ཉི་ཤུ་པ། བྱང་ཆུབ་སེམས་དཔའི་རྣམ་པར་དགོད་པ་བཅུ་བསྟན་པའི་ལེའུ།
སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་པ། དེ་ནས་བྱང་ཆུབ་སེམས་དཔའ་ཆོས་ཀྱི་བློ་གྲོས་དེའི་ཚེ། སངས་རྒྱས་ཀྱི་བྱིན་གྱི་བརླབས་ཀྱིས། སྦྱོང་བ་མཐའ་ཡས་པ་ཞེས་བྱ་བའི་ཏིང་ངེ་འཛིན་ལ་མཉམ་པར་གཞག་གོ །དེ་ལྟར་བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས། བྱང་ཆུབ་སེམས་དཔའི་ཏིང་ངེ་འཛིན་སྦྱོང་བ་མཐའ་ཡས་པ་ཞེས་བྱ་བ་དེ་ལ་མཉམ་པར་བཞག་མ་ཐག་ཏུ། དེའི་མོད་ལ་ཕྱོགས་བཅུའི་ཕྱོགས་རེ་རེའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་ནས། སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་ཆོས་ཀྱི་བློ་གྲོས་ཞེས་བྱ་བར་མཚན་མཐུན་པ་ཤ་སྟག་གིས་ཞལ་མངོན་པར་བསྟན་པ་མཐོང་བར་གྱུར་ཏེ། སངས་རྒྱས་བཅོམ་ལྡན་འདས་དེ་དག་གིས་འདི་སྐད་ཅེས་ཀྱང་བཀའ་སྩལ་ཏོ། །ཆོས་ཀྱི་བློ་གྲོས་ཁྱོད་དེ་ལྟར་བྱང་ཆུབ་སེམས་དཔའི་ཏིང་ངེ་འཛིན་སྦྱོང་བ་མཐའ་ཡས་པ་ལ་མཉམ་པར་གཞོག་པ་ལེགས་སོ། །ལེགས་སོ། །དེ་བས་ན་རིགས་ཀྱི་བུ་ཁྱོད་ལ་ཕྱོགས་བཅུ་ནས་དེ་བཞིན་གཤེགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་མཚན་མཐུན་པ་ཤ་སྟག་གིས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྔོན་གྱི་སྨོན་ལམ་དང་། ཁྱོད་བདག་གི་དགེ་བའི་རྩ་བས་ཉེ་བར་བརྟེན་པས་འདི་ལྟ་སྟེ། ཆོས་ཐམས་ཅད་བསྟན་པར་བྱ་བ་དང་། སངས་རྒྱས་ཀྱི་ཡེ་ཤེས་རྣམ་པར་འཕེལ་བར་བྱ་བ་དང་། ཆོས་ཀྱི་དབྱིངས་སུ་ཆུད་པར་བྱ་བ་དང་། སེམས་ཅན་གྱི་ཁམས་རྣམ་པར་བསྒོམ་པ་དང་། ཆགས་པ་མྱེད་པ་ཉིད་དུ་ཆུད་པར་བྱ་བ་དང་། བསྒྲིབས་པ་མེད་པའི་སྤྱོད་ཡུལ་ཐོབ་པར་བྱ་བ་དང་། ཀུན་ནས་སྦྱོར་བ་ཐོབ་པར་བྱ་བ་དང་། ཐམས་ཅད་མཁྱེན་པ་ཉིད་ཡོངས་སུ་གཟུང་བར་བྱ་བ་དང་། ཆོས་ཐམས་ཅད་ཁོང་དུ་ཆུད་པར་བྱ་བ་དང་། དབང་པོ་ཐམས་ཅད་ཡོངས་སུ་ཤེས་པར་བྱ་བ་དང་། ཆོས་བསྟན་པ་ཐམས་ཅད་ཡོངས་སུ་གཟུང་བ་དང་། འདི་ལྟ་སྟེ། བྱང་ཆུབ་
སེམས་དཔའི་རྣམ་པར་དགོད་པ་བཅུ་ལ་རྩོམ་པར་བྱ་བའི་ཕྱིར་བྱིན་གྱིས་བརླབས་པ་མཛད་ཀྱིས། རིགས་ཀྱི་བུ་ཁྱོད་ཀྱིས་སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་རླབས་ཀྱིས་ཆོས་བསྟན་པ་འདི་ལ་སྤོབས་པ་བསྐྱེད་ཅིག །དེ་ནས་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་ཆོས་ཀྱི་བློ་གྲོས་ལ་ཆགས་པ་མྱེད་པ་ཉེ་བར་བསྒྲུབ་པ་མཛད་དོ། །ཐོགས་པ་མྱེད་པ་ཉེ་བར་བསྒྲུབ་པ་མཛད་དོ། །མཆོད་པ་མྱེད་པ་ཉེ་བར་བསྒྲུབ་པ་མཛད་དོ། །རྨོངས་པ་མྱེད་པ་ཉེ་བར་བསྒྲུབ་པ་མཛད་དོ། །ཐ་དད་པ་མྱེད་པ་ཉེ་བར་བསྒྲུབ་པ་མཛད་དོ། །ཁ་ན་མ་ཐོ་བ་མྱེད་པ་ཉེ་བར་བསྒྲུབ་པ་མཛད་དོ། །དཔག་ཏུ་མྱེད་པ་ཉེ་བར་བསྒྲུབ་པ་མཛད་དོ། །ཞུམ་པ་མྱེད་པ་ཉེ་བར་བསྒྲུབ་པ་མཛད་དོ། །འཕྲོགས་པ་མྱེད་པ་ཉེ་བར་བསྒྲུབ་པ་མཛད་དོ། །དེ་ཅིའི་ཕྱིར་ཞེ་ན། ཏིང་ངེ་འཛིན་འདི་ཉིད་ཀྱི་ཆོས་ཉིད་ཐོབ་པའི་ཕྱིར་རོ། །དེ་ནས་སངས་རྒྱས་བཅོམ་ལྡན་འདས་དེ་དག་གིས། བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱི་སྤྱི་བོ་ལ་ཕྱག་གཡས་པས་བྱུག་པ་མཛད་དེ། དེ་ལྟར་སངས་རྒྱས་བཅོམ་ལྡན་འདས་དེ་དག་གི་ཕྱག་གིས་རེག་མ་ཐག་ཏུ་བྱང་ཆུབ་སེམས་དཔའ་ཆོས་ཀྱི་བློ་གྲོས་ཏིང་ངེ་འཛིན་དེ་ལས་ལངས་ཏེ། བྱང་ཆུབ་སེམས་དཔའ་དེ་དག་ལ་སྨྲས་པ། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་རིགས་ཤེས་བྱ་བ་འདི་ནི་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པས་ཤིན་ཏུ་ཡངས་པ་སྟེ། དེ་ལ་གནས་པའི་བྱང་ཆུབ་སེམས་དཔའ་རྣམས་ནི་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་རིགས་སུ་སྐྱེ་བ་ཡིན། མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་རིགས་སུ་སྐྱེ་བ་ཡིན། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་རིགས་སུ་སྐྱེ་བ་ཡིན། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའ་བརྩོན་པར་བྱེད་པ་གང་ལས་བསམས་ཏེ། དེ་སྐད་དུ་སྨྲས་པ་དེ་དག་གང་ཞེ་ན། ཀྱེ་རྒྱལ་བའི་སྲས་དག་བཅུ་པོ་འདི་དག་ནི་བྱང་ཆུབ་སེམས་དཔའ་རྣམ་པར་དགོད་པ་སྟེ། འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་པ་དང་།
གསུང་བ་དང་། གསུང་བར་འགྱུར་བ་དག་གོ །བཅུ་གང་ཞེ་ན། འདི་ལྟ་སྟེ། སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམ་པར་དགོད་པ་དང་། ལས་དང་པོ་པའི་བྱང་ཆུབ་སེམས་དཔའ་རྣམ་པར་དགོད་པ་དང་། རྣལ་འབྱོར་ལ་སྤྱོད་པའི་བྱང་ཆུབ་སེམས་དཔའ་རྣམ་པར་དགོད་པ་དང་། ཚེར་སྐྱེས་པའི་བྱང་ཆུབ་སེམས་དཔའ་རྣམ་པར་དགོད་པ་དང་། སྦྱོར་བ་ཕུན་སུམ་ཚོགས་པའི་བྱང་ཆུབ་སེམས་དཔའ་རྣམ་པར་དགོད་པ་དང་། བསམ་པ་ཕུན་སུམ་ཚོགས་པའི་བྱང་ཆུབ་སེམས་དཔའ་རྣམ་པར་དགོད་པ་དང་། ཕྱིར་མྱི་ལྡོག་པའི་བྱང་ཆུབ་སེམས་དཔའ་རྣམ་པར་དགོད་པ་དང་། གཞོན་ནུར་གྱུར་པའི་བྱང་ཆུབ་སེམས་དཔའ་རྣམ་པར་དགོད་པ་དང་། རྒྱལ་ཚབ་ཀྱི་བྱང་ཆུབ་སེམས་དཔའ་རྣམ་པར་དགོད་པ་དང་། དབང་བསྐུར་བའི་བྱང་ཆུབ་སེམས་དཔའ་རྣམ་པར་དགོད་པའོ། །ཀྱེ་རྒྱལ་བའི་སྲས་དག་བཅུ་པོ་དེ་དག་ནི་བྱང་ཆུབ་སེམས་དཔའ་རྣམ་པར་དགོད་པ་སྟེ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་པ་དང་། གསུང་བ་དང་། གསུང་བར་འགྱུར་བ་དག་གོ །ཀྱེ་རྒྱལ་བའི་སྲས་དག་དེ་ལ་སེམས་དང་པོ་བསྐྱེད་པའི་བྱང་ཆུབ་སེམས་དཔའ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའ་སངས་རྒྱས་བཅོམ་ལྡན་འདས་རྣམས་མཐོང་ནས། མཛེས་པ་དང་བཟང་བ་དང་། མྱིག་ཏུ་འོང་བ་དང་། ཁ་དོག་རྒྱས་པ་དང་། ཐུབ་པར་དཀའ་བ་དང་། མཐུ་ཆེ་བར་མཐོང་བ་དང་། རྫུ་འཕྲུལ་གྱི་རྣམ་པར་འཕྲུལ་པ་དང་། ཡོངས་སུ་བསྟན་པའི་རྣམ་པར་འཕྲུལ་པ་དང་། རྗེས་སུ་བསྟན་པའི་རྣམ་པར་འཕྲུལ་པ་མཐོང་བ་འམ། སེམས་ཅན་སྡུག་བསྔལ་བ་མཐོང་བ་འམ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་དེ་བཞིན་གཤེགས་པའི་ཆོས་རྒྱ་ཆེན་པོ་ཐོས་པར་གྱུར་ནས། ཐམས་ཅད་མཁྱེན་པ་ཉིད་དུ་སྨོན་ཅིང་སྔ་ཕྱི་མྱེད་པར་བྱང་ཆུབ་ཏུ་སེམས་བསྐྱེད་དེ། སེམས་བསྐྱེད་པ་དང་པོ་དེས་ནི་ཐུབ་པར་དཀའ་བའི་གནས་བཅུ་ཡོངས་སུ་བཟུང་བར་འགྱུར་
ཏེ། བཅུ་གང་ཞེ་ན། འདི་ལྟར་གནས་དང་གནས་མ་ཡིན་པ་ཤེས་པ་དང་། ལས་ཀྱི་རྣམ་པར་སྨྱིན་པ་ཤེས་པ་དང་། ཀུན་ནས་ཉོན་མོངས་པ་དང་རྣམ་པར་བྱང་བ་ཤེས་པ་དང་། དབང་པོ་དང་བརྩོན་འགྲུས་རྣམ་པ་ཐ་དད་པ་ཡོངས་སུ་རྫོགས་པ་མཆོག་དང་ཐ་མ་ཤེས་པ་དང་། མོས་པ་ཐ་དད་པ་དང་། མོས་པ་དུ་མ་ཤེས་པ་དང་། ཁམས་ཐ་དད་པ་དང་ཁམས་དུ་མ་ཤེས་པ་དང་། ཐམས་ཅད་དུ་འགྲོ་བའི་ལམ་ཤེས་པ་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། རྗེས་སུ་བསྒྲིབས་པ་མེད་པ་ཤེས་པ་དང་། ཆགས་པ་མྱེད་པའི་ལྷའི་མྱིག་ཤེས་པ་དང་། དུས་གསུམ་མཉམ་པ་ཉིད་དུ་ཟག་པ་མྱེད་པ་ཤེས་པའོ། །ཐུབ་པར་དཀའ་བའི་གནས་བཅུ་པོ་དེ་དག་ཡོངས་སུ་ཟིན་པར་གྱུར་ཏེ། དེ་ནི་སེམས་དང་པོ་བསྐྱེད་པའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་སེམས་དང་པོ་བསྐྱེད་པ་དེ་ནི་སངས་རྒྱས་མཆོད་པ་ལ་སྦྱར་བར་བྱ་སྟེ། བྱང་ཆུབ་སེམས་དཔའ་བསྟེན་པར་བདེ་བ་ཡང་དེ་ལ་བརྗོད་པར་བྱའོ། །འཇིག་རྟེན་གྱི་ནང་ན་གཙོ་བོར་གྱུར་པ་ཡང་དེ་ལ་བརྗོད་པར་བྱའོ། །ཕུལ་དུ་ཕྱིན་པ་ཡང་དེ་ལ་བརྗོད་པར་བྱའོ། །ཟིལ་གྱིས་མྱི་ནོན་པའི་གནས་ཀྱང་དེ་ལ་བརྗོད་པར་བྱའོ། །སངས་རྒྱས་ཀྱི་བདག་ཉིད་ཆེ་བ་འང་དེ་ལ་བསྟན་པར་བྱའོ། །སངས་རྒྱས་ཚད་མེད་པ་དང་འཕྲད་པར་འགྱུར་བ་ཡང་དེ་ལ་བསྟན་པར་བྱའོ། །རབ་ཏུ་ཞི་བའི་ཏིང་ངེ་འཛིན་གྱི་སྦྱོར་བ་ཡང་དེ་ལ་བརྗོད་པར་བྱའོ། །འཁོར་བའི་འཁོར་ལོ་ལས་ལྡོག་པར་འགྱུར་བ་ཡང་དེ་ལ་བརྗོད་པར་བྱའོ། །སེམས་ཅན་སྡུག་བསྔལ་བ་ཡོངས་སུ་བསྐྱབ་པ་ཡང་དེ་ལ་བརྗོད་པར་བྱའོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཆོས་ཐམས་ཅད་ལ་དེ་བས་ཀྱང་ཤས་ཆེར་སེམས་སྐྱེ་བར་བྱ་བ་དང་། གནས་གང་ཐོས་ཀྱང་དེ་ལ་བདག་ཉིད་སྦྱོར་བར་བྱ་བ་དང་། བདག་ཉིད་གཞན་གྱི་དྲིང་འཇོག་པར་མི་འགྱུར་བར་བྱ་བའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམ་པར་
དགོད་པའོ། །ཀྱེ་རྒྱལ་བའི་སྲས་དག་དེ་ལ་ལས་དང་པོ་པའི་བྱང་ཆུབ་སེམས་དཔའ་རྣམ་པར་དགོད་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའ་ཐོག་མ་ཉིད་དུ་སེམས་ཅན་ཐམས་ཅད་ལ་རྣམ་པ་བཅུར་སེམས་ཉེ་བར་གཞོག་སྟེ། བཅུ་གང་ཞེ་ན། འདི་ལྟ་སྟེ། ཕན་པའི་སེམས་ཉེ་བར་གཞོག་གོ །སྙིང་བརྩེ་བའི་སེམས་དང་། བདེ་བའི་སེམས་དང་། གནས་པའི་སེམས་དང་། བྱམས་པའི་སེམས་དང་། ཕན་འདོགས་པའི་སེམས་དང་། ཡོངས་སུ་བསྲུང་བའི་སེམས་དང་། མཉམ་པའི་སེམས་དང་། སློབ་དཔོན་གྱི་སེམས་དང་། སྟོན་པའི་སེམས་ཉེ་བར་གཞོག་གོ །རྣམ་པ་བཅུ་པོ་དེ་དག་གིས་སེམས་ཅན་ཐམས་ཅད་ལ་སེམས་ཉེ་བར་གཞོག་སྟེ། ཀྱེ་རྒྱལ་བའི་སྲས་དག་འདི་ནི་ལས་དང་པོ་བའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་དེ་ལ་བྱང་ཆུབ་སེམས་དཔའ་ལས་དང་པོ་པ་དེ་ནི་ཐོག་མ་ཉིད་དུ་ཁ་ཏོན་ལ་ཡོངས་སུ་བསྐུལ་བར་བྱའོ། །མང་དུ་ཐོས་ནས་དབེན་པར་གནས་པ་ལ་ཡོངས་སུ་བསྐུལ་བར་བྱའོ། །རབ་ཏུ་དབེན་པར་གྱུར་ནས་དགེ་བའི་བཤེས་སུ་འགྱུར་བར་ཡོངས་སུ་བསྐུལ་བར་བྱའོ། །དགེ་བའི་བཤེས་སུ་གྱུར་ནས་ང་ལོ་བདེ་བ་ལ་ཡོངས་སུ་བསྐུལ་བར་བྱའོ། །ང་ལོ་བདེ་བར་གྱུར་ནས་དུས་ཤེས་ལ་ཡོངས་སུ་བསྐུལ་བར་བྱའོ། །དུས་ཤེས་ནས་མི་འཇིགས་པ་ལ་ཡོངས་སུ་བསྐུལ་བར་བྱའོ། །མི་འཇིགས་པར་གྱུར་ནས་དོན་ཤེས་པ་ལ་ཡོངས་སུ་བསྐུལ་བར་བྱའོ། །དོན་ཤེས་ནས་ཆོས་ཀྱི་རྗེས་སུ་འབྲང་བ་ལ་ཡོངས་སུ་བསྐུལ་བར་བྱའོ། །ཆོས་ཀྱི་རྗེས་སུ་འགྲོ་བར་གྱུར་ནས་རྨོངས་པ་མེད་པ་ལ་ཡོངས་སུ་བསྐུལ་བར་བྱའོ། །རྨོངས་པ་མེད་པར་གྱུར་ནས་རྣམ་པར་དགོད་པ་ལ་ཡོངས་སུ་བསྐུལ་བར་བྱའོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ལ་དེ་བས་ཀྱང་ཤས་ཆེར་སྙིང་རྗེ་ཆེན་པོ་མངོན་དུ་གཞོག་པར་བྱ་བ་དང་། གནས་གང་ཐོས་ཀྱང་དེ་ལ་བདག་ཉིད་སྦྱོར་བར་བྱ་བ་དང་། བདག་ཉིད་གཞན་གྱི་དྲིང་འཇོག་པར་མྱི་འགྱུར་བར་བྱ་བའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་ལས་དང་པོ་པའི་བྱང་ཆུབ་
སེམས་དཔའ་རྣམ་པར་དགོད་པའོ། །ཀྱེ་རྒྱལ་བའི་སྲས་དག་དེ་ལ་རྣལ་འབྱོར་ལ་སྤྱོད་པའི་བྱང་ཆུབ་སེམས་དཔའ་རྣམ་པར་དགོད་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའ་དམྱིགས་པའི་རྣམ་པ་བཅུས་ཆོས་ཐམས་ཅད་ལ་བརྩོན་པར་བྱེད་དེ། བཅུ་གང་ཞེ་ན། འདི་ལྟར་ཆོས་ཐམས་ཅད་མི་རྟག་པ་དང་། ཆོས་ཐམས་ཅད་སྡུག་བསྔལ་བ་དང་། ཆོས་ཐམས་ཅད་སྟོང་པ་ཉིད་དང་། ཆོས་ཐམས་ཅད་བདག་མྱེད་པ་དང་། ཆོས་ཐམས་ཅད་བྱེད་པ་མྱེད་པ་དང་། ཆོས་ཐམས་ཅད་མྱོང་བ་མྱེད་པ་དང་། ཆོས་ཐམས་ཅད་བརྡ་མྱེད་པ་དང་། ཆོས་ཐམས་ཅད་གནས་མྱེད་པ་དང་། ཆོས་ཐམས་ཅད་རྣམ་པར་རྟོག་པ་མྱེད་པ་དང་། ཆོས་ཐམས་ཅད་ཆེད་དུ་བྱེད་པ་མྱེད་པ་སྟེ། དམྱིགས་པའི་རྣམ་པ་བཅུ་པོ་དེ་དག་གིས་ཆོས་ཀྱི་རྗེས་སུ་འབྲང་བའི་ཚུལ་དུ་བརྩོན་པར་མཛད་དེ། ཀྱེ་རྒྱལ་བའི་སྲས་དག །འདི་ནི་རྣལ་འབྱོར་ལ་སྤྱོད་པའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག །དེ་ལྟར་རྣལ་འབྱོར་ལ་སྤྱོད་པའི་བྱང་ཆུབ་སེམས་དཔའ་དེ་ནི་སེམས་ཅན་གྱི་ཁམས་བརྟག་པ་ལ་ཡོངས་སུ་བསྐུལ་བར་བྱའོ། །ཆོས་ཀྱི་ཁམས་བརྟག་པ་ལ་ཡོངས་སུ་བསྐུལ་བར་བྱའོ། །འཇིག་རྟེན་གྱི་ཁམས་བརྟག་པ་ལ་ཡོངས་སུ་བསྐུལ་བར་བྱའོ། །སའི་ཁམས་བརྟག་པ་ལ་ཡོངས་སུ་བསྐུལ་བར་བྱའོ། །ཆུའི་ཁམས་བརྟག་པ་ལ་ཡོངས་སུ་བསྐུལ་བར་བྱའོ། །མྱེའི་ཁམས་བརྟག་པ་ལ་ཡོངས་སུ་བསྐུལ་བར་བྱའོ། །རླུང་གི་ཁམས་བརྟག་པ་ལ་ཡོངས་སུ་བསྐུལ་བར་བྱའོ། །འདོད་པའི་ཁམས་བརྟག་པ་ལ་ཡོངས་སུ་བསྐུལ་བར་བྱའོ། །གཟུགས་ཀྱི་ཁམས་བརྟག་པ་ལ་ཡོངས་སུ་བསྐུལ་བར་བྱའོ། །གཟུགས་མྱེད་པའི་ཁམས་བརྟག་པ་ལ་ཡོངས་སུ་བསྐུལ་བར་བྱའོ། །དེ་ཅིའི་ཕྱིར་ཞེ་ན། དེ་བས་ཀྱང་ཆོས་ལ་སྣང་བ་འབྱུང་བ་དང་། གནས་གང་ཐོས་ཀྱང་དེ་ལ་བདག་ཉིད་སྦྱོར་བར་བྱ་བ་དང་། བདག་ཉིད་གཞན་གྱི་དྲིང་འཇོག་པར་མི་འགྱུར་བའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་རྣལ་འབྱོར་ལ་སྤྱོད་པའི་བྱང་ཆུབ་སེམས་དཔའ་རྣམ་པར་དགོད་པའོ། །
ཀྱེ་རྒྱལ་བའི་སྲས་དག་དེ་ལ་ཆེར་སྐྱེས་པའི་བྱང་ཆུབ་སེམས་དཔའ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའ་འཕགས་པའི་གསུང་རབ་ལ་ཡོངས་སུ་སྨྱིན་པ་བཅུས་སྐྱེས་པ་ཡིན་ཏེ། བཅུ་གང་ཞེ་ན། འདི་ལྟར་ཕྱིར་མི་ལྡོག་པ་དང་། སངས་རྒྱས་ལ་ཤེས་པས་མོས་པའི་མཐར་ཕྱིན་པ་དང་། ཆོས་ངེས་པར་རྟོགས་པ་དང་། སེམས་ཅན་རྣམ་པར་བསྒོམས་པ་དང་། ཞིང་རྣམ་པར་བསྒོམས་པ་དང་། འཇིག་རྟེན་གྱི་ཁམས་རྣམ་པར་བསྒོམས་པ་དང་། ལས་རྣམ་པར་བསྒོམས་པ་དང་། རྣམ་པར་སྨྱིན་པ་རྣམ་པར་བསྒོམས་པ་དང་། འཁོར་བ་རྣམ་པར་བསྒོམས་པ་དང་། མྱ་ངན་ལས་འདས་པ་རྣམ་པར་བསྒོམས་པ་སྟེ། ཡོངས་སུ་སྨྱིན་པ་བཅུ་པོ་འདི་དག་གིས་འཕགས་པའི་གསུང་རབ་ལས་སྐྱེས་པ་ཡིན་ཏེ། ཀྱེ་རྒྱལ་བའི་སྲས་དག་འདི་ནི་ཚེར་སྐྱེས་པའི་བྱང་ཆུབ་སེམས་དཔའོ། །དེ་ལྟར་ཚེར་སྐྱེས་པའི་བྱང་ཆུབ་སེམས་དཔའ་དེ་ནི་འདས་པའི་སངས་རྒྱས་རྣམས་ཀྱི་ཆོས་རྣམ་པར་བསྒོམ་པ་ལ་ཡོངས་སུ་བསྐུལ་བར་བྱའོ། །མ་བྱོན་པའི་སངས་རྒྱས་ཀྱི་ཆོས་རྣམ་པར་བསྒོམ་པ་ལ་ཡོངས་སུ་བསྐུལ་བར་བྱའོ། །ད་ལྟར་བྱུང་བའི་སངས་རྒྱས་ཀྱི་ཆོས་རྣམ་པར་བསྒོམ་པ་ལ་ཡོངས་སུ་བསྐུལ་བར་བྱའོ། །འདས་པའི་སངས་རྒྱས་ཀྱི་ཆོས་ཡང་དག་པར་བསྒྲུབ་པ་རྣམ་པར་བསྒོམ་པ་ལ་ཡོངས་སུ་བསྐུལ་བར་བྱའོ། །མ་བྱོན་པའི་སངས་རྒྱས་ཀྱི་ཆོས་ཡང་དག་པར་བསྒྲུབ་པར་བྱ་བ་རྣམ་པར་བསྒོམ་པ་ལ་ཡོངས་སུ་བསྐུལ་བར་བྱའོ། །ད་ལྟར་བྱུང་བའི་སངས་རྒྱས་ཀྱི་ཆོས་ཡང་དག་པར་བསྒྲུབ་པ་རྣམ་པར་བསྒོམ་པ་ལ་ཡོངས་སུ་བསྐུལ་བར་བྱའོ། །འདས་པའི་སངས་རྒྱས་ཀྱི་ཆོས་ཡོངས་སུ་བསྒྲུབ་པ་རྣམ་པར་བསྒོམ་པ་ལ་ཡོངས་སུ་བསྐུལ་བར་བྱའོ། །མ་བྱོན་པའི་སངས་རྒྱས་ཀྱི་ཆོས་ཡོངས་སུ་བསྒྲུབ་པར་བྱ་བ་རྣམ་པར་བསྒོམ་པ་ལ་ཡོངས་སུ་བསྐུལ་བར་བྱའོ། །ད་ལྟར་བྱུང་བའི་སངས་རྒྱས་ཀྱི་ཆོས་ཡོངས་སུ་བསྒྲུབ་པ་རྣམ་པར་བསྒོམ་པ་ལ་ཡོངས་སུ་བསྐུལ་བར་བྱའོ། །སངས་རྒྱས་མཉམ་པ་ཉིད་རྣམ་པར་བསྒོམ་པ་ལ་ཡོངས་སུ་བསྐུལ་བར་བྱའོ། །དེ་ཅིའི་ཕྱིར་ཞེ་ན། དེ་དུས་གསུམ་མཉམ་པ་ཉིད་
ལ་དེ་བས་ཀྱང་སེམས་འཇུག་པར་བྱ་བ་དང་། གནས་གང་ཐོས་ཀྱང་དེ་ལ་བདག་ཉིད་སྦྱོར་བ་དང་། བདག་ཉིད་གཞན་གྱི་དྲིང་ལ་འཇོག་པར་མི་བྱ་བའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་ཚེར་སྐྱེས་པའི་བྱང་ཆུབ་སེམས་དཔའ་རྣམ་པར་དགོད་པའོ། །ཀྱེ་རྒྱལ་བའི་སྲས་དག་དེ་ལ་སྦྱོར་བ་ཕུན་སུམ་ཚོགས་པའི་བྱང་ཆུབ་སེམས་དཔའ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའ་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་རྩོམ་མོ། །སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་རྩོམ་མོ། །སེམས་ཅན་ཐམས་ཅད་བདེ་བར་བྱ་བའི་ཕྱིར་རྩོམ་མོ། །སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་རྩོམ་མོ། །སེམས་ཅན་ཐམས་ཅད་ཡོངས་སུ་སྨྱིན་པར་བྱ་བའི་ཕྱིར་རྩོམ་མོ། །སེམས་ཅན་ཐམས་ཅད་ཡོངས་སུ་དགྲོལ་བར་བྱ་བའི་ཕྱིར་རྩོམ་མོ། །སེམས་ཅན་ཐམས་ཅད་ལ་གནོད་པ་མྱེད་པར་བྱ་བའི་ཕྱིར་རྩོམ་མོ། །སེམས་ཅན་ཐམས་ཅད་དྲང་བའི་ཕྱིར་རྩོམ་མོ། །སེམས་ཅན་ཐམས་ཅད་དང་བར་བྱ་བའི་ཕྱིར་རྩོམ་མོ། །སེམས་ཅན་ཐམས་ཅད་གདུལ་བའི་ཕྱིར་རྩོམ་མོ། །སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བའི་ཕྱིར་རྩོམ་མོ། །ཀྱེ་རྒྱལ་བའི་སྲས་དག་འདི་ནི་སྦྱོར་བ་ཕུན་སུམ་ཚོགས་པའི་བྱང་ཆུབ་སེམས་དཔའ་སྟེ། སྦྱོར་བ་ཕུན་སུམ་ཚོགས་པའི་བྱང་ཆུབ་སེམས་དཔའ་དེ་ལ་ནི་སེམས་ཅན་མཐའ་ཡས་པ་བརྗོད་པར་བྱའོ། །སེམས་ཅན་ཚད་མེད་པ་བརྗོད་པར་བྱའོ། །སེམས་ཅན་གྲངས་མེད་པ་བརྗོད་པར་བྱའོ། །སེམས་ཅན་བསམ་གྱིས་མྱི་ཁྱབ་པ་བརྗོད་པར་བྱའོ། །སེམས་ཅན་གཟུགས་མྱེད་པ་བརྗོད་པར་བྱའོ། །སེམས་ཅན་དཔག་ཏུ་མྱེད་པ་བརྗོད་པར་བྱའོ། །སེམས་ཅན་སྟོང་པ་བརྗོད་པར་བྱའོ། །སེམས་ཅན་བྱེད་པ་མྱེད་པ་བརྗོད་པར་བྱའོ། །སེམས་ཅན་དངོས་པོ་མྱེད་པ་བརྗོད་པར་བྱའོ། །སེམས་ཅན་རང་བཞིན་མྱེད་པ་བརྗོད་པར་བྱའོ། །དེ་ཅིའི་ཕྱིར་ཞེ་ན། དེའི་སེམས་དེ་བས་ཀྱང་ཤས་ཆེར་མངོན་པར་ཞེན་པ་ལ་མི་གནས་པར་བྱ་བ་
དང་། གནས་གང་ཐོས་ཀྱང་དེ་ལ་བདག་ཉིད་སྦྱོར་བར་བྱ་བ་དང་། བདག་ཉིད་གཞན་གྱི་དྲིང་མྱི་འཇོག་པར་བྱ་བའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་སྦྱོར་བ་ཕུན་སུམ་ཚོགས་པའི་བྱང་ཆུབ་སེམས་དཔའ་རྣམ་པར་དགོད་པའོ། །ཀྱེ་རྒྱལ་བའི་སྲས་དག་དེ་ལ་བསམ་པ་ཕུན་སུམ་ཚོགས་པའི་བྱང་ཆུབ་སེམས་དཔའ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའ་ཆོས་བཅུ་ཉན་ན། བསམ་པ་ངེས་པ་རབ་ཏུ་འཐོབ་པ་ཡིན་ཏེ། བཅུ་གང་ཞེ་ན། འདི་ལྟར་སངས་རྒྱས་ལ་སྙན་པའམ། མི་སྙན་པར་བརྗོད་ཀྱང་སངས་རྒྱས་ཀྱི་ཆོས་ལ་བསམ་པ་ངེས་པ་ཡིན། ཆོས་ལ་སྙན་པའམ་མྱི་སྙན་པར་བརྗོད་ཀྱང་སངས་རྒྱས་ཀྱི་ཆོས་ལ་བསམ་པ་ངེས་པ་ཡིན། བྱང་ཆུབ་སེམས་དཔའ་ལ་སྙན་པའམ་མྱི་སྙན་པར་བརྗོད་ཀྱང་སངས་རྒྱས་ཀྱི་ཆོས་ལ་བསམ་པ་ངེས་པ་ཡིན། བྱང་ཆུབ་སེམས་དཔའི་སྤྱོད་པ་ལ་སྙན་པའམ་མྱི་སྙན་པར་བརྗོད་ཀྱང་སངས་རྒྱས་ཀྱི་ཆོས་ལ་བསམ་པ་ངེས་པ་ཡིན། སེམས་ཅན་གྱི་ཁམས་ཆུང་བ་དང་། སེམས་ཅན་གྱི་ཁམས་ཆེ་བ་བརྗོད་ཀྱང་སངས་རྒྱས་ཀྱི་ཆོས་ལ་བསམ་པ་ངེས་པ་ཡིན། སེམས་ཅན་གྱི་ཁམས་ཀུན་ནས་ཉོན་མོངས་པ་དང་། སེམས་ཅན་གྱི་ཁམས་ཀུན་ནས་ཉོན་མོངས་པ་མེད་པར་བརྗོད་ཀྱང་སངས་རྒྱས་ཀྱི་ཆོས་ལ་བསམ་པ་ངེས་པ་ཡིན། སེམས་ཅན་གྱི་ཁམས་སྐྱོ་བར་སླ་བ་དང་། སེམས་ཅན་གྱི་ཁམས་སྐྱོ་བར་དཀའ་བ་བརྗོད་ཀྱང་སངས་རྒྱས་ཀྱི་ཆོས་ལ་བསམ་པ་ངེས་པ་ཡིན། ཆོས་ཀྱི་དབྱིངས་ཆུང་བའམ། ཆོས་ཀྱི་དབྱིངས་ཆེ་བ་བརྗོད་ཀྱང་སངས་རྒྱས་ཀྱི་ཆོས་ལ་བསམ་པ་ངེས་པ་ཡིན། ཆོས་ཀྱི་དབྱིངས་འགྲུབ་པའམ། ཆོས་ཀྱི་དབྱིངས་འཇིག་པར་བརྗོད་ཀྱང་། སངས་རྒྱས་ཀྱི་ཆོས་ལ་བསམ་པ་ངེས་པ་ཡིན། ཆོས་ཀྱི་དབྱིངས་ཡོད་པའམ། ཆོས་ཀྱི་དབྱིངས་མེད་པར་བརྗོད་ཀྱང་། སངས་རྒྱས་ཀྱི་ཆོས་ལ་བསམ་པ་ངེས་པ་ཡིན། ཀྱེ་རྒྱལ་བའི་སྲས་དག་དེ་ནི་བྱང་ཆུབ་སེམས་དཔའ་བསམ་པ་ཕུན་སུམ་ཚོགས་པ་དག་སྟེ། དེ་ལྟར་བསམ་པ་ཕུན་སུམ་ཚོགས་པའི་བྱང་ཆུབ་སེམས་དཔའ་དེ་ལ་ཆོས་ལ་འཇུག་པ་བཅུ་བརྗོད་
པར་བྱ་སྟེ། བཅུ་གང་ཞེ་ན། འདི་ལྟར་ཆོས་ཐམས་ཅད་མཚན་མ་མེད་པ་དང་། ཆོས་ཐམས་ཅད་མཚན་ཉིད་མེད་པ་དང་། ཆོས་ཐམས་ཅད་དངོས་པོ་མེད་པ་དང་། ཆོས་ཐམས་ཅད་ཡོད་པ་མ་ཡིན་པ་དང་། ཆོས་ཐམས་ཅད་བརྫུན་པ་དང་། ཆོས་ཐམས་ཅད་དབེན་པ་དང་། ཆོས་ཐམས་ཅད་རང་བཞིན་མེད་པ་དང་། ཆོས་ཐམས་ཅད་སྒྱུ་མ་ལྟ་བུ་དང་། ཆོས་ཐམས་ཅད་རྨི་ལམ་ལྟ་བུ་དང་། ཆོས་ཐམས་ཅད་རྟོག་པ་མེད་པ་བརྗོད་པར་བྱའོ། །དེ་ཅིའི་ཕྱིར་ཞེ་ན། དེའི་བསམ་པ་དེ་བས་ཀྱང་ཤས་ཆེར་མི་འཕྲོགས་པ་ལ་རྣམ་པར་བསྒྲུབ་པར་བྱ་བ་དང་། གནས་གང་ཐོས་ཀྱང་བདག་ཉིད་དེ་ལ་སྦྱོར་བར་བྱ་བ་དང་། བདག་ཉིད་གཞན་གྱི་དྲིང་འཇོག་པར་མི་འགྱུར་བར་བྱ་བའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་བསམ་པ་ཕུན་སུམ་ཚོགས་པའི་བྱང་ཆུབ་སེམས་དཔའ་རྣམ་པར་དགོད་པའོ། །ཀྱེ་རྒྱལ་བའི་སྲས་དག་དེ་ལ་ཕྱིར་མྱི་ལྡོག་པའི་བྱང་ཆུབ་སེམས་དཔའ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའ་དམྱིགས་པ་བཅུ་ཉན་པའི་ཚེ་བརྟན་པ་རབ་ཏུ་འཐོབ་སྟེ། བཅུ་གང་ཞེ་ན། འདི་ལྟར་སངས་རྒྱས་ཡོད་ཅེ་འམ་སངས་རྒྱས་མྱེད་ཅེ་ན་ཡང་སངས་རྒྱས་ཀྱི་ཆོས་ལས་ཕྱིར་མྱི་ལྡོག་གོ །ཆོས་ཡོད་ཅེ་འམ་ཆོས་མྱེད་ཅེ་ན་ཡང་སངས་རྒྱས་ཀྱི་ཆོས་ལས་ཕྱིར་མྱི་ལྡོག་གོ །བྱང་ཆུབ་སེམས་དཔའི་སྤྱོད་པ་ཡོད་ཅེ་འམ། བྱང་ཆུབ་སེམས་དཔའི་སྤྱོད་པ་མྱེད་ཅེ་ན་ཡང་སངས་རྒྱས་ཀྱི་ཆོས་ལས་ཕྱིར་མྱི་ལྡོག་གོ །བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ལ་འབྱུང་ཞེ་འམ། བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ལ་མི་འབྱུང་ཞེ་ན་ཡང་། སངས་རྒྱས་ཀྱི་ཆོས་ལས་ཕྱིར་མི་ལྡོག་གོ །དེ་བཞིན་གཤེགས་པ་འདས་ཞེ་འམ། དེ་བཞིན་གཤེགས་པ་མ་འདས་ཞེ་ན་ཡང་། སངས་རྒྱས་ཀྱི་ཆོས་ལས་ཕྱིར་མྱི་ལྡོག་གོ །དེ་བཞིན་གཤེགས་པ་བྱོན་ཅེ་འམ། དེ་བཞིན་གཤེགས་པ་བྱོན་པ་མ་ཡིན་ཅེ་ན་ཡང་སངས་རྒྱས་ཀྱི་ཆོས་ལས་ཕྱིར་མྱི་ལྡོག་གོ །སངས་རྒྱས་ད་ལྟར་བྱུང་
ཞེ་འམ། སངས་རྒྱས་ད་ལྟར་བྱུང་བ་མ་ཡིན་ཞེ་ན་ཡང་སངས་རྒྱས་ཀྱི་ཆོས་ལས་ཕྱིར་མི་ལྡོག་གོ །སངས་རྒྱས་ཀྱི་ཡེ་ཤེས་ཟད་མྱི་ཤེས་སོ་ཞེ་འམ། སངས་རྒྱས་ཀྱི་ཡེ་ཤེས་ཟད་ཤེས་སོ་ཞེས་ན་ཡང་སངས་རྒྱས་ཀྱི་ཆོས་ལས་ཕྱིར་མྱི་ལྡོག་གོ །དུས་གསུམ་མཚན་ཉིད་གཅིག་ཅེ་འམ་དུས་གསུམ་མཚན་ཉིད་ཐ་དད་ཅེ་ན་ཡང་སངས་རྒྱས་ཀྱི་ཆོས་ལས་ཕྱིར་མི་ལྡོག་གོ །ཀྱེ་རྒྱལ་བའི་སྲས་དག་འདི་ནི་ཕྱིར་མི་ལྡོག་པའི་བྱང་ཆུབ་སེམས་དཔའ་སྟེ། དེ་ལྟར་ཕྱིར་མྱི་ལྡོག་པའི་བྱང་ཆུབ་སེམས་དཔའ་དེ་ལ་ནི་ཆོས་འབྱམ་ཀླས་པ་བཅུ་བརྗོད་པར་བྱ་སྟེ། བཅུ་གང་ཞེ་ན། འདི་ལྟ་སྟེ་གཅིག་ལས་རྣམ་པ་ཐ་དད་པར་འགྱུར་བ་བརྗོད་པར་བྱའོ། །མང་པོ་ལས་ཐ་མི་དད་པར་བརྗོད་པར་བྱའོ། །དོན་དང་མཐུན་པའི་ཡི་གེ་བརྗོད་པར་བྱའོ། །ཡི་གེ་དང་མཐུན་པའི་དོན་བརྗོད་པར་བྱའོ། །དངོས་པོ་ཡོད་པ་དང་མཉམ་པ་ཉིད་དུ་བརྗོད་པར་བྱའོ། །དངོས་པོ་ཡོད་པ་མེད་པ་དང་མཉམ་པ་ཉིད་དུ་བརྗོད་པར་བྱའོ། །མཚན་མ་མྱེད་པ་མཚན་མ་དང་མཉམ་པ་ཉིད་དུ་བརྗོད་པར་བྱའོ། །མཚན་མ་མཚན་མ་མྱེད་པ་དང་མཉམ་པ་ཉིད་དུ་བརྗོད་པར་བྱའོ། །མཚན་ཉིད་མྱེད་པ་མཚན་ཉིད་དང་མཉམ་པ་ཉིད་དུ་བརྗོད་པར་བྱའོ། །མཚན་ཉིད་མཚན་ཉིད་མེད་པ་དང་། མཉམ་པ་ཉིད་དུ་བརྗོད་པར་བྱའོ། །དེ་ཅིའི་ཕྱིར་ཞེ་ན། དེ་ཅི་ནས་ཀྱང་དེ་བས་ཀྱང་ཤས་ཆེར་མཁས་པ་ཐམས་ཅད་ལ་ཡོངས་སུ་བྱང་བ་འབྱུང་བ་དང་། གནས་གང་ཐོས་ཀྱང་བདག་ཉིད་དེ་ལ་སྦྱོར་བར་བྱ་བ་དང་། བདག་ཉིད་གཞན་གྱི་དྲིང་མི་འཇོག་པར་འགྱུར་བར་བྱ་བའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་ཕྱིར་མྱི་ལྡོག་པའི་བྱང་ཆུབ་སེམས་དཔའ་རྣམ་པར་དགོད་པའོ། །ཀྱེ་རྒྱལ་བའི་སྲས་དག་དེ་ལ་གཞོན་ནུར་གྱུར་པའི་བྱང་ཆུབ་སེམས་དཔའ་གང་ཞེ་ན། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའ་ལས་བཅུ་ལ་གནས་པ་ཡིན་ཏེ། བཅུ་གང་ཞེ་ན། འདི་ལྟར་ལུས་ཀྱི་སྤྱོད་པ་ཁ་ན་མ་ཐོ་བ་མེད་པ་ཡིན། ངག་གི་སྤྱོད་པ་ཁ་ན་མ་ཐོ་བ་མེད་པ་ཡིན། ཡིད་ཀྱི་སྤྱོད་པ་ཁ་ན་མ་ཐོ་བ་མེད་པ་ཡིན།
སེམས་བསྐྱེད་པ་ཙམ་གྱིས་སྐྱེ་བ་བསྒྲུབ་པ་ཡིན། སེམས་ཅན་གཞན་གྱི་བསམ་པ་ཤེས་པ་ཡིན། གང་ཟག་གཞན་གྱི་མོས་པ་རྟོགས་པ་ཡིན། སེམས་ཅན་གྱི་ཁམས་ཐ་དད་པ་རབ་ཏུ་ཤེས་པ་ཡིན། ལས་ཀྱི་བྱིན་གྱི་རླབས་ཐ་དད་པ་རབ་ཏུ་རྟོགས་པ་ཡིན། འཇིག་རྟེན་གྱི་ཁམས་འགྲུབ་པ་དང་། འཇིག་པ་ཡོངས་སུ་འཇལ་བ་ཡིན། གར་དགའ་བར་འགྲོ་བ་ལ་མྱུར་བ་ཡིན། ཀྱེ་རྒྱལ་བའི་སྲས་དག །འདི་ནི་གཞོན་ནུར་གྱུར་པའི་བྱང་ཆུབ་སེམས་དཔའ་སྟེ། ཀྱེ་རྒྱལ་བའི་སྲས་དག་དེ་ལྟར་གཞོན་ནུར་གྱུར་པའི་བྱང་ཆུབ་སེམས་དཔའ་དེ་ལ་ནི་ཆོས་མངོན་པར་བསྒྲུབ་པ་བཅུ་བརྗོད་པར་བྱའོ། །བཅུ་གང་ཞེ་ན་འདི་ལྟ་སྟེ། སངས་རྒྱས་ཀྱི་ཞིང་ཡོངས་སུ་ཤེས་པ་བརྗོད་པར་བྱའོ། །སངས་རྒྱས་ཀྱི་ཞིང་རབ་ཏུ་བསྐྱེད་པ་བརྗོད་པར་བྱའོ། །སངས་རྒྱས་ཀྱི་ཞིང་གི་བྱིན་གྱི་རླབས་བརྗོད་པར་བྱའོ། །སངས་རྒྱས་ཀྱི་ཞིང་དུ་རྣམ་པར་རྒྱུ་བ་བརྗོད་པར་བྱའོ། །སངས་རྒྱས་ཀྱི་ཞིང་ཡོངས་སུ་གནན་པ་བརྗོད་པར་བྱའོ། །འཇིག་རྟེན་གྱི་ཁམས་གྲངས་མེད་པར་འགྲོ་བ་བརྗོད་པར་བྱའོ། །ཆོས་གྲངས་མྱེད་པ་ཡོངས་སུ་དྲི་བ་བརྗོད་པར་བྱའོ། །ཡིད་ཀྱི་རང་བཞིན་གྱི་ལུས་མངོན་པར་བསྒྲུབ་པ་བརྗོད་པར་བྱའོ། །དབྱངས་ཀྱི་སྦྱོར་བ་རབ་ཏུ་དགྱེ་བ་བརྗོད་པར་བྱའོ། །སེམས་བསྐྱེད་པ་གཅིག་ལས་སངས་རྒྱས་གྲངས་མེད་པ་བསྙེན་བཀུར་བར་བྱ་བ་བརྗོད་པར་བྱའོ། །དེ་ཅིའི་ཕྱིར་ཞེ་ན། དེ་བས་ཀྱང་ཤས་ཆེར་ཆོས་ཐམས་ཅད་ལ་མངོན་པར་བསྒྲུབ་པའི་མཁས་པ་འབྱུང་བར་བྱ་བ་དང་། གནས་གང་ཐོས་ཀྱང་དེ་ལ་བདག་ཉིད་སྦྱོར་བར་བྱ་བ་དང་། བདག་ཉིད་གཞན་གྱི་དྲིང་འཇོག་པར་མི་འགྱུར་བར་བྱ་བའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་གཞོན་ནུར་གྱུར་པའི་བྱང་ཆུབ་སེམས་དཔའ་རྣམ་པར་དགོད་པའོ། །ཀྱེ་རྒྱལ་བའི་སྲས་དག་རྒྱལ་ཚབ་ཀྱི་བྱང་ཆུབ་སེམས་དཔའ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའི་ཆོས་བཅུ་རྟོགས་པར་བྱ་བ་ལ་མཁས་པ་ཡིན་ཏེ། བཅུ་གང་ཞེ་ན། འདི་ལྟར་སེམས་ཅན་གྱི་སྐྱེ་བ་རྟོགས་པར་བྱ་བ་ལ་མཁས་པ་ཡིན།
ཉོན་མོངས་པའི་རྒྱུད་རྟོགས་པར་བྱ་བ་ལ་མཁས་པ་ཡིན། བག་ཆགས་ཀྱི་མཚམས་འབྲེལ་བ་རྟོགས་པར་བྱ་བ་ལ་མཁས་པ་ཡིན། སྤྱོད་ཡུལ་རྟོགས་པར་བྱ་བ་ལ་མཁས་པ་ཡིན། ཆོས་སྣ་ཚོགས་རྟོགས་པར་བྱ་བ་ལ་མཁས་པ་ཡིན། སྤྱད་པ་རྟོགས་པར་བྱ་བ་ལ་མཁས་པ་ཡིན། འཇིག་རྟེན་གྱི་ཁམས་རྣམ་པར་ཕྱེ་བ་རྟོགས་པར་བྱ་བ་ལ་མཁས་པ་ཡིན། སྔོན་གྱི་མཐའ་དང་ཕྱི་མའི་མཐའ་ཤེས་པར་རྟོགས་པར་བྱ་བ་ལ་མཁས་པ་ཡིན། འཇིག་རྟེན་གྱི་ཀུན་རྫོབ་ཀྱི་བདེན་པ་བརྟག་པ་རྟོགས་པར་བྱ་བ་ལ་མཁས་པ་ཡིན། དོན་དམ་པའི་བདེན་པ་བརྟག་པ་རྟོགས་པར་བྱ་བ་ལ་མཁས་པ་ཡིན། ཀྱེ་རྒྱལ་བའི་སྲས་དག་འདི་ནི་རྒྱལ་ཚབ་ཀྱི་བྱང་ཆུབ་སེམས་དཔའ་སྟེ། བྱང་ཆུབ་སེམས་དཔའ་རྒྱལ་ཚབ་དེ་ལ་ནི་གནས་བཅུ་བརྗོད་པར་བྱའོ། །བཅུ་གང་ཞེ་ན། འདི་ལྟ་སྟེ། རྒྱལ་པོའི་གནས་ལ་མཁས་པ་བརྗོད་པར་བྱའོ། །རྒྱལ་པོའི་གནས་ཀྱི་ཚུལ་བརྗོད་པར་བྱའོ། །རྒྱལ་པོའི་གནས་སུ་གནས་པ་བརྗོད་པར་བྱའོ། །རྒྱལ་པོའི་གནས་སུ་འགྲོ་བ་བརྗོད་པར་བྱའོ། །རྒྱལ་པོའི་གནས་སུ་སྤྱོད་པ་བརྗོད་པར་བྱའོ། །ཆོས་ཀྱི་རྒྱལ་པོར་དབང་བསྐུར་བ་བརྗོད་པར་བྱའོ། །ཆོས་ཀྱི་རྒྱལ་པོའི་བྱིན་བརྗོད་པར་བྱའོ། །ཆོས་ཀྱི་རྒྱལ་པོའི་མཐུ་བརྗོད་པར་བྱའོ། །ཆོས་ཀྱི་རྒྱལ་སྲིད་ལ་གནས་པ་བརྗོད་པར་བྱའོ། །ཆོས་ཀྱི་རྒྱལ་པོའི་བསྔགས་པ་བརྗོད་པར་བྱའོ། །དེ་ཅིའི་ཕྱིར་ཞེ་ན། ཅི་ནས་ཀྱང་དེའི་སེམས་བསྒྲིབས་པ་མེད་པ་མངོན་པར་བསྒྲུབ་པ་ལ་དེ་བས་ཀྱང་ཤས་ཆེར་གནས་པར་བྱ་བ་དང་། གནས་གང་ཐོས་ཀྱང་བདག་ཉིད་དེ་ལ་སྦྱོར་བར་བྱ་བ་དང་། བདག་ཉིད་གཞན་གྱི་དྲིང་འཇོག་པར་མི་བྱ་བའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་རྒྱལ་ཚབ་ཀྱི་བྱང་ཆུབ་སེམས་དཔའ་རྣམ་པར་དགོད་པའོ། །ཀྱེ་རྒྱལ་བའི་སྲས་དག་དེ་ལ་དབང་བསྐུར་བའི་བྱང་ཆུབ་སེམས་དཔའ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའི་ཡེ་ཤེས་ལ་རྣམ་པར་སྤྱོད་པ་བཅུ་དང་ལྡན་པ་ཡིན་ཏེ། བཅུ་གང་ཞེ་ན། འདི་ལྟར་འཇིག་རྟེན་གྱི་ཁམས་
གྲངས་མེད་པ་ཡོངས་སུ་བསྐྱེད་པའི་སེམས་མང་བ་ཡིན། འཇིག་རྟེན་གྱི་ཁམས་གྲངས་མེད་པ་སྣང་བར་བྱ་བའི་སེམས་མང་བ་ཡིན། འཇིག་རྟེན་གྱི་ཁམས་གྲངས་མེད་པ་བྱིན་གྱིས་བརླབ་པའི་སེམས་མང་བ་ཡིན། འཇིག་རྟེན་གྱི་ཁམས་གྲངས་མེད་པ་འདའ་བར་བྱ་བའི་སེམས་མང་བ་ཡིན། འཇིག་རྟེན་གྱི་ཁམས་གྲངས་མེད་པ་ཡོངས་སུ་སྦྱང་བའི་སེམས་མང་བ་ཡིན། སེམས་ཅན་གྲངས་མེད་པ་རྣམ་པར་དམིགས་པར་བྱ་བའི་སེམས་མང་བ་ཡིན། སེམས་ཅན་གྲངས་མེད་པ་རྣམ་པར་བརྟག་པའི་སེམས་མང་བ་ཡིན། སེམས་ཅན་གྲངས་མྱེད་པའི་དབང་པོ་རྟོགས་པར་བྱ་བའི་སེམས་མང་བ་ཡིན། སེམས་ཅན་གྲངས་མེད་པ་ཡོངས་སུ་གཟུང་བའི་སེམས་མང་བ་ཡིན། སེམས་ཅན་གྲངས་མེད་པ་གདུལ་བའི་སེམས་མང་བ་ཡིན་ཏེ། དེའི་ལུས་ནི་བྱང་ཆུབ་སེམས་དཔའ་རྒྱལ་ཚབ་ལ་གནས་པའི་བར་གྱིས་ཀྱང་ཤེས་པར་མྱི་ནུས་ཏེ་ལུས་ཀྱི་ལས་ཤེས་པར་མྱི་ནུས་སོ། །རྫུ་འཕྲུལ་ཤེས་པར་མྱི་ནུས་སོ། །རྫུ་འཕྲུལ་གྱི་རྣམ་པར་འཕྲུལ་པ་ཤེས་པར་མྱི་ནུས་སོ། །འདས་པ་ལྟ་བ་འམ་ཤེས་པར་མི་ནུས་སོ། །མ་འོངས་པ་ལྟ་བ་འམ་ཤེས་པར་མི་ནུས་སོ། །ད་ལྟར་བྱུང་བ་ལྟ་བའམ་ཤེས་པར་མི་ནུས་སོ། །ཞིང་མངོན་པར་འདུ་བྱེད་པ་ཤེས་པར་མི་ནུས་སོ། །སེམས་ཀྱི་ཡུལ་ཤེས་པར་མི་ནུས་སོ། །སེམས་ཀྱི་སྤྱོད་ཡུལ་ཡང་བྱང་ཆུབ་སེམས་དཔའ་རྒྱལ་ཚབ་ལ་གནས་པའི་བར་གྱིས་ཤེས་པར་མི་ནུས་ཏེ། ཀྱེ་རྒྱལ་བའི་སྲས་དག་འདི་ནི་དབང་བསྐུར་བའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་བྱང་ཆུབ་སེམས་དཔའ་དབང་བསྐུར་བ་དེ་ལ་ནི། སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ལ་འཇུག་པ་བཅུ་བཀའ་སྩལ་ཏེ། བཅུ་གང་ཞེ་ན། འདི་ལྟར་དུས་གསུམ་གྱི་ཡེ་ཤེས་བརྗོད་པ་མཛད་དོ། །སངས་རྒྱས་ཀྱི་ཆོས་ཀྱི་ཡེ་ཤེས་བརྗོད་པ་མཛད་དོ། །ཆོས་ཀྱི་དབྱིངས་ཆགས་པ་མེད་པ་བརྗོད་པ་མཛད་དོ། །ཆོས་ཀྱི་དབྱིངས་མཐའ་དང་དབུས་མེད་པ་བརྗོད་པ་མཛད་དོ། །འཇིག་རྟེན་གྱི་ཁམས་ཐམས་ཅད་རྒྱས་པར་དགང་བ་བརྗོད་པ་མཛད་དོ། །འཇིག་རྟེན་གྱི་ཁམས་ཐམས་ཅད་སྣང་བར་བྱ་བ་བརྗོད་པ་མཛད་དོ། །འཇིག་རྟེན་གྱི་ཁམས་ཐམས་
ཅད་བྱིན་གྱིས་བརླབ་པ་བརྗོད་པ་མཛད་དོ། །སེམས་ཅན་ཐམས་ཅད་ཡོངས་སུ་ཤེས་པའི་ཡེ་ཤེས་བརྗོད་པ་མཛད་དོ། །ཆོས་ཐམས་ཅད་ཡོངས་སུ་ཤེས་པའི་ཡེ་ཤེས་བརྗོད་པ་མཛད་དོ། །སངས་རྒྱས་མཐའ་ཡས་པ་བརྗོད་པ་མཛད་དོ། །དེ་ཅིའི་ཕྱིར་ཞེ་ན། དེ་ཅི་ནས་ཀྱང་དེའི་སེམས་རྣམ་པ་ཐམས་ཅད་མཁྱེན་པ་ཉིད་དུ་དེ་བས་ཀྱང་ཤས་ཆེར་གནས་པར་བྱ་བ་དང་། གནས་གང་ཐོས་ཀྱང་བདག་ཉིད་དེ་ལ་སྦྱོར་བར་བྱ་བ་དང་། སངས་རྒྱས་ཀྱི་ཆོས་ཐམས་ཅད་ལ་གཞན་གྱི་དྲིང་མྱི་འཇོག་པར་བྱ་བའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་རྒྱལ་ཚབ་ཀྱི་བྱང་ཆུབ་སེམས་དཔའ་རྣམ་པར་དགོད་པའོ། །དེ་ནས་དེའི་ཚེ་སངས་རྒྱས་ཀྱི་མཐུས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་རྣམ་པ་དྲུག་དུ་གཡོས་སོ། །གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ་རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ །རབ་ཏུ་ལྡེག་གོ །ཀུན་ཏུ་ལྡེག་གོ །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར་རབ་ཏུ་འུར་འུར་ཀུན་ཏུ་འུར་འུར་རོ། །ཤིག་ཤིག་རབ་ཏུ་ཤིག་ཤིག །ཀུན་ཏུ་ཤིག་ཤིག་གོ །སངས་རྒྱས་ཀྱི་མཐུ་དང་ཆོས་ཉིད་ཐོབ་པས། ལྷ་རྫས་ཀྱི་མེ་ཏོག་གི་སྤྲིན་གྱི་ཆར་མངོན་པར་བབ་པོ། །ལྷ་རྫས་ཀྱི་ཕྱེ་མའི་སྤྲིན་གྱི་ཆར་མངོན་པར་བབ་པོ། །ལྷ་རྫས་ཀྱི་ཕྲེང་བའི་སྤྲིན་གྱི་ཆར་མངོན་པར་བབ་པོ། །ལྷ་རྫས་ཀྱི་སྤོས་ཀྱི་སྤྲིན་གྱི་ཆར་མངོན་པར་བབ་པོ། །ལྷ་རྫས་ཀྱི་གོས་ཀྱི་སྤྲིན་གྱི་ཆར་མངོན་པར་བབ་པོ། །ལྷ་རྫས་ཀྱི་རིན་པོ་ཆེའི་སྤྲིན་གྱི་ཆར་མངོན་པར་བབ་པོ། །ལྷ་རྫས་ཀྱི་ལྷབ་ལྷུབ་ཀྱི་སྤྲིན་གྱི་ཆར་མངོན་པར་བབ་པོ། །ལྷ་རྫས་ཀྱི་རོལ་མོའི་སྒྲ་མངོན་པར་བྱུང་བར་གྱུར་ཏོ། །ལྷ་རྫས་ཀྱི་སྣང་བ་རབ་ཏུ་བྱུང་བར་གྱུར་ཏོ། །ལྷ་རྫས་ཀྱི་ང་རོ་ཤིན་ཏུ་གྲགས་པར་གྱུར་ཏོ། །
གླིང་བཞི་པ་འདིའི་རི་རབ་ཀྱི་རྩེ་མོར་ལྷའི་དབང་པོའི་ཁང་པ་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་ཡང་ཕྱོགས་བཅུ་རྒྱས་པར་བྱུང་སྟེ། ཆོས་བསྟན་པ་འདི་ཡང་ཐམས་ཅད་དུ་བྱུང་ངོ་། །སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་མང་པོ་ལྷགས་ཏེ། ཕྱོགས་བཅུ་རྒྱས་པར་བཀང་ནས་འདི་སྐད་ཅེས་འཛེར་ཏོ། །ཀྱེ་རྒྱལ་བའི་སྲས་དག་དེ་ལྟར་ཁྱོད་བྱང་ཆུབ་སེམས་དཔའ་རྣམས་ཀྱི་ཆོས་ཉིད་དེ་ལྟ་བུ་སྟོན་པ་ལེགས་སོ། །ལེགས་སོ། །ཀྱེ་རྒྱལ་བའི་སྲས་དག་བདག་ཅག་ཀུན་ཀྱང་མིང་ཆོས་ཀྱི་བློ་གྲོས་ཤེས་བྱ་བ་ཤ་སྟག་སྟེ། དེ་བཞིན་གཤེགས་པའི་མཚན་ཆོས་ཀྱི་བློ་གྲོས་ཤེས་བྱ་བ་ཤ་སྟག་གི་ཞམ་རིང་འཇིག་རྟེན་གྱི་ཁམས་ཆོས་ཀྱི་སྤྲིན་ཅེས་བྱ་བ་ཤ་སྟག་ནས་འདིར་ཕྱིན་ཏེ། ཐམས་ཅད་ན་ཡང་སངས་རྒྱས་ཀྱི་བྱིན་གྱི་རླབས་ཀྱིས་ཆོས་བསྟན་པ་འདི་ཉིད་འཁོར་གྱི་རྣམ་པ་འདི་ལྟ་བུ་དག་ཏུ་ཚིག་འདི་དག་དང་། ཡི་གེ་འདི་དག་དང་། ཁོང་དུ་ཆུད་པར་བྱ་བ་འདི་དག་གིས་དོན་འདི་ཉིད་མངོན་པར་སྨོས་ཤིང་ལྷག་ཆད་མྱེད་པར་སྟོན་ཏེ་ཀྱེ་རྒྱལ་བའི་སྲས་དག་དེ་ལྟར་བདག་ཅག་དབང་དུ་གྱུར་པ་ཤ་སྟག་སངས་རྒྱས་ཀྱི་བྱིན་གྱི་རླབས་ཀྱིས་འདིར་ཕྱིན་ཏོ། །ཇི་ལྟར་བདག་ཅག་འཇིག་རྟེན་གྱི་ཁམས་འདིར་ཕྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་འཇིག་རྟེན་གྱི་ཁམས་རེ་རེའི་གླིང་བཞི་པ་དག་གི་རི་རབ་ཀྱི་རྩེ་མོ་ལྷའི་དབང་པོའི་ཁང་པ་དག་ཏུ་ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་མང་པོ་ཕྱིན་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་ཕྱོགས་བཅུར་རྣམ་པར་བལྟས་ཏེ། ཆོས་ཀྱི་དབྱིངས་ལ་རྣམ་པར་བལྟས་ནས་སངས་རྒྱས་ཀྱི་བྱིན་གྱི་རླབས་ཀྱིས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རང་བྱུང་སངས་རྒྱས་ཐུགས་མཆོག་རབ་མངའ་བ། །སྐུ་གཟུགས་སྐུ་མདོག་ཤིན་ཏུ་མཛེས་ལྡན་ཞིང་། །
མཚན་བཟང་ཐུབ་པ་མེད་པ་མཐོང་གྱུར་ནས། །བྱང་ཆུབ་དོན་དུ་བསྟན་པ་སེམས་བསྒྱུར་རོ། །དཔེ་ཟླ་མེད་པའི་རྫུ་འཕྲུལ་སྟོབས་ཆེན་དང་། །ཡོངས་སུ་བསྟན་དང་རྗེས་སུ་བསྟན་མཐོང་སྟེ། །སྲིད་ལམ་ཀུན་ཏུ་སྡུག་བསྔལ་གྱུར་མཐོང་ཞིང་། །བྱང་ཆུབ་དོན་དུ་བསྟན་པ་སེམས་བསྒྱུར་རོ། །དེ་བཞིན་གཤེགས་པ་ཡོན་ཏན་ཀུན་མངའ་བ། །ཀུན་ཏུ་བཟང་པོའི་ཡོན་ཏན་ཐོས་གྱུར་ཅིང་། །ནམ་མཁའ་དབྱིངས་མཉམ་རྟོག་པ་མྱེད་པ་ཡི། །བརྟན་པ་བྱང་ཆུབ་དོན་དུ་སེམས་བསྐྱེད་དོ། །ཁམས་གསུམ་ཀུན་ན་གནས་ནི་འདི་དག་ཡིན། །གནས་མྱིན་རང་བཞིན་དག་ཀྱང་འདི་ཡིན་ཞེས། །མ་ནོར་དངོས་པོ་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྐྱེད་དོ། །འདས་དང་མ་འོངས་ད་ལྟར་བྱུང་བ་དང་། །དཀར་ནག་ལས་རྣམས་ཇི་སྙེད་ཡོད་དེ་དག །དེ་ཀུན་མཉམ་ཉིད་རྗེས་སུ་རྟོགས་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྐྱེད་དོ། །བསམ་གཏན་ཏིང་འཛིན་རྣམ་པར་ཐར་པ་དང་། །མཉམ་གཞག་དེ་བཞིན་ཀུན་ནས་ཉོན་མོངས་དང་། །རྣམ་བྱང་རྣམ་པར་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྐྱེད་དོ། །སེམས་ཅན་ཀུན་གྱི་དབང་པོ་ཅི་འདྲ་དང་། །བརྩོན་འགྲུས་སྟོབས་དང་དེ་བཞིན་ཅི་འདྲ་བ། །རྣམ་པ་སྣ་ཚོགས་དེ་དག་རྟོགས་བྱའི་ཕྱིར། །བྱང་ཆུབ་དོན་དུ་བརྟན་པ་སེམས་བསྒྱུར་རོ། །སེམས་ཅན་ཀུན་གྱི་མོས་པ་ཅི་འདྲ་དང་། །འཇིག་རྟེན་ཀུན་གྱི་བསམ་པ་སྣ་ཚོགས་རྣམས། །རྣམ་པ་ཀུན་ཏུ་ཐམས་ཅད་རྟོགས་བྱའི་ཕྱིར། །བྱང་ཆུབ་དོན་དུ་བརྟན་པ་སེམས་བསྒྱུར་རོ། ། འགྲོ་བ་རྣམས་ཀྱི་སྣ་ཚོགས་ཁམས་རྣམས་དང་། །འཇིག་རྟེན་ཀུན་གྱི་ཁམས་མང་དུ་མ་དང་། །ཁམས་ཀྱི་རང་བཞིན་རྟོགས་པར་བྱ་བའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཀུན་ཏུ་འགྲོ་བའི་སེམས་རྣམས་ཅི་འདྲ་དང་། །ལམ་རྣམས་ཅི་འདྲ་འདུས་བྱས་འདི་དག་གི །མ་ནོར་རང་བཞིན་རྟོགས་པར་བྱ་བའི་ཕྱིར། །བྱང་ཆུབ་དོན་དུ་
བརྟན་པ་སེམས་བསྒྱུར་རོ། །ཞིང་རྣམས་ཐམས་ཅད་མཐོང་བར་བྱ་བ་དང་། །སེམས་ཅན་འདི་དག་ཇི་ལྟར་འཁོར་གྱུར་ཅེས། །ཆགས་མེད་མིག་ནི་རྣམ་པར་དག་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །འདས་པའི་དུས་སུ་གང་རྣམས་ཅི་བྱུང་ཡང་། །མཚན་ཉིད་གང་ཡིན་ཅི་འདྲ་ཅི་དགོངས་པ། །སྔོན་གྱི་གནས་རྣམས་རྗེས་སུ་རྟོགས་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །འཇིག་རྟེན་ཀུན་ན་ཀུན་སྦྱོར་ཇི་སྙེད་དང་། །དོན་གྱི་མཚམས་འབྲེལ་བག་ཆགས་དེ་བཞིན་ཏེ། །ཉོན་མོངས་ཟད་བྱ་མཐར་ཐུག་ཤེས་བྱའི་ཕྱིར། །བྱང་ཆུབ་དོན་དུ་བརྟན་པ་སེམས་བསྒྱུར་རོ། །འགྲོ་བ་རྣམས་ཀྱི་ཐ་སྙད་གདགས་པ་དང་། །ཚིག་ལམ་སྐད་དུ་བརྗོད་པ་ཇི་སྙེད་པ། །བརྡ་ཡི་བདེན་པ་རྗེས་སུ་རྟོགས་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཆོས་རྣམས་ཇི་ལྟར་བརྗོད་དུ་མྱེད་པ་དང་། །སྟོང་པ་བྱེད་མྱེད་རང་བཞིན་དབེན་པའི་རྣམས། །དེ་དག་དངོས་ཉིད་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཞིང་རྣམས་ཐམས་ཅད་རབ་ཏུ་བསྐྱོད་པ་དང་། །རྒྱ་མཚོ་ཐམས་ཅད་ཡོངས་སུ་བསྐྱམ་བྱ་བར། །དེ་བཞིན་གཤེགས་པའི་རྫུ་འཕྲུལ་རྟོགས་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །སྤུ་རྩེ་རེ་རེའི་སྒོ་ནས་འོད་གཟེར་རྣམས། །ཕྱོགས་བཅུ་ཀུན་ཏུ་ཇི་ལྟར་དགྱེ་བྱ་བ། །དེ་འདྲའི་རང་བཞིན་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཞིང་རྣམས་བརྗོད་མེད་བསམ་གྱིས་མི་ཁྱབ་པ། །བདག་གི་ལག་པའི་མཐིལ་དུ་གཞག་བྱ་བར། །སྒྱུ་མའི་རྣམ་པ་ཐམས་ཅད་རྟོགས་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཇི་ལྟར་ཞིང་གི་སེམས་ཅན་ཡངས་པ་ཀུན། །གནོད་པ་མྱེད་པར་སྐྲ་རྩེར་གཞོག་བྱེད་པར། །སྲོག་མྱེད་ཆོས་རྣམས་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །རྒྱ་མཚོ་ཐམས་ཅད་ཆུ་ཆེན་གང་རྒྱས་པ། །སྐྲ་རྩེས་
བླངས་ཤིང་ཀུན་ཏུ་དོར་བྱ་བར། །མཐར་ཐུག་མ་ལུས་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཇི་ལྟར་བསམ་གྱིས་མྱི་ཁྱབ་ཞིང་གི་རྣམས། །ཕྲ་རབ་རྡུལ་བླགས་མ་ལུས་བགྲང་བྱ་བར། །རྡུལ་ཕྲན་གྲངས་རྣམས་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །འདས་པའི་བསྐལ་པ་དེ་བཞིན་མ་འོངས་དང་། །འཇིག་རྟེན་ཚིག་ཅིང་འགྲུབ་པ་དེ་བཞིན་ཏེ། །བསྐལ་པ་ཟད་ཅིང་གནས་པ་ཤེས་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །དུས་གསུམ་འབྱུང་བའི་དེ་བཞིན་གཤེགས་པ་དང་། །རང་རྒྱལ་དང་ནི་ཉན་ཐོས་ཐམས་ཅད་ཀྱི། །ཆོས་ཀྱི་རང་བཞིན་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །བརྗོད་དུ་མེད་པའི་འཇིག་རྟེན་ཁམས་ཀྱི་རྣམས། །སྐྲའི་ཉག་མས་བཅིངས་ཤིང་ཚད་གདབ་པར། །དངོས་པོའི་རང་བཞིན་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །བརྗོད་མྱེད་འཁོར་ཡུག་ཤིན་ཏུ་ཡངས་པ་དག །བ་སྤུའི་ཁུང་བུ་ཇི་ལྟར་གཟུང་བྱ་བར། །ཕྲ་དང་ཡངས་པ་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །མ་ལུས་འཇིག་རྟེན་ཁམས་རྣམས་ཐམས་ཅད་དུ། །ཇི་ལྟར་དབྱངས་གཅིག་ཀུན་ཏུ་གྲགས་འགྱུར་བར། །དབྱངས་ཀྱི་ཡན་ལག་རྣམ་དག་ཤེས་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །སེམས་ཅན་ཀུན་གྱི་སྒྲ་སྐད་ཇི་སྙེད་པ། །དབྱངས་གཅིག་བརྗོད་པས་ཇི་ལྟར་བརྗོད་བྱ་བར། །སྒྲ་ཡི་རང་བཞིན་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །འཇིག་རྟེན་ཐམས་ཅད་མ་ལུས་ཤེས་བྱེད་ཅིང་། །ཇི་ལྟར་འགྲོ་ཀུན་ཞི་ཞེས་སྟོན་འགྱུར་བར། །ལྕེ་ཡངས་ཁོང་དུ་ཆུད་པར་བྱ་བའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཞིང་རྣམས་ཐམས་ཅད་རབ་ཏུ་ཚིག་པ་དང་། །ཀུན་ནས་གནས་པ་མ་ལུས་
མཐོང་འགྱུར་བར། །རྣམ་རྟོག་ཆོས་ནི་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཞིང་རྣམས་ཐམས་ཅད་སངས་རྒྱས་གཅིག་བཞིན་དུ། །དེ་བཞིན་གཤེགས་པས་ཇི་ལྟར་རྒྱས་བྱ་བར། །རང་བྱུང་ཆོས་ནི་ཇི་ལྟར་རྟོགས་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཞིང་རྣམས་ཐམས་ཅད་རྡུལ་མཆོག་ཕྲ་བླགས་པ། །དེ་སྙེད་ལུས་སུ་ཇི་ལྟར་སྤྲུལ་བྱ་བར། །ཐམས་ཅད་ཡིད་ཀྱིས་དངོས་སུ་ཤེས་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཀུན་གཟིགས་འདས་པ་ཇི་སྙེད་བྱུང་བ་དང་། །མ་བྱོན་སངས་རྒྱས་དེ་བཞིན་བཞུགས་པ་རྣམས། །སྐད་ཅིག་སེམས་ཀྱིས་ཐམས་ཅད་རྟོགས་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཚིག་གཅིག་བརྩམས་ཏེ་བརྗོད་ཅིང་བཤད་བྱས་ཀྱང་། །བསྐལ་པ་བརྗོད་མྱེད་ཐམས་ཅད་ཟད་འགྱུར་བར། །ཆོས་ཀྱི་རྣམ་གྲངས་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ཕྱོགས་བཅུ་ཀུན་གྱི་འཇིག་རྟེན་མ་ལུས་རྣམས། །འབྱུང་ཞིང་ཇི་ལྟར་རྗེས་སུ་འབྲང་བ་དག །སེམས་ཀྱི་རང་བཞིན་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །ཕྱོགས་ཀུན་སྤྱོད་ཚེ་ཆགས་པར་མྱི་འགྱུར་བར། །དུས་གསུམ་སྟོང་པ་ཁོང་དུ་ཆུད་བྱའི་ཕྱིར། །བརྟན་པ་བྱང་ཆུབ་དོན་དུ་སེམས་བསྒྱུར་རོ། །དེ་ལྟར་བྱང་ཆུབ་དོན་དུ་བསྐྱེད་བྱེད་པ། །ཕྱོགས་བཅུའི་སངས་རྒྱས་བརྗོད་དུ་མེད་པ་ཀུན། །མཆོད་པར་བྱ་ལ་ཡོངས་སུ་བསྐུལ་བར་བྱ། །འདི་ནི་ཕྱིར་མི་ལྡོག་གི་གདམས་ངག་གོ །འཁོར་བ་དག་ན་བྱང་ཆུབ་དོན་སྤྱོད་ཚེ། །བྱང་ཆུབ་སེམས་དཔའི་བདེ་བ་ཇི་སྙེད་པ། །དེ་དག་དེ་ལ་ཡོངས་སུ་བརྗོད་པར་བྱ། །འདི་ནི་ཕྱིར་མི་ལྡོག་གི་གདམས་ངག་གོ །འཇིག་རྟེན་གཙོ་བོ་འཇིག་རྟེན་ཇི་སྙེད་པ། །ཕྱོགས་བཅུའི་ཐ་དད་ཚད་མེད་ཡོད་པ་རྣམས། །དེ་དག་བྱང་ཆུབ་སེམས་དཔའ་དེ་ལ་བརྗོད། །འདི་ནི་ཕྱིར་མི་ལྡོག་གི་གདམས་ངག་
གོ །མཆོག་གི་ཆོས་དང་ཇི་སྙེད་དམ་པའི་ཆོས། །འཕྲུལ་གྱི་ཆོས་དང་བླ་ན་མེད་པའི་ཆོས། །དེ་དག་བྱང་ཆུབ་སེམས་དཔའ་དེ་ལ་བསྟན། །འདི་ནི་སྐྱོན་མེད་རྣམས་ཀྱི་གདམས་ངག་གོ །གཞན་གྱིས་མྱི་ཐུབ་ཇི་སྙེད་གནས་ཡོད་པ། །འཇིག་རྟེན་ཀུན་གྱི་ཟིལ་གྱིས་མི་ནོན་རྣམས། །དེ་ལ་གནས་པར་རྒྱལ་སྲས་དེ་བརྗོད་དེ། །འདི་ནི་ཕྱིར་མི་ལྡོག་གི་གདམས་ངག་གོ །དེ་བཞིན་གཤེགས་པ་ཡོན་ཏན་ཀུན་ལྡན་པ། །འཇིག་རྟེན་མགོན་པོ་བདག་ཉིད་ཆེ་བ་ཀུན། །དེ་ལ་བྱང་ཆུབ་སེམས་དཔའ་དེ་བཞག་ཏེ། །འདི་ནི་སྐྱེས་བུ་ཁྱུ་མཆོག་གདམས་ངག་གོ །སངས་རྒྱས་གྲངས་མེད་བརྗོད་དུ་མེད་པ་དང་། །ཇི་ལྟར་འགྲོགས་པར་འགྱུར་བ་ཐམས་ཅད་ཀྱང་། །བྱང་ཆུབ་སེམས་དཔའ་དེ་ལ་བརྗོད་པར་བྱ། །འདི་ནི་ཕྱིར་མི་ལྡོག་གི་གདམས་ངག་གོ །ཏིང་འཛིན་ཞི་བ་ཇི་སྙེད་གང་ཡོད་པ། །དེ་དག་གདམས་ངག་ཇི་སྙེད་མ་ལུས་པར། །བྱང་ཆུབ་སེམས་དཔའ་དེ་ལ་བསྟན་པར་བྱ། །འདི་ནི་ཕྱིར་མི་ལྡོག་གི་གདམས་ངག་གོ །འཁོར་བའི་འཁོར་ལོ་ལྡོག་པར་འགྱུར་བ་དང་། །ཆོས་ཀྱི་འཁོར་ལོ་འཁོར་བར་འགྱུར་བ་དང་། །འཇིག་རྟེན་ཀུན་གྱི་ཆགས་པར་མི་འགྱུར་བ། །བྱང་ཆུབ་སེམས་དཔའ་དེ་ལ་བསྟན་པར་བྱ། །སེམས་ཅན་སྡུག་བསྔལ་གཟིར་བ་ཇི་སྙེད་དང་། །ཇི་སྙེད་ངན་སོང་གཙེས་པར་གྱུར་པ་ཡི། །སྐྱབས་དང་མགོན་དང་རྟེན་དུ་འགྱུར་བར་ཡང་། །བྱང་ཆུབ་སེམས་དཔའ་དེ་ལ་བརྗོད་པར་བྱ། །རྣམ་པ་འདི་འདྲས་རྒྱལ་སྲས་དང་པོ་དེ། །བྱང་ཆུབ་དོན་དུ་སེམས་རབ་སྐྱེར་འགྱུར་ཏེ། །དེ་ལྟར་གདམས་ངག་རྗེས་སུ་བསྟན་པར་བྱ། །འདི་ནི་རྒྱལ་བ་རྣམས་ཀྱི་རྣམ་པར་བཀོད་པའོ། །དེ་ནས་གཉིས་པ་ལས་ཀྱི་དང་པོ་པ། །ཐོག་མ་ཉིད་དུ་སེམས་ཅན་ཐམས་ཅད་ལ། །སེམས་བཅུ་ཉེ་བར་གཞོག་ཅིང་སྨོན་བྱེད་པ། །འདི་ནི་སྐྱོན་དང་བྲལ་བའི་གདམས་ངག་གོ །ཕན་པའི་སེམས་དང་དེ་བཞིན་བདེ་བའི་སེམས། །སྙིང་རྗེའི་སེམས་དང་དེ་བཞིན་བྱམས་པའི་སེམས། །
བསྲུང་བའི་སེམས་དང་དེ་བཞིན་མཉམ་པའི་སེམས། །སློབ་དཔོན་སེམས་དང་དེ་བཞིན་སྟོན་པའི་སེམས། །དེ་འདྲའི་སེམས་རྣམས་ཉེ་བར་གཞག་པ་ལ། །ཁ་ཏོན་ལུང་ལ་ཡོངས་སུ་བསྐུལ་བར་བྱ། །མང་དུ་ཐོས་པ་དགོན་པར་གནས་པར་བསྐུལ། །དབེན་པར་གྱུར་པས་དགེ་བཤེས་བསྙེན་འགྱུར་བྱ། །དགེ་བཤེས་གྱུར་ནས་ངང་བདེར་འགྱུར་བར་བྱ། ། ངང་ཚུལ་བདེ་བས་དུས་ཚུལ་ཤེས་པར་བྱ། །དུས་རྣམས་ཤེས་ནས་མྱི་འཇིགས་འགྱུར་བར་བྱ། །མི་འཇིགས་གྱུར་ནས་དོན་ལ་བརྩོན་པར་བྱ། །དོན་ཤེས་གྱུར་ནས་ཆོས་རྗེས་ཤེས་པར་བྱ། །ཆོས་ཤེས་གྱུར་ནས་རྨོངས་པ་མྱེད་པར་བྱ། །རྨོངས་པ་མྱེད་གྱུར་ལེགས་པར་བཤད་ཆོས་ལ། །རྒྱལ་སྲས་དེ་ནི་རྣམ་པར་གནས་པར་བྱ། །དེ་ཙམ་གྱིས་ནི་ལས་ཀྱི་དང་པོ་པ། །བྱང་ཆུབ་དོན་ཞུགས་བྱང་ཆུབ་སེམས་དཔའོ། །གདམས་ངག་རྗེས་སུ་བསྟན་པའང་དེ་ཡིན་ཏེ། །སངས་རྒྱས་སྲས་པོ་དེ་ལྟར་སློབ་པར་བྱེད། །གང་ཡང་བྱང་ཆུབ་སེམས་དཔའ་གསུང་བརྗོད་པ། །ཆོས་ཀྱི་རྒྱལ་པོའི་གསུང་ལ་ཤིན་ཏུ་བརྩོན། །མྱི་རྟག་སྡུག་བསྔལ་དེ་བཞིན་སྟོང་པ་ཉིད། །བདག་མྱེད་དེ་བཞིན་བྱེད་པ་མྱེད་པ་དང་། །ཆོས་རྣམས་ཐམས་ཅད་དེ་བཞིན་རོ་མེད་དང་། །འདུ་བྱེད་མ་ཡིན་དེ་བཞིན་གནས་མྱེད་དང་། །ཆེད་དུ་སྤྱོད་མེད་དེ་བཞིན་རྟོག་མྱེད་པར། །ཀུན་ལ་བྱང་ཆུབ་སེམས་དཔའ་དཔྱོད་པ་བྱེད། །དེ་ནི་འགྲོ་ཁམས་ཡོངས་སུ་བརྟག་པ་དང་། །དེ་བཞིན་ཆོས་དབྱིངས་བརྟག་པར་བསྐུལ་བར་བྱ། །འཇིག་རྟེན་ཁམས་ཡངས་མ་ལུས་མཐར་ཐུག་པ། །བརྟག་པར་བྱ་ལ་ཡོངས་སུ་བསྐུལ་བར་བྱ། །ས་དང་མེ་དང་དེ་བཞིན་ཆུ་ཁམས་དང་། །དེ་བཞིན་རླུང་དང་ཕྱོགས་བཅུའི་ནམ་མཁའ་དང་། །འདོད་པ་གཟུགས་དང་དེ་བཞིན་གཟུགས་མྱེད་པ། །བརྟག་པར་བྱ་ལ་ཡོངས་སུ་བསྐུལ་བར་བྱ། །ཁམས་རྣམས་ཡངས་པ་དེ་བཞིན་ཀུན་རྟོག་ཅིང་། །ཁམས་ཀྱི་རང་བཞིན་མ་ལུས་མཐར་ཕྱིན་པས། །
བྱང་ཆུབ་སེམས་དཔའ་རབ་ཏུ་བརྩོན་བྱེད་པ། །དེས་ན་དེར་འགྱུར་གདམས་ངག་དེ་ཡིན་ནོ། །ཆེར་སྐྱེས་པ་ཡི་བྱང་ཆུབ་སེམས་དཔའ་ནི། །འཕགས་པའི་གསུང་རབ་འདི་ལས་སྐྱེས་པ་སྟེ། །དངོས་པོ་རང་བཞིན་མེད་རྟོགས་དྲན་པ་ཅན། ། ཆོས་ཀྱི་རྗེས་འབྱུང་རིགས་ལྡན་ལེགས་པར་སྐྱེས། །དེ་ཡི་གནས་ལས་ཕྱིར་ལྡོག་མི་འགྱུར་ཏེ། །སངས་རྒྱས་རྣམས་ལ་ཤིན་ཏུ་མོས་པ་ཡིན། །ཆོས་རྣམས་དེ་བཞིན་ངེས་པར་རྟོགས་པ་སྟེ། །སེམས་ཅན་རང་བཞིན་མེད་པར་རྣམ་པར་སྒོམ། །ཆོས་དང་འཇིག་རྟེན་དེ་བཞིན་ཞིང་རྣམས་དང་། །རྣམ་སྨིན་འཁོར་བ་དེ་བཞིན་མྱ་ངན་འདས། །རྣམ་སྒོམ་རྒྱལ་སྲས་དེ་ལྟར་ཆེར་སྐྱེས་པ། །ཐུགས་ལས་བྱུང་བའི་སངས་རྒྱས་སྲས་ཤེས་བྱ། །འདས་དང་མ་བྱོན་ད་ལྟར་བྱུང་བ་ཡི། །སངས་རྒྱས་ཆོས་རྣམས་རྣམ་པར་བསྒོམ་བྱའི་ཕྱིར། །ཡོངས་སུ་བསྡུ་བ་ཅི་འདྲ་མཐར་ཐུག་པ། །དེ་ལྟར་དེ་དག་འགྲུབ་པར་འགྱུར་བ་དང་། །སངས་རྒྱས་ཐམས་ཅད་མཉམ་པ་ཉིད་རྟོགས་ཤིང་། །དུས་གསུམ་མཉམ་པ་ཉིད་ཀྱི་རྗེས་སོང་བས། །མཉམ་པ་ཉིད་ལ་སྣ་ཚོགས་མྱི་དམྱིགས་ཤིང་། །དུས་གསུམ་ཀུན་ལ་ཐ་དད་མྱེད་པར་འཇུག །དེ་ཙམ་གྱིས་ན་རྒྱལ་སྲས་བཞི་པ་སྟེ། །དེ་ཡི་བསྔགས་པ་རྣམ་པ་དེ་འདྲའོ། །དེ་ལྟར་འདི་ལ་ནན་ཏན་བསྒྲུབས་བྱས་ཤིང་། །བྱང་ཆུབ་སེམས་དཔའ་བྱང་ཆུབ་མཆོག་ཏུ་འབྱུང་། །དེ་ལས་གཞན་ཡང་རྒྱལ་སྲས་ལྔ་པ་ནི། །སྦྱོར་བ་ཕུན་སུམ་ཚོགས་ཞེས་བརྗོད་པ་ནི། །ཐབས་མཁས་ཚུལ་ལ་རྗེས་སུ་ཞུགས་གྱུར་ཅིང་། །བསོད་ནམས་ལས་རྣམས་བརྩམས་པའི་མཐར་ཕྱིན་བྱེད། །འཇིག་རྟེན་དག་ན་བསོད་ནམས་གང་བྱེད་ཀྱང་། །སེམས་ཅན་ཀུན་གྱི་སྐྱབས་སུ་འགྱུར་བ་དང་། །ཕན་ཚུན་དེ་བཞིན་བདེ་བ་བསྐྱེད་པ་དང་། །སྙིང་རྗེས་སྐྱེ་དགུ་གྲོལ་བར་འགྱུར་བ་དང་། །འཇིག་རྟེན་རྣམས་ཀྱི་གཙེ་བ་བསྩལ་བ་དང་། །དྲན་ཞིང་དེ་བཞིན་དད་པར་བྱ་བ་དང་། །སེམས་ཅན་མང་པོ་ཐམས་ཅད་
གདུལ་མོས་ཤིང་། །མྱ་ངན་འདས་པའི་སེམས་ཀྱི་མཐུ་ཡང་ཆེ། །སེམས་ཅན་ཐམས་ཅད་ཀུན་ཏུ་མཐའ་ཡས་དང་། །དེ་བཞིན་ཚད་མེད་གྲངས་ལས་འདས་པ་དང་། །བསམ་གྱིས་མྱི་ཁྱབ་གཞལ་མེད་དཔག་མེད་པ། །དེ་འདྲའི་ཆོས་རྣམས་དེ་ལ་བརྗོད་པར་བྱ། །དེ་ཙམ་གྱིས་ན་རྒྱལ་སྲས་ལྔ་པ་སྟེ། །སྦྱོར་བ་ཕུན་སུམ་ཚོགས་པ་སྙིང་རྗེ་ཅན། །དེ་ཡི་གདམས་ངག་ཚུལ་ནི་དེ་འདྲ་སྟེ། །ཡོན་ཏན་ཐམས་ཅད་མངའ་བས་བསྟན་པ་ཡིན། །གང་ཡང་བསམ་པ་ཕུན་སུམ་ཚོགས་བྱའི་ཕྱིར། །ཆོས་ཀྱི་ངོ་བོ་ཉིད་ཀྱིས་རྨོངས་མེད་ཅིང་། །རྣམ་རྟོག་རྟོག་བྲལ་དྲན་དང་ལྡན་པ་དེ། །ལྷར་བཅས་འཇིག་རྟེན་ཀུན་གྱིས་བསླུ་མི་ནུས། །སངས་རྒྱས་ཆོས་དང་དེ་བཞིན་རྒྱལ་སྲས་དང་། །སྤྱོད་པ་བསྔགས་སམ་རྣམ་པར་སྨད་ཀྱང་རུང་། །སེམས་ཅན་ཉུང་ཞེའམ་འོན་ཏམ་མང་ངོ་ཞེས། །ཐོས་པར་གྱུར་ཀྱང་བསམ་པ་ཞུམ་མྱི་འགྱུར། །སེམས་ཅན་ཉོན་མོངས་ཉོན་མོངས་མྱེད་ཅེ་འམ། །གདུལ་སླ་འོན་ཏམ་ཤིན་ཏུ་གདུལ་དཀའ་དང་། །ཆོས་ཀྱི་དབྱིངས་དེ་ཆུང་ངམ་རྒྱ་ཆེ་དང་། །ཀུན་ནས་འགྲུབ་འགྱུར་རྣམ་པར་འཇིག་ཅེ་འམ། །ཆོས་དབྱིངས་དེ་ནི་ཡོད་དམ་མེད་ཅེས་ཀྱང་། །བྱང་ཆུབ་སེམས་དཔས་ཐོས་གྱུར་དུས་གསུམ་ཚུལ། །ངེས་པར་རྟོགས་བྱེད་ཐམས་ཅད་རྣམ་རྟོག་ཅིང་། །སངས་རྒྱས་ཆོས་ལ་བསམ་པ་ཤིན་ཏུ་ངེས། །མཚན་མ་མེད་དང་མཚན་ཉིད་མྱེད་པ་དང་། །དངོས་ཉིད་ཡོད་མྱིན་བརྫུན་དང་བདེན་པ་དང་། །སྒྱུ་མ་རྨི་ལམ་མྱི་རྟོག་རང་བཞིན་མྱེད། །འདི་འདྲའི་ཆོས་ཚོལ་དེ་དག་ཉན་པ་བྱེད། །ཕྱིར་མི་ལྡོག་པའི་བྱང་ཆུབ་སེམས་དཔའ་ནི། །སངས་རྒྱས་ཆོས་དང་དེ་བཞིན་རྒྱལ་སྲས་དང་། །སྤྱོད་པ་ཡོད་མྱེད་རྟག་ཏུ་རྣམ་པར་བསྒོམ། །འབྱུང་ངམ་མྱི་འབྱུང་ཞེ་ནའང་ཕྱིར་མི་ལྡོག །དེ་བཞིན་གཤེགས་པ་འདས་ཞེའམ་མ་འདས་དང་། །མ་བྱོན་ཏོ་ཞེའམ་མ་བྱོན་མ་ཡིན་དང་། །སྐྱེས་སོ་མ་སྐྱེས་ཟད་འགྱུར་ཟད་མི་འགྱུར། །དེ་བཞིན་མཚན་གཅིག་ཐ་དད་
མཚན་དེ་བཞིན། །གཅིག་པ་རྣམ་པ་ཐ་དད་མང་པོ་དང་། །དོན་དང་དེ་བཞིན་ཡི་གེའི་དངོས་རྣམས་དང་། །ཐམས་ཅད་ཕན་ཚུན་ཡོངས་སུ་འཛུད་བྱེད་པ། །མི་ལྡོག་བྱང་ཆུབ་སེམས་དཔའ་བསྟན་པར་བྱ། །མཚན་མ་མེད་ལ་མཚན་མ་ཡོད་པ་དང་། །མཚན་ཉིད་མྱེད་ལ་མཚན་གྱིས་དམྱིགས་པ་དང་། །རྣམ་ཕྱེ་ཕན་ཚུན་ཡོངས་སུ་སྦྱར་བ་རྣམས། །ཐོས་ནས་འདི་ལ་མཐར་ཐུག་འཇུག་པར་བྱེད། །གཞན་ཡང་བྱང་ཆུབ་སེམས་དཔའ་གཞོན་གྱུར་པ། །ལུས་དང་ངག་དང་དེ་བཞིན་ཡིད་ཀུན་གྱིས། །ཁ་ན་མ་ཐོར་འགྱུར་བ་ནམ་ཡང་མེད། །ཅི་འདོད་ཚུལ་བཞིན་དེ་ནི་སྐྱེ་བ་བྱེད། །གཞན་གྱི་བསམ་པ་ཇི་བཞིན་རབ་ཏུ་ཤེས། །དེ་དག་མོས་པ་ཡོངས་སུ་རྟོགས་པར་བྱེད། །ཕྱོགས་རྣམས་གང་དུ་ཡིད་ཀྱིས་སྨོན་བྱེད་པ། །ཀུན་ཏུ་མངོན་ཤེས་མྱུར་བ་ཡིད་བཞིན་འཐོབ། །བདེ་བར་གཤེགས་པས་བསྔགས་པའི་ཆོས་ཐོབ་ཅིང་། །དེ་ལ་ཞུམ་པ་བསྐྱེད་པ་གང་ཡང་མེད། །ཞིང་རྣམས་ཡོངས་སུ་བསྐྱོད་པ་ཤེས་པ་དང་། །དེ་བཞིན་བྱིན་རླབས་རྣམ་པར་རྒྱུ་བ་དང་། །སངས་རྒྱས་ཞིང་རྣམས་ཡོངས་སུ་གནན་པ་དང་། །གྲངས་མེད་ཀུན་ཏུ་འགྲོ་བ་བརྗོད་པར་བྱ། །གྲངས་མེད་ཆོས་རྣམས་ཡོངས་སུ་འདྲི་བ་དང་། །ཅི་ནས་ཡིད་ཀྱི་རང་བཞིན་ལུས་འགྱུར་ཞིང་། །དབྱངས་ཀྱི་རྣམ་པ་ཤིན་ཏུ་ཡངས་འགྱུར་དང་། །སེམས་གཅིག་སངས་རྒྱས་གྲངས་མྱེད་བསྙེན་བཀུར་བརྗོད། །བྱང་ཆུབ་སེམས་དཔའ་རྒྱལ་ཚབ་བརྗོད་པ་ནི། །སེམས་ཅན་རྣམས་ཀྱི་སྐྱེ་བ་རབ་ཏུ་ཤེས། །ཉོན་མོངས་རྒྱུད་དང་རྣམ་པར་རྒྱུ་བ་ཤེས། །དེ་འདྲ་སྤྱོད་ཡུལ་དེ་འདྲའི་སྦྱོར་བ་ཅན། །ཆོས་ཀྱི་རྒྱུད་མང་རྣམ་པ་ཐ་དད་དང་། །སྔོན་མཐའ་ཕྱི་མཐའ་འཇིག་རྟེན་རྣམ་ཕྱེ་དང་། །བརྡེ་ཡི་བདེན་པ་དོན་དམ་བདེན་པ་དག །མ་ལུས་རྟོགས་པར་བྱ་ལ་མཁས་པ་ཡིན། ། དེའི་རྒྱལ་པོའི་གནས་ལ་མཁས་པར་བསྐུལ། །དེར་ཡང་ཇི་ལྟར་ཡོངས་སུ་སྤྱད་བྱ་དང་། །འགྲོ་བར་བྱ་དང་གནས་པར་བྱ་
བ་དང་། །རྒྱལ་པོའི་གནས་སུ་ཇི་ལྟར་རྣམ་སྤྱད་བརྗོད། །དེ་ལ་ཆོས་ཀྱི་རྒྱལ་པོའི་དབང་བསྐུར་དང་། །བྱིན་གྱི་རླབས་དང་དེ་བཞིན་མཐུ་ཆེན་དང་། །ཆོས་སུ་གནས་དང་འགྲོ་བར་བྱ་བ་དག །བརྗོད་པར་བྱ་སྟེ་རྒྱལ་ཚབ་དེ་འདྲ་ཡིན། །དེ་ཙམ་གྱིས་ན་དེ་ཡི་མཐར་ཐུག་སྟེ། །གདམས་ངག་དེས་ཀྱང་རློམ་སེམས་བྱེད་པ་མེད། །ཁོང་དུ་ཆུད་བྱེད་དྲན་ལྡན་རྒྱལ་ཚབ་དེ། །རྒྱལ་བ་ཀུན་གྱི་དྲུང་ན་སློབ་པ་བྱེད། །བདེ་བར་གཤེགས་པའི་སྲས་པོ་དབང་བསྐུར་བ། །ཐུ་བོ་མཆོག་དང་དམ་པར་གྱུར་པ་ནི། །འཇིག་རྟེན་ཁམས་མང་གྲངས་མྱེད་བསྐྱོད་པ་དང་། །ཡོངས་སུ་སྣང་བར་བྱ་བའི་སེམས་ཀྱང་མང་། །བྱིན་གྱི་རླབས་དང་ཡོངས་སུ་འདའ་བྱ་དང་། །ཡོངས་སུ་སྦྱོང་བའི་སེམས་ཀྱང་རབ་ཏུ་མང་། །གྲངས་མེད་འཇིག་རྟེན་ཤེས་པར་བྱ་བ་དང་། །དབང་པོ་ཕུན་ལྡན་རྣམ་པར་སྤྱད་ལ་མཁས། །དེ་དག་གཟུད་ཅིང་རྣམ་པར་འདུལ་བ་དང་། །ཐམས་ཅད་མཁྱེན་པའི་སེམས་ཀྱང་ཤིན་ཏུ་མང་། །ཞིང་མང་བརྗོད་དུ་མྱེད་པར་འགྲོ་བྱས་ཤིང་། །དམ་ཆོས་མཁས་རྣམས་མ་ལུས་རྣམ་པར་དཔྱོད། །དེའི་ལུས་དང་ལུས་ཀྱི་ལས་རྣམས་དང་། །རྫུ་འཕྲུལ་བསྟན་པའང་ཤེས་པར་མི་ནུས་ཏེ། །དུས་གསུམ་ཞིང་དུ་རྒྱལ་བའི་སེམས་དག་ཀྱང་། །རྒྱལ་ཚབ་གྱུར་པའི་བར་གྱིས་ཤེས་མི་ནུས། །དེ་ལ་ཐམས་ཅད་གཟིགས་པས་དུས་གསུམ་དང་། །སངས་རྒྱས་ཆོས་ཤེས་ཆགས་མེད་དེ་བཞིན་བརྗོད། །ཆོས་ཀྱི་དབྱིངས་ནི་མཐའ་དང་དབུས་མེད་པ། །རྒྱས་པར་འགེངས་པར་བདེ་གཤེགས་བརྗོད་པར་མཛད། །ཅི་ནས་འཇིག་རྟེན་ཁམས་ཀུན་མ་ལུས་པར། །ཡོངས་སུ་སྣང་བྱེད་བྱིན་གྱིས་རློབ་པ་དང་། །སེམས་ཅན་ཆོས་རྣམས་དེ་བཞིན་མ་ལུས་དང་། །སངས་རྒྱས་མཐའ་ཡས་དེ་བཞིན་བརྗོད་པ་མཛད། །རྒྱལ་སྲས་བརྟན་པ་རྣམ་པ་བཅུར་བགྲང་བ། །རྣམ་པར་དགོད་ལ་གནས་པ་དེ་དག་ཀུན། །རང་རང་སྤྱོད་ཡུལ་རབ་ཏུ་བརྩོན་བྱེད་པ། །འཇིག་རྟེན་ལྷར་བཅས་ཀུན་གྱིས་ཤེས་པར་དཀའ། །འོན་ཀྱང་
སེམས་བསྐྱེད་དང་པོར་མཐའ་ཡས་པས། །ཕྱོགས་བཅུ་མ་ལུས་ཐམས་ཅད་རྒྱས་པར་བྱ། །དུས་གསུམ་ཀུན་ཏུ་གང་ཚེ་སེམས་གཏོང་བ། །དེ་ཚེ་ཐམས་ཅད་མཁྱེན་པ་ཀུན་གཟིགས་འགྱུར། །ཞིང་རྣམས་ཀུན་ལ་མུ་མཐའ་ཡོད་པ་མིན། །སེམས་ཅན་ཆོས་དང་འཇིག་རྟེན་ཀུན་དེ་བཞིན། །ལས་དང་ཉོན་མོངས་གནས་ཀྱང་མཐའ་ཡས་ཏེ། །བྱང་ཆུབ་སེམས་རབ་དེ་ལ་གནས་པ་ཡིན། །སྐད་ཅིག་སེམས་ལ་བྱང་ཆུབ་གཞོལ་བའི་སེམས། །གང་སྐྱེས་འཇིག་རྟེན་ཀུན་གྱིས་ཤེས་མི་ནུས། །རང་རྒྱལ་རྣམས་དང་ཉན་ཐོས་ཀུན་གྱིས་མིན། །དེ་ནས་གོང་དུ་སྤྱོད་པ་ཇི་སྐད་བརྗོད། །གང་ཞིག་ཕྱོགས་བཅུའི་འཇིག་རྟེན་ཁམས་ཀྱི་རྣམས། །སྤུ་གཅིག་སྲང་ལ་ཚད་དུ་འཇལ་བྱེད་པ། །དེས་ནི་བྱང་ཆུབ་སེམས་དཔའི་སྤྱོད་པ་ཤེས། །འོན་ཀྱང་སངས་རྒྱས་ཡེ་ཤེས་ཡོངས་སུ་ཚོལ། །ཕྱོགས་བཅུའི་རྒྱ་མཚོ་ཇི་སྙེད་ཡོད་པ་ཀུན། །སྤུ་རྩེའི་ཐིགས་ཀྱིས་ཡོངས་འཇལ་ཤེས་བྱེད་པ། །དེ་ནི་རྒྱལ་སྲས་སྤྱོད་པ་འདི་འདྲ་དག །སེམས་ཀྱི་སྐད་ཅིག་གཅིག་ལ་བསྒྲུབ་པར་བྱེད། །ཇི་ལྟར་ཞིང་རྣམས་རྡུལ་རབ་ཕྲར་བླགས་ཤིང་། །སེམས་ཅན་ལ་ལ་མ་ལུས་བགྲང་བྱེད་དེ། །འདི་སྙེད་ཡོད་ཅེས་གྲངས་སུ་གཅོད་བྱེད་པ། །དེ་འདྲར་རྒྱལ་སྲས་སྤྱོད་པ་བརྗོད་པའོ། །འདས་པའི་སངས་རྒྱས་དེ་བཞིན་མ་བྱོན་དང་། །གང་རྣམས་ཕྱོགས་བཅུར་བྱུང་བར་གྱུར་པ་དང་། །རང་རྒྱལ་དེ་བཞིན་ཉན་ཐོས་རབ་མང་བ། །རྣམ་པར་དམྱིགས་ཤིང་བྱང་ཆུབ་སེམས་སྐྱེའོ། །སེམས་ཅན་ཁམས་རྣམས་མ་ལུས་རྒྱས་གང་ཞིང་། །བྱང་ཆུབ་དོན་དུ་ཐོག་མར་སེམས་བསྐྱེད་པ། །དེ་ཡང་བགྲང་བར་ནུས་པ་མ་ཡིན་ན། །དེ་ལས་གོང་དུ་ཅི་ཞིག་སྨོས་ཀྱང་དགོས། །བྱང་ཆུབ་སེམས་དཔའི་རྣམ་པར་དགོད་པ་བཅུ་བསྟན་པའི་ལེའུ་སྟེ་ཉི་ཤུ་པའོ།། །།