བཅོ་བརྒྱད་པ། དེ་བཞིན་གཤེགས་པ་རི་རབ་ཀྱི་རྩེར་གཤེགས་པའི་ལེའུ།
སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་དགུ་པ། དེ་ནས་སངས་རྒྱས་ཀྱི་མཐུས་ཤར་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་གི་ཕྱོགས་དང་། སྟེང་གི་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་དུ་གླིང་བཞི་པ་འདི་
ལ་སོགས་པ་གླིང་བཞི་པ་རེ་རེ་ན་ཡང་། དེ་བཞིན་གཤེགས་པ་དེ་དག་དེ་བཞིན་དུ་བཞུགས་པར་སྣང་ངོ་། །བྱང་ཆུབ་སེམས་དཔའ་དེ་དག་ཀྱང་དེ་བཞིན་གཤེགས་པའི་བྱིན་གྱི་རླབས་ཀྱིས་ཆོས་སྟོན་ཅིང་། དེ་བཞིན་གཤེགས་པའི་ཞབས་ཀྱི་དྲུང་ན་འཁོད་པར་ཡང་སོ་སོ་ནས་ཤེས་ཏེ། བཅོམ་ལྡན་འདས་ཀྱིས་ཀྱང་རྫུ་འཕྲུལ་མངོན་པར་འདུ་མཛད་པ་དེ་མ་བརྟུལ་བར་བྱང་ཆུབ་ཀྱི་ཤིང་གི་དྲུང་དུ་རི་རབ་ཀྱི་རྩེ་མོའི་ལྷའི་དབང་པོ་བརྒྱ་བྱིན་གྱི་ཁང་པ་རྣམ་པར་རྒྱལ་བ་ག་ལ་བ་དེར་གཤེགས་པར་སྣང་ངོ་། །ཇི་ལྟར་བཅོམ་ལྡན་འདས་གླིང་བཞི་པ་འདིའི། རི་རབ་ཀྱི་རྩེ་མོར་གཤེགས་པར་སྣང་བ། དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་དག་གི་རི་རབ་ཀྱི་རྩེ་མོར་གཤེགས་པར་སྣང་སྟེ། བྱིན་གྱི་རླབས་སྔ་མ་དག་ཀྱང་མ་ཉམས་པར་སྣང་ངོ་། །དེ་ནས་ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་རྣམ་པར་རྒྱལ་བའི་ཁང་པ་ལོགས་སུ་མངོན་པར་གཤེགས་པ་རྒྱང་རིང་པོ་ནས་མཐོང་ནས་རྣམ་པར་རྒྱལ་བའི་ཁང་པའི་ནང་དུ་རིངས་པའི་གཟུགས་སུ་རྫུ་འཕྲུལ་གྱི་རང་བཞིན་སེང་གེའི་གདན་ཕྱོགས་རྣམ་པར་སྣང་བའི་སྙིང་པོ་ཅན་པོག་རེ་སྟོང་ཕྲག་བཅུས་བརྒྱན་པ། གསེར་གྱི་དྲ་བ་སྟོང་ཕྲག་བཅུ་ཀུན་ཏུ་བྲེས་པ། གནམ་ཡོལ་སྟོང་ཕྲག་བཅུས་བླ་རེར་བྲེས་པ། གདུགས་སྟོང་ཕྲག་བཅུ་ཤིན་ཏུ་བཟུང་བ་དར་གྱི་ལྡ་ལྡི་སྟོང་ཕྲག་བཅུ་རབ་ཏུ་སྤྱངས་པ། མུ་ཏིག་གི་སེ་མོ་དོ་སྟོང་ཕྲག་བཅུ་དགའ་དགའ་ལྟར་བྱས་པ། གོས་སྟོང་ཕྲག་བཅུས་མངོན་པར་བཀབ་པ། ལྷའི་བུ་མོ་སྟོང་ཕྲག་བཅུས་མདུན་དུ་བྱས་པ། ཚངས་པ་སྟོང་ཕྲག་བཅུས་ཀུན་ནས་བསྐོར་བ། འོད་ཟེར་སྟོང་ཕྲག་བཅུས་ཤིན་ཏུ་སྣང་བར་གྱུར་པ། བཅོམ་ལྡན་འདས་ཀྱི་གདན་དུ་བཤམས་སོ། །ཇི་ལྟར་གླིང་བཞི་པ་འདིའི་རི་རབ་ཀྱི་རྩེ་མོར་ལྷའི་དབང་པོའི་ཁང་པ་རྣམ་པར་རྒྱལ་བར་ལྷའི་དབང་པོ་བརྒྱ་བྱིན་གྱིས་དེ་བཞིན་གཤེགས་པའི་གདན་བཤམས་པ་དེ་བཞིན་དུ། འཇིག་རྟེན་གྱི་ཁམས་ཐམས་ཅད་ཀྱི་རི་རབ་ཀྱི་རྩེ་མོ་དག་ཏུ་འང་ལྷའི་དབང་པོ་བརྒྱ་བྱིན་དག་གིས་དེ་བཞིན་གཤེགས་པའི་གདན་དག་ཚུལ་དེ་འདྲ་བ་དང་རྒྱན་དེ་འདྲ་བར་བཤམས་པར་གྱུར་ཏོ། །དེ་ནས་ལྷའི་དབང་པོ་
བརྒྱ་བྱིན་གྱིས་བཅོམ་ལྡན་འདས་ཀྱི་གདན་སེང་གེའི་ཁྲི་བཅས་ནས། ཞེ་ས་དང་རིམ་གྲོ་ཆེན་པོས་བཅོམ་ལྡན་འདས་གང་ན་བ་དེར་ཐལ་མོ་སྦྱར་ཏེ། ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཤེགས་སུ་གསོལ། བདེ་བར་གཤེགས་པ་གཤེགས་སུ་གསོལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བར་གཤེགས་སམ་ཞེས་གསོལ་ཏོ། །དེ་ནས་བཅོམ་ལྡན་འདས་ལྷའི་དབང་པོ་བརྒྱ་བྱིན་གྱིས་སྤྱན་དྲངས་ནས། རྣམ་པར་རྒྱལ་བའི་ཁང་པར་གཤེགས་སོ། །དེ་ལྟར་བཅོམ་ལྡན་འདས་གཤེགས་པ་དེ་བཞིན་དུ། འཇིག་རྟེན་གྱི་ཁམས་ཐམས་ཅད་ཀྱི་ལྷའི་ཁང་པ་དག་ཏུའང་གཤེགས་པར་སྣང་ངོ་། །དེ་ནས་ལྷའི་དབང་པོ་བརྒྱ་བྱིན་གྱིས་སངས་རྒྱས་ཀྱི་མཐུས་སུམ་ཅུ་རྩ་གསུམ་གྱི་ཁང་པ་ཐམས་ཅད་དུ་གླུ་དང་རོལ་མོ་དང་། སིལ་སྙན་བརྒྱ་ཕྲག་མང་པོ་དག་བཏང་སྟེ། ཞི་བར་བྱས་ནས་ཡང་དག་པར་རྫོགས་པའི་སངས་རྒྱས་སྔ་མ་དག་ལས་དགེ་བའི་རྩ་བ་བསྐྱེད་པ་དེ་དག་རྗེས་སུ་དྲན་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བཀྲ་ཤིས་དམ་པ་གང་ཞིག་གིས། །ཐུགས་རྗེ་ཆེན་པོ་མངའ་བ་འོད་སྲུངས་རིགས་སྐྱེས་པ། །རྣམ་པར་རྒྱལ་བར་གཤེགས་གྱུར་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །གསེར་ཐུབ་བསྒྲིབས་པ་མེད་པར་རབ་ཏུ་གཟིགས་པ་དེ། ། རིན་ཆེན་སྣ་ཚོགས་གཤེགས་གྱུར་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །བསོད་སྐྱབས་གསེར་གྱི་རི་བོ་འབར་བ་འདྲ་བ་དེ། །རྩེ་མོ་མཆོག་དུ་གཤེགས་གྱུར་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །ཐམས་ཅད་མངའ་བ་དགྲ་བཅོམ་དྲི་མ་གསུམ་སེལ་བ། །མཛོད་སྤུའི་རྩེ་མོར་གཤེགས་གྱུར་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །སངས་རྒྱས་གཙུག་ཏོར་དགོངས་པ་ཟིལ་གྱིས་མི་ནོན་པ། །རིན་ཆེན་སྣ་ཚོགས་གཤེགས་གྱུར་པ། །དེས་ནི་འདིར་ཡང་བཀྲ་ཤིས་ལེགས་
གྱུར་ཅིག །བཀྲ་ཤིས་དམ་པ་གང་ཞིག་གིས། །རྣམ་པར་གཟིགས་པ་སྐྱེས་བུའི་ཟླ་བ་མི་ཡི་མགོན། །རིན་ཆེན་རྒྱན་དུ་གཤེགས་གྱུར་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །ཤིན་ཏུ་རྒྱས་པ་དོན་དམ་མཁས་ཤིང་བརྟན་པ་དེ། །མ་ལ་ཡའི་རྩེ་མོར་གཤེགས་གྱུར་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །སངས་རྒྱས་སྟོན་མཆོག་ཐོགས་པ་མི་མངའ་བ། །དྲི་མེད་ཟླ་བར་གཤེགས་གྱུར་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །གྲགས་པ་དྲི་མ་མེད་པ་མགོན་པོ་པདྨོའི་བླ། །དྲི་མ་མེད་པར་གཤེགས་གྱུར་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །བཀྲ་ཤིས་དམ་པ་གང་ཞིག་གིས། །མགོན་པོ་མར་མེ་མཛད་པ་འོད་སྣང་མངའ་བ་དེ། །འོད་ཟེར་དྲ་བར་གཤེགས་གྱུར་པ། །དེས་ནི་འདིར་ཡང་བཀྲ་ཤིས་ལེགས་གྱུར་ཅིག །ཇི་ལྟར་ལྷའི་དབང་པོ་བརྒྱ་བྱིན་གྱིས་སངས་རྒྱས་ཀྱི་མཐུས་ཡང་དག་པར་རྫོགས་པའི་སངས་རྒྱས་བཅུའི་རྒྱལ་བ་གཤེགས་པ་གླུར་བླངས་ཏེ་ཚིགས་སུ་བཅད་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ན་ཡང་སངས་རྒྱས་ཀྱི་མཐུས་ལྷའི་དབང་པོ་རྣམས་དེ་བཞིན་གཤེགས་པའི་མཚན་གཞན་དང་གཞན་གྱིས། ཡང་དག་པར་རྫོགས་པའི་སངས་རྒྱས་བཅུའི་རྒྱལ་བ་གཤེགས་པ་དག་གླུར་ལེན་ཅིང་ཚིགས་སུ་བཅད་པར་གྱུར་ཏོ། །དེ་ནས་བཅོམ་ལྡན་འདས་རྣམ་པར་རྒྱལ་བའི་ཁང་པར་གཤེགས་ནས་སྐྱིལ་མོ་ཀྲུང་བཅས་ཏེ་བཞུགས་སོ། །བཅོམ་ལྡན་འདས་ཇི་ལྟར་བཞུགས་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ན་ཡང་དེ་བཞིན་གཤེགས་པ་དག་གདན་དེ་དག་ལ་བཞུགས་པར་སྣང་ངོ་། །བཅོམ་ལྡན་འདས་དེ་ལྟར་བཞུགས་མ་ཐག་ཏུ་དེའི་ཚེ་སངས་རྒྱས་ཀྱི་མཐུས། རྣམ་པར་རྒྱལ་བའི་ཁང་པ་དེ་ཡང་སུམ་ཅུ་རྩ་གསུམ་ཐམས་ཅད་ཀྱི་ཁང་པ་དང་། ལྷའི་རིས་ཙམ་དུ་ཆེ་བར་སྣང་བར་གྱུར་ཏེ། འདི་ན་ཇི་ལྟ་བ་ལྟར་འཇིག་རྟེན་གྱི་ཁམས་ཐམས་ཅད་ནའང་དེ་བཞིན་ནོ། །དེ་བཞིན་གཤེགས་པ་རི་རབ་ཀྱི་རྩེར་གཤེགས་པའི་ལེའུ་སྟེ། བཅྭོ་བརྒྱད་པའོ།། །།