བཞི་བཅུ་རྩ་ལྔ་པ། གྲུའི་ལེའུ།
རབ་འབྱོར། འདི་ལྟ་སྟེ། དཔེར་ན། གང་གི་ཚེ་རྒྱ་མཚོའི་གྲུ་ཞིག་པར་གྱུར་པ་ན། དེའི་ནང་ན་མི་འཁོད་པ་དག་གིས་ཤིང་ངམ། རྐྱལ་པའམ། མི་རོ་ལ་མ་འཇུས་ཤིང་མ་བཟུང་ན། རབ་འབྱོར། མི་དེ་དག་ནི། རྒྱ་མཚོའི་འགྲམ་དུ་མ་ཕྱིན་པར་འཆི་བའི་དུས་བྱེད་པར་རིག་པར་བྱའོ། །རབ་འབྱོར། རྒྱ་མཚོའི་གྲུ་ཞིག་པ་ན་མི་གང་དག་ཤིང་ངམ། རྐྱལ་པའམ། མི་རོ་ལ་འཇུ་ཞིང་འཛིན་པར་བྱེད་ན། རབ་འབྱོར། མི་དེ་དག་ནི། རྒྱ་མཚོའི་ནང་དུ་འཆི་བར་མི་འགྱུར་ཏེ། བདེ་བར་རྒྱ་མཚོ་ལས་རྒལ་བར་འགྱུར་ཞིང་། ཉེ་ཞོ་མེད་པར་ཐང་ལ་གནས་པར་འགྱུར་རོ། །རབ་འབྱོར། དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་པ་དང་པ་ཙམ་དང་། དགའ་བ་ཙམ་དང་ལྡན་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཡི་གེར་འབྲི་བར་མི་བྱེད། ལུང་ནོད་པར་མི་བྱེད། ཁ་ཏོན་དུ་མི་བྱེད། ཚུལ་བཞིན་དུ་ཡིད་ལ་མི་བྱེད་པ་དང་། དེ་བཞིན་དུ་སྦྱར་ཏེ། བསམ་གཏན་གྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པ་ཡི་གེར་འབྲི་བར་མི་བྱེད། ལུང་ནོད་པར་མི་བྱེད། ཁ་ཏོན་དུ་མི་བྱེད། ལྷག་པར་དམིགས་པར་མི་བྱེད་པ་དང་། དེ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་དང་ལྡན་པའི་མདོ་སྡེ་ཡི་གེར་འབྲི་བར་མི་བྱེད། ལུང་ནོད་པར་མི་བྱེད། ཁ་ཏོན་དུ་མི་བྱེད། ཚུལ་བཞིན་དུ་ཡིད་ལ་མི་བྱེད་པ་དང་། ལྷག་པར་དམིགས་པར་མི་བྱེད་པའི་གང་ཟག་བྱང་ཆུབ་སེམས་དཔའི་ཐེག་པ་པ་རྣམ་པ་ཐམས་ཅད་མཁྱེན་པ་ཉིད་ལ་ཞུགས་པ་གང་ཡིན་པ་དེ་དག་ནི། བར་མ་དོར་ལམ་དུ་ཉོན་མོངས་པར་འགྱུར་བར་རིག་པར་བྱ་སྟེ། དེ་དག་
ནི་ཉན་ཐོས་ཀྱི་ས་འམ། རང་སངས་རྒྱས་ཀྱི་ས་མངོན་སུམ་དུ་བྱེད་པར་འགྱུར་རོ། །རབ་འབྱོར། གང་ཟག་བྱང་ཆུབ་སེམས་དཔའི་ཐེག་པ་པ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་བའི་ཕྱིར་དད་པ་ཡོད་པ་དང་། བཟོད་པ་ཡོད་པ་དང་། དང་བ་ཡོད་པ་དང་། ལྷག་པའི་བསམ་པ་ཡོད་པ་དང་། འདོད་པ་ཡོད་པ་དང་། མོས་པ་ཡོད་པ་དང་། གཏོང་བ་ཡོད་པ་དང་། བརྩོན་པ་མི་གཏོང་བ་ཡོད་པ་དེ་དག་ནི། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡི་གེར་འབྲི་བར་བྱེད། ལུང་ནོད་པར་བྱེད། ཁ་ཏོན་དུ་བྱེད། ཚུལ་བཞིན་དུ་ཡིད་ལ་བྱེད་པར་འགྱུར་རོ། །རབ་འབྱོར། རིགས་ཀྱི་བུའམ། རིགས་ཀྱི་བུ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་དད་པ་དང་། བཟོད་པ་དང་། དང་བ་དང་། ལྷག་པའི་བསམ་པ་དང་། འདོད་པ་དང་། མོས་པ་དང་། གཏོང་བ་དང་། བརྩོན་པ་མི་གཏོང་བ་དེ་དག་དང་། གང་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་འཛིན་ཅིང་། རྣམ་པ་ཐམས་ཅད་མཁྱེན་པའི་བར་དུ་ཡོངས་སུ་འཛིན་པ་དེ་དག་བར་མ་དོར་ཉོན་མོངས་པར་མི་འགྱུར་ཞིང་། དེ་དག་ཉན་ཐོས་དང་། རང་སངས་རྒྱས་ཀྱི་ས་ལས་འདས་ཏེ་སེམས་ཅན་རྣམས་ཡོངས་སུ་སྨིན་པར་བྱས་ཤིང་། སངས་རྒྱས་ཀྱི་ཞིང་ཡོངས་སུ་དག་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་ལ་ལྟོས། རབ་འབྱོར། འདི་ལྟ་སྟེ། དཔེར་ན། སྐྱེས་པའམ། བུད་མེད་ཅིག་གིས་བུམ་པ་སོ་མ་བཏང་། མ་བསྲེགས་པས་ཆུ་བཅུ་བར་སེམས་ན། རབ་འབྱོར། བུམ་པ་དེ་ནི། རིང་པོར་མི་ཐུབ་སྟེ། མྱུར་བ་ཉིད་དུ་འཇིག་ཅིང་ཞུ་བར་འགྱུར་བར་རིག་པར་བྱའོ། །དེ་ཅིའི་ཕྱིར་ཞེ་ན། འདི་ལྟར། བུམ་པ་སོ་མ་བཏང་བའི་ཕྱིར་ཏེ། དེ་ནི། ཕྱིར་ས་ཐ་མལ་བ་ཉིད་དུ་འགྱུར་རོ། །རབ་འབྱོར། དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་པ་རྣམས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་དད་པའང་ཡོད།
བཟོད་པའང་ཡོད། དགའ་བའང་ཡོད། དང་བའང་ཡོད། ལྷག་པའི་བསམ་པའང་ཡོད། འདོད་པའང་ཡོད། མོས་པའང་ཡོད། གཏོང་བའང་ཡོད། བརྩོན་པ་མི་གཏོང་བའང་ཡོད་དུ་ཟིན་ཀྱང་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་ཟིན་ལ། ཐབས་ལ་མཁས་པས་ཡོངས་སུ་མ་ཟིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། སྦྱིན་པའི་ཕ་རོལ་ཏུ་ཕྱིན་པས་ཡོངས་སུ་མ་ཟིན་པ་དང་། ནང་སྟོང་པ་ཉིད་ཀྱིས་ཡོངས་སུ་མ་ཟིན། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བར་གྱིས་ཡོངས་སུ་མ་ཟིན། དྲན་པ་ཉེ་བར་བཞག་པ་རྣམས་ཀྱིས་ཡོངས་སུ་མ་ཟིན། ཡང་དག་པར་སྤོང་བ་རྣམས་དང་། རྫུ་འཕྲུལ་གྱི་རྐང་པ་རྣམས་དང་། དབང་པོ་རྣམས་དང་། སྟོབས་རྣམས་དང་། བྱང་ཆུབ་ཀྱི་ཡན་ལག་རྣམས་དང་། ལམ་གྱིས་ཡོངས་སུ་མ་ཟིན། མངོན་པར་ཤེས་པ་ལྔས་ཡོངས་སུ་མ་ཟིན། སྟོབས་བཅུ་དང་། མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱིས་ཡོངས་སུ་མ་ཟིན། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཡོངས་སུ་མ་ཟིན་ན། རབ་འབྱོར། རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་པ་དེ་དག་ནི། བར་མ་དོར་ཉོན་མོངས་པར་འགྱུར་རོ། །རབ་འབྱོར། རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་པ་བར་མ་དོར་ཉོན་མོངས་པར་འགྱུར་བ་གང་ཡིན་ཞེ་ན། འདི་ལྟ་སྟེ། ཉན་ཐོས་ཀྱི་ས་དང་། རང་སངས་རྒྱས་ཀྱི་ས་ཡིན་ནོ། །རབ་འབྱོར། འདི་ལྟ་སྟེ། དཔེར་ན། སྐྱེས་པའམ། བུད་མེད་གཅིག་གིས་བུམ་པ་སོ་བཏང་བས་ཆུ་ཀླུང་ངམ། ཁྲོན་པའམ། མཚོའམ། མཚེའུའམ། ལྟེང་ཀ་ནས་ཆུ་བཅུས་ན། རབ་འབྱོར། བུམ་པ་དེ་ནི། བདེ་བར་ཁྱིམ་དུ་ཕྱིན་པར་འགྱུར་བར་རིག་པར་བྱའོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་དད་པའང་ཡོད། བཟོད་
པའང་ཡོད། དགའ་བའང་ཡོད། དང་བའང་ཡོད། ལྷག་པའི་བསམ་པའང་ཡོད། འདོད་པའང་ཡོད། མོས་པའང་ཡོད། གཏོང་བའང་ཡོད། བརྩོན་པ་མི་གཏོང་བའང་ཡོད་ལ། དེ་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་ཅིང་ཐབས་ལ་མཁས་པ་དང་། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཡོངས་སུ་ཟིན་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། བར་མ་དོར་ལམ་དུ་འདི་ལྟ་སྟེ། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པར་ཉོན་མོངས་པར་མི་འགྱུར་ཞིང་། ཉེ་ཞོ་མེད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བར་རིག་པར་བྱའོ། །རབ་འབྱོར། འདི་ལྟ་སྟེ། དཔེར་ན། རྒྱ་མཚོའི་གྲུ་ལེགས་པར་མ་བཙོམས་ཤིང་ཟག་ལྷན་མ་བྱས་པར་རྫས་ཀྱིས་ལྕི་བར་བྱས་ཏེ་ཆུ་ལ་བཏང་ན། རབ་འབྱོར། གྲུ་དེ་ནི། བར་མ་དོར་ནུབ་པར་འགྱུར་ཏེ། རྫས་ཀྱང་ལོགས་ཤིག་།གྲུའང་ལོགས་ཤིག་ཏུ་འགྲོ་བར་འགྱུར་ཏེ། དེ་ལྟ་བུའི་ཚོང་པ་དེ་ནི། ཐབས་ལ་མི་མཁས་ཤིང་གནོད་པ་ཆེན་པོ་དང་ཕྲད་པར་འགྱུར་བ་དང་། རིན་པོ་ཆེ་ཆེན་པོ་དག་དང་བྲལ་བར་འགྱུར་བར་རིག་པར་བྱའོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་དད་པའང་ཡོད། བཟོད་པའང་ཡོད། དགའ་བའང་ཡོད། དང་བའང་ཡོད། ལྷག་པའི་བསམ་པའང་ཡོད། འདོད་པའང་ཡོད། མོས་པའང་ཡོད། གཏོང་བའང་ཡོད། བརྩོན་པ་མི་གཏོང་བའང་ཡོད་དུ་ཟིན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་ཟིན་ལ། ཐབས་ལ་མཁས་པས་ཡོངས་སུ་མ་ཟིན་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཡོངས་སུ་མ་ཟིན་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། བར་མ་དོར་ཉོན་མོངས་པར་འགྱུར་ཏེ། དོན་ཆེན་པོ་ལས་ཡོངས་སུ་ཉམས་ཤིང་། འདི་ལྟ་སྟེ། རྣམ་པ་ཐམས་ཅད་མཁྱེན་པ་ཉིད་ཀྱི་རིན་པོ་ཆེའི་ཕུང་པོ་ཆེན་པོ་ལས་ཡོངས་སུ་ཉམས་པར་འགྱུར་རོ། །རབ་འབྱོར་བྱང་
ཆུབ་སེམས་དཔའ་སེམས་དཔའ་ཆེན་པོའི་བར་མ་དོར་ཉོན་མོངས་པར་འགྱུར་བ་གང་ཞེ་ན། འདི་ལྟ་སྟེ་། ཉན་ཐོས་ཀྱི་ས་དང་། རང་སངས་རྒྱས་ཀྱིས་ཡིན་ནོ། །རབ་འབྱོར། འདི་ལྟ་སྟེ། དཔེར་ན། སྐྱེས་བུ་མཁས་པའི་རང་བཞིན་ཅན་གྱིས་རྒྱ་མཚོའི་གྲུ་ལེགས་པར་བཙེམས་ཤིང་ཟག་ལྷན་བྱས་ལ་ཤིན་ཏུ་སྦྱངས་ན། རབ་འབྱོར། རྒྱ་མཚོའི་གྲུ་དེ་ནི། བར་མ་དོར་ཞིག་པར་མི་འགྱུར་ཞིང་། དེས་གང་དུ་བགྲོད་པར་བྱ་བ་དེར་ཕྱིན་པར་འགྱུར་རོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་དད་པའང་ཡོད། བཟོད་པའང་ཡོད། དགའ་བའང་ཡོད། དང་བའང་ཡོད། ལྷག་པའི་བསམ་པའང་ཡོད། འདོད་པའང་ཡོད། མོས་པའང་ཡོད། གཏོང་བའང་ཡོད། བརྩོན་པ་མི་གཏོང་བའང་ཡོད་ལ། ཤེས་རབ་ཀྱི་ཕ་རོལ་ཏུ་ཕྱིན་པས་ཀྱང་ཡོངས་སུ་ཟིན་ཅིང་། ཐབས་ལ་མཁས་པས་ཀྱང་ཡོངས་སུ་ཟིན་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཀྱང་ཡོངས་སུ་ཟིན་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། བར་མ་དོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ལྡོག་པར་མི་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར། བྱང་ཆུབ་སེམས་དཔའ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་དད་པའང་་ཡོད། བཟོད་པའང་ཡོད། དགའ་བའང་ཡོད། དང་བའང་ཡོད། ལྷག་པའི་བསམ་པའང་ཡོད། འདོད་པའང་ཡོད། མོས་པའང་ཡོད། གཏོང་བའང་ཡོད། བརྩོན་པ་མི་གཏོང་བའང་ཡོད་ལ། དེ་ཤེས་རབ་ཀྱི་ཕ་རོལ་ཏུ་ཕྱིན་པས་ཀྱང་ཡོངས་སུ་ཟིན་ཅིང་། ཐབས་ལ་མཁས་པས་ཀྱང་ཡོངས་སུ་ཟིན་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཀྱང་ཡོངས་སུ་ཟིན་པའི་ཕྱིར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཉན་ཐོས་ཀྱིས་དང་། རང་སངས་རྒྱས་ཀྱི་སར་ལྟུང་བར་མི་འགྱུར་རོ། །རབ་འབྱོར། འདི་ལྟ་སྟེ། དཔེར་ན། མི་སྐྱེས་ནས་ལོ་བརྒྱ་ཉི་ཤུ་ལོན་པ། རྒས་ཤིང་འཁོགས་ལ་གཏུགས་
པ་ཞིག་ཡོད་དེ། དེའི་ལུས་ལ་རླུང་ལས་གྱུར་པའམ། མཁྲིས་པ་ལས་གྱུར་པའམ། བད་ཀན་ལས་གྱུར་པའམ། འདུས་པ་ལས་གྱུར་པའི་ནད་འགའ་ཞིག་བྱུང་ན། རབ་འབྱོར། འདི་ཇི་སྙམ་དུ་སེམས། ཅི། མི་དེ་རང་དགར་ལྡང་བའི་མཐུ་དང་ལྡན་ནམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཅི། མི་དེ་ལྡང་བར་འགྱུར་རམ། རབ་འབྱོར་གྱིས་གསོལ་པ། བཅོམ་ལྡན་འདས། མི་དེ་ནི། ཁྲི་ལས་ལྡང་བའི་རྔོ་ཐོགས་སུ་ལགས་ཀྱང་དེ་ནི། རྒས་པ་དེ་དང་། བྲོ་ནད་དེ་དག་གིས་ཉམས་དམས་པས། དཔག་ཚད་གཅིག་གི་བར་རམ། དཔག་ཚད་གཉིས་ཀྱི་བར་དུ་མཆི་བའི་མཐུའང་མ་མཆིས་ཏེ། ཁྲི་དེ་ལས་ལྡང་བའི་རྡོ་ཐོགས་སུ་ལགས་ཀྱང་མཆི་བའི་རྡོ་ནི། མི་ཐོགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་དད་པའང་ཡོད། བཟོད་པའང་ཡོད། དགའ་བའང་ཡོད། དང་བའང་ཡོད། ལྷག་པའི་བསམ་པའང་ཡོད། འདོད་པའང་ཡོད། མོས་པའང་ཡོད། གཏོང་བའང་ཡོད། བརྩོན་པ་མི་གཏོང་བའང་ཡོད་དུ་ཟིན་ཀྱང་དེ་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་ཟིན་ལ། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཡོངས་སུ་མ་ཟིན་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་ཟིན་པ་དང་། ཐབས་ལ་མཁས་པས་ཡོངས་སུ་མ་ཟིན་པའི་ཕྱིར་བར་མདོར་ལམ་དུ་ཉན་ཐོས་ཀྱི་སའམ། རང་སངས་རྒྱས་ཀྱི་སར་ལྟུང་བར་འགྱུར་རོ། །རབ་འབྱོར། འདི་ལྟ་སྟེ། དཔེར་ན། མི་སྐྱེས་ནས་ལོ་བརྒྱ་ཉི་ཤུ་ལོན་པ། རྒས་ཤིང་འཁོགས་ལ། གཏུགས་པར་གྱུར་པ་དེ་ལ་རླུང་ལས་གྱུར་པའམ། མཁྲིས་པ་ལས་གྱུར་པའམ། བད་ཀན་ལས་གྱུར་པའམ། འདུས་པ་ལས་གྱུར་པའི་ནད་ཀྱིས་ཉམས་དམས་པ་དེ་ཉིད་མི་
སྟོབས་དང་ལྡན་པ་གཉིས་ཀྱིས་མཆན་གཡས་གཡོན་ནས་བརྟེན་ཏེ་བཏེགས་ནས་ཁྲི་དེ་ལས་བསླངས་ཏེ་འདི་སྐད་དུ། ཀྱེ། མི་ཁྱོད་ཁོ་བོ་ཅག་གཉིས་ཀྱིས་བརྟེན་ཏེ་བཟུང་གི། གང་དུ་འདོད་པ་དང་། གང་དགའ་བར་སོང་ཞིག་དང་གནས་དེར་མ་ཕྱིན་གྱི་བར་དུ་བར་མདོར་འགྱེལ་བར་མི་འགྱུར་རོ། །ཞེས་ཟེར་བ་ད་བཞིན་དུ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་དད་པའང་ཡོད། བཟོད་པའང་ཡོད། དགའ་བའང་ཡོད། དང་བའང་ཡོད། ལྷག་པའི་བསམ་པའང་ཡོད། འདོད་པའང་ཡོད། མོས་པའང་ཡོད། གཏོང་པའང་ཡོད། བརྩོན་པ་མི་གཏོང་བའང་ཡོད་ལ། དེ་ཤེས་རབ་ཀྱི་ཕ་རོལ་ཏུ་ཕྱིན་པས་ཀྱང་ཡོངས་སུ་ཟིན་ཅིང་། ཐབས་ལ་མཁས་པས་ཀྱང་ཡོངས་སུ་ཟིན་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། བར་མ་དོར་ལྡོག་པར་མི་འགྱུར་བར་རིག་པར་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་གནས་དེ་འཐོབ་པའི་མཐུ་དང་ལྡན་པ་ཡིན་ནོ། །རབ་འབྱོར་གྱིས་གསོལ་པ། བཅོམ་ལྡན་འདས། རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་དག་།ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་ཟིན་ཅིང་ཐབས་ལ་མཁས་པས་ཡོངས་སུ་མ་ཟིན་ལ། ཉན་ཐོས་ཀྱི་ས་དང་། རང་སངས་རྒྱས་ཀྱི་སར་ཡང་ལྟུང་བར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དོན་འདི་འདྲི་བར་སེམས་པ་ལེགས་སོ། །ལེགས་སོ། །རབ་འབྱོར། འདི་ལ་བྱང་ཆུབ་སེམས་དཔའ་ཐོག་མ་ཁོ་ནར་སྦྱིན་པ་སྦྱིན་པར་བྱེད་པ་ན། ངར་འཛིན་པ་དང་། ང་ཡིར་འཛིན་པར་ལྟུང་བའི་སེམས་ཀྱི་རྒྱུད་ཀྱིས་སྦྱིན་པ་སྦྱིན་པར་བྱེད་ཅིང་། ཚུལ་ཁྲིམས་གང་སྲུང་བ་དང་། བཟོད་པ་གང་སྒོམ་པ་དང་། བརྩོན་འགྲུས་གང་
རྩོམ་པ་དང་། བསམ་གཏན་གང་ལ་སྙོམས་པར་འཇུག་པ་དང་། ཤེས་རབ་གང་སྒོམ་པ་དེའང་ངར་འཛིན་པ་དང་། ང་ཡིར་འཛིན་པར་ལྟུང་བའི་སེམས་ཀྱིས་ཤེས་རབ་སྒོམ་པར་བྱེད་དོ། །སྦྱིན་པ་སྦྱིན་པར་བྱེད་པ་ན། འདི་སྙམ་དུ་སེམས་ཏེ། བདག་གིས་སྦྱིན་པ་སྦྱིན་ནོ། །སྦྱིན་པ་འདི་སྦྱིན་པར་བྱའོ། །བདག་ནི། སྦྱིན་པ་དང་ལྡན་ནོ། །བདག་གིས་ཚུལ་ཁྲིམས་བསྲུང་ངོ་། །བདག་གིས་ཚུལ་ཁྲིམས་བསྒོམ་པར་བྱའོ། །བདག་ནི། ཚུལ་ཁྲིམས་དང་ལྡན་ནོ། །བདག་གིས་བཟོད་པར་བྱའོ། །བདག་གིས་བཟོད་པ་བསྒོམ་པར་བྱའོ། །བདག་ནི། བཟོད་པ་དང་ལྡན་ནོ། །བདག་གིས་བརྩོན་འགྲུས་བརྩམས་སོ། །བདག་གིས་བརྩོན་འགྲུས་བརྩམ་པར་བྱའོ། །བདག་ནི། བརྩོན་འགྲུས་དང་ལྡན་ནོ། །བདག་བསམ་གཏན་ལ་སྙོམས་པར་འཇུག་གོ །བདག་གིས་བསམ་གཏན་བསྒོམ་པར་བྱའོ། །བདག་ནི། བསམ་གཏན་དང་ལྡན་ནོ། །བདག་གིས་ཤེས་རབ་བསྒོམ་མོ། །བདག་གིས་ཤེས་རབ་འདི་བསྒོམ་པར་བྱའོ། །བདག་ནི། ཤེས་རབ་དང་ལྡན་ནོ། །སྙམ་སྟེ། དེ་སྦྱིན་པ་དེས་རློམ་སེམས་སུ་བྱེད་དོ། །སྦྱིན་པ་དེ་རློམ་སེམས་སུ་བྱེད་དོ། །བདག་གི་སྦྱིན་པའོ། །སྙམ་དུ་རློམ་སེམས་སུ་བྱེད་དོ། །དེ་བཞིན་དུ་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་རློམ་སེམས་སུ་བྱེད་དོ། །ཤེས་རབ་ཀྱིས་རློམ་སེམས་སུ་བྱེད་དོ། །བདག་གི་ཤེས་རབ་བོ། །སྙམ་དུ་རློམ་སེམས་སུ་བྱེད་དོ། །དེ་ཅིའི་ཕྱིར་ཞེ་ན། སྦྱིན་པའི་ཕ་རོལ་ཏུ་ཕྱིན་པ་ལ་ནི། རྣམ་པར་རྟོག་པ་དེ་དག་མེད་དེ། སྦྱིན་པའི་ཕ་རོལ་ཏུ་ཕྱིན་པ་ནི། ཕ་མཐར་ཕྱིན་པ་ཡིན་པའི་ཕྱིར་རོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་ནི། རྣམ་པར་རྟོག་པ་དེ་དག་མེད་དོ། །བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལའང་དེ་བཞིན་དུ་རྣམ་པར་རྟོག་པ་མི་སྐྱེའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཕ་མཐར་ཕྱིན་པ་ཡིན་ནོ། །བྱང་ཆུབ་སེམས་དཔའི་ཐེག་པ་པ་དེས་ནི་ཕ་
མཐའ་ཡང་མི་ཤེས། ཕ་རོལ་ཀྱང་མི་ཤེས་པའི་ཕྱིར་ཏེ། དེ་ནི། སྦྱིན་པའི་ཕ་རོལ་ཏུ་ཕྱིན་པས་ཡོངས་སུ་མ་ཟིན་ཅིང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་མ་ཟིན་ལ། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཡོངས་སུ་མ་ཟིན་པས། ཉན་ཐོས་ཀྱི་ས་དང་། རང་སངས་རྒྱས་ཀྱི་སར་ལྟུང་བར་འགྱུར་ཏེ། རྣམ་པ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་མི་འགྱུར་རོ། །རབ་འབྱོར། རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་པ་ཇི་ལྟར་ཐབས་ལ་མི་མཁས་པ་ཡིན་ཞེ་ན། རབ་འབྱོར། འདི་ལ་རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་པ་ཐབས་ལ་མི་མཁས་པས་ཐོག་མ་ཁོ་ནར་སྦྱིན་པ་སྦྱིན་པར་བྱེད་ཅིང་། ཐབས་ལ་མི་མཁས་པས་ཚུལ་ཁྲིམས་སྲུང་པར་བྱེད། ཐབས་ལ་མི་མཁས་པས་བཟོད་པ་སྒོམ་པར་བྱེད། ཐབས་ལ་མི་མཁས་པས་བརྩོན་འགྲུས་རྩོམ་པར་བྱེད། ཐབས་ལ་མི་མཁས་པས་བསམ་གཏན་ལ་སྙོམས་པར་འཇུག་པར་བྱེད། ཐབས་ལ་མི་མཁས་པས་ཤེས་རབ་སྒོམ་པར་བྱེད་ཅིང་། དེ་འདི་སྙམ་དུ་སེམས་ཏེ། བདག་གིས་སྦྱིན་པ་སྦྱིན་ནོ། །འདི་ལ་སྦྱིན་པར་བྱའོ། །སྦྱིན་པ་འདི་སྦྱིན་པར་བྱའོ། །བདག་གིས་ཚུལ་ཁྲིམས་བསྲུང་ངོ་། །བདག་གིས་བཟོད་པ་བསྒོམ་མོ། །བདག་གིས་བརྩོན་འགྲུས་རྩོམ་མོ། །བདག་གིས་བསམ་གཏན་ལ་སྙོམས་པར་འཇུག་པར་བྱའོ། །བདག་གིས་ཤེས་རབ་བསྒོམ་པར་བྱའོ། །ཤེས་རབ་འདི་བསྒོམ་པར་བྱའོ། །སྙམ་སྟེ། དེ་སྦྱིན་པ་དེ་རློམ་སེམས་སུ་བྱེད། སྦྱིན་པས་རློམ་སེམས་སུ་བྱེད། བདག་ནི། སྦྱིན་པ་དང་ལྡན་པའོ། །སྙམ་དུ་རློམ་སེམས་སུ་བྱེད་དོ། །དེ་ཚུལ་ཁྲིམས་རློམ་སེམས་སུ་བྱེད་དོ། །ཚུལ་ཁྲིམས་ཀྱིས་རློམ་སེམས་སུ་བྱེད། བདག་ནི། ཚུལ་ཁྲིམས་དང་ལྡན་པའོ། །སྙམ་དུ་རློམ་སེམས་སུ་བྱེད་དོ། །བཟོད་པ་རློམ་སེམས་སུ་བྱེད། བཟོད་པས་རློམ་སེམས་སུ་བྱེད། བདག་ནི་བཟོད་པ་
དང་ལྡན་པའོ། །སྙམ་དུ་རློམ་སེམས་སུ་བྱེད་དོ། །བརྩོན་འགྲུས་རློམ་སེམས་སུ་བྱེད། བརྩོན་འགྲུས་ཀྱིས་རློམ་སེམས་སུ་བྱེད། བདག་ནི། བརྩོན་འགྲུས་དང་ལྡན་པའོ། །སྙམ་དུ་རློམ་སེམས་སུ་བྱེད་དོ། །བསམ་གཏན་རློམ་སེམས་སུ་བྱེད། བསམ་གཏན་གྱིས་རློམ་སེམས་སུ་བྱེད། བདག་ནི། བསམ་གཏན་དང་ལྡན་པའོ། །སྙམ་དུ་རློམ་སེམས་སུ་བྱེད་དོ། །ཤེས་རབ་རློམ་སེམས་སུ་བྱེད། ཤེས་རབ་ཀྱིས་རློམ་སེམས་སུ་བྱེད། བདག་ནི། ཤེས་རབ་དང་ལྡན་པའོ། །སྙམ་དུ་རློམ་སེམས་སུ་བྱེད་དོ། །དེ་ཅིའི་ཕྱིར་ཞེ་ན། དེ་ཇི་ལྟར་རྣམ་པར་རྟོག་པ་བཞིན་དུ་སྦྱིན་པའི་ཕ་རོལ་ཏུ་ཕྱིན་པ་ལ་རྣམ་པར་རྟོག་པ་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དེ་ནི། མཐར་ཕྱིན་པ་ཡིན་ལ། དེ་བཞིན་དུ་སྦྱར་ཏེ། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི། ཕ་མཐར་ཕྱིན་པ་ཡིན་པའི་ཕྱིར་རོ། །དེ་ཇི་ལྟར་རྣམ་པར་རྟོག་པ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་རྟོག་པ་དེ་དག་མེད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དེ་ནི། ཕ་མཐར་ཕྱིན་པ་ཡིན་ན། རིགས་ཀྱི་བུ། བྱང་ཆུབ་སེམས་དཔའི་ཐེག་པ་པ་དེས་ནི། ཕ་མཐའ་ཡང་མི་ཤེས། ཕ་རོལ་ཀྱང་མི་ཤེས་པའི་ཕྱིར་རོ། །དེ་ནི། སྦྱིན་པའི་ཕ་རོལ་ཏུ་ཕྱིན་པས་ཡོངས་སུ་མ་ཟིན་པ་ནས་སྔ་མ་བཞིན་དུ་སྦྱར་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་བར་གྱིས་ཡོངས་སུ་མ་ཟིན་ལ། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཡོངས་སུ་མ་ཟིན་པས། ཉན་ཐོས་ཀྱི་ས་དང་། རང་སངས་རྒྱས་ཀྱི་སར་ལྟུང་བར་འགྱུར་ཞིང་། རྣམ་པ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་མི་འགྱུར་ཏེ། རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་ལ་མཁས་པས་ཡོངས་སུ་མ་ཟིན་པས། ཉན་ཐོས་ཀྱིས་དང་། རང་སངས་རྒྱས་ཀྱི་སར་ལྟུང་བར་འགྱུར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་ལ་མཁས་པས་ཡོངས་སུ་ཟིན་ལ། ཉན་ཐོས་ཀྱི་སའམ། རང་སངས་རྒྱས་ཀྱི་སར་མི་ལྟུང་ཞིང་། བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་ཞེ་ན། རབ་འབྱོར། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐོག་མ་ཁོ་ནར་སྦྱིན་པ་སྦྱིན་པ་ན། ངར་འཛིན་པ་དང་། ང་ཡིར་འཛིན་པའི་སེམས་ཀྱིས་སྦྱིན་པ་སྦྱིན་པར་མི་བྱེད་ཅིང་། ཤེས་རབ་ཀྱི་བར་དུ་སྒོམ་པར་བྱེད་དེ། དེ་འདི་སྙམ་དུ། བདག་གིས་སྦྱིན་པ་སྦྱིན་ནོ། །སྦྱིན་པ་འདི་སྦྱིན་པར་བྱའོ། །འདི་ལ་སྦྱིན་པ་སྦྱིན་པར་བྱའོ། །སྙམ་དུ་རློམ་སེམས་སུ་མི་བྱེད་དོ། །ཤེས་ཀྱི་ཕ་རོལ་ཏུ་ཕྱིན་པའི་བར་དུའང་དེ་བཞིན་དུ་སྦྱར་ཏེ། དེ་སྦྱིན་པ་ལ་རློམ་སེམས་སུ་མི་བྱེད། སྦྱིན་པས་རློམ་སེམས་སུ་མི་བྱེད། བདག་གི་སྦྱིན་པའོ། །སྙམ་དུ་རློམ་སེམས་སུ་མི་བྱེད་དོ། །དེ་བཞིན་དུ་སྦྱར་ཏེ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་རློམ་སེམས་སུ་མི་བྱེད། ཤེས་རབ་ཀྱིས་རློམ་སེམས་སུ་མི་བྱེད། བདག་གི་ཤེས་རབ་བོ། །སྙམ་དུ་རློམ་སེམས་སུ་མི་བྱེད་དོ། །དེ་ཅིའི་ཕྱིར་ཞེ་ན། འདི་ལྟར། སྦྱིན་པའི་ཕ་རོལ་ཏུ་ཕྱིན་པ་ལ་ནི། གང་གིས་རློམ་སེམས་སུ་བྱེད་པའི་རྣམ་པར་རྟོག་པ་མེད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་གང་གིས་རློམ་སེམས་སུ་བྱེད་པའི་རྣམ་པར་རྟོག་པ་མེད་པའི་ཕྱིར་རོ། །འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དེ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཕ་མཐར་ཕྱིན་པ་ཡིན་ལ། བྱང་ཆུབ་སེམས་དཔའ་དེའང་ཕ་མཐའ་ཡང་ཤེས། ཕ་རོལ་ཀྱང་ཤེས་ཏེ་རློམ་སེམས་སུ་མི་བྱེད་པ་དེ་ནི། སྦྱིན་པའི་ཕ་རོལ་ཏུ་ཕྱིན་པས་ཡོངས་སུ་ཟིན་པ་ཡིན་ནོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་ཅིང་། རྣམ་པ་ཐམས་ཅད་མཁྱེན་པ་ཉིད་ཀྱི་བར་གྱིས་ཡོངས་སུ་ཟིན་ཏེ། ཉན་ཐོས་ཀྱི་ས་དང་། རང་སངས་རྒྱས་ཀྱི་སར་ལྟུང་བར་འགྱུར་ཞིང་། རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་རོ། །རབ་འབྱོར། དེ་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་ཅིང་། དེ་བཞིན་དུ་ཐབས་ལ་མཁས་
པས་ཡོངས་སུ་ཟིན་ཏེ་ཉན་ཐོས་ཀྱི་ས་དང་། རང་སངས་རྒྱས་ཀྱི་སར་ལྟུང་བར་མི་འགྱུར་རོ། །ནག་པོའི་ཕྱོགས་ལ་ཇི་ལྟ་བ་བཞིན་དུ་དཀར་པོའི་ཕྱོགས་ཐམས་ཅད་ལའང་དེ་བཞིན་དུ་སྦྱར་བར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་ལས། གྲུའི་ལེའུ་ཞེས་བྱ་སྟེ། བཞི་བཅུ་རྩ་ལྔ་པའོ།། །།