བཅུ་པ། རྣམ་པར་སྣང་མཛད་ཀྱི་ལེའུ།
སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་གཉིས་པ། རིགས་ཀྱི་བུ་དག་སྔོན་འདས་པའི་བསྐལ་པ་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་དེ་བས་ཀྱང་ཕ་སྔའི་དུས་དེའི་ཚེ་དེའི་དུས་ན་འཇིག་རྟེན་གྱི་ཁམས་རྒྱ་མཚོ་ཚུལ་དྲི་མ་མེད་པར་ཕྱོགས་ཀུན་སྣང་བ་ཞེས་བྱ་བའི་དབུས་ན། འཇིག་རྟེན་གྱི་ཁམས་དཔལ་གྱི་སྒྲ་ཞེས་བྱ་བ་བྱུང་སྟེ། འཇིག་རྟེན་གྱི་ཁམས་དཔལ་གྱི་སྒྲ་ཞེས་བྱ་བ་དེ་ནི། རིན་པོ་ཆེའི་པད་མོ་མང་པོའི་རྒྱ་མཚོ་ལ་རབ་ཏུ་གནས་པ་རྣམ་པར་དག་ཅིང་ཀུན་ནས་ཉོན་མོངས་པ། འཇིག་རྟེན་གྱི་ཁམས་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ། ཀུན་ནས་ཟླུམ་པའི་དབྱིབས་སུ་འདུག་པ། གཞི་རྒྱན་མཐའ་ཡས་པས་བརྒྱན་པ། རིན་པོ་ཆེ་སྣ་ཚོགས་ཀྱི་ཤིང་གི་ཁོར་ཡུག་བརྒྱ་ཕྲག་གསུམ་གྱིས་ཀུན་ནས་བསྐོར་བ། རིན་པོ་ཆེའི་རྒྱན་ཐམས་ཅད་ཀྱི་སྤྲིན་གྱིས་ཀུན་ནས་ཡོག་པ། རི་རབ་དང་གྲོང་ཁྱེར་དང་། ཁང་ཁྱིམ་དྲི་མ་མེད་ཅིང་འོད་རྣམ་པར་སྣང་བས་བརྒྱན་པ། ཟས་དང་
སྐོམ་དང་། གོས་ཀྱི་ལོངས་སྤྱོད་ཡིད་ཀྱིས་བསམས་པས་འབྱུང་བ་རྒྱན་གྱི་རྣམ་པ་བརྗོད་པ་སྣ་ཚོགས་དང་ལྡན་པ་ཞིག་སྟེ། འཇིག་རྟེན་གྱི་ཁམས་དཔལ་གྱི་སྒྲ་ཞེས་བྱ་བ་དེའི་དབུས་ན། སྤོས་ཆུའི་རྒྱ་མཚོ་འོད་རྣམ་པར་དག་པ་ཞེས་བྱ་བ་ཡོད་དེ། དེ་ལས་མེ་ཏོག་གི་རི་རབ་མེ་ཏོག་འོད་འཕྲོ་བའི་རྒྱན་གྱི་རྒྱལ་མཚན་ཞེས་བྱ་བ། རིན་པོ་ཆེའི་ཁྲི་འཕང་བཅུའི་འཁོར་གྱིས་བསྐོར་ཅིང་བརྒྱན་པ་ཞིག་བྱུང་སྟེ། རི་རབ་དེའི་སྟེང་ན་ནགས་ཚལ་ཆེན་པོ་ཡལ་གའི་དཀྱིལ་འཁོར་རིན་པོ་ཆེའི་མེ་ཏོག་རྒྱས་པ་ཞེས་བྱ་བ། སྤོས་ཀྱི་རྒྱལ་མཚན་སྟོང་ཕྲག་དཔག་ཏུ་མེད་པ་ཤིན་ཏུ་བསྒྲེངས་པའི་རྒྱན་ཅན། མེ་ཏོག་གི་ཁང་པ་བརྩེགས་པ་དཔག་ཏུ་མེད་པའི་ཕྲེང་བ་རྣམ་པར་བྲེས་པ། ནོར་བུའི་ཁང་པ་བརྩེགས་པ་རྣམ་པར་བཀོད་པ། རིན་པོ་ཆེའི་རྡོ་རྗེའི་རྒྱལ་མཚན་དཔག་ཏུ་མེད་པས་ཀུན་ཏུ་བརྒྱན་པ། རིན་པོ་ཆེའི་མེ་ཏོག་པུན་ད་རི་ཀ་དཔག་ཏུ་མེད་པའི་ཕྲེང་བ་དག་གིས་ཀུན་ནས་བསྐོར་བ། སྤོས་དང་། རིན་པོ་ཆེའི་པད་མོ་མང་པོ་དཔག་ཏུ་མེད་པས་ཀུན་ཏུ་བརྒྱན་པ། རོལ་མོ་སྣ་ཚོགས་ཀྱི་སྒྲ་ཡིད་དུ་འོང་བའི་སྤྲིན་དཔག་ཏུ་མེད་པས་ཀུན་ཏུ་རྒྱས་པ། སྤོས་དང་བདུག་པའི་འོད་འཕྲོ་བའི་སྤྲིན་དཔག་ཏུ་མེད་པས་ཀུན་ཏུ་སྣང་བར་བྱས་པ། གྲོང་ཁྱེར་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་སེམས་ཅན་སྣ་ཚོགས་སྣང་བས་ཀུན་ནས་བསྐོར་བ་སྟེ། འདི་ལྟར་ནགས་ཚལ་ཆེན་པོ་ཡལ་གའི་དཀྱིལ་འཁོར་རིན་པོ་ཆེའི་མེ་ཏོག་རྒྱས་པ་ཞེས་བྱ་བ། དེའི་ཤར་ཕྱོགས་ལོགས་ན་གྲོང་ཁྱེར་ཆེན་པོ་འོད་འཕྲོ་སྣང་བ་ཞེས་བྱ་བ་མི་ཡི་རྒྱལ་པོའི་གནས་གྲོང་ཁྱེར་བརྒྱ་སྟོང་ཕྲག་བཅུའི་འཁོར་གྱིས་བསྐོར་བ། རིན་པོ་ཆེ་འབའ་ཞིག་ལས་བྱས་པ་ཆུ་དང་ཞེང་དུ་དཔག་ཚད་སྟོང་ཕྲག་བདུན་ཡོད་པ། རིན་པོ་ཆེ་སྣ་ཚོགས་ཀྱི་ཤིང་ཏགས་དང་། ཕྲུ་མའི་ར་བ་བདུན་གྱིས་བརྒྱན་ཅིང་ཀུན་ནས་བསྐོར་བ། རིན་པོ་ཆེའི་འོབས་སྤོས་ཀྱི་ཆུས་གང་བ། རིན་པོ་ཆེའི་མེ་ཏོག་ཨུཏྤ་ལ་དང་། པདྨོ་དང་། ཀུ་མུ་ད་དང་། མེ་ཏོག་པུན་ད་རི་ཀས་རྣམ་པར་བརྒྱན་པ་བདུན་གྱིས་ཀུན་ནས་བསྐོར་བ། ཤིང་ཏ་ལའི་ཕྲེང་བ་རྒྱན་རྣམ་པ་སྣ་ཚོགས་ཀྱི་ཚོགས་མང་པོ་འབྱིན་པ་
བདུན་གྱིས་ཀུན་ནས་བསྐོར་བ། རིན་པོ་ཆེའི་རྒྱན་དང་ཁང་བུ་བརྩེགས་པས་རབ་ཏུ་བརྒྱན་པ། སྟེང་ནས་གསེར་གྱི་དྲ་བ་དང་། དྲིལ་བུའི་དྲ་བ་དང་། མེ་ཏོག་གི་ཕྲེང་བའི་དྲ་བ་དང་། ཨིནྡྲ་ནཱི་ལའི་དྲ་བ་དང་། རྡོ་རྗེ་པད་མོའི་དྲ་བས་ཀུན་ནས་ཡོག་ལ། རིན་པོ་ཆེའི་ཤིང་དྲུང་མེ་ཏོག་གི་དྲ་བ་དང་། རོལ་མོའི་སྒྲ་མང་པོ་ཐམས་ཅད་ཀྱི་སྤྲིན་ཡིད་དུ་འོང་བས་ཀུན་ཏུ་ཁྱབ་པ། སྤོས་དང་ཕྲེང་བའི་རྒྱན་སྣ་ཚོགས་ཀྱིས་བརྒྱན་པ་ཡོད་དེ། དེའི་འཁོར་ཀུན་ན་སྒོ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ཡོད་དེ། སྒོ་དེ་དག་ཐམས་ཅད་ཀྱང་རིན་པོ་ཆེ་སྣ་ཚོགས་ཐམས་ཅད་ཀྱིས་བྱས་པ་སྟེ། སྒོ་དེ་དག་རེ་རེའི་མདུན་ཡང་རིན་པོ་ཆེ་རྡོ་ཡི་རྒྱལ་མཚན་རྒྱན་ཐམས་ཅད་ཀྱིས་བརྒྱན་པ་བདུན་བདུན་གྱིས་བརྒྱན་པའོ། །བཟའ་ཤིང་གི་ར་བ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུས་ཀྱང་ཀུན་ནས་བསྐོར་བ་སྟེ། བཟའ་ཤིང་གི་ར་བ་དེ་དག་ཐམས་ཅད་ཀྱང་སྤོས་དང་རིན་པོ་ཆེའི་ཤིང་སྣ་ཚོགས་ལས་སྤོས་ཀྱི་དྲི་ཀུན་ཏུ་བྱུང་བ་བྱ་སྣ་ཚོགས་ཡིད་དུ་འོང་བའི་སྒྲ་འབྱིན་པའོ། །གྲོང་ཁྱེར་ཆེན་པོ་འོད་འཕྲོ་བའི་སྤྲིན་ཅེས་བྱ་བ་དེར་མྱི་སྐྱེས་པ་ཐམས་ཅད་ཀྱང་ལས་ཀྱི་རྣམ་པར་སྨིན་པས་རྫུ་འཕྲུལ་ཐོབ་པ་དག་སྟེ། ནམ་མཁའ་ལས་རྒྱུ་བ་མི་དང་ལྷ་མཉམ་དུ་སྤྱོད་པ། ཡིད་བཞིན་གྱི་ཡུལ་ལ་ལོངས་སྤྱོད་པ་ཤ་སྟག་གོ །དེ་ནས་ལྷོ་ཕྱོགས་ལོགས་ན་ལྷ་ཡི་གྲོང་ཁྱེར་ཤིང་གི་མེ་ཏོག་སྣ་ཚོགས་ཞེས་བྱ་བ་ཡོད་དོ། །དེ་ནས་ལྷོ་ཕྱོགས་ལོགས་ན་ཀླུའི་གྲོང་ཁྱེར་ཀུན་ཏུ་རྫོགས་པ་ཞེས་བྱ་བ་ཡོད་དོ། །དེ་ནས་ལྷོ་ཕྱོགས་ལོགས་ན་གནོད་སྦྱིན་གྱི་གྲོང་ཁྱེར་རྡོ་རྗེའི་དཔལ་སྣ་ཚོགས་ཀྱི་རྒྱལ་མཚན་ཞེས་བྱ་བ་ཡོད་དོ། །དེ་ནས་ལྷོ་ཕྱོགས་ལོགས་ན་དྲི་ཟའི་གྲོང་ཁྱེར་གཞལ་མེད་ཁང་བཟང་པོ་ཞེས་བྱ་བ་ཡོད་དོ། །དེ་དང་འདབ་ཆགས་སུ་ལྷ་མ་ཡིན་གྱི་གྲོང་ཁྱེར་འཁོར་ལོའི་ཚོན་ཅེས་བྱ་བ་ཡོད་དོ། །དེ་དང་འདབ་ཆགས་སུ་འདབ་མ་བཟང་པོའི་གྲོང་ཁྱེར་རིན་པོ་ཆེ་སྣ་ཚོགས་བཟང་པོའི་ལྟེ་བ་ཞེས་བྱ་བ་ཡོད་དོ། །དེ་དང་འདབ་ཆགས་སུ་བྲམ་ཟེའི་གྲོང་ཁྱེར་རྒྱན་བཟང་པོ་སྣ་ཚོགས་ཞེས་བྱ་བ་ཡོད་དེ། དེ་དག་ལ་སྩོགས་པ་གྲོང་ཁྱེར་བྱེ་བ་ཁྲག་ཁྲིག་བརྒྱ་
སྟོང་ཕྲག་བཅུའི་འཁོར་གྱིས་བསྐོར་བའོ། །གྲོང་ཁྱེར་དེ་དག་རེ་རེ་ཞིང་ཡང་རྒྱན་མང་པོ་དུ་མས་བརྒྱན་པ་ནས་གྲོང་ཁྱེར་བྱེ་བ་ཁྲག་ཁྲིག་བརྒྱ་སྟོང་གི་འཁོར་གྱིས་བསྐོར་བའི་བར་དུ་སྟེ། ནགས་ཚལ་ཆེན་པོ་ཡལ་གའི་དཀྱིལ་འཁོར་རིན་པོ་ཆེའི་མེ་ཏོག་རྒྱས་པ་ཞེས་བྱ་བ་དེའི་དབུས་ན། སྙིང་པོ་བྱང་ཆུབ་རིན་པོ་ཆེའི་མེ་ཏོག་རྣམ་པར་སྣང་བ་ཞེས་བྱ་བ་རིན་པོ་ཆེ་ཐམས་ཅད་ཀྱི་ཤིང་། ཡལ་ག་སྟུག་ཅིང་རྒྱ་ཆེ་བའི་དཀྱིལ་འཁོར་རབ་ཏུ་རྒྱས་པས་ཀུན་ནས་བསྐོར་བ། རིན་པོ་ཆེའི་མེ་ཏོག་གཟུགས་དང་། དབྱིབས་རྣམ་པ་ཐ་དད་པ་མང་པོ་ཤིན་ཏུ་རྒྱས་པ་སྤོས་དང་མར་མེ་རིན་པོ་ཆེ་ཐམས་ཅད་ཀྱི་ཁ་དོག་ལྟར་འདུག་པའི་ཕྲེང་བ་མང་པོ་རྒྱ་ཆེན་པོའི་སྤྲིན་ཀུན་ཏུ་བཀྲམ་པ། རིན་པོ་ཆེའི་འོད་ཐུར་དུ་འཕྲོ་བས་ཞིང་ཀུན་ཏུ་ཁྱབ་པ་འོད་ཀྱི་དཀྱིལ་འཁོར་རྣམ་པར་དག་པའི་སྤྲིན་གྱིས་བརྒྱན་པ། ཕྱོགས་བཅུ་འོད་ཟེར་མང་པོས་རྣམ་པར་སྣང་བར་བྱས་པ་རྒྱན་ཐམས་ཅད་རིན་པོ་ཆེ་སྣ་ཚོགས་མང་པོས་སྤྲས་པ། རོལ་མོ་ཐམས་ཅད་ཀྱི་སྒྲ་དབྱངས་ཤིན་ཏུ་འབྱུང་བ། ནོར་བུའི་རྒྱལ་པོ་ཐམས་ཅད་ལས་བྱང་ཆུབ་སེམས་དཔའི་ལུས་འབྱུང་བ། ཕྱོགས་བཅུར་མེ་ཏོག་སྣ་ཚོགས་མང་པོ་རབ་ཏུ་འབྱུང་བ་ཡོད་དེ། དེའི་མདུན་དུ་པད་མོ་ཆེན་པོ་མེ་ཏོག་གི་ཟེ་བ་འོད་འཕྲོ་བའི་དཀྱིལ་འཁོར་ཞེས་བྱ་བ་རྒྱར་དཔག་ཚད་བྱེ་བ་ཕྲག་བརྒྱ་ཡོད་པ། རྩ་བ་སྤོས་དང་རིན་པོ་ཆེ་དང་རྡོ་རྗེའི་རྒྱ་མཚོ་ལ་ཟུག་པ། ཆུ་བ་རིན་པོ་ཆེ་སྣ་ཚོགས་ཀྱི་ཚོན་གྱིས་རྣམ་པ་སྣ་ཚོགས་སུ་གྱུར་པ། རིན་པོ་ཆེ་རྣམ་པ་ཐ་དད་པ་ཚད་མེད་པའི་འདབ་མ་ཅན། རིན་པོ་ཆེ་འོད་འཕྲོ་བ་དང་། སྤོས་ཀྱི་ཟེ་བའི་དཀྱིལ་འཁོར་གྱིས་བརྒྱན་པ། སྙིང་པོ་ལ་རིན་པོ་ཆེ་ཁ་དོག་མཐའ་ཡས་པའི་ཚོན་བཀྱེ་བ་པད་མོའི་དཀྱིལ་འཁོར་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་འཁོར་གྱིས་བསྐོར་བ། ཕྱོགས་བཅུར་འོད་ཀྱི་དཀྱིལ་འཁོར་རྒྱ་ཆེན་པོ་རབ་ཏུ་འགྱེད་པ། ཟེ་བ་ཐམས་ཅད་ལས་ཡིད་དུ་འོང་བའི་སྒྲ་འབྱུང་བ་མངོན་པར་བྱུང་ངོ་། །འཇིག་རྟེན་གྱི་ཁམས་དཔལ་གྱི་སྒྲ་ཞེས་བྱ་བ་དེར།
དེ་བཞིན་གཤེགས་པ་རི་རབ་བཅུའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། དེ་བཞིན་གཤེགས་པ་རི་རབ་བཅུའི་རྡུལ་ཤིན་ཏུ་ཕྲ་བ་སྙེད་དེ་དག་ལས་བསྐལ་པའི་ཐོག་མ་པ་ཐམས་ཅད་ཀྱི་ཐོག་མར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པའི་དེ་བཞིན་གཤེགས་པ་ནི་ཡོན་ཏན་ཐམས་ཅད་ཀྱི་རི་བོ་རི་རབ་ཀྱི་དབྱངས་ཤེས་བྱ་སྟེ། དེས་འཇིག་རྟེན་གྱི་ཁམས་རྒྱ་མཚོའི་ཚུལ་དྲི་མ་མེད་པར་ཕྱོགས་ཀུན་ཏུ་སྣང་བ་ཞེས་བྱ་བ་འདི་ཡོངས་སུ་སྦྱངས་སོ། །ཀྱེ་རྒྱལ་བའི་སྲས་དག་འཇིག་རྟེན་གྱི་ཁམས་དཔལ་གྱི་སྒྲ་ཞེས་བྱ་བ་དེར་ལོ་བརྒྱ་ན། དེ་བཞིན་གཤེགས་པ་འབྱུང་ངོ་ཞེས་བྱ་བའི་ཚེ། ནགས་ཚལ་ཆེན་པོ་ཡལ་གའི་དཀྱིལ་འཁོར་རིན་པོ་ཆེའི་མེ་ཏོག་རྒྱས་པ་ཞེས་བྱ་བ། དེ་ཡང་རྒྱན་ཐམས་ཅད་ཀྱིས་བརྒྱན་པར་གྱུར་ཏེ། འདི་ལྟར་རིན་པོ་ཆེའི་འོད་འཕྲོ་བའི་སྤྲིན་བསམ་གྱིས་མི་ཁྱབ་པ་རབ་ཏུ་གཏོང་བའི་སྙིང་པོ་ཅན་དུ་གྱུར་ནས། སངས་རྒྱས་ཀྱི་ཡོན་ཏན་གྱི་དཀྱིལ་འཁོར་གྱི་སྒྲ་ཡང་རབ་ཏུ་འབྱིན། ཕྱོགས་བཅུ་དག་ཀྱང་འོད་ཟེར་གྱི་དྲ་བས་རྣམ་པར་སྣང་བར་བྱེད། གཞལ་མེད་ཁང་དང་ཁང་ཁྱིམ་གྱི་གྲོང་རྡལ་ཐམས་ཅད་ཀྱང་རབ་ཏུ་སྣང་བར་བྱེད། རིན་པོ་ཆེའི་མེ་ཏོག་དང་། འོད་ཀྱི་དཀྱིལ་འཁོར་གྱི་སྤྲིན་ཡང་རབ་ཏུ་འགྱེད། སེམས་ཅན་ཐམས་ཅད་ཀྱི་སྔོན་གྱི་དགེ་བའི་རྩ་བ་ཡངས་པའི་སྒྲ་དང་། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་མཚན་གྱི་འཁོར་ལོ་རབ་ཏུ་མཐོང་བའི་སྒྲ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་དང་། སྤྱོད་པ་དང་འབྱུང་བ་མངོན་པར་བསྒྲུབ་པའི་སྒྲ་དང་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོའི་ངེས་པའི་ཚིག་སྣ་ཚོགས་རབ་ཏུ་བསྒྲག་པའི་སྒྲ་དག་ཀྱང་རབ་ཏུ་འབྱིན་ཏོ། །དེ་དག་ནི་དེ་བཞིན་གཤེགས་པ་སྐྱེ་བའི་ལྟས་ཏེ། རྒྱན་དེ་དག་བྱུང་བ་འཇིག་རྟེན་གྱི་ཁམས་དེར་དེ་བཞིན་གཤེགས་པ་འབྱུང་བར་འཇིག་རྟེན་གྱི་དབང་པོ་རྣམས་ཀྱིས་ཁོང་དུ་ཆུད་དོ། །དེ་བཞིན་གཤེགས་པ་ལས་མཉན་པའི་དགེ་བའི་རྩ་བ་ཡོངས་སུ་སྨིན་པ་དང་། སངས་རྒྱས་བལྟ་བར་མོས་
པ་དང་སྙིང་པོ་བྱང་ཆུབ་ཏུ་མངོན་པར་གཞོལ་བ་དེ་དག་ཐམས་ཅད་ཀྱང་ལྟས་མངོན་དུ་བྱུང་བས་ཡང་དག་པར་བསྐུལ་ཏོ། །བཅོམ་ལྡན་འདས་དེ་བཞིན་གཤེགས་པ་ཡོན་ཏན་ཐམས་ཅད་ཀྱི་རི་བོ་རི་རབ་ཀྱི་དཔལ་ཞེས་བྱ་བ་མཉམ་པ་ཉིད་ཀྱིས་ཆོས་ཀྱི་དབྱིངས་ཀུན་ཏུ་ཁྱབ་པའི་སྐུ་ཅན་སངས་རྒྱས་ཀྱི་ཞིང་ཐམས་ཅད་དུ་ཡོངས་སུ་སྐྱེ་བ་རབ་ཏུ་འཕྲོས་པ། སྐུ་སྙིང་པོ་བྱང་ཆུབ་ཐམས་ཅད་ལ་བཞུགས་པ། གཟུགས་ཀྱི་སྐུ་མཐའ་དང་དབུས་མེད་པར་རྣམ་པར་དག་པ། འཇིག་རྟེན་གྱི་ཁམས་ཐམས་ཅད་དུ་མངོན་པར་འཕགས་ཤིང་ཟིལ་གྱིས་གནོན་པ། མཚན་རིན་པོ་ཆེའི་མེ་ཏོག་ཐམས་ཅད་ཤིན་ཏུ་རྒྱས་པ། སེམས་ཅན་ཐམས་ཅད་ཀྱི་གནས་སུ་གཟུགས་བརྙན་རབ་ཏུ་འབྱུང་བ། འགྲོ་བ་ཐམས་ཅད་ལ་མངོན་དུ་སྟོན་པ། སངས་རྒྱས་ཀྱི་སྤྲུལ་པ་ཁ་དོག་མཐའ་ཡས་པའི་སྤྲིན་གྱིས་དྲ་བ་རབ་ཏུ་འགྱེད་པ། འཇིག་རྟེན་གྱི་ཁམས་འོད་ཀྱི་དཀྱིལ་འཁོར་གྱི་སྤྲིན་གྱིས་ཁྱབ་པར་མཛད་པ། འོད་ཟེར་ཀྱི་དྲ་བ་ཁ་དོག་མཐའ་ཡས་པ་རབ་ཏུ་གཏོང་བ་དེ་པད་མོ་ཆེན་པོ་དེ་ལ་མངོན་པར་བྱུང་བར་གྱུར་ཏོ། །ཇི་ལྟར་སྤོས་ཆུའི་རྒྱ་མཚོ་རྣམ་པར་དག་པའི་འོད་ལ་རབ་ཏུ་གནས་པའི་རི་རབ་མེ་ཏོག་གི་འོད་འཕྲོ་བས་བརྒྱན་པའི་རྒྱལ་མཚན་གསེར་ཤིན་ཏུ་འབར་བའི་རྒྱན་ཅེས་བྱ་བའི་རྩེ་མོ་ལ། ནགས་ཚལ་ཆེན་པོ་ཡལ་གའི་དཀྱིལ་འཁོར་རིན་པོ་ཆེའི་མེ་ཏོག་རྒྱས་པར་སངས་རྒྱས་ཀྱི་གདན་ལ་བཞུགས་པ། དེ་བཞིན་དུ་འཇིག་རྟེན་གྱི་ཁམས་དཔལ་གྱི་སྒྲ་ཀུན་ཏུ་ཡང་རི་རབ་བྱེ་བ་སྟོང་ཕྲག་དྲུག་ཅུ་རྩ་བརྒྱད་ཀྱི་རྩེ་མོ་ལ་བཞུགས་པར་ཀུན་ན་སྣང་ངོ་། །འཇིག་རྟེན་གྱི་ཁམས་རྒྱ་མཚོ་ཀུན་ཏུ་ཚུལ་རྒྱ་ཆེ་བ་ཀུན་གྱི་འཇིག་རྟེན་གྱི་ཁམས་ཀྱི་རྒྱུད་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་འབྱམ་ཀླས་པ་དག་གི་གླིང་བཞི་པ་ཐམས་ཅད་ནའང་སྙིང་པོ་བྱང་ཆུབ་ལ་བཞུགས་པར་སྣང་ངོ་། །དེ་ནས་བཅོམ་ལྡན་འདས་དེ་བཞིན་གཤེགས་པ་ཡོན་ཏན་ཐམས་ཅད་ཀྱི་རི་བོ་རི་རབ་དཔལ་གྱི་སྤྲིན་གྱི་སྨིན་མཚམས་ཀྱི་མཛོད་སྤུ་ནས་འོད་གཟེར་དགེ་བའི་རྩ་བ་ཐམས་ཅད་ཡོངས་སུ་སྐྱེད་པ་ཞེས་བྱ་
བ་འོད་ཟེར་སངས་རྒྱས་ཀྱི་ཞིང་། ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱིས་བསྐོར་བ་རབ་ཏུ་བཀྱེ་སྟེ། འཇིག་རྟེན་གྱི་ཁམས་ཐམས་ཅད་ཁྱབ་པར་མཛད་ནས། འདུལ་བ་ཐམས་ཅད་ཡང་དག་པར་བསྐུལ་ཏོ། །བཅོམ་ལྡན་འདས་དེ་བཞིན་གཤེགས་པ་ཡོན་ཏན་ཐམས་ཅད་ཀྱི་རི་བོ་རི་རབ་དཔལ་གྱི་སྤྲིན་གྱིས་འོད་ཟེར་དེ་དག་བཀྱེ་མ་ཐག་ཏུ། དེའི་མོད་ལ་སེམས་ཅན་ཐམས་ཅད་ཀྱི་ཉོན་མོངས་པ་ཐམས་ཅད་ཀྱང་རབ་ཏུ་ཞི་བར་གྱུར། སྒྲིབ་པའི་དྲ་བ་ཐམས་ཅད་ཀྱང་ཤིན་ཏུ་བསལ། སངས་རྒྱས་བལྟ་བ་ལ་སྒྲིབ་པའི་རི་ཐམས་ཅད་ཀྱང་རྣམ་པར་བཅོམ། སེམས་ཅན་ཐམས་ཅད་ཀྱི་རྙོག་པ་ཡང་རྣམ་པར་དག །དགེ་བ་རྒྱ་མཚོ་ཐམས་ཅད་ཀྱང་རབ་ཏུ་བྱུང་། མོས་པ་ཡངས་པའི་དཀྱིལ་འཁོར་ཡང་ཡོངས་སུ་དག །མི་ཁོམ་པ་དང་། ངན་སོང་དང་། ངན་འགྲོའི་གཡང་ས་དང་། འཇིགས་པ་ཐམས་ཅད་ཀྱང་རྣམ་པར་བསྩལ། ལུས་དང་སེམས་ཀྱི་གནོད་པ་ཐམས་ཅད་ཀྱང་རབ་ཏུ་ཞི། སངས་རྒྱས་མཐོང་བས་དགའ་བའི་ཤུགས་ཀྱང་རྣམ་པར་དག །ཐམས་ཅད་མཁྱེན་པ་ཉིད་ལ་རབ་ཏུ་གཞོལ་བ་ཡང་ཤིན་ཏུ་ཐོབ་པར་གྱུར་ཏེ། དེ་དག་འོད་གཟེར་དེས་ཡང་དག་པར་བསྐུལ་བ་དང་། འཇིག་རྟེན་གྱི་དབང་པོ་ཐམས་ཅད་འཁོར་བརྒྱ་སྟོང་དུ་མ་དག་གིས་བསྐོར་ཅིང་། བཅོམ་ལྡན་འདས་གང་ན་བ་དེར་འདོང་བར་གྱུར་ཏོ། །ཀྱེ་རྒྱལ་བའི་སྲས་དག །དེ་ལ་གྲོང་ཁྱེར་ཆེན་པོ་འོད་འཕྲོ་བའི་འོད་ཅེས་བྱ་བ་དེར་རྒྱལ་པོ་བལྟ་ན་དགའ་བ་ཤིན་ཏུ་གཙང་བའི་བློ་གྲོས་ཤེས་བྱ་བ། གྲོང་ཁྱེར་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་བདག་པོ་བྱུང་སྟེ། དེ་ལ་བུད་མེད་བསོད་ནམས་ཀྱི་དཔལ་ལ་སྩོགས་པ་སྟོང་ཕྲག་སུམ་ཅུ་རྩ་བདུན་ཡོད་དོ། །དེ་ལ་བུ་གཟི་བརྗིད་ཆེན་པོ་ལ་སྩོགས་པ་ལྔ་བརྒྱ་ཡོད་དོ། །རྒྱལ་པོའི་བུ་གཟི་བརྗིད་ཆེན་པོ་ལ་ཡང་བུད་མེད་བལྟ་ན་བཟང་བ་ལ་སྩོགས་པ་སྟོང་ཕྲག་བཅུ་ཡོད་དོ། །དེ་ནས་རྒྱལ་པོ་གཞོན་ནུ་གཟི་བརྗིད་ཆེན་པོས་སངས་རྒྱས་ཀྱི་རྣམ་པར་འཕྲུལ་པ་མཐོང་ནས་སྔོན་གྱི་དགེ་བའི་རྒྱུས་ཆོས་བཅུ་ཁོང་དུ་ཆུད་པར་གྱུར་ཏོ། །བཅུ་གང་ཞེ་ན། འདི་ལྟ་སྟེ།
སངས་རྒྱས་ཐམས་ཅད་ཀྱི་ཡོན་ཏན་གྱི་དཀྱིལ་འཁོར་ཅེས་བྱ་བའི་ཏིང་ངེ་འཛིན་ཁོང་དུ་ཆུད་དོ། །འདི་ལྟ་སྟེ་སངས་རྒྱས་ཀྱི་ཆོས་ཀྱི་དབྱིངས་ལ་སྒོ་ཀུན་ནས་རབ་ཏུ་འཇུག་པ་ཞེས་བྱ་བའི་ཏིང་ངེ་འཛིན་ཁོང་དུ་ཆུད་དོ། །འདི་ལྟ་སྟེ་ཚུལ་ཡངས་པའི་སྤྲིན་གྱི་སྙིང་པོ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་ཁོང་དུ་ཆུད་དོ། །འདི་ལྟ་སྟེ། འགྲོ་བ་ཐམས་ཅད་འདུལ་བའི་རྒྱན་ཆེན་པོ་ཞེས་བྱ་བའི་བྱམས་པ་ཆེན་པོ་ཁོང་དུ་ཆུད་དོ། །འདི་ལྟ་སྟེ་སྒྲ་ཡི་སྤྲིན་གྱིས་ཀུན་ཏུ་རྒྱས་པར་བྱེད་པ་ཞེས་བྱ་བའི་སྙིང་རྗེ་ཆེན་པོ་ཁོང་དུ་ཆུད་དོ། །འདི་ལྟ་སྟེ་ཡོན་ཏན་མཐའ་དང་དབུས་མེད་པས་ཡང་དག་པར་འཕགས་པ་ཞེས་བྱ་བ་དགའ་བ་ཆེན་པོ་ཁོང་དུ་ཆུད་དོ། །འདི་ལྟ་སྟེ་ཆོས་ཐམས་ཅད་ཇི་ལྟ་བ་བཞིན་དུ་རྟོགས་པ་ཞེས་བྱ་བའི་བཏང་སྙོམས་ཆེན་པོ་ཁོང་དུ་ཆུད་དོ། །འདི་ལྟ་སྟེ་ཚུལ་གྱི་གཞི་རྒྱ་ཆེན་པོ་རྒྱ་མཚོའི་སྙིང་པོ་ཞེས་བྱ་བའི་མངོན་པར་ཤེས་པ་ཆེན་པོ་ཁོང་དུ་ཆུད་དོ། །འདི་ལྟ་སྟེ་མོས་པ་རྒྱ་མཚོའི་སྟོབས་དང་ཤུགས་རྣམ་པར་འཕེལ་བར་བྱེད་པ་ཞེས་བྱ་བའི་སྨོན་ལམ་གྱི་ཚུལ་གྱི་སྒོ་ཆེན་པོ་ཁོང་དུ་ཆུད་དོ། །འདི་ལྟ་སྟེ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་འོད་ལ་ཡང་དག་པར་གཞོལ་བའི་ཤུགས་ཞེས་བྱ་བ་ཐ་དད་པ་ཡང་དག་པར་ཤེས་པའི་ཡེ་ཤེས་ཆེན་པོའི་སྒོ་ཁོང་དུ་ཆུད་དོ། །དེ་ནས་རྒྱལ་པོ་གཞོན་ནུ་གཟི་བརྗིད་ཆེན་པོ་ཞེས་བྱ་བ་དེ་ཆོས་ཀྱི་སྣང་བ་ཆེན་པོ་ཐོབ་ནས། སངས་རྒྱས་ཀྱི་བྱིན་གྱི་རླབས་ཀྱིས་འཁོར་གྱི་ཚོགས་ཐམས་ཅད་ལ་ཚིགས་སུ་བཅད་དེ་སྨྲས་པ། ཉི་མ་མང་པོ་སྟོང་གི་རྣམས། །མཁའ་ལ་མངོན་པར་འཕགས་པ་བཞིན། །སྙིང་པོ་བྱང་ཆུབ་དྲི་མེད་ལ། །སངས་རྒྱས་འོད་ནི་ཤིན་ཏུ་སྣང་། །བསྐལ་པ་བྱེ་བ་སྟོང་དག་གི །མགོན་པོ་འཇིག་རྟེན་བྱུང་བ་ནི། །སངས་རྒྱས་ཡང་དག་སྐྱེས་པ་རྣམས། །རྒྱལ་བ་ཀུན་ན་རབ་ཏུ་སྣང་། །ལྟོས་ཤིག་སངས་རྒྱས་འོད་ཟེར་ལ། །སངས་རྒྱས་སྤྲིན་ནི་བསམ་མི་ཁྱབ། །གནས་རྣམས་ཀུན་ན་ཀུན་ཀྱང་སྣང་། །དེ་བཞིན་གཤེགས་པ་མཉམ་པར་གཞག །འོད་འཕྲོ་སྤྲིན་རྣམས་རབ་
བཀྱེ་བ། །འོད་ཟེར་སྤྲིན་ལ་ཟད་མི་ཤེས། །འཇིག་རྟེན་འདི་དག་སྣང་བར་བྱེད། །སངས་རྒྱས་རྣམ་པར་འཕྲུལ་ལ་ལྟོས། །སངས་རྒྱས་རྣམས་ཀྱི་སྐུ་དག་ལས། །འོད་གཟེར་རྣམས་ནི་དྲི་མེད་པ། །སེམས་ཅན་ཀུན་དང་མཉམ་པའི་ལུས། །ཕྱོགས་དང་ཕྱོགས་མཚམས་རྒྱས་འགེངས་ལྟོས། །སངས་རྒྱས་གསུང་ནི་ཡིད་འོང་བ། །འགྲོ་བ་ཀུན་ཏུ་རབ་ཏུ་བསྒྲགས། །འགྲོ་ཀུན་དབྱངས་ཀྱི་ཡན་ལག་ཏུ། །སངས་རྒྱས་ཡོན་ཏན་རྣམ་པར་བརྗོད། །སངས་རྒྱས་འོད་ཀྱིས་ཕོག་པ་ཡི། །སེམས་ཅན་ཀུན་ཀྱང་བདེ་བར་གྱུར། །སྡུག་བསྔལ་ཐམས་ཅད་རབ་ཏུ་ཞི། །འགྲོ་བ་ཀུན་ཀྱང་དགའ་བ་སྐྱེས། །བྱང་ཆུབ་སེམས་དཔའི་སྤྲིན་གྱི་རྣམས། །རིན་ཆེན་སྤྲིན་རྣམས་རབ་འགྱེད་ཅིང་། །བསྟོད་པའི་སྤྲིན་གྱིས་རྒྱལ་བའི་དྲུང་། །ཕྱོགས་བཅུ་ཀུན་ནས་མངོན་པར་འོང་། །སྙིང་པོ་བྱང་ཆུབ་འདི་ལ་ཡང་། །སྒྲ་ཡི་རྒྱ་མཚོ་ཟབ་མོ་གྲག །སེམས་ཅན་ཐམས་ཅད་སྡུག་བསྔལ་ཞི། །སངས་རྒྱས་རྣམ་པར་འཕྲུལ་ལ་ལྟོས། །ཀུན་ཀྱང་སྲི་ཞུ་ལྡན་གྱུར་ཏེ། །དགའ་ཤིང་ཤིན་ཏུ་མོས་བྱས་ཤིང་། །ཆོས་ཀྱི་རྒྱལ་པོ་བལྟ་བའི་ཕྱིར། ། འཇིག་རྟེན་མགོན་པོའི་དྲུང་དུ་འདོང་། །ཀྱེ་རྒྱལ་བའི་སྲས་དག་རྒྱལ་བུ་གཞོན་ནུ་གཟི་བརྗིད་ཆེན་པོས་ཚིགས་སུ་བཅད་པ་འདི་བརྗོད་པའི་ཚེ། སངས་རྒྱས་ཀྱི་བྱིན་གྱི་རླབས་ཀྱིས་འཇིག་རྟེན་གྱི་ཁམས་དཔལ་གྱི་སྒྲ་ཐམས་ཅད་ཀྱི་སེམས་ཅན་གྱི་གནས་ཀུན་ཏུ་ཤིན་ཏུ་གྲག་པར་གྱུར་ཏོ། །དེ་ནས་རྒྱལ་པོ་བལྟ་ན་དགའ་བ་ཤིན་ཏུ་གཙང་བའི་བློ་གྲོས་ཀྱིས་ཚིགས་སུ་བཅད་པ་འདི་དག་ཐོས་ནས་དགའ་བ་ཆེན་པོ་སྐྱེས་ཏེ། རང་གི་འཁོར་དེ་དག་ལ་ཚིགས་སུ་བཅད་དེ་སྨྲས་པ། ཞང་བློན་རྣམས་དང་གཞོན་ནུ་དང་། །རྒྱལ་པོའི་མི་དང་བློན་པོ་དང་། །ཚོང་པ་རྣམས་དང་དེ་བཞིན་དུ། །ཡུལ་མི་རྣམས་ཀྱང་ཀུན་འདུས་ཤིག །གྲོང་ཁྱེར་རྣམས་ནི་ཀུན་ཏུ་ཡང་། །རྔ་སྒྲ་དག་གིས་མྱུར་དུ་སྒྲོགས། །ཀུན་ཀྱང་འཐུན་པར་ལྷན་ཅིག་ཏུ། །རྒྱལ་བ་བལྟ་བའི་ཕྱིར་དེངས་
ཤིག །སྲང་རྣམས་ཐམས་ཅད་ཀུན་ཏུ་ཡང་། །དགེ་བའི་དྲིལ་གྱི་སྒྲ་སྒྲོགས་ཤིག །བུ་དང་ཆུང་མ་འཁོར་བཅས་པ། །རྒྱལ་བ་བལྟ་བའི་ཕྱིར་ཡང་འདོང་། །གྲོང་ཁྱེར་རྣམས་ཀྱང་བརྒྱན་པར་གྱིས། །རྒྱན་རྣམས་ཀུན་ཏུ་བླ་རེ་བྲེས། །རྒྱལ་མཚན་དམ་པ་བཟང་པོའི་རྣམས། །ནོར་བུ་སྣ་ཚོགས་བརྒྱན་པར་སྒྲེང་། །རིན་ཆེན་དྲ་བའི་བླ་རེ་རྣམས། །ནམ་མཁའི་དཀྱིལ་དུ་བྲེ་བར་གྱིས། །ནམ་མཁའ་འདི་ལས་ཐམས་ཅད་དུ། །སིལ་སྙན་སྤྲིན་གྱི་སྒྲ་དག་ཕྱུང་། །ལམ་གྱི་སྲང་ཡང་བརྒྱན་པར་གྱིས། །རིན་ཆེན་ཆར་ཡང་ཀུན་ཏུ་ཕོབ། །བཞོན་པ་རིན་ཆེན་བསྟད་པར་གྱིས། །རྒྱལ་བ་བལྟ་བའི་ཕྱིར་འདོང་ངོ་། །རང་རང་སོ་སོའི་འཁོར་རྣམས་ཀྱིས། །སྣ་ཚོགས་སྤྲིན་གྱི་ཆར་ཕོབ་ཤིག །རྒྱན་གྱི་སྤྲིན་རྣམས་ཐམས་ཅད་ཀྱིས། །ནམ་མཁའི་དབྱིངས་ཀྱང་དགབ་པར་གྱིས། །སྤོས་དང་པད་མོ་འོད་ཀྱི་སྤྲིན། །མེ་ཏོག་གདུགས་རྣམས་བསམ་ཡས་དང་། །སེ་མོ་དོ་དང་ཕྲེང་སྤྲིན་དང་། །གོས་ཀྱི་སྤྲིན་གྱི་ཆར་ཕོབ་ཤིག །རི་རབ་རྣམས་དང་སྤོས་ཀྱི་རི། །ནོར་བུའི་འཁོར་ལོས་བརྒྱན་པར་གྱིས། ། དྲི་མེད་ཙན་དན་ཕྱེ་མ་རྣམས། །ནམ་མཁའི་དཀྱིལ་ལ་རབ་ཏུ་སྟོན། །ནོར་བུའི་ཕྲེང་བ་མེ་ཏོག་ཕྲེང་། །རིན་ཆེན་ཕྲེང་བ་དྲི་མེད་དང་། །རིན་ཆེན་སྒྲོན་གྱི་ཕྲེང་བ་རྣམས། །ནམ་མཁའི་དབྱིངས་ལ་བསྒྲུབ་པར་གྱིས། །ཐམས་ཅད་སངས་རྒྱས་མངོན་གྱིས་ལ། །དགའ་ཞིང་སྤྲོ་བའི་སེམས་བསྐྱེད་དེ། །བུ་དང་འཁོར་དུ་བཅས་པའི་རྣམས། །རྒྱལ་བ་བལྟ་ཕྱིར་ཀུན་འདོང་ངོ་། །དེ་ནས་རྒྱལ་པོ་བལྟ་ན་དགའ་བ་ཤིན་ཏུ་གཙང་བའི་བདག་པོ་བསོད་ནམས་དཔལ་ལ་སྩོགས་པ་བུད་མེད་སྟོང་ཕྲག་སུམ་ཅུ་རྩ་བདུན་དང་། གཟི་བརྗིད་ཆེན་པོ་ལ་སོགས་པ་གཞོན་ནུ་ལྔ་བརྒྱ་དང་། བློ་གྲོས་ཀྱི་སྟོབས་ལས་སྩོགས་པ་བློན་པོ་སྟོང་ཕྲག་དྲུག་ཅུ་དང་། དེ་དག་ལ་སྩོགས་པ་འཁོར་བྱེ་བ་ཁྲག་ཁྲིག་བརྒྱ་སྟོང་ཕྲག་བདུན་ཅུ་རྩ་བདུན་གྱིས་བསྐོར་ཅིང་མདུན་ཏུ་བདར་ཏེ་གྲོང་ཁྱེར་ཆེན་པོ་འོད་འཕྲོ་སྣང་བ་ནས་བྱུང་ནས་སྡེའི་འཁོར་དང་བཅས་པ་ནམ་མཁའི་དབྱིངས་
སུ་མངོན་པར་འཕགས་ཏེ། རྒྱལ་པོའི་རྫུ་འཕྲུལ་ཆེན་པོ་དང་། རྒྱལ་པོའི་མཐུ་ཆེན་པོས། ནམ་མཁའ་ཐམས་ཅད་རྒྱན་གྱི་སྤྲིན་ཐམས་ཅད་ཀྱིས་རྣམ་པར་བརྒྱན་ཏེ། བཅོམ་ལྡན་འདས་གང་ན་བ་དེར་དོང་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །ལྷའི་གྲོང་ཁྱེར་ཤིང་གི་མེ་ཏོག་སྣ་ཚོགས་ཤེས་བྱ་བ་ནས་ཀྱང་ལྷའི་དབང་པོ་རབ་མཚེ་མའི་རྒྱལ་མཚན་ཞེས་བྱ་བ་ལྷ་བྱེ་བ་ཁྲག་ཁྲིག་བརྒྱ་སྟོང་དང་ལྷན་ཅིག་ཏུ་བཅོམ་ལྡན་འདས་གང་ན་བ་དེར་དོང་སྟེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །ཀླུའི་གྲོང་ཁྱེར་ཀུན་ཏུ་རྫོགས་པ་ནས་ཀྱང་ཀླུའི་རྒྱལ་པོ་བཅུ་དྲི་མ་མྱེད་པའི་འོད་ཅེས་བྱ་བ་ཀླུ་བྱེ་བ་ཉི་ཤུ་རྩ་ལྔ་དང་ལྷན་ཅིག་གནོད་སྦྱིན་གྱི་གྲོང་ཁྱེར་རྡོ་རྗེའི་དཔལ་རྒྱལ་མཚན་ཞེས་བྱ་བ་ནས་ཀྱང་གནོད་སྦྱིན་གྱི་བདག་པོ་དཔའ་བས་རྒྱལ་བ་ཞེས་བྱ་བ་གནོད་སྦྱིན་བྱེ་བ་བདུན་ཅུ་རྩ་བདུན་དང་ལྷན་ཅིག །དྲི་ཟའི་གྲོང་ཁྱེར་གཞལ་མེད་ཁང་བཟང་པོ་ནས་ཀྱང་དྲི་ཟའི་རྒྱལ་པོ་བལྟ་ན་དགའ་བ་ཞེས་བྱ་བ་དྲི་ཟ་བྱེ་བ་དགུ་བཅུ་རྩ་བདུན་དང་ལྷན་ཅིག །ལྷ་མ་ཡིན་གྱི་གྲོང་ཁྱེར་འཁོར་ལོའི་ཚོན་ནས་ཀྱང་ལྷ་མ་ཡིན་གྱི་དབང་པོ་གཟུགས་རྣམ་པར་དག་པ་ལས་སེམས་པ་ཞེས་བྱ་བ་ལྷ་མ་ཡིན་བྱེ་བ་སྟོང་ཕྲག་ལྔ་བརྒྱའི་འཁོར་གྱིས་བསྐོར་བ་དང་ལྷན་ཅིག་ནམ་མཁའ་ལྡིང་གི་གྲོང་ཁྱེར་རིན་པོ་ཆེ་སྣ་ཚོགས་བཟང་པོའི་ལྟེ་བ་ནས་ཀྱང་ནམ་མཁའ་ལྡིང་གི་དབང་པོ་སྟོབས་བཅུ་སྤྱོད་པ་ཞེས་བྱ་བ་ནམ་མཁའ་ལྡིང་གི་འཁོར་དགུ་བཅུ་རྩ་དགུ་དང་ལྷན་ཅིག་མིའམ་ཅིའི་གྲོང་ཁྱེར་རྩེ་བའི་དགའ་བ་དང་ལྡན་པ་ནས་ཀྱང་མིའམ་ཅིའི་དབང་པོ་རྡོ་རྗེ་དཔལ་ཞེས་བྱ་བ་མིའམ་ཅི་བྱེ་བ་ཕྲག་བཅོ་བརྒྱད་དང་ལྷན་ཅིག །ལྟོ་འཕྱེ་ཆེན་པོའི་གྲོང་ཁྱེར་རིན་པོ་ཆེ་རྡོ་རྗེ་སྲ་བའི་རྒྱལ་མཚན་ནས་ཀྱང་ལྟོ་འཕྱེ་ཆེན་པོའི་དབང་པོ་རིན་པོ་ཆེ་གྲགས་པའི་རྒྱལ་མཚན་ཞེས་བྱ་བ་ལྟོ་འཕྱེ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་གསུམ་དང་ལྷན་ཅིག །ཚངས་པའི་གྲོང་ཁྱེར་རྒྱན་བཟང་པོ་སྣ་ཚོགས་ནས་ཀྱང་ཚངས་པའི་དབང་པོ་གཞན་གྱིས་ཕམ་པ་མེད་པ་ཞེས་བྱ་བ་ཚངས་པ་བྱེ་བ་ཕྲག་བཅྭོ་བརྒྱད་ཀྱི་འཁོར་གྱིས་བསྐོར་ཅིང་མདུན་དུ་བྱས་ཏེ། བཅོམ་ལྡན་འདས་ཡོན་ཏན་ཐམས་ཅད་ཀྱི་རི་བོ་རི་རབ་
གྱི་དཔལ་དེ་བཞིན་གཤེགས་པ་གང་ན་བ་དེར་དོང་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་དག་ལ་སྩོགས་པ་གྲོང་ཁྱེར་བྱེ་བ་ཁྲག་ཁྲིག་བརྒྱ་སྟོང་གྲོང་ཁྱེར་གྱི་འཁོར་དང་བཅས་པ་དག་ནས་སེམས་ཅན་གྱི་རིས་ཐ་དད་པ་ན་གནས་པའི་རྒྱལ་པོ་མང་པོ་འཁོར་དང་བཅས་ཏེ། བཅོམ་ལྡན་འདས་གང་ན་བ་དེར་དོང་སྟེ། བཅོམ་ལྡན་འདས་ལ་ཕྱག་འཚལ་ནས། ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཡོན་ཏན་ཐམས་ཅད་ཀྱི་རི་བོ་རི་རབ་ཀྱི་དཔལ་གྱིས་སེམས་ཅན་དེ་དག་འདུལ་བའི་དབང་ཉེ་བར་བཟུང་སྟེ། འཁོར་གྱི་དཀྱིལ་འཁོར་གྱི་རྒྱ་མཚོ་དེར་དུས་གསུམ་གྱི་སངས་རྒྱས་ཐམས་ཅད་ཡང་དག་པར་འབྱུང་བའི་ཆོས་རྣམ་པར་འཕྲུལ་པ་ཞེས་བྱ་བ་མདོའི་འཁོར་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་བཅས་པ་བསམ་པ་ཅི་ལྟ་བ་བཞིན་དུ་སེམས་ཅན་རྣམས་ལ་ཡོངས་སུ་བསྟན་ཏོ། །དེ་ནས་བྱང་ཆུབ་སེམས་དཔའ་གཟི་བརྗིད་ཆེན་པོས་ཆོས་ཀྱི་གཞུང་འདི་བསྟན་པ་ཐོས་ནས། བཅོམ་ལྡན་འདས་དེ་བཞིན་གཤེགས་པ་ཡོན་ཏན་ཐམས་ཅད་ཀྱི་རི་བོ་རི་རབ་ཀྱི་དཔལ་གྱིས་སྔོན་ཡང་དག་པར་བསྒྲུབས་པའི་ཆོས་རྒྱ་མཚོ་ལ་ཆོས་ཀྱི་སྣང་བ་རབ་ཏུ་ཐོབ་བོ། །འདི་ལྟ་སྟེ་ཆོས་ཐམས་ཅད་ཀྱི་དཀྱིལ་འཁོར་མཉམ་པ་ཉིད་ཀྱི་ཏིང་ངེ་འཛིན་གྱི་སྒོ་ལ་ཡེ་ཤེས་ཀྱི་སྣང་བ་རབ་ཏུ་ཐོབ་པོ། །འདི་ལྟ་སྟེ། ཐོག་མ་ཆོས་ཐམས་ཅད་ལ་ཡང་དག་པར་གཞོལ་བའི་བྱང་ཆུབ་ཀྱི་སེམས་ལ་གནས་པའི་ཡེ་ཤེས་ཀྱི་སྣང་བ་རབ་ཏུ་ཐོབ་པོ། །འདི་ལྟ་སྟེ་ཆོས་ཀྱི་དབྱིངས་ཀྱི་ཕྱོགས་རྣམ་པར་སྣང་བའི་སྙིང་པོའི་མིག་རྣམ་པར་དག་པ་ལ་ཡེ་ཤེས་ཀྱི་སྣང་བ་རབ་ཏུ་ཐོབ་པོ། །འདི་ལྟ་སྟེ་སངས་རྒྱས་ཀྱི་ཆོས་ཐམས་ཅད་ཀྱི་ཡེ་ཤེས་ཀྱི་རྒྱ་མཚོ་རབ་ཏུ་སྣང་ཞིང་རྣམ་པར་དབྱེ་བའི་སྨོན་ལམ་རྒྱ་མཚོ་ལ་ཡེ་ཤེས་ཀྱི་སྣང་བ་རབ་ཏུ་ཐོབ་པོ། །འདི་ལྟ་སྟེ་ཡོན་ཏན་ཆེན་པོ་རྒྱ་མཚོ་མཐའ་དང་དབུས་མེད་པ་རྣམ་པར་དག་པ་ལ་རབ་ཏུ་འཇུག་པའི་སྤྱོད་པའི་དཀྱིལ་འཁོར་ལ་ཡེ་ཤེས་ཀྱི་སྣང་བ་རབ་ཏུ་ཐོབ་པོ། །འདི་ལྟ་སྟེ་སྒོ་ཡངས་པ་ནས་སྣང་བ་
ཟབ་མོ་ཡང་དག་པར་འབྱུང་བ་རྒྱ་མཚོ་ལ་ཡེ་ཤེས་ཀྱི་སྣང་བ་རབ་ཏུ་ཐོབ་པོ། །འདི་ལྟ་སྟེ་ཕྱིར་མི་ལྡོག་པའི་སྟོབས་ཆེན་པོའི་ཤུགས་ཀྱི་སྙིང་པོ་དང་མཐུ་ཆེན་པོའི་རྒྱ་མཚོ་ལ་ཡེ་ཤེས་ཀྱི་སྣང་བ་རབ་ཏུ་ཐོབ་པོ། །འདི་ལྟ་སྟེ་ཆོས་ཀྱི་དབྱིངས་མཐའ་དང་དབུས་མེད་པར་སྤྲུལ་པས་བརྒྱན་ཅིང་འབྱུང་བའི་དཀྱིལ་འཁོར་ལ་ཡེ་ཤེས་ཀྱི་སྣང་བ་རབ་ཏུ་ཐོབ་པོ། །འདི་ལྟ་སྟེ་ཡོན་ཏན་གྱི་དཀྱིལ་འཁོར་རྒྱ་མཚོ་ཚད་མེད་པ་རབ་ཏུ་འཇུག་པ་ལ་མངོན་པར་བསྒྲུབ་པ་རྒྱ་མཚོའི་ཡེ་ཤེས་ཀྱི་སྣང་བ་རབ་ཏུ་ཐོབ་བོ། །འདི་ལྟ་སྟེ་སངས་རྒྱས་ཐམས་ཅད་རྣམ་པར་དམྱིགས་ཤིང་མོས་པ་རྒྱ་མཚོ་སྤྲིན་གྱིས་རྒྱན་ཡང་དག་པར་བསྒྲུབ་པ་རྒྱ་མཚོ་ལ་ཡེ་ཤེས་ཀྱི་སྣང་བ་རབ་ཏུ་ཐོབ་བོ། །འདི་ལྟ་སྟེ་ཆོས་ཀྱི་དབྱིངས་མཐའ་དང་དབུས་མེད་པ་དང་། མཉམ་པར་དེ་བཞིན་གཤེགས་པ་རྣམ་པར་དམྱིགས་པར་བྱ་བ་དང་། འགྲོ་བ་ཐམས་ཅད་མངོན་དུ་བསྟན་པ་དང་སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་ལ་ཡེ་ཤེས་ཀྱི་སྣང་བ་རབ་ཏུ་ཐོབ་པོ། །འདི་ལྟ་སྟེ་སངས་རྒྱས་ཀྱི་ཆོས་སྟོབས་དང་། མི་འཇིག་པ་ཐམས་ཅད་ལ་ཡེ་ཤེས་ཀྱི་སྣང་བ་རབ་ཏུ་ཐོབ་པོ། །དེ་ནས་བྱང་ཆུབ་སེམས་དཔའ་གཟི་བརྗིད་ཆེན་པོས་དེ་བཞིན་གཤེགས་པ་ཡོན་ཏན་ཐམས་ཅད་ཀྱི་རི་བོ་རི་རབ་ཀྱི་དཔལ་གྱི་སྔོན་གྱི་སྦྱོར་བ་རྒྱ་མཚོ་ལ་ཡེ་ཤེས་ཀྱི་སྣང་བ་རབ་ཏུ་ཐོབ་ནས། སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་ཆོས་ཉིད་འདི་ཐོས་ནས། །བདག་གི་ཡེ་ཤེས་སྣང་བ་སྐྱེས། །དེས་ནི་སངས་རྒྱས་སྔོན་སྤྱོད་པ། །རྒྱ་མཚོ་རྣམས་ཀྱང་རབ་ཏུ་མཐོང་། །སྐུ་ཚེ་ཀུན་ཏུ་ཇི་ལྟ་བུར། །ཕུན་སུམ་ཚོགས་གྱུར་ཀུན་ཀྱང་མཐོང་། །མཚན་གྱི་རྣམ་པ་རྣམས་དམིགས་དང་། །གང་གི་སངས་རྒྱས་མཆོད་པའང་ཤེས། །སྔོན་ཆད་སངས་རྒྱས་དྲུང་དག་ཏུ། །བསྐལ་པ་རྒྱ་མཚོར་སྤྱོད་སྤྱད་དེ། །སངས་རྒྱས་རྒྱ་མཚོ་མང་མཆོད་ནས། །ཞིང་གི་རྒྱ་མཚོ་ཡོངས་སུ་སྦྱངས། །སྐུ་ཡི་རྒྱ་མཚོ་མང་པོ་དག །རྒྱ་ཆེན་ཡོངས་སུ་ཀུན་བཏང་ཞིང་། ། སྤྱོད་པའི་དམ་པ་རབ་སྤྱད་དེ། །རྒྱ་
མཚོའི་ཞིང་ཡང་ཤིན་ཏུ་སྦྱངས། །སྙན་དང་ཤངས་མང་རྒྱ་མཚོ་དང་། །ཕྱག་ཞབས་དབུ་ཡང་དེ་བཞིན་ཏེ། །རྒྱལ་སྲིད་བཙུན་མོའི་འཁོར་བཏང་ཞིང་། །ཞིང་གི་རྒྱ་མཚོ་ཡོངས་སུ་སྦྱངས། །ཞིང་རྣམས་སོ་སོ་རེ་རེ་ལ། །བསྐལ་པ་བྱེ་བ་བསམ་ཡས་སུ། །བྱང་ཆུབ་སྤྱོད་པ་རབ་སྤྱོད་དེ། །ཞིང་གི་རྒྱ་མཚོ་རབ་ཏུ་སྦྱངས། །ཀུན་ཏུ་བཟང་པོའི་སྨོན་ལམ་གྱིས། །སྤྱོད་པ་རྒྱ་མཚོ་ཀུན་སྤྱད་ནས། །སངས་རྒྱས་རྒྱ་མཚོ་ཀུན་དྲུང་དུ། །ཞིང་གི་རྒྱ་མཚོ་རབ་ཏུ་སྦྱངས། །ཇི་ལྟར་ཉི་མའི་འོད་སྣང་བས། །ཉི་མའི་དཀྱིལ་འཁོར་མཐོང་བ་བཞིན། །སངས་རྒྱས་ཡེ་ཤེས་འོད་སྣང་བས། །སྔོན་གྱི་སྤྱོད་པ་རྣམས་ཀྱང་མཐོང་། །བྱང་ཆུབ་འཚང་རྒྱ་ཞི་བ་ཡིན། །ཆོས་ཀྱི་དབྱིངས་ནི་ཀུན་གང་བའི། །ཞིང་གི་རྒྱ་མཚོ་དག་པའི་རྣམས། །དྲི་མེད་འོད་ཅན་ཀུན་ཀྱང་མཐོང་། །སངས་རྒྱས་ཀུན་གྱི་བྱིན་རླབས་ཀྱིས། །བྱང་ཆུབ་སྤྱད་པ་སྤྱོད་པའི་ཚེ། །ཞིང་གི་རྒྱ་མཚོ་ཡངས་པའི་རྣམས། །དེ་ལྟར་བདག་གིས་སྦྱང་བར་བྱ། །ཀྱེ་རྒྱལ་བའི་སྲས་དག་དེའི་ཚེ་བྱང་ཆུབ་སེམས་དཔའ་གཟི་བརྗིད་ཆེན་པོས། བཅོམ་ལྡན་འདས་དེ་བཞིན་གཤེགས་པ་ཡོན་ཏན་ཐམས་ཅད་ཀྱི་རི་བོ་རི་རབ་དཔལ་གྱི་སྤྲིན་དེ་མཐོང་བ་དང་། བསྙེན་བཀུར་བ་དང་། མཆོད་པས་དེ་བཞིན་གཤེགས་པ་ལས་མངོན་པར་ཁོང་དུ་ཆུད་དེ། འཇིག་རྟེན་ཐམས་ཅད་ནི་སྣང་བར་བྱེད། སྔོན་གྱི་སྦྱོར་བ་རྒྱ་མཚོ་ནི་རབ་ཏུ་བརྗོད། བྱང་ཆུབ་སེམས་དཔའི་སྤྱོད་པ་རྒྱ་མཚོའི་ཚུལ་ནི་རབ་ཏུ་སྒྲོག །སངས་རྒྱས་ཐམས་ཅད་ཀྱི་ཡོན་ཏན་རྒྱ་མཚོའི་ཚུལ་ནི་ཤིན་ཏུ་བརྗོད། ཆོས་ཀྱི་དབྱིངས་ཐམས་ཅད་ལ་ཡང་དག་པར་གཞོལ་བའི་ཡེ་ཤེས་ཀྱི་སྒོ་ཡོངས་སུ་སྦྱང་བ་ནི་ཤིན་ཏུ་སྟོན། སྙིང་པོ་བྱང་ཆུབ་ཐམས་ཅད་ལ་མངོན་པར་འཚང་རྒྱ་བའི་རྣམ་པར་འཕྲུལ་པ་ནི་རབ་ཏུ་བརྗོད། སངས་རྒྱས་ཀྱི་སྟོབས་དང་མི་བསྙེངས་པ་དང་། ཡེ་ཤེས་ཐ་མི་དད་པ་ནི་ཤིན་ཏུ་
བརྗོད། དེ་བཞིན་གཤེགས་པའི་སྐུ་སྒོ་ཀུན་ནས་རྣམ་པར་དམིགས་ཤིང་མཐོང་བ་ནི་རབ་ཏུ་བརྗོད། སངས་རྒྱས་ཀྱི་ཞིང་རྣམ་པར་འཕྲུལ་པ་བསམ་གྱིས་མི་ཁྱབ་པ་ཤིན་ཏུ་སྟོན། སངས་རྒྱས་ཀྱི་རྣམ་པར་སྤྱོད་པ་མཐའ་དང་དབུས་མེད་པའི་རྒྱན་ནི་རབ་ཏུ་སྟོན་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ནི་མངོན་པར་བསྒྲུབ་པ་བྱེད་ཅིང་། སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་བྱང་ཆུབ་ཏུ་སེམས་བསྐྱེད་དེ། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་རྣམ་པར་དག་པའང་ཡོངས་སུ་འཛིན་དུ་བཙུད་དོ། །དེ་ནས་དེ་བཞིན་གཤེགས་པ་ཡོན་ཏན་ཐམས་ཅད་ཀྱི་རི་བོ་རི་རབ་དཔལ་གྱི་སྤྲིན་གྱིས། བྱང་ཆུབ་སེམས་དཔའ་གཟི་བརྗིད་ཆེན་པོ་ལ་ཚིགས་སུ་བཅད་དེ་གསུངས་པ། སེམས་ཅན་ཀུན་ལ་ཕན་པའི་ཕྱིར། །བྱང་ཆུབ་དོན་དུ་ཁྱོད་ཞུགས་པ། །གཟི་བརྗིད་ཆེན་པོ་ལེགས་སོ་ལེགས། །བསོད་ནམས་སྙིང་པོ་གྲགས་པ་ཆེ། །སྣང་བ་ཁྱོད་ཀྱིས་རབ་ཏུ་ནོན། །ཆོས་ཀྱི་དབྱིངས་ནི་ཁྱབ་བྱས་ཤིང་། །བསོད་ནམས་ཆེན་པོའི་སྤྲིན་ལྡན་པའི། །སངས་རྒྱས་ཡེ་ཤེས་མཆོད་པར་གྱུར། །བསྐལ་པ་ཞིང་གི་རྡུལ་སྙེད་དུ། །ཞིང་གཅིག་ན་ཡང་སྤྱོད་སྤྱད་ཅིང་། །ང་ཡི་ཡེ་ཤེས་ཇི་ལྟ་བུར། །ཁྱོད་ཀྱིས་མཐོང་བ་དེ་ལྟར་འགྱུར། །ཚུལ་འདི་ཀུན་ནས་ཤེས་པར་ནི། །བརྩོན་འགྲུས་ཆུང་ངུས་མི་ནུས་ཏེ། །བརྩོན་འགྲུས་སྟོབས་ཆེན་ལྡན་པའི་རྣམས། །རྒྱ་མཚོའི་ཞིང་རྣམས་དག་པར་བྱེད། །ཐམས་ཅད་རྡུལ་ལ་འཇུག་ཚུལ་དུ། །བསྐལ་པ་རྒྱ་མཚོར་སུ་སྤྱོད་པ། །རྒྱ་མཚོའི་ཞིང་གི་རྒྱན་གྱི་རྣམས། །དེ་ལ་འདི་འདྲར་རབ་ཏུ་འགྱུར། །སེམས་ཅན་རྣམས་ནི་རེ་རེའི་ཕྱིར། །བསྐལ་པ་རྒྱ་མཚོར་སྤྱོད་སྤྱད་ཅིང་། ། འཁོར་ཀྱང་སྐྱོ་བ་མེད་པའི་རྣམས། །དེ་དག་འཇིག་རྟེན་མགོན་པོར་འགྱུར། །བསྐལ་པ་ཕྱི་མའི་མཐར་ཐུག་པ། །རྒྱལ་བ་རེ་རེ་མཆོད་བྱེད་ཀྱང་། །གང་གི་སེམས་ལ་སྐྱོ་མེད་ན། །དེ་དག་དེ་བཞིན་གཤེགས་པར་འགྱུར། །དུས་གསུམ་གཤེགས་པའི་མགོན་པོ་ཀུན། །
ཁྱོད་ཀྱི་སྨོན་ལམ་དབང་གིས་གསལ། །སངས་རྒྱས་ཀུན་གྱི་འཁོར་རྣམས་ནི། །ཁྱོད་ཀྱི་ལུས་ཀྱང་རབ་ཏུ་གནས། །སངས་རྒྱས་ཀུན་གྱི་སྨོན་ལམ་དག །མཐའ་དང་དབུས་མེད་རྒྱ་མཚོ་ལ། །བློ་ཆེན་གང་རྣམས་འཇུག་པ་ན། །དེ་དག་ཚུལ་འདི་གནས་པར་འགྱུར། །ང་ལ་མཆོད་པ་བྱས་པས་ཀྱང་། །གཟི་བརྗིད་ཆེན་པོ་སྟོབས་ཆེན་གྱིས། །སེམས་ཅན་རི་རབ་རྡུལ་མཉམ་པ། །བྱང་ཆུབ་ཡོངས་སུ་སྨིན་པར་བྱས། །བྱང་ཆུབ་སེམས་དཔའ་གྲགས་ཆེན་དག །ཀུན་ཏུ་བཟང་པོ་དཔའ་བའི་རྣམས། །ཆོས་ཀྱི་དབྱིངས་ནི་ཀུན་བཀང་ཞིང་། །ཞིང་གི་རྒྱ་མཚོ་དག་པར་བྱེད། །ཀྱེ་རྒྱལ་བའི་སྲས་དག་དེ་ལ་བསྐལ་པ་རྒྱ་ཆེན་པོ་རིག་པ་ཞེས་བྱ་བ་དེ་ལ་བསྐལ་པ་བར་མ་ཆུ་ཀླུང་གང་གཱའི་བྱེ་མ་སྙེད་ཅིག་བྱུང་སྟེ། དེའི་དུས་ན་མི་རྣམས་ཀྱི་ཚེ་ཡང་བསྐལ་པ་བར་མ་གཉིས་ཐུབ་པར་གྱུར་ཏེ། རྒྱལ་བའི་སྲས་དག་དེ་བཞིན་གཤེགས་པ་ཡོན་ཏན་ཐམས་ཅད་ཀྱི་རི་བོ་རི་རབ་དཔལ་གྱི་སྤྲིན་དེའི་སྐུ་ཚེའི་ཚད་ནི་ལོ་བྱེ་བ་ཕྲག་ལྔ་བཅུར་གྱུར་ཏོ། །དེ་ཡོངས་སུ་མྱ་ངན་ལས་འདས་ནས། དེ་བཞིན་གཤེགས་པ་ཕ་རོལ་ཏུ་ཕྱིན་པའི་སྤྱན་བཟང་པོའི་རྒྱན་གྱི་རྒྱལ་པོ་ཞེས་བྱ་བ་འཇིག་རྟེན་དུ་ནགས་ཚལ་ཆེན་པོ་ཡལ་གའི་དཀྱིལ་འཁོར་རིན་པོ་ཆེའི་མེ་ཏོག་རྒྱས་པ་དེ་ཉིད་ལ་བྱུང་སྟེ། དེ་བཞིན་གཤེགས་པ་ཕ་རོལ་ཏུ་ཕྱིན་པའི་སྤྱན་བཟང་པོ་རྒྱན་གྱི་རྒྱལ་པོ་དེ་མངོན་པར་སངས་རྒྱས་པའི་རྣམ་པར་འཕྲུལ་པ་རྒྱལ་བུ་གཞོན་ནུ་གཟི་བརྗིད་ཆེན་པོས་མཐོང་ངོ་། །མཐོང་ནས་ཀྱང་སྒོ་རྒྱ་མཚོ་མཐའ་ཡས་པའི་སྙིང་པོ་ཞེས་བྱ་བ་རབ་ཏུ་ཐོབ་པོ། ། ཡེ་ཤེས་རྒྱ་ཆེན་པོའི་བྱིན་གྱི་རླབས་དང་ཆོས་ཀྱི་ཀློང་གི་གཟུངས་ཀྱང་རབ་ཏུ་ཐོབ་བོ། །ཀུན་གྱི་རྗེས་སུ་སོང་བར་འགྲོ་བ་འདུལ་བའི་རྣམ་པར་ཐར་པ་ཞེས་བྱ་བའི་བྱམས་པ་ཆེན་པོ་ཡང་རབ་ཏུ་ཐོབ་བོ། །དམིགས་པའི་སྒོའི་སྤྲིན་ཐམས་ཅད་ཀྱིས་རྒྱས་པར་བྱེད་པ་ཞེས་བྱ་བའི་སྙིང་རྗེ་ཆེན་པོ་ཡང་རབ་ཏུ་ཐོབ་བོ། །སངས་རྒྱས་ཐམས་ཅད་ཀྱི་ཡོན་ཏན་རྒྱ་མཚོ་དང་བྱིན་གྱི་
རླབས་ཀྱི་མཛོད་ཅེས་བྱ་བའི་དགའ་བ་ཆེན་པོ་ཡང་རབ་ཏུ་ཐོབ་བོ། །ཆོས་ཀྱི་རང་བཞིན་ནམ་མཁའི་དབྱིངས་རྣམ་པར་དག་པ་ཞེས་བྱ་བའི་བཏང་སྙོམས་ཆེན་པོ་ཡང་རབ་ཏུ་ཐོབ་བོ། །རང་བཞིན་དྲི་མ་མེད་པའི་ཆོས་ཀྱི་དབྱིངས་ཡོངས་སུ་དག་པའི་ལུས་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་རབ་ཏུ་ཐོབ་བོ། །ཆགས་པ་མེད་པའི་དབྱིངས་རྣམ་པར་སྣང་བའི་རྗེས་སུ་སོང་བ་ཞེས་བྱ་བའི་མངོན་པར་ཤེས་པ་ཡང་རབ་ཏུ་ཐོབ་བོ། །རབ་ཏུ་ཁོང་དུ་ཆུད་པས་དྲི་མ་མེད་པའི་ཀློང་ལ་ཡང་དག་པར་འཇུག་པ་ཞེས་བྱ་བའི་ཐ་དད་པ་ཡང་དག་པར་ཤེས་པ་ཡང་རབ་ཏུ་ཐོབ་བོ། །སངས་རྒྱས་ཐམས་ཅད་ཀྱི་ཆོས་ཀྱི་དཀྱིལ་འཁོར་ཡོངས་སུ་དག་པར་བྱེད་པ་ཞེས་བྱ་བའི་ཡེ་ཤེས་སྣང་བ་ཡང་རབ་ཏུ་ཐོབ་བོ། །དེ་དག་ལ་སྩོགས་པ་ཆོས་ཀྱི་སྒོ་སྟོང་ཕྲག་བཅུ་ཀུན་ནས་ནོན་པར་གྱུར་ཏེ། དེ་ནས་རྒྱལ་བུ་གཞོན་ནུ་གཟི་བརྗིད་ཆེན་པོས་སངས་རྒྱས་ཀྱི་བྱིན་གྱི་རླབས་ཀྱིས་འཁོར་གྱི་ཚོགས་ཐམས་ཅད་ལ་ཚིགས་སུ་བཅད་དེ་སྨྲས་པ། བསྐལ་པ་བྱེ་བ་བསམ་གྱིས་མི་ཁྱབ་ཏུ། །འཇིག་རྟེན་གཙོ་བོའི་དམ་པ་ཤིན་ཏུ་དཀོན། །སངས་རྒྱས་ཞིང་འདི་སེམས་ཅན་ཐོབ་རབ་ཐོབ། །དེ་དག་སངས་རྒྱས་གཉིས་པ་འདི་ཡང་མཐོང་། །སངས་རྒྱས་སྐུ་ལས་འོད་རྣམས་རབ་བཀྱེ་བ། །ཁ་དོག་མཐའ་ཡས་རྒྱ་མཚོ་རྣམ་པར་དག །འོད་ཟེར་སྤྱན་གྱིས་འཇིག་རྟེན་ཀུན་ཏུ་ཁྱབ། །ཀུན་ཏུ་རྒྱལ་བའི་ཡོན་ཏན་གྲགས་པར་བྱེད། །འོད་ཀྱིས་རིག་པ་རྨད་ཀྱི་དགའ་བ་སྐྱེ། །འགྲོ་བ་དེ་དག་ཀུན་གྱི་སྡུག་བསྔལ་ཞི། །ཕན་ཚུན་སྲིད་ཞུ་བྱམས་པའི་སེམས་གྱུར་ཅིང་། །སངས་རྒྱས་རྣམ་འཕྲུལ་འདི་དག་ཀུན་ཀྱང་མཐོང་། །སྤྲུལ་པའི་དྲ་བ་སྤྲིན་རྣམས་བསམ་མི་ཁྱབ། །རྣམ་པ་དུ་མའི་འོད་ཀྱི་དྲ་བ་འགྱེད། །ཕྱོགས་བཅུའི་ཞིང་རྣམས་ཀུན་ཀྱང་གང་བྱས་ཤིང་། །སངས་རྒྱས་རྣམ་པར་འཕྲུལ་པ་རབ་ཏུ་སྟོན། །རྒྱལ་བ་རྣམས་ཀྱི་སྤུ་རྩེ་རེ་རེ་ནས། །དབྱངས་སྤྲིན་བཀྱེ་བས་ནམ་མཁའ་ཀུན་བཀང་ཞིང་། །མུན་ནག་ཆེན་པོ་ཀུན་ནས་སྣང་བར་བྱེད། །དམྱལ་བའི་སྡུག་བསྔལ་ཀུན་ཀྱང་རྣམ་པར་སེལ། །
སངས་རྒྱས་དབྱངས་ནི་ཕྱོགས་རྣམས་བཅུ་པོ་ན། །སེམས་ཅན་རྣམས་ཀྱི་སྔོན་དགེ་རྒྱ་མཚོ་རྣམས། །ཐམས་ཅད་དབྱངས་ཀྱིས་ཀུན་ཏུ་སྒྲ་ཡང་སྒྲོག །སངས་རྒྱས་རྣམ་པར་འཕྲུལ་པ་དེ་དག་ལྟོས། །སངས་རྒྱས་འཁོར་རྣམས་རྒྱ་མཚོ་རྒྱ་ཆེ་བ། །མཐའ་དང་དབུས་མེད་ཡང་དག་རབ་ཏུ་བྱུང་། །དེ་ན་རྒྱལ་བ་ཆོས་ཀྱི་འཁོར་ལོ་བསྐོར། །སེམས་ཅན་རྒྱ་མཚོ་མི་ཟད་རྣམས་ཀྱང་འདུལ། །ཚད་མེད་རྣམ་པར་འཕྲུལ་པ་དག་ལ་ལྟོས། །ཞིང་རྣམས་ཀུན་ན་རྒྱལ་བ་མངོན་པར་བཞུགས། །དེ་ལྟར་བདེ་གཤེགས་ཡེ་ཤེས་ཆགས་པ་མེད། །སེམས་ཅན་དོན་དུ་རྣམ་པར་མངོན་སངས་རྒྱས། །དགའ་ཞིང་མོས་པར་ཀུན་ཀྱང་འདོད་པར་གྱིས། །བདེ་བའི་ཡིད་དང་སྲིད་ཞུ་སྤྲོ་བ་ཡིས། །བདེ་གཤེགས་དེ་ནི་བལྟ་བའི་ཕྱིར་འདོང་ངོ་། །དེ་མཐོང་སྡུག་བསྔལ་ཐམས་ཅད་ཞི་བར་འགྱུར། །བྱང་ཆུབ་སེམས་ནི་ཡང་དག་བསྐྱེད་བྱས་ཤིང་། །འགྲོ་བ་ཀུན་ལ་བྱམས་པའི་སེམས་འགྱུར་ཏེ། །ཀུན་ཏུ་བཟང་པོའི་སྨོན་ལམ་ཀུན་བཏབ་ཅིང་། །ཆོས་རྒྱལ་ཇི་བཞིན་བདག་ཅག་འགྱུར་བར་བྱ། །སངས་རྒྱས་ཀྱི་བྱིན་གྱི་རླབས་ཀྱིས་དེའི་སྒྲ་ལ་ཐོགས་པ་མེད་པས་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་གྱུར་ཏེ། དེ་ཐོས་པའི་སེམས་ཅན་ཚད་མེད་པ་རྣམས་ཀྱང་བྱང་ཆུབ་ཏུ་སྨོན་ལམ་བཏབ་པར་གྱུར་ཏོ། །དེ་ཡང་ཕ་དང་མ་དང་ལྷན་ཅིག་ཏུ་འཁོར་ཐམས་ཅད་དང་། སེམས་ཅན་བྱེ་བ་ཁྲག་ཁྲིག་བརྒྱ་སྟོང་དེ་དག་གིས་བསྐོར་ཅིང་མདུན་དུ་བྱས་ཏེ། རིན་པོ་ཆེའི་གདུགས་ཀྱི་སྤྲིན་ལྔས་ནམ་མཁའ་ཐམས་ཅད་ཀུན་ནས་ཡོག་པར་བྱས་ཏེ། བཅོམ་ལྡན་འདས་གང་ན་བ་དེར་དོང་ངོ་། །འོངས་པ་དེ་དག་ལ་བཅོམ་ལྡན་འདས་ཕ་རོལ་ཏུ་ཕྱིན་པའི་སྤྱན་བཟང་པོ་བརྒྱན་གྱི་རྒྱལ་པོ་དེ་བཞིན་གཤེགས་པས་ཆོས་ཀྱི་དབྱིངས་རང་བཞིན་དྲི་མ་མེད་པའི་རྒྱན་ཅེས་བྱ་བའི་མདོ་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་མདོའི་འཁོར་ཅན་ཡང་དག་པར་བསྟན་ཏོ། །དེས་དེ་ཐོས་ནས་ཚུལ་ཐམས་ཅད་རྣམ་པར་དག་པ་ལ་འཇུག་པར་འབྱུང་
བ་རབ་ཏུ་སྐྱེས་སོ། །ཡེ་ཤེས་ཀྱི་རིམ་པ་རྣམ་པར་དག་ཅིང་དྲི་མ་མེད་པའི་སྣང་བ་ཞེས་བྱ་བ་ཡང་ནོན་པར་གྱུར་ཏོ། །ཕ་རོལ་ཏུ་ཕྱིན་པའི་དཀྱིལ་འཁོར་འགྲོ་བ་ཐམས་ཅད་དགའ་བར་ལྟ་བའི་རྒྱན་ཅེས་བྱ་བར་ཡང་ཞུགས་པར་གྱུར་ཏོ། །ཞིང་ཐམས་ཅད་དུ་ཡང་ཡང་དག་པར་འཇུག་པ་དང་སྣང་བ་མཐའ་ཡས་པར་མཐོང་བས་རྣམ་པར་དག་པའི་སྤྱོད་པའི་དཀྱིལ་འཁོར་ལ་ཡང་རབ་ཏུ་ཞུགས་སོ། །སྤྱོད་པའི་དཀྱིལ་འཁོར་བསོད་ནམས་ཀྱི་སྤྲིན་དྲི་མ་མེད་པའི་འོད་ཀྱི་རྒྱལ་མཚན་ཅེས་བྱ་བ་ལ་ཡང་རབ་ཏུ་ཞུགས་པར་གྱུར་ཏོ། །རྗེས་སུ་རྟོག་པའི་དཀྱིལ་འཁོར་ཆོས་ཀྱི་རྒྱ་མཚོ་འབྱམ་ཀླས་པ་ཐམས་ཅད་སྣང་བ་ཞེས་བྱ་བ་ཡང་རྗེས་སུ་རྟོགས་པར་གྱུར་ཏོ། །འཇུག་པའི་དཀྱིལ་འཁོར་ཡེ་ཤེས་ཆེན་པོའི་ཤུགས་ཀྱི་རྒྱན་ཅེས་བྱ་བ་ལ་ཡང་རབ་ཏུ་ཞུགས་སོ། །རང་འབྱུང་དུ་འགྱུར་བ་ཤིན་ཏུ་མཐོང་བའི་ཤུགས་ཀྱི་དབང་བསྐུར་བའི་ཡེ་ཤེས་རྒྱ་མཚོ་ལ་ཡང་ཞུགས་པར་གྱུར་ཏོ། །དེ་བཞིན་གཤེགས་པའི་ཡོན་ཏན་རྒྱ་མཚོའི་མཚན་ཉིད་ཀྱི་འོད་རྣམ་པར་སྣང་བའི་སྣང་བ་ཆེན་པོས་ཀྱང་ཤིན་ཏུ་སྣང་བར་གྱུར་ཏོ། །སྨོན་ལམ་གྱི་སྟོབས་ཚད་མེད་པ་ལ་མོས་པ་རྒྱ་མཚོའི་སྙིང་པོའི་སྨོན་ལམ་མངོན་པར་བསྒྲུབ་པའི་ཡེ་ཤེས་ཀྱི་སྟོབས་ལ་ཡང་རྣམ་པར་དག་པར་གྱུར་ཏོ། །དེ་ནས་དེ་བཞིན་གཤེགས་པ་ཕ་རོལ་ཏུ་ཕྱིན་པའི་སྤྱན་བཟང་པོ་རྒྱན་གྱི་རྒྱལ་པོས་བྱང་ཆུབ་སེམས་དཔའ་གཟི་བརྗིད་ཆེན་པོ་ལ་ཚིགས་སུ་བཅད་དེ་གསུངས་པ། ལེགས་སོ་ཡོན་ཏན་ཡེ་ཤེས་རྒྱ་མཚོ་ཅན། །སངས་རྒྱས་བྱང་ཆུབ་སྨོན་ལམ་ཡང་དག་གནས། །སེམས་ཅན་ཀུན་གྱི་མགོན་དང་གནས་གྱུར་པའི། །རྒྱལ་བ་དམ་པ་བསམ་གྱིས་མི་ཁྱབ་འགྱུར། །ཡེ་ཤེས་རྒྱ་མཚོ་ཆེན་པོར་མངོན་པར་བྱུང་། །ཆོས་ཀྱི་དབྱིངས་སུ་ཐམས་ཅད་རྒྱས་བྱས་ཏེ། །སངས་རྒྱས་སྤྱོད་ཡུལ་རྒྱ་ཆེན་མི་ཟད་པའི། །བསམ་གྱིས་མྱི་ཁྱབ་ཚུལ་ལ་འཇུག་པར་འགྱུར། །སངས་རྒྱས་ཐམས་ཅད་ཡོན་ཏན་སྤྲིན་མཐོང་བའི། །ཡེ་ཤེས་ས་ཡང་མི་ཟད་ནོན་པར་གྱུར། །ཕ་རོལ་ཕྱིན་པ་རྒྱ་མཚོ་ཀུན་གྱི་ཚུལ། །གྲགས་པ་
ཆེན་པོ་ཡོངས་སུ་རྒྱས་པར་བྱེད། །གཟུངས་ཀྱི་ཚུལ་རྣམས་རྒྱ་མཚོ་མང་པོ་དང་། །ཐ་དད་ཡང་དག་ཤེས་ཚུལ་མི་ཟད་དང་། །སྤྱོད་པ་སྨོན་ལམ་ཁྱོད་ཀྱིས་མངོན་བསྒྲུབས་པས། །གཞལ་མེད་ཡེ་ཤེས་ལྡན་པར་ཁྱོད་འགྱུར་རོ། །ཏིང་ངེ་འཛིན་གྱི་རྒྱ་མཚོར་འཇུག་པར་འགྱུར། །སྨོན་ལམ་རྒྱ་མཚོའི་ནང་དུ་ཁྱོད་སྐྱེས་ཏེ། །རྣམ་འཕྲུལ་འདི་ལའང་ཤིན་ཏུ་འབྱུང་བར་འགྱུར། །འདི་ནི་སངས་རྒྱས་ཆོས་ཉིད་བསམ་མི་ཁྱབ། །ཆོས་དབྱིངས་དམ་པ་བསམ་གྱིས་མི་ཁྱབ་པའི། །བསམ་པ་རྒྱ་ཆེན་རྣམ་པར་སྦྱངས་བྱས་ཏེ། །སངས་རྒྱས་སྤྲིན་ལ་རྣམ་པར་བལྟ་བར་གྱིས། །རྒྱ་མཚོའི་ཞིང་རྣམས་དྲི་མེད་རྣམ་པར་སྦྱོངས། །ང་ཡི་བྱང་ཆུབ་སྤྱོད་ལ་འཇུག་པར་གྱིས། །སྔོན་གྱི་སྦྱོར་ཚུལ་རྒྱ་མཚོ་མང་པོ་ཡི། །སྤྱོད་པ་ངས་ནི་ཇི་ལྟར་རྣམ་སྦྱངས་པ། །དེ་འདྲའི་ཚུལ་ཡང་ཁྱོད་ཀྱིས་ཤེས་པར་གྱིས། །ཞིང་རྣམས་རེ་རེར་སངས་རྒྱས་མང་པོ་ངས། །རྒྱ་མཚོ་བརྒྱ་མང་ཤིན་ཏུ་མཆོད་པ་བྱས། །སྔོན་སྤྱོད་དེ་ཡི་འབྲས་བུ་འདི་ཡིན་ཏོ། །འདི་འདྲ་དྲི་མ་མེད་པའི་རྒྱན་ལ་ལྟོས། །ལས་ཀྱི་རྒྱ་མཚོ་མི་ཟད་རྒྱ་ཆེན་དང་། །ཞིང་རྣམས་རྒྱ་མཚོ་དག་བྱའི་སྤྱོད་པ་དང་། །སྨོན་ལམ་བསམ་ཡས་གོ་ཅ་བགོས་པས་ན། །འདི་རྣམས་འདི་འདྲའི་རྣམ་པར་འཕྲུལ་པར་འགྱུར། །སངས་རྒྱས་རྒྱ་མཚོ་མ་ལུས་མཆོད་བྱས་ཤིང་། །ཞིང་རྣམས་རྒྱ་ཆེན་རྒྱ་མཚོ་སྦྱངས་བྱས་ནས། །བསྐལ་པ་འབྱམ་ཀླས་ཀུན་ཏུ་སྦྱངས་བྱས་ཤིང་། །རྒྱལ་བ་ཡོན་ཏན་འོད་ཆེན་མངའ་བར་འགྱུར། །ཀྱེ་རྒྱལ་བའི་སྲས་དག་དེ་བཞིན་གཤེགས་པ་ཕ་རོལ་ཏུ་ཕྱིན་པའི་སྤྱན་བཟང་པོ་རྒྱན་གྱི་རྒྱལ་པོ་དེ་ཡོངས་སུ་མྱ་ངན་ལས་འདས་ནས་བལྟ་ན་དགའ་བ་ཤིན་ཏུ་གཙང་བའི་བདག་པོ་དེ་ཡང་དུས་བྱས་པར་གྱུར་ཏེ། རྒྱལ་བུ་གཞོན་ནུ་གཟི་བརྗིད་ཆེན་པོས་འཁོར་ལོས་སྒྱུར་བའི་རྒྱལ་སྲིད་ཐོབ་པར་གྱུར་ཏོ། །ནགས་ཚལ་ཆེན་པོ་ཡལ་གའི་དཀྱིལ་འཁོར་རིན་པོ་ཆེའི་མེ་ཏོག་རྒྱས་པ་ཞེས་བྱ་བ་དེར་ཡང་དེ་བཞིན་
གཤེགས་པ་བསོད་ནམས་རྒྱ་མཚོ་ཤིན་ཏུ་འཕགས་ཤིང་ཟིལ་གྱིས་མི་ནོན་པ་ཞེས་བྱ་བ་གསུམ་པ་བྱུང་བར་གྱུར་ཏེ། དེས་དེ་བཞིན་གཤེགས་པ་དེ་མངོན་པར་འཚང་རྒྱ་བའི་རྣམ་པར་འཕྲུལ་པ་མཐོང་ནས། འཁོར་ཐམས་ཅད་དང་དཔུང་གི་ཡན་ལག་བཞིའི་ཚོགས་དང་། རིན་པོ་ཆེ་བདུན་དང་། གྲོང་གི་མྱི་དང་ཡུལ་མིར་བཅས་ཏེ། བཅོམ་ལྡན་འདས་དེ་བཞིན་གཤེགས་པ་བསོད་ནམས་རྒྱ་མཚོ་ཤིན་ཏུ་འཕགས་ཤིང་ཟིལ་གྱིས་མི་ནོན་པ་གང་ན་བཞུགས་པ་དེར་དོང་ནས། དེས་བཅོམ་ལྡན་འདས་དེ་ལ་རིན་པོ་ཆེའི་ཁང་པ་བརྩེགས་པ། སྤོས་དང་ནོར་བུ་ཐམས་ཅད་ཀྱི་རྒྱན་གྱི་སྙིང་པོ་ཞེས་བྱ་བ་ཕུལ་ལོ། །དེར་དེ་བཞིན་གཤེགས་པ་དེས་ཀུན་ཏུ་བལྟ་བའི་སྤྱོད་པ་བྱང་ཆུབ་སེམས་དཔའི་སྤྱོད་པ་སྣང་བ་ཞེས་བྱ་བའི་མདོ། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་མདོའི་འཁོར་དང་བཅས་པའང་ཡང་དག་པར་བཤད་པར་གྱུར་ཏོ། །དེ་ཐོས་ནས་བྱང་ཆུབ་སེམས་དཔའ་གཟི་བརྗིད་ཆེན་པོས། བསོད་ནམས་ཆེན་པོའི་རྣམ་པར་སྣང་བ་ཞེས་བྱ་བའི་ཏིང་ངེ་འཛིན་རབ་ཏུ་ཐོབ་པོ། །ཏིང་ངེ་འཛིན་དེ་ཐོབ་ནས་ཀྱང་དུས་གསུམ་གྱི་བྱང་ཆུབ་སེམས་དཔའ་ཐམས་ཅད་ཀྱི་བསོད་ནམས་རྒྱ་མཚོ་མངོན་དུ་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བསོད་ནམས་རྒྱ་མཚོ་ཤིན་ཏུ་འཕགས་ཤིང་ཟིལ་གྱིས་མི་ནོན་པས་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་གཟིགས་ཏེ། བྱང་ཆུབ་སེམས་དཔའ་གཟི་བརྗིད་ཆེན་པོ་ལ་ཚིགས་སུ་བཅད་དེ་གསུངས་པ། ཡོན་ཏན་བསོད་ནམས་ཀུན་གྱི་གཟི་བརྗིད་ཅན། །བྱང་ཆུབ་མཆོག་གི་སྨོན་ལམ་ཡིད་ལྡན་པ། །འགྲོ་བ་ཀུན་ལ་སྙིང་རྗེ་རྒྱ་མཚོ་ཡིས། །ང་ཡི་དྲུང་དུ་ཁྱོད་འོངས་ལེགས་སོ་ལེགས། །སྙིང་རྗེའི་སྙིང་པོ་ཁྱོད་ནི་སེམས་ཅན་རྣམས། །སྡུག་བསྔལ་གྱུར་པ་ཀུན་གྲོལ་དོན་ཞུགས་པས། །འགྲོ་བ་ཀུན་གྱི་མགོན་དང་སྐྱབས་སུ་འགྱུར། །བྱང་ཆུབ་སྤྱོད་པའི་ཚུལ་ཡང་དེ་ཡིན་ནོ། །བྱང་ཆུབ་སེམས་དཔའ་ཤིན་ཏུ་བརྟན་པ་རྣམས། །སྐྱོ་མེད་ཡིད་ཀྱིས་སྤྱོད་པ་སྤྱད་པ་དག །མཆོག་ཏུ་གྱུར་ཅིང་དམ་པ་ཆགས་
མེད་པའི། །ཡེ་ཤེས་འདི་འདྲ་ཤིན་ཏུ་ཐོབ་པར་འགྱུར། །དེ་ལྟར་ཁྱོད་ནི་ཀུན་ཏུ་བཟང་པོ་ཡི། །མཐུ་ཆེན་སྨོན་ལམ་སྤྱོད་པར་ཞུགས་པས་ན། །བསོད་ནམས་འོད་དང་བསོད་ནམས་དཔལ་ཡིན་ཏེ། །བསོད་ནམས་འབྱུང་གནས་བསོད་ནམས་མཆོག་ཀྱང་ཡིན། །བསམ་གྱིས་མྱི་ཁྱབ་རྒྱལ་བ་རྒྱ་མཚོ་དག །མཐའ་དང་དབུས་མེད་པ་ནི་ཁྱོད་ཀྱིས་ཤེས། །མཐའ་དང་དབུས་མེད་དེ་དག་མཐོང་གྱུར་ནས། །དེ་དག་བསོད་ནམས་རྒྱ་མཚོ་རྟོགས་པར་འགྱུར། །ཁྱོད་ཀྱིས་ཕྱོགས་བཅུའི་ཞིང་རྣམས་ཐམས་ཅད་ཀྱི། །རྒྱལ་བའི་སྤྲིན་རྣམས་ཀུན་ཀྱང་ཤིན་ཏུ་མཐོང་། །དེ་དག་སྤྱོད་པ་རྒྱ་མཚོ་ཐམས་ཅད་ཀྱང་། །སྔོན་ཆད་ཇི་ལྟར་སྤྱད་པ་བཞིན་དུ་མཐོང་། །འདི་ཚུལ་རྒྱ་མཚོ་འདི་ལ་སུ་ཞུགས་ཤིང་། །ཡེ་ཤེས་ས་ལ་སུ་དག་གནས་གྱུར་པ། །དེ་དག་སངས་རྒྱས་ཀུན་གྱི་རྗེས་སློབ་ཅིང་། །ཐམས་ཅད་གཟིགས་པར་གདོན་མྱི་ཟ་བར་འགྱུར། །ཁྱོད་ནི་ཞིང་ཀུན་རྒྱ་མཚོའི་རྡུལ་སྙེད་ཀྱི། །བསྐལ་པ་རྒྱ་མཚོར་སྤྱོད་པ་རབ་སྤྱོད་ནས། །རྒྱལ་བ་ཀུན་གྱི་སྔོན་སྤྱད་རྒྱ་མཚོ་རྣམས། །བསླབས་ནས་རང་བྱུང་ཉིད་དུ་འགྱུར་བར་འོངས། །ཞིང་རྣམས་རྒྱ་མཚོ་ཡོངས་སུ་དག་པ་རྣམས། །ཕྱོགས་བཅུ་དག་ཏུ་ཇི་ལྟར་མཐོང་བ་བཞིན། །ཁྱོད་ཀྱི་ཞིང་ཡང་རྣམ་པར་དག་འགྱུར་ཏེ། །སྨོན་ལམ་ཀུན་ཀྱང་ཤིན་ཏུ་སྒྲོག་པར་འགྱུར། །འཁོར་གྱི་རྒྱ་མཚོ་འདི་དག་ཐམས་ཅད་ཀྱང་། །ཁྱོད་ཀྱི་སྨོན་ལམ་ཐོས་གྱུར་རབ་ཏུ་དགའ། །ཀུན་ཏུ་བཟང་པོའི་སྤྱོད་པའི་ལམ་དག་གིས། །བྱང་ཆུབ་མཆོག་ལ་རབ་ཏུ་འཇུག་པར་འགྱུར། །མཐའ་དང་དབུས་མྱེད་ཞིང་རྣམས་འབྱམ་ཀླས་པར། །བསྐལ་པ་རྒྱ་མཚོ་དག་ཏུ་སྤྱད་པ་སྤྱོད། །ཀུན་ཏུ་བཟང་པོའི་སྤྱོད་པ་ཐམས་ཅད་དང་། །སྨོན་ལམ་རྣམས་ཀྱང་ཡོངས་སུ་རྫོགས་པར་གྱིས། །ནགས་ཚལ་ཆེན་པོ་ཡལ་གའི་དཀྱིལ་འཁོར་རིན་པོ་ཆེའི་མེ་ཏོག་རྒྱས་པ་དེ་ཉིད་དུ། དེ་བཞིན་གཤེགས་པ་གྲགས་པ་རྣམ་པར་གྲགས་པའི་སྤྱན་པད་མོའི་དཔལ་ཞེས་བྱ་བ་བྱུང་བར་གྱུར་ཏོ། །རྒྱལ་པོ་གཟི་བརྗིད་ཆེན་པོ་དེ་ཡང་དེ་ནས་ཤི་འཕོས་ནས། རྒྱ་མཚོའི་
སྟེང་ན་ལྷའི་གྲོང་ཁྱེར་རིན་པོ་ཆེ་ཞི་བའི་གནས་ཤེས་བྱ་བར་ཕྱིན་ཏེ། དེར་བསོད་ནམས་དྲི་མ་མེད་པའི་དཔལ་ཞེས་བྱ་བ་ལྷའི་རྒྱལ་པོ་ཆེན་པོར་གྱུར་ཏོ། །དེ་ནས་དེ་ལྷའི་འཁོར་གྱི་ཚོགས་ཆེན་པོ་དང་བཅས་ཏེ། རིན་པོ་ཆེའི་མེ་ཏོག་གི་སྤྲིན་གྱི་ཆར་འབེབས་ཤིང་། བཅོམ་ལྡན་འདས་དེ་བཞིན་གཤེགས་པ་གྲགས་པ་རྣམ་པར་གྲགས་པའི་སྤྱན་པདྨོའི་དཔལ་གང་ན་བཞུགས་པ་དེར་དོང་ངོ་། །དེར་བཅོམ་ལྡན་འདས་དེ་བཞིན་གཤེགས་པ་གྲགས་པ་རྣམ་པར་གྲགས་པའི་སྤྱན་པདྨོའི་དཔལ་གྱིས་ཚུལ་ཡངས་པའི་སྒོ་ཀུན་ཏུ་རྣམ་པར་སྣང་བ་ཞེས་བྱ་བའི་མདོ། འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་མདོའི་འཁོར་དང་བཅས་པ་ཡང་དག་པར་སྟོན་ཏོ། །དེས་དེ་དག་ཐོས་ནས་དགའ་བའི་སྙིང་པོ་ཀུན་ནས་སྒོ་ཞེས་བྱ་བའི་ཏིང་ངེ་འཛིན་རབ་ཏུ་ཐོབ་པོ། །ཆོས་ཐམས་ཅད་ཀྱི་ཚུལ་རྒྱ་མཚོའི་དབྱིངས་སུ་ཡང་ཞུགས་པར་གྱུར་ཏེ། །རྣམ་པར་སྣང་མཛད་ཀྱི་ལེའུ་ཞེས་བྱ་བ་སྟེ། བཅུ་པའོ།། །།