ལྔ་བཅུ་རྩ་ལྔ་པ། རྣམ་པར་རྟོག་པ་སྤང་བར་བསྟན་པའི་ལེའུ།
ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ། བམ་པོ་བཞི་བཅུ་པ། རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ནི། རྨི་ལམ་ནའང་ཉན་ཐོས་ཀྱི་སའམ། རང་སངས་རྒྱས་ཀྱི་སའམ། ཁམས་གསུམ་པ་ལ་འདོད་པ་མེད་ཅིང་ཕན་ཡོན་གྱི་སེམས་མི་བསྐྱེད་ལ། ཆོས་ཐམས་ཅད་རྨི་ལམ་ལྟ་བུ་ཉིད་དུ་ལྟ་ཞིང་། ཆོས་ཐམས་ཅད་བྲག་ཅ་ལྟ་བུ་དང་། སྨིག་རྒྱུ་ལྟ་བུ་དང་། སྤྲུལ་པ་ལྟ་བུ་ཉིད་དུ་ལྟ་ལ་མངོན་སུམ་དུའང་མི་བྱེད་ན། རབ་འབྱོར། དེའང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར། གཞན་ཡང་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོས་རྨི་ལམ་ན་དེ་བཞིན་གཤེགས་པ་འཁོར་བརྒྱ་ཕྲག་དུ་མ་དང་། འཁོར་སྟོང་ཕྲག་དུ་མ་དང་། འཁོར་འབུམ་ཁྲག་དུ་མ་དང་། འཁོར་བྱེ་བ་ཁྲག་ཁྲིག་འབུམ་ཁྲག་དུ་མ་མངའ་བ། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དག་གིས་ཡོངས་སུ་བསྐོར་ཅིང་མདུན་གྱིས་བལྟས་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་སྟོན་པ་མཐོང་ལ། དེས་ཆོས་དེ་ཐོས་ནས་ཀྱང་ཆོས་དེའི་དོན་ཀུན་ཤེས་པར་བྱའོ། །ཞེས་ཆོས་དང་རྗེས་སུ་མཐུན་པའི་ཆོས་ལ་ཞུགས་ཤིང་། གནས་པ་དང་མཐུན་པར་ཞུགས་ཤིང་རྗེས་སུ་མཐུན་པའི་ཆོས་ལ་སྤྱོད་ན། རབ་འབྱོར། དེའང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར་གཞན་ཡང་གལ་ཏེ། བྱང་ཆུབ་སེམས་
དཔའ་སེམས་དཔའ་ཆེན་པོས་རྨི་ལམ་ན་དེ་བཞིན་གཤེགས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། འོད་འདོམ་གང་དང་ལྡན་པ་ནམ་མཁའ་ལ་མངོན་པར་འཕགས་ཏེ་དགེ་སློང་གི་དགེ་འདུན་ལ་ཆོས་སྟོན་ཅིང་། རྫུ་འཕྲུལ་གྱི་ཆོ་འཕྲུལ་སྟོན་པ་དང་། སྤྲུལ་པ་སྤྲུལ་པར་མཛད་ཅིང་། སྤྲུལ་པ་དེ་དག་གིས་ཀྱང་འཇིག་རྟེན་གྱི་ཁམས་གཞན་དག་ཏུ་སངས་རྒྱས་ཀྱི་བྱ་བ་བྱེད་པ་དག་མཐོང་ན། རབ་འབྱོར། དེའང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་རྨི་ལམ་ན་གྲོང་འཇོམས་པ་བྱུང་བའམ། གྲོང་ཁྱེར་འཇོམས་པ་བྱུང་བའམ། མེ་ཤོར་བར་གྱུར་པའམ། གཅན་གཟན་གདུག་པ་དག་མཐོང་ངམ། དེ་དག་ལས་གཞན་པའི་གཅན་གཟན་ཁྲེ་བེའི་རིགས་དག་མཐོང་ངམ། མགོ་གཅོད་པ་ཉེ་བར་གནས་པ་དག་མཐོང་ངམ། གང་དག་དེ་ལས་གཞན་པའི་འཇིགས་པ་དང་། དངང་བ་དག་མཐོང་ངམ། སྡུག་བསྔལ་བ་དང་། ཡིད་མི་བདེ་བ་དང་། འཁྲུགས་པ་དག་མཐོང་ངམ། བཀྲེས་པས་འཇིགས་པ་མཐོང་ངམ། སྐོམ་པས་འཇིགས་པ་མཐོང་ངམ། མ་ཤི་བ་མཐོང་ངམ། ཕ་ཤི་བ་མཐོང་ངམ། ཕུ་ནུ་ཤི་བ་མཐོང་ངམ། སྲིང་མོ་ཤི་བ་མཐོང་ངམ། མཛའ་བཤེས་དང་། བློན་པོ་དང་། ཉེ་དུ་དང་། སྣག་གི་གཉེན་མཚམས་དག་ཤི་བ་མཐོང་ན། མྱ་ངན་དང་། འཇིགས་པ་དང་། སྐྲག་པ་དང་། དངང་བར་མི་འགྱུར་ཞིང་། མི་སྐྲག་མི་དངང་ལ། དངང་བར་མི་འགྱུར་ཞིང་། རྨི་ལམ་དེ་རྨིས་པའི་འོག་ཏུ་སད་ནས་ཀྱང་འདི་སྙམ་དུ། ཀྱེ་མ་ཁམས་གསུམ་པ་འདི་དག་ཐམས་ཅད་ནི། རྨི་ལམ་ལྟ་བུ་སྟེ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཀྱང་ཁམས་གསུམ་པའི་ཆོས་ཐམས་ཅད་རྨི་ལམ་ལྟ་བུའོ། །ཞེས་ཆོས་བསྟན་པར་བྱའོ། །སྙམ་དུ་སེམས་ན། རབ་འབྱོར། དེའང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར་གཞན་ཡང་
ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེར་ངན་སོང་གསུམ་པོ་དག་ཐམས་ཅད་ཀྱི་ཐམས་ཅད། རྣམ་པ་ཐམས་ཅད་ཀྱི་ཐམས་ཅད་དུ་འབྱུང་བར་མི་འགྱུར་བར་ཇི་ལྟར་ཤེས་པར་བྱ་ཞེ་ན། རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོས་རྨི་ལམ་ན་སེམས་ཅན་དམྱལ་བ་པའི་སེམས་ཅན་མཐོང་ངམ་དུད་འགྲོའི་སྐྱེ་གནས་པའམ། གཤིན་རྗེའི་འཇིག་རྟེན་པའི་སེམས་ཅན་མཐོང་ན། འདི་ལྟ་བུའི་དྲན་པ་རྙེད་པར་འགྱུར་ཏེ། དྲན་པ་རྙེད་ནས་ཀྱང་འདི་སྙམ་དུ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེ་ན་ཅི་ནས་ཀྱང་ངན་སོང་གསུམ་པོ་ཐམས་ཅད་ཀྱི་ཐམས་ཅད། རྣམ་པ་ཐམས་ཅད་ཀྱི་ཐམས་ཅད་དུ་འབྱུང་བར་མི་འགྱུར་བ་དེ་ལྟར་བྱའོ། །སྙམ་དུ་སེམས་སོ། །དེ་ཅིའི་ཕྱིར་ཞེ་ན། འདི་ལྟར་རྨི་ལམ་གང་ཡིན་པ་དང་། རྨི་ལམ་གྱི་མཐའ་གང་ཡིན་པའི་ཆོས་དེ་གཉིས་ནི། གཉིས་སུ་མེད་ཅིང་། གཉིས་སུ་དབྱེར་མེད་པའི་ཕྱིར་ཏེ། རབ་འབྱོར། དེའང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཕྱིར་མི་ལྡོག་པའི་མཚན་ཉིད་དུ་རིག་པར་བྱའོ། །རབ་འབྱོར། གཞན་ཡང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྨི་ལམ་མམ། སད་པ་ན་གྲོང་ཁྱེར་ཚིག་པ་མཐོང་ན་འདི་སྙམ་དུ་སེམས་ཏེ། གང་བདག་གི་རྨི་ལམ་མམ། རྨི་ལམ་གྱི་མཐའ་སད་པ་ན། རྣམ་པ་གང་དག་དང་། རྟགས་གང་དག་དང་། མཚན་མ་གང་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པར་འགྱུར་བའི་རྣམ་པ་དེ་དག་དང་། རྟགས་དེ་དག་དང་། མཚན་མ་དེ་དག་མཐོང་བའི་རྣམ་པ་དེ་དག་དང་། རྟགས་དེ་དག་དང་། མཚན་མ་དེ་དག་གལ་ཏེ་བདག་ལ་ཡོད་ན། བདེན་པ་དང་བདེན་པའི་ཚིག་འདིས་གྲོང་ཁྱེར་ཚིག་པ་འདི་ཉེ་བར་ཞི་བ་དང་། བསིལ་བ་དང་། མེད་པར་གྱུར་ཅིག་།ཅེས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་
བདེན་པའི་བྱིན་གྱིས་རློབ་པར་བྱེད་པ་ན། གལ་ཏེ་ཉེ་བར་ཞི་བ་དང་། བསིལ་བ་དང་། མེད་པར་གྱུར་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ལུང་པོ་དེ། བདེན་པའི་ཚིག་དེ་ལས་འདས་ནས་ཁྱིམ་ནས་ཁྱིམ་དུ་སྲེག་པོ་དེ། བདེན་པའི་ཚིག་དེ་ལས་འདས་ནས་ཁྱིམ་ནས་ཁྱིམ་དུ་སྲེག་པར་བྱེད། སྲང་ནས་སྲང་དུ་སྲེག་པར་བྱེད་ཅིང་། ཁྱིམ་ལ་ལ་ནི། ཚིག་།ཁྱིམ་ལ་ལ་ནི། མ་ཚིག་།སྲང་ལ་ལ་ནི། ཚིག་།སྲང་ལ་ལ་ནི། མ་ཚིག་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟར། གང་གི་ཕྱིར་སེམས་ཅན་འདི་དག་གི་ཁྱིམ་ལ་ལ་ནི། ཚིག་།ཁྱིམ་ལ་ལ་ནི། མ་ཚིག་པ་ནི། སེམས་ཅན་འདི་དག་གིས་ཆོས་སྤོང་བར་འགྱུར་བའི་ལས་ཉེ་བར་བསགས་པས་ན། དེ་དག་ཚེ་འདི་ཉིད་ལ་ལས་རྣམ་པར་སྨིན་ཏེ། ཆོས་སྤོང་བའི་ལས་ཀྱི་ལྷག་མ་དེ་ཉིད་ལས་རྣམ་པར་སྨིན་པར་གྱུར་ཏོ། །ཞེས་བྱ་བར་རིག་པར་བྱ་སྟེ། རབ་འབྱོར། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་རྐྱེན་ནི། དེ་ཡིན་ནོ། །རྒྱུ་ནི། དེ་ཡིན་ཏེ། རྒྱུ་དེ་དག་དང་། རྐྱེན་དེ་དག་གིས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་རིག་པར་བྱའོ། །རབ་འབྱོར། གཞན་ཡང་རྣམ་པ་གང་དག་དང་། རྟགས་གང་དག་དང་། མཚན་མ་གང་དག་གིས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་རིག་པར་བྱ་བའི་རྣམ་པ་དེ་དག་དང་། རྟགས་དེ་དག་དང་། མཚན་མ་དེ་དག་བསྟན་པར་བྱའོ། །རབ་འབྱོར། གལ་ཏེ་སྐྱེས་པའམ། བུད་མེད་གང་ཡང་རུང་བ་ཞིག་མི་མ་ཡིན་པས་བྱིན་གྱིས་བརླབས་ཤིང་བབས་པར་གྱུར་ན། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལྟར་བསམ་པར་བྱ་སྟེ། གལ་ཏེ་བདག་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཡིན་ཞིང་། ཇི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་ལ། ཇི་ལྟར་བདག་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་། བདག་གི་བསམ་པ་རྣམ་པར་དག་ལ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡིད་ལ་བྱེད་པ་ཡོངས་སུ་དག་ཅིང་བདག་ལ་ཉན་ཐོས་ཀྱི་སེམས་མེད་ལ། བདག་རང་སངས་རྒྱས་ཀྱི་སེམས་དང་བྲལ་བ་དང་། བདག་ཉན་ཐོས་དང་། རང་སངས་རྒྱས་ཀྱི་སེམས་དང་བྲལ་བས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་ཞིང་། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་བར་མི་འགྱུར་ལ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་ཉིད་དུ་འགྱུར་ཞིང་། འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་ནི། གང་ཅིའང་མ་གཟིགས་པའམ། མ་གསན་པའམ། མི་མཁྱེན་པའམ། མི་རིག་པའམ། མངོན་སུམ་དུ་མ་མཛད་པའམ། མངོན་པར་རྫོགས་པར་སངས་མ་རྒྱས་པ་ཅིའང་མི་མངའ་བས། སངས་རྒྱས་བཅོམ་ལྡན་འདས་དེ་དག་གིས་བདག་གི་ལྷག་པའི་བསམ་པ་ཐུགས་སུ་ཆུད་ཅིང་། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་པ་ལྟ་ན། བདེན་པ་དང་བདེན་པའི་ཚིག་འདིས། སྐྱེས་པའམ། བུད་མེད་འདི་མི་མ་ཡིན་པ་གང་གིས་བཟུང་བའམ་གཙེས་པར་གྱུར་པའི་མི་མ་ཡིན་པ་དེ་གུད་དུ་འགྲོ་བར་གྱུར་ཅིག་།ཅེས་བསམ་པར་བྱའོ། །རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་དེ་སྐད་བརྗོད་པ་ན་གལ་ཏེ་མི་མ་ཡིན་པ་དེ་གུད་དུ་མ་སོང་བར་གྱུར་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པ་ཡིན་པར་རིག་པར་བྱའོ། །
རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་དེ་སྐད་བརྗོད་པ་ན་གལ་ཏེ་མི་མ་ཡིན་པར་གྱུར་པ་དེ་གུད་དུ་སོང་བར་གྱུར་ན། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཡིན་པར་རིག་པར་བྱ་སྟེ། རབ་འབྱོར། རྣམ་པ་དེ་དག་དང་། རྟགས་དེ་དག་དང་། མཚན་མ་དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པ་ཡིན་པར་རིག་པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་པ་རོལ་ཏུ་ཕྱིན་པ་དྲུག་ལ་མི་སྤྱོད་པ། ཐབས་ལ་མཁས་པ་དང་བྲལ་བ། དྲན་པ་ཉེ་བར་གཞག་པ་བཞི་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་བར་དག་ལ་མ་སྤྱད་པ། བྱང་ཆུབ་སེམས་དཔའི་སྐྱོན་མེད་པར་མ་ཞུགས་པའི་བདེན་པའི་བྱིན་གྱི་རླབས་ཀྱིས་བདུད་སྡིག་ཅན་འོང་བར་འགྱུར་ཏེ། རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་སྙམ་དུ། བདེན་པ་དང་བདེན་པའི་ཚིག་གང་གིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་བདེན་པ་དང་བདེན་པའི་ཚིག་དེས། མི་མ་ཡིན་པ་འདི་གུད་དུ་འགྲོ་བར་གྱུར་ཅིག་།ཅེས་དེ་ལྟར་བདེན་པའི་བྱིན་གྱི་རླབས་བྱེད་པ་དེ་ལ་བདུད་སྡིག་ཅན་འདི་སྙམ་དུ། ཇི་ལྟར་མི་མ་ཡིན་པ་དེ། འདི་ནས་གུད་དུ་འགྲོ་བར་འགྱུར་སྙམ་དུ་སྤྲོ་བ་སྐྱེ་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར། བདུད་སྡིག་ཅན་ནི། ཤིན་ཏུ་མཐུ་དང་ལྡན་ཞིང་ཤིན་ཏུ་གཟི་བརྗིད་དང་ལྡན་པ་ཡིན་ལ། མི་མ་ཡིན་པ་དེ་ནི། དེ་ལྟ་མ་ཡིན་པའི་ཕྱིར་ཏེ། དེའི་ཕྱིར་བདུད་སྡིག་ཅན་དེའི་བྱིན་གྱི་རླབས་ཀྱིས་དེ་གུད་དུ་སོང་བར་གྱུར་པ་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་འདི་སྙམ་དུ་སེམས་ཏེ། བདག་གི་མཐུས་མི་མ་ཡིན་པ་དེ་འདི་ནས་གུད་དུ་སོང་ངོ་། །སྙམ་ཞིང་། བདུད་ཀྱི་མཐུས་མི་མ་ཡིན་པ་དེ་དེ་ནས་གུད་དུ་སོང་བར་ནི་མ་ཤེས་ནས་དེ་བྱང་ཆུབ་སེམས་དཔའ་གཞན་དག་ལ་འདི་སྙམ་དུ་བདག་ནི། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཡིན་གྱི། འདི་དག་གཞན་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་མ་ཡིན་ནོ། །སྙམ་ནས་རློམ་སེམས་སུ་བྱེད། འབྱ་བར་བྱེད། བསྟིང་བར་བྱེད། འཁྲུག་པར་བྱེད། སྨོད་པར་བྱེད་དེ། དེ་དེ་ཙམ་གྱིས་ང་རྒྱལ་འཕེལ་བ་དང་། ང་རྒྱལ་བསྐྱེད་པར་འགྱུར་ཞིང་། རྣམ་པ་ཐམས་ཅད་མཁྱེན་པ་ཉིད་ཀྱང་རིང་དུ་བྱེད། སངས་རྒྱས་ཀྱི་ཡེ་ཤེས་བླ་ན་མེད་པའང་རིང་དུ་བྱེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཐབས་ལ་མི་མཁས་པ་དེ་ནི། དེ་ཙམ་གྱིས་ལྷག་པའི་ང་རྒྱལ་བསྐྱེད་པར་འགྱུར་བས་ན། དེའི་ས་ནི། གཉིས་སུ་ཤེས་པར་བྱ་སྟེ། གཉིས་གང་ཞེ་ན། འདི་ལྟ་སྟེ། ཉན་ཐོས་ཀྱི་ས་དང་། རང་སངས་རྒྱས་ཀྱི་སའོ། །དེ་ལྟར་བདེན་པའི་བྱིན་གྱི་རླབས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལ་བདུད་ཀྱི་ལས་འབྱུང་བར་འགྱུར་ཏེ། དེ་ལ་དེ་དགེ་བའི་བཤེས་གཉེན་དག་ལ་བསྟེན་པར་མི་འགྱུར། བསྙེན་པར་མི་འགྱུར། ཕྱིར་འབྲང་བར་མི་འགྱུར། གོམས་པར་བྱེད་པར་མི་འགྱུར། བསྙེན་བཀུར་བྱེད་པར་མི་འགྱུར་ཞིང་། བདུད་ཀྱི་བཅིང་བ་དེ་ཉིད་དམ་པོར་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཕ་རོལ་ཏུ་ཕྱིན་པ་དྲུག་ལ་མ་སྤྱད་ཅིང་། ཐབས་ལ་མཁས་པས་ཡོངས་སུ་མ་ཟིན་པའི་ཕྱིར་ཏེ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོས་དེའང་བདུད་ཀྱི་ལས་སུ་རིག་པར་བྱའོ། །རབ་འབྱོར། ཇི་ལྟར་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་མ་སྤྱད་ཅིང་། དེ་བཞིན་དུ་སྦྱར་ཏེ་སྐྱོན་མེད་པར་མ་ཞུགས་པའི་བར་གྱི་དྲུང་དུ་བདུད་སྡིག་ཅན་མིང་གི་བྱིན་གྱི་རླབས་ཀྱིས་འོང་བར་འགྱུར་ཞེ་ན། རབ་འབྱོར། འདི་ལ་བདུད་སྡིག་ཅན་ཆ་བྱད་གང་ཡང་རུང་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་དྲུང་དུ་འོངས་ནས་འདི་སྐད་དུ། རིགས་ཀྱི་བུ། ཁྱོད་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཡིན་ཏེ། ཁྱོད་ཀྱི་མིང་ནི། འདི་ཞེས་བྱའོ། །ཁྱོད་ཀྱི་མའི་མིང་ནི་འདི་ཞེས་བྱའོ། །ཁྱོད་ཀྱི་ཕའི་མིང་ནི་
འདི་ཞེས་བྱའོ། །ཁྱོད་ཀྱི་ཕུ་ནུའི་མིང་ནི། འདི་ཞེས་བྱའོ། །ཁྱོད་ཀྱི་མཛའ་བཤེས་དང་། བློན་པོ་དང་། ཉེ་དུ་དང་། སྣག་གི་གཉེན་མཚམས་ཀྱི་མིང་ནི། འདི་ཞེས་བྱའོ། །ཁྱོད་ཀྱི་ཕྱི་མོ་དང་། མེས་པོ་གཉིས་ཀྱི་བདུན་རྒྱུད་ཚུན་ཆད་ཀྱི་བར་གྱི་མིང་ནི། འདི་ཞེས་བྱའོ། །ཞེས་ཉེ་བར་སྟོན་ཅིང་། ཁྱོད་ནི། ལྗོངས་ག་གེ་མོ་ཞིག་དང་། ཁྱོད་ནི། གྲོང་ཁྱེར་ག་གེ་མོ་ཞིག་དང་། ཁྱོད་ནི། གྲོང་ཁྱེར་ག་གེ་མེ་ཞིག་དང་། ཁྱོད་ནི། ཡུལ་ག་གེ་མོ་ཞིག་ནས་ལྗོངས་ག་གེ་མོ་ཞིག་ཏུ་སྐྱེས་སོ། །གྲོང་ཁྱེར་ག་གེ་མོ་ཞིག་དང་། གྲོང་ག་གེ་མོ་ཞིག་ཏུ་སྐྱེས་བ་ཡིན་ནོ། །ཞེས་ཟེར་ཞིང་། གལ་ཏེ་དེ་རང་བཞིན་གྱིས་དམན་པ་ཞིག་ཡིན་ན། དེ་དེ་ལ་འདི་སྐད་དུ། ཁྱོད་ནི། སྔོན་ཡང་འདི་བཞིན་དུ་དམན་པ་ཉིད་དུ་གྱུར་པ་ཡིན་ནོ། །ཞེས་ཟེར་རོ། །གལ་ཏེ་རྣོ་བ་ཞིག་ཡིན་ན། དེ་འདི་སྐད་དུ། ཁྱོད་ནི། སྔོན་ཡང་དེ་བཞིན་དུ་རྣོ་བ་ཉིད་དུ་གྱུར་ཏོ། །ཞེས་ཟེར་རོ། །གལ་ཏེ་དགོན་པ་པ་ཞིག་ཡིན་ནམ། གལ་ཏེ་བསོད་སྙོམས་པ་ཞིག་ཡིན་ནམ། གལ་ཏེ་ཕྱག་དར་ཁྲོད་པ་ཞིག་ཡིན་ནམ། གལ་ཏེ་ཟས་ཕྱིས་མི་ལེན་པ་ཞིག་ཡིན་ནམ། གལ་ཏེ་སྟན་གཅིག་པ་ཞིག་ཡིན་ནམ། གལ་ཏེ་རྙེད་པས་ཆོག་པའི་བསོད་སྙོམས་པ་ཞིག་ཡིན་ནམ། གལ་ཏེ་དུར་ཁྲོད་པ་ཞིག་ཡིན་ནམ། གལ་ཏེ་བླ་གབ་མེད་པ་ཞིག་ཡིན་ནམ། གལ་ཏེ་ཤིང་དྲུང་པ་ཞིག་ཡིན་ནམ། གལ་ཏེ་ཅོག་བུ་པ་ཞིག་ཡིན་ནམ། གལ་ཏེ་གཞི་ཇི་བཞིན་པ་ཞིག་ཡིན་ནམ། གལ་ཏེ་ཆོས་གོས་གསུམ་པ་ཞིག་ཡིན་ནམ། གལ་ཏེ་འདོད་པ་ཆུང་བ་ཞིག་ཡིན་ནམ། གལ་ཏེ་ཆོག་ཤེས་པ་ཞིག་ཡིན་ནམ། གལ་ཏེ་རབ་ཏུ་དབེན་པ་ཞིག་ཡིན་ནམ། གལ་ཏེ་རྐང་པ་སྐུད་པ་དང་བྲལ་བ་ཞིག་ཡིན་ནམ། གལ་ཏེ་སྨྲ་བ་ཉུང་བ་ཞིག་ཡིན་ན། ཡང་དེ་འདི་སྐད་དུ། ཁྱོད་ནི། སྔོན་ཡང་འདི་ལྟར་སྨྲ་བ་ཉུང་བ་ཉིད་དུ་གྱུར་ཏོ། །ཞེས་ཟེར་རོ། །གལ་ཏེ་བརྗོད་པ་ཉུང་བ་ཞིག་ཡིན་ནའང་དེ་འདི་སྐད་དུ། ཁྱོད་ནི། སྔོན་ཡང་འདི་བཞིན་དུ་བརྗོད་པ་ཉུང་བ་ཉིད་དུ་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར། ཁྱོད་ལ་རྣམ་པ་འདི་ལྟ་བུའི་སྦྱངས་པའི་ཡོན་ཏན་དག་ཡོད་པ་ལས་ན། གདོན་མི་ཟ་བར་སྔོན་ཡང་ཁྱོད་སྦྱངས་པའི་ཡོན་ཏན་དང་། ལེགས་པར་སྡོམ་པ་འདི་དག་དང་ལྡན་པར་མ་གྱུར་མི་སྲིད་པའི་ཕྱིར་
རོ། །ཞེས་ཟེར་རོ། །དེ་དེ་ལྟར་སྔོན་གྱི་མིང་བསྟན་པ་དང་། རུས་བསྟན་པ་དེ་དང་། ད་ལྟར་བྱུང་བའི་སྦྱངས་པའི་ཡོན་ཏན་བསྟན་པ་དེས་རློམ་སེམས་སྐྱེ་བར་འགྱུར་ཏེ། དེར་ཡང་བདུད་སྡིག་ཅན་འོང་ཞིང་འདི་སྐད་དུ། རིགས་ཀྱི་བུ། ཁྱོད་ལ་སྦྱངས་པའི་ཡོན་ཏན་ཇི་ལྟར་ཡོད་པ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཉིད་དུ་ལུང་བསྟན་ཏོ། །ཞེས་ཟེར་ཞིང་། ཡང་ན་དགེ་སློང་གི་ཆ་བྱད་དུ་བསྒྱུར་ཅིང་འོང་ངོ་། །ཡང་ན་དགེ་སློང་མའི་ཆ་བྱད་དུ་བསྒྱུར་ཅིང་འོང་ངོ་། །ཡང་ན་ཁྱིམ་བདག་གི་ཆ་བྱད་དུ་བསྒྱུར་ཅིང་འོང་ངོ་། །ཡང་ན་མའི་ཆ་བྱད་དུ་བསྒྱུར་ཅིང་འོང་ངོ་། །ཡང་ན་་ཕའི་ཆ་བྱད་དུ་བསྒྱུར་ཅིང་འོང་ངོ་། །འོངས་ནས་ཀྱང་འདི་སྐད་དུ། རིགས་ཀྱི་བུ། ཁྱོད་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོན་ཏན་གང་ཡིན་པ་དེ་དག་ཁྱོད་ལ་ཡོད་པའི་ཕྱིར་རོ། །ཞེས་ཟེར་ལ། རབ་འབྱོར། ངས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་པ་རྣམས་དང་། རྟགས་རྣམས་དང་། མཚན་མ་རྣམས་བསྟན་པ་གང་ཡིན་པ་དེ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་མེད་ན། རབ་འབྱོར། དེ་ལས་གཞན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི། བདུད་ཀྱིས་བྱིན་གྱིས་བརླབས་པ་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། འདི་ལྟར། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་པ་གང་ཡིན་པ་དང་། རྟགས་གང་ཡིན་པ་དང་། མཚན་མ་གང་ཡིན་པ་དེ་དག་ཀྱང་དེ་ལ་མེད་ལ། མིང་བསྟན་པ་དེས་ཀྱང་དེ་ལས་གཞན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་ལ་རློམ་སེམས་སུ་བྱེད། འཕྱ་བར་བྱེད། བསྟིང་བར་བྱེད། ཁྱད་དུ་གསོད་པར་བྱེད་ཅིང་། སྨོད་པར་བྱེད་པའི་ཕྱིར་ཏེ། རབ་འབྱོར་མིང་བསྟན་པ་དེ་
ཡང་བྱང་ཆུབ་སེམས་དཔའ་སེམས་དཔའ་ཆེན་པོས་མིང་གི་བྱིན་གྱི་རླབས་ཀྱིས་བདུད་ཀྱི་ལས་སུ་རིག་པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མིང་གི་བྱིན་གྱི་རླབས་ཀྱིས་བདུད་ཀྱི་ལས་སུ་རིག་པར་བྱའོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར། བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་ལ་མ་སྤྱད་པས་ཕུང་པོའི་བདུད་མི་ཤེས་ཏེ། གཟུགས་མི་ཤེས། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མི་ཤེས་པའི་ཕྱིར་ཏེ། དེ་ལ་བདུད་སྡིག་ཅན་མིང་གི་བྱིན་གྱི་རླབས་ཀྱིས་ལུང་སྟོན་པར་འགྱུར་ཏེ། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་མིང་འདི་སྐད་ཅེས་བྱ་བར་འགྱུར་རོ། །ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་དེས་མིང་གང་རྗེས་སུ་བརྟག་པ་དང་། རྗེས་སུ་སྤྱོད་པ་དེ་ཉིད་རྗོད་པར་བྱེད་དེ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་འཆལ་པའི་རང་བཞིན་ཅན། ཐབས་ལ་མཁས་པ་དེ་འདི་སྙམ་དུ། བདག་གིས་མིང་གང་ཡིད་ཀྱིས་རྗེས་སུ་བརྟགས་ཤིང་རྗེས་སུ་དཔྱད་པ་དེ་ཉིད། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་མིང་དུ་འགྱུར་རོ། །སྙམ་ནས་ཇི་ལྟར་བདུད་སྡིག་ཅན་ནམ། བདུད་ཀྱི་རིས་ཀྱི་ལྷའམ། བདུད་ཀྱིས་བྱིན་གྱིས་བརླབས་པའི་དགེ་སློང་དག་གིས་བསྟན་པ་ན། དེ་འདི་སྙམ་དུ། ཇི་ལྟར་བདག་གིས་སེམས་བསྐྱེད་པ་བྱུང་བ་དང་། བདག་གི་མིང་ཇི་ལྟ་བ་བཞིན་དུ་དགེ་སློང་འདིས་བསྟན་ཏེ། མི་དང་མིང་དུ་མཐུན་པས་ན། བདག་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཡིན་ནོ། །སྙམ་དུ་སེམས་ལ། རབ་འབྱོར། ངས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་པ་དང་། རྟགས་དང་། མཚན་མ་བསྟན་པ་གང་ཡིན་པ་དེ་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་མེད་ཅིང་། རྣམ་པ་དང་། རྟགས་དང་། མཚན་མ་དེ་
དག་དང་ཡང་བྲལ་ལ། མིང་བསྟན་པ་དེས་ཀྱང་ང་རྒྱལ་བསྐྱེད་ཅིང་། དེ་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ལ་རློམ་སེམས་སུ་བྱེད། བརྙས་པར་བྱེད་ན། དེ་རློམ་སེམས་དང་། བརྙས་པ་དང་། ཁྱད་དུ་གསོད་པ་དེས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་རིང་དུ་འགྱུར་རོ། །དེ་ལྟར་ཐབས་ལ་མཁས་པ་དང་བྲལ་ཞིང་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བ་དང་། དགེ་བའི་བཤེས་གཉེན་དང་བྲལ་བ་དང་། སྡིག་པའི་གྲོགས་པོས་ཡོངས་སུ་ཟིན་པ་དེའི་ས་ནི། རྣམ་པ་གཉིས་སུ་ཤེས་པར་བྱ་སྟེ། འདི་ལྟ་སྟེ། ཉན་ཐོས་ཀྱི་ས་དང་། རང་སངས་རྒྱས་ཀྱི་སའོ། །ཡང་ན་ཤིན་ཏུ་ཡུན་རིང་པོར་འཁྱམས་ཤིང་འཁོར་བར་འཁོར་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་བརྟེན་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་གལ་ཏེ་དགའ་བ་དང་། ཡིད་རངས་པས་ཡང་དང་ཡང་དུ་དགེ་བའི་བཤེས་གཉེན་ལ་ལྟ་བ་རྙེད་ཅིང་དེ་ལ་བསྙེན་བཀུར་བྱེད་པར་འགྱུར་ཡང་། གལ་ཏེ་དེའི་ལུས་རྙེད་པ་དེས་སེམས་བསྐྱེད་པ་སྔ་མ་དེ་དག་ལ་སྨོད་པར་མི་བྱེད་ཅིང་། འཆག་པར་མི་བྱེད་ན། དེའི་སའང་རྣམ་པ་གཉིས་སུ་ཤེས་པར་བྱ་སྟེ། འདི་ལྟ་སྟེ། ཉན་ཐོས་ཀྱི་ས་དང་། རང་སངས་རྒྱས་ཀྱི་སའོ། །རབ་འབྱོར། འདི་ལྟ་སྟེ། དཔེར་ན། དགེ་སློང་ཞིག་ལ་ལྟུང་བའི་རྩ་བ་བཞི་པོ་དག་ལས་གང་ཡང་རུང་བ་ཞིག་བྱུང་ན། དགེ་སྦྱོང་མ་ཡིན། ཤཱཀྱའི་སྲས་མ་ཡིན་ཏེ། དེ་ནི། ལུས་དེ་ཉིད་ཀྱིས་དགེ་སྦྱོང་གི་འབྲས་བུ་བཞི་པོ་གང་ཡང་རུང་བ་དག་འཐོབ་པའི་སྐལ་པ་མེད་དོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་མིང་བསྟན་པ་ཙམ་གྱིས་རློམ་སེམས་དང་ལྡན་པས་སེམས་བསྐྱེད་ཅིང་། མིང་ཙམ་བརྗོད་པ་དེས་བྱང་ཆུབ་སེམས་དཔའ་གཞན་དག་ལ་རློམ་སེམས་སུ་བྱེད་ལ། བརྙས་པར་བྱེད་པ་དེ་ནི། དེ་པས་ཀྱང་ཤིན་ཏུ་ལྕི་བ་སྟེ། སེམས་བསྐྱེད་པ་དེ་ནི། དེ་བས་ཀྱང་ཤིན་ཏུ་ལྕི་བར་རིག་པར་བྱའོ། །རབ་འབྱོར། ལྟུང་བའི་རྩ་བ་ལྕི་བ་བཞི་ལྟ་ཞོག་གི་།བྱང་ཆུབ་སེམས་དཔའི་མིང་བསྟན་པ་ཙམ་གྱིས་རློམ་སེམས་དང་ལྡན་པས་
སེམས་བསྐྱེད་པ་དེ་ནི། མཚམས་མེད་པ་ལྔ་བས་ཀྱང་ཤིན་ཏུ་ལྕི་བ་ཡིན་ཏེ། སེམས་བསྐྱེད་པ་དེ་ནི། དེ་བས་ཀྱང་ཤིན་ཏུ་ལྕི་བར་རིག་པར་བྱའོ། །རབ་འབྱོར། དེ་ལྟར་ན། མིང་བསྟན་པས་བདུད་ཀྱི་ལས་ཕྲ་མོ་དེ་ལྟ་བུ་དག་འབྱུང་བར་འགྱུར་རོ། །རབ་འབྱོར། གཞན་ཡང་བདུད་སྡིག་ཅན་བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པའི་ཡོན་ཏན་དག་བརྗོད་ཅིང་འོང་བར་འགྱུར་ཏེ། འོང་ནས་ཀྱང་འདི་སྐད་དུ། དེ་བཞིན་གཤེགས་པ་ནི། དབེན་པའི་ཡོན་ཏན་དག་གསུང་བའོ། །ཞེས་ཟེར་ཏེ། རབ་འབྱོར། ང་ནི། འདི་ལྟ་སྟེ། དགོན་པ་དང་། ནགས་འདབས་དང་། བས་མཐའི་གནས་མལ་དག་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པ་ཡིན་པར་མི་སྨྲའོ། །རབ་འབྱོར་གྱིས་གསོལ་པ། བཅོམ་ལྡན་འདས། གལ་ཏེ་དེ་ལྟར་དགོན་པ་དང་། ནགས་འདབས་དང་། བས་མཐའི་གནས་མལ་དག་དབེན་པ་མ་ལགས་ན། བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པ་གཞན་གང་ཞིག་ལགས། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པ་གཞན་ཇི་ལྟ་བུ་ཞིག་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཉན་ཐོས་དང་ལྡན་པའི་ཡིད་ལ་བྱེད་པ་དག་གིས་དབེན་ཞིང་། རང་སངས་རྒྱས་དང་ལྡན་པའི་ཡིད་ལ་བྱེད་པ་དག་གིས་དབེན་ན། བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པ་ཡིན་ཏེ། དགོན་པ་དང་། ནགས་འདབས་དང་། བས་མཐའི་གནས་མལ་དག་ཏུ་གནས་པ་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པ་མ་ཡིན་གྱི། རབ་འབྱོར། དེ་ནི། བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པ་སྟེ། ངས་རྗེས་སུ་གནང་བ་ཡིན་ནོ། །གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་དབེན་པ་འདིས་ཉིན་མཚན་དུ་གནས་པ་ནི། དབེན་པ་ཉིད་དུ་གནས་པ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལྟ་སྟེ། བྱང་ཆུབ་སེམས་དཔའི་དབེན་པ་འདིས་དགོན་པ་དང་། ནགས་འདབས་དང་། བས་མཐའི་གནས་མལ་རྣམས་སུ་གནས་པ་ནི། དབེན་པ་ཉིད་དུ་གནས་པ་ཡིན་ནོ། །གལ་ཏེ་བྱང་ཆུབ་སེམས་
དཔའ་སེམས་དཔའ་ཆེན་པོ་དབེན་པ་འདིས་གྲོང་འདབས་སུ་གནས་ནའང་དབེན་པ་ཉིད་དུ་གནས་པ་ཡིན་ནོ། །རབ་འབྱོར། ངས་བྱང་ཆུབ་སེམས་དཔའ་སེམས་དཔའ་ཆེན་པོའི་དབེན་པ་རྗེས་སུ་གནང་བ་གང་ཡིན་པ་དེ་ལ་བདུད་སྡིག་ཅན་གྱི་དགོན་པ་དང་། ནག་འདབས་དང་། བས་མཐའི་གནས་མལ་རྣམས་སུ་གནས་པར་བྱའོ། །ཞེས་སྟོན་པར་བྱེད་དོ། །དེ་དབེན་པ་དེས་ཉན་ཐོས་དང་ལྡན་པ་ཡིད་ལ་བྱེད་པ་དང་། རང་སངས་རྒྱས་དང་ལྡན་པའི་ཡིད་ལ་བྱེད་པ་དང་ཤན་འདྲེས་པས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མི་བརྩོན་ཞིང་རྣམ་པ་ཐམས་ཅད་མཁྱེན་པ་ཉིད་ཀྱང་ཡོངས་སུ་རྫོགས་པར་མི་འགྱུར་རོ། །དེ་དེ་ལྟར་ཡིད་ལ་བྱེད་པ་ཡོངས་སུམ་དག་པར་གནས་པ་དེས་གནས་ཤིང་། དེ་ལས་གཞན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་གྲོང་འདབས་ན་གནས་ཤིང་། སེམས་དང་ཡིད་ལ་བྱེད་པ་ཡོངས་སུ་དག་པ། ཉན་ཐོས་ཀྱི་སེམས་དང་མ་འདྲེས་པ། རང་སངས་རྒྱས་ཀྱི་སེམས་དང་མ་འདྲེས་པ། དེ་ལས་གཞན་པའི་སྡིག་བའི་སེམས་བསྐྱེད་པ་དག་དང་མ་འདྲེས་པ། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་དང་། ཡོངས་སུ་ཤེས་པ་དག་ཡོངས་སུ་རྫོགས་པར་གྱུར་པ་དེ་དག་ལ་རློམ་སེམས་སུ་བྱེད་དོ། །གཞན་ཡང་ཐབས་ལ་མི་མཁས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ། འབྲོག་དགོན་པ་དཔག་ཚད་བརྒྱ་པ། གདུག་བ་དང་། རི་དྭགས་དང་། བྱ་དག་མེད་པ། ཆོམ་རྐུན་གྱི་དགོན་པ་དག་མེད་པ། སྲིན་པོ་རྒྱུ་བའི་ལམ་གྱི་མངོན་སུམ་དུ་བབ་པ་མ་ཡིན་པ་དེ་ལྟ་བུའི་ནང་དུ་ལོའམ། ལོ་བརྒྱའམ། ལོ་སྟོང་ངམ། ལོ་འབུམ་མམ། ལོ་བྱེ་བ་ཁྲག་ཁྲིག་ཕྲག་འབུམ་མམ། དེ་བས་ཀྱང་ལྷག་པར་གནས་སུ་ཟིན་ཀྱང་དབེན་པ་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་བསམ་པ་ལ་ཡང་དག་པར་ཞུགས་ཤིང་གནས་པའི་དབེན་པ་དེ་མི་ཤེས་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། འདྲེས་པ་ཉིད་དུ་གནས་པ་ཡིན་ཏེ། དབེན་པ་དེ་ལ་ཆགས་ཤིང་ཞེན་པར་གནས་པས་ཀུན་ནས་ཉོན་མོངས་
པ་ཅན་ཉིད་ཡིན་ཞིང་། དེས་དེ་ཙམ་གྱི་ངའི་སེམས་རངས་པར་བྱེད་པ་མ་ཡིན་ཏེ། ངས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དབེན་པ་བཤད་པ་གང་ཡིན་པའི་དབེན་པ་དེ་དང་དེ་མི་ལྡན་ཞིང་། དེ་ནི། དབེན་པ་དེ་ལ་མི་སྣང་ངོ་། །དེ་ཅིའི་ཕྱིར་ཞེ་ན། འདི་ལྟར། དེ་ནི། དབེན་པ་དེས་མི་གནས་པའི་ཕྱིར་རོ། །དེའི་དྲུང་དུ་བདུད་སྡིག་ཅན་འོངས་ཤིང་སྟེང་གི་བར་སྣང་ལ་འདུག་ནས་འདི་སྐད་དུ། རིགས་ཀྱི་བུ་ལེགས་སོ། །ལེགས་སོ། །འདི་ནི། དེ་བཞིན་གཤེགས་པས་བསྟན་པའི་དབེན་པ་མ་ནོར་བ་ཡིན་གྱི། ཁྱོད་དབེན་པ་འདི་ཉིད་དུ་འདུག་ཅིག་དང་། ཁྱོད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་སྨྲས་པ་དང་། དེ་དབེན་པ་དེ་བས་ཀྱང་དབེན་པ་གཅེས་པར་སེམས་ཤིང་། དེ་བྱང་ཆུབ་སེམས་དཔའི་ཐེག་པ་པའི་དགེ་སློང་རྣམས་དང་། དེ་བཞིན་དུ་སྦྱར་ཏེ་དགེ་བའི་ཆོས་ཅན་གཞན་དག་ལ་ཚེ་དང་ལྡན་པ་འདི་དག་ནི། འདྲེས་པར་གནས་པས་གནས་པ་ཡིན་ནོ། །ཞེས་རློམ་སེམས་སུ་བྱེད་ཅིང་། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་དབེན་པའི་གནས་པས་གནས་པ་དེ་དག་ལ་འདྲེས་པར་གནས་པས་སྐུལ་བར་བྱེད། རློམ་སེམས་སུ་བྱེད་དེ། གང་དག་འདྲེས་པར་གནས་པས་གནས་པ་དེ་དག་ནི། དབེན་པར་གནས་པས་སྤྱོད་པ་མ་ཡིན་ནོ། །ཞེས་ཟེར་ཞིང་། གང་ལ་ཞེས་བསྐྱེད་པར་བྱ་བ་དེ་དག་ལ་ཞེས་སྐྱེད་པར་མི་བྱེད་ཅིང་། དེ་ལ་ང་རྒྱལ་སྐྱེད་པར་བྱེད་དེ། །དེ་ཅིའི་ཕྱིར་ཞེ་ན། བདག་གནས་པ་གང་གིས་གནས་པའི་གནས་པ་འདི་ནི། ཡང་དག་པ་ཉིད་ཡིན་པས་ན། བདག་ལ་མི་མ་ཡིན་པ་རྣམས་སྐུལ་བར་བྱེད་ཅིང་། བདག་ལ་མི་མ་ཡིན་པ་རྣམས་དྲན་པར་བྱེད་ཀྱི། གྲོང་འདབས་ན་གནས་པ་དག་ལྟ་ལ་སུ་ཞིག་སྐུལ་ཞིང་དྲན་པར་བྱེད་པར་འགྱུར་སྙམ་དུ་སེམས་པའི་ཕྱིར་ཏེ། བྱང་ཆུབ་སེམས་དཔའ་དེ་ནི། དེ་ལྟར་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་གཞན་དག་ལ་རློམ་སེམས་སུ་བྱེད་པ་ཡིན་ཏེ། རབ་འབྱོར། དེ་ནི། བྱང་ཆུབ་སེམས་དཔའ་གདོལ་པ་ཡིན་པར་རིག་པར་བྱའོ། །བྱང་ཆུབ་སེམས་དཔའ་སུན་འབྱིན་པ་ཡིན་པར་རིག་པར་བྱའོ། །བྱང་ཆུབ་སེམས་དཔའ་
ལྟར་བཅོས་པ་ཡིན་པར་རིག་པར་བྱའོ། །ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱི་ཆོམ་རྐུན་པ་ཡིན་པར་རིག་པར་བྱའོ། །དགེ་སྦྱོང་གི་ཆ་བྱད་ཀྱིས་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ལ་རྐུ་བ་ཡིན་པར་རིག་པར་བྱའོ། །བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་རྣམས་ཀྱི་ཆོམ་རྐུན་པ་ཡིན་པར་རིག་པར་བྱ་སྟེ། དེ་ལྟ་བུའི་རང་བཞིན་ཅན་གྱི་གང་ཟག་ནི། བསྙེན་པར་མི་བྱ། བསྟེན་པར་མི་བྱ། བསྙེན་བཀུར་མི་བྱའོ། །དེ་ཅིའི་ཕྱིར་ཞེ་ན། རབ་འབྱོར། གང་ཟག་དེ་ལྟ་བུ་ནི། མངོན་པའི་ང་རྒྱལ་ཅན་དུ་རིག་པར་བྱ་བའི་ཕྱིར་རོ། །རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་རྣམ་པ་ཐམས་ཅད་མཁྱེན་པ་ཉིད་ཡོངས་སུ་མ་བཏང་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཡོངས་སུ་མ་བཏང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་བསམ་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ་དང་། སེམས་ཅན་ཐམས་ཅད་ཀྱི་དོན་བྱེད་པར་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟ་བུའི་རང་བཞིན་ཅན་གྱི་གང་ཟག་དག་ལ་བསྙེན་པར་མི་བྱ། བསྟེན་པར་མི་བྱ། བསྙེན་བཀུར་མི་བྱ་སྟེ། གཞན་དུ་ན་རྟག་ཏུ་འཁོར་བས་ཡིད་འབྱུང་བ་དང་། ཡིད་དངངས་པ་དང་། ཁམས་གསུམ་དང་མ་འདྲེས་པས་རང་གི་དོན་སྦྱོར་བ་ལ་རྗེས་སུ་བརྩོན་པར་བྱའོ། །དེ་ཉིད་ལའང་བྱམས་པའི་སེམས་བསྐྱེད་པར་བྱའོ། །དེ་ཉིད་ལའང་སྙིང་བརྩེ་བ་དང་སྙིང་རྗེ་བསྐྱེད་པར་བྱའོ། །དགའ་བ་དང་། བཏང་སྙོམས་བསྐྱེད་པར་བྱའོ། །ཅི་ནས་ཀྱང་བདག་ལ་སྐྱོན་དེ་ལྟ་བུ་དག་ཐམས་ཅད་ཀྱི་ཐམས་ཅད། རྣམ་པ་ཐམས་ཅད་ཀྱི་ཐམས་ཅད་དུ་འབྱུང་བར་མི་འགྱུར་ཞིང་། སྐྱེ་བར་མི་འགྱུར་བ་དེ་ལྟར་བྱའོ། །་ཏེ་བྱུང་ནའང་མྱུར་བ་ཉིད་དུ་སྤང་བར་བྱའོ། །ཞེས་བསླབ་པར་བྱ་སྟེ། རབ་འབྱོར། དེ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རང་གི་མངོན་པར་ཤེས་པས་རྟུལ་བ་་ཡིན་པར་རིག་པར་བྱའོ། །རབ་འབྱོར། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་བསམ་པས་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་དགེ་བའི་བཤེས་གཉེན་དག་ལ་བསྙེན་པར་བྱ། བསྟེན་པར་བྱ། བསྙེན་བཀུར་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དག་གང་ལགས་པར་རིག་པར་བགྱི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། སངས་རྒྱས་བཅོམ་ལྡན་འདས་རྣམས་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །རབ་འབྱོར། བྱང་ཆུབ་སེམས་དཔའ་རྣམས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །རབ་འབྱོར། ཉན་ཐོས་རྣམས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །རབ་འབྱོར། གང་དག་ཕ་རོལ་ཏུ་ཕྱིན་པ་དྲུག་སྨྲ་བ་དང་། བརྗོད་པ་དང་། སྟོན་པ་དང་། འདོགས་པ་དང་། འགོད་པ་དང་། རྣམ་པར་འབྱེད་པ་དང་། རྣམ་པར་འགྲེལ་བ་དང་། གསལ་བར་བྱེད་པ་དང་། ཡང་དག་པར་སྟོན་པར་བྱེད་པ་དེ་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །རབ་འབྱོར། ཕ་རོལ་ཏུ་ཕྱིན་པ་དྲུག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །དྲན་པ་ཉེ་བར་གཞག་པ་རྣམས་དང་། དེ་བཞིན་དུ་སྦྱར་ཏེ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་བར་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །དེ་བཞིན་ཉིད་དང་། ཡང་དག་པའི་མཐའ་དང་། ཆོས་ཀྱི་དབྱིངས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །རབ་འབྱོར། ཕ་རོལ་ཏུ་ཕྱིན་པ་དྲུག་ནི། སྟོན་པར་རིག་པར་བྱའོ། །ཕ་རོལ་ཏུ་ཕྱིན་པ་དྲུག་ནི་ལམ་དུ་རིག་པར་
བྱའོ། །ཕ་རོལ་ཏུ་ཕྱིན་དྲུག་ནི། སྣང་བའོ། །ཕ་རོལ་ཏུ་ཕྱིན་པ་དྲུག་ནི། སྒྲོན་མའོ། །ཕ་རོལ་ཏུ་ཕྱིན་པ་དྲུག་ནི། སྣང་གསལ་ལོ། བློའོ། །ཤེས་པའོ། །ཤེས་རབ་བོ། །ཕ་རོལ་ཏུ་ཕྱིན་པ་དྲུག་ནི། སྐྱོབ་པའོ། །ཕ་རོལ་ཏུ་ཕྱིན་པ་དྲུག་ནི། སྐྱབས་སོ། །ཕ་རོལ་ཏུ་ཕྱིན་དྲུག་ནི། དཔུང་གཉེན་ནོ། །ཕ་རོལ་ཏུ་ཕྱིན་པ་དྲུག་ནི། ཕའོ། །ཕ་རོལ་ཏུ་ཕྱིན་པ་དྲུག་ནི། མའོ། །དྲན་པ་ཉེ་བར་གཞག་པ་རྣམས་དང་། དེ་བཞིན་དུ་སྦྱར་ཏེ་རྣམ་པ་ཐམས་ཅད་མཁྱེན་པ་ཉིད་ཀྱི་བར་དག་ནི། བག་ཆགས་དང་། མཚམས་སྦྱོར་བ་དང་། ཉོན་མོངས་པ་ཐམས་ཅད་སྦོང་བར་འགྱུར་བ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་འདས་པའི་དུས་ན་བྱུང་བར་གྱུར་བའི་སངས་རྒྱས་བཅོམ་ལྡན་འདས་དེ་དག་གིའང་ཡབ་དང་ཡུམ་དུ་གྱུར་པ་ཡིན་ལ། རབ་འབྱོར། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་མ་འོངས་པའི་དུས་ན་འབྱུང་བར་འགྱུར་བའི་སངས་རྒྱས་བཅོམ་ལྡན་འདས་དེ་དག་གིའང་ཡབ་དང་ཡུམ་དུ་འགྱུར་བ་ཡིན་ཞིང་། རབ་འབྱོར། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་ནི། སངས་རྒྱས་བཅོམ་ལྡན་འདས་གང་དག་ད་ལྟར་ཕྱོགས་བཅུའི་འཇིག་རྟེན་གྱི་ཁམས་དག་ན་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་གིའང་ཡབ་དང་ཡུམ་དུ་གྱུར་པ་ཡིན་པའི་ཕྱིར་རོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ནི། འདི་ལས་ངེས་པར་བྱུང་བའི་ཕྱིར་རོ། །རབ་འབྱོར། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ་དང་། སངས་རྒྱས་ཀྱི་ཞིང་ཡོངས་སུ་དག་པར་བྱ་བར་འདོད་པ་དང་། སེམས་ཅན་རྣམས་ཀྱང་ཡོངས་སུ་སྨིན་པར་བྱ་བར་འདོད་པས། བསྡུ་བའི་
དངོས་པོ་བཞི་པོ་དག་གིས་སེམས་ཅན་རྣམས་ཡང་དག་པར་བསྡུ་བར་བྱའོ། །གཞི་གང་ཞེ་ན། སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་མཐུན་པ་རྣམས་སོ། །རབ་འབྱོར། ངས་དོན་གྱི་དབང་འདི་མཐོང་བས་འདི་སྐད་དུ། འདི་ལྟ་སྟེ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་ཉིད་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྟོན་པ་དང་། ཕ་དང་། མ་དང་། གནས་དང་། སྐྱོབ་པ་དང་། གླིང་དང་། སྐྱབས་དང་། དཔུང་གཉེན་ཡིན་ནོ། །ཞེས་སྨྲའོ། །རབ་འབྱོར། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་གཞན་གྱི་དྲིང་ལ་མི་འཇོག་པར་འགྲོ་བར་འདོད་པ་དང་། གཞན་གྱི་དྲིང་མི་འཇོག་པ་ལ་གནས་པར་འདོད་པ་དང་། སེམས་ཅན་ཐམས་ཅད་ཀྱི་སོམ་ཉི་གཅོད་པར་འདོད་པ་དང་། སངས་རྒྱས་ཀྱི་ཞིང་ཡོངས་སུ་དག་པར་བྱ་བར་འདོད་པ་དང་། སེམས་ཅན་རྣམས་ཡོངས་སུ་སྨིན་པར་བྱ་བར་འདོད་པས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བསླབ་པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོས་གང་ལ་བསླབ་པར་བྱ་བའི་ཆོས་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་རྒྱ་ཆེར་བསྟན་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་ཉིད་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། ནམ་མཁའ་ལྟར་ཆགས་པ་མེད་པའི་མཚན་ཉིད་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ། །རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། མཚན་ཉིད་མེད་བ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་མཚན་ཉིད་གང་ཡང་མེད་དོ། །རབ་འབྱོར་གྱིས་གསོལ་པ། བཅོམ་ལྡན་འདས། མཚན་ཉིད་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་མཆིས་པའི་མཚན་ཉིད་དེས་ཆོས་ཐམས་ཅད་ཀྱང་མཆིས་པར་འགྱུར་བའི་རྣམ་གྲངས་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། མཚན་ཉིད་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོད་པའི་མཚན་
ཉིད་ཀྱིས་ཆོས་ཐམས་ཅད་ཀྱང་ཡོད་པ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར། ཆོས་ཐམས་ཅད་ནི། རང་བཞིན་གྱིས་དབེན་ལ། ཆོས་ཐམས་ཅད་ནི། །རང་བཞིན་གྱིས་སྟོང་པའི་ཕྱིར་རོ། །རབ་འབྱོར། རྣམ་གྲངས་དེས་ན། མཚན་ཉིད་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོད་པའི་མཚན་ཉིད་དེས་ཆོས་ཐམས་ཅད་ཡོད་པ་ཡིན་ཏེ། འདི་ལྟ་སྟེ། སྟོང་པ་ཉིད་ཀྱི་མཚན་ཉིད་དང་། དབེན་པའི་མཚན་ཉིད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། གལ་ཏེ་ཆོས་ཐམས་ཅད་ནི། ཆོས་ཐམས་ཅད་ཀྱིས་དབེན་པ་ལགས་ལ། ཆོས་ཐམས་ཅད་ནི། ཆོས་ཐམས་ཅད་ཀྱིས་སྟོང་པ་ལགས་ན། བཅོམ་ལྡན་འདས། སེམས་ཅན་རྣམས་ཀྱི་ཀུན་ནས་ཉོན་མོངས་པ་དང་། རྣམ་པར་བྱང་བ་ཇི་ལྟར་མཆིས་པར་འགྱུར་ལགས། བཅོམ་ལྡན་འདས། དབེན་པ་ནི། ཀུན་ནས་ཉོན་མོངས་པར་མི་འགྱུར་ཞིང་། རྣམ་པར་བྱང་བར་མི་འགྱུར་ལ། སྟོང་པ་ཉིད་ཀྱང་ཀུན་ནས་ཉོན་མོངས་པར་མི་འགྱུར་ཞིང་། རྣམ་པར་བྱང་བར་མི་འགྱུར་ལགས་པས། དབེན་པ་དང་། སྟོང་པ་ཉིད་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་ལགས་ཏེ། དབེན་པས་ཀྱང་སྟོང་པ་ཉིད་ལ་བྱང་ཆུབ་མངོན་པར་རྫོགས་པར་འཚང་རྒྱ་བའི་ཆོས་གང་ཡང་དམིགས་པར་མི་འགྱུར་ལ། སྟོང་པ་ཉིད་ཀྱིས་ཀྱང་དབེན་པ་ལ་བྱང་ཆུབ་མངོན་པར་རྫོགས་པར་འཚང་རྒྱ་བའི་ཆོས་གང་ཡང་དམིགས་པར་མི་འགྱུར་ལགས་ན། བཅོམ་ལྡན་འདས་ཀྱིས་གསུངས་པ་འདིའི་དོན་ཇི་ལྟར་རྟོགས་པར་བགྱི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། འདི་ཇི་སྙམ་དུ་སེམས། སེམས་ཅན་འདི་དག་ཡུན་རིང་པོ་ནས་ངར་འཛིན་པ་དང་། ང་ཡིར་འཛིན་པ་ལ་སྤྱོད་སྤྱོད་པ་ཡིན་སྙམ་མམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་དེ་ལྟ་ལགས་སོ། །བདེ་བར་གཤེགས་པ། དེ་དེ་ལྟ་ལགས་ཏེ། སེམས་ཅན་འདི་
དག་ནི། ཡུན་རིང་པོ་ནས་ངར་འཛིན་པ་དང་། ང་ཡིར་འཛིན་པ་ལ་སྤྱོད་སྤྱོད་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ངར་འཛིན་པ་དང་། ང་ཡིར་འཛིན་པ་དག་དབེན་པ་ཡིན་ཞིང་། ངར་འཛིན་པ་དང་། ང་ཡིར་འཛིན་པ་དག་སྟོང་པ་ཡིན་སྙམ་མམ། རབ་འབྱོར་གྱིས་གསོལ་པ། བཅོམ་ལྡན་འདས། དབེན་པ་ལགས་སོ། །བདེ་བར་གཤེགས་པ། སྟོང་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ངར་འཛིན་པ་དང་། ང་ཡིར་འཛིན་པའི་སེམས་ཅན་རྣམས་འཕྱན་ཞིང་འཁོར་སྙམ་མམ། རབ་འབྱོར་གྱིས་གསོལ་པ། བཅོམ་ལྡན་འདས། དེ་དེ་ལྟ་ལགས་སོ། །བདེ་བར་གཤེགས་པ། དེ་དེ་ལྟ་ལགས་ཏེ། ངར་འཛིན་པ་དང་། ང་ཡིར་འཛིན་པའི་སེམས་ཅན་རྣམས་འཕྱན་ཞིང་འཁོར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ལྟར་ན། འཁོར་བ་ན་འཁོར་ཞིང་འཕྱན་པའི་སེམས་ཅན་རྣམས་ཀྱི་ཀུན་ནས་ཉོན་མོངས་པའང་ཡོད་པ་ཡིན་ནོ། །རབ་འབྱོར། གང་ལ་ངར་འཛིན་པ་མེད་པ་དང་། ང་ཡིར་འཛིན་པ་མེད་པ་དེ་ལ་འཛིན་པ་མེད་དེ། སེམས་ཅན་དེ་དག་ནི། འཁོར་བར་མི་འཕྱན་ཞིང་མི་འཁོར་རོ། །གང་ལ་འཁོར་བར་འཕྱན་པ་མེད་པ་དང་། འཁོར་བ་མེད་པ་དེ་ལ་ཀུན་ནས་ཉོན་མོངས་པར་འགྱུར་བ་མེད་དེ། རབ་འབྱོར། དེ་ལྟར་ན། རྣམ་པར་བྱང་བའང་ཡོད་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། གཟུགས་ལ་མི་སྤྱོད་ལགས་སོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་མི་སྤྱོད་ལགས་སོ། །དེ་བཞིན་དུ་དྲན་པ་ཉེ་བར་གཞག་པ་རྣམས་ཀྱི་བར་ལ་མི་སྤྱོད་ལགས་སོ། །སོ་སོ་ཡང་དག་པར་རིག་པ་བཞིའི་བར་ལ་མི་སྤྱོད་ལགས་སོ། །དེ་ཅིའི་སླད་དུ་ཞེ་ན། འདི་ལྟར་གང་སྤྱོད་པའམ། གང་གིས་སྤྱད་པའམ། གང་ལ་སྤྱད་པར་བགྱི་བའི་ཆོས་
དེ་དག་ཐམས་ཅད་དམིགས་སུ་མ་མཆིས་པའི་སླད་དུ་སྟེ། བཅོམ་ལྡན་འདས། དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱིས་མི་ཐུལ་བ་ལགས་སོ། །བཅོམ་ལྡན་འདས། དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཉན་ཐོས་དང་། རང་སངས་རྒྱས་ཐམས་ཅད་ཀྱིས་ཟིལ་གྱིས་མི་ནོན་པ་ལགས་སོ། །དེ་ཅིའི་སླད་དུ་ཞེ་ན། འདི་ལྟར། དེ་ནི། ཟིལ་གྱིས་མི་ནོན་པའི་གནས་འདི་ལྟ་སྟེ། བྱང་ཆུབ་སེམས་དཔའི་སྐྱོན་མ་མཆིས་པ་ལ་གནས་པའི་སླད་དུ་སྟེ། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་ཐམས་ཅད་མཁྱེན་པ་ཉིད་ཡིད་ལ་བགྱིད་པས་གནས་པ་ནི། ཟིལ་གྱིས་ནོན་པར་མི་འགྱུར་ལགས་སོ། །བཅོམ་ལྡན་འདས། དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། རྣམ་པ་ཐམས་ཅད་མཁྱེན་པ་ཉིད་དང་ཡང་ཉེ་བར་གྱུར་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཛམ་བུའི་གླིང་གི་སེམས་ཅན་གང་ཇི་སྙེད་པ་དེ་དག་ཐམས་ཅད་ཀྱིས་མིའི་ལུས་འཐོབ་པར་གྱུར་ལ། མིའི་ལུས་ཐོབ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ནས་དེ་དག་ལ་རིགས་ཀྱི་བུའམ། རིགས་ཀྱི་བུ་མོ་ལ་ལ་ཞིག་ཇི་སྲིད་འཚོའི་བར་དུ་བསྙེན་བཀུར་བྱེད་དེ། ན་བཟའ་དང་། ཞལ་ཟས་དང་། གཟིམས་ཆ་དང་། གདན་དང་། སྙུན་གྱི་གསོས་སྨན་དང་། ཡོ་བྱད་དག་གིས་བསྟི་སྟང་དུ་བྱེད། བླ་མར་བྱེད། རི་མོར་བྱེད། མཆོད་པར་བྱེད་ཅིང་། དགེ་བའི་རྩ་བ་དེའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ན། རབ་འབྱོར། འདི་ཇི་སྙམ་དུ་སེམས། རིགས་ཀྱི་བུའམ། རིགས་ཀྱི་བུ་མོ་དེ་བཞི་དེ་ལས་བསོད་ནམས་མང་དུ་བསྐྱེད་པར་འགྱུར་སྙམ་མམ། རབ་འབྱོར་གྱིས་གསོལ་པ། བཅོམ་ལྡན་འདས། མང་ལགས་སོ། །བདེ་བར་གཤེགས་པ། མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བས་ཀྱང་རིགས་ཀྱི་བུའམ། རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་དང་
ལྡན་པའི་ཡིད་ལ་བྱེད་པས་གནས་ཤིང་། གཞན་དག་ལའང་ཤེས་རབ་ཀྱི་ཕ་རོལ་ཏུ་ཕྱིན་པ་འཆད་པར་བྱེད། སྟོན་པར་བྱེད། འདོགས་པར་བྱེད། འགོད་པར་བྱེད། རྣམ་པར་འགྲེལ་བར་བྱེད། རྣམ་པར་འབྱེད་པར་བྱེད། གསལ་བར་བྱེད་ཅིང་ཡང་དག་པར་རབ་ཏུ་སྟོན་པར་བྱེད་པ་དེ། ཆེས་བསོད་ནམས་མང་དུ་བསྐྱེད་པར་འགྱུར་རོ། །དེ་བཞིན་དུ་སྦྱར་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གང་དག་ཇི་སྙེད་པ་དེ་དག་ཐམས་ཅད་སྔ་ཕྱི་མེད་པར་མིའི་ལུས་ཐོབ་པར་འགྱུར་ལ། རིགས་ཀྱི་བུའམ། རིགས་ཀྱི་བུ་མོ་ལ་ལ་ཞིག་གིས་དེ་དག་དགེ་བ་བཅུའི་ལས་ཀྱི་ལམ་ལ་བཀོད་ཅིང་། བསམ་གཏན་བཞི་དང་། ཚད་མེད་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་དང་། རྒྱུན་དུ་ཞུགས་པའི་འབྲས་བུ་དང་། དེ་བཞིན་དུ་སྦྱར་ཏེ་རང་བྱང་ཆུབ་ཀྱི་བར་ལ་བཀོད་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་ལ་བཀོད་ཅིང་། དགེ་བའི་རྩ་བ་དེའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ན། རབ་འབྱོར། འདི་ཇི་སྙམ་དུ་སེམས། རིགས་ཀྱི་བུའམ། རིགས་ཀྱི་བུ་མོ་དེ་གཞི་དེ་ལས་བསོད་ནམས་མང་དུ་བསྐྱེད་པར་འགྱུར་སྙམ་མམ། རབ་འབྱོར་གྱིས་གསོལ་པ། བཅོམ་ལྡན་འདས། མང་ལགས་སོ། །བདེ་བར་གཤེགས་པ། མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་བས་ཀྱང་རིགས་ཀྱི་བུའམ། རིགས་ཀྱི་བུ་མོ་གང་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱེད་པས་གནས་ཤིང་། གཞན་དག་ལའང་ཤེས་རབ་ཀྱི་ཕ་རོལ་ཏུ་ཕྱིན་པ་འཆད་པར་བྱེད། སྟོན་པར་བྱེད། འདོགས་པར་བྱེད། འགོད་པར་བྱེད། རྣམ་པར་འགྲེལ་བར་བྱེད། རྣམ་པར་འབྱེད་པར་བྱེད། གསལ་བར་བྱེད་ཅིང་ཡང་དག་པར་རབ་ཏུ་སྟོན་པར་བྱེད་པ་དེ། ཆེས་བསོད་ནམས་མང་དུ་བསྐྱེད་པར་འགྱུར་ཏེ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ནི། སེམས་ཅན་ཐམས་ཅད་ཀྱི་སྦྱིན་གནས་སུ་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་གཏོགས་པར་བྱང་ཆུབ་སེམས་
དཔའ་སེམས་དཔའ་ཆེན་པོའི་གནས་པ་ཇི་ལྟ་བ་དེ་ལྟ་བུའི་སེམས་ཅན་གང་ཡང་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟར། རིགས་ཀྱི་བུ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ནི། བྱམས་པ་ཆེན་པོ་མངོན་པར་སྒྲུབ་པར་བྱེད་ཅིང་། དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་སེམས་ཅན་ཐམས་ཅད་བསད་པར་གྱུར་པ་ལྟ་བུར་ཡང་དག་པར་རྗེས་སུ་མཐོང་ནས་དེ་དག་སྙིང་རྗེ་ཆེན་པོ་མངོན་པར་སྒྲུབ་པར་བྱེད་དེ། དེ་དག་གནས་པ་དེས་གནས་ཤིང་། དགའ་བས་རབ་ཏུ་དགའ་བར་བྱེད་ཅིང་། དེ་དག་དགའ་བ་ཆེན་པོ་མངོན་པར་སྒྲུབ་པར་བྱེད་ཀྱང་དེ་དག་མཚན་མ་དེ་དང་ལྷན་ཅིག་མི་གནས་པ་དེ་དག་བཏང་སྙོམས་ཆེན་པོ་ཐོབ་པར་བྱེད་པའི་ཕྱིར་རོ། །རབ་འབྱོར། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་ཀྱི་སྣང་བ་ཆེན་པོ་ཡིན་ཏེ། འདི་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་སྣང་བ་དང་། བསམ་གཏན་དང་། བརྩོན་འགྲུས་དང་། བཟོད་པ་དང་། ཚུལ་ཁྲིམས་དང་། སྦྱིན་པའི་ཕ་རོལ་ཏུ་ཕྱིན་པའི་སྣང་བ་ན་ནོ། །རིགས་ཀྱི་བུ་དེ་དག་ནི། མངོན་པར་རྫོགས་པར་སངས་མ་རྒྱས་ཀྱང་སེམས་ཅན་ཐམས་ཅད་ཀྱི་སྦྱིན་པའི་གནས་སུ་གྱུར་པའང་ཡིན་ལ། བླ་ན་མེད་པ་ཡང་དག་པར་གས་པའི་བྱང་ཆུབ་ལས་ཀྱང་ཕྱིར་མི་ལྡོག་གོ །གང་གིས་གོས་དང་། ཟས་དང་། མལ་ཆ་དང་། སྟན་དང་། ན་བའི་གསོས་སྨན་དང་། ཡོ་བྱད་དག་ཡོངས་སུ་སྤྱད་ན། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པས་གནས་ལ། སྦྱིན་པ་པོ་དང་། སྦྱིན་པ་དག་རྣམས་ཀྱི་སྦྱིན་པ་དེ་དག་ཡོངས་སུ་སྦྱོང་ཞིང་། རྣམ་པ་ཐམས་ཅད་མཁྱེན་པ་ཉིད་དང་ཡང་ཉེ་བར་གྱུར་པས་ན། དེའི་ཡོ་བྱད་དེ་དག་ནི། འབྲས་བུ་ཆེ་བ་དང་། ཕན་ཡོན་ཆེ་བར་འགྱུར་རོ། །རབ་འབྱོར། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཡུལ་འཁོར་གྱི་བསོད་སྙོམས་འབྲས་བུ་ཡོད་པར་སྤྱོད་པར་འདོད་པ་དང་། སེམས་ཅན་ཐམས་ཅད་ལ་ལམ་ཉེ་བར་སྟོན་པར་འདོད་པ་དང་། སྣང་བ་ཆེན་པོ་བྱེད་པར་འདོད་པ་དང་། སེམས་ཅན་བཅིངས་པར་གྱུར་པ་རྣམས་ཡོངས་སུ་དགྲོལ་བར་འདོད་
པ་དང་། སེམས་ཅན་ཐམས་ཅད་ལ་བླ་ན་མེད་པའི་ཤེས་རབ་ཀྱི་མིག་ཉེ་བར་སྟོན་པ་འདོད་པ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པ་དག་གིས་གནས་པར་བྱའོ། །རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པ་དེ་དག་གིས་ཡིད་ལ་བྱེད་ཅིང་། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པ་དེ་དག་གིས་ཡིད་ལ་བྱེད་ན། དེས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པ་ཉིད་ཀྱི་གཏམ་ཡང་བརྗོད་པར་བྱའོ། །དེས་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པ་ཉིད་ཀྱི་གཏམ་བརྗོད་ནས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པ་ཉིད་ཀྱི་ཡིད་ལ་བྱེད་པ་དག་ཡིད་ལ་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པ་ཉིད་ཀྱིས་ཡིད་ལ་བྱེད་པས་གནས་པ་དེས་ཡིད་ལ་བྱེད་པ་གཞན་དག་གིས་གོ་སྐབས་མི་དབྱེ་བར་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཡིད་ལ་བྱེད་པ་དེ་དག་གིས་བརྩོན་པ་མི་གཏང་བར་ཉིན་མཚན་དུ་གནས་པར་བྱེད་པ་དེ་ལྟར་བྱའོ། །རབ་འབྱོར། འདི་ལྟ་སྟེ། དཔེར་ན། སྔོན་ཆད་ནོར་བུ་རིན་པོ་ཆེ་རྙེད་མ་མྱོང་བའི་མི་ཞིག་ཡོད་ལ། དེས་དུས་གཞན་ཞིག་ན་ནོར་བུ་རིན་པོ་ཆེ་རྙེད་པར་གྱུར་ཏེ། དེས་ནོར་བུ་རིན་པོ་ཆེ་རྙེད་པས་དགའ་བ་དང་། མཆོག་ཏུ་དགའ་བ་དང་། ཡིད་བདེ་བ་རྒྱ་ཆེན་པོ་དང་ལྡན་པར་གྱུར་པ་ལས། དེས་ནོར་བུ་རིན་པོ་ཆེ་དེ་རྙེད་མ་ཐག་ཏུ་སྟོར་བར་གྱུར་ན། དེ་གཞི་དེ་ལས་སྡུག་བསྔལ་བ་དང་། ཡིད་མི་བདེ་བ་ཆེན་པོ་དང་ལྡན་པར་འགྱུར་ཏེ། དེ་རྟག་ཏུ་རྒྱུན་མི་ཆད་པར་ཨེ་མའོ་ཀྱེ་ཧུད་བདག་ནི། ནོར་བུ་རིན་པོ་ཆེ་དེ་དང་བྲལ་བར་གྱུར་ཏོ། །སྙམ་དུ་ནོར་བུ་རིན་པོ་ཆེ་དང་ལྡན་པའི་ཡིད་ལ་བྱེད་པ་ཤ་སྟག་འབྱུང་བར་འགྱུར་རོ། །རབ་འབྱོར། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་ཀྱང་འདི་ནི། རིན་པོ་ཆེ་ཡིན་ནོ། །སྙམ་དུ་བསམ་ཞིང་། རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱེད་པ་དག་དང་མི་འབྲལ་བར་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཡིད་ལ་བགྱིད་པ་ཐམས་ཅད་ནི། རང་བཞིན་དང་བྲལ་བ་
ལགས་ལ། ཡིད་ལ་བགྱིད་པ་ཐམས་ཅད་ནི། རང་བཞིན་གྱིས་སྟོང་པ་ལགས་ན། བཅོམ་ལྡན་འདས། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བགྱིད་པ་དག་དང་མ་བྲལ་བར་གྱུར་པ་ལགས། བྲལ་བ་ལ་ནི། བྱང་ཆུབ་སེམས་དཔའ་དང་། ཡིད་ལ་བགྱིད་པ་དག་དང་། རྣམ་པ་ཐམས་ཅད་མཁྱེན་པ་ཉིད་ཀྱང་དམིགས་སུ་མ་མཆིས་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟར། ཆོས་ཐམས་ཅད་ནི། རང་བཞིན་དང་བྲལ་བ་སྟེ། དེ་དག་ནི། ཉན་ཐོས་རྣམས་ཀྱིས་མ་བྱས། རང་སངས་རྒྱས་རྣམས་ཀྱིས་མ་བྱས། སངས་རྒྱས་བཅོམ་ལྡན་འདས་རྣམས་ཀྱིས་ཀྱང་མ་མཛད་དེ། ཆོས་ཀྱི་དབྱིངས་དང་། ཆོས་གནས་པ་ཉིད་དང་། ཆོས་སྐྱོན་མེད་པ་ཉིད་དང་། དེ་བཞིན་ཉིད་དང་། མ་ནོར་པ་དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཡང་དག་པའི་མཐའ་ནི། གནས་པ་ཉིད་ཡིན་ནོ། །ཞེས་བྱ་བར་ཤེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་དང་མ་བྲལ་བ་ཡིན་ནོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། རང་བཞིན་གྱིས་དབེན་ཞིང་རང་བཞིན་གྱིས་སྟོང་པ་ཡིན་པས་ན། དེ་ལ་རྣམ་པར་འཕེལ་བ་མེད་ཅིང་ཡོངས་སུ་འགྲིབ་པ་མེད་པའི་ཕྱིར་རོ། །རབ་འབྱོར་གྱིས་གསོལ་པ། བཅོམ་ལྡན་འདས། གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་རང་བཞིན་གྱིས་དབེན་ཞིང་རང་བཞིན་གྱིས་སྟོང་པ་ལགས་ན། བཅོམ་ལྡན་འདས། ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཡང་དག་པར་བསྒྲུབས་པར་བགྱིས་ཤིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བསྒྲུབས་ཀྱང་རྣམ་པར་འཕེལ་བ་འམ་ཡོངས་སུ་
འགྲིབ་པ་མེད་དེ། ཡང་དག་པའི་མཐའ་ལའང་རྣམ་པར་འཕེལ་བའམ་ཡོངས་སུ་འགྲིབ་པ་མེད་ལ་ཆོས་ཀྱི་དབྱིངས་ལའང་རྣམ་པར་འཕེལ་བའམ་ཡོངས་སུ་འགྲིབ་པ་མེད་དོ། །དེ་ཅིའི་ཕྱིར་ཞེ་ན། འདི་ལྟར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། གཅིག་ཀྱང་མ་ཡིན་ལ། གཉིས་ཀྱང་མ་ཡིན་པའི་ཕྱིར་རོ། །རབ་འབྱོར། གལ་ཏེ་དེ་ལྟར་བསྟན་པ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་མི་ཞུམ། མི་འགོང་། མི་སྐྲག་།མི་དངང་ཞིང་དངང་བར་མི་འགྱུར་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཕྱིར་མི་ལྡོག་པའི་ས་ལ་གནས་ཤིང་མཐའ་ཐུག་པར་འགྲོ་བ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པའི་སྟོང་པ་ཉིད་དང་། གསོག་ཉིད་དང་། གསོབ་ཉིད་དང་། ཡ་མ་བརླ་ཉིད་དང་། སྙིང་པོ་མ་མཆིས་པ་གང་ལགས་པ་དེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་ནི། མ་ཡིན་ནོ། །གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ལས་གུད་ན་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཆོས་འགའ་ཡང་དམིགས་སུ་མཆིས་ལགས་སམ། བཀའ་སྩལ་པ། རབ་འབྱོར་དེ་ནི། མ་ཡིན་ནོ། །གསོལ་པ། བཅོམ་ལྡན་འདས། ཤེས་རབ་ཀྱི་ཕ་རོལ་ཏུ་ཕྱིན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ལགས་སམ། བཀའ་སྩལ་པ། །རབ་འབྱོར། དེ་ནི། མ་ཡིན་ནོ། །གསོལ་པ། བཅོམ་ལྡན་འདས། སྟོང་པ་ཉིད་སྟོང་པ་ཉིད་ལ་སྤྱོད་ལགས་སམ། བཀའ་སྩལ་པ། རབ་འབྱོར། དེ་ནི། མ་ཡིན་ནོ། །གསོལ་པ། བཅོམ་ལྡན་འདས། སྟོང་པ་ཉིད་ལས་གཞན་པ་ཞིག་སྟོང་པ་ཉིད་ལ་སྤྱོད་ལགས་སམ། བཀའ་སྩལ་པ། རབ་འབྱོར། དེ་ནི། མ་ཡིན་ནོ། །གསོལ་པ། བཅོམ་ལྡན་འདས། གཟུགས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ལགས་སམ། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་
ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ལགས་སམ། བཀའ་སྩལ་པ། རབ་འབྱོར། དེ་ནི། མ་ཡིན་ནོ། །གསོལ་པ། བཅོམ་ལྡན་འདས། ཕ་རོལ་ཏུ་ཕྱིན་པ་དྲུག་པོ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ལགས་སམ། དེ་བཞིན་དུ་སོ་སོ་ཡང་དག་པར་རིག་པ་བཞིའི་བར་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ལགས་སམ། བཀའ་སྩལ་པ། རབ་འབྱོར། དེ་ནི། མ་ཡིན་ནོ། །གསོལ་པ། བཅོམ་ལྡན་འདས། གཟུགས་ཀྱི་སྟོང་པ་ཉིད་དང་། གསོག་ཉིད་དང་། གསོབ་ཉིད་དང་། ཡ་མ་བརླ་ཉིད་དང་། སྙིང་པོ་མ་མཆིས་པ་ཉིད་དང་། དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ལགས་པ་དེ་བཞིན་ཉིད་དང་། ཆོས་ཉིད་དང་། ཆོས་ཀྱི་དབྱིངས་དང་། ཆོས་གནས་པ་ཉིད་དང་། ཆོས་སྐྱོན་མེད་པ་ཉིད་དང་། ཡང་དག་པའི་མཐའ་གང་ལགས་པ་དེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ལགས་སམ། བཀའ་སྩལ་པ། རབ་འབྱོར། དེ་ནི། མ་ཡིན་ནོ། །གསོལ་པ། བཅོམ་ལྡན་འདས། དེ་བཞིན་དུ་མི་འཇིགས་པ་བཞིའི་བར་གྱི་སྟོང་པ་ཉིད་དང་། གསོག་ཉིད་དང་། གསོབ་ཉིད་་དང་། ཡ་མ་བརླ་ཉིད་དང་། སྙིང་པོ་མ་མཆིས་པ་ཉིད་གང་ལགས་པ་དེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ལགས་སམ། བཀའ་སྩལ་པ། རབ་འབྱོར། དེ་ནི། མ་ཡིན་ནོ། །གསོལ་པ་། བཅོམ་ལྡན་འདས། གལ་ཏེ་ཆོས་དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མི་སྤྱོད་ལགས་ན། བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་སྤྱད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། འདི་ཇི་སྙམ་དུ་སེམས། ཁྱོད་ཀྱིས་ཆོས་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཆོས་དེ་ཡང་དག་པར་རྗེས་སུ་མཐོང་སྙམ་མམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། ཁྱོད་ཀྱིས་གང་ལ་བྱང་ཆུབ་སེམས་དཔས་སྤྱད་པར་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་རྗེས་སུ་མཐོང་སྙམ་མམ། གསོལ་པ། བཅོམ་ལྡན་འདས། དེ་ནི་མ་ལགས་
སོ། །བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཁྱོད་ཀྱིས་གང་ཡང་དག་པར་རྗེས་སུ་མ་མཐོང་བའི་ཆོས་དེ་ལ་ཆོས་འགའ་ཞིག་དམིགས་སུ་ཡོད་སྙམ་མམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། རབ་འབྱོར། འདི་ཇི་སྙམ་དུ་སེམས། ཆོས་གང་དམིགས་སུ་མེད་པ་དེ་ལ་སྐྱེ་བའམ་འགག་པར་འགྱུར་པ་ཡོད་སྙམ་མམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། རབ་འབྱོར། འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་མི་སྐྱེ་བའི་ཆོས་ལ་བཟོད་པ་ཡིན་ཏེ། རབ་འབྱོར། བཟོད་པ་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་རོ། །རབ་འབྱོར། འདི་ནི། དེ་བཞིན་གཤེགས་པའི་མི་འཇིགས་པ་དང་། སོ་སོ་ཡང་དག་པར་རིག་པ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྒྲུབ་ཅིང་དེ་ལྟར་སྤྱོད་པ་དང་། དེ་ལྟར་འབད་ཅིང་དེ་ལྟར་རྩོལ་བས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཡེ་ཤེས་དང་། ཡེ་ཤེས་ཆེན་པོ་དང་། རྣམ་པ་ཐམས་ཅད་མཁྱེན་པ་ཉིད་རྗེས་སུ་འཐོབ་པར་མི་འགྱུར་བ་དེ་ནི། གནས་མེད་དོ། །དི་ཅིའི་ཕྱིར་ཞེ་ན། འདི་ལྟར། བྱང་ཆུབ་སེམས་དཔའ་སེམས་དཔའ་ཆེན་པོ་དེ། མི་སྐྱེ་བའི་ཆོས་ལ་བཟོད་པ་ཐོབ་པས་ན། འདི་ལྟར། དེ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་དེ་ལ་གཞོལ་བར་འགྱུར་བའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཐམས་ཅད་སྐྱེ་བའི་སླད་དུ་བྱང་ཆུབ་སེམས་དཔའ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་ལགས་སམ། བཀའ་སྩལ་པ། རབ་འབྱོར། དེ་ནི། མ་ཡིན་ནོ། །གསོལ་པ། བཅོམ་ལྡན་འདས། ཆོས་ཐམས་ཅད་སྐྱེ་བ་མ་མཆིས་པའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་
འགྱུར་ལགས་སམ། བཀའ་སྩལ་པ། རབ་འབྱོར། དེ་ནི། མ་ཡིན་ནོ། །གསོལ་བ། བཅོམ་ལྡན་འདས། གལ་ཏེ་སྐྱེ་བའི་སླད་དུའང་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་མི་འགྱུར་ལ། སྐྱེ་བ་མ་མཆིས་པའི་སླད་དུའང་མ་ལགས་ན། བཅོམ་ལྡན་འདས། འོ་ན་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་ལགས། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར་འདི་ཇི་སྙམ་དུ་སེམས། ཁྱོད་ཀྱིས་ཆོས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་ཆོས་དེ་ཡང་དག་པར་རྗེས་སུ་མཐོང་སྙམ་མམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། བཅོམ་ལྡན་འདས། བདག་གིས་ནི། ཆོས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་ཆོས་དེའང་ཡང་དག་པར་རྗེས་སུ་མ་མཐོང་ལ། བཅོམ་ལྡན་འདས། བདག་གིས་ནི། ཆོས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དང་། གང་གིས་མངོན་པར་རྫོགས་པར་འཚང་རྒྱ་བ་དང་། གང་ཞིག་མངོན་པར་རྫོགས་པར་འཚང་རྒྱ་བར་བགྱི་བའི་ཆོས་དེའང་ཡང་དག་པར་རྗེས་སུ་མ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། དེ་དེ་བཞིན་ནོ། །དེ་དེ་བཞིན་ཏེ། རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་མི་དམིགས་པ་ནི། འདི་སྙམ་དུ་བདག་མངོན་པར་རྫོགས་པར་འཚང་རྒྱ་བར་འགྱུར་རོ། །འདིས་མངོན་པར་རྫོགས་པར་འཚང་རྒྱ་བར་འགྱུར་རོ། །འདི་མངོན་པར་རྫོགས་པར་འཚང་རྒྱ་བར་འགྱུར་རོ། །སྙམ་དུ་མི་སེམས་སོ། །དེ་ཅིའི་ཕྱིར་ཞེ་ན། རབ་འབྱོར། འདི་ལྟར། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ལ་རྣམ་པར་རྟོག་པ་དེ་དག་ཐམས་ཅད་དུ་མི་འབྱུང་བའི་ཕྱིར་རོ། །དེ་ཅིའི་ཕྱིར་ཞེ་ན། རབ་འབྱོར། ཤེས་རབ་ཀྱི་ཕ་རོལ་ཏུ་ཕྱིན་པ་ནི། རྣམ་པར་རྟོག་པ་མེད་པའི་ཕྱིར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་ལས། རྣམ་པར་རྟོག་པ་སྤང་བར་བསྟན་པའི་ལེའུ་ཞེས་བྱ་སྟེ། ལྔ་བཅུ་རྩ་ལྔ་པའོ།། །།