ཉི་ཤུ་རྩ་དགུ་པ། གཞན་མུ་སྟེགས་ཅན་གྱི་ལེའུ།
དེ་ནས་གཞན་མུ་སྟེགས་ཅན་ཀུན་ཏུ་རྒྱུ་ཀླན་ཀ་འཚོལ་བའི་བསམ་པ་ཅན་རབ་ཏུ་མང་པོ་བརྒྱ་ཞིག་ཀླན་ཀ་བཙལ་བའི་ཕྱིར། བཅོམ་ལྡན་འདས་ག་ལ་བ་དེར་དོང་ངོ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། གཞན་མུ་སྟེགས་ཅན་ཀུན་ཏུ་རྒྱུ། བཅོམ་ལྡན་འདས་ཀྱི་བསྟན་པ་ལ་ཀླན་ཀ་འཚོལ་བའི་བསམ་པ་ཅན་རབ་ཏུ་མང་པོ་བརྒྱ་པོ་འདི་དག་བཅོམ་ལྡན་འདས་ག་ལ་བ་དེར་དོང་གི །གཞན་མུ་སྟེགས་ཅན་ཀུན་ཏུ་རྒྱུ་འདི་དག་ཅི་ནས་ཀྱང་བཅོམ་ལྡན་འདས་ཀྱི་ཐད་དུ་མི་འདོང་ཞིང། ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་པའི་བར་ཆད་བྱེད་པར་མི་འགྱུར་བར། བདག་གིས་བཅོམ་ལྡན་འདས་ལས་ཤེས་རབ་ཀྱི་ཕ་རོལ་ཏུ་ཕྱིན་པ་ཇི་ཙམ་ཞིག་བཟུང་བ་དེ་བདག་གིས་ངེས་པར་ཁ་ཏོན་དུ་བྱའོ། །སྙམ་མོ། །དེ་ནས་ལྷའི་དབང་པོ་བརྒྱ་བྱིན་གྱིས། བཅོམ་ལྡན་འདས་ལས་ཤེས་རབ་ཀྱི་ཕ་རོལ་ཏུ་ཕྱིན་པ་ཇི་ཙམ་ཞིག་བཟུང་བ་དེ་ཁ་ཏོན་དུ་བྱས་སོ། །དེ་ནས་གཞན་མུ་སྟེགས་ཅན་ཀུན་ཏུ་རྒྱུ་དེ་དག་གིས་རྒྱང་རིང་པོ་ནས་བཅོམ་ལྡན་འདས་ལ་བསྐོར་་བྱས་ཏེ། ལམ་གང་ནས་ལྷགས་པའི་ལམ་དེ་ཉིད་ནས་ཕྱིར་དོང་ངོ། །དེ་ནས་ཚེ་དང་ལྡན་པ་ཤཱ་རིའི་
བུ་འདི་སྙམ་དུ་སེམས་ཏེ། ཅིའི་ཕྱིར་གཞན་མུ་སྟེགས་ཅན་ཀུན་ཏུ་རྒྱུ་ཀླན་ཀ་འཚོལ་བའི་བསམ་པ་ཅན་འདི་དག་རྒྱང་རིང་པོ་ནས། བཅོམ་ལྡན་འདས་ལ་བསྐོར་བ་བྱས་ནས་གང་ནས་ལྷགས་པའི་ལམ་དེ་ཉིད་ནས་ཕྱིར་དོང་ཞིག་གུ། སྙམ་མོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུའི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས། ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ། ལྷའི་དབང་པོ་བརྒྱ་བྱིན་གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བསམས་ཏེ། དེས་ན་གཞན་མུ་སྟེགས་ཅན་ཀུན་ཏུ་རྒྱུ་འདི་དག་གིས་རྒྱང་རིང་པོ་ཉིད་ནས། ང་ལ་བསྐོར་བ་བྱས་ཏེ། ལམ་གང་ནས་ལྷགས་པ་དེ་ཉིད་ནས་ཕྱིར་དོང་ངོ། །ཤཱ་རིའི་བུ། གཞན་ཡང་མུ་སྟེགས་ཅན་ཀུན་ཏུ་རྒྱུ་འདི་དག་གི་ནང་ན་གཅིག་ལའང་དཀར་པོའི་ཆ་ཡོད་པར་ངས་མ་མཐོང་ངོ། །གཞན་མུ་སྟེགས་ཅན་ཀུན་ཏུ་རྒྱུ་འདི་དག་ཐམས་ཅད་ནི་ཞེ་འགྲས་པའི་སེམས་དང། ཀླན་ཀ་འཚོལ་བའི་བསམ་པས་འོང་བར་སེམས་ཏེ། ཤཱ་རིའི་བུ། གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཀླན་ཀ་བཙལ་བའི་བསམ་པའམ། ཞེ་འགྲས་པའི་སེམས་ཀྱིས་འོང་བར་ནུས་པ་དེ་ནི་འཇིག་རྟེན་ལྷ་དང་བཅས་པ་དང། བདུད་དང་བཅས་པ་དང། ཚངས་པ་དང་བཅས་པ་དང། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་ནང་ན་ངས་མ་མཐོང་སྟེ། དེ་ནི་གནས་མེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། འདི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་རྒྱལ་ཆེན་བཞིའི་རིས་གྱི་ལྷ་རྣམས་དང། འོག་མིན་མན་ཆད་ཀྱི་ལྷ་རྣམས་དང། ཉན་ཐོས་གང་དག་དང། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་གང་དག་དང། བྱང་ཆུབ་སེམས་དཔའ་གང་དག་འཁོད་པ་དེ་དག་ཐམས་ཅད་ཀྱིས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡོངས་སུ་བཟུང་བའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ཐམས་ཅད་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལས་བྱུང་པའི་ཕྱིར་རོ། །ཤཱ་རིའི་བུ། གཞན་ཡང་ཤར་ཕྱོགས་ཀྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་དང། ཕྱོགས་བཅུའི་བར་དུ་ཕྱོགས་རེ་རེར་ཡང་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་གི་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་རྣམས་དང། རང་སངས་རྒྱས་རྣམས་དང། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང། ལྷ་དང། ཀླུ་དང། གནོད་སྦྱིན་དང། དྲི་ཟ་དང། ལྷ་མ་ཡིན་དང། ནམ་མཁའ་ལྡིང་དང། མིའམ་ཅི་དང། ལྟོ་འཕྱེ་ཆེན་པོ་གང་ཡིན་པ་དེ་དག་ཐམས་ཅད་ཀྱིས་ཀྱང་ཤེས་རབ་ཀྱི་
ཕ་རོལ་ཏུ་ཕྱིན་པ་འདི་ཡོངས་སུ་བཟུང་བའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ཐམས་ཅད་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལས་བྱུང་བའི་ཕྱིར་རོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་འཁོར་བཞི་པོ་འདི་དག་སྤྱན་སྔ་ན་འཁོད་ཅིང། འདོད་པ་ན་སྤྱོད་པ་དང། གཟུགས་ན་སྤྱོད་པའི་ལྷའི་བུ་འདི་དག་ཀྱང་སྤྱན་སྔ་ན་འཁོད་པ་ལས་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་དུ་ངེས་ཀྱི། མིག་གིས་མི་རྩོལ་བར་བྱ་བའི་ཕྱིར་བདག་བཅོམ་ལྡན་འདས་ག་ལ་བ་དེར་འགྲོ་བར་བྱའོ། །སྙམ་མོ། །དེ་ནས་བདུད་སྡིག་ཅན་གྱིས་དཔུང་གི་ཚོགས་ཡན་ལག་བཞི་པ་མངོན་པར་སྤྲུལ་ནས། བཅོམ་ལྡན་འདས་ག་ལ་བ་དེར་འགྲོ་བར་བསམས་སོ། །དེ་ནས་ལྷའི་དབང་པོ་བརྒྱ་བྱིན་འདི་སྙམ་དུ་སེམས་ཏེ། ཀྱེ་མ་བདུད་སྡིག་ཅན་འདི་ནི་དཔུང་གི་ཚོགས་ཡན་ལག་བཞི་པ་མངོན་པར་སྤྲུལ་ནས། བཅོམ་ལྡན་འདས་ག་ལ་བ་དེར་འགྲོ་བར་འདོད་དེ། བདུད་སྡིག་ཅན་འདི་དཔུང་གི་ཚོགས་ཡན་ལག་བཞི་པའི་བཀོད་པ་གང་ཡིན་པ། དཔུང་གི་ཚོགས་ཡན་ལག་བཞི་པའི་བཀོད་པ་འདི་ལྟ་བུ་འདི་ནི་རྒྱལ་པོ་གཟུགས་ཅན་སྙིང་པོའི་ཡང་མ་ཡིན། དཔུང་གི་ཚོགས་ཡན་ལག་བཞི་པའི་བཀོད་པ་འདི་ལྟ་བུ་ནི་རྒྱལ་པོ་གསལ་རྒྱལ་གྱིའང་མ་ཡིན། ཤཱཀྱ་རྣམས་ཀྱིའང་མ་ཡིན། ལི་ཙ་བཱི་རྣམས་ཀྱིའང་མ་ཡིན་གྱི། བདུད་སྡིག་ཅན་ནི་ཡུན་རིང་པོ་ནས། བཅོམ་ལྡན་འདས་ལ་གླགས་ལྟ་ཞིང། སྐབས་འཚོལ་བ་དང། སེམས་ཅན་ཡང་དག་པ་ལ་ཞུགས་པ་རྣམས་ལ། གཙེ་བའི་བསམ་པ་དང་ལྡན་པ་ཡིན་པས། དཔུང་གི་ཚོགས་ཡན་ལག་བཞི་པ་གང་ཡིན་པ་འདི་ནི་བདུད་སྡིག་ཅན་གྱིས་མངོན་པར་སྤྲུལ་ཡིན་གྱི། བདག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བསམ་པར་བྱའོ། །དྲན་ནས་ཀྱང་ཁ་ཏོན་དུ་བྱའོ། །སྙམ་མོ། །དེ་ནས་ལྷའི་དབང་པོ་བརྒྱ་བྱིན་གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བསམས་སོ། །དྲན་ནས་ཀྱང་ཁ་ཏོན་དུ་བྱས་ཏེ། ལྷའི་དབང་པོ་བརྒྱ་བྱིན་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཇི་ཙམ་དུ་ཁ་ཏོན་བྱེད་པ་དེ་ཙམ་དུ། བདུད་སྡིག་ཅན་ལམ་དེ་ཉིད་དང། སྒོ་དེ་ཉིད་ནས་ཕྱིར་ལོག་གོ །དེ་ནས་འཁོར་དེར་རྒྱལ་ཆེན་བཞིའི་རིས་ཀྱི་ལྷའི་བུ་རྣམས་དང། འོག་མིན་མན་ཆད་ཀྱི་ལྷ་གང་ཡིན་པ་དེ་དག་གིས་ལྷའི་མེ་ཏོག་རྣམས་མངོན་པར་སྤྲུལ་ནས། བར་སྣང་ལ་འཁོད་བཞིན་དུ་བཅོམ་ལྡན་
འདས་ག་ལ་བ་དེར་ལོགས་སུ་འདོར་ཞིང་འཐོར་བར་བྱེད་ལ། ཚིག་འདི་སྐད་ཅེས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཇི་སྲིད་དུ་ཛམྦུའི་གླིང་གི་མི་རྣམས་ལ་གནས་པ་དེ་སྲིད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེད་པར་མི་འགྱུར་ཞིང། དམ་པའི་ཆོས་ཀྱང་ཡུན་རིང་དུ་གནས་པར་འགྱུར་ལ། དགེ་འདུན་ཡང་འཇིག་རྟེན་དུ་འབྱུང་བར་འགྱུར་བ་དང། དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དང། དེ་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྱོད་པའི་ཁྱད་པར་ཡང་གྲག་པར་འགྱུར་ལ། ཕྱོགས་གང་ལོགས་ན་རིགས་ཀྱི་བུའམ་རིགས་ཀྱི་བུ་མོ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡི་གེར་བྲིས་ཏེ། གླེགས་བམ་དུ་བྱས་ནས་འཆང་བའི་ཕྱོགས་དེ་སྣང་བ་དང་ལྡན་པར་འགྱུར་ལ། གང་ན་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སྤྱོད་པའི་ས་ཕྱོགས་དེའང་མགོན་ཡོད་ཅིང་མུན་པ་དང་བྲལ་བར་འགྱུར་བས་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཛམྦུ་གླིང་པའི་མི་རྣམས་ཡུན་རིང་དུ་སྤྱོད་པར་གྱུར་ཅིག །ཅེས་སྨྲས་སོ། །དེ་སྐད་ཅེས་གསོལ་པ་དང། བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །དེ་དེ་བཞིན་ཏེ། ཀཽ་ཤི་ཀ །ཕྱོགས་གང་དང། གང་གི་འཇིག་རྟེན་གྱི་ཁམས་རབ་འབྱམས་ན་ཤེས་རབ་ཀྱི་ཕ་རོལ་ཏུ་ཕྱིན་པ་འདི་སྤྱོད་ཅིང་གླེགས་བམ་ལ་བྲིས་པ་ཡོད་པའི་ས་ཕྱོགས་དེ་ནི་སྣང་བར་གྱུར་པ་ཡིན་ཏེ། ས་ཕྱོགས་དེ་ནི་མགོན་ཡོད་ཅིང། མུན་པ་མུན་ནག་དང་བྲལ་བར་འགྱུར་རོ། །དེ་ནས་ལྷའི་བུ་དེ་དག་གིས་ལྷའི་མེ་ཏོག་རྣམས་མངོན་པར་སྤྲུལ་ནས། བཅོམ་ལྡན་འདས་ག་ལ་བ་དེར་ལོགས་སུ་གཏོར་ཏེ། ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང། འཆང་བ་དང། ཀློག་པ་དང། ཀུན་ཆུབ་པར་བྱེད་པ་དང། ཚུལ་བཞིན་དུ་ཡིད་ལ་བགྱིད་པ་དེ་ལ་ནི་བདུད་དང། བདུད་ཀྱི་རིས་ཀྱི་ལྷ་རྣམས་ཀྱིས་གླགས་རྙེད་པར་མི་འགྱུར་ལགས་སོ། །བཅོམ་ལྡན་འདས། བདག་ཅག་གིས་ཀྱང་རིགས་ཀྱི་བུའམ་རིགས་ཀྱི་བུ་མོ་དེ་་ཏུ་རྒྱུན་མི་ཆད་པར་བསྲུང་བ་དང། བསྐྱབ་པ་དང། སྦ་བར་བགྱིའོ། །བདག་ཅག་ནི་རིགས་ཀྱི་བུ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང། འཆང་བ་དང། ཀུན་ཆུབ་པར་བྱེད་པ་དང། ་པ་དང། ཚུལ་བཞིན་དུ་ཡིད་
ལ་བགྱིད་པ་དེ་ལ་སྟོན་པ་ལགས་སོ། །སྙམ་དུ་འཛིན་ལགས་སོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་། རིགས་ཀྱི་བུའམ་རིགས་ཀྱི་བུ་མོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་ཏམ་། འཆང་ངམ། ཀློག་གམ། ཀུན་ཆུབ་པར་བགྱིད་དམ། ཚུལ་བཞིན་དུ་ཡིད་ལ་བགྱིད་པ་དེ་དག་ནི་དགེ་བའི་རྩེ་བ་ངན་དོན་དང་ལྡན་པ་མ་ལགས་སོ། །རིགས་ཀྱི་བུའམ་རིགས་ཀྱི་བུ་མོ་དེ་དག་ནི། སྔོན་གྱི་རྒྱལ་བ་ཐམས་ཅད་ལ་ལྷག་པར་བགྱི་བ་བགྱིས་པ་ལགས་སོ། །རིགས་ཀྱི་བུའམ་རིགས་ཀྱི་བུ་མོ་གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་འདི་འཛིན་པ་དང། ཚུལ་བཞིན་དུ་ཡིད་ལ་བགྱིད་པའི་བར་དག་ཏུ་བགྱིད་པའི་དེ་དག་ནི། སངས་རྒྱས་མང་པོ་ལ་བསྙེན་བཀུར་བགྱིད་བགྱིད་པ་དང། དགེ་བའི་བཤེས་གཉེན་གྱིས་ཡོངས་སུ་ཟིན་པ་ལགས་སོ། །དེ་ཅིའི་སླད་དུ་ཞེ་ན། རྣམ་པ་ཐམས་ཅད་མཁྱེན་པ་ཉིད་ནི། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་བྱུང་བ་ལགས་ལ། ཤེས་རབ་ཀྱི་ཕ་རོལ་ཏུ་ཕྱིན་པའང། འདི་ལྟ་སྟེ། རྣམ་པ་ཐམས་ཅད་མཁྱེན་པ་ཉིད་ལས་བྱུང་བ་ལགས་པའི་སླད་དུའོ། །དེ་ཅིའི་སླད་དུ་ཞེ་ན། འདི་ལྟར་རྣམ་པ་ཐམས་ཅད་མཁྱེན་པ་ཉིད་ཀྱང་གཞན་མ་ལགས་ལ། ཤེས་རབ་ཀྱི་ཕ་རོལ་ཏུ་ཕྱིན་པའང་གཞན་མ་ལགས་པའི་སླད་དུ་སྟེ། དེ་ལྟར་ན་རྣམ་པ་ཐམས་ཅད་མཁྱེན་པ་ཉིད་དང། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་གཉིས་སུ་མ་མཆིས་ཏེ་གཉིས་སུ་དབྱེར་མ་མཆིས་ཤིང་ཐ་མི་དད་དེ། གཅད་དུ་མ་མཆིས་པ་ལགས་སོ། །དེ་སྐད་ཅེས་གསོལ་པ་དང། བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ །དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། རྣམ་པ་ཐམས་ཅད་མཁྱེན་པ་ཉིད་དང། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་གཉིས་སུ་མེད་དེ་གཉིས་སུ་དབྱེར་མེད་ཅིང་ཐ་མི་དད་དེ། གཅད་དུ་མེད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་ལས། གཞན་མུ་སྟེགས་ཅན་གྱི་ལེའུ་ཞེས་བྱ་སྟེ་ཉི་ཤུ་རྩ་དགུ་པའོ། །སརྦ་མངྒལཾ།