བཅུ་གསུམ་པ། བདུད་བཏུལ་བའི་ལེའུ།
ཞི་བའི་བློ་གྲོས་བྱང་ཆུབ་སེམས་དཔའ་སེང་གེའི་ཁྲི་དེ་ལ་འདུག་མ་ཐག་ཏུ་དེ་ནས་སྨིན་མཚམས་ཀྱི་མཛོད་སྤུའི་བར་ནས་བདུད་བསྐུལ་
པ་ཞེས་བྱ་བའི་འོད་ཕྱུང་སྟེ་འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་འཁོད་པའི་བདུད་བྱེ་བ་ཕྲག་བཞི་བརྒྱ་ལ་རེག་གོ །འོད་དེས་དེ་དག་ལ་རེག་མ་ཐག་ཏུ་རང་རང་གི་གནས་ན་འཁོད་བཞིན་དུ་སྤུ་ཟིང་ཞེས་བྱེད་དེ། རང་གི་བདུད་ཀྱི་གནས་ཚིག་ཅིང་མོག་མོག་པོར་གྱུར་པར་ཤེས་ནས་དེ་དག་འདི་སྙམ་དུ་སེམས་ཏེ། གང་གི་ཕྱིར་གནས་འདི་དག་མོག་མོག་པོར་གྱུར་པར་སྣང་བ་འདི་ལ་རྒྱུ་ནི་ཅི་ཞིག་ཡོད་རྐྱེན་ནི་ཅི་ཞིག་ཡོད། བྱང་ཆུབ་སེམས་དཔའ་འམ་ཅིག་བྱང་ཆུབ་ཀྱི་སྙིང་པོར་འདུག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་གྲང་སྙམ་སྟེ་རྣམ་པར་བལྟས་པ་དང་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་པར་མཐོང་ངོ། །དེ་ནས་བདུད་སྡིག་ཅན་དེ་དག་རང་རང་གི་གནས་ནས་མི་སྣང་བར་གྱུར་ནས་བདུད་རེ་རེ་ཡང་གནོད་སྦྱིན་ཁ་དོག་རྣམ་པ་མང་པོ་དང། ཆ་བྱད་རྣམ་པ་མང་པོ་དང། དབྱིབས་རྣམ་པ་མང་པོ་དང། ཆུ་ཞེང་རྣམ་པ་མང་པོ་དང། གཡོ་བ་རྣམ་པ་མང་པོ་དང། མགོ་རྣམ་པ་མང་པོ་དང། མཚོན་ཆ་རྣམ་པ་མང་པོ་དང། རྒྱལ་མཚན་རྣམ་པ་མང་པོ་ཐོགས་པ་བྱེ་བ་ཁྲ་ཁྲིག་བརྒྱ་སྟོང་དག་གིས་བསྐོར་ཏེ། སྨྲ་བ་རྣམ་པ་མང་པོ་སྨྲ་ཞིང་བདུད་ཀྱི་མཐུ་ཆེན་པོ་དང། བདུད་ཀྱི་རྫུ་འཕྲུལ་ཆེན་པོས་བདུད་རེ་རེས་ཀྱང་བདུད་ཀྱི་འཁོར་གྱིས་རྒྱར་དཔག་ཚད་ཉི་ཁྲི་སྟེ་། ཁོར་ཡུག་ཏུ་དཔག་ཚད་བརྒྱད་ཁྲི་བཞི་སྟོང་བཀང་ནས་བྱང་ཆུབ་ཀྱི་ཤིང་དྲུང་དུ་དོང་ངོ་། །ཞི་བའི་བློ་གྲོས་འཁོར་ཆེན་པོ་དེ་དག་དོང་མ་ཐག་ཏུ་དེ་ནས་དེའི་ཚེ་ཡིད་ཏུ་མི་འོང་བ། མཉན་པར་མི་འོས་པ། མི་སྙན་པ། ཨུ་དུག་ཅེས་བྱ་བ་དང། པི་ཙིག་ཅེས་བྱ་བ་དང། ཧུ་ལུ་ཧུ་ལུ་ཞེས་བྱ་བ་དང། རྒྱོབ་ཤིག །ཟུང་ཤིག །སོད་ཅིག །ཆིངས་ཤིག་ཅེས་བྱ་བའི་སྒྲ་ཆེན་པོ་དེ་ལྟ་བུ་ཕྱུང་བར་གྱུར་ཏོ། །གལ་ཏེ་འདོད་ཆགས་དང་མ་བྲལ་བའི་སེམས་ཅན་རྣམས་ཀྱིས་སྒྲ་དེ་ཐོས་ལ། ཞི་བའི་བློ་གྲོས་གལ་ཏེ་བྱང་ཆུབ་སེམས་དཔས་སྒྲ་དེ་མི་གྲག་པར་མ་བྱས་ན་ནི་དེ་དག་ཁ་ནས་ཁྲག་དྲོན་པོ་སྐྱུག་ཅིང་འཆི་བ་འམ། ཤི་ལ་ཐུག་པའི་སྡུག་བསྔལ་ཆེན་པོ་རྙེད་པར་འགྱུར་རོ། དེ་ན་ནི་བྱང་ཆུབ་སེམས་དཔའ་སྙིང་རྗེ་ཆེན་པོས་
ནོན་པས་སེམས་ཅན་ལ་རྣམ་པར་འཚེ་བར་འགྱུར་དུ་འོང་ངོ་ཞེས་སྒྲ་དེ་མི་གྲག་པར་བྱས་པར་གྱུར་ཏོ། །ཞི་བའི་བློ་གྲོས་འདི་ཡང་བྱང་ཆུབ་སེམས་དཔའི་ཐབས་མཁས་པའི་ཡུལ་ཡིན་ནོ། །ཞི་བའི་བློ་གྲོས་སྒྲ་དེ་ལྟ་བུ་དེ་ཐོས་ཀྱང་བྱང་ཆུབ་སེམས་དཔའ་ནི་ཐ་ན་སྤུ་གཡོས་པར་ཡང་མ་གྱུར་ཏོ། །དེ་ཅིའི་ཕྱིར་ཞེ་ན། སྒྲ་འདི་ཐམས་ཅད་བྲག་ཆ་དང་མཚུངས་པར་ལེགས་པར་རྟོགས་པའི་ཕྱིར་རོ། །ཞི་བའི་བློ་གྲོས་བྱང་ཆུབ་ཀྱི་བསྙེན་བཀུར་པའི་ལྷ་རྣམས་ཀྱིས་བདུད་ལྷགས་པར་རིག་ནས་བདུད་སྡིག་ཅན་དེ་དག་ལ་བཟློག་པ་རྣམ་པ་བཅུ་དྲུག་གིས་ཟློག་པར་བྱེད་དེ། སྡིག་ཅན་དག་ཕོངས་པར་འགྱུར་པ་གདོན་པར་དགའ་བ་རྣམ་པ་འདི་ལྟ་བུ་འདི་དག་གིས་ཅི་ཞིག་བྱས་ཐུང་ཤིག དེ་ཅིའི་ཕྱིར་ཞེ་ན། སྡིག་ཅན་ཁྱེད་ནི་གྱད་སྟོབས་ཆུང་ངུ་ལ་གྱད་སྟོབས་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་བརྡ་བས་པར་འགྱུར་རོ། །སྡིག་ཅན་ཁྱེད་ནི་དཔའ་བོ་ཆེན་པོས་ཕ་རོལ་གྱི་སྡེ་བཅོམ་པ་ལྟར་དོ་མོད་བྱང་ཆུབ་སེམས་དཔས་ཕམ་པར་བྱས་པར་འགྱུར་རོ། །སྡིག་ཅན་ཁྱེད་ནི་སྲིན་བུ་མེ་ཁྱེར་ལ་ཟླ་བའི་དཀྱིལ་འཁོར་བབ་པ་ལྟར་དོ་མོད་བྱང་ཆུབ་སེམས་དཔས་ཟིལ་གྱིས་ནོན་པར་འགྱུར་རོ། །སྡིག་ཅན་ཁྱེད་ནི་ཕུབ་མ་སྤར་གང་ལ་རླུང་མར་བབ་པ་ལྟར་དོ་མོད་བྱང་ཆུབ་སེམས་དཔས་གཏོར་བར་འགྱུར་རོ། །སྡིག་ཅན་ཁྱེད་ནི་ཤིང་ས་ལ་ཆེན་པོ་རྩ་བ་ནས་ཆད་པ་ལྟར་དོ་མོད་བྱང་ཆུབ་སེམས་དཔས་སྒྱེལ་པར་འགྱུར་རོ། །སྡིག་ཅན་ཁྱེར་ནི་རི་དགས་ཀྱི་ཚོགས་ལ་སེང་གེ་བབ་པ་ལྟར་ངོ་མོད་བྱང་ཆུབ་སེམས་དཔས་དངངས་པར་བྱས་པར་འགྱུར་རོ། །སྡིག་ཅན་ཁྱེད་ནི་བརྗེས་ཀྱི་ཆུ་ལ་ཉི་ཚན་བབ་པ་ལྟར་དོ་མོད་བྱང་ཆུབ་སེམས་དཔས་ཡོངས་སུ་ཟད་པར་བྱས་པར་འགྱུར་རོ། །སྡིག་ཅན་ཁྱེད་ནི་མི་མཛའ་བའི་གྲོང་ཁྱེར་ལ་རྒྱལ་པོ་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་རླག་པར་འགྱུར་རོ། །སྡིག་ཅན་ཁྱེད་ནི་མི་གཡོ་ཅན་གསད་པར་བྱ་བ་ཤོར་པ་ལྟར་དོ་མོད་བྱང་ཆུབ་སེམས་དཔས་འབྲོས་པར་བྱེད་པར་འགྱུར་རོ། །སྡིག་ཅན་ཁྱེད་ནི་ཚོང་པ་ལམ་རྒྱགས་མང་པོ་མེས་ཚིག་པ་ལྟར་དོ་མོད་བྱང་ཆུབ་སེམས་དཔས་མགོ་འཁོར་བར་བྱེད་པར་འགྱུར་རོ། །སྡིག་ཅན་ཁྱེད་ནི་ཆོས་ཀྱི་རྒྱལ་པོ་རྒྱལ་སྲིད་ཉམས་པ་ལྟར་དོ་མོད་བྱང་ཆུབ་སེམས་དཔས་མྱ་ངན་བྱེད་དུ་
བཅུག་པར་འགྱུར་རོ། །སྡིག་ཅན་ཁྱེད་ནི་ཁྲུང་ཁྲུང་རྒན་པོ་འདབ་མ་བྲེགས་པ་ལྟར་དོ་མོད་བྱང་ཆུབ་སེམས་དཔས་སེམས་ཁོངས་སུ་བཅུག་པར་འགྱུར་རོ། །སྡིག་ཅན་ཁྱེད་ནི་འབྲོག་དགོན་པར་ལམ་བརྒྱགས་ཆད་པ་ལྟར་དོ་མོད་བྱང་ཆུབ་སེམས་དཔས་ཕོངས་པར་བྱས་པར་འགྱུར་རོ། སྡིག་ཅན་ཁྱེད་ནི་རྒྱ་མཚོ་ཆེན་པོའི་དབུས་སུ་གྲུ་ཞིག་པ་ལྟར་དོ་མོད་བྱང་ཆུབ་སེམས་དཔས་སྨྲེ་སྔགས་འདོན་དུ་བཅུག་པར་འགྱུར་རོ། །སྡིག་ཅན་ཁྱེད་ནི་བསྲེག་པའི་བསྐལ་པས་རྩྭ་དང་ནགས་ཚལ་ལྟར་དོ་མོད་བྱང་ཆུབ་སེམས་དཔས་རྙིས་པར་བྱས་པར་འགྱུར་རོ། །སྡིག་ཅི་ཁྱེད་ནི་རྡོ་བ་ལ་རྡོ་རྗེ་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་རྣམ་པར་གཏོང་བར་འགྱུར་རོ། །ཞི་བའི་བློ་གྲོས་དེ་ལྟར་བྱང་ཆུབ་ཀྱི་བསྙེན་བཀུར་བའི་ལྷ་རྣམས་ཀྱིས་བཟློག་པ་རྣམ་པ་བཅུ་དྲུག་གིས་བདུད་སྡིག་ཅན་རྣམས་ཟློག་པར་བྱེད་ཀྱང་བདུད་སྡིག་ཅན་དེ་དག་ཕྱིར་མ་ལོག་གོ །དེ་ནས་བྱང་ཆུབ་སེམས་དཔས་བསྐལ་པ་གྲངས་མེད་པ་བྱེ་བ་ཁྲག་ཁྲིས་བརྒྱ་སྟོང་དུ་སྦྱིན་པ་དང། དུལ་བ་དང། ལེགས་པར་སྡོམ་པ་དང། ཚུལ་ཁྲིམས་དང། བཟོད་པ་དང། བརྩོན་འགྲུས་དང། བསམ་གཏན་དང། ཤེས་རབ་དང། །བྱམས་པ་དང། སྙིང་རྗེ་དང། དགའ་བ་དང། བཏང་སྙོམས་དང། དྲན་པ་ཉེ་བར་གཞག་པ་དང། ཡང་དག་པར་སྤོང་བ་དང། རྫུ་འཕྲུལ་གྱི་རྐང་པ་དང། དབང་པོ་དང། སྟོབས་དང། བྱང་ཆུབ་ཀྱི་ཡན་ལག་དང། ལམ་དང། ཞི་གནས་དང། ལྷག་མཐོང་དང། རིག་པ་དང། རྣམ་པར་གྲོལ་བ་ཡོངས་སུ་སྦྱང་བ་བྱས་པས་ལག་པ་གཡས་པ་འཇམ་ཞིང་གཞོན་ལ་ཤིན་དུ་གཞོན་པ་གསེར་གྱི་ཁ་དོག་ལྟར་འདུག་པ་བརྐྱང་སྟེ། སྙིང་རྗེ་ཆེན་པོས་བསྐྱོད་པ་དང་སེམས་ཅན་ཐམས་ཅད་རབ་ཏུ་ཐར་པར་བྱ་བའི་ལྷག་པའི་བསམ་བས་སྤྱི་བོ་ནས་བཟུང་སྟེ། ལུས་ཐམས་ཅད་ལ་བྱུགས་ནས་འཇིག་རྟེན་གྱི་ཁམས་ཐམས་ཅད་ཀྱི་སངས་རྒྱས་བཅོམ་ལྡན་འདས་རྣམས་མངོན་དུ་བྱས་ཏེ་དྲན་པ་དང་ལྡན་ཞིང་ཤེས་བཞིན་དུ་ས་ཆེན་པོ་ལ་བརྡབས་སོ། །ཞི་བའི་བློ་གྲོས་བྱང་ཆུབ་སེམས་དཔས་ས་ཆེན་པོ་ལ་བརྡབས་མ་ཐག་ཏུ་དེ་ནས་དེའི་ཚེ་ཆེན་པོ་རྣམ་པ་དྲུག་ཏུ་གཡོས་སོ། །རབ་ཏུ་གཡོས་སོ། །
ཀུན་དུ་རབ་ཏུ་གཡོས་སོ། །འགུལ་ཏོ། རབ་ཏུ་འགུལ་ཏོ། །ཀུན་དུ་རབ་ཏུ་འགུལ་ཏོ། །ལྡེག་གོ །རབ་ཏུ་ལྡེག་གོ །ཀུན་དུ་རབ་ཏུ་ལྡེག་གོ །འཁྲུགས་སོ། །རབ་ཏུ་འཁྲུགས་སོ། །ཀུན་དུ་རབ་ཏུ་འཁྲུགས་སོ། །འུར་འུར་རོ། །རབ་ཏུ་འུར་འུར་རོ། །ཀུན་དུ་རབ་ཏུ་འུར་འུར་རོ། །ཆེམ་ཆེམ་མོ། །རབ་ཏུ་ཆེམ་ཆེམ་མོ། །ཀུན་དུ་རབ་ཏུ་ཆེམ་ཆེམ་མོ། །ཤར་ཕྱོགས་དམའ་ན་ནུབ་ཕྱོགས་མཐོའོ། །ནུབ་ཕྱོགས་དམའ་ན་ཤར་ཕྱོགས་མཐོའོ། །ལྷོ་ཕྱོགས་དམའ་ན་བྱང་ཕྱོགས་མཐོའོ། །བྱང་ཕྱོགས་དམའ་ན་ལྷོ་ཕྱོགས་མཐོའོ། །མཐའ་མཐོ་ན་དབུས་དམའོ། །དབུས་མཐོ་ན་མཐའ་དམའོ། །ཞི་བའི་བློ་གྲོས་དེ་ལྟར་རྣམ་པ་དྲག་དང་། ལྟས་ཆེན་པོ་བཅྭ་བརྒྱད་དུས་གཡོས་པ་ཆེན་པོ་འཇིག་རྟེན་དུ་བྱུང་བར་གྱུར་ཏོ། །བདུད་སྡིག་ཅན་རྣམས་ཀྱིས་ཀྱང་འུར་སྒྲ་དང་། ཏུག་ཆེམ་གྱིས་སྒྲ་ཆེན་པོ་དང་། ཟུང་ཤིག་དང་། རྒྱོབ་ཅིག་པ་དང། ཆིངས་ཤིག་པ་དང། སོད་ཅིག་པའི་སྒྲ་ཐོས་སོ། །བདུད་ཀྱི་འཁོར་གྱིས་ནི་བྱང་ཆུབ་སེམས་དཔའི་མཐུས་སྟེང་གི་བར་སྣང་ལ་འདི་ལྟ་བུའི་སྒྲ་འདི་ཐོས་སོ། །དྲང་སྲོང་ནང་ན་དྲང་སྲོང་མཆོག །འདི་ནི་མི་འཇིགས་སྦྱིན་པ་སྟེ། སྲོག་ཆགས་ཀུན་གྱི་སྐྱབས་ཡིན་གྱིས། འདི་ལ་སྐྱབས་སུ་འགྲོ་བར་གྱིས། ཞི་བའི་བློ་གྲོས་བདུད་ཀྱི་འཁོར་གྱིས་སྒྲ་དེ་ཐོས་པ་དང་། གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་ཁས་བུབ་ཏུ་ས་ལ་སྒྱེལ་ནས་སྐྱེས་བུ་ཆེན་པོ་ཡོངས་སུ་བསྐྱབ་ཏུ་གསོལ། ཡོངས་སུ་བསྐྱབ་ཏུ་གསོལ་ཞེས་ཚིག་དེ་སྐད་སྨྲས་སོ། །བདུད་སྡིག་ཅན་ལྷག་མ་རྣམས་ནི་དཔུང་གི་ཚོགས་དང་ལྷན་ཅིག་ཏུ་འབྲོས་པར་འདོད་ན་འབྲོས་མ་ནུས་ནས་དེ་དག་ལ་སྙིང་བརྩེ་བའི་ཕྱིར་བྱང་ཆུབ་སེམས་དཔའ་ལུས་ལས་འོད་བྱུང་བ་དང་། འོད་དེས་དེ་དག་འཇིགས་པ་ཐམས་ཅད་དང་བྲལ་ཏེ་རང་རང་གི་གནས་སུ་དོང་ངོ་། །ཞི་བའི་བློ་གྲོས་བྱང་ཆུབ་སེམས་དཔས་བདུད་འདུལ་བའི་རྣམ་པར་སྦྲུལ་པ་འདི་བསྟན་པ་ན་བདུད་གྱི་འཁོར་དེ་ལས་གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །
ལྷའི་བུ་སྔོན་སྦྱང་བ་བྱས་པ་བརྒྱད་ཁྲི་བཞི་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བདུད་བཏུལ་བའི་ལེའུ་ཞེས་བྱ་བ་སྟེ་བཅུ་གསུམ་པའོ། །