བཞི་བཅུ་རྩ་ལྔ་པ། སྡོང་པོས་བརྒྱན་པའི་ལེའུ། སྟོད་ཆ།
སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་བཞི་པ། བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་སྐྱབས་མྱེད་པ་ལ་ཟས་སྦྱིན་གྱི་ཀུན་དགའ་ར་བའི་ནང་ཕོ་བྲང་བརྩེགས་པ་རྒྱན་ཆེན་པོ་ཅན་ན། བྱང་ཆུབ་སེམས་དཔའ་
ཀུན་ཏུ་བཟང་པོ་དང་འཇམ་དཔལ་ལ་སྩོགས་པ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་པ་དམ་པའི་ཡེ་ཤེས་དང་། བརྟན་པ་དམ་པའི་ཡེ་ཤེས་དང་། ཆགས་མྱེད་དམ་པའི་ཡེ་ཤེས་དང་། མེ་ཏོག་དམ་པའི་ཡེ་ཤེས་དང་། ཉི་མ་དམ་པའི་ཡེ་ཤེས་དང་། ཟླ་བ་དམ་པའི་ཡེ་ཤེས་དང་། དྲི་མྱེད་དམ་པའི་ཡེ་ཤེས་དང་། རྡོ་རྗེ་དམ་པའི་ཡེ་ཤེས་དང་། རྡུལ་མྱེད་དམ་པའི་ཡེ་ཤེས་དང་། བྱང་ཆུབ་སེམས་དཔའ་རྣམ་པར་སྣང་བ་དམ་པའི་ཡེ་ཤེས་དང་། བྱང་ཆུབ་སེམས་དཔའ་སྐར་མའི་རྒྱལ་མཚན་དང་། རི་རབ་རྒྱལ་མཚན་དང་། རིན་ཆེན་རྒྱལ་མཚན་དང་། ཆགས་མྱེད་རྒྱལ་མཚན་དང་། མེ་ཏོག་རྒྱལ་མཚན་དང་། དྲི་མྱེད་རྒྱལ་མཚན་དང་། ཉི་མའི་རྒྱལ་མཚན་དང་། མཛེས་པའི་རྒྱལ་མཚན་དང་། རྡུལ་མྱེད་རྒྱལ་མཚན་དང་། བྱང་ཆུབ་སེམས་དཔའ་རྣམ་པར་སྣང་བའི་རྒྱལ་མཚན་དང་། བྱང་ཆུབ་སེམས་དཔའ་རིན་ཆེན་གཟི་བརྗིད་དང་། བློ་གྲོས་ཆེན་པོའི་གཟི་བརྗིད་དང་། ཡེ་ཤེས་རྡོ་རྗེའི་གཟི་བརྗིད་དང་། དྲི་མ་མྱེད་པའི་གཟི་བརྗིད་དང་། ཆོས་ཀྱི་ཉི་མའི་གཟི་བརྗིད་དང་། བསོད་ནམས་རི་བོའི་གཟི་བརྗིད་དང་། ཡེ་ཤེས་སྣང་བའི་གཟི་བརྗིད་དང་། ཀུན་ནས་དཔལ་གྱི་གཟི་བརྗིད་དང་། ཀུན་ནས་འོད་དཔལ་གཟི་བརྗིད་དང་། བྱང་ཆུབ་སེམས་དཔའ་ཕྱོགས་བཅུ་སྣང་བས་རྒྱས་པར་འགེངས་པའི་གཟི་བརྗིད་དང་། བྱང་ཆུབ་སེམས་དཔའ་སའི་སྙིང་པོ་དང་། ནམ་མཁའི་སྙིང་པོ་དང་། པདྨའི་སྙིང་པོ་དང་། རིན་པོ་ཆེའི་སྙིང་པོ་དང་། ཉི་མའི་སྙིང་པོ་དང་། ཡོན་ཏན་རྣམ་དག་སྙིང་པོ་དང་། ཆོས་རྒྱ་མཚོའི་སྙིང་པོ་དང་། རྣམ་པར་སྣང་བའི་སྙིང་པོ་དང་། གཙུག་གི་སྙིང་པོ་དང་། བྱང་ཆུབ་སེམས་དཔའ་པདྨོ་དཔལ་གྱི་སྙིང་པོ་དང་། བྱང་ཆུབ་སེམས་དཔའ་བཟང་པོའི་མྱིག་དང་། རྣམ་པར་དག་པའི་མྱིག་དང་། དྲི་མ་མྱེད་པའི་མྱིག་དང་། ཆགས་པ་མྱེད་པའི་མྱིག་དང་། ཀུན་ནས་ལྟ་བའི་མྱིག་དང་། ཤིན་ཏུ་རྣམ་པར་ལྟ་བའི་མྱིག་དང་། ཨུཏྤ་ལའི་
མྱིག་དང་། རྡོ་རྗེའི་མྱིག་དང་། རིན་པོ་ཆེའི་མྱིག་དང་། བྱང་ཆུབ་སེམས་དཔའ་ནམ་མཁའི་མྱིག་དང་། བྱང་ཆུབ་སེམས་དཔའ་ལྷའི་ཅོད་པན་དང་། ཆོས་ཀྱི་དབྱིངས་སྣང་བའི་བློ་གྲོས་ཅོད་པན་དང་། བྱང་ཆུབ་དམ་པའི་ཅོད་པན་དང་། ཕྱོགས་རྣམ་པར་སྣང་བའི་ཅོད་པན་དང་། སངས་རྒྱས་ཐམས་ཅད་ཡང་དག་པར་འབྱུང་བའི་སྙིང་པོའི་ཅོད་པན་དང་། འཇིག་རྟེན་ཐམས་ཅད་ལས་མངོན་པར་འཕགས་པའི་ཅོད་པན་དང་། ཀུན་ནས་རྣམ་པར་སྣང་བའི་ཅོད་པན་དང་། ཟིལ་གྱིས་ནོན་པ་མྱེད་པའི་ཅོད་པན་དང་། དེ་བཞིན་གཤེགས་པ་ཐམས་ཅད་ཀྱི་སེང་གེའི་ཁྲི་འཛིན་པའི་ཅོད་པན་དང་། བྱང་ཆུབ་སེམས་དཔའ་ཆོས་ཀྱི་དབྱིངས་ནམ་མཁའ་ཀུན་ནས་སྣང་བའི་ཅོད་པན་དང་། བྱང་ཆུབ་སེམས་དཔའ་ཚངས་པའི་དབང་པོའི་གཙུག་ཕུད་དང་། ཀླུའི་དབང་པོའི་གཙུག་ཕུད་དང་། སངས་རྒྱས་ཐམས་ཅད་ཀྱི་སྤྲུལ་པ་སྣང་བའི་གཙུག་ཕུད་དང་། བྱང་ཆུབ་དམ་པའི་གཙུག་ཕུད་དང་། སྨོན་ལམ་རྒྱ་མཚོ་ཐམས་ཅད་རབ་ཏུ་སྒྲོག་པའི་རིན་ཆེན་རྒྱལ་པོའི་གཙུག་ཕུད་དང་། དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་རབ་ཏུ་འགྱེད་པའི་ནོར་བུ་རིན་ཆེན་འབྲུག་སྒྲའི་གཙུག་ཕུད་དང་། ནམ་མཁའི་དབྱིངས་ཐམས་ཅད་ཐ་མྱི་དད་པར་རྣམ་པར་དམྱིགས་པའི་རིན་ཆེན་རྒྱལ་པོས་བརྒྱན་པའི་གཙུག་ཕུད་དང་། དེ་བཞིན་གཤེགས་པ་ཐམས་ཅད་རྣམ་པར་འཕྲུལ་པ་སྣང་བའི་རྒྱལ་མཚན་དང་། རིན་པོ་ཆེའི་རྒྱལ་པོ་དྲ་བས་ཀུན་ནས་ཡོག་པའི་གཙུག་ཕུད་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་སྒྲོག་པའི་གཙུག་ཕུད་དང་། བྱང་ཆུབ་སེམས་དཔའ་དུས་གསུམ་གྱི་མྱིང་ཐམས་ཅད་རབ་ཏུ་སྒྲོག་པའི་གཙུག་ཕུད་དང་། བྱང་ཆུབ་སེམས་དཔའ་རྒྱ་ཆེན་པོའི་འོད་དང་། གཟི་བརྗིད་དྲི་མ་མྱེད་པའི་འོད་དང་། རིན་པོ་ཆེའི་འོད་དང་། རྡུལ་དང་བྲལ་བའི་འོད་དང་། སྐར་མའི་འོད་དང་། ཆོས་ཀྱི་འོད་དང་ཞི་བའི་འོད་དང་། ཉི་མའི་འོད་དང་རྣམ་པར་འཕྲུལ་པའི་འོད་དང་། བྱང་ཆུབ་སེམས་དཔའ་ལྷའི་འོད་དང་། བྱང་ཆུབ་སེམས་དཔའ་བསོད་ནམས་དཔལ་དང་། ཡེ་ཤེས་དཔལ་དང་།
ཆོས་ཀྱི་དཔལ་དང་། མངོན་པར་ཤེས་པའི་དཔལ་དང་། འོད་ཀྱི་དཔལ་དང་། མེ་ཏོག་དཔལ་དང་། རིན་པོ་ཆེའི་དཔལ་དང་། བྱང་ཆུབ་ཀྱི་དཔལ་དང་། ཚངས་པའི་དཔལ་དང་། བྱང་ཆུབ་སེམས་དཔའ་ཀུན་ནས་སྣང་བའི་དཔལ་དང་། བྱང་ཆུབ་སེམས་དཔའ་ཚངས་པའི་དབྱངས་དང་། རྒྱ་མཚོའི་དབྱངས་དང་ས་སྒྲའི་དབྱངས་དང་། འཇིག་རྟེན་དབང་པོའི་དབྱངས་དང་། རི་དབང་རྒྱལ་པོ་འཐབ་པའི་དབྱངས་དང་། ཆོས་ཀྱི་དབྱིངས་ཀུན་ཏུ་རྒྱས་པའི་དབྱངས་དང་། ཆོས་རྒྱ་མཚོ་ཐམས་ཅད་རབ་ཏུ་སྒྲོག་པའི་དབྱངས་དང་། བདུད་ཀྱི་དཀྱིལ་འཁོར་ཐམས་ཅད་རབ་ཏུ་འདུལ་བའི་དབྱངས་དང་། སྙིང་རྗེ་ཆེན་པོའི་ཚུལ་གྱི་སྤྲིན་རབ་ཏུ་སྒྲོག་པའི་དབྱངས་དང་། བྱང་ཆུབ་སེམས་དཔའ་འགྲོ་བ་ཐམས་ཅད་སྡུག་བསྔལ་རབ་ཏུ་ཞི་བར་བྱ་བའི་དབུགས་འབྱིན་པའི་དབྱངས་དང་། བྱང་ཆུབ་སེམས་དཔའ་ཆོས་ཀྱིས་འཕགས་པ་དང་། ཁྱད་པར་གྱིས་འཕགས་པ་དང་། ཡེ་ཤེས་ཀྱིས་འཕགས་པ་དང་། བསོད་ནམས་རི་བོས་འཕགས་པ་དང་། ཡོན་ཏན་གྱི་ཚོགས་ཀྱིས་འཕགས་པ་དང་། གྲགས་པས་འཕགས་པ་དང་། ཀུན་ཏུ་སྣང་བས་འཕགས་པ་དང་། བྱམས་པ་ཆེན་པོས་འཕགས་པ་དང་། ཡེ་ཤེས་རྒྱ་མཚོས་འཕགས་པ་དང་། བྱང་ཆུབ་སེམས་དཔའ་དེ་བཞིན་གཤེགས་པའི་རྒྱུད་ཀྱི་གདུང་གིས་འཕགས་པ་དང་། བྱང་ཆུབ་སེམས་དཔའ་འོད་ཀྱི་དཔལ་དང་། མཆོག་གི་དཔལ་དང་། ཀུན་ཏུ་འཕགས་པའི་དཔལ་དང་། རྣམ་པར་སྣང་བའི་དཔལ་དང་། ཆོས་ཀྱི་དཔལ་དང་། ཟླ་བའི་དཔལ་དང་། ནམ་མཁའི་དཔལ་དང་། རིན་པོ་ཆེའི་དཔལ་དང་། དཔལ་གྱི་དཔལ་དང་། བྱང་ཆུབ་སེམས་དཔའ་ཡེ་ཤེས་ཀྱི་དཔལ་དང་། བྱང་ཆུབ་སེམས་དཔའ་རིའི་དབང་པོའི་རྒྱལ་པོ་དང་། ཆོས་ཀྱི་དབང་པོའི་རྒྱལ་པོ་དང་། འགྲོ་བའི་དབང་པོའི་རྒྱལ་པོ་དང་། ཚངས་པའི་དབང་པོའི་རྒྱལ་པོ་དང་། ཚོགས་ཀྱི་དབང་པོའི་རྒྱལ་པོ་དང་། ལྷའི་དབང་པོའི་རྒྱལ་པོ་དང་། ཞི་བའི་དབང་པོའི་རྒྱལ་པོ་དང་། མི་གཡོ་བའི་དབང་པོའི་རྒྱལ་པོ་དང་། ཁྱུ་མཆོག་གི་དབང་
པོའི་རྒྱལ་པོ་དང་། བྱང་ཆུབ་སེམས་དཔའ་མཆོག་གི་དབང་པོའི་རྒྱལ་པོ་དང་། བྱང་ཆུབ་སེམས་དཔའ་རབ་ཏུ་ཞི་བའི་སྒྲ་དང་། ཆགས་པ་མྱེད་པའི་སྒྲ་དང་། སའི་དབྱངས་ཀྱི་སྒྲ་དང་། རྒྱ་མཚོའི་འབྲུག་གི་སྒྲ་དང་། སྤྲིན་གྱི་དབྱངས་ཀྱི་སྒྲ་དང་། ཆོས་སྣང་བའི་སྒྲ་དང་། ནམ་མཁའི་དབྱངས་ཀྱི་སྒྲ་དང་། སེམས་ཅན་ཀུན་གྱི་དགེ་བའི་རྩ་བ་རབ་ཏུ་སྒྲོག་པའི་སྒྲ་དང་། སྔོན་གྱི་སྨོན་ལམ་ཡོངས་སུ་བསྐུལ་པའི་སྒྲ་དང་། བྱང་ཆུབ་སེམས་དཔའ་བདུད་ཀྱི་དཀྱིལ་འཁོར་བཅོམ་ཞིང་མྱེད་པར་བྱེད་པའི་སྒྲ་དང་། བྱང་ཆུབ་སེམས་དཔའ་རིན་པོ་ཆེའི་བློ་དང་། ཡེ་ཤེས་རི་བོའི་བློ་དང་། ནམ་མཁའི་བློ་དང་། དྲི་མ་མྱེད་པའི་བློ་དང་། ཆགས་པ་མྱེད་པའི་བློ་དང་། རྣམ་པར་སངས་རྒྱས་པའི་བློ་དང་། དུས་གསུམ་སྣང་བའི་བློ་དང་། ཡངས་པའི་བློ་དང་། ཀུན་ཏུ་སྣང་བའི་བློ་དང་། བྱང་ཆུབ་སེམས་དཔའ་ཆོས་ཀྱི་དབྱིངས་སུ་སྣང་བའི་བློ་དང་། དེ་དག་ལ་སྩོགས་པ་བྱང་ཆུབ་སེམས་དཔའ་ལྔ་སྟོང་ཙམ་སྟེ། ཀུན་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་གྱིས་བྱུང་བ་སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་པས། ཆགས་པ་མྱེད་པའི་སྤྱོད་ཡུལ་ཅན། དེ་བཞིན་གཤེགས་པ་ཐམས་ཅད་ཀྱི་དྲུང་དུ་འདོང་བས་ལུས་མཐའ་ཡས་པའི་བྱིན་གྱི་རླབས་དང་ལྡན་པ། སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་ཡོངས་སུ་བསྟན་པ་རྣམ་པར་དམྱིགས་པར་བྱ་བ་ལ་བསྒྲིབ་པ་མྱེད་པའི་མྱིག་གི་དཀྱིལ་འཁོར་རྣམ་པར་དག་པ། དེ་བཞིན་གཤེགས་པ་ཐམས་ཅད་མངོན་པར་འཚང་རྒྱ་བའི་ཚེ། ཉེ་བར་འདོང་བ་རྒྱུན་མྱི་གཅོད་པས། ཚད་མྱེད་པར་ཕྱིན་པ། ཆོས་རྒྱ་མཚོའི་ཚུལ་ཐམས་ཅད་ལ་ཡེ་ཤེས་སྣང་བ། རབ་ཏུ་ཐོབ་པས་སྣང་བ་མཐའ་ཡས་པ་དང་ལྡན་པ། སོ་སོ་ཡང་དག་པར་རིག་པ་རྣམ་པར་དག་པས་བསྐལ་པ་མཐའ་ཡས་པར་ཤིན་ཏུ་སྟོན་པ་མྱི་ཟད་པ་འགྲོ་བའི་བསམ་པ་ཅི་ལྟ་བ་བཞིན་དུ་གཟུགས་ཀྱི་ལུས་ཡོངས་སུ་སྟོན་པས་ནམ་མཁའི་དབྱིངས་ཀྱིས་ཀླས་པའི་ཡེ་ཤེས་ཀྱི་སྤྱོད་
ཡུལ་རྣམ་པར་དག་ཅིང་མྱི་གནས་པ། སེམས་ཅན་གྱི་ཁམས་སེམས་ཅན་མྱེད་པ་དང་། སྲོག་མྱེད་པ་ཡོངས་སུ་ཤེས་པས་རབ་རིབ་མྱེད་པ། ཆོས་ཀྱི་དབྱིངས་ཐམས་ཅད་དུ་འོད་ཟེར་གྱི་དྲ་བས་རྒྱས་པར་འགེངས་པས་ནམ་མཁའ་དང་མཉམ་པ་ཤ་སྟག་དང་ཐབས་གཅིག་ཏུ་བཞུགས་སོ། །ཉན་ཐོས་རྫུ་འཕྲུལ་ཆེན་པོ་དང་ལྡན་པ་ལྔ་བརྒྱ་སྟེ། ཐམས་ཅད་ཀྱང་བདེན་པའི་ཚུལ་གྱི་རང་བཞིན་མངོན་པར་ཁོང་དུ་ཆུད་པ། ཡང་དག་པའི་མཐའ་མངོན་སུམ་དུ་གྱུར་པ། ཆོས་ཀྱི་རང་བཞིན་ལ་ཞུགས་པ། སྲིད་པའི་རྒྱ་མཚོ་ལས་གྱེན་དུ་འཕགས་པ། དེ་བཞིན་གཤེགས་པའི་ཚོགས་སུ་འགྱུར་བའི་སྤྱོད་ཡུལ་ཅན་ཀུན་ནས་སྦྱོར་བ་དང་། བག་ལ་ཉལ་བ་དང་བཅིངས་པ་རྣམ་པར་བཟློག་པ། ཆགས་པ་མྱེད་པའི་གནས་ལ་བརྟེན་པ། ནམ་མཁའ་ལྟར་ཞི་བ་ལ་རྣམ་པར་སྤྱོད་པ། སངས་རྒྱས་ལ་ཐེ་ཙོམ་དང་ནེམ་ནུར་དང་། ཡིད་གཉིས་ཡོངས་སུ་ཆད་པ། སངས་རྒྱས་ཀྱི་ཡེ་ཤེས་རྒྱ་མཚོ་ལ་མོས་པའི་ལམ་དུ་ཞུགས་པ་ཤ་སྟག་དང་། འཇིག་རྟེན་གྱི་དབང་པོ་སྔོན་གྱི་རྒྱལ་བ་ལ་བྱ་བ་བྱས་པ། འགྲོ་བ་ཐམས་ཅད་ལ་ཕན་པ་དང་། བདེ་བའི་དོན་དུ་ཞུགས་པ། གསོལ་བ་མ་བཏབ་པར་དགེ་བའི་བཤེས་གཉེན་དུ་གྱུར་པ། སེམས་ཅན་གཞན་བསྲུང་བ་ལ་ཞུགས་པ། འཇིག་རྟེན་ཐམས་ཅད་ལས་འཕགས་པའི་ཁྱད་པར་དང་ལྡན་པའི་ཡེ་ཤེས་ཀྱི་སྒོ་ལ་ཞུགས་པ། སེམས་ཅན་ཐམས་ཅད་ཡོངས་སུ་མྱི་གཏོང་བའི་སེམས་དང་ལྡན་པ། སངས་རྒྱས་ཐམས་ཅད་ཀྱི་བསྟན་པའི་སྤྱོད་ཡུལ་ལ་བྱུང་བ་དེ་བཞིན་གཤེགས་པའི་བསྟན་པ་ཡོངས་སུ་བསྲུང་བ་ལ་ཞུགས་པ། སངས་རྒྱས་ཀྱི་རིགས་ཡང་དག་པར་གཟུང་བའི་སྨོན་ལམ་གྱིས་ཡང་དག་པར་སྐྱེས་པ། དེ་བཞིན་གཤེགས་པའི་གདུང་གི་རྒྱུད་དུ་འབྱུང་བ་མངོན་དུ་གྱུར་པ། ཐམས་ཅད་མཁྱེན་པ་ཉིད་ལ་མངོན་པར་མོས་པ་ཤ་སྟག་དང་ཡང་ཐབས་གཅིག་གོ །དེ་ནས་བྱང་ཆུབ་སེམས་དཔའ་འཁོར་དང་བཅས་པ་དེ་དག་དང་། ཉན་ཐོས་རྫུ་འཕྲུལ་ཆེན་པོ་དང་ལྡན་པ།
དེ་དག་དང་འཇིག་རྟེན་གྱི་དབང་པོ་འཁོར་དང་བཅས་པ་དེ་དག་འདི་སྙམ་དུ་གྱུར་ཏེ། དེ་བཞིན་གཤེགས་པའི་ཡུལ་དང་དེ་བཞིན་གཤེགས་པའི་ཡེ་ཤེས་ཀྱི་སྤྱོད་ཡུལ་དང་། དེ་བཞིན་གཤེགས་པའི་བྱིན་གྱི་རླབས་དང་། དེ་བཞིན་གཤེགས་པའི་སྟོབས་དང་། དེ་བཞིན་གཤེགས་པའི་མྱི་བསྙེངས་པ་དང་། དེ་བཞིན་གཤེགས་པའི་ཏིང་ངེ་འཛིན་དང་། དེ་བཞིན་གཤེགས་པའི་རྣམ་པར་སྤྱོད་པ་དང་། དེ་བཞིན་གཤེགས་པའི་མངའ་དང་། དེ་བཞིན་གཤེགས་པའི་ཡེ་ཤེས་དང་། དེ་བཞིན་གཤེགས་པའི་བྱིན་གྱི་རླབས་དང་། དེ་བཞིན་གཤེགས་པའི་རྣམ་པར་འཕྲུལ་པ་དང་། དེ་བཞིན་གཤེགས་པའི་མཐུ་དང་། དེ་བཞིན་གཤེགས་པའི་སྔོན་གྱི་སྨོན་ལམ་དང་། སྔོན་ལེགས་པར་སྤྱད་པའི་དགེ་བའི་རྩ་བ་དང་། དགེ་བའི་བཤེས་གཉེན་གྱི་སྐྱབས་དང་། དད་པའི་མྱིག་ཡོངས་སུ་དག་པ་དང་། རྒྱ་ཆེན་པོ་ལ་མོས་པའི་སྣང་བ་རབ་ཏུ་ཐོབ་པ་དང་། བྱང་ཆུབ་སེམས་དཔའི་ལྷག་པའི་བསམ་པ་རྣམ་པར་དག་པ་དང་། བསམ་པ་ཐག་པའི་ཐམས་ཅད་མཁྱེན་པ་ཉིད་དུ་སྨོན་ཅིང་ཡང་དག་པར་ཞུགས་པ་མ་གཏོགས་པར་ལྷ་དང་བཅས་པའི་འཇིག་རྟེན་གྱིས་འཇུག་པའམ། ཁོང་དུ་ཆུད་པའམ་ཡིད་ཆེས་པའམ། ཡོངས་སུ་ཤེས་པའམ། རྣམ་པར་རྟོག་པའམ། གཟུང་བའམ་རྣམ་པར་དཔྱད་པའམ། རྣམ་པར་བསྒོམ་པའམ། རྣམ་པར་དབྱེ་བའམ། རྣམ་པར་དགྲོལ་བའམ། རབ་ཏུ་བརྗོད་པའམ། སེམས་ཅན་ཕ་རོལ་གྱི་རྒྱུད་དུ་ཕྱིན་པར་བྱ་བར་ནི་མྱི་ནུས་ན། བཅོམ་ལྡན་འདས་ཉིད་ཀྱིས་བདག་ཅག་བྱང་ཆུབ་སེམས་དཔའ་རྣམས་ཀྱི་བསམ་པའི་ཚུལ་ཇི་ལྟ་བ་དང་། སེམས་ཅན་བསམ་པ་རྣམ་པ་ཐ་དད་པ་དང་། མོས་པ་སྣ་ཚོགས་དང་། ཤེས་པ་སྣ་ཚོགས་ཀྱི་ཚིག་དང་། བརྡ་སྣ་ཚོགས་སུ་གྱུར་པ། དབང་བསྒྱུར་བའི་ས་གཞན་དང་། གཞན་ལ་གནས་པ་དབང་པོ་སྣ་ཚོགས་སུ་རྣམ་པར་དག་པ། བསམ་པ་དང་སྦྱོར་བ་རྣམ་པ་གཞན་དང་གཞན་ཅན། སེམས་དང་བསམ་པའི་ཡུལ་གཞན་དང་གཞན་ཅན། དེ་བཞིན་གཤེགས་པའི་ཡོན་ཏན་གཞན་དང་གཞན་ལ་གནས་པ། ཆོས་
བསྟན་པ་གཞན་དང་གཞན་ལ་མོས་པ་དག་ལ་སྔོན་ཐམས་ཅད་མཁྱེན་པ་ཉིད་དུ་ཞུགས་པ་ལྟའང་ཡང་དག་པར་བསྟན་གྲང་། སྔོན་བྱང་ཆུབ་སེམས་དཔའི་སྨོན་ལམ་མངོན་པར་བསྒྲུབ་པ་ལྟའང་ཡང་དག་པར་བསྟན་གྲང་། སྔོན་གྱི་བྱང་ཆུབ་སེམས་དཔའི་ཕ་རོལ་ཏུ་ཕྱིན་པའི་དཀྱིལ་འཁོར་ཡོངས་སུ་དག་པ་ལྟའང་ཡང་དག་པར་བསྟན་གྲང་། སྔོན་གྱི་བྱང་ཆུབ་སེམས་དཔའི་ས་ཡོངས་སུ་མནན་པའི་རྣམ་པར་འཕྲུལ་པ་ལྟའང་ཡང་དག་པར་བསྟན་གྲང་། སྔོན་བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་མངོན་པར་བསྒྲུབ་པ་ཡོངས་སུ་རྫོགས་པར་མཛད་པ་ལྟའང་ཡང་དག་པར་བསྟན་གྲང་། སྔོན་གྱི་བྱང་ཆུབ་སེམས་དཔའི་ཚུལ་མངོན་པར་བསྒྲུབ་པ་རྣམ་པར་ཕྱེ་བའི་སྣང་བ་ལྟའང་ཡང་དག་པར་བསྟན་གྲང་། སྔོན་བྱང་ཆུབ་སེམས་དཔའི་ལམ་གྱི་རྒྱན་ཡོངས་སུ་དག་པར་མཛད་པ་ལྟའང་ཡང་དག་པར་བསྟན་གྲང་། སྔོན་བྱང་ཆུབ་སེམས་དཔའི་འབྱུང་བའི་ཚུལ་རྒྱ་མཚོ་མངོན་པར་བསྒྲུབ་པ་ལྟའང་ཡང་དག་པར་བསྟན་གྲང་། སྔོན་གྱི་བྱང་ཆུབ་སེམས་དཔའི་ཡང་དག་པར་བསྒྲུབ་པ་དང་། རྣམ་པར་འཕྲུལ་པའི་རྒྱན་ཕུན་སུམ་ཚོགས་པ་ལྟའང་ཡང་དག་པར་བསྟན་གྲང་། བྱང་ཆུབ་སེམས་དཔའི་སྔོན་གྱི་སྦྱོར་བ་རྒྱ་མཚོ་ལྟའང་ཡང་དག་པར་བསྟན་གྲང་། མངོན་པར་རྫོགས་པའི་བྱང་ཆུབ་ཀྱི་སྒོས་རྣམ་པར་འཕྲུལ་པ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པའི་ཆོས་ཀྱི་འཁོར་ལོ་རབ་ཏུ་བསྐོར། བའི་རྣམ་པར་འཕྲུལ་པ་དང་། ཁྱུ་མཆོག་གི་མཐུ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པའི་སངས་རྒྱས་ཀྱི་ཞིང་ཡོངས་སུ་དག་པ་དང་རྣམ་པར་འཕྲུལ་པ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པའི་སེམས་ཅན་གྱི་ཁམས་འདུལ་བའི་ཐབས་ཀྱི་སྒོ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པ་ཐམས་ཅད་མཁྱེན་པ་ཉིད་ཀྱི་ཆོས་ཀྱི་གྲོང་ཁྱེར་ལ་མངའ་མཛད་པ་ལྟའང་ཡང་དག་པར་
བསྟན་གྲང་། དེ་བཞིན་གཤེགས་པ་སེམས་ཅན་ཐམས་ཅད་ཀྱི་ལམ་སྣང་བར་མཛད་པ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པ་སེམས་ཅན་ཐམས་ཅད་ཀྱི་གནས་སུ་གཤེགས་ཤིང་རྣམ་པར་འཕྲུལ་པ་མཛད་པ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པ་སེམས་ཅན་ཐམས་ཅད་ཀྱི་ཡོན་བཞེས་པ་མཛད་པ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པ་སེམས་ཅན་ཐམས་ཅད་ཀྱི་བསོད་ནམས་དང་ཡོན་ཏན་སྟོན་པའི་ཆོ་འཕྲུལ་མཛད་པ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པ་སེམས་ཅན་ཐམས་ཅད་ཀྱི་སེམས་ཀྱི་ཚུལ་ལ་སངས་རྒྱས་ཀྱི་གཟུགས་བརྙན་དམྱིགས་པ་མཛད་པ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པ་སེམས་ཅན་ཐམས་ཅད་ལ། རྣམ་པར་འཕྲུལ་པའི་ཆོ་འཕྲུལ་མཛད་པ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པ་སེམས་ཅན་ཐམས་ཅད་ལ་ཡོངས་སུ་བསྟན་པ་དང་། རྗེས་སུ་བསྟན་པའི་ཆོ་འཕྲུལ་མཛད་པ་ལྟའང་ཡང་དག་པར་བསྟན་གྲང་། དེ་བཞིན་གཤེགས་པ་སེམས་ཅན་ཐམས་ཅད་ལ་སངས་རྒྱས་ཀྱི་ཏིང་ངེ་འཛིན་གྱི་སྤྱོད་ཡུལ་བསམ་གྱིས་མྱི་ཁྱབ་པས་རྣམ་པར་འཕྲུལ་པ་མཛད་པ་ལྟའང་ཡང་དག་པར་བསྟན་གྲང་སྙམ་པ་དང་། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་གི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས། སེང་གེ་རྣམ་པར་བསྒྱིངས་པ་ཞེས་བྱ་བའི་ཏིང་ངེ་འཛིན་ནམ་མཁའ་དང་མཉམ་པས་དཔེ་མྱེད་པ་འགྲོ་བ་ཐམས་ཅད་དུ་རྣམ་པར་སྣང་བའི་རྒྱན་དང་ལྡན་པ། ཐུགས་རྗེ་ཆེན་པོའི་སྒོའི་རང་བཞིན་ཅན། ཐུགས་རྗེ་ཆེན་པོའི་སྒོ་དང་ལྡན་པ། ཐུགས་རྗེ་ཆེན་པོ་སྔོན་དུ་འགྲོ་བ། ཐུགས་རྗེ་ཆེན་པོའི་ཆོས་ཅན་ལ་མཉམ་པར་གཞག་གོ །བཅོམ་ལྡན་འདས་ཀྱི་དེ་ལྟར་མཉམ་པར་བཞག་མ་ཐག་ཏུ་ཕོ་བྲང་བརྩེགས་པ་རྒྱན་ཆེན་པོ་ཅན་ཡང་མཐའ་དང་དབུས་མྱེད་པར་ཡངས་ཤིང་རྡོ་རྗེ་ཐུབ་པ་མྱེད་པའི་རྒྱལ་མཚན་གྱིས་སའི་གཞི་རབ་ཏུ་བཀོད་པ་དང་། ནོར་བུ་རིན་པོ་ཆེའི་རྒྱལ་པོ་ཐམས་ཅད་ཀྱི་དྲ་བ་ཀུན་ཏུ་བཀྲམ་པ། རིན་པོ་ཆེ་དུ་མའི་མེ་ཏོག་སིལ་མས་ཆལ་བར་གང་བ། ནོར་བུ་རིན་པོ་ཆེ་དམ་པ་མཛེས་པར་བཀྲམ་པ་
དང་། བཻ་ཌཱུརྱའི་ཀ་བས་མཛེས་པར་བྱས་པ། རིན་པོ་ཆེའི་རྒྱལ་པོ་འགྲོ་བ་རྣམ་པར་སྣང་བས་རྒྱན་ཤིན་ཏུ་རྣམ་པར་ཕྱེ་བ། རིན་པོ་ཆེ་བཟང་པོ་མང་པོ་དང་ལྡན་པའི་ནོར་བུ་རིན་པོ་ཆེ་འཛམ་བུའི་ཆུ་ཀླུང་གི་ཕུང་པོས་ཤིན་ཏུ་བརྒྱན་པ་དང་། རིན་པོ་ཆེ་ཐམས་ཅད་ལས་སྒོ་གང་དང་། རྟ་བབས་དང་། པུ་ཤུ་དང་། སྐར་ཁུང་བྱས་ཤིང་ཁྲི་འཕང་གྲངས་མྱེད་པ་རྣམ་པར་དག་པས་བརྒྱན་པ་དང་། འཇིག་རྟེན་གྱི་དབང་པོ་ཐམས་ཅད་དང་འདྲ་བའི་ནོར་བུ་རིན་པོ་ཆེའི་རྒྱན་དང་ལྡན་པ་དང་། འགྲོ་བ་རྒྱ་མཚོའི་ནོར་བུ་རིན་པོ་ཆེ་རྣམ་པར་ཕྱེ་བ་དང་། ནོར་བུ་རིན་པོ་ཆེ་ཐམས་ཅད་ཀྱི་དྲ་བས་ཀུན་ནས་ཡོག་པའི་གདུགས་དང་། རྒྱལ་མཚན་རབ་ཏུ་བསྒྲེང་བ་དང་། སྒོ་དང་རྟ་བབས་ཐམས་ཅད་ལས་འོད་ཟེར་ཆོས་ཀྱི་དབྱིངས་སུ་རྒྱས་པར་འགེངས་པ་རབ་ཏུ་འབྱུང་བས་རྣམ་པར་མཛེས་པར་བྱས་པ་དང་། ཕྱི་རོལ་གྱི་འཁོར་གྱི་དཀྱིལ་འཁོར་གྱི་སའི་གཞི་སྟེགས་བུ་བརྗོད་དུ་མྱེད་པས་བརྒྱན་པ་དང་། ཕྱོགས་ཀུན་ནས་ཐེམ་སྐས་ཀྱི་ཕྲེང་བ་ནོར་བུ་རིན་པོ་ཆེས་བརྩེགས་ཤིང་ཤིན་ཏུ་རྣམ་པར་ཕྱེ་བས་རབ་ཏུ་མཛེས་པར་ཀུན་ནས་གནས་པར་གྱུར་ཏོ། །ཛེ་ཏའི་ཚལ་ཐམས་ཅད་ཀྱང་ཆུ་ཞེང་གབ་པར་ཤིན་ཏུ་ཡངས་ཤིང་རྒྱ་ཆེ་བར་ཀུན་ནས་གནས་པར་གྱུར་ཏེ། སངས་རྒྱས་ཀྱི་མཐུས་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་རྣམས་ཀྱང་ཆུ་ཞེང་ཀུན་ཏུ་རྒྱ་ཆེ་ཞིང་ཡངས་པ་དང་། རིན་པོ་ཆེ་ཐམས་ཅད་ཀྱི་རྒྱན་སྣ་ཚོགས་དང་ལྡན་ཞིང་། སའི་གཞི་ནོར་བུ་རིན་པོ་ཆེ་སྣ་ཚོགས་བརྗོད་དུ་མྱེད་པས་ཀུན་ནས་གྲུབ་པ་དང་། ནོར་བུ་རིན་པོ་ཆེ་གྲངས་མྱེད་པའི་ར་བས་ཀུན་ནས་བསྐོར་བ་དང་། རིན་པོ་ཆེ་སྣ་ཚོགས་ཀྱི་ཤིང་ཏ་ལའི་ཕྲེང་བས་མཛེས་པར་བརྒྱན་པར་ཀུན་ནས་གནས་པར་གྱུར་ཏོ། །སངས་རྒྱས་ཀྱི་ཞིང་དེ་དག་ན་སྤོས་ཆུའི་ཆུ་ཀླུང་ཚད་མྱེད་པ་ཀློང་མཐའ་ཡས་པར་འཁྱིལ་པའི་སྤོས་ཀྱི་ཆུས་ཡོངས་སུ་གང་བ། རིན་པོ་ཆེ་སྣ་ཚོགས་ཀྱི་མེ་ཏོག་མང་པོ་དང་འདྲེས་པར་གྱུར་ལ་གཡས་ཕྱོགས་སུ་འཁྱིལ་ཅིང་འབབ་པ། སངས་རྒྱས་ཀྱི་ཆོས་ཐམས་ཅད་དབྱིངས་
སུ་སྒྲོག་པས་རབ་ཏུ་བརྒྱན་པ་དག་ཀྱང་ཀུན་ནས་གནས་པར་གྱུར་ཏོ། །རིན་པོ་ཆེའི་མེ་ཏོག་པུན་ད་རི་ཀའི་ཕྲེང་བ་དང་། རིན་པོ་ཆེའི་ཤིང་གམ་ཡོ་རིན་པོ་ཆེ་ཐམས་ཅད་ཀྱི་པདྨོ་རབ་ཏུ་རྒྱས་ཤིང་། ཤིན་ཏུ་འཕགས་པས་མཛེས་པར་བརྒྱན་པ་དང་། རིན་པོ་ཆེ་སྣ་ཚོགས་ཀྱི་ཁང་པ་བརྩེགས་པའི་ཕྲེང་བ་བསམ་གྱིས་མྱི་ཁྱབ་པ་ནོར་བུ་རིན་པོ་ཆེ་ཐམས་ཅད་ཀྱི་དྲ་བས་ཀུན་ནས་ཡོག་པ་ནོར་བུ་རིན་པོ་ཆེ་གྲངས་མྱེད་པའི་དྲ་བ་ཀུན་ཏུ་སྣང་བས་བརྒྱན་ཅིང་མཛེས་པ་དང་། ནོར་བུ་རིན་པོ་ཆེའི་གཞལ་མྱེད་ཁང་ནོར་བུ་རིན་པོ་ཆེ་ཐམས་ཅད་ཀྱིས་བརྒྱན་པ་གྲངས་མྱེད་པ་སྤོས་ཐམས་ཅད་ཀྱི་ངད་ཀུན་ནས་འབྱུང་བ་བདུག་སྤོས་ཀྱི་སྤྲིན་གྱི་རྒྱན་དང་ལྡན་པ་དག་ཀྱང་ཀུན་ནས་གནས་པར་གྱུར་ཏོ། །རིན་པོ་ཆེའི་རྒྱལ་མཚན་གྲངས་མྱེད་པ་དང་། གོས་ཀྱི་རྒྱལ་མཚན་དང་། བ་དན་གྱི་རྒྱལ་མཚན་དང་། རིན་པོ་ཆེའི་སྣམ་བུའི་རྒྱལ་མཚན་དང་། མེ་ཏོག་གི་རྒྱལ་མཚན་དང་། རྒྱན་གྱི་རྒྱལ་མཚན་དང་། ཕྲེང་བའི་རྒྱལ་མཚན་དང་། རིན་པོ་ཆེ་སྣ་ཚོགས་ཀྱི་དྲིལ་བུའི་རྒྱལ་མཚན་དང་། རིན་པོ་ཆེའི་རྒྱལ་བའི་གདུགས་ཀྱི་རྒྱལ་མཚན་དང་། ནོར་བུ་རིན་པོ་ཆེ་སྣང་བས་ཀུན་ཏུ་རྒྱས་པར་འགེངས་པའི་རྒྱལ་མཚན་དང་། ནོར་བུ་རིན་པོ་ཆེའི་རྒྱལ་པོ་དེ་བཞིན་གཤེགས་པ་ཐམས་ཅད་ཀྱི་མཚན་གྱི་འཁོར་ལོའི་དབྱངས་རབ་ཏུ་སྒྲོག་པའི་རྒྱལ་མཚན་དང་། ནོར་བུ་རིན་པོ་ཆེའི་རྒྱལ་པོ་སེང་གེ་ཡིད་དུ་འོང་བའི་རྒྱལ་མཚན་དང་། ནོར་བུ་རིན་པོ་ཆེའི་རྒྱལ་པོ་དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྦྱོར་བ་རབ་ཏུ་སྒྲོག་པའི་རྒྱལ་མཚན་དང་། ནོར་བུ་རིན་པོ་ཆེའི་རྒྱལ་པོ་ཆོས་ཀྱི་དབྱིངས་ཐམས་ཅད་རབ་ཏུ་སྣང་བའི་རྒྱལ་མཚན་དང་། རྒྱལ་མཚན་གྱི་རྒྱན་རྣམ་པར་ཕྱེ་བ་ཐམས་ཅད་ཕྱོགས་ཀུན་ནས་རྒྱན་ཏུ་གྱུར་པ་དག་ཀྱང་ཀུན་ནས་གནས་པར་གྱུར་ཏོ། །ཛེ་ཏའི་ཚལ་གྱི་ནམ་མཁའི་དབྱིངས་ཐམས་ཅད་ཀྱང་ལྷའི་གཞལ་མྱེད་ཁང་གི་སྤྲིན་བསམ་གྱིས་མྱི་ཁྱབ་པས་བརྒྱན་པར་ཀུན་ནས་གནས་པར་གྱུར་ཏེ། ཛེ་ཏའི་ཚལ་ཉིད་ཀྱང་སྤོས་སྣ་ཚོགས་ཀྱི་
ཤིང་གྲངས་མྱེད་པའི་སྤྲིན་གྱིས་ཀུན་ནས་ཡོག་ཅིང་བརྒྱན་པ་དང་། བརྗོད་དུ་མྱེད་པའི་རྒྱན་སྣ་ཚོགས་དང་ལྡན་པའི་རི་རབ་ཀྱིས་ཀུན་ནས་འཁོར་ཅིང་རྒྱན་པ་དང་། རོལ་མོ་བརྡུང་བ་དང་། དཀྲོལ་བ་བརྗོད་དུ་མྱེད་པའི་སྤྲིན་ལས་དེ་བཞིན་གཤེགས་པ་ཐམས་ཅད་ལ་བསྟོད་པའི་དབྱངས་དང་ང་རོ་སྙན་པ་འབྱུང་བས་ཀུན་ནས་བརྒྱན་པ་དང་། རིན་པོ་ཆེའི་པདྨོ་བརྗོད་དུ་མྱེད་པའི་སྤྲིན་གྱིས་ཀུན་ནས་ཡོག་ཅིང་བརྒྱན་པ་དང་། རིན་པོ་ཆེའི་སེང་གེའི་ཁྲི་བརྗོད་དུ་མྱེད་པའི་སྟེང་ལྷ་རྫས་ཀྱི་རིན་པོ་ཆེའི་སྟན་བཏིང་བ་ལ། བྱང་ཆུབ་སེམས་དཔའ་འཁོད་ཅིང་དེ་བཞིན་གཤེགས་པ་ལ་བསྟོད་པའི་སྒྲ་དབྱངས་སྙན་པ་འབྱིན་པའི་སྤྲིན་གྱིས་ཀུན་ནས་བརྒྱན་པ་དང་། ལྷའི་དབང་པོ་བརྗོད་དུ་མྱེད་པའི་གཟུགས་བརྙན་མངོན་པར་འབྱུང་བའི་ནོར་བུ་རིན་པོ་ཆེའི་འབྲུའི་སྤྲིན་གྱིས་ཀུན་ནས་བརྒྱན་པ་དང་། མུ་ཏིག་དཀར་པོའི་དྲ་བའི་སྤྲིན་བརྗོད་དུ་མྱེད་པས་ཀུན་ནས་བརྒྱན་པ་དང་། མུ་ཏིག་དམར་པོའི་ཁང་པ་བརྩེགས་པའི་སྤྲིན་བརྗོད་དུ་མྱེད་པས་ཀུན་ནས་ཡོག་ཅིང་བརྒྱན་པ་དང་། རྡོ་རྗེ་ལྟ་བུར་སྲ་བའི་མུ་ཏིག་གི་སྤྲིན་བརྗོད་དུ་མྱེད་པའི་ཆར་མངོན་པར་འབབ་པས་རབ་ཏུ་བརྒྱན་པར་ཀུན་ནས་གནས་པར་གྱུར་ཏོ། །དེ་ཅིའི་ཕྱིར་ཞེ་ན། དེ་ནི་དེ་བཞིན་གཤེགས་པའི་དགེ་བའི་རྩ་བ་བསམ་གྱིས་མི་ཁྱབ་པའི་ཕྱིར་རོ། །དེ་བཞིན་གཤེགས་པའི་ཆོས་དཀར་པོའི་ཚོགས་བསམ་གྱིས་མི་ཁྱབ་པའི་ཕྱིར་རོ། །དེ་བཞིན་གཤེགས་པའི་ཁྱུ་མཆོག་གི་མཐུ་དང་། བྱིན་གྱི་རླབས། བསམ་གྱིས་མྱི་ཁྱབ་པའི་ཕྱིར་རོ། །དེ་བཞིན་གཤེགས་པའི་སྐུ་གཅིག་གིས་འཇིག་རྟེན་གྱི་ཁམས་ཐམས་ཅད་དུ་རྒྱས་པར་འགེངས་པ་རྣམ་པར་འཕྲུལ་པ་བསམ་གྱིས་མྱི་ཁྱབ་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་སྐུ་གཅིག་ཏུ་ཞུགས་པས། སངས་རྒྱས་ཀྱི་ཞིང་རྣམ་པར་ཕྱེ་བ་ཐམས་ཅད་ལ་ཡང་དག་པར་གཞོལ་བའི་བྱིན་གྱི་རླབས་ཡོངས་སུ་སྟོན་པ་བསམ་གྱིས་མྱི་ཁྱབ་པའི་ཕྱིར་རོ། །དེ་བཞིན་གཤེགས་པ་རྣམས་རྡུལ་ཤིན་ཏུ་ཕྲ་བ་གཅིག་ལ་ཆོས་ཀྱི་དབྱིངས་ཐམས་ཅད་ཀྱི་གཟུགས་བརྙན་རྣམ་པར་དམྱིགས་
པར་ཡོངས་སུ་སྟོན་པར་མཛད་པ་བསམ་གྱིས་མྱི་ཁྱབ་པའི་ཕྱིར་རོ། །དེ་བཞིན་གཤེགས་པ་རྣམས་བ་སྤུའི་བུ་ག་གཅིག་ཏུ་སྔོན་གྱི་མཐའི་དེ་བཞིན་གཤེགས་པ་གཅིག་ནས་གཅིག་ཏུ་བརྒྱུད་པ་ཡོངས་སུ་སྟོན་པར་མཛད་པ་བསམ་གྱིས་མྱི་ཁྱབ་པའི་ཕྱིར་རོ། །དེ་བཞིན་གཤེགས་པ་རྣམས་ཀྱི་འོད་ཟེར་གཅིག་གི་སྒོ་ནས་འཇིག་རྟེན་གྱི་ཁམས་འབྱམ་ཀླས་པ་སྣང་བར་འགྱུར་བ་བསམ་གྱིས་མྱི་ཁྱབ་པའི་ཕྱིར་རོ། །དེ་བཞིན་གཤེགས་པ་རྣམས་བ་སྤུའི་རྩེ་མོ་གཅིག་ལས་སྤྲུལ་པའི་སྤྲིན་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་པ་བསམ་གྱིས་མི་ཁྱབ་པའི་ཕྱིར་རོ། །དེ་བཞིན་གཤེགས་པ་རྣམས་བ་སྤུའི་སྒོ་གཅིག་ནས་འཇིག་རྟེན་གྱི་ཁམས་འདུ་བ་དང་། འཇིག་པའི་བསྐལ་པ་ཡོངས་སུ་སྟོན་པ་བསམ་གྱིས་མྱི་ཁྱབ་པའི་ཕྱིར་རོ། །ཇི་ལྟར་ཛེ་ཏའི་ཚལ་དེ་ལྟ་བུའི་སངས་རྒྱས་ཀྱི་ཞིང་ཡོངས་སུ་དག་པས་ཡོངས་སུ་དག་པར་ཀུན་ནས་གནས་པར་གྱུར་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཐམས་ཅད་ཀྱང་ཡོངས་སུ་དག་པར་ཀུན་ནས་གནས་ཤིང་རབ་ཏུ་བརྒྱན་པ་དང་། ཤིན་ཏུ་སྤུད་པ་དང་། དེ་བཞིན་གཤེགས་པའི་སྐུས་ཡོངས་སུ་རྒྱས་པ་དང་། ཛེ་ཏའི་ཚལ་དུ་ཡང་དག་པར་གཞོལ་བ་དང་། བྱང་ཆུབ་སེམས་དཔས་ཡོངས་སུ་རྒྱས་པ་དང་། དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་ཤིན་ཏུ་རྣམ་པར་གནས་པ་དང་རྒྱན་ཐམས་ཅད་ཀྱི་སྤྲིན་གྱི་ཆར་མངོན་པར་འབབ་པ་དང་། རིན་པོ་ཆེ་ཐམས་ཅད་ཀྱི་འོད་ཀྱིས་རབ་ཏུ་སྣང་བ་དང་། རིན་པོ་ཆེ་སྣ་ཚོགས་ཐམས་ཅད་ཀྱི་སྤྲིན་གྱི་ཆར་མངོན་པར་འབབ་པས་བརྒྱན་པ་དང་། ཞིང་ཐམས་ཅད་ཀྱི་རྒྱན་གྱི་སྤྲིན་གྱིས་ཀུན་ནས་ཡོག་པར་བརྒྱན་པ་དང་། ལྷ་རྫས་ཀྱི་ལུས་ཐམས་ཅད་སྤྲིན་གྱི་ཆར་རབ་ཏུ་འབབ་པས་བརྒྱན་པ་དང་། མེ་ཏོག་སྣ་ཚོགས་ཐམས་ཅད་ཀྱི་སྤྲིན་ཤིན་ཏུ་རྒྱས་པའི་ལྷུན་གྱིས་ཀུན་ཏུ་རྒྱས་ཤིང་བརྒྱན་པ་དང་། གོས་ཐམས་ཅད་
ཀྱི་ཤིང་གི་སྤྲིན་གྱི་མཛོད་ནས་གོས་ཁ་དོག་སྣ་ཚོགས་སུ་མཛེས་པའི་ཆར་རབ་ཏུ་འབབ་པས་བརྒྱན་པ་དང་། ཕྲེང་བ་དང་ལྡ་ལྡི་དང་སེ་མོ་དོའི་རྒྱན་ཐམས་ཅད་ཀྱི་སྤྲིན་གྱི་ཆར་རྒྱུན་མི་ཆད་པར་མངོན་པར་འབབ་པས་བརྒྱན་པ་དང་། སྤོས་སྣ་ཚོགས་ཀྱི་བདུག་སྤོས་ཕྱོགས་ཀུན་ནས་འཐུལ་བའི་སྤྲིན་དང་ན་བུན་གྱི་ཆར་ཐམས་ཅད་ཀྱི་ལུས་ཀྱི་དབྱིབས་ལྟར་མངོན་པར་འབབ་པས་བརྒྱན་པ་དང་། རིན་པོ་ཆེ་ཐམས་ཅད་ཀྱི་མེ་ཏོག་གི་དྲ་བའི་སྤྲིན་ལས་རིན་པོ་ཆེའི་རྒྱལ་པོའི་ཕྱེ་མ་ཞིབ་བུའི་ཆར་རྒྱུན་མྱི་འཆད་པར་རབ་ཏུ་འབབ་པ་དང་། རིན་པོ་ཆེ་ཐམས་ཅད་ཀྱི་རྒྱལ་མཚན་དང་བ་དན་གྱི་སྤྲིན་ལྷའི་བུ་མོའི་ལག་ན་ཁྱེར་བ་ནམ་མཁའི་དབྱིངས་ཀུན་ཏུ་རྒྱུ་ཞིང་འཁོར་བས་བརྒྱན་པ་དང་། རིན་པོ་ཆེ་ཐམས་ཅད་ཀྱི་པདྨོ་རིན་པོ་ཆེ་སྣ་ཚོགས་ཀྱི་འདབ་མའི་དཀྱིལ་འཁོར་ཅན་ཆུ་བ་མཐོན་པོ་དང་ལྡན་པའི་ཟེ་བ་ལ་རོལ་མོ་བཀོད་པ་ཀུན་ནས་སྒྲ་འབྱིན་ཅིང་དབྱངས་སྙན་པར་སྒྲོག་པས་བརྒྱན་པ་དང་། རིན་པོ་ཆེའི་འབྲུ་སྣ་ཚོགས་ཀྱི་དྲ་བ་དང་། རིན་པོ་ཆེ་སེང་གེའི་དྲ་བ་སྣ་ཚོགས་རྣམ་པ་ཐ་དད་པའི་ཕྲེང་བ་དང་། སེ་མོ་དོས་བརྒྱན་པར་ཀུན་ནས་གནས་ཤིང་སྣང་བར་གྱུར་ཏོ། །དེ་ལྟར་བཅོམ་ལྡན་འདས་དེ་བཞིན་གཤེགས་པའི་ཏིང་ངེ་འཛིན་ཆེན་པོ་སེང་གེ་རྣམ་པར་བསྒྱིངས་པ་དེ་ལ་མཉམ་པར་བཞག་མ་ཐག་ཏུ། དེའི་ཚེ་ཤར་ཕྱོགས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་གསེར་གྱི་སྤྲིན་སྒྲོན་མའི་རྒྱལ་མཚན་ཞེས་བྱ་བ་དེ་བཞིན་གཤེགས་པ་རྣམ་པར་སྣང་མཛད་དཔལ་གྱི་གཟི་བརྗིད་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་རྣམ་པར་སྣང་བའི་སྨོན་ལམ་གྱི་གཙུག་གི་འོད་ཟེར་སྣང་བ་ཞེས་བྱ་བ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། ནམ་མཁའི་དབྱིངས་རྒྱན་སྣ་ཚོགས་ཀྱི་སྤྲིན་གྱིས་བརྒྱན་པ་དང་། ལྷ་རྫས་
ཀྱི་མེ་ཏོག་གི་སྤྲིན་གྱི་ཆར་མངོན་པར་དབབ་པ་དང་། ལྷ་རྫས་ཀྱི་སྤོས་ཀྱི་སྤྲིན་གྱི་ཆར་རབ་ཏུ་དགྱེ་བ་དང་། ལྷ་རྫས་ཀྱི་རིན་པོ་ཆེའི་པདྨོའི་སྤྲིན་གྱི་ཆར་མངོན་པར་གཏོར་བ་དང་། ལྷ་རྫས་ཀྱི་ཕྲེང་བའི་སྤྲིན་གྱི་ཆར་རབ་ཏུ་གཏང་བ་དང་། ལྷ་རྫས་ཀྱི་རིན་པོ་ཆེའི་སྤྲིན་གྱི་ཆར་མངོན་པར་དབབ་པ་དང་། ལྷ་རྫས་ཀྱི་རྒྱན་གྱི་སྤྲིན་གྱི་ཆར་མངོན་པར་དགྱེ་བ་དང་། ལྷ་རྫས་ཀྱི་རིན་པོ་ཆེའི་གདུགས་ཀྱི་སྤྲིན་གྱི་ཆར་མངོན་པར་བསྒྲུབ་པ་དང་། ཁ་དོག་སྣ་ཚོགས་རྣམ་པ་ཐ་དད་ཅིང་ཤིན་ཏུ་ཕྲ་བའི་ལྷ་རྫས་ཀྱི་གོས་ཀྱི་སྤྲིན་གྱི་ཆར་མངོན་པར་དབབ་པ་དང་། ལྷ་རྫས་ཀྱི་རིན་པོ་ཆེའི་རྒྱལ་མཚན་དང་། བ་དན་གྱི་སྤྲིན་ནམ་མཁའི་དབྱིངས་ལས་བྱིན་གྱིས་བརླབ་པ་དང་། རིན་པོ་ཆེ་སྣ་ཚོགས་ཀྱི་སྤྲིན་གྱི་རྒྱན་ཡིད་དུ་འོང་བས་ནམ་མཁའི་དབྱིངས་རྒྱས་པར་འགེངས་པར་བྱེད་ཅིང་། མྱི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས་བཅོམ་ལྡན་འདས་ག་ལ་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས་ཤར་ཕྱོགས་སུ་བརྟེན་ཏེ། ཁང་པ་བརྩེགས་པ་རྒྱན་ཀུན་དང་ལྡན་ཞིང་ནོར་བུ་རིན་པོ་ཆེའི་དྲ་བས་ཀུན་ནས་ཁྱབ་པ་དང་། སེང་གེའི་ཁྲི་ནོར་བུ་རིན་པོ་ཆེ་ཕྱོགས་རབ་ཏུ་སྣང་བའི་པདྨོའི་སྙིང་པོ་ཅན་དག་མངོན་པར་སྤྲུལ་ནས་ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོའི་དྲ་བའི་རྒྱན་གྱིས་ཀུན་ནས་བརྒྱན་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །ལྷོ་ཕྱོགས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་རྡོ་རྗེ་རྒྱལ་མཚན་གྱི་སྙིང་པོ་ཞེས་བྱ་བ་དེ་བཞིན་གཤེགས་པ་དཔལ་གྱི་སྙིང་པོ་ཀུན་ནས་སྣང་བའི་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་ཀྱི་ཤུགས་ཐུབ་པར་དཀའ་བའི་རྒྱལ་པོ་ཞེས་བྱ་བ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། འཇིག་
རྟེན་གྱི་ཁམས་རྒྱ་མཚོ་ཐམས་ཅད་སྤོས་ཀྱི་ལྡ་ལྡི་དང་དྲ་བས་ཀུན་ཏུ་འབྲེལ་བར་བྱིན་གྱིས་བརླབ་པ་དང་། སངས་རྒྱས་ཀྱི་ཞིང་འབྱམ་ཀླས་པ་ཐམས་ཅད་རིན་པོ་ཆེ་སྣ་ཚོགས་ཀྱི་ལྡ་ལྡི་དང་དྲ་བ་ཆེན་པོས་ཀུན་ཏུ་འབྲེལ་བར་བྱིན་གྱིས་བརླབ་པ་དང་། སངས་རྒྱས་ཀྱི་ཞིང་གི་རྒྱུད་ཐམས་ཅད་མེ་ཏོག་ཐམས་ཅད་ཀྱི་ལྡ་ལྡི་དང་། ཕྲེང་བའི་དྲ་བས་ཀུན་ཏུ་འབྲེལ་བར་བྱིན་གྱིས་བརླབ་པ་དང་། སངས་རྒྱས་ཀྱི་ཞིང་གི་འཁོར་ཐམས་ཅད་ཕྲེང་བ་དང་ལྡ་ལྡི་དང་། སེ་མོ་དོའི་དྲ་བས་ཀུན་ནས་འབྲེལ་བར་བྱིན་གྱིས་བརླབ་པ་དང་། སངས་རྒྱས་ཀྱི་ཞིང་གི་དཀྱིལ་འཁོར་ཐམས་ཅད་འོག་གི་གཞི་རྟེན་རྡོ་རྗེ་ཐམས་ཅད་ཀྱི་ཕྲེང་བས་ཡོངས་སུ་གཟུང་བར་བྱིན་གྱིས་བརླབ་པ་དང་། སངས་རྒྱས་ཀྱི་ཞིང་གི་ཚུལ་ཐམས་ཅད་ནོར་བུ་རིན་པོ་ཆེ་སྣ་ཚོགས་ཀྱི་དྲ་བས་ཀུན་ནས་འབྲེལ་བར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་ཐམས་ཅད་གོས་སྣ་ཚོགས་ཀྱི་ལྡ་ལྡིས་ཀུན་ནས་ཡོངས་སུ་བླངས་ཤིང་གཟུང་བར་བྱིན་གྱིས་བརླབ་པ་དང་། སངས་རྒྱས་ཀྱི་ཞིང་ཐམས་ཅད་རིན་པོ་ཆེ་སྣ་ཚོགས་ཀྱི་ལུས་ཀྱི་ཕྲེང་བ་དང་ལྡ་ལྡི་མང་པོའི་དྲ་བས་ཀུན་ནས་འབྲེལ་བར་མངོན་པར་བསྒྲུབ་པ་དང་། ཞིང་ཐམས་ཅད་ནོར་བུ་རིན་པོ་ཆེ་དཔལ་གྱི་འོད་ཟེར་གྱི་ལྡ་ལྡི་དང་། ཕྲེང་བའི་དྲ་བས་ཀུན་ནས་འབྲེལ་བར་བྱིན་གྱིས་བརླབ་པ་དང་། སངས་རྒྱས་ཀྱི་ཞིང་ཐམས་ཅད་རིན་པོ་ཆེ་རྣམ་པར་སྣང་བའི་ལྡ་ལྡི་དང་། དྲ་བས་ཀུན་ཏུ་འབྲེལ་བར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་ཐམས་ཅད་ཀྱི་གཞི་ནོར་བུ་རིན་པོ་ཆེ་སེང་གེ་ཡིད་དུ་འོང་བའི་ཕྲེང་བ་དང་། ལྡ་ལྡིའི་དྲ་བས་ཡོངས་སུ་གཟུང་བར་བྱིན་གྱིས་བརླབ་པ་བྱེད་ཅིང་། མྱི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས་བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། ལྷོ་ཕྱོགས་སུ་བརྟེན་ཏེ། ནོར་བུ་རིན་པོ་ཆེ་འགྲོ་བ་ལ་རྣམ་པར་སྣང་བའི་ཁང་པ་བརྩེགས་པ་དང་། སེང་གེའི་ཁྲི་ནོར་བུ་རིན་པོ་ཆེ་ཕྱོགས་ཀུན་ཏུ་རྣམ་པར་སྣང་བའི་པདྨོའི་སྙིང་པོ་ཅན་དག་མངོན་པར་སྤྲུལ་ཏེ།
རིན་པོ་ཆེ་ཐམས་ཅད་ཀྱི་མེ་ཏོག་གི་དྲ་བའི་རྒྱན་གྱིས་ཀུན་ནས་བརྒྱན་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །ནུབ་ཕྱོགས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་རིན་པོ་ཆེའི་རི་རབ་རྣམ་པར་སྣང་བའི་རྒྱལ་མཚན་མར་མྱེ་ཞེས་བྱ་བ་དེ་བཞིན་གཤེགས་པ་ཆོས་ཀྱི་དབྱིངས་ཀྱི་ཡེ་ཤེས་སྒྲོན་མའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་དཔལ་ཀུན་ནས་འཕགས་པའི་གཟི་བརྗིད་ཅེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། ཆོས་ཀྱི་དབྱིངས་ཐམས་ཅད་བདུག་སྤོས་ཁ་དོག་སྣ་ཚོགས་དང་། དྲི་སྣ་ཚོགས་སུ་ལྡན་པའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་དགང་བ་དང་། ཆོས་ཀྱི་དབྱིངས་ཐམས་ཅད་སྤོས་ཁ་དོག་སྣ་ཚོགས་དང་ལྡན་པའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་དགང་བ་དང་། ཆོས་ཀྱི་དབྱིངས་ཐམས་ཅད་བདུག་སྤོས་ཁ་དོག་དང་དྲི་དུ་མར་ལྡན་པའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་དགང་བ་དང་། ཆོས་ཀྱི་དབྱིངས་ཐམས་ཅད་སྤོས་ཁ་དོག་སྣ་ཚོགས་དང་ལྡན་པའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་དགང་བ་དང་། ཆོས་ཀྱི་དབྱིངས་ཐམས་ཅད་ནོར་བུ་རིན་པོ་ཆེའི་རྒྱལ་པོ་མདངས་འབྱུང་བས་ཐམས་ཅད་ཀྱི་རྡུལ་གྱི་ཁ་དོག་དང་འདྲ་བའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་དགང་བ་
དང་། ཆོས་ཀྱི་དབྱིངས་ཐམས་ཅད་ནོར་བུ་རིན་པོ་ཆེ་སྐར་མའི་རྒྱལ་མཚན་འོད་ཀྱི་དཀྱིལ་འཁོར་སྣ་ཚོགས་ཀྱི་རྒྱན་དང་ལྡན་པའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་དགང་བ་དང་། ཆོས་ཀྱི་དབྱིངས་ཐམས་ཅད་རིན་པོ་ཆེའི་རྒྱལ་པོ་རྡོ་རྗེའི་སྙིང་པོ་ཁ་དོག་སྣ་ཚོགས་ཅན། རྒྱན་རྣམ་པ་ཐ་དད་པའི་ཡུལ་དང་ལྡན་པའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་དགང་བ་དང་ཆོས་ཀྱི་དབྱིངས་ཐམས་ཅད་ནོར་བུ་རིན་པོ་ཆེ་འཛམ་བུའི་ཆུ་ཀླུང་འཇིག་རྟེན་གྱི་ཁམས་ཐམས་ཅད་དུ་སྣང་བའི་ཡུལ་དང་ལྡན་པའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་དགང་བ་དང་། ནམ་མཁའི་དབྱིངས་ཐམས་ཅད་ནོར་བུ་རིན་པོ་ཆེའི་རྒྱལ་པོ་ཆོས་ཀྱི་དབྱིངས་ཐམས་ཅད་རབ་ཏུ་སྣང་བའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་ཁྱབ་པར་བྱིན་གྱིས་བརླབ་པ་དང་། སེམས་ཅན་གྱི་ཁམས་ཀྱི་ཡུལ་ཐམས་ཅད་ནོར་བུ་རིན་པོ་ཆེའི་རྒྱལ་པོ་དེ་བཞིན་གཤེགས་པ་ཐམས་ཅད་ཀྱི་མཚན་རབ་ཏུ་སྣང་བའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་དགང་བ་དང་། ཆོས་ཀྱི་དབྱིངས་ཐམས་ཅད་ཀྱི་ནམ་མཁའ་རིན་པོ་ཆེའི་རྒྱལ་པོ་དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྦྱོར་བ་རབ་ཏུ་སྣང་བར་ཡོངས་སུ་སྟོན་ཅིང་། བྱང་ཆུབ་སེམས་དཔའི་སྤྱོད་པའི་སྒྲ་འབྱིན་པའི་རི་རབ་ཀྱི་སྤྲིན་གྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་དགང་བ་དང་། ཕྱོགས་བཅུ་ཐམས་ཅད་རིན་པོ་ཆེའི་རྒྱལ་པོ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་རབ་ཏུ་སྣང་བའི་འོད་དང་ལྡན་པའི་རི་རབ་ཀྱི་སྤྲིན་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་འགེངས་པ་བྱེད་ཅིང་། མྱི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས་བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། ནུབ་ཕྱོགས་སུ་བརྟེན་ཏེ། ཁང་པ་བརྩེགས་པ་སྤོས་ཀྱི་རྒྱལ་པོ་ཐམས་ཅད་ཀྱི་ལྷུན་དང་ལྡན་པ་མུ་ཏིག་གི་དྲ་བས་ཀུན་ནས་ཁྱབ་པ་དང་། སེང་གེའི་ཁྲི་ནོར་བུ་རིན་པོ་ཆེ་ལྷའི་དབང་པོ་རབ་ཏུ་སྣང་བའི་རྒྱལ་མཚན་གྱི་པདྨོའི་
སྙིང་པོ་ཅན་དག་མངོན་པར་སྤྲུལ་ནས། རིན་པོ་ཆེ་གསེར་གྱི་དྲ་བས་ཀུན་ནས་བརྒྱན་པ་དང་། ཡིད་བཞིན་གྱི་རྒྱལ་པོའི་ཅོད་པན་བཅིངས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །བྱང་ཕྱོགས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་རིན་པོ་ཆེའི་གོས་ཡོངས་སུ་སྣང་བ་ཞེས་བྱ་བ་དེ་བཞིན་གཤེགས་པ་ཆོས་ཀྱི་དབྱིངས་ནམ་མཁའི་དཔལ་རྣམ་པར་སྣང་བའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཆགས་པ་མྱེད་པའི་དཔལ་གྱི་རྒྱལ་པོ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། ནམ་མཁའི་དབྱིངས་རིན་པོ་ཆེའི་སྣམ་བུའི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་རིན་པོ་ཆེའི་གོས་ཁ་དོག་སེར་པོ་དང་། མདོག་སེར་པོའི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་རིན་པོ་ཆེའི་གོས་སྤོས་སྣ་ཚོགས་ཀྱིས་དྲི་ཞིམ་པོར་བྱས་པའི་སྤྲིན་གྱི་ཆར་རབ་ཏུ་འབབ་པའི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་རིན་པོ་ཆེའི་རྒྱལ་པོ་ཉི་མའི་རྒྱལ་མཚན་གྱི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་ནོར་བུ་རིན་པོ་ཆེ་གསེར་གྱི་མདོག་ཤིན་ཏུ་འབར་བའི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་ནོར་བུའི་རྒྱལ་པོ་རིན་པོ་ཆེ་འབར་བའི་གོས་ཀྱི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་རིན་པོ་ཆེ་སྐར་མ་ཐམས་ཅད་ཀྱི་གཟུགས་བརྙན་གྱིས་སྣ་ཚོགས་སུ་གྱུར་པའི་གོས་ཀྱི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་ཕྱོགས་བཅུ་ཀུན་ནས་ནོར་བུ་རིན་པོ་ཆེ་སྣམ་བུ་ཁྲ་བོའི་རྡོ་ལྟར་སྣང་བའི་སྤྲིན་གྱིས་ཡོངས་སུ་རྒྱས་པར་བྱིན་གྱིས་བརླབ་པ་དང་། ནམ་མཁའི་དབྱིངས་ཕྱོགས་
བཅུ་ཀུན་ནས་རིན་པོ་ཆེའི་རྒྱལ་པོ་རྣམ་པར་སྣང་བའི་དཔལ་རབ་ཏུ་འབར་བའི་འོད་དང་ལྡན་པའི་གོས་ཀྱི་སྤྲིན་གྱིས་ཡོངས་སུ་རྒྱས་པར་བྱིན་གྱིས་བརླབ་པ་དང་། ནམ་མཁའི་དབྱིངས་ཕྱོགས་བཅུ་ཀུན་ནས་ནོར་བུའི་རྒྱལ་པོ་སྣང་བ་ཤིན་ཏུ་གསལ་བས་ཕྱོགས་ཀྱི་དབྱིངས་རྣམ་པར་སྣང་བའི་གོས་ཀྱི་སྤྲིན་གྱིས་ཡོངས་སུ་རྒྱས་པར་བྱིན་གྱིས་བརླབ་པ་དང་། ནམ་མཁའི་དབྱིངས་རིན་པོ་ཆེའི་རྒྱལ་པོ་རྒྱ་མཚོའི་རྒྱན་གྱི་གོས་ཀྱི་སྤྲིན་གྱིས་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། མྱི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། བྱང་ཕྱོགས་སུ་བརྟེན་ཏེ། རིན་པོ་ཆེའི་རྒྱལ་པོ་རྒྱ་མཚོ་ཡོངས་སུ་འབྱུང་བའི་ཁང་པ་བརྩེགས་པ་དང་། སེང་གེའི་ཁྲི་བཻ་ཌཱུརྱའི་པདྨོའི་སྙིང་པོ་ཅན་དག་མངོན་པར་སྤྲུལ་ནས། ནོར་བུ་རིན་པོ་ཆེའི་རྒྱལ་པོ་སེང་གེ་མཛེས་པའི་དྲ་བས་ཡོངས་སུ་བརྒྱན་པ་དང་། རིན་པོ་ཆེ་སྐར་མའི་རྒྱལ་མཚན་མགོ་ལ་ཐོགས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །བྱང་དང་ཤར་གྱི་ཕྱོགས་མཚམས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་ས་ཆེན་པོ་ཐམས་ཅད་དུ་མཛེས་པའི་རིན་པོ་ཆེ་འོད་ཟེར་གྱི་དྲ་བ་རབ་ཏུ་འགྱེད་པ་ཞེས་བྱ་བ་དེ་བཞིན་གཤེགས་པ་མྱི་དམྱིགས་པའི་སྤྱན་གྱི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཆོས་ཀྱི་དབྱིངས་སུ་ཤིན་ཏུ་འཕྲུལ་བའི་སྨོན་ལམ་ཟླ་བ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རིན་པོ་ཆེའི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་
འབྱམ་ཀླས་པ་ཐམས་ཅད་སྤོས་ཀྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་བདུག་སྤོས་ཀྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་ཙན་དན་གྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་མེ་ཏོག་གི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རིན་པོ་ཆེའི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རྡོ་རྗེའི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་གསེར་གྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་གོས་ཀྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་པདྨོའི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་བྱེད་ཅིང་། མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས་བྱང་དང་ཤར་གྱི་ཕྱོགས་མཚམས་སུ་བརྟེན་ཏེ། ནོར་བུ་རིན་པོ་ཆེའི་ཁང་པ་བརྩེགས་པ་སྒོ་ཆོས་ཀྱི་དབྱིངས་ཐམས་ཅད་ལ་མངོན་པར་ལྟ་བ་དང་། སེང་གེའི་ཁྲི་རིན་པོ་ཆེའི་རྒྱལ་པོ་སྤོས་མཚུངས་པ་མྱེད་པའི་པད་མོའི་སྙིང་པོ་ཅན་དག་མངོན་པར་སྤྲུལ་ནས་རིན་པོ་ཆེའི་རྒྱལ་པོའི་མེ་ཏོག་གི་དྲ་བས་ཡོངས་སུ་བརྒྱན་པ་དང་། རིན་པོ་ཆེའི་རྒྱལ་པོ་མཛོད་སྣ་ཚོགས་ཀྱི་དྲ་བའི་ཅོད་པན་བཅིངས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་
འཁོད་དོ། །ཤར་དང་ལྷོའི་ཕྱོགས་མཚམས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་སྤོས་ཀྱི་སྤྲིན་གྱིས་བརྒྱན་པའི་རྒྱལ་མཚན་ཞེས་བྱ་བ་དེ་བཞིན་གཤེགས་པ་ཀླུ་དབང་གི་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཆོས་ཀྱི་འོད་འཕྲོ་བ་དང་ལྡན་པའི་རྒྱལ་པོ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། ནམ་མཁའི་དབྱིངས་ཐམས་ཅད་འོད་ཀྱི་དཀྱིལ་འཁོར་གསེར་གྱི་ཁ་དོག་ལྟ་བུའི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་རིན་པོ་ཆེ་ཁ་དོག་མཐའ་ཡས་པའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་དེ་བཞིན་གཤེགས་པའི་མཛོད་སྤུའི་ཁ་དོག་གི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་རིན་པོ་ཆེ་སྣ་ཚོགས་ཀྱི་ཁ་དོག་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་པདྨོའི་སྙིང་པོ་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་ནོར་བུའི་རྒྱལ་པོ་རིན་པོ་ཆེའི་ཤིང་གི་ཡལ་གའི་དཀྱིལ་འཁོར་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་དེ་བཞིན་གཤེགས་པའི་གཙུག་ཏོར་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་འཛམ་བུའི་ཆུ་ཀླུང་གི་གསེར་གྱི་ཁ་དོག་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་ཉི་མའི་ཁ་དོག་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་
གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་ཟླ་བ་དང་། སྐར་མའི་ཚོགས་ཀྱི་ཁ་དོག་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱེད་ཅིང་། མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས་བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། ཤར་དང་ལྷོའི་ཕྱོགས་མཚམས་སུ་བརྟེན་ཏེ། རིན་པོ་ཆེ་རྡུལ་དང་བྲལ་ཞིང་རྣམ་པར་སྣང་བ་ཕུན་སུམ་ཚོགས་པའི་མེ་ཏོག་གི་ཁང་པ་བརྩེགས་པ་དང་། སེང་གེའི་ཁྲི་རིན་པོ་ཆེ་སེང་གེ་རྡོ་རྗེའི་པདྨོའི་སྙིང་པོ་ཅན་དག་མངོན་པར་སྤྲུལ་ནས་ནོར་བུའི་རྒྱལ་པོ་རིན་པོ་ཆེའི་འོད་ཟེར་རབ་ཏུ་འབར་བའི་དྲ་བས་ཡོངས་སུ་བརྒྱན་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །ལྷོ་དང་ནུབ་ཀྱི་ཕྱོགས་མཚམས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་རིན་པོ་ཆེ་ཉི་མ་རབ་ཏུ་སྣང་བའི་སྙིང་པོ་ཞེས་བྱ་བ་དེ་བཞིན་གཤེགས་པ་ཆོས་ཀྱི་འཁོར་ལོའི་ཡེ་ཤེས་ཀུན་ཏུ་སྣང་བའི་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཐོར་བའི་ཡེ་ཤེས་རྒྱལ་མཚན་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས། འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། བ་སྤུའི་བུ་ག་ཐམས་ཅད་ནས་མེ་ཏོག་འོད་འཕྲོ་བའི་སྤྲིན་ནམ་མཁའི་དབྱིངས་
ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་རོལ་མོ་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་ནོར་བུ་རིན་པོ་ཆེ་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་རིན་པོ་ཆེའི་གོས་འོད་འཕྲོ་བའི་སྤོས་དང་། བདུག་སྤོས་སྣ་ཚོགས་ཀྱིས་རྣམ་པར་བདུགས་པའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་ཀླུས་རྣམ་པར་སྤྲུལ་པའི་གློག་གི་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་ནོར་བུ་རིན་པོ་ཆེ་རྣམ་པར་སྣང་བ་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་ནོར་བུ་རིན་པོ་ཆེ་གསེར་རབ་ཏུ་འབར་བ་འོད་རབ་ཏུ་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་རིན་པོ་ཆེའི་རྒྱལ་པོ་དཔལ་གྱི་སྙིང་པོ་འབར་བ་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་ནོར་བུ་རིན་པོ་ཆེ་དེ་བཞིན་གཤེགས་པའི་དགོངས་པ་རྒྱ་མཚོ་ལྟར་དུས་གསུམ་གྱི་རྒྱུད་རབ་ཏུ་སྣང་བའི་ཚུལ་དང་ལྡན་པའི་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་བྱེད་ཅིང་། མྱི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། ལྷོ་དང་ནུབ་ཀྱི་ཕྱོགས་མཚམས་སུ་བརྟེན་ཏེ། ནོར་བུ་རིན་པོ་ཆེ་ཆེན་པོ་འོད་ཟེར་གྱི་དྲ་བ་ཕྱོགས་ཀུན་ཏུ་མངོན་པར་གཞོལ་བའི་ཐིག་ལེས་ཆོས་ཀྱི་དབྱིངས་ཐམས་ཅད་དུ་རབ་ཏུ་སྣང་བའི་ཁང་པ་བརྩེགས་པ་དང་། སེང་གེའི་ཁྲི་ནོར་བུ་རིན་པོ་ཆེ་སྤོས་ཀྱི་སྒྲོན་མ་འོད་འཕྲོ་བའི་པདྨོའི་སྙིང་པོ་ཅན་དག་མངོན་པར་སྤྲུལ་ནས། རིན་པོ་ཆེའི་རྒྱལ་པོ་དྲི་མ་མེད་པའི་སྙིང་པོའི་དྲ་བས་ཡོངས་སུ་བརྒྱན་པ་དང་། རིན་པོ་ཆེའི་རྒྱལ་པོ་སེམས་ཅན་ཐམས་ཅད་རབ་ཏུ་འཛུད་པའི་དབྱངས་དང་ལྡན་པའི་ཅོད་པན་བཅིངས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །ནུབ་དང་བྱང་གི་ཕྱོགས་མཚམས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་རྣམ་པར་སྣང་མཛད་ཀྱི་སྙིང་པོ་ཞེས་བྱ་བ་དེ་བཞིན་གཤེགས་པ་དཔལ་གྱི་རི་བོ་ཀུན་ནས་རྣམ་པར་སྣང་བའི་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་རྣམ་པར་སྣང་བའི་སྨོན་ལམ་ཡེ་ཤེས་དཔལ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་
ཤིན་ཏུ་ཕྲ་བ་སྙེད་དང་ལྷན་ཅིག་ཏུ། བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་གཟུགས་བརྙན་གྱི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་བྱུང་བའི་བྱང་ཆུབ་སེམས་དཔའ་ཐམས་ཅད་ཀྱི་ལུས་ཀྱི་གཟུགས་བརྙན་གྱི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཐམས་ཅད་ཀྱི་ལུས་ཀྱི་གཟུགས་བརྙན་གྱི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་གཤེགས་པའི་སངས་རྒྱས་ཐམས་ཅད་ཀྱི་སྤྲུལ་པའི་ཚོགས་ཀྱི་གཟུགས་བརྙན་མང་པོའི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྦྱོར་བའི་གཟུགས་བརྙན་མང་པོའི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་བྱུང་བའི་ཉན་ཐོས་དང་། རང་སངས་རྒྱས་ཐམས་ཅད་ཀྱི་ལུས་ཀྱི་གཟུགས་བརྙན་རབ་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་གཤེགས་པའི་དེ་
བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་དང་། བྱང་ཆུབ་ཀྱི་ཤིང་གི་གཟུགས་ཀྱི་གཟུགས་བརྙན་གྱི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་གཤེགས་པའི་སངས་རྒྱས་ཐམས་ཅད་ཀྱི་རྣམ་པར་འཕྲུལ་པའི་གཟུགས་བརྙན་མང་པོའི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་བྱུང་བའི་འཇིག་རྟེན་གྱི་དབང་པོ་ཐམས་ཅད་ཀྱི་ལུས་ཀྱི་གཟུགས་བརྙན་གྱི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་བྱུང་བའི་སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་ཀྱི་གཟུགས་བརྙན་གྱི་སྤྲིན་ཀུན་ཏུ་དགྱེ་བས། སྐད་ཅིག་སྐད་ཅིག་ཏུ་ནམ་མཁའི་དབྱིངས་ཐམས་ཅད་རྒྱས་པར་འགེངས་ཤིང་མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། ནུབ་དང་བྱང་གི་ཕྱོགས་མཚམས་སུ་བརྟེན་ཏེ། རིན་པོ་ཆེའི་རྒྱལ་པོ་ཕྱོགས་ཀུན་ནས་རྣམ་པར་སྣང་བའི་སྙིང་པོའི་སེང་གེའི་ཁྲི་རིན་པོ་ཆེ་འགྲོ་བ་རྣམ་པར་སྣང་བའི་པདྨོའི་སྙིང་པོ་ཅན་དག་མངོན་པར་སྤྲུལ་ནས་མུ་ཏིག་འོད་ཐུབ་པ་མེད་པའི་དྲ་བས་ཡོངས་སུ་བརྒྱན་པ་དང་། རིན་པོ་ཆེ་འོད་ཀུན་ཏུ་སྣང་བའི་ཅོད་པན་བཅིངས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །འོག་གི་ཕྱོགས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་མ་རོལ་གྱི་འཇིག་རྟེན་གྱི་ཁམས་དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་རྣམ་པར་སྣང་བ་ཞེས་བྱ་བ་དེ་བཞིན་གཤེགས་པ་ཡེ་ཤེས་ནམ་མཁའ་ལྟ་བུར་ཆགས་པ་མེད་པའི་དཔལ་གྱི་རྒྱལ་མཚན་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་བསྒྲིབས་པ་ཐམས་ཅད་རྣམ་པར་འཐོར་བའི་ཡེ་ཤེས་ཀྱིས་རྣམ་པར་ནོན་པ་ཞེས་བྱ་བ་བྱང་
ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། བ་སྤུའི་བུ་ག་ཐམས་ཅད་ནས་འགྲོ་བ་ཐམས་ཅད་ཀྱི་སྐད་དང་སྒྲ་དང་དབྱངས་དང་ངེས་པའི་ཚིག་མངོན་པར་བསྒྲུབ་པ་རྒྱ་མཚོ་རབ་ཏུ་བརྗོད་པ་དང་། དུས་གསུམ་གྱི་བྱང་ཆུབ་སེམས་དཔའ་ཐམས་ཅད་འབྱུང་བའི་ཚུལ་རྒྱ་མཚོའི་སྤྲིན་གྱི་འབྲུག་སྒྲ་རབ་ཏུ་བསྒྲག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་མངོན་པར་བསྒྲུབ་པའི་ཚུལ་རྒྱ་མཚོའི་དབྱངས་རབ་ཏུ་བསྒྲག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡོངས་སུ་རྫོགས་པར་བྱ་བའི་ཚུལ་རྒྱ་མཚོའི་སྤྲིན་གྱི་སྒྲ་རབ་ཏུ་བསྒྲག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པའི་དཀྱིལ་འཁོར་ཞིང་ཐམས་ཅད་དུ་རྒྱས་པར་འགེངས་པའི་ཚུལ་རྒྱ་མཚོའི་དབྱངས་རབ་ཏུ་བསྒྲག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཡང་དག་པར་བསྒྲུབ་པ་དང་། རྣམ་པར་འཕྲུལ་པའི་ཚུལ་རྒྱ་མཚོའི་དབྱངས་རབ་ཏུ་བསྒྲག་པ་དང་། དེ་བཞིན་གཤེགས་པ་ཐམས་ཅད་སྙིང་པོ་བྱང་ཆུབ་ཏུ་གཤེགས་པ་དང་བདུད་ཀྱི་དཀྲུགས་མ་རྣམ་པར་འཐོར་བ་དང་། སྙིང་པོ་བྱང་ཆུབ་ཏུ་རྣམ་པར་འཚང་རྒྱ་བ་དང་། རྣམ་པར་འཕྲུལ་པ་མཛད་པའི་དབྱངས་རྒྱ་མཚོ་རབ་ཏུ་བསྒྲག་པ་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་འཁོར་བ་དང་། མདོ་སྡེའི་ཚུལ་དང་མིང་རྒྱ་མཚོའི་དབྱངས་ཀྱི་སྤྲིན་གྱི་འབྲུག་སྒྲ་བསྒྲག་པ་དང་། འགྲོ་བ་འདུལ་བ་ཐམས་ཅད་དུས་ལ་བབ་པའི་འཁོར་ལོས་འདུལ་བའི་ཆོས་ཀྱི་ཚུལ་དང་ཐབས་ཀྱི་སྒྲ་རབ་ཏུ་བསྒྲག་པ་དང་། ཡེ་ཤེས་ཐམས་ཅད་ཁོང་དུ་ཆུད་པར་བྱ་བའི་ཕྱིར་སྨོན་ལམ་ཇི་ལྟར་བཏབ་པ་དང་། དགེ་བའི་རྩ་བའི་ཁྱད་པར་དང་དུས་དང་ཐབས་དང་། ཆོས་ཀྱི་ཚུལ་རྒྱ་མཚོའི་དབྱངས་རབ་ཏུ་བསྒྲག་པ་བྱེད་ཅིང་། མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། འོག་གི་ཕྱོགས་སུ་བརྟེན་ཏེ། དེ་
བཞིན་གཤེགས་པ་ཐམས་ཅད་ཀྱི་གཞལ་མེད་ཁང་གཟུགས་བརྙན་རབ་ཏུ་སྣང་བ་རིན་པོ་ཆེ་སྣ་ཚོགས་ཐམས་ཅད་ཀྱི་མཛོད་ཀྱི་ཁང་པ་བརྩེགས་པ་དང་། སེང་གེའི་ཁྲི་རིན་པོ་ཆེ་ཐམས་ཅད་ཀྱི་གཟུགས་ཀྱི་པད་མོའི་སྙིང་པོ་ཡོངས་སུ་བཟུང་བ་དག་མངོན་པར་སྤྲུལ་ནས། རིན་པོ་ཆེའི་སྙིང་པོ་བྱང་ཆུབ་ཐམས་ཅད་ཀྱི་གཟུགས་བརྙན་རབ་ཏུ་སྣང་བའི་རྒྱལ་མཚན་གྱི་ཅོད་པན་མགོ་ལ་བཅིངས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས། སྐྱིལ་མོ་ཀྲུང་བཅས་ཏེ་འཁོད་དོ། །སྟེང་གི་ཕྱོགས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་སངས་རྒྱས་ཀྱི་རིགས་མི་ཟད་པ་ཤིན་ཏུ་སྟོན་པ་ཞེས་བྱ་བ་དེ་བཞིན་གཤེགས་པ་ཡེ་ཤེས་ཀྱི་དཀྱིལ་འཁོར་ཀུན་ཏུ་སྣང་བའི་དབྱངས་ཀྱི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་སྨོན་ལམ་གྱི་གཞི་རབ་ཏུ་རྟོགས་པ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་། ལྷན་ཅིག་ཏུ་བཅོམ་ལྡན་འདས་དེས་གནང་ནས། འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་དང་། ཡན་ལག་དང་ཉིང་ལག་ཐམས་ཅད་དང་། ཚིག་གི་ལམ་ཐམས་ཅད་དང་། གོས་དང་སྨད་གཡོགས་ཐམས་ཅད་ནས་བྱང་ཆུབ་སེམས་དཔའི་འཁོར་ཐམས་ཅད་དང་། བདག་དང་བཅོམ་ལྡན་འདས་རྣམ་པར་སྣང་མཛད་དང་། སྔོན་གྱི་མཐའི་མུར་ཐུག་པའི་དེ་བཞིན་གཤེགས་པ་འདས་པ་ཐམས་ཅད་དང་། ཕྱི་མའི་མཐའི་མུར་ཐུག་པའི་དེ་བཞིན་གཤེགས་པ་ལུང་བསྟན་པ་དང་། ལུང་མ་བསྟན་པ་མ་བྱོན་པ་ཐམས་ཅད་དང་། ད་ལྟར་བྱུང་བ་ཕྱོགས་བཅུའི་སངས་རྒྱས་ཀྱི་ཞིང་འབྱམ་ཀླས་པ་ཐམས་ཅད་ན་བཞུགས་པ་རྣམས་ཀྱི་སྔོན་སྦྱིན་པའི་ཕ་རོལ་ཏུ་ཕྱིན་པ་མཛད་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་དང་། ལེན་པ་དང་སྦྱིན་པའི་དངོས་པོ་ཐམས་ཅད་ཀྱི་གཟུགས་བརྙན་མཚན་དང་དཔེ་བྱད་བཟང་པོ་དང་། བ་སྤུའི་
སྒོ་དང་ལུས་ཐམས་ཅད་དང་། ཡན་ལག་དང་ཉིང་ལག་དང་ཚིག་གི་ལམ་དང་གོས་དང་སྨད་གཡོགས་ཐམས་ཅད་ལ་རབ་ཏུ་སྣང་བར་གྱུར་པར་རྣམ་པར་བསྟན་པ་དང་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཐམས་ཅད་དང་ལྡན་པའི་སྔོན་གྱི་སྦྱོར་བ་རྒྱ་མཚོ་དག་ཀྱང་རབ་ཏུ་སྣང་བར་ཡོངས་སུ་བསྟན་པ་དང་། བཟོད་པའི་ཕ་རོལ་ཏུ་ཕྱིན་པ་དང་ལྡན་པར་ཡན་ལག་དང་ཉིང་ལག་ཐམས་ཅད་འཐུབ་པ་རབ་ཏུ་བསྟན་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་བརྩོན་འགྲུས་དང་དྲག་ཤུལ་དང་། རྣམ་པར་གནོན་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། དེ་བཞིན་གཤེགས་པ་ཐམས་ཅད་ཀྱི་བསམ་གཏན་རྒྱ་མཚོ་ཡོངས་སུ་ཚོལ་ཞིང་རབ་ཏུ་བསྒྲུབ་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། དེ་བཞིན་གཤེགས་པ་ཐམས་ཅད་ཆོས་ཀྱི་འཁོར་ལོ་བསྐོར་བའི་ཚུལ་ཡོངས་སུ་བསྒྲུབ་ཅིང་། ཆོས་ཡོངས་སུ་ཚོལ་བ་དང་ལྡན་པ་དང་། བདོག་པ་ཐམས་ཅད་ཡོངས་སུ་གཏོང་ཞིང་ཤིན་ཏུ་ཞེ་ནོན་པའི་ལུས་དང་ངོའི་གཟུགས་བརྙན་རྣམ་པར་དམྱིགས་པར་བྱ་བས་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། དེ་བཞིན་གཤེགས་པ་ཐམས་ཅད་མཐོང་ཞིང་དགའ་བ་དང་། བྱང་ཆུབ་སེམས་དཔའ་ཐམས་ཅད་ཀྱི་ལམ་ལ་འགྲོ་བ་ཐམས་ཅད་མངོན་པར་མོས་པར་བྱེད་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་རྒྱ་མཚོ་མངོན་པར་བསྒྲུབ་པའི་སྒོ་ཡོངས་སུ་དག་པའི་རྒྱན་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྟོབས་ཀྱི་ཕ་རོལ་ཏུ་ཕྱིན་པ་རབ་ཏུ་གྲུབ་པ་དང་། རྣམ་པར་མནན་པ་དང་། རྣམ་པར་དག་པར་བྱས་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། ཆོས་ཀྱི་དབྱིངས་རྒྱ་ཆེན་པོ་རྣམ་པར་འཕྲུལ་པ་ཐམས་ཅད་ཀྱི་སྤྲིན་གྱིས་རྒྱས་པར་བཀང་སྟེ། བྱང་
ཆུབ་སེམས་དཔའ་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་བྱེད་ཅིང་། མྱི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། སྟེང་གི་ཕྱོགས་སུ་བརྟེན་ཏེ། རྡོ་རྗེའི་དབང་པོ་སྣ་ཚོགས་ཐམས་ཅད་ཀྱི་རྒྱན་གྱི་སྙིང་པོ་ཅན་གྱི་ཁང་པ་བརྩེགས་པ་དང་། སེང་གེའི་ཁྲི་རྡོ་རྗེ་དང་། ཨིན་དྲ་ནཱི་ལའི་པདྨོའི་སྙིང་པོ་ཅན་དག་མངོན་པར་སྤྲུལ་ནས་ནོར་བུའི་རྒྱལ་པོ་རིན་པོ་ཆེ་ཐམས་ཅད་རབ་ཏུ་འབར་བའི་དྲ་བས་ཀུན་ནས་བརྒྱན་པ་དང་། རིན་པོ་ཆེའི་རྒྱལ་པོ་དུས་གསུམ་གྱི་དེ་བཞིན་གཤེགས་པའི་མཚན་དབྱངས་སུ་སྒྲོག་པའི་ཕྲེང་བ་རབ་ཏུ་འཕྱང་བ་དང་། མགོ་ལ་རིན་པོ་ཆེའི་ཅོད་པན་ཐོགས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་ལྔ་པ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་འཁོར་དང་བཅས་པར་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་གྱིས་བྱུང་བ་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ནས་ཞལ་དུ་ལྟ་བ། ཡེ་ཤེས་ཡོངས་སུ་དག་པའི་མྱིག་དང་ལྡན་པ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་དང་། མདོ་སྡེའི་ཚུལ་གྱི་གསུང་རྒྱ་མཚོ་ལ་རྣ་བ་ཡོངས་སུ་གཞོལ་བ། བྱང་ཆུབ་སེམས་དཔའ་ཐམས་ཅད་ཀྱི་དབང་རབ་ཏུ་ཐོབ་པར་བྱ་བ་ལ། དམ་པའི་ཕ་རོལ་ཏུ་བགྲོད་པར་ཕྱིན་པའི་མཆོག་ཐོབ་པ། དེ་བཞིན་གཤེགས་པ་ཐམས་ཅད་ཀྱི་དྲུང་དུ་འདོང་བ། སྐད་ཅིག་སྐད་ཅིག་ཏུ། ཡོངས་སུ་བསྟན་པར་རྣམ་པར་འཕྲུལ་པས་བྱུང་བ། འཇིག་རྟེན་གྱི་ཁམས་ཐམས་ཅད་ལུས་གཅིག་གིས་རྒྱས་པར་དགང་བའི་ཡུལ་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ལུས་
མངོན་པར་འབྱུང་ཞིང་རྣམ་པར་སྣང་བ། རྡུལ་ཤིན་ཏུ་ཕྲ་བ་གཅིག་ལ་འཇིག་རྟེན་གྱི་ཁམས་ཐམས་ཅད་ཁམས་གཅིག་ཏུ་སྣང་ཞིང་ཁོངས་སུ་ཆུད་པར་ཡང་དག་པར་སྟོན་པའི་ཡུལ་དང་ལྡན་པ་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། འདུལ་བའི་དུས་ལ་སྡོད་པར་གཞོལ་བ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་སྤྲིན་གྱི་འབྲུག་སྒྲ་བ་སྤུའི ་བུ་ག་ཐམས་ཅད་ནས་རབ་ཏུ་སྒྲོག་པའི་ཡུལ་དང་ལྡན་པ། སེམས་ཅན་གྱི་ཁམས་ཐམས་ཅད་སྒྱུ་མ་ལྟ་བུར་ཡོངས་སུ་ཤེས་པ་རབ་ཏུ་ཐོབ་པ། དེ་བཞིན་གཤེགས་པ་ཐམས་ཅད་མིག་ཡོར་ལྟ་བུར་ཁོང་དུ་ཆུད་པ། སྲིད་པའི་རྒྱུད་དུ་སྐྱེ་བ་ཐམས་ཅད་རྨི་ལམ་ལྟ་བུ་ཤེས་པར་བྱུང་བ་ལས་དང་རྣམ་པར་སྨིན་པ་ཐམས་ཅད་གཟུགས་བརྙན་ལྟ་བུར་ཤེས་པས་རྣམ་པར་དག་པ། ཡེ་ཤེས་མངོན་པར་གྲུབ་པ་ཐམས་ཅད་སྨིག་རྒྱུ་ལྟ་བུར་མངོན་པར་ཤེས་པ། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་སྤྲུལ་པ་ལྟ་བུར་ཁོང་དུ་ཆུད་པ། དེ་བཞིན་གཤེགས་པའི་སྟོབས་བཅུ་དང་ཡེ་ཤེས་ཀྱི་སྣང་བ་རབ་ཏུ་ཐོབ་པ། མྱི་འཇིགས་པའི་ཁྱུ་མཆོག་དང་། སེང་གེའི་ང་རོས་རྣམ་པར་གནོན་པ། སོ་སོ་ཡང་དག་པར་རིག་པ་མྱི་ཟད་པའི་རྒྱ་མཚོར་ཞུགས་པ། འགྲོ་བ་ཐམས་ཅད་ཀྱི་སྐད་རྒྱ་མཚོ་དང་། ཆོས་ཀྱི་ངེས་པའི་ཚིག་གི་ཡེ་ཤེས་རབ་ཏུ་ཐོབ་པ། ཆོས་ཀྱི་དབྱིངས་དང་ནམ་མཁའ་ལྟར་ཆགས་པ་མྱེད་པའི་ཡེ་ཤེས་ཀྱི་སྤྱོད་ཡུལ་དང་ལྡན་པ། ཆོས་ཐམས་ཅད་ལ་སྒྲིབ་པ་མེད་པའི་ཡེ་ཤེས་རབ་ཏུ་ཐོབ་པ། བྱང་ཆུབ་སེམས་དཔའ་ཐམས་ཅད་ཀྱི་མངོན་པར་ཤེས་པ་ལ་ཡེ་ཤེས་ཀྱི་དཀྱིལ་འཁོར་རྣམ་པར་དག་པ་བདུད་ཀྱི་དཀྱིལ་འཁོར་ཐམས་ཅད་རྣམ་པར་དཀྲུག་པའི་བརྩོན་འགྲུས་དང་ལྡན་པ། དུས་གསུམ་ཐམས་ཅད་ཤེས་པའི་སྟོབས་ལ་རབ་ཏུ་གནས་པ། ཆོས་ཐམས་ཅད་ལ་ཡེ་ཤེས་སྒྲིབ་པ་མེད་པ་རབ་ཏུ་ཐོབ་པ། གནས་མྱེད་པས་ནམ་མཁའི་སྤྱོད་ཡུལ་དང་ལྡན་པ། ཐམས་ཅད་མཁྱེན་པའི་ས་ལེན་པ་མྱེད་པ། ནམ་མཁའ་ལྟ་བུའི་བརྩོན་འགྲུས་དང་ལྡན་པ། སྲིད་པ་ཐམས་ཅད་མྱི་དམྱིགས་པའི་ཡེ་ཤེས་ཀྱི་
སྤྱོད་ཡུལ་ཅན། ཆོས་ཀྱི་དབྱིངས་ཐམས་ཅད་ཀྱི་ཚུལ་རྒྱ་མཚོ་ལ་རབ་ཏུ་ཞུགས་པ། འཇིག་རྟེན་གྱི་ཁམས་ཐམས་ཅད་ཐ་མྱི་དད་པའི་ཡེ་ཤེས་ཀྱི་སྒོར་ཞུགས་པ། འཇིག་རྟེན་གྱི་ཁམས་ཐམས་ཅད་གཅིག་ནས་གཅིག་ཏུ་གཟུང་བའི་རྣམ་པར་འཕྲུལ་པས་བྱུང་བ། འཇིག་རྟེན་གྱི་ཁམས་ཀྱི་རྒྱུད་ཐམས་ཅད་དུ་སྐྱེས་པའི་ལུས་ཡོངས་སུ་སྟོན་པ། འཇིག་རྟེན་གྱི་ཁམས་ཐམས་ཅད་ཀྱི་དབྱིབས་ཕྲ་བ་དང་། རྒྱ་ཆེ་བ་དང་ཡངས་པ་དང་། དོག་པ་སྣ་ཚོགས་རབ་ཏུ་རྟོགས་པ་ཤིན་ཏུ་ཕྲ་ཞིང་རྒྱ་ཆེན་པོ་ཡང་དག་པར་གཟུད་པའི་ཡེ་ཤེས་ཁོང་དུ་ཆུད་པ། དམྱིགས་པ་རྒྱ་ཆེན་པོ་ཤིན་ཏུ་ཕྲ་བར་ཤེས་པ་དང་ལྡན་པ། སངས་རྒྱས་ཐམས་ཅད་དང་སེམས་ཀྱི་སྐད་ཅིག་ལ་འགྲོགས་པ་རབ་ཏུ་ཐོབ་པ། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱི་ཡེ་ཤེས་ཀྱི་ལུས་དང་ལྡན་པ། ཕྱོགས་རྒྱ་མཚོ་ཐམས་ཅད་དུ་མགོ་རྨོངས་པ་མྱེད་པའི་ཡེ་ཤེས་རབ་ཏུ་ཐོབ་པ་སེམས་ཀྱི་སྐད་ཅིག་གིས་ཕྱོགས་རྒྱ་མཚོ་ཐམས་ཅད་དུ་རྣམ་པར་འཕྲུལ་པས་རྒྱས་པར་འགེངས་པ་ཤ་སྟག་སྟེ། དེ་བཞིན་གཤེགས་པའི་བྱིན་གྱི་རླབས་ཀྱིས་དེ་ལྟ་བུའི་ཡོན་ཏན་ཚད་མྱེད་པ་དང་ལྡན་པའི་བྱང་ཆུབ་སེམས་དཔའ་ཤ་སྟག་གིས་ཛེ་ཏའི་ཚལ་ཐམས་ཅད་ཡོངས་སུ་རྒྱས་པར་གྱུར་ཀྱང་། ཉན་ཐོས་ཆེན་པོ་ཤ་རིའི་བུ་དང་། མོའུ་དགལ་གྱི་བུ་དང་འོད་སྲུངས་ཆེན་པོ་དང་། ནམ་འགྲུ་དང་། རབ་འབྱོར་དང་། འགག་མྱེད་དང་། མོས་པ་དང་། ཀ་ཏྱའི་བུ་དང་། བྱམས་གང་གི་བུ་ལ་སྩོགས་པས་ཛེ་ཏའི་ཚལ་ན་འཁོད་བཞིན་དུ་དེ་བཞིན་གཤེགས་པའི་རྣམ་པར་འཕྲུལ་པ་དེ་དག་མ་མཐོང་ངོ་། །སངས་རྒྱས་ཀྱི་བཀོད་པ་དེ་དག་དང་། སངས་རྒྱས་ཀྱི་ཁྱུ་མཆོག་གི་མཐུ་དང་། སངས་རྒྱས་ཀྱི་རྣམ་པར་རོལ་པ་དང་། སངས་རྒྱས་ཀྱི་ཆོ་འཕྲུལ་དང་། སངས་རྒྱས་ཀྱི་མངའ་ཆེན་པོ་དང་། སངས་རྒྱས་སྦྱོང་བའི་རྣམ་པར་འཕྲུལ་པ་དང་། སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་རླབས་དང་། སངས་རྒྱས་ཀྱི་ཞིང་ཡོངས་སུ་དག་པ་ཡང་མ་མཐོང་ངོ་། །བྱང་ཆུབ་སེམས་དཔའི་ཡུལ་བསམ་གྱིས་མྱི་ཁྱབ་པ་དེ་དག་དང་། བྱང་ཆུབ་
སེམས་དཔའ་ཀུན་ནས་འོངས་པ་དང་། བྱང་ཆུབ་སེམས་དཔའ་ཀུན་ནས་འདུས་པ་དང་། བྱང་ཆུབ་སེམས་དཔའ་ཀུན་ནས་ཚོགས་པ་དང་། བྱང་ཆུབ་སེམས་དཔའ་ཉེ་བར་འོངས་པ་དང་། བྱང་ཆུབ་སེམས་དཔའི་རྣམ་པར་འཕྲུལ་པ་དང་། བྱང་ཆུབ་སེམས་དཔའི་ཆོ་འཕྲུལ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་། བྱང་ཆུབ་སེམས་དཔའི་ཕྱོགས་སུ་འཁོད་པ་དང་། བྱང་ཆུབ་སེམས་དཔའི་སེང་གེའི་ཁྲི་བཀོད་པ་དང་། བྱང་ཆུབ་སེམས་དཔའི་ཁང་པ་དང་། བྱང་ཆུབ་སེམས་དཔའི་རྣམ་པར་སྤྱོད་པ་དང་། བྱང་ཆུབ་སེམས་དཔའི་ཏིང་ངེ་འཛིན་གྱིས་རྣམ་པར་རྩེ་བ་དང་། བྱང་ཆུབ་སེམས་དཔའི་རྣམ་པར་ལྟ་བ་དང་། བྱང་ཆུབ་སེམས་དཔའི་རྣམ་པར་བསྒྱིངས་པ་དང་བྱང་ཆུབ་སེམས་དཔའི་རྣམ་པར་གནོན་པ་དང་། བྱང་ཆུབ་སེམས་དཔའི་དེ་བཞིན་གཤེགས་པ་མཆོད་པ་དང་། བྱང་ཆུབ་སེམས་དཔའི་ལུང་བསྟན་པ་དང་། བྱང་ཆུབ་སེམས་དཔའི་ཡོངས་སུ་སྨིན་པར་གྱུར་པ་དང་། བྱང་ཆུབ་སེམས་དཔའི་སྔོན་དུ་འདོར་བ་དང་། བྱང་ཆུབ་སེམས་དཔའི་ཆོས་ཀྱི་ལུས་རྣམ་པར་དག་པ་དང་། བྱང་ཆུབ་སེམས་དཔའི་ཡེ་ཤེས་ཀྱི་ལུས་ཡོངས་སུ་རྫོགས་པ་དང་། བྱང་ཆུབ་སེམས་དཔའི་སྨོན་ལམ་གྱི་ལུས་རྣམ་པར་དམྱིགས་པ་དང་། བྱང་ཆུབ་སེམས་དཔའི་གཟུགས་ཀྱི་ལུས་ཡོངས་སུ་གྲུབ་པ་དང་། བྱང་ཆུབ་སེམས་དཔའི་མཚན་ཕུན་སུམ་ཚོགས་པ་ཡོངས་སུ་དག་པ་དང་། བྱང་ཆུབ་སེམས་དཔའི་འོད་ཀྱི་དཀྱིལ་འཁོར་ཁ་དོག་མཐའ་ཡས་པའི་བཀོད་པ་དང་། བྱང་ཆུབ་སེམས་དཔའི་འོད་ཟེར་གྱི་དྲ་བ་རབ་ཏུ་འགྱེད་པ་དང་། བྱང་ཆུབ་སེམས་དཔའི་སྤྲུལ་པའི་སྤྲིན་ཀུན་ཏུ་འགྱེད་པ་དང་། བྱང་ཆུབ་སེམས་དཔའི་ཕྱོགས་ཀྱི་དྲ་བ་རྒྱས་པར་འགེངས་པ་དང་། བྱང་ཆུབ་སེམས་དཔའ་སྤྱོད་པའི་དཀྱིལ་འཁོར་རྣམ་པར་སྤྲུལ་པ་ཡང་མ་མཐོང་ངོ་། །དེ་ཅིའི་ཕྱིར་ཞེ་ན། དགེ་བའི་རྩ་བ་མྱི་མཚུངས་པའི་ཕྱིར་ཏེ། དེ་དག་གིས་ནི་སྔོན་སངས་རྒྱས་ཀྱི་རྣམ་པར་འཕྲུལ་པ་མཐོང་བའི་རྒྱུར་འགྱུར་བའི་དགེ་བའི་རྩ་བ་མ་བསྩགས་སོ། །དེ་དག་ལ་ནི་སྔོན་སངས་རྒྱས་
བཅོམ་ལྡན་འདས་རྣམས་ཀྱིས་ཕྱོགས་བཅུའི་འཇིག་རྟེན་གྱི་ཁམས་སུ་གཏོགས་པའི་སངས་རྒྱས་ཀྱི་ཞིང་ཐམས་ཅད་ཀྱི་ཡོན་ཏན་དང་། བཀོད་པ་ཡོངས་སུ་དག་པ་ཡང་དག་པར་བསྟན་པ་མ་མཛད་དོ། །དེ་དག་ལ་ནི་སངས་རྒྱས་བཅོམ་ལྡན་འདས་རྣམས་ཀྱིས་སངས་རྒྱས་ཀྱི་རྣམ་པར་འཕྲུལ་པ་ཡང་དག་པར་བརྗོད་པ་མ་མཛད་དོ། །དེ་དག་གིས་ནི་སྔོན་འཁོར་བ་ན་འཁོར་བའི་ཚེ་སེམས་ཅན་རྣམས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་བསྐུལ་བ་མ་བྱས་སོ། །དེ་དག་གིས་ནི་གཞན་གྱི་སེམས་ཀྱི་རྒྱུད་ལ་བྱང་ཆུབ་ཏུ་སེམས་བསྐྱེད་པ་རབ་ཏུ་བཞག་པ་མ་བྱས་སོ། །དེ་དག་གིས་ནི་དེ་བཞིན་གཤེགས་པའི་གདུང་རྒྱུན་མྱི་གཅོད་པའི་ཕྱིར་ཞུགས་པ་མ་ཡིན་ནོ། །དེ་དག་གིས་ནི་སེམས་ཅན་ཐམས་ཅད་ཡོངས་སུ་བསྡུ་བའི་ཕྱིར་བརྩོན་པ་མ་ཡིན་ནོ། །དེ་དག་གིས་ནི་བྱང་ཆུབ་སེམས་དཔའ་རྣམས་ཕ་རོལ་ཏུ་ཕྱིན་པ་ལ་ཡང་དག་པར་བསྐུལ་བ་མ་བྱས་སོ། །དེ་དག་གིས་ནི་སྔོན་འཁོར་བ་ན་འཁོར་བའི་ཚེ། འགྲོ་བ་ཐམས་ཅད་ལས་ཁྱད་པར་དུ་འཕགས་པའི་ཡེ་ཤེས་ཀྱི་ས་ལ་དམིགས་པ་མ་བྱས་སོ། །དེ་དག་གིས་ནི་ཐམས་ཅད་མཁྱེན་པ་ཉིད་དུ་འགྱུར་བའི་དགེ་བའི་རྩ་བ་ཉེ་བར་བསྩགས་པ་མ་བྱས་སོ། །དེ་དག་གིས་ནི་དེ་བཞིན་གཤེགས་པའི་འཇིག་རྟེན་ལས་འདས་པའི་དགེ་བའི་རྩ་བ་ཡོངས་སུ་མ་བསྒྲུབས་སོ། །དེ་དག་གིས་ནི་སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་དུ་རྣམ་པར་འཕྲུལ་པའི་མངོན་པར་ཤེས་པ་ཁོང་དུ་མ་ཆུད་དོ། །དེ་དག་གིས་ནི་བྱང་ཆུབ་སེམས་དཔའི་མིག་གི་ལམ་གྱིས་རྣམ་པར་དམིགས་པར་བྱ་བ་འཇིག་རྟེན་ལས་འདས་པ་ཐུན་མོང་མ་ཡིན་པའི་བྱང་ཆུབ་ཏུ་དམིགས་པའི་དགེ་བའི་རྩ་བ་བྱང་ཆུབ་སེམས་དཔའི་སྨོན་ལམ་ཆེན་པོ་ལས་བྱུང་བ་ཁོང་དུ་མ་ཆུད་དོ། །ཉན་ཐོས་དང་རང་སངས་རྒྱས་ཀུན་གྱིས་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་ཡེ་ཤེས་གྱི་མིག་གི་ལམ་གྱིས་རྣམ་པར་དམིགས་པ་ཐུན་མོང་མ་ཡིན་པ་དེ་བཞིན་གཤེགས་པའི་བྱིན་གྱི་རླབས་ལས་བྱུང་བའི་སྒྱུ་མའི་རྣམ་པའི་ཆོས་ཉིད་ཀྱིས་གྲུབ་པ།
བྱང་ཆུབ་སེམས་དཔའ་འདུ་ཤེས་སྣ་ཚོགས་ཡོངས་སུ་འཛིན་པ་བྱིན་གྱིས་རློབ་པ། བྱང་ཆུབ་སེམས་དཔའི་དགའ་བའི་ཤུགས་ཆེན་པོ་རྣམ་པར་འཕེལ་བར་བྱེད་པ་ཁོང་དུ་མ་ཆུད་དོ། །དེ་བས་ན་ཉན་ཐོས་ཆེན་པོ་མཆོག་གི་ཟུང་དང་། བཟང་པོའི་ཟུང་ལ་སོགས་པ་དེ་དག་གིས་དེ་བཞིན་གཤེགས་པའི་རྣམ་པར་འཕྲུལ་པ་དེ་མི་མཐོང་ངོ་། །མྱི་ཐོས་སོ། །མི་ཤེས་སོ། །ཁོང་དུ་མི་ཆུད་དོ། །མི་རྟོགས་སོ། །མི་རིག་གོ །ཡིད་མི་ཆེས་སོ། །མི་སེམས་སོ། །རྣམ་པར་མི་ལྟའོ། །རྟོགས་པར་མི་ལྟའོ། །ངེས་པར་མི་སེམས་སོ། །ཉེ་བར་མི་སེམས་སོ། །དེ་ཅིའི་ཕྱིར་ཞེ་ན། དེ་ནི་སངས་རྒྱས་ཀྱི་སྤྱོད་ཡུལ་ཏེ་ཉན་ཐོས་ཀྱི་སྤྱོད་ཡུལ་མ་ཡིན་ནོ། །དེ་བས་ན་ཉན་ཐོས་ཆེན་པོ་དེ་དག་ཛེ་ཏའི་ཚལ་དེ་ཉིད་ན་འཁོད་ཀྱང་། སངས་རྒྱས་ཀྱི་རྣམ་པར་འཕྲུལ་པ་དེ་དག་མི་མཐོང་སྟེ། དེ་དག་ལ་དེ་དང་མཐུན་པའི་དགེ་བའི་རྩ་བ་མེད་དོ། །དེ་དག་གིས་སངས་རྒྱས་ཀྱི་རྣམ་པར་འཕྲུལ་པ་དེ་དག་མཐོང་དུ་དེ་ལྟ་བུའི་ཡེ་ཤེས་ཀྱི་མྱིག་རྣམ་པར་མ་དག་གོ །དམྱིགས་པ་ཆུང་ངུ་ལ་རྒྱ་ཆེན་པོའི་བྱིན་གྱི་རླབས་ཀྱིས་འཇུག་ཏུ་ཏིང་ངེ་འཛིན་དེ་ལྟ་བུ་མེད་དོ། །དེ་དག་ཤེས་པ་དང་། བལྟ་བའམ། ཁོང་དུ་ཆུད་པར་བྱ་བའམ། རྟོགས་པར་བྱ་བའམ། རྒྱས་པར་དགང་པར་བྱ་བའམ། འཇུག་པར་བྱ་བའམ། རྣམ་པར་བལྟ་བའམ། ཉམས་སུ་མྱོང་བར་བྱ་བའམ། གནན་པའམ། རྣམ་པར་གནན་པའམ། གཞན་གྱིས་ཐོས་པར་བྱ་བའམ། བསྟན་པར་བྱ་བའམ། སྨོས་པར་བྱ་བའམ། ཡང་དག་པར་བསྟན་པར་བྱ་བའམ། བསྟབས་པར་བྱ་བའམ། སྦྱིན་པར་བྱ་བའམ། དེ་ལ་སེམས་ཅན་རྣམས་ཡོངས་སུ་བསྐུལ་བར་བྱ་བའམ། སྦྱར་བར་བྱ་བའམ། རབ་ཏུ་དགོད་པར་བྱ་བའམ། སངས་རྒྱས་ཀྱི་རྣམ་པར་འཕྲུལ་པའི་ཆོས་ཉིད་ལ་སེམས་ཅན་དགོད་པར་བྱར་ཡང་དེ་དག་ལ་དེ་ལྟ་བུའི་རྣམ་པར་ཐར་པ་མེད་དོ། །དེ་ལྟ་བུའི་རྫུ་འཕྲུལ་མེད་དོ། །དེ་ལྟ་བུའི་ཁྱུ་མཆོག་གི་མཐུ་མེད་དོ། །དེ་ལྟ་བུའི་སྟོབས་མེད་དོ། །དེ་ལྟ་བུའི་དབང་མེད་དོ། །དེ་ལྟ་བུའི་གནས་མེད་དོ། །དེ་ལྟ་བུའི་འདུ་ཤེས་མེད་དོ། །དེ་ལྟ་བུའི་མྱིག་གི་མཐུ་མེད་དོ། །དེ་ལྟ་བུའི་ཡེ་ཤེས་
མེད་དོ། །དེ་ཅིའི་ཕྱིར་ཞེ་ན། དེ་དག་ནི་དེ་ལྟར་ཉན་ཐོས་ཀྱི་ཐེག་པས་བྱུང་བ་ཉན་ཐོས་ཀྱི་ལམ་གྱིས་ཡོངས་སུ་གྲུབ་པ། ཉན་ཐོས་ཀྱི་སྤྱོད་པའི་དཀྱིལ་འཁོར་ཡོངས་སུ་རྫོགས་པ། ཉན་ཐོས་ཀྱི་འབྲས་བུ་ལ་གནས་པ། བདེན་པ་སྣང་བ་ཤེས་པས་ངེས་པར་རྟོགས་པ། ཡང་དག་པའི་མཐའ་ལ་གནས་པ། ཤིན་ཏུ་ཞི་བའི་མཐར་ཐུག་པ། སྙིང་རྗེ་ཆེན་པོའི་བསམ་པ་མེད་པ། འཇིག་རྟེན་གྱི་ཁམས་ཐམས་ཅད་ལ་མྱི་ལྟ་མི་སྡོད་པ། རང་གི་དོན་གྲུབ་པ་དག་སྟེ། དེ་དག་ནི་ཛེ་ཏའི་ཚལ་དེ་ཉིད་དུ་ཀུན་ནས་འདུས་ཏེ་འཁོད་ལ། བཅོམ་ལྡན་འདས་ཀྱི་སྤྱན་སྔ་དང་གཡས་གཡོན་དང་། སྣམ་ལོགས་ན་བཅོམ་ལྡན་འདས་ལ་མངོན་དུ་ལྟ་བར་གནས་ཀྱང་། ཛེ་ཏའི་ཚལ་དེར་སངས་རྒྱས་ཀྱི་རྣམ་པར་འཕྲུལ་པ་དེ་དག་མཐོང་བར་མ་གྱུར་ཏོ། །དེ་ཅིའི་ཕྱིར་ཞེ་ན། ཐམས་ཅད་མཁྱེན་པའི་ཡེ་ཤེས་ཡང་དག་པར་མ་བསྒྲུབས་པ་དང་། ཐམས་ཅད་མཁྱེན་པའི་ཡེ་ཤེས་ཡང་དག་པར་མ་བསྡུས་པ་དང་། ཐམས་ཅད་མཁྱེན་པའི་ཡེ་ཤེས་ལ་ཡང་དག་པར་མ་ཞུགས་པ་དང་། ཐམས་ཅད་མཁྱེན་པའི་ཡེ་ཤེས་ལ་སྨོན་ལམ་ཡང་དག་པར་མ་བཏབ་པ་དང་། ཐམས་ཅད་མཁྱེན་པའི་ཡེ་ཤེས་མངོན་པར་མ་བསྒྲུབས་པ་དང་། ཐམས་ཅད་མཁྱེན་པའི་ཡེ་ཤེས་ཡོངས་སུ་མ་བསྒོམས་པ་དང་། ཐམས་ཅད་མཁྱེན་པའི་ཡེ་ཤེས་མ་སྦྱངས་པ་དེ་དག་གིས་ནི། དེ་བཞིན་གཤེགས་པའི་ཏིང་ངེ་འཛིན་གྱི་རྣམ་པར་འཕྲུལ་པ་དེ་ལ་འཇུག་ཅིང་རྟོགས་པར་བྱ་བའམ། བལྟ་ཞིང་ཁོང་དུ་ཆུད་པར་བྱ་བར་མྱི་ནུས་སོ། །དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའ་རིགས་དང་ལྡན་པ་རྣམས་ཀྱི་མྱིག་གི་ལམ་གྱིས་བལྟ་བ་ཡིན་གྱིས། ཉན་ཐོས་ཀྱི་མྱིག་གིས་བལྟ་བ་མ་ཡིན་ནོ། །དེ་བས་ན་ཉན་ཐོས་ཆེན་པོ་དེ་དག་ཛེ་ཏའི་ཚལ་དེ་ཉིད་ན་འཁོད་ཀྱང་དེ་བཞིན་གཤེགས་པའི་རྣམ་པར་འཕྲུལ་པ་དང་། སངས་རྒྱས་ཀྱི་བྱིན་གྱི་རླབས་དང་། སངས་རྒྱས་ཀྱི་ཞིང་ཡོངས་སུ་དག་པ་དང་། བྱང་ཆུབ་སེམས་དཔའ་ཀུན་ནས་འདུས་པ་ཡང་མཐོང་བར་མ་གྱུར་ཏོ། །
དེའང་འདི་ལྟ་སྟེ་དཔེར་ན། གང་གཱའི་ཆུ་ཀླུང་ཆེན་པོའི་ངོགས་ཕ་རོལ་ཚུར་རོལ་དུ་ཡི་དགས་བཀྲེས་པ་དང་། སྐོམ་པས་རབ་ཏུ་མནར་བ་གཅེར་བ་གོས་མྱེད་པ། ལུས་ཀྱི་མདོག་དང་ཁ་དོག་ཚིག་ཅིང་འཇུམ་པ་རླུང་དང་ཉི་མས་བསྐམས་པ། བྱ་རོག་མང་པོས་གཙེ་བ། སྤྱང་ཀི་དང་། ཝས་ཐོ་བཙམས་པ། བརྒྱ་སྟོང་མང་པོ་ཀུན་ནས་འདུས་ཀྱང་། གང་གཱའི་ཆུ་ཀླུང་ཆེན་པོ་མྱི་མཐོང་སྟེ། སྒྲིབ་པའི་ལས་ཀྱིས་བསྒྲིབས་པའི་ཕྱིར་ལ་ལས་ནི་བསྐམས་ཏེ་ཆུ་མེད་པར་མཐོང་ངོ་། །ལ་ལས་ནི་ཐལ་བས་ཡོངས་སུ་གང་བར་མཐོང་ངོ་། །དེ་བཞིན་དུ་ཉན་ཐོས་ཆེན་པོ་གནས་བརྟན་དེ་དག་ཛེ་ཏའི་ཚལ་དེ་ཉིད་ན་འཁོད་ཀྱང་ཐམས་ཅད་མཁྱེན་པ་ཉིད་དང་མྱི་མཐུན་པའི་ཕྱོགས་མ་རིག་པའི་ལིང་ཏོག་གིས་མྱིག་ཀུན་ནས་ཁེབས་པ་དང་། ཐམས་ཅད་མཁྱེན་པ་ཉིད་ཀྱི་སའི་དགེ་བའི་རྩ་བའི་མཐུས་ཡོངས་སུ་མ་བཟུང་བའི་ཕྱིར། དེ་བཞིན་གཤེགས་པའི་རྣམ་པར་འཕྲུལ་པ་དེ་དག་མ་མཐོང་མ་ཤེས་སོ། །འདི་ལྟ་སྟེ་དཔེར་ན་འདུན་མ་ཆེན་པོ་འདུས་པའི་སྐྱེ་བོ་མང་པོའི་དབུས་སུ་མྱི་ལ་ལ་ཞིག་གཉིད་ཀྱིས་མྱོས་ཏེ། ལོག་པར་གྱུར་ནས་དེ་གཉིད་ཀྱིས་ལོག་པའི་རྨྱི་ལམ་དུ་གནས་དེ་ཉིད་ན་ལྷའི་གྲོང་རྡལ་བརྒྱ་བྱིན་གྱི་གནས་བལྟ་ན་མཛེས་པ་དང་། རི་རབ་ཀྱི་སྟེང་ཤིང་དང་བཅས་པ། བཟའ་ཤིང་གི་ར་བའི་འཁོར་དང་བཅས་པ། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་གིས་གང་བ། ལྷའི་བུ་ཁྲག་ཁྲིག་བརྒྱ་ཕྲག་སྟོང་སྙེད་གནས་པ་ལྷའི་མེ་ཏོག་སྣ་ཚོགས་ཀྱིས་ཡོངས་སུ་གང་བ་དང་། ཡིད་བཞིན་གྱི་ཤིང་ལྷ་རྫས་ཀྱི་གོས་དང་མུ་ཏིག་གི་ཕྲེང་བ་དང་། རིན་པོ་ཆེའི་རྒྱན་དང་། སེ་མོ་དོ་སྣ་ཚོགས་མང་པོ་འབྱིན་པ་དང་། ལྷ་རྫས་ཀྱི་སིལ་སྙན་རྣམ་པ་སྣ་ཚོགས་རླུང་གིས་ཡོངས་སུ་བསྐྱོད་ཅིང་སྒྲ་དབྱངས་ཡིད་དུ་འོང་ལ་སྙན་པ་འབྱིན་པའི་སིལ་སྙན་གྱི་ཤིང་མང་པོ་དང་། དགའ་བའི་རྩེད་མོའི་བཀོད་པ་རྣམ་པ་སྣ་ཚོགས་མཐོང་བར་གྱུར་ལ། ལྷའི་བུ་མོ་མང་པོས་གླུ་བླངས་པ་དང་། ལྷ་རྫས་ཀྱི་རོལ་མོ་བྱས་པའི་སྒྲ་ཡིད་དུ་འོང་ཞིང་སྙན་པ་ཐོས་པར་གྱུར་ཏེ། བདག་ཉིད་ཀྱང་དེ་ན་
འདུག་པ་སྙམ་བྱེད་ལ། ལྷ་རྫས་ཀྱི་བཀོད་པས་ཀླུབས་པའི་གནས་དེ་དག་ཐམས་ཅད་མཐོང་བར་གྱུར་ཀྱང་། སྐྱེ་བོའི་ཚོགས་མང་པོ་དེ་དག་གིས་གནས་དེ་ཉིད་ན་འཁོད་བཞིན་དུ་མྱི་མཐོང་། མི་ཤེས། ཁོང་དུ་མི་ཆུད་དོ། །དེ་ཅིའི་ཕྱིར་ཞེ་ན། དེ་ནི་སྐྱེས་བུ་གཉིད་ཀྱིས་ལོག་པ་དེ་ཉིད་ཀྱི་རྨྱི་ལམ་གྱིས་བལྟ་བ་ཡིན་གྱི། གནས་དེ་ཉིད་ན་འཁོད་ཀྱང་སྐྱེ་བོ་མང་པོ་དེ་དག་གིས་བལྟ་བ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་དེ་དག་དང་། འཇིག་རྟེན་གྱི་དབང་པོ་བྱང་ཆུབ་ལ་མངོན་པར་མོས་པ་དེ་དག་སངས་རྒྱས་ཀྱི་བྱིན་གྱི་རླབས་རྒྱ་ཆེན་པོ་དང་། རང་གི་དགེ་བའི་རྩ་བའི་སྟོབས་མ་ནོར་བར་ཤིན་ཏུ་བསྩགས་པ་དང་། ཐམས་ཅད་མཁྱེན་པ་ཉིད་དུ་སྨོན་ལམ་ཤིན་ཏུ་མངོན་པར་བསྒྲུབས་པ་དང་། དེ་བཞིན་གཤེགས་པའི་ཡོན་ཏན་ཐམས་ཅད་ལ་ཤིན་ཏུ་ཞུགས་པ་དང་། བྱང་ཆུབ་སེམས་དཔའི་ལམ་བཀོད་པ་ཆེན་པོ་དང་ལྡན་པ་ལ་ཤིན་ཏུ་གནས་པ་དང་། ཐམས་ཅད་མཁྱེན་པའི་ཡེ་ཤེས་ཀྱི་ཆོས་ཉིད་དང་། ཡན་ལག་རྣམ་པ་ཐམས་ཅད་དུ་ཤིན་ཏུ་རྫོགས་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་ཁྱད་པར་དང་། སྨོན་ལམ་ཡོངས་སུ་རྫོགས་པར་བྱ་བ་རྣམ་པར་དག་པ་དང་། བྱང་ཆུབ་སེམས་དཔའི་ས་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་ཡོངས་སུ་གནོན་པ་དང་། བྱང་ཆུབ་སེམས་དཔའི་ཏིང་ངེ་འཛིན་གྱིས་རྣམ་པར་སྤྱོད་པ་ཐམས་ཅད་ལ་རྣམ་པར་རྩེ་བ་དང་། བྱང་ཆུབ་སེམས་དཔའི་ཡེ་ཤེས་ཀྱི་སྤྱོད་ཡུལ་ཐམས་ཅད་ལ་ཆགས་པ་མྱེད་པར་རྣམ་པར་སྤྱོད་པས་བསམ་གྱིས་མྱི་ཁྱབ་པའི་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་དེ་དག་དང་། སངས་རྒྱས་ཀྱི་རྣམ་པར་རོལ་པ་དེ་དག་མཐོང་ཞིང་ཁོང་དུ་ཆུད་ལ་ཉམས་སུ་མྱོང་བར་གྱུར་ཀྱང་། ཉན་ཐོས་ཆེན་པོ་མཆོག་གི་ཟུང་དང་། བཟང་པོའི་ཟུང་ལ་སྩོགས་པ་དེ་དག་ལ་བྱང་ཆུབ་སེམས་དཔའི་མྱིག་མྱེད་པས་མཐོང་བར་མ་གྱུར་ཤེས་པར་མ་གྱུར་ཏོ། །འདི་ལྟ་སྟེ་དཔེར་ན། རིའི་རྒྱལ་པོ་ཁ་བ་ཅན་སྨན་གྱི་འབྱུང་གནས་ཀྱིས་གང་བ་ལ་སྔགས་དང་། རིག་སྔགས་དང་། སྨན་གྱི་ཚུལ་
དང་། བླང་བའི་རྒྱུས་ཤེས་ཤིང་རིག་སྔགས་གྲུབ་པའི་སྐྱེས་བུ་གནས་པ། སྨན་གྱི་ཆོ་ག་ཐམས་ཅད་ཤེས་པ་སྨན་བླང་བའི་ལས་བྱེད་ཀྱང་། རི་བོའི་དབང་པོ་དེ་ཉིད་ལ་གནས་པའི་ཕྱུགས་དང་། བ་ལང་དང་ར་ལུག་འཚོ་བ་དང་། རྔོན་པ་དང་དེ་མ་ཡིན་པའི་མྱི་སྨན་གྱི་ཚུལ་མྱི་ཤེས་པ་གཞན་དག་གིས། སྨན་དེ་དག་གི་ཆོ་ག་དང་། སྨན་གྱི་རོ་དང་མཐུ་དང་ཡོན་ཏན་དང་བྱིན་དང་། ཐབས་དང་འཕྲོད་པ་མི་ཤེས་སོ། །དེ་བཞིན་དུ་བྱང་ཆུབ་སེམས་དཔའ་དེ་བཞིན་གཤེགས་པའི་ཡེ་ཤེས་ཀྱི་ཡུལ་ལ་ཞུགས་པ་བྱང་ཆུབ་སེམས་དཔའི་རྣམ་པར་འཕྲུལ་པའི་ཡུལ་གྱིས་བྱུང་བ། དེ་དག་གིས་དེ་བཞིན་གཤེགས་པའི་ཏིང་ངེ་འཛིན་གྱི་རྣམ་པར་འཕྲུལ་པའི་ཡུལ་དེ་དག་མཐོང་ཡང་ཉན་ཐོས་ཆེན་པོ་མཆོག་གི་ཟུང་དང་། བཟང་པོའི་ཟུང་ལ་སྩོགས་པ་རང་གི་དགོས་པས་ཚིམ་པར་གྱུར་པ། གཞན་གྱི་དགོས་པ་ཡལ་བར་གཞོག་པ། བཏང་སྙོམས་ཅན་དེ་དག་ཛེ་ཏའི་ཚལ་དེ་ཉིད་ན་གནས་ཀྱང་། ཚེ་འདི་ལ་བདེ་བར་སྤྱོད་པས་བདེ་ཞིང་དགའ་བར་གནས་པ་ལས་ཕར་དེ་བཞིན་གཤེགས་པའི་ཏིང་ངེ་འཛིན་གྱི་རྣམ་པར་འཕྲུལ་པའི་ཡུལ་དེ་དག་ཁོང་དུ་མི་ཆུད་དོ། །འདི་ལྟ་སྟེ་དཔེར་ན། ས་ཆེན་པོ་རིན་པོ་ཆེ་ཐམས་ཅད་ཀྱི་འབྱུང་གནས་ཕུན་སུམ་ཚོགས་པ། གཏེར་བརྒྱ་སྟོང་དུ་མས་གང་བ་རིན་པོ་ཆེ་སྣ་ཚོགས་རྣམ་པ་ཐ་དད་པས་ཡོངས་སུ་གང་བ་འདི་ལའང་རིན་པོ་ཆེའི་འབྱུང་གནས་དང་། གཏེར་གྱི་རྒྱུས་ལ་མཁས་ཤིང་བྱང་བའི་མྱི་རིན་པོ་ཆེ་བརྟག་པའི་གཙུག་ལག་གིས་བློ་ཤིན་ཏུ་བྱང་བ་གཏེར་གྱི་གཙུག་ལག་དང་རྒྱུས་དང་། དན་རྟགས་གྱ་ནོམ་པར་ལོབས་པ། བསོད་ནམས་རྒྱ་ཆེན་པོའི་སྟོབས་ཀྱིས་བརྟན་པ་དག་དེ་ལས་རིན་པོ་ཆེ་ཅི་འདོད་པར་བླངས་ཤིང་། བདག་ཀྱང་ཡོངས་སུ་ཚིམ་པར་བྱེད། ཕ་དང་མ་ལའང་ལེགས་པར་རིམ་གྲོ་བྱེད། བུ་ཕོ་སྨོས་ཀྱང་ལེགས་པར་གསོ་བར་བྱེད་ཅིང་། དེ་མ་ཡིན་པའི་སེམས་ཅན་རྒན་པ་དང་། ན་བ་དང་། དབུལ་བ་དང་། ཉམ་ཉེས་པ་དང་། ཁ་ཟས་དང་། གོས་ཀྱིས་མྱི་འབྱོར་པ་རྣམས་
ལ་སྡུད་ཅིང་ཁྱབ་པར་བགོ་བཤའ་བྱེད་ལ། ནོར་གྱི་དགའ་བ་སྣ་ཚོགས་ཉམས་སུ་མྱོང་བར་བྱེད་ཀྱང་། སེམས་ཅན་རིན་པོ་ཆེའི་འབྱུང་གནས་དང་། གཏེར་གྱི་རྒྱུས་མྱི་ཤེས་པ་བསོད་ནམས་མ་བྱས་པ། རིན་པོ་ཆེ་ལ་ཤེས་པའི་མྱིག་ཡོངས་སུ་མ་དག་པ། དེ་དག་ཉིད་ན་འཁོད་ཀྱང་། རིན་པོ་ཆེའི་འབྱུང་གནས་དེ་དག་དང་རིན་པོ་ཆེའི་གཏེར་དེ་དག་ཁོང་དུ་མྱི་ཆུད་མྱི་ཤེས་པས་རིན་པོ་ཆེའང་བླང་དུ་མྱེད་དོ། །རིན་པོ་ཆེའི་དོན་ཀྱང་བྱར་མེད་དོ། །དེ་བཞིན་དུ་བྱང་ཆུབ་སེམས་དཔའ་དེ་བཞིན་གཤེགས་པའི་ཡུལ་བསམ་གྱིས་མྱི་ཁྱབ་པ་ལ་ཡེ་ཤེས་ཀྱི་མྱིག་ཤིན་ཏུ་རྣམ་པར་དག་པ་དེ་བཞིན་གཤེགས་པའི ་ཡེ་ཤེས་ཀྱི་ཡུལ་བསམ་གྱིས་མྱི་ཁྱབ་པ་ལ་ཞུགས་པ། དེ་དག་ཛེ་ཏའི་ཚལ་ན་འཁོད་ཅིང་སངས་རྒྱས་ཀྱི་རྣམ་པར་འཕྲུལ་པ་དེ་དག་མཐོང་ལ་ཆོས་ཀྱི་ཚུལ་རྒྱ་མཚོ་ལ་འཇུག་ཅིང་ཏིང་ངེ་འཛིན་གྱི་ཕྱག་རྒྱ་ཡོངས་སུ་སྒྲུབ་སྟེ། དེ་བཞིན་གཤེགས་པའི་མཆོད་པ་དང་། རིམ་གྲོ་ལ་བརྩོན་ཞིང་དམ་པའི་ཆོས་ཡོངས་སུ་གཟུང་བ་ལ་མངོན་པར་བརྩོན་ཏེ། བསྡུ་བའི་དངོས་པོ་བཞིས་སེམས་ཅན་དེ་དག་ཡོངས་སུ་སྡུད་ཀྱང་། ཉན་ཐོས་ཆེན་པོ་དེ་དག་གིས་དེ་བཞིན་གཤེགས་པའི་རྣམ་པར་འཕྲུལ་པ་དེ་དག་དང་། བྱང་ཆུབ་སེམས་དཔའི་ཚོགས་ཆེན་པོ་ཀུན་ནས་འདུས་པ་དེ་ལྟ་བུའང་མ་མཐོང་མ་ཤེས་སོ། །འདི་ལྟ་སྟེ་དཔེར་ན། སྐྱེས་བུ་ལ་ལ་ཞིག་མྱིག་གཉིས་གོས་ཀྱིས་བཀབ་སྟེ། རིན་པོ་ཆེའི་གླིང་དུ་ཕྱིན་པར་གྱུར་ན། དེས་རིན་པོ་ཆེའི་གླིང་དེར་ཕན་ཚུན་འགྲོ་བ་དང་། འགྲེང་བ་དང་འདུག་པ་དང་ཉལ་བ་བྱས་ཀྱང་རིན་པོ་ཆེའི་འབྱུང་གནས་དེ་མྱི་མཐོང་ངོ་། །རིན་པོ་ཆེའི་ཤིང་དང་གོས་ཀྱི་རིན་པོ་ཆེ་དང་། སྤོས་ཀྱི་རིན་པོ་ཆེ་དང་། རིན་པོ་ཆེ་ཐམས་ཅད་ཀྱང་མྱི་མཐོང་ལ། རིན་པོ་ཆེ་དེ་དག་གི་སྤྱོད་ཡུལ་ལམ། རིན་ཐང་ངམ། ཡོངས་སུ་སྤྱོད་པའི་རྒྱུས་ཀྱང་མི་ཤེས་པས། དེ་ནི་རིན་པོ་ཆེ་དེ་དག་ལེན་ཀྱང་མྱི་ལེན་ལ། རིན་པོ་ཆེའི་དོན་ཀྱང་ཉམས་སུ་མྱོང་བར་མྱི་བྱེད་དོ། །གང་གི་མྱིག་ལ་བསྒྲིབས་པ་མེད་པ་དེ་དག་གིས་ནི་དེ་
དག་ཐམས་ཅད་མཐོང་ཞིང་ཤེས་སོ། །དེ་བཞིན་དུ་བྱང་ཆུབ་སེམས་དཔའ་ཆོས་རིན་པོ་ཆེའི་གླིང་ཆེན་པོར་ཕྱིན་པ་དེ་དག་གིས་བླ་ན་མེད་པའི་དེ་བཞིན་གཤེགས་པ་རིན་པོ་ཆེ་འཇིག་རྟེན་ཐམས་ཅད་ཀྱི་རྒྱན་དུ་གྱུར་པ་མངོན་དུ་གྱུར་ཏེ། ཛེ་ཏའི་ཚལ་ན་བཞུགས་ཤིང་སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མྱི་ཁྱབ་པ་ཡོངས་སུ་སྟོན་པ་མཐོང་ཡང་ཉན་ཐོས་ཆེན་པོ་དེ་དག །དེ་བཞིན་གཤེགས་པའི་ཞབས་ཀྱི་དྲུང་དེ་ཉིད་ན་གནས་ཤིང་སྤྱོད་ཀྱང་། དེ་བཞིན་གཤེགས་པའི་ཏིང་ངེ་འཛིན་གྱི་ཡུལ་རྣམ་པར་འཕྲུལ་པའི་ཆོ་འཕྲུལ་དེ་དག་མ་མཐོང་ངོ་། །བྱང་ཆུབ་སེམས་དཔའི་ཚོགས་མང་པོ་དེ་ལྟ་བུའི་རིན་པོ་ཆེའི་འབྱུང་གནས་ཆེན་པོ་ཡང་མཐོང་བར་མ་གྱུར་ཏོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་ཏིང་ངེ་འཛིན་གྱི་ཁྱུ་མཆོག་གི་མཐུ་ཕྱུང་བ་དང་། ཆོ་འཕྲུལ་བསམ་གྱིས་མྱི་ཁྱབ་པ་དེ་དག་ལྟར་ཐམས་ཅད་མཁྱེན་པ་ཉིད་དང་མི་མཐུན་པའི་ཕྱོགས་ཀྱི་མ་རིག་པའི་གོས་ཀྱིས་ཡེ་ཤེས་ཀྱི་མིག་བཀབ་པ། དེ་དག་ལ་བྱང་ཆུབ་སེམས་དཔའི་ཡེ་ཤེས་ཀྱི་མིག་ཡོངས་སུ་དག་པ་དེ་ལྟ་བུ་མེད་དོ། །དེ་དག་གིས་ཆོས་ཀྱི་དབྱིངས་གཅིག་ནས་གཅིག་ཏུ་བརྒྱུད་པ་ལ་འཇུག་པ་དེ་ལྟ་བུ་ཁོང་དུ་མ་ཆུད་དོ། །འདི་ལྟ་སྟེ་དཔེར་ན། མྱིག་ཡོངས་སུ་དག་པ་རྡུལ་དང་བྲལ་བས་རབ་ཏུ་སྣང་བ་དང་ལྡན་པ་ཞེས་བྱ་བ་རབ་རིབ་དང་། མུན་པ་ཐམས་ཅད་དང་མི་འགྲོགས་པ་ཡོད་དེ། དེ་མྱི་ལ་ལ་ཞིག་གིས་ཐོབ་པར་གྱུར་ན། དེ་རྡུལ་དང་བྲལ་བས་རབ་ཏུ་སྣང་བ་དང་ལྡན་པའི་མིག་ཡོངས་སུ་དག་པ་དང་ལྡན་པས་མཚན་མོ་མུན་པའི་མུན་ནག་ཤིན་ཏུ་གནག་པར་གྱུར་པའི་ནང་ན་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཀུན་ནས་འདུས་པ་དང་། ཆོ་ག་དང་སྤྱོད་ལམ་རྣམ་པ་སྣ་ཚོགས་དང་ལྡན་ཞིང་མུན་པའི་རབ་རིབ་ཀྱིས་མྱིག་ཡོངས་སུ་འཁྲུགས་པར་གྱུར་པ་མྱིའི་ཁྲོད་ན་འདུག་ཅིང་རྣམ་པར་རྒྱུ་ལ་ཕན་ཚུན་འགྲོ་བ་དང་། འགྲེང་བ་དང་སྤྱོད་ལམ་རྣམ་པ་སྣ་ཚོགས་ཀྱིས་སྤྱོད་ཀྱང་མི་དེ་དག་གིས་སྐྱེས་བུ་སྤྱོད་ལམ་སྣ་ཚོགས་ཀྱི་སྤྱོད་པ་དེ་མི་མཐོང་མྱི་ཤེས་སོ། །སྐྱེས་བུ་
དེས་ནི་འགྲོ་བའི་ཚོགས་ཆེན་པོ་སྤྱོད་ལམ་དང་ཆོ་ག་སྣ་ཚོགས་ཀྱིས་རྣམ་པར་སྤྱོད་པ། ཕྱོགས་ཐ་དད་དུ་མངོན་པར་བལྟས་པ། དབྱིབས་ཀྱི་རྣམ་པ་ཐ་དད་པ་ཁ་དོག་གི་རྣམ་པ་ཐ་དད་པ་དམིགས་པའི་ཚུལ་ཐ་དད་པ་ཐམས་ཅད་ཀྱང་མི་མཐོང་བ་མེད་དོ། །དེ་བཞིན་དུ་དེ་བཞིན་གཤེགས་པ་བྱང་ཆུབ་སེམས་དཔའི་ཚོགས་ཀྱི་འཁོར་མངའ་བ། རྣམ་པར་དག་ཅིང་ཆགས་པ་མི་མངའ་བའི་སྤྱན་དང་ལྡན་པས་འཇིག་རྟེན་ཐམས་ཅད་མཁྱེན་ཅིང་གཟིགས་ཏེ། སངས་རྒྱས་ཀྱི་ཏིང་ངེ་འཛིན་གྱི་རྣམ་པར་འཕྲུལ་པ་དང་ཆོ་འཕྲུལ་ཆེན་པོ་བསྟན་པ་མཛད་ཀྱང་། ཉན་ཐོས་ཆེན་པོ་དེ་དག་གིས་དེ་བཞིན་གཤེགས་པའི་ཡེ་ཤེས་དང་ཏིང་ངེ་འཛིན་གྱིས་རྣམ་པར་སྤྲུལ་པའི་ཆོ་འཕྲུལ་ཆེན་པོ་དེ་དག་མཐོང་བར་མ་གྱུར་ཏོ། །བྱང་ཆུབ་སེམས་དཔའ་ཆེན་པོའི་ཚོགས་ཆེན་པོ་དེ་ལྟ་བུ་ཡང་མཐོང་བར་མ་གྱུར་ཏོ། །འདི་ལྟ་སྟེ་དཔེར་ན། དགེ་སློང་ལ་ལ་ཞིག་སྐྱེ་བོ་མང་པོའི་ཚོགས་ཀྱི་དབུས་སུ་སས་ཁྱབ་པའི་ཏིང་ངེ་འཛིན་ལ་སྙོམས་པར་ཞུགས་པའམ། ཆུས་ཁྱབ་པའམ། མེས་ཁྱབ་པའམ། རླུང་གིས་ཁྱབ་པའམ། སྔོན་པོས་ཁྱབ་པའམ། སེར་པོས་ཁྱབ་པའམ། དམར་པོས་ཁྱབ་པའམ། དཀར་པོས་ཁྱབ་པའམ། ལྷས་ཁྱབ་པའམ། སེམས་ཅན་སྣ་ཚོགས་ཀྱི་ལུས་ཀྱིས་ཁྱབ་པའམ། སྒྲ་དང་དབྱངས་ཀུན་གྱིས་ཁྱབ་པའམ། དམིགས་པ་ཐམས་ཅད་ཀྱིས་ཁྱབ་པའི་ཏིང་ངེ་འཛིན་ལ་སྙོམས་པར་ཞུགས་ན་འགྲོ་བ་མང་པོའི་ཚོགས་དེ་དག་གིས་ཆུའི་ཕུང་པོ་དེ་མི་མཐོང་ངོ་། །མེའི་སྣང་བ་དེ་ཡང་མི་མཐོང་ངོ་། །སེམས་ཅན་སྣ་ཚོགས་ཀྱི་ལུས་ཀྱིས་ཁྱབ་པ་དང་། དམིགས་པ་ཐམས་ཅད་ཀྱིས་ཁྱབ་པའི་བར་དུ་ཡང་མི་མཐོང་སྟེ། ཏིང་ངེ་འཛིན་དེ་ལ་སྙོམས་པར་ཞུགས་ཤིང་རྣམ་པར་སྤྱོད་པ་རྣམས་ནི་མ་གཏོགས་སོ། །དེ་བཞིན་དུ་དེ་བཞིན་གཤེགས་པས་སངས་རྒྱས་ཀྱི་ཏིང་ངེ་འཛིན་གྱི་ཡུལ་གྱི་རྣམ་པར་སྤྲུལ་པ་བསམ་གྱིས་མི་ཁྱབ་པ་དེ་དག་ཡོངས་སུ་བསྟན་
པ་མཛད་ན་ཉན་ཐོས་ཆེན་པོ་དེ་དག་གིས་མཐོང་ཞིང་ཤེས་པར་མ་གྱུར་ཏེ། བྱང་ཆུབ་སེམས་དཔའ་དེ་བཞིན་གཤེགས་པའི་ལམ་ལ་ཞུགས་པ་དེ་དག་གིས་ནི་དེ་བཞིན་གཤེགས་པའི་ཡུལ་དེ་དག་མཐོང་ངོ་། །ཁོང་དུ་ཆུད་དོ། །འདི་ལྟ་སྟེ་དཔེར་ན། བསྐུ་བ་གྲུབ་པའི་མྱི་ནི་མིག་གཉིས་བསྐུས་མ་ཐག་ཏུ། སྐྱེ་བོ་མང་པོ་ཐམས་ཅད་ཀྱིས་ལུས་མི་མཐོང་ངོ་། །དེས་ནི་འགྲོའམ་འདུག་གམ། འགྲེང་ཡང་རུང་སྟེ། འགྲོ་བ་མང་པོ་ཐམས་ཅད་མཐོང་ངོ་། །དེ་བཞིན་དུ་དེ་བཞིན་གཤེགས་པ་འཇིག་རྟེན་ལས་འདས་པ་འགྲོ་བ་ཐམས་ཅད་ཀྱི་ཡུལ་ལས་ཡོངས་སུ་འདས་པ་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་དུ་ཞུགས་པ། བྱང་ཆུབ་སེམས་དཔའི་ཡེ་ཤེས་ཀྱི་མིག་གིས་ཤེས་པར་བྱ་བ་དེས་འགྲོ་བ་ཐམས་ཅད་གཟིགས་ཀྱང་ཉན་ཐོས་ཆེན་པོ་དེ་དག་གིས་དེ་བཞིན་གཤེགས་པའི་རྣམ་པར་འཕྲུལ་པ་དེ་དག་མ་མཐོང་ངོ་། །འདི་ལྟ་སྟེ་དཔེར་ན། མྱིའི་ཚེར་འགྲོགས་པའི་ལྷ་རྟག་ཏུ་རྗེས་སུ་འབྲང་བ་ནི། དེས་མྱི་དེ་མཐོང་ཡང་མྱིས་ལྷ་དེ་མི་མཐོང་ངོ་། །དེ་བཞིན་དུ་དེ་བཞིན་གཤེགས་པ་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལ་ཞུགས་པ། བྱང་ཆུབ་སེམས་དཔའི་ཚོགས་ཀུན་ནས་འདུས་པ་ཆེན་པོའི་དབུས་སུ་སངས་རྒྱས་ཀྱི་རྣམ་པར་འཕྲུལ་པ་ཆེན་པོ་ཡོངས་སུ་བསྟན་པ་མཛད་ཀྱང་། ཉན་ཐོས་ཆེན་པོ་དེ་དག་གིས་དེ་བཞིན་གཤེགས་པའི་རྣམ་པར་འཕྲུལ་པ་དང་། ཆོ་འཕྲུལ་ཆེན་པོ་དང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱི་རྣམ་པར་འཕྲུལ་པ་དེ་དག་ཀྱང་མ་མཐོང་ངོ་། །མ་ཤེས་སོ། །འདི་ལྟ་སྟེ་དཔེར་ན། དགེ་སློང་སེམས་ཅན་ཐམས་ཅད་ལ་དབང་གི་དམ་པའི་ཕ་རོལ་ཏུ་བགྲོད་པར་ཕྱིན་པའི་མཆོག་ཐོབ་པ་འདུ་ཤེས་དང་ཚོར་བ་འགོག་པ་ལ་སྙོམས་པར་ཞུགས་པ་ནི་ཤེས་པ་མེད་ལ་ཚོར་བ་མེད་པས་དབང་པོ་དྲུག་གིས་ཀྱང་བྱ་བ་གང་ཡང་ཉམས་སུ་མི་མྱོང་སྟེ། མྱ་ངན་ལས་འདས་པའང་མ་ཡིན་ལ་འཇིག་རྟེན་གྱི་ཐ་སྙད་ཐམས་ཅད་གནས་དེ་ཡོད་ཀྱང་སྙོམས་པར་ཞུགས་པ་དེ་ཉིད་ཀྱི་བྱིན་གྱི་རླབས་དང་མཐུས་དེས་མི་ཤེས་མྱི་མཐོང་ངོ་། །དེ་བཞིན་དུ་ཉན་ཐོས་ཆེན་པོ་དེ་དག་ཛེ་ཏའི་ཚལ་
དེ་ནའང་རྣམ་པར་སྤྱོད་ལ་དེ་དག་ལ་དབང་པོ་དྲུག་ཀྱང་ཡོད་དེ། དེ་བཞིན་གཤེགས་པའི་ཏིང་ངེ་འཛིན་དང་། རྣམ་པར་འཕྲུལ་པ་དང་ཁྱུ་མཆོག་གི་མཐུ་ཕྱུང་བ་དང་། ཆོ་འཕྲུལ་དེ་དག་མཐོང་བར་མ་གྱུར། ཁོང་དུ་ཆུད་པར་མ་གྱུར་ཤེས་པར་མ་གྱུར་ཏོ། །བྱང་ཆུབ་སེམས་དཔའི་ཆོ་འཕྲུལ་ཆེན་པོ་དེ་དག་དང་། བྱང་ཆུབ་སེམས་དཔའི་རྣམ་པར་འཕྲུལ་པ་དེ་དག་ཀྱང་ཁོང་དུ་མ་ཆུད་མ་མཐོང་མ་ཤེས་སོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཡུལ་ནི་ཟབ་ཅིང་ཡངས་ལ་ཚད་མེད་དེ། བལྟ་བར་དཀའ་ཞིང་རྟོགས་པར་དཀའ་སྟེ། ཁོང་དུ་ཆུད་པར་དཀའ་ལ་འཇིག་རྟེན་ཐམས་ཅད་ལས་ཡོངས་སུ་འདས་པའོ། །སངས་རྒྱས་ཀྱི་ཡུལ་ནི་བསམ་གྱིས་མི་ཁྱབ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱིས་མི་འདུས་པའོ། །དེ་བས་ན་ཉན་ཐོས་ཆེན་པོ་དེ་དག་ཛེ་ཏའི་ཚལ་དེ་ཉིད་ན་འཁོད་ཅིང་། བཅོམ་ལྡན་འདས་ཀྱི་ཞབས་ཀྱི་དྲུང་ན་སྤྱོད་ཀྱང་སངས་རྒྱས་ཀྱི་རྣམ་པར་འཕྲུལ་པ་དེ་དག་དང་བྱང་ཆུབ་སེམས་དཔའི་ཚོགས་ཆེན་པོ་དེ་དག་ཀྱང་མ་མཐོང་ངོ་། །ཛེ་ཏའི་ཚལ་འཇིག་རྟེན་གྱི་ཁམས་གྲངས་མེད་པ་བསམ་གྱིས་མི་ཁྱབ་པ་རྣམ་པར་དག་པའི་ཡོན་ཏན་དང་། རྒྱན་ཡོངས་སུ་འདུས་པ་དེ་དག་ཀྱང་མ་མཐོང་མ་ཤེས་ཏེ། དེ་ནི་སྣོད་དུ་མ་གྱུར་པའི་ཕྱིར་རོ། །དེ་ནས་བྱང་ཆུབ་སེམས་དཔའ་རྣམ་པར་སྣང་མཛད་ཀྱི་སྨོན་ལམ་གྱི་གཙུག་གི་འོད་ཟེར་རབ་ཏུ་སྣང་བས་སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ལྟོས་ཤིག་སེམས་ཅན་དམ་པ་ཡི། །སངས་རྒྱས་བྱང་ཆུབ་བསམ་མྱི་ཁྱབ། །རྒྱལ་བས་སངས་རྒྱས་རྣམ་འཕྲུལ་པ། ཛེ་ཏའི་རྒྱལ་མཚན་འདིར་བསྟན་ཏོ། །རང་བྱུང་རྣམས་ཀྱི་བྱིན་གྱི་རླབས། །བགྲང་དུ་མེད་པར་འབྱུང་བ་ལ། །སངས་རྒྱས་ཆོས་ཚུལ་མི་ཤེས་པའི། །འཇིག་རྟེན་ཀུན་ཀྱང་མགོ་རྨོངས་སོ། །ཆོས་ཀྱི་རྒྱལ་པོའི་ཆོ་འཕྲུལ་དག །ཚད་མེད་བསམ་གྱིས་མི་ཁྱབ་ཅིང་། །ཤིན་ཏུ་ཟབ་པ་འབྱུང་བ་ནི། །དེ་ལ་འཇིག་
རྟེན་འབབ་མི་ནུས། །རྫོགས་པའི་སངས་རྒྱས་ཁ་དོག་མདོག །མཚན་གྱིས་ཤིན་ཏུ་རྣམ་པར་ཀླུབས། །ཡང་དག་སངས་རྒྱས་བསྐྱེད་པ་ཡིས། །ཆོས་རབ་དེ་དག་མཚན་ཉིད་མེད། །རྣམ་འཕྲུལ་མཐའ་དང་དབུས་མྱེད་ལ། །ཚིག་གི་ལམ་གྱིས་བརྗོད་དཀའ་བའི། །རྣམ་འཕྲུལ་ཤིན་ཏུ་ཟབ་པ་དག །རྒྱལ་བས་ཛེ་ཏའི་ཚལ་དུ་བསྟན། །རྒྱལ་སྲས་བདག་ཉིད་ཆེ་བའི་རྣམས། །ཞིང་རྣམས་བསམ་ཡས་བྱེ་བ་ནས། །རྒྱལ་བའི་ཞལ་ལྟར་མོས་དགའ་སྟེ། །ཀུན་ནས་འདུས་པའི་ཚོགས་ལ་ལྟོས། །སྨོན་ལམ་ཡོངས་སུ་ཕུན་སུམ་ཚོགས། །སྤྱོད་ལམ་སྤྱོད་པ་ཆགས་མེད་པ། །དེ་དག་བསམ་པ་ཤེས་པར་ནི། །འཇིག་རྟེན་ཀུན་གྱིས་མི་ནུས་སོ། །དེ་དག་སེམས་དང་སྤྱོད་ཡུལ་དང་། །སྤྱོད་པ་དག་ཀྱང་ཉན་ཐོས་དང་། །རང་རྒྱལ་ཐམས་ཅད་ཡོངས་ཀྱིས་ཀྱང་། །རྣམ་པ་ཀུན་ཏུ་ཤེས་མི་ནུས། །རྒྱལ་སྲས་ཤེས་རབ་ཆེན་པོ་རྣམས། །གཞན་གྱིས་ཐུབ་དཀའ་ཕམ་བྱེད་ལ། །དཔའ་བའི་རྒྱལ་མཚན་མ་འདྲེས་ཤིང་། །ཡེ་ཤེས་ས་ལ་གཞོལ་གྱུར་པ། །ཏིང་འཛིན་དཔག་ཏུ་ཚད་མེད་ལ། །གྲགས་ཆེན་མཉམ་པར་གཞག་པ་རྣམས། །ཆོས་དབྱིངས་ཐམས་ཅད་རྒྱས་བཀང་ཞིང་། །རྣམ་པར་འཕྲུལ་པ་ཀུན་ཀྱང་སྟོན། །དེ་ནས་བྱང་ཆུབ་སེམས་དཔའ་ཐུབ་པར་དཀའ་བའི་བརྩོན་འགྲུས་ཀྱི་ཤུགས་ཀྱི་རྒྱལ་པོས་སངས་རྒྱས་ཀྱི་བྱིན་གྱི་རླབས་ཀྱིས། ཕྱོགས་བཅུར་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསོད་ནམས་སྙིང་པོ་ཤེས་རབ་ཆེ། །བྱང་ཆུབ་སྤྱོད་པའི་ཚུལ་རྟོགས་ཤིང་། །འཇིག་རྟེན་ཀུན་ལ་བདེ་བྱེད་པའི། །བདེ་གཤེགས་སྐུ་ལས་སྐྱེས་པ་ལྟོས། །ཡིད་གཞུངས་བློ་གྲོས་མཐའ་ཡས་ཤིང་། །ཤིན་ཏུ་མཉམ་གཞག་སེམས་ལྡན་པ། །མཐའ་དང་དབུས་མེད་ཟབ་པ་ཡི། །ཡེ་ཤེས་རྒྱ་ཆེན་སྤྱོད་ཡུལ་ཅན། །རྒྱན་རབ་མང་པོས་མཛེས་བྱས་པའི། །ཛེ་ཏའི་ནགས་ཚལ་རྒྱ་ཆེ་བ། །བྱང་ཆུབ་སེམས་དཔས་ཀུན་རྒྱས་ཤིང་། །བདེ་གཤེགས་བཞུགས་པའི་
གནས་གྱུར་པ། །གནས་མེད་མི་གནས་གྱུར་པ་རྣམས། །ཕྱོགས་རྣམས་བཅུ་ནས་ཀུན་འདུས་ཏེ། །པདྨོའི་སྟན་ལ་འཁོད་པ་དག །རྒྱ་མཚོ་མང་ལ་བལྟ་བ་གྱིས། །གནས་མྱེད་ལེན་པ་མེད་པ་རྣམས། །སྤྲོས་པ་མེད་ཅིང་མྱི་རྟེན་ལ། །རྡུལ་བྲལ་ཆགས་པའི་སེམས་མེད་པ། །ཆོས་ཀྱི་དབྱིངས་ལ་གཞོལ་བ་དང་། །ཡེ་ཤེས་རྒྱལ་མཚན་རབ་དཔའ་བ། །རྡོ་རྗེའི་སེམས་ནི་མི་གཡོ་ཞིང་། །གྲུབ་པ་མེད་པའི་ཆོས་རྣམས་ལ། །མྱ་ངན་འདའ་བར་གང་སྟོན་པ། །ཕྱོགས་བཅུའི་ཞིང་མང་བྱེ་བ་རྣམས། །གྲངས་ཀྱིས་མྱི་ཆོད་ཀུན་ནས་འདུས། །ཡང་དག་སངས་རྒྱས་དྲུང་དུ་ལྷགས། །གཉིས་ཀྱི་འདུ་ཤེས་རྣམ་པར་སྤངས། །རང་འབྱུང་ཤཱཀྱ་སེང་གེ་ཡི། །རྣམ་པར་འཕྲུལ་པ་འདི་དག་མཐོང་། །དེ་ཡི་བྱིན་རླབས་དམ་པ་ཡི། །བྱང་ཆུབ་སེམས་དཔའ་འདི་དག་ལྷགས། །སངས་རྒྱས་ཆོས་ལ་འབྱེད་པ་མེད། །ཆོས་དབྱིངས་གཞི་ལའང་དེ་བཞིན་ཏེ། །ཐ་སྙད་ཙམ་དུ་ཡོངས་འབྱེད་པའི། །ཕ་རོལ་ཕྱིན་པ་རྒྱལ་བའི་སྲས། །ཆོས་ཀྱི་དབྱིངས་ལ་དབྱེར་མེད་པའི། །མཐའ་ལ་ཐུག་པ་དེ་དག་གནས། །ཚིག་རྣམས་ཡོངས་སུ་ཟད་མེད་པས། །ཆོས་ལ་དབྱེ་བའང་རབ་ཏུ་བྱེད། །དེ་ནས་བྱང་ཆུབ་སེམས་དཔའ་ཀུན་ནས་འཕགས་པའི་གཟི་བརྗིད་རྒྱལ་པོས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ལྟོས་ཤིག་སེམས་ཅན་དམ་པ་ཡི། །ཡེ་ཤེས་དཀྱིལ་འཁོར་ཤིན་ཏུ་ཡངས། །དུས་དང་དུས་མྱིན་མཁྱེན་མཛད་ཅིང་། །སེམས་ཅན་རྣམས་ལ་ཆོས་ཀྱང་སྟོན། །མུ་སྟེགས་ལྡན་པ་ཚོགས་འདུས་པའི། །རྒོལ་བ་ཐམས་ཅད་རབ་ཏུ་འཇོམས། །སེམས་ཅན་བསམ་པ་ཇི་བཞིན་དུ། །རྣམ་པར་འཕྲུལ་པ་ཡོངས་སུ་སྟོན། །ཕྱོགས་ན་མི་བཞུགས་བདེ་གཤེགས་རྣམས། །སངས་རྒྱས་ཡུལ་གྱི་རྗེས་མི་བཞུད། །ཚད་མེད་པ་དང་ཚད་ཡོད་ལས། །ཐུབ་པ་ཆེན་
པོ་འདས་པ་མྱིན། །ཉི་མ་མཁའ་ལས་འགྲོ་བ་ནི། །ཉིན་པར་འགྲངས་པ་སྨོས་པ་བྱེད། །དེ་བཞིན་མཁྱེན་པས་མཁས་སྟོན་པ། །དུས་གསུམ་ཆགས་པ་མེད་པས་བརྗོད། །ཟླ་བ་ཉ་བའི་མཚན་མོ་ལ། །ཟླ་བའི་དཀྱིལ་འཁོར་འཕགས་པར་སྣང་། །དེ་བཞིན་ཆོས་དཀར་ཡོངས་རྫོགས་པའི། །མགོན་པོ་རྣམས་ཀྱང་མཐོང་བ་ཡིན། །བར་སྣང་ནམ་མཁའི་དབྱིངས་འདི་ལས། །ཉི་མའི་དཀྱིལ་འཁོར་རྒྱུ་བ་ནི། །གར་ཡང་ཐོགས་པ་མེད་པར་འགྲོ། །སངས་རྒྱས་རྣམ་འཕྲུལ་དེ་བཞིན་ནོ། །ཇི་ལྟར་ནམ་མཁའི་ཕྱོགས་རྣམས་ཀྱི། །ཞིང་རྣམས་ཀུན་ལ་མི་གནས་པ། །དེ་བཞིན་འཇིག་རྟེན་སྒྲོན་མ་ཡི། །སངས་རྒྱས་རྣམ་འཕྲུལ་ཤེས་པར་བྱ། །ཇི་ལྟར་ས་ནི་འཇིག་རྟེན་ན། །ལུས་ཅན་ཀུན་གྱི་གནས་ཡིན་པ། །འཇིག་རྟེན་སྒྲོན་མའི་འཇིག་རྟེན་ན། །ཆོས་ཀྱི་འཁོར་ལོ་དེ་ལྟར་གནས། །ཇི་ལྟར་རླུང་ནི་ཆགས་མེད་པར། །མཁའ་ལས་མགྱོགས་པར་རབ་རྒྱུ་བ། །དེ་བཞིན་སངས་རྒྱས་ཆོས་ཉིད་ཀྱང་། །འཇིག་རྟེན་ཁམས་སུ་རབ་ཏུ་རྒྱུ། །ཇི་ལྟར་ཆུ་ཡི་ཕུང་པོ་ལ། །ཞིང་རྣམས་འགྲངས་པ་ཀུན་གནས་པ། །དེ་བཞིན་དུས་གསུམ་སངས་རྒྱས་ཀྱང་། །ཡེ་ཤེས་ཚོགས་ལ་རབ་ཏུ་གནས། །དེ་ནས་བྱང་ཆུབ་སེམས་དཔའ་དཔལ་གྱི་སྙིང་པོ་ཆགས་པ་མེད་པའི་རྒྱལ་པོས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཇི་ལྟར་རྡོ་རྗེའི་རི་དང་བྲག །ཟང་ཡག་ཤིན་ཏུ་མཐོ་ཡོད་པ། །ད་ལྟར་འཇིག་རྟེན་ཀུན་སྐྱོབ་པའི། །སངས་རྒྱས་མངོན་པར་འཕགས་པས་མཐོ། །ཇི་ལྟར་རྒྱ་མཚོའི་ཆུ་ཆེན་དག །ཚད་མེད་རྙོག་པ་མེད་པ་ལྟར། །སངས་རྒྱས་མཐོང་བའང་དེ་བཞིན་ཏེ། །འཇིག་རྟེན་ཀུན་གྱི་སྐོམ་པ་གཅོད། །རྒྱ་མཚོའི་ཆུ་ལས་འཕགས་པ་ཡི། །རི་བོ་རི་རབ་ཅི་འདྲ་བ། །དེ་བཞིན་འཇིག་རྟེན་སྒྲོན་མ་ཡང་། །ཆོས་ཀྱི་མཚོ་ལས་མངོན་པར་འཕགས། །རིན་ཆེན་
ཀུན་གྱི་འབྱུང་གནས་ཀྱིས། །རྒྱ་མཚོ་རྒྱས་པ་ཇི་བཞིན་དུ། །རང་བྱུང་ཡེ་ཤེས་དེ་བཞིན་ཏེ། །མི་ཟད་སྐད་ཅིག་རབ་མཁྱེན་པ། །མགོན་པོའི་ཡེ་ཤེས་ཤིན་ཏུ་ཟབ། །ཚད་མེད་དེ་བཞིན་བགྲང་དུ་མྱེད། །དེ་བས་སངས་རྒྱས་རྣམ་འཕྲུལ་པ། །བསམ་གྱིས་མྱི་ཁྱབ་ཚད་མེད་སྟོན། །སྒྱུ་མའི་མཚན་ཉིད་སྟོན་པ་ཡི། །སྒྱུ་མཁན་མཁས་པ་ཇི་ལྟ་བ། །དེ་ལྟར་སངས་རྒྱས་མཁྱེན་དབང་ཡང་། །རྣམ་པར་འཕྲུལ་པ་རབ་ཏུ་སྟོན། །ཡིད་བཞིན་ནོར་བུ་རྣམ་དག་པ། །བསམ་དོན་རྫོགས་བྱེད་ཇི་ལྟ་བ། །དེ་བཞིན་བསམ་པ་དག་པ་ལ། །རྒྱལ་བ་སྨོན་ལམ་རྫོགས་པ་མཛད། །འོད་སྣང་གསལ་བ་བྱེད་པ་ཡི། །རིན་ཆེན་རྣམ་སྣང་ཇི་ལྟ་བ། །དེ་ལྟར་ཐམས་ཅད་མཁྱེན་པ་དག །འགྲོ་བའི་བསམ་པ་གསལ་བར་མཛད། །ཇི་ལྟར་ཕྱོགས་ལ་མངོན་ལྟ་བའི། །རིན་ཆེན་ཟུར་བརྒྱད་རབ་གནས་པ། །དེ་བཞིན་ཆགས་མེད་སྒྲོན་མ་ཡང་། །ཆོས་དབྱིངས་རབ་ཏུ་སྣང་བ་མཛད། །ཆུ་འདང་རིན་ཆེན་འོད་གསལ་བ། །ཇི་ལྟར་དྲི་མེད་ཆུ་འདང་བྱེད། །དེ་བཞིན་སངས་རྒྱས་མཐོང་བས་ཀྱང་། །འགྲོ་བའི་དབང་པོ་དག་པར་འགྱུར། །དེ་ནས་བྱང་ཆུབ་སེམས་དཔའ་ཆོས་ཀྱི་དབྱིངས་སུ་སྨོན་ལམ་རབ་ཏུ་འཕྲུལ་བའི་ཟླ་བའི་རྒྱལ་པོས། སངས་རྒྱས་ཀྱིས་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཕྱོགས་འདི་ཨིན་དྲ་ནཱི་ལ་ཡི། །ཁ་དོག་མདོག་གཅིག་བྱས་པ་ལྟར། །སངས་རྒྱས་མཐོང་བས་སྐྱེ་དགུ་རྣམས། །དེ་བཞིན་བྱང་ཆུབ་མདོག་ཏུ་འགྱུར། །སངས་རྒྱས་རྡུལ་ཕྲན་རེ་རེ་ལ། །རྣམ་པར་འཕྲུལ་པ་སྣ་ཚོགས་རྣམས། །ཚད་ཀྱིས་གཞལ་དུ་མེད་པ་སྟོན། །བྱང་ཆུབ་སེམས་དཔའ་རྣམ་དག་མཛད། །དེ་ནི་རྨད་བྱུང་ཤིན་ཏུ་ཟབ། །མཐའ་ཡས་བསྒྲུབ་པར་དཀའ་བ་སྟེ། །བློ་ལྡན་ཡེ་ཤེས་ཡུལ་དེ་ལ། །འཇིག་རྟེན་རྣམས་ནི་འབབ་མི་ནུས། །བྱང་ཆུབ་སེམས་དཔའ་བསྒྲུབ་དོན་དུ། །བཀོད་པ་ཕུན་སུམ་ཚོགས་པ་དང་། །སངས་རྒྱས་ཚུལ་
གྱིས་རྣམ་སྦྱངས་པའི། །ཆོས་ཀྱི་དབྱིངས་ལ་འཇུག་པ་སྟོན། །སངས་རྒྱས་ཞིང་རྣམས་བསམ་ཡས་པ། །བློ་ལྡན་བསྐོར་བའི་སངས་རྒྱས་ཀྱིས། །ཀུན་ནས་གང་བར་གྱུར་པ་ཡང་། །རྒྱལ་བ་དེ་ལ་སྟོན་པ་མཛད། །ཆོས་ཀུན་མངའ་སྒྱུར་སྟོན་པ་སྟེ། །ཤཱ་ཀྱའི་ཁྱུ་མཆོག་སྐྱེས་པར་གྱུར། །དེ་ཡི་ཆོ་འཕྲུལ་ཚད་མེད་པ། །འདི་དག་རབ་ཏུ་བྱུང་བ་ཡིན། །བརྟན་པའི་སྤྱོད་པ་སྣ་ཚོགས་རྣམས། །ཚད་མེད་རྣམ་པར་གཟིགས་གྱུར་ནས། །རྣམ་པར་འཕྲུལ་པ་མཐའ་ཡས་པ། །ཚད་མེད་གཟི་ཅན་སྟོན་པ་མཛད། །འཇིག་རྟེན་མགོན་པོ་རྒྱལ་སྲས་རྣམས། །ཆོས་ཀྱི་དབྱིངས་ལ་སློབ་པ་མཛད། །ཆོས་རྣམས་ཐམས་ཅད་ཡོངས་ལ་ཡང་། །ཆགས་མེད་ཡེ་ཤེས་སྤྱོད་ཡུལ་འགྱུར། །སྐྱེས་བུ་དབང་པོའི་བྱིན་རླབས་ཀྱིས། །ཆོ་འཕྲུལ་བརྒྱ་དང་རབ་ལྡན་ཞིང་། །འཇིག་རྟེན་ཐམས་ཅད་རྣམ་སྤྱོད་པའི། །ཆོས་ཀྱི་འཁོར་ལོ་རབ་ཏུ་བསྐོར། །སེམས་ཅན་གཙོ་བོའི་ཡུལ་ལ་ཡང་། །ཡེ་ཤེས་དཀྱིལ་འཁོར་ཡོངས་སྦྱོངས་ཤིང་། །ཤེས་རབ་ཆེན་པོའི་ཀླུ་ཆེན་རྣམས། །འཇིག་རྟེན་ཐམས་ཅད་འགྲེལ་བར་འགྱུར། །དེ་ནས་བྱང་ཆུབ་སེམས་དཔའ་ཆོས་ཀྱི་དོན་གྱི་བློ་གྲོས་གཟི་བརྗིད་རྒྱལ་པོས། །བཅོམ་ལྡན་འདས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དྲང་སྲོང་དམ་པའི་མཆོག་རྣམས་ཀྱི། །དུས་གསུམ་ཉན་ཐོས་གང་བྱུང་བ། །དེ་དག་ཀུན་གྱིས་བདེ་གཤེགས་ཀྱི། །གཤེགས་ཐབས་འཇོག་འདེག་མི་ཤེས་སོ། །དུས་གསུམ་མ་ལུས་ཐམས་ཅད་ཀྱི། །མ་ནོར་རང་རྒྱལ་གང་བྱུང་བ། །དེ་དག་གིས་ཀྱང་མགོན་པོ་ཡི། །གཤེགས་ཐབས་འཇོག་འདེག་མི་རིག་གོ །མ་རིག་མུན་པས་བསྒྲིབས་པ་རྣམས། །ཁྱི་ལྟར་ལྟོང་ལ་རྒྱུས་པ་ཡི། །སེམས་ཅན་དེ་འདྲ་ཀུན་གྱིས་ནི། །མགོན་པོ་མྱི་ཤེས་སྨོས་མི་དགོས། །རྒྱལ་བ་ཚད་མས་གཞལ་བ་མྱིན། །དེ་ནི་ཤེས་པར་མི་ནུས་ཏེ། །སངས་རྒྱས་ཆགས་མེད་ཡེ་ཤེས་ཅན། །
ཚིག་གི་ལམ་ལས་ཤིན་ཏུ་འདས། །ཟླ་བ་ཉ་རྒྱས་འོད་མངའ་བ། །བརྟན་པ་མཚན་གྱིས་རྣམ་པར་བྲིས། །དེ་ནི་བསྐལ་པ་དཔག་ཡས་པར། །རྣམ་འཕྲུལ་ཐོགས་མེད་སྤྱོད་པ་མཛད། །ཚུལ་སྒོ་རེ་རེས་སངས་རྒྱས་ལ། །ཤིན་ཏུ་མཉམ་བཞག་བསམ་བྱས་ཀྱང་། །བསྐལ་པ་བྱེ་བ་བསམ་ཡས་པ། །བརྗོད་དུ་མེད་པ་ཟད་འགྱུར་གྱི། །རང་བྱུང་རྣམས་ཀྱི་ཡོན་ཏན་ལས། །ཕྱོགས་གཅིག་ཆ་ཡི་མཐར་མྱི་ཕྱིན། །སངས་རྒྱས་དེ་ཡི་ཞལ་བལྟས་ཀྱང་། །སངས་རྒྱས་ཆོས་ནི་བསམ་མི་ཁྱབ། །གང་ཞིག་དེ་ལ་སྨོན་བྱེད་ཅིང་། །གང་ཞིག་ཡིད་ཀྱིས་དགའ་མོས་པ། །དེ་དག་ཀུན་གྱི་དེ་འདྲ་བའི། །སྤྱོད་ཡུལ་བལྟ་དཀའ་འཐོབ་པར་འགྱུར། །བསོད་ནམས་ཡེ་ཤེས་མཐའ་ཡས་ཤིང་། །ཚོགས་ཅན་ཡངས་པས་རྣམ་གནོན་ལ། །དྲི་མེད་བློ་ལྡན་སེམས་གནས་པ། །དེ་དག་འདི་ཡི་ཚུལ་ལ་འཇུག །དེ་དག་སྨོན་ལམ་རྒྱ་ཆེ་བས། །སེམས་དང་སྡོམ་པ་རྒྱ་ཆེ་སྟེ། །རྒྱལ་བའི་སྤྱོད་ཡུལ་ཐོབ་གྱུར་ཅིང་། །བྱང་ཆུབ་རྒྱ་ཆེན་གནོན་པར་འགྱུར། །དེ་ནས་བྱང་ཆུབ་སེམས་དཔའ་བདུད་ཀྱི་དཀྱིལ་འཁོར་རྣམ་པར་འཐོར་བའི་ཡེ་ཤེས་རྒྱལ་མཚན་གྱི་རྒྱལ་པོས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། །དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆགས་མེད་ཡེ་ཤེས་སྐུ་མངའ་བས། །རང་བྱུང་རྣམས་ནི་སྐུ་མེད་དེ། །བསམ་ཡས་ཡེ་ཤེས་ཡུལ་མངའ་བས། །དེ་དག་བསམ་པར་མི་ནུས་སོ། །ཕྲིན་ལས་དཀར་པོ་བསམ་ཡས་པས། །སངས་རྒྱས་སྐུ་རབ་བསྒྲུབ་པའི་ཕྱིར། །དེ་ལ་འཇིག་རྟེན་གསུམ་མི་འགོ །མཚན་དང་དཔེ་བྱད་བཟང་པོས་མཛེས། །ཆོས་ཀྱི་དབྱིངས་ཀྱིས་རྣམ་སྦྱངས་པས། །འཇིག་རྟེན་ཀུན་ཏུ་སྣང་བ་མཛད། །སངས་རྒྱས་བྱང་ཆུབ་སྒོ་ཡིན་ཏེ། །ཡེ་ཤེས་ཀུན་གྱི་གནས་ཆེན་ནོ། །ཆགས་པ་ཐམས་ཅད་རྣམ་སྤངས་པས། །རྡུལ་མེད་སྤྲོས་པ་མི་མངའོ། །ཡེ་ཤེས་འོད་ཟེར་རབ་འགྱེད་པས། །འཇིག་རྟེན་ཀུན་ཏུ་ཉི་མ་འདྲ། །ཁམས་གསུམ་ཐམས་ཅད་རྣམ་སྦྱོང་
པས། །སྲིད་པའི་འཇིགས་པ་རྣམ་པར་གཅོད། །བྱང་ཆུབ་སེམས་དཔའ་བསྒྲུབ་པ་མཛད། །བྱང་ཆུབ་འབྱུང་གནས་དེ་བཞིན་ནོ། །ཁ་དོག་མཐའ་ཡས་སྟོན་མཛད་ཀྱང་། །ཁ་དོག་ཀུན་ལ་གནས་པ་མེད། །སེམས་ཅན་ཀུན་གྱིས་བསམ་ཡས་པའི། །ཁ་དོག་ཚད་མེད་ཡོངས་སུ་སྟོན། །སྐད་ཅིག་གཅིག་ལ་སངས་རྒྱས་ཀྱི། །བྱང་ཆུབ་བསམ་ཡས་སྦྱངས་པས་ན། དེ་ཡི་ཡེ་ཤེས་མཐར་ཕྱིན་པར། །རྟག་པར་སུས་ཀྱང་མི་ནུས་སོ། །ཡེ་ཤེས་བསྟན་པ་ཟད་མྱི་ཤེས། །རང་བཞིན་རྣམ་པར་འགྱུར་བ་མེད། །དེ་ལ་དུས་གསུམ་རྒྱལ་བ་ཀུན། །སྐད་ཅིག་གཅིག་གིས་རབ་ཏུ་བརྗོད། །རྟག་པར་ལས་གཞན་ཡོངས་བཏང་སྟེ། །ཤེས་ལྡན་བྱང་ཆུབ་དོན་གཉེར་བས། །སེམས་ལ་སེམས་ཤེས་བྱ་བ་ཡང་། །དེ་ལ་སེམས་སྐྱེ་མེད་པར་བསམ། །གང་གི་སངས་རྒྱས་བསྐྱེད་པ་ཡི། །སངས་རྒྱས་ཆོས་རྣམས་བསམ་མི་ཁྱབ། །དེ་དག་བརྗོད་པའི་ཡུལ་མ་ཡིན། །ཤིན་ཏུ་ཟབ་པས་ཚིག་ལམ་སྤངས། །དེ་ནས་བྱང་ཆུབ་སེམས་དཔའ་རྣམ་པར་སྣང་མཛད་ཀྱི་སྨོན་ལམ་དཔལ་གྱི་རྒྱལ་མཚན་གྱིས། །སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། །དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དྲན་པ་རྨོངས་མེད་དག་པ་རྣམས། །ཆོས་འཛིན་ཤིན་ཏུ་ངེས་རྟོགས་ཤིང་། །བློ་གྲོས་བསམ་གྱིས་མི་ཁྱབ་ལ། །བྱང་ཆུབ་རྒྱ་མཚོ་མྱི་ཟད་པ། །དེ་དག་ཡིད་ནི་འདི་ལ་ངེས། །དེ་དག་སྤྱོད་པའི་སྤྱོད་ཡུལ་ཡིན། །དེ་དག་ཤེས་པ་འདིར་མྱི་གཡོ། །དེ་དག་འདི་ལ་ཐེ་ཙོམ་འཆད། །དེ་དག་སྐྱོ་བར་མྱི་འགྱུར་ཏེ། །དེ་དག་ཡིད་ཀྱང་ཞུམ་མི་འགྱུར། །སངས་རྒྱས་ཆོས་ལ་རབ་གཞོལ་བར། །དེ་དག་སེམས་ཀྱང་རབ་ཏུ་འབྱུང་། དེ་དག་དད་པ་རྟིང་ཚུགས་ཤིང་། །ཡང་དག་འཕགས་པ་རབ་ཏུ་བསྐྱེད། །དམིགས་མེད་གནས་པ་མེད་པ་ཡི། །ཡེ་ཤེས་འདི་ལ་དེ་དག་དགའ། །བསྐལ་པ་བྱེ་བར་བསྩགས་པ་ཡི། །ཡོངས་སུ་རྫོགས་པའི་དགེ་བའི་ཆོས། །ཡེ་ཤེས་འདི་འདོད་མཚུངས་
པ་མེད། །དེ་དག་ཐམས་ཅད་ཡོངས་སུ་སྔོ། །འཁོར་བའི་ནང་ན་རྣམ་རྒྱུ་ཡང་། །འཁོར་བ་དག་ལ་གནས་པ་མྱིན། །སངས་རྒྱས་ཆོས་རྣམས་རབ་རྟོགས་པས། །སངས་རྒྱས་ཡུལ་ལ་རབ་ཏུ་རྩེ། །སེམས་ཅན་ཁམས་ནི་ཇི་སྙེད་དུ། །འཇིག་རྟེན་ཕུན་སུམ་ཚོགས་རྒྱུ་བ། །དེ་དག་ཐམས་ཅད་བརྟན་པས་སྤངས། །སངས་རྒྱས་ཕུན་སུམ་ཚོགས་ལ་གནས། །སངས་རྒྱས་རྟག་ཏུ་འབྱུང་འགྱུར་ཀྱང་། །འཇིག་རྟེན་དོན་མེད་རབ་ཏུ་གནས། །ཆགས་མེད་སྤྱོད་པ་དེ་དག་ནི། །རྟག་ཏུ་སེམས་ཅན་དོན་ལ་གནས། །དེ་དག་སྤྱོད་པ་མཚུངས་མེད་དེ། །ལུས་ཅན་ཀུན་གྱིས་བསམ་མི་ཁྱབ། །འཇིག་རྟེན་བདེ་བ་ཀུན་སེམས་པས། །དེ་དག་སྡུག་བསྔལ་རྣམ་པར་བཟློག །འཇིག་རྟེན་ཀུན་ལ་སྙིང་བརྩེ་ཞིང་། །བྱང་ཆུབ་ཡེ་ཤེས་རྣམ་དག་པས། །དེ་དག་འཇིག་རྟེན་སྣང་བར་གྱུར། །འཇིག་རྟེན་ཐམས་ཅད་རབ་ཏུ་འགྲེལ། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་འཐོར་བའི་རྒྱལ་པོས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསྐལ་པ་བྱེ་བ་ཕྲག་བརྒྱར་ཡང་། །སངས་རྒྱས་སྒྲ་ནི་རབ་དཀོན་ན། །ཐེ་ཙོམ་ཐམས་ཅད་གཅོད་པ་ཡི། །དམ་པ་མཐོང་བ་ཅི་ཞིག་སྨོས། །ཆོས་ཀུན་ཐུགས་སུ་ཆུད་རྟོགས་པ། །འཇིག་རྟེན་གསུམ་པོའི་བསོད་ནམས་སྟེགས། །སེམས་ཅན་ཐམས་ཅད་རྣམ་སྦྱོང་བའི། །འཇིག་རྟེན་སྒྲོན་མ་མཐོང་གིས་དགའ། །སེམས་ཅན་གཙོ་བོ་མ་སྨད་པའི། །གཟུགས་ཀྱི་སྐུ་ནི་མཐོང་གྱུར་ན། །བསྐལ་པ་བྱེ་བ་ཁྲག་ཁྲིག་ཏུ། །ངོམས་ཤིང་ཚིམ་པ་སྐྱེར་མི་བཏུབ། །མྱིའི་དབང་པོའི་སྐུ་གཟུགས་ལ། །རྒྱལ་བའི་སྲས་རྣམས་ལྟ་ལྟ་ཞིང་། །རང་གི་དགེ་བའི་ཆགས་མེད་པ། །གཞན་དོན་བརྩོན་པ་བྱང་ཆུབ་བསྔོ། །ཐུབ་པ་ཆེན་པོའི་གཟུགས་ཀྱི་སྐུ། །དེ་ལས་སོ་སོ་ཡང་དག་རིག །ཆགས་མེད་ཡེ་ཤེས་འབྱུང་འགྱུར་བས། །དེ་ནི་སངས་རྒྱས་བྱང་ཆུབ་སྒོ། །སེམས་
ཅན་བསམ་ཡས་ཚད་མྱེད་པ། །སྣང་བར་མཛད་དེ་ཐེག་ཆེན་ལ། །བཙུད་ནས་ཐུབ་པ་ཆེན་པོའི་མཆོག །བྱང་ཆུབ་དམ་པར་ལུང་ཡང་སྟོན། །བསོད་ནམས་ཆེན་པོའི་རང་བཞིན་ཞིང་། །ཡེ་ཤེས་དཀྱིལ་འཁོར་ཤར་ཅིང་འབྱུང་། །འཇིག་རྟེན་ཚད་མེད་ཀུན་ཏུ་སྣང་། །བསོད་ནམས་ཕུང་པོ་རྣམ་འཕེལ་མཛད། །སྡུག་བསྔལ་དྲ་བ་རབ་ཏུ་གཅོད། །ཡེ་ཤེས་ཕུང་པོ་རྣམ་པར་སྤྱོད། །གང་གིས་རྒྱལ་བ་བསྙེན་བཀུར་བ། །དེ་དག་ངན་སོང་འཇིགས་པ་མེད། །རྐང་གཉིས་དམ་པ་མཐོང་གྱུར་ན། །ཤིན་ཏུ་ཡངས་པའི་སེམས་སྐྱེ་སྟེ། །འདི་སྣང་གསལ་བའི་ཤེས་རབ་མཐུ། །གྲངས་མེད་པ་ཡང་སྐྱེ་བར་འགྱུར། །སངས་རྒྱས་སྐྱེས་བུའི་མཆོག་མཐོང་ཞིང་། །བྱང་ཆུབ་དམ་པར་ངེས་པར་འགྱུར། །དེ་བཞིན་གཤེགས་པར་འགྱུར་བྱ་ཞེས། །དེ་དག་ཀུན་ཀྱང་ངེས་པར་སེམས། །དེ་ནས་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་སྨོན་ལམ་གྱི་གཞི་རབ་ཏུ་རྟོགས་པས། སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཡོན་ཏན་མཐའ་ཡས་ཕུན་ལྡན་པ། །ཤཱ་ཀྱའི་ཁྱུ་མཆོག་ཐུབ་མཐོང་ནས། །ཡོངས་སུ་བསྔོ་བ་བྱེད་པའི་སེམས། །ཐེག་པ་ཆེ་ལ་རྣམ་པར་འདག །སེམས་ཅན་ཀུན་གྱི་དོན་གྱི་ཕྱིར། །ཐུགས་རྗེ་ཆེ་མངའ་བརྟན་པ་རྣམས། །ཆོས་ཀྱི་འཁོར་ལོ་བསྐོར་མཛད་པ། །དེ་བཞིན་གཤེགས་པ་འབྱུང་བར་འགྱུར། །བསྐལ་པ་ཁྲག་ཁྲིག་ཕྲག་བརྒྱར་ཡང་། །སེམས་ཅན་དོན་ལ་བརྩོན་མཛད་པའི། །སངས་རྒྱས་རྣམས་ལ་ལུས་ཅན་རྣམས། །ཀུན་གྱིས་ལན་གླན་ཅིས་ཀྱང་ནུས། །ངན་སོང་གསུམ་པོ་མི་བཟད་པར། །བསྐལ་པ་བྱེ་བར་བཙོས་བླ་ཡི། །ཆགས་པ་ཐམས་ཅད་ཟློག་མཛད་པའི། །སྟོན་པ་མི་མཐོང་མ་ཡིན་ནོ། །སེམས་ཅན་ཀུན་གྱི་རྒྱུད་རྣམས་ན། །སྡུག་བསྔལ་ཕུང་པོ་ཇི་ཡོད་པ། །མ་ལུས་ཉམས་སུ་བཟོད་ནུས་ཀྱི། །སངས་རྒྱས་མི་མཐོང་མ་ཡིན་ནོ། །འཇིག་རྟེན་འདི་དག་ཐམས་ཅད་ན། །ཐ་དད་ངན་སོང་རྒྱུད་ཡོད་པ། །དེ་དག་ཡུན་རིང་གནས་
བླ་ཡི། །སངས་རྒྱས་མི་མཐོང་མ་ཡིན་ནོ། །སེམས་ཅན་དམྱལ་བ་རེ་རེར་ཡང་། །བསྐལ་པ་ཚད་མེད་གནས་བླ་ཡི། །མཐའ་ཡས་རྒྱལ་བས་བརྙེས་པ་ཡི། །བྱང་ཆུབ་མཆོག་ལས་རིང་གནས་མྱིན། །ཅི་ཞིག་ཕྱིར་ནི་ངན་སོང་དུ། །ཡུན་རིང་གནས་པར་འདོད་ཅེ་ན། །རྒྱལ་བའི་དབང་པོ་མཐོང་བ་ནི། །ཡེ་ཤེས་འཕེལ་བའི་རྒྱུར་འགྱུར་ཕྱིར། །རྒྱལ་བ་འཇིག་རྟེན་མཆོག་མཐོང་ན། །སྡུག་བསྔལ་ཐམས་ཅད་འཆད་པར་འགྱུར། །རྫོགས་པའི་སངས་རྒྱས་སྤྱོད་ཡུལ་གྱི། །ཡེ་ཤེས་ཁོང་དུ་ཆུད་པ་འབྱུང་། །སངས་རྒྱས་མྱི་ཡི་མཆོག་མཐོང་ཞིང་། །སྒྲིབ་པ་ཐམས་ཅད་ཟད་པར་འགྱུར། །བྱང་ཆུབ་གང་གིས་འཐོབ་པ་ཡི། །བསོད་ནམས་ཚད་མེད་འཕེལ་བར་འགྱུར། །སངས་རྒྱས་མཐོང་བས་སེམས་ཅན་རྣམས། །ཐེ་ཙོམ་ཡིད་གཉིས་ཆད་པར་འགྱུར། །འཇིག་རྟེན་འདས་དང་འཇིག་རྟེན་གྱི། །བསམ་པའང་ཡོངས་སུ་རྫོགས་པར་འགྱུར། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བྱང་ཆུབ་སེམས་དཔའི་ཚོགས་ཐམས་ཅད་ལ་རྣམ་པར་བལྟས་ཏེ། དེ་བཞིན་གཤེགས་པའི་ཏིང་ངེ་འཛིན་སེང་གེ་རྣམ་པར་བསྒྱིངས་པ་འདི་ཉིད་དེ་བས་ཀྱང་རྣམ་པར་དབྱེ་བ་དང་རྒྱ་ཆེར་བརྗོད་པ་དང་། གསལ་བར་བྱ་བ་དང་རབ་ཏུ་བརྗོད་པ་དང་། ཡང་དག་པར་བསྟན་པ་དང་། ཤིན་ཏུ་སྣང་བར་བྱ་བ་དང་། རབ་ཏུ་གསལ་བར་བྱ་བ་དང་མན་ངག་བསྟན་པའི་ཕྱིར། ཆོས་ཀྱི་དབྱིངས་ཀྱི་ཚུལ་ནམ་མཁའི་དབྱིངས་དང་མཉམ་པས། དུས་གསུམ་མཉམ་པ་ཉིད་དང་། ཆོས་ཀྱི་དབྱིངས་མཉམ་པ་ཉིད་དང་སེམས་ཅན་གྱི་ཁམས་མཉམ་པ་ཉིད་དང་། འཇིག་རྟེན་ཐམས་ཅད་མཉམ་པ་ཉིད་དང་ལས་ཀྱི་རྒྱུད་ཐམས་ཅད་མཉམ་པ་ཉིད་དང་སེམས་ཅན་གྱི་བསམ་པ་མཉམ་པ་ཉིད་དང་། སེམས་ཅན་གྱི་མོས་པ་མཉམ་པ་ཉིད་དང་། ཆོས་ཀྱི་སྣང་བ་མཉམ་པ་ཉིད་དང་། སེམས་ཅན་ཡོངས་སུ་སྨིན་པར་བྱ་བའི་དུས་མཉམ་པ་ཉིད་དང་། འགྲོ་བ་ཐམས་ཅད་ཀྱི་དབང་པོ་མཉམ་པ་ཉིད་ཀྱིས། དེ་བཞིན་གཤེགས་པའི་ཏིང་ངེ་འཛིན་སེང་
གེ་རྣམ་པར་བསྒྱིངས་པ། འདི་ཉིད་བྱང་ཆུབ་སེམས་དཔའ་དེ་དག་ལ་བསྟན་པའི་ཚུལ་བཅུས་ཡང་དག་པར་རབ་ཏུ་སྟོན་ཏེ། བཅུ་གང་ཞེ་ན། འདི་ལྟ་སྟེ། ཆོས་ཀྱི་དབྱིངས་ཐམས་ཅད་དུ་གཏོགས་པའི་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་རྣམས་ལ། སངས་རྒྱས་གཅིག་ནས་གཅིག་ཏུ་བརྒྱུད་པ་བསྟན་པ་དང་། འདི་ལྟ་སྟེ། ནམ་མཁའི་དབྱིངས་ཀྱིས་ཀླས་པའི་སངས་རྒྱས་ཀྱི་ཞིང་ཐམས་ཅད་དུ། ཕྱི་མའི་མཐའི་མུར་ཐུག་པའི་བསྐལ་པར་དེ་བཞིན་གཤེགས་པའི་ཡོན་ཏན་རྗེས་སུ་བརྗོད་པ་བསྟན་པ་དང་། འདི་ལྟ་སྟེ། སངས་རྒྱས་ཀྱི་ཞིང་ཐམས་ཅད་དུ་དེ་བཞིན་གཤེགས་པ་ཡོངས་སུ་སྐྱེ་བ་དང་། མཐའ་དང་དབུས་མེད་པའི་མངོན་པར་རྫོགས་པའི་བྱང་ཆུབ་ཀྱི་སྒོ་རྒྱ་མཚོ་ཡོངས་སུ་བརྗོད་ཅིང་བསྟན་པ་དང་། འདི་ལྟ་སྟེ། ནམ་མཁའི་དབྱིངས་ཀྱིས་ཀླས་པའི་སངས་རྒྱས་ཀྱི་ཞིང་གི་དེ་བཞིན་གཤེགས་པའི་འཁོར་གྱི་དཀྱིལ་འཁོར་གྱི་བྱང་ཆུབ་སེམས་དཔའི་དགེ་འདུན་སྙིང་པོ་བྱང་ཆུབ་ལ་མངོན་དུ་གྱུར་པའི་གནས་བསྟན་པ་དང་། འདི་ལྟ་སྟེ་དུས་གསུམ་གྱི་སངས་རྒྱས་ཀྱི་སྐུ་དང་འདྲ་བར་སྤྲུལ་པ་བ་སྤུའི་སྒོ་ཐམས་ཅད་ནས། སེམས་སྐད་ཅིག་ལ་རབ་ཏུ་དགྱེ་ཞིང་ཆོས་ཀྱི་དབྱིངས་རྒྱས་པར་དགང་བ་བསྟན་པ་དང་། འདི་ལྟ་སྟེ། ཕྱོགས་རྒྱ་མཚོ་ཐམས་ཅད་དུ་སངས་རྒྱས་ཀྱི་ཞིང་རྒྱ་མཚོ་གཞི་མཉམ་པར་བྱིན་གྱིས་བརླབ་ཅིང་ལུས་གཅིག་གིས་རྒྱས་པར་དགང་བ་བསྟན་པ་དང་། འདི་ལྟ་སྟེ། དམིགས་པའི་གཞི་ཐམས་ཅད་ལ་སངས་རྒྱས་ཀྱི་རྣམ་པར་སྤྲུལ་པ་དུས་གསུམ་ཐམས་ཅད་ཡང་དག་པར་གཞོལ་བར་འགྱུར་བའི་བྱིན་གྱི་རླབས་ཡང་དག་པར་བསྟན་པ་དང་། འདི་ལྟ་སྟེ་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལ། དུས་གསུམ་གྱི་ཞིང་གཅིག་ནས་གཅིག་ཏུ་བརྒྱུད་པའི་སངས་རྒྱས་ཀྱི་རྣམ་པར་འཕྲུལ་པ་དང་། བསྐལ་པ་རྒྱ་མཚོ་ཡོངས་སུ་བཤད་ཅིང་བསྟན་པ་དང་། འདི་ལྟ་སྟེ། དུས་གསུམ་གྱི་སངས་རྒྱས་ཀྱི་སྨོན་ལམ་རྒྱ་མཚོ་ཐམས་ཅད་བ་སྤུའི་སྒོ་ཐམས་ཅད་ནས་རབ་ཏུ་བརྗོད་པ་ཕྱི་མའི་མཐར་བྱིན་གྱིས་བརླབས་པས། བྱང་ཆུབ་སེམས་དཔའ་ཡང་དག་པར་འབྱུང་བ་བསྟན་པ་དང་། འདི་ལྟ་སྟེ། ཆོས་ཀྱི་དབྱིངས་དང་མཉམ་པའི་སེང་གེའི་ཁྲི་དང་།
བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་། སྙིང་པོ་བྱང་ཆུབ་ཀྱི་རྒྱན་ཐ་མྱི་དད་པ་དང་། ཆོས་ཀྱི་འཁོར་ལོ་རྣམ་པ་ཐ་དད་པ་རབ་ཏུ་བསྐོར་བ། ཕྱི་མའི་མཐར་བྱིན་གྱིས་བརླབ་པ་བསྟན་པའོ། །ཀྱེ་རྒྱལ་བའི་སྲས་དེ་ལྟར་སེང་གེ་རྣམ་པར་བསྒྱིངས་པའི་ཏིང་ངེ་འཛིན་འདི་ལ་བསྟན་པ་བཅུ་པོ་དེ་དག་ལ་སྩོགས་པ་ཤིན་ཏུ་བསྟན་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཡོད་དེ། ཀྱེ་རྒྱལ་བའི་སྲས་དག་དེ་ནི་དེ་བཞིན་གཤེགས་པའི་ཡེ་ཤེས་ཀྱི་སྤྱོད་ཡུལ་ལོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་དེ་བཞིན་གཤེགས་པའི་ཏིང་ངེ་འཛིན་ཆེན་པོ་སེང་གེ་རྣམ་པར་བསྒྱིངས་པ་འདི་ཉིད་ཀྱི་དོན་གྱི་ཕྱོགས་བསྟན་པའི་ཕྱིར་སངས་རྒྱས་ཀྱི་བྱིན་གྱི་རླབས་ཀྱིས་དེ་བཞིན་གཤེགས་པའི་ཞལ་དུ་ལྟ་ཞིང་འཁོར་གྱི་དཀྱིལ་འཁོར་རྒྱ་མཚོ་ཐམས་ཅད་ལ་རྣམ་པར་བལྟས་ནས། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་དང་། དེ་བཞིན་གཤེགས་པའི་ཏིང་ངེ་འཛིན་གྱི་རྣམ་པར་འཕྲུལ་པ་མཐའ་དང་དབུས་མེད་པ་ལ་རྣམ་པར་བལྟས་ཏེ། འཇིག་རྟེན་གྱི་ཁམས་བསམ་གྱིས་མི་ཁྱབ་པར་གཞོལ་བ་ལ་རྣམ་པར་བལྟས་ནས་ཡེ་ཤེས་བསམ་གྱིས་མྱི་ཁྱབ་པའི་སྒྱུ་མའི་ཆོས་ཉིད་ལ་རྣམ་པར་བལྟས་ཏེ། དུས་གསུམ་གྱི་སངས་རྒྱས་མཉམ་པ་ཉིད་བསམ་གྱིས་མི་ཁྱབ་པ་ལ་རྣམ་པར་བལྟས་ནས། མཐའ་དང་དབུས་མེད་པའི་ངག་གི་ལམ་དང་ངེས་པའི་ཚིག་དང་། ཆོས་ཀྱི་ཚུལ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བ་སྤུ་གཅིག་ལ་རྒྱ་མཚོ་རྒལ་བའི་ཞིང་། །ཞིང་ཀུན་ཤིན་ཏུ་ཕྲ་བའི་རྡུལ་དང་མཉམ། །དེ་ནས་སངས་རྒྱས་བྱང་ཆུབ་སེམས་དཔའི་འཁོར། །ཀུན་གྱིས་ཡོངས་བསྐོར་སངས་རྒྱས་གདན་ལ་བཞུགས། །སྤུ་གཅིག་རྩེ་ལ་ཞིང་མང་རྒྱ་མཚོ་རྣམས། །སྙིང་པོ་བྱང་ཆུབ་པདྨོའི་གདན་གནས་པས། །ཆོས་དབྱིངས་རྒྱ་ཆེན་ཡོངས་སུ་རྒྱས་བཀང་ཞིང་། །ཤིང་དྲུང་དམ་པ་ཀུན་ན་མགོན་པོ་སྣང་། །ཞིང་རྣམས་ཀུན་གྱི་རྡུལ་
ཕྲན་རབ་མང་རྙེད། །རྒྱལ་བ་སྤུ་རྩེ་གཅིག་ལ་ཡོངས་བཞུགས་པ། །བྱང་ཆུབ་སེམས་དཔའི་འཁོར་གྱིས་ཡོངས་སུ་བསྐོར། །ཀུན་ཀྱང་བཟང་པོའི་སྤྱོད་པ་སྟོན་པ་མཛད། །ཞིང་མཆོག་གཅིག་ན་རྒྱལ་བ་བཞུགས་གྱུར་ཀྱང་། །བྱང་ཆུབ་སེམས་དཔའི་སྤྲིན་མང་མི་ཟད་པ། །དེ་དག་ཕྱོགས་བཅུ་མ་ལུས་ཐམས་ཅད་ནས། །འབྱམ་ཀླས་ཞིང་ཀུན་བཀང་ཞིང་ཀུན་ཀྱང་འོང་། །ཞིང་རྣམས་བྱེ་བའི་རྡུལ་ཕྲན་མཉམ་པ་ཡི། །བྱང་ཆུབ་སེམས་དཔའ་ཡོན་ཏན་རྒྱ་མཚོ་འོད། །ཕྱོགས་བཅུའི་ཆོས་དབྱིངས་རྒྱས་པ་ཀུན་བཀང་ཞིང་། །སྟོན་པ་དེ་ལ་ཀུན་ཀྱང་འཁོར་ནས་ལྡང་། །ཞིང་རྣམས་ཀུན་ཏུ་གཟུགས་བརྙན་རབ་ཏུ་སྟོན། །ཆོས་ཀྱི་རྒྱལ་པོ་རྒྱལ་བའི་ཡེ་ཤེས་མཚོ། །དེ་དག་ཀུན་ཀྱང་བཟང་པོའི་སྤྱོད་ལ་གནས། །སངས་རྒྱས་ཀུན་གྱི་འཁོར་དུ་ཉེ་བར་འདོང་། །འབྱམ་ཀླས་ཞིང་རྣམས་ཀུན་ན་འཁོད་སྤྱོད་ཅིང་། །བྱང་ཆུབ་སེམས་དཔའི་དགའ་བ་རབ་གནས་ཏེ། །ཆོས་ཀྱི་སྤྲིན་མཉན་དཔའ་བོ་དེ་དག་ནི། །ཞིང་གཅིག་དུ་ཡང་བསྐལ་པ་བྱེ་བར་སྤྱོད། །བྱང་ཆུབ་སེམས་དཔའི་སྤྱད་པ་སྤྱོད་པར་བྱེད། །ཆོས་ཀྱི་གང་ཆེན་མཚོ་སྤྱོད་རྣམ་པར་སྣང་། །སྨོན་ལམ་རྒྱ་མཚོ་ཀུན་ལ་རབ་ཏུ་འཇུག །དེ་དག་སངས་རྒྱས་ས་ཡི་སྤྱོད་ཡུལ་གནས། །རྒྱལ་བའི་ཆོས་རྣམས་གཞན་དང་གཞན་བྱུང་བའི། །དེ་དག་ཀུན་ཏུ་བཟང་པོའི་སྤྱོད་པ་ཤེས། །སངས་རྒྱས་ཡོན་ཏན་ལེགས་པ་རྒྱ་མཚོ་དང་། །རྣམ་པར་འཕྲུལ་པ་རྒྱ་ཆེན་ཡངས་ལ་འཇུག །བདེ་གཤེགས་ཆོས་དབྱིངས་ཀུན་ཏུ་རྒྱས་བཀང་ཞིང་། །ཞིང་རྣམས་ཀུན་གྱི་རྡུལ་ཕྲན་ཇི་སྙེད་པའི། །སྐུ་ཡི་སྤྲིན་རྣམས་རྟག་ཏུ་འགྱེད་མཛད་ཅིང་། །ཆོས་ཀྱི་ཆར་གྱིས་བྱང་ཆུབ་རབ་ལ་དགོད།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་དྲུག་པ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་སངས་རྒྱས་ཀྱི་ཏིང་ངེ་འཛིན་སེང་གེ་རྣམ་པར་བསྒྱིངས་པ་འདི་ཉིད་ལ་དེ་བས་ཀྱང་བརྣན་ཏེ། འགོད་པ་མཛད་པའི་དོན་དུ་སྨིན་མཚམས་ཀྱི་མཛོད་སྤུའི་ནང་ནས་ཆོས་
ཀྱི་དབྱིངས་སྒོ་ཀུན་ནས་རྣམ་པར་དམིགས་པས་དུས་གསུམ་སྣང་བ་ཞེས་བྱ་བའི་འོད་ཟེར་ཆེན་པོ་འོད་ཟེར་གྱི་འཁོར་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་ལྡན་པ་བཀྱེ་སྟེ། ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་ཐམས་ཅད་ཀྱི་སངས་རྒྱས་ཀྱི་ཞིང་འབྱམ་ཀླས་པ་ཐམས་ཅད་སྣང་བར་མཛད་དོ། །དེ་ནས་བྱང་ཆུབ་སེམས་དཔའ་ཛེ་ཏའི་ཚལ་དུ་ཚོགས་པ་དེ་དག་གི་ཆོས་ཀྱི་དབྱིངས་ཐམས་ཅད་དུ་གཏོགས་པའི་སངས་རྒྱས་ཀྱི་ཞིང་ནམ་མཁའི་དབྱིངས་ཀྱི་མཐའ་ཀླས་པ་ཐམས་ཅད་དང་། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་དག་ལ། སངས་རྒྱས་ཀྱི་ཞིང་གི་མྱིང་དུ་བྱ་བ་ཁ་དོག་སྣ་ཚོགས་དང་། རྣམ་པ་སྣ་ཚོགས་སུ་རྣམ་པར་དག་པ་དང་། ཞིང་སྣ་ཚོགས་དང་། དབྱིབས་སྣ་ཚོགས་དང་ལྡན་པའི་སངས་རྒྱས་ཀྱི་ཞིང་དག་ན། བྱང་ཆུབ་སེམས་དཔའ་སྙིང་པོ་བྱང་ཆུབ་ཏུ་ཕྱིན་ཏེ། སེང་གེའི་ཁྲི་ལ་འདུག་པ་འཇིག་རྟེན་གྱི་དབང་པོ་ཐམས་ཅད་ཀྱིས་ཤིན་ཏུ་མཆོད་པ། བྱང་ཆུབ་སེམས་དཔའི་ཚོགས་ཀྱིས་ཀུན་ནས་བསྐོར་བ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་མཐོང་སྟེ། ལ་ལ་ན་ནི་སངས་རྒྱས་ཀྱི་ཞིང་བརྗོད་དུ་མྱེད་པ་ཙམ་དུ་ཤིན་ཏུ་ཡངས་པའི་འཁོར་གྱི་དཀྱིལ་འཁོར་ན། ཆོས་ཀྱི་དབྱིངས་རྒྱས་པར་ཁྱབ་པའི་དབྱངས་ཀྱི་དཀྱིལ་འཁོར་གྱིས་ཆོས་ཀྱི་འཁོར་ལོ་བསྐོར་བ་མཐོང་ངོ་། །ལ་ལ་ན་ནི་ལྷའི་གནས་ན་འདུག །ལ་ལ་ན་ནི་ཀླུའི་གནས་ན་འདུག །ལ་ལ་ན་ནི་གནོད་སྦྱིན་གྱི་གནས་ན་འདུག །ལ་ལ་ན་ནི་ལྷ་མ་ཡིན་གྱི་གནས་ན་འདུག །ལ་ལ་ན་ནི་ནམ་མཁའ་ལྡིང་གི་གནས་ན་འདུག །ལ་ལ་ན་ནི་མིའམ་ཅིའི་གནས་ན་འདུག །ལ་ལ་ན་ནི་ལྟོ་འཕྱེ་ཆེན་པོའི་གནས་ན་འདུག །ལ་ལ་ན་ནི་མིའི་དབང་པོའི་གནས་ན་འདུག །ལ་ལ་ན་ནི་མིའི་འཇིག་རྟེན་གྱི་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཁམས་དང་། རྒྱལ་པོའི་ཕོ་བྲང་
འཁོར་དག་ན་རྣམ་པར་འཕྲུལ་པ་སྣ་ཚོགས་དང་། སྤྱོད་ལམ་སྣ་ཚོགས་དང་། ལུས་སྣ་ཚོགས་དང་། ཏིང་ངེ་འཛིན་གྱི་སྒོ་རྣམ་པར་དམྱིགས་པ་སྣ་ཚོགས་དང་། ཏིང་ངེ་འཛིན་གྱི་མངོན་པར་ཤེས་པ་སྣ་ཚོགས་དང་། རིགས་དང་རྒྱུད་སྣ་ཚོགས་སུ་བྱུང་བ་དང་། ཁ་དོག་རྣམ་པར་དམིགས་པ་སྣ་ཚོགས་དང་འོད་ཀྱི་དཀྱིལ་འཁོར་སྣ་ཚོགས་དང་། འོད་ཟེར་གྱི་དྲ་བ་དགྱེ་བ་སྣ་ཚོགས་དང་། དབྱངས་ཀྱི་དཀྱིལ་འཁོར་སྣ་ཚོགས་དང་། གཏམ་གྱི་སྐྱེས་བུའི་གཞི་སྣ་ཚོགས་དང་། བསྟན་པའི་གཞི་སྣ་ཚོགས་དང་། ཚིག་དང་ཡི་གེ་དང་ངེས་པའི་ཚིག་སྣ་ཚོགས་ཀྱིས་འཁོར་གྱི་དཀྱིལ་འཁོར་སྣ་ཚོགས་ན་ཆོས་སྟོན་པ་མཐོང་བར་གྱུར་ཏོ། །བྱང་ཆུབ་སེམས་དཔའ་ཇི་སྙེད་ཀྱི་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་ཕྱོགས་བཅུ་ན་རྣམ་པར་གནས་པ། ཕྱོགས་ཀྱི་རྒྱུད་མཐའ་ཡས་པར་འདུས་པ། ཕྱོགས་རྒྱ་མཚོ་ཐམས་ཅད་དུ་གཏོགས་པ། ཆོས་སྣ་ཚོགས་ཀྱི་སྒོ་དང་ལྡན་པ། ཕྱོགས་ཀྱི་མྱིང་དུ་བྱ་བ་སྣ་ཚོགས་སུ་གཏོགས་པ། ཕྱོགས་སྣ་ཚོགས་ཀུན་ཏུ་གཞོལ་བ། ཕྱོགས་ཆ་རྣམ་པ་ཐ་དད་པར་གཏོགས་པ། ཕྱོགས་སྣ་ཚོགས་ཀྱི་རྗེས་སུ་སོང་བ། ཕྱོགས་རྒྱ་མཚོ་སྣ་ཚོགས་སུ་གཏོགས་པ་འདི་ལྟ་སྟེ། ཤར་ཕྱོགས་དང་། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་དང་ཤར་གྱི་ཕྱོགས་མཚམས་དང་། ཤར་དང་ལྷོའི་ཕྱོགས་མཚམས་དང་། ལྷོ་དང་ནུབ་ཀྱི་ཕྱོགས་མཚམས་དང་། ནུབ་དང་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་ཀྱི་ཞིང་གི་ལྷུན་གྱི་ཕྱོགས་དང་། སེམས་ཅན་གྱི་ལུས་ཀྱི་ཕྱོགས་དང་། སེམས་ཅན་གྱི་མྱིང་དུ་བྱ་བའི་ཕྱོགས་དང་། སྔོན་གྱི་མཐའི་མུར་ཐུག་པའི་ཕྱོགས་དང་། ཕྱོགས་བཅུའི་ད་ལྟར་བྱུང་བའི་ཕྱོགས་དང་། ནམ་མཁའི་ཁོངས་ཐམས་ཅད་དུ་སྐྲའི་རྩེ་མོ་ཤིན་ཏུ་ཕྲ་བ་དགོད་པས་དམིགས་པའི་ཕྱོགས་དང་། ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་གཅིག་ནས་གཅིག་ཏུ་བརྒྱུད་པའི་ཕྱོགས་ལ་འཇུག་པ་ཁོང་དུ་ཆུད་པར་
བྱ་བའི་ཕྱོགས་དང་། ལས་ཀྱི་འདུ་བྱེད་སྣ་ཚོགས་ཀྱིས་ཡོངས་སུ་གྲུབ་པའི་ཕྱོགས་དང་། སྐྲའི་རྩེ་མོ་གཅིག་ལ་མཐའ་དང་དབུས་མེད་པའི་ནམ་མཁའི་དབྱིངས་ཀྱི་མྱིང་དུ་བྱ་བར་གཏོགས་པའི་ཕྱོགས་ཀྱི་ཁོངས་སུ་ཆུད་པའི་དུས་གསུམ་གྱི་དབྱིངས་མཉམ་པ་ཉིད་དུ་གཞོལ་བས། ཀུན་ཏུ་གཏོགས་པའི་འགྲོ་བ་ཐམས་ཅད་ཐ་མྱི་དད་པས། སེམས་ཅན་ཐམས་ཅད་ཀྱི་འདུ་ཤེས་ཀྱི་རྣམ་པ་ལ་མཉམ་པའི་སྒྲ་དབྱངས་སུ་གྱུར་པའི་འགྲོ་བ་ཐམས་ཅད་ཀྱི་སེམས་ལ་གཟུགས་བརྙན་རབ་ཏུ་སྣང་བར་གྱུར་པའི་དེ་བཞིན་གཤེགས་པའི་སངས་རྒྱས་ཀྱི་ཏིང་ངེ་འཛིན་རྣམ་པར་འཕྲུལ་པ། སེམས་ཅན་ཐམས་ཅད་ཀྱི་ལུས་ལ་མངོན་པར་ལྟ་བ། དམིགས་པར་བྱ་བས་འཁོར་གྱི་དཀྱིལ་འཁོར་ཐམས་ཅད་དུ་འགྲོ་བའི་ཚུལ་དང་ལྡན་པ། བསྐལ་པ་ཐམས་ཅད་ལ་ཡེ་ཤེས་ཐ་མྱི་དད་པ། ཞིང་ཐམས་ཅད་ལ་ཀུན་ཏུ་སྙོམས་པས་སེམས་ཅན་གྱི་བསམ་པ་ཇི་ལྟ་བ་དེ་བཞིན་དུ་གཟུགས་མངོན་སུམ་དུ་བསྟན་པ་རྣམ་པར་དམིགས་པ་དང་། དེ་བཞིན་གཤེགས་པའི་རྣམ་པར་འཕྲུལ་པ་སངས་རྒྱས་ཀྱི་ཆོས་ཐམས་ཅད་ཡང་དག་པར་བསྟན་པས། སེམས་ཅན་ཐམས་ཅད་འདུལ་བ་རྒྱུན་མི་འཆད་པ་མཐོང་བར་གྱུར་པ་དེ་དག་ཐམས་ཅད་ནི་སྔོན། བཅོམ་ལྡན་འདས་རྣམ་པར་སྣང་མཛད་ཀྱིས་དགེ་བའི་སྤྱོད་པ་སྐལ་བ་མཉམ་པ་དང་། བསྡུ་བའི་དངོས་པོ་བཞིས་ཡོངས་སུ་བསྡུས་པ་མཐོང་བ་དང་མཉམ་པ་དང་། རྗེས་སུ་དྲན་པ་དང་བསྙེན་བཀུར་བས་ཡོངས་སུ་སྨིན་པར་བྱས་པ་དག་གོ །སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཙུད་པ་དག་གོ །དེ་བཞིན་གཤེགས་པ་དེ་དང་དེ་དག་གི་དྲུང་དུ་གཤེགས་པའི་ཚེ་དགེ་བའི་རྩ་བས་ཡོངས་སུ་བསྡུས་པ་དག་སྟེ། དེ་ལྟར་དགེ་བའི་རྩ་བ་སྐལ་པ་མཉམ་པས། ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར་འགྱུར་བའི་ཐབས་ཀྱིས་ཤིན་ཏུ་བཟུང་བའི་ཕྱིར། བཅོམ་ལྡན་འདས་རྣམ་པར་སྣང་མཛད་ཀྱི་ཏིང་ངེ་འཛིན་གྱི་རྣམ་པར་འཕྲུལ་པ་ཆོས་ཀྱི་དབྱིངས་ལྟར་ཡངས་ཤིང་ནམ་མཁའི་དབྱིངས་ཀྱི་མཐས་གཏུགས་པར་གྱུར་པ་དག་ཀྱང་མཐོང་ཞིང་ཁོང་དུ་ཆུད་པར་གྱུར་
པ་ཡིན་ཏེ། ལ་ལ་ནི་ཆོས་ཀྱི་སྐུ་ལ་འཇུག་གོ །ལ་ལ་ནི་གཟུགས་ཀྱི་སྐུ་ལ་འཇུག་གོ །ལ་ལ་ནི་སྔོན་གྱི་བྱང་ཆུབ་སེམས་དཔའི་ཡོངས་སུ་བསྒྲུབ་པ་ལ་འཇུག་གོ །ལ་ལ་ནི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་ལ་འཇུག་གོ །ལ་ལ་ནི་སྤྱོད་པའི་དཀྱིལ་འཁོར་ཡོངས་སུ་དག་པའི་རྒྱན་ལ་འཇུག་གོ །ལ་ལ་ནི་བྱང་ཆུབ་སེམས་དཔའི་ས་ཡི་རྣམ་པར་འཕྲུལ་པ་ལ་འཇུག་གོ །ལ་ལ་ནི་མངོན་པར་བྱང་ཆུབ་པའི་རྣམ་པར་འཕྲུལ་པ་ལ་འཇུག་གོ །ལ་ལ་ནི་སངས་རྒྱས་རྣམ་པར་སྤྱོད་པའི་ཏིང་ངེ་འཛིན་ཐ་མྱི་དད་པའི་རྣམ་པར་འཕྲུལ་པ་ལ་འཇུག་གོ །ལ་ལ་ནི་དེ་བཞིན་གཤེགས་པའི་སྟོབས་དང་མྱི་བསྙེངས་པ་ལ་འཇུག་གོ །ལ་ལ་ནི་སངས་རྒྱས་ཀྱི་སོ་སོ་ཡང་དག་པར་རིག་པ་རྒྱ་མཚོ་ལ་འཇུག་གོ །དེ་དག་ལ་སྩོགས་པ་སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ལ་འཇུག་སྟེ་མོས་པ་སྣ་ཚོགས་དང་ལམ་སྣ་ཚོགས་དང་། སྒོ་སྣ་ཚོགས་དང་། འཇུག་པ་སྣ་ཚོགས་དང་། འབབ་པ་སྣ་ཚོགས་དང་། རྣམ་པ་སྣ་ཚོགས་དང་། རྗེས་སུ་འབྲང་བ་སྣ་ཚོགས་དང་། ཕྱོགས་སྣ་ཚོགས་དང་སྣོད་སྣ་ཚོགས་དང་ཡུལ་སྣ་ཚོགས་དང་། འཇིག་རྟེན་སྣ་ཚོགས་དང་ཁོང་དུ་ཆུད་པ་སྣ་ཚོགས་དང་། ཚོགས་སྣ་ཚོགས་དང་རྣམ་པར་འཕྲུལ་པ་སྣ་ཚོགས་དང་། ཐབས་སྣ་ཚོགས་དང་ཏིང་ངེ་འཛིན་སྣ་ཚོགས་ཀྱིས་སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་དེ་དག་ལ་འཇུག་གོ །ཏིང་ངེ་འཛིན་སྣ་ཚོགས་ཀྱིས་འཇུག་པ་འདི་ལྟ་སྟེ། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ཀུན་ནས་བརྒྱན་པ་དང་། བྱང་ཆུབ་སེམས་དཔའི་ཏིང་ངེ་འཛིན་དུས་གསུམ་ཐམས་ཅད་ལ་ཐོགས་པ་མེད་པར་ཡུལ་སྣང་བར་བྱེད་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ཀྱི་གཞི་ཐ་མྱི་དད་པའི་ཡེ་ཤེས་སྣང་བ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པའི་ཡུལ་གྱི་དབྱིངས་ལ་འཇུག་པ་དང་། བྱང་ཆུབ་སེམས་དཔའི་ཏིང་ངེ་འཛིན་ནམ་མཁའི་དབྱིངས་སུ་སྣང་བ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པའི་སྟོབས་
བཅུ་འཐོབ་པས་རྣམ་པར་འབྱེད་པ་དང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་བསྙེངས་པ་མི་མངའ་བའི་རྒྱན་གྱིས་རྣམ་པར་གནོན་ཅིང་རྣམ་པར་བསྒྱིངས་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ཀྱི་ཚུལ་ཐམས་ཅད་ཀྱི་ཀློང་གི་སྙིང་པོ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ཐམས་ཅད་དུ་ཐོགས་པ་མེད་པར་སྒྲ་སྒྲོགས་པས་རྒྱས་པར་འགེངས་པའི་ཟླ་བ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་མཉམ་པ་ཉིད་ཀྱིས་བརྒྱན་པའི་འོད་ཀྱི་བྱང་ཆུབ་སེམས་དཔའ་དེ་དག་བཅོམ་ལྡན་འདས་རྣམ་པར་སྣང་མཛད་ཀྱི་སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་དེ་དག་ལ་རབ་ཏུ་འཇུག་གོ །བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་རྒྱལ་པོའི་ཐབས་ཆགས་པ་མྱེད་པའི་རྒྱལ་མཚན་དང་། བྱང་ཆུབ་སེམས་དཔའི་ཏིང་ངེ་འཛིན་དམྱིགས་པ་ཐམས་ཅད་ལ་སངས་རྒྱས་རྒྱ་མཚོ་རྣམ་པར་ལྟ་བ་དང་། བྱང་ཆུབ་སེམས་དཔའི་ཏིང་ངེ་འཛིན་འཇིག་རྟེན་གྱི་རྒྱུད་ཐམས་ཅད་དུ་ཐ་མྱི་དད་པའི་ལུས་སྣང་བའི་རྒྱལ་མཚན་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པའི་སྐུ་ཐ་དད་པའི་ཡུལ་ལ་འཇུག་པ་དང་། བྱང་ཆུབ་སེམས་དཔའི་ཏིང་ངེ་འཛིན་འཇིག་རྟེན་ཐམས་ཅད་ཀྱི་རྒྱུད་ཀྱི་རྗེས་སུ་འཇུག་པ་སྙིང་རྗེའི་སྙིང་པོ་ཅན་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཐམས་ཅད་ཀྱི་གནས་ལ་རྟེན་པའི་བྱིན་གྱི་རླབས་དང་། བྱང་ཆུབ་སེམས་དཔའི་ཏིང་ངེ་འཛིན་ཤིན་ཏུ་ཞི་ལ་རབ་ཏུ་ཞི་བས་ཀུན་ཏུ་སྣང་བའི་དཀྱིལ་འཁོར་དང་། བྱང་ཆུབ་སེམས་དཔའི་ཏིང་ངེ་འཛིན་སྤྲུལ་པ་བཟང་པོ་དམྱིགས་སུ་མེད་པས། ཀུན་ཏུ་འཕྲུལ་པའི་གཟུགས་བརྙན་དང་། བྱང་ཆུབ་སེམས་དཔའི་ཏིང་ངེ་འཛིན་ཞིང་ཐམས་ཅད་ཡོངས་སུ་འདུ་བའི་བྱིན་གྱི་རླབས་དང་། བྱང་ཆུབ་སེམས་དཔའི་ཏིང་ངེ་འཛིན་ཞིང་ཐམས་ཅད་དུ་མངོན་པར་འཚང་རྒྱ་བའི་རྣམ་པར་མངོན་པར་བསྒྲུབ་པ་དང་བྱང་ཆུབ་སེམས་དཔའི་ཏིང་ངེ་འཛིན་འགྲོ་བ་
ཐམས་ཅད་དུ་དབང་པོའི་ཁ་དོག་གིས་རྣམ་པར་སྤྱོད་པ་དང་། བྱང་ཆུབ་སེམས་དཔའི་ཏིང་ངེ་འཛིན་འགྲོ་བ་ཐམས་ཅད་དུ་ཁྱད་པར་དུ་འཕགས་པའི་དཀྱིལ་འཁོར་ཆགས་པ་མེད་པའི་རྣམ་པར་སྤྱོད་པ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པ་ཐམས་ཅད་སྐྱེད་པ་ལས་བྱུང་བའི་བྱིན་གྱི་རླབས་དང་། བྱང་ཆུབ་སེམས་དཔའི་ཏིང་ངེ་འཛིན་ཡོན་ཏན་རྒྱ་མཚོ་ཐམས་ཅད་ལ་ནན་ཏན་གྱིས་འཇུག་པ་དང་། བྱང་ཆུབ་སེམས་དཔའི་ཏིང་ངེ་འཛིན་དམྱིགས་པ་མ་ལུས་པ་ཐམས་ཅད་དུ་རྣམ་པར་འཕྲུལ་པ་མངོན་པར་བསྒྲུབ་པས། ཕྱི་མའི་མཐར་བྱིན་གྱིས་རློབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྦྱོར་བ་རྒྱ་མཚོ་ལ་འཇུག་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཕྱི་མའི་མཐར་དེ་བཞིན་གཤེགས་པ་ཐམས་ཅད་ཀྱི་རིགས་ཡང་དག་པར་འཛིན་པའི་བྱིན་གྱི་རླབས་དང་། བྱང་ཆུབ་སེམས་དཔའི་ཏིང་ངེ་འཛིན་ཕྱོགས་བཅུའི་ཞིང་རྒྱ་མཚོ་ད་ལྟར་བྱུང་བ་ཐམས་ཅད་ཡོངས་སུ་དག་པར་མོས་པའི་བྱིན་གྱི་རླབས་དང་། བྱང་ཆུབ་སེམས་དཔའི་ཏིང་ངེ་འཛིན་སེམས་ཀྱི་སྐད་ཅིག་གཅིག་ལ་སངས་རྒྱས་ཐམས་ཅད་དང་རྣམ་པར་སྤྱོད་ཅིང་འགྲོགས་པ་དང་། བྱང་ཆུབ་སེམས་དཔའི་ཏིང་ངེ་འཛིན་དམིགས་པ་ཐམས་ཅད་ལ་ཆགས་པ་མེད་པའི་མཐར་འཇུག་པ་དང་། བྱང་ཆུབ་སེམས་དཔའི་ཏིང་ངེ་འཛིན་འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་ཞིང་གཅིག་ཏུ་བྱིན་གྱིས་རློབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཐམས་ཅད་ཀྱི་སྐུར་འཕྲུལ་པ་མངོན་པར་སྒྲུབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་དབང་པོ་རྒྱ་མཚོ་རྡོ་རྗེའི་དབང་པོ་ལྟ་བུ་ཐམས་ཅད་ཁོང་དུ་ཆུད་པ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པ་ཐམས་ཅད་སྐུ་གཅིག་པའི་སྙིང་པོའི་བྱིན་གྱི་རླབས་དང་། བྱང་ཆུབ་སེམས་དཔའི་ཏིང་ངེ་འཛིན་སེམས་ཀྱི་སྐད་ཅིག་གཅིག་གི་ཆ་ལ་ཆོས་ཀྱི་དབྱིངས་ཀྱི་ཚུལ་ཐམས་ཅད་ཁོང་དུ་ཆུད་པས་ཁོམ་པར་གནས་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ཐམས་ཅད་དུ་ཞིང་འབྱམ་ཀླས་པ་བསྒྲུབ་པ་ཡོངས་སུ་སྟོན་པའི་བྱིན་གྱི་རླབས་དང་།
བྱང་ཆུབ་སེམས་དཔའི་ཏིང་ངེ་འཛིན་སྤྱིའུ་ཚུགས་སུ་གཞི་ལ་རྣམ་པར་སྤྱོད་པའི་བྱིན་གྱི་རླབས་པ་དང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཀྱི་སེམས་ཅན་གྱི་ལུས་ཐ་མྱི་དད་པར་བྱིན་གྱིས་རློབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཡེ་ཤེས་ཀྱི་ཀློང་ཐམས་ཅད་ལ་མངོན་སུམ་དུ་ཡང་དག་པར་གཞོལ་བ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཐམས་ཅད་ཀྱི་རང་བཞིན་མཚན་ཉིད་ཡོངས་སུ་ཤེས་པས་རབ་ཏུ་འབྱེད་པ་དང་། བྱང་ཆུབ་སེམས་དཔའི་ཏིང་ངེ་འཛིན་དུས་གསུམ་སེམས་ཀྱི་སྐད་ཅིག་ལ་ཐ་མྱི་དད་པའི་དཀྱིལ་འཁོར་དང་བྱང་ཆུབ་སེམས་དཔའི་ཏིང་ངེ་འཛིན་སེམས་ཀྱི་སྐད་ཅིག་ཐམས་ཅད་ཆོས་ཀྱི་དབྱིངས་ཀྱི་ཚུལ་གྱི་རང་བཞིན་དམ་པ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རྗེས་སུ་འབྲང་བའི་ཡེ་ཤེས་ཀྱི་རྣམ་པར་གནོན་པའི་སེང་གེ་དང་། བྱང་ཆུབ་སེམས་དཔའི་ཏིང་ངེ་འཛིན་དམྱིགས་པ་ཐམས་ཅད་ཆོས་ཀྱི་དབྱིངས་སུ་ཤེས་པའི་མིག་གི་དཀྱིལ་འཁོར་དང་། བྱང་ཆུབ་སེམས་དཔའི་ཏིང་ངེ་འཛིན་སྟོབས་བཅུའི་རྩལ་གྱིས་རྣམ་པར་གནོན་པས་ཡང་དག་པར་རྩོམ་པ་དང་། བྱང་ཆུབ་སེམས་དཔའི་ཏིང་ངེ་འཛིན་དམིགས་པ་ཐམས་ཅད་ཀུན་ནས་མཐོང་བའི་མིག་གི་དཀྱིལ་འཁོར་དང་བྱང་ཆུབ་སེམས་དཔའི་ཏིང་ངེ་འཛིན་ཁ་དོག་ཐམས་ཅད་དཀྱིལ་འཁོར་གྱིས་འགྲོ་བར་ཤིན་ཏུ་མཛེས་པ་མངོན་པར་སྒྲུབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་གློང་མི་གཡོ་བའི་སྙིང་པོ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་གཅིག་ལ་ཆོས་ཐམས་ཅད་ཡོངས་སུ་འདུ་བར་སྟོན་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་གཅིག་གི་ཚིག་གི་ལམ་ལ་ངེས་པའི་ངག་གི་རབ་ཏུ་འབྱེད་པས། བྱང་ཆུབ་སེམས་དཔའ་དེ་དག་བཅོམ་ལྡན་འདས་རྣམ་པར་སྣང་མཛད་ཀྱི་སངས་རྒྱས་ཀྱི་རྫུ་འཕྲུལ་གྱིས་རྣམ་པར་འཕྲུལ་པ་རྒྱ་མཚོ་དེ་དག་ལ་རབ་ཏུ་འཇུག་གོ །བྱང་ཆུབ་སེམས་
དཔའི་ཏིང་ངེ་འཛིན་སངས་རྒྱས་ཐམས་ཅད་ཀྱི་རྒྱལ་མཚན་བྱིན་གྱི་རླབས་ཀྱིས་ཆོས་སྟོན་པ་དང་། བྱང་ཆུབ་སེམས་དཔའི་ཏིང་ངེ་འཛིན་དུས་གསུམ་གྱི་མུ་ལ་མཐར་ཐུག་པ་མེད་པ་དང་། བྱང་ཆུབ་སེམས་དཔའི་ཏིང་ངེ་འཛིན་བསྐལ་པ་ཐམས་ཅད་ཁོང་དུ་ཆུད་པས་ཐ་མྱི་དད་པའི་ཡེ་ཤེས་དང་། བྱང་ཆུབ་སེམས་དཔའི་ཏིང་ངེ་འཛིན་ཚུལ་ཤིན་ཏུ་ཕྲ་བས་སྟོབས་བཅུ་ཁོངས་སུ་ཆུད་པ་དང་། བྱང་ཆུབ་སེམས་དཔའི་ཏིང་ངེ་འཛིན་མྱི་འཕྲོགས་པའི་བྱང་ཆུབ་སེམས་དཔའི་སྤྱོད་པ་བསྐལ་པ་ཐམས་ཅད་དུ་མངོན་པར་སྒྲུབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཕྱོགས་ཐམས་ཅད་ཀུན་ཏུ་ཤུགས་ཀྱིས་མངོན་དུ་ཐར་པའི་སྤྲིན་དང་། བྱང་ཆུབ་སེམས་དཔའི་ཏིང་ངེ་འཛིན་མངོན་པར་འཚང་རྒྱ་བའི་རྣམ་པར་འཕྲུལ་པ་རྣམ་པར་སྒྲུབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཚོར་བ་ཐམས་ཅད་ཀྱིས་རེག་པ་མེད་པས་བདེ་བའི་རྒྱལ་མཚན་དང་། བྱང་ཆུབ་སེམས་དཔའི་ཏིང་ངེ་འཛིན་རྒྱན་ཐམས་ཅད་དུ་ནམ་མཁའི་རྒྱན་མངོན་པར་སྒྲུབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་སྐད་ཅིག་སྐད་ཅིག་ཏུ་འགྲོ་བ་སྙེད་ཀྱི་སྤྲུལ་པའི་གཟུགས་བརྙན་གྱི་སྤྲིན་མངོན་པར་སྒྲུབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པའི་ཟླ་བའི་འོད་ནམ་མཁའ་ལྟར་རྡུལ་དང་བྲལ་བ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པ་ཐམས་ཅད་ནམ་མཁའ་ལྟར་བྱིན་གྱིས་རློབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཐམས་ཅད་ལ་དབང་པོའི་རྒྱན་རབ་ཏུ་སྣང་བ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཐམས་ཅད་ཀྱི་དོན་རྣམ་པར་འབྱེད་པའི་སྒྲོན་མ་དང་། བྱང་ཆུབ་སེམས་དཔའི་ཏིང་ངེ་འཛིན་སྟོབས་བཅུའི་དཀྱིལ་འཁོར་སྣང་བ་དང་། བྱང་ཆུབ་སེམས་དཔའི་ཏིང་ངེ་འཛིན་དུས་གསུམ་གྱི་སངས་རྒྱས་དཔལ་གྱི་རྒྱལ་མཚན་དང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཐམས་ཅད་གཅིག་ཏུ་འདྲེས་པའི་སྙིང་པོ་དང་། བྱང་ཆུབ་སེམས་དཔའི་ཏིང་ངེ་འཛིན་སྐད་ཅིག་སྐད་ཅིག་ལ་བརྩམས་པ་ཐམས་ཅད་མཐར་ཕྱིན་པར་བྱེད་པ་དང་། བྱང་ཆུབ་སེམས་དཔའི་ཏིང་ངེ་
འཛིན་བསོད་ནམས་མི་ཟད་པའི་སྙིང་པོ་དང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་མཐའ་ཡས་པ་མཐོང་བའི་ཡུལ་རབ་ཏུ་སྣང་བ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཐམས་ཅད་ལ་རྡོ་རྗེའི་སེང་གེ་ལྟར་རབ་ཏུ་གནས་པ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པ་ཐམས་ཅད་ཀྱི་སྤྲུལ་པ་ཡོངས་སུ་བསྟན་པས་ཀུན་ཏུ་རྣམ་པར་དམིགས་པ་མངོན་པར་སྒྲུབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པ་ཐམས་ཅད་ཀྱི་མཉན་པའི་ཉི་མ་གནོན་པ་དང་། བྱང་ཆུབ་སེམས་དཔའི་ཏིང་ངེ་འཛིན་དུས་གསུམ་གཅིག་ཏུ་སྤྱོད་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཐམས་ཅད་རང་བཞིན་གྱིས་རབ་ཏུ་ཞི་བར་སྒྲ་དབྱངས་ཀུན་ཏུ་སྒྲོགས་པ་དང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཐམས་ཅད་མཐོང་བའི་ས་མཚམས་འཛིན་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་མ་ལུས་པ་ཐམས་ཅད་ཀྱི་གནས་ཀྱི་པད་མོའི་ཚལ་རབ་ཏུ་རྒྱས་པ་དང་། བྱང་ཆུབ་སེམས་དཔའི་ཏིང་ངེ་འཛིན་གནས་མེད་པའི་ཆོས་ཀྱི་ནམ་མཁའ་ལ་རྣམ་པར་ལྟ་བ་དང་། བྱང་ཆུབ་སེམས་དཔའི་ཏིང་ངེ་འཛིན་ཕྱོགས་གཅིག་ཏུ་ཕྱོགས་བཅུ་རྒྱ་མཚོ་ཡོངས་སུ་སྡུད་པའི་ཀློང་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ཀྱི་གཞི་ཐམས་ཅད་ཀྱི་སྒོར་འཇུག་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་རྒྱ་མཚོ་ཐམས་ཅད་དང་ལྡན་པ་དང་། བྱང་ཆུབ་སེམས་དཔའི་ཏིང་ངེ་འཛིན་སེམས་ཅན་ཐམས་ཅད་ལ་འོད་རབ་ཏུ་འགྱེད་པས། རབ་ཏུ་ཞི་བའི་ལུས་སུ་འགྱུར་བ་དང་། བྱང་ཆུབ་སེམས་དཔའི་ཏིང་ངེ་འཛིན་སེམས་ཀྱི་སྐད་ཅིག་གཅིག་ལ་མངོན་པར་ཤེས་པ་དང་། སྨོན་ལམ་ཐམས་ཅད་མངོན་པར་སྒྲུབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་རྟག་པར་ཐམས་ཅད་དུ་ཀུན་ནས་མངོན་པར་རྫོགས་པར་འཚང་རྒྱ་བའི་བྱིན་གྱི་རླབས་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་
ཐམས་ཅད་རྒྱན་གཅིག་ཏུ་ཁོང་དུ་ཆུད་པར་འཇུག་པ་དང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཐམས་ཅད་དྲན་པའི་རང་བཞིན་གྱིས་རབ་ཏུ་སྣང་བ་དང་། བྱང་ཆུབ་སེམས་དཔའི་ཏིང་ངེ་འཛིན་འགྲོ་བ་ཐམས་ཅད་དུ་ཁྱད་པར་ཆེན་པོ་དང་ལྡན་པའི་ཡེ་ཤེས་མངོན་པར་ཤེས་པ་དང་། བྱང་ཆུབ་སེམས་དཔའི་ཏིང་ངེ་འཛིན་སེམས་ཀྱི་སྐད་ཅིག་གཅིག་གིས་ཆོས་ཀྱི་དབྱིངས་ཀྱི་ཚུལ་མཐའ་ཡས་པ་རང་གི་ལུས་ཀྱིས་རྒྱས་པར་འགེངས་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ཚུལ་གཅིག་གིས་ཆོས་ཐམས་ཅད་ཚུལ་གཅིག་པར་རྣམ་པར་དགོད་པའི་འོད་དང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཆོས་ཀྱི་དཀྱིལ་འཁོར་གྱི་འཁོར་ལོ་གཟི་བརྗིད་ཀྱི་བྱིན་གྱི་རླབས་དང་། བྱང་ཆུབ་སེམས་དཔའི་ཏིང་ངེ་འཛིན་སེམས་ཅན་གྱི་ཁམས་མིག་འཕྲུལ་ལྟ་བུ་ཡོངས་སུ་བསྡུ་བའི་སྨོན་ལམ་དང་། སྤྱོད་པ་བྱིན་གྱིས་རློབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཆོས་ཀྱི་དབྱིངས་ཀྱི་གཞི་ཐམས་ཅད་ཐ་མྱི་དད་པ་དང་། བྱང་ཆུབ་སེམས་དཔའི་ཏིང་ངེ་འཛིན་པདྨོའི་བྱིན་རྣམ་པར་འཕྲུལ་པས་ཀུན་ཏུ་རྣམ་པར་གནོན་པ་དང་། བྱང་ཆུབ་སེམས་དཔའི་ཏིང་ངེ་འཛིན་སེམས་ཅན་ཐམས་ཅད་ཀྱི་ལུས་ཀྱི་རྒྱུད་ཁོང་དུ་ཆུད་པས་མངོན་པར་ཤེས་པ་དང་། བྱང་ཆུབ་སེམས་དཔའི་ཏིང་ངེ་འཛིན་ལུས་སེམས་ཅན་ཐམས་ཅད་ལ་མངོན་དུ་བྱིན་གྱིས་རློབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་སེམས་ཅན་ཐམས་ཅད་ཀྱི་དབྱངས་ཀྱི་ཡན་ལག་རྒྱ་མཚོར་འགྲོ་བ་ཐམས་ཅད་ཀྱི་སྐད་ཡོངས་སུ་འབྱེད་པའི་ཚུལ་མངོན་པར་ཤེས་པ་དང་། བྱང་ཆུབ་སེམས་དཔའི་ཏིང་ངེ་འཛིན་འགྲོ་བའི་གཞི་ཐ་དད་པ་ཐམས་ཅད་ཁོང་དུ་ཆུད་པས་མངོན་པར་ཤེས་པ་དང་། བྱང་ཆུབ་སེམས་དཔའི་ཏིང་ངེ་འཛིན་སྙིང་རྗེ་ཆེན་པོའི་མཛོད་ཐ་མི་དད་པའི་སྙིང་པོ་དང་། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཐམས་ཅད་དེ་བཞིན་ཉིད་དུ་རྟོགས་པའི་མཐའ་ལ་འཇུག་པ་དང་། བྱང་ཆུབ་སེམས་དཔའི་ཏིང་ངེ་འཛིན་དེ་བཞིན་གཤེགས་པ་ཐམས་ཅད་ཀྱི་རྣམ་པར་ཐར་པའི་ཕོ་བྲང་ལ་རྣམ་པར་ལྟ་བས་སེང་
གེ་རྣམ་པར་བསྒྱིངས་པ་དང་། དེ་དག་ལ་སྩོགས་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ལམ་ལ་འཇུག་པ་དང་། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས། བྱང་ཆུབ་སེམས་དཔའ་དེ་དག་དེ་བཞིན་གཤེགས་པ་རྣམ་པར་སྣང་མཛད་ཀྱི་སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་དེ་དག་ལ་རབ་ཏུ་འཇུག་གོ །སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་ཐམས་ཅད་དུ་རྒྱས་པར་འགེངས་པར་འཇུག་པའི་ཚུལ་གྱིས་སྔོན་བསྐལ་པ་མཉམ་པར་སྤྱད་པ་ཡང་རྗེས་སུ་དྲན་ནོ། །དེ་ལྟར་བྱང་ཆུབ་སེམས་དཔའ་དེ་དག་ཛེ་ཏའི་ཚལ་དུ་ཕྱིན་ཅིང་། བཅོམ་ལྡན་འདས་ཀྱི་སྤྱན་སྔ་ན་འཁོད་པ། སེང་གེའི་ཁྲི་རིན་པོ་ཆེ་སྣ་ཚོགས་ཀྱི་པད་མོའི་སྙིང་པོ་ཅན་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་དང་མཉམ་པར་ཡངས་པ་ལ་འཁོད་པ། ཡེ་ཤེས་དང་མངོན་པར་ཤེས་པ་ཆེན་པོའི་རྣམ་པར་འཕྲུལ་པས་བྱུང་བ། ཡེ་ཤེས་དང་མངོན་པར་ཤེས་པ་རྣོ་བ་དང་ལྡན་པའི་ས་རྗེས་སུ་ཐོབ་པ། ཡེ་ཤེས་ཀྱིས་ཀུན་ཏུ་རྣམ་པར་དཔྱོད་པ། ཤེས་རབ་ཀྱི་འབྱུང་གནས་ཀྱི་རིགས་སུ་བྱུང་བ། ཐམས་ཅད་མཁྱེན་པའི་ཡེ་ཤེས་ལ་མངོན་དུ་གྱུར་པ། ཡེ་ཤེས་ཀྱི་མིག་རབ་རིབ་མེད་པ་དང་ལྡན་པ། སེམས་ཅན་གྱི་ཁ་ལོ་བསྒྱུར་བའི་རང་བཞིན་ཐོབ་པ། སངས་རྒྱས་ཐམས་ཅད་དང་མཉམ་པ་ཉིད་ཀྱི་རྗེས་སུ་སོང་བ། རྟག་ཏུ་རྣམ་པར་རྟོག་པ་མེད་པར་ཆོས་ལ་སྤྱོད་པ། ཆོས་ཀྱི་དམྱིགས་པ་ཐམས་ཅད་རབ་ཏུ་རྟོགས་པ། ཆོས་ཐམས་ཅད་རང་བཞིན་གྱིས་ཞི་བར་དམིགས་པ་འཇིག་རྟེན་ཐམས་ཅད་ཤིན་ཏུ་ཞི་བས། གནས་ཐ་དད་པ་མེད་པ་ལ་རབ་ཏུ་གཞོལ་བ། འཇིག་རྟེན་ཐ་དད་པ་ཐམས་ཅད་དུ་རབ་ཏུ་ཞུགས་པ། གནས་མེད་པར་ཞིང་ཐམས་ཅད་དུ་འདོང་བ། ཆོས་ཀྱི་གནས་ཐམས་ཅད་ལ་བརྟེན་པ་མེད་པར་ཆོས་ཐམས་ཅད་བླ་གབ་མེད་པའི་གཞལ་མེད་ཁང་དུ་ཕྱིན་པ། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་ཞུགས་པ་སེམས་ཅན་ཐམས་ཅད་ལ་བདེ་བའི་ལམ་སྟོན་པ། ཡེ་ཤེས་དང་རྣམ་པར་ཐར་པ་ཤིན་ཏུ་
འཕགས་པའི་གནས་ཀྱི་སྤྱོད་ཡུལ་ཅན། འདོད་ཆགས་དང་བྲལ་བའི་མཐར་ཕྱིན་པའི་ཡེ་ཤེས་ཀྱི་ལུས་དང་ལྡན་པ། སྲིད་པའི་རྒྱ་མཚོ་ཐམས་ཅད་ལས་གྱེན་དུ་འཕགས་པ། འགྲོ་བ་ཐམས་ཅད་ལ་ཡང་དག་པའི་མཐའ་རྣམ་པར་སྟོན་པ། ཆོས་རྒྱ་མཚོ་ཤེས་རབ་སྣང་བའི་དཀྱིལ་འཁོར་ཅན། ཏིང་ངེ་འཛིན་གང་ཆེན་མཚོ་དང་ལྡན་པའི་དབྱིངས་ལ་ཤིན་ཏུ་མཉམ་པར་བཞག་ཅིང་། སྙིང་རྗེ་ཆེན་པོ་རབ་ཏུ་སེམས་པ། ཆོས་ཀྱི་ཚུལ་སྒྱུ་མའི་རྣམ་པ་འདི་ལྟ་བུ་རབ་ཏུ་རྟོགས་པ། འཇིག་རྟེན་གྱི་ཁམས་ཐམས་ཅད་ལ་རྨི་ལམ་ལྟ་བུར་ཞུགས་པ། དེ་བཞིན་གཤེགས་པ་མཐོང་བ་ཐམས་ཅད་མིག་ཡོར་ལྟ་བུར་ཁོང་དུ་ཆུད་པ། སྒྲ་སྐད་དང་དབྱངས་ཐམས་ཅད་སྒྲ་བརྙན་ལྟ་བུར་རྣམ་པར་རིག་པ། ཆོས་ཐམས་ཅད་མངོན་པར་སྒྲུབ་པའི་ཡེ་ཤེས་སྤྲུལ་པ་ལྟ་བུར་རབ་ཏུ་རྟོགས་པ། ཁྱད་པར་དུ་འཕགས་པའི་སྨོན་ལམ་ཤིན་ཏུ་བསྩགས་པ། ཡེ་ཤེས་ཀྱི་དཀྱིལ་འཁོར་ཀུན་ནས་དག་པའི་མཁས་པ་དང་ལྡན་པ། སེམས་ཤིན་ཏུ་ཞི་ཞིང་རབ་ཏུ་ཞི་བ་དང་ལྡན་པ་གཟུངས་ཀྱི་རྒྱུད་ཐམས་ཅད་ཀྱི་ཡུལ་དང་ལྡན་པ། ཏིང་ངེ་འཛིན་གྱི་སྟོབས་ཀྱིས་དོགས་པ་མེད་པར་ཀུན་ནས་རབ་ཏུ་གནོན་པ་ཆོས་ཀྱི་དབྱིངས་ཀྱི་གནས་ཀྱི་མཐར་ཕྱིན་པའི་མིག་དང་ལྡན་པ། ཆོས་ཐམས་ཅད་ལ་དམིགས་པ་མེད་པར་རྣམ་པར་སྤྱོད་པ་རབ་ཏུ་ཐོབ་པ་ཤེས་རབ་རྒྱ་མཚོ་མཐའ་ཡས་པ་ལ་རྣམ་པར་སྤྱོད་པ། ཡེ་ཤེས་ཀྱི་ཕ་རོལ་ཏུ་ཕྱིན་པའི་ཕ་རོལ་ཏུ་སོང་བ། ཤེས་རབ་ཀྱི་ཕ་རོལ་ཏུ་ཕྱིན་པའི་སྟོབས་དང་། ཤུགས་ཐོབ་པ། རྫུ་འཕྲུལ་གྱི་ཕ་རོལ་ཏུ་ཕྱིན་པས་འགྲོ་བ་ཐམས་ཅད་ཀྱི་ཕ་རོལ་ཏུ་ཕྱིན་པ་ཏིང་ངེ་འཛིན་གྱི་ཕ་རོལ་ཏུ་ཕྱིན་པ་དབང་དུ་གྱུར་པ། དེ་བཞིན་གཤེགས་པ་ཐམས་ཅད་ཀྱི་དོན་མཁས་པ་ལ་ཕྱིན་ཅི་ལོག་མེད་པའི་ཡེ་ཤེས་དང་ལྡན་པ། ཆོས་ཀྱི་མཛོད་དབྱེ་བའི་ཆོ་ག་ལ་མཁས་པ། ངེས་པའི་ཚིག་ཤེས་པ་ལ་མངོན་པར་མཁས་པ། སྤོབས་པའི་སྟོབས་དང་། ཆོས་ཀྱི་སྤྲིན་ཟད་མྱི་ཤེས་པ་དང་ལྡན་པ། མྱི་འཇིགས་པས་ཁྱུ་མཆོག་དང་
སེང་གེའི་ང་རོ་འབྱིན་པ། གནས་མེད་པའི་ཆོས་ཀྱི་དགའ་བ་ལ་དགའ་བས་མོས་པ། ཆོས་ཐམས་ཅད་ལ་རབ་རིབ་མྱེད་པའི་མྱིག་གིས་ལྟ་བ། འཇིག་རྟེན་ཐམས་ཅད་ཀྱི་འབྱུང་བ་དང་། འཇིག་པ་ཤེས་པའི་ཟླ་བར་གྱུར་པ། ཤེས་རབ་ཀྱི་དཀྱིལ་འཁོར་གྱིས་བདེན་པའི་ཚུལ་ཐམས་ཅད་ལ་རྣམ་པར་སྤྱོད་པའི་འོད་ཟེར་ཅན། ཡེ་ཤེས་ཀྱི་རྡོ་རྗེ་བསོད་ནམས་ཀྱི་ཁོར་ཡུག་ཏུ་གྱུར་པ། དཔེར་བྱ་བ་ཐམས་ཅད་ལས་ཤིན་ཏུ་འདས་པ། ཆོས་ཐམས་ཅད་ལ་དབང་པོ་དང་ཡེ་ཤེས་ཀྱི་མྱུ་གུ་རབ་ཏུ་སྐྱེས་པ། དཔའ་བའི་རྒྱལ་མཚན་དང་ལྡན་པ། བདུད་ཐམས་ཅད་ཀྱི་རྒྱལ་མཚན་རབ་ཏུ་སྙོལ་བ་ལ་དཔའ་བ་ཡེ་ཤེས་མཐའ་ཡས་པའི་དཀྱིལ་འཁོར་གྱི་གཟི་བརྗིད་ཅན། འགྲོ་བ་ཐམས་ཅད་ལས་མངོན་པར་འཕགས་པའི་ལུས་དང་ལྡན་པ། ཆོས་ཐམས་ཅད་ལ་ཤེས་རབ་སྒྲིབ་པ་མེད་པར་ཟད་པ་དང་། མྱི་ཟད་པའི་མཐའི་ཡེ་ཤེས་ཀྱིས་རྣམ་པར་སངས་རྒྱས་པ། ཡང་དག་པའི་མཐའི་ཀུན་གྱི་མཐར་ཕྱིན་པ་ལ་གནས་པ། མཚན་མ་མེད་པ་ལ་རྣམ་པར་ལྟ་བའི་ཡེ་ཤེས་ཀྱི་མྱིག་མངོན་སུམ་ཅན། བྱང་ཆུབ་སེམས་དཔའི་སྤྱོད་པ་ཐམས་ཅད་མངོན་པར་བསྒྲུབ་པའི་རྒྱུ་ལ་མཁས་པ། མྱི་གཉིས་པའི་ཡེ་ཤེས་ཀྱི་སྤྱོད་ཡུལ་དང་ལྡན་པ་འཇིག་རྟེན་གྱི་རྒྱུད་ཐམས་ཅད་ལ་རྣམ་པར་ལྟ་བ། སངས་རྒྱས་ཀྱི་ཞིང་གི་རྒྱུད་གནས་མྱེད་པ་ལ་ཐམས་ཅད་དུ་གཟུགས་བརྙན་སྣང་བར་གྱུར་པ། ཆོས་ཐམས་ཅད་ལ་མུན་པ་དང་རྣམ་པར་བྲལ་བ་ཡེ་ཤེས་ཀྱི་དཀྱིལ་འཁོར་མུན་པ་མྱེད་པ་ལ་རབ་ཏུ་ཞུགས་པ། ཕྱོགས་ཀུན་ཏུ་ཆོས་གྱི་སྣང་བ་རབ་ཏུ་བཀྱེ་བ། འགྲོ་བ་ཐམས་ཅད་ཀྱི་བསོད་ནམས་ཀྱི་ཞིང་མཆོག་ཏུ་གྱུར་པ། ཐོས་པ་དང་མཐོང་བ་དང་། སྨོན་ལམ་དོན་ཡོད་པའི་ཟླ་བ། བསོད་ནམས་ཀྱི་རི་རབ་འཇིག་རྟེན་ཐམས་ཅད་ལས་མངོན་པར་འཕགས་པ། ཕས་ཀྱི་རྒོལ་བའི་ཚོགས་ཐམས་ཅད་ཚར་གཅོད་པ་ལ་ཤིན་ཏུ་དཔའ་བ། སངས་རྒྱས་ཀྱི་ཞིང་ཐམས་ཅད་དུ་སྒྲ་
སྐད་དང་དབྱངས་ཀྱི་ང་རོ་འབྱིན་པ། སངས་རྒྱས་ཐམས་ཅད་ཀྱི་སྐུ་མཐོང་བས་མྱི་ངོམས་པ། སངས་རྒྱས་ཀྱི་སྐུའི་གཟུགས་བརྙན་གྱི་དབང་བསྒྱུར་བ་དང་ལྡན་པ། འགྲོ་བ་གདུལ་བ་དང་མཐུན་པའི་ལུས་སུ་བྱིན་གྱིས་རློབ་པ། ཞིང་འབྱམ་ཀླས་པ་ཐམས་ཅད་དུ་ལུས་གཅིག་གིས་རྒྱས་པར་འགེངས་པ། མངོན་པར་འདུ་བྱ་བ་མྱེད་པའི་རྫུ་འཕྲུལ་གྱི་དཀྱིལ་འཁོར་ཡོངས་སུ་དག་པ། ཐོགས་པ་མྱེད་པར་འགྲོ་བའི་ཡེ་ཤེས་ཆེན་པོའི་ཐེག་པའི་གྲུ་དང་ལྡན་པ། ཡེ་ཤེས་ཀྱི་དཀྱིལ་འཁོར་གྱིས་ཆོས་ཀྱི་དབྱིངས་ཐམས་ཅད་དུ་ལུས་རབ་ཏུ་སྣང་བ། ཡེ་ཤེས་ཀྱི་ཉི་མ་འགྲོ་བ་ཐམས་ཅད་དུ་ཤར་བ། འགྲོ་བ་ཐམས་ཅད་བསམ་པ་ཇི་ལྟ་བ་བཞིན་དུ་དགའ་བའི་ཁ་དོག་དང་ལྡན་པ། འགྲོ་བ་ཐམས་ཅད་ཀྱི་བསམ་པ་དང་། དབང་པོ་རབ་ཏུ་རྟོགས་པའི་ཡེ་ཤེས་ཅན། ཆོས་ཐམས་ཅད་བསྒྲིབས་པ་མེད་པའི་ཡུལ་ཁོང་དུ་ཆུད་པ། ཆོས་ཐམས་ཅད་ཀྱི་རང་བཞིན་སྐྱེ་བ་མེད་པ་རྣམ་པར་རིག་པ་ཕྲ་བ་དང་ཡངས་པ་ཕན་ཚུན་དུ་ཡོངས་སུ་བསྡུ་བ་ལ་དབང་བསྒྱུར་བ་སངས་རྒྱས་ཀྱིས་ཟབ་མོའི་ཚུལ་ངེས་པར་རྟོགས་པ། དོན་ཟབ་མོའི་ཚིག་དང་། ཡི་གེའི་ཐ་སྙད་ལ་མཁས་པ། ཚིག་དང་ཡི་གེ་དང་། དོན་མྱི་ཟད་པ་རབ་ཏུ་བརྗོད་པ། མདོ་སྡེ་རྒྱ་མཚོ་ཐམས་ཅད་ཚིག་གཅིག་ཏུ་ཆུད་པར་རབ་ཏུ་སྟོན་པ། གཟུངས་དང་ཡེ་ཤེས་ཀྱི་ལུས་རྒྱ་ཆེན་པོ་བྱིན་གྱིས་རློབ་པ། བསྐལ་པ་མཐའ་ཡས་པར་ཡོངས་སུ་འཛིན་པའི་གཟུངས་དང་ལྡན་པའི་བྱིན་གྱི་རླབས་ཅན། སེམས་ཀྱི་སྐད་ཅིག་གཅིག་གིས་བསྐལ་པ་བརྗོད་དུ་མྱེད་པར་གནས་པ། རབ་ཏུ་རྟོགས་པའི་ཡེ་ཤེས་ཅན། སེམས་ཀྱི་སྐད་ཅིག་གཅིག་གིས་དུས་གསུམ་ཤེས་པས། འཇིག་རྟེན་ཐམས་ཅད་མངོན་པར་ཤེས་པ། ཆོས་ཀྱི་གཟུངས་ཀྱིས་སངས་རྒྱས་ཀྱི་ཆོས་རྒྱ་མཚོ་མཐའ་ཡས་པ་དྲན་ཞིང་སྤོབས་པ་འགྲོ་བ་ཐམས་ཅད་ཀྱིས་ཤེས་པར་འགྱུར་བའི་ཐབས་ཀྱིས་ཆོས་ཀྱི་འཁོར་ལོ་བསྐོར་བ་ལས་ཕྱིར་མྱི་ལྡོག་པ། སངས་རྒྱས་ཀྱི་ཡུལ་ལ་ཡེ་ཤེས་སྣང་བ་རབ་ཏུ་ཐོབ་པ། གྱ་ནོམ་པར་སྣང་བའི་ཏིང་ངེ་འཛིན་
ལ་རྟག་ཏུ་མཉམ་པར་བཞག་པ། ཆགས་པ་མྱེད་པའི་མཐའི་ཆོས་ཐམས་ཅད་རབ་ཏུ་དབྱེ་བའི་ཡེ་ཤེས་ལ་མངོན་པར་མཁས་པ། ཆོས་ཐམས་ཅད་ལས་ཁྱད་པར་དུ་འཕགས་པའི་རྣམ་པར་འཕྲུལ་པའི་ཡུལ་ལ་ཡེ་ཤེས་ཀྱིས་རྣམ་པར་རྩེ་བ། དམིགས་པ་ཐམས་ཅད་རྒྱན་བཟང་པོར་བྱིན་གྱིས་རློབ་པ། ཆོས་ཀྱི་དབྱིངས་ཕྱོགས་མྱེད་པ་ལ་ཕྱོགས་ཀྱི་རྗེས་སུ་འབྲང་བས་རབ་ཏུ་ཞུགས་པ་ཕྱོགས་ཐམས་ཅད་རྣམ་པར་དབྱེ་བས་ཆོས་ཀྱི་དབྱིངས་ལ་ཡང་དག་པར་གཞོལ་བ་ཤིན་ཏུ་ཕྲ་བ་སྟེ། ཡངས་པའི་རྡུལ་ཤིན་ཏུ་ཕྲ་བ་ལ་བྱང་ཆུབ་ཏུ་རྣམ་པར་འཚང་རྒྱ་བ། རང་བཞིན་ཁ་དོག་མྱེད་པ་ལས་ཁ་དོག་ཐམས་ཅད་ཡོངས་སུ་སྟོན་པ། ཕྱོགས་གཅིག་ལ་ཡང་དག་པར་གཞོལ་བ་དེ་ལྟ་བུའི་ཡོན་ཏན་དང་ཡེ་ཤེས་མཐའ་ཡས་པས་ཡང་དག་པར་བསྐྱེད་དེ། བསོད་ནམས་དང་ཡེ་ཤེས་ཀྱི་སྙིང་པོ་དང་ལྡན་པར་གྱུར་པ། སངས་རྒྱས་ཐམས་ཅད་ཀྱིས་བསྟོད་པ་བསྔགས་པ་བཀུར་བ་ཚིག་དང་ཡི་གེ་མྱི་ཟད་པས་ཡོན་ཏན་དང་ལེགས་པ་བརྗོད་དུ་ཡོད་པའི་བྱང་ཆུབ་སེམས་དཔའ་ཛེ་ཏའི་ཚལ་དུ་འདུས་ཏེ། འཁོད་པ་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་པ། དེ་བཞིན་གཤེགས་པའི་འོད་ཟེར་གྱིས་རབ་ཏུ་སྣང་བར་གྱུར་པ། དེ་དག་གི་ལུས་ཐམས་ཅད་དང་། ཁང་པ་བརྩེགས་པ་དེ་དག་དང་། བྱང་ཆུབ་སེམས་དཔའི་ལོངས་སྤྱོད་དེ་དག་དང་། བྱང་ཆུབ་སེམས་དཔའི་སྟན་དེ་དག་དང་། ཛེ་ཏའི་ཚལ་ཐམས་ཅད་ནས་ཀྱང་། དགའ་བ་ཆེན་པོའི་ཤུགས་རབ་ཏུ་ཐོབ་པའི་ཆོས་ཉིད་དང་། བྱང་ཆུབ་སེམས་དཔའི་ཆོས་སྣང་བ་བསམ་གྱིས་མྱི་ཁྱབ་པ་རབ་ཏུ་ཐོབ་པས་དགའ་བའི་ཤུགས་ལས་བྱུང་བའི་རྣམ་པར་འཕྲུལ་པ་ཆེན་པོའི་རྒྱན་མངོན་པར་འཐོན་ནས། ཆོས་ཀྱི་དབྱིངས་ཐམས་ཅད་རྒྱས་པ་ཁྱབ་པར་གྱུར་ཏོ། །འདི་ལྟ་སྟེ་སེམས་ཀྱི་སྐད་ཅིག་རེ་རེ་ལ་འོད་ཟེར་གྱི་དྲ་བའི་སྤྲིན་ཤིན་ཏུ་ཡངས་པ། འགྲོ་བ་ཐམས་ཅད་ཡོངས་སུ་ཚིམ་པར་བྱེད་པ་མངོན་པར་འཐོན་ཏེ། ཕྱོགས་བཅུ་རྒྱས་པ་ཁྱབ་པར་གྱུར་ཏོ། །རིན་པོ་ཆེ་
སྣ་ཚོགས་ཀྱི་དྲིལ་བུའི་སྤྲིན་མངོན་པར་འཐོན་ཏེ། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་དང་ལེགས་པ་རབ་ཏུ་བརྗོད་པའི་སྤྲིན་གྱི་ང་རོ་རྗེས་སུ་བསྒྲགས་པས་ཕྱོགས་བཅུ་རྒྱས་པར་ཁྱབ་པར་གྱུར་ཏོ། །དམྱིགས་པ་ཐམས་ཅད་ལས་འགྲོ་བ་ཐམས་ཅད་རོལ་མོའི་སྤྲིན་མངོན་པར་འཐོན་ཏེ། སེམས་ཅན་ཐམས་ཅད་ཀྱི་ལས་དང་རྣམ་པར་སྨིན་པ་རོལ་མོའི་སྒྲ་སྙན་པར་བླང་བས་རྗེས་སུ་སྒྲོག་ཅིང་ཕྱོགས་བཅུ་རྒྱས་པར་ཁྱབ་པར་གྱུར་ཏོ། །བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་དང་། བྱང་ཆུབ་སེམས་དཔའི་སྤྱོད་པ་སྣ་ཚོགས་ཡང་དག་པར་སྟོན་པའི་ཚུལ་གྱི་སྤྲིན་མང་པོ་མངོན་པར་འཐོན་ནས། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱི་སྒྲ་དབྱངས་རབ་ཏུ་སྒྲོག་པས་ཕྱོགས་བཅུ་རྒྱས་པར་ཁྱབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྤྲུལ་པ་དང་། རྣམ་པར་འཕྲུལ་བའི་སྤྲིན་མང་པོ་མངོན་པར་འཐོན་ནས། དེ་བཞིན་གཤེགས་པ་ཐམས་ཅད་ཀྱི་གསུང་གི་དབྱངས་རྗེས་སུ་བརྗོད་ཅིང་། ཕྱོགས་བཅུ་རྒྱས་པར་ཁྱབ་པར་གྱུར་ཏོ། །བྱང་ཆུབ་སེམས་དཔའི་ལུས་མཚན་དང་དཔེ་བྱད་བཟང་པོས་རྣམ་པར་བརྒྱན་པའི་སྤྲིན་མང་པོ་མངོན་པར་འཐོན་ནས། ཞིང་ཐམས་ཅད་དུ་འབྱུང་བའི་སངས་རྒྱས་སྐྱེ་བ་གཅིག་ནས། གཅིག་ཏུ་བརྒྱུད་པ་རབ་ཏུ་བརྗོད་ཅིང་ཕྱོགས་བཅུ་རྒྱས་པར་ཁྱབ་པར་གྱུར་ཏོ། །དུས་གསུམ་གྱི་དེ་བཞིན་གཤེགས་པ་ཐམས་ཅད་དང་མཉམ་པའི་སྙིང་པོ་བྱང་ཆུབ་ཀྱི་སྤྲིན་མང་པོ་མངོན་པར་འཐོན་ནས། དེ་བཞིན་གཤེགས་པ་ཐམས་ཅད་མངོན་པར་བྱང་ཆུབ་པའི་རྒྱན་བྱུང་བ་ཡོངས་སུ་སྟོན་ཅིང་། ཕྱོགས་བཅུ་རྒྱས་པར་ཁྱབ་པར་གྱུར་ཏོ། །དམྱིགས་པ་ཐམས་ཅད་ལས་ཀླུའི་དབང་པོའི་ལུས་གྱི་སྤྲིན་མང་པོ་མངོན་པར་འཐོན་ནས། སྤོས་སྣ་ཚོགས་ཀྱི་ཆར་རབ་ཏུ་འབེབས་ཤིང་ཕྱོགས་བཅུ་རྒྱས་པར་ཁྱབ་པར་གྱུར་ཏོ། །འགྲོ་བ་ཐམས་ཅད་ཀྱི་དབང་པོའི་ལུས་དང་འདྲ་བའི་སྤྲིན་མང་པོ་མངོན་པར་འཐོན་ནས། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ཡོངས་སུ་བརྗོད་པ་བྱེད་ཅིང་།
ཕྱོགས་བཅུ་རྒྱས་པར་ཁྱབ་པར་གྱུར་ཏོ། །ཞིང་ཡོངས་སུ་དག་པ་རིན་པོ་ཆེ་ཐམས་ཅད་ཀྱི་རང་བཞིན་ཡོངས་ཀྱི་གཟུགས་བརྙན་གྱི་སྤྲིན་མང་པོ་མངོན་པར་འཐོན་ནས། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་བསྐོར་བ་མངོན་པར་སྟོན་ཅིང་། ཕྱོགས་བཅུ་རྒྱས་པར་ཁྱབ་པར་གྱུར་ཏོ། །དེ་དག་ལ་སྩོགས་པ་བྱང་ཆུབ་སེམས་དཔའ་དེ་དག་གི་བྱིན་གྱི་རླབས་དང་། ཆོས་སྣང་བ་རྒྱ་མཚོ་བསམ་གྱིས་མྱི་ཁྱབ་པ་རབ་ཏུ་ཐོབ་པའི་ཆོས་ཉིད་ཀྱིས་རྒྱན་ཆེན་པོ་རྣམ་པར་སྤྲུལ་པའི་སྤྲིན་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་བྱུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་འཇམ་དཔལ་གྱིས་སངས་རྒྱས་ཀྱི་བྱིན་གྱི་རླབས་ཀྱིས་རྣམ་པར་འཕྲུལ་པ་དེ་དག་ཡོངས་སུ་སྟོན་པ་བྱེད་ཅིང་ཕྱོགས་བཅུར་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཛེ་ཏའི་ཚལ་དུ་སངས་རྒྱས་བྱིན་གྱི་རླབས། །མཐའ་ཡས་རྒྱ་ཆེན་ཡོངས་སུ་བྱུང་ལ་ལྟོས། །དམིགས་པ་ཀུན་ལས་ལུས་ཀྱི་སྤྲིན་ཆེན་རྣམས། །མངོན་པར་འཐོན་ཅིང་ཕྱོགས་རྣམས་ཀུན་ཏུ་ཁྱབ། །བདེ་གཤེགས་སྲས་པོ་རྣམས་ཀྱི་སྣ་ཚོགས་རྒྱན། །ཁ་དོག་མཐའ་ཡས་རྒྱ་ཆེན་རྣམ་དག་པ། །སྟན་དང་དམྱིགས་པ་ཡོངས་སུ་བཅས་པ་ལ། །དེ་དག་ཐམས་ཅད་གཟུགས་བརྙན་འབྱུང་བ་སྣང་། །རྒྱན་རྣམས་སྣ་ཚོགས་རིན་ཆེན་འོད་འཕྲོའི་སྤྲིན། །བདེ་གཤེགས་སྲས་པོ་རྣམས་ཀྱིས་སྤུ་རྩེ་ལས། །སངས་རྒྱས་གསུང་རྣམས་རབ་ཏུ་སྒྲོག་བྱེད་ཅིང་། །ཞིང་རྣམས་ཀུན་གྱི་དབྱིངས་སུ་ཁྱབ་པར་འཕྲོ། །ཚངས་པའི་དབང་པོའི་གཟུགས་འདྲ་ལུས་རྣམས་དང་། །སྤྱོད་ལམ་རབ་ཏུ་ཞི་བ་དག་པའི་གཟུགས། །ཞིང་གི་མེ་ཏོག་ཀུན་ལས་མངོན་འཐོན་ཏེ། །བསམ་གཏན་ཡན་ལག་བརྗོད་ཅིང་ཀུན་ཏུ་འདོང་། །ཀུན་ཏུ་བཟང་པོ་འདྲ་བའི་རྒྱལ་བའི་སྲས། །མཚན་རབ་དཔེ་བྱད་བཟང་པོས་བརྒྱན་པའི་ལུས། །གྲངས་མྱེད་བསམ་ཡས་བདེ་གཤེགས་བ་སྤུ་ལས། །སྤྲུལ་པ་དེ་འདྲ་ཐོགས་པ་མྱེད་པར་འབྱུང་། །བདེ་གཤེགས་སྲས་པོ་དུས་
གསུམ་བྱུང་བ་རྣམས། །ཡོན་ཏན་རྒྱ་མཚོའི་ལེགས་པ་བརྗོད་པ་དག །རྒྱ་མཚོ་ཆེ་མཉམ་རྒྱན་སྤྲིན་དེ་དག་ཀུན། །ཛེ་ཏའི་ཚལ་ན་གནས་ཤིང་རབ་ཏུ་བརྗོད། །ཕྱོགས་རྣམས་ཀུན་གྱི་སེམས་ཅན་ཡོངས་ཀྱི་ལས། །རྒྱ་མཚོ་ཆེན་པོ་སྣ་ཚོགས་མ་ལུས་པར། །ཛེ་ཏའི་ཚལ་གྱི་ཤིང་གི་གཟུགས་རྣམས་ཀྱི། །གསེབ་ནས་བྱུང་བར་གྱུར་པ་ཀུན་ཏུ་གྲག །དུས་གསུམ་བྱུང་བའི་རྒྱལ་བ་ཐམས་ཅད་ཀྱི། །ཞིང་རྣམས་ཀུན་གྱི་མ་ལུས་རྣམ་འཕྲུལ་བ། །ཞིང་རྣམས་རྒྱ་མཚོའི་རྡུལ་སྙེད་དེ་དག་ཀྱང་། །སོ་སོའི་དམྱིགས་ཀྱིས་དམིགས་པར་གྱུར་པ་སྣང་། །སངས་རྒྱས་ཕྱོགས་ཀྱི་ཞིང་རྣམས་རྒྱ་མཚོའི་སྤྲིན། །སྤུ་རྩེ་རེ་རེར་སྣ་ཚོགས་རྣམ་ཕྱེ་བའི། །སངས་རྒྱས་གནས་རྣམས་སྐད་ཅིག་རེ་རེར་སྣང་། །དེ་དག་ལ་ཡང་སངས་རྒྱས་སྤྲིན་མང་བཞུགས། །འགྲོ་དང་མཉམ་པར་ཕྱོགས་རྣམས་ཀུན་བཀང་ཞིང་། །སེམས་ཅན་ཐབས་ཀྱིས་ཡོངས་སུ་སྨིན་པར་བྱེད། །དེ་དག་འོད་ལས་སྤོས་ཀྱི་འོད་འཕྲོ་དང་། །མེ་ཏོག་ཕལ་ཆེན་རྒྱ་མཚོའི་སྤྲིན་ཀྱང་འབྱུང་། །མཁའ་ལྟར་ཚད་མྱེད་རིན་ཆེན་གཞལ་མེད་ཁང་། །མ་ལུས་རྒྱན་རབ་ཀུན་གྱིས་རྣམ་མཛེས་པ། །དེ་དག་ཐམས་ཅད་ཕྱོགས་རྣམས་ཀུན་ཁྱབ་བྱེད། །ཞིང་དང་སྙིང་པོ་བྱང་ཆུབ་དེ་བཞིན་ནོ། །དུས་གསུམ་བྱུང་བའི་རྒྱལ་བའི་སྲས་རྣམས་ཀྱིས། །ཀུན་ཏུ་བཟང་པོའི་སྤྱོད་པའི་རྣམ་ཚུལ་དུ། །ཞིང་རྣམས་རྒྱ་མཚོ་རྣམ་པར་དག་བྱས་པའི། །རྒྱན་རབ་སྣ་ཚོགས་འགྲོ་ལྟར་ཚད་མྱེད་པ། །ཕྱོགས་རྣམས་དུས་གསུམ་ཀུན་ཏུ་གང་བྱུང་རྣམས། །བསྐལ་པ་རྒྱ་མཚོ་ཆེན་པོར་རྣམ་སྦྱངས་པ། །དེ་དག་ཀུན་ཀྱང་ཛེ་ཏའི་ནགས་ཚལ་གྱི། །བར་སྣང་མཁའ་ལ་གཟུགས་བརྙན་ཚུལ་དུ་སྣང་། །དེ་ནས་བྱང་ཆུབ་སེམས་དཔའ་སངས་རྒྱས་ཀྱི་ཏིང་ངེ་འཛིན་གྱིས། རྒྱུད་ཤིན་ཏུ་སྣང་བར་བྱས་པ་དེ་དག་ལས། བྱང་ཆུབ་སེམས་དཔའ་རེ་རེས་ཀྱང་། སྙིང་རྗེ་ཆེན་པོའི་སྒོ་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་དུ་ཞུགས་པར་གྱུར་ནས། དེ་དག་དེ་བས་
ཀྱང་འགྲོ་བ་ཐམས་ཅད་ལ་ཕན་པ་དང་། ཡོངས་སུ་བསྡུ་བའི་དོན་དུ་ཞུགས་པར་གྱུར་ཏེ། དེ་ལྟར་མཉམ་པར་བཞག་པ་དེ་དག་གི་བ་སྤུའི་སྒོ་རེ་རེ་ནས་ཀྱང་། འོད་ཟེར་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་པར་གྱུར་ཏེ། འོད་ཟེར་དེ་དག་གི་སྒོ་རེ་རེ་ནས་ཀྱང་། བྱང་ཆུབ་སེམས་དཔའ་འཕྲུལ་བའི་སྤྲིན་འཇིག་རྟེན་གྱི་དབང་པོ་ཐམས་ཅད་དང་འདྲ་བའི་ལུས་དང་། འགྲོ་བ་ཐམས་ཅད་ལ་མངོན་པར་ལྟ་བའི་ལུས་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། འཕྲོད་པའི་ལུས་དང་ལྡན་པ་མངོན་པར་འཐོན་ཏེ། མངོན་པར་འཐོན་ནས་ཀྱང་། ཕྱོགས་ཐམས་ཅད་ཀྱི་ཆོས་ཀྱི་དབྱིངས་རྒྱས་པར་བཀང་ནས། སེམས་ཅན་ཐམས་ཅད་ཡང་དག་པར་བསྐུལ་ཞིང་ཡོངས་སུ་སྨིན་པར་བྱ་བ་དང་། གདུལ་བར་བྱེད་དོ། །ལྷའི་གནས་ན་ཤི་འཕོ་བ་ཡོངས་སུ་བསྟན་པའི་སྒོ་དང་། འཇིག་རྟེན་གྱི་ཁམས་ཐམས་ཅད་དུ་སྐྱེ་བ་ཡོངས་སུ་བསྟན་པའི་སྒོ་དང་། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ཡོངས་སུ་བསྟན་པའི་སྒོ་དང་། རྨི་ལམ་ཡོངས་སུ་བསྟན་པའི་སྒོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་སེམས་ཅན་ཡོངས་སུ་བསྐུལ་བ་བྱེད་དོ། །བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱིས་བྱུང་བའི་སྒོ་དང་། འཇིག་རྟེན་གྱི་ཁམས་ཡོངས་སུ་བསྐྱོད་པའི་སྒོ་དང་། སྦྱིན་པའི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་བསྟན་པའི་སྒོ་དང་། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་ལ་ནན་ཏན་དུ་བྱ་བ་དང་། རབ་ཏུ་བསྒྲུབ་པའི་སྒོ་དང་། ཡན་ལག་དང་ཉིང་ལག་གཅོད་པའི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་བསྟན་པའི་སྒོ་དང་། བྱང་ཆུབ་སེམས་དཔའི་རྣམ་པར་འཕྲུལ་པ་ཆེན་པོས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་བསྟན་པའི་སྒོ་དང་། བྱང་ཆུབ་སེམས་དཔའི་བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་དང་། སངས་རྒྱས་ཀྱི་ཡེ་ཤེས་ཀྱི་ལམ་གྱི་དཀྱིལ་འཁོར་སྣང་བ་རབ་ཏུ་བརྗོད་པའི་སྒོ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་བཙལ་བའི་ཕྱིར་
ཆོས་ཀྱི་ཚིག་དང་ཡི་གེ་རེ་རེའི་ཕྱིར། ལུས་གྲངས་མེད་པ་ཡོངས་སུ་གཏང་བ་ཡོངས་སུ་བསྟན་པའི་སྒོ་དང་། དེ་བཞིན་གཤེགས་པ་ཐམས་ཅད་ཀྱི་དྲུང་དུ་འགྲོ་ཞིང་ཆོས་ཐམས་ཅད་ཡོངས་སུ་དྲི་བའི་སྒོ་དང་། དུས་ལ་ཇི་ལྟར་འབབ་པ་དང་། བསམ་པ་ཇི་ལྟ་བ་བཞིན་དུ་འགྲོ་བའི་དྲུང་དུ་འགྲོ་ཞིང་ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར་འགྱུར་བ་ཐོབ་པར་བྱ་བའི་ཚུལ་རྒྱ་མཚོ་སྣང་བའི་རྣམ་པར་དམྱིགས་པར་བྱ་བའི་སྒོ་དང་། བྱང་ཆུབ་སེམས་དཔའི་བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་བདུད་དང་། ཕས་ཀྱི་རྒོལ་བས་མྱི་ཚུགས་པའི་སྟོབས་ཀྱི་རྒྱལ་མཚན་ཡོངས་སུ་བསྟན་པའི་སྒོ་དང་། བཟོ་ཐམས་ཅད་ཤེས་ཤིང་མཁས་པ་དང་ལྡན་པའི་ཡེ་ཤེས་ཀྱིས་ཡོངས་སུ་བསྟན་པའི་སྒོ་དང་། འགྲོ་བ་ཐམས་ཅད་ལས་ཁྱད་པར་དུ་འཕགས་པར་ཤེས་ཤིང་མཁས་པ་དང་ལྡན་པའི་ཡེ་ཤེས་ཀྱིས་ཡོངས་སུ་བསྟན་པའི་སྒོ་དང་། སེམས་ཅན་ཐམས་ཅད་ཀྱི་བསམ་པའི་ཁྱད་པར་ཤེས་ཤིང་མཁས་པ་དང་ལྡན་པའི་ཡེ་ཤེས་ཀྱིས་ཡོངས་སུ་བསྟན་པའི་སྒོ་དང་། སེམས་ཅན་ཐམས་ཅད་ཀྱི་དབང་པོ་ལ་འཇུག་པའི་ཐབས་ཀྱིས་ཉོན་མོངས་པ་དང་། བག་ཆགས་སྣ་ཚོགས་ཡང་དག་པར་གཞོམ་པ་ལ་ཤེས་ཤིང་མཁས་པ་དང་ལྡན་པའི་ཡེ་ཤེས་ཀྱིས་ཡོངས་སུ་བསྟན་པའི་སྒོ་དང་། དེ་དག་ལ་སྩོགས་པ་སེམས་ཅན་ཡོངས་སུ་སྨིན་པར་བྱ་བ་དང་། གདུལ་བའི་ཐབས་དང་བསྡུ་བའི་སྒོ། སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་བྱང་ཆུབ་སེམས་དཔའ་དེ་དག་སེམས་ཅན་ཐམས་ཅད་ཀྱི་གནས་སུ་ཕྱིན་པར་སྣང་སྟེ། ལ་ལ་ནི་ལྷའི་གནས་སུ་ཕྱིན་པར་སྣང་ངོ་། །ལ་ལ་ནི་ཀླུའི་གནས་སུ་ཕྱིན་པར་སྣང་ངོ་། །ལ་ལ་ནི་གནོད་སྦྱིན་གྱི་གནས་སུ་ཕྱིན་པར་སྣང་ངོ་། །ལ་ལ་ནི་དྲི་ཟའི་གནས་སུ་ཕྱིན་པར་སྣང་ངོ་། །ལ་ལ་ནི་ལྷ་མ་ཡིན་གྱི་གནས་སུ་ཕྱིན་པར་སྣང་ངོ་། །ལ་ལ་ནི་ནམ་མཁའ་ལྡིང་གི་གནས་སུ་ཕྱིན་པར་སྣང་ངོ་། །ལ་ལ་ནི་མིའམ་ཅིའི་གནས་སུ་ཕྱིན་པར་སྣང་ངོ་། །ལ་ལ་ནི་ལྟོ་འཕྱེ་ཆེན་པོའི་གནས་སུ་ཕྱིན་པར་སྣང་ངོ་། །ལ་ལ་ནི་ཚངས་པའི་དབང་པོའི་གནས་སུ་ཕྱིན་པར་སྣང་
ངོ་། །ལ་ལ་ནི་མིའི་གནས་སུ་ཕྱིན་པར་སྣང་ངོ་། །ལ་ལ་ནི་གཤིན་རྗེའི་གནས་སུ་ཕྱིན་པར་སྣང་ངོ་། །ལ་ལ་ནི་ཡི་དགས་ཀྱི་གནས་ཐམས་ཅད་དུ་ཕྱིན་པར་སྣང་ངོ་། །ལ་ལ་ནི་སེམས་ཅན་དམྱལ་བའི་འཇིག་རྟེན་ཐམས་ཅད་དུ་ཕྱིན་པར་སྣང་ངོ་། །ལ་ལ་ནི་ཡི་དགས་ཀྱི་སྐྱེ་གནས་ཀྱི་རྒྱུད་ཐམས་ཅད་དུ་ཕྱིན་པར་སྣང་སྟེ། མཐོང་བས་འདུལ་བའི་སེམས་ཅན་དང་། ཐོས་པས་འདུལ་བ་དང་རྗེས་སུ་དྲན་པས་འདུལ་བ་དང་། དབྱངས་ཀྱི་དཀྱིལ་འཁོར་གྱིས་འདུལ་བ་དང་། མྱིང་གི་ཆུ་ཀླུང་གི་སྒྲས་འདུལ་བ་དང་། འོད་ཀྱི་དཀྱིལ་འཁོར་གྱིས་འདུལ་བ་དང་། འོད་ཟེར་གྱི་དྲ་བ་རབ་ཏུ་དགྱེ་བས་འདུལ་བ་དང་། སེམས་ཅན་རྣམས་ཀྱི་བསམ་པའི་ཚུལ་ཇི་ལྟ་བ་བཞིན་དུ་ཡོངས་སུ་སྨིན་པར་བྱ་བ་དང་། གདུལ་བའི་ཕྱིར་སྙིང་རྗེ་ཆེན་པོ་ཐ་མྱི་དད་པ་དང་སྨོན་ལམ་ཐ་མི་དད་པ་དང་ཡེ་ཤེས་ཐ་མྱི་དད་པ་དང་། སེམས་ཅན་ཡོངས་སུ་བསྡུ་བ་ཐ་མྱི་དད་པའི་ཚུལ་དུ་བྱང་ཆུབ་སེམས་དཔའ་དེ་དག་ཛེ་ཏའི་ཚལ་ནས་རྣམ་པར་འཕྲུལ་པའི་རྒྱན་རྣམ་པ་སྣ་ཚོགས་ཀྱིས་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དང་། སེམས་ཅན་གྱི་ཁམས་འབྱམ་ཀླས་པ་ཐམས་ཅད་དུ་རྒྱས་པར་འགེངས་པར་བྱེད་པར་སྣང་ཡང་དེ་བཞིན་གཤེགས་པའི་ཞབས་ཀྱི་དྲུང་ནས་མྱི་གཡོ་སྟེ། ལ་ལ་ནི་རང་གི་གནས་དང་ཁང་པ་བརྩེགས་པ་དང་། སྟན་དང་འཁོར་དང་བཅས་པས། ཕྱོགས་བཅུ་རྒྱས་པར་བྱེད་པར་སྣང་ཡང་། དེ་བཞིན་གཤེགས་པའི་ཞབས་ཀྱི་དྲུང་ནས་མྱི་གཡོའོ། །ལ་ལ་ནི་སྤྲུལ་པའི་སྤྲིན་རབ་ཏུ་འགྱེད་པར་སྣང་ངོ་། །ལ་ལ་ནི་སེམས་ཅན་ཡོངས་སུ་སྨིན་པར་བྱ་བའི་དོན་དུ་གཅིག་པུ་གཉིས་སུ་མྱེད་པར་འགྲོ་བར་སྣང་ཡང་། དེ་བཞིན་གཤེགས་པའི་འཁོར་གྱི་དཀྱིལ་འཁོར་ནས་མྱི་གཡོའོ། །ལ་ལ་ནི་དགེ་སྦྱོང་གི་གཟུགས། ལ་ལ་ནི་ཚངས་པའི་གཟུགས། ལ་ལ་ནི་བརྟུལ་ཞུགས་ཅན་ཐམས་ཅད་ཀྱི་ཆ་བྱད་དང་། ཆོ་ག་དང་ཆུ་ཞེང་གི་གཟུགས། ལ་ལ་ནི་སྨན་པའི་གཟུགས། ལ་ལ་ནི་ཚོང་པའི་གཟུགས། ལ་ལ་ནི་སྙན་པས་འཚོ་བའི་གཟུགས། ལ་ལ་
ནི་གར་མཁན་གྱི་གཟུགས། ལ་ལ་ནི་ལྷ་ཁྱེར་བའི་གཟུགས། ལ་ལ་ནི་བཟོ་ཐམས་ཅད་དང་ལྡན་པའི་གཟུགས་སུ་གྲོང་དང་གྲོང་ཁྱེར་དང་། གྲོང་རྡལ་དང་། ལྗོངས་དང་། ཁམས་དང་། རྒྱལ་པོའི་ཕོ་བྲང་འཁོར་དུ་ཕྱིན་པར་སྣང་སྟེ། དུས་ཀྱི་དབང་གིས་དུས་ཀྱི་རྗེས་སུ་འབྲང་ཞིང་མྱིང་དང་གཟུགས་དང་ལུས་མངོན་པར་བསྒྲུབ་པ་ཐ་དད་པ་དང་། ལུས་ཀྱི་ཁ་དོག་དང་དབྱིབས་ཚུལ་དང་འདྲ་བ་དང་དབྱངས་རྣམ་པ་ཐ་དད་པ་དང་། སྐད་རྣམ་པ་ཐ་དད་པ་དང་། སྤྱོད་ལམ་རྣམ་པ་ཐ་དད་པ་དང་། གནས་རྣམ་པ་ཐ་དད་པས་བྱང་ཆུབ་སེམས་དཔའི་སྤྱོད་པ་དང་། འགྲོ་བ་ཐམས་ཅད་མྱིག་འཕྲུལ་ལྟ་བུར་ཤེས་པ་དང་། བཟོའི་འཁོར་ཐམས་ཅད་རབ་ཏུ་བརྗོད་པ་དང་། འགྲོ་བ་ཐམས་ཅད་ཀྱི་ཤེས་པ་བརྗོད་པས་སྣང་བའི་སྒྲོན་མ་དང་། བདེ་བ་ཐམས་ཅད་ཀྱི་བྱིན་གྱི་རླབས་ཀྱིས་བརྒྱན་པ་དང་། ལས་ཐམས་ཅད་སྣང་བར་བྱེད་པའི་འོད་དང་ལྡན་པ་དང་། ཕྱོགས་ཐམས་ཅད་ཐེག་པ་ལ་གནས་པས་རབ་ཏུ་སྦྱོང་བ་དང་། བྱང་ཆུབ་སེམས་དཔའི་སྤྱོད་པ་ཆོས་ཐམས་ཅད་ཀྱི་དཀྱིལ་འཁོར་རབ་ཏུ་སྣང་བ་ལ་སྤྱོད་ཅིང་། སེམས་ཅན་ཡོངས་སུ་སྨྱིན་པར་བྱ་བ་དང་། གདུལ་བའི་དོན་དུ་གྲོང་དང་གྲོང་ཁྱེར་དང་། གྲོང་རྡལ་དང་ལྗོངས་དང་། ཁམས་དང་། རྒྱལ་པོའི་གནས་དག་དུ་ཕྱིན་པར་སྣང་ངོ་། །དེ་ནས་འཇམ་དཔལ་གཞོན་ནུར་གྱུར་པ་གནས་པ་མྱེད་པའི་ཁང་པ་བརྩེགས་པ་ན་འདུག་འདུག་པ་ལས་སྐལ་བ་མཐུན་པའི་བྱང་ཆུབ་སེམས་དཔའ་དེ་དག་དང་། རྟག་ཏུ་ཕྱི་བཞིན་འབྲང་བའི་ལག་ན་རྡོ་རྗེ་དག་དང་། འཇིག་རྟེན་ཐམས་ཅད་ཀྱི་ཉམས་བལྟ་བ་ལ་བརྩོན་ཞིང་སངས་རྒྱས་ཐམས་ཅད་བསྙེན་བཀུར་བར་སྨོན་པའི་སེམས་དང་ལྡན་པའི་ལུས་ཀྱི་རིས་སུ་གཏོགས་པའི་ལྷ་དག་དང་། སྔོན་གྱི་སྨོན་ལམ་གྱི་རྗེས་སུ་འབྲང་བའི་རྐང་གིས་འགྲོ་བའི་རིས་སུ་གཏོགས་པའི་ལྷ་དག་དང་། ཆོས་མཉན་པ་ལ་མངོན་པར་མོས་པའི་སའི་ལྷ་དག་དང་། སྙིང་རྗེ་ཆེན་པོ་ལ་བརྩོན་པའི་ལུ་མ་དང་། མཚོ་དང་མཚེའུ་དང་། རྫིང་བུ་དང་ཁྲོན་པ་དང་། ཆུ་ཀླུང་
གི་ལྷ་དག་དང་། ཤེས་རབ་ཀྱི་འོད་སྣང་བས་རབ་ཏུ་གསལ་བའི་མེའི་ལྷ་དག་དང་། རིན་པོ་ཆེའི་ཅོད་པན་ཐོགས་པའི་རླུང་གི་ལྷ་དག་དང་། ཆོས་ཀྱི་ཕྱོགས་སྣང་བ་ཁོང་དུ་ཆུད་པའི་ཕྱོགས་ཀྱི་ལྷ་དག་དང་། མ་རིག་པའི་མུན་པ་བསལ་བ་ལ་བརྩོན་པའི་མཚན་མོའི་ལྷ་དག་དང་། དེ་བཞིན་གཤེགས་པའི་ཉི་མ་མངོན་པར་བསྒྲུབ་པ་ལ་བརྩོན་པའི་ཉི་མའི་ལྷ་དག་དང་། ཆོས་ཀྱི་དབྱིངས་ཐམས་ཅད་ཀྱི་ནམ་མཁའ་བརྒྱན་པ་ལ་བརྩོན་པའི་ནམ་མཁའི་ལྷ་དག་དང་། འགྲོ་བ་ཐམས་ཅད་སྲིད་པའི་རྒྱ་མཚོ་ལས་བསྒྲལ་བར་བརྩོན་པའི་གང་ཆེན་མཚོའི་ལྷ་དག་དང་། ཐམས་ཅད་མཁྱེན་པ་ཉིད་དུ་ཚོགས་ཡང་དག་པར་བསྩགས་པ་ལ་བརྩོན་ཞིང་། དགེ་བའི་རྩ་བའི་སྤོ་མངོན་པར་འཕགས་པའི་སེམས་དང་ལྡན་པའི་རིའི་ལྷ་དག་དང་། འགྲོ་བ་ཐམས་ཅད་ཀྱི་ལུས་བརྒྱན་པར་བརྩོན་ཞིང་སངས་རྒྱས་ཐམས་ཅད་ཀྱི་ཁ་དོག་དང་བྱིན་གྱི་རླབས་ལ་སྨོན་ཅིང་བརྩོན་པའི་ཆུ་ཀླུང་གི་ལྷ་དག་དང་། འགྲོ་བ་ཐམས་ཅད་ཀྱི་སེམས་ཀྱི་གྲོང་རྡལ་ཡོངས་སུ་བསྐྱང་བར་བརྩོན་པའི་གྲོང་གི་ལྷ་དག་དང་། ཐམས་ཅད་མཁྱེན་པའི་ཆོས་ཀྱི་གྲོང་ཁྱེར་དུ་སྨོན་ཅིང་མོས་པའི་ཀླུའི་དབང་པོ་དག་དང་། སེམས་ཅན་ཐམས་ཅད་ཡོངས་སུ་བསྲུང་བ་ལ་ཞུགས་པའི་གནོད་སྦྱིན་གྱི་དབང་པོ་དག་དང་། སེམས་ཅན་ཐམས་ཅད་ཀྱི་དགའ་བའི་ཤུགས་རྣམ་པར་འཕེལ་བར་བྱ་བ་ལ་བརྩོན་པའི་དྲི་ཟའི་དབང་པོ་དག་དང་། ཡི་དགས་ཀྱི་རྒྱུད་ཐམས་ཅད་རྣམ་པར་བཟློག་པ་ལ་བརྩོན་པའི་གྲུལ་བུམ་གྱི་དབང་པོ་དག་དང་། སེམས་ཅན་ཐམས་ཅད་སྲིད་པའི་རྒྱ་མཚོ་ནས་གདོན་པའི་སྨོན་ལམ་གྱིས་ཞུགས་པའི་ནམ་མཁའ་ལྡིང་གི་དབང་པོ་དག་དང་། འཇིག་རྟེན་ཐམས་ཅད་ལས་འཕགས་པའི་དེ་བཞིན་གཤེགས་པའི་སྐུ་དང་། སྟོབས་ཡོངས་སུ་བསྒྲུབ་པར་སྨོན་ལམ་ཡོངས་སུ་བསྐྱེད་པའི་ལྷ་མ་ཡིན་གྱི་དབང་པོ་དག་དང་། དེ་བཞིན་གཤེགས་པ་མཐོང་བས་དགའ་བར་གྱུར་ཅིང་། ལུས་རབ་ཏུ་འདུད་པའི་ལྟོ་འཕྱེ་ཆེན་པོའི་དབང་པོ་དག་
དང་། འཁོར་བ་ལས་སྐྱོ་བའི་ཡིད་དང་ལྡན་ཞིང་ངོར་བལྟ་བའི་ལྷའི་དབང་པོ་དག་དང་། རིམ་གྲོ་ཆེན་པོ་རབ་ཏུ་བྱེད་ཅིང་ལུས་རབ་ཏུ་འདུད་པའི་ཚངས་པའི་དབང་པོ་དག་དང་། ལྷན་ཅིག་ཏུ་དེ་དག་གིས་རིམ་གྲོ་ཆེན་པོས་མངོན་པར་བསྟོད་དེ་མཆོད་ཅིང་། དེ་ལྟ་བུའི་བྱང་ཆུབ་སེམས་དཔའི་རྣམ་པར་གནོན་པའི་རྒྱན་ཕུན་སུམ་ཚོགས་པ་དང་ལྡན་པར་རང་གི་གནས་ནས་བྱུང་སྟེ། བཅོམ་ལྡན་འདས་ལ་གཡས་ཕྱོགས་སུ་བསྐོར་བ་ལན་བརྒྱ་ཕྲག་དུ་མ་ཞིག་ཏུ་བྱས་ནས། མཆོད་པ་རྣམ་པ་དུ་མས་མཆོད་དེ། བཅོམ་ལྡན་འདས་ཀྱི་སྤྱན་སྔ་ནས་ཕྱིར་བྱུང་ནས། ལྷོ་ཕྱོགས་ལོགས་སུ་ཡུལ་རྒྱུ་ཞིང་སོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་བདུན་པ། དེ་ནས་སངས་རྒྱས་ཀྱི་བྱིན་གྱི་རླབས་ཀྱིས། ཚེ་དང་ལྡན་པ་ཤཱ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ། བྱང་ཆུབ་སེམས་དཔའི་རྣམ་པར་འཕྲུལ་པའི་རྒྱན་ཕུན་སུམ་ཚོགས་པ་དེ་འདྲ་བས། ཛེ་ཏའི་ཚལ་ནས་བྱུང་སྟེ། ལྷོ་ཕྱོགས་ལོགས་སུ་འགྲོ་བ་མཐོང་ནས། དེ་འདི་སྙམ་དུ་གྱུར་ཏེ། བདག་ཀྱང་འཇམ་དཔལ་གཞོན་ནུར་གྱུར་པ་དང་ལྷན་ཅིག་ཏུ་ཡུལ་རྒྱུ་ཞིང་འགྲོའོ་སྙམ་ནས། དེ་དགེ་སློང་དྲུག་ཅུ་ཙམ་གྱིས་བསྐོར་ཅིང་མདུན་དུ་བྱས་ཏེ། རང་གི་གནས་ནས་བྱུང་ནས། བཅོམ་ལྡན་འདས་གང་ན་བ་དེར་སོང་སྟེ། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་འཚལ་ནས། བཅོམ་ལྡན་འདས་ལ་ཞུས་ཏེ། བཅོམ་ལྡན་འདས་ཀྱིས་གནང་བ་དང་། བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔ་ནས་ཕྱིར་བྱུང་སྟེ། འཇམ་དཔལ་གཞོན་ནུར་གྱུར་པ་གང་ན་བ་དེར་དགེ་སློང་ལྷན་ཅིག་ཏུ་སྤྱོད་པ་རབ་ཏུ་བྱུང་ནས་རིང་པོ་མ་ལོན་པར་གསར་དུ་ཞུགས་པ་ཤ་སྟག་སྟེ། འདི་ལྟར་དགེ་སློང་རྒྱ་མཚོའི་བློ་དང་། ལེགས་པར་བྱིན་པ་ཆེན་པོ་དང་། བསོད་ནམས་ཀྱི་འོད་དང་། བུ་ཆེན་པོ་དང་ཀུན་ཁྱབ་སྦྱིན་པ་དང་། རྣམ་དག་སྤྱོད་པ་དང་། ལྷའི་དཔལ་དང་། དབང་པོའི་བློ་གྲོས་དང་། ཚངས་པའི་དམ་པ་དང་། དགེ་སློང་ཞི་བའི་བློ་གྲོས་དང་། དེ་དག་ལ་
སྩོགས་པའི་དགེ་སློང་དྲུག་ཅུ་ཙམ་ཀུན་ཀྱང་། སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་བསྐྱེད་པ། མོས་པ་ཟབ་མོར་གྱུར་པ། དད་པའི་མྱིག་ཡོངས་སུ་དག་པ། སེམས་རྒྱ་ཆེན་པོས་ཡོངས་སུ་སྤྱོད་པ། སངས་རྒྱས་ཀྱི་ཕྱོགས་རྣམ་པར་བལྟ་བ་ལ་མཐུ་ཡོད་པ། ཆོས་ཀྱི་ངོ་བོ་ཉིད་དང་། རང་བཞིན་ངེས་པར་རྟོགས་པའི་སེམས་དང་ལྡན་པ། གཞན་ལ་ཕན་པར་གྱུར་པའི་བློ་ཅན། དེ་བཞིན་གཤེགས་པའི་ཡོན་ཏན་ལ་མངོན་པར་མོས་པ། འཇམ་དཔལ་གཞོན་ནུར་གྱུར་པས་ཆོས་བསྟན་པས་འདུལ་བ་ཤ་སྟག་དང་འགྲོགས་ཤིང་མདུན་དུ་བྱས་ཏེ་སྔོན་དུ་བདར་ནས། འཇམ་དཔལ་གཞོན་ནུར་གྱུར་པ་གང་ན་བ་དེར་དོང་ངོ་། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས་དེ་ལྟར་ལམ་དུ་ཞུགས་ཏེ། འདོང་བའི་ཚེ་དགེ་སློང་དེ་དག་ཀུན་ལ་བལྟས་ནས། དགེ་སློང་རྒྱ་མཚོའི་བློ་ལ་སྨྲས་པ། རྒྱ་མཚོའི་བློ་བྱང་ཆུབ་སེམས་དཔའ་འཇམ་དཔལ་གྱི་ལུས་མཚན་དང་དཔེ་བྱད་བཟང་པོས་རྣམ་པར་བརྒྱན་ཅིང་། ཡོངས་སུ་དག་པ། ལྷ་དང་མིར་བཅས་པ་བསམ་གྱིས་མྱི་ཁྱབ་པ་དང་། འོད་ཀྱི་དཀྱིལ་འཁོར་ཡོངས་སུ་དག་ཅིང་སེམས་ཅན་ཚད་མྱེད་པའི་དགའ་བ་ཡོངས་སུ་སྐྱེད་པ་དང་། འོད་ཟེར་གྱི་དྲ་བའི་རྒྱན་སེམས་ཅན་དཔག་ཏུ་མྱེད་པའི་སྡུག་བསྔལ་རབ་ཏུ་ཞི་བར་བྱེད་པ་དང་། འཁོར་ཕུན་སུམ་ཚོགས་པ་སྔོན་གྱི་དགེ་བའི་རྩ་བས་ཡོངས་སུ་བཟུང་བ་དང་། ལམ་གྱི་རྒྱན་འགྲོ་ན་ལམ་མྱིག་མངས་རིས་སུ་གནས་པ་དང་ལམ་རྣམ་པར་གནོན་པའི་རྒྱན་ཕྱོགས་ཀྱི་དཀྱིལ་འཁོར་ཐམས་ཅད་ལ་མངོན་པར་ལྟ་བར་གནས་པ་དང་། བསོད་ནམས་ཕུན་སུམ་ཚོགས་པའི་རྒྱན་གཡས་གཡོན་ནས་གཏེར་ཆེན་པོ་མངོན་པར་འཐོན་པ་དང་སྔོན་གྱི་སངས་རྒྱས་ལ་རིམ་གྲོ་བྱས་པའི་དགེ་བའི་རྩ་བ་དང་རྒྱུ་མཐུན་པས། ཤིང་གི་གསེབ་ཐམས་ཅད་ནས་རྒྱན་མང་པོ་འབྱུང་བ་དང་། འཇིག་རྟེན་གྱི་དབང་པོ་ཐམས་ཅད་ལ་མཆོད་པའི་སྤྲིན་གྱི་ཆར་མངོན་པར་འབེབས་ཤིང་བཏུད་དེ་ཕྱག་འཚལ་བ་དང་། ཕྱོགས་བཅུ་ནས་དེ་བཞིན་གཤེགས་པ་ཐམས་ཅད་ཀྱིས་འོད་
ཟེར་གྱི་དྲ་བའི་དཀྱིལ་འཁོར་མང་པོ་བཀྱེ་བ། སངས་རྒྱས་ཀྱི་ཆོས་ཐམས་ཅད་རབ་ཏུ་སྒྲོག་ཅིང་སྤྱི་བོར་འཆར་བ་ལ་ལྟོས་ཤིག་ཅེས་དེ་དག་ལ་སོགས་པ་ཚེ་དང་ལྡན་པ་ཤཱ་རིའི་བུས། འཇམ་དཔལ་གཞོན་ནུར་གྱུར་པ་ལམ་དུ་ཞུགས་པའི་ཡོན་ཏན་གྱི་རྒྱན་ཚད་མེད་པ་དག །དགེ་སློང་དེ་དག་ལ་ཡོངས་སུ་བསྟན་ཏོ། །བརྗོད་དོ་བཤད་དོ། །སྨོས་སོ། །བཀྲོལ་ལོ། །རབ་ཏུ་བརྗོད་དོ། །རྣམ་པར་ཕྱེའོ། །གསལ་བར་བྱས་སོ། །དེ་ལྟར་གནས་བརྟན་ཤཱ་རིའི་བུས་འཇམ་དཔལ་གཞོན་ནུར་གྱུར་པའི་ཡོན་ཏན་ཅི་ཙམ་ཅི་ཙམ་དུ་བརྗོད་པ་དེ་ཙམ་དེ་ཙམ་དུ་དགེ་སློང་དེ་དག་གི་སེམས་རྣམ་པར་དག་པར་གྱུར་ཏོ། །རབ་ཏུ་དང་བར་གྱུར་ཏོ། །དགའ་བའི་ཤུགས་རྣམ་པར་འཕེལ་བར་གྱུར་ཏོ། །མོས་པ་སྐྱེས་པར་གྱུར་ཏོ། །དེ་དག་གི་སེམས་ཀྱི་རྒྱུད་ལས་སུ་རུང་བར་གྱུར་ཏོ། །དབང་པོ་རབ་ཏུ་དང་བར་གྱུར་ཏོ། །ཡིད་བདེ་བ་རྣམ་པར་འཕེལ་བར་གྱུར་ཏོ། །ཡིད་མྱི་བདེ་བ་རབ་ཏུ་བྱང་བར་གྱུར་ཏོ། །སེམས་ཀྱི་སྐྱོན་དང་བྲལ་བར་གྱུར་ཏོ། །སྒྲིབ་པ་ཐམས་ཅད་ཕྱིར་ལྡོག་པར་གྱུར་ཏོ། །སངས་རྒྱས་བལྟ་བ་ལ་མངོན་པར་མོས་པར་གྱུར་ཏོ། །སངས་རྒྱས་ཀྱི་ཆོས་ལ་སེམས་རབ་ཏུ་གཞོལ་བར་གྱུར་ཏོ། །བྱང་ཆུབ་སེམས་དཔའི་དབང་པོ་ཡོངས་སུ་དག་པར་གྱུར་ཏོ། །བྱང་ཆུབ་སེམས་དཔའི་དད་པའི་ཤུགས་སྐྱེས་པར་གྱུར་ཏོ། །སྙིང་རྗེ་ཆེན་པོ་བྱུང་བར་གྱུར་ཏོ། །ཕ་རོལ་ཏུ་ཕྱིན་པའི་དཀྱིལ་འཁོར་གནོན་པར་གྱུར་ཏོ། །སྙིང་རྗེ་ཆེན་པོ་ཡོངས་སུ་སྐྱེས་པར་གྱུར་ཏོ། །ཕྱོགས་བཅུའི་སངས་རྒྱས་རྒྱ་མཚོ་ཡོངས་སུ་སྣང་བར་གྱུར་ཏོ། །དེ་ལྟར་དེ་དག་ཐམས་ཅད་མཁྱེན་པ་ཉིད་དུ་མོས་པའི་ཤུགས་ཐོབ་པར་གྱུར་ནས་འདི་སྐད་འཛེར་ཏོ། །མཁན་པོ་བདག་ཅག་ཀྱང་སྐྱེས་བུ་དམ་པ་དེའི་དྲུང་དུ་ཕྱིན་པར་མཛད་དུ་གསོལ་ཞེས་ནས། དེ་ནས་ཚེ་དང་ལྡན་པ་ཤཱ་རིའི་བུ་དགེ་སློང་དེ་དག་དང་འགྲོགས་ཏེ། འཇམ་དཔལ་གཞོན་ནུར་གྱུར་པ་གང་ན་བ་དེར་སོང་ནས་འདི་སྐད་ཅེས་སྨྲས་སོ། །འཇམ་དཔལ་དགེ་སློང་འདི་དག་ནི་ཁྱོད་ལ་བལྟ་བར་འདོད་པ་དག་གོ །དེ་ནས་འཇམ་དཔལ་གཞོན་ནུར་གྱུར་པས་དགེ་སློང་དེ་དག་དང་། འཁོར་
གྱི་དཀྱིལ་འཁོར་གྱི་སའི་ཕྱོགས་དེ་ཙམ་དང་བཅས་པར་གླང་པོའི་ལྟ་སྟངས་ཀྱི་གཟི་དང་ལྡན་པར་ཁྱབ་པར་བལྟས་པ་དང་། དེའི་རྗེས་ལ་དགེ་སློང་དེ་དག་གིས་འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་སྤྱི་བོས་ཕྱག་འཚལ་ནས། ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །སྐྱེས་བུ་དམ་པ་ཁྱོད་མཐོང་བ་དང་། ཁྱོད་ལ་ཕྱག་འཚལ་བའི་དགེ་བའི་རྩ་བ་འདི་དང་བདག་ཅག་གི་དགེ་བའི་རྩ་བ་གཞན་ཁྱོད་ཀྱིས་མཁྱེན་པ་དང་། མཁན་པོས་ཐུགས་སུ་ཆུད་པ་དང་། གང་ཡང་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་མངོན་དུ་གཟིགས་པའི་དགེ་བའི་རྩ་བ་དེས། ཁྱོད་ཅི་འདྲ་བ་དེ་འདྲ་བར་གྱུར་ཏེ། རྣམ་པ་འདི་འདྲ་བའི་ལུས་ཐོབ་པར་ཤོག་ཤིག །རྣམ་པ་འདི་འདྲ་བའི་དབྱངས་དང་། རྣམ་པ་འདི་འདྲ་བའི་མཚན་དང་། འདི་ལྟ་བུའི་རྣམ་པར་འཕྲུལ་པ་དག་ཀྱང་ཁྱོད་ཇི་ལྟ་བ་བཞིན་དུ་ཐོབ་པར་ཤོག་ཤིག་ཅེས་དགེ་སློང་དེ་དག་གིས་དེ་སྐད་དུ་སྨྲས་པ་དང་། འཇམ་དཔལ་གཞོན་ནུར་གྱུར་པས་དགེ་སློང་དེ་དག་ལ་འདི་སྐད་ཅེས་སྨྲས་སོ། །དགེ་སློང་དག་ཡོངས་སུ་མྱི་སྐྱོ་བའི་སེམས་བསྐྱེད་པ་བཅུ་དང་ལྡན་པའི་རིགས་ཀྱི་བུའམ་རིགས་ཀྱི་བུ་མོ་ཐེག་པ་ཆེན་པོ་ལ་ཞུགས་པ་ནི་བྱང་ཆུབ་སེམས་དཔའི་ས་ལྟ་སྨོས་ཀྱང་ཅི་སྨོས་ཀྱི། དེ་བཞིན་གཤེགས་པའི་ས་ཡང་གནོན་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པ་ཐམས་ཅད་བལྟ་བ་དང་། བསྙེན་བཀུར་བ་དང་། མཆོད་པ་དང་རིམ་གྲོ་བྱ་བ་ལ་ཡོངས་སུ་མི་སྐྱོ་བའི་སེམས་བསྐྱེད་པ་དང་། དགེ་བའི་རྩ་བ་ཐམས་ཅད་བསྩགས་པ་ལས་ཕྱིར་མི་ལྡོག་ཅིང་ཡོངས་སུ་མྱི་སྐྱོ་བའི་སེམས་བསྐྱེད་པ་དང་། ཆོས་ཐམས་ཅད་བཙལ་བ་ལ་ཡོངས་སུ་མྱི་སྐྱོ་བའི་སེམས་བསྐྱེད་པ་དང་། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཐམས་ཅད་སྦྱོར་བ་ལ་ཡོངས་སུ་མྱི་སྐྱོ་བའི་སེམས་བསྐྱེད་པ་དང་། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ཡོངས་སུ་བསྒྲུབ་པ་ལ་ཡོངས་སུ་མྱི་སྐྱོ་བའི་སེམས་བསྐྱེད་པ་དང་། དུས་གཅིག་ནས་གཅིག་ཏུ་བརྒྱུད་པ་ཐམས་ཅད་དུ་འཇུག་པ་ལ་
ཡོངས་སུ་མི་སྐྱོ་བའི་སེམས་བསྐྱེད་པ་དང་། ཕྱོགས་བཅུའི་སངས་རྒྱས་ཀྱི་ཞིང་རྒྱ་མཚོ་རྒྱས་པར་དགང་ཞིང་ཡོངས་སུ་དག་པར་བྱ་བ་ལ། ཡོངས་སུ་མྱི་སྐྱོ་བའི་སེམས་བསྐྱེད་པ་དང་། སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་ཡོངས་སུ་མི་སྐྱོ་བའི་སེམས་བསྐྱེད་པ་དང་། ཞིང་དང་བསྐལ་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་མངོན་པར་བསྒྲུབ་པ་ལ་ཡོངས་སུ་མི་སྐྱོ་བའི་སེམས་བསྐྱེད་པ་དང་། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་ཏུ་ཕྱིན་པ་སྦྱར་བས་སེམས་ཅན་གཅིག་ཡོངས་སུ་སྨིན་པར་བྱ་བའི་ཚུལ་དུ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས། དེ་བཞིན་གཤེགས་པའི་སྟོབས་གཅིག་ཡོངས་སུ་བསྒྲུབ་པ་ལ་ཡོངས་སུ་མི་སྐྱོ་བའི་སེམས་བསྐྱེད་པའོ། །དགེ་སློང་དག་ཡོངས་སུ་མི་སྐྱོ་བའི་སེམས་བསྐྱེད་པ་བཅུ་པོ་འདི་དག་དང་ལྡན་པའི་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་ནི་དགེ་བའི་རྩ་བ་ཐམས་ཅད་ལ་ཡོངས་སུ་འགྲུབ་པར་འགྱུར་རོ། །འཁོར་བའི་རྒྱུད་ཐམས་ཅད་ལས་ཕྱིར་ལྡོག་པར་འགྱུར་རོ། །འཇིག་རྟེན་གྱི་རྒྱུད་ཐམས་ཅད་ལས་གྱེན་དུ་འཕགས་པར་འགྱུར་རོ། །ཉན་ཐོས་དང་རང་སངས་རྒྱས་ཀྱི་ས་ཐམས་ཅད་ལས་ཡོངས་སུ་འདའ་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རིགས་དང་རྒྱུད་དུ་འབྱུང་བར་འགྱུར་རོ། །བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་ལ་ཡང་དག་པར་འགྲུབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་ཡོན་ཏན་གྱི་ནན་ཏན་ལ་རྣམ་པར་དག་པར་འགྱུར་རོ། །བྱང་ཆུབ་སེམས་དཔའི་སྤྱོད་པ་ཐམས་ཅད་ལ་ཡོངས་སུ་དག་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྟོབས་ལ་ཡང་དག་པར་འབྱུང་བར་འགྱུར་རོ། །བདུད་དང་ཕས་ཀྱི་རྒོལ་བ་ཐམས་ཅད་རབ་ཏུ་འདུལ་བར་འགྱུར་རོ། །བྱང་ཆུབ་སེམས་དཔའི་ས་ཡོངས་སུ་གནོན་པར་འགྱུར་རོ། །དེ་བཞིན་གཤེགས་པའི་ས་དང་ཤིན་ཏུ་ཉེ་བར་འགྱུར་རོ། །དེ་ནས་དགེ་སློང་དེ་
དག་གིས་ཆོས་ཀྱི་ཚུལ་འདི་ཐོས་ནས། སངས་རྒྱས་ཐམས་ཅད་རྣམ་པར་མཐོང་བ་ལ་ཆགས་པ་མེད་པའི་མིག་གི་ཡུལ་ཞེས་བྱ་བའི་ཏིང་ངེ་འཛིན་ཐོབ་པར་གྱུར་ཏོ། །དེའི་མཐུས་ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་ན་བཞུགས་པའི། དེ་བཞིན་གཤེགས་པའི་འཁོར་གྱི་དཀྱིལ་འཁོར་མཐོང་བར་གྱུར་ཏོ། །འཇིག་རྟེན་གྱི་ཁམས་དེ་དག་གི་འགྲོ་བའི་རྒྱུད་དུ་སྐྱེས་པའི་སེམས་ཅན་དེ་དག་ཀྱང་མ་ལུས་པ་མཐོང་བར་གྱུར་ཏོ། །འཇིག་རྟེན་གྱི་ཁམས་དེ་དག་གི་སེམས་ཅན་རྣམས་ཀྱང་མ་ལུས་པར་མཐོང་བར་གྱུར་ཏོ། །འཇིག་རྟེན་གྱི་ཁམས་དེ་དག་ཀྱང་རྣམ་པར་ཕྱེ་བ་སྣ་ཚོགས་སུ་མཐོང་བར་གྱུར་ཏོ། །འཇིག་རྟེན་གྱི་ཁམས་དེ་དག་ན་རྡུལ་ཤིན་ཏུ་ཕྲ་བ་ཇི་སྙེད་ཡོད་པ་དེ་དག་ཀྱང་བགྲང་བའི་ཚུལ་གྱིས་རབ་ཏུ་ཤེས་པར་གྱུར་ཏོ། །སེམས་ཅན་དེ་དག་གི་རིན་པོ་ཆེའི་གནས་དང་། ལོངས་སྤྱོད་དེ་དག་ཀྱང་མཐོང་བར་གྱུར་ཏོ། །དེ་བཞིན་གཤེགས་པ་དེ་དག་གི་དབྱངས་ཀྱི་ཡན་ལག་རྒྱ་མཚོ་ཡང་ཐོས་པར་གྱུར་ཏོ། །ཆོས་བསྟན་པ་དེ་དག་ཀྱང་ཚིག་དང་ཡི་གེ་དང་ངེས་པའི་ཚིག་དང་སྐད་དང་མིང་དང་བརྡས་ཡོངས་སུ་ཤེས་པར་གྱུར་ཏོ། །སེམས་ཅན་དེ་དག་གི་སེམས་དང་དབང་པོ་དང་བསམ་པ་ལ་ཡང་རྣམ་པར་ལྟ་བར་གྱུར་ཏོ། །སྔོན་གྱི་མཐའ་དང་ཕྱི་མའི་མཐའི་ཚེ་རབས་བཅུ་ཡང་རྗེས་སུ་དྲན་པར་གྱུར་ཏོ། །དེ་བཞིན་གཤེགས་པ་དེ་དག་གི་ཆོས་ཀྱི་འཁོར་ལོ་བཅུའི་ངེས་པའི་ཚིག་མངོན་པར་བསྒྲུབ་པ་ལ་ཡང་རབ་ཏུ་ཞུགས་པར་གྱུར་ཏོ། །རྫུ་འཕྲུལ་གྱི་རྣམ་པར་འཕྲུལ་པ་མངོན་པར་བསྒྲུབ་པ་བཅུ་ལ་ཡང་རབ་ཏུ་ཞུགས་པར་གྱུར་ཏོ། །བསྟན་པའི་ཚུལ་མངོན་པར་བསྒྲུབ་པ་བཅུ་ལ་ཡང་དག་པར་རབ་ཏུ་ཞུགས་པར་གྱུར་ཏོ། །རྗེས་སུ་བསྟན་པའི་ཚིག་མངོན་པར་བསྒྲུབ་པ་བཅུ་ལ་ཡང་རབ་ཏུ་ཞུགས་པར་གྱུར་ཏོ། །དེ་བཞིན་གཤེགས་པ་དེ་དག་གི་སོ་སོ་ཡང་དག་པར་རིག་པའི་ཚུལ་མངོན་པར་བསྒྲུབ་པ་བཅུ་ལ་ཡང་རབ་ཏུ་ཞུགས་པར་གྱུར་ཏེ། ཏིང་ངེ་
འཛིན་དེ་ཐོབ་མ་ཐག་ཏུ། བྱང་ཆུབ་ཀྱི་སེམས་ཀྱི་ཡན་ལག་སྟོང་ཕྲག་བཅུ་ཡང་ཡོངས་སུ་རྫོགས་པར་གྱུར་ཏོ། །ཏིང་ངེ་འཛིན་སྟོང་ཕྲག་བཅུ་ཡང་ཡོངས་སུ་ནོན་པར་གྱུར་ཏོ། །ཕ་རོལ་ཏུ་ཕྱིན་པའི་ཡན་ལག་སྟོང་ཕྲག་བཅུ་ཡང་རྣམ་པར་དག་པར་གྱུར་ཏེ། སྣང་བ་ཆེན་པོ་རབ་ཏུ་ཐོབ་ཅིང་ཤེས་རབ་ཆེན་པོའི་དཀྱིལ་འཁོར་གྱི་སྣང་བར་གྱུར་པ་དེ་དག་གིས་བྱང་ཆུབ་སེམས་དཔའི་མངོན་པར་ཤེས་པ་བཅུ་རབ་ཏུ་ཐོབ་པར་གྱུར་ཏོ། །དེ་ལྟར་མངོན་པར་ཤེས་པའི་མྱུ་གུ་གཞོན་ཞིང་ཤིན་ཏུ་ཕྲ་བ་ཐོབ་སྟེ། བྱང་ཆུབ་ཏུ་སེམས་བསྐྱེད་པ་བརྟན་པ་ལ་གནས་པ་དེ་དག་འཇམ་དཔལ་གཞོན་ནུར་གྱུར་པས། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ཡང་དག་པར་བསྐུལ་ནས་རབ་ཏུ་བཀོད་དོ། །དེ་ལྟར་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་རབ་ཏུ་གནས་པ་དེ་དག་སྨོན་ལམ་ཆེན་པོ་རྒྱ་མཚོ་ལ་ཞུགས་ཤིང་མངོན་པར་སྒྲུབ་པར་གྱུར་ཏོ། །དེ་ལྟར་སྨོན་ལམ་ཆེན་པོ་རྒྱ་མཚོས་མངོན་པར་བསྒྲུབ་པའི་སེམས་རྣམ་པར་དག་པས་ལུས་ཡོངས་སུ་དག་པ་རབ་ཏུ་ཐོབ་པར་གྱུར་ཏོ། །ལུས་རྣམ་པར་དག་པས་ལུས་ཡང་བ་རབ་ཏུ་ཐོབ་པར་གྱུར་ཏོ། །དེ་ལྟར་ལུས་རྣམ་པར་དག་པ་དང་ལུས་ཡང་བས་མངོན་པར་ཤེས་པའི་སྒོ་དེ་དག་ཤིན་ཏུ་ཡངས་པར་བྱེད་པས། མི་ཉམས་ཤིང་རྗེས་སུ་འབྲང་བའི་མངོན་པར་ཤེས་པ་རབ་ཏུ་ཐོབ་པར་གྱུར་ཏོ། །མངོན་པར་ཤེས་པ་དེ་ཐོབ་པས་འཇམ་དཔལ་གཞོན་ནུར་གྱུར་པའི་རྐང་པའི་དྲུང་ནས་ཀྱང་མི་གཡོ་ལ། སངས་རྒྱས་ཀྱི་ཆོས་ཐམས་ཅད་ཡོངས་སུ་བསྒྲུབ་པའི་ཕྱིར་ཕྱོགས་བཅུར་ཡང་དེ་བཞིན་གཤེགས་པ་ཐམས་ཅད་ཀྱི་སྐུའི་འཕྲིན་ལས་ཀྱི་སྤྲིན་མངོན་པར་བསྒྲུབ་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས། དགེ་སློང་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཀོད་ནས་མཐར་གྱིས་ཡུལ་རྒྱུ་ཞིང་ལྷོ་ཕྱོགས་ལོགས་སུ་སྐྱིད་པའི་འབྱུང་གནས་ཞེས་བྱ་བའི་གྲོང་རྡལ་ཆེན་པོ་གང་ན་བ་དེར་ལོགས་སུ་སོང་སྟེ། ཕྱིན་ནས་གྲོང་རྡལ་ཆེན་པོ་སྐྱིད་པའི་འབྱུང་གནས་ཀྱི་ཤར་
ཕྱོགས་ལོགས་ན་ནགས་ཚལ་ཆེན་པོ་སཱ་ལ་སྣ་ཚོགས་ཀྱི་རྒྱལ་མཚན་གྱི་རྒྱན་ཅེས་བྱ་བ་སྔོན་གྱི་སངས་རྒྱས་བཞུགས་བཞུགས་པའི་མཆོད་རྟེན་སེམས་ཅན་སྨིན་པར་མཛད་པའི་དོན་དུ། དེ་བཞིན་གཤེགས་པས་བྱིན་གྱིས་བརླབས་པ། ཞིང་མཐའ་ཡས་པར་མིང་གི་སྒྲ་རྗེས་སུ་གྲགས་པ། སྔོན་ཅད་བཅོམ་ལྡན་འདས་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། ཡོངས་སུ་གཏང་བར་དཀའ་བ་དུ་མ་ཡོངས་སུ་བཏང་བ་སྟེ། སའི་ཕྱོགས་དེ་ན་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་རྟག་ཏུ་རྒྱུན་མི་འཆད་པར་མཆོད་པ་ལ་བརྩོན་པའི་གནས་ཡོད་པ་དེར་འཁོར་དང་བཅས་ཏེ་ཕྱིན་ནས་དེར་འཇམ་དཔལ་གཞོན་ནུར་གྱུར་པས། མདོ་སྡེ་ཆོས་ཀྱི་དབྱིངས་ཀྱི་ཚུལ་རབ་ཏུ་སྣང་བ། ཞེས་བྱ་བ་མདོ་སྡེ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་འབྱུང་བ་བསྟན་ཏོ། །དེ་བསྟན་པའི་ཚེ་རྒྱ་མཚོ་ཆེན་པོ་ནས་ཀླུ་བྱེ་བ་ཁྲག་ཁྲིག་བརྒྱ་སྟོང་དུ་མ་ཉེ་བར་ལྷགས་ཏེ། དེ་དག་གིས་ཆོས་ཀྱི་ཚུལ་དེ་ཐོས་ནས། ཀླུའི་རྒྱུད་ལ་རྣམ་པར་སྨོད་ཅིང་། དེ་བཞིན་གཤེགས་པའི་ཡོན་ཏན་ལ་མོས་པར་གྱུར་ནས་ཀླུའི་རྒྱུད་རྣམ་པར་བཟློག་སྟེ། ལྷ་དང་མིར་སྐྱེ་བ་ཡོངས་སུ་འཛིན་པར་གྱུར་ནས། དེར་ཀླུ་སྟོང་ཕྲག་བཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །ཆོས་དེ་བསྟན་པའི་ཚེ་སེམས་ཅན་གྱི་ཁམས་མཐའ་ཡས་པ་དང་དབུས་མེད་པ། ཐེག་པ་གསུམ་གྱིས་དུས་གཞན་དང་གཞན་དུ་རྣམ་པར་དུལ་བར་གྱུར་ཏོ། །དེ་ནས་སྐྱིད་པའི་འབྱུང་གནས་ཀྱི་མི་རྣམས་ཀྱིས། འཇམ་དཔལ་གཞོན་ནུར་གྱུར་པ་སྐྱིད་པའི་འབྱུང་གནས་ཀྱི་གྲོང་རྡལ་དུ་ཕྱིན་ཏེ། སཱ་ལ་སྣ་ཚོགས་ཀྱི་རྒྱན་གྱི་མཆོད་རྟེན་གྱི་གཞི་འདི་ཉིད་ན་རྣམ་པར་སྤྱོད་དོ་ཞེས་ཐོས་ནས། དགེ་བསྙེན་ཚོང་དཔོན་ཤེས་རབ་ཆེན་པོ་ལ་སོགས་པ། དགེ་བསྙེན་ཕ་དང་། དགེ་བསྙེན་མ་དང་། ཁྱེའུ་དང་བུ་མོ་མང་པོ་དག་སོ་སོ་ནས་
འཁོར་ལྔ་བརྒྱ་ལྔ་བརྒྱ་དང་བཅས་ཏེ། སྐྱིད་པའི་འབྱུང་གནས་ཀྱི་གྲོང་རྡལ་ནས་བྱུང་ནས། འཇམ་དཔལ་གཞོན་ནུར་གྱུར་པ་གང་ན་བ་དེར་དོང་ངོ་། །དེ་ལ་དགེ་བསྙེན་ཤེས་རབ་ཆེན་པོ་ནི་དགེ་བསྙེན་བཟང་པོས་བྱིན་དང་། ལྷས་བྱིན་དང་། བསོད་ནམས་འོད་དང་། གྲགས་པའི་ལྷ་དང་གྲགས་པས་བྱིན་དང་། ཟླ་བའི་དཔལ་དང་། ཟླ་བ་དགའ་བོ་དང་། བློ་གྲོས་བཟང་པོ་དང་། བློ་གྲོས་ཆེན་པོ་དང་། སྒྲ་གཅན་བཟང་པོ་དང་། དགེ་བསྙེན་བཟང་པོའི་དཔལ་དང་། དེ་དག་ལ་སོགས་པ་དགེ་བསྙེན་ལྔ་བརྒྱས་བསྐོར་ཅིང་མདུན་དུ་བྱས་ཏེ། འཇམ་དཔལ་གཞོན་ནུར་གྱུར་པ་གང་ན་བ་དེར་དོང་ནས། འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། འཇམ་དཔལ་གཞོན་ནུར་གྱུར་པ་ལ་ལན་གསུམ་དུ་བསྐོར་བ་བྱས་ནས། ཕྱོགས་གཅིག་ཏུ་འཁོད་དོ། །དེ་ལ་དགེ་བསྙེན་མ་ཤེས་རབ་ཆེན་མོ་ནི། དགེ་བསྙེན་མ་འོད་བཟང་མོ་དང་། ལུས་བཟང་མོ་དང་། དགེ་བ་ཡོད་པ་དང་། དགེ་བའི་དཔལ་དང་། ཟླ་བའི་འོད་དང་། དཔལ་གྱི་འོད་དང་། དཔལ་བཟང་མོ་དང་། དགེ་བསྙེན་མ་མིག་བཟང་མོ་དང་། དེ་དག་ལ་སོགས་པ་དགེ་བསྙེན་མ་ལྔ་བརྒྱས་བསྐོར་ཅིང་མདུན་དུ་བྱས་ཏེ། འཇམ་དཔལ་གཞོན་ནུར་གྱུར་པ་གང་ན་བ་དེར་དོང་ནས། འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། འཇམ་དཔལ་གཞོན་ནུར་གྱུར་པ་ལ་ལན་གསུམ་དུ་བསྐོར་བ་བྱས་ནས། ཕྱོགས་གཅིག་ཏུ་འཁོད་དོ། །དེ་ལ་ཚོང་དཔོན་གྱི་བུ་ནོར་བཟངས་ནི། ཚོང་དཔོན་གྱི་བུ་བརྟུལ་ཞུགས་བཟང་པོ་དང་། ཚུལ་ཁྲིམས་བཟང་པོ་དང་། ངང་ཚུལ་བཟང་པོ་དང་། རྣམ་པར་གནོན་པ་བཟང་པོ་དང་། བསམ་པ་བཟང་པོ་དང་། བློ་གྲོས་བཟང་པོ་དང་། བློ་བཟང་པོ་དང་། མིག་བཟང་པོ་དང་། ལག་པ་བཟང་པོ་དང་། ཚོང་དཔོན་གྱི་བུ་འོད་བཟང་པོ་དང་། དེ་དག་ལ་སོགས་པ་ཚོང་དཔོན་གྱི་བུ་ལྔ་བརྒྱས་བསྐོར་ཅིང་མདུན་དུ་བྱས་ཏེ། འཇམ་དཔལ་གཞོན་ནུར་གྱུར་པ་གང་ན་བ་དེར་དོང་ནས། འཇམ་དཔལ་གཞོན་ནུར་
གྱུར་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། འཇམ་དཔལ་གཞོན་ནུར་གྱུར་པ་ལ་ལན་གསུམ་བསྐོར་བ་བྱས་ཏེ། ཕྱོགས་གཅིག་ཏུ་འཁོད་དོ། །དེ་ལ་ཁྱིམ་བདག་ཤེས་རབ་ཆེན་པོའི་བུ་མོ་དགེ་བ་བཟང་མོ་ནི་བུ་མོ་བཟང་མོ་དང་། ཡིད་དུ་འོང་བའི་བཞིན་དང་། བརྟན་པའི་བློ་གྲོས་དང་། དཔལ་བཟང་མོ་དང་། ཚངས་པས་བྱིན་དང་། དཔལ་གྱི་འོད་དང་། བུ་མོ་འོད་བཟང་མོ་ལ་སོགས་པ་བུ་མོ་ལྔ་བརྒྱས་བསྐོར་ཅིང་མདུན་དུ་བྱས་ཏེ། འཇམ་དཔལ་གཞོན་ནུར་གྱུར་པ་གང་ན་བ་དེར་དོང་ནས། འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། འཇམ་དཔལ་གཞོན་ནུར་གྱུར་པ་ལ་ལན་གསུམ་དུ་བསྐོར་བ་བྱས་ནས། ཕྱོགས་གཅིག་ཏུ་འཁོད་དོ། །དེ་ནས་འཇམ་དཔལ་གཞོན་ནུར་གྱུར་པས་སྐྱིད་པའི་འབྱུང་གནས་ཀྱི་གྲོང་རྡལ་ནས་སྐྱེས་པ་དང་། བུད་མེད་དང་ཁྱེའུ་དང་བུ་མོ་དེ་དག་འདུས་ཏེ། འཁོད་པར་ཤེས་ནས་བསམ་པ་ཇི་ལྟ་བ་བཞིན་དུ་བསྟན་པའི་བྱིན་གྱི་ཟིལ་གྱིས་མནན་ཏེ་བྱམས་པ་ཆེན་པོའི་བྱིན་གྱིས་ཚིམ་པར་བྱས་ནས། སྙིང་རྗེ་ཆེན་པོའི་བྱིན་གྱིས་ཆོས་བསྟན་པ་མངོན་པར་བསྒྲུབས་ཏེ། ཡེ་ཤེས་ཀྱི་བྱིན་གྱིས་སེམས་དང་བསམ་པ་རྣམ་པར་ཕྱེ་ནས། སོ་སོ་ཡང་དག་པར་རིག་པ་ཆེན་པོས་ཆོས་བསྟན་པར་དགའ་སྟེ། ཚོང་དཔོན་གྱི་བུ་ནོར་བཟངས་ལ་བལྟས་སོ། །ཚོང་དཔོན་གྱི་བུ་ནོར་བཟངས་ཤེས་བྱ་བ་ཅིའི་ཕྱིར་ནོར་བཟངས་ཤེས་བྱ་ཞེ་ན། ཚོང་དཔོན་གྱི་བུ་ནོར་བཟངས་ཞེས་བྱ་བ་དེ་ཐོག་མ་མའི་མངལ་དུ་ཞུགས་མ་ཐག་ཏུ་ཁྱིམ་དེའི་འཁོར་ཀུན་ནས་རྣམ་པར་ཕྱེ་བའི་རིན་པོ་ཆེ་སྣ་བདུན་གྱི་སྡོང་པོ་འཐོན་པར་གྱུར་ཏོ། །རིན་པོ་ཆེའི་སྡོང་པོ་དེ་དག་གི་འོག་ན་རིན་པོ་ཆེའི་གཏེར་བདུན་ཡོད་དེ། གསེར་དང་དངུལ་དང་བཻ་ཌཱུརྱ་དང་། ཤེལ་དང་མུ་ཏིག་དམར་པོ་དང་། ཨ་སྨ་གར་བྷ་དང་། མུ་ས་ར་གལ་པ་དང་། རིན་པོ་ཆེ་དེ་བདུན་གྱི་རིན་པོ་ཆེའི་སྡོང་པོ་དེ་དག་ཀྱང་གཏེར་དེ་དག་ནས་སྐྱེས་ཏེ། སའི་གཞི་བརྟོལ་ནས་མངོན་པར་འཐོན་པར་གྱུར་ཏོ། །དེ་ཡན་ལག་དང་ཉིང་ལག་ཐམས་ཅད་ཡོངས་སུ་
རྫོགས་ཏེ། ཟླ་བ་བཅུ་ལོན་ནས་བཙས་པ་དང་། དེའི་ཚེ་གཏེར་ཆེན་པོ་བདུན་པོ་དེ་དག་ཀྱང་ཆུ་ཞེང་དང་རྔམས་སུ་ཁྲུ་བདུན་ཙམ་དུ་སའི་སྟེང་ནས་མངོན་པར་འཕགས་ཏེ། སྣང་བར་བྱུང་ནས་རྣམ་པར་སྣང་ཞིང་མཛེས་པར་གྱུར་ཏོ། །ཁྱིམ་དེར་རིན་པོ་ཆེ་སྣ་ཚོགས་ཀྱི་སྣོད་ལྔ་བརྒྱ་ཡང་བྱུང་བར་གྱུར་ཏེ། འདི་ལྟར་མར་གྱི་སྣོད་དང་། ཏིལ་མར་གྱི་སྣོད་དང་སྦྲང་རྩིའི་སྣོད་དང་མར་སར་གྱི་སྣོད་དང་། གཞན་དག་ཀྱང་སོ་སོ་ནས་ཡོ་བྱད་སྣ་ཚོགས་ཐམས་ཅད་ཀྱིས་ཡོངས་སུ་གང་བ་དག་སྟེ། འདི་ལྟར་རྡོ་རྗེའི་སྣོད་སྤོས་སྣ་ཚོགས་ཀྱིས་ཡོངས་སུ་གང་བ་དང་། སྤོས་ཀྱི་སྣོད་གོས་སྣ་ཚོགས་ཀྱིས་ཡོངས་སུ་གང་བ་དང་། མན་ཤེལ་གྱི་སྣོད་ཁ་ཟས་དང་། སྤྱན་གཟིགས་སྣ་ཚོགས་རོ་མཆོག་ཏུ་ཞིམ་པས་ཡོངས་སུ་གང་བ་དང་། ནོར་བུའི་སྣོད་རིན་པོ་ཆེ་སྣ་ཚོགས་ཀྱིས་ཡོངས་སུ་གང་བ་དང་། གསེར་གྱི་སྣོད་དངུལ་སིལ་མས་ཡོངས་སུ་གང་བ་དང་། དངུལ་གྱི་སྣོད་གསེར་ཕྱེས་ཡོངས་སུ་གང་བ་དང་། ཕྲ་མེན་གྱི་སྣོད་ནོར་བུ་རིན་པོ་ཆེ་བཻ་ཌཱུརྻས་ཡོངས་སུ་གང་བ་དང་། ཤེལ་གྱི་སྣོད་མུ་ས་ར་གལ་པས་ཡོངས་སུ་གང་བ་དང་། མུ་ས་ར་གལ་པའི་སྣོད་རིན་པོ་ཆེ་ཤེལ་གྱིས་ཡོངས་སུ་གང་བ་དང་། ཨ་སྨ་གར་བྷའི་སྣོད་མུ་ཏིག་དམར་པོས་ཡོངས་སུ་གང་བ་དང་། མུ་ཏིག་དམར་པོའི་སྣོད་ཨ་སྨ་གར་བྷས་ཡོངས་སུ་གང་བ་དང་། ནོར་བུ་རིན་པོ་ཆེ་སྐར་མའི་རྒྱལ་མཚན་གྱི་སྣོད་ནོར་བུ་རིན་པོ་ཆེ་ཆུ་འདང་གིས་ཡོངས་སུ་གང་བ་དང་། ནོར་བུ་རིན་པོ་ཆེ་ཆུ་འདང་གི་སྣོད་ནོར་བུ་རིན་པོ་ཆེ་སྐར་མའི་རྒྱལ་མཚན་གྱིས་ཡོངས་སུ་གང་བ་དང་། དེ་དག་ལ་སོགས་པ་རིན་པོ་ཆེའི་སྣོད་ལྔ་བརྒྱ་འཐོན་པར་གྱུར་ཏོ། །ཚོང་དཔོན་གྱི་བུ་ནོར་བཟངས་དེ་བཙས་མ་ཐག་ཏུ་ཁྱིམ་དང་བང་བ་དང་མཛོད་ཐམས་ཅད་དུ་ནོར་དང་འབྲུ་དང་། དབྱིག་དང་། གསེར་དང་རིན་པོ་ཆེ་སྣ་ཚོགས་ཀྱི་ཆར་མངོན་པར་བབ་པར་གྱུར་ཏོ། །དེ་ལ་བྲམ་ཟེའི་ལྟས་པ་དང་། ཕ་དང་མ་དང་གཉེན་གྱི་ཚོགས་ཀྱིས་འདི་བཙས་མ་ཐག་ཏུ་ནོར་མང་པོ་ཕུན་སུམ་ཚོགས་པ་འབྱུང་བར་གྱུར་པས་ན། ནོར་བཟངས་ནོར་བཟངས་
ཞེས་དེ་ལྟར་མིང་དུ་བཏགས་ཏེ། ཚོང་དཔོན་གྱི་བུ་ནོར་བཟངས་དེ་ནི་སྔོན་གྱི་རྒྱལ་བ་ལ་བྱ་བ་བྱས་སོ། །དགེ་བའི་རྩ་བ་བསྐྱེད་པའོ། །མོས་པ་རྒྱ་ཆེན་པོ་དང་ལྡན་པའོ། །དགེ་བའི་བཤེས་གཉེན་གྱི་རྗེས་སུ་འབྲང་བའི་བསམ་པ་ཅན་ནོ། །ལུས་དང་ངག་དང་ཡིད་ཀྱི་སྤྱོད་པ་ཁ་ན་མ་ཐོ་བ་མེད་པའོ། །བྱང་ཆུབ་སེམས་དཔའི་ལམ་ཡོངས་སུ་སྦྱངས་པ་ལ་རབ་ཏུ་བརྩོན་པའོ། །ཐམས་ཅད་མཁྱེན་པ་ལ་མངོན་པར་མོས་པའོ། །སངས་རྒྱས་ཀྱི་ཆོས་ཀྱི་སྣོད་དུ་གྱུར་པའོ། །བསམ་པའི་ནམ་མཁའ་ཡོངས་སུ་དག་པའོ། །བྱང་ཆུབ་ཀྱི་སེམས་ཆགས་པ་མེད་པ་ཡོངས་སུ་རྫོགས་པའོ། །དེ་ནས་འཇམ་དཔལ་གཞོན་ནུར་གྱུར་པས་ཚོང་དཔོན་གྱི་བུ་ནོར་བཟངས་ལ་བལྟས་ཏེ། དགའ་བའི་གཏམ་བྱས་ནས་དེ་ལ་འདི་ལྟ་སྟེ། སངས་རྒྱས་ཀྱི་ཆོས་ཐམས་ཅད་ལས་ཀྱང་བརྩམས། སངས་རྒྱས་ཀྱི་ཆོས་ཐམས་ཅད་ཡང་དག་པར་བསྡུ་ཞིང་། ཐོབ་པར་བྱ་བ་ལས་ཀྱང་བརྩམས། སངས་རྒྱས་ཐམས་ཅད་གཅིག་ནས་གཅིག་ཏུ་བརྒྱུད་པ་ལས་ཀྱང་བརྩམས། སངས་རྒྱས་གཅིག་ནས་གཅིག་ཏུ་བརྒྱུད་པ་ཐམས་ཅད་ཤེས་པར་བྱ་བ་ལས་ཀྱང་བརྩམས། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་རྣམ་པར་དག་པ་ལས་ཀྱང་བརྩམས། སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་དང་སྤྲུལ་པའི་རྒྱུད་ལས་ཀྱང་བརྩམས། སངས་རྒྱས་ཐམས་ཅད་ཀྱི་གཟུགས་ཀྱི་སྐུའི་མཚན་དང་དཔེ་བྱད་བཟང་པོ་རྣམ་པར་དག་པ་ལས་ཀྱང་བརྩམས། སངས་རྒྱས་ཐམས་ཅད་ཀྱི་ཆོས་ཀྱི་སྐུ་ཡོངས་སུ་གྲུབ་པ་ལས་ཀྱང་བརྩམས། སངས་རྒྱས་ཐམས་ཅད་ཀྱི་གསུང་རྣམ་པར་ཕྱེ་བ་ལས་ཀྱང་བརྩམས། སངས་རྒྱས་ཐམས་ཅད་ཀྱི་འོད་ཀྱི་དཀྱིལ་འཁོར་གྱི་བརྒྱན་རྣམ་པར་དག་པ་ལས་ཀྱང་བརྩམས། སངས་རྒྱས་ཐམས་ཅད་ཀྱི་མཉམ་པ་ཉིད་ལས་ཀྱང་བརྩམས་ཏེ། ཆོས་ཀྱང་བསྟན་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས། ཚོང་དཔོན་
གྱི་བུ་ནོར་བཟངས་དང་། སྐྱེ་བོའི་ཚོགས་ཆེན་པོ་དེ་དག་ཆོས་དང་མཐུན་པའི་གཏམ་གྱིས་བསྟན་ཏེ། ཡང་དག་པར་བསྐུལ་ནས་སྤྲོ་བ་བསྐྱེད་དེ། དགའ་བར་བྱས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཙུད་དེ། སྔོན་གྱི་དགེ་བའི་རྩ་བ་ཡོངས་སུ་དྲན་པར་བྱས་ནས། སྐྱིད་པའི་འབྱུང་གནས་ཀྱི་གྲོང་རྡལ་དེའི་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་ཆོས་བསྟན་པས། བྱིན་གྱིས་བརླབས་ཏེ་བདེ་བར་བྱས་ནས་དེ་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་འཇམ་དཔལ་གཞོན་ནུར་གྱུར་པ་ལས་རྣམ་པ་དེ་ལྟ་བུའི་སངས་རྒྱས་ཀྱི་ཡོན་ཏན་དང་། ཆེ་བ་ཉིད་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མོས་ཤིང་བརྩོན་པས་ཕྱི་བཞིན་དུ་འབྲང་སྟེ། འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་དེ་མངོན་པར་བསྟོད་དོ། །བློ་གྲོས་ཆེན་པོ་མཐའ་ཡས་སྤྱོད་ཡུལ་ཅན། །ཁྱོད་ཀྱི་མཐུས་ནི་སེམས་ཅན་སྨན་སླད་དུ། །བདག་ཀྱང་བྱང་ཆུབ་མཆོག་ཏུ་ཞུགས་པར་གྱུར། །དེ་ལ་ངེས་པ་གང་མཆིས་བདག་ལས་གསོན། །དགའ་བའི་ཆུས་བཀང་འོབས་ཀྱིས་ཀུན་ནས་བསྐོར། །ང་རྒྱལ་དྲེགས་པའི་ར་བ་མཐོ་བར་བརྩེགས། །སེམས་ཅན་ལམ་རྒྱུད་སྒོ་རྣམས་བཙུད་ཅིང་གདངས། །དེ་འདྲའི་ཁྱིམ་ནི་སྲིད་གསུམ་མིང་ལྡན་ཆེ། །དེ་ནི་གཏི་མུག་མ་རིག་གཟིངས་པས་ཁེབས། །འདོད་ཆགས་ཞེ་སྡང་མེ་ལྕེས་རབ་ཏུ་གདུངས། །རྟག་པར་བདུད་ཀྱི་དབང་པོའི་དབང་དུ་གྱུར། །དེ་ལ་བྱིས་པ་མ་རིག་རྟེན་ཀྱང་འཆའ། །སྲེད་པའི་སྒྲོག་དང་ཞགས་པས་ཤིན་ཏུ་གླགས། །གཡོ་དང་སྒྱུ་ཡི་སྐྱོན་གྱིས་ཐོ་བཙམས་ཤིང་། །ཐེ་ཙོམ་ཡིད་གཉིས་དག་གིས་མིག་མདོངས་པ། །ལོག་པ་ཕྱིན་ཕྱོགས་ལམ་ལ་རབ་ཏུ་ཞུགས། །ཕྲག་དོག་སེར་སྣའི་ཐག་པས་བཏགས་ཤིང་བཅིངས། །ཡི་དགས་བྱོལ་སོང་སེམས་དམྱལ་མི་ཁོམ་རྒྱུ། །རྒ་ཤི་ན་དང་སྐྱེ་བས་རབ་ཏུ་མནར། །མགོ་རྨོངས་ལམ་རྒྱུད་འཁོར་ལོ་ཀུན་ཏུ་འཁོར། །དེ་ལ་ཁྱོད་ནི་ཐུགས་རྗེ་རྣམ་དག་པའི། །དཀྱིལ་འཁོར་
ཡེ་ཤེས་འོད་ཟེར་སྣང་བ་མཛད། །ཉོན་མོངས་རྒྱ་མཚོ་བསྐམ་པར་ཤར་ཏེ་འཕགས། །ཉི་མ་འདྲ་བས་བདག་ལ་སྣང་བ་མཛོད། །བྱམས་པ་བསྒོམས་པས་དཀྱིལ་འཁོར་རྫོགས་ཤིང་ཉ། །བསོད་ནམས་ཟླ་འོད་བདེ་བའི་གཟེར་འགྱེད་པ། །སེམས་ཅན་ཀུན་གྱི་གནས་སུ་ཤར་གྱུར་གྱི། །ཟླ་བ་ཉ་བ་ལྟ་བུས་བདག་སྣང་མཛོད། །དཀར་མཐུས་ཐམས་ཅད་ཡོངས་བསྩགས་དཀོར་མངའ་ཞིང་། །ཆོས་དབྱིངས་མཁའ་ལ་ཆགས་པ་མེད་མངའ་བ། །ཆོས་ཀྱི་འཁོར་ལོ་རིན་ཆེན་སྔོན་འདྲེན་པས། །རྒྱལ་པོར་གྱུར་པས་བདག་ལ་བསྟན་དུ་གསོལ། །བྱང་ཆུབ་ཐེག་པའི་སྨོན་ལམ་མཐུ་མངའ་སྟེ། །བསོད་ནམས་ཡེ་ཤེས་ཤིན་ཏུ་ཡངས་བསྩགས་ཤིང་། །སེམས་ཅན་ཀུན་ལ་ཕན་པའི་དོན་ཞུགས་པའི། །དེད་དཔོན་ཆེན་པོས་བདག་ཀྱང་བསྐྱང་དུ་གསོལ། །བཟོད་པ་བརྟན་ཞིང་སྲ་བའི་གོ་མན་བས་ཏེ། །ཡེ་ཤེས་བཤན་མངའ་ཐུགས་རྗེའི་ཕྱག་རིང་བས། །བདུད་ཀྱི་དམག་དཔུང་ཚོགས་རྣམས་མངོན་གྱུར་པར། །དཔའ་བ་ཆེན་པོས་བདག་གི་བསེལ་ཡང་མཛོད། །ཆོས་ཀྱི་རི་རབ་སྤོ་ལ་བརྟན་བཞུགས་ཤིང་། །ཏིང་འཛིན་མཆོག་གི་ལྷ་མོས་ཀུན་ནས་བསྐོར། །ཉོན་མོངས་སྒྲ་གཅན་ལྷ་མིན་འདུལ་མཛད་པ། །བརྒྱ་བྱིན་གྱུར་པས་བདག་ཀྱང་གཟིགས་སུ་གསོལ། །བྱིས་པའི་གནས་གྱུར་ཁམས་གསུམ་ཁང་པ་ན། །ཉོན་མོངས་ལས་རྣམས་རྣམ་པར་བསལ་བ་མཁྱེན། །རྒྱུ་ཡི་ས་དང་ལམ་རྒྱུད་འཁོར་རྨོངས་པར། །མེ་མར་འདྲ་བས་བདག་ཀྱང་ཤུལ་བསྟན་གསོལ། །ངན་འགྲོའི་ལམ་རྣམས་རྣམ་པར་ཟློག་མཛད་ཅིང་། །བདེ་བར་འགྲོ་བའི་ལམ་རྣམས་རྣམ་སྦྱོང་བ། །འཇིག་རྟེན་ཀུན་གྱི་ལམ་གྱི་རྒྱུད་ལས་འདས། །བདག་ལའང་ཐར་པའི་སྒོ་ནི་བསྟན་དུ་གསོལ། །རྟག་དང་བདག་དང་བདེ་བར་འདུ་ཤེས་ལྡན། །ལོག་འཛིན་སྒོ་རེའི་སྐྱབས་ཀྱིས་གཅད་གྱུར་ཀྱིས། །བདེན་པའི་ཡེ་ཤེས་སྤྱན་རྣོ་མཆོག་མངའ་བས། །ཐར་སྒོ་བདག་ལའང་མྱུར་དུ་དབྱེ་བར་གསོལ། །ཡང་དག་
ལོག་པའི་ལམ་ལ་མཁས་གྱུར་ཅིང་། །ལམ་གྱི་རྒྱུས་དང་ཚུལ་ལ་བསྙེངས་མི་མངའ། །ལམ་རྣམས་ཀུན་གྱིས་འདུལ་བ་ཐུགས་ཆུད་པ། །བདག་ལ་བྱང་ཆུབ་ཤུལ་ནི་བསྟན་དུ་གསོལ། །ཡང་དག་ལྟ་བའི་ས་ཡི་ཐང་ལ་བཞུགས། །སངས་རྒྱས་ཀུན་གྱི་ཡོན་ཏན་ཆབ་ཀྱིས་བསྐྲུན། །སངས་རྒྱས་ཆོས་ལེགས་མེ་ཏོག་ཆར་འབེབས་པ། །བྱང་ཆུབ་ཤུལ་ནི་བདག་ལ་བསྟན་དུ་གསོལ། །རྒྱལ་བ་གང་འདས་མ་བྱོན་གང་རྣམས་དང་། །ད་ལྟར་བྱུང་བའི་རྒྱལ་བ་སྣང་མཛད་པ། །སེམས་ཅན་གཙོ་བོ་ལེགས་པར་གཤེགས་པའི་ཕྱོགས། །དེ་ཡང་ལམ་སྒྲོན་མཛད་པས་བདག་བསྟན་གསོལ། །ལས་ཀྱི་འཁྲུལ་འཁོར་ཚུལ་ལ་མི་བསྙེངས་པ། །ཆོས་ཐེག་ཤིང་རྟའི་འཁྲུལ་འཁོར་མཁྱེན་གྱུར་ཅིང་། །ཡེ་ཤེས་ཐེག་པའི་ཚུལ་ལ་རྣམ་ངེས་པ། །བྱང་ཆུབ་ཐེག་པ་བདག་ལ་བཤད་དུ་གསོལ། །མོས་ཤིང་སྨོན་པའི་འཁོར་ལོ་མུ་ཁྱུད་ཅན། །བཟོད་པ་རྡོ་རྗེ་སྙིང་རྗེ་སྲོག་ཤིང་བརྟན། །དད་པའི་གཉའ་ཤིང་རིན་ཆེན་ལེགས་སྤྲས་པའི། །བྱང་ཆུབ་ཐེག་ལ་བདག་ཀྱང་བསྐྱོན་དུ་གསོལ། །གཟུངས་རྣམས་ཀུན་གྱི་རྣམ་དག་དཀྱིལ་འཁོར་ཅན། །བྱམས་པ་བརྩེགས་པའི་དགའ་བས་རབ་བརྒྱན་པ། །སོ་སོ་ཡང་དག་རིག་པའི་དྲིལ་འཕྲིང་ཅན། །ཐེག་མཆོག་བཟང་པོ་བདག་ལ་བསྟན་དུ་གསོལ། །ཚངས་པའི་སྤྱོད་པའི་ལམ་གྱིས་མངོན་པར་བརྒྱན། །ཏིང་འཛིན་བུད་མེད་ཁྲག་ཁྲིག་ཀུན་ནས་རྒྱུ། །ཆོས་ཀྱི་རྔ་ཡི་དབྱངས་ཆེན་རབ་བསྒྲགས་པ། །ཐེག་པའི་དམ་པ་བདག་ལ་བསྟབས་སུ་གསོལ། །བསྡུ་བ་བཞི་ཡི་མི་ཟད་མཛོད་ལྡན་པ། །ཡེ་ཤེས་རིན་ཆེན་ཡོན་ཏན་ཕྲེང་གིས་བརྒྱན། །ཁྲེལ་ཡོད་དུལ་བའི་འཕྲེང་བས་མཆོག་བསྡམས་པའི། །ཐེག་པའི་དམ་པ་བདག་ལ་བསྟན་དུ་གསོལ། །སྦྱིན་པའི་འོད་ཟེར་དཀྱིལ་འཁོར་བཟང་པོ་ཅན། །ཚུལ་ཁྲིམས་ཙན་དན་སྙིང་རྗེའི་བྱུག་ལྡན་ཞིང་། །བཟོད་པའི་གཟེར་གྱིས་མཚམས་རྣམས་དམ་སྦྱར་བའི། །ཐེག་པའི་མཆོག་ལ་མྱུར་དུ་བདག་
བཞག་གསོལ། །སེམས་ཅན་ཐམས་ཅད་འདུལ་ལས་མི་ལྡོག་པ། །བསམ་གཏན་ཏིང་འཛིན་ཁ་ཁྱེར་མཐོར་སྒྲོན་ཅིང་། །ཤེས་རབ་ཐབས་གཉིས་འབྱོར་མཐུན་འགྲོ་རྒྱུ་བའི། །ཆོས་ཀྱི་ཐེག་པའི་མཆོག་ལ་བདག་བཞག་གསོལ། །སྨོན་ལམ་འཁོར་ལོས་ལམ་གྱི་འཁོར་སྦྱོང་བ། །ཆོས་ཀྱི་གཟུངས་དམ་མཐུ་བརྟན་ཆེ་ལྡན་ཞིང་། །ཡེ་ཤེས་འཁྲུལ་འཁོར་ལེགས་སྦྱངས་ལེགས་བྱས་པའི། །ཆོས་ཀྱི་ཐེག་པ་དེ་ལ་བདག་སྐྱོན་གསོལ། །ཀུན་ཏུ་བཟང་པོའི་སྤྱོད་པས་རབ་སྦྱངས་ཤིང་། །སེམས་ཅན་ལྟ་བས་རྒྱུ་ལ་ཐོགས་མེད་པ། །ཀུན་ཏུ་བཟང་པོའི་སྤྱོད་པས་གནོན་གྱུར་པའི། །ཡེ་ཤེས་ཐེག་པས་བདག་ལ་བསྡུད་དུ་གསོལ། །དེ་ནི་བརྟན་པས་རྡོ་རྗེ་བཞིན་གནས་པ། །ཡེ་ཤེས་སྒྱུ་མས་ལེགས་སྦྱངས་ལེགས་བྱས་ཤིང་། །སྒྲིབ་དང་ཆགས་པ་ཐམས་ཅད་གཅོད་པ་ཡི། །བཟང་པོའི་ཐེག་ལ་བདག་ཀྱང་བསྐྱོན་དུ་གསོལ། །འགྲོ་མཉམ་དྲི་མེད་ཤིན་ཏུ་ཡངས་གྱུར་པ། །སེམས་ཅན་ཐམས་ཅད་སྐྱོབ་པས་བདེ་སྒྲུབ་ཅིང་། །ཆོས་དབྱིངས་ཤིན་ཏུ་རྒྱ་ཆེན་རྣམ་སྣང་བའི། །བྱང་ཆུབ་ཐེག་ལ་བདག་ཀྱང་བསྐྱོན་དུ་གསོལ། །སྡུག་བསྔལ་ཕུང་པོ་རབ་འབྱུང་གཅོད་བྱེད་པ། །ཉོན་མོངས་ལས་ཀྱི་རྡུལ་མང་སྦྱོང་སེལ་ཅིང་། །བདུད་དང་ཕས་ཀྱི་རྒོལ་བ་ཀུན་འཇོམས་པའི། །ཆོས་ཀྱི་ཐེག་ལ་བདག་ཀྱང་བསྐྱོན་དུ་གསོལ། །ཕྱོགས་རྣམས་ཀུན་ཏུ་ཡེ་ཤེས་རབ་སྣང་བ། །ཆོས་དབྱིངས་ནམ་མཁའ་རྣམ་པར་ཀླུབས་བྱེད་ཅིང་། །སེམས་ཅན་ཀུན་གྱི་བསམ་པ་རྫོགས་བྱེད་པའི། །ཆོས་ཀྱི་ཐེག་ལ་བདག་ཀྱང་བསྐྱོན་དུ་གསོལ། །རྣམ་དག་མཁའ་ལྟར་ཚད་མེད་མི་ཟད་པ། །སྲེད་དང་མ་རིག་ལྟ་བའི་སྐྱོན་མེད་ཅིང་། །སེམས་ཅན་ཀུན་ལ་ཕན་པར་རབ་གནས་པའི། །ཆོས་ཀྱི་ཐེག་ལ་བདག་ཀྱང་བསྐྱོན་དུ་གསོལ། །རླུང་ཆེན་ལངས་པའི་ཤུགས་ཀྱི་ཤུགས་ལྡན་པས། །སྨོན་ལམ་མཐུ་ཡིས་འཇིག་རྟེན་ཀུན་འཛིན་ཅིང་། །ཞི་བའི་གནས་རབ་ཀུན་སར་སྐྱེལ་བྱེད་པའི། །
ཆོས་ཀྱི་ཐེག་ལ་བདག་ཀྱང་བསྐྱོན་དུ་གསོལ། །ས་ཆེན་བཞི་ཡི་སྟོབས་ཀྱི་སྟོབས་ལྡན་པ། །སྙིང་རྗེའི་མཐུ་དང་ཤུགས་ཀྱིས་ཁུར་ཁྱེར་ཞིང་། །ཡེ་ཤེས་ལོ་ཏོག་འགྲོ་བ་ཉེར་འཚོ་བའི། །ཐེག་པའི་མཆོག་ལ་བདག་ཀྱང་བསྐྱོན་དུ་གསོལ། །ཉི་མ་ལྟ་བུར་འགྲོ་བ་ཉེར་འཚོ་ཞིང་། །བསྡུ་བ་རབ་ཡངས་འཁོར་གྱི་དཀྱིལ་འཁོར་ཅན། །གཟུངས་ཀྱི་སྟོབས་མཆོག་དག་པའི་འོད་བཟང་བའི། །ཡེ་ཤེས་ཉི་མ་བདག་ལ་བསྟན་དུ་གསོལ། །བསྐལ་པ་མང་པོ་དུ་མར་རབ་བསླབས་པས། །རྒྱུ་ཡི་ཚུལ་དང་ས་ཀུན་མཁས་གྱུར་པ། །གང་གིས་འདུས་བྱས་གྲོང་ཁྱེར་གཞོམ་འགྱུར་བའི། །ཤེས་བརྟན་རྡོ་རྗེ་འཕགས་པས་བདག་ལ་སྩལ་དུ་གསོལ། །སངས་རྒྱས་ལེགས་ཀུན་བསླབ་པ་ཕུན་སུམ་གྱིས། །ཡེ་ཤེས་རྒྱ་མཚོ་ཡངས་པ་གང་ཞིག་ལ། །ཚད་མེད་རྒྱ་མཚོའི་བློ་མང་བསླབ་གྱུར་པས། །དེ་ལེགས་ཅི་འདྲ་འཕགས་པས་བཀའ་སྩལ་གསོལ། །གང་ན་ཡང་དག་སྤྱན་མངའ་ཁྱོད་བཞུགས་ཤིང་། །ཡེ་ཤེས་རྒྱལ་པོའི་ཅོད་པན་ལེགས་བརྒྱན་ཏེ། །ཆོས་ཀྱི་དབུ་ཐོད་དམ་པས་དབུ་བཅིངས་པའི། །ཆོས་ཀྱི་རྒྱལ་པོའི་ཕོ་བྲང་བདག་ཀྱང་སྟོན། དེ་ནས་འཇམ་དཔལ་གཞོན་ནུར་གྱུར་པས་གླང་པོའི་ལྟ་སྟངས་ཀྱིས་བལྟས་ཏེ། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་ལྟར་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དགེ་བའི་བཤེས་གཉེན་གྱི་རྗེས་སུ་འབྲང་ཞིང་བྱང་ཆུབ་སེམས་དཔའི་ལམ་ཡོངས་སུ་རྫོགས་པར་བྱ་བར་འདོད་དེ། བྱང་ཆུབ་སེམས་དཔའི་སྤྱོད་པ་ཡོངས་སུ་དྲི་བར་བསམ་པ་ལེགས་སོ་ལེགས་སོ། །རིགས་ཀྱི་བུ་འདི་ལྟ་སྟེ། དགེ་བའི་བཤེས་གཉེན་རྣམས་ལ་བསྙེན་ཅིང་བསྟེན་པ་དང་། རིམ་གྲོར་བྱ་བ་འདི་ནི་ཐམས་ཅད་མཁྱེན་པ་ཉིད་ཡོངས་སུ་གྲུབ་པར་འགྱུར་བའི་གཞི་ཡིན་ཏེ་འདི་ནི་མཐུན་པའི་རྒྱུ་ཡིན་གྱིས། རིགས་ཀྱི་བུ་དེ་བས་ན་ཁྱོད་ཀྱིས་དགེ་བའི་བཤེས་གཉེན་བསྙེན་
བཀུར་བས་ཡོངས་སུ་མ་སྐྱོ་བར་གྱིས་ཤིག །ནོར་བཟངས་ཀྱིས་སྨྲས་པ། འཕགས་པ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི། ཇི་ལྟར་ནན་ཏན་དུ་བགྱི། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་བརྩམ་པར་བགྱི། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་སྤྱད་པར་བགྱི། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བགྱི། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ཡོངས་སུ་སྦྱང་བར་བགྱི། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་འཇུག་པར་བགྱི། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་མངོན་པར་བསྒྲུབ་པར་བགྱི། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པའི་རྗེས་སུ་འབྲང་བར་བགྱི། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་ལྷག་པར་དམིགས་པར་བགྱི། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་རྒྱས་པར་བགྱི། ཇི་ལྟར་བྱང་ཆུབ་སེམས་དཔས་ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ཡོངས་སུ་རྫོགས་པར་འགྱུར་བ་རྒྱ་ཆེར་བསྟན་དུ་གསོལ། དེ་ནས་འཇམ་དཔལ་གཞོན་ནུར་གྱུར་པས་ཚོང་དཔོན་གྱི་བུ་ནོར་བཟངས་ལ་ཚིགས་སུ་བཅད་དེ་སྨྲས་པ། །དགེ་བའི་བསོད་ནམས་གང་ཆེན་མཚོ། །དེ་ལྟར་ཁྱོད་ནི་ང་ཡི་དྲུང་དུ་ཉེར་ཕྱིན་ཏེ། །སྙིང་རྗེ་སྙིང་བརྩེ་རྒྱ་ཆེན་གྱི། །ཡིད་ལྡན་བྱང་ཆུབ་དམ་པ་ཚོལ་བ་ལེགས། །འགྲོ་བ་ཐམས་ཅད་དགྲོལ་དོན་དུ། །སྤྱོད་པ་མཚུངས་མེད་དོན་དུ་སྨོན་ལམ་རབ་འདེབས་ཤིང་། །འགྲོ་བ་ཀུན་གྱི་སྐྱབས་འགྱུར་བ། །བྱང་ཆུབ་སེམས་དཔའི་སྤྱོད་པ་ཚུལ་འདི་ཡིན། །བྱང་ཆུབ་སེམས་དཔའི་བརྟན་པ་རྣམས། །འཁོར་བའི་ནང་ན་སྐྱོ་མེད་ཡིད་ཀྱིས་སྤྱོད་བྱེད་པ། །དེ་དག་ཀུན་ཏུ་བཟང་པོ་ཡི། །སྤྱོད་པ་ཐུབ་མེད་ཆགས་མེད་འཐོབ་པར་འགྱུར། །བསོད་ནམས་འོད་ཅན་བསོད་ནམས་
དཔལ། །དེ་ལྟར་ཁྱོད་ནི་ཀུན་ཏུ་བཟང་པོའི་སྤྱོད་པ་ལ། །འགྲོ་ལ་ཕན་ཕྱིར་སྨོན་བྱེད་པ། །བསོད་ནམས་རྒྱ་མཚོ་དགེ་ཞིང་དག་པའི་མཚན། །མཐའ་དང་དབུས་མྱེད་ཚད་མྱེད་པའི། །ཕྱོགས་བཅུའི་འཇིག་རྟེན་སངས་རྒྱས་ཀུན་ཀྱང་མཐོང་བར་འགྱུར། །དྲན་པའི་མཐུ་དང་སྟོབས་ཀྱིས་ཀྱང་། །དེ་དག་ཆོས་ཀྱི་སྤྲིན་ཀྱང་ཡོངས་སུ་འཛིན་པར་འགྱུར། །དེ་ལྟར་ཁྱོད་ཀྱིས་ཕྱོགས་བཅུ་ཡི། །སངས་རྒྱས་ཞིང་རྣམས་ཀུན་ཏུ་རྒྱལ་བ་མཐོང་ནས་ཀྱང་། །བྱང་ཆུབ་སྤྱོད་པའི་དོན་གྱི་ཕྱིར། །དེ་དག་ཀུན་ལ་སྨོན་ལམ་རྒྱ་མཚོ་དག་བྱེད་འགྱུར། །འཇིག་རྟེན་གཙོ་ལ་སློབ་བྱེད་ཅིང་། །གང་རྣམས་སངས་རྒྱས་ས་ལ་གནས་ནི་བཅས་བྱས་ཤིང་། །འདི་ཚུལ་རྒྱ་མཚོར་ཞུགས་གྱུར་པ། །དེ་དག་ཀུན་ཀྱང་ཐམས་ཅད་གཟིགས་པར་འགྱུར། །ཁྱོད་ནི་འབྱམ་ཀླས་ཞིང་ཀུན་ཏུ། །བསྐལ་མང་ཞིང་རྡུལ་སྙེད་དུ་ཀུན་ཏུ་བཟང་པོ་ཡི། །སྤྱོད་པའི་དམ་པ་སྤྱོད་བྱས་ཤིང་། །བྱང་ཆུབ་དམ་པ་ཞི་བ་འཐོབ་པར་འགྱུར། །ཞིང་རྣམས་མཐའ་དང་དབུས་མེད་པ། །མ་ལུས་ཀུན་ཏུ་བསྐལ་པ་རྒྱ་མཚོར་སྤྱད་པར་གྱིས། །ཀུན་ཏུ་བཟང་པོའི་སྤྱོད་མཆོག་ཕྱིར། །སྨོན་ལམ་རྒྱ་ཆེན་ཡོངས་སུ་རྫོགས་པར་བྱོས། །ཁྱོད་ནི་སྨོན་ལམ་ཐོས་གྱུར་ནས། །སེམས་ཅན་ཁྲག་ཁྲིག་དགའ་བ་ཡོངས་སུ་སྐྱེས་གྱུར་ཅིང་། །ཀུན་ཏུ་བཟང་པོའི་ཡེ་ཤེས་ཀྱིས། །བྱང་ཆུབ་མཆོག་ཏུ་སྨོན་པ་བྱེད་ལ་ལྟོས། །དེ་ནས་འཇམ་དཔལ་གཞོན་ནུར་གྱུར་པས་ཚིགས་སུ་བཅད་པ་དེ་དག་སྨྲས་ནས། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་བསྒོའོ། །རིགས་ཀྱི་བུ་དེ་ལྟར་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་། བྱང་ཆུབ་སེམས་དཔའི་སྤྱོད་པ་ཡོངས་སུ་བཙལ་བར་སེམས་པ་ལེགས་སོ་ལེགས་སོ། །རིགས་ཀྱི་བུ་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ལྟ་བུའི་སེམས་ཅན་ཡང་རབ་ཏུ་དཀོན་ཏེ། དེ་བས་ཀྱང་གང་གིས་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་སེམས་བསྐྱེད་ནས། བྱང་ཆུབ་སེམས་དཔའི་སྤྱོད་པ་ཡོངས་སུ་ཚོལ་བ་དེ་ལྟ་བུའི་སེམས་ཅན་ནི་ཆེས་དཀོན་ནོ། །རིགས་ཀྱི་བུ་དེ་བས་ན་བྱང་ཆུབ་སེམས་དཔས་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་ཕྱིར། ཡང་དག་པའི་དགེ་བའི་བཤེས་གཉེན་ལས་གདོན་མི་ཟ་བར་རྟོགས་པ་ཐོབ་པར་གྱིས་ཤིག །དགེ་བའི་བཤེས་གཉེན་ཡོངས་སུ་བཙལ་བ་ལ་ཡོངས་སུ་སྐྱོ་བའི་ཡིད་མེད་པར་གྱིས་ཤིག །དགེ་བའི་བཤེས་གཉེན་བལྟ་བ་ལ་ངོམས་པ་མེད་པར་གྱིས་ཤིག །དགེ་བའི་བཤེས་གཉེན་གྱིས་བསྟན་པ་ལ་མཐུན་པར་འཛིན་པར་གྱིས་ཤིག །དགེ་བའི་བཤེས་གཉེན་གྱི་ཐབས་མཁས་པའི་སྤྱོད་པ་ལ་ཁོང་ཁྲོ་བ་མེད་པར་གྱིས་ཤིག །རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན། ཡུལ་མི་མོ་གྱ་ནོམ་མཆོག་ཅེས་བྱ་བ་ཡོད་དེ། དེ་ན་མགུལ་ལེགས་པ་ཞེས་བྱ་བའི་རི་ཞིག་ཡོད་པ་དེ་ལ། དགེ་སློང་སྤྲིན་གྱི་དཔལ་ཞེས་བྱ་བ་འདུག་གིས་དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་བརྩམ་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་སྤྱད་པར་བྱ་བ་དང་། ཇི་ལྟར་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བྱ་བ་དང་། ཇི་ལྟར་ཡོངས་སུ་དག་པར་བྱ་བ་དང་། ཇི་ལྟར་འཇུག་པར་བྱ་བ་དང་། ཇི་ལྟར་མངོན་པར་བསྒྲུབ་པར་བྱ་བ་དང་། ཇི་ལྟར་རྗེས་སུ་འབྲང་བར་བྱ་བ་དང་། ཇི་ལྟར་ལྷག་པར་དམིགས་པར་བྱ་བ་དང་། ཇི་ལྟར་རྒྱས་པར་བྱ་བ་དང་། ཇི་ལྟར་བྱང་ཆུབ་སེམས་དཔས་ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ཡོངས་སུ་རྫོགས་པར་འགྱུར་བ་དྲིས་ཤིག་དང་དགེ་བའི་བཤེས་གཉེན་དེས་ཁྱོད་ལ་ཀུན་ཏུ་བཟང་པོའི་སྤྱོད་པའི་དཀྱིལ་འཁོར་སྟོན་ཏོ། །དེ་ནས་ཚོང་དཔོན་གྱི་བུ་ནོར་བཟངས་དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་
སྐྱེས་ནས། འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། འཇམ་དཔལ་གཞོན་ནུར་གྱུར་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ལན་བརྒྱ་སྟོང་དུ་མར་ཕྱིར་བལྟས་ཏེ། དགེ་བའི་བཤེས་གཉེན་ཡིད་དུ་འོང་བའི་སེམས་དང་ལྡན་པས། དགེ་བའི་བཤེས་གཉེན་མི་མཐོང་བ་མི་བཟོད་དེ། གདོང་མཆིམས་གང་བར་དུ་ཞིང་འཇམ་དཔལ་གཞོན་ནུར་གྱུར་པའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་མཐར་གྱིས་ཡུལ་མི་མོ་གྱ་ནོམ་མཆོག་ཅེས་བྱ་བ་དེར་སོང་སྟེ་ཕྱིན་ནས། ཡུལ་མི་མོ་གྱ་ནོམ་མཆོག་ནས་རྣམ་པར་བརྒྱུས་ཏེ། སྔོན་གྱི་དགེ་བའི་རྩ་བས་བྱུང་ཞིང་ལས་རྒྱ་ཆེན་པོས་བྱིན་གྱིས་བརླབས་པའི་ལོངས་སྤྱོད་ཡིད་དུ་འོང་བ་ལ་ཡོངས་སུ་སྤྱོད་ཅིང་རི་མགུལ་ལེགས་པ་གང་ན་བ་དེར་ཕྱིན་ནས། མགུལ་ལེགས་པའི་རི་ལ་འཛེགས་ཏེ། དགེ་སློང་སྤྲིན་གྱི་དཔལ་ལ་ཆོས་ཚོལ་ཞིང་། ཤར་ཕྱོགས་ལོགས་སུ་བྱུང་ངོ་། །དེ་བཞིན་དུ་ལྷོ་དང་ནུབ་དང་བྱང་དང་བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་སུ་ཡང་བྱུང་སྟེ། བླ་འོག་ཏུའང་ལྟ་ཞིང་དགེ་སློང་སྤྲིན་གྱི་དཔལ་ཚོལ་ཚོལ་བ་ལས་དེས་ཞག་བདུན་ལོན་པ་དང་། དགེ་སློང་སྤྲིན་གྱི་དཔལ་རི་རྩེ་ཅིག་གི་སྨན་ལྗོངས་ན་འཆག་ཅིང་འདུག་པ་མཐོང་ནས། དེ་དགེ་སློང་སྤྲིན་གྱི་དཔལ་གང་ན་བ་དེར་སོང་སྟེ། དགེ་སློང་སྤྲིན་གྱི་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ནས། དགེ་སློང་སྤྲིན་གྱི་དཔལ་ལ་གཡས་ཕྱོགས་སུ་བསྐོར་བ་བྱས་ཏེ། མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་པ་ཐུགས་སུ་ཆུད་པར་མཛད་དུ་གསོལ། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་དང་། ཇི་ལྟར་བྱང་ཆུབ་སེམས་དཔའི་སྤྱོད་པ་
བརྩམ་པ་དང་། ཇི་ལྟར་བྱང་ཆུབ་སེམས་དཔའི་སྤྱོད་པ་ལ་སྤྱད་པར་བགྱི་བ་དང་། ཇི་ལྟར་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བགྱི་བ་དང་། ཇི་ལྟར་ཡོངས་སུ་དག་པར་བགྱི་བ་དང་། ཇི་ལྟར་འཇུག་པར་བགྱི་བ་དང་། ཇི་ལྟར་རྗེས་སུ་འབྲང་བར་བགྱི་བ་དང་། ཇི་ལྟར་མངོན་པར་བསྒྲུབ་པར་བགྱི་བ་དང་། ཇི་ལྟར་ལྷག་པར་དམིགས་པར་བགྱི་བ་དང་། ཇི་ལྟར་རྒྱས་པར་བགྱི་བ་དང་། ཇི་ལྟར་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ཡོངས་སུ་རྫོགས་པར་འགྱུར་བ་མ་འཚལ་ཏེ། འཕགས་པ་ཁྱོད་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་། རྗེས་སུ་སྟོན་པ་མཛད་ཅེས་ཐོས་ན། འཕགས་པ་ཇི་ལྟར་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འབྱུང་བར་འགྱུར་བ་བདག་ལ་བསྟན་དུ་གསོལ། དེ་སྐད་ཅེས་སྨྲས་པ་དང་། དགེ་སློང་སྤྲིན་གྱི་དཔལ་གྱིས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་ལྟར་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་། བྱང་ཆུབ་སེམས་དཔའི་སྤྱོད་པ་ཡོངས་སུ་འདྲི་བ་ལེགས་སོ་ལེགས་སོ། །རིགས་ཀྱི་བུ་འདི་ལྟ་སྟེ། བྱང་ཆུབ་སེམས་དཔའི་སྤྱོད་པ་ཡོངས་སུ་བཙལ་བ་དང་། བྱང་ཆུབ་སེམས་དཔའི་སྤྱོད་ཡུལ་ཡོངས་སུ་བཙལ་བ་དང་། བྱང་ཆུབ་སེམས་དཔའི་འབྱུང་བ་རྣམ་པར་དག་པ་ཡོངས་སུ་བཙལ་བ་དང་། བྱང་ཆུབ་སེམས་དཔའི་ལམ་རྣམ་པར་དག་པ་ཡོངས་སུ་བཙལ་བ་དང་། བྱང་ཆུབ་སེམས་དཔའི་སྤྱོད་པ་རྒྱ་ཆེན་པོ་རྣམ་པར་དག་པ་ཡོངས་སུ་བཙལ་བ་དང་། བྱང་ཆུབ་སེམས་དཔའི་མངོན་པར་ཤེས་པ་བསྒྲུབ་པ་རྣམ་པར་དག་པ་ཡོངས་སུ་བཙལ་བ་དང་། བྱང་ཆུབ་སེམས་དཔའི་རྣམ་པར་ཐར་པ་ཡོངས་སུ་བསྟན་པ་དང་། བྱང་ཆུབ་སེམས་དཔའི་སྣང་བའི་སྙིང་རྗེའི་རྒྱུད་ཡོངས་སུ་བསྟན་པ་དང་། བྱང་ཆུབ་སེམས་དཔའི་འགྲོ་བའི་བསམ་པ་ཇི་ལྟ་བ་བཞིན་དུ་རྗེས་སུ་འབྲང་བ་
དང་། བྱང་ཆུབ་སེམས་དཔས་འཁོར་བ་དང་། མྱ་ངན་ལས་འདས་པའི་སྒོ་ཡོངས་སུ་བསྟན་པ་དང་། བྱང་ཆུབ་སེམས་དཔའ་རྣམས་ཀྱི་འདུས་བྱས་དང་། འདུས་མ་བྱས་ཀྱི་སྐྱོན་དང་། འཇིགས་པས་མི་གོས་པའི་རྒྱུད་ཡོངས་སུ་བཙལ་བ་འདི་ནི་དཀའོ། །ཤིན་ཏུ་དཀའོ། །རིགས་ཀྱི་བུ་ཁོ་བོ་ནི་མོས་པའི་སྟོབས་ཀྱི་དབང་གིས་མིག་གི་བློ་གྲོས་དང་། དད་པའི་མིག་རྣམ་པར་དག་པས་ཀུན་ཏུ་མངོན་པར་ལྟ་བའི་ཡེ་ཤེས་ཀྱི་འོད་སྣང་བ། ཕྱིན་ཕྱོགས་མེད་པ་དང་། ཡུལ་ཀུན་ལ་ཐོགས་པ་མེད་ཅིང་སྒྲིབ་པ་ཐམས་ཅད་དང་། བྲལ་བའི་ལྷག་མཐོང་ལ་མཁས་པ་དང་། མིག་གི་ཡུལ་ཀུན་ནས་ཡོངས་སུ་དག་པའི་ལུས་རྣམ་པར་དག་པ་དང་། ཕྱོགས་ཀྱི་རྒྱུད་འབྱམ་ཀླས་པ་ཐམས་ཅད་དུ་མངོན་པར་འདུད་པའི་ལུས་ཀྱིས་འདུད་པ་ལ་མཁས་པ་དང་། སངས་རྒྱས་ཐམས་ཅད་ཀྱི་ཆོས་ཀྱི་སྤྲིན་ཡོངས་སུ་འཛིན་པའི་གཟུངས་ཀྱི་སྟོབས་ཀྱིས་ཕྱོགས་ཀྱི་རྒྱུད་ཐམས་ཅད་ནས་མངོན་དུ་གཟིགས་པའི་དེ་བཞིན་གཤེགས་པ་རྣམས་མཐོང་སྟེ། འདི་ལྟར་ཤར་ཕྱོགས་ཀྱི་དེ་བཞིན་གཤེགས་པ་གཅིག་ཀྱང་མཐོང་ངོ་། །སངས་རྒྱས་གཉིས་དང་བཅུ་དང་། སངས་རྒྱས་བརྒྱ་དང་། སངས་རྒྱས་སྟོང་དང་། སངས་རྒྱས་བརྒྱ་ཕྲག་སྟོང་དང་། སངས་རྒྱས་བྱེ་བ་དང་། སངས་རྒྱས་བྱེ་བ་བརྒྱ་དང་། སངས་རྒྱས་བྱེ་བ་སྟོང་དང་། སངས་རྒྱས་བྱེ་བ་བརྒྱ་ཕྲག་སྟོང་དང་། སངས་རྒྱས་བྱེ་བ་ཁྲག་ཁྲིག་བརྒྱ་ཕྲག་སྟོང་ནས་དེ་བཞིན་གཤེགས་པ་ཚད་མེད་པ། དཔག་ཏུ་མེད་པ། གྲངས་མེད་པ། བསམ་གྱིས་མི་ཁྱབ་པ་མཚུངས་པ་མེད་པ། ཀུན་ཏུ་མཐའ་ཡས་པས་མཚམས་མེད་པ། གཞལ་དུ་མེད་པ། བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་མཐོང་ངོ་། །དེ་བཞིན་གཤེགས་
པ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཀྱང་མཐོང་ངོ་། །དེ་བཞིན་གཤེགས་པ་གླིང་བཞི་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་དང་། སྟོང་གཉིས་པ་དང་། སྟོང་གསུམ་གྱི་སྟོང་ཆེན་པོའི་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱང་མཐོང་ངོ་། དེ་བཞིན་གཤེགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱང་མཐོང་ངོ་། །དེ་བཞིན་གཤེགས་པ་སངས་རྒྱས་ཀྱི་ཞིང་བརྒྱའི་རྡུལ་ཤིན་ཏུ་ཕྲ་བ་སྙེད་དང་། སངས་རྒྱས་ཀྱི་ཞིང་སྟོང་གི་རྡུལ་ཤིན་ཏུ་ཕྲ་བ་སྙེད་དང་། སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་དང་། སངས་རྒྱས་ཀྱི་ཞིང་བྱེ་བའི་རྡུལ་ཤིན་ཏུ་ཕྲ་བ་སྙེད་དང་། སངས་རྒྱས་ཀྱི་ཞིང་བྱེ་བ་ཕྲག་བརྒྱའི་རྡུལ་ཤིན་ཏུ་ཕྲ་བ་སྙེད་དང་། སངས་རྒྱས་ཀྱི་ཞིང་བྱེ་བ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་དང་། སངས་རྒྱས་ཀྱི་ཞིང་བྱེ་བ་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་དང་། སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དག་ཀྱང་མཐོང་སྟེ། ཤར་ཕྱོགས་ལོགས་སུ་ཇི་ལྟ་བ་བཞིན་དུ། ལྷོ་ཕྱོགས་དང་ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་བླའི་ཕྱོགས་ཀྱི་དེ་བཞིན་གཤེགས་པ་གཅིག་ཀྱང་མཐོང་བ་ནས། དེ་བཞིན་གཤེགས་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དག་ཀྱང་མཐོང་བའི་བར་དུ་སྟེ། ཕྱོགས་རེ་རེར་རྣམ་པར་བལྟས་ཀྱང་། དེ་བཞིན་གཤེགས་པ་ཁ་དོག་སྣ་ཚོགས་མངའ་བ་དང་། དབྱིབས་སྣ་ཚོགས་མངའ་བ་དང་། རྣམ་པར་འཕྲུལ་པ་སྣ་ཚོགས་མངའ་བ་དང་། ཁྱུ་མཆོག་གི་མཐུ་དང་། རྣམ་པར་རོལ་པ་སྣ་ཚོགས་མངའ་བ་དང་། འཁོར་གྱི་དཀྱིལ་འཁོར་གྱི་རྒྱན་རྣམ་པ་སྣ་ཚོགས་མངའ་བ་དང་། འོད་ཟེར་གྱི་དྲ་བ་སྣང་བ་ཁ་དོག་དུ་མ་ཅན་དང་། ཁ་དོག་མཐའ་ཡས་པ་རབ་ཏུ་འགྱེད་པ་དང་། སངས་རྒྱས་ཀྱི་ཞིང་རྣམ་པར་དག་པ་དང་། ཕོ་བྲང་དང་རྒྱན་སྣ་ཚོགས་མངའ་བ་དང་། སྐུ་ཚེའི་ཚད་རྣམ་པར་དག་པ་རྣམ་པ་སྣ་ཚོགས་མངའ་བ་དང་། འགྲོ་བའི་བསམ་པ་ཇི་ལྟ་བ་བཞིན་དུ་རྣམ་པར་དམིགས་པར་མཛད་པ་དང་།
མངོན་པར་འཚང་རྒྱ་བ་རྣམ་པར་དག་པའི་སྒོས་རྣམ་པར་འཕྲུལ་པ་རྣམ་པ་སྣ་ཚོགས་མངའ་བ་དང་། སངས་རྒྱས་ཀྱི་ཁྱུ་མཆོག་དང་སེང་གེའི་ང་རོ་རྣམ་པར་སྒྲོག་པ་མང་པོ་མཐོང་ངོ་། །དེ་ལྟར་རིགས་ཀྱི་བུ་ཁོ་བོས་ནི་སྒོ་ཀུན་ནས་དམིགས་པ་ཐམས་ཅད་རྣམ་པར་རིག་པ་ལ་ཡང་དག་པར་གཞོལ་བའི་སངས་རྒྱས་རྗེས་སུ་དྲན་པ་འདི་ཐོབ་པར་ཟད་ན། བྱང་ཆུབ་སེམས་དཔའ་ཡེ་ཤེས་ཀྱི་དཀྱིལ་འཁོར་རྣམ་པར་དག་པ་གང་གིས། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དང་། སངས་རྒྱས་ཀྱི་ཞིང་དང་ཕོ་བྲང་རྣམ་པར་དག་པའི་རྒྱན་མངོན་པར་མཐོང་བས། སངས་རྒྱས་རྗེས་སུ་དྲན་པའི་སྒོ་ཀུན་ནས་སྣང་བའི་དཀྱིལ་འཁོར་རབ་ཏུ་ཐོབ་པ་དང་། བསམ་པ་ཇི་ལྟ་བ་བཞིན་དུ་རྣམ་པར་དམིགས་པར་དེ་བཞིན་གཤེགས་པ་མཐོང་བ་རྣམ་པར་དག་པས། སངས་རྒྱས་རྗེས་སུ་དྲན་པའི་སྒོ་འགྲོ་བ་ཐམས་ཅད་དུ་སྒྲོ་བཏགས་པ་རབ་ཏུ་ཐོབ་པ་དང་། གང་གིས་དེ་བཞིན་གཤེགས་པའི་སྟོབས་བཅུ་ཚད་མེད་པའི་རྗེས་སུ་འབྲང་བས་སངས་རྒྱས་རྗེས་སུ་དྲན་པའི་སྒོ། སྟོབས་ཀྱིས་སྒྲོ་བཏགས་པ་རབ་ཏུ་ཐོབ་པ་དང་། གང་གིས་ཆོས་མཉན་པའི་རྣམ་པས། དེ་བཞིན་གཤེགས་པ་ཐམས་ཅད་ཀྱི་སྐུའི་སྤྲིན་ལ་ལྟ་བས། སངས་རྒྱས་རྗེས་སུ་དྲན་པའི་སྒོ་ཆོས་ཀྱིས་སྒྲོ་བཏགས་པ་རབ་ཏུ་ཐོབ་པ་དང་གང་གིས་ཕྱོགས་རྒྱ་མཚོ་ཐམས་ཅད་ཀྱི་སངས་རྒྱས་རྒྱ་མཚོ་ཐ་མི་དད་པ་ལ་འཇུག་པས། སངས་རྒྱས་རྗེས་སུ་དྲན་པའི་སྒོ་ཕྱོགས་རྣམ་པར་སྣང་བའི་སྙིང་པོ་རབ་ཏུ་ཐོབ་པ་དང་། གང་གིས་དེ་བཞིན་གཤེགས་པའི་རྣམ་པར་འཕྲུལ་པ་དང་། ཁྱུ་མཆོག་གི་མཐུ་ཕྱུང་བ་ལ་རབ་ཏུ་ཕྲ་བར་དམིགས་ཤིང་འཇུག་པས། སངས་རྒྱས་རྗེས་སུ་དྲན་པའི་སྒོ་ཕྱོགས་ཐམས་ཅད་དུ་འཇུག་པ་རབ་ཏུ་ཐོབ་པ་དང་། བསྐལ་པ་ཐམས་ཅད་དུ་དེ་བཞིན་གཤེགས་པ་མཐོང་ཞིང་རྣམ་པར་དམིགས་པ་དང་མི་བྲལ་བས། སངས་རྒྱས་རྗེས་སུ་དྲན་པའི་སྒོ་བསྐལ་པར་སྒྲོ་བཏགས་པ་རབ་ཏུ་ཐོབ་པ་དང་། གང་གིས་དུས་ཐམས་ཅད་དུ་དེ་བཞིན་གཤེགས་པ་མཐོང་
ཞིང་འགྲོགས་པ་དང་མི་འབྲལ་བས། སངས་རྒྱས་རྗེས་སུ་དྲན་པའི་སྒོ་དུས་སུ་སྒྲོ་བཏགས་པ་རབ་ཏུ་ཐོབ་པ་དང་། གང་གིས་སངས་རྒྱས་ཀྱི་ཞིང་ཐམས་ཅད་ནས་མངོན་པར་འཕགས་ཤིང་ཟིལ་གྱིས་མི་ནོན་པའི་སངས་རྒྱས་ཀྱི་སྐུ་ཡོངས་སུ་མཐོང་ཞིང་རྣམ་པར་རིག་པའི་སངས་རྒྱས་རྗེས་སུ་དྲན་པའི་སྒོ་ཞིང་དུ་སྒྲོ་བཏགས་པ་རབ་ཏུ་ཐོབ་པ་དང་། གང་གིས་དུས་གསུམ་གྱི་དེ་བཞིན་གཤེགས་པའི་དཀྱིལ་འཁོར་རང་གི་སེམས་དང་བསམ་པར་ཡང་དག་པར་གཞོལ་བས། སངས་རྒྱས་རྗེས་སུ་དྲན་པའི་སྒོ་དུས་གསུམ་དུ་སྒྲོ་བཏགས་པ་རབ་ཏུ་ཐོབ་པ་དང་། གང་གིས་དམིགས་པ་ཐམས་ཅད་ལ་དེ་བཞིན་གཤེགས་པ་གཅིག་ནས་གཅིག་ཏུ་བརྒྱུད་པ་ཡང་དག་པར་ཚོགས་པ་མཐོང་ཞིང་དམིགས་པས་སངས་རྒྱས་རྗེས་སུ་དྲན་པའི་སྒོ་དམིགས་པར་སྒྲོ་བཏགས་པ་རབ་ཏུ་ཐོབ་པ་དང་། གང་གིས་སྐད་ཅིག་གཅིག་ལ་འཇིག་རྟེན་གྱི་ཁམས་ཐམས་ཅད་དུ་དེ་བཞིན་གཤེགས་པ་ཐམས་ཅད་ཡོངས་སུ་མྱ་ངན་ལས་འདའ་བ་རྣམ་པར་དམིགས་པས། སངས་རྒྱས་རྗེས་སུ་དྲན་པའི་སྒོ་ཞི་བས་སྒྲོ་བཏགས་པ་རབ་ཏུ་ཐོབ་པ་དང་། གང་གིས་ཉིན་གཅིག་ཏུ་གནས་ཐམས་ཅད་དུ་དེ་བཞིན་གཤེགས་པ་ཐམས་ཅད་གཤེགས་པར་རྣམ་པར་དམིགས་པས། སངས་རྒྱས་རྗེས་སུ་དྲན་པའི་སྒོ་འབྲལ་བས་སྒྲོ་བཏགས་པ་རབ་ཏུ་ཐོབ་པ་དང་། གང་གིས་དེ་བཞིན་གཤེགས་པ་རེ་རེ་སྐྱིལ་མོ་ཀྲུང་དུ་བཞུགས་པས་ཀྱང་། ཆོས་ཀྱི་དབྱིངས་ཐམས་ཅད་དུ་རྒྱས་པར་ཁྱབ་པའི་སངས་རྒྱས་ཀྱི་སྐུ་རྣམ་པར་དམིགས་པས། སངས་རྒྱས་རྗེས་སུ་དྲན་པའི་སྒོ་ཤིན་ཏུ་ཡངས་པས་སྒྲོ་བཏགས་པ་རབ་ཏུ་ཐོབ་པ་དང་། གང་གིས་སྐྲའི་རྩེ་མོ་གཅིག་ལ་སངས་རྒྱས་བརྗོད་དུ་མེད་པ་བྱུང་བ་མཉེས་པར་བྱ་བ་ལ་འཇུག་པས། སངས་རྒྱས་རྗེས་སུ་དྲན་པའི་སྒོ་ཤིན་ཏུ་ཕྲ་བས་སྒྲོ་བཏགས་པ་རབ་ཏུ་ཐོབ་པ་དང་། སྐད་ཅིག་གཅིག་ལ་འཇིག་རྟེན་གྱི་ཁམས་ཐམས་ཅད་དུ་མངོན་པར་འཚང་རྒྱ་ཞིང་། རྣམ་པར་འཕྲུལ་པ་སྟོན་པ་རྣམ་པར་དམིགས་པས།
གང་གིས་སངས་རྒྱས་རྗེས་སུ་དྲན་པའི་སྒོ་རྒྱན་དུ་སྒྲོ་བཏགས་པ་རབ་ཏུ་ཐོབ་པ་དང་། སངས་རྒྱས་བྱུང་བ་ཐམས་ཅད་ཀྱི་ཆོས་ཀྱི་འཁོར་ལོ་དང་། རྣམ་པར་འཕྲུལ་པ་དང་། ཡེ་ཤེས་སྣང་བ་རབ་ཏུ་ཐོབ་པས་གང་གིས་སངས་རྒྱས་རྗེས་སུ་དྲན་པའི་སྒོ་བགོས་པར་སྒྲོ་བཏགས་པ་རབ་ཏུ་ཐོབ་པ་དང་། རང་གིས་སེམས་དང་བསམ་པ་ལ་བལྟས་ནས། དེ་བཞིན་གཤེགས་པ་ཐམས་ཅད་སྣང་བ་རབ་ཏུ་ཐོབ་པས། སངས་རྒྱས་རྗེས་སུ་དྲན་པའི་སྒོ་སེམས་ཀྱིས་སྒྲོ་བཏགས་པ་རབ་ཏུ་ཐོབ་པ་དང་། འགྲོ་བ་ཐམས་ཅད་ཀྱིས་ལས་རྣམ་པ་ཇི་ལྟ་བུར་བསྩགས་པའི་གཟུགས་བརྙན་ཡོངས་སུ་སྟོན་པས། གང་གིས་སངས་རྒྱས་རྗེས་སུ་དྲན་པའི་སྒོ་ལས་ཀྱིས་སྒྲོ་བཏགས་པ་རབ་ཏུ་ཐོབ་པ་དང་། ཆོས་ཀྱི་དབྱིངས་མ་ལུས་པ་ཐམས་ཅད་པད་མོའི་ཚལ་གྱིས་རྒྱས་པར་སངས་རྒྱས་རྣམ་པར་འཕྲུལ་པ་རྒྱ་ཆེན་པོ་སྟོན་པ། ཕྱོགས་ཀུན་ཏུ་མངོན་སུམ་དུ་དམིགས་པས། གང་གིས་སངས་རྒྱས་རྗེས་སུ་དྲན་པའི་སྒོ་རྣམ་པར་འཕྲུལ་པས་སྒྲོ་བཏགས་པ་རབ་ཏུ་ཐོབ་པ་དང་། དེ་བཞིན་གཤེགས་པའི་སྐུ་གཟུགས་བརྙན་གྱི་སྤྲིན་དབྱངས་སྒྲོགས་པས་ཆོས་ཀྱི་དབྱིངས་དང་ནམ་མཁའ་ཀུན་ནས་སྣང་བ། གང་གིས་སངས་རྒྱས་རྗེས་སུ་དྲན་པའི་སྒོ་ནམ་མཁས་སྒྲོ་བཏགས་པ་རབ་ཏུ་ཐོབ་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་ཕྱོགས་ཀྱི་ལྗོངས་རྒྱ་མཚོའི་སྒོ་ཞེས་བྱ་བ་ཡོད་པ་དེ་ན། དགེ་སློང་རྒྱ་མཚོའི་སྤྲིན་ཅེས་བྱ་བ་འདུག་གི། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག་དང་། རིགས་ཀྱི་བུ་དགེ་བའི་བཤེས་གཉེན་དེ་ཁྱོད་ལ་དགེ་བའི་རྩ་བའི་ཚོགས་དང་། རྒྱུ་ཡོངས་སུ་སྟོན་པར་འགྱུར་རོ། །ཚོགས་ཀྱིས་རྒྱ་ཆེན་པོ་ཡང་ཁོང་དུ་ཆུད་པར་བྱེད་དོ། །དགེ་བའི་རྩ་བའི་སྟོབས་དང་། ཤུགས་རྒྱ་ཆེན་པོ་ཡང་ཡོངས་སུ་སྐྱེད་
པར་བྱེད་དོ། །བྱང་ཆུབ་ཀྱི་སེམས་ཀྱི་ཚོགས་དང་རྒྱུ་རྒྱ་ཆེན་པོ་ཡང་ཡོངས་སུ་བརྗོད་པར་འགྱུར་རོ། །ཐེག་པ་ཆེན་པོ་རབ་ཏུ་ཐོབ་པ་དང་། སྣང་བར་འགྱུར་བ་རྒྱ་ཆེན་པོ་ཡང་བསྐྱེད་པར་བྱེད་དོ། །ཕ་རོལ་ཏུ་ཕྱིན་པའི་ཚོགས་ཀྱི་སྟོབས་རྒྱ་ཆེན་པོ་ཡང་རབ་ཏུ་སྟོན་པར་བྱེད་དོ། །སྤྱོད་པ་རྒྱ་མཚོ་ལ་འཇུག་པའི་ཚུལ་རྒྱ་ཆེན་པོ་ཡང་རབ་ཏུ་རྗོད་པར་འགྱུར་རོ། །སྨོན་ལམ་གྱི་དཀྱིལ་འཁོར་རྒྱ་ཆེན་པོ་ཡང་ཡོངས་སུ་སྦྱོང་བར་འགྱུར་རོ། །སྒོ་ཀུན་ནས་འབྱུང་བའི་རྒྱན་རྒྱ་ཆེན་པོ་ཡང་རྣམ་པར་སྦྱོང་བར་འགྱུར་རོ། །སྙིང་རྗེ་ཆེན་པོའི་སྟོབས་རྒྱ་ཆེན་པོ་ཡང་ཡོངས་སུ་འཕེལ་བར་བྱེད་དོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དགེ་སློང་སྤྲིན་གྱི་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ནས། དགེ་སློང་སྤྲིན་གྱི་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། ལན་བརྒྱ་སྟོང་དུ་མར་ཕྱིར་བལྟས་ནས། དགེ་སློང་སྤྲིན་གྱི་དཔལ་གྱི་དྲུང་ནས་སོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་བརྒྱད་པ། དེ་ནས་ཚོང་དཔོན་གྱི་བུ་ནོར་བཟངས་དགེ་བའི་བཤེས་གཉེན་གྱི་གདམས་ངག་དེ་བཞིན་རྗེས་སུ་བསམ་པ་དང་། ཡེ་ཤེས་སྣང་བ་དེ་རྗེས་སུ་དྲན་པར་བྱ་བ་དང་། བྱང་ཆུབ་སེམས་དཔའི་རྣམ་པར་ཐར་པ་དེ་རྣམ་པར་དཔྱད་པ་དང་། བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་དེ་རྗེས་སུ་སྦྱང་བ་དང་བྱང་ཆུབ་སེམས་དཔའ་རྒྱ་མཚོའི་ཚུལ་དེ་བལྟ་བ་དང་། སངས་རྒྱས་ཀྱི་དཀྱིལ་འཁོར་དེ་ལ་མངོན་པར་མོས་པར་བྱ་བ་དང་། སངས་རྒྱས་བལྟ་བའི་ཕྱོགས་དེ་ལ་མངོན་པར་སྤྲོ་བར་བྱ་བ་དང་། སངས་རྒྱས་རྒྱ་མཚོ་དེ་ལ་རྗེས་སུ་བསམ་པ་དང་། སངས་རྒྱས་གཅིག་ནས་གཅིག་ཏུ་བརྒྱུད་པ་དེ་རྗེས་སུ་དྲན་པར་བྱ་བ་དང་། སངས་རྒྱས་ཀྱི་ཚུལ་རྟོགས་པར་བྱ་བ་དེ་ཁོང་དུ་ཆུད་པར་བྱ་བ་དང་། སངས་རྒྱས་ཀྱི་ནམ་མཁའ་དེ་ལ་རྗེས་སུ་བལྟ་བར་བྱེད་ཅིང་། མཐར་གྱིས་ཕྱོགས་ཀྱི་ལྗོངས་རྒྱ་མཚོའི་སྒོ་གང་ན་བ་དང་།
དགེ་སློང་རྒྱ་མཚོའི་སྤྲིན་གང་ན་བ་དེར་ཕྱིན་ནས། དགེ་སློང་རྒྱ་མཚོའི་སྤྲིན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་སློང་རྒྱ་མཚོའི་སྤྲིན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། དགེ་སློང་རྒྱ་མཚོའི་སྤྲིན་གྱི་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་ཞུགས་ཏེ། བླ་ན་མེད་པའི་ཡེ་ཤེས་རྒྱ་མཚོ་ལ་འཇུག་པར་འཚལ་ན། ཇི་ལྟར་བྱང་ཆུབ་སེམས་དཔའ་རྣམས་འཇིག་རྟེན་གྱི་རྒྱུད་ལས་ཕྱིར་ལྡོག་ཅིང་དེ་བཞིན་གཤེགས་པའི་རིགས་སུ་འགྲུབ་པར་འགྱུར་བ་དང་། འཁོར་བའི་རྒྱ་མཚོ་ལས་རྒལ་ཞིང་ཐམས་ཅད་མཁྱེན་པའི་རྒྱ་མཚོར་འཇུག་པར་འགྱུར་བ་དང་། བྱིས་པ་སོ་སོའི་སྐྱེ་བོའི་ས་ལས་གྱེན་དུ་འཕགས་པར་འགྱུར་ཞིང་། དེ་བཞིན་གཤེགས་པའི་རིགས་སུ་འགྲུབ་པར་འགྱུར་བ་དང་། འཁོར་བའི་རྒྱུད་ལས་ལྡོག་པར་འགྱུར་ཞིང་། བྱང་ཆུབ་སེམས་དཔའི་སྤྱོད་པའི་རྒྱུད་དུ་འཇུག་པར་འགྱུར་བ་དང་། འཁོར་བའི་རྒྱ་མཚོ་རྒྱུད་ཀྱི་འཁོར་ལོ་ལས་ཕྱིར་ལྡོག་ཅིང་བྱང་ཆུབ་སེམས་དཔའི་སྤྱོད་པ་དང་། སྨོན་ལམ་གྱི་འཁོར་ལོར་འཇུག་པར་འགྱུར་བ་དང་། བདུད་ཀྱི་དཀྱིལ་འཁོར་ཐམས་ཅད་རབ་ཏུ་འཇོམས་ཤིང་སངས་རྒྱས་ཀྱི་དཀྱིལ་འཁོར་འབྱུང་བ་ཐམས་ཅད་རབ་ཏུ་སྟོན་པ་དང་། སྲིད་པའི་རྒྱ་མཚོ་ཡོངས་སུ་སྐེམས་ཤིང་སྙིང་རྗེ་ཆེན་པོའི་མཚོ་རྣམ་པར་འཕེལ་བར་བྱེད་པ་དང་། མི་ཁོམ་པ་དང་ངན་སོང་དང་། ངན་འགྲོ་དང་ལོག་པར་ལྟུང་བ་ཐམས་ཅད་ཀྱི་སྒོ་གཅོད་ཅིང་། མཐོ་རིས་དང་མྱ་ངན་ལས་འདས་པའི་སྒོ་འབྱེད་པ་དང་། ཁམས་གསུམ་གྱི་གྲོང་ཁྱེར་གྱི་སྒོ་རྣམ་པར་གཅོད་ཅིང་ཐམས་ཅད་མཁྱེན་པ་ཉིད་ཀྱི་ཕོ་བྲང་གི་སྒོ་རྣམ་པར་འབྱེད་པ་དང་། ཡོ་བྱད་ཐམས་ཅད་ཀྱི་སྲེད་པ་རྣམ་པར་སྤོང་ཞིང་འགྲོ་བ་ཐམས་ཅད་བསྡུ་བའི་སྨོན་ལམ་ཡོངས་སུ་བསྐྱེད་པར་འགྱུར་བ་མ་འཚལ་ལོ། །དེ་སྐད་ཅེས་སྨྲས་པ་དང་། དགེ་སློང་རྒྱ་མཚོའི་སྤྲིན་གྱིས་ཚོང་དཔོན་གྱི་བུ་ནོར་
བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལེགས་སོ་ལེགས་སོ། །རིགས་ཀྱི་བུ་དགེ་བའི་རྩ་བ་མ་བསྐྱེད་པའི་སེམས་ཅན་རྣམས་ནི་བྱང་ཆུབ་ཏུ་སེམས་ཀྱང་མི་སྐྱེ་བའི་དགེ་བའི་རྩ་བ་སྒོ་ཀུན་ཏུ་སྣང་བ་རབ་ཏུ་ཐོབ་པ་དང་། ཐབས་ཀྱི་སྙིང་པོ་དང་ལྡན་པའི་ལམ་གྱི་ཏིང་ངེ་འཛིན་གྱི་ཡེ་ཤེས་སྣང་བས་རབ་ཏུ་སྣང་བར་འགྱུར་བ་དང་། བསོད་ནམས་ཀྱི་རྒྱ་མཚོའི་ཚོགས་རྒྱ་ཆེན་པོ་བསྩགས་པ་དང་། དཀར་པོའི་ཚོགས་ཐམས་ཅད་ཀྱི་རྒྱུན་མི་འཆད་པ་དང་། དགེ་བའི་བཤེས་གཉེན་ཐམས་ཅད་བཀུར་བས་ཡོངས་སུ་སྐྱོ་བ་མེད་པ་དང་། ལུས་དང་སྲོག་ལ་འཕངས་པ་མི་རྩི་བ་དང་། དངོས་པོར་འཛིན་པ་ཐམས་ཅད་དང་བྲལ་བ་དང་། མཐོན་དམན་མེད་པའི་ས་ལྟར་སེམས་མཉམ་པ་དང་། རང་བཞིན་གྱི་སྙིང་རྗེ་ཆེ་ཞིང་བྱམས་པར་སེམས་པ་དང་ལྡན་པ་དང་། སྲིད་པའི་ལམ་གྱི་རྒྱུད་ཐམས་ཅད་དུ་གནས་པར་འདུག་པ་དང་། དེ་བཞིན་གཤེགས་པའི་ཡུལ་ལ་མངོན་པར་མོས་པའི་སེམས་ཅན་རྣམས་བྱང་ཆུབ་ཏུ་སེམས་སྐྱེ་སྟེ། འདི་ལྟར་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་སྙིང་རྗེ་ཆེན་པོའི་སེམས་དང་འགྲོ་བ་ཐམས་ཅད་ལ་སྙོམས་པར་ནན་ཏན་དུ་བྱ་བའི་ཕྱིར་བྱམས་པ་ཆེན་པོའི་སེམས་དང་། འགྲོ་བ་ཐམས་ཅད་ཀྱི་སྡུག་བསྔལ་གྱི་ཕུང་པོ་ཞི་བར་བྱ་བའི་ཕྱིར་བདེ་བའི་སེམས་དང་། མི་དགེ་བའི་ཆོས་ཐམས་ཅད་ལས་རྣམ་པར་བཟློག་པའི་ཕྱིར་ཕན་པའི་སེམས་དང་། འཇིགས་པ་ཐམས་ཅད་ལས་ཡོངས་སུ་བསྲུང་བའི་ཕྱིར་སྙིང་བརྩེ་བའི་སེམས་དང་། བསྒྲིབས་པ་ཐམས་ཅད་རྣམ་པར་བཟློག་པའི་ཕྱིར་ཆགས་པ་མེད་པའི་སེམས་དང་། ཆོས་ཀྱི་དབྱིངས་ཐམས་ཅད་རྒྱས་པར་དགང་བའི་ཕྱིར། རྒྱ་ཆེན་པོའི་སེམས་དང་ནམ་མཁའི་དབྱིངས་ཀུན་ཏུ་གཞོལ་ཞིང་ཀུན་ཏུ་འགྲོ་བར་བྱ་བའི་ཕྱིར་མཐའ་ཡས་པའི་སེམས་དང་། དེ་བཞིན་གཤེགས་པ་ཐམས་ཅད་མཐོང་ཞིང་རྣམ་པར་
དམིགས་པར་བྱ་བའི་ཕྱིར་དྲི་མ་མེད་པའི་སེམས་དང་། དུས་གསུམ་གྱི་དམིགས་པ་མ་ལུས་པར་ཡེ་ཤེས་ཀྱིས་རྒྱས་པར་དགང་བའི་ཕྱིར་རྣམ་པར་དག་པའི་སེམས་དང་། ཐམས་ཅད་མཁྱེན་པའི་ཡེ་ཤེས་རྒྱ་མཚོ་ལ་འཇུག་པར་བྱ་བའི་ཕྱིར་ཡེ་ཤེས་ཀྱི་སེམས་ཀྱང་སྐྱེ་བར་འགྱུར་རོ། །རིགས་ཀྱི་བུ་ཁོ་བོས་ནི་ཕྱོགས་ཀྱི་ལྗོངས་རྒྱ་མཚོའི་སྒོ་འདིར་ལོ་བཅུ་གཉིས་སུ་རྒྱ་མཚོ་ཆེན་པོ་འདི་ལ་དམིགས་ཏེ། མངོན་དུ་བྱས་ནས་འདི་ལྟར་རྒྱ་མཚོ་རྒྱ་ཆེ་ཞིང་ཚད་མེད་པ་ལ་རྗེས་སུ་བསམ་པ་དང་། དྲི་མ་མེད་ཅིང་དང་བ་དང་། ཟབ་ཅིང་གཏིང་དཔག་དཀའ་བ་དང་། བགས་ཀྱིས་གཞོལ་ཞིང་ལེགས་པར་གནས་པ་དང་། རིན་པོ་ཆེའི་འབྱུང་གནས་དུ་མས་རྣམ་པར་བརྒྱན་པ་དང་། ཆུའི་ཕུང་པོ་ཚད་མེད་པ་དང་། ཁ་དོག་རྣམ་པ་ཐ་དད་པ་མང་ཞིང་བསམ་གྱིས་མི་ཁྱབ་པ་དང་། འབྱུང་པོ་མཐའ་ཡས་པའི་གནས་སུ་གྱུར་པ་དང་སྲོག་ཆགས་མང་པོ་སྣ་ཚོགས་ཀྱི་རྟེན་དུ་གྱུར་པ་དང་། སྤྲིན་ཆེན་པོའི་ཆར་ཡོངས་སུ་འཛིན་པ་དང་། གང་ཞིང་འབྲི་བར་འགྱུར་བ་མེད་པ་ལ་རྗེས་སུ་སེམས་པར་བྱེད་ཅིང་གནས་ཏེ། རིགས་ཀྱི་བུ་དེ་ལ་ཁོ་བོས་འདི་སྙམ་དུ་བསམ་མོ། །འཇིག་རྟེན་གྱི་ཁམས་འདི་ན་རྒྱ་མཚོ་ཆེན་པོ་འདི་བས་ཀྱང་འཕགས་པར་རྒྱ་ཆེ་ལ་འདི་བས་ཀྱང་ཡངས་ཤིང་འདི་བས་ཀྱང་ཚད་མེད་ལ། འདི་བས་ཀྱང་ངོ་མཚར་དང་ལྡན་པ་ལ་ལ་ཞིག་ཡོད་དམ་སྙམ་སྟེ། དེ་ལྟར་ཁོ་བོ་ཚུལ་བཞིན་དུ་བསམ་པ་ཡིད་ལ་བྱེད་པ་ལ་བརྩོན་པར་གནས་པའི་ཚེ། རྒྱ་མཚོ་ཆེན་པོའི་འོག་གི་གཞི་ལས་པད་མོ་ཆེན་པོ་ནོར་བུ་རིན་པོ་ཆེ་ཨིནྡྲ་ནཱི་ལ་ཐུབ་པ་མེད་ཅིང་རྡོ་རྗེ་ལྟ་བུར་སྲ་བའི་ཆུ་བ་ཅན། ནོར་བུ་རིན་པོ་ཆེ་བཻ་ཌཱུརྻ་དམ་པའི་རྒྱན་དང་ལྡན་པ། འཛམ་བུ་ཆུ་ཀླུང་གི་གསེར་ལྟར་དྲི་མ་མེད་པའི་ལོ་མ་རྒྱ་ཆེན་པོ་ཅན། དུས་དང་མཐུན་པའི་ཙན་དན་གྱི་སྙིང་པོའི་རྒྱན་གྱིས་བརྒྱན་པ། རིན་པོ་ཆེ་ཨ་སྨ་གར་བྷའི་ཟེ་བ་ཅན། རྒྱ་མཚོ་ཙམ་དུ་ཡངས་ཤིང་རྒྱ་ཆེ་བ་ལྷ་མ་ཡིན་གྱི་དབང་པོ་བརྒྱ་སྟོང་ཕྲག་བཅུས་སྡོང་པོའི་ལྷུན་ནས་བཟུང་བ། རིན་པོ་ཆེ་སྣ་ཚོགས་བརྒྱ་
ཕྲག་སྟོང་གི་དྲ་བས་ཀུན་ནས་ཡོག་པ། ཀླུ་ཡི་དབང་པོ་བརྒྱ་སྟོང་ཕྲག་བཅུས་སྤོས་ཆུའི་ཆར་མངོན་པར་ཕབ་པ། ནམ་མཁའ་ལྡིང་གི་དབང་པོ་བརྒྱ་སྟོང་ཕྲག་བཅུས་དར་དང་རིན་པོ་ཆེའི་ལྡ་ལྡི་དང་སེ་མོ་དོ་མང་པོ་མཆུས་བཟུང་ཞིང་རབ་ཏུ་སྤྱངས་པ་མིའམ་ཅིའི་དབང་པོ་བརྒྱ་སྟོང་ཕྲག་བཅུས་ཕན་པའི་སེམས་ཀྱིས་ཀུན་ནས་བལྟ་བ། ལྟོ་འཕྱེ་ཆེན་པོའི་དབང་པོ་བརྒྱ་སྟོང་ཕྲག་བཅུས་འཁོར་ནས་མངོན་པར་འདུད་པ། སྲིན་པོའི་དབང་པོ་བརྒྱ་སྟོང་ཕྲག་བཅུས་ལུས་འདུད་ཅིང་མངོན་པར་མཆོད་པ། དྲི་ཟའི་དབང་པོ་བརྒྱ་སྟོང་ཕྲག་བཅུས་རོལ་མོ་དང་གླུ་སྣ་ཚོགས་སྙན་པས་བསྟོད་ཅིང་མཆོད་པ། ལྷའི་དབང་པོ་བརྒྱ་སྟོང་ཕྲག་བཅུས་ལྷ་རྫས་ཀྱི་མེ་ཏོག་དང་། སྤོས་དང་ཕྲེང་བ་དང་། བདུག་སྤོས་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། ལྷའི་བ་དན་གྱི་སྤྲིན་གྱི་ཆར་མངོན་པར་ཕབ་པ། ཚངས་པའི་དབང་པོ་བརྒྱ་སྟོང་ཕྲག་བཅུས་སྤྱི་བོས་གཏུགས་ཏེ། ཕྱག་འཚལ་ཞིང་མཆོད་པ། གནས་གཙང་མའི་རིས་ཀྱི་ལྷ་བརྒྱ་སྟོང་ཕྲག་བཅུས་ཐལ་མོ་སྦྱར་ཅིང་ཕྱག་བྱ་བ། མིའི་དབང་པོ་འཁོར་ལོས་སྒྱུར་བ་བརྒྱ་སྟོང་ཕྲག་བཅུས་རིན་པོ་ཆེ་བདུན་གྱིས་བསུ་ཞིང་མངོན་པར་མཆོད་པ། རྒྱ་མཚོའི་ལྷ་བརྒྱ་སྟོང་ཕྲག་བཅུས་མངོན་པར་མཐོན་ཅིང་ཕྱག་བྱ་བ། ནོར་བུ་རིན་པོ་ཆེ་སྐར་མའི་ངད་བརྒྱ་སྟོང་ཕྲག་བཅུས་འོད་ཟེར་གྱི་རྒྱན་གྱིས་རབ་ཏུ་སྣང་བར་བྱས་པ། ནོར་བུ་རིན་པོ་ཆེ་བསོད་ནམས་ཀྱིས་དག་པ་བརྒྱ་སྟོང་ཕྲག་བཅུས་མཁོས་སུ་ཕེབས་པར་འཕེལ་པས་རབ་ཏུ་བརྒྱན་པ། ནོར་བུ་རིན་པོ་ཆེ་རྣམ་པར་སྣང་བ་བརྒྱ་སྟོང་ཕྲག་བཅུས་སྙིང་པོ་རབ་ཏུ་གསལ་བར་བྱས་པ། ནོར་བུ་རིན་པོ་ཆེ་དཔལ་གྱི་སྙིང་པོ་བརྒྱ་སྟོང་ཕྲག་བཅུས་དཔལ་ཆེན་པོ་ཤིན་ཏུ་འབར་བར་གྱུར་པ། ནོར་བུ་རིན་པོ་ཆེའི་མཛོད་སྣང་བ་བརྒྱ་སྟོང་ཕྲག་བཅུས་མཐའ་ཡས་པར་སྣང་བར་བྱས་པ། ནོར་བུ་རིན་པོ་ཆེ་འཛམ་བུའི་ཆུ་ཀླུང་བརྒྱ་སྟོང་ཕྲག་བཅུས་ཡོངས་སུ་སྟོན་པར་གནས་པས་རབ་ཏུ་བརྒྱན་པ། ནོར་བུ་རིན་པོ་ཆེ་
རྡོ་རྗེའི་སེང་གེ་བརྒྱ་སྟོང་ཕྲག་བཅུས་ཐུབ་པ་མེད་པར་བརྒྱན་པ། ནོར་བུ་རིན་པོ་ཆེ་ཉི་མའི་སྙིང་པོ་བརྒྱ་སྟོང་ཕྲག་བཅུས་རྒྱ་ཆེར་གསལ་བར་བསྒྲུབས་པ། ནོར་བུ་རིན་པོ་ཆེ་འབར་བ་བརྒྱ་སྟོང་ཕྲག་བཅུས་ཁ་དོག་སྣ་ཚོགས་སུ་བརྒྱན་པ། ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོ་བརྒྱ་སྟོང་ཕྲག་བཅུས་མི་ཟད་པའི་རྒྱན་དང་འོད་འབར་བར་བྱས་པ་བྱུང་སྟེ། པདྨ་ཆེན་པོ་དེ་ནི་དེ་བཞིན་གཤེགས་པའི་འཇིག་རྟེན་ལས་འདས་པའི་དགེ་བའི་རྩ་བ་ལས་བྱུང་བའོ། །བྱང་ཆུབ་སེམས་དཔའི་བསམ་པས་ཡོངས་སུ་བརྟན་པའོ། །ཕྱོགས་ཐམས་ཅད་དུ་མངོན་པར་དམིགས་སུ་ཡོད་པའོ། །སྒྱུ་མའི་རྣམ་པའི་ཆོས་ཀྱིས་བྱུང་བའོ། །རྗེན་པའི་དྲི་མ་མེད་པའི་ལས་ཀྱིས་བྱུང་བའོ། །ཉོན་མོངས་པ་མེད་པའི་ཆོས་ཀྱི་ཚུལ་གྱིས་བརྒྱན་པའོ། །རྨི་ལམ་ལྟ་བུའི་ཆོས་ཉིད་ཀྱིས་ཡོངས་སུ་བྱུང་བའོ། །མངོན་པར་འདུ་བྱ་བ་མེད་པའི་ཆོས་ཀྱི་ཚུལ་གྱིས་རྒྱས་བཏབ་པའོ། །ཆགས་པ་མེད་པའི་ཆོས་ཀྱི་ཚུལ་དང་ལྡན་པའོ། །ཕྱོགས་ཀྱི་ཁམས་ཀུན་ཏུ་ཆོས་ཀྱི་དབྱིངས་རྒྱས་པར་འགེངས་པའོ། །སངས་རྒྱས་ཀྱི་ཡུལ་བརྗོད་པ་དང་མཐུན་པ་སྟེ། དེའི་རྣམ་པ་དང་ཡོན་ཏན་དང་དབྱིབས་དང་། ཁ་དོག་དང་རྒྱན་གྱིས་མཐར་ཕྱིན་པ་ནི་བསྐལ་པ་བརྒྱ་སྟོང་གྲངས་མེད་པར་ཡང་ཁོང་དུ་ཆུད་པར་མི་ནུས་ཏེ། པད་མོ་ཆེན་པོ་དེ་ཡང་དེ་བཞིན་གཤེགས་པའི་སྐུ་སྐྱིལ་མོ་ཀྲུང་དུ་བཞུགས་པས་ཁྱབ་ཅིང་ཡོངས་སུ་རྒྱས་པར་མཐོང་ངོ་། །དེ་བཞིན་གཤེགས་པའི་སྐུ་དེ་ཡང་འདི་ནས་བཟུང་བ་ནས། སྲིད་པའི་རྩེ་མོའི་བར་གྱི་མཐས་ཀླས་པར་མཐོང་ངོ་། །དེ་བཞིན་གཤེགས་པ་དེའི་གདན་གྱི་རྒྱན་བསམ་གྱིས་མི་ཁྱབ་པ་ཡང་མཐོང་ངོ་། །འཁོར་གྱི་དཀྱིལ་འཁོར་གྱི་རྒྱན་བསམ་གྱིས་མི་ཁྱབ་པ་དང་། འོད་ཀྱི་དཀྱིལ་འཁོར་གྱི་རྒྱན་བསམ་གྱིས་མི་ཁྱབ་པ་དང་། མཚན་ཕུན་སུམ་ཚོགས་པ་བསམ་གྱིས་མི་ཁྱབ་པ་དང་། དཔེ་བྱད་བཟང་པོ་སྣ་ཚོགས་བསམ་གྱིས་མི་ཁྱབ་པ་དང་། སངས་རྒྱས་ཀྱི་ཁྱུ་མཆོག་གི་མཐུ་དང་། སངས་རྒྱས་ཀྱི་
རྣམ་པར་འཕྲུལ་པ་བསམ་གྱིས་མི་ཁྱབ་པ་དང་། དེ་བཞིན་གཤེགས་པའི་སྐུ་མདོག་རྣམ་པར་དག་པ་བསམ་གྱིས་མི་ཁྱབ་པ་དང་། སྤྱི་གཙུག་ལྟར་མི་མཐོང་བ་བསམ་གྱིས་མི་ཁྱབ་པ་དང་། ལྗགས་ཡངས་པ་བསམ་གྱིས་མི་ཁྱབ་པ་ཡང་མཐོང་ངོ་། ། སངས་རྒྱས་ཀྱི་གསུང་གི་རྒྱན་བསམ་གྱིས་མི་ཁྱབ་པ་དང་། དབྱངས་ཀྱི་དཀྱིལ་འཁོར་བསམ་གྱིས་མི་ཁྱབ་པའང་ཐོས་སོ། །སྟོབས་ཚད་མེད་པ་བསམ་གྱིས་མི་ཁྱབ་པ་དང་མི་བསྙེངས་པའི་རྒྱན་རྣམ་པར་དག་པ་བསམ་གྱིས་མི་ཁྱབ་པ་དང་། སོ་སོ་ཡང་དག་པར་རིག་པའི་སྟོབས་མངོན་པར་བསྒྲུབ་པ་བསམ་གྱིས་མི་ཁྱབ་པ་ཡང་རྗེས་སུ་ཤེས་སོ། །སྔོན་བྱང་ཆུབ་སེམས་དཔའི་སྤྱོད་པ་ཡང་དག་པར་བསྒྲུབ་པ་བསམ་གྱིས་མི་ཁྱབ་པ་ཡང་རྗེས་སུ་དྲན་ནོ། །མངོན་པར་རྫོགས་པར་བྱང་ཆུབ་པའི་རྣམ་པར་འཕྲུལ་པ་བསམ་གྱིས་མི་ཁྱབ་པ་ཡང་མཐོང་ངོ་། །ཆོས་ཀྱི་སྤྲིན་གྱི་འབྲུག་སྒྲ་མངོན་པར་བསྒྲགས་པ་བསམ་གྱིས་མི་ཁྱབ་པ་དང་ཡོངས་སུ་བསྟན་པ་རྣམ་པར་དམིགས་པའི་གནས་དང་། རྒྱན་བསམ་གྱིས་མི་ཁྱབ་པའང་ཐོས་སོ། །གཡས་གཡོས་ཀྱི་སྐུའི་རྣམ་པ་ཚད་མེད་པ་བསམ་གྱིས་མི་ཁྱབ་པ་དང་། སེམས་ཅན་གྱི་དོན་དང་དགོས་པ་བསམ་གྱིས་མི་ཁྱབ་པ་ཡོངས་སུ་གྲུབ་པར་འགྱུར་བའང་མཐོང་ངོ་། །དེ་བཞིན་གཤེགས་པ་དེས་ཀྱང་ཕྱག་གཡས་པ་བརྐྱང་ཞིང་ཁོ་བོའི་མགོ་ལ་བྱུགས་ནས། ཆོས་ཀྱི་རྣམ་གྲངས་ཀུན་ནས་མྱིག་ཅེས་བྱ་བ་དེ་བཞིན་གཤེགས་པ་ཐམས་ཅད་ཀྱི་ཡུལ་བྱང་ཆུབ་སེམས་དཔའི་སྤྱོད་པ་རབ་ཏུ་བརྗོད་པ་ཆོས་ཀྱི་དབྱིངས་ཀྱི་གཞི་དང་། རྣམ་པ་ཐ་དད་པ་ཐམས་ཅད་རབ་ཏུ་སྣང་བ་ཆོས་ཐམས་ཅད་ཀྱི་དཀྱིལ་འཁོར་ལ་ཡང་དག་པར་གཞོལ་ཞིང་སྣང་བར་བྱེད་པ། ཞིང་གི་དཀྱིལ་འཁོར་དང་རྣམ་པ་ཐམས་ཅད་རྣམ་པར་དག་པས་ཡོངས་སུ་སྣང་བ། ཕས་ཀྱི་རྒོལ་བའི་དཀྱིལ་འཁོར་ཐམས་ཅད་རྣམ་པར་འཐོར་བ་བདུད་གྱི་དཀྲུགས་མའི་དཀྱིལ་འཁོར་ཐམས་ཅད་དུ་འཇོམས་པ། སེམས་ཅན་གྱི་ཁམས་ཐམས་ཅད་
ཤིན་ཏུ་ཚིམ་པར་བྱེད་པ། སེམས་ཅན་ཐམས་ཅད་ཀྱི་སེམས་ཀྱི་ཐིབས་པོ་རབ་ཏུ་སྣང་བར་བྱེད་པ། སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་རྣམ་པར་དམིགས་པ། སེམས་ཅན་ཐམས་ཅད་ཀྱི་དབང་པོའི་འཁོར་ལོའི་རྒྱུད་དང་། མཐུ་སྣང་བར་བྱེད་པ་ཡང་དག་པར་བསྟན་ཏེ། ཁོ་བོས་ཡང་ཀུན་ནས་མིག་གི་ཆོས་ཀྱི་རྣམ་གྲངས་དེ་བླངས་སོ། །བཟུང་ངོ་སྤེལ་ཏོ་བསམས་སོ། །དེ་ལྟར་བཟུང་བ་དེ་ལའང་བྲི་ན་ནི་སྣག་ཚ་རྒྱ་མཚོ་ཆེན་པོའི་ཕུང་པོ་ཙམ་དང་། སྨྱི་གུའི་ཕུང་པོ་རི་རབ་རིའི་རྒྱལ་པོ་ཙམ་ཟད་པར་གྱུར་ཀྱང་ཆོས་ཀྱི་རྣམ་གྲངས་དེ་ལས་ལེའུ་རེ་རེ་དང་སྒོ་རེ་རེ་དང་ཆོས་ཀྱི་ཚུལ་རེ་རེ་དང་ཆོས་ཀྱི་ཚིག་རྣམ་པར་ཕྱེ་བ་རེ་རེ་ལས་ཀྱང་ཟད་པའམ། འགྲིབ་པའམ། འབྱང་བའམ། མཐར་ཐུག་པའམ། མཐའ་ཟད་པར་འགྱུར་བ་དམིགས་པར་མི་རུང་ངོ་། །རིགས་ཀྱི་བུ་དེ་ལྟར་བདག་གིས་ལོ་བཅུ་གཉིས་ཚང་བར་ཆོས་ཀྱི་རྣམ་གྲངས་ཀུན་ནས་མིག་ཅེས་བྱ་བ་འདི་ལ་ཉི་མ་གཅིག་ཅིང་ཡང་ཐོས་པ་འཛིན་པའི་གཟུངས་ཀྱི་འོད་སྣང་བས་ལེའུ་གྲངས་མེད་པ་ཞིག་ཁོང་དུ་ཆུད་དོ། །ཞི་བའི་སྒོའི་གཟུངས་ཀྱི་འོད་སྣང་བས་ལེའུ་གྲངས་མེད་པ་ཞིག་ལ་ཞུགས་སོ། །གློང་མཐའ་ཡས་པའི་གཟུངས་ཀྱི་འོད་སྣང་བས་ལེའུ་གྲངས་མེད་པ་ཞིག་ལ་ཡང་དག་པར་འཇུག་གོ །ས་ལ་རྣམ་པར་དཔྱོད་ཅིང་རྗེས་སུ་རྟོག་པར་བྱེད་པའི་གཟུངས་ཀྱི་འོད་སྣང་བས་ལེའུ་གྲངས་མེད་པ་ཞིག་རྣམ་པར་བསྒོམས་ཏེ་རྣམ་པར་དབྱེ་བ་བྱས་སོ། །གཟི་བརྗིད་དང་ལྡན་པའི་གཟུངས་ཀྱི་འོད་སྣང་བས་ལེའུ་གྲངས་མེད་པ་ཞིག་ཡོངས་སུ་བླངས་སོ། །པད་མོའི་རྒྱན་གྱི་གཟུངས་ཀྱི་འོད་སྣང་བས་ལེའུ་གྲངས་མེད་པ་ཞིག་མངོན་པར་བསྒྲུབས་སོ། །དབྱངས་ཀྱི་ཚུལ་གྱི་གཟུངས་ཀྱི་འོད་སྣང་བས་ལེའུ་གྲངས་མེད་པ་ཞིག་ཡང་དག་པར་བཤད་དོ། །ནམ་མཁའི་སྙིང་པོའི་གཟུངས་ཀྱི་འོད་སྣང་བས་ལེའུ་གྲངས་མེད་པ་ཞིག་རབ་ཏུ་ཕྱེ་བའོ། །སྐར་མ་བརྩེགས་པའི་གཟུངས་ཀྱི་འོད་སྣང་བས་ལེའུ་གྲངས་མེད་པ་ཞིག་ཤིན་ཏུ་རྒྱས་པར་བྱས་སོ། །རྒྱ་མཚོ་སྙིང་པོའི་གཟུངས་
ཀྱི་འོད་སྣང་བས་ལེའུ་གྲངས་མེད་པ་ཞིག་ཡོངས་སུ་བཀོད་དོ། །ཁོ་བོའི་དྲུང་དུ་ཤར་ཕྱོགས་ལོགས་ནས་ལྷ་དང་ལྷའི་དབང་པོའམ། ཀླུ་དང་ཀླུའི་དབང་པོའམ། གནོད་སྦྱིན་དང་གནོད་སྦྱིན་གྱི་དབང་པོའམ། དྲི་ཟ་དང་དྲི་ཟའི་དབང་པོའམ། ལྷ་མ་ཡིན་དང་ལྷ་མ་ཡིན་གྱི་དབང་པོའམ། ནམ་མཁའ་ལྡིང་དང་ནམ་མཁའ་ལྡིང་གི་དབང་པོའམ། མིའམ་ཅི་དང་མིའམ་ཅིའི་དབང་པོའམ། ལྟོ་འཕྱེ་ཆེན་པོ་དང་། ལྟོ་འཕྱེ་ཆེན་པོའི་དབང་པོའམ། མི་དང་མིའི་དབང་པོའམ། ཚངས་པ་དང་། ཚངས་པའི་དབང་པོའམ། སེམས་ཅན་གང་སུ་འོངས་ཀྱང་རུང་སྟེ། དེ་དག་ཐམས་ཅད་དེ་བཞིན་གཤེགས་པ་དང་། བྱང་ཆུབ་སེམས་དཔའི་སྤྱོད་པ་སྣང་བའི་ཆོས་ཀྱི་རྣམ་གྲངས་ཀུན་ནས་མིག་ཅེས་བྱ་བ་འདི་ཉིད་ལ་རབ་ཏུ་བཀོད་ཅིང་བཙུད་དེ། དེ་དག་ཀུན་ཀྱང་ཀུན་ནས་མིག་གི་ཆོས་ཀྱི་རྣམ་གྲངས་འདི་ཉིད་ལ་མོས་པར་བྱས་སོ། །རྟོག་ཏུ་བཙུད་དོ། །ཡོངས་སུ་བསྟན་ཏོ། །ཡང་དག་པར་བརྗོད་དོ། །ཡོངས་སུ་གསལ་བར་བྱས་སོ། །རྣམ་པར་ཕྱེའོ། །རྒྱས་པར་བྱས་སོ། །མངོན་པར་བསྟན་ཏོ། །རྣམ་པར་བཀྲོལ་ལོ་རབ་ཏུ་ཕྱེའོ། །ཤིན་ཏུ་སྣང་བར་བྱས་སོ། །དེ་ལྟར་ཤར་ཕྱོགས་ལ་ཇི་ལྟ་བ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་བླའི་ཕྱོགས་ནས་སེམས་ཅན་གང་སུ་འོངས་ཀྱང་རུང་སྟེ། ཀུན་ལ་ཡང་སྔ་མ་བཞིན་ནོ། །རིགས་ཀྱི་བུ་དེ་ལྟར་ཁོ་བོས་ནི་ཆོས་ཀྱི་རྣམ་གྲངས་གཅིག་ཅིག་ཤེས་པར་ཟད་ན། བྱང་ཆུབ་སེམས་དཔའི་སྨོན་ལམ་ཡོངས་སུ་དག་པ་དང་ལྡན་པས། བྱང་ཆུབ་སེམས་དཔའི་སྤྱོད་པ་རྒྱ་མཚོ་ཐམས་ཅད་ལ་ཞུགས་པ་དང་། བསྐལ་པ་ཐམས་ཅད་དུ་གནས་པ་རྒྱུན་མི་འཆད་པའི་ཕྱིར་སྨོན་ལམ་རྒྱ་མཚོ་ཐམས་ཅད་ལ་ཞུགས་པ་དང་། བསམ་པ་ཇི་ལྟ་བ་
བཞིན་དུ་རྗེས་སུ་འབྲང་བར་བྱ་བའི་ཕྱིར་སེམས་ཅན་རྒྱ་མཚོ་ཐམས་ཅད་ལ་ཞུགས་པ་དང་། སྟོབས་བཅུའི་ཡེ་ཤེས་ཆགས་པ་མེད་པའི་སྣང་བ་ཡོངས་སུ་བསྐྱེད་པའི་ཕྱིར་འགྲོ་བ་ཐམས་ཅད་ཀྱི་སེམས་རྒྱ་མཚོ་ལ་ཞུགས་པ་དང་། ཡོངས་སུ་སྨིན་པར་བྱ་བ་དང་། གདུལ་བའི་དུས་ལ་མི་འདའ་བར་བྱ་བའི་ཕྱིར་སེམས་ཅན་ཐམས་ཅད་ཀྱི་དབང་པོ་རྒྱ་མཚོ་ལ་ཞུགས་པ་དང་། ཞིང་ཐམས་ཅད་རྣམ་པར་དག་པར་བྱ་བའི་སྨོན་ལམ་མངོན་པར་བསྒྲུབས་པས། ཞིང་རྒྱ་མཚོ་ཐམས་ཅད་ལ་ཞུགས་པ་དང་། དེ་བཞིན་གཤེགས་པ་ལ་མཆོད་ཅིང་རིམ་གྲོ་བྱེད་པའི་སྟོབས་ཀྱིས་སངས་རྒྱས་རྒྱ་མཚོ་ཐམས་ཅད་ལ་ཞུགས་པ་དང་། ཡེ་ཤེས་རྣམ་པར་རིག་པས་ཆོས་རྒྱ་མཚོ་ཐམས་ཅད་ལ་ཞུགས་པ་དང་། ནན་ཏན་དང་ལྡན་པས་ཡོན་ཏན་རྒྱ་མཚོ་ཐམས་ཅད་ལ་ཞུགས་པ་དང་། བརྗོད་པ་ཐམས་ཅད་དུ་ཆོས་ཀྱི་འཁོར་ལོ་བསྐོར་བ་མངོན་པར་བསྒྲུབ་པའི་ཕྱིར། འགྲོ་བའི་སྐད་རྒྱ་མཚོ་ཐམས་ཅད་ལ་ཞུགས་པ་རྣམས་ཀྱི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་འདི་ནས་དཔག་ཚད་དྲུག་ཅུ་འདས་པའི་ལྷོ་ཕྱོགས་ཀྱི་གནས་འདི་ཉིད་ན། ལང་ཀའི་གནས་རྒྱ་མཚོའི་ངོགས་ཤེས་བྱ་བ་ཡོད་དེ། དེ་ན་དགེ་སློང་ཤིན་ཏུ་བརྟན་པ་ཞེས་བྱ་བ་འདུག་གིས། དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ཡོངས་སུ་སྦྱང་བར་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དགེ་སློང་རྒྱ་མཚོའི་སྤྲིན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་སློང་རྒྱ་མཚོའི་སྤྲིན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། དགེ་སློང་རྒྱ་མཚོའི་སྤྲིན་གྱི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་དགེ་བའི་བཤེས་གཉེན་གྱི་གདམས་ངག་དེ་དང་། ཀུན་ནས་མིག་གི་ཆོས་ཀྱི་རྣམ་གྲངས་དེ་ཡང་རྗེས་སུ་དྲན་པར་བྱེད་ཅིང་དེ་བཞིན་གཤེགས་པའི་རྣམ་པར་འཕྲུལ་པ་དེ་ཡང་རྗེས་སུ་བསམ་པ་དང་། ཆོས་ཀྱི་ཚིག་དང་ཡི་གེའི་སྤྲིན་དེ་དག་ཀྱང་ཡོངས་
སུ་གཟུང་བ་དང་། ཆོས་ཀྱི་སྒོ་རྒྱ་མཚོའི་ཚུལ་དེ་དག་ལའང་འཇུག་པར་བྱ་བ་དང་ཆོས་ཀྱི་ཚུལ་དེའང་རྣམ་པར་བལྟ་བ་དང་། ཆོས་ཀྱི་ལེའུ་དང་གློང་གི་ཚུལ་དེ་དག་ལ་འཇུག་པར་བྱ་བ་དང་། ཆོས་ཀྱི་ནམ་མཁའ་དེ་ལ་ཡང་དག་པར་གཞོལ་བར་བྱ་བ་དང་། ཆོས་ཀྱི་དཀྱིལ་འཁོར་དེ་ཡང་རྗེས་སུ་སྦྱང་བར་བྱ་བ་དང་། ཆོས་རིན་པོ་ཆེའི་གླིང་དེ་ཡང་རྗེས་སུ་སེམས་ཤིང་མཐར་གྱིས་ལང་ཀའི་གནས་རྒྱ་མཚོའི་ངོགས་ཤེས་བྱ་བ་གདན་པ་དེར་ཕྱིན་ནས། དགེ་སློང་ཤིན་ཏུ་བརྟན་པ་མཐོང་བར་དགའ་ཞིང་ཤར་ཕྱོགས་སུ་བལྟས་སོ། །དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། བླ་དང་འོག་ཏུ་དགེ་སློང་ཤིན་ཏུ་བརྟན་པ་མཐོང་བར་དགའ་སྟེ། ཀུན་ཏུ་བལྟས་པ་དང་། དེས་དགེ་སློང་ཤིན་ཏུ་བརྟན་པ་ནམ་མཁའི་དབྱིངས་ལ་ལྷ་བརྒྱ་སྟོང་གྲངས་མེད་པས་ཡོངས་སུ་བསྐོར་ཅིང་ཕན་ཚུན་དུ་འཆག་པ་མཐོང་ངོ་། །ནམ་མཁའི་དབྱིངས་དེ་ཡང་ལྷའི་དབང་པོ་རྣམས་ཀྱིས་དགེ་སློང་ཤིན་ཏུ་བརྟན་པ་ལ་མཆོད་པའི་ལས་སུ་བྱ་བའི་ཕྱིར། ལྷ་རྫས་ཀྱི་མེ་ཏོག་སིལ་མའི་སྤྲིན་གྱིས་ཡོག་པ་དང་། ལྷ་རྫས་ཀྱི་རོལ་མོའི་སྤྲིན་གྱི་སྒྲ་དང་། དར་གྱི་བ་དན་གྲངས་མེད་པའི་རྒྱན་གྱིས་བརྒྱན་པར་མཐོང་ངོ་། །ཀླུའི་དབང་པོ་རྣམས་ཀྱིས་ནམ་མཁའ་དེ་ལ་ཨ་ག་རུ་ནག་པོའི་སྤོས་མངོན་པར་འཐུལ་བའི་སྤྲིན་ཤིན་ཏུ་མཐོ་བ་ལས་འབྲུག་སྒྲ་བསམ་གྱིས་མི་ཁྱབ་པ་འབྱུང་བར་བྱས་པ་མཐོང་ངོ་། །མིའམ་ཅིའི་དབང་པོ་རྣམས་ཀྱིས་ནམ་མཁའ་དེ་ལ་ལྷ་རྫས་ཀྱི་ངག་སྙན་པའི་རྒྱུད་ཀྱི་བསྟོད་པའི་རོལ་མོ་བརྡུང་བ་དང་། དཀྲོལ་བ་དང་གླུར་བླང་བའི་དབྱངས་ཐམས་ཅད་སྦྱར་ཅིང་བླངས་པ་ཐོས་པར་གྱུར་ཏོ། །ལྟོ་འཕྱེ་ཆེན་པོའི་དབང་པོ་རྣམས་ཀྱིས་ནམ་མཁའ་དེ་ལ་གོས་ཤིན་ཏུ་ཕྲ་ཞིང་མདོག་བཟང་བའི་སྤྲིན་བསམ་གྱིས་མི་ཁྱབ་པ་དག་ཡིད་དགའ་བས་བཀྱེ་
སྟེ། དགེ་སློང་ཤིན་ཏུ་བརྟན་པ་ལ་དད་ཅིང་མོས་པའི་གཟུགས་སུ་ཕྱུང་བ་མཐོང་ངོ་། །ལྷ་མ་ཡིན་གྱི་དབང་པོ་རྣམས་ཀྱིས་ཀྱང་ནམ་མཁའ་དེ་ལ་ནོར་བུ་རིན་པོ་ཆེའི་སྤྲིན་བསམ་གྱིས་མི་ཁྱབ་པ་བྱིན་གྱིས་བརླབས་ཏེ། ཡོན་ཏན་བསམ་གྱིས་མི་ཁྱབ་པའི་རྒྱན་སྣང་བ་དང་ལྡན་པར་བྱས་པ་མཐོང་ངོ་། །ནམ་མཁའ་ལྡིང་གི་དབང་པོ་མང་པོ་ཡང་མྱིའི་གཟུགས་དང་ཁ་དོག་དང་དབྱིབས་སུ་འཁོད་ཅིང་ནམ་མཁའ་ལྡིང་གི་དབང་པོའི་བུ་མོས་ཀུན་ནས་བསྐོར་ཏེ། གསོད་པ་མེད་པ་ལ་དགའ་ཞིང་ཐལ་མོ་སྦྱར་ཏེ་གནས་པ་བསམ་གྱིས་མི་ཁྱབ་པ་མཐོང་ངོ་། །གནོད་སྦྱིན་གྱི་དབང་པོ་བརྒྱ་སྟོང་འཁོར་དང་བཅས་པ་བསམ་གྱིས་མི་ཁྱབ་པ་དག་ཀྱང་ནམ་མཁའ་དེ་ལ་ཤིན་ཏུ་མི་སྡུག་པའི་གཟུགས་སུ་དགེ་སློང་ཤིན་ཏུ་བརྟན་པ་ལ་བྱམས་པའི་མཐུ་དང་ལྡན་པར་འཁོད་པ་མཐོང་ངོ་། །སྲིན་པོའི་དབང་པོ་བརྒྱ་སྟོང་འཁོར་དང་བཅས་པ་བསམ་གྱིས་མི་ཁྱབ་པ་དག་ཀྱང་ནམ་མཁའ་དེ་ལ་དགེ་སློང་ཤིན་ཏུ་བརྟན་པ་ཡོངས་སུ་བསྲུང་བ་བྱེད་ཅིང་ཀུན་ཏུ་རྒྱུ་བ་མཐོང་ངོ་། །ཚངས་པའི་དབང་པོ་བརྒྱ་སྟོང་བསམ་གྱིས་མི་ཁྱབ་པ་དག་ཀྱང་ནམ་མཁའ་དེ་ལ་ཐལ་མོ་སྦྱར་ཅིང་དགའ་བ་དང་ཡིད་དུ་འོང་བའི་ཚིག་གི་རྒྱུད་ཀྱི་བསྟོད་པ་རབ་ཏུ་བརྗོད་པ་མཐོང་ངོ་། །གནས་གཙང་མའི་ལྷ་བརྒྱ་སྟོང་བསམ་གྱིས་མི་ཁྱབ་པ་དག་ཀྱང་ནམ་མཁའ་དེ་ལ་དགེ་སློང་ཤིན་ཏུ་བརྟན་པ་ལ་མཆོད་པའི་ལས་སུ་བྱ་བའི་ཕྱིར་ཐལ་མོ་སྦྱར་ཅིང་གཞལ་མེད་ཁང་ན་གནས་པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དགེ་སློང་ཤིན་ཏུ་བརྟན་པ་དེ་ལྟར་ནམ་མཁའི་དབྱིངས་ལ་འཆག་ཅིང་འདུག་པ་མཐོང་ནས་དགའ་རངས་ཏེ་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། དགེ་སློང་ཤིན་ཏུ་བརྟན་པ་ལ་ཐལ་མོ་སྦྱར་ཏེ་ཕྱག་འཚལ་ནས་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ཇི་ལྟར་བྱང་ཆུབ་སེམས་དཔའི་སངས་རྒྱས་ཀྱི་ཆོས་བཙལ་བར་བགྱི་བ་དང་། ཇི་ལྟར་བྱང་ཆུབ་
སེམས་དཔས་སངས་རྒྱས་ཀྱི་ཆོས་ཡོངས་སུ་བསྒྲུབ་པར་བགྱི་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་ཡོངས་སུ་བསྡུ་བར་བགྱི་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་བསྟན་པར་བགྱི་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་བསྒོམ་པར་བགྱི་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་ཀྱི་རྗེས་སུ་འབྲང་བར་བགྱི་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་ཡོངས་སུ་བརྟུལ་བར་བགྱི་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་ཡོངས་སུ་བསྒོམ་པར་བགྱི་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་རྣམ་པར་དག་པར་བགྱི་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་ཡོངས་སུ་སྦྱང་བར་བགྱི་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་ཁོང་དུ་ཆུད་པར་བགྱི་བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། འཕགས་པ་ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཆོས་ལ་ནན་ཏན་དུ་བགྱི། ཇི་ལྟར་ནན་ཏན་བགྱིས་ན་ཡང་དག་པ་ཇི་ལྟ་བ་བཞིན་དང་། སྐོལ་བར་མི་འགྱུར་བའི་སླད་དུ་སངས་རྒྱས་མཐོང་བ་དང་མི་འབྲལ་བ་དང་། བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་རྩ་བ་དང་། ཚུལ་གཅིག་ཏུ་འགྱུར་བའི་སླད་དུ་བྱང་ཆུབ་སེམས་དཔའ་མཐོང་བ་དང་མི་འབྲལ་བ་དང་། ཡེ་ཤེས་རྟོགས་པར་འགྱུར་བའི་སླད་དུ་སངས་རྒྱས་ཀྱི་ཆོས་དང་མི་འབྲལ་བ་དང་། བྱང་ཆུབ་སེམས་དཔའ་ཐམས་ཅད་ཀྱི་དོན་ཡོངས་སུ་ཐོབ་པར་བགྱི་བའི་སླད་དུ་བྱང་ཆུབ་སེམས་དཔའི་སྨོན་ལམ་ཐམས་ཅད་དང་མི་འབྲལ་བ་དང་། བསྐལ་པ་ཐམས་ཅད་དུ་གནས་པས་ཡོངས་སུ་མི་སྐྱོ་བར་བགྱི་བའི་སླད་དུ་བྱང་ཆུབ་སེམས་དཔའི་སྤྱོད་པ་དང་མི་འབྲལ་བ་དང་། འཇིག་རྟེན་གྱི་ཁམས་ཐམས་ཅད་ཡོངས་སུ་དག་པར་བགྱི་བའི་སླད་དུ་
སངས་རྒྱས་ཀྱི་ཞིང་ཐམས་ཅད་རྒྱས་པར་དགང་བ་དང་མི་འབྲལ་བ་དང་། དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་ཐམས་ཅད་རྣམ་པར་དམིགས་པར་བགྱི་བའི་སླད་དུ་སངས་རྒྱས་ཀྱི་རྣམ་པར་འཕྲུལ་པ་མཐོང་བ་དང་མི་འབྲལ་བ་དང་། བྱང་ཆུབ་སེམས་དཔའི་སྤྱོད་པ་སྤྲུལ་པ་ལྟ་བུས་སྲིད་པའི་རྒྱུད་ཐམས་ཅད་དུ་སྐྱེ་ཞིང་འཆི་འཕོ་བའི་སྐྱེ་མཆེད་རང་གི་ལུས་ཀྱིས་ཉམས་སུ་མྱོང་བར་བགྱི་བའི་སླད་དུ་འདུས་བྱས་ཀྱི་གནས་དང་མི་འབྲལ་བ་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་ཡོངས་སུ་གཟུང་བའི་སླད་དུ་ཆོས་མཉན་པ་དང་མི་འབྲལ་བ་དང་། དུས་གསུམ་གྱི་ཡེ་ཤེས་ཁོང་དུ་ཆུད་ཅིང་རྗེས་སུ་འབྲང་བར་བགྱི་བའི་སླད་དུ། ཡེ་ཤེས་སྣང་བ་དང་མི་འབྲལ་བར་འགྱུར་བ་དེ་བདག་ལ་བསྟན་དུ་གསོལ། དེ་སྐད་ཅེས་སྨྲས་པ་དང་། དགེ་སློང་ཤིན་ཏུ་བརྟན་པས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །དེ་ལྟར་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། སངས་རྒྱས་ཀྱི་ཆོས་དང་ཐམས་ཅད་མཁྱེན་པའི་ཆོས་དང་རང་བྱུང་གི་ཆོས་འདྲི་བ་ལེགས་སོ། །ལེགས་སོ། །རིགས་ཀྱི་བུ་ཁོ་བོ་ནི་བྱང་ཆུབ་སེམས་དཔའི་རྣམ་པར་ཐར་པ་ཐོགས་པ་མེད་པའི་སྒོ་ཐོབ་པ་སྟེ། རིགས་ཀྱི་བུ་བྱང་ཆུབ་སེམས་དཔའི་རྣམ་པར་ཐར་པ་ཐོགས་པ་མེད་པའི་སྒོ་དེ་ཁོ་བོས་བླངས་ཏེ། ཡོངས་སུ་བཟུང་ནས་རྗེས་སུ་འབྲང་ཞིང་རྣམ་པར་དབྱེ་བ་དང་། རྣམ་པར་དཔྱད་པ་དང་རྣམ་པར་བརྟག་པ་དང་སྣང་བར་བྱ་བ་དང་། རབ་ཏུ་སྣང་བར་བྱས་པས་ཐོགས་པ་མེད་པའི་མཐའ་ཞེས་བྱ་བའི་ཡེ་ཤེས་སྣང་བ་ཐོབ་བོ། །དེ་ཐོབ་པས་ཁོ་བོ་ནི་སེམས་ཅན་ཐམས་ཅད་ཀྱི་སེམས་དང་སྤྱོད་པ་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སེམས་ཅན་ཐམས་ཅད་ཀྱི་སྐྱེ་བ་དང་འཆི་འཕོ་ཡོངས་སུ་ཤེས་པར་བྱ་བ་ལ་ཐོགས་པ་མེད་དོ། །སྔོན་གྱི་གནས་རྗེས་སུ་དྲན་པར་བྱ་བའི་སྒོར་འཇུག་པ་ལ་ཐོགས་པ་མེད་དོ། །ཕྱི་མའི་མཐའི་བསྐལ་པར་འགྲོ་བ་ཐམས་ཅད་དང་འགྲོགས་པར་བྱ་བ་ལ་ཐོགས་
པ་མེད་དོ། །ད་ལྟར་བྱུང་བའི་དུས་ཀྱི་འགྲོ་བ་ཐམས་ཅད་རྣམ་པར་རིག་པར་བྱ་བ་ལ་ཐོགས་པ་མེད་དོ། །སེམས་ཅན་ཐམས་ཅད་ཀྱི་སྒྲ་སྐད་དང་། ཀུན་རྫོབ་ཡོངས་སུ་ཤེས་པར་བྱ་བ་ལ་ཐོགས་པ་མེད་དོ། །སེམས་ཅན་ཐམས་ཅད་ཀྱི་ཐེ་ཙོམ་གཅད་པར་བྱ་བ་ལ་ཐོགས་པ་མེད་དོ། །སེམས་ཅན་ཐམས་ཅད་ཀྱི་དབང་པོ་ཐ་དད་པར་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་དུས་སུ་འགྲོ་བར་བྱ་བ་ལ་ཐོགས་པ་མེད་དོ། །ཉིན་མཚན་དང་སྐད་ཅིག་དང་ཡུད་ཙམ་དང་ཐང་ཅིག་དང་། དུས་ཀྱི་མིང་དུ་བྱ་བ་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །དུས་གསུམ་རྒྱ་མཚོའི་རྒྱུད་དུ་འཇུག་པར་བྱ་བ་ལ་ཐོགས་པ་མེད་དོ། །ཕྱོགས་བཅུའི་སངས་རྒྱས་ཀྱི་ཞིང་རང་གི་ལུས་ཀྱིས་རྒྱས་པར་དག་པ་བར་བྱ་བ་ལ་ཐོགས་པ་མེད་དོ། །དེ་ནི་དེ་ལྟར་དངོས་པོ་མེད་པ་ལ་གནས་ཤིང་མངོན་པར་འདུ་བྱ་བ་མེད་པའི་རྫུ་འཕྲུལ་ཐོབ་པའི་ཕྱིར་ཏེ། རིགས་ཀྱི་བུ་དངོས་པོ་མེད་པ་ལ་གནས་ཤིང་མངོན་པར་འདུ་བྱ་བ་མེད་པའི་རྫུ་འཕྲུལ་དེའི་བྱིན་གྱིས་ཁོ་བོ་ནམ་མཁའ་དབྱིངས་འདི་ལས་ཕན་ཚུན་དུ་འགྲོ་ཞིང་འདུག་པ་དང་། སྙེས་པ་དང་སྤྱོད་ལམ་སྣ་ཚོགས་སུ་སྤྱོད་དོ། །མི་སྣང་བར་བྱེད་དོ། །སྣང་བར་འབྱུང་ངོ་། ། དུ་བ་འཐུལ་བར་བྱེད་དོ། །མེ་ལྕེ་འབར་བར་བྱེད་དོ། །གཅིག་ཏུ་བྱས་ཤིང་མང་པོར་བསྒྱུར་རོ། །མང་པོར་བྱས་ཤིང་གཅིག་ཏུ་བསྒྱུར་རོ། །སྣང་བ་དང་མི་སྣང་བའང་ཉམས་སུ་མྱོང་བར་བྱེད་དོ། །རྩིག་པ་ལའང་ཐག་ཐོགས་མེད་པ་དང་རབ་ལའང་ཐག་ཐོགས་མེད་པར་འགྲོ་སྟེ། དཔེར་ན་ནམ་མཁའ་ལ་བྱ་བཞིན་ནོ། །ནམ་མཁའ་ལའང་སྐྱིལ་མོ་ཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ས་ལ་ཡང་བྱེའུ་ཟུལ་དང་སྟེང་དུ་འབྱུང་བ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་བྱིང་བ་མེད་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །དུ་བ་འཐུལ་བ་དང་། མེ་ལྕེ་འབར་བ་བྱེད་དེ། དཔེར་
ན་མེའི་ཕུང་པོ་ཆེན་པོ་བཞིན་ནོ། །ས་ཡང་ཡོངས་སུ་གཡོ་བར་བྱེད་དོ། །ཉི་མ་དང་ཟླ་བ་འདི་གཉིས་དེ་ལྟར་རྫུ་འཕྲུལ་ཆེ་ཞིང་དེ་ལྟར་མཐུ་ཆེ་ལ། དེ་ལྟར་གཟི་བརྗིད་ཆེ་ཡང་ལག་པས་ཀུན་ནས་ཡོངས་སུ་ཉུག་གོ །ཚངས་པའི་འཇིག་རྟེན་གྱི་བར་དག་ཏུ་ཡང་ལུས་ཀྱིས་དབང་བསྒྱུར་རོ། །འཇིག་རྟེན་སྤོས་ཀྱི་དུད་པ་ན་བུན་དུ་ཆགས་པའི་སྤྲིན་གྱིས་ཀུན་ནས་ཁེབས་པར་བྱས་ཤིང་རབ་ཏུ་འབར་བར་བྱེད་དོ། །རིན་པོ་ཆེ་ཐམས་ཅད་ཀྱི་འོད་ཟེར་གྱི་སྤྲིན་གྱི་དྲ་བས་འཇིག་རྟེན་ཀུན་ནས་ཁེབས་པར་བྱས་ཤིང་། འགྲོ་བ་ཐམས་ཅད་དང་འདྲ་བའི་སྤྲུལ་པའི་སྤྲིན་རབ་ཏུ་འགྱེད་དོ། །ཁ་དོག་མཐའ་ཡས་པའི་འོད་ཀྱི་དྲ་བའི་སྤྲིན་རབ་ཏུ་བཀྱེ་ཞིང་ཕྱོགས་ཀུན་ཏུའང་འགྲོ་སྟེ། འདི་ལྟར་ཤར་ཕྱོགས་སུ་འགྲོའོ། །ལྷོ་ཕྱོགས་དང་ནུབ་ཕྱོགས་དང་བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་བླའི་ཕྱོགས་སུ་ཡང་འགྲོའོ། །སེམས་ཀྱི་སྐད་ཅིག་རེ་རེ་ཞིང་ཡང་ཤར་ཕྱོགས་ལོགས་སུ་འཇིག་རྟེན་གྱི་ཁམས་གཅིག་ཀྱང་འདའོ། །འཇིག་རྟེན་གྱི་ཁམས་གཉིས་དང་བཅུ་ཡང་འདའོ། །འཇིག་རྟེན་གྱི་ཁམས་བརྒྱ་དང་། འཇིག་རྟེན་གྱི་ཁམས་སྟོང་དང་། འཇིག་རྟེན་གྱི་ཁམས་བརྒྱ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་དང་། འཇིག་རྟེན་གྱི་ཁམས་བྱེ་བ་ཕྲག་བརྒྱ་དང་འཇིག་རྟེན་གྱི་ཁམས་བྱེ་བ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་བརྒྱ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་ཕྲག་སྟོང་དང་། འཇིག་རྟེན་གྱི་ཁམས་ཚད་མེད་པ་དང་། འཇིག་རྟེན་གྱི་ཁམས་དཔག་ཏུ་མེད་པ་དང་། འཇིག་རྟེན་གྱི་ཁམས་གྲངས་མེད་པ་དང་འཇིག་རྟེན་གྱི་ཁམས་བསམ་གྱིས་མི་ཁྱབ་པ་དང་། འཇིག་རྟེན་གྱི་ཁམས་མཚུངས་པ་མེད་པ་དང་། འཇིག་རྟེན་གྱི་ཁམས་གཞལ་དུ་མེད་པ་དང་། འཇིག་རྟེན་གྱི་ཁམས་
ཀུན་ཏུ་མཐའ་ཡས་པ་དང་། འཇིག་རྟེན་གྱི་ཁམས་མུ་མེད་པ་དང་འཇིག་རྟེན་གྱི་ཁམས་མཚམས་མེད་པ་དང་། འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་འདའ་བར་བྱེད་དེ། འཇིག་རྟེན་གྱི་ཁམས་དེ་དག་ན་སངས་རྒྱས་བཅོམ་ལྡན་འདས་ཇི་སྙེད་ཅིག་བཞུགས་ཤིང་འཚོ་སྐྱོང་ལ་འཇིག་རྟེན་གྱི་ཁམས་རྒྱ་མཚོ་དེ་དང་དེ་དག་དང་། འཇིག་རྟེན་གྱི་ཁམས་འབྱམ་ཀླས་པ་དེ་དང་དེ་དག་དང་། འཇིག་རྟེན་གྱི་ཁམས་ཀྱི་ཕྱོགས་དེ་དང་དེ་དག་དང་། འཇིག་རྟེན་གྱི་ཁམས་ཀྱི་རྒྱུད་དེ་དང་དེ་དག་དང་། འཇིག་རྟེན་གྱི་ཁམས་ཡོངས་སུ་འདུ་བ་དེ་དང་དེ་དག་དང་། འཇིག་རྟེན་གྱི་ཁམས་འབྱུང་བ་དེ་དང་དེ་དག་དང་། འཇིག་རྟེན་གྱི་ཁམས་སུ་བྱ་བ་དེ་དང་དེ་དག་དང་། འཇིག་རྟེན་གྱི་ཁམས་ཀྱི་སྒོ་དེ་དང་དེ་དག་དང་། འཇིག་རྟེན་གྱི་ཁམས་ཀྱི་བསྐལ་པར་བྱ་བ་དེ་དང་དེ་དག་དང་། འཇིག་རྟེན་གྱི་ཁམས་སུ་འཇུག་པ་དེ་དང་དེ་དག་དང་། འཇིག་རྟེན་གྱི་ཁམས་ཀྱི་སྙིང་པོ་བྱང་ཆུབ་རྣམ་པར་བཀོད་པ་དེ་དང་དེ་དག་དང་། འཇིག་རྟེན་གྱི་ཁམས་ཀྱི་འཁོར་གྱི་དཀྱིལ་འཁོར་དེ་དང་དེ་དག་ན། སངས་རྒྱས་བཅོམ་ལྡན་འདས་ཇི་སྙེད་ཅིག་ཆོས་སྟོན་པའི་དེ་བཞིན་གཤེགས་པ་དེ་དག་ལས་དེ་བཞིན་གཤེགས་པ་རེ་རེ་ཞིང་ཡང་སངས་རྒྱས་ཀྱི་ཞིང་མཐའ་ཡས་པའི་རྡུལ་ཤིན་ཏུ་ཕྲ་བ་སྙེད་ཀྱི་ལུས་སྣ་ཚོགས་དང་། ལུས་རེ་རེ་ཞིང་ཡང་སངས་རྒྱས་ཀྱི་ཞིང་མཐའ་ཡས་པའི་རྡུལ་ཤིན་ཏུ་ཕྲ་བ་སྙེད་ཀྱི་མཆོད་པའི་སྤྲིན་གྱི་ཆར་འབེབས་ཤིང་སྤྱན་སྔར་འགྲོའོ། །དེ་དག་ཏུ་ཕྱིན་ནས་ཀྱང་མེ་ཏོག་ཐམས་ཅད་དང་སྤོས་ཐམས་ཅད་དང་། ཕྲེང་བ་ཐམས་ཅད་དང་ཕྱེ་མ་ཐམས་ཅད་དང་། བྱུག་པ་ཐམས་ཅད་དང་ན་བཟའ་ཐམས་ཅད་དང་། རྒྱལ་མཚན་ཐམས་ཅད་དང་ལྷའི་བ་དན་ཐམས་ཅད་དང་བླ་རེ་ཐམས་ཅད་དང་། དྲ་བ་ཐམས་ཅད་དང་གཟུགས་ཐམས་ཅད་ཀྱི་མཆོད་པ་རྒྱུན་མ་ཆད་པར་བྱེད་དོ། །སངས་རྒྱས་བཅོམ་ལྡན་འདས་དེ་དག་གིས་གང་ཇི་སྙེད་དུ་
གསུངས་པ་དང་། བསྟན་པ་དང་། བརྗོད་པ་དང་། ཡང་དག་པར་བཤད་པ་དང་། ཡང་དག་པར་སྨོས་པ་དང་། ཡོངས་སུ་བརྗོད་པ་དང་། མན་ངག་དུ་གསུངས་པ་དང་། ཤིན་ཏུ་བསྟན་པ་དང་རབ་ཏུ་བརྗོད་པ་དེ་དག་ཐམས་ཅད་ཀྱང་ཤེས་ཤིང་འཛིན་ཏོ། །སངས་རྒྱས་བཅོམ་ལྡན་འདས་དེ་དག་གི་སངས་རྒྱས་ཀྱི་ཞིང་ཡོངས་སུ་དག་པ་ཇི་སྙེད་པ་དེ་དག་ཐམས་ཅད་ཀྱང་རྗེས་སུ་དྲན་ནོ། །ཤར་ཕྱོགས་སུ་ཇི་ལྟ་བ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་སུ་ཡང་འཇིག་རྟེན་གྱི་ཁམས་གཅིག་ཀྱང་འདའོ། །འཇིག་རྟེན་གྱི་ཁམས་གཉིས་དང་བཅུ་ཡང་འདའོ། །འཇིག་རྟེན་གྱི་ཁམས་བརྒྱ་ནས་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱང་འདའོ། །འཇིག་རྟེན་གྱི་ཁམས་དེ་དག་ན་སངས་རྒྱས་བཅོམ་ལྡན་འདས་ཇི་སྙེད་ཅིག་བཞུགས་ཤིང་འཚོ་སྐྱོང་ལ། འཇིག་རྟེན་གྱི་ཁམས་རྒྱ་མཚོ་དེ་དང་དེ་དག་དང་། འཇིག་རྟེན་གྱི་ཁམས་རྣམ་པར་དག་པ་དེ་དང་དེ་དག་ནས། འཇིག་རྟེན་གྱི་ཁམས་ཀྱི་འཁོར་གྱི་དཀྱིལ་འཁོར་དེ་དང་དེ་དག་ན་ཆོས་སྟོན་པ་དེ་དག་ཀུན་ཀྱང་མཐོང་ངོ་། །དེ་བཞིན་གཤེགས་པ་དེ་དག་ལའང་མེ་ཏོག་ཐམས་ཅད་ནས་གཟུགས་ཐམས་ཅད་ཀྱི་བར་གྱི་མཆོད་པ་བྱེད་དོ། །སངས་རྒྱས་བཅོམ་ལྡན་འདས་དེ་དག་གིས་གང་ཇི་སྙེད་དུ་གསུངས་པ་ནས། རབ་ཏུ་བརྗོད་པའི་བར་དེ་དག་ཐམས་ཅད་ཀྱང་ཡོངས་སུ་ཤེས་ཤིང་འཛིན་ཏོ། །སངས་རྒྱས་བཅོམ་ལྡན་འདས་དེ་དག་གི་སངས་རྒྱས་ཀྱི་ཞིང་ཡོངས་སུ་དག་པ་གང་ཇི་སྙེད་པ་དེ་དག་ཐམས་ཅད་ཀྱང་རྗེས་སུ་དྲན་ནོ། །སེམས་ཅན་གང་གིས་ཁོ་བོ་མཐོང་བར་གྱུར་པ་དང་། གང་དང་འགྲོགས་པར་གྱུར་པ་དེ་དག་ཀུན་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །སེམས་ཅན་
ཕྲ་མོའམ་རགས་པའམ་ངན་པའམ་བཟང་བའམ་བདེ་བའམ་མི་བདེ་བ་གང་ཇི་སྙེད་ཅིག་ཁོ་བོས་མཐོང་བར་གྱུར་པ་དེ་དག་ཀུན་ལ་ཡང་ཡོངས་སུ་སྨིན་པར་བྱ་བ་དང་། འདུལ་བའི་དུས་ལས་མི་འདའ་བར་བྱ་བའི་ཕྱིར། ཁོང་ཏ་དེ་དག་གི་ལུས་ཀྱི་ཚད་དང་མཉམ་པར་ལུས་བྱིན་གྱིས་རློབ་པོ། །སེམས་ཅན་ཇི་སྙེད་ཅིག་ཁོ་བོའི་དྲུང་དུ་འོང་བ་དེ་དག་ཐམས་ཅད་ཀྱང་། བྱང་ཆུབ་སེམས་དཔའི་རྣམ་པར་ཐར་པ་ཀུན་ཏུ་འགྲོ་བ་འདི་དང་། བྱང་ཆུབ་སེམས་དཔའི་རྣམ་པར་ཐར་པ་རྣམ་པར་གནོན་པ་དོན་ཡོད་པ་ལ་རབ་ཏུ་གཞོག་གོ །རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའི་རྣམ་པར་ཐར་པ་ཐོགས་པ་མེད་པའི་སྒོ་ཀུན་ཏུ་འགྲོ་བ་དེ་བཞིན་གཤེགས་པའི་མཆོད་པ་དང་། རིམ་གྲོ་རབ་ཏུ་སྦྱོར་བ་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། མཐུན་པ་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་སྙིང་རྗེ་ཆེན་པོའི་ངང་ཚུལ་ཅན། ཐེག་པ་ཆེན་པོའི་ངང་ཚུལ་ཅན། བྱང་ཆུབ་སེམས་དཔའི་ལམ་དང་མི་འབྲལ་བའི་ངང་ཚུལ་ཅན། ཐོགས་པ་མེད་པའི་ངང་ཚུལ་ཅན། བྱང་ཆུབ་སེམས་དཔའི་བསམ་པའི་སྙིང་པོ་ཆུད་མི་གསོན་པའི་ངང་ཚུལ་ཅན། བྱང་ཆུབ་ཀྱི་སེམས་ཡོངས་སུ་མི་གཏོང་བའི་ངང་ཚུལ་ཅན། སངས་རྒྱས་ཀྱི་ཆོས་ལ་ལྷག་པར་དམིགས་པའི་ངང་ཚུལ་ཅན། ཐམས་ཅད་མཁྱེན་པ་ཉིད་ཡིད་ལ་བྱ་བ་དང་མི་འབྲལ་བའི་ངང་ཚུལ་ཅན། ནམ་མཁའ་དང་མཉམ་པའི་ངང་ཚུལ་ཅན། འཇིག་རྟེན་ཐམས་ཅད་ལ་མི་གནས་པའི་ངང་ཚུལ་ཅན། ཆུད་མི་གསོན་པའི་ངང་ཚུལ་ཅན། མ་ཉམས་པའི་ངང་ཚུལ་ཅན། མ་གོད་པའི་ངང་ཚུལ་ཅན། གླགས་མེད་པའི་ངང་ཚུལ་ཅན། མ་འདྲེས་པའི་ངང་ཚུལ་ཅན། རྙོག་པ་མེད་པའི་ངང་ཚུལ་ཅན། འགྱོད་པ་མེད་པའི་ངང་ཚུལ་ཅན། རྣམ་པར་དག་པའི་ངང་ཚུལ་ཅན། བྱང་ཆུབ་སེམས་དཔའ་རྡུལ་དང་བྲལ་བ་དེ་དག་གི་སྤྱོད་པ་ཤེས་པའམ།
ཡོན་ཏན་བརྗོད་པ་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན། དྲ་བྱི་ལའི་གྲོང་རྡལ་རྡོ་རྗེའི་གྲོང་ཁྱེར་ཅན་བྱ་བ་ཡོད་དེ། དེ་ན་དྲ་བྱི་ལའི་སྤྲིན་ཅེས་བྱ་བ་འདུག་གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དགེ་སློང་རབ་ཏུ་བརྟན་པའི་རྐང་པ་གཉིས་ལ་སྤྱི་བོས་ཕྱག་འཚལ་ནས། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། ཡང་དང་ཡང་བལྟས་ནས་དགེ་སློང་ཤིན་ཏུ་བརྟན་པའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཆོས་ཀྱི་དད་པའི་ཤུགས་དང་། བྱིན་གྱིས་ནོན་པ། སངས་རྒྱས་ཡིད་ལ་བྱ་བའི་འདུ་ཤེས་དང་ལྡན་པ། དཀོན་མཆོག་གསུམ་གྱི་གདུང་མི་གཅད་པ་ལ་རབ་ཏུ་བརྩོན་པ། དུས་གསུམ་སྣང་བས་སེམས་སྣང་བར་གྱུར་པ་སྨོན་ལམ་ཆེན་པོ་ཡིད་ལ་བྱེད་པ་དང་ལྡན་པ་སེམས་ཅན་གྱི་ཁམས་ཐམས་ཅད་ཡོངས་སུ་བསྐྱབ་པའི་ཐབས་ལ་ཞུགས་པ། འདུས་བྱས་ཀྱི་དགེ་བ་ཐམས་ཅད་ལ་མི་གནས་པའི་སེམས་དང་ལྡན་པ། ཆོས་ཐམས་ཅད་ཀྱི་རང་བཞིན་ངེས་པར་རྟོགས་པར་བྱ་བ་ལ་བརྩོན་པ། འཇིག་རྟེན་གྱི་ཁམས་ཐམས་ཅད་ཡོངས་སུ་སྦྱང་བའི་སྨོན་ལམ་ལས་མི་གཡོ་བ། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་ན་གནས་པ་མེད་པར་གནས་པ་ཆོས་ཀྱི་སྣང་བ་དེ་རྗེས་སུ་དྲན་པར་བྱ་བ་དང་། དགེ་བའི་བཤེས་གཉེན་རྗེས་སུ་དྲན་པར་བྱ་བ་དང་། འདོད་ཆགས་དང་བྲལ་བའི་རིགས་ཡོངས་སུ་བརྗོད་པ་བྱེད་ཅིང་། མཐར་གྱིས་དྲ་བྱི་ལའི་གྲོང་རྡལ་རྡོ་རྗེའི་གྲོང་ཁྱེར་དུ་ཕྱིན་ནས། དྲ་བྱི་ལའི་སྤྲིན་ཡོངས་སུ་ཚོལ་ཚོལ་བ་ལས། གྲོང་ཁྱེར་གྱི་ཁྱམས་ཤིག་ན་ཆོས་བསྟན་པའི་དོན་དུ་སེང་གེའི་ཁྲི་ལ་འདུག་ཅིང་། སྲོག་ཆགས་སྟོང་ཕྲག་བཅུ་ཙམ་ཞིག་ལ་ཆོས་ཀྱི་རྣམ་གྲངས་ཡི་གེའི་འཁོར་ལོའི་རྒྱུད་ཀྱི་རྒྱན་ཅེས་བྱ་བ་ཡོངས་སུ་
སྟོན་ཅིང་འདུག་པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དྲ་བྱི་ལའི་སྤྲིན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དྲ་བྱི་ལའི་སྤྲིན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་ཀྱི་སེམས་སྲིད་པའི་ལམ་རྒྱུད་ཐམས་ཅད་དུ་ཆབ་མི་འཚལ་བ་དང་། ཇི་ལྟར་ཡོངས་སུ་སྐྱོ་བ་མ་མཆིས་ཤིང་། བསམ་པ་བརྟན་པར་འགྱུར་བ་དང་། ཇི་ལྟར་ཐུབ་པ་མ་མཆིས་ཤིང་ལྷག་པའི་བསམ་པ་ཡོངས་སུ་དག་པར་འགྱུར་བ་དང་། ཇི་ལྟར་ཡོངས་སུ་སྐྱོ་བ་མ་མཆིས་ཤིང་སྙིང་རྗེ་ཆེན་པོའི་སྟོབས་ཡང་དག་པ་སྐྱེ་བར་འགྱུར་བ་དང་ཇི་ལྟར་སྒོ་ཀུན་ནས་རྣམ་པར་དག་ཅིང་གཟུངས་ཀྱི་སྟོབས་གནོན་པར་འགྱུར་བ་དང་། ཇི་ལྟར་མ་རིག་པའི་རབ་རིབ་དང་སྒྲིབ་པ་རྣམ་པར་འཐོར་ཞིང་། ཤེས་རབ་ཀྱི་འོད་ཆོས་ཐམས་ཅད་ལ་རབ་རིབ་མ་མཆིས་པའི་སྣང་བ་སྐྱེ་བར་འགྱུར་བ་དང་། ཇི་ལྟར་དོན་དང་ཆོས་དང་ངེས་པའི་ཚིག་དང་སྤོབས་པ་ལ་མཁས་པའི་དབྱངས་ཀྱི་དཀྱིལ་འཁོར་ཡོངས་སུ་རྫོགས་ཤིང་། སོ་སོ་ཡང་དག་པར་རིག་པའི་སྟོབས་གནོན་པར་འགྱུར་བ་དང་། ཇི་ལྟར་སངས་རྒྱས་ཐམས་ཅད་ཀྱི་འཁོར་ལོ་ཐ་མི་དད་པ་ཡང་དག་པར་འཛིན་ཅིང་དྲན་པའི་སྟོབས་ཡོངས་སུ་གནོན་པར་འགྱུར་བ་དང་། ཇི་ལྟར་ཆོས་ཐམས་ཅད་ཀྱི་ཕྱོགས་རིགས་པའི་སྣང་བ་རྗེས་སུ་རྟོག་ཅིང་། རིག་པའི་སྟོབས་རྣམ་པར་དག་པར་འགྱུར་བ་དང་། ཇི་ལྟར་བྱང་ཆུབ་སེམས་དཔའི་ཏིང་ངེ་འཛིན་གྱི་སྟོབས་ཆོས་ཐམས་ཅད་ཀྱི་དོན་རྣམ་པར་གདོན་མི་ཟ་བར་རབ་ཏུ་དབྱེ་བ་ལ་བརྩོན་པས་འགྲུབ་པར་འགྱུར་བ་མ་འཚལ་ཏོ། །དེ་ནས་དྲ་བྱི་ལའི་སྤྲིན་གྱིས་བྱང་ཆུབ་སེམས་དཔའ་
ལ་རིམ་གྲོ་བྱ་བའི་ཕྱིར་སེང་གེའི་ཁྲི་དེ་ལས་ལངས་ཏེ་བབས་ནས་ཚོང་དཔོན་གྱི་བུ་ནོར་བཟངས་ལ་ལུས་ཐམས་ཅད་ཀྱིས་ཕྱག་བྱས་ནས། ཚོང་དཔོན་གྱི་བུ་ནོར་བཟངས་ལ་གསེར་གྱི་མེ་ཏོག་གི་ཕུང་པོས་མངོན་པར་གཏོར་ཏོ། །ནོར་བུ་རིན་པོ་ཆེ་རིན་ཐང་མེད་པ་མང་པོ་དང་། ཙན་དན་གྱི་ཕྱེ་མ་དམ་པས་ཀྱང་མངོན་པར་གཏོར་ཏོ། །གོས་ཚོན་སྣ་ཚོགས་རྣམ་པ་ཐ་དད་པས་ཁ་དོག་བསྒྱུར་བ་བརྒྱ་སྟོང་ཕྲག་དུ་མས་ཀྱང་མངོན་པར་བཀབ་བོ། །སྤོས་ཀྱི་མེ་ཏོག་ཁ་དོག་རྣམ་པ་ཐ་དད་ཅིང་ཡིད་དུ་འོང་ལ་བལྟ་ན་སྡུག་པ་མང་པོས་ཀྱང་མངོན་པར་གཏོར་ནས་མཆོད་པའི་རྣམ་པ་སྣ་ཚོགས་གཞན་དག་གིས་ཀྱང་། མཆོད་པ་དང་རིམ་གྲོ་དང་། བཀུར་སྟི་དང་བསྟི་སྟང་ཆེར་བྱས་ཏེ། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལེགས་སོ་ལེགས་སོ། །རིགས་ཀྱི་བུ་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ནི། སངས་རྒྱས་ཐམས་ཅད་ཀྱི་གདུང་མི་གཅད་པའི་ཕྱིར་ཞུགས་པ་ཡིན་ནོ། །འདོད་ཆགས་དང་བྲལ་བའི་རིགས་ཡང་དག་པ་ཅི་ལྟ་བ་བཞིན་དུ་རྣམ་པར་རིག་པར་བྱ་བ་ལ་བརྩོན་པ་ཡིན། ཞིང་གི་རྒྱུད་ཐམས་ཅད་ཡོངས་སུ་དག་པར་བྱ་བ་ལ་ཞུགས་པ་ཡིན། སེམས་ཅན་གྱི་རིགས་ཐམས་ཅད་ཡོངས་སུ་སྨིན་པར་བྱ་བ་དང་། འདུལ་བ་ལ་སྟ་གོན་དུ་གནས་པ་ཡིན། ཆོས་ཀྱི་རིགས་ཐམས་ཅད་ཡང་དག་པ་ཇི་ལྟ་བ་བཞིན་དུ་བརྟག་པ་ལ་བརྩོན་པ་ཡིན། ལས་ཀྱི་རིགས་ཐམས་ཅད་དང་མི་འགལ་བར་གནས་པ་ཡིན། བྱང་ཆུབ་སེམས་དཔའི་སྤྱོད་པའི་རིགས་ཐམས་ཅད་ཡོངས་སུ་རྫོགས་པར་བྱ་བ་ལ་རབ་ཏུ་བརྩོན་པ་ཡིན། སྨོན་ལམ་གྱི་རིགས་ཐམས་ཅད་རྒྱུན་མི་འཆད་པའི་ཕྱིར་ཡང་དག་པར་ཞུགས་པ་ཡིན། དུས་གསུམ་གྱི་རྒྱུད་ཐམས་ཅད་ཡེ་ཤེས་ཀྱི་ཁོང་དུ་ཆུད་པར་བྱ་བ་ལ་ཞུགས་པ་ཡིན། མོས་པའི་རིགས་ཤིན་ཏུ་བརྟན་པར་བྱ་བའི་ཕྱིར་བརྩོན་པ་
ཡིན་ཏེ། དེ་ནི་དེ་བཞིན་གཤེགས་པ་མང་པོ་ཐམས་ཅད་ཀྱི་བྱིན་གྱིས་བརླབས་པ་ཡིན། སངས་རྒྱས་ཐམས་ཅད་ཀྱིས་ཡང་དག་པར་དགོངས་པ་ཡིན། བྱང་ཆུབ་སེམས་དཔའ་ཐམས་ཅད་དང་མཉམ་པ་ཉིད་དུ་གྱུར་པ་ཡིན། འཕགས་པ་ཐམས་ཅད་ཀྱི་རྗེས་སུ་དགྱེས་པར་བྱ་བ་ཡིན། ཚངས་པའི་དབང་པོ་ཐམས་ཅད་ཀྱིས་མངོན་པར་དགའ་བར་བྱས་པ་ཡིན། ལྷའི་དབང་པོ་ཐམས་ཅད་ཀྱིས་ཡང་དག་པར་མཆོད་པ་ཡིན། གནོད་སྦྱིན་གྱི་དབང་པོ་ཐམས་ཅད་ཀྱིས་ཡོངས་སུ་བསྲུང་བ་ཡིན། སྲིན་པོའི་དབང་པོ་ཐམས་ཅད་ཀྱིས་རིམ་གྲོར་བྱས་པ་ཡིན། ཀླུའི་དབང་པོ་ཐམས་ཅད་ཀྱིས་བསུ་བ་ཡིན། མིའམ་ཅིའི་དབང་པོ་ཐམས་ཅད་ཀྱིས་མངོན་པར་བསྟོད་པ་ཡིན། འཇིག་རྟེན་གྱི་དབང་པོ་ཐམས་ཅད་ཀྱིས་ཡང་དག་པར་བསྔགས་པ་ཡིན། དེས་ནི་སེམས་ཅན་གྱི་ཁམས་ཐམས་ཅད་ཀྱང་ངན་སོང་གི་ལམ་རྒྱུད་གསུམ་པོ་ཡོངས་སུ་གཅད་པ་དང་མི་ཁོམ་པ་དང་། ངན་འགྲོའི་ལམ་ཐམས་ཅད་བཟློག་པ་དང་། དབུལ་བའི་ལམ་ཐམས་ཅད་ལས་ཡང་དག་པར་བཟླ་བ་དང་། ལྷ་དང་མིའི་ཕུན་སུམ་ཚོགས་པ་ཐོབ་པར་བྱ་བ་དང་། དགེ་བའི་བཤེས་གཉེན་མཐོང་བ་དང་མི་འབྲལ་བ་དང་། སངས་རྒྱས་ཀྱི་ཆོས་རྒྱ་ཆེན་པོ་མཉམ་པ་དང་། འབྲལ་བར་མི་འགྱུར་བ་དང་། བྱང་ཆུབ་ཀྱི་སེམས་ཀྱི་ཡན་ལག་ཡོངས་སུ་དག་པར་བྱ་བ་དང་། བྱང་ཆུབ་ཀྱི་སེམས་འབྱུང་བའི་རྒྱུད་ཡོངས་སུ་བསྒྲུབ་པ་དང་། བྱང་ཆུབ་སེམས་དཔའི་ལམ་སྣང་བ་ཐོབ་པར་བྱ་བ་དང་། བྱང་ཆུབ་སེམས་དཔའི་ཡེ་ཤེས་ཁོང་དུ་ཆུད་པར་བྱ་བ་དང་། བྱང་ཆུབ་སེམས་དཔའི་ས་ལ་གནས་པར་བྱ་བས་དབུགས་ཕྱིན་པར་བྱས་པ་ཡིན། རིགས་ཀྱི་བུ་དེ་ལ་བདག་འདི་སྙམ་དུ་སེམས་ཏེ། བྱང་ཆུབ་སེམས་དཔའ་རྣམས་ནི་དཀའ་བ་བྱེད་པ་སྟེ། འབྱུང་བར་དཀའ་ཞིང་མཐོང་བར་དཀའ་བའོ། །བྱང་ཆུབ་སེམས་དཔའ་རྣམས་ནི་སེམས་ཅན་རྣམས་ལ་བག་དྲོ་བར་བྱེད་པས་
ཕ་དང་མ་ལྟ་བུའོ། །བྱང་ཆུབ་སེམས་དཔའ་རྣམས་ནི་ལྷ་དང་བཅས་པའི་འཇིག་རྟེན་གྱི་རྒྱན་ཏུ་གྱུར་པའོ། །བྱང་ཆུབ་སེམས་དཔའ་རྣམས་ནི་སྡུག་བསྔལ་གྱིས་མནར་བ་རྣམས་ལ་སྐྱབས་སུ་གྱུར་པའོ། །བྱང་ཆུབ་སེམས་དཔའ་རྣམས་ནི་འགྲོ་བ་ཐམས་ཅད་ཡོངས་སུ་བསྲུང་བའི་ཕྱིར་གནས་སུ་གྱུར་པའོ། །བྱང་ཆུབ་སེམས་དཔའ་རྣམས་ནི་འཇིགས་པ་སྣ་ཚོགས་ཀྱིས་གཙེས་པ་རྣམས་ལ་དཔུང་གཉེན་དུ་གྱུར་པའོ། །བྱང་ཆུབ་སེམས་དཔའ་རྣམས་ནི་འགྲོ་བ་ཐམས་ཅད་ངན་སོང་གསུམ་དུ་ལྟུང་བ་ལས་ཡོངས་སུ་རྟོན་པའི་ཕྱིར་རླུང་གི་དཀྱིལ་འཁོར་ལྟ་བུའོ། །བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ཀྱི་དགེ་བའི་རྩ་བ་རྣམ་པར་འཕེལ་བར་བྱེད་པས་ས་ལྟ་བུའོ། །བྱང་ཆུབ་སེམས་དཔའ་རྣམས་ནི་བསོད་ནམས་རིན་པོ་ཆེའི་མཛོད་མི་ཟད་པའི་གཏོས་དང་ལྡན་པས་རྒྱ་མཚོ་ལྟ་བུའོ། །བྱང་ཆུབ་སེམས་དཔའ་རྣམས་ནི་ཡེ་ཤེས་ཀྱི་འོད་ཀྱིས་སྣང་བར་བྱེད་པའི་ཕྱིར་ཉི་མ་ལྟ་བུའོ། །བྱང་ཆུབ་སེམས་དཔའ་རྣམས་ནི་དགེ་བའི་རྩ་བས་ཤིན་ཏུ་མཐོ་བས་རི་རབ་ལྟ་བུའོ། །བྱང་ཆུབ་སེམས་དཔའ་རྣམས་ནི་སྙིང་པོ་བྱང་ཆུབ་ཏུ་ཡེ་ཤེས་ཀྱི་ཟླ་བ་འཆར་བར་འགྱུར་བའི་ཕྱིར་ཟླ་བ་ལྟ་བུའོ། །བྱང་ཆུབ་སེམས་དཔའ་རྣམས་ནི་བདུད་ཀྱི་སྡེ་ཐམས་ཅད་རབ་ཏུ་འཇོམས་པས་དཔའ་བོར་གྱུར་པའོ། །བྱང་ཆུབ་སེམས་དཔའ་རྣམས་ནི་རང་བྱུང་གི་ཆོས་ཀྱི་གྲོང་ཁྱེར་དུ་ཕྱིན་པར་བྱེད་པས་རྟུལ་ཕོད་པ་ལྟ་བུའོ། །བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ཀྱི་བག་ལ་བྱམས་པའི་རླན་ཡོངས་སུ་སྐེམ་པས་མེ་ལྟ་བུའོ། །བྱང་ཆུབ་སེམས་དཔའ་རྣམས་ནི་ཆོས་ཀྱི་སྤྲིན་རྒྱ་ཆེན་པོའི་ཆར་མངོན་པར་འབེབས་པས་སྤྲིན་ལྟ་བུའོ། །བྱང་ཆུབ་སེམས་དཔའ་རྣམས་ནི་སེམས་ཅན་གྱི་དབང་པོ་དད་པ་ལ་སྩོགས་པའི་མྱུ་གུ་རྣམ་པར་འཕེལ་བར་བྱེད་པས་ཆར་པ་ལྟ་བུའོ། །བྱང་ཆུབ་སེམས་དཔའ་རྣམས་ནི་ཆོས་རྒྱ་མཚོའི་འགྲམ་ཡོངས་སུ་སྟོན་པས་མཉན་པ་ལྟ་བུའོ། །བྱང་ཆུབ་སེམས་དཔའ་རྣམས་
ནི་སེམས་ཅན་ཐམས་ཅད་འཁོར་བའི་རྒྱ་མཚོ་ལས་ཡང་དག་པར་སྒྲོལ་བའི་ཕྱིར་ཟམ་པ་ལྟ་བུའོ། །བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ཀྱིས་མངོན་པར་བགྲོད་པར་བྱ་བའི་ཕྱིར་མུ་སྟེགས་ལྟ་བུའོ། །དེ་ལྟར་དྲ་བྱི་ལའི་སྤྲིན་གྱིས་ཚོང་དཔོན་གྱི་བུ་ནོར་བཟངས་ཀྱི་མདུན་དུ་འདུག་སྟེ། ཚིག་གི་རྒྱུད་དེ་དག་གིས་བྱང་ཆུབ་སེམས་དཔའ་རྣམས་ལ་ཡོངས་སུ་བསྔགས་པ་བྱས་ནས། ཚོང་དཔོན་གྱི་བུ་ནོར་བཟངས་ལ་ལེགས་སོ་ཞེས་བསྔགས་སོ། །དེ་ལྟར་དེ་བྱང་ཆུབ་སེམས་དཔའ་ཡང་དག་པར་དགའ་བར་བྱ་བའི་ཕྱིར་ཚིག་བརྗོད་པའི་ཚེ། ཁའི་སྒོ་ནས་འོད་འཕྲོ་བའི་ཕུང་པོ་རྣམ་པ་འདི་ལྟ་བུ་བྱུང་སྟེ། འོད་འཕྲོ་བའི་ཕུང་པོ་དེས་སྟོང་གསུམ་གྱི་འཇིག་རྟེན་གྱི་ཁམས་རྒྱས་པར་གང་བར་གྱུར་ནས། ལྷ་དང་ལྷ་རྫུ་འཕྲུལ་ཆེན་པོའམ། ཀླུ་དང་ཀླུ་རྫུ་འཕྲུལ་ཆེན་པོའམ། གནོད་སྦྱིན་དང་གནོད་སྦྱིན་རྫུ་འཕྲུལ་ཆེན་པོའམ། དྲི་ཟ་དང་དྲི་ཟ་རྫུ་འཕྲུལ་ཆེན་པོའམ། ལྷ་མ་ཡིན་དང་ལྷ་མ་ཡིན་རྫུ་འཕྲུལ་ཆེན་པོའམ། ནམ་མཁའ་ལྡིང་དང་ནམ་མཁའ་ལྡིང་རྫུ་འཕྲུལ་ཆེན་པོའམ། མིའམ་ཅི་དང་མིའམ་ཅི་རྫུ་འཕྲུལ་ཆེན་པོའམ། ལྟོ་འཕྱེ་ཆེན་པོ་དང་ལྟོ་འཕྱེ་ཆེན་པོ་རྫུ་འཕྲུལ་ཆེན་པོའམ། མི་དང་མི་རྫུ་འཕྲུལ་ཆེན་པོའམ། །མི་མ་ཡིན་པ་དང་མི་མ་ཡིན་པ་རྫུ་འཕྲུལ་ཆེན་པོའམ། ཚངས་པ་དང་ཚངས་པ་རྫུ་འཕྲུལ་ཆེན་པོའམ། སེམས་ཅན་གང་སུས་མཐོང་ཡང་རུང་སྟེ། སྣང་བ་དེས་ཡོངས་སུ་སྣང་བར་བྱས་པ་དེ་དག་དྲ་བྱི་ལ་སྤྲིན་གྱི་དྲུང་དུ་འོངས་སོ། །དེ་ནས་དེ་ལྟར་དྲ་བྱི་ལ་སྤྲིན་གྱིས་བསམ་པ་བྱིན་གྱིས་བརླབས་ཤིང་ཐལ་མོ་སྦྱར་ཏེ། གནས་པ་ལུས་དང་སེམས་སིམ་པར་གྱུར་པ། དགའ་བ་རྒྱ་ཆེན་པོ་སྐྱེས་པ། སྲི་ཞུ་ཆེན་པོ་ལ་གནས་པ། ང་རྒྱལ་གྱི་རྒྱལ་མཚན་བཅོམ་པ། གཡོ་རྒྱུ་དང་བྲལ་བ། དབང་པོ་རྣམ་པར་དང་བར་གྱུར་པ་དེ་དག་ལ་དྲ་བྱི་ལའི་སྤྲིན་གྱིས་ཆོས་ཀྱི་རྣམ་གྲངས་ཡི་གེའི་འཁོར་ལོའི་རྒྱུད་ཀྱི་རྒྱན་ཅེས་བྱ་བ་དེ་ཉིད་རྒྱ་ཆེར་ཡང་དག་པར་
བསྟན་ཏེ། ཁོང་དུ་ཆུད་པ་དང་རྟོགས་པ་དང་ཤེས་པ་དང་རིག་པར་བྱས་སོ། །དེ་ཐོས་ནས་ཀྱང་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་དེའི་ཕྱིར་ཆོས་ཀྱི་སྟན་ལ་འདུག་ནས། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་བོ་ནི་དབྱངས་དང་ལྡན་པའི་གཟུངས་ཐོབ་པ་སྟེ། དེའི་མཐུས་ཁོ་བོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལྷ་རྣམས་ཀྱི་ལྷའི་སྐད་ཀྱང་ཤེས་སོ། །དེ་བཞིན་དུ་ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། ཚངས་པ་རྣམས་ཀྱི་ཚངས་པའི་སྐད་ཀྱང་ཤེས་སོ། །ལྷ་རྣམས་ཀྱི་ལྷའི་སྐད་སྣ་ཚོགས་ཀྱང་ཤེས་སོ། །དེ་བཞིན་དུ་ཀླུ་དང་གནོད་སྦྱིན་དང་དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། ཚངས་པ་རྣམས་ཀྱི་ཚངས་པའི་སྐད་སྣ་ཚོགས་ཀྱང་ཤེས་སོ། །ལྷ་རྣམས་ཀྱི་ལྷའི་སྐད་གཅིག་པ་ཡང་ཤེས་སོ། །དེ་བཞིན་དུ་ཀླུ་དང་གནོད་སྦྱིན་དང་དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། ཚངས་པ་རྣམས་ཀྱི་ཚངས་པའི་སྐད་གཅིག་པ་ཡང་ཤེས་སོ། །ལྷ་རྣམས་ཀྱི་ལྷའི་སྐད་ཐ་དད་པ་ཡང་ཤེས་སོ། །དེ་བཞིན་དུ་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་མིའམ་ཅི་དང་། ལྟོ་འཕྱེ་ཆེན་པོ་དང་མི་དང་མི་མ་ཡིན་པ་དང་། ཚངས་པ་རྣམས་ཀྱི་ཚངས་པའི་སྐད་ཐ་དད་པ་ཡང་ཤེས་སོ། །བྱོལ་སོང་གི་སྐྱེ་གནས་སུ་སྐྱེས་པའི་སེམས་ཅན་རྣམས་ཀྱི་བརྡ་དང་སྐད་དང་མིང་ཐ་དད་པའང་ཤེས་སོ། །སེམས་ཅན་དམྱལ་བ་པའི་སེམས་ཅན་རྣམས་ཀྱི་སྐད་དང་། མིང་རྣམས་ཀྱང་ཤེས་སོ། །གཤིན་རྗེའི་འཇིག་རྟེན་པའི་སེམས་ཅན་རྣམས་ཀྱི་སྐད་དང་མིང་རྣམས་ཀྱང་ཤེས་སོ། །འཕགས་པའི་སྐད་དང་མིང་རྣམས་ཀྱང་ཤེས་སོ། །འཕགས་པ་མ་ཡིན་པའི་སྐད་དང་མིང་
རྣམས་ཀྱང་ཤེས་སོ། །བྱང་ཆུབ་སེམས་དཔའ་རྣམས་ཀྱི་ཚིག་དང་བརྡ་དང་། ངེས་པའི་ངག་སེམས་ཅན་གྱི་བསམ་པ་བཞིན་དུ་འབྱུང་བ་ཡང་ཤེས་སོ། །སེམས་ཀྱི་སྐད་ཅིག་རེ་རེ་ལ་ཡང་དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཀྱི་དབྱངས་ཀྱི་ཡན་ལག་དང་གསུང་རྒྱ་མཚོ་སེམས་ཅན་ཐམས་ཅད་ཀྱི་མིང་དང་གཏམ་གྱི་སྒྲ་དང་། ཚིག་ཏུ་ལྡན་པ་ཡང་རྟོགས་ཤིང་ཁོང་དུ་ཆུད་དོ། །ཇི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སེམས་ཅན་རྣམས་ཀྱི་བརྡ་དང་ངེས་པའི་ཚིག་དང་སྐད་དང་མིང་རྒྱ་མཚོ་ལ་འཇུག་ཅིང་ཤེས་པ་དེ་བཞིན་དུ་ཤར་ཕྱོགས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ། གྲངས་མེད་པ། བསམ་གྱིས་མི་ཁྱབ་པ། མཚུངས་པ་མེད་པ། ཀུན་ཏུ་མཐའ་ཡས་པ་མུ་མེད་པ། ས་མཚམས་མེད་པ་གཞལ་དུ་མེད་པ། བརྗོད་དུ་མེད་པའི་ཡང་བརྗོད་དུ་མེད་པ་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་ཀྱི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་ནས་བརྗོད་དུ་མེད་པའི་ཡང་བརྗོད་དུ་མེད་པའི་བར་གྱི་སེམས་ཅན་རྣམས་ཀྱི་བརྡ་དང་། ངེས་པའི་ཚིག་དང་སྐད་དང་མིང་རྒྱ་མཚོ་ཐམས་ཅད་ལ་འཇུག་ཅིང་ཤེས་ཏེ། འདི་ལྟར་ལྷ་རྣམས་ཀྱི་ལྷའི་སྐད་ཀྱང་ཤེས་སོ། །ཚངས་པ་རྣམས་ཀྱི་ཚངས་པའི་སྐད་ཀྱི་བར་དུའང་ཤེས་སོ། །རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའ་རྣམས་ཀྱི་གཟུངས་སྣང་བ་དབྱངས་དང་ལྡན་པ་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་འགྲོ་བ་སྣ་ཚོགས་ཀྱི་བརྡའི་རྣམ་པ་རྒྱ་མཚོ་
ལ་ཞུགས་པ་དེ་དག་དང་། འགྲོ་བ་སྣ་ཚོགས་ཀྱི་སྐད་དང་། མིང་རྒྱ་མཚོ་ལ་ཞུགས་པ་དེ་དག་དང་། འགྲོ་བ་སྣ་ཚོགས་ཀྱི་མིང་ཤིན་ཏུ་བསྟན་པ་མིང་རྒྱ་མཚོ་ལ་ཞུགས་པ་དེ་དག་དང་འགྲོ་བ་སྣ་ཚོགས་ཀྱི་བརྗོད་པ་རབ་ཏུ་བཀོད་པ་དང་། རྣམ་པར་སྤྱོད་པ་རྒྱ་མཚོ་ལ་ཞུགས་པ་དེ་དག་དང་། ཚིག་ཐམས་ཅད་ཀྱི་མཚམས་སྦྱར་བ་རྒྱ་མཚོ་ལ་ཞུགས་པ་དེ་དག་དང་། ཚིག་ལྷུར་བླངས་ཏེ་བསྟན་པ་རྒྱ་མཚོ་ལ་ཞུགས་པ་དེ་དག་དང་། དུས་གསུམ་གྱི་དམིགས་པ་ཐམས་ཅད་དམིགས་པ་གཅིག་ཏུ་རྣམ་པར་སྤྱོད་པ་རྒྱ་མཚོ་གང་ཆེན་མཚོ་ལ་ཞུགས་པ་དེ་དག་དང་། ཚིག་གིས་བརྩེགས་ཏེ་བསྟན་པ་རྒྱ་མཚོ་ལ་ཞུགས་པ་དེ་དག་དང་། ཚིག་གཉིས་ནས་བརྩེགས་ཏེ་བསྟན་པ་རྒྱ་མཚོ་ལ་ཞུགས་པ་དེ་དག་དང་། ཚིག་རབ་ཏུ་ཕྱེ་སྟེ་བསྟན་པ་རྒྱ་མཚོ་ལ་ཞུགས་པ་དེ་དག་དང་། ཆོས་ཐམས་ཅད་རབ་ཏུ་དབྱེ་བས་འདུལ་བའི་ཚུལ་བསྟན་པ་རྒྱ་མཚོ་ལ་ཞུགས་པ་དེ་དག་དང་། འགྲོ་བ་ཐམས་ཅད་ཀྱི་སྐད་རྒྱ་མཚོ་ལ་ཞུགས་པ་དེ་དག་དང་། དབྱངས་ཀྱི་དཀྱིལ་འཁོར་རྣམ་པར་དག་པའི་རྒྱན་ཐམས་ཅད་ལ་ཞུགས་པ་དེ་དག་དང་། ཡི་གེའི་འཁོར་ལོའི་མཐར་ཕྱིན་པར་བྱ་བས་རབ་ཏུ་དབྱེ་བ་ལས་བྱུང་བ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་ཡུལ་ནགས་ཚལ་ན་གནས་པ་ཞེས་བྱ་བ་ཡོད་དེ། དེ་ན་ཚོང་དཔོན་བཏང་བརྗོད་ཅེས་བྱ་བ་འདུག་གི་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བརྩོན་པར་བྱ་བ་དང་། ཇི་ལྟར་འབྱུང་བར་བྱ་བ་དང་། ཇི་ལྟར་སེམས་ངེས་པར་བཞག་པར་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས། དྲ་བྱི་ལ་སྤྲིན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཆོས་ཀྱི་རིམ་གྲོ་བྱས་ནས། དད་པའི་མཚན་ཉིད་རྩ་བ་ཚུགས་པ་ལ་རབ་ཏུ་བརྟག་པ་དང་། དགེ་བའི་བཤེས་གཉེན་ལས་འོངས་པའི་ཐམས་ཅད་མཁྱེན་པ་
ཉིད་ལ་ཡང་དག་པར་ལྟ་ཞིང་གདོང་མཆི་མས་གང་བར་ངུས་ཏེ། དྲ་བྱི་ལ་སྤྲིན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ་ཕྱག་འཚལ་ཞིང་དྲ་བྱི་ལ་སྤྲིན་གྱི་དྲུང་ནས་སོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་དགུ་པ། དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའི་གཟུངས་སྣང་བ་དབྱངས་དང་ལྡན་པའི་རྒྱན་དེ་ཉིད་ལ་རྗེས་སུ་བསམ་པ་དང་། བྱང་ཆུབ་སེམས་དཔའི་སྐད་ཀྱི་ཚུལ་རྒྱ་མཚོ་དེ་ཉིད་ལ་འཇུག་པར་བྱ་བ་དང་། བྱང་ཆུབ་སེམས་དཔའི་ཚུལ་ཕྲ་མོ་ལ་འཇུག་པ་དེ་ཉིད་རྗེས་སུ་དྲན་པར་བྱ་བ་དང་། བྱང་ཆུབ་སེམས་དཔའི་སེམས་རྣམ་པར་བྱང་བས། རྣམ་པར་དག་པ་དེ་ཉིད་ཀྱི་རྗེས་སུ་འབྲང་བར་བྱ་བ་དང་། བྱང་ཆུབ་སེམས་དཔའི་དགེ་བའི་རྩ་བའི་བག་ཆགས་བསྡུ་ཞིང་བསྒྲུབ་པ་མངོན་པར་བསྒྲུབ་པ་དང་། བྱང་ཆུབ་སེམས་དཔའི་ཡོངས་སུ་སྨིན་པར་བྱ་བའི་སྒོ་དེ་ཉིད་རྣམ་པར་སྦྱང་བ་དང་། བྱང་ཆུབ་སེམས་དཔའ་རྣམས་ཀྱི་སེམས་ཅན་བསྡུ་བའི་ཡེ་ཤེས་དེ་ཉིད་ཤིན་ཏུ་བྱང་བར་བྱ་བ་དང་། བྱང་ཆུབ་སེམས་དཔའི་བསམ་པའི་སྟོབས་རྣམ་པར་དག་པ་བྱ་བ་དེ་ཉིད་བརྟན་པར་བྱ་བ་དང་། བྱང་ཆུབ་སེམས་དཔའི་ལྷག་པའི་བསམ་པའི་སྟོབས་དེ་ཉིད་ཉེ་བར་བརྟན་པར་བྱ་བ་དང་། བྱང་ཆུབ་སེམས་དཔའི་མོས་པའི་རྒྱུད་དེ་ཉིད་ཡོངས་སུ་སྦྱང་བ་དང་། བྱང་ཆུབ་སེམས་དཔའི་སེམས་དེ་ཉིད་གདོན་མི་ཟ་བར་དགེ་བར་བསམ་པ་དང་བྱང་ཆུབ་སེམས་དཔའི་ཡི་དམ་ཆེན་པོ་དེ་ཉིད་མཐར་ཕྱིན་པར་བྱེད་ཅིང་། ཚོང་དཔོན་གྱི་བུ་ནོར་བཟངས་ཡི་དམ་ལ་བརྟན་ཞིང་སྨོན་ལམ་གྱི་སེམས་ཀྱིས་ཡོངས་སུ་སྐྱོ་བ་མེད་པའི་རྒྱུད་ཀྱི་རྒྱན་དང་ལྡན་པ། ཕྱིར་མི་ལྡོག་པས་རྣམ་པར་གནོན་པའི་བརྩོན་འགྲུས་ཅན། ཡིད་ཀྱིས་བརྟུལ་བ་ལས་མི་ཟློགས་པ། དད་པ་མི་འཕྲོགས་པའི་སྟོབས་དང་ལྡན་པ། རྡོ་རྗེ་མཐུ་བོ་ཆེ་མི་ཕྱེད་པའི་སེམས་དང་ལྡན་པ་དགེ་
བའི་བཤེས་གཉེན་ཐམས་ཅད་ཀྱི་གདམས་ངག་འཐུན་པར་ལེན་པ། ཤེས་རབ་ཁ་མ་བབ་པའི་ཡུལ་དང་ལྡན་པ། སྒོ་ཀུན་ནས་རྣམ་པར་དག་པ་ལ་མངོན་དུ་གྱུར་པ། ཡེ་ཤེས་རྣམ་པར་དག་པའི་སྤྱོད་ཡུལ་ཐོགས་པ་མེད་པ་ཀུན་ཏུ་ལྟ་བའི་ཡེ་ཤེས་ཀྱི་ཚུལ་སྣང་བ་དང་ལྡན་པ། སའི་གཟུངས་ཀུན་ནས་སྣང་བ་རབ་ཏུ་ཐོབ་པ། ཆོས་ཀྱི་དབྱིངས་ཀྱི་གཞིའི་བྱེ་བྲག་ལ་མངོན་སུམ་དུ་གྱུར་པའི་སེམས་དང་ལྡན་པ། གཞི་ཀུན་ལ་རྟེན་པའི་རྒྱན་རྣམ་པར་དག་པའི་རང་བཞིན་རྣམ་པར་དམིགས་པ་གནས་པ་མེད་པ་དང་། བདག་གི་མེད་པ་དང་གཉིས་སུ་མེད་པའི་སྤྱོད་ཡུལ་ལ་རབ་ཏུ་བརྩོན་པ། འདུ་ཤེས་ཐམས་ཅད་ལས་འདའ་བར་བྱེད་པའི་ཡེ་ཤེས་ཀྱི་སྒོ་རྣམ་པར་དག་པ། ཆོས་ཀྱི་ཕྱོགས་དང་གཞི་ཐ་དད་པའི་ཕྱོགས་ལ་སོ་སོར་རྟོག་པ་མེད་པ་འཇིག་རྟེན་གྱི་གཞི་དང་ཕྱོགས་ཀྱི་བྱེ་བྲག་ལས་ཕྱིར་མི་ལྡོག་པ། ཆོས་ཀྱི་གཞི་དང་ཕྱོགས་ཀྱི་བྱེ་བྲག་ལས་ཕྱིར་མི་ལྡོག་པ་སངས་རྒྱས་ཀྱི་ཕྱོགས་དང་གཞི་ཐ་དད་པ་མཐོང་བ་དང་། རྣམ་པར་རིག་པར་བྱ་བ་ལ་གཞོལ་བ། དུས་ཀྱི་ཕྱོགས་དང་གཞིའི་བྱེ་བྲག་ཁོང་དུ་ཆུད་པའི་ཡེ་ཤེས་ཅན། ཆོས་ཀྱི་འཁོར་ལོ་ཡིད་དུ་འོང་བས་ཡང་དག་པར་བསྒྲུབས་པའི་བློ་དང་ལྡན་པ། ཡེ་ཤེས་ཀུན་ནས་སྣང་བའི་ཏིང་ངེ་འཛིན་གྱི་རྣམ་པར་སྣང་བས་སེམས་གསལ་བར་བྱས་པ། ཡིད་ཀྱི་ཡུལ་ལུས་ཀུན་དང་ལྡན་པའི་ས་ལ་ཞུགས་པ་དེ་བཞིན་གཤེགས་པའི་ཡེ་ཤེས་སྣང་བས་རྒྱུད་ཤིན་ཏུ་སྣང་བར་བྱས་པ། ཐམས་ཅད་མཁྱེན་པ་ཉིད་དུ་དད་པའི་དབའ་རླབས་ཀྱི་ཤུགས་ཀྱིས་རབ་ཏུ་རློབ་པ། སངས་རྒྱས་ཀྱི་ཆོས་ལ་མོས་པའི་ཤུགས་དང་འབྲལ་བ་མེད་པ་དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་དུ་བརླབས་པ། སངས་རྒྱས་ཐམས་ཅད་རང་གི་སེམས་ཀྱི་རྒྱུད་ཁོང་དུ་ཆུད་པའི་འོད་ཀྱིས་སྣང་བར་གྱུར་པ། འཇིག་རྟེན་གྱི་ཁམས་ཀྱི་དྲ་བ་ཐམས་ཅད་རང་གི་ལུས་ཀྱིས་རྒྱས་པར་དགང་བའི་སྨོན་ལམ་དང་ཆོས་ཀྱི་དབྱིངས་ཐམས་ཅད་རང་གི་ལུས་སུ་ཡང་དག་པར་བསྡུ་བ་དང་། མངོན་པར་བསྒྲུབ་པ་ལ་བརྩོན་པ། དེ་མཐར་གྱིས་སོང་སོང་སྟེ། ལོ་
བཅུ་གཉིས་ཀྱིས་ཡུལ་ནགས་ཚལ་ན་གནས་པར་ཕྱིན་ནས། དེས་ཚོང་དཔོན་བཏང་བརྗོད་དེ་བཙལ་བཙལ་ཏེ་མཐོང་ངོ་། །མཐོང་ནས་ཀྱང་ལུས་ཐམས་ཅད་ཀྱིས་ཕབ་སྟེ། ཕྱག་འཚལ་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་དེ་རིང་དགེ་བའི་བཤེས་གཉེན་དང་མཇལ་བར་གྱུར་པ་ནི་བདག་གིས་འཐོབ་པར་བགྱི་བ་ལེགས་པར་ཐོབ་བོ། །དེ་ཅིའི་སླད་དུ་ཞེ་ན། དགེ་བའི་བཤེས་གཉེན་རྣམས་ནི་མཐོང་བར་དཀའ་བའོ། །འབྱུང་བར་དཀའ་བའོ། །མཇལ་བར་དཀའ་བའོ། ། བགྲོད་པར་དཀའ་བའོ། །བསྙེན་བཀུར་བགྱི་བར་དཀའ་བའོ། །མཉེས་པར་བགྱི་བར་དཀའ་བའོ། །འགྲོགས་པར་དཀའ་བའོ། །རིམ་གྲོ་བགྱི་བར་དཀའ་བའོ། །དགེ་བའི་བཤེས་གཉེན་རྣམས་ནི་རྗེས་སུ་འབྲང་བར་དཀའ་བ་ལགས་ན། དེ་ལྟ་བུའི་དགེ་བའི་བཤེས་གཉེན་དང་འགྲོགས་པ་དེ་རིང་བདག་གིས་ཐོབ་པར་གྱུར་ཏོ། །འཕགས་པ་བདག་གིས་འདི་ལྟ་སྟེ། སངས་རྒྱས་ཐམས་ཅད་བསྙེན་བཀུར་བ་དང་། སངས་རྒྱས་ཐམས་ཅད་ལ་རིམ་གྲོ་བགྱི་བ་དང་། སངས་རྒྱས་ཐམས་ཅད་ཀྱི་ཞལ་བལྟ་བ་དང་། སངས་རྒྱས་ཐམས་ཅད་རྣམ་པར་དམིགས་པར་བགྱི་བ་དང་། སངས་རྒྱས་ཐམས་ཅད་དང་མཉམ་པ་ཉིད་ཐོབ་པར་བགྱི་བ་དང་། སངས་རྒྱས་ཐམས་ཅད་ཀྱི་སྨོན་ལམ་ཁོང་དུ་ཆུད་པར་བགྱི་བ་དང་། སངས་རྒྱས་ཐམས་ཅད་ཀྱི་སྨོན་ལམ་ཡོངས་སུ་རྫོགས་པར་བགྱི་བ་དང་། སངས་རྒྱས་ཐམས་ཅད་ཀྱི་ཡང་དག་པར་བསྒྲུབ་པའི་ཡེ་ཤེས་སྣང་བར་བགྱི་བ་དང་། སངས་རྒྱས་ཐམས་ཅད་རང་གི་ལུས་སུ་མངོན་པར་བསྒྲུབ་པ་དང་། སངས་རྒྱས་ཐམས་ཅད་ཀྱིས་ཡང་དག་པར་བསྒྲུབས་པ་རང་གི་སྤྱོད་པ་མངོན་པར་བསྒྲུབ་པར་བགྱི་བ་དང་། སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་མངོན་སུམ་དུ་རྟོགས་པར་བགྱི་བ་དང་། སངས་རྒྱས་ཐམས་ཅད་ཀྱི་སྟོབས་དང་མི་བསྙེངས་པ་ཡོངས་སུ་དག་པར་བགྱི་བ་དང་། སངས་རྒྱས་ཐམས་ཅད་ཀྱི་ཆོས་བསྟན་པ་མཉན་པས་མི་ངོམས་པར་བགྱི་བ་དང་། སངས་
རྒྱས་ཐམས་ཅད་ཀྱི་ཆོས་བསྟན་པ་མཉན་ཅིང་བླང་བར་བགྱི་བ་དང་། སངས་རྒྱས་ཐམས་ཅད་ཀྱི་ཆོས་བསྟན་པ་ཡང་དག་པར་གཟུང་བར་བགྱི་བ་དང་། སངས་རྒྱས་ཐམས་ཅད་ཀྱི་ཆོས་བསྟན་པ་རྣམ་པར་དབྱེ་བར་བགྱི་བ་དང་། སངས་རྒྱས་ཐམས་ཅད་ཀྱི་ཆོས་བསྟན་པ་ཡོངས་སུ་གཟུང་བ་དང་། བྱང་ཆུབ་སེམས་དཔའ་ཐམས་ཅད་དང་། ཚུལ་གཅིག་ཏུ་འགྱུར་བར་བགྱི་བ་དང་། བྱང་ཆུབ་སེམས་དཔའ་ཐམས་ཅད་དང་སྐལ་བར་མཉམ་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་ཡོངས་སུ་དག་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་མངོན་པར་བསྒྲུབ་པ་རྣམ་པར་དག་པར་བགྱི་བ་དང་བྱང་ཆུབ་སེམས་དཔའ་ཐམས་ཅད་ཀྱི་སངས་རྒྱས་ཀྱི་བྱིན་གྱི་རླབས་ཀྱི་མཛོད་རབ་ཏུ་ཐོབ་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་ཆོས་ཀྱི་གཏེར་དང་མཛོད་མི་ཟད་པའི་ཡེ་ཤེས་སྣང་བ་ཐོབ་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་གྱི་གཏེར་དང་མཛོད་ཁོང་དུ་ཆུད་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་མཛོད་ཚད་མེད་པ་མངོན་པར་བསྒྲུབ་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྙིང་རྗེ་ཆེན་པོའི་གཏེར་དང་མཛོད་སེམས་ཅན་འདུལ་བའི་མཐར་ཕྱིན་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་འཕྲུལ་བའི་གཏེར་དང་མཛོད་རྣམ་པར་དམིགས་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་དབང་གི་གཏེར་དང་། མཛོད་རང་གི་སེམས་ཀྱིས་དབང་དུ་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་དག་བའི་གཏེར་དང་། མཛོད་རྣམ་པ་ཐམས་ཅད་དུ་བརྒྱན་པར་བགྱི་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། འཕགས་པ་དེ་ལྟ་བུའི་སེམས་ཀྱིས་བདག་འདིར་མཆིས་སོ། །
བསམ་པ་དེ་ལྟ་བུ་དང་ཡིད་ལ་སྨོན་པ་དེ་ལྟ་བུ་དང་། མངོན་པར་དགའ་བ་དེ་ལྟ་བུ་དང་། སེམས་པ་དེ་ལྟ་བུ་དང་། གདོན་མི་འཚལ་བར་བསྒྲུབ་པར་བསམ་པ་དེ་ལྟ་བུ་དང་། སྤྱོད་ཡུལ་མངོན་དུ་བགྱི་བ་དེ་ལྟ་བུ་དང་། ཚུལ་ཁོང་དུ་ཆུད་པར་བགྱི་བ་ལ་མོས་པ་དེ་ལྟ་བུ་དང་། རྣམ་པར་དག་པ་ལ་གཞོལ་བ་དེ་ལྟ་བུ་དང་། རྣམ་པར་དཔྱོད་པའི་བསམ་པ་དེ་ལྟ་བུ་དང་། རབ་ཏུ་གཞོལ་བའི་སེམས་དེ་ལྟ་བུ་དང་། དགེ་བའི་སྦྱོར་བ་དེ་ལྟ་བུ་དང་། མངོན་དུ་འགྱུར་བའི་དབང་པོ་དེ་ལྟ་བུས་བདག་འདིར་མཆིས་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་། རྗེས་སུ་སྟོན་པ་མཛད་ཅིང་ཚུལ་ནི་ཉེ་བར་སྟོན་པ་མཛད། རྟོགས་པར་བགྱི་བ་ནི་སྣང་བར་མཛད། ལམ་ནི་བསྟན་པ་མཛད། མུ་སྟེགས་ལ་ནི་འཇོག་པར་མཛད། ཆོས་ཀྱི་སྒོ་ནི་རྣམ་པར་འབྱེད་པ་མཛད། ཐེ་ཙོམ་ནི་ཡོངས་སུ་གཅོད་པར་མཛད། ནེམ་ནུར་ནི་སེལ་བར་མཛད། ཡིད་གཉིས་ཀྱི་ཟུག་རྔུ་ནི་འབྱིན་པར་མཛད། དོགས་པའི་དྲི་མ་ནི་སྦྱོང་བར་མཛད། སེམས་ཀྱི་ཐིབས་པོ་ནི་སྣང་བར་མཛད། སེམས་ཀྱི་དྲི་མ་ནི་ཡོངས་སུ་སེལ་བར་མཛད། སེམས་ཀྱི་རྒྱུད་ནི་རབ་ཏུ་དང་བར་མཛད། སེམས་ཀྱི་གཡོ་སྒྱུ་ནི་ཡོངས་སུ་སེལ་བར་མཛད། སེམས་ཀྱི་གདུང་བ་ནི་ཡོངས་སུ་སིམ་པར་མཛད། འཁོར་བ་ལས་ནི་སེམས་རྣམ་པར་བཟློག་པར་མཛད། མི་དགེ་བའི་ལས་ནི་ཕྱིར་བཟློག་པར་མཛད། སེམས་ཅན་དམྱལ་བ་ལས་ནི་ལྡོག་པར་མཛད། གནས་དང་ནི་དབྲལ་བར་མཛད། མངོན་པར་ཞེན་པ་ལས་ནི་གྱེན་དུ་བསྐྱོད་པ་མཛད། ཆགས་པ་ཐམས་ཅད་ལས་ནི་ཡོངས་སུ་འགྲེལ་བ་མཛད། ཐམས་ཅད་མཁྱེན་པ་ཉིད་དུ་ནི་བསྒྲུབ་པ་མཛད། ཆོས་ཀྱི་གྲོང་ཁྱེར་དུ་འཇུག་པར་བགྱི་བའི་སླད་དུ་ནི་མངོན་དུ་གྱུར་པར་མཛད། སྙིང་རྗེ་ཆེན་པོ་ལ་ནི་རབ་ཏུ་བསྒྲུབ་པ་མཛད། བྱམས་པ་ཆེན་པོ་ལ་ནི་རབ་ཏུ་གཞོག་པ་མཛད། བྱང་ཆུབ་སེམས་དཔའི་སྤྱོད་པ་ལ་ནི་རབ་ཏུ་སྦྱོར་བ་མཛད། ཏིང་ངེ་འཛིན་གྱི་སྒོ་བསྒོམ་པ་ལ་ནི་འཛུད་པ་མཛད། རྟོགས་པར་འགྱུར་བའི་སྒོ་ལ་ནི་
གནས་པར་མཛད། རང་བཞིན་ངེས་པར་རྟོགས་པ་ལ་ནི་གཞག་པར་མཛད། སྟོབས་དང་ལྡན་པས་ནི་ཁྱབ་པར་མཛད། འགྲོ་བ་ཐམས་ཅད་མཉམ་པ་ཉིད་དུ་ནི་སེམས་རྣམ་པར་དབྱེ་བ་མཛད་དོ། །ཞེས་ཐོས་ན། འཕགས་པ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བརྩོན་པར་བགྱི། ཇི་ལྟར་སྦྱར་བར་བགྱི། ཇི་ལྟར་བརྩོན་པར་བགྱིས་ན། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་རྣམ་པར་དག་པར་འགྱུར་བ་བདག་ལ་བསྟན་དུ་གསོལ། དེ་ནས་ཚོང་དཔོན་བཏང་བརྗོད་ཀྱིས་དེའི་ཚེ་བྱང་ཆུབ་སེམས་དཔའི་ཏིང་ངེ་འཛིན་གྱི་སྒོ་སངས་རྒྱས་ཀྱི་ཞིང་ཐམས་ཅད་ཡང་དག་པར་འདུ་བ་ཞེས་བྱ་བ་གཟུངས་ཀྱི་སྒོ་ཀློང་མཐའ་ཡས་པ་སྔོན་དུ་འགྲོ་བ་ལ། སྔོན་གྱི་དགེ་བའི་རྩ་བའི་ཤུགས་དང་། དེ་བཞིན་གཤེགས་པའི་བྱིན་གྱི་རླབས་དང་། འཇམ་དཔལ་གཞོན་ནུར་གྱུར་པས་ཡང་དག་པར་བསམས་ཤིང་ཡེ་ཤེས་སྣང་བ་ཉེ་བར་བསྒྲུབས་པས་སྙོམས་པར་ཞུགས་སོ། །ཚོང་དཔོན་བཏང་བརྗོད་དེ་ལྟར་སྙོམས་པར་ཞུགས་མ་ཐག་ཏུ་གཟུགས་ཀྱི་ལུས་ཡོངས་སུ་དག་པ་རྣམ་པ་འདི་ལྟ་བུར་གནས་པར་གྱུར་ཏེ། ལུས་ཡོངས་སུ་དག་པ་དེའི་མཐུས་ཕྱོགས་བཅུའི་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་སངས་རྒྱས་ཀྱི་ཞིང་ཡོངས་སུ་དག་པ་དང་བཅས། འཁོར་གྱི་དཀྱིལ་འཁོར་དང་བཅས། འོད་རྣམ་པར་དག་པ་དང་བཅས། སྔོན་སྤྱོད་པ་ལ་ཞུགས་པ་དང་བཅས། སངས་རྒྱས་ཀྱི་རྣམ་པར་འཕྲུལ་པ་དང་བཅས། སྨོན་ལམ་གྱི་ཚོགས་དང་བཅས། སྤྱོད་པ་དང་འབྱུང་བའི་རྒྱན་རྣམ་པར་དག་པ་དང་བཅས། མངོན་པར་རྫོགས་པར་འཚང་རྒྱ་བ་ཡོངས་སུ་སྟོན་པ་དང་བཅས། ཆོས་ཀྱི་འཁོར་ལོ་ཤིན་ཏུ་སྟོན་པ་དང་བཅས། སེམས་ཅན་ཡོངས་སུ་སྨིན་པར་མཛད་པ་དང་བཅས། ཆོས་ཀྱི་མུའི་མཐར་ཐུག་པ་དང་བཅས་པར་ཀུན་ཀྱང་ལུས་ཀྱི་ཁོངས་སུ་ཆུད་ཅིང་འདུས་པར་སྣང་སྟེ། དེ་དག་ཀྱང་ཕན་ཚུན་མ་འདྲེས་པ་དང་། ཕན་ཚུན་མཆོད་
པ་དང་། ཕན་ཚུན་ཤིན་ཏུ་རྣམ་པར་ཕྱེ་བ་དང་། ཕན་ཚུན་ཤིན་ཏུ་རྣམ་པར་གནས་པ་དང་། ཚུལ་སྣ་ཚོགས་སུ་ཞུགས་པ་དང་ཡང་དག་པ་ཇི་ལྟ་བ་བཞིན་དུ་རྣམ་པར་དམིགས་པ་དང་། སངས་རྒྱས་ཀྱི་ཞིང་རྒྱན་སྣ་ཚོགས་ཅན་མངའ་བ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་སྣ་ཚོགས་ཀྱི་རྒྱན་དང་ལྡན་པ་དང་། སངས་རྒྱས་ཀྱི་རྣམ་པར་འཕྲུལ་པ་སྣ་ཚོགས་ཡོངས་སུ་སྟོན་པར་སྣང་ངོ་། །ཐེག་པ་སྣ་ཚོགས་རྣམ་པར་དགོད་པ་མཛད་པ་དང་། སྨོན་ལམ་གྱི་སྒོ་སྣ་ཚོགས་ཡོངས་སུ་བརྗོད་པ་དང་། འཇིག་རྟེན་གྱི་ཁམས་ལ་ལ་ན་ནི་དགའ་ལྡན་གྱི་ཕོ་བྲང་དུ་སྐྱེས་ཤིང་སངས་རྒྱས་ཀྱི་འཕྲིན་ལས་ཐམས་ཅད་མཛད་པར་སྣང་ངོ་། །ལ་ལ་ན་ནི་དགའ་ལྡན་གྱི་ཕོ་བྲང་ནས་འཕོ་བ་དང་། ལ་ལ་ན་ནི་ཡུམ་གྱི་སྐུ་ན་བཞུགས་ཤིང་རྣམ་པར་འཕྲུལ་པ་སྣ་ཚོགས་ཡོངས་སུ་སྟོན་པ་དང་། ལ་ལ་ན་ནི་སྐྱེ་བ་དང་། ལ་ལ་ན་ནི་བྱིས་པའི་རྩེད་མོ་སྟོན་པ་མཛད་པ་དང་། ལ་ལ་ན་ནི་བཙུན་མོའི་འཁོར་གྱི་ནང་ན་བཞུགས་པ་དང་། ལ་ལ་ན་ནི་མངོན་པར་འབྱུང་བ་དང་། ལ་ལ་ན་ནི་སྙིང་པོ་བྱང་ཆུབ་ཏུ་གཤེགས་ཏེ། རྣམ་པར་འཕྲུལ་པའི་རྒྱན་ཆེན་པོས་བདུད་ཀྱི་སྡེ་ཕམ་པར་མཛད་པ་དང་། ལ་ལ་ན་ནི་ལྷ་དང་ཀླུ་དང་། གནོད་སྦྱིན་དང་། དྲི་ཟས་ཡོངས་སུ་བསྐོར་ཅིང་ཚངས་པའི་དབང་པོས་ཆོས་ཀྱི་འཁོར་ལོ་བསྐོར་བར་གསོལ་བ་གདབ་པ་དང་། ལ་ལ་ན་ནི་ཆོས་ཀྱི་འཁོར་ལོ་བསྐོར་བ་མཛད་པ་དང་། ལ་ལ་ན་ནི་སེམས་ཅན་ཐམས་ཅད་ཀྱི་གནས་ན་བཞུགས་པ་དང་། ལ་ལ་ན་ནི་ཡོངས་སུ་མྱ་ངན་ལས་འདའ་བར་སྣང་ངོ་། །འཇིག་རྟེན་གྱི་ཁམས་ལ་ལ་ན་ནི་དེ་བཞིན་གཤེགས་པ་མྱ་ངན་ལས་འདས་པ་རྣམས་ཀྱི་རིང་བསྲེལ་རྣམ་པར་དགོད་པར་སྣང་ངོ་། །སངས་རྒྱས་ཀྱི་ཞིང་ལ་ལ་ན་ནི་ལྷ་དང་མི་རྣམས་དེ་བཞིན་གཤེགས་པའི་མཆོད་རྟེན་ལ་རྒྱན་གྱིས་ཀླུབས་པ་བྱེད་པར་སྣང་སྟེ། སངས་རྒྱས་བཅོམ་ལྡན་འདས་དེ་དག་གིས་སེམས་ཅན་གྱི་རིས་རྣམ་པ་ཐ་དད་པ་དང་། སེམས་ཅན་གྱི་འཇིག་རྟེན་གྱི་རྣམ་པ་ཐ་དད་པ་དང་། སེམས་
ཅན་གྱི་ལམ་རྣམ་པ་ཐ་དད་པ་དང་། སེམས་ཅན་གྱི་སྐྱེ་གནས་རྣམ་པ་ཐ་དད་པ་དང་། སེམས་ཅན་གྱི་ཚོགས་རྣམ་པ་ཐ་དད་པ་དང་། སེམས་ཅན་གྱི་དགེ་བའི་རྩ་བའི་རྒྱུད་རྣམ་པ་ཐ་དད་པ་དང་། སེམས་ཅན་གྱི་ལམ་གྱི་རྒྱུད་རྣམ་པ་ཐ་དད་པ་དང་། སེམས་ཅན་གྱི་བསམ་པའི་རྒྱུད་རྣམ་པ་ཐ་དད་པ་དང་། སེམས་ཅན་གྱི་མོས་པའི་རྒྱུད་རྣམ་པ་ཐ་དད་པ་དང་། སེམས་ཅན་གྱི་དབང་པོའི་རྒྱུད་རྣམ་པ་ཐ་དད་པ་དང་། དུས་ཀྱི་རྒྱུད་རྣམ་པ་ཐ་དད་པ་དང་། སེམས་ཅན་གྱི་ལས་ཀྱི་བྱེ་བྲག་རྣམ་པ་ཐ་དད་པ་དང་། སེམས་ཅན་གྱི་ལས་མི་མཐུན་པ་རྣམ་པ་ཐ་དད་པ་དང་། སེམས་ཅན་གྱི་འཇིག་རྟེན་རྣམ་པར་དབྱེ་བ་རྣམ་པ་ཐ་དད་པ་དང་། སེམས་ཅན་གྱི་ཚུལ་ལམ་དང་སྤྱོད་པ་རྣམ་པ་ཐ་དད་པ་ལ་རྣམ་པར་སྤྱོད་པ་དང་། སེམས་ཅན་རྒྱ་མཚོ་བསམ་པ་དང་སྦྱོར་བའི་རྣམ་པ་ཐ་དད་པ་དང་དབང་པོ་མི་མཐུན་པ་སྣ་ཚོགས་རྣམ་པར་དག་པ་དང་། ཉོན་མོངས་པ་དང་། བག་ཆགས་སྣ་ཚོགས་བག་ལ་ཉལ་བར་གྱུར་པའི་སེམས་ཅན་འབྱམ་ཀླས་པ་རྣམས་ལ་སངས་རྒྱས་ཀྱི་རྣམ་པར་འཕྲུལ་པ་རྣམ་པ་སྣ་ཚོགས་ཡོངས་སུ་བསྟན་པ་དང་། ཡུལ་སྣ་ཚོགས་ཀྱི་ངེས་པའི་ཚིག་དང་། དབྱངས་ཀྱི་ཡན་ལག་དང་གསུང་རྣམ་པ་སྣ་ཚོགས་སུ་བསྒྲུབས་པ་དང་། མདོ་སྡེ་སྣ་ཚོགས་ཀྱི་ཚུལ་རབ་ཏུ་བརྗོད་པ་དང་། གཟུངས་ཀྱི་སྒོ་རྣམ་པ་ཐ་དད་པའི་རྒྱུད་དང་སོ་སོ་ཡང་དག་པར་རིག་པའི་ཚུལ་གྱི་གཞུང་སྣ་ཚོགས་དང་། འཕགས་པའི་བདེན་པའི་མིང་རྒྱ་མཚོའི་རྒྱུད་རྣམ་པ་སྣ་ཚོགས་དང་། སངས་རྒྱས་ཀྱི་ཁྱུ་མཆོག་དང་སེང་གེའི་ང་རོ་རབ་ཏུ་བསྒྲགས་པ་དང་། སེམས་ཅན་གྱི་དགེ་བའི་རྩ་བ་སྣ་ཚོགས་བསྟན་པའི་ཆོ་འཕྲུལ་ཡོངས་སུ་བསྟན་པ་དང་། དྲན་པའི་སྒོ་སྣ་ཚོགས་ཅན་ཤིན་ཏུ་བསྟན་པའི་རྣམ་པར་འཕྲུལ་པ་དང་། བྱང་ཆུབ་སེམས་དཔའ་ལུང་བསྟན་པའི་སེང་གེའི་ང་རོ་སྣ་ཚོགས་དང་། དེ་བཞིན་གཤེགས་པའི་ཆོས་ཀྱི་འཁོར་ལོའི་མཐུ་ཕྱུང་བ་རྣམ་པ་སྣ་ཚོགས་ཀྱི་འཁོར་གྱི་དཀྱིལ་འཁོར་མཐའ་དང་དབུས་མེད་པ་མཐའ་ཡས་པར་རྣམ་པ་ཐ་དད་པ་ཕན་ཚུན་མཆོད་པ་དང་། རྣམ་པར་དག་པའི་འཁོར་
གྱི་དཀྱིལ་འཁོར་སྣ་ཚོགས་ཡངས་པ་དང་། འཁོར་གྱི་དཀྱིལ་འཁོར་ཤིན་ཏུ་ཕྲ་བར་འདུས་པ་དང་། དཔག་ཚད་གཅིག་གི་ཚད་ཙམ་དང་། དཔག་ཚད་བཅུའི་ཚད་ཙམ་དང་། དཔག་ཚད་བརྒྱའི་ཚད་ཙམ་ནས། འཁོར་གྱི་དཀྱིལ་འཁོར་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཚད་ཙམ་དུ་སངས་རྒྱས་བཅོམ་ལྡན་འདས་དེ་དག་གིས། དེ་བཞིན་གཤེགས་པའི་གསུང་དབྱངས་ཀྱི་ཡན་ལག་དང་། སྒྲ་སྐད་ཐམས་ཅད་ཀྱི་རྗེས་སུ་འགྲོ་བས་ཆོས་ཇི་སྙེད་དུ་བསྟན་པ་དེ་དག་ཐམས་ཅད་ཀྱང་། ཚོང་དཔོན་གྱི་བུ་ནོར་བཟངས་ཀྱིས་ཐོས་སོ་བླངས་སོ། །ཡང་དག་པར་བཟུང་ངོ་བསམས་སོ། །སངས་རྒྱས་ཀྱི་རྣམ་པར་འཕྲུལ་པ་དེ་དག་ཀྱང་མཐོང་ངོ་། །བྱང་ཆུབ་སེམས་དཔའི་ཏིང་ངེ་འཛིན་གྱི་ཁྱུ་མཆོག་གི་མཐུ་ཕྱུང་བ་དེ་དག་ཀྱང་མཐོང་ངོ་། །དེ་ནས་ཚོང་དཔོན་བཏང་བརྗོད་དྲན་ཞིང་ཤེས་བཞིན་དུ་ཏིང་ངེ་འཛིན་དེ་ལས་ལངས་ནས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་བོ་ནི་དེ་བཞིན་གཤེགས་པའི་རྣམ་པར་ཐར་པ་ཐོགས་པ་མེད་པའི་རྒྱན་ཅེས་བྱ་བ་ཡོངས་སུ་བླངས་ཤིང་འཛིན་པ་སྟེ། རིགས་ཀྱི་བུ་དེ་ལྟར་ཁོ་བོ་དེ་བཞིན་གཤེགས་པའི་རྣམ་པར་ཐར་པ་ཐོགས་པ་མེད་པའི་རྒྱན་དེ་ལ་རྟོག་ཅིང་དཔྱོད་པའི་ཚེ། ཤར་ཕྱོགས་ཀྱི་འཇིག་རྟེན་གྱི་ཁམས་འཛམ་བུ་ཆུ་ཀླུང་གི་མདོག་དང་ལྡན་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐར་མའི་དབང་ཕྱུག་རྒྱལ་པོ་ཞེས་བྱ་བ་བྱང་ཆུབ་སེམས་དཔའ་རྣམ་པར་སྣང་བའི་སྙིང་པོ་ལ་སོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། །ལྷོ་ཕྱོགས་ཀྱི་འཇིག་རྟེན་གྱི་ཁམས་སྟོབས་ཐམས་ཅད་ཀྱི་ཤུགས་དང་ལྡན་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་ཀུན་
ཏུ་རྣམ་པར་ཡངས་པ་ཞེས་བྱ་བ་བྱང་ཆུབ་སེམས་དཔའ་བསམ་པའི་རྒྱལ་པོ་ལ་སྩོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། །ནུབ་ཕྱོགས་ཀྱི་འཇིག་རྟེན་གྱི་ཁམས་སྤོས་ཐམས་ཅད་ཀྱི་འོད་དང་ལྡན་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་མར་མེའི་རྒྱལ་པོ་ཞེས་བྱ་བ། བྱང་ཆུབ་སེམས་དཔའ་ཆགས་པ་མེད་པའི་སེམས་ལ་སྩོགས་པ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་། ཐབས་གཅིག་ཏུ་བཞུགས་པ་ཡང་མིག་ལམ་དུ་སྣང་ངོ་། །བྱང་ཕྱོགས་ཀྱི་འཇིག་རྟེན་གྱི་ཁམས་ངུར་སྨྲིག་གི་རྒྱལ་མཚན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་རབ་ཏུ་འདུལ་བ་ཞེས་བྱ་བ་བྱང་ཆུབ་སེམས་དཔའ་རྡོ་རྗེའི་གོམ་པས་རྣམ་པར་གནོན་པ་ལ་སོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པ་ཡང་མིག་ལམ་དུ་སྣང་ངོ་། །བྱང་ཤར་གྱི་ཕྱོགས་མཚམས་ཀྱི་འཇིག་རྟེན་གྱི་ཁམས་རིན་པོ་ཆེ་ཐམས་ཅད་རབ་ཏུ་འབར་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་དམིགས་པའི་སྤྱན་རྣམ་པར་དམིགས་པ་ཞེས་བྱ་བ་བྱང་ཆུབ་སེམས་དཔའ་དམིགས་པ་མེད་པར་ཤིན་ཏུ་སྤྲུལ་པ་ལ་སྩོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པ་ཡང་མིག་ལམ་དུ་སྣང་ངོ་། །ཤར་ལྷོའི་ཕྱོགས་མཚམས་ཀྱི་འཇིག་རྟེན་གྱི་ཁམས་སྤོས་ཀྱི་འོད་ཟེར་རབ་ཏུ་སྣང་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་ཀྱི་མར་མེ་ཞེས་བྱ་བ་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་གཞི་ཐ་དད་པའི་དཔལ་གྱི་རྒྱལ་པོ་ལ་སྩོགས་པ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་
གཅིག་ཏུ་བཞུགས་པའང་མིག་ལམ་དུ་སྣང་ངོ་། །ལྷོ་ནུབ་ཀྱི་ཕྱོགས་མཚམས་ཀྱི་འཇིག་རྟེན་གྱི་ཁམས་ཉི་མའི་འོད་གཟེར་ལྟར་སྣང་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒོ་ཀུན་ནས་ཡེ་ཤེས་རྣམ་པར་སྣང་བའི་དབྱངས་ཞེས་བྱ་བ་བྱང་ཆུབ་སེམས་དཔའི་མེ་ཏོག་གི་འོད་ཀུན་ནས་འཕྲོ་བར་གཙུག་ཕུད་རབ་ཏུ་འཕྱང་བ་ལ་སོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། །ནུབ་བྱང་གི་ཕྱོགས་མཚམས་ཀྱི་འཇིག་རྟེན་གྱི་ཁམས་སྤོས་ཀྱི་རྒྱན་ཡིད་དུ་འོང་བའི་དགེ་བའི་སྙིང་པོ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་རྒྱ་མཚོ་ཚད་མེད་པའི་འོད་ཅེས་བྱ་བ། བྱང་ཆུབ་སེམས་དཔའ་ལུས་ཀྱི་འོད་ཟེར་ཐོགས་པ་མེད་པའི་གཟི་བརྗིད་རྒྱལ་པོ་བློ་གྲོས་ལ་སྩོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། །འོག་གི་ཕྱོགས་ཀྱི་འཇིག་རྟེན་གྱི་ཁམས་རིན་པོ་ཆེའི་སེང་གེ་སྣང་ཞིང་འབར་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་ཆོས་ཀྱི་དབྱིངས་སུ་སྣང་བ་ཞེས་བྱ་བ་བྱང་ཆུབ་སེམས་དཔའ་ཆོས་ཀྱི་དབྱིངས་འོད་འཕྲོ་ཞིང་རྣམ་པར་སྣང་བར་བྱུང་བའི་བློ་གྲོས་ལ་སོགས་པ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། །སྟེང་གི་ཕྱོགས་ཀྱི་འཇིག་རྟེན་གྱི་ཁམས་མཚན་གྱི་འོད་རྣམ་པར་སྣང་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་གྲགས་པ་ཐོགས་པ་མེད་པའི་རྣམ་པར་ཐར་པའི་འོད་ཀྱི་རྒྱལ་པོ་ཞེས་བྱ་བ་བྱང་ཆུབ་སེམས་དཔའ་སྟོབས་དང་། བརྩོན་འགྲུས་ཐོགས་པ་མེད་པའི་བློ་གྲོས་ལ་སོགས་པ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་
ཐམས་ཅད་དང་ཐབས་གཅིག་ཏུ་བཞུགས་པའང་མིག་ལམ་དུ་སྣང་ངོ་། ། རིགས་ཀྱི་བུ་དེ་ལྟར་དེ་བཞིན་གཤེགས་པ་འདི་དག་ལ་སོགས་པ། ཕྱོགས་བཅུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་མཐོང་ཡང་དེ་བཞིན་གཤེགས་པ་དེ་དག་ཀྱང་འདིར་མི་བྱོན། ཁོ་བོ་ཡང་དེར་འགྲོ་བ་མེད་དེ་ནམ་འདོད་པ་དེ་ན་བདེ་བ་ཡོད་པའི་འཇིག་རྟེན་གྱི་ཁམས་ན། དེ་བཞིན་གཤེགས་པ་འོད་སྣང་མཐའ་ཡས་པ་བཞུགས་པའང་མཐོང་ངོ་། །ཙན་དན་ཡོད་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་འོད་སྣང་རྡོ་རྗེ་བཞུགས་པའང་མཐོང་ངོ་། །སྤོས་དྲི་ཡོད་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་འོད་སྣང་རིན་ཆེན་བཞུགས་པ་ཡང་མཐོང་ངོ་། །པད་མོ་ཡོད་པའི་འཇིག་རྟེན་གྱི་ཁམས་ན། དེ་བཞིན་གཤེགས་པ་འོད་སྣང་རིན་ཆེན་པད་མོ་བཞུགས་པའང་མཐོང་ངོ་། །གསེར་ཡོད་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་འོད་སྣང་ཞི་བ་བཞུགས་པའང་མཐོང་ངོ་། །མངོན་པར་དགའ་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་མི་སྒུལ་བ་བཞུགས་པའང་མཐོང་ངོ་། །ཤིན་ཏུ་བརྟན་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་སེང་གེ་བཞུགས་པའང་མཐོང་ངོ་། །མེ་ལོང་གི་དཀྱིལ་འཁོར་ལྟར་སྣང་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་བློ་གྲོས་ཟླ་བ་བཞུགས་པ་ཡང་མཐོང་ངོ་། །རིན་ཆེན་དཔལ་གྱི་དད་པས་བརྒྱན་པའི་འཇིག་རྟེན་གྱི་ཁམས་ན་དེ་བཞིན་གཤེགས་པ་རྣམ་པར་སྣང་མཛད་བཞུགས་པ་ཡང་མཐོང་ངོ་། །རིགས་ཀྱི་བུ་དེ་ལྟར་ཁོ་བོས་ནི་ཕྱོགས་གང་དང་གང་ན་འཇིག་རྟེན་གྱི་ཁམས་གང་དང་གང་གི་དེ་བཞིན་གཤེགས་པ་གང་དང་གང་མཐོང་བར་འདོད་པའི་དེ་བཞིན་གཤེགས་པ་དེ་དང་དེ་དག་ཀྱང་མཐོང་ངོ་། །དུས་གང་དང་གང་དུ་དམིགས་པ་གང་དང་གང་ལ་སྔོན་གྱི་སྤྱོད་པ་གང་དང་གང་གིས་དེ་བཞིན་གཤེགས་པ་མཐོང་བར་འདོད་པ་དང་། རྣམ་པར་འཕྲུལ་པ་གང་དང་གང་གི་དོན་དང་།
སེམས་ཅན་འདུལ་བ་གང་དང་གང་གི་དོན་དུ་དེ་བཞིན་གཤེགས་པ་གང་དང་གང་མཐོང་བར་འདོད་པའི་དེ་བཞིན་གཤེགས་པ་དེ་དང་དེ་དག་ཀྱང་མཐོང་སྟེ། དེ་བཞིན་གཤེགས་པ་དེ་དག་ཀྱང་འདིར་གཤེགས་པ་མ་ཡིན། བདག་ཀྱང་དེར་ཕྱིན་པ་མ་ཡིན་ནོ། །རིགས་ཀྱི་བུ་དེ་ལྟར་ཁོ་བོས་དེ་བཞིན་གཤེགས་པ་རྣམས་ག་ལས་ཀྱང་བྱོན་པ་མེད་པར་ཤེས་ལ། རང་གི་ལུས་ཀྱང་གར་ཡང་འགྲོ་བ་མེད་པར་ཤེས་པ་དང་། དེ་བཞིན་གཤེགས་པ་རྣམས་རྣམ་པར་དམྱིགས་པ་ཡང་རྨི་ལམ་ལྟ་བུར་ཤེས་ལ། རང་གི་སེམས་རྣམ་པར་དམིགས་པ་ཡང་རྨི་ལམ་དང་འདྲ་བར་རྒྱུ་བར་ཤེས་པ་དང་། དེ་བཞིན་གཤེགས་པ་རྣམས་རྣམ་པར་དམྱིགས་པ་ཡང་གཟུགས་བརྙན་ལྟ་བུར་ཤེས་ལ་རང་གི་སེམས་རྣམ་པར་དམྱིགས་པ་ཡང་ཆུའི་སྣོད་གསལ་བ་ལྟ་བུར་ཤེས་པ་དང་། དེ་བཞིན་གཤེགས་པ་རྣམས་རྣམ་པར་དམིགས་པ་ཡང་སྒྱུ་མས་བྱས་པའི་གཟུགས་བརྙན་ལྟ་བུར་ཤེས་ལ་རང་གི་སེམས་རྣམ་པར་དམྱིགས་པ་ཡང་སྒྱུ་མ་ལྟ་བུར་ཤེས་པ་དང་། དེ་བཞིན་གཤེགས་པའི་གསུང་ཡང་སྒྲ་བརྙན་རིའི་བྲག་ཆ་ལྟ་བུར་བརྗོད་པར་ཤེས་ལ་རང་གི་སེམས་རྣམ་པར་དམྱིགས་པ་ཡང་སྒྲ་བརྙན་ལྟ་བུར་ཤེས་པས་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ཐམས་ཅད་ནི་རང་གི་སེམས་ཀྱི་བྱིན་གྱི་རླབས་ལས་འབྱུང་ངོ་། །ཞེས་བྱ་བར་རྗེས་སུ་རྟོགས་ཤིང་ཁོང་དུ་ཆུད་དོ། །སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་ཀྱང་རང་གི་སེམས་ཀྱི་བྱིན་གྱི་རླབས་སོ། །བྱང་ཆུབ་སེམས་དཔའི་སྤྱོད་པ་ཡང་རང་གི་སེམས་ཀྱི་བྱིན་གྱི་རླབས་སོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ཡང་རང་གི་སེམས་ཀྱི་བྱིན་གྱི་རླབས་སོ། །བྱང་ཆུབ་སེམས་དཔའི་སྨོན་ལམ་མངོན་པར་བསྒྲུབ་པ་ཡང་རང་གི་སེམས་ཀྱི་བྱིན་གྱི་རླབས་སོ། །ཐམས་ཅད་མཁྱེན་པ་ཉིད་ཀྱི་གྲོང་ཁྱེར་དུ་ཕྱིན་པར་བྱ་བ་ཡང་རང་གི་སེམས་ཀྱི་
བྱིན་གྱི་རླབས་སོ། །རྣམ་པར་ཐར་པ་བསམ་གྱིས་མི་ཁྱབ་པས་རྣམ་པར་རྩེ་བ་ཡང་རང་གི་སེམས་ཀྱི་བྱིན་གྱི་རླབས་སོ། །སངས་རྒྱས་ཀྱི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་ཡང་རང་གི་སེམས་ཀྱི་བྱིན་གྱི་རླབས་སོ། །ཆོས་ཀྱི་དབྱིངས་ཀུན་ནས་འདུས་པར་ཁྱུ་མཆོག་གི་མཐུ་དབྱུང་ཞིང་རྣམ་པར་འཕྲུལ་པ་ཡང་རང་གི་སེམས་ཀྱི་བྱིན་གྱི་རླབས་སོ། །བསྐལ་པ་ཐམས་ཅད་ཤིན་ཏུ་ཕྲ་བར་བསྡུ་བའི་ཡེ་ཤེས་ཀྱང་རང་གི་སེམས་ཀྱི་བྱིན་གྱི་རླབས་སོ། །ཞེས་བྱ་བར་ཁོང་དུ་ཆུད་ཅིང་རྗེས་སུ་རྟོགས་སོ། །རིགས་ཀྱི་བུ་དེ་ལ་ཁོ་བོ་འདི་སྙམ་དུ་སེམས་ཏེ། དགེ་བའི་རྩ་བ་ཐམས་ཅད་ཀྱིས་ནི་རང་གི་སེམས་ཉིད་ཉེ་བར་བརྟན་པར་བྱའོ། །ཆོས་ཀྱི་སྤྲིན་གྱིས་ནི་རང་གི་སེམས་ཉིད་ཡོངས་སུ་བརླན་པར་བྱའོ། །སྒྲིབ་པའི་ཆོས་རྣམས་ལས་ནི་རང་གི་སེམས་ཉིད་ཡོངས་སུ་སྦྱང་བར་བྱའོ། །བརྩོན་འགྲུས་ཀྱིས་ནི་རང་གི་སེམས་ཉིད་བརྟན་པར་བྱའོ། །བཟོད་པས་ནི་རང་གི་སེམས་ཉིད་མཉམ་པར་བྱའོ། །ཡེ་ཤེས་ཁོང་དུ་ཆུད་པར་བྱ་བ་ལ་ནི་རང་གི་སེམས་ཉིད་གཞོལ་བར་བྱའོ། །ཤེས་རབ་ཀྱིས་ནི་རང་གི་སེམས་ཉིད་ཡོངས་སུ་སྦྱང་བར་བྱའོ། །དབང་རྣམས་ལ་ནི་རང་གི་སེམས་ཉིད་མངོན་པར་བསྒྲུབ་པར་བྱའོ། །སངས་རྒྱས་དང་མཉམ་པ་ཉིད་ལ་ནི་རང་གི་སེམས་ཉིད་རྒྱས་པར་བྱའོ། །དེ་བཞིན་གཤེགས་པའི་སྟོབས་བཅུས་ནི་རང་གི་སེམས་ཉིད་སྣང་བར་བྱའོ་སྙམ་མོ། །རིགས་ཀྱི་བུ་ཁོ་བོ་ནི་དེ་བཞིན་གཤེགས་པའི་རྣམ་པར་ཐར་པ་ཐོགས་པ་མེད་པའི་རྒྱན་འདི་ཤེས་ཏེ། བླངས་ཤིང་ཡོངས་སུ་འཛིན་པར་ཟད་ན། ཁོ་བོས་བྱང་ཆུབ་སེམས་དཔའ་ཆགས་པ་མེད་པའི་སེམས་དང་ལྡན་པ་ཆགས་པ་མེད་པར་རྣམ་པར་སྤྱོད་པའི་སྤྱོད་ཡུལ་དང་ལྡན་པ། ད་ལྟར་བྱུང་བའི་སངས་རྒྱས་ཐམས་ཅད་མངོན་སུམ་དུ་བཞུགས་པའི་ཏིང་ངེ་འཛིན་རབ་ཏུ་ཐོབ་པ། མྱ་ངན་ལས་འདའ་བ་མྱེད་པའི་མཐའ་ལ་གནས་པའི་རྫོགས་པའི་
བྱང་ཆུབ་ཀྱི་སྒོའི་ཏིང་ངེ་འཛིན་རབ་ཏུ་ཐོབ་པ། དུས་གསུམ་མཉམ་པ་ཉིད་དུ་གྱུར་པ། གཞི་ཀུན་ནས་ཕྱེད་པའི་ཏིང་ངེ་འཛིན་གྱི་སྤྱོད་ཡུལ་གྱི་ཚུལ་ཤེས་པ། སངས་རྒྱས་ཀྱི་ཞིང་ཐམས་ཅད་དུ་ལུས་རྣམ་པར་བཀྲམ་པ། སངས་རྒྱས་ཀྱི་ཡུལ་ཐ་མྱི་དད་པ་ལ་རྣམ་པར་སྤྱོད་པ། ཕྱོགས་ཐམས་ཅད་དུ་མངོན་པར་ཕྱོགས་པའི་སྤྱོད་ཡུལ་དང་ལྡན་པ། ཕྱིན་ཕྱོགས་མེད་པའི་ཡེ་ཤེས་ཀྱི་དཀྱིལ་འཁོར་གྱིས་རྣམ་པར་ལྟ་བ་དེ་དག་གི་ལུས་ལ་འཇིག་རྟེན་གྱི་ཁམས་ཐམས་ཅད་འཇིག་ཅིང་འདུ་བར་སྣང་ཡང་དེ་དག་ལ་བདག་དང་འཇིག་རྟེན་གྱི་ཁམས་སུ་གཉིས་ཀྱི་འདུ་ཤེས་མེད་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་འཛམ་བུ་གླིང་གི་མགོ་འགེབས་པས་རྒྱས་པར་འགེངས་པ་ཞེས་བྱ་བ་ཡོད་དེ། དེ་ན་དགེ་སློང་རྒྱ་མཚོའི་རྒྱལ་མཚན་ཅེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཚོང་དཔོན་བཏང་བརྗོད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཚོང་དཔོན་བཏང་བརྗོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། ཚོང་དཔོན་བཏང་བརྗོད་ཀྱི་ཡོན་ཏན་གྲངས་མེད་པ་ལ་སྙན་པར་བརྗོད་དེ། བརྟག་པ་དང་། མོས་པར་བྱ་བ་དང་། མི་བཏང་བར་བྱ་བ་སེམས་ཤིང་ངུ་སྟེ་སྨྲེ་སྔགས་བཏོན་ནས། དགེ་བའི་བཤེས་གཉེན་སྡུག་པར་སེམས་ཤིང་དགེ་བའི་བཤེས་གཉེན་གྱི་རྗེས་སུ་འབྲང་བ་དང་། དགེ་བའི་བཤེས་གཉེན་ལ་བསྙེན་བཀུར་བར་མོས་པ་དང་། དགེ་བའི་བཤེས་གཉེན་གྱིས་བསྒོ་བ་དང་། མྱི་འགལ་བར་བྱེད་པ་དང་ཐམས་ཅད་མཁྱེན་པ་ཉིད་དགེ་བའི་བཤེས་གཉེན་ལ་རག་ལུས་པར་རྗེས་སུ་བལྟ་བ་དང་། དགེ་བའི་བཤེས་གཉེན་ལ་རྗེས་སུ་
བསམ་པ་དང་། དགེ་བའི་བཤེས་གཉེན་ལ་གཡོ་སྒྱུ་མེད་པར་སྤྱོད་པ་དང་། དགེ་བའི་བཤེས་གཉེན་གྱི་སེམས་ཀྱི་དབང་དུ་འགྲོ་བར་བྱ་བ་དང་ལྡན་པས་དགེ་བའི་བཤེས་གཉེན་རྣམས་གནོད་པ་ཐམས་ཅད་ཡོངས་སུ་སྤོང་བར་བྱེད་པས་མ་ཙམ་དུ་སེམས། དགེ་བའི་རྩ་བ་ཡོངས་སུ་བསྐྱེད་པས་ཕ་ཙམ་དུ་སེམས་ཤིང་ཚོང་དཔོན་བཏང་བརྗོད་ཀྱི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཚོང་དཔོན་བཏང་བརྗོད་ཀྱིས་བསྟན་པ་དེ་ལ་རྗེས་སུ་སེམས་ཤིང་། ཚོང་དཔོན་བཏང་བརྗོད་ཀྱི་གདམས་ངག་ལ་ནན་ཏན་དུ་བྱ་བ་དང་། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་རྗེས་སུ་འབྲང་བར་བྱ་བ་དང་། བྱང་ཆུབ་སེམས་དཔའི་ཡེ་ཤེས་སྣང་བ་བསམ་གྱིས་མི་ཁྱབ་པ་རྗེས་སུ་དྲན་པར་བྱ་བ་དང་། ཆོས་ཀྱི་དབྱིངས་ལ་འཇུག་ཅིང་འབབ་པ་བསམ་གྱིས་མི་ཁྱབ་པ་ཁོང་དུ་ཆུད་པར་བྱ་བ་དང་། བྱང་ཆུབ་སེམས་དཔའ་རྣམས་ཀྱི་ཡོངས་སུ་འདུ་བར་བྱ་བའི་ཚུལ་བསམ་གྱིས་མི་ཁྱབ་པ་ལ་འཇུག་པར་བྱ་བ་དང་། དེ་བཞིན་གཤེགས་པའི་རྣམ་པར་འཕྲུལ་པ་བསམ་གྱིས་མི་ཁྱབ་པའི་རྗེས་སུ་བལྟ་བར་བྱ་བ་དང་། སངས་རྒྱས་ཀྱི་ཞིང་ཡོངས་སུ་བསྡུ་བ་བསམ་གྱིས་མི་ཁྱབ་པ་ལ་མོས་པར་བྱ་བ་དང་། སངས་རྒྱས་ཀྱི་བྱིན་གྱི་རླབས་ཀྱི་རྒྱན་རྗེས་སུ་སྦྱང་བ་དང་། བྱང་ཆུབ་སེམས་དཔའི་ཏིང་ངེ་འཛིན་དང་། རྣམ་པར་ཐར་པའི་རྣམ་པར་དགོད་པ་དང་། ཁྱུ་མཆོག་གི་མཐུ་ཕྱུང་བ་བསམ་གྱིས་མྱི་ཁྱབ་པ་ལ་ཡོངས་སུ་བརྟག་པ་དང་། འཇིག་རྟེན་གྱི་ཁམས་ཐ་དད་པ་ལ་སྒྲིབ་པ་མེད་པ་བསམ་གྱིས་མི་ཁྱབ་པ་ལ་འཇུག་པ་དང་། བྱང་ཆུབ་སེམས་དཔའི་ལས་ལ་བསམ་པ་ཤིན་ཏུ་བརྟན་པ་དེ་ལ་ནན་དུ་བྱ་བ་དང་། བྱང་ཆུབ་སེམས་དཔའི་ལས་དང་། སྨོན་ལམ་གྱི་རྒྱུད་བསམ་གྱིས་མི་ཁྱབ་པ་དེའི་རྗེས་སུ་སྤྱོད་ཅིང་མཐར་གྱིས་འཛམ་བུ་གླིང་གི་མགོ་འགེབས་པས་རྒྱས་པར་འགེངས་པ་ཞེས་བྱ་བ་གང་ན་བ་དེར་ཕྱིན་ནས།
དགེ་སློང་རྒྱ་མཚོའི་རྒྱལ་མཚན་ཚོལ་ཚོལ་བ་ལས། འཆག་པའི་གནས་ཤིག་གི་འཆག་པའི་མཐར་འདུག་སྟེ། ཏིང་ངེ་འཛིན་ལ་མཉམ་པར་བཞག་ནས་དབུགས་ཕྱི་ནང་དུ་རྒྱུ་བ་མེད་ཅིང་མྱི་གཡོ་ལ་བྱེད་པ་མེད་ཅིང་ལུས་དྲང་པོར་བསྲང་སྟེ། དྲན་པ་མངོན་དུ་བྱས་ནས་ཏིང་ངེ་འཛིན་གྱི་རྣམ་པར་འཕྲུལ་པ་བསམ་གྱིས་མྱི་ཁྱབ་པར་རྣམ་པར་འཕྲུལ་ཞིང་གཡས་གཡོན་དང་། སྟེང་ལོགས་སུ་ལུས་མཐའ་ཡས་ལ་ཚད་མེད་ཅིང་བསམ་གྱིས་མི་ཁྱབ་པ་སྤྱི་གཙུག་བལྟར་མི་མཐོང་བ། ཁ་དོག་དུ་མའི་ལུས་དང་ལྡན་པ་སེམས་ཀྱི་སྐད་ཅིག་རེ་རེ་ལ་ཁ་དོག་རྣམ་པ་ཐ་དད་པ་ཚད་མེད་པ་ཡོངས་སུ་སྟོན་པ་དེ། དེ་དེ་ལྟར་མཉམ་པར་བཞག་ཅིང་ཟབ་ལ་ཞི་སྟེ། གཡོ་བ་མེད་ཅིང་དམིགས་པ་མེད་ལ་དགའ་བས་ལུས་མཐོ་བར་གྱུར་པ་དེའི་བ་སྤུའི་སྒོ་ཐམས་ཅད་ནས་བྱང་ཆུབ་སེམས་དཔའི་རྣམ་པར་ཐར་པས་རྣམ་པར་འཕྲུལ་པ་བསམ་གྱིས་མི་ཁྱབ་པ་རབ་ཏུ་འགྱེད་པར་བྱེད་ཅིང་འདུག་པ་མཐོང་ངོ་། །རྣམ་པར་ཐར་པས་རྣམ་པར་འཕྲུལ་པ་དེའི་མཐུས་སེམས་ཀྱི་སྐད་ཅིག་རེ་རེ་ལ་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་མཆོད་པ་སྦྱར་བ་དང་། སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བ་དང་། སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་རྣམ་པར་བཟློག་པ་དང་། ངན་སོང་གི་ལམ་ཐམས་ཅད་ཡོངས་སུ་གཅད་པ་དང་། སེམས་ཅན་ཐམས་ཅད་ཀྱི་བདེ་བའི་ལམ་གྱི་སྒོ་དབྱེ་བ་དང་། སེམས་ཅན་ཐམས་ཅད་ཀྱི་ཉོན་མོངས་པའི་གདུང་བ་རབ་ཏུ་ཞི་བར་བྱ་བ་དང་། སེམས་ཅན་ཐམས་ཅད་ཀྱི་མི་ཤེས་པའི་སྒྲིབ་པ་རྣམ་པར་གཏོར་བ་དང་སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ལ་དགོད་པའི་ཕྱིར་རྣམ་པར་འཕྲུལ་པའི་བྱེ་བྲག་རྣམ་པ་སྣ་ཚོགས་མཐའ་ཡས་པས་ཆོས་ཀྱི་དབྱིངས་ཐམས་ཅད་རྒྱས་པར་འགེངས་ཤིང་དེའི་རྐང་པའི་མཐིལ་གཉིས་ནས། ཚོང་དཔོན་གྱི་ཚོགས་བཀུར་
སྟི་དང་། རིམ་གྲོ་སྣ་ཚོགས་བྱེད་པ་འཇིག་རྟེན་གྱི་ཁམས་ཐམས་ཅད་དུ་གཏོགས་པའི་ཚོང་དཔོན་དང་འདྲ་བའི་གཟུགས་དང་ལྡན་པ་ལྷག་པའི་ཡུལ་ལ་སྤྱོད་པ། རྒྱན་སྣ་ཚོགས་ཀྱིས་ལུས་ཤིན་ཏུ་ཀླུབས་པ། ཐོར་ཚུགས་དང་གཙུག་གི་རིན་པོ་ཆེ་དང་། ཅོད་པན་སྣ་ཚོགས་ཐོགས་པ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱིས་པ་བྱེ་བ་འཕྱེས་པའི་འཁོར་དང་ལྡན་པ་བྱུང་བ་མཐོང་ངོ་། །བྲམ་ཟེ་དང་ཁྱིམ་བདག་མང་པོ་བཟའ་བཏུང་རྣམ་པ་མང་པོ་དང་། རོའི་ཡན་ལག་སྣ་ཚོགས་སུ་སྦྱར་བ་ཐམས་ཅད་དང་། རྒྱན་ཐམས་ཅད་དང་། གོས་ཐམས་ཅད་དང་། མེ་ཏོག་ཐམས་ཅད་དང་། ཕྲེང་བ་ཐམས་ཅད་དང་། སྤོས་ཐམས་ཅད་དང་། བྱུག་པ་ཐམས་ཅད་དང་། འདོད་པའི་ཡོ་བྱད་ཐམས་ཅད་དང་། རིན་པོ་ཆེ་ཐམས་ཅད་དང་། གནས་ཐམས་ཅད་དང་། སྣོད་རྣམ་པ་སྣ་ཚོགས་ཐམས་ཅད་དང་། ཡོ་བྱད་རྣམ་པ་སྣ་ཚོགས་ཐམས་ཅད་ཀྱིས་སེམས་ཅན་དབུལ་པོ་རྣམས་ཡོངས་སུ་སྡུད་ཅིང་། འགྲོ་བ་སྡུག་བསྔལ་བ་རྣམས་དབུགས་དབྱུང་བ་དང་། སེམས་ཅན་གྱི་སེམས་ཚིམ་པར་བྱ་བ་དང་། སེམས་ཅན་གྱི་བསམ་པ་རྣམ་པར་དག་པར་བྱ་བ་དང་། སེམས་ཅན་རྣམས་བྱང་ཆུབ་ཏུ་ཡོངས་སུ་སྨིན་པར་བྱེད་ཅིང་ཕྱོགས་བཅུ་བཀང་སྟེ། འདོང་བ་མཐོང་ངོ་། །པུས་མོའི་ལྷ་ང་གཉིས་ནས་རྒྱལ་རིགས་མཁས་པའི་གཟུགས་དང་། བྲམ་ཟེ་མཁས་པའི་གཟུགས་དང་། འཇིག་རྟེན་ན་མཁས་པའི་གཟུགས་དང་། བཟོ་སྣ་ཚོགས་ལ་མཁས་པའི་གཟུགས་དང་། མིའི་འགྲོ་བའི་རྒྱུད་ན་མཁས་པའི་གཟུགས་དང་། འཇིག་རྟེན་པ་དང་། འཇིག་རྟེན་ལས་འདས་པའི་ལས་ཀྱི་ཚུལ་དང་། རྒྱུས་ལ་གསལ་ཞིང་མཁས་པའི་གཟུགས་དང་། འཇིག་རྟེན་གྱི་སློབ་དཔོན་དུ་བྱ་བར་མཁས་པའི་གཟུགས་ཆ་བྱད་རྣམ་པ་དུ་མ་དང་ལྡན་པ། དབྱིབས་དང་རྒྱན་རྣམ་པ་དུ་མ་དང་ལྡན་པ། ཡིད་དུ་འོང་བའི་ཚིག་མང་པོ་བརྗོད་པས། ཡིད་མི་བདེ་བའི་སེམས་ཅན་རབ་ཏུ་
དགའ་བར་བྱེད་ཅིང་ཆོས་ཀྱི་ནོར་གྱིས་དབུལ་བའི་སེམས་ཅན་རྣམས་ལ་ཕན་གདགས་པ་དང་། སྡུག་བསྔལ་བའི་སེམས་ཅན་རྣམས་བདེ་བར་བྱ་བ་དང་། ལོག་པར་ལྟུང་བའི་སེམས་ཅན་རྣམས་མངོན་པར་གདོན་པ་དང་། ཐེག་པའི་གྲུ་ལ་ཉམ་ཉེས་སུ་གྱུར་པའི་སེམས་ཅན་རྣམས་དབུགས་དབྱུང་བ་དང་། འཇིགས་པའི་སེམས་ཅན་རྣམས་ཡོངས་སུ་བསྐྱབ་པ་དང་། དགེ་བའི་རྩ་བའི་སྒྲ་ཀུན་ཏུ་གྲགས་པར་བྱ་བ་དང་། སྡིག་པ་ལས་བཟློག་པའི་སྒྲ་ཡོངས་སུ་བསྒྲག་པ་དང་། དགེ་བའི་ཆོས་ཡང་དག་པར་བླང་བ་ལ་སེམས་ཅན་གཟུང་བ་དང་། དོན་སྤྱོད་པ་ལ་སེམས་ཅན་དགོད་པ་དང་། དགའ་བའི་ཤུགས་ཡོངས་སུ་བསྐྱེད་པ་དང་། སྙན་པར་སྨྲ་བའི་བསྡུ་བའི་དངོས་པོ་ཡོངས་སུ་བརྗོད་པ་དང་། འཇིག་རྟེན་ལ་དོན་མཐུན་པར་བསྒྲུབ་པ་སྟོན་པར་བྱེད་ཅིང་ཕྱོགས་བཅུ་རྒྱས་པར་བཀང་སྟེ་འདོང་བ་མཐོང་ངོ་། །ལྟེ་བའི་དཀྱིལ་འཁོར་ནས་དྲང་སྲོང་མང་པོ་འགྲོ་བ་ཐམས་ཅད་ཀྱི་ལུས་ཀྱི་དབྱིབས་སུ་འཁོད་པ། པགས་པ་དང་ཤུན་པའི་གོས་གྱོན་པ་རིལ་བ་ཐོགས་པ། གཟུགས་དང་ཆ་བྱད་དང་དབྱིབས་སྣ་ཚོགས་ཅན་སྤྱོད་ལམ་རབ་ཏུ་ཞི་བ་དག་བྱུང་ནས། སྟེང་གི་བར་སྣང་ལས་སངས་རྒྱས་ཀྱི་ཡོན་ཏན་བརྗོད་པ་བྱེད་ཅིང་། ཆོས་ཀྱི་སྒྲ་ཡོངས་སུ་བསྒྲག་པ་དང་། སངས་རྒྱས་ཀྱི་སྒྲ་བརྗོད་པ་དང་། བྱང་ཆུབ་སེམས་དཔའི་དགེ་འདུན་ཡོངས་སུ་བསྟན་པ་དང་། ཚངས་པའི་སྤྱོད་པ་ཡོངས་སུ་བརྗོད་པ་དང་། དབང་པོ་དབེན་པ་ལ་སེམས་ཅན་དགོད་པ་དང་། རང་བཞིན་མེད་པའི་དོན་རབ་ཏུ་བརྟག་པ་དང་། ཡེ་ཤེས་ཀྱི་དོན་ལ་འཇིག་རྟེན་རབ་ཏུ་དགོད་པ་དང་། འཇིག་རྟེན་གྱི་གཙུག་ལག་གི་རྣམ་པ་ཡོངས་སུ་བརྗོད་པ་དང་། ཐམས་ཅད་མཁྱེན་པའི་ཡེ་ཤེས་ཀྱིས་འབྱུང་བའི་ལམ་གྱི་ཚུལ་རབ་ཏུ་བསྟན་པ་དང་། མཐར་གྱིས་བྱ་བའི་ལས་ལ་སེམས་ཅན་རབ་ཏུ་དགོད་པ་བྱེད་ཅིང་། ཕྱོགས་བཅུ་བཀང་སྟེ་འདོང་བ་
མཐོང་ངོ་། །རྩི་བ་ལོགས་གཉིས་ནས། ཀླུའི་བུ་མོ་འཇིག་རྟེན་རྒྱུ་བ་ཐམས་ཅད་ཀྱི་གྲངས་དང་མཉམ་པ། ལུས་ཀྱི་དབྱིབས་བསམ་གྱིས་མི་ཁྱབ་པ་དུ་མ་དང་ལྡན་པ་བྱུང་སྟེ་ཀླུའི་རྣམ་པར་འཕྲུལ་པ་བསམ་གྱིས་མི་ཁྱབ་པ་ཡོངས་སུ་བསྟན་པ་དང་། སྤོས་ཀྱི་སྤྲིན་གྱི་རྒྱན་བསམ་གྱིས་མི་ཁྱབ་པ་ནམ་མཁའི་དབྱིངས་ལ་བྱིན་གྱིས་བརླབ་པ་དང་། མེ་ཏོག་གི་སྤྲིན་གྱི་རྒྱན་བསམ་གྱིས་མི་ཁྱབ་པས་ནམ་མཁའི་དབྱིངས་ཐམས་ཅད་བརྒྱན་པ་དང་། ཕྲེང་བའི་སྤྲིན་བསམ་གྱིས་མི་ཁྱབ་པའི་རྒྱན་གྱིས་ནམ་མཁའི་དབྱིངས་ཐམས་ཅད་རྣམ་པར་ཀླུབས་པ་དང་། རིན་པོ་ཆེའི་གདུགས་ཀྱི་སྤྲིན་བསམ་གྱིས་མི་ཁྱབ་པའི་རྒྱན་གྱིས། ཆོས་ཀྱི་དབྱིངས་ཐམས་ཅད་ཡོངས་སུ་ཁེབས་པར་བྱ་བ་དང་། རིན་པོ་ཆེའི་རྒྱལ་མཚན་གྱི་སྤྲིན་བསམ་གྱིས་མི་ཁྱབ་པའི་རྒྱན་དང་། རིན་པོ་ཆེའི་ལྷའི་བ་དན་གྱི་སྤྲིན་བསམ་གྱིས་མི་ཁྱབ་པའི་རྒྱན་དང་། རིན་པོ་ཆེའི་ཕྱང་འཕྲུལ་སྣ་ཚོགས་ཀྱི་སྤྲིན་དང་། ཆར་བསམ་གྱིས་མི་ཁྱབ་པའི་རྒྱན་དང་། ནོར་བུ་རིན་པོ་ཆེ་དམ་པའི་སྤྲིན་གྱི་ཆར་འབབ་པ་བསམ་གྱིས་མི་ཁྱབ་པའི་རྒྱན་དང་། རིན་པོ་ཆེའི་སེ་མོ་དོ་སྣ་ཚོགས་དང་། མེ་ཏོག་གི་སྤྲིན་གྱི་ཆར་བསམ་གྱིས་མི་ཁྱབ་པའི་བརྒྱན་དང་། རིན་པོ་ཆེའི་ཁྲི་ལ་སྐྱིལ་མོ་ཀྲུང་དུ་འཁོད་པའི་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཀྱི་སྤྲིན་གྱི་ཆར་བསམ་གྱིས་མི་ཁྱབ་པ་འབེབས་པའི་རྒྱན་དང་། ལྷ་རྫས་ཀྱི་རིན་པོ་ཆེའི་རྒྱན་སྣ་ཚོགས་དང་ལྡན་པའི་ལྷའི་བུ་མོ་མང་པོ་ཆོས་ཀྱི་གླུ་སྙན་པའི་སྒྲ་དབྱངས་ཀྱི་སྤྲིན་གྱི་ཆར་འབེབས་པ་བསམ་གྱིས་མི་ཁྱབ་པ་དང་། རིན་པོ་ཆེའི་པད་མོ་ཟེ་བ་མཐོ་བ་མུ་ཏིག་གི་དྲ་བས་བརྒྱན་པ། རིན་པོ་ཆེའི་རྒྱལ་པོ་ཐམས་ཅད་ཀྱི་འབྲུའི་སྤྲིན་གྱི་ཆར་རྣམ་པར་འཐོར་བ་བསམ་གྱིས་མི་ཁྱབ་པའི་རྒྱན་དང་། རིན་པོ་ཆེའི་ཅོད་པན་གྱི་སྤྲིན་ནོར་བུ་རིན་པོ་ཆེ་ཐམས་ཅད་ཀྱིས་རབ་ཏུ་བརྒྱན་པ། འོད་ཟེར་གྱི་སྤྲིན་མཐའ་ཡས་པའི་ཆར་འབེབས་པ་བསམ་གྱིས་མི་ཁྱབ་པའི་རྒྱན་དང་།
ལྷའི་ལུས་ཀྱི་སྤྲིན་གྱི་མེ་ཏོག་དང་། ཕྲེང་བ་དང་། གདུགས་དང་། རྒྱལ་མཚན་དང་། ལྷའི་བ་དན་བསམ་གྱིས་མི་ཁྱབ་པའི་རྒྱན་དང་། ལྷའི་བུ་མོ་མང་པོའི་ལུས་ཀྱི་སྤྲིན་ཐལ་མོ་སྦྱར་ཏེ། གསེར་གྱི་མེ་ཏོག་སྙིམ་པས་འདོར་བ། དེ་བཞིན་གཤེགས་པ་ལ་ཡོན་ཏན་དང་། ལེགས་པ་ཐམས་ཅད་དུ་བསྟོད་པའི་སྤྲིན་གྱི་འབྲུག་སྒྲ་འབྱིན་ཅིང་ཆར་འབེབས་པ། བསམ་གྱིས་མི་ཁྱབ་པའི་རྒྱན་ནམ་མཁའི་དབྱིངས་ལ་བྱིན་གྱིས་རློབ་ཅིང་། སྤོས་ཀྱི་ཕུང་པོའི་སྤྲིན་རིན་པོ་ཆེ་ཐམས་ཅད་ཀྱི་ཁ་དོག་ཏུ་འདུག་པ་དང་། བདུག་སྤོས་ཀྱི་ན་བུན་དང་སྤྲིན་ཤིན་ཏུ་རྒྱ་ཆེ་བས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་མངོན་པར་ཁེབས་པར་བྱ་བ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རབ་ཏུ་བརྒྱན་པ་དང་། སེམས་ཅན་ཐམས་ཅད་རབ་ཏུ་དགའ་བར་བྱ་བ་དང་། སངས་རྒྱས་ཐམས་ཅད་མཆོད་པས་སྐད་ཅིག་སྐད་ཅིག་ཏུ་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །མཐོང་ཀའི་དཔལ་གྱི་བེའུ་ནས་ལྷ་མ་ཡིན་གྱི་དབང་པོ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། ལྷ་མ་ཡིན་གྱི་སྒྱུས་རྣམ་པར་འཕྲུལ་པ་བསམ་གྱིས་མི་ཁྱབ་པ་རབ་ཏུ་སྟོན་ཅིང་ཆུ་འཛིན་ཆེན་པོ་ཡོངས་སུ་བསྐྱམ་པ་དང་། འཇིག་རྟེན་གྱི་ཁམས་བརྒྱ་སྟོང་རབ་ཏུ་བསྐྱོད་པ་དང་། རིའི་རྒྱལ་པོ་ཆེན་པོ་ཐམས་ཅད་འཐབ་པར་བྱ་བ་དང་། ལྷའི་གནས་ཐམས་ཅད་ཡོངས་སུ་བསྐྱོད་པ་དང་། བདུད་ཀྱི་དཀྱིལ་འཁོར་ཐམས་ཅད་ཟིལ་གྱིས་གནན་པ་དང་། བདུད་ཀྱི་སྡེ་ཐམས་ཅད་རབ་ཏུ་གདུལ་བ་དང་། ང་རྒྱལ་དང་རློམ་པ་དང་དྲེགས་པ་ཐམས་ཅད་རབ་ཏུ་གཞོམ་པ་དང་། གནོད་པར་སེམས་པའི་སེམས་བཟློག་ཅིང་དགའ་བར་བྱ་བ་དང་། འཐོ་འཚམ་པའི་སེམས་ཕྱིར་བཟློག་པར་བྱ་བ་དང་། སེམས་ཅན་རྣམས་ཀྱི་མི་དགེ་བའི་ཆོས་རབ་ཏུ་ཞི་བར་བྱ་བ་དང་། ཉོན་མོངས་པའི་རི་རྣམ་པར་གཏོར་བ་དང་། ཉོན་མོངས་པའི་ཐབ་མོ་ཤིན་ཏུ་ཞི་བར་བྱ་བ་
དང་། ལྷ་མ་ཡིན་གྱི་སྒྱུས་རྣམ་པར་འཕྲུལ་པ་དང་། རྣམ་པར་རྩེ་བ་སྣ་ཚོགས་ཀྱིས་སེམས་ཅན་རྣམས་སྐྱོ་བར་བྱ་བ་དང་། སྡིག་པ་ལས་གྱེན་དུ་བསྐྱོད་པ་དང་། འཁོར་བས་འཇིགས་པར་བྱ་བ་དང་། སྲིད་པའི་ལམ་གྱི་རྒྱུད་ཐམས་ཅད་ནས་གྱེན་དུ་བསྐྱོད་དེ་གནས་མེད་པ་ལ་རབ་ཏུ་གནས་པར་བྱ་བ་དང་། བྱང་ཆུབ་ཀྱི་སེམས་ལ་སེམས་ཅན་རྣམས་རབ་ཏུ་དགོད་པ་དང་། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་རྣམ་པར་དག་པར་བྱ་བ་དང་། བྱང་ཆུབ་སེམས་དཔའ་རྣམས་ཕ་རོལ་ཏུ་ཕྱིན་པ་ལ་རབ་ཏུ་དགོད་པར་བྱ་བ་དང་། བྱང་ཆུབ་སེམས་དཔའི་ས་ལ་རབ་ཏུ་གཟུང་བ་དང་། བྱང་ཆུབ་སེམས་དཔའ་རྣམས་ཀྱིས་སངས་རྒྱས་ཀྱི་ཆོས་ཀྱི་ཚུལ་སྣང་བ་ཡོངས་སུ་བསྐྱེད་པ་དང་། ཆོས་ཀྱི་ཚུལ་རྣམ་པར་དགོད་པ་སྣ་ཚོགས་ཀྱིས་སེམས་ཀྱི་སྐད་ཅིག་རེ་རེ་ཞིང་ཆོས་ཀྱི་དབྱིངས་རྒྱས་པར་འགེངས་པར་བྱེད་པ། ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །རྒྱབ་ཀྱི་གཞུང་ནས་ཉན་ཐོས་དང་། རང་སངས་རྒྱས་མང་པོ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས་ཉན་ཐོས་དང་། རང་སངས་རྒྱས་ཀྱིས་འདུལ་བའི་སེམས་ཅན་བདག་ཏུ་མངོན་པར་ཞེན་པ་རྣམས་ལ་བདག་མེད་པ་དང་། སེམས་ཅན་མེད་པ་ཡོངས་སུ་བརྗོད་པ་བྱེད་ཅིང་། རྟག་པར་མངོན་པར་ཞེན་པ་རྣམས་ལ་འདུ་བྱེད་ཐམས་ཅད་མྱི་རྟག་པར་ཡོངས་སུ་བསྟན་པ་དང་། འདོད་ཆགས་ཀྱི་སྤྱོད་པ་ཅན་རྣམས་ལ་མྱི་སྡུག་པ་དང་། ཞེ་སྡང་གི་སྤྱོད་པ་ཅན་རྣམས་ལ་བྱམས་པ་དང་། གཏི་མུག་གི་སྤྱོད་པ་ཅན་རྣམས་ལ་རྐྱེན་ལས་བྱུང་བའི་རྟེན་ཅིང་འབྲེལ་བར་འབྱུང་བ་བརྗོད་པ་དང་། ཆ་མཉམ་པའི་སྤྱོད་པ་ཅན་རྣམས་ལ་ཡེ་ཤེས་ཀྱི་ཡུལ་དང་ལྡན་པའི་ཆོས་ཀྱི་ཚུལ་མངོན་པར་བསྟན་པ་དང་། ཡུལ་ལ་མངོན་པར་དགའ་བ་རྣམས་ལ་གནས་མེད་པ་རབ་ཏུ་བརྗོད་པ་དང་། ཞི་བ་ལ་གནས་སུ་སེམས་པ་རྣམས་ལ་སྨོན་ལམ་གྱི་ཁྱད་པར་གྱིས་སྤྲོ་བ་བསྐྱེད་པ་དང་། ཕྱོགས་ཀྱི་རྒྱུད་དང་སྒོ་ཐམས་
ཅད་དུ་ཆོས་ཀྱི་ཚུལ་རྒྱ་མཚོའི་རྒྱུད་དང་། སྒོ་ཐམས་ཅད་སེམས་ཅན་ཐམས་ཅད་ཀྱི་དོན་དུ་བརྗོད་པར་བྱེད་ཅིང་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །ཕྲག་པའི་ལྷུན་གཉིས་ལས་གནོད་སྦྱིན་དང་། སྲིན་པོའི་དབང་པོ་དབྱིབས་སྣ་ཚོགས་དང་ལྡན་ཞིང་ལུས་མི་སྡུག་པ་ཁ་དོག་དང་ཆུ་ཞེང་སྣ་ཚོགས་ཅན་སྤྱོད་ལམ་གྱི་རྣམ་པ་སྣ་ཚོགས་དང་ལྡན་པ། བཞོན་པ་སྣ་ཚོགས་ལ་ཞོན་པ། འཁོར་སྣ་ཚོགས་ཀྱིས་ཡོངས་སུ་བསྐོར་བ། སེམས་ཅན་གྱི་ཁམས་ཡོངས་སུ་བསྐྱང་བ་ལ་བརྩོན་པ། འོད་སྣ་ཚོགས་ཀྱིས་སྣང་བར་བྱ་བ་ལ་བརྩོན་པ། དབྱངས་སྣ་ཚོགས་རབ་ཏུ་སྒྲོག་པ། སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས་ཐབས་མངོན་པར་བསྒྲུབ་པ་སྣ་ཚོགས་མ་འདྲེས་པས་ཕྱོགས་དང་ཕྱོགས་མཚམས་ཀུན་གྱི་ནམ་མཁའ་རྒྱས་པར་འགེངས་ཤིང་དགེ་བའི་སྤྱོད་པ་ཐམས་ཅད་ཡོངས་སུ་བསྲུང་བ་དང་། འཕགས་པའི་དཀྱིལ་འཁོར་ཐམས་ཅད་ཡོངས་སུ་བསྲུང་བ་དང་། བྱང་ཆུབ་སེམས་དཔའ་ཐམས་ཅད་ཡོངས་སུ་གཟུང་བ་དང་། ལག་ན་རྡོ་རྗེའི་ལས་ཀྱིས་ཡང་དག་པར་སོང་བ་དང་། ཡང་དག་པར་ཞུགས་པ་ཐམས་ཅད་ཡོངས་སུ་བསྲུང་བ་དང་། སངས་རྒྱས་ཐམས་ཅད་ལ་མཆོད་པ་དང་རིམ་གྲོ་བྱ་བ་དང་། སེམས་ཅན་ལོག་པར་ལྟུང་བ་རྣམས་ཀྱི་ངན་སོང་གི་ལམ་གྱི་རྒྱུད་ཐམས་ཅད་རྣམ་པར་བཟློག་པ་དང་། འཇིག་རྟེན་ཐམས་ཅད་ཀྱི་ནད་དང་། གནོད་པ་དང་འཇིགས་པ་ཐམས་ཅད་ཞི་བར་བྱེད་པའི་དོན་དུ་བརྩོན་པ། སེམས་ཅན་གྱི་དོན་བྱ་བས་འཇིག་རྟེན་ཡོངས་སུ་བསྐྱང་བ་ལ་བརྩོན་པ་རྣམས་བསོད་ནམས་དང་། ཡེ་ཤེས་ཀྱི་འཁོར་ལོ་ཡོངས་སུ་རྫོགས་པར་བྱ་བ་དང་། ཆོས་ཀྱི་འཁོར་ལོའི་རྗེས་སུ་འབྲང་བར་བྱ་བ་དང་། ཕས་ཀྱི་རྒོལ་བའི་འཁོར་ཚར་གཅོད་པར་བྱེད་ཅིང་། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་བྱེད་པ། ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །མདུན་གྱི་ལྟོ་ནས་མྱིའམ་
ཅིའི་དབང་པོ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་མིའམ་ཅིའི་དབང་པོའི་བུ་མོའི་འཁོར་བརྒྱ་སྟོང་གྲངས་མེད་པ་ཅན་དང་། དྲི་ཟའི་དབང་པོ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད། དྲི་ཟའི་དབང་པོའི་བུ་མོའི་འཁོར་བརྒྱ་སྟོང་གྲངས་མེད་པ་ཅན་དག་བྱུང་ནས། ལྷའི་རོལ་མོ་བརྒྱ་སྟོང་གྲངས་མེད་པའི་སྒྲ་སྙན་པ་དང་། གླུའི་དབྱངས་ཀྱིས་ཆོས་ཀྱི་རང་བཞིན་དང་ལྡན་པའི་སངས་རྒྱས་ཀྱི་བསྟོད་པ་བརྗོད་པ་བྱེད་ཅིང་། བྱང་ཆུབ་ཀྱི་སེམས་ཡོངས་སུ་བསྔགས་པ་དང་། བྱང་ཆུབ་སེམས་དཔའི་སྤྱོད་པ་ཡོངས་སུ་བརྗོད་པ་དང་། མངོན་པར་རྫོགས་པར་འཚང་རྒྱ་བའི་སྒོ་ཐམས་ཅད་ལ་མངོན་པར་བསྟོད་པ་དང་། ཆོས་ཀྱི་འཁོར་ལོའི་སྒོ་ཐམས་ཅད་དུ་འཇུག་པ་དང་། རྣམ་པར་འཕྲུལ་པའི་སྒོ་ཐམས་ཅད་ལ་མངོན་པར་སྤྲོ་བར་བྱ་བ་དང་ཡོངས་སུ་མྱ་ངན་ལས་འདའ་བའི་སྒོ་ཐམས་ཅད་ཡོངས་སུ་བརྗོད་པ་དང་། སངས་རྒྱས་ཀྱིས་བསྟན་པའི་སྒོ་ཐམས་ཅད་ཡོངས་སུ་གཟུང་བ་དང་། སེམས་ཅན་གྱི་སྒོ་ཐམས་ཅད་རབ་ཏུ་དགའ་བར་བྱ་བ་དང་། སངས་རྒྱས་ཀྱི་ཞིང་གི་སྒོ་ཐམས་ཅད་ཡོངས་སུ་དག་པར་བྱ་བ་དང་། ཆོས་ཀྱི་སྒོ་ཐམས་ཅད་མངོན་པར་བསྟན་པར་བྱ་བ་དང་། སྒྲིབ་པའི་སྒོ་ཐམས་ཅད་རྣམ་པར་བཟློག་པར་བྱ་བ་དང་། དགེ་བའི་རྩ་བའི་སྒོ་ཐམས་ཅད་ཡོངས་སུ་བསྐྱེད་པ་བྱེད་ཅིང་། ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །ཁའི་སྒོ་ནས་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་བདུན་དང་ལྡན་ཞིང་སྟོབས་ཀྱི་ཡན་ལག་བཞིའི་ཚོགས་ཀྱི་འཁོར་དང་ལྡན་པ་བྱུང་ནས། སྦྱིན་པ་ཆེན་པོའི་འོད་ཟེར་གྱི་རྒྱན་རབ་ཏུ་འགྱེད་ཅིང་རིན་པོ་ཆེའི་འབྱུང་གནས་ཐམས་ཅད་ཡོངས་སུ་གཏང་བ་དང་། ནོར་བུ་རིན་པོ་ཆེའི་ཚོགས་ཐམས་ཅད་སྦྱིན་པ་དང་། དབུལ་པོ་རྣམས་ནོར་དང་ལྡན་པར་བྱ་བ་དང་། སྲོག་གཅོད་པ་ལས་འཇིག་རྟེན་རྣམ་པར་བཟློག་པ་དང་། བྱམས་པའི་སེམས་ལ་སེམས་ཅན་
རབ་ཏུ་དགོད་པ་དང་། མ་བྱིན་པར་ལེན་པ་དང་རབ་ཏུ་དབྲལ་བ་དང་། རྒྱན་གྱིས་ཤིན་ཏུ་བརྒྱན་པའི་བུ་མོ་བྱེ་བ་ཁྲག་ཁྲིག་བརྒྱ་སྟོང་ཡོངས་སུ་གཏང་བ་དང་། འདོད་པས་ལོག་པར་གཡེམ་པ་ལས་རྣམ་པར་བཟློག་པ་དང་། ཚངས་པའི་སྤྱོད་པ་ལ་རབ་ཏུ་དགོད་པ་དང་། བརྫུན་དུ་སྨྲ་བ་ལས་རྣམ་པར་བཟློག་པ་དང་། བསླུ་བ་མྱེད་པ་ལ་གཞོལ་བར་རབ་ཏུ་དགོད་པ་དང་། ཕྲ་མའི་ཚིག་ལས་རྣམ་པར་བཟློག་པ་དང་། གཞན་འདུམ་པར་བརྩོན་པའི་ཚིག་རབ་ཏུ་བརྗོད་པ་དང་། ཞེ་གཅོད་པའི་ཚིག་ལས་འཇིག་རྟེན་རྣམ་པར་བཟློག་པ་དང་། འཇམ་ཞིང་ཡིད་དུ་འོང་བའི་ཚིག་རབ་ཏུ་བརྗོད་པ་དང་། གནོད་པའི་ཆོས་དང་ལྡན་པའི་བྱུང་རྒྱལ་དུ་སྨྲ་བ་ལས་སེམས་ཅན་རྣམ་པར་བཟློག་པ་དང་། དོན་ཟབ་མོའི་ཚིག་རབ་ཏུ་དབྱེ་བ་གདོན་མི་ཟ་བ་ལ་ཡང་དག་པར་དགོད་པ་དང་། ངག་གི་ཉེས་པ་ཐམས་ཅད་ལས་འཇིག་རྟེན་རྣམ་པར་བཟློག་པ་དང་། སྙིང་རྗེ་དང་ལྡན་པའི་ཚིག་རབ་ཏུ་བརྗོད་པར་བྱ་བ་དང་། འཇིག་རྟེན་གྱི་སྙིང་གི་དྲི་མ་ཡོངས་སུ་སེལ་ཅིང་འདོད་པ་ཆུང་བ་དང་། ཆོག་ཤེས་པ་ལ་བརྩོན་པར་སེམས་ཅན་རབ་ཏུ་དགོད་པ་དང་། ཆགས་སེམས་ལས་འཇིག་རྟེན་རྣམ་པར་བཟློག་པ་དང་། གཞན་གྱི་སེམས་ཀྱི་རྒྱུད་དགའ་བར་བྱེད་པ་ལ་རབ་ཏུ་དགོད་པ་དང་། ལྟ་བའི་དྲ་བ་ཐམས་ཅད་ལས་འཇིག་རྟེན་རབ་ཏུ་གདོན་པ་དང་། ཡིད་གཉིས་ཀྱི་ར་བ་ཐམས་ཅད་རྣམ་པར་གཏོར་བ་དང་། ཐེ་ཙོམ་གྱི་སྤོ་ཐམས་ཅད་ཡང་རབ་ཏུ་གཞོམ་པ་དང་། ནེམ་ནུར་དང་སོམ་ཉིའི་རབ་རིབ་ཡོངས་སུ་བསྩལ་བ་དང་། ཆོས་རྣམ་པར་དབྱེ་བའི་འཇིག་རྟེན་དུ་རབ་ཏུ་དབྱེ་བ་དང་། རྐྱེན་ལས་བྱུང་བ་རབ་ཏུ་བརྗོད་པ་དང་། རང་བཞིན་གྱིས་བདེན་པའི་ཚུལ་ལ་སེམས་ཅན་རབ་ཏུ་དགོད་པ་དང་། སྒྲིབ་པ་ཐམས་ཅད་རྣམ་པར་བཟློག་པ་དང་། སྒྲིབ་པ་མེད་པའི་ཚུལ་ལ་གཟུང་བ་དང་། སངས་རྒྱས་ཀྱི་དོན་གྱི་ཚུལ་སྣ་ཚོགས་བརྗོད་
པ་བྱེད་ཅིང་། ཕྱོགས་བཅུའི་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །མིག་གཉིས་ནས་ཉི་མའི་དཀྱིལ་འཁོར་བརྒྱ་སྟོང་སངས་རྒྱས་གྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། སེམས་ཅན་དམྱལ་བ་ཆེན་པོ་ཐམས་ཅད་ཡོངས་སུ་སྣང་བར་བྱེད་ཅིང་འཇིག་རྟེན་གྱི་མུན་པ་ཆེན་པོ་སེལ་བ་དང་། སེམས་ཅན་རྣམས་ཀྱི་གཏི་མུག་གི་རབ་རིབ་སེལ་བ་དང་། གྲང་བའི་སེམས་ཅན་དམྱལ་བ་ན་འཁོད་པའི་སེམས་ཅན་རྣམས་ཀྱི་གྲང་བའི་སྡུག་བསྔལ་རབ་ཏུ་ཞི་བར་བྱེད་པ་དང་། སའི་རང་བཞིན་གྱི་ཞིང་རྣམས་སུ་འོད་ཁ་དོག་དཀར་པོ་ཅན་རབ་ཏུ་འགྱེད་པ་དང་། གསེར་གྱི་རང་བཞིན་གྱི་ཞིང་རྣམས་སུ་འོད་བཻ་དཱུ་རྱའི་ཁ་དོག་ཅན་རབ་ཏུ་འགྱེད་པ་དང་བཻ་དཱུ་རྱའི་རང་བཞིན་གྱི་ཞིང་རྣམས་སུ་འོད་དངུལ་གྱི་ཁ་དོག་ཅན་རབ་ཏུ་འགྱེད་པ་དང་། དངུལ་གྱི་རང་བཞིན་གྱི་ཞིང་རྣམས་སུ་འོད་གསེར་གྱི་ཁ་དོག་ཅན་རབ་ཏུ་འགྱེད་པ་དང་། གསེར་གྱི་རང་བཞིན་གྱི་ཞིང་རྣམས་སུ་འོད་ཤེལ་གྱི་ཁ་དོག་ཅན་རབ་ཏུ་འགྱེད་པ་དང་། གསེར་གྱི་རང་བཞིན་གྱི་ཞིང་རྣམས་སུ་འོད་མུ་ཏིག་དམར་པོའི་ཁ་དོག་ཅན་རབ་ཏུ་འགྱེད་པ་དང་། ཨ་སྨ་གརྦྷའི་རང་བཞིན་གྱི་ཞིང་རྣམས་སུ་འོད་གསེར་གྱི་ཁ་དོག་ཅན་རབ་ཏུ་འགྱེད་པ་དང་། གསེར་གྱི་རང་བཞིན་གྱི་ཞིང་རྣམས་སུ་འོད་ཨ་སྨ་གརྦྷའི་ཁ་དོག་ཅན་རབ་ཏུ་འགྱེད་པ་དང་། ཨིན་དྲ་ནཱི་ལའི་རང་བཞིན་གྱི་ཞིང་རྣམས་སུ་འོད་རིན་པོ་ཆེའི་རྒྱལ་པོ་ཉི་མའི་སྙིང་པོའི་ཁ་དོག་ཅན་རབ་ཏུ་འགྱེད་པ་དང་། རིན་པོ་ཆེའི་རྒྱལ་པོ་ཉི་མའི་སྙིང་པོའི་རང་བཞིན་གྱི་ཞིང་རྣམས་སུ་འོད་རིན་པོ་ཆེའི་རྒྱལ་པོ་ཨིན་དྲ་ནཱི་ལའི་ཁ་དོག་ཅན་རབ་ཏུ་འགྱེད་པ་དང་། མུ་ཏིག་དམར་པོའི་རང་བཞིན་གྱི་ཞིང་རྣམས་སུ་འོད་རིན་པོ་ཆེའི་རྒྱལ་པོ་ཟླ་བའི་འོད་ཟེར་གྱི་དྲ་བ་དང་དཀྱིལ་འཁོར་གྱི་སྙིང་པོའི་ཁ་དོག་ཅན་རབ་ཏུ་འགྱེད་པ་དང་། རིན་པོ་ཆེའི་རྒྱལ་པོ་ཟླ་བའི་འོད་ཟེར་གྱི་དྲ་བ་དང་དཀྱིལ་འཁོར་གྱི་སྙིང་པོའི་རང་བཞིན་གྱི་ཞིང་རྣམས་སུ་འོད་མུ་ཏིག་དམར་པོའི་ཁ་དོག་ཅན་རབ་ཏུ་འགྱེད་པ་དང་། རིན་པོ་ཆེ་གཅིག་གི་རང་བཞིན་གྱི་ཞིང་རྣམས་སུ་འོད་རིན་པོ་ཆེ་སྣ་ཚོགས་ཀྱི་ཁ་དོག་ཅན་རབ་ཏུ་འགྱེད་
པ་དང་། རིན་པོ་ཆེ་སྣ་ཚོགས་ཀྱི་རང་བཞིན་གྱི་ཞིང་རྣམས་སུ་འོད་རིན་པོ་ཆེ་གཅིག་གི་ཁ་དོག་ཅན་རབ་ཏུ་འགྱེད་པ་དང་། དེ་བཞིན་དུ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དུ་སེམས་ཅན་གྱི་དོན་ཚད་མེད་པ་ལ་བརྩོན་ཞིང་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །སྨིན་མཚམས་ཀྱི་མཛོད་སྤུ་ནས་ཟླ་བ་མང་པོ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། ལྷའི་དབང་པོ་ཐམས་ཅད་ཟིལ་གྱིས་གནོན་ཅིང་། འཇིག་རྟེན་ཐམས་ཅད་ཀྱི་འདོད་པའི་དགའ་བ་རྣམ་པར་བཟློག་པ་དང་། སངས་རྒྱས་བལྟ་བར་དགའ་བ་ལ་རྗེས་སུ་བསྔགས་པ་བྱེད་ཅིང་། སེམས་ཅན་ཚད་མྱེད་པ་གདུལ་བ་ལ་བརྩོན་པར་ཕྱོགས་བཅུའི་ཆོས་ཀྱི་དབྱིངས་རྒྱས་པར་འགེངས་པར་མཐོང་ངོ་། །འཕྲལ་བ་ནས་ཚངས་པ་ཆེན་པོ་སྤྱོད་ལམ་རབ་ཏུ་ཞི་བ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་བ་ནས། ཚངས་པའི་དབྱངས་སུ་བརྗོད་དེ། སངས་རྒྱས་ཐམས་ཅད་ལ་གསོལ་བ་གདབ་པ་དང་བྱང་ཆུབ་སེམས་དཔའ་ཐམས་ཅད་རབ་ཏུ་དགའ་བར་བྱ་བ་བྱེད་ཅིང་སེམས་ཅན་གྱི་དོན་ཚད་མེད་པ་ལ་བརྩོན་པར་ཕྱོགས་བཅུའི་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །མགོ་ནས་བྱང་ཆུབ་སེམས་དཔའ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། ཁ་དོག་དང་དབྱིབས་སྣ་ཚོགས་ཀྱིས་བརྒྱན་པའི་ལུས་ཡོངས་སུ་སྟོན་ཅིང་། དཔེ་བྱད་བཟང་པོས་རྣམ་པར་བྲིས་པའི་ལུས་རབ་ཏུ་སྟོན་པ་དང་། འོད་ཀྱི་དཀྱིལ་འཁོར་གྱི་སྤྲིན་མཐའ་དང་དབུས་མེད་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་སངས་རྒྱས་ཐམས་ཅད་ཀྱི་སྔོན་གྱི་བྱང་ཆུབ་སེམས་དཔའི་སྤྱོད་པ་ནས་བཟུང་སྟེ། གཏོང་བ་དང་ལེན་པ་དང་། དངོས་པོ་ཡོངས་སུ་གཏོང་བའི་སྤྲིན་མང་པོ་རབ་ཏུ་དགྱེ་བ་དང་། ཕ་
རོལ་ཏུ་ཕྱིན་པ་སྣ་ཚོགས་དང་ལྡན་པའི་སྔོན་གྱི་སྦྱོར་བ་རྒྱ་མཚོ་ཡོངས་སུ་བསྟན་པ་དང་། སྦྱིན་པའི་སྤྱོད་པ་འཇིག་རྟེན་དུ་ཡོངས་སུ་བརྗོད་པ་དང་། སེར་སྣའི་དྲི་མ་རྣམ་པར་བཟློག་པ་དང་། ཆགས་པ་ཐམས་ཅད་སྤང་བ་ལ་སེམས་ཅན་རབ་ཏུ་དགོད་པ་དང་། འཇིག་རྟེན་རིན་པོ་ཆེ་སྣ་ཚོགས་ཐམས་ཅད་ཀྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། སྦྱིན་པའི་ཕ་རོལ་ཏུ་ཕྱིན་པ་ལ་སེམས་ཅན་རབ་ཏུ་དགོད་པ་དང་། མཚན་ཐམས་ཅད་ཀྱི་ཡོན་ཏན་ཡང་དག་པར་བརྗོད་པ་དང་། སངས་རྒྱས་ཀྱི་མཚན་འབྱུང་བའི་རྒྱུ་སྟོན་པ་བྱེད་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གྲངས་མྱེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་བརྗོད་ཅིང་། བ་སྤུའི་བུ་ག་ཐམས་ཅད་ནས་སངས་རྒྱས་ཐམས་ཅད་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་ཡོངས་སུ་བསྟན་པ་དང་། སེམས་ཅན་ཐམས་ཅད་ལམ་གྱི་རྒྱུད་དང་ཡུལ་ལས་ཕྱིར་ཕྱོགས་པར་བྱས་ཏེ། དེ་བཞིན་གཤེགས་པའི་ཡུལ་ལ་མངོན་དུ་ཕྱོགས་པར་བྱ་བ་དང་། འཇིག་རྟེན་གྱི་འདོད་པ་ལ་རྣམ་པར་སྨད་པ་དང་། འཇིག་རྟེན་གྱི་ཕྱིན་ཅི་ལོག་གི་ལིང་ཏོག་རྣམ་པར་བསལ་བ་དང་། ལོག་པའི་རྣམ་པར་རྟོག་པ་རབ་ཏུ་ཞི་བར་བྱས་ནས་བྱང་ཆུབ་སེམས་དཔའི་ཚུལ་ཁྲིམས་ལ་ཡང་དག་པར་དགོད་པ་དང་། སྙིང་རྗེ་ཆེན་པོའི་ཚུལ་ཁྲིམས་ཡོངས་སུ་བརྗོད་ཅིང་དེ་བཞིན་གཤེགས་པའི་ཚུལ་ཁྲིམས་རབ་ཏུ་ཐོབ་པར་བྱ་བའི་ཕྱིར། སངས་རྒྱས་ཀྱི་ལམ་ནན་ཏན་དུ་བྱ་བའི་ཚུལ་ཁྲིམས་ལ་སེམས་ཅན་རབ་ཏུ་དགོད་པ་དང་། སྲིད་པའི་ལམ་གྱི་རྒྱུད་རྨི་ལམ་ལྟ་བུར་སེམས་ཅན་རྣམས་ལ་རབ་ཏུ་བརྗོད་ཅིང་། རྨི་ལམ་གྱི་ཚུལ་དང་མཉམ་པར་ཡོངས་སུ་གཞོལ་བར་བྱ་བའི་ཕྱིར་ཡུལ་ཡོངས་སུ་འཛིན་པ་དང་ཉོན་མོངས་པ་ལ་དབང་བསྒྱུར་བར་སེམས་ཅན་རྣམས་རབ་ཏུ་དགོད་པ་བྱེད་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་
ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། འཇིག་རྟེན་རྣམས་ལ་མདོག་གསེར་གྱི་ཁ་དོག་ལྟ་བུ་མངོན་པར་སྟོན་ཅིང་། ཁྲོ་བ་མེད་པ་དང་། འཁྲུག་པ་མེད་པ་དང་། ཤར་གཉེར་བ་མེད་པ་དང་། ཞེ་སྡང་བ་མེད་པ་དང་། ཆུད་གསོན་པ་མེད་པ་དང་། ཁོང་ཁྲོ་བ་མེད་པའི་སེམས་ལ་སེམས་ཅན་རབ་ཏུ་དགོད་པ་དང་། བྱོལ་སོང་གི་སྐྱེ་གནས་ཀྱི་ལམ་གྱི་རྒྱུད་ཐམས་ཅད་ཡོངས་སུ་གཅོད་པའི་ཕྱིར། བ་སྤུའི་སྒོ་ཐམས་ཅད་ནས་བཟོད་པའི་ཕ་རོལ་ཏུ་ཕྱིན་པ་དང་ལྡན་པའི་དེ་བཞིན་གཤེགས་པའི་སྔོན་གྱི་སྦྱོར་བའི་སྤྲིན་རབ་ཏུ་འགྱེད་ཅིང་བཟོད་པའི་སྟོབས་ལ་སེམས་ཅན་རབ་ཏུ་དགོད་པ་དང་། ཆོས་ལ་དབང་བསྒྱུར་བ་ལ་སེམས་ཅན་རབ་ཏུ་སྣང་བར་བྱེད་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། བྱང་ཆུབ་སེམས་དཔའི་བརྩོན་འགྲུས་ཀྱི་སྟོབས་མཐའ་ཡས་པ་ཤིན་ཏུ་སྟོན་ཅིང་། ཐམས་ཅད་མཁྱེན་པ་ཉིད་དུ་བརྩམས་པ་ལས་ཕྱིར་མྱི་ལྡོག་པའི་སྟོབས་ཀྱིས་ཐོས་པ་རྒྱ་མཚོ་ཡོངས་སུ་བཙལ་བས་མི་སྐྱོ་བར་བྱ་བ་ཡོངས་སུ་བརྗོད་པ་དང་། དེ་བཞིན་གཤེགས་པ་ཐམས་ཅད་མཆོད་ཅིང་རིམ་གྲོ་བྱ་བ་ལ་སེམས་ཅན་རབ་ཏུ་གཟུད་པ་དང་། སྡུག་བསྔལ་གྱི་ཕུང་པོ་ཐམས་ཅད་རྣམ་པར་བཟློག་པའི་བརྩོན་འགྲུས་ཆེན་པོ་ལ་སེམས་ཅན་རབ་ཏུ་དགོད་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལྡན་པའི་སྔོན་གྱི་སྦྱོར་བ་མང་པོའི་སྤྲིན་ལུས་ཐམས་ཅད་ལས་རབ་ཏུ་འགྱེད་ཅིང་བྱང་ཆུབ་སེམས་དཔའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་བསྟན་པ་དང་། སེམས་ཅན་རྣམས་ཀྱི་ལེ་ལོའི་རི་རྣམ་པར་གཏོར་བ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སེམས་ཅན་རབ་ཏུ་དགོད་པ་དང་ལས་ལ་དབང་བསྒྱུར་བ་ལ་འཇིག་རྟེན་རབ་ཏུ་གཟུད་པ་དང་། རྒྱུན་མི་ཆད་པར་བརྩོན་པར་བྱེད་པ་མཐོང་ངོ་། །ཡང་བྱང་ཆུབ་
སེམས་དཔའ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། བྱང་ཆུབ་སེམས་དཔའ་རྣམས་ཀྱི་རྗེས་སུ་དྲན་པའི་ལམ་ལ་སེམས་ཅན་ཐམས་ཅད་རབ་ཏུ་དགོད་ཅིང་སྒྲིབ་པ་དང་། བར་དུ་གཅོད་པ་དང་། རབ་རིབ་ཐམས་ཅད་རྣམ་པར་སེལ་བ་དང་། རློམ་པ་དང་བག་མེད་པ་ཐམས་ཅད་ལས་སེམས་ཅན་རྣམ་པར་བཟློག་པ་དང་། བག་ཡོད་པའི་ཆོས་ལ་རབ་ཏུ་དགོད་པ་དང་། ཁེངས་པ་འགྱིང་བ་དང་། ང་རྒྱལ་གྱི་རྒྱལ་མཚན་རབ་ཏུ་སྙོལ་བ་དང་། སངས་རྒྱས་ཀྱི་བསམ་གཏན་གྱི་ཡན་ལག་རྒྱ་མཚོ་བརྗོད་པ་དང་། འཇིག་རྟེན་རྣམས་ལ་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་བསྔགས་པ་དང་། བ་སྤུའི་བུ་ག་ཐམས་ཅད་ནས་བསམ་གཏན་གྱི་ཕ་རོལ་ཏུ་ཕྱིན་པ་དང་ལྡན་པའི་སྔོན་གྱི་ཚུལ་མང་པོའི་སྤྲིན་རབ་ཏུ་དགྱེ་བ་དང་། སེམས་ལ་དབང་བསྒྱུར་བ་ལ་སེམས་ཅན་རབ་ཏུ་དགོད་པ་བྱེད་ཅིང་སྐད་ཅིག་རེ་རེ་ལ་ཆོས་ཀྱི་དབྱིངས་རྒྱས་པར་འགེངས་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། བ་སྤུའི་བུ་ག་ཐམས་ཅད་ནས་སངས་རྒྱས་ཀྱི་ཆོས་ཡོངས་སུ་ཚོལ་བ་དང་ལྡན་པའི་སྔོན་གྱི་སྦྱོར་བ་མང་པོའི་སྤྲིན་རབ་ཏུ་དགྱེ་བ་དང་། དབྱངས་ཀྱི་ཡན་ལག་རྒྱ་མཚོའི་སྐད་ཐམས་ཅད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་སྤྲིན་གྱི་འབྲུག་སྒྲ་སྒྲོག་པ་དང་། ཡང་དག་པར་ལྟ་བའི་གློག་རབ་ཏུ་འགྱེད་པ་དང་། ཆོས་ཀྱི་རང་བཞིན་གྱི་སྒྲ་དབྱངས་རབ་ཏུ་བསྒྲག་པ་དང་། སེམས་ཅན་རྣམས་ཀྱི་བདག་ཏུ་ལྟ་བའི་རིའི་ལྷུན་རབ་ཏུ་གཞིག་པ་དང་། ལྟ་བ་ཐམས་ཅད་ཀྱི་ཟུག་རྔུ་དབྱུང་བ་དང་། ཐེ་ཙོམ་དང་ཡིད་གཉིས་དང་ནེམ་ནུར་གྱི་རབ་རིབ་རྣམ་པར་བསྩལ་བ་དང་། ཡེ་ཤེས་ཀྱི་དབང་ཡང་དག་པར་བསྔགས་པ་བྱེད་ཅིང་། སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་རྒྱས་པར་འགེངས་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་
གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། སངས་རྒྱས་ཐམས་ཅད་ཀྱི་ཐབས་མཁས་པའི་ཚུལ་གྱི་དཀྱིལ་འཁོར་རབ་ཏུ་བརྗོད་པ་བྱེད་ཅིང་བ་སྤུའི་བུ་ག་ཐམས་ཅད་ནས་ཐབས་མཁས་པ་དང་ལྡན་པའི་སྔོན་གྱི་སྦྱོར་བ་མང་པོའི་སྤྲིན་རབ་ཏུ་དགྱེ་བ་དང་། འཇིག་རྟེན་རྣམས་ལ་ཐབས་མཁས་པའི་སྤྱོད་པ་རབ་ཏུ་བརྗོད་པ་དང་། ཐེག་པ་ཆེན་པོའི་འབྱུང་བ་མངོན་པར་བསྟན་པ་དང་། སངས་རྒྱས་ཐམས་ཅད་ཀྱི་དཀྱིལ་འཁོར་ཡང་དག་པར་བསྔགས་པ་དང་། འཁོར་བ་དང་མྱ་ངན་ལས་འདས་པ་ཐ་མྱི་དད་པའི་བྱང་ཆུབ་སེམས་དཔའི་སྤྱོད་པ་ཡོངས་སུ་བསྟན་པ་དང་། བྱང་ཆུབ་སེམས་དཔའ་རྣམས་ཀྱི་ཐབས་མཁས་པའི་ཕ་རོལ་ཏུ་ཕྱིན་པ་ལ་སེམས་ཅན་རབ་ཏུ་དགོད་པ་དང་། འཇིག་རྟེན་རྣམས་ལ་བྱང་ཆུབ་སེམས་དཔའི་དབང་གི་དཀྱིལ་འཁོར་རབ་ཏུ་བསྟན་པ་བྱེད་ཅིང་། སེམས་བསྐྱེད་པ་རེ་རེ་ལ་ཆོས་ཀྱི་དབྱིངས་རྒྱས་པར་འགེངས་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། བ་སྤུའི་བུ་ག་ཐམས་ཅད་ནས་དེ་བཞིན་གཤེགས་པ་ཐམས་ཅད་ཀྱི་མཚན་རྒྱ་མཚོའི་སྤྲིན་གྱི་འབྲུག་སྒྲ་སྒྲོག་ཅིང་། བ་སྤུའི་བུ་ག་ཐམས་ཅད་ནས་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་དག་པ་དང་ལྡན་པའི་སྔོན་གྱི་སྦྱོར་བ་མང་པོའི་སྤྲིན་རབ་ཏུ་དགྱེ་བ་དང་། སྨོན་ལམ་གྱི་ཕ་རོལ་ཏུ་ཕྱིན་པ་ཡང་དག་པར་བསྔགས་པ་དང་། བྱང་ཆུབ་སེམས་དཔའི་དབང་ཐམས་ཅད་ལ་སེམས་ཅན་རབ་ཏུ་དགོད་པ་དང་། སྨོན་ལམ་ཆེན་པོའི་ཤིང་རྟའི་འཁོར་ལོ་ཕྱི་མའི་མཐའི་མུར་ཐུག་པར་འདྲིལ་བ། ཆོས་ཐམས་ཅད་ཀྱི་རྗེས་སུ་འབྲང་བ་ཉོན་མོངས་པ་ཐམས་ཅད་རྣམ་པར་བཟློག་པ། མི་ཤེས་པའི་རི་རྣམ་པར་འཐོར་བ། འཇིག་རྟེན་དུ་རབ་ཏུ་བརྗོད་པ་བྱེད་ཅིང་། སྨོན་ལམ་སྣ་ཚོགས་ཀྱི་རྣམ་པར་འཕྲུལ་པས། སེམས་ཀྱི་སྐད་ཅིག་རེ་རེ་
ལ་ཆོས་ཀྱི་དབྱིངས་རྒྱས་པར་འགེངས་པ་མཐོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་སུམ་ཅུ་པ། ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། བྱང་ཆུབ་སེམས་དཔའི་སྟོབས་རབ་ཏུ་སྣང་བར་བྱ་བ་དང་། བྱང་ཆུབ་སེམས་དཔའི་སྟོབས་ཡོངས་སུ་བསྒྲུབ་པའི་སྒྲ་རབ་ཏུ་དབྱུང་བ་དང་། བ་སྤུའི་བུ་ག་ཐམས་ཅད་ནས་སྟོབས་ཀྱི་ཕ་རོལ་ཏུ་ཕྱིན་པ་སྒྲུབ་ཅིང་འབྱིན་པའི་སྔོན་གྱི་སྦྱོར་བ་མང་པོའི་སྤྲིན་རབ་ཏུ་དགྱེ་བ་དང་། བདུད་དང་ཕས་ཀྱི་རྒོལ་བ་ཐམས་ཅད་ཀྱིས་མི་ཐུབ་པའི་སྟོབས་ཡོངས་སུ་བསྟན་པ་དང་། ཁོར་ཡུག་དང་རྡོ་རྗེའི་རི་ཐམས་ཅད་ལུས་ཀྱི་སྟེང་དུ་རྡིབ་ཀྱང་མི་ཉམས་པའི་སྟོབས་རབ་ཏུ་བརྗོད་པ་དང་། བསྐལ་པས་ཚིག་པ་ཐམས་ཅད་ཀྱི་མེ་རྒྱ་མཚོའི་ནང་ན་གནས་ཀྱང་ལུས་ལ་གནོད་པ་མེད་པའི་སྟོབས་ཡོངས་སུ་བསྟན་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་ལག་པའི་མཐིལ་གྱིས་ནམ་མཁའི་དབྱིངས་སུ་སྟོན་པའི་སྟོབས་ཡོངས་སུ་སྟོན་པ་བྱེད་ཅིང་། སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་སུ་འགེངས་པས་རྒྱུན་མི་གཅོད་པ་མཐོང་ངོ་། །ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། སེམས་ཅན་རྣམས་ལ་ཡེ་ཤེས་ཀྱི་དཀྱིལ་འཁོར་སྟོན་ཅིང་བ་སྤུའི་བུ་ག་ཐམས་ཅད་ནས་ཡེ་ཤེས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་དང་ལྡན་པའི་སྔོན་གྱི་སྦྱོར་བ་མང་པོའི་སྤྲིན་རབ་ཏུ་དགྱེ་བ་དང་། འཇིག་རྟེན་རྣམས་ལ་སངས་རྒྱས་ཐམས་ཅད་ཀྱི་ཡོན་ཏན་དང་། ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་རབ་ཏུ་བརྗོད་པ་དང་། སངས་རྒྱས་ཐམས་ཅད་ཀྱི་མཚན་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་མངོན་པར་བསྟན་པ་དང་། སྨོན་ལམ་ཐམས་ཅད་མངོན་པར་བསྒྲུབ་པའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་ཡོངས་སུ་བརྗོད་པ་དང་།
སེམས་ཅན་ཐམས་ཅད་ཡོངས་སུ་བསྡུ་བའི་སྨོན་ལམ་མངོན་པར་བསྒྲུབ་པའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་ཤིན་ཏུ་ཡངས་པར་བྱ་བ་དང་། སེམས་ཅན་ཐམས་ཅད་བདག་མྱེད་པའི་རང་བཞིན་ལ་གཟུད་པ་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་རྣམ་པར་བསྟན་པ་དང་། སེམས་ཅན་ཐམས་ཅད་ཀྱི་སེམས་རྒྱ་མཚོ་རྣམ་པར་བལྟ་བ་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་རབ་ཏུ་བརྗོད་པ་དང་། སེམས་ཅན་ཐམས་ཅད་ཀྱི་དབང་པོ་རྣམ་པར་དབྱེ་བའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་རབ་ཏུ་དབྱེ་བ་དང་། སེམས་ཅན་ཐམས་ཅད་ཀྱི་བསམ་པ་དང་མོས་པ་རྣམ་པར་བལྟ་བའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་ཡང་དག་པར་བརྗོད་པ་དང་། སེམས་ཅན་ཐམས་ཅད་ཀྱི་ལས་རྒྱ་མཚོ་ལ་འཇུག་པའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་རྣམ་པར་གྲོལ་བ་དང་། སེམས་ཅན་ཐམས་ཅད་ཀྱི་སྨོན་ལམ་རྒྱ་མཚོ་ལ་འཇུག་པའི་ཡེ་ཤེས་མངོན་པར་ཤེས་པ་དང་ལྡན་པའི་ཡེ་ཤེས་ཀྱིས་ཡོངས་སུ་བསྟན་པ་བྱེད་ཅིང་། སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །སྤྱི་བོའི་གཙུག་ཏོར་གྱི་གསེབ་ནས་དེ་བཞིན་གཤེགས་པའི་སྐུ་སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་མཚན་དམ་པ་དང་། དཔེ་བྱད་བཟང་པོ་རྣམ་པར་དག་པས་བརྒྱན་པ། འཛམ་བུ་ཆུ་ཀླུང་གི་གསེར་གྱི་རི་བོ་ཤིན་ཏུ་འབར་བ་ལྟར་སྣང་བ་འོད་ཀྱི་དཀྱིལ་འཁོར་ཕྱོགས་བཅུར་སྤ་ཞིང་ཚད་མེད་པར་འབར་བ་དང་། ཆོས་ཀྱི་དབྱིངས་ཚུལ་གྱིས་རྒྱས་པར་འགེངས་པའི་དབྱངས་མངའ་བ། སངས་རྒྱས་ཀྱི་རྣམ་པར་འཕྲུལ་པ་མཐའ་དང་དབུས་མེད་པ་ཡོངས་སུ་སྟོན་པ་འགྲོ་བ་ཐམས་ཅད་ལ་ཐ་མི་དད་པར་ཆོས་ཀྱི་སྤྲིན་གྱི་ཆར་མངོན་པར་འབེབས་པ་སྟེ། འདི་ལྟར་སྙིང་པོ་བྱང་ཆུབ་མཆོག་ཏུ་ཕྱིན་པའི་བྱང་ཆུབ་སེམས་དཔའ་
རྣམས་ལ་ཆོས་ཀྱི་དབྱིངས་ཀྱི་གཞིའི་བྱེ་བྲག་མངོན་སུམ་དུ་ཤེས་པའི་སྤྲིན་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་དབང་བསྐུར་བ་ཐོབ་པ་རྣམས་ལ་གཞི་ཀུན་ཏུ་རྟེན་པའི་སྤྲིན་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་ཆོས་ཆེན་པོའི་རྒྱལ་ཚབ་ཏུ་དབང་བསྐུར་བ་རྣམས་ལ་སྒོ་ཀུན་ནས་འཇུག་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་གཞོན་ནུར་གྱུར་པ་རྣམས་ལ་ཀུན་ནས་བརྒྱན་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་ཕྱིར་མི་ལྡོག་པ་རྣམས་ལ་སྙིང་རྗེ་ཆེན་པོའི་ཚོགས་ཤིན་ཏུ་བརྟན་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་ལྷག་པའི་བསམ་པ་དག་པ་རྣམས་ལ་ཆོས་ཐམས་ཅད་ཀྱི་རང་བཞིན་གྱི་བྱེ་བྲག་ཤེས་པའི་རྡོ་རྗེ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་སྔོན་གྱི་སྦྱོར་བ་དང་ལྡན་པ་རྣམས་ལ་འགྲོ་བ་ཡོངས་སུ་སྡུད་པས་ཀུན་ནས་བརྒྱན་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་ཚེར་སྐྱེས་པ་རྣམས་ལ་དུས་གསུམ་གྱི་དེ་བཞིན་གཤེགས་པའི་དཀྱིལ་འཁོར་མངོན་སུམ་དུ་དམིགས་པའི་སྤྲིན་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་རྣལ་འབྱོར་ལ་སྤྱོད་པ་རྣམས་ལ་ཆོས་ཐམས་ཅད་ཀྱི་རང་བཞིན་དང་གཞི་རབ་ཏུ་སྒྲོག་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་ལས་དང་པོ་པ་རྣམས་ལ་སྙིང་རྗེ་ཆེན་པོའི་ཚུལ་དང་ཐབས་ཀྱི་སྙིང་པོའི་སྤྲིན་ཀུན་ཏུ་འབྱུང་བ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་སེམས་དང་པོ་བསྐྱེད་པ་རྣམས་ལ་དགའ་བར་བགྱི་བའི་མཛོད་ཤིན་ཏུ་བསྩགས་པའི་སྙིང་པོ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱང་ཆུབ་སེམས་དཔའ་
ཡངས་པ་ལ་མོས་པ་རྣམས་ལ་རྣམ་པར་ཐར་པ་མི་ཟད་པ་དང་། དེ་བཞིན་གཤེགས་པའི་སྨོན་ལམ་གྱིས་དགའ་བར་བྱེད་པའི་མཛོད་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། གཟུགས་ལ་སྤྱོད་པའི་སེམས་ཅན་རྣམས་ལ་གཞི་ཀུན་ཏུ་མི་ཟད་པའི་མཛོད་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། ཚངས་པའི་རིས་ཀྱི་ལྷ་རྣམས་ལ་ཚུལ་རྒྱ་མཚོ་ཚད་མེད་པའི་འབྲུག་སྒྲའི་དབྱངས་ཤེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། དབང་བསྒྱུར་གྱི་ལྷ་རྣམས་ལ་སྟོབས་འབྱུང་བའི་ཆོས་ཀྱི་ཡོ་བྱད་མི་ཟད་པའི་མཛོད་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བདུད་ཀྱི་རིས་ཀྱི་ལྷ་རྣམས་ལ་ཐམས་ཅད་མཁྱེན་པ་ཉིད་ཀྱི་ཚོགས་རྒྱལ་མཚན་སྣ་ཚོགས་ཅན་ཡང་དག་པ་བསྒྲུབ་པའི་དབྱངས་ཤེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། འཕྲུལ་དགའི་ལྷ་རྣམས་ལ་ཡེ་ཤེས་རིན་པོ་ཆེ་སྣ་ཚོགས་ལ་བརྩོན་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། དགའ་ལྡན་གྱི་ལྷ་རྣམས་ལ་བྱང་ཆུབ་སེམས་དཔའི་སྨོན་ལམ་རིན་པོ་ཆེ་སྣ་ཚོགས་ཀྱི་རྒྱལ་མཚན་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། མཚེ་མའི་ལྷ་རྣམས་ལ་དེ་བཞིན་གཤེགས་པ་ཐམས་ཅད་རྗེས་སུ་དྲན་པའི་མཛོད་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། ལྷའི་དབང་པོ་བརྒྱ་བྱིན་གྱི་གནས་སུ་དེ་བཞིན་གཤེགས་པ་མཐོང་བས་དགེ་བའི་ཤུགས་འབྱུང་བ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། གནོད་སྦྱིན་གྱི་དབང་པོའི་གནས་སུ་ཆོས་ཀྱི་དབྱིངས་ཀྱི་ནམ་མཁའ་ལ་དེ་བཞིན་གཤེགས་པའི་གནས་རྣམ་པར་འཕྲུལ་པས་རྒྱས་པར་འགེངས་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། དྲི་ཟའི་དབང་པོའི་གནས་སུ་དེ་བཞིན་གཤེགས་པ་ཐམས་ཅད་ཀྱི་ཆོས་ཡང་དག་པར་བགྲོ་བ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་
དབབ་པ་དང་། ལྷ་མ་ཡིན་གྱི་གནས་སུ་ཡེ་ཤེས་ཀྱི་ཚུལ་རྡོ་རྗེའི་དཀྱིལ་འཁོར་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། ནམ་མཁའ་ལྡིང་གི་དབང་པོའི་གནས་སུ་དེ་བཞིན་གཤེགས་པ་ཐམས་ཅད་འབྱུང་བའི་ཐབས་ཀྱི་སྤྲིན་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། མིའམ་ཅིའི་དབང་པོའི་གནས་སུ་ཆོས་ཀྱི་སྤྲིན་ཡང་དག་པར་འགྲོ་བ་ཐམས་ཅད་ཀྱི་དབྱངས་ཤེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། ཀླུའི་དབང་པོའི་གནས་སུ་བྱང་ཆུབ་སེམས་དཔའི་རྣམ་པར་འཕྲུལ་པ་སྒྲོག་ཅིང་སྲིད་པའི་ལམ་གྱི་རྒྱུད་ལས་སྐྱོ་བ་བསྐྱེད་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། ལྟོ་འཕྱེ་ཆེན་པོའི་དབང་པོའི་གནས་སུ་དགའ་བ་རྒྱ་མཚོ་རྣམ་པར་འཕེལ་བར་བྱེད་པའི་ཤུགས་ཤེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། མྱིའི་གནས་སུ་འགྲོ་བ་ཐམས་ཅད་ལས་ཁྱད་པར་དུ་འཕགས་པའི་ཡེ་ཤེས་རྣམ་པར་འབྱེད་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། སེམས་ཅན་དམྱལ་བའི་འཇིག་རྟེན་དུ་འཁོར་བའི་སྡུག་བསྔལ་ཐམས་ཅད་རབ་ཏུ་ཞི་བའི་དབྱངས་དང་། འཕགས་པའི་ལམ་གྱི་ཚིག་གི་རྒྱུད་ཀྱིས་བརྒྱན་པ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། བྱོལ་སོང་གི་སྐྱེ་གནས་སུ་ལས་ཀྱི་ལམ་ཁ་ན་མ་ཐོ་བ་མེད་པ་ལ་ནན་ཏན་དུ་བྱ་བའི་དབྱངས་དང་། དེ་བཞིན་གཤེགས་པ་རྗེས་སུ་དྲན་པའི་སྤྲིན་གྱི་དཀྱིལ་འཁོར་གྱི་ལྷུན་ཅེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། གཤིན་རྗེའི་འཇིག་རྟེན་དུ་དེ་བཞིན་གཤེགས་པ་ཐམས་ཅད་ཀྱི་ཕ་རོལ་ཏུ་ཕྱིན་པ་བསྒྲག་པ། སེམས་ཅན་ཐམས་ཅད་ཀྱི་གཏོང་བའི་སེམས་འབྱུང་བ་ཞེས་བྱ་བའི་ཆོས་ཀྱི་སྤྲིན་གྱི་ཆར་མངོན་པར་དབབ་པ་དང་། སེམས་ཅན་ལོག་པར་ལྟུང་བ་རྣམས་ལ་སྡུག་བསྔལ་ཐམས་ཅད་ཞི་བ་རབ་ཏུ་འཐོབ་པས་དབུགས་འབྱུང་བའི་དབྱངས་ཀྱི་ང་རོ་ཞེས་བྱ་བའི་ཆོས་ཀྱི་སྤྲིན་གྱི་ཆར་
མངོན་པར་དབབ་པ་མཛད་ཅིང་ཆོས་ཀྱི་དབྱིངས་རྒྱས་པར་འགེངས་པ་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་འོད་ཟེར་གྱི་དྲ་བ་དང་། དཀྱིལ་འཁོར་གྱི་ཁ་དོག་དང་གཟུགས་ཀྱི་གློང་དང་རྒྱན་གྲངས་མེད་པ་ཅན་དགོས་པ་སྣ་ཚོགས་གྲངས་མེད་པ་ལ་སྟ་གོན་དུ་གནས་པ། སངས་རྒྱས་ཀྱི་ཞིང་གྲངས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ནས། ཕྱོགས་བཅུའི་ཆོས་ཀྱི་དབྱིངས་རྒྱས་པར་འགེངས་པ་མཐོང་སྟེ། འདི་ལྟར་བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་ལས་ནི་སྦྱིན་པའི་སྤྱོད་པ་སྐྱོན་མེད་པས། བདོག་པ་ཐམས་ཅད་ཡོངས་སུ་གཏོང་བ་རྣམ་པར་འཕྲུལ་པ་མཐོང་ངོ་། །བ་སྤུའི་སྒོའི་དྲ་བ་དང་། དཀྱིལ་འཁོར་ལ་ལ་ལས་ནི་དུས་གསུམ་གྱི་བྱང་ཆུབ་སེམས་དཔའ་ཐམས་ཅད་ཀྱི་ཚུལ་ཁྲིམས་དང་བརྟུལ་ཞུགས་དང་། ཡི་དམ་དང་ཚུལ་ཁྲིམས་ཀྱི་དཀྱིལ་འཁོར་དུ་རྣམ་པར་འཕྲུལ་པ་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་ལས་ནི་བྱང་ཆུབ་སེམས་དཔའ་ཐམས་ཅད་བཟོད་པའི་སྤྱོད་པའི་རྣམ་པ་དུས་གསུམ་དུ་བྱུང་བའི་བྱང་ཆུབ་སེམས་དཔའ་རྣམས་རྐ་ལག་དང་། ཡན་ལག་གི་དམ་པ་བཅད་ཀྱང་ཉམས་སུ་བཟོད་པ་བྱེད་པའི་རྣམ་པར་འཕྲུལ་པ་དང་། ཁུ་ཚུར་དང་དབྱིག་པས་བསྣུན་ཏེ། མཚོན་གྱིས་ལུས་ལ་བཏབ་ཀྱང་ཉམས་སུ་བཟོད་པར་བྱེད་པའི་རྣམ་པར་འཕྲུལ་པ་དང་། ལུས་ཐམས་ཅད་གཤེགས་སམ། སྙིང་དང་མྱིག་ཕྱུང་ཡང་ཉམས་སུ་བཟོད་པ་བྱེད་པའི་རྣམ་པར་འཕྲུལ་པ་མཐོང་ངོ་། །བྱང་ཆུབ་སེམས་དཔའ་དུས་གསུམ་དུ་བྱུང་བ་རྣམ་པར་བརྟགས་པའི་ལུས་དང་ལྡན་པ་གཞན་དག་གིས་ཐམས་ཅད་མཁྱེན་པ་ཉིད་ཡོངས་སུ་བཙལ་བའི་ཆེད་དུ་ལུས་དང་། སེམས་ལ་གནོད་པ་ཐམས་ཅད་དང་ཡན་ལག་དང་ཉིང་ལག་བཅད་པ་ཐམས་ཅད་ཀྱང་སྙིང་རྗེ་ཆེན་པོས་དབང་དུ་བྱས་པའི་ཕྱིར་ཉམས་
སུ་བཟོད་པར་བྱས་པ་དང་། བག་ལ་ཉལ་བར་བྱས་པ་དང་བཏང་སྙོམས་སུ་བཞག་པའི་བྱང་ཆུབ་སེམས་དཔའི་བཟོད་པའི་སྤྱོད་པ་རྣམ་པར་འཕྲུལ་པའི་གཟུགས་བརྙན་གྱི་གཟུགས་དེ་ལྟ་བུ་དག་ཀྱང་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་ལས་ནི་བྱང་ཆུབ་སེམས་དཔའ་ཐམས་ཅད་ཀྱི་བརྩོན་འགྲུས་ཀྱི་སྤྱོད་པ་རྣམ་པ་ཐ་དད་པ་རྣམ་པར་ཕྱེ་བའི་གཟུགས་དང་། བྱང་ཆུབ་སེམས་དཔའ་འདས་པ་དང་། མ་འོངས་པ་དང་ད་ལྟར་བྱུང་བའི་བརྩོན་འགྲུས་ཀྱི་རྣམ་པར་འཕྲུལ་པ་འཇིག་རྟེན་ཡོངས་སུ་བསྐྱོད་པ་དང་རྒྱ་མཚོ་ཡོངས་སུ་བསྐྱོད་པ་དང་། སེམས་ཅན་ཡོངས་སུ་སྐྱོ་བར་བྱ་བ་དང་། མུ་སྟེགས་ཅན་ཐམས་ཅད་ཡོངས་སུ་ཚར་གཅད་པ་དང་། བདུད་ཐམས་ཅད་སྤ་དགོང་བ་དང་། ཆོས་ཀྱི་ཕྱོགས་སྣང་བར་བྱ་བའི་བྱང་ཆུབ་སེམས་དཔའི་མཐུ་ཆེན་པོར་རྣམ་པར་འཕྲུལ་པ་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་ལས་ནི་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་རྣམ་པར་རྒྱུ་བའི་རྣམ་གྲངས་ཇི་སྙེད་པ་དང་ལུས་ཉེ་བར་ལེན་པ་ཇི་སྙེད་པ་དང་། རིགས་སུ་སྐྱེ་བ་ཡོངས་སུ་བཟུང་བ་ཅི་སྙེད་པ་དང་། གཟུགས་ཀྱི་ལུས་ཡོངས་སུ་གྲུབ་པ་ཇི་སྙེད་པ་དང་། དགེ་བའི་བཤེས་གཉེན་གྱིས་རྗེས་སུ་བསྟན་པ་ཡོངས་སུ་བཟུང་བ་ཇི་སྙེད་པ་དང་། དགེ་བའི་བཤེས་གཉེན་གྱིས་མན་ངག་ལ་ནན་ཏན་དུ་བྱ་བའི་གནས་ཇི་སྙེད་པ་དང་། དེ་བཞིན་གཤེགས་པའི་བསམ་གཏན་གྱི་ཡན་ལག་ཡོངས་སུ་བསྒྲུབ་པ་དང་། འཐུན་པའི་གཙུག་ལག་ཁང་དང་། གནས་དང་། གཞལ་མེད་ཁང་དང་། ཡུལ་དང་། རིའི་སུལ་ཇི་སྙེད་པ་དང་། བསམ་གཏན་གྱི་ཡན་ལག་དེ་དག་སུས་ཡོངས་སུ་བསྒྲུབ་པའི་དྲང་སྲོང་གི་ལུས་ཇི་སྙེད་པ་དང་། རྒྱལ་པོའི་ཐབས་ཇི་སྙེད་པ་དང་། འབྱུང་བ་ལ་མངོན་པར་མོས་པ་ཇི་སྙེད་པ་དང་། བརྟུལ་ཞུགས་དང་ཡི་དམ་དང་། ཚུལ་དང་སྤྱོད་ལམ་ཇི་སྙེད་པ་དེ་དག་ཐམས་ཅད་ཀྱང་ཚོང་དཔོན་གྱི་བུ་ནོར་བཟངས་ཀྱིས་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་
ལས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྤྱོད་པ་ལ་རྣམ་པར་སྤྱོད་ཅིང་། ཆོས་ཐམས་ཅད་ཡོངས་སུ་ཚོལ་བ་དང་ལྡན་པའི་ལུས་ཡོངས་སུ་བཟུང་བ་མཐོང་ངོ་། ལུས་གང་གིས་ཆོས་ཀྱི་ཚིག་གཅིག་གི་དོན་དུ་ཡང་བ་དོག་པ་ཐམས་ཅད་ཡོངས་སུ་བཏང་སྟེ། སེམས་ཅན་ཐམས་ཅད་ལས་ཡོངས་སུ་བཙལ་བ་དང་རིམ་གྲོ་དང་། བཀུར་སྟི་ཐམས་ཅད་ཀྱིས་དགེ་བའི་བཤེས་གཉེན་ཐམས་ཅད་ལས་ཡོངས་སུ་བཙལ་བ་དང་། དད་པ་དང་སྲི་ཞུས་ལུས་རབ་ཏུ་བཏུད་དེ། དེ་བཞིན་གཤེགས་པ་རྣམས་ལས་ཡོངས་སུ་བཙལ་བ་དང་། ཆོས་ཀྱི་ཚིག་གཅིག་ལ་ཇི་ལྟ་བ་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་དང་ལྡན་པའི་ཆོས་ཀྱི་ཚིག་ཐམས་ཅད་ལའང་དེ་བཞིན་ཏེ། འགྲོ་བ་ཐམས་ཅད་དུ་གཟུགས་བརྙན་བྱུང་བའི་ལུས་ཐམས་ཅད་ཀྱི་ཡོངས་སུ་བཙལ་བ་དེ་དག་ཐམས་ཅད་ཀྱང་ཚོང་དཔོན་གྱི་བུ་ནོར་བཟངས་ཀྱིས་བ་སྤུའི་སྒོ་གཅིག་གི་འོད་ཟེར་གྱི་དྲ་བ་དང་དཀྱིལ་འཁོར་ལས་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བ་དང་། དཀྱིལ་འཁོར་ལ་ལ་ལས་ནི་བྱང་ཆུབ་སེམས་དཔའ་ཐམས་ཅད་ཀྱི་སེམས་ཅན་ཡོངས་སུ་སྨིན་པར་བྱ་བའི་ཐབས་འགྲོ་བའི་རྒྱུད་རྒྱ་མཚོ་ཐམས་ཅད་དུ་འབྱམ་ཀླས་པ། སེམས་ཅན་ཐམས་ཅད་ཡོངས་སུ་བསྡུ་བའི་སྦྱོར་བར་མཐོང་ངོ་། །སེམས་ཅན་རེ་རེ་ལ་ཡང་ལུས་དང་སྤྱོད་པའི་ཚུལ་གྱི་སྒོ། སྔོན་གྱི་ལུས་ཉེ་བར་བླངས་པ་ཐབས་མཁས་པའི་སྤྱོད་པ་ལ་བརྩོན་པ། སེམས་ཅན་ཐམས་ཅད་ཀྱི་ལུས་དང་འདྲ་བས་ཡོངས་སུ་སྡུད་པ་ཡང་བ་སྤུའི་སྒོའི་འོད་ཟེར་གྱི་དྲ་བའི་དཀྱིལ་འཁོར་གཅིག་ལས་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བའི་དཀྱིལ་འཁོར་ལ་ལ་ལས་ནི་སྔོན་བཅོམ་ལྡན་འདས་ཀྱི་བསྐལ་པ་ཐམས་ཅད་ཀྱི་སྨོན་ལམ་མངོན་པར་བསྒྲུབས་པའི་སྤྱོད་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་སྨོན་ལམ་མངོན་པར་བསྒྲུབས་པའི་སྤྱོད་པ་དང་། ཞིང་ཐམས་ཅད་ཡོངས་སུ་དག་པར་བྱ་བའི་སྨོན་ལམ་མངོན་པར་བསྒྲུབས་པ་མཛད་
པ་ཇི་སྙེད་པ་དང་། སྨོན་ལམ་ཐམས་ཅད་མངོན་པར་བསྒྲུབས་པའི་དཀྱིལ་འཁོར་ཇི་སྙེད་ཅིག་དེ་བཞིན་གཤེགས་པ་དེ་དང་དེ་དག་གི་ཞབས་ཀྱི་དྲུང་དུ་འཁོར་བའི་སྐྱོན་ཐམས་ཅད་ལས་སོ་སོའི་རེ་རེའི་གཉེན་པོར་མངོན་པར་བསྒྲུབས་པར་མཛད་པ། དེ་དག་ཐམས་ཅད་ཀྱང་ཚོང་དཔོན་གྱི་བུ་ནོར་བཟངས་ཀྱིས་བ་སྤུའི་སྒོའི་འོད་ཟེར་གྱི་དྲ་བའི་དཀྱིལ་འཁོར་གཅིག་ལས་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བའི་དཀྱིལ་འཁོར་ལ་ལ་ལས་ནི་སྟོབས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཐམས་ཅད་དང་ལྡན་པའི་སྔོན་གྱི་སྦྱོར་བ་རྒྱ་མཚོ་མཐོང་ངོ་། །བ་སྤུའི་སྒོའི་འོད་ཟེར་གྱི་དྲ་བའི་དཀྱིལ་འཁོར་ལ་ལ་ལས་ནི་ཡེ་ཤེས་ཀྱི་སྤྱོད་པ་རྣམ་པར་རྒྱུ་བ་ཐམས་ཅད་དང་ལྡན་པ་མི་ཤེས་པའི་གཉིད་ཀྱིས་ལོག་པའི་སེམས་ཅན་སད་པར་བྱེད་པའི་རང་བཞིན་དང་ལྡན་པའི་སྔོན་གྱི་སྦྱོར་བ་རྒྱ་མཚོ་མཐོང་བར་གྱུར་ཏོ། །དེ་ནས་ཚོང་དཔོན་གྱི་བུ་ནོར་བཟངས་དགེ་སློང་རྒྱ་མཚོའི་རྒྱལ་མཚན་དེ་ལྟར་མཉམ་པར་བཞག་པ་ལ་སེམས་ཤིང་རྟོག་པ་དང་། ཏིང་ངེ་འཛིན་གྱི་རྣམ་པར་ཐར་པའི་དཀྱིལ་འཁོར་དེ་རྗེས་སུ་དྲན་པར་བྱ་བ་དང་། བྱང་ཆུབ་སེམས་དཔའི་ཏིང་ངེ་འཛིན་གྱི་ཁྱུ་མཆོག་གི་མཐུ་ཕྱུང་བ་དེ་ལ་རྗེས་སུ་རྣམ་པར་བསམ་པ་དང་། སེམས་ཅན་གྱི་དོན་གྱི་ཚུལ་རྒྱ་མཚོ་དེ་ལ་འཇུག་པར་བྱ་བ་དང་། མངོན་པར་འདུ་བྱ་བའི་སྒོ་རྒྱུད་ཀུན་ལ་མངོན་དུ་གནས་པའི་རྒྱན་དེའི་རྗེས་སུ་འབྲང་ཞིང་ཁོང་དུ་ཆུད་པར་བྱ་བ་དང་། ཆོས་ཀྱི་དབྱིངས་ཀྱི་རྒྱན་རྣམ་པར་དག་པའི་ཡེ་ཤེས་ཀྱི་སྒོ་དེ་ལ་འཇུག་པར་བྱ་བ་དང་། སངས་རྒྱས་ཀྱི་བྱིན་གྱི་རླབས་ཡང་དག་པར་མནོད་པའི་ཡེ་ཤེས་དེ་ལ་རབ་ཏུ་བརྟག་པ་དང་། བྱང་ཆུབ་སེམས་དཔའི་དབང་གི་སྟོབས་དེ་ཡོངས་སུ་བསྐྱེད་པ་དང་། བྱང་ཆུབ་སེམས་དཔའི་སྨོན་ལམ་གྱི་སྟོབས་དེ་བརྟན་པར་བྱ་བ་དང་། བྱང་ཆུབ་སེམས་དཔའི་སྤྱོད་པའི་སྟོབས་དེ་ཤིན་ཏུ་རྒྱས་པར་བྱ་བ་བྱེད་ཅིང་། དགེ་སློང་རྒྱ་མཚོའི་རྒྱལ་མཚན་གྱི་མདུན་དུ་ཉིན་ཞག་གཅིག་
ཀྱང་ལོན་ནོ། །ཉིན་ཞག་གཉིས་དང་བདུན་ཡང་ལོན་ནོ། །ཟླ་བ་ཕྱེད་དང་ཟླ་བ་གཅིག་དང་། ཟླ་བ་གཉིས་དང་ཟླ་བ་དྲུག་གི་བར་དང་། ཉིན་ཞག་ཀྱང་དྲུག་ཏུ་དགེ་སློང་རྒྱ་མཚོའི་རྒྱལ་མཚན་གྱི་མདུན་དུ་ལོན་ཏེ། དེ་ལྟར་ཟླ་བ་དྲུག་དང་། ཉིན་ཞག་དྲུག་འདས་ནས་དགེ་སློང་རྒྱ་མཚོའི་རྒྱལ་མཚན་ཏིང་ངེ་འཛིན་དེ་ལས་ལངས་སོ། །དེ་ནས་ནོར་བཟངས་ཀྱིས་སྨྲས་པ། འཕགས་པ་ཏིང་ངེ་འཛིན་འདི་དེ་ལྟར་ཟབ་ལ། དེ་ལྟར་རྒྱ་ཆེ་ཞིང་དེ་ལྟར་ཚད་མ་མཆིས་པའི་ཡུལ་དང་ལྡན་པ་དང་། དེ་ལྟར་བསམ་གྱིས་མི་ཁྱབ་པའི་རྒྱན་དང་ལྡན་པ་དང་། དེ་ལྟར་སྣང་བ་མཚུངས་པ་མ་མཆིས་པ་དང་། དེ་ལྟར་གྲངས་མ་མཆིས་པའི་རྒྱན་དང་ལྡན་པ་དང་། དེ་ལྟར་མི་འཕྲོགས་པའི་སྤྱོད་ཡུལ་དང་ལྡན་པ་དང་། དེ་ལྟར་མ་འདྲེས་པའི་ཡུལ་དང་ལྡན་པ་དང་། དེ་ལྟར་ཕྱོགས་ཀུན་ཏུ་རྣམ་པར་སྣང་བ་དང་། ཏིང་ངེ་འཛིན་འདི་དེ་ལྟར་སེམས་ཅན་གྱི་དོན་ཚད་མ་མཆིས་པ་རབ་ཏུ་སྒྲུབ་པར་གྱུར་པ་ནི་ངོ་མཚར་ཏེ། དེ་ནི་སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་ཚད་མ་མཆིས་པ་རྣམ་པར་ཞི་བར་བགྱི་བ་ལ་སྟ་གོན་དུ་གནས་པ་སྟེ། འདི་ལྟར་དབུལ་བའི་སྡུག་བསྔལ་ཞི་བར་བགྱི་བ་ལ་སྟ་གོན་དུ་གནས་སོ། །སེམས་ཅན་དམྱལ་བའི་ལམ་གྱི་རྒྱུད་རྒྱུན་བཅད་པ་དང་། བྱོལ་སོང་གི་སྐྱེ་གནས་ཀྱི་ལམ་གྱི་རྒྱུད་ལས་ཡོངས་སུ་བསྐྱབ་པ་དང་། མི་ཁོམ་པའི་ལམ་གྱི་རྒྱུད་ཀྱི་སྒོ་ཐམས་ཅད་གཅད་པ་དང་། མཐོ་རིས་ཀྱི་ལམ་གྱི་རྒྱུད་དུ་ཕྱིན་པར་བགྱི་བ་དང་། ལྷ་དང་མིའི་དགའ་བ་དང་། བདེ་བ་འབྱུང་བར་བགྱི་བ་དང་། བསམ་གཏན་གྱི་ཡུལ་གྱིས་དགའ་བ་ཉམས་སུ་མྱོང་བར་བགྱི་བ་དང་། འདུས་བྱས་ལ་སྤྱོད་པའི་བདེ་བ་ཡོངས་སུ་འཕེལ་བར་བགྱི་བ་དང་། ཁམས་གསུམ་པ་ལས་འབྱུང་བའི་སྒོ་ཡོངས་སུ་བསྟན་པ་ལ་སྟ་གོན་དུ་གནས་སོ། །བྱང་ཆུབ་ཀྱི་སེམས་ཡང་དག་པར་སྐྱེ་བའི་རྒྱུ་ཡོངས་སུ་བརྗོད་པ་ལ་སྟ་གོན་དུ་གནས་སོ། །བསོད་ནམས་དང་ཡེ་ཤེས་ཀྱི་ཚོགས་ཡང་དག་པར་སྐྱེ་བའི་རྒྱུ་རྣམ་པར་འཕེལ་བར་བགྱི་བ་དང་།
སྙིང་རྗེ་ཆེན་པོའི་ཤུགས་རྒྱ་ཆེན་པོ་རྣམ་པར་འཕེལ་བར་བགྱི་བ་དང་། སྨོན་ལམ་ཆེན་པོའི་སྟོབས་ཡོངས་སུ་བསྐྱེད་པར་བགྱི་བ་དང་། བྱང་ཆུབ་སེམས་དཔའི་ལམ་སྣང་བ་རབ་ཏུ་ཐོབ་པར་བགྱི་བ་དང་། ཕ་རོལ་ཏུ་ཕྱིན་པ་ཆེན་པོའི་ཐེག་པ་རྣམ་པར་དགོད་པ་དང་། ཐེག་པ་ཆེན་པོའི་ཁྱད་པར་ལ་འཇུག་པ་མངོན་པར་བསྒྲུབ་པ་དང་། ཀུན་ཏུ་བཟང་པོའི་སྤྱོད་པ་ཤེས་ཤིང་སྣང་བར་བགྱི་བ་དང་། བྱང་ཆུབ་སེམས་དཔའི་ས་ཤེས་ཤིང་སྣང་བ་ཐོབ་པར་བགྱི་བ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་དང་སྤྱོད་པ་དང་། འབྱུང་བའི་རྒྱན་རྣམ་པར་དག་པ་ཡོངས་སུ་བསྒྲུབ་པ་དང་། ཐམས་ཅད་མཁྱེན་པའི་ས་གནན་པ་ལ་ཐོགས་པ་མ་མཆིས་པར་བགྱི་བ་ལ་སྟ་གོན་དུ་གནས་པའོ། །འཕགས་པ་ཏིང་ངེ་འཛིན་དེའི་མིང་ཅི་ཞེས་བགྱི་སྨྲས་པ། རིགས་ཀྱི་བུ་ཤེས་རབ་ཀྱི་ཕ་རོལ་ཏུ་ཕྱིན་པ་ཀུན་ནས་ལྟ་བའི་བཏང་སྙོམས་ཡོངས་སུ་ཐོབ་པ་ཞེས་བྱ་བ་ཡོད་དེ། ཏིང་ངེ་འཛིན་འདི་ནི་དེའི་སྣང་བ་སྟེ། སྒོ་ཀུན་ནས་རྣམ་པར་དག་པའི་རྒྱན་ཅེས་བྱའོ། །རིགས་ཀྱི་བུ་ཤེས་རབ་ཀྱི་ཕ་རོལ་ཏུ་ཕྱིན་པ་ཀུན་ནས་ལྟ་བའི་བཏང་སྙོམས་རབ་ཏུ་ཐོབ་པའི་སྣང་བ་ལས་སྐྱེས་པའི་ཏིང་ངེ་འཛིན་སྒོ་ཀུན་ནས་རྣམ་པར་དག་པའི་རྒྱན་ཅེས་བྱ་བ་འདི་ཤིན་ཏུ་བསྒོམས་ན་སྒོ་ཀུན་ནས་རྣམ་པར་དག་པའི་རྒྱན་ལ་སྩོགས་པ་ཏིང་ངེ་འཛིན་བརྒྱ་སྟོང་གྲངས་མེད་པ་ཕྲག་བཅུ་ཚང་བ་ཡོངས་སུ་འགྲུབ་པར་འགྱུར་རོ། །སྨྲས་པ། འཕགས་པ་ཏིང་ངེ་འཛིན་འདིའི་ཡུལ་དེར་བས་སམ་མ་བས། སྨྲས་པ། རིགས་ཀྱི་བུ་ཏིང་ངེ་འཛིན་འདི་ལ་སྙོམས་པར་ཞུགས་པ་ལ་ནི་འཇིག་རྟེན་གྱི་ཁམས་རྣམ་པར་དམིགས་པ་ལ་ཐོགས་པ་མེད་དོ། །འཇིག་རྟེན་གྱི་ཁམས་སུ་འཇུག་པར་བྱ་བ་ལ་ཐོགས་པ་མེད་དོ། །འཇིག་རྟེན་གྱི་ཁམས་རྣམ་པར་གནོན་པ་ལ་ཐོགས་པ་མེད་དོ། །འཇིག་རྟེན་གྱི་ཁམས་ཡོངས་སུ་བརྒྱན་པ་ལ་ཐོགས་པ་མེད་དོ། །འཇིག་རྟེན་གྱི་ཁམས་ཡོངས་སུ་སྦྱང་བ་ལ་
ཐོགས་པ་མེད་དོ། །འཇིག་རྟེན་གྱི་ཁམས་ཡོངས་སུ་དག་པར་བྱ་བ་ལ་ཐོགས་པ་མེད་དོ། །སངས་རྒྱས་བལྟ་ཞིང་རྣམ་པར་དམིགས་པར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་བདག་ཉིད་ཆེ་བ་བརྟག་པ་ལ་ཐོགས་པ་མེད་དོ། །སངས་རྒྱས་ཀྱི་རྣམ་པར་འཕྲུལ་པ་ཡོངས་སུ་ཤེས་པར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་སྟོབས་ལ་འཇུག་ཅིང་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་ཡོན་ཏན་རྒྱ་མཚོར་འཇུག་པ་ལ་ཐོགས་པ་མེད་དོ། །སངས་རྒྱས་ཀྱི་ཆོས་ཀྱི་སྤྲིན་གྱི་ཆར་ཡོངས་སུ་གཟུང་བ་ལ་ཐོགས་པ་མེད་དོ། །སངས་རྒྱས་ཀྱི་ཆོས་ཀྱི་འཁོར་ལོ་འཁོར་མ་འདྲེས་པ་ཤེས་ཤིང་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་འཁོར་གྱི་དཀྱིལ་འཁོར་རྒྱ་མཚོ་ལ་འཇུག་ཅིང་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །ཕྱོགས་བཅུར་འཇུག་ཅིང་རྗེས་སུ་བགྲང་བར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་ཆོས་བསྟན་པ་རྗེས་སུ་བརྟག་པར་བྱ་བ་ལ་ཐོགས་པ་མེད་དོ། །སངས་རྒྱས་ཀྱི་ཕྱོགས་རྗེས་སུ་བརྟག་པར་བྱ་བ་ལ་ཐོགས་པ་མེད་དོ། །སྙིང་རྗེ་ཆེན་པོའི་ཕྱོགས་རྣམ་པར་མི་སྤང་བ་ལ་ཐོགས་པ་མེད་དོ། །བྱམས་པས་ཕྱོགས་རྒྱས་པར་དགང་བ་ལ་ཐོགས་པ་མེད་དོ། །སངས་རྒྱས་བལྟ་བའི་ཕྱོགས་ལ་འཇུག་པས་མི་ངོམས་པར་བྱ་བ་ལ་ཐོགས་པ་མེད་དོ། །སེམས་ཅན་རྒྱ་མཚོ་ཐམས་ཅད་དུ་འཇུག་ཅིང་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སེམས་ཅན་གྱི་དབང་པོ་རྒྱ་མཚོ་ཐམས་ཅད་ཤེས་ཤིང་ཁོང་དུ་ཆུད་པར་བྱ་བ་ལ་ཐོགས་པ་མེད་དོ། །སེམས་ཅན་གྱི་དབང་པོ་ཐ་དད་པ་ཐམས་ཅད་ཤེས་པར་བྱ་བ་ལ་ཐོགས་པ་མེད་དོ། །རིགས་ཀྱི་བུ་ཁོ་བོས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་འདི་ཤེས་སུ་ཟད་ན། བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་རྒྱ་མཚོ་ལ་ཞུགས་པ་ཆོས་ཀྱི་དབྱིངས་ཀྱི་ཡུལ་ལ་བློ་གྲོས་རྣམ་པར་
དག་པ། ཆོས་ཐམས་ཅད་ལ་རིག་པ་རྗེས་སུ་འབྲང་བའི་ཡེ་ཤེས་ཅན། བློ་ཤིན་ཏུ་ཡངས་པས་ཚད་མེད་པའི་ཡུལ་རྒྱས་པར་འགེངས་པ་གཟུངས་ཆེན་པོའི་སྣང་བ་ལ་དབང་བསྒྱུར་བ། ཏིང་ངེ་འཛིན་གྱི་དཀྱིལ་འཁོར་སྣང་བ་ཐམས་ཅད་ཤིན་ཏུ་དག་པ་མངོན་པར་ཤེས་པ་རྣམ་པར་འཕྲུལ་པ་དང་། ཁྱུ་མཆོག་གི་མཐུ་འབྱིན་པ་ལ་ཤིན་ཏུ་བྱུང་བ་སོ་སོ་ཡང་དག་པར་རིག་པ་མི་ཟད་པའི་རྒྱ་མཚོ་ལ་ཞུགས་པ། ངག་སྙན་པ་སའི་སྙིང་པོ་དང་ལྡན་པ་བརྗོད་པ་འགྲོ་བ་ཐམས་ཅད་ཀྱི་རྟེན་དུ་གྱུར་པ་རྣམས་ཀྱི་སྤྱོད་པ་ཤེས་པའམ། ཡོན་ཏན་བརྗོད་པའམ། སྤྱོད་ཡུལ་བསྟན་པའམ། ཡུལ་རབ་ཏུ་བརྗོད་པའམ། སྨོན་ལམ་ཆེན་པོའི་སྟོབས་ཡང་དག་པར་བསྔགས་པའམ། འབྱུང་བའི་སྒོ་ཡོངས་སུ་སྣང་བར་བྱ་བའམ། ཡང་དག་པར་བསྒྲུབ་པ་མངོན་པར་བརྗོད་པའམ། ལམ་ཡོངས་སུ་བསྟན་པའམ། ཏིང་ངེ་འཛིན་གྱི་རྒྱུན་གྱི་རྗེས་སུ་འབྲང་བར་བྱ་བའམ། སེམས་ཀྱི་ཡུལ་ཤེས་པར་བྱ་བའམ། ཡེ་ཤེས་མཉམ་པ་ཉིད་ཁོང་དུ་ཆུད་པར་བྱ་བར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་ཕྱོགས་ཀྱི་གནས་རྒྱ་མཚོ་རྣམ་པར་རློབ་པ་ཞེས་བྱ་བ་ཡོད་དེ། དེ་ན་བཟའ་ཤིང་གི་ར་བ་ཀུན་ནས་རྣམ་པར་བརྒྱན་པ་ཞེས་བྱ་བ་ཞིག་གྲོང་ཁྱེར་འོད་ཆེན་པོ་ཞེས་བྱ་བའི་ཤར་ཕྱོགས་ལོགས་ན་ཡོད་དེ། དེ་ན་ཤེད་ལས་སྐྱེས་པའི་རྒྱལ་པོ་འོད་བཟངས་ཀྱི་ཆུང་མ་དགེ་བསྙེན་མ་ཡིད་བཞིན་ཞེས་བྱ་བ་ཡོད་ཀྱིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། དགེ་སློང་རྒྱ་མཚོའི་རྒྱལ་མཚན་ལས་སྙིང་པོ་ཡོངས་སུ་བླངས་ཏེ། ཆོས་ཀྱི་ཉེ་བར་འཚོ་བ་བྱས་པ། ཏིང་ངེ་འཛིན་གྱི་ཡུལ་ལ་ཞུགས་པ། སྣང་བ་ཐོབ་པ་ཡེ་ཤེས་ཀྱིས་སྣང་བར་གྱུར་པ། ཏིང་ངེ་
འཛིན་གྱི་སྣང་བ་རབ་ཏུ་ཐོབ་པ། མོས་པ་རྣམ་པར་དག་པ་ཁོང་དུ་ཆུད་པ། སེམས་ཅན་ཆོས་ཀྱི་ཚུལ་གྱིས་སྣང་བའི་རྗེས་སུ་སོང་བ། རྣམ་པར་དག་པའི་སྒོས་སྣང་བ་དང་ལྡན་པར་གྱུར་པ། ཕྱོགས་སུ་ཡེ་ཤེས་ཀྱི་སྣང་བ་རབ་ཏུ་འདལ་བ་དེས། དགེ་སློང་རྒྱ་མཚོའི་རྒྱལ་མཚན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། དགེ་སློང་རྒྱ་མཚོའི་རྒྱལ་མཚན་ལ་བཏུད་དེ་ཕྱག་འཚལ་ནས། ཡང་དང་ཡང་ལྟ་ཞིང་ཡང་དང་ཡང་མངོན་པར་བལྟ་བ་དང་། ཕྱག་བྱ་བ་དང་། རབ་ཏུ་གདུད་པ་དང་། གུས་པར་བྱ་བ་དང་། རིམ་གྲོར་བྱ་བ་དང་། ཡིད་ལ་བྱ་བ་དང་། བསམ་པ་དང་། བསྒོམ་པ་དང་། ཡོངས་སུ་བསྒོམ་པ་དང་། ལེགས་པར་བརྗོད་པ་དང་། ངོ་མཚར་དུ་བྱ་བ་དང་། ཡོན་ཏན་མངོན་དུ་བྱ་བ་དང་། རྗེས་སུ་བསྔགས་པ་དང་། རྗེས་སུ་འབྲང་བར་བྱ་བ་དང་། རྗེས་སུ་དྲན་པར་བྱ་བ་དང་། བརྟན་པར་བྱ་བ་དང་། མི་གཏང་བ་དང་། ཡིད་ལ་བསམ་པ་དང་། རྗེས་སུ་འབྲང་བར་བྱ་བ་དང་། སྨོན་ལམ་གྱི་རྗེས་སུ་འཇུག་པར་བྱ་བ་དང་། མཐོང་བར་དགའ་བ་དང་། དབྱངས་ཀྱི་མཚན་མ་གཟུང་བ་དང་། གཟུངས་ཀྱི་རྗེས་སུ་བསམ་པ་དང་། མིང་ཡོངས་སུ་གཟུང་བའི་རྗེས་སུ་སོང་བའི་སེམས་དང་ལྡན་པར་བྱ་བ་དང་། ཁ་དོག་དང་། དབྱིབས་རྗེས་སུ་དྲན་པར་བྱ་བ་དང་། ཡེ་ཤེས་ཀྱི་ཡུལ་རྗེས་སུ་བསམ་པ་དང་། ཏིང་ངེ་འཛིན་གྱི་ཡུལ་ལ་རྗེས་སུ་འཇུག་པར་བྱ་བ་དང་། སྨོན་ལམ་གྱི་ཡུལ་ལ་རྗེས་སུ་འབྲང་བར་བྱ་བ་དང་། སྤྱོད་ཡུལ་གྱི་ཡུལ་རྣམ་པར་སྦྱང་བར་བྱ་བ་དང་། ཡེ་ཤེས་ཀྱི་སྣང་བ་ཡོངས་སུ་གཟུང་བ་བྱེད་ཅིང་། དགེ་སློང་རྒྱ་མཚོའི་རྒྱལ་མཚན་གྱི་དྲུང་ནས་སོང་ངོ་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་སོ་གཅིག་པ། དེ་ནས་ཚོང་དཔོན་གྱི་བུ་ནོར་བཟངས་དགེ་བའི་བཤེས་གཉེན་གྱི་ཡོན་ཏན་གྱིས་ནི་མགུ། དགེ་
བའི་བཤེས་གཉེན་གྱིས་ནི་ཡང་དག་པར་བསྔགས་ཏེ་བཏང་། དགེ་བའི་བཤེས་གཉེན་མཐོང་བའི་བྱིན་གྱིས་ནི་བྱིན་དུ་བརླབས། དགེ་བའི་བཤེས་གཉེན་གྱི་གདམས་ངག་ལ་ནི་ནན་ཏན་དུ་བྱེད། དགེ་བའི་བཤེས་གཉེན་ཡིད་དུ་འོང་བ་ནི་རྗེས་སུ་སེམས། དགེ་བའི་བཤེས་གཉེན་ལ་ནི་སངས་རྒྱས་ཀྱི་ཆོས་ཀྱི་འབྱུང་གནས་ཙམ་དུ་ལྟ། དགེ་བའི་བཤེས་གཉེན་ནི་སངས་རྒྱས་ཀྱི་ཆོས་སྟོན་པ་ཡིན་པར་ཡང་དག་པར་ལྟ། དགེ་བའི་བཤེས་གཉེན་ནི་ཐམས་ཅད་མཁྱེན་པ་ཉིད་ཀྱི་ཆོས་ལ་རྗེས་སུ་ལྟ། དགེ་བའི་བཤེས་གཉེན་ནི་སངས་རྒྱས་ནམ་མཁའ་བལྟ་བ་ལ་མིག་ཙམ་ཏུ་ལྟ་ཞིང་མཐར་གྱིས་ཕྱོགས་ཀྱི་གནས་རྒྱ་མཚོ་རྣམ་པར་རློབ་པའི་བཟའ་ཤིང་གི་ར་བ་ཀུན་ནས་རྣམ་པར་བརྒྱན་པ། གང་ན་བ་དེར་ཕྱིན་ནས་དེས་མཐོང་བ། བཟའ་ཤིང་གི་ར་བ་ཀུན་ནས་རྣམ་པར་བརྒྱན་པ། རིན་པོ་ཆེ་ཐམས་ཅད་ཀྱི་ར་བས་ཀུན་ནས་བསྐོར་བ། རིན་པོ་ཆེའི་ཤིང་གི་ཕྲེང་བ་སྤེལ་བ་ལེགས་པས་ཡོངས་སུ་བརྒྱན་པ། རིན་པོ་ཆེ་ཐམས་ཅད་ཀྱི་ཤིང་གི་ཕྲེང་བའི་མེ་ཏོག་སྲབ་བུ་ཡིད་དུ་འོང་བའི་སྤྲིན་རབ་ཏུ་འབྲུལ་བས་གཞི་རྒྱས་པ། རིན་པོ་ཆེ་ཐམས་ཅད་ཀྱི་ཤིང་གིས་ཡང་དག་པར་བརྒྱན་པ། ཤིང་ཐམས་ཅད་ཀྱི་མེ་ཏོག་ཤིན་ཏུ་རྒྱས་པ་སྣ་ཚོགས་ཀྱིས་ཡོངས་སུ་གང་བ། སྤོས་སྣ་ཚོགས་ཀྱི་ཤིང་གི་ཕྲེང་བ་ལས་ཕྱོགས་ཀུན་ཏུ་སྤོས་ཀྱི་ངད་ཞིམ་པ་རིན་པོ་ཆེའི་ཕྲེང་བའི་ཤིང་སྣ་ཚོགས་ཀྱི་ལྷུན་ལས་རིན་པོ་ཆེ་སྣ་ཚོགས་ཀྱི་ཕྲེང་བ་འཕྱང་བ། རབ་ཏུ་འབྱུང་ཞིང་ཆར་ལྟར་མངོན་པར་བབ་པ། རིན་པོ་ཆེའི་རྒྱལ་པོ་ཐམས་ཅད་ཀྱི་ཤིང་དང་ནོར་བུ་རིན་པོ་ཆེ་སྣ་ཚོགས་ཀྱིས་མཛེས་ཤིང་སྤ་ལ། རྒྱ་ཆེར་བརྒྱན་པའི་གཞི་ཅན་ཡིད་བཞིན་གྱི་གོས་ཀྱི་ཤིང་ཐམས་ཅད་ལས་ཁ་དོག་སྣ་ཚོགས་ཀྱི་གོས་འབྱུང་བས་གམ་ཡོ་ཁེབས་ཤིང་མཛེས་པར་བརྒྱན་པ། སིལ་སྙན་གྱི་ཤིང་ཐམས་ཅད་ལས་ལྷ་རྫས་ལས་ཀྱང་འཕགས་པའི་སིལ་སྙན་རླུང་གིས་བསྐྱོད་ཅིང་སྒྲ་འབྱིན་པའི་དབྱངས་སྙན་པར་འབྱུང་བ། སའི་གཞི་མཐོན་དམན་མེད་པར་གནས་པ་རྒྱན་གྱི་ཤིང་སྣ་ཚོགས་ཀྱི་གསེབ་ནས། རྒྱན་སྣ་
ཚོགས་རྣམ་པ་ཐ་དད་པ་རྒྱུན་ཏུ་འབྱུང་ཞིང་འཕྱང་བས། རབ་ཏུ་བརྒྱན་པའི་རྒྱན་དང་ལྡན་པ་མཐོང་སྟེ། བཟའ་ཤིང་གི་ར་བ་ཆེན་པོ་ཀུན་ནས་རྣམ་པར་བརྒྱན་པ་དེའི་ནང་ན་ཁང་པ་བྱེ་བ་བརྒྱ་སྟོང་ཕྲག་བཅུ་ཀུན་ཀྱང་ནོར་བུ་རིན་པོ་ཆེ་དམ་པ་སྣ་ཚོགས་ཀྱི་བ་གམ་གྱིས་རྣམ་པར་བརྒྱན་པ་དང་། ཁང་པ་བརྩེགས་པ་བརྒྱ་སྟོང་ཕྲག་བཅུ་འཛམ་བུ་ཆུ་ཀླུང་གི་གསེར་ལས་བརྩེགས་པའི་བདེ་དང་ལྡན་པ་དང་། གཞལ་མེད་ཁང་བརྒྱ་སྟོང་ཕྲག་བཅུ་ཀ་གདུང་རིན་པོ་ཆེ་རྣམ་པར་སྣང་བ། ལས་བྲེས་པ། རྫིང་བུ་བརྒྱ་སྟོང་ཕྲག་བཅུ་རིན་པོ་ཆེ་ཐམས་ཅད་ལས་གཞི་བླངས་ཏེ། རིན་པོ་ཆེ་སྣ་ཚོགས་ཀྱི་ཕ་གུས་མུ་ཁྱུད་བྱས་པ། རིན་པོ་ཆེ་ཐམས་ཅད་ཀྱི་ཐེམ་སྐས་བཏགས་པ། རིན་པོ་ཆེ་སྣ་ཚོགས་ཀྱི་སྟེགས་བུས་བསྐོར་བ། ལྷ་རྫས་ཀྱི་ཙན་དན་གྱི་དྲི་དང་ལྡན་པའི་ཆུས་གང་བ། གསེར་གྱི་བྱེ་མས་ཀུན་ཏུ་གྲམ་པ། གཞི་ནོར་བུ་རིན་པོ་ཆེ་ཆུ་འདང་ཀུན་ཏུ་བཀྲམ་པ། ཕྱོགས་བཞི་ནས་ཐེམ་སྐས་རྣམ་པར་བྲེས་པ། ཡན་ལག་བརྒྱད་དང་ལྡན་པའི་ཆུས་གང་བ། ང་ངུར་དང་། རྨ་བྱ་དང་། ཁུ་བྱུག་དང་། ཁྲུང་ཁྲུང་དང་། ཀ་ལ་པིང་ཀ་དང་། ཀུན་ལའི་སྒྲ་སྐད་སྙན་པའི་དབྱངས་དང་ལྡན་པ། རིན་པོ་ཆེའི་ཏ་ལའི་ཕྲེང་བས་ཀུན་ནས་བརྒྱན་པ། གསེར་གྱི་དྲིལ་བུའི་དྲ་བས་ཀུན་ནས་ཡོག་པ། རླུང་གིས་བསྐྱོད་པའི་སྒྲ་ཡིད་དུ་འོང་བ་འབྱུང་བ། སྟེང་ནས་རིན་པོ་ཆེའི་བླ་རེ་ཆེན་པོ་བྲེས་པ། རིན་པོ་ཆེ་སྣ་ཚོགས་ཀྱི་ཤིང་གི་ར་བས་ཡོངས་སུ་བསྐོར་བ། རིན་པོ་ཆེའི་དྲ་བས་བརྒྱན་པའི་གདུགས་དང་རྒྱལ་མཚན་ལེགས་པར་བསྒྲེང་བ། ལུ་མ་བརྒྱ་སྟོང་ཕྲག་བཅུ་དུས་དང་མཐུན་པའི་ཙན་དན་གྱི་འདམ་གྱིས་མཐའ་འཁོར་བ་རིན་པོ་ཆེ་སྣ་ཚོགས་ཀྱི་ཁ་དོག་ཏུ་འདུག་པའི་པད་མོས་ཡོངས་སུ་ཁྱབ་པ། རིན་པོ་ཆེའི་པད་མོའི་འོད་ཆེན་པོས་སྣང་བར་གྱུར་པའི་ཆུ་དྲི་མ་མེད་པ་དང་ལྡན་པ་ཡོད་པ་སྟེ། བཟའ་ཤིང་གི་ར་བ་དེའི་དབུས་ན་གཞལ་མེད་ཁང་ཆེན་པོ་
རྒྱལ་མཚན་སྣ་ཚོགས་ཞེས་བྱ་བ། སའི་གཞི་རིན་པོ་ཆེ་རྒྱ་མཚོའི་སྙིང་པོ་ལས་བླངས་པ། ནོར་བུ་རིན་པོ་ཆེའི་ཀ་བ་བཀྱེ་བ་འཛམ་བུ་ཆུ་ཀླུང་གི་གསེར་གྱི་ལྷུན་མངོན་པར་འཕགས་པ་ནོར་བུ་རིན་པོ་ཆེ་འགྲོ་བར་རྣམ་པར་སྣང་བའི་སྤང་ལེབ་བཀྱེ་བས་བརྒྱན་པ། གཞི་ནོར་བུ་རིན་པོ་ཆེ་འབར་བ་གྲངས་མེད་པའི་དྲ་བས་བྲེས་པ། རིན་པོ་ཆེའི་རྒྱལ་པོ་མི་ཕམ་པའི་སྤོས་ཀྱི་དྲིས་གམ་ཡོ་ཀུན་ནས་བདུགས་པ། རིན་པོ་ཆེའི་རྒྱལ་པོ་སྒྲ་སྙན་པ་འབྱིན་པའི་དྲི་ངད་ཀུན་ཏུ་ལྡང་བ། རིན་པོ་ཆེའི་རྒྱལ་པོ་དྲི་རྣམ་པར་གསལ་བར་བྱེད་པས་དབང་པོ་རྣོ་བའི་བག་ཆགས་རྣམ་པར་བསྒྲུབ་པ་དང་ལྡན་ཞིང་གཞལ་མེད་ཁང་ཆེན་པོ་རྒྱལ་མཚན་སྣ་ཚོགས་དེར་སྟན་གྲངས་མེད་ཅིང་ཚད་མེད་པ་བཏིང་བར་གྱུར་པ་འདི་ལྟ་སྟེ་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་ཕྱོགས་སྣང་བར་བྱེད་པའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་རྣམ་པར་སྣང་བའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་འགྲོ་བ་ཡིད་དུ་འོང་བའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་མཛོད་སྣ་ཚོགས་ཀྱི་པད་མོའི་སྙིང་པོ་ཅན་དང་། རིན་པོ་ཆེ་སེང་གེའི་ཤིང་ཐགས་ཀྱི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་དྲི་མ་མྱེད་པའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེས་བརྒྱན་པའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་སྒོ་ཀུན་ནས་བརྒྱན་པའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་འོད་ཀྱི་རྒྱན་གྱི་པད་མའི་སྙིང་པོ་ཅན་དང་། ནོར་བུ་རིན་པོ་ཆེ་རྒྱ་མཚོའི་གནས་རྣམ་པར་དག་པའི་རིན་པོ་ཆེས་རྣམ་པར་བརྒྱན་པའི་འོད་ཟེར་ཀུན་ཏུ་འབྱུང་བའི་པད་མོའི་སྙིང་པོ་ཅན་དང་། ནོར་བུ་རིན་པོ་ཆེ་རྡོ་རྗེའི་སེང་གེས་གནོན་པའི་པད་མོའི་སྙིང་པོ་ཅན་དག་བཤམས་ཤིང་བཏིང་བ་སྟེ། གཞལ་མེད་ཁང་ཆེན་པོ་རྒྱལ་མཚན་སྣ་ཚོགས་དེའི་བ་གམ་མང་པོ་ཡང་། རིན་པོ་ཆེ་བསམ་གྱིས་མི་ཁྱབ་པ་ལས་བྱས་པ་རིན་པོ་ཆེ་སྣ་ཚོགས་ཀྱིས་རྣམ་པར་བརྒྱན་པ། ཁ་དོག་བསམ་
གྱིས་མི་ཁྱབ་པར་མཛེས་ཤིང་གཟུགས་ཡིད་དུ་འོང་བ་དག་གོ །བཟའ་ཤིང་གི་ར་བ་ཀུན་ནས་བརྒྱན་པ་དེ། སྟེང་ནས་བླ་རེ་ཆེན་པོ་བརྒྱ་སྟོང་ཕྲག་བཅུས་ཀུན་ནས་ཁེབས་པ་སྟེ། འདི་ལྟར་གོས་ཀྱི་བླ་རེ་དང་ཁྲི་ཤིང་གི་བླ་རེ་དང་མེ་ཏོག་གི་བླ་རེ་དང་། ཕྲེང་བའི་བླ་རེ་དང་། སྤོས་ཀྱི་བླ་རེ་དང་། ནོར་བུ་རིན་པོ་ཆེའི་བླ་རེ་དང་། གསེར་གྱི་བླ་རེ་དང་། རྒྱན་གྱི་བླ་རེ་དང་། རིན་པོ་ཆེ་རྡོ་རྗེ་སྣང་བའི་བླ་རེ་དང་། གླང་པོའི་ཤུགས་དང་ལྡན་པས་སྤྲུལ་པའི་ལྷ་མོའི་བླ་རེ་དང་། ནོར་བུ་རིན་པོ་ཆེ་བརྒྱ་བྱིན་མངོན་པར་དགའ་བའི་བླ་རེ་དང་། དེ་དག་ལ་སོགས་པ་བླ་རེ་བརྒྱ་སྟོང་ཕྲག་བཅུས་ཀུན་ནས་ཁེབས་པར་བྱས་པའོ། །རིན་པོ་ཆེའི་དྲ་བ་བརྒྱ་སྟོང་ཕྲག་བཅུས་ཀུན་ནས་ཡོག་པ་སྟེ། འདི་ལྟར་རིན་པོ་ཆེ་དམ་པའི་དྲིལ་བུའི་དྲ་བ་དང་། རིན་པོ་ཆེའི་གདུགས་ཀྱི་དྲ་བ་དང་། རིན་པོ་ཆེའི་འབྲུའི་དྲ་བ་དང་། མུ་ཏིག་རྒྱ་མཚོའི་སྙིང་པོའི་དྲ་བ་དང་། ནོར་བུ་རིན་པོ་ཆེ་བཻ་ཌཱུརྱ་སྔོན་པོའི་དྲ་བ་དང་། སེང་གེའི་ཁྲི་ཤིང་གི་དྲ་བ་དང་། ནོར་བུ་རིན་པོ་ཆེ་ཆུ་ཤེལ་གྱི་དྲ་བ་དང་། སྤོས་ཀྱི་གཟུགས་ཀྱི་དྲ་བ་དང་། རིན་པོ་ཆེའི་ཅོད་པན་དང་། རིན་པོ་ཆེའི་ཕྲེང་བའི་དྲ་བ་དང་། དེ་དག་ལ་སོགས་པ་རིན་པོ་ཆེའི་དྲ་བ་བརྒྱ་སྟོང་ཕྲག་བཅུས་ཀུན་ནས་ཡོག་པ། སྣང་བ་ཆེན་པོ་བརྒྱ་སྟོང་ཕྲག་བཅུས་ཀྱང་ཀུན་ནས་ཡོག་པ་སྟེ། འདི་ལྟར་ནོར་བུ་རིན་པོ་ཆེ་སྐར་མའི་འོད་ཟེར་གྱི་སྣང་བ་དང་། ནོར་བུ་རིན་པོ་ཆེ་ཉི་མའི་སྙིང་པོའི་སྣང་བ་དང་། ནོར་བུ་རིན་པོ་ཆེ་ཟླ་བའི་རྒྱལ་མཚན་གྱི་སྣང་བ་དང་། ནོར་བུ་རིན་པོ་ཆེ་སྤོས་ཀྱི་དུད་པ་འོད་འཕྲོ་བའི་སྣང་བ་དང་། ནོར་བུ་རིན་པོ་ཆེ་དཔལ་གྱི་སྙིང་པོའི་སྣང་བ་དང་། ནོར་བུ་རིན་པོ་ཆེ་པད་མོའི་སྙིང་པོའི་སྣང་བ་དང་། ནོར་བུ་རིན་པོ་ཆེ་སྐར་མའི་རྒྱལ་མཚན་གྱི་སྣང་བ་དང་། ནོར་བུ་རིན་པོ་ཆེ་སྒྲོན་མ་ཆེན་པོའི་སྣང་བ་དང་། ནོར་བུ་རིན་པོ་ཆེ་ཕྱོགས་ཀུན་ཏུ་རྣམ་པར་སྣང་བའི་སྣང་བ་དང་། ནོར་བུ་རིན་པོ་ཆེ་སྤོས་ཀྱི་སྤྲིན་ཆེན་པོ་དང་།
ཀློག་གི་ཕྲེང་བ་འབྱུང་བའི་སྣང་བ་དང་། དེ་དག་ལ་སོགས་པ་ནོར་བུ་རིན་པོ་ཆེའི་སྣང་བ་ཆེན་པོ་བརྒྱ་སྟོང་ཕྲག་བཅུས་རྟག་ཏུ་སྣང་བར་བྱས་པའོ། །བཟའ་ཤིང་གི་ར་བ་དེ་ནི་རྒྱན་ཆེན་པོའི་སྤྲིན་བརྒྱ་སྟོང་ཕྲག་བཅུའི་ཆར་འབབ་པའི་རྒྱན་དང་ལྡན་པ་སྟེ། དུས་དང་མཐུན་པའི་ཙན་དན་གྱི་སྤྲིན་བརྒྱ་སྟོང་ཕྲག་བཅུའི་འབྲུག་སྒྲ་རབ་ཏུ་འབྱུང་བ། ལྷ་རྫས་ལས་འདས་པའི་ཕྲེང་བ་དང་། ལྡ་ལྡིའི་སྤྲིན་ཆེན་པོ་ཀུན་ཏུ་མཆེད་པས་རབ་ཏུ་བརྒྱན་པ། ལྷ་རྫས་ལས་འདས་པའི་གོས་ཚོན་སྣ་ཚོགས་དང་ལྡན་པའི་སྤྲིན་བརྒྱ་སྟོང་ཕྲག་བཅུའི་སྤྲིན་མངོན་པར་འབབ་པ། ལྷ་རྫས་ལས་འདས་པའི་རྒྱན་གྱི་སྤྲིན་བརྒྱ་སྟོང་ཕྲག་བཅུས་རྣམ་པར་ཀླུབས་པ། ལྷའི་བུ་བརྒྱ་སྟོང་ཕྲག་བཅུ་མཐོང་བར་དགའ་སྟེ། འོག་ཏུ་ལྟ་ཞིང་རབ་ཏུ་འདུད་པའི་ཕྱག་ཆར་བཞིན་དུ་འབབ་པ། ལྷ་མོའི་སྤྲིན་བརྒྱ་སྟོང་ཕྲག་བཅུ་སྔོན་གྱི་སྤྱོད་པའི་སྐལ་བ་མཉམ་པས་རང་རང་གི་ལུས་འབུལ་བའི་ཆར་མངོན་པར་འབབ་པ། བྱང་ཆུབ་སེམས་དཔའི་སྤྲིན་བརྒྱ་སྟོང་ཕྲག་བཅུ་ཆོས་མཉན་པས། སྐོམ་ཞིང་འོང་བའི་ཆར་མངོན་པར་འབབ་སྟེ། དེ་ན་དགེ་བསྙེན་མ་ཡིད་བཞིན་གསེར་གྱི་སྙིང་པོའི་ཁྲི་ཆེན་པོ་ལ་འདུག་ཅིང་། མུ་ཏིག་རྒྱ་མཚོའི་སྙིང་པོའི་དྲ་བས་བརྒྱན་པའི་ཅོད་པན་ཐོགས་པ། ལག་པ་ལ་ལྷ་རྫས་ལས་འདས་པའི་གསེར་གྱི་དཔུང་རྒྱན་དང་། གདུབ་བུ་ཐོགས་པ། ལག་པ་ནོར་བུ་རིན་པོ་ཆེ་དཔལ་གྱི་རང་བཞིན་གྱི་འོད་ཟེར་གྱིས་རྣམ་པར་མཛེས་པར་གྱུར་པ། རྣ་ཆ་རིན་པོ་ཆེ་མཐོན་ཏིང་དྲི་མ་མེད་པ་རབ་ཏུ་འཕྱང་བ། མགོ་ནོར་བུ་རིན་པོ་ཆེའི་དྲ་བས་མཛེས་པར་བརྒྱན་པ། ནོར་བུ་རིན་པོ་ཆེ་སེང་གེའི་གདོང་གི་རྣ་བའི་གོང་རྒྱན་ཐོགས་པ། ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོའི་མགུལ་ཀོར་ཐོགས་པ། ལུས་རིན་པོ་ཆེ་ཐམས་ཅད་ཀྱི་དྲ་བས་ཡོག་ཅིང་འོད་རབ་ཏུ་འབར་བ། སྲོག་ཆགས་བྱེ་བ་ཁྲག་ཁྲིག་གི་ལུས་རབ་ཏུ་བཏུད་དེ། ཕྱག་བྱ་བ་ཞིག་འདུག་སྟེ། དགེ་བསྙེན་མ་ཡིད་
བཞིན་དེའི་དྲུང་དུ་ཤར་ཕྱོགས་ནས་ཚངས་པ་ཆེན་པོའམ། ཚངས་ལྷ་ཉེ་ཕན་དང་། ཚངས་པའི་རིས་སུ་གཏོགས་པའམ། དབང་བྱེད་དམ། གཞན་འཕྲུལ་དབང་བྱེད་ཀྱི་རིས་སུ་གཏོགས་པའམ། རབ་འཕྲུལ་དགའ་འམ། འཕྲུལ་དགའི་རིས་སུ་གཏོགས་པའམ། རབ་དགའ་ལྡན་ནམ། དགའ་ལྡན་གྱི་རིས་སུ་གཏོགས་པའམ། རབ་མཚེ་མའམ། མཚེ་མའི་རིས་སུ་གཏོགས་པའམ། ལྷའི་དབང་པོའམ། སུམ་ཅུ་རྩ་གསུམ་གྱི་རིས་སུ་གཏོགས་པའམ། གནོད་སྦྱིན་གྱི་དབང་པོའམ། གནོད་སྦྱིན་ནམ། དྲི་ཟའི་དབང་པོའམ། དྲི་ཟའམ། གྲུལ་བུམ་གྱི་དབང་པོའམ། གྲུལ་བུམ་འམ། ཀླུའི་དབང་པོའམ། ཀླུའམ། ལྷ་མ་ཡིན་གྱི་དབང་པོའམ། ལྷ་མ་ཡིན་ནམ། ནམ་མཁའ་ལྡིང་གི་དབང་པོའམ ། ནམ་མཁའ་ལྡིང་ངམ། མིའམ་ཅིའི་དབང་པོའམ། མིའམ་ཅིའམ། ལྟོ་འཕྱེ་ཆེན་པོའི་དབང་པོའམ། ལྟོ་འཕྱེ་ཆེན་པོའམ། གཤིན་རྗེའམ། གཤིན་རྗེའི་བུ་མོའམ། ཡི་དགས་རྫུ་འཕྲུལ་ཆེན་པོའམ། ཡི་དགས་སམ། མིའི་དབང་པོའམ། མིའང་རུང་སྟེ། སེམས་ཅན་ཚད་མེད་གྲངས་མེད་པ་དག་འོང་བ་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་ནས་ཀྱང་། ཚངས་པ་ཆེན་པོའམ། ཚངས་ལྷ་ཉེ་ཕན་ནམ། ཚངས་པའི་རིས་སུ་གཏོགས་པའམ། དབང་བྱེད་དམ། དབང་བྱེད་ཀྱི་རིས་སུ་གཏོགས་པ་ནས། མིའི་དབང་པོའམ། མིའི་བར་གྱི་སེམས་ཅན་མང་པོ་འོང་བ། དེ་དག་ནད་སྣ་ཚོགས་ཞིག་གིས་བཏབ་པའམ། ཉོན་མོངས་པ་སྣ་ཚོགས་ཀྱིས་ཀུན་ནས་འཁོར་ཏམ། ལྟ་བའི་རྣམ་པ་སྣ་ཚོགས་ལ་མངོན་པར་ཞེན་ཏམ། ལས་ཀྱི་སྒྲིབ་པས་བསྒྲིབས་པ་ཞིག་ཡོད་ནའང་། དེ་དག་གིས་དགེ་བསྙེན་མ་ཡིད་
བཞིན་དེ་མཐོང་མ་ཐག་ཏུ་ནད་ཐམས་ཅད་ཀྱང་རབ་ཏུ་ཞི་བར་གྱུར། སེམས་ཅན་གྱི་ཉོན་མོངས་པའི་དྲི་མ་དང་ཡང་བྲལ་བར་གྱུར། ལྟ་བའི་གསལ་ཤིང་ཡང་ཕྱིན་པར་གྱུར། སྒྲིབ་པའི་རི་ཐམས་ཅད་ཀྱང་རྣམ་པར་བཤིག་པར་གྱུར། རྣམ་པར་དག་པའི་དཀྱིལ་འཁོར་བསྒྲིབས་པ་མེད་པ་ཡང་ཁོང་དུ་ཆུད་པར་གྱུར་ཏེ། རྣམ་པར་དག་པའི་དཀྱིལ་འཁོར་དེ་ཡོད་པས་ནི་དགེ་བའི་རྩ་བ་ཐམས་ཅད་ཀྱང་རབ་ཏུ་བྱང་བར་གྱུར། དབང་པོའི་མྱུ་གུ་ཐམས་ཅད་ཀྱང་རྣམ་པར་འཕེལ་བར་གྱུར། ཐམས་ཅད་མཁྱེན་པའི་ཡེ་ཤེས་ཀྱི་ཚུལ་རྒྱ་མཚོ་ལ་ཡང་དག་པར་གཞོལ་བར་གྱུར། གཟུངས་ཀྱི་སྒོ་རྒྱ་མཚོ་ཐམས་ཅད་ལའང་འཇུག་པར་གྱུར། ཏིང་ངེ་འཛིན་གྱི་སྒོ་དང་ཚུལ་རྒྱ་མཚོ་ཐམས་ཅད་ཀྱང་མངོན་སུམ་དུ་གྱུར། སྨོན་ལམ་གྱི་སྒོ་ཐམས་ཅད་ཀྱང་ཡང་དག་པར་སྐྱེ་བར་གྱུར། སྤྱོད་པའི་སྒོ་ཐམས་ཅད་ཀྱང་རབ་ཏུ་བྱུང་བར་གྱུར། ཡོན་ཏན་མངོན་པར་བསྒྲུབ་པའི་སྒོ་ཐམས་ཅད་ཀྱང་རྣམ་པར་དག་པར་གྱུར། སེམས་རྒྱ་ཆེན་པོ་ཡང་མངོན་པར་ཤེས་པ་ཐམས་ཅད་དང་ལྡན་པའི་ཚུལ་དུ་བྱུང་བར་གྱུར། ལུས་ཐོགས་པ་མེད་པས་ཀྱང་ཐམས་ཅད་དུ་རྗེས་སུ་འགྲོ་བར་གྱུར་ཏོ། །དེ་ནས་ཚོང་དཔོན་གྱི་བུ་ནོར་བཟངས་བཟའ་ཤིང་གི་ར་བ་ཀུན་ནས་རྣམ་པར་བརྒྱན་པའི་ནང་དུ་ཕྱིན་ཏེ་བལྟས་ནས། དགེ་བསྙེན་མ་ཡིད་བཞིན་ཁྲི་བཟང་པོ་ལ་འདུག་པ་མཐོང་ནས། དེ་དགེ་བསྙེན་མ་ཡིད་བཞིན་གང་ན་བ་དེར་སོང་སྟེ། ཕྱིན་ནས་དགེ་བསྙེན་མ་ཡིད་བཞིན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་བསྙེན་མ་ཡིད་བཞིན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་
མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་ཐོས་ན། འཕགས་མ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། དེས་སྨྲས་པ་རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་མྱ་ངན་མེད་པ་བདེ་བའི་རྒྱལ་མཚན་ཐོབ་པ་སྟེ། རིགས་ཀྱི་བུ་ཁོ་མོ་ནི་དེའི་མཐུས་མཐོང་ན་དོན་ཡོད་པའོ། །མཉན་ན་དོན་ཡོད་པའོ། །རིམ་གྲོར་བྱས་ན་དོན་ཡོད་པའོ། །གནས་གཅིག་ན་འགྲོགས་པ་དོན་ཡོད་པའོ། ། རྗེས་སུ་དྲན་པར་བྱས་པ་དོན་ཡོད་པའོ། །རིགས་ཀྱི་བུ་ཁོ་མོ་ནི་སེམས་ཅན་དགེ་བའི་རྩ་བ་མ་བསྐྱེད་པ། དགེ་བའི་བཤེས་གཉེན་གྱིས་ཡོངས་སུ་མ་ཟིན་པ། ཡང་དག་པར་རྫོགས་པའི་སངས་རྒྱས་ཀྱིས་མ་དགོངས་པ་རྣམས་ཀྱིས་མཐོང་ཞིང་རྣམ་པར་དམིགས་པར་མིག་ལམ་དུ་འོང་བར་མི་འགྱུར་ཏེ། རིགས་ཀྱི་བུ་ཁོ་མོ་མཐོང་བ་ཙམ་གྱིས་ནི་སེམས་ཅན་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །གཞན་ཡང་རིགས་ཀྱི་བུ་ཁོ་མོའི་དྲུང་དུ་ཤར་ཕྱོགས་ནས་དེ་བཞིན་གཤེགས་པ་དག་བྱོན་ཅིང་། གདན་རིན་པོ་ཆེའི་ཁྲི་འདི་ལ་བཞུགས་ནས་ཆོས་སྟོན་ཏོ། །ཤར་ཕྱོགས་ནས་ཇི་ལྟ་བ་བཞིན་དུ་ཕྱོགས་བཅུ་ནས་ཀྱང་དེ་བཞིན་ཏེ། རིགས་ཀྱི་བུ་དེ་ལྟ་བས་ན། ཁོ་མོ་ནི་དེ་བཞིན་གཤེགས་པ་མཐོང་བ་དང་མི་འབྲལ་བའོ། །ཆོས་མཉན་པ་དང་མི་འབྲལ་བའོ། །བྱང་ཆུབ་སེམས་དཔའ་དང་འགྲོགས་པ་དང་མི་འབྲལ་བའོ། །རིགས་ཀྱི་བུ་ཁོ་མོ་དང་སྤྱོད་པའི་སྐལ་བ་མཉམ་པའི་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པོ་བཟའ་ཤིང་གི་ར་བ་ཀུན་ནས་རྣམ་པར་བརྒྱན་པ་འདི་ན་གནས་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤ་སྟག་གོ །རིགས་
ཀྱི་བུ་སེམས་ཅན་གཞན་གང་འདི་ན་གནས་པ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ། ཕྱིར་མི་ལྡོག་པའི་དགེ་འདུན་དུ་གཏོགས་པ་ཤ་སྟག་སྟེ། ཁོ་མོ་དང་སྤྱོད་པའི་སྐལ་བ་མཉམ་པ་དག་གོ །སྨྲས་པ་ལས་འཕགས་མ་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡུན་ཇི་སྲིད་ཅིག་ནས་ཐུགས་བསྐྱེད། སྨྲས་པ་རིགས་ཀྱི་བུ་ཁོ་མོ་ནི་སྔོན་གྱི་གནས་རྗེས་སུ་དྲན་ནོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཅེས་བྱ་བ་བྱུང་བ་དེ་བཞིན་གཤེགས་པ་དེའི་དྲུང་དུ་ཁོ་མོས་ཚངས་པའི་སྤྱོད་པ་སྤྱད་དོ། །དེ་བཞིན་གཤེགས་པ་དེ་ཁོ་མོས་མཆོད་དོ། །དེ་བཞིན་གཤེགས་པ་དེ་ལས་ཆོས་བསྟན་པ་ཁོ་མོས་ཡོངས་སུ་བཟུང་ངོ་། །དེའི་སྔ་རོལ་དུ་དེ་བཞིན་གཤེགས་པ་དྲི་མ་མེད་པ་ཞེས་བྱ་བ་བྱུང་སྟེ། དེའི་བསྟན་པ་ལའང་ཁོ་མོ་རབ་ཏུ་བྱུང་ངོ་། །ཆོས་ཀྱི་འཁོར་ལོ་ཡང་ཁོ་མོས་བཟུང་ངོ་། །དེའི་སྔ་རོལ་དུ་དེ་བཞིན་གཤེགས་པ་དཔལ་ཞེས་བྱ་བ་བྱུང་སྟེ། དེ་ཡང་ཁོ་མོས་བསྙེན་བཀུར་ཏོ། །དེའི་སྔ་རོལ་ཏུ་དེ་བཞིན་གཤེགས་པ་རི་རབ་དཔལ་ཞེས་བྱ་བ་བྱུང་ངོ་། །དེའི་སྔ་རོལ་ཏུ་དེ་བཞིན་གཤེགས་པ་པད་མོའི་སྙིང་པོ་ཞེས་བྱ་བ་བྱུང་ངོ་། །དེའི་སྔ་རོལ་ཏུ་དེ་བཞིན་གཤེགས་པ་རྣམ་པར་སྣང་མཛད་ཅེས་བྱ་བ་བྱུང་ངོ་། །དེའི་སྔ་རོལ་ཏུ་དེ་བཞིན་གཤེགས་པ་ཀུན་ཏུ་གཟིགས་པ་ཞེས་བྱ་བ་བྱུང་ངོ་། །དེའི་སྔ་རོལ་ཏུ་དེ་བཞིན་གཤེགས་པ་ཚངས་པ་དག་པ་ཞེས་བྱ་བ་བྱུང་ངོ་། །དེའི་སྔ་རོལ་ཏུ་དེ་བཞིན་གཤེགས་པ་རྡོ་རྗེའི་གཙུག་ཅེས་བྱ་བ་བྱུང་ངོ་། །དེའི་ཀུན་སྔ་རོལ་ཏུ་དེ་བཞིན་གཤེགས་པ་ཆུ་བོའི་ལྷ་ཞེས་བྱ་བ་བྱུང་སྟེ། རིགས་ཀྱི་བུ་གཞུང་དེ་ལྟར་ཚེ་གཅིག་ནས་གཅིག་ཏུ་བརྒྱུད་པ་དང་། བསྐལ་པ་གཅིག་ནས་གཅིག་ཏུ་བརྒྱུད་པའི་སངས་རྒྱས་གཅིག་ནས་གཅིག་ཏུ་བརྒྱུད་པ། དེ་བཞིན་གཤེགས་
པའི་མཚམས་འདབ་ཆགས་སུ་བསམས་ཏེ། དྲན་པར་བྱས་ན། གང་ཁོ་མོས་རིམ་གྲོར་བྱས་ཏེ། བསྙེན་བཀུར་བ་དང་། མཆོད་པ་དང་། བསྟི་སྟང་དུ་བྱས་པ་དང་། གང་གི་སྤྱན་སྔར་ཁོ་མོས་ཆོས་ཐོས་པར་གྱུར་པ་དང་། གང་གི་བསྟན་པ་ལ་ཁོ་མོས་ཚངས་པའི་སྤྱོད་པ་སྤྱད་པའི་དེ་བཞིན་གཤེགས་པ་ཆུ་ཀླུང་གང་གཱ་སུམ་ཅུ་རྩ་དྲུག་གི་བྱེ་མ་སྙེད་རྗེས་སུ་དྲན་ཏེ། རིགས་ཀྱི་བུ་དེ་ཕན་ཅད་དུ་ཁོ་མོས་དེ་བཞིན་གཤེགས་པ་ཇི་སྙེད་ཅིག་བསྙེན་བཀུར་བ་ནི། དེ་བཞིན་གཤེགས་པ་རྣམས་ཀྱིས་མཁྱེན་ཏོ། །རིགས་ཀྱི་བུ་སེམས་དང་པོ་བསྐྱེད་མ་ཐག་ཏུ་ཆོས་ཀྱི་དབྱིངས་རྒྱས་པར་འགེངས་པས་བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་སྙིང་རྗེ་ཆེན་པོའི་ཁོངས་སུ་འགྲོ་བ་ཐམས་ཅད་ཆུད་པས། བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་སྨོན་ལམ་ཆེན་པོས་ཕྱོགས་བཅུའི་ཆོས་ཀྱི་དབྱིངས་ཀྱི་གཞི་ཟད་ཟད་དུ་འགྲོ་བས་བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་བྱམས་པ་ཆེན་པོས་འགྲོ་བ་ཐམས་ཅད་རྒྱས་པར་འགེངས་པའི་ཕྱིར། བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་བྱང་ཆུབ་སེམས་དཔའི་སྤྱོད་པས་ཞིང་ཐམས་ཅད་དུ་བསྐལ་པ་ཐམས་ཅད་ཡོངས་སུ་སྡུད་པས། བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་ཏིང་ངེ་འཛིན་གྱི་སྟོབས་ཀྱིས་བྱང་ཆུབ་སེམས་དཔའི་ལམ་ལས་ཕྱིར་མི་ལྡོག་པས་བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་གཟུངས་ཀྱི་སྟོབས་ཀྱིས་འགྲོ་བ་ཐམས་ཅད་ཡོངས་སུ་འཛིན་པའི་གཟུངས་ཀྱི་ཚུལ་ཁོང་དུ་ཆུད་པར་བྱེད་པས་བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་ཡེ་ཤེས་སྣང་བའི་སྟོབས་ཀྱིས་དུས་གསུམ་གྱི་ཡེ་ཤེས་ཀྱི་ཚུལ། ཁོང་དུ་ཆུད་པར་བྱེད་ཅིང་། ཡང་དག་པར་འཛིན་པས་བྱང་ཆུབ་སེམས་དཔའ་རྣམས་ནི་ཚད་མེད་
པའོ། །རིགས་ཀྱི་བུ་མངོན་པར་ཤེས་པའི་སྟོབས་ཀྱིས་ཞིང་ཐམས་ཅད་དུ་སེམས་ཅན་རྣམས་ཀྱི་བསམ་པ་དང་། མོས་པ་ཅི་ལྟ་བ་བཞིན་དུ་འོད་ཀྱི་དྲ་བའི་འཁོར་ལོ་མངོན་པར་བསྒྲུབ་པས་བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་སོ་སོ་ཡང་དག་པར་རིག་པའི་སྟོབས་ཀྱིས་ཚིག་གཅིག་བརྗོད་ཀྱང་འགྲོ་བ་ཐམས་ཅད་ཤིན་ཏུ་ཚིམ་པར་བྱེད་པས། བྱང་ཆུབ་སེམས་དཔའ་རྣམས་ནི་ཚད་མེད་པའོ། །རིགས་ཀྱི་བུ་ལུས་རྣམ་པར་དག་པས། སངས་རྒྱས་ཀྱི་ཞིང་ཐམས་ཅད་རང་གི་ལུས་ཀྱིས་རྒྱས་པར་འགེངས་པས། བྱང་ཆུབ་སེམས་དཔའ་རྣམས་ནི་ཚད་མེད་པའོ། །ནོར་བཟངས་ཀྱིས་སྨྲས་པ། འཕགས་མ་ཁྱོད་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར། སྨྲས་པ་རིགས་ཀྱི་བུ་འདི་ལྟ་སྟེ། སེམས་ཅན་གཅིག་ཅིག་ལ་དམིགས་ཤིང་གདུལ་བར་བྱ་བ་དང་། སྨིན་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་ཏེ། སེམས་ཅན་བརྒྱའི་ཕྱིར་མ་ཡིན། སེམས་ཅན་སྟོང་གི་ཕྱིར་མ་ཡིན། སེམས་ཅན་བརྒྱ་ཕྲག་སྟོང་གི་ཕྱིར་མ་ཡིན། སེམས་ཅན་བྱེ་བའི་ཕྱིར་མ་ཡིན། སེམས་ཅན་བྱེ་བ་བརྒྱའི་ཕྱིར་མ་ཡིན། སེམས་ཅན་བྱེ་བ་སྟོང་གི་ཕྱིར་མ་ཡིན། སེམས་ཅན་བྱེ་བ་བརྒྱ་ཕྲག་སྟོང་གི་ཕྱིར་མ་ཡིན་ཏེ། སེམས་ཅན་བྱེ་བ་ཁྲག་ཁྲིག་བརྒྱ་ཕྲག་སྟོང་གི་དོན་དུ། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་ནོ། །སེམས་ཅན་ཐམས་ཐམས་ཀྱི་ཕྱིར་མ་ཡིན། སེམས་ཅན་ཁྲག་ཁྲིག་གི་ཕྱིར་མ་ཡིན། སེམས་ཅན་གང་ཡའི་ཕྱིར་མ་ཡིན། སེམས་ཅན་བན་བུན་གྱི་ཕྱིར་མ་ཡིན། སེམས་ཅན་ཕྱར་ཕྱུར་གྱི་ཕྱིར་མ་ཡིན། སེམས་ཅན་བྱང་བྱིང་གི་ཕྱིར་མ་ཡིན། སེམས་ཅན་ཉེར་འཇལ་གྱི་ཕྱིར་མ་ཡིན། སེམས་ཅན་ཕྱལ་ཕྱོལ་གྱི་ཕྱིར་མ་ཡིན།
སེམས་ཅན་ཡལ་ཡོལ་གྱི་ཕྱིར་མ་ཡིན། སེམས་ཅན་ལྗད་ལྗོད་ཀྱི་ཕྱིར་མ་ཡིན། སེམས་ཅན་ཕྱོད་ཟིམ་གྱི་ཕྱིར་མ་ཡིན། སེམས་ཅན་ཕྱད་ཕྱོད་ཀྱི་ཕྱིར་མ་ཡིན། སེམས་ཅན་ལྡམ་ལྡེམ་གྱི་ཕྱིར་མ་ཡིན། སེམས་ཅན་ཡ་གངས་ཀྱི་ཕྱིར་མ་ཡིན། སེམས་ཅན་ཆོ་མའི་ཕྱིར་མ་ཡིན། སེམས་ཅན་ཁྲམ་ཁྲིམ་གྱི་ཕྱིར་མ་ཡིན། སེམས་ཅན་ནབ་ནུབ་ཀྱི་ཕྱིར་མ་ཡིན། སེམས་ཅན་བརྒྱུད་ཡས་ཀྱི་ཕྱིར་མ་ཡིན། སེམས་ཅན་བཏང་ཡས་ཀྱི་ཕྱིར་མ་ཡིན། སེམས་ཅན་བཀྲ་ཡར་གྱི་ཕྱིར་མ་ཡིན། སེམས་ཅན་གསལ་ཡས་ཀྱི་ཕྱིར་མ་ཡིན། སེམས་ཅན་གཞལ་བརྟག་གི་ཕྱིར་མ་ཡིན། སེམས་ཅན་མཚུངས་མེད་ཀྱི་ཕྱིར་མ་ཡིན། སེམས་ཅན་ལམ་ལུམ་གྱི་ཕྱིར་མ་ཡིན། སེམས་ཅན་རབ་རིབ་ཀྱི་ཕྱིར་མ་ཡིན། སེམས་ཅན་ཐབ་ཐིབ་ཀྱི་ཕྱིར་མ་ཡིན། སེམས་ཅན་འགྲིགས་ཡོལ་གྱི་ཕྱིར་མ་ཡིན། སེམས་ཅན་ཐེན་ཕྱོའི་ཕྱིར་མ་ཡིན། སེམས་ཅན་བསམ་ཕྱོད་ཀྱི་ཕྱིར་མ་ཡིན། སེམས་ཅན་འདྲ་མཉམ་གྱི་ཕྱིར་མ་ཡིན། སེམས་ཅན་བྲང་བྲེང་གི་ཕྱིར་མ་ཡིན། སེམས་ཅན་བགྲོང་ཡས་ཀྱི་ཕྱིར་མ་ཡིན། སེམས་ཅན་རྒྱས་འདལ་གྱི་ཕྱིར་མ་ཡིན། སེམས་ཅན་བསྔོ་ཡས་ཀྱི་ཕྱིར་མ་ཡིན། སེམས་ཅན་ཟང་ཡག་གི་ཕྱིར་མ་ཡིན། སེམས་ཅན་འཕྲོ་བཀྱེའི་ཕྱིར་མ་ཡིན། སེམས་ཅན་རྩེ་འཕྱོའི་ཕྱིར་མ་ཡིན། སེམས་ཅན་ཡོང་ཏན་གྱི་ཕྱིར་མ་ཡིན། སེམས་ཅན་འབྲུག་གཡོས་ཀྱི་ཕྱིར་མ་ཡིན། སེམས་ཅན་སང་ཡལ་གྱི་ཕྱིར་མ་ཡིན། སེམས་ཅན་ཐིང་ཡུག་གི་ཕྱིར་མ་ཡིན། སེམས་ཅན་སྣང་ཡལ་གྱི་ཕྱིར་མ་ཡིན། སེམས་ཅན་ནན་པའི་ཕྱིར་མ་ཡིན། སེམས་ཅན་ཡིད་འཕྱོའི་ཕྱིར་མ་ཡིན། སེམས་ཅན་ནབ་ནེབ་ཀྱི་ཕྱིར་མ་ཡིན། སེམས་ཅན་ཁྲིག་ཐམས་ཀྱི་ཕྱིར་མ་ཡིན། སེམས་ཅན་ཡལ་ཡོལ་གྱི་ཕྱིར་མ་ཡིན། སེམས་ཅན་བགྲང་ཡས་ཀྱི་ཕྱིར་མ་ཡིན།
སེམས་ཅན་ཐུག་ཡལ་གྱི་ཕྱིར་མ་ཡིན། སེམས་ཅན་ཡད་ཡུད་ཀྱི་ཕྱིར་མ་ཡིན། སེམས་ཅན་ཕྱོ་ལྡོག་གི་ཕྱིར་མ་ཡིན། སེམས་ཅན་བརྡ་ཡས་ཀྱི་ཕྱིར་མ་ཡིན། སེམས་ཅན་ལྷུབ་བེའི་ཕྱིར་མ་ཡིན། སེམས་ཅན་ཐག་ཐུག་གི་ཕྱིར་མ་ཡིན། སེམས་ཅན་ཁྲིག་གེའི་ཕྱིར་མ་ཡིན། སེམས་ཅན་རིག་ཡས་ཀྱི་ཕྱིར་མ་ཡིན། སེམས་ཅན་སྙད་མེད་ཀྱི་ཕྱིར་མ་ཡིན། སེམས་ཅན་མཆོག་ཕྲེང་གི་ཕྱིར་མ་ཡིན། སེམས་ཅན་ཉག་འབྲུའི་ཕྱིར་མ་ཡིན། སེམས་ཅན་སྤུ་འཕྱེས་ཀྱི་ཕྱིར་མ་ཡིན། སེམས་ཅན་འབྲུ་འབྲེལ་གྱི་ཕྱིར་མ་ཡིན། སེམས་ཅན་བརྗོད་འོས་ཀྱི་ཕྱིར་མ་ཡིན། སེམས་ཅན་ལྷོད་ཡས་ཀྱི་ཕྱིར་མ་ཡིན། སེམས་ཅན་བརྗོད་ཕུལ་གྱི་ཕྱིར་མ་ཡིན། སེམས་ཅན་ཞི་སྙད་ཀྱི་ཕྱིར་མ་ཡིན། སེམས་ཅན་ངག་ཐིམ་གྱི་ཕྱིར་མ་ཡིན། སེམས་ཅན་འཕྱོ་འགྱུར་གྱི་ཕྱིར་མ་ཡིན། སེམས་ཅན་ཉར་ཉེར་གྱི་ཕྱིར་མ་ཡིན། སེམས་ཅན་ཕྱག་ཕྱིག་གི་ཕྱིར་མ་ཡིན། སེམས་ཅན་ཟལ་ཟུལ་གྱི་ཕྱིར་མ་ཡིན། སེམས་ཅན་སལ་སལ་གྱི་ཕྱིར་མ་ཡིན། སེམས་ཅན་གཡོ་ལྡེག་གི་ཕྱིར་མ་ཡིན། སེམས་ཅན་ཕན་ཕུན་གྱི་ཕྱིར་མ་ཡིན། སེམས་ཅན་བརྣང་ཡའི་ཕྱིར་མ་ཡིན། སེམས་ཅན་རེམ་གྲོལ་གྱི་ཕྱིར་མ་ཡིན། སེམས་ཅན་རྫི་ངད་ཀྱི་ཕྱིར་མ་ཡིན། སེམས་ཅན་རྫི་རྡུལ་གྱི་ཕྱིར་མ་ཡིན། སེམས་ཅན་ཕུན་ཡོལ་གྱི་ཕྱིར་མ་ཡིན། སེམས་ཅན་འོལ་འོལ་གྱི་ཕྱིར་མ་ཡིན། སེམས་ཅན་ངད་ངད་ཀྱི་ཕྱིར་མ་ཡིན། སེམས་ཅན་བགྲང་བརྩིའི་ཕྱིར་མ་ཡིན། སེམས་ཅན་ཟབ་བགྲང་གི་ཕྱིར་མ་ཡིན། སེམས་ཅན་དགའ་རྐྱང་གི་ཕྱིར་མ་ཡིན། སེམས་ཅན་གྲངས་མཐའི་ཕྱིར་མ་ཡིན། སེམས་ཅན་ཕྱོད་ཡལ་གྱི་ཕྱིར་མ་ཡིན། སེམས་ཅན་འོལ་ཕྱོད་ཀྱི་ཕྱིར་མ་ཡིན། སེམས་ཅན་གདབ་ཡས་ཀྱི་ཕྱིར་མ་ཡིན། སེམས་ཅན་གཅལ་ཡས་ཀྱི་ཕྱིར་མ་ཡིན།
སེམས་ཅན་བགྲང་ཡས་ཀྱི་ཕྱིར་མ་ཡིན། སེམས་ཅན་བྱིམ་འཕྱོའི་ཕྱིར་མ་ཡིན། སེམས་ཅན་ཡམ་མེའི་ཕྱིར་མ་ཡིན། སེམས་ཅན་བསྙལ་ཡས་ཀྱི་ཕྱིར་མ་ཡིན། སེམས་ཅན་ལྡབ་ལྡོབ་ཀྱི་ཕྱིར་མ་ཡིན། སེམས་ཅན་འཕན་ཆད་ཀྱི་ཕྱིར་མ་ཡིན། སེམས་ཅན་ཕང་ཕུང་གི་ཕྱིར་མ་ཡིན། སེམས་ཅན་མཐའ་རྡུལ་གྱི་ཕྱིར་མ་ཡིན། སེམས་ཅན་རྒྱུ་ལྡིང་གི་ཕྱིར་མ་ཡིན། སེམས་ཅན་ཡུན་འགྱངས་ཀྱི་ཕྱིར་མ་ཡིན། སེམས་ཅན་མཁའ་ཡལ་གྱི་ཕྱིར་མ་ཡིན། སེམས་ཅན་བུན་ལོབ་ཀྱི་ཕྱིར་མ་ཡིན། སེམས་ཅན་ལམ་ལོམ་གྱི་ཕྱིར་མ་ཡིན། སེམས་ཅན་བསྙད་ཡས་ཀྱི་ཕྱིར་མ་ཡིན། སེམས་ཅན་ལང་ལིང་གི་ཕྱིར་མ་ཡིན། སེམས་ཅན་ལྗབ་ལྗིབ་ཀྱི་ཕྱིར་མ་ཡིན། སེམས་ཅན་མི་བརྩལ་གྱི་ཕྱིར་མ་ཡིན། སེམས་ཅན་འབྱམ་ཡས་ཀྱི་ཕྱིར་མ་ཡིན། སེམས་ཅན་ང་འགྲང་གི་ཕྱིར་མ་ཡིན། སེམས་ཅན་སྨོས་ཡལ་གྱི་ཕྱིར་མ་ཡིན། སེམས་ཅན་བཀྲ་ཆལ་གྱི་ཕྱིར་མ་ཡིན། སེམས་ཅན་ལོ་རྒྱས་ཀྱི་ཕྱིར་མ་ཡིན། སེམས་ཅན་འབུམ་རྡིབ་ཀྱི་ཕྱིར་མ་ཡིན། སེམས་ཅན་ལ་ལོའི་ཕྱིར་མ་ཡིན། སེམས་ཅན་ཕྱམ་ཕྱམ་གྱི་ཕྱིར་མ་ཡིན། སེམས་ཅན་བགྲང་ཕྱོས་ཀྱི་ཕྱིར་མ་ཡིན། སེམས་ཅན་བགྲང་ཕྱོས་ལ་བསྒྲེས་པའི་ཕྱིར་མ་ཡིན། སེམས་ཅན་དཔག་ཡས་ཀྱི་ཕྱིར་མ་ཡིན། སེམས་ཅན་དཔག་ཡས་ལ་བསྒྲེས་པའི་ཕྱིར་མ་ཡིན། སེམས་ཅན་ཡལ་ཕྱོང་གི་ཕྱིར་མ་ཡིན། སེམས་ཅན་ཡལ་ཕྱོང་ལ་བསྒྲེས་པའི་ཕྱིར་མ་ཡིན། སེམས་ཅན་མུ་ཡལ་གྱི་ཕྱིར་མ་ཡིན། སེམས་ཅན་མུ་ཡལ་ལ་བསྒྲེས་པའི་ཕྱིར་མ་ཡིན། སེམས་ཅན་བགྲང་ཡོལ་གྱི་ཕྱིར་མ་ཡིན། སེམས་ཅན་བགྲང་ཡོལ་ལ་བསྒྲེས་པའི་ཕྱིར་མ་ཡིན། སེམས་ཅན་མི་འཇལ་གྱི་ཕྱིར་མ་ཡིན། སེམས་ཅན་
མི་འཇལ་ལ་བསྒྲེས་པའི་ཕྱིར་མ་ཡིན། སེམས་ཅན་བསམ་ཕྱོད་ཀྱི་ཕྱིར་མ་ཡིན། སེམས་ཅན་བསམ་ཕྱོད་ལ་བསྒྲེས་པའི་ཕྱིར་མ་ཡིན། སེམས་ཅན་མཐའ་འབྱམ་གྱི་ཕྱིར་མ་ཡིན། སེམས་ཅན་མཐའ་འབྱམ་ལ་བསྒྲེས་པའི་ཕྱིར་མ་ཡིན། སེམས་ཅན་དཔག་ཐག་གི་ཕྱིར་མ་ཡིན། སེམས་ཅན་དཔག་ཐག་ལ་བསྒྲེས་པའི་ཕྱིར་མ་ཡིན། སེམས་ཅན་བརྗོད་དུ་མེད་པའི་ཕྱིར་མ་ཡིན། སེམས་ཅན་བརྗོད་དུ་མེད་པ་ལ་བསྒྲེས་པའི་ཕྱིར་མ་ཡིན། སེམས་ཅན་བརྗོད་དུ་མེད་པའི་ཡང་བརྗོད་དུ་མེད་པའི་ཕྱིར་མ་ཡིན། སེམས་ཅན་བརྗོད་དུ་མེད་པའི་ཡང་བརྗོད་དུ་མེད་པ་ལ་བསྒྲེས་པའི་ཕྱིར་མ་ཡིན། སེམས་ཅན་འཇིག་རྟེན་གྱི་ཁམས་གཅིག་ཏུ་གཏོགས་པ་རྣམས་ཀྱི་ཕྱིར་མ་ཡིན་པ་ནས། བརྗོད་དུ་མེད་པའི་ཡང་བརྗོད་དུ་མེད་པའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་ཕྱིར་མ་ཡིན། གླིང་བཞི་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་ཕྱིར་མ་ཡིན། སྟོང་གི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་ཕྱིར་མ་ཡིན། སྟོང་གཉིས་ཀྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་ཕྱིར་མ་ཡིན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་ཕྱིར་མ་ཡིན་པ་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་དོན་དུ་འདི་ལྟ་སྟེ་ཡོངས་སུ་སྨིན་པར་བྱ་བ་དང་། གདུལ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་
ཏུ་སྐྱེ་བ་མ་ཡིན་གྱི། འདི་ལྟ་སྟེ། འཇིག་རྟེན་གྱི་ཁམས་མ་ལུས་པ་ལྷག་མ་མེད་པ་མཐའ་དག་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་དོན་དུ་ཡོངས་སུ་སྨིན་པར་བྱ་བ་དང་། གདུལ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེའོ། །འདི་ལྟ་སྟེ་སངས་རྒྱས་གཅིག་བསྙེན་བཀུར་བ་དང་། མཉེས་པར་བྱ་བ་དང་། མཆོད་ཅིང་རིམ་གྲོར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་དང་། སངས་རྒྱས་བཅུ་བསྙེན་བཀུར་ཞིང་མཉེས་པར་བྱ་བ་དང་། མཆོད་ཅིང་རིམ་གྲོར་བྱ་བའི་ཕྱིར་མ་ཡིན་པ་ནས། བརྗོད་དུ་མེད་པའི་ཡང་བརྗོད་དུ་མེད་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་བསྙེན་བཀུར་ཞིང་མཉེས་པར་བྱ་བ་དང་། མཆོད་ཅིང་རིམ་གྲོར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། འཇིག་རྟེན་གྱི་ཁམས་གཅིག་ཏུ་གཏོགས་པའི་སངས་རྒྱས་ཀྱི་རྒྱུད་བསྙེན་བཀུར་ཞིང་མཉེས་པར་བྱ་བ་དང་། མཆོད་ཅིང་རིམ་གྲོར་བྱ་བའི་ཕྱིར་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་དེ་བཞིན་གཤེགས་པའི་རྒྱུད་བསྙེན་བཀུར་ཞིང་མཉེས་པར་བྱ་བ་དང་། མཆོད་ཅིང་རིམ་གྲོར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་ནོ། །སངས་རྒྱས་ཀྱི་ཞིང་གཅིག་ཡོངས་སུ་དག་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། དེ་བཞིན་གཤེགས་པ་གཅིག་གི་བསྟན་པ་ཡོངས་སུ་གཟུང་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་
སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་དེ་བཞིན་གཤེགས་པའི་བསྟན་པ་ཡོངས་སུ་གཟུང་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། སངས་རྒྱས་གཅིག་རབ་ཏུ་ཞུགས་པའི་སྨོན་ལམ་རྣམ་པ་ཐ་དད་པ་ལ་འཇུག་པའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་རབ་ཏུ་ཞུགས་པའི་སྨོན་ལམ་རྣམ་པ་ཐ་དད་པ་ལ་འཇུག་པའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་ནོ། །དེ་བཞིན་གཤེགས་པ་གཅིག་གི་སངས་རྒྱས་ཀྱི་ཞིང་གི་རྒྱན་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་དེ་བཞིན་གཤེགས་པའི་སངས་རྒྱས་ཀྱི་ཞིང་གི་རྒྱན་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། སངས་རྒྱས་གཅིག་གི་འཁོར་གྱི་དཀྱིལ་འཁོར་རྣམ་པར་ཕྱེ་བ་ལ་འཇུག་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་གྱི་དཀྱིལ་འཁོར་རྣམ་པར་ཕྱེ་བ་ལ་འཇུག་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། དེ་བཞིན་གཤེགས་པ་གཅིག་གི་ཆོས་ཀྱི་འཁོར་ལོ་ཡོངས་སུ་གཟུང་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་དེ་བཞིན་གཤེགས་པའི་ཆོས་ཀྱི་འཁོར་ལོ་ཡོངས་སུ་གཟུང་བའི་ཕྱིར་བྱང་ཆུབ་སེམས་
དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། སེམས་ཅན་གྱི་སེམས་རྒྱ་མཚོ་གཅིག་ཁོང་དུ་ཆུད་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སེམས་ཅན་གྱི་སེམས་རྒྱ་མཚོ་ཁོང་དུ་ཆུད་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། སེམས་ཅན་གཅིག་གི་དབང་པོའི་འཁོར་ལོ་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སེམས་ཅན་གྱི་དབང་པོའི་འཁོར་ལོ་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། སེམས་ཅན་གཅིག་གི་དབང་པོ་རྒྱ་མཚོ་ཁོང་དུ་ཆུད་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སེམས་ཅན་གྱི་དབང་པོ་རྒྱ་མཚོ་ཁོང་དུ་ཆུད་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། འཇིག་རྟེན་གྱི་ཁམས་གཅིག་གི་བསྐལ་པ་གཅིག་ནས་གཅིག་ཏུ་བརྒྱུད་པར་བྱ་བ་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་ཀྱི་བསྐལ་པ་གཅིག་ནས་གཅིག་ཏུ་བརྒྱུད་པར་བྱ་བ་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། འཇིག་རྟེན་གྱི་ཁམས་གཅིག་ཏུ་གཏོགས་པའི་སེམས་ཅན་ཐམས་ཅད་ཀྱི་སྤྱོད་པའི་བག་ཆགས་ཀྱི་མཚམས་སྦྱོར་བ་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་
སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་ཀྱི་སྤྱོད་པའི་བག་ཆགས་ཀྱི་མཚམས་སྦྱོར་བ་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། འཇིག་རྟེན་གྱི་ཁམས་གཅིག་ཏུ་གཏོགས་པའི་སེམས་ཅན་ཐམས་ཅད་ཀྱི་ཉོན་མོངས་པ་རྒྱ་མཚོ་ཐམས་ཅད་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་ཀྱི་ཉོན་མོངས་པ་རྒྱ་མཚོ་ཐམས་ཅད་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། འཇིག་རྟེན་གྱི་ཁམས་གཅིག་ཏུ་གཏོགས་པའི་སེམས་ཅན་ཐམས་ཅད་ཀྱི་ལས་རྒྱ་མཚོ་ཐམས་ཅད་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་ཀྱི་ལས་རྒྱ་མཚོ་ཐམས་ཅད་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན། འཇིག་རྟེན་གྱི་ཁམས་གཅིག་ཏུ་གཏོགས་པའི་སེམས་ཅན་ཐམས་ཅད་ཀྱི་སྤྱོད་པ་རྒྱ་མཚོ་ཐམས་ཅད་ཁོང་དུ་ཆུད་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་པ་ནས། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་ཀྱི་སྤྱོད་པ་རྒྱ་མཚོ་ཐམས་ཅད་ཁོང་དུ་ཆུད་པར་བྱ་བའི་ཕྱིར། བྱང་ཆུབ་སེམས་དཔའ་
རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་གྱི། སེམས་ཅན་གྱི་ཁམས་མ་ལུས་པ་ལྷག་མ་མེད་པ་མཐའ་དག་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེའོ། །སངས་རྒྱས་མ་ལུས་པ་ཐམས་ཅད་བསྙེན་བཀུར་ཞིང་མཉེས་པར་བྱ་བ་དང་། མཆོད་ཅིང་རིམ་གྲོར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེའོ། །འཇིག་རྟེན་གྱི་ཁམས་མ་ལུས་པ་ཐམས་ཅད་དུ་གཏོགས་པའི་སངས་རྒྱས་ཀྱི་རྒྱུད་བསྙེན་བཀུར་ཞིང་མཉེས་པར་བྱ་བ་དང་། མཆོད་ཅིང་རིམ་གྲོར་བྱ་བའི་ཕྱིར་བྱང་ཆུབ་སེམས་དཔའ་རྣམས་སྨོན་ལམ་ལ་མངོན་པར་མོས་པ་ཡིན། སངས་རྒྱས་ཀྱི་ཞིང་མ་ལུས་པ་ཐམས་ཅད་ཡོངས་སུ་དག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་བསམ་པ་བརྟན་པར་འགྱུར་བ་ཡིན། སངས་རྒྱས་ཀྱི་བསྟན་པ་མ་ལུས་པ་ཐམས་ཅད་ཡོངས་སུ་གཟུང་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྦྱོར་བ་འབྱུང་བ་ཡིན། དེ་བཞིན་གཤེགས་པ་རབ་ཏུ་ཞུགས་པའི་སྨོན་ལམ་རྣམ་པ་ཐ་དད་པ་མ་ལུས་པ་ཐམས་ཅད་ཀྱི་རྗེས་སུ་འབྲང་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་ཀྱི་ཤུགས་དྲག་པོ་སྐྱེ་བ་ཡིན། དེ་བཞིན་གཤེགས་པའི་སངས་རྒྱས་ཀྱི་ཞིང་གི་ཡོན་ཏན་གྱི་རྒྱན་མ་ལུས་པ་ཐམས་ཅད་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་ཡི་དམ་བརྟན་པ་སྐྱེ་བ་ཡིན། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱ་མཚོ་མ་ལུས་པ་ཐམས་ཅད་ལ་འཇུག་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་མངོན་པར་མོས་པ་འབྱུང་བ་ཡིན། འགྲོ་བའི་སེམས་རྒྱ་མཚོ་མ་ལུས་པ་ཐམས་ཅད་ལ་འཇུག་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྨོན་ལམ་ཡོངས་སུ་སྐྱེ་བ་ཡིན། སེམས་ཅན་གྱི་དབང་པོའི་འཁོར་ལོ་མ་ལུས་པ་ཐམས་ཅད་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་མངོན་པར་འདོད་པ་སྐྱེ་བ་ཡིན། སེམས་
ཅན་གྱི་དབང་པོ་རྒྱ་མཚོ་མ་ལུས་པ་ཐམས་ཅད་ཁོང་དུ་ཆུད་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སྤྲོ་བ་སྐྱེ་བ་ཡིན། འཇིག་རྟེན་གྱི་ཁམས་མ་ལུས་པ་ཐམས་ཅད་ཀྱི་བསྐལ་པ་གཅིག་ནས་གཅིག་ཏུ་བརྒྱུད་པ་ལ་འཇུག་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་མོས་པ་སྐྱེ་བ་ཡིན། སེམས་ཅན་མ་ལུས་པ་ཐམས་ཅད་ཀྱི་ཉོན་མོངས་པའི་བག་ཆགས་ཀྱི་མཚམས་སྦྱོར་བ་ཡོངས་སུ་གཅད་པའི་ཕྱིར། བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཡོངས་སུ་སྐྱེ་བ་ཡིན། སེམས་ཅན་མ་ལུས་པ་ཐམས་ཅད་ཀྱི་ལས་དང་ཉོན་མོངས་པའི་རྒྱ་མཚོ་བསྐམ་པའི་ཕྱིར། བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཆེན་པོའི་ཉི་མ་འཆར་བ་ཡིན། སེམས་ཅན་མ་ལུས་པ་ཐམས་ཅད་ཀྱི་སྤྱོད་པ་ཡོངས་སུ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་སྣང་བ་འབྱུང་བ་ཡིན། སེམས་ཅན་མ་ལུས་པ་ཐམས་ཅད་ཀྱི་སྡུག་བསྔལ་གྱི་མེའི་ཕུང་པོ་རབ་ཏུ་ཞི་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སྙིང་རྗེའི་སྤྲིན་ཆེན་པོ་ཀུན་ནས་འདུ་བ་ཡིན། རིགས་ཀྱི་བུ་མདོར་ན་དེ་དག་ལ་སྩོགས་པ་བྱང་ཆུབ་སེམས་དཔའི་སྤྱོད་པའི་ཚུལ་དང་། སྒོ་གྲངས་མེད་པ་བརྒྱ་སྟོང་ཕྲག་བཅུ་དག་བྱང་ཆུབ་སེམས་དཔའ་རྣམས་ཀྱིས་ཡོངས་སུ་བསྒྲུབ་པར་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ། བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་ཡེ་ཤེས་ཁོང་དུ་ཆུད་པར་བྱ་བའི་ཕྱིར། ཆོས་ཐམས་ཅད་ལ་ཡང་དག་པར་གཞོལ་བའོ། །བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་ཡོངས་སུ་དག་པར་བྱ་བའི་ཕྱིར་ཞིང་ཐམས་ཅད་ལ་ཡང་དག་པར་གཞོལ་བའོ། །རིགས་ཀྱི་བུ་དེ་ལྟ་བས་ན། ཁོ་མོས་ནི་བདག་གི་སྨོན་ལམ་ནམ་མཁའི་དབྱིངས་རྣམ་པར་དག་པའི་མཐའ་གང་དུ་ཐུག་པ་དེའི་མཐས་ཀླས་པར་ཤོག་ཤིག །བདག་གི་སྨོན་ལམ་འཇིག་རྟེན་གྱི་ཁམས་རྣམ་པར་དག་པའི་མཐའ་གང་དུ་ཐུག་པ་དེའི་མཐས་ཀླས་པར་ཤོག་ཤིག །བདག་གི་སྨོན་ལམ་སེམས་ཅན་ཐམས་ཅད་ཀྱི་ཉོན་མོངས་པ་དང་། བག་ཆགས་ཀྱི་
མཚམས་སྦྱོར་བ་དང་། བག་ལ་ཉལ་བའི་མཐའ་གང་དུ་ཐུག་པ་དེའི་མཐས་ཀླས་པར་ཤོག་ཤིག །ཅེས་དེ་ལྟར་སྨོན་ལམ་བཏབ་བོ། །སྨྲས་པ། འཕགས་མ་རྣམ་པར་ཐར་པ་འདིའི་མིང་ཅི་ཞེས་བགྱི། སྨྲས་པ། རིགས་ཀྱི་བུ་རྣམ་པར་ཐར་པ་འདི་ནི་ཉོན་མོངས་པ་མེད་པ་བདེ་བའི་རྒྱལ་མཚན་ཞེས་བྱ་བ་སྟེ། རིགས་ཀྱི་བུ་ཁོ་མོས་ཀྱང་བྱང་ཆུབ་སེམས་དཔའི་རྣམ་པར་ཐར་པ་དེ་གཅིག་པུ་ཤེས་པར་ཟད་ན་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་ཡང་དག་པར་འཛིན་པའི་ཕྱིར། སེམས་རྒྱ་མཚོ་དང་ལྡན་པ་ལྷག་པའི་བསམ་པ་བརྟན་པའི་ཕྱིར་རི་རབ་དང་འདྲ་བ། སེམས་ཅན་ཐམས་ཅད་ཀྱི་ཉོན་མོངས་པའི་ནད་རབ་ཏུ་སོས་པར་བྱེད་པའི་ཕྱིར་སྨན་གྱི་རྒྱལ་པོ་མཐོང་ན་ལེགས་པ་ལྟ་བུ། སེམས་ཅན་ཐམས་ཅད་ཀྱི་མ་རིག་པའི་མུན་པ་སེལ་བའི་ཕྱིར་ཉི་མར་གྱུར་པ། སེམས་ཅན་ཐམས་ཅད་ཀྱི་བསམ་པའི་གནས་སུ་གྱུར་པས་ས་ལྟ་བུའི་སེམས་དང་ལྡན་པ། འགྲོ་བ་ཐམས་ཅད་ཀྱི་དོན་བྱེད་པའི་ཕྱིར་རླུང་དུ་གྱུར་པ། སེམས་ཅན་ཐམས་ཅད་ལ་ཡེ་ཤེས་ཀྱི་སྣང་བ་འབྱིན་པའི་ཕྱིར་མར་མེར་གྱུར་པ། ཞི་བའི་སྒྲས་སངས་རྒྱས་ཀྱི་ཆོས་ཀྱི་ཆར་ཡང་དག་པ་ཇི་ལྟ་བ་བཞིན་དུ་འབེབས་པའི་ཕྱིར་སྤྲིན་དུ་གྱུར་པ་བསོད་ནམས་ཀྱི་འོད་གཟེར་གྱི་དྲ་བ་རབ་ཏུ་འགྱེད་པའི་ཕྱིར་ཟླ་བ་ལྟ་བུ། འགྲོ་བ་ཐམས་ཅད་ཡོངས་སུ་བསྲུང་བ་ལ་ཞུགས་པའི་ཕྱིར། བརྒྱ་བྱིན་ལྟ་བུ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པའམ། བྱང་ཆུབ་སེམས་དཔའི་བསླབ་པ་བསམ་གྱིས་མི་ཁྱབ་པ་སྨོས་པའམ། བྱང་ཆུབ་སེམས་དཔའི་སྨོན་ལམ་གྱི་རྣམ་པ་མཐའ་དང་དབུས་མེད་པ་ཡོངས་སུ་བསྟན་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་རྒྱ་མཚོ་རྣམ་པར་རློབ་པ་འདི་ན་ཡུལ་ཆུ་བ་གཙང་མ་ཞེས་བྱ་བ་ཡོད་དེ། དེ་ན་དྲང་སྲོང་འཇིགས་མཆོག་དབྱངས་ཤེས་བྱ་བ་འདུག་གི་དེའི་གན་དུ་སོང་ལ་དྲིས་ཤིག་དང་། དེས་རིགས་ཀྱི་བུ་ཁྱོད་ལ་བྱང་ཆུབ་སེམས་དཔའི་
སྤྱོད་པ་སྟོན་པར་འགྱུར་རོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དགེ་བསྙེན་མ་ཡིད་བཞིན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་བསྙེན་མ་ཡིད་བཞིན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ་ཕྱག་འཚལ་ནས། ངོ་མཆི་མས་གང་བར་ངུས་ཏེ། བྱང་ཆུབ་མཆོག་ཏུ་དཀོན་པ་རྗེས་སུ་སེམས་ཤིང་དགེ་བའི་བཤེས་གཉེན་རིམ་གྲོར་བྱ་བ་དཀོན་པ་རྗེས་སུ་བསམ་པ་དང་། སྐྱེས་བུ་དམ་པ་དང་འཕྲད་པ་དཀོན་པ་རྗེས་སུ་བསམ་པ་དང་། བྱང་ཆུབ་སེམས་དཔའི་དབང་པོ་འཐོབ་པར་བྱ་བ་རྗེས་སུ་བསམ་པ་དང་། བྱང་ཆུབ་སེམས་དཔའི་བསམ་པ་ཡོངས་སུ་དག་པ་དཀོན་པ་རྗེས་སུ་བསམ་པ་དང་། སྐལ་བ་མཉམ་པའི་དགེ་བའི་བཤེས་གཉེན་དང་ཕྲད་པ་དཀོན་པ་རྗེས་སུ་བསམ་པ་དང་། བྱང་ཆུབ་ཏུ་ཡང་དག་པ་ཇི་ལྟ་བ་བཞིན་དུ་མངོན་པར་མོས་ཤིང་སེམས་ངེས་པར་གཞོག་པ་དཀོན་པ་རྗེས་སུ་བསམ་པ་དང་། མི་མཉམ་པ་མེད་པའི་ཆོས་ཀྱི་ཚུལ་རྗེས་སུ་བསྟན་པའི་སྦྱོར་བ་དཀོན་པ་རྗེས་སུ་བསམ་པ་དང་། སེམས་དྲི་མ་མེད་ཅིང་མི་འཕྲོགས་པའི་སྦྱོར་བ་ཡང་དག་པར་བསྒྲུབ་པར་དཀའ་བ་རྗེས་སུ་བསམ་པ་དང་། ཐམས་ཅད་མཁྱེན་པ་ཉིད་དུ་ཤུགས་དྲག་པོ་རྣམ་པར་བསྐྱེད་པའི་ཆོས་ཀྱི་སྣང་བ་དཀོན་པ་རྗེས་སུ་བསམ་པ་བྱེད་ཅིང་། དགེ་བསྙེན་མ་ཡིད་བཞིན་གྱི་དྲུང་ནས་སོང་ངོ་། དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའི་གདམས་ངག་གི་རྗེས་སུ་སོང་བའི་སེམས་དང་ལྡན་པ། བྱང་ཆུབ་སེམས་དཔའི་སྤྱོད་པ་ཡོངས་སུ་དག་པར་བྱེད་པའི་རྗེས་སུ་སོང་བའི་སེམས་དང་ལྡན་པ། བྱང་ཆུབ་སེམས་དཔའི་བསོད་ནམས་ཀྱི་སྟོབས་རྣམ་པར་འཕེལ་བར་བྱ་བའི་སེམས་དང་ལྡན་པ། སངས་རྒྱས་བལྟ་བའི་ཤུགས་དྲག་པོས་རབ་ཏུ་སྣང་བར་བྱ་བའི་སེམས་དང་ལྡན་པ། ཆོས་ཀྱི་གཏེར་འཐོབ་པར་བྱ་བ་ལ་ཤུགས་དྲག་པོ་སྐྱེས་པའི་
སེམས་དང་ལྡན་པ། སྨོན་ལམ་ཆེན་པོ་མངོན་པར་བསྒྲུབ་པའི་ཤུགས་དྲག་པོ་རབ་ཏུ་འཕེལ་བའི་སེམས་དང་ལྡན་པ་ཆོས་ཐམས་ཅད་ཀྱི་ཕྱོགས་ལ་མངོན་དུ་ལྟ་བའི་སེམས་དང་ལྡན་པ། ཆོས་ཀྱི་རང་བཞིན་གྱི་འོད་ཀྱིས་སྣང་བར་བྱས་པའི་སེམས་དང་ལྡན་པ། སྒྲིབ་པ་ཐམས་ཅད་རྣམ་པར་འཐོར་བའི་སེམས་དང་ལྡན་པ། ཆོས་ཀྱི་དབྱིངས་ལ་མུན་པ་མེད་པར་རྣམ་པར་ལྟ་བའི་སེམས་དང་ལྡན་པ། རྡོ་རྗེ་རིན་པོ་ཆེ་མཐུ་བོ་ཆེས་མྱི་ཆོམས་པ་ལྷར་དྲི་མ་མེད་པའི་སེམས་དང་ལྡན་པ། བདུད་ཐམས་ཅད་ཀྱི་དཔུང་གིས་བརྒལ་བར་དཀའ་ཞིང་ཐུབ་པར་དཀའ་བའི་སེམས་དང་ལྡན་པ་དེ་མཐར་གྱིས་ཡུལ་ཆུ་བ་གཙང་མ་ག་ལ་བ་དེར་ཕྱིན་ནས། དྲང་སྲོང་འཇིགས་མཆོག་དབྱངས་ཚོལ་ཚོལ་བ་ལས། དེའི་ཚེ་དྲང་སྲོང་འཇིགས་མཆོག་དབྱངས་དགེ་བ་སྦྱང་བའི་གནས་ཤིང་དང་། ཤིང་ཕྲན་སྣ་ཚོགས་གྲངས་མེད་པའི་ནགས་ཚལ་མདངས་དགའ་བ། ལོ་མས་རྒྱས་པའི་ཤིང་གིས་ཀུན་ནས་འགྲིགས་པ། རྟག་ཏུ་མེ་ཏོག་རྒྱས་པ་དང་ལྡན་པའི་ཤིང་སྣ་ཚོགས་ཅན། རྟག་ཏུ་ཤིང་ཏོག་མང་པོ་དང་ལྡན་པའི་ཤིང་ཏོག་གི་ཤིང་དང་ལྡན་པ། ནོར་བུ་རིན་པོ་ཆེ་སྣ་ཚོགས་ཀྱི་ཤིང་དྲུང་ནོར་བུ་རིན་པོ་ཆེའི་སྤང་ལེབ་ཀྱིས་རྟག་ཏུ་གཤིབས་པ་དང་ལྡན་པ། ཙན་དན་དམ་པའི་ཤིང་ཀུན་ནས་རྣམ་པར་བྲེས་པ། ཨ་ག་རུ་ཡིད་དུ་འོང་བའི་ཤིང་ལས་སྤོས་ཀྱི་དྲི་རྟག་ཏུ་འབྱུང་བས་རབ་ཏུ་བརྒྱན་པ། ཕྱོགས་བཞི་ནས་ཤིང་བ་ཏ་ལ་རྣམ་པར་མཛེས་པར་སྐྱེས་པས་ཡོངས་སུ་བརྒྱན་པ། ནྱ་གྲོ་དའི་ཤིང་དབྱིབས་ཡིད་དུ་འོང་བ་དང་ལྡན་པ། འཛམ་བུའི་ཤིང་ལས་རྟག་ཏུ་ཤིང་ཏོག་སྨིན་པ་འབྲུལ་བ། མེ་ཏོག་གི་ཚལ་པདྨོ་དང་ཨུཏ་པ་ལ་གསར་དུ་སྐྱེས་པས་རབ་ཏུ་བརྒྱན་པ་ཞིག་ན་འདུག་འདུག་སྟེ། ཚོང་དཔོན་གྱི་བུ་ནོར་བཟངས་ཀྱིས་དྲང་སྲོང་འཇིགས་མཆོག་དབྱངས་དྲང་སྲོང་སྟོང་ཕྲག་བཅུས་བསྐོར་ཅིང་། ཙན་དན་གྱི་ཡལ་ག་ཤིན་ཏུ་འབྲེལ་བའི་
བྱ་སྐྱིབས་ཤིག་ན། ཐོར་ཚུགས་ཀྱི་ཅོད་པན་ཅན། པགས་པ་དང་། རྩའི་གོས་གྱོན་པ། ཤིང་ཤུན་གྱི་སྨད་ཡོགས་ཅན་རྩའི་སྟན་ལ་འདུག་པ་མཐོང་ངོ་། །མཐོང་ནས་ཀྱང་དྲང་སྲོང་འཇིགས་མཆོག་དབྱངས་ག་ལ་བ་དེར་སོང་སྟེ། ཕྱིན་ནས་ཡང་དག་པའི་དགེ་བའི་བཤེས་གཉེན་དང་ཕྲད་པའི་བསམ་པས་དགེ་བའི་བཤེས་གཉེན་ནི་ཡང་དག་པའི་ལམ་སྟོན་པས། ཐམས་ཅད་མཁྱེན་པ་ཉིད་འབྱུང་བའི་སྒོ་ཡིན་པར་ཡང་དག་པར་ལྟ། ཐམས་ཅད་མཁྱེན་པའི་ས་ལ་གཞོག་པས། ཐམས་ཅད་མཁྱེན་པ་ཉིད་ནི་དགེ་བའི་བཤེས་གཉེན་གྱི་གདམས་ངག་ལ་རག་ལུས་པར་ཡང་དག་པར་ལྟ། སྟོབས་བཅུའི་ཡེ་ཤེས་རིན་པོ་ཆེའི་གླིང་དུ་སྐྱེལ་བས། ཐམས་ཅད་མཁྱེན་པ་ཉིད་ནི་དགེ་བའི་བཤེས་གཉེན་གྱི་མཉན་པ་ལ་རག་ལུས་པར་ཡང་དག་པར་ལྟ། སྟོབས་བཅུའི་ཡེ་ཤེས་སྣང་བ་ཡང་དག་པར་བསྐྱེད་པས་ཐམས་ཅད་མཁྱེན་པ་ཉིད་ནི་དགེ་བའི་བཤེས་གཉེན་གྱི་སྒྲོན་མས་སྣང་བར་བྱ་བ་ཡིན་པར་ཡང་དག་པར་ལྟ། ཉམ་ཉེས་མེད་པར་ཐམས་ཅད་མཁྱེན་པ་ཉིད་ཀྱི་གྲོང་དུ་ཕྱིན་པར་བྱེད་པས། ཐམས་ཅད་མཁྱེན་པ་ཉིད་ཀྱི་ལམ་ནི་དགེ་བའི་བཤེས་གཉེན་ཡིན་པར་ཡང་དག་པར་ལྟ། མཉམ་པ་དང་མི་མཉམ་པ་ཡོངས་སུ་སྟོན་པས། ཐམས་ཅད་མཁྱེན་པ་ཉིད་ཀྱི་མར་མེ་ནི་དགེ་བའི་བཤེས་གཉེན་ཡིན་པར་ཡང་དག་པར་ལྟ། གཡང་སའི་འཇིགས་པ་ཐམས་ཅད་མེད་པར་བྱེད་པས་ཐམས་ཅད་མཁྱེན་པ་ཉིད་ཀྱི་སྟེགས་ནི་དགེ་བའི་བཤེས་གཉེན་ཡིན་པར་ཡང་དག་པར་ལྟ། བྱམས་པ་ཆེན་པོའི་སྟོབས་ཀྱིས་སིམ་པ་ཡོངས་སུ་བསྐྱེད་པའི་ཕྱིར་ཐམས་ཅད་མཁྱེན་པ་ཉིད་ཀྱི་གདུགས་ནི་དགེ་བའི་བཤེས་གཉེན་ཡིན་པར་ཡང་དག་པར་ལྟ། སྙིང་རྗེ་ཆེན་པོ་ཡོངས་སུ་བསྐྱེད་པས་ཐམས་ཅད་མཁྱེན་པ་ཉིད་ཀྱི་ཤུགས་དྲག་པོ་ནི་དགེ་བའི་བཤེས་གཉེན་ཡིན་པར་ཡང་དག་པར་ལྟ་ཞིང་ཆོས་ཀྱི་རང་བཞིན་གྱི་ཚུལ་རབ་ཏུ་སྣང་བར་བྱེད་པས་ཐམས་ཅད་མཁྱེན་པ་ཉིད་གསལ་བར་མཐོང་བ་ནི། དགེ་བའི་བཤེས་གཉེན་ལ་རག་ལས་པར་མཐོང་ནས། ལུས་ཐམས་
ཅད་ཀྱིས་ཕབ་སྟེ། ཕྱག་བྱས་ནས་ལངས་ཏེ། དྲང་སྲོང་འཇིགས་མཆོག་དབྱངས་ལ་ལན་བརྒྱ་སྟོང་དུ་མར་བསྐོར་བ་བྱས་ནས་མདུན་དུ་འདུག་སྟེ། ཐལ་མོ་སྦྱར་ནས་ཡིད་དུ་འོང་བའི་ཚུལ་གྱིས་ཡིད་དུ་འོང་བའི་ཚིག་བརྗོད་དེ། འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་། རྗེས་སུ་བསྟན་པ་མཛད་དོ་ཞེས་ཐོས་ན། འཕགས་པ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། དེ་ནས་དྲང་སྲོང་འཇིགས་མཆོག་དབྱངས་ཀྱིས་བྲམ་ཟེའི་བྱིས་པ་སྟོང་ཕྲག་བཅུ་པོ་དེ་དག་ལ་བལྟས་ཏེ། འདི་སྐད་ཅེས་སྨྲས་སོ། །བྱིས་པ་དག་རིགས་ཀྱི་བུ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། སེམས་ཅན་ཐམས་ཅད་འཇིགས་པ་མེད་པ་ལ་མགྲོན་དུ་གཉེར་ཏོ། །རིགས་ཀྱི་བུ་འདི་ནི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་སྟ་གོན་དུ་གནས་པ་སྟེ། ཡེ་ཤེས་རྒྱ་མཚོ་ལ་མངོན་དུ་གྱུར་པའོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་གྱི་ཆར་བཏུང་བར་འདོད་པའོ། །ཆོས་ཀྱི་ཚུལ་རྒྱ་མཚོ་ཐམས་ཅད་ལ་འཇུག་པར་འདོད་པའོ། །ཡེ་ཤེས་ཀྱི་སྣང་བ་ཆེན་པོ་ལ་གནས་པར་འདོད་པའོ། །སྙིང་རྗེ་ཆེན་པོའི་སྤྲིན་བསྡུ་བར་འདོད་པའོ། །ཆོས་ཀྱི་ཆར་ཆེན་པོ་མངོན་པར་དབབ་པར་འདོད་པའོ། །ཡེ་ཤེས་ཆེན་པོའི་ཟླ་བ་འཇིག་རྟེན་དུ་ཤར་བར་བྱས་ཏེ། ཉོན་མོངས་པའི་གདུང་བ་ཐམས་ཅད་རབ་ཏུ་གཞིལ་བར་འདོད་པའོ། །སེམས་ཅན་ཐམས་ཅད་ཀྱི་དགེ་བའི་རྩ་བ་རྣམ་པར་སྤེལ་བར་འདོད་པའོ། །དེ་ནས་བྲམ་ཟེའི་བྱིས་པ་སྟོང་ཕྲག་བཅུ་པོ་དེ་དག་གིས་མེ་ཏོག་དྲི་ཞིམ་ལ་ཡིད་དུ་འོང་ཞིང་ཁ་དོག་སྣ་ཚོགས་དང་ལྡན་པ་མང་པོས་
ཚོང་དཔོན་གྱི་བུ་ནོར་བཟངས་ལ་གཏོར་ཏོ། །མངོན་པར་གཏོར་ཏོ། །རབ་ཏུ་གཏོར་ཏོ། །མངོན་པར་ཕྱག་འཚལ་ཏོ། །དེ་ལྟར་བཏུད་དེ་ཕྱག་འཚལ་ནས། གཡས་ཕྱོགས་སུ་བསྐོར་བ་བྱས་ཏེ། ཚིག་འདི་སྐད་དུ་བརྗོད་དོ། །འདི་ནི་སེམས་ཅན་ཐམས་ཅད་ཡོངས་སུ་སྐྱོབ་པར་འགྱུར་རོ། །སེམས་ཅན་དམྱལ་བའི་སྡུག་བསྔལ་ཐམས་ཅད་རབ་ཏུ་ཞི་བར་བགྱིད་པར་འགྱུར་རོ། །བྱོལ་སོང་གི་སྐྱེ་གནས་ཀྱི་ལམ་གྱི་རྒྱུད་ཐམས་ཅད་རྣམ་པར་གཅོད་པར་འགྱུར་རོ། །གཤིན་རྗེའི་འཇིག་རྟེན་གྱི་ལམ་གྱི་རྒྱུད་ཐམས་ཅད་རྣམ་པར་བཟློག་པར་འགྱུར་རོ། །མི་ཁོམ་པའི་སྒོ་ཐམས་ཅད་གཅོད་པར་འགྱུར་རོ། །སྲེད་པའི་རྒྱ་མཚོ་ཡོངས་སུ་སྐེམས་པར་འགྱུར་རོ། །སྲིད་པའི་འཆིང་བ་གཅོད་པར་འགྱུར་རོ། །སྡུག་བསྔལ་གྱི་ཕུང་པོ་རྣམ་པར་བཟློག་པར་འགྱུར་རོ། །མ་རིག་པའི་མུན་པ་སེལ་བར་འགྱུར་རོ། །བསོད་ནམས་ཀྱི་ཁོར་ཡུག་གིས་འཇིག་རྟེན་ཡོངས་སུ་བསྐོར་བར་འགྱུར་རོ། །ཡེ་ཤེས་རིན་པོ་ཆེའི་འབྱུང་གནས་སུ་ཡོངས་སུ་སྟོན་པར་འགྱུར་རོ། །ཡེ་ཤེས་ཀྱི་ཉི་མ་འཆར་བར་བགྱིད་པར་འགྱུར་རོ། །ཆོས་ཀྱི་མིག་རྣམ་པར་སྦྱོང་བར་འགྱུར་རོ། །འཇིག་རྟེན་རྣམས་ལ་མཉམ་པ་དང་མི་མཉམ་པ་ཡང་དག་པར་སྟོན་པར་འགྱུར་རོ། །དེ་ནས་དྲང་སྲོང་འཇིགས་མཆོག་དབྱངས་ཀྱིས་བྱིས་པ་དེ་དག་ལ་འདི་སྐད་ཅེས་སྨྲས་སོ། །བྱིས་པ་དག་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ནི་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཅན་ཐམས་ཅད་ཀྱི་བདེ་བ་རབ་ཏུ་བསྐྱེད་དེ། རིམ་གྱིས་ཐམས་ཅད་མཁྱེན་པ་ཉིད་ཀྱང་འཐོབ་པར་འགྱུར་རོ། །བྱིས་པ་དག་རིགས་ཀྱི་བུ་འདིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་སྟེ། དེ་བས་ན་འདི་ནི་སངས་རྒྱས་ཀྱི་ཡོན་ཏན་ཐམས་ཅད་ཀྱིས་ཡོངས་སུ་སྦྱོང་བར་འགྱུར་རོ། །དེ་ནས་དྲང་སྲོང་འཇིགས་མཆོག་དབྱངས་ཀྱིས། ཚོང་
དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་བོ་ནི་བྱང་ཆུབ་སེམས་དཔའི་རྣམ་པར་ཐར་པ་གཞན་གྱིས་མི་ཐུབ་པའི་རྒྱལ་མཚན་ཐོབ་པའོ། །ནོར་བཟངས་ཀྱིས་སྨྲས་པ། བྱང་ཆུབ་སེམས་དཔའི་རྣམ་པར་ཐར་པ་གཞན་གྱིས་མི་ཐུབ་པ་འདིའི་ཡུལ་ཇི་ལྟ་བུ་ཞིག་མཆིས། དེ་ནས་དྲང་སྲོང་འཇིགས་མཆོག་དབྱངས་ཀྱིས་ལག་པ་གཡས་པ་བརྐྱང་སྟེ། ཚོང་དཔོན་གྱི་བུ་ནོར་བཟངས་ཀྱི་མགོ་ལ་བྱུགས་ནས་ལག་པ་གཡས་པས་བཟུང་ངོ་། །ཚོང་དཔོན་གྱི་བུ་ནོར་བཟངས་ལ་དྲང་སྲོང་འཇིགས་མཆོག་དབྱངས་ཀྱིས་ལག་པ་གཡས་པས་བཟུང་མ་ཐག་ཏུ་དེའི་མོད་ལ་ཚོང་དཔོན་གྱི་བུ་ནོར་བཟངས་ཀྱིས། ཕྱོགས་བཅུར་སངས་རྒྱས་ཀྱི་ཞིང་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་མཐོང་བར་གྱུར་ཏེ། དེ་དག་གི་དེ་བཞིན་གཤེགས་པ་སངས་རྒྱས་ཀྱི་ཞིང་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་ཞབས་ཀྱི་དྲུང་ན་བདག་ཉིད་འདུག་པར་ཤེས་པར་གྱུར་ཏོ། །སངས་རྒྱས་ཀྱི་ཞིང་དེ་དག་ཀྱང་རྣམ་པ་གྲངས་མེད་པར་རྣམ་པར་དག་པའི་རྒྱན་དང་ལྡན་པར་མཐོང་ངོ་། །དེ་དག་ནའང་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་ཁ་དོག་སྣ་ཚོགས་ཅན་རྒྱན་རྣམ་པ་ཐ་དད་པ་དང་ལྡན་པ་དག་འཁོད་པ་མཐོང་ངོ་། །འཁོར་གྱི་དཀྱིལ་འཁོར་རྒྱ་མཚོ་དེ་དག་ནའང་དེ་བཞིན་གཤེགས་པའི་སྐུ་མཚན་དང་དཔེ་བྱད་བཟང་པོ་འབར་བས་བརྒྱན་པ་དག་བཞུགས་པ་མཐོང་ངོ་། །དེ་དག་ལས་ཀྱང་ཚིག་དང་ཡི་གེ་གཅིག་ལས་ཀྱང་ཕྱིར་ཕྱོགས་པ་མེད་པར་ཆོས་བསྟན་པ་ཉན་ཏོ། །དེ་བཞིན་གཤེགས་པའི་ཆོས་ཀྱི་འཁོར་ལོ་དེ་དག་ཀྱང་ཕན་ཚུན་མ་འདྲེས་པར་ཡང་དག་པར་འཛིན་ཏོ། །ཆོས་ཀྱི་སྤྲིན་གྱི་ཆར་སེམས་ཅན་གྱི་བསམ་པ་སྣ་ཚོགས་ལ་འབབ་པ་དེ་དག་ཀྱང་ཡང་དག་པར་འཛིན་ཏོ། །དེ་བཞིན་གཤེགས་པ་དེ་དག་གི་སྔོན་གྱི་སྨོན་ལམ་མོས་པ་སྣ་ཚོགས་ཀྱི་སྟོབས་ཀྱིས་རྣམ་པར་སྦྱངས་པ་རྒྱ་མཚོ་ལ་ཡང་ཞུགས་སོ། །སངས་རྒྱས་ཀྱི་ཡང་དག་པར་
བསྡུ་བ་སྨོན་ལམ་སྣ་ཚོགས་རྒྱ་མཚོས་རྣམ་པར་དག་པ་རྒྱ་མཚོ་དེ་དག་ལ་ཡང་ཞུགས་སོ། །སངས་རྒྱས་ཀྱི་སྐུ་མདོག་སེམས་ཅན་གྱི་བསམས་པ་ཇི་ལྟ་བ་བཞིན་དུ་ཚིམ་པར་འགྱུར་བར་རྣམ་པར་དམྱིགས་པ་དེ་དག་ཀྱང་མཐོང་ངོ་། །སངས་རྒྱས་ཀྱི་འོད་གཟེར་གྱི་དྲ་བ་འདོད་ཆགས་དང་བྲལ་བ་སྣ་ཚོགས་ཀྱིས་རྣམ་པར་དག་པའི་རྒྱན་གྱི་དཀྱིལ་འཁོར་དེ་དག་ཀྱང་མཐོང་ངོ་། །སངས་རྒྱས་ཀྱི་སྟོབས་དེ་དག་ལའང་ཡེ་ཤེས་རྣམ་པར་སྣང་བ་བསྒྲིབས་པ་མེད་པ་དང་ལྡན་པས་ཞུགས་སོ། །དེ་ལྟར་བྱང་ཆུབ་སེམས་དཔའི་རྣམ་པར་ཐར་པ་གཞན་གྱིས་མི་ཐུབ་པའི་རྒྱལ་མཚན་གྱི་ཡེ་ཤེས་ཀྱི་འོད་ཀྱིས་སྣང་བར་གྱུར་པ། ཏིང་ངེ་འཛིན་རྣམ་པར་སྣང་མཛད་ཀྱི་སྙིང་པོ་སྣང་བ་རབ་ཏུ་ཐོབ་པ། ཏིང་ངེ་འཛིན་ཡེ་ཤེས་མྱི་ཟད་པའི་རྣམ་པར་ཐར་པ་དང་ལྡན་པ། གཟུངས་ཀྱི་སྒོ་སྣང་བ་ཕྱོགས་ཀུན་གྱི་དྲ་བ་རབ་ཏུ་ཐོབ་པ། གཟུངས་ཀྱི་སྒོ་རྡོ་རྗེའི་སྙིང་པོས་སེམས་རབ་ཏུ་གསལ་བར་བྱས་པ། ཏིང་ངེ་འཛིན་ཡེ་ཤེས་བརྩེགས་པ་རྣམ་པར་ཕྱེ་བའི་ཡུལ་ལ་རྣམ་པར་ཕྱེ་བ་རབ་ཏུ་ཐོབ་པ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་གཞི་ཀུན་ནས་རྣམ་པར་བརྒྱན་པའི་སྙིང་པོ་ཡུལ་དུ་གྱུར་པ། ཏིང་ངེ་འཛིན་གྱི་སྣང་བ་སངས་རྒྱས་ནམ་མཁའི་སྙིང་པོའི་དཀྱིལ་འཁོར་ལ་རབ་ཏུ་ཞུགས་པ། ཏིང་ངེ་འཛིན་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོའི་མུ་ཁྱུད་ཀྱིས་སེམས་རབ་ཏུ་སྣང་བར་བྱས་པ། ཏིང་ངེ་འཛིན་གྱི་སྣང་བ་དུས་གསུམ་གྱི་ཡེ་ཤེས་རིན་པོ་ཆེ་མི་ཟད་པའི་དཀྱིལ་འཁོར་ལ་རབ་ཏུ་བརྩོན་པ་དེས་དེ་བཞིན་གཤེགས་པ་ལ་ལའི་ཞབས་ཀྱི་དྲུང་དུ་ནི་ཉིན་ཞག་གཅིག་ལོན་པར་ཤེས་སོ། །ལ་ལར་ནི་ཉིན་ཞག་བདུན་ལོན་པ་སྙམ། ལ་ལར་ནི་ཟླ་བ་ཕྱེད་ལོན་པ་སྙམ། ལ་ལར་ནི་ཟླ་བ་གཅིག་ལོན་པ་སྙམ། ལ་ལར་ནི་ལོ་གཅིག་ལོན་པ་སྙམ། ལ་ལར་ནི་ལོ་བརྒྱར་ལོན་པ་སྙམ། ལ་ལར་ནི་ལོ་སྟོང་ལོན་པ་སྙམ། ལ་ལར་ནི་ལོ་བརྒྱ་ཕྲག་སྟོང་ལོན་པ་སྙམ། ལ་ལར་ནི་ལོ་བྱེ་བ་ལོན་པ་སྙམ། ལ་ལར་ནི་ལོ་བྱེ་བ་བརྒྱ་ལོན་པ་སྙམ། ལ་ལར་ནི་ལོ་བྱེ་བ་སྟོང་ལོན་པ་སྙམ། ལ་ལར་ནི་ལོ་
བྱེ་བ་བརྒྱ་ཕྲག་སྟོང་ལོན་པ་སྙམ། ལ་ལར་ནི་ལོ་བྱེ་བ་ཁྲག་ཁྲིག་ལོན་པ་སྙམ། ལ་ལར་ནི་བསྐལ་པ་ཕྱེད་ལོན་པ་སྙམ། ལ་ལར་ནི་བསྐལ་པ་གཅིག་ལོན་པ་སྙམ། ལ་ལར་ནི་བསྐལ་པ་བརྒྱ་ལོན་པ་སྙམ། ལ་ལར་ནི་བསྐལ་པ་སྟོང་ལོན་པ་སྙམ། ལ་ལར་ནི་བསྐལ་པ་བརྒྱ་ཕྲག་སྟོང་ལོན་པ་སྙམ། ལ་ལར་ནི་བསྐལ་པ་བྱེ་བ་ལོན་པ་སྙམ། ལ་ལར་ནི་བསྐལ་པ་བྱེ་བ་ཕྲག་བརྒྱ་ལོན་པ་སྙམ། ལ་ལར་ནི་བསྐལ་པ་བྱེ་བ་ཕྲག་སྟོང་ལོན་པ་སྙམ། ལ་ལར་ནི་བསྐལ་པ་བྱེ་བ་བརྒྱ་ཕྲག་སྟོང་ལོན་པ་སྙམ། ལ་ལར་ནི་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་ལོན་པ་སྙམ་བྱེད་པ་ནས། དེ་བཞིན་གཤེགས་པ་ལ་ལའི་ཞབས་ཀྱི་དྲུང་དུ་ནི་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་སྙེད་ལོན་པར་གྱུར་པ་སྙམ་བྱེད་དེ། དེ་བཞིན་གཤེགས་པ་ལ་ལའི་ཞབས་ཀྱི་དྲུང་དུ་ནི་བསྐལ་པ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ལོན་པ་སྙམ་བྱེད་པ་ནས། བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ལོན་པ་སྙམ་བྱེད་པར་གྱུར་ཏོ། །དེ་ནས་དྲང་སྲོང་འཇིགས་མཆོག་དབྱངས་ཀྱིས། ཚོང་དཔོན་གྱི་བུ་ནོར་བཟངས་བཏང་བ་དང་། དེས་ཡང་བདག་དྲང་སྲོང་འཇིགས་མཆོག་དབྱངས་ཀྱི་མདུན་དུ་འདུག་པར་ཤེས་པར་གྱུར་ཏོ། །དེ་ལ་དྲང་སྲོང་འཇིགས་མཆོག་དབྱངས་ཀྱིས་སྨྲས་པ་རིགས་ཀྱི་བུ་དྲན་མོད། སྨྲས་པ་འཕགས་པ་དགེ་བའི་བཤེས་གཉེན་གྱི་བྱིན་གྱི་རླབས་ཀྱིས་དྲན་ནོ། །སྨྲས་པ་རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའི་རྣམ་པར་ཐར་པ་གཞན་གྱིས་མི་ཐུབ་པའི་རྒྱལ་མཚན་འདི་ཤེས་པར་ཟད་ན། བྱང་ཆུབ་སེམས་དཔའ་འགྲོ་བ་ཐམས་ཅད་ལས་ཁྱད་པར་དུ་འཕགས་པའི་ཡེ་ཤེས་མངོན་པར་ཤེས་པ་དང་ལྡན་པའི་ཏིང་ངེ་འཛིན་ཐོབ་པ། དུས་ཐམས་ཅད་དུ་འཁོར་ལོ་བསྐོར་བ། སངས་རྒྱས་ཀྱི་མཚན་དང་། ཡེ་ཤེས་མངོན་པར་བསྒྲུབ་པ་ལ་མཁས་པ། དེ་བཞིན་གཤེགས་པ་བྱུང་བའི་ཉི་མ་ལ་རྣམ་པར་དམིགས་པའི་རྒྱན་རབ་ཏུ་དགོད་པ་
དུས་གསུམ་གྱི་ཡུལ་སྐད་ཅིག་གཅིག་གི་ཡེ་ཤེས་སུ་ཡང་དག་པར་སྡུད་པ། འཇིག་རྟེན་གྱི་ཁམས་ཐམས་ཅད་དུ་ལུས་ཤིན་ཏུ་རྣམ་པར་བཀྲམ་པ་ཆོས་ཀྱི་དབྱིངས་ཐམས་ཅད་ལ་ཡེ་ཤེས་སྣང་བའི་རང་བཞིན་དང་ལྡན་པ། སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་མངོན་སུམ་དུ་མངོན་པར་ལངས་པ། སེམས་ཅན་གྱི་བསམ་པ་ཇི་ལྟ་བ་བཞིན་དུ་སྤྱོད་པས། རྣམ་པར་སྤྱོད་པ་དང་མཐུན་པའི་ཚུལ་དང་ལྡན་པ་འདོད་པ་བཞིན་དུ་ཀུན་ཏུ་སྣང་ཞིང་དྲི་མ་མེད་ལ་འོད་དང་ལྡན་པའི་ཡེ་ཤེས་ཀྱི་དཀྱིལ་འཁོར་རྣམ་པར་དག་པ། དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པའམ། སྨོན་ལམ་གྱི་ཁྱད་པར་སྨོས་པའམ། ཞིང་གི་མངོན་པར་འདུ་བྱ་བ་ཤེས་པའམ། ཡེ་ཤེས་ཀྱི་ཡུལ་ལ་འཇུག་པར་བྱ་བའམ། ཏིང་ངེ་འཛིན་གྱི་སྤྱོད་ཡུལ་གྱི་རྗེས་སུ་འབྲང་བར་བྱ་བའམ། རྫུ་འཕྲུལ་དང་རྣམ་པར་འཕྲུལ་པ་ལ་འཇུག་པར་བྱ་བའམ། རྣམ་པར་ཐར་པའི་ཁྱུ་མཆོག་གི་མཐུ་ཕྱུང་བ་དང་། རྣམ་པར་རྩེ་བའི་རྗེས་སུ་འབྲང་བར་བྱ་བའམ། ལུས་རྣམ་པར་ཕྱེ་བའི་མཚན་མ་གཟུང་བར་བྱ་བའམ། དབྱངས་ཀྱི་དཀྱིལ་འཁོར་རྣམ་པར་དག་པ་བརྗོད་པའམ། ཡེ་ཤེས་ཀྱི་སྣང་བ་རབ་ཏུ་བསྟན་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་ཡུལ་ཡོངས་སུ་ཚོལ་བ་ཞེས་བྱ་བ་ཡོད་དེ། དེ་ན་བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་ཅེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་དགའ་རངས་ཏེ་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། དྲང་སྲོང་འཇིགས་མཆོག་དབྱངས་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དྲང་སྲོང་འཇིགས་མཆོག་དབྱངས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ་དྲང་སྲོང་འཇིགས་མཆོག་དབྱངས་ཀྱི་དྲུང་ནས་སོང་ངོ་།། །།
སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་སུམ་ཅུ་གཉིས་པ། དེ་ནས་ཚོང་དཔོན་གྱི་བུ་ནོར་བཟངས། བྱང་ཆུབ་སེམས་དཔའི་རྣམ་པར་ཐར་པ་གཞན་གྱིས་མི་ཐུབ་པའི་རྒྱལ་མཚན་གྱི་ཡེ་ཤེས་ཀྱིས་སྣང་བར་བྱས་པ། སངས་རྒྱས་ཀྱི་ཡུལ་གྱི་རྣམ་པར་འཕྲུལ་པ་བསམ་གྱིས་མི་ཁྱབ་པ་ལ་མངོན་སུམ་དུ་རྣམ་པར་སྤྱོད་པ། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་མངོན་སུམ་གྱི་ཡེ་ཤེས་ཀྱིས་མངོན་པར་ཤེས་པ། བྱང་ཆུབ་སེམས་དཔའི་ཏིང་ངེ་འཛིན་བསམ་གྱིས་མི་ཁྱབ་པའི་ཡེ་ཤེས་ཀྱིས། སེམས་སྣང་བར་གྱུར་པ་དུས་ཐམས་ཅད་དུ་ཡང་དག་པར་འཇུག་པའི་ཏིང་ངེ་འཛིན་གྱི་ཡེ་ཤེས་སྣང་བ་རབ་ཏུ་ཐོབ་པ། འདུ་ཤེས་ཀྱི་རྣམ་པ་ཐམས་ཅད་ལ་ཡང་དག་པར་འཇུག་པའི་ཏིང་ངེ་འཛིན་གྱི་ཡུལ་གྱིས་སྣང་བར་གྱུར་པ། འགྲོ་བ་ཐམས་ཅད་ལས་ཁྱད་པར་དུ་འཕགས་པ་དང་ལྡན་པའི་ཡེ་ཤེས་སྣང་བ་ཐོབ་པ། ཐམས་ཅད་ཀྱི་རྗེས་སུ་སོང་བའི་སྤྱོད་ཡུལ་ལ་རྣམ་པར་སྤྱོད་པ་མངོན་ཏུ་གྱུར་པ། གཉིས་སུ་རྣམ་པར་རྟོག་པ་མེད་པས་མཉམ་པ་ཉིད་དུ་བསྟན་པའི་ཡེ་ཤེས་ལྷུར་ལེན་པ། དམྱིགས་པ་ཐམས་ཅད་ལ་རབ་ཏུ་འདལ་བའི་ཡེ་ཤེས་སྣང་བ་དང་ལྡན་པ། མཉམ་པ་ཐམས་ཅད་ལ་མངོན་དུ་གྱུར་པའི་བཟོད་པ་རྣམ་པར་དག་པ་ལ་མོས་པའི་མཛོད་ལ་མཁས་པ་རང་བཞིན་གྱི་ཆོས་ལ་བཟོད་པ་ཁོང་དུ་ཆུད་པའི་ཡེ་ཤེས་མངོན་པར་ཤེས་པ་དང་ལྡན་པ། བྱང་ཆུབ་སེམས་དཔའི་སྤྱོད་པའི་རང་བཞིན་བསྒོམ་པ་དང་མི་འབྲལ་བའི་སེམས་དང་ལྡན་པ། ཐམས་ཅད་མཁྱེན་པ་ཉིད་ཀྱི་ཤུགས་དྲག་པོ་ལས་ཕྱིར་མི་ལྡོག་པའི་སེམས་དང་ལྡན་པ། སྟོབས་བཅུའི་ཡེ་ཤེས་སྣང་བའི་འོད་རབ་ཏུ་ཐོབ་པ། ཆོས་ཀྱི་དབྱིངས་བརྗོད་པ་ལ་མངོན་པར་
མོས་པས། ངོམས་པ་མེད་པའི་སེམས་དང་ལྡན་པ། ཐམས་ཅད་མཁྱེན་པ་ཉིད་ལ་རྣམ་པར་སྤྱོད་པའི་སྤྱོད་ཡུལ་ལ་འཇུག་པ་ཁོང་དུ་ཆུད་པའི་སེམས་དང་ལྡན་པ། བྱང་ཆུབ་སེམས་དཔའི་སྤྱོད་པའི་རྒྱན་མཐའ་ཡས་པ་མངོན་པར་བསྒྲུབ་པའི་སེམས་དང་ལྡན་པ། བྱང་ཆུབ་སེམས་དཔའི་སྨོན་ལམ་གྱི་དཀྱིལ་འཁོར་མཐའ་ཡས་པ། རྣམ་པར་སྤྱད་པའི་སེམས་དང་ལྡན་པ། འཇིག་རྟེན་གྱི་ཁམས་ཀྱི་དྲ་བ་མི་ཟད་པ། ཁོང་དུ་ཆུད་པའི་ཡེ་ཤེས་མཐའ་དང་དབུས་མེད་པ་མངོན་དུ་གྱུར་པའི་སེམས་དང་ལྡན་པ། སེམས་ཅན་རྒྱ་མཚོ་མཐའ་ཡས་པ་ཡོངས་སུ་སྨིན་པར་བྱ་བ་དང་། གདུལ་བར་བྱ་བ་ལ་ཞུམ་པ་མེད་པའི་སེམས་དང་ལྡན་པ་དེས། བྱང་ཆུབ་སེམས་དཔའི་སྤྱོད་པའི་ཡུལ་མཐའ་ཡས་པ་ལ་ཡང་དག་པར་བལྟ་བ་དང་། འཇིག་རྟེན་གྱི་ཁམས་ཀྱི་རྒྱུད་རྣམ་པ་ཐ་དད་པ་མཐའ་ཡས་པ་ལ་ཡང་དག་པར་བལྟ་བ་དང་། འཇིག་རྟེན་གྱི་ཁམས་རྣམ་པར་ཕྱེ་བ་སྣ་ཚོགས་མཐའ་ཡས་པ་ལ་ཡང་དག་པར་བལྟ་བ་དང་། འཇིག་རྟེན་གྱི་ཁམས་མཐའ་ཡས་པ་དམྱིགས་པ་ཕྲ་བ་དང་། ཡངས་པའི་ཁོངས་སུ་ཆུད་པར་བྱ་བ་ལ་ཡང་དག་པར་བལྟ་བ་དང་། འཇིག་རྟེན་གྱི་ཁམས་ཀྱི་གཞི་མཐའ་ཡས་པའི་མིང་གི་དྲ་བ་སྣ་ཚོགས་ཡང་དག་པར་བལྟ་བ་དང་། འཇིག་རྟེན་གྱི་ཁམས་སུ་རྣམ་པར་སྤྱད་པ། རྣམ་པར་གདགས་པ་མཐའ་ཡས་པའི་ཀུན་རྫོབ་རྣམ་པ་ཐ་དད་པ་ལ་ཡང་དག་པར་བལྟ་བ་དང་། སེམས་ཅན་གྱི་མོས་པ་སྣ་ཚོགས་མཐའ་ཡས་པ་ལ་ཡང་དག་པར་བལྟ་བ་དང་། སེམས་ཅན་རྣམ་པར་ཕྱེ་བའི་རྣམ་པ་ཐ་དད་པ། མཐའ་ཡས་པ་ལ་ཡང་དག་པར་བལྟ་བ་དང་། སེམས་ཅན་མཐའ་ཡས་པ་ཡོངས་སུ་སྨིན་པར་བྱ་བ་དང་། གདུལ་བ་ཁོང་དུ་ཆུད་པར་བྱ་བ་དང་། ཡང་དག་པར་བལྟ་བ་དང་། སེམས་ཅན་དང་ཕྱོགས་དང་དུས་
མཐའ་ཡས་པའི་མྱིང་གི་རྣམ་པ་སྣ་ཚོགས་ལ་ཡང་དག་པར་བལྟ་བ་དང་། དགེ་བའི་བཤེས་གཉེན་མངོན་དུ་བྱ་བ་བྱེད་ཅིང་མཐར་གྱིས་ཡུལ་ཚོལ་བ་དང་ལྡན་པ་གང་ན་བ་དང་། བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་ག་ལ་བ་དེར་ཕྱིན་ཏོ། །དེའི་ཚེ་བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་ཐམས་ཅད་མཁྱེན་པ་ཉིད་བསྒྲུབ་པའི་གཞིར་བྱས་ཤིང་དཀའ་ཐུབ་དྲག་པོ་ལ་སྤྱོད་དེ། དེའི་ཕྱོགས་བཞི་ནས་མེའི་ཕུང་པོ་རི་རབ་ཙམ་དུ་ཆེ་བ་བུས་པ་དང་། རི་ཤིན་ཏུ་མཐོ་བའི་གཡང་སའི་ལམ་གྱི་རྒྱུད་སྤུ་གྲིའི་སོས་གཤིབས་པས་འཁོད་པར་སྣང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ། འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་སྤྱད་པ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་། རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། འཕགས་པ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ་དེས་སྨྲས་པ་རིགས་ཀྱི་བུ་སོང་ལ་སྤུ་གྲིའི་སོ་དང་ར་བའི་རི་འདི་ལ་འཛེགས་ཏེ། མེའི་འོབས་འདིར་མཆོངས་ཤིག་དང་། དེས་ཁྱོད་ཀྱི་བྱང་ཆུབ་སེམས་དཔའི་སྤྱོད་པ་ཡོངས་སུ་དག་པར་འགྱུར་རོ་ཞེས་ནས། ཚོང་དཔོན་གྱི་བུ་ནོར་བཟངས་འདི་སྙམ་དུ་སེམས་པར་གྱུར་ཏེ། མི་ཁོམ་པ་བརྒྱད་ལས་རྣམ་པར་ལྡོག་པ་ཡང་ཤིན་ཏུ་དཀོན། མྱིར་གྱུར་ཏེ་ཁོམ་པ་ཕུན་སུམ་ཚོགས་ཤིང་། རྣམ་པར་དག་པ་ཡང་ཤིན་ཏུ་དཀོན། སངས་རྒྱས་འབྱུང་བ་ཡང་ཤིན་ཏུ་དཀོན། དབང་པོ་
ཉམས་པ་མྱེད་པ་ཡང་ཤིན་དུ་དཀོན། སངས་རྒྱས་ཀྱི་ཆོས་ཐོས་པ་ཡང་ཤིན་དུ་དཀོན། སྐྱེས་བུ་དམ་པ་དང་ཕྲད་པ་ཡང་ཤིན་ཏུ་དཀོན། ཡང་དག་པའི་དགེ་བའི་བཤེས་གཉེན་ཡང་ཤིན་ཏུ་དཀོན། ཡང་དག་པའི་ཚུལ་རྗེས་སུ་བསྟན་པས་ལེགས་པར་སྡུད་པ་ཡང་ཤིན་ཏུ་དཀོན། ཡང་དག་པར་འཚོ་བར་བྱ་བ་ཡང་ཤིན་ཏུ་དཀོན། མིའི་འཇིག་རྟེན་ན་ཆོས་དང་གཉེར་བའི་ཆོས་ལ་ནན་ཏན་བྱེད་པ་ཡང་ཤིན་ཏུ་དཀོན་ན། དེ་སྐད་ཟེར་ཞིང་བདག་གི་དགེ་བའི་བར་ཆད་ལ་ཞུགས་ལ་དེ་ལྟར་བདག་གི་སྲོག་གཅད་པར་བརྩོན་པ་འདི་བདུད་དམ་ཅིག་མ་ཡིན་ནམ། བདུད་ཀྱི་བྱིན་གྱིས་བརླབས་པའམ། བདུད་ཀྱི་རིས་སུ་གཏོགས་པའམ། དགེ་བའི་བཤེས་གཉེན་ལྟར་བརྫུས་པའམ། བྱང་ཆུབ་སེམས་དཔའ་ལ་མྱི་གཅགས་པ་བྱེད་པ་ཞིག་མ་ཡིན་གྲང་། བདག་གི་ཐམས་ཅད་མཁྱེན་པ་ཉིད་ལ་བགེགས་བྱེད་པར་འདོད་པ་ཞིག་མ་ཡིན་གྲང་། བདག་ལམ་གོལ་བ་ངན་པར་གཞུག་པར་འདོད་པ་ཞིག་མ་ཡིན་གྲང་། བདག་གིས་སངས་རྒྱས་ཀྱི་ཆོས་ཁོང་དུ་ཆུད་པར་བྱ་བའི་ཆོས་ཀྱི་སྒོ་ལ་བགེགས་བྱེད་པ་ཞིག་མ་ཡིན་གྲང་། སྙམ་ནས། དེ་དེ་ལྟར་སེམས་ཤིང་ཡིད་ལ་བྱེད་པའི་ཚེ། ཚངས་པ་སྟོང་ཕྲག་བཅུ་སྟེང་གི་བར་སྣང་ལ་གནས་ཏེ། འདི་སྐད་ཅེས་འཛེར་ཏོ། །རིགས་ཀྱི་བུ་དེ་ལྟ་བུའི་སེམས་མི་བརྟན་པར་མ་བྱེད་ཅིག །རིགས་ཀྱི་བུ་འཕགས་པ་འདི་ནི་ཏིང་ངེ་འཛིན་རྡོ་རྗེ་འོད་འཕྲོ་བའི་སྣང་བ་རབ་ཏུ་ཐོབ་པ་སྟེ། བརྩོན་འགྲུས་ལྡོག་པ་མེད་པའོ། །བརྩམས་པ་ཆེན་པོ་མཐར་དབྱུང་བ་ལ་ཞུགས་པའོ། །འགྲོ་བ་ཐམས་ཅད་ཀྱི་སྲེད་པའི་རླན་བསྐམ་པ་ལ་མངོན་པར་བརྩོན་པའོ། །ལྟ་བའི་རྣམ་པ་དང་དྲ་བ་ཐམས་ཅད་གཏུབ་པ་ལ་བརྩོན་པའོ། །ཉོན་མོངས་པའི་ལྕིག་ལྕིག་ཐམས་ཅད་ཟད་པར་བསྲེག་པ་ལ་སྟ་གོན་དུ་གནས་པའོ། །མི་
ཁོམ་མི་ཤེས་པའི་བས་མཐའི་དགོན་པ་ཐམས་ཅད་སྣང་བར་བྱ་བ་ལ་བརྩོན་པའོ། །སེམས་ཅན་ཐམས་ཅད་ཀྱི་རྒ་ཤིའི་གཡང་ས་དང་། འཇིགས་པ་རྣམ་པར་བཟློག་པ་ལ་ཡི་དམ་བརྟན་པའོ། །དུས་གསུམ་གྱི་མུན་པ་བསལ་བ་ལ་མངོན་པར་བརྩོན་པའོ། །ཆོས་ཐམས་ཅད་ཀྱི་འོད་གཟེར་དགྱེ་བ་ལ་ཞུགས་པའོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། ཚངས་པ་ཇི་སྙེད་ཅིག་མཁན་པོ་དང་དབང་བསྒྱུར་བ་དང་། འཇིག་རྟེན་ཐམས་ཅད་ཀྱི་གཙོ་བོར་རང་རང་རློམ་ཞིང་སེམས་པ། ལྟ་བའི་རྣམ་པ་སྣ་ཚོགས་ལ་མངོན་པར་ཞེན་པ། དེ་དག་ཐམས་ཅད་འཕགས་པ་འདིའི་དཀའ་ཐུབ་དང་། བརྟུལ་ཞུགས་ཀྱི་ཐུགས་དམ་གྱི་མཐུས་རང་རང་གི་གནས་ན་བག་དགའ་བ་མེད་ཅིང་། དེ་དག་བསམ་གཏན་གྱི་རོ་དགའ་བ་མྱོང་བ་མེད་པས། འཕགས་པ་འདིའི་དྲུང་དུ་འདོང་ངོ་། །དེ་དག་ཕྱིན་པ་དང་། འཕགས་པ་འདིའི་རྫུ་འཕྲུལ་གྱི་སྦྱིན་པ་དང་། དྲག་ཤུལ་གྱི་དཀའ་ཐུབ་དང་། བརྟུལ་ཞུགས་ཀྱི་ཟིལ་གྱིས་མནན་ཏེ། ལྟ་བའི་རྣམ་པ་ཐམས་ཅད་རྣམ་པར་བཟློག་པ་དང་། ང་རྒྱལ་དང་རློམ་སེམས་ཐམས་ཅད་རབ་ཏུ་སྤང་བའི་ཕྱིར་ཆོས་སྟོན་ཏོ། །འགྲོ་བ་ཐམས་ཅད་ལ་བྱམས་པ་ཆེན་པོ་དང་། སྙིང་རྗེ་ཆེན་པོས་ཁྱབ་པར་བྱ་བ་དང་། བྱང་ཆུབ་ཀྱི་བསམ་པ་བརྟན་པར་བྱ་བ་དང་། བྱང་ཆུབ་ཏུ་སེམས་བསྐྱེད་པ་ཤིན་ཏུ་ཡངས་པར་བྱ་བ་དང་། སངས་རྒྱས་ཐམས་ཅད་ཡང་དག་པར་བལྟ་བ་ལ་མངོན་པར་བརྩོན་པར་བྱ་བ་དང་། སངས་རྒྱས་ཀྱི་གསུང་གི་དཀྱིལ་འཁོར་ཐོབ་པར་བྱ་བ་ཡོངས་སུ་རྫོགས་པར་བྱ་བ་དང་། ཐམས་ཅད་དུ་གྲགས་པའི་སངས་རྒྱས་ཀྱི་དབྱངས་ལ་ཐོགས་པ་མེད་ཅིང་བསྒྲིབ་པ་མེད་པར་བྱ་བའི་ཕྱིར་ཆོས་སྟོན་ཏོ། །
བདུད་སྟོང་ཕྲག་བཅུ་ཡང་སྟེང་གི་བར་སྣང་ལ་འཁོད་ནས། ལྷ་རྫས་ཀྱི་ནོར་བུ་རིན་པོ་ཆེས་མངོན་པར་གཏོར་ཏེ། འདི་སྐད་ཅེས་འཛེར་ཏོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། འོད་འཕྲོ་བའི་ཕུང་པོ་འདི་ལས་སྣང་བ་ཆེན་པོ་བྱུང་ཞིང་ཁོ་བོ་ཅག་གི་ཁྱིམ་དང་། ལུས་དང་རྒྱན་གྱི་ལོངས་སྤྱོད་ཐམས་ཅད་ཟིལ་གྱིས་གནོན་ཏོ། །དེའི་ཕྱིར་ཁོ་བོ་ཅག་ཀྱང་སོ་སོའི་གནས་གནས་ན་བག་དགའ་བ་མེད་པས་འཁོར་དང་བཅས་ཏེ་འཕགས་པ་འདིའི་དྲུང་དུ་འདོང་ངོ་། །ཁོ་བོ་ཅག་འདིའི་དྲུང་དུ་ཕྱིན་ནས་ཀྱང་། འཕགས་པ་འདི་ནི་ཁོ་བོ་ཅག་ལ་ཅི་ནས་ཀྱང་རང་རང་གི་སེམས་སོར་ཆུད་ནས་བྱང་ཆུབ་ཏུ་སེམས་བསྐྱེད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟ་དེ་ལྟར་ཆོས་སྟོན་ཏོ། །དབང་བསྒྱུར་གྱི་ལྷའི་རྒྱལ་པོ། སྟོང་ཕྲག་བཅུས་ཀྱང་ལྷ་རྫས་ཀྱི་མེ་ཏོག་གིས་མངོན་པར་གཏོར་ཏེ། འདི་སྐད་ཅེས་འཛེར་ཏོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་བྱེད་པའི་ཚེ། ཁོ་བོ་ཅག་ཀྱང་རང་རང་གི་གནས་ན་དགའ་བ་མེད་དེ། དེ་ལྟར་བདག་ཅག་ཀྱང་རང་རང་གི་སྐྱེ་བོའི་འཁོར་དང་བཅས་ཏེ་འདིའི་དྲུང་དུ་འདོང་ངོ་། །བདག་ཅག་འདིའི་དྲུང་དུ་ཕྱིན་པ་དང་འདི་ནི་བདག་ཅག་ལ་རང་རང་གི་སེམས་ལ་དབང་བསྒྱུར་བ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཉོན་མོངས་པ་ཐམས་ཅད་ལ་དབང་བསྒྱུར་བ་ཐོབ་པར་བྱ་བ་དང་། བསམ་པ་ཇི་ལྟ་བ་བཞིན་དུ་སྐྱེ་བ་ལ་དབང་བསྒྱུར་བ་ཐོབ་པར་བྱ་བ་དང་། ལས་ཀྱི་སྒྲིབ་པ་ཐམས་ཅད་རྣམ་པར་དག་པའི་དབང་རབ་ཏུ་ཐོབ་པར་བྱ་བ་དང་། སྙོམས་པར་འཇུག་པ་ཐམས་ཅད་ལ་དབང་རབ་ཏུ་ཐོབ་པར་བྱ་བ་དང་། ཡོ་བྱད་ལ་དབང་བའི་རྒྱན་ཡོངས་སུ་དག་པར་བྱ་བ་དང་། བསམ་པ་ཇི་ལྟ་བ་བཞིན་དུ་
ཚེ་ལ་དབང་བསྒྱུར་བ་ཐོབ་པར་བྱ་བའི་ཕྱིར་ཆོས་སྟོན་ཏོ། །རབ་འཕྲུལ་དགའི་ལྷའི་རྒྱལ་པོ་སྟོང་ཕྲག་བཅུ་ཡང་སྟེང་གི་བར་སྣང་ལ་འཁོད་དེ། ལྷ་རྫས་ཀྱི་གླུ་ཡང་དག་པར་སྦྱར་བའི་ང་རོ་སྙན་པའི་དབྱངས་བསྒྲགས་ཏེ། མཆོད་པ་བྱས་ནས་འདི་སྐད་ཅེས་འཛེར་ཏོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། མེའི་ཕུང་པོ་འདི་ལས་དེ་དང་འདྲ་བའི་འོད་བྱུང་ཞིང་དེས་ཁོ་བོ་ཅག་གི་གཞལ་མེད་ཁང་འདི་དག་རྣམ་པར་དག་སྟེ། གསལ་བ་དང་འོད་ཤིན་ཏུ་དང་བར་གྱུར་ཏོ། །རྒྱན་འདི་དག་དང་ལྷའི་བུ་མོ་འདི་དག་ཀྱང་རྣམ་པར་དག་ཅིང་གསལ་ལ་འོད་ཤིན་དུ་དང་བར་གྱུར་ཏོ། །དེ་བས་ན་བདག་ཅག་ཀྱང་ལྷའི་བུ་དང་ལྷ་མོའི་ཚོགས་ཀྱི་འཁོར་དང་བཅས་པར་འདོད་པ་ལ་དགའ་བར་ཚོར་བ་མེད་དོ། །འདོད་པའི་བདེ་བ་ལ་མངོན་པར་དགའ་བ་མེད་པས་ལུས་དང་སེམས་ཚིམ་པར་གྱུར་ནས། འཕགས་པ་འདིའི་དྲུང་དུ་དོང་བ་ཡིན་ཏེ། འཕགས་པ་འདི་ནི་བདག་ཅག་དེ་ལྟར་ཕྱིན་པ་རྣམས་ལ་སེམས་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །སེམས་ཀྱི་འོད་འདང་བར་བྱ་བ་དང་། སེམས་ཤིན་དུ་དག་པར་བྱ་བ་དང་། སེམས་ལས་སུ་རུང་བར་བྱ་བ་དང་། སེམས་ཀྱི་དགའ་བ་ཡོངས་སུ་བསྐྱེད་པ་དང་། སྟོབས་བཅུའི་ཡེ་ཤེས་འཐོབ་པ་རྣམ་པར་དག་པར་བྱ་བ་དང་། ཆོས་ཀྱི་ཤུགས་ཆེན་པོ་རྣམ་པར་འཕེལ་བར་བྱ་བ་དང་། སངས་རྒྱས་ཀྱི་སྐུ་ཚད་མེད་པ་མངོན་པར་བསྒྲུབ་པའི་ཕྱིར་ལུས་རྣམ་པར་དག་པར་བྱ་བ་དང་། དེ་བཞིན་གཤེགས་པའི་གསུང་ཐོབ་པར་བྱ་བའི་ཕྱིར་ངག་རྣམ་པར་དག་པར་བྱ་བ་དང་། ཐམས་ཅད་མཁྱེན་པ་ཉིད་རབ་ཏུ་ཐོབ་པར་བྱ་བར་སེམས་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །རབ་དགའ་ལྡན་གྱི་ལྷའི་རྒྱལ་པོ་སྟོང་ཕྲག་བཅུའི་ལྷའི་བུ་དང་། ལྷའི་བུ་མོའི་ཚོགས་ཀྱི་འཁོར་དང་བཅས་
པ་དག་ཀྱང་སྟེང་གི་བར་སྣང་ལ་འཁོད་ནས། སྤོས་སྣ་ཚོགས་ཀྱི་ཕྱེ་མའི་སྤྲིན་གྱི་ཆར་མངོན་པར་ཕབ་པས་མཆོད་པ་བྱས་ཏེ། ཕྱག་འཚལ་ནས་འདི་སྐད་ཅེས་འཛེར་ཏོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། བདག་ཅག་ཀྱང་རང་རང་གི་གནས་ན་དགའ་བ་མེད་དེ། དེ་ལྟར་དགའ་བ་མེད་པས་འདིའི་དྲུང་དུ་འདོང་སྟེ། བདག་ཅག་ཕྱིན་པ་རྣམས་ལ་འཕགས་པ་འདི་ནི་ཡུལ་ཐམས་ཅད་ལ་ལྟོས་པ་མེད་པར་བྱ་བའི་ཕྱིར་ཆོས་སྟོན་ཏོ། །ཆོག་ཤེས་པའི་སེམས་སུ་བྱ་བ་དང་། དགེ་བའི་རྩ་བ་ཡང་དག་པར་བསྐྱེད་པ་དང་། བྱང་ཆུབ་ཏུ་སེམས་བསྐྱེད་པ་རབ་ཏུ་ཐོབ་པར་བྱ་བ་ནས། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཆོས་སྟོན་ཏོ། །རབ་མཚེ་མའི་ལྷའི་རྒྱལ་པོ་སྟོང་ཕྲག་བཅུ་ལྷའི་བུ་དང་། ལྷའི་བུ་མོའི་ཚོགས་ཀྱི་འཁོར་དང་བཅས་པ་དག་གིས་ཀྱང་ལྷ་རྫས་ཀྱི་མེ་ཏོག་མན་ད་ར་བའི་ཆར་མངོན་པར་ཕབ་སྟེ། འདི་སྐད་ཅེས་འཛེར་ཏོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། བདག་ཅག་ཀྱང་ལྷ་རྫས་ཀྱི་གླུ་སྙན་པ་ལ་དགའ་བ་མེད་དེ། དེ་ལྟར་དགའ་བ་མེད་པས་འཕགས་པ་འདིའི་དྲུང་དུ་འདོང་སྟེ། བདག་ཅག་ཕྱིན་ནས་ཀྱང་། འཕགས་པ་འདི་ནི་འདོད་པའི་དགའ་བ་ཐམས་ཅད་རྣམ་པར་བཟློག་པར་བྱ་བ་ནས། སངས་རྒྱས་ཀྱི་ཆོས་ཐམས་ཅད་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ལྷའི་དབང་པོ་བརྒྱ་བྱིན་སྟོང་ཕྲག་བཅུ་སོ་སོ་ནས། ཉེ་བའི་དབང་པོ་སུམ་ཅུ་རྩ་གཉིས་དང་། ལྷའི་བུ་དང་། ལྷའི་བུ་མོའི་ཚོགས་ཀྱི་འཁོར་དང་བཅས་པས། ལྷ་རྫས་ཀྱི་གོས་དང་། རིན་པོ་ཆེའི་རྒྱན་དང་། མེ་ཏོག་གི་སྤྲིན་གྱི་ཆར་མངོན་པར་ཕབ་སྟེ། འདི་སྐད་ཅེས་འཛེར་ཏོ། ། རིགས་ཀྱི་བུ་
འཕགས་པ་འདི། དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། བདག་ཅག་ཀྱང་བརྒྱ་བྱིན་གྱི་ཁང་པ་དང་། བཟའ་ཤིང་གི་ར་བ་དང་། རྩེ་བའི་ནགས་ཚལ་དང་། ལྷ་རྫས་ཀྱི་རོལ་མོ་བརྡུང་ཞིང་དཀྲོལ་བ་དང་། གམ་ཡོ་ན་གླུ་ལེན་པའི་ལོངས་སྤྱོད་ལ་དགའ་བ་མེད་དེ། དེ་ལྟར་བདག་ཅག་དགའ་བ་མེད་པས་འདིའི་དྲུང་དུ་འདོང་ངོ་། །བདག་ཅག་དེར་ཕྱིན་ནས་ཀྱང་འཕགས་པ་འདི་ནི་ཁོ་བོ་ཅག་ལ་འདོད་པའི་དགའ་བ་ཐམས་ཅད་ཡོངས་སུ་སྤང་བའི་ཕྱིར་ཆོས་སྟོན་ཏོ། །འདི་དག་ཐམས་ཅད་ནི་རྟག་པ་མ་ཡིན་ཏེ། མི་བརྟན་ཞིང་འཇིག་པར་འགྱུར་བའི་ཆོས་ཅན་ནོ་ཞེས་བྱ་བའི་ཚིག་བརྗོད་དོ། །དྲེགས་པ་དང་བག་མེད་པ་ཐམས་ཅད་ཡོངས་སུ་གཅད་པ་དང་། བླ་ན་མེད་པའི་བྱང་ཆུབ་ཏུ་སྤྲོ་བ་བསྐྱེད་པའི་ཕྱིར་ཆོས་སྟོན་ཏོ། །རིགས་ཀྱི་བུ་གཞན་ཡང་འདིས་བལྟས་པ་ཙམ་གྱིས་རི་རབ་ཀྱི་རྩེ་མོ་ཐམས་ཅད་ཀྱང་གཡོ་བར་འགྱུར་ཏེ། དེས་བདག་ཅག་གཤིགས་པས་སེམས་སྐྱོ་བར་གྱུར་ནས། ཐམས་ཅད་མཁྱེན་པའི་སེམས་བརྟན་པས། ཐམས་ཅད་མཁྱེན་པའི་ཡེ་ཤེས་སུ་སྨོན་ལམ་མངོན་པར་སྒྲུབ་བོ། །ཀླུའི་རྒྱལ་པོ་ཤུགས་ལྡན་དང་། དགའ་བོ་དང་། བསྙེན་དགའ་བོ་ལ་སྩོགས་པ། ཀླུ་བརྒྱ་སྟོང་ཕྲག་བཅུ་དག་ཀྱང་སྟེང་གི་བར་སྣང་ལ་གནས་ཤིང་དུས་དང་མཐུན་པའི་ལྷ་རྫས་ཀྱི་ཙན་དན་གྱི་སྤྲིན་དང་། ཀླུའི་བུ་མོས་གླུ་བླངས་པའི་ང་རོ་སྙན་པའི་དབྱངས་དང་། ལྷ་རྫས་ཀྱི་སྤོས་ཆུའི་རྒྱུན་རབ་ཏུ་འབབ་པའི་ཆར་མངོན་པར་ཕབ་སྟེ། འདི་སྐད་ཅེས་འཛེར་ཏོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། མེའི་ཕུང་པོ་ཆེན་པོ་འདི་ལས་འོད་ཆེན་པོ་བྱུང་སྟེ། དེས་ཀླུའི་གནས་ཐམས་ཅད་སྣང་བར་བྱས་ནས། བྱེ་མའི་ཆར་དང་། ནམ་མཁའ་ལྡིང་གི་འཇིགས་པ་ཡོངས་སུ་སེལ་ཏོ། །ཁྲོ་བ་
འབྱུང་བ་ཡང་ཞི་བར་བྱས་ཏེ། ལུས་སིམ་པར་བྱས་ནས་ཡིད་ཤིན་ཏུ་མོས་པར་བྱེད་དོ། །དེ་ལྟར་སེམས་ཤིན་ཏུ་མོས་པར་གྱུར་ནས། འཕགས་པ་འདི་ནི་བདག་ཅག་ལ་ཆོས་སྟོན་ཏེ། འདི་ལྟར་ཀླུའི་ལམ་གྱི་རྒྱུད་ངན་པ་རྣམ་པར་སྨད་པ་དང་། སྒྲིབ་པའི་ལས་ཐམས་ཅད་རབ་ཏུ་སྤང་བའི་ཕྱིར་ཉེས་པ་འཆགས་སུ་བཙུད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཙུད་དེ་ཐམས་ཅད་མཁྱེན་པ་ཉིད་ལ་རབ་ཏུ་དགོད་དོ། །གནོད་སྦྱིན་གྱི་དབང་པོ་སྟོང་ཕྲག་བཅུ་ཡང་ནམ་མཁའི་དབྱིངས་ལ་འཁོད་དེ། མཆོད་པ་རྣམ་པ་སྣ་ཚོགས་ཀྱིས་བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་དང་། ཚོང་དཔོན་གྱི་བུ་ནོར་བཟངས་ལ་མཆོད་པ་བྱས་ནས་འདི་སྐད་ཅེས་འཛེར་ཏོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། ཁོ་བོ་ཅག་གི་འཁོར་ཀུན་ཀྱང་མི་རྣམས་ལ་བྱམས་པའི་སེམས་སྐྱེ་བར་འགྱུར་ཏེ། གནོད་སྦྱིན་དང་། སྲིན་པོ་དང་། གྲུལ་བུམ་ཐམས་ཅད་ཀྱང་བྱམས་པའི་སེམས་དང་ལྡན་པར་གྱུར་ཏོ། །དེ་དག་བྱམས་པའི་སེམས་དང་ལྡན་ཞིང་འཚེ་བ་མེད་པ་ལ་ཞུགས་པ་རྣམས་ཁོ་བོ་ཅག་གི་དྲུང་དུ་འོང་ངོ་། །ཁོ་བོ་ཅག་ཀྱང་དེ་ལྟར་བྱམས་པའི་དབང་གི་ཟིལ་གྱིས་ནོན་པས། རང་རང་གི་གནས་དེ་དང་། དེ་དག་ན་དགའ་བ་མེད་དེ། དེ་ལྟར་བདག་ཅག་ཀྱང་རང་རང་གི་སྐྱེ་བོའི་འཁོར་དང་བཅས་ཏེ། འཕགས་པ་འདིའི་དྲུང་དུ་འདོང་ངོ་། །འཕགས་པ་བདག་ཅག་དེ་ལྟར་འོངས་པ་རྣམས་ལ་འཕགས་པ་འདིའི་སྐུ་ལས་བྱུང་བའི་འོད་ཀྱིས་ལུས་ཐམས་ཅད་སྣང་བར་བྱས་ཤིང་། བདེ་བས་ཁྱབ་པར་མཛད་དེ། དེ་ལྟར་བདག་ཅག་ལུས་དང་སེམས་བདེ་བར་གྱུར་ནས། འཕགས་པ་འདི་ནི་ཅི་ནས་ཀྱང་བདག་ཅག་ལ་གནོད་སྦྱིན་དང་། སྲིན་པོ་དང་གྲུལ་བུམ་དང་། ལུས་སྲུལ་པོ་མང་པོ་བྱང་ཆུབ་ཏུ་སེམས་སྐྱེ་བར་འགྱུར་བ་དེ་ལྟར་ཆོས་སྟོན་ཏོ། །དྲི་ཟའི་དབང་པོ་སྟོང་ཕྲག་
བཅུ་དག་ཀྱང་སྟེང་གི་བར་སྣང་ལ་འཁོད་ནས་འདི་སྐད་ཅེས་འཛེར་ཏོ། །རིགས་ཀྱི་བུ་ཁོ་བོ་ཅག་ཀྱང་རང་རང་གི་གནས་ན་འཁོད་པའི་ཚེ། འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། མེའི་ཕུང་པོ་འདི་ལས་འོད་བྱུང་སྟེ། བདག་ཅག་གི་གནས་སྣང་བར་གྱུར་ཏོ། །དེ་ལྟར་བདག་ཅག་འོད་དེས་ཕོག་སྟེ། བདེ་བ་བསམ་གྱིས་མི་ཁྱབ་པ་དང་ལྡན་པར་གྱུར་པས། འཕགས་པ་འདིའི་དྲུང་དུ་འདོང་སྟེ། བདག་ཅག་དྲུང་དུ་ཕྱིན་ནས་ཀྱང་འཕགས་པ་འདི་ནི་བདག་ཅག་ཅི་ནས་ཀྱང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟར་ཆོས་སྟོན་ཏོ། །ལྷ་མ་ཡིན་གྱི་དབང་པོ་སྟོང་ཕྲག་བཅུ་དག་ཀྱང་རྒྱ་མཚོའི་ནང་ནས་མངོན་པར་འཐོན་ཏེ། ནམ་མཁའ་ལ་པུས་མོ་གཡས་པའི་ལྷ་ང་བཙུགས་ཏེ། ཐལ་མོ་སྦྱར་ནས་ཕྱག་འཚལ་ཞིང་འདི་སྐད་ཅེས་འཛེར་ཏོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། ཁོ་བོ་ཅག་གི་ལྷ་མ་ཡིན་གྱི་འཇིག་རྟེན་རྒྱ་མཚོ་དང་རིར་བཅས་པའི་ས་ཆེན་པོའི་དཀྱིལ་འཁོར་རབ་ཏུ་གཡོ་བར་གྱུར་ཏེ། བདག་ཅག་ཀུན་གྱི་ང་རྒྱལ་དང་རློམ་སེམས་དང་། དྲེགས་པ་ཐམས་ཅད་བརྟུལ་ཤུགས་དང་། དཀའ་ཐུབ་ཀྱི་ཟིལ་གྱིས་ནོན་ཏེ། འཕགས་པ་འདིའི་དྲུང་དུ་འདོང་ངོ་། །དེར་ཕྱིན་ནས་ཀྱང་འཕགས་པ་འདི་ནི་བདག་ཅག་ལ་གཡོ་སྒྱུ་ཐམས་ཅད་རབ་ཏུ་སྤང་བ་དང་། ཆོས་ཟབ་མོའི་བཟོད་པ་ལ་གཟུད་པ་དང་། མི་གཡོ་བའི་ཆོས་ཉིད་ལ་རབ་ཏུ་དགོད་པ་དང་། སྟོབས་བཅུའི་ཡེ་ཤེས་ཡོངས་སུ་གྲུབ་པར་བྱ་བའི་ཕྱིར་ཆོས་སྟོན་ཏོ། །ནམ་མཁའ་ལྡིང་གི་དབང་པོ་ཤུགས་ཆེན་པོ་འཛིན་པ་ལ་སྩོགས་པ་ནམ་མཁའ་ལྡིང་གི་དབང་པོ་སྟོང་ཕྲག་བཅུས་ཀྱང་བྲམ་ཟེའི་བུ་ཤིན་ཏུ་སྡུག་གུའི་
གཟུགས་སུ་མངོན་པར་སྤྲུལ་ཏེ། འདི་སྐད་ཅེས་འཛེར་ཏོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། མེའི་ཕུང་པོ་འདི་དག་ལས་འོད་ཆེན་པོ་བྱུང་སྟེ། བདག་ཅག་གི་གནས་སྣང་བར་བྱས་ནས། ཡོངས་སུ་གཡོ་བར་བྱེད་དོ། །དེས་བདག་ཅག་ཀྱང་འཇིགས་ཤིང་སྐྲག་སྟེ། སྐྱོ་བའི་ཡིད་དང་ལྡན་པར་གྱུར་ནས་འཕགས་པ་འདིའི་དྲུང་དུ་འདོང་ངོ་། །འཕགས་པ་འདི་ཡང་བདག་ཅག་ལ་ཆོས་སྟོན་ཅིང་། བྱམས་པ་ཆེན་པོ་ལ་ཡང་དག་པར་སྦྱོར་བ་མཛད་དོ། །སྙིང་རྗེ་ཆེན་པོ་ལ་ཡང་དག་པར་དགོད་པ་མཛད་དོ། །འཁོར་བའི་རྒྱ་མཚོར་འཇུག་པ་ལ་ཡང་ཡང་དག་པར་སྦྱོར་བ་མཛད་དོ། །འདོད་པའི་འདམ་དུ་བྱིང་བའི་སེམས་ཅན་མངོན་པར་གདོན་པར་བྱ་བ་ལའང་ཡོངས་སུ་སྦྱོར་བ་མཛད་དོ། །ལྷག་པའི་བསམ་པའི་སྒོ་རྣམ་པར་དག་པར་བྱ་བ་ལའང་རབ་ཏུ་སྦྱོར་བ་མཛད་དོ། །ཤེས་རབ་དང་ཐབས་ཤིན་ཏུ་གསལ་བ་ལའང་ཡང་དག་པར་སྦྱོར་བ་མཛད་དོ། །རྣམ་པ་ཇི་ལྟ་བུར་ཡོངས་སུ་སྨྱིན་པར་བྱ་བའི་སེམས་ཅན་རྣམས་གདུལ་བར་བྱ་བ་ལའང་རབ་ཏུ་སྦྱོར་བ་མཛད་དོ། །མིའམ་ཅིའི་དབང་པོ་སྟོང་ཕྲག་བཅུ་ཡང་སྟེང་གི་བར་སྣང་ལ་འཁོད་དེ་འདི་སྐད་ཅེས་འཛེར་ཏོ། །རིགས་ཀྱི་བུ་འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། ཁོ་བོ་ཅག་གི་གནས་ན་འཁོད་པའི་ཤིང་ཏ་ལའི་ཕྲེང་བ་ལས་དྲིལ་བུའི་དྲ་བ་རིན་པོ་ཆེའི་སྲད་བུས་ལྡ་ལྡིར་བརྒྱུས་པའི་སིལ་སྙན་དང་། རོལ་མོའི་ཡོ་བྱད་དང་། རིན་པོ་ཆེའི་རྒྱན་དང་། ཁྱིམ་གྱི་ལོངས་སྤྱོད་ཐམས་ཅད་ལས་སངས་རྒྱས་ཀྱི་སྒྲ་བྱུང་ངོ་། །ཆོས་ཀྱི་སྒྲ་དང་ཕྱིར་མི་ལྡོག་པའི་བྱང་ཆུབ་སེམས་དཔའི་དགེ་འདུན་གྱི་སྒྲ་དང་། བྱང་ཆུབ་ཏུ་ཡང་དག་པར་ཞུགས་པའི་སྨོན་ལམ་གྱི་སྒྲ་བྱུང་ངོ་། །འཇིག་རྟེན་གྱི་ཁམས་ཀྱི་གྲངས་སུ་བྱ་བ་ཆེ་གེ་མོ་ཞིག་ན་ནི་བྱང་ཆུབ་སེམས་དཔའ་མྱིང་འདི་དང་འདི་ཞེས་བྱ་བ་ཞིག་བྱང་ཆུབ་ཏུ་སྨོན་ལམ་འདེབས་སོ། །འཇིག་རྟེན་གྱི་ཁམས་ཀྱི་གྲངས་སུ་བྱ་བ་ཆེ་གེ་མོ་ཞིག་ན་ནི་བྱང་ཆུབ་སེམས་དཔའི་མྱིང་འདི་དང་འདི་ཞེས་
བྱ་བ་ཞིག་དཀའ་བ་ཡོངས་སུ་གཏོང་བ་བྱེད་དོ། །འཇིག་རྟེན་གྱི་ཁམས་ཀྱི་གྲངས་སུ་བྱ་བ་ཆེ་གེ་མོ་ཞིག་ན་ནི་བྱང་ཆུབ་སེམས་དཔའ་མྱིང་འདི་དང་འདི་ཞེས་བྱ་བ་ཞིག་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱི་དཀྱིལ་འཁོར་ཡོངས་སུ་སྦྱོང་བ་བྱེད་དོ། །འཇིག་རྟེན་གྱི་ཁམས་ཀྱི་གྲངས་སུ་བྱ་བ་ཆེ་གེ་མོ་ཞིག་ན་ནི་བྱང་ཆུབ་སེམས་དཔའ་མྱིང་འདི་དང་འདི་ཞེས་བྱ་བ་ཞིག་སྙིང་པོ་བྱང་ཆུབ་ཏུ་འགྲོའོ། །འཇིག་རྟེན་གྱི་ཁམས་ཀྱི་གྲངས་སུ་བྱ་བ་ཆེ་གེ་མོ་ཞིག་ན་ནི་བྱང་ཆུབ་སེམས་དཔའ་མྱིང་འདི་དང་འདི་ཞེས་བྱ་བ་ཞིག་དཔུང་དང་བཞོན་པར་བཅས་པའི་བདུད་རབ་ཏུ་ཕམ་པར་བྱས་ཏེ། བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །འཇིག་རྟེན་གྱི་ཁམས་ཀྱི་གྲངས་སུ་བྱ་བ་ཆེ་གེ་མོ་ཞིག་ན་ནི་དེ་བཞིན་གཤེགས་པ་མཚན་འདི་དང་འདི་ཞེས་བྱ་བ་ཞིག་ཆོས་ཀྱི་འཁོར་ལོ་བསྐོར་བ་མཛད་དོ། །འཇིག་རྟེན་གྱི་ཁམས་ཀྱི་གྲངས་སུ་བྱ་བ་ཆེ་གེ་མོ་ཞིག་ན་ནི་དེ་བཞིན་གཤེགས་པ་མཚན་འདི་དང་ནི་ཆེ་གེ་མོ་ཞིག་སངས་རྒྱས་ཀྱི་འཕྲིན་ལས་མ་ལུས་པར་མཛད་ནས། ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བ་མཛད་དོ། །ཞེས་བྱ་བའི་སྒྲ་འབྱིན་ཏེ། རིགས་ཀྱི་བུ་འཛམ་བུའི་གླིང་གི་རྩྭ་དང་ཤིང་དང་། ཡལ་ག་དང་། ལོ་མ་དང་། འདབ་མ་ཐམས་ཅད་རྡུལ་ཤིན་ཏུ་ཕྲ་བའི་ཆར་བླགས་པའི་མུར་ཐུག་པར་ནི་རུང་ཡང་སྲིད་ཀྱི་དེ་བཞིན་གཤེགས་པ་དེ་དག་གི་མཚན་དང་། བྱང་ཆུབ་སེམས་དཔའ་རྣམས་ཀྱི་སྨོན་ལམ་དང་། བྱང་ཆུབ་སེམས་དཔའི་སྤྱོད་པ་ལ་འཇུག་པའི་ཁྱད་པར་གང་ཁོ་བོ་ཅག་གི་གནས་ན་ཡོད་པའི་ཤིང་ཏ་ལའི་ཕྲེང་བ་ལས་རོལ་མོའི་ཡོ་བྱད་དང་། རིན་པོ་ཆེའི་རྒྱན་དང་། ཁྱིམ་
གྱི་ལོངས་སྤྱོད་རླུང་གིས་བསྐྱོད་པའི་སྒྲ་འབྱུང་ཞིང་། ང་རོ་འབྱིན་པ་དང་། རྣ་ལམ་དུ་གྲགས་པའི་མཐའ་ནི་ཐུག་པར་མི་རུང་ངོ་། །དེ་ལྟར་བདག་ཅག་ཀྱང་སངས་རྒྱས་དང་། ཆོས་དང་། དགེ་འདུན་དང་། བྱང་ཆུབ་སེམས་དཔའ་རབ་ཏུ་འཇུག་པའི་སྨོན་ལམ་དང་། སྤྱོད་པ་དང་མཚན་གྱི་ཆུ་ཀླུང་གི་སྒྲས་དགའ་བ་ཆེན་པོའི་ཤུགས་དྲག་པོས་ཉམས་བདེ་བ་སྐྱེས་ཏེ། འཕགས་པ་འདིའི་དྲུང་དུ་འདོང་ངོ་། །དེ་ལྟར་བདག་ཅག་ཕྱིན་པར་གྱུར་ནས་ཀྱང་། འཕགས་པ་འདི་ནི་བདག་ཅག་ལ་ཅི་ནས་ཀྱང་། ཁོ་བོ་ཅག་གི་འཁོར་གྱི་སེམས་ཅན་དུ་མ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མྱི་ལྡོག་པར་འགྱུར་བ་དེ་ལྟ་བུར་ཆོས་སྟོན་པ་མཛད་དོ། །འདོད་པ་ལ་སྤྱོད་པའི་ལྷའི་བུ་སྟོང་ཕྲག་དཔག་ཏུ་མེད་པ་ཁ་དོག་ཤིན་ཏུ་མཛེས་པ་དག་ཀྱང་ནམ་མཁའ་ལ་འཁོད་ཅིང་ཡིད་ཀྱིས་སྤྲུལ་པའི་མཆོད་པས་མཆོད་པ་བྱས་ནས་འདི་སྐད་ཅེས་འཛེར་ཏོ། །འཕགས་པ་འདི་དཀའ་ཐུབ་ལྔས་ཡོངས་སུ་གདུང་བ་མཛད་པའི་ཚེ། མེའི་ཕུང་པོ་འདི་དག་ལས་རྣམ་པ་འདི་ལྟ་བུའི་འོད་བྱུང་ཏེ། འོད་དེས་མར་ན་མནར་མེད་པ་ཡན་ཆད་དུ་སེམས་ཅན་དམྱལ་བ་རྣམས་སྣང་བར་བྱས་ནས། སེམས་ཅན་དམྱལ་བ་པའི་སེམས་ཅན་ཐམས་ཅད་ཀྱི་སྡུག་བསྔལ་རྩེ་ཟིལ་བར་བྱས་ཏེ། འོད་དེ་ཉིད་ཀྱིས་འཕགས་པ་འདི་བདག་ཅག་གི་མྱིག་ལམ་དུ་སྣང་བར་བསྟན་པས་དེའི་ཕྱིར་ཁོ་བོ་ཅག་ཀྱང་འཕགས་པ་འདི་ལ་སེམས་མོས་པར་གྱུར་ནས། འདོད་པ་ལ་སྤྱོད་པའི་ལྷའི་རིས་ཉམས་སུ་བདེ་བར་སྐྱེས་སོ། །དེ་ལྟར་བདག་ཅག་ཀྱང་འཕགས་པ་འདིས་མཛད་པ་ལ་དྲིན་དུ་གཟོ་ཞིང་མཐོང་བས་མི་ངོམས་པས་འདོད་པའི་དགའ་བ་ཐམས་ཅད་ཡོངས་སུ་སྤངས་ཏེ། འཕགས་པ་འདིའི་དྲུང་དུ་འདོང་ངོ་། །དེར་བདག་ཅག་ཕྱིར་ནས་ཀྱང་འཕགས་པ་འདི་ནི་ཅི་ནས་ཀྱང་། སེམས་ཅན་ཚད་མྱེད་པ་རྣམས་བྱང་
ཆུབ་ཏུ་སྨོན་ལམ་འདེབས་པར་འགྱུར་བ་དེ་ལྟར་ཆོས་སྟོན་པ་མཛད་དོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཆོས་ཀྱི་ཚུལ་རྣམ་པ་འདི་ལྟ་བུ་ཐོས་ནས་དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ཏེ། བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་ལ་ཡང་དག་པའི་དགེ་བའི་བཤེས་གཉེན་དུ་འདུ་ཤེས་བསྐྱེད་དེ། བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། འདི་སྐད་ཅེས་སྨྲས་སོ། །འཕགས་པ་དེ་ལྟར་བདག་གིས་དགེ་བའི་བཤེས་གཉེན་གྱི་བཀའ་དང་། འགལ་བར་བགྱིས་པའི་ནོངས་པ་ལ་ནོངས་པར་བཤགས་སོ། །དེ་ནས་བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་ཀྱིས། ཚོང་དཔོན་གྱི་བུ་ནོར་བཟངས་ལ་ཚིགས་སུ་བཅད་པ་འདི་དག་སྨྲས་སོ། །བྱང་ཆུབ་སེམས་དཔའ་གང་ཞིག་རྗེས་སུ་བསྟན་དང་འཐུན་བྱེད་ཅིང་། །དྲན་པ་ཉེ་བར་གཞག་སྟེ་བླ་མའི་ངག་གཅོག་མི་བྱེད་ན། །དེ་ཕྱིར་དེ་ཡི་དོན་རྣམས་ཐམས་ཅད་འཐུན་པར་འགྲུབ་པར་འགྱུར། མཐུན་པའི་སངས་རྒྱས་ཡེ་ཤེས་བྱང་ཆུབ་དྲུང་དུ་འཚང་ཡང་རྒྱ། དེ་ནས་ཚོང་དཔོན་གྱི་བུ་ནོར་བཟངས་ཀྱིས་རིའི་གཡང་སའི་ལམ་སྤུ་གྲི་སོ་གཤིབས་པ་ལ་འཛེགས་ཏེ། མེའི་ཕུང་པོ་ཆེན་པོ་དེར་མཆོངས་སོ། །དེ་ལྟར་མཆོངས་པའི་ཚེ། བྱང་ཆུབ་སེམས་དཔའི་ཏིང་ངེ་འཛིན་ཤིན་ཏུ་བརྟན་པ་ཞེས་བྱ་བ་ཐོབ་པར་གྱུར་ཏོ། །མྱེ་དེས་རེག་ནས་ཀྱང་བྱང་ཆུབ་སེམས་དཔའི་ཏིང་ངེ་འཛིན་རབ་ཏུ་ཞི་བའི་བདེ་བ་མངོན་པར་ཤེས་པ་ཞེས་བྱ་བ་ཐོབ་པར་གྱུར་ནས་དེས་འདི་སྐད་ཅེས་སྨྲས་སོ། །འཕགས་པ་མྱེའི་ཕུང་པོ་ལ་དེ་ལྟར་རེག་ན་བདེ་བ་དང་། རིའི་ལམ་སྤུ་གྲིས་གཏམས་པ་འདི་ཡང་དེ་ལྟར་རེག་ན་བདེ་བ་དེ་ནི་ངོ་མཚར་ཆེའོ། །དེས་སྨྲས་པ། རིགས་ཀྱི་བུ་ཁོ་བོ་ནི་བྱང་ཆུབ་སེམས་དཔའི་རྣམ་པར་ཐར་པ་དཀྱིལ་འཁོར་
ཡོངས་སུ་མི་ཟད་པ་ཐོབ་པ་སྟེ། རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའི་རྣམ་པར་ཐར་པ་དཀྱིལ་འཁོར་ཡོངས་སུ་མི་ཟད་པ་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་མེའི་ཕུང་པོ་ལྟ་བུ་འགྲོ་བ་ཐམས་ཅད་ཀྱི་ཉོན་མོངས་པ་དང་། ལྟ་བའི་རྣམ་པ་ཐམས་ཅད་ཡོངས་སུ་ཟད་པར་བྱ་བའི་སྨོན་ལམ་ཅན་རུ་མཚོན་ཕྱིར་མི་ལྡོག་པ་དང་ལྡན་པ། སེམས་ལ་ཐུབ་པ་མེད་ཅིང་སེམས་དམའ་བ་མེད་པ་དང་ལྡན་པ། ཡིད་ཞུམ་པ་མེད་པ་ཅན་རྡོ་རྗེའི་སྙིང་པོ་དང་ལྡན་པའི་མཐུ་བོ་ཆེ་ལྟ་བུ་བརྩམས་པ་ཆེན་པོ་མཐར་ཕྱིན་པར་བྱ་བ་ལ་སྒྱིད་ལུག་པ་མེད་པ་སྦྱོར་བ་ལྷོད་པ་མྱེད་པ། རླུང་གི་དཀྱིལ་འཁོར་ལྟ་བུར་འགྲོ་བ་ཐམས་ཅད་ཀྱི་དོན་དུ་བརྩོན་པ། བརྩོན་འགྲུས་ཕྱིར་མི་ལྡོག་པ་དང་ལྡན་པ། ཕྱིར་མི་ཟློག་པའི་གོ་ཅ་བགོས་པ། དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་སེང་གེ་རྣམ་པར་བསྒྱིངས་པ་ཞེས་བྱ་བ་ཡོད་དེ། དེ་ན་རྒྱལ་པོ་སེང་གེ་དཔལ་གྱི་བུ་མོ་བྱམས་མ་ཞེས་བྱ་བ་བུ་མོ་ལྔ་བརྒྱའི་འཁོར་དང་བཅས་པ་འདུག་གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས། བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། བྲམ་ཟེ་རྒྱལ་བའི་དྲོད་ཀྱི་སྐྱེ་མཆེད་ཀྱི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་དགེ་བའི་བཤེས་གཉེན་ལ་རིམ་གྲོ་བསམ་གྱིས་མྱི་ཁྱབ་པ་ལ་ཞུགས་པ་མོས་པ་རྒྱ་ཆེན་པོས་རྣམ་པར་དག་པ་ཐེག་པ་ཆེན་པོ་ལ་མངོན་དུ་ཕྱོགས་པ། སངས་རྒྱས་ཀྱི་ཡེ་ཤེས་ལ་མངོན་
པར་མོས་པ། སངས་རྒྱས་ཀྱི་ཆོས་ལ་ཡང་དག་པར་ཞུགས་པ། དགེ་བའི་བཤེས་གཉེན་གྱི་རྗེས་སུ་འབྲང་བར་སྤྲོ་བ། ཆོས་ཀྱི་རིམ་གྲོ་ལ་རྣམ་པར་སྤྱོད་པ། ཆགས་པ་མེད་པའི་ཡེ་ཤེས་ལ་མངོན་དུ་གྱུར་པ། ཡང་དག་པའི་མཐའ་ཤིན་ཏུ་རྟོགས་པ། ཡེ་ཤེས་ཀྱི་མཐའ་ལ་གནས་པའི་ཡུལ་དང་ལྡན་པ། དུས་གསུམ་སྐད་ཅིག་གི་ཆ་ཤས་ལ་ཁོང་དུ་ཆུད་པར་བྱེད་པ། ནམ་མཁའི་མཐའ་གཉིས་སུ་མེད་པ་མངོན་དུ་གྱུར་པ། མི་གཉིས་པའི་མཐའ་རྣམ་པར་གདོན་མི་ཟ་བ་ཐོབ་པ། ཆོས་ཀྱི་དབྱིངས་ཀྱི་མཐའ་ལ་རྣམ་པར་མི་རྟོག་པར་གནས་པ། བསྒྲིབས་པ་མེད་པའི་མཐས་གདུལ་བ་ཁོང་དུ་ཆུད་པར་བྱ་བ་ལ་ཞུགས་པ། ཆོས་ཀྱི་མཐའ་དང་མྱི་འགལ་བར་བྱ་བ་ལ་གཞོལ་བ། དེ་བཞིན་གཤེགས་པའི་མཐའ་ལ་མཐའ་མེད་པར་ཁོང་དུ་ཆུད་པ། སངས་རྒྱས་ཐམས་ཅད་ཀྱི་མཐའ་ལ་རྣམ་པར་མི་རྟོག་པར་གནས་པ། སེམས་ཅན་ཐམས་ཅད་ཀྱི་འདུ་ཤེས་ཀྱི་དྲ་བ་རྣམ་པར་གཏོར་བའི་ཡེ་ཤེས་ལ་གཞོལ་བ། ཞིང་ལ་མངོན་པར་ཆགས་པ་ཐམས་ཅད་དང་བྲལ་བ། སངས་རྒྱས་ཀྱི་འཁོར་གྱི་དཀྱིལ་འཁོར་ཐམས་ཅད་ལ་ཆགས་པ་མེད་པའི་སེམས་དང་ལྡན་པ། སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བ་ལ་གནས་པ་མེད་པར་སྤྱོད་པ། སེམས་ཅན་ཐམས་ཅད་ལ་བདག་མེད་པ་དང་། སེམས་ཅན་མེད་པའི་འདུ་ཤེས་དང་ལྡན་པ། སྒྲ་ཐམས་ཅད་ཚིག་གི་ལམ་ལྟ་བུར་ཁོང་དུ་ཆུད་པ། གཟུགས་ཐམས་ཅད་གཟུགས་ཀྱི་གཟུགས་བརྙན་དང་མཉམ་པར་རྣམ་པར་རིག་པར་བྱ་བ་ལ་གཞོལ་བ་དེ་མཐར་གྱིས་སེང་གེ་རྣམ་པར་བསྒྱིངས་པའི་གྲོང་ཁྱེར་གང་ན་བ་དེར་ཕྱིན་ཏེ། བུ་མོ་བྱམས་མ་ཚོལ་ཞིང་ཡོངས་སུ་རྨེད་རྨེད་པ་ལས། རྒྱལ་པོ་སེང་གེ་དཔལ་གྱི་བུ་མོ་བྱམས་མ་འཁོར་བུ་མོ་ལྔ་བརྒྱ་དང་ལྡན་པ་དེ་ཁང་པ་རྣམ་པར་སྣང་བའི་སྙིང་པོ་ཞེས་བྱ་
བའི་ནང་ན་ཁྲི་ཙན་དན་སྦྲུལ་གྱི་སྙིང་པོའི་རྐང་པ་ཅན། གསེར་གྱི་ལྕག་ཕོད་ཀྱི་དྲ་བས་ལེགས་པར་བླས་པ། ལྷ་རྫས་ཀྱི་སྟན་བཏིང་བ་ལ་འདུག་ཅིང་ཆོས་སྟོན་ཏོ། །ཞེས་ཐོས་ནས། སེང་གེ་རྣམ་པར་བསྒྱིངས་པའི་གྲོང་ཁྱེར་དུ་སོང་སྟེ། རྒྱལ་པོ་སེང་གེ་དཔལ་གྱི་གནས་གང་ན་བ་དེར་ཕྱིན་ནས། རྒྱལ་པོའི་ཕྱི་སྒོའི་སྒོ་གང་ན་བུ་མོ་བྱམས་མ་མཐོང་བར་དགའ་བའི་ཕྱིར་སྡོད་ཅིང་འདུག་འདུག་པ་དང་། དེས་དེར་སྲོག་ཆགས་བརྒྱ་ཕྲག་དུ་མ་དང་། སྲོག་ཆགས་སྟོང་ཕྲག་དུ་མ་དང་། སྲོག་ཆགས་བརྒྱ་སྟོང་ཕྲག་དུ་མ་འདོང་བ་མཐོང་ནས། ཁྱེད་གང་ནས་འོངས། ད་གང་དུ་འདོང་ཞེས་དྲིས་པ་དང་། དེ་དག་ན་རེ་ངེད་ནི་བུ་མོ་བྱམས་མའི་དྲུང་དུ་ཆོས་མཉན་པའི་ཕྱིར་འདོང་ངོ་ཞེས་ནས། དེས་བསམས་པ་འདིར་ནི་སུ་འགྲོ་ཡང་བགག་པ་མེད་པ་ལྟ་ཞིག་སྙམ་སྟེ། དེ་ཡང་ནང་དུ་ཕྱིན་ཏོ། །དེ་ལྟར་ཕྱིན་ཏེ་བལྟས་ན་ཁང་པ་རྣམ་པར་སྣང ་བའི་སྙིང་པོ་ཅན་དེ་ཡང་། གཞི་ཤེལ་དུ་འདུག་པའི་ས་ལས་བླངས་ཏེ། བཻ་ཌཱུརྱའི་ཀ་བ་བཀྱེ་བ། རྩིག་པ་རྡོ་རྗེ་ལས་བྱས་པ། འཛམ་བུ་ཆུ་ཀླུང་གི་གསེར་གྱི་ལྷུན་དང་ལྡན་པའི་བ་གམ་བརྒྱ་ཕྲག་སྟོང་གིས་བརྒྱན་པ། ནོར་བུ་རིན་པོ་ཆེ་གྲངས་མེད་པས་རྣམ་པར་བྲིས་པ། རིན་པོ་ཆེ་སྟོང་གི་སྙིང་པོའི་མེ་ལོང་གི་དཀྱིལ་འཁོར་གྱིས་ཤིན་ཏུ་སྤ་བར་བྱས་པ། ནོར་བུ་རིན་པོ་ཆེ་འགྲོ་བའི་ཡིད་དུ་འོང་བས་རྣམ་པར་བརྒྱན་པ། རིན་པོ་ཆེའི་ཤིང་ཐགས་གྲངས་མེད་པས་ཡོངས་སུ་བསྐོར་བ། གསེར་གྱི་དྲིལ་བུ་བརྒྱ་སྟོང་ཤིན་ཏུ་འཁྲོལ་བའི་སྒྲ་སྙན་པ་བསམ་གྱིས་མི་ཁྱབ་པའི་རྒྱན་དང་ལྡན་པ་འདུག་པར་མཐོང་ངོ་། །བུ་མོ་བྱམས་མ་དེ་ཡང་མིག་དཀར་ནག་འབྱེས་པ། སྐྲ་མཐོན་ཏིང་དུ་འདུག་པ། མདོག་གསེར་གྱི་ཁ་དོག་ལྟར་འདུག་པ་མཐོང་ནས། དེས་དེའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་
ཐལ་མོ་སྦྱར་ཏེ་མདུན་དུ་འདུག་ནས། འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་། རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། འཕགས་མ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། སྨྲས་པ། རིགས་ཀྱི་བུ། ཁོ་མོའི་གནས་ཀྱི་རྒྱན་ལ་ལྟོས་ཤིག །ཅེས་ནས་དེས་ཀུན་ཏུ་བྱུལ་ཏེ་བལྟས་པ་དང་། རྩིག་པ་རེ་རེ་དང་། ཀ་བ་རེ་རེ་དང་། མེ་ལོང་གི་དཀྱིལ་འཁོར་རེ་རེ་དང་། རྣམ་པའི་བྱེ་བྲག་རེ་རེ་དང་། དབྱིབས་རེ་རེ་དང་། ནོར་བུ་རིན་པོ་ཆེ་རེ་རེ་དང་། གསེར་གྱི་དྲིལ་བུ་རེ་རེ་དང་། རིན་པོ་ཆེའི་ཤིང་རེ་རེ་དང་། བ་སྤུའི་བུ་ག་རེ་རེ་དང་། རིན་པོ་ཆེའི་སེ་མོ་དོ་རེ་རེ་ལས་ཀྱང་། ཆོས་ཀྱི་དབྱིངས་ཐམས་ཅད་ན་བཞུགས་པའི་དེ་བཞིན་གཤེགས་པ་ཐོག་མ་ཐུགས་བསྐྱེད་པ་དང་བཅས་པ། སྤྱོད་པ་དང་སྨོན་ལམ་གྱི་ཡུལ་དང་བཅས་པ། འབྱུང་བའི་རྒྱན་དང་བཅས་པ། མངོན་པར་འཚང་རྒྱ་བའི་རྣམ་པར་འཕྲུལ་པ་དང་བཅས་པ། ཆོས་ཀྱི་འཁོར་ལོ་བསྐོར་བ་དང་བཅས་པ། ཡོངས་སུ་མྱ་ངན་ལས་འདའ་བ་སྟོན་པ་དང་བཅས་པར་གཟུགས་བརྙན་གྱི་ཚུལ་དུ་མཐོང་བར་གྱུར་ཏོ། །དམྱིགས་པ་དེ་དག་རེ་རེ་ལས་ཇི་ལྟ་བ་བཞིན་དུ་དམྱིགས་པ་ཐམས་ཅད་ལས་ཀྱང་མཐོང་བར་གྱུར་ཏོ། །འདི་ལྟ་སྟེ་དཔེར་ན། ཆུས་ཡོངས་སུ་གང་བའི་མཚོ་དང་ཞིང་རྙོག་པ་མེད་ལ་རྣམ་པར་གསལ་
བ་ལ་ནི་ནམ་མཁའ་གཉི་ཟླ་དང་། སྐར་མའི་ཚོགས་ཀྱིས་བརྒྱན་པ། གཟུགས་བརྙན་གྱི་ཚུལ་དུ་ཡོངས་སུ་སྣང་ངོ་། །དེ་བཞིན་དུ་ཁང་པ་རྣམ་པར་སྣང་བའི་སྙིང་པོའི་དམྱིགས་པ་རེ་རེ་ལས་ཀྱང་ཆོས་ཀྱི་དབྱིངས་ཀུན་ན་བཞུགས་པའི་དེ་བཞིན་གཤེགས་པ་ཐམས་ཅད་གཟུགས་བརྙན་གྱི་ཚུལ་དུ་ཡོངས་སུ་སྣང་བར་གྱུར་ཏེ། དེ་ནི་བུ་མོ་བྱམས་མའི་སྔོན་གྱི་དགེ་བའི་རྩ་བའི་རྒྱུའི་ཕྱིར་ཏེ། དེས་དེ་ལྟར་རྣམ་པར་བལྟས་ནས། སངས་རྒྱས་མཐོང་བའི་རྒྱན་གྱི་མཚན་མ་དེ་ཡོངས་སུ་བཟུང་སྟེ། ཐལ་མོ་སྦྱར་ནས། བུ་མོ་བྱམས་མའི་གདོང་དུ་བལྟས་པ་དང་། དེས་སྨྲས་པ། རིགས་ཀྱི་བུ་ཁོ་མོ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་ཀུན་ནས་རྣམ་པར་བརྒྱན་པ་ཞེས་བྱ་བ་ཐོབ་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་འདི་ནི་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱའི་ཀླུང་སུམ་ཅུ་རྩ་དྲུག་གི་བྱེ་མ་སྙེད་ལས་ཡོངས་སུ་བཙལ་བ་སྟེ། དེ་བཞིན་གཤེགས་པ་དེ་དག་གིས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་ཀུན་ནས་རྣམ་པར་བརྒྱན་པ་འདི་སྒོ་སྣ་ཚོགས་ཀྱི་ཁོང་དུ་ཆུད་པར་བྱ་བས་རྟོགས་པར་མཛད་དེ། གཅིག་གིས་གང་གསུངས་པ་དེའང་གཉིས་ཀྱིས་མ་གསུངས་སོ། །སྨྲས་པ། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་ཀུན་ནས་རྣམ་པར་བརྒྱན་པ་འདིའི་ཡུལ་ཇི་ལྟ་བུ་ཞིག་མཆིས། སྨྲས་པ། རིགས་ཀྱི་བུ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་ཀུན་ནས་རྣམ་པར་བརྒྱན་པ་འདི་ལ་ཁོ་མོ་མངོན་དུ་བྱེད་ཅིང་། སེམས་པ་དང་རྗེས་སུ་འབྲང་བར་བྱ་བ་དང་། རྣམ་པར་དཔྱོད་པ་དང་། རྗེས་སུ་སེམས་པ་དང་། དྲན་པར་བྱ་བ་དང་། ཡོངས་སུ་གཟུང་བ་དང་། རྣམ་པར་བརྟག་པ་དང་། མངོན་པར་བསྒྲུབ་པ་དང་། ཡང་དག་པར་བརྒྱན་པར་བྱ་བ་དང་། རབ་ཏུ་རྣམ་པར་དབྱེ་བ་
བྱེད་པའི་ཚེ། གཟུངས་ཀུན་ནས་སྒོ་ཞེས་བྱ་བ་ཡོངས་སུ་སྐྱེ་སྟེ། གཟུངས་ཀྱི་དཀྱིལ་འཁོར་དེར་ནི་ཆོས་ཀྱི་སྒོ་བརྒྱ་སྟོང་གྲངས་མེད་པ་ཕྲག་བཅུ་ཡོངས་སུ་འདུའོ། །ཁོང་དུ་ཆུད་དོ། །མངོན་དུ་གྱུར་ཏོ། །མངོན་པར་འདུའོ། །ཁོངས་ན་འཁོད་དོ། །འདི་ལྟ་སྟེ། སངས་རྒྱས་ཀྱི་ཞིང་གི་སྒོ་དང་། སངས་རྒྱས་ཀྱི་སྒོ་དང་། ཆོས་ཀྱི་སྒོ་དང་། སེམས་ཅན་གྱི་སྒོ་དང་། འདས་པའི་སྒོ་དང་། མ་འོངས་པའི་སྒོ་དང་། ད་ལྟར་བྱུང་བའི་སྒོ་དང་། གནས་པའི་མཐའི་སྒོ་དང་། བསོད་ནམས་ཀྱི་སྒོ་དང་། བསོད་ནམས་ཀྱི་ཚོགས་ཀྱི་སྒོ་དང་། ཡེ་ཤེས་ཀྱི་སྒོ་དང་། ཡེ་ཤེས་ཀྱི་ཚོགས་ཀྱི་སྒོ་དང་། སྨོན་ལམ་གྱི་སྒོ་དང་། སྨོན་ལམ་གྱི་རྣམ་པའི་སྒོ་དང་། སྤྱོད་པའི་སྒོ་དང་། སྤྱོད་པ་རྣམ་པར་དག་པའི་སྒོ་དང་། སྤྱོད་པ་ཡོངས་སུ་འབྱུང་བའི་སྒོ་དང་། སྤྱོད་པ་ཡོངས་སུ་རྫོགས་པར་བྱ་བའི་སྒོ་དང་། ལས་ཀྱི་སྒོ་དང་། ལས་དང་མི་འགལ་བའི་སྒོ་དང་། ལས་ཀྱི་རྒྱུན་གྱི་སྒོ་དང་། ལས་མངོན་པར་འདུ་བྱ་བའི་སྒོ་དང་། མི་མཉམ་པའི་ལས་ཡོངས་སུ་སྤང་བའི་སྒོ་དང་། ཡང་དག་པའི་ལས་ལ་ནན་ཏན་དུ་བྱ་བའི་སྒོ་དང་། ལས་ལ་དབང་བསྒྱུར་བའི་སྒོ་དང་། ལེགས་པར་སྤྱད་པའི་སྒོ་དང་། ལེགས་པར་སྤྱད་པ་ཡང་དག་པར་བླང་བའི་སྒོ་དང་། ཏིང་ངེ་འཛིན་གྱི་སྒོ་དང་། ཏིང་ངེ་འཛིན་ཁོང་དུ་ཆུད་པར་བྱ་བའི་སྒོ་དང་། ཏིང་ངེ་འཛིན་ལ་རྣམ་པར་སྤྱད་པའི་སྒོ་དང་། ཏིང་ངེ་འཛིན་གྱི་སྤྱོད་ཡུལ་གྱི་སྒོ་དང་། ཏིང་ངེ་འཛིན་ལས་ལྡང་བའི་སྒོ་དང་། མངོན་པར་ཤེས་པའི་སྒོ་དང་། སེམས་རྒྱ་མཚོའི་སྒོ་དང་། སེམས་ཀྱི་རྣམ་གྲངས་ཀྱི་སྒོ་དང་། སེམས་ཀྱི་རྒྱུད་ཡོངས་སུ་དག་པར་བྱ་བའི་སྒོ་དང་། སེམས་ཀྱི་ཐིབས་པོ་སྣང་བར་བྱ་བའི་སྒོ་དང་། སེམས་ཀྱི་མཚོ་དང་བར་བྱ་བའི་སྒོ་དང་། སེམས་འབྱུང་བའི་སྒོ་དང་། སེམས་
རྣམ་པར་རྒྱུ་བའི་སྒོ་དང་། སེམས་ཅན་ཀུན་ནས་ཉོན་མོངས་པ་རྒྱུ་བའི་སྒོ་དང་། ཉོན་མོངས་པའི་བག་ཆགས་ཀྱི་སྒོ་དང་། ཉོན་མོངས་པའི་སྦྱོར་བའི་སྒོ་དང་། མོས་པའི་སྒོ་དང་། སེམས་ཅན་གྱི་སྤྱོད་པའི་སྒོ་དང་། སེམས་ཅན་གྱི་སྤྱོད་པ་རྣམ་པ་ཐ་དད་པའི་སྒོ་དང་། འཇིག་རྟེན་འབྱུང་བའི་སྒོ་དང་། སེམས་ཅན་གྱི་བསམ་པའི་སྒོ་དང་། སེམས་ཅན་གྱི་འདུ་ཤེས་ཀྱི་རྣམ་པའི་སྒོ་དང་། ཕྱོགས་ཀྱི་སྒོ་དང་། ཆོས་ཀྱི་ཕྱོགས་ཀྱི་སྒོ་དང་། སྙིང་རྗེ་ཆེན་པོའི་སྒོ་དང་། བྱམས་པ་ཆེན་པོའི་སྒོ་དང་། ཞི་བའི་སྒོ་དང་། ངག་གི་ལམ་གྱི་སྒོ་དང་། ཚུལ་གྱི་སྒོ་དང་། ཁོང་དུ་ཆུད་པར་བྱ་བའི་སྒོ་དང་། རྣམ་པར་ཕྱེ་བའི་སྒོ་དང་། ཡང་དག་པར་འདུ་བའི་སྒོ་དང་། ཆགས་པ་མེད་པའི་མཐའི་སྒོ་དང་། ཀུན་གྱི་སྒོ་དང་། སངས་རྒྱས་ཀྱི་ཆོས་ཀྱི་སྒོ་དང་། བྱང་ཆུབ་སེམས་དཔའི་ཆོས་ཀྱི་སྒོ་དང་། ཉན་ཐོས་ཀྱི་ཆོས་ཀྱི་སྒོ་དང་། རང་སངས་རྒྱས་ཀྱི་ཆོས་ཀྱི་སྒོ་དང་། འཇིག་རྟེན་གྱི་ཆོས་ཀྱི་སྒོ་དང་། འཇིག་རྟེན་འབྱུང་བའི་ཆོས་ཀྱི་སྒོ་དང་། འཇིག་རྟེན་འཇིག་པའི་ཆོས་ཀྱི་སྒོ་དང་། འཇིག་རྟེན་ཀུན་ནས་གནས་པའི་སྒོ་དང་། འཇིག་རྟེན་གྱི་ཁམས་རྣམ་པར་དག་པའི་སྒོ་དང་། འཇིག་རྟེན་གྱི་ཁམས་ཀུན་ནས་ཉོན་མོངས་པའི་སྒོ་དང་། འཇིག་རྟེན་གྱི་ཁམས་ཀུན་ནས་ཉོན་མོངས་པ་ལ་རྣམ་པར་དག་པའི་སྒོ་དང་། འཇིག་རྟེན་གྱི་ཁམས་རྣམ་པར་དག་པ་ལ་ཀུན་ནས་ཉོན་མོངས་པའི་སྒོ་དང་། འཇིག་རྟེན་གྱི་ཁམས་གཅིག་ཏུ་ཀུན་ནས་ཉོན་མོངས་པའི་སྒོ་དང་། འཇིག་རྟེན་གྱི་ཁམས་གཅིག་ཏུ་རྣམ་པར་དག་པའི་སྒོ་དང་། འཇིག་རྟེན་གྱི་ཁམས་གཞི་མཉམ་པ་ཉིད་དུ་ཁོང་དུ་ཆུད་པར་བྱ་བའི་སྒོ་དང་། འཇིག་རྟེན་གྱི་ཁམས་སྣྲེལ་ཞིའི་སྒོ་དང་། འཇིག་རྟེན་གྱི་ཁམས་སྤྱིའུ་ཚུགས་སུ་རྒྱུ་བའི་སྒོ་དང་། མྱིག་འཕྲུལ་དུ་འཇུག་པའི་སྒོ་དང་། འཇིག་
རྟེན་གྱི་ཁམས་ཀྱི་རྒྱུད་ཀྱི་སྒོ་དང་། གནས་ཀྱི་འདུ་ཤེས་ཀྱི་རྣམ་པར་གྱུར་པའི་སྒོ་དང་། ཕྲ་བ་རྒྱ་ཆེན་པོར་ཁོང་དུ་ཆུད་པར་བྱ་བའི་སྒོ་དང་། རྒྱ་ཆེན་པོ་ཕྲ་བར་ཁོང་དུ་ཆུད་པར་བྱ་བའི་སྒོ་དང་། སངས་རྒྱས་མཐོང་བར་བྱ་བའི་སྒོ་དང་། སངས་རྒྱས་ཀྱི་སྐུ་རྣམ་པ་ཐ་དད་པའི་སྒོ་དང་། སངས་རྒྱས་ཀྱི་འོད་གཟེར་གྱི་དྲ་བ་རྣམ་པ་ཐ་དད་པའི་སྒོ་དང་། སངས་རྒྱས་ཀྱི་གསུང་གི་དཀྱིལ་འཁོར་རྣམ་པར་ཕྱེ་བའི་སྒོ་དང་། སངས་རྒྱས་ཀྱི་ཆོས་ཀྱི་འཁོར་ལོ་མངོན་པར་བསྒྲུབ་པའི་སྒོ་དང་། སངས་རྒྱས་ཀྱི་ཆོས་ཀྱི་འཁོར་ལོ་ཐ་དད་པའི་སྒོ་དང་། སངས་རྒྱས་ཀྱི་ཆོས་ཀྱི་འཁོར་ལོ་ངེས་པའི་ཚིག་གི་སྒོ་དང་། སངས་རྒྱས་ཀྱི་ཆོས་ཀྱི་འཁོར་ལོ་འཁོར་བ་ཀུན་ཏུ་འཁོར་བའི་སྒོ་དང་། སངས་རྒྱས་ཀྱི་ཕྲིན་ལས་ཀྱི་སྒོ་དང་། སངས་རྒྱས་ཀྱི་འཁོར་གྱི་དཀྱིལ་འཁོར་གྱི་སྒོ་དང་། སངས་རྒྱས་ཀྱི་འཁོར་གྱི་དཀྱིལ་འཁོར་རྣམ་པར་ཕྱེ་བའི་སྒོ་དང་། སངས་རྒྱས་ཀྱི་འཁོར་གྱི་དཀྱིལ་འཁོར་རྒྱ་མཚོར་འཇུག་པའི་སྒོ་དང་། སངས་རྒྱས་ཀྱི་སྟོབས་སྣང་བའི་སྒོ་དང་། སངས་རྒྱས་ཀྱི་ཏིང་ངེ་འཛིན་གྱི་སྒོ་དང་། སངས་རྒྱས་ཀྱི་ཏིང་ངེ་འཛིན་གྱིས་རྣམ་པར་འཕྲུལ་པའི་སྒོ་དང་། སངས་རྒྱས་ཀྱི་རྣམ་པར་སྤྱོད་པའི་སྒོ་དང་། སངས་རྒྱས་ཀྱི་བྱིན་གྱི་རླབས་ཀྱི་སྒོ་དང་། སངས་རྒྱས་ཀྱི་སྤྲུལ་པའི་སྒོ་དང་། སངས་རྒྱས་ཀྱི་སེམས་ཅན་ཕ་རོལ་གྱི་སེམས་ཐུགས་སུ་ཆུད་པའི་སྒོ་དང་། སངས་རྒྱས་ཀྱི་རྫུ་འཕྲུལ་གྱིས་རྣམ་པར་འཕྲུལ་པའི་སྒོ་དང་། དགའ་ལྡན་གྱི་ཕོ་བྲང་ན་བཞུགས་པའི་སྒོ་ནས་ཡོངས་སུ་མྱ་ངན་ལས་འདའ་བ་བསྟན་པའི་བར་གྱི་སྒོ་དང་། སེམས་ཅན་གྱི་དོན་ཚད་མྱེད་པ་མཛད་པའི་སྒོ་དང་། ཆོས་ཟབ་མོའི་ཚུལ་གྱི་སྒོ་དང་། ཆོས་སྣ་ཚོགས་ཀྱི་ཚུལ་གྱི་སྒོ་དང་། བྱང་ཆུབ་ཀྱི་སེམས་ཀྱི་ཆོས་ཀྱི་རྣམ་པའི་སྒོ་དང་། བྱང་ཆུབ་ཀྱི་སེམས་འབྱུང་བའི་རྣམ་པའི་ཆོས་ཀྱི་སྒོ་དང་། བྱང་ཆུབ་ཀྱི་སེམས་
ཀྱི་ཚོགས་ཀྱི་རྣམ་པའི་སྒོ་དང་། སྨོན་ལམ་གྱི་རྣམ་པའི་སྒོ་དང་། སྤྱོད་པའི་རྣམ་པའི་སྒོ་དང་། མངོན་པར་ཤེས་པའི་རྣམ་པའི་སྒོ་དང་། འབྱུང་བའི་རྣམ་པའི་སྒོ་དང་། གཟུངས་རྣམ་པར་དག་པའི་རྣམ་པའི་སྒོ་དང་། ཡེ་ཤེས་ཀྱི་དཀྱིལ་འཁོར་རྣམ་པར་དག་པའི་རྣམ་པའི་སྒོ་དང་། ཤེས་རབ་ཡོངས་སུ་དག་པའི་རྣམ་པའི་སྒོ་དང་། བྱང་ཆུབ་ཚད་མྱེད་པའི་རྣམ་པའི་སྒོ་དང་། དྲན་པ་རྣམ་པར་དག་པའི་རྣམ་པའི་སྒོ་དག་སྟེ། རིགས་ཀྱི་བུ་དེ་ལྟར་ཁོ་མོས་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་དྲན་པས་ཀུན་ནས་རྣམ་པར་བརྒྱན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་སེམས་ནམ་མཁའི་དབྱིངས་དང་མཉམ་པ། བློ་གྲོས་ཆོས་ཀྱི་དབྱིངས་ལྟར་ཡངས་པ། རྒྱུད་བསོད་ནམས་ཀྱི་ཚོགས་ཀྱིས་བརྟན་པ། འཇིག་རྟེན་ལས་འདས་པའི་ལམ་དུ་ཞུགས་པ། འཇིག་རྟེན་གྱི་ཆོས་ཡོངས་སུ་མྱི་རྒྱུ་བ། ཡེ་ཤེས་སྣང་བའི་མྱིག་རབ་རིབ་མྱེད་པ་རབ་ཏུ་ཐོབ་པ། ཆོས་ཀྱི་དབྱིངས་ཐམས་ཅད་མུན་པ་མྱེད་པར་ཁོང་དུ་ཆུད་པ། བློ་ནམ་མཁའ་ལྟར་ཚད་མེད་པ་དང་ལྡན་པ། དམྱིགས་པ་ཐམས་ཅད་ཀྱི་རྗེས་སུ་སོང་བའི་མྱིག་ཅན། ཆགས་པ་མེད་པའི་སྣང་བའི་སྙིང་པོ་དང་ལྡན་པ། ཆོས་ཐམས་ཅད་ཀྱི་དོན་རབ་ཏུ་དབྱེ་བ་ལ་མཁས་པ། ཟིལ་གྱིས་གནོན་ལ། འཇིག་རྟེན་ཀུན་གྱི་ཟིལ་གྱིས་མི་ནོན་པ། འཇིག་རྟེན་གྱི་སྤྱོད་པའི་ཚུལ་ལ་རྣམ་པར་སྤྱོད་པ། འཇིག་རྟེན་གྱི་ལམ་གྱི་རྒྱུད་ཐམས་ཅད་ན་ཁ་ན་མ་ཐོ་བ་མེད་པ། འཇིག་རྟེན་གྱི་དོན་བྱེད་པ་ལ་བརྩོན་པ། འགྲོ་བ་ཐམས་ཅད་ཀྱི་རྟེན་དུ་གྱུར་པ། འགྲོ་བ་ཐམས་ཅད་ཀྱི་ངག་གི་ཚུལ་དང་། རྣམ་པ་ལ་མཁས་པ། འགྲོ་བ་ཐམས་ཅད་དུ་གནས་པའི་བསམ་པ་དང་ལྡན་པ། བསམ་པ་ཇི་ལྟ་བ་བཞིན་དུ་རྣམ་པར་དམྱིགས་པ་སྟོན་པ། དུས་ཀྱི་འཁོར་ལོ་ཐམས་ཅད་ལ་དབང་བསྒྱུར་བ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་
པར་ནུས་རེ་སྐན། །སོང་རིགས་ཀྱི་བུ། ལྷོ་ཕྱོགས་ཀྱི་རྒྱུད་འདི་ཉིད་ན་ཡུལ་མྱིག་གསུམ་པ་ཞེས་བྱ་བ་ཡོད་དེ། དེ་ན་དགེ་སློང་བལྟ་ན་སྡུག་པ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་བུ་མོ་བྱམས་མའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། བུ་མོ་བྱམས་མ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། བུ་མོ་བྱམས་མའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའི་ཡེ་ཤེས་ཀྱི་རྣམ་པར་སྤྱོད་པ་ཟབ་མོ་རྗེས་སུ་བསམ་པ་དང་། ཆོས་ཀྱི་དབྱིངས་ཀྱི་གཞི་ཟབ་མོ་ཁོང་དུ་ཆུད་པར་བྱ་བ་རྗེས་སུ་བསམ་པ་དང་། སེམས་ཅན་གྱི་ཡེ་ཤེས་ཤིན་ཏུ་ཕྲ་ཞིང་ཟབ་པ་རྗེས་སུ་བསམ་པ་དང་། འཇིག་རྟེན་གྱི་འདུ་ཤེས་ཀྱི་རྣམ་པ་ཟབ་མོ་རྗེས་སུ་བསམ་པ་དང་། མངོན་པར་འདུ་བྱ་བ་མེད་པའི་དབྱིངས་ཟབ་མོ་རྗེས་སུ་བསམ་པ་དང་། སེམས་ཀྱི་རྒྱུད་ཀྱི་དབྱིངས་ཟབ་མོ་རྗེས་སུ་བསམ་པ་དང་། རྟེན་ཅིང་འབྲེལ་བར་འབྱུང་བའི་དབྱིངས་ཟབ་མོ་རྗེས་སུ་བསམ་པ་དང་། རང་བཞིན་གྱིས་དབེན་པའི་དབྱིངས་ཟབ་མོ་རྗེས་སུ་བསམ་པ་དང་། འགྲོ་བ་ཐམས་ཅད་ཀྱི་རྣམ་པར་དཔྱོད་པ་བདེན་པའི་དབྱིངས་ཟབ་མོ་རྗེས་སུ་བསམ་པ་དང་། ཆོས་ཀྱི་དབྱིངས་བརྒྱན་པའི་དབྱིངས་ཟབ་མོ་རྗེས་སུ་བསམ་པ་དང་། ལུས་ཀྱི་འཁྲུལ་འཁོར་ཤུགས་ཀྱིས་འཁོར་བའི་དབྱིངས་ཟབ་མོ་རྗེས་སུ་བསམ་པ་དང་། ལས་ཀྱིས་སྣ་ཚོགས་སུ་གྱུར་པའི་དབྱིངས་ཟབ་མོ་རྗེས་སུ་བསམ་པ་བྱེད་ཅིང་མཐར་གྱིས་ཡུལ་མྱིག་གསུམ་པ་གང་ན་བ་དེར་ཕྱིན་ཏེ། ཡུལ་གྱི་འཁོར་དང་། གྲོང་ཁྱེར་གྱི་འཁོར་དང་། ཚོང་དུས་ཀྱི་འཁོར་དང་། གྲོང་རྡལ་གྱི་འཁོར་དང་། ཡུལ་གྲུའི་འཁོར་དང་། ལྷས་ཀྱི་
འཁོར་དང་། དྲང་སྲོང་དགེ་བ་སྦྱོང་བའི་གནས་ཀྱི་འཁོར་དང་། ཡུལ་དང་ཕྱོགས་ཀྱི་འཁོར་དང་། ཆུའི་རྒྱུད་ཀྱི་འཁོར་དང་། རིའི་སལ་སུལ་གྱི་འཁོར་དང་། ནགས་ཚལ་ཆེན་པོའི་འཁོར་དག་ཏུ་དགེ་སློང་བལྟ་ན་སྡུག་པ་ཡོངས་སུ་ཚོལ་ཚོལ་བ་ལས་དེས་དགེ་སློང་བལྟ་ན་སྡུག་པ་ནགས་ཚལ་སྟུག་པོ་ཞིག་ན། གཞོན་ཞིང་དར་ལ་བབ་པ། གཟུགས་མཛེས་ཤིང་སྡུག་ལ་བལྟ་ན་ཡིད་དུ་འོང་བ། སྐྲ་མཐོན་ཏིང་གཡས་ཕྱོགས་སུ་འཁྱིལ་བ་དང་ལྡན་པ། མགོ་གདུགས་ལྟར་འདུག་པ། གཙུག་ཏོར་གྱི་སྤྱི་བོ་ཅན། འཕྲལ་བ་ཡངས་པ། མྱིག་དཀར་ནག་འབྱེས་ཤིང་རིང་ལ། རྫི་མ་བའི་རྫི་མ་ལྟར་འདུག་པ། སྣའི་དབྱིབས་ལེགས་ཤིང་བཟང་ལ། རན་པར་མཛེས་པ་དང་ལྡན་པ། མཆུ་མཚལ་ལྟར་མདོག་བཟང་ཤིང་ཤིན་ཏུ་ལེགས་པ་དང་ལྡན་པ། སོ་མཉམ་ཞིང་ཐགས་བཟང་ལ། ཤིན་ཏུ་དཀར་བ་བཞི་བཅུ་ཚང་བ་དང་ལྡན་པ། འགྲམ་པའི་ལྷ་ང་སེང་གེ་ལྟར་འདུག་པ། མཁུར་བ་ཤས་གང་ཞིང་རྒྱས་པ། སྨྱིན་ཚུགས་གཞུ་ལྟར་འདུག་ཅིང་རིང་ལ། ཤིན་ཏུ་མཛེས་པ། མཛོད་སྤུ་ཟླ་བའི་ཁ་དོག་ལྟར་འདུག་པའི་ཐིག་ལེ་ཅན། རྣ་ཤལ་རིང་ཞིང་ལྷོད་པར་འཕྱང་བ། ཟླ་བ་ཉ་བ་ལྟར་བཞིན་མདངས་དང་ལྡན་ཞིང་ཤིན་ཏུ་བཟང་བ། མགུལ་ཟླུམ་ཞིང་དུང་ལྟར་མཛེས་པ། སྙིང་ཀ་དཔལ་གྱི་བེའུས་བརྒྱན་པ། རོ་སྟོད་སེང་གེའི་རོ་སྟོད་ལྟར་འདུག་པ། ཐལ་གོང་ཤིན་ཏུ་རྒྱས་པ། དཔུང་མགོའི་ལྷུན་ལེགས་ཤིང་ཟླུམ་པ། ལག་པ་རིང་ལ། དྲ་བས་འབྲེལ་པའི་སོར་མོ་ཅན། རྐ་ལག་འཁོར་ལོས་བརྒྱན་པ། རྐ་ལག་འཇམ་ཞིང་གཞོན་ལ་ཤས་རྒྱས་པ། བདུན་ཤིན་ཏུ་མཐོ་བ། རྐེད་པ་རྡོ་རྗེ་ལྟར་འདུག་པ། ལུས་ཆེ་ཞིང་དྲང་བ། བརླ་ཟླུམ་པ། ཕོ་མཚན་གསང་བའི་སྦུབས་ན་འདུག་པ། བྱིན་པ་རི་དགས་ཨེ་ནེ་ཡའི་བྱིན་པ་ལྟར་འདུག་པ། སོར་མོ་རིང་བ། རྐང་པའི་རྟིང་པ་ཡངས་པ། འོད་འདོམ་གང་བ་དང་ལྡན་པ། མདོག་གསེར་གྱི་ཁ་དོག་ལྟར་འདུག་པ། བ་སྤུ་རེ་རེ་ནས་གཡས་ཕྱོགས་སུ་གྱེན་དུ་
འཁྱིལ་བ། ཤིང་ནྱ་གྲོ་དྷའི་རྒྱལ་པོ་ལྟར་ཆུ་ཞེང་གབ་པ། ལུས་མཚན་དང་དཔེ་བྱད་བཟང་པོས་ཤིན་ཏུ་བརྒྱན་པ། མྱིག་མྱི་འགེབས་ཤིང་མི་རྒོད་པ། དྲན་པ་ཉེ་བར་གནས་པ། རིའི་རྒྱལ་པོ་ཁ་བ་ཅན་ལྟར་རྩྭ་དང་། ནགས་ཚལ་དང་། སྨན་དང་ཤིང་ཕྲན་སྣ་ཚོགས་ཀྱིས་བརྒྱན་པ། བློ་ཤིན་ཏུ་ཡངས་པ། ཡེ་ཤེས་ཀྱི་སྤྱོད་ཡུལ་དང་། ཡུལ་ལ་ཐུབ་པ་མྱེད་པ། དབྱངས་ཀྱི་དཀྱིལ་འཁོར་གྱི་རྒྱན་སྤྲིན་གྱི་སྒྲ་ལྟ་བུ་དང་ལྡན་པ། གཡོ་བ་དང་། རློམ་སེམས་དང་། གཡེང་བ་དང་སྤྲོས་པ་ཐམས་ཅད་དང་བྲལ་བའི་སེམས་དང་ལྡན་པ། ཡེ་ཤེས་ཀྱི་སྤྱོད་ཡུལ་མ་འདྲེས་པ། སངས་རྒྱས་ཀྱི་ཡུལ་རྒྱ་ཆེན་པོའི་སྣང་བ་ཐོབ་པ། སེམས་ཅན་ཐམས་ཅད་ཡོངས་སུ་སྨྱིན་པར་བྱ་བ་དང་། གདུལ་བའི་བསམ་པ་རྒྱུན་མྱི་འཆད་པ། སྙིང་རྗེ་ཆེན་པོའི་དཀྱིལ་འཁོར་ཤིན་ཏུ་ཡངས་པ་སྐྱེས་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་ཡོངས་སུ་གཟུང་བ་དང་། སེམས་ཅན་ཐམས་ཅད་ཀྱི་ཡེ་ཤེས་སྣང་བ་ཡང་དག་པར་བསྐྱེད་པའི་ཕྱིར། དེ་བཞིན་གཤེགས་པའི་ཚུལ་རྗེས་སུ་དྲན་ཞིང་འགྲོ་བ་ཐམས་ཅད་ཀྱི་དོན་དུ་འཆག་པ་ལ་ཞུགས་ཏེ། དྲག་དལ་མྱེད་ཅིང་པད་རལ་མེད་ལ་ཤིན་ཏུ་མཛེས་པར་འཆག་པ། གནས་གཙང་མའི་ལྷའི་གོས་དང་ལྡན་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མྱིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་དང་། མྱི་དང་མྱི་མ་ཡིན་པས་བསྐོར་ཅིང་འདུག་པ་མཐོང་ངོ་། །དགེ་སློང་བལྟ་ན་མཛེས་པ་དེ་འཆག་པའི་ཚེ། ཕྱོགས་མངོན་དུ་གྱུར་པའི་ཕྱོགས་ཀྱི་ལྷ་རྣམས་ཕྱོགས་ཀྱི་དཀྱིལ་འཁོར་ཡོངས་སུ་བསྒྲུབ་པ་བྱེད་དོ། །རྐང་གིས་འགྲོ་བའི་ལྷ་རྣམས་རིན་པོ་ཆེའི་པདྨོས་གོམ་པ་འདོར་བའི་ཚེ། ཡོངས་སུ་བླང་བ་བྱེད་དོ། །མྱེའི་ལྷ་སྣང་བའི་དཀྱིལ་འཁོར་ཟད་མྱི་ཤེས་པ་རྣམས་ཀྱང་། མུན་པ་དང་རབ་རིབ་རྣམ་པར་སེལ་ཏོ། །འཛམ་བུ་རྒྱལ་མཚན་གྱི་ནགས་ཚལ་གྱི་ལྷ་རྣམས་
ཀྱང་མེ་ཏོག་མང་པོའི་ཆར་མངོན་པར་འབེབས་སོ། །སའི་ལྷ་མི་གཡོ་བའི་སྙིང་པོ་ཅན་རྣམས་ཀྱང་རིན་པོ་ཆེའི་འབྱུང་གནས་མང་པོ་སྟོན་ཏོ། །ནམ་མཁའི་ལྷ་ཀུན་ནས་སྣང་བའི་དཔལ་དང་ལྡན་པ་རྣམས་ཀྱང་ནམ་མཁའི་དབྱིངས་ཡོངས་སུ་བརྒྱན་པ་བྱེད་དོ། །རྒྱ་མཚོའི་ལྷ་དཔལ་ཀུན་ནས་འབྱུང་བ་རྣམས་ཀྱང་རིན་པོ་ཆེ་དམ་པ་མང་པོས་མངོན་པར་འཐོར་ཏོ། །རི་རབ་ཀྱི་ལྷ་དྲི་མ་མེད་པའི་སྙིང་པོ་ཅན་རྣམས་ཀྱང་ཐལ་མོ་སྦྱར་ཅིང་ཕྱག་འཚལ་ཏོ། །རླུང་གི་ལྷ་ཐོགས་པ་མེད་པའི་སྟོབས་ཅན་རྣམས་ཀྱང་། སྤོས་དང་། བདུག་སྤོས་དང་། མེ་ཏོག་འཐོར་བའི་རླུང་རབ་ཏུ་འགྱེད་དོ། །མཚན་མོའི་ལྷ་གནས་པར་བྱེད་པ་ལུས་ཤིན་ཏུ་བརྒྱན་པ་རྣམས་ཀྱང་ལུས་ཤིན་ཏུ་བཏུད་ཅིང་ཕྱག་འཚལ་ཏོ། །ཉིན་མོའི་ལྷ་རྟག་ཏུ་སད་པར་བྱེད་པའི་དཀྱིལ་འཁོར་ཅན་རྣམས་ཀྱང་ནོར་བུ་རིན་པོ་ཆེ་ཕྱོགས་སྣང་བར་བྱེད་པའི་རྒྱལ་མཚན་ཐོགས་ཤིང་། སྣང་བ་བསྐྱེད་པའི་ཕྱིར་ནམ་མཁའི་དབྱིངས་ལ་འཁོད་དོ། །དེ་ནས་ཚོང་དཔོན་གྱི་བུ་ནོར་བཟངས་དགེ་སློང་བལྟ་ན་སྡུག་པ་གང་ན་བ་དེར་ཕྱིན་ནས། དགེ་སློང་བལྟ་ན་སྡུག་པའི་རྐང་པའི་བོལ་གཉིས་ལ་སྤྱི་བོས་གཏུགས་ཏེ་ཕྱག་འཚལ་ནས། དགེ་སློང་བལྟ་ན་སྡུག་པའི་རྐང་པའི་བོལ་གཉིས་ལ་བཞིན་སྦྱར་ཏེ། ལེགས་པར་ཕྱིན་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས། བྱང་ཆུབ་སེམས་དཔའི་སྤྱོད་པ་ཡོངས་སུ་ཚོལ་བ་ཞིག་ལགས་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་། རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། འཕགས་པ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། དེས་སྨྲས་པ། རིགས་ཀྱི་བུ། ཁོ་བོ་ནི་ཚེས་བཏབ་ན་དར་ལ་བབ་པ། རབ་ཏུ་བྱུང་བས་བཏབ་ན་གསར་དུ་ཞུགས་པ་སྟེ། རིགས་
ཀྱི་བུ། ཁོ་བོས་ནི་ཚེ་དེ་འདྲ་བ་གཅིག་གིས་དེ་བཞིན་གཤེགས་པ་ཆུ་ཀླུང་གངྒཱ་སུམ་ཅུ་རྩ་བརྒྱད་ཀྱི་དྲུང་དུ་ཚངས་པར་སྤྱོད་པ་སྤྱད་དེ། བདག་གིས་དེ་བཞིན་གཤེགས་པ་ལ་ལའི་ཞམ་རིང་དུ་ནི་ཉིན་ཞག་གཅིག་དུ་ཚངས་པའི་སྤྱོད་པ་སྤྱད་དོ། །ལ་ལར་ནི་ཉིན་ཞག་བདུན་དུ། ལ་ལར་ནི་ཟླ་བ་ཕྱེད་དུ། ལ་ལར་ནི་ཟླ་བ་གཅིག་ཏུ། ལ་ལར་ནི་ལོ་གཅིག་ཏུ། ལ་ལར་ནི་ལོ་བརྒྱར། ལ་ལར་ནི་ལོ་སྟོང་དུ། ལ་ལར་ནི་ལོ་བརྒྱ་ཕྲག་སྟོང་དུ། ལ་ལར་ནི་ལོ་བྱེ་བར། ལ་ལར་ནི་ལོ་བྱེ་བ་ཁྲག་ཁྲིག་དུ། ལ་ལར་ནི་ལོ་བརྗོད་དུ་མེད་པའི་ཡང་བརྗོད་དུ་མེད་པར། ལ་ལར་ནི་བསྐལ་པ་བར་མར། ལ་ལར་ནི་བསྐལ་པ་ཕྱེད་དུ། ལ་ལར་ནི་བསྐལ་པར། བདག་གིས་དེ་བཞིན་གཤེགས་པ་ལ་ལའི་ཞམ་རིང་དུ་ནི། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་ཚངས་པའི་སྤྱོད་པ་སྤྱད་དེ། བསྐལ་པ་བགྲང་བའི་ཚུལ་འདི་ཉིད་ཀྱིས། དེ་བཞིན་གཤེགས་པ་ཐམས་ཅད་ལས་ཆོས་བསྟན་པ་ཐོས་ཏེ། གདམས་ངག་དང་། རྗེས་སུ་བསྟན་པ་ཡང་དག་པར་བླངས་སོ། །སྨོན་ལམ་གྱི་རྒྱུན་ཡོངས་སུ་སྦྱངས་སོ། །ཡང་དག་པར་བསྒྲུབ་པའི་ཡུལ་ལ་ཞུགས་སོ། །སྤྱོད་པའི་དཀྱིལ་འཁོར་ཡོངས་སུ་སྦྱངས་སོ། །ཕ་རོལ་ཏུ་ཕྱིན་པ་རྒྱ་མཚོ་ཡོངས་སུ་རྫོགས་པར་བྱས་སོ། །མངོན་པར་རྫོགས་པར་འཚང་རྒྱ་བའི་རྣམ་པར་འཕྲུལ་པ། ཡོངས་སུ་ཤེས་པར་བྱས་སོ། །དེ་དག་གི་ཆོས་ཀྱི་འཁོར་ལོ་བསྐོར་བ་ཕན་ཚུན་མ་འདྲེས་པ་དག་ཀྱང་ཡོངས་སུ་བཟུང་ངོ་། །དེ་དག་གི་སྟོབས་མཉམ་པ་ཉིད་ཀྱང་། ཁོང་དུ་ཆུད་པར་བྱས་སོ། །དེ་དག་གིས་བསྟན་པ་ཡང་དམ་པའི་ཆོས་ཟད་པའི་མཐར་ཐུག་གི་བར་དུ་ཡོངས་སུ་བཟུང་ངོ་། །ཁོ་བོས་དེ་བཞིན་གཤེགས་པ་དེ་དག་ཐམས་ཅད་ཀྱི་སྔོན་གྱི་སྨོན་ལམ་རྣམས་ཀྱང་སྨོན་ལམ་གྱི་དཀྱིལ་འཁོར་གྱི་ཏིང་ངེ་
འཛིན་མངོན་པར་བསྒྲུབ་པའི་སྟོབས་ཀྱིས་རང་གི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཕྱིར་མངོན་པར་བསྒྲུབས་སོ། །ཁོ་བོས་དེ་བཞིན་གཤེགས་པ་དེ་དག་ཐམས་ཅད་ཀྱི་སྔོན་གྱི་བྱང་ཆུབ་སེམས་དཔའི་སྤྱོད་པ་རྣམས་ཀྱང་སྤྱོད་པ་ཐམས་ཅད་ལ་འཇུག་པའི་ཏིང་ངེ་འཛིན་ཐོབ་པའི་སྟོབས་ཀྱིས་རང་གི་སྤྱོད་པ་ཡོངས་སུ་དག་པར་བྱ་བའི་ཕྱིར་མངོན་པར་བསྒྲུབས་སོ། །ཁོ་བོས་དེ་བཞིན་གཤེགས་པ་དེ་དག་ཐམས་ཅད་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ཡང་ཀུན་ཏུ་བཟང་པོའི་སྤྱོད་པས་འབྱུང་བའི་སྟོབས་ཀྱིས་མངོན་པར་བསྒྲུབས་སོ། །གཞན་ཡང་རིགས་ཀྱི་བུ། ཁོ་བོ་འཆག་ས་འདི་ན་འཆག་པའི་ཚེ། ཕྱོགས་ཀྱི་རྒྱུད་ཀྱི་སྒོ་ཐམས་ཅད་ཀྱང་ཤིན་ཏུ་རྣམ་པར་ལྟ་བའི་ཡེ་ཤེས་ཀྱི་སྒོས་མངོན་དུ་འགྱུར་རོ། །འཇིག་རྟེན་གྱི་ཁམས་ཀྱི་རྒྱུད་ཀྱི་སྒོ་ཐམས་ཅད་ཀྱང་། སྨོན་ལམ་ཆེན་པོ་མངོན་པར་བསྒྲུབས་པའི་སྟོབས་ཀྱིས་སེམས་བསྐྱེད་པ་གཅིག་ལ་འཇིག་རྟེན་གྱི་ཁམས་བརྗོད་དུ་མེད་པའིའང་བརྗོད་དུ་མེད་པ་འདའ་ཞིང་ཡོངས་སུ་དག་པར་བྱ་བའི་ཕྱིར་རྣམ་པར་འགྲུབ་པར་འགྱུར་རོ། །སེམས་ཀྱི་སྐད་ཅིག་གཅིག་ལ་སེམས་ཅན་གྱི་སྤྱོད་པའི་ཚུལ་གྱི་སྒོ་བརྗོད་དུ་མེད་པའི་ཡང་། བརྗོད་དུ་མེད་པ་དག་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་མངོན་པར་བསྒྲུབས་པའི་སྟོབས་ཀྱིས་སྟོབས་བཅུའི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར་མངོན་སུམ་དུ་འགྱུར་རོ། །སེམས་བསྐྱེད་པ་གཅིག་ལ་སངས་རྒྱས་བརྗོད་དུ་མྱེད་པའི་ཡང་། བརྗོད་དུ་མེད་པ་མཐོང་བ་རྣམ་པར་དག་པ་དག་ཀྱང་སྔ་ཕྱིའི་དེ་བཞིན་གཤེགས་པ་རྣམས་ལ་མཆོད་པའི་སྨོན་ལམ་མངོན་པར་བསྒྲུབས་པའི་སྟོབས་ཀྱིས། དེ་བཞིན་གཤེགས་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་། བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ལ་མཆོད་པ་དང་། བསྙེན་བཀུར་བ་དང་། རིམ་གྲོ་བྱ་བའི་ཕྱིར་མངོན་དུ་འགྱུར་རོ། །
སེམས་བསྐྱེད་པ་གཅིག་ལ་དེ་བཞིན་གཤེགས་པ་བརྗོད་དུ་མེད་པའི་ཡང་བརྗོད་དུ་མེད་པའི་ཆོས་ཀྱི་སྤྲིན་གྱི་ཆར་རྣམས་ཀྱང་ཆོས་ཀྱི་འཁོར་ལོ་ཡོངས་སུ་འཛིན་པའི་གཟུངས་དང་། སྨོན་ལམ་མངོན་པར་བསྒྲུབས་པའི་སྟོབས་ཀྱིས། ཆོས་ཀྱི་ཚུལ་གྲངས་མེད་པ་རྣམ་པར་འཚང་རྒྱ་ཞིང་ཁོང་དུ་ཆུད་པར་བྱ་བའི་ཕྱིར་བསམ་པ་ལ་མངོན་པར་འབབ་བོ། །སེམས་བསྐྱེད་པ་གཅིག་ལ་བྱང་ཆུབ་སེམས་དཔའི་སྤྱོད་པ་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་བྱང་ཆུབ་སེམས་དཔའི་སྤྱོད་པ་མྱིག་འཕྲུལ་ལྟ་བུར་ཡོངས་སུ་རྫོགས་པར་བྱ་བའི་སྨོན་ལམ་མངོན་པར་བསྒྲུབས་པའི་སྟོབས་ཀྱིས་སྤྱོད་པའི་དཀྱིལ་འཁོར་ཐམས་ཅད་ཡོངས་སུ་དག་པར་བྱ་བའི་ཕྱིར་མངོན་དུ་འགྱུར་རོ། །སེམས་བསྐྱེད་པ་གཅིག་ལ་ཏིང་ངེ་འཛིན་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་ཏིང་ངེ་འཛིན་གྱི་སྒོ་གཅིག་ཏུ་ཏིང་ངེ་འཛིན་གྱི་སྒོ་ཐམས་ཅད་ཡང་དག་པར་འདུ་བར་བྱ་བའི་སྨོན་ལམ་མངོན་པར་བསྒྲུབས་པའི་སྟོབས་ཀྱིས་ཏིང་ངེ་འཛིན་གྱི་དཀྱིལ་འཁོར་ཐམས་ཅད་ཡོངས་སུ་དག་པར་བྱ་བའི་ཕྱིར་མངོན་དུ་འགྱུར་རོ། །སེམས་བསྐྱེད་པ་གཅིག་ལ་དབང་པོ་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་དྲན་པའི་མཐར་ཕྱིན་པའི་དབང་པོ་ཐོབ་པར་བྱ་བའི་སྨོན་ལམ་མངོན་པར་བསྒྲུབས་པའི་སྟོབས་ཀྱིས་དབང་པོའི་འཁོར་ལོ་དང་། དུས་ཀྱི་འཁོར་ལོ་ཐམས་ཅད་ཀྱི་རྗེས་སུ་འབྲང་བར་བྱ་བའི་ཕྱིར་མངོན་དུ་འགྱུར་རོ། །སེམས་བསྐྱེད་པ་གཅིག་ལ་དུས་ཀྱི་འཁོར་ལོ་བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་སེམས་ཅན་ཟད་མི་ཤེས་པ་ཟད་པར་བྱ་བའི་སྨོན་ལམ་མངོན་པར་བསྒྲུབས་པའི་སྟོབས་ཀྱིས་དུས་ཐམས་ཅད་དུ་ཆོས་ཀྱི་འཁོར་ལོ་རབ་ཏུ་བསྐོར་བའི་ཕྱིར་མངོན་དུ་འགྱུར་རོ། །སེམས་བསྐྱེད་པ་གཅིག་ལ་དུས་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པ་ཐམས་ཅད་ཀྱང་དུས་གཅིག་ཏུ་རྣམ་པར་དགོད་པའི་ཚུལ་ཁོང་དུ་ཆུད་པའི་ཡེ་ཤེས་སྣང་བའི་སྨོན་ལམ་མངོན་པར་བསྒྲུབས་པའི་སྟོབས་ཀྱིས། འཇིག་རྟེན་གྱི་ཁམས་ཐམས་ཅད་ཀྱི་དུས་གསུམ་རྣམ་པར་དགོད་པའི་ཕྱིར་མངོན་
སུམ་དུ་འགྱུར་ཏེ། རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའི་རྣམ་པར་ཐར་པ་ཤིན་ཏུ་ཞི་བར་མི་འགྱུར་བའི་སྒྲོན་མ་ཞེས་བྱ་བ་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་བསམ་པ་རྡོ་རྗེ་ལྟ་བུ་དང་ལྡན་པ་དེ་བཞིན་གཤེགས་པ་ཐམས་ཅད་ཀྱི་རིགས་སུ་རིགས་དང་ལྡན་པར་བྱུང་བ། སྲོག་གི་དབང་པོ་ལ་རྒྱུན་ཆད་པ་མེད་པ། ཡེ་ཤེས་ཀྱི་སྒྲོན་མ་ཞི་བར་འགྱུར་བ་མེད་པ། མི་ཤིགས་མི་ཕྱེད་པའི་ལུས་དང་ལྡན་པ། སྒྱུ་མའི་རྣམ་པ་ལྟ་བུའི་གཟུགས་ཤིན་ཏུ་གྲུབ་པ། རྒྱུའི་ཆོས་དང་མཉམ་པའི་ཡན་ལག་དང་། ཉིང་ལག་ཏུ་ལྡན་པའི་ལུས་ཅན་འགྲོ་བ་རྣམས་ཀྱི་བསམ་པ་ཇི་ལྟ་བ་བཞིན་དུ་རྣམ་པར་དམྱིགས་པར་བྱེད་པའི་ལུས་དང་ལྡན་པ། འགྲོ་བ་ཐམས་ཅད་དང་འདྲ་བའི་གཟུགས་དང་ལུས་དང་ཁ་དོག་དང་། དབྱིབས་དང་ཆུ་ཞེང་ཡོངས་སུ་སྟོན་པ། མེ་མདག་དང་མེ་ལྕེ་དང་། དུག་དང་མཚོན་གྱིས་མི་ཚུགས་པའི་ལུས་དང་ལྡན་པ་རྡོ་རྗེ་ལྟར་སྲ་ཞིང་ཁོར་ཡུག་ལྟར་ཐུག་པ་མེད་པའི་ལུས་ཅན། བདུད་དང་ཕས་ཀྱི་རྒོལ་བ་ཐམས་ཅད་ཀྱི་སྟོབས་ཀྱི་སྟོབས་མེད་པར་བྱེད་པ། འཛམ་བུ་ཆུ་ཀླུང་གི་གསེར་གྱི་རི་བོ་དང་འདྲ་བར་འགྲོ་བ་ཀུན་ལས་མངོན་པར་འཕགས་པའི་ལུས་དང་ལྡན་པ། འགྲོ་བ་ཐམས་ཅད་དུ་རྣམ་པར་དམྱིགས་པའི་གཞི་དང་ལྡན་པ། སྒོ་ཐམས་ཅད་དུ་རྣམ་པར་དམྱིགས་ཤིང་ཐོས་པར་འགྱུར་བ། འགྲོ་བ་ཐམས་ཅད་ཀྱི་ངོར་བལྟ་བ། ཆོས་ཐམས་ཅད་ཀྱི་སྤྲིན་གྱི་འབྱུང་གནས་སུ་གྱུར་པ། ཕྱོགས་ཀུན་ཏུ་རྣམ་པར་སྣང་བ་སྒྲིབ་པའི་རི་ཐམས་ཅད་རྣམ་པར་གཏོར་བས་བལྟ་ན་མཛེས་པ་མི་དགེ་བའི་རྩ་བ་ཐམས་ཅད་ཤིན་ཏུ་འཇོམས་པས་ཤིན་ཏུ་དཔའ་བར་སྣང་བ་དགེ་བའི་རྩ་བ་རྒྱ་ཆེན་པོའི་རྒྱུ་འཐུན་པ་ལས་བྱུང་བས་བལྟ་ན་དགའ་བ་འབྱུང་བར་ཤིན་ཏུ་དཀའ་ཞིང་དཀོན་པས་མེ་ཏོག་ཨུ་དུམ་བཱ་ར་ལྟ་བུ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་ཡུལ་དགེ་སྦྱོང་གི་
དཀྱིལ་འཁོར་ཞེས་བྱ་བ་ན་གྲོང་ཁྱེར་སྒོ་བཟང་པོ་ཞེས་བྱ་བ་ཡོད་དེ། དེ་ན་ཁྱེའུ་དབང་པོའི་དབང་ཕྱུག་ཅེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའི་རྣམ་པར་གནོན་པ་དང་། ནན་ཏན་རྣམ་པར་དག་པར་བྱ་བ་ལ་བརྩོན་པ། བྱང་ཆུབ་སེམས་དཔའི་སྟོབས་སྣང་བས་སེམས་ཤིན་ཏུ་སྣང་བར་གྱུར་པ། བྱང་ཆུབ་སེམས་དཔའི་བརྟན་པ་གཞན་གྱིས་མི་ཐུབ་ཅིང་བརྒལ་ཐག་ཆང་བའི་སྙིང་དང་ལྡན་པ། བྱང་ཆུབ་སེམས་དཔའི་སྨོན་ལམ་གྱི་གོ་ཆ་བཟངས་པོས་སེམས་ཞུམ་པ་མེད་པ། བྱང་ཆུབ་སེམས་དཔའི་བསམ་པ་བརྟན་པས་ཀུན་ཏུ་གནས་ཤིང་ཡོངས་སུ་འཕེལ་བར་འགྱུར་བ་ལ་བརྩོན་པ། བྱང་ཆུབ་སེམས་དཔའི་སྤྱོད་པའི་སྤྲིན་གྱི་ཆར་ཡོངས་སུ་འཛིན་པའི་བསམ་པ་དང་ལྡན་པ། བྱང་ཆུབ་སེམས་དཔའི་ཆོས་ཀྱི་སྤྲིན་གྱི་ཆར་གྱིས་ཡོངས་སུ་མི་ངོམས་པའི་རྒྱུད་དང་ལྡན་པ། བྱང་ཆུབ་སེམས་དཔའི་ཡོན་ཏན་ཐམས་ཅད་ལ་འཇུག་པའི་སྨོན་ལམ་ལ་མངོན་དུ་གྱུར་པ། འགྲོ་བ་ཐམས་ཅད་ཀྱི་ཁ་ལོ་བསྒྱུར་བས་ཡོངས་སུ་སྡུད་པར་བདག་ཉིད་ཡོངས་སུ་གཏོང་བར་འདོད་པ་འགྲོ་བ་ཐམས་ཅད་འཁོར་བའི་དགོན་པ་ཆེན་པོ་ལས་བཟླ་བར་འདོད་པ་དགེ་བའི་བཤེས་གཉེན་བལྟ་བ་དང་། མཉན་པ་དང་། བསྙེན་བཀུར་བས་ཡོངས་སུ་མི་ངོམས་པ། ཆོས་ཀྱི་རིམ་གྲོ་ཚད་མེད་པ་བསྐྱེད་པ་དང་ལྡན་པ་དེས། དགེ་སློང་བལྟ་ན་སྡུག་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་སློང་བལྟ་ན་སྡུག་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། དགེ་སློང་བལྟ་ན་སྡུག་པའི་དྲུང་ནས་སོང་ངོ་།། །