བཅུ་གཉིས་པ། བྱང་ཆུབ་ཀྱི་སྙིང་པོར་བཞུད་པའི་ལེའུ།
དེ་ནས་བྱང་ཆུབ་སེམས་དཔའ་ལུས་བཀྲུས་ཏེ་ལུས་སྟོབས་དང་ལྡན་པར་གྱུར་ནས་ཟས་ཟོས་ཏེ་བྱང་ཆུབ་ཀྱི་སྙིང་པོ་གལ་བ་དེར་སོང་ངོ་། དེ་སོང་བ་དང་ས་ལ་སྤྱོད་པའི་ལྷའི་བུ་ས་བཟངས་ཞེས་བྱ་བས་ས་ལ་སྤྱོད་པའི་ལྷའི་བུ་ཐམས་ཅད་ལ་བོས་ཏེ་སྨྲས་པ་། ས་འཛིན་གང་ཞིག་མི་གཡོ་མི་བསྐྱོད་པ། སྲེད་པས་བསལ་ཅིང་ཁོང་ཁྲོ་རབ་སྤངས་པ། བྱང་ཆུབ་སེམས་དཔའ་དེ་ནི་ཤིང་དྲུང་བྱོན། ས་གཞི་དག་ནི་ལེགས་པར་བརྒྱན་པར་བྱ། ལེགས་སོ་ཞེས་ཏེ་ས་ལ་སྤྱོད་རྣམ་དགའ། སྟོང་གསུམ་ཐམས་ཅད་ཡོངས་སུ་ཕྱག་དར་བྱེད། མེ་ཏོག་སིལ་མ་བཀྲམ་ཞིང་སྤོས་མཆོག་བདུགས།
སྤོས་ཆུ་དག་གིས་ས་གཞི་ཆག་ཆག་བཏབ། ལག་ན་གཞོང་ཐོགས་དེ་བཞིན་ཕྲེང་བ་ཐོགས། གཞལ་མེད་ཁང་གནས་དེ་བཞིན་པར་སྣང་བ། དེ་དག་བྱང་ཆུབ་སེམས་དཔའ་མཐོང་ནས་དགའ། དེ་ཚེ་མེ་ཏོག་སྣ་ཚོགས་ཆར་དུ་ཕབ། གླིང་བཞི་པ་དག་རྣམས་ན་སྐྱོང་བ་བཞི། ཇི་སྙེད་པ་དག་ཐམས་ཅད་འཁོར་བཅས་ཏེ། རྣམ་པར་འདྲེན་ལ་མཆོད་པ་བྱ་བའི་ཕྱིར་། གསེར་གྱི་དྲ་བས་སྟོང་གསུམ་ཐམས་ཅད་བཀབ། སྟོང་གསུམ་འཇིག་རྟེན་བརྒྱ་བྱིན་རྫུ་འཕྲུལ་ཆེ། དེ་དག་བྱང་ཆུབ་སེམས་དཔའ་མཆོད་པའི་ཕྱིར། སུམ་བཅུ་རྩ་གསུམ་རྣམ་རྒྱལ་ཁང་མཛེས་པ། དེ་ལྟས་སྟོང་གསུམ་ཐམས་ཅད་མཛེས་པར་བརྒྱན། འཐབ་བྲལ་རྣམས་ཐམས་ཅད་རབ་དགའ་སྟེ། སྐྱེས་བུ་མཆོག་ལ་ཡང་དག་མཆོད་པའི་ཕྱིར། མི་མཇེད་འཇིག་རྟེན་ཁམས་ཀྱི་སྟོང་གསུམ་ཀུན། ནམ་མཁའ་བཻ་དཱུ་ཪྻ་དྲ་བས་བཀབ། དགའ་ལྡན་རབ་དང་དགའ་ལྡན་ལྷ་རྣམས་ཀྱང། དེ་དག་མུ་ཏིག་དྲ་བས་བརྒྱན་པ་བྱས། རྒྱན་ཕྲེང་དེ་བཞིན་ཟླ་གམ་རྣམས་ཀྱང་ཐོགས། མུ་ཏིག་སིལ་མའི་ཆར་ཡང་རབ་ཏུ་འབེབས། ལྷའི་རྒྱལ་པོ་རབ་ཏུ་འཕྲུལ་གྱི་བར་། རབ་ཏུ་དགའ་ནས་འཛམ་བུའི་ཆུ་གསེར་གྱི། དྲིལ་བུའི་དྲ་བ་གསེར་གྱི་དྲར་བཅས་དང། སྒྲ་སྙན་བཅས་པས་སྟོང་གསུམ་ཐམས་ཅད་བཀབ། ཐམས་ཅད་དོན་ལ་མི་འཇིགས་མཆོད་པའི་ཕྱིར་། དབང་སྒྱུར་དག་གིས་ལྷ་ཡི་རིན་པོ་ཆེ། རྣམ་པར་དག་ཅིང་གཟི་བརྗིད་མཐའ་ཡས་པ། འོད་གསལ་དྲི་མེད་དྲ་བ་གཅིག་ཀྱང་སྤྲུལ། ཀླུ་དང་དྲི་ཟ་ལྟོ་འཕྱེ་ཆེན་པོ་དང།་ལྷ་མིན་མཁའ་ལྡིང་མི་འམ་ཅི་ཀུན་གྱིས། རང་རང་གནས་དང་བཀོད་པ་རྣམས་ཀྱིས་ནི། འདོད་ཁམས་ལེགས་པར་བརྒྱན་ནས་མཛེས་པར་བྱས། ཞི་བའི་བློ་གྲོས་དེ་ནས་སྟོང་གསུམ་གྱི་དབང་པོ་ཚངས་པ་ཆེན་པོ་དབང་སྒྱུར་ཞེས་བྱ་བས་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་མངོན་དུ་ཕྱོགས་པར་མཐོང་ནས་ཚངས་རིས་ཀྱི་ལྷ་རྣམས་ལ་སྨྲས་པ། གྲོགས་པོ་དག་ཤེས་པར་གྱིས་ཤིག། བྱང་ཆུབ་སེམས་དཔའ་སེམས་དཔའ་
ཆེན་པོ་གོ་ཆ་ཆེན་པོ་བསྣབས་པ། དམ་བཅས་པ་ཆེན་པོ་མ་བོར་བ། གོ་ཆ་སྲ་བ་མནབས་པ། ཐུགས་ཡོངས་སུ་མ་སྐྱོ་བ། བྱང་ཆུབ་སེམས་དཔའི་སྤྱོད་པ་ཐམས་ཅད་ལས་ངེས་པར་བྱུང་བ། ཕ་རོལ་དུ་ཕྱིན་པ་ཐམས་ཅད་ཀྱི་ཕ་རོལ་དུ་བྱོན་པ། བྱང་ཆུབ་སེམས་དཔའི་ས་ཐམས་ཅད་ལ་མངའ་དབང་བརྙེས་པ། བྱང་ཆུབ་སེམས་དཔའི་བསམ་པ་ཐམས་ཅད་ཤིན་དུ་རྣམ་པར་དག་པ། སེམས་ཅན་ཐམས་ཅད་ཀྱི་དབང་པོའི་རྗེས་སུ་ཞུགས་པ། དེ་བཞིན་གཤེགས་པའི་གསང་བ་ཐམས་ཅད་ལ་ཤིན་དུ་ཞུགས་པ། བདུད་ཀྱི་ལས་ཀྱི་ལམ་ཐམས་ཅད་ལས་ཡང་དག་པར་འདས་པ། དགེ་བའི་རྩ་བ་ཐམས་ཅད་ལ་གཞན་གྱི་དྲིང་མི་འཇོག་པ། དེ་བཞིན་གཤེགས པ་ཐམས་ཅད་ཀྱིས་བྱིན་གྱིས་བརླབས་པ། སེམས་ཅན་ཐམས་ཅད་ལ་རབ་ཏུ་ཐར་བའི་ལམ་སྟོན་པ་དེད་དཔོན་ཆེན་པོར་གྱུར་པ། བདུད་ཀྱི་དཀྱིལ་འཁོར་ཐམས་ཅད་འཇོམས་པར་མཛད་པ། སྟོང་གསུམ་ན་དཔའ་བོ་གཅིག་པར་གྱུར་པ། ཆོས་ཀྱི་སྨན་ཐམས་ཅད་ཡང་དག་པར་བསྒྲུབས་པ་སྨན་པའི་རྒྱལ་པོ་ཆེན་པོ། རྣམ་པར་དགྲོལ་བའི་ཐབས་བརྙེས་པ་ཆོས་ཀྱི་རྒྱལ་པོ་ཆེན་པོ། ཤེས་རབ་ཀྱི་འོད་ཆེན་པོ་གཏོང་བ་ཏོག་ཆེན་པོའི་རྒྱལ་པོ། འཇིག་རྟེན་གྱི་ཆོས་བརྒྱད་ཀྱིས་མ་གོས་པ་པདྨ་ཆེན་པོ་ལྟ་བུ། ཆོས་ཐམས་ཅད་ཀྱི་གཟུངས་མ་བསྙེལ་པ་རྒྱ་མཚོ་ཆེན་པོ་དང་འདྲ་བ། རྗེས་སུ་ཆགས་པ་དང་། ཁོང་ཁྲོ་བ་དང་བྲལ་བ། མི་གཡོ་བ། མི་བསྐྱོད་པ། རི་རབ་ཆེན་པོ་ལྟ་བུ། ཤིན་དུ་དྲི་མ་མེད་པ། ཤིན་དུ་ཡོངས་སུ་དག་པ། ཤིན་དུ་དཀར་བའི་བློ་དང་ལྡན་པ། ནོར་བུ་རིན་པོ་ཆེ་ཆེན་པོ་དང་འདྲ་བ། ཆོས་ཐམས་ཅད་ལ་དབང་སྒྱུར་བ། སེམས་ལས་སུ་རུང་བ། ཚངས་པ་ཆེན་པོ་ལྟ་བུའི་བྱང་ཆུབ་སེམས་དཔའ་དེ་བདུད་ཀྱི་སྡེ་རབ་ཏུ་འདུལ་བ་དང་། བླ་ན་མེད་པ་ཡང་དག་པར་རྫོགས་པར་བྱང་ཆུབ་བར་བཞེད་པ་དང་། སྟོབས་བཅུ་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཡོངས་སུ་རྫོགས་པར་མཛད་པ་དང་། ཆོས་ཀྱི་འཁོར་ལོ་ཆེན་པོ་བསྐོར་བ་དང་།
སེང་གེའི་སྒྲ་ཆེན་པོ་བསྒྲག་པ་དང། ཆོས་ཀྱི་སྦྱིན་པས་སེམས་ཅན་ཐམས་ཅད་ཚིམ་པར་མཛད་པ་དང་། སེམས་ཅན་ཐམས་ཅད་ཀྱི་ཆོས་ཀྱི་མིག་རྣམ་པར་སྦྱང་པ་དང་། ཕས་ཀྱི་རྒོལ་བ་ཐམས་ཅད་ཆོས་དང་མཐུན་པས་ཚར་གཅད་པ་དང་། སྔོན་དམ་བཅས་པ་ཡོངས་སུ་རྫོགས་པ་སངས་རྒྱས་བཅོམ་ལྡན་འདས་རྣམས་ལ བསྟན་པར་བཞེད་པ་དང། ཆོས་ཐམས་ཅད་ལ་དབང་ཕྱུག་གི་མངའ་དབང་བརྙེས་པར་མཛད་པའི་ཕྱིར་བྱང་ཆུབ་ཀྱི་སྙིང་པོར་བཞུད་ཀྱིས། དེ་ལ་གྲོགས་པོ་དག་ཁྱེད་བྱང་ཆུབ་སེམས་དཔའ་ལ་མཆོད་པ་དང་རིམ་གྲོ་བྱ་བ་ལ་སྤྲོ་བར་གྱིས་ཤིག། དེ་ནས་སྟོང་གསུམ་གྱི་བདག་པོ་ཚངས་པ་ཆེན་པོ་མི་མཇེད་གྱི་བདག་པོ་དེ་ཡིད་རབ་ཏུ་དགའ་ནས་ཚངས་རིས་ཀྱི་ལྷ་ཐམས་ཅད་ལ་སྨྲས་པ། གྲོགས་པོ་དག་བསྐལ་པ་བརྒྱ་སྟོང་མང་པོར་བརཏལ་ཞུགས་དང་དཀའ་ཐུབ་བསགས་པ་། སྐྱེས་བུ་ཆེན་པོ་དམ་པ་དེ་བྱང་ཆུབ་ཀྱི་སྙིང་པོ་ག་ལ་དེར་བཞུད་ཀྱིས་དེ་ལ་ཁྱོད་ཀྱིས་བཀོད་པ་ཆེན་པོ་རྣམས་ཀྱི་སྟོང་གསུམ་གྱི་སྟོང་ཆེན་པོ་ཐམས་ཅད་བརྒྱན་པར་གྱིས་ཤིག། དེ་ནས་ཚངས་པ་ཆེན་པོ་མི་མཇེད་ཀྱི་བདག་པོ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། སེམས་ཅན་རྣམ་དག་བརཏལ་ཞུགས་ཆོས་དེས་པ་། ལྷར་བཅས་འཇིག་རྟེན་དག་ལ་ཕན་བཞེད་པ། ལྷ་དང་མི་ཡིས་མཆོད་པ་ལྷ་ཡི་ལྷ། ཐུབ་པ་ཆེན་པོ་བྱང་ཆུབ་སྙིང་པོར་གཤེགས། སྡེ་དང་བཅས་པའི་བདུད་ནི་གདུལ་བ་དང། ཐམས་ཅད་མཁྱེན་ཀྱི་ཡེ་ཤེས་འཚང་རྒྱ་དང། རྫོགས་པའི་སངས་རྒྱས་ཆོས་རྣམས་ཡོངས་བཀང་དང། དམ་པའི་ཆོས་ཀྱི་འཁོར་ལོ་བསྐོར་བ་དང། མཁས་པ་སེང་གེའི་སྒྲ་ཆེན་བསྒྲག་པ་དང། སེམས་ཅན་ཐམས་ཅད་ཚིམ་པར་བྱ་བ་དང། དམ་པའི་ཆོས་མིག་ཡོངས་སུ་སྦྱང་བའི་ཕྱིར། འདྲེན་པ་བྱང་ཆུབ་སྙིག་པོར་ཉེ་བར་གཤེགས། །
ཕས་ཀྱི་རྒོལ་བ་རྣམས་ནི་ཚར་གཅད་པ་དང། སྔོན་གྱི་དམ་བཅས་ཡོངས་སུ་བཀང་བ་དང། རྫོགས་སངས་རྒྱས་ཀྱི་མཛད་པ་བསྟན་པའི་ཕྱིར། འདྲེན་པ་བྱང་ཆུབ་སྙིང་པོར་ཉེ་བར་གཤེགས། ལེགས་པར་ཐམས་ཅད་ལྷན་ཅིག་འདུས་ནས་ནི། ས་ཡི་གཞི་ནི་ལེགས་པར་བརྒྱན་པར་བྱ། སྟོང་གསུམ་བརྒྱན་པར་གྱུར་ལ་ལྟོས་ཤིག་ཀྱེ། འདོད་པའི་ཁམས་ཀྱང་བརྒྱན་པར་གྱུར་པ་ལྟོས། འདོད་པའི་ཁམས་ནི་ཇི་ལྟར་བརྒྱན་པ་བཞིན། དེ་ལྟར་གཟུགས་ཀྱི་ཁམས་ཀྱང་བརྒྱན་པར་བྱ། ཚངས་པ་རྣམས་ནི་སེམས་དང་ལེགས་སོ་ཞེས། རབ་ཏུ་དགའ་ནས་སྟོང་གསུམ་བརྒྱན་པར་གྱུར་། ཇི་ལྟར་འདོད་པའི་ཁམས་ན་བཀོད་སྣག་བ། དེ་བས་ལྷག་པའི་མཆོད་པ་དེ་དག་བསྟན་། མེ་ཏོག་རྣམས་ཀྱིས་བཀང་ཞིང་སྨོས་ཀྱིས་བཀང། རིན་ཆེན་རྣམས་ཀྱིས་མཆོད་ཅིང་སིལ་སྙན་བསྒྲགས་། ཚངས་པ་ལ་སོགས་འོག་མིན་ལྷ་ཡི་རྣམས་། རབ་ཏུ་དགའ་ནས་སྟོང་གསུམ་ཐམས་ཅད་ཀྱང། དགའ་བར་འགྱུར་དང་ཕྱག་བྱའི་འོས་སུ་བྱས། རང་རང་གནས་ཀྱི་གཞི་ཡང་བཀོད་པ་བྱས། ལྷ་རྣམས་ཀྱིས་ནི་གོང་ནས་གོང་དུ་ཡང། ལྷག་པ་ལྷག་པའི་རྒྱན་རྣམས་རབ་ཏུ་བསྟན་། ལྷ་ཡི་བུ་མོ་བྱེ་བ་དྲུག་བཅུ་བརྒྱས་། བྱང་ཆུབ་རྡོ་རྗེ་གདན་ནི་བརྒྱབ་པར་བྱེད། སྤོས་ཆུ་ཡིས་ནི་ཀུན་དུ་ཆག་ཆག་འདེབས། མེ་ཏོག་སྣ་ཚོགས་དག་ཀྱང་འཐོར་བར་བྱེད། ས་གཞི་དག་ལ་རིན་ཆེན་རྣམས་ཀྱང་བཀྲམ། བྱང་ཆབ་སྙིང་པོར་རྒྱན་རྣམས་རབ་ཏུ་བསྟན། ཐམས་ཅད་ཚིག་གིས་བརྗོད་པར་མི་ནུས་པ། དེ་སྙེད་ཚད་ཀྱི་བཀོད་པ་འདིར་བྱས་གྱུར། ཞི་བའི་བློ་གྲོས་བྱང་ཆུབ་སེམས་དཔའ་བྱང་ཆུབ་ཀྱི་སྙིག་པོར་འགྲོ་བ་ན་སྟོང་གི་དབང་པོ་ཚངས་པ་ཆེན་པོ་མི་མཇེད་ཀྱི་བདག་པོས་ཚངས་རིས་ཀྱི་ལྷ་ཐམས་ཅད་ལ་སྨྲས་པ། གྲོགས་པོ་དག་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་བརཏལ་ཞུགས་དང། དཀའ་ཐུབ་རྣམས་ཀྱི་སྤྱོད་པ་སྤྱད་པ་སེམས་ཅན་གྱི་མཆོག་སྐྱེས་བུ་ཆེན་པོ་འདི་བྱང་ཆུབ་ཀྱི་སྙིང་པོར་བཞུད་ཀྱིས། དེ་ལ་ཁྱེད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་བཀོད་པ་ཆེན་པོ་རྣམས་ཀྱིས་བརྒྱན་པར་གྱིས་ཤིག། དེ་ནས་མི་མཇེད་ཀྱི་བདག་པོ་ཚངས་པས་ཚངས་རིས་ཀྱི་ལྷའི་བུ་རྣམས་ལ་ཚིགས་སུ་བཅད་པ་འདི་དག་སྨྲས་སོ། །སེམས་ཅན་རྣམ་དག་བརཏལ་ཞུགས་ཆོས་དེས་པ། ཕན་བཞེད་
འཇིག་རྟེན་དོན་མཛད་བདག་ཉིད་ཆེ། དེ་ནི་བློ་ངན་སྡེ་བཅས་བདུད་འདུལ་དུ། ཤིང་གི་དབང་པོ་བྱང་ཆུབ་དྲུང་དུ་བཞུད། ཐམས་ཅད་འདུས་ཏེ་ལྷན་ཅིག་འདོད་བར་བྱ། སྟོང་གསུམ་མི་མཇེད་འདི་ནི་བརྒྱན་པར་བྱ། འདི་ནི་ལྷར་བཅས་འཇིག་རྟེན་ཆོས་ཀྱི་དབང། ཡང་དག་མཆོད་ན་བསོད་ནམས་མཐའ་ཡས་འགྱུར། ཚངས་པ་དེ་དག་ཚིག་མཆོག་དེ་ཐོས་ནས། སྟོང་གསུམ་ཐམས་ཅད་མ་ལུས་བརྒྱན་པར་བྱེད་ཅིང། ལེགས་པར་ཕྱགས་ཏེ་མེ་ཏོག་རྒྱལ་མཚན་བརྒྱན་། འཇིག་རྟེན་ཁམས་ནི་རིན་ཆེན་རང་བཞིན་སྤྲུལ། ཉི་མ་ཟླ་བའི་འོད་ཀྱི་བཀོད་པ་དང། བྱ་བའི་གདུགས་རྣམས་ནམ་མཁར་དེ་དག་སྤྲུལ། ས་ལའི་ཤིང་རྣམས་མེ་ཏོག་མཆོག་སྤྲུལ་པ། དགའ་ཚལ་ལྟ་བུ་དེ་དག་རྣམས་ཀྱིས་སྤྲུལ། ལམ་གང་ནས་ནི་དྲང་སྲོང་ཆེ་གཤེགས་པ། དེ་ནི་ཤིང་རྟ་བདུན་བསྣམས་ཚད་དུ་སྤྲུལ། རིན་ཆེན་གཞི་ལ་གསེར་གྱི་པདྨ་བཀྲམ། ཁ་ཁྱེར་རིམ་པ་བདུན་གྱིས་ཡོངས་སུ་བསྐོར། བརྒྱ་བྱིན་གྱིས་དེར་བཀོད་པ་གང་བྱས་པ། དེ་དག་ལྷ་མི་རྣམས་ཀྱིས་སྔོན་མ་མཐོང། སུམ་བཅུ་གསུམ་དབང་རྣམ་རྒྱལ་ཁང་འདྲ་བར། དེ་ལྟར་གླིང་བཞི་དག་ནི་མཛེས་པར་བརྒྱན། འཐབ་བྲལ་ལྷ་དང་དགའ་ལྡན་འཕྲུལ་བ་དང། གཞན་འཕྲུལ་པ་དང། འོག་མིན་ལྷ་ཡི་རྣམས་། སྟོབས་དང་ཤུགས་འཆང་ཐམས་ཅད་བརྩོན་པར་ནི། བྱང་ཆུབ་སྙིང་པོ་དམ་པ་རྒྱན་པར་བྱེད། བྱང་ཆུབ་སྙིང་པོར་གཤེགས་པའི་བར་དེར་ནི། འདོད་པའི་ཁམས་འདིར་དཀོན་མཆོག་གང་ཡོད་པ། ལྷ་འམ་ཀླུ་འམ་མི་འམ་ཅི་རྣམས་ཀྱི། དེ་དག་ཐམས་ཅ་སྐད་ཅིག་དེ་ལ་བསྟན། ཕྱོགས་བཞི་དག་ནས་ལྷ་མོ་བྱེ་བ་ལྷགས། མེ་ཏོག་རྣམས་དང་སྤོས་དང་བྱུག་པ་ཡིས། བྱང་ཆུབ་ཤིང་ནི་མངོན་དུ་རྒྱན་པར་བྱེད། སྤོས་ཆུས་ཡིས་ནི་ཀུན་དུ་ཆག་ཆག་འདེབས་བྱང་ཆུབ་ཤིང་ནི་ལེགས་པར་བརྒྱན་བྱས་ཏེ། སུམ་བཅུ་རྩ་གསུམ་ལྷ་ཡི་ཡོངས་འདུ་འདྲ། ལྷ་རྣམས་བྱེ་བ་དག་གིས་མཛེས་སྤྲུལ་པ། བཀོད་པ་དེ་དག་ཚིག་གིས་བརྗོད་མི་ནུས། ཞི་བའི་བློ་གྲོས་དེ་ནས་བྱང་ཆུབ་སེམས་དཔའ་བྱང་ཆུབ་ཀྱི་
སྙིང་པོར་འགྲོ་བ་ན་རྐང་པའི་མཐིལ་འཁོར་ལོ་རྩིབས་སྟོང་པ་གཉིས་ལས་འདི་འདྲ་བའི་འོད་ཕྱུང་སྟེ་འོད་དེས་སེམས་ཅན་དམྱལ་བ་དང། དུད་འགྲོའི་སྐྱེ་གནས་དང། གཤིན་རྗེའི་འཇིག་རྟེན་པའི་སེམས་ཅན་ཐམས་ཅད་ཀྱི་སྡུག་བསྔལ་གྱི་ཚོར་བ་རྣམས་རྒྱུན་བཅད་དོ། །ཀླུའི་རྒྱལ་པོ་ནག་པོའི་གནས་ཀྱང་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་ཀླུའི་བདག་པོ་ནག་པོས་བྱང་ཆུབ་སེམས་དཔའི་འོད་མཐོང་ནས་། ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ནས་། དགའ་བ་དང་ཡིད་བདེ་བ་སྐྱེས་ཏེ་ཐམས་ཅད་དང་ལྡན་པའི་རང་གི་འཁོར་ལ་ཚིགས་སུ་བཅད་པས་སྨྲས་པ། གསེར་གྱི་ཁ་དོག་འདྲ་བའི་འོད། གནས་འདིར་ལྷང་དེར་གྱུར་པས་ན། ཁོ་བོའི་ལུས་ནི་རབ་ཏུ་ཚིམ། སེམས་ཀྱང་རབ་ཏུ་དགའ་བར གྱུར་། ཁོ་བོས་སྔོན་གྱི་སངས་རྒྱས་ཀྱི། ལྟས་བཟང་མཐོང་བ་ལྟར་ན་ནི། གདོན་མི་ཟ་བར་དཔའ་ཆེན་པོ། སངས་རྒྱས་འཇིག་རྟེན་འབྱུང་བར་འགྱུར་། ལེགས་པར་ཕྱེ་མ་ཕྲེང་བ་དང། སྤོས་དང་མེ་ཏོག་བྱུག་པ་དང། གསེར་དང་ནོར་བུ་མུ་ཏིག་དང། །དུང་དང་རྒྱབ་ཕྲེང་མཆོག་རྣམས་དང། རོལ་མོ་སིལ་སྙན་རྣམ་ཐོགས་ལ། གདུགས་དང་རྒྱལ་མཚན་ཐོགས་ནས་ནི། བ་དན་དག་ཀྱང་བསྒྲེང་བྱོས་ཏེ། སྟོན་པ་ལ་ནི་མཆོད་པ་བྱ། ཀླུ་ཡི་རྒྱལ་པོའི་གནས་འདི་ན། བཟང་པོའི་རྒྱན་རྣམས་ཇི་སྙེད་པ། དེ་དག་རབ་ཏུ་དགའ་བ་ཡིས། སངས་རྒྱས་ལ་ནི་རིམ་གྲོ་བྱ་། དེ་ནས་ཀླུའི་རྒྱལ་པོ་ནག་པོ་ཆུང་མའི་འཁོར་དང་བཅས་། གཉེན་གྱི་འཁོར་དང་བཅས་ཏེ། མེ་ཏོག་དང་།སྤོས་དང་ཕྲེང་བ་དང། བྱུག་པ་དང། ཕྱེ་མ་དང། གོས་དང། གདུགས་དང། རྒྱལ་མཚན་དང་། བ་དན་ཐོགས་པ་དང། སིལ་སྙན་དང། ཕེག་རྡོབ་པ་དང། རོལ་མོའི་སྒྲ་འབྱིན་པ་རྣམས་དང་ལྷན་ཅིག་ཏུ་རང་གི་གནས་ནས་བྱུང་སྟེ་སྤོས་ཆུས་གང་བའི་སྤྲིན་མངོན་པར་སྤྲུལ་ནས་སྤོས་ཆུའི་ཆར་པ་ནི་འབེབས་ཀླུའི་མུ་ཏིག་དང། ཀླུའི་མེ་ཏོག་གི་ཆར་ནི་འབེབས་ཤིག་ཀླུའི་མཐུ་ཆེན་པོ་དང། ཀླུའི་རྫུ་འཕྲུལ་ཆེན་པོས་བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས་འཁོར་དང་བཅས་པས་བྱང་ཆུབ་སེམས་དཔའ་ལ་
མཆོད་པ་བྱས་ཏེ་ཞབས་ལ་ཕྱག་འཚལ་ནས་རོལ་མོ་དང། སིལ་སྙན་ལེན་པ་དང། བཅས་པས་བྱང་ཆུབ་སེམས་དཔའ་ལ་བསྐོར་བ་བྱས་ཏེ་ཕྱོགས་གཅིག་ཏུ་འདུག་ནས་མངོན་པར་བསྟོད་དོ། དེ་ལ་འདི་སྐད་ཅེས་བྱ་སྟེ། སྐྱེས་བུ་མཆོག་གི་འོད་ནི་རབ་བཀྱེ་བས། སངས་རྒྱས་ལེན་པ་དང། བཅས་པས་བྱང་ཆུབ་སེམས་དཔའ་ལ་བསྐོར་བ་བྱས་ཏེ་ཕྱོགས་གཅིག་ཏུ་འདུག་ནས་མངོན་པར་བསྟོད་དོ། །དེ་ལ་འདི་སྐད་ཅེས་བྱ་སྟེ། སྐྱེས་བུ་མཆོག་གི་འོད་ནི་རབ་བཀྱེ་བས། སངས་རྒྱས་ཞིང་འདི་ཐམས་ཅད་སྣང་བར་གྱུར། སྐད་ཅིག་དེ་ལ་ངན་སོང་གསུམ་ཡང་ཞི། ནག་པོའི་གནས་ཀྱང་འོད་ཀྱིས་ཁྱབ་པར་གྱུར། ཀླུ་ཡི་རྒྱལ་པོ་དེ་ཡིས་འོད་མཐོང་ནས་། རབ་ཏུ་དགའ་སྟེ་དེ་ཚེ་ཚིག་སྨྲས་པ། གསེར་གྱི་མདོག་གི་འོད་འདི་བྱུང་ལགས་ན། དེ་རིང་སངས་རྒྱས་འབྱུང་དུ་གདོན་མི་ཟ་། ཀླུ་མོ་ཁྲག་ཁྲིག་གིས་མདུན་བདར་ཏེ། གདུགས་དང་མེ་ཏོག་གོས་མཆོག་ཐོགས་ནས་སུ། བྱང་ཆུབ་སེམས་དཔའ་དེ་ནི་ག་ལར་སོང། ཕྱག་བྱས་མཆོད་པ་བྱས་ནས་གུས་བཅས་འདུག། ས་ཀུན་རིན་ཆེན་མེ་ཏོག་རྣམས་ཀྱིས་གང་ཤིང་དེ་ཚེ་མཛེས་པར་བརྒྱན། ཤིང་མཆོག་ཀུན་དང་སྨན་དང་རྩྭ་རྣམས་དེ་དག་བྱང་ཆུག་ཤིང་ལ་འདུད་། འདི་ན་ཡོད་པའི་ཆུ་ཀླུང་ཐམས་ཅད་མི་འབབ་མཁའ་ལ་རླུང་མི་ལྡང་། དེ་རིང་བདུད་བཏུལ་ནས་ནི་འཇིག་རྟེན་ཐམས་ཅད་ཟིལ་གྱིས་གནོན་པར་འགྱུར་སྲིད་པ་གསུམ་ན་བརྒྱ་བྱིན་ཚངས་པ་ཉི་མ་ཟླ་བའི་འོད་མི་སྣང། མཚུངས་མེད་ཁྱོད་ཀྱི་འོད་རེག་ནས་དེ་རིང་ངན་སོང་གསུང་པོ་ཞི། བདག་གི་གནས་སུ་འོད་བྱུང་ནས་ནི་སངས་རྒྱས་འབྱུང་བར་སྟོན་པར་བགྱིད། དགྱེས་མཛོད་རང་ཤིང་ཚིམ་པ་སྐྱེད། བུམ་པ་གང་བ་འདི་དག་ནམ་མཁར་སོང་སྟེ་ཁྱོད་ལ་སྐོར་བ་དང། ཙ་ཤའི་ཚོགས་རྣམས་འདི་དག་ནམ་མཁར་སོང་སྟེ་ཁྱོད་ལ་སྐོར་བ་དང། ལྷར་བཅས་མིར་བཅས་འཇིག་རྟེན་དག་ཀྱང་མཆོད་པར་བརྩོན་པར་གནས་པ་ལས། དེ་རིང་འགྲོ་བའི་སྦྱིན་གནས་འགྱུར་ཞིང་ཤེས་རབ་འདོད་པའི་ལམ་དུ་འགྱུར། བདེ་བར་གཤེགས་པ་བདག་གིས་རྙེད་པ་ལེགས་རྙེད་གཟི་བརྗིད་ཆེ་ལྡན་པ། མི་མཆོག་འཁོར་བ་འཇིག་དང་དེ་བཞིན་གསེར་ཐུབ་ཅེས་ནི་བྱ་བ་མཆོད། མི་མཆོག་འོད་སྲུང་དང་ནི་ཤཱཀྱ་མཆོག་ཁྱོད་དེ་རིང་བདག་གིས་མཆོད་བདག་ནི་སངས་རྒྱས་དཔའ་མཐོང་མ་བྲལ་བྱང་ཆུབ་དམ་པ་དོན་དུ་གཉེར་། ས་ནི་གྲུམ་ཞིང་
རི་རྣམས་གཡོས་ལ་འགྲོ་བ་ཐམས་ཅད་མེད་འགྱུར་སྲིད། སུ་ཞིག་བྱང་ཆུབ་ཏུ་ནི་སེམས་དེས་ལྷག་པའི་བསམ་བས་འཕགས་གྱུར་པ། དེ་ནི་དེ་རིང་སྟོབས་བཅུ་ལྡན་པར་མི་འགྱུར་གནས་ནི་མཆིས་མ་ལགས། སེང་གེའི་སྒྲ་བསྒྲགས་ཚངས་པའི་དབྱངས་ཅན་བཅོམ་ལྡན་འདྲེན་པ་གསུང་ཕྱུང་ཤིག །ཞི་བའི་བློ་གྲོས་དེ་ནས་ཀླུའི་རྒྱལ་པོ་ནག་པོའི་ཆུང་མ་དམ་པ་གསེར་འོད་ཅེས་བྱ་བ་དེ་ཀླུའི་བུ་མོ་རབ་ཏུ་མང་པོས་བསྐོར་ཅིང་མདུན་དུ་བདར་ནས་གདུགས་སྣ་ཚོགས་ཐོགས་པ་དང་། རས་བཅོས་བུ་སྣ་ཚོགས་ཐོགས་པ་དང་། མུ་ཏིག་གི་རྒྱན་ཕྲེང་སྣ་ཚོགས་ཐོགས་པ་དང་། ནོར་བུ་རིན་པོ་ཆེ་སྣ་ཚོགས་ཐོགས་པ་དང་། ལྷའི་དང་མིའི་ཕྲེང་བ་བརྒྱུས་པ་ཐོགས་པ་དང་། པོག་པོར་སྣ་ཚོགས་ཐོགས་པ་དང་། སིལ་སྙན་དང་། རོམ་མོའི་སྒྲ་སྣ་ཚོགས་ལེན་པ་རྣམས་དང་ལྷན་ཅིག་ཏུ་རིན་པོ་ཆེའི་མེ་ཏོག་སྣ་ཚོགས་ཀྱིས་བྱང་ཆུབ་སེམས་དཔའ་འོད་བ་ལ་འཐོར་ཞིང་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འཁྲུལ་པ་མི་མངའ་མི་དངང་མི་བསྙེངས་བག་མི་ཚ། མ་ཞུམ་མི་དམན་རབ་དགྱེས་མི་ཐུབ་ཆགས་མི་མངའ། སྡང་དང་མོངས་དང་བརྐམ་པ་མི་མངའ་ཆགས་བྲལ་པ། རྣམ་གྲོལ་དྲང་སྲོང་ཆེན་པོ་ཁྱོད་ལ་ཕྱག་འཚལ་ལོ། །དོགས་བྲལ་ཟུག་རྔུ་བྲལ་ཞིག་དུལ་ལ་མ་རིག་སེལ། འགྲོ་བ་ཐམས་ཅད་སྡུག་བསྔལ་རྣམས་ལས་རབ་ཏུ་འགྲེལ། གནས་དང་སྐྱབས་དང་གླིང་མ་མཆིས་པ་མཁྱེན་ནས་ནི། གནས་ཁྱོད་སྐྱབས་ཁྱོད་འཇིག་རྟེན་གསུམ་པོ་དག་ཏུ་བྱུང། ཇི་ལྟར་ལྷ་ཡི་ཚོགས་རྣམས་དད་ཅིང་རབ་དགའ་སྟེ། མཁའ་ལས་མེ་ཏོག་ཆར་ཆེན་རབ་ཏུ་འབེབས་པ་དང། ཇི་ལྟར་གོས་ཆེན་དག་ཀྱང་འདོར་བར་བགྱིད་ལགས་ན། དྲང་སྲོང་ཆེན་པོ་མགོན་པོ་རྒྱལ་བར་དེར་འགྱུར་སྙམ་། དགྱེས་སྐྱེད་ཤིང་དབང་དྲུང་གཤེགས་མི་བསྙེངས་བཞུགས་མཛོད་ལ། བདུད་སྡེ་ཕམ་པར་མཛོད་དེ་ཉོན་མོངས་དྲ་བ་དྲོལ། ཇི་ལྟར་སྔོན་གྱི་རྒྱལ་དབང་དེ་དག་སངས་རྒྱས་པ། དེ་ལྟར་བྱང་ཆུབ་རབ་མཆོག་ཞི་བ་འཚང་རྒྱར་མཛོད། གང་གི་དོན་དུ་ཁྱོད་ཀྱིས་བསྐལ་པ་བྱེ་མང་དུ། འགྲོ་བ་དག་ནི་དགྲོལ་ཕྱིར་དཀའ་བ་རྣམས་ཀྱང་སྤྱད། །
ཁྱོད་ཀྱི་དགོངས་པ་དེ་རྫོགས་ཤིག་དབང་དྲུང་གཤེགས་ཏེ། བྱང་ཆུབ་མཆོག་ལ་རེག་པར་མཛད་པའི་དུས་འདི་ལགས། བམ་པོ་དྲུག་པ། ཞི་བའི་བློ་གྲོས་དེ་ནས་བྱང་ཆུབ་སེམས་དཔའ་ཀླུའི་རྒྱལ་པོ་ནག་པོའི་གནས་ན་བྱུང་ནས་བྱང་ཆུབ་ཀྱི་སྙིང་པོ་ག་ལ་དེར་སོང་སྟེ་འགྲོ་བ་ན་ལམ་གྱིས་གཡས་རོལ་ན་རྩྭ་འཚོད་བཀྲ་ཤིས་པ་ཞེས་བྱ་བ་བརྩྭ་ཞིང་འདུག་པ་དེས་བྱང་ཆུབ་སེམས་དཔའ་དགའ་བ་འཁྱིལ་པ། གཡས་སུ་འཁྱིལ་པ། ཁ་དོག་དང་ལྡན་པ། དྲི་དང་ལྡན་པ། ཀ་ཙ་ལིན་དི་ཀ་ལྟར་རེག་ན་བདེ་བ་སྤྲ་གང་བླངས་ཏེ་བྱང་ཆུབ་སེམས་དཔའ་ག་ལ་དེར་སོང་ནས་ཕྱིན་པ་དང། རྩྭ་སྤར་གང་བྱང་ཆུབ་སེམས་དཔའ་ལ་བྱིན་ཏེ། བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། ཞི་བའི་བློ་གྲོས་ཁྱོད་རྩྭ་འཚེད་བ་བཀྲ་ཤིས་པ་མི་སྔ་མི་འཕྱི་བར་བྱང་ཆུབ་ཏུ་སེམས་བསྐྱེད་ཅིང་རྩྭ་ཡང་བྱིན་ནོ་སྙམ་དུ་སེམས་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་ནི་རྩྭ་འཚོད་བཀྲ་ཤིས་པའི་སྔོན་གྱི་སྨོན་ལམ་ཡིན་ཏེ། ཇི་ལྟར་ཁོ་བོ་བསྐལ་པ་བཟང་པོ་པའི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་སྙིང་པོར་ཁྲི་ཤོམ་བ་བཞིན་ནོ། །དེ་ཅིའི་ཕྱིར་ཞེ་ན། ཞི་བའི་བློ་གྲོས་ཁོ་བོས་མངོན་བར་ཤེས་ཏེ་འདས་པའི་དུས་ན་བསྐལ་པ་བཟང་པོ་འདིའི་སྔ་རོལ་བསྐལ་པ་དགུ་བཅུ་རྩ་གཅིག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་པ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྣམ་པར་གཟིགས་ཞེས་བྱ་བ་འཇིག་རྟེན་དུ་བྱང་སྟེ། དེའི་གསུང་རབ་ལ་དགེ་སློང་སྟོང་ཐམས་བ་ཚངས་པར་སྤྱོད་པ་སྦྱང་ནས་བཅོམ་ལྡན་འདས་དེས་ཁྱོད་ཅག་བསྐལ་པ་བཟང་པོ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་འགྱུར་རོ་ཞེས་དེ་དག་ལུང་བསྟན་ཏོ། དེའི་ཚེ་ན་ཁྱ་མི་བདག་བློ་གྲོས་
ལྡན་ཞེས་བྱ་བ་ཞིག་འཁོར་དེ་ཉིད་དུ་འདུས་པར་གྱུར་ཏེ་འདུས་པ་དེས། བྱང་ཆུབ་སེམས་དཔའ་དེ་དག་ལུང་བསྟན་པ་དེ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དུ་སེམས་བསྐྱེད་དེ། འདི་སྐད་དུ་བསྐལ་པ་བཟང་པོ་པའི་བྱང་ཆུབ་སེམས་དཔའ་དེ་དག་བྱང་ཆུབ་ཀྱི་སྙིང་པོར་འགྲོ་བ་ན་སེང་གེའི་ཁྲི་བྱི་དོར་བྱའོ་ཞེས་སྨོན་ལམ་བཏབ་བོ། །ཞི་བའི་བློ་གྲོས་དེའི་ཚེ་དེའི་དུས་ན་ཁྱིམ་བདག་བློ་གྲོས་ལྡན་ཞེས་བྱ་བར་འགྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟ་བ་འམ། ཡིད་གཉིས་སུ་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྩྭ་འཚོད་བཀྲ་ཤིས་པ་འདི་དེའི་ཚེ་དེའི་དུས་ན་ཁྱིམ་བདག་བློ་གྲོས་ལྡན་ཞེས་བྱ་བར་གྱུར་ཏོ། །ཞི་བའི་བློ་གྲོས་ཁྱོད་ཀྱིས་རྣམ་གྲངས་འདིས་ཀྱང་རྩྭ་འཆོང་བཀྲ་ཤིས་པའི་སྔོན་གྱི་སྨོན་ལམ་འདི་ལྟར་རིག་པར་བྱ་སྟེ། སེམས་ཅན་རྣམས་ཀྱི་མོས་པ་ཇི་ལྟ་བ་དང། དབང་པོ་ཡོངས་སུ་སྨིན་པ་ཇི་ལྟ་བུ་བཞིན་དུ་དེ་ཁ་ཅིག་ལ་ནི་རྩྭ་སྤར་གང་འབུལ་བར་འགྱུར། ཁ་ཅིག་ལ་ནི་རིན་པོ་ཆེ་བཀོད་པའི་སེང་གེའི་ཁྲི་འབུལ་བར་འགྱུར་རོ། །ཞི་བའི་བློ་གྲོས་དེ་ནས་བྱང་ཆུབ་སེམས་དཔའ་བྱང་ཆུབ་ཀྱི་སྙིག་པོའི་ཤིང་དྲུང་དུ་སོང་བ་དང་། བྱང་ཆུབ་ཀྱི་སྙིང་པོའི་ལྷ་རྣམས་ལྷའི་བུ་མོ་མེ་ཏོག་གི་སྐོན་བུ་ཐོགས་པ་དང། སྤོས་དང་། ཕྱེ་མའི་ཕུར་མ་ཐོགས་པ་ཁྲི་དང་ལྷན་ཅིག་ཏུ་བྱང་ཆུབ་ཀྱི་སྙིང་པོ་ག་ལ་བ་དེར་སོང་སྟེ་ཕྱིན་པ་དང་། བྱང་ཆུབ་སེམས་དཔའི་རྐང་པ་ལ་མགོ་བོས་ཕྱག་འཚལ་ནས་ཇི་ལྟར་ཐོགས་པའི་མེ་ཏོག་དང་། ཕྱེ་མ་དང་། སྤོས་དང་། ཕྲེང་བ་དང་། བྱུག་པ་རྣམས་ཀྱིས་བྱང་ཆུབ་སེམས་དཔའ་ལ་གཏོར་ཏེ་ཚིགས་སུ་བཅད་བ་འདི་དག་གིས་མངོན་པར་བསྟོད་དོ། །བདག་ཉིད་ཆེན་པོ་མ་བསྙེངས་དཔའ་ཞིང་དུལ་ཞི་བ། དགྱེས་ཤིང་ཚིམ་པ་བརྟན་པ་ཁྱོད་ལ་ཕྱག་འཚལ་ལོ། །འབར་བ་ཉམས་དགྱེས་ཁ་ན་མ་ཐོ་མ་མངའ་བ། སྐྱོན་ལས་གྲོལ་བའི་སྟོན་པ་ཁྱོད་ལ་ཕྱག་འཚལ་ལོ། །སྡུག་བསྔལ་ཆེན་པོར་བྱིང་བ་མགོན་མེད་འགྲོ་འདི་ལ། ཁྱོད་ནི་བདེ་བ་རབ་ཏུ་སྩོལ་བའི་མགོན་པོ་གཅིག །འགྲོ་བའི་ཉོན་མོངས་ནད་རྣམས་སྤང་པའི་ཕྱིར་བྱུང་བ། སྨན་པའི་རྒྱལ་ཆེན་གྲགས་ལྡན་ཁྱོད་ལ་ཕྱག་འཚལ་ལོ། །ཇི་ལྟར་ལྷ་ཚོགས་དད་ཅིག་རབ་ཏུ་དགའ་བ་ཡིས། །
ལྷ་ཡི་མེ་ཏོག་ཆར་པ་རབ་ཏུ་འབེབས་པ་ལས། བདུད་དག་སྡེ་དང་བཅས་པ་བྱམས་པས་བཅོམ་ནས་ནི། ཁྱོད་ཀྱིས་བྱང་ཆུབ་དམ་པ་དེ་རིང་བརྙེས་སུ་དེས། ཤིང་དབང་དྲུང་དུ་གཤེགས་ཏེ་ཁྲི་དེར་བཞུགས་ནས་སུ། བདུད་བཏུལ་ནས་ནི་མུན་པ་ཐམས་ཅད་གཞོམ་པར་མཛོད་། ཇི་ལྟར་སྔོན་གྱི་ཐུབ་དབང་དེ་དག་སངས་རྒྱས་པ། དེ་ལྟར་བྱང་ཆུབ་ཞི་བ་མཆོག་རབ་འཚང་རྒྱར་མཛོད། ཇི་ལྟར་ཁྱོད་ཀྱིས་འགྲོ་བ་དགྲོལ་བའི་དོན་དུ་ནི། བསྐལ་པ་བྱེ་བར་དཀའ་མཛད་རྣམ་པར་དག་འགྱུར་བ། དྲང་སྲོང་ཆེན་པོ་ཁྱོད་ཀྱི་དགོངས་མཆོག་དེང་རྫོགས་ཀྱིས། ཤིང་དབང་དྲུང་དུ་བཞུགས་ཏེ་བྱང་ཆུབ་འཚང་རྒྱར་མཛོད་། ཞི་བའི་བློ་གྲོས་དེ་ནས་བྱང་ཆུབ་སེམས་དཔས་རྩྭ་སྤར་གང་ཁྱེར་ནས་བྱང་ཆུབ་ཀྱི་སྙིང་པོ་ག་ལ་བ་དེར་སོང་སྟེ་ཕྱིན་པ་དང། བྱང་ཆུབ་ཀྱི་ཤིང་དྲུང་དུ་བདག་ཉིད་ཀྱིས་རྩྭའི་གདིང་བ་བཏིང་ནས་བྱང་ཆུབ་ཀྱིས་ཤིང་ལ་ཕྱག་འཚལ་ཏེ་ལན་བདུན་བསྐོར་བ་བྱས་སོ། །ཞི་བའི་བློ་གྲོས་བྱང་ཆུབ་སེམས་དཔའ་རྩྭའི་གདིང་བ་བཏིང་མ་ཐག་ཏུ་དེ་ནས་ལྷའི་བུ་བརྒྱད་ཁྲི་བཞི་སྟོང་གིས་སེང་གེའི་ཁྲི་སྣ་ཚོགས་བལྟ་ན་སྡུག་པ། མཐོ་བ་། ཡངས་པ། རིན་པོ་ཆེ་ཐམས་ཅད་ཀྱིས་སྤྲས་པ། རིན་པོ་ཆེའི་ཁ་ཁྱེར་ན། རིན་པོ་ཆེའི་དྲ་བ་གཡོགས་པ། རིན་པོ་ཆེའི་དྲིལ་བུ་གཡེར་ཀའི་དྲ་བ་བྲེས་པ། མུ་ཏིག་གི་རྒྱན་ཕྲེང་རབ་ཏུ་སྦྱངས་པ། རས་བཅོས་བུ་བརྒྱ་སྟོང་དུ་མ་བཏིང་བ་བརྒྱད་ཁྲི་བཞི་སྟོང་བྱང་ཆུབ་སེམས་དཔའི་ཆེད་ཏུ་བཤམས་སོ། ཞི་བའི་བློ་གྲོས་དེ་ན་བྱང་ཆུབ་སེམས་དཔའ་སེང་གེའི་ཁྲི་བརྒྱད་ཁྲི་བཞི་སྟོང་པོ་དེ་དག་ཐམས་ཅད་ལ་བདག་ཉིད་འདུག་པར་ཀུན་དུ་བསྟན་པར་གྱུར་ཏོ། །ལྷའི་བུ་དེ་དག་གིས་ཀྱང་གཞན་དང་གཞན་དུ་མི་མཐོང་མི་ཤེས་ཏེ། ལྷའི་བུ་རེ་རེས་ཀྱང་འདི་ལྟར་བྱང་ཆུབ་སེམས་དཔའ་ནི་བདག་གི་སེང་གེའི་ཁྲི་ལ་བཞུགས་སོ། །བདག་གི་སེང་གེའི་ཁྲི་ལ་བཞུགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བར་ཤེས་ཏེ། དེ་དག་དགའ་བ་དང། མཆོག་ཏུ་དགའ་བ་དེ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །བྱང་ཆུབ་ཀྱི་སྙིང་པོར་བཞུད་པའི་ལེའུ་ཞེས་བྱ་བ་སྟེ་བཅུ་གཉིས་པའོ། །