕྱེད་དང་གསུམ་ཚུན་ཆད་མཚམས་སོ། །བཙུན་པ་འོག་གི་ཁམས་ཀྱི་མཚམས་གང་ལགས། ཨུ་པཱ་ལི་ཇི་ཙམ་ཆུ་ལ་ཐུག་པར་གྱུར་པའི་བར་དུའོ། །བཙུན་པ་དཔག་ཚད་ཕྱེད་དང་གསུམ་ལས་འདས་ཏེ། ཆུ་ལ་ཐུག་པར་གྱུར་ན་ཅི་དེ་ཡང་མཚམས་ཞེས་བགྱིའམ། ཨུ་པཱ་ལི་མ་ཡིན་ནོ། །དཔག་ཚད་ཕྱེད་དང་གསུམ་ཚུན་ཆད་ནི་མཚམས་ཡིན་གྱི། དེ་ཕན་ཆད་ནི་མཚམས་མ་ཡིན་ནོ། །བཙུན་པ་སྟེང་གི་ཁམས་སུ་མཚམས་གང་ལགས། ཨུ་པཱ་ལི་ཇི་ཙམ་ཤིང་གི་རྩེ་མོའམ་རྩིག་པའི་སྟེང་ལ་ཐུག་པར་གྱུར་པའི་བར་དུའོ། །བཙུན་པ་དཔག་ཚད་ཕྱེད་དང་གསུམ་ཕན་ཆད་ཀྱི་ཤིང་གི་རྩེ་མོའམ། རྩིག་པའི་སྟེང་དུ་གྱུར་ན་ཅི་དེ་ཡང་མཚམས་ཞེས་བགྱིའམ། ཨུ་པཱ་ལི་མ་ཡིན་ནོ། །ཨུ་པཱ་ལི་དཔག་ཚད་ཕྱེད་དང་གསུམ་ཚུན་ཆད་ནི་མཚམས་སོ། །དེ་ཕན་ཆད་ནི་མཚམས་མ་ཡིན་ནོ། །བཙུན་པ་རིའི་མཚམས་གང་ལགས། ཨུ་པཱ་ལི་ཇི་ཙམ་ཆུས་བསྐོར་བ་ལ་ཐུག་པའི་བར་དུའོ། །བཙུན་པ་དཔག་ཚད་ཕྱེད་དང་གསུམ་ཕན་ཆད་གཅིག་ཏུ་ཆུས་བསྐོར་བར་གྱུར་ན་ཅི་དེ་ཡང་མཚམས་ཞེས་བགྱིའམ། ཨུ་པཱ་ལི་མ་ཡིན་ནོ། །ཨུ་པཱ་ལི་དཔག་ཚད་ཕྱེད་དང་གསུམ་ཚུན་ཆད་ནི་མཚམས་སོ། །དེ་ཕན་ཆད་ནི་མཚམས་མ་ཡིན་ནོ། །བཙུན་པ་དབྱར་གྱི་ནང་དུ་དགེ་འདུན་བྱེ་སྟེ། དེ་ན་དགེ་སློང་ཞིག་ཞག་བདུན་དུ་བྱིན་གྱིས་བརླབས་ཏེ། བདག་ཆོས་ལ་ཕྱོགས་པར་
བསམས་བཞིན་དུ་ཆོས་མ་ལགས་པའི་ཕྱོགས་ཀྱི་ནང་དུ་མཆིས་ན་དབྱར་ཆད་པ་་་ཞེས་བགྱིའམ། དབྱར་མ་ཆད་པ་ཞེས་བགྱི། ཨུ་པཱ་ལི་དེ་སྟེ་དེ་དག་གིས་ལྟ་བ་ལ་ཡང་དད་ལ་དེར་སོང་ནས། སྐྱ་རེངས་ཤར་ན་དབྱར་ཆད་པ་ཞེས་བྱའོ། །དེ་སྟེ་ལྟ་བ་ལ་ཡང་མ་དད་ལ་དེར་སོང་ནས། སྐྱ་རེངས་མ་ཤར་ན་དེ་དབྱར་མ་ཆད་པ་ཞེས་བྱའོ། །བཙུན་པ་བཅོམ་ལྡན་འདས་ཀྱིས་དབྱར་ཚུལ་ན་གནས་པའི་ཚེ། དགེ་སློང་གིས་ཞག་བདུན་དུ་བྱིན་གྱིས་བརླབས་ཏེ། མཚམས་ཀྱི་སླད་རོལ་དུ་སོང་ཤིག་ཅེས་གསུངས་ན། གང་དུ་བྱིན་གྱིས་བརླབ་པར་བགྱི། ཨུ་པཱ་ལི་མཚམས་ཀྱི་ནང་དུའོ། །ཇི་ལྟ་བུར་བགྱི། དགེ་སློང་གི་མདུན་དུ་འདུག་ནས་ཐལ་མོ་སྦྱར་བ་བྱ་སྟེ། ཚིག་འདི་སྐད་ཅེས་སྨྲོས་ཤིག །དགོངས་ཤིག་ཚེ་དང་ལྡན་པ་བདག་དགེ་སློང་མིང་འདི་ཞེས་བགྱི་བ་མཚམས་ཀྱི་ནང་གནས་འདིར་་་དབྱར་དང་པོའམ་ཐ་མ་ཡང་རུང་སྟེ་ཚུལ་དུ་ཞུགས་པ་ལས། བདག་མིང་འདི་ཞེས་བགྱི་བ་དགེ་འདུན་གྱི་དོན་ལ་མཚམས་ཀྱི་སླད་རོལ་དུ་མཆི་བའི་སླད་དུ་ཞག་བདུན་བྱིན་གྱིས་བརླབས་ཏེ། བདག་དབྱར་འདིར་རོ། །བདག་དབྱར་འདིར་གནས་སོ་ཞེས་ཀུན་རྒྱས་པར་བྱ་སྟེ་སྔ་མ་བཞིན་ནོ། །གླེང་གཞིའི་སྒོ་དང་པོའི་མདོའི་ཚིགས་སུ་བཅད་པ་དྲུག་གོ །། །མདོར་ན། སྡེ་ལྔ་རྣམས་ཏེ་བསམས་བཞིན་དུ། །ཀུན་རྒྱུ་གཉེན་ལའང་དེ་བཞིན་ཏེ། །ལུང་ལ་ཐེ་ཚོམ་བྱུང་བ་དང་། །མ་ཐོབ་ཕྱིར་ཡང་འགྲོ་བ་འོ། །སངས་རྒྱས་བཅོམ་ལྡན་འདས་མཉམ་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་དབྱར་ཚུལ་དུ་འཇུག་པར་གྱིས་ཤིག་ཅེས་གསུངས་ན། གང་དག་ཚུལ་དུ་འཇུག་པར་བགྱི། ཨུ་པཱ་ལི་དེ་ནི་ལྔ་སྟེ། དགེ་སློང་དང་། དགེ་སློང་མ་དང་། དགེ་སློབ་མ་དང་། དགེ་ཚུལ་ཕ་དང་། དགེ་ཚུལ་མའོ། །ཇི་ལྟར་འཇུག་པར་
བགྱི། ཐམས་ཅད་ཀྱང་སྔ་མ་བཞིན་དུའོ། །བཙུན་པ་བཅོམ་ལྡན་འདས་ཀྱིས་ཞག་བདུན་དུ་བྱིན་གྱིས་བརླབ་པར་བྱས་ན། དགེ་བསྙེན་གྱི་དོན་ལ་མཚམས་ཀྱི་སླད་རོལ་དུ་སོང་ཤིག་ཅེས་གསུངས་ན། བཙུན་པ་དེ་སྟེ་མུ་སྟེགས་ཅན་ཞིག་མཆིས་ན་དེའི་དོན་ལ་ཡང་མཆི་བར་བགྱིའམ། ཨུ་པཱ་ལི་དེ་སྟེ་སྡིག་པ་ལ་ལྟ་བ་དེ་ལས་དབྲལ་བར་འདོད་ན་འགྲོ་བར་བྱའོ། །བཙུན་པ་གཉེན་ཞིག་མཆིས་ན། དེའི་དོན་ལ་ཡང་མཆི་བར་བགྱིའམ། འགྲོ་བར་བྱའོ། །བཙུན་པ་དགེ་སློང་ཞིག་གཞུང་ལ་ཐེ་ཚོམ་མམ་དོགས་པ་ཞིག་མཆིས་ན། དེ་ཡང་མཆི་བར་བགྱིའམ། ཨུ་པཱ་ལི་དེ་ཡང་འགྲོ་བར་བྱའོ། །བཙུན་པ་དགེ་སློང་གིས་མ་ཐོབ་པ་ལས་ཐོབ་པའི་སླད་དུ། མ་ཆུད་པ་ལས་ཆུད་པའི་སླད་དུ། མངོན་དུ་མ་བགྱིས་པ་ལས་མངོན་དུ་བགྱི་བའི་སླད་དུ། ཐེ་ཚོམ་མམ་དོགས་པ་ཞིག་མཆིས་ན། དེ་ཡང་མཆི་བར་བགྱིའམ། ཨུ་པཱ་ལི་དེ་ཡང་འགྲོ་བར་བྱའོ། །གླེང་གཞིའི་སྒོ་དང་པོའི་མདོའི་ཚིགས་སུ་བཅད་པ་བདུན་ནོ།། །།མདོར་ན། མ་དྲས་གོས་ཀྱང་དེ་བཞིན་ཏེ། །འོན་ཏེ་གྲོང་དུ་འགྲོ་བ་དང་། །ཀུན་ཏུ་རྒྱུ་དང་དེ་བཞིན་པ། །གཏན་ལ་བབ་ན་གོང་ལུགས་སོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་མ་དྲས་པའི་གོས་བྱིན་གྱིས་བརླབ་པར་རུང་ངམ། ཨུ་པཱ་ལི་མི་རུང་མོད་ཀྱི་རྣམ་པ་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་པའི་གོས་འཚལ་ནས་གྲོང་དུ་མཆིར་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་པའི་གོས་འཚལ་ཏེ། ཁྱིམ་པའི་ཁྱིམ་དུ་མཆིར་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་པའི་གོས་འཚལ་ཏེ། ཁྱིམ་པའི་ཁྱིམ་དུ་གནས་སུ་མཆིས་སུ་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་པའི་གོས་འཚལ་ཏེ། ཀུན་ཏུ་རྒྱུ་བའི་ཁྱིམ་དུ་མཆིར་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་
པའི་གོས་འཚལ་ཏེ། ཀུན་ཏུ་རྒྱུ་བའི་གནས་སུ་མཆིས་སུ་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །བཙུན་པ་མ་དྲས་པའི་གོས་འཚལ་ཏེ། སླད་རོལ་དུ་མཆིར་རུང་ངམ། ཨུ་པཱ་ལི་མི་རུང་མོད་ཀྱི་དེ་ལྟ་བུའི་རྐྱེན་གྱིས་ན་རུང་ངོ་། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཆོས་གོས་ཁྲུ་ཚད་དུ་བྱོས་ཤིག་ཅེས་གསུངས་ན། བཙུན་པ་ལ་ལ་ཞིག་ཁྲུ་ཐུང་ཞིང་ལུས་རིང་ན་དེས་ཀྱང་ཁྲུ་ཚད་དུ་བགྱིའམ། ཨུ་པཱ་ལི་དེ་ནི་ཁྲུ་ཚད་དུ་བྱ་བ་མ་ཡིན་གྱི། དེའི་ལུས་ཀྱི་ཚད་དུ་བྱོས་ཤིག །བཙུན་པ་གང་ལ་ཐབས་ཀྱིས་ཆོས་གོས་མི་ལངས་ན། དེས་ཇི་ལྟར་བགྱི། ཨུ་པཱ་ལི་དེས་གོང་ལུགས་སུ་གྱིས་ལ་ཆོངས་ཤིག །གླེང་གཞིའི་སྒོ་དང་པོའི་མདོའི་ཚིགས་སུ་བཅད་པ་བརྒྱད་པའོ།། །།མདོར་ན། ལྷམ་ལ་རྣམ་པ་ལྔར་བྱ་སྟེ། །སེང་གེ་གཅན་གཟན་མི་སྲུན་དང་། །འདུག་པར་ཡང་ནི་མི་རུང་སྟེ། །པགས་པ་ལ་ནི་ཉལ་མི་བྱའོ། །སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་་་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་བལ་གླང་ཅང་ཤེས་ཀྱི་པགས་པ་ལས་བགྱིས་པའི་ལྷམ་མ་འཆང་ཤིག་གསུངས་ན། བཙུན་པ་ཅི་བལ་གླང་ཕལ་གྱི་པགས་པ་ལ་ཡང་ལྷམ་བགྱིས་ཏེ། བཅང་བར་མི་་་བགྱིའམ། ཨུ་པཱ་ལི་དེ་དག་གི་པགས་པ་ལ་ཡང་ལྷམ་བྱས་ཏེ་བཅང་བར་མི་་་བྱའོ། །ཨུ་པཱ་ལི་དེ་ཅིའི་ཕྱིར་ཞེ་ན། དེ་དག་ཀྱང་སྣ་སྟོབས་དང་ལྡན་པ། སོ་སྟོབས་དང་ལྡན་པ། རྐང་སྟོབས་དང་ལྡན་པའོ། །བཙུན་པ་བཅོམ་ལྡན་འདས་ཀྱིས་རྟ་ཅང་ཤེས་ཀྱི་པགས་པ་ལས་བགྱིས་པའི་ལྷམ་མ་འཆང་ཤིག་ཅེས་་་གསུངས་ན། བཙུན་པ་ཅི་རྟ་ཕལ་གྱི་པགས་པའི་
ལྷམ་ཡང་བཅང་བར་མི་བགྱིའམ། ཨུ་པཱ་ལི་དེའི་པགས་པའི་ལྷམ་ཡང་བཅང་བར་མི་བྱའོ། །དེ་ཅིའི་ཕྱིར་ཞེ་ན། ཨུ་པཱ་ལི་དེ་དག་མགྱོགས་པ་དང་ལྡན། སྟོབས་དང་ལྡན་པའི་ཕྱིར་རོ། །བཙུན་པ་བཅོམ་ལྡན་འདས་ཀྱིས་སེང་གེ་དང་། སྟག་དང་གཟིག་གི་པགས་པ་ལས་བགྱིས་པའི་ལྷམ་མ་འཆང་ཤིག་ཅེས་གསུངས་ན། བཙུན་པ་་་གཅན་གཟན་མི་སྲུན་པ་གཞན་དག་ཀྱང་མཆིས་ན། དེ་དག་གི་པགས་པ་ལས་བགྱིས་པའི་ལྷམ་བཅང་བར་མི་བགྱིའམ། ཨུ་པཱ་ལི་དེ་དག་གི་པགས་པ་ལ་ལྷམ་བྱས་པ་ཡང་མ་འཆང་ཤིག །ཨུ་པཱ་ལི་དེ་ཅིའི་ཕྱིར་ཞེ་ན། དེ་དག་ཀྱང་སེན་མོའི་སྟོབས་དང་ལྡན། མཆེ་བའི་སྟོབས་དང་ལྡན་པའི་ཕྱིར་རོ། །བཙུན་པ་བཅོམ་ལྡན་འདས་ཀྱིས་པགས་པའི་སྟེང་དུ་མ་འདུག་ཤིག་ཅེས་གསུངས་ན། བཙུན་པ་ཇི་ཙམ་གྱིས་ན་པགས་པའི་སྟེང་དུ་མཆིས་པ་ཞེས་བགྱི། ཨུ་པཱ་ལི་དེ་ནི་ཇི་ཙམ་རྐུབ་བཞག་པར་གྱུར་པས་སོ། །བཙུན་པ་བཅོམ་ལྡན་འདས་ཀྱིས་པགས་པའི་སྟེང་དུ་མ་ཉལ་ཅིག་ཅེས་གསུངས་ན། བཙུན་པ་ཇི་ཙམ་གྱིས་ན་པགས་པའི་སྟེང་དུ་ཉལ་བ་ཞེས་བགྱི། དེ་ནི་ཨུ་པཱ་ལི་ཇི་ཙམ་འཕྲེས་པར་གྱུར་པའོ། །གླེང་གཞིའི་སྒོ་དང་པོའི་མདོའི་ཚིགས་སུ་བཅད་པ་དགུ་པའོ།། །།མདོར་ན། ཤ་རྗེན་དང་ནི་རྩབ་མོ་དང་། །ཡོངས་སུ་བཙགས་པར་གྱུར་པ་དང་། །གཞང་འབྲུམ་གཅད་པར་མི་བྱ་སྟེ། །གཙུག་ལག་ཁང་དང་བཅའ་བ་འོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་དགེ་སློང་སེ་ཀ་ཏ་བྲོ་འཚལ་བ་ལ་ཤ་རྗེན་བྱིན་ཅིག་ཅེས་གསུངས་ན། བཙུན་པ་སུ་ལས་བླང་བར་བགྱི། ཨུ་པཱ་ལི་དེ་ནི་ཤ་འཚོང་བ་རྣམ་པ་ལྔ་ལས་སོ། །རྣམ་པ་ལྔ་གང་ཞེ་ན། ཤེན་པ་དང་། ཁྱིམ་བྱ་གསོད་པ་དང་། རི་བྱ་གསོད་པ་དང་། ཕག་གསོད་པ་
དང་། རི་དགས་གསོད་པ་རྣམས་སོ། །འོ་ན་བཙུན་པ་སུས་བླང་ཞིང་བྱིན་ལེན་བགྱི། ཨུ་པཱ་ལི་དགེ་བསྙེན་དད་པས་སོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་དུས་ན་དགེ་སློང་གཞན་ཞིག་ན་བར་གྱུར་ནས་དེ་སྨན་པའི་དྲུང་དུ་སོང་སྟེ། ནད་མེད་ཅིག་ཅེས་སྨྲས་ནས་བཞིན་བཟངས་བདག་ནད་འདི་དང་འདི་ལྟ་བུ་ཞིག་གིས་བཏབ་ན་དཔྱད་ཅིག་སྟོན་་་ཅིག །དེས་འཕགས་པ་མར་འཐུང་ཤིག་དང་འཚོ་བར་འགྱུར་རོ་ཞེས་སྨྲས་པ་དང་། དེས་བཞིན་བཟངས་བཅོམ་ལྡན་འདས་ཀྱིས་མ་གནང་ངོ་ཞེས་སྨྲས་པ་དང་། སྨན་པས་ཁྱོད་ཀྱི་སྟོན་པ་ནི་ཐུགས་རྗེ་ཅན་ཡིན་གྱིས་གནང་བར་འགྱུར་རོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་སྨན་པས་མར་གྱིས་འཚོ་བར་འགྱུར་ཞེས་བསྒོ་ན་འཐུང་ཤིག །དགེ་སློང་དེས་མར་འཐུངས་ན་སྐོམ་གྱིས་གཟིར་བར་གྱུར་ཏེ། དེས་སྨན་པ་ལ་བཞིན་བཟངས་བདག་ནི་སྐོམ་པས་གཟིར་ཏོ། །དེས་སྨྲས་པ་འཕགས་པ་རྩབ་མོ་སྐྱུར་པོ་འཐུང་ཤིག །དེས་སྨྲས་པ། བཅོམ་ལྡན་འདས་ཀྱིས་དུས་མ་ཡིན་པའི་ཟས་མ་གནང་ན་ཇི་ལྟར་འཐུང་བར་བྱ། སྨན་པས་སྨྲས་པ། འཕགས་པ་ཁྱོད་ཀྱི་སྟོན་པ་ནི་ཐུགས་རྗེ་ཅན་ཡིན་ཏེ་གནང་དུ་གདོན་མི་ཟའོ། །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་ན་རྩབ་མོ་སྐྱུར་པོ་འཐུང་ཤིག་ཅེས་རྗེས་སུ་གནང་བ་དང་། དགེ་སློང་དག་གིས་རྩབ་མོ་སྐྱུར་པོ་ཇི་ལྟར་བཏུང་བ་མི་ཤེས་སོ། །དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྩབ་མོ་སྐྱུར་པོ་ནི་རྣམ་པ་འདི་ལྔའོ། །ལྔ་གང་ཞེ་ན། འདི་ལྟ་སྟེ། འབྲས་བུའི་ཆང་ལས་ཚར་གྱུར་པ་དང་། འབྲུའི་ཆང་ལས་ཚར་གྱུར་པ་དང་། ཞོའི་ཆུ་དང་། དར་བ་དང་། རྩབ་མོ་དང་ལྔའོ། །དེ་ལ་འབྲས་བུའི་ཆང་ལས་ཚར་གྱུར་པ་ནི་གང་འབྲས་བུ་རྣམས་ལས་བྱས་པ་དང་། མ་རུང་སྟེ་སྐྱུར་པོར་
གྱུར་པའོ། །འབྲུའི་ཆང་ལས་ཚར་གྱུར་པ་ནི་གང་འབྲུ་རྣམས་ལས་སྦྱར་ནས་མ་རུང་སྟེ་སྐྱུར་པོར་གྱུར་པའོ། །ཞོའི་ཆུ་ནི་ཞོ་ལས་ཆུ་བྱུང་བའོ། །དར་བའི་ཁུ་བ་ནི་དར་བ་ཞོའི་ཆུ་ལྟ་བུར་གྱུར་པའོ། །རྩབ་མོ་ནི་རྩབ་མོ་ཉིད་ཡིན་ནོ། །དེ་དག་གི་ནང་དུ་ཆུས་བསླད་ལ་རས་ཀྱི་ནང་དུ་བཙགས་ཏེ། ཇི་ལྟར་མདའ་རྒྱུའི་ཁ་དོག་བཞིན་དུ་གྱུར་པ་དེ་ནི་དུས་དང་། དུས་མ་ཡིན་པ་དང་། ན་བ་དང་། མི་ན་བའི་དགེ་སློང་དག་བཏུང་བར་བྱ་སྟེ། དེ་ལ་ཐེ་ཚོམ་ནི་མ་བྱེད་ཅིག། གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་དགེ་སློང་གཞན་ཞིག་གཞང་འབྲུམ་གྱི་ནད་ཀྱིས་བཏབ་ནས་དེས་འབྲུམ་བུ་སེན་མོས་བཅད་པ་དང་། དེ་སླར་སྡུག་བསྔལ་ཞིང་རྩུབ་ལ་ཚ་ཞིང་གནོད་ལ་ན་བར་གྱུར་པ་དང་། དེ་སྡུག་བསྔལ་གྱིས་རབ་ཏུ་གཟིར་ནས་དེས་འདི་སྙམ་དུ་བདག་ལ་བཅོམ་ལྡན་འདས་ཀྱིས་སྡུག་བསྔལ་ཞིང་དོག་པ་དག་ཏུ་གྱུར་ཀྱང་མ་དགོངས་སྙམ་བསམས་པ་་་དང་། དེ་ནས་བཅོམ་ལྡན་འདས་ཀྱི་ཐུགས་རྗེ་ཆེན་པོས་བསྐུལ་ནས་དེའི་གནས་སུ་བྱོན་ཏེ། དགེ་སློང་ཅི་ཉེས་ཞེས་རྨས་པ་དང་། དེ་སྙིང་རྗེ་ཞིང་མི་དགའ་ནས་མིག་མཆི་མས་གང་མཆིལ་མས་བརྣངས་བཞིན་དུ་ཚིག་ངལ་ནས། བཅོམ་ལྡན་འདས་ལ་ཇི་ལྟར་གྱུར་པ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་སྔ་ནས་ཀྱང་གཞང་འབྲུམ་མ་གཅོད་ཅིག་ཅེས་མ་བསྒོའམ། བཅོམ་ལྡན་འདས་ཀྱིས་བཀའ་སྩལ་ལགས་སོ། །འོ་ན་ཁྱོད་ཀྱིས་ཅིའི་ཕྱིར་དེ་ལྟར་བྱ། བཅོམ་ལྡན་འདས་སྡུག་བསྔལ་གྱིས་གཟིར་བའི་སླད་དུའོ། །དེ་ནས་བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་དག་དགེ་སློང་འདི་ནི་སྡུག་བསྔལ་གྱིས་གཟིར་བས་ན་ཉེས་པ་མེད་ཀྱིས། ངས་ཡང་འདི་ལྟར་བསྒོ་བ་ནི་དགེ་སློང་དག་གཞང་འབྲུམ་གྱི་ནད་ཀྱིས་གཟིར་ན་སེན་མོ་ལ་སོགས་པས་བདག་ཉིད་ཀྱིས་ཀྱང་མ་གཅད་ཅིག །གཞན་ཡང་གཅོད་དུ་མ་གཞུག་ཤིག །དེ་ལ་དཔྱད་རྣམ་པ་གཉིས་སུ་སྦྱར་ཞིང་བྱ་སྟེ། སྨན་དང་སྔགས་ཀྱིས་སོ། །དགེ་སློང་གཞང་
འབྲུམ་གྱི་ནད་ཀྱིས་གཟིར་བ་ལ་སེན་མོ་ལ་སོགས་པས་བཅད་དམ། གཅོད་དུ་བཅུག་ན་འདས་པ་དང་བཅས་པར་འགྱུར་རོ། །སངས་རྒྱས་བཅོམ་ལྡན་འདས་ཤཱཀྱའི་གྲོང་འདབ་ཚོང་པ་སྦུ་བུ་ཅན་ཞེས་བྱ་བ་ན་བཞུགས་སོ། །དེའི་ཚེ་ན་ཁྱིམ་བདག་གཞན་ཞིག་བདག་ཉིད་དང་། བདག་ཉིད་མོས། བདག་ཉིད་དགའ་ནས་གཙུག་ལག་ཁང་ཞིག་བརྩིགས་ཏེ། ཚེ་དང་ལྡན་པ་སྒྲ་ཅན་འཛིན་གང་ཟག་གཅིག་པུ་ལ་ཕུལ་ལོ། །དེ་ནས་ཚེ་དང་ལྡན་པ་སྒྲ་ཅན་འཛིན་ཇི་སྲིད་ཅིག་གི་བར་དུ་གཙུག་ལག་ཁང་དེར་གནས་ནས་ལྷུང་བཟེད་དང་ཆོས་གོས་ཁྱེར་ཏེ་གཞོངས་སྤྱོད་དུ་སོང་ངོ་། །ཁྱིམ་བདག་དེས་འཕགས་པ་སྒྲ་ཅན་འཛིན་ཇི་སྲིད་ཀྱི་བར་དུ་གཙུག་ལག་ཁང་དེར་གནས་ནས་་་ལྷུང་བཟེད་དང་ཆོས་གོས་ཁྱེར་ཏེ་གཞོངས་སྤྱོད་དུ་སོང་ཞེས་ཐོས་སོ། །དེ་སྐད་ཅེས་ཐོས་ནས་ཁྱིམ་བདག་དེས་གཙུག་ལག་ཁང་དེ་དགེ་འདུན་ལ་ཕུལ་ལོ། །དེ་ནས་ཚེ་དང་ལྡན་པ་སྒྲ་ཅན་འཛིན་ཇི་སྲིད་དགའ་བའི་བར་དུ་གཞོངས་སྤྱད་ནས་ལྷུང་བཟེད་དང་ཆོས་གོས་ཁྱེར་ཏེ། ཤཱཀྱའི་གྲོང་འདབ་ཚོང་པ་སྦུ་བུ་ཅན་ཞེས་བྱ་བ་གང་ན་བ་དེར་སྤྱོད་ཅིང་སོང་སྟེ། རིམ་བཞིན་དུ་སྤྱོད་པ་སྤྱོད་ཅིང་ཚོང་པ་སྦུ་བུ་ཅན་ཞེས་བྱ་བར་ཕྱིན་པ་དང་། ཚེ་དང་ལྡན་པ་སྒྲ་ཅན་འཛིན་གྱིས་ཁྱིམ་བདག་དེས་གཙུག་ལག་ཁང་དེ་དགེ་འདུན་ལ་ཕུལ་ལོ་ཞེས་ཐོས་སོ། །དེ་སྐད་ཅེས་ཐོས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཚེ་དང་ལྡན་པ་སྒྲ་ཅན་འཛིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འདི་ནི་ཁྱིམ་བདག་གཞན་ཞིག་བདག་ཉིད་དང་། བདག་ཉིད་མོས། བདག་ཉིད་དགའ་ནས་གཙུག་ལག་ཁང་ཞིག་བརྩིགས་ཏེ། བདག་གང་ཟག་གཅིག་པུ་ལ་སྩལ་ནས་གཙུག་ལག་ཁང་དེར་བདག་ཇི་སྲིད་ཅིག་གི་བར་དུ་མཆིས་ཏེ། ལྷུང་བཟེད་དང་ཆོས་གོས་འཚལ་ནས་གཞོངས་སྤྱོད་དུ་མཆིས་པ་དང་། ཁྱིམ་བདག་དེས་
འཕགས་པ་སྒྲ་ཅན་འཛིན་གཙུག་ལག་ཁང་དེར་ཇི་སྲིད་ཅིག་གི་བར་དུ་འདུག་ནས་ལྷུང་བཟེད་དང་་་ཆོས་གོས་ཁྱེར་ཏེ་གཞོངས་སྤྱོད་དུ་སོང་ངོ་ཞེས་ཐོས་སོ། །དེ་སྐད་ཐོས་པ་དང་། ཁྱིམ་བདག་དེས་ཡང་གཙུག་ལག་ཁང་དེ་དགེ་འདུན་ལ་ཕུལ་ན་བཙུན་པ་དེ་ལ་་་བདག་གིས་ད་ཇི་ལྟར་བགྱི་ཞེས་གསོལ་པ་དང་། སྒྲ་ཅན་འཛིན་ཚུར་ཤོག །ཁྱིམ་བདག་དེ་གང་ན་བ་དེར་སོང་སྟེ་དྲུང་དུ་ཕྱིན་པ་དང་། ཁྱིམ་བདག་དེ་ལ་འདི་སྐད་ཅེས་སྨྲོས་ཤིག །ཁྱིམ་བདག་བདག་གིས་ལུས་དང་ངག་དང་ཡིད་ཀྱིས་ཉེས་པར་གྱུར་པ་ལྟ་ཡོད་དམ་ཞེས་སྨྲོས་ཤིག །བཙུན་པ་དེ་བཞིན་དུ་བགྱིའོ་ཞེས་ཚེ་དང་ལྡན་པ་སྒྲ་ཅན་འཛིན་བཅོམ་ལྡན་འདས་ལས་མཉན་ཏེ། ཁྱིམ་བདག་དེ་གང་ན་བ་དེར་སོང་ནས་ཕྱིན་པ་དང་། ཁྱིམ་བདག་དེ་ལ་འདི་སྐད་ཅེས་སྨྲས་སོ། །ཁྱིམ་བདག་བདག་གིས་ལུས་དང་ངག་དང་ཡིད་ཀྱིས་ཉེས་པར་གྱུར་པ་ལྟ་ཡོད་དམ། འཕགས་པ་སྒྲ་ཅན་འཛིན་གྱིས་ལུས་དང་ངག་དང་ཡིད་ཀྱི་སྒོ་ནས་ཅུང་ཟད་ཙམ་ཡང་ནོངས་པར་གྱུར་པ་མ་མཆིས་སོ། །དེ་ནས་ཚེ་དང་ལྡན་པ་སྒྲ་ཅན་འཛིན་གྱིས་ཁྱིམ་བདག་དེ་ལ་ལེགས་པར་ཤིན་ཏུ་བརྟགས་ཤིང་སྨྲས་ཏེ། བཅོམ་ལྡན་འདས་གང་ན་བ་དེར་སོང་ནས་དྲུང་དུ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གིས་ཁྱིམ་བདག་དེ་ལ་ཁྱིམ་བདག་བདག་གིས་ལུས་དང་ངག་དང་ཡིད་ཀྱིས་ཅུང་ཟད་ཙམ་ཡང་ཉེས་པར་གྱུར་པ་ལྟ་ཡོད་དམ་ཞེས་་་བགྱིས་ན། དེ་འདི་སྐད་ཅེས་འཕགས་པ་སྒྲ་ཅན་འཛིན་ཁྱོད་ཀྱིས་ལུས་དང་ངག་དང་ཡིད་ཀྱི་སྒོ་ནས་ཅུང་ཟད་ཙམ་ཡང་ནོངས་པར་བགྱིས་པ་མ་མཆིས་སོ་ཞེས་མཆིའོ། །དེའི་ཚེ་ན་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་བསིལ་ཡབ་ཐོགས་ཏེ། བཅོམ་ལྡན་འདས་ལ་གཡོབ་ཅིང་འདུག་པ་དང་། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ། ཀུན་དགའ་བོ་སོང་ལ་ཤཱཀྱའི་གྲོང་འདབ་
ཚོང་པ་སྦུ་བུ་ཅན་ཞེས་བྱ་བ་ན་གནས་ཤིང་འཁོད་པའི་དགེ་སློང་ཐམས་ཅད་འདུན་ཁང་དུ་སྡུས་ཤིག་ཅེས་བཀའ་སྩལ་པ་་་དང་། བཙུན་པ་བཀའ་བཞིན་འཚལ་ལོ་ཞེས་གསོལ་ནས། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལས་མཉན་ཏེ། ཤཱཀྱའི་གྲོང་འདབ་ཚོང་པ་སྦུ་བུ་ཅན་ཞེས་བྱ་བ་ན་དགེ་སློང་ཇི་སྙེད་གནས་ཤིང་འཁོད་པ་དེ་དག་ཐམས་ཅད་འདུན་ཁང་དུ་བསྡུས་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་དུ་བཙུན་པ་བཅོམ་ལྡན་འདས་དུས་ལ་བབ་པར་དགོངས་ན་ཤཱཀྱའི་གྲོང་འདབ་ཚོང་པ་སྦུ་བུ་ཅན་ཞེས་བགྱི་བ་ན། དགེ་སློང་ཇི་སྙེད་གནས་ཤིང་འཁོད་པ་དེ་དག་ཐམས་ཅད་འདུན་ཁང་དུ་འདུས་ནས་མཆིས་སོ་ཞེས་གསོལ་པ་དང་། དེ་ནས་བཅོམ་ལྡན་འདས་འདུན་ཁང་གང་ན་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་མདུན་ན་གདན་བཏིང་བ་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་དག་གང་གིས་གང་ཟག་གཅིག་ལ་སྦྱིན་པ་བྱིན་ཏེ། གཞན་ལ་བྱིན་ན་ཆོས་མ་ཡིན་པར་བྱིན་པ་སྟེ། ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །གཉིས་ལས་མང་བའམ། དགེ་འདུན་ལ་བྱིན་ན་ཡང་ཆོས་མ་ཡིན་པར་བྱིན་པའོ། །ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །དགེ་སློང་དག་གང་གིས་གང་ཟག་གཉིས་ལ་སྦྱིན་པ་བྱིན་པ་གཅིག་ལ་བྱིན་ནམ། གཞན་ལའམ། གཉིས་ལའམ། མང་པོ་ལའམ། དགེ་འདུན་ལ་བྱིན་ན་ཆོས་མ་ཡིན་པར་བྱིན་པའོ། །ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །དགེ་སློང་དག་གང་གིས་གང་ཟག་མང་པོ་ལ་སྦྱིན་པ་བྱིན་ན་གཅིག་ལ་བྱིན་ནམ། གཉིས་ལའམ། མང་པོ་གཞན་ལའམ། དགེ་འདུན་ལ་བྱིན་ན་ཆོས་མ་ཡིན་པར་བྱིན་པའོ། །ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །དགེ་འདུན་ལ་
བྱིན་ཏེ་གང་ཟག་གཅིག་ལ་བྱིན་ནམ། གཉིས་ལའམ། མང་པོ་ལ་བྱིན་ནམ། དགེ་འདུན་གཞན་ལ་བྱིན་ན་ཆོས་མ་ཡིན་པར་བྱིན་པའོ། །ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །དེ་བཞིན་གཤེགས་པའི་ཉན་ཐོས་ཀྱི་དགེ་འདུན་དག་བྱེ་སྟེ། ཕྱོགས་དང་ཕྱོགས་མ་ཡིན་པར་གནས་པ་ལས་ཕྱོགས་གཅིག་ལ་སྦྱིན་པ་དེ་གཞན་ལ་བྱིན་ན་ཆོས་མ་ཡིན་པར་བྱིན་པའོ། །ཆོས་མ་ཡིན་པར་བླངས་པའོ། །མི་རུང་བར་སྤྱོད་པའོ། །དགེ་སློང་དག་གང་གིས་གང་ཟག་གཅིག་ལ་སྦྱིན་པ་བྱིན་པ་གཞན་ལ་མ་བྱིན་ན་ཆོས་བཞིན་དུ་བྱིན་པའོ། །ཆོས་བཞིན་དུ་བླངས་པའོ། །རུང་བར་སྤྱོད་པའོ། །གཉིས་ལ་མ་ཡིན། མང་པོ་ལ་མ་ཡིན། དགེ་འདུན་ལ་མ་བྱིན་ན་ཆོས་བཞིན་དུ་བྱིན་པའོ། །རུང་བར་སྤྱོད་པའོ། །དགེ་སློང་དག་གང་གིས་གང་ཟག་གཉིས་ལ་སྦྱིན་པ་བྱིན་པ་དེ་གཅིག་ལ་མ་ཡིན། གཞན་ལ་མ་ཡིན། མང་པོ་ལ་མ་ཡིན། དགེ་འདུན་ལ་མ་བྱིན་ན་ཆོས་བཞིན་དུ་བྱིན་པའོ། །ཆོས་བཞིན་དུ་བླངས་པའོ། །རུང་བར་སྤྱོད་པའོ། །དགེ་སློང་དག་གང་གིས་གང་ཟག་མང་པོ་ལ་སྦྱིན་པ་བྱིན་པ་དེ་གཅིག་ལ་མ་བྱིན་གཉིས་ལའམ། མང་པོ་གཞན་ལའམ། དགེ་འདུན་ལ་མ་བྱིན་ན་ཆོས་བཞིན་དུ་བྱིན་པའོ། །ཆོས་བཞིན་དུ་བླངས་པའོ། །རུང་བར་སྤྱོད་པའོ། །དགེ་སློང་དག་གང་གིས་དགེ་འདུན་ལ་སྦྱིན་པ་བྱིན་པ་དེ་གང་ཟག་གཅིག་ལ་མ་བྱིན། གཉིས་ལའམ། མང་པོའམ། དགེ་འདུན་གཞན་ལ་མ་བྱིན་ན་ཆོས་བཞིན་དུ་བྱིན་པའོ། །ཆོས་བཞིན་དུ་བླངས་པའོ། །རུང་བར་སྤྱོད་པའོ། །ཡང་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་སྟེ། ཕྱོགས་དང་ཕྱོགས་མ་ཡིན་པར་གནས་པ་ལ་ཕྱོགས་གཅིག་ལ་སྦྱིན་པ་བྱིན་པ་དེ་གཞན་ལ་མ་བྱིན་ན་ཆོས་བཞིན་དུ་བྱིན་པའོ་ཆོས་བཞིན་དུ་བླངས་པའོ། །རུང་བར་སྤྱོད་པའོ། །དགེ་སློང་དག་རྒྱལ་པོ་ནི་ས་གཞི་ལ་དབང་ངོ་། །བདག་པོ་ནི་མལ་སྟན་ལ་དབང་ངོ་། །དགེ་སློང་ནི་ལྷུང་བཟེད་དང་ཆོས་གོས་ལ་དབང་ངོ་། །སྦྱིན་
པ་བྱེད་པ་དང་། སྦྱིན་པའི་བདག་པོ་ནི་བདག་གིས་བྱིན་པའི་ཆོས་རྣམས་ལ་སླར་འཆོས་པའི་རིགས་ཀྱི་གཞན་ལ་སྦྱིན་པར་ནི་མ་ཡིན་ནོ། །དེ་ཅིའི་ཕྱིར་ཞེ་ན། དགེ་སློང་དག་སྦྱིན་པ་ནི་སྔ་མ་ཡིན་ཏེ། ཕྱི་མ་ནི་མ་ཡིན་ནོ། །དེ་བས་ན་སྒྲ་ཅན་འཛིན་ལ་གཙུག་ལག་ཁང་སླར་བྱིན་ཅིག །དགེ་སློང་དག་གང་གིས་སྦྱིན་པ་གཞན་ལ་བྱིན་པ་དེ་ཡང་གཞན་ལ་བྱིན་ན། དེ་ལྟ་བུའི་རྐྱེན་མ་གཏོགས་ཏེ། འདས་པ་དང་བཅས་པར་འགྱུར་རོ། །དགེ་སློང་དག་གིས་ཀྱང་ཚེ་དང་ལྡན་པ་སྒྲ་ཅན་འཛིན་ལ་གཙུག་ལག་ཁང་སླར་བྱིན་ནོ།། །།འདུལ་བ་གཞུང་དམ་པ། བམ་པོ་སུམ་བཅུ་རྩ་གཉིས་པ། གླེང་གཞི་ནི་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་ལོ་ལྔ་པ་དང་། ལོ་དྲུག་པ་དང་། གཙུག་ལག་ཁང་གི་དུས་སྟོན་དང་། དུས་སྟོན་ཆེན་པོ་དག་བྱོས་ཤིག་ཅེས་གསུངས་པ་དང་། བྲམ་ཟེ་དང་ཁྱིམ་བདག་དག་གིས་ཀྱང་དེ་བཞིན་བྱེད་དོ། །དེར་ཡུལ་སོ་སོ་ན་གནས་པའི་དགེ་སློང་དག་ཀྱང་འདུས་ནས་དེ་དག་ལ་བྲམ་ཟེ་་་དང་ཁྱིམ་བདག་དད་པ་ཅན་དག་གིས་བཅའ་བ་མང་དུ་བྱིན་པ་དང་། དེ་དག་གིས་ཅུང་ཟད་ཅིག་ཟོས་ནས་ལྷག་མ་དེ་དགེ་ཚུལ་ཕ་དག་ལ་བྱིན་ནོ། །དེ་དག་གིས་ཀྱང་ཕྱི་དེ་ཉིན་དགེ་སློང་དེ་དག་ལ་དེ་ཉིད་བྱིན་ལེན་བྱས་པ་དང་། དེ་དག་གིས་དགེ་ཚུལ་ཕ་དག་ལ་ཁྱེད་ཅག་གི་བཟའ་བ་འདི་གང་ནས་འོངས་ཞེས་དྲིས་པ་དང་། དེ་དག་གིས་སྨྲས་པ། ཁྱེད་ཅག་གིས་ཁར་རྩང་་བདག་ཅག་ལ་བྱིན་པ་དེ་ཉིད་ལགས་སོ། །དགེ་སློང་རྣམས་ཀྱིས་ངེད་ཀྱིས་འདི་ཁྱེད་ལ་བྱིན་པ་ཡིན་ནོ། །ཞེས་སྨྲས་ཏེ་ཐེ་ཚོམ་དུ་གྱུར་ནས་མི་ལེན་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རེ་བ་ཡོད་བཞིན་དུ་དེས་བྱིན་ལ་རེ་བ་ཡོད་བཞིན་དུ་སླར་ཟོས་ན་དེ་དག་གིས་བྱིན་ན་ནི་ཉེས་བྱས་ཏེ། ཟོས་ན་ལྟུང་བའོ། །རེ་བ་ཡོད་བཞིན་དུ་དེས་བྱིན་ལ་རེ་བ་མེད་བཞིན་དུ་སླར་ཟོས་ན་དེ་དག་གིས་བྱིན་པའི་ཚེ་ནི་ཉེས་བྱས། ཟོས་ན་ཉེས་པ་མེད་དོ། །དེས་རེ་བ་མེད་བཞིན་དུ་བྱིན་ལ་རེ་བ་ཡོད་བཞིན་དུ་
ཟོས་ན་དེ་དག་གིས་བྱིན་པའི་ཚེ་ནི་ཉེས་པ་མེད། ཟོས་ན་ལྟུང་བའོ། །རེ་བ་མེད་བཞིན་དུ་བྱིན་ལ་རེ་བ་མེད་བཞིན་དུ་ཟོས་ན་དེ་དག་གིས་བྱིན་པའི་ཚེ་ཡང་་་ཉེས་པ་མེད་ལ་ཟ་བའི་ཚེ་ཡང་ཉེས་པ་མེད་དོ། །གླེང་གཞིའི་སྒོ་དང་པོའི་མདོའི་ཚིགས་སུ་བཅད་པ་བཅུ་པ་རྫོགས་ཏེ། སྒོ་དང་པོ་རྫོགས་སྷོ།། །།