ཉི་ཤུ་རྩ་ལྔ་པ། ཚིགས་སུ་བཅད་པ་བསྟན་པའི་ལེའུ།
དེ་ནས་སངས་རྒྱས་ཀྱི་མཐུས་ཕྱོགས་བཅུ་ནས། བྱང་ཆུབ་སེམས་དཔའ་མང་པོ་ལྷགས་པར་གྱུར་ཏེ། བྱང་ཆུབ་སེམས་དཔའ་རེ་རེ་ཞིང་ཡང་འཁོར་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འོངས་ཏེ། བྱང་ཆུབ་སེམས་དཔའ་རེ་རེ་ཞིང་ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་ཕྱིན་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་མིང་འདི་
ཞེས་བྱ་བ་དག་སྟེ། འདི་ལྟར་ཡོན་ཏན་དང་ལྡན་པ་དང་། བློ་གྲོས་དང་ལྡན་པ་དང་། དཔལ་དང་ལྡན་པ་དང་། དགའ་བ་དང་ལྡན་པ་དང་། ཁྲེལ་དང་ལྡན་པ་དང་། བརྩོན་འགྲུས་དང་ལྡན་པ་དང་། སྟོབས་དང་ལྡན་པ་དང་། རིག་པ་དང་ལྡན་པ་དང་། བློ་དང་ལྡན་པ་དང་། ཡེ་ཤེས་དང་ལྡན་པ་དག་གོ །བྱང་ཆུབ་སེམས་དཔའ་དེ་དག་ཐམས་ཅད་ཀྱང་འཇིག་རྟེན་གྱི་ཁམས་མིང་འདི་ཞེས་བྱ་བ་དག་ནས་འོངས་པ་སྟེ། འདི་ལྟར་གཉེན་དང་ལྡན་པ་དང་། མེ་ཏོག་དང་ལྡན་པ་དང་། ནོར་དང་ལྡན་པ་དང་། དཔལ་དང་ལྡན་པ་དང་། སྒྲོན་མ་དང་ལྡན་པ་དང་། རྡོ་རྗེ་དང་ལྡན་པ་དང་། བདེ་བ་དང་ལྡན་པ་དང་། ཉི་མ་དང་ལྡན་པ་དང་། དགེ་བ་དང་ལྡན་པ་དང་། ཚངས་པ་དང་ལྡན་པ་དག་གོ །བྱང་ཆུབ་སེམས་དཔའ་དེ་དག་ཐམས་ཅད་ཀྱང་དེ་བཞིན་གཤེགས་པ་མཚན་འདི་ཞེས་བྱ་བ་དག་གི་ཞམ་རིང་ན་ཚངས་པར་སྤྱོད་པ་དག་སྟེ། འདི་ལྟར་ཉམས་པ་མེད་པའི་སྤྱན་དང་། གཞན་མ་ཡིན་པའི་སྤྱན་དང་། མི་གཡོ་བའི་སྤྱན་དང་། མི་སྐྱོད་པའི་སྤྱན་དང་། ཆུའི་སྤྱན་དང་། བཅིངས་པ་མེད་པའི་སྤྱན་དང་། ཀུན་ཏུ་སྤྱོད་པའི་སྤྱན་དང་། འོད་ཀྱི་སྤྱན་དང་། དམ་པའི་སྤྱན་དང་། མཐོན་ཐིང་གི་སྤྱན་དག་གོ །དེ་ནས་བྱང་ཆུབ་སེམས་དཔའ་དེ་དག་བཅོམ་ལྡན་འདས་ལ་ཕྱག་འཚལ་ནས། སངས་རྒྱས་ཀྱི་མཐུས་ཕྱོགས་བཅུ་རྒྱས་པར་བྱས་ཏེ། གང་ནས་འོངས་པའི་ཕྱོགས་སུ་བརྟན་ནས་སེང་གེའི་ཁྲི་རིན་པོ་ཆེའི་སྙིང་པོ་ཅན་དག་བཤམས་ཏེ་སྐྱིལ་མོ་ཀྲུང་བཅས་ནས་འཁོད་དོ། །ཇི་ལྟར་གླིང་བཞི་པ་འདིར་རབ་མཚེ་མའི་གནས་སུ་བྱང་ཆུབ་སེམས་དཔའ་འོངས་པར་གྱུར་པ་དེ་བཞིན་དུ། འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཀུན་ཏུ་ཡང་རབ་མཚེ་མའི་གནས་ཀྱི་ཁང་པ་ནོར་བུ་སྣ་ཚོགས་སུ་ཡང་ལྷགས་པར་གྱུར་ཏེ། བྱང་ཆུབ་སེམས་དཔའི་མིང་ཡང་དེ་སྐད་ཅེས་བྱ་བ་ཤ་སྟག །དེ་བཞིན་གཤེགས་པའི་མཚན་ཀྱང་དེ་སྐད་ཅེས་བྱ་བའི་ཞམ་རིང་ན། ཚངས་པར་སྤྱོད་པ་ཤ་སྟག་གོ །དེ་ནས་བཅོམ་ལྡན་འདས་ཀྱིས་ཞབས་
ཀྱི་བོལ་གཉིས་ནས་འོད་ཟེར་བྱེ་བ་བརྒྱ་སྟོང་བཀྱེ་སྟེ། ཕྱོགས་བཅུ་ཐམས་ཅད་སྣང་བར་བྱས་ནས། འཇིག་རྟེན་གྱི་ཁམས་ཐམས་ཅད་བསྟན་ཏེ། བྱང་ཆུབ་སེམས་དཔའ་དེ་དག་གིས། འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཀུན་གྱི་རབ་མཚེ་མའི་གནས་ཐམས་ཅད་ན་ཡང་དེ་བཞིན་གཤེགས་པའི་རྣམ་པར་འཕྲུལ་པ་ཡོད་པ་མཐོང་ངོ་། །དེ་ནས་བྱང་ཆུབ་སེམས་དཔའ་ཡོན་ཏན་དང་ལྡན་པས། སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་འོད་ཟེར་འོད་སྣང་བས། །ཕྱོགས་རྣམས་ཐམས་ཅད་རྣམ་པར་སྣང་། །དེས་ནི་རབ་ཏུ་གསལ་བྱས་པས། །མིག་ལ་རབ་རིབ་གང་ཡང་མེད། །མཚེ་མ་རབ་ཀྱི་གནས་འདི་ན། །གང་ཟག་དམ་པ་སངས་རྒྱས་བཞུགས། །དེ་བཞིན་ཀུན་ནའང་གསལ་བར་སྣང་། །དེ་ནི་འཇིག་རྟེན་ངོ་མཚར་ཏོ། །སེམས་ཅན་གཙོ་བོ་བཅུ་ཡི་རྣམས། །གཤེགས་པར་གྱུར་པ་མངོན་པར་སྟོན། །དེ་དག་འཁོར་ཀྱང་ཅི་འདྲ་བ། །དེ་བཞིན་ཀུན་ན་རབ་ཏུ་སྣང་། །ཕྱོགས་རྣམས་བཅུ་པོ་ཐམས་ཅད་ན། །ཆོས་ཀྱི་དམ་པ་རབ་ཏུ་སྟོན། །དེ་ཀུན་མིང་ཡང་འདི་བཞིན་ཏེ། །བདག་ཅག་རྣམས་ཀྱི་ཀུན་རྫོབ་བཞིན། །འཇིག་རྟེན་ཁམས་ཀྱི་མིང་དག་ཀྱང་། །དེ་ཞེས་བྱ་བ་ཀུན་ནས་འོངས། །གང་ཟག་དམ་པ་དེ་དག་ནི། །ཚངས་པའི་སྤྱོད་པ་དེ་ན་སྤྱོད། །བདག་ཅག་རྣམས་ལ་གང་བརྟགས་པ། །ཀུན་གྱི་མིང་ཡང་དེ་དང་མཐུན། །སངས་རྒྱས་ཞིང་རྣམས་ཕུན་ལྡན་པ། །དེ་དག་སངས་རྒྱས་རྣམ་འཕྲུལ་བའོ། །མི་ཡི་འཇིག་རྟེན་ཀུན་ན་ཡང་། །འདི་ན་རྒྱལ་བ་བཞུགས་པར་ཤེས། །གཞན་གྱིས་དེ་ཡི་རྒྱལ་པོ་ཡི། །གནས་ན་དེ་བཞིན་བཞུགས་པ་མཐོང་། །འཇིག་རྟེན་ཁམས་རྣམས་ཐམས་ཅད་ན། །གང་ཟག་དམ་པ་དེ་བཞུགས་ཀྱང་། །རྒྱལ་བ་མཚེ་མ་རབ་གནས་ན། ། བཞུགས་པར་བདག་ཅག་ཀུན་ཀྱང་སེམས། །འཇིག་རྟེན་ཁམས་རྣམས་ཐམས་ཅད་ན། །སངས་རྒྱས་གཟི་བརྗིད་བསམ་མི་ཁྱབ། །དེ་དག་སྨོན་ལམ་བསྐུལ་བའི་ཕྱིར། །འཇིག་རྟེན་ཁམས་སུ་རབ་ཏུ་
བཀྱེ། །སེམས་ཅན་གཙོ་བོའི་རྣམ་འཕྲུལ་པ། །འདི་དག་དེ་རྣམས་ཀུན་གྱིས་མཐོང་། །སངས་རྒྱས་ཡོན་ཏན་མཐའ་ཡས་ཏེ། །འཇིག་རྟེན་ཟང་ཟིང་ཐུབ་པས་སྤངས། །ཕྱོགས་རྣམས་ཐམས་ཅད་ཀུན་ཏུ་རྒྱུ། །ཆགས་པ་མེད་པ་ནམ་མཁའ་བཞིན། །དེ་ནི་གཅིག་ལས་ཤིན་ཏུ་འདས། །མང་པོ་དག་ཏུའང་མི་དམིགས་སོ། །མཐའ་ཡས་ལེགས་མངའ་སངས་རྒྱས་རྣམས། །དེ་དག་ཤེས་པར་ཇི་ལྟར་རུང་། །གནས་པ་མེད་ཅིང་ལེན་པ་མེད། །ཆོས་དབྱིངས་རྟོགས་པར་ཐུགས་སུ་ཆུད། །དེ་ནས་བྱང་ཆུབ་སེམས་དཔའ་བློ་གྲོས་དང་ལྡན་པས། །སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། །དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་མགོན་པོ་འཕྲུལ་ཆེན་རྣམས། །རྡུལ་མེད་གང་ཟག་དམ་པ་དག །འདུས་ཤིང་ཚོགས་པ་བསམ་ཡས་པའི། །བསྐལ་པ་དག་ཏུ་ཤིན་ཏུ་དཀོན། །དེ་དག་ཐམས་ཅད་ཀུན་གཟིགས་པ། །སེམས་ཅན་གཙོ་བོ་འོད་མཛད་དེ། །སྲོག་ཆགས་ཀུན་ལ་ཕན་པའི་ཕྱིར། །སེམས་ཅན་རྣམས་ལ་ཆོས་སྟོན་ཏོ། །འཇིག་རྟེན་མུན་ནག་འདི་དག་ཏུ། །འཇིག་རྟེན་མགོན་པོ་བྱུང་གྱུར་པ། །འཇིག་རྟེན་སྒྲོན་མ་དེ་དག་ནི། །བལྟ་བར་ཤིན་ཏུ་དཀའ་བ་ཡིན། །སྦྱིན་པ་ཚུལ་ཁྲིམས་བཟོད་པའི་དང་། །བརྩོན་འགྲུས་བསམ་གཏན་བསྒོམས་པ་དང་། །ཤེས་རབ་སྔོན་ཆད་སྤྱད་པས་ན། །འགྲོ་བ་ཐམས་ཅད་སྣང་བ་མཛད། །སངས་རྒྱས་འདྲ་བ་གང་ཡང་མེད། །དེ་ཕྱིར་དེ་ཡི་མཉམ་པ་མེད། །ཆོས་རྣམས་ཡོད་པ་མ་ཡིན་པས། །སྐྱེས་བུ་དམ་པ་མཐོང་བ་མེད། །སངས་རྒྱས་ཤེས་རབ་ཆེན་པོ་རྣམས། །མཚན་གྱི་ཚོགས་ནི་བསམ་མི་ཁྱབ། །སྐུ་ཡི་ཚོགས་ཀྱིས་ཤིན་ཏུ་འཕགས། །ཆོས་རྣམས་ཀུན་གྱིས་ཡང་དག་བྱུང་། ། འཇིག་རྟེན་གྲགས་ཆེན་དམ་པའི་རྣམས། །དཔའ་བོ་ཆེན་པོ་དེ་དག་སྣང་། །དེ་དག་མཚན་ཙམ་ཐོས་པས་ཀྱང་། །ངན་སོང་ཐམས་ཅད་སྤངས་པར་འགྱུར། །
བསྐལ་པ་རྣམས་ནི་བརྗོད་མེད་པར། །བྱང་ཆུབ་དོན་དུ་འཁོར་བྱས་ཀྱང་། །འདི་ཡི་ཚུལ་ནི་མ་ཤེས་ན། །བྱང་ཆུབ་དོན་དུ་ཞུགས་པ་མྱིན། །སངས་རྒྱས་བསམ་གྱིས་མི་ཁྱབ་པ། །བསྐལ་པ་བྱེ་བར་བཀུར་བ་དང་། །གང་གིས་ཚུལ་འདི་བསམ་པ་གཉིས། །འདི་ནི་དེ་ལས་ཁྱད་དུ་འཕགས། །གང་གིས་བརྗོད་བྱས་ཞིང་གི་རྣམས། །རིན་ཆེན་གང་སྟེ་ཐུབ་གསོལ་ཀྱང་། །འདི་ཡི་ཚུལ་ནི་མ་ཤེས་ན། །སངས་རྒྱས་བྱང་ཆུབ་དེ་ལ་རིང་། །དེ་ནས་བྱང་ཆུབ་སེམས་དཔའ་དཔལ་དང་ལྡན་པས། སངས་རྒྱས་ཀྱི་བྱིན་གྱི་རླབས་ཀྱིས། ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ནམ་མཁའ་དྲི་མ་མེད་པ་ལ། །ཉི་མའི་འོད་ཟེར་མཐའ་ཡས་པ། །དཔྱིད་ཀྱི་ཟླ་བ་ཐ་མ་ལ། །ཕྱོགས་བཅུ་དག་ཏུ་རབ་ཏུ་སྣང་། །དེ་ཚེ་སྨྱིག་རྒྱུ་ཅི་འདྲ་བ། །དེ་དག་བགྲང་བར་མི་ནུས་ཏེ། །མིག་ཅན་རྣམས་ཀྱང་དེ་ལ་རྨོངས། །ལོང་བ་རྣམས་ཀྱི་སྤྱོད་ཡུལ་མིན། །དེ་བཞིན་སེམས་ཅན་གཙོ་བོ་ཡིས། །ཡོན་ཏན་མཐའ་དང་དབུས་མེད་པ། །བསྐལ་པ་བསམ་གྱིས་མྱི་ཁྱབ་པར། །སུས་ཀྱང་ཤེས་པར་མི་ནུས་སོ། །དེ་དག་གང་ནས་བླངས་པ་མེད། །དེ་བཞིན་སུས་ཀྱང་བྱས་པ་མེད། །དེ་ནི་ཅི་ལས་སྐྱེས་པ་མེད། །རྣམ་པར་བསྒོམས་ན་ཡོད་པ་མྱིན། །འོང་བ་མེད་པའི་ཆོས་རྣམས་ལ། །འགྲོ་བ་དེ་བཞིན་མྱི་དམྱིགས་ཏེ། །དེ་ཕྱིར་དེ་དག་རྒྱུ་ཡང་མྱེད། །དེ་བཞིན་འཇིག་པའང་ཡོད་པ་མྱིན། །འཇིག་པ་མྱེད་པའི་ཆོས་རྣམས་ཀྱི། །རང་བཞིན་གང་གིས་ཤེས་པས་ནི། །གང་ལ་སྐྱེ་བ་མེད་པ་ཡི། །ཡང་དག་སངས་རྒྱས་མཐོང་བ་ཡིན། །སྐྱེས་པ་མེད་པའི་ཆོས་རྣམས་ཀྱི། །རང་བཞིན་དངོས་པོ་མི་དམིགས་ཏེ། །དེ་འདྲའི་དོན་དུ་ཤེས་པས་ནི། །དམིགས་པ་མེད་པ་ཤེས་པ་ཡིན། །འདི་ལ་ཤེས་བྱེད་གང་ཡང་མེད། ། ཆོས་རྣམས་ཐམས་ཅད་མཚན་ཉིད་མེད། །ཆོས་ཉིད་འདི་ནི་ཤེས་གྱུར་ལ། །ཡོངས་སུ་ཤེས་པ་གང་ཡང་མེད། །སྐྱེ་བ་དག་ནི་བརྗོད་པ་སྟེ། །དེ་ཕྱིར་ཞིང་རྣམས་
རབ་ཏུ་བརྗོད། །ཞིང་གི་རང་བཞིན་ཤེས་གྱུར་པ། །འཁྲུག་པ་མེད་པ་རབ་ཏུ་ཤེས། །གང་ཚེ་འཇིག་རྟེན་ཞིང་ཡིན་པར། །ཚུལ་བཞིན་དུ་ནི་རྟོགས་བྱེད་ན། །དེ་ཚེ་ཐམས་ཅད་དོན་བསྟན་པ། །བྱང་ཆུབ་སེམས་དཔས་རབ་ཏུ་ཤེས། །དེ་ནས་བྱང་ཆུབ་སེམས་དཔའ་དགའ་བ་དང་ལྡན་པས། སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གནས་འདི་ཤིན་ཏུ་རྒྱ་ཆེ་སྟེ། །ཆོས་ཀྱི་དབྱིངས་ཀྱིས་ཀླས་པ་ཡིན། །རྟག་ཏུ་ཀུན་ཏུ་སོང་བ་སྟེ། །ཡིད་དུ་འོང་ཞིང་གནས་ཀྱང་མེད། །དེ་ལ་ཡང་དག་བརྟགས་བྱས་ཤིང་། །རིམ་གྲོ་ཡོད་པར་དད་བྱེད་ན། །སྡུག་བསྔལ་ནམ་ཡང་མི་མཐོང་སྟེ། །ངན་སོང་རྣམས་ཀྱང་མི་མཐོང་ངོ་། །ཚད་མེད་དེ་བཞིན་གྲངས་མེད་པའི། །འཇིག་རྟེན་ཁམས་སུ་སུ་འགྲོ་བས། །གང་རྣམས་འདི་ན་སྣང་བ་ཡིས། །སངས་རྒྱས་བྱིན་རླབས་ཐོས་པར་འགྱུར། །དྲང་སྲོང་ཆེན་པོའི་བྱིན་གྱི་རླབས། །གང་གིས་ཐོས་པར་གྱུར་ནས་ཀྱང་། །འདི་འདྲ་སངས་རྒྱས་ཆོས་སོ་ཞེས། །རྟོག་མེད་བླ་མེད་བྱང་ཆུབ་པོ། །གང་རྣམས་འདས་པའི་སངས་རྒྱས་ཀྱི། །ཆོས་ཉིད་ལ་ནི་ཡིད་ཆེས་པ། །དེ་ཀུན་འཇིག་རྟེན་སྒྲོན་མ་སྟེ། །རྐང་གཉིས་ལྡན་པའི་དམ་པར་གྱུར། །སངས་རྒྱས་རྣམ་པར་འཕྲུལ་པ་འདི། །ལ་ལ་ཞིག་གིས་ཐོས་གྱུར་ཅིང་། །ཐོས་ནས་དད་པར་བྱེད་གྱུར་ན། །དེ་དག་མི་ཡི་དམ་པར་འགྱུར། །བརྟན་པ་གང་རྣམས་ད་ལྟར་ཡང་། །སངས་རྒྱས་ཆོས་ལ་དད་བྱེད་པ། །དེ་དག་དོན་གཟིགས་མི་འཇིགས་པའི། །དེ་བཞིན་གཤེགས་པར་འགྱུར་བ་ཡིན། །བསྐལ་པ་བསམ་གྱིས་མི་ཁྱབ་པར། །འདི་འདྲ་ཐོས་པ་ཤིན་ཏུ་དཀོན། །སྨོན་ལམ་དབང་ནི་མ་གཏོགས་པར། །བློ་གྲོས་འདི་འདྲར་འགྱུར་བ་མྱིན། །སངས་རྒྱས་དམ་ཆོས་འདི་ལས་ཀྱང་། །ལེགས་པར་བཤད་པ་གཟུང་བྱས་ཤིང་། །གཞན་ལ་སྟོན་པ་སུ་བྱེད་པ། །དེ་དག་བསམ་གྱིས་མྱི་ཁྱབ་འགྱུར། །དེ་ལ་
བརྩོན་འགྲུས་བསྐྱེད་བྱས་ཤིང་། །ཡིད་ལ་གོ་ཅ་བགོ་བྱས་ཏེ། །གང་ལས་སངས་རྒྱས་བརྗོད་པ་ཡི། །ཤེས་པ་འདི་འདྲ་མཉན་པར་བྱ། །དེ་ནས་བྱང་ཆུབ་སེམས་དཔའ་ཁྲེལ་དང་ལྡན་པས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་ཞིག་ཐོས་ནས་འདི་འདྲ་བའི། །དགའ་བ་ཡངས་པ་སྐྱེ་བ་དང་། །ཐེ་ཙོམ་རྣམ་པར་གཅད་པ་ནི། །འཇིག་རྟེན་ན་ནི་ངོ་མཚར་ཆེ། །འདི་ལྟར་ཐམས་ཅད་གཟིགས་པའི་རྣམས། །ཉིད་ཀྱིས་འགྲོ་ལ་བཀའ་སྩལ་ན། །སངས་རྒྱས་མི་མཁྱེན་གང་ཡང་མེད། །དེ་ལྟར་སངས་རྒྱས་བསམ་མི་ཁྱབ། །མི་ཤེས་པ་ཡི་རྒྱུ་ལས་ནི། །ཡེ་ཤེས་འཇུག་པར་མི་འགྱུར་ཏེ། །མུན་པའི་མཐུ་དང་སྣང་བ་གཉིས། །ལྷན་ཅིག་འབྱུང་བར་མི་འགྱུར་བསྟན། །ཇི་ལྟར་གཟུགས་དང་གཟུགས་མེད་པ། །བསྐལ་བ་མཉམ་པ་མེད་པར་བཤད། །དེ་ལྟར་ཤེས་དང་མི་ཤེས་པ། །འགྲོགས་པར་ཤིན་ཏུ་མི་འགྱུར་རོ། །འཁོར་དང་མྱ་ངན་འདས་པ་དག །ཇི་ལྟར་མེད་ལས་བརྟགས་པ་ལྟར། །དེ་བཞིན་ཤེས་དང་མི་ཤེས་པ། །མཚན་ཉིད་བཞིན་དུ་དམིགས་པ་མེད། །ཇི་ལྟར་འཇིག་རྟེན་འཇིག་པ་དང་། །འདུ་བར་འགྱུར་བ་རིང་བ་སྟེ། །ཕན་ཚུན་འགྲོགས་པར་མི་འགྱུར་བ། །ཤེས་དང་མི་ཤེས་དེ་བཞིན་ནོ། །ཇི་ལྟར་བྱང་ཆུབ་སེམས་དཔའ་ཡི། །ཐོག་མའི་སེམས་དང་ཐ་མའི་སེམས། །ལྷན་ཅིག་མྱི་གནས་འབྱུང་བ་ལྟར། །ཤེས་དང་མི་ཤེས་དེ་བཞིན་ནོ། །ཇི་ལྟར་ལུས་དང་རྣམ་ཤེས་པ། །གཞན་དང་གཞན་ལས་འབྱུང་འགྱུར་བ། །དེ་བཞིན་ཤེས་དང་མི་ཤེས་གཉིས། །འགྲོགས་པར་འགྱུར་བ་ནམ་ཡང་མེད། །ཇི་ལྟར་དུག་ལ་ཕན་པའི་རྩི། །འཕྲལ་དུ་དུག་ནི་དུག་མྱིན་བྱེད། །དེ་ལྟར་ཤེས་པ་མི་ཤེས་པས། །ཤིན་ཏུ་སོལ་བ་བྱེད་པ་བརྗོད། །སངས་རྒྱས་བླ་ན་གང་ཡང་མེད། ། དེ་དང་འདྲ་བའང་ཡོད་པ་མིན། །དེ་ལས་གཞན་དུ་འགྱུར་བ་མེད། །དེ་བས་རྒྱལ་བ་ཤིན་ཏུ་དཀོན། །དེ་ནས་བྱང་ཆུབ་སེམས་དཔའ་བརྩོན་འགྲུས་དང་ལྡན་པས།
སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་དེ་སྨྲས་པ། ཆོས་རྣམས་འདི་དག་འགལ་མྱེད་པར། །མཁྱེན་ནས་སངས་རྒྱས་ཐུགས་སུ་ཆུད། །དེས་ནི་མི་མཁྱེན་གང་ཡང་མྱེད། །ཡེ་ཤེས་ཀྱི་ཡང་ཕ་རོལ་ཕྱིན། །ཇི་ལྟར་གསེར་དང་ས་ལེ་སྦྲམ། །ངོ་བོ་ཉིད་ཀྱིས་འགལ་བ་མེད། །དེ་ལྟར་ཆོས་མིན་དེ་བཞིན་ཆོས། །དེ་དག་ཐམས་ཅད་མཚན་ཉིད་གཅིག །སེམས་ཅན་སེམས་ཅན་མ་ཡིན་པ། །ངོ་བོ་ཉིད་ཀྱིས་རང་བཞིན་མེད། །གདགས་སུ་མེད་ལས་འབྱུང་བ་ལྟར། །ཆོས་རྣམས་རང་བཞིན་དེ་བཞིན་ནོ། །མ་འོངས་དུས་ནི་ཇི་ལྟ་བུར། །འདས་པས་བརྗོད་པར་བྱ་བ་སྟེ། །དེ་ལ་མཚན་ཉིད་ཡོད་པ་མིན། །དེ་བཞིན་ཆོས་ལ་མཚན་ཉིད་མེད། །འབྲེལ་བར་སྐྱེ་དང་འགོག་པ་དང་། །རང་བཞིན་མེད་དང་རང་བཞིན་དག །རྣམ་པ་ཐ་དད་གྱུར་པ་ལྟར། །སངས་རྒྱས་རང་བཞིན་དེ་བཞིན་ནོ། །མྱ་ངན་འདས་པ་གཟུང་མྱེད་པ། །གཉིས་ཀྱི་དུས་ན་བརྗོད་པར་བྱས། །དེ་ལ་བྱེ་བྲག་གང་ཡང་མེད། །དེ་བཞིན་གཟུགས་ལ་རྣམ་རྟོག་པའོ། །ཇི་ལྟར་ཅི་ཞིག་བགྲང་བྱས་ཤིང་། །བགྲང་བར་བྱེད་ཅེས་བརྗོད་པ་ཡང་། །དེ་ལ་ཐ་དད་གང་ཡང་མེད། །དེ་བཞིན་གཟུགས་ཀྱི་རང་བཞིན་ནོ། །ཇི་ལྟར་གཅིག་ནས་གཅིག་གི་བླར། །མང་པོའི་ཚུལ་དུ་བགྲང་བ་ཡིས། །དངོས་པོ་གྲངས་མེད་འགྱུར་བ་ཡང་། །བློ་ཡི་རྣམ་པ་ཐ་དད་བསྟན། །འཇིག་རྟེན་ཁམས་རྣམས་ལ་ལ་དག །བསམ་གྱིས་མི་ཁྱབ་ཚིག་གྱུར་ཀྱང་། །ནམ་མཁའ་འཇིག་པར་འགྱུར་བ་མེད། །རང་འབྱུང་ཡེ་ཤེས་དེ་བཞིན་ནོ། །ཇི་ལྟར་འཇིག་རྟེན་ཕྱོགས་བཅུ་ཡི། །ནམ་མཁའ་སོ་སོར་བརྟགས་པ་ལྟར། །དེ་བཞིན་སངས་རྒྱས་རྣམས་མཐོང་སྟེ། །སངས་རྒྱས་རྣམས་ལ་རྟོག་མི་མངའ། །དེ་ནས་བྱང་ཆུབ་སེམས་དཔའ་སྟོབས་དང་ལྡན་པས། སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་དེ་སྨྲས་པ། ཇི་ལྟར་དུས་རྣམས་གསུམ་པོ་ཡིས། །སེམས་ཅན་
ཁམས་རྣམས་བརྗོད་པར་འགྱུར། །སེམས་ཅན་དེ་དག་ཐམས་ཅད་ཀྱང་། །ཕུང་པོ་ལྔ་ལས་ཤིན་ཏུ་བརྗོད། །དེ་རྣམས་ལས་ཀྱི་ཕུང་ཆེན་ཡིན། །ལས་ཀྱི་རྩ་བའང་སེམས་ཡིན་ཏེ། །སེམས་ནི་སྒྱུ་མ་བཞིན་དུ་བཤད། །སྒྱུ་མར་གྱུར་པའི་འགྲོ་འདིའོ། །གང་ན་འཇིག་རྟེན་འདི་འབྱུང་ཞིང་། །ཡང་ན་ལྡོག་པར་འགྱུར་བ་ཡིན། །འཇིག་རྟེན་འཇིག་རྟེན་མྱི་བྱེད་དེ། །གཞན་གྱི་རྒྱུས་ཀྱང་བྱས་པ་མྱིན། །འཇིག་རྟེན་འདི་ནི་འབྱུང་བ་འབྱུང་། །འཇིག་རྟེན་འདིར་ཡང་ལྡོག་པར་འགྱུར། །འབྱུང་ཞེས་བརྗོད་པར་མི་བྱ་སྟེ། །དེ་ནི་འཇིག་རྟེན་ཤེས་པ་ཡིན། །གང་ལ་འཇིག་རྟེན་སྣང་བ་ཞེས། །འདུ་ཤེས་རྣམ་པར་བརྟགས་པ་ཡི། །འཇིག་རྟེན་ཞེས་བྱ་གང་ཞིག་ཡིན། །སྣང་བ་ཞེས་བྱའང་ཅི་ཞིག་ཡིན། །དུས་གསུམ་དག་ཏུ་རྒྱུ་བ་ཡི། །ཕུང་པོ་འདི་ནི་འཇིག་རྟེན་ཡིན། །དེ་དག་འགོག་པ་སྣང་བ་ཞེས། །འགྲོ་བ་དག་ཏུ་འདུ་ཤེས་འགྱུར། །ཕུང་པོ་ཞེས་བྱ་འདི་ནི་ཅི། །ཕུང་པོའི་རང་བཞིན་ཇི་ལྟ་བུ། །ཕུང་པོ་རྣམས་ནི་མི་འཇིག་ཕྱིར། །དངོས་པོ་མེད་ཅེས་རབ་ཏུ་བརྗོད། །ཕུང་པོ་འོད་དག་རྣམ་བརྟགས་དོན། །དེ་དག་རང་བཞིན་སྟོང་པ་ཡིན། །མི་འཇིག་དོན་ནི་སྟོང་པ་སྟེ། །དངོས་པོ་མེད་ཅེས་བྱ་བའོ། །འཇིག་རྟེན་ཅི་བཞིན་སངས་རྒྱས་ཏེ། །སངས་རྒྱས་ཆོས་ཀྱང་དེ་བཞིན་ནོ། །སངས་རྒྱས་ཆོས་དང་སངས་རྒྱས་རྣམས། །ངོ་བོ་ཉིད་ཀྱིས་རང་བཞིན་མེད། །མ་ནོར་ཡང་དག་ཇི་བཞིན་པའི། །ཆོས་ཉིད་འདི་ནི་རྟོགས་གྱུར་ནས། །ཀུན་གཟིགས་ཐམས་ཅད་མཁྱེན་པ་ཡི། །སངས་རྒྱས་ཀུན་ན་རབ་ཏུ་སྣང་། །དེ་ནས་བྱང་ཆུབ་སེམས་དཔའ་རིག་པ་དང་ལྡན་པས། སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ནས། དེའི་ཚེ་ཚིགས་སུ་བཅད་དེ་སྨྲས་པ། རང་བཞིན་དངོས་པོ་མེད་པ་ཡིས། །འཇིག་རྟེན་ཁམས་རྣམས་ཐམས་ཅད་ཀྱི། །ས་ཡི་ཁམས་རྣམས་ཅི་བཞིན་ཏེ། ། སངས་རྒྱས་རྣམ་འཕྲུལ་ངོ་མཚར་ཆེ། །དེ་ཡི་རང་བཞིན་འདི་ཡིན་ལ། །བརྗོད་ཅིང་བསྔགས་པ་མཐའ་ཡས་ཏེ། །འདས་པའི་འཇིག་རྟེན་ཁམས་
རྣམས་སུ། །སུས་ཀྱང་བརྗོད་པ་མ་ཡིན་ན། །གཞན་དུ་སེམས་ཅན་ལས་ཀྱིས་ན། །ཤིན་ཏུ་བསྟན་པར་བརྗོད་པ་སྟེ། །སེམས་ཅན་རྣམས་ནི་མ་གཏོགས་པར། །ལས་ཤེས་བྱ་བ་ཅི་མི་དམིགས། །དེ་བཞིན་སྟོང་པའི་ལས་ཀྱིས་ཀྱང་། །བརྗོད་པ་རྣམས་ནི་ཚད་མེད་པར། །སེམས་ཅན་ཀུན་གྱི་ལས་སུ་འགྱུར། །དེ་ལ་མ་འོངས་གང་ཡང་མེད། །ཇི་ལྟར་ཁ་དོག་དབྱིབས་ཀྱི་རྣམས། །ལས་ཀྱི་རྒྱུད་ནི་བསམ་མི་ཁྱབ། །སྣང་ཡང་དེ་དག་དེ་ན་མེད། །རྣམ་པར་རིག་པའི་དངོས་ཉིད་འདྲ། །དེ་བཞིན་སེམས་ཅན་གཙོ་བོ་ཡི། །སྐུ་ནི་བསམ་གྱིས་མྱི་ཁྱབ་པ། །བརྗོད་པ་རྣམས་ཀྱང་ཚད་མེད་པར། །ཞིང་རྣམས་ཀུན་ན་རབ་ཏུ་སྣང་། །སྐུ་ནི་རྫོགས་པའི་སངས་རྒྱས་མིན། །སངས་རྒྱས་རྣམས་ལ་སྐུ་མི་མངའ། །དཔའ་བོ་ཆེན་པོ་ཆོས་སྐུ་སྟེ། །ཆོས་ཀུན་རྟོགས་པར་ཐུགས་སུ་ཆུད། །གང་གིས་རང་བྱུང་རྣམས་ཀྱི་སྐུ། །ཡང་དག་ཅི་བཞིན་མཐོང་བ་ནི། །སངས་རྒྱས་ཆོས་ནི་རྣམ་ཀུན་དང་། །ཆོས་རྣམས་ལ་ཡང་རྨོངས་པ་མེད། །འདས་པར་གྱུར་པའི་ཆོས་རྣམས་ཀུན། །མྱ་ངན་འདས་པར་ཤེས་གྱུར་ན། །དེ་དག་ཤིན་ཏུ་མི་གནས་པའི། །རྫོགས་པའི་སངས་རྒྱས་མཐོང་བ་ཡིན། །ཡང་དག་སངས་རྒྱས་སུས་མཐོང་ཞིང་། །དྲན་པ་ཤིན་ཏུ་བསྒོམས་བྱས་ཏེ། །མཚན་མེད་ཐ་དད་མེད་པ་རྣམས། །དེ་དག་ཆོས་ཀྱི་རྒྱལ་པོའི་སྲས། །དེ་ནས་བྱང་ཆུབ་སེམས་དཔའ་བློ་དང་ལྡན་པས། སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་དེ་སྨྲས་པ། ཇི་ལྟར་རི་མོའི་ལས་རྣམས་ལ། །ཚོན་རྣམས་སྣ་ཚོགས་ཀུན་འདུ་བ། །ཀུན་ཀྱང་འབྱུང་བ་ཆེན་པོར་མཉམ། །སེམས་ཀྱིས་ཡོངས་སུ་བརྟགས་པ་ཡིན། །ཁམས་ལ་ཚོན་རྩི་དེ་དག་མྱེད། །ཚོན་རྩི་ལ་ཡང་ཁམས་མེད་དེ། །ཁམས་རྣམས་མ་གཏོགས ་གཞན་ན་ཡང་། །ཚོན་ཞེས་བྱ་བ་གང་ཡང་མེད། །སེམས་ལ་རི་མོ་དེ་མེད་དོ། །རི་མོ་ལ་ཡང་སེམས་མེད་དེ། །སེམས་དེ་མ་གཏོགས་
གཞན་དུ་ཡང་། །རི་མོ་གང་ཡང་མི་དམིགས་སོ། །སེམས་དེ་རྟག་པ་མ་ཡིན་པ། །བསམ་གྱིས་མྱི་ཁྱབ་ཚད་མེད་ཅིང་། །ཕན་ཚུན་ཤེས་པ་མྱེད་པ་ཡི། །གཟུགས་རྣམས་ཐམས་ཅད་སྟོན་པར་བྱེད། །ཇི་ལྟར་རི་མོ་མཁན་གྱི་རྣམས། །སེམས་ནི་གང་གིས་རི་མོ་དེ། །བྲིས་པའི་སེམས་ཀྱང་མི་ཤེས་པ། །དེ་བཞིན་ཆོས་ཀྱི་རང་བཞིན་ནོ། །སེམས་ནི་རི་མོ་མཁན་དང་འདྲ། །སེམས་ནི་ཕུང་པོ་བྱེད་པ་སྟེ། །འཇིག་རྟེན་ཁམས་ན་ཇི་སྙེད་པའི། །འཇིག་རྟེན་འདི་དག་སེམས་ཀྱིས་བྲིས། །སེམས་དང་འདྲ་བ་སངས་རྒྱས་ཏེ། །སངས་རྒྱས་ཇི་བཞིན་འགྲོ་བའོ། །སེམས་དང་སངས་རྒྱས་དག་ལ་ཡང་། །ངོ་བོ་ཉིད་ཀྱིས་ཟད་པ་མེད། །སེམས་ཀྱི་རྒྱུད་རྣམས་ཅི་འདྲ་བ། །དེ་དག་སངས་རྒྱས་རབ་ཏུ་མཁྱེན། །དེ་ཕྱིར་སངས་རྒྱས་རང་བཞིན་གྱིས། །འགྲོ་བ་སྣ་ཚོགས་གྱུར་པར་སྣང་། །ལུས་ཀྱི་རྣམས་ལ་སེམས་མེད་དེ། །སེམས་ལའང་ལུས་རྣམས་ཡོད་པ་མྱིན། །སངས་རྒྱས་མཛད་པའང་རབ་ཏུ་བྱེད། །དེ་ལྟར་སྤྱོད་པ་ངོ་མཚར་ཆེ། །གང་ཞིག་དུས་གསུམ་ཐམས་ཅད་ཀྱི། །རྒྱལ་བ་ཐམས་ཅད་ཤེས་འདོད་ན། །སངས་རྒྱས་ཐམས་ཅད་སེམས་ཀྱི་དངོས། །ཆོས་ཀྱི་དབྱིངས་སུ་བལྟ་བར་གྱིས། །དེ་ནས་བྱང་ཆུབ་སེམས་དཔའ་ཡེ་ཤེས་དང་ལྡན་པས། སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་དེ་སྨྲས་པ། གཟུང་དུ་མེད་ལ་འཛིན་ཅེས་བྱ། །སྣང་བ་མེད་ལ་སྣང་བ་སྟེ། །མཉན་དུ་མེད་པ་མཉན་པར་བྱེད། །སེམས་མེད་པ་ཡི་སེམས་དང་ལྡན། །ཚད་མེད་པ་ལ་ཚད་མ་ཡིན། །གང་ཞིག་འཛིན་པར་མི་འདོད་པ། །དེ་ནི་ཚད་མེད་ཚད་མ་ཡིན། །ནམ་ཡང་འཛིན་པར་མི་འགྱུར་རོ། །བརྗོད་དུ་མེད་པ་སྨྲ་བྱེད་པ། །བདག་ལ་ཤིན་ཏུ་བསླུ་བ་སྟེ། །དེ་ཡི་དོན་ཀྱང་བརྗོད་མི་བྱེད། ། སྲོག་ཆགས་རྣམས་ཀྱང་ཚིམ་མི་འགྱུར། །དེ་བཞིན་མཐའ་ཡས་བརྗོད་ལྡན་པའི། །བརྗོད་པ་གང་ཞིག་སྨྲ་འདོད་པ། །བསྐལ་པ་གྲངས་མེད་ཟད་བྱས་ཀྱང་། །རང་
འབྱུང་རྣམས་ཀྱིས་བརྗོད་མི་ཟད། །ཡིད་བཞིན་ནོར་བུ་དག་པ་ནི། །ཁ་དོག་ཀུན་ཏུ་རབ་ཏུ་སྣང་། །དེ་ལ་ཁ་དོག་ཡོད་པ་མྱིན། །སངས་རྒྱས་ཡོན་ཏན་དེ་བཞིན་ནོ། །ཇི་ལྟར་ནམ་མཁའ་དྲི་མེད་ཅིང་། །གཟུགས་མེད་བསྟན་དུ་མེད་ཡིན་ཡང་། །གཟུགས་རྣམས་ཐམས་ཅད་སྟོན་པར་བྱེད། །ནམ་མཁའ་སྣང་བ་གང་ཡང་མེད། །དེ་བཞིན་ཐམས་ཅད་གཟིགས་པ་རྣམས། །ཡོན་ཏན་ཀུན་དང་ལྡན་སྟོན་ཀྱང་། །དེ་ནི་སུས་ཀྱང་མཐོང་བ་མེད། །སེམས་ལའང་དེ་ནི་མི་དམིགས་སོ། །སངས་རྒྱས་སྒྲ་ནི་གྲག་མོད་ཀྱི། །དེ་བཞིན་གཤེགས་པ་སྒྲ་མ་ཡིན། །སྒྲ་ནི་མ་གཏོགས་གཞན་དུ་ཡང་། །སངས་རྒྱས་ཤེས་པར་མི་རུང་ངོ་། །ཇི་ལྟར་བདག་གི་མཐོང་ཚུལ་དུ། །འདི་ནི་ཤེས་བྱའི་གནས་མ་ཡིན། །སངས་རྒྱས་བྱང་ཆུབ་བླང་དུ་མེད། །དེ་ལ་རྣམ་པར་རྟོག་པ་མེད། །སངས་རྒྱས་ཆོས་རྣམས་གང་དག་ཀྱང་། །སུ་ལའང་སངས་རྒྱས་གསུང་པ་མྱེད། །སེམས་ཅན་བསམ་པ་ཇི་བཞིན་དུ། །དེ་ལ་དེ་འདྲ་སྟོན་པ་མཛད། །ཤིན་ཏུ་རྒྱས་པ་ཆེན་པོའི་མདོ་སངས་རྒྱས་ཕལ་པོ་ཆེ་ཞེས་བྱ་བ་ལས། རབ་མཚེ་མའི་གནས་སུ་བྱང་ཆུབ་སེམས་དཔའ་འདུས་པས། ཚིགས་སུ་བཅད་པ་བསྟན་པའི་ལེའུ་ཞེས་བྱ་བ་སྟེ། ཉི་ཤུ་ལྔ་པ།། །།