སུམ་ཅུ་རྩ་གསུམ་པ། ཏིང་ངེ་འཛིན་བཅུའི་ལེའུ།

---

^{[མ་དཔེ་གཟིགས་ན་འདིར་གནོན།]}

བཅོམ་ལྡན་འདས་ཐོག་མ་མངོན་པར་སངས་རྒྱས་པ་ཕོ་བྲང་འོད་ཐམས་ཅད་ཀྱི་སྙིང་པོ་ཅན་ན་དེ་བཞིན་དུ་མཉམ་པར་གཞག་པར་བཅོམ་ལྡན་འདས་བསམ་གཏན་ཁྲག་ཁྲིག་བརྒྱའི་ཏིང་ངེ་འཛིན་དང་། ཐམས་ཅད་ཀྱིས་མྱི་ཕྱེད་པའི་ལྷག་པའི་བསམ་པས་ཐོབ་པའི་ཐམས་ཅད་མཁྱེན་པའི་སྟོབས་དང་དེ་བཞིན་གཤེགས་པའི་སྐུ་ཤིན་ཏུ་དག་པ་དང་། གནས་མེད་པ་ལ་རྟེན་པའི་སངས་རྒྱས་ཀྱི་སྐུ་དང་མི་གཉིས་པའི་ཞི་གནས་དང་ཡང་དག་པར་ལྡན་པ་དང་། ཚད་མྱེད་པར་ཁྱབ་པའི་སངས་རྒྱས་ཀྱི་ཆེ་བ་ཉིད་དང་མི་གནས་པའི་བསམ་གཏན་གྱི་རྒྱུད་དང་འགྲོ་བ་ཐམས་ཅད་ཀྱིས་རྣམ་པར་དམིགས་པའི་དེ་བཞིན་གཤེགས་པ་ལྟ་བ་དང་དུས་ལ་བབ་པའི་སངས་རྒྱས་འབྱུང་བ་དང་སྐད་ཅིག་གཅིག་གིས་བྱུང་བའི་མཚན་ཉིད་མེད་པ་ལ་སྤྱོད་པས་བཞུགས་ཏེ། བྱང་ཆུབ་སེམས་དཔའ་དབང་བསྐུར་བ་བྱང་ཆུབ་སེམས་དཔའི་རྣམ་པར་དགོད་པ་ལ་རབ་ཏུ་གནས་པ་མཐའ་དང་དབུས་མེད་པའི་ཆོས་ཀྱི་དབྱིངས་ཀྱིས་བྱང་ཆུབ་སེམས་དཔའི་ཡོངས་སུ་དག་པ་དང་ལྡན་པ་བྱང་ཆུབ་སེམས་དཔའི་ཏིང་ངེ་འཛིན་ཀུན་ཏུ་ལྟ་བ་རབ་ཏུ་ཐོབ་པ་འགྲོ་བ་ཐམས་ཅད་བདེ་བར་བྱེད་པའི་སྙིང་རྗེ་ཆེན་པོ་རབ་ཏུ་ཐོབ་པ། བདུད་ཀྱི་དཔུང་ཐམས་ཅད་རབ་ཏུ་འཇོམས་པ་ཐམས་ཅད་མཁྱེན་པའི་ཡེ་ཤེས་ཡང་དག་པར་བསྒྲུབ་པ་འགྲོ་བ་ཐམས་ཅད་རབ་ཏུ་ཞི་བར་གནས་པས། བྱང་ཆུབ་སེམས་དཔའི་རྣམ་པར་ཐར་པ་མི་གནས་པ་ལ་གནས་པ། སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང་ཐབས་གཅིག་སྟེ། འདི་ལྟར་བྱང་ཆུབ་སེམས་དཔའ་རྡོ་རྗེའི་གཙུག་དང་གཞལ་དུ་མེད་པའི་བློ་གྲོས་དང་། ཞི་བའི་བློ་གྲོས་དང་གཏོང་བའི་བློ་གྲོས་དང་། ཀླུའི་བློ་གྲོས་དང་ཐོབ་པའི་བློ་གྲོས་དང་། སྦྱིན་པའི་བློ་གྲོས་དང་སྟོབས་ཀྱི་བློ་གྲོས་དང་བསམ་གྱིས་མྱི་ཁྱབ་པའི་བློ་གྲོས་དང་།

---

^{[མ་དཔེ་གཟིགས་ན་འདིར་གནོན།]}

ཆགས་པ་མེད་པའི་བློ་གྲོས་དང་། མཆོག་གི་བློ་གྲོས་དང་ལྷའི་བློ་གྲོས་དང་། མཆོད་སྦྱིན་བྱས་པའི་བློ་གྲོས་དང་མཐུའི་བློ་གྲོས་དང་། དོན་གྱི་བློ་གྲོས་དང་ཆོས་ལ་དད་པའི་བློ་གྲོས་དང་། ཆོས་ཀྱི་བློ་གྲོས་དང་ཞི་བའི་བློ་གྲོས་དང་། ནམ་མཁའི་བློ་གྲོས་དང་། སྐད་ཅིག་གཅིག་གི་བློ་གྲོས་དང་། ལེགས་པའི་བློ་གྲོས་དང་། སྡོམ་པའི་བློ་གྲོས་དང་། མཁའི་བློ་གྲོས་དང་། སྟོབས་ཀྱི་བློ་གྲོས་དང་། གླང་པོའི་བློ་གྲོས་དང་། སངས་རྒྱས་ཀྱི་མཐུའི་བློ་གྲོས་དང་། དོན་རྣམ་པར་དམིགས་པའི་བློ་གྲོས་དང་། དམ་པའི་བློ་གྲོས་དང་། ཡེ་ཤེས་སྣང་བའི་བློ་གྲོས་དང་། འཕགས་པའི་བློ་གྲོས་དང་དྲན་པའི་རྒྱན་དང་། དངོས་པོ་མེད་པའི་མཐར་ཕྱིན་པ་དང་། རང་བཞིན་གྱི་རྒྱན་དང་ཡུལ་ཟབ་མོ་དང་གནས་དང་གནས་མ་ཡིན་པ་ལ་མཁས་པ་དང་། ཀླུའི་འོད་དང་སྣང་བ་འཛིན་པ་དང་། སངས་རྒྱས་ཀྱི་རིམ་གྲོ་ལ་བརྩོན་པ་དང་། སེམས་ཀྱི་རྒྱལ་པོ་དང་སྤྱོད་པ་གཅིག་པ་དང་མངོན་པར་ཤེས་པ་མཉམས་པ་དང་། ཡེ་ཤེས་ཀྱི་ཚོགས་དང་ཡོན་ཏན་འབྱུང་གནས་དང་ཆོས་ཀྱི་སྒྲོན་མ་དང་། འགྲོ་བའི་བདག་པོ་དང་། འགྲོ་བ་འཛིན་པ་དང་། བདེ་བ་བྱེད་པ་དང་མཆོག་ཏུ་གྱུར་པ་དང་བླ་ན་མེད་པ་དང་མཉམ་པ་མེད་པ་དང་འདྲ་བ་མེད་པ་དང་། འོད་ཐོགས་པ་མེད་པ་དང་། འོད་རབ་ཏུ་སྣང་བ་དང་། གྲགས་པའི་འོད་དང་། ཤིན་ཏུ་རྣམ་པར་སྣང་བ་དང་ལག་པ་བརྟན་པ་དང་། ཆོས་ཀྱི་ཆར་པ་དང་ཐིག་ལེ་དམ་པ་དང་། ཡེ་ཤེས་ཀྱི་མིག་དང་ཆོས་ཀྱི་མིག་དང་། ཤེས་རབ་ཀྱི་སྤྲིན་དང་སའི་རྒྱལ་པོ་དང་སྨོན་ལམ་ཁྱད་པར་དུ་ཐོགས་པ་མེད་པས་འགྲོ་བ་དང་། ཡེ་ཤེས་ཀྱི་སྙིང་པོ་དང་བསམ་པའི་རྒྱལ་པོ་དང་ནང་གི་བློ་གྲོས་ཡང་དག་པར་གྲུབ་པ་དང་ཐམས་ཅད་མཁྱེན་པའི་སྤྱོད་ཡུལ་དང་། སའི་སྟོབས་ཀྱིས་རྣམ་པར་གནོན་པ་དང་ས་དང་སྟོབས་དང་། མི་འཇིགས་པ་འཛིན་པ་དང་ཟླ་བ་བཟང་པོ་དང་རི་བོ་ཆེན་པོའི་དཔལ་

---

^{[མ་དཔེ་གཟིགས་ན་འདིར་གནོན།]}

དང་། རིན་པོ་ཆེ་ཆེན་པོའི་དཔལ་དང་བར་སྣང་གི་རྒྱུད་དང་། ཁམས་ཆེན་པོའི་རྒྱལ་པོ་དང་དཀྱིལ་འཁོར་མཉམ་པ་ཁོང་དུ་ཆུད་པ་དང་། གཟི་བརྗིད་གཞན་གྱིས་མི་འཕམ་པ་དང་། ཀླུ་ཆེན་པོ་ལྟ་བའི་དཔལ་དང་མཉམ་པ་ཉིད་ཀྱི་ངང་ཚུལ་དང་ཕྱིར་མི་ལྡོག་པའི་བརྩོན་འགྲུས་དང་སངས་རྒྱས་ཀྱི་འཁོར་ལོ་ཡང་དག་པར་འཛིན་པའི་དཔལ་དང་། དྲན་པའི་ཡུལ་ཉམས་པ་མེད་པ་དང་བསམ་གྱིས་མི་ཁྱབ་པའི་བློ་གྲོས་ཀྱིས་རྣམ་པར་རྟོགས་པ་དང་མཐའ་དང་དབུས་མེད་པའི་བློས་རྣམ་པར་རོལ་པ་དང་། མཛོད་ཟད་མི་ཤེས་པ་དང་། ཡེ་ཤེས་ཉི་མའི་དཔལ་དང་། ཆོས་ཀྱི་ཉི་མ་དང་། ཡེ་ཤེས་ཕུན་སུམ་ཚོགས་པའི་སྙིང་པོ་དང་། བློ་དམ་པའི་ཆར་འབེབས་པ་དང་། ཀུན་ཏུ་ལྟ་བ་དང་། བལྟ་ན་དོན་ཡོད་པ་དང་རྡོ་རྗེ་མངོན་པར་ཤེས་པ་དང་། ཡེ་ཤེས་རྡོ་རྗེའི་བློ་གྲོས་དང་ཀུན་ཏུ་མིག་གི་དཔལ་དང་། སངས་རྒྱས་ཀྱི་དོན་གྱི་ཉི་མ་དང་སངས་རྒྱས་ཀྱི་རྡོ་རྗེ་ཡང་དག་པར་གཟུང་བའི་བསམ་པ་དང་བྱང་ཆུབ་སེམས་དཔའ་སེམས་དཔའ་ཆེན་པོ་མིག་གི་ཡུལ་ཀུན་ཏུ་ཡེ་ཤེས་ཀྱི་རྒྱན་དང་། དེ་དག་ལ་སོགས་པ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་སྔོན་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་བྱང་ཆུབ་སེམས་དཔའི་སྤྱོད་པ་དང་། དགེ་བའི་རྩ་བ་ལ་གྲོགས་སུ་གྱུར་པ་ཤ་སྟག་དང་ཐབས་གཅིག་གོ །དེ་ནས་བྱང་ཆུབ་སེམས་དཔའ་ཀུན་ཏུ་མིག་དེའི་ཚེ་སངས་རྒྱས་ཀྱི་མཐུས་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེར་ཐལ་མོས་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་བདག་གིས་ཞུས་ནས་ཞུས་པའི་ལུང་བསྟན་པར་བཅོམ་ལྡན་འདས་ཀྱིས་སྐབས་དབྱེ་བར་གནང་ན། བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་

---

^{[མ་དཔེ་གཟིགས་ན་འདིར་གནོན།]}

པའི་སངས་རྒྱས་ལ་ཕྱོགས་གཅིག་ཅིག་ཞུའོ། །དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་མིག་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་མིག་ཁྱོད་ཀྱིས་དེ་བཞིན་གཤེགས་པ་ལ་ཅི་དང་ཅི་འདོད་པ་དྲིས་ཤིག་དང་ངས་དྲིས་པ་དེ་དང་། དེའི་ལུང་བསྟན་པས་ཁྱོད་ཀྱི་སེམས་ཚིམ་པར་བྱའོ། །དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་ཀུན་ཏུ་མིག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཏིང་ངེ་འཛིན་དང་། རྣམ་པར་ཐར་པ་དུ་མ་དང་ལྡན་པའི་བྱང་ཆུབ་སེམས་དཔའ་ཀུན་ཏུ་བཟང་པོའི་སྒོ་དང་། ཀུན་ཏུ་བཟང་པོའི་སྤྱོད་པ་དང་སྨོན་ལམ་དུ་ལྡན་པ་རྣམས་ཏིང་ངེ་འཛིན་དང་རྣམ་པར་ཐར་པ་ལ་སྙོམས་པར་འཇུག་ཅིང་རྣམ་པར་ལྡང་བ་ལགས། ཏིང་ངེ་འཛིན་གྱི་ཁྱད་པར་གྱི་གནས་འཐོབ་པ་ལགས། བྱང་ཆུབ་སེམས་དཔའི་ཏིང་ངེ་འཛིན་བསམ་གྱིས་མི་ཁྱབ་པ་ལ་སྙོམས་པར་འཇུག་པ་དང་རྣམ་པར་ལྡང་བ་ལ་མཁས་པ་རྒྱུན་མི་འཆད་པ་འཐོབ་པ་ལགས། ཏིང་ངེ་འཛིན་ཐམས་ཅད་ཀྱི་ཁྱུ་མཆོག་གི་མཐུ་དང་རྣམ་པར་འཕྲུལ་པ་དང་ལྡན་པ་ལགས་དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་མིག་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་མིག་ཁྱོད་ཀྱིས་དེ་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་བྱང་ཆུབ་སེམས་དཔའི་དཀྱིལ་འཁོར་ཐམས་ཅད་དང་། དེ་བཞིན་གཤེགས་པའི་དཀྱིལ་འཁོར་ཐམས་ཅད་ཀྱི་དོན་དུ་དེ་བཞིན་གཤེགས་པ་ལ་དོན་འདི་འདྲི་བར་བསམ་པ་ལེགས་སོ་ལེགས་སོ། །ཀུན་ཏུ་མིག་དེ་བས་ན་བྱང་ཆུབ་སེམས་དཔའ་ཀུན་ཏུ་བཟང་པོ་བསམ་གྱིས་མི་ཁྱབ་པའི་བྱང་ཆུབ་སེམས་དཔའི་རྣམ་པར་འཕྲུལ་པ་དང་ལྡན་པ། བྱང་ཆུབ་སེམས་དཔའི་ཁྱུ་མཆོག་གི་མཐུ་བསྒྲུབ་པར་

---

^{[མ་དཔེ་གཟིགས་ན་འདིར་གནོན།]}

དཀའ་བ་དང་ལྡན་པ་བྱང་ཆུབ་སེམས་དཔའི་སྤྱོད་པ་ལ་འཇུག་པ་ཚད་མེད་པས་མངོན་པར་བྱུང་བ། བྱང་ཆུབ་སེམས་དཔའི་ཆོ་འཕྲུལ་དང་། རྣམ་པར་འཕྲུལ་པ་ལ་ཤིན་ཏུ་བསླབས་པ་བྱང་ཆུབ་སེམས་དཔའི་སྨོན་ལམ་བསྒྲུབ་པར་དཀའ་བས་རྣམ་པར་སྦྱངས་པ་བྱང་ཆུབ་སེམས་དཔའི་འབྱུང་བ་ཕྱིར་མི་ལྡོག་པ་དང་ལྡན་པ། ཕ་རོལ་ཏུ་ཕྱིན་པའི་ཚུལ་མཐའ་ཡས་པས་རྣམ་པར་སྦྱངས་པ། གཟུངས་འཐོབ་པར་བྱ་བ་མུ་མེད་པ་དང་ལྡན་པ་ཐ་དད་པ་ཡང་དག་པར་ཤེས་པ། ཟད་མི་ཤེས་པས་ཐོགས་པ་མྱེད་པར་རྣམ་པར་དག་པ། འགྲོ་བ་ཐམས་ཅད་ལ་སྐྱོ་བ་མྱེད་པ་ཐོབ་པའི་སྙིང་རྗེ་ཆེན་པོས་ཕྱི་མའི་མཐའི་མུར་ཐུག་པའི་སྨོན་ལམ་དང་ལྡན་པ། འདི་འཁོར་འདིར་འདུས་ཏེ། འདུག་པ་ཡིན་གྱིས་དེ་ལ་དྲིས་ཤིག་དང་། ཏིང་ངེ་འཛིན་དང་རྣམ་པར་འཕྲུལ་པ་སྟོན་ཏོ། །དེ་ནས་བྱང་ཆུབ་སེམས་དཔའི་འཁོར་དེ་དག་གིས་བྱང་ཆུབ་སེམས་དཔའ་ཀུན་ཏུ་བཟང་པོའི་མིང་ཐོས་མ་ཐག་ཏུ། བྱང་ཆུབ་སེམས་དཔའི་ཏིང་ངེ་འཛིན་བསམ་གྱིས་མི་ཁྱབ་པ་མངོན་དུ་གྱུར་ཏོ། །ཆགས་པ་མེད་པའི་སེམས་རྣམ་པར་ཕྱེ་བས་ཀྱང་བྱིན་གྱིས་བརླབས་པར་གྱུར་ཏོ། །ཡེ་ཤེས་བསམ་གྱིས་མི་ཁྱབ་པར་འཇུག་པར་བྱ་བ་ལ་འང་རབ་ཏུ་གཞོལ་བར་གྱུར་ཏོ། ། ཡེ་ཤེས་མི་འཕྲོགས་པའི་སྤྱོད་ཡུལ་ཡང་རབ་ཏུ་བྱུང་ངོ་། །དེ་བཞིན་གཤེགས་པ་གྲངས་མེད་པ་མཐོང་ཞིང་རྣམ་པར་དམྱིགས་པ་ཡང་མངོན་དུ་གྱུར་ཏོ། །དེ་བཞིན་གཤེགས་པའི་སྟོབས་ཚད་མེད་པ་ཡང་ཁོང་དུ་ཆུད་པར་གྱུར་ཏོ། །དེ་བཞིན་གཤེགས་པ་དང་རྒྱུད་ཀྱི་ཚུལ་གཅིག་པ་ཡང་རྗེས་སུ་རྟོགས་པར་གྱུར་ཏོ། །དུས་གསུམ་མཐའ་ཡས་པ་ལ་འཇུག་པ་ཡང་ཁོང་དུ་ཆུད་པར་གྱུར་ཏོ། །བསོད་ནམས་ཟད་མི་ཤེས་པའི་བྱིན་ཡང་ཐོབ་པར་གྱུར་ཏོ། །རྣམ་པར་འཕྲུལ་པ་བཟང་པོ་ཡོངས་སུ་རྫོགས་པར་བྱ་བའང་ཁོང་དུ་ཆུད་པར་གྱུར་

---

^{[མ་དཔེ་གཟིགས་ན་འདིར་གནོན།]}

ནས། དེ་དག་ཐམས་ཅད་ཀྱིས་རིམ་གྲོ་དང་བཅས་ཤིང་རྗེ་ས་དང་བཅས་པས་དེ་བཞིན་གཤེགས་པའི་འཁོར་གྱི་དཀྱིལ་འཁོར་ཐམས་ཅད་དུ་ལྟ་བར་གྱུར་ན། དེ་བཞིན་གཤེགས་པའི་བྱིན་གྱི་རླབས་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་རྫུ་འཕྲུལ་གྱི་ཁྱུ་མཆོག་གི་མཐུས་བྱང་ཆུབ་སེམས་དཔའ་ཀུན་ཏུ་བཟང་པོ་ཡང་མ་མཐོང་། བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ཀྱང་མ་མཐོང་། བྱང་ཆུབ་སེམས་དཔའ་ཀུན་ཏུ་བཟང་པོ་གང་ན་གནས་པའི་སྟན་ཡང་མ་མཐོང་ངོ་། །དེ་ནས་བྱང་ཆུབ་སེམས་དཔའ་ཀུན་ཏུ་མིག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཀུན་ཏུ་བཟང་པོ་ད་ལྟ་ག་ལ་མཆིས། བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་མིག་འཁོར་འདི་ཉིད་ན་ངའི་ཞབས་ཀྱི་དྲུང་ན་འདུག་གོ །ངའི་ཞབས་ཀྱི་དྲུང་ན་སྤྱོད་དོ། །ངའི་ཞབས་ཀྱི་དྲུང་ནས་མ་གཡོས་སོ། །དེ་ནས་བྱང་ཆུབ་སེམས་དཔའ་ཀུན་ཏུ་མིག་དང་། བྱང་ཆུབ་སེམས་དཔའི་འཁོར་དེ་དག་ཐམས་ཅད་ཀྱིས། ཡང་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀུན་ཏུ་བཟང་པོ་དེ་མ་མཐོང་ངོ་། །དེའི་ལུས་ཀྱང་མ་མཐོང་དེའི་སྟན་ཡང་མ་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་ཁྱེད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་མ་མཐོང་ཞིང་སྟན་མ་མཐོང་བ་ནི། དེ་དེ་བཞིན་ཏེ་ཡུས་སོ་དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ཀུན་ཏུ་བཟང་པོ་དེ་ནི་བརྗོད་དུ་མེད་ཅིང་ཟབ་པ་ལ་གནས་པ་སྟེ། འདི་ལྟར་ཡེ་ཤེས་ཀྱི་དབྱིངས་མཐའ་ཡས་པ་ལ་འཇུག་པ་ལ་ཞུགས་པའོ། །སེང་གེ་རྣམ་པར་བསྒྱིངས་པའི་ཏིང་

---

^{[མ་དཔེ་གཟིགས་ན་འདིར་གནོན།]}

ངེ་འཛིན་རབ་ཏུ་ཐོབ་པའོ། །སངས་རྒྱས་ཀྱི་ཆོ་འཕྲུལ་བླ་ན་མེད་པ་རབ་ཏུ་ཐོབ་པའོ། །ཆགས་པ་མེད་པའི་མཐས་རྣམ་པར་དག་པའི་དེ་བཞིན་གཤེགས་པའི་སྟོབས་བཅུས་གྲུབ་པའོ། །ཆོས་ཀྱི་དབྱིངས་དམ་པའི་ལས་དང་ལྡན་པའོ། །སངས་རྒྱས་ཐམས་ཅད་ཀྱི་བྱིན་གྱི་རླབས་ལ་གནས་པའོ། །འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་དང་ཡེ་ཤེས་ཐ་མི་དད་པའི་རྒྱུན་དང་ལྡན་པའོ། །འདི་ལྟ་སྟེ། བྱང་ཆུབ་སེམས་དཔའ་ཀུན་ཏུ་བཟང་པོ་འདི་ནི་སེམས་སྐད་ཅིག་གི་མཐའི་རྗེས་སུ་འབྲང་བའོ། །དེ་ནས་བྱང་ཆུབ་སེམས་དཔའ་ཀུན་ཏུ་མིག་གིས་དེ་བཞིན་གཤེགས་པ་ལས་ཀུན་ཏུ་བཟང་པོའི་ཡོན་ཏན་རྣམ་པར་དག་པ་ཐོས་མ་ཐག་ཏུ་བྱང་ཆུབ་སེམས་དཔའི་ཏིང་ངེ་འཛིན་གྲངས་མེད་པ་བརྒྱ་སྟོང་ཕྲག་བཅུ་ལ་མཉམ་པར་གཞག་སྟེ། བྱང་ཆུབ་སེམས་དཔའ་ཀུན་ཏུ་བཟང་པོ་མངོན་པར་འདོད་ཅིང་མཐོང་བར་བྱ་བ་དང་། གསོལ་བ་གདབ་པའི་བསམ་པས་ཚོལ་ལོ། །ཡོངས་སུ་ཚོལ་ལོ་རབ་ཏུ་རྟོག་གོ །ཤིན་ཏུ་ཞིབ་ཅིང་བརྟགས་པར་རྣམ་པར་དཔྱོད་དོ། །རྗེས་སུ་རྟོག་གོ །རྣམ་པར་ལྟའོ། །འོན་ཀྱང་བྱང་ཆུབ་སེམས་དཔའ་ཀུན་ཏུ་མིག་གིས་བྱང་ཆུབ་སེམས་དཔའ་ཀུན་ཏུ་བཟང་པོ་མ་མཐོང་ངོ་། །བྱང་ཆུབ་སེམས་དཔའི་འཁོར་དེ་དག་ཐམས་ཅད་ཀྱིས་ཀྱང་མཐོང་བར་མ་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་མིག་ཏིང་ངེ་འཛིན་དེ་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཏིང་ངེ་འཛིན་གྲངས་མ་མཆིས་པ་སྟོང་ཕྲག་བཅུ་ལ་མཉམ་པར་གཞག་སྟེ། རྣམ་པར་བལྟས་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོ་མ་མཐོང་ངོ་། །དེའི་ལུས་ཀྱི་ལས་ཀྱང་མ་མཐོང་ངོ་། །དེའི་ངག་

---

^{[མ་དཔེ་གཟིགས་ན་འདིར་གནོན།]}

དང་ངག་གི་ལས་ཀྱང་མ་མཐོང་ངོ་། །དེའི་ཡིད་དང་ཡིད་ཀྱི་ལས་ཀྱང་མ་མཐོང་ངོ་། །དེའི་སྟན་ཡང་མ་མཐོང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དེ་གང་ན་མཆིས་པ་དང་སྤྱོད་པའི་ཕྱོགས་དེ་ཡང་མ་མཐོང་ངོ་བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་མིག་དོན་དེ་བཞིན་ཏེ། ཁྱོད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་དེ་མི་མཐོང་ངོ་། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པ་ལ་ཤིན་ཏུ་བསླབས་པ་ནི་བྱང་ཆུབ་སེམས་དཔའ་ཀུན་ཏུ་བཟང་པོའོ། །ཀུན་ཏུ་མིག་དེ་ལ་ཇི་སྙམ་དུ་སེམས། སྒྱུ་མའི་གཟུགས་ཀྱི་རྣམ་པ་སྣ་ཚོགས་མང་པོ་སྒྱུ་མའི་སྔགས་ཀྱི་ཡི་གེ་གང་ལ་གནས་པ་དམྱིགས་པར་ནུས་སམ། བཙུན་པ་བཅོམ་ལྡན་འདས་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་མིག་སྒྱུ་མའི་སྔགས་ཀྱི་གཟུགས་ཀྱི། རྣམ་པ་དེ་དག་ཀྱང་དམིགས་ཤིང་བསྟན་པར་མི་ནུས་ན། བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ཀྱི་སྤྱོད་ཡུལ་གསང་བ་དང་། ངག་གི་སྤྱོད་ཡུལ་གསང་བ་དང་། ཡིད་ཀྱི་སྤྱོད་ཡུལ་གསང་བ་ལ་འཇུག་པར་མི་ནུས་པ་དང་། མཐོང་བར་མི་ནུས་པ་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཀུན་ཏུ་བཟང་པོ་ནི་ཟབ་ཅིང་། བསམ་གྱིས་མི་ཁྱབ་པར་རྣམ་པར་སྤྱོད་པའོ། །བྱང་ཆུབ་སེམས་དཔའ་ཀུན་ཏུ་བཟང་པོ་ནི་ཚད་མེད་ཅིང་ཚད་ལས་འདས་པ་སྟེ། ཡེ་ཤེས་རྡོ་རྗེའི་བློ་དང་ལྡན་པའོ། །ཆོས་ཀྱི་དབྱིངས་མཐའ་དང་དབུས་མེད་པ་ལ་ཡང་དག་པར་གནས་པའོ། །འཇིག་རྟེན་གྱི་ཁམས་ཐམས་ཅད་དུ་གནས་མེད་པར་སྤྱོད་ཅིང་། སེམས་ཅན་ཐམས་ཅད་ཀྱི་ལུས་དང་གཟུགས་ཀྱི་རྗེས་སུ་ཞུགས་པའོ། །བླང་བ་མེད་པའི་ཆོས་ཀྱི་ཚུལ་དང་ལྡན་པའོ། །མི་ཟད་ཅིང་ཐ་མི་དད་པའི་རྫུ་འཕྲུལ་དང་ཁྱུ་མཆོག་གི་

---

^{[མ་དཔེ་གཟིགས་ན་འདིར་གནོན།]}

མཐུ་ལ་ལྷུན་གྱིས་གྲུབ་པར་གནས་པའི་མཐར་ཕྱིན་པའོ། །བྱང་ཆུབ་སེམས་དཔའ་ཀུན་ཏུ་བཟང་པོ་ནི་ཆོས་ཀྱི་དབྱིངས་ཁོང་དུ་ཆུད་པ་དང་ལྡན་པའོ། །དེ་ལྟར་རིགས་ཀྱི་བུ་བྱང་ཆུབ་སེམས་དཔའ་ཀུན་ཏུ་བཟང་པོ་ནི་བལྟ་ན་དོན་ཡོད་པའོ། །མཉན་ན་དོན་ཡོད་པའོ་བསྙེན་བཀུར་བྱེད་པ་དོན་ཡོད་པའོ། །བསམ་པ་དོན་ཡོད་པའོ་རྗེས་སུ་དྲན་པ་དོན་ཡོད་པའོ། །དེ་ལ་དད་པར་བྱས་པ་དོན་ཡོད་པའོ། །བྱང་ཆུབ་སེམས་དཔའ་ཀུན་ཏུ་བཟང་པོ་དེ་ནི་མཐོང་བ་དོན་ཡོད་པའོ། །ཐོས་པ་དོན་ཡོད་པའོ། །བསྙེན་བཀུར་བ་དོན་ཡོད་པའོ། །བསམ་པ་དོན་ཡོད་པའོ། །རྗེས་སུ་དྲན་པར་བྱས་པ་དོན་ཡོད་པའོ། །དེ་ལ་མོས་པར་བྱས་པ་དོན་ཡོད་པའོ། །བལྟ་བ་དོན་ཡོད་པའོ། །བརྟགས་པ་དོན་ཡོད་པའོ། །བཙལ་བ་དོན་ཡོད་པའོ། །བྱང་ཆུབ་སེམས་དཔའ་ཀུན་ཏུ་བཟང་པོ་ནི་རྗེས་སུ་སྨོན་ལམ་གདབ་པ་དོན་ཡོད་པའོ། །དེ་ནས་བྱང་ཆུབ་སེམས་དཔའ་ཀུན་ཏུ་མྱིག་དང་། བྱང་ཆུབ་སེམས་དཔའི་འཁོར་དེ་དག་ཐམས་ཅད་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་འདོད་ཅིང་། ཐལ་མོ་སྦྱར་ཏེ་བཅོམ་ལྡན་འདས་དང་བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚལ་ཞིང་ཚིག་འདི་སྐད་བརྗོད་དོ། །སངས་རྒྱས་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚལ་ལོ། །སངས་རྒྱས་ཐམས་ཅད་ལ་བཏུད་དེ་ཕྱག་འཚལ་ལོ། །བྱང་ཆུབ་སེམས་དཔའ་ཀུན་ཏུ་བཟང་པོ་ལ་བཏུད་དེ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་མིག་དང་བྱང་ཆུབ་སེམས་དཔའི་འཁོར་ཆེན་པོ་དེ་དག་ལ་བཀའ་སྩལ་པ། རིགས་ཀྱི་བུ་དག་བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚོལ་ལ་གསོལ་བ་ཐོབ་ཤིག །ཕྱོགས་ཐམས་ཅད་དུ་མངོན་དུ་གྱིས་ལ་ཀུན་ཏུ་མིག་གི་ལས་སུ་བྱིན་གྱིས་རློབ་

---

^{[མ་དཔེ་གཟིགས་ན་འདིར་གནོན།]}

སྟེ། བྱང་ཆུབ་སེམས་དཔའ་ཀུན་ཏུ་བཟང་པོ་ལ་དམིགས་པ་གྱིས་ལ། ཆོས་ཀྱི་དབྱིངས་ཐམས་ཅད་མངོན་ཏུ་བྱ་བའི་སེམས་ཀྱིས་བྱིན་གྱིས་བརླབ་པ་གྱིས་ཏེ། ཆོས་ཐམས་ཅད་འདོད་ཆགས་དང་བྲལ་བར་ཁོང་དུ་ཆུད་པར་གྱིས་ལ་བྱང་ཆུབ་སེམས་དཔའ་ཀུན་ཏུ་བཟང་པོ་དང་སྨོན་ལམ་གཅིག་པར་བྱུང་སྟེ། གཉིས་སུ་མེད་པ་ལ་མཉམ་པར་ཞོག་ལ་འཇིག་རྟེན་གྱི་ཁམས་ཐམས་ཅད་ལུས་ལས་མངོན་པར་བྱུང་བར་བྱིན་གྱིས་རློབ་སྟེ། དབང་པོ་ཐ་མི་དད་པའི་རྗེས་སུ་འབྲང་བར་གྱིས་ལ། ཀུན་ཏུ་བཟང་པོའི་སྨོན་ལམ་ཀུན་ཏུ་འགྲོ་བ་ཡོངས་སུ་སྦྱང་བར་གྱིས་ཤིག་དང་། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་འགྱུར་རོ། །དེ་ནས་བྱང་ཆུབ་སེམས་དཔའ་ཀུན་ཏུ་མིག་གིས་བཅོམ་ལྡན་འདས་ཀྱིས་བཀའ་སྩལ་པ་དེ་སྐད་ཐོས་ནས། བྱང་ཆུབ་སེམས་དཔའི་འཁོར་དེ་དག་དང་བཅས་པས་སྤྱི་བོས་གཏུགས་ཏེ་ཕྱག་འཚལ་ནས། བྱང་ཆུབ་སེམས་དཔའ་ཀུན་ཏུ་བཟང་པོ་ལ་གསོལ་བ་གཏབ་བོ། །བྱང་ཆུབ་སེམས་དཔའ་དེ་དག་གིས་གསོལ་བ་གཏབ་མ་ཐག་ཏུ། དེའི་ཚེ་བྱང་ཆུབ་སེམས་དཔའ་ཀུན་ཏུ་བཟང་པོས་རྣམ་པར་ཐར་པའི་རྣམ་པར་འཕྲུལ་པ་གང་གིས་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་དེ་བཞིན་གཤེགས་པའི་ཞབས་ཀྱི་དྲུང་ན་གནས་ཤིང་པད་མོའི་སྟན་ལ་འདུག་པར་མཐོང་བར་འགྱུར་བ་དང་། འཁོར་དེའི་བྱང་ཆུབ་སེམས་དཔའ་རྣམས་ཀྱི་ལུས་ལས་ཀྱང་འབྱུང་བར་སྣང་བ་དང་འཇིག་རྟེན་གྱི་ཁམས་ཀྱི་རྒྱུད་འབྱམ་ཀླས་པ་དག་ནས་ཀྱང་འོང་བར་སྣང་བ་དང་། སངས་རྒྱས་གཅིག་ནས་གཅིག་ཏུ་བརྒྱུད་པ་ཐམས་ཅད་ཡང་དག་པར་སྟོན་པ་དང་སངས་རྒྱས་ཐམས་ཅད་ཀྱི་འཕྲིན་ལས་འཇིག་རྟེན་གྱི་ཁམས་ཐམས་ཅད་དུ་རབ་ཏུ་བརྗོད་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་རབ་ཏུ་སྟོན་པ་དང་། ཐམས་

---

^{[མ་དཔེ་གཟིགས་ན་འདིར་གནོན།]}

ཅད་མཁྱེན་པའི་ཡེ་ཤེས་ཀྱི་ལམ་སྣང་བར་བྱེད་པ་དང་། བྱང་ཆུབ་སེམས་དཔའི་རྣམ་པར་འཕྲུལ་པ་ཐམས་ཅད་ཡང་དག་པར་སྟོན་པ་དང་། བྱང་ཆུབ་སེམས་དཔའི་ཁྱུ་མཆོག་གི་མཐུ་ཕྱུང་བ་ཐམས་ཅད་ཡང་དག་པར་བརྗོད་པ་དང་། དེ་བཞིན་གཤེགས་པ་ཚད་མེད་པའི་དུས་གསུམ་རབ་ཏུ་སྟོན་པ་དེ་ལྟ་བུའི་རྣམ་པར་ཐར་པའི་རྣམ་པར་འཕྲུལ་པ་ཀུན་ཏུ་བསྟན་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་མྱིག་དང་བྱང་ཆུབ་སེམས་དཔའི་འཁོར་དེ་དག་ཐམས་ཅད་ཀྱིས་རྣམ་པར་འཕྲུལ་པ་དེ་དག་མཐོང་ནས་དགའ་ཞིང་མགུ་སྟེ། རངས་ནས་རབ་ཏུ་དགའ་ཞིང་བདེ་བ་དང་ཡིད་དགའ་བ་སྐྱེས་ནས་དམིགས་པ་ཐམས་ཅད་ཀྱིས་བཏུད་པའི་རྗེ་སས། བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚལ་ཏོ། །དེའི་ཚེ། སངས་རྒྱས་ཀྱི་བྱིན་གྱི་རླབས་དང་། བྱང་ཆུབ་སེམས་དཔའ། དེ་དག་མོས་པ་དང་། བྱང་ཆུབ་སེམས་དཔའ། ཀུན་ཏུ་བཟང་པོའི་སྔོན་གྱི་དགེ་བའི་རྩ་བས་སྤྲིན་གྱི་ཆར་སྟོང་ཕྲག་བཅུ་མངོན་པར་བབ་པར་གྱུར་པ་འདི་ལྟ་སྟེ། མེ་ཏོག་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །ཕྲེང་བ་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །སྤོས་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །སྤོས་ཀྱི་ཕྱེ་མ་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །གདུགས་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །ན་བཟའ་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །རྒྱན་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །རིན་པོ་ཆེ་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །སྤོས་སྣ་ཚོགས་ཀྱི་སྤྲིན་གྱི་ཆར་མངོན་པར་བབ་བོ། །སྣམ་བུ་རིན་པོ་ཆེའི་སྤྲིན་གྱི་ཆར་མངོན་པར་བབ་བོ། །འཇིག་རྟེན་གྱི་ཁམས་བརྗོད་དུ་མེད་པ་རྣམ་པ་དྲུག་ཏུ་གཡོས་སོ་རོལ་མོ་བརྡུང་བ་དང་། དཀྲོལ་བ་ཐམས་ཅད་ཀྱི་སྒྲ་མང་པོ་བྱུང་ངོ་། །ལྷའི་ང་

---

^{[མ་དཔེ་གཟིགས་ན་འདིར་གནོན།]}

རོ་སྙན་པ་མང་པོ་རབ་ཏུ་བྱུང་ངོ་། །འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་སྣང་བ་ཆེན་པོས་ཁྱབ་པར་སྣང་ངོ་། །འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་སེམས་ཅན་རྣམས་རྣམ་པར་དག་པར་གྱུར་ཏོ། །ངན་སོང་གི་ལམ་གྱི་རྒྱུད་གསུམ་རྣམ་པར་ཞི་བར་གྱུར་ཏོ། །འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་རྣམ་པར་དག་པར་གྱུར་ཏོ། །བྱང་ཆུབ་སེམས་དཔའ་བརྗོད་དུ་མེད་པའི་ཡང་བརྗོད་དུ་མེད་པ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ཞུགས་པར་གྱུར་ཏོ། །བྱང་ཆུབ་སེམས་དཔའ་བརྗོད་དུ་མེད་པའི་ཡང་བརྗོད་དུ་མེད་པ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ཡོངས་སུ་གྲུབ་པར་གྱུར་ཏོ། །བྱང་ཆུབ་སེམས་དཔའ་བརྗོད་དུ་མེད་པའི་ཡང་བརྗོད་དུ་མེད་པ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་སྨོན་ལམ་ཡོངས་སུ་རྫོགས་པར་བྱས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་མིག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཀུན་ཏུ་བཟང་པོ་ནི། བདག་ཉིད་ཆེ་བ་ལ་མངོན་པར་སྤྱོད་པའོ། །མཚུངས་པ་མ་མཆིས་པ་ལ་རྣམ་པར་སྤྱོད་པའོ། །ཡོངས་སུ་མི་ཆོད་པ་ལ་རྣམ་པར་སྤྱོད་པའོ། །སླར་མི་ལྡོག་པ་ལ་རྣམ་པར་སྤྱོད་པའོ། །མཉམ་པ་ཉིད་རྗེས་སུ་རྟོགས་པ་ལ་རྣམ་པར་སྤྱོད་པའོ། །གཞན་གྱིས་མི་ཟློག་པ་ལ་རྣམ་པར་སྤྱོད་པའོ། །ཆོས་ཐམས་ཅད་ཐ་མི་དད་པ་ལ་རྣམ་པར་སྤྱོད་པའོ། །ཆོས་ཐམས་ཅད་མ་འདྲེས་པར་རྣམ་པར་སྤྱོད་པའོ། །སེམས་ཅན་ཐམས་ཅད་ཀྱི་སེམས་ཀྱི་བྱིན་གྱི་རླབས་མཁས་པ་ལ་རྣམ་པར་སྤྱོད་པའོ། །བཅོམ་ལྡན་འདས་བྱང་ཆུབ་སེམས་དཔའ་ཀུན་ཏུ་བཟང་པོ་ནི་ཆོས་ཐམས་ཅད་ཀྱི་དབང་དང་།

---

^{[མ་དཔེ་གཟིགས་ན་འདིར་གནོན།]}

ཏིང་ངེ་འཛིན་དང་རྣམ་པར་ཐར་པ་ལ་རྣམ་པར་སྤྱོད་པའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་མིག་དེ་ཁྱོད་ཀྱིས་ཇི་སྐད་དུ་སྨྲས་པ་དེ་བཞིན་ཏེ། བྱང་ཆུབ་སེམས་དཔའ་ཀུན་ཏུ་བཟང་པོ་ནི་ཡོན་ཏན་གྲངས་མེད་པས་རྣམ་པར་དག་པའོ། །ཡོན་ཏན་མཚུངས་པ་མེད་པས་རྣམ་པར་བརྒྱན་པའོ། །ཡོན་ཏན་ཚད་མེད་པ་རིན་པོ་ཆེ་དང་ལྡན་པའོ། །ཡོན་ཏན་བསམ་གྱིས་མི་ཁྱབ་པའི་འབྱུང་གནས་རྒྱ་མཚོའོ། །ཡོན་ཏན་དཔག་ཏུ་མེད་པའི་མཚན་ཉིད་དོ། །ཡོན་ཏན་མུ་མེད་པའི་སྤྲིན་ཏོ། །ཡོན་ཏན་ས་མཚམས་མེད་པས་བསྔགས་ཤིང་བསྟོད་པའོ། །ཆོས་རིན་པོ་ཆེ་ཟད་མི་ཤེས་པའོ། །བྱང་ཆུབ་སེམས་དཔའ་ཀུན་ཏུ་བཟང་པོ་ནི་སངས་རྒྱས་ཐམས་ཅད་ཀྱིས་ཡོན་ཏན་བརྗོད་ཅིང་བསྔགས་པ་མི་ཟད་པའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་བཟང་པོ་ཁྱོད་ཀྱིས་བྱང་ཆུབ་སེམས་དཔའ་ཀུན་ཏུ་མིག་དང་། བྱང་ཆུབ་སེམས་དཔའི་འཁོར་ཐམས་ཅད་ལ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ཡོངས་སུ་རྫོགས་པ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་ཤིན་ཏུ་བསྟན་པ་གང་གིས་འདས་པ་དང་། མ་འོངས་པ་དང་། ད་ལྟར་བྱུང་བའི་བྱང་ཆུབ་སེམས་དཔའི་སྤྱོད་པ་བྱུང་བ་དང་། འབྱུང་བ་དང་འབྱུང་བར་འགྱུར་བའི་ཏིང་ངེ་འཛིན་བཅུ་ཤིན་ཏུ་བསྟན་པ་ལ་མཁས་པས་ཏིང་ངེ་འཛིན་རྒྱ་ཆེན་པོ་བཅུ་ཤིན་ཏུ་བསྟན་པ་སྤོབས་པར་གྱིས་ཤིག །བཅུ་གང་ཞེ་ན་འདི་ལྟ་སྟེ། བྱང་ཆུབ་སེམས་དཔའི་ཏིང་ངེ་འཛིན་རྒྱ་ཆེན་པོ་ལ་མཁས་པ་རབ་ཏུ་ཐོབ་པ་དང་། རྗེས་སུ་འགྲོ་བ་སྣང་བ་ཞེས་བྱ་བ་དང་། འདི་ལྟ་སྟེ། བྱང་ཆུབ་སེམས་

---

^{[མ་དཔེ་གཟིགས་ན་འདིར་གནོན།]}

དཔའི་ཏིང་ངེ་འཛིན་རྒྱ་ཆེན་པོ་རབ་ཏུ་ཐོབ་པ་ཡིད་དུ་འོང་བ་ཞེས་བྱ་བ་དང་། འདི་ལྟ་སྟེ། ཞིང་འབྱམ་ཀླས་པ་གཅིག་ནས་གཅིག་ཏུ་བརྒྱུད་པའི་རྗེས་སུ་སོང་བ་དང་། འདི་ལྟ་སྟེ། ལྷག་པའི་བསམ་པ་གཙང་མས་སྤྱོད་པ་ཞེས་བྱ་བ་དང་། འདི་ལྟ་སྟེ་འདས་པའི་རྒྱན་གྱི་སྙིང་པོ་ཞེས་བྱ་བ་དང་། འདི་ལྟ་སྟེ། ཡེ་ཤེས་རྣམ་པར་སྣང་བའི་སྙིང་པོ་ཞེས་བྱ་བ་དང་། འདི་ལྟ་སྟེ། སངས་རྒྱས་ཐམས་ཅད་ཀྱིས་རྣམ་པར་བཀོད་པའི་འཇིག་རྟེན་གྱི་ཁམས་ཀྱི་རྒྱན་ཅེས་བྱ་བ་དང་། འདི་ལྟ་སྟེ། སེམས་ཅན་གྱི་ལུས་ཐ་མི་དད་པ་ཞེས་བྱ་བ་དང་། འདི་ལྟ་སྟེ། སེམས་ཅན་གྱི་ཁམས་ལ་དབང་བ་ཞེས་བྱ་བ་དང་། འདི་ལྟ་སྟེ། བྱང་ཆུབ་སེམས་དཔའི་ཏིང་ངེ་འཛིན་རྒྱ་ཆེན་པོ་ལ་མཁས་པ་རབ་ཏུ་ཐོབ་པ་བཅུ་པ་ཆགས་པ་མེད་པའི་དཀྱིལ་འཁོར་ཅེས་བྱ་བ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་འདི་བཅུ་ནི། འདས་པ་དང་མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱིས་གསུངས་སོ། །གསུང་ངོ་གསུང་བར་འགྱུར་རོ། །བྱང་ཆུབ་སེམས་དཔའ་གང་གིས་ཏིང་ངེ་འཛིན་བཅུ་པོ་འདི་དག་ལ་བསྟེན་ཅིང་བསྒོམས་ཏེ་མང་དུ་བྱས་པ་དང་། དངོས་པོར་བྱས་པ་དང་། ཤེས་པར་བྱས་པ་དང་། མངོན་དུ་བྱས་པ་དང་མདུན་དུ་བྱས་པ་དང་། མཉམ་པར་གཞག་པ་དང་། ཤིན་ཏུ་བརྩམས་པ་དེ་དག་ཀྱང་བྱང་ཆུབ་སེམས་དཔའི་ཏིང་ངེ་འཛིན་བཅུ་པོ་འདི་དག་དང་ལྡན་པས། བྱང་ཆུབ་སེམས་དཔའ་ཡིན་ཡང་སངས་རྒྱས་ཞེས་བྱའོ། །དེ་བཞིན་གཤེགས་པ་ཞེས་བྱའོ། །སྟོབས་བཅུ་པ་ཞེས་བྱའོ། །འདྲེན་པ་ཞེས་བྱའོ། །རྣམ་པར་འདྲེན་པ་ཞེས་བྱའོ། །ཐམས་ཅད་མཁྱེན་པ་ཞེས་བྱའོ། །ཐམས་ཅད་གཟིགས་པ་ཞེས་བྱའོ། །ཆགས་པ་མེད་པ་ལ་

---

^{[མ་དཔེ་གཟིགས་ན་འདིར་གནོན།]}

གནས་པ་ཞེས་བྱའོ། །བསྒྲིབས་པ་མྱེད་པའི་སྤྱོད་ཡུལ་ཅན་ཞེས་བྱའོ། །ཆོས་ཐམས་ཅད་ཀྱི་དབང་ཕྱུག་ཅེས་བྱའོ། །བྱང་ཆུབ་སེམས་དཔའ་གང་གིས་ཏིང་ངེ་འཛིན་འདི་དག་ཐོབ་པ་དེ་ནི་འཇིག་རྟེན་གྱི་ཁམས་ཐམས་ཅད་དུ་རྗེས་སུ་སོང་བ་ཡང་ཡིན་ལ། འཇིག་རྟེན་གྱི་ཁམས་ཐམས་ཅད་ནས་ཕྱིར་ལོག་པའང་ཡིན། སེམས་ཅན་ཐམས་ཅད་ཀྱི་ཁམས་སུ་རབ་ཏུ་སོང་བའང་ཡིན་ལ་སེམས་ཅན་མེད་པའི་མཐའ་ཡང་ཁོང་དུ་ཆུད་པ་ཡིན། ཆགས་པ་མེད་པའི་ལུས་ཀྱི་སྙིང་པོའི་རྗེས་སུ་སོང་བའང་ཡིན་ལ། ཆོས་ཀྱི་དབྱིངས་ཐམས་ཅད་ལ་འཇུག་པར་སྤྱོད་པ་ཡིན་ནོ། །ཆོས་ཀྱི་དབྱིངས་མཐའ་དང་དབུས་མེད་པས་ཀྱང་རྣམ་པར་དག་ལ་འདས་པ་དང་། མ་བྱོན་པ་དང་ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་ཡང་རྗེས་སུ་འབྲང་བ་ཡིན། དེ་བཞིན་གཤེགས་པ་ཐམས་ཅད་ཀྱི་ཆོས་རྣམ་པར་མཐོང་བ་ཡང་ཡིན་ལ། སྤྱོད་པ་ཐམས་ཅད་ཀྱི་ཡང་རྗེས་སུ་སོང་བ་ཡིན། དབྱངས་ཀྱི་ཡན་ལག་དང་ཡི་གེ་ལ་རབ་ཏུ་སྤོབས་ཤིང་། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་རྫོགས་པས་རྣམ་པར་དག་པ་ཡིན་ལ། བྱང་ཆུབ་སེམས་དཔའི་སྤྱོད་པ་རྣམ་པར་ཕྱེ་བ་ཡོངས་སུ་རྫོགས་པར་བྱ་བ་ལའང་རབ་ཏུ་གནས་པ་ཡིན། རྟག་པར་དུས་གསུམ་སྐད་ཅིག་ཏུ། ཞུགས་པའང་ཡིན་ལ་དུས་གསུམ་ཐམས་ཅད་ཡོངས་སུ་ཤེས་པར་བྱ་བའི་ཕྱིར་ཡང་ཡང་དག་པར་གཞོལ་བའང་ཡིན། སངས་རྒྱས་ཐམས་ཅད་ཀྱི་ཆོས་སྟོན་པ་ཡང་ཡིན་ལ། ཐབས་ཀྱིས་ཆོས་ཐམས་ཅད་ཀྱི་འཁོར་ལོ་བསྐོར་བ་ལས་ཕྱིར་མི་ལྡོག་པའི་ལུས་དང་ཡང་ལྡན་པ་ཡིན། འདས་པ་དང་། མ་འོངས་པ་དང་། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་རྣམ་པར་འཚང་རྒྱ་བར་བྱ་བའི་ཚུལ་ལ་ཡང་རབ་ཏུ་ཞུགས་ལ་སངས་རྒྱས་གཅིག་མངོན་པར་སངས་རྒྱས་པས། སངས་རྒྱས་ཐམས་ཅད་དུའང་ཤིན་ཏུ་སྟོན་པ་ཡིན་ཏེ། འདི་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་རྣམ་

---

^{[མ་དཔེ་གཟིགས་ན་འདིར་གནོན།]}

པའི་ཚུལ་ལོ། །འདི་དག་ནི་བྱང་ཆུབ་སེམས་དཔའ་རྣམས་ཀྱི། ཡེ་ཤེས་རྣམ་པར་སྦྱངས་པའི་ཚུལ་ལོ། །ཐམས་ཅད་མཁྱེན་པའི་རྒྱལ་མཚན་གཞན་གྱིས་མི་ཕམ་པའི་ཚུལ་ལོ། །བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་གྱི་ཚུལ་ལོ། །བྱང་ཆུབ་སེམས་དཔའི་མངོན་པར་ཤེས་པ་རྣོན་པོ་དང་། འགྲོགས་པའི་ཚུལ་ལོ། །གཟུངས་དང་སྤོབས་པ་ཐམས་ཅད་ཀྱི་ཚུལ་ལོ། །དུས་གསུམ་ཐ་མི་དད་པའི་ཚུལ་ལོ། །འདས་པ་དང་། མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཚུལ་ལོ། །སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ལ་རབ་ཏུ་དགོད་པའི་ཚུལ་ལོ། །འདི་དག་ནི་བྱང་ཆུབ་སེམས་དཔའ་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་ཡོངས་སུ་དག་པར་བྱ་བའི་ཁྱུ་མཆོག་གི་མཐུ་བསྟན་པའི་ཚུལ་ལོ། །བྱང་ཆུབ་སེམས་དཔའི་ཏིང་ངེ་འཛིན་འདི་དག་ཐོབ་པའི་བྱང་ཆུབ་སེམས་དཔའ་རྣམས་ནི་མཐུ་མི་ཟད་པའི་ཕྱིར་ཆོས་ཀྱི་དབྱིངས་ཀྱི་སྟོབས་ཐོབ་པ་ཡིན་ནོ། །འཕོ་བ་མེད་པའི་མཐར་ཐུག་པར་འགྱུར་བའི་ཕྱིར་ནམ་མཁའི་དབྱིངས་ལྟར་ཚད་མེད་པ་ཡིན། ཆོས་ཀྱི་རྒྱལ་སྲིད་ལ་འགྲོ་བ་དབང་བསྐུར་བའི་ཕྱིར་དབང་མཐའ་ཡས་པར་བསྒྱུར་བ་ཡིན། སྟོབས་བཅུ་ཤིན་ཏུ་ཡངས་པའི་ཚུལ་ཐོབ་པའི་ཕྱིར། འགྲོ་བ་ཐམས་ཅད་དུ་ཚད་མེད་པའི་ཡེ་ཤེས་ཐོབ་པ་ཡིན། རབ་ཏུ་ཞི་བའི་མཐའ་ལ་ཞུགས་པས། ཉོན་མོངས་པ་མེད་པའི་སེམས་རབ་ཏུ་བསྒོམས་པ་ཡིན། ཤུགས་དང་ལྡན་པའི་རྩལ་བདོག་པས་སྙིང་རྗེ་ཆེན་པོའི་སེང་གེ་ཡིན། ཡོན་ཏན་དང་བསྔགས་པ་ཐམས་ཅད་དང་ལྡན་པས་ཆོས་ཀྱི་སྒྲོན་མ་ལ་ཡང་དག་པར་གཞོལ་ཞིང་མི་ཟད་པ་ཡིན། ཉན་ཐོས་དང་རང་སངས་རྒྱས་ཐམས་ཅད་ཀྱི་བསམ་གྱིས་མི་ཁྱབ་པ་ཡིན། ཆོས་ཤེས་ཤིང་ཁོང་དུ་ཆུད་པས་གནས་ཀྱི་མཐར་ཕྱིན་པ་ཡིན། སྤྱོད་པ་དང་རྣམ་པར་གདགས་པ་དང་། བརྡ་ཐམས་

---

^{[མ་དཔེ་གཟིགས་ན་འདིར་གནོན།]}

ཅད་ལ་སྣ་ཚོགས་སུ་ཤིན་ཏུ་བསྟན་པ་བྱེད་པར་མཁས་པ་ཡིན། ཆོས་ཐམས་ཅད་མཚན་མ་མེད་པ་ལ་མཁས་པ་ལ་ཞུགས་པས། མཚན་མ་མེད་པ་ལ་མོས་པ་ཡིན། དེ་བཞིན་གཤེགས་པའི་མངའ་ཆེན་པོས་རྣམ་པར་དག་པས་རིགས་དང་། རྒྱུད་རྣམ་པར་དག་པ་ཡིན། གཞི་མེད་པ་ལ་འཇུག་པའི་ཡེ་ཤེས་ཀྱིས་ཆོས་ཀྱི་གཞི་རབ་ཏུ་དབྱེ་བའི་སྙིང་པོའི་རྗེས་སུ་སོང་བ་ཡིན། ཆོས་ཡོངས་སུ་གཏོང་བ་ལ་བརྩོན་པས་དུས་ཐམས་ཅད་དུ་མཁས་པ་དང་ལྡན་པ་ཡིན། ཤེས་པར་བྱ་བ་ཐམས་ཅད་ཁོང་དུ་ཆུད་པས་སེམས་ཅན་གྱི་ནང་ན་མཁས་པ་ཡིན། སྐྱེ་དགུ་ཐམས་ཅད་ཤིན་ཏུ་དག་པར་བྱེད་པས་མཐའ་ཡས་པ་རྣམ་པར་སྦྱོང་བ་ཡིན། སངས་རྒྱས་ཀྱི་བྱང་ཆུབ་རྣམ་པར་སངས་རྒྱས་པ་དང་། འཚང་རྒྱ་བར་བྱ་བའི་སྤྱོད་པ་ཡང་དག་པར་སྟོན་པས་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱི་ཐབས་ལ་མཁས་པ་ཡིན། བྱང་ཆུབ་སེམས་དཔའི་སྤྱོད་པའི་བྱིན་གྱི་རླབས་ཀྱིས་ཟད་མི་ཤེས་པ་ཡིན། ཐམས་ཅད་མཁྱེན་པའི་ཡུལ་རྣམ་པར་འཚང་རྒྱ་བར་བྱ་བ་ལ་མཁས་པས། ཆོ་འཕྲུལ་ཆེན་པོ་སྟོན་པ་ཡིན་གྱིས་དེ་བས་ན་ཀུན་ཏུ་བཟང་པོ་བྱང་ཆུབ་སེམས་དཔའི་ཏིང་ངེ་འཛིན་བཅུ་པོ་འདི་དག་རྒྱ་ཆེར་སྤྲོས་ཏེ། བཤད་པས་བསྟན་པར་གྱིས་ཤིག །བྱང་ཆུབ་སེམས་དཔའི་འཁོར་འདི་དག་ཐམས་ཅད་མཉན་པར་འདོད་དོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས། བཅོམ་ལྡན་འདས་ཀྱིས་བཀའ་སྩལ་པ་དང་། བྱང་ཆུབ་སེམས་དཔའ་དེ་དག་གིས་ཀྱང་གསོལ་བ་བཏབ་པར་ཤེས་ནས། བྱང་ཆུབ་སེམས་དཔའ་ཀུན་ཏུ་མྱིག་དང་། བྱང་ཆུབ་སེམས་དཔའི་ཚོགས་ཐམས་ཅད་ལ་སྨྲས་པ། ཀྱེ་རྒྱལ་བའི་སྲས་དག །བཅུ་པོ་འདི་རྣམས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ཆོས་མ་ལུས་པར་

---

^{[མ་དཔེ་གཟིགས་ན་འདིར་གནོན།]}

མཐར་ཐུག་པ་སྟེ། བཅུ་གང་ཞེ་ན་འདི་ལྟ་སྟེ། སངས་རྒྱས་སྐྱེ་བ་ཁོང་དུ་ཆུད་པའི་ཡེ་ཤེས་དང་། སེམས་ཅན་དྲི་མ་མེད་པར་མངོན་པར་བསྒྲུབ་པར་བྱ་བའི་ཡེ་ཤེས་དང་། འཇིག་རྟེན་གྱི་ཁམས་མིག་ཡོར་ལྟ་བུར་ཤེས་པའི་ཡེ་ཤེས་དང་། ཆོས་ཀྱི་དབྱིངས་ཀྱི་རྗེས་སུ་འཇུག་པའི་ཡེ་ཤེས་དང་། བྱང་ཆུབ་སེམས་དཔའ་རབ་ཏུ་གཟུང་བ་ལ་མཁས་པའི་ཡེ་ཤེས་དང་། ཕྱིར་མི་ལྡོག་པའི་བྱང་ཆུབ་སེམས་དཔའི་ཐབས་ཡོངས་སུ་གནན་པའི་ཡེ་ཤེས་དང་། དོན་ཐམས་ཅད་དང་ལྡན་པའི་ཆོས་ཀྱི་ལྷག་མཐོང་ལ་མཁས་པའི་ཡེ་ཤེས་དང་། བྱང་ཆུབ་ཀྱི་སེམས་ཀྱི་མཐུའི་རྗེས་སུ་སོང་བའི་ཡེ་ཤེས་དང་། སངས་རྒྱས་ཀྱི་ཆོས་ཐམས་ཅད་ཤེས་པའི་ཡེ་ཤེས་དང་། ཐམས་ཅད་མཁྱེན་པའི་སྨོན་ལམ་དང་བྱིན་གྱི་རླབས་ཀྱི་ཡེ་ཤེས་ཏེ། ཀྱེ་རྒྱལ་བའི་སྲས་དག །དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ཆོས་མ་ལུས་པར་མཐར་ཐུག་པའོ། །ཀྱེ་རྒྱལ་བའི་སྲས་དག །བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སེམས་བསྐྱེད་པ་མཐའ་དང་དབུས་མེད་པ་སྟེ། བཅུ་གང་ཞེ་ན་འདི་ལྟ་སྟེ། སེམས་ཅན་ཐམས་ཅད་ཉེ་བར་གཟུང་བ་དང་། ཡོངས་སུ་དགྲོལ་བའི་ཕྱིར། སེམས་བསྐྱེད་པ་མཐའ་དང་དབུས་མེད་པ་དང་། འདི་ལྟ་སྟེ་སངས་རྒྱས་ཀྱི་ཆོས་ཐམས་ཅད་ཡོངས་སུ་བསྒྲུབ་པའི་ཕྱིར། སེམས་བསྐྱེད་པ་མཐའ་དང་དབུས་མེད་པ་དང་། འདི་ལྟ་སྟེ་སངས་རྒྱས་ཐམས་ཅད་བསྙེན་བཀུར་ཞིང་མཆོད་པའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང་། འདི་ལྟ་སྟེ། སངས་རྒྱས་ཐམས་ཅད་མཐོང་བར་བྱ་བའི་མིག་ཚད་མེད་པ་ཡང་དག་པར་བསྒྲུབ་པའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང་། འདི་ལྟ་སྟེ་སངས་རྒྱས་ཐམས་ཅད་ཀྱི་གསུང་དང་དབྱངས་དང་བཀའ་ཡང་དག་པར་བཟུང་ཞིང་

---

^{[མ་དཔེ་གཟིགས་ན་འདིར་གནོན།]}

ཉམས་པ་མེད་པར་བྱ་བའི་ཕྱིར། སེམས་བསྐྱེད་པ་མཐའ་དང་དབུས་མེད་པ་དང་། འདི་ལྟ་སྟེ། སངས་རྒྱས་ཐམས་ཅད་ཀྱི་རྣམ་པར་འཕྲུལ་པའི་བྱེ་བྲག་ཐ་དད་པ་རྣམ་པར་དབྱེ་བ་ལ་མཁས་པར་ཁོང་དུ་ཆུད་པ་བསྐྱེད་པའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་བྱང་ཆུབ་ཀྱི་མཚམས་སྦྱར་བའི་སྟོབས་ལ་འཇུག་པར་བྱ་བའི་ཕྱིར། སེམས་བསྐྱེད་པ་མཐའ་དང་དབུས་མེད་པ་དང་། འདི་ལྟ་སྟེ་ཐམས་ཅད་མཁྱེན་པའི་སྟོབས་མཐའ་ཡས་པས་ཤིན་ཏུ་ཕྲ་བར་དམིགས་ཤིང་། ཡོངས་སུ་མནན་པའི་སངས་རྒྱས་ཀྱི་ཆོས་རབ་ཏུ་བསྟན་པའི་ཕྱིར་སེམས་བསྐྱེད་པ་མཐའ་དང་དབུས་མེད་པ་དང་། འདི་ལྟ་སྟེ། སངས་རྒྱས་ཀྱི་ཁྱུ་མཆོག་གི་མཐུ་བསམ་གྱིས་མི་ཁྱབ་ཅིང་འབྱམ་ཀླས་པ་ལ་འཇུག་པ་དང་ཁོང་དུ་ཆུད་པར་བྱ་བའི་ཕྱིར། སེམས་བསྐྱེད་པ་མཐའ་དང་དབུས་མེད་པ་དང་། འདི་ལྟ་སྟེ་སངས་རྒྱས་ཀྱི་ཐ་དད་པ་ཡང་དག་པར་མཁྱེན་པ་མངོན་དུ་བྱ་བར་ལྷག་པའི་བསམ་པ་ཡང་དག་པར་གཏང་ཞིང་སངས་རྒྱས་ཀྱི་ཆོས་ཐམས་ཅད་ཡང་དག་པར་བླང་བའི་ཕྱིར། སེམས་བསྐྱེད་པ་མཐའ་དང་དབུས་མེད་པ་དང་། འདི་ལྟ་སྟེ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་འཇུག་ཅིང་། ལུས་སྣ་ཚོགས་ཀྱི་བྱིན་གྱི་རླབས་ཡང་དག་པར་བསྟན་པའི་ཕྱིར། སེམས་བསྐྱེད་པ་མཐའ་དང་དབུས་མེད་པ་སྟེ། ཀྱེ་རྒྱལ་བའི་སྲས་དག །བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་མཐའ་དང་དབུས་མེད་པའོ། །ཀྱེ་རྒྱལ་བའི་སྲས་དག །བཅུ་པོ་འདི་རྣམས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་གྱི་བྱེ་བྲག་ལ་འཇུག་པའི་

---

^{[མ་དཔེ་གཟིགས་ན་འདིར་གནོན།]}

ཡེ་ཤེས་ཏེ། བཅུ་གང་ཞེ་ན་འདི་ལྟར་ཤར་ཕྱོགས་སུ་སྙོམས་པར་ཞུགས་ཏེ། ནུབ་ཕྱོགས་ནས་རྣམ་པར་ལྡང་བ་དང་། ནུབ་ཕྱོགས་སུ་སྙོམས་པར་ཞུགས་ཏེ། ཤར་ཕྱོགས་ནས་རྣམ་པར་ལྡང་བ་དང་ཤར་དང་བྱང་གི་མཚམས་སུ་སྙོམས་པར་ཞུགས་ཏེ། ལྷོ་དང་ནུབ་ཀྱི་མཚམས་ནས་རྣམ་པར་ལྡང་བ་དང་། ལྷོ་དང་ནུབ་ཀྱི་མཚམས་སུ་སྙོམས་པར་ཞུགས་ཏེ། ཤར་དང་བྱང་གི་མཚམས་ནས་རྣམ་པར་ལྡང་བ་དང་། ལྷོ་ཕྱོགས་སུ་སྙོམས་པར་ཞུགས་ཏེ། བྱང་ཕྱོགས་ནས་རྣམ་པར་ལྡང་བ་དང་། བྱང་ཕྱོགས་སུ་སྙོམས་པར་ཞུགས་ཏེ། ལྷོ་ཕྱོགས་ནས་རྣམ་པར་ལྡང་བ་དང་། ནུབ་དང་བྱང་གི་མཚམས་སུ་སྙོམས་པར་ཞུགས་ཏེ། ཤར་དང་ལྷོའི་མཚམས་ནས་རྣམ་པར་ལྡང་བ་དང་། ཤར་དང་ལྷོའི་མཚམས་སུ་སྙོམས་པར་ཞུགས་ཏེ། ནུབ་དང་བྱང་གི་མཚམས་ནས་རྣམ་པར་ལྡང་བ་དང་། འོག་གི་ཕྱོགས་སུ་སྙོམས་པར་ཞུགས་ཏེ། སྟེང་གི་ཕྱོགས་ནས་རྣམ་པར་ལྡང་བ་དང་། སྟེང་གི་ཕྱོགས་སུ་སྙོམས་པར་ཞུགས་ཤིང་འོག་གི་ཕྱོགས་ནས་རྣམ་པར་ལྡང་བ་སྟེ། ཀྱེ་རྒྱལ་བའི་སྲས་དག་བཅུ་པོ་འདི་རྣམས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་གི་ཏིང་ངེ་འཛིན་གྱི་བྱེ་བྲག་ལ་འཇུག་པའི་ཡེ་ཤེས་སོ། །ཀྱེ་རྒྱལ་བའི་སྲས་དག་བཅུ་པོ་འདི་རྣམས་ནི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོར་བྱ་བ་ལ་མཁས་པ་སྟེ། བཅུ་གང་ཞེ་ན་འདི་ལྟ་སྟེ། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་པད་མོ་གཅིག་ཏུ་བྱིན་གྱིས་བརླབས་ཏེ། པདྨོ་གཅིག་པོ་དེ་རང་གི་སྐྱིལ་མོ་ཀྲུང་གིས་རྒྱས་པར་ཁྱབ་པར་བྱིན་གྱིས་རློབ་བོ། །རང་གི་ལུས་དེ་ལས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྟོན་ཏོ། །སྟོང་

---

^{[མ་དཔེ་གཟིགས་ན་འདིར་གནོན།]}

གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེར་ཡང་གླིང་བཞི་པ་ཁྲག་ཁྲིག་ཕྲག་བརྒྱ་སྟོན་ཏོ། །གླིང་བཞི་པ་ཁྲག་ཁྲིག་བརྒྱ་པོ་རེ་རེ་ཞིང་ཡང་བདག་གི་ལུས་རེ་རེ་བྱིན་གྱིས་རློབ་སྟེ། ལུས་དེ་དག་རེ་རེ་ལའང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྲག་ཁྲིག་བརྒྱ་བརྒྱ་སྟོན་ཏོ། །འཇིག་རྟེན་གྱི་ཁམས་དེ་དག་གི་གླིང་བཞི་པ་རེ་རེར་ཡང་བྱང་ཆུབ་སེམས་དཔའི་སྤྱོད་པ་ཁྲག་ཁྲིག་བརྒྱ་བརྒྱ་ཡང་དག་པར་སྟོན་ཏེ། བྱང་ཆུབ་སེམས་དཔའི་སྤྱོད་པ་དེ་དག་རེ་རེ་ལ་ཡང་མོས་པ་བྱེ་བ་ཁྲག་ཁྲིག་བརྒྱ་བརྒྱ་མངོན་པར་སྒྲུབ་བོ། །མོས་པ་དེ་དག་རེ་རེ་ལ་ཡང་དབང་པོ་སྣ་ཚོགས་རྣམ་པར་ཕྱེ་བ་ཁྲག་ཁྲིག་བརྒྱ་བརྒྱ་ཡོངས་སུ་རྫོགས་པ་རབ་ཏུ་ཐོབ་པར་བྱ་བ་ཡོངས་སུ་རྫོགས་པར་བྱེད་དོ། །དབང་པོ་སྣ་ཚོགས་རྣམ་པར་ཕྱེ་བ་དེ་དག་རེ་རེ་ལ་ཡང་བྱང་ཆུབ་སེམས་དཔའ་ཁྲག་ཁྲིག་ཕྲག་བརྒྱ་བརྒྱ་ཕྱིར་མི་ལྡོག་པའི་ལས་ཀྱིས་བྱང་ཆུབ་སེམས་དཔའི་ཆོས་ལ་རབ་ཏུ་གཞོག་གོ །འོན་ཀྱང་ལུས་མང་པོའམ་ལྷག་པར་འཕེལ་བར་མི་བྱེད་དོ། །མཉམ་པར་གཞག་པའང་ཉམས་པར་འགྱུར་བ་མེད་དོ། །ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན། ལྷ་མ་ཡིན་གྱི་དབང་པོ་སྒྲ་གཅན་ཞེས་བྱ་བ་ཡོད་དེ། དེའི་རང་བཞིན་གྱི་ལུས་ནི་དཔག་ཚད་བདུན་བརྒྱའོ། །དེའི་སྤྲུལ་པའི་ལུས་ནི་དཔག་ཚད་བརྒྱ་སྟོང་ཕྲག་དྲུག་ཅུ་རྩ་བརྒྱད་དེ། དེའི་ལུས་ཕྱེད་རྒྱ་མཚོ་ཆེན་པོའི་ནང་ན། འདུག་ཀྱང་ལུས་ཀྱི་སྟོད་གྱེན་དུ་འཕགས་པ་རི་རབ་ཀྱི་རྩེ་མོ་དང་མཉམ་ཡང་། ཀྱེ་རྒྱལ་བའི་སྲས་ལྷ་མ་ཡིན་གྱི་དབང་པོ་སྒྲ་གཅན་དེ་སྤྲུལ་པའི་ལུས་ཚད་བརྒྱ་སྟོང་ཕྲག་དྲུག་ཅུ་རྩ་བརྒྱད་པ་དེས་སྔོན་གྱི་ལུས་འཇིག་པར་མི་བྱེད་དོ། །སྔོན་སྐྱེས་པའི་ཕུང་པོ་དང་ཁམས་དང་། སྐྱེ་མཆེད་ཀྱང་ཡོངས་སུ་ཉམས་པར་མི་འགྱུར་རོ། །ལུས་ཆེན་པོ་དེ་ཡོད་པས་ཀྱང་སྤྲུལ་པའི་ལུས་ལ་གཞན་དུ་འདུ་ཤེས་པར་མི་འགྱུར་ཏེ། ལུས་སྔ་

---

^{[མ་དཔེ་གཟིགས་ན་འདིར་གནོན།]}

མ་ཤི་འཕོས་པའི་འདུ་ཤེས་ཀྱང་མེད་ལ་གསར་དུ་སྐྱེས་པའི་ལུས་ཀྱིས་ཀྱང་ཉམས་དགའ་བ་རབ་ཏུ་ཐོབ་པ་ཡིན་ཏེ། སྤྲུལ་པའི་ལུས་དེས་མཐུ་དང་དབང་བྱེད་པར་དབང་སྒྱུར་བར་ཡང་ཡང་དག་པར་སྟོན་ན། རྨོངས་ཤིང་འཁྲུལ་བར་འགྱུར་བའང་མེད་དེ། ལྷ་མ་ཡིན་གྱི་དབང་པོ་སྒྲ་གཅན་དེ་ནི་འདོད་ཆགས་ཅན་ཞེ་སྡང་ཅན་གཏི་མུག་ཅན་ཏེ། ང་རྒྱལ་དང་དྲེགས་པ་དང་ལྡན་ཡང་རྒྱ་མཚོའི་ནང་ན་གནས་ཤིང་རྒྱ་མཚོའི་ནང་གི་ཁྱིམ་ན་འདུག་བཞིན་དུ་རྣམ་པ་དེ་ལྟ་བུའི་སྤྲུལ་པའི་ལུས་ཀྱིས་མངོན་པར་འཕགས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་སྒྱུ་མའི་རྣམ་པར་རབ་ཏུ་རྟོགས་པ། འཇིག་རྟེན་ཐམས་ཅད་ན་དཔེ་མེད་པ། མིག་ཡོར་དང་མཉམ་པར་རབ་ཏུ་ཞུགས་པ། འཇིག་རྟེན་གྱི་ཁམས་ཐམས་ཅད་སངས་རྒྱས་སྐྱེས་པའི་སྤྲུལ་པ་རྣམ་པར་དམིགས་པ་ལྟ་བུར་ཁོང་དུ་ཆུད་པ། སྒྲ་དབྱངས་རྣམ་པར་དམིགས་པ་ཐམས་ཅད་རིའི་བྲག་ཅ་ལྟ་བུར་ཤེས་པ། ཡང་དག་པའི་ཆོས་རབ་ཏུ་མཐོང་བ། ཆོས་ཇི་ལྟ་བ་བཞིན་གྱི་ལུས་དང་ལྡན་པ། རང་བཞིན་གྱིས་འོད་གསལ་ཞིང་དང་བའི་ཆོས་ལ་ཞུགས་པ། སེམས་ཀྱི་རང་བཞིན་དངོས་པོ་མྱེད་པར་རབ་ཏུ་རྟོགས་པ། ལུས་ཀྱི་ཡུལ་ཚད་མེད་པ་ལ་གནས་པ། སངས་རྒྱས་ཀྱི་ཡེ་ཤེས་སྣང་བས་བྱང་ཆུབ་ཀྱི་སྤྱོད་པ་རྣམ་པར་སྦྱངས་པ་ལྟ་སྨོས་ཀྱང་ཅི་དགོས་ཏེ། དེ་ཏིང་ངེ་འཛིན་ཆེན་པོ་དེ་ལ་གནས་པས་ཆུང་ཟད་དུ་འཁྲུལ་པའང་མེད་ན་བློང་ཞིང་རྨོངས་པར་འགྱུར་བ་མེད་པ་ལྟ་ཅི་སྨོས། དེ་ལུས་ཀྱི་སྟོད་ལྷའི་འཇིག་རྟེན་དུ་འཕགས་པར་བྱིན་གྱིས་རློབ་ཅིང་ལུས་ཀྱི་སྨད་འདོད་པའི་ཁམས་ན་འདུག་པར་བྱིན་གྱིས་རློབ་ཀྱང་ཤིན་ཏུ་མཉམ་པར་བཞག་པས་རབ་ཏུ་སྦྱར་བའི་ཏིང་ངེ་འཛིན་གྱི་དཀྱིལ་འཁོར་ཆེན་པོ་དེས་ལྷ་མ་ཡིན་གྱི་དབང་པོ་སྒྲ་གཅན་དེ་ཡང་རང་གི་ལུས་ཀྱི་ནང་དུ་རླག་པ་དེ་ལུས་ཆེན་པོ་སྟོན་ཅིང་སྤྱོམས་པའི་སྐྱེ་

---

^{[མ་དཔེ་གཟིགས་ན་འདིར་གནོན།]}

བ་དང་རྫུ་འཕྲུལ་ཐམས་ཅད་ཀྱང་ལུས་ཀྱི་ནང་དུ་རླག་པར་བྱིན་གྱིས་རློབ་བོ། །ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན། མི་སྡུག་པ་སྒོམ་པ་ལ་གནས་པའི་དགེ་སློང་ནི། མི་སྡུག་པའི་མཚན་མར་རྣམ་པར་ལྟ་ཞིང་ནང་གི་ལུས་ལ་རྟོག་པ་ལ་མངོན་པར་བརྩོན་པ་ཡིན། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ལུས་སུ་འཇིག་རྟེན་གྱི་ཁམས་ཐམས་ཅད་ཆུད་པར་བྱ་བའི་ཕྱིར་ཆོས་ཀྱི་ལུས་ལ་བརྟག་པར་མངོན་པར་བརྩོན་པ་ཡིན་ཏེ་ལུས་དེ་ལ་འཇིག་རྟེན་དང་། འཇིག་རྟེན་གྱི་ཆོས་མཐོང་བ་ཡང་འདི་ལྟ་སྟེ། བྱང་ཆུབ་སེམས་དཔའི་ཁྱུ་མཆོག་གི་མཐུ་དང་། རྣམ་པར་འཕྲུལ་པ་དང་། ཏིང་ངེ་འཛིན་རབ་ཏུ་ཐོབ་པས་ལུས་ལ་འཇིག་རྟེན་དང་འཇིག་རྟེན་གྱི་ཆོས་ཀྱིས་ཆགས་པ་མེད་དོ། །ཀྱེ་རྒྱལ་བའི་སྲས་དག་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་རྗེས་སུ་འགྲོ་བ་སྣང་བ་ཞེས་བྱའོ། །ཀྱེ་རྒྱལ་བའི་སྲས་དག་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམས། སྟོང་གི་འཇིག་རྟེན་གྱི་ཁམས་རེ་རེ་ལ་བྱིན་གྱིས་རློབ་སྟེ། འཇིག་རྟེན་གྱི་ཁམས་དེ་དག་རེ་རེ་ཡང་ལུས་རྣམ་པར་དམིགས་པ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཡང་དག་པར་སྟོན་ཏོ། །ལུས་དེ་དག་རེ་རེ་ལས་ཀྱང་འོད་གཟེར་གྱི་དཀྱིལ་འཁོར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་རབ་ཏུ་འགྱེད་དོ། །འོད་གཟེར་རེ་རེ་ལ་ཡང་ཁ་དོག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཡང་དག་པར་སྟོན་ཏེ། ཁ་དོག་

---

^{[མ་དཔེ་གཟིགས་ན་འདིར་གནོན།]}

དེ་དག་རེ་རེས་ཀྱང་འཇིག་རྟེན་གྱི་ཁམས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་སྣང་བར་བྱེད་དོ། །སྣང་བ་དེ་དག་རེ་རེས་ཀྱང་སེམས་ཅན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྨིན་པར་བྱེད་དོ། །དེ་ལ་ཡང་བྱང་ཆུབ་སེམས་དཔའ་དེས་འཇིག་རྟེན་གྱི་ཁམས་རབ་ཏུ་ཤེས་སོ། །འཇིག་རྟེན་གྱི་ཁམས་རྣམ་པར་ཕྱེ་བ་རབ་ཏུ་ཤེས་སོ། །འཇིག་རྟེན་གྱི་ཁམས་ཀུན་ནས་ཉོན་མོངས་པ་རབ་ཏུ་ཤེས་སོ། །འཇིག་རྟེན་གྱི་ཁམས་རྣམ་པར་དག་པ་རབ་ཏུ་ཤེས་སོ། །འཇིག་རྟེན་གྱི་ཁམས་སུ་འགྲོ་བ་རབ་ཏུ་ཤེས་སོ། །འཇིག་རྟེན་གྱི་ཁམས་བྱིན་གྱིས་བརླབ་པ་རབ་ཏུ་ཤེས་སོ། །འཇིག་རྟེན་གྱི་ཁམས་སུ་གནས་པར་བྱ་བ་རབ་ཏུ་ཤེས་སོ། །འཇིག་རྟེན་གྱི་ཁམས་སྣང་བར་བྱ་བ་རབ་ཏུ་ཤེས་སོ། །འཇིག་རྟེན་གྱི་ཁམས་ནས་འགྲོ་བ་འང་རབ་ཏུ་ཤེས་སོ། །དེ་ལྟར་བྱང་ཆུབ་སེམས་དཔའ་འཇིག་རྟེན་གྱི་ཁམས་ལ་དེ་ལྟར་འཇུག་ཀྱང་འཇིག་རྟེན་གྱི་ཁམས་ཇི་ལྟ་བ་དེ་བཞིན་དུ་བྱང་ཆུབ་སེམས་དཔའ་ལ་འཇུག་སྟེ། འཇིག་རྟེན་གྱི་ཁམས་རྣམ་པར་དམིགས་པས། འཇིག་རྟེན་གྱི་ཁམས་སྤྲོ་བར་ཡང་མྱི་བྱེད་དེ། ཆོས་ཀྱི་རང་བཞིན་ལས་ཀྱང་འཇིག་རྟེན་གྱི་ཁམས་འཇིག་པར་མྱི་བྱེད་དོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་གསུམ་པ། ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན་ལྷའི་བུ་ཉི་མ་འཆར་བའི་ཚེ་རི་རབ་རིའི་རྒྱལ་པོ་འཁོར་བར་གནས་པའི་རིན་པོ་ཆེའི་རི་བདུན་ལ་འཆར་བར་འགྱུར་ཏེ། རི་བདུན་པོ་དེ་དག་ལ་ཤར་ནས་རི་མཚམས་ཀྱི་གནས་བདུན་པོ་ཤིན་ཏུ་རུབ་པ་དེ་དག་ཏུའང་སྣང་བའི་ཚུལ་གྱིས་ཀུན་ཏུ་འཆར་རོ། །དེ་ཡང་རིན་པོ་ཆེའི་རི་བདུན་པོ་གསེར་གྱི་མདོག་ཅན་དེ་དག་ལ་ཉི་མའི་གཟུགས་བརྙན་སྣང་བས་རི་བདུན་གྱི་ཉི་མའི་གཟུགས་བརྙན་རི་མཚམས་བདུན་པོ་དེ་དག་ཏུ་སྣང་བའི་ཚུལ་གྱིས་འཆར་བར་འགྱུར་ཏེ། རི་མཚམས་བདུན་པོ་དེ་དག་ཀྱང་གསེར་གྱི་མདོག་ཏུ་འདུག་པས། དེ་དག་ལས་ཀྱང་རི་བདུན་པོ་དེ་དག་ལ་གཟུགས་བརྙན་གྱི་ཚུལ་དུ་ཉི་མའི་འོད་འཆར་ཤིང་རྣམ་པར་དམིགས་པར་འགྱུར་རོ། །དེ་ལྟར་ན་གཅིག་གིས་གཅིག་སྣང་བར་

---

^{[མ་དཔེ་གཟིགས་ན་འདིར་གནོན།]}

བྱ་བའི་ཚུལ་དུ་རི་མཚམས་དེ་དག་ཏུ་ཉི་མའི་གཟུགས་བརྙན་ཤར་ཅིང་རིན་པོ་ཆེའི་རི་དེ་དག་ལ་ཉི་མའི་གཟུགས་བརྙན་འབྱུང་བས་དེའི་ཕྱིར་རིན་པོ་ཆེའི་རི་རྣམས་ལས་ཉི་མ་འཆར་ཞེས་བྱའོ། །དེ་ལྟར་གཅིག་ནས་གཅིག་ཏུ་སྣང་བ་རྣམ་པར་དམིགས་པར་བརྒྱུད་པས་ཉི་མའི་དཀྱིལ་འཁོར་གྱི་མཐར་ཐུག་པ་མེད་དོ། །དེ་ལྟར་སྣང་བ་ཡང་དངོས་པོ་ཡང་མ་ཡིན། དངོས་པོ་མ་ཡིན་པའང་མ་ཡིན། ཡོད་པའང་མ་ཡིན། མེད་པའང་མ་ཡིན། རི་རྣམས་ལ་གནས་པའང་མ་ཡིན་ནང་དུ་ཕྱིན་པའང་མ་ཡིན། ཕྱི་རོལ་ན་གནས་པའང་མ་ཡིན། དེ་དག་དང་བྲལ་བར་གནས་པའང་མ་ཡིན་ནོ། །ཀྱེ་རྒྱལ་བའི་སྲས་དག་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་ཏིང་ངེ་འཛིན་འདི་ལ་གནས་པ་ཡང་འཇིག་རྟེན་གྱི་ཁམས་རྣམ་པར་དམིགས་པ་འཇིག་པར་ཡང་མི་བྱེད་དོ། །ཆོས་རྣམས་ཀྱི་རང་བཞིན་ཡང་ཡོངས་སུ་མི་སྤོང་ངོ་། །བྱང་ཆུབ་སེམས་དཔའ་དེ་ཉིད་འཇིག་རྟེན་གྱི་ཁམས་ཀྱི་ནང་དུ་ཕྱིན་པའང་མ་ཡིན་ནོ། །བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་རྣམ་པར་དམིགས་པའི་ཕྱི་རོལ་ན་འདུག་པའང་མ་ཡིན་ནོ། །བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་ལ་ཡང་མི་རྟོག་སྟེ། བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་ལ་རྣམ་པར་རྟོག་པའང་མ་ཡིན་ནོ། །བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་ཀྱི་མཚན་མ་རྣམ་པར་འཇིག་པར་བྱེད་པ་ཡང་མ་ཡིན་ནོ། །ཆོས་ཐམས་ཅད་ཀྱི་མཚན་ཉིད་གཅིག་པོ་ཡང་མཚན་ཉིད་མེད་པ་ལས་རྣམ་པར་མི་ཟློག་སྟེ། བྱང་ཆུབ་སེམས་དཔའ་དེ་ཡང་ཆོས་རྣམ་པར་དབྱེ་བ་འཁྲུག་པར་མི་བྱེད་དོ། །བྱང་ཆུབ་སེམས་དཔའ་དེ་དེ་བཞིན་ཉིད་ཀྱི་རང་བཞིན་གནས་པ་དེ་ལས་ཀྱང་ཕྱིར་མི་ལྡོག་གོ །ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན། སྒྱུ་མའི་གཙུག་ལག་མིག་འཕྲུལ་ཞེས་བྱ་བ་འཇིག་རྟེན་ན་ཡོད་དེ། སྒྱུ་མའི་མཁན་པོ་སྒྱུ་མའི་གཙུག་ལག་དེ་ལ་ཤིན་ཏུ་བསླབས་ཤིང་

---

^{[མ་དཔེ་གཟིགས་ན་འདིར་གནོན།]}

ནན་ཏན་ཏུ་བྱེད་བྱེད་པ་རྣམས་ལམ་པོ་ཆེའི་བཞི་མདོ་དག་ཏུ་འཁོད་ཅིང་འགྲོ་བའི་ཚོགས་ཆེན་པོ་འདུས་པ་དག་གི་མདུན་དུ་སྐད་ཅིག་ཡུད་ཙམ་དུ་ཉི་མ་གཅིག་དང་། ཉིན་ཞག་བདུན་དང་ཟླ་བ་ཕྱེད་དང་། ཟླ་བ་གཅིག་དང་ཟླ་བ་གཅིག་ཀྱང་སྟོན་ཏོ། །ལོ་གཅིག་ཀྱང་སྟོན་ཏོ། །ལོ་བརྒྱ་ཡང་སྟོན་ཏོ། །གྲོང་ཡང་སྟོན་ཏོ། །ཡུལ་ཡང་སྟོན་ཏོ། །ཆུ་ཀླུང་གི་རྒྱུན་ཀྱང་སྟོན་ཏོ། །རྒྱ་མཚོ་ཡང་སྟོན་ཏོ། །སྤྲིན་ཡོངས་སུ་སྡུད་པ་ཡང་སྟོན་ཏོ། །སྤྲིན་ཆེན་པོ་ལས་ཆར་འབབ་པ་ཡང་སྟོན་ཏོ། །གནམ་སྟོང་པ་ལས་ཆར་འབབ་པ་ཡང་སྟོན་ཏོ། ། འཇིག་རྟེན་གྱི་གནས་རྣམ་པ་སྣ་ཚོགས་ཡང་སྟོན་ཏེ། དེ་ལྟར་བསྟན་པས་ཉི་མ་གཅིག་པོ་འཇིག་པར་མི་འགྱུར་རོ། །ཉི་མ་གཅིག་པོས་ཀྱང་ཉིན་ཞག་དང་ཟླ་བ་དང་ལོ་དེ་དག་འཇིག་པར་མི་འགྱུར་རོ། །ཡུན་རིང་པོས་ཀྱང་སྒྱུ་མ་སྟོན་ཅིང་བསྒྲུབ་པ་ཟད་པར་མི་འགྱུར་ཏེ། སྒྱུ་མ་བསྟན་པའི་དུས་ཀྱིས་ཀྱང་ཡུན་རིང་པོ་རྣམ་པར་དམིགས་པ་ཟད་པར་མི་འགྱུར་རོ། །ཀྱེ་རྒྱལ་བའི་སྲས་དག་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་ལ་མཉམ་པར་གཞག་པ་ཡང་འཇིག་རྟེན་གྱི་ཁམས་གཅིག་ཏུ་འཇིག་རྟེན་གྱི་ཁམས་གྲངས་མེད་པ་ལ་འཇུག་པ་རབ་ཏུ་སྟོན་ཏོ། །རླུང་གི་ཕུང་པོ་དང་། མེའི་ཕུང་པོ་དང་། ཆུའི་ཕུང་པོ་དང་། སའི་ཕུང་པོར་བཅས་པ་དང་། རྒྱ་མཚོ་དང་གླིང་དུ་བཅས་པ་དང་། རིན་པོ་ཆེའི་རི་དང་རི་རབ་དང་ཁོར་ཡུག་དང་། བཏང་བཟུང་དང་ཁོར་ཡུག་ཆེན་པོས་ཡོངས་སུ་བསྐོར་བར་བཅས་པ་དང་། མིའི་འཇིག་རྟེན་དང་གྲོང་རྡལ་དང་ཡུལ་གྲུ་དང་། གྲོང་གི་གང་པར་བཅས་པ་དང་། བཟའ་ཤིང་གི་ར་བ་དང་། ཆུ་ཀླུང་དང་། མཚོ་དང་ལྟེང་ཀར་བཅས་པ་དང་། ལྷའི་གནས་དང་། རྒྱན་དུ་བཅས་པ་དང་། ཀླུའི་གནས་སུ་བཅས་པ་དང་། གནོད་སྦྱིན་གྱི་གནས་སུ་བཅས་པ་དང་། དྲི་ཟའི་གནས་སུ་བཅས་པ་དང་། ལྷ་མ་ཡིན་གྱི་གནས་སུ་བཅས་པ་དང་ནམ་མཁའ་ལྡིང་གི་གནས་སུ་བཅས་པ་དང་། མིའམ་ཅིའི་

---

^{[མ་དཔེ་གཟིགས་ན་འདིར་གནོན།]}

གནས་སུ་བཅས་པ་དང་། མིའི་རྒྱན་དང་གནས་སུ་བཅས་པ་དང་། འདོད་པའི་ཁམས་ཀྱི་ཡུལ་དང་བཅས་པ་དང་། གཟུགས་ཀྱི་ཁམས་ཀྱི་ཡུལ་དང་བཅས་པ་དང་། གཟུགས་མེད་པའི་ཁམས་ཀྱི་ཡུལ་དང་བཅས་པ་དང་། འཇིག་རྟེན་གྱི་ཁམས་བྱུར་བུར་བཅས་པ་དང་། འཇིག་རྟེན་གྱི་ཁམས་སྟོང་དུ་བཅས་པ་དང་། འཇིག་རྟེན་གྱི་ཁམས་སྟོང་གསུམ་དུ་བཅས་པ་དང་། ལས་དང་རྣམ་པར་སྨིན་པར་བཅས་པ་དང་། ཤི་འཕོ་དང་སྐྱེ་བར་བཅས་པ་དང་། སེམས་ཅན་དུ་བཅས་པ་དང་ཡུན་རིང་པོར་བཅས་པ་དང་། ཡུད་ཙམ་ཐང་ཅིག་ཏུ་བཅས་པ་དང་། ཉི་མར་བཅས་པ་དང་། དུས་མཚམས་སུ་བཅས་པ་དང་། ཟླ་བ་དང་ལོ་དང་ལོ་བརྒྱར་བཅས་པ་དང་བསྐལ་པ་དང་། འཇིག་པ་དང་འདུ་བར་བཅས་པ་དང་ཀུན་ནས་ཉོན་མོངས་པ་དང་རྣམ་པར་དག་པ་དང་། ཡངས་པ་དང་ཕྲ་བ་དང་རྒྱ་ཆེ་བ་དང་ཚད་མེད་པར་བཅས་པ་དང་། སངས་རྒྱས་སྐྱེ་བར་བཅས་པ་དང་། བྱང་ཆུབ་སེམས་དཔའི་འཁོར་དུ་བཅས་པ་དང་། འདུལ་བའི་སེམས་ཅན་དུ་བཅས་པ་དང་། སངས་རྒྱས་རྣམ་པར་འཕྲུལ་པའི་ཡུལ་དང་ཐམས་ཅད་དུ་བྱིན་གྱིས་བརླབ་པ་དང་། སངས་རྒྱས་ཀྱི་ཞིང་རྣམ་པར་དག་པར་བཅས་པ་དང་། ཡུལ་དང་ཕྱོགས་དང་། གཞི་སྣ་ཚོགས་དང་། གནས་སྣོད་དུ་མས་གང་བ་དང་། འགྲོ་བའི་རྒྱུད་སྣ་ཚོགས་དང་། སེམས་ཅན་གྱི་རིས་བསམ་གྱིས་མི་ཁྱབ་པར་བཅས་པ་དང་། སྔོན་གྱི་མཐའ་དང་ཕྱི་མའི་མཐའ་དང་། ད་ལྟར་བྱུང་བ་དང་། རིན་པོ་ཆེ་སྣ་ཚོགས་དང་། རིན་པོ་ཆེ་དུ་མ་དང་། ལས་དང་རྣམ་པར་སྨིན་པ་སྣ་ཚོགས་རྣམ་པར་དག་པར་བཅས་པ་དང་། འཇིག་རྟེན་གྱི་ཁམས་དེ་དག་ལ་འཇིག་རྟེན་གྱི་ཁམས་གཅིག་ཏུ་འཇུག་པའི་ཚེ། འཇིག་རྟེན་ན་ཡོད་པ་དང་། འཇིག་རྟེན་དུ་གཏོགས་པའི་སེམས་ཅན་དེ་དག་ཐམས་ཅད་ཀྱང་སྟོན་ཏོ། །མཐོང་བར་བྱེད་དོ། །ཤེས་པར་བྱེད་

---

^{[མ་དཔེ་གཟིགས་ན་འདིར་གནོན།]}

དོ། །རྣམ་པར་དཔྱོད་དོ། །རྟོགས་པར་བྱེད་དོ། །རབ་ཏུ་ཤེས་པར་བྱེད་དོ། །ཁོང་དུ་ཆུད་པར་བྱེད་དོ། །དེ་ལ་ཡང་དག་པར་འཇུག་པ་ཡང་མི་ཟད་པའི་ཡེ་ཤེས་ཀྱིས་ཐོབ་པར་གྱུར་པར་ཡང་དག་པ་ཇི་ལྟ་བ་བཞིན་དུ་མ་ནོར་བར་ལྟའོ། །འཇིག་རྟེན་གྱི་ཁམས་ཀྱི་གྲངས་དེ་དག་གིས་ཀྱང་འཇིག་རྟེན་གྱི་ཁམས་འདི་དག་རྣམ་པར་འཇིག་པར་མི་བྱེད་དེ་འཇིག་རྟེན་གྱི་ཁམས་འདི་དག་གིས་འཇིག་རྟེན་གྱི་ཁམས་དེ་དག་རྣམ་པར་འཇིག་པར་མྱི་བྱེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་ཆོས་ཐམས་ཅད་ལ་སྲོག་མེད་པའི་ཆོས་ལ་ཡོངས་སུ་རབ་ཏུ་ཞུགས་པ་སྟེ། བྱང་ཆུབ་སེམས་དཔའ་ནི་བྱེད་པ་མེད་པའི་ཆོས་ལ་རབ་ཏུ་ཞུགས་པས་སྤྱོད་པ་ཐམས་ཅད་ལ་རློམ་སེམས་མེད་དོ། །བྱང་ཆུབ་སེམས་དཔའ་ནི་འཇིག་རྟེན་ཐམས་ཅད་ཉོན་མོངས་པ་མེད་པའི་ཆོས་ལ་བརྩོན་པས་བདག་མེད་པ་ལ་སྤྱོད་པ་ཡིན། བྱང་ཆུབ་སེམས་དཔའ་ནི་ལུས་ཐམས་ཅད་ལ་རྟེན་ཅིང་འབྲེལ་བར་འབྱུང་བའི་ཆོས་སུ་ཡང་དག་པ་ཇི་ལྟ་བ་བཞིན་དུ་ལྟ་བས་སེམས་ཅན་མེད་པ་ལ་སྤྱོད་པ་ཡིན། བྱང་ཆུབ་སེམས་དཔའ་ནི་སྐྱེ་བ་དང་འཇིག་པ་ཐམས་ཅད་ཆོས་ཀྱི་རྒྱུད་ཀྱི་རྒྱུ་ལས་བྱུང་བའི་ཆོས་སུ་རྟོགས་པས་གང་ཟག་མེད་པ་ལ་སྤྱོད་པ་ཡིན། བྱང་ཆུབ་སེམས་དཔའ་ནི་ཆོས་ཀྱི་རང་བཞིན་ཡང་དག་པར་བླང་བ་ལ་ཞུགས་པས་ཤེད་ཅན་དང་ཤེད་ལས་སྐྱེས་པ་མེད་པ་ལ་གནས་པ་ཡིན། བྱང་ཆུབ་སེམས་དཔའ་ནི་ཆོས་ཐམས་ཅད་རང་བཞིན་གྱིས་དབེན་པས་བྱེད་པ་པོ་མེད་པ་ལ་སྤྱོད་པ་ཡིན། བྱང་ཆུབ་སེམས་དཔའ་ནི་ཆོས་ཐམས་ཅད་ལ་དེ་བཞིན་གཤེགས་པའི་སྤྱོད་པ་རྣམ་པར་ཕྱེ་བ་གཅིག་གིས་སྤྱོད་པས་རྣམ་པར་མི་རྟོག་པ་ལ་སྤྱོད་པ་ཡིན། བྱང་ཆུབ་སེམས་དཔའ་ནི་ཆོས་ཀྱི་དབྱིངས་དབྱེར་མེད་པའི་ཆོས་ཉིད་ཀྱིས་བསམ་གྱིས་མི་ཁྱབ་པ་ལ་གནས་པ་ཡིན། བྱང་ཆུབ་སེམས་དཔའ་ནི་ཐབས་ཀྱི་རྣམ་གྲངས་ལ་མཁས་ཤིང་སེམས་ཅན་གདུལ་བ་ལ་བརྩོན་

---

^{[མ་དཔེ་གཟིགས་ན་འདིར་གནོན།]}

པས་སྙིང་རྗེ་ཆེན་པོ་ལ་སྤྱོད་པ་ཡིན་ཏེ། དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཁམས་གཅིག་རྣམ་པར་གཞོག་པས་འཇིག་རྟེན་གྱི་ཁམས་རྣམ་པར་དགོད་པ་གྲངས་མེད་པ་ལ་འཇུག་གོ །བསྐལ་པ་གྲངས་མེད་པའི་རྒྱུད་རབ་ཏུ་ཤེས་སོ། །བྱང་ཆུབ་སེམས་དཔའི་འཇུག་པ་གྲངས་མེད་པ་ཡང་དག་པར་མཐོང་ངོ་། །སངས་རྒྱས་གྲངས་མེད་པའི་རྗེས་སུ་ཡང་དག་པར་འབྲང་ངོ་། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་ཆོས་བསྟན་པ་ཡང་དག་པར་འཛིན་ཏོ། །བྱང་ཆུབ་སེམས་དཔའི་སྤྱོད་པ་དེ་ལ་བདག་ཡང་དག་པར་སྤྱོད་པར་མཐོང་སྟེ། འདི་ནས་ཀྱང་བདག་གུད་དུ་གཡོ་བ་མྱེད་དོ། །དེ་དག་དང་བདག་ཏུ་ཐ་དད་པ་མེད་པར་ཡང་རབ་ཏུ་ཤེས་ཏེ། ཆོས་ཀྱི་དབྱིངས་ལ་འཇུག་པས་ཀྱང་རྒྱུན་ཆད་པ་མེད་པར་རབ་ཏུ་འཇུག་གོ །ཡེ་ཤེས་ཀྱི་རྗེས་སུ་འཇུག་ཅིང་། ཕྱིར་མི་ལྡོག་པའང་རབ་ཏུ་ཤེས་ཏེ། དཔེར་ན་སྒྱུ་མའི་མཁན་པོ་དེ་ས་འདི་ལ་གནས་ཤིང་སྒྱུ་མ་ཐམས་ཅད་སྟོན་ཀྱང་སྒྱུ་མའི་སྤྲུལ་པ་དེས་ས་འདི་སྐྱོན་ཅན་དུའང་མི་འགྱུར་ལ། སྒྱུ་མའི་སྤྲིན་དེ་དག་གིས་ཀྱང་ས་འདི་རླན་པར་མི་འགྱུར་ཏེ། སྒྱུ་མའི་ཉི་མ་དེ་ས་མུན་པའི་གྲངས་སུ་བྱ་བ་འདི་དག་བསྩལ་བར་ཡང་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་སངས་རྒྱས་ཀྱི་ཞིང་གི་ཡུལ་ལ་ཞིང་དུ་འཇུག་པའང་བྱེད། འཇིག་རྟེན་མ་ཡིན་པའི་ཡུལ་ལ་འཇིག་རྟེན་ཡང་རབ་ཏུ་ཤེས། གཟུགས་མེད་པའི་ཡུལ་ལ་གཟུགས་སུ་བྱིན་གྱིས་རློབ་པའང་ཤིན་ཏུ་སྟོན་ཏེ། གཅིག་གིས་གཉིས་པ་ཡང་འཇིག་པར་མི་བྱེད་དོ། །གཉིས་བས་ཀྱང་གཅིག་འཇིག་པར་མི་བྱེད་དོ། །དེ་ནི་དེས་འཇིག་རྟེན་གྱི་ཆོས་ཐམས་ཅད་སྒྱུ་མའི་དྲ་བར་ཆོས་ཀྱི་རང་བཞིན་ལ་འཇུག་པས་རབ་ཏུ་ཤེས་ཤིང་ཁོང་དུ་ཆུད་པ་དང་། ཡེ་ཤེས་

---

^{[མ་དཔེ་གཟིགས་ན་འདིར་གནོན།]}

ཀྱི་རང་བཞིན་ལ་འཇུག་པ་དང་། ལས་ཀྱི་རང་བཞིན་ལ་འཇུག་པས་ཁོང་དུ་ཆུད་པ་དང་། ལས་ཀྱི་རང་བཞིན་ཡེ་ཤེས་ཀྱི་རང་བཞིན་དུ་རབ་ཏུ་བསྒྲུབ་པ་དང་། ཡེ་ཤེས་ཀྱི་རང་བཞིན་དུ་ལས་ཐམས་ཅད་རབ་ཏུ་སྤྱོད་པས་དེའི་ཕྱིར་རབ་ཏུ་ཤེས་སོ། །འདི་ལྟ་སྟེ་དཔེར་ན། སྒྱུ་མའི་མཁན་པོ་དེ་ནི་སྒྱུ་མའི་རྣམ་པར་སྟོན་ན་ས་མེད་པར་ཡོངས་སུ་སྟོན་པ་མ་ཡིན། སྐྱེ་བོའི་ཚོགས་སྣ་ཚོགས་མེད་པར་ཡོངས་སུ་སྟོན་པའང་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་ཡང་ནམ་མཁའི་རང་བཞིན་མེད་པར་འཇིག་རྟེན་ཐམས་ཅད་ལ་ཡོངས་སུ་འཇུག་པའང་མ་ཡིན། འཇིག་རྟེན་གྱི་ཁམས་རྣམ་པ་མེད་པར་ནམ་མཁའི་རང་བཞིན་ལ་འཇུག་པའང་མ་ཡིན་ནོ། །དེ་ཅིའི་ཕྱིར་ཞེ་ན། ནམ་མཁའི་རང་བཞིན་ཡང་འཇིག་རྟེན་དང་ཐ་མི་དད། འཇིག་རྟེན་གྱི་རྣམ་པ་ཡང་ནམ་མཁའི་རང་བཞིན་དང་ཐ་མི་དད་དེ། བྱང་ཆུབ་སེམས་དཔའ་དེ་ནི་ནམ་མཁའི་རང་བཞིན་དེ་ལ་འཇིག་རྟེན་གྱི་ཡུལ་དང་ལས་སྣ་ཚོགས་ཀྱི་རྒྱན་རྣམ་པ་སྣ་ཚོགས་ལ་རབ་ཏུ་འཇུག་གོ །མངོན་པར་སྒྲུབ་བོ། །ཡང་དག་པར་ལྟའོ། །རྣམ་པར་ལྟའོ། །ཁོང་དུ་ཆུད་པར་བྱེད་དོ། །རྟོག་པར་བྱེད་དོ། །གོམས་པར་བྱེད་དོ། །རྗེས་སུ་སྒོམ་མོ། །རབ་ཏུ་རྟོག་གོ །རྣམ་པར་དཔྱོད་དོ། །སེམས་སྐད་ཅིག་གིས་འཇིག་རྟེན་གྱི་ཁམས་གྲངས་མེད་པའི་འཇིག་པ་དང་། འདུ་བའི་རྣམ་པ་ཡང་རབ་ཏུ་ཤེས་སོ། །བསྐལ་པ་གཅིག་ནས་གཅིག་ཏུ་བརྒྱུད་པའི་རྣམ་པ་ལ་བརྩོན་པར་བྱ་བ་ཡང་རབ་ཏུ་ཤེས་སོ། །སྐད་ཅིག་གཅིག་གིས་བསྐལ་པ་དེ་དག་གཅིག་ནས་གཅིག་ཏུ་བརྒྱུད་པའི་དུས་ཐམས་ཅད་དབང་དུ་བྱེད་དོ། །སེམས་སྐད་ཅིག་རེ་རེ་ལ་བསྐལ་པ་དང་དུས་རྣམ་པར་དམིགས་པས་མང་དུ་བྱེད་པ་དེ་ཡང་ལུས་ལས་གཞན་དུ་མི་བྱེད་དེ། དེ་ཡང་དེ་བཞིན་

---

^{[མ་དཔེ་གཟིགས་ན་འདིར་གནོན།]}

གཤེགས་པའི་ཡེ་ཤེས་བསམ་གྱིས་མི་ཁྱབ་པའི་རྣམ་པར་ཐར་པ་སྒྱུ་མ་ལ་བྱང་ཆུབ་སེམས་དཔའ་རབ་ཏུ་སློབ་ཅིང་ཡོངས་སུ་གྲུབ་པའི་ཕ་རོལ་ཏུ་ཕྱིན་པས་ཡེ་ཤེས་སྒྱུ་མའི་མཐར་ཕྱིན་པ་དང་། འཇིག་རྟེན་སྒྱུ་མའི་གྲངས་ཀྱི་རྗེས་སུ་ཞུགས་པ་དང་། ཆོས་ཐམས་ཅད་སྒྱུ་མའི་རང་བཞིན་དུ་རྟོགས་པ་དང་། འཇིག་རྟེན་དང་འགལ་བ་མེད་པའི་ཡེ་ཤེས་སྒྱུ་མའི་མཐར་ཕྱིན་པ་དང་། དུས་གསུམ་སྒྱུ་མ་ཐ་མི་དད་པར་ཁོང་དུ་ཆུད་པ་དང་། མངོན་པར་ཤེས་པ་སྒྱུ་མ་ངེས་པར་རྟོགས་པ་དང་། སེམས་སྒྱུ་མ་མཐའ་ཡས་ཤིང་མུ་མེད་པ་ལ་རབ་ཏུ་ཞུགས་པ་དང་། སངས་རྒྱས་ཐམས་ཅད་སྒྱུ་མའི་རང་བཞིན་དུ་ཡང་དག་པར་མོས་པར་བྱས་པའི་ཕྱིར་ཏེ། དེ་ལྟར་བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་ལ་རབ་ཏུ་འཇུག་ཅིང་རྣམ་པར་སྤྱོད་ཀྱང་ཐམས་ཅད་དུ་ཆགས་པ་མེད་དེ། ཀུན་ལའང་རློམ་སེམས་མེད་དོ། །འདི་ལྟ་སྟེ་དཔེར་ན། སྒྱུ་མ་བྱེད་པ་ནི་མིག་འཕྲུལ་དང་སྒྱུ་མ་ཐམས་ཅད་སྟོན་ཀྱང་ཡོངས་སུ་སྟོན་པ་ཡང་མེད་དེ། དེ་ལ་རྨོངས་པར་ཡང་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་རྣམས་ཀྱང་ཆོས་ཐམས་ཅད་ལ་འཇུག་པའི་ཕ་རོལ་ཏུའང་ཕྱིན་ལ་ཆོས་ལ་ཞུགས་པས་རློམ་པ་ཡང་མེད་དོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་ཡིད་དུ་འོང་བ་ཞེས་བྱ་བ་སྟེ་གཉིས་པའོ། །ཀྱེ་རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཤར་ཕྱོགས་ལོགས་སུ་འཇིག་རྟེན་གྱི་ཁམས་གྲངས་མེད་པ་འདས་ཤིང་། དེར་སངས་རྒྱས་ཀྱི་ཞིང་འབྱམ་ཀླས་པ་གཅིག་ནས་གཅིག་ཏུ་བརྒྱུད་པའི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་འཇུག་གོ །འཇིག་རྟེན་གྱི་ཁམས་དེ་དག་ཇི་སྙེད་

---

^{[མ་དཔེ་གཟིགས་ན་འདིར་གནོན།]}

འདས་པ་དེ་སྙེད་ཀྱི་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་འདས་ནས། འཇིག་རྟེན་གྱི་ཁམས་དེ་དག་ཏུའང་འཇིག་རྟེན་གྱི་ཁམས་ལ་ལར་ཉི་མ་རངས་པར་སྙོམས་པར་འཇུག་གོ །ལ་ལར་སྔ་དྲོའི་དུས་ལ་ལར་ཉི་མ་གུང་གི་དུས་ལ་ལར་ཕྱི་དྲོའི་དུས་ལ་ལར་སྔ་དྲོའི་ཐུན་གྱི་དུས། ལ་ལར་ཉི་མ་གུང་གི་ཐུན་གྱི་དུས། ལ་ལར་ཕྱི་དྲོའི་ཐུན་གྱི་དུས། ལ་ལར་སྐད་ཅིག་གཅིག་གི་དུས། ལ་ལར་ཡུད་ཙམ་ཅིག་གི་དུས། ལ་ལར་ཐང་ཅིག་གི་དུས། ལ་ལར་སྲོད་ཀྱི་དུས། ལ་ལར་ཡུད་དུ་ཡན་མན་གྱི་དུས། ལ་ལར་ཟླ་བ་གཅིག་གི་དུས། ལ་ལར་ལོའི་དུས། ལ་ལར་ལོ་བརྒྱ་སྟོང་གི་དུས། ལ་ལར་ལོ་བྱེ་བ་བརྒྱ་སྟོང་གི་དུས། ལ་ལར་ལོ་བྱེ་བ་ཁྲག་ཁྲིག་བརྒྱ་སྟོང་གི་དུས། ལ་ལར་བསྐལ་པ་གཅིག་གི་དུས། ལ་ལར་བསྐལ་པ་བརྒྱའི་དུས། ལ་ལར་བསྐལ་པ་སྟོང་གི་དུས། ལ་ལར་བསྐལ་པ་བརྒྱ་ཕྲག་སྟོང་གི་དུས། ལ་ལར་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གི་དུས། ལ་ལར་བསྐལ་པ་ཚད་མེད་པའི་དུས། ལ་ལར་བསྐལ་པ་དཔག་ཏུ་མེད་པའི་དུས། ལ་ལར་བསྐལ་པ་མུ་མེད་པའི་དུས། ལ་ལར་བསྐལ་པ་མཐའ་ཡས་པའི་དུས། ལ་ལར་བསྐལ་པ་གྲངས་མེད་པའི་དུས། ལ་ལར་བསྐལ་པ་བསམ་གྱིས་མི་ཁྱབ་པའི་དུས། ལ་ལར་བསྐལ་པ་གཞལ་དུ་མེད་པའི་དུས། ལ་ལར་བསྐལ་པ་བགྲང་དུ་མེད་པའི་དུས། ལ་ལར་བསྐལ་པ་ས་མཚམས་མེད་པའི་དུས། ལ་ལར་བསྐལ་པ་བརྗོད་དུ་མེད་པའི་དུས་སུ་སྙོམས་པར་འཇུག་ཀྱང་། བྱང་ཆུབ་སེམས་དཔའ་དེས་ཆོས་སྒྱུ་མ་དེ་དག་རིང་དུ་གནས་པར་སེམས་པར་མི་འགྱུར་རོ། །དུས་གཞན་དུ་རྗེས་སུ་འབྲང་བར་ཡང་མི་སེམས་ཏེ། བྱང་ཆུབ་སེམས་དཔའ་དེ་དུས་རྣམ་པ་ཐ་དད་པ་སྣ་ཚོགས་དེ་དག་ལ་མངོན་པར་ཆགས་པར་ཡང་མྱི་བྱེད་དོ། །མངོན་པར་ཞེན་པ་ཡང་མི་བྱེད་དོ། །དབང་དུ་ཡང་མི་བྱེད་དོ། །

---

^{[མ་དཔེ་གཟིགས་ན་འདིར་གནོན།]}

མི་རྟོག་གོ། །རྣམ་པར་མི་རྟོག་གོ །ཆོས་ཐམས་ཅད་ལ་ཉམས་པ་མེད་པར་གཞོལ་བས་བྱམས་པའི་མངོན་པར་ཤེས་པ་དང་ལྡན་པ་ཡིན། ཏིང་ངེ་འཛིན་གྱི་མངོན་པར་ཤེས་པ་དང་ལྡན་པ་ཡིན། ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། ལྷའི་བུ་ཉི་མ་ནི་ཉིན་པར་སྣང་བར་བྱེད་ཅིང་འགྲོ་ཡང་། ཉིན་པར་དང་ཡང་འགྲོགས་པ་མེད། མཚན་མོ་དང་ཡང་མི་འགྲོགས་སོ། །འགྲོ་བའི་ཚེའང་ཉིན་མོར་སྣང་ལ། ནུབ་ནས་ཀྱང་མཚན་མོར་སྣང་ངོ་། །འོན་ཀྱང་ཉིན་པར་ཡང་སྐྱེད་པ་མེད་ལ་མཚན་མོ་ཡང་གཤིག་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཇིག་རྟེན་གྱི་ཁམས་གྲངས་མེད་པ་དག་ཏུ་སྙོམས་པར་ཞུགས་ཤིང་། གྲངས་སུ་བརྗོད་པས་རྣམ་པར་སྟོན་ཏོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་ཞིང་འབྱམ་ཀླས་པ་གཅིག་ནས་གཅིག་ཏུ་བརྒྱུད་པའི་རྗེས་སུ་སོང་བ་ཞེས་བྱ་བ་སྟེ་གསུམ་པའོ། །ཀྱེ་རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་གྱི་ལུས་སངས་རྒྱས་ཀྱི་སྐུར་མངོན་པར་མོས་པར་བྱེད་དེ། དེས་དེ་བཞིན་གཤེགས་པ་ཤིན་ཏུ་མང་པོ་མཐོང་བས་འཇིག་རྟེན་གྱི་ཁམས་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་དེ་བཞིན་གཤེགས་པ་དེ་དག་ལ་སྤོས་ཀྱི་རྣམ་པའི་མཆོག་ཐམས་ཅད་ཀྱིས་མཆོད་པ་བྱེད་དོ། །མེ་ཏོག་སྣ་ཚོགས་ཡིད་དུ་འོང་བ་ཐམས་ཅད་ཀྱིས་མཆོད་པ་བྱེད་དོ། །ཞིང་ཡངས་པའི་རྣམ་པ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་མཆོད་པ་བྱེད་དོ། །རྒྱན་གྱི་རྣམ་པར་འགྲོ་བ་ཐམས་ཅད་ལས་ཤིན་ཏུ་འདས་པ་ཐམས་ཅད་ཀྱིས་མཆོད་པ་བྱེད་དོ། །འགྲོ་བ་ཐམས་ཅད་ཀྱི་རིན་པོ་ཆེ་སྣ་ཚོགས་ཚད་མེད་པས་ཀུན་ཏུ་

---

^{[མ་དཔེ་གཟིགས་ན་འདིར་གནོན།]}

ཡོག་པའི་རྣམ་པ་ཐམས་ཅད་ཀྱིས་མཆོད་པ་བྱེད་དོ། །རྒྱན་རྣམ་པར་ཕྱེ་བའི་ཚོགས་ཀྱི་རྣམ་པ་ཐམས་ཅད་ཀྱིས་མཆོད་པ་བྱེད་དོ། །ནོར་བུ་རིན་པོ་ཆེ་སྣ་ཚོགས་དམ་པའི་གཙུག་ལག་ཁང་གི་རྣམ་པ་གྲངས་མེད་པ་ཐམས་ཅད་ཀྱིས་མཆོད་པ་བྱེད་དོ། །ལྷ་རྫས་ལས་ཀྱང་འདས་པའི་མནབ་སྩལ་དང་། ཞལ་ཟས་སངས་རྒྱས་ཀྱི་བྱིན་གྱིས་བརླབས་པའི་རྣམ་པ་དམ་པ་ཐམས་ཅད་ཀྱིས་མཆོད་པ་བྱེད་དོ། །སངས་རྒྱས་ཀྱི་ཞིང་ཐམས་ཅད་རྣམ་པར་དག་པར་བྱ་བའི་རྒྱན་སྣ་ཚོགས་རྣམ་པ་ཐ་དད་པ་མ་ལུས་པ་སངས་རྒྱས་བསྙེན་བཀུར་བ་དང་། མཆོད་པའི་རྣམ་པར་གཏོགས་པས་སངས་རྒྱས་ཐམས་ཅད་ལ་རིམ་གྲོ་བྱ་བའི་ཚུལ་དང་ལྡན་པར་མཆོད་པ་བྱེད་དོ། །དེ་བཞིན་གཤེགས་པ་དེ་དག་གི་ཞབས་ལའང་ཕྱག་འཚལ་ཞིང་ལུས་ཐམས་ཅད་ཀྱིས་རབ་ཏུ་འབེབས་སོ། །རྗེ་སར་ཞུ་བ་རྣམས་ཀྱང་བྱེད་དེ། སངས་རྒྱས་ཀྱི་ཆོས་ཀྱང་ཤིན་ཏུ་རྟོགས་པར་བྱེད་དོ། །སངས་རྒྱས་ཀྱི་བསྟན་པ་ཡང་རབ་ཏུ་འཛིན་ཏོ། །སངས་རྒྱས་ཀྱི་ཆེ་བ་ཉིད་ཀྱང་ཁོང་དུ་ཆུད་པར་བྱེད་དོ། །དེ་བཞིན་ཉིད་ལ་ཡང་ཡང་དག་པར་འཇུག་པས་རབ་ཏུ་འཇུག་གོ །སྙིང་རྗེ་ཆེན་པོའི་རྗེས་སུ་འབྲང་བའང་རབ་ཏུ་བྱེད་དོ། །ཆགས་པ་མེད་པའི་སྟོབས་རབ་ཏུ་སྤེལ་བ་ལའང་མངོན་པར་མོས་ཤིང་། སངས་རྒྱས་ཀྱི་ཆོས་ཐམས་ཅད་ཀྱང་ཡོངས་སུ་འཐོབ་པར་བྱེད་དོ། །སེམས་ཅན་ཐམས་ཅད་ཀྱི་གཙོ་བོའི་རྗེས་སུ་ཡང་རབ་ཏུ་འབྲང་སྟེ། སྐད་ཅིག་གཅིག་གིས་མཐར་ཡང་རབ་ཏུ་འཇུག་གོ །དེ་བཞིན་གཤེགས་པ་དེ་དག་འབྱུང་བའི་ཚེའང་སྐྱེ་བ་མི་དམིགས་སོ། །དེ་བཞིན་གཤེགས་པ་དེ་དག་མྱ་ངན་ལས་འདའ་བའི་ཚེའང་འཇིག་པ་མི་དམིགས་སོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། གཡེང་བའི་སེམས་ཀྱིས་ཡུལ་རྣམ་པར་དམིགས་པ་ནི་གཟུགས་ལས་ཀྱང་མ་བྱུང་དམིགས་པ་ལས་ཀྱང་མ་བྱུང་

---

^{[མ་དཔེ་གཟིགས་ན་འདིར་གནོན།]}

ངོ་། །སེམས་རྣམ་པར་མི་དམིགས་པའི་ཚེའང་མི་དམིགས་པ་གང་ལས་ཀྱང་འགག་པར་མི་འགྱུར་རོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔས་ཀྱང་དེ་བཞིན་གཤེགས་པ་དེ་དག་འབྱུང་བའི་ཚེ་འབྱུང་བ་མི་དམིགས་སོ། །དེ་བཞིན་གཤེགས་པ་དེ་དག་མྱ་ངན་ལས་འདའ་བའི་ཚེའང་འཇིག་པར་མི་དམིགས་སོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། ཉི་མའི་གུང་ལ་སྨིག་རྒྱུ་བ་སྣང་བ་ནི་སྤྲིན་ལས་བྱུང་བའང་མ་ཡིན། རྒྱ་མཚོ་ལས་བྱུང་བའང་མ་ཡིན། སྤྲིན་ལ་གནས་པ་ཡང་མ་ཡིན། ས་ལ་གནས་པ་ཡང་མ་ཡིན། ཕྱོགས་ནས་བྱུང་བ་ཡང་མ་ཡིན། དགེ་བ་ཡང་མ་ཡིན། མི་དགེ་བ་ཡང་མ་ཡིན། དད་པ་ཡང་མ་ཡིན། རྙོག་པ་ཅན་ཡང་མ་ཡིན། བཏུང་བ་ཡང་མ་ཡིན། བདོ་བ་ཡང་མ་ཡིན། དངོས་པོ་ཡོད་པ་ཡང་མ་ཡིན། དངོས་པོ་མེད་པ་ཡང་མ་ཡིན། རོ་དང་ལྡན་པ་ཡང་མ་ཡིན། རྣམ་པར་དམིགས་པ་དང་རྣམ་པར་མི་དམིགས་པའི་གྲངས་སུ་ཡང་མི་ཆུད་ན། དེའི་རྐྱེན་གྱིས་རྣམ་པར་ཤེས་པར་གདགས་པའང་ཡོད་དེ། སྨིག་རྒྱུ་བའི་རྒྱུད་ཇི་ལྟ་བ་དེ་བཞིན་དུ་ཆུ་ཀླུང་གི་འདུ་ཤེས་སྐྱེ་སྟེ། རྒྱང་རིང་པོ་ནས་འདུ་ཤེས་དང་རྣམ་པར་ཤེས་པ་སྐྱེའོ། །ཉེ་བར་བསྙེན་ན་འཇིག་ཅིང་སྨིག་རྒྱུ་བར་རྣམ་པར་དམིགས་པ་ཡང་མེད་དོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔས་ཀྱང་དེ་བཞིན་གཤེགས་པ་དེ་དག་སྐྱེ་བའི་ཚེའང་སྐྱེ་བར་མི་དམིགས་སོ། །དེ་བཞིན་གཤེགས་པ་དེ་དག་མྱ་ངན་ལས་འདའ་བའི་ཚེའང་འཇིག་པར་མི་དམིགས་ཀྱང་མཚན་ཡོད་པས་སངས་རྒྱས་ལ་སངས་རྒྱས་ཀྱི་འདུ་ཤེས་ཀྱིས་རྣམ་པར་དམིགས་སོ། །མཚན་མྱེད་པས་མཚན་མེད་པའི་མཚན་མས་མི་དམིགས་ཏེ། ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་

---

^{[མ་དཔེ་གཟིགས་ན་འདིར་གནོན།]}

འཛིན་ལྷག་པའི་བསམ་པ་གཙང་མས་སྤྱོད་པ་ཞེས་བྱ་བ་སྟེ། དེ་ལ་སྙོམས་པར་ཞུགས་ཤིང་རྣམ་པར་ལངས་ཀྱང་དེ་ནི་འཇིག་པ་མེད་དོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། མི་གཉིད་ཀྱིས་ལོག་པ་རྨི་ལམ་རྨིས་ནས་སད་དེ་མཚན་མ་ཡིད་ཀྱིས་ཟིན་ལ་དྲན་ཞིང་རྨི་ལམ་བསྒྲིབས་པ་མེད་པ་རྣམ་པར་དམིགས་པ་ནི་སད་ཀྱང་རྨི་ལམ་རྗེས་སུ་དྲན་པས་ཡོངས་སུ་དྲན་ནོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་སངས་རྒྱས་མཐོང་བའི་མཚན་མ་ཡང་ཡོངས་སུ་འཇིག་པར་མི་བྱེད་དོ། །སངས་རྒྱས་ཀྱི་ཆོས་བླངས་པ་རྣམས་ཀྱང་ཡང་དག་པར་འཛིན་ཏོ། །དེ་བཞིན་གཤེགས་པ་དེ་དག་གིས་འཁོར་གྱི་དཀྱིལ་འཁོར་རྣམ་པར་དག་པར་ཡང་བསམ་པ་ཇི་ལྟ་བ་བཞིན་དུ་རྣམ་པར་དམིགས་སོ། །སངས་རྒྱས་ཀྱི་ཞིང་གི་རྒྱན་ཀྱང་རྗེས་སུ་འཐོབ་པར་བྱེད་དོ། །དོན་གྱི་ཚུལ་ཡང་རྣམ་པར་འཕེལ་བར་བྱེད་དོ། །ཆོས་ཐམས་ཅད་ཀྱི་ཚུལ་ཡང་རྣམ་པ་དུ་མར་ཡོངས་སུ་སྦྱོང་ངོ་། །ཡེ་ཤེས་ཀྱི་སྒྲོན་མ་ཡང་ཤིན་ཏུ་ཡངས་པར་བྱེད་དོ། །སངས་རྒྱས་ཀྱི་རིགས་ཀྱང་རྣམ་པར་འཕེལ་བར་བྱེད་དོ། །མི་འཇིགས་པ་ཡོངས་སུ་དག་པ་ཡང་རབ་ཏུ་བརྗོད་དོ། །ཐ་དད་པ་ཡང་དག་པར་ཤེས་པ་མི་ཟད་པའང་རབ་ཏུ་སྟོན་ཏོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་བཞི་པའོ། །ཀྱེ་རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སངས་རྒྱས་བཅོམ་ལྡན་འདས་རྣམས་ཀྱི་འོད་ལ་རབ་ཏུ་འཇུག་གོ །བསྐལ་པ་གཅིག་ནས་གཅིག་ཏུ་བརྒྱུད་པས། ཞིང་གཅིག་ནས་གཅིག་ཏུ་བརྒྱུད་པ་ཁོང་དུ་ཆུད་པར་བྱེད་དོ། །ཞིང་གཅིག་ནས་གཅིག་ཏུ་བརྒྱུད་པས་སངས་རྒྱས་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་སོ། །

---

^{[མ་དཔེ་གཟིགས་ན་འདིར་གནོན།]}

སངས་རྒྱས་གཅིག་ནས་གཅིག་ཏུ་བརྒྱུད་པས་ཆོས་བསྟན་པ་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་སོ། །ཆོས་གཅིག་ནས་གཅིག་ཏུ་བརྒྱུད་པས། བསམ་པ་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་སོ། །བསམ་པ་གཅིག་ནས་གཅིག་ཏུ་བརྒྱུད་པས། དབང་པོ་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་སོ། །དབང་པོ་གཅིག་ནས་གཅིག་ཏུ་བརྒྱུད་པས། འདུལ་བ་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་སོ། །འདུལ་བ་གཅིག་ནས་གཅིག་ཏུ་བརྒྱུད་པས། དེ་བཞིན་གཤེགས་པ་རྣམས་ཀྱི་སྐུ་ཚེ་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་སོ། །སྐུ་ཚེ་གཅིག་ནས་གཅིག་ཏུ་བརྒྱུད་པས། ལོ་གྲངས་བྱེ་བ་ཁྲག་ཁྲིག་གཅིག་ནས་གཅིག་ཏུ་བརྒྱུད་པ་རབ་ཏུ་ཤེས་པ་སྟེ། དེ་ལྟར་དེ་བཞིན་གཤེགས་པ་རྣམས་ཀྱི་ཡེ་ཤེས་མཐའ་ཡས་པ་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་ཞིང་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་ཆོས་ཀྱི་རྣམ་གྲངས་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་བསྐལ་པ་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་ཆོས་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་སེམས་ཅན་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་མོས་པ་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་སེམས་ཅན་གྱི་སྤྱོད་པ་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་ཉོན་མོངས་པ་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་བག་ཆགས་རྣམས་འདབ་ཆགས་པར་རབ་ཏུ་ཤེས་སོ། །དེ་བཞིན་དུ་འདས་པའི་རྣམ་པར་བྱང་བ་རྣམ་པར་དག་པ་རྣམས་འདབ་ཆགས་པར་རབ་ཏུ་ཤེས་སོ། །དེ་དག་ཏིང་ངེ་འཛིན་འདས་པ་རྣམ་པར་དག་པའི་སྙིང་པོ་ཞེས་བྱ་བ་ལ་སྙོམས་

---

^{[མ་དཔེ་གཟིགས་ན་འདིར་གནོན།]}

པར་འཇུག་སྟེ། སེམས་བསྐྱེད་པ་གཅིག་གིས་བསྐལ་པ་བརྒྱ་ཕྲག་སྟོང་ལ་འཇུག་གོ །དེ་དང་འདབ་ཆགས་པའི་སེམས་མཐའ་ཡས་པས་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་ལ་འཇུག་གོ །བསྐལ་པ་ཚད་མེད་པ་ལ་འཇུག་གོ །བསྐལ་པ་དཔག་ཏུ་མེད་པ་ལ་འཇུག་གོ །བསྐལ་པ་གཞལ་དུ་མེད་པ་ལ་འཇུག་གོ །བསྐལ་པ་མུ་མེད་པ་ལ་འཇུག་གོ ། བསྐལ་པ་ས་མཚམས་མེད་པ་ལ་འཇུག་གོ །བསྐལ་པ་གྲངས་མེད་པ་ལ་འཇུག་གོ །བསྐལ་པ་བསམ་གྱིས་མི་ཁྱབ་པ་ལ་འཇུག་གོ །བསྐལ་པ་དཔག་གིས་མི་ཁྱབ་པ་ལ་འཇུག་གོ །བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་ལ་འཇུག་གོ །དེ་དག་ཏིང་ངེ་འཛིན་ད་ལྟར་བྱུང་བ་འགག་པ་མེད་པ་ལ་འདས་པ་མ་སྐྱེས་ཤིང་བསྒྲིབས་པ་མེད་པ་ཞེས་བྱ་བ་ལ་སྙོམས་པར་འཇུག་སྟེ། ཏིང་ངེ་འཛིན་དེ་ལ་དེ་དག་ཆོས་བཅུས་དབང་བསྐུར་བ་ཡིན། དེ་དག་དེ་ལས་ལངས་ནས་ཀྱང་དེ་བཞིན་གཤེགས་པ་རྣམས་ལ་དབང་བསྐུར་བའི་ཆོས་བཅུ་པོ་དེ་དག་ལ་བསམ་གྱིས་མི་ཁྱབ་པར་ཡང་དག་པར་འཇུག་གོ །རབ་ཏུ་འཐོབ་པར་བྱེད་དོ། །ཤིན་ཏུ་བརྩོན་པར་བྱེད་དོ། །ཡོངས་སུ་རྫོགས་པར་བྱེད་དོ། །ཐོགས་པ་མེད་པར་ཡོངས་སུ་ཁོང་དུ་ཆུད་པར་བྱེད་དོ། །རྟོགས་པར་བྱེད་དོ། །རྗེས་སུ་འཐོབ་པར་བྱེད་དོ། །ཡོངས་སུ་རྒྱས་པར་བྱེད་དོ། །ཡོངས་སུ་འཛིན་ཏོ། །འཁོར་གསུམ་ལ་རབ་ཏུ་ཞུགས་པས་མཉམ་པ་ཉིད་དུ་འཛིན་པར་བྱེད་དོ། །བཅུ་གང་ཞེ་ན་འདི་ལྟ་སྟེ། དོན་ཐ་དད་པ་ཡང་དག་པར་ཤེས་པ་དང་། ངེས་པའི་ཚིག་ཐ་དད་པ་ཡང་དག་པར་ཤེས་པས་ཆུད་མི་ཟ་བ་དང་། འཕྲལ་དུ་བསྒྲུབ་པ་མ་ཡིན་པའི་སྤོབས་པ་ཐ་དད་པ་ཡང་དག་པར་ཤེས་པ་དང་། གཅད་དུ་མེད་པའི་ཆོས་ཐ་དད་པ་ཡང་དག་པར་ཤེས་པ་དང་། མི་འཇིགས་པ་རྣམས་ལ་རང་བྱུང་བ་དང་། སེམས་ཅན་མེད་པའི་ཚིག་རབ་ཏུ་བརྟེན་པ་དང་། སེམས་ཅན་ཐམས་ཅད་ཀྱི་འཇུག་

---

^{[མ་དཔེ་གཟིགས་ན་འདིར་གནོན།]}

པའི་ཚུལ་དང་། ཁམས་གསུམ་པའི་དམ་པ་དང་དགེ་བའི་རྩ་བ་བླ་ན་མེད་པ་དང་། དེ་བཞིན་གཤེགས་པའི་སྐུ་རྡུལ་གཅིག་གི་ཚད་དུ་སྟོན་པ་སྟེ། དེས་དེ་བཞིན་གཤེགས་པའི་སྐུ་རྡུལ་བརྒྱའི་བར་གྱི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་རྡུལ་སྟོང་གི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་རྒྱང་གྲགས་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་དཔག་ཚད་ཕྱེད་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་དཔག་ཚད་གཅིག་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་དཔག་ཚད་བཅུ་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་དཔག་ཚད་བརྒྱ་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་དཔག་ཚད་བརྒྱ་སྟོང་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཛམ་བུའི་གླིང་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་གླིང་བཞིའི་འཇིག་རྟེན་གྱི་ཁམས་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་སྟོང་གི་འཇིག་རྟེན་གྱི་ཁམས་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་སྟོང་གཉིས་ཀྱི་འཇིག་རྟེན་གྱི་ཁམས་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བརྒྱའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་སྟོང་གི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བརྒྱ་ཕྲག་སྟོང་གི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བྱེ་བ་བརྒྱ་སྟོང་གི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་ཚད་མེད་པའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་དཔག་ཏུ་མེད་པའི་ཚད་དུ་རབ་ཏུ་མཐོང་

---

^{[མ་དཔེ་གཟིགས་ན་འདིར་གནོན།]}

ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་གྲངས་མེད་པའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་མཐའ་ཡས་པའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་མུ་མེད་པའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བསམ་གྱིས་མི་ཁྱབ་པའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་གཞལ་དུ་མེད་པའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་དཔག་ཏུ་མེད་པའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བགྲང་དུ་མེད་པའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་ས་མཚམས་མེད་པའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བརྗོད་དུ་མེད་པའི་ཚད་དུ་རབ་ཏུ་མཐོང་ངོ་། །དེ་བཞིན་གཤེགས་པའི་སྐུ་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་ཚད་དུ་རབ་ཏུ་མཐོང་ངོ་དེ་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པའི་སྐུ་དེ་ལྟ་བུའི་ཁ་དོག་ཚད་མེད་པར་རབ་ཏུ་མཐོང་ངོ་། །དེ་ལྟ་བུའི་སྐུ་གཟུགས་ཚད་མེད་པར་རབ་ཏུ་མཐོང་ངོ་། །དེ་ལྟ་བུའི་མཚན་ཚད་མེད་པར་རབ་ཏུ་མཐོང་ངོ་། །དེ་ལྟ་བུའི་འོད་ཚད་མེད་པར་རབ་ཏུ་མཐོང་ངོ་། །དེ་ལྟ་བུའི་འོད་གཟེར་གྱི་དྲ་བ་སྣང་བ་ཚད་མེད་པར་རབ་ཏུ་མཐོང་ངོ་། །ཆོས་ཀྱི་དབྱིངས་ཚད་མེད་པར་རབ་ཏུ་མཐོང་ངོ་། །ཆོས་ཀྱི་དབྱིངས་མཐའ་དང་དབུས་མེད་པར་རབ་ཏུ་མཐོང་ངོ་། །ཆོས་ཀྱི་དབྱིངས་ཐམས་ཅད་ཡེ་ཤེས་ཀྱིས་ཁོང་དུ་ཆུད་པར་རབ་ཏུ་མཐོང་ངོ་། །ཆགས་པ་མེད་པའི་ལུས་རབ་ཏུ་མཐོང་ངོ་། །བསྒྲིབས་པ་མེད་པའི་རྣམ་པར་དག་པ་རབ་ཏུ་མཐོང་ངོ་། །དེ་ལྟར་བྱང་ཆུབ་སེམས་དཔའ་དེ་བཞིན་གཤེགས་པའི་སྐུ་

---

^{[མ་དཔེ་གཟིགས་ན་འདིར་གནོན།]}

རབ་ཏུ་མཐོང་ངོ་ཡང་དེ་བཞིན་གཤེགས་པའི་སྐུ་དེ་རྣམ་པར་འཕེལ་བར་ཡང་མི་བྱེད། འགྲིབ་པར་ཡང་མི་བྱེད་དོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། ནམ་མཁའ་ནི་ཡུངས་ཀར་སྲིན་བུས་ཟོས་པའི་སྦུབས་ཀྱིས་ཆུང་ངུ་བྱས་པ་ཡང་མ་ཡིན། འཇིག་རྟེན་གྱི་ཁམས་གྲངས་མེད་པ་དང་། འཇིག་རྟེན་གྱི་ཁམས་ཀྱི་མཚམས་དེ་དག་གིས་ཡངས་པར་བྱས་པ་ཡང་མ་ཡིན་ནོ། །ཀྱེ་རྒྱལ་བའི་སྲས་དག །དེ་བཞིན་དུ་དེ་བཞིན་གཤེགས་པའི་སྐུ་ཡང་ལྟ་བ་རྒྱ་ཆེན་པོས་ཡངས་པར་བྱས་པའང་མ་ཡིན། ལྟ་བ་རྒྱ་ཆུང་ངུས་བལྟས་པས་ཆུང་ངུ་བྱས་པ་ཡང་མ་ཡིན་ནོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། ཟླ་བའི་དཀྱིལ་འཁོར་ནི་འཛམ་བུའི་གླིང་ནས་ལྟ་བས་ཆུང་ངུ་བྱས་པའང་མ་ཡིན། ཟླ་བའི་དཀྱིལ་འཁོར་ལ་གནས་ཏེ་བལྟས་པས་ཆེར་བྱས་པའང་མ་ཡིན་ནོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་དེ་དག་ཏིང་ངེ་འཛིན་འདི་ལ་གནས་ཤིང་སངས་རྒྱས་དེ་དག་མཐོང་བར་ཡང་འགྱུར་ལ། དེ་བཞིན་གཤེགས་པའི་སྤྲུལ་པ་དེ་དག་ཀྱང་འཇིག་པར་མི་བྱེད་དོ། །བསམ་པ་ཇི་ལྟ་བ་བཞིན་དུ་ཡང་སངས་རྒྱས་མཐོང་བར་བྱེད་དོ། །སངས་རྒྱས་ཀྱི་གསུང་དེ་བཞིན་གཤེགས་པའི་དབྱངས་ཀྱིས་ཆོས་ཇི་སྙེད་དུ་བརྗོད་ཅིང་བསྟན་པ་དེ་དག་ཐམས་ཅད་ཀྱང་རབ་ཏུ་འཛིན་ཅིང་ཤེས་པར་བྱེད་པ་ཡིན། རབ་ཏུ་ཤེས་པར་བྱེད་པ་ཡིན། ཉམས་པ་མེད་པའི་ཆོས་ལའང་རབ་ཏུ་རྟེན་པ་ཡིན། ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། སེམས་ཅན་རྣམས་ཀྱི་འཆི་འཕོ་དང་སྐྱེ་བ་ནི་སེམས་ལ་གསོལ་བ་གདབ་པ་མེད་དོ། །དེ་བཞིན་དུ་བྱང་ཆུབ་སེམས་དཔའི་ཏིང་ངེ་འཛིན་འདི་ལ་གནས་པའི་འཇིག་རྟེན་གྱི་ཁམས་ཀྱི་རྒྱན་དང་སངས་རྒྱས་རྣམ་པར་དམིགས་པ་ཡང་ནན་ཏན་བྱ་མི་དགོས་

---

^{[མ་དཔེ་གཟིགས་ན་འདིར་གནོན།]}

པར་རྣམ་པར་འདག་སྟེ། བྱང་ཆུབ་སེམས་དཔའ་དེ་ནི་མྱུར་བ་བཅུ་དང་ལྡན་པ་ཡིན། བཅུ་གང་ཞེ་ན། འདི་ལྟ་སྟེ། སྤྱོད་པ་ལ་ཡང་དག་པར་བྱུང་བས་ཡོངས་སུ་རྫོགས་པར་བྱ་བ་མྱུར་དུ་ཡོངས་སུ་རྫོགས་པར་བྱེད་པ་ཡིན། སངས་རྒྱས་ཀྱི་ཆོས་སྣང་བས་འཇིག་རྟེན་མྱུར་དུ་སྣང་བར་བྱེད་པ་ཡིན། ཆོས་ཀྱི་འཁོར་ལོའི་ཐབས་མཁས་པས་སེམས་ཅན་མྱུར་དུ་ཡོངས་སུ་སྨིན་པར་བྱེད་པ་ཡིན། ལས་ཇི་ལྟ་བ་བཞིན་དུ་སེམས་ཅན་རྣམ་པར་དམྱིགས་པས་སངས་རྒྱས་ཀྱི་ཞིང་མྱུར་དུ་ཡོངས་སུ་སྦྱོང་བ་ཡིན། སྟོབས་བཅུ་མཉམ་པ་ཉིད་ཀྱི་ཡེ་ཤེས་མྱུར་དུ་གནོན་པ་ཡིན། དེ་བཞིན་གཤེགས་པ་ཐམས་ཅད་དང་མྱུར་དུ་འགྲོགས་པ་ཡིན། བྱམས་པ་ཆེན་པོའི་སྟོབས་ཀྱིས་བདུད་ཀྱི་དཀྲུགས་མ་མྱུར་དུ་འཇོམས་པ་ཡིན། ཐེ་ཙོམ་ཡོངས་སུ་གཅོད་པས་སེམས་ཅན་ཐམས་ཅད་མྱུར་དུ་ཚིམ་པར་བྱེད་པ་ཡིན། མོས་པ་དང་འདུལ་བ་ཇི་ལྟ་བ་བཞིན་དུ་རྣམ་པར་འཕྲུལ་བ་མྱུར་དུ་ཡང་དག་པར་སྟོན་པ་ཡིན། འཇིག་རྟེན་གྱི་ཁམས་ཐམས་ཅད་དུ་སྒྲ་སྐད་སྣ་ཚོགས་རྣམ་པར་དག་པར་འགྱུར་བའི་ཕྱིར་ཆོས་ཐམས་ཅད་ཀྱི་རང་བཞིན་དང་མྱུར་དུ་ལྡན་པར་འགྱུར་བ་ཡིན། བྱང་ཆུབ་སེམས་དཔའ་དེ་ནི་ཆོས་ཐམས་ཅད་ལ་བྱང་ཆུབ་སེམས་དཔའི་རྒྱ་བཅུས་བཏབ་པ་ཡིན་ཏེ། བཅུ་གང་ཞེ་ན་འདི་ལྟ་སྟེ། བྱང་ཆུབ་སེམས་དཔའ་དེ་ནི་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་དང་། དགེ་བའི་རྩ་བ་གཅིག་པ་ཡིན། བྱང་ཆུབ་སེམས་དཔའ་དེ་ནི་མཐའ་དང་དབུས་མེད་པའི་ལུས་ཀྱིས་ཡེ་ཤེས་ཀྱི་རང་བཞིན་གཅིག་པ་ཡིན། བྱང་ཆུབ་སེམས་དཔའ་དེ་ནི་དེ་བཞིན་གཤེགས་པ་ཐམས་ཅད་ལ་མཆོད་པས་སྤྱོད་པ་གཅིག་པ་ཡིན། བྱང་ཆུབ་སེམས་དཔའ་དེ་ནི་གཉིས་སུ་མེད་པ་ཡང་དག་

---

^{[མ་དཔེ་གཟིགས་ན་འདིར་གནོན།]}

པར་བླང་བ་ལ་རྟོགས་པར་བཞག་པས་དཀྱིལ་འཁོར་ཚད་མེད་པ་ཡིན། བྱང་ཆུབ་སེམས་དཔའ་དེ་ནི་ཆོས་ཀྱི་དབྱིངས་ཡོངས་སུ་ཤེས་པས་ཆགས་པ་མེད་པའི་ཡུལ་དང་ལྡན་པ་ཡིན། བྱང་ཆུབ་སེམས་དཔའ་དེ་ནི་སྟོབས་བཅུའི་སྣང་བ་ཐོབ་པས་བསྒྲིབས་པ་མེད་པའི་སྤྱོད་ཡུལ་དང་ལྡན་པ་ཡིན། བྱང་ཆུབ་སེམས་དཔའ་དེ་ནི་མི་གཉིས་པ་ལ་ཡང་དག་པར་སྤྱོད་པས་དགང་སླ་བ་ཡིན། བྱང་ཆུབ་སེམས་དཔའ་དེ་ནི་འགྲོ་བ་ཐམས་ཅད་འདུལ་བའི་ཕྱིར་ཡོངས་སུ་རྒྱུན་འཆད་པ་མེད་པ་ཡིན། བྱང་ཆུབ་སེམས་དཔའ་དེ་ནི་དོན་ཤེས་ཤིང་མཁས་པར་བྱ་བ་ལ་ཤིན་ཏུ་རྟོགས་པར་བཞག་པ་ཡིན། བྱང་ཆུབ་སེམས་དཔའ་དེ་ནི་སངས་རྒྱས་ཐམས་ཅད་དང་མི་གཉིས་པ་ཡིན་ཏེ། ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་ཀྱི་ཚུལ་སངས་རྒྱས་ཐམས་ཅད་ཀྱི་ས་རྣམ་པར་བཀོད་པའི་འཇིག་རྟེན་གྱི་ཁམས་ཀྱི་རྒྱན་ཅེས་བྱ་བ་སྟེ། ཏིང་ངེ་འཛིན་དེ་དང་ལྡན་པའི་བྱང་ཆུབ་སེམས་དཔའ་ནི་སངས་རྒྱས་ཀྱི་ཆོས་ཐམས་ཅད་ལ་སློབ་དཔོན་མེད་པ་ཡིན། འགྲོ་བ་ཐམས་ཅད་དུ་འགྲོ་བའི་རྩལ་ཡོད་པས་གཞན་གྱི་དྲིང་མི་འཇོག་པ་ཡིན། སེམས་རང་བཞིན་འོད་གསལ་ཞིང་དག་པ་དང་ལྡན་པས་ཤིན་ཏུ་དག་པ་ཡིན། འཇིག་རྟེན་ཐམས་ཅད་ཡོངས་སུ་འགྲེལ་བ་ལ་ཞུགས་པས་ཐུ་བོ་དམ་པ་ཡིན། སྐྱེ་དགུ་ཐམས་ཅད་ལ་བསམ་པ་ཐག་པ་ནས་ཕན་པ་ཡིན། མ་འོངས་པའི་སངས་རྒྱས་ཀྱི་རིགས་རབ་ཏུ་བསྒྲུབ་པ་ཡིན། ཐམས་ཅད་མཁྱེན་པའི་སྒོ་ལ་རབ་ཏུ་གཞོག་པ་ཡིན། གཉིས་སུ་མེད་པར་སྨྲ་ཞིང་ནོར་བ་མེད་པར་ཁོང་དུ་ཆུད་པར་སྟོན་པས་དེ་ཁོ་ན་ཉིད་ལ་མཁས་པ་ཡིན། སངས་རྒྱས་ཀྱི་ཆོས་ཐམས་ཅད་ཀྱི་ཆོས་ཀྱི་མཛོད་རབ་ཏུ་བཏང་བ་ཡིན། སེམས་ཅན་གྱི་རིས་རྣམས་སུ་བསམ་པ་ཇི་ལྟ་བ་

---

^{[མ་དཔེ་གཟིགས་ན་འདིར་གནོན།]}

བཞིན་དུ་ཆོས་ཀྱི་སྤྲིན་གྱི་ཆར་འབེབས་པ་ཡིན། ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། བརྒྱ་བྱིན་མངོན་པར་དགའ་བའི་ནོར་བུ་རིན་པོ་ཆེ་ནི། ལྷའི་རྒྱལ་པོའི་སྤྱི་བོ་ལ་བཏགས་ན། ནོར་བུ་དེའི་བྱིན་གྱིས་ལྷའི་དབང་པོ་བརྒྱ་བྱིན་འོད་དང་ལྡན་པར་འགྱུར་བ་སྟེ། ནོར་བུ་རིན་པོ་ཆེ་བདོག་པས་ལྷའི་རྒྱལ་པོ་བརྒྱ་བྱིན་ཆོས་བཅུས་སུམ་ཅུ་རྩ་གསུམ་པའི་ལྷ་ཐམས་ཅད་ཟིལ་གྱིས་གནོན་ཏེ། བཅུ་གང་ཞེ་ན། སུམ་ཅུ་རྩ་གསུམ་རིས་ཀྱི་ལྷའི་བུ་གཞན་ཐམས་ཅད་ཀྱི་ལྷ་རྫས་ལས་འདས་པའི་མདོག་དང་། ལྷ་རྫས་ལས་འདས་པའི་གཟུགས་དང་། ལྷ་རྫས་ལས་འདས་པའི་བལྟ་ན་མཛེས་པ་དང་། ལྷ་རྫས་ལས་འདས་པའི་འཁོར་དང་། ལྷ་རྫས་ལས་འདས་པའི་ལོངས་སྤྱོད་དང་། ལྷ་རྫས་ལས་འདས་པའི་རྫུ་འཕྲུལ་དང་། ལྷ་རྫས་ལས་འདས་པའི་དབང་ཆེན་པོ་དང་། ལྷ་རྫས་ལས་འདས་པའི་སྤྱོད་པ་དང་། ལྷ་རྫས་ལས་འདས་པའི་བློ་གྲོས་དང་། ལྷ་རྫས་ལས་འདས་པའི་ཤེས་རབ་སྟེ། དེ་ནི་ལྷ་རྫས་ལས་འདས་པའི་བསོད་ནམས་རབ་ཏུ་གྲུབ་པས་ནོར་བུ་རིན་པོ་ཆེ་དེ་ཐོབ་པའི་ཕྱིར་རོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་དེ་ཡང་ཏིང་ངེ་འཛིན་འདི་ཐོབ་པས་ཡེ་ཤེས་ཀྱི་ཚོགས་ཆེན་པོ་ཡངས་པའི་གཏེར་ཆེན་པོ་བཅུ་འཐོབ་བོ། །བཅུ་གང་ཞེ་ན། འདི་ལྟ་སྟེ་སངས་རྒྱས་ཀྱི་ཞིང་ཐམས་ཅད་སྣང་བར་བྱ་བའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། སེམས་ཅན་གྱི་ཁམས་ཐམས་ཅད་དུ་སྐྱེ་ཞིང་འབྱུང་བའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། དུས་གསུམ་དུ་སྤྲུལ་པའི་བྱིན་གྱིས་བརླབས་པའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། སངས་རྒྱས་ཐམས་ཅད་ཀྱི་སྐུའི་བྱིན་གྱིས་བརླབས་པའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། ཆོས་ཐམས་ཅད་རྟོགས་པར་རིག་པའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། ཆོས་ཐམས་ཅད་ཉེ་བར་སྟོན་པའི་ཆོས་

---

^{[མ་དཔེ་གཟིགས་ན་འདིར་གནོན།]}

ཤིན་ཏུ་བརྗོད་པའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། འགྲོ་བ་ཐམས་ཅད་ཁོངས་སུ་ཆུད་པའི་ཆོས་ཀྱི་ལུས་ཀྱི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། ཆོས་ཐམས་ཅད་མངོན་དུ་གྱུར་ཅིང་ཀུན་ཏུ་མཐོང་བའི་མྱིག་གི་ཡེ་ཤེས་རྣམ་པར་དག་པ་རབ་ཏུ་འཐོབ་བོ། །འདི་ལྟ་སྟེ། དབང་ཐམས་ཅད་ཀྱི་ཕ་རོལ་ཏུ་ཕྱིན་པའི་ཡེ་ཤེས་རབ་ཏུ་འཐོབ་བོ། །འདི་ལྟ་སྟེ། ཆོས་འབྱམ་ཀླས་པ་ཐམས་ཅད་མ་ལུས་པར་ཁོང་དུ་ཆུད་པ་རབ་ཏུ་འཐོབ་བོ། །ཏིང་ངེ་འཛིན་འདི་ཐོབ་མ་ཐག་ཏུ་བྱང་ཆུབ་སེམས་དཔའ་དེ་རྣམ་པར་དམིགས་པ་ཐམས་ཅད་འཇིག་རྟེན་གྱི་ཁམས་ཐམས་ཅད་རྣམ་པར་བརྒྱན་པར་བྱ་བའི་ཕྱིར་དག་པའི་ལུས་བཅུ་འཐོབ་བོ། །བཅུ་གང་ཞེ་ན། འདི་ལྟ་སྟེ། འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་སྣང་བར་བྱ་བའི་ཕྱིར། འོད་ཀྱི་དཀྱིལ་འཁོར་བརྗོད་དུ་མེད་པའི་ཡང་བརྗོད་དུ་མེད་པ་རབ་ཏུ་འགྱེད་དོ། །འདི་ལྟ་སྟེ། འཇིག་རྟེན་གྱི་ཁམས་རྣམ་པར་དག་པར་བྱ་བའི་ཕྱིར། ཁ་དོག་དུ་མ་དང་། ཁ་དོག་སྣ་ཚོགས་དང་། འོད་ཀྱི་དཀྱིལ་འཁོར་བརྗོད་དུ་མེད་པའི་ཡང་བརྗོད་དུ་མེད་པར་བྱིན་གྱིས་རློབ་བོ། །འདི་ལྟ་སྟེ། སེམས་ཅན་བྱིན་གྱིས་བརླབ་ཅིང་གདུལ་བའི་ཕྱིར་འོད་གཟེར་གྱི་དཀྱིལ་འཁོར་བརྗོད་དུ་མེད་པའི་ཡང་བརྗོད་དུ་མེད་པ་རབ་ཏུ་འགྱེད་དོ། །འདི་ལྟ་སྟེ། སངས་རྒྱས་ཐམས་ཅད་ཀྱི་སྤྱན་སྔར་འགྲོ་བའི་ཕྱིར་ལུས་བརྗོད་དུ་མེད་པའི་ཡང་བརྗོད་དུ་མེད་པར་བྱིན་གྱིས་རློབ་བོ། །འདི་ལྟ་སྟེ། སངས་རྒྱས་ཐམས་ཅད་བསྙེན་བཀུར་བར་བྱ་བའི་ཕྱིར། སྤོས་དང་མེ་ཏོག་སྣ་ཚོགས་ཡིད་དུ་འོང་བའི་སྤྲིན་དུ་མ་བརྗོད་དུ་མེད་པའི་ཡང་བརྗོད་དུ་མེད་པའི་ཆར་མངོན་པར་འབེབས་སོ། །འདི་ལྟ་སྟེ། སངས་རྒྱས་བསྙེན་བཀུར་བ་དང་། སེམས་ཅན་གདུལ་བའི་ཕྱིར་བ་སྤུའི་ཁུང་བུ་རེ་རེར་ཡང་རོལ་མོ་བརྡུང་བ་དང་དཀྲོལ་བ་དང་

---

^{[མ་དཔེ་གཟིགས་ན་འདིར་གནོན།]}

བརྒྱ་ཕྲག་དུ་མ་ཡིད་དུ་འོང་ཞིང་རྒྱ་ཆེ་བ་བརྗོད་དུ་མེད་པའི་ཡང་བརྗོད་དུ་མེད་པར་བྱིན་གྱིས་རློབ་བོ། །འདི་ལྟ་སྟེ་སེམས་ཅན་མོས་པའི་ཚུལ་བཞིན་ཡོངས་སུ་སྨིན་པར་བྱ་བའི་ཕྱིར། སྤྲུལ་པའི་རྒྱུད་རྣམ་པ་སྣ་ཚོགས་རྣམ་པར་དག་པ་དང་། ཁྱུ་མཆོག་གི་མཐུ་དང་རྣམ་པར་འཕྲུལ་པའི་སྤྲུལ་པ་དུ་མ་བརྗོད་དུ་མེད་པའི་ཡང་བརྗོད་དུ་མེད་པ་ལ་རབ་ཏུ་རྟེན་ཏོ། །འདི་ལྟ་སྟེ། ཕྱོགས་བཅུར་སངས་རྒྱས་ཀྱི་ཆོས་རྣམ་པ་ཐ་དད་པ་སྣ་ཚོགས་ཡོངས་སུ་དྲི་བའི་ཕྱིར་གོམ་པ་རེ་རེས་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་ཡོངས་སུ་འདའ་བར་བྱེད་དོ། །འདི་ལྟ་སྟེ། མཐོང་བ་དང་། ཐོས་པ་དང་། མཆོད་པ་ཐམས་ཅད་དོན་ཡོད་པར་བྱ་བའི་ཕྱིར་སྤྱི་གཙུག་བལྟར་མི་སྣང་བའི་ལུས་རྣམ་པར་དག་པ་དང་། གཟུགས་དང་མཚན་སྣ་ཚོགས་རྣམ་པར་དག་པ་བརྗོད་དུ་མེད་པའི་ཡང་བརྗོད་དུ་མེད་པ་རབ་ཏུ་འཐོབ་བོ། །འདི་ལྟ་སྟེ། སྒྲ་སྐད་སྣ་ཚོགས་དང་། སྒྲ་སྐད་དུ་མས་འགྲོ་བ་རྣམས་རྣམ་པར་བསྟན་པའི་ཕྱིར། སྒྲ་དང་སྐད་དང་ང་རོ་དང་། དབྱངས་ཀྱི་ཡན་ལག་བརྗོད་དུ་མེད་པའི་ཡང་བརྗོད་དུ་མེད་པ་རབ་ཏུ་བརྗོད་དོ། །དེ་ལྟར་བྱང་ཆུབ་སེམས་དཔའ་ལུས་ཀྱི་གཟི་བརྗིད་ཕུན་སུམ་ཚོགས་ཤིང་། རྣམ་པར་དག་པ་བཅུ་རབ་ཏུ་འཐོབ་བོ། །བྱང་ཆུབ་སེམས་དཔའ་དེ་ནི་སེམས་ཅན་བྱིན་གྱིས་བརླབ་པ་ཡོངས་སུ་རྫོགས་པར་བྱ་བ་བཅུ་རབ་ཏུ་འཐོབ་སྟེ། བཅུ་གང་ཞེ་ན། འདི་ལྟ་སྟེ། སངས་རྒྱས་མཐོང་ཞིང་རྣམ་པར་དམིགས་པར་བྱ་བའི་ཕྱིར། སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། སངས་རྒྱས་ལ་དད་པ་རབ་ཏུ་འཐོབ་པར་བྱ་བའི་ཕྱིར། སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། ཆོས་ཉན་ཅིང་ཁོང་དུ་ཆུད་པར་བྱ་བའི་ཕྱིར། སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། སངས་རྒྱས་དང་བཅས་པའི་འཇིག་

---

^{[མ་དཔེ་གཟིགས་ན་འདིར་གནོན།]}

རྟེན་གྱི་ཁམས་བསྟན་པའི་ཕྱིར་སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ་སངས་རྒྱས་ཀྱི་རྣམ་པར་འཕྲུལ་པ་ཡང་དག་པར་བསྟན་པའི་ཕྱིར་སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ་ལས་ཇི་ལྟར་བསྩགས་པ་བཞིན་དུ་རྗེས་སུ་དྲན་པར་བྱ་བའི་ཕྱིར་སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། རྩེ་གཅིག་ཏུ་འགྱུར་བ་ཡོངས་སུ་རྫོགས་པར་བྱ་བའི་ཕྱིར་སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ་སངས་རྒྱས་ཀྱི་ཆ་བྱད་རྣམ་པར་དག་པར་བྱ་བའི་ཕྱིར་སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། བྱང་ཆུབ་ཀྱི་སེམས་ལ་ཡང་དག་པར་འཇུག་པར་བྱ་བའི་ཕྱིར་སེམས་ཅན་རྣམས་བྱིན་གྱིས་རློབ་བོ། །འདི་ལྟ་སྟེ། སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར། སེམས་ཅན་རྣམས་བྱིན་གྱིས་རློབ་བོ། །ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་དེ་སེམས་ཅན་བྱིན་གྱིས་བརླབ་པ་བཅུ་ཡོངས་སུ་རྫོགས་པར་བྱེད་དོ། །ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའ་སེམས་ཅན་བྱིན་གྱིས་བརླབ་པ་བཅུ་ཡོངས་སུ་རྫོགས་པར་བྱས་ནས་སེམས་ཅན་རྣམས་ལ་སངས་རྒྱས་ཀྱི་མཛད་པ་བཅུ་བྱེད་དེ། བཅུ་གང་ཞེ་ན། འདི་ལྟར་བྱང་ཆུབ་སེམས་དཔའ་ནི་ཐོས་པས་ཀྱང་སེམས་ཅན་རྣམས་ཡོངས་སུ་སྨིན་པར་བྱེད་པས་སེམས་ཅན་རྣམས་ལ་སངས་རྒྱས་ཀྱི་མཛད་པ་བྱེད་པ་ཡིན། འདི་ལྟ་སྟེ། བྱང་ཆུབ་སེམས་དཔའ་ནི་མཐོང་བས་ཀྱང་སེམས་ཅན་འདུལ་བའི་ཕྱིར། སངས་རྒྱས་ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་རྗེས་སུ་དྲན་པས་ཀྱང་སེམས་རྣམ་པར་དག་པར་འགྱུར་བས་སངས་རྒྱས་ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་འཇིག་རྟེན་གྱི་ཁམས་སྐྱོད་པས་ཀྱང་ངན་སོང་གསུམ་རྣམ་པར་བཟློག་པའི་ཕྱིར།

---

^{[མ་དཔེ་གཟིགས་ན་འདིར་གནོན།]}

སངས་རྒྱས་ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་བྱིན་གྱི་རླབས་ཀྱིས་ཀྱང་སེམས་ཅན་རྣམས་ཀྱི་དྲན་པ་ཉམས་པར་མི་འགྱུར་བའི་ཕྱིར། སངས་རྒྱས་ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་རྨི་ལམ་དུ་མཐོང་བས་ཀྱང་སེམས་ཅན་རྣམས་ཀྱི་དྲན་པ་ཉམས་པར་མི་འགྱུར་བའི་ཕྱིར། སངས་རྒྱས་ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་འོད་ཀྱི་དཀྱིལ་འཁོར་འགྱེད་པས་ཀྱང་སེམས་ཅན་རྣམས་ཀྱི་དྲན་པ་ཉམས་པར་མི་འགྱུར་བའི་ཕྱིར། སངས་རྒྱས་ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་སྤྱོད་པ་ཡང་དག་པར་སྟོན་པས་ཀྱང་སེམས་ཅན་རྣམས་སྨོན་ལམ་གྱི་ཁྱད་པར་ལ་རབ་ཏུ་གཞོག་པས་སངས་རྒྱས་ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་མངོན་པར་འཚང་རྒྱ་བས་ཀྱང་སེམས་ཅན་རྣམས་ཆོས་ཁོང་དུ་ཆུད་པར་རྟོགས་པར་འགྱུར་བའི་ཕྱིར་སངས་རྒྱས་ཀྱི་མཛད་པ་བྱེད་པ་ཡིན། བྱང་ཆུབ་སེམས་དཔའ་ནི་མྱ་ངན་ལས་འདས་པ་སྟོན་པས་ཀྱང་སེམས་ཅན་མི་དགའ་བ་བསྟན་པས་ཤིན་ཏུ་རྟོགས་པར་བྱེད་པའི་ཕྱིར། སངས་རྒྱས་ཀྱི་མཛད་པ་བྱེད་པ་ཡིན་ཏེ། ཀྱེ་རྒྱལ་བའི་སྲས་དག །འདི་དག་ནི་བྱང་ཆུབ་སེམས་དཔའ་སེམས་ཅན་རྣམས་ལ་སངས་རྒྱས་ཀྱི་མཛད་པ་བཅུ་བྱེད་པའོ། །ཀྱེ་རྒྱལ་བའི་སྲས་དག །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཏིང་ངེ་འཛིན་ཆེན་པོ་ལུས་ཡང་དག་པར་འདྲེས་པ་ཞེས་བྱ་བ་ལ་སྙོམས་པར་འཇུག་སྟེ། ལུས་ཡང་དག་པར་འདྲེས་པ་དེས་མི་གནས་པ་བཅུ་ཡོངས་སུ་རྫོགས་པར་བྱེད་དོ། །བཅུ་གང་ཞེ་ན་འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་ལ་མི་གནས་པ་དང་། ཕྱོགས་ཐམས་ཅད་ལ་མི་གནས་པ་དང་། བསྐལ་པ་ཐམས་ཅད་ལ་

---

^{[མ་དཔེ་གཟིགས་ན་འདིར་གནོན།]}

མི་གནས་པ་དང་། སེམས་ཅན་ཐམས་ཅད་ལ་མི་གནས་པ་དང་། ཆོས་ཐམས་ཅད་ལ་མི་གནས་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ལ་མི་གནས་པ་དང་། བྱང་ཆུབ་སེམས་དཔའི་སྨོན་ལམ་ཐམས་ཅད་ལ་མི་གནས་པ་དང་། ཏིང་ངེ་འཛིན་ཐམས་ཅད་ལ་མི་གནས་པ་དང་། སངས་རྒྱས་ཐམས་ཅད་ལ་མི་གནས་པ་དང་། ས་ཐམས་ཅད་ལ་མི་གནས་པ་སྟེ། བྱང་ཆུབ་སེམས་དཔའ་ལུས་ཡང་དག་པར་འདྲེས་པའི་ཏིང་ངེ་འཛིན་ལ་གནས་པའི་ཚེ། གནས་མེད་པ་བཅུ་པོ་འདི་དག་རབ་ཏུ་འཐོབ་བོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་བཞི་པ། ཇི་ལྟར་ན་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་ལུས་ཡང་དག་པར་འདྲེས་པ་ལ་མཉམ་པར་གཞོག་ཅེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་ནང་གི་ལུས་སུ་སྙོམས་པར་ཞུགས་ཤིང་ཕྱི་རོལ་གྱི་ལུས་ལས་རྣམ་པར་ལྡང་ངོ་། །ཕྱི་རོལ་གྱི་ལུས་སུ་སྙོམས་པར་ཞུགས་ཤིང་། ནང་གི་ལུས་ལས་རྣམ་པར་ལྡང་ངོ་། ། ལུས་གཅིག་ཏུ་སྙོམས་པར་ཞུགས་ཤིང་། ལུས་ཐ་དད་པ་ལས་རྣམ་པར་ལྡང་ངོ་། །ལུས་ཐ་དད་པ་ལ་སྙོམས་པར་ཞུགས་ཤིང་མྱིའི་ལུས་ལས་རྣམ་པར་ལྡང་ངོ་། །མིའི་ལུས་སུ་སྙོམས་པར་ཞུགས་ཤིང་། གནོད་སྦྱིན་གྱི་ལུས་ལས་རྣམ་པར་ལྡང་ངོ་། །གནོད་སྦྱིན་གྱི་ལུས་སུ་སྙོམས་པར་ཞུགས་ཤིང་། ཀླུའི་ལུས་ལས་རྣམ་པར་ལྡང་ངོ་། །ཀླུའི་ལུས་སུ་སྙོམས་པར་ཞུགས་ཤིང་། ལྷ་མ་ཡིན་གྱི་ལུས་ལས་རྣམ་པར་ལྡང་ངོ་། །ལྷ་མ་ཡིན་གྱི་ལུས་སུ་སྙོམས་པར་ཞུགས་ཤིང་། ལྷའི་ལུས་ལས་རྣམ་པར་ལྡང་ངོ་། །ལྷའི་ལུས་སུ་སྙོམས་པར་ཞུགས་ཤིང་། ཚངས་པའི་ལུས་ལས་རྣམ་པར་ལྡང་ངོ་། །ཚངས་པའི་ལུས་སུ་སྙོམས་པར་ཞུགས་ཤིང་། འདོད་

---

^{[མ་དཔེ་གཟིགས་ན་འདིར་གནོན།]}

པའི་ཁམས་ནས་རྣམ་པར་ལྡང་ངོ་། །འདོད་པའི་ཁམས་ནས་སྙོམས་པར་ཞུགས་ཤིང་། མཐོ་རིས་ཀྱི་འཇིག་རྟེན་ནས་རྣམ་པར་ལྡང་ངོ་། །མཐོ་རིས་ཀྱི་འཇིག་རྟེན་དུ་སྙོམས་པར་ཞུགས་ཤིང་། སེམས་ཅན་དམྱལ་བ་ནས་རྣམ་པར་ལྡང་ངོ་། །སེམས་ཅན་དམྱལ་བར་སྙོམས་པར་ཞུགས་ཤིང་། མྱིའི་ཁམས་ནས་རྣམ་པར་ལྡང་ངོ་། །མྱིའི་ཁམས་ལ་སྙོམས་པར་ཞུགས་ཤིང་། དེ་མ་ཡིན་པའི་ལམ་གྱི་རྒྱུད་གཞན་ནས་རྣམ་པར་ལྡང་ངོ་། །དེ་མ་ཡིན་པའི་ལམ་གྱི་རྒྱུད་ལ་སྙོམས་པར་ཞུགས་ཤིང་། ལུས་སྟོང་ལས་རྣམ་པར་ལྡང་ངོ་། །ལུས་སྟོང་ལ་སྙོམས་པར་ཞུགས་ཤིང་། ལུས་གཅིག་ལས་རྣམ་པར་ལྡང་ངོ་། །ལུས་གཅིག་ལ་སྙོམས་པར་ཞུགས་ཤིང་། ལུས་བྱེ་བ་ལས་རྣམ་པར་ལྡང་ངོ་། །ལུས་བྱེ་བ་ལ་སྙོམས་པར་ཞུགས་ཤིང་། ལུས་གཅིག་ལས་རྣམ་པར་ལྡང་ངོ་། །ལུས་གཅིག་ལ་སྙོམས་པར་ཞུགས་ཤིང་། ལུས་ཁྲག་ཁྲིག་ལས་རྣམ་པར་ལྡང་ངོ་། །ལུས་ཁྲག་ཁྲིག་ལ་སྙོམས་པར་ཞུགས་ཤིང་། འཛམ་བུའི་གླིང་དུ་གཏོགས་པའི་སེམས་ཅན་ལས་རྣམ་པར་ལྡང་ངོ་། །འཛམ་བུའི་གླིང་དུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། ནུབ་ཀྱི་བན་ལང་སྤྱོད་དུ་གཏོགས་པའི་སེམས་ཅན་ལས་རྣམ་པར་ལྡང་ངོ་། །ནུབ་ཕྱོགས་ཀྱི་བན་ལང་སྤྱོད་དུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། བྱང་གི་སྒྲ་མི་སྙན་དུ་གཏོགས་པའི་སེམས་ཅན་ལས་རྣམ་པར་ལྡང་ངོ་། །བྱང་གི་སྒྲ་མི་སྙན་དུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། ཤར་གྱི་ལུས་འཕགས་པོར་གཏོགས་པའི་སེམས་ཅན་ལས་རྣམ་པར་ལྡང་ངོ་། །ཤར་གྱི་ལུས་འཕགས་པོར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། གླིང་གསུམ་དུ་གཏོགས་པའི་སེམས་ཅན་ལས་རྣམ་པར་ལྡང་ངོ་། །གླིང་གསུམ་དུ་གཏོགས་པའི་

---

^{[མ་དཔེ་གཟིགས་ན་འདིར་གནོན།]}

སེམས་ཅན་ལ་སྙོམས་པར་ཞུགས་ཤིང་། གླིང་གཉིས་སུ་གཏོགས་པའི་སེམས་ཅན་ལས་རྣམ་པར་ལྡང་ངོ་། །གླིང་གཉིས་སུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། གླིང་བཞིར་གཏོགས་པའི་སེམས་ཅན་ལས་རྣམ་པར་ལྡང་ངོ་། །གླིང་བཞིར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། རྒྱ་མཚོར་གཏོགས་པའི་སེམས་ཅན་ལས་རྣམ་པར་ལྡང་ངོ་། །རྒྱ་མཚོར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། རྒྱ་མཚོའི་ལྷའི་ལུས་ལས་རྣམ་པར་ལྡང་ངོ་། །རྒྱ་མཚོའི་ལྷའི་ལུས་སུ་སྙོམས་པར་ཞུགས་ཤིང་། རྒྱ་མཚོར་གཏོགས་པའི་ཆུའི་ཕུང་པོ་ལས་རྣམ་པར་ལྡང་ངོ་། །རྒྱ་མཚོར་གཏོགས་པའི་ཆུའི་ཕུང་པོ་ལ་སྙོམས་པར་ཞུགས་ཤིང་། རྒྱ་མཚོར་གཏོགས་པའི་སའི་ཕུང་པོ་ལས་རྣམ་པར་ལྡང་ངོ་། ། རྒྱ་མཚོར་གཏོགས་པའི་སའི་ཕུང་པོ་ལ་སྙོམས་པར་ཞུགས་ཤིང་། རྒྱ་མཚོར་གཏོགས་པའི་མྱེའི་ཕུང་པོ་ལས་རྣམ་པར་ལྡང་ངོ་། །རྒྱ་མཚོར་གཏོགས་པའི་མེའི་ཕུང་པོ་ལ་སྙོམས་པར་ཞུགས་ཤིང་། རྒྱ་མཚོར་གཏོགས་པའི་རླུང་གི་ཕུང་པོ་ལས་རྣམ་པར་ལྡང་ངོ་། །རྒྱ་མཚོར་གཏོགས་པའི་རླུང་གི་ཕུང་པོ་ལ་སྙོམས་པར་ཞུགས་ཤིང་། འབྱུང་བ་ཆེན་པོ་བཞི་ལས་རྣམ་པར་ལྡང་ངོ་། །འབྱུང་བ་ཆེན་པོ་བཞི་ལ་སྙོམས་པར་ཞུགས་ཤིང་། ཆོས་འབྱུང་བ་མེད་པ་ལས་རྣམ་པར་ལྡང་ངོ་། །ཆོས་འབྱུང་བ་མེད་པ་ལ་སྙོམས་པར་ཞུགས་ཤིང་། རི་རབ་ལས་རྣམ་པར་ལྡང་ངོ་། །རི་རབ་ལ་སྙོམས་པར་ཞུགས་ཤིང་། རིན་པོ་ཆེའི་རི་བདུན་ལས་རྣམ་པར་ལྡང་ངོ་། །རིན་པོ་ཆེའི་རི་བདུན་ལ་སྙོམས་པར་ཞུགས་ཤིང་། རིན་པོ་ཆེའི་རྒྱན་བདུན་ལས་རྣམ་པར་ལྡང་ངོ་། །རིན་པོ་ཆེའི་རྒྱན་བདུན་ལ་སྙོམས་པར་ཞུགས་ཤིང་། ས་བོན་དང་ལོ་ཏོག་དང་། ས་དང་ཤིང་དང་རི་ནག་པོ་སྣ་ཚོགས་

---

^{[མ་དཔེ་གཟིགས་ན་འདིར་གནོན།]}

ལས་རྣམ་པར་ལྡང་ངོ་། །ས་བོན་དང་། ལོ་ཏོག་དང་ས་དང་ཤིང་དང་། རི་ནག་པོ་ལ་སྙོམས་པར་ཞུགས་ཤིང་། མེ་ཏོག་བཟང་པོ་དང་དྲི་ཞིམ་པོ་དང་རིན་པོ་ཆེའི་རྒྱན་གྱིས་བརྒྱན་པའི་རི་ལས་རྣམ་པར་ལྡང་ངོ་། །མེ་ཏོག་བཟང་པོ་དང་དྲི་ཞིམ་པོ་དང་རིན་པོ་ཆེའི་རྒྱན་གྱིས་བརྒྱན་པའི་རི་ལ་སྙོམས་པར་ཞུགས་ཤིང་། གླིང་བཞི་པར་གཏོགས་པའི་བླ་དང་འོག་ཐམས་ཅད་དང་། སེམས་ཅན་རྣམ་པར་ཕྱེ་བ་ཐམས་ཅད་ཀྱི་སྐྱེ་གནས་ལས་རྣམ་པར་ལྡང་ངོ་། །གླིང་བཞི་བར་གཏོགས་པའི་བླ་དང་འོག་ཐམས་ཅད་དང་སེམས་ཅན་རྣམ་པར་ཕྱེ་བ་ཐམས་ཅད་ཀྱི་སྐྱེ་གནས་ལ་སྙོམས་པར་ཞུགས་ཤིང་། སྟོང་གི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལས་རྣམ་པར་ལྡང་ངོ་། །སྟོང་གི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། སྟོང་གཉིས་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལས་རྣམ་པར་ལྡང་ངོ་། །སྟོང་གཉིས་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། སྟོང་གསུམ་གྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལས་རྣམ་པར་ལྡང་ངོ་། །སྟོང་གསུམ་གྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལས་རྣམ་པར་ལྡང་ངོ་། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྲག་ཁྲིག་ཕྲག་བརྒྱར་གཏོགས་པའི་སེམས་ཅན་ལས་རྣམ་པར་ལྡང་ངོ་། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྲག་ཁྲིག་ཕྲག་བརྒྱར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། བྱེ་བ་བརྒྱ་ཕྲག་སྟོང་དུ་གཏོགས་པའི་སེམས་ཅན་ལས་རྣམ་པར་ལྡང་ངོ་། །འཇིག་རྟེན་གྱི་ཁམས་བྱེ་བ་བརྒྱ་ཕྲག་སྟོང་དུ་གཏོགས་པའི་

---

^{[མ་དཔེ་གཟིགས་ན་འདིར་གནོན།]}

སེམས་ཅན་ལ་སྙོམས་པར་ཞུགས་ཤིང་། འཇིག་རྟེན་གྱི་ཁམས་ཚད་མེད་པར་གཏོགས་པའི་སེམས་ཅན་ལས་རྣམ་པར་ལྡང་ངོ་། །འཇིག་རྟེན་གྱི་ཁམས་ཚད་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་ལས་རྣམ་པར་ལྡང་ངོ་། །འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། སངས་རྒྱས་ཀྱི་ཞིང་དཔག་ཏུ་མེད་པར་གཏོགས་པའི་སེམས་ཅན་ལས་རྣམ་པར་ལྡང་ངོ་། །སངས་རྒྱས་ཀྱི་ཞིང་དཔག་ཏུ་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། སངས་རྒྱས་ཀྱི་ཞིང་མཐའ་ཡས་པར་གཏོགས་པའི་སེམས་ཅན་ལས་རྣམ་པར་ལྡང་ངོ་། །སངས་རྒྱས་ཀྱི་ཞིང་མཐའ་ཡས་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། སངས་རྒྱས་ཀྱི་ཞིང་མུ་མེད་པར་གཏོགས་པའི་སེམས་ཅན་ལས་རྣམ་པར་ལྡང་ངོ་། །སངས་རྒྱས་ཀྱི་ཞིང་མུ་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། འཇིག་རྟེན་གྱི་ཁམས་གཞལ་དུ་མེད་པར་གཏོགས་པའི་སེམས་ཅན་ལས་རྣམ་པར་ལྡང་ངོ་། །འཇིག་རྟེན་གྱི་ཁམས་གཞལ་དུ་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། འཇིག་རྟེན་གྱི་ཁམས་བསམ་གྱིས་མི་ཁྱབ་པར་གཏོགས་པའི་སེམས་ཅན་ལས་རྣམ་པར་ལྡང་ངོ་། །འཇིག་རྟེན་གྱི་ཁམས་བསམ་གྱིས་མི་ཁྱབ་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། འཇིག་རྟེན་གྱི་

---

^{[མ་དཔེ་གཟིགས་ན་འདིར་གནོན།]}

ཁམས་དཔག་གིས་མི་ལང་བར་གཏོགས་པའི་སེམས་ཅན་ལས་རྣམ་པར་ལྡང་ངོ་། །འཇིག་རྟེན་གྱི་ཁམས་དཔག་གིས་མི་ལང་བར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། འཇིག་རྟེན་གྱི་ཁམས་བརྗོད་དུ་མེད་པའི་སེམས་ཅན་ལས་རྣམ་པར་ལྡང་ངོ་། །འཇིག་རྟེན་གྱི་ཁམས་བརྗོད་དུ་མེད་པའི་སེམས་ཅན་ལ་སྙོམས་པར་ཞུགས་ཤིང་། འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པར་གཏོགས་པའི་སེམས་ཅན་ལས་རྣམ་པར་ལྡང་ངོ་། །འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པར་གཏོགས་པའི་སེམས་ཅན་ལ་སྙོམས་པར་ཞུགས་ཤིང་། ཀུན་ནས་ཉོན་མོངས་པའི་སེམས་ཅན་ལས་རྣམ་པར་ལྡང་ངོ་། །ཀུན་ནས་ཉོན་མོངས་པའི་སེམས་ཅན་ལ་སྙོམས་པར་ཞུགས་ཤིང་། རྣམ་པར་བྱང་བའི་སེམས་ཅན་ལས་རྣམ་པར་ལྡང་ངོ་། །རྣམ་པར་བྱང་བའི་སེམས་ཅན་ལ་སྙོམས་པར་ཞུགས་ཤིང་། མིག་གི་སྐྱེ་མཆེད་ལས་རྣམ་པར་ལྡང་ངོ་། །མིག་གི་སྐྱེ་མཆེད་ལ་སྙོམས་པར་ཞུགས་ཤིང་། རྣ་བའི་སྐྱེ་མཆེད་ལས་རྣམ་པར་ལྡང་ངོ་། །རྣ་བའི་སྐྱེ་མཆེད་ལ་སྙོམས་པར་ཞུགས་ཤིང་། སྣའི་སྐྱེ་མཆེད་ལས་རྣམ་པར་ལྡང་ངོ་། །སྣའི་སྐྱེ་མཆེད་ལ་སྙོམས་པར་ཞུགས་ཤིང་། ལྕེའི་སྐྱེ་མཆེད་ལས་རྣམ་པར་ལྡང་ངོ་། །ལྕེའི་སྐྱེ་མཆེད་ལ་སྙོམས་པར་ཞུགས་ཤིང་། ལུས་ཀྱི་སྐྱེ་མཆེད་ལས་རྣམ་པར་ལྡང་ངོ་། །ལུས་ཀྱི་སྐྱེ་མཆེད་ལ་སྙོམས་པར་ཞུགས་ཤིང་། རེག་གི་སྐྱེ་མཆེད་ལས་རྣམ་པར་ལྡང་ངོ་། །རེག་གི་སྐྱེ་མཆེད་ལ་སྙོམས་པར་ཞུགས་ཤིང་། རོའི་སྐྱེ་མཆེད་ལས་རྣམ་པར་ལྡང་ངོ་། །རོའི་སྐྱེ་མཆེད་ལ་སྙོམས་པར་ཞུགས་ཤིང་། དྲིའི་སྐྱེ་མཆེད་ལས་རྣམ་པར་ལྡང་ངོ་། །དྲིའི་སྐྱེ་མཆེད་ལ་སྙོམས་པར་ཞུགས་ཤིང་། སྒྲའི་སྐྱེ་མཆེད་ལས་རྣམ་པར་

---

^{[མ་དཔེ་གཟིགས་ན་འདིར་གནོན།]}

ལྡང་ངོ་། །སྒྲའི་སྐྱེ་མཆེད་ལ་སྙོམས་པར་ཞུགས་ཤིང་། གཟུགས་ཀྱི་སྐྱེ་མཆེད་ལས་རྣམ་པར་ལྡང་ངོ་། །གཟུགས་ཀྱི་སྐྱེ་མཆེད་ལ་སྙོམས་པར་ཞུགས་ཤིང་། རྡུལ་ཤིན་ཏུ་ཕྲ་བ་གཅིག་ལས་རྣམ་པར་ལྡང་ངོ་། །རྡུལ་ཤིན་ཏུ་ཕྲ་བ་གཅིག་ལ་སྙོམས་པར་ཞུགས་ཤིང་། འཇིག་རྟེན་གྱི་ཁམས་གྲངས་མེད་པའི་རྡུལ་ཤིན་ཏུ་ཕྲ་བ་རྣམ་པར་ཕྱེ་བ་ལས་རྣམ་པར་ལྡང་ངོ་། །འཇིག་རྟེན་གྱི་ཁམས་གྲངས་མེད་པའི་རྡུལ་ཤིན་ཏུ་ཕྲ་བ་རྣམ་པར་ཕྱེ་བ་ལ་སྙོམས་པར་ཞུགས་ཤིང་། ཉན་ཐོས་ལས་རྣམ་པར་ལྡང་ངོ་། །ཉན་ཐོས་ལ་སྙོམས་པར་ཞུགས་ཤིང་། རང་སངས་རྒྱས་ལས་རྣམ་པར་ལྡང་ངོ་། །རང་སངས་རྒྱས་ལ་སྙོམས་པར་ཞུགས་ཤིང་། རང་གི་ལུས་ལས་རྣམ་པར་ལྡང་ངོ་། །རང་གི་ལུས་ལ་སྙོམས་པར་ཞུགས་ཤིང་། སངས་རྒྱས་ཀྱི་སྐུ་ལས་རྣམ་པར་ལྡང་ངོ་། །སངས་རྒྱས་ཀྱི་སྐུ་ལ་སྙོམས་པར་ཞུགས་ཤིང་། སེམས་ཀྱི་སྐད་ཅིག་གཅིག་ལས་རྣམ་པར་ལྡང་ངོ་། །སེམས་ཀྱི་སྐད་ཅིག་གཅིག་ལ་སྙོམས་པར་ཞུགས་ཤིང་། བསྐལ་པ་བྱེ་བ་ལས་རྣམ་པར་ལྡང་ངོ་། །བསྐལ་པ་བྱེ་བ་ལ་སྙོམས་པར་ཞུགས་ཤིང་། སྔོན་གྱི་མཐའ་ལས་རྣམ་པར་ལྡང་ངོ་། །སྔོན་གྱི་མཐའ་ལ་སྙོམས་པར་ཞུགས་ཤིང་། ཕྱི་མའི་མཐའ་ལས་རྣམ་པར་ལྡང་ངོ་། །ཕྱི་མའི་མཐའ་ལ་སྙོམས་པར་ཞུགས་ཤིང་། ད་ལྟར་བྱུང་བའི་མཐའ་ལས་རྣམ་པར་ལྡང་ངོ་། །ད་ལྟར་བྱུང་བའི་མཐའ་ལ་སྙོམས་པར་ཞུགས་ཤིང་། དུས་གསུམ་ལས་རྣམ་པར་ལྡང་ངོ་། །དུས་གསུམ་ལ་སྙོམས་པར་ཞུགས་ཤིང་། སྐད་ཅིག་གི་མཐའ་ལས་རྣམ་པར་ལྡང་ངོ་། །སྐད་ཅིག་གི་མཐའ་ལ་སྙོམས་པར་ཞུགས་ཤིང་། དུས་གསུམ་ལས་རྣམ་པར་ལྡང་ངོ་། །དུས་གསུམ་ལ་སྙོམས་པར་ཞུགས་ཤིང་། ཕྱོགས་བཅུ་ནས་རྣམ་པར་ལྡང་ངོ་། །ཕྱོགས་བཅུར་སྙོམས་

---

^{[མ་དཔེ་གཟིགས་ན་འདིར་གནོན།]}

པར་ཞུགས་ཤིང་། ངག་གི་ལམ་ལས་རྣམ་པར་ལྡང་ངོ་། །ངག་གི་ལམ་ལ་སྙོམས་པར་ཞུགས་ཤིང་། ཕྱོགས་བཅུ་ནས་རྣམ་པར་ལྡང་ངོ་། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། འབྱུང་པོའི་གནོད་སྦྱིན་གྱིས་ནོན་པའི་མི་ནི་གནོད་སྦྱིན་གྱི་དབང་གིས་ལུས་དེ་དང་དེར་གྱུར་ཅིང་འཕྱན་ཏེ་རང་ལ་དབང་མེད་དོ། །འབྱུང་པོའི་གནོད་སྦྱིན་དེ་ཡང་གཞན་གྱི་ལུས་ཀྱི་དབང་གིས་འགྲོ་སྟེ། བདག་གི་ལུས་མི་སྟོན་ཏོ། །ཀྱེ་རྒྱལ་བའི་སྲས་དག །དེ་བཞིན་དུ་ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའ་ཡང་ནང་དུ་སྙོམས་པར་ཞུགས་ཤིང་། ཕྱི་རོལ་ལས་རྣམ་པར་ལྡང་ངོ་། །ཕྱི་རོལ་དུ་སྙོམས་པར་ཞུགས་ཤིང་། ནང་ནས་རྣམ་པར་ལྡང་ངོ་། །འདི་ལྟ་སྟེ་དཔེར་ན། ཤི་བའི་རོ་སྔགས་ཀྱི་བྱིན་གྱིས་བརླབས་པ་ནི་འགྲོ་ཞིང་རྒྱུའོ། །གང་གི་ཕྱིར་ཡོངས་སུ་བསླང་བ་དེ་ལ་ཡང་ཅི་དགའ་བ་ཐོབ་པར་བྱེད་དེ་ཤི་བའི་རོ་དེ་དང་སྔགས་སུ་ཡང་གཅིག་པ་མ་ཡིན་ནོ། །ཀྱེ་རྒྱལ་བའི་སྲས་དེ་བཞིན་དུ། ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའ་ཡང་དམིགས་པ་སྐལ་བ་མཉམ་པར་སྙོམས་པར་ཞུགས་ཤིང་། སྐལ་བ་མི་མཉམ་པའི་དམིགས་པ་ལས་རྣམ་པར་ལྡང་ངོ་། །སྐལ་པ་མི་མཉམ་པའི་དམིགས་པ་ལ་སྙོམས་པར་ཞུགས་ཤིང་། སྐལ་པ་མཉམ་པའི་དམིགས་པ་ལས་རྣམ་པར་ལྡང་ངོ་། །ཀྱེ་རྒྱལ་བའི་སྲས་དག །འདི་ལྟ་སྟེ། དགེ་སློང་དབང་ཐོབ་པ་ནི་གཅིག་ཏུ་གྱུར་ཅིང་མང་པོར་འགྱུར་རོ། །མང་པོར་གྱུར་ཅིང་གཅིག་ཏུ་འགྱུར་རོ། །ལུས་གཅིག་ནས་ཤི་འཕོས་ཏེ། དེའི་ཚེ་ལུས་མང་པོ་དེ་དག་ཏུ་སྐྱེས་པའང་མ་ཡིན། ལུས་མང་པོ་དེ་དག་ལས་ཤི་འཕོས་ཏེ། དེའི་ཚེ་ལུས་གཅིག་ཏུ་སྐྱེས་པའང་མ་ཡིན་ནོ། །གཅིག་ཏུ་གྱུར་པ་ལས་ཤི་འཕོས་ཏེ། མང་པོར་སྐྱེས་པའང་མ་ཡིན། མང་པོར་གྱུར་པ་ལས་ཤི་འཕོས་ཏེ། གཅིག་

---

^{[མ་དཔེ་གཟིགས་ན་འདིར་གནོན།]}

ཏུ་གྱུར་པའང་མ་ཡིན་ནོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའ་ཡང་ལུས་གཅིག་ཏུ་སྙོམས་པར་ཞུགས་ཤིང་། ལུས་མང་པོ་ལས་རྣམ་པར་ལྡང་ངོ་། །ལུས་མང་པོ་ལ་སྙོམས་པར་ཞུགས་ཤིང་། ལུས་གཅིག་ལས་རྣམ་པར་ལྡང་ངོ་། །འདི་ལྟ་སྟེ་དཔེར་ན། ས་གཅིག་གི་རོ་ནི་རྣམ་པ་གཅིག་པ་སྟེ། ལོ་ཏོག་མང་པོ་དང་། འབྱུང་བ་མང་པོ་སྣ་ཚོགས་སུ་རང་གི་རོ་ཀུན་ཏུ་གཏོང་ཡང་། སའི་རོ་དུས་དུས་སུ་རྣམ་པ་ཐ་དད་པར་འགྱུར་བ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའི་ཏིང་ངེ་འཛིན་འདི་ཐོབ་པ་ཡང་རྣམ་པ་གཅིག་ལ་སྙོམས་པར་ཞུགས་ཤིང་། རྣམ་པ་མང་པོ་ལས་རྣམ་པར་ལྡང་ངོ་། །རྣམ་པ་མང་པོ་ལ་སྙོམས་པར་ཞུགས་ཤིང་། རྣམ་པ་གཅིག་ལས་རྣམ་པར་ལྡང་ངོ་། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ཏིང་ངེ་འཛིན་སེམས་ཅན་རྣམས་ཀྱི་ཁམས་ཐ་མི་དད་པ་ཞེས་བྱ་བ་སྟེ་བརྒྱད་པའོ། །དེ་ལ་གནས་པའི་བྱང་ཆུབ་སེམས་དཔའ་ནི་རབ་ཏུ་བསྔགས་པའི་ཆོས་བཅུས་རབ་ཏུ་བསྔགས་པ་ཡིན་བཅུ་གང་ཞེ་ན་འདི་ལྟ་སྟེ། དེ་བཞིན་ཉིད་ལ་མཉམ་པར་བཞག་པའི་ཚུལ་གྱིས་དེ་བཞིན་གཤེགས་པ་ཞེས་བྱ། སངས་རྒྱས་ཀྱི་ཆོས་ཐམས་ཅད་ཁོང་དུ་ཆུད་པར་རྟོགས་པས་སངས་རྒྱས་ཞེས་བྱ། འཇིག་རྟེན་ཐམས་ཅད་ལ་རབ་ཏུ་སྟོན་པས་སྟོན་པ་ཞེས་བྱ། ཆོས་ཐམས་ཅད་ཤེས་པར་གྱུར་པས། ཐམས་ཅད་མཁྱེན་པ་ཞེས་བྱ། འགྲོ་བ་ཐམས་ཅད་ཀྱི་རྟེན་དུ་གྱུར་པས་མགོན་ཞེས་བྱ། ཆོས་ཐམས་ཅད་ཀྱི་ཚུལ་རྗེས་སུ་རྟོགས་པས་འདྲེན་པ་ཞེས་བྱ། སེམས་ཅན་ཐམས་ཅད་ལ་ཐམས་ཅད་མཁྱེན་པའི་ཡེ་ཤེས་ཀུན་ཏུ་བྱིན་པར་བྱེད་པས། རྣམ་པར་འདྲེན་པ་ཞེས་བྱ། འགྲོ་བ་ཐམས་ཅད་དུ་སྣང་བའི་སྒྲོན་མར་གྱུར་པས་སྣང་བ་ཞེས་བྱ། དོན་གྲུབ་སྟེ་བྱ་བ་བྱས་ལ་ཆོས་ཐམས་ཅད་རབ་ཏུ་ཕྱེ་བ་ཤེས་ཤིང་

---

^{[མ་དཔེ་གཟིགས་ན་འདིར་གནོན།]}

ཆགས་པ་མེད་པ་ལ་སྤྱོད་པ་ཡོངས་སུ་རྫོགས་པས། སྟོབས་བཅུ་མངའ་བ་ཞེས་བྱ། ཆོས་ཀྱི་འཁོར་ལོ་ཐམས་ཅད་ལ་དབང་བའི་ཕ་རོལ་ཏུ་ཕྱིན་པ་ཐོབ་པས་ཐམས་ཅད་གཟིགས་པ་ཞེས་བྱ་བ་སྟེ། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་དེ་ནི་རབ་ཏུ་བསྔགས་པའི་ཆོས་འདི་བཅུས་རབ་ཏུ་བསྔགས་པ་ཡིན་བྱང་ཆུབ་སེམས་དཔའ་དེ་ནི་སྣང་བ་བཅུས་སྣང་བར་བྱས་པ་ཡིན་ཏེ། བཅུ་གང་ཞེ་ན་འདི་ལྟ་སྟེ། སངས་རྒྱས་ཐམས་ཅད་ཀྱི་སྣང་བ་དང་། སེམས་ཅན་གྱི་ཁམས་ཡང་དག་པར་བླངས་ཏེ། རྣམ་པར་བརྒྱན་ཅིང་བྱིན་གྱིས་བརླབས་པའི་སྣང་བ་དང་། གདུལ་ཞིང་བྱིན་གྱིས་བརླབས་པའི་སྣང་བས་སེམས་ཅན་ཐམས་ཅད་ཀྱི་སྣང་བ་དང་། ཆོས་ཀྱི་དབྱིངས་ཀྱི་དཀྱིལ་འཁོར་ཐམས་ཅད་དུ་སྟོན་པས་མི་འཇིགས་པ་ཚད་མེད་པའི་སྣང་བ་དང་ཆོས་ཐམས་ཅད་ལ་ཐ་དད་པར་བྱེད་པ་མེད་པས་ཐ་དད་པར་བྱེད་པ་མེད་པའི་སྣང་བ་དང་། ཆོས་ཐམས་ཅད་འདོད་ཆགས་དང་བྲལ་བར་ཁོང་དུ་ཆུད་པས་ཚུལ་ལ་འཇུག་པའི་སྣང་བ་དང་། ཆོས་ཐམས་ཅད་འདོད་ཆགས་དང་བྲལ་བས་མཉམ་པ་ཉིད་ཀྱིས་ཐ་དད་པར་བྱ་བ་མེད་པ་ལ་འཇུག་པའི་སྣང་བ་དང་། སངས་རྒྱས་ཐམས་ཅད་ཀྱི་བྱིན་གྱི་རླབས་རྒྱུན་མི་འཆད་པས་འགྲོ་བ་ཐམས་ཅད་ཀྱི་སྐྱབས་སུ་རྣམ་པར་འཕྲུལ་པའི་སྣང་བ་དང་། སངས་རྒྱས་ཐམས་ཅད་ཀྱི་ཁྱུ་མཆོག་གི་མཐུ་ཕྱུང་བ་ཕ་རོལ་ཏུ་ཕྱིན་པ་ཐོབ་པས། མུན་པ་ཤིན་ཏུ་བསྩལ་བའི་སྣང་བ་དང་། ཐམས་ཅད་ལ་གནས་པར་ཤིན་ཏུ་བསྟན་པ་ལ་མཁས་ཤིང་གཞོལ་བས། ཆོས་ཐམས་ཅད་ཀྱི་དེ་བཞིན་ཉིད་ཀྱི་སྣང་བ་སྟེ། སྣང་བ་འདི་བཅུས་བྱང་ཆུབ་སེམས་དཔའ་དེ་སྣང་བར་བྱས་པ་ཡིན། བྱང་ཆུབ་སེམས་དཔའ་དེ་ཐམས་ཅད་དུ་མངོན་པར་འདུ་བྱ་བ་མེད་པ་བཅུས་ཤིན་ཏུ་བསླབས་པ་ཡིན། བཅུ་གང་ཞེ་ན་འདི་ལྟ་སྟེ། མངོན་པར་འདུས་མ་བྱས་པའི་ལུས་ཀྱི་ལས་དང་། མངོན་པར་འདུས་མ་བྱས་པའི་ངག་གི་ལས་དང་། མངོན་པར་འདུས་མ་

---

^{[མ་དཔེ་གཟིགས་ན་འདིར་གནོན།]}

བྱས་པའི་ཡིད་ཀྱི་ལས་དང་། དངོས་པོ་མེད་པ་ལ་གནས་ཤིང་། མངོན་པར་འདུས་མ་བྱས་པའི་རྫུ་འཕྲུལ་དང་། མ་ཉམས་ཤིང་མངོན་པར་འདུས་མ་བྱས་པའི་ཆོས་ཉིད་དང་། ཐ་མི་དད་པའི་ཡེ་ཤེས་དང་། མ་སྐྱེས་པའི་ཡེ་ཤེས་དང་། མ་འགགས་པའི་ཆོས་ཉིད་དང་། བསྟན་པའི་ཚིག་རབ་ཏུ་ཤེས་པ་དང་། དོན་ཉམས་པ་མེད་པ་སྟེ། ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་དེ་ཐམས་ཅད་དུ་མངོན་པར་འདུས་མ་བྱས་པའི་ཚིག་བཅུ་པོ་འདི་དག་གིས་ཤིན་ཏུ་བསླབས་པ་ཡིན། ཀྱེ་རྒྱལ་བའི་སྲས་དག །དེ་ལྟར་ན་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྣམ་པ་ཐ་དད་པའི་དམིགས་པ་རྣམས་ཀྱིས་གཅིག་དང་མང་པོ་ལ་སྙོམས་པར་འཇུག་ཅིང་། རྣམ་པར་ལྡང་བ་དང་། སྐལ་བ་མི་མཉམ་པ་དང་། སྐལ་བ་མཉམ་པ་དང་། སྐལ་བ་མཉམ་པ་དང་། སྐལ་བ་མི་མཉམ་པ་དང་། ཡངས་པ་དང་། ཕྲ་བ་དང་། ཕྲ་བ་དང་། ཡངས་པ་དང་། ཆུང་བ་དང་། ཆེ་བ་དང་། ཆེ་བ་དང་། ཆུང་བ་དང་། རྗེས་སུ་འགྲོ་བ་དང་། རྣམ་པར་ཕྱེ་བ་དང་། རྣམ་པར་ཕྱེ་བ་དང་། རྗེས་སུ་འགྲོ་བ་དང་། ལུས་མེད་པ་དང་། ལུས་དང་བཅས་པ་དང་། ལུས་དང་བཅས་པ་དང་། ལུས་མེད་པ་དང་། རྣམ་པར་ལྡང་བ་དང་། སྙོམས་པར་ཞུགས་པ་དང་། སྙོམས་པར་ཞུགས་པ་དང་། རྣམ་པར་ལྡང་བ་དང་། རྣམ་པར་དམིགས་པ་དང་། དམྱིགས་པ་མེད་པ་དང་། དམྱིགས་པ་མྱེད་པ་དང་། རྣམ་པར་དམིགས་པས་ཏིང་ངེ་འཛིན་འདི་ནི་ཆོ་འཕྲུལ་ཐམས་ཅད་ཀྱི་ཡུལ་ལོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། རིག་སྔགས་ཅན་ཆེན་པོའི་རིག་སྔགས་ཀྱིས་བསྒྲུབས་པ་ནི་གཟུགས་རྣམ་པ་སྣ་ཚོགས་བསྟན་པའི་འབྱུང་གནས་སུ་རབ་ཏུ་གྲུབ་པར་འགྱུར་ཡང་སྔགས་དེ་ཡང་གཞན་ལ་སྒྱུ་མའི་གཟུགས་ཀྱི་རྣམ་པར་སྨིན་པ་དག་ཀྱང་གཞན་ནོ། །དེ་ལྟ་

---

^{[མ་དཔེ་གཟིགས་ན་འདིར་གནོན།]}

ཡིན་ཡང་སྒྱུ་མའི་རྣམ་པ་དེ་དག་ནི་སྔགས་ཀྱི་སྒྲའི་མཐར་ཐུག་པ་ཡིན་ཏེ། མིག་གི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་གཟུགས་ཀྱི་རྣམ་པ་དང་། སྒྱུ་མ་དང་། རྣ་བའི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་སྒྲ་དང་སྒྱུ་མ་དང་། སྣའི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་དྲི་དང་། སྒྱུ་མ་དང་། ལྕེའི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་རོ་དང་། སྒྱུ་མ་དང་། ལུས་ཀྱི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་རེག་བྱ་དང་། སྒྱུ་མ་དང་། ཡིད་ཀྱི་རྣམ་པར་ཤེས་པས་ཤེས་པར་བྱ་བའི་སྒྱུ་མའི་རྣམ་པ་དང་། སྤྲུལ་པ་མང་པོས་ཆོ་འཕྲུལ་ཞིང་རྣམ་པར་འགྱུར་བ་དག་ཀྱང་དེ་བཞིན་ནོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་ཡང་སྐལ་བ་མཉམ་པར་སྙོམས་པར་ཞུགས་ཤིང་། སྐལ་བ་མི་མཉམ་པ་ལས་རྣམ་པར་ལྡང་བར་སྟོན་ཏོ། །སྐལ་བ་མི་མཉམ་པ་ལ་སྙོམས་པར་ཞུགས་ཤིང་། སྐལ་བ་སྙམ་པ་ལས་རྣམ་པར་ལྡང་བར་སྟོན་ཏོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། ལྷ་དང་ལྷ་མ་ཡིན་གཡུལ་དུ་ལྷགས་པའི་ཚེ། ལྷ་རྣམས་རྒྱལ་ཞིང་ལྷ་མ་ཡིན་ཕམ་པར་གྱུར་ན། དེའི་ཚེ་ལྷའི་དབང་པོ་དཔག་ཚད་བརྒྱའི་ལུས་མིག་སྟོང་དང་ལྡན་པ། དཔུང་གི་ཚོགས་ཡན་ལག་བཞིས་ཡོངས་སུ་བསྐོར་ཅིང་། ལྷ་མ་ཡིན་རྣམ་པར་འཐོར་ཏེ། དེའི་ཚེ་ལྷ་མ་ཡིན་གྱི་དབང་པོ་དེ་ལྷ་མ་ཡིན་གྱི་སྒྱུ་ལ་ཤིན་ཏུ་མཁས་པས། སུམ་ཅུ་རྩ་གསུམ་པའི་ལྷའི་སྡེ་ཀུན་ཏུ་འབྱེར་པ་དང་། རྫིང་བདེ་བ་འབྱུང་བའི་དྲུང་གི་ཁུང་ནས་ལྷ་མ་ཡིན་ཤིང་རྟ་དང་། བཞོན་པ་དང་དཔུང་དུ་བཅས་པ་མང་པོ་འབྱུང་བར་སྟོན་ཏོ། །ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་སྒྱུ་མ་ལྟ་བུའི་ཡེ་ཤེས་ལ་

---

^{[མ་དཔེ་གཟིགས་ན་འདིར་གནོན།]}

གནས་པ་ཡོངས་སུ་གྲུབ་པའི་ཕྱིར་ཐ་མི་དད་པའི་ཆོས་ལ་སྙོམས་པར་ཞུགས་ཤིང་། ཐ་དད་པའི་ཆོས་ལས་རྣམ་པར་ལྡང་བ་སྟོན་ཏོ། །ཀྱེ་རྒྱལ་བའི་སྲས་དག །འདི་ལྟ་སྟེ་དཔེར་ན། ས་བོན་མང་པོ་དང་འབྱུང་བ་མང་པོ་དག་ལས་ས་བོན་ས་ལ་བཏབ་ན་ས་བོན་ནི་འོག་ཏུ་འགྲོ། འབྲས་བུ་ནི་སྟེང་དུ་འབྱུང་བ་ཡིན། ཀྱེ་རྒྱལ་བའི་སྲས་དག །དེ་བཞིན་དུ་བྱང་ཆུབ་སེམས་དཔའ་ཡང་ཏིང་ངེ་འཛིན་གྱི་རྒྱུད་ཀྱི་ཚུལ་གཅིག་པར་སྙོམས་པར་ཞུགས་ཤིང་། ཚུལ་གྱི་རྣམ་པ་ཐ་དད་པ་ལས་རྣམ་པར་ལྡང་བ་སྟོན་ཏོ། །འདི་ལྟ་སྟེ་དཔེར་ན། བུད་མེད་སྐྱེས་པ་དང་ཕྲད་པར་གྱུར་པའི་ཁྲག་རྡུས་པ་ལས་བུར་འགྱུར་ཏེ། རྡུས་པ་དེ་མའི་ཁོང་ན་གནས་ཤིང་རིམ་གྱིས་སྐྱེས་པ་དང་། ཟླ་བ་བཅུ་ལ་ལས་ཡོངས་སུ་དག་པ་ནི་ཡན་ལག་དང་ཉིང་ལག་ཐམས་ཅད་དང་ལྡན་པ། དབང་པོ་ཚང་ཞིང་རྣམ་པར་དག་པར་སྐྱེ་ཡང་ཁྲག་རྡུས་པ་དེ་ཡང་གཞན་དབང་པོ་དྲུག་རྣམས་ཀྱང་གཞན་ནོ། ། ཁྲག་རྡུས་པ་དེ་ལ་ཡང་དབང་པོ་དྲུག་ཕྲ་བའི་ཚུལ་དུ་མེད་པ་མ་ཡིན་ཏེ། སྲིད་པའི་ཡན་ལག་གི་མཚན་ཉིད་དང་ལྡན་ལ་ལས་གཅིག་ནས་གཅིག་ཏུ་བརྒྱུད་པས་བསྐྱེད་ཅིང་རླུང་དང་ལྡན་ན། ལས་ཀྱི་རྣམ་པར་སྨིན་པ་ཇི་ལྟ་བ་བཞིན་དུ་ཡན་ལག་མ་ཉམས་པར་སྐྱེའོ། །དེ་བཞིན་དུ་བྱང་ཆུབ་སེམས་དཔའ་ཡང་ཐམས་ཅད་མཁྱེན་པའི་དངོས་པོའི་ཚུལ་དུ་སྙོམས་པར་ཞུགས་ཤིང་། དངོས་པོ་མེད་པའི་ཚུལ་ལས་རྣམ་པར་ལྡང་ངོ་། །འདི་ལྟ་སྟེ་དཔེར་ན། ཀླུའི་གནས་ནི་ས་ལ་རྟེན་མོད་ཀྱི་བར་སྣང་གནས་ལ་སྤྲིན་ཀྱང་སྐྱེད་ལ་བར་སྣང་གནས་ལ་ཀླུའི་གནས་དང་ཁྱིམ་མྱེད་ཀྱང་། སྤྲིན་གྱི་ཆར་འདོད་པའི་མི་རྣམས་གྱེན་དུ་ལྟ་ཞིང་། ཀླུའི་སྤྲུལ་པ་བར་སྣང་གི་གནས་ལ་ཡོད་པ་ལ་ལྟ་སྟེ། གནས་འོག་ན་འདུག་ཀྱང་སྤྲིན་བླ་ན་ལྡིང་བར་སྣང་ངོ་། །དེ་

---

^{[མ་དཔེ་གཟིགས་ན་འདིར་གནོན།]}

བཞིན་དུ་ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའ་ཡང་མཚན་ཉིད་མེད་པ་ལ་སྙོམས་པར་ཞུགས་ཤིང་། མཚན་ཉིད་ལས་རྣམ་པར་ལྡང་ངོ་། །འདི་ལྟ་སྟེ་དཔེར་ན། ཚངས་པ་ཡིད་དུ་འོང་བ་ཞེས་བྱ་བའི་ཚངས་པའི་གཞལ་མེད་ཁང་ཆེན་པོ་རྣམ་དག་ཕུལ་ཞེས་བྱ་བ་ཡོད་དེ། གཞལ་མེད་ཁང་ཆེན་པོ་དེ་ལ་སྟོང་གི་འཇིག་རྟེན་ཐམས་ཅད་སྣང་ངོ་། །སྟོང་ཕྲག་བཅུའི་འཇིག་རྟེན་ཐམས་ཅད་སྣང་ངོ་། །སྟོང་ཕྲག་བརྒྱའི་འཇིག་རྟེན་ཐམས་ཅད་སྣང་ངོ་། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལྷའི་གནས་དང་བཅས་པ། ཀླུའི་གནས་དང་བཅས་པ། གནོད་སྦྱིན་གྱི་གནས་དང་བཅས་པ། དྲི་ཟའི་གནས་དང་བཅས་པ། ལྷ་མ་ཡིན་གྱི་གནས་དང་བཅས་པ། ནམ་མཁའ་ལྡིང་གི་གནས་དང་བཅས་པ། མིའམ་ཅིའི་གནས་དང་བཅས་པ། ལྟོ་འཕྱེ་ཆེན་པོའི་གནས་དང་བཅས་པ། མིའི་འཇིག་རྟེན་དང་བཅས་པ། ངན་སོང་གི་རྒྱུད་གསུམ་དང་བཅས་པ། རི་རབ་དང་བཅས་པ། ཁོར་ཡུག་དང་བཅས་པ། རིན་པོ་ཆེའི་རི་དང་བཅས་པ། བཏང་བཟུང་དང་བཅས་པ། རྒྱ་མཚོ་དང་བཅས་པ། གླིང་བཞི་མ་འདྲེས་པར་འཁོར་དང་བཅས་པ། གྲོང་ཁྱེར་དང་། གྲོང་རྡལ་དང་། ཕོ་བྲང་འཁོར་དང་། རྒྱལ་པོའི་གནས་དང་བཅས་པ། རི་དང་བྲག་དང་། ཤིང་མང་པོ་སྣ་ཚོགས་དང་བཅས་པ། རིན་པོ་ཆེའི་རྒྱན་དང་བཅས་པ། སྨན་དང་ནགས་ཚལ་དང་རྫིང་དང་། ལུ་མའི་རྒྱན་དང་། ཆུ་ཀླུང་དང་ཆུ་ཀླུང་ཆེན་པོ་དང་། ཁོར་ཡུག་ཆེན་པོའི་མཐར་ཐུག་པ་ཐམས་ཅད་སྣང་སྟེ། དེ་ཡང་དེ་ཙམ་དུ་ཟད་ཀྱི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་གཏོགས་པ་ལས། ཆུང་ངུ་ན་རྡུལ་ཤིན་ཏུ་ཕྲ་བའི་གཟེགས་མ་བར་སྣང་བ་གནས་ལ་འཕྱོ་བ་ལྟ་བུར་ཕྲ་བ་དང་། ར་བ་དང་ཆུ་ཀླུང་ཡངས་པ་དེ་དག་ཐམས་ཅད་ཀྱང་ཚངས་པའི་གཞལ་མེད་ཁང་འགྲོ་བ་ཐམས་ཅད་ན་ཕུལ་དུ་གྱུར་ཅིང་། རྣམ་པར་དག་པའི་

---

^{[མ་དཔེ་གཟིགས་ན་འདིར་གནོན།]}

ལྷུན་ལ་གཟུགས་བརྙན་གྱི་ཚུལ་དུ་སྣང་ཞིང་རྣམ་པར་དམིགས་ལ་མཐོང་བར་གྱུར་ཀྱང་དེ་དག་ལ་ཐག་ཐོགས་གང་ཡང་མེད་དོ། །དེ་ཡང་འདི་ལྟར་དཔེར་ན། མེ་ལོང་གི་དཀྱིལ་འཁོར་ལ་བཞིན་གྱི་གཟུགས་བརྙན་སྣང་བ་བཞིན་དུ་གཞལ་མེད་ཁང་ཆེན་པོ་དེ་ལ་ཐམས་ཅད་སྣང་། ཐམས་ཅད་ཀྱང་གསལ། ཐམས་ཅད་ཀྱང་དམིགས་ཏེ། ཐམས་ཅད་ཀྱི་གཟུགས་བརྙན་དམིགས་པར་ཡོད་དོ། །དེ་བཞིན་དུ་བྱང་ཆུབ་སེམས་དཔའ་ཡང་སེམས་ཅན་གྱི་ཁམས་ཐ་མི་དད་པ། ཞེས་བྱ་བའི་ཏིང་ངེ་འཛིན་འདིས་ཞིང་གི་རྒྱུད་ཀྱང་རབ་ཏུ་ཤེས་སོ། ། སངས་རྒྱས་ཀྱི་རྒྱུད་ཀྱང་རབ་ཏུ་ཤེས་སོ། །སེམས་ཅན་གྱི་རྒྱུད་ཀྱང་རབ་ཏུ་ཤེས་སོ། །ཆོས་ཀྱི་རྒྱུད་ཀྱང་རབ་ཏུ་ཤེས་སོ། །སྤྱོད་པའི་རྒྱུད་ཀྱང་རབ་ཏུ་སྒྲུབ་བོ། །མོས་པའི་རྒྱུད་ཀྱང་ཡོངས་སུ་རྫོགས་པར་བྱེད་དོ། །ཏིང་ངེ་འཛིན་གྱི་རྒྱུད་ལའང་རྣམ་པར་འཕྲུལ་པར་བྱེད་དོ། །རྣམ་པར་ལྡང་བའི་རྒྱུད་ཀྱང་ཡོངས་སུ་སྟོན་ཏོ། །ཡེ་ཤེས་ཀྱི་རྒྱུད་ཀྱང་རབ་ཏུ་འཐོབ་བོ། །སྐད་ཅིག་གི་མཐའི་རྒྱུད་ལའང་རབ་ཏུ་གནས་སོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་དེ་ནི་རྣམ་པར་འཕྲུལ་པ་བཅུས་ཀྱང་མཆོག་ཏུ་གྱུར་པ་ཡིན་ཏེ། བཅུ་གང་ཞེ་ན་འདི་ལྟར། སངས་རྒྱས་ཀྱི་རྣམ་པར་འཕྲུལ་པ་ནམ་མཁའི་དབྱིངས་ཀྱིས་ཀླས་པ། ཆོས་ཀྱི་དབྱིངས་ཀྱི་མཐས་གཏུགས་པ་དང་། བྱང་ཆུབ་སེམས་དཔའི་རྣམ་པར་འཕྲུལ་པ་ཐ་དད་པ་མེད་པའི་མཐར་ཐུག་པ་ཐ་མི་དད་པའི་དབང་དམ་པའི་ཕ་རོལ་ཏུ་ཕྱིན་པ་དང་། བྱང་ཆུབ་སེམས་དཔའི་སྤྱོད་པ་དང་། སྨོན་ལམ་ཆེན་པོའི་རྣམ་པར་འཕྲུལ་བ་དེ་བཞིན་ཉིད་ལ་ཞུགས་ཤིང་། སངས་རྒྱས་ཀྱི་མཛད་པའི་ཕ་རོལ་ཏུ་ཕྱིན་པ་ཐོབ་པ་དང་། འཇིག་རྟེན་གྱི་ཁམས་རྣམ་པར་འཕྲུལ་པ་དམིགས་པ་ཐམས་ཅད་དོན་ཡོད་ཅིང་རྣམ་པར་དག་པས་འཇིག་རྟེན་གྱི་ཁམས་ཐམས་ཅད་རབ་ཏུ་སྣང་བར་བྱ་བའི་བྱིན་གྱི་རླབས་ཅན་དང་། སེམས་ཅན་

---

^{[མ་དཔེ་གཟིགས་ན་འདིར་གནོན།]}

ཐམས་ཅད་རྣམ་པར་འཕྲུལ་པ་བསམ་གྱིས་མི་ཁྱབ་པའི་ལས་རྣམ་པར་སྨིན་པ་སྒྱུ་མ་ལྟ་བུ་ལ་འཇུག་པ་དང་། ཡེ་ཤེས་དང་། ཏིང་ངེ་འཛིན་གྱི་རྣམ་པར་འཕྲུལ་པ་ཡངས་པ་དང་། ཕྲ་བའི་ཏིང་ངེ་འཛིན་གྱི་མཚན་མ་དང་། ཏིང་ངེ་འཛིན་ལས་ལྡང་བ་ཤེས་པ་དང་། འདི་ལྟ་སྟེ་བྱང་ཆུབ་སེམས་དཔའི་མཐུ་དང་བྱང་ཆུབ་སེམས་དཔའི་ཁོང་དུ་ཆུད་པས། དེ་བཞིན་གཤེགས་པའི་ཡུལ་ལ་འཇུག་ཅིང་འབྱུང་བ་དང་། དེ་བཞིན་གཤེགས་པའི་སྐུ་སྟོན་པའི་རྣམ་པར་འཕྲུལ་བ་དང་། གཞན་ཡང་བྱང་ཆུབ་སེམས་དཔའ་སངས་རྒྱས་སྤྲུལ་པ་དང་། སངས་རྒྱས་སུ་བྱིན་གྱིས་རློབ་པ་དང་། ཆོས་ཀྱི་འཁོར་ལོ་སྤྲུལ་པ་དང་། འདུལ་བ་བྱིན་གྱིས་བརླབ་པ་བྱེད་ཅིང་། དེ་བཞིན་གཤེགས་པའི་རིགས་དང་། རྒྱུད་དུ་སྐྱེ་བ་དང་། སངས་རྒྱས་ཀྱི་སྒྲ་གྲག་པར་བྱ་བ་རབ་ཏུ་སྒྲུབ་པའི་རྫུ་འཕྲུལ་དང་། རྣམ་པར་འཕྲུལ་པ་སེམས་ལྟར་མགྱོགས་པའི་ཕ་རོལ་ཏུ་ཕྱིན་པ་ཡིན། གཞན་ཡང་བྱང་ཆུབ་སེམས་དཔའ་སངས་རྒྱས་བརྗོད་དུ་མེད་པའི་བསྟན་པ་དང་། ལྡེམ་པོ་དག་རབ་ཏུ་ཤེས་ཏེ། ཆོས་ཀྱི་སྒོ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་ཡང་བརྗོད་དུ་མེད་པས་ཆོས་ཀྱི་འཁོར་ལོ་རྣམ་པར་འཕྲུལ་བ་དག་པར་བྱེད་དོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཉིན་ཞག་གི་གྲངས་དང་ཡུད་དུ་ཡན་མན་དང་། ཟླ་བའི་གྲངས་དང་ལོ་དང་བསྐལ་པའི་གྲངས་རབ་ཏུ་ཤེས་ཏེ། སྐད་ཅིག་གཅིག་དང་ལྡན་པའི་ཡེ་ཤེས་ཀྱིས་དུས་གསུམ་མངོན་པར་བསྒྲུབ་པའི་རྣམ་པར་འཕྲུལ་པ་ཡང་དག་པར་སྟོན་ཏེ། བྱང་ཆུབ་སེམས་དཔའི་སྤྱོད་པ་རྣམ་པར་འཕྲུལ་པ་བཅུ་པོ་འདི་དག་ལའང་ཕ་རོལ་ཏུ་ཕྱིན་པ་ཐོབ་པ་ཡིན་ཏེ། ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་སེམས་ཅན་གྱི་ཁམས་ཐ་མི་དད་པ་ཞེས་བྱ་བ་སྟེ་བརྒྱད་པའོ། །གཞན་

---

^{[མ་དཔེ་གཟིགས་ན་འདིར་གནོན།]}

ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བདག་གི་ལུས་དང་མིག་གི་སྐྱེ་མཆེད་ནས་ཡིད་ཀྱི་སྐྱེ་མཆེད་ཀྱི་མཐར་ཐུག་པའི་བར་དུ། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ལ་དབང་བསྒྱུར་བ་ཞེས་བྱ་བ་ལ་སྙོམས་པར་འཇུག་སྟེ། བདག་གི་བ་སྤུའི་ཁུང་བུ་རེ་རེར་ཡང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ལ་དབང་བསྒྱུར་བ་ལ་སྙོམས་པར་འཇུག་གོ །དེའི་རང་བཞིན་གྱི་ཆོས་ཉིད་ཀྱང་དེར་བྱིན་གྱིས་རློབ་སྟེ། དེ་ཉིད་ནས་འཇིག་རྟེན་ཡང་རབ་ཏུ་ཤེས་སོ། །འཇིག་རྟེན་གྱི་ཆོས་ཀྱང་རབ་ཏུ་ཤེས་སོ། །འཇིག་རྟེན་གྱི་ཁམས་ཀྱང་རབ་ཏུ་ཤེས་སོ། །འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཡང་རབ་ཏུ་ཤེས་སོ། །འཇིག་རྟེན་གྱི་ཁམས་གྲངས་མེད་པ་ཡང་རབ་ཏུ་ཤེས་སོ། །འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱང་རབ་ཏུ་ཤེས་སོ། །འཇིག་རྟེན་གྱི་ཁམས་དེ་དག་ཀྱང་བྱང་ཆུབ་སེམས་དཔའི་ཡོན་ཏན་ཡོངས་སུ་རྫོགས་ཤིང་། དག་པས་རྣམ་པར་དག་ལ་འོད་གསལ་ཞིང་རྒྱན་བཟང་པོ་ཤིན་ཏུ་མང་བས་རྣམ་པ་དུ་མར་བརྒྱན་ཅིང་། རིན་པོ་ཆེ་བཟང་པོ་སྣ་ཚོགས་ཀྱིས་ཤིན་ཏུ་གང་བར་མཐོང་སྟེ། དེ་ནས་བསྐལ་པ་བརྒྱར་ཡང་བྱང་ཆུབ་ཀྱི་སྤྱད་པ་སྤྱོད་ཅིང་གནས་སོ། །བསྐལ་པ་སྟོང་དང་། བསྐལ་པ་ཁྲག་ཁྲིག་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དང་། བསྐལ་པ་ཚད་མེད་པ་དང་། བསྐལ་པ་གྲངས་མེད་པ་དང་། བསྐལ་པ་དཔག་ཏུ་མེད་པ་དང་། བསྐལ་པ་མུ་མེད་པ་དང་། བསྐལ་པ་བགྲང་དུ་མེད་པ་དང་། བསྐལ་པ་མཐའ་ཡས་པ་དང་། བསྐལ་པ་མཚུངས་པ་མེད་པ་དང་། བསྐལ་པ་བསམ་གྱིས་མི་ཁྱབ་པ་དང་། བསྐལ་པ་གཞལ་དུ་མེད་པ་དང་། བསྐལ་པ་བརྗོད་དུ་མེད་པ་དང་། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་དང་།

---

^{[མ་དཔེ་གཟིགས་ན་འདིར་གནོན།]}

བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དུ་བྱང་ཆུབ་སེམས་དཔའི་སྤྱད་པ་སྤྱོད་ཅིང་གནས་སོ། །ཡོངས་སུ་རྒྱུན་མི་གཅོད་དོ། ། དེ་ན་དེ་ལྟར་བྱང་ཆུབ་སེམས་དཔའ་དེ་མཉམ་པར་བཞག་པས་སྙོམས་པར་འཇུག་གོ །རྣམ་པར་ལྡང་ངོ་། །དེ་དེ་ལྟར་ཏིང་ངེ་འཛིན་དེ་ལ་སྙོམས་པར་ཞུགས་ཤིང་། རྣམ་པར་ལྡང་བ་དང་། འཇིག་རྟེན་གྱི་ཁམས་མངོན་པར་བསྒྲུབ་པ་དག་ཀྱང་རབ་ཏུ་སྤྱོད་དོ། །དེར་ཡང་སེམས་ཅན་གྱི་ཁམས་ཡོངས་སུ་སྨིན་པར་བྱེད་དོ། །ཆོས་ཀྱི་དབྱིངས་ཁོང་དུ་ཆུད་པར་བྱེད་དོ། །དུས་ཤེས་པར་བྱ་བ་རབ་ཏུ་རྟོགས་པར་བྱེད་དོ། །ཆོས་བསྟན་པ་ཤིན་ཏུ་བྱིན་གྱིས་རློབ་པོ། །ཆགས་པ་མེད་ཅིང་ཐོགས་པ་མེད་པའི་རྒྱུད་ཀྱང་ཡོངས་སུ་རྫོགས་པར་བྱེད་དོ། །ཆོས་ཀྱི་དབྱིངས་ཀྱི་དབང་གིས་མིག་ཐ་དད་པ་མེད་པའང་ཁོང་དུ་ཆུད་པ་ཡིན། རྣ་བ་ཐ་དད་པ་མེད་པའི་དམ་པའི་ཕ་རོལ་ཏུ་ཕྱིན་པ་ཡིན། སྣ་ཐ་དད་པ་མེད་པ་ལ་མཁས་པར་གྱུར་པ་ཡིན། ལྕེ་ཐ་དད་པ་མེད་པའི་བསླབ་པ་ལ་ཤིན་ཏུ་བསླབས་པ་ཡིན། ལུས་ཐ་དད་པ་མེད་པ་ཤིན་ཏུ་གྲུབ་པ་ཡིན། སེམས་ཐ་དད་པ་མེད་པའི་རྗེས་སུ་སོང་ཞིང་ཁོང་དུ་ཆུད་པ་ཡིན་ཏེ། དེ་དེ་ལྟ་བུའི་ཡེ་ཤེས་དང་ལྡན་པས་གཟུངས་ཁྲག་ཁྲིག་སྟོང་ཕྲག་བཅུའི་ཆོས་སྣང་བ་འབྱུང་ངོ་། །སྤྱོད་པ་ཡོངས་སུ་དག་པ་ཁྲག་ཁྲིག་སྟོང་ཕྲག་བཅུ་ཡོངས་སུ་འགྲུབ་བོ། །དབང་པོ་ཐམས་ཅད་མངོན་པར་ཤེས་པ་ཁྲག་ཁྲིག་སྟོང་ཕྲག་བཅུ་རབ་ཏུ་གནོན་ཏོ། །མངོན་པར་ཤེས་པ་ཁྲག་ཁྲིག་སྟོང་ཕྲག་བཅུ་ཡོངས་སུ་རྫོགས་པར་འགྱུར་རོ། །ཏིང་ངེ་འཛིན་ཁྲག་ཁྲིག་སྟོང་ཕྲག་བཅུ་ཡོངས་སུ་གནོན་ཏོ། །རྫུ་འཕྲུལ་ཁྲག་ཁྲིག་སྟོང་ཕྲག་བཅུ་ཡོངས་སུ་འགྲུབ་བོ། །སྟོབས་ཁྲག་ཁྲིག་སྟོང་ཕྲག་བཅུ་རྣམ་པར་འཕེལ་ལོ། །བསམ་པ་ཁྲག་ཁྲིག་སྟོང་ཕྲག་བཅུ་ཡོངས་སུ་རྫོགས་པར་འགྱུར་རོ། །བྱིན་གྱི་རླབས་

---

^{[མ་དཔེ་གཟིགས་ན་འདིར་གནོན།]}

ཁྲག་ཁྲིག་སྟོང་ཕྲག་བཅུ་ཡང་དག་པར་སྟོན་ནོ། །རྣམ་པར་འཕྲུལ་བ་ཁྲག་ཁྲིག་སྟོང་ཕྲག་བཅུ་མངོན་སུམ་དུ་འགྱུར་རོ། །བྱང་ཆུབ་སེམས་དཔའི་ཆགས་པ་མེད་པ་ཁྲག་ཁྲིག་སྟོང་ཕྲག་བཅུ་ཡང་དག་པར་འགྲུབ་བོ། །བྱང་ཆུབ་སེམས་དཔའི་ཚོགས་ཁྲག་ཁྲིག་སྟོང་ཕྲག་བཅུ་ཡོངས་སུ་རྫོགས་པར་འགྱུར་རོ། །བྱང་ཆུབ་སེམས་དཔའི་རིགས་ཁྲག་ཁྲིག་སྟོང་ཕྲག་བཅུས་ཡོངས་སུ་སྦྱོང་ཞིང་ཀུན་ཏུ་འགྲོའོ། །བྱང་ཆུབ་སེམས་དཔའི་ཚུལ་ཁྲག་ཁྲིག་སྟོང་ཕྲག་བཅུས་ཡོངས་སུ་སྣང་བར་འགྱུར་རོ། །དོན་ཁྲག་ཁྲིག་སྟོང་ཕྲག་བཅུ་ཤིན་ཏུ་སྟོན་ཏོ། །སྨོན་ལམ་ཁྲག་ཁྲིག་སྟོང་ཕྲག་བཅུ་དང་ཡང་དག་པར་ལྡན་ནོ། །ཡོངས་སུ་བསྔོ་བ་ཁྲག་ཁྲིག་སྟོང་ཕྲག་བཅུ་ཤིན་ཏུ་སྟོན་ཏོ། །བྱང་ཆུབ་སེམས་དཔའི་སྐྱོན་མེད་པ་ཁྲག་ཁྲིག་སྟོང་ཕྲག་བཅུ་ཡོངས་སུ་དག་པར་བྱེད་དོ། །ཆོས་ཀྱི་སྒོ་ཁྲག་ཁྲིག་སྟོང་ཕྲག་བཅུ་རབ་ཏུ་སྣང་བར་བྱེད་དོ། །བྱང་ཆུབ་སེམས་དཔའི་བསྟན་པ་ཁྲག་ཁྲིག་སྟོང་ཕྲག་བཅུ་ཡོངས་སུ་རྫོགས་པར་བྱེད་དོ། །བྱང་ཆུབ་སེམས་དཔའི་རྣམ་པར་དག་པ་ཁྲག་ཁྲིག་སྟོང་ཕྲག་བཅུ་རྣམ་པར་དག་པར་བྱེད་དེ། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ལ་དབང་བསྒྱུར་བ་འདི་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི། ཡོན་ཏན་གྱི་ཚོགས་དུ་མ་དང་ལྡན་པ་ཡིན། ཡོན་ཏན་གྱི་ཚོགས་ཚད་མེད་པ་དང་ལྡན་པ་ཡིན། ཡོན་ཏན་གྱི་ཚོགས་མཐའ་ཡས་པ་དང་ལྡན་པ་ཡིན། ཡོན་ཏན་གྱི་ཚོགས་བསམ་གྱིས་མི་ཁྱབ་པ་དང་ལྡན་པ་ཡིན། ཡོན་ཏན་གྱི་ཚོགས་མཚུངས་པ་མེད་པ་དང་ལྡན་པ་ཡིན། ཡོན་ཏན་གྱི་ཚོགས་གཞལ་དུ་མེད་པ་དང་ལྡན་པ་ཡིན། ཡོན་ཏན་གྱི་ཚོགས་བརྗོད་དུ་མེད་པ་དང་ལྡན་པ་ཡིན། ཡོན་ཏན་གྱི་ཚོགས་ཟད་མི་ཤེས་པ་དང་ལྡན་པ་ཡིན།

---

^{[མ་དཔེ་གཟིགས་ན་འདིར་གནོན།]}

ཡོན་ཏན་གྱི་ཚོགས་ཀུན་ཏུ་མཐའ་ཡས་པ་དང་ལྡན་པ་ཡིན། ཡོན་ཏན་གྱི་ཚོགས་དེ་དག་གིས་བྱང་ཆུབ་སེམས་དཔའ་ཤིན་ཏུ་སྦྱངས་པ་ཡིན། ཡང་དག་པར་བྱང་བར་བྱས་པ་ཡིན། རབ་ཏུ་བརྒྱན་པ་ཡིན། ཡོངས་སུ་བཟུང་བ་ཡིན། ཡང་དག་པར་གྲུབ་པར་བྱས་པ་ཡིན། ཡང་དག་པར་བརྗོད་པ་ཡིན། ཉེ་བར་བརྟན་པ་ཡིན། མཐུན་པའི་འབྲས་བུ་དང་ལྡན་པར་བྱས་པ་ཡིན། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ལ་དབང་བསྒྱུར་བ་འདི་ལ་གནས་པའི་བྱང་ཆུབ་སེམས་དཔའ་དེ་ནི་ཤར་ཕྱོགས་ལོགས་ཀྱི་སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་དེ་བཞིན་གཤེགས་པ་མཚན་མཐུན་ལ་མཚན་གཅིག་ལ་ཡང་རྣམ་པར་བརྟག་ཅིང་། རྣམ་པར་དབྱེ་བའི་རྣམ་པ་སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་མངའ་ཞིང་མཚན་གཅིག་ལ་ཇི་ལྟ་བ་དེ་བཞིན་དུ་མཚན་རེ་རེ་ལས་རྣམ་པར་བརྟག་ཅིང་རྣམ་པར་དབྱེ་བའི་རྣམ་པ་སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་མངའ་བ་ཤ་སྟག་གི་བྱིན་གྱིས་བརླབ་པ་མཛད་དོ། །ཤར་ཕྱོགས་སུ་ཇི་ལྟ་བ་དེ་བཞིན་དུ་ལྷོ་ཕྱོགས་དང་། དེ་བཞིན་དུ་ནུབ་ཕྱོགས་དང་། དེ་བཞིན་དུ་བྱང་ཕྱོགས་དང་། དེ་བཞིན་དུ་བྱང་ཤར་གྱི་ཕྱོགས་མཚམས་དང་། དེ་བཞིན་དུ་ཤར་ལྷོའི་ཕྱོགས་མཚམས་དང་། དེ་བཞིན་དུ་ལྷོ་ནུབ་ཀྱི་ཕྱོགས་མཚམས་དང་། དེ་བཞིན་དུ་ནུབ་བྱང་གི་ཕྱོགས་མཚམས་དང་། དེ་བཞིན་དུ་འོག་གི་ཕྱོགས་དང་། དེ་བཞིན་དུ་སྟེང་གི་ཕྱོགས་ཀྱི་སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་དེ་བཞིན་གཤེགས་པ་མཚན་རྣམ་པར་དགོད་པ་གཅིག་ཏུ་མཐུན་པ་ཤ་སྟག ། བྱང་ཆུབ་སེམས་དཔའ་དེ་ལ་བྱིན་གྱིས་རློབ་པ་མཛད་ཅིང་ཞལ་མངོན་པར་སྟོན་ཏོ། །བྱང་ཆུབ་སེམས་དཔའ་དེའི་སངས་རྒྱས་ཀྱི་ཞིང་རྣམ་པར་དག་

---

^{[མ་དཔེ་གཟིགས་ན་འདིར་གནོན།]}

པ་ཡང་བྱིན་གྱིས་རློབ་པ་མཛད་དོ། །དེ་བཞིན་གཤེགས་པའི་སྲས་ཀྱི་ཐུ་བོར་བརྗོད་པའི་ཕྱིར་ལུས་ཚད་མེད་པ་ཡང་རབ་ཏུ་བརྗོད་པ་མཛད་དོ། །དེ་བཞིན་གཤེགས་པའི་སྤྱན་བསམ་གྱིས་མི་ཁྱབ་པའང་རབ་ཏུ་བསྟན་ཏོ། །དེ་བཞིན་གཤེགས་པའི་སྙན་ཚད་མེད་པའང་ཤིན་ཏུ་བརྗོད་དོ། །དེ་བཞིན་གཤེགས་པའི་ཤངས་མི་བསྙེངས་པའི་དགོངས་པ་དང་ལྡན་པ་ཡང་རབ་ཏུ་བསྟན་ཏོ། །དེ་བཞིན་གཤེགས་པའི་སྲས་ཀྱི་ཐུ་བོའི་ཡོན་ཏན་ཕུན་སུམ་ཚོགས་པ་ཡང་ཡང་དག་པར་བསྟན་ཏོ། །དེ་བཞིན་གཤེགས་པའི་རྫུ་འཕྲུལ་རྗེས་སུ་བསྒྲགས་པ་ཡང་རབ་ཏུ་བཤད་དོ། །དེ་བཞིན་གཤེགས་པའི་བྱང་ཆུབ་མཐའ་དང་དབུས་མེད་པ་ཡང་དག་པར་སྦྱང་བ་མཛད་དོ། །དེ་བཞིན་གཤེགས་པའི་གསུང་དགོངས་པས་རྣམ་པར་དག་པའང་ཐོབ་པར་མཛད་དོ། །དེ་བཞིན་གཤེགས་པའི་ཆོས་ཀྱི་འཁོར་ལོ་ཕྱིར་མི་ལྡོག་པ་ཡང་ཡང་དག་པར་སྟོན་ཏོ། །དེ་བཞིན་གཤེགས་པའི་འཁོར་མཐའ་ཡས་པ་ཡང་རྣམ་པར་དམིགས་པ་མཛད་དོ། །དེ་བཞིན་གཤེགས་པའི་ཆོས་ལྡེམ་པོ་དག་མཐའ་ཡས་པ་ལའང་རབ་ཏུ་ཞུགས་པ་མཛད་དོ། །དེ་བཞིན་གཤེགས་པའི་དགེ་བའི་རྩ་བ་ཡང་ཡང་དག་པར་བརྗོད་དོ། །དེ་བཞིན་གཤེགས་པའི་མཉམ་པ་ཉིད་ལའང་ཡང་དག་པར་གཞུག་པ་མཛད་དོ། །དེ་བཞིན་གཤེགས་པའི་རིགས་དང་རྒྱུད་དུས་ཀྱི་ཚད་དང་མཉམ་པ་ཡང་རབ་ཏུ་བརྗོད་དོ། །དེ་བཞིན་གཤེགས་པའི་ཆོས་ཀྱི་རྣམ་པ་དང་བྱེ་བྲག་ཐམས་ཅད་ཀྱང་ཤིན་ཏུ་བསྟན་ཏོ། །དེ་བཞིན་གཤེགས་པའི་ཆོས་ཀྱི་བྱིན་གྱི་རླབས་རྣམ་པར་དམིགས་པར་བྱ་བའང་རབ་ཏུ་བརྗོད་དོ། །དེ་བཞིན་གཤེགས་པའི་ཞིང་བསྟན་པ་ཡང་བྱིན་གྱིས་བརླབ་པ་མཛད་དོ། །དེ་བཞིན་གཤེགས་པའི་གསུང་ཆོས་ཀྱི་སྤྲིན་གྱི་ཆར་ཡང་རབ་ཏུ་འབེབས་སོ། །སངས་རྒྱས་ཀྱི་ཞིང་ཐམས་ཅད་རྣམ་པར་དམིགས་པར་བྱ་བ་ཡང་ཡོངས་སུ་བསྟན་ཏོ། །སངས་རྒྱས་ཐམས་ཅད་ཀྱི་

---

^{[མ་དཔེ་གཟིགས་ན་འདིར་གནོན།]}

སྙོམས་པར་འཇུག་པ་ཡང་རབ་ཏུ་བརྗོད་དོ། །སངས་རྒྱས་ཐམས་ཅད་ཀྱི་འཁོར་ཀུན་ནས་འདུས་པ་གཅིག་ནས་གཅིག་ཏུ་བརྒྱུད་པའང་རྣམ་པར་དམིགས་པ་མཛད་དོ། །སངས་རྒྱས་ཐམས་ཅད་ཀྱི་ཆོས་བསམ་གྱིས་མི་ཁྱབ་པའང་བྱིན་གྱིས་བརླབ་པ་མཛད་དོ། །ཆོས་ཐམས་ཅད་མཉམ་པ་ཉིད་ཀྱང་ཡང་དག་པར་བསྟན་ཏོ། །ཆོས་ཐམས་ཅད་མི་འཕོ་ཞིང་རྒྱུན་འཆད་པ་མེད་པ་ཡང་ཁོང་དུ་ཆུད་པར་མཛད་དོ། །ཆོས་ཀྱི་དཀྱིལ་འཁོར་ཐམས་ཅད་ཀྱི་རྗེས་སུ་འགྲོ་བ་ཡང་རབ་ཏུ་རྫོགས་པར་མཛད་དོ། །དེ་བཞིན་གཤེགས་པའི་ཡོན་ཏན་ཚད་མེད་པ་ཡང་ཡོངས་སུ་བསྟན་ཏོ། །ཏིང་ངེ་འཛིན་གྱི་དཀྱིལ་འཁོར་ཐམས་ཅད་སྦྱང་བ་ཡང་ཁོང་དུ་ཆུད་པར་མཛད་དོ། །སེམས་སྒྱུ་མ་ལྟ་བུ་མཐར་ཐུག་པ་མེད་པ་ཡང་རབ་ཏུ་བསྒྲུབ་པ་མཛད་དོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ལ་དབང་བསྒྱུར་བ་འདི་ལ་གནས་པའི་བྱང་ཆུབ་སེམས་དཔའ་ནི། སངས་རྒྱས་བཅོམ་ལྡན་འདས་མཚན་ཐ་དད་པ་མཚན་རེ་རེ་ཞིང་ཡང་རྣམ་པར་དབྱེ་བའི་བྱེ་བྲག །སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་མངའ་བ་མཚན་དེ་དག་རེ་རེའི་རྣམ་པར་དབྱེ་བའི་རྣམ་གྲངས་ཀྱང་སངས་རྒྱས་ཀྱི་ཞིང་གྲངས་མེད་པ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་མངའ་བ་དག་གིས་མཐའ་དང་དབུས་མེད་པའི་ཚུལ་དུ་ལུས་ཀྱང་བྱིན་གྱིས་བརླབ་པ་མཛད་དོ། །ཆགས་པ་མེད་པའི་ཚུལ་དུ་སེམས་ཀྱང་བྱིན་གྱིས་བརླབ་པ་མཛད་དོ། །ཆོས་ཐམས་ཅད་ཉམས་པ་མེད་པ་ལ་གཞོལ་བར་དྲན་པའང་བྱིན་གྱིས་བརླབ་པ་མཛད་དོ། །ཆོས་ཐམས་ཅད་རྟོགས་པར་ཁོང་དུ་ཆུད་པར་བློ་གྲོས་ཀྱང་བྱིན་གྱིས་བརླབ་པ་མཛད་དོ། །ཆོས་ཐམས་ཅད་ཤིན་ཏུ་འཛིན་པར་རིག་པའང་བྱིན་གྱིས་བརླབ་པར་མཛད་དོ། །ཆོས་ཐམས་ཅད་ཡངས་ཤིང་འབྱམ་ཀླས་པའི་ཚུལ་དུ་བློ་ཡང་བྱིན་གྱིས་བརླབ་

---

^{[མ་དཔེ་གཟིགས་ན་འདིར་གནོན།]}

པ་མཛད་དོ། །མངོན་པར་ཤེས་པ་རྣོན་པོས་ཆོས་ཐ་མི་དད་པར་མཁས་པར་ཁོང་དུ་ཆུད་པར་དབང་པོ་ཚད་མེད་པའང་བྱིན་གྱིས་བརླབ་པ་མཛད་དོ། །བྱིན་གྱི་རླབས་ཀྱིས་ཆོས་ཀྱི་དབྱིངས་ཁོང་དུ་ཆུད་པའི་ཚུལ་དུ་སྤྱོད་ཡུལ་ཐོགས་པ་མེད་པ་ཡང་བྱིན་གྱིས་བརླབ་པ་མཛད་དོ། །བསྒྲིབས་པ་མེད་པའི་ཡེ་ཤེས་རྣམ་པར་དག་པར་ཡེ་ཤེས་ལ་འཇུག་པའང་བྱིན་གྱིས་བརླབ་པ་མཛད་དོ། །འཇིག་རྟེན་གྱི་ཁམས་ཐམས་ཅད་དུ་རྣམ་པར་འཕྲུལ་པ་ཡང་དག་པར་སྟོན་པར་མངོན་པར་འཚང་རྒྱ་བའང་བྱིན་གྱིས་བརླབ་པ་མཛད་དོ། །ཀྱེ་རྒྱལ་བའི་སྲས་དག །དེ་ལྟར་བྱང་ཆུབ་སེམས་དཔའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་རྒྱ་མཚོའི་སྒོ་བཅུ་ལ་ཤིན་ཏུ་རྟོགས་པ་ཡིན་ཏེ། བཅུ་གང་ཞེ་ན། འདི་ལྟར་སངས་རྒྱས་རྒྱ་མཚོ་མཐོང་བས་རྟོགས་པ་ཡིན། སེམས་ཅན་རྒྱ་མཚོ་མིང་གིས་ཁོང་དུ་ཆུད་པ་ཡིན། ཆོས་རྒྱ་མཚོ་ཡེ་ཤེས་ཀྱིས་རབ་ཏུ་རྟོགས་པ་ཡིན། ཞིང་རྒྱ་མཚོ་ལ་དངོས་པོ་མེད་པར་གནས་ཤིང་མངོན་པར་འདུས་མ་བྱས་པའི་བསམ་པས་རྗེས་སུ་འབྲང་བ་ཡིན། ཡོན་ཏན་རྒྱ་མཚོ་ཕུན་སུམ་ཚོགས་པས་རབ་ཏུ་རྟོགས་པ་ཡིན། ཡེ་ཤེས་ཀྱི་རྣམ་པར་འཕྲུལ་པ་རྒྱ་མཚོ་རྣམ་པར་དམིགས་པས་ཁོང་དུ་ཆུད་པ་ཡིན། དབང་པོ་རྒྱ་མཚོ་རྣམ་པར་ཕྱེ་བ་ལ་མཁས་པའི་སའི་ཡེ་ཤེས་ཀྱིས་ཁོང་དུ་ཆུད་པ་ཡིན། སེམས་རྒྱ་མཚོ་སེམས་ཅན་གྱི་རིས་ཐམས་ཅད་ཀྱི་སེམས་ཐ་དད་པ་དང་སེམས་ཡངས་པ་དང་། སེམས་ཚད་མེད་པ་ཡོངས་སུ་ཤེས་པས་ཁོང་དུ་ཆུད་པ་ཡིན། སྤྱོད་པ་རྒྱ་མཚོ་སྨོན་ལམ་གྱིས་ཡོངས་སུ་རྫོགས་པར་བྱེད་པ་ཡིན། སྨོན་ལམ་རྒྱ་མཚོ་མཐའ་ལས་བརྒལ་བར་འབྱུང་བ་རྣམ་པར་དག་པས་ཡོངས་སུ་གྲུབ་པར་བྱེད་པ་ཡིན་ཏེ། འདི་དག་ནི་བྱང་ཆུབ་སེམས་དཔའ་དེ་རྒྱ་མཚོའི་སྒོ་

---

^{[མ་དཔེ་གཟིགས་ན་འདིར་གནོན།]}

བཅུ་ལ་ཤིན་ཏུ་རྟོགས་པ་རྣམས་སོ། །བྱང་ཆུབ་སེམས་དཔའ་དེ་ནི་མཆོག་ཏུ་བྱ་བ་བཅུ་འཐོབ་པ་ཡིན་ཏེ། བཅུ་གང་ཞེ་ན། འདི་ལྟར་སེམས་ཅན་ཐམས་ཅད་ཀྱི་ཕུལ་དུ་བྱ་བ་འཐོབ་པ་ཡིན། ལྷ་ཐམས་ཅད་ཀྱི་མཆོག་ཏུ་བྱ་བ་འཐོབ་པ་ཡིན། ཚངས་པ་ཁྱུ་མཆོག་ཐམས་ཅད་ཀྱི་ནང་ན་ཆགས་པ་མེད་པ་འཐོབ་པ་ཡིན། འཇིག་རྟེན་ཐམས་ཅད་ཀྱིས་མི་འཕྲོགས་པ་འཐོབ་པ་ཡིན། འགྲོ་བ་ཐམས་ཅད་ཀྱིས་མི་ཐུབ་པ་འཐོབ་པ་ཡིན། འགྲོ་བ་ཐམས་ཅད་དང་ཐ་མི་དད་པ་འཐོབ་པ་ཡིན། ལམ་གྱི་རྒྱུད་ཐམས་ཅད་ནས་འབྱུང་བ་འཐོབ་པ་ཡིན། སྐྱེ་བ་ཐམས་ཅད་དུ་དབང་ཕྱུག་འཐོབ་པ་ཡིན། སངས་རྒྱས་ཀྱི་ཆོས་ཐམས་ཅད་ལ་དབང་འཐོབ་པ་ཡིན། འབྱུང་བའི་རྣམ་པར་འཕྲུལ་པ་ཐམས་ཅད་ལ་སྟོབས་དང་ཤུགས་འཐོབ་པ་ཡིན་ཏེ། འདི་དག་ནི་བྱང་ཆུབ་སེམས་དཔས་མཆོག་ཏུ་བྱ་བ་བཅུ་འཐོབ་པའོ། །བྱང་ཆུབ་སེམས་དཔའ་དེ་ནི་སྟོབས་བཅུས་སེམས་ཅན་གྱི་ཁམས་སུ་ནན་ཏན་བྱེད་པ་ཡིན་ཏེ། བཅུ་གང་ཞེ་ན། འདི་ལྟར་འགྲོ་བ་ཐམས་ཅད་འདུལ་བའི་སྟོབས་ཀྱི་འབྱུང་བའི་དེད་དཔོན་དུ་འགྱུར་བ་དང་། བརྩོན་འགྲུས་ཀྱི་སྟོབས་ཀྱིས་ཕྱིར་མི་ལྡོག་པ་དང་། ཆགས་པ་མེད་པའི་སྟོབས་ཀྱིས་དྲི་མ་མེད་པ་དང་། ཞི་བའི་སྟོབས་ཀྱིས་བསྒྲིབ་པ་མེད་པ་དང་། སེམས་ཀྱི་རྒྱུད་ཡོངས་སུ་བསྒྱུར་བའི་སྟོབས་ཀྱིས་ཆོས་ཐམས་ཅད་ལ་དབང་བསྒྱུར་བ་དང་། རང་བཞིན་གྱི་ཆོས་ཀྱི་སྟོབས་ཀྱིས་དོན་གྱི་དབང་དང་། བསྒྲིབས་པ་མྱེད་པའི་ཆོས་ཀྱིས་ཤེས་རབ་ཆེ་བ་དང་། མྱི་འཇིགས་པའི་སྟོབས་ཀྱིས་ཆོས་སྟོན་པ་དང་། ཐ་དད་པ་ཡང་དག་པར་ཤེས་པའི་སྟོབས་ཀྱིས་བྱིན་གྱི་རློབ་པའི་ཆོས་ཉིད་དང་། རང་བྱུང་གི་སྟོབས་ཀྱིས་མཐའ་ཡས་པའི་ཡེ་ཤེས་རྣམ་པར་སྟོན་པ་སྟེ། སྟོབས་ཆེན་པོ། སྟོབས་འཕགས་པ།

---

^{[མ་དཔེ་གཟིགས་ན་འདིར་གནོན།]}

སྟོབས་དཔེ་མེད་པ། སྟོབས་ཚད་མེད་པ། སྟོབས་ཤིན་ཏུ་བསྒྲུབས་པ། སྟོབས་མི་གཡོ་བ། སྟོབས་ཤིན་ཏུ་བརྟན་པ། སྟོབས་འཁྲུགས་པ་མེད་པ། སྟོབས་ཡེ་ཤེས་ཀྱི་བློ་གྲོས་ཅན། སྟོབས་ལེགས་པར་བསྒྲུབས་པ། སྟོབས་མཉམ་པར་བཞག་པ། སྟོབས་ཡོངས་སུ་དག་པ། སྟོབས་ཆོས་ཀྱི་ལུས་ཅན། སྟོབས་ཆོས་སྣང་བ་ཅན། སྟོབས་ཆོས་ཀྱི་སྒྲོན་མ་ཅན། སྟོབས་ཆོས་ཀྱི་ཚུལ་ཅན། སྟོབས་ཟིལ་གྱིས་མི་ནོན་པ། སྟོབས་ཤིན་ཏུ་མཉམ་པར་བཞག་པ། རྩལ་དམ་པ་དང་ལྡན་པའི་སྟོབས། སྐྱེས་བུ་དམ་པའི་སྟོབས། སྐྱེས་བུ་དམ་པས་བསྟེན་པའི་སྟོབས། ཡང་དག་པར་རྫོགས་པའི་སངས་རྒྱས་ཀྱི་བྱིན་གྱིས་བརླབས་པའི་སྟོབས། རྣམ་པ་ཐམས་ཅད་དུ་དགེ་བའི་རྩ་བ་ལ་བརྟེན་པའི་སྟོབས། དགེ་བའི་རྩ་བ་ཚད་མེད་པ་ལ་གནས་པའི་སྟོབས། དེ་བཞིན་གཤེགས་པའི་སྟོབས་ལ་ཞུགས་པའི་སྟོབས་སེམས་རྟོགས་པར་བཞག་པའི་སྟོབས། བྱང་ཆུབ་སེམས་དཔའི་དགའ་བ་རྣམ་པར་འཕེལ་བའི་སྟོབས། བྱང་ཆུབ་སེམས་དཔའི་དད་པ་རབ་ཏུ་བསྐྱེད་པའི་སྟོབས། བྱང་ཆུབ་སེམས་དཔའི་ཤུགས་ཤིན་ཏུ་འཕེལ་བར་བྱེད་པའི་སྟོབས། བྱང་ཆུབ་སེམས་དཔའི་སེམས་ཀྱི་རྒྱུ་མཐར་ཕྱིན་པའི་སྟོབས། བྱང་ཆུབ་སེམས་དཔའི་ལྷག་པའི་བསམ་པ་རྣམ་པར་དག་པར་བྱེད་པའི་སྟོབས། བྱང་ཆུབ་སེམས་དཔའི་དགེ་བའི་རྩ་བ་ལ་ཡོངས་སུ་གནས་པ་དང་། རྒྱུ་མཐུན་པའི་སྟོབས། ཆོས་ལ་ཤིན་ཏུ་གཞོལ་བའི་སྟོབས། ལུས་ལ་ཐོགས་པ་མེད་པའི་སྟོབས། ཐབས་མཁས་པའི་ཚུལ་ལ་ཞུགས་པའི་སྟོབས། ཆོས་ཐམས་ཅད་འོད་དང་ཞིང་རྣམ་པར་སྣང་བའི་སྟོབས།

---

^{[མ་དཔེ་གཟིགས་ན་འདིར་གནོན།]}

འགྲོ་བ་ཐམས་ཅད་དུ་གཡོ་བ་མེད་པའི་ཕུན་སུམ་ཚོགས་པའི་སྟོབས། སེམས་ཅན་ཐམས་ཅད་ཀྱིས་མི་འཕྲོགས་ཤིང་མི་སྒུལ་བའི་སྟོབས་བཅུས་སེམས་ཅན་གྱི་ཁམས་སུ་ནན་ཏན་བྱེད་པ་སྟེ། བྱང་ཆུབ་སེམས་དཔའ་དེའི་ཡོན་ཏན་དེ་ལྟར་ཚད་མེད་པ་དང་། ཆོས་ཀྱི་བསྔགས་པ་དེ་ལྟར་ཚད་མེད་པ་ཡོངས་སུ་རྫོགས་པར་འགྱུར་རོ། །མངོན་པར་སྣང་བར་འགྱུར་རོ། །འབྱུང་བར་འགྱུར་རོ། །འཕེལ་བར་འགྱུར་རོ། །རབ་ཏུ་སྐྱེ་བར་འགྱུར་རོ། །རབ་ཏུ་རྟོན་པར་འགྱུར་རོ། །ཡང་དག་པར་འཕེལ་བར་འགྱུར་རོ། །རྣམ་པར་དག་པར་འགྱུར་ཞིང་ཡོངས་སུ་དག་པར་འགྱུར་ཏེ། ཡོན་ཏན་དེ་དག་ལ་མཐའ་མེད་དོ། །བདེན་པ་ཤེས་པ་ལ་མཐའ་མེད་དོ། །བྱང་ཆུབ་སེམས་དཔའི་སྤྱོད་པ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་ཚུལ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་ཁྱུ་མཆོག་གི་མཐུ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་དགའ་བ་སྤྱོད་པ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་མངོན་པར་གྲུབ་པ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་རྣམ་པར་དག་པ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་འབྱུང་བ་དེ་དག་ལ་མཐའ་མེད་དོ། །བྱང་ཆུབ་སེམས་དཔའི་ལས་ལ་དབང་བསྒྱུར་བ་དེ་དག་གི་མཐའ་ནི་བསྐལ་པ་བརྗོད་དུ་མེད་པས་ཀྱང་བརྗོད་པར་མི་ནུས་ཏེ། དེ་དག་ནི་བྱང་ཆུབ་སེམས་དཔའ་དེས་འཐོབ་བོ། །དེ་དག་ནི་བྱང་ཆུབ་སེམས་དཔའ་དེས་འགྲུབ་བོ། །དེ་དག་ནི་བྱང་ཆུབ་སེམས་དཔའ་དེས་གནོན་ཏོ། །དེ་དག་ནི་བྱང་ཆུབ་སེམས་དཔའ་དེ་ལ་མངོན་སུམ་དུ་དད་པར་འགྱུར་རོ། །དེ་དག་ནི་བྱང་ཆུབ་སེམས་དཔའ་དེ་ལ་རབ་ཏུ་སྣང་ངོ་། །དེ་དག་ནི་བྱང་ཆུབ་སེམས་དཔའ་དེས་ཡོངས་སུ་ཤེས་སོ། །དེ་དག་ནི་བྱང་ཆུབ་སེམས་དཔའ་དེའི་ཆོས་ཀྱི་

---

^{[མ་དཔེ་གཟིགས་ན་འདིར་གནོན།]}

ཚུལ་དུ་འབྱུང་ངོ་། །དེ་དག་ནི་བྱང་ཆུབ་སེམས་དཔའ་དེའི་རྣམ་པར་དགོད་པའི་ཡེ་ཤེས་སུ་འགྲོའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་ལྔ་པ། ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་ཏིང་ངེ་འཛིན་ཚད་མེད་པ་གྲངས་མེད་པ། གཞལ་དུ་མེད་པ། མུ་མེད་པ། ཀུན་ཏུ་མཐའ་ཡས་པ། དཔག་ཏུ་མེད་པ། བསམ་གྱིས་མི་ཁྱབ་པ། མཚུངས་པ་མེད་པ། བརྗོད་དུ་མེད་པའི་ཡང་བརྗོད་དུ་མེད་པ་དག་ལ་དམིགས་པ་རེ་རེ་ནས་འཇུག་པས་སྙོམས་པར་འཇུག་གོ །རྣམ་པར་ལྡང་ངོ་། །ཏིང་ངེ་འཛིན་དེ་དག་དང་། ཏིང་ངེ་འཛིན་གྱི་ཁྱད་པར་ཡང་རབ་ཏུ་ཤེས་སོ། །ཏིང་ངེ་འཛིན་གཞལ་དུ་མེད་པ་ཡང་རབ་ཏུ་ཤེས་སོ། ། ཏིང་ངེ་འཛིན་ཤིན་ཏུ་ཡངས་པ་ཡང་རབ་ཏུ་ཤེས་སོ། །ཏིང་ངེ་འཛིན་ལ་རྣམ་པར་སྤྱད་པའང་རབ་ཏུ་ཤེས་སོ། །ཏིང་ངེ་འཛིན་གྱི་མཚན་མ་ཡང་རབ་ཏུ་ཤེས་སོ། །ཏིང་ངེ་འཛིན་གྱི་བསྟན་པ་ཡང་རབ་ཏུ་ཤེས་སོ། །ཏིང་ངེ་འཛིན་གྱི་སྤྱོད་ཡུལ་ཡང་རབ་ཏུ་ཤེས་སོ། །ཏིང་ངེ་འཛིན་གྱི་རྒྱུ་མཐུན་པའི་འབྲས་བུའང་རབ་ཏུ་ཤེས་སོ། །ཏིང་ངེ་འཛིན་གྱི་དབེན་པའང་རབ་ཏུ་ཤེས་སོ། །ཏིང་ངེ་འཛིན་གྱི་རང་བཞིན་ཡང་རབ་ཏུ་ཤེས་སོ། །ཏིང་ངེ་འཛིན་གྱི་འབྱུང་བའང་རབ་ཏུ་ཤེས་སོ། །འདི་ལྟ་སྟེ་དཔེར་ན། ཀླུའི་རྒྱལ་པོ་ཆེན་པོ་མ་དྲོས་པའི་གནས་ནས། ཆུ་ཀླུང་ཆེན་པོ་མ་འདྲེས་པ། རྙོག་པ་མེད་པ། དང་བ། འོད་གསལ་བ། དྲི་མ་མེད་པ། དག་པ། ནམ་མཁའ་ལྟ་བུ་དྲི་མ་དང་བྲལ་བ་བཞི་འབབ་སྟེ། དེ་དག་ཀྱང་གཉིས་དང་གསུམ་དང་བཞིའི་སྒོ་ནས་འབབ་སྟེ། འདི་ལྟར་ཆུ་ཀླུང་ཆེན་པོ་གང་གཱ་ནི་གླང་པོ་ཆེའི་ཁ་ནས་འབབ་བོ། །ཆུ་ཀླུང་ཆེན་པོ་སི་ཏ་ནི་སེང་གེའི་ཁ་ནས་འབབ་བོ། །ཆུ་ཀླུང་ཆེན་པོ་སིན་དྷི་ནི་གླང་གི་ཁ་

---

^{[མ་དཔེ་གཟིགས་ན་འདིར་གནོན།]}

ནས་འབབ་བོ། །ཆུ་ཀླུང་ཆེན་པོ་པཀྴུ་ནི་རྟའི་ཁ་ནས་འབབ་བོ། །དེ་དག་དེ་ལྟར་ཕྱོགས་བཞི་ནས་ཁ་བཞི་ནས་འབབ་སྟེ། ཆུ་ཀླུང་གང་གཱ་ནི་དོང་ནས་དངུལ་གྱི་བྱེ་མ་འདྲེན་ཅིང་འབབ་སྟེ། དངུལ་གྱི་བྱེ་མ་ལ་གནས་སོ། །ཆུ་ཀླུང་སི་ཏ་ནི་དོང་ནས་རྡོ་རྗེའི་བྱེ་མ་འདྲེན་ཅིང་འབབ་སྟེ། རྡོ་རྗེའི་བྱེ་མ་ལ་གནས་སོ། །ཆུ་ཀླུང་སི་ཏ་ནི་དོང་ནས་གསེར་གྱི་བྱེ་མ་འདྲེན་ཅིང་འབབ་སྟེ། གསེར་གྱི་བྱེ་མ་ལ་གནས་སོ། །ཆུ་ཀླུང་ཆེན་པོ་པཀྴུ་ནི་དངོ་ནས་བཻ་དཱུ་རྱ་སྔོན་པོའི་བྱེ་མ་འདྲེན་ཅིང་འབབ་སྟེ་བཻ་དཱུ་རྱ་སྔོན་པོའི་བྱེ་མ་ལ་གནས་སོ། །ཆུ་ཀླུང་ཆེན་པོ་གང་གཱ་ནི་ལྷ་རྫས་ཀྱི་དངུལ་གྱི་ཁ་དོག་ལྟ་བུའི་སྒོ་ནས་འབབ་བོ། །ཆུ་ཀླུང་ཆེན་པོ་སི་ཏ་ནི་ལྷ་རྫས་ཀྱི་རྡོ་རྗེའི་ཁ་དོག་ལྟ་བུའི་སྒོ་ནས་འབབ་བོ། །ཆུ་ཀླུང་ཆེན་པོ་སིན་དྷུ་ནི་ལྷ་རྫས་ཀྱི་གསེར་གྱི་ཁ་དོག་ལྟ་བུའི་སྒོ་ནས་འབབ་བོ། །ཆུ་ཀླུང་ཆེན་པོ་པཀྴུ་ནི་ལྷ་རྫས་ཀྱི་བཻ་དཱུ་རྱ་སྔོན་པོའི་ཁ་དོག་ལྟ་བུའི་སྒོ་ནས་འབབ་བོ། །ཆུ་ཀླུང་ཆེན་པོ་དེ་བཞི་ཡང་ཁའི་སྒོ་དཔག་ཚད་ཙམ་གྱི་ཚད་ནས་འབབ་སྟེ། དེ་དག་འབབ་པའི་ཚེ་རེ་རེས་ཀྱང་མཚོ་ཆེན་པོ་ལ་ལན་བདུན་དུ་གཡས་ཕྱོགས་སུ་བསྐོར་ཏེ། ཕྱོགས་བཞིར་འབབ་ཅིང་རྒྱ་མཚོ་ཆེན་པོ་གང་ཆེན་མཚོ་ལ་ཞེན་པར་འདོང་ངོ་། །དེ་ལྟར་ཆུ་ཀླུང་ཆེན་པོ་རྣམས་ཀྱིས་ལན་བདུན་དུ་གཡས་ཕྱོགས་སུ་བསྐོར་བའི་བར་གྱི་གླིང་དེ་དག་ཀྱང་མེ་ཏོག་ཨུཏ་པ་ལ་དང་། པད་མོ་དང་། ཀུ་མུ་ད་དང་། པུན་ད་རི་ཀ་དང་། ལྷ་རྫས་ཀྱི་རིན་པོ་ཆེའི་རང་བཞིན་ལས་གྲུབ་པ་ཡིད་དུ་འོང་བ་དྲི་ཞིམ་པ། མཐའི་རྒྱན་དུ་སྡུག་པ། མདོག་གསལ་བ། རིན་པོ་ཆེ་སྣ་ཚོགས་ཀྱི་ཁ་དོག་ལྟར་འདུག་པ། འོད་དང་ཞིང་གསལ་བ། གཅིག་གི་གཟུགས་བརྙན་གཅིག་ཏུ་སྣང་བ་མདངས་དགའ་བ་བལྟ་ན་ཡིད་དུ་འོང་བ། རང་བཞིན་དང་ཞིང་ཤིན་ཏུ་རྣམ་པར་དག་པས་བརྒྱན་པ་སྟེ། བལྟ་ན་ཁ་

---

^{[མ་དཔེ་གཟིགས་ན་འདིར་གནོན།]}

དོག་གསལ་བ། མུན་པ་སེལ་ཅིང་སྣང་བ་འབྱིན་པ། བལྟ་ན་གཏང་མི་བྲ་ཞིང་ཤིན་ཏུ་རྣམ་པར་ཕྱེ་བར་བརྒྱན་པ། ཁ་དོག་སྣ་ཚོགས་སུ་མེ་ཏོག་གིས་ཀུན་ནས་ཡོག་པ། འདབ་མ་སྣ་ཚོགས་དང་ལྡན་ཞིང་སྙིང་པོ་ཁ་དོག་སྣ་ཚོགས་ཅན། ཟེ་བ་མདོག་དུ་མར་སྣང་བའི་མེ་ཏོག་གིས་ཡོངས་སུ་བརྒྱན་པ་སྟེ། མཚོ་ཆེན་པོ་དེའི་ནང་དང་། མཚོའི་དཀྱིལ་འཁོར་ནི་རྒྱར་དཔག་ཚད་ལྔ་བཅུ་ཡོད་པ་དེ། ཟབས་སུ་དཔག་ཚད་ལྔ་བཅུ་ཡོད་དོ། །དེའི་གཞི་ནི་རིན་པོ་ཆེའི་གསེག་མ་བདལ་བ་སྟེ། རིན་པོ་ཆེ་སྣ་ཚོགས་ཁ་དོག་དུ་མ་དང་ལྡན་པས་ཤིན་ཏུ་བརྒྱན་པར་གནས་པའོ། །དེའི་ངོགས་ནི་རིན་པོ་ཆེ་སྣ་ཚོགས་ཕ་གུ་བརྩིགས་པ་ལྟར་འདུག་པས་ཀུན་ནས་འཁོར་བའོ། །དེའི་དྲི་ནི་ཙན་དན་བཟང་པོའི་བསུང་ལྟ་བུ་སྟེ། མེ་ཏོག་ཁ་དོག་དུ་མ་ཅན་ལས་བསུང་གི་ངད་རྣམ་པ་དུ་མ་ལངས་པ་དང་ལྡན་པ། མེ་ཏོག་ཨུཏྤ་ལ་དང་། པད་མོ་དང་། ཀུ་མུ་ད་དང་པུན་ད་རི་ཀ་ས་ཀུན་ནས་ཡོག་པ། རིན་པོ་ཆེའི་ཤིང་མེ་ཏོག་རབ་ཏུ་རྒྱས་པས་ཀུན་ནས་འཁོར་བ་སྟེ། ནམ་ལྷའི་བུ་ཉི་མ་འཆར་བའི་ཚེ་ཉི་མའི་འོད་ཟེར་དེ་དག་མཚོའི་རིན་པོ་ཆེ་དང་གསེག་མ་དང་། མེ་ཏོག་དང་། ཆུ་ཀླུང་གི་རྒྱུད་ཀྱི་བྱེ་མ་དང་། དངོའི་ཁ་དང་། ཆུ་ཀླུང་གིས་གཡས་ཕྱོགས་སུ་བསྐོར་བའི་མཚོ་དང་རིན་པོ་ཆེའི་ཤིང་གི་ལྷུན་དང་། ཡལ་ག་དང་ལོ་མ་དང་མེ་ཏོག་ལ་བབ་པར་གྱུར་ན། དེའི་ཚེ་འོད་ཟེར་རེ་རེས་ཕོག་ཀྱང་རིན་པོ་ཆེའི་འབྱུང་གནས་སྣ་ཚོགས་ཀྱི་དབྱིངས་ན་གནས་པའི་འོད་ཟེར་གྱི་དྲ་བ་བྱེ་བ་ཁྲག་ཁྲིག་བརྒྱ་སྟོང་གིས་ཀུན་ནས་ཡོག་པ་ལྟ་བུར་སྣང་སྟེ། ཐམས་ཅད་ཀྱང་འོད་ཀྱི་མདོག་དམ་པ་དེས། འཇམ་འཇམ་ལྟར་འདུག་པས་མཚོ་ཆེན་པོ་མ་དྲོས་པ་རྣམ་པའི་མཆོག་ཐམས་ཅད་དང་ལྡན་པར་སྣང་ངོ་། །མཚོ་ཆེན་པོ་མ་དྲོས་པ་དེའི་འཁོར་ན་

---

^{[མ་དཔེ་གཟིགས་ན་འདིར་གནོན།]}

རིན་པོ་ཆེ་རྒྱན་དུ་འཁོད་པ་ཡིད་དུ་འོང་ཞིང་ཆལ་པར་རྒྱས་ལ་རྒྱ་ཆེ་བར་འདལ་བ་དེ་དག་ཐམས་ཅད་ཀྱང་ཉི་མའི་དཀྱིལ་འཁོར་ལྟ་བུར་གྱུར་བར་སྣང་སྟེ། རིན་པོ་ཆེ་དམ་པ་སྣ་ཚོགས་ཤིན་ཏུ་ཕྲ་བ་ཐམས་ཅད་དང་། རིན་པོ་ཆེའི་བྱེ་མ་ཀུན་ཏུ་བདལ་བ་དང་། རིན་པོ་ཆེའི་རྒྱན་སྣ་ཚོགས་ཤིན་ཏུ་ཕྲ་བ་དང་། རིན་པོ་ཆེའི་རྡུལ་ཤིན་ཏུ་ཕྲ་བ་དང་། རིན་པོ་ཆེའི་རྡུལ་ཤིན་ཏུ་ཕྲ་བའི་བྱེ་མ་དེ་ལྟར་ཕྲ་བ་དག་ལའང་ཕན་ཚུན་དུ། གཟུགས་བརྙན་སྣང་ན། ཆུང་ཞེས་དོག་པའམ་ཆེ་ཞེས་ཡངས་པ་མེད་པར་དངོས་པོ་ཇི་ལྟ་བ་བཞིན་དུ་མ་ནོར་བར་སྣང་ངོ་། །ཆུ་ཀླུང་ཆེན་པོ་དེ་དག་ཇི་ལྟར་མཚོ་ཆེན་པོ་མ་དྲོས་པ་ལས་ཁ་བཞི་ནས་འབབ་པ་དེ་བཞིན་དུ། བྱང་ཆུབ་སེམས་དཔའ་སེམས་དཔའ་ཆེན་པོའི་ཐ་དད་པ་ཡང་དག་པར་ཤེས་པ་བཞིའི་ཆུ་ཀླུང་ཆེན་པོ་འབབ་པ་ཡང་ཐམས་ཅད་མཁྱེན་པ་ཉིད་ཀྱི་རྒྱ་མཚོ་ལ་ཞེན་པར་འདོང་ངོ་། །ཇི་ལྟར་ཆུ་ཀླུང་ཆེན་པོ་གང་གཱ་གླང་པོའི་ཁ་དངུལ་གྱི་ཁ་དོག་ཏུ་འདུག་པ་ནས་དངུལ་གྱི་བྱེ་མ་འདྲེན་ཅིང་འབབ་པ། དེ་བཞིན་དུ་བྱང་ཆུབ་སེམས་དཔའ་ཆོས་དཀར་པོ་དག་པར་བྱེད་པའི་སྒོ་ནས་དོན་ཐ་དད་པ་ཡང་དག་པར་ཤེས་པ། དེ་བཞིན་གཤེགས་པའི་ཚུལ་ཐམས་ཅད་ཡོངས་སུ་སྦྱོང་བ། དོན་གྱི་ཚུལ་ཐམས་ཅད་ཤིན་ཏུ་དག་པར་བྱེད་པ་ཡང་ཆོས་ཐམས་ཅད་ཀྱི་སྣང་བ་རྣམ་པར་གསལ་བར་བྱེད་ཅིང་འབབ་སྟེ། བསྒྲིབས་པ་མེད་པའི་རྒྱ་མཚོའི་མཐར་ཐུག་པར་འགྲོའོ། །ཇི་ལྟར་ཆུ་ཀླུང་ཆེན་པོ་སི་ཏ་སེང་གེའི་ཁ་རྡོ་རྗེའི་ཁ་དོག་ཏུ་འདུག་པ་ནས་རྡོ་རྗེའི་བྱེ་མ་འདྲེན་ཅིང་འབབ་པ་དེ་བཞིན་དུ། བྱང་ཆུབ་སེམས་དཔའི་ཆོས་ཐ་དད་པ་ཡང་དག་པར་ཤེས་པ་སངས་རྒྱས་ཀྱི་རྡོ་རྗེའི་ཚིག་བརྗོད་པ་དང་། འགྲོ་བ་ཐམས་ཅད་ལ་སྣང་བར་བྱ་བ་དང་། ཡེ་ཤེས་ཀྱི་རྡོ་རྗེའི་ཚིག་རབ་ཏུ་འདྲེན་ཅིང་འབབ་སྟེ། ཆགས་པ་

---

^{[མ་དཔེ་གཟིགས་ན་འདིར་གནོན།]}

མེད་པའི་རྒྱ་མཚོ་ལ་ཞེན་པར་འགྲོའོ། །ཇི་ལྟར་ཆུ་ཀླུང་ཆེན་པོ་སིན་དྷུ་གླང་གི་ཁ་གསེར་གྱི་ཁ་དོག་ཏུ་འདུག་པ་ནས་གསེར་གྱི་བྱེ་མ་འདྲེན་ཅིང་འབབ་པ་དེ་བཞིན་དུ་བྱང་ཆུབ་སེམས་དཔའི་ངེས་པའི་ཚིག་ཐ་དད་པ་ཡང་དག་པར་ཤེས་པ་སེམས་ཅན་གྱི་ཚོགས་ཐམས་ཅད་ཁོང་དུ་ཆུད་པར་བྱེད་ཅིང་འགལ་བ་མེད་པ་དང་། འགྲོ་བ་ཐམས་ཅད་ཚིམ་པར་བྱེད་པ། ཤིན་ཏུ་འགྲོ་བ་ཡང་ཚུལ་རྣམ་པར་དག་པའི་ཡན་ལག་གིས་ཡོངས་སུ་སྨིན་པར་བྱ་བ་དང་། འདུལ་བ་ལ་རྟག་ཏུ་བརྩོན་པར་འབབ་སྟེ། རྟེན་ཅིང་འབྲེལ་བར་བྱུང་བའི་ཚུལ་གྱི་རྒྱ་མཚོ་ལ་ཞེན་པར་འགྲོའོ། །ཇི་ལྟར་ཆུ་ཀླུང་ཆེན་པོ། པཀྴུ་རྟའི་ཁ་བཻ་དཱུ་རྱ་སྔོན་པོའི་ཁ་དོག་དུ་འདུག་པ་ནས། བཻ་དཱུ་སྔོན་པོའི་བྱེ་མ་འདྲེན་ཅིང་འབབ་པ་དེ་བཞིན་དུ་བྱང་ཆུབ་སེམས་དཔའི་སྤོབས་པ་ཐ་དད་པ་མི་ཟད་པ་ཡང་ཆོས་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་རབ་ཏུ་སྣང་བར་བྱ་བ་དང་། དམ་པའི་ཆོས་ཀྱི་ཆུ་ཀླུང་རྒྱུན་དུ་འབབ་པར་བྱ་བའི་ཀླུང་རབ་ཏུ་བསྐྱེད་པར་བྱེད་ཅིང་ཆོས་ཐམས་ཅད་ཀྱི་རྒྱ་མཚོ་ལས་གཞོལ་བར་འབབ་སྟེ། བྱང་ཆུབ་སེམས་དཔའ་ཐམས་ཅད་ཀྱི་ཆོས་རྒྱ་མཚོ་ལ་ཞེན་པར་འགྲོའོ། །ཇི་ལྟར་ཆུ་ཀླུང་ཆེན་པོ་བཞི་པོ་དེ་དག་གིས་མཚོ་ཆེན་པོ་མ་དྲོས་པ་ལ་གཡས་ཕྱོགས་སུ་བསྐོར་བ་བྱས་ཏེ། ཕྱོགས་བཞི་ནས་རྒྱ་མཚོ་ལ་ཞེན་པར་འདོང་བ་དེ་བཞིན་དུ། བྱང་ཆུབ་སེམས་དཔའི་ཡང་ལུས་ཀྱི་ལས་མཐུན་པ་དང་ལྡན་པ་ཡིན། ངག་གི་ལས་མཐུན་པ་དང་ལྡན་པ་ཡིན། ཡིད་ཀྱི་ལས་མཐུན་པ་དང་ལྡན་པ་ཡིན། མཐུན་པའི་ཡེ་ཤེས་སྔོན་དུ་འགྲོ་བ་དང་ལྡན་པ་ཡིན། ཇི་ལྟར་དེ་དག་ཕྱོགས་བཞི་ནས་རྒྱ་མཚོ་ཆེན་པོ་ལ་ཞེན་པར་འདོང་བ་དེ་བཞིན་དུ། བྱང་ཆུབ་སེམས་དཔའ་ཡང་ཕྱོགས་བཞི་ནས་ཐམས་ཅད་མཐོང་བའི་ཡེ་ཤེས་ཀྱི་རྒྱ་མཚོ་ལ་ཞེན་པར་འགྲོ་བ་ཡིན་ཏེ། བཞི་གང་ཞེ་ན། འདི་ལྟ་སྟེ། སངས་རྒྱས་རྣམ་པར་དམིགས་

---

^{[མ་དཔེ་གཟིགས་ན་འདིར་གནོན།]}

པས། སངས་རྒྱས་ཐམས་ཅད་མཐོང་བའི་ཕྱོགས་དང་། འདི་ལྟ་སྟེ། ལུས་ཀྱི་ལས་དེས་པ་དང་། གཟུངས་བརྗོད་དུ་མེད་པས་ཡོངས་སུ་འཛིན་པས་ཆོས་ཐམས་ཅད་སྣང་བའི་ཕྱོགས་དང་། འདི་ལྟ་སྟེ་བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཕ་རོལ་ཏུ་ཕྱིན་པའི་ཕྱོགས་དང་། ཆོས་ཀྱི་འཁོར་ལོ་བསྐོར་བས་སེམས་ཅན་ཐམས་ཅད་དགའ་བར་བྱ་བ་ཡོངས་སུ་རྫོགས་པར་བྱ་བའི་ཕྱིར་སྙིང་རྗེ་ཆེན་པོའི་ཕྱོགས་སོ། །ཇི་ལྟར་ཆུ་ཀླུང་ཆེན་པོ་དེ་དག་གིས་ལན་བདུན་དུ་བསྐོར་བའི་བར་གྱི་གླིང་རྣམས་མེ་ཏོག་ཨུཏ་པ་ལ་དང་། པད་མོ་དང་ཀུ་མུ་ད་དང་། པུན་ད་རི་ཀས་ཀུན་ནས་ཡོག་པ་དེ་བཞིན་དུ་བྱང་ཆུབ་སེམས་དཔའ་བར་མ་དོར་འདུལ་བར་མ་གྱུར་བའི་སེམས་ཅན་རྣམས་ལ་བཏང་སྙོམས་སུ་གཞོག་པ་ཡང་ཏིང་ངེ་འཛིན་བྱེ་བ་ཁྲག་ཁྲིག་བརྒྱ་ཕྲག་སྟོང་གིས་ཀུན་ཏུ་ཁྱབ་པའོ། །སངས་རྒྱས་མཐོང་བའི་རྣམ་པ་སྣ་ཚོགས་སུ་བརྒྱན་པའོ། །སངས་རྒྱས་ཀྱི་ཞིང་ཡོངས་སུ་དག་ཅིང་རྡུལ་མེད་པས་ཡིད་དུ་འོང་བའོ། །ཇི་ལྟར་མཚོ་ཆེན་པོ་མ་དྲོས་པ་རིན་པོ་ཆེའི་ཤིང་གིས་ཡོངས་སུ་འཁོར་བ་དེ་བཞིན་དུ། བྱང་ཆུབ་སེམས་དཔའ་ཡང་བྱང་ཆུབ་ཏུ་མངོན་པར་འཚང་རྒྱ་བ་སྟོན་ན་སངས་རྒྱས་ཀྱི་ཞིང་གིས་ཀུན་ནས་འཁོར་ཞིང་བརྒྱན་པ་ཡིན། ཇི་ལྟར་མཚོ་ཆེན་པོ་མ་དྲོས་པའི་ནང་དཔག་ཚད་ལྔ་བཅུ་ཡོད་ལ་དང་ཞིང་རྙོག་པ་མེད་པ་དང་གསལ་བ་དེ་བཞིན་དུ། བྱང་ཆུབ་སེམས་དཔའ་མངོན་པར་འཚང་རྒྱ་བའི་སེམས་ཀྱང་དགེ་བའི་རྩ་བ་ཐམས་ཅད་ཀྱིས་ཡོངས་སུ་རྒྱས་པས་དང་ཞིང་རྙོག་པ་མེད་ལ་གསལ་བ་དང་། མཐའ་དང་དབུས་མེད་པ་ཡིན། ཇི་ལྟར་མཚོ་ཆེན་པོ་མ་དྲོས་པ་རིན་པོ་ཆེའི་ཕ་གུས་བརྩིགས་པས་མཐའ་བསྐོར་ཅིང་ཙན་དན་དྲི་ཞིམ་པོའི་བསུང་དང་ལྡན་པ་དེ་བཞིན་དུ་བྱང་ཆུབ་སེམས་དཔའ་མངོན་པར་འཚང་རྒྱ་བའི་སེམས་ཀྱང་ཡེ་ཤེས་རིན་པོ་ཆེ་ཁྲག་ཁྲིག་སྟོང་ཕྲག་བཅུས་ཤིན་ཏུ་བརྒྱན་

---

^{[མ་དཔེ་གཟིགས་ན་འདིར་གནོན།]}

ཅིང་ཁྱད་པར་དུ་འཕགས་པའི་སྨོན་ལམ་གྱི་ཡེ་ཤེས་དང་ལྡན་ལ་དགེ་བའི་རྩ་བ་དྲི་ཞིམ་པོ་ཐམས་ཅད་དང་ལྡན་པའོ། །ཇི་ལྟར་མཚོ་ཆེན་པོ་མ་དྲོས་པའི་ནང་རིན་པོ་ཆེ་ཐམས་ཅད་ཀྱི་གྲམ་བུས་ཡོངས་སུ་བརྒྱན་ཅིང་ནོར་བུ་རིན་པོ་ཆེ་རྣམ་པ་སྣ་ཚོགས་ཀྱིས་མཛེས་པར་གྱུར་པ་དེ་བཞིན་དུ། བྱང་ཆུབ་སེམས་དཔའི་ཡེ་ཤེས་ཕྲ་བ་ཁོང་དུ་ཆུད་པའི་དྲན་པ་ཡང་བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་རིན་པོ་ཆེས་རྣམ་པར་བརྒྱན་ཅིང་ད་ལྟར་བྱུང་བའི་ཆོས་ཐམས་ཅད་ལ་ཐོགས་པ་མེད་པའི་སངས་རྒྱས་ཐམས་ཅད་ཀྱི་གནས་ལ་རྣམ་པར་སྤྱོད་པས་ཚུལ་དང་། དུས་ཤེས་པར་བྱ་བ་ཐམས་ཅད་ལ་ཞུགས་པ་ཡིན། ཇི་ལྟར་ཀླུའི་རྒྱལ་པོ་ཆེན་པོ་མ་དྲོས་པ་གཙེ་བ་དང་། མི་བདེ་བ་ཐམས་ཅད་ལས་རྣམ་པར་འདས་པ་དེ་བཞིན་དུ། བྱང་ཆུབ་སེམས་དཔའ་ཡང་འཇིག་རྟེན་གྱི་གཙེ་བ་དང་། འཇིགས་པ་ཐམས་ཅད་དང་བྲལ་བ་ཡིན་ཏེ། འཇིག་རྟེན་ཐམས་ཅད་དུ་སྣང་བར་གནས་ཀྱང་འཇིག་རྟེན་ཐམས་ཅད་ཀྱིས་མི་གོས་པ་ཡིན། ཇི་ལྟར་ཆུ་ཀླུང་ཆེན་པོ་བཞི་པོ་དེ་དག་གིས་འཛམ་བུ་གླིང་མངོན་པར་བརླན་ཅིང་ཡོངས་སུ་བརླན་ནས་རྒྱ་མཚོ་ཆེན་པོ་ལ་ཞེན་པར་འདོང་བ་དེ་བཞིན་དུ། བྱང་ཆུབ་སེམས་དཔའ་ཡང་ཡེ་ཤེས་ཀྱི་ཆུ་ཀླུང་ཆེན་པོ་བཞིས་ལྷ་དང་འཇིག་རྟེན་དུ་བཅས་པ། ཚངས་པར་བཅས་པ། དགེ་སྦྱོང་དང་བྲམ་ཟེའི་སྐྱེ་དགུར་བཅས་པ་མངོན་པར་བརླན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཡེ་ཤེས་རྒྱ་མཚོ་སྟོབས་བཅུས་རྣམ་པར་བརྒྱན་པ་ལ་ཞེན་པར་འགྲོའོ། །བཞི་གང་ཞེ་ན་འདི་ལྟ་སྟེ། སྨོན་པའི་ཡེ་ཤེས་ཀྱི་ཆུ་ཀླུང་འགྲོ་བ་ཐམས་ཅད་བསྐྱབ་པ་དང་། འགྲོ་བ་ཐམས་ཅད་གདུལ་བའི་ཕྱིར་རྒྱུན་མི་འཆད་པར་འགྲོ་བ་དང་། འདི་ལྟ་སྟེ་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ཆུ་ཀླུང་བྱང་ཆུབ་

---

^{[མ་དཔེ་གཟིགས་ན་འདིར་གནོན།]}

སེམས་དཔའི་སྤྱོད་པ་རྣམ་པར་དག་པས་རབ་ཏུ་དང་བ། སེམས་ཅན་གྱི་ཁམས་ཐམས་ཅད་ལ་ཕན་འདོགས་ཤིང་མི་ཟད་པའི་རྒྱུན་གྱིས་མཐར་ཐུག་པས་དུས་གསུམ་གྱི་ཡེ་ཤེས་རྒྱ་མཚོ་ལ་ཞེན་པར་འབབ་པ་དང་། འདི་ལྟ་སྟེ་བྱང་ཆུབ་སེམས་དཔའི་མཉམ་པ་མེད་པའི་ཡེ་ཤེས་ཀྱི་ཆུ་ཀླུང་ཏིང་ངེ་འཛིན་རིན་པོ་ཆེ་གྲངས་མེད་པས་བརྒྱན་པ་སངས་རྒྱས་ཐམས་ཅད་ལྟ་ཞིང་སངས་རྒྱས་ཐམས་ཅད་ཀྱི་ཡེ་ཤེས་རྒྱ་མཚོ་ལ་ཞེན་པར་འབབ་པ་དང་། འདི་ལྟ་སྟེ། སྙིང་རྗེ་ཆེན་པོའི་ཡེ་ཤེས་ཀྱི་ཆུ་ཀླུང་བྱམས་པ་ཆེན་པོའི་དབང་དུ་གྱུར་པ། འགྲོ་བ་ཐམས་ཅད་ནས་ཕྱིར་མི་ལྡོག་ཅིང་འགྲོ་བ་ཐམས་ཅད་ཉེ་བར་བཟུང་བའི་ཕྱིར། ཐབས་མཁས་པའི་མཚམས་སྦྱོར་བ་གྲངས་མེད་པས། ཡོངས་སུ་གདུང་བ་ཞི་བར་བྱེད་ཅིང་སྟོབས་བཅུ་རྒྱ་མཚོ་ལ་ཞེན་པར་འབབ་པའོ། །ཇི་ལྟར་ཆུ་ཀླུང་ཆེན་པོ་བཞི་པོ་དེ་དག་མཚོ་ཆེན་པོ་མ་དྲོས་པ་ནས་མི་ཟད་པའི་རྒྱ་མཚོ་ལ་ཞེན་པར་འདོད་པ་དེ་བཞིན་དུ་བྱང་ཆུབ་སེམས་དཔའ་ཡང་ཁྱད་པར་དུ་འཕགས་པའི་སྨོན་ལམ་དང་ལྡན་པའི་བྱང་ཆུབ་སེམས་དཔའི་སྤྱོད་པས་ཐམས་ཅད་མཁྱེན་པའི་ཡེ་ཤེས་ཟད་མི་ཤེས་པའི་མཐར་ཐུག་པར་འགྲོ་ཞིང་རྣམ་པར་འཚང་རྒྱ་བར་རྣམ་པར་རོལ་པས་རྣམ་པར་འཚང་རྒྱ་བ་ཡིན། ཇི་ལྟར་ཆུ་ཀླུང་ཆེན་པོ་བཞི་པོ་དེ་དག་རྒྱ་མཚོ་ཆེན་པོ་ལ་ཞེན་པར་འདོང་ཞིང་ཕྱིར་མི་ལྡོག་པ་དེ་བཞིན་དུ། བྱང་ཆུབ་སེམས་དཔའ་སྨོན་ལམ་གྱི་རྒྱུན་མ་འཆད་པར་བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་ལ་རབ་ཏུ་བརྩོན་པ་ཡང་ཐམས་ཅད་མཁྱེན་པ་ཉིད་དུ་མངོན་པར་བསྒྲུབ་པ་ལས། ཕྱིར་མི་ལྡོག་ཅིང་སངས་རྒྱས་ཀྱི་བྱང་ཆུབ་ཆོས་ཐམས་ཅད་ལ་བསྒྲིབས་པ་མེད་པ་དང་། ཆགས་པ་མེད་པ་ལ་གནས་པའི་དེ་བཞིན་གཤེགས་པའི་ཡེ་ཤེས་རྒྱ་མཚོ་ལ་ཞེན་པར་

---

^{[མ་དཔེ་གཟིགས་ན་འདིར་གནོན།]}

འགྲོའོ། །ཇི་ལྟར་ཆུ་ཀླུང་ཆེན་པོ་བཞི་པོ་དེ་དག་བསྐལ་པར་གནས་ཤིང་སྐྱོ་བ་དང་། ཡོངས་སུ་སྐྱོ་བ་མེད་པར་རྒྱ་མཚོ་ལ་ཞེན་པར་འདོང་བ་དེ་བཞིན་དུ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ལ་བརྩོན་པའི་བྱང་ཆུབ་སེམས་དཔའ་ཡང་ཕྱི་མའི་མཐའི་མུར་ཐུག་པའི་བསྐལ་པར་བྱང་ཆུབ་སེམས་དཔའི་སྤྱད་པ་སྤྱོད་པས་ཡོངས་སུ་མི་སྐྱོ་བར་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་རྒྱ་མཚོ་རྒྱུན་མ་ཆད་པར་རྗེས་སུ་གཞོལ་ཞིང་ཞེན་པར་འགྲོ་བ་ཡིན། ཇི་ལྟར་མཚོ་ཆེན་པོ་མ་དྲོས་པ་དེ་རིན་པོ་ཆེ་སྣ་ཚོགས་ཀྱི་མདོག་ལྟར་འདུག་ཅིང་དངུལ་གྱི་བྱེ་མའི་མདོག་ཏུ་སྣང་བ་དང་། གསེར་གྱི་བྱེ་མའི་མདོག་དུ་སྣང་བ་དང་རྡོ་རྗེའི་བྱེ་མའི་མདོག་ཏུ་སྣང་བ་དང་། བཻ་དཱུ་རྱའི་བྱེ་མའི་མདོག་ཏུ་སྣང་བ་དང་། ཉི་མའི་འོད་གཟེར་གྱིས་ཕོག་ན་ཉི་མའི་དཀྱིལ་འཁོར་རྣམ་པ་ཐམས་ཅད་དང་ལྡན་པའི་གཟུགས་སུ་མངོན་ཞིང་སྣང་བ་དང་། ཉི་མའི་འོད་གཟེར་དང་ཕྲད་ན་མཚོ་ཆེན་པོ་མ་དྲོས་པ་དེ་དམིགས་པ་ཐམས་ཅད་ཀྱི་གཟུགས་སུ་གྱུར་པར་སྣང་ཡང་གཟུགས་ལུས་ཀྱི་གཟུགས་སུ་སྣང་བ་དང་། རིན་པོ་ཆེ་སྣ་ཚོགས་ཀྱི་རྣམ་པར་སྣང་བར་གྱུར་པ་དེ་དག་གཅིག་གིས་གཅིག་བདོ་ཞིང་ཕན་ཚུན་དུ་གནོད་པར་འགྱུར་བ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་ལ་དབང་བསྒྱུར་བའི་ཏིང་ངེ་འཛིན་འདི་ལ་གནས་པས་རང་གི་ལུས་ཀྱི་བ་སྤུའི་ཁུང་བུ་རེ་རེ་ཡང་དེ་བཞིན་གཤེགས་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རབ་ཏུ་མཐོང་ངོ་། ། སངས་རྒྱས་ཀྱི་ཞིང་ཡང་མཐོང་ངོ་། །འཁོར་གྱི་དཀྱིལ་འཁོར་དུ་ཡང་འཇུག་གོ །ཆོས་བསྟན་པ་ཡང་ཉན་ཏོ། །དེ་དག་ཐམས་ཅད་ཀྱང་མཉེས་པར་བྱེད་དོ། །དེ་བཞིན་

---

^{[མ་དཔེ་གཟིགས་ན་འདིར་གནོན།]}

གཤེགས་པའི་སྐུ་ཚད་མེད་པ་ལའང་ཡིད་ཆེས་ཤིང་ཁོང་དུ་ཆུད་པར་བྱེད་དོ། །སངས་རྒྱས་ཀྱི་ཞིང་དེ་དག་ན་དེ་བཞིན་གཤེགས་པ་རྣམས་ལ་བསྙེན་བཀུར་བྱེད་ཅིང་ཆོས་ཉན་པས་ཀྱང་བསྐལ་པ་བརྗོད་དུ་མྱེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་འདའ་བར་བྱེད་ཀྱང་ཡུན་རིང་པོའི་འདུ་ཤེས་ཀྱང་མྱི་སྐྱེ། ཡུན་ཐུང་ངུའི་འདུ་ཤེས་ཀྱང་མི་སྐྱེའོ། །བ་སྤུའི་བུ་ག་དེ་དག་ཏུའང་དེའི་ལུས་ལ་མི་བདེ་བ་མེད་ཅིང་འཇིག་རྟེན་གྱི་ཁམས་དེ་དག་དང་། དེ་བཞིན་གཤེགས་པ་བཞུགས་པ་དེ་དག་དང་། འཁོར་གྱི་དཀྱིལ་འཁོར་དེ་དག་དང་སེམས་ཅན་གྱི་ཁམས་སྣ་ཚོགས་འཁོད་པ་དེ་དག་ལའང་གནོད་པ་མེད་དོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་ཆོས་ཀྱི་དབྱིངས་ལ་འཇུག་པ་དེ་སེམས་ཤིན་ཏུ་ཕྲ་བས་མཐའ་དང་དབུས་མེད་པ་ལས་ཀྱི་རྣམ་པར་སྨིན་པ་དཔེ་མེད་པའི་ཚུལ་ལ་འཇུག་པ། ཏིང་ངེ་འཛིན་བསམ་གྱིས་མི་ཁྱབ་པའི་ཡུལ་རྟོགས་པར་གནས་པ། བསམ་གྱིས་མྱི་ཁྱབ་པའི་ཡུལ་སངས་རྒྱས་ཐམས་ཅད་ཀྱི་ཡུལ་རྣམ་པར་བསྒྲུབ་པ། སངས་རྒྱས་ཐམས་ཅད་ཀྱི་བྱིན་གྱི་རླབས་བསམ་གྱིས་མི་ཁྱབ་པ་སངས་རྒྱས་ཀྱི་རྣམ་པར་འཕྲུལ་པ་ཚད་མེད་པ་བསྒྲུབ་པར་དཀའ་བ། བཟོད་པར་དཀའ་བ། དེ་བཞིན་གཤེགས་པའི་སྟོབས་བཅུ་ཡོངས་སུ་འཛིན་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། དམིགས་པ་ཡོངས་སུ་རྫོགས་པར་བྱེད་པ། སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་ལ་འཇུག་པས་སྐྱོ་བ་མེད་པའི་ཕྱིར་རོ། །དེ་ལྟར་བྱང་ཆུབ་སེམས་དཔའ་དེ་སེམས་སྐད་ཅིག་ལ་སྙོམས་པར་ཞུགས་ཤིང་རྣམ་པར་ལྡང་ཡང་། ཡུན་རིང་པོ་ཡང་འཇིག་པར་མི་བྱེད། མངོན་པར་ཞེན་པར་ཡང་མི་ལྟུང་། དམིགས་པ་ཐམས་ཅད་ལའང་གནས་པ་མེད་དེ། དངོས་པོ་ཐམས་ཅད་ལའང་མྱི་གནས་སོ། །སྐད་ཅིག་གི་རྒྱུད་ལའང་རབ་ཏུ་འཇུག་གོ །སེམས་ཅན་གྱི་

---

^{[མ་དཔེ་གཟིགས་ན་འདིར་གནོན།]}

དོན་ཡང་ཡང་དག་པར་སྒྲུབ་བོ། །སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་མཐོང་བས་ཀྱང་ངོམས་པར་མི་བྱེད་དོ། །ཆོས་ཀྱི་དབྱིངས་ཀྱི་མཐར་དབྱུང་བས་ཀྱང་སྒྱིད་ལུག་པར་མི་བྱེད་དེ། དེ་ལ་བཞག་པར་བྱ་བ་ཡང་གང་ཡང་མྱེད་དོ། །ཐམས་ཅད་མཁྱེན་པའི་ཡེ་ཤེས་མངོན་པར་བསྒྲུབ་པའི་རྗེས་སུ་ཡང་རབ་ཏུ་འཇུག་གོ །ཡེ་ཤེས་ཀྱི་སྤྲུལ་པ་ཡང་བྱིན་གྱིས་རློབ་བོ། །སེམས་ཅན་གྱི་རིས་ལ་འཇུག་པར་ཡང་མཐའ་དང་དབུས་མེད་པར་འཇུག་གོ །འཇིག་རྟེན་གྱི་ཁམས་ཐམས་ཅད་རྣམ་པར་དག་པ་ཡང་ཡོངས་སུ་རྫོགས་པར་བྱེད་དོ། །འཇིག་རྟེན་གྱི་ཕྱིན་ཅི་ལོག་ཐམས་ཅད་ཀྱང་རྣམ་པར་རྟོག་པ་མེད་པས་རབ་ཏུ་ཤེས་སོ། །རྟོག་པའི་ས་ཐམས་ཅད་ལས་ཀྱང་ཡོངས་སུ་འདའོ། །མཚན་མ་སྣ་ཚོགས་ཡོངས་སུ་ཤེས་པ་ཡང་མི་སྤོང་ངོ་། །བྱང་ཆུབ་སེམས་དཔའི་ཡེ་ཤེས་དང་ཐབས་ལ་མཁས་པ་ཡང་ཡོངས་སུ་རྫོགས་པར་བྱེད་དོ། །ཤིན་ཏུ་རྣམ་པར་དག་པ་ལའང་རྟོག་པར་མི་བྱེད་དོ། །ཐམས་ཅད་ཟིལ་གྱིས་གནོན་པའི་ས་ཡང་རབ་ཏུ་འཐོབ་པར་བྱེད་དོ། །འདི་ལྟ་སྟེ་དཔེར་ན། ནམ་མཁའི་རང་བཞིན་ནི་དངོས་པོ་ཐམས་ཅད་ཀྱི་རྗེས་སུ་སོང་བའང་ཡིན་ལ། དངོས་པོ་ཐམས་ཅད་ལས་ཀྱང་རྣམ་པར་འདས་པའོ། །དེ་བཞིན་དུ་བྱང་ཆུབ་སེམས་དཔའ་ཡང་འཇིག་རྟེན་གྱི་ཁམས་ཐམས་ཅད་དུའང་རྒྱུ་ལ། འཇིག་རྟེན་གྱི་ཁམས་ཐམས་ཅད་ལས་ཀྱང་རྣམ་པར་འདས་པ་ཡིན། སེམས་ཅན་གྱི་ཁམས་ཡོངས་སུ་དགྲོལ་བ་ལའང་བརྩོན་ལ་སེམས་ཅན་གྱི་འདུ་ཤེས་ཐམས་ཅད་ཀྱང་མེད་པ་ཡིན། ཆོས་ཀྱི་དབྱིངས་ཐམས་ཅད་ཀྱང་ཡེ་ཤེས་ཀྱི་སྤྱོད་ཡུལ་དུ་གྱུར་ལ་ཆོས་ཐམས་ཅད་ཀྱིས་སྙེམས་པའི་སེམས་ཀྱང་མེད་པ་ཡིན། སངས་རྒྱས་ཐམས་ཅད་བལྟ་བས་ཀྱང་མི་ངོམས་ལ། སངས་རྒྱས་ཐམས་ཅད་ལ་བལྟ་བའི་གནས་ཀྱང་ཡོངས་སུ་བསྩལ་བ་ཡིན།

---

^{[མ་དཔེ་གཟིགས་ན་འདིར་གནོན།]}

ཏིང་ངེ་འཛིན་གྱི་རྣམ་པ་ཐམས་ཅད་ལ་མཁས་པར་བྱ་བའང་ཁོང་དུ་ཆུད་ལ། ཆོས་ཐམས་ཅད་ཀྱི་དེ་བཞིན་ཉིད་ཁོང་དུ་ཆུད་པས་ཆགས་པ་ཡང་མེད་པ་ཡིན། ཆོས་ཀྱི་ཚིག་རྣམ་པར་ཤེས་པ་མཐའ་ཡས་པའི་སྤོབས་པ་དང་ཡང་ལྡན་ལ་ཚིག་མེད་ཅིང་ཡི་གེ་མེད་པ་ཡང་ཁོང་དུ་ཆུད་པ་ཡིན། བརྗོད་དུ་མེད་པ་ལའང་ཤིན་ཏུ་སྤྱོད་ལ། དབྱངས་ཀྱི་ཡན་ལག་རྣམ་པར་དག་པ་དང་ཡང་ལྡན་པ་ཡིན། ཆོས་ཐམས་ཅད་ཀྱིའང་མཐར་ཕྱིན་ལ་གཟུགས་སྣ་ཚོགས་ཀྱིས་འདུལ་བ་རྣམས་ཀྱང་ཡུལ་དུ་བྱེད་པ་ཡིན། ཆོས་ཐམས་ཅད་ཀྱི་རང་བཞིན་གྱི་མཐར་ཡང་རབ་ཏུ་ཐུག་ལ་སྙིང་རྗེ་ཆེན་པོས་སེམས་ཅན་གྱི་ཁམས་ཐམས་ཅད་ཡོངས་སུ་དགྲོལ་ཞིང་གདུལ་བ་ལ་ཡང་རབ་ཏུ་བརྩོན་པ་ཡིན། སེམས་ཅན་གྱི་ཁམས་འཕེལ་བ་དང་། འགྲིབ་པ་མེད་པའང་རབ་ཏུ་ཤེས་ལ་ཆོས་ཀྱི་དབྱིངས་ཀུན་ཏུ་ཁྱབ་པ་ཁོང་དུ་ཆུད་པ་ལས་ཀྱང་མི་གཡོ་བ་ཡིན། འགྲོ་བ་ཐམས་ཅད་གདུལ་བ་ཡང་རྒྱུན་མི་གཅོད་ལ་དེ་བཞིན་གཤེགས་པའི་སྤྱོད་པ་འཁོར་གསུམ་ཡོངས་སུ་དག་པ་ཡང་ཁོང་དུ་ཆུད་པ་ཡིན། ཆོས་རྣམ་པ་སྣ་ཚོགས་ལའང་རྣམ་པར་མི་རྟོག་ལ་བསྟན་པ་སྣ་ཚོགས་ལ་འཇིགས་པ་མེད་པས་ཆོས་བསྟན་པའི་ཆོས་ཀྱི་འཁོར་ལོ་ཡང་རྒྱུན་མི་ཆད་པ་ཡིན། ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་ཆོས་ཀྱི་དབྱིངས་ལ་དབང་བསྒྱུར་བ་ཞེས་བྱ་བ་སྟེ་དགུ་པའོ། །ཀྱེ་རྒྱལ་བའི་སྲས་དག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཏིང་ངེ་འཛིན་རྒྱ་ཆེན་པོ་ལ་མཁས་པའི་ཡེ་ཤེས་བཅུ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་ཏིང་ངེ་འཛིན་ཆགས་པ་མེད་ཅིང་དྲི་མ་མེད་པ་ཞེས་བྱ་བ་ལ་སྙོམས་པར་འཇུག་སྟེ། ཏིང་ངེ་འཛིན་དེ་ལ་སྙོམས་

---

^{[མ་དཔེ་གཟིགས་ན་འདིར་གནོན།]}

པར་ཞུགས་པའི་ཚེ་ལུས་ཀྱི་ལས་ཆགས་པ་མེད་པར་ཡང་དག་པར་གནས་སོ། །ངག་གི་ལས་ཆགས་པ་མེད་པར་ཡང་དག་པར་གནས་སོ། །ཡིད་ཀྱི་ལས་ཆགས་པ་མེད་པར་ཡང་དག་པར་གནས་སོ། །སངས་རྒྱས་ཀྱི་ཞིང་མཉམ་པ་ཉིད་ཆགས་པ་མེད་པར་ཡང་དག་པར་གནས་སོ། །སེམས་ཅན་ཡོངས་སུ་སྨིན་པར་བྱ་བའི་ཡེ་ཤེས་ཆགས་པ་མེད་པ་ལ་ཡང་དག་པར་འཇུག་གོ །སེམས་ཅན་འདུལ་བའི་ཡེ་ཤེས་ཆགས་པ་མེད་པར་ཡང་དག་པར་གནས་སོ། །འོད་གཟེར་ཀུན་ཏུ་དགྱེ་བ་ཆགས་པ་མེད་པ་རབ་ཏུ་འགྱེད་དོ། །འོད་ཀྱི་དཀྱིལ་འཁོར་ཆགས་པ་མེད་པ་རབ་ཏུ་གཏོང་ངོ་། །སྤྲུལ་པ་མང་པོ་ཆགས་པ་མེད་པ་རབ་ཏུ་འགྱེད་དོ། །ཆོས་ཀྱི་འཁོར་ལོ་ཆགས་པ་མེད་པ་རབ་ཏུ་སྐོར་རོ། །བྱང་ཆུབ་སེམས་དཔའི་ཁྱུ་མཆོག་གི་མཐུ་ཕྱུང་བའང་རབ་ཏུ་ཐོབ་པར་བྱེད་དོ། །སངས་རྒྱས་ཀྱི་སྟོབས་རྣམས་ལའང་ཡང་དག་པར་འཇུག་གོ །སངས་རྒྱས་ཀྱི་ཡེ་ཤེས་ཀྱང་རབ་ཏུ་འཐོབ་པར་བྱེད་དོ། །སངས་རྒྱས་ཀྱི་བཞེངས་པས་རྣམ་པར་ལྡང་ངོ་། །སངས་རྒྱས་ཀྱི་རྣམ་པར་འཕྲུལ་བ་སྣང་བས་ཉེ་བར་སྤྱོད་དོ། །བྱང་ཆུབ་སེམས་དཔའི་དེ་ཏིང་ངེ་འཛིན་འདི་ལ་གནས་པའི་ཚེ་ཐམས་ཅད་མཁྱེན་པ་ཉིད་ལ་རབ་ཏུ་རྟོག་གོ །ཐམས་ཅད་མཁྱེན་པ་ཉིད་ལ་ཡོངས་སུ་ལྟའོ། །ཐམས་ཅད་མཁྱེན་པ་ཉིད་ཁོང་དུ་ཆུད་པར་བྱེད་དོ། །ཐམས་ཅད་མཁྱེན་པ་ཉིད་རྟོགས་པར་བྱེད་དོ། །ཐམས་ཅད་མཁྱེན་པ་ཉིད་དམིགས་པར་བྱེད་དོ། །ཐམས་ཅད་མཁྱེན་པ་ཉིད་ལ་རབ་ཏུ་ལྟའོ། །ཐམས་ཅད་མཁྱེན་པ་ཉིད་ལ་རྗེས་སུ་ལྟའོ། །ཐམས་ཅད་མཁྱེན་པ་ཉིད་ལ་རྣམ་པར་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་ཆེན་པོ་དང་། བྱང་ཆུབ་སེམས་དཔའི་

---

^{[མ་དཔེ་གཟིགས་ན་འདིར་གནོན།]}

སེམས་ཆེན་པོ་དང་། བྱང་ཆུབ་སེམས་དཔའི་སྤྱོད་པ་ཆེན་པོ་དང་། བྱང་ཆུབ་སེམས་དཔའི་ཁོང་དུ་ཆུད་པ་ཆེན་པོ་དང་། བྱང་ཆུབ་སེམས་དཔའི་རྟོགས་པ་ཆེན་པོ་དང་། བྱང་ཆུབ་སེམས་དཔའི་སྣང་བ་ཆེན་པོ་དང་། བྱང་ཆུབ་སེམས་དཔའི་སྐྱེ་བ་ཆེན་པོ་དང་། བྱང་ཆུབ་སེམས་དཔའི་བྱིན་གྱི་རླབས་ཆེན་པོ་དང་། བྱང་ཆུབ་སེམས་དཔའི་སྤྲུལ་པ་ཆེན་པོ་དང་། བྱང་ཆུབ་སེམས་དཔའི་རྒྱུན་ཆེན་པོ་ཡོངས་སུ་མི་གཅོད་དོ། །ལྡོག་པར་མི་བྱེད་དོ། །སྐྱོ་བར་མི་བྱེད་དོ། །གཏོང་བར་མི་བྱེད་དོ། །འགྱེད་པར་མི་བྱེད་དོ། །སྒྱིད་ལུག་པར་མི་བྱེད་དོ། །གཞོག་པར་མི་བྱེད་དོ། །བྱང་ཆུབ་སེམས་དཔའི་རྒྱུན་མཐར་འབྱིན་པར་མི་བྱེད་དོ། །དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའི་ཆོས་ལ་སྨོན་ལམ་ཆེན་པོས་རབ་ཏུ་གྲུབ་པ་དང་། ཡང་དག་པར་འཇུག་པའི་འབྱུང་གནས་ཆེན་པོ་དང་། འཇིགས་པ་མེད་པའི་སངས་རྒྱས་ཀྱི་ཆོས་རྒྱ་མཚོ་ཆེན་པོ་ཤིན་ཏུ་བསླབས་པས་བྱང་ཆུབ་སེམས་དཔའི་སྨོན་ལམ་ཁྱད་པར་དུ་འཕགས་པ་དང་ལྡན་པའི་ཕྱིར་རོ། །བྱང་ཆུབ་སེམས་དཔའི་སྤྱོད་པ་ཁྱད་པར་དང་ལྡན་པའི་ཕྱིར་རོ། །ཐབས་མཁས་པའི་ཡེ་ཤེས་སྣང་བ་ལ་ཤིན་ཏུ་བསླབ་པའི་ཕྱིར་རོ། །བྱང་ཆུབ་སེམས་དཔའི་སྤྲུལ་པ་ཡོངས་སུ་ཤེས་པའི་ཕྱིར་རོ། །སེམས་ཅན་ཐམས་ཅད་ཀྱི་གཙོ་བོས་བྱིན་གྱིས་བརླབ་པའི་ཕྱིར་རོ། །འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱི། ཐུགས་རྗེ་ཆེན་པོའི་རྗེས་སུ་སྙེགས་པའི་ཕྱིར་རོ། །སངས་རྒྱས་ཀྱི་ཆོས་འགྱུར་བ་མེད་པ་ཡོངས་སུ་བསྒྲུབ་པའི་ཕྱིར་རོ། །དེ་ཅིའི་ཕྱིར་ཞེ་ན། འདི་ལྟ་སྟེ་དཔེར་ན། མི་ལ་ལ་ཞིག་གིས་ནོར་བུ་རིན་པོ་ཆེ་སྣ་ཚོགས་ཚོན་གྱིས་བསྒྱུར་བའི་གོས་ཀྱི་སྟེང་དུ་བཞག་ན། ནོར་བུ་རིན་པོ་ཆེ་དེ་ཡང་ཁོང་ནས་ཚོན་གྱིས་གྱུར་པར་སྣང་སྟེ།

---

^{[མ་དཔེ་གཟིགས་ན་འདིར་གནོན།]}

ནོར་བུ་རིན་པོ་ཆེའི་རང་བཞིན་ནི་འགྱུར་བ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་ཏིང་ངེ་འཛིན་རིན་པོ་ཆེ་ཐོབ་པའི་ཡེ་ཤེས་ཀྱི་སྒོས་ཐམས་ཅད་མཁྱེན་པ་ཉིད་ལ་ཡོངས་སུ་ལྟ་ཞིང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའང་རྒྱུན་མི་གཅོད་དོ། །ཇི་ལྟར་ནོར་བུ་རིན་པོ་ཆེ་དེ་ཁ་དོག་ཐམས་ཅད་སྟོན་ཀྱང་ནོར་བུའི་རང་བཞིན་ཡོངས་སུ་མི་སྤོང་བ་དེ་བཞིན་དུ། བྱང་ཆུབ་སེམས་དཔའ་ཡང་བྱང་ཆུབ་སེམས་དཔའི་སྤྱོད་པའི་རང་བཞིན་ཐམས་ཅད་མཁྱེན་པའི་ཡོན་ཏན་ཅན་ཡོངས་སུ་མི་སྤང་ངོ་། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེ་ནི་འགྲོ་བ་ཐམས་ཅད་ཀྱི་དོན་དུ་ཡང་དག་པར་ཞུགས་པའི་ཕྱིར་རོ། །འགྲོ་བ་ཐམས་ཅད་དགྲོལ་བར་སྨོན་པའི་ཕྱིར་རོ། །སངས་རྒྱས་ཐམས་ཅད་མཉེས་པར་བྱེད་པ་ལས་ཕྱིར་མི་ལྡོག་པའི་ཕྱིར་རོ། །འཇིག་རྟེན་གྱི་ཁམས་ཐམས་ཅད་རྣམ་པར་སྤྱོད་པས་སྒྱིད་ལུག་པ་མེད་པའི་ཕྱིར་རོ། །འགྲོ་བ་ཐམས་ཅད་དུ་རྒྱུན་མི་ཆད་པར་སྤྱོད་པས་སྐྱོ་བ་མེད་པའི་ཕྱིར་རོ། །ཆོས་རྒྱ་མཚོ་མཐའ་དང་དབུས་མེད་ཅིང་ཚད་མེད་པས་ཡོངས་སུ་ཡི་ཆད་པ་མེད་པའི་ཕྱིར་རོ། །སེམས་ཅན་རྣམ་པར་དག་པར་བྱ་བའི་དམིགས་པས་རྣམ་པར་འཕེལ་བ་ཐམས་ཅད་སྟོན་པའི་ལས་ཕྱིར་འགྱེད་པ་མེད་པའི་ཕྱིར་རོ། །འགྲོ་བ་ཐམས་ཅད་ལ་རིམ་གྲོ་བྱ་བས་སྙོམ་པ་མེད་ཅིང་སྒྱིད་ལུག་པ་མེད་པའི་ཕྱིར་རོ། །འགྲོ་བ་ཐམས་ཅད་སྣང་བར་བྱ་བས་སྐྱོ་བ་མེད་པའི་ཕྱིར་རོ། །ཆོས་ཀྱི་སྒོ་མཐའ་ཡས་པ་ལ་འཇུག་པ་ལས་ཕྱིར་མི་ལྡོག་ཅིང་ཡོངས་སུ་སྐྱོ་བ་མེད་པའི་ཕྱིར་རོ། །འདི་ལྟ་སྟེ་དཔེར་ན། ནམ་མཁའི་རང་བཞིན་ནི་འཇིག་རྟེན་གྱི་ཁམས་ཐམས་ཅད་ཡོངས་སུ་འཛིན་ཅིང་རྟེན་ཀྱང་ངལ་བ་མེད་ཅིང་དུབ་པ་མེད་ལ་ཉམ་ཆུང་བར་མི་འགྱུར་ཞིང་དགའ་བར་མི་འགྱུར།

---

^{[མ་དཔེ་གཟིགས་ན་འདིར་གནོན།]}

འཇིག་པར་མི་འགྱུར་འགྱེས་པར་མི་འགྱུར། བྱང་བར་མི་འགྱུར། རྣམ་པ་ཐ་དད་པར་མི་འགྱུར། རྣམ་པ་གཞན་དུ་མི་འགྱུར། དངོས་པོ་གཞན་དུ་མི་འགྱུར། རང་བཞིན་རྣམ་པར་མི་སྤོང་ངོ་། །དེ་ཅིའི་ཕྱིར་ཞེ་ན། དེ་ནི་ནམ་མཁའི་རང་བཞིན་ཆོས་ཉིད་ཀྱི་ངོ་བོ་ཉིད་ཀྱི་ཕྱིར་རོ། །དེ་བཞིན་དུ་བྱང་ཆུབ་སེམས་དཔའ་ཡང་སྨོན་ལམ་ཆེན་པོ་རྒྱ་ཆེ་ཞིང་ཡངས་ལ་ཚད་མེད་པ་དང་ལྡན་པས་སེམས་ཅན་ཐམས་ཅད་དགྲོལ་བ་ལ་ཉེ་བར་གནས་པའི་སྒོས་སྐྱོ་ཞིང་དུབ་པའི་སེམས་མི་སྐྱེད་དོ། །འདི་ལྟ་སྟེ་དཔེར་ན། མྱ་ངན་ལས་འདས་པ་ནི་དུས་གསུམ་གྱི་སེམས་ཅན་མཐའ་དང་དབུས་མེད་པ་དེ་སྙེད་ཅིག་ཡོངས་སུ་མྱ་ངན་ལས་ཟློ་ཡང་བར་འགའ་ཙམ་ཡང་སྐྱོ་བ་མེད་ཅིང་སྒྱིད་ལུག་པ་མེད་དེ་ཡོངས་སུ་ཡི་ཆད་པ་མེད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། མྱ་ངན་ལས་འདས་པའི་མཐར་ཐུག་པ་འདི་ནི་ཆོས་ཐམས་ཅད་ཀྱི་དབེན་པ་ཉིད་དེ་དེ་བས་ན་གང་ལས་ཀྱང་ཕྱིར་ནུར་བར་བྱ་བ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་འགྲོ་བ་ཐམས་ཅད་གདོན་པའི་ཕྱིར་འཇིག་རྟེན་དུ་སྐྱེས་པས་སེམས་ཅན་ཐམས་ཅད་ཡོངས་སུ་དགྲོལ་བ་ལ་སྐྱོ་བའི་སེམས་མི་སྐྱེད་དོ། །འདི་ལྟ་སྟེ་དཔེར་ན། ཐམས་ཅད་མཁྱེན་པ་ཉིད་ལ་བྱང་ཆུབ་སེམས་དཔའ་དེ་སྙེད་ཅིག་བྱང་ཆུབ་ཀྱི་དོན་དུ་གནས་ཀྱང་སྐྱོ་བ་དང་དུབ་པ་མེད་དེ། འདས་པ་དང་མ་འོངས་པ་དང་། ད་ལྟར་བྱུང་བ་རྣམས་སངས་རྒྱས་ཀྱི་མངའ་བསྒྱུར་བ་ལ་བསྒྲུབས་སོ། །བསྒྲུབ་པོ། །བསྒྲུབ་པར་འགྱུར་རོ། །དེ་ཅིའི་ཕྱིར་ཞེ་ན། དེ་ནི་ཟད་པ་མེད་པའི་ཆོས་ཉིད་ཐོབ་པའི་ཕྱིར་ཏེ། དེ་ལས་གཞན་དུ་འགྱུར་བ་མེད་ཅིང་འདུལ་བའི་ཆོས་ལ་མངོན་པར་ཆགས་པ་མེད་པས་ཕྱིར་ནུར་བ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་ཐམས་ཅད་མཁྱེན་པ་ཉིད་ཀྱི་ཏིང་ངེ་འཛིན་མང་པོ་བདག་གིས་ཐོབ་པར་བྱེད་ཅིང་ཁོང་དུ་ཆུད་པར་བྱེད་དོ། །

---

^{[མ་དཔེ་གཟིགས་ན་འདིར་གནོན།]}

དེ་ལྟར་བྱང་ཆུབ་སེམས་དཔའ་དེའི་ཏིང་ངེ་འཛིན་དེ་ནི་འོད་ཕྱོགས་ཐམས་ཅད་ཀྱི་མཐས་ཀླས་པར་འདལ་བ། འཇིག་རྟེན་གྱི་ཁམས་ཐམས་ཅད་དུ་འོད་གཟེར་ཐོགས་པ་མེད་པ། ཡོན་ཏན་སྣ་ཚོགས་དུ་མའི་སྙིང་པོ་ཅན་གོས་བརྗོད་དུ་མེད་པ་ཡོངས་སུ་འབྱུང་བ་རིན་པོ་ཆེ་བརྗོད་དུ་མེད་པ་ཡོངས་སུ་འབྱུང་བ། སྤོས་བརྗོད་དུ་མེད་པ་ཡོངས་སུ་འབྱུང་བ་རྒྱན་དང་། ལྷབ་ལྷུབ་དུ་མ་དང་ལྡན་པ། གསེར་གྱི་དྲ་བ་རྒྱ་ཆེན་པོས་ཀུན་ནས་ཡོག་པ། དྲིལ་བུའི་དྲ་བའི་སྒྲ་ཀུན་ནས་འབྱུང་བ། བལྟ་ན་བཟང་ཞིང་ཡིད་དུ་འོང་བ། རིན་པོ་ཆེ་སྣ་ཚོགས་བརྗོད་དུ་མེད་པའི་མཛོད་དང་ལྡན་པ། རིན་པོ་ཆེ་སྣ་ཚོགས་མང་པོ་སྟོན་པས་དག་ཅིང་བཟང་བར་སྤྱོད་པ་གནས་ཤིན་ཏུ་བརྟན་པ། ཐམས་ཅད་མཁྱེན་པ་ཉིད་ཀྱི་སྒོ་སྟོན་པའི་ཡོན་ཏན་ཅན། དེ་བཞིན་གཤེགས་པ་མང་པོས་བྱིན་གྱིས་རླབས་པ། དགེ་བའི་རྩ་བ་དག་པ་ཐམས་ཅད་ཀྱིས་ཡང་དག་པར་བྱུང་བས་རྣམ་པར་སྣང་བ་དེ་བཞིན་གཤེགས་པ་ཐམས་ཅད་ཀྱི་དཔལ་གྱི་བྱིན་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ལས་བྱུང་བ། ལུས་གཅིག་ཏུ་གནས་ཀྱང་ཕྱོགས་བཅུ་བརྗོད་དུ་མེད་ཅིང་ཚད་མེད་པར་བྱང་ཆུབ་སེམས་དཔའ་འབྱུང་བའི་གོ་འཕང་དང་ཡོན་ཏན་ཚད་མེད་པ་གྲངས་མེད་པ་བརྒྱ་སྟོང་རྣམ་པར་དག་པ་ཕུན་སུམ་ཚོགས་པ་ཐམས་ཅད་མཁྱེན་པ་ཉིད་དུ་མཐུན་ཞིང་གནས་སུ་གྱུར་པ། སངས་རྒྱས་ཐམས་ཅད་མཁྱེན་པ་ཉིད་དུ་མཐུན་ཞིང་གནས་སུ་གྱུར་པས། སངས་རྒྱས་ཐམས་ཅད་ཀྱི་སྣང་བ་འབྱུང་བར་བྱེད་པ། འགྲོ་བ་ཐམས་ཅད་ཀྱི་མཆོད་རྟེན་དུ་གྱུར་པ། འཇིག་རྟེན་ཐམས་ཅད་ཀྱིས་ཕྱག་བྱ་ཞིང་མདུན་དུ་བྱ་བར་འོས་པ། ཆོས་ཉིད་སྒྱུ་མ་ལྟ་བུའི་མཐུན་པའི་འབྲས་བུ་སྤྲུལ་པ་ཀུན་ཏུ་འགྱེད་པ། འགྲོ་བ་ཐམས་ཅད་ཀྱི་དཔེ་དང་དཔེ་མེད་པའི་ཡོན་ཏན་

---

^{[མ་དཔེ་གཟིགས་ན་འདིར་གནོན།]}

ཅན་ཏེ། དེ་ལ་གནས་པའི་ཚེ། བྱང་ཆུབ་སེམས་དཔའ་སྐྱིལ་མོ་ཀྲུང་གཅིག་ཏུ་གནས་ཤིང་དེའི་བདག་ཉིད་ཡོངས་སུ་རྫོགས་པར་བྱེད་པའི་ཚེ། འཇིག་རྟེན་གྱི་ཁམས་ཐམས་ཅད་མ་ལུས་པར་བྱང་ཆུབ་སེམས་དཔའི་སྐྱིལ་མོ་ཀྲུང་གཅིག་གིས་ཡོངས་སུ་ཁྱབ་པར་འགྱུར་ཏེ། སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་སྟེ། དེ་ལྟར་གནས་པའི་ཚེ། བ་སྤུའི་ཁུང་བུ་གཅིག་ནས་ཀྱང་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འོད་གཟེར་འབྱུང་སྟེ། བ་སྤུའི་ཁུང་བུ་གཅིག་ནས་ཇི་ལྟ་བ་དེ་བཞིན་དུ་བ་སྤུའི་ཁུང་བུ་ཐམས་ཅད་ནས་ཀྱང་འོད་གཟེར་དེ་སྙེད་དེ་སྙེད་འབྱུང་ངོ་། །འོད་ཟེར་གྱི་སྒོ་དེ་དག་རེ་རེ་ལས་ཀྱང་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་ནོར་བུ་རིན་པོ་ཆེ་རྣམ་པར་སྣང་བའི་སྙིང་པོ་ཅན་ཁ་དོག་དུ་མར་སྣང་བ། རྒྱན་སྣ་ཚོགས་དང་ལྡན་པ། ཡོན་ཏན་གྱི་རྣམ་པ་དུ་མ་དང་ལྡན་པ། རིན་པོ་ཆེའི་དྲ་བ་རྒྱ་ཆེན་པོས་ཀུན་ནས་ཁེབས་པ། མེ་ཏོག་གི་དྲ་བ་རྒྱ་ཆེན་པོས་ཡོངས་སུ་ཁེབས་པ། སྤོས་རིན་པོ་ཆེ་ཁྲག་ཁྲིག་བརྒྱ་སྟོང་ཀུན་ཏུ་གཏོང་བ། རིན་པོ་ཆེའི་རྒྱན་ཡིད་དུ་འོང་བ་སྣ་ཚོགས་ཀྱི་སྙིང་པོ་ཅན། རིན་པོ་ཆེའི་གདུགས་བསམ་གྱིས་མི་ཁྱབ་པས་བཀབ་པ་འབྱུང་སྟེ། རིན་པོ་ཆེ་དེ་དག་རེ་རེ་ལས་ཀྱང་ཁང་པ་བརྩེགས་པ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ་། །ཁང་པ་བརྩེགས་པ་དེ་དག་རེ་རེ་ལས་ཀྱང་སེང་གེའི་ཁྲི་པད་མོའི་སྙིང་པོ་ཅན་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ་། །སེང་གེའི་ཁྲི་པད་མོའི་སྙིང་པོ་ཅན་དེ་དག་རེ་རེ་ལས་ཀྱང་འོད་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ་། །

---

^{[མ་དཔེ་གཟིགས་ན་འདིར་གནོན།]}

འོད་དེ་དག་རེ་རེ་ལས་ཀྱང་ཁ་དོག་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་འབྱུང་ངོ་། །ཁ་དོག་དེ་དག་རེ་རེ་ལས་ཀྱང་སྣང་བའི་དཀྱིལ་འཁོར་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ་། །སྣང་བའི་དཀྱིལ་འཁོར་དེ་དག་རེ་རེ་ལས་ཀྱང་ནོར་བུ་རིན་པོ་ཆེ་རྣམ་པར་སྣང་བ་སྣ་ཚོགས་ཀྱི་མེ་ཏོག་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ་། །མེ་ཏོག་དེ་དག་རེ་རེ་ལས་ཀྱང་རིན་པོ་ཆེ་ཐམས་ཅད་ཀྱི་རྒྱན་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ་། །རྒྱན་དེ་དག་རེ་རེ་ལས་ཀྱང་ཁྱུ་མཆོག་གི་མཐུ་ཕྱུང་བ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་འབྱུང་ངོ་། །ཁྱུ་མཆོག་གི་མཐུ་ཕྱུང་བ་དེ་དག་རེ་རེ་ལས་ཀྱང་སངས་རྒྱས་ཀྱི་ཆོས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་ཆར་རབ་ཏུ་འབབ་བོ། །ཆོས་ཀྱི་ཚིག་རྣམ་པར་ཕྱེ་བའི་ཆར་དེ་དག་ལས་ཀྱང་ཆོས་ཁོང་དུ་ཆུད་པར་བྱ་བའི་མདོའི་ཚུལ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་བརྗོད་དོ། །མདོའི་ཚུལ་ཡོངས་སུ་བརྗོད་པ་དེ་དག་རེ་རེ་ལས་ཀྱང་ཆོས་ཀྱི་སྒོ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་སྟོན་ཏོ། །ཆོས་ཀྱི་སྒོ་རབ་ཏུ་བསྟན་པ་དེ་དག་རེ་རེ་ཞིང་ཡང་ཡེ་ཤེས་རྡོ་རྗེ་ལྟ་བུས་གཏན་ལ་ཕབས་པའི་ཆོས་ཀྱི་འཁོར་ལོ་ཆོས་ཀྱི་རྣམ་གྲངས་སྣ་ཚོགས་དང་ལྡན་པ་བསྟན་པ་རྒྱ་ཆེན་པོ་ཅན་ཆོས་ཀྱི་ཚིག་རྣམ་པ་ཐ་དད་པ་དང་ལྡན་པར་འཁོར་བ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་

---

^{[མ་དཔེ་གཟིགས་ན་འདིར་གནོན།]}

སྙེད་རབ་ཏུ་སྐོར་རོ། །ཆོས་ཀྱི་འཁོར་ལོ་བསྐོར་བ་དེ་དག་རེ་རེ་ཞིང་ཡང་སེམས་ཅན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྨིན་པར་བྱེད་དོ། །སེམས་ཅན་གྱི་ཁམས་ཡོངས་སུ་སྨིན་པར་བྱ་བ་འབྱམ་ཀླས་པ་དེ་དག་རེ་རེ་ཞིང་ཡང་སེམས་ཅན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་སངས་རྒྱས་ཀྱི་ཆོས་ལ་འདུལ་ཏེ། དེ་ལྟར་སྙོམས་པར་ཞུགས་ཤིང་རྣམ་པར་འཕྲུལ་པ་རྒྱ་ཆེན་པོ་སྟོན་པ། ཏིང་ངེ་འཛིན་གྱི་ཡུལ་ཟིལ་གྱིས་མྱི་ནོན་པ། སྤྲུལ་པའི་སྒྱུ་མ་སྣ་ཚོགས་ལ་མངོན་པར་ཞེན་པ་མེད་པ། རང་བཞིན་ཚད་མེད་པ་མཐའ་དང་དབུས་མེད་པ་བརྗོད་དུ་མེད་པ་དང་ལྡན་པ། ཆོས་ཀྱི་དབྱིངས་རྡུལ་མེད་པའི་རང་བཞིན་ཅན་ཡང་དག་པའི་མཐའི་མཚན་ཉིད་ཅན། དེ་བཞིན་གཤེགས་པའི་རིགས་ལ་སྤྱོད་པ། ཆགས་པ་མེད་པའི་མཐར་ཐུག་པ། གནས་མེད་པ། ལེན་པ་མེད་པ། རྩ་བ་མེད་པ། ཟབ་པ། གཏིང་དཔག་དཀའ་བ། མངོན་སུམ་དུ་ཁོང་དུ་ཆུད་པས་རབ་ཏུ་རྟོགས་པ་ཚད་མེད་པ་རྨོངས་པ་མེད་པ། གཞི་མེད་པ། ཆོས་ཀྱི་དབྱིངས་ཀྱི་གནས་གཞི་མེད་པ་དང་ལྡན་པ། འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱིས་བསྔགས་པ། དེ་བཞིན་གཤེགས་པའི་སྟོབས་དང་རྒྱུ་མཐུན་པའི་འབྲས་བུ་ཅན། སངས་རྒྱས་ཀྱི་ཡུལ་གྱི་རྗེས་སུ་སྙེགས་པ། བྱང་ཆུབ་སེམས་དཔའི་ཚེ་གཅིག་པའི་མངོན་སུམ་དུ་གྱུར་པ། བྱང་ཆུབ་སེམས་དཔའི་མིག་རྡུལ་མེད་པ་དང་ལྡན་པ། ཤེས་རབ་ཀྱི་མིག་ཀུན་ཏུ་སྤྱོད་པ་ཅན། ཤའི་མིག་རྡུལ་དང་བྲལ་ཞིང་རྡུལ་མེད་པར་ཡང་དག་པར་སྐྱེས་པ། སངས་རྒྱས་ཀྱི་སྤྱན་ཀུན་ཏུ་སྣང་བ་ཅན། ཡེ་ཤེས་ཀྱི་མིག་ཞེས་བྱ་བའི་དོན་གྱི་ཡུལ་དང་། རྣམ་པ་རབ་ཏུ་སྟོན་པ་ཅན་ཆོས་ཀྱི་སྒོ་འབྱེད་པའི་སྐྱེས་བུ་དམ་པ་ཡང་དག་པར་ཞུགས་པའི་བྱང་ཆུབ་ཀྱི་སེམས་ཡོངས་

---

^{[མ་དཔེ་གཟིགས་ན་འདིར་གནོན།]}

སུ་རྫོགས་པ། ཡུལ་ལ་ཐོགས་པ་མེད་པ། ཡེ་ཤེས་ཀྱི་རྣམ་པའི་འབྱུང་གནས་སུ་གྱུར་པ། འཇིག་རྟེན་ཐམས་ཅད་ལས་མངོན་པར་འཕགས་པ། སྐྱེ་བ་མེད་པ་ཡང་དག་པར་བྱུང་བ། རྣམ་པར་འཕྲུལ་པས་སྐྱེ་བ་ཀུན་ཏུ་སྟོན་པ། བྱིན་གྱི་རླབས་ཀྱི་ཡུལ་ལ་མཁས་པ། ཡོན་ཏན་མཆོག་གིས་རྣམ་པར་དག་པ། བསམ་པ་འོད་གསལ་བའི་སྙིང་པོ་ཅན། མོས་པ་ཤིན་ཏུ་དག་པས་ཡེ་ཤེས་ནམ་མཁའི་དབྱིངས་ཀུན་ནས་ཁེབས་པ་དང་ལྡན་པ། འཕགས་པའི་ཚོགས་ཀྱིས་བལྟ་བར་འོས་པ། སྨོན་ལམ་མངོན་དུ་གྱུར་པ། འདོད་པ་ཡོངས་སུ་རྫོགས་པ། ཡོན་ཏན་བསྔགས་པ་ཟད་མི་ཤེས་པ། སངས་རྒྱས་ཐམས་ཅད་ཀྱི་ལྷག་མཐོང་གི་མཛོད་དུ་གྱུར་པ། སངས་རྒྱས་ཀྱི་བྱང་ཆུབ་ཀྱི་འབྱུང་གནས་རྒྱ་མཚོར་གྱུར་པ་ཡེ་ཤེས་རིན་པོ་ཆེ་ཐམས་ཅད་ཀྱིས་ཤིན་ཏུ་བརྒྱན་པ། ཡེ་ཤེས་ཀྱི་སྐྱེས་བུ་པུན་ད་རི་ཀར་བྱུང་བ། སེམས་ཅན་གྱི་དོན་མཐའ་དང་དབུས་མེད་པར་རབ་ཏུ་སྒྲུབ་པ། སངས་རྒྱས་ཀྱི་ཡེ་ཤེས་མུ་མེད་པ་ལ་ཞུགས་པའི་འོད་གཟེར་གྱིས་སྣང་བར་གྱུར་པ། ཡེ་ཤེས་ཀྱི་འོད་ཡོངས་སུ་སྣང་བ། ཆོས་རྣམ་པར་དག་པ་སྣང་བས་ཀུན་ཏུ་སྤྱོད་པ། ཤིན་ཏུ་དབེན་པའི་སྒོར་གྱུར་པ། སངས་རྒྱས་ཀྱི་ཆོས་ཐམས་ཅད་ལ་ཐོགས་པ་མེད་པར་དམིགས་པའི་ཡེ་ཤེས་ཀྱི་མཐར་ཐུག་པ། སངས་རྒྱས་ཐམས་ཅད་ཀྱི་བྱང་ཆུབ་ཀྱི་ཐབས་དང་ལྡན་པ། ཡོན་ཏན་གྱི་སྤྱོད་པ་ལས་བྱུང་བ། སྐྱེས་བུ་དམ་པ་བྱང་ཆུབ་སེམས་དཔའི་ཚུལ་རབ་ཏུ་ཤེས་པ། བྱང་ཆུབ་སེམས་དཔའི་བཅུན་སྤུ་ལ་རབ་ཏུ་གནས་པ། སངས་རྒྱས་ཐམས་ཅད་ཀྱིས་ཡང་དག་པར་དགོངས་པས། རབ་ཏུ་ཞུགས་པ། སངས་རྒྱས་ཀྱི་ཆོས་ཀྱི་སྐུའི་བྱིན་དང་། སྙིང་པོ་ཅན། དྲན་པ་བསམ་གྱིས་མི་ཁྱབ་པ་རྩེ་གཅིག་ཏུ་

---

^{[མ་དཔེ་གཟིགས་ན་འདིར་གནོན།]}

གྱུར་པ། དམིགས་པ་མེད་པའི་ཡུལ་དང་མཚན་མ་སྟོན་པ། ཤིན་ཏུ་ཡངས་པ་ལས་ཡང་དག་པར་བྱུང་བའི་རྒྱུད་ཅན། ཆགས་པ་མེད་པའི་སྤྱོད་ཡུལ་དུ་ཁོང་དུ་ཆུད་པའི་ཆོས་ཀྱི་དབྱིངས་ཀྱིས་བྱང་ཆུབ་ཚད་མེད་པ་ནམ་མཁའི་དབྱིངས་ལྟར་ཡངས་ཤིང་ས་མཚམས་མེད་པའི་སངས་རྒྱས་ཀྱི་ཡུལ་གྱིས་འཇིག་རྟེན་ཐམས་ཅད་དུ། སེམས་ཅན་གྱི་དོན་བྱེད་པ། ཐམས་ཅད་མཁྱེན་པའི་དགེ་བའི་རྩ་བ་དང་། རྒྱུ་མཐུན་པའི་ཡེ་ཤེས་ཚད་མེད་པའི་ཡུལ་རྣམ་པར་ནོན་པ། དག་ཅིང་དྲག་ཤུལ་ཆེ་བའི་ཡེ་ཤེས་ཀྱིས་གྲུབ་པ། བྱང་ཆུབ་སེམས་དཔའི་བསམ་པ་དང་ཡང་དག་པར་འགྲོགས་པ། བྱང་ཆུབ་སེམས་དཔའ་ཐམས་ཅད་ཀྱི་རིགས་དག་པར་བྱེད་པ་དེ་བཞིན་གཤེགས་པའི་བྱང་ཆུབ་ཡིད་དུ་འོང་བ་དང་ལྡན་པ། སངས་རྒྱས་དང་བྱང་ཆུབ་སེམས་དཔའི་ཆོས་ཐམས་ཅད་ཀྱིས་ཁ་ན་མ་ཐོ་བ་མེད་པའི་ཚུལ་ཤིན་ཏུ་ཕྲ་བའི་ཐབས་ཤེས་པ། རྟོགས་པ་རྡོ་རྗེ་ལྟ་བུའི་སྟོབས་དང་མཐུས་བྱུང་བ། སངས་རྒྱས་ཀྱི་བྱིན་གྱི་རླབས་ཀྱིས་རྟོགས་པར་གྱུར་པ། སེམས་ཅན་གྱིས་ཐོས་པར་དཀའ་བ་མི་གཉིས་པའི་སྒོར་ཞུགས་པ། ཆོས་ཀྱི་ཚུལ་མཚན་ཉིད་མེད་པ་ལ་གཞོལ་བ། མཚན་མའི་རྒྱུད་ཀྱི་ཆོས་སྟོན་པ་ཐམས་ཅད་ལས་ཤིན་ཏུ་འཕགས་པ། སེམས་ཅན་བསམ་པ་བཞིན་དུ་འདུལ་བ་ཡང་དག་པར་སྟོན་པ། དད་པ་ཇི་ལྟ་བ་བཞིན་དུ་འགྲོ་བ་ཚིམ་པར་བྱེད་པ། ཆོས་ཀྱི་དབྱིངས་ཐ་མི་དད་པའི་རང་བཞིན་ཅན། ཡེ་ཤེས་མི་ཟད་པའི་ཡུལ་ཤིན་ཏུ་ནོན་པ། བྱང་ཆུབ་སེམས་དཔའི་མཐུ་ཆེན་པོས་བྱུང་བ། བྱང་ཆུབ་སེམས་དཔའི་མཉམ་པ་ཉིད་ཐུབ་པ་མེད་པ་རབ་ཏུ་ཐོབ་པ། དེ་བཞིན་གཤེགས་པ་མཐོང་བའི་ཡོན་ཏན་ལ་འཇུག་པ། ཐམས་ཅད་ཀྱི་མཐའི་རྗེས་སུ་འགྲོ་བ། རྣམ་པར་ཕྱེ་བ་ཐམས་ཅད་ལ་མཁས་པའི་ཡེ་ཤེས་དང་ལྡན་པ། ཆོས་ཀྱི་

---

^{[མ་དཔེ་གཟིགས་ན་འདིར་གནོན།]}

གྲངས་ཡོངས་སུ་སྟོན་པ། ཞིང་ཐམས་ཅད་རྣམ་པར་དམིགས་པར་བྱ་བ་ལ་རབ་ཏུ་གཞོལ་བ། ཞིང་དག་པར་བྱ་བར་དཀའ་བ་ཐམས་ཅད་ཀྱི་རྒྱན་དུ་གྱུར་པ། སངས་རྒྱས་ཀྱི་ཆོས་སྣང་བ་ཐམས་ཅད་ཡང་དག་པར་སྟོན་པ། བྱང་ཆུབ་སེམས་དཔའི་གནས་ཀྱིས་བྱུང་བ་འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱི་ཆོས་རབ་ཏུ་བརྗོད་པ། འཇིག་རྟེན་ཐམས་ཅད་ལ་རྣམ་པར་ལྟ་བ་དགེ་བ་མཐའ་དང་མུ་མེད་པས་ཡང་དག་པར་བྱུང་བ། འཇིག་རྟེན་གྱི་རྩོམ་པ་ཐམས་ཅད་ལས་རྣམ་པར་འདས་པ། སངས་རྒྱས་ཀྱི་འཇིག་རྟེན་ལས་འདས་པས་ཤིན་དུ་བྱུང་བ། མཚུངས་པ་མེད་པ་དང་། འདྲ་བ་མེད་པའི་དབང་གིས་ཤེས་པར་གྱུར་པ། མཁས་པས་ཁོང་དུ་ཆུད་པ། སྐྱེས་བུ་དམ་པས་ཡང་དག་པར་བསུ་བ། མ་བྱོན་པའི་སངས་རྒྱས་ཐམས་ཅད་ཀྱི་རྒྱུད་ཡོངས་སུ་འཛིན་པ། བྱང་ཆུབ་སེམས་དཔའི་དགེ་བའི་བཤེས་གཉེན་གྱིས་བྱུང་བ། ལྷག་པའི་བསམ་པ་རྣམ་པར་དག་པས་འབྲས་བུ་ཡོངས་སུ་གྲུབ་པ། ལྷག་པའི་བསམ་པ་ཆེ་བ་ཉིད་ལ་གནས་པ་རབ་ཏུ་ཐོབ་པ། མཉན་པ་དང་བསྟན་པའི་དགེ་བའི་རྩ་བ་ཐོབ་པར་བྱ་བ་རབ་ཏུ་ཐོབ་པ། ཆོས་ཐམས་ཅད་ལ་ཆགས་པ་མེད་པར་གནས་པའི་མཐའི་དཀྱིལ་འཁོར་དང་ལྡན་པ། གཡོ་བ་མེད་པར་ཀུན་ཏུ་སྤྱོད་པ་རློམ་སེམས་ཐམས་ཅད་རྣམ་པར་འཇིག་པ། གཡོ་བ་ཐམས་ཅད་ལས་ཡང་དག་པར་ལངས་པ། ཆོས་ལ་གནས་པས་ཡེ་ཤེས་རྣམ་པར་སྣང་བ་དང་ལྡན་པ། མུན་པ་མེད་པ་ལ་ཞུགས་པ། སངས་རྒྱས་ཀྱི་ཆོས་ཐམས་ཅད་ལ་ཡང་དག་པར་ཞུགས་པས་སྣང་བ་ཐོབ་པ། འགག་པ་མེད་པར་སྲིད་པ་ཐམས་ཅད་ལས་ཤིན་ཏུ་འཕགས་པ། སྲིད་པ་ཐམས་ཅད་ཁོང་དུ་ཆུད་པ་འདུས་བྱས་ཐམས་ཅད་ཡུལ་དུ་གྱུར་པའི་ཐ་དད་པ་ཡང་དག་པར་ཤེས་པ་དང་

---

^{[མ་དཔེ་གཟིགས་ན་འདིར་གནོན།]}

ལྡན་པ། མངོན་པར་འདུ་བྱ་བ་མེད་པའི་རང་བཞིན་དང་། ངོ་བོ་ཉིད་ཅན་ལུས་ཀྱི་ལས་མཐའ་ཡས་པ་དང་ལྡན་པ། ངག་གི་ལས་མུ་མེད་པ་དང་ལྡན་པ། ཡིད་ཀྱི་ལས་མཐའ་དང་དབུས་མེད་པ་དང་ལྡན་པ། ཐ་སྙད་དང་ཡི་གེའི་རྒྱུད་བརྗོད་དུ་མེད་པ་དང་ལྡན་པ། སངས་རྒྱས་ཀྱི་ཡོན་ཏན་རྒྱ་མཚོ་ལ་ཞུགས་པ། འདུ་ཤེས་ཀྱི་རྣམ་པ་ཐམས་ཅད་ཁོང་དུ་ཆུད་པས་ཆགས་པ་མེད་ཅིང་བཅིངས་པ་མེད་པ་འདུ་ཤེས་ཐམས་ཅད་དང་བྲལ་བའི་ཡུལ་ལ་ཤིན་ཏུ་བསྒོམས་པ། ཆོས་ཀྱི་དབྱིངས་གཟུགས་མེད་པ་ནམ་མཁའི་རང་བཞིན་ལྟ་བུས་ཡང་དག་པར་བྱུང་བ། ཆོས་ཐམས་ཅད་ནམ་མཁའ་ལྟ་བུར་རྣམ་པར་བསྒོམ་པ་ལ་རབ་ཏུ་ཞུགས་པ། ཆོས་ཀྱི་དབྱིངས་བསྟན་པ་ལ་ཡེ་ཤེས་དབང་དུ་གྱུར་པ། ཐམས་ཅད་མཁྱེན་པའི་ཡུལ་མ་འདྲེས་པའི་སྒོ་མངོན་པར་བསྒྲུབས་པ། སྟོབས་བཅུའི་སར་ཤེས་པར་བྱ་བ་ཤིན་ཏུ་བསླབས་པ། ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་སྟེགས་དང་ལྡན་པ། ཆོས་ཐམས་ཅད་ལ་ལྷག་མཐོང་གི་ཡེ་ཤེས་དང་ལྡན་པ། བྱང་ཆུབ་སེམས་དཔའ་ཆོས་དེ་དང་དེ་དག་རྣམ་པར་དགོད་པའི་དོན་ཁོང་དུ་ཆུད་པར་བྱ་བ་ལ་ཡེ་ཤེས་ཀྱི་མིག་གིས་ཞི་གནས་ཀྱིས་ཡང་དག་པར་ནོན་ཅིང་ཡེ་ཤེས་ཆེན་པོ་བསྒོམ་པས་རྣམ་པར་སྣང་བར་གྱུར་པའི་ཁྱད་པར་ཅན་གྱི་སྨོན་ལམ་དང་ལྡན་པ། རབ་ཏུ་སྟོན་པ་སངས་རྒྱས་ཐམས་ཅད་ཀྱི་དེ་བཞིན་གཤེགས་པའི་མཐུ་ཐ་དད་པ་མེད་པ་བསྟན་པ་སྟེ། དེ་ཉིད་ཆགས་པ་མེད་པའི་སྒོའི་ཚུལ་ལོ། །དེ་ཉིད་བྱང་ཆུབ་སེམས་དཔའ་མང་པོའི་འབྱུང་བའོ། །དེ་ཉིད་བྱང་ཆུབ་སེམས་དཔའི་མཐུས་ཐམས་ཅད་མཁྱེན་པའི་བརྩོན་འགྲུས་ལ་འཇུག་པ་སྟེ། ཆགས་པ་མེད་པ་ལ་གནས་པར་བྱ་བའི་ཕྱིར་ཞིང་རྣམས་ཀྱི་ཞིང་ངོ་། །སེམས་ཅན་མེད་པའི་མཐའ་ལ་གནས་པར་བྱ་བའི་ཕྱིར། སེམས་

---

^{[མ་དཔེ་གཟིགས་ན་འདིར་གནོན།]}

ཅན་གྱི་ཁམས་རྣམས་འདུལ་བའོ། །དམིགས་པ་ཐམས་ཅད་མི་དམིགས་པར་བྱ་བའི་ཕྱིར་སངས་རྒྱས་ཀྱི་ཆོས་ཐམས་ཅད་རབ་ཏུ་སྟོན་པའོ། །རྟོག་པ་ཐམས་ཅད་ལས་རབ་ཏུ་དབེན་པར་བྱ་བའི་ཕྱིར་གཉིས་སུ་མེད་པ་ཤིན་ཏུ་སྟོན་པའོ། །གཉིས་སུ་མེད་པའི་དོན་དུ་མངོན་པར་འདུ་བྱ་བ་མེད་པ་ཐམས་ཅད་ཀྱི་མངོན་པར་འདུ་བྱེད་པ་རབ་ཏུ་བརྗོད་པའོ། །གཟུགས་སུ་དམིགས་པ་མེད་ཀྱང་གཟུགས་ཀྱི་གྲངས་སུ་བསྟན་པ་དང་། ཚོར་བའི་ཡུལ་མེད་ཀྱང་ཚོར་བའི་ཡུལ་དུ་བརྗོད་པའི་ཕྱིར་སངས་རྒྱས་ཐམས་ཅད་ཀྱི་བདག་ཉིད་ཆེད་དུ་བརྗོད་པའོ། ། ཕྱིན་ཅི་ལོག་ཐམས་ཅད་ཀྱང་བྱང་ལ་འདུ་ཤེས་ཀྱི་གནས་ཐམས་ཅད་ཀྱང་ཡོངས་སུ་སྟོན་པའོ། །མངོན་པར་འདུ་བྱ་བ་མེད་པར་ཡང་བསྟན་ལ་འདུ་བྱེད་ཐམས་ཅད་ཀྱང་རབ་ཏུ་བརྗོད་པའོ། །འདུ་བྱེད་ཐམས་ཅད་ཀྱང་རྣམ་པར་མི་དམིགས་ལ་ཆོས་ཐམས་ཅད་རྣམ་པར་ཤེས་པར་ཡང་རབ་ཏུ་བརྗོད་པའོ། །ཆོས་ཀྱི་འཁོར་ལོ་ཡང་བྱིན་གྱིས་རློབ་ལ། ཆོས་ཐམས་ཅད་བརྗོད་དུ་མེད་པར་ཡང་རབ་ཏུ་སྟོན་པའོ། །ཆོས་ཐམས་ཅད་ལའང་རྒྱུ་བ་མེད་ལ་ཆོས་ཀྱི་འཁོར་ལོའང་ཤིན་ཏུ་བསྐོར་བའོ། །ཆོས་ཐམས་ཅད་ལའང་རྣམ་པ་ཐ་དད་པ་མེད་པ་ལ་རྣམ་པར་དབྱེ་བ་ཡང་ཡོངས་སུ་སྟོན་པའོ། །ཆོས་ཐམས་ཅད་ལ་སྐྱེ་བ་མེད་པར་ཡང་སྟོན་ལ། གཟུགས་རྣམས་འཇིག་པའི་མཚན་ཉིད་དུའང་བརྗོད་པའོ། །ཆོས་ཐམས་ཅད་ཤིན་ཏུ་ཕྲ་བར་ཡང་ཁོང་དུ་ཆུད་ལ། ཕྲ་བ་རྣམས་ཤིན་ཏུ་ཡངས་པར་ཡང་སྟོན་པའོ། །བླ་ན་མེད་པའི་ཆོས་ཀྱང་སྦྱིན་པར་བྱེད་ལ། གོང་མའི་གོ་འཕང་ཤེས་པར་བྱ་བ་ཡང་རབ་ཏུ་སྟོན་པའོ། །ཆོས་ཐམས་ཅད་བརྗོད་དུ་མེད་པར་ཡང་རྗོད་ལ། བརྗོད་པའི་ཚིག་དང་ཡི་གེའི་རྒྱན་རྣམ་པར་དག་པ་ཡང་རབ་ཏུ་སྟོན་པའོ། །ཕྱི་དང་ནང་གི་ཆོས་

---

^{[མ་དཔེ་གཟིགས་ན་འདིར་གནོན།]}

མེད་པར་བསྟན་པ་ལའང་ཤིན་ཏུ་མཁས་ལ་ཆོས་ཐམས་ཅད་སེམས་མེད་ཅིང་བརྟགས་པའི་རྒྱུད་ཇི་ལྟ་བ་བཞིན་དུའང་རབ་ཏུ་སྟོན་པའོ། །ཡོངས་སུ་འགྲུབ་པ་ཚད་མེད་པས་འབྱུང་བ་ཡང་ཁོང་དུ་ཆུད་ལ། བྱང་བའི་མཐར་ཕྱིན་པས་ཆོས་ཐམས་ཅད་ཟག་པ་ཟད་པར་ཡང་རབ་ཏུ་སྟོན་པའོ། །ཆོས་ཐམས་ཅད་ཉོན་མོངས་པ་མེད་པར་ཁོང་དུ་ཆུད་ལ་རང་བྱུང་གི་འདུ་ཤེས་ཀྱང་རབ་ཏུ་བརྗོད་པའོ། །ཆོས་ཐམས་ཅད་ལ་སློབ་དཔོན་མེད་པ་ཡང་ཤིན་ཏུ་སྟོན་ལ་བླ་མ་ལ་བརྟེན་ཅིང་སྟེན་པར་ཡང་རབ་ཏུ་སྟོན་པའོ། །ཆོས་ཐམས་ཅད་གཞན་གྱི་དྲིང་མི་འཇོག་པར་ཡང་ཤེས་ལ་དགེ་བའི་བཤེས་གཉེན་གྱི་སྤྱོད་ཡུལ་ཡང་རབ་ཏུ་བརྗོད་པའོ། །ཆོས་ཐམས་ཅད་རྒྱུ་བ་མེད་པར་ཡང་བརྗོད་ལ་ཆོས་ཀྱི་འཁོར་ལོ་བསྐོར་བ་ཡང་ཤིན་ཏུ་སྟོན་པའོ། །ཆོས་ཐམས་ཅད་འབྱུང་བ་མེད་པར་ཡང་རབ་ཏུ་ཤེས་ལ། རྒྱུ་ལས་འབྱུང་བའང་ཡོངས་སུ་མི་གཏོང་བའོ། །ཆོས་ཐམས་ཅད་ཐོག་མ་མེད་པར་ཡང་རབ་ཏུ་བརྗོད་ལ་སྔོན་གྱི་མཐའི་མུ་ཡང་རབ་ཏུ་སྦྱོང་བའོ། །ཆོས་ཐམས་ཅད་འོང་བ་མེད་པར་ཡང་ཁོང་དུ་ཆུད་ལ་འོང་བའི་མཐའ་ཡང་རབ་ཏུ་བརྗོད་པའོ། །ཆོས་ཐམས་ཅད་མ་འོངས་པ་དང་། ད་ལྟར་བྱུང་བ་མེད་པར་ཡང་རབ་ཏུ་སྟོན་ལ། ད་ལྟར་བྱུང་བར་ཡང་ཤིན་ཏུ་སྟོན་པའོ། །བྱ་བ་མེད་པའི་ལམ་ཡང་ཡོངས་སུ་བརྗོད་ལ་བྱ་བའི་ལམ་ཡང་ཤིན་ཏུ་སྟོན་པའོ། །ཆོས་ཐམས་ཅད་རྒྱུ་བ་མེད་པར་ཡང་རབ་ཏུ་ཤེས་ལ། རྒྱུ་བསགས་པར་ཡང་རབ་ཏུ་བརྗོད་པའོ། །ཆོས་ཐམས་ཅད་མཉམ་པ་མེད་པར་ཡང་སྟོན་ལ། མཉམ་པ་ཉིད་ཀྱི་ལམ་གྱིས་ལམ་གོས་པའང་རབ་ཏུ་བརྗོད་པའོ། །ཆོས་ཐམས་ཅད་ཚིག་གི་ལམ་དང་བྲལ་བར་ཡང་སྟོན་ལ་དུས་གསུམ་ཤིན་ཏུ་བསྟན་པའང་ཤིན་ཏུ་རྟོགས་པར་བྱེད་པའོ། །ཆོས་ཐམས་ཅད་གནས་པ་མྱེད་པར་

---

^{[མ་དཔེ་གཟིགས་ན་འདིར་གནོན།]}

ཡང་སྟོན་ལ་གནས་ཤིན་ཏུ་གཞོམ་པ་ལ་རབ་ཏུ་མཁས་པའོ། །ཆོས་ཐམས་ཅད་ལུས་མེད་ཀྱང་། འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱི་སྐུ་ཡང་རབ་ཏུ་ཐོབ་པར་བྱེད་པའོ། །འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་ཀྱང་ཤིན་ཏུ་སྟོན་ལ་སངས་རྒྱས་གཅིག་པར་བསྟན་པ་ཡང་རབ་ཏུ་སྟོན་ཏོ། །ཆོས་ཐམས་ཅད་ལ་བརྗོད་པ་མེད་པར་ཡང་ཁོང་དུ་ཆུད་ལ་ཆོས་ཐམས་ཅད་ཡོངས་སུ་བརྗོད་པའང་རབ་ཏུ་སྟོན་ཏོ། །ཆོས་ཐམས་ཅད་བལྟར་མེད་པར་ཡང་སྟོན་ལ་ལྟ་བའང་རབ་ཏུ་བརྗོད་པའོ། །ཆོས་ཐམས་ཅད་ལ་མཐའ་མེད་པར་ཡང་སྟོན་ལ་ཆོས་བསྟན་པའི་རྣམ་པས་ཀྱང་རབ་ཏུ་བརྗོད་པའོ། །ཆོས་ཐམས་ཅད་ལ་ཡུལ་མེད་ཀྱང་ཡེ་ཤེས་ཀྱི་ཡུལ་དུ་རབ་ཏུ་བརྗོད་པའོ། །ཆོས་ཀྱི་རྣམ་གྲངས་ཐམས་ཅད་ཁྱད་པར་མེད་ཀྱང་འབྲས་བུའི་ཁྱད་པར་རྣམ་པར་སྦྱང་བ་རབ་ཏུ་སྟོན་པའོ། །ཆོས་ཐམས་ཅད་ལ་འབྱུང་བ་མེད་ཀྱང་སྤྱོད་པས་འབྱུང་བའི་ཁྱད་པར་རབ་ཏུ་སྟོན་པའོ། །ཆོས་ཐམས་ཅད་ཀུན་ཏུ་ཁྱབ་པ་ཡིན་ཡང་མདོས་ཡོངས་སུ་བརྗོད་པ་ཤིན་ཏུ་སྟོན་པའོ། །ཆོས་ཐམས་ཅད་ལ་སྣང་བ་མེད་ཀྱང་སྣང་བ་ཡོངས་སུ་བརྗོད་པའི་ཕྱིར་རྣམ་པར་སྣང་བར་བྱེད་པ་སྟེ། དེ་ལྟར་རྒྱ་ཆེ་བའི་ཏིང་ངེ་འཛིན་གྱི་ཡེ་ཤེས་ཀྱི་དཀྱིལ་འཁོར་ཆེན་པོ་ལ། བྱང་ཆུབ་སེམས་དཔའ་རྣམས་འཇུག་གོ །ཁོང་དུ་ཆུད་པར་བྱེད་དོ། །ཐོབ་པར་བྱེད་དོ། །རྗེས་སུ་སྙེགས་པར་བྱེད་དོ། །ཤིན་ཏུ་སྒྲུབ་པར་བྱེད་དོ། །ཡོངས་སུ་རྫོགས་པར་བྱེད་དོ། །ཤིན་ཏུ་སྩོགས་སོ། །ཡོངས་སུ་སྦྱོང་ངོ་། །སྙོམས་པར་འཇུག་གོ །ཆོས་ཐམས་ཅད་དེའི་ཆོས་ཉིད་དང་རང་བཞིན་དང་ཡེ་ཤེས་ཀྱི་སྙིང་པོའི་ཚུལ་གྱིས་སངས་རྒྱས་ཐམས་ཅད་ཀྱི་ཆོས་སུ་ཁོང་དུ་ཆུད་པར་

---

^{[མ་དཔེ་གཟིགས་ན་འདིར་གནོན།]}

བྱེད་ཀྱང་། བྱང་ཆུབ་སེམས་དཔའ་དེ་ནི། འདི་སྙམ་དུ་མི་སེམས་ཏེ་བྱང་ཆུབ་སེམས་དཔའ་ནི་འདི་སྙེད་ཅིག་གོ །བྱང་ཆུབ་སེམས་དཔའི་ཆོས་ནི་འདི་སྙེད་ཅིག་གོ །བྱང་ཆུབ་སེམས་དཔའི་མཐར་ཐུག་པ་ནི་འདི་ཙམ་ཞིག་གོ །སྤྲུལ་པའི་བྱིན་གྱི་རླབས་ནི་འདི་ཙམ་ཞིག་གོ །མངོན་པར་ཤེས་པ་བསྒྲུབ་པ་ནི་འདི་སྙེད་ཅིག་གོ །ཡེ་ཤེས་ནི་འདི་ཙམ་ཞིག་གོ །ངེས་པར་རྟོགས་པར་བྱ་བ་ནི་འདི་ཙམ་ཞིག་གོ །རྗེས་སུ་སྙེགས་པ་ནི་འདི་ཙམ་ཞིག་གོ །འཇུག་པར་བྱ་བ་ནི་འདི་ཙམ་ཞིག་གོ །བྱང་ཆུབ་སེམས་དཔའི་ཡུལ་ནི་འདི་ཙམ་ཞིག་གོ་སྙམ་དུ་སེམས་པ་མེད་དོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་དྲུག་པ། དེ་ཅིའི་ཕྱིར་ཞེ་ན། དེ་ནི་འདི་ལྟར་བྱང་ཆུབ་སེམས་དཔའི་ཏིང་ངེ་འཛིན་རྣམས་ནི་རྣམ་པ་དེ་ལྟ་བུ་སྟེ། དེ་ལྟར་ཚད་མེད་པའི་ཕྱིར་རོ། །བྱང་ཆུབ་སེམས་དཔའི་ཏིང་ངེ་འཛིན་རྣམས་ནི་དེ་ལྟ་བུའི་ཁྱད་པར་དང་ལྡན་པའི་ཕྱིར་རོ། །དེ་དག་ནི་གཞན་དང་གཞན་གྱིས་བསྐྱེད་པ། གཞན་དང་གཞན་དུ་བྱིན་གྱིས་བརླབས་པ། གཞན་དང་གཞན་དུ་རྒྱུ་བ། ཆོས་རྣམ་པ་སྣ་ཚོགས་ཀྱི་སྒོ་ཅན་ཡེ་ཤེས་ཀྱི་སྒོ་བརྗོད་དུ་མེད་པ། བློས་རྣམ་པར་བརྟག་ཅིང་རྣམ་པར་དབྱེ་བས་ཁྱད་པར་གྱི་མཐའ་མེད་པ་ངེས་པར་རྟོགས་པ་གྲངས་མེད་པས་ཁོང་དུ་ཆུད་པ། ཡེ་ཤེས་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པས་རྒྱ་ཆེ་བ། སངས་རྒྱས་མཐོང་བ་སྣ་ཚོགས་ཀྱི་མཛོད་དུ་གྱུར་པས་མཐའ་དང་དབུས་མེད་པ་མོས་པས་རྣམ་པར་དག་པ། དབང་པོ་ཤིན་ཏུ་ཡངས་པ། མངོན་པར་ཤེས་པ་རབ་ཏུ་རྣོ་བ། བསྩགས་པ་མེད་པའི་སྤྱོད་ཡུལ་ཅན། ཀུན་ཏུ་ལྟ་བས་རབ་ཏུ་ཐོབ་པ། སངས་རྒྱས་ཐམས་ཅད་བལྟ་བས་གྲུབ་པ། ཀུན་ཏུ་བཟང་པོའི་ལྷག་པའི་བསམ་པས་

---

^{[མ་དཔེ་གཟིགས་ན་འདིར་གནོན།]}

བསྒྲུབས་པ། ཡེ་ཤེས་ཀྱི་རྒྱལ་པོའི་སྐུ་ལས་བྱུང་བ། དེ་བཞིན་གཤེགས་པས་བསྟན་པའི་ཡེ་ཤེས་ཚད་མེད་པ་རྣམ་པར་འཕྲུལ་པའི་རྣམ་པར་ཕྱེ་བ་མཐའ་དང་དབུས་མེད་པ། སངས་རྒྱས་ཐམས་ཅད་ཀྱི་ཡེ་ཤེས་ཟད་མི་ཤེས་པ་ལས་གོལ་བ་མེད་པའི་སྒོ་ཅན། སངས་རྒྱས་ཀྱི་ཡུལ་ཐམས་ཅད་མངོན་སུམ་དུ་གྱུར་པ། བྱང་ཆུབ་སེམས་དཔའ་ཀུན་ཏུ་བཟང་པོའི་ཡེ་ཤེས་ཀྱི་ཁྱུ་མཆོག་གི་མཐུ་ཕྱུང་བས་རྣམ་པར་སྦྱོང་བ། སྒོ་ཐམས་ཅད་ཀྱི་དཀྱིལ་འཁོར་རབ་ཏུ་སྐྱེས་པས་དཔེ་མེད་པར་བརྗོད་པ། དམིགས་པ་ཤིན་ཏུ་ཕྲ་བས་ཆོས་ཀྱི་དབྱིངས་ཐམས་ཅད་ལ་ཡང་དག་པར་གཞོལ་བ། ཆོས་ཀྱི་དབྱིངས་ཐམས་ཅད་མ་ལུས་པར་དམིགས་པ་ཤིན་ཏུ་ཕྲ་བས་བྱིན་གྱིས་རློབ་པ། འཕགས་པར་གསུང་བའི་ཐམས་ཅད་མཁྱེན་པས་ཤིན་ཏུ་སྣང་བར་བྱས་པ། དབང་གི་དམིགས་པ་ཐམས་ཅད་མངོན་པར་བསྒྲུབ་པ། ཆོས་ཀྱི་སྒོ་ཐམས་ཅད་ཀྱི་མཐར་ཕྱིན་པའི་ཐ་དད་པ་ཡང་དག་པར་ཤེས་པ་ཅན། ཆོས་ཀྱི་དབྱིངས་ཀྱིས་ཀླས་པའི་ཡེ་ཤེས་ཀྱི་ལུས་དང་ལྡན་པ། ཐམས་ཅད་དུ་འགྲོ་བའི་ལམ་གྱིས་གྲུབ་པ། ཏིང་ངེ་འཛིན་ཐམས་ཅད་མཁས་པར་ཁོང་དུ་ཆུད་པ། སེམས་སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་དག་སྟེ། སེམས་སྐད་ཅིག་རེ་རེ་ལ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་གནས་ཏེ། ཏིང་ངེ་འཛིན་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཕྲག་བརྒྱ་ལ་སྙོམས་པར་ཞུགས་ཀྱང་། བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་ངེ་འཛིན་དང་། ཡུལ་གྱི་རྒྱན་གྱི་སྣང་བས་ཡོངས་སུ་སྣང་བར་བྱ་བ་རྣམས་ཀྱི་མཐའ་དམིགས་པར་མི་རུང་ངོ་། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་བྱིན་གྱི་རླབས་ཀྱིས་བྱིན་དུ་བརླབས་པ་སྟེ། ཐམས་ཅད་ཀྱང་ཁོང་དུ་ཆུད་པར་

---

^{[མ་དཔེ་གཟིགས་ན་འདིར་གནོན།]}

བྱ་བའོ། །ཞིང་རྣམས་ནི་མུ་མེད་པ་སྟེ་ཐམས་ཅད་ཀྱང་ཁོང་དུ་ཆུད་པར་བྱ་བའོ། །སེམས་ཅན་གྱི་ཁམས་ཐམས་ཅད་ནི་བསམ་གྱིས་མི་ཁྱབ་པ་སྟེ། དེ་དག་ནི་རྡོ་རྗེའི་ཚིག་ཁོང་དུ་ཆུད་པར་བྱ་བའོ། །དེ་དག་གི་ཁྱད་པར་ཐམས་ཅད་ཀྱང་ཁོང་དུ་ཆུད་པར་བྱ་བའོ། །སྔོན་གྱི་མཐའ་ནི་ཐོག་མ་དང་ཐ་མ་མེད་པ་སྟེ། དེ་དག་ཀྱང་ཐམས་ཅད་ཁོང་དུ་ཆུད་པར་བྱ་བའོ། །ཕྱི་མའི་མཐའ་ནི་མུ་མེད་པ་སྟེ། དེ་དག་ཀྱང་ལྷག་མ་མ་ལུས་པར་ཁོང་དུ་ཆུད་པར་བྱ་བའོ། །ད་ལྟར་བྱུང་བའི་དུས་ནི་མཐའ་དང་དབུས་མེད་པ་སྟེ། ནམ་མཁའི་དབྱིངས་ཀྱིས་ཀླས་པ། ཆོས་ཀྱི་དབྱིངས་ཀྱི་མཐས་གཏུགས་པ་སྟེ། དེ་ཡང་མ་ལུས་པར་ཁོང་དུ་ཆུད་པར་བྱ་བའོ། །སངས་རྒྱས་ཀྱི་ཡུལ་ནི་བསམ་གྱིས་མི་ཁྱབ་པའི་ཡུལ་ཏེ། དེ་དག་ཀྱང་ཐམས་ཅད་ཁོང་དུ་ཆུད་པར་བྱ་བའོ། །བྱང་ཆུབ་སེམས་དཔའི་སྤྱོད་པ་ནི་གྲངས་མེད་པ་སྟེ། དེ་དག་ཀྱང་ཐམས་ཅད་ཁོང་དུ་ཆུད་པར་བྱ་བའོ། །སངས་རྒྱས་ཀྱི་ཐུགས་སུ་ཆུད་པ་དང་དགོངས་པ་ནི་ཡུལ་མཐའ་ཡས་པ་ཡུལ་བརྗོད་དུ་མེད་པ་སྟེ། དེ་དག་ཀྱང་ཐམས་ཅད་ཁོང་དུ་ཆུད་པར་བྱ་བའོ། །ཆོས་སུ་དམིགས་པ་ཐམས་ཅད་ནི་སེམས་ཀྱི་རང་བཞིན་མཐར་ཕྱིན་པ་མེད་པ་སྟེ། དེ་དག་ཀྱང་ཐམས་ཅད་ལྷག་མ་མེད་པར་ཁོང་དུ་ཆུད་པར་བྱ་བའོ། །དེ་ཅིའི་ཕྱིར་ཞེ་ན། འདི་ལྟ་སྟེ་དཔེར་ན། ཡིད་བཞིན་གྱི་ནོར་བུ་ལས་ནི་ཇི་བསམ་པ་ཐམས་ཅད་འབྱུང་ཡང་དེ་སྙེད་དུ་མངོན་པར་འདུ་བྱེད་པས་སྟོངས་པར་མི་འགྱུར་ཞིང་བསམ་པ་ཐམས་ཅད་ཡོངས་སུ་རྫོགས་པར་འགྱུར་ཡང་རྒྱུན་ཆད་པ་མེད་དོ། །ཟད་པར་འགྱུར་བ་མེད་དོ། །ཡིད་བཞིན་གྱི་ནོར་བུ་དེ་ཡང་རྒྱུན་གཅོད་པར་སེམས་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་སེམས་སྒྱུ་མ་ལྟ་བུ་ལ་ཞུགས་པས་ཆོས་ཀྱི་དམིགས་པ་ཐམས་ཅད་མངོན་པར་བསྒྲུབ་

---

^{[མ་དཔེ་གཟིགས་ན་འདིར་གནོན།]}

ཀྱང་མཐར་ཕྱིན་པའི་སེམས་མི་བསྐྱེད་དེ་ཏིང་ངེ་འཛིན་དེ་དང་དེ་དག་གི་རྒྱུན་ཡོངས་སུ་མི་གཅོད་དོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ནི་སྒྱུ་མའི་དཀྱིལ་འཁོར་ཡངས་ཤིང་རྒྱ་ཆེ་བ་ཚད་མེད་པ་ལ་ཞུགས་པས་ཀུན་ཏུ་བཟང་པོའི་སྤྱོད་པ་དོན་ཡོད་པ་ངེས་པར་རྟོགས་པ་ལ་གནས་པ་དང་། མངོན་པར་བསྒྲུབ་པ་ཁོང་དུ་ཆུད་པའི་ཡེ་ཤེས་ཀྱི་སྒོ་དང་ལྡན་པས་དེ་ལ་རྒྱས་པར་འགྱུར་བའམ། འབྲི་བར་འགྱུར་བ་མེད་དོ། །འདི་ལྟ་སྟེ་དཔེར་ན། བྱིས་པ་སོ་སོའི་སྐྱེ་བོ་རྣམས་ནི་སེམས་ཀྱི་སྒོ་མུ་མེད་པ་སྟེ། དེ་དག་གི་སེམས་ནི་མ་སྐྱེས་མི་སྐྱེ་སྐྱེ་བར་མི་འགྱུར་བ་ཡིན་ཡང་། དེ་དག་གི་སེམས་སྐྱེ་བ་དང་། སྐྱེ་བར་འགྱུར་བའང་མཐའ་མེད་པ་སྟེ། ཐུག་པ་མེད་པའོ། །ཟད་པར་མི་འགྱུར་བའོ། །སེམས་ཀྱི་རྒྱུད་ཡོངས་སུ་རྒྱུན་ཆད་པ་མེད་དེ་བསམ་གྱིས་མི་ཁྱབ་པའོ། །དེ་བཞིན་དུ་བྱང་ཆུབ་སེམས་དཔའ་ཏིང་ངེ་འཛིན་གྱི་རྣམ་པ་སྒྱུ་མའི་སྒོ་མང་པོ་ཀུན་དང་ལྡན་པ་འདི་ལྟ་བུ་ལ་སྙོམས་པར་ཞུགས་པ་ལའང་མུར་ཐུག་པ་མེད་དོ། །ཚད་ཀྱིས་གཅལ་བ་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཀུན་ཏུ་བཟང་པོས་དེ་སྙེད་དུ་ཚད་མེད་པའི་ཆོས་ཀྱི་ཚུལ་གྱི་སྒོ་ཁོང་དུ་ཆུད་པའི་ཕྱིར་རོ། །འདི་ལྟ་སྟེ་དཔེར་ན། ཀླུའི་རྒྱལ་པོ་རྒྱ་མཚོ་ཆེན་པོ་དང་། དགའ་བོ་དང་བསྙེན་དགའ་བོ་དང་། ཡིད་དུ་འོང་བ་དང་། ཀླུའི་རྒྱལ་པོ་ཆེན་པོ་དེ་མ་ཡིན་པ་དག་གིས་ཆར་ཕབ་ན་ཆར་པའི་ཐིགས་པ་རེ་རེ་ཞིང་བ་རུ་རའི་འབྲས་བུ་ཙམ་གྱི་རྒྱུན་དུ་ཕབ་ཀྱང་། ཆར་པ་དེ་ལ་ཟད་ཅེས་བྱ་བ་མེད་དོ། །སྔར་བབ་པ་དེ་ཉིད་ཕྱིར་འབབ་ཅེས་བྱ་བ་མེད་དོ། །སྤྲིན་གྱི་མངོན་པར་འདུ་བྱ་བ་ལ་ཟད་ཅེས་བྱ་བ་མྱེད་དོ། །དེ་བཞིན་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་ངེ་འཛིན་གྱི་སྒོ་དང་ཡེ་ཤེས་ཀྱི་སྒོ་དང་། ཆོས་ཀྱི་སྒོ་དང་། སངས་

---

^{[མ་དཔེ་གཟིགས་ན་འདིར་གནོན།]}

རྒྱས་ལྟ་བའི་སྒོ་དང་། ཕྱོགས་སུ་འགྲོ་བའི་སྒོ་དང་སེམས་ཀྱི་དབང་གི་རྗེས་སུ་འགྲོ་བའི་སྒོ་དང་། བྱིན་གྱི་རླབས་ཀྱི་སྒོ་དང་། ཆོ་འཕྲུལ་གྱི་སྒོ་དང་། རྣམ་པར་འཕྲུལ་བའི་སྒོ་དང་། མྱ་ངན་ལས་འདས་པའི་ཚུལ་གྱི་སྒོ་དང་། ཆོས་ཀྱི་ཚུལ་གྱི་སྒོ་དང་། བྱང་ཆུབ་སེམས་དཔའི་ཚོགས་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པ་ཡོངས་སུ་རྫོགས་པར་བྱ་བའི་སྒོ་དང་། དེ་བཞིན་གཤེགས་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་མངོན་པར་སངས་རྒྱས་པའི་དྲུང་དུ་འགྲོ་བའི་སྒོ་དང་། དབང་པོའི་དྲ་བ་བརྗོད་དུ་མེད་པའི་ཡང་བརྗོད་དུ་མེད་པ་ལ་འཇུག་ཅིང་ཁོང་དུ་ཆུད་པར་བྱ་བའི་སྒོ་དང་། འཇིག་རྟེན་གྱི་ཁམས་ཀྱི་རྒྱུད་ཐ་དད་པའི་བྱེ་བྲག་བརྗོད་དུ་མེད་པའི་ཡང་བརྗོད་དུ་མེད་པ་སེམས་ཀྱི་ཚད་ཀྱིས་ཁོང་དུ་ཆུད་པར་བྱ་བ་དང་། སངས་རྒྱས་ཀྱི་ཞིང་འབྱམ་ཀླས་པའི་སྒོ་དང་། འཇིག་རྟེན་གྱི་ཁམས་དངོས་པོ་ཡོད་པ་དང་དངོས་པོ་མེད་པ་བརྗོད་དུ་མེད་པའི་ཡང་བརྗོད་དུ་མྱེད་པའི་སྒོ་དང་། སེམས་ཅན་གྱི་འདུ་ཤེས་ཁོང་དུ་ཆུད་པར་བྱ་བ་དང་། རྗེས་སུ་བསྙེག་པ་བརྗོད་དུ་མེད་པའི་ཡང་བརྗོད་དུ་མེད་པའི་སྒོ་དང་། དུས་རྣམ་པ་ཐ་དད་ཅིང་བསྐལ་པ་མི་མཐུན་པ་ཁོང་དུ་ཆུད་པར་བྱ་བ་དང་། བསྟན་པ་བརྗོད་དུ་མྱེད་པའི་ཡང་བརྗོད་དུ་མེད་པའི་སྒོ་དང་འཇིག་རྟེན་གྱི་ཁམས་ཀྱི་རྒྱུད་འབྱུང་བ་དང་། འཇིག་པ་བརྗོད་དུ་མེད་པའི་ཡང་བརྗོད་དུ་མེད་པ་ཡང་དག་པ་ཇི་ལྟ་བ་བཞིན་དུ་ཤེས་པས་ཁོང་དུ་ཆུད་པའི་སྒོ་དང་། སངས་རྒྱས་ཀྱི་ཞིང་སྤྱིའུ་ཚུགས་བརྗོད་དུ་མེད་པའི་ཡང་བརྗོད་དུ་མེད་པ་དང་། སྣྲེལ་ཞིར་རྒྱུ་བ་བརྗོད་དུ་མེད་པའི་ཡང་བརྗོད་དུ་མེད་པ་དག་ཏུ་སེམས་ཀྱི་སྐད་ཅིག་གཅིག་གིས་བྱང་ཆུབ་ཏུ་རྣམ་པར་འཚང་རྒྱ་བར་བྱ་བའི་སྒོ་ལ་མཐའ་མེད་དོ། །ཟད་པ་མྱེད་དོ། །ས་མཚམས་མེད་དོ། །མུ་མེད་དོ། །སྐྱོ་བ་

---

^{[མ་དཔེ་གཟིགས་ན་འདིར་གནོན།]}

མེད་དོ། །ཡོངས་སུ་ཡི་འཆད་པ་མེད་དོ། །ཐུག་པ་མྱེད་དོ། །རྒྱུན་ཆད་པ་མྱེད་དོ། །ཕྱིར་ལྡོག་པ་མེད་དོ། །ཆུད་ཟ་བ་མེད་དོ། །འོན་ཀྱང་བྱང་ཆུབ་སེམས་དཔའ་དེ་ཆོས་ཀྱི་སྒོས་ཐུག་པ་མྱེད་པར་མི་འགྱུར་རོ། །ངེས་པར་རྟོགས་པར་བྱ་བས་ཡོངས་སུ་ཡི་འཆད་པར་འགྱུར་བ་མེད་དོ། །ཐམས་ཅད་མཁྱེན་པའི་སྒོ་ཟད་པར་འགྱུར་བ་མེད་དོ། །སངས་རྒྱས་ཀྱི་ཞིང་འབྱམ་ཀླས་པའི་འཇིག་རྟེན་གྱི་ཁམས་ཐམས་ཅད་སྣང་བར་བྱ་བ་ལས་ཕྱིར་ལྡོག་པ་མེད་དོ། །ཆོས་ཀྱི་འཁོར་ལོ་བརྗོད་དུ་མེད་པའི་ཡང་བརྗོད་དུ་མེད་པ་རབ་ཏུ་བསྐོར་བ་ལ་བཏང་སྙོམས་སུ་བྱེད་པ་མྱེད་དོ། །སངས་རྒྱས་ཀྱི་དགོངས་པ་ཡོངས་སུ་དྲི་བ་ལ་ཟད་པར་འགྱུར་བ་མེད་དོ། །སངས་རྒྱས་ཀྱི་བྱང་ཆུབ་བལྟ་བ་ལ་མཐར་ཐུག་པ་མྱེད་དོ། །སེམས་ཅན་གྱི་ཁམས་ཐམས་ཅད་འདུལ་བར་བྱ་བ་ཡོངས་སུ་གཏོང་བ་མེད་དོ། །ཀུན་ཏུ་བཟང་པོའི་སྤྱོད་པ་དང་། སྨོན་ལམ་གྱིས་འབྱུང་བ་རྒྱུན་འཆད་པར་འགྱུར་བ་མྱེད་དོ། །ཁ་དོག་མཐའ་ཡས་པའི་ལུས་ཚད་མེད་པ། བརྗོད་དུ་མེད་པའི་ཡང་བརྗོད་དུ་མེད་པ་ཡོངས་སུ་བསྟན་པས་ས་མཚམས་སུ་འགྱུར་བ་མེད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ་དཔེར་ན། མེ་ནི་ཇི་སྲིད་དུ་ཤིང་ཡོད་པ་དེ་སྲིད་དུ་འབར་ཏེ། མེ་འབར་བ་ལ་མཐར་ཐུག་པ་མྱེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་ཇི་ཙམ་དུ་སེམས་ཅན་གྱི་ཁམས་ལ་རྣམ་པར་དཔྱོད་པ་དང་། ཇི་ཙམ་དུ་ཆོས་ཀྱི་དབྱིངས་ལ་འཇུག་པ་དང་། ཇི་ཙམ་དུ་འཇིག་རྟེན་གྱི་ཁམས་སུ་རྒྱུ་བ་དང་། ཇི་ཙམ་དུ་ནམ་མཁའི་རང་བཞིན་གྱི་ཚད་མི་དམིགས་པ་དང་། ཇི་ཙམ་དུ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་གཅིག་ནས་གཅིག་ཏུ་བརྒྱུད་པའི་སེམས་ཀྱི་སྐད་ཅིག་རེ་རེ་ལ་འཇུག་ཅིང་ཁོང་དུ་ཆུད་པར་བྱ་བ་དང་། ཇི་ཙམ་དུ་ཐམས་ཅད་མཁྱེན་པའི་ཡེ་ཤེས་དང་སངས་རྒྱས་ཀྱི་ཞིང་འབྱམ་ཀླས་པ་བརྗོད་དུ་མེད་པའི་ཡང་བརྗོད་དུ་མེད་པ་དག་གི་ཆོས་ཀྱི་བྱེ་བྲག་རྣམ་པར་ཕྱེ་བ་ལ་འཇུག་པ་དང་། ཇི་ཙམ་དུ་

---

^{[མ་དཔེ་གཟིགས་ན་འདིར་གནོན།]}

སེམས་ཅན་གྱི་ཁམས་ཀྱི་རྒྱུད་བརྗོད་དུ་མེད་པའི་ཡང་བརྗོད་དུ་མེད་པ་དགེ་བའི་རྩ་བ་ལ་གཞོག་ཅིང་ཉེ་བར་འཚོ་བར་བྱེད་པ་དང་། ཉེ་བར་སྟོན་པ་དང་། ཤིན་ཏུ་རྣམ་པར་དག་པར་བྱེད་པ་དང་། ཇི་ཙམ་དུ་བྱང་ཆུབ་སེམས་དཔའི་དགེ་བའི་རྩ་བ་དམ་པ་བརྗོད་དུ་མེད་པའི་ཡང་བརྗོད་དུ་མེད་པ་ཡང་དག་པར་མཐོང་ཞིང་སྨོན་ལམ་གཅིག་ཏུ་ངེས་པ་མེད་པ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ལ་ངེས་པར་བྱ་བ་དང་། ཀུན་ཏུ་བཟང་པོའི་སྤྱོད་ཡུལ་གྱི་ཡེ་ཤེས་ཀྱི་སྒོ་ལ་གཞོག་པ་དང་། ཇི་ཙམ་དུ་དུས་གསུམ་ལ་འཇུག་པའི་རྒྱུད་བརྗོད་དུ་མེད་པའི་ཡང་བརྗོད་དུ་མེད་པ་འབྱམ་ཀླས་པ་དང་། སྙོམས་ཤིང་རྣམ་པར་རྟོག་པའི་དུས་ལ་འཇུག་པས་མཐའ་དང་དབུས་མེད་པའི་ཚུལ་དུ་འཇུག་པ་དང་། ཇི་ཙམ་དུ་འཇིག་རྟེན་གྱི་ཁམས་འབྱུང་བ་དང་། འཇིག་པ་དང་གནས་པ་བརྗོད་དུ་མེད་པའི་ཡང་བརྗོད་དུ་མེད་པ་རྣམ་པར་རྟོག་པའི་དམིགས་པ་ཀུན་ཏུ་རྒྱུ་བ་འབྱུང་ཞིང་རྒྱུན་མི་འཆད་པ་དེ་ཙམ་དུ་ཡེ་ཤེས་ཀྱི་དམིགས་པ་སྙིང་རྗེ་ཆེན་པོ་ལས་བྱུང་བ། སྨོན་ལམ་ཆེན་པོས་སྤྲུལ་པ། འགྲོ་བ་ཐམས་ཅད་མ་ལུས་པར་གདུལ་བ་ལ་བརྩོན་པ་ཡང་མཐར་ཐུག་ཅེས་བྱ་བ་མེད་དོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ཡོངས་སུ་རྫོགས་པར་བྱ་བའི་ཕྱིར། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་ཁྱད་པར་ཡེ་ཤེས་ཀྱིས་བསྒྲུབས་པས་འགྲོ་བ་ཐམས་ཅད་ཡོངས་སུ་དགྲོལ་བར་བྱ་བ་ལ་བརྩོན་པའི་ཕྱིར་རོ། །དེ་བས་ན་བྱང་ཆུབ་སེམས་དཔའ་ཏིང་ངེ་འཛིན་གྱི་རྣམ་པ་

---

^{[མ་དཔེ་གཟིགས་ན་འདིར་གནོན།]}

དེ་ལྟ་བུ་དང་། དེ་ལྟ་བུའི་ཡུལ་དེ་ལྟར་རྒྱ་ཆེ་བ་དང་། དེ་ལྟར་ཡངས་པ་དང་། དེ་ལྟར་ཚད་མེད་པ་དང་། དེ་ལྟར་བསམ་གྱིས་མི་ཁྱབ་པ་དང་། དེ་ལྟར་འོད་ཀུན་ཏུ་མཐའ་ཡས་པ་དང་། དེ་ལྟར་སངས་རྒྱས་ཐམས་ཅད་མངོན་དུ་གྱུར་པ་དང་། དེ་ལྟར་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པ་དང་། དེ་ལྟར་དགེ་བའི་རྩ་བ་ཐམས་ཅད་ཀྱིས་ཡོངས་སུ་གྲུབ་པ་དང་། དེ་ལྟར་མི་འཁྲུགས་པའི་སེམས་དང་ལྡན་པ་ལ་མངོན་པར་བརྩོན་པར་བྱའོ། །ཡོངས་སུ་ཡི་འཆད་པ་མེད་པས་བརྟན་པར་བྱའོ། །སྐྱོ་བ་མེད་པའི་སེམས་ཀྱིས་བསྒྲུབ་པར་བྱའོ། །བསམ་པ་ཕྱིར་མི་ལྡོག་པར་བསྐྱེད་པར་བྱའོ། །གདོན་མི་ཟ་བར་འབྱུང་བས་སྦྱར་བར་བྱའོ། །རྩོམ་པའི་ནན་ཏན་གྱིས་མཐུན་པར་སྤྱད་པར་བྱའོ། །བསམ་གྱིས་མི་ཁྱབ་པའི་ཡེ་ཤེས་ཡོངས་སུ་གནོན་པར་བྱའོ། །སྒྱུའི་ས་ལ་མངོན་པར་ཞེན་པ་མེད་པར་བྱའོ། །འཇིག་རྟེན་གྱི་ཡུལ་ཐམས་ཅད་ལ་མི་གནས་པར་བྱའོ། །ཆོས་ཐམས་ཅད་ལ་ཆགས་པ་མེད་པར་བྱའོ། །རློམ་སེམས་ཐམས་ཅད་ཡང་དག་པར་བསལ་བར་བྱའོ། །དངོས་པོ་ཐམས་ཅད་ལ་ཆགས་པ་མེད་པར་བྱའོ། །དམིགས་པ་ཐམས་ཅད་ལ་རྟོགས་པ་མེད་པར་བྱའོ། །ཆོས་ཁོང་དུ་ཆུད་པར་བྱ་བ་ལ་ཚོད་འཛིན་པ་མེད་པར་བྱའོ། །ཆོས་ཀྱི་ཡེ་ཤེས་རྟོག་པར་ཁོང་དུ་ཆུད་པར་བྱའོ། །ཐམས་ཅད་མཁྱེན་པའི་གདན་ལ་སངས་རྒྱས་སུ་བྱང་ཆུབ་པས་རྨོངས་པ་མེད་པར་བྱའོ། །ཆོས་ཀྱི་སྣང་བ་ཡོངས་སུ་བསྒྲུབ་པར་བྱའོ། །འགྲོ་བ་ཐམས་ཅད་དགེ་བའི་རྩ་བས་ཡོངས་སུ་བསྡུ་བར་བྱའོ། །བདུད་ཀྱི་ཡུལ་ལས་སེམས་ཅན་ཡོངས་སུ་བསྐྱོད་པར་བྱའོ། །ཆོས་ཀྱི་ཡུལ་ལ་སེམས་ཅན་རབ་ཏུ་དགོད་པར་བྱའོ། །སངས་རྒྱས་ཀྱི་ཡུལ་ལ་རབ་

---

^{[མ་དཔེ་གཟིགས་ན་འདིར་གནོན།]}

ཏུ་གཟུང་བར་བྱའོ། །སྨོན་ལམ་གྱི་ཡུལ་ལས་ཕྱིར་ལྡོག་པ་མེད་པར་བྱའོ། །འབྱུང་བའི་ཡུལ་ལ་རྟོག་པས་གཞག་པར་བྱའོ། །རྣམ་པར་དག་པའི་ཡུལ་ལ་རབ་ཏུ་ཞེན་པར་བྱའོ། །ཕ་རོལ་ཏུ་ཕྱིན་པའི་ཡུལ་ཁོང་དུ་ཆུད་པར་བྱའོ། །སངས་རྒྱས་ཐམས་ཅད་ལ་ཤིན་ཏུ་མོས་པར་བྱའོ། །ཆོས་ཐམས་ཅད་ལ་དངོས་པོ་མེད་པའི་བདག་ཉིད་དུ་ཡང་དག་པར་འཇུག་པར་བྱའོ། །ཆོས་ཐམས་ཅད་རང་བཞིན་མེད་པ་ཁོང་དུ་ཆུད་པར་བྱའོ། །འཇིག་རྟེན་གྱི་རང་བཞིན་སྣང་བར་བྱའོ། །ཆོས་ཀྱི་འཐད་པ་རབ་ཏུ་བརྗོད་པར་བྱའོ། །ཡེ་ཤེས་ཀྱི་རང་བཞིན་ཡང་དག་པར་བསྟན་པར་བྱའོ། ། གོ་ཅའི་དམ་པ་བགོས་པ་ཡོངས་སུ་མི་སྤང་བར་བྱའོ། །སྐལ་པ་མཉམ་པར་སྤྱོད་པ་རྣམས་དང་ལྷན་ཅིག་གནས་པར་བྱའོ། །སངས་རྒྱས་ཐམས་ཅད་རྗེས་སུ་དྲན་པ་ལ་སེམས་ལྷོད་པ་མེད་པར་བྱའོ། །དེ་བཞིན་གཤེགས་པ་ཐམས་ཅད་ལ་རྣམ་པར་རྟོག་པ་མེད་པར་བྱའོ། །ཆོས་ཀྱི་དབྱིངས་ཐ་དད་པ་མེད་པ་ལ་བདག་རབ་ཏུ་སྦྱར་བར་བྱའོ། །སེམས་སྒྱུ་མ་ལྟ་བུར་རབ་ཏུ་ཤེས་པར་བྱའོ། །འཇིག་རྟེན་གྱི་རྒྱུད་ཐམས་ཅད་རྨི་ལམ་ལྟ་བུར་ཁོང་དུ་ཆུད་པར་བྱའོ། །སྨོན་ལམ་དང་སངས་རྒྱས་བལྟ་བར་བྱ་བ་ཐམས་ཅད་མིག་ཡོར་ལྟ་བུར་ཤེས་པར་བྱའོ། །སློབ་པ་མེད་པའི་ཆོས་འབྱམ་ཀླས་པ། ཐམས་ཅད་སྤྲུལ་པ་ལྟ་བུར་ཤེས་པར་བྱའོ། །ཚིག་གི་ལམ་ཐམས་ཅད་སྒྲ་བརྙན་ལྟ་བུར་ཁོང་དུ་ཆུད་པར་བྱའོ། །ཆོས་ཐམས་ཅད་སྒྱུ་མ་ལྟ་བུར་རྟོགས་པར་བྱའོ། །ཤི་འཕོ་དང་སྐྱེ་བ་ཐམས་ཅད་འཁྲུལ་འཁོར་ལྟ་བུར་ཤེས་པར་བྱའོ། །སངས་རྒྱས་ཀྱི་ཞིང་དུ་འགྲོ་བ་ཐམས་ཅད་ལུས་མེད་པར་ཁོང་དུ་ཆུད་པར་བྱའོ། །དེ་བཞིན་གཤེགས་པ་ཐམས་ཅད་ལ་སངས་རྒྱས་ཀྱི་ཆོས་དྲི་བས་ཡོངས་སུ་སྐྱོ་བ་མེད་པར་བྱའོ། །

---

^{[མ་དཔེ་གཟིགས་ན་འདིར་གནོན།]}

འཇིག་རྟེན་གྱི་ཆོས་ཐམས་ཅད་འཇིག་པར་བསྟན་པའི་ས་དང་། གདམས་ངག་དང་མན་ངག་ཏུ་བྱ་བ་ལ་བཏང་སྙོམས་མེད་པར་བྱའོ། །གདུལ་བར་བྱ་བ་དུས་ལ་བབ་པའི་སེམས་ཅན་རྣམས་ཡོངས་སུ་སྨིན་པར་བྱའོ། །ཞེས་དེ་ལྟར་བྱང་ཆུབ་སེམས་དཔའ་དེ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ནན་ཏན་བྱེད་པ་དང་། དེ་ལྟར་བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ཡོངས་སུ་སྒྲུབ་པ་དང་། དེ་ལྟར་བྱང་ཆུབ་སེམས་དཔའི་འབྱུང་བ་ལ་རབ་ཏུ་བརྩོན་པ་དང་། དེ་ལྟར་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཀྱི་ཆོས་ཡོངས་སུ་འཛིན་པ་དང་། དེ་ལྟར་ཆོས་ཉིད་འཁྲུགས་པ་མེད་པ་རྣམ་པར་འབྱེད་པ་དང་། དེ་ལྟར་སངས་རྒྱས་ཀྱི་ཞིང་འབྱམ་ཀླས་པ་རྣམ་པར་སྤྱོད་པ་དང་། དེ་ལྟར་དེ་བཞིན་གཤེགས་པ་ཐམས་ཅད་ལ་མོས་པར་བྱེད་པ་དང་། དེ་ལྟར་སངས་རྒྱས་ཀྱི་སྟོབས་འབྱམ་ཀླས་པ་ཁོང་དུ་ཆུད་པར་བྱེད་པ་དང་། དེ་ལྟར་ཆགས་པ་མེད་པའི་སེམས་ཀྱིས་རབ་ཏུ་འབྱེད་པ་དང་། ཕྱོགས་མཚམས་མེད་པ་བརྗོད་དུ་མྱེད་པའི་ཡང་བརྗོད་དུ་མེད་པ་རྣམ་པ་ཐ་དད་པ་དག་ཏུ་སྐལ་བ་མཉམ་པར་རྣམ་པར་དགོད་པ་ལ་འགྲོ་བ་རྣམས་རབ་ཏུ་དགོད་པའི་ཚེ། སངས་རྒྱས་ཀྱི་ཞིང་དེ་བཞིན་གཤེགས་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཐམས་ཅད་མ་ལུས་པ་དེ་དག་གི། ཕྱོགས་གཅིག་གི་དེ་བཞིན་གཤེགས་པ་མཚན་ཐ་དད་པ་དང་། མཚན་གཅིག་པ་ཐམས་ཅད་དང་། ཕྱོགས་གཅིག་ནས་ཇི་ལྟ་བ་བཞིན་དུ་ཕྱོགས་བཅུའི་ཕྱོགས་འབྱམ་ཀླས་པའི་རྒྱུད་ཐམས་ཅད་ནས་ཀྱང་དེ་བཞིན་ཏེ། ཕྱོགས་འབྱམ་ཀླས་པའི་རྒྱུད་གཅིག་ནས་ཇི་ལྟ་བ་བཞིན་དུ་

---

^{[མ་དཔེ་གཟིགས་ན་འདིར་གནོན།]}

ཕྱོགས་ཀྱི་རྒྱུད་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཐམས་ཅད་ནས་ཀྱང་དེ་བཞིན་ཏེ། ཕྱོགས་རེ་རེ་ནས་ཀྱང་མཚན་རེ་རེའི་སྒོས་དེ་བཞིན་གཤེགས་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་ཞལ་མངོན་པར་བསྟན་ཏོ། །དེ་བཞིན་དུ་ཆོས་ཀྱི་དབྱིངས་ཀྱི་མཐས་ཀླས་པའི་ཕྱོགས་བཅུ་མ་ལུས་པར་རྫོགས་པའི་སངས་རྒྱས་ཀྱི་ཞིང་ཐམས་ཅད་ནས་ཀྱང་། དེ་བཞིན་གཤེགས་པ་ཀུན་གྱིས་ཞལ་མངོན་པར་བསྟན་ཏེ། བྱང་ཆུབ་སེམས་དཔའ་དེ་ཡེ་ཤེས་ཆེན་པོའི་ཏིང་ངེ་འཛིན་དང་སྙོམས་པར་འཇུག་པ་ཀུན་ཏུ་བཟང་པོའི་སྤྱོད་ཡུལ་ལ་ཡང་དག་པར་གནས་པའི་རྣམ་པ་དེ་ལྟ་བུ་དང་། དེ་བཞིན་གཤེགས་པའི་ཡུལ་ལ་རྨོངས་པ་མེད་ཅིང་ཆོས་ཐམས་ཅད་ལ་རབ་ཏུ་གཞོལ་བར་བྱ་བའི་ཕྱིར་དེ་བཞིན་གཤེགས་པའི་བློ་གྲོས་ཉེ་བར་བསྒྲུབ་པ་མཛད་དོ། །ཐམས་ཅད་མཁྱེན་པ་ཉིད་དུ་ཡང་དག་པར་གཞོལ་ཞིང་ཆོས་རྣམ་པ་ཐ་དད་པ་ཐམས་ཅད་ཀྱི་དོན་ཁོང་དུ་ཆུད་པར་བྱའོ། །ཕྱིར་བློ་གྲོས་ཉེ་བར་བསྒྲུབ་པ་མཛད་དེ། ཆགས་པ་མེད་པ་ལ་རྟོགས་པར་གཞོག་པས། སངས་རྒྱས་ཀྱི་ཆོས་ཐམས་ཅད་ཡོངས་སུ་འཛིན་པར་བྱ་བའི་ཕྱིར་རིག་པ་ཉེ་བར་བསྒྲུབ་པ་མཛད་དོ། །ཡེ་ཤེས་འབྱམ་ཀླས་པ་ཁོང་དུ་ཆུད་པར་བྱ་བ་དང་། བློས་རྣམ་པར་སངས་རྒྱས་པའི་ཆོས་ཀྱི་དབྱིངས་ཀྱི་ཡུལ་གྱི་མཐས་ཀླས་པ་ཐམས་ཅད་ལ་སངས་རྒྱས་ཀྱི་བྱང་ཆུབ་ཉེ་བར་བསྒྲུབ་པར་མཛད་དོ། །བྱང་ཆུབ་སེམས་དཔའ་དེ་ཆོས་ཀྱི་སྣང་བ་དང་། འོད་ཐམས་ཅད་ཀྱིས་མུན་པ་མེད་པའི་ཡེ་ཤེས་འབྱམ་ཀླས་པ་ལས་ཕྱིར་མི་ལྡོག་པར་བྱ་བའི་ཕྱིར་ཤེས་རབ་ཉེ་བར་བསྒྲུབ་པ་མཛད་དོ། །བྱང་ཆུབ་སེམས་དཔའ་དེ་ཐབས་མཁས་པ་འཇིག་རྟེན་ཐམས་ཅད་ལས་འཕགས་པས་སེམས་ཅན་

---

^{[མ་དཔེ་གཟིགས་ན་འདིར་གནོན།]}

འདུལ་བ་ལ་བསྒྲིབས་པ་མེད་པར་བྱ་བའི་ཕྱིར་ཡེ་ཤེས་ཉེ་བར་བསྒྲུབ་པ་མཛད་དོ། །བྱང་ཆུབ་སེམས་དཔའ་དེ་ཆོས་ཀྱི་རྒྱུད་མཐའ་ཡས་པ་བརྗོད་པ་ལ་ཟད་མི་ཤེས་པ་ཐ་དད་པ་ཡང་དག་པར་ཤེས་པ་བསྐྱེད་པའི་ཕྱིར་སྤོབས་པ་ཉེ་བར་བསྒྲུབ་པ་མཛད་དོ། །བྱང་ཆུབ་སེམས་དཔའ་དེ་འགྲོ་བ་ཐམས་ཅད་དུ་ལུས་བརྗོད་དུ་མེད་པའི་ཡང་བརྗོད་དུ་མེད་པའི་རྒྱུད་དང་། ཁ་དོག་མཐའ་ཡས་པ་རྣམ་པ་ཐ་དད་པ་རྣམ་པར་སྟོན་པར་བྱ་བའི་ཕྱིར་སྤྲུལ་པ་ཉེ་བར་བསྒྲུབ་པ་མཛད་དོ། །བྱང་ཆུབ་སེམས་དཔའ་དེ་སེམས་ཅན་སྣ་ཚོགས་ཐམས་ཅད་ལ་དབྱངས་ཀྱི་ཡན་ལག་དང་ལྡན་པའི་སྒྲ་དབྱངས་དང་། སྐད་སྣ་ཚོགས་བསྟན་པར་བྱ་བའི་ཕྱིར་ལྕེ་ཡངས་པ་ཉེ་བར་བསྒྲུབ་པ་མཛད་དོ། །བྱང་ཆུབ་སེམས་དཔའ་དེ་མཐོང་མ་ཐག་ཏུ་སྟོན་པ་དང་། ཐོས་པར་བྱེད་པས་སེམས་ཅན་ཐམས་ཅད་ཡོངས་སུ་སྨྱིན་པར་བྱ་བ་ལ་རྨོངས་པ་མེད་པར་བྱ་བའི་ཕྱིར་རྨོངས་པ་མེད་པ་ཉེ་བར་བསྒྲུབ་པ་མཛད་དོ། །དེས་བྱང་ཆུབ་སེམས་དཔའ་དེ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ཡོངས་སུ་གྲུབ་པ་ཡིན། ཡོངས་སུ་གྲུབ་ནས་ཀྱང་ཐམས་ཅད་མཁྱེན་པའི་སྒོ་ཡོངས་སུ་རྫོགས་པར་བྱ་བས་དེ་བཞིན་གཤེགས་པའི་རིགས་ལ་འཇུག་གོ །འབྱུང་བའི་སྒོ་ཡོངས་སུ་དག་པར་བྱེད་དོ། །ཆགས་པ་མེད་པའི་སྒོས་ཡོངས་སུ་འབྱུང་བར་བྱེད་དོ། །སེམས་ཅན་ཐམས་ཅད་འབྱུང་བའི་སྒོ་ཡོངས་སུ་རྩོམ་ཞིང་བྱིན་གྱིས་རློབ་བོ། །ཆོས་ཐམས་ཅད་ཀྱི་རྣམ་པར་འཕྲུལ་པའི་སྒོ་ཡང་དག་པར་སྟོན་ཏོ། །ཆོ་འཕྲུལ་གྱི་སྒོ་ཚད་མེད་པས་སེམས་ཅན་འདུལ་བ་ལ་རབ་ཏུ་འཇུག་གོ །བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་རྣམ་པ་ལ་རབ་ཏུ་མཁས་པར་སྦྱོང་ངོ་། །སངས་རྒྱས་ཐམས་ཅད་ཀྱི་ཁྱུ་མཆོག་གི་མཐུ་ཕྱུང་བ་ལ་བྱང་ཆུབ་སེམས་དཔའ་

---

^{[མ་དཔེ་གཟིགས་ན་འདིར་གནོན།]}

ཀུན་ཏུ་བཟང་པོའི་སྤྱོད་པས་ཡང་དག་པར་འབྱུང་ངོ་། །ཕྱི་མའི་མཐའི་མུར་ཐུག་པའི་འགྲོ་བ་ཐམས་ཅད་གདུལ་བའི་ཕྱིར། སངས་རྒྱས་ཀྱི་ཆོས་ཐམས་ཅད་རྣམ་པར་ཕྱེ་བའི་ཆོས་ཀྱི་འཁོར་ལོ་རབ་ཏུ་བསྐོར་བ་འགྲོ་བ་ཐམས་ཅད་གདུལ་བའི་མཐར་ཐུག་པར་བྱིན་གྱི་རླབས་ཀྱིས་བྱིན་ཏུ་རློབ་པོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི། སྨོན་ལམ་གྱི་ཁྱད་པར་དེ་ལྟ་བུ་དང་ལྡན་པས་ཡོངས་སུ་གྲུབ་པ་མ་གྲུབ་ན། འཇིག་རྟེན་ཐམས་ཅད་ཀྱི་སློབ་དཔོན་དུ་གྱུར་པ་ཡིན། ཆོས་ཀྱི་ཉི་མ་འཇིག་རྟེན་དུ་ཤར་བ་ཡིན། ཡེ་ཤེས་ཀྱི་ཟླ་བ་འཇིག་རྟེན་ཐམས་ཅད་དུ་སྣང་བར་བྱུང་བ་ཡིན། ཡེ་ཤེས་དམ་པའི་རི་རབ་མི་གཡོ་བ་འཇིག་རྟེན་ཐམས་ཅད་ལས་མངོན་པར་འཕགས་པ་ཡིན། ཡེ་ཤེས་ཀྱི་རྒྱ་མཚོ་ཚད་མེད་པ་འཇིག་རྟེན་ཐམས་ཅད་དུ་ཡང་དག་པར་གནས་པ་ཡིན། བསྒྲུབ་པ་རྒྱུན་མི་ཆད་པས་འཇིག་རྟེན་ཐམས་ཅད་དུ་ཆོས་ཀྱི་ནན་ཏན་བྱེད་པ་ཡིན། འཇིག་རྟེན་གྱི་ཁམས་མཚམས་མེད་པ་ཐམས་ཅད་དུ་རབ་ཏུ་སྣང་བ་ཡིན། རྣམ་པར་དག་པ་ཡངས་ཤིང་མཐའ་ཡས་པ་འགྲོ་བ་ཐམས་ཅད་དུ་བརྗོད་པ་ཡིན། སེམས་ཅན་གྱི་ཁམས་མཐའ་དང་དབུས་མེད་པ་དགེ་བའི་རྩ་བ་དང་བསོད་ནམས་ཀྱི་རྒྱུད་དང་ཐམས་ཅད་མཁྱེན་པ་ཉིད་དང་ལྡན་པའི་སྨོན་ལམ་ཆེན་པོ་རབ་ཏུ་བརྩོན་པར་གཞོག་པ་ཡིན། ཀུན་ཏུ་བཟང་པོས་སྤྱོད་པའི་བརྩོན་འགྲུས་ཡངས་པ་རྒྱ་ཆེན་པོའི་སྨོན་ལམ་ཆེན་པོ་ལ་རབ་ཏུ་གཞོག་པ་ཡིན། སྤྱོད་པ་ཆེན་པོ་དང་ཏིང་ངེ་འཛིན་ཡངས་པའི་རྣམ་པར་འཕྲུལ་པ་བརྗོད་དུ་མེད་པའི་ཡང་བརྗོད་དུ་མེད་པ་ལ་སེམས་ཅན་གྱི་ཁམས་ཡང་དག་པར་གཞོག་ཅིང་རབ་ཏུ་སྦྱོར་རོ། །དེ་ལྟར་བྱང་ཆུབ་སེམས་དཔའ་དེ་ལྟ་བུའི་ངང་ཚུལ་ཅན་དེ་ལྟ་བུའི་ཡེ་ཤེས་ཅན། དེ་ལྟ་བུའི་ཆོས་འཐོབ་པར་གྱུར་པ། དེ་ལྟ་བུའི་

---

^{[མ་དཔེ་གཟིགས་ན་འདིར་གནོན།]}

ཆོས་ཀྱིས་སྣང་བར་གྱུར་པ། དེ་ལྟ་བུའི་ཆོས་ལ་གནས་པ། ཆོས་དེ་ལྟ་བུ་མཐོང་བར་གྱུར་པ། མངོན་པར་ཤེས་པ་དེ་ལྟ་བུའི་ཡིད་དང་ལྡན་པ། ཆོ་འཕྲུལ་དམ་པ་དེ་ལྟ་བུ་དང་ལྡན་པ། ཆོ་འཕྲུལ་མཆོག་ཏུ་བྱ་བ་ཕུལ་དུ་བྱུང་བ་དེ་ལྟ་བུས་ཡང་དག་པར་བསྒྲུབས་པ། རྟག་ཏུ་བརྩོན་པའི་སྙིང་རྗེ་ཆེན་པོས་མངོན་པར་འཕགས་པ། ཆོས་ཀྱི་དོན་བཟང་པོ་ལ་རྟག་ཏུ་རྒྱུན་མི་འཆད་པར་བརྩོན་པ། བདེ་བའི་ལམ་ཡང་དག་པར་སྟོན་པ། བསོད་ནམས་ཆེན་པོ་དང་ཡེ་ཤེས་ཡངས་པའི་འོད་གཟེར་གྱི་རྒྱལ་མཚན་དུ་གྱུར་པ། རྣམ་པར་ཐར་པ་བསམ་གྱིས་མི་ཁྱབ་པ་ཤིན་ཏུ་ཐོབ་པ། ཐམས་ཅད་མཁྱེན་པའི་ཡུལ་ལ་དོན་ཡོད་པར་རྗེས་སུ་སོང་བ། སངས་རྒྱས་ཀྱི་རྣམ་པར་ཐར་པའི་ཕ་རོལ་ཏུ་ཕྱིན་པ་ཐོབ་པ། རྣམ་པར་ཐར་པའི་ཚུལ་ཤིན་ཏུ་ཕྲ་བ། བསམ་གྱིས་མི་ཁྱབ་པ་རབ་ཏུ་བསྒོམས་པ། ཆོས་ཀྱི་དབྱིངས་ཀྱི་རྒྱུད་དང་། ཚུལ་རྨོངས་པ་མེད་པར་ཁོང་དུ་ཆུད་པ། ཀུན་ཏུ་བཟང་པོའི་ཏིང་ངེ་འཛིན་བརྗོད་དུ་མེད་པའི་ཡང་བརྗོད་དུ་མེད་པ་ལ་རྣམ་པར་རྩེ་ཞིང་བརྗོད་པ། སེང་གེ་བསྒྱིངས་པའི་ཡེ་ཤེས་ཀྱིས་གྲུབ་པ་ལ་ཤིན་ཏུ་གནས་པ། སེམས་དང་ཡིད་རྣམ་པར་ཤེས་པ་ལ་ཆགས་པ་མེད་པ་རྣམས་ཀྱི་ཆོས་ཀྱི་བསམ་པ་དང་། ལྷག་པའི་བསམ་པ་རབ་ཏུ་ཡངས་པ་ཆེན་པོ་བཅུ་འབྱུང་ངོ་། །བཅུ་གང་ཞེ་ན། འདི་ལ་བྱང་ཆུབ་སེམས་དཔའ་སངས་རྒྱས་ཐམས་ཅད་རྗེས་སུ་དྲན་པས་གནས་པ་ཡིན། ཆོས་ཐམས་ཅད་ཀྱི་དེ་བཞིན་ཉིད་ཚད་མེད་པས་གནས་པ་ཡིན། སེམས་ཅན་ཐམས་ཅད་གདུལ་བའི་སྙིང་རྗེ་ཆེན་པོས་གནས་པ་ཡིན། ཞིང་རྣམ་པར་དག་པའི་གནས་བསམ་གྱིས་མི་ཁྱབ་པའི་ཕྱིར་གནས་པ་རྣམ་པར་དག་པས་གནས་པ་ཡིན། སངས་རྒྱས་བཅོམ་ལྡན་འདས་རྣམས་ནི་ཡུལ་ལ་མོས་པ་རྣམ་

---

^{[མ་དཔེ་གཟིགས་ན་འདིར་གནོན།]}

པར་དག་པས་གནས་པ་ཡིན། འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱི་བྱང་ཆུབ་ཐ་དད་པར་མི་བྱེད་པས་གནས་པ་ཡིན། ཆགས་པ་མེད་པའི་མཐའ་བསྒྲིབས་པ་མེད་པའི་ཆོས་ཐམས་ཅད་ཀྱི་ངོ་བོ་ཉིད་དང་། རང་བཞིན་མཚན་ཉིད་མེད་པས་གནས་པ་ཡིན། དེ་བཞིན་གཤེགས་པ་ཐམས་ཅད་ཀྱི་དགེ་བའི་རྩ་བ་འདས་པ་དང་མ་བྱུང་བ་དང་། ད་ལྟར་བྱུང་བ་ཐམས་ཅད་དང་རྒྱུད་ཀྱི་ཚུལ་གཅིག་ཏུ་གྱུར་པས་གནས་པ་ཡིན། དེ་བཞིན་གཤེགས་པ་ཐམས་ཅད་ཀྱི་སྐུའི་ཕྲིན་ལས་དང་གསུང་གི་ཕྲིན་ལས་དང་། ཐུགས་ཀྱི་ཕྲིན་ལས་འདས་པ་དང་མ་བྱུང་བ་དང་། ད་ལྟར་བྱུང་བ་མེད་པའི་ཆོས་ཀྱི་དབྱིངས་ཤིན་ཏུ་སྟོན་པའི་ཡེ་ཤེས་སྔོན་དུ་འགྲོ་བས་གནས་པ་ཡིན། དེ་བཞིན་གཤེགས་པ་འདས་པ་དང་མ་བྱོན་པ་དང་ད་ལྟར་བྱུང་བ་ཐམས་ཅད་ཀྱི་སྐྱེ་བ་དང་། མངོན་པར་འབྱུང་བ་དང་། སྙིང་པོ་བྱང་ཆུབ་ཏུ་གཤེགས་པ་དང་། མངོན་པར་འཚང་རྒྱ་བ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདའ་བ་དུས་གསུམ་མཉམ་པ་ཉིད་དུ་ཐུགས་སུ་ཆུད་པ་སྐད་ཅིག་གཅིག་གི་མཐར་འཇུག་པས་གནས་པ་ཡིན་ཏེ། དེ་ལྟར་བྱང་ཆུབ་སེམས་དཔའི་ལྷག་པའི་བསམ་པ་དེ་དག་ནི་ཚད་མེད་པ། ཤིན་ཏུ་ཡངས་པ་བགྲང་དུ་མེད་པ་གཞལ་དུ་མེད་པ། ཟད་མི་ཤེས་པ་བརྗོད་པར་དཀའ་བ། བསམ་གྱིས་མི་ཁྱབ་པ། བརྗོད་དུ་མེད་པ། བཟོད་པར་དཀའ་བ། འགྲོ་བ་ཐམས་ཅད་ཀྱིས་མི་འཕྲོགས་པ་དག་སྟེ། ཆོས་ཐམས་ཅད་ཀྱི་ཡེ་ཤེས་རབ་ཏུ་བསྒྲུབ་པའི་ཕྱིར་བྱང་ཆུབ་སེམས་དཔའ་དེ་ལྷག་པའི་བསམ་པ་དེ་ལྟ་བུས་གནས་སོ། །དེ་དག་གི་བྱང་ཆུབ་སེམས་དཔའ་དེ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་ཕ་རོལ་ཏུ་ཕྱིན་པ་ཐོབ་པ་ཡིན་ཏེ། ཆོས་རྣམ་པར་དག་པ་ཡང་རབ་ཏུ་

---

^{[མ་དཔེ་གཟིགས་ན་འདིར་གནོན།]}

ཐོབ་བོ། །བསམ་པའི་སྟོབས་ཀྱང་རྣམ་པར་འཕེལ་བར་བྱེད་དོ། །སེམས་ཅན་རྣམས་ལ་དགེ་བའི་རྩ་བ་ཚད་མེད་པ་ཡང་ཡང་དག་པར་སྟོན་ཏོ། །བྱང་ཆུབ་སེམས་དཔའི་སྟོབས་ཀྱང་རྣམ་པར་འཕེལ་བར་བྱེད་དོ། །བྱང་ཆུབ་སེམས་དཔའི་ཡོན་ཏན་མི་ཁོམ་པ་ཁོམ་པར་བྱེད་པ་ཐམས་ཅད་ཀྱང་ཡོངས་སུ་རྫོགས་པར་བྱེད་དོ། །ཤིན་ཏུ་འབྱུང་བའི་ཕྱིར་བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་གྲུབ་པ་ཡང་རབ་ཏུ་ཐོབ་བོ། །སངས་རྒྱས་ཐམས་ཅད་ཀྱི་ཆོས་ཀྱི་གཟུངས་ཀྱིས་འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱི་བསྟན་པ་ཡང་དག་པར་འཛིན་ཏོ། །འདོད་ཆགས་དང་བྲལ་བའི་མཐར་སེམས་ཅན་གྱི་ཁམས་ཐམས་ཅད་ལ་ཡང་དག་པར་ལྟའོ། །ཚིག་གི་ལམ་གྱི་རྒྱུད་ཀྱིས་སེམས་ཅན་ཐམས་ཅད་འདུལ་བ་ཡོངས་སུ་སྟོན་ཏོ། །དེ་ཅིའི་ཕྱིར་ཞེ་ན། དེ་ནི་ཏིང་ངེ་འཛིན་རྒྱ་ཆེན་པོ་དེ་ལྟ་བུ་ཐོབ་པའི་བྱང་ཆུབ་སེམས་དཔའ་རྣམས་ཀྱི་ཆོས་ཉིད་དེ། དེས་བྱང་ཆུབ་སེམས་དཔའ་དེ་སངས་རྒྱས་ཀྱི་ཡེ་ཤེས་འབྱམ་ཀླས་པ་ཐམས་ཅད་ལ་མཆོག་ཏུ་བྱ་བ་རབ་ཏུ་འཐོབ་བོ། །དེའི་ཕྱིར་ཆོས་འབྱམ་ཀླས་པ་ཐམས་ཅད་སྟོན་པ་ལ་མཁས་པའི་ཐ་དད་པ་ཡང་དག་པར་ཤེས་པ་རབ་ཏུ་འཐོབ་བོ། །དེའི་ཕྱིར་འཇིག་རྟེན་ཐམས་ཅད་དུ་ཆོས་ཀྱི་དམ་པ་འཇིགས་པ་མེད་པ་རྣམ་པར་དག་པ་རབ་ཏུ་འཐོབ་བོ། །དེའི་ཕྱིར་ཏིང་ངེ་འཛིན་ཐམས་ཅད་ཀྱི་རྗེས་སུ་འགྲོ་བའི་ཡེ་ཤེས་རབ་ཏུ་འཐོབ་བོ། །དེའི་ཕྱིར་བྱང་ཆུབ་སེམས་དཔའི་ཚུལ་ཐམས་ཅད་ལ་མཁས་པའི་དམ་པ་རབ་ཏུ་འཐོབ་བོ། །དེའི་ཕྱིར་ཚུལ་ཐམས་ཅད་ཀྱི་རྒྱན་རབ་ཏུ་འཐོབ་བོ། །དེའི་ཕྱིར་འཇིག་རྟེན་ཐམས་ཅད་དུ་ཆོས་ཀྱིས་དབུགས་ཕྱིན་པའི་ཕ་རོལ་ཏུ་ཕྱིན་པ་དང་ལྡན་པར་འགྱུར་རོ། །དེའི་ཕྱིར་སེམས་ཅན་ཐམས་ཅད་ཀྱི་དུས་དང་དུས་

---

^{[མ་དཔེ་གཟིགས་ན་འདིར་གནོན།]}

མ་ཡིན་པ་རབ་ཏུ་ཤེས་སོ། །དེའི་ཕྱིར་འཇིག་རྟེན་གྱི་ཁམས་ཐམས་ཅད་སྣང་བར་བྱ་བ་རབ་ཏུ་ཤེས་སོ། །དེའི་ཕྱིར་སེམས་ཅན་ཐམས་ཅད་ལ་བསྒྲིབས་པ་མེད་པའི་ཡེ་ཤེས་ཁོང་དུ་ཆུད་པར་འགྱུར་རོ། །དེའི་ཕྱིར་དོན་ཐམས་ཅད་བསྒྲུབས་པར་ཡོན་ཏན་ཐམས་ཅད་ལ་ཡན་ལག་རབ་ཏུ་གནས་པར་འགྱུར་རོ། །དེའི་ཕྱིར་ཐེག་པའི་དམ་པ་རབ་ཏུ་བརྩོན་པར་བྱས་ཏེ། སེམས་ཅན་ཐམས་ཅད་ལ་མཉམ་པར་གཞག་པ་རྣམ་པར་དག་པ་རབ་ཏུ་བརྗོད་དོ། །དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའ་སེམས་ཅན་གྱི་དོན་ལ་གནས་པ་སྙིང་རྗེ་ཆེན་པོ་དེ་ལྟ་བུ་རྣམ་པར་འཕེལ་བར་བྱེད་པ་དང་། དགེ་བའི་བཤེས་གཉེན་དང་བསྟེན་པར་འདོད་པ། སངས་རྒྱས་ཐམས་ཅད་བལྟ་བར་འདོད་པ། ཆོས་ཐམས་ཅད་སྣང་བར་བྱ་བར་འདོད་པ། ཞིང་ཐམས་ཅད་དུ་འགྲོ་བར་འདོད་པ། ཕྱོགས་ཐམས་ཅད་དུ་རྒྱུ་བར་འདོད་པ། དུས་གསུམ་མཉམ་པ་ཉིད་ཁོང་དུ་ཆུད་པར་འདོད་པ། ཆོས་ཐམས་ཅད་མཉམ་པ་ཉིད་མངོན་པར་འཚང་རྒྱ་བར་འདོད་པ། སངས་རྒྱས་མཉམ་པ་ཉིད་ལ་རབ་ཏུ་གནས་པར་འདོད་པ། ཡེ་ཤེས་མཉམ་པ་ཉིད་ལ་འདུག་པར་འདོད་པས་ཆོས་འདི་དག་ལ་ལས་དེ་ལྟ་བུར་བརྩོན་ཞིང་ལས་གཞན་མེད་པ་དང་། ངོམས་མི་ཤེས་པ་དང་། སེམས་མ་འཁྲུགས་པ་དང་། ཡིད་རྩེ་གཅིག་ཏུ་གྱུར་པ་དང་། དེ་ལྟར་གནས་པ་ལ་བརྩོན་པ་དང་། དེ་ལྟར་ཁོང་དུ་ཆུད་པའི་ཡིད་དང་། དེ་ལྟར་མ་ཉམས་པའི་སེམས་དང་། དེ་ལྟ་བུའི་ཡིད་བདེ་བ་དང་། དེ་ལྟར་ལས་སུ་རུང་བ་དང་། དེ་ལྟར་བརྩོན་པ་དང་། དེ་ལྟར་མཐར་འབྱིན་པ་དང་། དེ་ལྟར་རྣམ་པར་སྤྱོད་པས་ནན་ཏན་དུ་བྱ་ཞིང་མངོན་པར་བསྒྲུབ་པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་ནི་ལོག་པར་སྨྲ་བ་མ་ཡིན། བྱང་ཆུབ་སེམས་དཔའ་རྣམས་

---

^{[མ་དཔེ་གཟིགས་ན་འདིར་གནོན།]}

ནི་གཞན་དུ་སྨྲ་བ་མ་ཡིན་ཏེ། བྱང་ཆུབ་སེམས་དཔའ་རྣམས་ནི་ཇི་སྐད་དུ་སྨྲས་པ་དེ་བཞིན་དུ་བྱེད་པའོ། །དེ་ཅིའི་ཕྱིར་ཞེ་ན། འདི་ལྟ་སྟེ་དཔེར་ན། རྡོ་རྗེ་ནི་གཅོག་ཏུ་མི་རུང་བར་བརྗོད་པ་སྟེ། མི་ཆོགས་པའི་རང་བཞིན་ཡོངས་སུ་མི་གཏོང་ངོ་། །དེ་བཞིན་དུ་བྱང་ཆུབ་སེམས་དཔའ་ཡང་ཆོས་འདི་དག་ལས་བརྗོད་པ་སྟེ། འདི་ལྟ་བུའི་ཆོས་ལ་གནས་པ་ཡོངས་སུ་མི་གཏོང་ངོ་། །འདི་ལྟ་སྟེ་དཔེར་ན། གསེར་ནི་ཁ་དོག་ཤིན་ཏུ་བཟང་བར་བརྗོད་པ་སྟེ། གསེར་གྱི་ཁ་དོག་བཟང་པོ་རྣམ་པར་དག་པ་ཡོངས་སུ་མི་གཏོང་ངོ་། །དེ་བཞིན་དུ་བྱང་ཆུབ་སེམས་དཔའ་ཡང་དེ་ལྟར་དགེ་ཞིང་བཟང་བའི་ཆོས་ཀྱིས་བརྗོད་པ་སྟེ། དེ་ལྟར་དགེ་ཞིང་བཟང་བའི་ཆོས་ལ་གནས་པ་ཡོངས་སུ་མི་གཏོང་ངོ་། །འདི་ལྟ་སྟེ་དཔེར་ན། ལྷའི་བུ་ཉི་མ་ནི་སྣང་བའི་དཀྱིལ་འཁོར་གྱིས་བརྗོད་པ་སྟེ། སྣང་བ་ཡོངས་སུ་མི་གཏོང་ངོ་། །དེ་བཞིན་དུ་བྱང་ཆུབ་སེམས་དཔའ་ཡང་འགྲོ་བ་ཐམས་ཅད་དུ་སྣང་བས་བརྗོད་པ་སྟེ། བྱང་ཆུབ་སེམས་དཔའི་སྣང་བ་ཡོངས་སུ་མི་གཏོང་ངོ་། །འདི་ལྟ་སྟེ་དཔེར་ན། རིའི་རྒྱལ་པོ་རི་རབ་ནི་རིན་པོ་ཆེ་བཞིའི་ཕུང་པོས་རྒྱ་མཚོ་ལས་ཤིན་ཏུ་འཕགས་པར་བརྗོད་པ་སྟེ། རྒྱ་མཚོ་ལས་ཤིན་ཏུ་འཕགས་པ་ཡོངས་སུ་མི་གཏོང་ངོ་། །དེ་བཞིན་དུ་བྱང་ཆུབ་སེམས་དཔའ་ཡང་འཇིག་རྟེན་ཐམས་ཅད་ལ་དགེ་བའི་རྩ་བས་ཤིན་ཏུ་འཕགས་པར་བརྗོད་པ་སྟེ། འཇིག་རྟེན་ཐམས་ཅད་ལས་ཤིན་ཏུ་འཕགས་པ་ཡོངས་སུ་མི་གཏོང་ངོ་། །འདི་ལྟ་སྟེ་དཔེར་ན། ས་ཆེན་པོ་ནི་འགྲོ་བ་ཐམས་ཅད་ཡོངས་སུ་རྟོན་པར་བརྗོད་པ་སྟེ། རྟོན་པའི་རང་བཞིན་ཡོངས་སུ་མི་གཏོང་ངོ་། །དེ་བཞིན་དུ་བྱང་ཆུབ་སེམས་དཔའ་ཡང་འགྲོ་བ་ཐམས་ཅད་ཡོངས་སུ་འགྲེལ་པས་བརྗོད་པ་སྟེ། སྙིང་རྗེ་ཆེན་པོ་ཡོངས་སུ་མི་གཏོང་ངོ་། །འདི་ལྟ་སྟེ་དཔེར་ན། རྒྱ་མཚོ་ཆེན་

---

^{[མ་དཔེ་གཟིགས་ན་འདིར་གནོན།]}

པོ་ནི་རིན་པོ་ཆེ་ཐམས་ཅད་ཀྱི་འབྱུང་གནས་སུ་བརྗོད་པ་སྟེ། རྒྱ་མཚོའི་ཆུ་ཡོངས་སུ་མི་གཏོང་ངོ་། །དེ་བཞིན་དུ་བྱང་ཆུབ་སེམས་དཔའ་ཡང་དགེ་བའི་རྩ་བ་ཐམས་ཅད་ཀྱི་འབྱུང་གནས་སུ་བརྗོད་པ་སྟེ། སེམས་ཅན་ཐམས་ཅད་ཡོངས་སུ་དགྲོལ་བའི་སྨོན་ལམ་ཡོངས་སུ་མི་གཏོང་ངོ་། །འདི་ལྟ་སྟེ་དཔེར་ན། འཕོང་གི་སློབ་དཔོན་ནི་མདའ་གཞུ་དང་འཕོང་ལ་ཟོ་བདོག་བདེ་བས་ཇི་སྲིད་དུ་མདའ་གཞུ་དང་ལྡན་ཞིང་མདའ་གཞུ་ལ་བརྩོན་པས་བརྗོད་པར་བྱ་བ་སྟེ། འཕོང་གི་ཚུལ་དུ་བྱ་བ་ཡོངས་སུ་མི་གཏོང་ངོ་། །དེ་བཞིན་དུ་བྱང་ཆུབ་སེམས་དཔའ་ཡང་ཇི་ཙམ་དུ་ཏིང་ངེ་འཛིན་གྱི་སྒོ་དང་། ཡུལ་གྱི་རྣམ་པ་འདི་ལྟ་བུ་ལ་མངོན་པར་བརྩོན་ཞིང་ཡོངས་སུ་བསྒྲུབ་པ་དེ་ཙམ་དུ་ཐམས་ཅད་མཁྱེན་པའི་ཡེ་ཤེས་ཀྱིས་སྣང་བར་འགྱུར་བ་ཡིན། འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོ་ནི་ཇི་ཙམ་དུ་ཚེ་རིང་བ་དེ་ཙམ་དུ་བདེ་བ་མྱོང་བ་ཡིན། དེ་བཞིན་དུ་བྱང་ཆུབ་སེམས་དཔའ་ཡང་ཇི་ཙམ་དུ་བྱང་ཆུབ་སེམས་དཔའི་སྤྱད་པ་སྤྱོད་ཅིང་རྣམ་པ་འདི་ལྟ་བུའི་ཏིང་ངེ་འཛིན་ཆེན་པོ་ལ་སྙོམས་པར་འཇུག་པ་དེ་ཙམ་དུ་སེམས་ཅན་གྱི་ཁམས་རྣམ་པར་དག་པར་འགྱུར་རོ། །ཤིན་ཏུ་རྣམ་པར་དག་པ་ཡང་རབ་ཏུ་ཐོབ་བོ། །འདི་ལྟ་སྟེ་དཔེར་ན། ཇི་ཙམ་དུ་ས་བོན་བཏབ་པ་དེ་ཙམ་དུ་རྣམ་པར་འཕེལ་ལོ། །དེ་བཞིན་དུ་བྱང་ཆུབ་སེམས་དཔའ་ཡང་ཅི་ཙམ་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་བརྩོན་པ་དེ་ཙམ་དུ་སེམས་ཅན་གྱི་ཁམས་རྣམས་དགེ་བའི་རྩ་བ་ལ་རྣམ་པར་དག་པར་འགྱུར་རོ། །འདི་ལྟ་སྟེ་དཔེར་ན། སྤྲིན་ཆེན་པོ་ནི་ཇི་ཙམ་དུ་ཆར་འབེབ་པ་དེ་ཙམ་དུ་དབྱར་གྱི་དུས་ལ་ས་བོན་རྣམ་པར་འཕེལ་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་ཇི་ཙམ་དུ་

---

^{[མ་དཔེ་གཟིགས་ན་འདིར་གནོན།]}

ཆོས་ཀྱི་སྤྲིན་གྱི་ཆར་འབེབས་ཤིང་བྱང་ཆུབ་སེམས་དཔའི་སྤྱད་པ་སྤྱོད་པ་དང་། རྣམ་པ་འདི་ལྟ་བུའི་ཏིང་ངེ་འཛིན་ཆེན་པོ་ལ་སྙོམས་པར་འཇུག་པ་དེ་ཙམ་དུ་སེམས་ཅན་རྣམས་ཤིན་ཏུ་རྣམ་པར་དག་པར་འགྱུར་ཏེ། ཤིན་ཏུ་མཐར་ཐུག་པར་འགྱུར་བ་དང་། ཤིན་ཏུ་བདེ་བ་ཕུན་སུམ་ཚོགས་པ་དང་ལྡན་པ་དང་། མཆོག་ཏུ་བྱ་བ་ཤིན་ཏུ་འཐོབ་པ་དང་། ཤིན་ཏུ་ཕ་རོལ་ཏུ་ཕྱིན་པ་དང་། འཇིག་རྟེན་ཐམས་ཅད་ཤིན་ཏུ་ཚིམ་པར་བྱེད་པ་དང་། སྐྱེ་དགུ་ཐམས་ཅད་ཀྱི་བྱ་བ་ཐམས་ཅད་ལ་ཐེ་ཙོམ་ཤིན་ཏུ་གཅོད་པ་དང་། སྦྱིན་བསྲེག་ཡོངས་སུ་བཟུང་ཞིང་སྦྱིན་པ་ཡོངས་སུ་སྦྱོང་བས་བསོད་ནམས་རྨད་དུ་བྱུང་བ་དང་། ཕྱིར་མི་ལྡོག་པའི་འཁོར་ལོ་ལ་རབ་ཏུ་གཞོག་པའི་ཕྱིར་ཐམས་ཅད་མཁྱེན་པ་ཉིད་དུ་སྐལ་བ་ཤིན་ཏུ་མཉམ་པར་འགྱུར་བ་དང་། སེམས་ཅན་ཐམས་ཅད་ཁམས་གསུམ་ལས་བསྒྲལ་བའི་ཕྱིར་ཡེ་ཤེས་ཤིན་ཏུ་རྣམ་པར་དག་པར་བྱེད་པ་ཡིན། ཐམས་ཅད་མཁྱེན་པའི་ཡེ་ཤེས་ལ་སེམས་ཅན་རྣམས་དགོད་པའི་ཕྱིར་ཆོས་ཀྱི་འཁོར་ལོས་སྒྱུར་བ་དམ་པར་འགྱུར་བ་ཡིན། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་རང་བཞིན་གྱི་ཆོས་ཀྱི་དབྱིངས་རྣམ་པར་ཕྱེ་བ་སྟེ། བསམ་གྱིས་མི་ཁྱབ་པའོ། །ཚད་མེད་པའོ། །བྱང་ཆུབ་སེམས་དཔའི་སྤྱོད་པ་རྣམ་པར་སྦྱོང་བའོ། །ཐམས་ཅད་མཁྱེན་པ་ཉིད་ཀྱི་ཕྱིར་ཡེ་ཤེས་སྦྱོང་བའོ། །ཡོངས་སུ་འདུལ་བས་སེམས་ཅན་སྦྱོང་བའོ། །ཡོངས་སུ་བསྔོ་བས་ཞིང་སྦྱོང་བའོ། །རབ་ཏུ་གཞོག་པས་ཆོས་སྦྱོང་བའོ། །ཞུམ་པ་མེད་པས་མི་འཇིགས་པ་སྦྱོང་བའོ། །རབ་ཏུ་བསྟན་པ་ཐ་དད་པ་ཡང་དག་པར་ཤེས་པ་སྦྱོང་བའོ། །ཤིན་ཏུ་བསྟན་པས་ཆོས་སྦྱོང་བའོ། །ཆོས་ཐམས་ཅད་ལས་ཕྱིར་མི་ལྡོག་པར་གཟུངས་སྦྱོང་བའོ། །སངས་རྒྱས་ཀྱི་འབྱུང་བ་ཐམས་ཅད་ཀྱི་དོན་དུ་སངས་རྒྱས་ཀྱི་བསྟན་པ་སྦྱོང་བའོ། །དེ་ལྟར་བྱང་ཆུབ་སེམས་

---

^{[མ་དཔེ་གཟིགས་ན་འདིར་གནོན།]}

དཔའ་ཏིང་ངེ་འཛིན་འདི་ལ་གནས་པ་ནི་ཡོན་ཏན་འདི་དག་དང་། གཞན་ཡང་ཡོངས་སུ་དག་པ་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་རབ་ཏུ་འཐོབ་བོ། །ཏིང་ངེ་འཛིན་ཆེན་པོའི་དཀྱིལ་འཁོར་འདི་དག་གི་དབང་དང་། སངས་རྒྱས་ཐམས་ཅད་ཀྱི་བྱིན་གྱི་རླབས་དང་། རང་གི་དགེ་བའི་རྩ་བའི་རྒྱུའི་སྟོབས་དང་། ཡེ་ཤེས་ཀྱི་སའི་སྒྲོལ་བའི་མཐུ་དང་། དགེ་བའི་བཤེས་གཉེན་གྱིས་ཉེ་བར་བརྟན་པའི་སྟོབས་དང་། བདུད་ཀྱི་ལས་ཐམས་ཅད་རབ་ཏུ་འཇོམས་པའི་མཐུ་དང་། དགེ་བའི་ལས་སྐལ་པ་མཉམ་པ་རྣམས་ཀྱི་གཞུང་གཅིག་པའི་མཐུ་དང་སྨོན་ལམ་རྣམས་ཀྱི་དག་པའི་སྟོབས་དང་། ཇི་ལྟར་བསྐྱེད་པའི་དགེ་བའི་རྩ་བ་རྣམས་ཡོངས་སུ་གྲུབ་པའི་སྟོབས་དང་། འཇིག་རྟེན་ལས་འདས་པའི་བསོད་ནམས་ཐུབ་པ་མེད་ཅིང་ཟད་མི་ཤེས་པའི་མཐུ་དེ་ལྟར་སྙོམས་པར་འཇུག་པ་ལ་གནས་པ་ནི། ཡོན་ཏན་མཚུངས་པ་མཉམ་པ་བཅུས་སངས་རྒྱས་འདས་པ་དང་། མ་བྱོན་པ་དང་ད་ལྟར་བྱུང་བ་ཐམས་ཅད་མཚུངས་པ་མཉམ་པ་ཡིན་ཏེ། བཅུ་གང་ཞེ་ན། འདི་ལྟར་གཟུགས་དང་མཚན་དང་དཔེ་བྱད་བཟང་པོ་སྣ་ཚོགས་ཀྱིས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། འོད་དང་འོད་ཟེར་གྱི་དྲ་བ་རབ་ཏུ་འགྱེད་པ་རྣམ་པར་དག་པས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། རྫུ་འཕྲུལ་དང་རྣམ་པར་འཕྲུལ་པ་དང་། སྤྲུལ་པ་སེམས་ཅན་འདུལ་བའི་ཚུལ་བཞིན་དུ་སྟོན་པས། བྱང་ཆུབ་སེམས་དཔའ་མཚུངས་པ་མཉམ་པ་ཡིན། ལུས་ཚད་མེད་པ་དང་། ཁ་དོག་མཐའ་ཡས་པ་དང་། དབྱངས་ཐམས་ཅད་རྣམ་པར་དག་པས། བྱང་ཆུབ་སེམས་དཔའ་མཚུངས་པ་མཉམ་པ་ཡིན། སངས་རྒྱས་ཀྱི་ཞིང་རྣམ་པར་དག་པ་བྱིན་གྱིས་རློབ་ཅིང་སེམས་ཅན་གྱི་

---

^{[མ་དཔེ་གཟིགས་ན་འདིར་གནོན།]}

ལས་དང་སྤྱོད་པ་ཇི་ལྟ་བ་བཞིན་དུ་རྣམ་པར་དམིགས་པ་ཡང་དག་པར་སྟོན་པས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། སེམས་ཅན་ཐམས་ཅད་ཀྱི་ཐ་སྙད་གཟུངས་དམ་པས་འཛིན་པའི་མཐུ་དང་དྲན་པ་ཉམས་པ་མེད་པའི་མཐར་ཐུག་པར་གནས་པས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། ཐ་དད་པ་ཡང་དག་པར་ཤེས་པ་མི་ཟད་པས་སེམས་ཅན་ཐམས་ཅད་ཀྱི་སྒྲ་སྐད་ཤེས་པས། སྟོན་ཅིང་ཆོས་ཀྱི་འཁོར་ལོ་བསྐོར་བས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། མི་འཇིགས་པས་བག་ཚ་བ་མེད་པར་སེང་གེའི་ང་རོ་སྒྲོག་ཅིང་ཆོས་དང་མཐུན་པར་སེམས་ཅན་ཐམས་ཅད་ཁོང་དུ་ཆུད་པར་བྱེད་པས། བྱང་ཆུབ་སེམས་དཔའ་མཚུངས་པ་མཉམ་པ་ཡིན། དུས་གསུམ་གྱི་ཚིག་ལམ་ལ་འཇུག་པ་སྐད་ཅིག་གི་མཐར་འཇུག་པར་བྱེད་པས་བྱང་ཆུབ་སེམས་དཔའ་མཚུངས་པ་མཉམ་པ་ཡིན། སངས་རྒྱས་ཀྱི་སྟོབས་དང་དེ་བཞིན་གཤེགས་པའི་ཡུལ་རྣམ་པར་ཕྱེ་བ་སེམས་ཅན་རྣམས་ལ་ཡང་དག་པར་སྟོན་པས། བྱང་ཆུབ་སེམས་དཔའ་དེ་བཞིན་གཤེགས་པ་ཐམས་ཅད་དང་མཚུངས་པ་མཉམ་པ་ཡིན། དེ་ནས་བྱང་ཆུབ་སེམས་དཔའ་ཀུན་ཏུ་མྱིག་གིས། བྱང་ཆུབ་སེམས་དཔའ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དེ་ལྟར་བྱང་ཆུབ་སེམས་དཔའ་དེ་རྣམ་པ་དེ་ལྟ་བུ་དེ་དག་དང་ལྡན་པས་དེ་བཞིན་གཤེགས་པ་ཐམས་ཅད་དང་མཚུངས་པ་མཉམ་པ་ཡིན་ན། ཅིའི་ཕྱིར་སངས་རྒྱས་མ་ཡིན། ཅིའི་ཕྱིར་སྟོབས་བཅུ་མ་ཡིན། ཅིའི་ཕྱིར་ཐམས་ཅད་མཁྱེན་པ་མ་ཡིན། ཅིའི་ཕྱིར་ཀུན་ཏུ་གཟིགས་པ་མ་ཡིན། ཅིའི་ཕྱིར་ཆོས་ཐམས་ཅད་ཀྱི་དཀྱིལ་འཁོར་ལ་བསྒྲིབས་པ་མི་མངའ་བར་གཟིགས་པ་མ་ཡིན། ཅིའི་ཕྱིར་ཆོས་ཐམས་ཅད་མངོན་པར་སངས་རྒྱས་པ་མ་ཡིན། ཅིའི་ཕྱིར་འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་

---

^{[མ་དཔེ་གཟིགས་ན་འདིར་གནོན།]}

ཐམས་ཅད་དང་མི་གཉིས་པར་སྤྱོད་པ་མ་ཡིན། ཅིའི་ཕྱིར་གནས་པའི་མཐར་གྱུར་པའི་ཡེ་ཤེས་དང་ལྡན་པ་མ་ཡིན། ཅིའི་ཕྱིར་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་རྒྱུན་གཅོད་པ་མ་ཡིན། ཅིའི་ཕྱིར་ཆོས་ཀྱི་དབྱིངས་ཀྱི་མཐར་ཐུག་པ་མ་ཡིན། ཅིའི་ཕྱིར་བྱང་ཆུབ་སེམས་དཔའི་རྒྱུད་ཉེ་བར་ལེན་པ་བཏང་སྙོམས་སུ་མི་གཞོག །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས། བྱང་ཆུབ་སེམས་དཔའ་ཀུན་ཏུ་མིག་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་ཁྱོད་དེ་སྐད་དུ་གལ་ཏེ། བྱང་ཆུབ་སེམས་དཔའ་དེ་དེ་བཞིན་གཤེགས་པ་ཐམས་ཅད་དང་མཚུངས་པ་མཉམ་པ་ཡིན་ན། ཅིའི་ཕྱིར་སངས་རྒྱས་མ་ཡིན་ཞེས་ཟེར་བ་དེ་ཇི་སྐད་སྨྲས་པ་དེ་བཞིན་ཏེ་ལེགས་སོ་ལེགས་སོ། །ཀྱེ་རྒྱལ་བའི་སྲས་ནམ་བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་དང་འདས་པ་དང་མ་འོངས་པ་དང་ད་ལྟར་བྱུང་བའི་སྨོན་ལམ་ཐ་མི་དད་པར་ཞུགས་པས་ཡང་དག་པར་སྐྱེས་པའི་ཡུལ་ཐོབ་པར་གྱུར་པ་དེའི་ཚེ་སངས་རྒྱས་ཞེས་བྱའོ། །དེ་བཞིན་གཤེགས་པའི་དོན་དུ་བྱང་ཆུབ་སེམས་དཔའི་སྤྱད་པ་སྤྱོད་པ་རྒྱུན་མ་བཅད་པས་དེ་བྱང་ཆུབ་སེམས་དཔའ་ཞེས་བྱའོ། །ནམ་དེ་བཞིན་གཤེགས་པ་རྣམས་ཀྱི་སྟོབས་བཅུ་ལ་ཞུགས་པར་གྱུར་པ་དེའི་ཚེ་སྟོབས་བཅུ་ཞེས་བྱའོ། །དེ་བཞིན་གཤེགས་པའི་སྟོབས་སྒྲུབ་ཅིང་། བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པས་བྱང་ཆུབ་སེམས་དཔའ་ཞེས་བྱའོ། །ནམ་ཆེད་དུ་བྱ་བ་མེད་པར་ཆོས་ཀྱི་དབྱིངས་ཤིན་ཏུ་བསྟན་པ་ཐམས་ཅད་རྟོགས་པར་གྱུར་པ་དེའི་ཚེ་ཐམས་ཅད་མཁྱེན་པ་ཞེས་བྱའོ། །ཆོས་ཀྱི་དབྱིངས་ཐམས་ཅད་ཤིན་ཏུ་བསྟན་པ་ཐ་དད་པ་ལ་འཇུག་པ་རིག་པར་སྤྱོད་ཅིང་མཁས་པར་བྱ་བ་ལས་ཕྱིར་མི་ལྡོག་པས་དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་

---

^{[མ་དཔེ་གཟིགས་ན་འདིར་གནོན།]}

སེམས་དཔའ་དེ་ཆོས་ཐམས་ཅད་མི་གཉིས་པར་ཡང་དག་པར་སྤྱོད་པ་ཡོངས་སུ་ཤེས་པར་གྱུར་པ་དེའི་ཚེ་སངས་རྒྱས་ཀྱི་ཆོས་ཐམས་ཅད་རྣམ་པར་སངས་རྒྱས་པའི་བློ་མངའ་བ་ཞེས་བྱའོ། །བྱང་ཆུབ་སེམས་དཔའ་དེ་ཆོས་ཐམས་ཅད་གཉིས་པ་དང་གཉིས་མ་ཡིན་པ་ལ་མཁས་པས་རྣམ་པ་ཐ་དད་པའི་རྒྱུད་ལ་འཇུག་ཅིང་ཆོས་གཅིག་ནས་གཅིག་ཏུ་བརྒྱུད་པ་མཁས་པ་ལ་གནས་པས་དེ་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེ་ཀུན་ཏུ་གཟིགས་པའི་ཡུལ་ཡེ་ཤེས་ཀྱི་སྒོས་ཁོང་དུ་ཆུད་པར་གྱུར་པ་དེའི་ཚེ་ཀུན་ཏུ་གཟིགས་པ་ཞེས་བྱའོ། །བྱང་ཆུབ་སེམས་དཔའ་དེ་ཀུན་ཏུ་གཟིགས་པའི་ཡུལ་མངོན་པར་སྒྲུབ་ཅིང་སེམས་དང་ཡེ་ཤེས་སེམས་སྐད་ཅིག་ཏུ་རྣམ་པར་འཕེལ་བས་ཡོངས་སུ་སྐྱོ་བར་མི་བྱེད་པས་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེ་ཆོས་སྣང་བའི་སྒོ་ཐམས་ཅད་ཀྱིས་སྣང་བར་བྱེད་ཅིང་མུན་པ་མེད་པའི་ས་ལ་གནས་པ་དེའི་ཚེ་བསྒྲིབས་པ་མེད་པར་གཟིགས་པ་ཞེས་བྱའོ། །བྱང་ཆུབ་སེམས་དཔའ་དེ་བསྒྲིབས་པ་མེད་པའི་ཡེ་ཤེས་སྟོན་པའི་དོན་དུ་སངས་རྒྱས་རྗེས་སུ་དྲན་པས་དེ་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱི་ཚུལ་མངོན་པར་ཁོང་དུ་ཆུད་པར་གྱུར་པ་དེའི་ཚེ། ཆོས་ཐམས་ཅད་མངོན་པར་སངས་རྒྱས་པ་ཞེས་བྱའོ། །བྱང་ཆུབ་སེམས་དཔའ་དེ་དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱི་ཚུལ་མངོན་པར་སངས་རྒྱས་པ་ལ་སྤྱོད་ཅིང་རྟོགས་པ་ལ་ཁོང་དུ་ཆུད་པས་དེ་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེ་དེ་བཞིན་གཤེགས་པའི་གནས་ལ་སྤྱོད་ཅིང་། དེ་བཞིན་གཤེགས་པ་ཐམས་ཅད་དང་མི་གཉིས་པར་གྱུར་པ་དེའི་ཚེ་

---

^{[མ་དཔེ་གཟིགས་ན་འདིར་གནོན།]}

འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་དང་མི་གཉིས་པ་ཞེས་བྱའོ། །བྱང་ཆུབ་སེམས་དཔའ་དེ་དེ་བཞིན་གཤེགས་པའི་སྐུ་ཐོབ་པར་བྱ་བའི་ཕྱིར་བདག་ཡོངས་སུ་སྦྱོང་ཞིང་རྣམ་པར་སྒོམ་པས་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེ་འགྲོ་བ་ཐམས་ཅད་དུ་གནས་པ་ཡང་དག་པའི་མཐའ་ཁོང་དུ་ཆུད་པར་གྱུར་པ་དེའི་ཚེ་ཡང་དག་པའི་མཐའ་མཁྱེན་པ་ཞེས་བྱའོ། །བྱང་ཆུབ་སེམས་དཔའ་དེ་གནས་པའི་ཡང་དག་པའི་མཐའ་ལ་རྟོགས་པར་གཞོག་ཅིང་ཡང་དག་པའི་མཐའ་མངོན་དུ་མི་བྱེད་ལ། ཆོས་ཐམས་ཅད་རབ་ཏུ་དབྱེ་བའི་རྒྱུད་ལ་བཏང་སྙོམས་རབ་ཏུ་ཐོབ་པ་ཡང་མ་ཡིན་པས་དེ་བྱང་ཆུབ་སེམས་དཔའ་ཞེས་བྱའོ། །ནམ་བྱང་ཆུབ་སེམས་དཔའ་དེ་ལེན་པ་མེད་ཅིང་འདོར་བ་མེད་པ་ལ་རྟོག་པ་མེད་ཅིང་རྣམ་པར་རྟོག་པ་མེད་པར་གྱུར་པ་དེའི་ཚེ། སྨོན་ལམ་ཡོངས་སུ་བཏང་བ་ཞེས་བྱའོ། །བྱང་ཆུབ་སེམས་དཔའ་དེ་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བྱེད་ཅིང་ཤིན་ཏུ་ཡངས་པར་བྱེད་པ་དང་། རྣམ་པར་སྦྱོང་བ་དང་ཕྱིར་མི་ལྡོག་པར་བྱེད་པས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་རྒྱུན་མ་བཅད་པ་ཞེས་བྱའོ། །ནམ་བྱང་ཆུབ་སེམས་དཔའ་དེ་ཆོས་ཀྱི་དབྱིངས་སྣང་བར་བྱ་བའི་ཚུལ་གྱིས་ཆོས་ཀྱི་དབྱིངས་མཐའ་དང་དབུས་མེད་པ་རབ་ཏུ་ཤེས་ཤིང་མཚན་ཉིད་གཅིག་གིས་ཆོས་ཐམས་ཅད་ཀྱི་མཚན་ཉིད་རབ་ཏུ་ཤེས་པར་གྱུར་པ་དེའི་ཚེ་ཆོས་ཀྱི་དབྱིངས་ཀྱི་མཐར་ཐུག་པ་ཞེས་བྱའོ། །ནམ་བྱང་ཆུབ་སེམས་དཔའ་དེ་ཕྱིར་མི་ལྡོག་པའི་བཏང་སྙོམས་དང་ལྡན་པར་གྱུར་པ་དེའི་ཚེ། བྱང་ཆུབ་སེམས་དཔའི་རྒྱུད་ཉེ་བར་ལེན་པ་ལ་བཏང་སྙོམས་པ་ཞེས་བྱའོ། །བྱང་ཆུབ་སེམས་དཔའ་དེ་ཆོས་ཀྱི་དབྱིངས་ལ་འཇུག་པ་རབ་ཏུ་ཤེས་པའི་ཚུལ་གྱིས་ཆོས་

---

^{[མ་དཔེ་གཟིགས་ན་འདིར་གནོན།]}

ཀྱི་དབྱིངས་མཐའ་དང་དབུས་མེད་པ་རབ་ཏུ་ཤེས་ཤིང་ཆོས་ཐམས་ཅད་མཚན་ཉིད་ཐ་དད་པའི་ཚུལ་གྱིས་མཚན་ཉིད་སྣ་ཚོགས་རབ་ཏུ་ཤེས་ལ་ཕྱི་མའི་མཐའི་མུར་ཐུག་པའི་བསྐལ་པར་སྐྱོ་བ་མེད་ཅིང་ཡོངས་སུ་ཡི་འཆད་པ་མེད་དེ། འགྲོ་བ་ཐམས་ཅད་སྙིང་རྗེ་ཆེན་པོས་ཡོངས་སུ་བསྐྱབ་པའི་སེམས་ཀྱིས་སེམས་ཅན་ཐམས་ཅད་ཡོངས་སུ་འགྲེལ་ཅིང་འདུལ་བས་དེའི་ཕྱིར་བྱང་ཆུབ་སེམས་དཔའ་ཀུན་ཏུ་བཟང་པོ་ཞེས་བྱའོ། །ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན། གླང་པོའི་རྒྱལ་པོ་ཤུགས་དང་ལྡན་པ་ཞེས་བྱ་བ་ནི་རི་གསེར་གྱི་ལོགས་ཞེས་བྱ་བའི་རིན་པོ་ཆེ་བདུན་གྱི་རང་བཞིན་གྱི་ལུང་པ་རིན་པོ་ཆེའི་ར་བ་བདུན་གྱིས་བསྐོར་བ། རིན་པོ་ཆེའི་ཤིང་ཐགས་ཀྱི་དྲ་བ་བདུན་གྱིས་བསྐོར་བ་རིན་པོ་ཆེའི་དྲ་བས་ཀུན་ནས་ཡོག་པ་ན་གནས་ཏེ། གླང་པོའི་རྒྱལ་པོ་ཤུགས་དང་ལྡན་པ་དེ་ཡང་ཐམས་ཅད་དུ་དཀར་བ་གངས་ཀྱི་མདོག་ལྟར་འདུག་པ། གསེར་གྱི་རྒྱལ་མཚན་ཅན། གསེར་གྱི་རྒྱན་གྱིས་བརྒྱན་པ། གསེར་གྱི་ཕྱང་འཕྲུལ་གྱིས་ཀླུབས་པ། གསེར་གྱི་དྲ་བས་བཀབ་པ། དྲིལ་བུའི་དྲ་བ་བརྒྱུས་པ། རིན་པོ་ཆེ་ཐམས་ཅད་ཀྱི་དྲ་བས་སྣ་ཀུན་ནས་བཀབ་པ། རིན་པོ་ཆེའི་དྲིལ་བུའི་ཕྲེང་བ་ཀུན་ནས་བརྒྱུས་པ། ཡན་ལག་བདུན་ཤིན་ཏུ་གནས་པ། མཆེ་བ་དྲུག་དང་ལྡན་པ། ཡིད་དུ་འོང་བ་གཟུགས་དང་ཁ་དོག་མི་མཐུན་པ་མེད་པ་བལྟ་ན་སྐྱོ་མི་ཤེས་པར་སྡུག་པ་རྣམ་པར་དག་པ། རིགས་དང་ལྡན་པ་ཅང་ཤེས་པ་ཡིད་བཞིན་དུ་བྱེད་པ་སྟེ། དེ་ནི་ལྷའི་དབང་པོ་སུམ་ཅུ་རྩ་གསུམ་གྱི་བདག་པོ་བརྒྱ་བྱིན་གྱི་སྒོ་ན་གསེར་གྱི་ལོགས་ཀྱི་རི་ལུང་པ་ནས་མི་སྣང་བར་གྱུར་ཏེ། སུམ་ཅུ་རྩ་གསུམ་གྱི་ལྷའི་རྒྱལ་པོ་བརྒྱ་བྱིན་ལ་རིམ་གྲོ་བྱ་བའི་ཕྱིར་འོང་ངོ་། །དེ་ནས་ལྷའི་རྒྱལ་པོ་བརྒྱ་བྱིན་གྱིས་གླང་པོའི་རྒྱལ་པོ་ཤུགས་དང་ལྡན་པ་ལ་ཞོན་པར་གྱུར་ན། དེའི་ཚེ་གླང་པོའི་རྒྱལ་པོ་ཤུགས་དང་ལྡན་པ་དེ་རྫུ་འཕྲུལ་གྱི་རྣམ་པ་སྣ་ཚོགས་སྟོན་

---

^{[མ་དཔེ་གཟིགས་ན་འདིར་གནོན།]}

ཏེ། མགོ་སུམ་ཅུ་རྩ་གསུམ་མངོན་པར་སྤྲུལ་པ་བྱེད་དོ། །མགོ་རེ་རེ་ལ་ཡང་མཆེ་བ་དྲུག་དྲུག་མངོན་པར་སྤྲུལ་པ་བྱེད་དོ། །སོ་རེ་རེ་ལ་ཡང་རྫིང་བུ་བདུན་བདུན་མངོན་པར་སྤྲུལ་པ་བྱེད་དོ། །རྫིང་བུ་རེ་རེ་ཞིང་ཡང་པད་མོ་བདུན་བདུན་མངོན་པར་སྤྲུལ་པ་བྱེད་དོ། །པད་མོ་རེ་རེ་ལ་ཡང་ལྷའི་བུ་མོ་བརྒྱ་ཕྲག་བདུན་བདུན་མངོན་པར་སྤྲུལ་པ་བྱེད་དོ། །ལྷའི་བུ་མོ་དེ་དག་ཐམས་ཅད་ཀྱང་ལྷ་རྫས་ཀྱི་རོལ་མོ་སྟོང་ཕྲག་དུ་མའི་སྒྲ་འབྱིན་པས་ལྷའི་དབང་པོ་བརྒྱ་བྱིན་ལ་རིམ་གྲོར་བྱེད་དོ། །ལྷའི་དབང་པོ་བརྒྱ་བྱིན་ཡང་ཤུགས་དང་ལྡན་པའི་རིམ་གྲོ་དང་སྤྲུལ་པ་ལ་ལོངས་སྤྱོད་པའི་ཕྱིར། ཆུ་ཀླུང་ཕྱོགས་མཚམས་ཞེས་བྱ་བའི་ངོགས་ནས་པུན་ད་རི་ཀ་གཅིག་གིས་ཁེབས་པ་ཞེས་བྱ་བའི་བཟའ་ཤིང་གི་ར་བར་འགྲོའོ། །དེ་ནས་ལྷའི་དབང་པོ་བརྒྱ་བྱིན་པུན་ད་རི་ཀ་གཅིག་གིས་ཁེབས་པའི་བཟའ་ཤིང་གི་ར་བར་ཕྱིན་ནས། གླང་པོའི་རྒྱལ་པོ་ཤུགས་དང་ལྡན་པ་ལས་བབས་ཏེ། ཁང་པ་རིན་པོ་ཆེ་ཐམས་ཅད་ཀྱི་རྒྱན་དང་སྙིང་པོ་ཅན་ན་གནས་ཤིང་ལྷའི་བུ་མོ་མཐའ་ཡས་པ་དང་རྩེའོ། །དེ་ནས་གླང་པོའི་རྒྱལ་པོ་ཤུགས་དང་ལྡན་པའི་ལུས་སྣ་ཚོགས་ཀྱིས་རྫུ་འཕྲུལ་བརྟུལ་ཏེ་སུམ་ཅུ་རྩ་གསུམ་པའི་ལྷ་རྣམས་དང་པུན་ད་རི་ཀ་གཅིག་གིས་ཁེབས་པའི་བཟའ་ཤིང་གི་ར་བ་དེ་ན་ལྷ་མོ་རྣམས་དང་ལྷན་ཅིག་རྩེ་དགའ་ཞིང་དགའ་བར་སྤྱོད་དོ། །དེ་ལྟར་གླང་པོའི་རྒྱལ་པོ་ཤུགས་དང་ལྡན་པ་རྩེ་དགའ་ཞིང་དགའ་བར་སྤྱོད་པའི་ཚེ། སུམ་ཅུ་རྩ་གསུམ་པའི་ལྷ་དང་ལུས་མཚུངས་པར་གནས་པས་སུམ་ཅུ་རྩ་གསུམ་པའི་ལྷ་དང་གླང་པོའི་རྒྱལ་པོ་ཤུགས་དང་ལྡན་པས་ལུས་ཤེས་ལུས་ཀྱི་ཁྱད་པར་མེད་དོ། །གཟུགས་ཤེས་གཟུགས་ཀྱི་ཁྱད་པར་མེད་དོ། །ཁ་དོག་ཅེས་ཁ་དོག་གི་ཁྱད་པར་མེད་དོ། །གཟི་བརྗིད་ཅེས་གཟི་བརྗིད་ཀྱི་ཁྱད་པར་མེད་དོ། །འོད་དང་རྒྱན་དང་གོས་དང་རྩེད་མོ་དང་ལོངས་སྤྱོད་དང་བལྟ་བ་དང་ཚུལ་གྱིས་ཀྱང་ཁྱད་པར་གང་ཡང་མེད་དེ་གླང་པོའི་རྒྱལ་པོ་ཤུགས་དང་ལྡན་པ་དང་། སུམ་ཅུ་རྩ་

---

^{[མ་དཔེ་གཟིགས་ན་འདིར་གནོན།]}

གསུམ་པའི་ལྷ་རྣམས་སུ་འདི་དག་ནི་སུམ་ཅུ་རྩ་གསུམ་པའི་ལྷའོ། །འདི་དག་ནི་གླང་པོའི་རྒྱལ་པོ་ཤུགས་དང་ལྡན་པའོ་ཞེས་བྱ་བར་རྣམ་པར་བརྟག་ཏུ་མེད་དོ། །སུམ་ཅུ་རྩ་གསུམ་པའི་ལྷ་རྣམས་དང་གླང་པོའི་རྒྱལ་པོ་ཤུགས་དང་ལྡན་པར་འདྲའོ། །གླང་པོའི་རྒྱལ་པོ་ཤུགས་དང་ལྡན་པ་དང་། སུམ་ཅུ་རྩ་གསུམ་པའི་ལྷ་རྣམས་སུ་འདྲའོ། །ཀྱེ་རྒྱལ་བའི་སྲས་དག་དེ་ལྟར་གླང་པོའི་རྒྱལ་པོ་ཤུགས་དང་ལྡན་པ་གསེར་གྱི་ལོགས་ཀྱི་རི་རིན་པོ་ཆེ་བདུན་གྱི་རང་བཞིན་གྱི་ལུང་པ་ནས་དགའ་བ་སྣ་ཚོགས་མངོན་པར་སྤྲུལ་པ་བྱས་ཏེ། སུམ་ཅུ་རྩ་གསུམ་པའི་ལྷའི་ནང་དུ་ལྷའི་དབང་པོ་བརྒྱ་བྱིན་གྱི་ལོངས་སྤྱོད་ཀྱི་དོན་དུ་འོངས་ནས་ལྷའི་དབང་པོ་བརྒྱ་བྱིན་ལ་མཆོད་པ་དང་རིམ་གྲོ་བྱ་བ་དང་། བཀུར་སྟི་བྱ་བ་དང་། ཕུ་དུད་བྱ་བའི་ཕྱིར་སུམ་ཅུ་རྩ་གསུམ་པའི་ལྷ་དང་ཐ་མི་དད་པའི་ཚུལ་གྱིས་ལྷའི་དགའ་བ་ལ་སྤྱོད་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་ལ་བརྩོན་པ། བྱང་ཆུབ་སེམས་དཔའི་ཏིང་ངེ་འཛིན་རིན་པོ་ཆེའི་རྒྱན་གྱིས་བརྒྱན་པ། བྱང་ཆུབ་སེམས་དཔའི་ཡོན་ཏན་བྱང་ཆུབ་ཀྱི་ཡན་ལག་བདུན་ཤིན་ཏུ་གནས་པ། འོད་གཟེར་ཀུན་ཏུ་འགྱེད་པའི་ལུས་དང་ལྡན་པ། ཆོས་ཀྱི་དྲིལ་གྱི་སྒྲ་ཀུན་ཏུ་སྒྲོག་པའི་དབྱངས་དང་ལྡན་པ། ཆོས་ཀྱི་རྒྱལ་མཚན་རབ་ཏུ་བསྒྲེང་བའི་རྒྱལ་མཚན་ཅན། སྙིང་རྗེའི་ལུང་པའི་གནས་ན་འདུག་པ། མཐུ་བོ་ཆེའི་སྟོབས་ཀྱི་ལུས་ཀྱི་ཁྱད་པར་ཅན། ཐེག་པ་ཆེན་པོའི་སྨོན་ལམ་གྱི་མཆེ་བ་དང་ལྡན་པ། དྲག་ཤུལ་གྱི་སེང་གེས་བག་ཚ་བ་མེད་པ། ཡེ་ཤེས་ཀྱི་རྒྱུད་ཀྱི་ཆོས་ཀྱི་ཅོད་པན་བཏགས་པ། གསང་བའི་གནས་ཐམས་ཅད་ནས་རབ་ཏུ་བྱུང་བ། བྱང་ཆུབ་སེམས་དཔའི་སྤྱོད་པ་དང་སྨོན་ལམ་གྱིས་སྐྱོ་བ་མྱེད་

---

^{[མ་དཔེ་གཟིགས་ན་འདིར་གནོན།]}

པའི་བྱང་ཆུབ་ཀྱི་ཤིང་དྲུང་ན་མོས་ཤིང་སྤྱོད་པ་དང་། སྨོན་ལམ་གྱི་རྒྱུན་མི་གཅོད་པ། བྱང་ཆུབ་ཀྱི་ཤིང་དྲུང་དུ་འདུག་ཅིང་ཐམས་ཅད་མཁྱེན་པ་ཉིད་ཀྱི་རྫིང་བུ་ཐ་དད་པ་མེད་པར་མངོན་པར་འཚང་རྒྱ་བར་མངོན་སུམ་དུ་གྱུར་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་རྒྱ་ཆེན་པོ་རྣམ་པར་འཕེལ་བར་བྱེད་པ་དང་། བློ་རྣམ་པར་སངས་རྒྱས་པ་བྱང་ཆུབ་སེམས་དཔའི་སྨོན་ལམ་མངོན་པར་སྒྲུབ་ཅིང་རྒྱུན་མི་གཅོད་པ། ལྷོད་པར་མི་བྱེད་པ། ཕྱིར་ལྡོག་པར་མི་བྱེད་པ། སྙིང་རྗེ་ཆེན་པོ་མཐའ་དང་དབུས་མེད་པ་རྣམ་པར་འཕེལ་བར་བྱེད་པ། སྨོན་ལམ་ཆེན་པོའི་ཐེག་པས་སེམས་ཅན་ཐམས་ཅད་ཀྱི་རིས་ན་ཀུན་ཏུ་བཟང་པོའི་སྤྱོད་པ་ལ་མངོན་པར་གནས་ཤིང་བརྩོན་འགྲུས་ཡོངས་སུ་མི་གཏོང་བ། ཕྱི་མའི་མཐའི་མུར་ཐུག་པར་སེམས་ཅན་ཐམས་ཅད་ཀྱི་སྡུག་བསྔལ་ཡོངས་སུ་བསྩལ་བའི་ཕྱིར། བྱང་ཆུབ་སེམས་དཔའ་ཀུན་ཏུ་བཟང་པོའི་ལམ་ཡོངས་སུ་ཆད་པར་མི་བྱེད་ཀྱང་བྱང་ཆུབ་ཏུ་མངོན་པར་ཡང་འཚང་མི་རྒྱ་སྟེ། རྫོགས་པར་བྱང་ཆུབ་པའི་སྒོ་བརྗོད་དུ་མྱེད་པའི་ཡང་བརྗོད་དུ་མྱེད་པ་དང་། ཆོས་ཀྱི་འཁོར་ལོ་བསྐོར་བའི་སྒོ་བརྗོད་དུ་མེད་པའི་ཡང་བརྗོད་དུ་མེད་པ་དང་། སྒོམ་པའི་བསམ་པ་སྣ་ཚོགས་ཀྱི་སྒོ་བརྗོད་དུ་མེད་པའི་ཡང་བརྗོད་དུ་མེད་པ་དང་། ཞིང་འབྱམ་ཀླས་པ་སྣ་ཚོགས་ཀྱི་གནས་སུ་མྱ་ངན་ལས་འདའ་བ་དང་། རྣམ་པར་འཕྲུལ་པ་དང་མངོན་པར་འཚང་རྒྱ་བའི་སྒོ་བརྗོད་དུ་མེད་པའི་ཡང་བརྗོད་དུ་མེད་པས། འཇིག་རྟེན་གྱི་ཁམས་སྣ་ཚོགས་འབྱམ་ཀླས་པ་བརྗོད་དུ་མེད་པའི་ཡང་བརྗོད་དུ་མེད་པ་དག་ཏུ་སྐྱེ་བར་སྣང་ངོ་། །བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱད་པ་སྤྱོད་པར་སྣང་ངོ་། །དེ་བཞིན་གཤེགས་པ་བྱང་ཆུབ་ཀྱི་ཤིང་དྲུང་དུ་མངོན་པར་སངས་

---

^{[མ་དཔེ་གཟིགས་ན་འདིར་གནོན།]}

རྒྱས་པ་བརྗོད་དུ་མེད་པའི་ཡང་བརྗོད་དུ་མེད་པ། བྱང་ཆུབ་སེམས་དཔའི་ཚོགས་བརྗོད་དུ་མེད་པའི་ཡང་བརྗོད་དུ་མེད་པས་ཀུན་ནས་བསྐོར་བ་དག་གི་ཞབས་ཀྱི་དྲུང་དུ་འགྲོ་བར་སྣང་ངོ་། །ཕྱོགས་འབྱམ་ཀླས་པ་དང་ཕྱོགས་མཚམས་འབྱམ་ཀླས་པའི་སངས་རྒྱས་ཀྱི་ཞིང་མང་པོ་རྒྱ་མཚོ་དག་ཏུ་མངོན་པར་སངས་རྒྱས་ནས་སྐད་ཅིག་གཅིག་ལོན་པ་དང་། མངོན་པར་སངས་རྒྱས་ནས་ཡུད་ཙམ་ཅིག་ལོན་པ་དང་། མངོན་པར་སངས་རྒྱས་ནས་དུས་གཞན་དུ་གྱུར་པ་དང་། མངོན་པར་སངས་རྒྱས་ནས་ཉི་མ་གཅིག་ལོན་པ་དང་། མངོན་པར་སངས་རྒྱས་ནས་ཟླ་བ་ཕྱེད་ལོན་པ་དང་། མངོན་པར་སངས་རྒྱས་ནས་ལོ་གཅིག་ལོན་པ་དང་། མངོན་པར་སངས་རྒྱས་ནས་ལོ་གྲངས་མེད་པ་ལོན་པ་དང་། མངོན་པར་སངས་རྒྱས་ནས་བསྐལ་པ་གཅིག་ལོན་པ་དང་། མངོན་པར་སངས་རྒྱས་ནས་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་སྙེད་ལོན་པའི་དེ་བཞིན་གཤེགས་པ་དག་གི་ཞབས་ཀྱི་དྲུང་དུ་ཉེ་བར་འགྲོའོ། །དེ་བཞིན་དུ་ཤར་ཕྱོགས་ཀྱི་སངས་རྒྱས་ཀྱི་ཞིང་གི་སངས་རྒྱས་ཐམས་ཅད་ལ་རིམ་གྲོ་བྱེད་དོ། །མཆོད་པ་བྱེད་དོ། །ཕྱག་འཚལ་ལོ། །རབ་ཏུ་འདུད་དོ། །སངས་རྒྱས་རྣམས་ལ་ཞུ་བ་བྱེད་དོ། །རྣམ་པར་འཕེལ་བའི་སྒྱུ་མའི་དཀྱིལ་འཁོར་གྱི་ཞིང་ཡོངས་སུ་བྱང་ཞིང་བྱང་ཆུབ་སེམས་དཔའི་སྤྱོད་པ་རྣམ་པར་དག་པ་མཐའ་ཡས་པ་དང་། ཡེ་ཤེས་བརྗོད་དུ་མེད་པའི་ཡང་བརྗོད་དུ་མེད་པ་དང་། བྱང་ཆུབ་སེམས་དཔའི་རྣམ་པར་འཕྲུལ་བ་བརྗོད་དུ་མེད་པའི་ཡང་བརྗོད་དུ་མེད་པས་བྱང་ཆུབ་སེམས་དཔའི་ཁྱུ་མཆོག་གི་མཐུ་ཕྱུང་བ་སྣ་ཚོགས་དང་བྱང་ཆུབ་སེམས་དཔའི་ཡེ་ཤེས་ཡངས་པ་སྣ་ཚོགས་དང་། བྱང་ཆུབ་སེམས་དཔའི་སྤྱོད་ཡུལ་སྣ་ཚོགས་དང་བྱང་ཆུབ་སེམས་དཔའི་རྫུ་འཕྲུལ་སྣ་ཚོགས་དང་། བྱང་ཆུབ་

---

^{[མ་དཔེ་གཟིགས་ན་འདིར་གནོན།]}

སེམས་དཔའི་མངོན་པར་བསྒྲུབ་པའི་ཁྱུ་མཆོག་གི་མཐུ་མཐའ་དང་དབུས་མེད་པ་སྣ་ཚོགས་དང་། བྱང་ཆུབ་སེམས་དཔའི་རྣམ་པར་ཐར་པ་ལ་རྣམ་པར་རྩེ་བ་སྣ་ཚོགས་དང་། བྱང་ཆུབ་སེམས་དཔའི་ཆོས་སྣང་བ་རྣམ་པར་དག་པའི་ཚུལ་སྣ་ཚོགས་ཀྱི་བྱང་ཆུབ་སེམས་དཔའི་སྤྱོད་པ་དང་། སྨོན་ལམ་གྱིས་ཐམས་ཅད་དུ་སྤྱོད་པར་སྣང་ངོ་། །བྱང་ཆུབ་སེམས་དཔའ་ཀུན་ཏུ་བཟང་པོའི་རྫུ་འཕྲུལ་དང་། ཁྱུ་མཆོག་གི་མཐུ་ཕྱུང་བའི་ཚུལ་གྱིས་སྔོན་གྱི་མཐའ་ཡང་འཇིག་པར་མི་བྱེད་དེ། འཁོར་བའི་འཁོར་ལོ་རྒྱུན་གཅད་པ་དང་། འཇིག་རྟེན་གྱི་ཁམས་ཀྱི་རྒྱུད་འབྱམ་ཀླས་པ་རྣམ་པར་དག་པར་བྱ་བ་དང་དེ་བཞིན་གཤེགས་པའི་རྒྱུད་དང་། སངས་རྒྱས་ཐམས་ཅད་མཐོང་བར་བྱ་བ་དང་། སངས་རྒྱས་ཀྱི་ཆོས་ཐམས་ཅད་ལ་འཇུག་ཅིང་ཁོང་དུ་ཆུད་པར་བྱ་བ་དང་། དུས་གསུམ་གྱི་རྒྱུད་ཀྱི་སངས་རྒྱས་ཀྱི་ཚུལ་རྗེས་སུ་དྲན་པར་བྱ་བ་དང་། ཐམས་ཅད་མཁྱེན་པའི་ཡེ་ཤེས་ཀྱི་རྒྱུད་རྣམ་པ་ཐ་དད་པའི་སྒྲ་དང་། ཆོས་ཐམས་ཅད་ཀྱི་རྒྱུ་ཕྱོགས་ཀྱི་རྒྱུད་དང་ཆོས་ཀྱི་ལུས་ཐམས་ཅད་ཀྱི་རྗེས་སུ་འབྲང་བར་བྱ་བ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ཡང་དག་པར་གཟུང་བའི་རྒྱུད་ཁོང་དུ་ཆུད་ཅིང་ཡོངས་སུ་རྫོགས་པར་བྱ་བ་དང་། ཀུན་ཏུ་བཟང་པོའི་རྒྱུད་ཀྱིས་ཐམས་ཅད་མཁྱེན་པའི་ཡེ་ཤེས་དང་ཁྱུ་མཆོག་གི་མཐུ་མངོན་པར་འཚང་རྒྱ་བར་བྱ་བའི་ཕྱིར། སེམས་ཅན་བརྗོད་དུ་མེད་པའི་ཡང་བརྗོད་དུ་མེད་པ་རྣམ་པར་དག་པར་བྱེད་དོ། །ཀྱེ་རྒྱལ་བའི་སྲས་དག་ལྟོས་དང་དེ་ལྟར་ཀུན་ཏུ་བཟང་པོའི་སྤྱོད་པ་རྒྱུན་མི་འཆད་པ་དང་། བྱང་ཆུབ་སེམས་དཔའི་སྤྱོད་པ་ཡོངས་སུ་འཆད་པ་མེད་པ་དང་། ཐམས་ཅད་མཁྱེན་པ་ཉིད་ཀྱི་སྣང་བ་ཉམས་པ་མེད་པ་དང་། སངས་རྒྱས་ཐམས་ཅད་ཡོངས་སུ་བལྟ་བའི་ཕྱིར་ཀུན་ཏུ་བཟང་པོའི་སྤྱོད་པ་རྒྱ་ཆེན་པོ་འབྱུང་ཞིང་ཐམས་ཅད་མཁྱེན་པའི་ཁྱུ་མཆོག་གི་མཐུ་ཕྱུང་བ་མྱོང་བར་བྱེད་པ་ངོ་མཚར་མི་ཆེ་

---

^{[མ་དཔེ་གཟིགས་ན་འདིར་གནོན།]}

འམ། ཀྱེ་རྒྱལ་བའི་སྲས་དག་གླང་པོའི་རྒྱལ་པོ་ཤུགས་དང་ལྡན་པ་དེ་ནི་གླང་པོའི་གནས་ནས་ཀྱང་འཕོ་བ་མེད་ལ་སུམ་ཅུ་རྩ་གསུམ་གྱི་སྐྱེ་བའི་སྐྱེ་མཆེད་དུ་ཡང་རབ་ཏུ་སྐྱེའོ། །བཞོན་པའི་དངོས་པོར་ཡང་རྣམ་པར་སྤྱོད་དོ། །ལྷའི་རྩེ་བ་ལའང་ཡོངས་སུ་སྤྱོད་དོ། །རིམ་གྲོ་བྱ་བའི་ཚུལ་ཡང་ཡོངས་སུ་མི་སྤོང་ངོ་། །ལྷའི་བུ་མོ་རྣམས་དང་ཡང་ཀུན་ཏུ་རྩེའོ། །ལྷ་རྣམས་དང་ཡང་མཚུངས་ཤིང་མཉམ་སྟེ། རྣམ་པ་ཐ་དད་པ་མེད་དོ། །ཀྱེ་རྒྱལ་བའི་སྲས་དག་དེ་བཞིན་དུ་བྱང་ཆུབ་སེམས་དཔའ་ཡང་ཀུན་ཏུ་བཟང་པོའི་སྤྱོད་པ་ཐེག་པ་ཆེན་པོ་ཡང་ཡོངས་སུ་མི་གཏོང་ཞིང་ཤི་འཕོ་བ་ཡང་མེད་ལ་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་ལ་ཡང་རབ་ཏུ་སྤྱོད་དོ། །ཐམས་ཅད་མཁྱེན་པ་ཉིད་ལ་ཡང་རྣམ་པར་རྩེའོ། །སངས་རྒྱས་ཀྱི་རྣམ་པར་ཐར་པ་ཡང་རབ་ཏུ་ཤེས་སོ། །ཆགས་པ་མེད་པ་ཉིད་ཀྱང་མངོན་པར་སྒྲུབ་བོ། །ཆགས་པ་མེད་ཅིང་བསྒྲིབས་པ་མེད་པ་ཡང་རྣམ་པར་དག་པར་བྱེད་དོ། །ཞིང་རྣམས་ལ་ཡང་གནས་པ་མེད་དོ། །སངས་རྒྱས་ཀྱི་ཆོས་རྣམས་ལ་ཡང་རློམ་སེམས་མྱེད་ཅིང་མི་རྟོག་རྣམ་པར་མི་རྟོག་གོ །ཆོས་ཐམས་ཅད་ཀྱང་མཉམ་པ་ཉིད་དུ་བྱེད་དོ། །མྱི་གཉིས་པ་དང་ཡང་འགལ་བར་མྱི་བྱེད་དེ། སངས་རྒྱས་ཀྱི་ཞིང་ཡང་ཡོངས་སུ་མི་སྤོང་སྟེ། དེ་ལྟ་ན་བྱང་ཆུབ་སེམས་དཔའ་དེ་འདས་པ་དང་། མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་དང་ཡང་མཚུངས་ཤིང་མཉམ་ལ་བྱང་ཆུབ་སེམས་དཔའི་སྤྱོད་པ་ཡང་རྒྱུན་མི་གཅོད་པ་ཡིན། ཀྱེ་རྒྱལ་བའི་སྲས་དག་གླང་པོའི་རྒྱལ་པོ་ཤུགས་དང་ལྡན་པ་དེ་གླང་པོའི་ཡུལ་ན་ཡང་སྣང་ལ་ལྷའི་ཡུལ་ན་ཡང་སྤྱོད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་འདི་ལྟ་བུའི་ཆོས་རྒྱ་ཆེན་པོ་དང་ལྡན་པ་ཡང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ལ་རབ་ཏུ་གནས་པའི་བྱང་ཆུབ་སེམས་དཔའི་ལྷག་

---

^{[མ་དཔེ་གཟིགས་ན་འདིར་གནོན།]}

པའི་བསམ་པ་རྣམ་པར་དག་པས་ཡང་དག་པར་གནས་པ་ཡིན། ཀྱེ་རྒྱལ་བའི་སྲས་དག་འདི་ནི་ཏིང་ངེ་འཛིན་གྱི་དཀྱིལ་འཁོར་རྒྱ་ཆེན་པོ་ཚད་མེད་པ་བྱང་ཆུབ་སེམས་དཔའ་ཉེ་བར་སྤྱོད་པ། ལྷག་པའི་བསམ་པས་རབ་ཏུ་ཐོབ་པ། ཡེ་ཤེས་ཆེན་པོ་ལ་ཞུགས་པ་བཅུ་པ་སྟེ། ཀྱེ་རྒྱལ་བའི་སྲས་དག་འདི་དག་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་ཏིང་ངེ་འཛིན་རྒྱ་ཆེན་པོའི་དཀྱིལ་འཁོར་བཅུ་རྣམས་སོ། །ཏིང་ངེ་འཛིན་བཅུའི་ལེའུ་སྟེ། སུམ་ཅུ་རྩ་གསུམ་པའོ།། །།