སུམ་ཅུ་རྩ་གཅིག་པ། ས་བཅུའི་ལེའུ།
ཤིན་ཏུ་རྒྱས་པ་ཆེན་པོའི་མདོ། སངས་རྒྱས་རྨད་གཅད་ཅེས་བྱ་བ་ལས་ས་བཅུ་པའི་ལེའུ་སྟེ། བམ་པོ་བཅུ་གསུམ་པ། དེ་ནས་བཅོམ་ལྡན་འདས་ལྷའི་རྒྱལ་པོ་དབང་སྒྱུར་གྱི་གནས་ཀྱི་ནོར་བུ་རིན་པོ་ཆེ་དམ་པའི་ཁང་པ་ན། བྱང་ཆུབ་སེམས་དཔའི་དགེ་འདུན་ཆེན་པོ་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ། འཇིག་རྟེན་གྱི་ཁམས་གཞན་དང་གཞན་ནས་འདུས་པ་ཤ་སྟག་ཀུན་ཀྱང་བྱང་ཆུབ་སེམས་དཔའི་ཡེ་ཤེས་ཀྱི་ཡུལ་དང་སྤྱོད་ཡུལ་ཐམས་ཅད་རབ་ཏུ་ཐོབ་པས་གནས་པ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཡུལ་ལ་འཇུག་ཅིང་གཞོལ་བའི་སྤྱོད་ཡུལ་མ་བཏང་བ། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་བྱ་བའི་དུས་
བཞིན་དུ་ཐོགས་པ་མེད་པའི་བྱིན་གྱི་རླབས་རྣམ་པ་ཐ་དད་པས་བྱ་བ་ཐམས་ཅད་ཡང་དག་པར་སྟོན་པ་ལ་མཁས་པ། བྱང་ཆུབ་སེམས་དཔའི་སྨོན་ལམ་ཐམས་ཅད་མངོན་པར་བསྒྲུབ་ཅིང་བསྐལ་པ་དང་ཞིང་དང་དུས་སུ་སྤྱོད་པ་ལ་གནས་པའི་རྒྱུན་མི་གཅོད་པ། བྱང་ཆུབ་སེམས་དཔའི་བསོད་ནམས་དང་ཡེ་ཤེས་དང་རྫུ་འཕྲུལ་གྱི་ཚོགས་ཡོངས་སུ་རྫོགས་ཤིང་འགྲོ་བ་ཐམས་ཅད་ཉེ་བར་འཚོ་བ་མི་ཟད་པ་ལ་རབ་ཏུ་ཞུགས་པ། བྱང་ཆུབ་སེམས་དཔའི་ཤེས་རབ་དང་། ཐབས་ཐམས་ཅད་ཀྱི་ཕ་རོལ་ཏུ་ཕྱིན་པ་དམ་པ་ཐོབ་པ། བྱང་ཆུབ་སེམས་དཔའི་སྤྱོད་པས་འཁོར་བ་དང་། མྱ་ངན་ལས་འདས་པའི་སྒོ་ཡང་དག་པར་བསྟན་ཅིང་ཤིན་ཏུ་བསྒྲུབ་པའི་རྒྱུན་མི་གཅོད་པ། བྱང་ཆུབ་སེམས་དཔའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་དང་། མངོན་པར་ཤེས་པ་དང་། རིག་པ་དང་ཡེ་ཤེས་ལ་རྣམ་པར་རོལ་པའི་མངོན་པར་ཤེས་པས་བྱ་བ་ཐམས་ཅད་ཡང་དག་པར་སྟོན་པ་ལ་མཁས་པ། བྱང་ཆུབ་སེམས་དཔའི་རྫུ་འཕྲུལ་དང་སྟོབས་དང་། དབང་ཐམས་ཅད་ཐོབ་ཅིང་མངོན་པར་འདུ་བྱ་བ་མེད་པའི་སེམས་སྐད་ཅིག་གིས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་འདོད་པ་ལ་སྔུན་དུ་འདྲེན་པའི་གཏམ་གྱི་སྐྱེས་བུ་དམ་པ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་ཡང་དག་པར་གཟུང་བ་དང་། སངས་རྒྱས་ལ་མཆོད་པ་དང་། རིམ་གྲོ་རྒྱ་ཆེན་པོ་བྱ་བའི་དོན་དུ་མངོན་པར་བརྩོན་པ། བྱང་ཆུབ་སེམས་དཔའི་ལས་ཐམས་ཅད་ཡང་དག་པར་བླང་བ་མཉམ་པ་ཉིད་ཀྱི་སྦྱོར་བས་འཇིག་རྟེན་གྱི་ཁམས་ཐམས་ཅད་དུ་ལུས་ཀྱི་གཟུགས་བརྙན་རབ་ཏུ་འབྱུང་བ་ཆོས་ཀྱི་དབྱིངས་ཐམས་ཅད་དུ་ཆགས་པ་མེད་པའི་དབྱངས་རབ་ཏུ་སྒྲོག་པས་དུས་གསུམ་ཐམས་ཅད་དུ་ཆགས་པ་མེད་པའི་སེམས་དང་། ཡེ་ཤེས་ཀྱི་ཡུལ་རྒྱས་པར་འགེངས་པ། བྱང་ཆུབ་སེམས་དཔའི་ཡོན་ཏན་དང་ནན་ཏན་ཡོངས་སུ་རྫོགས་པ་ཐམས་ཅད་བསྐལ་པ་བརྗོད་དུ་
མེད་པར་རྒྱུན་མི་ཆད་པར་ཡང་དག་པར་བསྟན་པ་ལ་ཡོན་ཏན་བསྔགས་ཤིང་བརྗོད་པ་ཟད་མི་ཤེས་པ་ཤ་སྟག་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་པད་མོའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་པད་མོ་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཙང་བའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བ་དྲི་མ་མྱེད་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱན་རྣམ་པར་བཀོད་པ་ཐམས་ཅད་རབ་ཏུ་སྣང་བར་སྟོན་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་རྣམ་པར་སྣང་བའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་ཡིད་དུ་འོང་བའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཙན་དན་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མེ་ཏོག་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མེ་ཏོག་རྒྱས་པོ་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་ལྷའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བསྒྲིབས་པ་མྱེད་པའི་ཡེ་ཤེས་རྣམ་པར་དག་པའི་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་
དྲི་མ་དང་བྲལ་བའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་སྣ་ཚོགས་རྒྱན་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཟེར་གྱི་དྲ་བ་ཆེན་པོ་རབ་ཏུ་སྣང་བའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འོད་དྲི་མ་མེད་པའི་དཔལ་གྱི་གཟི་བརྗིད་བཟང་པོའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གསེར་བཟང་ཞིང་དྲི་མ་མེད་པའི་དབྱིག་གིས་སྤྲས་པའི་གཟི་བརྗིད་མཛེས་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཚན་ཐམས་ཅད་ཀྱིས་བརྒྱན་པས་རྣམ་པར་དག་པའི་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་གྱི་བེའུ་རྡོ་རྗེ་འོད་འཕྲོ་བས་བརྒྱན་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འོད་འབར་ཞིང་འཕྲོ་བའི་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མའི་རྒྱལ་པོ་འོད་རབ་ཏུ་སྣང་བའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་མཛོད་ཡེ་ཤེས་བསྒྲིབས་པ་མེད་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དབྱངས་ཀྱི་དཀྱིལ་འཁོར་བསྒྲིབས་པ་མེད་ཅིང་ང་རོ་སྙན་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཀྱི་སྙིང་པོ་ཡོན་ཏན་གྱི་འགྲོ་བ་ཐམས་ཅད་ཀྱི་སྨོན་ལམ་ཡང་དག་པར་འཛིན་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱ་མཚོའི་རྒྱན་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རི་རབ་དཔལ་གྱི་སྙིང་པོ་དང་བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་ཐམས་ཅད་རྣམ་པར་དག་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་
སངས་རྒྱས་དཔལ་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་གྲོལ་བའི་ཟླ་བ་དང་། དེ་དག་ལ་སྩོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་པ་གཞལ་དུ་མེད་པ། གྲངས་མེད་པ་བསམ་གྱིས་མི་ཁྱབ་པ། མཚུངས་པ་མྱེད་པ་དཔག་ཏུ་མེད་པ། ཀུན་ཏུ་མཐའ་ཡས་པ། མུ་མེད་པ་ས་མཚམས་མྱེད་པ། བརྗོད་དུ་མྱེད་པའི་ཡང་བརྗོད་དུ་མེད་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་སྩོགས་པའི་སངས་རྒྱས་ཀྱི་ཞིང་སྣ་ཚོགས་ནས་འདུས་པ་ཤ་སྟག་དང་། ཐབས་གཅིག་ཏུ་བཞུགས་སོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་སངས་རྒྱས་ཀྱི་མཐུས་ཐེག་པ་ཆེན་པོ་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་བྱང་ཆུབ་སེམས་དཔའི་ཏིང་ངེ་འཛིན་ཐེག་པ་ཆེན་པོ་རབ་ཏུ་སྣང་བ་དེ་ལ་མཉམ་པར་བཞག་མ་ཐག་ཏུ། དེ་ནས་དེའི་ཚེ་ཕྱོགས་བཅུའི་འཇིག་རྟེན་གྱི་ཕྱོགས་རེ་རེའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་ནས། སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་མཚན་རྡོ་རྗེའི་སྙིང་པོ་ཞེས་བྱ་བར་མཐུན་པ་ཤ་སྟག་གིས་ཞལ་མངོན་པར་བསྟན་ཏེ། སངས་རྒྱས་བཅོམ་ལྡན་འདས་དེ་དག་གིས་དེ་ལ་འདི་སྐད་ཅེས་བཀའ་སྩལ་ཏོ། །རྒྱལ་བའི་བུ་དེ་ལྟར་ཁྱོད་བྱང་ཆུབ་སེམས་དཔའི་ཏིང་ངེ་འཛིན་ཐེག་པ་ཆེན་པོ་རབ་ཏུ་སྣང་བ་ལ་སྙོམས་པར་ཞུགས་པ་ལེགས་སོ་ལེགས་སོ། །འདི་ལྟར་རིགས་ཀྱི་བུ་ཁྱོད་ལ་ཕྱོགས་བཅུའི་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་མཚན་རྡོ་རྗེའི་སྙིང་པོ་ཞེས་བྱ་བར་མཐུན་པ་ཤ་སྟག་གིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་འདིའི་སྔོན་གྱི་སྨོན་ལམ་གྱི་
བྱིན་གྱི་རླབས་དང་། ཁྱོད་ཉིད་ཀྱི་ཡེ་ཤེས་ཀྱི་ཁྱད་པར་གྱིས་བྱང་ཆུབ་སེམས་དཔའ་ཐམས་ཅད་ལ་སངས་རྒྱས་ཀྱི་ཆོས་སྣང་བ་བསམ་གྱིས་མི་ཁྱབ་པ་རབ་ཏུ་བརྗོད་ཅིང་ཡེ་ཤེས་ཀྱི་ས་ལ་འཇུག་པར་བྱ་བ་དང་། དགེ་བའི་རྩ་བ་ཐམས་ཅད་ཡང་དག་པར་བསྡུ་བ་དང་། སངས་རྒྱས་ཀྱི་ཆོས་ཐམས་ཅད་རབ་ཏུ་དབྱེ་བ་ལ་མཁས་པར་བྱ་བ་དང་། ཆོས་ཐམས་ཅད་ལ་ཡེ་ཤེས་ཤིན་ཏུ་ཡངས་པར་བྱ་བ་དང་། ཤིན་ཏུ་ལེགས་པར་གནས་པའི་ཆོས་རབ་ཏུ་བསྟན་པ་དང་། ཡེ་ཤེས་ཐ་མྱི་དད་པ་རྣམ་པར་སྦྱང་བ་དང་འཇིག་རྟེན་གྱི་ཆོས་ཐམས་ཅད་ཀྱིས་གོས་པ་མྱེད་པར་བྱ་བ་དང་། འཇིག་རྟེན་ལས་འདས་པའི་དགེ་བའི་རྩ་བ་ཡོངས་སུ་དག་པར་བྱ་བ་དང་། ཡེ་ཤེས་བསམ་གྱིས་མི་ཁྱབ་པའི་ཡུལ་ཁོང་དུ་ཆུད་པར་བྱ་བ་ནས་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་གྱི་བར་དུ་ཁོང་དུ་ཆུད་པར་བྱ་བ་དང་། འདི་ལྟར་བྱང་ཆུབ་སེམས་དཔའི་ས་བཅུ་བརྩམ་པ་རབ་ཏུ་འཐོབ་པར་བྱ་བ་དང་། བྱང་ཆུབ་སེམས་དཔའི་ས་མ་ནོར་བར་མངོན་པར་རྣམ་པར་དགོད་པ་ཤིན་ཏུ་བསྟན་པ་དང་། སངས་རྒྱས་ཀྱི་ཆོས་ཐམས་ཅད་ལ་ཡང་དག་པར་དམྱིགས་པར་བྱ་བ་དང་། ཟག་པ་མེད་པའི་ཆོས་ཀྱི་བྱེ་བྲག་རྣམ་པར་བསྒོམ་པ་དང་། རྣམ་པར་དབྱེ་བ་ཤིན་ཏུ་རྣམ་པར་ཕྱེ་བའི་ཤེས་རབ་ཀྱི་སྣང་བ་ཆེན་པོ་ལ་མཁས་པའི་ཡེ་ཤེས་ཀྱི་རྒྱན་ཐོབ་པར་བྱ་བ་དང་། ཤིན་ཏུ་བརྟགས་པའི་ཡེ་ཤེས་ཀྱི་སྒོ་ལ་འཇུག་པར་བྱ་བ་དང་། གནས་ཀྱི་རྣམ་པ་ཅི་རིགས་སུ་བརྗོད་པ་དང་། སྤོབས་པའི་སྣང་བ་དམའ་བ་མྱེད་པ་ཐོབ་པར་བྱ་བ་དང་། ཐ་དད་པ་ཡང་དག་པར་ཤེས་པ་ཆེན་པོའི་ས་ཤིན་ཏུ་རྟོགས་པར་བྱ་བ་དང་། བྱང་ཆུབ་ཀྱི་སེམས་ལ་དྲན་པ་ཉམས་པ་མེད་པར་བྱ་བ་དང་། སེམས་ཅན་གྱི་ཁམས་ཐམས་ཅད་ཡོངས་སུ་སྨྱིན་པར་བྱ་བ་དང་། ཐམས་ཅད་དུ་སོང་བའི་བློ་རྣམ་པར་གདོན་མི་ཟ་བ་ལ་མཁས་པ་རབ་ཏུ་ཐོབ་པར་བྱ་བའི་ཕྱིར་བྱིན་གྱིས་བརླབ་པ་མཛད་དོ། །དེ་བས་ན་རིགས་ཀྱི་བུ་ཁྱོད་ཀྱིས་
ཆོས་ཀྱི་སྒོ་རབ་ཏུ་དབྱེ་བ་ལ་མཁས་པར་འགྱུར་བའི་ཆོས་ཀྱི་རྣམ་གྲངས་འདི་ལ་སངས་རྒྱས་ཀྱི་མཐུ་དང་། དེ་བཞིན་གཤེགས་པའི་ཡེ་ཤེས་སྣང་བའི་བྱིན་གྱི་རླབས་ཀྱིས་རང་གི་དགེ་བའི་རྩ་བ་ཡོངས་སུ་དག་པར་བྱ་བ་དང་། ཆོས་ཀྱི་དབྱིངས་ཤིན་ཏུ་སྦྱངས་པ་དང་། སེམས་ཅན་གྱི་ཁམས་ཐམས་ཅད་ལ་ཕན་གདགས་པ་དང་། ཆོས་ཀྱི་སྐུའི་ཡེ་ཤེས་ཀྱི་ལུས་ལ་འཇུག་པར་བྱ་བ་དང་། སངས་རྒྱས་ཐམས་ཅད་ཀྱིས་དབང་བསྐུར་བ་ཡང་དག་པར་བླང་བ་དང་། འཇིག་རྟེན་གྱི་ཁམས་ཐམས་ཅད་དུ་ཤིན་ཏུ་འཕགས་པའི་ལུས་འབྱུང་བར་བྱ་བ་དང་། འཇིག་རྟེན་གྱི་ལམ་གྱི་རྒྱུད་ཐམས་ཅད་ལས་ཡང་དག་པར་འདའ་བར་བྱ་བ་དང་། འཇིག་རྟེན་ལས་འདས་པའི་ཆོས་ཀྱི་ཚུལ་ཡོངས་སུ་དག་པར་བྱ་བ་དང་། ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར་སྤོབས་པ་སྐྱེད་ཅིག །དེ་ནས་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་ཟིལ་གྱིས་མི་ནོན་པར་ལུས་ཉེ་བར་བསྒྲུབ་པ་མཛད་དོ། །ཐོགས་པ་མྱེད་པའི་སྤོབས་པས་ཤིན་ཏུ་སྟོན་པ་ཉེ་བར་བསྒྲུབ་པ་མཛད་དོ། །ཤིན་ཏུ་སྦྱངས་པའི་ཡེ་ཤེས་རྣམ་པར་ཕྱེ་བ་ལ་འཇུག་པ་ཉེ་བར་བསྒྲུབ་པ་མཛད་དོ། །དྲན་པ་ཉམས་པ་མྱེད་པའི་བྱིན་གྱི་རླབས་ཉེ་བར་བསྒྲུབ་པ་མཛད་དོ། །བློ་གྲོས་ཤིན་ཏུ་ངེས་པར་རྟོགས་པས་མཁས་པ་ཉེ་བར་བསྒྲུབ་པ་མཛད་དོ། །ཐམས་ཅད་ཀྱི་རྗེས་སུ་སོང་བའི་བློའི་རྗེས་སུ་འགྲོ་བ་ཉེ་བར་བསྒྲུབ་པ་མཛད་དོ། །ཡང་དག་པར་རྫོགས་པའི་སངས་རྒྱས་ཀྱི་སྟོབས་ཐུབ་པ་མྱེད་པ་ཉེ་བར་བསྒྲུབ་པ་མཛད་དོ། །དེ་བཞིན་གཤེགས་པའི་མྱི་འཇིགས་པ་ཆེ་ཞིང་ཞུམ་པ་མྱེད་པ་ཉེ་བར་བསྒྲུབ་པ་མཛད་དོ། །ཐམས་ཅད་མཁྱེན་པའི་ཡེ་ཤེས་དང་ཐ་དད་པ་ཡང་དག་པར མཛད་པ་མཁྱེན་པས་རྣམ་པར་དབྱེ་བའི་ཆོས་ཀྱི་ཚུལ་ཤིན་ཏུ་རྟོག་པར་བྱ་བ་ཉེ་བར་བསྒྲུབ་པ་མཛད་དོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་ཐུགས་ཀྱི་རྒྱན་ཤིན་ཏུ་རྣམ་པར་
ཕྱེ་བ་མངོན་པར་བསྡུ་བ་ཉེ་བར་བསྒྲུབ་པ་མཛད་དོ། །དེ་ཅིའི་ཕྱིར་ཞེ་ན། དེ་ནི་ཏིང་ངེ་འཛིན་དེ་ཉིད་ཀྱི་ཆོས་ཉིད་རབ་ཏུ་ཐོབ་པ་དང་། སྔོན་གྱི་སྨོན་ལམ་གྱིས་མངོན་པར་བསྒྲུབས་པ་དང་ལྷག་པའི་བསམ་པ་ཤིན་ཏུ་རྣམ་པར་སྦྱངས་པ་དང་། ཡེ་ཤེས་ཀྱི་དཀྱིལ་འཁོར་ཤིན་ཏུ་སྦྱངས་པ་དང་། ཚོགས་ཤིན་ཏུ་བསྩགས་པ་དང་། ཡོངས་སུ་སྦྱང་བ་ཤིན་ཏུ་བྱས་པ་དང་། དྲན་པའི་སྣོད་ཚད་མེད་པ་དང་། མོས་པ་རྣམ་པར་དག་ཅིང་འོད་ཤིན་ཏུ་གསལ་བ་དང་། གཟུངས་ཀྱི་སྒོ་ཐ་མི་དད་པ་ཐོབ་པ་དང་། ཆོས་ཀྱི་དབྱིངས་ཀྱི་ཡེ་ཤེས་ཀྱི་ཕྱག་རྒྱས་ཤིན་ཏུ་བཏབ་པའི་ཕྱིར་རོ། །དེ་ནས་སངས་རྒྱས་བཅོམ་ལྡན་འདས་དེ་དག་གིས་དེ་དག་ན་བཞུགས་བཞིན་དུ་རྫུ་འཕྲུལ་གྱི་མཐུས་སོ་སོ་ནས་ཕྱག་གཡས་པ་བརྐྱང་སྟེ། བྱང་ཆུབ་སེམས་དཔའ་རྡོ་རྗེའི་སྙིང་པོའི་མགོ་ལ་བྱུག་པ་མཛད་དོ། །སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་རེག་མ་ཐག་ཏུ་དེ་ཉིད་ཀྱི་ཚེ་ཏིང་ངེ་འཛིན་དེ་ལས་ལངས་ནས། བྱང་ཆུབ་སེམས་དཔའ་དེ་དག་ལ་སྨྲས་པ། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའི་སྨོན་ལམ་འདི་ནི་ཤིན་ཏུ་རྣམ་པར་གདོན་མི་ཟ་བ་སྟེ། ཐ་མི་དད་པ་བལྟར་མེད་པ་ཆོས་ཀྱི་དབྱིངས་ཀྱིས་ཀླས་པར་ཡངས་པ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ་སངས་རྒྱས་ཀྱི་ཞིང་ཐམས་ཅད་དང་། སེམས་ཅན་གྱི་ཁམས་ཐམས་ཅད་དུ་རྒྱས་པར་ཁྱབ་པ། འགྲོ་བ་ཐམས་ཅད་ཡོངས་སུ་སྐྱོབ་པ། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པ་སྟེ། ཀྱེ་རྒྱལ་བའི་སྲས་དག་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ཀྱི་ས་ལ་ཡང་རབ་ཏུ་འཇུག་པར་འགྱུར་རོ། །མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ཀྱི་ས་ལ་ཡང་རབ་ཏུ་འཇུག་པར་འགྱུར་རོ། །ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ཀྱི་ས་ལ་ཡང་
རབ་ཏུ་འཇུག་པར་འགྱུར་རོ། །ཀྱེ་རྒྱལ་བའི་སྲས་དག །དེ་ལ་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ས་རྣམས་ཏེ། གང་ལ་བསམས་ཏེ་བདག་གིས་དེ་སྐད་དུ་སྨྲས་པ་དེ་དག་ནི། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་སོ། །གསུང་ངོ་། །གསུང་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། རབ་ཏུ་དགའ་བ་ཞེས་བྱ་བ་བྱང་ཆུབ་སེམས་དཔའི་ས་དང་པོ་དང་། དྲི་མ་དང་བྲལ་བ་ཞེས་བྱ་བ་བྱང་ཆུབ་སེམས་དཔའི་ས་གཉིས་པ་དང་། འོད་བྱེད་པ་ཞེས་བྱ་བ་བྱང་ཆུབ་སེམས་དཔའི་ས་གསུམ་པ་དང་། འོད་འཕྲོ་བ་ཅན་ཞེས་བྱ་བ་བྱང་ཆུབ་སེམས་དཔའི་ས་བཞི་པ་དང་། རྒྱལ་བར་དཀའ་བ་ཞེས་བྱ་བ་བྱང་ཆུབ་སེམས་དཔའི་ས་ལྔ་པ་དང་། མངོན་སུམ་པ་ཞེས་བྱ་བ་བྱང་ཆུབ་སེམས་དཔའི་ས་དྲུག་པ་དང་། རིང་དུ་སོང་བ་ཞེས་བྱ་བ་བྱང་ཆུབ་སེམས་དཔའི་ས་བདུན་པ་དང་། མི་གཡོ་བ་ཞེས་བྱ་བ་བྱང་ཆུབ་སེམས་དཔའི་ས་བརྒྱད་པ་དང་། ལེགས་པའི་བློ་གྲོས་ཞེས་བྱ་བ་བྱང་ཆུབ་སེམས་དཔའི་ས་དགུ་པ་དང་། ཆོས་ཀྱི་སྤྲིན་ཅེས་བྱ་བ་བྱང་ཆུབ་སེམས་དཔའི་ས་བཅུ་པ་སྟེ། ཀྱེ་རྒྱལ་བའི་སྲས་དག །དེ་རྣམས་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ས་བཅུ་པ་སྟེ། དེ་ནི་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་སོ། །གསུང་ངོ་། །གསུང་བར་འགྱུར་རོ། །ཀྱེ་རྒྱལ་བའི་སྲས་དག །བདག་གིས་ནི་སངས་རྒྱས་ཀྱི་ཞིང་གང་ནའང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས། བྱང་ཆུབ་སེམས་དཔའི་ས་བཅུ་པོ་འདི་དག་མི་གསུང་བ་དེ་ལྟ་བུ་མ་མཐོང་ངོ་། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ལམ་ཡོངས་སུ་སྦྱོང་བའི་ཆོས་སྣང་བའི་སྒོ་འདི་ནི་ཡང་དག་ཕུལ་ཞེས་བྱ་བ་ཡིན་ཏེ། འདི་ལྟར་བྱང་ཆུབ་སེམས་དཔའི་ས་རྣམ་པར་དགོད་པ་
ཤིན་ཏུ་བསྟན་པའོ། །ཀྱེ་རྒྱལ་བའི་སྲས་དག་གནས་འདི་ནི་བསམ་གྱིས་མི་ཁྱབ་པ་སྟེ། འདི་ལྟར་བྱང་ཆུབ་སེམས་དཔའ་རྣམས་ཀྱིས་ཤེས་པའོ། །དེ་ནས་དེ་ལྟར་བྱང་ཆུབ་སེམས་དཔའ་རྡོ་རྗེའི་སྙིང་པོས་བྱང་ཆུབ་སེམས་དཔའི་ས་བཅུ་པོ་འདི་དག་མིང་ཙམ་ཞིག་བརྗོད་དེ་ཅང་མི་ཟེར་བར་འདུག་ནས། དེ་ལས་རབ་ཏུ་ཕྱེ་སྟེ་མ་བཤད་པ་དང་། དེ་ནས་བྱང་ཆུབ་སེམས་དཔའི་འཁོར་དེ་དག་ཐམས་ཅད་བྱང་ཆུབ་སེམས་དཔའི་ས་བཅུ་པོ་དེ་དག་གི་མིང་ཙམ་ཞིག་ཐོས་ལས་རབ་ཏུ་ཕྱེ་སྟེ། མི་བརྗོད་པས་སྐོམ་པར་གྱུར་ནས་དེ་དག་འདི་སྙམ་དུ་སེམས་ཏེ། དེ་ལྟར་བྱང་ཆུབ་སེམས་དཔའ་རྡོ་རྗེའི་སྙིང་པོས་བྱང་ཆུབ་སེམས་དཔའི་ས་བཅུ་པོ་དེ་དག་གི་མིང་ཙམ་ཞིག་བརྗོད་དེ་ཅང་མི་ཟེར་བར་འདུག་ནས། དེ་ལས་རབ་ཏུ་ཕྱེ་ཞིང་མི་སྟོན་པ་དེ་ལ་རྒྱུ་ནི་གང་རྐྱེན་ནི་ཅི་ཞིག་ཡོད་སྙམ་པ་དང་། དེའི་ཚེ་བྱང་ཆུབ་སེམས་དཔའི་འཁོར་འདུས་པ་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་གྲོལ་བའི་ཟླ་བ་ཞེས་བྱ་བ་འདུས་ཤིང་འདུག་འདུག་སྟེ། དེ་ནས་བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས། བྱང་ཆུབ་སེམས་དཔའི་འཁོར་དེ་དག་གི་སེམས་ཀྱི་ཡོངས་སུ་རྟོག་པ་སེམས་ཀྱིས་ཡོངས་སུ་ཤེས་ནས། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་གླུའི་དབྱངས་ཀྱིས་ཚིགས་སུ་བཅད་དེ་དོན་དེ་དྲིས་སོ། །ཅི་ཕྱིར་རྟོག་པ་རྣམ་དག་ཅིང་། །དྲན་དང་ཡེ་ཤེས་ལྡན་པ་ཡིས། །ས་ཡི་མཆོག་ནི་བརྗོད་བྱས་ཏེ། །མཁས་པས་རྣམ་པར་ཕྱེ་མི་བཤད། །འདི་ཀུན་ངེས་པར་རྟོགས་པ་སྟེ། །བྱང་ཆུབ་སེམས་དཔའ་གྲགས་ཆེན་ཡིན། །ཅི་ཕྱིར་ཁྱོད་ཀྱི་ས་བརྗོད་དེ། །རབ་ཏུ་ཕྱེ་བ་བཤད་མི་བགྱི། །རྒྱལ་སྲས་འཇིགས་མེད་འདི་དག་ནི། །ཀུན་ཀྱང་ཤིན་ཏུ་ཉན་པར་འདོད། །ས་ཡི་དོན་ཚུལ་ཡང་དག་ཏུ། །རྣམ་པར་ཕྱེ་སྟེ་བཤད་པར་མཛོད། །འཁོར་འདི་ཤིན་ཏུ་རྣམ་དང་སྟེ། །ལེ་ལོ་མེད་ཅིང་དགེ་དང་ལྡན། །དག་པའི་མཆོག་ལ་གནས་པ་སྟེ། །ཡོན་ཏན་ཡེ་ཤེས་ལྡན་པ་ཡི། །
ཕན་ཚུན་གཅིག་ལ་གཅིག་ལྟ་ཞིང་། །ཀུན་ཀྱང་རིམ་གྲོ་བཅས་པར་གནས། །སྦྲང་རྩི་ཇི་ལྟར་སྤང་མྱིན་པ། །དེ་ལྟར་བདུད་རྩི་མཆོག་ཀྱང་འདོད། །རྡོ་རྗེའི་སྙིང་པོ་འཇིགས་མེད་པ། །ཤེས་རབ་ཆེན་པོས་དེ་ཐོས་ནས། །འཁོར་རྣམས་དགའ་བར་བྱ་བའི་ཕྱིར། །བདེ་བར་གཤེགས་པའི་སྲས་ལ་སྨྲས། །སངས་རྒྱས་སྐུར་བ་ཡང་དག་འབྱུང་བས་ན། །བྱང་ཆུབ་སེམས་དཔའི་སྤྱོད་པ་རབ་བསྟན་ཅིང་། །ས་རྒྱུ་དམ་པ་རྣམ་པར་དབྱེ་བྱ་བ། །དེ་ནི་རྨད་འབྱུང་མཆོག་ཏུ་དགའ་བ་ཡིན། །ཕྲ་ཞིང་བལྟ་དཀའ་རྣམ་པར་རྟོག་པ་སྤངས། །སེམས་ཀྱི་ས་དང་བྲལ་བས་བསྒྲུབ་པར་དཀའ། །མཁས་པ་རྣམས་ཀྱི་ཟག་མེད་སྤྱོད་ཡུལ་ཏེ། །འགྲོ་བ་རྣམས་ཀྱིས་དེ་ཐོས་མོས་པར་འགྱུར། །རྡོ་རྗེ་ལྟ་བུར་བསམ་པ་རབ་གཞག་སྟེ། །སངས་རྒྱས་ཡེ་ཤེས་མཆོག་ལ་མོས་བྱས་ཤིང་། །བདག་མེད་པ་ཡི་སེམས་ཀྱི་ས་ཤེས་ན། །ཡེ་ཤེས་དམ་པ་འདི་བཟོད་མཉན་པར་ནུས། །ཇི་ལྟར་བར་སྣང་ཚོན་རིས་བྲིས་པ་དང་། །ནམ་མཁའི་དབྱིངས་ལ་རླུང་གནས་ཇི་བཞིན་དུ། །དེ་ལྟར་ཡེ་ཤེས་ཟག་པ་མེད་པ་ཡང་། ། ཤིན་ཏུ་བལྟ་དཀའ་ཐུབ་པས་རྣམ་པར་ཕྱེ། །དེ་ལ་བདག་གིས་སེམས་ནི་འདི་སྙམ་བྱེད། །སངས་རྒྱས་ཡེ་ཤེས་དམ་པ་བསམ་ཡས་ལ། །འགྲོ་བ་གང་རྣམས་དད་པར་བྱེད་དཀོན་ཞེས། །དེ་ཡི་ཕྱིར་ན་མ་སྨྲས་མ་བཤད་དོ། །དེ་སྐད་སྨྲས་པ་དང་། བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་འདི་སྐད་སྨྲས་སོ། །ཀྱེ་རྒྱལ་བའི་སྲས་འཁོར་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འདི་དག་ལ་བསམ་པ་ཤིན་ཏུ་སྦྱངས་པ། ཀུན་ཏུ་རྟོག་པ་ཡོངས་སུ་སྦྱངས་པ་སྤྱད་པར་བྱ་བ་ཤིན་ཏུ་སྤྱོད་པ། ཚོགས་ཤིན་ཏུ་བསྩགས་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཤིན་ཏུ་བསྙེན་བཀུར་བ། ཡོན་ཏན་དང་ཡེ་ཤེས་ཚད་མེད་པ་དང་ལྡན་པ། ཐེ་ཙོམ་དང་ནེམ་ནུར་མེད་པ། ཉོན་མོངས་པ་དང་བྲལ་བ། མོས་པ་དང་
ལྷག་པའི་བསམ་པ་ལ་རབ་ཏུ་གནས་པ། གཞན་གྱི་དྲིང་མི་འཇོག་པ་ཤ་སྟག་ཚོགས་པས་ཡོངས་སུ་དག་པ་ཡིན་གྱིས། ཀྱེ་རྒྱལ་བའི་སྲས་དེ་བཞིན་གཤེགས་པའི་བྱིན་གྱིས་ལེགས་པར་བཤད་པ་མཛོད་ཅིག་དང་། བྱང་ཆུབ་སེམས་དཔའ་འདི་དག་ཐམས་ཅད་ནི་རྣམ་པ་འདི་ལྟ་བུའི་གནས་ཟབ་མོ་ལ་མངོན་སུམ་དུ་གནས་པ་ཤ་སྟག་གོ །དེ་ནས་བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་དོན་འདི་ཉིད་གསལ་བར་བཟླས་པའི་ཕྱིར། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་ཚིགས་སུ་བཅད་དེ་སྨྲས་པ། བྱང་ཆུབ་སེམས་དཔའི་སྤྱོད་པ་བླ་མེད་པ། །ས་རྣམས་རབ་ཕྱེ་རྣམ་དགོད་བརྟགས་པ་ཡི། །ཡེ་ཤེས་སྦྱོང་ཞིང་བྱང་ཆུབ་ཐོབ་བྱེད་པ། །མཆོག་དང་དམ་པ་ཞི་བའི་ཆོས་རྣམས་ཤོད། །འཁོར་འདི་དག་པ་ཉོན་མོངས་མེད་པའི་མཆོག །མོས་དང་བསམ་པ་ཤིན་ཏུ་སྦྱངས་པ་སྟེ། །སངས་རྒྱས་བྱེ་བ་མང་ལ་སྤྱད་པ་སྤྱོད། །ས་འདི་བརྟགས་ལ་ཡིད་ཆེས་ལྡན་པ་ཡིན། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་འཁོར་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྣམ་པ་འདི་ལྟ་བུའི་གནས་ཟབ་མོ་ལ་བསམ་པ་ཤིན་ཏུ་སྦྱངས་པ། ཀུན་ཏུ་རྟོག་པ་ཡོངས་སུ་སྦྱངས་པ། སྤྱོད་པ་ཤིན་ཏུ་སྤྱད་པ། ཚོགས་ཤིན་ཏུ་བསྩགས་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ་དགེ་བའི་རྩ་བ་ཤིན་ཏུ་བསྩགས་པ། ཡོན་ཏན་དང་ཡེ་ཤེས་ཚད་མེད་པ་དང་ལྡན་པ། ཐེ་ཙོམ་དང་ནེམ་ནུར་མེད་པ། ཉོན་མོངས་པ་དང་བྲལ་བ། མོས་པ་དང་ལྷག་པའི་བསམ་པ་ལ་རབ་ཏུ་གནས་པ། གཞན་གྱི་དྲིང་མི་འཇོག་པ་ཤ་སྟག་ཚོགས་པས་ཤིན་ཏུ་དག་པ་ཡང་ཡིན་ན། འོན་ཀྱང་སེམས་ཅན་མོས་པ་ཆུང་ངུ་གཞན་དག་གིས་ཟབ་མོའི་རྣམ་པ་འདི་ལྟ་བུ་བསམ་གྱིས་མི་ཁྱབ་པའི་གནས་དག་ཐོས་པར་གྱུར་ལ་ཐོས་ནས་ཀྱང་ཐེ་ཙོམ་དང་ཡིད་གཉིས་སུ་གྱུར་ན། དེ་དག་ལ་ཡུན་རིང་པོར་གནོད་པ་དང་། དོན་མེད་པ་དང་། མི་བདེ་བའི་རྒྱུར་འགྱུར་བས་འདི་ལྟ་ཞིག་ཏུ་སྙིང་བརྩེ་བའི་ཕྱིར་བདག་ནི་
ཅང་མི་ཟེར་བར་འདུག་པ་ཉིད་དུ་མོས་སོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་དོན་འདི་ཉིད་གསལ་བར་བསྟན་པའི་ཕྱིར་ཚིགས་སུ་བཅད་པ་འདི་དག་སྨྲས་སོ། །འཁོར་འདི་རྣམ་དག་ཤེས་རབ་ཡངས་པ་སྟེ། །ཟབ་ཅིང་གསལ་བའི་སྤྱོད་ལྡན་རྟོག་ཤེས་ཤིང་། །གཞན་དྲིང་མྱི་འཇོག་རི་རྒྱལ་བཞིན་མི་གཡོ། །བསམ་རྟོག་མི་འཁྲུག་རྒྱ་མཚོ་ཆེན་པོ་འདྲ། །འོན་ཀྱང་མ་རྟོགས་མི་ཤེས་མ་སྦྱང་བ། །རྣམ་ཤེས་ཡུལ་ནས་དོན་ལ་ཤེས་མེད་པས། ཐོས་ཤིང་མ་ཆེས་ཕྲལ་དུ་ངན་སོང་ལྟུང་། །དེ་དག་སྙིང་བརྩེས་ཡེ་ཤེས་ས་མ་བཤད། །དེ་ནས་བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་ཡང་བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་གསོལ་བ་བཏབ་པ། ཀྱེ་རྒྱལ་བའི་སྲས་ལེགས་པར་བཤད་པ་མཛོད་ཅིག་དང་། དེ་བཞིན་གཤེགས་པའི་བྱིན་གྱིས་རྣམ་པ་འདི་ལྟ་བུ་བསམ་གྱིས་མྱི་ཁྱབ་པའི་གནས་འདི་དག་ཀྱང་གཞན་དུ་མི་འགྱུར་བ་དང་། ལེགས་པར་ཡིད་ཆེས་པར་འགྱུར་རོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དེ་ནི་འདི་ལྟར་ས་ཤིན་ཏུ་བསྟན་པ་འདི་བཤད་པའི་ཚེ་ཆོས་ཉིད་རབ་ཏུ་ཐོབ་པས། སངས་རྒྱས་ཐམས་ཅད་ཀྱིས་ཀྱང་དགོངས་པར་འགྱུར། བྱང་ཆུབ་སེམས་དཔའ་ཐམས་ཅད་ཀྱང་ཡེ་ཤེས་ཀྱི་ས་འདི་ཡོངས་སུ་བསྲུང་བའི་དོན་དུ་རབ་ཏུ་བརྩོན་པར་བྱེད་དོ། །དེ་ཡང་ཅིའི་ཕྱིར་ཞེ་ན། འདི་ནི་སྤྱོད་པའི་ས་དང་པོ་སྟེ། འདི་ནི་སངས་རྒྱས་ཀྱི་ཆོས་ཐམས་ཅད་ཡང་དག་པར་འགྲུབ་པའི་གཞི་ཡིན་ནོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ཡི་གེ་དང་འབྲུ་འགྲངས་པ་ཇི་སྙེད་དུ་བསྟན་པ་དེ་དག་ཐམས་ཅད་ཀྱི་སྔོན་དུ་འགྲོ་བའང་ཡི་གེའི་ཕྱི་མོའོ། །ཐ་མར་ཡང་ཡི་གེའི་ཕྱི་མོ་ལ་ཐུག་སྟེ། ཡི་གེའི་ཕྱི་མོ་བསྟན་པས་མ་ཁྱབ་པ་དེ་ལྟ་བུའི་ཡི་གེ་དང་འབྲུ་འགྲངས་པ་བསྟན་པ་ནི་གང་ཡང་མེད་དོ། །ཀྱེ་རྒྱལ་བའི་སྲས་དེ་བཞིན་དུ་སངས་རྒྱས་ཀྱི་ཆོས་ཐམས་ཅད་ཀྱང་སྤྱོད་པས་རབ་ཏུ་འགྲུབ་པས་ས་སྔོན་དུ་འགྲོ་བའོ། །རང་བྱུང་གི་ཡེ་ཤེས་ཀྱི་མཐར་ཐུག་པར་འགྱུར་བས། སའི་མཐར་ཐུག་པའོ་དེ་བས་ན། ཀྱེ་རྒྱལ་
བའི་སྲས་ཤོད་ཅིག་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་ཡོངས་སུ་བསྲུང་བའི་ཕྱིར་བྱིན་གྱིས་རློབ་པ་མཛད་དོ། །དེ་ནས་བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་དོན་འདི་ཉིད་གསལ་བར་བཟླས་པའི་ཕྱིར། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་ཚིགས་སུ་བཅད་དེ་སྨྲས་པ། ས་དང་སྤྱོད་འཇུག་བྱང་ཆུབ་འགྱུར་བ་ཡེ་ཤེས་སྒྲུབ་བྱེད་པ། །སྤྱོད་པ་རྣམ་དག་ཐམས་ཅད་མཁྱེན་པའི་སྲས་ཀྱིས་ལེགས་པར་ཤོད། །ཕྱོགས་བཅུའི་རྒྱལ་བ་བདེ་གཤེགས་ཀུན་མགོན་འདྲེན་པ་ཇི་སྙེད་པ། །ཁྱུ་མཆོག་དེ་ཀུན་ཡེ་ཤེས་འབྱུང་གནས་སྟོན་ལ་དགོངས་པ་མཛད། །འདི་ནི་དང་པོ་ཞུགས་པའི་ཤེས་སྤྱོད་འདི་མཐར་ཐུག་སྟེ། །རྒྱལ་བའི་ཆོས་རབ་གཞལ་ཡས་ཇི་སྙེད་དེ་དག་འབྱུང་གནས་འདི། །ཡི་གེ་འགྲངས་པ་ཕྱི་མོའི་རྗེས་འགྲོ་སྔོན་དུ་དེ་འགྲོ་ལྟར། །དེ་བཞིན་ས་མཆོག་བློ་ཡི་ཡུལ་དུ་ཐ་མ་ཐུག་པར་འདོད། །དེ་ནས་བྱང་ཆུབ་སེམས་དཔའ་དེ་དག་ཐམས་ཅད་ཀྱི་དབྱངས་ཀྱི་ང་རོ་གཅིག་ཏུ་གླུའི་དབྱངས་ཀྱིས་ཚིགས་སུ་བཅད་དེ། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་དོན་འདི་ཉིད་ཀྱི་ཕྱིར། གསོལ་བ་བཏབ་པ། བློ་ཡངས་དམ་པའི་ཕུལ་མངའ་བ། །སྤོབས་པ་མཐའ་ཡས་རྣམ་པར་དབྱེ་བ་རྟོགས་མཁྱེན་པས། །ཡིད་དུ་འོང་བའི་གསུང་དབྱངས་ཀྱིས། །ཀུན་ལ་ཕན་དོན་དམ་པ་བཤད་པ་མཛོད། །དྲན་དང་དགའ་བས་སྤྱོད་དག་པ། །སྟོབས་བཅུའི་སྟོབས་ཀྱིས་ཤུགས་སྩོགས་ཡོན་ཏན་ལྡན་པ་ཡི། །ས་ཡི་དམ་པ་མཆོག་གི་རྣམས། །ཐ་དད་ཡང་དག་དོན་མཁྱེན་སྤྱོད་པས་ཤོད། །ཞི་སྡོམ་བསྒྲུབ་པའི་ཡིད་ལྡན་པ། །ང་རྒྱལ་དྲེགས་དང་ལྟ་བའི་ཉོན་མོངས་ཞིར་གྱུར་པས། །འཁོར་འདིར་ཐེ་ཙོམ་བྲལ་བ་སྟེ། །ཁྱོད་ཀྱིས་ལེགས་པར་བཤད་དོ་རེ་ཞིག་སྡོད། །སྐོམ་པ་བསིལ་བའི་ཆུ་འདོད་བཞིན། །བཀྲེས་པ་ཁ་ཟས་ནད་པ་སྨན་རབ་འདོད་པ་དང་། །བུང་བ་སྦྲང་རྩི་འདོད་
པ་ལྟར། །དེ་བཞིན་འཁོར་འདི་ཁྱོད་ཀྱི་ཚིག་ལ་སྡོད། །དེ་བས་ཤིན་ཏུ་བློ་ཡངས་པས། །རྡུལ་མེད་རྣམས་ལ་ས་ཡི་དམ་པ་འཇུག་པ་ཤོད། །ཆགས་མེད་སྟོབས་བཅུའི་ཚོགས་གྱུར་པ། །བདེ་གཤེགས་སྤྱོད་པ་མ་ལུས་བཤད་པར་མཛོད། །དེ་ནས་དེའི་ཚེ་བཅོམ་ལྡན་འདས་ཤཱཀྱ་ཐུབ་པའི་མཛོད་སྤུ་ནས། བྱང་ཆུབ་སེམས་དཔའི་སྟོབས་སྣང་བ་ཞེས་བྱ་བའི་འོད་ཟེར་འཁོར་གྱི་འོད་ཟེར་བརྒྱ་སྟོང་གྲངས་མེད་པ་དང་ལྡན་པ་བྱུང་ངོ་། །དེ་བྱུང་ནས་ཕྱོགས་བཅུ་ཐམས་ཅད་ཀྱི་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་མ་ལུས་པར་སྣང་བར་བྱས་ནས། སེམས་ཅན་ཐམས་ཅད་ཀྱི་ངན་སོང་གི་སྡུག་བསྔལ་ཐམས་ཅད་རྩེ་ཟིལ་བར་བྱས་ཏེ། བདུད་ཀྱི་ཁྱིམ་ཐམས་ཅད་ཟིལ་གྱིས་མནན་ནས། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་སྣང་བར་བྱས་ཏེ། སངས་རྒྱས་ཀྱི་ཡུལ་གྱི་རྣམ་པ་བསམ་གྱིས་མྱི་ཁྱབ་པའི་མཐུ་བསྟན་ནས། ཕྱོགས་བཅུ་ཐམས་ཅད་ཀྱི་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ཆོས་བསྟན་པའི་བྱིན་གྱི་རླབས་ཀྱིས་བྱིན་དུ་བརླབས་པའི་བྱང་ཆུབ་སེམས་དཔའི་ལུས་སྣང་བར་བྱས་ཏེ། སངས་རྒྱས་ཀྱི་རྣམ་པར་འཕྲུལ་བ་བསམ་གྱིས་མི་ཁྱབ་པ་བསྟན་ནས། སྟེང་གི་བར་སྣང་ལ་འོད་ཟེར་སྟུག་པོའི་སྤྲིན་གྱི་དྲ་བའི་ཁང་པ་བརྩེགས་པ་ཆེན་པོར་བྱས་ཏེ་འདུག་གོ །དེ་བཞིན་དུ་སངས་རྒྱས་བཅོམ་ལྡན་འདས་དེ་དག་གི་མཛོད་སྤུ་དག་ནས་ཀྱང་བྱང་ཆུབ་སེམས་དཔའི་འོད་སྣང་བ་ཞེས་བྱ་བའི་འོད་ཟེར་འཁོར་གྱི་འོད་ཟེར་གྲངས་མྱེད་པ་དང་ལྡན་པ་དག་བྱུང་བར་གྱུར་ཏོ། །བྱུང་ནས་ཀྱང་དེ་དག་གིས་ཕྱོགས་བཅུ་ཐམས་ཅད་དུ་འཇིག་རྟེན་གྱི་ཁམས་འབྱམ་ཀླས་པ་ཀུན་ཏུ་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ཆོས་བསྟན་པའི་བྱིན་གྱིས་བྱིན་དུ་བརླབས་པའི་བྱང་ཆུབ་སེམས་དཔའ་རྣམས་སྣང་བར་བྱས་ཏེ། སངས་རྒྱས་ཀྱི་རྣམ་པར་
འཕྲུལ་པ་བསམ་གྱིས་མྱི་ཁྱབ་པ་བསྟན་ནས། འཇིག་རྟེན་གྱི་ཁམས་མི་མཇེད་འདི་ཡང་སྣང་བར་བྱས། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པའི་འཁོར་གྱི་དཀྱིལ་འཁོར་འདི་འང་སྣང་བར་བྱས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོའི་ལུས་ཀྱང་སྣང་བར་བྱས་ནས། སྟེང་གི་བར་སྣང་ལ་དེ་བཞིན་དུ་འོད་ཟེར་སྟུག་པོའི་སྤྲིན་གྱི་དྲ་བའི་ཁང་པ་བརྩེགས་པ་ཆེན་པོར་བྱས་ཏེ་འཁོད་དོ། །དེ་ནས་འོད་ཟེར་སྟུག་པོའི་སྤྲིན་གྱི་དྲ་བའི་ཁང་པ་བརྩེགས་པ་ཆེན་པོ་དེ་དག་ནས་སངས་རྒྱས་ཀྱི་བྱིན་གྱིས་སྒྲའི་རྣམ་པ་འདི་ལྟ་བུ་འདི་བྱུང་ངོ་། །མི་མཉམ་མཉམ་དང་མཉམ་པ་མཁའ་དང་མཉམ་པ་དག །སྟོབས་བཅུའི་ཁྱུ་མཆོག་མཐུ་ལྡན་ཚད་མེད་ཡོན་ཏན་ཅན། །འཇིག་རྟེན་ཀུན་མཆོག་མི་ཡི་དམ་པ་ཕུལ་གྱི་རྣམས། །ཤཱཀྱ་སེང་གེའི་ཆོས་ལ་བྱིན་རླབས་དམ་པ་མཛད། །བདེ་གཤེགས་སྲས་པོ་འདྲེན་པའི་བྱིན་གྱིས་བཤད་པར་གྱིས། །ཆོས་རྒྱལ་ཁྱུ་མཆོག་རྣམས་ཀྱི་མཛོད་ཀྱི་དམ་པ་ཕྱེ། །ས་ཡི་ཡེ་ཤེས་རྣམ་ཕྱེ་སྤྱོད་མཆོག་རབ་ཡངས་པ། །སྟོབས་བཅུའི་བྱིན་གྱིས་མ་ཐོགས་མྱུར་དུ་བསྟན་པ་གྱིས། །གང་གི་རྣ་ལམ་བསམ་པར་ཆོས་དམ་རིན་ཆེན་འདི། །སོང་བར་གྱུར་པ་དེ་དག་བདེ་གཤེགས་བྱིན་གྱིས་བརླབས། །རྡུལ་མེད་ས་ཀུན་རིམ་གྱིས་རབ་ཏུ་རྫོགས་བྱས་ནས། །སྟོབས་བཅུ་ལྡན་པའི་རྒྱལ་བ་དམ་པར་འགྲུབ་པར་འགྱུར། །རྒྱ་མཚོའི་ཆུ་བྱུང་གྱུར་ཅིང་བསྐལ་པའི་མྱེས་གདུངས་ཀྱང་། །གལ་ཏེ་སྣོད་གྱུར་སེམས་ཅན་དེ་དག་འདི་ལ་ཉན། །གང་རྣམས་ཐེ་ཙོམ་ཟ་ཞིང་ཡིད་གཉིས་བྱེད་པ་ནི། །དེ་དག་རྣ་བས་རྣམ་པ་ཀུན་ཏུ་ཐོས་མི་འགྱུར། །དེ་ཕྱིར་ས་ཡི་ཡེ་ཤེས་ལམ་མཆོག་བསྟན་པར་གྱིས། །གནས་དང་རྒྱུད་དང་འཕྲོ་བ་རིམ་གྱིས་རབ་ཏུ་ཤོད། །སྤྱོད་དང་ཡུལ་དང་ཆོས་དང་ཡེ་ཤེས་ཚུལ་རྣམས་ཀྱི། །ཆོས་ཀྱི་ཚུལ་ཡང་འགྲོ་བ་ཀུན་ལ་ཕན་ཕྱིར་ཤོད། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་ཕྱོགས་བཅུར་བལྟས་ནས། འཁོར་ཐམས་ཅད་དེ་བས་ཀྱང་དད་པར་བྱ་བའི་ཕྱིར་དེའི་ཚེ་ཚིགས་སུ་བཅད་
པ་འདི་དག་སྨྲས་སོ། །ཕྲ་ལ་ཤེས་དཀའ་དྲང་སྲོང་ཆེན་པོའི་ལམ། །མི་རྟོག་རྟོག་ཡུལ་མ་ཡིན་ལྟ་བར་དཀའ། །རང་བཞིན་ཞི་ཞིང་འགག་མེད་འབྱུང་བ་མེད། །མཁས་གསལ་ཤེས་པས་ཁོང་དུ་ཆུད་པ་ཡིན། །ངོ་བོ་ཉིད་སྟོང་ཞི་ཞིང་སྡུག་བསྔལ་ཟད། །རྒྱུད་ལས་རྣམ་གྲོལ་མཉམ་པར་མྱ་ངན་འདས། །མཐའ་དང་དབུས་མེད་ཚིག་གིས་བརྗོད་དུ་མེད། །དུས་གསུམ་གྲོལ་བ་ནམ་མཁའ་འདྲ་ཞིང་མཚུངས། །བདེ་གཤེགས་སྤྱོད་ཡུལ་ཞི་ཞིང་ཉེ་བར་ཞི། །སྨྲ་བའི་ལམ་རྣམས་ཀུན་གྱིས་བརྗོད་པར་དཀའ། །དེ་དག་ས་དང་སྤྱོད་པ་དེ་འདྲ་བས། །སྨྲ་བར་དཀའ་ན་བསྟན་པར་ག་ལ་ནུས། །དེ་ནི་བསམ་ཡས་སེམས་ལམ་རྣམ་པར་སྤངས། །ཡེ་ཤེས་མངོན་བསྒྲུབས་རྒྱལ་བའི་སྤྱོད་ཡུལ་ཏེ། །ཕུང་པོ་སྐྱེ་མཆེད་ཁམས་ཀྱིས་སྐྱེད་པ་མིན། །སེམས་ཀྱིས་མི་ཤེས་ཡིད་ཀྱིས་རྣམ་མ་བརྟགས། །ཇི་ལྟར་བར་སྣང་གནས་ཀྱི་བྱ་ཡི་རྗེས། །ཤིན་ཏུ་སྨྲ་དཀའ་བསྟན་པར་མི་ནུས་པ། །དེ་ལྟར་བདེ་གཤེགས་སྲས་ཀྱི་ས་རྣམས་ཀྱང་། །ཡིད་དང་སེམས་ཀྱི་ཡུལ་གྱིས་ཤེས་མི་ནུས། །འོན་ཀྱང་བྱམས་དང་སྙིང་རྗེ་སྨོན་ལམ་གྱིས། །དེ་ལས་ཕྱོགས་ཙམ་རིམ་པའི་ཚུལ་བཞིན་དུ། །བཤད་པར་བྱ་སྟེ་སེམས་ཀྱི་སྤྱོད་ཡུལ་མིན། །ཡེ་ཤེས་ཚུལ་གྱིས་རྫོགས་པར་བྱ་བའོ། །དེ་འདྲའི་སྤྱོད་ཡུལ་ཕྲ་ཞིང་བལྟ་དཀའ་བ། །རང་རིག་ཡིན་པས་བརྗོད་པར་མི་ནུས་ཀྱང་། །འོན་ཀྱང་བདེ་བར་གཤེགས་པའི་མཐུས་བརྗོད་ཀྱིས། །ཐམས་ཅད་མཐུན་པར་ནན་ཏན་གྱིས་དེ་ཉོན། །ཡེ་ཤེས་ས་དང་སྤྱོད་འཇུག་ཅི་འདྲ་བ། །བསྐལ་པ་བྱེ་བར་ཟད་པར་མི་ནུས་ཏེ། །ཡང་དག་དོན་དངོས་གཞན་མིན་གནས་པ་ལས། །མདོ་ཙམ་བཤད་ཀྱིས་དེ་དག་མཉན་པར་གྱིས། །མཐུན་ཞིང་ནན་ཏན་ཡོད་པར་སྟ་གོན་གནས། །བདེ་གཤེགས་བྱིན་གྱིས་བདག་གིས་བཤད་པར་བྱ། །དཔེ་ལྡན་འཐད་ལ་ཡི་གེ་མཉམ་པ་ཡི། །ཆོས་སྒྲ་དམ་པ་བདག་གིས་བརྗོད་པར་བྱ། །འདི་ནི་ཚིག་གིས་བརྗོད་པར་ཤིན་ཏུ་དཀའ། །དེ་ལྟར་ཚད་མེད་བདེ་གཤེགས་
མཐུ་དག་ལས། ། ཆུ་ཐིགས་གཅིག་འདྲ་བདག་གི་ལུས་འདི་ལ། །དེ་རིང་ཞུགས་ཀྱིས་བཤད་པ་མཉན་པར་གྱིས། །ཀྱེ་རྒྱལ་བའི་སྲས་དག །དེ་ལ་སེམས་ཅན་དགེ་བའི་རྩ་བ་ཤིན་ཏུ་བསྩགས་པ་སྤྱད་པ་ཤིན་ཏུ་སྤྱོད་པ། ཚོགས་ཤིན་ཏུ་བསགས་པ། སངས་རྒྱས་འབྱུང་བ་ཤིན་ཏུ་བསྙེན་བཀུར་བ། ཆོས་དཀར་པོ་ཤིན་ཏུ་བསྡུས་པ། དགེ་བའི་བཤེས་གཉེན་གྱིས་ཤིན་ཏུ་བཟུང་བ། བསམ་པ་ཡོངས་སུ་དག་པ། ལྷག་པའི་བསམ་པ་ཤིན་ཏུ་རྒྱ་ཆེན་པོ་ཅན་མོས་པ་རྒྱ་ཆེན་པོ་དང་ལྡན་པ། སྙིང་རྗེ་དང་སྙིང་བརྩེ་བ་མངོན་དུ་གྱུར་པ། སངས་རྒྱས་ཀྱི་ཡེ་ཤེས་ལ་མངོན་པར་མོས་པ་རྣམས་རྣམ་པ་ཐམས་ཅད་མཁྱེན་པའི་ཡེ་ཤེས་ལ་མོས་པ་དང་། སྟོབས་བཅུའི་སྟོབས་ཐོབ་པར་བྱ་བ་དང་། མི་འཇིགས་པ་ཆེན་པོ་ཐོབ་པར་བྱ་བ་དང་། སངས་རྒྱས་ཀྱི་ཆོས་མཉམ་པ་ཉིད་ཐོབ་པར་བྱ་བ་དང་། འགྲོ་བ་ཐམས་ཅད་ཡོངས་སུ་བསྐྱབ་པར་བྱ་བ་དང་། སྙིང་བརྩེ་བ་དང་སྙིང་རྗེ་ཆེན་པོ་ཡོངས་སུ་དག་པར་བྱ་བ་དང་། ཕྱོགས་བཅུ་མ་ལུས་པར་ཐོགས་པ་མེད་པའི་ཡེ་ཤེས་མངོན་དུ་འགྱུར་བར་བྱ་བ་དང་། སངས་རྒྱས་ཀྱི་ཞིང་མ་ལུས་པ་ཐམས་ཅད་ཐོགས་པ་མེད་པར་ཡོངས་སུ་སྦྱངས་པར་བྱ་བ་དང་། དུས་གསུམ་ཐམས་ཅད་སྐད་ཅིག་གཅིག་གིས་ཁོང་དུ་ཆུད་པར་བྱ་བ་དང་། ཆོས་ཀྱི་འཁོར་ལོ་ཆེན་པོ་རབ་ཏུ་བསྐོར་བ་ལ་ཁྱུ་མཆོག་གི་མཐུ་དབྱུང་བ་རྒྱ་ཆེན་པོ་འཐོབ་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་སྙིང་རྗེ་ཆེན་པོ་སྔོན་དུ་འགྲོ་བ། ཤེས་རབ་དང་ཡེ་ཤེས་ཀྱི་དབང་དུ་གྱུར་པ། ཐབས་མཁས་པས་ཡོངས་སུ་བཟུང་བ། བསམ་པ་དང་ལྷག་པའི་བསམ་པས་རབ་ཏུ་བརྟན་པ། དེ་བཞིན་གཤེགས་པའི་སྟོབས་ཚད་མེད་པ་དང་ལྡན་པ། སེམས་ཅན་གྱི་སྟོབས་དང་། བློའི་སྟོབས་རྣམ་པར་དབྱེ་བར་བྱ་བ་ཤིན་ཏུ་རྣམ་པར་ཕྱེ་བ་ཆགས་པ་མེད་པའི་ཡེ་ཤེས་མངོན་དུ་གྱུར་པ་རང་བྱུང་གི་ཡེ་ཤེས་དང་མཐུན་པ། སངས་རྒྱས་ཐམས་ཅད་ཀྱི་ཆོས་ལ་ཤེས་རབ་དང་ཡེ་ཤེས་ཀྱི་མན་ངག་ཡང་དག་པར་ཚོལ་བ། སངས་རྒྱས་བྱུང་བ་ཐམས་ཅད་ལས་གདམས་ངག་
ཡང་དག་པར་བླངས་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐར་ཐུག་པར་གནས་པ། ཕྱི་མའི་མཐའི་མུར་ཐུག་པར་སྐྱེ་བར་འགྱུར་ཏེ། སེམས་བསྐྱེད་པ་དེ་བསྐྱེད་མ་ཐག་ཏུ། བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོའི་སྐྱེ་བོའི་ས་ལས་རབ་ཏུ་འདས་པ་ཡིན། བྱང་ཆུབ་སེམས་དཔའི་སྐྱོན་མེད་པ་ཤིན་ཏུ་ནོན་པ་ཡིན། དེ་བཞིན་གཤེགས་པའི་རིགས་སུ་སྐྱེས་པ་ཡིན། རིགས་བརྗོད་པ་ལ་ཁ་ན་མ་ཐོ་བ་མེད་པ་ཡིན། འཇིག་རྟེན་གྱི་ལམ་ཐམས་ཅད་ལས་ཕྱིར་ལོག་པ་ཡིན། འཇིག་རྟེན་ལས་འདས་པའི་ལམ་ཤིན་ཏུ་ནོན་པ་ཡིན། བྱང་ཆུབ་སེམས་དཔའི་ཆོས་ཉིད་ལ་གནས་པ་ཡིན། བྱང་ཆུབ་སེམས་དཔའི་རྣམ་པར་དགོད་པ་ལ་རབ་ཏུ་གནས་པ་ཡིན། དུས་གསུམ་མཉམ་པ་ཉིད་ཀྱི་རྗེས་སུ་སོང་བ་ཡིན། རྫོགས་པའི་བྱང་ཆུབ་ལ་ཤིན་ཏུ་གཞོལ་བས་དེ་བཞིན་གཤེགས་པའི་རིགས་སུ་ངེས་པ་ཡིན། ཀྱེ་རྒྱལ་བའི་སྲས་དག །ཆོས་ཀྱི་རྣམ་པ་འདི་ལྟ་བུ་ལ་གནས་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་ས་རབ་ཏུ་དགའ་བ་ལ་མི་གཡོ་བའི་ཚུལ་གྱིས་རབ་ཏུ་གནས་སོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ས་རབ་ཏུ་དགའ་བ་ལ་གནས་པའི་བྱང་ཆུབ་སེམས་དཔའ་ནི་རབ་ཏུ་དགའ་བ་མང་བ་ཡིན། ཡིད་བདེ་བ་མང་བ་ཡིན། མོས་པ་མང་བ་ཡིན། རངས་པ་མང་བ་ཡིན། མགུ་བ་མང་བ་ཡིན། སྤྲོ་བ་མང་བ་ཡིན། རྩོལ་བ་མང་བ་ཡིན། འཚེ་བ་མེད་པ་མང་བ་ཡིན། ཁྲོ་བ་མེད་པ་མང་བ་ཡིན། ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའི་ས་རབ་ཏུ་དགའ་བ་ལ་གནས་པའི་བྱང་ཆུབ་སེམས་དཔའ་ནི་སངས་རྒྱས་བཅོམ་ལྡན་འདས་རྣམས་རྗེས་སུ་དྲན་ཞིང་རབ་ཏུ་དགའ་བ་ཡིན། སངས་རྒྱས་ཀྱི་ཆོས་རྣམས་རྗེས་སུ་དྲན་ཞིང་རབ་ཏུ་དགའ་བ་ཡིན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྗེས་སུ་དྲན་ཞིང་རབ་ཏུ་དགའ་བ་ཡིན། བྱང་ཆུབ་སེམས་དཔའི་སྤྱོད་པ་རྗེས་སུ་དྲན་ཞིང་རབ་ཏུ་དགའ་བ་ཡིན། ཕ་རོལ་ཏུ་ཕྱིན་པ་རྣམ་པར་དག་པ་རྗེས་སུ་དྲན་ཞིང་རབ་ཏུ་དགའ་བ་ཡིན། བྱང་ཆུབ་སེམས་དཔའི་སའི་ཁྱད་པར་རྗེས་སུ་དྲན་ཞིང་རབ་ཏུ་དགའ་
བ་ཡིན། བྱང་ཆུབ་སེམས་དཔའི་སྤྱོད་ཡུལ་མི་འཕྲོགས་པ་རྗེས་སུ་དྲན་ཞིང་རབ་ཏུ་དགའ་བ་ཡིན། དེ་བཞིན་གཤེགས་པའི་གདམས་ངག་དང་ལུས་རྗེས་སུ་དྲན་ཞིང་རབ་ཏུ་དགའ་བ་ཡིན། སེམས་ཅན་གྱི་དོན་རབ་ཏུ་ཐོབ་པར་བྱ་བ་རྗེས་སུ་དྲན་ཞིང་རབ་ཏུ་དགའ་བ་ཡིན། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལ་འཇུག་པའི་ཐབས་རྗེས་སུ་དྲན་ཞིང་རབ་ཏུ་དགའ་བ་ཡིན། ཡང་འདི་སྙམ་དུ་སེམས་ཏེ། བདག་ནི་འགྲོ་བ་ཐམས་ཅད་ཀྱི་ཡུལ་ལས་ཕྱིར་ལོག་གོ །ཞེས་རབ་ཏུ་དགའ་བ་བསྐྱེད་དོ། །བདག་ནི་སངས་རྒྱས་ཀྱི་ས་དང་ཉེ་བར་གྱུར་ཏོ་ཞེས་རབ་ཏུ་དགའ་བ་བསྐྱེད་དོ། །བདག་ནི་བྱིས་པའི་ས་ལས་རིང་དུ་གྱུར་ཏོ། །ཞེས་རབ་ཏུ་དགའ་བ་བསྐྱེད་དོ། །བདག་ནི་ཡེ་ཤེས་ཀྱི་ས་དང་ཉེ་བར་གྱུར་ཏོ། །ཞེས་རབ་ཏུ་དགའ་བ་བསྐྱེད་དོ། །བདག་ནི་ངན་སོང་དང་ངན་འགྲོའི་འཇིགས་པ་ཐམས་ཅད་རྒྱུན་ཆད་དོ། །ཞེས་རབ་ཏུ་དགའ་བ་བསྐྱེད་དོ། །བདག་ནི་སེམས་ཅན་ཐམས་ཅད་ཀྱི་གནས་སུ་གྱུར་ཏོ། །ཞེས་རབ་ཏུ་དགའ་བ་བསྐྱེད་དོ། །བདག་ནི་དེ་བཞིན་གཤེགས་པ་ཐམས་ཅད་མཐོང་བར་འགྱུར་བ་དང་ཉེ་བར་གྱུར་ཏོ། །ཞེས་རབ་ཏུ་དགའ་བ་བསྐྱེད་དོ། །བདག་ནི་དེ་བཞིན་གཤེགས་པ་ཐམས་ཅད་ཀྱི་ཡུལ་ལ་ཡང་དག་པར་འབྱུང་ངོ་། །ཞེས་རབ་ཏུ་དགའ་བ་བསྐྱེད་དོ། །བདག་ནི་བྱང་ཆུབ་སེམས་དཔའ་ཐམས་ཅད་ཀྱི་མཉམ་པ་ཉིད་དང་ལྡན་པར་གྱུར་ཏོ། །ཞེས་རབ་ཏུ་དགའ་བ་བསྐྱེད་དོ། །བདག་ནི་འཇིགས་པ་དང་། བག་ཚ་བ་དང་སྔངས་པ་དང་། སྐྱི་གཡའ་བ་ཐམས་ཅད་དང་བྲལ་ལོ། །ཞེས་རབ་ཏུ་དགའ་བ་བསྐྱེད་དོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དག་འདི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ས་རབ་ཏུ་དགའ་བ་འདི་ཐོབ་མ་ཐག་ཏུ་འཇིགས་པའི་རྣམ་པ་འདི་དག་འདི་ལྟ་སྟེ། འཚོ་བ་མེད་པས་འཇིགས་
པའམ། མི་བསྔགས་པས་འཇིགས་པའམ། འཆི་བས་འཇིགས་པའམ། ངན་སོང་གིས་འཇིགས་པའམ། འཁོར་དུ་བག་ཚ་བས་འཇིགས་པ་དེ་དག་ཐམས་ཅད་དེ་ལ་མྱེད་པ་ཡིན། དེ་ཅིའི་ཕྱིར་ཞེ་ན། འདི་ལྟར་དེ་ནི་བདག་གི་འདུ་ཤེས་དང་བྲལ་བས་དེ་ལ་བདག་འཕངས་པར་སེམས་པའང་མེད་ན། ཡོ་བྱད་ཐམས་ཅད་ལ་ཕངས་པར་སེམས་པ་ལྟ་ག་ལ་ཡོད་དེ། དེའི་ཕྱིར་དེ་ལ་འཚོ་བ་མེད་པས་འཇིགས་པ་མྱེད་དོ། །དེ་ནི་སུ་ལས་ཀྱང་རིམ་གྲོར་བྱ་བ་ཆུང་ཟད་ཙམ་ཡང་རེ་བ་མེད་ལ་གཞན་དུ་ན་བདག་ཉིད་ཀྱིས་སེམས་ཅན་དེ་དག་ལ་ཡོ་བྱད་མང་པོ་ཐམས་ཅད་ཀྱིས་བསྡུད་པར་བྱའོ། །སྙམ་དུ་སེམས་པས། དེའི་ཕྱིར་དེ་ལ་མི་བསྔགས་པའི་འཇིགས་པ་མེད་དོ། །དེ་བདག་ཏུ་ལྟ་བ་དང་བྲལ་བས་དེ་ལ་བདག་གི་འདུ་ཤེས་མྱེད་དེ་དེའི་ཕྱིར་དེ་ལ་འཆི་བའི་འཇིགས་པ་མྱེད་དོ། །བདག་ཤི་ནས་ཀྱང་གདོན་མི་ཟ་བར་སངས་རྒྱས་དང་བྱང་ཆུབ་སེམས་དཔའ་དག་དང་མི་འབྲལ་བར་འགྱུར་རོ། །ཞེས་དེའི་ཕྱིར་དེ་ལ་ངན་སོང་གི་འཇིགས་པ་མྱེད་དོ། །དེ་འདི་སྙམ་དུ་སེམས་ཏེ། བདག་གི་བསམ་པ་དང་འཇིག་རྟེན་ན་མཚུངས་པ་སུ་ཡང་མེད་ན་ལྷག་པ་ལྟ་ག་ལ་ཡོད་ཅེས་དེའི་ཕྱིར་དེ་ལ་འཁོར་དུ་བག་ཚ་བ་མེད་དོ། །ཀྱེ་རྒྱལ་བའི་སྲས་དག་དེ་ལྟར་འཇིགས་པ་དང་། དངངས་པ་དང་བག་ཚ་བ་དང་སྐྱི་གཡའ་བ་མེད་པའི་བྱང་ཆུབ་སེམས་དཔའ་ནི་སྙིང་རྗེ་ཆེན་པོ་སྔོན་དུ་འགྲོ་བས་ལྷག་པའི་བསམ་པ་མ་ཉམས་ཤིང་མི་དམའ་བས་དེ་བས་ཀྱང་དགེ་བའི་རྩ་བ་ཐམས་ཅད་ཡང་དག་པར་བསྡུ་བའི་ཕྱིར་རབ་ཏུ་བརྩོན་པར་བྱེད་དོ། །ཀྱེ་རྒྱལ་བའི་སྲས་དག །དེ་དད་པ་ལ་དབང་བསྒྱུར་བ་དང་མོས་པ་མང་བ་དང་ཡིད་ཆེས་པ་ཤིན་ཏུ་རྣམ་པར་དག་པ་དང་རྟོག་པ་མང་བ་དང་སྙིང་བརྩེ་བ་དང་། སྙིང་རྗེས་མངོན་པར་བསྒྲུབ་པ་དང་བྱམས་པ་ཆེན་པོ་དང་ལྡན་པ་དང་། ཡིད་སྐྱོ་བ་མེད་པ་དང་ངོ་ཚ་ཤེས་པ་དང་ཁྲེལ་ཡོད་པའི་རྒྱན་དང་བཟོད་ཅིང་ངེས་པ་དང་ལྡན་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བསྟན་
པ་ལ་རིམ་གྲོ་དང་བཀུར་སྟི་དང་རི་མོ་ཡོད་པ་དང་ཉིན་མཚན་དུ་མི་ངོམས་པར་དགེ་བའི་རྩ་བ་སྩོགས་པ་དང་དགེ་བའི་བཤེས་གཉེན་ལ་བསྟེན་པ་དང་། ཆོས་ཀྱི་དགའ་བས་དགའ་བར་གནས་པ་དང་། མི་ངོམས་པར་མང་དུ་ཐོས་པ་ཚོལ་བ་དང་། ཇི་སྐད་དུ་ཐོས་པའི་ཆོས་ལ་ཚུལ་བཞིན་དུ་རྟོགས་པ་དང་། གནས་མེད་པའི་ཡིད་དང་འཐོབ་པ་དང་བཀུར་སྟི་དང་། བསྔགས་པ་ལ་ཆགས་པ་མེད་པ་དང་ཡོ་བྱད་ཐམས་ཅད་ལ་ཕངས་པར་སེམས་ཤིང་ཆགས་པ་མེད་པ་དང་སེམས་བསྐྱེད་པ་རིན་པོ་ཆེ་ལྟ་བུས་ངོམས་པ་མྱེད་པར་མངོན་པར་བསྒྲུབ་པ་དང་། ཐམས་ཅད་མཁྱེན་པ་ཉིད་ཀྱི་ས་ལ་མངོན་པར་མོས་པ་དང་། དེ་བཞིན་གཤེགས་པའི་སྟོབས་དང་མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་ལ་དམིགས་པ་དང་། ཕ་རོལ་ཏུ་ཕྱིན་པའི་ཚོགས་ཡོངས་སུ་ཚོལ་བ་དང་། སྒྱུ་དང་གཡོ་ཡོངས་སུ་སྤངས་པ་དང་། ཇི་སྐད་དུ་སྨྲས་པ་དེ་ལྟར་བྱེད་པ་དང་། རྟག་ཏུ་རྒྱུན་མི་འཆད་པར་བདེན་པའི་ཚིག་གི་རྗེས་སུ་བསྲུང་བ་དང་། དེ་བཞིན་གཤེགས་པའི་རིགས་ལ་སྐྱོན་དུ་འགྱུར་བར་མྱི་བྱེད་པ་དང་། བྱང་ཆུབ་སེམས་དཔའི་བསླབ་པ་མི་གཏོང་བ་དང་། རིའི་དབང་པོའི་རྒྱལ་པོ་ཆེན་པོ་ལྟར་ཐམས་ཅད་མཁྱེན་པ་ཉིད་ཀྱི་སེམས་མི་སྒུལ་བ་དང་། འཇིག་རྟེན་གྱི་བྱ་བ་ཐམས་ཅད་ལ་མངོན་པར་དགའ་བ་མེད་པ་དང་། འཇིག་རྟེན་ལས་འདས་པའི་དགེ་བའི་རྩ་བའི་ལམ་དང་ལྡན་པ་དང་། མི་ངོམས་པར་བྱང་ཆུབ་ཀྱི་ཡན་ལག་གི་ཚོགས་རབ་ཏུ་སྩོགས་པ་དང་། རྟག་ཏུ་རྒྱུན་མི་འཆད་པར་གོང་ནས་གོང་དུ་ཁྱད་པར་དུ་འབོགས་པའི་ལམ་ཚོལ་བ་དང་ས་ཡོངས་སུ་སྦྱོང་བའི་ཆོས་ཀྱི་རྣམ་པ་འདི་ལྟ་བུ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བྱང་ཆུབ་སེམས་དཔའི་ས་རབ་ཏུ་དགའ་བ་ལ་གནས་པ་ཡིན་ཏེ། དེ་བྱང་ཆུབ་སེམས་དཔའི་ས་རབ་ཏུ་དགའ་བ་དེ་ལ་ཤིན་ཏུ་གནས་ཤིང་རྣམ་པ་འདི་ལྟ་བུའི་སྨོན་ལམ་ཆེན་པོ་དང་། བརྩོན་པ་ཆེན་པོ་དང་། མངོན་པར་བསྒྲུབ་པ་ཆེན་པོ་འདི་དག་
མངོན་པར་སྒྲུབ་སྟེ། འདི་ལྟར་སངས་རྒྱས་ཐམས་ཅད་མ་ལུས་པ་ལྷག་མ་མེད་པ་དང་མཐའ་དག་ལ་མཆོད་ཅིང་རིམ་གྲོ་བྱ་བའི་ཕྱིར་རྣམ་པའི་མཆོག་ཐམས་ཅད་དང་ལྡན་པ་མོས་པ་རྒྱ་ཆེན་པོས་རྣམ་པར་དག་པ། ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ་ནམ་མཁའི་དབྱིངས་ཀྱི་མཐར་ཐུག་པ་ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་དུ་སངས་རྒྱས་སྐྱེ་བ་འགྲངས་པ་ལ་རིམ་གྲོ་དང་། མཆོད་པ་ཆེན་པོ་བྱ་བ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། དེ་བཞིན་གཤེགས་པ་ཐམས་ཅད་ཀྱིས་གསུངས་པའི་ཆོས་ཀྱི་ཚུལ་ཡང་དག་པར་གཟུང་བ་དང་། སངས་རྒྱས་ཐམས་ཅད་ཀྱི་བྱང་ཆུབ་ཡང་དག་པར་བླངས་པ་དང་། ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་བསྟན་པ་ཡང་དག་པར་བསྲུང་བའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་ཀྱི་སངས་རྒྱས་འབྱུང་བ་འགྲངས་པའི་དམ་པའི་ཆོས་ཡོངས་སུ་གཟུང་བ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་པོ། །འདི་ལྟ་སྟེ། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་མ་ལུས་པའི་སངས་རྒྱས་སྐྱེ་བ་ཐམས་ཅད་ཀྱི་དགའ་ལྡན་གྱི་ཕོ་བྲང་དམ་པ་ན་བཞུགས་པ་ལ་སྩོགས་ཏེ། འཕོ་བ་དང་གཤེགས་པ་དང་། སྐུ་ན་བཞུགས་པ་དང་། སྐྱེ་བ་དང་། གཞོན་ནུའི་རོལ་པ་དང་། བཙུན་མོའི་འཁོར་གྱི་ནང་ན་བཞུགས་པ་དང་། མངོན་པར་འབྱུང་བ་དང་། དཀའ་བ་སྤྱད་པ་དང་། སྙིང་པོ་བྱང་ཆུབ་ཏུ་གཤེགས་པ་དང་། བདུད་གདུལ་བ་དང་། མངོན་པར་འཚང་རྒྱ་བ་དང་། གསོལ་བ་གདབ་པ་དང་། ཆོས་ཀྱི་འཁོར་ལོ་ཆེན་པོ་བསྐོར་བ་དང་། མྱ་ངན་ལས་འདས་པ་ཆེན་པོ་སྟོན་པའི་དྲུང་དུ་འགྲོ་ཞིང་མཆོད་པ་དང་། རིམ་གྲོ་བྱ་བ་དང་། དམ་པའི་ཆོས་ཡང་དག་པར་གཟུང་བའི་སྦྱོར་བ་ལས་སྩོགས་པ་ཐམས་ཅད་གཅིག་ཏུ་མངོན་པར་
བསྒྲུབ་པའི་ཕྱིར། ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ་ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ་བསྐལ་པ་འགྲངས་པ་ཐམས་ཅད་དུ་སངས་རྒྱས་འབྱུང་བ་འགྲངས་པའི་དྲུང་དུ་འགྲོ་བ་ནས། མྱ་ངན་ལས་འདས་པ་ཆེན་པོའི་བར་གྱི་དྲུང་དུ་འགྲོ་བ་རྒྱུན་མི་ཆད་པའི་སྨོན་ལམ་ཆེན་པོ་མངོན་པར་སྒྲུབ་པོ། །འདི་ལྟ་སྟེ། བྱང་ཆུབ་སེམས་དཔའི་སྤྱོད་པ་རྒྱ་ཆེན་པོ་ཤིན་ཏུ་ཡངས་པ་ཚད་མེད་པ། མི་འཕྲོགས་པ་ཐ་མི་དད་པ་ཕ་རོལ་ཏུ་ཕྱིན་པ་ཐམས་ཅད་ཀྱིས་ཡང་དག་པར་བསྡུས་པ། ས་ཡོངས་སུ་སྦྱང་བའི་ཡན་ལག་དང་ཉེ་བའི་ཡན་ལག་དུ་བཅས་པ་མངོན་པར་བསྒྲུབ་པ་དང་། མཚན་ཉིད་དང་བྱེ་བྲག་གི་མཚན་ཉིད་དུ་བཅས་པ་དང་། འགྲུབ་པ་དང་། འཇིག་པ་དང་། བྱང་ཆུབ་སེམས་དཔའི་སྤྱོད་པར་གཏོགས་པ་ཐམས་ཅད་དང་། ས་ཇི་ལྟ་བ་བཞིན་དང་། ཇི་ལྟ་བུར་བསྟན་པ་དང་། ཕ་རོལ་ཏུ་ཕྱིན་པ་ཡོངས་སུ་སྦྱང་བ་ལ་གདམས་ངག་དང་། མན་ངག་གི་སྦྱིན་པ་ཉེ་བར་བསྟན་པའི་སེམས་བསྐྱེད་པ་མངོན་པར་བསྒྲུབ་པའི་ཕྱིར་ཆོས་ཀྱི་དབྱིངས་ཀྱིས་ཀླས་པ་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་དུ་སྤྱོད་པ་འགྲངས་པ་སེམས་བསྐྱེད་པས་མངོན་པར་བསྒྲུབ་པ། རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་པོ། །འདི་ལྟ་སྟེ། སེམས་ཅན་གྱི་ཁམས་ཐམས་ཅད་མ་ལུས་པ་ལྷག་མ་མེད་པ་མཐའ་དག་གཟུགས་ཡོད་པ་དང་། གཟུགས་མྱེད་པ་དང་། འདུ་ཤེས་ཡོད་པ་དང་། འདུ་ཤེས་མེད་པ་དང་། འདུ་ཤེས་ཡོད་པའང་མ་ཡིན། འདུ་ཤེས་མེད་པའང་མ་ཡིན་པ་དང་། སྒོ་ང་ལས་སྐྱེས་པ་དང་། མངལ་ལས་སྐྱེས་པ་དང་། དྲོད་གཤེར་ལས་སྐྱེས་པ་དང་། རྫུས་ཏེ་བྱུང་བ་ཁམས་གསུམ་དུ་གཏོགས་པ། འགྲོ་བ་དྲུག་ཏུ་འདུས་པ། སྐྱེ་བ་ཐམས་ཅད་དུ་གཏོགས་པའི་སེམས་ཅན་གྱི་ཁམས་ཐམས་ཅད་ཡོངས་སུ་སྨིན་
པར་བྱ་བ་དང་སངས་རྒྱས་ཀྱི་ཆོས་ལ་གཟུད་པ་དང་། ལམ་གྱི་རྒྱུད་འགྲངས་པ་ཐམས་ཅད་རྒྱུན་གཅད་པ་དང་། ཐམས་ཅད་མཁྱེན་པའི་ཡེ་ཤེས་ལ་དགོད་པའི་ཕྱིར་ཆོས་ཀྱི་དབྱིངས་ཀྱིས་ཀླས་པར། རྒྱ་ཆེ་བ་ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ་བསྐལ་པ་འགྲངས་པ་ཐམས་ཅད་དང་། སེམས་ཅན་འགྲངས་པ་ཐམས་ཅད་དུ་སེམས་ཅན་གྱི་ཁམས་ཡོངས་སུ་སྨིན་པར་བྱ་བ་ལ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། འཇིག་རྟེན་གྱི་ཁམས་ཡངས་པ་དང་། དོག་པ་དང་། རྒྱ་ཆེན་པོ་དང་། ཚད་མྱེད་པ་དང་། ཕྲ་བ་དང་། ཆེ་བ་དང་། སྣྲེལ་ཞི་དང་། སྤྱིའུ་ཚུགས་སུ་རྒྱུ་བ་ཐམས་ཅད་མ་ལུས་པ་ལྷག་མ་མྱེད་པ་མཐའ་དག་གཞི་མཉམ་པར་ཡང་དག་པར་འཇུག་པ་ཁོང་དུ་ཆུད་པར་བྱ་བ་དང་། མྱིག་འཕྲུལ་གྱི་རྣམ་པ་ལྟར་ཕྱོགས་བཅུའི་རྣམ་པ་ཐ་དད་པ་མ་ལུས་པའི་རྣམ་པ་ལ་འཇུག་པ། རྣམ་པར་ཕྱེ་བའི་ཡེ་ཤེས་ཁོང་དུ་ཆུད་ཅིང་། མངོན་དུ་འགྱུར་བར་བྱ་བའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་དུ། འཇིག་རྟེན་གྱི་ཁམས་འགྲངས་པར་འཇིག་རྟེན་གྱི་ཁམས་ཐམས་ཅད་ལ་འཇུག་ཅིང་ཡོངས་སུ་དག་པར་བྱ་བའི་ཕྱིར། སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། ཞིང་ཐམས་ཅད་ཞིང་གཅིག་ཏུ་ཡང་དག་པར་གཞོལ་བར་བྱ་བ་དང་། ཞིང་གཅིག་ཞིང་ཐམས་ཅད་དུ་ཡང་དག་པར་གཞོལ་བར་བྱ་བ་དང་། ཡོངས་སུ་སྦྱང་བ་དང་། སངས་རྒྱས་ཀྱི་ཞིང་ཚད་མེད་པ་འོད་མང་པོའི་རྒྱན་གྱིས་རབ་ཏུ་བརྒྱན་པར་བྱ་བ་དང་། ཀུན་ནས་ཉོན་མོངས་པ་ཐམས་ཅད་བསྩལ་བས། ཡོངས་སུ་དག་པའི་ལམ་དང་ལྡན་པ་དང་། སེམས་ཅན་ཡེ་ཤེས་ཀྱི་འབྱུང་གནས་ཚད་མེད་པས་ཡོངས་སུ་གང་བའི་སངས་རྒྱས་ཀྱི་ཡུལ་རྒྱ་ཆེན་པོ་ལ་ཡང་དག་པར་གཞོལ་ཞིང་ཁོང་དུ་ཆུད་
པར་བྱ་བ་དང་། བསམ་པའི་ཚུལ་བཞིན་དུ་སེམས་ཅན་རྣམས་ལ་ཡང་དག་པར་བསྟན་ཅིང་ཤིན་ཏུ་ཚིམ་པར་བྱ་བའི་ཕྱིར། ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ་ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་དུ་ཞིང་འགྲངས་པར་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་ལ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། བྱང་ཆུབ་སེམས་དཔའ་ཐམས་ཅད་དང་བསམ་པ་གཅིག་པའི་སྦྱོར་བ་དང་། ལྟོད་པ་མེད་པའི་དགེ་བའི་རྩ་བ་ཐམས་ཅད་བསྩགས་པ་དང་། བྱང་ཆུབ་སེམས་དཔའ་ཐམས་ཅད་དང་དམྱིགས་པ་གཅིག་ཅིང་མཉམ་པ་དང་། བྱང་ཆུབ་སེམས་དཔའ་དང་རྟག་ཏུ་རྒྱུན་མི་འཆད་པར་འགྲོགས་ཤིང་མྱི་འབྲལ་བ་དང་། སངས་རྒྱས་འབྱུང་བ་ཅི་དགར་བསྟན་པ་དང་། རང་གི་སེམས་བསྐྱེད་པས་དེ་བཞིན་གཤེགས་པ་ཐམས་ཅད་ཀྱི་ཡུལ་དང་། མཐུ་དང་ཡེ་ཤེས་ཁོང་དུ་ཆུད་པར་བྱ་བ་དང་། མ་ཉམས་ཤིང་རྗེས་སུ་འབྲང་བའི་མངོན་པར་ཤེས་པ་རབ་ཏུ་ཐོབ་པར་བྱ་བ་དང་། འཇིག་རྟེན་གྱི་ཁམས་ཐམས་ཅད་དུ་རྣམ་པར་རྒྱུ་བར་བྱ་བ་དང་། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་གཟུགས་བརྙན་འབྱུང་བ་ཡང་དག་པར་བསྟན་པ་དང་། སྐྱེ་བའི་སྐྱེ་གནས་ཐམས་ཅད་དུ་རང་གི་ལུས་རྗེས་སུ་འགྲོ་བར་བྱ་བ་དང་། ཐེག་པ་ཆེན་པོ་བསམ་གྱིས་མྱི་ཁྱབ་པ་དང་ལྡན་པའི། བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱད་པ་རྒྱུན་མི་འཆད་པའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་དུ། སྤྱོད་པ་འགྲངས་པར་ཐེག་པ་ཆེན་པོ་མངོན་པར་བསྒྲུབ་པ་ལ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། ཕྱིར་མི་ལྡོག་པའི་འཁོར་ལོ་ལ་ཡང་དག་པར་གནས་ཤིང་བྱང་ཆུབ་སེམས་དཔའི་སྤྱོད་པ་སྤྱད་པ་དང་། ལུས་དང་། ངག་དང་། ཡིད་ཀྱི་ལས་དོན་ཡོད་པར་བྱ་བ་དང་། མཐོང་མ་ཐག་ཏུ་
སངས་རྒྱས་ཀྱི་ཆོས་གདོན་མི་ཟ་བར་འཐོབ་པར་བྱ་བ་དང་། དབྱངས་བརྗོད་མ་ཐག་ཏུ་ཡེ་ཤེས་ཁོང་དུ་ཆུད་པར་བྱ་བ་དང་། དད་པར་གྱུར་མ་ཐག་ཏུ་ཉོན་མོངས་པ་ཕྱིར་མི་ལྡོག་པར་བྱ་བ་དང་། བསམ་པ་སྨན་གྱི་རྒྱལ་པོ་ཆེན་པོ་ལྟ་བུ་རབ་ཏུ་ཐོབ་པར་བྱ་བ་དང་། ལུས་ཡིད་བཞིན་གྱི་ནོར་བུ་ལྟ་བུ་འཐོབ་པར་བྱ་བ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་སྤྱད་པའི་ཕྱིར་ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་དུ་ཕྱིར་མི་ལྡོག་པའི་འཁོར་ལོ་འགྲངས་པར་སྤྱོད་པ་ཐམས་ཅད་འབྲས་བུ་ཡོད་པ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་དུ་བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དང་། སྐྲའི་སྦུབས་གཅིག་དང་ཐ་མི་དད་པའི་སྐྲའི་སྦུབས་ཐམས་ཅད་དུ་ཚེ་དང་སྐྱེ་བ་དང་། གཞོན་ནུ་རོལ་པ་དང་། བཙུན་མོའི་འཁོར་གྱི་ནང་ན་བཞུགས་པ་དང་། མངོན་པར་འབྱུང་བ་དང་རྣམ་པར་འཕྲུལ་པ་དང་། སྙིང་པོ་བྱང་ཆུབ་ཏུ་གཤེགས་པ་དང་། བདུད་འདུལ་བ་དང་མངོན་པར་འཚང་རྒྱ་བ་དང་། གསོལ་བ་གདབ་པ་དང་། ཆོས་ཀྱི་འཁོར་ལོ་ཆེན་པོ་བསྐོར་བ་དང་། ཡོངས་སུ་མྱ་ངན་ལས་འདའ་བ་ཆེན་པོ་བསྟན་པ་དང་། སངས་རྒྱས་ཀྱི་ཡུལ་དང་མཐུ་དང་ཡེ་ཤེས་ཆེན་པོ་ཁོང་དུ་ཆུད་པར་བྱ་བ་དང་། སེམས་ཅན་གྱི་ཁམས་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་སངས་རྒྱས་འབྱུང་བ་དང་། སྐད་ཅིག་གཅིག་ཏུ་མངོན་པར་འཚང་རྒྱ་བ་དང་། རབ་ཏུ་ཞི་བ་ཐོབ་པར་བྱ་བ་ཡང་དག་པར་བསྟན་པ་དང་། མངོན་པར་འཚང་རྒྱ་བ་གཅིག་གིས་ཆོས་ཀྱི་དབྱིངས་ཐམས་ཅད་འཕྲུལ་པས་རྒྱས་པར་དགང་བ་དང་། དབྱངས་གཅིག་བརྗོད་པས་སེམས་ཅན་གྱི་ཁམས་ཐམས་ཅད་ཀྱི་སེམས་དང་། བསམ་པ་ཤིན་ཏུ་ཚིམ་པར་བྱ་བ་དང་། མྱ་ངན་ལས་འདས་པ་ཆེན་པོ་ཡོངས་སུ་བསྟན་པ་དང་། སྤྱོད་པ་རྣམས་
རྒྱུན་མི་འཆད་པར་བྱ་བ་དང་། ཐེག་པ་ཆེན་པོའི་ས་ལ་ཆོས་ཐམས་ཅད་རྣམ་པར་དགོད་པ་ཡང་དག་པར་བསྟན་པ་དང་། ཆོས་ཤེས་པའི་རྫུ་འཕྲུལ་གྱི་རྒྱུ་དང་། མངོན་པར་ཤེས་པ་དང་དབང་གིས་ཆོས་ཀྱི་དབྱིངས་ཐམས་ཅད་སྤྲུལ་པས་རྣམ་པར་དགང་བའི་ཕྱིར། ཆོས་ཀྱི་དབྱིངས་ཀྱིས་ཀླས་པར་རྒྱ་ཆེ་བ། ནམ་མཁའི་དབྱིངས་ཀྱི་མཐར་ཐུག་པ། ཕྱི་མའི་མཐའི་མུར་ཐུག་པ། བསྐལ་པ་འགྲངས་པ་ཐམས་ཅད་དུ་མངོན་པར་འཚང་རྒྱ་བ་འགྲངས་པར་ཡེ་ཤེས་ཆེན་པོའི་མངོན་པར་ཤེས་པ་རྒྱུན་མི་འཆད་པའི་སྨོན་ལམ་ཆེན་པོ་མངོན་པར་སྒྲུབ་བོ། །ཀྱེ་རྒྱལ་བའི་སྲས་དག །དེ་ལྟར་རྣམ་པ་འདི་ལྟ་བུའི་སྨོན་ལམ་ཆེན་པོ་དང་། བརྩོན་འགྲུས་ཆེན་པོ་དང་། མངོན་པར་བསྒྲུབ་པ་ཆེན་པོའི་སྨོན་ལམ་གྱི་སྒོ་བཅུ་པོ་འདི་དག་ལས་སྩོགས་པ། སྨོན་ལམ་བརྒྱ་སྟོང་གྲངས་མེད་པ་ཕྲག་བཅུ་ཚང་བ་དག །བྱང་ཆུབ་སེམས་དཔའི་ས་རབ་ཏུ་དགའ་བ་ལ་གནས་པའི་བྱང་ཆུབ་སེམས་དཔས་ཐོབ་བོ། །མངོན་པར་སྒྲུབ་བོ། །སྨོན་ལམ་དེ་དག་ཀྱང་མཐར་ཐུག་པའི་གནས་བཅུས་མངོན་པར་བསྒྲུབ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་གྱི་ཁམས་ཀྱི་མཐར་ཐུག་པ་དང་། འཇིག་རྟེན་གྱི་ཁམས་ཀྱི་མཐར་ཐུག་པ་དང་། ནམ་མཁའི་ཁམས་ཀྱི་མཐར་ཐུག་པ་དང་། ཆོས་ཀྱི་ཁམས་ཀྱི་མཐར་ཐུག་པ་དང་། མྱ་ངན་ལས་འདས་པའི་ཁམས་ཀྱི་མཐར་ཐུག་པ་དང་། སངས་རྒྱས་འབྱུང་བའི་ཁམས་ཀྱི་མཐར་ཐུག་པ་དང་། དེ་བཞིན་གཤེགས་པའི་ཡེ་ཤེས་ཀྱི་ཁམས་ཀྱི་མཐར་ཐུག་པ་དང་། སེམས་ཀྱི་དམྱིགས་པའི་ཁམས་ཀྱི་མཐར་ཐུག་པ་དང་། ཡེ་ཤེས་མངོན་པར་བསྒྲུབ་པའི་ཁམས་ཀྱི་མཐར་ཐུག་པ་དང་། འཇིག་རྟེན་གྱི་རྒྱུད་དང་། ཆོས་ཀྱི་རྒྱུད་དང་། ཡེ་ཤེས་ཀྱི་རྒྱུད་ཀྱི་ཁམས་ཀྱི་མཐར་ཐུག་པ་དག་གོ། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་བཞི་པ། དེ་ལྟར་སྨོན་ལམ་ཆེན་པོ་འདི་དག་སེམས་ཅན་གྱི་
ཁམས་ཀྱི་མཐར་གང་དུ་ཐུག་པ་དེའི་མཐར་ཐུག་པར་གྱུར་ཅིག །སྨོན་ལམ་ཆེན་པོ་འདི་དག་འཇིག་རྟེན་གྱི་ཁམས་ཀྱི་མཐའ་གང་དུ་ཐུག་པ་དང་། ནམ་མཁའི་ཁམས་དང་ཆོས་ཀྱི་ཁམས་དང་། མྱ་ངན་ལས་འདས་པའི་ཁམས་དང་། སངས་རྒྱས་འབྱུང་བའི་ཁམས་དང་། དེ་བཞིན་གཤེགས་པའི་ཡེ་ཤེས་ཀྱི་ཁམས་དང་། སེམས་ཅན་གྱི་དམྱིགས་པའི་ཁམས་དང་། ཡེ་ཤེས་མངོན་པར་བསྒྲུབ་པའི་ཁམས་དང་། འཇིག་རྟེན་གྱི་རྒྱུད་དང་། ཆོས་ཀྱི་རྒྱུད་དང་། ཡེ་ཤེས་ཀྱི་རྒྱུད་ཀྱི་ཁམས་ཀྱི་མཐའ་གང་དུ་ཐུག་པ། དེའི་མཐར་ཐུག་པར་གྱུར་ཅིག །འདི་ལྟར་སེམས་ཅན་གྱི་ཁམས་མཐར་ཐུག་པ་མེད་པ་དང་། འཇིག་རྟེན་གྱི་ཁམས་དང་ནམ་མཁའི་ཁམས་དང་། ཆོས་ཀྱི་ཁམས་དང་མྱ་ངན་ལས་འདས་པའི་ཁམས་དང་། སངས་རྒྱས་འབྱུང་བའི་ཁམས་དང་། དེ་བཞིན་གཤེགས་པའི་ཡེ་ཤེས་ཀྱི་ཁམས་དང་། སེམས་ཅན་གྱི་དམྱིགས་པའི་ཁམས་དང་། ཡེ་ཤེས་མངོན་པར་བསྒྲུབ་པའི་ཁམས་དང་། འཇིག་རྟེན་གྱི་རྒྱུད་དང་། ཆོས་ཀྱི་རྒྱུད་དང་། ཡེ་ཤེས་ཀྱི་རྒྱུད་ཀྱི་ཁམས་མཐར་ཐུག་པ་མེད་པ་དེ་བཞིན་དུ་སྨོན་ལམ་ཆེན་པོ་འདི་དག་ཀྱང་མཐར་ཐུག་པ་མྱེད་པར་གྱུར་ཏེ། བདག་གི་དགེ་བའི་རྩ་བ་འདི་དག་ཀྱང་། མཐར་ཐུག་པ་མྱེད་པར་གྱུར་ཅིག་ཅེས་དེ་ལྟར་སྨོན་ལམ་ཤིན་ཏུ་བསྒྲུབས་ཤིང་ཕན་པའི་སེམས་དང་ལྡན་པ། འཇམ་པའི་སེམས་དང་ལྡན་པ། ལས་སུ་རུང་བའི་སེམས་དང་ལྡན་པ། ཞི་བའི་སེམས་དང་ལྡན་པ། དུལ་བའི་སེམས་དང་ལྡན་པ། ཉེ་བར་ཞི་བའི་སེམས་དང་ལྡན་པ། མཉེན་པའི་སེམས་དང་ལྡན་པ། བྱམས་པའི་སེམས་དང་ལྡན་པ། འཁྲུགས་པ་མེད་པའི་སེམས་དང་ལྡན་པ། གློང་བ་མེད་པའི་སེམས་དང་ལྡན་པ་དེ་ནི་ལེགས་པར་རྟོག་པ་མང་ཞིང་དད་པ་དང་ལྡན་པ་ཡིན་ཏེ། དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྔོན་གྱི་མཐའི་སྤྱོད་པ་མངོན་པར་བསྒྲུབས་པའི་རྒྱུད་ལ་ཡིད་ཆེས་
པ་ཡིན། ཕ་རོལ་ཏུ་ཕྱིན་པ་ཡང་དག་པར་བསྡུ་བ་ལ་ཡིད་ཆེས་པ་ཡིན། ས་ཡང་དག་པར་བསྒྲུབ་པ་དང་། ཁྱད་པར་དུ་འགྱུར་བ་ལ་མངོན་པར་བསྒྲུབ་པ་དང་། ཁྱད་པར་དུ་འགྱུར་བ་ལ་མངོན་པར་ཡིད་ཆེས་པ་ཡིན། སྟོབས་ཡོངས་སུ་འགྲུབ་པ་ལ་མངོན་པར་ཡིད་ཆེས་པ་ཡིན། མི་འཇིགས་པ་ཡོངས་སུ་རྫོགས་པར་འགྱུར་བ་ལ་མངོན་པར་ཡིད་ཆེས་པ་ཡིན། སངས་རྒྱས་ཀྱི་ཆོས་མ་འདྲེས་པ་མི་འཕྲོགས་པ་ལ་མངོན་པར་ཡིད་ཆེས་པ་ཡིན། སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ལ་མངོན་པར་ཡིད་ཆེས་པ་ཡིན། སངས་རྒྱས་ཀྱི་ཡུལ་མཐའ་དང་དབུས་མེད་པ་མངོན་པར་བསྒྲུབ་པ་ལ་མངོན་པར་ཡིད་ཆེས་པ་ཡིན། དེ་བཞིན་གཤེགས་པའི་སྤྱོད་ཡུལ་ཚད་མེད་པའི་རྗེས་སུ་སོང་བའི་རྗེས་སུ་འཇུག་པ་ལ་མངོན་པར་ཡིད་ཆེས་པ་ཡིན། འབྲས་བུ་ཡོངས་སུ་གྲུབ་པ་ལ་མངོན་པར་ཡིད་ཆེས་པ་ཡིན་ཏེ། མདོར་བསྡུ་ན་བྱང་ཆུབ་སེམས་དཔའི་སྤྱོད་པ་ཐམས་ཅད་དང་། དེ་བཞིན་གཤེགས་པའི་ས་དང་། ཡེ་ཤེས་ཀྱི་བར་དུ་ཤིན་ཏུ་བསྟན་པའི་བྱིན་གྱི་རླབས་ལ་མངོན་པར་ཡིད་ཆེས་པ་ཡིན་ནོ། །ཡང་དེ་འདི་སྙམ་དུ་སེམས་ཏེ། སངས་རྒྱས་ཀྱི་ཆོས་འདི་དག་དེ་ལྟར་རྒྱ་ཆེ་ཞིང་དེ་ལྟར་ཟབ་ལ་དེ་ལྟར་དབེན་ཞིང་དེ་ལྟར་ཞི་བ་སྟེ། དེ་ལྟར་སྟོང་ལ་དེ་ལྟར་མཚན་མ་མེད་ཅིང་དེ་ལྟར་སྨོན་པ་མྱེད་ལ། དེ་ལྟར་ཆགས་པ་མེད་དེ། དེ་ལྟར་གོས་པ་མྱེད་ཅིང་དེ་ལྟར་ཚད་མེད་ལ་སངས་རྒྱས་ཀྱི་ཆོས་དེ་དག་དེ་ལྟར་རླབས་ཆེ་ན་འོན་ཀྱང་བྱིས་པ་སོ་སོའི་སྐྱེ་བོ་འདི་དག་ལྟ་བ་ངན་པར་ལྟུང་བའི་རྒྱུད་དང་། མ་རིག་པའི་མུན་ནག་དང་། རབ་རིབ་ཐིབས་པོས་ཀུན་ནས་ཁེབས་པའི་ཡིད་དང་། ང་རྒྱལ་གྱི་རྒྱལ་མཚན་ཤིན་ཏུ་བསྒྲེངས་པའི་ཡོངས་སུ་རྟོག་པ་དང་། སྲེད་པའི་དྲ་བས་མངོན་པར་ཡེ་རྔམ་པའི་ཡིད་ལ་བྱ་བ་དང་། སྒྱུ་དང་གཡོའི་ཐིབས་པོ་ལ་རྗེས་སུ་སྤྱོད་པའི་སེམས་དང་། བསམ་པ་དང་ཕྲག་དོག་དང་
འཇུངས་པ་ཅན་གྱི་ཀུན་ནས་འཁོར་བས་ལམ་གྱི་རྒྱུད་དུ་སྐྱེ་བའི་ཀུན་ཏུ་འབྲེལ་པ་དང་། འདོད་ཆགས་དང་ཞེ་སྡང་དང་། གཏི་མུག་ལ་སྤྱོད་པའི་ལས་ཤིན་ཏུ་བསྩགས་པ་དང་། ཁྲོ་བ་དང་ཁོན་དུ་འཛིན་པས་འབར་བར་བྱས་པའི་སེམས་ཀྱི་མེ་ལྕེ་དང་། ཕྱིན་ཅི་ལོག་དང་བཅས་པའི་ལས་མངོན་པར་བསྒྲུབ་པ་དང་། འདོད་པ་དང་སྲེད་པའི་མ་རིག་པ་དང་། ལྟ་བ་དང་ཀུན་ཏུ་ཟབ་པའི་བག་ཆགས་མཚམས་འབྲེལ་པའི་སེམས་དང་། ཡིད་དང་རྣམ་པར་ཤེས་པའི་ས་བོན་གྱིས་འདི་ལྟ་སྟེ། ཁམས་གསུམ་དུ་མིང་དང་གཟུགས་ལྷན་ཅིག་ཏུ། སྐྱེས་ཤིང་ཐ་མི་དད་པར་བྱུང་བའི་ཡང་སྐྱེ་བའི་སྡུག་བསྔལ་གྱི་མྱུ་གུ་མངོན་པར་སྐྱེད་དོ། །མྱིང་དང་གཟུགས་དེ་རྣམ་པར་འཕེལ་ནས་སྐྱེ་མཆེད་དྲུག་གི་ཚོགས་འབྱུང་བར་འགྱུར་རོ། །སྐྱེ་མཆེད་རྣམས་བྱུང་བས་ཕན་ཚུན་རེག་པ་དང་ཕྲད་ཅིང་འདུས་པས་ཚོར་བ་མངོན་པར་འབྱུང་ངོ་། །ཚོར་བ་མྱོང་བ་དེ་ཉིད་ལ་ཡང་དང་ཡང་མངོན་པར་དགའ་བས་སྲེད་པ་དང་ཉེ་བར་ལེན་པ་རྣམ་པར་འཕེལ་ལོ། །ཉེ་བར་ལེན་པ་རྣམ་པར་འཕེལ་བས། སྲིད་པ་ཀུན་ཏུ་འབྱུང་ངོ་། །སྲིད་པ་ཀུན་ཏུ་འབྱུང་བས་སྐྱེ་བ་དང་། རྒ་ཤི་དང་། མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་དང་། ཡིད་མྱི་བདེ་བ་དང་། འཁྲུག་པ་རྣམས་ཀྱང་འབྱུང་བར་འགྱུར་ཏེ། དེ་ལྟར་སེམས་ཅན་དེ་དག་གི་སྡུག་བསྔལ་གྱི་ཕུང་པོ་བདག་དང་བདག་གི་མྱེད་པ། གསོབ་གསོག་སྟོང་པ་བྱེད་པ་མྱེད་པ། སེམས་མེད་པ་རྩྭ་དང་ཤིང་དང་། རྩིག་པ་དང་། སྒང་སྒོང་དང་མིག་ཡོར་ལྟ་བུ་མངོན་པར་འབྱུང་བ་ཡང་དེ་ལྟར་ཁོང་དུ་མྱི་ཆུད་དོ་ཞེས། དེ་ལ་བྱང་ཆུབ་སེམས་དཔས་སེམས་ཅན་དེ་དག་དེ་ལྟར་སྡུག་བསྔལ་གྱི་ཕུང་པོ་དང་འབྲལ་མི་མྱོང་བ་མཐོང་ནས། དེའི་ཕྱིར་དེའི་སྙིང་རྗེ་ཆེན་པོ་རྒྱས་པར་འབྱུང་སྟེ། སེམས་ཅན་འདི་དག་ནི་བདག་གིས་ཡོངས་སུ་བསྐྱབ་པར་བྱ་བ་དག་གོ །ཡོངས་སུ་དགྲོལ་བར་བྱ་བ་དག་གོ། །ཤིན་ཏུ་བདེ་བ་ལ་
དགོད་པར་བྱ་བ་དག་གོ་སྙམ་སྟེ། དེའི་ཕྱིར་དེའི་བྱམས་པ་ཆེན་པོ་རྒྱས་པར་འབྱུང་ངོ་། །ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་སྙིང་རྗེ་དང་བྱམས་པ་དེ་ལྟ་བུའི་རྣམ་པ་དང་ལྡན་པའི་ལྷག་པའི་བསམ་པས་བྱང་ཆུབ་སེམས་དཔའི་ས་དང་པོ་ལ་གནས་པའི་ཚེ། དངོས་པོ་ཐམས་ཅད་ལ་ཕངས་པར་སེམས་པའི་སེམས་ཡོངས་སུ་སྤངས་ནས་སངས་རྒྱས་ཀྱི་ཡེ་ཤེས་ལ་མོས་པ་དང་། དད་པ་རླབས་པོ་ཆེའི་བློས་སྦྱིན་པ་ཆེན་པོ་ལ་རབ་ཏུ་བརྩོན་པར་བྱེད་དེ། དེ་འདི་ལྟར་འདི་ལྟ་སྟེ། ནོར་དང་། འབྲུའི་མཛོད་དང་། བང་བ་ཡོངས་སུ་གཏང་བར་བྱ་བ་དག་གམ། གསེར་དང་། ནོར་བུ་དང་། མུ་ཏིག་དང་། བཻ་ཌཱུརྱ་དང་། རིན་པོ་ཆེ་ཤི་ལ་དང་། བྱི་རུ་དང་། དངུལ་དང་། ས་ལེ་སྦྲམ་ཡོངས་སུ་གཏང་བར་བྱ་བའམ། རིན་པོ་ཆེའི་རྒྱན་དང་། ལྷབ་ལྷུབ་ཡོངས་སུ་གཏང་བའམ་རྟ་དང་། གླང་པོ་དང་། ཤིང་རྟ་དང་རྐང་ཏང་དང་། བཞོན་པ་ཡོངས་སུ་གཏང་བའམ། བྲན་ཕོ་དང་། བྲན་མོ་ཡོངས་སུ་གཏང་བའམ། གྲོང་དང་གྲོང་ཁྱེར་དང་། ལྗོངས་དང་། ཕོ་བྲང་འཁོར་དང་། རྒྱལ་པོའི་གནས་ཡོངས་སུ་གཏང་བའམ། བཟའ་ཤིང་གི་ར་བ་དང་། དཀའ་ཐུབ་ཀྱི་ནགས་ཚལ་དང་། གཙུག་ལག་ཁང་ཡོངས་སུ་གཏང་བའམ། ཆུང་མ་དང་བུ་དང་བུ་མོ་ཡོངས་སུ་གཏང་བའམ། སྡུག་ཅིང་ཡིད་དུ་འོང་བའི་དངོས་པོ་ཐམས་ཅད་ཡོངས་སུ་གཏང་བའམ། མགོ་དང་རྣ་བ་དང་རྐ་ལག་དང་མྱིག་དང་ཡན་ལག་གི་དམ་པ་དང་། ལུས་ཐམས་ཅད་ཡོངས་སུ་གཏང་བའམ། གཏང་བར་བྱ་བའི་དངོས་པོ་དེ་དག་ཐམས་ཅད་ལ་ཆགས་པ་མྱེད་པར་བྱས་ནས་སངས་རྒྱས་ཀྱི་ཡེ་ཤེས་ལ་དད་པ་དང་། མོས་པའི་བློས་ཡོངས་སུ་གཏོང་སྟེ། དེ་ལྟར་དེ་བྱང་ཆུབ་སེམས་དཔའི་ས་དང་པོ་འདི་ལ་གནས་པའི་ཚེ་གཏོང་བ་ཆེན་པོ་རབ་ཏུ་བྱེད་དོ། །དེ་དེ་ལྟར་བྱམས་པ་དང་སྙིང་རྗེ་དང་གཏོང་བའི་བསམ་པ་དང་ལྡན་པས་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་ཡང་དང་ཡང་འཇིག་རྟེན་པ་དང་། འཇིག་རྟེན་ལས་འདས་པའི་དོན་ཡོངས་སུ་ཚོལ་ཞིང་དོན་
དུ་གཉེར་ཏོ། །དེ་དེ་ལྟར་ཡོངས་སུ་ཚོལ་ཞིང་དོན་དུ་གཉེར་བའི་ཚེ། ཡོངས་སུ་སྐྱོ་བའི་སེམས་མི་སྐྱེ་སྟེ། དེའི་ཕྱིར་དེའི་ཡོངས་སུ་མི་སྐྱོ་བའི་སེམས་མངོན་པར་འབྱུང་ངོ་། །ཡོངས་སུ་སྐྱོ་བ་མེད་པས་གཙུག་ལག་ཐམས་ཅད་ལ་འཇིགས་པ་མེད་པ་ཡིན། དེའི་ཕྱིར་དེ་གཙུག་ལག་ཐམས་ཅད་ལ་རབ་ཏུ་ཤེས་པ་ཡིན་ཏེ། དེ་དེ་ལྟ་བུའི་གཙུག་ལག་དང་ལྡན་པས་བྱ་བ་དང་མྱི་བྱ་བ་ཤིན་ཏུ་རྟོགས་པའི་བློས་སེམས་ཅན་རབ་འབྲིང་དང་ཐ་མ་ལ་དད་པའི་ཚུལ་ཇི་ལྟ་བ་དང་། ཅི་འོས་པས་ཅི་ནུས་སུ་སྙིང་ཐག་པ་ནས་ཡང་དག་པ་ཉིད་ཐོབ་པར་བྱ་བའི་ཕྱིར་བརྩོན་པར་བྱེད་དོ། །ནན་ཏན་དུ་བྱེད་དོ། །དེའི་ཕྱིར་དེ་འཇིག་རྟེན་ཤེས་པ་ཡིན་ཏེ། འཇིག་རྟེན་ཤེས་པས་དུས་དང་ཚོད་དུ་རན་པར་སྤྱོད་ཅིང་ངོ་ཚ་ཤེས་པ་དང་། ཁྲེལ་ཡོད་པས་བསམ་པ་ཤིན་ཏུ་བརྒྱན་པས་བདག་དང་གཞན་གྱི་དོན་དུ་རབ་ཏུ་བརྩོན་པར་བྱེད་དེ། དེའི་ཕྱིར་ངོ་ཚ་ཤེས་ཤིང་ཁྲེལ་ཡོད་པ་ཡིན། སྦྱོར་བ་དེ་དག་ལའང་འབྱུང་བར་སྤྱོད་པ་ཡིན། ཕྱིར་མི་ཟློགས་ཤིང་ཕྱིར་མི་ལྡོག་པའི་བརྩོན་འགྲུས་དང་སྟོབས་ཀྱི་ཤུགས་ཀྱང་རབ་ཏུ་ཐོབ་པ་ཡིན་ཏེ། དེ་ལྟར་དེའི་དགའ་བའི་སྟོབས་དང་ཤུགས་ཡོངས་སུ་སྐྱེས་པ་ཡིན། དགའ་བའི་སྟོབས་དང་ཤུགས་རབ་ཏུ་ཐོབ་པས་དེ་བཞིན་གཤེགས་པ་མཆོད་ཅིང་རིམ་གྲོ་བྱ་བ་ལ་རབ་ཏུ་བརྩོན་ཞིང་བསྟན་པ་ལའང་ནན་ཏན་ཤིན་ཏུ་བྱེད་དོ། །དེ་ལྟར་དེའི་ས་ཡོངས་སུ་སྦྱོང་བའི་ཆོས་འདི་ལྟ་སྟེ། དད་པ་དང་སྙིང་རྗེ་དང་། བྱམས་པ་དང་། གཏོང་བ་དང་། སྐྱོ་བ་མེད་པ་དང་། གཙུག་ལག་ཤེས་པ་དང་། འཇིག་རྟེན་ཤེས་པ་དང་། ཁྲེལ་ཡོད་ཅིང་ངོ་ཚ་ཤེས་པ་དང་། དགའ་བའི་སྟོབས་ཀྱི་ཤུགས་དང་། དེ་བཞིན་གཤེགས་པ་མཆོད་ཅིང་རིམ་གྲོར་བྱ་བའི་ནན་ཏན་ཡོངས་སུ་སྐྱེས་པ་ཡིན་ནོ། །དེ་དེ་ལྟར་བྱང་ཆུབ་སེམས་དཔའི་ས་རབ་ཏུ་དགའ་བ་འདི་ལ་གནས་པའི་ཚེ་ལྟ་བ་རྒྱ་ཆེན་པོ་དང་། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་རབ་ཏུ་སྣང་བར་འགྱུར་ཏེ། ལྟ་བ་རྒྱ་ཆེན་པོ་དང་སྨོན་ལམ་གྱི་སྟོབས་ཀྱིས་སངས་རྒྱས་
བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་མང་པོ་དང་། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང་། སངས་རྒྱས་ཁྲག་ཁྲིག་སྟོང་ཕྲག་མང་པོ་དང་སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་རབ་ཏུ་སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས་བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང་བསོད་སྙོམས་དང་། གཟིམས་ཅ་དང་སྙུན་གྱི་རྐྱེན་སྨན་དང་། ཡོ་བྱད་དག་ཀྱང་འབུལ་ཞིང་། བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་ཚོགས་རྣམས་ལའང་ཡང་དག་པར་མཆོད་པར་བྱེད་དེ། དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་ལྟར་དེས་སངས་རྒྱས་བཅོམ་ལྡན་འདས་དེ་དག་མཆོད་པས་སེམས་ཅན་ཡོངས་སུ་སྨིན་པར་བྱ་བ་མངོན་པར་འགྲུབ་པ་ཡིན། དེ་བསྡུ་བའི་དངོས་པོ་སྦྱིན་པ་དང་། ངག་སྙན་པ་གཉིས་ཀྱི་ཤས་ཆེ་བས་སེམས་ཅན་རྣམས་ཡོངས་སུ་སྨིན་པར་བྱེད་དོ། །དེའི་མོས་པའི་སྟོབས་དང་ཤུགས་ཀྱིས་བསྡུ་བའི་དངོས་པོ་གོང་མ་གཉིས་ཀྱང་ཡོངས་སུ་འགྲུབ་པར་འགྱུར་ཏེ། མ་ལུས་པར་ཁོང་དུ་ཆུད་པར་ནི་མ་ཡིན་ནོ། །དེའི་ཕ་རོལ་ཏུ་ཕྱིན་པ་བཅུ་ལས་སྦྱིན་པའི་ཕ་རོལ་ཏུ་ཕྱིན་པ་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་བསྒྲུབ་པ་མ་ཡིན་ནོ། །དེ་ཇི་ལྟ་ཇི་ལྟར་སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱེད་ཅིང་སེམས་ཅན་ཡོངས་སུ་སྨིན་
པར་བྱ་བ་ལ་བརྩོན་པ་དང་། ས་ཡོངས་སུ་སྦྱོང་བའི་ཆོས་འདི་དག་ཡང་དག་པར་བླངས་ཏེ་གནས་པ་དེ་ལྟ་དེ་ལྟར་དེའི་དགེ་བའི་རྩ་བ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པ་དེ་དག་དེ་བས་ཀྱང་ཤས་ཆེར་ཤིན་ཏུ་བྱང་བ་དང་། ཡོངས་སུ་དག་པ་དང་ལས་སུ་རུང་བར་འགྱུར་རོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། མགར་བ་མཁས་པས་གསེར་གྱི་ས་ལེ་སྦྲམ། ཇི་ལྟ་ཇི་ལྟར་མྱེར་བསྲེགས་པ་དེ་ལྟ་དེ་ལྟར་ཤིན་ཏུ་བྱང་ཞིང་ཡོངས་སུ་དག་པ་དང་། ཅི་དགར་ལས་སུ་རུང་བར་འགྱུར་རོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་རྣམས་ཇི་ལྟ་ཇི་ལྟར་སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱེད་ཅིང་སེམས་ཅན་ཡོངས་སུ་སྨྱིན་པར་བྱ་བ་ལ་བརྩོན་པར་བྱེད་པ་དང་། ས་ཡོངས་སུ་སྦྱོང་བའི་ཆོས་ཀྱི་རྣམ་པ་འདི་ལྟ་བུ་དག་ཡང་དག་པར་བླངས་ཏེ་གནས་པ་དེ་ལྟ་དེ་ལྟར་དེའི་དགེ་བའི་རྩ་བ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པ་དེ་དག་ཤིན་ཏུ་བྱང་བ་དང་། ཡོངས་སུ་དག་པ་དང་། ཅི་དགར་ལས་སུ་རུང་བར་འགྱུར་རོ། །ཀྱེ་རྒྱལ་བའི་སྲས་དག །གཞན་ཡང་ས་དང་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་བྱང་ཆུབ་སེམས་དཔའི་ས་དང་པོ་དེ་ཉིད་ཀྱི་རྣམ་པ་དང་། འཐོབ་པར་བྱ་བ་དང་། རྒྱུ་མཐུན་པའི་འབྲས་བུ་སངས་རྒྱས་དང་། བྱང་ཆུབ་སེམས་དཔའ་དང་དགེ་བའི་བཤེས་གཉེན་ལས་ཡོངས་སུ་བཙལ་ཞིང་ཡོངས་སུ་དྲི་བར་བྱའོ། །སའི་ཡན་ལག་ཡོངས་སུ་བསྒྲུབ་པའི་ཕྱིར་ཡང་ངོམས་མྱི་ཤེས་པར་བྱས་ཏེ། དེས་བྱང་ཆུབ་སེམས་དཔའི་ས་དང་པོ་འདི་ལ་གནས་པའི་ཚེ། བྱང་ཆུབ་སེམས་དཔའི་ས་གཉིས་པ་དང་། གསུམ་པ་དང་། བཞི་པ་དང་། ལྔ་པ་དང་། དྲུག་པ་དང་། བདུན་པ་དང་། བརྒྱད་པ་དང་། དགུ་པ་དང་། བཅུ་པའི་རྣམ་པ་དང་། ཐོབ་པར་བྱ་བ་དང་། རྒྱུ་མཐུན་པའི་འབྲས་བུ་སངས་རྒྱས་དང་། བྱང་ཆུབ་སེམས་དཔའ་
དང་། དགེ་བའི་བཤེས་གཉེན་ལས་ཡོངས་སུ་བཙལ་ཞིང་ཡོངས་སུ་དྲི་བར་བྱའོ། །སའི་ཡན་ལག་ཡོངས་སུ་བསྒྲུབ་པའི་ཕྱིར་ཡང་ངོམས་མི་ཤེས་པར་བྱའོ། །དེས་སའི་ཕྱོགས་དང་མི་མཐུན་པའི་ཕྱོགས་ལ་མཁས་པར་བྱའོ། །ས་འགྲུབ་པ་དང་འཇིག་པ་ལ་མཁས་པར་བྱའོ། །སའི་རྣམ་པ་དང་། རྒྱུ་མཐུན་པའི་འབྲས་བུ་ལ་མཁས་པར་བྱའོ། །ས་འཐོབ་པར་བྱ་བ་དང་རྣམ་པར་བསྒོམ་པ་ལ་མཁས་པར་བྱའོ། །སའི་རྣམ་པ་ཡོངས་སུ་སྦྱང་བ་ལ་མཁས་པར་བྱའོ། །ས་ནས་སར་འཕར་བ་ལ་མཁས་པར་བྱའོ། །ས་དང་ས་ལ་རྣམ་པར་གནས་པ་ལ་མཁས་པར་བྱའོ། །ས་ནས་སའི་གནས་གཞན་དུ་འཕོ་བར་བྱ་བ་ལ་མཁས་པར་བྱའོ། །ས་ནས་སར་ཡོངས་སུ་སྦྱང་བའི་ཁྱད་པར་གྱི་ཡེ་ཤེས་ལ་མཁས་པར་བྱའོ། །ས་ནས་ས་ཐོབ་ནས་ཕྱིར་མི་ལྡོག་པའི་ཡེ་ཤེས་ལ་མཁས་པར་བྱའོ། །བྱང་ཆུབ་སེམས་དཔའི་ས་ཡོངས་སུ་སྦྱང་བས་དེ་བཞིན་གཤེགས་པའི་ས་གནན་པ་ལ་མཁས་པར་བྱའོ། །ཀྱེ་རྒྱལ་བའི་སྲས་དག ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སའི་རྣམ་པ་མངོན་པར་བསྒྲུབ་པ་ལ་མཁས་པ་ནི་ས་དང་པོ་ལས་གྱེན་དུ་མ་བསྐྱོད་པར་ས་བཅུའི་བར་དུ་གནན་ཅིང་ཐོབ་པར་བྱ་བ་ཐོགས་པ་མྱེད་དེ། ཐོགས་པ་མྱེད་པར་འགྲོ་བ་དང་། སའི་ཡེ་ཤེས་སྣང་བས་སངས་རྒྱས་ཀྱི་ཡེ་ཤེས་སྣང་བའང་རབ་ཏུ་ཐོབ་བོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། དེད་དཔོན་ཆེན་པོ་མཁས་པས་ལམ་གྲོགས་ཡོངས་སུ་གདོན་པའི་བསམ་པ་དང་ལྡན་པ། གྲོང་རྡལ་ཆེན་པོའི་སར་ཕྱིན་པར་བྱ་བར། འདོད་པ་ནི་ཐོག་མ་ནས་ལམ་དང་ལམ་གྱི་ཡོན་ཏན་དང་། ལམ་ལས་གོལ་བའི་ཉེས་པ་དང་ལམ་གྱི་བར་མལ་གྱི་ཁྱད་པར་དང་། ལམ་གྱི་བར་མལ་འཁྲུལ་ན་ཉེས་པར་འགྱུར་བ་དང་། ལམ་དུ་བྱ་མི་བྱ་དང་། བརྒྱགས་བཤམས་པ་ཡོངས་སུ་ཚོལ་ཞིང་ཀུན་ཏུ་འདྲིའོ། །ཐོག་མའི་ལམ་གྱི་བར་མལ་ནས་མ་འཕགས་པ་ནས་གྲོང་
རྡལ་དུ་ཕྱིན་གྱི་བར་དུ་ཤིན་ཏུ་མཁས་པ་ཡིན། ལམ་གྱི་བར་མལ་དེ་ནས་མ་འཕགས་པར་དེ་ཉིད་ནས་ཤེས་པས་ཤིན་ཏུ་བརྟགས་པའི་བློ་དང་བརྒྱགས་ཀྱི་ཚོགས་ཆེན་པོ་ཕུན་སུམ་ཚོགས་པས་ལམ་གྲོགས་མང་པོ་རྣམས་ཉམ་ཉེས་མྱེད་པར་གྲོང་རྡལ་ཆེན་པོ་དེར་ཕྱིན་པར་བྱེད་དེ། མྱ་ངམ་དང་དགོན་པའི་ཉེས་པས་བདག་དང་ལམ་གྲོགས་རྣམས་ལ་གནོད་པར་མི་འགྱུར་བར་བྱེད་དོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དེད་དཔོན་མཁས་པ་ཡང་གང་གི་ཚེ་བྱང་ཆུབ་སེམས་དཔའི་ས་དང་པོ་ལ་གནས་ཤིང་སའི་ཕྱོགས་དང་མི་མཐུན་པའི་ཕྱོགས་ལ་མཁས་པ་དང་། ས་འགྲུབ་པ་དང་འཇིག་པ་ལ་མཁས་པ་དང་། སའི་རྣམ་པ་དང་རྒྱུ་མཐུན་པའི་འབྲས་བུ་ལ་མཁས་པ་དང་། ས་འཐོབ་པར་བྱ་བ་དང་། རྣམ་པར་བསྒོམ་པ་ལ་མཁས་པ་དང་། སའི་ཡན་ལག་ཡོངས་སུ་སྦྱང་བ་ལ་མཁས་པ་དང་། ས་ནས་སར་འཕར་བ་ལ་མཁས་པ་དང་། ས་ནས་སར་རྣམ་པར་གནས་པ་ལ་མཁས་པ་དང་། ས་ནས་སར་ཁྱད་པར་དུ་འགྱུར་བའི་ཡེ་ཤེས་ལ་མཁས་པ་དང་། ས་ནས་ས་ཐོབ་པ་ལས་ཕྱིར་མི་ལྡོག་པ་ལ་མཁས་པ་དང་། བྱང་ཆུབ་སེམས་དཔའི་ས་ཐམས་ཅད་ཡོངས་སུ་སྦྱང་བས་དེ་བཞིན་གཤེགས་པའི་ས་གནོན་པ་ལ་མཁས་པར་གྱུར་པ་དེའི་ཚེ། བསོད་ནམས་ཀྱི་ཚོགས་ཆེན་པོའི་བརྒྱགས་ཡོངས་སུ་གཟུང་བ་དང་། ཡེ་ཤེས་ཀྱི་ཚོགས་ཆེན་པོ་ལ་རྣམ་པར་དབྱེ་བ་ཤིན་ཏུ་བྱས་པ་དང་། སེམས་ཅན་གྱི་ལམ་གྲོགས་མང་པོ་ཡོངས་སུ་གདོན་པའི་བསམ་པ་དང་ལྡན་པས་ཐམས་ཅད་མཁྱེན་པའི་གྲོང་རྡལ་ཆེན་པོར་ཕྱིན་པར་བྱ་བར་འདོད་ཅིང་ཐོག་མ་ནས་སའི་ལམ་དང་། སའི་ལམ་གྱི་ཡོན་ཏན་དང་། སའི་ལམ་གོལ་བའི་ཉེས་པ་དང་། སའི་ལམ་གྱི་བར་མལ་གྱི་ཁྱད་པར་དང་། སའི་ལམ་གྱི་བར་མལ་འཁྲུལ་ན་ཉེས་པར་འགྱུར་བ་དང་། བསོད་ནམས་ཀྱི་ཚོགས་
ཆེན་པོའི་བརྒྱགས་བཤམས་ཤིང་བསྩོགས་པ་དག་ཀྱང་སངས་རྒྱས་དང་། བྱང་ཆུབ་སེམས་དཔའ་དག་དང་། དགེ་བའི་བཤེས་གཉེན་དག་ལས་ཡོངས་སུ་ཚོལ་ཤིང་ཡོངས་སུ་འདྲི་སྟེ། དེ་ལམ་གྱི་བར་མལ་དང་པོ་ནས་གྱེན་དུ་མ་འཕགས་པར་ཐམས་ཅད་མཁྱེན་པའི་གྲོང་རྡལ་ཆེན་པོར་ཕྱིན་པར་བྱ་བའི་བར་དུ་མཁས་པ་ཡིན། དེ་དེ་ལྟར་ཡེ་ཤེས་ཀྱིས་རྣམ་པར་རྟོག་པའི་བློ་དང་། བསོད་ནམས་དང་ཡེ་ཤེས་ཀྱི་ཚོགས་ཆེན་པོའི་བརྒྱགས་ཕུན་སུམ་ཚོགས་པས་སེམས་ཅན་གྱི་ལམ་གྲོགས་ཀྱི་ཚོགས་ཆེན་པོ་ཡོངས་སུ་སྨྱིན་པའི་ཚུལ་བཞིན་དུ་འཁོར་བའི་མྱ་ངམ་དང་དགོན་པ་བརྒལ་དཀའ་བ་ལས་བསྒྲལ་ཏེ་ཐམས་ཅད་མཁྱེན་པའི་ཡེ་ཤེས་ཀྱི་གྲོང་རྡལ་ཆེན་པོའི་བར་ཕྱིན་པར་བྱེད་ཅིང་འཁོར་བའི་མྱ་ངན་དང་དགོན་པའི་ཉེས་པས་སེམས་ཅན་ལམ་གྲོགས་སམ་བདག་ལ་གནོད་པར་ཡང་མི་འགྱུར་བར་བྱེད་དོ། །ཀྱེ་རྒྱལ་བའི་སྲས་དག །དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་སྐྱོ་བ་མེད་པའི་ཡིད་ཀྱིས་ས་ཡོངས་སུ་སྦྱང་བའི་ཁྱད་པར་ལ་བརྩོན་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱིས་གནན་པའི་བར་དུ་ཡང་མཁས་པར་བྱའོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བའི་སྒོར་འཇུག་པ་མདོར་བསྡུས་ཏེ་བསྟན་པའོ། །རྒྱ་ཆེར་ནི་ཤིན་ཏུ་བསྟན་པ་བརྒྱ་སྟོང་གྲངས་མྱེད་པ་ལ་རྣམ་པའི་མུར་ཐུག་པ་མྱེད་པ་སྟེ། བསྐལ་པ་གྲངས་མྱེད་པའི་མཐར་ཐུག་པར་ཤིན་ཏུ་བསྟན་པའི་ཚུལ་གྱིས་ཁོང་དུ་ཆུད་པར་བྱའོ། །དེ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕལ་ཆེར་འཛམ་བུའི་གླིང་གི་རྒྱལ་པོར་འགྱུར་ཏེ། སྲིད་ཆེན་པོ་ལ་དབང་སྒྱུར་བ་རབ་ཏུ་ཐོབ་ཅིང་ཆོས་ཀྱིས་ཡོངས་སུ་བསྐྱང་བ་དང་། སེམས་ཅན་རྣམས་སྦྱིན་པ་ཆེན་པོས་ཡོངས་སུ་བསྡུ་
བ་ལ་མཁས་ཤིང་མཐུ་ཡོད་པ་ཡིན། སེམས་ཅན་རྣམས་ཀྱི་འཇུངས་པའི་དྲི་མ་བཟློག་པ་ལ་མཁས་པ་ཡིན། སྦྱིན་པ་ཆེན་པོ་རྩོམ་པས་ཡོངས་སུ་དུབ་པར་མི་འགྱུར་བ་ཡིན། དེ་སྦྱིན་པའམ་ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། རྣམ་པར་འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང་། ཆོས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་། ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་། མི་འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ། ཁྱིམ་དང་ཆུང་མ་དང་སྲིད་ཐམས་ཅད་ཡོངས་སུ་སྤངས་ཏེ། དེ་བཞིན་གཤེགས་པའི་བསྟན་པ་ལ་རབ་ཏུ་འབྱུང་བ་དང་། རབ་ཏུ་བྱུང་ནས་ཀྱང་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་བརྒྱ་རབ་ཏུ་འཐོབ་ཅིང་སྙོམས་པར་འཇུག་པ་དང་། སངས་རྒྱས་བརྒྱ་མཐོང་བ་དང་། དེ་དག་གིས་བྱིན་གྱི་རླབས་ཀྱང་ཡང་དག་པར་ཤེས་པ་དང་། འཇིག་རྟེན་ཁམས་བརྒྱ་སྐྱོད་པ་དང་། སངས་རྒྱས་ཀྱི་ཞིང་བརྒྱར་འགྲོ་བ་དང་། འཇིག་རྟེན་
གྱི་ཁམས་བརྒྱ་སྣང་བར་བྱ་བ་དང་། སེམས་ཅན་བརྒྱ་ཡོངས་སུ་སྨྱིན་པར་བྱ་བ་དང་། བསྐལ་པ་བརྒྱར་གནས་པར་བྱ་བ་དང་། སྔོན་གྱི་མཐའ་དང་ཕྱི་མའི་མཐའི་བསྐལ་པ་བརྒྱ་ལ་རབ་ཏུ་འཇུག་པ་དང་། ཆོས་ཀྱི་སྒོ་བརྒྱ་རྣམ་པར་འབྱེད་པ་དང་། ལུས་བརྒྱ་ཡོངས་སུ་བསྟན་པ་དང་། ལུས་རེ་རེ་ལ་བྱང་ཆུབ་སེམས་དཔའི་འཁོར་བརྒྱ་ཡང་དག་པར་བསྟན་པར་བྱ་བའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཅད་བྱང་ཆུབ་སེམས་དཔའི་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ་དེ་དག་གིས་ལུས་སམ་འོད་དང་རྫུ་འཕྲུལ་ལམ་མྱིག་གམ་སྤྱོད་ཡུལ་ལམ། དབྱངས་སམ་སྤྱོད་པའམ་རྒྱན་ཏམ་བྱིན་གྱི་རླབས་སམ་མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཀྱང་བགྲང་བར་དཀའོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང་བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་དཀར་པོའི་ཆོས་བསྩགས་དགེ་བ་མཐུན་ལྡན་ཞིང་། །བདེ་གཤེགས་ཡོངས་སུ་བསྙེན་བཀུར་སྙིང་རྗེ་བྱམས་ལྡན་ལ། །དད་པ་རྒྱ་ཆེ་དགེ་སེམས་ངང་ཚུལ་དག་ལྡན་པ། །རྒྱལ་བའི་ཡེ་ཤེས་དོན་དུ་རླབས་ཆེན་སེམས་ཀྱང་བསྐྱེད། །རྒྱལ་བའི་ཆོས་རྫོགས་འགྲོ་བ་ཡོངས་སུ་བསྐྱབ་དོན་དུ། །ཐམས་ཅད་མཁྱེན་པ་སངས་རྒྱས་སྟོབས་སྦྱོང་བརྟན་མཐུ་ཅན། །བརྩེ་བ་ཆེན་པོས་ཆོས་ཀྱི་འཁོར་ལོ་བསྐོར་བྱ་བས། །རྒྱལ་བའི་ཞིང་སྦྱོང་སེམས་ཀྱི་དམ་པ་རབ་ཏུ་བསྐྱེད། །འགྲོ་བར་རྣམ་པ་སྣ་ཚོགས་དུས་རྣམས་བསྟན་པའི་ཕྱིར། །འདྲེན་པ་ཀུན་གྱི་ཡོན་ཏན་ཐམས་ཅད་འདོད་ཚོལ་ཞིང་། །དུས་གསུམ་སྐད་ཅིག་གཅིག་ཏུ་མི་རྟོག་ཤེས་བྱེད་
པའི། །མཁའ་འདྲ་ཤིན་ཏུ་ཡངས་པའི་སེམས་དང་ལྡན་པར་བྱེད། །ཤེས་རབ་དབང་སྒྱུར་སྙིང་རྗེ་སྔུན་འགྲོ་ཐབས་ལྡན་ཞིང་། །མོས་དང་བསམ་པ་རྣམ་དག་སྟོབས་ཀྱིས་ཚད་མྱེད་ལ། །ཆགས་མྱེད་མངོན་གྱུར་གཞན་གྱི་དྲིང་ལ་མྱི་འཇོག་པ། །བདེ་གཤེགས་རྣམས་དང་མཉམ་གྱུར་སེམས་ཀྱི་དམ་པ་བསྐྱེད། །བདེ་གཤེགས་སྲས་སེམས་རིན་ཆེན་ཡང་དག་སྐྱེས་འཕྲལ་དུ། །བྱིས་པའི་སྤྱོད་བྲལ་སངས་རྒྱས་རྣམས་ཀྱི་སྤྱོད་དང་ལྡན། །སྟོབས་བཅུ་མངའ་རིགས་ཁ་ན་མ་ཐོ་མེད་པར་སྐྱེས། །བདེ་གཤེགས་མཉམ་ཉིད་རྗེས་རྟོགས་བྱང་ཆུབ་མཆོག་ཏུ་ངེས། །འདི་འདྲའི་སེམས་དང་ས་ཐོབ་ལྷན་ཅིག་མངོན་པར་སྐྱེ། །བསམ་པ་མྱི་གཡོ་རི་ཡི་རྒྱལ་པོ་འདྲ་བར་གནས། །རབ་ཏུ་དགའ་ཞིང་སྤྲོས་མང་དད་དང་ལྡན་པ་སྟེ། །མོས་པའི་ཤུགས་ཡངས་རྟག་པར་སེམས་ཀྱི་མཆོག་དང་ལྡན། །འཁྲུགས་དང་འཚེ་བ་མྱེད་ཅིང་ཁྲོ་བ་མྱེད་པ་སྟེ། །ངོ་ཚ་ཤེས་ཤིང་སྲི་ཞུ་དྲན་ལྡན་ཤིན་ཏུ་བསྡམས། །འགྲོ་བ་ཡོངས་སུ་བསྐྱབ་པའི་མཚུངས་མེད་ཡེ་ཤེས་དྲན་གྱུར་ཅིང་། །འདོད་པར་བྱ་བའི་གནས་དང་ལྡན་གྱུར་དགའ་བ་སྐྱེད། །ས་ཐོབ་གྱུར་མ་ཐག་ཏུ་འཇིགས་པ་ལྔ་དང་བྲལ། །འཚོ་བ་མེད་དང་འཆི་དང་མི་བསྔགས་ངན་འགྲོ་དང་། །འཁོར་གྱི་འཇིགས་བྲལ་དེ་ལ་བག་ཚའི་རྣམ་པ་མྱེད། །ཅི་ཕྱིར་ཞེ་ན་དེ་ལ་བདག་གི་གནས་མྱེད་དོ། །དེ་དག་བག་ཚ་བྲལ་ཞིང་སྙིང་རྗེ་བྱམས་དང་ལྡན། །བསྟི་སྟང་དང་ལྡན་དགའ་བ་ཕུན་སུམ་ཡོན་ཏན་མང་། །ཉིན་དང་མཚན་དུ་དགེ་བའི་ཕྱོགས་ལ་སྟེན་བྱེད་ཅིང་། །སེམས་ཅན་དོན་དུ་ཆོས་བརྩོན་འདོད་བསྐྱེད་ཕྱིར་མ་ཡིན། །དགེ་བའི་ཆོས་ཐོས་བསམ་ལ་མཁས་ཤིང་གནས་མྱེད་སྤྱོད། །འཐོབ་སེམས་སྲེད་བྲལ་བྱང་ཆུབ་སེམས་ལ་རྟག་པར་དགའ། །བདེ་གཤེགས་ཡེ་ཤེས་འདོད་ཅིང་གཞན་དུ་སེམས་པ་མེད། །ཕ་རོལ་ཕྱིན་པ་ཚོལ་ཞིང་སྒྱུ་དང་གཡོ་ཡང་སྤངས། །ཅི་སྨྲས་དེ་བཞིན་བྱེད་པས་བདེན་པའི་ཚིག་
ལ་གནས། །རྒྱལ་བའི་རིགས་སྐྱོན་མི་འགྱུར་བྱང་ཆུབ་སློབ་ལ་སྤྱོད། །འཇིག་རྟེན་ལས་ཀྱི་བསམ་བྲལ་འགྲོ་བའི་དོན་དུ་བརྩོན། །དཀར་པོས་ངོམས་པ་མེད་པར་ཕྱིར་ཞིང་གོང་དུ་རྩོལ། །དེ་དག་འདི་འདྲའི་ཆོས་བརྩོན་ཡོན་ཏན་དོན་དང་ལྡན། །རྒྱལ་བ་བལྟ་བའི་དོན་དུ་སྨོན་ལམ་མངོན་པར་སྒྲུབ། །དམ་ཆོས་ཡོངས་སུ་གཟུང་ཞིང་དྲང་སྲོང་དྲུང་འགྲོ་དང་། །སྤྱོད་པ་མཆོག་གི་དོན་དུ་སྨོན་ལམ་མངོན་པར་སྒྲུབ། །སེམས་ཅན་ཡོངས་སུ་སྨིན་བྱ་སངས་རྒྱས་ཞིང་སྦྱངས་ཏེ། །དེ་ཡི་ཞིང་མཆོག་རྒྱལ་སྲས་ཀུན་གྱིས་གང་འགྱུར་ཞིང་། །རྒྱལ་སྲས་རྣམས་དང་བསམ་པ་གཅིག་ཅིང་དོན་མཐུན་ཕྱིར། །སྐྲ་སྦུབས་ཀུན་ཏུ་དོན་གྱི་དམ་པ་མངོན་འཚང་རྒྱ། །དེ་དག་སྨོན་ལམ་དུ་མ་མངོན་པར་བསྒྲུབ་པ་བྱེད། །དེ་དག་མཐའ་ཡས་ཡངས་ཤིང་མཐར་ཐུག་མེད་དང་ལྡན། །ནམ་མཁའི་ཁམས་དང་ཆོས་ཉིད་མྱ་ངན་འདས་ཁམས་དང་། །འཇིག་རྟེན་མཐར་ཐུག་རྒྱལ་བ་འབྱུང་དང་ཡེ་ཤེས་ས། །སེམས་ཀྱི་ཡུལ་དང་ཡེ་ཤེས་འཇུག་པའི་མཐར་ཐུག་དང་། །རྣམ་གསུམ་རྒྱུད་རྣམས་མཐར་ཐུག་འགྲོ་བའི་མུར་ཐུག་པ། །རྣམ་པ་དེ་ཚུལ་བདག་སྨོན་མཐར་ཡང་ཐུག་གྱུར་ཅིང་། །དེ་དག་མཐར་ཐུག་ཇི་བཞིན་བདག་སྤྱོད་དེ་འདྲར་ཤོག །དེ་ལྟར་མངོན་བསྒྲུབས་འཇམ་ཞིང་བྱམས་པའི་སེམས་ལྡན་པ། །སངས་རྒྱས་ཡོན་ཏན་ཡིད་ཆེས་སེམས་ཅན་རྣམ་པར་ལྟ། །སེམས་ཅན་སྡུག་བསྔལ་ཉོན་མོངས་བདག་གིས་བསྐྱབ་ཅེས་ཏེ། །རྟེན་འབྲེལ་འབྱུང་འཇུག་སྙིང་རྗེ་བྱམས་དང་ལྡན་པ་ནི། །དེ་དག་དོན་དུ་སྣ་ཚོགས་སྦྱིན་པ་ཡང་དུ་རྩོམ། །རྒྱལ་སྲིད་མཆོག་དང་རིན་ཆེན་སྣ་ཚོགས་གླང་པོ་རྟ། །མགོ་དང་རྐ་ལག་མྱིག་དང་དེ་བཞིན་བདག་ཉིད་ཤ །ཐམས་ཅད་ཡོངས་སུ་གཏང་ཡང་ཞུམ་པའི་ཡིད་མྱེད་དོ། །གཙུག་ལག་སྣ་ཚོགས་ཚོལ་ཡང་ཡོངས་སུ་སྐྱོ་བ་མྱེད། །གཙུག་ལག་འཇིག་རྟེན་
སྤྱོད་པའི་རྗེས་ཀྱང་བར་དུ་སྙེགས། །འཇིག་རྟེན་ཤེས་དང་ལྡན་ཞིང་ཁྲེལ་ཡོད་དགའ་དང་ལྡན། །བདེ་གཤེགས་གཅིག་མྱིན་རིམ་གྲོ་རྗེས་སུ་མཆོད་པ་བྱེད། །དེ་ལྟར་མཁས་པ་ཉིན་མཚན་རྟག་ཏུ་བརྩོན་པ་ཡི། །དགེ་བ་མྱེད་བཅུག་གསེར་བཞིན་ཤིན་ཏུ་དག་པར་འགྱུར། །དེ་དག་ས་རྣམས་བཅུ་པོ་འདི་ལ་སྦྱངས་བྱས་ཤིང་། །ཐོགས་པ་མྱེད་པར་ཆགས་མེད་རབ་ཏུ་ཐོབ་པར་འགྱུར། །ཇི་ལྟར་དེད་དཔོན་ལམ་གྲོགས་མང་ལ་ཕན་བརྩོན་པ། །ལམ་གྱི་ཡོན་ཏན་དྲི་ཞིང་བདེ་བའི་གྲོང་དུ་སྐྱེལ། །དེ་བཞིན་བྱང་ཆུབ་སེམས་དཔའ་དང་པོའི་ས་གནས་པ། །འགྲོ་བའི་དོན་བཤམས་ཆགས་མེད་ས་བཅུ་རབ་ཏུ་འཐོབ། །འདི་གནས་ཡོན་ཏན་ལྡན་པ་མི་ཡི་དབང་པོར་འགྱུར། །བྱམས་པའི་སེམས་ཀྱིས་ས་རྣམས་ཡོངས་སུ་སྐྱོང་། །འཛམ་བུའི་རྒྱལ་མཚན་སྲིད་ཀུན་རབ་ཏུ་སྐྱོང་བྱེད་ཅིང་། །སྦྱིན་པས་འགྲོ་བ་སངས་རྒྱས་ཡེ་ཤེས་མཆོག་ལ་དགོད། །ཁྱུ་མཆོག་དམ་པ་འདོད་ན་རྒྱལ་སྲིད་རབ་ཏུ་གཏོང་། །རྒྱལ་བའི་བསྟན་པ་རབ་ཏུ་བྱུང་ཞིང་བརྩོན་འགྲུས་རྩོམ། །ཏིང་འཛིན་བརྒྱ་དང་སངས་རྒྱས་བརྒྱ་རྣམས་མཐོང་བར་བྱེད། །ཞིང་བརྒྱ་སྐྱོད་ཅིང་རབ་ཏུ་སྣང་བྱེད་ཀུན་ཏུ་འགྲོ། །སེམས་ཅན་བརྒྱ་སྦྱོང་ཆོས་ཀྱི་སྒོ་ལ་འགོད་པ་བྱེད། །བསྐལ་པ་བརྒྱར་འཇུག་ལུས་བརྒྱ་རབ་ཏུ་སྟོན་པ་བྱེད། །རྒྱལ་བའི་སྲས་ཀྱང་བརྒྱ་ཡི་གྲངས་ཚངས་ཡོངས་སུ་སྟོན། །དེ་ཡི་གོང་ན་སྨོན་མཆོག་སྟོབས་ལྡན་ཚད་ཀྱང་མྱེད། །བདག་གིས་དོན་དུ་མདོར་བསྡུས་ཏེ། །ས་རྣམས་ཁྱེད་ལ་བཤད་པ་བྱས། །རྒྱ་ཆེ་བསྐལ་པ་བྱེ་བར་ཡང་། །ཐམས་ཅད་ཟད་པར་མི་ནུས་སོ། །དེ་ལྟར་ས་ཡི་དང་པོ་འདི། །འཇིག་རྟེན་ཀུན་ལ་ཕན་སེམས་པའི། །བྱང་ཆུབ་སེམས་དཔའ་མཆོག་རྣམས་ལ། །རྒྱལ་བའི་སྲས་ཀྱིས་བསྟན་པ་ཡིན། །རབ་ཏུ་དགའ་བ་ཞེས་བྱ་སྟེ། །བྱང་ཆུབ་སེམས་དཔའི་ས་དང་པོ། །ས་མཆོག་
ཡིད་དུ་འོང་བ་འདི། །གནས་ཀྱི་དམ་པ་ཐོབ་གྱུར་ནས། །བདེ་བར་གཤེགས་པའི་སྲས་ཀྱི་རྣམས། །ཡིད་རྟོག་དང་ཞིང་རབ་ཏུ་དགའ། །ཀུན་ཀྱང་སྟན་ལས་ལངས་གྱུར་ཏེ། །མཁའ་ཡི་དབྱིངས་ལ་མངོན་འཕགས་ནས། །མེ་ཏོག་སིལ་མ་རབ་ཏུ་འཐོར། །ལེགས་ཞེས་བྱ་བའི་ཚིག་ཀྱང་བརྗོད། །རྡོ་རྗེའི་སྙིང་པོ་འཇིགས་མེད་པ། །ཤེས་རབ་ཆེན་པོ་ལེགས་སོ་ལེགས། །བྱང་ཆུབ་སེམས་དཔའི་སྤྱོད་པ་སྟེ། །ས་འདི་ཁྱོད་ཀྱིས་ལེགས་པར་བཤད། །འཁོར་འདི་རྣམ་པར་དང་ཞིང་གསལ། །རྣམ་གྲོལ་ཟླ་བ་འདི་ཡང་འདྲི། །རྒྱལ་བའི་སྲས་ཀྱི་གོང་དུ་ཡང་། །ས་གཉིས་རབ་ཏུ་བརྗོད་པར་མཛོད། །ཡིད་ཀྱི་རྟོག་པ་ཅི་འདྲ་བས། །ས་གཉིས་པ་ནི་འཐོབ་འགྱུར་བ། །ཤེས་རབ་ཆེན་པོས་བཤད་པར་མཛོད། །རྒྱལ་བའི་སྲས་རྣམས་ཉན་པར་འདོད། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དག་དེ་ལྟར་བྱང་ཆུབ་སེམས་དཔའ་ས་དང་པོ་ལ་ཡོངས་སུ་སྦྱང་བ་བྱས་པ་དེ་ས་གཉིས་པ་ལ་མངོན་པར་མོས་པ་ཡིན་ཏེ། དེའི་སེམས་ཀྱི་བསམ་པ་བཅུ་འབྱུང་ངོ་། །བཅུ་གང་ཞེ་ན། འདི་ལྟ་སྟེ། དྲང་པོའི་བསམ་པ་དང་། འཇམ་པའི་བསམ་པ་དང་། ལས་སུ་རུང་བའི་བསམ་པ་དང་། དུལ་བའི་བསམ་པ་དང་། ཞི་བའི་བསམ་པ་དང་། དགེ་བའི་བསམ་པ་དང་། མ་འདྲེས་པའི་བསམ་པ་དང་། མི་ལྟོས་པའི་བསམ་པ་དང་རླབས་པོ་ཆེའི་བསམ་པ་དང་། བདག་ཉིད་ཆེ་བའི་བསམ་པ་དང་། སེམས་ཀྱི་བསམ་པ་བཅུ་པོ་འདི་དག་འབྱུང་སྟེ། དེ་དག་གིས་བྱང་ཆུབ་སེམས་དཔའི་ས་གཉིས་པ་དྲི་མ་བྲལ་བ་ལ་གནས་པ་ཡིན། ཀྱེ་རྒྱལ་བའི་སྲས་དག ། དེ་ལ་བྱང་ཆུབ་སེམས་དཔའི་ས་དྲི་མ་དང་བྲལ་བ་ལ་གནས་པའི་བྱང་ཆུབ་སེམས་དཔའ་ནི་རང་བཞིན་གྱིས་སྲོག་གཅོད་པ་དང་བྲལ་བ་ཡིན་ཏེ། དབྱིག་པ་སྤངས་མཚོན་ཆ་སྤངས། ཁོན་དུ་འཛིན་པ་སྤངས་
ཤིང་ངོ་ཚ་དང་ལྡན་པས་སྲོག་ཆགས་སུ་གྱུར་པ་ཐམས་ཅད་ལ་ཕན་པ་དང་བདེ་བས་ཕན་འདོགས་ཤིང་བྱམས་པའི་སེམས་དང་ལྡན་པ་ཡིན་ཏེ། དེ་ཡིད་ཀྱི་ཡོངས་སུ་རྟོག་པ་ཙམ་གྱིས་ཀྱང་སྲོག་ཆགས་ལ་འཚེ་བ་མི་བྱེད་ན་སེམས་ཅན་གཞན་ལ་སེམས་ཅན་དུ་འདུ་ཤེས་ཤིང་ཆེད་དུ་བསམས་ཏེ། ལུས་ལ་གཙེ་བ་ཆེན་པོ་བྱ་བ་ལྟ་ཅི་སྨོས། བདག་གི་ལོངས་སྤྱོད་གྱིས་ཆོག་ཤེས་ཤིང་གཞན་གྱི་ལོངས་སྤྱོད་ལ་རེ་བ་མེད་པས་མ་བྱིན་པར་ལེན་པ་དང་བྲལ་བ་ཡིན་ཏེ། དེ་གཞན་གྱིས་ཡོངས་སུ་བཟུང་བའི་དངོས་པོ་ལ་གཞན་གྱིས་ཡོངས་སུ་བཟུང་བར་འདུ་ཤེས་ཤིང་རྐུ་སེམས་ཉེ་བར་བཞག་སྟེ། ཆུང་ངུ་ན་རྩྭ་དང་ལོ་མ་ཡང་མ་བྱིན་པར་མི་ལེན་ན་འཚོ་བའི་ཡོ་བྱད་གཞན་ལྟ་ཅི་སྨོས། བདག་གི་ཆུང་མས་ཆོག་ཤེས་ཤིང་གཞན་གྱི་ཆུང་མ་ལ་རེ་བ་མེད་པས་འདོད་པས་ལོག་པར་གཡེམ་པ་དང་བྲལ་བ་ཡིན་ཏེ། དེ་གཞན་གྱིས་ཡོངས་སུ་བཟུང་བའི་བུད་མྱེད་གཞན་གྱི་ཆུང་མ་རུས་དང་མཚན་མ་དང་ཆོས་ཀྱིས་བསྲུང་བ་རྣམས་ལ་ཆགས་སེམས་ཀྱང་མྱི་སྐྱེ་ན་གཉིས་ཀྱིས་གཉིས་ཕྲད་པར་བྱ་བ་ལྟ་ཅི་སྨོས། ཡང་དག་པར་སྨྲ་ཞིང་བདེན་པར་སྨྲ་བ་དང་། དུས་སུ་སྨྲ་བ་དང་། ཚོད་དུ་སྨྲ་བ་ལ་ཇི་སྐད་དུ་སྨྲས་པ་དེ་བཞིན་དུ་བྱེད་པས། བརྫུན་དུ་སྨྲ་བ་དང་བྲལ་བ་ཡིན་ཏེ། དེ་ཆུང་ངུ་ན་རྨི་ལམ་དུ་ཡང་བརྫུན་གྱི་ཚིག་མི་བརྗོད་ན། ཆེད་དུ་བསམས་ཏེ་བརྗོད་པ་ལྟ་ཅི་སྨོས། དེ་སེམས་ཅན་གྱི་དབྱེན་མི་བྱེད་ཅིང་མྱི་འཚེ་བ་ལ་ཞུགས་པས། ཕྲ་མའི་ཚིག་དང་བྲལ་བ་ཡིན་ཏེ། དེ་དག་དབྱེ་བའི་ཕྱིར་ཚུ་བི་ལས་ཐོས་ཤིང་ཕ་བིར་སྙོད་པ་མ་ཡིན། ཕ་བི་ལས་ཐོས་ནས་ཚུ་བིར་སྙོད་པ་མ་ཡིན་ཏེ། འདུམ་པ་རྣམས་དབྱེ་བར་མི་བྱེད། བྱེ་བ་རྣམས་ལ་དཔར་བས་མི་རྣོན་ཏེ། མི་འདུམ་པ་ལ་དགའ་ཞིང་མི་འདུམ་པ་ལ་མོས་པ་མ་ཡིན་པས་བདེན་ནམ་རྫུན་ཡང་རུང་མི་འདུམ་པར་བྱ་བའི་ཚིག་མི་སྨྲའོ། །ཞེ་གཅོད་པའི་ཚིག་དང་བྲལ་བ་ཡིན་ཏེ། སྙོགས་པ་དང་། བརླང་བ་དང་། རྩུབ་པ་དང་། གཞན་
ལ་གནོད་པ་དང་། ཞེ་སྣད་པར་གྱུར་པ་དང་། ཉེས་པ་ངོར་བརྗོད་པ་དང་། ཉེས་པ་ངོར་བརྗོད་པ་ལ་གཞོལ་བ་དང་། གྲོང་མའི་ཚིག་དང་། མ་རབས་ཀྱི་ཚིག་དང་། གཟུངས་སུ་བཟུང་བ་མ་ཡིན་པ་དང་། རྣར་མི་སྙན་པ་དང་། ཁྲོ་བ་དང་གཤེ་བ་ལས་བྱུང་བ་དང་། སྙིང་ན་བར་བྱེད་པ་དང་། ཡིད་ཡོངས་སུ་གདུང་བར་བྱེད་པ་དང་། མི་སྙན་པ་དང་། ཡིད་དུ་མི་འོང་བ་དང་། བདག་དང་གཞན་གྱི་སེམས་མ་རུང་བར་བྱེད་པའི་ཚིག་གི་རྣམ་པ་དེ་ལྟ་བུ་སྤངས་ཏེ། གང་འདི་འཇམ་པ་དང་ཡིད་དུ་འོང་བ་དང་། སྙན་པ་དང་། གཟུངས་སུ་བཟུང་བ་དང་། རྣར་འོང་བ་དང་། སྙིང་དུ་སྡུག་པ་དང་། ཕོ་བྲང་འཁོར་གྱི་ཚིག་དང་། གཙིགས་པ་དང་། གསལ་བ་དང་། འགོ་བ་དང་མཉན་པར་འོས་པ་དང་། མི་གནས་པ་དང་། སྐྱེ་བོ་མང་པོ་དགའ་བར་འགྱུར་བ་དང་། སྐྱེ་བོ་མང་པོའི་ཡིད་དུ་འོང་བ་དང་། མཁས་པས་བསྔགས་པ་དང་། སེམས་ཅན་ཐམས་ཅད་ལ་ཕན་ཞིང་བདེ་བར་འགྱུར་བ་དང་། ཡིད་བདེ་བར་བྱེད་པ་དང་། ཡིད་སིམ་པར་བྱེད་པ་དང་། བདག་དང་གཞན་གྱི་སེམས་དང་བར་བྱེད་པ་དང་། འདོད་ཆགས་དང་ཞེ་སྡང་དང་གཏི་མུག་དང་། ཉོན་མོངས་པ་ཐམས་ཅད་ཞི་བར་བྱེད་པའི་ཚིག་གི་རྣམ་པ་དེ་ལྟ་བུ་དག་བརྗོད་དོ། །ཚིག་ཀྱལ་པ་སྤངས་པ་ཡིན་ཏེ། ལེགས་པར་ལན་གློན་པའི་ཚིག་དང་། དུས་སུ་སྨྲ་བ་དང་། བདེན་པར་སྨྲ་བ་དང་། དོན་དུ་སྨྲ་བ་དང་། ཆོས་སུ་སྨྲ་བ་དང་། རིགས་པར་སྨྲ་བ་དང་། དུལ་བར་སྨྲ་བ་དང་། དུས་ལ་བབ་པར་ཤིན་ཏུ་གོ་བའི་གཏན་ཚིགས་དང་བཅས་པར་སྨྲ་བར་དེ་ཆུང་ངུ་ན་བཞད་གད་དུ་བྱ་བ་ཙམ་གྱི་ཚིག་ལ་ཡང་ཡོངས་སུ་སྤང་བར་བྱ་བ་ཡོངས་སུ་སྤོང་ན་དགོས་པ་དོན་དུ་གཉེར་ཅིང་ཚིག་གིས་རྣམ་པར་འཁྲུག་པ་ལྟ་ཅི་སྨོས། ཆགས་སེམས་མེད་པ་ཡིན་ཏེ། དེ་གཞན་གྱི་ནོར་དང་། གཞན་གྱི་འདོད་པ་དང་། གཞན་དབང་བའི་ཡོ་བྱད་གཞན་གྱིས་ཡོངས་སུ་བཟུང་བ་ལ་ཇི་ལྟར་ན། གང་གཞན་གྱི་ཡིན་པ་དེ་དག་བདག་གིར་འགྱུར་ཞེས་ཏེ། ཆགས་སེམས་མི་བསྐྱེད་མི་རེ་མི་སྨོན་
ཅིང་འདོད་པའི་སེམས་མི་བསྐྱེད་དོ། །གནོད་སེམས་དང་བྲལ་བ་ཡིན་ཏེ། སེམས་ཅན་ཐམས་ཅད་ལ་བྱམས་པའི་སེམས་དང་ཕན་པའི་སེམས་དང་སྙིང་བརྩེ་བའི་སེམས་དང་། བདེ་བའི་སེམས་དང་། འཇམ་པའི་སེམས་དང་། འགྲོ་བ་ཐམས་ཅད་ལ་ཕན་གདགས་པའི་སེམས་དང་། འབྱུང་པོ་ཐམས་ཅད་ལ་ཕན་ཞིང་སྙིང་བརྩེ་བའི་སེམས་དང་ལྡན་པས། གང་འདི་ཁྲོ་བ་དང་། མདུད་པར་འཛིན་པ་དང་། ཐབ་དང་དྲི་མ་དང་གནོད་སེམས་དང་ཁོང་ཁྲོ་བ་ལ་སྩོགས་པ་དེ་དག་སྤངས་ཏེ། གང་འདི་ཕན་པ་དང་ལྡན་པ། བྱམས་པ་དང་ལྡན་པ། སེམས་ཅན་ཐམས་ཅད་ལ་ཕན་པ་དང་། བདེ་བར་བྱ་བའི་ཕྱིར་རྣམ་པར་རྟོག་ཅིང་། རྣམ་པར་དཔྱོད་པ་དེ་དག་ལ་རྣམ་པར་རྟོག་པ་ཡིན། ཡང་དག་པར་ལྟ་བ་དང་ལྡན་ཞིང་ངོ་མཚར་དང་བཀྲ་ཤིས་དང་། ངང་ཚུལ་ངན་པའི་ལྟ་བ་སྣ་ཚོགས་དང་བྲལ་བ་ཡིན་ཏེ། ལྟ་བ་དྲང་ཞིང་གཡོ་མེད་ལ་སྒྱུ་མེད་པས་སངས་རྒྱས་དང་། ཆོས་དང་དགེ་འདུན་ལ་བསམ་པ་ངེས་པ་ཡིན། དེ་དགེ་བ་བཅུའི་ལས་ཀྱི་ལམ་འདི་དག་རྟག་ཏུ་རྒྱུན་མི་འཆད་པར་བསྲུང་ཞིང་འདི་ལྟར་སེམས་ཀྱི་བསམ་པ་མངོན་པར་སྒྲུབ་སྟེ། སེམས་ཅན་རྣམས་ཀྱི་ངན་སོང་དང་ངན་འགྲོ་དང་། ལོག་པར་ལྟུང་བ་ཡོད་པ་གང་ཡང་རུང་སྟེ། དེ་དག་ཐམས་ཅད་མི་དགེ་བ་བཅུའི་ལམ་ཡོངས་སུ་བླངས་པའི་རྒྱུ་ལས་བྱུང་གིས་བདག་གིས་ནི་འདི་ལྟར་བདག་ཉིད་ཡང་དག་པའི་ནན་ཏན་ལ་གནས་ཏེ། གཞན་ཡང་ཡང་དག་པའི་ནན་ཏན་ལ་དགོད་པར་བྱའོ། །ཡང་དག་པའི་ནན་ཏན་ལ་གནས་པར་བསྟན་ཏོ། །དེ་ཅིའི་ཕྱིར་ཞེ་ན། བདག་ལོག་པའི་ནན་ཏན་ལ་གནས་ཤིང་། གཞན་ཡང་དག་པའི་ནན་ཏན་ལ་དགོད་པར་བྱ་བ་འདི་ནི་གནས་མེད་སྐབས་མེད་པ་སྟེ། འདི་ནི་མི་སྲིད་དོ། །ཞེས་ནས་ཡང་དེ་འདི་ལྟར་རྣམ་པར་དཔྱོད་དེ། མི་དགེ་བ་བཅུའི་ལས་ཀྱི་ལམ་འདི་དག་ཡོངས་སུ་བཟུང་བའི་རྒྱུས་སེམས་ཅན་དམྱལ་བ་དང་བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་གྱི་ལམ་གྱི་རྒྱུད་དུ་སྐྱེ་བ་རྣམས་ཡོད་པར་གྱུར་ཏོ། །
དགེ་བ་བཅུའི་ལས་ཀྱི་ལམ་ཡོངས་སུ་བཟུང་བས་ནི་མིར་སྐྱེ་བ་ལ་སོགས་པ་སྲིད་པའི་རྩེ་མོའི་བར་དུ་སྐྱེ་བ་ཡོད་པར་གྱུར་ཏོ། །དེའི་གོང་དུ་དགེ་བ་བཅུའི་ལས་ཀྱི་ལམ་འདི་དག་ཉི་ཙེའི་སེམས་དང་ཁམས་གསུམ་པས་སྐྲག་པའི་ཡིད་དང་། སྙིང་རྗེ་ཆེན་པོ་མེད་པ་དང་། གཞན་ལས་ཐོས་པའི་སྒྲའི་རྗེས་སུ་འབྲང་བའི་ཤེས་རབ་ཀྱིས་རྣམ་པར་ཡོངས་སུ་བསྒོམས་ན་ཉན་ཐོས་ཀྱི་ཐེག་པ་ཡོངས་སུ་སྒྲུབ་པོ། །དེའི་གོང་དུ་གཞན་གྱི་དྲིང་མི་འཇོག་པ་དང་། རང་མངོན་པར་འཚང་རྒྱ་བ་དང་། སྙིང་རྗེ་ཆེན་པོ་དང་། ཐབས་མཁས་པ་མེད་པ་དང་། རྟེན་ཅིང་འབྲེལ་བར་འབྱུང་བ་ཟབ་པར་ཁོང་དུ་ཆུད་པས་ཡོངས་སུ་སྦྱངས་ན། རང་སངས་རྒྱས་ཀྱི་ཐེག་པ་ཡོངས་སུ་སྒྲུབ་བོ། །དེའི་གོང་དུ་ཡངས་ཤིང་ཚད་མེད་པའི་སེམས་དང་། སྙིང་བརྩེ་ཞིང་སྙིང་རྗེ་དང་ལྡན་པ་དང་། ཐབས་མཁས་པས་ཡང་དག་པར་གཟུང་བ་དང་། སྨོན་ལམ་ཆེན་པོ་ཤིན་ཏུ་གདབ་པ་དང་། སེམས་ཅན་ཐམས་ཅད་ཡོངས་སུ་མི་གཏོང་བ་དང་། སངས་རྒྱས་ཀྱི་ཡེ་ཤེས་རྒྱ་ཆེན་པོ་ལ་དམྱིགས་པས་ཡོངས་སུ་སྦྱངས་ན། བྱང་ཆུབ་སེམས་དཔའི་ས་ཡོངས་སུ་དག་པ་དང་། ཕ་རོལ་ཏུ་ཕྱིན་པ་རྣམ་པར་དག་པའི་སྤྱོད་པ་རྒྱ་ཆེན་པོ་ཡོངས་སུ་བསྒྲུབ་པར་འགྱུར་རོ། །དེའི་གོང་དུ་དགེ་བ་བཅུའི་ལས་ཀྱི་ལམ་འདི་དག་ཉིད་རྣམ་པའི་མཆོག་ཐམས་ཅད་དང་ལྡན་པར་ཡོངས་སུ་སྦྱངས་པས་སྟོབས་བཅུའི་སྟོབས་ཐོབ་པར་འགྱུར་བ་དང་། མི་འཇིགས་པ་བཞི་འཐོབ་པ་ནས་རྣམ་པའི་མཆོག་ཐམས་ཅད་དང་ལྡན་པའི་སངས་རྒྱས་ཀྱི་ཆོས་ཐམས་ཅད་ཡོངས་སུ་འགྲུབ་པ་ཡང་དག་པར་སྒྲུབ་བོ། །དེ་ལྟ་བས་ན་བདག་གིས་དགེ་བ་བཅུའི་ལས་མངོན་པར་བསྒྲུབ་དུ་འདྲ་བ་ལ་རྣམ་པ་ཐམས་ཅད་དུ་ཡོངས་སུ་སྦྱང་ཞིང་མངོན་པར་བསྒྲུབ་པ་ལ་བརྩོན་པར་བྱའོ་ཞེས་ནས། དེ་འདི་ལྟར་ཡང་དག་པར་སློབ་སྟེ། མི་དགེ་བ་བཅུའི་ལས་ཀྱི་ལམ་འདི་དག་བསྟེན་པ་དང་། བསྒོམས་པ་དང་མང་དུ་བྱས་པའི་ཤས་ཆེ་བས་ནི་སེམས་ཅན་དམྱལ་
བའི་རྒྱུར་འགྱུར་རོ། །འབྲིང་གིས་ནི་བྱོལ་སོང་གི་སྐྱེ་གནས་ཀྱི་རྒྱུར་འགྱུར་རོ། །ཐ་མས་ནི་གཤིན་རྗེའི་འཇིག་རྟེན་གྱི་རྒྱུར་འགྱུར་ཏེ། དེ་ལ་སྲོག་གཅོད་པས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་པ་འདི་ལྟ་སྟེ། ཚེ་ཐུང་བ་དང་ནད་མང་བའོ། །མ་བྱིན་པར་ལེན་པས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨྱིན་པ་གཉིས་མངོན་པར་འགྲུབ་པ་འདི་ལྟ་སྟེ། ལོངས་སྤྱོད་ཆུང་བ་དང་ཐུན་མོང་གི་ལོངས་སྤྱོད་དུ་འགྱུར་བའོ། །འདོད་པས་ལོག་པར་གཡེམ་པས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མྱིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་པ་འདི་ལྟ་སྟེ། ལྟོད་པ་དང་བཅས་པའི་ཆུང་མ་དང་། གཡོག་འཁོར་མི་སྲུན་པའོ། །བརྫུན་དུ་སྨྲ་བས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མྱིར་སྐྱེས་ན་ཡང་རྣམ་པར་སྨྱིན་པ་གཉིས་མངོན་པར་འགྲུབ་པ་འདི་ལྟ་སྟེ། སྐུར་པ་མང་བ་དང་། གཞན་གྱིས་བསླུ་བའོ། །ཕྲ་མས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་པ་འདི་ལྟ་སྟེ། གཡོག་མི་འདུམ་པ་དང་། གཡོག་ངན་པར་འགྱུར་བའོ། །ཞེ་གཅོད་པའི་ཚིག་གིས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་
པ་གཉིས་མངོན་པར་འགྲུབ་པ་འདི་ལྟ་སྟེ། ཡིད་དུ་མི་འོང་བ་ཐོས་པ་དང་། འཐབ་མོའི་ཚིག་གོ །ཚིག་ཀྱལ་པས་ནི། སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ནའང་རྣམ་པར་སྨིན་པ་གཉིས་མངོན་པར་འགྲུབ་པ་འདི་ལྟ་སྟེ། ཚིག་མི་བཙུན་པ་དང་། སྤོབས་པ་མ་བརྟགས་པའོ། །ཆགས་སེམས་ཀྱིས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་པ་འདི་ལྟ་སྟེ། ཆོག་མི་ཤེས་པ་དང་། འདོད་པ་ཆེ་བའོ། །གནོད་སེམས་ཀྱིས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མྱིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་པ་འདི་ལྟ་སྟེ། གནོད་པར་གླགས་ལྟ་བ་དང་། ཕ་རོལ་གྱིས་མནར་བའོ། །ལོག་པར་ལྟ་བས་ནི་སེམས་ཅན་དམྱལ་བར་ཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་ཅི་སྟེ་མྱིར་སྐྱེས་ན་ཡང་རྣམ་པར་སྨིན་པ་གཉིས་མངོན་པར་འགྲུབ་པ་འདི་ལྟ་སྟེ། ལྟ་བ་ངན་པར་ལྟུང་བ་དང་གཡོ་སྒྱུ་ཅན་ནོ། ། དེ་ལྟར་ན་མི་དགེ་བ་བཅུའི་ལས་ཀྱི་ལམ་འདི་དག་ནི་སྡུག་བསྔལ་གྱི་ཕུང་པོ་ཆེ་ཞིང་ཚད་མེད་པ་སྡུད་པར་འགྱུར་གྱིས་མི་དགེ་བ་བཅུའི་ལས་ཀྱི་ལམ་འདི་དག་བདག་གིས་སྤངས་ཏེ་ཆོས་ལ་དགའ་ཞིང་མོས་པར་དགའ་བར་གནས་པར་བྱའོ་ཞེས་ཏེ། དེ་མི་དགེ་བ་བཅུའི་ལས་ཀྱི་ལམ་འདི་དག་སྤངས་ནས་དགེ་བ་བཅུའི་ལས་ཀྱི་ལམ་ལ་གནས་ཤིང་གཞན་ཡང་དེ་ཉིད་ལ་རབ་ཏུ་གཞོག་གོ །དེ་སེམས་ཅན་རྣམས་ལ་སྔོན་བས་ཀྱང་ཕན་པའི་སེམས་དང་། བདེ་བའི་སེམས་དང་། བྱམས་པའི་སེམས་དང་། སྙིང་རྗེའི་སེམས་དང་། སྙིང་བརྩེ་བའི་སེམས་དང་། ཕན་གདགས་པའི་སེམས་དང་། ཡོངས་སུ་བསྲུང་བའི་སེམས་དང་། སློབ་དཔོན་ཀྱི་སེམས་དང་། སྟོན་པའི་སེམས་དང་མཉམ་པའི་སེམས་བསྐྱེད་ཅིང་དེ་འདི་སྙམ་དུ་སེམས་ཏེ། ཀྱེ་མ་སེམས་ཅན་འདི་དག་ནི་ལྟ་བ་ངན་པར་ལྟུང་བ་དག་སྟེ། བློ་གྲོས་མི་མཉམ་ཞིང་བསམ་པ་མི་མཉམ་པ། ལོག་པའི་ལམ་ཐིབས་
པོར་རྒྱུ་བ་ཡིན་གྱིས་དེ་དག་བདག་གིས་བདེན་པའི་ལམ་ཡང་དག་པར་ལྟ་བའི་ལམ། དེ་བཞིན་ཉིད་ཇི་ལྟ་བ་བཞིན་ལ་རབ་ཏུ་དགོད་པར་བྱའོ། །ཨེ་མའོ་སེམས་ཅན་འདི་དག་ནི་མི་མཐུན་ཞིང་རྩོད་པ་དང་། འཐབ་པ་ལ་ཞུགས་པ་རྟག་ཏུ་རྒྱུན་མི་འཆད་པར་ཁྲོ་བ་དང་། ཁོན་དུ་འཛིན་པས་ཤིན་ཏུ་འབར་བར་གྱུར་པ་ཡིན་གྱིས་དེ་དག་བདག་གིས་བླ་ན་མེད་པའི་བྱམས་པ་ཆེན་པོ་རབ་ཏུ་ཉེ་བར་བསྒྲུབ་པ་ལ་རབ་ཏུ་དགོད་པར་བྱའོ། །ཀྱེ་མ་སེམས་ཅན་འདི་དག་ནི་ཆོག་མི་ཤེས་ཤིང་གཞན་གྱི་ནོར་ལ་མངོན་པར་ཞེན་ཏེ། ཤིན་ཏུ་མི་ཟད་པར་འཚོ་བས་རྗེས་སུ་སྤྱོད་པ་ཡིན་གྱིས་དེ་དག་བདག་གིས་ལུས་དང་། ངག་དང་ཡིད་ཀྱི་ལས་ཡོངས་སུ་དག་པས་འཚོ་བ་ལ་རབ་ཏུ་དགོད་པར་བྱའོ། །ཀྱེ་མ་སེམས་ཅན་འདི་དག་ནི་འདོད་ཆགས་དང་ཞེ་སྡང་དང་གཏི་མུག་དང་། སྲིད་པའི་གཞི་དང་ལྡན་ཞིང་ཉོན་མོངས་པ་སྣ་ཚོགས་ཀྱི་མེ་ལྕེ་རྟག་ཏུ་རྒྱུན་མི་འཆད་པར་ཀུན་ཏུ་འབར་བར་གྱུར་ཀྱང་འདི་ལས་འབྱུང་བའི་ཐབས་ཡོངས་སུ་མི་ཚོལ་བ་ཡིན་གྱིས་དེ་དག་བདག་གིས་ཉོན་མོངས་པ་ཐམས་ཅད་ཤིན་ཏུ་ཞི་ཞིང་གཙེ་བ་མེད་པའི་མྱ་ངན་ལས་འདས་པ་ལ་རབ་ཏུ་དགོད་པར་བྱའོ། །ཀྱེ་མ་སེམས་ཅན་འདི་དག་ནི་གཏི་མུག་གི་མུན་པ་དང་། རབ་རིབ་ཀྱི་ལིང་ཐོག་གིས་བསྒྲིབས་ཤིང་མུན་པ་ཆེན་པོ་ཐིབས་པོའི་ནང་དུ་སོང་བས་ཤེས་རབ་ཀྱི་སྣང་བ་དང་རིང་དུ་གྱུར་ཏེ། འཁོར་བའི་མྱ་ངམ་ཆེན་པོར་ལས་ཤིང་ལྟ་བ་ངན་པའི་མྱ་ངམ་ལ་གཞོལ་བར་གྱུར་པ་ཡིན་གྱིས་དེ་དག་བདག་གིས་ཅི་ནས་ཀྱང་ཆོས་ཐམས་ཅད་ཀྱི་ཡང་དག་པ་ཇི་ལྟ་བ་ཉིད་བསྒྲིབས་པ་མེད་པ་ཁོང་དུ་ཆུད་པར་འགྱུར་བ་དང་། གཞན་གྱི་དྲིང་མི་འཇོག་པ་འཐོབ་པར་འགྱུར་བར་ཤེས་རབ་ཀྱི་མྱིག་བསྒྲིབས་པ་མེད་པ་ཡོངས་སུ་སྦྱང་བར་བྱའོ། །ཀྱེ་མ་སེམས་ཅན་འདི་དག་ནི་འཁོར་བའི་མྱ་ངམ་དང་དགོན་པ་ཆེན་པོར་ལས་ཤིང་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་
རྟེན་གྱི་གཡང་ས་ལ་མངོན་དུ་བལྟས་པ། ལྟ་བ་ངན་པ་མི་ཟད་པའི་དྲ་བས་ཀུན་ནས་འཁོར་བ། གཏི་མུག་ཐིབས་པོས་ཀུན་ནས་ཡོག་པ། ལོག་པའི་ལམ་གོལ་བར་ཞུགས་པ། ལོང་བར་གྱུར་པ་དགེ་བའི་མགོན་མེད་པ། འབྱུང་བ་མ་ཡིན་པ་ལ་འབྱུང་བར་ལྟ་བ། བདུད་ཀྱི་ཞགས་པས་བཅིངས་པ། ཡུལ་གྱི་རྐུན་པོས་ཟིན་པ། བདུད་ཀྱི་བསམ་པ་ཐིབས་པོར་ནུབ་པ། སངས་རྒྱས་ཀྱི་བསམ་པ་དང་རིང་དུ་གྱུར་པ་ཡིན་གྱིས་དེ་དག་བདག་གིས་རྣམ་པ་དེ་ལྟ་བུའི་འཁོར་བའི་དགོན་པ་དང་། མྱ་ངམ་བརྒལ་དཀའ་བ་ལས་བསྒྲལ་ཏེ། འཇིགས་པ་མེད་པའི་གནས་ཐམས་ཅད་མཁྱེན་པའི་གྲོང་རྡལ་ཆེན་པོ་གཙེ་བ་མེད་པར་རབ་ཏུ་དགོད་པར་བྱའོ། །ཀྱེ་མ་སེམས་ཅན་འདི་དག་ནི་ཆུ་བོ་ཆེན་པོའི་གླིང་དུ་བྱིང་ཞིང་འདོད་པ་དང་སྲིད་པའི་མ་རིག་པ་དང་། ལྟ་བའི་ཆུ་བོ་ལ་རབ་ཏུ་གཞོལ་བ། འཁོར་བའི་རྒྱུད་དུ་འབྲང་བ། སྲེད་པའི་ཆུ་ཀླུང་གིས་ཁྱེར་ཞིང་རྦ་རླབས་ཆེན་པོས་གཡེངས་པ། སྲེད་པའི་འདོད་ཆགས་ཀྱི་མཐུས་ཤིན་ཏུ་བཅོམ་པ། བརྟག་པའི་མཐུ་མེད་པར་འདོད་པ་དང་། གནོད་སེམས་དང་འཚེ་བ་དང་། རྣམ་པར་རྟོག་པ་མང་པོའི་རྗེས་སུ་སྤྱོད་པ་འཇིག་ཚོགས་ལ་ལྟ་བའི་ཆུའི་སྲིན་པོས་ཁྲིད་པ་འདོད་པའི་ཡོན་ཏན་ཐིབས་པོའི་གླིང་དུ་ཞུགས་པ། སྨོན་པའི་འདོད་ཆགས་ཀྱི་འདམ་དུ་ཐོགས་པ། ངའི་ང་རྒྱལ་གྱི་དབྱེ་བ་ཆེན་པོར་འཁྱམས་པ། རྟེན་མེད་པ། སྐྱེ་མཆེད་ཀྱི་གྲོང་རྡལ་ནས་མ་འཕགས་པ་དགེ་བའི་སྒྲོལ་བ་མྱེད་པ་ཡིན་གྱིས། དེ་དག་བདག་གིས་སྙིང་རྗེ་ཆེན་པོ་དང་། དགེ་བའི་རྩ་བའི་སྟོབས་ཀྱི་ཤུགས་ཀྱིས་བཏོན་ཏེ། ཐམས་ཅད་མཁྱེན་པ་རིན་པོ་ཆེའི་གླིང་གཙེ་བ་མེད་པ་རྡུལ་མྱེད་པ་ཞི་བ་བདེ་བ་འཇིགས་པ་མེད་པ་ལ་རབ་ཏུ་དགོད་པར་བྱའོ། །ཀྱེ་མ་སེམས་ཅན་འདི་དག་ནི་ཁམས་གསུམ་གྱི་སྡུག་བསྔལ་དང་། ཡིད་མི་བདེ་བ་དང་། འཁྲུག་པ་མང་པོ་ཅན་ཆགས་པ་དང་ཁོང་ཁྲོ་བ་
དང་། སྡུག་པ་དང་མི་སྡུག་པས་རྣམ་པར་བཅིངས་པ། མྱ་ངན་དང་སྨྲེ་སྔགས་འདོན་པའི་རྗེས་སུ་སྤྱོད་པ། སྲེད་པའི་སྒྲོག་གིས་བཅིངས་པ། མ་རིག་པའི་ཐིབས་པོས་ཀུན་ནས་ཡོག་པའི་ནང་ན་མི་མཐུན་པར་གྱུར་པ་ཡིན་གྱིས་དེ་དག་བདག་གིས་ཁམས་གསུམ་པའི་གནས་ཐམས་ཅད་ལས་དབེན་པའི་མྱ་ངན་ལས་འདས་པ་བསྒྲིབས་པ་མེད་པ་ལ་རབ་ཏུ་དགོད་པར་བྱའོ། །ཀྱེ་མ་སེམས་ཅན་འདི་དག་ནི་བདག་དང་བདག་གི་ལ་མངོན་པར་ཞེན་ཞིང་ཕུང་པོའི་གནས་ལས་མ་འཕགས་པ་ཕྱིན་ཅི་ལོག་བཞི་ལ་རབ་ཏུ་ཞུགས་པ། སྐྱེ་མཆེད་དྲུག་གི་གྲོང་སྟོང་པ་ལ་ཤིན་ཏུ་གནས་པ་འབྱུང་བ་ཆེན་པོ་བཞིའི་སྦྲུལ་གྱིས་གཙེ་བ་ཕུང་པོའི་གཤེད་མ་དང་ཆོམ་པོས་ཤིན་ཏུ་བཅོམ་པ། གཞལ་དུ་མེད་པའི་སྡུག་བསྔལ་མྱོང་བར་གྱུར་པ་ཡིན་གྱིས་དེ་དག་བདག་གིས་བདེ་བའི་དམ་པ་གནས་ཐམས་ཅད་དང་བྲལ་བ་འདི་ལྟ་སྟེ། བསྒྲིབས་པ་མེད་པ་ཐམས་ཅད་མཁྱེན་པའི་མྱ་ངན་ལས་འདས་པ་ལ་རབ་ཏུ་དགོད་པར་བྱའོ། །ཀྱེ་མ་སེམས་ཅན་འདི་དག་ནི་དམའ་བ་དང་ཞན་པ་དང་ཞུམ་པ་ལ་མོས་ཤིང་ཐམས་ཅད་མཁྱེན་པའི་ཡེ་ཤེས་དམ་པའི་སེམས་མི་ལྡོག་པས་ཐེག་པ་ཆེན་པོས་འབྱུང་བ་ཡོད་ཀྱང་ཉན་ཐོས་དང་། རང་སངས་རྒྱས་ཀྱི་བློ་ཅན་ཡིན་གྱིས་དེ་དག་བདག་གིས་སངས་རྒྱས་ཀྱི་ཆོས་རྒྱ་ཆེན་པོའི་བློ་གྲོས་དང་བསམ་པ་ཡངས་པའི་ཐེག་པ་ཆེན་པོ་བླ་ན་མེད་པ་ལ་ཐམས་ཅད་མཁྱེན་པའི་ཡེ་ཤེས་ཡོངས་སུ་བསྟན་པས་རབ་ཏུ་དགོད་པར་བྱའོ་སྙམ་མོ། །ཀྱེ་རྒྱལ་བའི་སྲས་དག །དེ་ལྟར་ཚུལ་ཁྲིམས་ཀྱི་སྟོབས་དང་མཐུ་དེ་ལྟ་བུ་དང་ལྡན་པའི་བྱང་ཆུབ་སེམས་དཔའི་སྙིང་རྗེ་དང་བྱམས་པ་མངོན་པར་བསྒྲུབ་པ་ལ་མཁས་པ། སེམས་ཅན་ཐམས་ཅད་ཀྱིས་མ་བཅོལ་བའི་བཤེས་གཉེན་དུ་གྱུར་པ། སེམས་ཅན་ཐམས་ཅད་ཡོངས་སུ་མ་བཏང་བ། བྱ་བ་དང་མི་བྱ་བ་མངོན་པར་བསྒྲུབ་པ་ལ་མཁས་པ།
བྱང་ཆུབ་སེམས་དཔའི་ས་དྲི་མ་མེད་པ་ལ་གནས་པ་དེའི་ལྟ་བ་རྒྱ་ཆེན་པོ་དང་། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་རབ་ཏུ་སྣང་བར་གྱུར་ཏེ། ལྟ་བ་རྒྱ་ཆེན་པོ་དང་སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་ཕྲག་མང་པོ་དང་། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང་། སངས་རྒྱས་ཁྲག་ཁྲིག་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་རབ་ཏུ་སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས་བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང་། བསོད་སྙོམས་དང་གཟིམས་ཆ་དང་། སྙུན་གྱི་རྐྱེན་སྨན་དང་ཡོ་བྱད་དག་ཀྱང་འབུལ་ཞིང་བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་ཚོགས་རྣམས་ལ་ཡང་དག་པར་མཆོད་པ་བྱེད་དེ། དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལས་དགེ་བ་བཅུའི་ལས་ཀྱི་ལམ་འདི་དག་ཀྱང་རིམ་གྲོ་ཆེན་པོས་རབ་ཏུ་འཛིན་ཏེ། ཇི་ལྟར་བཟུང་བ་དེའང་བར་མ་དོར་ཆུད་ཟོས་པར་མི་བྱེད་དོ། །དེ་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང་། བསྐལ་པ་ཁྲག་ཁྲིག་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང་། བསྐལ་
པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་སེར་སྣའི་སྐྱོན་དང་། ཚུལ་ཁྲིམས་ངན་པའི་དྲི་མ་མྱེད་པས་གཏོང་བ་དང་། ཚུལ་ཁྲིམས་རྣམ་པར་དག་པ་ལ་ཡང་དག་པར་འབྱུང་ཞིང་གནས་སོ། །ཀྱེ་རྒྱལ་བའི་སྲས་དག་འདི་ལྟ་སྟེ། དཔེར་ན། གསེར་གྱི་ས་ལེ་སྦྲམ་དེ་ཉིད་ནག་མཚུར་དུ་བཅུག་ན་དེ་བས་ཀྱང་དྲི་མ་ཐམས་ཅད་དང་བྲལ་བར་འགྱུར་རོ། །ཀྱེ་རྒྱལ་བའི་སྲས་དག་དེ་བཞིན་དུ་བྱང་ཆུབ་སེམས་དཔའི་ས་དྲི་མ་དང་བྲལ་བ་འདི་ལ་གནས་པའི་བྱང་ཆུབ་སེམས་དཔའ་ཡང་བསྐལ་པ་དུ་མ་ནས། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མའི་བར་དུ་སེར་སྣའི་ཉེས་པ་དང་། ཚུལ་ཁྲིམས་ངན་པའི་དྲི་མ་མེད་པས་གཏོང་བ་དང་། ཚུལ་ཁྲིམས་རྣམ་པར་དག་པ་ལ་ཡང་དག་པར་འབྱུང་ཞིང་གནས་སོ། །དེའི་བསྡུ་བའི་དངོས་པོ་བཞི་ལས་ངག་སྙན་པ་ཤས་ཆེ་བ་ཡིན། ཕ་རོལ་ཏུ་ཕྱིན་པ་བཅུ་ལས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་བསྒྲུབ་པ་མ་ཡིན་ནོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ས་དྲི་མ་མེད་པ་ཞེས་བྱ་བ་སྟེ། བྱང་ཆུབ་སེམས་དཔའི་ས་གཉིས་པ་མདོར་བསྟན་པའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་འཁོར་ལོས་སྒྱུར་བའི་རྒྱལ་པོ་གླིང་བཞི་ལ་དབང་བར་འགྱུར་ཏེ། ཆོས་ཀྱིས་དབང་བསྒྱུར་བ་རབ་ཏུ་ཐོབ་ཅིང་རིན་པོ་ཆེ་བདུན་དང་ལྡན་པ། སེམས་ཅན་ཐམས་ཅད་ཀྱི་སེར་སྣའི་སྐྱོན་དང་། ཚུལ་ཁྲིམས་ངན་པའི་དྲི་མ་བཟློག་པར་བྱ་བ་ལ་མཁས་ཤིང་མཐུ་ཡོད་པ་དང་། སེམས་ཅན་རྣམས་དགེ་བ་བཅུའི་ལས་ཀྱི་ལམ་ལ་རབ་ཏུ་དགོད་པར་བྱ་བར་ཤིན་ཏུ་མཁས་པ་དང་། སྦྱིན་པ་ཆེན་པོ་རྩོམ་པས་ཐུབ་པ་མེད་པ་ཡིན་ཏེ། སྦྱིན་པའམ་ངག་སྙན་པའམ། དོན་གྲུབ་པའམ་དོན་མཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་
ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། རྣམ་པར་འདྲེན་པར་འགྱུར་ཡོངས་སུ་འདྲེན་པར་འགྱུར་བ་ནས་ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང་། ཆོས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་། ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་། མི་འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས་རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ནོ། །དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཁྱིམ་དང་། ཆུང་མ་དང་སྲིད་ཐམས་ཅད་ཡོངས་སུ་སྤངས་ཏེ། དེ་བཞིན་གཤེགས་པའི་བསྟན་པ་ལ་རབ་ཏུ་འབྱུང་བ་དང་། དེ་རབ་ཏུ་བྱུང་ནས་ཀྱང་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་སྟོང་རབ་ཏུ་འཐོབ་བོ། །སྙོམས་པར་འཇུག་པ་དང་། ཏིང་ངེ་འཛིན་སྟོང་རབ་ཏུ་ཐོབ་ཅིང་དེ་དག་ལ་སྙོམས་པར་འཇུག་པ་དང་། སངས་རྒྱས་སྟོང་མཐོང་བ་དང་། དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་སྟོང་སྐྱོད་པ་དང་། སངས་རྒྱས་ཀྱི་ཞིང་སྟོང་དུ་འགྲོ་བ་དང་། འཇིག་རྟེན་གྱི་ཁམས་སྟོང་སྣང་བར་བྱེད་པ་དང་། སེམས་ཅན་སྟོང་ཡོངས་སུ་སྨིན་པར་བྱེད་པ་དང་། བསྐལ་པ་སྟོང་དུ་གནས་པ་དང་། སྔོན་གྱི་མཐའ་དང་། ཕྱི་མའི་མཐའི་བསྐལ་པ་སྟོང་ལ་རབ་ཏུ་འཇུག་པ་དང་། ཆོས་ཀྱི་སྒོ་སྟོང་རྣམ་པར་འབྱེད་པ་དང་། ལུས་སྟོང་ཡོངས་སུ་བསྟན་པ་དང་། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་སྟོང་ཡང་དག་
པར་བསྟན་པར་བྱ་བའི་བརྩོན་འགྲུས་དེ་ལྟ་བུ་རྩོམ་མོ། །དེ་ཡན་ཆད་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དང་རྫུ་འཕྲུལ་ལམ། མྱིག་གམ་སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ་བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མའི་བར་གྱིས་ཀྱང་བགྲང་བར་དཀའ་འོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང་། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་མཉེན་དྲང་ལས་རུང་འཇམ་པའི་སེམས་ལྡན་ཞིང་། །བསམ་པ་དགེ་དང་བསམ་པ་ཞི་དང་ལྡན་པ་རྣམས། །འདུ་འཛིའི་དམྱིགས་བྲལ་རླབས་ཆེན་བློ་དང་ལྡན་པ་ཡི། །ཆེ་ཉིད་སེམས་ལྡན་མཁས་པ་དེ་དག་གཉིས་ལ་འཕར། །དེ་གནས་ཡོན་ཏན་འཆང་ཞིང་དགེ་བ་ཕུན་ལྡན་པ། །གཙེ་མེད་སེམས་ལྡན་སྲོག་གཅོད་རྣམ་པར་ཀུན་སྤངས་ཤིང་། །མ་བྱིན་ལེན་དང་གཞན་གྱི་ཆུང་མ་དེ་བཞིན་སྤངས། །བདེན་དང་ལྡན་ཞིང་ཕྲ་མ་མི་སྨྲ་ཞེ་གཅོད་མེད། །གཞན་གྱི་ལོངས་སྤྱོད་འདོད་སེམས་བྲལ་ཞིང་བྱམས་སེམས་ལྡན། །དྲང་ཞིང་གཡོ་མེད་ཡང་དག་ལམ་དུ་རབ་ཏུ་ཞུགས། །གཡོ་མེད་ཐིབས་པོ་མེད་ཅིང་ཤིན་ཏུ་ངེས་པ་སྟེ། །རྟག་ཏུ་བག་ཡོད་སྟོན་པའི་སྤྱོད་པ་ཡོངས་སུ་བསྲུང་། །སེམས་དམྱལ་བྱོལ་སོང་སྐྱེ་གནས་སྡུག་བསྔལ་ཇི་སྙེད་དང་། །གཤིན་རྗེའི་རིས་ན་ཡི་དྭགས་རྟག་ཏུ་ལུས་འབར་བ། །དེ་དག་སྡིག་བློས་དགེ་བ་མྱིན་ལ་
བརྩོན་པས་བྱུང་། །དེ་བས་དེ་སྤངས་བདེན་པའི་ཆོས་དང་ལྡན་པར་བྱ། །མྱི་ཡི་ནང་དུ་སྐྱེ་བ་ཡིད་དུ་འོང་ལ་སྩོགས། །སྲིད་རྩེའི་བར་གྱི་ལྷ་ཡི་བསམ་གཏན་བདེ་བ་དང་། །རང་རྒྱལ་ཐེག་པ་དེ་བཞིན་ཉན་ཐོས་ཐེག་པ་དག །ཀུན་ཀྱང་དཀར་ལམ་བཅུ་པོས་བྱུང་བ་ཡིན་ཞེས་ཏེ། །དེ་ལྟར་ཤེས་ཤིང་རྟག་པར་མཁས་པ་བག་ཡོད་པ། །ཤིན་ཏུ་བསྡམས་པའི་ཡིད་ཀྱིས་ཕ་རོལ་ཚུལ་ལ་དགོད། །སེམས་ཅན་སྡུག་བསྔལ་ཤེས་ཤིང་སྙིང་བརྩེ་བསྐྱེད་བྱས་ནས། །དེ་བས་གོང་དུ་སྙིང་རྗེའི་སེམས་དང་ལྡན་པར་བྱེད། །ཀྱེ་མ་བྱིས་པའི་བློ་ཅན་འདི་དག་ལྟ་ངན་ལྷུང་། །ཁྲོ་ཞིང་ཤར་གཉེར་གདོན་པ་ཀུན་སེམས་རྩོད་པ་ཅན། །རྟག་ཏུ་མི་ངོམས་ཡུལ་ལ་ཡང་དང་ཡང་དུ་སྨོན། །གཞི་གསུམ་འབྲེལ་པ་དེ་དག་ཡོངས་སུ་དགྲོལ་བར་བྱ། །གཏི་མུག་མུན་པ་ཆེན་པོས་ཀུན་ནས་ཡོག་པ་རྣམས། །ལྟ་བའི་དྲ་མང་མྱ་ངམ་ལམ་དུ་ལྷུང་གྱུར་པ། །འཁོར་བའི་ཤིང་ཐགས་ནང་ན་རྟག་ཏུ་དགྲས་གཙེ་ཞིང་། །བདུད་ཀྱི་ཆོམ་པོའི་ནང་གནས་དེ་དག་བདག་གིས་དགྲོལ། །ཉོན་མོངས་རླབས་ཀྱིས་གཡེངས་ཤིང་ཆུ་བོ་བཞིར་ནུབ་པ། །ཁམས་གསུམ་སྡུག་བསྔལ་བརྒྱ་ཡིས་ཡོངས་སུ་གདུངས་པ་རྣམས། །ཕུང་པོའི་གནས་ལ་རྟེན་ཅིང་བདག་ཏུ་འདུ་ཤེས་པ། །དེ་དག་སྡུག་བསྔལ་དགྲོལ་དོན་བདག་གིས་བརྩོན་པར་བྱ། །སངས་རྒྱས་ཡེ་ཤེས་དམ་པ་རྨད་བྱུང་ཕུལ་སྤངས་ཤིང་། །འབྱུང་བ་ཡོད་བཞིན་དམའ་བའི་བློ་གྲོས་སྐྱེད་བྱེད་པ། །དེ་དག་དེ་བཞིན་གཤེགས་པའི་ཡེ་ཤེས་ཡངས་དགོད་ཅེས། །རྒྱལ་བའི་ཡེ་ཤེས་དོན་དུ་བརྩོན་འགྲུས་ཡངས་པ་རྩོམ། །འདི་གནས་ཡོན་ཏན་བརྒྱ་བསྩགས་དྲང་སྲོང་ཆེན་པོ་རྣམས། །བདེ་གཤེགས་དུ་མ་མཐོང་ཞིང་མཆོད་པའང་རབ་ཏུ་བྱེད། །དགེ་བ་དེ་དག་བསྐལ་པ་བྱེ་བར་ཕྱིར་ཞིང་སྦྱོང་། །གསེར་གྱི་དམ་པ་ནག་མཚུར་ནང་དུ་
བཅུག་པ་བཞིན། །འདི་གནས་རྒྱལ་སྲས་འཁོར་ལོས་སྒྱུར་བའི་རྒྱལ་པོར་འགྱུར། །དགེ་བ་བཅུ་ལ་སེམས་ཅན་རབ་ཏུ་དགོད་པ་བྱེད། །དགེ་ཚོགས་གང་ཡང་རུང་སྟེ་སྩོགས་པར་བྱེད་པ་རྣམས། །སྟོབས་བཅུ་ལྡན་ཞིང་འགྲོ་བའི་སྐྱབས་འགྱུར་དོན་དུ་སོགས། །འདོད་ན་རྒྱལ་པོའི་སྲིད་ཀྱང་རྣམ་པར་སྤངས་བྱས་ཤིང་། །བརྟན་པ་རྣམས་ནི་བསྟན་པའི་མཆོག་ལ་རབ་བྱུང་ནས། །བརྩོན་འགྲུས་ལྡན་ཞིང་ཏིང་འཛིན་དམ་པ་མཆོག་ཀྱང་འཐོབ། །སངས་རྒྱས་སྟོང་ཚངས་སྐད་ཅིག་གཅིག་གིས་མཐོང་བར་བྱེད། །འདི་འདྲའི་ཚུལ་གྱིས་བགྲང་བས་གཞན་ཡང་གཅིག་མིན་པ། །ཁྱུ་མཆོག་ས་འདི་གནས་པ་རབ་ཏུ་སྟོན་པར་བྱེད། །དེ་ཡི་གོང་ན་ཡེ་ཤེས་སྨོན་ལམ་མཆོག་ལྡན་པ། །རྣམ་པར་འཕྲུལ་པ་རྣམ་པ་དུ་མས་སེམས་ཅན་འདུལ། །དེ་ལྟར་ས་མཆོག་གཉིས་པ་འདི། །འཇིག་རྟེན་ཀུན་ལ་ཕན་འདོད་པའི། །བྱང་ཆུབ་སེམས་དཔའི་མཆོག་རྣམས་ལ། །བདེ་བར་གཤེགས་པའི་སྲས་ཀྱིས་བསྟན། །དྲི་མ་དང་བྲལ་བ་ཞེས་བྱ་བ་སྟེ་བྱང་ཆུབ་སེམས་དཔའི་ས་གཉིས་པའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅོ་ལྔ་པ། བྱང་ཆུབ་སེམས་དཔའི་སྤྱོད་ཡུལ་བསམ་ཡས་པ། །ས་མཆོག་སྤྱོད་པ་དེ་སྐད་ཐོས་གྱུར་ནས། །རྒྱལ་བའི་སྲས་རྣམས་རབ་ཏུ་དགའ་ཞིང་བསྟི་སྟང་དུ། །མེ་ཏོག་སྤྲིན་ཆར་མངོན་པར་ཀུན་ནས་འབེབས། །རི་ཡི་རྒྱལ་པོ་བོད་པ་ལེགས་སོ་ལེགས། །སེམས་ཅན་ཀུན་ལ་སྙིང་བརྩེ་བསམ་པ་ཡིས། །ས་མཆོག་དམ་པའི་སྤྱོད་ཡུལ་དེ་འདྲ་དང་། །མཁས་པའི་ཚུལ་ཁྲིམས་སྡོམ་པ་ཁྱོད་ཀྱིས་བཤད། །ཡང་དག་དེ་དངོས་མ་ནོར་གཞན་མིན་པའི། །བྱང་ཆུབ་སེམས་དཔའི་སྤྱོད་པ་ཡིད་འོང་ཞིང་། །སེམས་ཅན་ཀུན་ལ་ཕན་དང་བདེ་བ་རབ་སེམས་པ། །ཕུལ་དུ་འོད་གསལ་ཁྱོད་ཀྱིས་བསྟན་པ་བྱས། །ད་དུང་ད་ཆུད་ལྷ་དང་མིས་མཆོད་ཅིང་། །ཆོས་ཀྱི་ཡེ་ཤེས་རིགས་པར་བརྗོད་མཁས་པ། །དེ་དག་སྤྱོད་ཡུལ་ཚུལ་ནི་ཇི་བཞིན་དུ། །ས་ཡི་དམ་པ་གསུམ་པོ་བརྗོད་པར་མཛོད། །དྲང་སྲོང་ཆེན་པོའི་སྦྱིན་ཚུལ་སྤྱོད་
པ་དང་། །བཟོད་པ་བརྩོན་འགྲུས་ཞི་བ་ཤེས་རབ་ཐབས། །བྱམས་པའི་མཆོག་དང་སྙིང་རྗེའི་ལམ་གྱི་རྣམས། །རྒྱལ་སྲས་སྤྱོད་པ་རྣམས་སྦྱང་བསྟན་མཛོད་ཅིག །རྡོ་རྗེའི་སྙིང་པོ་འཇིགས་མྱེད་ལ། །རྣམ་གྲོལ་ཟླ་བས་ཡང་སྨྲས་པ། །གསུམ་ལ་ཡང་དག་འཕར་འགྱུར་བའི། །བསམ་པ་མཁས་པས་བཤད་པར་མཛོད། །བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་ས་གཉིས་པ་ལ་བསམ་པ་ཤིན་ཏུ་སྦྱངས་པ་ནི་ས་གསུམ་པ་ཡོངས་སུ་གནོན་ཏོ། །དེ་སེམས་ཀྱི་བསམ་པ་ཡིད་ལ་བྱ་བ་བཅུས་ཡོངས་སུ་གནོན་ཏེ། བཅུ་གང་ཞེ་ན། འདི་ལྟ་སྟེ། དག་པའི་སེམས་ཀྱི་བསམ་པ་ཡིད་ལ་བྱ་བ་དང་། མི་གཡོ་བའི་སེམས་ཀྱི་བསམ་པ་ཡིད་ལ་བྱ་བ་དང་། སྐྱོ་བའི་སེམས་ཀྱི་བསམ་པ་ཡིད་ལ་བྱ་བ་དང་། འདོད་ཆགས་དང་བྲལ་བའི་སེམས་ཀྱི་བསམ་པ་ཡིད་ལ་བྱ་བ་དང་། ཕྱིར་མི་ལྡོག་པའི་སེམས་ཀྱི་བསམ་པ་ཡིད་ལ་བྱ་བ་དང་། བརྟན་པའི་སེམས་ཀྱི་བསམ་པ་ཡིད་ལ་བྱ་བ་དང་། སྦྱོངས་པའི་སེམས་ཀྱི་བསམ་པ་ཡིད་ལ་བྱ་བ་དང་། རློམ་པའི་སེམས་ཀྱི་བསམ་པ་ཡིད་ལ་བྱ་བ་དང་། རླབས་པོ་ཆེའི་སེམས་ཀྱི་བསམ་པ་ཡིད་ལ་བྱ་བ་དང་། བདག་ཉིད་ཆེ་བའི་སེམས་ཀྱི་བསམ་པ་ཡིད་ལ་བྱ་བའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་བྱང་ཆུབ་སེམས་དཔའི་ས་གསུམ་པ་ལ་གནས་པ་ནི་འདུ་བྱེད་ཀྱི་རྣམ་པ་ཐམས་ཅད་ལ་མི་རྟག་པ་ཡང་དག་པར་ཇི་ལྟ་བ་བཞིན་དུ་རབ་ཏུ་རྟོག་གོ །སྡུག་བསྔལ་བ་དང་། བདག་མེད་པ་དང་། མི་སྡུག་པ་དང་། ཡིད་བརྟན་དུ་མི་རུང་བ་དང་། རྣམ་པར་འཇིགས་པ་དང་། རིང་དུ་མི་གནས་པ་དང་། སྐད་ཅིག་ཏུ་འབྱུང་ཞིང་འགག་པ་དང་། མི་ཟད་ཅིང་མི་སྐྱེ་མི་འགག་པ་དང་། སྔོན་གྱི་མཐའ་ཀུན་ནས་མ་བྱུང་བ་དང་། ཕྱི་མའི་མཐའ་
འཕོ་བ་མེད་པ་དང་། ད་ལྟར་བྱུང་བ་མི་གནས་པར་རབ་ཏུ་རྟོག་གོ །དེ་འདུ་བྱེད་ཀྱི་རྣམ་པ་དེ་ལྟ་བུ་ལ་རབ་ཏུ་རྟོག་པའི་ཚེ་མངོན་པར་འཇིག་པ་དང་། མྱ་ངན་ཅན་སྨྲེ་སྔགས་འདོན་པ་ཅན་དང་། འཁྲུག་པ་ཅན་ཡིད་དུ་འོང་བ་དང་། ཡིད་དུ་མི་འོང་བས་རྣམ་པར་བཅིངས་པ། སྡུག་བསྔལ་དང་ཡིད་མི་བདེ་བ་མང་བ་བསྩགས་པ་མེད་པ་ལས་བྱུང་བ། འདོད་ཆགས་དང་ཞེ་སྡང་དང་། གཏི་མུག་གི་མྱེ་རབ་ཏུ་འབར་བ། ནད་དུ་མས་རྣམ་པར་བསྐྱེད་པ། སྒྱུ་མའི་རང་བཞིན་ལྟ་བུར་མཐོང་ནས་དེ་དེ་བས་ཀྱང་འདུ་བྱེད་ཐམས་ཅད་ལས་སེམས་གྱེན་དུ་བསྐྱོད་ཅིང་། དེ་བཞིན་གཤེགས་པའི་ཡེ་ཤེས་ལ་རབ་ཏུ་གཏོང་སྟེ། དེས་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པའང་རྗེས་སུ་མཐོང་སྟེ། མཚུངས་པ་མྱེད་པ་དང་། གཞལ་དུ་མེད་པ་དང་། རྙེད་པར་དཀའ་བ་དང་། མ་འདྲེས་པ་དང་། གནོད་པ་མེད་པ་དང་། འཁྲུག་པ་མེད་པ་དང་། མི་འཇིགས་པའི་གྲོང་རྡལ་དུ་འགྲོ་བ་དང་། ཕྱིར་མྱི་ལྡོག་པ་དང་། འགྲོ་བ་མང་པོ་ཡོངས་སུ་སྐྱོབ་པ་ཡང་དག་པར་རྗེས་སུ་མཐོང་ངོ་། །དེས་དེ་བཞིན་གཤེགས་པའི་ཡེ་ཤེས་དེ་ལྟར་ཚད་མེད་པ་མཐོང་སྟེ། འདུ་བྱེད་ཀྱི་རྣམ་པ་དེ་ལྟར་སྡུག་བསྔལ་མང་པོས་གཙེས་པ་མཐོང་ནས། སེམས་ཅན་ཐམས་ཅད་ལ་དེ་བས་ཀྱང་ཤས་ཆེར་སེམས་ཀྱི་བསམ་པ་བཅུ་ཉེ་བར་གཞོག་སྟེ། བཅུ་གང་ཞེ་ན། འདི་ལྟ་སྟེ། མགོན་མེད་པ་དང་། སྐྱབས་མེད་པ་དང་། རྟེན་མེད་པའི་སེམས་ཀྱི་བསམ་པ་དང་། རྟག་ཏུ་འཕོངས་པའི་སེམས་ཀྱི་བསམ་པ་དང་། འདོད་ཆགས་དང་། ཞེ་སྡང་དང་། གཏི་མུག་གི་མེ་ཀུན་ནས་འབར་བའི་སེམས་ཀྱི་བསམ་པ་དང་། སྲིད་པའི་བཙོན་རས་བཟུང་བའི་སེམས་ཀྱི་བསམ་པ་དང་། རྟག་ཏུ་རྒྱུན་མི་འཆད་པར་ཉོན་མོངས་པའི་ཐིབས་པོས་བསྒྲིབས་པའི་སེམས་ཀྱི་བསམ་པ་དང་། བརྟག་པའི་མཐུ་མེད་པའི་སེམས་ཀྱི་
བསམ་པ་དང་། དགེ་བའི་ཆོས་ལ་མོས་པ་མེད་པའི་སེམས་ཀྱི་བསམ་པ་དང་། སངས་རྒྱས་ཀྱི་ཆོས་ཐམས་ཅད་ལས་ཤིན་ཏུ་གོལ་བའི་སེམས་ཀྱི་བསམ་པ་དང་། འཁོར་བའི་རྒྱུད་ཀྱི་རྗེས་སུ་འབབ་པའི་སེམས་ཀྱི་བསམ་པ་དང་། ཐར་པའི་ལམ་གྱིས་སྔངས་པའི་སེམས་ཀྱི་བསམ་པ་དང་། སེམས་ཀྱི་བསམ་པ་འདི་བཅུ་ཉེ་བར་གཞོག་གོ །དེ་ནས་དེ་ལྟར་སེམས་ཅན་གྱི་ཁམས་གཙེ་བ་མང་པོ་ཅན་མཐོང་ནས། བརྩོན་འགྲུས་འདི་ལྟར་རྩོམ་སྟེ། སེམས་ཅན་འདི་དག་ནི་བདག་གིས་བསྐྱབ་པར་བྱ་བ་ཡོངས་སུ་དགྲོལ་བར་བྱ་བ། ཡོངས་སུ་སྦྱང་བར་བྱ་བ། ཤིན་ཏུ་གདོན་པར་བྱ་བ་རབ་ཏུ་དགོད་པར་བྱ་བ། ཤིན་ཏུ་བརྟན་པར་བྱ་བ། ཡོངས་སུ་ཚིམ་པར་བྱ་བ། གནས་སུ་ཕྱིན་པར་བྱ་བ། རྣམ་པར་གདུལ་བར་བྱ་བ་དང་ཡོངས་སུ་མྱ་ངན་ལས་འདའ་བར་བྱ་བ་ཡིན་ནོ། །ཞེས་ནས་དེ་དེ་ལྟར་འདུ་བྱེད་ཀྱི་རྣམ་པ་ཐམས་ཅད་ལས་སྐྱོ་བའི་རྗེས་སུ་སོང་ཞིང་སེམས་ཅན་ཐམས་ཅད་ལ་རབ་ཏུ་ལྟ་བའི་རྗེས་སུ་སོང་བ་དང་། ཐམས་ཅད་མཁྱེན་པའི་ཡེ་ཤེས་ལ་ཐམས་ཅད་མཁྱེན་པའི་ཡེ་ཤེས་ཀྱི་རྗེས་སུ་སོང་ཞིང་། དེ་བཞིན་གཤེགས་པའི་ཡེ་ཤེས་ལ་རབ་ཏུ་རྟེན་པས་སེམས་ཅན་ཐམས་ཅད་ཡོངས་སུ་བསྐྱབ་པར་བྱ་བ་ལ་བརྩོན་པ་དེ་འདི་ལྟར་ཡོངས་སུ་རྟོག་སྟེ། རྒྱུ་དང་གཞི་དང་ཚུལ་དང་ཐབས་གང་ཞིག་གིས་འདི་ལྟ་བུར་སྡུག་བསྔལ་དང་། ཉེ་བའི་ཉོན་མོངས་པར་ལྟུང་བའི་སེམས་ཅན་འདི་དག་མངོན་པར་གདོན་པར་ནུས་རྒྱུ་དང་གཞི་དང་ཚུལ་དང་ཐབས་གང་ཞིག་གིས་ནི་ཤིན་ཏུ་བདེ་བའི་མྱ་ངན་ལས་འདས་པར་དགོད་པར་ནུས་སྙམ་ནས། དེ་ལ་བྱང་ཆུབ་སེམས་དཔའ་འདི་སྙམ་དུ་སེམས་ཏེ། བསྒྲིབས་པ་མེད་པའི་ཡེ་ཤེས་རྣམ་པར་ཐར་པའི་གནས་མ་གཏོགས་པར་གཞན་གྱིས་མི་ནུས་སོ། །བསྒྲིབས་པ་མེད་པའི་ཡེ་ཤེས་རྣམ་པར་ཐར་པའི་གནས་དེ་ཡང་ཆོས་ཐམས་ཅད་
ཡང་དག་པར་ཇི་ལྟ་བ་བཞིན་དུ་ཁོང་དུ་ཆུད་པ་མ་གཏོགས་པར་གཞན་གྱིས་ཐོབ་པར་མི་ནུས་སོ། །ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ་ཡང་རྒྱུ་བ་མེད་ཅིང་སྐྱེ་བ་མེད་པ་ལ་སྤྱོད་པའི་ཤེས་རབ་མ་གཏོགས་པར་གཞན་གྱིས་ཁོང་དུ་ཆུད་པར་མི་ནུས་སོ། །ཤེས་རབ་ཀྱི་སྣང་བ་དེ་ཡང་བསམ་གཏན་ལ་མཁས་ཤིང་རྟོགས་པའི་བློས་རབ་ཏུ་རྟོག་པ་མེད་པར་གཞན་གྱིས་ཐོབ་པར་མི་རུང་ངོ་། །བསམ་གཏན་ལ་མཁས་ཤིང་རྟོགས་པའི་བློས་རབ་ཏུ་རྟོག་པ་དེ་ཡང་ཐོས་པས་མཁས་པ་མྱེད་པར་མི་འབྱུང་ངོ་། །ཞེས་དེ་དེ་ལྟར་ཤིན་ཏུ་བརྟགས་པའི་ཤེས་པ་དང་ལྡན་པས་དེ་བས་ཀྱང་ཤེས་ཆེར་དམ་པའི་ཆོས་ཚོལ་བ་ལ་མངོན་པར་བརྩོན་པར་གནས་ཏེ་ཉིན་མཚན་དུ་ཆོས་མཉན་པ་དོན་དུ་གཉེར་བ་ཡིན། སངས་རྒྱས་ཀྱི་ཆོས་བཙལ་བའི་དོན་དུ་ཆོས་ལ་མོས་ཤིང་ངོམས་མི་ཤེས་ལ་རྒྱུན་མི་འཆད་པ་ཡིན། ཆོས་ལ་དགའ་ཞིང་སྤྲོ་བ་དང་། ཆོས་ལ་རབ་ཏུ་འཇུག་པ་ཡིན། ཆོས་ལ་གཞོལ་ཞིང་ཆོས་ལ་འབབ་པ་དང་། ཆོས་ལ་འབབ་པ་ཡིན། ཆོས་ལ་རྟེན་ཅིང་ཆོས་ལ་སྐྱབས་ཚོལ་བ་དང་། ཆོས་ལ་མཐུ་ཚོལ་བ་ཡིན། ཆོས་དང་གཉེར་བའི་ཆོས་ལ་མངོན་པར་བརྩོན་པ་ཡིན་ཏེ། དེ་དེ་ལྟར་ཆོས་ཚོལ་བ་ལ་མངོན་པར་བརྩོན་པས་རིན་པོ་ཆེའི་རྣམ་པའམ། དབྱིག་གི་རྣམ་པའམ། ནོར་དང་། འབྲུའི་མཛོད་དང་བང་བ་གང་ཡང་རུང་སྟེ། ཡོངས་སུ་མི་གཏོང་བ་དེ་ལྟ་བུ་གང་ཡང་མྱེད་དོ། །ཆོས་སྨྲ་བའི་གང་ཟག་དེ་འབའ་ཞིག་ལ་དཀའ་བའི་འདུ་ཤེས་སུ་གྱུར་པ་ལས་ཕར་དེ་དག་གཞན་ལ་ཅུང་ཟད་ཀྱང་དཀའ་བའི་འདུ་ཤེས་མྱི་བསྐྱེད་དོ། །དེ་ནི་ཆོས་ཀྱི་དོན་དུ་ཕྱི་རོལ་གྱི་དངོས་པོ་ཉེ་བར་བཟུང་བ་ཡོངས་སུ་མི་གཏོང་བ་དེ་གང་ཡང་མྱེད་དོ། །ནང་གི་དངོས་པོ་ཡོངས་སུ་མི་གཏོང་བར་བྱ་བ་དེ་ལྟ་བུའང་ཅུང་ཟད་ཀྱང་མྱེད་དོ། །གང་འདི་དག་འདི་ལྟ་སྟེ། གཡོག་འཁོར་ཡོངས་སུ་གཏང་
བའམ། རྒྱལ་སྲིད་ཡོངས་སུ་གཏང་བའམ། ལོངས་སྤྱོད་ཡོངས་སུ་གཏང་བའམ། ནོར་དང་འབྲུ་དང་། ནོར་བུ་དང་། གསེར་གྱི་མཛོད་དང་། བང་བ་ཡོངས་སུ་གཏང་བ་དང་། རྟ་དང་གླང་པོ་དང་། ཤིང་རྟ་དང་། བཞོན་པ་ཡོངས་སུ་གཏང་བའམ་རིན་པོ་ཆེའི་རྒྱན་དང་ལྷབ་ལྷུབ་ཡོངས་སུ་གཏང་བ་དང་། ཆུང་མ་དང་བུ་དང་བུ་མོ་ཡོངས་སུ་གཏང་བའམ། མགོ་དང་རྐ་ལག་དང་ཡན་ལག་གི་དམ་པ་ཡོངས་སུ་གཏང་བའམ། ལུས་ཐམས་ཅད་ཡོངས་སུ་གཏང་བར་བྱ་བ་ཡང་རུང་སྟེ། དེ་དག་ཐམས་ཅད་ཆོས་ཀྱི་དོན་དུ་ཡོངས་སུ་མི་གཏོང་བ་གང་ཡང་མྱེད་དོ། །བླ་མ་ལ་བསྙེན་བཀུར་དང་རིམ་གྲོ་བྱ་བ་གང་ཡང་རུང་སྟེ། ཉམས་སུ་མི་ལེན་པ་གང་ཡང་མེད་དོ། །ང་རྒྱལ་དང་ལྷག་པའི་ང་རྒྱལ་ཡོངས་སུ་གཏང་བས། ང་རྒྱལ་མེད་པ་ལ་སྤྱད་པ་གང་ཡང་རུང་སྟེ། ཉམས་སུ་མི་ལེན་པ་གང་ཡང་མྱེད་དོ། །ལུས་ཀྱི་གནོད་པ་གང་ཡང་རུང་སྟེ། ཉམས་སུ་མི་ལེན་པ་གང་ཡང་མྱེད་དོ། །དེ་མ་ཐོས་པའི་ཆོས་ཀྱི་ཚིག་གཅིག་ཐོས་པ་ནོར་ཆེ་བར་འཛིན་གྱིས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་གང་བའི་རིན་པོ་ཆེའི་ཕུང་པོ་ཐོབ་པས་མ་ཡིན་ནོ། །ལེགས་པར་བཤད་པའི་ཚིགས་སུ་བཅད་པ་གཅིག་ཐོས་པས་སེམས་དགའ་བར་འགྱུར་གྱི། བརྒྱ་བྱིན་དང་ཚངས་པ་དང་། འཁོར་ལོས་སྒྱུར་བའི་རྒྱལ་པོའི་སྲིད་ལ་བསྐལ་པ་བརྒྱ་སྟོང་མང་པོའི་མཐར་ཐུག་པར་གནས་པས་ནི་མ་ཡིན་ནོ། །དེ་ལ་ལ་ལ་ཞིག་བརྒྱ་ལ་འདི་སྐད་དུ་ཟེར་ཏེ། གལ་ཏེ་ཁྱོད་ཀྱིས་མེའི་དོང་ཆེན་པོར་ལུས་བོར་ཏེ། སྡུག་བསྔལ་གྱི་ཚོར་བའི་ཕུང་པོ་ཆེན་པོ་རང་གི་ལུས་ཀྱིས་ཉམས་སུ་བླང་བར་ནུས་ན། ངས་ཁྱོད་ལ་ཆོས་ཀྱི་ཚིག་ཡང་དག་པར་རྫོགས་པའི་སངས་རྒྱས་ཀྱིས་བསྟན་པ། བྱང་ཆུབ་སེམས་དཔའི་སྤྱོད་པ་ཡོངས་སུ་སྦྱོང་བ་འདི་བཤད་པར་བྱའོ། །ཞེ་ན་ཡང་དེ་འདི་སྙམ་དུ་སེམས་ཏེ་ཆོས་ཀྱི་ཚིག་
ཡང་དག་པར་རྫོགས་པའི་སངས་རྒྱས་ཀྱིས་བསྟན་པ་བྱང་ཆུབ་སེམས་དཔའི་སྤྱོད་པ་ཡོངས་སུ་སྦྱོང་བའི་དོན་དུ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མེས་གང་བར་ཡང་ཚངས་པའི་འཇིག་རྟེན་ནས་བདག་གིས་བདག་དོར་བར་མོས་ན་མེའི་དོང་ཐ་མལ་པ་ནི་འདི་ལྟ་ཞིག་ཏུ་བདག་དོར་བ་ལྟ་ཅི་སྨོས་ཀྱིས། དེ་བས་སེམས་ཅན་དམྱལ་བའི་སྡུག་བསྔལ་ཐམས་ཅད་ཉམས་སུ་བབ་པས་ཀྱང་བདག་གིས་ཆོས་བཙལ་བར་བྱའི་མྱེའི་སྡུག་བསྔལ་དང་འགྲོགས་པ་ལྟ་ཁྱད་དུ་བསད་དོ་ཞེས་ནས་དེ་རྣམ་པ་དེ་ལྟ་བུའི་བརྩོན་འགྲུས་རྩོམ་པས་ཆོས་ཡོངས་སུ་ཚོལ་ལོ། །ཇི་སྐད་དུ་ཐོས་པའི་ཆོས་རྣམས་ལ་ཡང་ཚུལ་བཞིན་དུ་རབ་ཏུ་རྟོགས་པའི་ངང་ཚུལ་ཅན་ཡིན་ཏེ། དེས་ཆོས་དེ་དག་ཐོས་ནས་ཀྱང་རྗེས་ལ་རང་གི་སེམས་རྟོག་པར་བཞག་པས་གཅིག་པུ་དབེན་པ་ན་འདུག་ཅིང་འདི་ལྟར་རྟོག་གོ །ཆོས་དང་གཉེར་བའི་ཆོས་ལ་ནན་ཏན་དུ་བྱ་བས་སངས་རྒྱས་ཀྱི་ཆོས་ཁོང་དུ་ཆུད་པར་བྱ་བའི་ཚིག་གི་ལམ་ཡོངས་སུ་དག་པ་འབའ་ཞིག་གིས་མ་ཡིན་ནོ་ཞེས་ཏེ། བྱང་ཆུབ་སེམས་དཔའ་དེ་བྱང་ཆུབ་སེམས་དཔའི་ས་འོད་བྱེད་པ་ལ་གནས་ཤིང་། འདོད་པ་རྣམས་ལས་དབེན། སྡིག་ཏོ་དང་མི་དགེ་བའི་ཆོས་རྣམས་ལས་དབེན་ཞིང་རྣམ་པར་རྟོག་པ་ཅན་རྣམ་པར་དཔྱོད་པ་ཅན། དབེན་པ་ལས་སྐྱེས་པའི་དགའ་བ་དང་། བདེ་བའི་བསམ་གཏན་དང་པོ་ལ་ཉེ་བར་བསྒྲུབས་ཏེ་གནས་སོ། །དེ་རྣམ་པར་རྟོག་པ་དང་། རྣམ་པར་དཔྱོད་པ་རྣམ་པར་ཞི་སྟེ། ནང་ཤིན་ཏུ་དང་ཞིང་སེམས་ཀྱི་རྒྱུད་གཅིག་ཏུ་གྱུར་པས་རྣམ་པར་རྟོག་པ་དང་། རྣམ་པར་དཔྱོད་པ་མྱེད་པ། ཏིང་ངེ་འཛིན་ལས་སྐྱེས་པའི་དགའ་བ་དང་། བདེ་བ་བསམ་གཏན་གཉིས་པ་ཉེ་བར་བསྒྲུབས་ཏེ་གནས་སོ། །དེ་དགའ་བ་ལ་འདོད་ཆགས་དང་བྲལ་ཏེ་བཏང་སྙོམས་སུ་གནས་པས། དྲན་པ་དང་ལྡན་ཞིང་རབ་ཏུ་ཤེས་པར་བདེ་བ་ཡང་ལུས་ཀྱིས་རབ་ཏུ་ཚོར་ཏེ།
འཕགས་པ་རྣམས་ཀྱི་བཏང་སྙོམས་པ་དྲན་པ་ཅན་དགའ་བ་མེད་ལ་བདེ་བ་ལ་གནས་པའོ། །ཞེས་བྱ་བར་བསམ་གཏན་གསུམ་པ་ལ་ཉེ་བར་བསྒྲུབས་ཏེ་གནས་སོ། །དེ་བདེ་བ་ཡང་སྤངས། སྡུག་བསྔལ་བ་ཡང་སྤངས་ལ་བདེ་བའི་ཡིད་དང་། ཉམ་ང་བའི་ཡིད་ཀྱང་སྔར་ནུབ་པས་སྡུག་བསྔལ་ཡང་མེད། བདེ་བ་ཡང་མེད་པའི་བཏང་སྙོམས་དྲན་པས་ཡོངས་སུ་དག་པའི་བསམ་གཏན་བཞི་པ་ལ་ཉེ་བར་བསྒྲུབས་ཏེ་གནས་སོ། །དེ་གཟུགས་སུ་འདུ་ཤེས་པ་ལས་རྣམ་པ་ཐམས་ཅད་དུ་འདས་ནས། ཐོགས་པའི་འདུ་ཤེས་རྣམས་ནུབ་སྟེ། འདུ་ཤེས་སྣ་ཚོགས་ཡིད་ལ་མི་བྱེད་པས་མཐའ་ཡས་ནམ་མཁའ་ཞེས་ཏེ། ནམ་མཁའ་མཐའ་ཡས་པའི་སྐྱེ་མཆེད་ལ་ཉེ་བར་བསྒྲུབས་ཏེ་གནས་སོ། །དེ་ནམ་མཁའ་མཐའ་ཡས་པའི་སྐྱེ་མཆེད་ལས་རྣམ་པ་ཐམས་ཅད་དུ་འདས་ནས་མཐའ་ཡས་རྣམ་ཤེས་ཤེས་ཏེ་རྣམ་པར་ཤེས་པ་མཐའ་ཡས་པའི་སྐྱེ་མཆེད་ལ་ཉེ་བར་བསྒྲུབས་ཏེ་གནས་སོ། །དེ་རྣམ་པར་ཤེས་པའི་སྐྱེ་མཆེད་ལས་རྣམ་པ་ཐམས་ཅད་དུ་འདས་ནས་མ་ཡོད་ཅུང་ཟད་ཅེས་ཏེ་ཅུང་ཟད་ཀྱང་མེད་པའི་སྐྱེ་མཆེད་ལ་ཉེ་བར་བསྒྲུབས་ཏེ་གནས་སོ། །དེ་ཅུང་ཟད་ཀྱང་མེད་པའི་སྐྱེ་མཆེད་ལས་རྣམ་པ་ཐམས་ཅད་དུ་འདས་ནས། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ལ་ཉེ་བར་བསྒྲུབས་ཏེ་གནས་སོ། །དེ་ཆོས་དང་གཉེར་བའི་ཆོས་ལ་ནན་ཏན་དུ་བྱ་བ་མ་གཏོགས་པར་དེ་ཡང་མངོན་པར་དགའ་བའི་གནས་དང་། རྟེན་པ་ཡིན་པས་དེ་བྱམས་པ་དང་ལྡན་པའི་སེམས་ཡངས་པ། རྒྱ་ཆེ་བ་གཉིས་སུ་མྱེད་པ་ཚད་མྱེད་པ་ཁོན་མེད་པ། ལྟོད་པ་མེད་པ་བསྒྲིབས་པ་མེད་པ། གནོད་པ་མྱེད་པ། ཐམས་ཅད་དུ་ཁྱབ་པས་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་རྒྱས་པར་བཀང་ནས་ཉེ་བར་བསྒྲུབས་ཏེ་གནས་སོ། །དེ་བཞིན་དུ་སྙིང་རྗེ་དང་ལྡན་པ་དང་། དགའ་བ་དང་ལྡན་པ། བཏང་སྙོམས་དང་ལྡན་པའི་སེམས་ཡངས་པ། རྒྱ་ཆེ་བ་
གཉིས་སུ་མེད་པ། ཚད་མེད་པ་ཁོན་མེད་པ་ལྟོད་པ་མེད་པ་བསྒྲིབས་པ་མེད་པ། གནོད་པ་མེད་པ་ཐམས་ཅད་དུ་ཁྱབ་པས་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་རྒྱས་པར་བཀང་ནས་ཉེ་བར་བསྒྲུབས་ཏེ་གནས་སོ། །དེ་རྫུ་འཕྲུལ་གྱིས་རྣམ་པ་དུ་མ་མྱོང་བར་བྱེད་དེ་ས་འདི་ཡང་གཡོ་བར་བྱེད་དོ། །གཅིག་ཏུ་གྱུར་ནས་མང་པོར་འགྱུར་རོ། །མང་པོར་གྱུར་ནས་གཅིག་ཏུ་འགྱུར་རོ། །སྣང་བ་དང་མི་སྣང་བ་ལའང་རབ་ཏུ་སྤྱོད་དེ་རྩིག་པ་ལ་ཐགས་ཐོགས་མེད་པ་དང་། ར་བ་ལ་ཐགས་ཐོགས་མེད་པ་དང་། རི་ལ་ཡང་དཔེར་ན་ནམ་མཁའ་བཞིན་དུ་ཐགས་ཐོགས་མེད་ཅིང་ཆགས་པ་མེད་པར་འགྲོའོ། །དཔེར་ན་ནམ་མཁའ་ལ་ལྡིང་བའི་བྱ་བཞིན་དུ་ནམ་མཁའ་ལའང་དཀྱིལ་མོ་དཀྲུང་གིས་གནས་པར་བྱེད་དོ། །ཆུ་བཞིན་དུ་ས་ལའང་ནུབ་ཅིང་འབྱུང་བ་སྟོན་ཏོ། །ས་བཞིན་དུ་ཆུ་ལ་ཡང་འབྱིང་བ་མེད་པར་འགྲོའོ། །མྱེའི་ཕུང་པོ་ཆེན་པོ་བཞིན་དུ་དུ་བ་འཐུལ་ལོ། །མེ་ལྕེ་འབར་རོ། །སྤྲིན་ཆེན་པོ་བཞིན་དུ་ལུས་ལས་ཆར་འབེབས་སོ། །ཉི་མ་དང་ཟླ་བ་འདི་དག་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་ལ། འདི་ལྟར་དབང་ཆེ་བར་གྲགས་པ་དག་ཀྱང་ལག་པས་ཉུག་ཅིང་རེག་པར་བྱེད་དོ། །ཚངས་པའི་འཇིག་རྟེན་གྱི་བར་དུ་ཡང་ལུས་ཀྱིས་དབང་བསྒྱུར་ཏེ། དེ་ལྷའི་རྣ་བའི་ཁམས་རྣམ་པར་དག་པ་མྱི་ལས་འདས་པས་ལྷ་དང་མིའི་སྒྲ་གཉིས་ཀ་ཡང་ཉན་ཏོ། །རིང་ཡང་རུང་ཉེ་ཡང་རུང་སྟེ་ཆུང་ངུ་ན་སྦྲང་བུ་དང་། ཤ་སྦྲང་དང་། བུང་བ་དང་། སྲིན་བུའི་སྒྲ་ཡང་ཐོས་སོ། །དེ་སེམས་ཅན་ཕ་རོལ་དང་གང་ཟག་ཕ་རོལ་གྱི་སེམས་ཀྱང་སེམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་ཤེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །
འདོད་ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བ་དང་། ཉོན་མོངས་པ་དང་བཅས་པ་དང་། ཉོན་མོངས་པ་དང་བྲལ་བ་དང་། ཆེ་བ་དང་། ཆུང་བ་དང་། ཡངས་པ་དང་། དོག་པ་དང་། མཉམ་པར་བཞག་པ་དང་། མཉམ་པར་མ་བཞག་པ་དང་། རྣམ་པར་གྲོལ་བ་དང་། རྣམ་པར་མ་གྲོལ་བ་དང་། སྐྱོན་ཅན་དང་། སྐྱོན་མེད་པ་དང་། སེམས་རྒྱ་ཆེན་པོ་ལ་སེམས་རྒྱ་ཆེན་པོའོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །སེམས་རྒྱ་ཆུང་ངུ་ལ་སེམས་རྒྱ་ཆུང་ངུའོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། དེ་ལྟར་ན་སེམས་ཅན་ཕ་རོལ་དང་། གང་ཟག་ཕ་རོལ་གྱི་སེམས་སེམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་རྣམ་པ་དུ་མར་སྔོན་གྱི་གནས་རྗེས་སུ་དྲན་ཏེ། ཚེ་རབས་གཅིག་ཀྱང་རྗེས་སུ་དྲན་ནོ། །གཉིས་དང་། གསུམ་དང་། བཞི་དང་། ལྔ་དང་། བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། ཚེ་རབས་བརྒྱ་ཡང་རྗེས་སུ་དྲན་ནོ། །ཚེ་རབས་བརྒྱ་ཕྲག་དུ་མ་དང་། ཚེ་རབས་སྟོང་ཕྲག་དུ་མ་དང་། ཚེ་རབས་བརྒྱ་སྟོང་ཕྲག་དུ་མ་དང་། ཚེ་རབས་བྱེ་བ་ཕྲག་བརྒྱ་སྟོང་ཕྲག་དུ་མ་ནས། ཚེ་རབས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་བར་དུ་རྗེས་སུ་དྲན་ནོ། །འདུ་བའི་བསྐལ་པ་དུ་མ་དང་། འཇིག་པའི་བསྐལ་པ་དུ་མ་དང་། འདུ་བ་དང་འཇིག་པའི་བསྐལ་པ་དུ་མ་ཡང་རྗེས་སུ་དྲན་ནོ། །བསྐལ་པ་བརྒྱ་ཡང་རྗེས་སུ་དྲན་ནོ། །བསྐལ་པ་སྟོང་དང་། བསྐལ་པ་སྟོང་ཕྲག་བརྒྱ་དང་། བསྐལ་པ་བྱེ་བ་སྟོང་ཕྲག་བརྒྱ་ནས། བསྐལ་པ་བྱེ་བ་བརྒྱ་སྟོང་དུ་མའི་བར་དུ་རྗེས་སུ་དྲན་ནོ། །བསྐལ་པ་ཁྲག་ཁྲིག་དང་བསྐལ་པ་ཁྲག་ཁྲིག་བརྒྱ་དང་། བསྐལ་པ་ཁྲག་ཁྲིག་སྟོང་དང་། བསྐལ་
པ་ཁྲག་ཁྲིག་སྟོང་ཕྲག་བརྒྱ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ནས། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མའི་བར་དུ་རྗེས་སུ་དྲན་ཏེ། བདག་ནི་ཆེ་གེ་མོ་ཞིག་ན་འདུག་འདུག་གོ །མིང་ནི་འདི་ཞེས་བྱའོ། །རིགས་ནི་འདི་ཡིན་ནོ། །རུས་ནི་འདི་ཡིན་ནོ། །ཁ་ཟས་ནི་འདི་ཟོས་སོ་ཚེ་ནི་འདི་ཙམ་ཞིག་ཏུ་གྱུར་ཏོ། །འདི་སྲིད་ཅིག་ཏུ་རིང་དུ་གནས་སོ། །བདེ་བ་དང་ཉོན་མོངས་པ་ནི་འདི་ལྟ་བུ་ཞིག་མྱོང་ངོ་། །དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་འདི་ལྟ་བུ་ཞིག་ཏུ་སྐྱེས་སོ། །ཞེས་ས་ཚིགས་དང་བཅས། མཚན་མ་དང་བཅས། དན་རྟགས་དང་བཅས་པར་རྣམ་པ་དུ་མར་སྔོན་གྱི་གནས་རྗེས་སུ་དྲན་ནོ། །དེས་ལྷའི་མིག་རྣམ་པར་དག་ཅིང་མི་ལས་འདས་པས་སེམས་ཅན་རྣམས་ཤི་འཕོ་བ་དང་། སྐྱེ་བ་དང་། ཁ་དོག་སྡུག་པ་དང་། ཁ་དོག་མི་སྡུག་པ་དང་། བདེ་བའི་ལམ་དུ་ཕྱིན་པ་དང་། ངན་སོང་དུ་སོང་བ་དང་། ངན་པ་དང་། བཟང་པོ་ཐམས་ཅད་རབ་ཏུ་མཐོང་ངོ་། །ལས་ཇི་ལྟ་བ་བཞིན་དུ་རྗེས་སུ་འབྲང་བའི་སེམས་ཅན་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སེམས་ཅན་འདི་དག་ནི་ལུས་ཀྱིས་ངན་དུ་སྤྱོད་པ་དང་ལྡན་པ། ངག་གིས་ངན་དུ་སྤྱོད་པ་དང་ལྡན་པ། ཡིད་ཀྱིས་ངན་དུ་སྤྱོད་པ་དང་ལྡན་པ། འཕགས་པ་རྣམས་ལ་སྐུར་པ་འདེབས་པ་ལོག་པར་ལྟ་བ་ཅན་དག་སྟེ། ལོག་པར་ལྟ་བའི་ལས་རབ་ཏུ་བླངས་པའི་རྒྱུས་ལུས་ཞིག་སྟེ། ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེའོ། །ཞེས་བྱ་བ་དང་། སེམས་ཅན་འདི་དག་ནི་ལུས་ཀྱིས་ལེགས་པར་སྤྱོད་པ་དང་ལྡན་པ། ངག་གིས་ལེགས་པར་སྤྱོད་པ་དང་ལྡན་པ། ཡིད་ཀྱིས་ལེགས་པར་སྤྱོད་པ་དང་ལྡན་པ། འཕགས་པ་ལ་སྐུར་པ་མི་འདེབས་པ་ཡང་དག་པར་ལྟ་བ་
ཅན་དག་སྟེ། ཡང་དག་པར་ལྟ་བའི་ལས་རབ་ཏུ་བླངས་པའི་རྒྱུས་ལུས་ཞིག་སྟེ། ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷར་སྐྱེ་འོ་ཞེས་བྱ་བར་རབ་ཏུ་ཤེས་ཏེ། དེ་ལྟར་ན་ལྷའི་མྱིག་རྣམ་པར་དག་པ་མི་ལས་འདས་པས་སེམས་ཅན་འཆི་བ་དང་། སྐྱེ་བ་དང་། ཁ་དོག་སྡུག་པ་དང་། ཁ་དོག་མི་སྡུག་པ་དང་། བདེ་འགྲོར་སོང་བ་དང་། ངན་སོང་དུ་སོང་བ་དང་། ངན་པ་དང་། བཟང་པོ་ཐམས་ཅད་ས་ཚིགས་དང་བཅས། མཚན་མ་དང་བཅས། དན་རྟགས་དང་བཅས་པར་རབ་ཏུ་མཐོང་ཏེ། ལས་ཇི་ལྟ་བ་བཞིན་དུ་རྗེས་སུ་འབྲང་བའི་སེམས་ཅན་རྣམས་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་འདི་དག་ལ་སྙོམས་པར་འཇུག་ཅིང་རྣམ་པར་ལྡང་ཡང་གང་དུ་བྱང་ཆུབ་ཀྱི་ཡན་ལག་ཡོངས་སུ་རྫོགས་པར་འགྱུར་བའི་གནས་མ་གཏོགས་པར་དེ་དག་གི་དབང་གིས་མི་སྐྱེའོ། །བྱང་ཆུབ་སེམས་དཔའི་ས་འོད་བྱེད་པ་འདི་ལ་གནས་པའི་ཚེ། དེའི་ལྟ་བ་རྒྱ་ཆེན་པོ་དང་། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་ཏེ། ལྟ་བ་རྒྱ་ཆེན་པོ་དང་སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་མང་པོ་དང་། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང་། སངས་རྒྱས་ཁྲག་ཁྲིག་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་རབ་ཏུ་སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་ནས། བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང་། བསོད་སྙོམས་དང་། གཟིམས་ཆ་དང་། སྙུན་གྱི་
རྐྱེན་སྨན་དང་། ཡོ་བྱད་དག་ཀྱང་འབུལ་ཞིང་བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་ཚོགས་རྣམས་ལ་ཡང་ཡང་དག་པར་མཆོད་པ་བྱེད་དེ། དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་བསྙེན་བཀུར་བྱེད་ཅིང་དེ་དག་ལས་རིམ་གྲོར་ཆོས་ཉན་ཏོ། །ལེན་ཏོ་འཛིན་ཏོ། །ཐོས་ནས་ཀྱང་ཅི་ཚུལ་དུ་ནན་ཏན་གྱིས་ཡང་དག་པར་སྒྲུབ་སྟེ། དེ་ཆོས་ཐམས་ཅད་ལ་འཕོ་བ་མྱེད་པ་དང་། འཇིག་པ་མེད་པ་དང་རྟེན་ཅིང་འབྲེལ་བར་འབྱུང་བ་ཤེས་པས་རབ་ཏུ་ལྟ་ཞིང་རྟོག་པས་ཀྱང་འདོད་པའི་བཅིངས་པ་ཐམས་ཅད་བསྲབས་པར་འགྱུར་རོ། །སྲིད་པའི་བཅིངས་པ་ཐམས་ཅད་བསྲབས་པར་འགྱུར་རོ། །མ་རིག་པའི་བཅིངས་པ་ཐམས་ཅད་བསྲབས་པར་འགྱུར་རོ། །ལྟ་བ་ལས་བྱུང་བའི་བཅིངས་པ་རྣམས་ནི་སྔ་ནས་ཀྱང་བྱང་བ་ཡིན་ཏེ། བྱང་ཆུབ་སེམས་དཔའི་ས་འོད་བྱེད་པ་འདི་ལ་གནས་པའི་བྱང་ཆུབ་སེམས་དཔའི་ལོག་པའི་འདོད་ཆགས་ནི་བསྐལ་པ་དུ་མ་དང་བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང་། བསྐལ་པ་ཁྲག་ཁྲིག་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་སྤངས་ཤིང་མི་སྩོགས་པར་གནས་སོ། །ལོག་པའི་ཞེ་སྡང་སྤངས་ཤིང་མི་སྩོགས་པར་གནས་སོ། །ལོག་པའི་གཏི་མུག་སྤངས་ཤིང་མི་སྩོགས་པར་གནས་ཏེ། དགེ་བའི་རྩ་བ་དེ་དག་ཀྱང་ཡོངས་སུ་བྱང་བ་དང་། ཡོངས་སུ་དག་པ་དང་། ལས་སུ་རུང་བར་གྱུར་པས་གནས་སོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། གསེར་གྱི་ས་ལེ་
སྦྲམ་དེ་ཉིད་མགར་བ་མཁས་པའི་ལག་ན་སྤྱོད་ན་སྲང་གྲངས་ཅི་ཡོད་པའི་ཚད་བཞིན་དུ་འདུག་གོ །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ས་འོད་བྱེད་པ་འདི་ལ་གནས་པའི་ལོག་པའི་འདོད་ཆགས་ཀྱང་འགྲིབ་པ་མེད་པར་འབྱང་བར་འགྱུར་རོ། །ལོག་པའི་ཞེ་སྡང་ཡང་འགྲིབ་པ་མེད་པར་འབྱང་བར་འགྱུར་རོ། །ལོག་པའི་གཏི་མུག་ཀྱང་འགྲིབ་པ་མེད་པར་འབྱང་བར་འགྱུར་རོ། །དགེ་བའི་རྩ་བ་དེ་དག་ཀྱང་རབ་ཏུ་འབྱང་ཞིང་ཡོངས་སུ་དག་པ་དང་། ལས་སུ་རུང་བར་འགྱུར་རོ། །དེའི་བཟོད་པ་དང་དེས་པ་ཡང་དེ་བས་ཀྱང་ཡོངས་སུ་དག་པར་འགྱུར་རོ། །གྲོགས་ལ་བདེ་ཞིང་ངེས་པའི་བསམ་པ་དང་། མི་འཁྲུགས་པའི་བསམ་པ་དང་། གློང་བ་མེད་པའི་བསམ་པ་དང་། རྙོག་པ་མེད་པའི་བསམ་པ་དང་། མཐོན་དམན་མེད་པའི་བསམ་པ་དང་། སེམས་ཅན་ལ་ཕན་འདོགས་པས་ལན་མི་རེ་བའི་བསམ་པ་དང་། ཕན་བཏགས་པ་ལ་ཕྱིར་ལན་གློན་པའི་བསམ་པ་དང་། གཡོ་མེད་ཅིང་སྒྱུ་མེད་པའི་བསམ་པ་དང་། ཐིབས་པོ་མེད་པའི་བསམ་པ་ཡོངས་སུ་དག་པར་འགྱུར་ཏེ། དེའི་བསྡུ་བའི་དངོས་པོ་བཞི་ལས་དོན་སྒྲུབ་པ་ཤས་ཆེ་བ་ཡིན། ཕ་རོལ་ཏུ་ཕྱིན་པ་བཅུ་ལས་བཟོད་པའི་ཕ་རོལ་ཏུ་ཕྱིན་པ་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་བསྒྲུབ་པ་མ་ཡིན་ཏེ་ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ས་འོད་བྱེད་པ་ཞེས་བྱ་བ་སྟེ། བྱང་ཆུབ་སེམས་དཔའི་ས་གསུམ་པའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་ལྷའི་རྒྱལ་པོ་དབང་པོར་འགྱུར་ཏེ་སེམས་ཅན་རྣམས་ཀྱི་འདོད་པའི་འདོད་ཆགས་རྣམ་པར་བཟློག་པའི་ཐབས་ཉེ་བར་བསྒྲུབ་པ་ལ་མཁས་ཤིང་མཐུ་ཡོད་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པའི་དགེ་བའི་རྩ་བ་གང་ཅི་རྩོམ་ཡང་རུང་སྟེ།
དེ་ཐམས་ཅད་ཇི་ལྟར་ན། སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། རྣམ་པར་འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས་ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང་། ཆོས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་། ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་། མི་འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་བརྒྱ་སྟོང་རབ་ཏུ་ཐོབ་ཅིང་དེ་དག་ལ་སྙོམ་པར་འཇུག་པ་དང་། སངས་རྒྱས་བརྒྱ་སྟོང་མཐོང་བ་དང་། དེ་དག་གི་བྱིན་གྱི་རླབ་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་བརྒྱ་སྟོང་སྐྱོད་པ་དང་། སངས་རྒྱས་ཀྱི་ཞིང་བརྒྱ་སྟོང་དུ་འགྲོ་བ་དང་། འཇིག་རྟེན་གྱི་ཁམས་བརྒྱ་སྟོང་སྣང་བར་བྱེད་པ་དང་། སེམས་ཅན་བརྒྱ་སྟོང་ཡོངས་སུ་སྨིན་པར་བྱེད་པ་དང་། བསྐལ་པ་བརྒྱ་སྟོང་དུ་གནས་པར་བྱ་བ་དང་། སྔོན་གྱི་མཐའ་དང་ཕྱི་མའི་མཐའི་བསྐལ་པ་བརྒྱ་སྟོང་ལ་རབ་ཏུ་འཇུག་པ་དང་། ཆོས་ཀྱི་སྒོ་བརྒྱ་སྟོང་རྣམ་པར་འབྱེད་པ་དང་། ལུས་བརྒྱ་སྟོང་ཡོངས་སུ་བསྟན་པ་དང་། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་བརྒྱ་སྟོང་ཡང་དག་པར་བསྟན་པར་བྱ་བའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཅད་བྱང་ཆུབ་སེམས་དཔའི་སྨོན་ལམ་གྱི་མཐུ་ཅན་རྣམས་
སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ་འོད་དམ། རྫུ་འཕྲུལ་ལམ། མྱིག་གམ་སྤྱོད་ཡུལ་ལམ་དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའ་འོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པ་དང་བསྟན་པར་བྱ་བའི་ཕྱིར། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་ཡོན་ཏན་འབྱུང་གནས་བསམ་དག་སེམས་དེས་པ། །སྐྱོ་ཞིང་འདོད་ཆགས་བྲལ་ཏེ་འཚོ་མེད་སེམས་དང་ལྡན། །སེམས་བསྐྱེད་བསྟན་པ་དགའ་ལྡན་རྒྱ་ཆེན་ཤུགས་ཅན་རྣམས། །མཁས་པ་བདག་ཉིད་ཆེ་བའི་སེམས་ལྡན་གསུམ་པ་གནོན། །འོད་བྱེད་ས་ཕྱོགས་འདི་ལ་གནས་པའི་མཁས་པ་ནི། །སྡུག་བསྔལ་མི་རྟག་མི་སྡུག་རབ་ཏུ་འཇིག་ཆོས་དང་། །རིང་པོར་མི་གནས་སྐད་ཅིག་སྙིང་པོ་མེད་པ་ནི། །འདུས་བྱས་རྣམ་པ་འོང་བ་མེད་ལ་རབ་ཏུ་རྟོག །ནད་དུ་གྱུར་པ་མྱ་ངན་སྨྲེ་སྔགས་འདོན་དང་བཅས། །གནོད་དང་འཁྲུག་དང་སྡུག་དང་མི་སྡུག་རྗེས་འབྲང་བ། །སྡུག་བསྔལ་ཡིད་བློང་ཕུང་པོ་འབར་བའི་མེ་འདྲ་བར། །འདུས་བྱས་མཐའ་ཡས་ཀུན་ནས་འབར་མཐོང་དེ་ལས་སྐྱེད། །སྲིད་པ་གསུམ་པོ་ཀུན་ལས་སྐྱོ་ཞིང་ལྟོས་སེམས་མེད། །བདེ་གཤེགས་ཡེ་ཤེས་འདོད་ཅིང་བློ་གཞན་མེད་པ་སྟེ། །བསམ་དུ་མེད་ཅིང་གཞལ་ཡས་ཕ་རོལ་མཐའ་ཡས་པའི། །རྒྱལ་བའི་ཡེ་ཤེས་གནོད་མེད་དེ་དག་རབ་ཏུ་མཐོང་། །དེ་དག་སངས་རྒྱས་ཡེ་ཤེས་གནོད་མེད་མཐོང་གྱུར་ནས། །སྐྱབས་མེད་མགོན་དང་བྲལ་བ་རབ་ཏུ་དགྲོལ་བའི་ཕྱིར། །རྟག་ཏུ་དབུལ་ཞིང་མེ་གསུམ་ཀུན་ནས་འབར་གྱུར་དང་། །སྲིད་པའི་བཙོན་རར་
སྡུག་བསྔལ་སྣ་བརྒྱས་སེམས་བསྐོར་ཅིང་། །ཉོན་མོངས་བསྒྲིབས་དང་རྣམ་པར་ལྟ་དང་འདོད་ཉམས་པ། །བདེ་གཤེགས་ཆོས་ཀྱི་དགའ་བ་སྟོར་བའི་བྱིས་པ་རྣམས། །འཁོར་བའི་རྒྱུད་དུ་འབབ་ཅིང་ཐར་བས་སྔངས་གྱུར་པ། །བདག་གིས་སྐྱབས་པ་ཡིན་ཞེས་བརྩོན་འགྲུས་དམ་དུ་རྩོམ། །ཡེ་ཤེས་འདོད་པས་ལྟོས་པ་མེད་པར་འགྲོ་དོན་བྱེད། །གང་རྒྱུས་རྣམ་ཐར་ལམ་གྱི་རྒྱུ་ནི་གང་ཞེས་རྟོག །བདེ་གཤེགས་ཡེ་ཤེས་བསྒྲིབས་པ་མེད་ལས་གཞན་མེད་ན། །བདེ་གཤེགས་ཡེ་ཤེས་དེ་ཡང་ཤེས་རབ་མཐུས་འབྱུང་སྟེ། །ཤེས་རབ་ཐོས་ལས་འབྱུང་བར་བྱང་ཆུབ་སེམས་དཔའ་རྟོག །དེ་ལྟར་ཤེས་ནས་ཐོས་དོན་སྤྱད་པར་བརྩོན་འགྲུས་རྩོམ། །ཉིན་མཚན་ཉན་པའི་རྒྱུར་སྤྱོད་བྱ་བ་གཞན་མྱེད་པར། །ཆོས་ཀྱི་དོན་གཉེར་ཆོས་ལ་རབ་ཏུ་བརྟེན་པ་ཡིན། །ནོར་བུ་མུ་ཏིག་རིན་ཆེན་ཚོགས་དང་མཛའ་གཉེན་དང་། །སྲིད་ལོངས་དུ་མ་ཕོ་བྲང་ཕུན་ལྡན་དམ་པ་དང་། །ཆུང་མ་དག་དང་བུ་དང་མཐུན་པར་སྤྱོད་པའི་འཁོར། །ལྟོས་མེད་སེམས་ཀྱིས་མཁས་པ་ཆོས་ཀྱི་དོན་དུ་གཏོང་། །མགོ་དང་རྐ་ལག་མྱིག་དང་དེ་བཞིན་བདག་གི་ཤ །ལྕེ་དང་མཆེ་བ་རྣ་བ་སྣ་དང་ཁྲག་རྣམས་དང་། །ཕངས་པའི་རྐང་དང་སྙིང་ཕྱུང་ཡོངས་སུ་གཏོང་བ་བྱེད། །འདི་ནི་དཀའ་བར་མི་བརྩི་ཐོས་པ་དེ་དཀར་བརྩི། །ལ་ལ་དེ་དྲུང་འོངས་ཤིང་འདི་སྐད་སྨྲར་གྱུར་ཏེ། །དེ་སྟེ་མེ་ལྕེ་མི་ཟད་འབར་དོང་མཆོང་ཕོད་ན། །བདེ་གཤེགས་བསྟན་ཆོས་རིན་ཆེན་བཤད་དོ་ཞེས་ན་ཡང་། །ཐོས་ནས་མི་དམའི་ཡིད་ཀྱིས་ཡོན་ཏན་དོན་དུ་མཆོང་། །ཆོས་ཀྱི་ཚིག་གཅིག་དོན་དུ་རི་རབ་རྩེས་བརྟག་པར། །སྟོང་གསུམ་མེས་བཀང་ཚངས་རིས་ཡུལ་ནས་མཆོངས་གྱུར་ཀྱང་། །ད་དུང་རྒྱལ་བའི་བྱང་ཆུབ་ཡངས་པ་ཐོབ་དཀའ་ན། །དེ་སྟེ་ཐ་མལ་མི་བདེས་རྙེད་འགྱུར་ཤིན་ཏུ་བདེ། །དྲང་སྲོང་མཆོག་གི་ཡེ་ཤེས་འཐོབ་འགྱུར་ཇི་སྲིད་པ། །དེ་སྲིད་བར་དུ་མནར་མེད་སྡུག་བསྔལ་
བཟོད་བྱ་ན། །མི་ཡི་སྡུག་བསྔལ་ཕུང་པོ་སྣ་ཚོགས་ཅི་སྨོས་ཀྱིས། །ཆོས་རབ་མཉན་པའི་དོན་དུ་བདག་གིས་ཉམས་བླང་ཞེས། །ཆོས་རྣམས་ཐོས་པར་གྱུར་ནས་ཚུལ་བཞིན་སེམས་པར་བྱེད། །བསམ་གཏན་ཚད་མེད་དེ་བཞིན་གཟུགས་མེད་རྣམ་པ་བཞི། །མངོན་པར་ཤེས་པའི་དམ་པ་ལྔ་པོ་མངོན་སྒྲུབ་ཀྱང་། །དེ་དག་དབང་གིས་སྐྱེ་བར་དེ་དག་འགྱུར་བ་མིན། །ལེགས་ལྡན་འདི་གནས་སངས་རྒྱས་ཁྲག་ཁྲིག་མང་པོ་ལ། །མཆོད་པ་བྱེད་ཅིང་དེས་རྟོགས་ཡིད་ཀྱིས་ཆོས་ཀྱང་ཉན། །སྲབས་པར་གྱུར་ཅིང་ལོག་བྲལ་ཡོངས་སུ་དག་པར་འགྱུར། །སྐྱོན་མེད་གསེར་སྦྲམ་ཇི་ལྟར་སྲང་ལ་བཅལ་བ་བཞིན། །དེ་གནས་ཡོན་ཏན་ལྡན་པ་ལྷ་ཡི་བདག་པོ་སྟེ། །དབང་སྒྱུར་དོན་བྱེད་འདོད་པའི་ནད་ཀྱི་རྣམ་པ་སེལ། །ལྷ་མང་སྣ་ཚོགས་དུ་མ་དགེ་བའི་ལམ་ལ་དགོད། །སངས་རྒྱས་ཡོན་ཏན་མངོན་འདོད་བསམ་པ་གཞན་ཡང་མྱེད། །འདི་ལ་གནས་པའི་རྒྱལ་སྲས་བརྩོན་འགྲུས་རབ་རྩོམ་སྟེ། །བརྒྱ་ཕྲག་སྟོང་ལས་མི་ཉུང་ཏིང་འཛིན་ཐོབ་པ་ཡིན། །མཚན་རབ་སྐུ་བརྒྱན་སངས་རྒྱས་རྣམས་ཀྱང་རབ་ཏུ་མཐོང་། །ཡན་ཅད་སྨོན་ལམ་རབ་ལྡན་ཡོན་ཏན་བསམ་མི་ཁྱབ། །དེ་ལྟར་ས་མཆོག་གསུམ་པ་འདི། །འཇིག་རྟེན་ཀུན་ལ་ཕན་བརྩོན་པའི། །བྱང་ཆུབ་སེམས་དཔའི་མཆོག་རྣམས་ལ། །རྒྱལ་བའི་སྲས་ཀྱིས་བསྟན་པ་ཡིན། །འོད་བྱེད་པ་ཞེས་བྱ་བ་སྟེ། །བྱང་ཆུབ་སེམས་དཔའི་ས་གསུམ་པའོ། །ས་མཆོག་དམ་པ་ཡིད་འོང་ཕུལ་གྱི། །སྤྱོད་པ་ཡངས་པ་འདི་འདྲ་ཐོས་ནས། །རྒྱལ་སྲས་ཡིད་དགའ་ཤིན་ཏུ་མགུ་གྱུར། །རྒྱལ་བ་ལ་ནི་མེ་ཏོག་མངོན་འཐོར། །ཆོས་འདི་ཤིན་ཏུ་བསྟན་ཅིང་བརྗོད་པས། །ལན་ཚྭའི་གང་ཆེན་མཚོ་ཡང་གཡོས་འགྱུར། །ལྷ་ཡི་བུ་མོ་ཡིད་འོང་སྙན་པའི། །གླུ་ཡི་དབྱངས་སུ་ཆོས་རབ་དབྱངས་ལེན། །དབང་བསྒྱུར་ལྷ་དབང་ཤིན་ཏུ་ཡིད་དགའ། །བདེ་གཤེགས་
རིན་ཆེན་ལྷ་རྫས་ནོར་འཐོར། །དོན་གྲུབ་ཡོན་ཏན་ཕ་རོལ་ཕྱིན་པའི། །རྒྱལ་བ་དེ་ཚེ་གསུང་རབ་སྒྲོག་མཛད། །ཅི་ཕྱིར་ཞེ་ན་ཆོས་ཀྱི་དམ་པ། །རྫོགས་པའི་བྱང་ཆུབ་སེམས་དཔའི་སྤྱོད་རབ། །དེ་རིང་འདིར་ཐོས་མཁས་པའི་ས་དེ། །བསྐལ་པ་བརྒྱར་ཡང་ཐོས་པར་རབ་དཀའ། །རྒྱལ་སྲས་མཁས་ལ་སྤྱོད་པའི་དམ་པ། །ལྷ་དང་མི་ལ་ཕན་པས་ཡང་ཤོད། །ས་དོན་ངེས་པར་མ་ནོར་ལམ་འདི། །ལྷ་མང་འདི་དག་ཡིད་དགའ་ཉན་འགྱུར། །བདེ་བར་གཤེགས་པའི་སྲས་པོ་ལ། །རྣམ་ཐར་ཟླ་བས་ཡང་སྨྲས་པ། །བཞི་པོར་ཡང་དག་འཕར་བ་ཡི། །སྤྱོད་ཡུལ་མཁས་པས་བཤད་པར་མཛོད། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་ས་གསུམ་པ་ལ་སྣང་བ་ཤིན་ཏུ་སྦྱང་བ་ནི། བྱང་ཆུབ་སེམས་དཔའི་ས་བཞི་པ་ཡོངས་སུ་གནོན་ཏེ། དེ་ཆོས་སྣང་བ་ལ་འཇུག་པ་བཅུ་ཡོངས་སུ་གནོན་ཏེ། བཅུ་གང་ཞེ་ན། འདི་ལྟ་སྟེ། སེམས་ཅན་གྱི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང་། འཇིག་རྟེན་གྱི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང་། ཆོས་ཀྱི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང་ནམ་མཁའི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང་། རྣམ་པར་ཤེས་པའི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང་། འདོད་པའི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང་། གཟུགས་ཀྱི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང་། གཟུགས་མེད་པའི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང་། བསམ་པ་དང་མོས་པ་ཡངས་པའི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང་། བདག་
ཉིད་ཆེ་བའི་བསམ་པ་དང་མོས་པའི་ཁམས་རྣམ་པར་དཔྱད་པ་སྣང་བ་ལ་འཇུག་པ་དང་། ཆོས་སྣང་བ་ལ་འཇུག་པ་བཅུ་པོ་འདི་དག་གིས་ཡོངས་སུ་གནོན་ཏོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ས་འོད་འཕྲོ་བ་ཅན་ཐོབ་པའི་བྱང་ཆུབ་སེམས་དཔའ་ནི་དེ་བཞིན་གཤེགས་པའི་རིགས་སུ་དེའི་བདག་ཉིད་ཀྱི་ཆོས་རབ་ཏུ་འཐོབ་པའི་ཕྱིར་ཡེ་ཤེས་ཡོངས་སུ་སྨིན་པར་བྱེད་པའི་ཆོས་བཅུས་ཡང་དག་པར་བྱུང་བ་ཡིན། བཅུ་གང་ཞེ་ན། འདི་ལྟ་སྟེ། ཕྱིར་མི་ལྡོག་པའི་བསམ་པ་དང་། དཀོན་མཆོག་གསུམ་ལ་དད་པ་མྱི་ཕྱེད་པ་རབ་ཏུ་ཐོབ་པའི་མཐར་ཐུག་པ་དང་། འདུ་བྱེད་སྐྱེ་བ་དང་། འཇིག་པ་རྣམ་པར་བསྒོམ་པ་དང་། རང་བཞིན་གྱིས་མ་སྐྱེས་པ་རྣམ་པར་བསྒོམ་པ་དང་། འཇིག་རྟེན་རྒྱུ་ཞིང་ལྡོག་པ་རྣམ་པར་བསྒོམ་པ་དང་། ལས་ཀྱིས་སྲིད་པར་སྐྱེ་བ་རྣམ་པར་བསྒོམ་པ་དང་འཁོར་བ་དང་མྱ་ངན་ལས་འདས་པ་རྣམ་པར་བསྒོམ་པ་དང་། སེམས་ཅན་གྱི་ཞིང་དང་ལས་རྣམ་པར་བསྒོམ་པ་དང་། སྔོན་གྱི་མཐའ་དང་ཕྱི་མའི་མཐའ་རྣམ་པར་བསྒོམ་པ་དང་། མྱེད་པའི་མཐའ་དང་ཟད་པའི་མཐའ་རྣམ་པར་བསྒོམ་པ་སྟེ། ཀྱེ་རྒྱལ་བའི་སྲས་དག །ཡེ་ཤེས་ཡོངས་སུ་སྨིན་པར་བྱེད་པའི་ཆོས་བཅུ་པོ་འདི་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། དེ་བཞིན་གཤེགས་པའི་རིགས་སུ་དེའི་བདག་ཉིད་ཀྱི་ཆོས་རབ་ཏུ་འཐོབ་པའི་ཕྱིར་ཡང་དག་པར་བྱུང་བ་ཡིན། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའི་ས་འོད་འཕྲོ་བ་ཅན་ལ་གནས་པའི་བྱང་ཆུབ་སེམས་དཔའ་དེ་ནི་ཡོངས་སུ་སྦྱོང་བ་དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང་། ཡིད་མི་བདེ་བ་རྣམ་པར་སྤངས་ཏེ། ནང་གི་ལུས་ལ་ལུས་ཀྱིས་རྗེས་སུ་ལྟ་བར་གནས་སོ། །ཡོངས་སུ་སྤྱོད་པ་དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང་ཡིད་མི་བདེ་བ་རྣམ་པར་
སྤངས་ཏེ། ཕྱིའི་ལུས་ལ་ལུས་ཀྱི་རྗེས་སུ་ལྟ་བར་གནས་སོ། །སྤྱོད་པ་དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང་ཡིད་མི་བདེ་བ་རྣམ་པར་སྤངས་ཏེ། ཕྱི་ནང་གི་ལུས་ལ་ལུས་ཀྱི་རྗེས་སུ་ལྟ་བར་གནས་སོ། །དེ་བཞིན་དུ་ནང་གི་ཚོར་བ་དང་། ཕྱི་རོལ་གྱི་ཚོར་བ་དང་། ཕྱི་ནང་གི་ཚོར་བ་དང་། དེ་བཞིན་དུ་ནང་གི་སེམས་དང་། ཕྱི་རོལ་གྱི་སེམས་དང་། ཕྱི་ནང་གི་སེམས་ལ་ལྟ་སྟེ་སྤྱོད་པ་དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང་། ཡིད་མི་བདེ་བ་རྣམ་པར་སྤངས་ཏེ། ནང་གི་ཆོས་ལ་ཆོས་ཀྱི་རྗེས་སུ་ལྟ་བར་གནས་སོ། །ཡོངས་སུ་སྤྱོད་པ་དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང་ཡིད་མི་བདེ་བ་རྣམ་པར་སྤངས་ཏེ། ཕྱི་རོལ་གྱི་ཆོས་ལ་ཆོས་ཀྱི་རྗེས་སུ་ལྟ་བར་གནས་སོ། ། ཡོངས་སུ་སྤྱོད་པ་དང་ལྡན་ཞིང་ཤེས་བཞིན་ཅན་དྲན་པ་དང་ལྡན་པར་འཇིག་རྟེན་གྱི་ཆགས་སེམས་དང་ཡིད་མི་བདེ་བ་རྣམ་པར་སྤངས་ཏེ། ཕྱི་ནང་གི་ཆོས་ལ་ཆོས་ཀྱི་རྗེས་སུ་ལྟ་བར་གནས་སོ། །དེ་སྡིག་ཏོ་དང་མི་དགེ་བའི་ཆོས་མ་སྐྱེས་པ་རྣམས་མི་སྐྱེ་བའི་ཕྱིར་དད་པ་སྐྱེད་དོ། །རྩོལ་ལོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །སྨོན་ལམ་ཡང་དག་པར་འདེབས་སོ། །སྡིག་ཏོ་དང་མི་དགེ་བའི་ཆོས་སྐྱེས་པ་རྣམས་སྤང་བའི་ཕྱིར་དད་པ་སྐྱེད་དོ། །རྩོལ་ལོ། །བརྩོན་འགྲུས་རྩོམ་མོ་སེམས་རབ་ཏུ་འཛིན་ཏོ། །སྨོན་ལམ་ཡང་དག་པར་འདེབས་སོ། །དགེ་བའི་ཆོས་མ་སྐྱེས་པ་རྣམས་སྐྱེ་བར་འགྱུར་བར་དད་པ་སྐྱེད་དོ། །རྩོལ་ལོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །སྨོན་ལམ་ཡང་དག་པར་འདེབས་སོ། །དགེ་བའི་ཆོས་སྐྱེས་པ་རྣམས་གནས་པ་དང་། མི་ཉམས་པ་དང་། རྒྱ་ཆེར་འགྱུར་བ་དང་། དེ་བས་ཀྱང་འཕེལ་བར་འགྱུར་བ་དང་། བསྒོམ་པ་དང་ཡོངས་སུ་རྫོགས་པར་འགྱུར་བའི་ཕྱིར་
དད་པ་སྐྱེད་དོ། །རྩོལ་ལོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །སྨོན་ལམ་ཡང་དག་པར་འདེབས་སོ། །དེ་མོས་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ་རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །བརྩོན་འགྲུས་ཀྱི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ་འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ་རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །སེམས་ཀྱི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ་འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ་རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དད་པའི་དབང་པོ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །བརྩོན་འགྲུས་ཀྱི་དབང་པོ་དབེན་པ་ལ་གནས་པ་འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ་རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དྲན་པའི་དབང་པོ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ་རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཏིང་ངེ་འཛིན་གྱི་དབང་པོ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ་རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཤེས་རབ་ཀྱི་དབང་པོ་དབེན་པ་ལ་གནས་པ་འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དད་པའི་སྟོབས་དབེན་པ་ལ་གནས་པ།
འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །བརྩོན་འགྲུས་ཀྱི་སྟོབས་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དྲན་པའི་སྟོབས་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ་རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཏིང་ངེ་འཛིན་གྱི་སྟོབས་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཤེས་རབ་ཀྱི་སྟོབས་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དྲན་པ་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ་འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དགའ་བ་ཡང་དག་བྱང་ཆུབ་ཀྱི་ཡན་ལག་དབེན་པ་ལ་
གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །བག་ཡངས་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤོངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །བཏང་སྙོམས་ཡང་དག་བྱང་ཆུབ་ཀྱི་ཡན་ལག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཡང་དག་པའི་ལྟ་བ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཡང་དག་པའི་རྟོག་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཡང་དག་པའི་ངག་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཡང་དག་པའི་ལས་ཀྱི་མཐའ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཡང་དག་པའི་འཚོ་བ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཡང་དག་པའི་རྩོལ་བ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཡང་དག་པའི་དྲན་པ་དབེན་པ་ལ་གནས་པ། འདོད་ཆགས་དང་
བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །ཡང་དག་པའི་ཏིང་ངེ་འཛིན་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤངས་པས་ཡོངས་སུ་གྲུབ་པ་ཡོངས་སུ་སྒོམ་མོ། །དེ་དག་ཀྱང་སེམས་ཅན་ཐམས་ཅད་ལ་ལྟ་བ་དང་། སྔོན་གྱི་སྨོན་ལམ་མངོན་པས་བསྒྲུབས་པར་ཉེ་བར་བརྟེན་པ་དང་། སྙིང་རྗེ་ཆེན་པོ་སྔོན་དུ་བཏང་བ་དང་། བྱམས་པ་ཆེན་པོ་དང་ལྡན་པར་བྱ་བ་དང་། ཐམས་ཅད་མཁྱེན་པའི་ཡེ་ཤེས་ལ་དམིགས་པ་དང་། སངས་རྒྱས་ཀྱི་ཞིང་བསྒྲུབ་ཅིང་རྒྱན་མངོན་པར་གྲུབ་པར་བྱ་བ་དང་། དེ་བཞིན་གཤེགས་པའི་སྟོབས་དང་མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་དང་། གཟུགས་དང་མཚན་དང་། དཔེ་བྱད་བཟང་པོ་དང་། དབྱངས་ཀྱི་ཡན་ལག་དང་། གསུང་ཕུན་སུམ་ཚོགས་པ་མངོན་པར་བསྒྲུབ་པ་དང་། གོང་ནས་གོང་དུ་ཁྱད་པར་དུ་འགྱུར་བའི་ཆོས་ཡོངས་སུ་བཙལ་བ་དང་། སངས་རྒྱས་ཀྱི་རྣམ་པར་ཐར་པ་ཟབ་མོ་ཐོས་པ་ཁོང་དུ་ཆུད་པར་བྱ་བ་དང་། ཤེས་རབ་དང་ཐབས་ལ་ཤིན་ཏུ་མཁས་པས་རྣམ་པར་དཔྱོད་པའི་ཕྱིར་རོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པའི་བྱང་ཆུབ་སེམས་དཔའ་ནི་གང་འདི་འཇིག་ཚོགས་ལ་ལྟ་བ་ལ་སྩོགས་པ་བདག་ཏུ་མངོན་པར་ཆགས་པ་དང་། སེམས་ཅན་དུ་མངོན་པར་ཆགས་པ་དང་། སྲོག་དང་གསོ་བ་དང་། གང་ཟག་དང་། ཤེད་བདག་དང་། ཤེད་ལས་སྐྱེས་པ་ལ་མངོན་པར་ཆགས་པ་དང་། ཕུང་པོ་དང་། ཁམས་དང་། སྐྱེ་མཆེད་ལ་མངོན་པར་ཆགས་པ་ལས་བྱུང་བ། བརྐྱང་བ་དང་བསྐུམ་པ་དང་། རྣམ་པར་བརྟག་པ་དང་། རྣམ་པར་དཔྱད་པ་དང་དྲན་པ་དང་། བདག་གིར་བྱས་པ་དང་། ནོར་དུ་བྱས་པ་དང་། བརྟེན་པའི་གནས་སུ་གྱུར་པ་དེ་དག་ཐམས་ཅད་ཀྱི་ཐམས་ཅད་དུ་རབ་ཏུ་
ཤེས་སོ། །རབ་ཏུ་སྤོང་ངོ་། །དེ་འདི་ལྟར་ལས་གང་བྱ་བའི་མི་ཆ་བ་ཡང་དག་པར་རྫོགས་པའི་སངས་རྒྱས་ཀྱིས་སྨད་པ། ཀུན་ནས་ཉོན་མོངས་པ་དང་ལྡན་པ་དེ་དག་ཐམས་ཅད་ཀྱི་ཐམས་ཅད་དུ་སྤོང་ངོ་། །ལས་གང་བྱ་བའི་རིགས་པ་ཡང་དག་པར་རྫོགས་པའི་སངས་རྒྱས་ཀྱིས་བསྔགས་པ། བྱང་ཆུབ་ཀྱི་ལམ་གྱི་ཚོགས་དང་མཐུན་པ་དེ་དག་ཡང་དག་པར་བླངས་ཤིང་གནས་ཏེ། དེ་ཕྱིར་ཞིང་ཇི་ལྟ་ཇི་ལྟར་ཐབས་དང་ཤེས་རབ་ཀྱིས་མངོན་པར་བསྒྲུབས་པའི་ལམ་ཡང་དག་པར་བསྒྲུབ་པའི་ཕྱིར་ལམ་གྱི་ཡན་ལག་རྣམས་བསྒོམ་པ་དེ་ལྟ་དེ་ལྟར་འཇམ་པའི་སེམས་དང་ལྡན་པ་ཡིན། མཉེན་པའི་སེམས་དང་ལྡན་པ་ཡིན་ལས་སུ་རུང་བའི་སེམས་དང་ལྡན་པ་ཡིན། ཕན་པ་དང་བདེ་བ་སྐྱེད་པའི་སེམས་དང་ལྡན་པ་ཡིན། ཀུན་ནས་ཉོན་མོངས་པ་མེད་པའི་སེམས་དང་ལྡན་པ་ཡིན། གོང་ནས་གོང་དུ་ཁྱད་པར་ཡོངས་སུ་ཚོལ་བའི་སེམས་དང་ལྡན་པ་ཡིན། ཡེ་ཤེས་ཀྱི་ཁྱད་པར་ལ་མོས་པའི་སེམས་དང་ལྡན་པ་ཡིན། འགྲོ་བ་ཐམས་ཅད་ཡོངས་སུ་བསྐྱབ་པའི་སེམས་དང་ལྡན་པ་ཡིན། བླ་མ་ལ་རིམ་གྲོ་བྱ་བ་དང་མཐུན་པའི་སེམས་དང་ལྡན་པ་ཡིན། ཇི་སྐད་དུ་ཐོས་པའི་ཆོས་ལ་ནན་ཏན་དུ་བྱེད་པའི་སེམས་དང་ལྡན་པ་ཡིན་ཏེ། དེ་ནི་བྱས་པ་ཤེས་པས་དྲིན་དུ་གཟོ་བ་ཡིན། འགྲོགས་ན་བདེ་ཞིང་དེས་པ་ཡིན། འཇམ་ཞིང་མཉེན་པ་ཡིན། སྒྱུ་མེད་ཅིང་ང་རྒྱལ་མེད་ལ། ཐིབས་པོ་མེད་པར་སྤྱོད་པ་ཡིན། མཐུན་པར་འཛིན་ཅིང་ང་ལོ་བདེ་བ་ཡིན་ཏེ། དེ་དེ་ལྟར་བཟོད་པ་དང་ལྡན་དེ་ལྟར་དུལ་བ་དང་ལྡན་དེ་ལྟར་ཞི་བ་དང་ལྡན་ཏེ། དེ་ལྟར་བཟོད་ཅིང་དུལ་ལ་ཞི་བ་དང་ལྡན་པས་གོང་དུ་ས་ཡོངས་སུ་སྦྱོང་བའི་ལས་རྣམས་ཡིད་ལ་བྱེད་ཅིང་ཡང་དག་པར་སྤྱོད་པས་ཕྱིར་མི་ལྡོག་པའི་བརྩོན་འགྲུས་དང་ལྡན་པ་ཡིན། རྒྱུན་མ་ཆད་པའི་བརྩོན་འགྲུས་དང་ལྡན་པ་ཡིན། ཀུན་ནས་ཉོན་མོངས་པ་མེད་པའི་བརྩོན་འགྲུས་དང་ལྡན་པ་ཡིན།
ཟློག་པར་མི་ནུས་པའི་བརྩོན་འགྲུས་དང་ལྡན་པ་ཡིན། སྐྱོ་བ་མེད་པའི་བརྩོན་འགྲུས་དང་ལྡན་པ་ཡིན། ཡངས་པའི་བརྩོན་འགྲུས་དང་ལྡན་པ་ཡིན། མཐའ་ཡས་པའི་བརྩོན་འགྲུས་དང་ལྡན་པ་ཡིན། ཤིན་ཏུ་སྦྱངས་པའི་བརྩོན་འགྲུས་དང་ལྡན་པ་ཡིན། མི་མཉམ་པ་དང་མཉམ་པའི་བརྩོན་འགྲུས་དང་ལྡན་པ་ཡིན། མི་འཕྲོགས་པའི་བརྩོན་འགྲུས་དང་ལྡན་པ་ཡིན། སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་བརྩོན་འགྲུས་དང་ལྡན་པ་ཡིན་ཚུལ་དང་མི་ཚུལ་བ་བྱེ་བྲག་ཕྱེད་པའི་བརྩོན་འགྲུས་དང་ལྡན་པ་ཡིན་ཏེ། ཕྱིར་ཞིང་དེའི་བསམ་པའི་ཁམས་ཡོངས་སུ་དག་པར་འགྱུར་རོ། །ལྷག་པའི་བསམ་པའི་ཁམས་དང་རྣམ་པར་མི་འབྲལ་ལོ། །མོས་པའི་ཁམས་ཀྱང་ཤིན་ཏུ་བྱང་བར་འགྱུར་རོ། །དགེ་བའི་རྩ་བ་རྣམ་པར་འཕེལ་བ་ཡང་ཡོངས་སུ་སྐྱེའོ། །འཇིག་རྟེན་གྱི་དྲི་མའི་རྙོག་པ་དང་ཡང་བྲལ་བར་འགྱུར་རོ། །ཐེ་ཙོམ་དང་ཡིད་གཉིས་དང་ནེམ་ནུར་ཡང་རྒྱུན་ཆད་པར་འགྱུར་རོ། །ནེམ་ནུར་མེད་པ་ལ་མངོན་སུམ་དུ་གྱུར་པ་ཡང་ཡོངས་སུ་རྫོགས་པར་འགྱུར་རོ། །དགའ་བ་དང་བག་ཡངས་ཀྱང་ཡང་དག་པར་འབྱུང་ངོ་། །དེ་བཞིན་གཤེགས་པ་ལ་དད་པ་རླབས་ཆེན་པོ་ཡང་མངོན་སུམ་དུ་འགྱུར་རོ། །སེམས་ཀྱི་བསམ་པ་ཚད་མེད་པ་ཡང་ཡང་དག་པར་སྐྱེའོ། །དེ་བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པའི་ཚེ་ལྟ་བ་རྒྱ་ཆེན་པོ་དང་སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་ཏེ། ལྟ་བ་རྒྱ་ཆེན་པོ་དང་སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་མང་པོ་དང་། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང་། སངས་རྒྱས་ཁྲག་ཁྲིག་སྟོང་ཕྲག་མང་པོ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་སྣང་བར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་དེ་དག་མཐོང་ནས་བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང་བསོད་སྙོམས་དང་། གཟིམས་ཆ་དང་སྙུན་གྱི་རྐྱེན་སྨན་དང་ཡོ་བྱད་དག་ཀྱང་འབུལ་ཞིང་བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་ཚོགས་རྣམས་ལ་ཡང་ཡང་དག་པར་མཆོད་པ་བྱེད་དེ། དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་བསྙེན་བཀུར་བ་བྱེད་ཅིང་དེ་དག་གིས་ཆོས་བསྟན་པ་ཡང་རིམ་གྲོར་ཉན་ཅིང་ལེན་ཏོ། །འཛིན་ཏོ་ཐོས་ནས་ཀྱང་ཅི་ཚུལ་དུ་ནན་ཏན་གྱིས་ཡང་དག་པར་སྒྲུབ་བོ། །དེ་དག་ལས་ཕལ་ཆེར་དེ་བཞིན་གཤེགས་པ་དེ་དག་གི་བསྟན་པ་ལ་རབ་ཏུ་འབྱུང་སྟེ། ཕྱིར་ཞིང་དེའི་བསམ་པ་དང་ལྷག་པའི་བསམ་པ་དང་མོས་པ་མཉམ་པ་ཉིད་ཀྱང་རྣམ་པར་དག་པར་འགྱུར་ཏེ། བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པའི་བྱང་ཆུབ་སེམས་དཔའ་དེ་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང་། བསྐལ་པ་ཁྲག་ཁྲིག་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་བསམ་པ་དང་ལྷག་པའི་བསམ་པ་དང་། མོས་པའི་བསམ་པ་མཉམ་པ་ཉིད་རབ་ཏུ་གནས་སོ། །དེའི་དགེ་བའི་རྩ་བ་དེ་དག་ཐམས་ཅད་ཀྱང་ཡོངས་སུ་དག་ཅིང་ཤིན་ཏུ་འོད་གསལ་བར་འགྱུར་རོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། གསེར་གྱི་ས་ལེ་སྦྲམ་དེ་ཉིད་མགར་བ་མཁས་པས་རྒྱན་དུ་བྱས་པ་ནི། དེ་མ་ཡིན་པའི་གསེར་གྱི་ས་ལེ་སྦྲམ་གཞན་རྒྱན་དུ་མ་བྱས་པས་མི་འཕྲོགས་
ཤིང་མི་ཐུབ་པ་ཡིན། ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པའི་དགེ་བའི་རྩ་བ་དེ་དག་ཀྱང་དེ་མ་ཡིན་པའི་བྱང་ཆུབ་སེམས་དཔའི་ས་འོག་མ་རྣམས་ལ་གནས་པའི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བས་མི་འཕྲོགས་ཤིང་མི་ཐུབ་པ་ཡིན། ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན་ནོར་བུ་རིན་པོ་ཆེ་འོད་དང་ལྡན་པ་འོད་ཟེར་གྱི་དཀྱིལ་འཁོར་ཡོངས་སུ་དག་པ་ཅན་སྣང་བ་རབ་ཏུ་གཏོང་བ་ནི་དེ་མ་ཡིན་པའི་རིན་པོ་ཆེའི་རྣམ་པས་མི་འཕྲོགས་ཤིང་མི་ཐུབ་པ་ཡིན། རླུང་ལངས་པ་དང་ཆུ་དང་ཆར་བབ་པས་འོད་མི་ཆོད་པ་ཡིན། ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་ས་འོད་འཕྲོ་བ་ཅན་འདི་ལ་གནས་པ་ཡང་དེ་མ་ཡིན་པའི་ས་འོག་མ་ལ་གནས་པའི་བྱང་ཆུབ་སེམས་དཔའ་རྣམས་ཀྱིས་མི་འཕྲོགས་ཤིང་མི་ཐུབ་པ་ཡིན། བདུད་དང་ཉོན་མོངས་པའི་རྒྱུད་རྣམས་ཀྱིས་ཡེ་ཤེས་མི་ཆོད་པ་ཡིན། དེའི་བསྡུ་བའི་དངོས་པོ་བཞི་ལས་དོན་མཐུན་པའི་ཤས་ཆེ་བ་ཡིན། ཕ་རོལ་ཏུ་ཕྱིན་པ་བཅུ་ལས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་སྒྲུབ་པ་མ་ཡིན་ནོ། །ཀྱེ་རྒྱལ་བའི་སྲས་དག་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ས་བཞི་པ་སྟེ་འོད་འཕྲོ་བ་ཅན་ཞེས་བྱའོ། །དེ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕལ་ཆེར་ལྷའི་རྒྱལ་པོ་རབ་འཚེ་མར་འགྱུར་ཏེ། སེམས་ཅན་རྣམས་ཀྱི་འཇིག་ཚོགས་ལ་ལྟ་བ་མང་པོ་ཡང་དག་པར་གཞོལ་བ་ལ་མཁས་ཤིང་མཐུ་ཡོད་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་འཐུན་པས་དགེ་བའི་རྩ་བ་གང་ཅི་ཙམ་ཡང་རུང་སྟེ། དེ་ཐམས་ཅད་ཇི་ལྟར་ན་
སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས། ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང་། ཆོས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་། ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་། མི་འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས་རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་། མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་ཁྲག་ཁྲིག་རབ་ཏུ་ཐོབ་ཅིང་དེ་དག་ལ་སྙོམས་པར་འཇུག་པ་དང་། སངས་རྒྱས་ཁྲག་ཁྲིག་མཐོང་ཞིང་དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་ཁྲག་ཁྲིག་སྐྱོད་པ་དང་། སངས་རྒྱས་ཀྱི་ཞིང་ཁྲག་ཁྲིག་དུ་འགྲོ་བ་དང་། འཇིག་རྟེན་གྱི་ཁམས་ཁྲག་ཁྲིག་སྣང་བར་བྱ་བ་དང་། སེམས་ཅན་ཁྲག་ཁྲིག་ཡོངས་སུ་སྨིན་པར་བྱ་བ་དང་། བསྐལ་པ་ཁྲག་ཁྲིག་དུ་གནས་པར་བྱ་བ་དང་། སྔོན་གྱི་མཐའ་དང་། ཕྱི་མའི་མཐའི་བསྐལ་པ་ཁྲག་ཁྲིག་ལ་རབ་ཏུ་འཇུག་པ་དང་། ཆོས་ཀྱི་སྒོ་ཁྲག་ཁྲིག་རྣམ་པར་འབྱེད་པ་དང་། ལུས་ཁྲག་ཁྲིག་ཡོངས་སུ་བསྟན་པ་དང་། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་ཁྲག་ཁྲིག་ཡང་དག་པར་བསྟན་པར་བྱ་བའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཅད་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དམ་རྫུ་འཕྲུལ་ལམ། མིག་གམ། སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་
བྱེད་པ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའ་འོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང་། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ས་གསུམ་འོད་བྱེད་པ་ལ་ཤིན་ཏུ་སྦྱངས་བྱས་ཤིང་། །ནམ་མཁའི་ཁམས་དང་ཡིད་ཀྱི་ཁམས་དང་ཁམས་གསུམ་དང་། །སེམས་ཅན་སྤྱོད་དང་ཆོས་དང་འཇིག་རྟེན་དཔྱོད་བྱེད་ཅིང་། །མོས་དང་བསམ་པ་རྣམ་པར་དག་པ་ཡང་དག་གནོན། །འོད་འཕྲོ་ཡོད་པའི་ས་ཐོབ་འཕྲལ་དུ་མཐུ་ཆེན་རྣམས། །སྟོན་པའི་རིགས་སུ་ཡང་དག་སྐྱེས་པས་ཕྱིར་མི་ལྡོག །སངས་རྒྱས་ཆོས་དང་དགེ་འདུན་དཀོན་མཆོག་དང་མི་ཕྱེད། །སྐྱེ་ཞིང་འཇིག་དང་གནས་པ་བྱེད་པ་མེད་པ་ལྟར། །འཇིག་རྟེན་རྒྱུ་བའི་ལས་དང་བྱེད་དང་སྲིད་སྐྱེ་དང་། །མྱ་ངན་འདས་འཁོར་ཞིང་དང་སེམས་ཅན་རྣམ་པར་སྒོམ། །སྔོན་དང་ཕྱི་མཐའ་ཟད་དང་སྐྱེ་མེད་གྲུབ་པ་དང་། །ལས་ལ་སྟོན་པའི་རིགས་ཀྱི་རྗེས་སུ་འབྲང་ཞིང་སྒོམ། །དེ་དག་འདི་འདྲའི་ཆོས་ལྡན་ཕན་དང་བདེར་སེམས་པ། །ལུས་དང་དྲན་པ་ཚོར་བ་སེམས་དང་ཆོས་སྒོམ་སྟེ། །དྲན་པ་ཉེ་བར་གཞག་བསྒོམ་བརྟེན་པ་རྣམ་སྤངས་པ། །ཕྱི་དང་ནང་དང་གཉིས་ཀའི་རྣམ་པར་མཁས་པ་སྒོམ། །སྡིག་ཏོ་ཟད་ཅིང་དགེ་ཆོས་རྣམ་པར་འཕེལ་འགྱུར་བའི། །ཡང་དག་སྤོང་བ་བཞི་ལའང་མཁས་པ་སྒོམ་པ་བྱེད། །རྫུ་འཕྲུལ་རྐང་པ་བཞི་དང་སྟོབས་དང་དབང་པོ་དང་། །བྱང་ཆུབ་ཡན་ལག་རིན་ཆེན་ལམ་རབ་ཡིད་འོང་སྒོམ། །དེ་དག་ཀུན་ཀྱང་འགྲོ་ལ་ལྟ་བའི་བློ་སྒོམ་སྟེ། །སྙིང་བརྩེ་བྱམས་པ་སྔོན་འགྲོ་སྨོན་ལམ་ཉེ་བར་རྟོན། །སྟོབས་ཀྱི་དམ་པ་གོ་འཕང་མཆོག་གི་རྗེས་སེམས་ཤིང་། ། ཐམས་ཅད་མཁྱེན་པའི་ཡེ་ཤེས་སངས་
རྒྱས་ཞིང་ལ་སྨོན། །སྟོན་པའི་འཇིགས་མེད་རྣམས་དང་ཆོས་རྣམས་འཕྲོགས་མེད་དང་། །སངས་རྒྱས་གསུང་གི་མཆོག་ལ་བརྟེན་པ་སྨོན་བྱེད་ཅིང་། །རིན་ཆེན་ལམ་ཟབ་རྣམ་པར་ཐར་པའི་གནས་རྣམས་དང་། །ཆེ་བའི་ཐབས་རྣམས་ཡང་དག་བསྒྲུབ་ཕྱིར་བསྒོམ་པ་བྱེད། །འཇིག་ཚོགས་ལྟ་མེད་ལྟ་བ་དྲུག་ཅུ་གཉིས་ཀྱང་མེད། །བདག་དང་བདག་གི་མེད་ཅིང་སྲོག་ཏུ་དམིགས་པ་མེད། །ཕུང་པོ་སྐྱེ་མཆེད་རྣམས་དང་ཁམས་ཀྱི་གནས་དང་རྟེན། །ཀུན་ཀྱང་མཁས་པས་བཞི་པོའི་ས་ལ་རབ་ཏུ་སྤངས། །དེས་ནི་གང་དང་གང་རྣམས་རྒྱལ་བས་སྨད་མཛད་པའི། །ལས་དང་ཉོན་མོངས་བཅས་པ་དོན་དུ་མི་འགྱུར་རྣམས། །དེ་དག་ཡོངས་སུ་སྤངས་ཤིང་མཁས་པ་ཁོང་ནས་དག །འགྲོ་བ་བསྐྱབ་པའི་དོན་དུ་ལས་རབ་དགེ་ལ་བརྩོན། །མཁས་པ་དེ་ནི་བྱམས་པའི་སེམས་ལྡན་བག་ཀྱང་ཡོད། །མཉེན་འཇམ་སེམས་ལྡན་ཕན་དང་བདེ་བྱེད་དྲན་དང་ལྡན། །དམ་པའི་དོན་རྣམས་ཐམས་ཅད་སྐྱོན་མེད་ཡོངས་སུ་ཚོལ། །ཡེ་ཤེས་དབང་བསྐུར་མངོན་མོས་འགྲོ་བའི་དོན་ཀྱང་བྱས། །བླ་མ་རིམ་གྲོར་བྱེད་དང་ལྡན་ཞིང་ནན་ཏན་བརྩོན། །དྲིན་གཟོ་ཁྲོ་བ་མེད་ཅིང་ང་ལོ་བདེ་དང་ལྡན། །སྒྱུ་མེད་ཐིབས་པོ་མེད་ཅིང་ཤིན་ཏུ་ངེས་པ་སྟེ། །ཡང་དག་སྒྲུབ་བྱེད་བརྩོན་འགྲུས་ཕྱིར་ལྡོག་མེད་པ་ཡིན། །ཡིད་དུ་འོང་བའི་ས་འདི་ལ་ནི་དེ་གནས་ཚེ། །ལྷག་པའི་བསམ་པ་ཉིད་དང་བསམ་དག་འཐོབ་པར་འགྱུར། །མོས་པ་རབ་ཏུ་འབྱུང་འགྱུར་དགེ་ཆོས་རྣམ་པར་འཕེལ། །དྲི་མ་རྙོག་པ་ཐེ་ཙོམ་ཡིད་གཉིས་ཐམས་ཅད་བསྩལ། །འདི་ལ་གནས་པའི་མི་རབ་ཁྱུ་མཆོག་རྒྱལ་བའི་སྲས། །བདེ་གཤེགས་བྱེ་བ་དུ་མ་མངོན་པར་མཆོད་པ་བྱེད། །ཆོས་ཀྱང་ཉན་བྱེད་བསྟན་པ་དེ་ལ་རབ་ཏུ་འབྱུང་། །རྒྱན་དུ་བྱས་པའི་གསེར་ལྟར་མི་འཕྲོགས་ཐུབ་པ་མེད། །མཁས་པ་འདི་ལ་གནས་པའི་ཡོན་ཏན་བསམ་པ་དང་། །ཡེ་ཤེས་ཐབས་དང་སྤྱོད་པ་རྣམ་དག་ལམ་ལ་ཡང་། །རྣམ་པར་བཟློག་པར་བདུད་རྣམས་བྱེ་བས་མི་ནུས་ཏེ། །
རིན་ཆེན་འོད་ལ་རླུང་གིས་ཆོད་པར་མི་འགྱུར་བཞིན། །མི་དང་ལྷས་མཆོད་འོས་པ་འདི་ལ་གནས་པ་ནི། །དབང་ཕྱུག་མཚེ་མའི་དམ་པ་ཆོས་ལ་སྤྱད་པར་འགྱུར། །ལྟ་བའི་ཐིབས་པོ་རྣམས་ལས་སེམས་ཅན་རྣམ་པར་བཟློག །རྒྱལ་བའི་ཡེ་ཤེས་དོན་ཏུ་དགེ་བ་རབ་ཏུ་རྩོམ། །བརྩོན་འགྲུས་ལྡན་པས་མི་ཡི་ཁྱུ་མཆོག་ཁྲག་ཁྲིག་བརྒྱ། །གཞན་དུ་མི་སེམས་ཤིན་ཏུ་མཉམ་པར་གཞག་པས་མཐོང་། །ཡན་ཅད་སྨོན་ལམ་དམ་པ་ཡོན་ཏན་དོན་སྤྱོད་པ། །ཡེ་ཤེས་འབྱུང་གནས་བསྐལ་པ་མང་པོར་མངོན་པར་སྒྲུབ། །དེ་ལྟར་ས་མཆོག་བཞི་པ་འདི། །རྣམ་དག་དག་པའི་སྤྱོད་ལྡན་ཞིང་། །ཡོན་ཏན་ཡེ་ཤེས་དོན་ལྡན་ལ། །བདེ་བར་གཤེགས་པའི་སྲས་ཀྱིས་བསྟན། །འོད་འཕྲོ་ཅན་ཞེས་བྱ་བ་སྟེ། །བྱང་ཆུབ་སེམས་དཔའི་ས་བཞི་པའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་དྲུག་པ། མཁས་པ་རྣམས་ཀྱི་ས་མཆོག་སྤྱོད་པ་ཐོས་གྱུར་ནས། །ཆོས་ཀྱི་ཤེས་པས་རྒྱལ་སྲས་མགུ་ཞིང་དགའ། །དགའ་བའི་ཡིད་ཀྱིས་མཁའ་ལས་མེ་ཏོག་ཆར་ཡང་འབེབས། །བདག་ཉིད་ཆེ་བའི་བདེ་གཤེགས་སྲས་པོ་དགེ་ཞེས་བརྗོད། །ལྷ་ཡི་བདག་པོ་དབང་སྒྱུར་ལྷ་ཡི་ཚོགས་རྣམས་དང་། །དགའ་བས་མཁའ་ལ་འཕགས་ཏེ་བདེ་གཤེགས་མཆོད་པའི་ཕྱིར། །མེ་ཏོག་སྣ་ཚོགས་སྤྲིན་ཆེན་མདོག་སྡུག་ཡིད་འོང་བ། །དགའ་ཞིང་མོས་པས་བདེ་བར་གཤེགས་ལ་མངོན་པར་གཏོར། །གླུ་དབྱངས་སྙན་པ་ཡིད་འོང་སིལ་སྙན་རྔ་ཡི་སྒྲ། །ལྷ་ཚོགས་མང་པོས་རྒྱལ་བ་མཆོད་པའི་དོན་དུ་བྱས། །རྒྱལ་བ་དེ་ཚེ་རབ་ཏུ་འཕྲུལ་པའི་སྐུ་ཡང་སྟོན། །སྒྲ་དབྱངས་རྣམ་པ་ཀུན་ལས་འདི་འདྲའི་སྒྲ་བྱུང་ངོ་། །ཡུན་རིང་མཆོག་གིས་ཐུབ་པའི་དགོངས་པ་རྫོགས། །ཡུན་རིང་མཆོག་གིས་ཐུབ་པས་བྱང་ཆུབ་བརྙེས། །ལྷ་མི་ཕན་པ་ཡུན་རིང་མཆོག་གིས་
མཐོང་། །ལྷ་ཡི་གནས་སུ་ཤཱཀྱ་ཐུབ་པ་གཤེགས། །ཡུན་རིང་མཆོག་གིས་རྒྱ་མཚོའི་ཆུ་ཡང་གཡོས། །ཡུན་རིང་མཆོག་གིས་འོད་བཟང་ཐུབ་པས་བཀྱེ། །ཡུན་རིང་མཆོག་གིས་སེམས་ཅན་བདེ་བར་གྱུར། །ཐུགས་རྗེ་ཆེ་གསུང་ཡུན་རིང་མཆོག་གིས་ཐོས། །ཡུན་རིང་མཆོག་གིས་ཐུབ་པ་ཆེ་དང་ཕྲད། །ཡོན་ཏན་ཀུན་གྱི་མཐར་ཕྱིན་ད་བྱོན་ཏོ། །ང་རྒྱལ་དྲེགས་སྙེམས་མུན་པ་ཀུན་སྤངས་ཏེ། །མཚུངས་མེད་མཆོད་པར་འོས་ལ་མཆོད་པ་གྱིས། །དེ་ལ་མཆོད་བྱས་བདེ་འགྲོའི་ལམ་དུ་འགྲོ། །དེ་ལ་མཆོད་བྱས་བདེ་བ་རྣམ་པ་མང་། །དེ་ལ་མཆོད་བྱས་སྡུག་བསྔལ་ཐམས་ཅད་འབྱང་། །དེ་ལ་མཆོད་བྱས་རྒྱལ་བའི་ཡེ་ཤེས་འཐོབ། །རྒྱལ་བ་མཁའ་ལྟར་རྣམ་པར་དག་པ་སྟེ། །འགྲོ་བས་མི་གོས་པད་མའི་ཆུ་དང་འདྲ། །ཤིན་ཏུ་འཕགས་པ་རྒྱ་མཚོའི་རི་རབ་བཞིན། །སྤྲོ་བའི་སེམས་ཀྱིས་རྒྱལ་བ་མཆོད་གྱིས་ཤིག །དེ་སྐད་དབྱངས་སུ་བརྗོད་བྱས་ནས། །ལྷ་ཡི་བུ་མོ་བརྒྱ་མང་བ། །དགའ་བས་རྒྱས་པས་རབ་ཏུ་བལྟ། །ཤིན་ཏུ་དགའ་བས་རིམ་གྲོ་བྱེད། །དེ་ནས་རྡོ་རྗེའི་སྙིང་པོ་ལ། །རྣམ་ཐར་ཟླ་བས་སྨྲས་པ་ནི། །ས་ལྔའི་རྣམ་པ་ཅི་འདྲ་བ། །རྒྱལ་བའི་སྲས་ཀྱིས་བཤད་པར་མཛོད། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་ས་བཞི་པ་ལ་སའི་ལམ་ཡོངས་སུ་རྫོགས་པ་ནི་བྱང་ཆུབ་སེམས་དཔའི་ས་ལྔ་པ་ལ་འཇུག་སྟེ། དེ་སེམས་ཀྱི་བསམ་པ་རྣམ་པར་དག་པའི་མཉམ་པ་ཉིད་བཅུས་འཇུག་གོ །བཅུ་གང་ཞེ་ན་འདི་ལྟ་སྟེ། འདས་པའི་སངས་རྒྱས་ཀྱི་ཆོས་ཀྱིས་བསམ་པ་རྣམ་པར་དག་པ་མཉམ་པ་ཉིད་དང་། མ་བྱོན་པའི་སངས་རྒྱས་ཀྱི་ཆོས་ཀྱིས་བསམ་པ་རྣམ་པར་དག་པ་མཉམ་པ་ཉིད་དང་། ད་ལྟར་བྱུང་བའི་སངས་རྒྱས་ཀྱི་ཆོས་ཀྱིས་བསམ་པ་རྣམ་པར་དག་པ་མཉམ་པ་ཉིད་དང་། ཚུལ་ཁྲིམས་ཀྱིས་བསམ་པ་རྣམ་པར་དག་པ་
མཉམ་པ་ཉིད་དང་། སེམས་ཀྱིས་བསམ་པ་རྣམ་པར་དག་པ་མཉམ་པ་ཉིད་དང་། ལྟ་བ་དང་ནེམ་ནུར་དང་དོགས་པ་བསྩལ་བས་བསམ་པ་རྣམ་པར་དག་པ་མཉམ་པ་ཉིད་དང་། ལམ་དང་ལམ་མ་ཡིན་པ་ཤེས་པས་བསམ་པ་རྣམ་པར་དག་པ་མཉམ་པ་ཉིད་དང་། ནན་ཏན་དང་སྤོང་བ་ཤེས་པས་བསམ་པ་རྣམ་པར་དག་པ་མཉམ་པ་ཉིད་དང་། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་གོང་ནས་གོང་དུ་རྣམ་པར་སྒོམ་པས་བསམ་པ་རྣམ་པར་དག་པ་མཉམ་པ་ཉིད་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་རྣམ་པར་དག་པ་མཉམ་པ་ཉིད་དེ། ཀྱེ་རྒྱལ་བའི་སྲས་དག །སེམས་ཀྱི་བསམ་པ་རྣམ་པར་དག་པ་བཅུ་པོ་འདི་དག་གིས་དེ་ལ་འཇུག་སྟེ། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའི་ས་ལྔ་པ་ཐོབ་པའི་བྱང་ཆུབ་སེམས་དཔའ་དེ་ནི་བྱང་ཆུབ་ཀྱི་ཕྱོགས་དང་ལམ་གྱི་ཡན་ལག་དེ་དག་ཉིད་ལ་སྦྱང་བ་ཤིན་ཏུ་བྱས་ཤིང་། ལྷག་པའི་བསམ་པ་ཤིན་ཏུ་སྦྱངས་པས་དེའི་གོང་དུ་ལམ་གྱི་ཁྱད་པར་ཚོལ་ཞིང་དེ་བཞིན་ཉིད་ཀྱི་རྗེས་སུ་ཞུགས་པ་དང་། སྨོན་ལམ་གྱི་མཐུ་དང་། ཤུགས་དང་སྙིང་རྗེ་དང་། བྱམས་པས་སེམས་ཅན་ཡོངས་སུ་མི་གཏོང་བ་དང་། བསོད་ནམས་དང་ཡེ་ཤེས་ཀྱི་ཚོགས་རབ་ཏུ་བསྩགས་པ་དང་། ཡོངས་སུ་རྒྱུན་འཆད་པ་མེད་པ་དང་། ཐབས་ལ་མཁས་པས་མངོན་པར་སྒྲུབ་པ་དང་། གོང་ནས་གོང་དུ་སའི་སྣང་བ་བལྟ་བ་དང་། དེ་བཞིན་གཤེགས་པའི་བྱིན་གྱི་རླབས་བཙལ་བ་དང་། དྲན་པ་དང་བློ་གྲོས་དང་། རིག་པ་དང་། བློའི་སྟོབས་དང་། ཤུགས་ཀྱིས་ཡིད་ལ་བྱ་བའི་ཕྱིར་མི་ཟློག་པར་བྱས་ཏེ། འདི་ནི་སྡུག་བསྔལ་འཕགས་པའི་བདེན་པ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདི་ནི་སྡུག་བསྔལ་ཀུན་འབྱུང་བ། འདི་ནི་སྡུག་བསྔལ་ཀུན་འགོག་པ། འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། དེ་ཀུན་རྫོབ་ཀྱི་བདེན་པ་ལ་མཁས་
པ་ཡིན། དོན་དམ་པའི་བདེན་པ་ལ་མཁས་པ་ཡིན། མཚན་ཉིད་ཀྱི་བདེན་པ་ལ་མཁས་པ་ཡིན། རྣམ་པར་དབྱེ་བའི་བདེན་པ་ལ་མཁས་པ་ཡིན། བརྟག་པའི་བདེན་པ་ལ་མཁས་པ་ཡིན། དངོས་པོའི་བདེན་པ་ལ་མཁས་པ་ཡིན། འབྱུང་བའི་བདེན་པ་ལ་མཁས་པ་ཡིན། བྱང་ཞིང་མི་སྐྱེ་བའི་བདེན་པ་ལ་མཁས་པ་ཡིན། ལམ་གྱི་ཡེ་ཤེས་ལ་འཇུག་པའི་བདེན་པ་ལ་མཁས་པ་ཡིན། བྱང་ཆུབ་སེམས་དཔའི་སའི་རིམ་པ་མཚམས་སྦྱར་བ་བསྒྲུབ་པར་བྱ་བས་དེ་བཞིན་གཤེགས་པའི་ཡེ་ཤེས་ཡང་དག་པར་བསྐྱེད་པའི་བར་དུ་མཁས་པ་ཡིན་ཏེ། དེ་སེམས་ཅན་གཞན་དང་གང་ཟག་གཞན་ལ་བསམ་པ་ཇི་ལྟ་བ་བཞིན་དུ་ཤིན་ཏུ་དགའ་བར་བྱེད་པས་ཀུན་རྫོབ་ཀྱི་བདེན་པ་ཡང་རབ་ཏུ་ཤེས་སོ། །ཐེག་པ་གཅིག་ཏུ་ཡང་དག་པར་གཞོལ་བས་དོན་དམ་པའི་བདེན་པ་ཡང་རབ་ཏུ་ཤེས་སོ། །ཆོས་ཀྱི་རང་གི་མཚན་ཉིད་ཁོང་དུ་ཆུད་པས་མཚན་ཉིད་ཀྱི་བདེན་པ་ཡང་རབ་ཏུ་ཤེས་སོ། །ཆོས་ཀྱི་བྱེ་བྲག་རྣམ་པར་དགོད་པ་ཁོང་དུ་ཆུད་པས་རྣམ་པར་དབྱེ་བའི་བདེན་པ་ཡང་རབ་ཏུ་ཤེས་སོ། །ཕུང་པོ་དང་ཁམས་དང་སྐྱེ་མཆེད་རྣམ་པར་དགོད་པས་རྟོག་པའི་བདེན་པ་ཡང་རབ་ཏུ་ཤེས་སོ། །ལུས་དང་སེམས་ལ་གནོད་པ་ཉམས་སུ་འབབ་པས་དངོས་པོའི་བདེན་པ་ཡང་རབ་ཏུ་ཤེས་སོ། །འགྲོ་བའི་རྒྱུད་ཀྱི་མཚམས་སྦྱོར་བས་འབྱུང་བའི་བདེན་པ་ཡང་རབ་ཏུ་ཤེས་སོ། །རིམས་དང་ཡོངས་སུ་གདུང་བ་ཐམས་ཅད་ཤིན་ཏུ་ཞི་བས་བྱང་ཞིང་མི་སྐྱེ་བའི་བདེན་པ་ཡང་རབ་ཏུ་ཤེས་སོ། །མི་གཉིས་པས་མངོན་པར་བསྒྲུབས་པས་ལམ་གྱི་ཡེ་ཤེས་ལ་འཇུག་པའི་བདེན་པ་ཡང་རབ་ཏུ་ཤེས་སོ། །རྣམ་པ་ཐམས་ཅད་དུ་མངོན་པར་འཚང་རྒྱ་བ་དང་། བྱང་ཆུབ་སེམས་དཔའི་སའི་རིམ་པ་ཐམས་ཅད་མཚམས་སྦྱོར་བ་རབ་ཏུ་བསྒྲུབ་པས་དེ་བཞིན་གཤེགས་པའི་ཡེ་ཤེས་ཡང་དག་པར་འབྱུང་བའི་བདེན་པ་ཡང་རབ་ཏུ་ཤེས་སོ། །དེའང་མོས་པས་ཤེས་པའི་སྟོབས་དང་ཤུགས་ཀྱིས་ཏེ་ལྷག་མ་མ་ལུས་པར་ཡེ་
ཤེས་ཁོང་དུ་ཆུད་པས་ནི་མ་ཡིན་ནོ། །དེ་དེ་ལྟར་བདེན་པ་ལ་མཁས་པ། མངོན་པར་བསྒྲུབ་པའི་བློས་འདུས་བྱས་ཐམས་ཅད་གསོབ་གསོག་བརྫུན་པ་བསླུ་བའི་ཆོས་ཅན་དཀུ་བྱེད་པ། བྱིས་པ་འདྲིད་པར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། དེ་སྔོན་བས་ཀྱང་སེམས་ཅན་ཐམས་ཅད་ལ་སྙིང་རྗེ་མངོན་དུ་འགྱུར་རོ། །བྱམས་པ་ཆེན་པོའི་སྣང་བ་ཡང་རབ་ཏུ་འབྱུང་སྟེ། དེ་དེ་ལྟར་ཡེ་ཤེས་ཀྱི་སྟོབས་དང་ཤུགས་རབ་ཏུ་ཐོབ་ཅིང་སེམས་ཅན་ཐམས་ཅད་ལ་ལྟ་བ་དང་། སངས་རྒྱས་ཀྱི་ཡེ་ཤེས་ལ་མངོན་པར་མོས་པས་འདུ་བྱེད་ཀྱི་རྣམ་པ་ཐམས་ཅད་ཀྱི་སྔོན་གྱི་མཐའ་དང་ཕྱི་མའི་མཐའ་རབ་ཏུ་རྟོག་སྟེ། འདི་ལྟར་སྔོན་གྱི་མཐའི་མ་རིག་པ་དང་། སྲིད་པ་དང་སྲེད་པ་ལས་རབ་ཏུ་བྱུང་བའི་སེམས་ཅན་འཁོར་བའི་རྒྱུད་དུ་འབབ་པ། ཕུང་པོའི་གནས་ལས་མ་འཕགས་པ། སྡུག་བསྔལ་གྱི་ཕུང་པོ་བདག་མེད་པ། སེམས་ཅན་མེད་པ། སྲོག་མེད་པ། གསོ་བ་མེད་པ། གང་ཟག་མེད་པ། བདག་དང་བདག་གི་དང་བྲལ་བ་རྣམ་པར་འཕེལ་ལོ། །ཞེས་དེའང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདི་ལྟར་ཕྱི་མའི་མཐའི་མེད་པ་ལ་རྨོངས་པའི་འདོད་པ་འདི་ཉིད་རྒྱུན་གཅོད་པ་དང་མཐར་དབྱུང་བ་དང་། འབྱུང་བར་བྱ་བ་དང་། ཡོད་པ་དང་མེད་པ་དེ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། དེ་འདི་སྙམ་དུ་སེམས་སོ། །དེ་ལྟར་ལུས་གྲངས་མེད་པ་ཞིག་འགགས་ལ་འགག་པར་འགྱུར་ཞིང་འགག་བཞིན་ཏེ། འདི་ལྟར་རྒུད་པར་འགྱུར་ཡང་ལུས་ལ་སྐྱོ་བ་མི་སྐྱེད་ཅིང་སྡུག་བསྔལ་གྱི་འཁྲུལ་འཁོར་ཇེ་བས་ཇེ་འཕེལ་དུ་བྱེད་པ་དང་། འཁོར་བའི་རྒྱུད་ལས་ཕྱིར་མི་ལྡོག་ཅིང་ཕུང་པོའི་གནས་མི་གཏོང་བ་དང་། ཁམས་ཀྱི་སྦྲུལ་གྱིས་སྐྱོ་བར་མི་འགྱུར་བ་དང་། ང་རྒྱལ་དང་ལྟ་བའི་ཟུག་རྔུ་མི་འབྱིན་ཅིང་འདོད་ཆགས་དང་ཞེ་སྡང་དང་གཏི་མུག་
གི་མེ་ལྕེ་འབར་བ་ཞི་བར་མི་བྱེད་པ་དང་། མ་རིག་པའི་མུན་པ་ཆེན་པོ་མི་སེལ་ཅིང་སྲིད་པའི་མཚོ་མི་སྐེམ་ལ་སྟོབས་བཅུའི་དེད་དཔོན་མི་ཚོལ་ཞིང་བདུད་ཀྱི་བསམ་པ་ཐིབས་པོའི་རྗེས་སུ་སོང་སྟེ་འཁོར་བའི་རྒྱ་མཚོ་རྣམ་པར་རྟོག་པ་སྣ་ཚོགས་ཀྱི་ཆུ་སྲིན་གྱིས་དཀྲུགས་པས་ཡོངས་སུ་གཡེང་བར་འཁོད་ཅིང་བྱིས་པ་སོ་སོའི་སྐྱེ་བོ་དེ་དག་དེ་ལྟར་མི་ཤེས་ཤིང་རྨོངས་པ་ནི་ངོ་མཚར་ཆེས་མ་ལ་བདག་གིས་སེམས་ཅན་དེ་ལྟར་སྡུག་བསྔལ་གྱིས་མནར་བ། མགོན་མེད་པ། དཔུང་གཉེན་མེད་པ། སྐྱབས་མེད་པ། གནས་མེད་པ། གཞི་མེད་པ། རྟེན་མེད་པ། ལོང་བར་གྱུར་པ། མ་རིག་པའི་སྒོ་ངའི་སྦུབས་དང་། བྲིས་ཡོག་པ། མུན་པས་ཁེབས་པ་དེ་དག་གི་དོན་དུ་བདག་གཅིག་པུ་གཉིས་སུ་མེད་པས་བསོད་ནམས་དང་། ཡེ་ཤེས་ཀྱི་ཚོགས་ཀྱི་རྣམ་པར་བསྩགས་པར་བྱ་བ་ཇི་ལྟ་བུར་བསྩགས་པས་སེམས་ཅན་དེ་དག་ཤིན་ཏུ་རྣམ་པར་དག་པ་འཐོབ་པར་འགྱུར་བ་དང་། སྟོབས་བཅུའི་སྟོབས་ཀྱི་ཡེ་ཤེས་ཆགས་པ་མེད་པའི་བར་གྱི་མཐར་ཐུག་པ་ཐོབ་པར་འགྱུར་བའི་རྣམ་པ་དེ་ལྟ་བུའི་བསོད་ནམས་དང་ཡེ་ཤེས་ཀྱི་ཚོགས་བསྩགས་པར་བྱའམ་ཅི་སྙམ་སྟེ། དེ་དེ་ལྟར་ཤིན་ཏུ་བརྟགས་པའི་ཡེ་ཤེས་ཀྱིས་མངོན་པར་བསྒྲུབ་པའི་བློས་དགེ་བའི་རྩ་བ་གང་ཅི་རྩོམ་ཡང་དེ་དག་ཐམས་ཅད་སེམས་ཅན་ཐམས་ཅད་ཡོངས་སུ་བསྐྱབ་པ་དང་། སེམས་ཅན་ཐམས་ཅད་ལ་ཕན་པ་དང་། སེམས་ཅན་ཐམས་ཅད་ལ་བདེ་བ་དང་། སེམས་ཅན་ཐམས་ཅད་ལ་སྙིང་བརྩེ་བ་དང་། སེམས་ཅན་ཐམས་ཅད་ལ་གཙེ་བ་མེད་པ་དང་། སེམས་ཅན་ཐམས་ཅད་ཡོངས་སུ་དགྲོལ་བ་དང་། སེམས་ཅན་ཐམས་ཅད་དྲང་བ་དང་། སེམས་ཅན་ཐམས་ཅད་དད་པར་བྱ་བ་དང་། སེམས་ཅན་ཐམས་ཅད་གདུལ་བ་དང་། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བའི་ཕྱིར་རབ་ཏུ་རྩོམ་སྟེ། བྱང་ཆུབ་སེམས་དཔའི་
ས་ལྔ་པ་ཤིན་ཏུ་རྒྱལ་བར་དཀའ་བ་འདི་ལ་གནས་པའི་བྱང་ཆུབ་སེམས་དཔའ་དེ་ནི། དེ་བས་ཀྱང་ཉམས་པར་མི་འགྱུར་བའི་ཆོས་ཉིད་ཀྱིས་དྲན་པ་དང་ལྡན་པ་ཡིན། ཤིན་ཏུ་ངེས་པར་རྟོགས་པའི་ཡེ་ཤེས་ཀྱི་བློ་གྲོས་དང་ལྡན་པ་ཡིན། མདོའི་དོན་དང་ཚུལ་དང་ལྡེམ་པོའི་ངག་ཁོང་དུ་ཆུད་པས་རིག་པ་དང་ལྡན་པ་ཡིན། བདག་དང་གཞན་གྱི་རྗེས་སུ་སྲུང་བས་ངོ་ཚ་ཤེས་ཤིང་ཁྲེལ་ཡོད་པ་ཡིན། སྡོམ་པ་དང་ཚུལ་མ་བོར་བས་དགའ་བ་དང་ལྡན་པ་ཡིན། གནས་དང་གནས་མ་ཡིན་པ་ལ་མཁས་ཤིང་ཤིན་ཏུ་བརྟགས་པས་བློ་དང་ལྡན་པ་ཡིན། གཞན་གྱི་དྲིང་མི་འཇོག་པས་ཡེ་ཤེས་དང་ལྡན་པ་ཡིན། དོན་དང་དོན་མ་ཡིན་པའི་ཚིག་ཡང་དག་པར་དབྱེ་བ་ལ་མཁས་པས་ཤེས་རབ་དང་ལྡན་པ་ཡིན། བསྒོམ་པ་མངོན་པར་བསྒྲུབ་པ་ལ་མཁས་པས་མངོན་པར་ཤེས་པ་བསྒྲུབ་པ་ཐོབ་པ་ཡིན། འཇིག་རྟེན་གྱི་རྗེས་སུ་འབྲང་བས་ཐབས་ལ་མཁས་པ་ཡིན། བསོད་ནམས་ཀྱི་ཚོགས་ཉེ་བར་སྩོགས་པས་ངོམས་མི་ཤེས་པ་ཡིན། ཡེ་ཤེས་ཀྱི་ཚོགས་ཡོངས་སུ་ཚོལ་བས་བརྩོན་འགྲུས་རྒྱུན་མི་འཆད་པ་ཡིན། བྱམས་པ་དང་སྙིང་རྗེ་ཆེན་པོའི་ཚོགས་ཡང་དག་པར་སོགས་པས་སྐྱོ་བ་མེད་པའི་བསམ་པ་དང་ལྡན་པ་ཡིན། དེ་བཞིན་གཤེགས་པའི་སྟོབས་དང་མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་ཡོངས་སུ་ཚོལ་བས་སྙོམ་ལས་མེད་པར་ཡོངས་སུ་ཚོལ་བ་ལ་བརྩོན་པ་ཡིན། སངས་རྒྱས་ཀྱི་ཞིང་བསྒྲུབ་པ་དང་། རྒྱན་མངོན་པར་ཤོམ་པས་མངོན་པར་བསྒྲུབ་པའི་ཡིད་དང་ལྡན་པ་ཡིན། མཚན་དང་དཔེ་བྱད་བཟང་པོ་ཡང་དག་པར་བསྒྲུབ་པས་དགེ་བ་རྣམ་པ་སྣ་ཚོགས་ལ་བརྩོན་པ་ཡིན། དེ་བཞིན་གཤེགས་པའི་སྐུ་དང་གསུང་དང་ཐུགས་ཀྱི་རྒྱན་ཡོངས་སུ་ཚོལ་བས། རྟག་ཏུ་རྒྱུན་མི་འཆད་པར་བརྩོན་པ་ཡིན། བྱང་ཆུབ་སེམས་དཔའ་དང་ཆོས་སྨྲ་བ་ཐམས་ཅད་ལ་རིམ་གྲོ་བྱེད་པས་བསྙེན་བཀུར་དང་། སྲི་ཞུ་ཆེན་པོའི་ངང་
ཚུལ་ཅན་ཡིན། བྱང་ཆུབ་ཀྱི་སེམས་དང་ཐབས་མཁས་པ་ཆེན་པོའི་ངང་ཚུལ་དང་ལྡན་པར་འཇིག་རྟེན་དུ་རྒྱུ་བས་ཁོང་ཁྲོ་བ་མེད་པའི་སེམས་དང་ལྡན་པ་ཡིན། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་མངོན་པར་བརྩོན་པས་ཉིན་མཚན་དུ་གཞན་དུ་སེམས་པའི་ཡིད་ཡོངས་སུ་སྤངས་པ་ཡིན་ཏེ། དེ་དེ་ལྟར་མངོན་པར་བརྩོན་པས་སྦྱིན་པས་ཀྱང་སེམས་ཅན་ཡོངས་སུ་སྨིན་པར་བྱེད་དོ། །ངག་སྙན་པ་དང་། དོན་བསྒྲུབ་པ་དང་། དོན་མཐུན་པ་དང་གཟུགས་ཀྱི་ལུས་ཀུན་ཏུ་བསྟན་པ་དང་། ཆོས་བཤད་པ་དང་། བྱང་ཆུབ་སེམས་དཔའི་སྤྱོད་པ་བརྗོད་པ་དང་། དེ་བཞིན་གཤེགས་པའི་ཆེ་བ་ཉིད་སྨོས་པ་དང་། འཁོར་བའི་ཉེས་པ་བསྟན་པ་དང་། སངས་རྒྱས་ཀྱི་ཡེ་ཤེས་ཀྱི་ཡོན་ཏན་ཡོངས་སུ་གྲག་པར་བྱ་བ་དང་། རྫུ་འཕྲུལ་དང་རྣམ་པར་འཕྲུལ་པ་ཆེན་པོ་མངོན་པར་བསྒྲུབ་པ་དང་། བྱ་བ་དང་ཐབས་རྣམ་པ་སྣ་ཚོགས་ཀྱི་སྦྱོར་བས་སེམས་ཅན་ཡོངས་སུ་སྨིན་པར་བྱེད་དོ། །དེ་ལྟར་སེམས་ཅན་ཡོངས་སུ་སྨིན་པར་བྱ་བ་ལ་མངོན་པར་བརྩོན་པ་དང་ལྡན་ཞིང་སངས་རྒྱས་ཀྱི་ཡེ་ཤེས་ཀྱི་རྗེས་སུ་སོང་བའི་བསམ་པ་ཅན་དགེ་བའི་རྩ་བ་ཕྱིར་མི་ལྡོག་པའི་སྦྱོར་བ་དང་ལྡན་པ། ཁྱད་པར་ཅན་གྱི་ཆོས་ཡོངས་སུ་བཙལ་བ་ལ་མངོན་པར་བརྩོན་པ་དེ་གང་འདི་འཇིག་རྟེན་ན་ཡོད་པའི་ཡི་གེ་དང་གཙུག་ལག་དང་། ལག་བརྡ་དང་། གྲངས་དང་། རྩིས་དང་། ཤོད་ཐབས་ལས་སྩོགས་པ་དང་། ཁམས་ཀྱི་ཆོ་ག་དང་། གསོ་བའི་ཆོ་ག་དང་། སྐེམ་པ་དང་། བརྗོད་བྱེད་དང་། འབྱུང་པོའི་གདོན་བསལ་བ་དང་། དུག་དང་རོ་ལངས་ཀྱི་སྦྱོར་བ་བསལ་བ་དང་། རང་བཟོ་དང་གར་གྱི་ཆོ་ག་དང་། གཏམ་དང་། རོལ་མོ་དང་། སྒྲུང་གཏམ་དགའ་བ་བསྐྱེད་པ་དང་། གྲོང་དང་གྲོང་ཁྱེར་དང་། བཟའ་ཤིང་གི་ར་བ་དང་། ཆུ་ཀླུང་དང་། མཚེའུ་དང་། ལྟེང་ཀ་དང་། རྫིང་བུ་དང་། མེ་ཏོག་དང་། ཤིང་ཏོག་དང་། རྩི་དང་། ནགས་ཚལ་མངོན་པར་བསྒྲུབ་པ་དང་། གསེར་དང་། དངུལ་དང་།
ནོར་བུ་དང་། མུ་ཏིག་དང་། བཻ་ཌཱུརྱ་དང་། དུང་དང་། རིན་པོ་ཆེ་ཤི་ལ་དང་། བྱི་རུ་དང་། རིན་པོ་ཆེ་རྣམས་ཀྱི་འབྱུང་གནས་བསྟན་པ་དང་། ཉི་མ་དང་ཟླ་བ་དང་། གཟའ་དང་རྒྱུ་སྐར་དང་། ས་གཡོ་བ་དང་། རི་དགས་ཀྱི་ལྟས་དང་། རྨི་ལམ་དང་། ལྟས་བསྟན་པ་ལ་འཇུག་པ་དང་། ཡན་ལག་དང་། ཉིང་ལག་གི་མཚན་དང་། སྤྱོད་པའི་མཚན་དང་། སྡོམ་པ་དང་། ཚུལ་དང་། བསམ་གཏན་དང་། མངོན་པར་ཤེས་པ་དང་། ཚད་མེད་པ་དང་། གཟུགས་མེད་པའི་གནས་རྣམས་དང་། གཞན་ཡང་གང་སེམས་ཅན་ལ་འཚེ་བར་མི་འགྱུར་བའི་སྦྱོར་བ་དང་། སེམས་ཅན་ཐམས་ཅད་ལ་ཕན་པ་དང་། བདེ་བར་འགྱུར་བ་ཡོད་དགུ་དེ་དག་ཐམས་ཅད་འཇིག་རྟེན་ལ་སྙིང་བརྩེ་བས་རིམ་གྱིས་སངས་རྒྱས་ཀྱི་ཆོས་ལ་རབ་ཏུ་དགོད་པའི་ཕྱིར་མངོན་པར་སྒྲུབ་བོ། །བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་འདི་ལ་གནས་པའི་བྱང་ཆུབ་སེམས་དཔའི་ལྟ་བ་རྒྱ་ཆེན་པོ་དང་། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་ཏེ། ལྟ་བ་རྒྱ་ཆེན་པོ་དང་སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་མང་པོ་དང་། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང་། སངས་རྒྱས་ཁྲག་ཁྲིག་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས་བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང་། བསོད་སྙོམས་དང་། གཟིམས་ཆ་དང་། སྙུན་གྱི་རྐྱེན་སྨན་དང་། ཡོ་བྱད་དག་ཀྱང་འབུལ་ཞིང་བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །
དགེ་འདུན་གྱི་ཚོགས་རྣམས་ལ་ཡང་ཡང་དག་པར་མཆོད་པ་བྱེད་དོ། །དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་རིམ་གྲོ་བྱེད་ཅིང་དེ་དག་ལས་རིམ་གྲོ་དང་། ཞེ་ས་དང་བསྟི་སྟང་དུ་ཆོས་བསྟན་པ་ཉན་ཏོ། །ལེན་ཏོ་འཛིན་ཏོ། །ཐོས་ནས་ཀྱང་ཅི་ཚུལ་དུ་ནན་ཏན་གྱིས་ཡང་དག་པར་བསྒྲུབས་ཏེ། དེ་དག་ལས་ཕལ་ཆེར་དེ་བཞིན་གཤེགས་པ་དེ་དག་གི་བསྟན་པ་ལ་རབ་ཏུ་འབྱུང་ངོ་། །རབ་ཏུ་བྱུང་ནས་ཀྱང་ཐོས་པ་འཛིན་པའི་གཟུངས་རབ་ཏུ་ཐོབ་པའི་ཆོས་སྨྲ་བར་འགྱུར་བ་ཡིན། དེ་ལྟར་བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་འདི་ལ་གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་དེ་དག་བསྐལ་པ་དུ་མར་ཤིན་ཏུ་བྱང་བ་དང་། ཡོངས་སུ་དག་པ་དང་། འོད་རབ་ཏུ་གསལ་བར་གནས་སོ། །བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང་། བསྐལ་པ་ཁྲག་ཁྲིག་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་དགེ་བའི་རྩ་བ་དེ་དག་ཤིན་ཏུ་བྱང་བ་དང་ཡོངས་སུ་དག་པ་དང་། རབ་ཏུ་འོད་གསལ་བར་གནས་སོ། །ཀྱེ་རྒྱལ་བའི་སྲས་དག །གསེར་གྱི་ས་ལེ་སྦྲམ་དེ་ཉིད་རིན་པོ་ཆེ་མུ་ས་ར་གལ་པས་བཏབ་ན་དེ་བས་ཀྱང་ཡོངས་སུ་འཚེར་རོ། །ཡོངས་སུ་དག་པར་འགྱུར་རོ། །འོད་ཤིན་ཏུ་གསལ་ཞིང་དང་བར་འགྱུར་རོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་འདི་ལ་གནས་པའི་བྱང་ཆུབ་སེམས་དཔའི་དགེ་བའི་རྩ་བ་ཐབས་དང་། ཤེས་རབ་ཀྱིས་རྣམ་པར་སྤྱད་པ་ཡང་དེ་བས་ཀྱང་ཤིན་
ཏུ་བྱང་བ་དང་། ཡོངས་སུ་དག་པ་དང་རབ་ཏུ་འོད་གསལ་ཞིང་དང་བ་ཡིན། ཡེ་ཤེས་ཀྱི་སྦྱོར་བའི་ཡོན་ཏན་མངོན་པར་བསྒྲུབ་པ་དང་ལྡན་པ་ཡིན། མི་འཕྲོགས་ཤིང་ཤིན་ཏུ་བརྟགས་པ་ཡིན། ཀྱེ་རྒྱལ་བའི་སྲས་དག །འདི་ལྟ་སྟེ། དཔེར་ན། ཉི་མ་དང་ཟླ་བ་དང་། སྐར་མ་དང་། རྒྱུ་སྐར་གྱི་གཞལ་མེད་ཁང་གི་འོད་སྣང་བ་ནི་རླུང་གི་དཀྱིལ་འཁོར་གྱིས་མི་འཕྲོགས་ཤིང་རླུང་དང་ཐུན་མོང་དུ་མི་སྤྱོད་པ་ཡིན། ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་འདི་ལ་གནས་པའི་དགེ་བའི་རྩ་བ་ཐབས་དང་ཤེས་རབ་དང་ཡེ་ཤེས་དང་སེམས་ཀྱིས་ཤིན་ཏུ་བརྟགས་པ་དང་ལྡན་པ་ཡང་ཉན་ཐོས་དང་། རང་སངས་རྒྱས་ཀྱིས་མི་འཕྲོགས་པ་ཡིན། འཇིག་རྟེན་པ་དང་ཐུན་མོང་དུ་མི་སྤྱོད་པ་ཡིན། དེའི་ཕ་རོལ་ཏུ་ཕྱིན་པ་བཅུ་ལས་བསམ་གཏན་གྱི་ཕ་རོལ་ཏུ་ཕྱིན་པ་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་མི་བསྒྲུབ་པ་མ་ཡིན་ནོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ཤིན་ཏུ་རྒྱལ་བར་དགའ་བ་ཞེས་བྱ་བ་བྱང་ཆུབ་སེམས་དཔའི་ས་ལྔ་པ་མདོར་བསྟན་པའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་ལྷའི་རྒྱལ་པོ་རབ་དགའ་ལྡན་དུ་འགྱུར་ཏེ། སེམས་ཅན་ཐམས་ཅད་ཀྱི་མུ་སྟེགས་ཀྱི་གནས་ཐམས་ཅད་རྣམ་པར་ཟློག་པ་ལ་མཁས་ཤིང་མཐུ་ཡོད་པ་ཡིན། དེ་སྦྱིན་པའམ་ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས། ཐམས་ཅད་མཁྱེན་པའི་ཡེ་ཤེས་ལ་བརྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང་། ཆོས་
ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་། ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་། མི་འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་ཁྲག་ཁྲིག་ཕྲག་སྟོང་རབ་ཏུ་འཐོབ་ཅིང་དེ་དག་ལ་སྙོམས་པར་འཇུག་པ་དང་། སངས་རྒྱས་ཁྲག་ཁྲིག་ཕྲག་སྟོང་མཐོང་ཞིང་དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་ཁྲག་ཁྲིག་ཕྲག་སྟོང་སྐྱོད་པ་དང་། སངས་རྒྱས་ཀྱི་ཞིང་ཁྲག་ཁྲིག་ཕྲག་སྟོང་དུ་འགྲོ་བ་དང་། འཇིག་རྟེན་གྱི་ཁམས་ཁྲག་ཁྲིག་ཕྲག་སྟོང་དུ་སྣང་བར་བྱ་བ་དང་། སེམས་ཅན་ཁྲག་ཁྲིག་ཕྲག་སྟོང་ཡོངས་སུ་སྨིན་པར་བྱ་བ་དང་། བསྐལ་པ་ཁྲག་ཁྲིག་ཕྲག་སྟོང་དུ་གནས་པར་བྱ་བ་དང་། སྔོན་གྱི་མཐའ་དང་ཕྱི་མའི་མཐའི་བསྐལ་པ་ཁྲག་ཁྲིག་ཕྲག་སྟོང་ལ་རབ་ཏུ་འཇུག་པ་དང་། ཆོས་ཀྱི་སྒོ་ཁྲག་ཁྲིག་ཕྲག་སྟོང་རྣམ་པར་འབྱེད་པ་དང་། ལུས་ཁྲག་ཁྲིག་ཕྲག་སྟོང་ཡོངས་སུ་བསྟན་པ་དང་། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་ཁྲག་ཁྲིག་ཕྲག་སྟོང་ཡང་དག་པར་བསྟན་པར་བྱ་བའི་ཕྱིར་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཅད་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ། འོད་དམ་རྫུ་འཕྲུལ་ལམ་མིག་གམ། སྤྱོད་ཡུལ་ལམ་དབྱངས་སམ། སྤྱོད་པའམ་རྒྱན་ཏམ་བྱིན་གྱིས་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་
བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཀྱང་བགྲང་བར་དཀའ་འོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང་། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་སྤྱོད་པ་བཞི་པོ་དེ་ལྟར་རྣམ་སྦྱངས་ཏེ། །དུས་གསུམ་མཉམ་པ་ཉིད་ཀྱི་རྗེས་སུ་སེམས་བྱེད་ཅིང་། །ཚུལ་ཁྲིམས་སེམས་དང་ནན་ཏན་ལམ་རྣམས་རྣམ་དག་པས། །ནེམ་ནུར་མེད་པའི་མཁས་པ་ལྔ་པོ་ཡོངས་སུ་གནོན། །དྲན་པའི་གཞུ་དང་དབང་པོའི་མདའ་རྣོ་ཕྱིར་མི་ལྡོག །ཡང་དག་སྤོང་བ་རྟ་ཡིན་བཞོན་པ་རྫུ་འཕྲུལ་རྐང་། །སྟོབས་ལྔ་གོ་ཅ་དགྲ་རྣམས་ཀྱིས་ནི་ཚུགས་མི་ནུས། །དཔའ་བས་མི་ལྡོག་མཁས་པ་ལྔ་པོ་ཡོངས་སུ་གནོན། །ངོ་ཚ་ཁྲེལ་ཡོད་གོས་ཡིན་མཁས་པའི་ཚུལ་གཙང་སྤོས། །བྱང་ཆུབ་ཡན་ལག་ཕྲེང་བ་བྱུག་པ་བསམ་གཏན་མཆོག །ཤེས་རབ་རྣམ་པར་དཔྱོད་དང་ཐབས་མཆོག་རྒྱན་ཡིན་ཏེ། །བཟའ་ཤིང་ར་བ་ཏིང་འཛིན་དགའ་ལྡན་ཡང་དག་གནོན། །རྫུ་འཕྲུལ་བཞི་པོ་རྐང་པ་དྲན་པ་རྣམ་དག་མགྲིན། །བྱམས་བརྩེ་རྣམ་དག་མིག་ཡིན་ཤེས་རབ་མཆེ་བ་མཆོག །བདག་མེད་ང་རོས་ཉོན་མོངས་དགྲ་རྣམས་རབ་ཏུ་འཇོམས། །མཁས་པ་མི་ཡི་སེང་གེ་ས་ལྔ་ཡོངས་སུ་གནོན། །དེ་དག་ས་མཆོག་ལྔ་པོའི་ཕྱོགས་སུ་ཕྱིན་གྱུར་ནས། །ཡོངས་སུ་དག་པའི་ལམ་རྣམས་ཕྱིར་ཞིང་གོང་དུ་སྦྱོང་། །བསམ་དག་མཁས་པ་རྒྱལ་བ་འཐོབ་པར་བྱ་དོན་དུ། །སྐྱོ་བ་མེད་པར་སྙིང་རྗེ་བྱམས་པའི་རྗེས་སུ་སེམས། །བསོད་ནམས་ཚོགས་བསྩགས་དེ་བཞིན་ཡེ་ཤེས་རབ་ལྡན་པ། །ས་རྣམས་སྣང་བར་བྱ་ཕྱིར་གཅིག་མིན་ཐབས་རྟོག་ཅིང་། །སངས་རྒྱས་བྱིན་གྱིས་དྲན་དང་བློ་གྲོས་བློ་ཐོབ་པས། །བདེན་པ་བཞི་པོ་མ་ལུས་ཡང་དག་ཁོང་དུ་ཆུད། །དོན་དམ་བདེན་པ་དེ་བཞིན་ཀུན་རྫོབ་མཚན་བདེན་དང་། །རྣམ་པར་དབྱེ་བའི་བདེན་པ་དེ་བཞིན་བརྟག་བདེན་དང་། །
འབྱུང་ཞིང་འཇུག་དང་དངོས་པོ་ཞི་ལམ་བདེན་པ་ནས། །སྒྲིབ་མེད་བདེན་པའི་བར་དུ་ཡང་དག་རབ་ཏུ་རྟོགས། །དེ་ལྟར་བདེན་པས་ཡོངས་སུ་སྦྱངས་པའི་བློ་ཕྲ་ཡང་། །རྣམ་ཐར་དམ་པ་སྒྲིབ་མེད་དེ་ནི་ཐོབ་པ་མིན། །ཡེ་ཤེས་མོས་ཡངས་ཡོན་ཏན་རྣམས་ཀྱི་འབྱུང་གནས་ཏེ། །འགྲོ་ཀུན་དགྲ་བཅོམ་རང་རྒྱལ་རྣམས་ནི་ཟིལ་གྱིས་གནོན། །དེ་དག་བདེན་པས་དེ་ལྟར་རང་གི་བློ་བསྒྲུབས་པས། །འདུས་བྱས་བརྫུན་ཞིང་རང་བཞིན་སྙིང་པོ་མེད་པར་ཤེས། །སེམས་ཅན་དོན་དུ་བདེ་གཤེགས་ཡེ་ཤེས་ཚོལ་བའི་ཚེ། །བདེ་གཤེགས་ཐུགས་བརྩེ་བྱམས་པ་སྣང་བ་རབ་ཏུ་ཐོབ། །འདུས་བྱས་སྔོན་དང་ཕྱི་མཐའ་མཁས་པ་རབ་ཏུ་ལྟ། །གཏི་མུག་མུན་ནག་མུན་པས་འཁྲུགས་ཤིང་སྲེད་ཆགས་པའི། ། འགྲོ་རྣམས་སྡུག་བསྔལ་ཕུང་པོ་ལྟ་བ་བདག་མེད་ཅིང་། །སྲོག་བྲལ་རྩ་ཤིང་འདྲ་བ་མངོན་པར་སེལ་བ་བྱེད། །ཉོན་མོངས་རྗེས་འགྲོ་འདི་དག་འདས་དང་མ་འོངས་པའི། །སྡུག་བསྔལ་རྒྱུན་གཅོད་མཐར་ཕྱིན་གཞལ་བར་ཡོང་མི་བྱེད། །ཀྱི་ཧུད་འགྲོ་བ་དེ་ལྟར་འཁྱམས་ཤེས་སྙིང་རྗེ་སྐྱེ། །གཏི་མུག་འཁྲུལ་བས་འཁོར་བའི་རྒྱུད་དུ་ཕྱིར་མི་ལྡོག །ཕུང་པོའི་གནས་དང་ཁམས་སྦྲུལ་ལྟ་བུའི་ཟུག་རྔུ་ཅན། །མེས་གདུངས་ཡིད་ཅན་སྒྲིབ་པའི་མུན་པས་བསྒྲིབས་གྱུར་པ། །དོན་རྣམས་རྣམ་པར་མ་བརྟགས་སྲེད་པའི་མཚོར་ལྟུང་ཞིང་། །རྒྱལ་བའི་དེད་དཔོན་བྲལ་བ་སྡུག་བསྔལ་རྒྱ་མཚོར་གནས། །དེ་ལྟར་རིག་ནས་བག་ཡོད་ཕྱིར་ཞིང་རབ་ཏུ་རྩོམ། །ཅི་རྩོམ་ཀུན་ཀྱང་འགྲོ་བ་རྣམ་ཐར་དོན་དུ་སྟེ། །ཕྱིར་ཞིང་དྲན་ལྡན་བློ་གྲོས་རིག་དང་ལྡན་པ་ཡིན། །ཁྲེལ་ཡོད་དགའ་ལྡན་མཁས་པ་བློ་ལྡན་ཤེས་རབ་ལྡན། །བསོད་ནམས་བསྩགས་དང་ཡེ་ཤེས་དམ་པས་མི་ངོམས་ཤིང་། །རྟག་ཏུ་སྐྱོ་མེད་ལེ་ལོ་མེད་པར་ཐོས་པ་ཚོལ། །ཞིང་བསྒྲུབ་རྒྱལ་བའི་མཚན་དང་སངས་རྒྱས་གསུང་ཚོལ་ཞིང་། །སེམས་ཅན་ཕན་པར་བརྩོན་པའི་བྱ་བས་ངོམས་མི་ཤེས། །འགྲོ་བ་སྨིན་བྱའི་དོན་དུ་
མཁས་པས་བཟོ་ཡི་གནས། །ཡི་གེ་ལག་བརྡ་གྲངས་དང་རྩིས་དང་གསོ་བའི་ཐབས། །འབྱུང་པོའི་གདོན་དང་ལས་རྣམས་སྣ་ཚོགས་བསྩལ་བའི་ཕྱིར། །སྙིང་བརྩེ་བྱམས་པའི་བློ་གསལ་གཙུག་ལག་ཀུན་ལ་གཞོལ། །རང་བཟོ་མཆོག་དང་གར་སྡུག་སྣ་ཚོགས་དགའ་བྱེད་དང་། །ཆུ་ཀླུང་ར་བ་ཤིང་ཏོག་མེ་ཏོག་འདུག་གནས་དང་། །བྱ་བ་སྣ་ཚོགས་སྒྲུབ་བྱེད་སེམས་ཅན་བདེ་དོན་དུ། །རིན་ཆེན་འབྱུང་གནས་དུ་མའང་ཉེ་བར་སྟོན་པ་བྱེད། །ས་གཡོ་ཉི་ཟླ་གཟའ་སྐར་ཀུན་ཀྱང་དེ་བཞིན་དུ། །སེམས་ཅན་ཡན་ལག་མཚན་མའི་དཔྱད་དང་རྒྱལ་སྲིད་གནས། །གཟུགས་མེད་བསམ་གཏན་མངོན་ཤེས་མཆོག་དང་ཚད་མེད་པ། །འགྲོ་ལ་བདེ་དང་ཕན་པའི་དོན་འདོད་མངོན་པར་བསྒྲུབ། །ཤིན་ཏུ་རྒྱལ་དཀའ་འདི་ཐོབ་ཤེས་རབ་མཆོག་སྤྱོད་པ། །སངས་རྒྱས་བྱེ་བ་མཆོད་བྱེད་ཆོས་རྣམས་ཉན་པ་བྱེད། །དེ་དག་དགེ་དང་བསམ་པ་ཕྱིར་ཞིང་དག་པར་འགྱུར། །གསེར་སྦྲམ་ཇི་ལྟར་མུ་སར་གལ་བས་བཏབ་པ་བཞིན། །ཇི་ལྟར་བར་སྣང་གཟའི་རིན་ཆེན་གཞལ་མེད་ཁང་། །རླུང་ལ་རྒྱུ་སྟེ་འོན་ཀྱང་རླུང་གིས་འཕྲོགས་པ་མིན། །དེ་ལྟར་འགྲོ་བའི་དོན་སྤྱོད་འཇིག་རྟེན་ཆོས་སྤྱོད་ཀྱང་། །ཇི་ལྟར་པད་མོ་ཆུས་མི་ཆགས་བཞིན་འཕྲོགས་པ་མིན། །འདི་ལ་གནས་པ་དགའ་ལྡན་དབང་པོ་མཁས་པར་འགྱུར། །མུ་སྟེགས་སྤྱོད་དང་ལྟ་བ་མང་པོའི་གནས་ཀྱང་སེལ། །སྟོབས་རྣམས་བཅུ་པོས་སེམས་ཅན་བསྐྱབ་པར་བྱའོ་ཞེས། །དགེ་བ་དེ་དག་རྒྱལ་བའི་ཡེ་ཤེས་དོན་དུ་རྩོམ། །འདི་ནས་གོང་དུ་བརྩོན་འགྲུས་རྩོམ་བྱེད་མཐུ་ཐོབ་པ། །ཁྲག་ཁྲིག་བྱེ་བ་སྟོང་གི་བདེ་གཤེགས་མཆོད་པ་བྱེད། །ཏིང་འཛིན་ཐོབ་ནས་ཁྲག་ཁྲིག་ཞིང་ཡང་མཁས་པས་སྐྱོད། །ཡན་ཅད་སྨོན་ལམ་ཁྱད་པར་ཡོན་ཏན་འབྱུང་གནས་སོ། །
དེ་ལྟར་ས་མཆོག་ལྔ་པ་འདི། །ཐབས་ཀྱི་རྣམ་པ་ཁྲག་ཁྲིག་གིས། །སེམས་ཅན་གཙོ་ལ་ཡང་དག་ཏུ། །རྒྱལ་བའི་སྲས་ཀྱིས་བསྟན་པ་ཡིན། །ཤིན་ཏུ་རྒྱལ་བར་དཀའ་བ་ཞེས་བྱ་བ་སྟེ། བྱང་ཆུབ་སེམས་དཔའི་ས་ལྔ་པའོ། །མཁས་པ་རྣམས་ཀྱི་ས་མཆོག་སྤྱོད་པ་རབ་ཐོབ་ནས། །རྒྱལ་སྲས་དགའ་ཞིང་མཁའ་ལས་མེ་ཏོག་ཆར་འབེབས་སོ། །ནོར་བུ་རིན་ཆེན་རྣམ་དག་འོད་གསལ་རྒྱ་ཆེན་འབྱུང་བ་དག །བདེ་བར་གཤེགས་ལ་མངོན་འཐོར་དགེ་ཞེས་རྣམ་པར་བརྗོད། །ལྷ་རྣམས་བརྒྱ་ཕྲག་སྟོང་གྲངས་དགའ་ཞིང་བར་སྣང་ལས། །ལྷ་རྫས་ཡིད་འོང་རིན་ཆེན་སྣ་ཚོགས་ཕྱེ་མའི་རྣམས། །བདེ་བར་གཤེགས་ལ་མངོན་འཐོར་བྱུག་པ་ཕྲེང་བ་སྤོས། །གདུགས་དང་རྒྱལ་མཚན་བ་དན་སེ་མོ་དོ་ཡང་འབུལ། །ལྷའི་དབང་པོ་དབང་བསྒྱུར་ལྷ་ཚོགས་མང་པོ་དང་། །སྟེང་གི་མཁའ་ལ་འཁོད་ཅིང་རིན་ཆེན་སྤྲིན་ཡངས་པ། །རྒྱལ་བ་མཆོད་པའི་དོན་དུ་བདེ་བར་གཤེགས་ལ་འཐོར། །དགའ་བའི་སེམས་ཀྱིས་རྒྱལ་སྲས་ལེགས་ཞེས་རྣམ་པར་བརྗོད། །བར་སྣང་གནས་ནས་ལྷ་ཡི་བུ་མོ་སྟོང་གིས་ཀྱང་། །གླུ་དབྱངས་ཡིད་འོང་རོལ་མོའི་སྒྲ་དབྱངས་སྙན་པ་ཕྱུང་། །སྒྲ་རྣམས་ཀུན་གྱི་དབྱངས་ལས་འདི་སྐད་ཚིག་ཀྱང་བྱུང་། །རྒྱལ་བའི་གསུང་ནི་ཡིད་འོང་ཉོན་མོངས་གདུང་བ་སེལ། །ཆོས་རྣམས་ཐམས་ཅད་སྟོང་ཞིང་དངོས་ཞི་མཚན་མ་མེད། །ནམ་མཁའི་དབྱིངས་དང་མཚུངས་མཉམ་རྣམ་དག་རྣམ་མི་རྟོག །འགྲོ་དང་གནས་ལས་རྣམ་འདས་མ་ལུས་སྤྲོས་པ་མེད། །དེ་བཞིན་ཉིད་དུ་ཆོས་རྣམས་ཡང་དག་མཉམ་མི་རྟོག །ཆོས་རྣམས་ཀུན་ལ་སྣང་བ་ཁོང་དུ་སུས་ཆུད་པ། །དེ་ལ་དངོས་དང་དངོས་མེད་གཡོ་བ་གང་ཡང་མེད། །སྙིང་རྗེ་བརྩེ་བས་འགྲོ་བ་དགྲོལ་ཕྱིར་བརྩོན་པ་ནི། །དེ་དང་དེ་དག་རྒྱལ་སྲས་ཆོས་ཀྱི་སྐུ་སྐྱེས་པའོ། །མཚན་མ་ཐམས་ཅད་སྤངས་ཤིང་སྦྱིན་པའི་སྤྱད་པ་སྤྱོད། །
ཚུལ་ཁྲིམས་ཤིན་ཏུ་སེམས་དམ་སྔོན་ནས་ཞི་ཞིང་དུལ། །འགྲོ་བའི་དོན་དུ་ཆོས་ཀྱི་ཡེ་ཤེས་མ་ཉམས་བཟོད། །བརྩོན་འགྲུས་སྟོབས་དང་ལྡན་ཞིང་ཆོས་རྣམས་ཀུན་གྱིས་དབེན། །ཉོན་མོངས་བསྩལ་ཞིང་རྣམ་དག་བསམ་གཏན་ཚུལ་ལ་ཞུགས། །དངོས་པོ་ཐམས་ཅད་སྔ་ནས་ཞི་ཞིང་རྣམ་པར་ཕྱེ། །ཡེ་ཤེས་སྤྱོད་དང་སྟོབས་ཕྱུག་རྟག་ཏུ་འགྲོ་དོན་བརྩོན། །རྒྱལ་སྲས་དེ་དག་སྡིག་ཞི་ཆེ་བ་ཉིད་དང་ལྡན། །དེ་སྐད་སྒྲ་དབྱངས་སྙན་པ་སྟོང་གྲངས་བརྗོད་བྱས་ནས། །ལྷའི་བུ་མོ་མི་སྨྲ་དད་པར་ཐུབ་ལ་ལྟ། །རྡོ་རྗེའི་སྙིང་པོ་འཇིགས་མེད་ལ། །ཐར་པའི་ཟླ་བས་ཡང་སྨྲས་པ། །ས་མཆོག་ལྔ་ཡི་གོང་མ་དེ། །རྣམ་པ་ཅི་འདྲས་འགྲུབ་པར་འགྱུར། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དག་དེ་ལྟར་བྱང་ཆུབ་སེམས་དཔའི་ས་ལྔ་པ་ལ། སའི་ལམ་ཡོངས་སུ་རྫོགས་པའི་བྱང་ཆུབ་སེམས་དཔའ་དེ་ནི་བྱང་ཆུབ་སེམས་དཔའི་ས་དྲུག་པ་ལ་འཇུག་གོ །དེ་ཆོས་མཉམ་པ་ཉིད་བཅུས་འཇུག་སྟེ། བཅུ་གང་ཞེ་ན་འདི་ལྟ་སྟེ། ཆོས་ཐམས་ཅད་མཚན་མ་མེད་པ་མཉམ་པ་ཉིད་དང་། ཆོས་ཐམས་ཅད་མཚན་ཉིད་མེད་པ་མཉམ་པ་ཉིད་དང་། ཆོས་ཐམས་ཅད་མི་སྐྱེ་བ་མཉམ་པ་ཉིད་དང་། ཆོས་ཐམས་ཅད་མ་བྱུང་བ་མཉམ་པ་ཉིད་དང་། ཆོས་ཐམས་ཅད་དབེན་པ་མཉམ་པ་ཉིད་དང་། ཆོས་ཐམས་ཅད་སྔ་ནས་རྣམ་པར་དག་པ་མཉམ་པ་ཉིད་དང་། ཆོས་ཐམས་ཅད་སྤྲོས་པ་མེད་པ་མཉམ་པ་ཉིད་དང་། ཆོས་ཐམས་ཅད་བླང་བ་མེད་པ་དང་། དོར་བ་མེད་པ་མཉམ་པ་ཉིད་དང་། ཆོས་ཐམས་ཅད་སྒྱུ་མ་དང་རྨི་ལམ་དང་མིག་ཡོར་དང་སྒྲ་བརྙན་དང་། ཆུའི་ཟླ་བ་དང་། གཟུགས་བརྙན་དང་། སྤྲུལ་པ་དང་མཚུངས་པ་མཉམ་པ་ཉིད་དང་། ཆོས་ཐམས་ཅད་དངོས་པོ་ཡོད་པ་དང་། དངོས་པོ་མེད་པ་དང་། གཉིས་ཀ་མ་ཡིན་པ་མཉམ་པ་ཉིད་དེ། ཀྱེ་རྒྱལ་བའི་སྲས་དག །ཆོས་མཉམ་པ་ཉིད་བཅུ་པོ་འདི་དག་གིས་བྱང་ཆུབ་
སེམས་དཔའ་ས་དྲུག་པ་ལ་འཇུག་གོ །དེ་ཆོས་ཐམས་ཅད་ལ་རང་བཞིན་དེ་འདྲ་བར་རབ་ཏུ་རྟོག་ཅིང་དཔྱོད་པ་དང་། འཐུན་པར་སེམས་ཤིང་མི་འཐུན་པར་མི་བྱེད་པས་བྱང་ཆུབ་སེམས་དཔའི་ས་དྲུག་པ་འཐུན་པའི་བཟོད་པ་རྣོན་པོས་འཐོབ་སྟེ། འོན་ཀྱང་ད་དུང་མི་སྐྱེ་བའི་ཆོས་ལ་བཟོད་པ་མངོན་དུ་གྱུར་པ་ནི་ཐོབ་པ་མ་ཡིན་ནོ། །དེ་ཆོས་ཐམས་ཅད་ལ་རང་བཞིན་དེ་ལྟར་རྟོག་པའི་ཚེ། དེ་བས་ཀྱང་སྙིང་རྗེ་ཆེན་པོ་སྔོན་དུ་འགྲོ་བ་དང་། སྙིང་རྗེ་ཆེན་པོ་ལ་དབང་སྒྱུར་བས་སྙིང་རྗེ་ཆེན་པོ་ཡོངས་སུ་རྫོགས་པར་བྱ་བའི་ཕྱིར་འཇིག་རྟེན་འབྱུང་བ་དང་། འཇིག་པ་ལ་རྣམ་པར་ལྟའོ། ། དེ་འཇིག་རྟེན་འབྱུང་བ་དང་། འཇིག་པ་ལ་ལྟ་བའི་ཚེ་འདི་སྙམ་སྟེ། འཇིག་རྟེན་ཀུན་ཏུ་རྒྱུ་བའི་སྐྱེ་བ་ཇི་སྙེད་ཡོད་པ་དེ་དག་ཐམས་ཅད་བདག་ཏུ་མངོན་པར་ཞེན་པ་ལས་འབྱུང་སྟེ། བདག་ཏུ་མངོན་པར་ཞེན་པ་དང་བྲལ་ན་འབྱུང་བ་ཡང་མེད་པར་འགྱུར་རོ། །བྱིས་པའི་བློ་ཅན་བདག་ཏུ་མངོན་པར་ཞེན་པ་མི་ཤེས་པའི་རབ་རིབ་ཀྱིས་བསྒྲིབས་པ། ཡོད་པ་དང་། མེད་པ་ལ་མངོན་པར་མོས་པ། ཚུལ་བཞིན་མ་ཡིན་པ་ཡིད་ལ་བྱེད་པ་ལ་གཞོལ་བ། ཡང་དག་པ་མ་ཡིན་པར་རབ་ཏུ་ཞུགས་པ། ལོག་པའི་རྗེས་སུ་འབྲང་བ་དེ་དག་ནི་བསོད་ནམས་དང་བསོད་ནམས་མ་ཡིན་པའི་འདུ་བྱེད་ཉེ་བར་སྩོགས་ཏེ། འདུ་བྱེད་དེ་དག་གིས་ཡོངས་སུ་བསྒོས་པའི་སེམས་ཀྱི་ས་བོན་ཟག་པ་དང་བཅས་པ། ཉེ་བར་ལེན་པ་དང་བཅས་པ་ནི་མ་འོངས་པའི་སྐྱེ་བ་དང་། རྒ་ཤི་དང་། ཡང་སྲིད་པ་མངོན་པར་འགྲུབ་པ་འབྱུང་བར་ཉེ་བར་སོང་བ་ཡིན་ཏེ། ལས་ཀྱི་ཞིང་གི་གཞི་དང་། མ་རིག་པའི་མུན་པ་དང་སྲེད་པའི་སྣུམ་དང་། ངའི་ང་རྒྱལ་གྱིས་བརླན་པའི་ལྟ་བའི་རྣམ་པ་དང་འདྲ་བ་རབ་ཏུ་འཕེལ་བས་མིང་དང་གཟུགས་ཀྱི་མྱུ་གུ་འབྱུང་སྟེ། བྱུང་ནས་རྣམ་པར་འཕེལ་ལོ། །མིང་དང་གཟུགས་ཀྱི་མྱུ་གུ་རྣམ་པར་འཕེལ་ནས་དབང་པོ་ལྔ་འབྱུང་བར་འགྱུར་རོ། །དབང་པོ་ལྔ་བྱུང་ནས་ཕན་ཚུན་འདུས་ཤིང་འཕྲད་པས་
རེག་པར་འགྱུར་རོ། །རེག་པ་འདུས་པས་ཚོར་བ་འབྱུང་ངོ་། །ཚོར་ནས་དེའི་རྗེས་སུ་མངོན་པར་སྨོན་པས་སྲེད་པ་འབྱུང་ངོ་། །སྲེད་པ་ནི་ཉེ་བར་ལེན་པ་རྣམ་པར་འཕེལ་བར་བྱེད་དོ། །ཉེ་བར་ལེན་པ་རྣམ་པར་འཕེལ་བ་ལས་སྲིད་པ་འབྱུང་བར་འགྱུར་རོ། །སྲིད་པ་བྱུང་ནས་ཕུང་པོ་ལྔ་པོ་འབྱུང་བར་འགྱུར་ཏེ། ཕུང་པོ་ལྔ་བྱུང་ནས་ལམ་གྱི་རྒྱུད་ལྔར་རིམ་གྱིས་དེངས་པར་འགྱུར་རོ། །དེངས་ནས་འབྲལ་བར་འགྱུར་ཏེ་དེངས་ཤིང་བྲལ་བས། མི་དགའ་ཞིང་ཡོངས་སུ་གདུང་བར་འགྱུར་རོ། །མི་དགའ་བ་དང་ཡོངས་སུ་གདུང་བའི་རྒྱུས་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་འབྱུང་བར་འགྱུར། ཡང་དེ་དག་ལས་སུའང་འབྱུང་བར་བྱེད་པ་མེད་དོ། །རང་བཞིན་དང་ལྷུན་གྱིས་གྲུབ་པར་འཇིག་པར་འགྱུར་ཡང་དེ་དག་ལ་འཇིག་པར་བྱེད་པ་སུ་འང་མེད་དོ་ཞེས་དེ་ལྟར། བྱང་ཆུབ་སེམས་དཔའ་སེམས་དཔའ་ཆེན་པོ་ལུགས་སུ་མཐུན་པར་རྟེན་ཅིང་འབྲེལ་བར་འབྱུང་བ་ལ་རབ་ཏུ་རྟོག་གོ །དེ་འདི་སྙམ་དུ་སེམས་ཏེ་བདེན་པར་མངོན་པར་མི་ཤེས་པ་ནི་ཡང་དག་པར་མ་རིག་པ་སྟེ། མ་རིག་པས་བྱས་པའི་ལས་ཀྱི་རྣམ་པར་སྨིན་པ་ནི་འདུ་བྱེད་རྣམས་སོ། །འདུ་བྱེད་ལ་གནས་པའི་སེམས་དང་པོ་ནི་རྣམ་པར་ཤེས་པའོ། །རྣམ་པར་ཤེས་པ་དང་། ལྷན་ཅིག་ཏུ་སྐྱེས་པའི་ཉེ་བར་ལེན་པའི་ཕུང་པོ་བཞི་ནི་མིང་དང་གཟུགས་སོ། །མིང་དང་གཟུགས་རྣམ་པར་འཕེལ་བ་ནི་དྲུག་གི་སྐྱེ་མཆེད་དོ། །དབང་པོ་དང་ཡུལ་དང་རྣམ་པར་ཤེས་པ་གསུམ་ཕྲད་པ་ཟག་པ་དང་བཅས་པ་ནི་རེག་པའོ། །རེག་པའི་རྗེས་ལས་སྐྱེས་པ་ནི་ཚོར་བའོ། །ཚོར་བ་ལ་ཆགས་པ་ནི་སྲེད་པའོ། །སྲེད་པ་རྣམ་པར་འཕེལ་བ་ནི་ཉེ་བར་ལེན་པའོ། །ཉེ་བར་ལེན་པ་ལས་བྱུང་བའི་ལས་ཟག་པ་དང་བཅས་པ་ནི་སྲིད་པའོ། །ལས་དང་རྒྱུ་མཐུན་པའི་འབྲས་བུ་ནི་སྐྱེ་བའོ། །སྐྱེ་བ་ནི་ཕུང་པོ་
འབྱུང་བའོ། །ཕུང་པོ་ཡོངས་སུ་སྨིན་པ་ནི་རྒ་བའོ། །རྒས་ནས་ཕུང་པོ་འཇིག་པ་ནི་འཆི་བའོ། །འཆི་ཞིང་འབྲལ་བའི་ཚེ་མོས་ཤིང་ཆགས་པར་གྱུར་པའི་སེམས་ལ་ཡོངས་སུ་གདུང་བ་ནི་མྱ་ངན་ཏོ། །མྱ་ངན་ལས་བྱུང་བའི་ཚིག་ཏུ་རྗོད་པ་ནི་སྨྲེ་སྔགས་འདོན་པའོ། །དབང་པོ་ལྔའི་ཉམས་སུ་བབ་པ་ནི་སྡུག་བསྔལ་ལོ། །ཡིད་ཀྱི་ལྟ་བའི་ཉམས་སུ་བབ་པ་ནི་ཡིད་མི་བདེ་བའོ། །སྡུག་བསྔལ་དང་ཡིད་མི་བདེ་བ་མང་པོ་བྱུང་བ་ནི་འཁྲུགས་པ་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་དང་སྡུག་བསྔལ་གྱི་སྡོང་པོ་འབའ་ཤིག་བྱེད་པ་པོ་དང་། ཚོར་བ་པོ་མེད་པ་མངོན་པར་གྲུབ་པར་འགྱུར་རོ། །དེ་འདི་སྙམ་དུ་སེམས་ཏེ་བྱེད་པ་པོ་ལ་མངོན་པར་ཆགས་པས་ལས་རྣམས་ཡོད་པར་གྱུར་ཏོ། །གང་ན་བྱེད་པ་པོ་མེད་པ་དེ་ན་དོན་དམ་པར་ལས་ཀྱང་མི་དམིགས་སོ། །དེ་འདི་སྙམ་དུ་སེམས་ཏེ། འདི་ལྟར་ཁམས་གསུམ་པ་འདི་ནི་སེམས་ཙམ་སྟེ། གང་འདི་སྲིད་པའི་ཡན་ལག་བཅུ་གཉིས་དེ་བཞིན་གཤེགས་པས་རབ་ཏུ་ཕྱེ་སྟེ། བཀའ་སྩལ་པ་དེ་དག་ཐམས་ཅད་ཀྱང་སེམས་གཅིག་ལ་གནས་པ་དག་གོ །དེ་ཅིའི་ཕྱིར་ཞེ་ན། དངོས་པོ་གང་ལ་འདོད་ཆགས་དང་ལྡན་པའི་སེམས་སྐྱེས་པ་དེ་ནི་རྣམ་པར་ཤེས་པའོ། །དངོས་པོ་ནི་འདུ་བྱེད་དོ། །འདུ་བྱེད་ལ་མགོ་རྨོངས་པ་ནི་མ་རིག་པའོ། །མ་རིག་པའི་སེམས་དང་ལྷན་ཅིག་སྐྱེས་པ་ནི་མིང་དང་གཟུགས་སོ། །མིང་དང་གཟུགས་རྣམ་པར་འཕེལ་བ་ནི་དྲུག་གི་སྐྱེ་མཆེད་དོ། །དྲུག་གི་སྐྱེ་མཆེད་དང་འབྲེལ་བ་ནི་རེག་པའོ། །རེག་པ་དང་ལྷན་ཅིག་སྐྱེས་པ་ནི་ཚོར་བའོ། །ཚོར་བས་མི་ངོམས་པ་ནི་སྲེད་པའོ། །སྲེད་པས་མནར་ཏེ་སྡུད་ཅིང་མི་གཏོང་བ་ནི་ཉེ་བར་ལེན་པའོ། །སྲིད་པའི་ཡན་ལག་འབྱུང་བ་འདི་དག་ནི་སྲིད་པའོ། །སྲིད་པ་འབྱུང་བ་ནི་སྐྱེ་བའོ། །སྐྱེ་བ་ཡོངས་སུ་སྨིན་པ་ནི་རྒ་བའོ། །རྒ་བ་དང་བྲལ་བ་ནི་འཆི་བའོ། །དེ་ལ་མ་
རིག་པ་ནི་བྱ་བ་གཉིས་སུ་ཉེ་བར་གནས་པ་ཡིན་ཏེ། སེམས་ཅན་རྣམས་ཀྱང་དམིགས་པ་ལ་རྨོངས་པར་བྱེད་དོ། །འདུ་བྱེད་མངོན་པར་འགྲུབ་པའི་རྒྱུ་ཡང་འབྱིན་ཏོ། །འདུ་བྱེད་རྣམས་ཀྱང་བྱ་བ་གཉིས་སུ་ཉེ་བར་གནས་པ་ཡིན་ཏེ། མ་འོངས་པའི་རྣམ་པར་སྨིན་པ་ཡང་མངོན་པར་འགྲུབ་པར་བྱེད་དོ། །རྣམ་པར་ཤེས་པ་མངོན་པར་འགྲུབ་པའི་རྒྱུ་ཡང་འབྱིན་ཏོ། །རྣམ་པར་ཤེས་པའང་བྱ་བ་གཉིས་སུ་ཉེ་བར་གནས་པ་ཡིན་ཏེ། སྲིད་པའི་ཉིང་གི་མཚམས་ཀྱང་སྦྱོར་རོ། །མིང་དང་གཟུགས་མངོན་པར་འགྲུབ་པའི་རྒྱུ་ཡང་འབྱིན་ཏོ། །མིང་དང་གཟུགས་ཀྱང་བྱ་བ་གཉིས་སུ་ཉེ་བར་གནས་པ་ཡིན་ཏེ། ཕན་ཚུན་ཉེ་བར་རྟོན་པ་ཡང་བྱེད་དོ། །སྐྱེ་མཆེད་དྲུག་མངོན་པར་འགྲུབ་པའི་རྒྱུ་ཡང་འབྱིན་ཏོ། །དྲུག་གི་སྐྱེ་མཆེད་ཀྱང་བྱ་བ་གཉིས་སུ་ཉེ་བར་གནས་པ་ཡིན་ཏེ། རང་གི་ཡུལ་རྣམ་པར་ཕྱེ་བ་ཡང་སྟོན་ཏོ། །རེག་པ་མངོན་པར་འགྲུབ་པའི་རྒྱུ་ཡང་འབྱིན་ཏོ། །རེག་པ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། དམྱིགས་པ་ལ་རེག་པར་ཡང་བྱེད་དོ། །ཚོར་བ་མངོན་པར་འགྲུབ་པའི་རྒྱུ་ཡང་འབྱིན་ཏོ། །ཚོར་བ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། ཡིད་དུ་འོང་བ་དང་ཡིད་དུ་མི་འོང་བ་དང་གཉིས་ཀ་མ་ཡིན་པར་ཚོར་བ་ཡང་སྐྱེད་དོ། །སྲེད་པ་མངོན་པར་འགྲུབ་པའི་རྒྱུ་ཡང་འབྱིན་ཏོ། །སྲེད་པ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། ཆགས་པར་འགྱུར་བའི་དངོས་པོ་ལ་མངོན་པར་ཆགས་པར་ཡང་བྱེད་དོ། །ཉེ་བར་ལེན་པ་མངོན་པར་འགྲུབ་པའི་རྒྱུ་ཡང་འབྱིན་ཏོ། །ཉེ་བར་ལེན་པ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། ཀུན་ནས་ཉོན་མོངས་པས་འཆིང་བ་ཡང་བྱེད་དོ། །སྲིད་པ་མངོན་པར་འབྱུང་བའི་རྒྱུ་ཡང་འབྱིན་ཏོ། །སྲིད་པ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། སྲིད་པའི་རྒྱུད་གཞན་དུ་ཡང་གནས་པར་བྱེད་དོ་སྐྱེ་བ་མངོན་པར་འགྲུབ་པའི་རྒྱུ་ཡང་འབྱིན་ཏོ། །སྐྱེ་བ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ།
ཕུང་པོ་འབྱུང་བར་ཡང་བྱེད་དོ། །རྒ་བ་མངོན་པར་འགྲུབ་པའི་རྒྱུ་ཡང་འབྱིན་ཏོ། །རྒ་བ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ། དབང་པོ་ཡོངས་སུ་འགྱུར་བར་ཡང་བྱེད་དོ། །འཆི་བར་འགྱུར་བའི་རྒྱུ་ཡང་འབྱིན་ཏོ། །འཆི་བ་ཡང་བྱ་བ་གཉིས་སུ་ཉེ་བར་གནས་པ་ཡིན་ཏེ་འདུ་བྱེད་འཇིག་པར་ཡང་བྱེད་དོ། །ཡོངས་སུ་མ་ཤེས་པ་རྒྱུན་མི་འཆད་པའི་རྒྱུ་ཡང་འབྱིན་ཏོ། །དེ་ལ་མ་རིག་པའི་རྐྱེན་གྱིས་འདུ་བྱེད་རྣམས་སོ། །ཞེས་བྱ་བ་ནི་མ་རིག་པའི་རྐྱེན་གྱིས་འདུ་བྱེད་རྣམས་རྒྱུན་མི་འཆད་ཅིང་རྟོན་པའོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པའོ། །ཞེས་བྱ་བ་ནི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་རྒྱུན་མི་འཆད་ཅིང་རྟོན་པའོ། །རྣམ་པར་ཤེས་པའི་རྐྱེན་གྱིས་མིང་དང་གཟུགས་ཤེས་བྱ་བ་ནི་རྣམ་པར་ཤེས་པའི་རྐྱེན་གྱིས་མིང་དང་གཟུགས་རྒྱུན་མི་འཆད་ཅིང་རྟོན་པའོ། །མིང་དང་གཟུགས་ཀྱི་རྐྱེན་གྱིས་དྲུག་གི་སྐྱེ་མཆེད་ཅེས་བྱ་བ་ནི་མིང་དང་གཟུགས་ཀྱི་རྐྱེན་གྱིས་དྲུག་གི་སྐྱེ་མཆེད་རྒྱུན་མི་འཆད་ཅིང་རྟོན་པའོ། །དྲུག་གི་སྐྱེ་མཆེད་ཀྱི་རྐྱེན་གྱིས་རེག་པའོ། །ཞེས་བྱ་བ་ནི་དྲུག་གི་སྐྱེ་མཆེད་ཀྱི་རྐྱེན་གྱིས་རེག་པ་རྒྱུན་མི་འཆད་ཅིང་རྟོན་པའོ། །རེག་པའི་རྐྱེན་གྱིས་ཚོར་བའོ། །ཞེས་བྱ་བ་ནི་རེག་པའི་རྐྱེན་གྱིས་ཚོར་བ་རྒྱུན་མི་འཆད་ཅིང་རྟོན་པའོ། །ཚོར་བའི་རྐྱེན་གྱིས་སྲེད་པའོ། །ཞེས་བྱ་བ་ནི་ཚོར་བའི་རྐྱེན་གྱིས་སྲེད་པ་རྒྱུན་མི་འཆད་ཅིང་རྟོན་པའོ། །སྲེད་པའི་རྐྱེན་གྱིས་ཉེ་བར་ལེན་པའོ། །ཞེས་བྱ་བ་ནི་སྲེད་པའི་རྐྱེན་གྱིས་ཉེ་བར་ལེན་པ་རྒྱུན་མི་འཆད་ཅིང་རྟོན་པའོ། །ཉེ་བར་ལེན་པའི་རྐྱེན་གྱིས་སྲིད་པའོ། །ཞེས་བྱ་བ་ནི་ལེན་པའི་རྐྱེན་གྱིས་སྲིད་པ་རྒྱུན་མི་འཆད་ཅིང་རྟོན་པའོ། །སྲིད་པའི་རྐྱེན་གྱིས་སྐྱེ་བའོ། །ཞེས་བྱ་བ་ནི་སྲིད་པའི་རྐྱེན་གྱིས་སྐྱེ་བ་རྒྱུན་མི་འཆད་ཅིང་རྟོན་པའོ། །སྐྱེ་བའི་རྐྱེན་གྱིས་རྒ་ཤིའོ་ཞེས་བྱ་བ་ནི་སྐྱེ་བའི་རྐྱེན་གྱིས་རྒ་ཤི་རྒྱུན་མི་
འཆད་ཅིང་རྟོན་པའོ། །མ་རིག་པ་འགགས་པས་འདུ་བྱེད་རྣམས་འགག་གོ །ཞེས་བྱ་བ་ནི་མ་རིག་པའི་རྐྱེན་མེད་པས་འདུ་བྱེད་རྣམས་ཉེ་བར་ཞི་ཞིང་རྟོན་པ་མེད་པའོ། །འདུ་བྱེད་འགགས་པས་རྣམ་པར་ཤེས་པ་འགག་གོ །ཞེས་བྱ་བ་ནི་འདུ་བྱེད་ཀྱི་རྐྱེན་མེད་པས་རྣམ་པར་ཤེས་པ་ཉེ་བར་ཞི་ཞིང་རྟོན་པ་མེད་པའོ། །རྣམ་པར་ཤེས་པ་འགགས་པས་མིང་དང་གཟུགས་འགག་གོ །ཞེས་བྱ་བ་ནི་རྣམ་པར་ཤེས་པའི་རྐྱེན་མེད་པས་མིང་དང་གཟུགས་ཉེ་བར་ཞི་ཞིང་རྟོན་པ་མེད་པའོ། །མིང་དང་གཟུགས་འགགས་པས་དྲུག་གི་སྐྱེ་མཆེད་འགག་གོ །ཞེས་བྱ་བ་ནི་མིང་དང་གཟུགས་ཀྱི་རྐྱེན་མེད་པས་དྲུག་གི་སྐྱེ་མཆེད་ཉེ་བར་ཞི་ཞིང་རྟོན་པ་མེད་པའོ། །དྲུག་གི་སྐྱེ་མཆེད་འགགས་པས་རེག་པ་འགག་གོ །ཞེས་བྱ་བ་ནི་དྲུག་གི་སྐྱེ་མཆེད་ཀྱི་རྐྱེན་མེད་པས་རེག་པ་ཉེ་བར་ཞི་ཞིང་རྟོན་པ་མེད་པའོ། །རེག་པ་འགགས་པས་ཚོར་བ་འགག་གོ །ཞེས་བྱ་བ་ནི་རེག་པའི་རྐྱེན་མེད་པས་ཚོར་བ་ཉེ་བར་ཞི་ཞིང་རྟོན་པ་མེད་པའོ། །ཚོར་བ་འགགས་པས་སྲེད་པ་འགག་གོ །ཞེས་བྱ་བ་ནི་ཚོར་བའི་རྐྱེན་མེད་པས་སྲེད་པ་ཉེ་བར་ཞི་ཞིང་རྟོན་པ་མེད་པའོ། །སྲེད་པ་འགགས་པས་ལེན་པ་འགག་གོ །ཞེས་བྱ་བ་ནི་སྲེད་པའི་རྐྱེན་མེད་པས་ལེན་པ་ཉེ་བར་ཞི་ཞིང་རྟོན་པ་མེད་པའོ། །ཉེ་བར་ལེན་པ་འགགས་པས་སྲིད་པ་འགག་གོ །ཞེས་བྱ་བ་ནི་ཉེ་བར་ལེན་པའི་རྐྱེན་མེད་པས་སྲིད་པ་ཉེ་བར་ཞི་ཞིང་རྟོན་པ་མེད་པའོ། །སྲིད་པ་འགགས་པས་སྐྱེ་བ་འགག་གོ །ཞེས་བྱ་བ་ནི་སྲིད་པའི་རྐྱེན་མེད་པས་སྐྱེ་བ་ཉེ་བར་ཞི་ཞིང་རྟོན་པ་མེད་པའོ། །སྐྱེ་བ་འགགས་པས་རྒ་ཤི་འགག་གོ །ཞེས་བྱ་བ་ནི་སྐྱེ་བའི་རྐྱེན་མེད་པས་རྒ་ཤི་ཉེ་བར་ཞི་ཞིང་རྟོན་པ་མེད་པའོ། །དེ་ལ་མ་རིག་པ་དང་སྲིད་པ་དང་ཉེ་བར་ལེན་པ་ནི་ཉོན་མོངས་པའི་ལམ་གྱི་རྒྱུན་མི་འཆད་པའོ། །འདུ་བྱེད་དང་སྲིད་པ་ནི་
ལས་ཀྱི་ལམ་གྱི་རྒྱུན་མི་འཆད་པའོ། །ལྷག་མ་རྣམས་ནི་སྡུག་བསྔལ་གྱི་ལམ་གྱི་རྒྱུན་མི་འཆད་པའོ། །རབ་ཏུ་རྣམ་པར་ཕྱེ་བས་སྔུན་གྱི་མཐའ་དང་ཕྱི་མའི་མཐའ་འགགས་པས་ལམ་གྱི་རྒྱུན་མི་འཆད་པའོ། །དེ་ལྟར་ལམ་འདི་གསུམ་ནི་བདག་མེད་ཅིང་བདག་དང་བདག་གི་དང་བྲལ་བར་འབྱུང་ཞིང་འཇིག་པ་སྟེ། རང་བཞིན་གྱིས་མདུང་ཁྱིམ་ལྟ་བུའོ། །དེ་ལྟར་མ་རིག་པའི་རྐྱེན་གྱིས་འདུ་བྱེད་རྣམས་ཤེས་བྱ་བ་འདི་ནི་སྔོན་གྱི་མཐའ་ལ་བལྟས་པའོ། །རྣམ་པར་ཤེས་པ་དང་མིང་དང་གཟུགས་དང་དྲུག་གི་སྐྱེ་མཆེད་དང་རེག་པ་དང་། ཚོར་བ་འདི་དག་ནི་ད་ལྟར་བྱུང་བ་ལ་བལྟས་པའོ། །སྲེད་པ་དང་ཉེ་བར་ལེན་པ་དང་སྲིད་པ་དང་། སྐྱེ་བ་ཞེས་བྱ་བ་འདི་ནི་ཕྱི་མའི་མཐའ་ལ་བལྟས་པ་སྟེ། དེ་ཕན་ཆད་དུའང་དེ་དག་རྒྱུན་དུ་འབྱུང་ངོ་། །མ་རིག་པ་འགགས་པས་འདུ་བྱེད་རྣམས་འགག་ཅེས་བྱ་བ་འདི་ནི་ལྟ་བ་རྒྱུན་ཆད་པ་སྟེ་ལྷག་མ་རྣམས་ཀྱང་དེ་བཞིན་ནོ། །ཡང་འདི་ལྟར་སྲིད་པའི་ཡན་ལག་བཅུ་གཉིས་པོ་འདི་དག་གི་རྒྱུས་སྡུག་བསྔལ་གསུམ་འབྱུང་སྟེ། དེ་ལ་མ་རིག་པ་དང་འདུ་བྱེད་དང་རྣམ་པར་ཤེས་པ་དང་མིང་དང་། གཟུགས་དང་། དྲུག་གི་སྐྱེ་མཆེད་ཅེས་བྱ་བ་ནི། འདུ་བྱེད་ཀྱི་སྡུག་བསྔལ་ལོ། །རེག་པ་དང་ཚོར་བ་ཞེས་བྱ་བ་འདི་ནི་སྡུག་བསྔལ་གྱི་ཡང་སྡུག་བསྔལ་ལོ། །སྲེད་པ་དང་ཉེ་བར་ལེན་པ་དང་། སྲིད་པ་དང་། སྐྱེ་བ་ནས་འཁྲུག་པ་ཞེས་བྱ་བའི་བར་འདི་ནི་འགྱུར་བའི་སྡུག་བསྔལ་ལོ། །མ་རིག་པ་འགགས་པས་འདུ་བྱེད་རྣམས་འགག་ཅེས་བྱ་བ་འདི་ནི་སྡུག་བསྔལ་གསུམ་གྱི་རྒྱུན་ཆད་པའོ། །མ་རིག་པའི་རྐྱེན་གྱིས་འདུ་བྱེད་རྣམས་ཤེས་བྱ་བ་ནི་འདུ་བྱེད་རྣམས་རྒྱུ་དང་རྐྱེན་ལས་བྱུང་བ་སྟེ། ལྷག་མ་རྣམས་ཀྱང་དེ་བཞིན་ནོ། །མ་རིག་པ་འགགས་པས་འདུ་བྱེད་འགག་ཅེས་བྱ་བ་ནི། འདུ་བྱེད་རྣམས་མེད་པ་སྟེ། ལྷག་མ་རྣམས་ཀྱང་དེ་བཞིན་ནོ། །མ་རིག་པའི་རྐྱེན་
གྱིས་འདུ་བྱེད་རྣམས་ཤེས་བྱ་བ་ནི་སྐྱེ་བ་རྣམ་པར་འབྲེལ་བ་སྟེ། ལྷག་མ་རྣམས་ཀྱང་དེ་བཞིན་ནོ། །མ་རིག་པ་འགགས་པས་འདུ་བྱེད་འགག་ཅེས་བྱ་བ་ནི། འཇིག་པ་རྣམ་པར་འབྲེལ་བ་སྟེ། ལྷག་མ་རྣམས་ཀྱང་དེ་བཞིན་ནོ། །མ་རིག་པའི་རྐྱེན་གྱིས་འདུ་བྱེད་རྣམས་ཤེས་བྱ་བ་ནི་སྲིད་པ་ལུགས་སུ་འཐུན་པར་བརྟག་པ་སྟེ། ལྷག་མ་རྣམས་ཀྱང་དེ་བཞིན་ནོ། །མ་རིག་པ་འགགས་པས་འདུ་བྱེད་འགག་ཅེས་བྱ་བ་ནི་ཟད་པ་དང་འཇིག་པའི་ལུགས་སུ་འཐུན་པར་བརྟག་པ་སྟེ། ལྷག་མ་རྣམས་ཀྱང་དེ་བཞིན་ནོ། །ཞེས་དེ་ལྟར་རྟེན་ཅིང་འབྲེལ་བར་འབྱུང་བ་ལ་ལུགས་སུ་འཐུན་པ་དང་། མི་འཐུན་པའི་ཚུལ་དུ་རབ་ཏུ་རྟོག་སྟེ། འདི་ལྟར་སྲིད་པའི་ཡན་ལག་རྗེས་སུ་འབྲེལ་བ་དང་། སེམས་གཅིག་ཏུ་ཡང་དག་པར་འདུ་བ་དང་། རང་གི་ལས་མ་འདྲེས་པ་དང་། ཆེད་དུ་བྱེད་པ་མེད་པ་དང་ལམ་གསུམ་གྱི་རྒྱུད་དུ་འབྲང་བ་དང་། སྔོན་གྱི་མཐའ་དང་ད་ལྟར་བྱུང་བ་དང་། ཕྱི་མའི་མཐའ་ལ་བལྟ་བ་དང་། སྡུག་བསྔལ་གསུམ་འབྱུང་བ་དང་། རྒྱུ་དང་རྐྱེན་ལས་བྱུང་བ་དང་། སྐྱེ་བ་དང་འཇིག་པ་རྣམ་པར་འབྲེལ་བ་དང་། སྲིད་པའི་ལུགས་སུ་འཐུན་པ་དང་། ཟད་པར་འགྱུར་བར་རབ་ཏུ་རྟོག་པའོ། །དེ་དེ་ལྟར་རྟེན་ཅིང་འབྲེལ་བར་འབྱུང་བ་ལ་རྣམ་པ་བཅུར་རབ་ཏུ་རྟོག་ཅིང་བདག་མེད་པ་དང་། སྲོག་མེད་པ་དང་། གང་ཟག་མེད་པ་དང་། ངོ་བོ་ཉིད་ཀྱིས་སྟོང་པ་དང་། རང་བཞིན་གྱིས་བྱེད་པ་པོ་དང་། ཚོར་བ་པོ་མེད་པར་རབ་ཏུ་རྟོག་པའི་ཚེ། སྟོང་པ་ཉིད་ཀྱི་རྣམ་པར་ཐར་པའི་སྒོ་སྐྱེས་པ་ཡིན། སྲིད་པའི་ཡན་ལག་འདི་དག་གི་རང་བཞིན་འགགས་ཤིང་རྣམ་པར་ཐར་པ་ལ་ཤིན་ཏུ་ཉེ་བར་གནས་པས་ཆོས་ཀྱི་མཚན་མ་གང་ཡང་མི་སྐྱེ་སྟེ་དེས་དེའི་མཚན་མ་མེད་པའི་རྣམ་པར་ཐར་པའི་སྒོ་སྐྱེས་པ་ཡིན། དེ་ལྟར་དེ་སྟོང་པ་ཉིད་དང་མཚན་མ་མེད་པ་ལ་ཞུགས་པས་སྙིང་རྗེ་ཆེན་པོ་སྔོན་དུ་གཏོང་
ཞིང་སེམས་ཅན་ཡོངས་སུ་སྨིན་པར་བྱ་བ་མ་གཏོགས་པར་འདོད་པ་གང་ཡང་མི་སྐྱེ་སྟེ་དེས་དེའི་སྨོན་པ་མེད་པའི་རྣམ་པར་ཐར་པའི་སྒོ་སྐྱེས་པ་ཡིན། དེ་རྣམ་པར་ཐར་པའི་སྒོ་གསུམ་པོ་འདི་དག་སྒོམ་པས་བདག་དང་ཕ་རོལ་གྱི་འདུ་ཤེས་དང་བྲལ་བ་དང་། བྱེད་པ་པོ་དང་། ཚོར་བ་པོའི་འདུ་ཤེས་དང་བྲལ་བ་དང་། ཡོད་པ་དང་མེད་པའི་འདུ་ཤེས་དང་བྲལ་བས། བྱང་ཆུབ་ཀྱི་ཡན་ལག་ཡོངས་སུ་མ་རྫོགས་པ་རྣམས་ཡོངས་སུ་རྫོགས་པར་བྱ་བའི་ཕྱིར་སྙིང་རྗེ་ཆེན་པོ་སྔོན་དུ་བཏང་སྟེ། དེ་བས་ཀྱང་ཤིན་ཏུ་བརྩོན་པར་བྱེད་དོ། །དེ་འདི་སྙམ་དུ་སེམས་ཏེ། འདུ་བ་ཡོད་པས་ནི་འདུས་བྱས་འཕེལ་བར་འགྱུར་རོ། །འདུ་བ་དང་བྲལ་བས་ནི་འཕེལ་བ་མེད་དོ། །རྒྱུ་རྐྱེན་དང་ལྡན་པས་ནི་འདུ་བྱེད་འཕེལ་བར་འགྱུར་རོ། །རྒྱུ་རྐྱེན་དང་མི་ལྡན་པས་ནི་འཕེལ་བ་མེད་དོ། །དེ་ལྟ་བས་ན་བདག་གིས་དེ་ལྟ་བུའི་འདུས་བྱས་ཉེས་པ་མང་པོའི་སྐྱོན་ཅན་ཤེས་པར་བྱས་ཏེ་འདུ་བ་དང་རྒྱུ་རྐྱེན་དང་ལྡན་པ་འདི་དག་རྒྱུན་གཅད་པར་བྱའོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་འདུ་བྱེད་རྣམས་ཤིན་ཏུ་ཞི་བའང་མངོན་དུ་མི་བྱའོ་ཞེས་ཏེ། ཀྱེ་རྒྱལ་བའི་སྲས་དག་དེ་དེ་ལྟར་འདུ་བྱེད་ཀྱི་རྣམ་པ་དེ་ལྟར་ཉེས་པ་མང་པོའི་སྐྱོན་ཅན་སྙིང་པོ་དང་རང་བཞིན་མེད་པ་སྐྱེ་བ་མེད་པ་འགག་པ་མེད་པའི་རང་བཞིན་དུ་རབ་ཏུ་རྟོག་པ་དང་སྙིང་རྗེ་ཆེན་པོ་རབ་ཏུ་བསྒྲུབ་པ་དང་། སེམས་ཅན་ཡོངས་སུ་མི་གཏོང་བས་ཆགས་པ་མེད་པའི་ཡེ་ཤེས་མངོན་སུམ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་སྣང་བའི་ཚུལ་དུ་མངོན་སུམ་དུ་འགྱུར་རོ། །དེ་དེ་ལྟ་བུའི་ཡེ་ཤེས་དང་ལྡན་ཞིང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པས་སྣང་བར་གྱུར་ནས་ཀྱང་། བྱང་ཆུབ་ཀྱི་ཡན་ལག་ཡོངས་སུ་སྡུད་པའི་རྐྱེན་ཉེ་བར་སྩོགས་ཤིང་ཡང་དག་པར་སྡུད་དོ། །འདུས་བྱས་དང་འགྲོགས་པར་ཡང་མི་གནས་སོ། །འདུ་བྱེད་རྣམས་རང་བཞིན་གྱིས་ཞི་བ་ཡང་རབ་
ཏུ་རྟོག་གོ །འོན་ཀྱང་བྱང་ཆུབ་ཀྱི་ཡན་ལག་རྣམས་མ་རྫོགས་པའི་ཕྱིར་དེ་ལ་མི་གནས་ཏེ། དེ་བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་ཚེ་འཇུག་པ་སྟོང་པ་ཞེས་བྱ་བའི་ཏིང་ངེ་འཛིན་སྐྱེ་བར་འགྱུར་རོ། །རང་བཞིན་སྟོང་པ་ཉིད་དང་། དོན་དམ་པ་སྟོང་པ་ཉིད་དང་། ཆེན་པོ་སྟོང་པ་ཉིད་དང་། འདུ་བ་སྟོང་པ་ཉིད་དང་། མངོན་པར་བསྒྲུབ་པ་སྟོང་པ་ཉིད་དང་། ཡང་དག་པ་ཇི་ལྟ་བ་བཞིན་དུ་རྣམ་པར་རྟོག་པའི་སྟོང་པ་ཉིད་དང་། ལྟོས་པ་སྟོང་པ་ཉིད་དང་། ཐ་དད་པ་དང་ཐ་དད་པ་མེད་པ་སྟོང་པ་ཉིད་ཅེས་བྱ་བའི་ཏིང་ངེ་འཛིན་ཀྱང་སྐྱེ་བར་འགྱུར་ཏེ། དེ་དག་ལ་སྩོགས་པ་སྟོང་པ་ཉིད་ཀྱི་སྒོའི་ཏིང་ངེ་འཛིན་བརྒྱ་སྟོང་ཕྲག་བཅུ་དེ་ལ་མངོན་སུམ་དུ་འགྱུར་རོ། །དེ་བཞིན་དུ་མཚན་མ་མེད་པའི་སྒོའི་ཏིང་ངེ་འཛིན་བརྒྱ་སྟོང་ཕྲག་བཅུ་དང་སྨོན་པ་མེད་པའི་སྒོའི་ཏིང་ངེ་འཛིན་བརྒྱ་སྟོང་ཕྲག་བཅུ་མངོན་སུམ་དུ་འགྱུར་རོ། །དེ་ལྟར་བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་བྱང་ཆུབ་སེམས་དཔའ་དེ་ཕྱིར་ཞིང་མི་ཕྱེད་པའི་བསམ་པ་ཡོངས་སུ་རྫོགས་པ་འཐོབ་པོ། །ངེས་པའི་བསམ་པ་དང་དགེ་བའི་བསམ་པ་དང་། ཟབ་པའི་བསམ་པ་དང་། ཕྱིར་མི་ལྡོག་པའི་བསམ་པ་དང་། རྒྱུན་མི་འཆད་པའི་བསམ་པ་དང་། དྲི་མ་མེད་པའི་བསམ་པ་དང་། མཐའ་ཡས་པའི་བསམ་པ་དང་། ཡེ་ཤེས་ལ་མངོན་པར་མོས་པའི་བསམ་པ་དང་། ཐབས་དང་ཤེས་རབ་ཏུ་ལྡན་པའི་བསམ་པ་ཡོངས་སུ་རྫོགས་པ་འཐོབ་སྟེ། བྱང་ཆུབ་སེམས་དཔའི་བསམ་པ་འདི་བཅུ་ནི། དེ་བཞིན་གཤེགས་པའི་བྱང་ཆུབ་ཀྱི་རྗེས་སུ་སོང་བ་ཡིན། ཕས་ཀྱི་རྒོལ་བ་ཐམས་ཅད་ཀྱི་ཕྱིར་མི་ལྡོག་པ་ཡིན། ཡེ་ཤེས་ཀྱི་ས་ལ་ཡང་དག་པར་གཞོལ་བ་ཡིན། ཉན་ཐོས་དང་། རང་སངས་རྒྱས་ཀྱི་ས་ལས་རྣམ་པར་ལོག་པ་ཡིན། སངས་རྒྱས་ཀྱི་ཡེ་ཤེས་མངོན་དུ་བྱ་བ་ལ་ཤིན་ཏུ་ངེས་པ་ཡིན། བདུད་དང་ཉོན་མོངས་པ་
ཀུན་ནས་རྒྱུ་བ་ཐམས་ཅད་ཀྱིས་མི་འཕྲོགས་པ་ཡིན། བྱང་ཆུབ་སེམས་དཔའི་སྣང་བ་ལ་ཤིན་ཏུ་གནས་པ་ཡིན། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་ཡང་དག་པར་སྤྱད་པ་ཡོངས་སུ་བསྒོམས་པ་ཡིན། ཐབས་དང་། ཤེས་རབ་དང་། ཡེ་ཤེས་རྣམ་པར་དཔྱད་པ་དང་ལྡན་པ་ཡིན། བྱང་ཆུབ་ཀྱི་ཕྱོགས་ཀྱི་ཆོས་མངོན་པར་བསྒྲུབ་པ་དང་། རྣམ་པར་འདྲེས་པ་ཡིན། དེ་ལྟར་དེ་བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་ཚེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་ཤས་ཆེ་བ་ཡིན། ཆོས་དེ་དག་ལ་ཚུལ་བཞིན་དུ་འཐུན་པར་བྱེད་ཅིང་མི་མཐུན་པར་མི་བྱེད་པས་འཐུན་པའི་བཟོད་པ་གསུམ་པ་རབ་ཏུ་རྣོ་བ་རབ་ཏུ་སྐྱེས་པ་ཡིན། དེ་ལྟར་དེ་བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་ཚེ་དེའི་ལྟ་བ་རྒྱ་ཆེན་པོ་དང་སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་ཏེ། ལྟ་བ་རྒྱ་ཆེན་པོ་དང་། སྨོན་ལམ་གྱི་སྟོབས་ཀྱིས་སངས་རྒྱས་བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་ཕྲག་མང་པོ་དང་། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང་། སངས་རྒྱས་ཁྲག་ཁྲིག་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས་བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང་། བསོད་སྙོམས་དང་། གཟིམས་ཆ་དང་། སྙུན་གྱི་རྐྱེན་སྨན་དང་ཡོ་བྱད་དག་ཀྱང་འབུལ་ཞིང་བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་
ཚོགས་རྣམས་ལ་ཡང་ཡང་དག་པར་མཆོད་པ་བྱེད་དེ་དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་བསྙེན་བཀུར་བྱེད་ཅིང་རིམ་གྲོ་དང་། བཀུར་སྟིས་ནན་ཏན་ཏུ་ཆོས་ཉན་ཅིང་ལེན་ཏོ། །འཛིན་ཏོ། །ཐོས་ནས་ཀྱང་ཡང་དག་པ་ཇི་ལྟ་བ་བཞིན་དུ་སྙོམས་པར་འཇུག་པ་དང་། ཤེས་རབ་དང་ཡེ་ཤེས་ཀྱི་སྣང་བས་རབ་ཏུ་བརྩོན་པར་བྱེད་དེ་ནན་ཏན་གྱིས་ཡོངས་སུ་འཛིན་པས་དེ་སྔོན་བས་ཀྱང་དེ་བཞིན་གཤེགས་པའི་ཆོས་ཀྱི་མཛོད་རབ་ཏུ་ཐོབ་པ་ཡིན། དེ་ལྟར་དེ་བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་ཚེ། དགེ་བའི་རྩ་བ་དེ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང་། བསྐལ་པ་ཁྲག་ཁྲིག་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་སྔོན་བས་ཀྱང་ཆེས་བྱང་བ་དང་། ཆེས་འོད་གསལ་ཞིང་དང་བར་གནས་སོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། གསེར་གྱི་ས་ལེ་སྦྲམ་དེ་ཉིད་བཻ་དཱུ་རྱས་བཏབ་ན་སྔོན་བས་ཀྱང་ཤིན་ཏུ་འཚེར་ལ་འོད་གསལ་ཞིང་དང་བར་འགྱུར་རོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་བྱང་ཆུབ་སེམས་དཔའི་དགེ་བའི་རྩ་བ་དེ་དག་ཀྱང་ཤེས་རབ་དང་ཡེ་ཤེས་ཀྱིས་ཤིན་ཏུ་བརྟགས་པས་སྔོན་བས་ཀྱང་ཤིན་ཏུ་བྱང་ལ་འོད་གསལ་ཞིང་དང་བ་ཡིན་ཏེ། ཕྱི་ཕྱིར་ཞིང་ཡང་རབ་ཏུ་ཞི་བས་མི་འཕྲོགས་པར་འགྱུར་རོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། ཟླ་བའི་འོད་ནི་སེམས་
ཅན་གྱི་ལུས་ཀྱང་སིམ་པར་བྱེད་ལ། རླུང་གི་དཀྱིལ་འཁོར་ཆེན་པོ་བཞིས་ཀྱང་མི་འཕྲོགས་པ་ཡིན། ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ས་མངོན་སུམ་འདི་ལ་གནས་པའི་དགེ་བའི་རྩ་བ་དེ་དག་སྔོན་བས་ཀྱང་སེམས་ཅན་དུ་མའི་བསམ་པའི་ཉོན་མོངས་པ་འབར་བ་ཡང་ཞི་ཞིང་སིམ་པར་བྱེད་ལ། བདུད་ཀྱི་ལམ་གྱི་རྒྱུད་བཞིས་ཀྱང་མི་འཕྲོགས་པ་ཡིན། དེའི་ཕ་རོལ་ཏུ་ཕྱིན་པ་བཅུ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་བསྒྲུབ་པ་མ་ཡིན་ནོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ས་མངོན་སུམ་ཞེས་བྱ་བ་སྟེ། བྱང་ཆུབ་སེམས་དཔའི་ས་དྲུག་པའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་ལྷའི་རྒྱལ་པོ་རབ་འཕྲུལ་དགར་འགྱུར་ཏེ། སེམས་ཅན་ཐམས་ཅད་ཀྱི་ལྷག་པའི་ང་རྒྱལ་ཞི་བར་བྱ་བ་ལ་མཁས་ཤིང་མཐུ་ཡོད་པ་ཡིན། ཉན་པ་ཐམས་ཅད་ཀྱི་ཡོངས་སུ་དྲི་བས་མི་འཕྲོགས་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས། ཐམས་ཅད་མཁྱེན་པའི་ཡེ་ཤེས་ལ་བརྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང་། ཆོས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་། ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་།
མི་འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་ཁྲག་ཁྲིག་བརྒྱ་སྟོང་རབ་ཏུ་འཐོབ་ཅིང་དེ་དག་ལ་མཉམ་པར་གཞོག་པ་དང་། སངས་རྒྱས་ཁྲག་ཁྲིག་བརྒྱ་སྟོང་མཐོང་བ་དང་། དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་ཁྲག་ཁྲིག་བརྒྱ་སྟོང་སྐྱོད་པ་དང་། སངས་རྒྱས་ཀྱི་ཞིང་ཁྲག་ཁྲིག་བརྒྱ་སྟོང་དུ་འགྲོ་བ་དང་། འཇིག་རྟེན་གྱི་ཁམས་ཁྲག་ཁྲིག་བརྒྱ་སྟོང་སྣང་བར་བྱ་བ་དང་། སེམས་ཅན་ཁྲག་ཁྲིག་བརྒྱ་སྟོང་ཡོངས་སུ་སྨིན་པར་བྱ་བ་དང་། བསྐལ་པ་ཁྲག་ཁྲིག་བརྒྱ་སྟོང་དུ་གནས་པར་བྱ་བ་དང་། སྔོན་གྱི་མཐའ་དང་། ཕྱི་མའི་མཐའི་བསྐལ་པ་ཁྲག་ཁྲིག་བརྒྱ་སྟོང་ལ་རབ་ཏུ་འཇུག་པ་དང་། ཆོས་ཀྱི་སྒོ་ཁྲག་ཁྲིག་བརྒྱ་སྟོང་རྣམ་པར་འབྱེད་པ་དང་། ལུས་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་བསྟན་པ་དང་། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་ཁྲག་ཁྲིག་བརྒྱ་སྟོང་ཡང་དག་པར་བསྟན་པར་བྱ་བའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཅད་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ་དེ་དག་གི་ལུས་སམ། འོད་དམ་རྫུ་འཕྲུལ་ལམ། མིག་གམ་སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ་བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའོ། །དེ་ནས་བྱང་ཆུབ་སེམས་དཔའ་
རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང་། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མཁས་པས་ལམ་གྱི་སྤྱོད་པ་ལྔ་པོར་ཡོངས་རྫོགས་ནས། །ཆོས་རྣམས་མཚན་མེད་མཚན་ཉིད་མེད་དང་མ་སྐྱེས་དང་། །མ་བྱུང་སྔ་ནས་ཡོངས་སུ་ཞི་ཞིང་སྤྲོས་མེད་པ། །ཡོངས་སུ་བསྒོམ་པས་ཡེ་ཤེས་བློ་ཅན་དྲུག་པ་གནོན། །ཆོས་རྣམས་དབེན་ཞིང་ལེན་མེད་རྣམ་པར་རྟོག་མེད་དང་། །སྒྱུ་མའི་རང་བཞིན་གཉིས་ཀའི་དངོས་ལས་རྣམ་གྲོལ་བས། །ཆོས་ཀྱི་ཚུལ་ལ་འགལ་མེད་རྗེས་སུ་འཐུན་བྱེད་ཅིང་། །ཡེ་ཤེས་ལྡན་པའི་དམ་པ་དྲུག་པ་ཡོངས་སུ་གནོན། །འཐུན་པ་རྣོ་ལ་གནས་ཤིང་ཡེ་ཤེས་སྟོབས་ལྡན་པ། །འཇིག་རྟེན་ཀུན་གྱི་འབྱུང་དང་འཇིག་ལ་རབ་ཏུ་རྟོག །གཏི་མུག་མུན་པས་འགྲོ་བ་འབྱུང་བ་ཀུན་ཏུ་སྐྱེད། །གཏི་མུག་དེ་ཉིད་བྲལ་བས་འབྱུང་བ་མེད་པ་ཡིན། །རྐྱེན་གྱི་རྣམ་པ་དོན་དམ་སྟོང་པར་རྣམ་པར་འབྱེད། །བྱ་བ་མི་འགལ་རྒྱུ་རྐྱེན་བྱེད་པ་མཉམ་པར་ཤེས། །ཡང་དག་ཇི་བཞིན་བྱེད་པ་མེད་པར་ལས་ཤེས་ནས། །འདུས་བྱས་སྤྲིན་སྡུག་ལྟ་བུར་བྱེད་པ་མེད་པར་ཤེས། །བདེན་པ་མི་ཤེས་དེ་ནི་ཡང་དག་མ་རིག་པ། །ལས་ནི་སེམས་ཀྱི་སྟོབས་ཀྱིས་མགོ་རྨོངས་བྱུང་བར་གྱུར། །སེམས་ལ་རྟེན་ཏེ་ལྷན་ཅིག་བྱུང་བ་མིང་དང་གཟུགས། །དེ་ལྟར་སྡུག་བསྔལ་ཕུང་པོ་ཆེན་པོའི་བར་དུ་འབྱུང་། །ཁམས་གསུམ་སེམས་ཀྱི་རྒྱུ་ལས་བྱུང་བར་དེ་འཇུག་སྟེ། །སྲིད་པའི་ཡན་ལག་བཅུ་གཉིས་འདི་དག་སེམས་གཅིག་རྟེན། །འདོད་ཆགས་སྐྱེས་པ་དེ་ལས་སེམས་སུ་བརྗོད་པ་ཡིན། །དེ་བཞིན་སྲིད་པའི་དངོས་པོ་སེམས་ཀྱི་རྣམ་པའོ། །མ་རིག་བྱ་བ་གཉིས་བྱེད་རྨོངས་པའི་དངོས་པོ་ལ། །རྨོངས་པར་བྱས་ཤིང་དེ་ནས་སེམས་པའི་རྒྱུ་ཡང་འབྱིན། །དེ་བཞིན་རྒ་བ་ཕུང་པོ་གཞིག་བྱ་འཇིག་བྱེད་པར། །དེ་ལས་སྡུག་བསྔལ་མིང་ཐོགས་ཐམས་ཅད་མི་ཟད་འབྱུང་། །མ་རིག་རྐྱེན་གྱིས་ཆད་པར་འགྱུར་བ་ཡོད་པ་མིན། །རྣམ་པར་ཆད་ཅིང་རྒྱུ་རྐྱེན་བྲལ་བས་ཡོད་པ་འགག །
གཏི་མུག་སྲེད་པ་ཉེར་ལེན་ཉོན་མོངས་ལམ་ཡིན་ཏེ། །ལས་དང་སྲིད་པ་སེམས་པ་ལྷག་མ་སྡུག་བསྔལ་ཡིན། །གཏི་མུག་སྐྱེ་མཆེད་བར་དུ་འདུས་བྱས་སྡུག་བསྔལ་ཏེ། །རེག་དང་ཚོར་བ་དེ་དག་སྡུག་བསྔལ་སྡུག་བསྔལ་ཡིན། །ཡན་ལག་ལྷག་མ་འགྱུར་བའི་སྡུག་བསྔལ་རྣམས་འཕེལ་བ། །བདག་མེད་ཤེས་པས་སྡུག་བསྔལ་གསུམ་པོ་འཆད་པར་འགྱུར། །མུན་པ་སེམས་དང་འདུས་བྱས་འདི་ནི་སྔོན་ལྟས་ཡིན། །རྣམ་པར་ཤེས་ནས་ཚོར་བའི་རྒྱུན་ཏུ་ད་ལྟར་བྱུང་། །སྲེད་དང་སྲིད་པར་སྡུག་བསྔལ་འབྱུང་བ་ཕྱི་མའི་མཐའ། །འགགས་ཤིང་ཟད་པ་དེ་དག་ལྟ་བ་ཆད་པ་ཡིན། །གཏི་མུག་རྐྱེན་གྱིས་དེ་དག་རྣམ་པར་འབྲེལ་བ་འབྱུང་། །ཟད་པས་བྱང་ཆུབ་རྐྱེན་རྣམས་རྣམ་པར་འབྲེལ་བ་ཡིན། །རྒྱུ་ལས་རྒྱུ་འབྱུང་མེད་ན་རྒྱུ་ཡི་རྒྱུན་ཆད་འགྱུར། །བདེ་ཕན་ཤེས་ལྡན་རང་བཞིན་སྟོང་པ་དེ་ལྟར་རྟོག །རྒྱུད་དུ་འཐུན་པ་གཏི་མུག་མུན་ལས་བྱུང་བ་ཡིན། །མི་འཐུན་བཟློག་པ་གཏི་མུག་ཟད་པས་མི་འབྱུང་བའོ། །ཟབ་པའི་རྐྱེན་དང་དེ་དག་ཡོད་དང་མེད་པ་ལས། །གནས་པ་མེད་བློ་རྣམ་པ་བཅུར་ནི་དེ་ལྟར་རྟོག །སྲིད་པའི་ཡན་ལག་མཚམས་དང་སེམས་གཅིག་ལས་འཐུན་དང་། །ཆེད་དུ་མི་བྱེད་རྒྱུད་གསུམ་རྗེས་འབྲང་སྔོན་མཐའ་དང་། །སྡུག་བསྔལ་གསུམ་དང་རྒྱུས་བྱུང་སྐྱེ་དང་འཇིག་པ་དང་། །སྲིད་པའི་མཐར་ཕྱིན་ཟད་དང་རྐྱེན་གྱི་ལུགས་འཐུན་པར། །དེ་ལྟར་རྟེན་འབྲེལ་འབྱུང་ལ་ཡང་དག་འཇུག་བྱེད་པས། །སྒྱུ་འདྲ་ཡང་དག་མ་ཡིན་ཚོར་བར་བྱེད་མེད་ཅིང་། །རྨི་ལམ་འདྲ་བ་དེ་བཞིན་མིག་ཡོར་འདྲ་བ་སྟེ། །བྱིས་པ་བསླུ་བའི་སྨིག་རྒྱུ་རང་བཞིན་མཚུངས་མཉམ་པ། །དེ་ལྟར་བསྒོམ་པ་མཁས་པའི་སྟོང་པ་ཉིད་ཀྱི་སྒོ། །རྐྱེན་རྣམས་མེད་པ་དེ་ནི་མཚན་མ་མེད་པ་སྟེ། །ལོག་པར་ཤེས་པས་ནམ་ཡང་སྨོན་པ་མེད་པ་ཡིན། །གཞན་དུ་སེམས་ཅན་སྙིང་བརྩེའི་དོན་དུ་སྐྱེ་བ་འཛིན། །དེ་འདྲའི་རྣམ་ཐར་སྒོ་ལ་སྒོམ་བྱེད་མཐུ་ཆེ་བ། །
སྙིང་བརྩེའི་བློ་ལྡན་སངས་རྒྱས་ཡོན་ཏན་མངོན་འདོད་ཅིང་། །འདུས་བྱས་འདུས་པ་མཁས་པ་ཡོངས་སུ་རྟོག་བྱེད་པས། །བསམ་པ་ངེས་ཤིང་གཅིག་མིན་ལེགས་དང་ལྡན་པ་ཡིན། །སྟོང་ཉིད་ཏིང་འཛིན་སྟོང་ཕྲག་བཅུ་རྣམས་ཡོངས་སུ་རྒྱས། །དེ་བཞིན་བརྟན་པ་མཚན་མ་མེད་དང་སྨོན་མེད་ལྡན། །ཤེས་རབ་ཤེས་ཆེ་འཐུན་པའི་བཟོད་པ་མཆོག་ཅན་ཏེ། །མཁས་པའི་རྣམ་ཐར་ཡེ་ཤེས་ཆགས་པ་མེད་དང་ལྡན། །དེ་འདྲའི་བསམ་པས་དྲང་སྲོང་ཆེ་མང་མཆོད་བྱེད་པས། །རྒྱལ་བའི་བསྟན་པ་འདི་ལ་ཤིན་ཏུ་བསྔགས་པ་ཡིན། །དེ་ནི་སངས་རྒྱས་མཛོད་ཐོབ་ཁོང་དུ་ཆུད་པས་ན། །བཻ་ཌཱུརྻས་བཏབ་གསེར་མཆོག་བཞིན་དུ་སྔོན་བས་གསལ། །ཟླ་བའི་འོད་ནི་འགྲོ་བའི་ལུས་ལ་སིམ་པར་བྱེད། །རླུང་བཞི་ལངས་པས་ཡོངས་སུ་འཕྲོགས་པར་མི་ནུས་སོ། །རྒྱལ་སྲས་འོད་ཀྱང་བདུད་ཀྱི་ལམ་ལས་ཤིན་ཏུ་འདས། །ཉོན་མོངས་ཡོངས་སུ་གདུང་དང་སྡུག་བསྔལ་ནད་ཀྱང་སེལ། །ས་འདི་ཕྱོགས་སུ་ཕྱིན་པ་ལྷ་ཡི་བདག་པོར་འགྱུར། །འཕྲུལ་དགའི་དམ་པ་ལྷག་པའི་ང་རྒྱལ་སེལ་ལ་མཁས། །ཡེ་ཤེས་ལམ་དང་ལྡན་པ་དེ་ནི་ཅི་རྩོམ་ཡང་། །ཉན་ཐོས་ལམ་ལས་འདས་ཏེ་བརྟན་ཞིང་མི་འཕྲོགས་པའོ། །བདེ་གཤེགས་སྲས་པོ་བརྩོན་འགྲུས་ལྡན་པ་འདོད་གྱུར་ན། །ཏིང་འཛིན་བྱེ་བ་བརྒྱ་སྟོང་ཚང་བ་ཐོབ་པར་བྱེད། །སྐད་ཅིག་གཅིག་ཏུ་ཕྱོགས་བཅུར་སངས་རྒྱས་མང་པོ་ལྟ། །དཔྱིད་ཀྱི་ཉི་མ་གསལ་ཞིང་ལྷན་པར་བྱེད་པ་བཞིན། །ཟབ་ཅིང་བལྟ་དཀའ་ཕྲ་བ་སྟེ། །ཉན་ཐོས་ང་རྒྱལ་ཤེས་མི་ནུས། །བདག་ཉིད་ཆེ་ལ་ས་དྲུག་པ། །རྒྱལ་བའི་སྲས་ཀྱིས་བཤད་པ་ཡིན། །མངོན་སུམ་པ་ཞེས་བྱ་བ་སྟེ། །བྱང་ཆུབ་སེམས་དཔའི་ས་དྲུག་པའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་བདུན་པ། དེ་ནས་སྣ་ཚོགས་
ཡིད་འོང་སྤྲིན། །ལྷ་ཚོགས་མང་པོ་མཁའ་ལ་གནས་ཤིང་མངོན་པར་འཐོར། །ཚིག་སྙན་རྣམ་པར་བརྗོད་པ་བྱེད། །དགའ་བའི་དམ་པ་མཆོག་གིས་ཡོངས་སུ་རྒྱས། །དགེའོ་དོན་དམ་སེམས་མཛད་ཅིང་། །ཡོན་ཏན་བརྒྱ་དང་ཡང་དག་ལྡན་ཞིང་དབང་སྒྱུར་བ། །མི་ཡི་པུན་དཱ་རི་ཀ་ཡིན། །འགྲོ་ལ་ཕན་པའི་སྤྱོད་རབ་ཡང་དག་བཤད། །ཡིད་འོང་འོད་མཆོག་ལྡན་ཁྱོད་དང་། །མི་ཡི་གཙོ་བོ་མྱ་ངན་ཡོངས་སུ་སེལ་མཛད་ལ། །དབང་ཕྱུག་ཆེན་པོ་མཁའ་གནས་ཤིང་། །སྤོས་སྤྲིན་ཡིད་འོང་དམ་པ་མངོན་པར་འཐོར། །ཚིག་སྙན་རབ་ཏུ་བརྗོད་པ་བྱེད། །ལྷ་ཚོགས་མང་པོ་མཁའ་ལས་དགའ་འགྱུར་དབྱངས་སྒྲོག་ཅིང་། །གང་གིས་ས་བསྟན་འདི་ཐོས་པ། །དེ་དག་ཐོབ་པ་བཟང་པོ་ཐོབ་ཅེས་ཟེར། །རོལ་མོ་བརྡུང་དཀྲོལ་དབྱངས་སྙན་པ། །བརྒྱ་མང་ལྷ་ཡི་བུ་མོས་དགའ་བར་བྱས། །བདེ་བར་གཤེགས་དང་ཁྱོད་མཐུ་ཡིས། །ཚིག་རབ་འདི་འདྲ་རབ་ཏུ་བརྗོད་པར་འགྱུར། །ཞི་དང་ངེས་སྤྱོད་དམ་པ་ཅན། །མ་དུལ་འདུལ་མཛད་འཇིག་རྟེན་ཀུན་གྱིས་མཆོད་བྱས་པ། །འཇིག་རྟེན་ཀུན་ལས་འདས་པ་ཡི། །འཇིག་རྟེན་སྤྱོད་པ་ཤིན་ཏུ་ཕྲ་བ་བསྟན། །སྣ་ཚོགས་ལུས་ཀྱང་རབ་ཏུ་བསྟན། །ལུས་དང་ལུས་ལ་ཆོས་ཉིད་ཕུན་སུམ་ཚོགས་ཤིང་ལྡན། །རྣམ་དཔྱོད་ཞི་གནས་མཐུས་བཅིལ་བས། །དབྱངས་སུ་སྒྲོག་ཀྱང་ཡི་གེ་བརྗོད་མི་བྱེད། །ཞིང་རྣམས་བརྒྱར་ཡང་འདོད་བྱེད་ཅིང་། །མགོན་པོ་མཆོད་པར་འོས་ལ་མཆོད་རབ་བྱེད། །ཞིང་རྒྱལ་བདག་ཏུ་འདུ་ཤེས་པ། །ཡེ་ཤེས་དབང་སྒྱུར་མཆོག་གིས་རབ་ཏུ་སེལ། །སེམས་ཅན་ཡོངས་སུ་སྨིན་བྱེད་ཀྱང་། །བདག་དང་གཞན་གྱི་འདུ་ཤེས་རྣམ་པ་ཀུན་ཏུ་མེད། །དགེ་བ་ཡངས་པ་ཡང་དག་སྩོགས། །འོན་ཀྱང་དགེ་བ་
སྩོགས་ལ་གནས་པ་མེད། །འདོད་ཆགས་ཞེ་སྡང་གཏི་མུག་གིས། །འཇིག་རྟེན་ཐམས་ཅད་རབ་ཏུ་འབར་བར་མཐོང་གྱུར་ཅིང་། །འདུ་ཤེས་ཐམས་ཅད་རྣམ་སྤངས་ནས། །སྙིང་བརྩེ་ལྡན་པར་བརྩོན་འགྲུས་རབ་ཏུ་རྩོམ། །ལྷ་མང་ལྷ་ཡི་བུ་མོ་ཡིས། །གསུང་བའི་མཆོག་ལ་མཆོད་བྱས་ནས། །ཀུན་ཀྱང་མི་སྨྲ་དགར་གྱུར་ཏེ། །དྲང་སྲོང་ཆེ་ལ་ལྟ་ཞིང་གནས། །ཐར་པའི་ཟླ་བས་ཡང་སྨྲས་པ། །འཁོར་རྣམས་ཤིན་ཏུ་རྣམ་པར་དང་། །ས་བདུན་པ་ཡི་རྣམ་པ་དག །རྒྱལ་བའི་སྲས་ཀྱིས་བཤད་པ་མཛོད། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའི་ས་དྲུག་པ་ལ་དེ་ལྟར་སའི་ལམ་ཡོངས་སུ་རྫོགས་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་ས་བདུན་པ་ཡོངས་སུ་གནོན་ཏོ། །དེ་ཐབས་དང་ཤེས་རབ་ཀྱིས་མངོན་པར་བསྒྲུབས་པའི་ལམ་བརྩམ་པའི་ཁྱད་པར་བཅུས་ཡོངས་སུ་གནོན་ཏེ། བཅུ་གང་ཞེ་ན། འདི་ལྟ་སྟེ། སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པའི་ཏིང་ངེ་འཛིན་ཤིན་ཏུ་བསྒོམས་པའི་ཡིད་དང་ཡང་ལྡན་ལ་བསོད་ནམས་དང་། ཡེ་ཤེས་ཀྱི་ཚོགས་ཆེན་པོ་ཡང་ཡང་དག་པར་སྩོགས་པ་ཡིན། བདག་མེད་པ་དང་། གསོ་བ་མེད་པ་དང་། གང་ཟག་མེད་པའི་ཆོས་ལའང་རབ་ཏུ་འཇུག་ལ་ཚད་མེད་པ་བཞི་མངོན་པར་བསྒྲུབ་པ་ཡང་ཡོངས་སུ་མི་གཏོང་བ་ཡིན། བསོད་ནམས་ཀྱི་ཚོགས་ཀྱིས་ཤིན་ཏུ་མཐོ་བའི་ཕ་རོལ་ཏུ་ཕྱིན་པ་མངོན་པར་བསྒྲུབ་པའང་མངོན་པར་སྒྲུབ་ལ། ཆོས་གང་ལའང་མངོན་པར་ཆགས་པ་མེད་པ་ཡིན། ཁམས་གསུམ་པ་ལས་དབེན་པར་གྱུར་པའང་ཐོབ་ལ། ཁམས་གསུམ་པ་བསྡུ་བ་དང་། རྒྱན་མངོན་པར་བསྒྲུབ་པ་ཡིན། ཉོན་མོངས་པ་འབར་བ་ཐམས་ཅད་ཤིན་ཏུ་ཞི་ཞིང་རབ་ཏུ་ཞི་སྟེ། ཉེ་བར་ཞི་བའང་ཡིན་ལ་སེམས་ཅན་ཐམས་ཅད་ཀྱི་འདོད་ཆགས་དང་། ཞེ་སྡང་དང་
གཏི་མུག་དང་། ཉོན་མོངས་པའི་མེ་ལྕེ་རབ་ཏུ་ཞི་བར་མངོན་པར་བསྒྲུབ་པའང་མངོན་པར་སྒྲུབ་པ་ཡིན། སྒྱུ་མ་དང་རྨི་ལམ་དང་མིག་ཡོར་དང་། སྒྲ་བརྙན་དང་། ཆུའི་ཟླ་བ་དང་། གཟུགས་བརྙན་དང་། སྤྲུལ་པའི་རང་བཞིན་ལྟ་བུར་ཡོད་པ་དང་། མེད་པ་དང་། གཉིས་ཀ་མ་ཡིན་པ་ཐམས་ཅད་ཀྱང་ཁོང་དུ་ཆུད་ལ། ལས་དང་བྱ་བ་རྣམ་པར་ཕྱེ་བ་ཚད་མེད་པའི་བསམ་པ་ཡང་མངོན་པར་སྒྲུབ་པ་ཡིན། ཞིང་གི་ཐ་གྲུ་ནམ་མཁའ་དང་མཉམ་པར་ཤིན་ཏུ་བསྒོམས་པའི་ཡིད་དང་ཡང་ལྡན་ལ། སངས་རྒྱས་ཀྱི་ཞིང་ཡོངས་སུ་སྦྱོང་ཞིང་བསྒྲུབ་པ་དང་། རྒྱན་ཀྱང་མངོན་པར་སྒྲུབ་པ་ཡིན། སངས་རྒྱས་ཐམས་ཅད་ཀྱི་རང་བཞིན་དང་། ཆོས་དང་། སྐུ་ནམ་མཁའ་ལྟ་བུར་ཡང་རབ་ཏུ་འཇུག་ལ། གཟུགས་དང་། མཚན་དང་། དཔེ་བྱད་བཟང་པོ་བསྡུ་ཞིང་རྒྱན་མངོན་པར་བསྒྲུབ་པའང་མངོན་པར་སྒྲུབ་པ་ཡིན། དེ་བཞིན་གཤེགས་པའི་གསུང་རང་བཞིན་གྱིས་ཞི་ཞིང་བརྗོད་དུ་མེད་པའི་སྒྲ་དབྱངས་དང་ལྡན་པར་ཡང་ཡིད་ཆེས་ལ་སེམས་ཅན་ཐམས་ཅད་ཀྱི་དབྱངས་ཀྱི་ཡན་ལག་རྣམ་པར་ཕྱེ་བའི་རྒྱན་མངོན་པར་བསྒྲུབ་པ་ཡང་མངོན་པར་སྒྲུབ་པ་ཡིན། སངས་རྒྱས་བཅོམ་ལྡན་འདས་རྣམས་ཀྱིས་སྐད་ཅིག་གཅིག་ཏུ་དུས་གསུམ་ཐུགས་སུ་ཆུད་པར་ཡང་ཁོང་དུ་ཆུད་ལ་དུས་དང་བསྐལ་པའི་གྲངས་མཚན་ཉིད་ཐ་དད་པ་ལའང་སེམས་ཅན་གྱི་བསམ་པ་རྣམ་པར་བསྒོམ་པའི་ཕྱིར་རྗེས་སུ་འཇུག་པ་ཡིན་ཏེ། ཀྱེ་རྒྱལ་བའི་སྲས་དག །ཐབས་དང་ཤེས་རབ་ཀྱིས་མངོན་པར་བསྒྲུབས་པའི་ལམ་བརྩམ་པའི་ཁྱད་པར་འདི་བཅུས། བྱང་ཆུབ་སེམས་དཔའ་ས་དྲུག་པ་ལ་རྣམ་པར་དབྱེ་བ་ཤིན་ཏུ་བྱས་པ། ས་བདུན་ཡོངས་སུ་གནོན་ཏོ། །ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལམ་གྱི་ཚོགས་ཐབས་དང་ཤེས་རབ་ཀྱིས་མངོན་པར་བསྒྲུབ་
པའི་ཁྱད་པར་སྣང་བར་གྱུར་པ་འདི་དག་མངོན་པར་བསྒྲུབས་པས། བྱང་ཆུབ་སེམས་དཔའི་ས་བདུན་ཡོངས་སུ་གནོན་ཅེས་བྱ་སྟེ། དེ་ལྟར་བྱང་ཆུབ་སེམས་དཔའི་ས་བདུན་ལ་གནས་པའི་བྱང་ཆུབ་སེམས་དཔའ་དེ་ནི་སེམས་ཅན་གྱི་ཁམས་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི། སེམས་ཅན་ཡོངས་སུ་སྨིན་པར་མཛད་པ་དང་། འདུལ་བའི་ཕྲིན་ལས་ཚད་མེད་པ་ལ་འཇུག་གོ །འཇིག་རྟེན་གྱི་ཁམས་མང་པོ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི། སངས་རྒྱས་ཀྱི་ཞིང་རྣམ་པར་དག་པ་ཚད་མེད་པ་ལ་འཇུག་གོ །ཆོས་ཐ་དད་པ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་མངོན་པར་འཚང་རྒྱ་བ་ཚད་མེད་པ་ལ་འཇུག་གོ །བསྐལ་པའི་གྲངས་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་དུས་གསུམ་ཐུགས་སུ་ཆུད་པ་ཚད་མེད་པ་ལ་འཇུག་གོ །སེམས་ཅན་གྱི་མོས་པའི་ཁྱད་པར་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་མཚན་དང་། སྐུ་གཟུགས་དང་སྐུ་སྣ་ཚོགས་སྟོན་པ་ཚད་མེད་པ་ལ་འཇུག་གོ །སེམས་ཅན་རྣམས་ཀྱི་བསམ་པ་དང་། དབང་པོ་ཐ་དད་པ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་གསུང་བརྗོད་པས། སེམས་ཅན་ཡོངས་སུ་སྨིན་པར་མཛད་པ་ཚད་མེད་པ་ལ་འཇུག་གོ །སེམས་ཅན་རྣམས་ཀྱི་སེམས་དང་སྤྱོད་པ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་འབྱམ་ཀླས་པ་ཐུགས་སུ་ཆུད་པ་ཚད་མྱེད་པ་ལ་འཇུག་གོ །ཉན་ཐོས་ཀྱི་ཐེག་པས་འབྱུང་བ་ལ་མོས་པ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་ལམ་ཤིན་ཏུ་བསྟན་
པའི་ཡེ་ཤེས་ལ་འཇུག་པ་ཚད་མེད་པ་ལ་འཇུག་ཅིང་མོས་པར་བྱེད་དོ། །རང་སངས་རྒྱས་ཀྱི་ཡེ་ཤེས་ཡང་དག་པར་བསྒྲུབ་པ་ཤིན་ཏུ་རྫོགས་པར་བྱ་བ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ཟབ་མོའི་སྒོར་འཇུག་པ་བསྟན་པ་ཚད་མེད་པ་ལ་འཇུག་གོ །བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པའི་སྦྱོར་བ་ཚད་མེད་པ་ལ་འཇུག་གོ །སངས་རྒྱས་བཅོམ་ལྡན་འདས་རྣམས་ཀྱི་ཐེག་པ་ཆེན་པོ་ཡང་དག་པར་བསྒྲུབ་པ་ལ་འཇུག་པ་ཤིན་ཏུ་བསྟན་པ་ཚད་མེད་པ་ལ་འཇུག་གོ །དེ་འདི་སྙམ་དུ་སེམས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྤྱོད་ཡུལ་ནི་དེ་ལྟར་ཚད་མེད་པ་སྟེ། དེ་ནི་བསྐལ་པ་བརྒྱ་ཕྲག་ཁྲག་ཁྲིག་དང་། བསྐལ་པ་སྟོང་ཕྲག་ཁྲག་ཁྲིག་དང་། བསྐལ་པ་བརྒྱ་སྟོང་ཕྲག་ཁྲག་ཁྲིག་ནས་དེ་སྙེད་ཀྱི། བསྐལ་པ་བྱེ་བ་ཁྲག་ཁྲིག་བརྒྱ་སྟོང་གིས་ཀྱང་བགྲང་བར་དཀའ་སྟེ། སངས་རྒྱས་བཅོམ་ལྡན་འདས་རྣམས་ཀྱི་སྤྱོད་ཡུལ་དེ་བདག་གིས་ལྷུན་གྱིས་གྲུབ་པར་བསྒྲུབ་པར་བྱའོ། །རྟོག་པ་མེད་པ་དང་། རྣམ་པར་རྟོག་པ་མེད་པར་ཡོངས་སུ་རྫོགས་པར་བྱའོ། །ཞེས་དེ་དེ་ལྟར་ཤིན་ཏུ་བརྟགས་པའི་ཡེ་ཤེས་དང་། མངོན་པར་ཤེས་པ་དང་ལྡན་ཞིང་རྟག་ཏུ་རྒྱུན་མི་འཆད་པར་མངོན་པར་བརྩོན་པ་ནི། ཐབས་དང་ཤེས་རབ་ཀྱིས་ཡོངས་སུ་བསྒོམས་པའི་ལམ་གྱི་ཚོགས་རྒྱ་ཆེན་པོའི་ཡེ་ཤེས་ལ་མི་གཡོ་བའི་ཚུལ་གྱིས་ཡོངས་སུ་གནས་པ་ཡིན། དེ་སྐད་ཅིག་གཅིག་ཏུ་ཡང་ལམ་མངོན་པར་བསྒྲུབ་པ་ལས་ལྡང་བར་མི་བྱེད་དེ། དེ་འགྲོ་ཡང་དེ་ལྟ་བུའི་ཡེ་ཤེས་མངོན་པར་བསྒྲུབ་པ་ཡིན། འགྲེང་བ་དང་། འདུག་པ་དང་། ཉལ་བ་དང་། རྨི་ལམ་དག་ཏུ་ཡང་སྒྲིབ་པ་མེད་ཅིང་སྤྱོད་ལམ་ཐམས་ཅད་ལ་གནས་ཀྱང་རྣམ་པ་འདི་ལྟ་བུའི་ཡེ་
ཤེས་ཡིད་ལ་བྱ་བ་དང་མི་འབྲལ་བ་ཡིན། དེའི་སེམས་བསྐྱེད་པ་རེ་རེ་ལ་ཡང་བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་བཅུ་དང་། བྱང་ཆུབ་སེམས་དཔའི་ས་བཅུ་ཡང་དག་པར་བསྒྲུབ་པ་ཡང་དག་པར་འབྱུང་ངོ་། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་སྙིང་རྗེ་ཆེན་པོ་སྔོན་དུ་བཏང་བའི་སེམས་བསྐྱེད་པ་བྱུང་བ་རེ་རེ་ཞིང་ཡང་། སངས་རྒྱས་ཀྱི་ཆོས་ཡང་དག་པར་བསྒྲུབ་པ་དང་། དེ་བཞིན་གཤེགས་པའི་ཡེ་ཤེས་ཀྱི་དོན་དུ་ཡོངས་སུ་བསྔོ་བས་དེ་ལ་གང་སངས་རྒྱས་ཀྱི་ཡེ་ཤེས་ཡོངས་སུ་ཚོལ་ཞིང་། སེམས་ཅན་རྣམས་ལ་དགེ་བའི་རྩ་བ་ཡོངས་སུ་གཏོང་བ་འདི་ནི་དེའི་སྦྱིན་པའི་ཕ་རོལ་ཏུ་ཕྱིན་པའོ། །གང་ཉོན་མོངས་པའི་ཡོངས་སུ་གདུང་བ་ཐམས་ཅད་རབ་ཏུ་ཞི་བ་འདི་ནི་དེའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །གང་སྙིང་རྗེ་དང་བྱམས་པ་སྔོན་དུ་འགྲོ་བས་སེམས་ཅན་ཐམས་ཅད་ལ་འཚིག་པ་མེད་པ་འདི་ནི་དེའི་བཟོད་པའི་ཕ་རོལ་ཏུ་ཕྱིན་པའོ། །གང་གོང་ནས་གོང་དུ་དགེ་བའི་ཆོས་ཚོལ་བས་མི་ངོམས་པར་དམ་འཆའ་བ་འདི་ནི་དེའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །གང་ཐམས་ཅད་མཁྱེན་པའི་ཡེ་ཤེས་མངོན་དུ་བྱ་བའི་ཕྱིར། འགྱོད་པ་མེད་པའི་ལམ་དང་ལྡན་པ་འདི་ནི་དེའི་བསམ་གཏན་གྱི་ཕ་རོལ་ཏུ་ཕྱིན་པའོ། །གང་རང་བཞིན་གྱིས་མ་སྐྱེས་པ་མངོན་དུ་གྱུར་པ་འདི་ནི་དེའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །གང་ཡེ་ཤེས་ཚད་མེད་པ་མངོན་པར་བསྒྲུབ་པ་འདི་ནི་དེའི་ཐབས་མཁས་པའི་ཕ་རོལ་ཏུ་ཕྱིན་པའོ། །གང་གོང་ནས་གོང་དུ་ཡེ་ཤེས་ལ་དམིགས་ཤིང་མངོན་པར་བསྒྲུབ་པ་འདི་ནི་དེའི་སྨོན་ལམ་གྱི་ཕ་རོལ་ཏུ་ཕྱིན་པའོ། །གང་ཕས་ཀྱི་རྒོལ་བ་ཐམས་ཅད་དང་བདུད་ཀྱི་ཚོགས་ཐམས་ཅད་ཀྱིས་ལམ་ཡོངས་སུ་མི་
ཆོད་པ་འདི་ནི་དེའི་སྟོབས་ཀྱི་ཕ་རོལ་ཏུ་ཕྱིན་པའོ། །གང་ཆོས་ཐམས་ཅད་ལ་ཡང་དག་པ་ཇི་ལྟ་བ་བཞིན་དུ་རྟོག་པ་འདི་ནི་དེའི་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །ཀྱེ་རྒྱལ་བའི་སྲས་དག །དེ་ལྟར་ན་བྱང་ཆུབ་སེམས་དཔའི་ས་རིང་དུ་སོང་བ་འདི་ལ་གནས་པའི་བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་བཅུ་པོ་དེ་དག་དེ་ལྟར་ཡོངས་སུ་རྫོགས་པར་འགྱུར་ཏེ། བསྡུ་བའི་དངོས་པོ་བཞི་ཡང་ཡོངས་སུ་རྫོགས་པར་འགྱུར་རོ། །བྱིན་གྱི་རླབས་བཅུ་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། རྣམ་པར་ཐར་པའི་སྒོ་གསུམ་དང་། མདོར་བསྡུ་ན་བྱང་ཆུབ་ཀྱི་ཡན་ལག་གི་ཆོས་ཐམས་ཅད་སྐད་ཅིག་སྐད་ཅིག་ཏུ་ཡོངས་སུ་རྫོགས་པར་འགྱུར་རོ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་ཅི་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ས་བདུན་པ་འདི་ལ་གནས་པ་འབའ་ཞིག་གི་བྱང་ཆུབ་ཀྱི་ཡན་ལག་ཐམས་ཅད་སྐད་ཅིག་སྐད་ཅིག་ཏུ་ཡོངས་སུ་རྫོགས་པར་འགྱུར་རམ། འོན་ཏེ་མ་ཡིན་གྱིས་ས་བཅུ་པོ་ཐམས་ཅད་ལའང་དེ་བཞིན་དུ་ཡོངས་སུ་རྫོགས་པར་འགྱུར། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་ས་བཅུ་པོ་ཀུན་ལའང་བྱང་ཆུབ་སེམས་དཔའི་བྱང་ཆུབ་ཀྱི་ཡན་ལག་ཐམས་ཅད་སྐད་ཅིག་སྐད་ཅིག་ཏུ་ཡོངས་སུ་རྫོགས་པར་ལྟ་འགྱུར་ཏེ། བྱང་ཆུབ་སེམས་དཔའི་ས་བདུན་པོ་འདི་ལ་ནི་དེ་དག་པས་ལྷག་པར་ཡོངས་སུ་རྫོགས་པར་འགྱུར་རོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་འདི་ནི་ནན་ཏན་དུ་བྱ་བའི་སྤྱོད་པ་ཡོངས་སུ་རྫོགས་པར་བྱེད་པ་
ཡེ་ཤེས་དང་མངོན་པར་ཤེས་པའི་སྤྱོད་པ་ཡོངས་སུ་གནོན་པ་སྟེ། དེ་ལྟར་ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་དང་པོ་ལ་ནི་སྨོན་ལམ་ཐམས་ཅད་ལ་ལྷག་པར་དམིགས་པས་བྱང་ཆུབ་སེམས་དཔའི་བྱང་ཆུབ་ཀྱི་ཡན་ལག་ཐམས་ཅད་ཡོངས་སུ་རྫོགས་པར་འགྱུར་རོ། །གཉིས་པ་ལ་སེམས་ཀྱི་དྲི་མ་ཐམས་ཅད་བསྩལ་བས་གསུམ་པ་ལ་སྨོན་ལམ་རྣམ་པར་འཕེལ་བ་དང་། ཆོས་ཀྱི་སྣང་བ་ཐོབ་པས། བཞི་པ་ལ་ལམ་ལ་འཇུག་པས། ལྔ་པ་ལ་འཇིག་རྟེན་གྱི་སྤྱོད་པའི་རྗེས་སུ་འབྲང་བས། དྲུག་པ་ལ་ཆོས་ཟབ་མོའི་སྒོར་འཇུག་པས་བྱང་ཆུབ་ཀྱི་ཡན་ལག་ཐམས་ཅད་ཡོངས་སུ་རྫོགས་པར་འགྱུར་ཏེ། བྱང་ཆུབ་སེམས་དཔའི་ས་བདུན་པ་འདི་ལ་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་སྒྲུབ་པས་བྱང་ཆུབ་ཀྱི་ཡན་ལག་ཐམས་ཅད་སྐད་ཅིག་སྐད་ཅིག་ཏུ་ཡོངས་སུ་གྲུབ་པར་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་ས་དང་པོ་ནས་བཟུང་སྟེ། བྱང་ཆུབ་སེམས་དཔའི་ས་བདུན་པའི་བར་དུ་བྱང་ཆུབ་སེམས་དཔས་མངོན་པར་བསྒྲུབས་པའི་ཡེ་ཤེས་མངོན་པར་བསྒྲུབ་པའི་སྦྱོར་བའི་ཡན་ལག་དེ་དག་བྱང་ཆུབ་སེམས་དཔའི་ས་བརྒྱད་པ་ཡན་ཅད་ལྷུན་གྱིས་གྲུབ་པར་ཡོངས་སུ་འགྲུབ་བོ། །ཀྱེ་རྒྱལ་བའི་སྲས། འདི་ལྟ་སྟེ། དཔེར་ན། ཀུན་ནས་ཉོན་མོངས་ཤིང་རྣམ་པར་དག་པའི་འཇིག་རྟེན་གྱི་ཁམས་དང་ཤིན་ཏུ་དག་པའི་འཇིག་རྟེན་གྱི་ཁམས་དག་གི་འཇིག་རྟེན་གྱི་ཁམས་གཉིས་ཀྱི་འཇིག་རྟེན་གྱི་ཁམས་ཀྱི་བར་ནི་སྨོན་ལམ་དང་། ཐབས་དང་ཤེས་རབ་དང་མངོན་པར་ཤེས་པའི་སྟོབས་དང་། ཤུགས་ཆེན་པོ་མ་གཏོགས་པར་འདོད་འདོད་བརྒལ་བར་མི་ནུས་སོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་སྤྱོད་པ་འདྲེས་པ་དང་ཡོངས་སུ་དག་པའི་བར་ཡང་སྨོན་པ་དང་། ཐབས་དང་། ཤེས་རབ་དང་། མངོན་པར་ཤེས་པ་དང་། ཡེ་ཤེས་ཀྱི་སྟོབས་
དང་ཤུགས་ཆེན་པོ་མ་གཏོགས་པར། འདོད་འདོད་བརྒལ་བར་མི་ནུས་སོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ་རྒྱལ་བའི་སྲས་འོ་ན་ཅི་བྱང་ཆུབ་སེམས་དཔའི་ས་བདུན་རྣམས་ལ་བྱང་ཆུབ་སེམས་དཔའི་སྤྱོད་པ་ཉོན་མོངས་པའི་སྤྱོད་པས་ཀུན་ནས་ཉོན་མོངས་པར་ཡིད་ཆེས་པར་བྱ་བ་ཡིན་ནམ། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བ་ཉིད་བཟུང་བ་ཡན་ཅད་དུ་བྱང་ཆུབ་སེམས་དཔའི་སྤྱོད་པ་ཐམས་ཅད་བྱང་ཆུབ་ཏུ་ཡོངས་སུ་བསྔོས་པའི་དབང་གིས་ཉོན་མོངས་པའི་རྙོག་པ་དང་བྲལ་བར་གར་འོས་པའི་ཚུལ་གྱི་ལམ་མཉམ་པ་ཉིད་ཀྱིས་ཡིད་ཆེས་པར་བྱ་སྟེ། དེ་ཙམ་གྱིས་ས་བདུན་པོ་རྣམས་སུ་ཉོན་མོངས་པའི་སྤྱོད་པ་ལས་ཡང་དག་པར་འདས་ཤེས་ནི་མི་བྱའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོ་ནི་ལྷ་རྫས་ཀྱི་གླང་པོ་རིན་པོ་ཆེ་ལ་ཞོན་ཞིང་གླིང་བཞི་དག་ཏུའང་འགྲོ། མིའི་སྡུག་བསྔལ་དང་། ཕོངས་པ་དང་། ཀུན་ནས་ཉོན་མོངས་པའི་ཉེས་པ་རྣམས་ཀྱང་རབ་ཏུ་ཤེས་ཏེ། འོན་ཀྱང་ཉེས་པ་དེ་དག་གིས་གོས་པར་མི་འགྱུར་རོ། །དེ་ཙམ་གྱིས་མིའི་ལུས་ལས་ཡོངས་སུ་འདས་པའང་མ་ཡིན་ཏེ། ནམ་མིའི་ལུས་སྤངས་ཏེ་ཚངས་པའི་འཇིག་རྟེན་དུ་སྐྱེས་པར་གྱུར་པ་དེའི་ཚེ་ནི་ཚངས་པའི་གཞལ་མེད་ཁང་ན་གནས་ཤིང་སྟོང་གི་འཇིག་རྟེན་གྱི་ཁམས་ཀྱང་མཐོང་། དེ་དག་ཏུའང་འགྲོ་ཚངས་པའི་གཟུགས་བརྙན་ཡང་ཀུན་ཏུ་སྟོན་ཏེ་མི་ཞེས་ཀྱང་མི་བརྗོད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་དང་པོ་བཟུང་བ་ཡན་ཅད་བྱང་ཆུབ་སེམས་དཔའ་ཕ་རོལ་ཏུ་ཕྱིན་པའི་ཐེག་པ་ལ་ཞོན་ཞིང་འགྲོ་བ་ཐམས་ཅད་དུ་རྒྱུ་བའི་ཚེ་ཀུན་ནས་ཉོན་མོངས་པའི་ཉེས་པ་རྣམས་ཀྱང་རབ་ཏུ་ཤེས་ཏེ་ཡང་དག་པའི་ལམ་དུ་ཞུགས་པས་
ཀུན་ནས་ཉོན་མོངས་པ་དེ་དག་གིས་གོས་པར་ཡང་མི་འགྱུར་རོ། །འོན་ཀྱང་དེ་ཙམ་གྱི་ས་བདུན་པོ་རྣམས་ལ་ཉོན་མོངས་པའི་ཉེས་པ་རྣམས་ལས་ཡང་དག་པར་འདས་ཤེས་ནི་མི་བྱ་སྟེ། ནམ་སྦྱོར་བ་ཅན་གྱི་སྤྱོད་པ་ཐམས་ཅད་སྤངས་ཏེ་ས་བདུན་པོ་ནས་ས་བརྒྱད་པ་ཡོངས་སུ་ནོན་པར་གྱུར་ཏེ། བྱང་ཆུབ་སེམས་དཔའི་ཐེག་པ་ཡོངས་སུ་དག་པ་ལ་ཞོན་ཞིང་འགྲོ་བ་ཐམས་ཅད་དུ་རྒྱུ་བའི་ཚེ་ཀུན་ནས་ཉོན་མོངས་པའི་ཉེས་པ་ཐམས་ཅད་ཀྱང་རབ་ཏུ་ཤེས་ཏེ། འཇིག་རྟེན་གྱི་བྱ་བ་ཀུན་ལས་འདས་པས་ཉེས་པ་དེ་དག་གིས་ཀུན་ནས་ཉོན་མོངས་པར་གྱུར་ཅེས་མི་བྱའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་འདོད་ཆགས་ལས་སྩོགས་པའི་ཉོན་མོངས་པ་ཐམས་ཅད་ལས་ཀྱང་ཤིན་ཏུ་ཤས་ཆེ་བར་འདའ་སྟེ། བྱང་ཆུབ་སེམས་དཔའི་ས་བདུན་པ་འདི་ལ་སྤྱོད་པའི་བྱང་ཆུབ་སེམས་དཔའ་དེ་ནི་ཉོན་མོངས་པ་ཅན་ཞེས་ཀྱང་མི་བྱ། ཉོན་མོངས་པ་མེད་པ་ཞེས་ཀྱང་མི་བྱའོ། །དེ་ཅིའི་ཕྱིར་ཞེ་ན། ཉོན་མོངས་པ་ཐམས་ཅད་རྒྱུ་བ་མེད་པས་ཉོན་མོངས་པ་ཅན་ཞེས་མི་བྱའོ། །དེ་བཞིན་གཤེགས་པའི་ཡེ་ཤེས་མངོན་པར་འདོད་ཅིང་བསམ་པ་ཡོངས་སུ་མ་རྫོགས་པས་ཉོན་མོངས་པ་མེད་པ་ཞེས་ཀྱང་མི་བྱའོ། །དེ་ལྟར་བྱང་ཆུབ་སེམས་དཔའི་ས་བདུན་པ་ལ་གནས་པའི་བྱང་ཆུབ་སེམས་དཔའ་ནི་ལྷག་པའི་བསམ་པས་ཡོངས་སུ་དག་པའི་ལུས་ཀྱི་ལས་དང་ལྡན་པ་ཡིན། ལྷག་པའི་བསམ་པས་ཡོངས་སུ་དག་པའི་ངག་གི་ལས་དང་ལྡན་པ་ཡིན། ལྷག་པའི་བསམ་པས་ཡོངས་སུ་དག་པའི་ཡིད་ཀྱི་ལས་དང་ལྡན་པ་ཡིན། དེ་ནི་འདི་ལྟར་མི་དགེ་བའི་ལས་ཀྱི་ལམ་དེ་བཞིན་གཤེགས་པས་སྨད་པ་ཀུན་ནས་ཉོན་མོངས་པ་དང་བཅས་པ་དེ་དག་ལས་ཐམས་ཅད་ཀྱི་ཐམས་ཅད་དུ་ཡང་དག་པར་འདས་པས་འདས་པ་ཡིན། གང་འདི་དག་དགེ་
བའི་ལམ་ཡང་དག་པར་རྫོགས་པའི་སངས་རྒྱས་ཀྱིས་བསྔགས་པ་དེ་དག་གི་རྗེས་སུ་རྟག་ཏུ་རྒྱུན་མི་འཆད་པར་འབྲང་བ་ཡིན། གང་ཡང་བྱང་ཆུབ་སེམས་དཔའི་ས་ལྔ་པ་ལ་བཟོའི་གནས་དང་ལས་ཀྱི་གནས་ཇི་ལྟར་མངོན་པར་བསྒྲུབས་པ་དེ་དག་ཐམས་ཅད་ཀྱང་ལྷུན་གྱིས་གྲུབ་པར་རབ་ཏུ་འབྱུང་ངོ་། །དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སློབ་དཔོན་དུ་བྱ་བ་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། བྱང་ཆུབ་སེམས་དཔའི་ས་བརྒྱད་པ་ཡན་ཅད་ཀྱི་བྱང་ཆུབ་སེམས་དཔའ་མ་གཏོགས་པར་སུའང་དེ་དང་བསམ་པའམ་སྦྱོར་བས་མཉམ་པ་མེད་དོ། །འདི་ལྟར་ཡང་གང་འདི་དག་བསམ་གཏན་རྣམས་དང་། ཏིང་ངེ་འཛིན་དག་དང་། སྙོམས་པར་འཇུག་པ་རྣམས་དང་། མངོན་པར་ཤེས་པ་དག་དང་། རྣམ་པར་ཐར་པ་རྣམས་ཀྱང་ཐམས་ཅད་ཀྱི་ཐམས་ཅད་དུ་བསྒོམ་པ་མངོན་པར་བསྒྲུབ་པའི་སྒོའི་ཚུལ་གྱིས་མངོན་དུ་འགྱུར་ཏེ། འོན་ཀྱང་ད་དུང་བྱང་ཆུབ་སེམས་དཔའི་ས་བརྒྱད་པ་ལ་ཇི་ལྟ་བ་དེ་བཞིན་དུ་ནི་རྣམ་པར་སྨིན་པས་ཡོངས་སུ་རྫོགས་པ་མ་ཡིན་ནོ། །དེ་ལྟར་བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའི་སེམས་བསྐྱེད་པ་ཐམས་ཅད་ལ་ཤེས་རབ་དང་། ཐབས་དང་། བསྒོམ་པའི་སྟོབས་ཡོངས་སུ་རྫོགས་པར་འགྱུར་ཏེ། སྔོན་བས་ཀྱང་བྱང་ཆུབ་ཀྱི་ཡན་ལག་ཐམས་ཅད་ཡོངས་སུ་རྫོགས་པ་རབ་ཏུ་འཐོབ་བོ། །དེ་དེ་ལྟར་བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་ཚེ། བྱང་ཆུབ་སེམས་དཔའི་ཏིང་ངེ་འཛིན་རྣམ་པར་དབྱེ་བ་ཤིན་ཏུ་རྣམ་པར་ཕྱེ་བ་ཞེས་བྱ་བ་ལ་མཉམ་པར་གཞོག་སྟེ། བྱང་ཆུབ་སེམས་དཔའི་ཏིང་ངེ་འཛིན་དོན་ཤིན་ཏུ་བསམ་པ་ཞེས་བྱ་བ་དང་། ཁྱད་པར་གྱི་བློ་གྲོས་ཤེས་བྱ་བ་དང་། རབ་ཏུ་ཕྱེ་བའི་དོན་གྱི་མཛོད་ཅེས་བྱ་བ་དང་། ཆོས་ཇི་ལྟ་བ་བཞིན་དུ་རྣམ་པར་འབྱེད་པ་ཞེས་བྱ་བ་དང་།
རྩ་བ་ཤིན་ཏུ་གནས་པས་བརྟན་པ་ཞེས་བྱ་བ་དང་། ཡེ་ཤེས་དང་མངོན་པར་ཤེས་པའི་སྒོ་ཞེས་བྱ་བ་དང་། ཆོས་ཀྱི་དབྱིངས་ཡོངས་སུ་སྦྱངས་པ་ཞེས་བྱ་བ་དང་། དེ་བཞིན་གཤེགས་པའི་ཡོན་ཏན་ཞེས་བྱ་བ་དང་། དོན་སྣ་ཚོགས་ཀྱི་མཛོད་འཁོར་བ་དང་། མྱ་ངན་ལས་འདས་པའི་སྒོ་ཞེས་བྱ་བ་ལ་ཡང་མཉམ་པར་གཞོག་སྟེ། དེ་དག་ལ་སྩོགས་པ་མངོན་པར་ཤེས་པ་དང་། ཡེ་ཤེས་ཆེན་པོའི་སྒོའི་ཏིང་ངེ་འཛིན་ས་ཡོངས་སུ་སྦྱོང་བར་བྱེད་པ། བརྒྱ་སྟོང་ཕྲག་བཅུ་ཚང་བ་ལ་སྙོམས་པར་འཇུག་གོ །དེ་ཐབས་དང་། ཤེས་རབ་ཀྱིས་ཡོངས་སུ་སྦྱངས་པའི་ཏིང་ངེ་འཛིན་དེ་དག་རབ་ཏུ་ཐོབ་པ་དང་། སྙིང་རྗེ་དང་སྙིང་བརྩེ་བའི་མཐུས་ཉན་ཐོས་ཀྱི་ས་ལས་འདས་པ་ཡིན། རང་སངས་རྒྱས་ཀྱི་ས་ལས་འདས་པ་ཡིན། ཤེས་རབ་དང་ཡེ་ཤེས་ཀྱིས་རྣམ་པར་དཔྱད་པའི་ས་མངོན་སུམ་དུ་གྱུར་པ་ཡིན། དེ་ལྟར་དེ་བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་ཚེ། ལུས་ཀྱི་ལས་ཚད་མེད་པ་མཚན་མ་དང་བྲལ་བ་རབ་ཏུ་འབྱུང་ངོ་། །ངག་གི་ལས་ཚད་མེད་པ་མཚན་མ་དང་བྲལ་བ་རབ་ཏུ་འབྱུང་ངོ་། །ཡིད་ཀྱི་ལས་ཚད་མེད་པ་མཚན་མ་དང་བྲལ་བ་ཤིན་ཏུ་རྣམ་པར་སྦྱངས་པ་མི་སྐྱེ་བའི་ཆོས་ཀྱི་བཟོད་པས་སྣང་བར་གྱུར་པ་ཚད་མེད་པ་རབ་ཏུ་འབྱུང་ངོ་། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ་རྒྱལ་བའི་སྲས་དེ་ལྟ་གོ་བྱང་ཆུབ་སེམས་དཔའི་ས་དང་པོ་ལ་གནས་པའི་ཚེའང་བྱང་ཆུབ་སེམས་དཔའི་ལུས་དང་ངག་དང་ཡིད་ཀྱི་ལས་ཚད་མེད་པ། ཉན་ཐོས་དང་རང་སངས་རྒྱས་ཀྱི་སྤྱོད་པ་ལས་ཡང་དག་པར་འདས་ན་ཇི་རོབ། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དེ་ལྟའང་མ་ཡིན་ཏེ། དེ་ནི་སངས་རྒྱས་ཀྱི་ཆོས་ལ་དམིགས་པའི་མཐུར་ཟད་ཀྱི་རང་གི་བློས་རྣམ་པར་དཔྱད་པ་ནི་མ་ཡིན་ནོ། །བྱང་ཆུབ་
སེམས་དཔའི་ས་བདུན་པོ་འདི་ལ་ནི་རང་གི་བློའི་སྤྱོད་ཡུལ་རྣམ་པར་དཔྱོད་པ་རབ་ཏུ་ཐོབ་པས་ཉན་ཐོས་དང་རང་སངས་རྒྱས་ཐམས་ཅད་ཀྱི་མི་འཕྲོགས་པ་ཡིན། ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རྒྱལ་པོའི་རིགས་སུ་སྐྱེས་པའི་རྒྱལ་པོའི་བུ་རྒྱལ་པོའི་མཚན་དང་ལྡན་པ་ནི་བཙས་མ་ཐག་ཏུ་རྒྱལ་པོའི་བྱིན་གྱིས་བློན་པོའི་ཚོགས་ཐམས་ཅད་ཟིལ་གྱིས་གནོན་གྱི། རང་གི་བློས་རྣམ་པར་དཔྱད་པས་ནི་མ་ཡིན་ནོ། །ནམ་ནར་སོན་པར་གྱུར་པ་དེའི་ཚེ། རང་གི་བློའི་མཐུས་བློན་པོ་ཐམས་ཅད་ཀྱི་བྱེད་པའི་ཚུལ་ལས་ཤིན་ཏུ་འདས་པ་ཡིན། ཀྱེ་རྒྱལ་བའི་སྲས་དེ་བཞིན་དུ། བྱང་ཆུབ་སེམས་དཔའ་འང་སེམས་བསྐྱེད་མ་ཐག་ཏུ་ལྷག་པའི་བསམ་པའི་བདག་ཉིད་ཆེན་པོས། ཉན་ཐོས་དང་། རང་སངས་རྒྱས་ཐམས་ཅད་ཟིལ་གྱིས་གནོན་ཏེ། རང་གི་བློས་རྣམ་པར་བརྟགས་པ་ནི་མ་ཡིན་ནོ། །བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་རང་གི་ཡུལ་གྱི་ཡེ་ཤེས་ཀྱི་སྟོབས་ཀྱི་ཤུགས་ཀྱིས། ཉན་ཐོས་དང་། རང་སངས་རྒྱས་ཀྱི་བྱེད་པའི་ཚུལ་ལས་ཤིན་ཏུ་འདས་པ་ཡིན་ནོ། །ཀྱེ་རྒྱལ་བའི་སྲས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་ཚེ། ལུས་དང་། ངག་དང་། ཡིད་ཀྱི་ལས་ཟབ་ཅིང་དབེན་ལ་རྒྱུ་བ་མེད་པ་དང་ལྡན་པའང་རབ་ཏུ་ཐོབ་པ་ཡིན་ཏེ། ཁྱད་པར་གོང་དུ་བཙལ་བའི་བརྩོན་འགྲུས་ཀྱང་ཡོངས་སུ་མི་གཏོང་ངོ་། །ཡོངས་སུ་བཙལ་བའི་བརྩོན་འགྲུས་དེས་ཀྱང་ཡང་དག་པའི་མཐར་གནས་པ་ལ་གནས་ཏེ། ཁྱད་པར་གོང་མ་ཤིན་ཏུ་ཐོབ་པར་བྱ་བའི་ཕྱིར། ཡང་དག་པའི་མཐའ་མངོན་དུའང་མི་བྱེད་དོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ།
ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་གང་ཡན་ཅད་དུ། བྱང་ཆུབ་སེམས་དཔའི་འགོག་པ་ལ་སྙོམས་པར་འཇུག །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་དྲུག་པ་ཡན་ཅད། བྱང་ཆུབ་སེམས་དཔའི་འགོག་པ་ལ་སྙོམས་པར་འཇུག་སྟེ། བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་སེམས་སྐད་ཅིག་རེ་རེ་ལ་ཡང་འགོག་པ་ལ་སྙོམས་པར་འཇུག་སྟེ། འགོག་པ་མངོན་དུ་བྱས་ཤེས་ནི་མི་བྱའོ། །དེ་བས་ན་དེ་ནི་བསམ་གྱིས་མི་ཁྱབ་པའི་ལུས་དང་། ངག་དང་ཡིད་ཀྱི་ལས་དང་ལྡན་ཞེས་བྱ་བ་ཡིན་ནོ། །ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་ཡང་དག་པའི་མཐའ་ལ་གནས་པས་ཀྱང་། གནས་ལ་ཡང་དག་པའི་མཐའ་མངོན་དུ་ཡང་མི་བྱེད་པ་ནི་ངོ་མཚར་ཆེའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། མི་ལ་ལ་ཞིག་རྒྱ་མཚོ་ཆེན་པོའི་གྲུ་ཆེན་པོར་ཞུགས་ཏེ་རྒལ་བའི་ཐབས་ལ་མཁས་ཤིང་རླུང་ལ་མཁས་པ་དང་། ཆུ་ལ་མཁས་པ་ནི་རྒྱ་མཚོ་ཆེན་པོའི་ཆུའི་ཉེས་པས་མི་གོས་སོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ས་བདུན་པ་འདི་ལ་གནས་ཤིང་ཕ་རོལ་ཏུ་ཕྱིན་པའི་གྲུ་ཆེན་པོར་ཞུགས་པ་ཡང་ཡང་དག་པའི་མཐའ་ལ་གནས་པས་ཀྱང་གནས་ལ་ཡང་དག་པའི་མཐའ་མངོན་དུ་ཡང་མི་བྱེད་དོ་དེ་ལྟར་དེ་ཡེ་ཤེས་ཀྱི་སྟོབས་དང་ཤུགས་ཐོབ་པ་ནི་ཏིང་ངེ་འཛིན་དང་ཡེ་ཤེས་ཀྱི་སྟོབས་དང་ཤུགས་ཀྱིས་མངོན་པར་བསྒྲུབ་པའི་བློ་དང་ཐབས་དང་ཤེས་རབ་ཀྱི་སྟོབས་དང་ཤུགས་ཆེན་པོས་འཁོར་བའི་སྒོ་ཡང་སྟོན་ལ་མྱ་ངན་ལས་འདས་པའི་བསམ་པ་དང་ཡང་མི་འབྲལ་བ་ཡིན་འཁོར་མང་པོས་ཀུན་ནས་བསྐོར་བར་སྣང་ཡང་རྟག་ཏུ་རྒྱུན་མི་འཆད་པར་སེམས་ཀྱི་དབེན་པ་ཡང་རབ་ཏུ་ཐོབ་པ་ཡིན། ཁམས་
གསུམ་དུ་སྐྱེ་བ་ཡང་སྨོན་ལམ་གྱི་དབང་གིས་མངོན་པར་སྒྲུབ་ལ་འཇིག་རྟེན་གྱི་ཉེས་པས་ཀྱང་མི་གོས་པ་ཡིན། ཞི་ཞིང་རབ་ཏུ་ཞི་བའང་ཡིན་ལ་ཐབས་ཀྱིས་ཀྱང་རབ་ཏུ་འབར་ཏེ། དེ་ལྟར་འབར་ཡང་ཚིག་པར་མི་འགྱུར་བ་ཡིན། སངས་རྒྱས་ཀྱི་ཡེ་ཤེས་ལའང་ཡོངས་སུ་འཇུག་ལ་ཉན་ཐོས་དང་། རང་སངས་རྒྱས་ཀྱི་ས་ལས་ཀྱང་ཕྱིར་མི་ལྡོག་པ་ཡིན། སངས་རྒྱས་ཀྱི་ཡུལ་གྱི་མཐིལ་དུ་ཡང་ཕྱིན་ལ་བདུད་ཀྱི་ཡུལ་ནའང་འདུག་པར་སྣང་བ་ཡིན། བདུད་ཀྱི་ལམ་བཞི་ལས་ཀྱང་ཡང་དག་པར་འདས་ལ་བདུད་ཀྱི་ཡུལ་དང་སྤྱོད་ཡུལ་ཡང་ཡང་དག་པར་སྟོན་པ་ཡིན། མུ་སྟེགས་ཅན་གྱི་གནས་ཐམས་ཅད་ནའང་འདུག་པར་སྣང་ལ། སངས་རྒྱས་ཀྱི་མུ་སྟེགས་ཀྱི་གནས་ཀྱི་བསམ་པ་ཡང་། མི་གཏོང་བ་ཡིན། འཇིག་རྟེན་གྱི་བྱ་བ་ཐམས་ཅད་དང་ཡང་ལྡན་པར་སྣང་ལ། འཇིག་རྟེན་ལས་འདས་པའི་ཚུལ་ལ་ཡང་ཡང་དག་པར་གཞོལ་བ་ཡིན། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། མི་དང་མི་མ་ཡིན་པ་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་ཐམས་ཅད་ལས་ལྷག་པའི་རྒྱན་དང་ལྷབ་ལྷུབ་ཤིན་ཏུ་བསྒྲུབ་པ་ཡང་རབ་ཏུ་ཐོབ་ལ། ཆོས་ལ་དགའ་བ་ཡིད་ལ་བྱ་བའང་མི་སྤོང་བ་ཡིན། དེ་ལྟར་དེ་ལྟ་བུའི་ཡེ་ཤེས་དང་ལྡན་པར་བྱང་ཆུབ་སེམས་དཔའི་ས་རིང་དུ་སོང་བ་འདི་ལ་གནས་པའི་བྱང་ཆུབ་སེམས་དཔའ་དེའི་ལྟ་བ་རྒྱ་ཆེན་པོ་དང་། སྨོན་ལམ་གྱི་སྟོབས་ཀྱིས་སངས་རྒྱས་མང་པོ་སྣང་བར་འགྱུར་ཏེ། ལྟ་བ་རྒྱ་ཆེན་པོ་དང་སྨོན་ལམ་གྱི་སྟོབས་ཀྱིས། སངས་རྒྱས་བརྒྱ་ཕྲག་མང་པོ་དང་། སངས་རྒྱས་སྟོང་ཕྲག་མང་པོ་དང་། སངས་རྒྱས་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་བརྒྱ་སྟོང་ཕྲག་
མང་པོ་དང་། སངས་རྒྱས་ཁྲག་ཁྲིག་མང་པོ་དང་། སངས་རྒྱས་ཁྲག་ཁྲིག་བརྒྱ་ཕྲག་མང་པོ་དང་། སངས་རྒྱས་ཁྲག་ཁྲིག་སྟོང་ཕྲག་མང་པོ་དང་། སངས་རྒྱས་ཁྲག་ཁྲིག་བརྒྱ་སྟོང་ཕྲག་མང་པོ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་སྣང་བར་འགྱུར་རོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས་བསམ་པ་རྒྱ་ཆེན་པོས་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །ན་བཟའ་དང་། བསོད་སྙོམས་དང་། གཟིམས་ཆ་དང་སྙུན་གྱི་རྐྱེན་སྨན་དང་། ཡོ་བྱད་དག་ཀྱང་འབུལ་ཞིང་། བྱང་ཆུབ་སེམས་དཔའི་བདེ་བའི་ཡོ་བྱད་ཐམས་ཅད་ཀྱང་ཡོངས་སུ་འབུལ་ལོ། །དགེ་འདུན་གྱི་ཚོགས་རྣམས་ལ་ཡང་ཡང་དག་པར་མཆོད་པ་བྱེད་དེ། དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །དེ་ལྟར་དེ་བཞིན་གཤེགས་པ་དེ་དག་ལ་བསྙེན་བཀུར་བྱེད་ཅིང་། དེ་དག་ལས་རྗེས་དང་རིམ་གྲོས་ནན་ཏན་དུ་ཆོས་བསྟན་པ་ཉན་ཅིང་ལེན་ཏོ་འཛིན་ཏོ། །ཐོས་ནས་ཀྱང་མ་ནོར་བའི་སྙོམས་པར་འཇུག་པ་དང་། ཤེས་རབ་དང་ཡེ་ཤེས་ཀྱི་སྣང་བས་རབ་ཏུ་བརྩོན་པར་བྱེད་ཅིང་ནན་ཏན་གྱིས་ཡོངས་སུ་འཛིན་ཏོ། །སངས་རྒྱས་བཅོམ་ལྡན་འདས་དེ་དག་གི་བསྟན་པ་ཡང་ཡང་དག་པར་འཛིན་ཏོ། །ཉན་ཐོས་དང་། རང་སངས་རྒྱས་ཀྱི་མངོན་པར་རྟོགས་པ་ཡོངས་སུ་དྲི་བས་ཀྱང་མི་འཕྲོགས་པ་ཡིན་ཏེ། དེ་སྔོན་བས་ཀྱང་སེམས་ཅན་ལ་ཕན་འདོགས་པའི་ཆོས་ཀྱི་བཟོད་པ་རྣམ་པར་དག་པར་འགྱུར་བ་ཡིན། དེ་ལྟར་བྱང་ཆུབ་སེམས་དཔའི་ས་རིང་དུ་སོང་བ་འདི་ལ་གནས་པའི་བྱང་ཆུབ་སེམས་དཔའ་དེའི་དགེ་བའི་རྩ་བ་དེ་དག་སྔོན་བས་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་བརྒྱ་སྟོང་ཕྲག་
དུ་མ་དང་། བསྐལ་པ་ཁྲག་ཁྲིག་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང་། བསྐལ་པ་ཁྲག་ཁྲིག་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ཤིན་ཏུ་དག་ཅིང་ཡོངས་སུ་བྱང་བར་གནས་སོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། གསེར་གྱི་ས་ལེ་སྦྲམ་དེ་ཉིད་རིན་པོ་ཆེ་ཐམས་ཅད་ཀྱིས་རབ་ཏུ་སྤྲས་པ་ནི་སྔོན་བས་ཀྱང་། རྒྱན་གྱི་རྣམ་པ་གཞན་དང་གཞན་གྱིས་མི་ཐུབ་པ་དང་། ཆེས་འོད་གསལ་ཞིང་དང་བར་འགྱུར་རོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ས་རིང་དུ་སོང་བ་འདི་ལ་གནས་པའི་ཐབས་དང་ཤེས་རབ་ཀྱིས་བསྒྲུབས་པའི་དགེ་བའི་རྩ་བ་དེ་དག་སྔོན་བས་ཀྱང་ཆེས་ཤིན་ཏུ་བྱང་བ་དང་། ཆེས་འོད་གསལ་ཞིང་དང་བར་འགྱུར་རོ། །ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་མི་འཕྲོགས་པ་ཡིན། ཀྱེ་རྒྱལ་བའི་སྲས་འདི་ལྟ་སྟེ་དཔེར་ན་ཉི་མའི་འོད་ནི་སྐར་མའི་ཚོགས་དང་ཟླ་བའི་འོད་ཀྱིས་མི་འཕྲོགས་ཤིང་འཛམ་བུའི་གླིང་ན་རླན་གྱི་བག་ཡོད་པ་ཐམས་ཅད་ཀྱང་ཤིན་ཏུ་སྐེམ་པར་བྱེད་དོ། །ཀྱེ་རྒྱལ་བའི་སྲས་དེ་བཞིན་དུ། བྱང་ཆུབ་སེམས་དཔའི་ས་རིང་དུ་སོང་བ་འདི་ལ་གནས་པའི། བྱང་ཆུབ་སེམས་དཔའི་དགེ་བའི་རྩ་བ་དེ་དག་ཀྱང་སྔོན་བས་ཀྱང་། ཉན་ཐོས་དང་། རང་སངས་རྒྱས་ཐམས་ཅད་ཀྱིས། མི་འཕྲོགས་པ་ཡིན། ཕྱིན་ཅི་ལོག་བཞི་དང་ལྡན་པའི་ཉོན་མོངས་པའི་རླན་གྱི་རྣམ་པ་ཐམས་ཅད་ཀྱང་། ཡོངས་སུ་སྐེམ་མོ། །དེའི་ཕ་རོལ་དུ་ཕྱིན་པ་བཅུ་ལས། ཐབས་མཁས་པའི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་མི་བསྒྲུབ་པ་མ་ཡིན་ནོ། །ཀྱེ་རྒྱལ་བའི་སྲས་འདི་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི། རིང་དུ་
སོང་བ་ཞེས་བྱ་བ་སྟེ། བྱང་ཆུབ་སེམས་དཔའི་ས་བདུན་པ་མདོར་བསྟན་པའོ། །དེ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཕལ་ཆེར་ལྷའི་རྒྱལ་པོ་དབང་སྒྱུར་དུ་འགྱུར་ཏེ། སེམས་ཅན་རྣམས་ལ། མངོན་པར་རྟོགས་པའི་ཡེ་ཤེས་ཡང་དག་པར་བསྟབས་པ་ལ་མཁས་ཤིང་མཐུ་ཡོད་པ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱིས། ཡོངས་སུ་དྲི་བས་མི་ཟད་པ་ཡིན། སེམས་ཅན་སྐྱོན་མེད་པར་ཤིན་ཏུ་བསླབ་པར་བྱ་བ་ལའང་མཁས་པ་ཡིན་ཏེ། སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་འཐུན་པས། དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན། སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས། ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང་། ཆོས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་། ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་། མི་འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ། ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་རབ་ཏུ་ཐོབ་ཅིང་དེ་དག་ལ་སྙོམས་པར་འཇུག་པ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མཐོང་བ་དང་། དེ་དག་གི་བྱིན་གྱི་
རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་སྣང་བར་བྱ་བ་དང་། སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་སྨིན་པར་བྱ་བ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་གནས་པར་བྱ་བ་དང་། སྔོན་གྱི་མཐའ་དང་ཕྱི་མའི་མཐའི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་རབ་ཏུ་འཇུག་པ་དང་། ཆོས་ཀྱི་སྒོ་བྱེ་བ་ཁྲག་ཁྲིག་བརྒྱ་སྟོང་རྣམ་པར་འབྱེད་པ་དང་། ལུས་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་བསྟན་པ་དང་། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་བྱེ་བ་ཁྲག་ཁྲིག་བརྒྱ་སྟོང་ཡང་དག་པར་བསྟན་པར་བྱ་བའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཅད་བྱང་ཆུབ་སེམས་དཔའ་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ་འོད་དམ། རྫུ་འཕྲུལ་ལམ། མྱིག་གམ། སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང་བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཡེ་ཤེས་ཟབ་མོ་དོན་དམ་ཚིག་གི་རྗེས་སྙེགས་ཤིང་། །ས་དྲུག་རྟོགས་པའི་ཡིད་ལྡན་བདག་ཉིད་མཉམ་བཞག་པ། །ཤེས་རབ་ཐབས་གཉིས་ཟུང་དུ་འབྲེལ་པ་མངོན་པར་བསྒྲུབ། །མཁས་པ་ས་བདུན་སྦྱོང་བ་དམ་པ་ཡོངས་སུ་གནོན། །སྟོང་པ་མཚན་མེད་མི་སྨོན་སྙིང་རྗེ་བྱམས་དང་ལྡན། །ཆོས་ཉིད་མཉམ་པའི་རྗེས་འགྲོ་སངས་རྒྱས་མཆོད་པར་བྱེད། །ཤེས་པས་ཤེས་བྱས་བསོད་ནམས་སྟོབས་ཀྱིས་མི་ངོམས་པས། །དེའི་ཕྱིར་མཁས་པ་
བདུན་པའི་ས་ཕྱོགས་ཡོངས་སུ་གནོན། །ཁམས་གསུམ་མངོན་པར་སྒྲུབ་བྱེད་ཤིན་ཏུ་དབེན་པ་ཐོབ། །ཉོན་མོངས་སྟོབས་རྣམས་ཞི་ཞིང་གྲོལ་བ་ཞི་ལ་མོས། །མིག་ཡོར་སྒྱུ་མ་རྨི་ལམ་མི་གཉིས་ཆོས་སྤྱོད་ཀྱང་། །སྙིང་རྗེ་ལས་སྤྱོད་སྟོན་པ་མཁས་པས་བདུན་པ་གནོན། །ནམ་མཁའི་བསམ་པས་ཞིང་རྣམས་ཡོངས་སྤྱོད་རྣམ་མི་རྟོག །རྒྱལ་བའི་མཚན་དང་ལྡན་ཞིང་མི་གཡོ་ཆོས་དང་ལྡན། །བརྗོད་པའི་དབྱངས་བྲལ་འགྲོ་བ་དགར་བྱ་དོན་དུ་གཉེར། །སྐད་ཅིག་སེམས་ཀྱིས་རྒྱལ་བས་ཀུན་མཁྱེན་ཡང་དག་གཞོལ། །ཆོས་རྣམས་འདི་དག་སྤྱད་པས་སྣང་བ་ཐོབ་གྱུར་པས། །འགྲོ་བའི་དོན་འདོད་ས་མཆོག་ཡོངས་སུ་གནོན་ཅེས་བྱ། །དེ་དག་ས་འདི་གནས་ཤིང་མཐའ་ཡས་སེམས་ཅན་སྤྱོད། །བདེ་གཤེགས་ཚད་མེད་ལས་མཁྱེན་རྣམ་པར་དཔྱོད་པ་བྱེད། །ཞིང་དང་བསྐལ་པ་ཆོས་གྲངས་སྣ་ཚོགས་དུ་མ་དང་། །མོས་དང་བསམ་པ་སེམས་དང་སྤྱོད་པ་སྣ་ཚོགས་དང་། །ཐེག་པ་གསུམ་པོ་བསྟན་པ་ཚད་མེད་ཡང་དག་འཇུག །བདག་གིས་སེམས་ཅན་དེ་དག་ཡོངས་སུ་སྨིན་བྱ་ཞེས། །དེ་དག་དེ་ལྟར་རྣམ་ཕྱེ་ཤེས་རབ་ལམ་ལྡན་པ། །སྤྱོད་ལམ་བཞི་པོར་མངོན་པར་བརྩོན་ཞིང་ཐབས་དང་ལྡན། །སེམས་ཀྱི་སྐད་ཅིག་ཀུན་ལ་བྱང་ཆུབ་ཡོན་ཏན་སྒྲུབ། །ཕ་རོལ་ཕྱིན་པ་བཅུར་འཇུག་ཡོངས་སུ་རྫོགས་པར་བྱེད། །སེམས་སྐྱེས་འགྲོ་ལ་ཡོངས་སྔོ་དེ་ནི་སྦྱིན་པའོ། །ཚུལ་ཁྲིམས་ཉོན་མོངས་ཞི་བ་བཟོད་པ་མི་འཚིག་པ། །བརྩོན་འགྲུས་དེ་ནས་ཁྱད་པར་གོང་དུ་རྩོམ་པ་སྟེ། །ལམ་ལས་མི་སྒུལ་དེ་ནི་ལེགས་ལྡན་བསམ་གཏན་ནོ། །མི་སྐྱེའི་བཟོད་པ་རྡུལ་མེད་མཁས་པའི་ཤེས་རབ་མཆོག །ད་དུང་མངོན་འདོད་སྔོ་བ་དེ་ཡི་སྨོན་ལམ་སྟེ། །མི་ཐུབ་སྟོབས་ཡིན་ཤིན་ཏུ་རྟོགས་པ་ཡེ་ཤེས་སོ། །དེ་ལྟར་བྱང་ཆུབ་ཡོན་ཏན་ཐམས་ཅད་སྐད་ཅིག་ལྡན། །དང་པོར་དམིགས་པས་ཡོན་ཏན་ཡོངས་སུ་རྫོགས་པར་འགྱུར། །གཉིས་ལ་དྲི་མ་བསྩལ་ཕྱིར་
གསུམ་ལ་བགེགས་བསྩལ་པས། །བཞི་ལ་ལམ་གྱིས་ལྔ་ལ་མཉམ་པ་ཉིད་ཀྱིས་ཏེ། །མི་སྐྱེའི་སྣང་བས་མཁས་པའི་དྲུག་པོ་རྣམ་པར་འཕེལ། །བདུན་པོ་འདིར་ཕྱིན་ཡོན་ཏན་མཐའ་དག་ཀུན་རྫོགས་པར། །སྨོན་ལམ་དུ་མ་སྣ་ཚོགས་མངོན་པར་བསྒྲུབ་པ་བྱེད། །ཅི་ཕྱིར་ཞེ་ན་ཡེ་ཤེས་སྤྱོད་པ་འདིར་གྲུབ་པ། །དེ་ནི་བརྒྱད་པ་ཡན་ཅད་ཀུན་ཏུ་རྣམ་དག་འགྱུར། །འདའ་དཀའ་ཕྱིན་དཀའ་ཡེ་ཤེས་མང་པོའི་ལས་ཀྱིས་འགྲུབ། །ཞིང་གཉིས་བར་མཚམས་ཇི་ལྟར་ཡོངས་སུ་བརྒལ་དཀའ་བཞིན། །བདུན་ལ་སྤྱོད་པ་རྒྱལ་པོ་ཆགས་མེད་ཇི་བཞིན་ཏེ། །ལམ་ལ་གནས་པ་ཡིན་གྱི་ཐམས་ཅད་བརྟན་མ་འདས། །བརྒྱད་པའི་ཡེ་ཤེས་ས་དང་གང་ཚེ་ལྡན་གྱུར་པ། །དེ་ཚེ་སེམས་ཀྱི་ཡུལ་འདས་ཡེ་ཤེས་ལས་ལ་གནས། །ཚངས་པ་འགྲོ་བ་ལྟ་ཡང་མི་ཡི་བདག་ཉིད་མིན། །དེ་བཞིན་མཁས་པ་པད་མོ་བཞིན་དུ་མི་ཆགས་སྤྱོད། །འདི་ལ་གནས་པ་ཉོན་མོངས་སྣ་ཚོགས་རབ་ཏུ་འདའ། །དེ་དག་ཉོན་མོངས་སྤྱོད་མེད་བྱང་བའང་ཐོབ་པ་མིན། །ལམ་ལ་གནས་ཀྱང་དེ་འདྲའི་ཉོན་མོངས་སྤྱོད་མེད་མིན། །རྒྱལ་བའི་ཡེ་ཤེས་མངོན་འདོད་དེ་བས་ཟད་པ་མིན། །འཇིག་རྟེན་བཟོ་དང་ལས་གནས་རྣམ་པ་སྣ་ཚོགས་དག །མཁས་པས་གཙུག་ལག་རྒྱུས་ལ་གནས་ཏེ་ཤེས་བྱས་དང་། །བསམ་གཏན་མངོན་ཤེས་སྟོབས་བསྒོམས་ལྡན་པར་གྱུར་པ་རྣམས། །དེ་བས་གསལ་འགྱུར་ཏིང་འཛིན་སྣ་ཚོགས་མངོན་པར་སྒྲུབ། །ཉན་ཐོས་རང་རྒྱལ་སྤྱོད་ལས་ཡོངས་སུ་འདས་པ་སྟེ། །བདུན་པའི་བྱང་ཆུབ་སེམས་དཔའི་སྤྱོད་ལ་མཁས་པ་གནས། །སྔོན་ཆད་བསམ་པས་ཡིན་གྱི་འདི་ལ་ཡེ་ཤེས་ཀྱིས། །ནར་སོན་མཐུ་དང་ལྡན་པའི་རྒྱལ་པོའི་བུ་བཞིན་ནོ། །ཤིན་ཏུ་ཟབ་དང་ལྡན་པས་གོང་དུ་རྩོམ་བྱེད་དེ། །འགོག་པའི་སེམས་དང་ལྡན་ཡང་མངོན་པར་མི་བྱེད་དོ། །ཇི་ལྟར་རྒྱ་མཚོར་ཕྱིན་ཞིང་གྲུ་ཆེན་ཞུགས་གྱུར་པ། །ཆུ་ཚུལ་ཐམས་ཅད་མངོན་གྱུར་གྲུ་ལ་སྐྱོན་
མི་འགྱུར། །དེ་དག་སྔོན་བས་ཐབས་དང་ཤེས་རབ་མཆོག་དང་ལྡན། །ཤེས་དཀའ་འགྲོ་བ་ཀུན་ཏུ་ཤེས་སྤྱོད་ཡོན་ཏན་མང་། །སངས་རྒྱས་བྱེ་བ་ཡང་དུ་བསམ་པ་དག་པས་མཆོད། །གསེར་སྦྲམ་དེ་ཉིད་རིན་ཆེན་མང་པོས་སྤྲས་པ་བཞིན། །འདི་ལ་གནས་པའི་མཁས་པའི་ཤེས་རབ་མཆོག་གི་འོད། །སྲེད་པའི་ཆུ་རྣམས་ཇི་ལྟར་གཉི་བཞིན་ཡོངས་སུ་སྐེམ། །ས་མཆོག་འདི་ལ་གནས་པ་དབང་སྒྱུར་རྒྱལ་པོར་འགྱུར། །ཡེ་ཤེས་དམ་པའི་འབྲས་བུ་སྟོན་ལ་མཐུ་ཡོད་མཁས། །འདོད་ན་བརྩོན་འགྲུས་དམ་པའི་སྟོབས་དང་ལྡན་གྱུར་པ། །སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚང་བ་དག །ཕྱོགས་རྣམས་ཀུན་ཏུ་ཤིན་ཏུ་མཉམ་པར་བཞག་པས་མཐོང་། །ཡན་ཅད་སྨོན་ལམ་ཡོན་ཏན་མཆོག་ཅན་ཚད་ཀྱང་མེད། །འདི་ནི་ས་མཆོག་བདུན་པ་སྟེ། །རང་རྒྱལ་དབང་ལ་སྤྱོད་པ་དང་། །འཇིག་རྟེན་ཀུན་གྱིས་ཤེས་པར་དཀའ། །ཐབས་དང་ཤེས་རབ་སྦྱོར་བའོ། །རིང་དུ་སོང་བ་ཞེས་བྱ་བ་སྟེ། བྱང་ཆུབ་སེམས་དཔའི་ས་བདུན་པའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅྭ་བརྒྱད་པ། མཁས་པའི་སྤྱོད་པ་དེ་འདྲ་དམ་པ་ཐོས་ནས། །ལྷ་ཡི་ཚོགས་དང་ལྷའི་དབང་པོ་ཀུན་དགའ། །བྱང་ཆུབ་སེམས་དཔའ་འགྲོ་ཕན་བརྩོན་པ་མང་པོ། །བདེ་བར་གཤེགས་དང་རྒྱལ་སྲས་རྣམས་ལ་མཆོད་བྱེད། །མེ་ཏོག་ཕྲེང་བ་རྒྱལ་མཚན་བ་དན་ཡིད་འོང་། །སྤོས་དང་ཕྱེ་མ་རིན་ཆེན་ན་བཟའ་རྒྱན་པ། །དབྱིག་གིས་སྤྲས་པའི་གདུགས་རབ་ཁྲག་ཁྲིག་དུ་མ། །ཕྲེང་བའི་སྤྲིན་ཀྱི་དམ་པའི་ཆར་ཡང་མངོན་འབེབས། །ལྷའི་བུ་མོས་ཡིད་དུ་འོང་བའི་སྒྲ་དབྱངས། །དུ་མའི་སིལ་སྙན་གར་གྱི་མཆོག་དང་ལྡན་བྱས། །བདེ་བར་གཤེགས་དང་རྒྱལ་སྲས་མཆོད་པའི་དོན་དུ། །ཐུབ་པའི་ཡོན་ཏན་རྨད་དུ་བྱུང་བ་རྗོད་བྱེད། །ཐམས་ཅད་གཟིགས་པ་རྐང་གཉིས་ཁྱུ་མཆོག་གཙོ་བོ། །
སངས་རྒྱས་སྤྱོད་ཡུལ་འགྲོ་ལ་ཕན་ཕྱིར་སྟོན་མཛད། །དབྱངས་སྤྲིན་ཡིད་དུ་འོང་བ་རབ་ཏུ་འབྱུང་བའི། །རྔ་དང་སིལ་སྙན་སྣ་ཚོགས་རྣམས་ལས་འདི་འབྱུང་། །སྐྲ་ཡི་རྩེ་ལ་བདེ་གཤེགས་བརྒྱ་ཕྲག་སྟོང་སྙེད། །གང་ག་ཁྲག་ཁྲིག་བྱེ་བའི་རྡུལ་བས་དེ་མང་། །ཞིང་མཆོག་དམ་པ་མཉམ་པ་མེད་པ་དག་ན། །ཁྱུ་མཆོག་རྣམས་ནི་རྡུལ་བྲལ་ཆོས་རྣམས་སྟོན་མཛད། །སྤུ་གཅིག་རྩེ་ལ་འབྱམ་ཀླས་དམ་པའི་ཞིང་མང་། །གླིང་བཞི་དུ་མ་རྒྱ་མཚོ་མཚོ་ཆེན་ཀུན་གནས། །ཁོར་ཡུག་བྱེ་བ་དེ་བཞིན་རི་རབ་ཐམས་ཅད། །སོ་སོའི་ཚུལ་དང་ལྡན་པར་ཀུན་ཀྱང་སྣང་གྱུར། །སྐྲ་ཡི་རྩེ་མོ་དེ་ལ་འགྲོ་རྒྱུད་དྲུག་པོ། །ཡི་དྭགས་བྱོལ་སོང་མི་དང་སེམས་དམྱལ་ལྷ་དང་། །གནོད་སྦྱིན་སྲིན་པོ་ཀླུ་དང་ལྷ་མིན་མང་པོ། །སྣ་ཚོགས་ལས་ཀྱི་ཡུལ་ལ་ཀུན་ཀྱང་སྤྱོད་བྱེད། །རྡུལ་བྲལ་ཀུན་གྱི་ཞིང་གི་སྤྱོད་ཡུལ་ཀུན་ཏུ། ། འཁོར་ལོ་དམ་པའི་མཆོག་ཀྱང་དེ་ཚེ་འཁོར་གྱུར། །འགྲོ་བའི་འདུ་ཤེས་སེམས་དང་དེ་བཞིན་སྤྱོད་པ། །བདེ་གཤེགས་གསུང་གི་དམ་པས་ཀུན་ཀྱང་བསྟན་བྱས། །སེམས་ཅན་ལུས་ལ་བདེ་གཤེགས་ཞིང་མང་སྣ་ཚོགས། །ཞིང་ལ་སེམས་ཅན་རྨད་སྙེད་ལུས་ཀྱང་དེ་བཞིན། །ལྷ་དང་མི་ཡི་ལམ་རྒྱུད་དེ་བཞིན་སྣ་ཚོགས། །མཁྱེན་ནས་བདེ་བར་གཤེགས་པ་ཆོས་རྣམས་ཀུན་སྟོན། །ཤིན་ཏུ་ཡངས་པའི་ཞིང་ལ་འདུ་ཤེས་ཕྲར་གྱུར། །རྡུལ་གྱི་མཚན་མ་དག་ལ་འདུ་ཤེས་ཡངས་གྱུར། །དེ་ལས་སྩོགས་པ་བདེ་བར་གཤེགས་པའི་རྫུ་འཕྲུལ། །འཇིག་རྟེན་ཀུན་གྱི་བརྗོད་ཀྱང་ཟད་པར་མི་འགྱུར། །ཆེ་བ་ཉིད་དབྱངས་དེ་སྐད་དུ། །སྙན་པའི་དབྱངས་སུ་གྲག་གྱུར་ནས། །འཁོར་རྣམས་རབ་ཏུ་དགའ་ཞིང་ཞི། །གསུང་བའི་མཆོག་ལ་ལྟ་ཞིང་གནས། །འཁོར་རྣམས་ཞི་བར་ཤེས་གྱུར་ནས། །རྣམ་གྲོལ་ཟླ་བས་ཡང་སྨྲས་པ། །ས་བརྒྱད་པ་ཡི་རྣམ་པ་དང་། །དེ་ལ་འཇུག་པ་བསྟན་པར་མཛོད། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དག །
དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའི་ས་བདུན་པ་ལ་རྣམ་པར་དབྱེ་བ་ཤིན་ཏུ་བྱས་པ། ཐབས་དང་ཤེས་རབ་ཀྱིས་ལམ་ཤིན་ཏུ་སྦྱངས་པ། ཚོགས་ཤིན་ཏུ་བསྩགས་པ། སྨོན་ལམ་ཆེན་པོ་ཤིན་ཏུ་བཏབ་པའི་སྟོབས་དང་ཤུགས་ཅན། དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་དུ་རླབས་པ་རང་གི་དགེ་བའི་རྩ་བའི་སྟོབས་དང་ཤུགས་ཐོབ་པ། དེ་བཞིན་གཤེགས་པའི་སྟོབས་དང་མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་དང་ལྡན་པ། བསམ་པ་དང་ལྷག་པའི་བསམ་པས་ཡོངས་སུ་སྦྱངས་པའི་སེམས་དང་ལྡན་པ། བསོད་ནམས་དང་ཡེ་ཤེས་ཀྱི་སྟོབས་ཀྱིས་མངོན་པར་འཕགས་པ། སྙིང་རྗེ་དང་སྙིང་བརྩེ་བ་ཆེན་པོས་སེམས་ཅན་གྱི་ཁམས་ཐམས་ཅད་ཡོངས་སུ་མི་གཏོང་བའི་སྦྱོར་བ་དང་ལྡན་པ། ཡེ་ཤེས་ཀྱི་ལམ་ཚད་མེད་པའི་རྗེས་སུ་སོང་བ་དེ་ཆོས་ཐམས་ཅད་ཐོག་མ་ནས་མ་བྱུང་བ་ཉིད་ལ་ཡང་དག་པ་ཇི་ལྟ་བ་བཞིན་དུ་འཇུག་གོ །མ་སྐྱེས་པ་དང་། མཚན་ཉིད་མེད་པ་དང་། སྐྱེ་བ་མེད་པ་དང་། འཇིག་པ་མེད་པ་དང་། ཐུག་པ་མེད་པ་དང་། མི་རྒྱུ་བ་དང་། མི་ལྡོག་པ་དང་། དངོས་པོ་མེད་པའི་རང་བཞིན་དང་། ཐོག་མ་དང་ཐ་མ་དང་དབུས་མཉམ་པ་ཉིད་དང་། དེ་བཞིན་ཉིད་ཀྱིས་རྣམ་པར་མི་རྟོག་པའི་ཐམས་ཅད་མཁྱེན་པའི་ཡེ་ཤེས་ལའང་ཡང་དག་པ་ཇི་ལྟ་བ་བཞིན་དུ་འཇུག་སྟེ། དེས་རྣམ་པ་ཐམས་ཅད་དུ་སེམས་དང་ཡིད་དང་རྣམ་པར་ཤེས་པའི་རྣམ་པར་རྟོག་པ་དང་། འདུ་ཤེས་དང་བྲལ་ཞིང་ཐོགས་པ་མེད་ལ་ནམ་མཁའ་དང་འདྲ་ཞིང་ནམ་མཁའི་རང་བཞིན་དུ་ཁོང་དུ་ཆུད་པས་མི་སྐྱེ་བའི་ཆོས་ལ་བཟོད་པ་ཐོབ་ཅེས་བྱའོ། །ཀྱེ་རྒྱལ་བའི་སྲས་དག །དེ་ལ་དེ་ལྟ་བུའི་བཟོད་པ་དང་ལྡན་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་ས་མི་གཡོ་བ་ཐོབ་མ་ཐག་ཏུ་བྱང་ཆུབ་སེམས་དཔའི་གནས་ཟབ་མོ་ཤེས་པར་དཀའ་བ་ཐ་མི་དད་པ་མཚན་མ་ཐམས་ཅད་དང་བྲལ་བ་འདུ་ཤེས་ཀྱི་བགེགས་ཐམས་ཅད་ལས་ཕྱིར་ལོག་པ་ཚད་མེད་
པ། ཉན་ཐོས་དང་། རང་སངས་རྒྱས་ཐམས་ཅད་ཀྱིས་མི་འཕྲོགས་པ། དབེན་པ་ཐམས་ཅད་མངོན་དུ་གྱུར་པ། ཤིན་ཏུ་ཐོབ་པ་ཡིན། ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། དགེ་སློང་རྫུ་འཕྲུལ་དང་ལྡན་པ་སེམས་ཀྱི་དབང་དམ་པའི་ཕ་རོལ་ཏུ་བགྲོད་པར་ཕྱིན་པ་མཐར་གྱིས་འགོག་པའི་བར་དུ་མཉམ་པར་བཞག་པ་ནི་རྒྱུ་བ་དང་སེམས་པ་དང་། གཡོ་བའི་རྣམ་པར་རྟོག་པ་དང་། འདུ་ཤེས་ཐམས་ཅད་དང་བྲལ་བ་ཡིན། ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་ཡང་བྱང་ཆུབ་སེམས་དཔའི་ས་བརྒྱད་པ་མི་གཡོ་བ་འདི་ཐོབ་མ་ཐག་ཏུ་ཆེད་དུ་བྱ་བ་ཐམས་ཅད་དང་བྲལ་ཏེ་ལྷུན་གྱིས་གྲུབ་པའི་ཆོས་ཉིད་ཐོབ་ཅིང་ལུས་དང་ངག་དང་སེམས་ཀྱི་རྩོལ་བ་ཐམས་ཅད་དང་བྲལ་ཏེ་ཤིན་ཏུ་དབེན་པའི་ཆོས་ཉིད་ལ་གནས་པ་ཡིན། ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན། མི་ལ་ལ་ཞིག་གཉིད་ཀྱིས་ལོག་པའི་རྨི་ལམ་དུ་བདག་ཆུ་ཀླུང་ཆེན་པོས་ཁྱེར་བ་སྙམ་བྱེད་ལ། དེ་དེ་ནས་ཅི་ཕྱིན་ཏུ་འབད་ཅིང་རྩོལ་བ་ཆེན་པོ་རྩོམ་རྩོམ་པ་ལས་དེ་འབད་ཅིང་རྩོལ་བ་ཆེན་པོ་དེ་ཉིད་ཀྱིས་སད་པར་གྱུར་ན། དེ་སད་མ་ཐག་ཏུ་འབད་ཅིང་རྩོལ་བ་ཐམས་ཅད་དང་བྲལ་བར་འགྱུར་རོ། །ཀྱེ་རྒྱལ་བའི་སྲས་དག་དེ་བཞིན་དུ་བྱང་ཆུབ་སེམས་དཔའ་ཡང་ཉོན་མོངས་པའི་ཆུ་ཀླུང་ཆེན་པོ་བཞིར་སེམས་ཅན་མང་པོ་དོང་བར་ཤེས་ནས་འབད་ཅིང་རྩོལ་བ་ཡོངས་སུ་རྩོམ་མོ། །དེ་བརྩོན་འགྲུས་ཆེན་པོ་དང་ལྡན་པས་བྱང་ཆུབ་སེམས་དཔའི་ས་མི་གཡོ་བ་འདི་ཐོབ་མ་ཐག་ཏུ་ཆེད་དུ་བྱ་བ་ཐམས་ཅད་བྲལ་བ་ཡིན་ཏེ། དེའི་གཉིས་པོ་རྒྱུ་བའམ། མཚན་མ་རྒྱུ་བ་དག་ཀྱང་ཐམས་ཅད་དུ་མི་སྣང་བར་འགྱུར་རོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། ཚངས་པའི་འཇིག་རྟེན་དུ་སྐྱེས་ཤིང་གནས་པ་ནི་འདོད་པ་ལ་སྤྱོད་པའི་ཉོན་མོངས་པ་རྣམས་ཡོངས་སུ་མི་རྒྱུ་བ་ཡིན། ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་མི་གཡོ་བ་ལ་གནས་པའི་བྱང་ཆུབ་སེམས་དཔའ་ཡང་སེམས་དང་ཡིད་དང་། རྣམ་པར་ཤེས་པ་ཡོངས་སུ་རྒྱུ་བ་
རྣམས་ཐམས་ཅད་ཀྱི་ཐམས་ཅད་དུ་ཡོངས་སུ་མི་རྒྱུ་བ་ཡིན་ཏེ། དེ་སངས་རྒྱས་ལ་ཡོངས་སུ་རྒྱུ་བའམ། བྱང་ཆུབ་ལ་ཡོངས་སུ་རྒྱུ་བའམ། བྱང་ཆུབ་སེམས་དཔའ་ལ་ཡོངས་སུ་རྒྱུ་བའམ། རང་སངས་རྒྱས་ལ་ཡོངས་སུ་རྒྱུ་བའམ། ཉན་ཐོས་ལ་ཡོངས་སུ་རྒྱུ་བའམ། མྱ་ངན་ལས་འདས་པ་ལ་ཡོངས་སུ་རྒྱུ་བའམ། དགྲ་བཅོམ་པ་ལ་ཡོངས་སུ་རྒྱུ་བའམ། ཕྱིར་མི་འོང་བ་ལ་ཡོངས་སུ་རྒྱུ་བའམ། ལན་ཅིག་ཕྱིར་འོང་བ་ལ་ཡོངས་སུ་རྒྱུ་བའམ། རྒྱུན་ཏུ་ཞུགས་པ་ལ་ཡོངས་སུ་རྒྱུ་བ་ཡང་ཡོངས་སུ་མི་རྒྱུ་ན་འཇིག་རྟེན་པའི་ཡོངས་སུ་རྒྱུ་བ་ཡོངས་སུ་མི་རྒྱུ་བ་ལྟ་ཅི་སྨོས། ཀྱེ་རྒྱལ་བའི་སྲས་དག །དེ་ལྟར་མི་གཡོ་བའི་ས་ལ་གནས་པའི་བྱང་ཆུབ་སེམས་དཔའ་སྔོན་གྱི་སྨོན་ལམ་གྱི་སྟོབས་དང་ཤུགས་ལ་གནས་པ་དེའི་ཆོས་ཀྱི་སྒོའི་རྒྱུད་དེ་ལ་སངས་རྒྱས་བཅོམ་ལྡན་འདས་རྣམས་དེ་བཞིན་གཤེགས་པའི་ཡེ་ཤེས་ཀྱིས་ཉེ་བར་བསྒྲུབ་པ་མཛད་དེ། དེ་ལ་འདི་སྐད་ཅེས་ཀྱང་བཀའ་སྩལ་ཏོ། །རིགས་ཀྱི་བུ་ལེགས་སོ་ལེགས་སོ། །སངས་རྒྱས་ཀྱི་ཆོས་རྗེས་སུ་རྟོགས་པར་བྱ་བ་ལ་འདི་ནི་དོན་དམ་པའི་བཟོད་པའང་ཡིན་ན། འོན་ཀྱང་རིགས་ཀྱི་བུ་ངེད་ཀྱི་སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་ཕུན་སུམ་ཚོགས་པ་དེ་ཁྱོད་ལ་མེད་ཅིང་། སངས་རྒྱས་ཀྱི་ཆོས་ཕུན་སུམ་ཚོགས་པ་དེ་དག་ཡོངས་སུ་བཙལ་བའི་ཕྱིར་བརྩོན་འགྲུས་རྩོམས་ཤིག །བཟོད་པའི་སྒོ་འདི་ཉིད་ཀྱང་མ་བཏོང་ཤིག །རིགས་ཀྱི་བུ་འདི་ལྟ་སྟེ། ཁྱོད་ཀྱིས་དེ་ལྟར་ཞི་བའི་རྣམ་པར་ཐར་པ་ཐོབ་ཀྱང་། བྱིས་པ་སོ་སོའི་སྐྱེ་བོ་འདི་དག་ཞི་བ་མ་ཡིན་རབ་ཏུ་ཞི་བ་མ་ཡིན་ཏེ། ཉོན་མོངས་པ་སྣ་ཚོགས་ཡོངས་སུ་རྒྱུ་བར་གྱུར་ན། དེ་ལྟར་རྣམ་པར་རྟོག་པ་རྣམ་པ་སྣ་ཚོགས་ཀྱིས་ཡོངས་སུ་མནར་བ་ལ་སོམས། འདི་ལྟར་ཡང་རིགས་ཀྱི་བུ་ཁྱོད་ཀྱི་སྔོན་གྱི་སྨོན་ལམ་སེམས་ཅན་ཀྱི་དོན་ཡོངས་སུ་འགྲུབ་པར་བྱ་བར་བཏབ་པ་དང་། ཡེ་ཤེས་ཀྱི་སྒོ་བསམ་གྱིས་མི་ཁྱབ་པ་དྲན་པར་གྱིས་ཤིག །འདི་ལྟར་ཡང་རིགས་ཀྱི་བུ་འདི་ནི་ཆོས་
རྣམས་ཀྱི་ཆོས་ཉིད་དེ། དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་། ཆོས་ཀྱི་དབྱིངས་དང་ཆོས་ཀྱི་གནས་ཉིད་འདི་ནི་དེ་བཞིན་དུ་འདུག་པ་སྟེ། འདིས་ནི་དེ་བཞིན་གཤེགས་པ་རྣམས་ཉི་ཙེ་བརྗོད་པར་བྱ་བ་མ་ཡིན་ཏེ། ཉན་ཐོས་དང་། རང་སངས་རྒྱས་ཐམས་ཅད་ཀྱང་རྣམ་པར་མི་རྟོག་པའི་ཆོས་ཉིད་འདི་འཐོབ་བོ། །རིགས་ཀྱི་བུ་ཁྱོད་ངེད་ཀྱི་ལུས་ཚད་མེད་པ་དང་། ཡེ་ཤེས་ཚད་མེད་པ་དང་། སངས་རྒྱས་ཀྱི་ཞིང་ཚད་མེད་པ་དང་། ཡེ་ཤེས་མངོན་པར་བསྒྲུབ་པ་ཚད་མེད་པ་དང་། འོད་ཀྱི་དཀྱིལ་འཁོར་ཚད་མེད་པ་དང་། དབྱངས་ཀྱི་ཡན་ལག་རྣམ་པར་དག་པ་ཚད་མེད་པ་ལ་ལྟོས། ཁྱོད་ཀྱིས་ཀྱང་དེ་བཞིན་དུ་མངོན་པར་བསྒྲུབ་པར་བྱ་དགོས་སོ། །འདི་ལྟར་རིགས་ཀྱི་བུ་གང་དེ་ལྟར་ཆོས་ཐམས་ཅད་ལ་རྣམ་པར་མི་རྟོག་པ་དེ་ནི་ཁྱོད་ཀྱི་སྣང་བ་གཅིག་པུར་ཟད་དེ། རིགས་ཀྱི་བུ་དེ་བཞིན་གཤེགས་པ་རྣམས་ཀྱི་ཆོས་སྣང་བ་ནི་འདི་འདྲ་སྟེ། ཡོངས་སུ་མཐའ་ཡས་པར་སོང་ལ་ཡོངས་སུ་མཐའ་ཡས་པར་བསྒྲུབ་པ་སྟེ། དེ་སྙེད་ཀྱི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གིས་ཀྱང་བགྲང་བར་དཀས། དེ་དག་ཐོབ་པར་བྱ་བའི་ཕྱིར་མངོན་པར་བསྒྲུབ་པ་སྐྱེད་ཅིག །འདི་ལྟར་ཡང་རིགས་ཀྱི་བུ་ཕྱོགས་བཅུའི་ཞིང་ཚད་མེད་པ་དང་། སེམས་ཅན་ཚད་མེད་པ་དང་། ཆོས་རྣམ་པར་ཕྱེ་བ་ཚད་མེད་པ་ལྟོས་ཏེ། དེ་དག་ཐམས་ཅད་མ་ནོར་བར་བགྲང་བར་གྱིས་ཤིག་ཅེས་སྟེ། ཀྱེ་རྒྱལ་བའི་སྲས་དག །དེ་ལྟར་དེ་ལྟ་བུའི་ཡེ་ཤེས་དང་ལྡན་པའི་བྱང་ཆུབ་སེམས་དཔའ་ལ་སངས་རྒྱས་བཅོམ་ལྡན་འདས་དེ་དག་ཡེ་ཤེས་མངོན་པར་བསྒྲུབ་པའི་སྒོ་དེ་དག་ལ་སྩོགས་པ་གང་གིས་བྱང་ཆུབ་སེམས་དཔའ་ཡེ་ཤེས་རྣམ་པར་ཕྱེ་བའི་ཚུལ་མངོན་པར་བསྒྲུབ་པའི་ལས་ཚད་མེད་པ་ཡོངས་སུ་རྫོགས་པར་བྱེད་པ་གཞལ་དུ་མེད་པ་དེ་དག་ཉེ་བར་བསྒྲུབ་པ་མཛད་དོ། །ཀྱེ་རྒྱལ་བའི་སྲས་དག །ཁྱེད་ཀྱིས་ཡིད་ཆེས་པ་དང་། ཁོང་དུ་ཆུད་པར་བྱ་ན་གལ་ཏེ་སངས་རྒྱས་བཅོམ་ལྡན་འདས་དེ་དག་གིས་
བྱང་ཆུབ་སེམས་དཔའ་དེ་མངོན་པར་བསྒྲུབ་པའི་སྒོར་གཞུག་པ་མཛད་དུ་ཟིན་ན། དེ་ཉིད་དེའི་མཐའ་ལས་བརྒལ་བའི་མྱ་ངན་ལས་འདས་པར་འགྱུར་ཏེ། སེམས་ཅན་ཐམས་ཅད་ཀྱི་དགོས་པའང་རྒྱུན་གཅད་པར་འགྱུར་རོ། །དེ་ལྟར་སངས་རྒྱས་བཅོམ་ལྡན་འདས་དེ་དག་ནི། བྱང་ཆུབ་སེམས་དཔའ་དེ་ལ་ཡེ་ཤེས་མངོན་པར་བསྒྲུབ་པའི་ལས་གང་གིས་སྐད་ཅིག་གཅིག་ཏུ་མངོན་པར་བསྒྲུབ་པས་ཀྱང་ཐོག་མ་སེམས་བསྐྱེད་པ་ཕྱིན་ཅད་ས་བདུན་པ་ལ་ཞུགས་ཤིང་། རྗེས་སུ་སོང་བ་ཡོངས་སུ་རྩོམ་པའི་བར་སྔ་མ་དེ་དག་གིས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆ་དང་ཁྲག་ཁྲིག་གི་ཆ་དང་། ཁྲག་ཁྲིག་བརྒྱའི་ཆ་དང་། ཁྲག་ཁྲིག་སྟོང་གི་ཆ་དང་། ཁྲག་ཁྲིག་བརྒྱ་ཕྲག་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཆར་ཡང་ཉེ་བར་མི་འགྲོའོ། །གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོ་བ་ནས་བསྒྲུན་པ་ཙམ་གྱི་བར་དུའང་མི་ཆོག་པ་དེ་སྙེད་དུ་ཚད་མེད་པའི་ཡེ་ཤེས་མངོན་པར་བསྒྲུབ་པ་ལས་ཉེ་བར་བསྒྲུབ་པ་མཛད་དོ། །ཀྱེ་རྒྱལ་བའི་སྲས་དག །དེ་ཅིའི་ཕྱིར་ཞེ་ན། སྔོན་ཅད་ལུས་གཅིག་གིས་མངོན་པར་བསྒྲུབས་པས་སྤྱོད་པ་མངོན་པར་བསྒྲུབ་པར་གྱུར་གྱི་འདི་ལ་གནས་པའི་བྱང་ཆུབ་སེམས་དཔའ་རྣམས་ནི་ལུས་རྣམ་པར་ཕྱེ་བ་ཚད་མེད་པས་བྱང་ཆུབ་སེམས་དཔའི་སྤྱོད་པའི་མཐུ་ཡོངས་སུ་སྡུད་དེ། དབྱངས་མངོན་པར་བསྒྲུབ་པ་ཚད་མེད་པ་དང་། ཡེ་ཤེས་མངོན་པར་བསྒྲུབ་པ་ཚད་མེད་པ་དང་། སྐྱེ་བ་མངོན་པར་བསྒྲུབ་པ་ཚད་མེད་པ་དང་། ཞིང་ཡོངས་སུ་སྤྱད་པ་ཚད་མེད་པ་དང་། སེམས་ཅན་ཡོངས་སུ་སྨིན་པར་བྱ་བ་ཚད་མེད་པ་དང་། སངས་རྒྱས་མཆོད་ཅིང་བསྙེན་བཀུར་བ་ཚད་མེད་པ་དང་། ཆོས་ཀྱི་ཚུལ་ཁོང་དུ་ཆུད་པ་ཚད་མེད་པ་དང་། མངོན་པར་ཤེས་པ་མངོན་པར་བསྒྲུབ་པའི་སྟོབས་དང་ཤུགས་ཚད་མེད་པ་དང་། འཁོར་གྱི་དཀྱིལ་འཁོར་ཚད་མེད་པ་རྣམ་པར་ཕྱེ་བ་དང་། ཚད་མེད་པའི་རྗེས་སུ་སོང་བའི་ལུས་དང་། ངག་དང་ཡིད་ཀྱི་ལས་ཀྱིས་བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་མཐུ་
མི་སྒུལ་བའི་ཚུལ་གྱིས་ཡང་དག་པར་སྒྲུབ་བོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། རྒྱ་མཚོ་ཆེན་པོར་འགྲོ་བའི་གྲུ་ནི་རྒྱ་མཚོ་ཆེན་པོར་མ་ཕྱིན་གྱི་བར་དུ་ཆེད་དུ་བསྐྱོད་ཅིང་འགྲོ་བར་བྱ་བ་ཡིན་ཏེ། རྒྱ་མཚོ་ཆེན་པོ་ལ་ཞེན་མ་ཐག་ཏུ་རླུང་གི་དཀྱིལ་འཁོར་གྱིས་བསྩུ་བས་ཆེད་དུ་བསྐྱོད་མི་དགོས་པ་ཡིན། དེས་རྒྱ་མཚོ་ཆེན་པོ་ལ་ཉིན་གཅིག་གིས་ཅི་ཆོད་པ་དེ་ནི་སྔོན་ཆེད་དུ་བསྐྱོད་ཅིང་འགྲོ་བས་ལོ་བརྒྱར་ཡང་དེ་ལྟར་ཚད་མེད་པར་ཕྱིན་པར་མི་ནུས་སོ། །ཀྱེ་རྒྱལ་བའི་སྲས་དག་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་ཆེན་པོའི་ཚོགས་ཡང་དག་པར་བསྩགས་པ། ཐེག་པ་ཆེན་པོའི་གྲུར་ཞུགས་པ་ཡང་། བྱང་ཆུབ་སེམས་དཔའི་སྤྱོད་པའི་རྒྱ་མཚོར་ཕྱིན་ནས། ཡུད་ཙམ་ཅིག་ཏུ་ལྷུན་གྱིས་གྲུབ་པའི་ཡེ་ཤེས་ཀྱི་ས་ཐམས་ཅད་མཁྱེན་པའི་ཡེ་ཤེས་ཇི་ཙམ་ཡང་དག་པར་གནོན་པ་དེ་ནི་སྔོན་གྱི་ཆེད་དུ་བྱ་བའི་ལས་ཀྱིས་བསྐལ་པ་བརྒྱ་སྟོང་དུ་ཡང་ཡང་དག་པར་གནོན་པར་མི་ནུས་སོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ས་བརྒྱད་པ་འདི་ཐོབ་པའི་བྱང་ཆུབ་སེམས་དཔའ་ནི་ཐབས་མཁས་པའི་ཡེ་ཤེས་ཀྱིས་བསྒྲུབ་པ་ལྷུན་གྱིས་གྲུབ་པ་ལ་ཤིན་ཏུ་ཞུགས་པའི། བྱང་ཆུབ་སེམས་དཔའི་བློས་ཐམས་ཅད་མཁྱེན་པའི་ཡེ་ཤེས་ལ་རྣམ་པར་དཔྱོད་ཅིང་འཇིག་རྟེན་གྱི་ཁམས་འབྱུང་བ་ཡང་རྣམ་པར་དཔྱོད་དོ། །འཇིག་རྟེན་གྱི་ཁམས་འཇིག་པའང་རྣམ་པར་དཔྱོད་དོ། །དེ་འཇིག་རྟེན་ཇི་ལྟར་འབྱུང་བ་དེ་ཡང་རབ་ཏུ་ཤེས་སོ། །འཇིག་རྟེན་ཇི་ལྟར་འཇིག་པ་དེ་ཡང་རབ་ཏུ་ཤེས་སོ། །ལས་གང་བསྩགས་པས་འཇིག་རྟེན་འབྱུང་བར་འགྱུར་བ་དེ་ཡང་རབ་ཏུ་ཤེས་སོ། །ལས་གང་བསྩགས་པས་འཇིག་རྟེན་ན་འཇིག་པར་འགྱུར་བ་དེ་ཡང་རབ་ཏུ་ཤེས་སོ། །དུས་ཇི་སྲིད་ཀྱིས་འཇིག་རྟེན་འབྱུང་བར་འགྱུར་བ་དེ་ཡང་རབ་ཏུ་ཤེས་སོ། །དུས་ཇི་སྲིད་ཀྱིས་འཇིག་རྟེན་འཇིག་པར་འགྱུར་བ་དེ་ཡང་རབ་ཏུ་ཤེས་སོ། །དུས་ཇི་སྲིད་དུ་འཇིག་རྟེན་བྱུང་ནས་གནས་
པ་དེའང་རབ་ཏུ་ཤེས་སོ། །དུས་ཇི་སྲིད་དུ་འཇིག་རྟེན་ཞིག་པར་གནས་པ་དེ་ཡང་རབ་ཏུ་ཤེས་སོ། །དེ་སའི་ཁམས་ཤིན་ཏུ་ཆུང་བ་ཡང་རབ་ཏུ་ཤེས་སོ། །སའི་ཁམས་ཤིན་ཏུ་ཆེ་བའང་རབ་ཏུ་ཤེས་སོ། །སའི་ཁམས་ཚད་མེད་པ་ཡང་རབ་ཏུ་ཤེས་སོ། །སའི་ཁམས་རྣམ་པར་ཕྱེ་བ་ཡང་རབ་ཏུ་ཤེས་སོ། །དེ་ཆུའི་ཁམས་ཤིན་ཏུ་ཆུང་བ་ཡང་རབ་ཏུ་ཤེས་སོ། །ཆུའི་ཁམས་ཤིན་ཏུ་ཆེ་བའང་རབ་ཏུ་ཤེས་སོ། །ཆུའི་ཁམས་ཚད་མེད་པའང་རབ་ཏུ་ཤེས་སོ། །ཆུའི་ཁམས་རྣམ་པར་ཕྱེ་བ་ཡང་རབ་ཏུ་ཤེས་སོ། །དེ་མྱེའི་ཁམས་ཤིན་ཏུ་ཆུང་བ་ཡང་རབ་ཏུ་ཤེས་སོ། །མྱེའི་ཁམས་ཤིན་ཏུ་ཆེ་བ་ཡང་རབ་ཏུ་ཤེས་སོ། །མྱེའི་ཁམས་ཚད་མེད་པ་ཡང་རབ་ཏུ་ཤེས་སོ། །མྱེའི་ཁམས་རྣམ་པར་ཕྱེ་བ་ཡང་རབ་ཏུ་ཤེས་སོ། །དེ་རླུང་གི་ཁམས་ཤིན་ཏུ་ཆུང་བ་ཡང་རབ་ཏུ་ཤེས་སོ། །རླུང་གི་ཁམས་ཤིན་ཏུ་ཆེ་བ་ཡང་རབ་ཏུ་ཤེས་སོ། །རླུང་གི་ཁམས་ཚད་མྱེད་པ་ཡང་རབ་ཏུ་ཤེས་སོ། །རླུང་གི་ཁམས་རྣམ་པར་ཕྱེ་བ་ཡང་རབ་ཏུ་ཤེས་སོ། །དེ་ཤིན་ཏུ་ཕྲ་བའི་རྡུལ་ཤིན་ཏུ་ཕྲ་བ་ཉིད་ཀྱང་རབ་ཏུ་ཤེས་སོ། །ཤིན་ཏུ་ཕྲ་བའི་རྡུལ་ཡངས་པ་ཡང་རབ་ཏུ་ཤེས་སོ། །ཤིན་ཏུ་ཕྲ་བའི་རྡུལ་ཚད་མེད་པ་ཡང་རབ་ཏུ་ཤེས་སོ། །ཤིན་ཏུ་ཕྲ་བའི་རྡུལ་རྣམ་པར་ཕྱེ་བ་ཡང་རབ་ཏུ་ཤེས་སོ། །འཇིག་རྟེན་གྱི་ཁམས་གང་ན་སའི་ཁམས་ཀྱི་རྡུལ་ཤིན་ཏུ་ཕྲ་བ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །ཆུའི་ཁམས་ཀྱི་རྡུལ་ཤིན་ཏུ་ཕྲ་བ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །མྱེའི་ཁམས་ཀྱི་རྡུལ་ཤིན་ཏུ་ཕྲ་བ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །རླུང་གི་ཁམས་ཀྱི་རྡུལ་ཤིན་ཏུ་ཕྲ་བ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །རིན་པོ་ཆེ་རྣམ་པར་ཕྱེ་བ་ཇི་སྙེད་ཡོད་པ་དང་། རིན་པོ་ཆེའི་རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་དག་ཀྱང་རབ་ཏུ་ཤེས་སོ། །སེམས་ཅན་གྱི་ལུས་ལ་རྡུལ་ཇི་སྙེད་ཡོད་པ་དེ་དག་ཀྱང་རབ་ཏུ་ཤེས་སོ། །ཞིང་གི་ལྷུན་ལ་རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་དག་ཀྱང་རབ་ཏུ་ཤེས་སོ། །དེ་སེམས་ཅན་གྱི་ལུས་ཆེ་བ་དང་།
ལུས་ཡངས་པ་དང་། ལུས་ཕྲ་བ་དང་། ལུས་རྣམ་པར་ཕྱེ་བ་ཡང་རབ་ཏུ་ཤེས་སོ། །སེམས་ཅན་དམྱལ་བ་པའི་ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དང་། བྱོལ་སོང་གི་སྐྱེ་གནས་པའི་ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དང་། གཤིན་རྗེའི་འཇིག་རྟེན་པའི་ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དང་། ལྷ་མ་ཡིན་གྱི་འཇིག་རྟེན་པའི་ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དང་། ལྷའི་འཇིག་རྟེན་པའི་ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དང་། མྱིའི་རིས་སུ་གཏོགས་པའི་ལུས་རྡུལ་ཤིན་ཏུ་ཕྲ་བ་ཇི་སྙེད་ཀྱིས་བྱུང་བ་དེ་དག་ཀྱང་རབ་ཏུ་ཤེས་སོ། །དེ་དེ་ལྟར་རྡུལ་ཤིན་ཏུ་ཕྲ་བ་རབ་ཏུ་དབྱེ་བ་ལ་ཞུགས་པ་ནི་འདོད་པའི་ཁམས་འཇིག་པ་ཡང་རབ་ཏུ་ཤེས་སོ། །གཟུགས་ཀྱི་ཁམས་འཇིག་པ་ཡང་རབ་ཏུ་ཤེས་སོ། །གཟུགས་མྱེད་པའི་ཁམས་འཇིག་པ་ཡང་རབ་ཏུ་ཤེས་སོ། །འདོད་པའི་ཁམས་འདུ་བ་ཡང་རབ་ཏུ་ཤེས་སོ། །གཟུགས་ཀྱི་ཁམས་འདུ་བ་ཡང་རབ་ཏུ་ཤེས་སོ། །གཟུགས་མེད་པའི་ཁམས་འདུ་བ་ཡང་རབ་ཏུ་ཤེས་སོ། །འདོད་པའི་ཁམས་ཆུང་བ་ཡང་རབ་ཏུ་ཤེས་སོ། །འདོད་པའི་ཁམས་ཆེ་བའང་རབ་ཏུ་ཤེས་སོ། །འདོད་པའི་ཁམས་ཚད་མྱེད་པའང་རབ་ཏུ་ཤེས་སོ། །འདོད་པའི་ཁམས་རྣམ་པར་ཕྱེ་བ་ཡང་རབ་ཏུ་ཤེས་སོ། །གཟུགས་ཀྱི་ཁམས་དང་གཟུགས་མྱེད་པའི་ཁམས་ཆུང་བ་ཡང་རབ་ཏུ་ཤེས་སོ། །ཆེ་བའང་རབ་ཏུ་ཤེས་སོ། །ཚད་མྱེད་པའང་རབ་ཏུ་ཤེས་སོ། །རྣམ་པར་ཕྱེ་བའང་རབ་ཏུ་ཤེས་སོ། །དེ་ཁམས་གསུམ་རྣམ་པར་དཔྱད་པའི་ཡེ་ཤེས་ཁོང་དུ་ཆུད་པ་མངོན་པར་བསྒྲུབ་པའི་ཡེ་ཤེས་ཀྱི་སྣང་བ་དང་ལྡན་ལ། སེམས་ཅན་གྱི་ལུས་རབ་ཏུ་དབྱེ་བ་ལ་མཁས་ཤིང་། ཞིང་གི་ལྷུན་རྣམ་པར་དབྱེ་བའི་ཡེ་ཤེས་ལ་མཁས་པས་སྐྱེ་བའི་སྐྱེ་མཆེད་ཐམས་ཅད་མངོན་པར་བསྒྲུབ་པ་ལ་བློ་ཤིན་ཏུ་གཏོང་སྟེ། དེ་ནི་སེམས་ཅན་ཐམས་ཅད་ཡོངས་སུ་སྨྱིན་པར་བྱ་བའི་ཕྱིར་སེམས་ཅན་རྣམས་ཀྱི་སྐྱེ་བ་དང་། ཡོངས་སུ་གྲུབ་པ་ཅི་འདྲ་བ་དེ་ལྟ་བུར་རང་གི་
ལུས་བྱིན་གྱིས་རློབ་བོ། །དེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་བཀང་ཞིང་སེམས་ཅན་གྱི་མོས་པ་ཇི་ལྟ་བ་དེ་བཞིན་དུ་རང་གི་ལུས་མིག་ཡོར་ལྟ་བུའི་ཡེ་ཤེས་ཀྱི་རྗེས་སུ་འབྲང་བས་སྐྱེ་བར་བྱ་བའི་ཕྱིར་མངོན་པར་བསྒྲུབ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཉིས་སམ། གསུམ་མམ། བཞིའམ། ལྔའམ། བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུ་དག་ནས་བརྗོད་དུ་མྱེད་པའི་ཡང་བརྗོད་དུ་མྱེད་པའི་བར་དག་རྒྱས་པར་བཀང་སྟེ། སེམས་ཅན་གྱི་མོས་པ་ཇི་ལྟ་བ་དེ་བཞིན་དུ་རང་གི་ལུས་མྱིག་ཡོར་ལྟ་བུའི་ཡེ་ཤེས་ཀྱི་རྗེས་སུ་འབྲང་བས་སྐྱེ་བར་བྱ་བའི་ཕྱིར་མངོན་པར་སྒྲུབ་བོ། །དེ་དེ་ལྟ་བུའི་ཡེ་ཤེས་དང་ལྡན་པས་སངས་རྒྱས་ཀྱི་ཞིང་གཅིག་ནས་ཀྱང་མྱི་གཡོ་ལ། སངས་རྒྱས་ཀྱི་ཞིང་བརྗོད་དུ་མྱེད་པ་དག་གི་དེ་བཞིན་གཤེགས་པའི་འཁོར་གྱི་དཀྱིལ་འཁོར་དག་དུ་ཡང་སྣང་བར་ཕྱིན་པ་ཡིན། དེ་སེམས་ཅན་རྣམས་ཀྱི་ལུས་རྣམ་པར་ཕྱེ་བ་དང་། མོས་པ་དང་བསམ་པ་ཇི་ལྟ་བ་བཞིན་དུ་ཞིང་དེ་དང་དེ་དག་དང་། འཁོར་གྱི་དཀྱིལ་འཁོར་དེ་དང་། དེ་དག་ཏུ་དེ་ལྟ་དེ་ལྟར་རང་གི་ལུས་སྟོན་ཏེ། དགེ་སྦྱོང་གི་འཁོར་གྱི་དཀྱིལ་འཁོར་དུ་དགེ་སྦྱོང་གི་ཁ་དོག་དང་གཟུགས་སྟོན་ཏོ། །བྲམ་ཟེའི་འཁོར་གྱི་དཀྱིལ་འཁོར་དུ། བྲམ་ཟེའི་ཁ་དོག་དང་གཟུགས་སྟོན་ཏོ། །རྒྱལ་རིགས་ཀྱི་འཁོར་གྱི་དཀྱིལ་འཁོར་དུ་རྒྱལ་རིགས་ཀྱི་ཁ་དོག་དང་གཟུགས་སྟོན་ཏོ། །རྗེའུ་རིགས་ཀྱི་འཁོར་གྱི་དཀྱིལ་འཁོར་དུ། རྗེའུ་རིགས་ཀྱི་ཁ་དོག་དང་གཟུགས་སྟོན་ཏོ། །ཁྱིམ་བདག་གི་འཁོར་གྱི་དཀྱིལ་འཁོར་དུ། ཁྱིམ་བདག་གི་ཁ་དོག་དང་གཟུགས་སྟོན་ཏོ། །རྒྱལ་པོ་ཆེན་པོ་བཞིའི་རིས་ཀྱི་འཁོར་གྱི་དཀྱིལ་འཁོར་དུ། རྒྱལ་པོ་ཆེན་པོ་བཞིའི་ཁ་དོག་དང་གཟུགས་སྟོན་ཏོ། །སུམ་ཅུ་རྩ་གསུམ་པའི་འཁོར་གྱི་དཀྱིལ་འཁོར་དུ། སུམ་ཅུ་རྩ་གསུམ་པའི་ཁ་དོག་དང་གཟུགས་སྟོན་ཏོ། །དེ་བཞིན་དུ་
མཚེ་མའི་འཁོར་གྱི་དཀྱིལ་འཁོར་དང་། དགའ་ལྡན་གྱི་འཁོར་གྱི་དཀྱིལ་འཁོར་དང་། འཕྲུལ་དགའི་འཁོར་གྱི་དཀྱིལ་འཁོར་དང་། གཞན་འཕྲུལ་དབང་བྱེད་ཀྱི་འཁོར་གྱི་དཀྱིལ་འཁོར་དང་། ཚངས་པའི་འཁོར་གྱི་དཀྱིལ་འཁོར་ནས་འོག་མིན་གྱི་འཁོར་གྱི་དཀྱིལ་འཁོར་གྱི་བར་དུ་དེ་ལྟ་དེ་ལྟ་བུའི་ཁ་དོག་དང་གཟུགས་སྟོན་ཏོ། །དེ་ཉན་ཐོས་ཀྱིས་འདུལ་བའི་སེམས་ཅན་རྣམས་ལ་ཉན་ཐོས་ཀྱི་ལུས་དང་ཁ་དོག་དང་གཟུགས་སྟོན་ཏོ། །རང་སངས་རྒྱས་ཀྱིས་འདུལ་བའི་སེམས་ཅན་རྣམས་ལ་རང་སངས་རྒྱས་ཀྱི་ལུས་དང་ཁ་དོག་དང་གཟུགས་སྟོན་ཏོ། །བྱང་ཆུབ་སེམས་དཔས་འདུལ་བའི་སེམས་ཅན་རྣམས་ལ་བྱང་ཆུབ་སེམས་དཔའི་ལུས་དང་ཁ་དོག་དང་གཟུགས་སྟོན་ཏོ། །དེ་བཞིན་གཤེགས་པས་འདུལ་བའི་སེམས་ཅན་རྣམས་ལ་དེ་བཞིན་གཤེགས་པའི་སྐུ་དང་ཁ་དོག་དང་གཟུགས་སྟོན་ཏོ། །ཀྱེ་རྒྱལ་བའི་སྲས་དག །དེ་ལྟར་སངས་རྒྱས་ཀྱི་ཞིང་བརྗོད་དུ་མེད་པ་ཇི་སྙེད་པ་དེ་དག་གི་སེམས་ཅན་རྣམས་ཀྱི་མོས་པ་རབ་ཏུ་མང་བ་དེ་དག་ཐམས་ཅད་དུ་རང་གི་ལུས་དེ་ལྟ་དེ་ལྟར་རྣམ་པར་ཕྱེ་བ་ཡོངས་སུ་སྟོན་ཏོ། །དེ་ལུས་ཀྱི་རྣམ་པར་རྟོག་པ་དང་། འདུ་ཤེས་ཐམས་ཅད་དང་རྣམ་པར་བྲལ་བ་སྟེ། ལུས་མཉམ་པ་ཉིད་ཐོབ་པས། སེམས་ཅན་གྱི་ལུས་རབ་ཏུ་ཤེས་སོ། །ཞིང་གི་ལུས་དང་རྣམ་པར་སྨིན་པའི་ལུས་དང་། ཉན་ཐོས་ཀྱི་ལུས་དང་། རང་སངས་རྒྱས་ཀྱི་ལུས་དང་། བྱང་ཆུབ་སེམས་དཔའི་ལུས་དང་། དེ་བཞིན་གཤེགས་པའི་སྐུ་དང་། ཡེ་ཤེས་ཀྱི་ལུས་དང་། ཆོས་ཀྱི་ལུས་དང་། ནམ་མཁའི་ལུས་ཀྱང་རབ་ཏུ་ཤེས་སོ། །དེས་སེམས་ཅན་རྣམས་ཀྱི་སེམས་དང་བསམ་པ་མངོན་པར་བསྒྲུབ་པ་ཡོངས་སུ་ཤེས་པས། འདོད་ན་སེམས་ཅན་གྱི་ལུས་ནམ་མཁའི་ལུས་སུ་བྱིན་གྱིས་རློབ་བོ། །དེ་བཞིན་དུ་ཞིང་གི་ལུས་དང་། ལས་རྣམ་པར་སྨིན་པའི་ལུས་དང་། ཉན་ཐོས་ཀྱི་ལུས་དང་། རང་སངས་རྒྱས་ཀྱི་ལུས་དང་། བྱང་ཆུབ་
སེམས་དཔའི་ལུས་དང་། དེ་བཞིན་གཤེགས་པའི་སྐུ་དང་། ཡེ་ཤེས་ཀྱི་ལུས་དང་། ཆོས་ཀྱི་ལུས་ཀྱང་ནམ་མཁའི་ལུས་སུ་བྱིན་གྱིས་རློབ་བོ། །དེས་སེམས་ཅན་རྣམས་ཀྱི་སེམས་དང་བསམ་པ་མངོན་པར་བསྒྲུབ་པ་ཡོངས་སུ་ཤེས་པས་སེམས་ཅན་གྱི་ལུས་རང་གི་ལུས་སུ་བྱིན་གྱིས་རློབ་བོ། །དེ་བཞིན་དུ་ཞིང་གི་ལུས་དང་ལས་རྣམ་པར་སྨིན་པའི་ལུས་དང་། ཉན་ཐོས་ཀྱི་ལུས་དང་། རང་སངས་རྒྱས་ཀྱི་ལུས་དང་། བྱང་ཆུབ་སེམས་དཔའི་ལུས་དང་། དེ་བཞིན་གཤེགས་པའི་སྐུ་དང་། ཡེ་ཤེས་ཀྱི་ལུས་དང་ཆོས་ཀྱི་ལུས་དང་ནམ་མཁའི་ལུས་ཀྱང་རང་གི་ལུས་སུ་བྱིན་གྱིས་རློབ་བོ། །དེས་སེམས་ཅན་རྣམས་ཀྱི་སེམས་དང་བསམ་པ་མངོན་པར་བསྒྲུབ་པ་ཡོངས་སུ་ཤེས་པས། ལུས་གང་དང་གང་། ལུས་གང་དང་གང་དུ་འདོད་པ་དེ་དང་དེའི་ལུས་སུ་ལུས་དེ་དང་དེ་དག་བྱིན་གྱིས་རློབ་བོ། །དེས་སེམས་ཅན་ཀྱི་ལུས་རྣམས་ཀྱི་ལས་ཀྱི་ལུས་ཀྱང་རབ་ཏུ་ཤེས་སོ། །རྣམ་པར་སྨིན་པའི་ལུས་དང་། ཉོན་མོངས་པའི་ལུས་དང་། གཟུགས་ཀྱི་ལུས་དང་། གཟུགས་མེད་པའི་ལུས་ཀྱང་རབ་ཏུ་ཤེས་སོ། །ཞིང་གི་ལུས་རྣམས་ཀྱི་ཆུང་བའི་རང་བཞིན་ཡང་རབ་ཏུ་ཤེས་སོ། །ཆེ་བ་དང་ཚད་མེད་པ་དང་། ཀུན་ནས་ཉོན་མོངས་པ་དང་། རྣམ་པར་དག་པ་དང་། སྣྲེལ་ཞི་དང་། སྤྱིའུ་ཚུགས་དང་། གཞི་མཉམ་པར་ཡང་དག་པར་འཇུག་པ་དང་། ཕྱོགས་ཀྱི་དྲ་བ་རྣམ་པར་དབྱེ་བ་ཡང་རབ་ཏུ་ཤེས་སོ། །ལས་རྣམ་པར་སྨིན་པའི་ལུས་རྣམ་པར་ཕྱེ་བའི་བརྡ་ཡང་རབ་ཏུ་ཤེས་སོ། །དེ་བཞིན་དུ་ཉན་ཐོས་ཀྱི་ལུས་རྣམ་པར་ཕྱེ་བའི་བརྡ་དང་། རང་སངས་རྒྱས་ཀྱི་ལུས་རྣམ་པར་ཕྱེ་བའི་བརྡ་དང་། བྱང་ཆུབ་སེམས་དཔའི་ལུས་རྣམ་པར་ཕྱེ་བའི་བརྡ་ཡང་རབ་ཏུ་ཤེས་སོ། །དེ་བཞིན་གཤེགས་པའི་སྐུ་རྣམས་ཀྱི་མངོན་པར་འཚང་རྒྱ་བའི་ལུས་ཀྱང་རབ་ཏུ་ཤེས་སོ། །སྨོན་ལམ་གྱི་ལུས་དང་སྤྲུལ་པའི་ལུས་དང་། བྱིན་གྱི་རླབས་ཀྱི་ལུས་དང་། གཟུགས་དང་མཚན་དང་དཔེ་བྱད་བཟང་པོའི་རྒྱན་གྱི་ལུས་དང་། འོད་ཀྱི་ལུས་དང་ཡིད་ཀྱི་རང་བཞིན་གྱི་ལུས་དང་།
བསོད་ནམས་ཀྱི་ལུས་དང་། ཡེ་ཤེས་ཀྱི་ལུས་དང་། ཆོས་ཀྱི་ལུས་ཀྱང་རབ་ཏུ་ཤེས་སོ། །ཡེ་ཤེས་ཀྱི་ལུས་རྣམས་ཀྱི་ཤིན་ཏུ་རྣམ་པར་དཔྱད་པ་ཉིད་ཀྱང་རབ་ཏུ་ཤེས་སོ། །ཡང་དག་པ་ཇི་ལྟ་བ་བཞིན་དུ་བརྟགས་པ་ཡང་རབ་ཏུ་ཤེས་སོ། །འབྲས་བུའི་སྦྱོར་བས་ཡང་དག་པར་བཟུང་བ་དང་། འཇིག་རྟེན་པ་དང་འཇིག་རྟེན་ལས་འདས་པ་རྣམ་པར་ཕྱེ་བ་དང་། ཐེག་པ་གསུམ་རྣམ་པར་དགོད་པ་དང་། ཐུན་མོང་དང་ཐུན་མོང་མ་ཡིན་པ་དང་། འབྱུང་བ་དང་མི་འབྱུང་བ་དང་། སློབ་པ་དང་། མི་སློབ་པ་ཡང་རབ་ཏུ་ཤེས་སོ། །ཆོས་ཀྱི་ལུས་རྣམས་ཀྱི་མཉམ་པ་ཉིད་ཀྱང་རབ་ཏུ་ཤེས་སོ། །འཁྲུལ་པ་མེད་པ་ཡང་རབ་ཏུ་ཤེས་སོ། །གནས་དང་བརྡ་དང་ཀུན་རྫོབ་རྣམ་པར་དགོད་པ་དང་། སེམས་ཅན་དང་སེམས་ཅན་མ་ཡིན་པའི་ཆོས་རྣམ་པར་དགོད་པ་དང་། སངས་རྒྱས་དང་ཆོས་དང་འཕགས་པའི་དགེ་འདུན་རྣམ་པར་དགོད་པ་ཡང་རབ་ཏུ་ཤེས་སོ། །ནམ་མཁའི་ལུས་རྣམས་ཀྱི་ཚད་མྱེད་པ་ཉིད་ཀྱང་རབ་ཏུ་ཤེས་སོ། །ཐམས་ཅད་ཀྱི་རྗེས་སུ་སོང་བ་དང་། ལུས་མྱེད་པ་དང་། ནོར་བ་མེད་ཅིང་མཐའ་ཡས་པ་དང་། གཟུགས་མང་པོ་མངོན་ཞིང་གསལ་བར་བྱེད་པ་ཡང་རབ་ཏུ་ཤེས་སོ། །དེས་ལུས་ཀྱི་ཡེ་ཤེས་མངོན་པར་བསྒྲུབ་པ་དེ་ལྟ་བུ་རབ་ཏུ་ཐོབ་པས་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་ཚེ་བྱིན་གྱིས་བརླབ་པའི་ཕྱིར། ཚེའི་དབང་རབ་ཏུ་འཐོབ་བོ། །ཏིང་ངེ་འཛིན་ཤིན་ཏུ་རྟོགས་པའི་ཡེ་ཤེས་ལ་འཇུག་པར་བྱ་བའི་ཕྱིར་སེམས་ཅན་གྱི་དབང་རབ་ཏུ་འཐོབ་བོ། །འཇིག་རྟེན་གྱི་ཁམས་ཐམས་ཅད་རྒྱན་དུ་མས་རབ་ཏུ་བརྒྱན་ཅིང་ཤིན་ཏུ་ཀླུབས་པའི་བྱིན་གྱི་རླབས་ཡང་དག་པར་བསྟན་པའི་ཕྱིར་ཡོ་བྱད་ཀྱི་དབང་རབ་ཏུ་འཐོབ་བོ། །ལས་ཀྱི་རྣམ་པར་སྨིན་པའི་བྱིན་གྱི་རླབས། དུས་བཞིན་དུ་མ་ནོར་བར་བསྟན་པའི་ཕྱིར་ལས་ཀྱི་དབང་རབ་ཏུ་འཐོབ་བོ། །འཇིག་རྟེན་གྱི་ཁམས་ཐམས་ཅད་དུ་སྐྱེ་བ་ཡོངས་སུ་བསྟན་པའི་ཕྱིར་སྐྱེ་བའི་དབང་རབ་ཏུ་འཐོབ་བོ། །སངས་རྒྱས་ཀྱི་ཞིང་དང་དུས་གང་དུ་ཅི་དགའ་
བར་མངོན་པར་འཚང་རྒྱ་བ་ཡང་དག་པར་བསྟན་པའི་ཕྱིར་སྨོན་ལམ་གྱི་སྟོབས་རབ་ཏུ་འཐོབ་བོ། །འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱིས་རབ་ཏུ་གང་བ་ཡང་དག་པར་བསྟན་པའི་ཕྱིར་མོས་པའི་དབང་རབ་ཏུ་འཐོབ་བོ། །སངས་རྒྱས་ཀྱི་ཞིང་ཐམས་ཅད་དུ་རྫུ་འཕྲུལ་དང་རྣམ་པར་འཕྲུལ་པ་ཡང་དག་པར་བསྟན་པའི་ཕྱིར་རྫུ་འཕྲུལ་གྱི་སྟོབས་རབ་ཏུ་འཐོབ་བོ། །དེ་བཞིན་གཤེགས་པའི་སྟོབས་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་དང་། མཚན་དང་དཔེ་བྱད་བཟང་པོ་དང་། མངོན་པར་འཚང་རྒྱ་བ་ཡང་དག་པར་བསྟན་པའི་ཕྱིར། ཡེ་ཤེས་ཀྱི་དབང་རབ་ཏུ་འཐོབ་བོ། །མཐའ་དང་དབུས་མེད་པའི་ཆོས་ཀྱི་སྒོ་སྣང་བ་ཡང་དག་པར་བསྟན་པའི་ཕྱིར་ཆོས་ཀྱི་དབང་རབ་ཏུ་འཐོབ་བོ། །དེ་བྱང་ཆུབ་སེམས་དཔའི་དབང་བཅུ་པོ་འདི་དག་ཐོབ་མ་ཐག་ནས་བསམ་གྱིས་མི་ཁྱབ་པའི་ཡེ་ཤེས་དང་ལྡན་པ་ཡིན། ཚད་མེད་པའི་ཡེ་ཤེས་དང་ལྡན་པ་ཡིན། ཡངས་པའི་ཡེ་ཤེས་དང་ལྡན་པ་ཡིན། མི་འཕྲོགས་པའི་ཡེ་ཤེས་དང་ལྡན་པ་ཡིན། དེས་དེ་ལྟ་བུའི་རྗེས་སུ་སོང་ཞིང་དེ་ལྟ་བུའི་ཡེ་ཤེས་དང་ལྡན་པས་ལུས་ཀྱི་ལས་ཁ་ན་མ་ཐོ་བ་ཤིན་ཏུ་མེད་པ་ཡང་དག་པར་རྒྱུ་ཞིང་འབྱུང་བ་ཡིན། ངག་གི་ལས་ཁ་ན་མ་ཐོ་བ་ཤིན་ཏུ་མེད་པ་ཡང་དག་པར་རྒྱུ་ཞིང་འབྱུང་བ་ཡིན། ཡིད་ཀྱི་ལས་ཁ་ན་མ་ཐོ་བ་ཤིན་ཏུ་མེད་ཅིང་ཡེ་ཤེས་སྔོན་དུ་འགྲོ་བ་ཡེ་ཤེས་རྗེས་སུ་འབྲང་བ། ཤེས་རབ་ཀྱི་ཕ་རོལ་ཏུ་ཕྱིན་པས་དབང་སྒྱུར་བ། སྙིང་རྗེ་ཆེན་པོ་སྔོན་དུ་འགྲོ་བ་ཐབས་མཁས་པས་ཤིན་ཏུ་རྣམ་པར་ཕྱེ་བ་སྨོན་ལམ་གྱིས་ཤིན་ཏུ་མངོན་པར་བསྒྲུབས་པ། དེ་བཞིན་གཤེགས་པའི་བྱིན་གྱིས་ཤིན་ཏུ་བརླབས་པ། སེམས་ཅན་གྱི་དོན་བྱ་ཞིང་སྦྱོར་བ་རྒྱུན་མ་ཆད་པ། འཇིག་རྟེན་གྱི་ཁམས་ཐམས་ཅད་དུ་རྣམ་པར་ཕྱེ་བ་ཡང་དག་པར་རྒྱུ་ཞིང་འབྱུང་ངོ་། །ཀྱེ་རྒྱལ་བའི་སྲས་དག །དེ་ལ་མདོར་བསྡུ་ན་བྱང་ཆུབ་སེམས་དཔའི་ས་མི་གཡོ་བ་འདི་ཐོབ་པའི་བྱང་ཆུབ་སེམས་དཔའི་ལུས་
དང་ངག་དང་ཡིད་ཀྱི་ལས་ནི་སངས་རྒྱས་ཀྱི་ཆོས་ཐམས་ཅད་ཡང་དག་པར་སྡུད་པའི་ཕྱིར་ཡང་དག་པར་རྒྱུ་ཞིང་འབྱུང་ངོ་། །དེ་ལྟར་དེས་བྱང་ཆུབ་སེམས་དཔའི་ས་མི་གཡོ་བ་འདི་ཐོབ་པས། ཉོན་མོངས་པའི་རྒྱུ་བ་ཐམས་ཅད་དང་བྲལ་བའི་ཕྱིར་བསམ་པའི་སྟོབས་ཤིན་ཏུ་བརྟན་པ་ཡིན། ལམ་དང་མི་འབྲལ་བའི་ཕྱིར་ལྷག་པའི་བསམ་པ་ཤིན་ཏུ་བརྟན་པ་ཡིན། སེམས་ཅན་གྱི་དོན་ཡོངས་སུ་མི་གཏོང་བའི་ཕྱིར་སྙིང་རྗེ་ཆེན་པོའི་སྟོབས་ཤིན་ཏུ་བརྟན་པ་ཡིན། འགྲོ་བ་ཐམས་ཅད་ཡོངས་སུ་སྐྱོབ་པའི་ཕྱིར་བྱམས་པ་ཆེན་པོའི་སྟོབས་ཤིན་ཏུ་བརྟན་པ་ཡིན། ཉམས་པ་མེད་པའི་ཆོས་དང་ལྡན་པའི་ཕྱིར་གཟུངས་ཀྱི་སྟོབས་ཤིན་ཏུ་བརྟན་པ་ཡིན། སངས་རྒྱས་ཀྱི་ཆོས་ཐམས་ཅད་རབ་ཏུ་དབྱེ་བའི་བྱེ་བྲག་ལ་མཁས་པའི་ཕྱིར་སྤོབས་པའི་སྟོབས་ཤིན་ཏུ་བརྟན་པ་ཡིན། འཇིག་རྟེན་གྱི་ཁམས་མཐའ་ཡས་པར་སྤྱོད་པའི་རྣམ་པ་ལ་མཁས་པས་མངོན་པར་ཤེས་པའི་སྟོབས་ཤིན་ཏུ་བརྟན་པ་ཡིན། བྱང་ཆུབ་སེམས་དཔའི་བྱ་བ་ཐམས་ཅད་ཡོངས་སུ་མི་གཏོང་བས་སྨོན་ལམ་གྱི་སྟོབས་ཤིན་ཏུ་བརྟན་པ་ཡིན། སངས་རྒྱས་ཀྱི་ཆོས་ཐམས་ཅད་ཡང་དག་པར་བསྒྲུབ་པའི་ཕྱིར། ཕ་རོལ་ཏུ་ཕྱིན་པའི་སྟོབས་ཤིན་ཏུ་བརྟན་པ་ཡིན། ཐམས་ཅད་མཁྱེན་པའི་ཡེ་ཤེས་རྣམ་པ་ཐམས་ཅད་དུ་མངོན་ཏུ་གྱུར་པས། དེ་བཞིན་གཤེགས་པའི་བྱིན་གྱི་རླབས་ཀྱི་སྟོབས་ཤིན་ཏུ་བརྟན་པ་ཡིན་ཏེ། དེ་དེ་ལྟ་བུའི་སྟོབས་ཀྱི་ཤུགས་དང་ལྡན་པས་བྱ་བ་ཐམས་ཅད་ཀྱང་ཡང་དག་པར་སྟོན་ལ་བྱ་བ་ཐམས་ཅད་ལ་ཁ་ན་མ་ཐོ་བའང་མེད་པ་ཡིན། ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ཡེ་ཤེས་ཀྱི་ས་བརྒྱད་པ་སྟེ། མི་འཕྲོགས་པའི་ཕྱིར་མི་གཡོ་བ་ཞེས་བྱའོ། །ཡེ་ཤེས་མི་ཟློག་པའི་ཕྱིར་མི་འགྱུར་བ་ཞེས་བྱའོ། །འགྲོ་བ་ཐམས་ཅད་ཀྱིས་ཤེས་པར་དཀའ་བས་ན་ཐོབ་པར་དཀའ་བའི་ས་ཞེས་བྱའོ། །ཁ་ན་མ་ཐོ་བ་མེད་པའི་ཕྱིར་གཞོན་ནུའི་ས་ཞེས་བྱའོ། །
བསམ་པ་ཇི་ལྟ་བ་བཞིན་དུ་དབང་བསྒྱུར་བས་སྐྱེ་བའི་ས་ཞེས་བྱའོ། །གཟོད་བྱ་བ་མེད་པས་ཡོངས་སུ་རྫོགས་པའི་ས་ཞེས་བྱའོ། །ཡེ་ཤེས་ཀྱི་རྣམ་པར་དབྱེ་བ་ཤིན་ཏུ་བྱ་བས་མཐར་ཐུག་པའི་ས་ཞེས་བྱའོ། །སྨོན་ལམ་ཤིན་ཏུ་མངོན་པར་བསྒྲུབ་པས་མྱ་ངན་ལས་འདས་པའི་ས་ཞེས་བྱའོ། །གཞན་གྱིས་རྣམ་པར་མི་འཁྲུགས་པས་བྱིན་གྱི་རླབས་ཀྱི་ས་ཞེས་བྱའོ། །སྔོན་གྱི་མཐར་མངོན་པར་བསྒྲུབས་པས་ལྷུན་གྱིས་གྲུབ་པའི་ས་ཞེས་བྱའོ། །ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་དེ་ལྟ་བུའི་ཡེ་ཤེས་མངོན་པར་བསྒྲུབ་པ་དང་ལྡན་ཞིང་། སངས་རྒྱས་ཀྱི་རིགས་ཀྱི་རྗེས་སུ་སོང་བ། སངས་རྒྱས་ཀྱི་ཡོན་ཏན་གྱིས་ཤིན་ཏུ་གསལ་བར་གྱུར་པ། དེ་བཞིན་གཤེགས་པའི་སྤྱོད་ལམ་དང་། སྤྱོད་པ་དང་ཚུལ་གྱི་རྗེས་སུ་སོང་བ། སངས་རྒྱས་ཀྱི་ཡུལ་ལ་མངོན་དུ་གྱུར་པ་དེ་ནི་རྟག་ཏུ་རྒྱུན་མི་འཆད་པར་དེ་བཞིན་གཤེགས་པའི་བྱིན་གྱིས་ཤིན་ཏུ་བརླབས་པ་ཡིན། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོས་རབ་ཏུ་བསྩུ་བ་ཡིན། ལག་ན་རྡོ་རྗེ་རྟག་པར་རྗེས་སུ་འབྲང་བ་ཡིན། ཏིང་ངེ་འཛིན་གྱི་སྟོབས་ཡོངས་སུ་མ་བཏང་བ་ཡིན། ལུས་རྣམ་པར་ཕྱེ་བ་ཚད་མེད་པ་མངོན་པར་བསྒྲུབ་པ་ཡིན། ལུས་ཀྱི་སྤྱོད་པའི་སྟོབས་ཐམས་ཅད་དང་ལྡན་པ་ཡིན། མངོན་པར་ཤེས་པ་ཆེན་པོའི་རྣམ་པར་སྨིན་པ་ཡོངས་སུ་རྫོགས་པ་ཡིན། ཏིང་ངེ་འཛིན་མཐའ་ཡས་པ་ལ་དབང་བསྒྱུར་བ་ཡིན། ལུང་བསྟན་པ་ཚད་མེད་པ་ཡང་དག་པར་ནོད་པ་ཡིན། ཡོངས་སུ་སྨིན་པའི་ཚུལ་བཞིན་དུ་འགྲོ་བ་རྣམས་ལ་མངོན་པར་འཚང་རྒྱ་བ་ཡོངས་སུ་སྟོན་པ་ཡིན་ཏེ། དེ་དེ་ལྟ་བུའི་ས་དང་ལྡན་ཞིང་ཐེག་པ་ཆེན་པོའི་དཀྱིལ་འཁོར་ལ་རབ་ཏུ་ཞུགས་པ་ཤིན་ཏུ་རྣམ་པར་དཔྱད་པའི་ཡེ་ཤེས་མངོན་པར་ཤེས་པ་ཆེན་པོ་དང་ལྡན་པ། རྟག་ཏུ་རྒྱུན་མི་ཆད་པར་ཤེས་རབ་སྣང་བའི་འོད་གཟེར་གཏོང་བ། ཆོས་ཀྱི་དབྱིངས་ཆགས་པ་མེད་པའི་ལམ་དུ་ཞུགས་པ། འཇིག་རྟེན་གྱི་ཁམས་ཀྱི་ལམ་རྣམ་པར་དབྱེ་
བ་ལ་མཁས་པ། ཡོན་ཏན་གྱི་རྣམ་པ་ཐམས་ཅད་ཡང་དག་པར་སྟོན་པ། རང་གི་སེམས་བསྐྱེད་པ་ལ་དབང་བསྒྱུར་བ་སྔོན་གྱི་མཐའ་དང་ཕྱི་མའི་མཐའ་ཤིན་ཏུ་རྟོགས་པའི་ཡེ་ཤེས་ཅན། བདུད་ཀྱི་ལམ་ཐམས་ཅད་ཡོངས་སུ་བཟློག་པའི་ཡེ་ཤེས་དང་ལྡན་པ། དེ་བཞིན་གཤེགས་པའི་ཡུལ་དང་སྤྱོད་ཡུལ་གྱི་རྗེས་སུ་ཞུགས་པ་ནི། འཇིག་རྟེན་གྱི་ཁམས་འབྱམ་ཀླས་ཤིང་མུ་མེད་པ་དག་ཏུ་བྱང་ཆུབ་སེམས་དཔའི་སྤྱོད་པ་ཕྱིར་མི་ལྡོག་པའི་ཚུལ་གྱིས། སྤྱོད་པས་དེའི་ཕྱིར་བྱང་ཆུབ་སེམས་དཔའ་དེ་ནི་བྱང་ཆུབ་སེམས་དཔའི་ས་མི་གཡོ་བ་ཐོབ་པ་ཡིན་ཞེས་བྱའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ས་མི་གཡོ་བ་ཐོབ་པའི་བྱང་ཆུབ་སེམས་དཔའ་ནི་ཏིང་ངེ་འཛིན་གྱི་སྟོབས་ཀྱིས་མངོན་པར་བསྒྲུབས་པས་རྟག་ཏུ་རྒྱུན་མི་འཆད་པར་དེ་བཞིན་གཤེགས་པ་མཐའ་ཡས་པ་མཐོང་བ་དང་མི་འབྲལ་བ་ཡིན། སངས་རྒྱས་མཐོང་བ་ལ་མཆོད་ཅིང་བསྙེན་བཀུར་བ་རྒྱ་ཆེན་པོ་ཡང་ཡོངས་སུ་མི་གཏོང་སྟེ། དེ་བསྐལ་པ་རེ་རེ་དང་། འཇིག་རྟེན་གྱི་ཁམས་འབྱམ་ཀླས་པ་རེ་རེ་དག་ཏུ་ཡང་སངས་རྒྱས་དུ་མ་དང་། སངས་རྒྱས་བརྒྱ་ཕྲག་དུ་མ་དང་། སངས་རྒྱས་སྟོང་ཕྲག་དུ་མ་དང་། སངས་རྒྱས་བརྒྱ་སྟོང་ཕྲག་དུ་མ་དང་། སངས་རྒྱས་བྱེ་བ་བརྒྱ་སྟོང་ཕྲག་དུ་མ་དང་། སངས་རྒྱས་ཁྲག་ཁྲིག་དུ་མ་དང་། སངས་རྒྱས་ཁྲག་ཁྲིག་བརྒྱ་ཕྲག་དུ་མ་དང་། སངས་རྒྱས་ཁྲག་ཁྲིག་སྟོང་ཕྲག་དུ་མ་དང་། སངས་རྒྱས་ཁྲག་ཁྲིག་བརྒྱ་སྟོང་ཕྲག་དུ་མ་དང་། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་ལ་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། །མཆོད་པ་མངོན་པར་བསྒྲུབ་པའི་རྣམ་པ་ཐམས་ཅད་ཀྱང་ཡང་དག་པར་འབུལ་ལོ། །དེ་བཞིན་གཤེགས་པ་དེ་དག་ལ་བསྙེན་བཀུར་བྱེད་ཅིང་འཇིག་རྟེན་གྱི་ཁམས་རྣམ་པར་དབྱེ་བ་སྔོན་དུ་འགྲོ་བའི་ཆོས་སྣང་བ་ཉེ་བར་བསྒྲུབ་པ་ཡང་ཡང་དག་པར་ལེན་ཏོ། །དེ་སྔོན་བས་ཀྱང་དེ་བཞིན་གཤེགས་པའི་ཆོས་ཀྱི་མཛོད་རབ་ཏུ་ཐོབ་པས། འཇིག་རྟེན་གྱི་ཁམས་རྣམ་པར་
ཕྱེ་བ་ཡོངས་སུ་བྲིས་པ་ཤིན་ཏུ་བསྟན་པས་མི་འཕྲོགས་པ་ཡིན། དེའི་དགེ་བའི་རྩ་བ་དེ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་དུ་མ་དང་། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང་། བསྐལ་པ་ཁྲག་ཁྲིག་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ཤིན་ཏུ་བྱང་བ་དང་ཡོངས་སུ་དག་པ་དང་ཤིན་ཏུ་འོད་གསལ་ཞིང་དང་བར་གནས་པ་ཡིན། ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། གསེར་གྱི་ས་ལེ་སྦྲམ་དེ་ཉིད་མགར་བ་མཁས་པ་དེས་ཡོངས་སུ་ཟིན་པར་གྱུར་ནས་འཛམ་བུའི་གླིང་གི་བདག་པོའི་མགུལ་ལམ་མགོ་ལ་བཏགས་ན་སེམས་ཅན་འཛམ་བུའི་གླིང་པ་ཐམས་ཅད་ཀྱི་རྒྱན་གྱི་རྣམ་པ་ཀུན་གྱིས་མི་ཐུབ་མི་འཕྲོགས་པ་ཡིན། ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་མི་གཡོ་བ་འདི་ལ་གནས་པའི་བྱང་ཆུབ་སེམས་དཔའི་དགེ་བའི་རྩ་བ་དེ་དག་ཉན་ཐོས་དང་། རང་སངས་རྒྱས་ཐམས་ཅད་ནས་བྱང་ཆུབ་སེམས་དཔའི་ས་བདུན་པ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་བར་གྱིས་ཀྱང་མི་འཕྲོགས་པ་ཡིན། བྱང་ཆུབ་སེམས་དཔའི་ས་འདི་དང་ལྡན་པའི་བྱང་ཆུབ་སེམས་དཔའི་ཡེ་ཤེས་ཀྱི་འོད་ཆེན་པོ་ནི་ཡེ་ཤེས་ཀྱི་སྒོ་ཤིན་ཏུ་རྣམ་པར་ཕྱེ་བས་སེམས་ཅན་རྣམས་ཀྱི་ཉོན་མོངས་པའི་མུན་པ་རབ་ཏུ་སེལ་ཏོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། སྟོང་ལ་དབང་བའི་ཚངས་པ་ནི། སྟོང་གི་འཇིག་རྟེན་གྱི་ཁམས་བྱམས་པས་བཀང་ཞིང་འོད་ཀྱིས་སྣང་བར་བྱེད་དོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་མི་གཡོ་བ་འདི་ལ་གནས་པའི་བྱང་ཆུབ་སེམས་དཔའ་ཡང་སངས་རྒྱས་ཀྱི་ཞིང་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བར་གྱི་འཇིག་རྟེན་གྱི་
ཁམས་སྣང་བས་རྒྱས་པར་བཀང་ཞིང་། སེམས་ཅན་རྣམས་ཀྱི་ཉོན་མོངས་པའི་ཡོངས་སུ་གདུང་བ་མཐར་གྱིས་ཞི་བར་བྱེད་དོ། །ལུས་ཀྱང་ཤིན་ཏུ་ཚིམ་པར་བྱེད་དོ། །དེ་བཞིན་དུ་ཕ་རོལ་དུ་ཕྱིན་པ་བཅུ་ལས་སྨོན་ལམ་གྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་བསྒྲུབ་པ་མ་ཡིན་ནོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ས་མི་གཡོ་བ་ཞེས་བྱ་བ་སྟེ། བྱང་ཆུབ་སེམས་དཔའི་ས་བརྒྱད་པ་མདོར་བསྟན་པའོ། །རྒྱ་ཆེར་ནི་བསྐལ་པ་མུ་མེད་པས་བསྟན་པའི་མཐར་ཐུག་པར་ཤེས་པར་བྱའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་སྟོང་གི་བདག་པོ་ཚངས་པ་ཆེན་པོར་འགྱུར་ཏེ། གཞན་ཟིལ་གྱིས་གནོན་ཅིང་། གཞན་གྱི་ཟིལ་གྱིས་མི་གནོན་པ་དང་། དོན་མཐོང་ཞིང་དབང་ཐོབ་པར་འགྱུར་ཏེ། སེམས་ཅན་རྣམས་ལ་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་སྟོན་པ་ལ་མཁས་ཤིང་མཐུ་ཡོད་པ་ཡིན། འཇིག་རྟེན་གྱི་ཁམས་རྣམ་པར་ཕྱེ་བ་ཡོངས་སུ་དྲིས་པས་མི་འཕྲོགས་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་འཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས་ཐམས་ཅད་མཁྱེན་པའི་ཡེ་ཤེས་ལ་བརྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང་། ཆོས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་། ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་། མྱི་འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས་རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་
ཡིད་ལ་བྱ་བ་དང་། མྱི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ། ཏིང་ངེ་འཛིན་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་འཐོབ་ཅིང་དེ་དག་ལ་སྙོམས་པར་འཇུག་པ་དང་། སངས་རྒྱས་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་མཐོང་བ་དང་། དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སྐྱོད་པ་དང་། སངས་རྒྱས་ཀྱི་ཞིང་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་དུ་ཕྲ་བ་སྙེད་དུ་འགྲོ་བ་དང་། འཇིག་རྟེན་གྱི་ཁམས་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སྣང་བར་བྱ་བ་དང་། སེམས་ཅན་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྨིན་པར་བྱ་བ་དང་། བསྐལ་པ་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དུ་གནས་པར་བྱ་བ་དང་། སྔོན་གྱི་མཐའ་དང་ཕྱི་མའི་མཐའི་བསྐལ་པ་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ལ་རབ་ཏུ་འཇུག་པ་དང་། ཆོས་ཀྱི་སྒོ་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རྣམ་པར་འབྱེད་པ་དང་། ལུས་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་བསྟན་པ་དང་། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་སྟོང་གསུམ་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡང་དག་པར་བསྟན་པར་བྱ་བའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཅད་བྱང་ཆུབ་སེམས་དཔའི་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས། རྣམ་པར་འཕྲུལ་ཏེ་དེ་དག་གི་ལུས་སམ་འོད་དམ། རྫུ་འཕྲུལ་ལམ། མིག་གམ། སྤྱོད་ཡུལ་ལམ། དབྱངས་སམ། སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དག་བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའོ། །དེ་ནས་བྱང་ཆུབ་སེམས་
དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང་། བསྟན་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་ས་བདུན་ཤེས་རབ་ཐབས་ཀྱིས་ལམ་སྦྱངས་ཤིང་། །ཤིན་དུ་མཆོག་བསྩགས་སྨོན་ལམ་ཆེན་པོ་རབ་བཏབ་པ། །མྱི་ཡི་དམ་པས་བྱིན་རླབས་དགེ་བའི་རྩ་ལྡན་ཞིང་། །ཡེ་ཤེས་མངོན་འདོད་མཁས་པ་བརྒྱད་པ་ཡོངས་སུ་གནོན། །བསོད་ནམས་ཡེ་ཤེས་ཉེར་བསྩགས་སྙིང་རྗེ་བྱམས་ལྡན་ཞིང་། །ཚད་མེད་སེམས་ཀྱི་རྗེས་སོང་མཁའ་དང་འདྲ་བའི་བློ། །དྲང་སྲོང་ཆེན་པོ་ཆོས་ཐོས་རྟོགས་པའི་སྟོབས་ལྡན་པ། །མྱི་སྐྱེ་བ་ཡི་བཟོད་པ་ཕྲ་ཞིང་ཞི་བ་རབ་ཏུ་འཐོབ། །སྔ་ནས་མ་སྐྱེ་མི་སྐྱེ་མཚན་ཉིད་མེད་པ་དང་། །མ་བྱུང་འཇིག་པ་མེད་ཅིང་རྒྱུ་བ་མེད་པ་དང་། །དངོས་པོ་སྐྱེ་འཇིག་མེད་པའི་དེ་ཉིད་རྟོག་མེད་པ། །ཡིད་དང་སེམས་ཀྱི་རྒྱུ་བ་མེད་ཅིང་ནམ་མཁའ་འདྲ། །དེ་དག་འདི་འདྲའི་བཟོད་ལྡན་སྤྲོས་པ་མེད་གྱུར་པའི། །མཁས་པ་ཟབ་སྤྱོད་ཞི་བའི་གནས་རབ་ཐོབ་པ་ཡིན། །དགྲ་བཅོམ་རང་རྒྱལ་འགྲོ་བ་ཀུན་གྱིས་ཤེས་པར་དཀའ། །མཚན་མ་སྣ་ཚོགས་འཛིན་པའི་འདུ་ཤེས་རྣམ་པར་བསྩལ། །དེ་ལྟར་གནས་པའི་ཡིད་དང་སེམས་དང་རྟོག་པ་མེད། །དགེ་སློང་འགོག་དང་ལྡན་པར་རྣམ་པར་མྱི་རྟོག་ཐོབ། །རྨི་ལམ་ཆུས་ཁྱེར་གཉིད་སད་བཞིན་དུ་རྩོལ་དང་བྲལ། །ཚངས་པའི་གནས་ཀྱི་འདོད་པ་ཇི་བཞིན་གཉིས་ཀྱང་མེད། །སྔོན་གྱི་བྱིན་གྱིས་བདེ་གཤེགས་ཡང་དག་བསྐུལ་བ་མཛད། །འདི་ནི་བདེ་གཤེགས་དབང་བསྐུར་བཟོད་པ་དམ་པ་སྟེ། །ངེད་ཀྱི་ཡེ་ཤེས་སྟོབས་ཡང་སངས་རྒྱས་ཆོས་ཀྱི་རྣམས། །དེ་དག་ཁྱོད་ལ་མེད་ཀྱིས་དེ་ལ་བརྩོན་འགྲུས་རྩོམ། །ཅི་ཕན་ཁྱོད་ཀྱི་ཉོན་མོངས་འབར་བ་ཀུན་ཞི་ཡང་། །འཇིག་རྟེན་ཉོན་མོངས་མྱེས་ཚིག་དེ་དག་མི་བལྟའམ། །སེམས་ཅན་ཕན་ཕྱིར་སྤྱད་པའི་སྔོན་གྱི་སྨོན་ལམ་སེམས། །འགྲོ་བ་མཐར་རྒྱུར་ཡེ་ཤེས་དོན་
ཞུགས་ཤེས་པར་གྱིས། །ཆོས་ཉིད་དེ་བཞིན་ཉིད་འདི་མྱི་རྟོག་རྟག་ཏུ་འདུག །ས་འདི་རྒྱལ་བ་ཉན་ཐོས་རང་རྒྱལ་ཀུན་གྱི་སྟེ། །འདིས་ནི་འཇིག་རྟེན་དག་ཏུ་སྟོབས་བཅུ་མི་བརྗོད་དོ། །གཞན་དུ་ཡེ་ཤེས་ཡངས་པ་དུས་གསུམ་ཚད་ཀྱིས་བརྗོད། །དེ་ལྟར་དེ་ལ་མཚུངས་མེད་ལྷ་དང་མྱིས་མཆོད་པ། །ཡེ་ཤེས་སྒོ་མོ་རྣམ་མང་ཉེ་བར་བསྒྲུབ་པ་མཛད། །རྒྱལ་བའི་ཆོས་བསྒྲུབ་ཕ་རོལ་མཐའ་ཡས་གཞུག་མཛད་པ། །དེ་ལ་སྔོན་གྱི་བྱང་ཆུབ་སྤྱོད་པས་ཆར་མྱི་འགྲོ། །ཁྱུ་མཆོག་དེ་དག་ཡེ་ཤེས་ས་མཆོག་འདི་ཐོབ་ནས། །ཕྱོགས་རྣམས་ཀུན་ཏུ་སྐད་ཅིག་གཅིག་གིས་རྒྱས་འགེངས་པ། །ཡེ་ཤེས་ཤུགས་དང་ལྡན་ཞིང་མངོན་ཤེས་མཆོག་ཐོབ་པས། །རྒྱ་མཚོ་ཆེར་ཕྱིན་གྲུ་ཆེན་རླུང་གིས་བཀུར་བ་བཞིན། །ཆེད་དུ་བསྐྱོད་སེམས་བྲལ་ཞིང་ཡེ་ཤེས་ལས་ལ་གནས། །ཞིང་རྣམས་འབྱུང་ཞིང་གནས་པ་རྣམ་པར་དཔྱོད་པ་བྱེད། །ཁམས་རྣམས་བཞི་པོ་ཁ་དོག་ཐ་དད་ཡངས་པ་དང་། །ཕྲ་ཞིང་ཆེ་དང་རྣམ་པར་ཕྱེ་ལ་ཡང་དག་འཇུག །སྟོང་གསུམ་ཤིན་ཏུ་རྡུལ་ཕྲ་ཀུན་ལ་འཇུག་བྱེད་དེ། །ཁམས་བཞི་འགྲོ་བའི་ལུས་རྣམས་རྣམ་པར་ཕྱེ་བ་དང་། །རྒྱུ་དྲུག་རིན་ཆེན་རྣམ་པར་ཕྱེ་བའི་རྡུལ་ཕྲན་རྣམས། །རྣམ་པར་ཕྱེ་ཞིང་ཡེ་ཤེས་ཡུལ་གྱིས་མ་ལུས་བགྲང་། །ཡེ་ཤེས་རྣམས་བསྒོམས་ཡིད་ལྡན་ལུས་རྣམས་ཐམས་ཅད་དུ། །འགྲོ་བའི་དོན་ཕྱིར་རང་གི་ལུས་རྣམས་གཟུད་པ་བྱེད། །སྟོང་གསུམ་ཐམས་ཅད་སྣ་ཚོགས་གཟུགས་ཀྱིས་ཁྱབ་བྱས་ཤིང་། །འཇིག་རྟེན་མཐའ་ཡས་དག་ཏུ་སྣ་ཚོགས་ལུས་ཀྱང་སྟོན། །བར་སྣང་མཁའ་ལ་ཉི་ཟླ་རླུང་གིས་རྒྱུ་འགྲོ་ཡང་། །སོ་སོའི་དཀྱིལ་འཁོར་གཟུགས་བརྙན་ཆུ་དཀྱིལ་རབ་ཏུ་སྣང་། །དེ་བཞིན་མི་གཡོའི་ཆོས་ལ་ཡེ་ཤེས་དམ་པས་རྒྱུ། །བསམ་དག་འགྲོ་བ་རྣམས་ལ་མཁས་པའི་གཟུགས་བརྙན་སྣང་། །འགྲོ་བའི་བསམ་པ་བཞིན་དུ་ལུས་ཀྱི་རྣམ་ཕྱེ་བ། །མྱི་དང་ལྷ་ཡི་འཁོར་རྣམས་ཀུན་ཏུ་སྟོན་པ་བྱེད། །ཉན་ཐོས་རང་རྒྱལ་བདེ་གཤེགས་སྲས་ཀྱི་ལུས་རྣམས་དང་། །
བདེ་བར་གཤེགས་སྐུ་ཡན་ལག་བརྒྱད་པ་རབ་ཏུ་སྟོན། །སེམས་ཅན་ཞིང་དང་དེ་བཞིན་ལས་ཀྱི་རྣམ་སྨིན་ལུས། །འཕགས་ལུས་སྣ་ཚོགས་དེ་བཞིན་ཆོས་དང་ཡེ་ཤེས་ལུས། །ནམ་མཁའི་ལུས་དང་མཉམ་པ་ཉིད་དུ་ཁྱུ་མཆོག་ལྡན། །རྫུ་འཕྲུལ་སྣ་ཚོགས་འགྲོ་བ་ཚིམ་པར་བྱ་ཕྱིར་སྟོན། །དབང་བཅུ་དྲི་མ་མྱེད་པའི་ཡེ་ཤེས་དཔྱོད་པ་ཐོབ། །ཡེ་ཤེས་སྤྱོད་དང་ལས་རྣམས་སྙིང་རྗེ་འཐུན་པའང་ཐོབ། །ལས་རྣམས་ཇི་སྙེད་རྒྱལ་བའི་ཆོས་རྣམས་ཡོངས་སུ་བསྒྲུབ། །སྡོམ་པ་གསུམ་ལ་གནས་ཤིང་མི་གཡོ་རི་རབ་བཞིན། །རྒྱལ་སྲས་རྣམས་ཀྱི་སྟོབས་བཅུ་བསྐྱོད་པར་མི་ནུས་པ། །དེ་དག་ཀུན་ལྡན་བདུད་རྣམས་ཀུན་གྱིས་ཡོང་མི་ཟློག །སངས་རྒྱས་བྱིན་རླབས་བརྒྱ་བྱིན་ཚངས་པས་ཕྱག་ཀྱང་བྱ། །ལག་ན་རྡོ་རྗེའི་དཔུང་རྣམས་རྟག་ཏུ་ཕྱི་བཞིན་འབྲང་། །ས་ཕྱོགས་འདི་ལ་གནས་པའི་ཡོན་ཏན་མཐའ་ཡས་ཏེ། །དེ་དག་བསྐལ་པ་ཁྲག་ཁྲིག་སྟོང་གིས་ཟད་མི་ནུས། །དེ་དག་སངས་རྒྱས་བྱེ་བ་བསྙེན་བཀུར་ཡང་བྱེད་པས། །རྒྱལ་པོའི་མགོ་ལ་འདུག་པའི་རྒྱན་བཞིན་ཤིན་ཏུ་གསལ། །ས་ཕྱོགས་འདི་གནས་བྱང་ཆུབ་སེམས་དཔའ་ཤེས་ལྡན་པ། །སྟོང་གི་བདག་པོ་ཚངས་ཆེན་ཡོན་ཏན་མང་པོར་འགྱུར། །ཐེག་པ་གསུམ་སྟོན་ཡོངས་སུ་མྱི་འཁྲུགས་མི་འཕྲོགས་ཏེ། །འོད་བཟང་བྱམས་པའི་བསམ་པས་འགྲོ་བའི་ཉོན་མོངས་སེལ། །སྐད་ཅིག་གཅིག་ཏུ་སྟོང་ཕྲག་བཅུ་ཡི་ཞིང་རྣམས་ཀྱི། །རྡུལ་ཁམས་ཇི་སྙེད་དེ་སྙེད་ཏིང་འཛིན་ལྡན་པ་འཐོབ། །ཕྱོགས་བཅུའི་སེམས་ཅན་གཙོ་བོ་དེ་སྙེད་མང་པོ་མཐོང་། །ཡན་ཅད་སྨོན་ལམ་མཆོག་གི་རྒྱན་ཅན་གཅིག་མིན་ནོ། །འདི་ནི་མདོར་བསྡུས་རྒྱལ་སྲས་ཀྱིས། །ས་བརྒྱད་ཤིན་ཏུ་བསྟན་པ་སྟེ། །རྒྱ་ཆེ་བསྐལ་པ་བྱེ་བར་ཡང་། །ཐམས་ཅད་མཐར་ཕྱིན་མྱི་ནུས་སོ། །བྱང་ཆུབ་སེམས་དཔའི་ས་བརྒྱད་པ་སྟེ་
མི་གཡོ་བ་ཞེས་བྱ་བའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་དགུ་པ། ས་ཡི་དམ་པ་འདི་བཤད་ཚེ། །དེ་བཞིན་གཤེགས་པའི་བྱིན་རླབས་ཀྱིས། །ཚད་མེད་བསམ་གྱིས་མི་ཁྱབ་པའི། །བྱེ་བའི་ཞིང་རྣམས་གཡོས་པར་གྱུར། །ཐམས་ཅད་གཟིགས་པའི་སྐུ་ལས་ཀྱང་། །འོད་གཟེར་ཡིད་དུ་འོང་བ་བཀྱེ། །དེས་ནི་ཞིང་རྣམས་སྣང་བར་བྱས། །སེམས་ཅན་རྣམས་ཀྱང་བདེ་བར་གྱུར། །བྱང་ཆུབ་སེམས་དཔའ་སྟོང་སྙེད་ཀྱང་། །བར་སྣང་གནས་ལ་འཁོད་གྱུར་ཏེ། །ལྷ་རྫས་ལྷག་པའི་མཆོད་པ་ཡིས། །གསུང་པའི་མཆོག་ལ་མཆོད་པ་བྱེད། །ལྷ་ཡི་རྒྱལ་པོ་དབང་ཕྱུག་དང་། །དབང་བསྒྱུར་རྣམས་ཀྱང་དགའ་བར་གྱུར། །མཆོད་པ་རྣམ་པ་སྣ་ཚོགས་ཀྱིས། །ཡོན་ཏན་རྒྱ་མཚོ་མཆོད་པ་བྱེད། །དེ་ནས་ལྷ་ཡི་བུ་མོ་སྟོང་། །དགའ་ཞིང་དབང་པོ་བདེར་གྱུར་པས། །སྦྱར་ལེགས་སྙན་པའི་གླུ་ཡི་དབྱངས། །སྟོན་པ་མཆོད་པའི་དོན་དུ་ལེན། །རོལ་མོའི་སྒྲ་དབྱངས་དེ་དག་ལས། །དྲང་སྲོང་ཆེན་པོའི་བྱིན་རླབས་ཀྱིས། །འདི་འདྲའི་སྒྲ་དབྱངས་སྟོང་སྙེད་དུ། །སྙན་པའི་དབྱངས་སུ་གྲག་པར་གྱུར། །ཞི་དུལ་རབ་ཞི་དྲི་མ་ཐམས་ཅད་མྱེད་གྱུར་ཅིང་། །ས་ཡི་མཆོག་དང་ལྡན་པས་སྤྱོད་པ་ལེགས་སྤྱོད་པ། །ཕྱོགས་བཅུར་འགྲོ་ལ་ཕན་པར་སྤྱོད་པའི་ཁྱུ་མཆོག་རྣམས། །མཁའ་དབྱིངས་འདྲ་བའི་ཡིད་ཀྱི་རྒྱལ་བའི་སྤྱོད་པ་སྟོན། །མྱི་ཡི་གནས་དང་ལྷ་ཡི་གནས་དང་ཀླུ་གནས་སུ། །ཕྱོགས་བཅུར་བསོད་ནམས་སྟོབས་ཀྱིས་རྒྱན་རྣམས་མང་པོ་བྱུང་། །དེ་ལས་ཡང་དུ་རྒྱལ་སྲས་ཡེ་ཤེས་ལ་མོས་པ། །རྒྱལ་བའི་ཡོན་ཏན་བསྔགས་པ་རྒྱ་ཆེན་རབ་ཏུ་སྟོན། །ཞིང་གཅིག་མ་གཡོས་རྡུལ་མེད་ཞིང་རྣམས་ཐམས་ཅད་དུ། །འགྲོ་ལ་ཕན་བྱེད་ཟླ་བ་ལྟ་བུའི་འོད་ལྡན་པ། །ཐམས་ཅད་དབྱངས་སུ་འདུ་ཤེས་སེམས་
ཞི་ཡིད་རབ་ཀྱིས། །སོ་སོའི་སྐད་བཞིན་སྒྲ་སྐད་བརྒྱ་ཡང་རྣམ་པར་བརྗོད། །སེམས་ཅན་གང་རྣམས་བློ་ཞན་སེམས་ཡིད་དམར་གྱུར་པ། །དེ་ལ་མཁས་པ་ཁྱུ་མཆོག་ཉན་ཐོས་སྤྱོད་པ་སྟོན། །སེམས་ཅན་གང་རྣམས་སེམས་རྣོ་རང་རྒྱལ་ཐེག་བརྩོན་པ། །དེ་ལ་རྡུལ་མེད་རང་རྒྱལ་ཐེག་པའི་ཡེ་ཤེས་སྟོན། །སེམས་ཅན་གང་རྣམས་ཕན་སེམས་སྙིང་རྗེ་བརྩེ་ཡིད་ཅན། །དེ་ལ་དེ་དག་རྒྱལ་སྲས་སྤྱོད་པའི་མཆོག་ཀྱང་སྟོན། །སེམས་ཅན་གང་རྣམས་བློ་མཆོག་དམ་པའི་ཡིད་མོས་པ། །དེ་ལ་མཁས་པ་ཚད་མེད་སངས་རྒྱས་སྐུ་སྟོན་ཏོ། །ཇི་ལྟར་སྒྱུ་མཁན་འགྲོ་བ་རྣམས་ལ་སྒྱུ་སྟོན་པ། །ལུས་མང་བྱེ་བ་སྣ་ཚོགས་དེ་དག་དངོས་པོ་མྱེད། །དེ་བཞིན་རྒྱལ་སྲས་མཁས་པ་ཡེ་ཤེས་སྒྱུ་མཁས་པ། །སྤྱོད་པ་ཐམས་ཅད་སྟོན་ཀྱང་དེ་དག་དངོས་པོ་མེད། །འདི་འདྲའི་སྒྲ་སྐད་བརྒྱ་སྟོང་དུ། །སྙན་པའི་དབྱངས་སུ་བརྗོད་བྱས་ནས། །ལྷའི་བུ་མོ་མི་སྨྲ་བར། །ཞི་ལ་མོས་པས་རྒྱལ་བ་ལྟ། །འཁོར་རྣམས་རྣམ་པར་དང་བས་ན། །བདེ་གཤེགས་སྲས་ལ་ཡང་སྨྲས་པ། །དམ་ཆོས་སྤྱོད་པའི་སྤྱོད་པ་རྣམས། །བརྒྱད་པའི་གོང་དུ་ཡང་གསུངས་ཤིག །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་བྱང་ཆུབ་སེམས་དཔའི་ས་བརྒྱད་པ་ལ་གནས་པ་ནི་དེ་ལྟ་བུའི་བློ་ཚད་མེད་པའི་ཡེ་ཤེས་ཀྱིས་རྣམ་པར་དཔྱད་པས་དེ་ནས་གོང་དུ་རྣམ་པར་ཐར་པ་ཞི་བ་ལ་མོས་པར་ཞེ་ནོན་ཅིང་དེ་ནས་གོང་དུ། དེ་བཞིན་གཤེགས་པའི་ཡེ་ཤེས་ཤིན་ཏུ་རྫོགས་པ་རྣམ་པར་སྤྱད་པ་དང་། དེ་བཞིན་གཤེགས་པས་གསུངས་པའི་རྗེས་སུ་འཇུག་པར་བྱ་བ་ལ་འཇུག་པ་དང་། ཡེ་ཤེས་བསམ་གྱིས་མི་ཁྱབ་པའི་ཆེ་བ་ཉིད་རྣམ་པར་དབྱེ་བ་དང་། གཟུངས་དང་། ཏིང་ངེ་འཛིན་རབ་ཏུ་དབྱེ་བ་ཡོངས་སུ་སྦྱང་བ་དང་། མངོན་པར་ཤེས་པ་རྒྱ་ཆེན་པོ་མངོན་པར་བསྒྲུབ་པ་དང་། འཇིག་རྟེན་གྱི་ཁམས་རྣམ་པར་དབྱེ་བ་ཁོང་
དུ་ཆུད་པར་བྱ་བ་དང་། དེ་བཞིན་གཤེགས་པའི་སྟོབས་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་ཡོངས་སུ་མི་འཕྲོགས་པ་སྦྱང་བར་བྱ་བ་དང་། དེ་བཞིན་གཤེགས་པའི་ཆོས་ཀྱི་འཁོར་ལོ་བསྐོར་བ་དང་། ཁྱུ་མཆོག་གི་མཐུ་ཕྱུང་བའི་རྗེས་སུ་འབྲང་བར་བྱ་བ་དང་། སྙིང་རྗེ་ཆེན་པོའི་མཐུ་ཕྱུང་བ་ཡོངས་སུ་མྱི་གཏོང་བར་བྱེད་པས། བྱང་ཆུབ་སེམས་དཔའི་ས་དགུ་པ་ཡོངས་སུ་གནོན་ཏེ། དེ་བྱང་ཆུབ་སེམས་དཔའི་ས་འདི་ལ་གནས་པའི་ཚེ། དགེ་བ་དང་། མི་དགེ་བ་དང་། ལུང་དུ་མ་བསྟན་པའི་ཆོས་མངོན་པར་འདུ་བྱ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཟག་པ་དང་བཅས་པ་དང་། ཟག་པ་མེད་པའི་ཆོས་མངོན་པར་འདུ་བྱ་བ་དང་། འཇིག་རྟེན་པ་དང་། འཇིག་རྟེན་ལས་འདས་པའི་ཆོས་མངོན་པར་འདུ་བྱ་བ་དང་། བསམ་པ་དང་བསམ་དུ་མེད་པའི་ཆོས་མངོན་པར་འདུ་བྱ་བ་དང་ངེས་པ་དང་། མ་ངེས་པའི་ཆོས་མངོན་པར་འདུ་བྱ་བ་དང་། ཉན་ཐོས་དང་། རང་སངས་རྒྱས་ཀྱི་ཆོས་མངོན་པར་འདུ་བྱ་བ་དང་། བྱང་ཆུབ་སེམས་དཔའི་སྤྱོད་པའི་ཆོས་མངོན་པར་འདུ་བྱ་བ་དང་། དེ་བཞིན་གཤེགས་པའི་སའི་ཆོས་མངོན་པར་འདུ་བྱ་བ་དང་། འདུས་བྱས་ཀྱི་ཆོས་མངོན་པར་འདུ་བྱ་བ་དང་། འདུས་མ་བྱས་ཀྱི་ཆོས་མངོན་པར་འདུ་བྱ་བ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་དེ་ལྟ་བུའི་ཤེས་པར་བྱ་བ་ཁོང་དུ་ཆུད་པའི་བློས་སེམས་ཅན་གྱི་སེམས་ཐིབས་པོ་རབ་ཏུ་རྒྱུ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཉོན་མོངས་པའི་ཐིབས་པོ་རབ་ཏུ་རྒྱུ་བ་དང་། ལས་ཐིབས་པོ་རབ་ཏུ་རྒྱུ་བ་དང་། དབང་པོ་ཐིབས་པོ་རབ་ཏུ་རྒྱུ་བ་དང་། མོས་པའི་ཐིབས་པོ་རབ་ཏུ་རྒྱུ་བ་དང་། ཁམས་ཐིབས་པོ་རབ་ཏུ་རྒྱུ་བ་དང་། བསམ་པ་དང་བག་ལ་ཉལ་བ་ཐིབས་པོ་རབ་ཏུ་རྒྱུ་བ་དང་། སྐྱེ་བ་ཐིབས་པོ་རབ་ཏུ་རྒྱུ་བ་དང་། བག་ཆགས་ཀྱི་མཚམས་སྦྱོར་བ་ཐིབས་པོ་རབ་ཏུ་རྒྱུ་བ་དང་། ཕུང་པོ་གསུམ་དུ་རྣམ་
པར་གནས་པའི་ཐིབས་པོ་རབ་ཏུ་རྒྱུ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་སེམས་ཅན་རྣམས་ཀྱི་སེམས་རྣམ་པ་ཐ་དད་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སེམས་རྣམ་པ་སྣ་ཚོགས་དང་། སེམས་སྐད་ཅིག་ཏུ་མྱུར་དུ་འགྱུར་ཞིང་འཇིག་པ་དང་མི་འཇིག་པ་དང་། སེམས་ལུས་མེད་པ་དང་། སེམས་མཐའ་ཡས་ཤིང་ཐམས་ཅད་དུ་དབང་བྱེད་པ་དང་། སེམས་འོད་གསལ་ཞིང་དང་བ་དང་། སེམས་ཉོན་མོངས་པ་དང་བཅས་པ་དང་། ཉོན་མོངས་པ་མེད་པ་དང་། སེམས་བཅིངས་པ་དང་། རྣམ་པར་གྲོལ་བ་དང་། སེམས་སྒྱུ་མ་ལྟ་བུར་རྣམ་པར་བསྒྲུབ་པ་དང་། སེམས་འགྲོ་བའི་རྒྱུད་ཇི་ལྟ་བ་བཞིན་དུ་ཉེ་བར་གནས་པ་ནས། སེམས་རྣམ་པ་སྣ་ཚོགས། སྟོང་ཕྲག་དུ་མའི་བར་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་ཉོན་མོངས་པ་རྣམས་རིང་དུ་སོང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སྦྱོར་བ་མཐའ་ཡས་པ་དང་ལྷན་ཅིག་སྐྱེས་ཤིང་ཐ་མི་དད་པ་དང་། བག་ལ་ཉལ་བ་དང་། ཀུན་ནས་འཁོར་བའི་གནས་གཅིག་པ་དང་། སེམས་དང་ལྡན་པ་དང་། མི་ལྡན་པ་དང་སྐྱེ་བའི་མཚམས་སྦྱོར་བ་དང་། ལམ་གྱི་རྒྱུད་ཇི་ལྟ་བ་བཞིན་དུ་ཉེ་བར་གནས་པ་དང་། ཁམས་གསུམ་རྣམ་པར་ཕྱེ་བ་དང་། སྲེད་པ་དང་། མ་རིག་པ་དང་། ལྟ་བའི་ཟུག་རྔུ་དང་། ང་རྒྱལ་དང་གཏི་མུག་གི་ཁ་ན་མ་ཐོ་བ་ཆེན་པོ་དང་། ལས་རྣམ་པ་གསུམ་གྱི་གཞི་རྒྱུན་མྱི་འཆད་པ་ནས་མདོར་བསྡུ་ན་ཉོན་མོངས་པའི་རྒྱུད་སྟོང་ཕྲག་བརྒྱད་ཅུ་རྩ་བཞིའི་བར་དུ་རྗེས་སུ་འཇུག་པར་བྱ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་ལས་དགེ་བ་དང་། མི་དགེ་བ་དང་། ལུང་དུ་མ་བསྟན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། རྣམ་པར་དམྱིགས་པ་དང་། རྣམ་པར་མི་དམྱིགས་པ་དང་། སེམས་དང་ལྷན་ཅིག་ཏུ་སྐྱེས་ཤིང་ཐ་མི་དད་པ་དང་། རང་གི་ངང་གིས་སྐད་ཅིག་ཏུ་རྒྱུས་འབྱུང་ཞིང་འཇིག་ལ་འབྲས་བུ་ཆུད་མྱི་ཟ་བར་མཚམས་སྦྱོར་བ་དང་། རྣམ་
པར་སྨིན་པ་ཡོད་པ་དང་། རྣམ་པར་སྨིན་པ་མེད་པ་དང་། ནག་པོ་དང་། དཀར་པོ་དང་། མྱི་དཀར་མྱི་གནག་པ་དང་། ཕྱོགས་དུ་མའི་ལས་ཡོངས་སུ་ལེན་པ་རྣམ་པ་ཐ་དད་པ་དང་། ལས་ཀྱི་ཞིང་ཚད་མེད་པ་དང་འཕགས་པ་དང་། འཇིག་རྟེན་པ་རྣམ་པར་ཕྱེ་བ་དང་། འཇིག་རྟེན་ལས་འདས་པའི་ཆོས་རྣམ་པར་དགོད་པ་དང་། ཉེ་བར་ལེན་པ་དང་བཅས་པ་དང་། ཉེ་བར་ལེན་པ་མྱེད་པ་དང་། འདུས་བྱས་དང་། འདུས་མ་བྱས་དང་། ཚེ་འདི་དང་སྐྱེ་བ་དང་། རྒྱུད་གཞན་དུ་ཚོར་བར་འགྱུར་བ་དང་། ཐེག་པ་དང་ཐེག་པ་མ་ཡིན་པར་ངེས་པ་དང་མ་ངེས་པ་ནས། ལས་རྣམ་པ་ཐ་དད་པ་སྟོང་ཕྲག་བརྒྱད་ཅུ་རྩ་བཞིའི་བར་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་དབང་པོ་ཞན་པ་དང་། འབྲིང་དང་རབ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སྔོན་གྱི་མཐའ་དང་ཕྱི་མའི་མཐར་ཐ་དད་པ་དང་། ཐ་མི་དད་པ་དང་། ཡངས་པ་དང་། འབྲིང་དང་ཐ་མ་དང་། ཉོན་མོངས་པ་དང་། ལྷན་ཅིག་ཏུ་སྐྱེས་ཤིང་ཐ་མི་དད་པ་དང་། ཐེག་པ་དང་ཐེག་པ་མ་ཡིན་པར་ངེས་པ་དང་། མ་ངེས་པ་དང་། ཡོངས་སུ་སྨིན་པའི་ཚུལ་བཞིན་དུ་འདུལ་བ་དང་། དབང་པོའི་དྲ་བའི་རྗེས་སུ་འབྲང་ཞིང་མྱུར་དུ་འཇིག་པ་དང་། མཚན་མར་འཛིན་པ་དང་། དབང་པོའི་དབང་གཞན་གྱིས་མྱི་ཐུལ་བ་དང་། དབང་པོའི་རྣམ་པ་ཕྱིར་བཟློག་ཏུ་རུང་བ་དང་། ཕྱིར་བཟློག་ཏུ་མི་རུང་བ་དང་། རིང་དུ་སོང་བ་དང་། ལྷན་ཅིག་སྐྱེས་པ་རྣམ་པ་སྣ་ཚོགས་ཐ་དད་པ་ནས་དབང་པོ་རྣམ་པ་ཐ་དད་པ་སྟོང་ཕྲག་བརྒྱད་ཅུ་རྩ་བཞིའི་བར་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་མོས་པ་ཞན་པ་དང་འབྲིང་དང་། རབ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་ནས། དབང་པོའི་ཚུལ་བཞིན་དུ་མོས་པ་རྣམ་པ་ཐ་དད་པ་སྟོང་ཕྲག་བརྒྱད་ཅུ་རྩ་བཞིའི་བར་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་ཁམས་ཐ་མ་དང་འབྲིང་དང་། རབ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་ནས་ཁམས་རྣམ་པ་ཐ་དད་པ་སྟོང་ཕྲག་བརྒྱད་ཅུ་རྩ་བཞིའི་བར་དུ་ཡང་དག་
པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་བསམ་པ་ཐ་མ་དང་འབྲིང་དང་། རབ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་ནས་བསམ་པ་རྣམ་པ་ཐ་དད་པ་སྟོང་ཕྲག་དུ་མའི་བར་དུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་བག་ལ་ཉལ་བ་རྣམས་བསམ་པ་དང་ལྷན་ཅིག་སྐྱེས་པ་དང་། སེམས་དང་ལྷན་ཅིག་སྐྱེས་པ་དང་། སེམས་དང་ལྡན་པ་དང་། སེམས་དང་མྱི་ལྡན་པ་དང་རིང་དུ་སོང་བ་དང་། ཐོག་མ་མེད་པ་ནས། གུད་དུ་མ་བསྐྱོད་པ་དང་། བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་དང་། མངོན་པར་ཤེས་པ་བཟོད་པར་དཀའ་བ་དང་། ཁམས་གསུམ་པའི་མཚམས་ཤིན་ཏུ་སྦྱོར་བ་དང་། ཐོག་མ་མེད་པའི་དུས་ཀྱི་སེམས་ཀྱི་རྒྱུད་ཀུན་ཏུ་རྒྱུ་བར་བྱེད་པ་དང་། སྐྱེ་བའི་སྒོ་ཀུན་ནས་འབྱུང་བ་རྣམ་པར་དམྱིགས་པར་བྱེད་པ་དང་། གཉེན་པོ་ཐོབ་པས་དངོས་པོར་མྱི་འགྱུར་བ་དང་། སའི་སྐྱེ་མཆེད་དང་ཕྲད་པ་དང་། མི་ཕྲད་པ་དང་། འཕགས་པའི་ལམ་ཐ་དད་པ་མྱེད་པས་ཡང་དག་པར་བསྩལ་བ། ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་སྐྱེ་བ་རྣམ་པ་ཐ་དད་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ལས་ཇི་ལྟ་བ་བཞིན་དུ་སྐྱེ་བ་དང་། སེམས་ཅན་དམྱལ་བ་དང་བྱོལ་སོང་དང་ཡི་དྭགས་དང་། ལྷ་མ་ཡིན་དང་། མྱི་དང་། ལྷའི་གནས་རྣམ་པར་དགོད་པ་དང་། གཟུགས་དང་གཟུགས་མྱེད་པར་སྐྱེ་བ་དང་། འདུ་ཤེས་ཡོད་པ་དང་འདུ་ཤེས་མྱེད་པར་སྐྱེ་བ་དང་། ལས་ཀྱི་ཞིང་དང་། སྲེད་པའི་རླན་དང་། མ་རིག་པའི་མུན་པ་དང་། རྣམ་པར་ཤེས་པའི་ས་བོན་གྱིས་ཡང་སྲིད་པ་རབ་ཏུ་འབྱུང་བ་དང་། མྱིང་དང་གཟུགས་ལྷན་ཅིག་སྐྱེས་ཤིང་ཐ་མྱི་དད་པ་དང་། སྲིད་པར་འགྲོ་ཡང་ཁྱེར་ཞིང་སྲེད་པས་མངོན་པར་མོས་པའི་མཚམས་སྦྱོར་བ་དང་། སྤྱོད་པར་འདོད་པ་དང་། འབྱུང་བར་འདོད་པ་དང་། སེམས་ཅན་ལ་མོས་པ་དང་། ཐོག་མ་དང་ཐ་མ་མྱེད་པ་དང་། ཁམས་གསུམ་པ་ཡོངས་སུ་འཛིན་པ་དང་། སྲིད་པ་
ཉིང་གི་མཚམས་སྦྱོར་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་བག་ཆགས་རྣམས་རྒྱུ་བ་དང་མྱི་རྒྱུ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ལམ་གྱི་རྒྱུད་གང་དང་ཇི་ལྟར་འབྲེལ་བའི་བག་ཆགས་ཀྱིས་བསྒོས་པ་དང་། སེམས་ཅན་སྤྱད་པ་སྤྱོད་པ་ཇི་ལྟ་བ་བཞིན་དུ་བསྒོས་པ་དང་། ལས་དང་ཉོན་མོངས་པ་ལ་གོམས་པ་ཇི་ལྟ་བ་བཞིན་དུ་བསྒོས་པ་དང་། དགེ་བ་དང་མྱི་དགེ་བ་དང་། ལུང་དུ་མ་བསྟན་པའི་ལས་ལ་གོམས་པས་བསྒོས་པ་དང་། ཡང་སྲིད་པར་འགྲོ་བར་བསྒོས་པ་དང་། མཐར་གྱིས་བསྒོས་པ་དང་། རིང་དུ་སོང་ཞིང་རྒྱུན་མི་འཆད་པ་དང་། ཉོན་མོངས་པ་བསྩལ་བས་བསྒོས་པ་དང་། དངོས་པོར་གྱུར་པ་དང་དངོས་པོར་མ་གྱུར་པས་བསྒོས་པ་དང་། ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་དང་། དེ་བཞིན་གཤེགས་པ་མཐོང་ཞིང་ཐོས་པས་བསྒོས་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་ནི་སེམས་ཅན་གྱི་ཕུང་པོ་ཡང་དག་པར་ངེས་པ་དང་། ལོག་པར་ངེས་པ་དང་། གཉིས་ཀར་མ་ངེས་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཡང་དག་པར་ལྟ་བས་ཡང་དག་པར་ངེས་པ་དང་། ལོག་པར་ལྟ་བས་ལོག་པར་ངེས་པ་དང་། དེ་གཉིས་ཀ་དང་བྲལ་བས་མ་ངེས་པ་དང་། མཚམས་མྱེད་པ་ལྔ་ལས་གང་ཡང་རུང་བར་ལོག་པར་ངེས་པ་དང་། དབང་པོ་ལྔར་ཡང་དག་པར་ངེས་པ་དང་། དེ་གཉིས་ཀ་དང་བྲལ་བས་མ་ངེས་པ་དང་། ལོག་པ་བརྒྱད་དུ་ལོག་པར་ངེས་པ་དང་། ཡང་དག་པ་ལ་ཡང་དག་པར་ངེས་པ་དང་། ཕྱིས་བྱར་མྱེད་པ་དང་དེ་གཉིས་ཀ་དང་བྲལ་བས་མ་ངེས་པ་དང་། སེར་སྣ་དང་ཕྲག་དོག་དང་། སྙིང་མྱི་བརྩེ་བ་ལ་ཉེ་བར་སྤྱོད་པ་མ་བཏང་བས་ལོག་པར་ངེས་པ་དང་། འཕགས་པ་བླ་ན་མེད་པའི་ལམ་བསྒོམས་པས་ཡང་དག་པར་ངེས་པ་དང་། དེ་གཉིས་ཀ་དང་བྲལ་བས་མ་ངེས་པའི་ཕུང་པོར་བསྟན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཀྱེ་རྒྱལ་བའི་སྲས་དག །དེ་ལྟར་དེ་ལྟ་བུའི་ཡེ་ཤེས་དང་ལྡན་པའི་བྱང་ཆུབ་སེམས་དཔའ་ནི་བྱང་ཆུབ་སེམས་
དཔའི་ས་ལེགས་པའི་བློ་གྲོས་ལ་རབ་ཏུ་གནས་པ་ཞེས་བྱ་སྟེ། བྱང་ཆུབ་སེམས་དཔའི་ས་ལེགས་པའི་བློ་གྲོས་འདི་ལ་གནས་པའི་བྱང་ཆུབ་སེམས་དཔའ་དེ་ནི་སེམས་ཅན་གྱི་སྤྱོད་པ་རྣམ་པ་ཐ་དད་པ་དེ་ལྟ་བུ་དག་ཡོངས་སུ་ཤེས་ནས། དེའི་ཚུལ་བཞིན་དུ་ཐར་པ་ཉེ་བར་བསྒྲུབ་པ་ཉེ་བར་སྒྲུབ་བོ། །དེ་སེམས་ཅན་ཡོངས་སུ་སྨིན་པར་བྱ་བ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སེམས་ཅན་གདུལ་བ་དང་། ཉན་ཐོས་ཀྱི་ཐེག་པ་བསྟན་པ་དང་། རང་སངས་རྒྱས་ཀྱི་ཐེག་པ་བསྟན་པ་དང་། བྱང་ཆུབ་སེམས་དཔའི་ཐེག་པ་བསྟན་པ་དང་། དེ་བཞིན་གཤེགས་པའི་ས་བསྟན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེས་དེ་ལྟར་ཤེས་ནས་སེམས་ཅན་རྣམས་ལ་ཡང་དག་པ་ཇི་ལྟ་བ་བཞིན་དུ་ཆོས་སྟོན་ཏེ། བསམ་པ་རྣམ་པར་དབྱེ་བའི་ཚུལ་ཇི་ལྟ་བ་དང་། བག་ལ་ཉལ་བ་རྣམ་པར་དབྱེ་བའི་ཚུལ་ཇི་ལྟ་བ་དང་། དབང་པོ་རྣམ་པར་དབྱེ་བའི་ཚུལ་ཇི་ལྟ་བ་དང་། མོས་པ་རྣམ་པར་དབྱེ་བའི་ཚུལ་ཇི་ལྟ་བ་དང་། སྤྱོད་ཡུལ་རྣམ་པར་དབྱེ་བའི་ཚུལ་ཇི་ལྟ་བ་བཞིན་དུ་ཡེ་ཤེས་ཉེ་བར་བསྒྲུབ་པ་དང་། སྤྱོད་ཡུལ་ཐམས་ཅད་ཀྱི་རྒྱུས་ཁོང་དུ་ཆུད་པ་དང་། ཁམས་ཐིབས་པོ་ཡོངས་སུ་རྒྱུ་བའི་ཚུལ་ཇི་ལྟ་བ་བཞིན་དུ་རྗེས་སུ་འབྲང་བར་བྱ་བ་དང་། སྐྱེ་བ་དང་། ཉོན་མོངས་པའི་ལས་ཀྱི་བག་ཆགས་རྣམ་པ་གང་དང་གང་ཡོད་པ་ཕྱིར་བཟློག་པར་བྱ་བ་དང་། ཕུང་པོ་རྣམ་པར་དགོད་པའི་ཚུལ་ཇི་ལྟ་བ་བཞིན་དུ་ཚུལ་དང་སྦྱར་བ་དང་། ཐེག་པ་གང་ལ་མོས་པའི་རྣམ་པར་ཐར་པ་ཐོབ་པར་བྱ་བས་ཆོས་སྟོན་ཏེ། དེ་ལྟར་བྱང་ཆུབ་སེམས་དཔའི་ས་ལེགས་པའི་བློ་གྲོས་འདི་ལ་གནས་པའི་བྱང་ཆུབ་སེམས་དཔའ་ནི། ཆོས་སྨྲ་བ་ཆེན་པོའི་གོ་འཕང་ལ་གནས་ཤིང་དེ་བཞིན་གཤེགས་པའི་ཆོས་ཀྱི་མཛོད་ཡོངས་སུ་བསྲུང་བ་ཡིན། དེ་ཆོས་སྨྲ་བའི་ཚུལ་དང་ལྡན་པས་ཡེ་ཤེས་ལ་མཁས་པ་ཚད་མེད་པའི་རྗེས་སུ་སོང་ཞིང་ཐ་དད་པ་ཡང་དག་པར་ཤེས་པ་
བཞིས་མངོན་པར་བསྒྲུབས་པའི་བྱང་ཆུབ་སེམས་དཔའི་ཚིག་གིས་ཆོས་སྟོན་ཏེ། དེ་ལ་བྱང་ཆུབ་སེམས་དཔའ་ཐ་དད་པ་ཡང་དག་པར་ཤེས་པ་བཞི་རྟག་ཏུ་རྒྱུན་མི་ཆད་ཅིང་མ་འདྲེས་པར་ཡང་དག་པར་འབྱུང་ངོ་། །བཞི་གང་ཞེ་ན་འདི་ལྟ་སྟེ། ཆོས་ཐ་དད་པ་ཡང་དག་པར་ཤེས་པ་དང་། དོན་ཐ་དད་པ་ཡང་དག་པར་ཤེས་པ་དང་། ངེས་པའི་ཚིག་ཐ་དད་པ་ཡང་དག་པར་ཤེས་པ་དང་། སྤོབས་པ་ཐ་དད་པ་ཡང་དག་པར་ཤེས་པའོ། །དེ་ཆོས་ཐ་དད་པ་ཡང་དག་པར་ཤེས་པས། ཆོས་རྣམས་ཀྱི་རང་གི་མཚན་ཉིད་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་ཆོས་རྣམས་ཀྱི་རྣམ་པར་དབྱེ་བ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་ཆོས་རྣམས་མ་འདྲེས་པར་བསྟན་པ་རབ་ཏུ་ཤེས་སོ། །སྤོབས་པ་ཐ་དད་པ་ཡང་དག་པར་ཤེས་པས་ཆོས་རྣམས་འཐུན་པར་རྗེས་སུ་མཚམས་སྦྱར་བ་རྒྱུན་མི་འཆད་པ་རབ་ཏུ་ཤེས་སོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས་ཆོས་རྣམས་ཀྱི་རང་བཞིན་མྱེད་པ་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་ཆོས་རྣམས་ཀྱི་འབྱུང་བ་དང་། འཇིག་པ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་ཆོས་ཐམས་ཅད་རྣམ་པར་དགོད་པ་རྒྱུན་ཆད་པ་མེད་པར་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་ཇི་ལྟར་རྣམ་པར་བཀོད་པ་བཞིན་དུ་འཁྲུག་པ་མྱེད་པ་མཐའ་ཡས་པས་ཆོས་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས། ད་ལྟར་བྱུང་བའི་ཆོས་རྣམ་པར་དབྱེ་བ་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་འདས་པ་དང་། མ་འོངས་པའི་ཆོས་རྣམ་པར་དབྱེ་བ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་འདས་པ་དང་། མ་འོངས་པ་དང་། ད་ལྟར་བྱུང་བ་མ་འདྲེས་པར་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་དུས་རེ་རེ་ཞིང་ཆོས་ཀྱི་སྣང་བ་མུ་མྱེད་པར་ཆོས་
སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས། ཆོས་ཀྱི་བྱེ་བྲག་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས། དོན་གྱི་བྱེ་བྲག་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་སྐད་ཇི་ལྟ་བ་བཞིན་དུ་བསྟན་པས་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་བསམ་པ་ཇི་ལྟ་བ་བཞིན་དུ་ཤེས་པས་ཆོས་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས་ཆོས་ཀྱི་རྒྱུས་རྣམ་པར་དབྱེ་བ་མ་འདྲེས་པ་མཁས་པར་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་རྗེས་སུ་འགྲོ་བའི་ཡེ་ཤེས་དེ་བཞིན་ཉིད་དུ་རྣམ་པར་དགོད་པ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་ཀུན་རྫོབ་ཀྱི་རྒྱུས་ཡང་དག་པར་བསྟན་པས་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་དོན་དམ་པའི་རྒྱུ་ལ་མཁས་པས་ཆོས་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས་ཆོས་རྣམས་ཚུལ་གཅིག་ལས་མི་འགྱུར་བ་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་ཕུང་པོ་དང་། ཁམས་དང་སྐྱེ་མཆེད་དང་རྟེན་ཅིང་འབྲེལ་པར་འབྱུང་བ་མཁས་པར་ཁོང་དུ་ཆུད་པར་བྱ་བ་ལ་ཡང་དག་པར་འཇུག་གོ །ངེས་པའི་ཚིག་ཐ་དད་པ་ཡང་དག་པར་ཤེས་པས་འགྲོ་བ་ཐམས་ཅད་མངོན་པར་སྨོན་པའི་སྒྲ་དབྱངས་ཤིན་ཏུ་སྙན་པའི་ཚིག་གིས་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས། ཕྱི་ཕྱིར་ཞིང་དྲན་པ་མཐའ་ཡས་པས་ཆོས་སྟོན་ཏོ། །གཞན་ཡང་ཆོས་
ཐ་དད་པ་ཡང་དག་པར་ཤེས་པས་ཐེག་པ་གཅིག་ལ་ཡང་དག་པར་གཞོལ་བ་ཐ་དད་པ་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་ཐེག་པ་རབ་ཏུ་རྣམ་པར་ཕྱེ་བའི་རྣམ་པ་ཐ་དད་པ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས་ཐེག་པ་ཐམས་ཅད་ཐ་དད་པ་མེད་པར་ཤིན་ཏུ་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས་ཐེག་པ་རེ་རེ་ལ་ཡང་ཆོས་ཀྱི་སྣང་བ་མུ་མྱེད་པར་ཤིན་ཏུ་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས། བྱང་ཆུབ་སེམས་དཔའི་སྤྱོད་པ་དང་། ཡེ་ཤེས་ཀྱི་སྤྱོད་པ་དང་། ཆོས་ཀྱི་སྤྱོད་པ་ཐམས་ཅད་ཡེ་ཤེས་ཀྱི་ཁོང་དུ་ཆུད་པར་བྱ་བ་ལ་རབ་ཏུ་འཇུག་གོ །དོན་ཐ་དད་པ་ཡང་དག་པར་ཤེས་པས། ས་བཅུ་རྣམ་པར་དགོད་ཅིང་། ཤིན་ཏུ་བསྟན་པ་རྣམ་པར་ཕྱེ་བ་ལ་ཡང་དག་པར་འཇུག་གོ །ངེས་པའི་ཚིག་ཐ་དད་པ་ཡང་དག་པར་ཤེས་པས། སའི་ལམ་ཇི་ལྟ་བ་བཞིན་དུ་ཉེ་བར་བསྒྲུབ་པ་ཐ་མྱི་དད་པར་ཡང་དག་པར་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས། ས་རེ་རེ་ཞིང་རྣམ་པ་མུ་མྱེད་པར་ཡང་དག་པར་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས། དེ་བཞིན་གཤེགས་པ་ཐམས་ཅད་མཚན་ཉིད་གཅིག་ཏུ། ཁོང་དུ་ཆུད་པར་བྱ་བ་ལ་རབ་ཏུ་འཇུག་གོ །དོན་ཐ་དད་པ་ཡང་དག་པར་ཤེས་པས་དུས་དང་དངོས་པོ་དང་། མཚན་ཉིད་རྣམ་པར་ཕྱེ་བ་སྣ་ཚོགས་ཁོང་དུ་ཆུད་པར་བྱ་བ་རབ་ཏུ་ཤེས་སོ། །ངེས་པའི་ཚིག་ཐ་དད་པ་ཡང་དག་པར་ཤེས་པས། ཁོང་དུ་ཆུད་པ་རྣམ་པར་ཕྱེ་བ་ཇི་ལྟ་བ་བཞིན་དུ་བསྟན་པས་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས། ཆོས་ཀྱི་ཚིག་རེ་རེ་ལ་ཡང་བསྐལ་པ་མཐའ་ཡས་པར་རྒྱུན་མི་ཆད་པར་ཆོས་སྟོན་ཏོ། །གཞན་ཡང་ཆོས་ཐ་དད་པ་ཡང་དག་པར་ཤེས་པས། དེ་བཞིན་གཤེགས་པ་ཐམས་ཅད་ཀྱི་གསུང་དང་། སྟོབས་དང་། མྱི་འཇིགས་པ་དང་། སངས་རྒྱས་ཀྱི་ཆོས་དང་། བྱམས་པ་ཆེན་པོ་དང་། ཐུགས་རྗེ་ཆེན་པོ་དང་། ཐ་དད་པ་ཡང་དག་པར་མཁྱེན་པའི་ཚུལ་དང་། ཆོས་ཀྱི་འཁོར་ལོ་བསྐོར་བ་དང་། ཐམས་ཅད་མཁྱེན་པའི་ཡེ་ཤེས་རྟོགས་པར་བྱ་བ་རབ་ཏུ་ཤེས་སོ། །དོན་ཐ་དད་པ་ཡང་དག་པར་ཤེས་པས་སེམས་ཅན་གྱི་སྤྱོད་པ་སྟོང་ཕྲག་བརྒྱད་ཅུ་རྩ་བཞི་དང་། བསམ་པ་ཇི་ལྟ་བ་དང་། དབང་པོ་ཇི་ལྟ་བ་དང་མོས་པ་ཇི་ལྟ་བ་བཞིན་དུ་དེ་བཞིན་གཤེགས་པའི་གསུང་རབ་ཏུ་ཤེས་སོ། །ངེས་པའི་
ཚིག་ཐ་དད་པ་ཡང་དག་པར་ཤེས་པས། སེམས་ཅན་ཐམས་ཅད་ཀྱི་སྤྱོད་པ་དང་། མ་འདྲེས་པའི་དེ་བཞིན་གཤེགས་པའི་གསུང་རྗེས་སུ་བསྒྲགས་པས་ཆོས་སྟོན་ཏོ། །སྤོབས་པ་ཐ་དད་པ་ཡང་དག་པར་ཤེས་པས། དེ་བཞིན་གཤེགས་པའི་ཡེ་ཤེས་འོད་གསལ་བ་དང་། སྤྱོད་པའི་དཀྱིལ་འཁོར་ལ་མོས་པས་ཆོས་སྟོན་ཏོ། །ཀྱེ་རྒྱལ་བའི་སྲས་དག །དེ་ལྟར་ཐ་དད་པ་ཡང་དག་པར་ཤེས་པའི་ཡེ་ཤེས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་དེ་བཞིན་གཤེགས་པའི་ཆོས་ཀྱི་མཛོད་ཐོབ་ཅིང་། བྱང་ཆུབ་སེམས་དཔའི་ས་དགུ་པ་ལ་གནས་པ་ཆོས་སྨྲ་བ་ཆེན་པོའི་གོ་འཕང་ལ་གནས་པའི་ཚེ། དོན་དང་ལྡན་པའི་གཟུངས་རབ་ཏུ་ཐོབ་པ་ཡིན། ཆོས་དང་ལྡན་པའི་གཟུངས་རབ་ཏུ་ཐོབ་པ་ཡིན། ཡེ་ཤེས་མངོན་པར་བསྒྲུབ་པ་དང་ལྡན་པའི་གཟུངས་རབ་ཏུ་ཐོབ་པ་ཡིན། སྣང་བ་དང་ལྡན་པའི་གཟུངས་རབ་ཏུ་ཐོབ་པ་ཡིན། བློ་གྲོས་བཟང་པོ་དང་ལྡན་པའི་གཟུངས་དང་། དབྱིག་དང་ལྡན་པའི་གཟུངས་དང་། གྲགས་པ་དང་ལྡན་པའི་གཟུངས་དང་། གཟི་བརྗིད་དང་ལྡན་པའི་གཟུངས་དང་། ཆགས་པ་མེད་པའི་སྒོའི་གཟུངས་དང་། མཐའ་ཡས་པ་དང་ལྡན་པའི་གཟུངས་དང་། དོན་སྣ་ཚོགས་ཀྱི་མཛོད་དང་ལྡན་པའི་གཟུངས་རབ་ཏུ་ཐོབ་པ་ཡིན། དེ་གཟུངས་དེ་དག་ལ་སོགས་པ་གཟུངས་ཀྱི་སྒོ་བརྒྱ་སྟོང་གྲངས་མྱེད་པ་ཕྲག་བཅུ་ཡོངས་སུ་ཚང་བར་འཐོབ་སྟེ། གཟུངས་ཀྱི་སྒོ་བརྒྱ་སྟོང་གྲངས་མྱེད་པ་ཕྲག་བཅུ་དང་ལྡན་པའི་དབྱངས་ཀྱི་ཡན་ལག་ལ་མཁས་པས་དེ་སྙེད་དུ་ཚད་མེད་པ་ཉིད་དང་ལྡན་པའི་སྤོབས་པ་རྣམ་པར་ཕྱེ་བའི་སྒོས་ཆོས་སྟོན་ཏོ། ། དེ་དེ་ལྟར་ཚད་མྱེད་པའི་གཟུངས་ཀྱི་སྒོ་བརྒྱ་སྟོང་གྲངས་མྱེད་པས་ཚད་མྱེད་པའི་སངས་རྒྱས་བཅོམ་ལྡན་འདས་ལས་ཆོས་ཉན་ཅིང་ཐོས་ནས་ཀྱང་བརྗེད་པར་མྱི་བྱེད་དེ། ཇི་སྐད་དུ་ཐོས་པ་ཡང་ཚད་མྱེད་པ་རྣམ་པར་ཕྱེ་བས་ཤིན་ཏུ་སྟོན་ཏོ། །དེ་ནི་དེ་བཞིན་གཤེགས་པ་གཅིག་ལས་གཟུངས་ཀྱི་སྒོ་བརྒྱ་སྟོང་གྲངས་མེད་པ་ཕྲག་བཅུས་ཆོས་ཁོང་དུ་ཆུད་པར་བྱེད་དེ། དེ་བཞིན་གཤེགས་པ་གཅིག་ལས་ཇི་ལྟ་བ་དེ་བཞིན་
དུ་ཡང་དག་པར་རྫོགས་པའི་སངས་རྒྱས་མཐའ་ཡས་པ་ལས་གཟུངས་ཀྱི་སྒོ་བརྒྱ་སྟོང་གྲངས་མེད་པ་ཕྲག་བཅུས་ཆོས་ཁོང་དུ་ཆུད་པར་བྱེད་དོ། །དེ་སྨོན་པ་ཙམ་གྱིས་ཀྱང་ཡང་དག་པར་རྫོགས་པའི་སངས་རྒྱས་རྣམས་ལས་ཆོས་ཀྱི་སྒོ་སྣང་བ་ཆེས་མང་དུ་ཡང་དག་པར་འཛིན་གྱི་ཉན་ཐོས་ཤིན་ཏུ་མང་དུ་ཐོས་པ་དང་ལྡན་པ་ཐོས་པ་འཛིན་པའི་གཟུངས་རབ་ཏུ་ཐོབ་པ་རྣམས་ཀྱིས་ནི་བསྐལ་པ་བརྒྱ་ཕྲག་སྟོང་དུ་ཡང་གཟུང་བའི་བྱིན་གྱི་རླབས་ཀྱིས་དེ་ལྟར་མྱི་ཟིན་ཏོ། །དེ་ལྟར་དེ་ལྟ་བུའི་གཟུངས་ཐོབ་ཅིང་སྤོབས་པ་ཐོབ་པས་ཆོས་ཀྱི་གཏམ་བྱ་བའི་ཕྱིར་འདུག་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། ཆོས་ཀྱི་སྟན་ལ་འདུག་ཅིང་སེམས་ཅན་རྣམས་ལ་བསམ་པ་ཇི་ལྟ་བ་བཞིན་དུ་རྣམ་པར་ཕྱེ་ཞིང་ཆོས་སྟོན་ཏོ། །དེའི་ཆོས་ཀྱི་སྟན་ཡང་དེ་བཞིན་གཤེགས་པ་དག་དང་། བྱང་ཆུབ་སེམས་དཔའ་དབང་བསྐུར་བའི་ས་ཐོབ་པ་མ་གཏོགས་པར་ཐམས་ཅད་ལས་འཕགས་ཤིང་སྣང་བ་ཚད་མྱེད་པ་དང་ལྡན་པ་ཡིན། དེ་འདོད་ན་ཆོས་ཀྱི་སྟན་ལ་འདུག་ཅིང་དབྱངས་གཅིག་གིས་འཁོར་ཐམས་ཅད་དུ་སྒྲ་སྐད་སྣ་ཚོགས་རྣམ་པ་ཐ་དད་པས་ཡང་དག་པར་གོ་བར་བྱེད་དོ། །འདོད་ན་སྒྲ་སྐད་སྣ་ཚོགས་དང་། དབྱངས་ཀྱི་ཡན་ལག་ཐ་དད་པ་རྣམ་པར་ཕྱེ་བས་འཁོར་ཐམས་ཅད་མངོན་པར་གོ་བར་བྱེད་དོ། །འདོད་ན་འོད་གཟེར་གྱི་སྒོ་ཉེ་བར་བསྒྲུབ་པས་ཆོས་ཀྱི་སྒོ་ཤིན་ཏུ་བརྗོད་དོ། །འདོད་ན་བ་སྤུའི་བུ་ག་ཐམས་ཅད་ནས་དབྱངས་རྣམ་པར་ཕྱེ་བ་ཤིན་ཏུ་བརྗོད་དོ། །འདོད་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གཟུགས་སུ་སྣང་བ་ཇི་སྙེད་ཡོད་པའི་གཟུགས་སུ་སྣང་བ་དེ་དག་ལས་ཆོས་ཀྱི་སྒྲ་འབྱུང་བར་བྱེད་དོ། །འདོད་ན་དབྱངས་ཀྱི་ཡན་ལག་གཅིག་གི་སྒྲས་ཆོས་ཀྱི་དབྱིངས་ཐམས་ཅད་ཁོང་དུ་ཆུད་པར་བྱེད་དོ། །འདོད་ན་སྒྲ་དང་དབྱངས་ཐམས་ཅད་ཆོས་ཀྱི་སྒྲར་བྱིན་གྱིས་རློབ་བོ། །འདོད་ན་འཇིག་རྟེན་གྱི་ཁམས་ཐམས་ཅད་ན་ཡོད་པའི་གླུ་དང་རོལ་མོ་བརྡུང་བ་དང་དཀྲོལ་བའི་སྒྲ་ཐམས་ཅད་ལས་ཆོས་ཀྱི་སྒྲ་འབྱུང་བར་བྱེད་དོ། །འདོད་ན་ཡི་གེ་གཅིག་གི་སྒྲ་ལས་ཆོས་ཐམས་ཅད་ཀྱི་ཚིག་རབ་ཏུ་ཕྱེ་བའི་
སྒྲ་འབྱུང་བར་བྱེད་དོ། །འདོད་ན་འཇིག་རྟེན་གྱི་ཁམས་མཐའ་ཡས་ཤིང་བརྗོད་དུ་མྱེད་པའི་ས་དང་ཆུ་དང་མྱེ་དང་རླུང་གི་ཕུང་པོ་རྡུལ་ཤིན་ཏུ་ཕྲ་བ་རྣམ་པར་ཕྱེ་བ་རྡུལ་ཤིན་ཏུ་ཕྲ་བ་རེ་རེ་ལས་ཆོས་ཀྱི་སྒོ་བརྗོད་དུ་མྱེད་པ་འབྱུང་བར་བྱེད་དོ། །གལ་ཏེ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་འོངས་ཏེ། སྐད་ཅིག་ཡུད་ཙམ་ཐང་ཅིག་ཏུ་དྲི་བ་ཡོངས་སུ་འདྲི་ཞིང་དེ་དག་རེ་རེས་ཀྱང་སྒྲ་རྣམ་པ་ཐ་དད་པ་ཚད་མེད་པས་ཡོངས་སུ་དྲིས་པར་གྱུར་ལ། གཅིག་གིས་གང་དྲིས་པ་དེ་གཞན་མྱི་འདྲི་བར་གྱུར་ནའང་དེ་ལ་བྱང་ཆུབ་སེམས་དཔའ་དེས་སེམས་ཅན་དེ་དག་ཐམས་ཅད་ཀྱི་སྒྲ་ཚིག་སོ་སོ་དང་། ཡི་གེའི་འབྲུ་ཡན་ཅད་མ་ལུས་པར་བཟུང་སྟེ། བཟུང་ནས་ཀྱང་ཚིག་གཅིག་མངོན་པར་བརྗོད་པས་སེམས་ཅན་དེ་དག་ཐམས་ཅད་ཀྱི་སེམས་དང་བསམ་པ་ཚིམ་པར་བྱེད་པ་ནས། འཇིག་རྟེན་གྱི་ཁམས་བརྗོད་དུ་མེད་པའི་བར་དུ་གཏོགས་པའི་སེམས་ཅན་ཐམས་ཅད་ཀྱིས་སྐད་ཅིག་ཐང་ཅིག་ཡུད་ཙམ་དུ་དྲི་བ་ཡོངས་སུ་དྲིས་ཏེ། དེ་དག་རེ་རེ་ཞིང་ཡང་སྒྲ་རྣམ་པ་ཐ་དད་པ་ཚད་མེད་པས་དྲི་བར་གྱུར་ལ། གཅིག་གིས་ཅི་དྲིས་པ་དེ་གཞན་མྱི་འདྲི་བར་གྱུར་ནའང་དེ་དག་ཐམས་ཅད་བྱང་ཆུབ་སེམས་དཔའ་དེས་སྐད་ཅིག་ཡུད་ཙམ་ཐང་ཅིག་ཏུ་མ་ལུས་པར་བཟུང་སྟེ། སྒྲ་གཅིག་བརྗོད་པས་དེ་དག་ཐམས་ཅད་ཁོང་དུ་ཆུད་པར་བྱེད་དོ། །དེ་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མྱེད་པའི་བར་དག་ཀྱང་རྒྱས་པར་བཀང་ཞིང་སེམས་ཅན་རྣམས་ལ་བསམ་པ་དང་། དབང་པོ་དང་མོས་པ་ཇི་ལྟ་བ་བཞིན་དུ་ཆོས་སྟོན་ཏོ། །ཆོས་ཀྱི་གཏམ་ལ་ཞུགས་པའི་ཚེ་ཡང་དེ་བཞིན་གཤེགས་པའི་བྱིན་གྱི་རླབས་ལེན་ཅིང་། སངས་རྒྱས་ཀྱི་མཛད་པ་ཐམས་ཅད་ཀྱིས་སེམས་ཅན་ཐམས་ཅད་ལ་ཉེ་བར་གནས་པ་ཡིན་ཡང་། དེ་ལྟ་བུའི་ཡེ་ཤེས་སྣང་བས་འཛིན་པ་ཡོངས་སུ་རྩོམ་སྟེ། གལ་ཏེ་སྐྲའི་རྩེ་མོའི་གོ་གཅིག་ལ་འཇིག་རྟེན་གྱི་ཁམས་བརྗོད་དུ་མེད་པའི་རྡུལ་ཤིན་ཏུ་ཕྲ་བ་ཇི་སྙེད་པ་དེ་སྙེད་ཀྱི་དེ་བཞིན་གཤེགས་པ་བཞུགས་ལ་དེ་སྙེད་དུ་ཚད་མྱེད་
པར་གྱུར་པའི་འཁོར་གྱི་དཀྱིལ་འཁོར་དུ་ཆོས་བསྟན་ཏེ། དེ་བཞིན་གཤེགས་པ་དེ་དག་རེ་རེས་ཀྱང་དེ་སྙེད་ཀྱི་སེམས་ཅན་ཚད་མེད་པ་ལ་ཆོས་རྣམ་པ་ཐ་དད་པར་ཤིན་ཏུ་བསྟན་ཏེ། སེམས་ཅན་གྱི་བསམ་པའི་རྒྱུད་རེ་རེ་ལའང་དེ་སྙེད་དུ་ཆོས་ཉེ་བར་བསྒྲུབ་པ་ཚད་མྱེད་པ་ཉེ་བར་བསྒྲུབ་པར་གྱུར་ལ། དེ་བཞིན་གཤེགས་པ་གཅིག་གི་ཇི་ལྟ་བ་བཞིན་དུ་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཐམས་ཅད་དུ་སྟེ། སྐྲའི་རྩེ་མོའི་གོ་གཅིག་ལ་ཇི་ལྟ་བ་དེ་བཞིན་དུ་ཆོས་ཀྱི་དབྱིངས་ཐམས་ཅད་དུ་དེ་ལྟར་གྱུར་ཀྱང་དེ་དག་ཐམས་ཅད་ཟིན་པར་འགྱུར་ན། འཇིག་རྟེན་གྱི་ཁམས་དེ་ཙམ་དག་གི་སེམས་ཅན་རྣམས་ཀྱི་ལྟ་སྨོས་ཀྱང་ཅི་དགོས། དེ་དེ་ལྟར་བྱང་ཆུབ་སེམས་དཔའི་ས་ལེགས་པའི་བློ་གྲོས་འདི་ཐོབ་པའི་བྱང་ཆུབ་སེམས་དཔའ་ནི་ཉིན་མཚན་དུ་ཡིད་ལ་བསམ་པ་གཞན་མེད་པར་སངས་རྒྱས་ཀྱི་སྤྱོད་ཡུལ་ལ་ཞུགས་པས་དེ་བཞིན་གཤེགས་པ་དང་འགྲོགས་པ་རབ་ཏུ་ཐོབ་ཅིང་། བྱང་ཆུབ་སེམས་དཔའི་རྣམ་པར་ཐར་པ་ཟབ་མོ་རབ་ཏུ་ཐོབ་པ་ཡིན། དེ་དེ་ལྟ་བུའི་ཡེ་ཤེས་དང་ལྡན་ཞིང་མཉམ་པར་བཞག་ཀྱང་དེ་བཞིན་གཤེགས་པ་ལྟ་བ་ཡོངས་སུ་མྱི་སྤོང་སྟེ། བསྐལ་པ་རེ་རེ་ཞིང་ཡང་སངས་རྒྱས་དུ་མ་ནས། སངས་རྒྱས་བརྒྱ་སྟོང་བྱེ་བ་ཁྲག་ཁྲིག་ལྟ་ཞིང་མཐོང་ནས་ཀྱང་རིམ་གྲོ་དང་། བཀུར་སྟི་དང་། བསྟི་སྟང་དང་། མཆོད་པ་བྱེད་དེ། སངས་རྒྱས་མཐོང་ཞིང་མཆོད་པ་བྱ་བ་རྒྱ་ཆེན་པོ་ཡོངས་སུ་མི་གཏོང་ངོ་། །དེ་བཞིན་གཤེགས་པ་དེ་དག་ལ་ཞུ་བ་ཡོངས་སུ་ཞུ་བ་བྱེད་དེ། ཆོས་ཀྱི་གཟུངས་རབ་ཏུ་བསྟན་པ་ལས་ཤིན་ཏུ་འབྱུང་བ་ཡིན། དེའི་དགེ་བའི་རྩ་བ་དེ་དག་སྔོན་བས་ཀྱང་ཤིན་ཏུ་བྱང་ཞིང་མྱི་འཕྲོགས་པར་འགྱུར་ཏེ། ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན། གསེར་གྱི་ས་ལེ་སྦྲམ་དེ་ཉིད་མགར་བ་མཁས་པས་རྒྱན་ཏུ་བྱས་ཏེ། ཡོངས་སུ་ཟིན་པ་འཁོར་ལོས་སྒྱུར་བའི་རྒྱལ་པོའི་ཡན་ལག་གི་དམ་པ་མགོའམ་མགུལ་དུ་བཏགས་ན། ཁམས་ཀྱི་རྒྱལ་པོ་ཐམས་ཅད་དང་། གླིང་བཞི་པའི་སེམས་ཅན་ཐམས་ཅད་ཀྱི་རྒྱན་གྱི་རྣམ་པས་མྱི་ཐུབ་ཅིང་
མྱི་འཕྲོགས་པ་ཡིན། ཀྱེ་རྒྱལ་བའི་སྲས་དག་དེ་བཞིན་དུ་བྱང་ཆུབ་སེམས་དཔའི་ས་ལེགས་པའི་བློ་གྲོས་འདི་ལ་གནས་པའི་བྱང་ཆུབ་སེམས་དཔའི་དགེ་བའི་རྩ་བ་དེ་དག་ཀྱང་ཉན་ཐོས་དང་། རང་སངས་རྒྱས་དང་། ས་འོག་མ་ལ་གནས་པའི་བྱང་ཆུབ་སེམས་དཔའ་ཐམས་ཅད་ཀྱིས་མྱི་འཕྲོགས་ཤིང་མི་ཐུབ་པ་ཡིན། དེའི་དགེ་བའི་རྩ་བ་སྣང་བ་དེས་ནི་སེམས་ཅན་རྣམས་ཀྱི་ཉོན་མོངས་པ་དང་། སེམས་ཀྱི་ཐིབས་པོ་སྣང་བར་བྱས་ཏེ། དེ་ཉིད་ནས་ཕྱིར་ལྡོག་གོ །ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན། སྟོང་གཉིས་ལ་དབང་བའི་ཚངས་པ་ཆེན་པོ་ནི་སྟོང་གཉིས་ཀྱི་འཇིག་རྟེན་གྱི་ཁམས་ཐམས་ཅད་ཀྱི་ཐིབས་པོ་དམའ་བར་གཞོལ་བ་ཡོངས་སུ་སྣང་བར་བྱེད་དོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་ལེགས་པའི་བློ་གྲོས་འདི་ལ་གནས་པའི་བྱང་ཆུབ་སེམས་དཔའི་དགེ་བའི་རྩ་བའི་སྣང་བ་དེ་ཡང་སེམས་ཅན་རྣམས་ཀྱི་ཉོན་མོངས་པ་དང་། སེམས་ཀྱི་ཐིབས་པོ་སྣང་བར་བྱས་ཏེ། དེ་ཉིད་ནས་ཕྱིར་ལྡོག་གོ །དེའི་ཕ་རོལ་ཏུ་ཕྱིན་པ་བཅུ་ལས་སྟོབས་ཀྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ལྷག་མ་རྣམས་ཀྱང་ཅི་ཚུལ་ཅི་ནུས་སུ་ཡང་དག་པར་མི་བསྒྲུབ་པ་མ་ཡིན་ནོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་ས་ལེགས་པའི་བློ་གྲོས་ཤེས་བྱ་བ་སྟེ། བྱང་ཆུབ་སེམས་དཔའི་ས་དགུ་པ་མདོར་བསྟན་པའོ། །རྒྱ་ཆེར་ནི་བསྐལ་པ་མུ་མེད་པས་བསྟན་པའི་མཐར་ཐུག་པར་ཤེས་པར་བྱའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་ཚངས་པ་ཆེན་པོར་གྱུར་ཏེ། སྟོབས་དང་མཐུ་ཆེན་པོ་ཐོབ་པ་སྟོང་གཉིས་ལ་དབང་ཞིང་ཟིལ་གྱིས་ནོན་པ། གཞན་གྱི་ཟིལ་གྱིས་མྱི་ནོན་པ། མཐུན་པའི་དོན་མཐོང་བ་དབང་ཤིན་ཏུ་ཐོབ་པ། སེམས་ཅན་རྣམས་ལ་ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཐམས་ཅད་སྟོན་པ་ལ་མཁས་ཤིང་མཐུ་ཡོད་པ་སྟེ། སེམས་ཅན་གྱི་བསམ་པ་ཡོངས་སུ་དྲིས་པ་བསྟན་པས་མྱི་འཕྲོགས་པ་ཡིན། དེ་སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་
ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མྱེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས། ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང་། ཆོས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་། ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་། མྱི་འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་། མྱི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་སངས་རྒྱས་ཀྱི་ཞིང་གྲངས་མྱེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་རབ་ཏུ་ཐོབ་ཅིང་དེ་དག་ལ་སྙོམས་པར་འཇུག་པ་དང་། སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་མཐོང་བ་དང་། དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གྲངས་མྱེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་སྐྱོད་པ་དང་། སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་དུ་འགྲོ་བ་དང་། འཇིག་རྟེན་གྱི་ཁམས་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་སྣང་བར་བྱ་བ་དང་། སེམས་ཅན་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྨྱིན་པར་བྱ་བ་དང་། བསྐལ་པ་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་དུ་གནས་པར་བྱ་བ་དང་། སྔོན་གྱི་མཐའ་དང་ཕྱི་མའི་མཐའི་བསྐལ་པ་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་ལ་རབ་ཏུ་འཇུག་པ་དང་། ཆོས་ཀྱི་སྒོ་སངས་
རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་རྣམ་པར་འབྱེད་པ་དང་། ལུས་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་ཡོངས་སུ་བསྟན་པ་དང་། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་ཡང་དག་པར་བསྟན་པའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཅད་བྱང་ཆུབ་སེམས་དཔའི་སྨོན་ལམ་གྱི་མཐུ་ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ་འོད་དམ་རྫུ་འཕྲུལ་ལམ། མྱིག་གམ་སྤྱོད་ཡུལ་ལམ། དབྱངས་སམ་སྤྱོད་པའམ། རྒྱན་ཏམ་བྱིན་གྱི་རླབས་སམ། མོས་པའམ་མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཀྱང་བགྲང་བར་དཀའོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་སའི་དོན་འདི་ཉིད་ཡང་བརྟག་པར་བྱ་བ་དང་བསྟན་པར་བྱ་བའི་ཕྱིར། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་དག་ཚད་མེད་སྟོབས་ཀྱི་བློ་ཡིས་རྣམ་དཔྱོད་ཅིང་། །ཡེ་ཤེས་ཕྲ་བའི་དམ་པ་འགྲོ་བས་ཤེས་དཀའ་བ། །དེ་བཞིན་གཤེགས་པ་གསང་བའི་གནས་ལ་ཡང་དག་འཇུག །འགྲོ་བའི་དོན་བྱེད་དེ་དག་ས་དགུ་ཡོངས་སུ་གནོན། །དེ་དག་གཟུངས་མཆོག་ཏིང་འཛིན་ཆེ་བ་ཉིད་མཆོག་དང་། །མངོན་ཤེས་ཡངས་དང་དེ་བཞིན་ཞིང་འཇུག་མཐའ་ཡས་དང་། །སྟོབས་དང་རྟོགས་པའི་ཡེ་ཤེས་རྒྱལ་བའི་བརྟན་གནས་དང་། །སྨོན་ལམ་སྙིང་རྗེའི་བསམ་པས་མཁས་པ་དགུ་ལ་འཇུག །ས་དགུ་ལྡན་པ་དེ་དག་རྒྱལ་བའི་མཛོད་འཛིན་ཅིང་། །དགེ་བའི་ཆོས་དང་མྱི་དགེ་ལུང་དུ་མ་བསྟན་དང་། །ཟག་དང་བཅས་དང་འཇིག་རྟེན་པ་དང་འཕགས་པ་དང་། །བསམ་དུ་རུང་དང་བསམ་དུ་མི་རུང་མཁས་པས་ཤེས། །ངེས་པའི་ཆོས་དང་མ་ངེས་ཆོས་ཀྱང་རབ་ཏུ་རྟོགས། །ཐེག་གསུམ་ཕུན་སུམ་ཚོགས་པའི་བྱ་བ་ཡོངས་སུ་འཇལ། །
འདུས་བྱས་རྣམ་པར་ཕྱེ་དང་གྲངས་དང་རྒྱུ་བ་དག །འཇིག་རྟེན་ཇི་ལྟར་མངོན་བྱེད་དེ་ལ་རབ་ཏུ་འཇུག །དེ་དག་དེ་འདྲའི་ཤེས་ལྡན་བློ་མཆོག་ཕྲ་ལྡན་པ། །སེམས་ཅན་སེམས་ཀྱི་ཐིབས་པོ་ཡོངས་སུ་རྟོག་པ་བྱེད། །རྣམ་ཤེས་སྣ་ཚོགས་མྱུར་དུ་འགྱུར་ཞིང་ལྡོག་པ་དང་། ། རྣམ་ཤེས་མཐའ་ཡས་འབྱུང་ལ་རྟག་ཏུ་མཁས་པ་འཇུག །ཉོན་མོངས་མཐའ་ཡས་སྦྱོར་དང་གྲོགས་སུ་འགྱུར་བ་དང་། །ཀུན་ནས་འཁོར་དང་བག་ཉལ་འགྲོ་རྒྱུད་མཚམས་སྦྱོར་དང་། །ལས་རྣམས་སྣ་ཚོགས་རྣམ་པར་ཕྱེ་ལའང་དེ་བཞིན་འཇུག །རྒྱུ་དང་འགོག་དང་འབྲས་བུ་འཇིག་ལའང་ཡང་དག་འཇུག །དབང་པོ་རྣོ་དང་ཐ་མ་འབྲིང་དང་ཡངས་པ་དང་། །ཐ་དད་སྔོན་དང་ཕྱི་མའི་མཐའ་ལའང་ཡང་དག་འཇུག །མོས་པ་དགེ་དང་མི་དགེ་སྣ་ཚོགས་དུ་མ་དག །སྟོང་ཕྲག་བརྒྱད་ཅུ་རྩ་བཞི་ཀུན་ལ་ཡང་དག་འཇུག །ཁམས་ཀྱི་རྣམ་པ་ཉོན་མོངས་ལྟ་བ་སྲིད་པ་རྣམས། །ཐིབས་པོ་གྱུར་པ་སྔ་ཕྱི་མེད་ཅིང་འཆད་མེད་དང་། །བག་ཉལ་བསམ་པ་ལྷན་ཅིག་སྐྱེས་པའི་རྒྱུད་རྣམས་ཀྱི། །སེམས་རྣམས་ཀུན་རྒྱུ་འབྲེལ་ཅིང་རྒྱུན་ཆད་མྱི་འགྱུར་བ། །བསམ་པ་བག་ཉལ་རྒྱུད་ཡོད་དངོས་པོ་མ་ཡིན་ཏེ། །ཡུལ་ལ་མི་གནས་བསམ་པ་ཡོངས་སུ་འབྲལ་མི་འགྱུར། །ཤེས་པར་དཀའ་བའི་བསམ་གཏན་ཡུལ་ལས་ཕྱིར་མྱི་ལྡོག །རྡོ་རྗེ་ལྟ་བུའི་ལམ་གྱིས་ཆོད་འགྱུར་གཞན་གྱིས་མྱིན། །རྒྱུད་དྲུག་སྐྱེ་བ་རྣམ་པར་ཕྱེ་ལ་རབ་ཏུ་འཇུག །སྲེད་རླན་མ་རིག་མུན་པ་དེ་བཞིན་ལས་ཀྱི་ཞིང་། །རྣམ་ཤེས་ས་བོན་བཅས་འབྱུང་མྱུ་གུ་མྱིང་དང་གཟུགས། །ཁམས་གསུམ་སྔོན་མཐའ་མེད་པར་དེ་དག་རབ་ཏུ་འཇུག །དེ་དག་བག་ཆགས་ཚུལ་དང་ཉོན་མོངས་ལས་དང་སེམས། །འདོད་ཆགས་བྲལ་བས་ལམ་གྱི་རྒྱུད་དུ་འབྱུང་བ་མྱིན། །སེམས་ཅན་ཕུང་པོ་གསུམ་དུ་ངེས་པ་ཡང་དག་ཤེས། །ལྟ་བར་བྱིང་བ་ཤེས་པའི་ལམ་དང་དེ་དག་ལྡན། །དེ་འདྲའི་ཤེས་ལྡན་ས་མཆོག་འདི་ལ་གནས་པ་སྟེ། ། སེམས་ཅན་བསམ་པ་མོས་པ་དབང་པོའི་ཚུལ་བཞིན་དུ། །ཆོས་རྣམས་རྣམ་པར་ཕྱེ་ཞིང་ཤིན་ཏུ་
སྟོན་པ་བྱེད། །ཐ་དད་ཡང་དག་དོན་ཤེས་ངེས་ཚིག་སྤོབས་པ་ཡིས། །དེ་དག་ཆོས་སྨྲའི་ཚུལ་ལ་གནས་པ་རབ་ཏུ་ཐོབ། །སེང་གེ་ཁྱུ་མཆོག་དཔེ་འདྲ་རི་ཡི་རྒྱལ་པོ་འདྲ། །བདུད་རྩི་སྤྲིན་ཆེན་ཞིམ་པའི་ཆར་ཡང་རབ་ཏུ་འབེབས། །ཀླུ་ཡི་རྒྱལ་པོས་རྒྱ་མཚོ་རྒྱས་པར་བྱེད་པ་བཞིན། །དོན་གྱི་དོན་ཤེས་དེ་བཞིན་ཆོས་ཉིད་རབ་ཏུ་ཤེས། །ངེས་ཚིག་རྗེས་སུ་སོང་ཞིང་སྤོབས་པ་རབ་ཏུ་ཐོབ། །དེ་དག་གྲངས་མྱེད་སྟོང་ཕྲག་བཅུ་ཡི་གཟུངས་ཐོབ་པས། །ཆོས་རྣམས་འཛིན་པ་རྒྱ་མཚོ་སྤྲིན་ཆེན་ཆར་འཛིན་བཞིན། །དེ་དག་དེ་འདྲའི་ཏིང་འཛིན་གཟུངས་གསལ་ཐོབ་གྱུར་པས། །སྐད་ཅིག་གཅིག་གིས་སངས་རྒྱས་མང་པོ་སྟོང་ཡང་མཐོང་། །རིན་ཆེན་ཆོས་རྣམས་ཐོབ་ནས་ཡང་དུ་སྟོན་བྱེད་དེ། །ཚིག་གི་དཀྱིལ་འཁོར་རྣམ་དག་དབྱངས་ཀྱི་ཡན་ལག་ལྡན། །འདོད་ན་སྟོང་གསུམ་འཇིག་རྟེན་ཁམས་སུ་གཏོགས་པ་ཡིས། །སེམས་ཅན་བསམ་སེམས་སྣ་ཚོགས་ཚུལ་བཞིན་སྨིན་བྱེད་ཅིང་། །ཐམས་ཅད་བསམ་པ་དབང་པོ་ཇི་བཞིན་ཚིམ་པར་བྱེད། །གླིང་བཞི་རྒྱ་མཚོའི་སྤྲིན་བཞིན་ཡང་དག་རབ་ཏུ་འཇུག །དེ་བས་གོང་དུ་ལེགས་ལྡན་བརྩོན་འགྲུས་རབ་ཐོབ་པ། །སྐྲ་རྩེའི་གོ་གཅིག་བསམ་གྱིས་མི་ཁྱབ་སེམས་པ་བྱེད། །སེམས་ཅན་སྣ་ཚོགས་མང་ལ་བདེ་གཤེགས་ཆོས་སྟོན་པ། །ཐོས་ནས་ས་བོན་ཀུན་འཛིན་ས་བཞིན་ཡོངས་སུ་འཛིན། །ཕྱོགས་རྣམས་བཅུ་པོའི་སེམས་ཅན་མང་པོ་ཇི་སྙེད་པ། །དེ་དག་ཐམས་ཅད་འཁོར་གཅིག་འདུས་པར་འཁོད་གྱུར་ཀྱང་། །དེ་དག་བསམ་པ་སྐད་ཅིག་གཅིག་གིས་བསམ་བྱས་ཤིང་། །སྒྲ་སྐད་གཅིག་གིས་དེ་དག་ཐམས་ཅད་ཚིམ་པར་བྱེད། །འདི་ལ་གནས་པ་ཆོས་རྒྱལ་ལྷ་མྱི་མཆོག་ཏུ་འགྱུར། །རྒྱལ་བའི་སྲས་པོ་ཆོས་ཀྱིས་ཡོངས་སུ་སྐྱོང་བ་ཡིན། །ཉིན་མཚན་ཀུན་ཏུ་རྒྱལ་བ་རྣམས་དང་རྟག་པར་འགྲོགས། །ཟབ་ཡངས་ཡེ་ཤེས་རྣམ་པར་ཐར་པ་ལྡན་པར་གནས། །དེ་དག་དུ་ཡང་སངས་རྒྱས་ཁྲག་ཁྲིག་བསྙེན་བཀུར་བྱེད། །
འཁོར་ལོས་སྒྱུར་བའི་རྒྱན་བཟང་ཡོངས་སུ་བྱང་བ་བཞིན། །དེ་ཡི་འོད་ཀྱང་ཉོན་མོངས་ཐིབས་པོ་སྣང་བར་བྱེད། །ཚངས་པའི་འོད་ཀྱིས་སྟོང་གཉིས་འཇིག་རྟེན་ཇི་བཞིན་ནོ། །འདི་ལ་གནས་པ་ལེགས་ལྡན་ཚངས་ཆེན་འཇིག་རྟེན་དུ། །སྐྱེ་འགྱུར་ཐེག་གསུམ་སྟོན་ལ་མཁས་ཤིང་མཐུ་ཡོད་པ། །འགྲོ་བ་ཀུན་ལ་ཕན་ཕྱིར་ཅི་རྩོམ་གང་ཡང་རུང་། །ཡོན་ཏན་ཤེས་ལྡན་བདེ་གཤེགས་ཡེ་ཤེས་ལྡན་པར་སྔོ། །གྲངས་མེད་ཞིང་དུ་གཏོགས་པ་རྡུལ་ཕྲན་དུ་ཡོད་པ། །དེ་སྙེད་ཏིང་འཛིན་སྐད་ཅིག་གཅིག་ཏུ་བརྟན་པས་འཐོབ། །ཕྱོགས་རྣམས་ཀུན་གྱི་རྒྱལ་བ་མཐོང་ཞིང་གསུང་ཡང་ཉན། །ཡན་ཅད་སྨོན་ལམ་ལྡན་པ་ཚད་མེད་རྣམ་པར་འཕྲུལ། །འདི་ནི་ས་རབ་དགུ་པ་སྟེ། །ཡེ་ཤེས་ཆེན་པོ་རྣམ་པར་སྤྱོད། །ཟབ་ཅིང་བལྟ་དཀའ་ཤིན་ཏུ་ཕྲ། །རྒྱལ་བའི་སྲས་ཀྱིས་བསྟན་པ་ཡིན། །ལེགས་པའི་བློ་གྲོས་ཤེས་བྱ་བ་སྟེ། བྱང་ཆུབ་སེམས་དཔའི་ས་དགུ་པའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་པའོ། །སྤྱོད་པ་བླ་ན་མེད་པ་འདི་ཐོས་ནས། །གཙང་གནས་ལྷ་རྣམས་བྱེ་བ་རབ་ཏུ་དགའ། །དབང་པོ་ཚིམ་པར་བར་སྣང་མཁའ་ལ་གནས། །བདེ་བར་གཤེགས་ལ་རྗེ་སར་མཆོད་པ་བྱེད། ། བྱང་ཆུབ་སེམས་དཔའ་བྱེ་བ་བསམ་ཡས་པ། །བར་སྣང་མཁའ་གནས་རབ་ཏུ་དགར་གྱུར་ཅིང་། །སྤོས་སྤྲིན་ཚད་མེད་ཡིད་དུ་འོང་བ་དག །འགྲོ་བའི་ཉོན་མོངས་སེལ་བ་དྲི་ཞིམ་བདུག་པ་བྱེད། །ལྷ་ཡི་དབང་པོ་དབང་བསྒྱུར་རབ་དགའ་ཞིང་། །བར་སྣང་གནས་ལས་ལྷ་འཁོར་ཁྲག་ཁྲིག་དང་། །རིམ་གྲོ་བཅས་པར་གོས་རྣམས་འདོར་བར་བྱེད། །ཡིད་འོང་གོས་བརྒྱ་ཡོངས་སུ་བསྐོར་བ་བྱས། །ལྷ་ཡི་བུ་མོ་མང་པོ་ཤིན་ཏུ་དགའ། །བདེ་བར་གཤེགས་ལ་རྗེས་སུ་མཆོད་པ་བྱེད། །རོལ་མོ་བརྡུང་བ་བྱེ་བ་ཁྲག་ཁྲིག་བྱེད། །འདི་འདྲའི་སྒྲ་དབྱངས་ཀུན་ལས་བྱུང་བར་གྱུར། །ཞིང་མཆོག་
གཅིག་ན་བདེ་བར་གཤེགས་པ་བཞུགས། །ཞིང་རྣམས་ཀུན་ཏུ་སྐུ་གཟུགས་རབ་ཏུ་བསྟན། །སྐུ་གཟུགས་ཁྲག་ཁྲིག་སྣ་ཚོགས་ཡིད་དུ་འོང་། །ཆོས་དབྱིངས་རྒྱ་ཆེན་ཡོངས་སུ་རྒྱས་པར་གང་། །སྤུ་གཅིག་རྩེ་ནས་བདེ་གཤེགས་འོད་བཀྱེ་བ། །འགྲོ་བའི་ཉོན་མོངས་ཡོངས་སུ་ཞི་བར་འཕྲོ། །ཞིང་གི་རྡུལ་ཁམས་ཟད་པར་ནུས་འགྱུར་གྱི། །དེ་དག་བགྲང་བས་ཤེས་པར་མྱི་ནུས་སོ། །ལ་ལས་སངས་རྒྱས་མཚན་རབ་མངའ་བར་མཐོང་། །འཁོར་ལོས་སྒྱུར་བའི་དམ་པར་ལ་ལས་མཐོང་། །ཞིང་རྣམས་ལ་ལར་སྤྱོད་པ་མཆོག་མཛད་ཅིང་། །དག་ཅིང་ཞི་བར་རྐང་གཉིས་དམ་པ་མཐོང་། །དགའ་ལྡན་གནས་ན་མགོན་པོ་བཞུགས་པ་དང་། །འཕོ་དང་གཤེགས་པར་དེ་བཞིན་རབ་ཏུ་སྣང་། །ཞིང་རྣམས་བྱེ་བར་ཡུམ་གྱི་སྐུར་བཞུགས་དང་། །ཞིང་རྣམས་ལ་ལར་སྐྱེ་བ་དེ་བཞིན་སྣང་། །འགྲོ་བའི་དོན་དུ་མགོན་པོ་འབྱུང་མཛད་དང་། །བྱང་ཆུབ་དམ་པ་མཆོག་ཏུ་འཚང་རྒྱ་ཞིང་། །ཆོས་ཀྱི་འཁོར་ལོ་མྱ་ངན་འདའ་བ་དག །ཞིང་མང་ཁྲག་ཁྲིག་ཀུན་ན་དེ་བཞིན་སྣང་། །སྒྱུ་མའི་མཁན་པོ་མཁས་པར་ལོབས་གྱུར་པ། །ཇི་ལྟར་འཚོ་ཕྱིར་གཟུགས་མང་སྟོན་པ་བཞིན། །དེ་བཞིན་སྟོན་པ་ཡེ་ཤེས་མཆོག་མཁྱེན་པ། །སྐུ་གཟུགས་ཀུན་ཏུ་འགྲོ་བ་རྣམས་ལ་སྟོན། །སྟོང་པ་ཞི་བ་རང་བཞིན་མཚན་ཉིད་མྱེད། །ཆོས་ཉིད་བར་སྣང་མཁའ་དང་མཉམ་པར་ཡང་། །སངས་རྒྱས་སྟོན་པ་དོན་དམ་དེ་ཉིད་དུ། །སངས་རྒྱས་སྤྱོད་ཡུལ་མཆོག་གིས་ཡང་དག་བསྟན། །བདེ་གཤེགས་སྤྱོད་ཡུལ་རང་བཞིན་ཅི་འདྲ་བ། །སེམས་ཅན་ཀུན་གྱི་ཆོས་ཉིད་དེ་འདྲ་སྟེ། །མཚན་དང་མཚན་གཞི་མཉམ་པ་ཉིད་ཀྱིས་འདྲ། །མཚན་ཉིད་མེད་པ་ཆོས་རྣམས་ཀུན་གྱི་མཆོག །བདེ་གཤེགས་ཡེ་ཤེས་དོན་དུ་སུ་གཉེར་བས། །རྟོག་དང་རྣམ་རྟོགས་ཡོངས་རྟོག་ཡོངས་སུ་སྤོངས། །དངོས་དང་དངོས་མེད་མཉམ་ཉིད་ཤེས་པར་གྱིས། །མྱུར་དུ་མྱི་ཡི་གཙོ་བོ་མཆོག་ཏུ་འགྱུར། །འདི་འདྲའི་སྒྲ་སྐད་སྟོང་སྙེད་དུ། །སྙན་པའི་དབྱངས་སུ་
བརྗོད་བྱས་ནས། །ལྷའི་བུ་མོ་མྱི་སྨྲ་ཞིང་། །ཞི་ལ་དགའ་བར་བདེ་གཤེགས་ལྟ། །འཁོར་རྣམས་ཞི་བར་ཤེས་གྱུར་ནས། །རྣམ་ཐར་ཟླ་བ་འཇིགས་མེད་པས། །རྡོ་རྗེའི་སྙིང་པོ་འཇིགས་མྱེད་པ། །རྒྱལ་སྲས་དེ་ལ་ཡང་སྨྲས་པ། །བཅུ་པར་ཡང་དག་འཕར་བ་ཡི། །རྣམ་པ་ཡོན་ཏན་སྤྱོད་ཡུལ་དང་། །མཚན་མ་དག་དང་ཆོ་འཕྲུལ་རྣམས། །མཁས་པས་ཀུན་ཀྱང་བསྟན་པར་མཛོད། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་དེ་བྱང་ཆུབ་སེམས་དཔའི་ས་དགུ་པའི་བར་དུ་ཤེས་པར་བྱ་བ། ཚད་མེད་པ་ཡོངས་སུ་བརྟགས་པའི་བློས་རྣམ་པར་དབྱེ་བ་ཤིན་ཏུ་རྣམ་པར་ཕྱེ་བ། ཆོས་དཀར་པོ་ཤིན་ཏུ་རྫོགས་པ་བསྩགས་པར་བྱ་བའི་ཚོགས་མཐའ་ཡས་པ་ཤིན་ཏུ་བསྩགས་པ། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་ཟིན་པ། སྙིང་རྗེ་ཆེན་པོ་ཤིན་ཏུ་ཡངས་པ་ཐོབ་པ། འཇིག་རྟེན་གྱི་ཁམས་རྣམ་པར་ཕྱེ་བ་རྣམ་པ་ཐ་དད་པ་ལ་མཁས་པ། སེམས་ཅན་གྱི་ཁམས་ཐིབས་པོས་ཉེ་བར་སྤྱོད་པ་ལ་རབ་ཏུ་ཞུགས་པ། དེ་བཞིན་གཤེགས་པའི་སྤྱོད་ཡུལ་ལ་འཇུག་པ་དང་ལྡན་པའི་འདུ་ཤེས་དང་། ཡིད་ལ་བྱེད་པ་ཅན་སྟོབས་དང་མི་འཇིགས་པ་དང་། སངས་རྒྱས་ཀྱི་ཆོས་ལ་ལྷག་པར་དམིགས་པའི་རྗེས་སུ་སོང་བ་ནི་རྣམ་པ་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་ལ་དབང་བསྐུར་བའི་ས་ཐོབ་པ་ཞེས་བྱའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་ཡེ་ཤེས་དེ་ལྟ་བུ་དང་ལྡན་ཞིང་དབང་བསྐུར་བའི་ས་ཐོབ་པ་དེ་ལ་བྱང་ཆུབ་སེམས་དཔའི་ཏིང་ངེ་འཛིན་དྲི་མ་མྱེད་པ་ཞེས་བྱ་བ་མངོན་དུ་འགྱུར་རོ། །བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་རྣམ་པར་ཕྱེ་བ་ལ་འཇུག་པ་ཞེས་བྱ་བ་དང་། སྙིང་པོ་བྱང་ཆུབ་ཀྱི་རྒྱན་རྣམ་པར་ཕྱེ་བ་ཞེས་བྱ་བ་དང་། འོད་གཟེར་གྱི་མེ་ཏོག་རྣམ་པ་ཐམས་ཅད་ཅེས་བྱ་བ་དང་། རྒྱ་མཚོའི་སྙིང་པོ་ཞེས་བྱ་བ་དང་། རྒྱ་མཚོའི་རྒྱ་ཞེས་བྱ་བ་དང་། ནམ་མཁའི་དབྱིངས་ལྟར་ཡངས་པ་ཞེས་བྱ་བ་དང་། ཆོས་ཐམས་ཅད་ཀྱི་རང་བཞིན་རྣམ་པར་འབྱེད་པ་ཞེས་བྱ་བ་དང་། སེམས་ཅན་ཐམས་
ཅད་ཀྱི་སེམས་དང་སྤྱོད་པའི་རྗེས་སུ་སོང་བ་ཞེས་བྱ་བ་དང་། ད་ལྟར་བྱུང་བའི་སངས་རྒྱས་ཐམས་ཅད་མངོན་སུམ་དུ་བཞུགས་པ་ཞེས་བྱ་བ་མངོན་དུ་འགྱུར་ཏེ། དེ་ལ་དེ་དག་ལ་སྩོགས་པ་ཏིང་ངེ་འཛིན་བརྒྱ་སྟོང་ཕྲག་གྲངས་མེད་པ་ཕྲག་བཅུ་མངོན་དུ་འགྱུར་རོ། །དེ་ཏིང་ངེ་འཛིན་དེ་དག་ཐམས་ཅད་ལ་མཉམ་པར་གཞོག་ཅིང་རྣམ་པར་ལྡང་ངོ་། །དེ་ཏིང་ངེ་འཛིན་ལ་མཁས་པ་དང་ལྡན་པ་ཡིན་ཏེ། ཏིང་ངེ་འཛིན་གྱི་དགོས་པ་དེ་དག་ཐམས་ཅད་ལ་ཡང་རབ་ཏུ་སྤྱོད་དོ། །ཏིང་ངེ་འཛིན་བརྒྱ་སྟོང་གྲངས་མྱེད་པ་ཕྲག་བཅུའི་ཐ་མ་ལ་ཐམས་ཅད་མཁྱེན་པའི་ཡེ་ཤེས་ཀྱི་ཁྱད་པར་གྱིས་མངོན་པར་དབང་བསྐུར་བ་ཞེས་བྱ་བའི་བྱང་ཆུབ་སེམས་དཔའི་ཏིང་ངེ་འཛིན་མངོན་དུ་འགྱུར་ཏེ། མངོན་དུ་གྱུར་མ་ཐག་ཏུ་སྟོང་གསུམ་བརྒྱ་སྟོང་ཕྲག་བཅུའི་ཐ་གྲུ་དང་མཉམ་པའི་རིན་པོ་ཆེའི་པད་མོ་རིན་པོ་ཆེ་ཐམས་ཅད་ཀྱིས་རྣམ་པ་ཐམས་ཅད་དུ་སྤྲས་ཤིང་བརྒྱན་པ་འཇིག་རྟེན་ཐམས་ཅད་ཀྱི་སྤྱོད་ཡུལ་ལས་འདས་པ། འཇིག་རྟེན་ལས་འདས་པའི་དགེ་བའི་རྩ་བས་བྱུང་བ། སྒྱུ་མའི་རང་བཞིན་དང་། སྤྱོད་ཡུལ་གྱིས་ཡོངས་སུ་གྲུབ་པ། ཆོས་ཀྱི་དབྱིངས་ལ་ཤིན་ཏུ་གནས་པར་སྣང་བ་ལྷ་རྫས་ཀྱི་ཡུལ་ལས་ཤིན་ཏུ་འདས་པ། ནོར་བུ་རིན་པོ་ཆེ་བཻ་དཱུ་རྱའི་ཆུ་བོ་ཆེན་པོ་ཅན། ཙན་དན་གྱི་རྒྱལ་པོ་མཚུངས་པ་མེད་པའི་སྙིང་པོ་ཅན། ཨསྨ་གར་བྷ་རབ་ཀྱི་ཟེ་བ་ཅན། འཛམ་བུ་ཆུ་ཀླུང་གི་གསེར་ལྟར་སྣང་བའི་ལོ་མ་ཅན། འོད་གཟེར་ཚད་མྱེད་པས་ཤིན་ཏུ་རྒྱས་པའི་ལྷུན་ཅན། རིན་པོ་ཆེ་ཐམས་ཅད་ཀྱིས་ནང་ཡོངས་སུ་སྤྲས་པ་རིན་པོ་ཆེ་མུ་མེད་པའི་དྲ་བས་ཀུན་ནས་ཡོག་པ། སྟོང་གསུམ་བརྒྱ་སྟོང་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་ཀྱི་རིན་པོ་ཆེའི་པད་མོ་ཆེན་པོའི་འཁོར་དང་ལྡན་པ་འབྱུང་བར་འགྱུར་ཏེ། བྱང་ཆུབ་སེམས་དཔའ་དེའི་ལུས་ཀྱང་དེ་དང་རྐྱེན་ཏུ་འཚམ་ཞིང་དེའི་ཚུལ་དང་མཐུན་པར་གནས་སོ། །དེ་ཐམས་ཅད་མཁྱེན་པའི་ཡེ་ཤེས་ཀྱི་ཁྱད་པར་གྱིས་དབང་བསྐུར་བ་དང་ལྡན་པའི་ཏིང་ངེ་འཛིན་ཐོབ་མ་ཐག་ཏུ་རིན་པོ་ཆེའི་པད་མོའི་རྒྱལ་པོ་ཆེན་པོ་དེ་ལ་འདུག་པར་
སྣང་སྟེ། རིན་པོ་ཆེའི་པདྨོའི་རྒྱལ་པོ་ཆེན་པོ་དེ་ལ་བྱང་ཆུབ་སེམས་དཔའ་དེ་འདུག་མ་ཐག་ཏུ་རིན་པོ་ཆེའི་པདྨོའི་རྒྱལ་པོ་ཆེན་པོ་དེའི་འཁོར་རིན་པོ་ཆེའི་པདྨོ་ཇི་སྙེད་བྱུང་བ་དེ་སྙེད་ཀྱི་བྱང་ཆུབ་སེམས་དཔས་བྱང་ཆུབ་སེམས་དཔའ་དེ་ཡོངས་སུ་བསྐོར་ཏེ། རིན་པོ་ཆེའི་པད་མོ་དེ་དག་ལ་འཁོད་ནས། བྱང་ཆུབ་སེམས་དཔའ་དེ་ཉིད་ལ་བལྟ་ཞིང་དེ་དག་རེ་རེ་ཞིང་ཡང་ཏིང་ངེ་འཛིན་བརྒྱ་སྟོང་ཕྲག་བཅུ་བཅུ་ལ་སྙོམས་པར་འཇུག་གོ །བྱང་ཆུབ་སེམས་དཔའ་དེ་དང་བྱང་ཆུབ་སེམས་དཔའ་དེ་དག་གིས་མཉམ་པར་བཞག་མ་ཐག་ཏུ་འཇིག་རྟེན་གྱི་ཁམས་ཐམས་ཅད་མ་ལུས་པར་གཡོ་བར་འགྱུར་རོ། །ངན་སོང་ཐམས་ཅད་རྩེ་ཞིལ་བར་འགྱུར་རོ། །ཆོས་ཀྱི་དབྱིངས་ཐམས་ཅད་སྣང་བས་རྒྱས་པར་འགྱུར་རོ། །འཇིག་རྟེན་གྱི་ཁམས་ཐམས་ཅད་ཡོངས་སུ་དག་པར་འགྱུར་རོ། །ཞིང་ཐམས་ཅད་དུ་སངས་རྒྱས་ཀྱི་སྒྲ་གྲག་པར་འགྱུར་རོ། །སྐལ་བ་དང་སྤྱོད་པ་མཐུན་པའི་བྱང་ཆུབ་སེམས་དཔའ་ཐམས་ཅད་ཀྱང་འདུ་བར་འགྱུར་རོ། །འཇིག་རྟེན་གྱི་ཁམས་ཐམས་ཅད་ཀྱི་ལྷ་དང་མྱིའི་རོལ་མོ་བརྡུང་བ་དང་དཀྲོལ་བའི་སྒྲ་ཡང་འབྱུང་བར་འགྱུར་རོ། །སེམས་ཅན་ཐམས་ཅད་ཀྱི་བདེ་བ་ཡང་སྐྱེ་བར་འགྱུར་རོ། །ཡང་དག་པར་རྫོགས་པའི་སངས་རྒྱས་ཐམས་ཅད་ལ་བསམ་གྱིས་མི་ཁྱབ་པའི་མཆོད་པ་དང་། རིམ་གྲོ་ཡང་རབ་ཏུ་འབྱུང་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཀྱང་རྣམ་པར་དམིགས་པར་འགྱུར་ཏེ། དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་དེ་ནི་རིན་པོ་ཆེའི་པད་མོའི་རྒྱལ་པོ་དེ་ལ་འདུག་མ་ཐག་ཏུ་རྐང་པའི་མཐིལ་གཉིས་ཀྱི་འོག་ནས་འོད་གཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་ངོ་། །བྱུང་ནས་ཀྱང་ཕྱོགས་བཅུར་མནར་མེད་པའི་སེམས་ཅན་དམྱལ་བ་ཆེན་པོ་ཡན་ཅད་སྣང་བར་བྱས་ཏེ། སྡུག་བསྔལ་རྣམས་ཀྱང་རབ་ཏུ་ཞི་བར་བྱེད་དོ། །པུས་མོའི་ལྷ་ང་གཉིས་ནས་འོད་
གཟེར་བརྒྱ་སྟོང་གྲངས་མེད་པ་ཕྲག་བཅུ་བྱུང་སྟེ། བྱུང་ནས་ཀྱང་ཕྱོགས་བཅུར་བྱོལ་སོང་གི་སྐྱེ་གནས་ཀྱི་གནས་ཐམས་ཅད་སྣང་བར་བྱས་ནས་སྡུག་བསྔལ་རྣམས་ཀྱང་རབ་ཏུ་ཞི་བར་བྱེད་དོ། །ལྟེ་བའི་དཀྱིལ་འཁོར་ནས་འོད་ཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་གཤིན་རྗེའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་ནས། སྡུག་བསྔལ་རྣམས་ཀྱང་རབ་ཏུ་ཞི་བར་བྱེད་དོ། །གཡས་གཡོན་གྱི་རྩིབ་ལོགས་གཉིས་ནས་འོད་གཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་མྱིའི་གནས་རྣམས་སྣང་བར་བྱས་ཏེ། སྡུག་བསྔལ་རྣམས་ཀྱང་རབ་ཏུ་ཞི་བར་བྱེད་དོ། །ལག་པའི་མཐིལ་གཉིས་ནས་འོད་གཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་ལྷ་དང་ལྷ་མ་ཡིན་གྱི་གནས་རྣམས་སྣང་བར་བྱས་ནས། སྡུག་བསྔལ་རྣམས་ཀྱང་རབ་ཏུ་ཞི་བར་བྱེད་དོ། །ཕྲག་པ་གཉིས་ནས་འོད་གཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་ཉན་ཐོས་ཀྱི་ཐེག་པ་པ་རྣམས་ཀྱི་གནས་སྣང་བར་བྱས་ནས། ཆོས་སྣང་བའི་སྒོ་ཡང་ཉེ་བར་སྒྲུབ་བོ། །རྒྱབ་དང་མགུལ་ནས་འོད་གཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་རང་སངས་རྒྱས་ཀྱི་གནས་ཐམས་ཅད་སྣང་བར་བྱས་ནས་ཞི་བའི་ཏིང་ངེ་འཛིན་གྱི་ཚུལ་གྱི་སྒོའང་ཉེ་བར་སྒྲུབ་བོ། །ཁའི་སྒོ་ནས་འོད་གཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་བྱང་ཆུབ་སེམས་དཔའ་སེམས་དང་པོ་བསྐྱེད་པ་ནས་བཟུང་བ་ཡན་ཅད་ས་དགུ་པ་ཐོབ་པའི་བར་དག་སྣང་བར་བྱས་ནས། ཤེས་རབ་དང་ཐབས་ཀྱི་ཚུལ་གྱི་སྒོ་ཡང་ཉེ་བར་སྒྲུབ་བོ། །སྨྱིན་མཚམས་ཀྱི་མཛོད་སྤུ་ནས་འོད་གཟེར་བརྒྱ་སྟོང་གྲངས་མེད་པ་ཕྲག་བཅུ་འབྱུང་སྟེ། བྱུང་ནས་ཀྱང་ཕྱོགས་བཅུར་བདུད་ཀྱི་གནས་ཐམས་ཅད་ཟིལ་གྱིས་མནན་ཏེ། དབང་བསྐུར་བའི་ས་ཐོབ་པའི་བྱང་ཆུབ་སེམས་དཔའ་རྣམས་སྣང་བར་བྱས་ནས། དེ་དག་གི་ལུས་སུ་ནུབ་པར་འགྱུར་
རོ། །ཡན་ལག་དམ་པའི་སྤྱི་གཙུག་ནས་འོད་གཟེར་སྟོང་གསུམ་བརྒྱ་སྟོང་གྲངས་མེད་པ་ཕྲག་བཅུ་ཚང་བའི་རྡུལ་ཤིན་ཏུ་ཕྲ་བ་སྙེད་འབྱུང་སྟེ། བྱུང་ནས་ཀྱང་ཕྱོགས་བཅུར་དེ་བཞིན་གཤེགས་པའི་འཁོར་གྱི་དཀྱིལ་འཁོར་ཐམས་ཅད་སྣང་བར་བྱས་ཏེ། འཇིག་རྟེན་ལན་བཅུར་བསྐོར་བ་བྱས་ནས། སྟེང་གི་ནམ་མཁའི་དབྱིངས་ལ་འདུག་སྟེ། འོད་གཟེར་གྱི་དྲ་བའི་དཀྱིལ་འཁོར་དུ་བྱས་ནས། དེ་བཞིན་གཤེགས་པ་ལ་མཆོད་ཅིང་རིམ་གྲོ་བྱ་བ་འོད་ཤིན་ཏུ་གསལ་བ་ཞེས་བྱ་བ་རབ་ཏུ་བྱེད་དེ། མཆོད་པ་དང་རིམ་གྲོ་དེ་ལ་སེམས་དང་པོ་བསྐྱེད་པ་ཉེ་བར་བཟུང་བ་ཡན་ཅད་ས་དགུ་པ་ཐོབ་ཀྱི་བར་དུ་དེ་བཞིན་གཤེགས་པ་མཆོད་ཅིང་རིམ་གྲོ་བྱས་པས་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་བརྒྱ་སྟོང་གི་ཆ་དང་། ཁྲག་ཁྲིག་གི་ཆ་དང་། ཁྲག་ཁྲིག་བརྒྱའི་ཆ་དང་། ཁྲག་ཁྲིག་སྟོང་གི་ཆ་དང་ཁྲག་ཁྲིག་བརྒྱ་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མྱི་འགྲོའོ། །གྲངས་དང་ཆ་དང་། བགྲང་བ་དང་རྒྱུར་ཡང་ཉེ་བར་མྱི་འགྲོ་བ་ནས་བསྒྲུན་པ་ཙམ་གྱི་བར་དུའང་མྱི་ཆོག་གོ །འོད་གཟེར་གྱི་དྲ་བའི་དཀྱིལ་འཁོར་ཆེན་པོ་དེ་ལས་ཕྱོགས་བཅུ་ན་མེ་ཏོག་དུ་གདགས་པ་དང་། སྤོས་དང་། བདུག་པ་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་དང་། རིན་པོ་ཆེའི་རྒྱན་དང་། ནོར་བུ་རིན་པོ་ཆེར་གདགས་པ་ཅི་ཡོད་པ་དེ་དག་ཐམས་ཅད་ལས་ལྷག་ཅིང་འཇིག་རྟེན་གྱི་ཡུལ་ཐམས་ཅད་ལས་འདས་ལ་འཇིག་རྟེན་ལས་འདས་པའི་དགེ་བའི་རྩ་བའི་དབང་གིས་གྲུབ་པ་དག་སྤྲིན་ཆེན་པོའི་ཆར་བཞིན་དུ་མངོན་པར་འབབ་བོ། །མཆོད་པ་དེ་དག་སེམས་ཅན་གང་གིས་མཐོང་བ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །མཆོད་པ་དང་། རིམ་གྲོའི་རྣམ་པ་དེ་ལྟ་བུ་དག་བྱས་ནས་ཀྱང་འོད་གཟེར་དེ་དག་གིས་དེ་བཞིན་གཤེགས་པའི་འཁོར་གྱི་དཀྱིལ་འཁོར་ཐམས་
ཅད་སྣང་བར་བྱས་ནས། འཇིག་རྟེན་ལན་བཅུར་བསྐོར་བ་བྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཞབས་ཀྱི་མཐིལ་གྱི་འོག་ཏུ་ནུབ་པར་གྱུར་ཏེ། དེ་ནས་དེ་བཞིན་གཤེགས་པ་དེ་དག་དང་བྱང་ཆུབ་སེམས་དཔའ་དེ་དག་གིས་འཇིག་རྟེན་གྱི་ཁམས་འབྱམ་ཀླས་པ་ཆེ་གེ་མོ་ཞིག་ཏུ་དེ་ལྟ་བུའི་སྤྱོད་པ་དང་ལྡན་པའི་བྱང་ཆུབ་སེམས་དཔའ་དབང་བསྐུར་བའི་དུས་ལ་བབ་པར་ཐུགས་སུ་ཆུད་དོ། །ཀྱེ་རྒྱལ་བའི་སྲས་དག །དེར་ཕྱོགས་བཅུ་ནས་བྱང་ཆུབ་སེམས་དཔའི་ས་དགུ་ལ་གནས་པའི་བར་གྱི་བྱང་ཆུབ་སེམས་དཔའ་མཐའ་ཡས་པ་འོངས་ཏེ། བྱང་ཆུབ་སེམས་དཔའ་དེ་ལ་ཀུན་ནས་བསྐོར་ནས། མཆོད་པ་ཆེན་པོ་བྱས་ཏེ་བྱང་ཆུབ་སེམས་དཔའ་དེ་ཉིད་ལ་ལྟ་ཞིང་ཏིང་ངེ་འཛིན་སྟོང་ཕྲག་བཅུ་བཅུ་ལ་སོ་སོ་ནས་མཉམ་པར་གཞོག་གོ །བྱང་ཆུབ་སེམས་དཔའ་དབང་བསྐུར་བའི་ས་ཐོབ་པ་རྣམས་ཀྱི་དཔལ་གྱི་བེའུ་དང་རྡོ་རྗེ་དང་། བཀྲ་ཤིས་ལས་བདུད་ཀྱི་དགྲ་ལས་རྣམ་པར་རྒྱལ་བ་ཞེས་བྱ་བའི་འོད་གཟེར་ཆེན་པོ་གཅིག །འོད་གཟེར་གྱི་འཁོར་བརྒྱ་སྟོང་གྲངས་མེད་པ་ཕྲག་བཅུ་དང་ལྡན་པ་འབྱུང་སྟེ། བྱུང་ནས་ཀྱང་ཕྱོགས་བཅུར་སྣང་བར་བྱས་ནས་ཆོ་འཕྲུལ་མུ་མེད་པ་ཡང་དག་པར་བསྟན་ཏེ། བྱང་ཆུབ་སེམས་དཔའ་དེའི་དཔལ་གྱི་བེའུ་དང་། རྡོ་རྗེ་དང་བཀྲ་ཤིས་སུ་ནུབ་པར་འགྱུར་རོ། །འོད་གཟེར་དེ་དག་དེར་ནུབ་མ་ཐག་ཏུ་བྱང་ཆུབ་སེམས་དཔའ་དེའི་སྟོབས་དང་། མཐུ་ཡང་བརྒྱ་ཕྲག་སྟོང་གྱུར་པས་ཀྱང་ལྷག་པར་མངོན་པར་འཕེལ་བར་སྣང་ངོ་། །ཀྱེ་རྒྱལ་བའི་སྲས་དག །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་སྨིན་མཚམས་ཀྱི་མཛོད་སྤུ་ནས་ཐམས་ཅད་མཁྱེན་པའི་མངོན་པར་ཤེས་པ་དང་ལྡན་པ་ཞེས་བྱ་བའི་འོད་ཟེར་འོད་གཟེར་གྱི་འཁོར་གྲངས་མེད་པ་དང་ལྡན་པ་འབྱུང་སྟེ། དེ་དག་གིས་ཕྱོགས་བཅུ་ཐམས་ཅད་དུ་འཇིག་རྟེན་གྱི་ཁམས་ཐམས་ཅད་མ་ལུས་པར་སྣང་བར་བྱས་ནས། འཇིག་རྟེན་ལན་
བཅུར་བསྐོར་ཏེ། དེ་བཞིན་གཤེགས་པའི་རྣམ་པར་འཕྲུལ་པ་ཆེན་པོ་བསྟན་ནས། བྱང་ཆུབ་སེམས་དཔའ་བརྒྱ་སྟོང་བྱེ་བ་ཁྲག་ཁྲིག་མང་པོ་ཡང་དག་པར་བསྐུལ་ནས། སངས་རྒྱས་ཀྱི་ཞིང་འབྱམ་ཀླས་པ་ཐམས་ཅད་རྣམ་པ་དྲུག་ཏུ་བསྐྱོད་དེ། ངན་སོང་ཐམས་ཅད་ཀྱི་ལམ་གྱི་རྒྱུད་དང་སྐྱེ་བ་དང་། ཤི་འཕོ་རབ་ཏུ་ཞི་བར་བྱས་ནས་བདུད་ཀྱི་གནས་ཐམས་ཅད་ཟིལ་གྱིས་མནན་ཏེ། དེ་བཞིན་གཤེགས་པ་ཐམས་ཅད་མངོན་པར་འཚང་རྒྱ་བ་རྣམ་པར་སངས་རྒྱས་པའི་སངས་རྒྱས་ཀྱི་གདན་ཡང་དག་པར་བསྟན་ནས། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་བརྒྱན་པའི་མཐུ་རབ་ཏུ་བསྟན་ཏེ། འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་སྣང་བར་བྱས་ནས། ཕྱིར་ལོག་སྟེ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཀྱི་སྟེང་ནས་བསྐོར་བ་བྱས་ཏེ། རྒྱན་ཆེན་པོ་བསྟན་ནས། འོད་གཟེར་དེ་དག་བྱང་ཆུབ་སེམས་དཔའ་དེའི་ཡན་ལག་གི་དམ་པར་ནུབ་བོ། །དེའི་འཁོར་གྱི་འོད་གཟེར་རྣམས་ཀྱང་དེ་ལྟར་ཚོགས་པའི་བྱང་ཆུབ་སེམས་དཔའ་རྣམས་ཀྱི་མགོར་ནུབ་པར་འགྱུར་རོ། །འོད་གཟེར་དེ་དག་གིས་ཕོག་མ་ཐག་ཏུ་བྱང་ཆུབ་སེམས་དཔའ་དེ་དག་གིས་སྔན་ཅད་མ་ཐོབ་པའི་ཏིང་ངེ་འཛིན་སྟོང་ཕྲག་བཅུ་བཅུ་རབ་ཏུ་འཐོབ་བོ། །འོད་གཟེར་དེ་དག་ཀྱང་དུས་གཅིག་ཏུ་བྱང་ཆུབ་སེམས་དཔའ་དེའི་ཡན་ལག་དམ་པ་ལ་འཆར་བར་འགྱུར་ཏེ། བྱང་ཆུབ་སེམས་དཔའ་དེ་ཡང་ཡང་དག་པར་རྫོགས་པའི་སངས་རྒྱས་ཀྱི་ཡུལ་ལ་མངོན་པར་དབང་བསྐུར་ཞེས་བྱའོ། །སྟོབས་བཅུ་ཡོངས་སུ་རྫོགས་ནས་ནི། ཡང་དག་པར་རྫོགས་པའི་སངས་རྒྱས་སུ་བགྲང་བ་ཡང་འཐོབ་པར་འགྱུར་རོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོའི་བུ་ཐུ་བོ་གཞོན་ནུ་བཙུན་མོ་དམ་པ་ལས་བཙས་པ། རྒྱལ་པོའི་མཚན་དང་ལྡན་པ་དེ་འཁོར་ལོས་སྒྱུར་བའི་རྒྱལ་པོས་ལྷའི་གླང་པོ་རིན་པོ་ཆེ་ལ་
གསེར་གྱི་ཁྲི་དམ་པའི་སྟེང་དུ་བཞག་སྟེ། སྟེང་ནས་བླ་རེ་བྲེས་ཤིང་། གདུགས་དང་། རྒྱལ་མཚན་དང་། བ་དན་དང་། རོལ་མོ་བརྡུང་བ་དང་། དཀྲོལ་བ་དང་། གླུའི་དབྱངས་ལ་སོགས་པའི་རྒྱན་ཆེན་པོ་བྱས་ཏེ། རྒྱ་མཚོ་ཆེན་པོ་བཞི་ལས་ཆུ་བླངས་པ་གསེར་གྱི་བུམ་པས་བཅུས་ཏེ། ཆུ་དེས་གཞོན་ནུ་དེའི་སྤྱི་བོ་ནས་མངོན་པར་དབང་བསྐུར་ནས། དབང་བསྐུར་མ་ཐག་ཏུ་དེ་ནི་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཞེས་བྱ་བའི་གྲངས་སུ་འགྲོའོ། །དགེ་བ་བཅུའི་ལས་ཀྱི་ལམ་ཡོངས་སུ་རྫོགས་ནས་ནི་འཁོར་ལོས་སྒྱུར་བར་བགྲང་བ་རབ་ཏུ་འཐོབ་པོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་ཡང་སངས་རྒྱས་བཅོམ་ལྡན་འདས་དེ་དག་གིས་དབང་བསྐུར་མ་ཐག་ཏུ། ཡེ་ཤེས་ཀྱི་དབང་མངོན་པར་བསྐུར་བས་མངོན་པར་དབང་བསྐུར་བ་ཞེས་བྱའོ། །སྟོབས་བཅུ་ཡོངས་སུ་རྫོགས་ནས་ནི། ཡང་དག་པར་རྫོགས་པའི་སངས་རྒྱས་ཀྱི་གྲངས་སུ་འགྲོའོ། །ཀྱེ་རྒྱལ་བའི་སྲས་དག་འདི་ནི། གང་གི་དོན་དུ་བྱང་ཆུབ་སེམས་དཔའ་དཀའ་བ་བརྒྱ་སྟོང་དུ་མ་རྩོམ་པའི་བྱང་ཆུབ་སེམས་དཔའི་མངོན་པར་དབང་བསྐུར་བའོ། །དེ་དེ་ལྟར་མངོན་པར་དབང་བསྐུར་ཞིང་ཡོན་ཏན་དང་ཡེ་ཤེས་རྣམ་པར་འཕེལ་བ་ནི། བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པ་ཞེས་བྱའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔའ་ནི་ཆོས་ཀྱི་ཁམས་ཡང་དག་པར་བསྒྲུབ་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདོད་པའི་ཁམས་ཡང་དག་པར་བསྒྲུབ་པ་དང་། གཟུགས་ཀྱི་ཁམས་ཡང་དག་པར་བསྒྲུབ་པ་དང་། གཟུགས་མེད་པའི་ཁམས་ཡང་དག་པར་བསྒྲུབ་པ་དང་། འཇིག་རྟེན་གྱི་ཁམས་ཡང་དག་པར་བསྒྲུབ་པ་དང་། སེམས་ཅན་གྱི་ཁམས་ཡང་དག་པར་བསྒྲུབ་པ་དང་། རྣམ་
པར་ཤེས་པའི་ཁམས་ཡང་དག་པར་བསྒྲུབ་པ་དང་། འདུས་བྱས་དང་འདུས་མ་བྱས་ཀྱི་ཁམས་ཡང་དག་པར་བསྒྲུབ་པ་དང་། ནམ་མཁའི་ཁམས་ཡང་དག་པར་བསྒྲུབ་པ་དང་། ཡང་དག་པ་དང་ཡང་དག་པ་མ་ཡིན་པའི་ཁམས་བསྟན་པ་ཡང་དག་པར་བསྒྲུབ་པ་དང་། མྱ་ངན་ལས་འདས་པའི་ཁམས་ཡང་དག་པར་བསྒྲུབ་པ་དང་། ལྟ་བའི་རྣམ་པ་དང་ཉོན་མོངས་པ་ཡང་དག་པར་བསྒྲུབ་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འཇིག་རྟེན་གྱི་ཁམས་འཇིག་པ་དང་འདུ་བ་ཡང་དག་པར་བསྒྲུབ་པ་དང་། ཉན་ཐོས་ཀྱི་སྤྱོད་པ་ཡང་དག་པར་བསྒྲུབ་པ་དང་། རང་སངས་རྒྱས་ཀྱི་སྤྱོད་པ་ཡང་དག་པར་བསྒྲུབ་པ་དང་། བྱང་ཆུབ་སེམས་དཔའི་སྤྱོད་པ་ཡང་དག་པར་བསྒྲུབ་པ་དང་། དེ་བཞིན་གཤེགས་པའི་སྟོབས་དང་མི་འཇིགས་པ་དང་། གཟུགས་ཀྱི་སྐུ་དང་། ཆོས་ཀྱི་སྐུ་ཡང་དག་པར་བསྒྲུབ་པ་དང་། རྣམ་པ་ཐམས་ཅད་མཁྱེན་པའི་ཡེ་ཤེས་ཡང་དག་པར་བསྒྲུབ་པ་དང་། མངོན་པར་རྫོགས་པར་འཚང་རྒྱ་བ་དང་། ཆོས་ཀྱི་འཁོར་ལོ་བསྐོར་བ་དང་། བཟློག་པ་བསྟན་པ་ཡང་དག་པར་བསྒྲུབ་པ་དང་། མདོར་བསྡུ་ན་ཆོས་ཐམས་ཅད་རྣམ་པར་ཕྱེ་བ་ལ་འཇུག་ཅིང་ཤིན་ཏུ་བརྟག་པ་ཡང་དག་པར་བསྒྲུབ་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་དེ་ལྟ་བུའི་ཡེ་ཤེས་དང་ལྡན་པའི་བློས་གོང་དུ་སེམས་ཅན་རྣམས་ཀྱི་སྤྲུལ་པའི་ལས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཉོན་མོངས་པའི་སྤྲུལ་པ་དང་། ལྟ་བའི་རྣམ་པའི་སྤྲུལ་པ་དང་། འཇིག་རྟེན་གྱི་ཁམས་ཀྱི་སྤྲུལ་པ་དང་། ཆོས་ཀྱི་ཁམས་ཀྱི་སྤྲུལ་པ་དང་། ཉན་ཐོས་ཀྱི་སྤྲུལ་པ་དང་། རང་སངས་རྒྱས་ཀྱི་སྤྲུལ་པ་དང་། བྱང་ཆུབ་སེམས་དཔའི་སྤྲུལ་པ་དང་། དེ་བཞིན་གཤེགས་པའི་སྤྲུལ་པ་དང་། སྤྲུལ་པ་ཐམས་ཅད་ཀྱི་རྣམ་པར་དགོད་པ་དང་། རྣམ་པར་མི་དགོད་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་སངས་རྒྱས་ཀྱི་བྱིན་གྱི་རླབས་ཀྱང་ཡང་དག་པ་
ཇི་ལྟ་བ་བཞིན་དུ་རབ་ཏུ་ཤེས་སོ། །ཆོས་ཀྱི་བྱིན་གྱི་རླབས་དང་། དགེ་འདུན་གྱི་བྱིན་གྱི་རླབས་དང་། ལས་ཀྱི་བྱིན་གྱི་རླབས་དང་། ཉོན་མོངས་པའི་བྱིན་གྱི་རླབས་དང་། དུས་ཀྱི་བྱིན་གྱི་རླབས་དང་། སྨོན་ལམ་གྱི་བྱིན་གྱི་རླབས་དང་། མཆོད་པའི་བྱིན་གྱི་རླབས་དང་། སྤྱོད་པའི་བྱིན་གྱི་རླབས་དང་། བསྐལ་པའི་བྱིན་གྱི་རླབས་དང་། ཡེ་ཤེས་ཀྱི་བྱིན་གྱི་རླབས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གང་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཕྲ་བ་ལ་འཇུག་པའི་ཡེ་ཤེས་འདི་ལྟ་སྟེ། སྤྱོད་པ་ཕྲ་བ་ལ་འཇུག་པའི་ཡེ་ཤེས་སམ། སྐྱེ་བ་དང་འཕོ་བ་ཕྲ་བ་ལ་འཇུག་པའི་ཡེ་ཤེས་སམ། སྐུ་ཚེ་ཕྲ་བ་ལ་འཇུག་པའི་ཡེ་ཤེས་སམ། མངོན་པར་འབྱུང་བ་ཕྲ་བ་ལ་འཇུག་པའི་ཡེ་ཤེས་སམ། མངོན་པར་བྱང་ཆུབ་པ་ཕྲ་བ་ལ་འཇུག་པའི་ཡེ་ཤེས་སམ། རྣམ་པར་འཕྲུལ་པ་ཕྲ་བ་ལ་འཇུག་པའི་ཡེ་ཤེས་སམ། ཆོས་ཀྱི་འཁོར་ལོ་བསྐོར་བ་ཕྲ་བ་ལ་འཇུག་པའི་ཡེ་ཤེས་སམ། སྐུ་ཚེའི་ཚད་བྱིན་གྱི་རླབས་པ་ཕྲ་བ་ལ་འཇུག་པའི་ཡེ་ཤེས་སམ། ཡོངས་སུ་མྱ་ངན་ལས་འདའ་བ་ཕྲ་བ་ལ་འཇུག་པའི་ཡེ་ཤེས་སམ། བསྟན་པ་གནས་པ་ཕྲ་བ་ལ་འཇུག་པའི་ཡེ་ཤེས་དེ་དག་ཐམས་ཅད་ཡང་དག་པ་ཇི་ལྟ་བ་བཞིན་དུ་དེས་རབ་ཏུ་ཤེས་སོ། །གང་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་གསང་བ་ལ་འཇུག་པའི་གནས་འདི་ལྟ་སྟེ། སྐུའི་གསང་བའམ། གསུང་གི་གསང་བའམ། ཐུགས་ཀྱི་གསང་བའམ། དུས་དང་དུས་མ་ཡིན་པ་ཐུགས་སུ་ཆུད་པའི་གསང་བའམ། བྱང་ཆུབ་སེམས་དཔའ་ལུང་བསྟན་པའི་གསང་བའམ། སེམས་ཅན་བསྡུ་བ་དང་། ཚར་གཅད་པ་གསང་བའམ། ཐེག་པ་ཐ་དད་པ་གསང་བའམ། སེམས་ཅན་གྱི་སྤྱོད་པ་དང་། དབང་པོ་རྣམ་པར་ཕྱེ་བ་གསང་བའམ། ལས་དང་བྱ་བ་ལ་འཇུག་པ་
གསང་བའམ། སྤྱོད་པ་དང་མངོན་པར་འཚང་རྒྱ་བའི་རང་བཞིན་བརྗོད་པ་ཐུགས་སུ་ཆུད་པ་གསང་བ་དེ་དག་ཐམས་ཅད་ཡང་དག་པ་ཇི་ལྟ་བ་བཞིན་དུ་དེས་རབ་ཏུ་ཤེས་སོ། །གང་འདི་དག་བསྐལ་པ་ལ་འཇུག་པའི་ཡེ་ཤེས་འདི་ལྟ་སྟེ། བསྐལ་པ་གཅིག་ལ་བསྐལ་པ་གྲངས་མེད་པར་ཡང་དག་པར་འཇུག་པ་དང་། གྲངས་མེད་པའི་བསྐལ་པ་ལ་བསྐལ་པ་གཅིག་ཏུ་ཡང་དག་པར་འཇུག་པ་དང་། བསྐལ་པ་གྲངས་མེད་པ་ལ་བསྐལ་པ་གྲངས་མེད་པར་ཡང་དག་པར་འཇུག་པ་དང་། སྐད་ཅིག་ལ་བསྐལ་པ་དང་བསྐལ་པ་ལ་སྐད་ཅིག་ཏུ་ཡང་དག་པར་འཇུག་པ་དང་། བསྐལ་པ་ལ་བསྐལ་པ་མ་ཡིན་པར་ཡང་དག་པར་འཇུག་པ་དང་། བསྐལ་པ་མ་ཡིན་པ་ལ་བསྐལ་པར་ཡང་དག་པར་འཇུག་པ་དང་། སངས་རྒྱས་དང་བཅས་པའི་བསྐལ་པ་སངས་རྒྱས་མེད་པའི་བསྐལ་པར་ཡང་དག་པར་འཇུག་པ་དང་། སངས་རྒྱས་མེད་པའི་བསྐལ་པ་སངས་རྒྱས་དང་བཅས་པའི་བསྐལ་པར་ཡང་དག་པར་འཇུག་པ་དང་། འདས་པ་དང་། མ་འོངས་པ་དང་། ད་ལྟར་བྱུང་བའི་བསྐལ་པ་ལ། ད་ལྟར་བྱུང་བ་དང་། འདས་པ་དང་། མ་འོངས་པའི་བསྐལ་པ་འཇུག་ཅིང་། མ་འོངས་པ་དང་འདས་པ་དང་ད་ལྟར་བྱུང་བའི་བསྐལ་པར་ཡང་དག་པར་འཇུག་པ་དང་། བསྐལ་པ་རིང་པོ་ལ་བསྐལ་པ་ཐུང་ངུར་ཡང་དག་པར་འཇུག་པ་དང་། བསྐལ་པ་ཐུང་ངུ་ལ་བསྐལ་པ་རིང་པོར་ཡང་དག་པར་འཇུག་པ་དང་། བསྐལ་པ་ཐམས་ཅད་ལ་མིང་དུ་གདགས་པ་ཡང་དག་པར་འཇུག་པ་དེ་དག་ཐམས་ཅད་ཀྱང་ཡང་དག་པ་ཇི་ལྟ་བ་བཞིན་དུ་དེས་རབ་ཏུ་ཤེས་སོ། །གང་འདི་དག་དེ་བཞིན་གཤེགས་པ་རྣམས་ཀྱིས་ཐུགས་སུ་ཆུད་པའི་ཡེ་ཤེས་འདི་ལྟ་སྟེ། སྐྲའི་རྩེ་མོ་ལ་འཇུག་པའི་ཡེ་ཤེས་སམ། རྡུལ་ཤིན་ཏུ་ཕྲ་བ་ལ་འཇུག་པའི་ཡེ་ཤེས་སམ། ཞིང་མང་པོ་མངོན་པར་འཚང་རྒྱ་བ་ལ་འཇུག་པའི་ཡེ་ཤེས་སམ། སེམས་ཅན་གྱི་ལུས་དང་། སེམས་མངོན་པར་འཚང་རྒྱ་བ་ལ་འཇུག་པའི་ཡེ་ཤེས་སམ། ཐམས་ཅད་དུ་ཁྱབ་པར་མངོན་པར་
འཚང་རྒྱ་བ་ལ་འཇུག་པའི་ཡེ་ཤེས་སམ། སྣྲེལ་ཞིའི་སྤྱོད་པ་ལ་འཇུག་པ་ཡང་དག་པར་བསྟན་པའི་ཡེ་ཤེས་སམ། ལུགས་དང་མཐུན་པའི་སྤྱོད་པ་ཡང་དག་པར་བསྟན་པ་ལ་འཇུག་པའི་ཡེ་ཤེས་སམ། ལུགས་དང་མྱི་མཐུན་པའི་སྤྱོད་པ་ཡང་དག་པར་བསྟན་པ་ལ་འཇུག་པའི་ཡེ་ཤེས་སམ། འཇིག་རྟེན་བསམ་དུ་རུང་བ་དང་། བསམ་དུ་མྱི་རུང་བ་དང་། རྣམ་པར་ཤེས་པར་རུང་བ་དང་། རྣམ་པར་ཤེས་པར་མྱི་རུང་བའི་སྤྱོད་པ་ཡང་དག་པར་བསྟན་པ་ལ་འཇུག་པའི་ཡེ་ཤེས་སམ། ཉན་ཐོས་ཀྱིས་ཤེས་པར་བྱ་བ་དང་རང་སངས་རྒྱས་ཀྱིས་ཤེས་པར་བྱ་བ་དང་། བྱང་ཆུབ་སེམས་དཔས་ཤེས་པར་བྱ་བ་དང་། དེ་བཞིན་གཤེགས་པས་མཁྱེན་པར་བྱ་བའི་སྤྱོད་པ་ཡང་དག་པར་བསྟན་པ་ལ་འཇུག་པའི་ཡེ་ཤེས་དེ་དག་ཐམས་ཅད་ཀྱང་ཡང་དག་པ་ཇི་ལྟ་བ་བཞིན་དུ་དེས་རབ་ཏུ་ཤེས་སོ། །ཀྱེ་རྒྱལ་བའི་སྲས་དག །དེ་ལྟར་ན་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ཤིན་ཏུ་ཡངས་པ་ཚད་མྱེད་པས། ས་འདི་ལ་གནས་པའི་བྱང་ཆུབ་སེམས་དཔས་ཁོང་དུ་ཆུད་པའི་ཡེ་ཤེས་ཀྱང་ཚད་མྱེད་དོ། །ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའི་ས་འདི་དང་ལྡན་པའི་བྱང་ཆུབ་སེམས་དཔའ་དེ་བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མྱི་ཁྱབ་པ་ཞེས་བྱ་བ་རབ་ཏུ་འཐོབ་བོ། །བསྒྲིབས་པ་མྱེད་པ་ཞེས་བྱ་བ་དང་། རྣམ་པར་དག་པ་རབ་ཏུ་འབྱེད་པ་ཞེས་བྱ་བ་དང་། སྒོ་ཀུན་ཏུ་སྣང་བ་ཞེས་བྱ་བ་དང་། དེ་བཞིན་གཤེགས་པའི་མཛོད་ཅེས་བྱ་བ་དང་། འཁོར་ལོ་ཐོགས་པ་མེད་པ་དང་ལྡན་པ་ཞེས་བྱ་བ་དང་། དུས་གསུམ་གྱི་རྗེས་སུ་སོང་བ་ཞེས་བྱ་བ་དང་། ཆོས་ཀྱི་དབྱིངས་ཀྱི་སྙིང་པོ་ཞེས་བྱ་བ་དང་། རྣམ་པར་ཐར་པའི་དཀྱིལ་འཁོར་སྣང་བ་ཞེས་བྱ་བ་དང་། ཡུལ་མ་ལུས་པ་ཞེས་བྱ་བའི་བྱང་ཆུབ་སེམས་དཔའི་རྣམ་པར་ཐར་པ་རབ་ཏུ་འཐོབ་པོ། །ཀྱེ་རྒྱལ་བའི་སྲས་དག །འདི་ལྟ་སྟེ་བྱང་ཆུབ་སེམས་དཔའི་རྣམ་པར་ཐར་པ་
བཅུ་པོ་དེ་དག་ལས་སྩོགས་པ་རྣམ་པར་ཐར་པའི་སྒོ་བརྒྱ་སྟོང་གྲངས་མེད་པ་བྱང་ཆུབ་སེམས་དཔའི་ས་བཅུ་པ་འདི་ལ་གནས་པའི་བྱང་ཆུབ་སེམས་དཔས་རབ་ཏུ་འཐོབ་སྟེ། དེ་བཞིན་དུ་ཏིང་ངེ་འཛིན་བརྒྱ་ཕྲག་སྟོང་དང་། གཟུངས་བརྒྱ་ཕྲག་སྟོང་དང་། མངོན་པར་ཤེས་པ་མངོན་པར་བསྒྲུབ་པ་བརྒྱ་ཕྲག་སྟོང་ཡང་རབ་ཏུ་འཐོབ་བོ། །དེ་ཡེ་ཤེས་དེ་ལྟ་བུ་དང་ལྡན་པའི་བློ་དང་ཚད་མྱེད་པ་རྗེས་སུ་སོང་བའི་དྲན་པ་མཁས་པ་དང་ལྡན་པ་ཡིན། དེ་ཕྱོགས་བཅུའི་སངས་རྒྱས་བཅོམ་ལྡན་འདས་གྲངས་མེད་པ་ལས་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་ཚད་མེད་པ་དང་། ཆོས་ཀྱི་འོད་ཆེན་པོ་དང་། ཆོས་ཀྱི་སྤྲིན་ཆེན་པོ་ཡང་དག་པར་འཛིན་ཏོ། །མོས་པར་བྱེད་དོ། །ཡང་དག་པར་ལེན་ཏོ། །བདག་གིར་བྱེད་དོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། རྒྱ་མཚོའི་ཀླུའི་རྒྱལ་པོའི་སྤྲིན་ལས་རྣམ་པར་བཀྱེ་བའི་ཆུའི་ཕུང་པོ་ཆེན་པོ་ནི་རྒྱ་མཚོ་ཆེན་པོ་མ་གཏོགས་པར་སའི་ཕྱོགས་གཞན་གྱིས་བཟོད་པའམ། བདག་གིར་བྱ་བའམ། བླང་བའམ། གཟུང་བར་མྱི་ནུས་སོ། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་གསང་བ་ལ་འཇུག་པ་དང་། ཆོས་ཀྱི་སྣང་བ་ཆེན་པོ་དང་། ཆོས་ཀྱི་འོད་ཆེན་པོ་དང་། ཆོས་ཀྱི་སྤྲིན་ཆེན་པོ་དེ་དག་ནི་སེམས་ཅན་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་དང་ས་དང་པོ་ཉེ་བར་བཟུང་བ་ཡན་ཅད། ས་དགུ་པའི་བར་ལ་གནས་པའི་བྱང་ཆུབ་སེམས་དཔའ་དེ་དག་གིས་ཀྱང་བཟོད་པའམ། བླང་བའམ། ཡང་དག་པར་གཟུང་བའམ། བདག་གིར་བྱ་བ་སླ་བ་མ་ཡིན་ཏེ། བྱང་ཆུབ་སེམས་དཔའི་ས་ཆོས་ཀྱི་སྤྲིན་འདི་ལ་གནས་པའི་བྱང་ཆུབ་སེམས་དཔའ་ནི་དེ་དག་ཐམས་ཅད་ལ་མོས་པར་བྱེད་དོ། །ཡང་དག་པར་ལེན་ཏོ། །ཡང་དག་པར་འཛིན་ཏོ། །བདག་གིར་བྱེད་དོ། །ཀྱེ་རྒྱལ་བའི་སྲས་དག །
འདི་ལྟ་སྟེ་དཔེར་ན། རྒྱ་མཚོ་ཆེན་པོ་ནི་ཀླུའི་རྒྱལ་པོ་ཆེན་པོ་གཅིག་གིས་སྤྲིན་ཆེན་པོ་ཡང་བཟོད་དོ། །ལེན་ཏོ། །འཛིན་ཏོ། །བདག་གིར་བྱེད་དོ། །ཀླུའི་རྒྱལ་པོ་ཆེན་པོ་གཉིས་དང་། གསུམ་ནས་ཚད་མེད་པའི་བར་གྱི་སྤྲིན་ཆེན་པོ་དག་ཀྱང་སྐད་ཅིག་ཡུད་ཙམ་ཐང་ཅིག་གིས་བཟོད་དོ། །ལེན་ཏོ། །འཛིན་ཏོ། །བདག་གིར་བྱེད་དོ། །དེ་ཅིའི་ཕྱིར་ཞེ་ན། རྒྱ་མཚོ་ཆེན་པོ་དེ་ཚད་མྱེད་པར་རྒྱ་ཆེ་ཞིང་ཡངས་པའི་ཕྱིར་རོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའི་ས་ཆོས་ཀྱི་སྤྲིན་འདི་ལ་གནས་པའི་བྱང་ཆུབ་སེམས་དཔའ་ཡང་དེ་བཞིན་གཤེགས་པ་གཅིག་ལས་ཀྱང་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་དང་། ཆོས་ཀྱི་འོད་ཆེན་པོ་དང་། ཆོས་ཀྱི་སྤྲིན་ཆེན་པོ་ཚད་མེད་པ་རྣམས་བཟོད་དོ། །ཡང་དག་པར་ལེན་ཏོ། །ཡང་དག་པར་འཛིན་ཏོ། །བདག་གིར་བྱེད་དོ། །དེ་བཞིན་གཤེགས་པ་གཉིས་དང་། གསུམ་ནས་ཚད་མེད་པའི་བར་དག་ལས་ཀྱང་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་དང་། ཆོས་ཀྱི་འོད་ཆེན་པོ་དང་། ཆོས་ཀྱི་སྤྲིན་ཆེན་པོ་ཚད་མེད་པ་བཟོད་དོ། །ཡང་དག་པར་འཛིན་ཏོ། །ཡང་དག་པར་ལེན་ཏོ། །བདག་གིར་བྱེད་དོ། །དེ་ཅིའི་ཕྱིར་ཞེ་ན། ས་འདི་ཡང་ཆོས་ཀྱི་སྤྲིན་ཅེས་བྱའོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ་རྒྱལ་བའི་སྲས་དེ་བཞིན་གཤེགས་པ་ཇི་སྙེད་ཅིག་ལས་བྱང་ཆུབ་སེམས་དཔའ་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་ཆེན་པོ་དང་། ཆོས་ཀྱི་འོད་ཆེན་པོ་དང་། ཆོས་ཀྱི་སྤྲིན་ཆེན་པོ་བཟོད་པར་བྱེད་པ་དང་། ཡང་དག་པར་འཛིན་པ་དང་། ཡང་དག་པར་ལེན་ཅིང་བདག་གིར་བྱེད་པ་དེ་དག་བགྲང་བར་ནུས་སམ། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་དེ་བཞིན་གཤེགས་པ་འདི་སྙེད་ཅིག་ལས་བྱང་ཆུབ་སེམས་དཔའ་སྐད་ཅིག་ཡུད་ཙམ་ཐང་ཅིག་ཏུ་ཆོས་
ཀྱི་སྣང་བ་ཆེན་པོ་དང་། ཆོས་ཀྱི་འོད་ཆེན་པོ་དང་། ཆོས་ཀྱི་སྤྲིན་ཆེན་པོ་བཟོད་ཅིང་ཡང་དག་པར་ལེན་པ་དང་། ཡང་དག་པར་འཛིན་ཅིང་བདག་གིར་བྱེད་དོ། །ཞེས་གྲངས་ཀྱིས་ཤིན་ཏུ་བསྟན་པའི་ཚུལ་དུ་བགྲང་བར་སླ་བ་མ་ཡིན་ཏེ། འོན་ཀྱང་དཔེ་ཙམ་དུ་བསྟན་པར་བྱའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་ཕྲག་སྟོང་གི་རྡུལ་ཕྲ་བ་སྙེད་ན་སེམས་ཅན་གྱི་ཁམས་མ་ལུས་པའི་ཚུལ་དུ་ཇི་སྙེད་ཅིག་ཡོད་པ་དེ་དག་ལས། སེམས་ཅན་གཅིག་ཅིག་ཐོས་པ་འཛིན་པའི་གཟུངས་རབ་ཏུ་ཐོབ་པར་གྱུར་ཏེ། འདི་ལྟ་སྟེ་དཔེར་ན། བཅོམ་ལྡན་འདས་རྡོ་རྗེ་པད་མོའི་བླ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་དགེ་སློང་རྣམ་པར་རྒྱལ་བ་ཆེན་པོ་ཞེས་བྱ་བ་བཞིན་དུ་དེ་བཞིན་གཤེགས་པའི་ཞམ་རིང་བ། ཉན་ཐོས་ཆེན་པོ་ཐོས་པ་འཛིན་པའི་མཆོག་ཏུ་ཕྱིན་པར་གྱུར་ལ། རྣམ་པ་དེ་ལྟ་བུའི་ཐོས་པ་འཛིན་པའི་སྟོབས་ཀྱི་ཤུགས་དང་། སེམས་ཅན་གཅིག་པོ་དེ་ལྡན་པར་གྱུར་ཏེ། སེམས་ཅན་གཅིག་པོ་དེ་ཅི་འདྲ་བ་དེ་བཞིན་དུ་འཇིག་རྟེན་གྱི་ཁམས་དེ་དག་ཐམས་ཅད་ཀྱི་སེམས་ཅན་ཐམས་ཅད་ལྡན་པར་གྱུར་ལ། གཅིག་གིས་གང་བཟུང་བ་དེ་བཞིན་གྱིས་བཟུང་ན། ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས་སེམས་ཅན་དེ་དག་གི་ཐོས་པ་འཛིན་པའི་ཤེས་པ་དེ་དག་ཚད་མེད་ཅིང་མང་བ་ཡིན་མོད། བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ་རྒྱལ་བའི་སྲས་སེམས་ཅན་དེ་དག་གི་ཐོས་པ་འཛིན་པའི་ཤེས་པ་དེ་ནི་མང་སྟེ་ཚད་ཀྱང་མྱེད་དོ། །བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་ཁྱོད་ཀྱིས་ཁོང་དུ་ཆུད་པ་དང་། ཡིད་ཆེས་པར་བྱ་ན་དེ་ལྟར་བྱང་ཆུབ་སེམས་དཔའི་ས་ཆོས་ཀྱི་སྤྲིན་འདི་ལ་གནས་པའི་བྱང་ཆུབ་སེམས་དཔའ་ནི་དེ་བཞིན་གཤེགས་པ་གཅིག་ལས་ཀྱང་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་དང་།
འོད་དང་སྤྲིན་ཆེན་པོ་ཆོས་ཀྱི་དབྱིངས་དུས་གསུམ་གྱི་མཛོད་ཅེས་བྱ་བ་བཟོད་ཅིང་ཡང་དག་པར་ལེན་ཏོ། །ཡང་དག་པར་འཛིན་ཏོ། །བདག་གིར་བྱེད་དོ། །ཆོས་ཀྱི་སྣང་བ་དང་། འོད་དང་སྤྲིན་ཆེན་པོ་ཡང་དག་པར་འཛིན་པའི་ཤེས་པ་དེ་ལ་ཐོས་པ་འཛིན་པའི་ཤེས་པ་སྔ་མས་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་ཕྲག་སྟོང་གི་ཆ་དང་། བྱེ་བའི་ཆ་དང་བྱེ་བ་བརྒྱའི་ཆ་དང་། བྱེ་བ་སྟོང་གི་ཆ་དང་། བྱེ་བ་བརྒྱ་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མྱི་འགྲོ་བ་ནས་བསྒྲུན་པ་ཙམ་གྱི་བར་དུའང་མྱི་ཆོག་གོ །དེ་བཞིན་གཤེགས་པ་གཅིག་ལས་ཇི་ལྟ་བ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་སྔ་མ་དག་ན་རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་སྙེད་ཀྱི་ཡང་དག་པར་རྫོགས་པའི་སངས་རྒྱས་རྣམས་དང་། དེ་དག་བས་ཀྱང་ཆེས་མང་ཞིང་ཚད་མེད་པའི་དེ་བཞིན་གཤེགས་པ་རྣམས་ལས་སྐད་ཅིག་ཡུད་ཙམ་ཐང་ཅིག་ཏུ་ཆོས་ཀྱི་སྣང་བ་དང་། འོད་དང་སྤྲིན་ཆེན་པོ་ཆོས་ཀྱི་དབྱིངས་དུས་གསུམ་གྱི་མཛོད་ཅེས་བྱ་བ་བཟོད་ཅིང་ཡང་དག་པར་ལེན་ཏོ། །ཡང་དག་པར་འཛིན་ཏོ། །བདག་གིར་བྱེད་དོ། །དེ་བས་ན་ས་འདི་ཡང་ཆོས་ཀྱི་སྤྲིན་ཅེས་བྱའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔའ་ནི་རང་གི་སྨོན་ལམ་གྱི་སྟོབས་དང་ཤུགས་ཀྱིས་སྙིང་བརྩེ་བ་དང་སྙིང་རྗེ་ཆེན་པོའི་སྤྲིན་ཆོས་ཀྱི་སྣང་བ་ཆེན་པོ་རབ་ཏུ་སྒྲོག་པའི་འབྲུག་སྒྲ་ཤིན་ཏུ་སྒྲོག་པ་མངོན་པར་ཤེས་པ་དང་། རིག་པ་དང་མྱི་འཇིགས་པའི་གློག་རྣམ་པར་འགྱུ་བ། འོད་གཟེར་ཆེན་པོའི་རླུང་གིས་ཤིན་ཏུ་བསྐྱོད་པ། བསོད་ནམས་དང་ཡེ་ཤེས་ཀྱི་སྤྲིན་གྱི་དྲ་བ་སྟུག་པོས་ཀུན་ནས་ཁེབས་པ། ལུས་སྣ་ཚོགས་ཀྱི་སྤྲིན་གྱི་ཀློང་ཡང་དག་པར་སྟོན་པ། ཆོས་ཀྱི་སྒྲ་ཆེན་པོ་རབ་ཏུ་སྒྲོག་པ། བདུད་ཀྱི་འཁོར་ཐམས་
ཅད་ཤིན་ཏུ་ཚར་གཅོད་པ། ཡོངས་སུ་བསླང་སྟེ། སྐད་ཅིག་ཡུད་ཙམ་ཐང་ཅིག་ཏུ་ཕྱོགས་བཅུའི་འཇིག་རྟེན་སྔ་མ་དེ་དག་ན་རྡུལ་ཕྲ་རབ་ཇི་སྙེད་ཡོད་པ་དེ་སྙེད་ཀྱི་འཇིག་རྟེན་གྱི་ཁམས་ཀྱང་བྱེ་བ་ཁྲག་ཁྲིག་བརྒྱ་སྟོང་དང་། དེ་དག་བས་ཀྱང་ཆེས་མང་ཞིང་ཚད་མེད་པའི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་རྒྱས་པར་བཀང་སྟེ། དགེ་བའི་བདུད་རྩིའི་རྒྱུན་གྱི་ཆར་ཆེན་པོས་བསམ་པ་ཇི་ལྟ་བ་བཞིན་དུ་སེམས་ཅན་རྣམས་ཀྱི་མྱི་ཤེས་པ་ལས་ལངས་པའི་ཉོན་མོངས་པའི་རྡུལ་གྱི་མེ་ལྕེ་ཐམས་ཅད་རབ་ཏུ་ཞི་བར་བྱེད་དེ། དེ་བས་ན་ས་འདིའང་ཆོས་ཀྱི་སྤྲིན་ཅེས་བྱའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔའ་ནི་འཇིག་རྟེན་གྱི་ཁམས་གཅིག་ཏུ་ཡང་དགའ་ལྡན་གྱི་གནས་ན་བཞུགས་པ་ནས་བཟུང་སྟེ། འཕོ་བ་དང་ཡུམ་གྱི་སྐུར་བཞུད་པ་དང་སྐུ་ན་བཞུགས་པ་དང་། ཚེ་དང་མངོན་པར་འབྱུང་བ་དང་། མངོན་པར་འཚང་རྒྱ་བ་དང་། གསོལ་བ་གདབ་པ་དང་། ཆོས་ཀྱི་འཁོར་ལོ་ཆེན་པོ་བསྐོར་བ་དང་། མྱ་ངན་ལས་འདས་པ་ཆེན་པོ་བསྟན་པའི་བར་དུ་སེམས་ཅན་གྱི་བསམ་པའི་ཚུལ་དང་། འདུལ་བའི་ཚུལ་ཇི་ལྟ་བ་བཞིན་དུ་དེ་བཞིན་གཤེགས་པའི་འཕྲིན་ལས་ཐམས་ཅད་བྱིན་གྱིས་རློབ་བོ། །དེ་བཞིན་དུ་འཇིག་རྟེན་གྱི་ཁམས་གཉིས་ནས་འཇིག་རྟེན་གྱི་ཁམས་སྔ་མ་དེ་དག་ན་རྡུལ་ཕྲ་རབ་ཇི་སྙེད་ཡོད་པ་དེ་དག་བས་ཀྱང་ཆེས་མང་བའི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པའི་བར་དག་ཏུ་ཡང་དགའ་ལྡན་གྱི་གནས་ན་བཞུགས་པ་ནས་བཟུང་སྟེ། ཡོངས་སུ་མྱ་ངན་ལས་འདས་པ་ཆེན་པོ་བསྟན་པའི་བར་དུ་སེམས་ཅན་རྣམས་ཀྱི་བསམ་པའི་ཚུལ་དང་། འདུལ་བའི་ཚུལ་ཇི་ལྟ་བ་བཞིན་དུ་དེ་བཞིན་གཤེགས་པའི་འཕྲིན་ལས་ཐམས་ཅད་བྱིན་གྱིས་རློབ་བོ། །དེ་དེ་ལྟ་བུའི་ཡེ་ཤེས་དང་ལྡན་ཞིང་ཤིན་ཏུ་བརྟགས་པའི་མངོན་པར་ཤེས་པ་ཆེན་པོ་ཐོབ་པས། འདོད་ན་འཇིག་རྟེན་གྱི་ཁམས་དོག་པ་ཡངས་པར་བྱིན་གྱིས་རློབ་བོ། །ཡངས་པ་ཡང་དོག་པར་བྱིན་གྱིས་རློབ་པོ། །འདོད་ན་ཀུན་ནས་ཉོན་མོངས་པ་
རྣམ་པར་དག་པར་བྱིན་གྱིས་རློབ་པོ། །རྣམ་པར་དག་པ་ཀུན་ནས་ཉོན་མོངས་པར་བྱིན་གྱིས་རློབ་པོ། །དེ་བཞིན་དུ་རྒྱ་ཆེན་པོ་དང་ཤིན་ཏུ་ཡངས་པ་དང་། ཚད་མེད་པ་དང་། ཕྲ་བ་དང་། ཐ་གྲུ་ཆེན་པོ་དང་། སྣྲེལ་ཞི་དང་། སྤྱིའུ་ཚུགས་དང་། གཞི་མཉམ་པ་ལ་སོགས་པའི་འཇིག་རྟེན་གྱི་ཁམས་ཐམས་ཅད་ཀྱང་ཁྱུ་མཆོག་གི་མཐུ་ཕྱུང་བས་མངོན་པར་བསྒྲུབ་པ་དེ་དང་དེར་བྱིན་གྱིས་རློབ་པོ། །དེ་འདོད་ན་རྡུལ་ཤིན་ཏུ་ཕྲ་བ་གཅིག་ལ་འཇིག་རྟེན་གྱི་ཁམས་ཁོར་ཡུག་གི་འོབས་དང་བཅས་པ་རྣམ་པ་ཐམས་ཅད་དང་ལྡན་པ་གཅིག་ཀྱང་བྱིན་གྱིས་རློབ་སྟེ། རྡུལ་ཤིན་ཏུ་ཕྲ་བ་དེའང་མྱི་འཕེལ་ལ་བྱ་བ་དེ་དག་ཀྱང་ཡོངས་སུ་སྟོན་ཏོ། །རྡུལ་ཤིན་ཏུ་ཕྲ་བ་གཅིག་ལ་འཇིག་རྟེན་གྱི་ཁམས་གཉིས་དང་གསུམ་དང་བཞི་དང་ལྔ་ནས་འཇིག་རྟེན་གྱི་ཁམས་བརྗོད་དུ་མེད་པའི་བར་དུ་ཐམས་ཅད་ཀྱང་ཁོར་ཡུག་གི་འོབས་དང་བཅས་པ་རྣམ་པ་ཐམས་ཅད་དང་ལྡན་པར་བྱིན་གྱིས་རློབ་སྟེ། རྡུལ་ཤིན་ཏུ་ཕྲ་བ་དེ་ཡང་མི་འཕེལ་ལ་བྱ་བ་དེ་དག་ཀྱང་ཡོངས་སུ་སྟོན་ཏོ། །འདོད་ན་འཇིག་རྟེན་གྱི་ཁམས་གཅིག་ཏུ་འཇིག་རྟེན་གྱི་ཁམས་གཉིས་ཀྱི་རྒྱུན་ཡོངས་སུ་སྟོན་ཏོ། །འདོད་ན་འཇིག་རྟེན་གྱི་ཁམས་བརྗོད་དུ་མེད་པའི་བར་གྱི་རྒྱུན་ཡོངས་སུ་སྟོན་ཏོ། །འདོད་ན་འཇིག་རྟེན་གྱི་ཁམས་གཅིག་གི་རྒྱན་འཇིག་རྟེན་གྱི་ཁམས་གཉིས་སུ་ཡོངས་སུ་སྟོན་ཏོ། །འདོད་ན་འཇིག་རྟེན་གྱི་ཁམས་བརྗོད་དུ་མེད་པ་དག་ཏུ་ཡང་ཡོངས་སུ་སྟོན་ཏོ། །འདོད་ན་འཇིག་རྟེན་གྱི་ཁམས་བརྗོད་དུ་མེད་པ་དག་ན། སེམས་ཅན་གྱི་ཁམས་ཇི་སྙེད་ཡོད་པ་དེ་དག་ཐམས་ཅད་འཇིག་རྟེན་གྱི་ཁམས་གཅིག་ཏུ་སྡུད་དེ་སེམས་ཅན་དེ་དག་ལ་ཡང་གནོད་པར་མྱི་འགྱུར་རོ། །འདོད་ན་འཇིག་རྟེན་གྱི་ཁམས་གཅིག་ན་སེམས་ཅན་གྱི་ཁམས་ཅི་སྙེད་པ་དེ་དག་འཇིག་རྟེན་གྱི་ཁམས་བརྗོད་དུ་མེད་པར་སྡུད་དེ། སེམས་ཅན་དེ་དག་ལ་ཡང་གནོད་པར་མྱི་འགྱུར་རོ། །འདོད་ན་སྐྲའི་རྩེ་མོ་གཅིག་ལ་སངས་རྒྱས་ཀྱི་ཡུལ་གྱི་རྒྱན་རྣམ་པ་ཐམས་ཅད་དང་ལྡན་པ་གཅིག་སྟོན་ཏོ། །
འདོད་ན་སངས་རྒྱས་ཀྱི་ཡུལ་གྱི་རྒྱན་རྣམ་པ་ཐམས་ཅད་དང་ལྡན་པ་བརྗོད་དུ་མེད་པའི་བར་དུ་སྟོན་ཏོ། །འདོད་ན་འཇིག་རྟེན་གྱི་ཁམས་བརྗོད་དུ་མེད་པ་དག་ན་རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་སྙེད་ཀྱི་ལུས་སྐད་ཅིག་ཡུད་ཙམ་ཐང་ཅིག་ཏུ་ཤིན་ཏུ་སྤྲུལ་པ་བྱེད་དོ། །ལུས་རེ་རེ་ལ་ཡང་དེ་སྙེད་ཀྱི་ལག་པ་ཡོངས་སུ་སྟོན་ཏེ། ལག་པ་དེ་དག་གིས་ཀྱང་ཕྱོགས་བཅུར་སངས་རྒྱས་མཆོད་པ་རབ་ཏུ་བྱེད་དེ། ལག་པ་རེ་རེས་ཀྱང་མེ་ཏོག་གི་ཕུང་པོ་ཆུ་ཀླུང་གང་གཱའི་བྱེ་མ་སྙེད་སངས་རྒྱས་བཅོམ་ལྡན་འདས་དེ་དག་ལ་མངོན་པར་འཐོར་རོ། །མེ་ཏོག་ཇི་ལྟ་བ་དེ་བཞིན་དུ་སྤོས་དང་། ཕྲེང་བ་དང་བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་དང་། དེ་བཞིན་དུ་རྒྱན་ཐམས་ཅད་ཀྱང་ཡོངས་སུ་འབུལ་ལོ། །ལུས་རེ་རེ་ལ་ཡང་དེ་སྙེད་ཀྱི་མགོ་བྱིན་གྱིས་རློབ་ཅིང་མགོ་རེ་རེ་ལ་ཡང་དེ་སྙེད་ཀྱི་ལྕེ་བྱིན་གྱིས་བརླབས་ཏེ། དེ་དག་གིས་ཀྱང་སངས་རྒྱས་བཅོམ་ལྡན་འདས་དེ་དག་གི་ཡོན་ཏན་ཤིན་ཏུ་བརྗོད་པ་བྱེད་དོ། །སེམས་བསྐྱེད་པ་རེ་རེ་ལ་ཡང་ཕྱོགས་བཅུ་རྒྱས་པར་ཁྱབ་པར་འགྲོ་སྟེ། སེམས་བསྐྱེད་པ་ཙམ་གྱིས་ཀྱང་མངོན་པར་རྫོགས་པར་བྱང་ཆུབ་པ་ཚད་མེད་པ་ནས། མྱ་ངན་ལས་འདས་པ་ཆེན་པོ་རྒྱན་གྱི་བར་དུ་བྱིན་གྱིས་རློབ་བོ། །དུས་གསུམ་གྱི་ལུས་ཚད་མེད་པ་ཡང་བྱིན་གྱིས་རློབ་སྟེ། རང་གི་ལུས་ལ་སངས་རྒྱས་བཅོམ་ལྡན་འདས་ཚད་མེད་པ་རྣམས་ཀྱི་སངས་རྒྱས་ཀྱི་ཞིང་གི་ཡོན་ཏན་དང་རྒྱན་ཚད་མེད་པ་བྱིན་གྱིས་རློབ་བོ། །འཇིག་རྟེན་གྱི་ཁམས་འཇིག་པ་དང་། འདུ་བ་ཐམས་ཅད་ཀྱང་རང་གི་ལུས་ལ་བྱིན་གྱིས་རློབ་པོ། །རླུང་གི་དཀྱིལ་འཁོར་ཐམས་ཅད་ཀྱང་བ་སྤུའི་ཁུང་བུ་གཅིག་ནས་གཏོང་སྟེ། སེམས་ཅན་རྣམས་ལ་ཡང་གནོད་པར་མི་བྱེད་དོ། །འདོད་ན་ཆུའི་ཕུང་པོ་ཡན་ཅད་འཇིག་རྟེན་གྱི་ཁམས་གཅིག་བྱིན་གྱིས་རློབ་བོ། །དེར་ཡང་པད་མོ་ཆེན་པོ་བྱིན་གྱིས་རློབ་བོ། །
པད་མོ་ཆེན་པོ་དེའི་འོད་རྣམ་པར་ཕྱེ་བས་ཀྱང་འཇིག་རྟེན་གྱི་ཁམས་མུ་མེད་པ་རྒྱས་པར་གང་བར་བྱེད་དོ། །དེ་ལ་ཡང་བྱང་ཆུབ་ཀྱི་ཤིང་ཆེན་པོ་ཡོངས་སུ་སྟོན་པ་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་བར་དུ་ཡང་དག་པར་སྟོན་ཏོ། །རང་གི་ལུས་ལ་ཕྱོགས་བཅུའི་ནོར་བུ་དང་། གློག་དང་ཉི་ཟླའི་འོད་བྱིན་གྱིས་རློབ་པ་ནས། སྣང་བ་དང་འོད་ཐམས་ཅད་ཀྱི་བར་དུ་བྱིན་གྱིས་རློབ་བོ། །ཁའི་དབུགས་ཀྱིས་ཀྱང་ཕྱོགས་རེ་རེའི་འཇིག་རྟེན་གྱི་ཁམས་མཐའ་ཡས་པ་གཡོ་བར་བྱེད་དེ། སེམས་ཅན་རྣམས་འཇིགས་པར་ཡང་མི་བྱེད་དོ། །ཕྱོགས་བཅུར་རླུང་གིས་འཇིག་པ་དང་། མྱེས་འཇིག་པ་དང་། ཆུས་འཇིག་པ་ཡང་བྱིན་གྱིས་རློབ་ལ། འདོད་ན་སེམས་ཅན་ཐམས་ཅད་བསམ་པ་བཞིན་དུ་གཟུགས་ཀྱི་ལུས་དང་། གནས་ཡོངས་སུ་རྒྱན་པར་བྱིན་གྱིས་རློབ་བོ། །རང་གི་ལུས་ལ་དེ་བཞིན་གཤེགས་པའི་སྐུ་བྱིན་གྱིས་རློབ་བོ། །དེ་བཞིན་གཤེགས་པའི་སྐུ་ལ་རང་གི་ལུས་བྱིན་གྱིས་རློབ་བོ། །དེ་བཞིན་གཤེགས་པའི་སྐུ་ལ་རང་གི་སངས་རྒྱས་ཀྱི་ཞིང་བྱིན་གྱིས་རློབ་བོ། །རང་གི་སངས་རྒྱས་ཀྱི་ཞིང་དུ་དེ་བཞིན་གཤེགས་པའི་སྐུ་བྱིན་གྱིས་རློབ་བོ། །ཀྱེ་རྒྱལ་བའི་སྲས་དེ་ལྟར་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔའ་ནི་རྫུ་འཕྲུལ་དང་རྣམ་པར་འཕྲུལ་པ་འདི་དག་དང་། གཞན་ཡང་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་ཡོངས་སུ་སྟོན་ཏོ། །དེ་ནས་འཁོར་དེའི་བྱང་ཆུབ་སེམས་དཔའ་ལ་ལ་དང་། ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་དང་། དབང་ཕྱུག་ཆེན་པོ་དང་། གཙང་མའི་གནས་སུ་གཏོགས་པ་ཁ་ཅིག་འདི་སྙམ་དུ་སེམས་ཏེ། དེ་ལྟར་དེ་སྟེ་བྱང་ཆུབ་སེམས་དཔའི་རྫུ་འཕྲུལ་མངོན་པར་འདུ་བྱ་བའི་སྤྱོད་ཡུལ་ཡང་དེ་ལྟར་ཚད་མེད་ན། དེ་བཞིན་གཤེགས་པ་རྣམས་ཀྱི་རྫུ་འཕྲུལ་གྱི་རྣམ་པ་ཅི་འདྲ་བ་ཞིག་ཡོད་སྙམ་པ་
དང་། དེ་ནས་བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་འཁོར་དེ་དག་གི་སེམས་དང་བསམ་པའི་རྒྱུད་ཤེས་ནས་བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་འཁོར་འདི་དག་ཐེ་ཙོམ་དུ་གྱུར་ན། དེ་དག་གི་ཐེ་ཙོམ་གཅོད་པའི་ཕྱིར་བྱང་ཆུབ་སེམས་དཔའི་ཆོ་འཕྲུལ་རྣམ་པར་ཕྱེ་བ་ཆུང་ཟད་ཅིག་མི་བསྟན་ཏམ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་གཅིག་པ། དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོ་དེའི་ཚེ། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཀྱི་ལྷུན་དང་། རང་བཞིན་ཡང་དག་པར་སྟོན་པ་ཞེས་བྱ་བ་ལ་སྙོམས་པར་ཞུགས་སོ། །དེ་ལྟར་བྱང་ཆུབ་སེམས་དཔའ་རྡོ་རྗེའི་སྙིང་པོ་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཀྱི་ལྷུན་དང་། རང་བཞིན་ཡང་དག་པར་སྟོན་པ་ལ་སྙོམས་པར་ཞུགས་མ་ཐག་ཏུ་དེ་ནས་དེ་ཉིད་ཀྱི་ཚེ། བྱང་ཆུབ་སེམས་དཔའི་འཁོར་དེ་དག་ཐམས་ཅད་དང་། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་དང་། དབང་ཕྱུག་ཆེན་པོ་དང་། གཙང་མའི་གནས་ཀྱི་རིས་སུ་གཏོགས་པའི་འཁོར་དེ་དག་ཐམས་ཅད་བྱང་ཆུབ་སེམས་དཔའ་རྡོ་རྗེའི་སྙིང་པོའི་ལུས་ཀྱི་ནང་ན་འཁོད་པ་རང་རང་གིས་ཤེས་པར་གྱུར་ཏེ། དེར་སངས་རྒྱས་ཀྱི་ཞིང་མངོན་དུ་གྲུབ་པར་ཤེས་སོ། །སངས་རྒྱས་ཀྱི་ཞིང་དེའི་རྣམ་པ་དང་། རྒྱན་ཇི་སྙེད་པ་དེ་དག་ཀྱང་བསྐལ་པ་ཁྲག་ཁྲིག་ཚང་བས་ཀྱང་བརྗོད་པར་མི་ནུས་པར་མཐོང་སྟེ། དེར་བྱང་ཆུབ་ཀྱི་ཤིང་སྟོང་གསུམ་བརྒྱ་སྟོང་ཕྲག་བཅུར་ཁྱབ་པའི་ལྷུན་ཅན་སྟོང་གསུམ་ཁྲག་ཁྲིག་ཡོངས་སུ་ཚང་བ་ཙམ་དུ་ཡངས་ཤིང་། ཚད་མེད་པའི་
ཡལ་ག་ཅན། རྩེ་མོ་ཤིན་ཏུ་མཐོ་བ་བྱུང་སྟེ། དེ་དང་རྐྱེན་དུ་འབབ་པར་དེའི་དྲུང་གི་སྙིང་པོ་བྱང་ཆུབ་ལ་སེང་གེའི་ཁྲི་རྒྱ་ཆེན་པོ་བྱུང་ནས་དེ་ལ་དེ་བཞིན་གཤེགས་པ་མངོན་པར་ཤེས་པའི་བློ་གྲོས་ཐམས་ཅད་ཀྱི་རྒྱལ་པོ་ཞེས་བྱ་བ་སྙིང་པོ་བྱང་ཆུབ་ཏུ་གཤེགས་ཏེ་བཞུགས་པར་མཐོང་ངོ་། །དེ་ལྟར་དེ་ན་རྒྱན་ཇི་སྙེད་སྣང་བར་གྱུར་པ་དེ་དག་ནི་བསྐལ་པ་ཁྲག་ཁྲིག་ཡོངས་སུ་ཚང་བས་ཀྱང་བརྗོད་པར་དཀའོ། །དེས་ཆོ་འཕྲུལ་ཆེན་པོ་འདི་བསྟན་ནས་བྱང་ཆུབ་སེམས་དཔའི་འཁོར་དེ་དག་ཐམས་ཅད་དང་། ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། བརྒྱ་བྱིན་དང་ཚངས་པ་དང་འཇིག་རྟེན་གྱི་མགོན་པོ་དང་། དབང་ཕྱུག་ཆེན་པོ་དང་། གནས་གཙང་མའི་རིས་སུ་གཏོགས་པའི་འཁོར་དེ་དག་ཐམས་ཅད་སོ་སོའི་གནས་ཇི་བཞིན་དུ་བཀོད་པ་དང་། དེ་ནས་འཁོར་དེ་དག་ཐམས་ཅད་ངོ་མཚར་དང་རྨད་དུ་གྱུར་ནས། མི་སྨྲ་བར་བྱང་ཆུབ་སེམས་དཔའ་རྡོ་རྗེའི་སྙིང་པོ་དེ་ཉིད་ལ་སེམས་ཤིང་འཁོད་པར་གྱུར་ཏོ། །དེ་ནས་བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས། བྱང་ཆུབ་སེམས་དཔའ་རྡོ་རྗེའི་སྙིང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་ཏིང་ངེ་འཛིན་འདིའི་མཐུ་རྣམ་པར་བཀོད་པ་དེ་ནི་རྨད་དུ་བྱུང་བར་ངོ་མཚར་ཆེ་ན། ཀྱེ་རྒྱལ་བའི་སྲས་ཏིང་ངེ་འཛིན་དེའི་མྱིང་ཅི་ཞེས་བྱ། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་ཏིང་ངེ་འཛིན་དེ་ནི་སངས་རྒྱས་ཀྱི་ཞིང་ཐམས་ཅད་ཀྱི་ལྷུན་དང་རང་བཞིན་ཡང་དག་པར་སྟོན་པ་ཞེས་བྱའོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ་རྒྱལ་བའི་སྲས་འོ་ན་ཏིང་ངེ་འཛིན་འདིའི་སྤྱོད་ཡུལ་དང་། ཡུལ་དང་རྒྱན་ཇི་ལྟ་བུ་ཡིན། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ཏིང་ངེ་འཛིན་འདི་
ལ་ཤིན་ཏུ་གོམས་པ་ནི། འདོད་ན་སངས་རྒྱས་ཀྱི་ཞིང་འདི་འདྲ་བ་འཇིག་རྟེན་གྱི་ཁམས་ཆུ་ཀླུང་གང་གཱའི་བྱེ་མ་སྙེད་དམ། དེ་བས་ཀྱང་མང་དུ་རང་གི་ལུས་ལ་སྟོན་ཏོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔས་ནི་བྱང་ཆུབ་སེམས་དཔའི་ཏིང་ངེ་འཛིན་འདི་འདྲ་བ་བརྒྱ་སྟོང་ཤིན་ཏུ་མང་བ་རབ་ཏུ་འཐོབ་སྟེ། དེ་བས་བྱང་ཆུབ་སེམས་དཔའ་དེའི་ལུས་སམ། ལུས་ཀྱི་ལས་ནི་བྱང་ཆུབ་སེམས་དཔའ་རྒྱལ་ཚབ་ཀྱི་གོ་འཕང་ཐོབ་ཅིང་བྱང་ཆུབ་སེམས་དཔའི་ས་ལེགས་པའི་བློ་གྲོས་ལ་གནས་པ་དག་གིས་ཀྱང་ཤེས་པར་སླ་བ་མ་ཡིན་ནོ། །ངག་གམ་ངག་གི་ལས་ཀྱང་ཤེས་པར་སླ་བ་མ་ཡིན་ནོ། །ཡིད་དམ་ཡིད་ཀྱི་ལས་ཀྱང་ཤེས་པར་སླ་བ་མ་ཡིན་ནོ། །རྫུ་འཕྲུལ་ཤེས་པར་སླ་བ་མ་ཡིན་ནོ། །དུས་གསུམ་ལ་རྣམ་པར་ལྟ་བ་ཤེས་པར་སླ་བ་མ་ཡིན་ནོ། །ཏིང་ངེ་འཛིན་གྱི་སྤྱོད་ཡུལ་ལ་འཇུག་པ་ཤེས་པར་སླ་བ་མ་ཡིན་ནོ། །ཡེ་ཤེས་ཀྱི་ཡུལ་ཤེས་པར་སླ་བ་མ་ཡིན་ནོ། །རྣམ་པར་ཐར་པས་རྣམ་པར་རོལ་བ་ཤེས་པར་སླ་བ་མ་ཡིན་ནོ། །འཕྲུལ་པའི་ལས་ཤེས་པར་སླ་བ་མ་ཡིན་ནོ། །བྱིན་གྱི་རླབས་ཀྱི་ལས་ཤེས་པར་སླ་བ་མ་ཡིན་ནོ། །མཐུའི་ལས་ཤེས་པར་སླ་བ་མ་ཡིན་པ་ནས་མདོར་བསྡུ་ན་གོམ་པ་འདོར་ཞིང་འདེགས་པའི་ལས་ཀྱི་བར་དུ་ཡང་བྱང་ཆུབ་སེམས་དཔའ་རྒྱལ་ཚབ་ཀྱི་གོ་འཕང་ཐོབ་ཅིང་བྱང་ཆུབ་སེམས་དཔའི་ས་ལེགས་པའི་བློ་གྲོས་ལ་གནས་པ་རྣམས་ཀྱིས་ཀྱང་ཤེས་པར་སླ་བ་མ་ཡིན་ཏེ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་ཆོས་ཀྱི་སྤྲིན་འདི་ནི་མདོར་བསྡུས་ཏེ་བསྟན་ན་ཡང་དེ་ལྟར་ཚད་མེད་པ་སྟེ། རྒྱ་ཆེར་ནི་བསྐལ་པ་བརྒྱ་སྟོང་གྲངས་མེད་པས་ཀྱང་བསྟན་པའི་མཐར་ཐུག་པར་མི་འགྱུར་བར་ཤེས་པར་བྱའོ། །བྱང་ཆུབ་སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་
དང་བྱིན་གྱིས་རླབས་ཀྱང་དེ་ལྟར་ཚད་མེད་ན་དེ་བཞིན་གཤེགས་པ་རྣམས་ཀྱི་སྤྱོད་ཡུལ་དང་ཡུལ་གྱི་རྒྱུད་ཅི་འདྲ་བ་ཞིག་ཡོད། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། མྱི་ལ་ལ་ཞིག་གིས་གླིང་བཞི་པའི་འཇིག་རྟེན་གྱི་ཁམས་ནས་རྡེའུ་རྒྱ་ཤུག་གི་ཚིག་གུ་ཙམ་གཉིས་སམ་གསུམ་ཞིག་བླངས་ཏེ། འཇིག་རྟེན་གྱི་ཁམས་མཐའ་ཡས་པ་དག་ན། སའི་ཁམས་ཇི་སྙེད་ཅིག་ཡོད་པ། རྡོ་བ་འདི་ལས་ཇི་ཙམ་ཞིག་གིས་ལྷག་པར་འཕགས་ཤིང་ལྷག་པར་ཚད་མེད་ཅེས་ཟེར་བ་ཞིག་ཡོད་ན། ཀྱེ་རྒྱལ་བའི་སྲས་དེ་ལྟར་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་ཚད་མེད་པ་མངའ་བ་རྣམས་ཀྱི་ཆོས་ཉིད་བྱང་ཆུབ་སེམས་དཔའི་ཆོས་ཉིད་ཀྱིས་འཇལ་བ་ནི་ཁྱོད་ཀྱི་ཚིག་འདི་དེ་དང་འདྲ་བར་བདག་གིས་དཔགས་སོ། །ཀྱེ་རྒྱལ་བའི་སྲས་ཇི་ལྟར་གླིང་བཞི་པའི་འཇིག་རྟེན་གྱི་ཁམས་ནས་གང་བླངས་པའི་སའི་ཁམས་ཆུང་ཟད་ལ་ལྷག་མ་ལས་ཚད་མེད་པ་དེ་བཞིན་དུ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་ཆོས་ཀྱི་སྤྲིན་འདི་ཁོ་ན་ཡང་བསྐལ་པ་གྲངས་མེད་པར་ཤིན་ཏུ་བསྟན་ཀྱང་ཕྱོགས་ཙམ་ཞིག་བསྟན་དུ་ཟད་ན། དེ་བཞིན་གཤེགས་པའི་ས་ལྟ་སྨོས་སུའང་ག་ལ་ཡོད། ཀྱེ་རྒྱལ་བའི་སྲས་ཁྱོད་ཀྱིས་ཁོང་དུ་ཆུད་པ་དང་། ཡིད་ཆེས་པར་བྱ་ན་དེ་བཞིན་གཤེགས་པ་འདི་བདག་གི་མདུན་ན་དཔང་དུ་བཞུགས་ཏེ། ཀྱེ་རྒྱལ་བའི་སྲས། གལ་ཏེ་ཕྱོགས་བཅུའི་ཕྱོགས་རེ་རེའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མུ་མེད་པའི་རྡུལ་ཤིན་ཏུ་ཕྲ་བ་ཇི་སྙེད་ཅིག་ས་འདི་ལྟ་བུ་ཐོབ་པའི་བྱང་ཆུབ་སེམས་དཔའ་རྣམས་ཀྱིས་བུ་རམ་ཤིང་གི་ཚལ་ལམ། སྨྱིག་མའི་ཚལ་ལམ། འོད་མའི་ཚལ་ལམ། ཏིལ་གྱི་ཞིང་ཐིབས་པོ་བཞིན་དུ་ཡོངས་སུ་གང་བར་གྱུར་ཀྱང་། བྱང་ཆུབ་སེམས་དཔའི་སྤྱོད་པ་མངོན་པར་བསྒྲུབ་པ་བསྐལ་པ་མུ་མེད་པར་མངོན་པར་བསྒྲུབས་པ་དེ་དག་གིས་ནི་དེ་བཞིན་
གཤེགས་པའི་ཡེ་ཤེས་སྐད་ཅིག་ཡུད་ཙམ་ཐང་ཅིག་ཏུ་བྱུང་བའི་དེ་བཞིན་གཤེགས་པའི་ཡུལ་གྱི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱའི་ཆ་དང་། བྱེ་བ་བརྒྱ་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོ་བ་ནས་གྲངས་དང་ཆ་དང་བགྲང་བ་དང་དཔེ་དང་རྒྱུ་དང་བསྒྲུན་པ་ཙམ་དུ་ཡང་ཉེ་བར་མི་འགྲོའོ། །ཀྱེ་རྒྱལ་བའི་སྲས་དེ་ལྟར་ཡེ་ཤེས་དེ་ལྟ་བུ་དང་ལྡན་པའི་བྱང་ཆུབ་སེམས་དཔའ་དེ་བཞིན་གཤེགས་པའི་སྐུ་དང་གསུང་དང་ཐུགས་དང་གཉིས་སུ་མེད་པ་ནི། བྱང་ཆུབ་སེམས་དཔའི་ཏིང་ངེ་འཛིན་གྱི་སྟོབས་ཀྱང་ཡོངས་སུ་མི་གཏོང་ལ་སངས་རྒྱས་བལྟ་བ་དང་། མཆོད་པ་དང་། རིམ་གྲོ་ཡང་རབ་ཏུ་བྱེད་དེ། བསྐལ་པ་རེ་རེ་ལ་ཡང་དེ་བཞིན་གཤེགས་པ་མཐའ་ཡས་པ་ལ་མཆོད་པ་རྣམ་པ་ཐམས་ཅད་དུ་མངོན་པར་བསྒྲུབས་པའི་མཆོད་པ་རྒྱ་ཆེན་པོའི་རྗེས་སུ་སོང་བས་མཆོད་པ་བྱེད་དོ། །སངས་རྒྱས་བཅོམ་ལྡན་འདས་དེ་དག་གི་བྱིན་གྱི་རླབས་ཀྱི་སྣང་བ་ཡང་ཡང་དག་པར་འཛིན་ཏོ། །དེ་ནི་སྔོན་བས་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་བརྒྱ་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་ཕྲག་དུ་མ་དང་། བསྐལ་པ་ཁྲག་ཁྲིག་སྟོང་ཕྲག་དུ་མ་དང་། བསྐལ་པ་ཁྲག་ཁྲིག་བརྒྱ་སྟོང་ཕྲག་དུ་མ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ཆོས་ཀྱི་དབྱིངས་ཡོངས་སུ་དྲིས་པ་ཤིན་ཏུ་བསྟན་པས་མི་འཕྲོགས་པར་གནས་སོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། ལྷ་རྫས་ཀྱི་རྒྱན་གྱི་རྣམ་པ་མགར་བས་མ་བརྡུངས་པ་རིན་པོ་ཆེའི་དམ་པས་སྤྲས་པ། ལྷའི་རྒྱལ་པོ་དབང་བསྒྱུར་གྱི་ཡན་ལག་གི་དམ་པ་མགོའམ་མགུལ་དུ་བཏགས་ན། དེ་མ་ཡིན་པའི་ལྷ་དང་མྱིའི་རྒྱན་གྱི་རྣམ་པ་གཞན་གྱིས་མི་འཕྲོགས་ཤིང་མི་ཐུབ་པ་ཡིན།
ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའ་ས་བཅུ་པ་ཆོས་ཀྱི་སྤྲིན་འདི་ཐོབ་པའི་བྱང་ཆུབ་སེམས་དཔའི་ཡེ་ཤེས་ཀྱི་རྒྱུད་དེ་དག་ཀྱང་སེམས་ཅན་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའི་ས་དང་པོ་ཉེ་བར་བཟུང་བ་ཡན་ཅད་བྱང་ཆུབ་སེམས་དཔའི་ས་དགུ་པ་ཐོབ་པའི་བར་གྱི། བྱང་ཆུབ་སེམས་དཔའ་རྣམས་ཀྱིས་ཀྱང་མི་འཕྲོགས་པ་ཡིན། བྱང་ཆུབ་སེམས་དཔའི་ས་འདི་ལ་གནས་པའི་ཡེ་ཤེས་སྣང་བ་ནི་སེམས་ཅན་རྣམས་ཐམས་ཅད་མཁྱེན་པའི་ཡེ་ཤེས་ལ་གཟུད་པའི་རྒྱུ་ཡིན་ཏེ། དེ་མ་ཡིན་པའི་ཡེ་ཤེས་སྣང་བ་གཞན་གྱིས་མི་འཕྲོགས་སོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ལྷའི་རྒྱལ་པོ་དབང་ཕྱུག་ཆེན་པོའི་འོད་ཀྱིས་ནི་སྐྱེ་བའི་སྐྱེ་མཆེད་ཐམས་ཅད་དུའང་ཁྱབ་ལ་སེམས་ཅན་རྣམས་ཀྱི་ལུས་ཀྱང་སིམ་པར་བྱེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའ་ས་བཅུ་པ་འདི་ལ་གནས་པའི་བྱང་ཆུབ་སེམས་དཔའི་ཡེ་ཤེས་སྣང་བ་ཡང་ཉན་ཐོས་དང་། རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའི་ས་དང་པོ་ལ་ཉེ་བར་བཟུང་བ་ཡན་ཅད་བྱང་ཆུབ་སེམས་དཔའི་ས་དགུ་པ་ལ་གནས་པའི་བར་གྱི་བྱང་ཆུབ་སེམས་དཔའ་རྣམས་ཀྱིས་ཀྱང་མི་འཕྲོགས་པ་ཡིན། ཐམས་ཅད་མཁྱེན་པའི་ཡེ་ཤེས་ཀྱི་བར་གྱི་ཆོས་ཉིད་ལ་ཡང་སེམས་ཅན་རྣམས་རབ་ཏུ་གཞོག་གོ །ཀྱེ་རྒྱལ་བའི་སྲས་བྱང་ཆུབ་སེམས་དཔའི་ཡེ་ཤེས་དེ་ལྟ་བུ་དང་ལྡན་པ་ལ་ནི། སངས་རྒྱས་བཅོམ་ལྡན་འདས་རྣམས་ཀྱིས་དུས་གསུམ་གྱི་ཡེ་ཤེས་ཡང་དག་པར་སྟོན་ཏོ། །ཆོས་ཀྱི་དབྱིངས་རབ་ཏུ་ཕྱེ་བའི་ཡེ་ཤེས་དང་། འཇིག་རྟེན་གྱི་ཁམས་ཐམས་ཅད་རྒྱས་པར་དགང་བ་དང་། འཇིག་རྟེན་གྱི་ཁམས་ཐམས་ཅད་དུ་སྣང་བར་བྱིན་གྱིས་བརླབ་པ་དང་། སེམས་ཅན་ཐམས་ཅད་དང་ཞིང་གི་ཆོས་ཡོངས་སུ་ཤེས་པར་བྱ་བ་དང་། སེམས་ཅན་ཐམས་ཅད་ཀྱི་སེམས་དང་། སྤྱོད་པ་ལ་
འཇུག་པའི་ཡེ་ཤེས་ནས་མདོར་བསྡུ་ན། ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་བར་དུ་ཡང་དག་པར་བསྟན་ཏོ། །དེའི་ཕ་རོལ་ཏུ་ཕྱིན་པ་བཅུ་ལས་ཡེ་ཤེས་ཀྱི་ཕ་རོལ་ཏུ་ཕྱིན་པའི་ཤས་ཆེ་བ་ཡིན་ཏེ། ཀྱེ་རྒྱལ་བའི་སྲས་འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་སྤྲིན་ཅེས་བྱ་བ། བྱང་ཆུབ་སེམས་དཔའི་ས་བཅུ་པ་མདོར་བསྟན་པའོ། །རྒྱ་ཆེར་ནི་བསྐལ་པ་གྲངས་མྱེད་པ་མུ་མྱེད་པས་བསྟན་པའི་མཐར་ཐུག་པར་ཤེས་པར་བྱའོ། །དེ་ལ་གནས་པའི་བྱང་ཆུབ་སེམས་དཔའ་ནི་ཕལ་ཆེར་ལྷའི་རྒྱལ་པོ་དབང་ཕྱུག་ཆེན་པོར་འགྱུར་ཏེ། སེམས་ཅན་རྣམས་ལ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་བསྟན་པ་ལ་མཁས་ཤིང་མཐུ་ཡོད་པ་ཡིན། ཆོས་ཀྱི་དབྱིངས་རྣམ་པར་ཕྱེ་བ་ཡོངས་སུ་དྲིས་པ་བསྟན་པས་མི་འཕྲོགས་པ་ཡིན། སྦྱིན་པའམ། ངག་སྙན་པའམ། དོན་བསྒྲུབ་པའམ། དོན་མཐུན་པས་དགེ་བའི་རྩ་བ་གང་ཅི་རྩོམ་ཡང་རུང་སྟེ། དེ་ཐམས་ཅད་ཇི་ལྟར་ན་སེམས་ཅན་ཐམས་ཅད་ཀྱི་མཆོག་ཏུ་འགྱུར། གཙོ་བོར་འགྱུར། ཐུ་བོར་འགྱུར། ཕུལ་དུ་འགྱུར། དམ་པར་འགྱུར། བླ་ན་མེད་པར་འགྱུར། འདྲེན་པར་འགྱུར། ཡོངས་སུ་འདྲེན་པར་འགྱུར་བ་ནས། ཐམས་ཅད་མཁྱེན་པའི་ཡེ་ཤེས་ལ་རྟེན་པའི་བར་དུ་འགྱུར་སྙམ་སྟེ། སངས་རྒྱས་ཡིད་ལ་བྱ་བ་དང་། ཆོས་ཡིད་ལ་བྱ་བ་དང་། དགེ་འདུན་ཡིད་ལ་བྱ་བ་དང་། བྱང་ཆུབ་སེམས་དཔའ་ཡིད་ལ་བྱ་བ་དང་། བྱང་ཆུབ་སེམས་དཔའི་སྤྱོད་པ་ཡིད་ལ་བྱ་བ་དང་། བྱང་ཆུབ་སེམས་དཔའི་ས་ཡིད་ལ་བྱ་བ་དང་། ཕ་རོལ་ཏུ་ཕྱིན་པ་ཡིད་ལ་བྱ་བ་དང་། སྟོབས་ཡིད་ལ་བྱ་བ་དང་། མི་
འཇིགས་པ་ཡིད་ལ་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་ཡིད་ལ་བྱ་བ་ནས་རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡིད་ལ་བྱ་བ་དང་། མི་འབྲལ་བ་ཡིན་ཏེ། དེ་འདོད་ན་སྐད་ཅིག་ཡུད་ཙམ་ཐང་ཅིག་ཏུ་ཏིང་ངེ་འཛིན་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་འཐོབ་ཅིང་དེ་དག་ལ་སྙོམས་པར་འཇུག་པ་དང་། སངས་རྒྱས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་མཐོང་བ་དང་། དེ་དག་གི་བྱིན་གྱི་རླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སྐྱོད་པ་དང་། སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དུ་འགྲོ་བ་དང་། འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སྣང་བར་བྱ་བ་དང་། སེམས་ཅན་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྨིན་པར་བྱ་བ་དང་། བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དུ་གནས་པར་བྱ་བ་དང་། སྔོན་གྱི་མཐའ་དང་ཕྱི་མའི་མཐའི་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ལ་རབ་ཏུ་འཇུག་པ་དང་། ཆོས་ཀྱི་སྒོ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རྣམ་པར་དབྱེ་བར་བྱ་བ་དང་། ལུས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་བསྟན་པ་དང་། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡང་དག་པར་བསྟན་པའི་བརྩོན་འགྲུས་ཀྱི་རྣམ་པ་དེ་ལྟ་བུ་རྩོམ་མོ། །དེ་ཡན་ཅད་བྱང་ཆུབ་སེམས་དཔའི་སྨོན་ལམ་གྱི་མཐུ་
ཅན་རྣམས་སྨོན་ལམ་གྱི་ཁྱད་པར་གྱིས་རྣམ་པར་འཕྲུལ་ཏེ། དེ་དག་གི་ལུས་སམ་འོད་དམ། རྫུ་འཕྲུལ་ལམ། མིག་གམ་སྤྱོད་ཡུལ་ལམ། དབྱངས་སམ་སྤྱོད་པའམ། རྒྱན་ཏམ། བྱིན་གྱི་རླབས་སམ། མོས་པའམ། མངོན་པར་འདུ་བྱེད་པ་དག་ཀྱང་བསྐལ་པ་དུ་མ་དང་། བསྐལ་པ་བརྒྱ་ཕྲག་དུ་མ་དང་། བསྐལ་པ་སྟོང་ཕྲག་དུ་མ་དང་། བསྐལ་པ་བརྒྱ་སྟོང་ཕྲག་དུ་མའི་བར་གྱིས་ཀྱང་བགྲང་བར་དཀའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་བཅུ་པོ་དེ་དག་ནི་རིམ་གྱིས་མངོན་དུ་གཞོལ་བས། ཐམས་ཅད་མཁྱེན་པའི་ཡེ་ཤེས་ལ་རྣམ་པ་ཐམས་ཅད་དུ་རྗེས་སུ་སོང་བར་བལྟའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། མཚོ་ཆེན་པོ་མ་དྲོས་པ་ལས་བྱུང་བའི་འབབ་ཆུ་ནི་ཆུ་ཀླུང་ཆེན་པོའི་རྒྱུད་ཀྱི་སྒོ་བཞིས་འཛམ་བུའི་གླིང་ཡོངས་སུ་ངོམས་པར་བྱས་ནས་མི་ཟད་པར་བྱས་ཏེ། གོང་དུ་རྣམ་པར་འཕེལ་བ་དང་། རྒྱ་མཚོ་ཆེན་པོའི་བར་དུ་ཞེན་པར་འགྱུར་ཏེ། ཆུ་དེ་ནི་ཐོག་མ་ནས་ཀྱང་རྒྱ་མཚོ་ཆེན་པོ་ལ་མངོན་པར་གཞོལ་བ་ཡིན་ཏེ། ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་ཀྱི་སེམས་ལས་བྱུང་བའི་དགེ་བའི་རྩ་བའི་ཆུ་འབབ་པ་ཡང་སྨོན་ལམ་ཆེན་པོའི་ཆུ་ཀླུང་གི་རྒྱུན་གྱི་སྒོ་ནས་བསྡུ་བའི་དངོས་པོ་བཞིས་སེམས་ཅན་གྱི་ཁམས་ངོམས་པར་བྱས་ཏེ། མི་ཟད་པར་བྱས་ནས་གོང་དུ་རྣམ་པར་འཕེལ་བ་དང་། རྣམ་པ་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་ཀྱི་བར་གྱི་རྒྱ་མཚོ་ཆེན་པོ་ལ་ཞེན་པར་འགྱུར་ཏེ། དགེ་བའི་རྩ་བའི་ཆུ་དེ་ནི་ཐོག་མ་ནས་ཀྱང་ཐམས་ཅད་མཁྱེན་པ་ཉིད་ཀྱི་རྒྱ་མཚོ་ཆེན་པོ་ལ་མངོན་པར་གཞོལ་བ་ཡིན། ཀྱེ་རྒྱལ་བའི་སྲས། བྱང་ཆུབ་སེམས་དཔའི་ས་བཅུ་པོ་དེ་དག་ནི་སངས་རྒྱས་ཀྱི་ཡེ་ཤེས་ཀྱི་གཞི་ལས་ཡོད་པར་འགྱུར་ཏེ། ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ས་ཆེན་པོའི་གཞི་ལས་རིའི་རྒྱལ་པོ་ཆེན་པོ་བཅུ་ཡོད་པར་
གྱུར་པ་འདི་ལྟ་སྟེ། རིའི་རྒྱལ་པོ་ཆེན་པོ་ཁ་བ་ཅན་དང་། རིའི་རྒྱལ་པོ་ཆེན་པོ་སྤོས་ངད་ཅན་དང་། རིའི་རྒྱལ་པོ་ཆེན་པོ་རྣམ་པར་འདལ་བ་དང་། རིའི་རྒྱལ་པོ་ཆེན་པོ་དྲང་སྲོང་རི་དང་། རིའི་རྒྱལ་པོ་ཆེན་པོ་གཉའ་ཤིང་འཛིན་དང་། རིའི་རྒྱལ་པོ་ཆེན་པོ་རྟ་རྣ་རི་དང་། རིའི་རྒྱལ་པོ་ཆེན་པོ་ས་འཛིན་དང་། རིའི་རྒྱལ་པོ་ཆེན་པོ་ཁོར་ཡུག་དང་། རིའི་རྒྱལ་པོ་ཆེན་པོ་དཔལ་ཆེན་དང་། རིའི་རྒྱལ་པོ་ཆེན་པོ་རི་རབ་བོ། །ཀྱེ་རྒྱལ་བའི་སྲས་དེ་ལ་འདི་ལྟ་སྟེ་དཔེར་ན། རིའི་རྒྱལ་པོ་ཆེན་པོ་ཁ་བ་ཅན་ནི་སྨན་གྱི་རྣམ་པ་ཐམས་ཅད་ཀྱི་འབྱུང་གནས་ཏེ། སྨན་སྣ་ཚོགས་ཐམས་ཅད་བླངས་པས་མཐར་ཐུག་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་རབ་ཏུ་དགའ་བ་ལ་གནས་པའི་བྱང་ཆུབ་སེམས་དཔའ་ཡང་འཇིག་རྟེན་པའི་གཙུག་ལག་དང་། ཚིག་དང་སྔགས་དང་། རིག་པའི་གནས་ཀྱི་འབྱུང་གནས་ཡིན་ཏེ། འཇིག་རྟེན་པའི་གཙུག་ལག་དང་ཚིག་དང་སྔགས་དང་། རིག་པའི་གནས་བསྟན་པས་མཐར་ཐུག་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་སྤོས་ཀྱི་ངད་ཅན་ནི། སྤོས་ཀྱི་རྣམ་པ་ཐམས་ཅད་ཀྱི་འབྱུང་གནས་ཡིན་ཏེ། སྤོས་ཀྱི་རྣམ་པ་སྣ་ཚོགས་བླངས་པས་མཐར་ཐུག་པ་མེད་དོ། །ཀྱེ་རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་དྲི་མ་དང་བྲལ་བ་ལ་གནས་པའི་བྱང་ཆུབ་སེམས་དཔའ་འང་བྱང་ཆུབ་སེམས་དཔའི་ཚུལ་ཁྲིམས་དང་། སྡོམ་པ་དང་ཚུལ་ཐམས་ཅད་ཀྱི་འབྱུང་གནས་ཡིན་ཏེ། བྱང་ཆུབ་སེམས་དཔའི་ཚུལ་ཁྲིམས་དང་སྡོམ་པ་དང་། ཚུལ་རྣམ་པ་སྣ་ཚོགས་ཀྱི་སྤོས་ཀྱི་མཐར་ཐུག་པ་མེད་དོ། །ཀྱེ་རྒྱལ་བའི་སྲས། འདི་ལྟ་སྟེ་དཔེར་ན། རིའི་རྒྱལ་པོ་རྣམ་པར་འདལ་བ་ནི། རིན་པོ་ཆེའི་རང་བཞིན་ཤིན་ཏུ་དག་པ། རིན་པོ་ཆེའི་རྣམ་པ་ཐམས་ཅད་ཀྱི་འབྱུང་གནས་ཡིན་ཏེ། རིན་པོ་ཆེ་རྣམ་པ་སྣ་ཚོགས་ཐམས་ཅད་བླངས་
པས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་འོད་བྱེད་པ་ལ་གནས་པའི་བྱང་ཆུབ་སེམས་དཔའ་ཡང་འཇིག་རྟེན་པའི་བསམ་གཏན་དང་། མངོན་པར་ཤེས་པ་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་ཀྱི་འབྱུང་གནས་ཡིན་ཏེ། འཇིག་རྟེན་པའི་བསམ་གཏན་དང་། མངོན་པར་ཤེས་པ་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ། དཔེར་ན། རིའི་རྒྱལ་པོ་ཆེན་པོ་དྲང་སྲོང་རི་ནི་རིན་པོ་ཆེའི་རང་བཞིན་རྣམ་པར་དག་པ་དྲང་སྲོང་མངོན་པར་ཤེས་པ་ལྔ་དང་ལྡན་པའི་འབྱུང་གནས་ཏེ། མངོན་པར་ཤེས་པ་ལྔ་དང་ལྡན་པའི་དྲང་སྲོང་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི་ས་འོད་འཕྲོ་བ་ཅན་ལ་གནས་པའི་བྱང་ཆུབ་སེམས་དཔའ་ཡང་ལམ་དང་ལམ་མ་ཡིན་པའི་ཁྱད་པར་དང་། བྱེ་བྲག་ཤེས་པ་ཐམས་ཅད་ཀྱི་འབྱུང་གནས་ཡིན་ཏེ། ལམ་དང་ལམ་མ་ཡིན་པའི་ཁྱད་པར་དང་བྱེ་བྲག་གི་རྒྱུས་ཡོངས་སུ་དྲིས་པ་ཡོངས་སུ་བསྟན་པས་ཟད་པར་མི་འགྱུར་རོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་ཆེན་པོ་གཉའ་ཤིང་འཛིན་ནི་རིན་པོ་ཆེའི་རང་བཞིན་རྣམ་པར་དག་པ་གནོད་སྦྱིན་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་གནས་ཡིན་ཏེ། གནོད་སྦྱིན་རྫུ་འཕྲུལ་ཆེན་པོ་ཅན་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་ལ་གནས་པའི་བྱང་ཆུབ་སེམས་དཔའ་ཡང་མངོན་པར་ཤེས་པ་དང་། རྗུ་འཕྲུལ་དང་རྣམ་པར་འཕྲུལ་པ་དང་། ཆོ་འཕྲུལ་ཐམས་ཅད་ཀྱི་འབྱུང་གནས་ཡིན་ཏེ། མངོན་པར་ཤེས་པ་དང་། རྫུ་འཕྲུལ་དང་རྣམ་པར་འཕྲུལ་པ་དང་། ཆོ་འཕྲུལ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་
དཔེར་ན། རིའི་རྒྱལ་པོ་ཆེན་པོ་རྟ་རྣ་རི་ནི་རིན་པོ་ཆེའི་རང་བཞིན་རྣམ་པར་དག་པ། ཤིང་ཏོག་གི་རྣམ་པ་ཐམས་ཅད་ཀྱི་འབྱུང་གནས་ཏེ། ཤིང་ཏོག་གི་རྣམ་པ་སྣ་ཚོགས་ཐམས་ཅད་བླངས་པས་ཟད་པར་མི་འགྱུར་རོ། །ཀྱེ་རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའི། ས་མངོན་སུམ་ལ་གནས་པའི། བྱང་ཆུབ་སེམས་དཔའ་ཡང་རྟེན་ཅིང་འབྲེལ་པར་འབྱུང་བ་ལ་འཇུག་པ་ཤིན་ཏུ་བསྟན་པའི་འབྱུང་གནས་ཡིན་ཏེ། ཉན་ཐོས་ཀྱི་འབྲས་བུ་མངོན་པར་ཁོང་དུ་ཆུད་པར་བྱ་བ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་ཆེན་པོ་ས་འཛིན་ནི་རིན་པོ་ཆེའི་རང་བཞིན་རྣམ་པར་དག་པ། ཀླུ་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་གནས་ཏེ། ཀླུ་རྫུ་འཕྲུལ་ཆེན་པོ་ཅན་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ། བྱང་ཆུབ་སེམས་དཔའི་ས་རིང་དུ་སོང་བ་ལ་གནས་པའི་བྱང་ཆུབ་སེམས་དཔའ་ཡང་ཐབས་དང་ཤེས་རབ་ཤིན་ཏུ་བསྟན་པའི་འབྱུང་གནས་ཡིན་ཏེ། རང་སངས་རྒྱས་ཀྱི་འབྲས་བུ་མངོན་པར་ཁོང་དུ་ཆུད་པར་བྱ་བ་ཡོངས་སུ་དྲིས་པ། བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་ཆེན་པོ་ཁོར་ཡུག་ནི་རིན་པོ་ཆེ་ཆེན་པོའི་རང་བཞིན་རྣམ་པར་དག་པ་དབང་དུ་གྱུར་པ་རྣམས་ཀྱི་འབྱུང་གནས་ཡིན་ཏེ། དབང་དུ་གྱུར་པ་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་མི་གཡོ་བ་ལ་གནས་པའི་བྱང་ཆུབ་སེམས་དཔའ་ཡང་། བྱང་ཆུབ་སེམས་དཔའི་དབང་མངོན་པར་བསྒྲུབ་པ། ཡོངས་སུ་དྲིས་པ་ཤིན་ཏུ་བསྟན་པའི་འབྱུང་གནས་ཡིན་ཏེ། འཇིག་རྟེན་གྱི་ཁམས་རྣམ་པར་ཕྱེ་བ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་དཔལ་དང་ལྡན་པ་ནི་རིན་པོ་ཆེའི་རང་བཞིན་རྣམ་པར་དག་
པ་ལྷ་མ་ཡིན་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་གནས་ཡིན་ཏེ། ལྷ་མ་ཡིན་རྫུ་འཕྲུལ་ཆེན་པོ་ཅན་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་ལེགས་པའི་བློ་གྲོས་ལ་གནས་པའི་བྱང་ཆུབ་སེམས་དཔའ་ཡང་སེམས་ཅན་འབྱུང་བ་དང་། འཇིག་པ་ཤེས་པའི་རྒྱུད་ཐམས་ཅད་ཀྱི་འབྱུང་གནས་ཡིན་ཏེ། འགྲོ་བ་ཐམས་ཅད་འབྱུང་བ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རིའི་རྒྱལ་པོ་ཆེན་པོ་རི་རབ་ནི་རིན་པོ་ཆེའི་རང་བཞིན་རྣམ་པར་དག་པ་ལྷ་རྫུ་འཕྲུལ་ཆེན་པོ་དང་ལྡན་པ་རྣམས་ཀྱི་འབྱུང་གནས་ཡིན་ཏེ། ལྷ་རྫུ་འཕྲུལ་ཆེན་པོ་ཅན་བགྲངས་པས་ཟད་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔའ་ཡང་དེ་བཞིན་གཤེགས་པའི་སྟོབས་དང་། མྱི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་རྣམས་ཀྱི་འབྱུང་གནས་ཡིན་ཏེ། སངས་རྒྱས་ཀྱི་འཕྲིན་ལས་ཡང་དག་པར་བསྟན་པ་ཡོངས་སུ་དྲིས་པ་བསྟན་པས་ཟད་པ་མེད་དོ། །ཀྱེ་རྒྱལ་བའི་སྲས་ཇི་ལྟར་རིན་པོ་ཆེའི་རི་ཆེན་པོ་དེ་དག་རྒྱ་མཚོ་ཆེན་པོ་ལས་བྱུང་ཞིང་རྒྱ་མཚོ་ཆེན་པོ་ལས་སྨོས་པ་དེ་བཞིན་དུ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ས་བཅུ་པོ་འདི་དག་ཀྱང་ཐམས་ཅད་མཁྱེན་པ་ཉིད་ལས་བྱུང་ངོ་། །ཐམས་ཅད་མཁྱེན་པ་ཉིད་ལས་སྨོས་པའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རྒྱ་མཚོ་ཆེན་པོ་ནི་རྣམ་པ་བཅུས་མི་འཕྲོགས་པའི་ཕྱིར་རྒྱ་མཚོའི་གྲངས་སུ་འགྲོ་སྟེ། བཅུ་གང་ཞེ་ན་འདི་ལྟ་སྟེ། རིམ་གྱིས་གཞོལ་བ་དང་། ཤི་བའི་རོ་དང་མྱི་འགོགས་པ་དང་། ཆུ་གཞན་གྱི་གྲངས་ཡོངས་སུ་སྤངས་པ་དང་། རོ་གཅིག་པ་དང་། རིན་པོ་ཆེ་མང་བ་དང་། ཟབ་ཅིང་གཏིང་རིང་བ་དང་། ཡངས་ཤིང་ཚད་མེད་པ་དང་། འབྱུང་པོ་མང་པོའི་གནས་སུ་གྱུར་པ་དང་། དབྲེས་ཀྱི་ཚུལ་ལས་མི་འདའ་བ་དང་། སྤྲིན་ཆེན་པོའི་ཆར་ཐམས་ཅད་ཡོངས་སུ་
འཛིན་པས་མི་ངོམས་པའོ། །ཀྱེ་རྒྱལ་བའི་སྲས། དེ་བཞིན་དུ་བྱང་ཆུབ་སེམས་དཔའ་ཡང་སྤྱོད་པའི་རྣམ་པ་བཅུས་མི་འཕྲོགས་པའི་གྲངས་སུ་འགྲོའོ། །བཅུ་གང་ཞེ་ན་འདི་ལྟ་སྟེ། བྱང་ཆུབ་སེམས་དཔའི་ས་རབ་ཏུ་དགའ་བ་ལ་སྨོན་ལམ་ཆེན་པོ་རིམ་གྱིས་མངོན་པར་བསྒྲུབས་པས་གཞོལ་བ་དང་བྱང་ཆུབ་སེམས་དཔའི་ས་དྲི་མ་དང་བྲལ་བ་ལ་ཚུལ་ཁྲིམས་ངན་པའི་རོ་དང་མི་འགྲོགས་པ་དང་། བྱང་ཆུབ་སེམས་དཔའི་ས་འོད་བྱེད་པ་ལ་འཇིག་རྟེན་པ་རྣམ་པར་གདགས་པའི་གྲངས་ཡོངས་སུ་སྤངས་པ་དང་། བྱང་ཆུབ་སེམས་དཔའི་ས་འོད་འཕྲོ་བ་ཅན་ལ། སངས་རྒྱས་ལ་མོས་པ་མི་ཕྱེད་པའི་རོ་གཅིག་པ་དང་། བྱང་ཆུབ་སེམས་དཔའི་ས་ཤིན་ཏུ་རྒྱལ་བར་དཀའ་བ་ལ་ཐབས་དང་མངོན་པར་ཤེས་པ་ཚད་མེད་པས་འཇིག་རྟེན་གྱི་བྱ་བ་མངོན་པར་བསྒྲུབས་པའི་རིན་པོ་ཆེ་མང་བ་དང་། བྱང་ཆུབ་སེམས་དཔའི་ས་མངོན་སུམ་ལ་རྟེན་ཅིང་འབྲེལ་པར་འབྱུང་བ་རབ་ཏུ་བརྟགས་པས་ཤིན་ཏུ་ཟབ་པ་དང་། བྱང་ཆུབ་སེམས་དཔའི་ས་རིང་དུ་སོང་བ་ལ་བློ་དང་རྣམ་པར་འབྱེད་པ་དང་། མཁས་པ་ཡངས་ཤིང་ཚད་མེད་པ་དང་། བྱང་ཆུབ་སེམས་དཔའི་ས་མི་གཡོ་བ་ལ་རྒྱན་ཆེན་པོ་མངོན་པར་བསྒྲུབ་པ་ཡང་དག་པར་བསྟན་པའི་འབྱུང་པོ་མང་པོ་གནས་པ་དང་། བྱང་ཆུབ་སེམས་དཔའི་ས་ལེགས་པའི་བློ་གྲོས་ལ་རྣམ་པར་ཐར་པ་ཐབ་མོ་དང་། འགྲོ་བ་ཐམས་ཅད་ཀྱི་སྤྱོད་པ་ཇི་ལྟ་བ་བཞིན་དུ་ཁོང་དུ་ཆུད་པའི་ཚུལ་གྱི་དབྲེས་ལས་མི་འདའ་བ་དང་། བྱང་ཆུབ་སེམས་དཔའི་ས་ཆོས་ཀྱི་སྤྲིན་ལ་དེ་བཞིན་གཤེགས་པ་ཐམས་ཅད་ཀྱི་ཆོས་སྣང་བའི་སྤྲིན་ཆེན་པོའི་ཆར་ཡང་དག་པར་བཟུང་བས། མི་ངོམས་པའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ནི་རིན་པོ་ཆེའི་མཁན་པོ་མཁས་པས་ཤིན་ཏུ་བསྲེགས་ཤིན་ཏུ་བསྒྲུབས་ཤིན་ཏུ་སྦྱངས་ཤིན་ཏུ་ཡང་དག་པར་བྱས་ལེགས་པར་ཕུག །
རིན་པོ་ཆེའི་སྲད་བུས་ལེགས་པར་བཏགས། རིན་པོ་ཆེའི་བཻ་དཱུ་རྱའི་རྩ་བའི་རྒྱལ་མཚན་གྱི་རྩེ་མོ་ལ་བཞག་སྟེ། འོད་ཐམས་ཅད་འབྱུང་བར་འགྱུར་ལ་རྒྱལ་པོས་བསྔགས་པར་གྱུར་ཏེ། རིན་པོ་ཆེའི་རིགས་བཅུ་ལས་འདས་ཤིང་ཤིན་ཏུ་འཕགས་པར་གྱུར་པ་དེའི་ཚེ། སེམས་ཅན་ཐམས་ཅད་ལ་རིན་པོ་ཆེས་ཕན་གདགས་པའི་དོན་དུ་ཉེ་བར་གནས་པ་ཡིན། ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའི་ཐམས་ཅད་མཁྱེན་པ་ཉིད་ཀྱི་སེམས་རིན་པོ་ཆེ་བསྐྱེད་པ་ཡང་སྦྱངས་པའི་ཡོན་ཏན་གྱི་སྡོམ་པ་དང་ཚུལ་ཁྲིམས་དང་བརྟུལ་ཤུགས་དང་དཀའ་ཐུབ་ཀྱིས་ཤིན་ཏུ་བསྲེགས། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པས་ཤིན་ཏུ་བསྒྲུབས། ལམ་གྱི་ཡན་ལག་གི་རྣམ་པས་ཤིན་ཏུ་སྦྱངས། ཐབས་དང་མངོན་པར་ཤེས་པས་ཤིན་ཏུ་དག་པར་བྱས། རྟེན་ཅིང་འབྲེལ་པར་འབྱུང་བས་ཤིན་ཏུ་ཕུག །ཐབས་དང་ཤེས་རབ་རིན་པོ་ཆེ་སྣ་ཚོགས་ཀྱི་སྲད་བུས་ཤིན་ཏུ་བཏགས། དབང་གི་རིན་པོ་ཆེ་བཻ་དཱུ་རྱའི་ཡུ་བའི་རྒྱལ་མཚན་གྱི་རྩེ་མོ་ལ་བཞག །སེམས་ཅན་གྱི་སྤྱོད་པ་རབ་ཏུ་བརྟགས་པ་དང་། ཐོས་པའི་ཡེ་ཤེས་ཀྱི་འོད་རབ་ཏུ་འབྱུང་བར་གྱུར་ཏེ། ཆོས་ཀྱི་རྒྱལ་པོ་དེ་བཞིན་གཤེགས་པས་ཡང་དག་པར་རྫོགས་པའི་སངས་རྒྱས་ཀྱི་མངོན་པར་དབང་བསྐུར་བས་དབང་བསྐུར་བར་གྱུར་པ་དེའི་ཚེ། སེམས་ཅན་ཐམས་ཅད་ལ་སངས་རྒྱས་ཀྱི་ཕྲིན་ལས་རིན་པོ་ཆེ་ཐམས་ཅད་ཀྱིས་ཡང་དག་པར་ཕན་གདགས་པའི་དོན་དུ་ཉེ་བར་གནས་པ་ཡིན་ཏེ། དེའི་ཚེ་ཐམས་ཅད་མཁྱེན་པ་ཞེས་ཀྱང་བྱའོ། ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་སྤྱོད་པ་ཡང་དག་པར་བསྒྲུབ་ཅིང་། རྣམ་པ་ཐམས་ཅད་མཁྱེན་པའི་ཡེ་ཤེས་དང་ཡོན་ཏན་ཡང་དག་པར་བསྩགས་པའི་ཆོས་ཀྱི་སྒོའི་རྒྱུད་འདི་ནི་སེམས་ཅན་དགེ་བའི་རྩ་བ་མ་བསྐྱེད་པ་རྣམས་ཀྱི་རྣ་ལམ་དུ་གྲག་པར་མི་འགྱུར་རོ། །བྱང་ཆུབ་
སེམས་དཔའ་རྣམ་པར་གྲོལ་བའི་ཟླ་བས་སྨྲས་པ། ཀྱེ་རྒྱལ་བའི་སྲས་འོ་ན་རྣམ་པ་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་དང་ཡོན་ཏན་ཡང་དག་པར་བསྩགས་པའི་ཆོས་ཀྱི་སྒོའི་རྒྱུད་འདི་གང་གི་རྣ་ལམ་དུ་གྲག་པར་གྱུར་པ་དེ་དག་བསོད་ནམས་ཀྱི་ཚོགས་ཇི་ཙམ་ཞིག་དང་ལྡན་པར་འགྱུར། བྱང་ཆུབ་སེམས་དཔའ་རྡོ་རྗེའི་སྙིང་པོས་སྨྲས་པ། ཀྱེ་རྒྱལ་བའི་སྲས་ཐམས་ཅད་མཁྱེན་པའི་ཡེ་ཤེས་ཀྱི་མཐུ་ཇི་ཙམ་པ་དེ་སྙེད་ཀྱི་བསོད་ནམས་ཀྱི་ཚོགས་ནི་ཐམས་ཅད་མཁྱེན་པ་ཉིད་དུ་སེམས་བསྐྱེད་ཅིང་བསྒྲུབ་པར་དམིགས་པ་ལ་ཡོད་དེ། ཆོས་ཀྱི་སྒོའི་རྒྱུད་འདི་གྲག་ཅིང་མངོན་པར་གྱུར་པའི་བསོད་ནམས་ཀྱི་ཚོགས་ཀྱང་དེ་ཙམ་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་རྣམ་པ་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་དང་ཡོན་ཏན་ཡང་དག་པར་བསྩགས་པའི་ཆོས་ཀྱི་རྒྱུད་འདི་ནི་བྱང་ཆུབ་སེམས་དཔའ་མ་ཡིན་པས་མཉན་པའམ། མོས་པར་བྱ་བའམ། གཟུང་བར་ཡང་མི་ནུས་ན་བསྒོམ་པའི་རྣམ་པར་སྦྱོར་བས་བརྩོན་པར་མི་ནུས་པ་ལྟ་ཅི་སྨོས། དེ་བས་ན་ཀྱེ་རྒྱལ་བའི་སྲས་གང་གིས་ཆོས་ཀྱི་སྒོའི་རྒྱུད་འདི་ཐོས་ཏེ་ཐོས་ནས་མོས་པར་བྱེད་པ་དང་། མོས་པར་བྱས་ཤིང་འཛིན་པ་དང་། བསྒོམ་པའི་རྣམ་པས་བརྩོན་པར་བྱེད་ན། སེམས་ཅན་དེ་དག་ནི་ཐམས་ཅད་མཁྱེན་པའི་ཡེ་ཤེས་ཀྱི་སྒོ་དང་ལྡན་པར་ཤེས་པར་བྱའོ། །དེ་ནས་དེའི་ཚེ་སངས་རྒྱས་ཀྱི་མཐུ་དང་ཆོས་ཉིད་ཐོབ་པས། ཕྱོགས་བཅུར་འཇིག་རྟེན་གྱི་ཁམས་སངས་རྒྱས་ཀྱི་ཞིང་ཁྲག་ཁྲིག་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རྣམ་པ་དྲུག་དང་ལྟས་ཆེན་པོ་བཅྭ་བརྒྱད་དུ་གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ་རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ་རབ་ཏུ་ལྡེག་གོ །ཀུན་ཏུ་ལྡེག་གོ །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར་རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག་རབ་ཏུ་ཤིག་ཤིག །ཀུན་ཏུ་ཤིག་ཤིག་གོ །སངས་རྒྱས་ཀྱི་མཐུ་དང་ཆོས་ཉིད་རབ་ཏུ་ཐོབ་པས་
ལྷ་རྫས་ཀྱི་འཕྲེང་བའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་གོས་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་རིན་པོ་ཆེའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་གདུགས་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་རྒྱལ་མཚན་གྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་བ་དན་གྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ཀྱི་རོལ་མོ་བརྡུང་བ་དང་། དཀྲོལ་བ་དང་གླུའི་དབྱངས་ཀྱི་སྤྲིན་གྱི་སྒྲ་མངོན་པར་སྒྲོག་གོ །ལྷ་རྫས་ལས་འདས་པའི་ཐམས་ཅད་མཁྱེན་པའི་ས་ལ་མངོན་པར་བསྟོད་པའི་གླུའི་དབྱངས་ཀྱི་སྤྲིན་གྱི་སྒྲ་དབྱངས་མངོན་པར་སྒྲོག་གོ །ཇི་ལྟར་གླིང་བཞི་པའི་འཇིག་རྟེན་གྱི་ཁམས་འདི་གཞན་འཕྲུལ་དབང་བྱེད་ཀྱི་གནས་སུ་ལྷའི་རྒྱལ་པོ་དབང་བསྒྱུར་གྱི་གཞལ་མེད་ཁང་ནོར་བུ་རིན་པོ་ཆེའི་སྙིང་པོར་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་ཡང་ཕྱོགས་བཅུ་རྒྱས་པར་གང་ཞིང་ཆོས་བསྟན་པ་འདི་ཡང་ཐམས་ཅད་དུ་བྱུང་བར་གྱུར་ཏོ། །སངས་རྒྱས་ཀྱི་མཐུས་ཕྱོགས་བཅུ་ནས་བྱང་ཆུབ་སེམས་དཔའ་སངས་རྒྱས་ཀྱི་ཞིང་ཁྲག་ཁྲིག་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཕྱོགས་བཅུ་རྒྱས་པར་བྱེད་ཅིང་ལྷགས་ཏེ་དེ་དག་ཕྱིན་ནས་ཀྱང་འདི་སྐད་ཅེས་ཟེར་རོ། །ཀྱེ་རྒྱལ་བའི་སྲས་དེ་ལྟར་ཁྱོད་ཀྱིས་བྱང་ཆུབ་སེམས་དཔའི་ཆོས་ཉིད་འདི་བརྗོད་པ་ལེགས་སོ་ལེགས་སོ། །ཀྱེ་རྒྱལ་བའི་སྲས་བདག་ཅག་ཀྱང་རྡོ་རྗེའི་སྙིང་པོ་ཞེས་བྱ་བར་མིང་མཐུན་པ་ཤ་སྟག་སྟེ། འཇིག་རྟེན་གྱི་ཁམས་རྡོ་རྗེའི་དཔལ་ཞེས་བྱ་བ་ནས་དེ་བཞིན་གཤེགས་པ་མཚན་རྡོ་རྗེའི་རྒྱལ་མཚན་ཞེས་བྱ་བ་དག་གི་དྲུང་ནས་འདིར་ལྷགས་ཏེ། འཇིག་རྟེན་གྱི་ཁམས་དེ་དག་ཐམས་ཅད་ན་ཡང་ཆོས་བསྟན་པ་འདི་ཉིད་སངས་རྒྱས་ཀྱི་མཐུས་འཁོར་གྱི་རྣམ་པ་འདི་འདྲ་བ་དག་ལ་ཚིག་འདི་དག་ཉིད་དང་ཡི་གེ་འདི་དག་ཉིད་དང་ཁོང་དུ་ཆུད་པར་བྱ་བ་འདི་དག་ཉིད་དང་། དོན་འདི་ཉིད་ལྷག་ཆད་མེད་པར་མངོན་པར་བརྗོད་དེ་འབྱུང་བར་གྱུར་ཏོ། །
ཀྱེ་རྒྱལ་བའི་སྲས་བདག་ཅག་ཀྱང་དབང་དུ་གྱུར་པ་ཤ་སྟག །སངས་རྒྱས་ཀྱི་མཐུས་འཁོར་འདིར་ཕྱིན་ཏོ། །ཀྱེ་རྒྱལ་བའི་སྲས་འཇིག་རྟེན་གྱི་ཁམས་འདིར་བདག་ཅག་ཇི་ལྟར་ཕྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པའི་འཇིག་རྟེན་གྱི་ཁམས་རེ་རེའི་གཞན་འཕྲུལ་དབང་བྱེད་ཀྱི་གནས་ཀྱི་ལྷའི་རྒྱལ་པོ་དབང་བསྒྱུར་གྱི་གཞལ་མེད་ཁང་ནོར་བུ་རིན་པོ་ཆེའི་སྙིང་པོར་ཡང་སངས་རྒྱས་ཀྱི་ཞིང་ཁྲག་ཁྲིག་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་རྣམས་ཕྱིན་པར་གྱུར་ཏོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས། ཕྱོགས་བཅུར་བལྟས་ཏེ་འཁོར་གྱི་དཀྱིལ་འཁོར་ཐམས་ཅད་ལ་བལྟས་ནས། ཆོས་ཀྱི་དབྱིངས་ལ་རྣམ་པར་བལྟ་བ་དང་། ཐམས་ཅད་མཁྱེན་པའི་ཡེ་ཤེས་ཀྱི་སེམས་བསྐྱེད་པ་ཡང་དག་པར་བརྗོད་པ་དང་། བྱང་ཆུབ་སེམས་དཔའི་ཡུལ་ཡང་དག་པར་བསྟན་པ་དང་། སྤྱོད་པའི་སྟོབས་ཡོངས་སུ་སྦྱངས་པ་དང་། རྣམ་པ་ཐམས་ཅད་མཁྱེན་པ་ཡང་དག་པར་བསྒྲུབ་པ་བརྗོད་པ་དང་། འཇིག་རྟེན་གྱི་དྲི་མ་སེལ་བ་དང་། ཐམས་ཅད་མཁྱེན་པའི་ཡེ་ཤེས་ཉེ་བར་བསྒྲུབ་པ་དང་། བསམ་གྱིས་མི་ཁྱབ་པའི་ཡེ་ཤེས་ཀྱི་རྒྱན་ཡོངས་སུ་བསྟན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཡོན་ཏན་རབ་ཏུ་བརྗོད་པ་བྱེད་ཅིང་སའི་དོན་འདི་ཡང་བརྟག་པར་བྱ་བ་དང་། བསྟན་པའི་ཕྱིར་སངས་རྒྱས་ཀྱི་མཐུས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞི་དང་དུལ་དགའ་ཞི་ཞིང་དུལ་བའི་ཡིད་ལྡན་ལ། །ནམ་མཁའི་དབྱིངས་འདྲ་བར་སྣང་མཁའ་དང་མཚུངས་འདྲ་ཞིང་། །ཐ་བའི་དྲི་མ་རྣམ་སྦྱངས་ལམ་རྣམས་ཤེས་གནས་པའི། །བྱང་ཆུབ་སེམས་དཔའི་སྤྱོད་པའི་ཁྱད་པར་རབ་ལ་ཉོན། །བསྐལ་པ་བྱེ་བར་དགེ་བ་བརྒྱ་སྟོང་རབ་བསགས་ཤིང་། །སངས་རྒྱས་བརྒྱ་སྟོང་དྲང་སྲོང་ཆེན་པོ་མཆོད་བྱས་ཏེ། །དབང་བསྒྱུར་རྣམས་དང་རང་རྒྱལ་མཐའ་ཡས་མཆོད་བྱས་ནས། །འགྲོ་བ་ཀུན་ལ་
ཕན་ཕྱིར་བྱང་ཆུབ་སེམས་སྐྱེའོ། །བརྟུལ་ཞུགས་དཀའ་ཐུབ་དཀའ་སྤྱད་དུལ་བཟོད་ལྡན་གྱུར་ལ། །ཁྲེལ་ཡོད་དཔལ་གྱིས་སྤྱོད་ལྡན་ཡེ་ཤེས་དགེ་འཕགས་ཤིང་། །བློ་གྲོས་རིག་ཡངས་སངས་རྒྱས་ཡེ་ཤེས་སེམས་ལྡན་གྱི། །བྱང་ཆུབ་སེམས་རབ་རྒྱལ་བའི་སྟོབས་དང་མཉམ་འདྲ་སྐྱེ། །དུས་གསུམ་རྒྱལ་བ་ཇི་སྙེད་མཆོད་རབ་མཆོད་པའི་ཕྱིར། །ནམ་མཁའི་དབྱིངས་ཚད་ཞིང་རྣམས་ཐམས་ཅད་ཡོངས་སུ་སྦྱོང་། །ཆོས་རྣམས་ཐམས་ཅད་ཇི་སྙེད་དེ་དག་མཉམ་རྟོགས་པས། །འགྲོ་བ་དགྲོལ་བའི་དོན་དུ་བྱང་ཆུབ་སེམས་སྐྱེའོ། །གཞལ་ཡས་སེམས་སྐྱེས་ས་མཆོག་རབ་ཏུ་ཐོབ་གྱུར་ནས། །སྡིག་པ་ཐམས་ཅད་བསལ་ཕྱིར་རྡུལ་མེད་རབ་ཏུ་དགའ། །སྨོན་ལམ་སྟོབས་དཔྱད་དཀར་ཆོས་ཡང་དག་བསྩགས་བྱས་ནས། །སྙིང་རྗེ་བརྩེ་ལྡན་ས་ཡི་གོང་མ་ཡོངས་སུ་གནོན། །འགྲོ་ཕྱིར་བྱམས་སེམས་ཚུལ་ཁྲིམས་ཐོས་དང་ཡོན་ཏན་ལྡན། །དྲི་མེད་དྲི་བྲལ་རང་བཞིན་ཡང་དག་བསམ་པ་ཡིས། ། འཇིག་རྟེན་ཐམས་ཅད་མེ་གསུམ་འབར་བར་མཐོང་གྱུར་ནས། །གསུམ་པ་རྣམ་ཡངས་བློ་ཡིས་འགྲོ་བའི་དོན་དུ་གནོན། །སྡུག་བསྔལ་མི་རྟག་ནད་པ་ཟུག་རྔུས་མི་བདེ་བའི། །ཁམས་གསུམ་རྟག་ཏུ་སྡུག་བསྔལ་བརྒྱ་ཡི་མེ་འབར་བས། །འདུས་བྱས་ཉེས་མཐོང་རྒྱལ་བའི་ལེགས་པ་མངོན་མོས་ཤིང་། །ཡེ་ཤེས་འོད་འཕྲོ་ཡངས་ལྡན་འོད་འཕྲོ་ཡོད་པ་གནོན། །དྲན་དང་བློ་ལྡན་ལམ་གྱི་ཡེ་ཤེས་ཐོབ་གྱུར་ཅིང་། །ས་མཆོག་དེ་ལ་སངས་རྒྱས་བརྒྱ་སྟོང་བསྙེན་བཀུར་ནས། །མི་ཡི་གཙོ་བོའི་ཡོན་ཏན་རྟག་ཏུ་དྲན་བྱེད་ཅིང་། །འགྲོ་བ་ཀུན་གྱིས་ཐུབ་དཀའ་རྒྱལ་བར་དཀའ་བ་གནོན། །ཡེ་ཤེས་བློ་གྲོས་ཐབས་དང་ཤེས་རབ་བློ་དཔྱོད་པས། །འགྲོ་དོན་མཐའ་ཡས་སྣ་ཚོགས་བྱ་བ་བསྟེན་བྱས་ཤིང་། །སྟོབས་བཅུ་མཆོད་པ་སེམས་ཅན་དོན་རྣམས་བསྒྲུབས་བྱས་ཏེ། །མི་སྐྱེ་མངོན་སུམ་མཐའ་ཡས་ས་དྲུག་ཡོངས་སུ་གནོན། །འཇིག་
རྟེན་ཀུན་ཏུ་འགྲོ་བས་ཤེས་དཀའ་སྤྱོད་བྱེད་ཅིང་། །བདག་བྲལ་བྱེད་མེད་ཡོད་དང་མེད་པ་རྣམ་བསྩལ་བའི། །རང་བཞིན་སྟོང་ཆོས་ཡན་ལག་བཅུ་གཉིས་རབ་འབྱུང་ཞེས། །ཕྲ་ཞིང་རྣོ་བའི་སེམས་ལྡན་བདུན་པ་ཡོངས་སུ་གནོན། །ཐབས་དང་ཤེས་རབ་སེམས་ཡངས་རབ་ཏུ་ཐོབ་གྱུར་ཅིང་། །རིང་དུ་སོང་བ་གདུལ་དཀའ་རིང་དུ་སོང་བ་གནོན། །རང་བཞིན་དུལ་ཞིང་ཞི་ཕྱིར་དུ་མའི་སེམས་སྤངས་ཏེ། །དེ་ནས་ནམ་མཁའ་འདྲ་བའི་མི་གཡོ་ཡོངས་སུ་གནོན། །དེ་ལ་མཁས་པའི་ཡེ་ཤེས་ལས་རྣམས་སྣ་ཚོགས་ཕྱིར། །ཞི་བ་དེ་ལས་བསླང་ཞིང་མི་ཡི་མཆོག་ཏུ་བསྣམས། །དབང་བཅུ་ལྡན་ཞིང་འཇིག་རྟེན་ཡང་དག་ཉིད་དཔྱོད་པའི། །རང་བཞིན་ཆེན་པོ་འགྲོ་ཕྱིར་ལེགས་པའི་བློ་གྲོས་གནོན། །འདི་ལ་ཤིན་ཏུ་ཕྲ་བར་འཇིག་རྟེན་ཀུན་དཔྱད་ཅིང་། །སེམས་ཅན་ཐིབས་པོའི་སྤྱོད་ལྡན་ཉོན་མོངས་ལས་དཔྱད་དེ། །དེ་དག་གདུལ་བའི་སྤྱོད་པས་ཡོན་ཏན་མང་པོ་གནོན། །བདེ་གཤེགས་མཛོད་ཐོབ་དོན་གྱི་དམ་པ་རབ་ཏུ་སྟོན། །དཀར་ཆོས་རིམ་གྱིས་དེ་འདྲའི་སྤྱོད་དང་ལྡན་གྱུར་པས། །ས་དགུའི་བར་དུ་བསོད་ནམས་ཡེ་ཤེས་ཚོགས་ཐོབ་ཅིང་། །རྒྱལ་བ་རྣམས་ཀྱི་སྟོབས་མཆོག་དོན་དམ་མངོན་འདོད་པ། །ཡེ་ཤེས་ཡོན་ཏན་དབང་བསྐུར་སངས་རྒྱས་ཀུན་ལས་འཐོབ། །བརྒྱ་སྟོང་ཕྲག་བཅུའི་ཏིང་འཛིན་གྲངས་མེད་གང་ཡོད་པ། །སྤྱོད་ཡུལ་ཤེས་པ་ཆེ་ཉིད་ཤེས་ཡངས་ཐོབ་གྱུར་ནས། །དེ་ཡི་རྗེས་ལ་ཐམས་ཅད་མཁྱེན་པར་དབང་བསྐུར་འཐོབ། །ཡུལ་ཡངས་ཏིང་འཛིན་དེ་དག་ཐོས་པ་དེ་མི་སྒུལ། །གང་ཚེ་དེ་ཡིས་ཀུན་མཁྱེན་དབང་བསྐུར་ཐོབ་པའི་ཚེ། །པད་མོ་རྒྱ་ཆེན་རིན་ཆེན་ཀུན་གྱིས་བརྒྱན་པ་འབྱུང་། །དེ་ཡི་ཚུལ་མཐུན་ལུས་ཀྱི་དབུས་སུ་གནས་པར་འགྱུར། །རྒྱལ་བའི་སྲས་ཀྱིས་ཡོངས་བསྐོར་དེ་ལ་ལྟ་ཞིང་གནས། །དེ་ཡི་འོད་གཟེར་ཁྲག་ཁྲིག་མཐའ་ཡས་སྟོང་ཕྲག་མང་། །ཕྱོགས་
བཅུའི་འགྲོ་བའི་སྡུག་བསྔལ་ཀུན་ཀྱང་ཞི་བར་བྱེད། །མགོ་ཡི་གཙུག་ནས་འོད་གཟེར་བྱེ་བ་སྟོང་བྱུང་ཞིང་། །ཕྱོགས་རྣམས་ཀུན་གྱི་མི་ཡི་གཙོ་བོའི་འཁོར་དུ་རྒྱུ། །སྟེང་གི་ནམ་མཁའི་དབྱིངས་ལ་འོད་གཟེར་དྲ་བ་གནས། །སངས་རྒྱས་མཆོད་ཕྱིར་བརྩོན་པར་རྒྱལ་བའི་ཞབས་སུ་འདོང་། །དེའི་ཚེ་རྒྱལ་བ་རྣམས་དང་རྒྱལ་སྲས་རྣམས་ཀྱིས་ཀྱང་། །ཆོས་རབ་དོན་དུ་རྒྱལ་སྲས་དབང་བསྐུར་ཐོབ་པར་མཁྱེན། །མཆོད་པའི་དོན་དུ་རྒྱལ་སྲས་མཐའ་ཡས་ཀུན་ཀྱང་འོང་། །དེ་ཚེ་ཀུན་མཁྱེན་དབང་བསྐུར་མི་མཆོག་མཛོད་སྤུ་ནས། །དབང་བསྐུར་འོད་གཟེར་དམ་པ་མང་པོ་འབྱུང་བར་འགྱུར། །འོད་གཟེར་མཆོག་གིས་བསྐོར་ཞིང་སྤྱི་བོའི་གཙུག་ཏུ་ནུབ། །གང་ཚེ་རྒྱལ་མཆོག་བུ་ཡི་ཐུ་བོ་སྲིད་མཆོག་ལ། །དབང་བསྐུར་བཞིན་དུ་སངས་རྒྱས་ཀུན་གྱིས་དབང་བསྐུར་ཚེ། །ཕྱོགས་བཅུའི་འཇིག་རྟེན་ཐམས་ཅད་ཀུན་ནས་གཡོ་བར་འགྱུར། །མནར་མེད་བར་གྱི་སྡུག་བསྔལ་དེ་ཚེ་ཞི་ཞིང་འདུག །གང་ཚེ་ཀུན་མཁྱེན་དབང་གིས་མངོན་པར་དབང་བསྐུར་བ། །དེ་ཕྱིར་མཁས་པས་ཆོས་སྤྲིན་ས་མཆོག་ཐོབ་ཅེས་བྱ། །མཁས་པ་འདི་ལ་གནས་པའི་ཤེས་རྒྱུད་ཚད་མེད་དེ། །ས་རབ་འདི་ལ་གནས་པ་འགྲོ་ཀུན་གཙོ་ཡིན་ནོ། །གཟུགས་དང་གཟུགས་མེད་དེ་བཞིན་འདོད་པའི་ཁམས་ཡངས་དང་། །སེམས་ཅན་ཁམས་དང་ཞིང་དང་ཆོས་ཁམས་ཡངས་པ་དང་། །གྲངས་དང་གྲངས་མེད་ནམ་མཁའི་ཁམས་ཀྱི་བར་དུ་སྟེ། །ཆོས་དབྱིངས་ཡངས་པ་ཐམས་ཅད་མ་ནོར་ཁོང་དུ་ཆུད། །འདི་ལ་གནས་པ་མཐུ་ཆེན་སྤྲུལ་པའི་ལས་ཀུན་དང་། །དེ་བཞིན་བྱིན་རླབས་རྒྱལ་བའི་ཡེ་ཤེས་ཕྲ་བ་དང་། །མི་མཆོག་གསང་བ་བསྐལ་པའི་གྲངས་རྣམས་ཤེས་བྱ་དང་། །སྐྲ་རྩེ་གཅིག་ཏུ་འཇིག་རྟེན་ཁམས་རྣམས་གཟུད་པ་དང་། །མི་ཡི་གཙོ་བོ་འབྱུང་དང་སྐུ་ཚེ་འཚང་རྒྱ་དང་། །འཁོར་ལོ་དམ་པ་བསྐོར་དང་མྱ་ངན་འདའ་བའི་རྣམས། །ཐམས་ཅད་རབ་ཤེས་གོང་དུ་རྣམ་ཐར་ཞི་བ་དག །སྔན་ཆད་མ་ཐོབ་ཀུན་
ཀྱང་དེ་ཚེ་རབ་ཏུ་འཐོབ། །འདི་ལ་གནས་པའི་མཐུ་ཆེན་རྒྱལ་བའི་ཆོས་ཀྱི་སྤྲིན། །ཐམས་ཅད་ཁོང་དུ་ཆུད་བྱེད་དྲན་པས་ཀུན་ཀྱང་འཛིན། །ཀླུ་རྣམས་ཀུན་གྱི་སྤྲིན་ཆར་རྒྱ་མཚོ་འཛིན་པ་ལྟར། །དེ་བཞིན་རྒྱལ་བའི་ཆོས་སྤྲིན་ཆར་ཆེན་ཀུན་ཀྱང་འཛིན། །རྒྱལ་བ་གཅིག་ལས་ཆོས་གང་མཐུ་ཆེན་དེས་ཐོབ་པ། །དེ་ལ་ཕྱོགས་བཅུ་མཐའ་ཡས་ཞིང་གི་སེམས་ཅན་རྣམས། །ཐམས་ཅད་བདེ་གཤེགས་ཉན་ཐོས་ཐོས་པ་འཛིན་གྱུར་ཀྱང་། །བྱང་ཆུབ་སེམས་དཔའ་ཐོས་པའི་གྲངས་ཆར་ཉེར་མི་འགྲོ། །ཡེ་ཤེས་སྤྱོད་པའི་སྟོབས་ཀྱིས་སྔན་ཅད་སྤྱད་པའི་མཐུས། །སྐད་ཅིག་ཡུད་ཙམ་གཅིག་ཏུ་ཁྲག་ཁྲིག་ཞིང་བཀང་ཞིང་། །བདུད་རྩིའི་ཆར་འབེབས་ཉོན་མོངས་ཀུན་ཀྱང་ཞི་བར་བྱེད། །དེ་ཕྱིར་རྒྱལ་བས་འདི་མིང་ཆོས་ཀྱི་སྤྲིན་ཅེས་གསུངས། །འདི་ནས་མཐུ་ཆེན་ལྷ་ཡི་འཇིག་རྟེན་གཙོར་གྱུར་པའི། །ཕྱོགས་རྣམས་ཀུན་ཏུ་མི་ཡི་གཙོ་བོའི་ཡུལ་ཡང་སྟོན། །རྣམ་འཕྲུལ་ཁྲག་ཁྲིག་སྟོང་ཕྲག་དུ་མ་ཡང་སྟོན་ཏེ། །བྱང་ཆུབ་སྤྱོད་པ་དེ་སེམས་འགྲོ་བ་མྱོས་པར་འགྱུར། །མཁས་པ་ལེགས་ལྡན་འདི་གནས་གོམ་པ་བོར་བ་ཙམ། །ས་དགུའི་བར་དུ་གནས་པས་ཤེས་པར་མི་ནུས་ན། །སེམས་ཅན་གཞན་གྱིས་ཤེས་པར་མི་འགྱུར་སྨོས་ཅི་དགོས། །དུས་གསུམ་ཉན་ཐོས་རང་རྒྱལ་ཀུན་གྱིས་དེ་བཞིན་ནོ། །འདི་གནས་ཐམས་ཅད་མཁྱེན་པར་འགྲོ་བ་ཀུན་ལ་སྟོན། །ཤེས་པས་དུས་གསུམ་ཀུན་ཏུ་ཐོགས་མེད་ཞི་ཆོས་ཅན། །ཞིང་རྣམས་ཀུན་ཏུ་རྒྱས་བཀང་ཆོས་རྣམས་ཀུན་གྱི་བར། །རྒྱལ་བ་ཀུན་གྱི་ཡོན་ཏན་བརྗོད་ཅིང་སྟོན་པ་བྱེད། །མཁས་པ་འདི་ལ་གནས་པ་སངས་རྒྱས་མཆོད་བྱེད་ཅིང་། །ཕྱོགས་རྣམས་ཀུན་ཏུ་ཞིང་དང་ཆོས་ཀྱི་དབྱིངས་བཀང་སྟེ། །རྒྱལ་བ་མངོན་དུ་མཆོད་པས་མཆོད་བྱེད་འཕྲོགས་པ་མེད། །ཡོན་ཏན་ཀུན་ལྡན་ས་ཡི་ལྷ་ཡི་ལྷ་ཞེས་བྱ། །མཁས་པ་འདི་གནས་ཤེས་
རབ་སྣང་བས་འགྲོ་ཀུན་གྱི། །མུན་པ་ཀུན་བསྩལ་ཆོས་ཀྱི་ཚུལ་ཡང་རབ་ཏུ་སྟོན། །དབང་ཕྱུག་དམ་པའི་མཐུ་ཡིས་འགྲོ་བའི་འདོད་ཆགས་སེལ། །དེ་བས་རྒྱལ་སྲས་ཉོན་མོངས་སེལ་ལ་མཁས་ཞེས་བྱ། །འདི་ལ་གནས་པ་དེ་དག་ཁམས་གསུམ་དབང་ཕྱུག་འགྱུར། །ཡེ་ཤེས་ཚུལ་ཤེས་ཐེག་པ་གསུམ་པོ་སྟོན་ལ་མཁས། །སྐད་ཅིག་ཡུད་ཙམ་ཅིག་གིས་ཏིང་འཛིན་གཅིག་མིན་ཐོབ། །ཕྱོགས་བཅུ་ཀུན་ཏུ་རྒྱལ་བའི་དམ་པ་གཅིག་མིན་སྟོན། །འདི་ནི་བདག་གིས་རྒྱལ་སྲས་ས་རྣམས་མདོར་བསྟན་གྱི། །རྒྱ་ཆེར་བསྐལ་པ་བརྒྱ་ཕྲག་སྟོང་གིས་བསྟན་མི་ནུས། །ཡོན་ཏན་འདི་འདྲའི་སངས་རྒྱས་ཡེ་ཤེས་ས་འདི་ལ། །གནས་པ་རྟག་ཏུ་རི་ཡི་རྒྱལ་པོ་བཞིན་མི་གཡོ། །རྒྱལ་སྲས་ཐོག་མ་གཙུག་ལག་ཀུན་གྱིས་མི་གཡོ་སྟེ། །སྨན་གྱི་རྣམ་པ་ཀུན་ནས་རི་རྒྱལ་གངས་བཞིན་ནོ། །ཚུལ་ཁྲིམས་ཐོས་པས་གཉིས་པ་སྤོས་ངད་སྤོས་དང་འདྲ། །རྣམ་འདལ་མེ་ཏོག་ཇི་བཞིན་གསུམ་པ་ཤེས་པར་བྱ། །ལམ་ལ་མོས་བཞིན་མི་འཁྲུགས་འོད་འཕྲོ་ཐོབ་པ་སྟེ། །དྲང་སྲོང་གནས་བཞིན་མཁས་པ་རྣམས་ཀྱི་རྟེན་གྱུར་པའོ། །གནོད་སྦྱིན་གཉའ་ཤིང་འཛིན་བཞིན་བསམ་ཡས་ལྔ་པ་ཐོབ། །རྟ་རྣའི་ཤིང་ཏོག་འདྲ་བར་དྲུག་པའི་འབྲས་བུ་སྟེ། །བདུན་པ་ས་འཛིན་ཀླུ་བཞིན་ཤེས་རབ་ཆེན་པོས་ཐོབ། །ཁོར་ཡུག་དབང་ལྡན་བཞིན་དུ་བརྒྱད་པ་དབང་ཅན་ཐོབ། །དགུ་པ་དྲི་མ་སེལ་བ་དཔལ་ཅན་ལྷ་མིན་བཞིན། །བཅུ་པ་རྒྱལ་བའི་ལེགས་ལྡན་རི་རབ་ལྷ་གནས་འདྲ། །དང་པོ་སྨོན་ལམ་སྔོན་འགྲོ་གོང་མ་ཚུལ་ཁྲིམས་ཚོགས། །གསུམ་པ་སྤྱོད་པའི་ཡོན་ཏན་བཞི་པ་གཅིག་གི་དངོས། །ལྔ་པ་དགེ་མང་དྲུག་པ་ཤིན་ཏུ་ཟབ་པའི་དངོས། །བརྒྱད་པ་བློ་གྲོས་ཡངས་པ་ཀུན་ཏུ་གཅིག་མིན་རྒྱན། །དགུ་པ་མཁས་པ་ཡེ་ཤེས་ཕྲ་ཞིང་ཟབ་དང་ལྡན། །འགྲོ་རྒྱུད་ཐམས་ཅད་ཡེ་ཤེས་ལྡན་པས་རབ་ཏུ་གནོན། །བཅུ་པ་རྒྱལ་བ་རྣམས་ལས་ཡང་
དག་ཆོས་འཛིན་ཏེ། །རྒྱལ་སྲས་སྤྱོད་པ་མི་སྒུལ་རྒྱ་མཚོ་དེ་འདྲའོ། །སྤྱོད་པ་བཅུ་འདས་ཐོག་མའི་སེམས་རབ་སྐྱེ་བར་འགྱུར། །དཀའ་ཐུབ་རྟུལ་བས་གཉིས་པ་གསུམ་པ་བསམ་གཏན་གྱིས། །དག་པས་བཞི་པ་ཤིན་ཏུ་བྱང་བས་ལྔ་པའོ། །དྲུག་པ་རྣོན་པོས་རྟོགས་པ་བདུན་པ་མི་ཕྱེད་ས། །བརྒྱད་པ་མཐུ་ཆེན་རྡོ་རྗེའི་རྒྱལ་མཚན་ལྡན་པ་ཡིན། །དགུ་ལ་ཡེ་ཤེས་ལྡན་པས་ཐིབས་པོའི་སྤྱོད་པ་ཤེས། །བཅུ་ལ་རྒྱལ་བས་དབང་བསྐུར་རྒྱལ་པོ་དབང་ཐོབ་བཞིན། །ཡོན་ཏན་རིན་ཆེན་དག་པས་དེ་བཞིན་རིམ་དུ་འཕར། །ཕྱོགས་རྣམས་ཀུན་གྱི་ཞིང་རྣམས་བཤིག་སྟེ་བགྲང་བར་ནུས། །རྣམ་ཤེས་གཅིག་གིས་འགྲོ་བ་ཀུན་སེམས་ཤེས་པར་རུང་། །ནམ་མཁའི་དབྱིངས་ཀུན་སྐྲ་ཡིས་གཞལ་བར་ནུས་སྲིད་ཀྱི། །རྒྱལ་བའི་ཡོན་ཏན་བསྐལ་པ་ཁྲག་ཁྲིག་བཤད་མི་ནུས། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་མངོན་པར་གནང་སྟེ། ཡིད་དགའ་བར་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་དེ་སྐད་ཅེས་སྨྲས་པ་དང་། བཅོམ་ལྡན་འདས་གཞན་འཕྲུལ་དབང་བྱེད་ཀྱི་ལྷའི་ནང་ན་བཞུགས་ཤིང་མངོན་པར་སངས་རྒྱས་ནས་རིང་པོར་མ་ལོན་ཏེ། ཞག་བདུན་པ་གཉིས་ལ་བབ་པའི་ཚེ་ལྷའི་རྒྱལ་པོ་དབང་བྱེད་ཀྱི་གཞལ་མེད་ཁང་ནོར་བུ་རིན་པོ་ཆེའི་སྙིང་པོ་ཅན་ན་བཞུགས་པས། བྱང་ཆུབ་སེམས་དཔའ་རྡོ་རྗེའི་སྙིང་པོས་བཤད་པ་ལ་མངོན་པར་དགྱེས་པ་མཛད་དོ། །བྱང་ཆུབ་སེམས་དཔའི་འཁོར་དེ་དག་ཐམས་ཅད་དང་། ལྷ་དང་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། བརྒྱ་བྱིན་དང་ཚངས་པ་དང་། འཇིག་རྟེན་གྱི་མགོན་དང་། དབང་ཕྱུག་ཆེན་པོ་དང་། གཙང་མའི་རིས་སུ་གཏོགས་པའི་འཁོར་ཐམས་ཅད་ཀྱང་མངོན་པར་དགའོ། །ས་བཅུའི་ལེའུ་སྟེ་སུམ་ཅུ་གཅིག་པའོ།། །།