འཕགས་པ་གོ་ཆའི་བཀོད་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ།
འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱིས་རྣམ་གྲངས་ལེའུ་སྟོང་ཕྲག་བརྒྱ་བ་ལས་ལེའུ་བདུན་པ་སྟེ་གོ་ཆའི་བཀོད་པ་བསྟེན་པ། བམ་པོ་དང་པོ། རྒྱ་གར་སྐད་དུ། ཨཱརྻ་ཝ་རྨ་བྱཱུ་ཧ་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་གོ་ཆའི་བཀོད་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། འདི་སྐད་བདག་གི་ཐོས་པ་དུས་གཅིག་ན། བཅོམ་ལྡན་འདས་རྒྱ་ལ་པོའི་ཁབ་ན་བྱ་ཀ་ལན་ད་ཀའི་གནས་འོད་མའི་ཚལ་ན་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་སྣ་ཚོགས་ནས་འདུས་པ་ཤ་སྟག་དང་ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ལ་འཁོར་མང་པོ་བརྒྱ་སྟོང་ཚད་མེད་པས་ཡོངས་སུ་བསྐོར་ཅིང་གུས་པས་རིམ་གྲོ་དང་། བཀུར་སྟི་བྱས་པར་གྱུར་ཏོ། དེའི་ཚེ་འདུས་པ་དེར་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཤེས་བྱ་བ་འདུས་པར་གྱུར་བ་དེ་འདུ་པ་སྟན་ལས་ལངས་ནས་བླ་གོས་ཕྲག་གཅིག་ཏུ་གཟར་ཏེ། པུས་མོ་གཡས་པའི་ལྷ་ད་ས་བཙུགས་ནས་སྤྱི་བོ་བཏུད་དེ་ཕྱག་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ། བཅོམ་ལྡན་འདས་བདག་ལ་ཐེ་ཚོམ་ཅུང་ཟང་ཅིག་མཆིས་ཏེ། དེ་བཞིན་གཤེགས་པ་ལ་ཞུ་བར་འཚལ་ན་ཐུགས་རྗེས་གནང་བར་མཛད་ཅིང་བདག་ལ་བཤད་དུ་གསོལ། དེ་སྐད་ཅེས་གསོལ་པ་དང་། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཚིགས་སུ་བཅད་དེ་གསོལ་པ། དཔའ་ཆེན་སྐྱེས་བུ་ཆེན་པོ་སྟེ། །འཇིག་རྟེན་དག་ན་མཚུངས་མ་མཆིས། །བདག་ནི་སེམས་ཅན་དག་གི་སླད། །ཐེ་ཚོམ་ཅུང་ཟད་ཞུ་བ་ལགས། །སེང་གེའི་གདན་ལས་མ་བཞེངས་པར། །སྐུ་ནི་ཕྱོགས་བཅུ་ཀུན་དུ་ཁྱབ། །ཐ་དད་སྨྲ་བ་ཐམས་ཅད་ཀྱིས། །གང་ཡང་བསྒུལ་བར་མི་འགྱུར་བར། །མཁྱེན་པའི་གཏེར་ནི་མཐའ་མི་མངའ། །སྟོབས་རྣམས་ཀྱང་ན་ཚད་མ་མཆིས། །བཅོམ་ལྡན་སྟོབས་ནི་རེ་རེས་ཀྱང་། །འཇིག་རྟེན་མ་ལུས་སྒྲོལ་བར་མཛད། །ཐམས་ཅད་མཁྱེན་ལ་རབ་གནས་ཤིང་། །སྟོབས་བཅུ་ལ་ནི་གང་གནས་པ། །མི་འཇིགས་སེང་གེ་ཆེན་པོ་སྟེ། །རྒྱལ་བ་བླ་ན་མེད་པའི་གཙོ། །མ་འདྲེས་ཆོས་ནི་
བཅྭ་བརྒྱད་དག། །དེ་བཞིན་གཤེགས་ལ་མངའ་བས་ན། །འཇིག་རྟེན་རྣམས་ནི་གསལ་མཛད་ཅིང་། །མུ་སྟེགས་རྣམས་ནི་ཕམ་བར་མཛད། །ཆོས་རྣམས་ཐམས་ཅད་རབ་མཁྱེན་པས། །དེ་སླད་མཐའ་མེད་མཆོག་ཅེས་བགྱི། །ཉམས་པ་མི་མངའི་འདྲེན་པ་ལ། །བདག་ནི་ཐེ་ཚོམ་ཞུ་བ་ལགས། །དྲི་མེད་མཁྱེན་པ་མཐའ་མེད་པ། །མཁྱེན་པ་མི་གཡོ་རྒྱ་མཚོ་བཞིན། །མཁྱེན་པ་ཡུལ་ལ་ཐོགས་མི་མངའ། །བདག་ནི་ཐེ་ཚོམ་ཞུ་བ་ལགས། །བཅོམ་ལྡན་ལེགས་པར་བསྒོམ་པ་ན། །ལམ་ལ་ཐེ་ཚོམ་ཡོད་མི་མངའ། །བདེར་གནས་འདྲེན་བ་ཆེན་པོ་ལ། །བདག་ནི་ཐེ་ཚོམ་ཞུ་བ་ལགས། །ཆུ་བོ་དག་ནི་རབ་རྒལ་ཅིང་། །མཚམས་སྦྱོར་འཆིང་བ་ཡོངས་ཅད་པ། །གདུག་པའི་ཟུག་རྔུ་འབྱིན་པ་ལ། །བདག་ནི་ཐེ་ཚོམ་ཞུ་བ་ལགས། །མ་རིག་སྒོ་ངའི་སྦུབས་བཅོམ་ཞིང་། །ཉོན་མོངས་གདུང་བ་ཉེར་ཞི་བ། །ཤིན་དུ་བསིལ་ལ་རབ་གནས་ལ། །བདག་ནི་ཐེ་ཚོམ་ཞུ་བ་ལགས། །འཇིགས་མེད་ཡེ་ཤེས་བླ་མེད་དང་། །ཡེ་ཤེས་ཆགས་དང་ཐོག་མེད་པ། །ཆོས་ཀྱི་རྒྱ་མཚོའི་མཁྱེན་པ་རྣམས། །དེ་བཞིན་གཤེགས་པས་མངོན་སུམ་བརྙེས། །སངས་རྒྱས་ཡོན་ཏན་ཚད་མེད་པས། །མངོན་སུམ་མཁྱེན་པ་ཡོངས་སུ་རྫོགས། །ཟག་པ་ཐམས་ཅད་ཟད་གྱུར་ཅིང་། །ཉོན་མོངས་ལྟ་བ་རབ་བཅོམ་པ། །བཅོམ་ལྡན་ཡོན་ཏན་ཚད་མེད་པ། །མང་པོ་དག་ནི་རབ་ཏུ་བསགས། །བསམ་གྱིས་མི་ཁྱབ་ཆོས་རྗེ་ལ། བདག་ནི་ཐེ་ཚོམ་ཞུ་བ་ལགས། །བཅོམ་ལྡན་མཆོག་གིས་མཁྱེན་པ་ཡིས། །འཇིག་རྟེན་ཀུན་ནི་གསལ་བར་མཛད། །ཆོས་ཀྱི་སྣང་བ་སྟོན་མཛད་པས། །ཡོན་ཏན་རྒྱ་མཚོ་མཐའ་མི་མངའ། །འདྲེན་པའི་ཆོས་ཀྱི་འོད་ཟེར་གྱིས། །འཇིག་རྟེན་ཀུན་དུ་གསལ་བར་མཛད། །དེ་སླད་འཇིག་རྟེན་སངས་རྒྱས་ཀྱི། །ཆོས་ཀྱི་འོད་ཟེར་སྣང་བ་ལགས། །ཆོས་ཀྱི་རྒྱ་མཚོ་ཐམས་ཅད་མཁྱེན། །སྤོབས་པ་དག་ནི་བླ་ན་མེད། །བརྩོན་འགྲུས་བསམ་གྱིས་མི་ཁྱབ་ཅིང་། །རྣམ་པ་ལྟ་བ་རབ་སྤངས་པ། །སངས་རྒྱས་སྤྱན་ནི་མཐའ་མིད་པས། །མཁྱེན་པའི་ཡུལ་ལ་མཐའ་མི་མངའ། །འཇིག་རྟེན་མཚུངས་མེད་གཙོ་བོ་ལ། །བདག་ནི་ཐེ་ཚོམ་ཞུ་བ་ལགས། །ཆོས་རྒྱལ་ཐུབ་པ་ཆེན་པོ་ཡིས། །སེམས་ཅན་ཐེ་ཚོམ་གཅོད་པར་མཛད། །འདྲེན་པ་ལ་ནི་བདག་ཞུ་ན། །མོས་པ་ཇི་བཞིན་བཀས་བཤད་
གསོལ། །ལྷ་དང་མི་ཡི་འཇིག་རྟེན་ཀུན། །ཐམས་ཅད་བདག་གིས་རབ་བརྟགས་ན། །དེ་བཞིན་གཤེགས་དང་མཚུངས་མེད་པས། ཐམས་ཅད་མ་ལུས་གསལ་བར་མཛད། །ཡོན་ཏན་རྣམས་ལ་རབ་གནས་ཤིང་། །རྒྱན་དང་ལྡན་བའི་སྐྱེས་ཆེན་ལགས། །བསམ་གྱིས་མི་ཁྱབ་ཆོས་ཀྱི་རྒྱལ། །དྲང་སྲོང་ནད་ན་གསལ་བ་པོ། །དཔེར་ན་གངས་རི་ཆེན་པོ་ནི། །རིན་ཆེན་ཀུན་གྱིས་བཀོད་པའི་གནས། བཅོམ་ལྡན་ཆོས་གདན་བཞུགས་པ་ཡི། །བཀོད་པ་དག་ཀྱང་དེ་བཞིན་ནོ། །རབ་ཡངས་བརྩོན་འགྲུས་ཆེན་པོ་ཡིས། །ཡིད་འོད་སྒྲ་ནི་སྟོན་མཛད་པས །སེམས་ཅན་གང་དག་ཐོས་གྱུར་ན། །དགེ་བའི་རྩ་བ་རྣམ་དག་འགྱུར། །བཅོམ་ལྡན་མི་གཡོ་མཆོག་ལགས་པས། །ཆོས་ཀྱི་སྣང་བ་སྟོང་བར་མཛད། །དེས་ནི་སེམས་ཅན་ཐམས་ཅད་ཀྱི། །ཡིད་བཞིན་བློ་ནི་བདེ་བར་འགྱུར། །དུས་དང་འཁོར་ནི་རབ་མཁྱེན་ཅིང་། །གང་ཟག་མཁྱེན་པ་འདྲེན་པ་ཡིས། །ཆོས་ཀྱི་སྣང་བ་སྟོན་མཛད་པས། །དུས་མཁྱེན་པ་ཡི་བློ་ལྡན་ལགས། །ཚངས་སྐད་བརྩོན་འགྲུས་ཆེན་པོ་ཡིས། །རྣམ་དག་གསུང་ནི་བཀས་བཤད་གསོལ། །ཆར་ཆེན་ས་ལ་བབས་པ་ལྟར། །ཆོས་ཀྱི་རླན་གྱིས་ཁྱབ་པར་མཛོད། །བཅོམ་ལྡན་འཁོར་འདུས་ནང་བཞུགས་ཏེ། །ཀུན་ཏུ་ཆོས་ཀྱི་ཆར་ཕབ་ནས། །ཆོས་འདི་ལ་ནི་གང་རེ་བ། །སེམས་ཅན་རྣམས་ནི་ཚིམ་པར་མཛོད། །མཆོག་ཏུ་བད་ལ་རབ་གནས་པས། །རྒྱལ་པོ་རི་རབ་ཇི་ལྟ་བཞིན། སེམས་ཅན་རྣམས་ལ་སྦྱིན་མཛད་ཅིང། །མང་པོ་རྣམས་ནི་དགའ་བར་མཛོད། །དཔའ་ཆེན་རྐང་གཉིས་གཙོ་དག་ནི། །སྤྱོད་ཡུལ་བསམ་གྱིས་མི་ཁྱབ་པས། །སེམས་ཅན་དག་ནི་ཐམས་ཅད་ཀྱིས། །གང་ཡང་འཆལ་བར་མི་འགྱུར་རོ། །སྐྱེས་བུ་ཆེན་པོ་ཚད་མ་མཆིས། །འཁོར་འདུས་འཐུན་བར་གྱུར་བ་དག། །ཐུབ་པ་ཆེ་ལ་བརྟེན་ནས་ནི། །སངས་རྒྱས་སྤྱོད་ཡུལ་ཆོལ་བ་ལགས། །བདག་ནི་སངས་རྒྱས་སྤྱོད་ཡུལ་ལ། ། གཞོལ་བའི་སླད་དུ་འདེར་མཆིས་ན། འདྲེན་པ་མཁྱེན་པ་ཐོགས་མི་མངའ། །ཇི་ལྟར་མྱུར་དུ་དབྱེ་མི་མཛད། །བདག་ནི་དེ་ཡི་མོས་བ་བཞིན། །ཞལ་དུ་བལྟས་ནས་ཞུ་ལགས་ན། །བཅོམ་ལྡན་ཐུགས་རྗེས་རབ་ཕྱེ་ནས། །ཐེ་ཚོམ་རྣམས་ནི་བཅད་དུ་གསོལ། །བླ་མེད་ཆོས་ནི་ཐོས་གྱུར་ན། །སེམས་ནི་རབ་ཏུ་དགའ་བར་འགྱུར། །ལུས་
ནི་དགའ་བས་ཁྱབ་གྱུར་ནས། །ཐེ་ཚོམ་དྲ་བ་ཆད་པར་འགྱུར། ཆོས་ཀྱི་རྒྱལ་པོ་བླ་མེད་གཙོ། །ཐམས་ཅད་མཁྱེན་པ་འཇིགས་མི་མངའ། །ཐམས་ཅད་མཁྱེན་ཅིང་གཟིགས་པ་ལ། །བདག་ནི་ཐེ་ཚོམ་ཞུ་བ་ལགས། །སངས་རྒྱས་ཆོས་ནི་ཐམས་ཅད་ལ། །ཐེ་ཚོམ་ཅུང་ཟད་ཡོད་མི་མངའ། །རབ་བརྩོན་འདྲེན་པ་ཆེན་པོ་ལ། །བདག་ནི་ཐེ་ཚོམ་ཞུ་བ་ལགས། །བླ་མེད་ཐེ་ཚོམ་ཆད་པ་པོ། །ཆོས་ལ་ཐེ་ཚོམ་མི་མངའ་བ། །ཡོན་ཏན་རྒྱ་མཚོ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །སྣང་བ་ཆེན་པོ་དཔག་མེད་དང་། །ཡོན་ཏན་ཆེན་པོ་དཔག་མེད་དང་། །རྣམ་དག་མཁྱེན་པ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །བརྩོན་འགྲུས་མཁྱེན་པ་དཔག་མེད་དང་། །སྤྱོད་ཡུལ་མཁྱེན་པ་དཔག་མེད་དང་། །ཕན་དོགས་མཁྱེན་པ་དཔག་མེད་ལ། །བདག་ནི་ཐེ་ཚོམ་ཞུ་བ་ལགས། །བཅོམ་ལྡན་མཁྱེན་པ་མཐའ་མེད་ཀྱང་། མཐའ་དང་མཐའ་མེད་རབ་ཏུ་སྤངས། །ཐེ་ཚོམ་ཐམས་ཅད་གཅོད་པ་ལ། བདག་ནི་ཐེ་ཚོམ་ཞུ་བ་ལགས། །བསམ་གྱིས་མི་ཁྱབ་ཆོས་ཀྱི་རྒྱལ། །ཐུགས་རྗེས་ཞུ་བ་གསན་དུ་གསོལ། །གནད་པར་མཛད་ན་བདག་ཞུ་ན། །ཐུབ་པ་ཆེན་པོས་བཤད་དུ་གསོལ། །ཐམས་ཅད་མཁྱེན་པ་ཤཱཀྱའི་གཙོ། །གྲགས་ཆེན་ལ་ནི་ཞུ་བ་ལགས། །གལ་ཏེ་ཐུགས་རྗེས་གནང་གྱུར་ན། །ཐེ་ཚོམ་དྲ་བ་བཅད་དུ་གསོལ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་དེང་ཁྱོད་ཀྱིས་ངའི་ཞལ་དུ་བལྟས་ནས་སེམས་རྩེ་གཅིག་ཏུ་གསོལ་བ་འདེབས་པ་འདིས་དེ་བཞིན་གཤེགས་པ་ལ་ཞུ་བ་དུ་ཞིག་ཞུ་བར་སེམས། གལ་ཏེ་ཞུ་བ་ཡོད་ན་ངས་བཤད་པར་བྱའོ། དེ་སྐད་ཅེས་བཀའ་སྩལ་པ་དང་། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།། །བློ་གྲོས་མཐའ་ཡས་ཁྱོད་ཀྱིས་ནི། །ང་ལ་ཅི་ཞིག་འདྲི་བར་སེམས། །དེ་བཞིན་ཏུ་ནི་ཞུས་ཤིག་དང་། །དས་ནི་རབ་ཏུ་བཤད་པར་བྱ། །ཁྱོད་ཀྱིས་ཇི་སྐད་དྲིས་པ་བཞིན། །རེ་རེ་ནས་ནི་གསལ་ཕྱེ་ནས། །ཇི་ལྟར་མོས་དང་འཐུན་བཞིན་དུ། །མྱུར་དུ་ཕྱེ་སྟེ་རབ་བཤད་དོ། །ངས་ནི་ཁྱོད་ལ་རབ་བཤད་ཀྱིས། །ཐམས་ཅད་ཐེ་ཚོམ་མེད་པར་བྱོས། །ཇི་ལྟར་ཁྱོད་ཀྱི་འདོད་པ་བཞིན། །
ཁྱོད་ཀྱིས་ཞུས་དང་འཚམ་པར་བཤད། །དེང་ཁྱོད་དུས་བཞིན་ཞུ་བར་གྱིས། །དུས་དང་དོན་ནི་ཇི་ལྟ་བཞིན། །དུས་བཞིན་དུ་ནི་ཞུས་པའི་ཕྱིར། །དས་ནི་ངེས་པར་རབ་བཤད་དོ། །ཇི་ལྟར་ཁྱོད་ཀྱི་མོས་པ་བཞིན། །ཞུ་བ་དག་ནི་ཞུས་ཤིག་དང་། །ངས་ནི་ཐམས་ཅད་རྗེས་འཐུན་བར། །ཁྱོད་ལ་རབ་ཏུ་བཤད་པར་བྱ། །དེང་ཁྱོད་དུས་སུ་ཞུས་ཤིག་དང་། །དས་ཀྱང་དུས་བཞིན་བཤད་པར་བྱ། །ཐེ་ཚོམ་དྲ་བ་བཤད་པས་ན། །ཐེ་ཚོམ་མེད་པ་འཐོབ་པར་འགྱུར། །ང་ནི་ཆོས་ཀྱི་རྗེར་གྱུར་པས། །དོན་ནི་མཐར་ཕྱིན་ཐུགས་སུ་ཆུད། །ཆོས་རྣམས་ཐམས་ཅད་དག་ལ་ཡང་། ཐེ་ཚོམ་མེད་པ་བརྙེས་པ་ཡིན། །ང་ནི་ཆོས་རྣམས་ཐམས་ཅད་ལས། །མངོན་སངས་རྒྱས་པས་བསམ་དཀའ་ཡིན། །སེམས་ཅན་མོས་པ་ཇི་བཞིན་དུ། །ཞུས་པ་དག་ནི་སྟོང་པར་མཛད། །ང་ནི་ཆོས་རྣམས་ཐམས་ཅད་ལ། །ཐོགས་པ་དག་ནི་མི་མངའ་བས། །དུས་བཞིན་དུ་ནི་ཞུས་པ་ལ། །མྱུར་དུ་བཤད་པ་མཛད་པ་ཡིན། །ངས་ནི་དུས་བཞིན་རབ་བཤད་ཅིང་། །ཐེ་ཚོམ་དག་ནི་མི་མདའ་བས། །དེ་ཡིན་མོས་པ་ཇི་ལྟ་བར། །དེ་ཡི་ཐེ་ཚོམ་གཅོད་པར་མཛད། །ང་ནི་རྟག་ཏུ་དུས་རྣམས་དང་། །འཁོར་འདུས་པ་ཡི་བསམ་པ་དང་། །སེམས་ཅན་དག་ནི་ཐམས་ཅད་ཀྱི། བསམ་པ་ཐ་དད་མཁྱེན་པ་ཡིན། །རྟག་ཏུ་སེམས་ཅན་ཐམས་ཅད་ཀྱི། །འདོད་པ་དང་ནི་འདོད་མེད་པ། སོ་སོར་རབ་ཏུ་བརྟགས་ནས་ནི། །དེ་དག་གསལ་བར་གཟིགས་པ་ཡིན། །གལ་ཏེ་བློ་དང་ལྡན་པ་རྣམས། །ལེགས་པ་ཉིད་དུ་སྒྲུབ་བྱེད་ན། །ང་ཡིས་དུས་དང་སྦྱར་ནས་ནི། །ཡང་དག་ཆོས་སྟོན་གོ་བར་མཛད། །བློ་དང་མི་ལྡན་དེ་དག་ནི། །གཏི་མུག་དག་གིས་རྨོངས་དཀྲུགས་ཤིང་། །དེ་དག་ཤེས་རབ་སྣང་མེད་པས། །ཡང་དག་ཆོས་ལ་གུས་མི་འགྱུར། །གལ་ཏེ་གུས་པ་མེད་གྱུར་ན། །ཡང་དག་ཆོས་ནི་ཆོལ་མི་བྱེད། །ཆོས་འདི་ཐོས་པར་གྱུར་ཀྱང་ནི། །སྣང་བ་ཆེན་པོའི་ཤེས་མི་སྐྱེ། །གང་ཞིག་ཆོས་ལ་མཁས་གྱུར་པ། །ཆོས་ལ་མོས་ཤིག་ཚོལ་བར་བྱེད། །གལ་ཏེ་ཆོས་འདི་ཐོས་གྱུར་ན། །རབ་སྣང་ཡེ་ཤེས་ཐོབ་པར་འགྱུར། །ཐེག་ཆེན་དག་ལ་མོས་པ་ནི། །མི་ཡི་གཙོ་བོ་ཚོལ་བྱེད་པས། །རབ་སྣང་ཡེ་ཤེས་ཐོབ་པར་གྱུར། །བསམ་གྱིས་མི་ཁྱབ་གཉེར་བ་དག། །བསམ་གྱིས་མི་
ཁྱབ་ཡེ་ཤེས་ལ། །གཞོལ་བ་གང་ཡིན་དེ་དག་ནི། །ཐོས་པས་ཡོངས་སུ་རྫོགས་པར་འགྱུར། །དཔག་མེད་ཡེ་ཤེས་ལ་མོས་དང་། །བསམ་གྱིས་མི་ཁྱབ་གཉེར་བ་དག། །དེས་ནི་ཆོས་འདི་ཐོས་གྱུར་ན། །བླ་མེད་ཡེ་ཤེས་ཐོབ་པར་འགྱུར། །སེམས་ཅན་དག་ནི་ལ་ལ་ཞིག། བྱང་ཆུབ་སྙིང་པོ་ཚོལ་བ་དང་། །བླ་མེད་འཁོར་ལོ་སྐོར་འདོད་པས། །མོས་ཤིང་རབ་ཏུ་བརྩོན་པ་དང་། །ཆོས་ལ་གཙོ་བོར་གང་འཛིན་པ། །དྲི་མེད་ཆོས་ནི་ཐོས་གྱུར་ན། །མོས་ཤིང་རབ་ཏུ་དགའ་བར་འགྱུར། །གལ་ཏེ་སེམས་ཅན་ལ་ལ་དག། །ལེགས་པར་བསྒྲུབ་པར་མོས་གྱུར་པ། །ཆོས་ཀྱི་འོད་ཟེར་སྣང་བ་ཡི། །བླ་མེད་ཆོས་འདི་བསྟན་པར་བྱ། །ཁུར་ལྕི་རྣམས་ནི་ཁྱེར་བ་དང་། །ནན་ཏན་བསྒྲུབ་པ་ལ་མོས་པ། །དེས་ནི་ཆོས་འདི་ཐོས་གྱུར་ན། །དགའ་བས་ཀུན་དུ་ཁྱད་པར་འགྱུར། །གང་ཞིག་རབ་ཏུ་མོས་པ་ཡིས། །དགེ་བའི་ཆོས་ནི་སེམས་བྱེད་ན། །དེ་ལ་སྙིང་བརྩེ་བསམ་བཞག་ནས། །རབ་ཏུ་ཕྱེ་ནས་བསྟན་པར་བྱ། །ཁྱོད་ལ་སོགས་ལ་ཐུགས་བརྩེ་ཕྱིར། །ཁྱོད་ཀྱིས་ཇི་སྐད་ཞུས་པ་བཞིན། །ངས་ཀྱང་ཡང་དག་ངེས་པར་ནི། །ཁྱོད་ཀྱི་ཐེ་ཚོམ་བཅད་པར་བྱ། །ངས་ནི་ལོ་མང་སྟོང་ཕྲག་ཏུ། །ཐབས་མཁས་དག་ནི་རབ་བསྒོམས་ཤིང་། །ཐེ་ཚོམ་དག་ནི་བསལ་བས་ན། །ཁྱོད་ཀྱིས་མོས་པ་རབ་ཏུ་མཁྱེན། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །ཁྱོད་ལ་རབ་ཏུ་བསྟན་པས་ན། །ཐེ་ཚོམ་རྣམས་ནི་བཅད་པར་བྱ། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །ཇི་ལྟར་མོས་པ་བཞིན་དུ་ནི། །ངས་ནི་རབ་ཏུ་བཤད་པར་བྱ། །གལ་ཏེ་ཐེ་ཚོམ་ཡོད་གྱུར་ན། །ཇི་ལྟར་འདོད་བཞིན་ཞུ་བར་གྱིས། །ང་ནི་ཆོས་ལ་རབ་གནས་པས། །གཡོ་བ་མེད་པ་བརྙེད་པ་ཡིན། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་བྱང་ཆུབ་སེམས་དཔའི་ཐེག་པ་ལ་ཐེ་ཚོམ་ཅུང་ཟད་ཅིག་མཆིས་པ་དེང་ཞུ་བ་ལགས་ན། ཇི་ལྟར་ན་སྐྱེས་བུ་དམ་པ་འཇིགས་པ་སྤངས་ནས་ཡང་དག་པར་
སེམས་རྩེ་གཅིག་ཏུ་སེམས་ཅན་རྣམས་ཀྱི་སླད་དུ་གོ་ཆ་ཆེན་པོ་བགོས་ནས་གོ་ཆ་ཆེན་པོས་རབ་ཏུ་བརྒྱན་པ་དང་། མོས་པ་ཆེན་པོ་བསྐྱེད་ནས་གུས་པར་བགྱིད་པ་དང་། བག་ཡོད་པ་དང་བཅས་པས་ཐེག་པ་ཆེན་པོ་འདི་ལ་འཚལ་ནས་ཤིན་ཏུ་རྣམ་པར་དག་པ་ཆེན་པོ་མཉམ་པ་ཉིད་ཀྱི་ཤུལ་མཐོ་དམན་དང་། གྱོ་མོ་དང་། གསེག་མ་དང་། ཚེར་མ་དང་། མི་གཙང་བ་རྣམ་པ་སྣ་ཚོགས་ཀྱི་ལྟ་བའི་ཐིབས་པོ་རྣམས་མ་མཆིས་པ། ཟུག་རྔུ་ཟུག་པའི་སྡུག་བསྔལ་དང་། ཉོན་མོངས་པའི་གཡང་ས་མ་མཆིས་པ། འཆི་བ་དང་། འཇིགས་ཤིང་སྐྲག་པ་དང་། བར་ཆད་མ་མཆིས་པ། དྲང་ཞིང་གྱ་གྱུ་མ་མཆིས་པ་དང་། དེ་ཁོ་ན་ཉིད་ཀྱི་མཉམ་པ་ཉིད་ཀྱི་ཤུལ་དང་། ཐོགས་པ་མ་མཆིས་པའི་ཤུལ་དུ་ཞུགས་ནས་ལྟ་བའི་ཐིབས་པོ་རྣམས་བཅད་པ་དང་། དྲ་བ་ཐམས་ཅད་དྲལ་བ་དང་། མུན་ནག་རྣམས་བསལ་བ་དང་། སྲིད་པའི་མངོན་པར་ཞེན་པ་རྣམས་སྤང་བ་དང་། འདུ་འཕྲོ་བ་རྣམས་སྤང་བའི་སླད་དུ་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བ་ལགས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་དོན་འདིའི་སླད་དུ་ཞུ་བ་ལགས་སོ། སྐྱེས་བུ་དམ་པ་ཇི་ལྟ་བུས་གོ་ཆ་ཆེན་པོ་ཇི་ལྟ་བུ་བགོས་ན་གོ་ཆ་བགོས་པ་དེས་ཐེག་པ་ཆེན་པོ་ལ་འཚལ་ནས་ལམ་ཆེན་པོ་འདིས་གཞོལ་ཞིང་ཡང་དག་པར་འཇུག་པར་འགྱུར་བ་ལགས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གོ་ཆའི་བཀོད་པ་གང་ལགས་པ་དང་། ལམ་གང་ལ་གནས་པ་དང་། ཆོས་རྣམས་ཀྱི་ཚུལ་ལ་མཁས་པ་ལ་གནས་པ་གང་ལགས་པ་བཀས་བཤད་དུ་གསོལ། ཆོས་ཀྱི་ཚུལ་ལ་མཁས་པ་ལ་རབ་ཏུ་གནས་པས་ནི་ཆོས་རྣམས་ཀྱི་ཚུལ་ལ་མཁས་པའི་སྣང་བ་སྐྱེད་པར་འགྱུར་ལ། ཆོས་ཀྱི་སྣང་བའི་དབང་གིས་ནི་གོ་ཆ་མི་སྤོང་པར་ཐེག་པ་ཆེན་པོ་ལ་འཚལ་ནས་ནུར་བ་མ་མཆིས་པའི་བརྩོན་འགྲུས་ཀྱི་སྟོབས་དང་། བརྗོད་ངས་པ་མ་མཆིས་པའི་དབང་པོ་དང་། རྒྱུན་ཆགས་པ་མ་མཆིས་པའི་ཤེས་རབ་ཀྱི་སྟོབས་ཀྱིས་མྱུར་དུ་ཆོས་ཀྱི་དབྱིངས་ཀྱི་ཚུལ་ལ་གསལ་བར་མཁས་པ་མངོན་པར་བསྒྲུབས་ནས། བྱང་ཆུབ་ཀྱི་སྙིང་པོར་བགྲོད་པ་དང་།
ཆོས་ཀྱི་འཁོར་ལོ་བསྐོར་ནས་སེམས་ཅན་རྣམས་ལ་ཡང་དག་པར་ཆོས་སྟོན་པའི་སླད་དུ་སེམས་ཅན་ཐམས་ཅད་ཇི་ལྟར་མོས་པ་དང་། ཇི་ལྟར་གཞོལ་བ་བཞིན་དུ་མ་གྲོལ་བ་ལས་རྣམ་པར་གྲོལ་བར་འགྱུར་ལགས་སོ། བཅོམ་ལྡན་འདས་ཐེག་པ་ཆེན་པོ་འདིས་སེམས་ཅན་རྣམས་ལ་སྨན་པ་དང་། བདེ་བར་བགྱི་བའི་སླད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་དོན་འདི་ཞུ་ལགས་སོ། བཅོམ་ལྡན་འདས་དེ་བཞིན་གཤེགས་པ་ནི་ཐམས་ཅད་མཁྱེན་པ་ཐམས་ཅད་གཟིགས་པ་ལགས་ན་ཆོས་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་མངོན་པར་བསྒྲུབས་པ་དང་། ཏིང་ངེ་འཛིན་ཐོབ་པའི་དབང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་མངོན་བར་རྫོགས་པར་སངས་མ་རྒྱས་ཀྱི་བར་དུ་ཕྱིར་ལྡོག་པར་མི་འགྱུར་བ་གང་ལགས་པ་བཀས་བཤད་དུ་གསོལ། བཅོམ་ལྡན་འདས་དེ་བཞིན་གཤེགས་པའི་མཁྱེན་པ་དང་། གཟིགས་པ་ནི་ངོ་མཚར་རྨད་དུ་བྱུང་བའི་ཆོས་ཡོངས་སུ་རྫོགས་ཤིང་སེམས་ཅན་རྣམས་ཀྱི་ཤེས་རབ་ཀྱི་སྨན་རབ་ཏུ་མཁྱེན་པ་ལགས་པས་དེའི་སླད་དུ་བདག་ཞུ་བ་གསོལ་ལགས་སོ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཚིགས་སུ་བཅད་དེ་གསོལ་པ།། །བྱང་ཆུབ་སེམས་དཔའ་རྣམས་ཀྱི་སླད། །སངས་རྒྱས་ཆོས་དོན་ཟབ་མོ་དག། །ཐམས་ཅད་མཁྱེན་ཅིང་གཟིགས་པ་པོ། །རྐང་གཉིས་གཙོ་ལ་བདག་ཞུ་ལགས། །ཐེག་པ་ཆེན་པོའི་རྣལ་འབྱོར་པ། །ཏིང་འཛིན་གང་གིས་གཞོལ་གྱུར་པ། །སེམས་ཅན་རྣམས་ལ་སྨན་སླད་དུ། །དེ་དག་ཞུ་བ་གསོལ་བ་ལགས། །ཇི་ལྟར་སྐྱེས་བུ་དམ་པ་ཡིས། །གོ་ཆ་དཔག་མེད་བགོ་བར་འགྱུར། །དེ་ལྟར་གོ་ཆ་བགོས་ནས་ཀྱང་། །ཇི་ལྟར་རབ་ཏུ་གཞོལ་བར་འགྱུར། །ཇི་ལྟར་འདུན་བ་སློང་བར་འགྱུར། །ཇི་ལྟར་དེ་ལ་སྲེད་པར་འགྱུར། །ཇི་ལྟར་བརྩོན་འགྲུས་ཆེན་པོར་འགྱུར། །ཇི་ལྟར་བག་ཡོད་ལྡན་པར་འགྱུར། །ཇི་ལྟར་བྱང་ཆུབ་སེམས་དཔའ་རྣམས། །
ཐེག་ཆེན་འདི་ལ་གཞོལ་བར་བགྱི། །དེ་ལ་འཚལ་ནས་ཅི་བགྱིད་པ། །དངོས་པོ་འདི་ཡང་བཀས་བཤད་གསོལ། །ཇི་ལྟར་ཐེག་ཆེན་གདེག་ནས་ནི། །བྱང་ཆུབ་སེམས་ལ་གཞོལ་གྱུར་པ། །འཇིག་རྟེན་འདྲེན་པའི་ཐུགས་རྗེས་ཡིས། །མྱུར་དུ་བདག་ལ་བཀས་བཤད་གསོལ། །ཇི་ལྟར་ཡང་དག་མཉམ་ལམ་གྱིས། །མཉམ་པ་ཉིད་དུ་གཞོལ་བར་འགྱུར། །ལྟ་བ་རྣམས་ཀྱི་ཐིབས་པོ་དག། །གཅོད་པར་བགྱིད་ལ་སྐྱོན་མེད་འགྱུར། །སྤྱོད་ཡུལ་དག་ནི་ཐམས་ཅད་ལས། །ཇི་ལྟར་བགྱིས་ན་འདའ་བར་འགྱུར། །ཇི་ལྟར་མཉམ་པ་ཉིད་དག་གིས། །འདོད་ཆགས་དྲ་བ་དྲལ་བར་འགྱུར། །ཇི་ལྟར་མུན་ནག་རབ་བསལ་ནས། །ཡེ་ཤེས་སྣང་ཆེན་ཐོབ་པར་འགྱུར། །བྱང་ཆུབ་སེམས་དཔའ་དེ་དག་གིས། །ཇི་ལྟར་བགྱིས་ན་གཞོལ་བར་འགྱུར། །ཇི་ལྟར་སོ་སོར་རབ་བརྟགས་པས། །འཆིང་བ་མང་པོ་སྤོང་བར་འགྱུར། །ཇི་ལྟར་བྱང་ཆུབ་སེམས་དཔའ་རྣམས། །འཆིང་བ་སྤངས་ནས་བདེ་བར་གནས། །ཇི་ལྟར་བྱང་ཆུབ་སེམས་དཔའ་རྣམས། །འཇིགས་པ་ཆེ་ལས་འདའ་བར་འགྱུར། །ཆོས་ཀྱི་དོན་ལ་མཁས་གྱུར་ནས། །བླ་མེད་ལ་ནི་གཞོལ་བར་འགྱུར། །བྱང་ཆུབ་སེམས་དཔའ་ཇི་ལྟ་བུའི། །དཔའ་མེད་གོ་ཆ་བགོ་བར་བགྱིད། །གོ་ཆ་དེ་དག་བགོས་ནས་ཀྱང་། །ཐེག་ཆེན་ལ་ནི་འཚལ་བར་བགྱིད། །ཇི་ལྟར་བྱང་ཆུབ་སེམས་དཔའ་རྣམས། །མཉམ་ཉིད་ལམ་ལ་གཞོལ་བར་བགྱིད། །བདག་གིས་དིང་འདིར་ཞུས་པ་འདི། །བཅོམ་ལྡན་འདས་ཀྱིས་བཀས་བཤད་གསོལ། །བྱང་ཆུབ་སེམས་དཔའ་ཇི་ལྟ་བུར། །གོ་ཆ་བཀོད་པ་ཐོབ་འགྱུར་དང་། །བླ་མེད་ཐེག་པ་རབ་བརྒྱན་པ། །བཅོམ་ལྡན་འདས་ཀྱིས་བཀས་བཤད་གསོལ། །ལམ་འདི་ལ་ནི་གནས་པ་དང་། །ལམ་དིའི་བཀོད་པ་གང་ལགས་དང་། །ཆོས་རྣམས་ལ་ནི་མཁས་གྱུར་པ། །བཅོམ་ལྡན་འདས་ཀྱིས་བཀས་བཤད་གསོལ། །ཆོས་ཀྱི་དབྱིངས་ཀྱི་ཚུལ་རྣམས་དང་། །ཆོས་ལ་མཁས་པའི་སྣང་བ་དག། །ཇི་ལྟ་བུར་ནི་རྟོག་གྱུར་པ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་བྱང་ཆུབ་སེམས་དཔའ་རྣམས། །ཆོས་ཀྱི་སྣང་བ་དེ་ཐོས་
ནས། །ཆོས་རྣམས་ཐམས་ཅད་མཐར་ཕྱིན་པ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་བྱང་ཆུབ་སེམས་དཔའ་རྣམས། །ཆོས་ཀྱི་སྣང་བ་ཐོབ་གྱུར་ནས། །གོ་ཆ་ཆེན་པོ་མི་སྤོང་ཞིང་། །དེ་ཡི་དབང་གིས་གཞོལ་འགྱུར་ལགས། །ཇི་ལྟར་བྱང་ཆུབ་སེམས་དཔའ་རྣམས། །ཐེག་ཆེན་འདི་ལ་འཚལ་ནས་ནི། །བརྩོན་འགྲུས་ལྡོག་པར་མི་འགྱུར་ཞིང་། །དེ་ཡི་དབང་གིས་གཞོལ་འགྱུར་ལགས། །ཇི་ལྟར་བྱང་ཆུབ་སེམས་དཔའ་རྣམས། །བསམ་པ་དག་ནི་རབ་བརྟན་ཞིང་། །འདི་ལྟར་ཤེས་རབ་སྟོབས་དག་གིས། །ཤིན་དུ་འདུལ་བ་ཐོབ་འགྱུར་ལགས། །ཇི་ལྟར་ཆོས་ཀྱི་དབྱིངས་རྣམས་ཀྱི། །ཚུལ་ལ་མཁས་པས་ཐོབ་པར་འགྱུར། །ཆོས་ཀྱི་རྒྱལ་པོ་བསམ་མི་ཁྱབ། །བཅོམ་ལྡན་འདས་ཀྱིས་བཀས་བཤད་གསོལ། །ཇི་ལྟར་མྱུར་བ་ཁོ་ནར་ནི། །བྱང་ཆུབ་སྙིང་པོར་བགྲོད་གྱུར་ནས། །སུ་ཡང་སྐོར་བར་མི་འགྱུར་བ། །ཚངས་པའི་འཁོར་ལོ་སྐོར་འགྱུར་ལགས།། ཇི་ལྟར་གཡོ་བ་མ་མཆིས་པར། །སྔོན་གྱི་སྨོན་ལམ་ཇི་ལྟ་བཞིན། །སེམས་ཅན་ཐམས་ཅད་ཀུན་ལ་ནི། །ཆོས་རྣམས་ཡང་དག་སྟོན་འགྱུར་ལགས། ཆོས་རྣམས་ཡང་དག་བསྟན་པས་ན། །འཁོར་བ་ལས་ནི་གྲོལ་འགྱུར་ལགས། །ཇི་ལྟར་བགྱིས་ན་སེམས་ཅན་རྣམས། །གཏན་དུ་བདེ་བ་འཐོབ་འགྱུར་ལགས། །སེམས་ཅན་རྣམས་ལ་སྨན་སླད་དུ། །འཇིག་རྟེན་འདྲེན་ལ་བདག་ཞུ་ན། །ཐམས་ཅད་མཁྱེན་ཅིང་གཟིགས་པ་པོའི། །ཐུགས་རྗེས་བདག་ལ་བཀས་བཤད་གསོལ། །ཆོས་ནི་གང་དང་གང་དག་གིས། །བྱང་ཆུབ་སེམས་དཔའ་སྨིན་བགྱིད་པ། །ཆོས་ཀྱི་རྒྱ་མཚོ་ཐམས་ཅད་ཀྱིས། །ཏིང་འཛིན་ཕྱག་རྒྱ་མཛད་དུ་གསོལ། །སངས་རྒྱས་ཆོས་ལ་རབ་མོས་ཤིང་། །བྱང་ཆུབ་ཆེ་ལ་གང་ལྟ་བ། །ཆོས་ཀྱི་སྒྲ་འདི་ཐོས་གྱུར་ན། །ལུས་ཀུན་ཁྱབ་པར་དགའ་བར་འགྱུར། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་ཁྱོད་ཀྱིས་སྔོན་སངས་རྒྱས་ཚད་མེད་པ་རྣམས་ལ་མཆོད་ཅིང་རིམ་གྲོ་བྱས་པ་དང་། དགེ་བའི་རྩ་བ་རྣམས་བསྐྱེད་ཅིང་ཡོན་ཏན་གཞལ་དུ་མེད་པ་བསགས་པས་ན་ཆོས་ཟབ་མོ་འདི་ལ་རབ་ཏུ་གཅུང་བ་མོས་པར་གྱུར་པ་དང་། བསམ་པ་རྒྱ་ཆེན་པོས་
སེམས་ཅན་ཡོངས་སུ་སྨིན་པར་བྱ་བའི་ཕྱིར་སྙིང་རྗེ་ཆེན་པོ་བསྐྱེད་ནས་དེ་བཞིན་གཤེགས་པ་ལ་ཞུ་བ་ཞུས་པ་ལེགས་སོ་ལགས་སོ། ཁྱོད་ལེགས་པར་ཉོན་ལ་ཤིན་དུ་ཡིད་ལ་ཟུང་ཤིག་དང་། ངས་ཁྱོད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོན་ཏན་མངོན་པར་བསྒྲུབ་པ་དང་། ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་གྱུར་པ་ཡང་དག་པར་བཤད་པར་བྱའོ། བཅོམ་ལྡན་འདས་དེ་བཞིན་དུ་ཐོས་བར་འཚལ་ལོ་ཞེས་གསོལ་པ་དང་། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། བློ་གྲོས་མཐའ་ཡས་བྱང་ཆུབ་སེམས་དཔའི་སེམས་དཔའ་ཆེན་པོ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་གོ་ཆ་ཆེན་པོ་བགོས་པ་དེས་སེམས་ཅན་རྣམས་ཡོངས་སུ་བསྡུད་པའི་ཕྱིར་གོ་ཆ་ཆེན་པོ་བགོ་བར་བྱའོ། སེམས་ཅན་རྣམས་སྦྱིན་པ་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། སེམས་ཅན་རྣམས་ཚུལ་ཁྲིམས་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། སེམས་ཅན་རྣམས་བཟོད་པ་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། སེམས་ཅན་རྣམས་བརྩོན་འགྲུས་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། སེམས་ཅན་རྣམས་བསམ་གཏན་རྣམ་པར་དག་པ་ལ་དགོད་བའི་ཕྱིར་གོ་ཆ་ཆེན་པོ་བགོ་བར་བྱའོ། སེམས་རྣམས་ཤེས་རབ་རྣམ་པར་དག་པ་ལ་དགོད་པའི་ཕྱིར་གོ་ཆ་ཆེན་པོ་བགོ་བར་བྱའོ། སེམས་ཅན་རྣམས་བདེ་བ་ཐོབ་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། སེམས་ཅན་རྣམས་ལ་ཕན་གདགས་པའི་དངོས་པོ་དང་མཚུངས་པར་ལྡན་པའི་སེམས་བསྐྱེད་པའི་ཕྱིར་གོ་ཆ་ཆེན་པོ་བགོ་བར་བྱའོ། སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ནང་ཀྱི་གཉེན་པོར་བྱ་བའི་ཕྱིར་གོ་ཆ་ཆེན་པོ་བགོ་པར་བྱའོ། ཡོན་ཏན་ཆེན་པོ་མངོན་པར་བསྒྲུབ་པ་ལ་མཁས་པར་བྱ་བའི་ཕྱིར་གོ་ཆ་ཆེན་པོ་བགོ་བྱའོ། བླ་ན་མེད་པའི་ཡེ་ཤེས་ལེགས་པར་ཡོངས་སུ་རྫོགས་པར་བྱ་བའི་ཕྱིར་གོ་ཆ་ཆེན་པོ་བགོ་བར་བྱའོ། སེམས་ཅན་རྣམས་འཁོར་བའི་འཇིགས་པ་ལས་ཡོངས་སུ་བསྐྱབ་པའི་ཕྱིར་གོ་ཆ་ཆེན་པོ་བགོ་བར་བྱའོ། མཚུངས་པ་མེད་པའི་ཡེ་
ཤེས་ལེགས་པར་ཡོངས་སུ་རྫོགས་པར་རབ་ཏུ་བསྟན་པར་འདོད་པའི་ཕྱིར་གོ་ཆ་ཆེན་པོ་བགོ་བར་བྱའོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བདུད་དང་། བདུང་ཀྱི་འཁོར་དང་། བདུང་ཀྱི་ཕོ་ཉ་དང་། བདུང་ཀྱི་ལས་ལ་གནས་པ་དང་། ལྟ་བ་རྣམས་ཀྱི་ཐིབས་པོ་དང་། ལམ་ཡང་བར་ཞུགས་པའི་མུ་སྟེགས་ཅན་གྱི་བསྟན་པ་ལས་རབ་ཏུ་བྱུང་པ་ཐམས་ཅད་དང་། འཇིག་རྟེན་རྒྱང་པན་དང་། མུ་སྟེགས་ཅན་དང་འཐུན་བ་ཇི་སྙེད་པ་དག་དང་འཐབ་པའི་ཕྱིར་གོ་ཆ་ཆེན་པོ་བགོ་བར་བྱའོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་གོ་ཆ་ཆེན་པོ་བགོ་ཞིང་། གོ་ཆ་མི་སྤོང་པར་བརྩོན་འགྲུས་ཆེན་པོ་བསྐྱེད་ནས་སེམས་ཅན་གྱི་ཁམས་ཐམས་ཅད་དུ་ཞུགས་ཏེ། བཟོད་པ་ལ་གནས་ནས་འཇིགས་པ་རྣམས་སྤངས་ཏེ། མི་སྐྲག་མིད་དང་། མི་གཡོ་མི་འཁྲུགས་པར་བྱས་ནས་གོ་ཆ་དཔའ་ཏུ་མེད་པ་དག་བགོ་བར་བྱའོ། དེ་འདི་ལྟ་སྟེ། སེམས་ཅན་ཐམས་ཅད་ཡོངས་སུ་སྐྱོབ་པའི་གོ་ཆ་དང་། ལྟ་བའི་ཐིབས་པོ་ཐམས་ཅད་གཅོད་པའི་གོ་ཆ་དང་། བདུད་ཀྱི་དཔུང་རྣམ་པར་འཇིག་པར་བྱེད་པའི་གོ་ཆ་དང་། ཤེས་རབ་ཡང་དག་པར་ལེན་པའི་གོ་ཆ་དང་། ཚོགས་དཔག་ཏུ་མེད་པ་སོགས་བའི་གོ་ཆ་དང་། ཁུར་ལྕི་བ་རྣམས་སྒྲོལ་བའི་གོ་ཆ་དང་། མངོན་བར་ཡིད་ཆེས་པ་འཕེལ་བར་བྱེད་བའི་གོ་ཆ་དང་། ཚུལ་ཁྲིམས་ལ་གནས་བའི་གོ་ཆ་དང་། ལས་ཀྱི་ཀུན་གཞི་ཡོངས་སུ་སྦྱོང་བའི་གོ་ཆ་དང་། ཐམས་ཅད་རྣམ་པར་དག་པར་བྱེད་པའི་སྟོབས་ཀྱི་གཏེར་གྱི་གོ་ཆ་དང་། ཐབས་མཁས་པའི་གཏེར་གྱི་གོ་ཆ་དང་། མངོན་པར་ཞེན་པ་ཐམས་ཅད་ཡོངས་སུ་སྤོང་བའི་གོ་ཆ་དང་། ལྡོག་པ་དང་། འགྱེད་པ་མེད་པའི་ཤེས་རབ་ཀྱི་གོ་ཆ་གང་ཡིན་པའོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གོ་ཆ་ཆེན་པོ་དེ་ལྟ་བུ་བགོས་ནས་འཁོར་བའི་མཐའ་ཇི་སྲིད་པ་དེའི་བར་དུ་ཤིན་དུ་བསྟན་པའི་བརྩོན་འགྲུས་ཀྱི་སྟོབས་གཡོ་བ་མི་སྤོང་བར་བླ་ན་མེད་པ་ཡག་དག་པར་རྫོགས་པའི་བྱང་ཆུབ་ལ་གཞོལ་བར་བྱའོ། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།། །བྱང་ཆུབ་སེམས་དཔའ་སེམས་ཅན་རྣམས། །བསྡུ་ཕྱིར་གོ་ཆ་བགོ་བར་བྱ། །སེམས་ཅན་རྣམས་ནི་ཚད་མེད་ཕྱིར། །གོ་ཆ་བགོས་བ་ཚད་མེད་དོ། །སྦྱིན་
པ་རྣམ་པར་དག་པའི་ཕྱིར། །ཐམས་ཅད་རབ་ཏུ་དགའ་བར་བྱེད། །སེམས་ཅན་ལ་ནི་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །ཚུལ་འཁྲིམས་རྣམ་པར་དག་པའི་ཕྱིར། །གོ་ཆ་འདི་ནི་བགོ་བར་བྱ། །འཇིག་རྟེན་ལ་ནི་ཕན་འདོགས་བྱེད། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །བཟོད་པ་རྣམ་པར་དག་བའི་ཕྱིར། །དང་ཤིང་བདེ་བར་གནས་པར་བྱེད། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །བརྩོན་འགྲུས་རྣམ་པར་དག་པའི་ཕྱིར། །ཕྱིར་མི་ལྡོག་པར་འགྲུས་པར་བྱེད། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །བསམ་གཏན་རྣམ་པར་དག་པའི་ཕྱིར། །སྤྱོད་ཡུལ་དག་ཀྱང་དེ་བཞིན་ནོ། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །ཤེས་རབ་རྣམ་པར་དག་པའི་ཕྱིར། །ཟག་མེད་བླ་ན་མེད་པའི་ཡིན། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་འདི་ནི་བགོ་བར་བྱ། །སེམས་ཅན་དག་ནི་ཐམས་ཅད་ལ། །བདེ་བའི་ཡོ་བྱང་སྦྱིན་དགོས་པས། །དོན་དེ་ལེགས་པར་ཤེས་པའི་ཕྱིར། །གོ་ཆ་འདི་ནི་བགོ་བར་བྱ། །བྱང་ཆུབ་སེམས་དཔའ་སེམས་ཅན་རྣམས། །ཕན་པའི་དངོས་པོ་བྱ་དགོས་པས། །བསྡུ་བ་རྣམ་དག་བཞི་པོ་ཡིས། །སྲིད་པ་ཀུན་དུ་འཇུག་པར་བྱེད། །འདོད་ཆགས་ཞེ་སྡང་གཏི་མུག་ནད། །གཉེན་པོ་དག་ནི་བསྟན་པའི་ཕྱིར། །སེམས་ཅན་ལ་ནི་སྨན་གཏོང་བས། །ནད་རྣམས་རབ་ཏུ་སེལ་བར་བྱེད། །དེས་ན་བྱང་ཆུབ་སེམས་དཔའ་རྣམས། །གོ་ཆ་ལེགས་པར་བགོས་ནས་ནི། །ཡོན་ཏན་རྣམས་ཀྱི་ཚོགས་དག་ན། །མཁས་པ་དཔག་མེད་ཐོབ་པ་ཡིན། །སེམས་ཅན་འཁོར་བའི་སྡུག་བསྔལ་གྱི། །ཉམས་ཐག་ཤིན་ཏུ་མི་བདེ་བས། །བདག་གིས་ཡོངས་སུ་བསྐྱབ་སྙམ་ནས། །གོ་ཆ་དཔག་མེད་བགོ་བར་བྱ། །འཁོར་བའི་སྡུག་བསྔལ་ཚད་མེད་རྣམས། །བདག་གིས་རྣམ་པར་དགྲོལ་སྙམ་ནས། །སྲིད་ལྟའི་དྲ་བས་གླགས་པ་དག། །ཐམས་ཅད་ཡོངས་སུ་བཅད་པར་བྱ། །གང་གིས་ཉོན་མོངས་དྲ་བ་འདི། ཐམས་ཅད་གཅོད་པར་གང་ནུས་པ། །བརྟན་ངའི་བརྩོན་འགྲུས་སྟོབས་དག་གིས། །དཔའ་བོའི་གོ་ཆ་བགོ་བ་ཡིན། །སེམས་ཅན་དག་ནི་ཐམས་ཅད་ཀུན། །བདེ་བའི་ལམ་ལ་རབ་བཀོད་ཅིང་། །མྱ་ངན་འདས་
ལ་གཞོལ་བ་དང་། །བླ་མེད་བདེ་ལ་དགོད་པར་བྱ། །གང་ཞིག་བརྩོན་འགྲུས་ཆེན་པོའི་སྟོབས། །གོ་ཆ་འདི་ནི་བགོ་བར་བྱེད་པ། །བདུད་རྣམས་ཐམས་ཅད་དག་དང་ནི། །རྟག་ཏུ་འཐབ་ཀྱང་ངལ་མི་འགྱུར། །གང་ཞིག་ལྟ་ལ་རབ་གནས་ནས། །ཐིབས་པོ་དག་དུ་གང་ཞུགས་དང་། །འཇིག་རྟེན་རྒྱང་པ་ན་བདག་ལ། །གོ་ཆ་བགོས་ནས་ཕན་གདགས་བྱ། །གཞན་ཡང་འཁོར་ནི་ཚད་མེད་པ། །ལམ་གོལ་དག་ཏུ་ཞུགས་པ་རྣམས། །དེ་དག་ལ་ནི་ཕན་གདགས་ཕྱིར། །གོ་ཆ་དཔག་མེད་བགོ་བར་བྱ། །དེ་ལྟར་གོ་ཆ་བགོས་ནས་ནི། །གོ་ཆ་ཆེན་པོ་མི་སྤང་བར། །བརྩོན་འགྲུས་ཆེན་པོའི་སྟོབས་བསྐྱེད་ན། །གོ་བགོས་རབ་རྟགས་ཁྱད་པར་འཕགས། །སེམས་ཅན་ཁམས་ལ་རབ་ཞུགས་ཏེ། །བཟོད་པ་ལ་ནི་གནས་གྱུར་ནས། །བརྟན་པའི་བཟོད་པ་བསྒྲུབ་བྱེད་པ། །གོ་བགོས་གོང་ན་མེད་པ་ཡིན། །འཇིགས་པ་དག་ནི་རབ་སྤོངས་ཤིང་། །སྐྲག་པ་དག་ནི་མེད་པར་ཡང་། །གོ་ཆ་དཔག་མེད་བགོས་ནས་ནི། །ཐམས་ཅད་རབ་བརྩོན་འགྲུས་པར་བྱ། །གང་ཞིག་གོ་ཆ་རབ་གནས་པ། །རྟག་ཏུ་ཡང་དག་རྟོགས་གྱུར་ཅིང་། །རབ་དབེན་གཡོ་བ་མེད་པས་ན། །མི་འཁྲུགས་ལྡོག་པར་མི་འགྱུར་རོ། །དེ་ལྟའི་གོ་ཆ་རབ་བགོས་ནས། །བློ་དང་ལྡན་པས་གཞན་ཡང་ནི། །སེམས་ཅན་སྐྱོབ་པའི་གོ་བགོས་ཏེ། །བདུད་ཀྱི་གོ་ཆ་གཞོམ་པར་བྱ། །ཡོན་ཏན་དཔག་མེད་གོ་ཆ་དག། །ཐམས་ཅད་རབ་ཏུ་བགོ་བར་བྱ། །དབང་པོ་ཤེས་མཆོག་གང་ཟག་གིས། །བགོས་ནས་བདེ་བ་ཐོབ་པར་འགྱུར། །ཁུར་ལྕི་རབ་ཏུ་སྤང་བའི་ཕྱིར། །བླ་མེད་གོ་ཆ་བགོས་ནས་སུ། །སེམས་ཅན་ཐམས་ཅད་ཡོངས་བཟླས་ནས། །སྡུག་བསྔལ་ཁུར་ལས་ཐར་པར་བྱ། །རྣམ་དག་དད་པ་འཕེལ་བྱེད་ཅིང་། །དབང་པོ་དྲུག་ནི་རབ་བསྡོམ་པ། །ཚུལ་ཁྲིམས་གང་དག་ལྡན་པ་ནི། །གོ་བགོས་གོང་ན་མེད་པ་ཡིན། །དཔའ་པོ་ཡེ་ཤེས་བསྒྲུབ་པ་ལ། །བྱང་ཆུབ་སེམས་དཔའ་རབ་གནས་པས། །སྤྱོད་ལམ་མཚུལ་ཁྲིམས་ལྡན་པས་ན། །གོ་བགོས་གཡོ་བ་མེད་པ་ཡིན། །སྔོན་གྱི་རྒྱལ་བ་མང་པོ་ལས། །རྣམ་དག་ལས་ནི་བསྒྲུབས་པས་ན། །དེ་ཕྱིར་གོ་ཆ་རབ་བགོས་ནས། །རྟག་ཏུ་འཇིགས་པ་མེད་པ་ཡིན། །སེམས་ཅན་ལ་ནི་སྲིད་པའི་བློས། །འཇིག་རྟེན་ལས་ནི་ཕན་
འདོགས་པས། །ཐབས་ནི་རབ་ཏུ་རྟོགས་པས་ན། །གོ་བགོས་ལེགས་པར་གནས་པ་ཡིན། །ཐབས་མཁས་ཡེ་ཤེས་གང་ཡིན་པ། བྱང་ཆུབ་སེམས་དཔས་རབ་རྟོགས་པས། །དེ་ལྟར་གོ་ཆ་བགོས་ནས་ནི། །འཆིང་བ་མཐའ་དག་གཅོད་བར་བྱེད། །མངོན་ཞེན་ཐམས་ཅད་རབ་སྤོང་ཞིང་། །ཡིད་ཆེས་རྒྱབ་ཀྱིས་མི་ཕྱོགས་པ། །གོ་བགོས་བློ་དང་ལྡན་པ་ནི། །བླ་མེད་བྱང་ཆུབ་བགྲོད་པར་འགྱུར། །བྱང་ཆུབ་སེམས་དཔའ་ངེས་པར་ནི། །བདག་དང་གཞན་ལ་ཕན་འདོགས་གང་། །བརྩོན་འགྲུས་སྟོབས་ལ་རབ་གནས་པ། །བརྟན་ཞིང་ཕྱིར་ལྡོག་མི་འགྱུར་རོ།། །།བམ་པོ་གཉིས་པ། གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསྐལ་པ་ཚད་མེད་པ་ནས་ཁུར་ཆེན་པོ་ཁྱེར་ཞིང་གོ་ཆ་ཆེན་པོ་བགོས་པའི་གོ་ཆ་དེ་ལྟ་བུ་དེ་ནི་བདུད་དམ། །བདུད་ཀྱི་འཁོར་རམ། བདུད་ཀྱི་ཕོ་ཉ་འམ། ལོག་པར་ལྟ་བའི་ཐིབས་པོ་དགོན་དུད་མ་རུངས་པར་ཞུགས་པའི་སེམས་ཅན་རྣམས་ཀྱིས་མཐོང་བར་མི་འགྱུར་རོ། །དེ་ཅིའི་ཕྱིར་ཞེ་ན། གཟུགས་མེད་ཅིང་བསྟན་དུ་མེད་པ་དང་། ལྟོས་པ་མེད་ཅིང་མཚན་མེད་པ་དང་། མཚན་མ་སྤངས་པས་མཚན་མ་དང་བྲལ་བ་དང་། མིང་དང་ཡི་གེ་མེད་པའི་ཕྱིར་རོ། བློ་གྲོས་མཐའ་ཡས་གལ་ཏེ་ལ་ལ་ཞིག་མདའི་ཚང་རི་རབ་ཙམ་ཤ་སྟག་འཕངས་ན་ཡང་ཕོག་པར་མི་འགྱུར་ལ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་ཐམས་ཅད་བདུད་ཀྱི་རྒྱལ་པོར་གྱུར་ལ། རེ་རེ་ལ་ཡང་བདུད་ཀྱི་དམག་རྣམ་པ་སྣ་ཚོགས་འཁོར་དང་ཅས་པར་གྱུར་པ་དེ་དག་དུས་གཅིག་ཏུ་མདའ་རྣོན་པོ་ཚང་རི་རབ་ཙམ་ཤ་སྟག་འཕངས་ན་ཡང་ནམ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟ་བུའི་གོ་ཆ་བགོས་པ་ལ་རྣམ་པར་གཞིགས་པ་འམ། ཐ་ན་སྤུ་ཉག་མ་གཅིག་ཙམ་ཉམས་པར་བྱེད་པར་མི་ནུས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སེམས་ཀྱིས་ཀྱང་ཐ་དད་པའི་འདུ་ཤེས་སྐྱེད་པར་མི་ནུས་ན་ལུས་ཀྱིས་གནོད་པ་བྱ་བ་ལྟ་སྨོས་ཀྱང་ཅི་དགོས། བྱང་ཆུབ་སེམས་དཔའ་སེམས་དཔའ་ཆེན་པོ་གང་སེམས་རྩེ་གཅིག་ཏུ་དེ་དག་འདུལ་བར་བྱེད་པ་གང་ཡིན་པ་དེ་དག་ནི་བདུད་མང་པོ་ཕམ་པར་བྱེད་ཅིང་ཉེ་བར་ཞི་བར་ཡང་བྱེད་ལ། གོ་ཆ་དེ་ལྟ་བུ་ལ་གནས་
ཤིང་གཡོ་བ་མེད་པར་སེམས་ཅན་ཐམས་ཅད་ཀྱིས་ཀྱང་རྣམ་པར་འཇིག་པར་བྱེད་མི་ནུས་སོ། དེ་ཅིའི་ཕྱིར་ཞེ་ན། འདི་ལྟར་མཚན་མ་མེད་པའི་ཕྱིར་དང་། སེམས་ཅན་རྣམས་ཀྱིས་བལྟ་བར་བྱ་བའི་སྤྱོད་ཡུལ་མ་ཡིན་བའི་ཕྱིར་སེམས་ཅན་ཐམས་ཅད་ཀྱིས་མཐོང་ཞིང་ཤེས་པར་མི་ནུས་སོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་རྟོགས་པའི་ཕྱིར་ཡང་དག་པ་ཇི་ལྟ་བ་བཞིན་དུ་གོ་ཆ་ཆེན་པོ་བགོས་པ་དེ་དག་ཤེས་ཤིང་མཐོང་ངོ། སེམས་ཅན་རྣམས་ཡོངས་སུ་བསྐྱབ་པའི་ཕྱིར་ཆོས་ཐམས་ཅད་ལ་ཡང་མངོན་པར་ཞེན་པ་མི་བྱེད་དོ། སེམས་ཅན་རྣམས་ལ་ཕན་གདགས་པའི་ཕྱིར་ཆོས་ཐམས་ཅད་ལ་ཡང་དམིགས་པར་མི་བྱེད་དེ། དེ་ལྟ་བས་ན་སེམས་ཅན་རྣམས་ཀྱིས་མཐོང་ཞིང་ཤེས་པར་མི་ནུས་སོ། གོ་ཆ་དེ་ལྟ་བུ་བགོས་པ་དེ་དག་ལ་ནི་ཁ་དོག་གི་མཚན་མ་མེད་ཅིང་བསྟན་དུ་མེད་པ་དང་། ཚིག་གི་བརྗོད་པ་མེད་པའི་ཕྱིར་གཟུགས་དང་ཡང་མཚུངས་པར་ལྡན་པར་མི་འགྱུར་ལ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དང་། ཡང་མཚུངས་པར་ལྡན་པར་མི་འགྱུར་རོ། ནང་དང་མཚུངས་པར་ལྡན་པར་མི་འགྱུར། ཕྱི་རོལ་དང་མཚུངས་པར་ལྡན་པར་མི་འགྱུར། ནང་དང་ཕྱི་རོལ་གཉིས་ཀ་དང་མཚུངས་པར་ལྡན་པར་མི་འགྱུར། ནང་ཡང་མ་ཡིན་ཕྱི་རོལ་ཡང་མ་ཡིན་པ་དང་མཚུངས་པར་ལྡན་པར་མི་འགྱུར། ཁམས་དང་ཡང་མཚུངས་པར་ལྡན་པར་མི་འགྱུར། སྐྱེ་མཆེད་དང་ཡང་ཡང་མཚུངས་པར་ལྡན་པར་མི་འགྱུར། སའི་ཁམས་དང་ཡང་མཚུངས་པར་ལྡན་པར་མི་འགྱུར། ཆུ་དང་། མེ་དང་། རླུང་དང་། ནམ་མཁའ་དང་། རྣམ་པར་ཤེས་པའི་ཁམས་དང་ཡང་མཚུངས་པར་ལྡན་པར་མི་འགྱུར། འདོད་པའི་ཁམས་དང་ཡང་མཚུངས་པར་ལྡན་པར་མི་འགྱུར། གཟུགས་དང་གཟུགས་མེད་བའི་ཁམས་དང་ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་དང་བཅས་པ་དང་། ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་མེད་དང་ཡང་མཚུངས་པར་ལྡན་པར་མི་འགྱུར། མངོན་པར་འདུ་བྱེད་པ་དང་བཅས་པ་དང་། མངོན་པར་འདུ་བྱེད་པ་མེད་པ་དང་ཡང་མཚུངས་པར་ལྡན་པར་
མི་འགྱུར། མངོན་པར་འདུ་བྱེད་པ་དང་བཅས་པ་ཡང་མ་ཡིན། མངོན་པར་འདུ་བྱེད་པ་མེད་པ་ཡང་མ་ཡིན་པ་དང་། ཡང་མཚུངས་པར་ལྡན་པར་མི་འགྱུར། ཉན་ཐོས་ཀྱི་ས་དང་ཡང་མཚུངས་པར་ལྡན་པར་མི་འགྱུར། རང་སངས་རྒྱས་ཀྱི་ས་དང་ཡང་མཚུངས་པར་ལྡན་པར་མི་འགྱུར། སངས་རྒྱས་ཀྱི་ས་དང་ཡང་མཚུངས་པར་ལྡན་པར་མི་འགྱུར། ཚིག་གི་ལམ་དང་ཡང་མཚུངས་པར་ལྡན་པར་མི་འགྱུར། གཟུགས་ཀྱི་རྒྱུ་དང་ཡང་མཚུངས་པར་ལྡན་པར་མི་འགྱུར། གཟུགས་ཀྱི་མཚན་ཉིད་དང་ཡང་མཚུངས་པར་ལྡན་པར་མི་འགྱུར། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་རྒྱུ་དང་མཚུངས་པར་ལྡན་པར་མི་འགྱུར། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་མཚན་ཉིད་དང་ཡང་མཚུངས་པར་ལྡན་པར་མི་འགྱུར། མཚན་ཉིད་དང་། མཚན་ཉིད་མ་ཡིན་བ་དང་ཡང་མཚུངས་བར་ལྡན་པར་མི་འགྱུར། ཆོས་ཐམས་ཅད་དང་མཚུངས་བར་ལྡན་པར་ཡང་མི་འགྱུར། མཚུངས་པར་ལྡན་པར་མི་འགྱུར་བ་ཡང་མ་ཡིན་ཏེ། འཆིང་བ་མེད་པ། གྲོལ་བ་མེད་པ་བགྲང་པ་བ་དང་། དཔེ་དག་གིས་ཤེས་པར་བྱ་བ་མ་ཡིན་པ་སྟེ། འདི་ལྟར་ཆོས་ཐམས་ཅད་ནི་བགྲང་བ་ལས་ཡང་དག་པར་འདས་པའི་ཕྱིར་རོ། དེ་ལྟ་བུའི་གོ་ཆ་དང་ལྡན་པ་དེ་དག་ནི་ཆོས་ཐམས་ཅད་དུ་ལྟ་བ་ཡང་དག་པར་མི་དམིགས་ཏེ། གཟུགས་སུ་ལྟ་བ་ཡང་དག་པར་མི་དམིགས་སོ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པར་ལྟ་བར་ཡང་དག་པར་མི་དམིགས་སོ། ཐ་ན་ཆོས་ཅུང་ཟད་ཙམ་དུ་ལྟ་བ་ཡང་དག་པར་མི་དམིགས་སོ། དེ་བཞིན་དུ་གོ་ཆ་དེ་ལྟ་བུ་བགོས་པ་དེ་དག་ནི་ཆོས་ཐམས་ཅད་དང་མཚུངས་པར་ལྡན་པ་ཡང་མ་ཡིན། མཚུངས་པ་མི་ལྡན་པ་ཡང་མ་ཡིན་ནོ། གཟུགས་དང་མཚུངས་པར་ལྡན་པ་ཡང་མ་ཡིན། མཚུངས་པར་མི་ལྡན་པ་ཡང་མ་ཡིན་ནོ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པར་དག་མཚུངས་པར་ལྡན་པ་ཡང་མ་ཡིན། མཚུངས་པར་མི་ལྡན་པ་ཡང་མ་ཡིན་ཏེ། ཆོས་ཐམས་ཅད་ཀྱི་མཚུངས་པར་ལྡན་པ་དང་། མཚུངས་པར་མི་ལྡན་པ་དེ་དག་ཐག་བསྲིངས་པ་ཡིན་ནོ། དེ་བཞིན་དུ་གོ་ཆ་དེ་ལྟ་བུ་བགོས་པ་དེ་དག་ལ་ནི་མངོན་པར་འདུ་བྱ་བ་མེད་དེ། བྱེད་པ་མེད་
པའི་ཕྱིར་རོ། མཚན་པ་ཡང་མེད་དེ། མཆན་མ་ཉིད་ཡོད་པ་མ་ཡིན་པའི་ཕྱིར་རོ། གནས་ཀྱི་མཚན་མ་མེད་པ། འདུས་པའི་མཚན་མ་མེད་པ། རྣམ་པར་རྟོག་པ་མེད་པ། གཡོ་བ་མེད་པ། དམིགས་པ་མེད་པ། ངོ་བོ་ཉིད་དུ་བལྟ་བ་མེད་པ་སྟེ། གོ་ཆ་བགོས་བ་ཉིད་ཀྱང་དམིགས་སུ་མེད་པའོ། དེ་བཞིན་དུ་གོ་ཆ་བགོས་པ་ཉིད་ཀྱང་ཡང་དག་པར་རྗེས་སུ་མི་མཐོང་ངོ། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གོ་ཆ་ཡང་དག་པར་བགོས་པ་ན་གང་གིས་གོ་ཆ་བགོས་པ་དང་། གང་དུ་གོ་ཆ་བགོས་པ་དང་། གང་ལས་གོ་ཆ་བགོས་པ་ཡང་དག་པར་རྗེས་སུ་མི་མཐོང་བ་དང་། བདག་གིས་གོ་ཆ་བགོས་པ་དང་། བདག་གིས་གོ་ཆ་བགོས་པར་ཡང་ཡང་དག་པར་རྗེས་སུ་མི་མཐོང་བ་དང་། འདིར་གོ་ཆ་བགོས་པ་དང་། གཞན་དུ་གོ་ཆ་བགོས་པ་ཡང་ཡང་དག་པར་རྗེས་སུ་མི་མཐོང་བ་དང་། གོ་ཆ་དེ་ལྟ་བུ་བགོས་པའི་སེམས་ཅན་ཡང་ཡང་དག་པར་རྗེས་སུ་མི་མཐོང་སྟེ། ཆོས་ཐམས་ཅད་མངོན་པར་འདུས་བྱ་བ་མེད་པའི་ཕྱིར་དང་། ཡོད་པ་མ་ཡིན་བའི་ཕྱིར་རོ། བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་དེ་ལྟ་བུ་བགོས་པ་དེ་དག་ནི་དེ་བཞིན་གཤེགས་པའི་གོ་ཆ་བགོས་པ་ཡིན་པས་ལུས་ཀྱང་མི་དམིགས། ངག་ཀྱི་མི་དམིགས། ཡིད་ཀྱང་མི་དམིགས་ཏེ་དམིགས་སུ་མེད་པའི་ཕྱིར་རྣམ་པར་རྟོག་པ་རབ་ཏུ་སྤངས་པ་ཡིན་ནོ། བྱང་ཆུབ་སེམས་དཔའ་སེམས་དཔའ་ཆེན་པོ་གང་གལ་ཏེ་ཆོས་ཅུང་ཟད་ཙམ་ལ་གནས་པར་གྱུར་ཏམ། གལ་ཏེ་ཆོས་ཅུང་ཟད་ཙམ་ལ་དམིགས་ནས་གོ་ཆ་བགོས་སམ། གོ་ཆ་བགོས་འམ། གོ་ཆ་བགོ་བར་འགྱུར་བ་དེ་དག་ནི་གོ་ཆ་ཆེན་པོ་བགོས་པ་ཞེས་མི་བྱ་སྟེ། གལ་ཏེ་སེམས་དེ་དག་ལས་ཡང་དག་པར་འདས་པར་གྱུར་པ་ན་གདོད་བསམ་གྱིས་མི་ཁྱབ་པའི་གོ་ཆ་ཆེན་པོ་བགོས་པ་ཞེས་བརྗོད་པར་བྱའོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་འགའ་ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན། བསྐལ་པ་གཅིག་གི་སེམས་ཅན་ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན་བསྐལ་པ་བརྒྱ་སྟོང་དང་བསྐལ་པ་བྱེ་བ་བརྒྱ་སྟོང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་གི་སེམས་ཅན་ཙམ་གྱི་ཕྱིར་གོ་ཆ་ཆེན་པོ་བགོས་པ་མ་ཡིན་གྱི།
བསྐལ་པ་ཚད་མེད་པ་གྲངས་མེད་པའི་སེམས་ཅན་གྱི་ཕྱིར་གོ་ཆ་ཆེན་པོ་བགོས་པ་ཡིན་ཡས་དེའི་ཕྱིར་གོ་ཆ་ཆེན་པོ་ཚད་མེད་པ་བགོས་པ་ཞེས་བྱའོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཡག་དག་པར་བགོས་པ་ན་སེམས་ཅན་གྱི་འདུ་ཤེས་ལ་མི་གནས་པའི་གོ་ཆ་གྱོན་པར་བྱེད་དོ། སེམས་ཅན་གྱི་འདུ་ཤེས་མི་སྐྱེད་པའི་གོ་ཆ་དང་། སེམས་ཅན་གྱི་འདུ་ཤེས་སྤང་བའི་གོ་ཆ་དང་། བདག་གི་འདུ་ཤེས་བཟློག་པའི་གོ་ཆ་དང་། སེམས་ཅན་གྱི་ངོ་བོ་ཉིད་ཤེས་པའི་གོ་ཆ་དང་། བདག་གི་ངོ་བོ་ཉིད་ཤེས་པའི་གོ་ཆ་དང་། འདུ་ཤེས་དང་། ཚོར་བ་ལས་ཡང་དག་པར་འདས་པའི་གོ་ཆ་དང་། ཆོས་ཐམས་ཅད་ལ་བྱེད་པའི་འདུ་ཤེས་པའི་གོ་ཆ་དང་། མཚན་མའི་གོ་ཆ་དང་། མཚན་མ་མེད་པའི་མཚན་ཉིད་ཀྱི་གོ་ཆ་དང་། སྨོན་པ་མེད་པའི་མཚན་ཉིད་ཀྱི་གོ་ཆ་དང་། ཆོས་ཐམས་ཅད་སྐྱེ་བ་མེད་པའི་མཚན་ཉིད་ཀྱི་གོ་ཆ་དང་། འགག་པ་མེད་པའི་མཚན་ཉིད་ཤེས་པའི་གོ་ཆ་དང་། ཆོས་ཐམས་ཅད་ཀྱི་བྱེ་བྲག་གི་ངོ་བོ་ཉིད་ཀྱི་མཚན་ཉིད་ཤེས་པའི་གོ་ཆ་དང་། ངོ་བོ་ཉིད་མེད་པའི་མཚན་ཉིད་ཤེས་པའི་གོ་ཆ་དང་། ཆོས་ཐམས་ཅད་ཀྱི་དངོས་པོའི་མཚན་ཉིད་ཤེས་པའི་གོ་ཆ་དང་། དངོས་པོ་མེད་པའི་མཚན་ཉིད་ཀྱི་གོ་ཆ་གྱོན་པར་བྱེད་དོ། བློ་གྲོས་མཐའ་ཡས་གལ་ཏེ་དངོས་པོ་མེད་པ་ལ་གནས་ནས་གོ་ཆ་གྱོན་པར་བྱེད་ལ་གོ་ཆ་ཆེན་པོ་བགོས་པ་ཞེས་མི་བྱ་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དངོས་པོ་ལ་མི་གནས་པར་ཡེ་ཤེས་ཆེན་པོ་ཡོངས་སུ་ཚོལ་བ་ཡིན་པས་དེའི་ཕྱིར་གོ་ཆ་ཆེན་པོ་བགོས་པ་ཞེས་བརྗོད་པ་ཡིན་ནོ། དེ་ནས་དེའི་ཆེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།། །བསྐལ་པ་སྟོང་ཕྲག་ཚད་མེད་དུ། གོ་ཆ་དཔག་མེད་བགོས་ནས་ནི། །སེམས་ཅན་དག་ནི་ཐམས་ཅད་ཀུན། །སྡུག་བསྔལ་རྣམས་ལས་གྲོལ་བར་བྱེད། དེ་ལྟའི་གོ་ཆ་ཆེ་བགོས་པ། བདུད་དམ་བདུད་ཀྱི་མངག་པ་དང་། །བདུད་ཀྱི་ལས་རྣམས་བྱེད་པ་དག། །མིག་གིས་མཐོང་བར་མི་འགྱུར་རོ། །དེ་ལས་གཞན་པའི་སེམས་ཅན་གང་། ལྟ་བ་ཐིབས་པོར་ཞུགས་པ་དག། །བསམ་གྱིས་མི་ཁྱབ་གོ་ཆ་འདི། །ངེས་ཀྱང་ཐོབ་པར་འགྱུར་མ་ཡིན། །གཟུགས་མེད་ཅིང་ནི་ཁ་དོག་མེད། །བསྟན་
དུ་མེད་ཅིང་ལྟོས་མེད་པ། །གོ་ཆ་བསམ་བགྱིས་མི་ཁྱབ་པ། །དེ་ཕྱིར་མིག་གིས་བལྟ་བྱ་མིན། མིང་མེད་མཚན་མ་མེད་པ་དང་། མཚན་མ་ཐམས་ཅད་སྤངས་པས་ན། །གོ་ཆ་བགོས་པ་དཔག་ཏུ་མེད། གལ་ཏེ་མདའ་ནི་རི་རབ་ཚད། །ཤིན་ཏུ་རྣོན་པོ་འཕངས་ན་ཡང་། བསམ་གྱིས་མི་ཁྱབ་གོ་བགོས་པས། །མདའ་ནི་རང་ཉིད་ཆག་པར་འགྱུར། འཇིག་རྟེན་བདུད་ན་ཇི་སྙེད་པས། །རི་རབ་ཚད་ནི་མདའ་རྣམས་ཀྱིས། །གོ་ཆ་ཆེན་པོ་བགོས་པ་ལ། །དུས་གཅིག་འོངས་ཏེ་འཕངས་ན་ཡང་། །གོ་ཆ་ཆེན་པོ་བགོས་པ་ཡི། སྤུ་ཉག་གཅིག་ནི་ཉམས་མི་འགྱུར། བསམ་གྱིས་མི་ཁྱབ་གོ་བགོས་པས། །གང་ཡག་ཕན་བྱེད་གཞིག་མི་ནུས། དེ་ནས་བྱང་ཆུབ་སེམས་དཔའ་རྣམས། །ལུས་དང་སེམས་ནི་འགྱུར་བ་མེད། །བསམ་གྱིས་མི་ཁྱབ་གོ་བགོས་ལ། །སུ་ཞིག་བསྒུལ་ཞིང་གཡོ་བར་ནུས། །སེམས་བསྐྱེད་ཐང་ཅིག་ཙམ་གྱིས་ཀྱང་། །བདུད་ནི་མང་པོ་ཕམ་བྱེད་པས། །བྱང་ཆུབ་སེམས་དཔའ་བསམ་མི་ཁྱབ། །བདུད་དཔུང་དག་ནི་འཇིལ་བར་བྱེད། །དེ་ལྟའི་གོ་ཆ་ཆེ་བགོས་པ། །ནམས་ཀྱང་གཡོ་བར་མི་འགྱུར་བས། སེམས་ཅན་དག་ནི་ཐམས་ཅད་ཀྱིས། །མཐོང་བར་ནུས་པ་གང་ཡང་མེད། །སེམས་ཅན་དག་ནི་ཐམས་ཀྱིས། །གོ་ཆ་མཚན་ཉིད་མི་ཤེས་པས། དེ་ཕྱིར་སེམས་ཅན་ཐམས་ཅད་ཀྱིས། མིག་གིས་མཐོང་བར་མི་ནུས་སོ། བྱང་ཆུབ་སེམས་དཔའ་སྐྱབས་མེད་ཅིང་། །ཆོས་རྣམས་ཐམས་ཅད་ཤེས་པས་ནི། །རྡོ་རྗེ་མཆོག་དག་འདྲ་བས་ན།། །དེ་ནི་ལེགས་པར་གོ་བགོས་ཡིན། །ཆོས་རྣམས་ཐམས་ཅད་མི་ལེན་ཅིང་། །སེམས་ཅན་རྣམས་ནི་སྐྱོབ་བྱེད་པས། །སངས་རྒྱས་ཆོས་ཀྱི་རྗེས་འབྲང་ཕྱིར། །དེ་ནི་ལེགས་པར་གོ་བགོས་ཡིན། །གོ་ཆར་འཛིན་པ་མེད་པ་ནི། །ཆོས་རྣམས་ཀུན་གྱི་རྗེས་འབྲང་བ། བསམ་གྱིས་མི་ཁྱབ་གོ་བགོས་པས། །དེ་ནི་ལེགས་པར་གོ་བགོས་ཡིན། །གོ་ཆ་བསྟན་པར་མེད་པར་ཡང་། །ཆོས་ནི་ཐམས་ཅད་གང་སྦྱོང་བ། ཆོས་རྣམས་ཚིག་དང་བྲལ་བས་ན། །སྟོན་པར་ནུས་པ་གང་ཡང་མེད། །གཟུགས་དང་མཚུངས་པར་མི་ལྡན་ཞིང་། ཚོར་བ་དང་ཡང་མཚུངས་མི་ལྡན། །འདུ་ཤེས་འདུ་བྱེད་རྣམ་ཤེས་དང་། །
མཚུངས་ལྡན་འདུས་བ་ཡང་མ་ཡིན། །ནང་ཏུ་མཚུངས་པར་མི་ལྡན་ཞིང་། །ཕྱིར་རོལ་ཏུ་ཡང་མཚུངས་ལྡན་མིན། ནང་དང་ཕྱི་རོལ་གཉིས་གར་ཡང་། །མཚུངས་ལྡན་འདུས་པ་ཡང་མ་ཡིན། །ཁམས་དང་མཚུངས་པར་མི་ལྡན་ཞིང་། སྐྱེ་མཆེད་དང་ཡང་མཚུངས་ལྡན་མིན། །ཁམས་དང་སྐྱེ་མཆེད་དག་དག་ཡང་། །འདུས་པར་གྱུར་པར་ཡོད་མ་ཡིན། །ས་དང་མཚུངས་པར་མི་ལྡན་ཞིང་། །ཆུ་དང་མཚུངས་པར་ལྡན་པ་མིན། །མེ་རླུང་ནམ་མཁའ་རྣམ་ཤེས་དང་། །མཚུངས་ལྡན་འདུས་པ་ཡང་མ་ཡིན། །འདོད་དང་མཚུངས་པར་མི་ལྡན་ཞིང་། །གཟུགས་དང་མཚུངས་པར་ལྡན་པའང་མིན། །གཟུགས་མེད་པའི་ཁམས་རྣམས་དང་། །མཚུངས་ལྡན་འདུས་པ་ཡང་མ་ཡིན། །ཐམས་ཅད་དམིགས་སུ་མེད་པས་ན། །མངོན་པར་འདུས་བྱེད་རྣམས་དང་ནི། མངོན་པར་འདུས་བྱས་མེད་པ་དང་། །མཚུངས་ལྡན་འདུས་པ་ཡང་མ་ཡིན། །བསམ་གྱིས་མི་ཁྱབ་གོ་བགོས་པས། །གནས་པ་མེད་ཅིང་འདུས་པ་མེད། །འཆིང་བ་མེད་ཅིང་གྲོལ་བ་མེད། །མཚུངས་པར་མི་ལྡན་ཡོད་མ་ཡིན། །གོ་ཆ་མཐའ་ནི་དཔག་མེད་པས། །ཉན་ཐོས་དག་གི་ས་དག་དང་། །རང་སངས་རྒྱས་ཀྱི་ས་དང་ཡང་། མཚུངས་ལྡན་འདུས་པ་ཡང་མ་ཡིན། །སངས་རྒྱས་ཀྱི་ནི་ས་རྣམས་དང་། །ཆོས་རྣམས་ཐམས་ཅད་ཀུན་དང་ནི། །ཐམས་ཅད་མཚུངས་པར་མི་ལྡན་ཞིང་། །ཐམས་ཅད་འདུས་པར་གྱུར་མ་ཡིན། །ཚིག་གི་ལམ་ནི་སྣ་ཚོགས་ཀྱིས། །གང་ཡང་རིགས་པར་མི་འགྱུར་བས། །དཔག་ཏུ་མེད་པའི་གོ་ཆ་འདི། །ངོ་བོ་མེད་ཅིང་བསམ་དཀའ་ཡིན། ། ཆོས་རྣམས་ཐམས་ཅད་བདག་དང་ནི། །མཚུངས་ལྡན་མཚུངས་མིན་ལྡན་མིན་པས། །བསམ་གྱིས་མི་ཁྱབ་གོ་ཆ་ནི། །བགྲང་བ་ཀུན་ལས་འདས་པ་ཡིན། །གོ་ཆ་བླ་ན་མེད་པས་ན། །འཆིང་བ་མེད་ཅིང་གྲོལ་བ་མེད། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་ཤེས་མཚན་ཉིད་མེད། །དེ་དག་གི་ནི་མཚན་ཉིད་དང་། །མཚུངས་ལྡན་འདུས་བ་ཡང་མ་ཡིན། །ཆོས་རྣམས་ཀུན་གྱི་མཚན་ཉིད་དང་། །མཚུངས་ལྡན་མཚུངས་མིན་ལྡན་པའང་མིན། །མཚན་མ་མེད་པ་དག་དང་ཡང་། །མཚུངས་ལྡན་འདུས་པ་ཡང་མ་ཡིན། །གོ་ཆ་བླ་ན་མེད་པས་ནི། །འཆིང་བ་
མེད་ཅིང་གྲོལ་བ་མེད། །ཆོས་རྣམས་དག་ནི་ཐམས་ཅད་ལས། །ཆོས་གཅིག་གྲངས་སུའང་བགྲང་བ་མེད། །ཆོས་རྣམས་ཐམས་ཅད་དག་ལས་ནི། །གོ་ཆ་དམིགས་པར་མི་འགྱུར་པས། །དེ་ཕྱིར་བླ་ན་མེད་འགྱུར་ཞིང་། །བསམ་གྱིས་མི་ཁྱབ་པ་ཞེས་བརྗོད། །གོ་ཆ་ལ་ནི་གཟུགས་མེད་ཅིང་། །ཚོར་བ་འདུ་ཤེས་ཡོད་མ་ཡིན། །འདུ་ཤེས་མེད་ཅིང་རྣམ་ཤེས་མེད། །ཕུང་པོ་རྣམས་ཀྱིས་བསྡུས་པའང་མིན། །དེ་ལྟའི་དཔའ་བོ་གང་དག་གིས། །གོ་ཆ་ཆེན་པོ་འདི་བགོས་པས། །ལུས་དང་སེམས་ནི་མི་དམིགས་པས། །ཆོས་ནི་ཅུང་ཟད་མཐོང་མི་འགྱུར། །བསམ་པ་རྣམས་ལས་འདས་པའི་ཕྱིར། རྣམས་དག་སེམས་ལ་རབ་གནས་ཤིང་། །རྟག་ཏུ་ཞུམ་པ་མེད་བས་ན། བསམ་གྱིས་མི་ཁྱབ་པ་ཞེས་བརྗོད། །ཤིན་དུ་བརྟན་པས་གོ་བགོས་པ། །དེ་ཡི་སེམས་ནི་མི་སྒུལ་ཞིང་། །བསྐལ་པའི་ཚད་ནི་མི་འཛིན་པས། །བསམ་གྱིས་མི་ཁྱབ་པ་ཞེས་བརྗོད། གོ་ཆ་ལ་ནི་ཚད་མེད་ཅིང་། །ཆོས་དང་ཆོས་མིན་མི་ལེན་པས། །དུས་ཀྱི་ཚད་ནི་མེད་པའི་ཕྱིར། །གཞལ་དུ་མེད་པ་ཞེས་བྱའོ། །སེམས་ཅན་འདུ་ཤེས་མི་སྐྱེད་ཅིང་། །བདག་གི་འདུ་ཤེས་ཡོད་མ་ཡིན། ། འདུ་ཤེས་འདི་ནི་ཤེས་པའི་ཕྱིར། །འདུ་ཤེས་ཐམས་ཅད་སྐྱེ་མི་འགྱུར། །ཆོས་རྣམས་ཐམས་ཅད་ཤེས་ཀྱང་ནི། །ཆོས་དེའི་འདུ་ཤེས་སྐྱེ་མི་འགྱུར། །དེ་ལྟར་གོ་ཆ་གང་བགོས་པས། བསམ་གྱིས་མི་ཁྱབ་པ་ཞེས་བརྗོད། །གཞན་ཡང་བློ་གྲོས་མཐའ་ཡས་གོ་ཆ་ཆེན་པོ་འདི་ནི་ཆོས་གྱ་ནོམ་པའི་བཀོད་པའི་ཡོ་བྱད་ཅེས་ཀྱང་བྱ། །མཆོག་ཏུ་གྱུར་པ་ཞེས་ཀྱང་བྱ་སྟེ། རྣམ་པར་གཞིག་པར་མི་ནུས་པའི་ཕྱིར་རོ། ཆོས་ཐམས་ཅད་དབྱེར་མེད་པ་ཞེས་བྱ་སྟེ། ཆོས་ཅུག་ཟད་ཙམ་ལ་ཡང་བྱེ་བྲག་ཏུ་འབྱེད་པ་མེད་པའི་ཕྱིར་རོ། བྱང་ཆུབ་སེམས་དཔའ་སེམས་དཔའ་ཆེན་པོ་གང་གོ་ཆ་འདི་ལྟ་བུ་བགོས་པ་དེ་ནི་ཤེས་རབ་ཆེན་པོའི་སྟོབས་འཛིན་ཅིང་ཐེག་པ་ཆེན་པོ་དང་ཐེག་པ་མཆོག་དང་མཚུངས་པ་མེད་པའི་ཐེག་པ་དང་། ཡོངས་སུ་བསྡུད་པ་ཆེན་པོའི་ཐེག་པ་དང་དཔག་ཏུ་མེད་པ་སྡུད་པའི་ཐེག་པ་ལ་ཞོན་ནས་སེམས་ཅན་ཐམས་ཅད་ཐེག་པ་འདིས་འདེགས་པར་བྱེད་ཀྱང་ཐེག་པ་འདི་ལ་མི་ཤོང་བ་གང་ཡང་མེད་ལ། ཐེག་པ་དེ་ཡང་
འཕེལ་བ་མེད་ཅིང་འགྲིབ་པ་མེད་པ་པར་སེམས་ཅན་རྣམས་བདེ་བ་ལ་དགོད་པར་བྱེད་ཅིང་སེམས་ཅན་རྣམས་བདེ་བར་ངེས་པར་བྱུང་བར་བྱེད་དོ། སེམས་ཅན་གང་ངེས་པར་བདེ་བར་བྱེད་པའི་ཐེག་པ་འདི་ལ་ཞོན་པ་གང་ཡོན་པ་དེ་དག་ལ་ནི་ལུས་དང་སེམས་ངལ་ཞིང་ཉོན་མོངས་པར་གྱུར་པར་ཡོད་པར་མི་འགྱུར་རོ། །བློ་གྲོས་མཐའ་ཡས་ཐེག་པ་འདི་ནི་ལྷ་དང་། མི་དང་། ལྷ་མ་ཡན་དུ་བཅས་པའི་འཇིག་རྟེན་དང་། ཉན་ཐོས་དང་། རང་སངས་རྒྱས་དང་ཐེག་པ་གཞན་གྱིས་ངེས་པར་འབྱུང་བར་བྱེད་པ་ཐམས་ཅད་ཟིལ་གྱིས་གནོད་པར་བྱེད་དོ། ཐེག་པ་འདི་ནི་འགྲོ་བ་མེད་པ་འོང་བ་མེད་པ་གནས་པ་མེད་པ་བལྟར་མེད་པ་ཤེས་མེད་པ་སྔོན་གྱི་མཐའ་མི་དམིགས་པ་ཕྱི་མའི་མཐའ་མི་དམིགས་པ། དབུས་ཀྱི་མཐའ་མི་དམིགས་པ། དུས་གསུམ་མཉམ་པ་ཉིད་དུ་གྱུར་ཅིང་། ནམ་མཁའ་དང་མཚུངས་པ། ཀུན་ནས་ཉོན་མོངས་པའི་རྡུལ་མི་སྤོང་པ། བལྟས་པ་མེད་པ། ཐོགས་པ་མེད་པ་མངོན་པར་ཞེན་པ་མེད་པ་ཡིན་པས། ཐེག་པ་འདིས་ངེས་པར་འབྱུང་བར་བྱའོ། ཐེག་པ་འདི་ནི་ཚད་མེད་པ་ཡིན་ཏེ་གཞལ་དུ་མེད་པའི་ཕྱིར་རོ། རང་བཞིན་གྱིས་ཐོགས་པའི་མཚན་མ་མེད་པ་ཡག་ཡིན་ཏེ། མཚན་མ་ལ་མི་གནས་པའི་ཕྱིར་རོ། ཐེག་པ་མཆོག་འདི་ལ་ཞོན་པ་གང་ཡིན་པ་དེ་དག་ནི་སེམས་ལ་ཞུམ་པ་མེད་པར་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞོལ་ཞིང་འཇུག་པར་འགྱུར་རོ། བློ་གྲོས་མཐའ་ཡས་འདི་ལྟ་སྟེ། དཔེར་ན་མར་མེ་དང་ཉི་མ་དང་ཟླ་བའི་དཀྱིལ་འཁོར་ནི་སེམས་ཅན་རྣམས་ཀྱི་སྣང་བ་ཆེན་པོར་བྱེད་དོ། དེ་བཞིན་དུ་ཐེག་པ་ཆེན་པོ་འདི་ཡང་འོད་ཟེར་གྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གསལ་བར་བྱེད་ཅིང་གང་གིས་ཀྱང་ཟིལ་གྱིས་ནོན་པ་འམ་བར་ཆད་བྱེད་མི་ནུས་པས་ཡོན་ཏན་ཆེན་པོའི་རྒྱ་མཚོ་དཔག་ཏུ་མེད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་འགྱུར་རོ། བློ་གྲོས་མཐའ་ཡས་ཐེག་པ་འདི་ནི་མུན་གནག་སྤོང་བར་བྱེད་ཅིང་འཇིག་རྟེན་གྱི་ནད་ཐམས་ཅད་རབ་ཏུ་སེལ་པ་དང་། འཇིག་རྟེན་པའི་ཆོས་ཐམས་ཅད་ལས་ཡང་དག་པར་འདས་ཤིང་སེམས་ཅན་ཆེན་པོ་ཡོངས་སུ་སྡུད་པ་ཡིན་པས་དམན་པ་རྣམས་ཀྱི་བཞོན་པར་བྱ་བ་མ་ཡིན་ཏེ། གོ་ཆ་ཆེན་པོ་བགོས་པ་ནི་མ་གཏོགས་སོ། ངས་ཇི་སྐད་དུ་འདི་བསྐལ་པ་ཚད་མེད་པ་
ནས་སེམས་ཅན་རྣམས་ཡོངས་སུ་བསྐྱབས་པ། སངས་རྒྱས་མང་པོ་ལ་མཆོད་ཅིང་རིམ་གྲོ་བྱས་པ། དགེ་བའི་རྩ་བ་རྣམས་བསྐྱེད་པ། ཚོགས་ཡོངས་སུ་དག་པ་རྣམས་ཀྱིས་བཞོན་པ་བྱ་བ་ཡིན་གྱི། ཉན་ཐོས་དང། རང་སངས་རྒྱས་དང་དེ་ལས་གཞན་པ་འཇིག་རྟེན་གྱིས་བཅིངས་པ་འཇིག་རྟེན་དང་མཚུངས་པར་ལྡན་པ་དང་། མངོན་བའི་ང་རྒྱལ་ཅན་དང་། མུ་སྟེགས་ཅན་ལ་མངོན་པར་ཡིད་ཆེས་པར་བྱེད་པ་དམན་པ་ཐམས་ཅད་ཐེག་པ་འདིའི་མིང་ཐོས་པར་ཡང་མི་འདོད་ན་ཐེག་པ་འདི་ལ་བཞོན་པར་བྱ་བ་ལྟ་སྨོན་ཀྱང་ཅི་དགོས་ཞེས་བསྲུངས་པ་ལྟ་བུའོ། གལ་ཏེ་སེམས་ཅན་གང་ལ་ལ་ཞིག་བསམ་གྱིས་མི་ཁྱབ་པའི་སྤྱོད་ཡུལ་ལ་རྣམ་པར་རྩེན་ཅིང་ཐེག་པ་འདི་ལ་ཞོན་བར་བྱེད་ན་སྨོན་ལམ་ཁྱད་བར་དུ་འཕགས་པ་ཇི་ལྷ་བ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་འགྱུར་རོ། བློ་གྲོས་མཐའ་ཡས་ཐེག་པ་འདི་ནི་མཐའ་མེད་དེ། སྔོན་དང་། དབུས་དང་། ཐ་མའི་མཐའ་རྟོགས་པར་མི་ནུས་སོ། ཐེག་པ་འདི་ནི་མཐའ་ཡོངས་སུ་ཆད་པ་ཡིན་ཏེ། མཐའ་མི་དམིགས་པས་མཐའ་དཔག་ཏུ་མེད་དོ། ཐེག་པ་འདིའི་མཐའ་ནི་ཚད་མེད་པའི་མཐའ་ཡིན་ནོ། བློ་གྲོས་མཐའ་ཡས་ཐེག་པ་ལ་ནི་མཐའ་དཔག་ཏུ་མེད་པས་དབུས་ཀྱི་མཐའ་ཡང་མེད་ལ་སྤང་པར་བྱ་བའི་མཐའ་ཅུང་ཟད་ཙམ་ཡང་ཡོད་པ་མ་ཡིན་ནོ་དེ་ལ་མཐའ་སྤངས་པ་ཞེས་བྱ་བ་ནི་མཐའ་ཞེས་བྱ་བ་ཅུང་ཟད་ཀྱང་མེད་པས་སྤངས་པ་ཞེས་བཤད་དོ། རྣམ་པར་མི་རྟོག་པའི་མཐའ་ལ་མཐའ་སྤངས་པ་ཞེས་བཤད་དེ། དེ་ནི་ཐེག་པ་འདིའི་མཐའ་སྤངས་པ་ཞེས་བྱའོ། མཐའ་ཡོད་པ་མ་ཡིན་པས་དབུས་ཀྱི་མཐའ་ཞེས་བྱའོ། མཐའ་ཡོད་པ་མ་ཡིན་པས་མཐའི་མཐའ་ཞེས་བྱའོ། མཐའ་ཡོད་པ་མ་ཡིན་པས་མཐའ་ཞེས་བཤད་དོ། །མཐའ་དེ་ལ་ནི་མཐའ་དམིགས་སུ་མེད་དོ། དམིགས་སུ་མེད་པའི་ཕྱིར་མཐའི་མཐའ་དང་། དབུས་ཀྱི་མཐའ་དང་། མཐའ་མེད་པས་རྒྱུན་མི་ཆད་པར་མཐའི་སྒོར་འཇུག་པར་འགྱུར་རོ། །མཐའི་སྒོར་ཞུགས་པའི་ཕྱིར་ཐེག་པ་འདི་དེ་ལས་ཡང་དག་པར་འདས་པ་ཡིན་ཡང་ཡང་དག་པར་འདས་པ་ཉིད་དམིགས་སུ་མེད་དོ། །བློ་གྲོས་མཐའ་ཡས་མཐའ་ཉིད་གང་ཞེ་ན། འདི་ལྟ་སྟེ།
ཆད་པ་དང་། རྟག་པའི་མཐའ་གང་ཡིན་པའོ། ཚིག་གི་རྗེས་སུ་ཞུགས་པའི་ཕྱིར་མཐའ་ཉིད་མཐའ་མ་ཡིན་ནོ། །དེས་རྟག་པའི་མཐའ་སྤངས་ན་མཐའི་མཐའ་ཡང་ཡོད་པར་མི་འགྱུར་ཏེ། མཐའ་དེའི་མཚན་ཉིད་མཐའ་མེད་པའི་ཕྱིར་རོ། དེ་ལ་མཐའ་ཞེས་བྱ་བ་ནི་རྣམ་པར་རྟོག་པ་མེད་ཅིང་རྣམ་པར་རྟོག་པ་ཆད་པའི་ཕྱིར་མཐའ་ལས་ཡང་དག་པར་འདས་ཤིང་ཆད་པ་དང་། རྟག་པར་རབ་ཏུ་སྤངས་པ་ཡིན་ནོ། བློ་གྲོས་མཐའ་ཡས་གང་འཇིག་ཚོགས་ལ་ལྟ་བ་དང་བཅས་པ་དེ་ནི་མཐའི་སྒོ་གནས་པར་བྱེད་ཀྱི། གང་འཇིག་ཚོགས་ལ་བལྟ་བ་མེད་པ་དེ་དག་ནི་མཐའི་སྒོ་ལ་མངོན་པར་ཞེན་པར་མི་བྱེད་དོ། མངོན་པར་ཞེས་པ་མེད་པའི་ཕྱིར་ཆད་པ་དང་། རྟག་པའི་མཐའ་ལས་ཡང་དག་པར་འདས་པ་ཡིན་ནོ། བློ་གྲོས་མཐའ་ཡས་ཆད་པ་དང་། རྟག་པའི་མཐའ་དེ་དག་ནི་ཡང་དག་པར་ཡོད་པ་མ་ཡིན་གྱི་སླུ་བའི་ཚིག་སྲིད་པ་གསུམ་པོ་དག་ན་མཐའ་རྣམ་པ་གཉིས་སུ་རྣམ་པར་རྟོག་པར་བྱེད་པ་ཡིན་པས་མཐའ་གཉིས་པོ་དེ་དག་གིས་ཡོངས་སུ་བསྡུས་ཤིང་མཚུངས་པར་ལྡན་པར་མ་གྱུར་ན་ཡང་དག་པར་འདས་ཤིང་འཇིག་ཚོགས་ལ་ལྟ་བ་སྤོང་པའི་ཕྱིར་མཐའ་གཉིས་ཀྱི་སྒོ་ལ་མངོན་པར་ཞེན་པར་མི་བྱེད་དོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་འཇིག་ཚོགས་ལ་ལྟ་བ་ད་དུང་མ་སྤངས་པ་གང་ཡིན་དེ་དག་ནི་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་པ་ཞེས་མི་བྱ་སྟེ། མཐའི་སྒོ་དེ་དག་ལ་མངོན་པར་ཞེན་པར་གྱུར་པས་གལ་ཏེ་མཐའ་སྤོང་བར་འདོང་པར་གྱུར་ན་ཡང་མཐའ་སྤོང་པའི་འདུ་ཤེས་སྐྱེད་པར་བྱེད་པས་སྔོན་དང་ཕྱིར་མའི་མཐའ་ལ་རྣམ་པར་རྟོག་པར་བྱེད་དོ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཇིག་ཚོགས་ལ་ལྟ་བ་སྤངས་པ་གང་ཡིན་བ་དེ་དག་ནི་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་བཞོན་པ་ཞེས་བྱ་སྟེ། མཐའི་སྒོ་དེ་དག་ལ་མངོན་པར་ཞེན་པ་མེད་པས་མཐའ་གཉིས་པོ་དག་ལས་ཡང་དག་པར་འདས་ནས་རབ་ཏུ་བདེ་བའི་ཐེག་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་བློ་གྲོས་ཆེན་པོའི་སྟོབས་ཀྱིས་མཐའི་ཆོས་ལ་གནས་པ་
ཐམས་ཅད་མི་སྤོང་མི་གཞིག་པའི་ཐབས་ལ་མཁས་པས་ཞི་གནས་དང་། ལྷག་མཐོང་ཡོངས་སུ་བསྡུས་ནས་མཚན་མ་མེད་པ་མངོན་པར་བསྒྲུབས་ཏེ། མཚན་མ་མེད་པ་མངོན་སུམ་དུ་གྱུར་ན་སངས་རྒྱས་རྣམས་ཀྱིས་ཆོས་ཀྱི་སྣང་བ་སྦྱིན་བར་འགྱུར་ལ། ཆོས་ཀྱི་སྣང་བ་ཐོབ་པའི་དབང་གིས་མཐའ་ཐམས་ཅད་ཡོངས་སུ་སྤོང་ཞིང་མཐའི་སྤོད་བ་དེ་དག་ལ་ཡང་མངོན་པར་ཞེན་པ་མེད་པས་མཐའ་ཅུང་ཟད་ཙམ་ལ་ཡང་མཐའི་སྒོ་དེ་དག་དང་མཚུངས་པར་ལྡན་པ་འམ། མཚུངས་པར་མི་ལྡན་བ་འམ། ཡིད་ལ་བྱེད་པ་འམ། ཡིད་ལ་མི་བྱེད་པ་ཡང་མེད་པར་ཆོས་ཐམས་ཅད་ལ་ཐབས་མཁས་པས་ཞི་གནས་དང་། ལྷག་མཐོང་དེ་ལ་རབ་ཏུ་གནས་ཤིང་ཆོས་ཀྱི་སྣང་བ་ཆེན་པོ་དཔག་ཏུ་མེད་པ་འཐོབ་པར་འགྱུར་རོ། ཆོས་ཀྱི་སྣང་བ་ཐོབ་པའི་ཕྱིར་ནི་མུན་ནག་དང་། སྤུ་ཟིང་ཞེས་བྱེད་པའི་འཇིགས་པ་དག་ཡོངས་སུ་སྤངས་ནས་ཆོས་ཀྱི་རྒྱལ་མཚན་ཆེན་པོ་བསྒྲེང་བ་དང་། ཚངས་པའི་སྒྲ་ཆེན་པོ་འབྱིན་པ་དང་། སེང་གེའི་སྒྲ་ཆེན་པོ་བསྒྲགས་ནས་སེམས་ཅན་རྣམས་ལ་འདི་སྐད་དུ་ཀྱེ་ཁྱེད་རྣམས་མྱུར་དུ་འདིར་ཤོག་ལ་ཐེག་པ་ཆེན་པོ་རབ་ཏུ་བདེ་བའི་ཐེག་པ་དང་། ཁ་ལོ་བསྒྱུར་བ་ཆེན་པོའི་ཐེག་པ་དང་། རབ་ཏུ་གཞོལ་བ་ཆེན་པོའི་ཐེག་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་ནས་སེམས་ཅན་རྣམས་ལ་ཆོས་ཀྱི་སྣང་བ་རབ་ཏུ་སྟོན་ལ། ཆོས་ཀྱི་སྣང་བའི་དབང་གིས་སེམས་ཅན་རྣམས་གོ་ཆ་ཆེན་པོ་བགོས་ནས་ཐེག་པ་ཆེན་པོ་གཞོན་བ་ལ་དགོད་པར་བྱའོ། ཞེས་སྒྲོགས་པར་བྱེད་དོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཐེག་པ་ཆེན་པོ་འདི་དང་། གོ་ཆ་ཆེན་པོ་འདི་ལ་སེར་སྣ་མི་སྐྱེད་པར་སེམས་ཅན་རྣམས་ལ་བྱང་ཆུབ་ཏུ་སེམས་བསྐྱེད་དེ། གོ་ཆ་འདི་བགོས་ནས་ཐེག་པ་ཆེན་པོ་འདི་ལ་ཞོན་པར་གྱུར་ཅིག་ཅེས་སྨོན་ལམ་གདབ་པར་བྱའོ། །ཐེག་པ་ཆེན་པོ་འདི་དག་གོ་ཆ་ཆེན་པོ་འདི་ལ་སེར་སྣ་མི་བྱ་བར་སེམས་ཅན་རྣམས་ལ་བརྒྱུད་ཅིག་སྤེལ་བར་བྱའོ། །གཞན་ཡང་སེམས་ཅན་རྣམས་གོ་ཆ་འདི་བགོས་ནས་ཐེག་པ་ཆེན་པོ་འདི་ལ་ཞོན་ཏེ་ངེས་པར་འབྱུག་བར་གྱུར་ཅིག་ཅེས་སྨོན་ལམ་གདབ་པར་བྱའོ། །བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་སྤྱོད་པ་འདི་ལྟ་བུ་ལ་གནས་པའི་ཚེ་སངས་རྒྱས་ཀྱི་ཞིང་ཡོངས་སུ་དག་པ་ཡང་ཡོངས་སུ་སྡུད་པར་བྱེད་ལ་ཉན་ཐོས་དང་། བྱང་ཆུབ་སེམས་དཔའ་རྣམས་ཀྱི་ཡོན་ཏན་ཡོངས་སུ་རྫོགས་པའི་ཡང་སྡུད་པར་འགྱུར་བས་ཡོན་ཏན་གྱི་རྒྱ་མཚོ་ཆེན་པོ་དཔག་ཏུ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱའོ། བློ་གོས་མཐའ་ཡས་ཐེག་པ་ཆེན་པོ་འདི་ནི་ཆོས་ཀྱི་དབྱིངས་དང་མཉམ་པས་ཚུ་རོལ་གྱི་འགྲམ་དང་། ཕ་རོལ་གྱི་འགྲམ་དམིགས་སུ་མེད་མོད་ཀྱི་འོན་ཀྱང་རང་གི་དང་གིས་སེམས་ཅན་ཐམས་ཅད་བཏེག་སྟེ། འདི་ནས་ཆོས་ཀྱི་དབྱིངས་སུ་ཕྱིན་པར་བྱེད་པས་གནས་མེད་པའི་རྗེས་སུ་འཐུན་པ་དང་། ཆོས་ཀྱི་དབྱིངས་ཀྱི་རྗེས་སུ་འཐུན་པ་དང་། གོ་ཆའི་རྗེས་སུ་འཐུན་བར་འགྱུར་རོ། གང་གིས་ཐེག་པ་ཆེན་པོའི་ཆོས་ཀྱི་དབྱིངས་དང་མཉམ་འདི་ལ་ནན་ཏན་གྱིས་སྒྲུབ་པར་བྱེད་པ་དེ་དག་ནི་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་རབ་ཏུ་ཞུགས་པ་ཡིན་ནོ། བློ་གྲོས་མཐའ་ཡས་འདི་ལྟ་སྟེ། དཔེར་ན་ཆོས་ཀྱི་དབྱིངས་ནི་རྡུལ་གྱིས་གོས་པ་མེད་པས་གང་གིས་རྣམ་པར་གཞིག་པའམ་གོས་པར་བྱར་མེད་དོ། ཐེག་པ་ཆེན་པོ་འདི་ཡང་དེ་བཞིན་དུ་རྣམ་པར་འཇིག་པ་མེད་ཅིང་གོས་པ་མེད་དེ། རྣམ་པར་འཇིག་པ་དང་། གོས་པ་མེད་པའི་ཕྱིར་ཐམས་ཅད་མཁྱེན་པའི་ཡེ་ཤེས་ལ་རབ་ཏུ་གཞོལ་བར་འགྱུར་ཏེ། དེའི་ཕྱིར་ཐེག་པ་འདི་ནི་ཐེག་པ་ཆེན་པོ་ཞེས་བྱའོ། ཐེག་པ་འདི་ནི་ཐོག་པ་མེད་པས་ལྷ་དང་། མི་དང་ལྷ་མ་ཡིན་དུ་བཅས་པའི་འཇིག་རྟེན་ཐམས་ཅད་གང་གིས་ཀྱང་བསྐོར་མི་ནུས་ཤིང་མངོན་པར་ཞེན་པ་མེད་པའི་ཕྱིར་ཐམས་ཅད་མཁྱེན་པའི་ཡེ་ཤེས་ལ་རབ་ཏུ་གཞོལ་བ་ཡིན་པས་དེའི་ཕྱིར་ཐེག་པ་འདི་ནི་ཐེག་པ་ཆེན་པོ་ཞེས་བྱའོ། དེ་ལ་ཐེག་ཆེན་པ་པོ་ཞེས་བྱ་བ་ནི་བཀོད་པ་ཆེན་པོ་གང་ཡིན་བ་སྟེ། བཀོད་པ་ཐམས་ཅད་གང་ཡང་ཐེག་པ་ཆེན་པོ་འདིར་མི་འཇུག་པ་མེད་པས་སོ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་འདི་སྐད་ཅེས་གསོལ་ཏོ། བཅོམ་ལྡན་འདས་ཐེག་པ་འདི་ལ་ཡང་འདུས་བྱས་ཀྱི་བཀོད་པ་ཞེས་བགྱི་བ་ལྟ་ཅི་མཆིས་ལགས་སམ། དེ་ནས་
བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། བློ་གྲོས་མཐའ་ཡས་དེ་དེ་བཞིན་ནོ། དེ་དེ་བཞིན་ཏེ། ད་ནི་འཇིག་རྟེན་པའི་རྗེས་སུ་ཐེག་པ་འདིར་ཡང་འདུས་བྱས་ཀྱི་བཀོད་པ་ཐམས་ཅད་རབ་ཏུ་སྟོན་པར་མཛད་དོ། བློ་གྲོས་མཐའ་ཡས་འཁོར་ལོས་སྒྱུར་བའི་རྒྱལ་པོ་འམ། ལྷའི་དབང་པོ་བརྒྱ་བྱིན་ནམ། ཚངས་པའི་རྒྱལ་པོ་ཡང་རུང་སྟེ། དེ་དག་ཐམས་ཅད་ནི་ཐེག་པོ་འདི་ལས་བྱུང་ངོ། འབྱུང་ངོ་། འབྱུང་བར་འགྱུར་ཏེ། འཁོར་ལོས་སྒྱུར་བ་དང་། བརྒྱ་བྱིན་དང་། ཚངས་པའི་འབྱོར་པའི་ས་ལ་གནས་པར་བྱེད་ཀྱང་འཁོར་བའི་ཉོན་མོངས་པའི་སྐྱོན་རྣམས་ཀྱིས་གོས་པར་མི་འགྱུར་བས་འདོད་པ་རྣམས་ཀྱི་ཉེས་དམིགས་རེ་རེ་ནས་འཇལ་བར་བྱེད་ཅིང་གཞལ་ནས་ཀྱག་ཡོངས་སུ་སྐྱོ་བར་གྱུར་པས་དེས་པར་འབྱུང་བའི་ལམ་རབ་ཏུ་རྟོག་པར་འགྱུར་རོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཐེག་པ་འདི་ལ་ཞོན་པར་བྱེད་པ་གང་ཡིན་པ་དེ་དག་ནི་འཁོར་བ་ལེན་པར་བྱེད་ཀྱང་གནས་ཐམས་ཅད་དུ་སྐྱོན་གྱིས་གོས་པར་མི་འགྱུར་ཞིང་ཉེས་དམིགས་ཀྱང་མཐོང་ལ་ངེས་པར་འབྱུང་བ་ཡག་རབ་ཏུ་ཤེས་པས་ངས་འདིར་མ་བསྟན་པའི་ཆོས་རྣམས་དང་། བཀོད་པ་གང་ཡིན་པ་དེ་དག་ཀྱང་ཐེག་པ་འདི་འི་མཚན་ཉིད་ཀྱི་དབང་གིས་ཆོས་དེ་དག་དང་། བཀོད་པ་དེ་དག་ཀྱང་རབ་ཏུ་རྟོག་ནས་བླ་ན་མེད་པ་ཡག་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།། །།ཐེག་ཆེན་བླ་ན་མེད་པའི་ཐེག་། །ཐེག་པ་འདི་ནི་བསམ་མི་ཁྱབ། །གང་ཞིག་ཐེག་པ་འདི་ཞོན་བ། །དེ་དག་ངེས་པར་འབྱུང་བར་འགྱུར། །བརྟེན་པའི་གནས་ཆེན་ཡིན་བས་ན། །ཐེག་པ་འདི་ནི་བསམ་མི་ཁྱབ། །མཐའ་ནི་དཔག་མེད་ཚད་མེད་པས། །དེ་ཕྱིར་ཐེག་ཆེན་ཞེས་བྱའོ། །སེམས་ཅན་དག་ནི་ཐམས་ཀྱིས། །ཐེག་པ་འདི་ལ་གཞོལ་བྱེད་ཀྱང་། །ཐེག་པ་འདི་ལ་འགྲིབ་པ་མེད། །འཕེལ་བར་ཡང་ནི་མི་འགྱུར་རོ། །སེམས་ཅན་དག་ནི་ཐམས་ཅད་ལས། །གང་ཞིག་ཐེག་པ་འདི་ཞོན་བ། །བདེ་བར་གཞོལ་བ་འགྱུར་བས་ན། །དེ་ན་སྡུག་བསྔལ་ཅི་ཡང་མེད། །
གལ་ཏེ་བྱང་ཆུབ་སེམས་དཔའ་རྣམས། །ཐེག་པ་འདི་ལ་གཞོལ་བྱེད་ན། །དྲང་པོར་འགྲོ་ཞིང་གཞན་སྤྱོད་མེད། །ལུས་དང་སེམས་ནི་ངལ་མི་འགྱུར། །འཇིག་རྟེན་རྣམས་ནི་གསལ་བྱེད་པས། །ལྷ་མི་ལྷ་མ་ཡིན་རྣམས་ཀྱི། །ཐེག་ཆེན་བླ་མེད་འདི་ལ་ནི། །སེམས་བསྐྱེད་རབ་ཏུ་གཞོལ་བར་བྱ། །རང་སངས་རྒྱས་དང་ཉན་ཐོས་ཀྱི། །ཐེག་པ་ཟིལ་གནོན་གང་འདོད་པ། །ཐེག་ཆེན་བླ་མེད་འདི་ལ་ནི། །སེམས་བསྐྱེད་རབ་ཏུ་གཞོལ་བར་བྱ། །འགྲོ་བ་མེད་ཅིང་འོང་བ་མེད། །གནས་པ་མེད་ཅིང་སྡོན་མཐའ་མེད། །ཕྱི་དང་དབུས་ཀྱི་མཐའ་ཡག་མེད། །ཐོབ་མེད་མཐོང་བ་མེད་པས་ན། །དུས་གསུམ་དག་ནི་མཉམ་པ་ཉིད། །ཇི་ལྟར་ནམ་མཁའ་དག་པ་ལྟར། །ཐེག་པ་འདི་ཡང་དེ་བཞིན་ཏེ། །ཉོན་མོངས་དག་ནི་རབ་ཏུ་སྤངས། །ཐེག་པ་འདི་ནི་ལྟོས་པ་མེད། །སྒྲིབ་མེད་ཐོགས་པ་མེད་པས་ན། ཐམས་ཅད་ཡོངས་སུ་སྐྱོབ་པར་ནུས། །གཞོལ་བར་བྱེད་ཀྱང་མངོན་ཞེན་མེད། །ཐེག་པ་འདི་ནི་ཚད་མེད་པས། །མཚན་མ་ཐམས་ཅད་ཡོད་མ་ཡིན། །རང་བཞིན་དག་ནི་མི་དམིགས་པར། །འཇིགས་མེད་བསམ་གྱིས་མི་ཁྱབ་ཡིན། །གང་ཞིག་ཐེག་པ་འདི་ཞོན་ནས། །འཇིགས་པ་མེད་པ་ཐོབ་པས་ནི། །དེ་ཡིས་སངས་རྒྱས་ཆོས་དག་ལ། །སྒྲིབ་མེད་ཐོགས་པ་མེད་པར་འགྱུར། །ཐེག་པ་འདི་ལ་གང་ཞོན་པ། །འཇིག་རྟེན་ཀུན་ནི་སྣང་བྱེད་པར། །ཉི་མའི་འོད་ཟེར་བརྒྱ་སྟོང་ལྟར། །ཐམས་ཅད་དུ་ནི་གསལ་བར་བྱེད། །ཐེག་པ་འདི་ནི་མི་འཇིགས་ཅིང་། །ཟིལ་གྱིས་གནོན་པ་མེད་པས་ན། །ཡོན་ཏན་ཚོགས་ནི་དཔག་མེད་ལྡན། །བླ་མེད་འདི་ལ་གཞོལ་བར་བྱ། །ཐེག་པ་འདི་ནི་འཇིག་རྟེན་འདས། །ཁམས་དག་ལས་ནི་ངེས་པར་འབྱུང་། །མུན་ནག་དག་ནི་རབ་ཏུ་སྤངས། །ཟག་པ་མེད་ལ་གཞོལ་བར་བྱེད། །ཐེག་འདི་བྱང་ཆུབ་སེམས་དཔའ་རྣམས། །འབའ་ཤིག་ཡོངས་སུ་འཛིན་བས་ན། །དེ་ལས་གཞན་པའི་སེམས་ཅན་རྣམས། །དེར་ནི་ཤོང་བར་མི་འགྱུར་རོ། །བློ་དང་ལྡན་པ་གང་ཞིག་གིས། །བསྐལ་པ་སྟོང་ཕྲག་ཚད་མེད་དུ། །ཐབས་མཁས་ནན་ཏན་སྒྲུབ་བྱེད་པ། །ངེས་འདོད་ཐེག་པ་འདི་བཞིན་འགྱུར། །ཉན་ཐོས་ཀྱི་ནི་ཚོགས་རྣམས་དང་། །
རང་རྒྱལ་དག་གི་ཚོགས་དག་དང་། །མུ་སྟེགས་དག་ནི་ཐམས་ཅད་ཀྱིས། །ཐེག་པ་འདི་ལ་གཞོལ་མི་ནུས། །གལ་ཏེ་སེམས་ཅན་གང་ཞིག་གིས། །བསམ་གྱིས་མི་ཁྱབ་པ་ཆོས་འདི་ལ། །ཐབས་མཁས་རྣམ་པར་གང་རྩེན་པ། །ཐེག་པ་འདི་ལ་གནས་པར་འགྱུར། །མོས་པ་དག་ནི་ཇི་ལྟ་བཞིན། །ཁྱབ་པའི་སྨོན་ལམ་རྣམ་གཞག་ནས། །ཡང་དག་ལམ་ལ་རབ་གནས་ཤིང་། །བླ་མའི་འདི་ལ་གཞོལ་བར་བྱ། །ཐེག་པ་འདི་ནི་མཐའ་མེད་པས། །དབུས་ཀྱི་མཐའ་ཡང་ཡོད་མ་ཡིན། །མཐའ་ཡི་མཐའ་དང་དབུས་ཀྱི་མཐའ། །ཐམས་ཅད་དམིགས་པར་མི་འགྱུར་རོ། །མཐའ་ནི་དམིགས་སུ་མེད་པས་ན། །ཐེག་པ་ཆེ་ལ་མཐའ་ཡོད་མིན། །མཐའ་ནི་ཐམས་ཅད་སྤངས་པའི་ཕྱིར། །བདེ་བར་ཡང་དག་གཞོལ་བར་བྱ། །ཐེག་མཐའ་དག་ནི་དཔག་མེད་པས། །དཔག་མེད་གང་ཡིན་ཐེག་མཐའ་ཡིན། །ཐེག་འདི་མཐའ་ནི་ཚད་མེད་པས། །ཚད་མེད་གང་ཡིན་ཐེག་མཐའ་ཡིན། །ཐེག་འདི་མཐའ་སྤོངས་མེད་པས་ན། །མཐའ་མེད་གང་ཡིན་སྤོང་མཐའ་ཡིན། །མཐའ་ནི་གང་ཞིག་མི་རྟོག་ན། སྤོང་བ་ཡང་ནི་དམིགས་མི་འགྱུར། །ཐེག་པའི་མཐའ་ནི་དཔག་མེད་པས། །དབུས་ཀྱི་མཐའ་ཡང་ཡོད་མ་ཡིན། །མཐའ་མེད་མཐའ་ནི་མེད་པས་ན། །མཐའ་ཡི་ངོ་བོ་ཅི་ཡང་མེད། །མཐའ་དང་མཐའ་མེད་མཚན་ཉིད་ནི། །མཐའ་མིན་མཐའ་ཡི་མཚན་ཉིད་མིན། །མཐའ་རྣམས་དེ་དག་ལ་ཡག་ནི། །མཐའ་ཡི་མཚན་ཉིད་ཅི་ཡང་མེད། །མཐའ་མིན་ལ་ནི་མཐའ་སྒོར་བཤད། །ཐེག་པ་འདི་ནི་ཡང་དག་འདས། །དེ་ཡི་ཚད་ལས་འདས་པས་ན། །མཚུངས་པར་ལྡན་པར་དམིགས་སུ་མེད། །ངས་ནི་རྟག་དང་ཆད་པའི་མཐའ། །མཐའ་རྣམས་དེ་དག་ཐམས་ཅད་ནི། མཐའ་མིན་པར་ཡང་རབ་ཏུ་བསྟན། །མཐའ་ནི་ཐམས་ཅད་མཐའ་མེད་པས། །མཐའ་ཡི་མཚན་ཉིད་ཡོད་མ་ཡིན། །རང་བཞིན་ངོ་བོ་ཐམས་ཅད་ནི། །དེ་ན་རྟོག་པོ་ཅི་ཡང་མེད། །མཐའ་རྣམས་དེ་དག་ཐམས་ཅད་ལ། །རྣམ་པར་རྟོག་པ་གང་སྤངས་པ། །མཐའ་ཡོད་དང་ནི་མཐའ་མེད་རྣམས། །ཐམས་ཅད་རབ་ཏུ་སྤོང་བར་འགྱུར། །གང་ཞིག་འཇིག་རྟེན་ལྟ་ལྡན་པ། །དེས་ནི་མཐའ་སྒོར་རབ་སྟོན་ཅིང་། །མཐའ་རྣམས་ལ་
ནི་རབ་ཞེན་པས། །སྐྱབས་མེད་པར་ནི་གྱུར་པ་ཡིན། །གང་ཞིག་འཇིག་ཚོགས་ལྟ་མིན་ལྡན། །མཐའ་སྒོ་རྣམས་ལ་མ་ཆགས་པ། །མཐའ་རྣམས་ཐམས་ཅད་མི་འཛིན་པས། །སྣང་བ་དག་ནི་བྱེད་པར་འགྱུར། །ཐམས་ཅད་མཐའ་ནི་མཐའ་མིན་པས། །མཐའ་རྣམས་ཡང་དག་ཡོད་མ་ཡིན། །མཐའ་ཡི་མཚན་ཉིད་ཐམས་ཅད་ནི། །དེ་དག་ཡོད་པར་མི་འགྱུར་རོ། །མཐའ་རྣམས་ཐམས་ཅད་མི་ལེན་ཅིང་། །མཐའ་དག་ལས་ནི་གང་འདས་པ། །མཐའ་སྒོ་དག་ལ་ཆགས་མེད་པས། །འཇིག་ཚོགས་ལྟ་བཅས་སྤོང་བར་བྱེད། །གང་ཞིག་འཇིག་ཚོགས་ལྟ་བ་དག། མི་གཅོད་སྤོང་བར་མི་བྱེད་པ། །གོ་ཆ་ཆེན་པོ་མ་བགོས་པས། །ཐེག་ཆེན་ལ་ནི་མོས་མི་འགྱུར། །མཐའ་རྣམས་དག་ནི་ལེན་བྱེད་ཅིང་། །མཐའ་ཡི་མཚན་ཉིད་སྔོན་གྱི་མཐའ། །ཕྱི་མའི་མཐའ་ནི་གང་རྟོགས་པ། །དེ་དག་ཐམས་ཅད་རྣམ་རྟོག་ཡིན། །གང་ཞིག་འཇིག་ཆོགས་ལྟ་བ་དག། །ཐམས་ཅད་རབ་ཏུ་གང་སྤངས་པ། །གོ་ཆ་དཔག་མེད་བགོས་ནས་ནི། །བླ་མེད་ཐེག་པ་ཞོན་པ་ཡིན། །མཐའ་སྒོ་རྣམས་ལ་མ་ཆགས་པས། །འཇིག་རྟེན་བློར་ནི་གྱུར་བས་ན། །མཐའ་རྣམས་སྣ་ཚོགས་དག་ལ་ནི། །ཐམས་ཅད་ཡང་དག་འདས་པར་འགྱུར། །དེས་ནས་སངས་རྒྱས་ཆོས་རྣམས་ལ། །བདེ་བར་ཡང་དག་ཞུགས་པ་ཡིན། །བྱང་ཆུབ་སེམས་དཔའ་རབ་རྟགས་ན། །ཤེས་རབ་ཆེན་པོ་སྟོབས་དག་གིས། །ཆོས་འགའ་ཡང་ནི་མི་དམིགས་པས། །སྤང་ཞིང་བསལ་དུ་ཅི་ཡང་མེད། རྟག་ཏུ་ཐབས་ལ་མཁས་པ་ཡིས། །ཞི་གནས་ལྷག་མཐོང་ལེགས་བསྡུས་པ། །མཚན་ཉེད་གཅིག་ཏུ་རྟོགས་པའི་ཕྱིར། །མཚན་ཉིད་རྣམས་ནི་རབ་ཏུ་རྟོགས། །ཡང་དག་ཆོས་ལ་རབ་གནས་ཤིང་། །ཆོས་ཀྱི་སྣང་ཆེན་ཐོབ་པས་ན། །ཆོས་ཀྱི་སྣང་བ་དེ་ཡིས་ནི། །མཐའ་རྣམས་དེ་དག་ཁོང་དུ་ཆུང་། །མཐའ་ནི་ཅུང་ཟད་ཙམ་དག་དང་། །མཐའ་དང་མཐའ་མིན་དེ་དག་ནི། །མཚུངས་པར་ལྡན་པར་མི་མཐོང་བས། །ཐམས་ཅད་ལ་ནི་ཆགས་པ་མེད། །སེམས་ཅན་སྡུག་བསྔལ་ལ་མཐོང་འགྱུར་ན། །སྤྲོ་བསྐྱེད་ཚིག་ནི་འདི་སྐད་དུ། །ཁྱེད་འདིར་ཤོག་ལ་ཐེག་འདི་ལ། །ངེས་པར་འབྱུང་བར་གྱིས་ཤེས་
སྨྲོས། །སྐྱེ་བ་ལེན་པ་ཐམས་ཅད་དུ། །ཆོས་ཀྱི་སྣང་བ་བྱེད་པར་འགྱུར། །གོ་བགོས་ཐེག་ཆེན་ཞོན་ནས་ནི། །འདི་ཉིད་རབ་ཏུ་བསྟན་པར་བྱ། །ཐེག་པ་འདི་དང་གོ་ཆ་འདི། །དེ་དག་ལ་ནི་ཕངས་མི་བྱ། །སེམས་ཅན་རྣམས་ནི་ཐམས་ཅད་ཀྱིས། །གོ་བགོས་ཐེག་པ་ཆེན་པོ་དང་། །རབ་བདེ་ཐེག་པ་འདི་ཞོན་ནས། །བླ་མེད་བགྲོད་ལ་དགོད་པར་བྱ། །བྱང་ཆུབ་སེམས་དཔའ་དེ་དག་ནི། །རྣལ་འབྱོར་འདི་ལ་གནས་གྱུར་ནས། །སངས་རྒྱས་ཀྱི་ནི་ཆོས་དག་ལ། །མྱུར་བ་ཁོ་ནར་གཞོལ་བར་འགྱུར། །སངས་རྒྱས་ཞིང་ནི་རྣམ་དག་དང་། །ཉན་ཐོས་བྱང་ཆུབ་སེམས་དཔའ་ཡི། །ཡོན་ཏན་བཀོད་པ་གང་ཡིན་པ། །དངོས་པོ་དེ་དག་འཛིན་པར་འགྱུར། །བམ་པོ་གསུམ་པ།། །།གཞན་ཡང་བློ་གྲོས་མཐའ་ཡས་ངས་མངོན་བར་དྲན་ཏེ། སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་གོ་ཆ་འདི་ལྟ་བུ་བགོས་ཤིང་ཐེག་པ་ཆེན་པོ་འདི་ལྟ་བུ་ལ་ཞོན་པས་ན་མཐའ་རྣམས་ལས་ཡང་དག་པར་འདས་ཤིང་མུན་པ་རྣམས་རབ་ཏུ་བསལ་བ་དང། །འཇིགས་པ་རྣམས་བསྐྱབ་ཤིང་བརྩོན་འགྲུས་ཆེན་པོས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་དག་ལས་བྱང་ཆུབ་སེམས་དཔའ་སེམས་དཔའ་ཆེན་པོའི་གོ་ཆའི་བཀོད་པ་དང་། ཐེག་པ་ཆེན་པོའི་བཀོད་པ་འདི་ཐོས་པས་རབ་ཏུ་དགའ་བར་གྱུར་ཏེ། ཆོས་འདི་སྒོམ་པ་ན་སངས་རྒྱས་བཅོམ་ལྡན་འདས་དེ་དག་ལ་གུས་པས་རིམ་གྲོ་དང་། བཀུར་སྟི་བྱེད་ཀྱང་འདི་སྙམ་ཏུ་བདག་ནི་གོ་ཆ་འདི་ལྟ་བུ་བགོས་པའོ། བདག་ནི་གོ་ཆ་འདི་ལྟ་བུ་དང་ལྡན་པའོ། བདག་ནི་ཆོས་འདི་ལྟ་བུ་ཐོས་པ་ཡིན་ནོ། བདག་ནི་ཆོས་འདི་ལྟ་བུ་དང་ལྡན་པ་ཡིན་ནོ། བདག་ནི་ཆོས་ཀྱི་རྣམ་པ་འདི་ལྟ་བུ་དང་ལྡན་པ་ཡིན་ནོ་སྙམ་པའི་བསམ་པ་མ་བྱུང་ངོ་། །ད་ལ་དེའི་ཚེ་བདག་ཏུ་འདུ་ཤེས་པ་མེད་པས་འཇིགས་ཚོགས་ལ་ལྟ་བ་སྤངས་ཤིང་བདག་ཏུ་ང་རྒྱལ་བ་ཡང་སྤངས་སོ། སེམས་ལ་མཐོ་དམན་མེད་ཅིང་རྣམ་པར་རྟོག་པ་ཡང་མེད་པར་གྱུར་ཏོ། སེམས་ཅན་ཐམས་ཅད་བསྡུས་པ་དང། དེ་བཞིན་གཤེགས་པ་རྣམས་ཀྱི་ཆོས་ཀྱི་སྡེ་སྣོད་རབ་ཏུ་བསྲུང་བ་དང་། སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་རྣམས་ཡོངས་སུ་
སྨིན་པར་བྱ་བའི་ཕྱིར་སྐད་ཅིག་ཙམ་དུ་ཡང་སེམས་ཡོངས་སུ་སྐྱོ་ཞིང་དལ་བར་མ་གྱུར་ཏོ། ད་དེའི་ཚེ་གོ་ཆ་མ་སྤངས་ཤིང་ཐེག་པ་དཔག་ཏུ་མེད་པ་ལ་ཞོན་པར་གྱུར་པས་ཚེ་རབས་ཐམས་ཅད་དུ་བདུད་ཀྱི་དཔུང་དང་། བདུང་ཀྱི་འཁོར་དང་། བདུད་ཀྱི་དམག་རྣམས་བཅོམ་ཞིང་ཕམ་བར་བྱས་སོ། ལམ་ཐ་དད་པར་གྱུར་བ་ཙ་ར་ཀ་དང་། འཇིག་རྟེན་བརྒྱང་པན་དང་། པ་རི་པར་ཙ་ཀ་རྣམ་པར་གཡེང་བར་གྱུར་བར་ཐམས་ཅད་དང་། གཞན་ཡང་མུ་སྟེག་ཅན་འདི་དང་འདྲ་བ་རྣམས་ངས་རབ་ཏུ་བཏུལ་དེ་བདེ་བ་ལ་བཀོད་དོ། ཐ་དད་པར་སྨྲ་བ་ཐམས་ཅད་ཚར་བཅད་དོ། མུ་སྟེགས་ཅན་ཐམས་ཅད་རབ་ཏུ་བཏུལ་ཏོ། ལོག་པར་སོང་བའི་སེམས་ཅན་རྣམས་ཐེག་པ་འདི་འི་དབང་གིས་དགེ་བའི་སྡོམ་པ་སྣ་ཚོགས་ལ་གནས་པར་བྱས་སོ། སེམས་ཅན་རྣམས་ལ་གོ་ཆ་དང་གོ་ཆའི་བཀོད་པ་རྣམ་པར་ཕྱེ་སྟེ་བསྟན་ཏོ། སེམས་ཅན་རྣམས་ལ་རབ་ཏུ་བདེ་བ་ཐེག་པ་ཆེན་པོའི་ཆོས་ཀྱི་རྣམ་པ་དེ་ལྟ་བུ་དག་བསྟན་པས། གང་ཐེག་པ་འདི་ལ་གནས་པར་གྱུར་པ་དེ་དག་བདེ་བའི་ཡོ་བྱད་ཐམས་ཅད་ཐོབ་པར་བྱས་ཏེ། འདི་ལྟ་སྟེ། འདུས་བྱས་ཀྱི་བདེ་བའི་ཡོ་བྱད་འཁོར་ལོས་སྒྱུར་བའི་རྒྱལ་པོའི་བདེ་བའི་ཡོ་བྱད་དང་། བརྒྱ་བྱིན་དང་། ཚངས་པའི་རྒྱལ་པོའི་བདེ་བའི་ཡོ་བྱང་དང་། འདུས་མ་བྱས་ཀྱི་བདེ་བའི་ཡོ་བྱད་ཐོབ་པར་བྱས་པ་གང་ཡིན་པའོ། སེམས་ཅན་རྣམས་ལ་ཆོས་འདི་བསྟན་པར་གྱུར་བ་ན་དེ་དག་ཆོས་འདི་ལ་ཡང་དག་པར་ཞུགས་པས། འཕགས་པའི་རིགས་སུ་སྐྱེས་པས། ཆོས་ཀྱི་རྒྱལ་མཚན་ཆེན་པོ་བསྒྲེང་ཞེད་སིང་གེའི་སྒྲ་བསྒྲགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞོལ་བར་གྱུར་ཏོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་དེ་ལྟ་བུ་བགོས་ནས་ཚུལ་བཞིན་དུ་སོ་སོར་བརྟགས་ཤིང་རབ་ཏུ་རྣམ་པར་འབྱེད་བར་བྱེད་པ་དེ་དག་ནི་ཆོས་གང་གིས་རབ་ཏུ་གཞོལ་བར་འགྱུར་བའི་ཆོས་དེ་དག་ཐམས་ཅད་མ་ལུས་པར་ཤེས་ཤིང་མཐོང་བར་གྱུར་ཀྱང་རྣམ་པར་རྟོག་པར་མི་བྱེད་དོ། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ལམ་ཡང་དག་པ་ལ་གནས་པས་ཚུལ་བཞིན་དུ་ཤེས་པར་
གྱུར་པའི་ཕྱིར་དང་། ཡང་དག་པའི་ལམ་ལ་རབ་ཏུ་ཞུགས་པས་ཚུལ་བཞིན་དུ་མཐོང་པའི་ཕྱིར་རོ། །ཚུལ་བཞིན་དུ་རྣམ་པར་དག་པར་གྱུར་པ་གང་ཡིན་བ་དེ་ནི་རྣམ་པར་རྟོག་པར་ཡང་མ་ཡིན་རྣམ་པར་མི་རྟོག་ཡང་མ་ཡིན་བས་རྣམ་པར་རྟོག་པ་དང་། རྣམ་པར་མི་རྟོག་པ་དག་མཉམ་པ་ཉིད་དུ་ཤེས་ཤིང་མཐོང་བར་འགྱུར་རོ། གང་གིས་ཆོས་རྣམས་བཙལ་ཞིང་གཉེར་དུ་ཡོད་བར་མཐོང་བ་དེ་དག་ནི་མཉམ་པ་ཉིད་མ་ཡིན་བས་ཚུལ་བཞིན་དུ་རྣམ་པར་དག་པའི་ཤེས་པ་དང་། མཐོང་བ་ལ་གནས་པར་མི་འགྱུར་རོ། རྣམ་པར་རྟོག་པ་དང་། རྣམ་པར་མི་རྟོག་པ་མེད་པ་གང་ཡིན་པ་དེ་དག་ནི་རྣམ་པར་རྟོག་པ་དང་། རྣམ་པར་མི་རྟོག་པ་དེ་དག་ལ་མངོན་པར་ཞེན་ཅིང་འཛིན་པར་མི་བྱེད་ལ། མངོན་པར་ཞེན་ཅིང་འཛིན་པ་མེད་པས་རྣམ་པར་རྟོག་དང་། རྣམ་པར་མི་རྟོག་པ་ཡང་ཡོངས་སུ་སྤོང་བར་བྱེད་དོ། ལམ་འདི་ལ་ནི་སྙིང་བརྩེ་བ་ཡང་མེད། མངོན་པར་འདུ་བྱེད་པ་ཡང་མེད། སྒྲོ་འདོགས་པ་ཡང་མེད། བླང་ཞིང་དོར་བ་ཡང་མེད་དོ། མཉམ་པ་ཉིད་ཀྱི་ལམ་ཡང་དག་པ་ལ་གནས་པ་ནི་འདས་པ་དང་། ད་ལྟར་བྱུང་བ་དང་། མ་འོངས་པ་ལ་རྣམ་པར་མི་བྱེད་པས་མི་བྱེད་པ་རྣམ་པར་རྟོག་པ་ཐམས་ཅད་དང་། བག་ལ་ཉལ་ཇི་སྙེད་པ་དག་མ་ལུས་པར་ཁོང་དུ་ཆུང་ཅིང་ཆོས་ཐམ་ཅད་ཀྱི་མཉམ་པ་ཉིད་ཀྱི་ཕྱིན་ཅི་མ་ལོག་པའི་དོན་ལ་རབ་ཏུ་གནས་པར་བྱེད་པས་ལམ་ཡང་དག་པ་ལ་གནས་པ་ཞེས་བྱའོ། བློ་གྲོས་མཐའ་ཡས་ལམ་དང་། རྣམ་པར་དག་པའི་ལམ་གང་ཞེ་ན་། འཕགས་པའི་ལམ་ཡན་ལག་བརྒྱད་པ་གང་ཡིན་བ་སྟེ། འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་དག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་ཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། ཡང་དག་པའི་ལྷ་བས་ནི་འཇིག་ཚོགས་ལ་ལྟ་བ་སྤོང་ཞིང་ལྟ་བར་གྱུར་པའི་སྤྱོད་ཡུལ་ཐམས་ཅད་ལས་ཡང་དག་པར་འདའ་བར་བྱེད་པས་ལྟ་བ་ཐམས་ཅད་གནས་དང་། དུས་ཐམས་ཅད་དུ་ཤིན་དུ་རྣམ་པར་དག་པ་ཡང་འཐོབ་པར་འགྱུར་ལ། རྣམ་པར་རྟོག་པ་དང་། ཁྱད་པར་དུ་རྣམ་པར་རྟོག་པ་དང་། ཀུན་དུ་རྣམ་པར་རྟོག་པ་ཐམས་ཅད་རབ་ཏུ་
རྟོགས་པས་རྣམ་པར་རྟོག་པ་དང་། ཁྱད་པར་དུ་རྣམ་པར་རྟོག་པ་དང་། ཀུན་དུ་རྣམ་པར་རྟོག་པ་ཡང་མེད་པར་འགྱུར་རོ། ལོག་པར་རྟོག་པ་ལ་མི་གནས་ཤིང་ལོག་པར་རྟོག་པ་རབ་ཏུ་སྤངས་པས་ཡང་དག་པའི་འཚོ་བ་དང་། ཡག་དག་པའི་འཚོ་བའི་འདི་ཤེས་ཀྱང་འཐོབ་བར་འགྱུར་རོ། འཚོ་བ་རྣམ་པར་དག་པ་མཐོང་ཞིང་འཚོ་བ་རྣམ་པར་དག་པ་ལ་གནས་པའི་ལུས་ཀྱི་ལས་རྣམ་པར་དག་པ་དང་། དག་གི་ལས་རྣམ་པར་དག་པ་དང་། ཡིད་ཀྱི་ལས་རྣམ་པར་དག་པ་མཐོང་ཞིང་ཡང་དག་པའི་ལས་ཀྱི་མཐའ་ལ་གནས་པར་འགྱུར་རོ། ཡང་དག་པའི་ལྟ་བའི་དག་གི་ལས་ཀྱིས་ནི་ཚིག་དང་། སྨྲ་བ་མང་པོ་དག་རབ་ཏུ་ཤེས་ཤིང་མཐོང་བས་ཡང་དག་པའི་དག་ལ་གནས་ནས་མི་མཐུན་པའི་ཕྱོགས་ཡོངས་སུ་དག་པར་བྱེད་དོ། ཡང་དག་པའི་རྩོལ་བའི་ལྟ་བས་ནི་བརྩོན་འགྲུས་རབ་ཏུ་སྤུང་ཅིང་། ཡང་དག་པའི་བརྩོན་འགྲུས་ལ་གནས་པར་བྱེད་དོ། ཡང་དག་པའི་ལྟ་བའི་དྲན་བས་ནི་རྗེས་སུ་དྲན་བ་ཡང་མེད། ཡིད་ལ་བྱེད་པ་ཡང་མེད། འཛིན་བ་ཡང་མེད་པར་རྣམ་པར་དག་པའི་དྲན་བས་ཡང་དག་པའི་དྲན་པ་ལ་གནས་པར་བྱེད་དོ། ཡང་དག་པའི་ཏིང་ངེ་འཛིན་གྱིས་ནི་ཏིང་ངེ་འཛིན་ལ་གནས་པ་མེད་པར་ཏིང་ངེ་འཛིན་དུ་ལྟ་བ་རབ་ཏུ་སྦྱངས་ནས་ཡང་དག་པའི་ཏིང་ངེ་འཛིན་ལ་རབ་ཏུ་གནས་པར་བྱེད་དོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་མཐོང་བའི་ཚེ་ཐམས་ཅད་དུ་རྣམ་པར་དག་པའི་ཡང་དག་པའི་ལྟ་བ་ཐོབ་པས་ཤིན་ཏུ་རྣམ་པར་དག་པའི་ལམ་ལ་གནས་པར་འགྱུར་ཏེ། ཤིན་ཏུ་རྣམ་པར་དག་པའི་ལམ་འདི་ནི་སྐྱེས་བུ་དམ་པ་རྣམས་ཀྱིས་སྒོམ་བར་བྱ་བ། བློ་དང་ལྡན་པ་རྣམས་ཀྱིས་བཀུར་བར་བྱ་བ། འཕགས་པ་རྣམས་དགའ་བར་བྱེད་པ། དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས་པ་ཡིན་པས་བཏུད་དང་། བདུད་ཀྱི་འཁོར་དང་། བདུད་ཀྱི་མངག་པ་དང་། བདུད་ཀྱི་རིས་ཀྱི་ལྷ་ཐམས་ཅད་ཀྱི་བགྲོད་པར་བྱ་བའི་གནས་མ་ཡིན་ནོ། ཕྱི་རོལ་པའི་ལམ་ལ་སྲིད་ཅིང་མངོན་པར་ཞེན་པ་ཐམས་ཅད་དང་། རྩོད་པའི་སྨྲ་བ་ལ་གནས་པ་དང་། ལྟ་བའི་ཐིབས་པོར་ཞུགས་པ་དང་། ལམ་མ་ཡིན་བར་སོང་བ་དང་། འཇིག་རྟེན་རྒྱང་པན་པ་ལ་སོགས་པས་བགྲོད་
པར་བྱ་བའི་སྤྱོད་ཡུལ་ཡང་མ་ཡིན་ནོ། མྱ་ངན་ལས་འདས་པ་ལ་སྲིད་པ་ཐམས་ཅད་ཀྱིས་བགྲོད་པར་བྱ་བའི་སྤྱོད་ཡུལ་ཡང་མ་ཡིན་ནོ། དེ་ཅིའི་ཕྱིར་ཞེ་ན། འདུས་མ་བྱས་ལ་གནས་པ་གང་ཡིན་པ་དེ་དག་ནི་མྱ་ངན་ལས་འདས་པར་རྣམ་བར་རྟོག་པ་དང་བཅས་པས་ན་མྱ་ངན་ལས་འདས་པར་རྟོག་པ་གང་ཡིན་པ་དེ་ཉིད་འདུ་བྱེད་རྣམས་སུ་རྣམ་པར་རྟོག་པ་ཡིན་པས་སོ། དེ་ཅིའི་ཕྱིར་ཞེ་ན། མྱ་ངན་ལས་འདས་པའི་དབྱིངས་སུ་རྣམ་པར་རྟོག་པའི་གཡོ་བ་ཐམས་ཅད་ལས་ཡང་དག་པར་འདས་པ་ཡིན་བས་འདུས་མ་བྱས་ཀྱང་ཡོད་པ་མ་ཡིན་ན་འདུས་བྱས་ཡོད་པར་མི་འགྱུར་བ་ལྟ་སྨོས་ཀྱང་ཅི་དགོས་ཏེ། ལམ་འདི་ནི་རྣམ་པར་རྟོག་པ་ཐམས་ཅད་ཡོངས་སུ་སྦྱོང་བར་བྱེད་པས་ཐ་ན་འདུས་མ་བྱས་སུ་རྟོག་པ་ཅུང་ཟད་ཙམ་ཡང་མེད་ན་འདུས་བྱས་སུ་རྟོག་པ་ཐམས་ཅད་ལྟ་ཡོད་པར་ག་ལ་འགྱུར། གང་གིས་ཇི་ཙམ་དུ་འཕགས་པའི་ལམ་ལ་རྣམ་པར་རྟོག་པ་དང་བཅས་པ་དེ་དག་ནི་འཕགས་པའི་ལམ་ལ་གནས་པ་ཞེས་མི་བྱའོ་གང་གིས་རྣམ་པར་རྟོག་པའི་གཡོ་བ་ཐམས་ཅད་སྤངས་པ་གང་ཡིན་བ་དེ་ནི་འཕགས་པའི་ལམ་ལ་གནས་པ་དང་། འཇིགས་པ་མེད་པའི་ལམ་ལ་གནས་པ་དང་། རབ་ཏུ་ཞི་བའི་ལམ་ལ་གནས་པ་དང་། རབ་ཏུ་བདེ་བའི་ལམ་ལ་གནས་པ་ཞེས་བྱའོ། ལམ་འདིས་ནི་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྡུག་བསྔལ་མེད་པའི་གནས་སུ་ཕྱིན་པར་བྱེད་དོ། ལམ་འདིས་ནི་ངོ་བོ་ཉིད་མེད་པར་ཕྱིན་པར་བྱེད་ཅིང་ངོ་བོ་ཉིད་ཀྱི་གནས་ལས་ཡང་དག་པར་འདའ་བར་བྱེད་དོ། ལམ་འདིས་ནི་ངོ་བོ་ཉིད་དང་། ངོ་བོ་ཉིད་མ་ཡིན་པ་ཐམས་ཅད་སྤངས་བའི་གནས་སུ་ཕྱིན་པར་བྱེད་དོ། ལམ་འདིས་ནི་མཚན་ཉིད་བསྟན་དུ་མེད་པ་དང་། གཟུགས་ཅན་གྱི་མཚན་ཉིད་མ་ཡན་བའི་གནས་སུ་ཕྱིན་པར་བྱེད་དོ། ལམ་འདིས་ནི་ནམ་མཁའ་བཞིན་དུ་ཐམས་ཅད་དུ་ཁྱབ་པས་བླ་ན་མེད་པའི་གཞལ་མེད་ཁང་ཆེན་པོར་ཕྱིན་པར་བྱེད་དེ། དེ་ལྟར་སོང་བ་གང་ཡིན་བ་དེ་དག་ནི་ཕྱིར་ལྡོག་པར་མི་འགྱུར་བས་ང་དེ་བ་རྣམ་པ་སྣ་ཆོགས་རབ་ཏུ་འཐོབ་པར་འགྱུར་རོ་གཞལ་མེད་ཁང་དེ་ཡང་བསྟན་དུ་མེད་ཅིང་དངོས་པོའི་མཚན་མ་ཅི་ཡང་མེད་པས་འདུས་
བྱས་ཅུང་ཟད་ཙམ་ཡང་མེད་དེ། འདུ་བྱས་བཀག་ཅིང་འདུས་མ་བྱས་སྤངས་པ་ཡིན་པས་སེམས་ཅན་རྣམས་ལ་འདུས་བྱས་ཀྱི་བདེ་བ་འམ་འདུས་མ་བྱས་ཀྱི་བདེ་བ་ཡང་སྦྱིན་བར་མི་བྱེད་དོ། བློ་གྲོས་མཐའ་ཡས་ཇི་ཙམ་དུ་འདུས་བྱས་ཀྱི་མྱ་ངན་ལས་འདས་པ་ལ་མོས་པ་དེ་དག་ཀྱང་འདུས་བྱས་ཀྱི་བདེ་བ་ཡོངས་སུ་ཚོལ་བར་མི་བྱེད་ན་གཞལ་མེད་ཁང་ཆེན་པོར་ཞུགས་པ་ལྟ་སྨོས་ཀྱང་ཅི་དགོས། གཞལ་མེད་ཁང་ཆེན་པོ་དེ་ནི་མངོན་པར་འདུ་བྱ་བ་མེད་པ་དང་། རབ་ཏུ་བསིལ་ཞིང་དབེན་བར་གྱུར་བའི་ཕྱིར་མྱ་ངན་ལས་འདས་པ་ཞེས་བྱའོ། འདོད་ཆགས་དང་། ཞེ་སྡང་དང་། གཏི་མུག་འགོག་པ་དང་། བག་ལ་ཉལ་རྣམས་སྤོངས་བ་དང་། སྲིད་པའི་ལྟ་བ་དྲལ་བ་དང་། མ་རིག་པའི་ཆུ་བོ་བསྐམས་པ་དང་། ཟུག་རྔུ་གདུག་པ་རྩ་བ་ནས་བཏོན་པ་དང་མིང་གེ་བའི་ཆོས་རྣམས་ཟད་པའི་ཕྱིར་མྱ་ངན་ལས་འདས་པ་ཞེས་བྱའོ། ང་རྒྱལ་གྱི་ནད་དང་། སྡུག་བསྔལ་མང་པོས་ཉོན་མོངས་པ་ཐམས་ཅད་ཐག་བསྲིངས་པའི་ཕྱིར་མྱ་ངན་ལས་འདས་པ་ཞེས་བྱའོ། སེམས་དང་། ཡིད་དང་། རྣམ་པར་ཤེས་པའི་སྤྱོད་ཡུལ་མ་ཡིན་པའི་ཕྱིར་མྱ་ངན་ལས་འདས་པ་ཞེས་བྱའོ། རྩོད་པའི་སྨྲ་བ་རྣམས་དང་། མཚམས་སྦྱོར་བ་ཐམས་ཅད་ནས་ཆོས་ཀྱི་འདུ་ཤེས་ཀྱི་བར་དུ་ཉེ་བར་གྱུར་བའི་ཕྱིར་མྱ་ངན་ལས་འདས་པ་ཞེས་བྱའོ། ཡིད་ཀྱི་མོས་པ་རྣམས་དང་། ཡིད་ཀྱི་མོས་པས་ཡོངས་སུ་ཚོལ་བ་གཅོད་ཅིང་། རྣམ་པར་བརྟག་པ་དང་། རྣམ་པར་བརྟག་པར་བྱ་བའི་མཚན་མ་མེད་པའི་ཕྱིར་མྱ་ངན་ལས་འདས་པ་ཞེས་བྱའོ། བློ་གྲོས་མཐའ་ཡས་འདི་ནི་ཡོངས་སུ་མྱ་ངན་ལས་འདས་པ་ཆེན་པོའི་ངོ་བོ་ཉིད་ཡིན་ཏེ། མྱ་ངན་ལས་འདས་པ་ལ་མཐའ་མེད་པས་བརྗོད་ཀྱིས་མི་ལང་ངོ། གལ་ཏེ་བགྲོད་པར་བྱ་བ་དང་བཅས་པར་གྱུར་ན་དེ་ནི་ལམ་མ་ཡིན་ཏེ། ལམ་ལ་ཡང་ཚིག་མེད་པས་བརྗོད་པར་མི་ནུས་སོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་འདིས་མྱ་ངན་ལས་འདས་པའི་གཞལ་མེད་ཁང་ཆེན་པོར་བགྲོད་པར་གྱུར་པ་ན་སེམས་ཅན་བརྒྱ་སྟོང་ཚད་མེད་པ་རྣམས་ཀྱང་ལམ་འདི་ལ་འགོད་པར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ལམ་འདི་ལ་གཞོལ་བར་གྱུར་པའི་ཚེ་ཡོངས་སུ་ངལ་བ་དང་། གདུང་བ་མེད་པར་ཇི་ལྟ་ཇི་ལྟར་ཡོངས་སུ་ཚོལ་བ་དང་། ཇི་ལྟ་ཇི་ལྟར་རབ་ཏུ་བཀོད་པ་དང་། འདུན་པ་དེ་ལྟ་དེ་ལྟར་རབ་ཏུ་བཀོད་ནས་བཀོད་པ་རེ་རེས་ཀྱང་སེམས་ཅན་ཡོངས་སུ་བསྡུས་ནས་ཆོས་སྟོན་པར་བྱེད་པས་སེམས་ཅན་རྣམས་རབ་ཏུ་དགའ་བར་བྱེད་དོ། དེ་ཅིའི་ཕྱིར་ཞེ་ན། ལམ་འདི་ནི་མཚུངས་པ་མེད་པས་མི་མཐུན་པའི་ཕྱོགས་ཡོངས་སུ་དག་པར་བྱེད་པ་དང་། བྱ་བ་རྣམས་མཐར་ཕྱིན་པར་བྱེད་པས་སངས་རྒྱས་བཅོམ་ལྡན་འདས་རྣམས་དང་། ཉན་ཐོས་དང་། རང་སངས་རྒྱས་དག་ཀྱང་ལམ་འདི་ལ་གཞོལ་ཞིང་འགལ་བར་མི་མཛད་པ་དང་། ས་དེ་དག་ཏུ་མ་བྱོན་ཅིང་སྨོན་པ་རྣམས་ཡོངས་སུ་རྫོགས་པར་མ་གྱུར་གྱི་བར་དུ་ནམས་ཀྱང་སྤོང་བར་མི་མཛད་པས་སོ། དེ་ལས་གང་ཞེ་ན། འདི་ལྟ་སྟེ། མྱ་ངན་ལས་འདས་པའི་ས་དང་། གཞལ་མེད་ཁང་ཆེན་པོའི་ས་གང་ཡིན་པའོ། འདི་ལ་ལྟ་སྟེ། དཔེར་ན་ནམ་མཁའ་ནི་དཔེར་བྱར་མེད་ཀྱང་ནམ་མཁའ་གཏོགས་པར་དཔེ་གཞན་གྱིས་ནམ་མཁའ་མཚོན་པར་མི་ནུས་པས་ཤིན་ཏུ་ཡངས་ཤིང་རྒྱ་ཆེ་བའི་ནམ་མཁའ་དབེན་པ་ལ་ནམ་མཁའ་ཞེས་བརྗོད་དོ། མྱ་ངན་ལས་འདས་པའི་གཞལ་མེད་ཁང་ཡང་དེ་བཞིན་དུ་སྟོང་པ་ཉིད་ཀྱི་དབེན་པ་ཆེན་པོ་བདག་པོ་མེད་པ། བདག་གི་བ་མེད་པ་ཡིན་པས་སེམས་ཅན་ཐམས་ཅད་དེར་ཞུགས་པར་གྱུར་ཀྱང་སྤུ་ཉག་མ་གཅིག་ཙམ་གྱི་ཚད་ཀྱང་ཡོངས་སུ་གཟུང་དུ་མེད་དེ། ཤིན་དུ་ཡངས་ཤིང་རྒྱ་ཆེ་བའི་སྟོང་པ་ཉིད་རབ་ཏུ་དབེན་བ། རྒྱ་ཆེ་ཞིང་ཚད་མེད་པས་མྱ་ངན་ལས་འདས་པ་ཆེན་པོ་ཞེས་ཀྱང་བྱའོ། གཞལ་མེད་ཁང་ཆེན་པོ་ཞེས་ཀྱང་བྱའོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལམ་ཁྱད་པར་དུ་འཕགས་པ་འདི་ནི་ཉན་ཐོས་དང། རང་སངས་རྒྱས་རྣམས་ལས་ཡོད་པ་མ་ཡིན་ནོ་སྙམ་ནས་ལམ་འདི་ལ་གནས་པ་གང་ཡིན་པ་དེ་དག་ནི་ཡོན་ཏན་གྱི་ཚོགས་ཐམས་ཅད་མངོན་པར་སྒྲུབ་ཅིང་ཕྱིར་མི་ལྡོག་པ་ཐོབ་པར་གྱུར་པས་སེམས་ཅན་རྣམས་ལ་ཕན་འདོགས་པ་ཆེན་པོ་བྱེད་པར་འགྱུར་རོ། སྤྱོད་པ་ཁྱད་པར་དུ་འཕགས་པས་བཀོད་པ་
བྱས་ནས་ལམ་འདིས་སེམས་བསྐྱེད་དེ་གཞོལ་བར་གྱུར་པས་ན་དེའི་བཀོད་པ་དེ་ལྟ་བུ་དེ་ནི་ཉན་ཐོས་དང། རང་སངས་རྒྱས་རྣམས་ལ་ཡོད་པ་མ་ཡིན་ནོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ལམ་འདི་ལ་གནས་པའི་ཚེ་གལ་ཏེ་འཁོར་ལོས་སྒྱུར་པའི་རྒྱལ་པོ་བྱས་པར་གྱུར་པ་ན་ཡང་ཆགས་ཤིང་ལྟ་བ་མེད་པར་མཐུ་ཆེན་པོ་དང་ལྡན་ཞིང་རྫུ་འཕྲུལ་སྟོན་པར་བྱེད་པ་དང་། འཇིག་རྟེན་དང་འཇིག་རྟེན་ལས་འདས་པ་ཡང་རབ་ཏུ་རྟོགས་པར་འགྱུར་རོ། གལ་ཏེ་བརྒྱ་བྱིན་དང་། ཚངས་པའི་རྒྱལ་པོ་བྱས་པར་གྱུར་ན་ཡང་ཆགས་ཤིང་ཞེན་པ་མེད་པས་ང་རྒྱལ་སྤངས་ནས་སངས་རྒྱས་རྣམས་ལ་བལྟ་བར་མོས་པ་དང་། ཡང་དག་པའི་ཆོས་ཉན་པར་དགའ་བ་དང། ལྷ་བརྒྱ་སྟོང་ཚད་མེད་པ་རྣམས་ཡོངས་སུ་སྨིན་པར་བྱེད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།། །བྱང་ཆུབ་སེམས་དཔའི་ཁྱད་པར་ལམ། །འཇིག་རྟེན་དག་ན་མཆོག་གྱུར་པས། །འཕགས་པ་ཐེག་པ་པ་གཉིས་དག། །ཐམས་ཅད་ལམ་འདིར་འཇུག་པར་འགྱུར། །བྱང་ཆུབ་སེམས་དཔའ་ཐམས་ཅད་གང་། བྱང་ཆུབ་ཆེན་པོར་བགྲོད་པ་དང། ལམ་གྱི་བཀོད་པ་ཐོབ་འདོད་པ། ལམ་འདིར་རབ་ཏུ་དབྱེ་པར་བྱ། གང་ཞིག་ལམ་འདི་དག་ལ་ནི། །བགྲོད་དང་བགྲོད་པར་འགྱུར་བདག། །དེ་དག་ཡང་དག་ལྟ་བ་ཡིས། །ལམ་འདི་ལ་ནི་གནས་པར་བྱ། །བྱང་ཆུབ་སེམས་དཔའ་ཐམས་ཅད་གང་། །མཉམ་པའི་ལྟ་ལ་གང་གནས་པ། །ལམ་འདིར་རབ་ཏུ་ཞུགས་ནས་ནི། །བདེ་བས་ངེས་པར་འབྱུང་བར་བྱ། ལམ་འདི་མཆོག་ཏུ་ཁྱད་པར་འཕགས། ལམ་འདི་བླ་ན་མེད་པས་ན། །ཡང་དག་ཇི་བཞིན་འདྲེན་བྱེད་ཀྱང། །གཟུང་བར་བྱ་བ་ཅི་ཡང་མེད། །གང་ཞིག་ལམ་འདིར་གནས་པ་དང་། །ལམ་འདིར་ཡང་དག་ཞུགས་པ་ཡི། །བློ་ལྡན་གང་ཟག་ཐམས་ཅད་ཀྱི། །སེམས་ནི་གཡོ་བར་མི་འགྱུར་རོ། །ལམ་འདི་ལ་ནི་ཅུང་ཟད་ཀྱང་། །གཡོ་བ་ཡོད་པར་མི་སྟོན་པས། །དེས་ནི་གཡོ་བ་ཡོད་མི་འགྱུར། །གཡོ་བ་དག་ནི་རྟག་ཏུ་སྤོང། །ང་ཡིས་ལམ་འདི་དག་ལ་ནི། །གཡོ་བ་མེད་ཅིང་བྱེད་པ་
མེད། །སྒྲོ་འདོགས་མེད་པར་རབ་བརྟན་པས། །ལམ་འདི་དེ་ཕྱིར་བླ་ན་མེད། བྱང་ཆུབ་དག་ནི་ཐམས་ཅད་ཀུན། །ལམ་འདི་ལ་ནི་རབ་གནས་ཀྱང་། །ལམ་འདི་ལ་ནི་སྲེད་མེད་ཅིང་། །ཁོང་ཁྲོ་བ་ཡང་ཡོད་པ་མིན། །ལན་འདི་འདས་པ་མ་ཡིན་ཏེ། །ལམ་འདི་མ་འོངས་པ་ཡང་མིན། །དེ་ཡིས་རྣམ་རྟོག་རབ་བསལ་ནས། །དེ་བཞིན་དུ་ནི་བསྒོམ་པར་བྱ། །ལམ་འདི་ལ་ནི་ཉོན་མོངས་མེད། །ལམ་འདི་ལ་ནི་རྣམ་རྟོག་མེད། །དོན་དག་དང་ནི་མི་འགལ་བར། །དེ་བཞིན་དུ་ནི་གནས་པར་བྱ། །ལམ་མཆོག་ལ་ནི་གང་གནས་པ། །གནས་པ་མེད་པར་གནས་པར་བྱ། །ལམ་འདི་ལ་ནི་གང་གནས་པ། །རྣམ་དག་རང་བཞིན་འཐོབ་པར་འགྱུར། །ང་ཡིས་ཡན་ལག་བརྒྱད་པའི་ལམ། །འཕགས་པའི་བགྲོད་པ་ཡིན་པར་བཤད། །ལམ་འདི་ལ་ནི་གང་གནས་པ། །བྱང་ཆུབ་ཐོབ་པར་དཀའ་མི་འགྱུར། །བྱང་ཆུབ་སེམས་དཔའ་མགོན་མེད་པས། །དེ་བཞིན་ལམ་འདིར་གནས་པར་བྱ། །རྣམ་དག་ལམ་འདི་ཐོབ་གྱུར་ནས། །རེ་རེ་ནས་ནི་བགྲོད་པར་བྱ། །ལམ་རབ་མཆོག་ཏུ་གྱུར་པ་འདི། །སྐྱེས་བུ་དམ་པ་སྒྲུབ་བྱེད་ཅིང། །དེ་བཞིན་གཤེགས་པས་བསྔགས་པས་ན། །ཡེ་ཤེས་འདི་ནི་བླ་ན་མེད། །བདུད་དང་བདུད་ཀྱི་དམག་རྣམས་དང་། །བདུད་ཀྱིས་ཡོངས་སུ་བཟུང་བ་དང་། །མུ་སྟེགས་ཅན་ནི་གཞན་རྣམས་ཀྱིས། །བགྲོད་པར་བྱ་བའི་ཡུལ་མ་ཡིན། །མྱ་ངན་འདས་ལ་གང་རྟོག་པ། །ལམ་མཆོག་འདི་ལ་གནས་མི་འགྱུར། །བྱིས་པ་རྣམ་རྟོག་གཙེས་པས་ན། །མྱ་ངན་འདས་ལ་ཕྱོགས་མི་འགྱུར། །རྣམ་རྟོག་ལས་ནི་གང་འདས་པ། །འདུ་ཤེས་རྣམ་རྟོག་མེད་པས་ན། །ལམ་ནི་ཆེན་པོ་འདི་དག་ལ། །དེས་ན་རབ་ཏུ་ཞུགས་པར་འགྱུར། །འཕགས་པ་རྣམས་ཀྱི་ལམ་མཆོག་འདི། །བྱིས་པ་སྐྱེ་བོ་སྤོང་བར་བྱེད། །ཆོས་འདི་ལ་ནི་གང་ཞུགས་པ། །ལམ་འདི་བླ་ན་མེད་པ་ཡིན། །ཁྱད་པར་འཕགས་པའི་ལམ་མཆོག་འདི། །བླ་མེད་གནས་སུ་ཕྱིན་པར་བྱེད། །དེ་ནི་གནོད་དང་མྱ་ངན་མེད། །འཇིགས་པ་མེད་ཅིང་བགེགས་ཀྱང་མེད། །བླ་ན་མེད་པའི་ལམ་འདི་ནི། །གཟུགས་མེད་ཁ་དོག་མཚན་ཉིད་མེད། །གཟུགས་ཀྱི་མཚན་ཉིད་དག་གིས་ཀྱང་། །བསྟན་པར་ཡང་ནི་མི་ནུས་སོ། །
ཤིན་དུ་བདེ་བའི་ལམ་འདི་ནི། །ཡང་དག་ཡིན་པས་འཇིགས་པ་མེད། །ལམ་འདི་ལ་ནི་གང་ཞུགས་པ། །མཐར་ནི་མྱ་ངན་འདའ་བར་འགྱུར། །མཆོག་ཏུ་རྣམ་དག་ལམ་འདི་ནི། །ནམ་མཁའ་སྟོང་པ་འདྲ་བས་ན། །ཐམས་ཅད་དུ་ནི་ཐོགས་པ་མེད། །རྟག་ཏུ་མྱ་ངན་འདས་ལ་གཞོལ། གལ་ཏེ་མྱ་ངན་འདས་ཕྱིན་ན། །ཕྱིར་ནི་ལྡོག་པར་མི་འགྱུར་པས། །མྱ་ངན་འདས་པ་ཆེན་པོ་འདི། །བླ་མེད་མཆོག་ཏུ་བདེ་བ་ཡིན། །མྱ་ངན་འདས་ཆེན་གཞལ་མེད་ཁང། །སྟོང་དབེན་ཚང་ནི་གཞལ་དུ་མེད། །དེ་ཕྱིར་མྱ་ངན་འདས་ཆེན་ཡིན། །གཞལ་མེད་ཁང་ཆེན་ཞེས་ཀྱང་བྱ། །མྱ་ངན་འདས་པ་ཆེན་པོ་འདིར། །དུག་གསུམ་ཉོན་མོངས་རབ་ཏུ་ཞི། །གལ་ཏེ་དེར་ནི་ཕྱིན་གྱུར་ན། །ལྡོག་པ་མེད་ཅིང་སྐྱེ་ལེན་མེད། །མྱ་ངན་འདས་ཆེན་སྟོང་དབེན་འདི། །དཔེར་ན་ནམ་མཁའ་ཇི་ལྟ་བཞིན། །སྟོང་དབེན་རྒྱ་ནི་ཆེ་བའི་ཕྱིར། །དེ་ན་ཐོགས་པ་ཅི་ཡང་མེད། །མྱ་ངན་འདས་ཆེན་གཞལ་མེད་ཁང། །སྡུག་བསྔལ་མྱ་ངན་གནས་སྤངས་ཤིང། །སྤྱོད་ཡུལ་གནས་ནི་དཔག་མེད་པས། །མྱ་ངན་འདས་པ་ཞེས་བརྗོད་དོ། །མྱ་ངན་འདས་ལ་གྲངས་མེད་པས། །གྲངས་ཀྱི་ཚད་ནི་དམིགས་སུ་མེད། །རབ་ཞི་བསིལ་བའི་རང་བཞིན་ལ། །མྱ་ངན་འདས་པ་ཞེས་བརྗོད་དོ། །མྱ་ངན་འདས་ལ་བྱ་མེད་པས། །ལམ་ཞུགས་པ་ཡང་བླ་ན་མེད། །ཚད་མེད་རྣམ་རྟོག་མེད་པས་ན། །རྣམ་པར་རྟོག་པ་དམིགས་སུ་མེད། །དས་ནི་བྱང་ཆུབ་སེམས་དཔའི་ཕྱིར། །ལམ་འདི་རབ་ཏུ་བསྟན་པའི་ཕྱིར། །ལམ་འདི་ལ་ནི་གང་གནས་པ། །དེ་ནི་མྱ་ངན་འདས་དང་ཉེ། །ལམ་འདི་ལ་ནི་གང་གནས་པ། །འཇིག་རྟེན་པ་ཡི་བདེ་བའི་མཆོག། །ཐམས་ཅད་རབ་ཏུ་འཐོབ་འགྱུར་བས། །འཇིགས་པ་མེད་པ་ཞེས་བྱའོ། །ལམ་འདི་ལ་ནི་རབ་གནས་ན། །སེམས་ནི་ཉོན་མོངས་མེད་པར་འགྱུར། །དེས་ན་ལམ་ནི་རྣམ་དག་པས། །འཇིགས་པ་མེད་པ་ཞེས་བྱའོ། །མཉམ་ཉིད་ཡང་དག་ལམ་མཐོང་པས། །ཐམས་ཅད་རྗེས་སུ་རྟོགས་པར་འགྱུར། །འཚོ་བའི་ཡོ་བྱད་ཐམས་ཅད་ལ །ཐམས་ཅད་དུ་ནི་ཆགས་མི་འགྱུར། །བྱང་ཆུབ་སེམས་དཔའི་གནས་མེད་པ། །ཡང་དག་ཁྱད་པར་འཕགས་པའི་ལམ། །སེམས་ཅན་རྣམས་ལ་ཕན་
འདོགས་པ། །རབ་ཏུ་རྩོལ་བས་གཞོལ་བར་བྱ། །བླ་མེད་ལམ་ནི་ཐོབ་གྱུར་ན། །ལམ་མཆོག་བཀོད་པ་འདི་དག་གིས། །འཇིག་རྟེན་རྣམས་ནི་མགུ་བྱེད་པས། །ལམ་འདི་ལ་ནི་གཞོལ་བར་བྱ། །ལམ་འདི་མཆོག་ཏུ་ཁྱད་པར་འཕགས། །ཡིད་ནི་ཡོངས་སུ་དག་པར་བྱེད། །ཇི་ལྟར་མོས་བཞིན་ཚོལ་བ་དག། །ཐམས་ཅད་རབ་ཏུ་གཞོལ་པར་བྱ། །གལ་ཏེ་འཁོར་ལོས་སྒྱུར་བའི་རྒྱལ། །དཔུང་ཆེན་ཐོབ་པར་གྱུར་ན་ཡང། །རྒྱལ་ཐབས་དག་ནི་རབ་སྤོངས་ནས། །རབ་བྱུང་ལམ་ནི་སློབ་པར་བྱེད། །གལ་ཏེ་བརྒྱ་བྱིན་ཚངས་པ་ཡི། །རྒྱལ་ཐབས་ཐོབ་པར་གྱུར་ན་ཡང། །དེ་དག་ལ་ནི་ཆགས་མེད་པས། །དེ་ནི་ལེགས་པར་རྗེས་འབྲང་ཡིན། །འཇིག་རྟེན་བསླབ་པའི་གནས་རྣམས་ཀྱང། །ཐམས་ཅད་གསལ་བར་ཁོང་དུ་ཆུད། །ལམ་འདི་ལ་ནི་གང་གནས་པ། །བདེན་ཚིག་སྨྲ་བ་ཞེས་བྱའོ། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་འདི་ལ་ཡང་དག་པར་གཞོལ་པར་གྱུར་པ་ན་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་པར་འདོད་པའི་ཕྱིར་ཆོས་གཅིག་མངོན་པར་སྒྲུབ་པར་བྱེད་དེ། འདི་ལྟ་སྟེ། མི་དགེ་བའི་ཆོས་རྣམས་མི་བྱེད་པ་གང་ཡིན་པའོ། གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། ནང་དུ་དགེ་བའི་ཆོས་གང་ཡིན་ཞེས་ཚུལ་བཞིན་དུ་སེམས་པ་དང། ཕྱི་རོལ་དུ་དགེ་བའི་ཆོས་གང་ཡིན་ཞེས་ཚུལ་བཞིན་དུ་འདྲི་བར་བྱེད་པ་གང་ཡིན་པའོ། གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། དངོས་པོ་ཇི་ལྟ་བ་བཞིན་དུ་ཆོས་རྣམས་རྟོགས་པར་ཁོང་དུ་ཆུད་པ་དང། དངོས་པོ་མེད་པ་དང། རྣམ་པར་རྟོགས་པ་མེད་པར་ཁོང་དུ་ཆུད་པ་གང་ཡིན་པའོ། གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་པའི་ཕྱིར་ཆོས་རྣམ་པ་གཉིས་
མངོན་པར་སྒྲུབ་པར་བྱེད་དེ། ནང་དུ་རྟོགས་པའི་རྗེས་སུ་འབྲང་བར་བྱེད་པ་དང། ཕྱི་རོལ་ལ་མངོན་པར་ཞེན་པ་མེད་པ་གང་ཡིན་པའོ། གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། རྣམ་པར་རྟོག་པར་བྱ་བ་མེད་པར་བདག་ཉིད་མངོན་པར་ཡིད་ཆེས་པ་དང། སེམས་ཅན་གང་ད་དུང་མངོན་པར་ཡིད་ཆེས་པར་མ་གྱུར་པ་དེ་དག་བདག་གིས་ལམ་འདི་ལ་དགོད་པར་བྱའོ་སྙམ་དུ་སེམས་པ་གང་ཡིན་པའོ། གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གཉིས་མངོན་པར་སྒྲུབ་པར་བྱེད་དེ། ལས་སུ་བྱ་བ་རྣམས་ཡང་དག་པ་ཇི་ལྟ་བ་བཞིན་དུ་ཤེས་ཤིང་མཐོང་བ་དང། ལས་སུ་བྱ་བ་རྣམས་ལ་མངོན་པར་ཞེན་པ་མེད་པ་གང་ཡིན་པའོ། གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གསུམ་མངོན་པར་སྒྲུབ་པར་བྱེད་དེ། ཉེ་བར་ལེན་པའི་ཕུང་པོ་སྡུག་བསྔལ་དང་བཅས་པ་རྣམས་རེ་རེ་ནས་རྟོགས་པར་ཁོང་དུ་ཆུད་པར་བྱེད་པ་དང། ཉེ་བར་ལེན་པའི་ཕུང་པོ་སྡུག་བསྔལ་མེད་པ་རྣམས་ནན་ཏན་གྱིས་ཡོངས་སུ་ཚོལ་ཞིང་མོས་པར་བྱེད་པ་དང། འདུས་པའི་ཆོས་རྣམས་ཡོངས་སུ་སྤོང་བར་བརྩོན་པ་གང་ཡིན་པའོ། གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་གསུམ་མངོན་པར་སྒྲུབ་པར་བྱེད་དེ། ཆོས་མཆོག་ཏུ་གྱུར་པ་ཡང་དག་པར་སྟོན་པ་ན་ཚིག་འགལ་བ་མེད་པར་ཆོས་ཀྱི་དོན་རྗེས་སུ་འཐུན་པར་སྟོན་ཅིང་སེམས་ལ་རྩོད་པ་མེད་པ་དང། ཚིག་འབྲུ་དང། ཡི་གེ་ཐམས་ཅད་ལ་མངོན་པར་ཞེན་པ་མེད་པ་དང། ཆོས་ཐམས་ཅད་ཡོངས་སུ་སྡུད་པར་བྱེད་པ་གང་ཡིན་པའོ། གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་བཞི་མངོན་པར་སྒྲུབ་པར་བྱེད་དེ། དོན་ལ་ཡང་དག་པར་སྦྱོར་བའི་དངོས་པོ་མངོན་བར་སྒྲུབ་པར་བྱེད་པ་དང་། དོན་ཇི་ལྟ་བ་བཞིན་དུ་རྗེས་སུ་འཐུན་བར་ཡང་དག་པའི་སྦྱོར་བའི་དངོས་པོ་མངོན་པར་སྒྲུབ་པར་བྱེད་པ་དང་། ཆོས་ཀྱི་རྗེས་སུ་འཐུན་པའི་སོ་སོར་རྟོག་པ་ལ་ཡང་དག་པར་སྦྱོར་བའི་དངོས་པོ་མངོན་བར་སྒྲུབ་པར་བྱེད་པ་དང་། ཐམས་ཅད་ལ་མངོན་པར་ཞེན་པ་མི་སྐྱེད་པར་ཡང་དག་པའི་སྦྱོར་བའི་དངོས་པོ་མངོན་པར་སྒྲུབ་པར་བྱེད་པ་གང་ཡིན་པའོ།།གཞན་ཡང་ཡང་དག་པའི་ལམ་ཡན་ལག་བརྒྱད་པ་ཡོངས་སུ་བསྡུ་བའི་ཕྱིར་ཆོས་རྣམ་པ་བཞི་མངོན་པར་སྒྲུབ་པར་བྱེད་དེ། ཤིན་དུ་བརྟན་
པའི་ཡི་དམ་གྱིས་བདག་ཉིད་སྲུང་ཞིང་ཇི་སྐད་བསྟན་པ་ཁོ་ན་བཞིན་དུ་སྒྲུབ་པར་བྱེད་པ་དང་། དབང་པོ་དྲུག་ལ་མཁས་ཤིང་ལམ་ལ་གཞོལ་བར་བྱེད་པ་དང། བསམ་པ་རྣམ་པར་དག་པར་བྱེད་པ་དང་། བག་ཡོད་པ་ལ་གནས་པར་བྱེད་པ་གང་ཡིན་པའོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཀྱི་སྤྱོད་པ་འདིས་ལམ་ཡོངས་སུ་སྡུད་པར་བྱེད་པའི་ཕྱིར་ལམ་གྱི་རྗེས་སུ་འབྲང་བ་ཞེས་བྱ་སྟེ། ཆོས་ཐམས་ཅད་ཀྱི་ངོ་བོ་ཉིད་སྟོང་པ་ཉིད་དུ་བལྟ་བའི་ཕྱིར་དང་། མིང་མེད་པའི་ཕྱིར་དང། མཚན་མ་མེད་པའི་ཕྱིར་དང། སྨོན་པ་མེད་པའི་ཕྱིར་དང་། སྐྱེ་བ་མེད་པའི་ཕྱིར་དང་། མངོན་པར་འདུ་བྱ་བ་མེད་པའི་ཕྱིར་དང་། ཡོངས་སུ་སྐྱོ་བར་གྱུར་པའི་ཕྱིར་དང་། སྤངས་པར་གྱུར་པའི་ཕྱིར་དང་། འགགས་པའི་ཕྱིར་དང་། ངེས་པར་འབྱུང་བའི་ཕྱིར་ཆོས་ཀྱི་སྣང་བ་ཐོབ་པ་ཡིན་ནོ། སྐྱེ་བ་རྣམས་ཟད་པར་སོ་སོར་རྟོག་པ་ན་ཡང་སྐྱེ་བ་མེད་པ་ལ་ཡང་སྐྱེ་བའི་འདུ་ཤེས་སྐྱེད་པར་མི་བྱེད་པས་དེའི་ཚེ་སྐྱེ་བ་ལས་ཡང་དག་པར་འདས་ནས་ཆོས་མ་ཡིན་པ་ལས་ངེས་པར་འབྱུང་བ་དང་། རྣམ་པར་དག་པའི་ལམ་ཐོབ་ནས་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། ལམ་རྣམ་པར་དག་པར་གྱུར་པའི་ཕྱིར་འདུ་ཤེས་ཐམས་ཅད་ལས་ཡང་དག་པར་འདས་ནས་འདུ་ཤེས་མེད་པ་ལ་མི་གནས་པ་དང་། ལམ་གྱི་འདུ་ཤེས་བཀག་ནས་ཆོས་ཀྱི་འདུ་ཤེས་སྤོང་བ་དང། མ་རིག་པའི་དྲ་བ་ལས་ངེས་པར་འབྱུང་ཞིང་རིག་པས་བསྒོམ་པས་འཐོབ་པར་བྱ་བའི་ཆོས་རྣམས་ཀྱང་རབ་ཏུ་འཐོབ་པར་འགྱུར་རོ། རིག་པས་བསྒོམ་པས་ཆོས་གང་ཞིག་འཐོབ་པར་འགྱུར་ཞེ་ན། འདི་ལྟ་སྟེ། རིག་པས་བསྒོམས་པས་འདུ་ཤེས་དང་། ཚོར་བ་འགོག་པ་འཐོབ་པ་དང་། ཆོས་ཐམས་ཅད་ལ་ངེས་པར་མཁས་པ་འཐོབ་པ་དང་། དགོངས་ཏེ་གསུངས་པ་རྟོགས་པས་ཆོས་ཉིད་ཀྱི་རྗེས་སུ་འབྲང་བར་འགྱུར་རོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་འདིར་ཞུགས་པར་གྱུར་པའི་ཚེ་ཡུལ་ལ་མི་གནས་ཤིང་མཚན་མས་བསྒྲིབས་པར་མི་འགྱུར་ཏེ། ཆོས་ཐམས་ཅད་ནམ་མཁའ་དང་མཚུངས་པ་དང་། སྐྱེ་བ་ནམ་མཁའ་དང་མཚུངས་པ་དང་། སྐྱེ་བའི་ངོ་བོ་ཉིད་ནམ་མཁའི་ངོ་བོ་ཉིད་དང་
མཚུངས་པར་ཤེས་པས་མཚན་མ་ཅུང་ཟད་ཙམ་གྱིས་ཀྱང་བར་ཆད་བྱེད་པར་མི་འགྱུར་རོ། ལམ་འདི་ཤིན་དུ་རྣམ་པར་དག་པས་གནོད་པས་འཇིགས་པ་ཡང་མེད་དོ། གོ་ཆ་ཆེན་པོ་བགོས་པས་འཛིན་པས་འཆིང་བར་ཡང་མི་འགྱུར་ལ། ཐེག་པ་ཆེན་པོ་ལ་ཞོན་བས་རྨོངས་པར་མི་འགྱུར་རོ། བསྒྲིབས་པ་རྣམས་སྤངས་པས་ནམ་མཁའ་ལྟ་བུར་གྱུར་ནས་འདིར་ཞུགས་ཏེ། སེམས་ཅན་རྣམས་ཀྱི་སྣང་བ་ཆེན་པོ་བྱེད་པར་འགྱུར་རོ། བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལམ་ཁྱད་པར་དུ་འཕགས་པ་ཡིན་ཏེ། ཉན་ཐོས་དང་། རང་སངས་རྒྱས་ཀྱི་སྤྱོད་ཡུལ་མ་ཡིན་ནོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།། །།ཡང་དག་ལམ་བརྒྱད་བསྡུ་པའི་ཕྱིར། ཆོས་སྤྱོད་རྣམས་ནི་སྟོན་པ་ཡི། །ལམ་འདི་ལ་ནི་གང་གནས་པ། །དེ་ནི་བརྩོན་འགྲུས་ཆེན་པོ་ཡིན། །དགེ་བའི་ཆོས་ཀྱིས་ལམ་བསྒྲུབས་ཤིང་། །དུས་ནི་ཐམས་ཅད་དག་ཏུ་ཡང་། །མི་དགེའི་ཆོས་ནི་མི་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་རྣལ་འབྱོར་པས། །ནང་དུ་ཚུལ་བཞིན་ཡིད་བྱེད་ཅིང་། །ཕྱི་རོལ་དུ་ནི་འདྲི་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་གང་རྟོག་པ། །དངོས་པོ་ཇི་བཞིན་རབ་ཤེས་ཤིང་། །ཚུལ་བཞིན་ཆོས་བཞིན་གང་གནས་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་སྐྱབས་བྱེད་པས། །ནང་དུ་རྗེས་སུ་རྟོག་བྱེད་ཅིང་། །ཕྱི་རོལ་དུ་ནི་ཞེན་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་འཇིགས་མེད་པས། །བདག་ཉིད་རྟོག་མེད་ཡིད་ཆེས་ཤིང། །གཞན་དག་ཡིད་ཆེས་གནས་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཡིད་བྱེད་པས། །བྱ་བའི་ལས་རྣམས་དག་བྱེད་ཅིང་། ལས་རྣམས་ལ་ནི་འཛིན་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་འཆིང་མེད་པས། །རྟག་ཏུ་སྡུག་བསྔལ་ཉེར་ལེན་ཤེས། །ཉེར་ལེན་སྡུག་བསྔལ་མེད་ཚོས་བ། །སྤྱོད་པ་འདི་ནི་ལམ་སྡུད་འགྱུར། །བྱང་ཆུབ་སེམས་དཔའ་རབ་ཤེས་པས། །འདུས་པ་སྤྱོད་པ་སྤྱོད་སྒྲུབ་ཅིང་། །འདུས་འཕྲོད་དག་ནི་གང་
སྤོང་བ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་དོན་སེམས་པས། །དོན་ཀྱི་རྗེས་སུ་རབ་རྟོགས་ཤིང་། །རྩོད་པ་མེད་པར་གང་སྟོན་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་བློ་ལྡན་པས། །ཚིག་འབྲུ་ཡི་གེ་ཞེན་མེད་པར། །ཆོས་རྣམས་ཐམས་ཅད་སྡུད་བྱེད་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཆོས་སྤྱོད་པས། །ཆོས་ཀྱི་རྗེས་སུ་འཐུན་བྱེད་ཅིང། །དོན་གྱི་རྗེས་སུ་འཐུན་གྱུར་པ། སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ལམ་འབྲང་བས། །བརྟན་པའི་ཡིད་དམ་ཡང་དག་གནས། །ཇི་སྐད་བསྟན་བཞིན་གང་སྒྲུབས་པ། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ལམ་དག་པས། །ཡིད་ལ་མས་པ་རབ་སྦྱངས་ནས། །ཆོས་ལ་གནས་ཤིང་བག་ཡོད། །སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཐམས་ཅད་དུ། །སྤྱོད་པ་འདི་རྣམས་རབ་བསྒྲུབས་ནས། །ལུས་དང་སེམས་ནི་བདེ་ཐོབ་ན། སྤྱོད་པ་འདིས་ནི་ལམ་སྡུད་འགྱུར། །བྱང་ཆུབ་སེམས་དཔའ་ཡང་དག་དྲན། །རྣམ་དག་ལམ་ལ་གང་གནས་པ། །ཆོས་རྣམས་སྟོང་ཞིང་མཚན་མེད་པར། །ཐམས་ཅད་རབ་ཏུ་རྟོགས་པར་འགྱུར། །བྱང་ཆུབ་སེམས་དཔའ་རབ་བརྟགས་ན། །སྨོན་ལམ་རྣམ་པར་དག་བྱེད་ཅིང་། །སྨོན་ལམ་མེད་ལ་མི་གནས་པས། །མཚན་མ་རྣམས་ནི་སྤོང་བར་འགྱུར། །བྱང་ཆུབ་སེམས་དཔའ་ཚུལ་བཞིན་དུ། དོན་ཚུལ་མཉམ་བར་རབ་བརྟགས་ན། །ཆོས་རྣམས་སྐྱེ་བར་མི་འགྱུར་བས། །ཐེ་ཚོམ་ཅུང་ཟད་ཡོང་མི་འགྱུར། །བྱང་ཆུབ་སེམས་དཔའ་བློ་ལྡན་དག། །ཐམས་ཅད་ཆོས་ནི་རབ་བརྟགས་ན། །སྐྱེ་ཞིང་ཞི་བར་འགྱུར་བའི་ཕྱིར། གསལ་བར་མཐོང་ནས་གཞོལ་བར་འགྱུར། །བྱང་ཆུབ་སེམས་དཔའ་ཆོས་རྟོགས་པས། །ཚུལ་བཞིན་ཆོས་སྐྱེ་མཐོང་བས་ན། །སྐྱེ་བ་ལས་ནི་སྐྱེ་མི་མཐོང་། །ཟད་པ་ལས་ནི་ཟད་མི་མཐོང་། །བྱང་ཆུབ་སེམས་དཔའ་བརྩོན་འགྲུས་ལྡན། །དེ་ལྟར་སོ་སོར་རྟོག་བྱེད་ན། །ཆོས་མིན་པ་ལས་དེས་འབྱུང་ཞིང་། །ཡང་དག་གནས་ལ་གནས་པར་འགྱུར། །བྱང་ཆུབ་སེམས་དཔའ་བློ་དམ་པས། །ལམ་འདི་རྣམ་
པར་དག་བས་ན། །མྱུར་དུ་བདེ་གནས་ཕྱིན་སེམས་པ། །བླ་མེད་བཟོད་པ་འགྲུབ་པར་འགྱུར། །བྱང་ཆུབ་སེམས་དཔའ་བློ་དམ་པས། །ཚུལ་བཞིན་ཆོས་རྣམས་རྟོག་བྱེད་ཅིང་། །འདུ་ཤེས་རྣམས་ལས་གང་འདས་པ། །འདུ་ཤེས་མེད་ལ་རྟག་གནས་འགྱུར། །བྱང་ཆུབ་སེམས་དཔའ་བློ་དམ་པས། །ལམ་འདི་རབ་སྦྱོར་འགྱུར་རོ་ཞེས། །ལམ་གྱི་འདུ་ཤེས་གང་སྤོང་བ། །ཆོས་ཀྱི་འདུ་ཤེས་ལ་མི་གནས། །བྱང་ཆུབ་སེམས་དཔའ་བློ་དག་པས། །ལམ་འདི་རབ་ཏུ་སྤྱོད་པའི་ཕྱིར། །མ་རིག་དྲ་བ་དྲལ་སེམས་པ། །ཆོས་ཀྱི་སྣང་ཆེན་ཐོབ་པར་འགྱུར། །བྱང་ཆུབ་སེམས་དཔའ་བློ་དམ་པས། །རིག་པས་སྒོམ་པར་བྱེད་པས་ནི། །སེམས་ཅན་རྣམས་ལ་སྟོན་བྱེད་པས། །དེས་ན་རབ་ཏུ་གཞོལ་བར་འགྱུར། །བྱང་ཆུབ་སེམས་དཔའ་རིག་སྒོམ་པ། །ཆོས་རྣམས་ཐམས་ཅད་རབ་རྟོགས་ཕྱིར། །དོན་ཟབ་ལ་ནི་ངེས་འགྱུར་ཞིང་། །ཐབས་མཁས་ཆེན་པོ་ཐོབ་པར་འགྱུར། །བྱང་ཆུབ་སེམས་དཔའ་རིག་སྒོམ་པ། །ཐབས་ཀྱིས་འདུ་ཤེས་ཀུན་སྤངས་བས། །གསང་བའི་ཆོས་ཀྱི་རྗེས་འབྲང་ཞིང་། །ངེས་པའི་དོན་ནི་རྟོགས་པར་འགྱུར། །བྱང་ཆུབ་སེམས་དཔའ་བློ་དམ་པས། །ཆོས་ཀྱི་སྣང་བ་ཆེན་པོ་ཡིས། །འདུ་ཤེས་ཚོར་བ་འགོག་བྱེད་ན། །དེས་ན་ཡང་དག་གཞོལ་བར་འགྱུར། །བྱང་ཆུབ་སེམས་དཔའ་བློ་དམ་པས། །ལམ་འདི་ལ་ནི་མི་གནས་ཕྱིར། །ལམ་ལ་ཡང་དག་གཞོལ་བར་འགྱུར། །བྱང་ཆུབ་སེམས་དཔའ་འཇིགས་མེད་པས། །ཆོས་རྣམས་དག་ནི་ཐམས་ཅད་ཀྱང་། །ནམ་མཁའ་དག་པ་ལྟར་ཤེས་པས། །མཚན་མ་རྣམས་ཀྱིས་སྒྲིབ་མི་འགྱུར། །བྱང་ཆུབ་སེམས་དཔའ་ཆོས་རྣམས་ཀྱི། །རང་བཞིན་ནམ་མཁའ་འདྲར་ཤེས་ཏེ། །ཆོས་རྣམས་ནམ་མཁའ་འདྲ་བའི་ཕྱིར། །རྣམ་དག་དྲི་མ་མེད་པར་ཤེས། །བྱང་ཆུབ་སེམས་དཔའ་དེ་ལྟ་བུར། །གནས་པས་མཚན་མ་སྒྲིབས་པར་འགྱུར། །མྱུར་དུ་སེམས་ཅན་རྣམས་ལ་ནི། །གདམས་ངག་རྗེས་སུ་སྟོན་པར་འགྱུར། །བྱང་ཆུབ་སེམས་དཔའ་བློ་དམ་པའི། །ལས་རྣམས་ཐམས་ཅད་རྣམ་དག་པས། །ལམ་ལ་བར་ཆད་ཅི་ཡང་མེད། ཐོགས་པ་མེད་པར་གཞོལ་བར་འགྱུར། །རྣམ་པར་དག་པའི་ལམ་འདི་ནི། །བྱང་ཆུབ་ཆེན་པོར་མྱུར་དུ་འགྲོ། །འདུས་མ་
བྱས་ནི་མངོན་དུ་བྱེད མཉམ་པ་ཉིད་དུ་གཞོལ་བར་འགྱུར། །བྱང་ཆུབ་སེམས་དཔའ་གོ་ཆེན་པོ། །ཐེག་ཆེན་ལམ་ནི་ཆེན་པོ་དག། །ནམ་མཁའ་འདྲ་བར་ཐོགས་མེད་ཅིང་། །རྣམ་པར་དག་པར་གདོལ་བར་བྱ། །ཐེག་དད་ལམ་འདི་གང་སྐྱེས་པ། །ནམ་མཁའ་བསྐྱེད་པ་ལྟ་བུར་ནི། །མཚན་མ་མང་པོ་རབ་སྤངས་ནས། །མཚན་མ་མེད་པར་བགྲོད་པར་བྱ། །ཐེག་པ་ཆེན་པོ་མཉམ་པའི་ཐེག། །རྒྱ་ཆེན་ནམ་མཁའ་འདྲ་བས་ན །ཤིན་དུ་རྣམ་དག་ལམ་འདི་ལ། །ཐེག་པ་འདིས་ནི་བགྲོད་པར་བྱ། །བྱང་ཆུབ་སེམས་དཔའ་ཐམས་ཅད་ཀྱང་། །ཆོས་འདི་ལས་ནི་གུས་བྱེད་པས། །སེམས་ཅན་རྣམས་ནི་ཀུན་གྱི་ཕྱིར། །དཔའ་བོས་རབ་ཏུ་བགྲོད་པར་བྱ། །བྱང་ཆུབ་ཆེན་པོར་བགྲོད་བྱེད་ཅིང་། །ཁྱད་པར་ལམ་འདིར་གང་གནས་པ། །ཐེག་པ་པ་གཉིས་ལ་སོགས་པས། །བགྲོད་པར་བྱ་བའི་ཡུལ་མ་ཡིན། །བྱང་ཆུབ་སེམས་དཔའ་ཡང་དག་དྲན། །ལམ་འདི་དག་པར་གང་བྱེད་པ། །རྣམ་པར་དག་པའི་ལམ་འདི་ཡིས། །བླ་མེད་མཆོག་ཏུ་བགྲོད་པར་འགྱུར། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དེ་ལྟར་ཡང་དག་པར་ཞུགས་ཤིང་གཞོལ་བར་གྱུར་པའི་ཚེ་དྲན་པ་ཉེ་བར་གཞག་བ་དང་། ཡང་དག་པར་སྤོང་བ་དང་། །དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། རྫུ་འཕྲུལ་གྱི་རྐང་པ་དང་། །ཞི་གནས་དང་། ལྷག་མཐོང་ཚད་མེད་པ་རྣམས་ཡང་དག་པར་ཁོང་དུ་ཆུད་པས་ཡོན་ཏན་ཁྱད་པར་དུ་འཕགས་པ་ཚད་མེད་པས་བརྒྱན་ནས་འཇིག་རྟེན་པ་རྣམས་རབ་ཏུ་གདུལ་བའི་ཕྱིར་དང་། གོ་ཆ་ཆེན་པོ་བགོས་ནས་ཁམས་གསུམ་ལས་དེས་པར་འབྱུང་བར་བྱ་བའི་ཕྱིར་དང་། ཐེག་པ་ཆེན་པོ་ལ་ཞོན་ནས་ལྷ་དང་། མི་དང་། ལྷ་མ་ཡིན་རྣམས་ཡོངས་སུ་གཟུང་བར་བྱ་བའི་ཕྱིར་ལམ་འདི་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་གཞོལ་བར་བྱེད་དོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཆེན་པོ་བགོས་ཏེ། ཐེག་པ་ཆེན་པོ་ལ་ཞོན་ནས་ལམ་འདི་ལ་
གནས་པའི་ཚེ་གལ་ཏེ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱིས་སེམས་ཅན་ཀུན་ལ་ཁྱབ་པར་མི་བྱེད་དམ། སེམས་ཅན་རྣམས་ལ་བདག་དང་འདྲ་བར་ཕངས་པར་མི་བྱེད་ན་ནི་དེ་ལྟ་བུའི་གོ་ཆ་དང་། ཐེག་པ་ཆེན་པོ་འདི་དག་ནི་ས་ཆེན་པོས་ཀྱང་ཐེག་པར་མི་འགྱུར་ལ། སེམས་ཅན་ཐམས་ཅད་ཀྱིས་ཀྱང་སྟེན་པར་མི་འགྱུར་བ་ཞིག་ན་འདི་ལྟར་སེམས་ཅན་རྣམས་ལ་སྙིང་བརྩེ་ཞིང་ཕན་གདགས་པའི་ཕྱིར་གོ་ཆ་ཆེན་པོ་བགོས་ཏེ། ཐེག་པ་ཆེན་པོ་ལ་ཞོན་ནས་ལམ་འདི་ལ་གནས་པ་ཡིན་པས་གོ་ཆ་དང་། ཐེག་པ་ཆེན་པོའི་ལམ་ཆེན་པོ་འདི་དག་ཏུ་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ཐམས་ཅད་ཀྱིས་ཀྱང་བགྲོད་པར་མི་ནུས་ལ། བྱིས་པ་སོ་སོའི་སྐྱེ་བོ་འཇིག་རྟེན་ལ་མངོན་པར་ཞེན་པ་དང་། འཇིག་རྟེན་ན་གནས་པར་མོས་པ་ཐམས་ཅད་ཀྱིས་ཀྱང་མཐོང་བར་མི་ནུས་པ་ཡིན་ནོ། གཞན་ཡང་བྱང་ཆུབ་སེམས་དཔའ་ཆེན་པོ་རྣམས་ནི་སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་གོ་ཆ་ཆེན་པོ་བགོས་པ་ཡིན་བས་འདི་ལྟར་གོ་ཆའི་མཐུས་ས་དང་། ཆུ་དང་། མེ་དང་། རླུང་གི་ཁམས་བྱིན་གྱིས་བརླབས་པས་སའི་ཁམས་འདི་གཡོ་ཞིང་འཁྲུག་པ་མེད་པ་དང་། སེམས་ཅན་ཐམས་ཅད་འཇིགས་པ་མི་སྐྱེ་བ་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་རྣམས་ཀྱང་དེ་དག་གི་རྗེས་སུ་ཅི་རིགས་པར་བྱ་བ་རྣམས་བྱེད་པ་ཡིན་ནོ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་པོ་སེམས་བསྐྱེད་དི་གོ་ཆ་བགོས་ནས་དེད་གོ་ཆ་ཆེན་པོ་འདི་བགོས་ཏེ། ཐེག་པ་ཆེན་པོ་འདི་ལ་ཞོན་ནས་རྣམ་པར་དག་པའི་ལམ་གྱིས་སྐྱེ་བ་གཅིག་གིས་ཐོགས་པ་ལ་གཞོལ་ཞིང་བྱང་ཆུབ་ཀྱི་ཤིང་དྲུང་དུ་བགྲོད་པ་དང་། བྱང་ཆུབ་ཀྱི་སྙིང་པོ་ལ་ཞུགས་པར་གྱུར་པའི་བར་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྡོ་རྗེ་ལས་མངོན་པར་གྲུབ་པའི་སའི་དཀྱིལ་འཁོར་ཤིན་དུ་བརྟན་པ་འདི་གལ་ཏེ་བྱིན་གྱིས་མ་བརླབས་ན་འཁྲུག་ཅིང་གཡོ་བར་འགྱུར་ཏེ། ཤིན་དུ་བརྟན་བའི་རྡོ་རྗེ་ལས་མངོན་པར་གྲུབ་པ་ཡིན་ཡང་གོ་ཆ་ཆེན་པོ་དང་། ཐེག་པ་ཆེན་པོའི་ལམ་ཆེན་པོ་འདི་འདེགས་པའི་འོས་སུ་མི་འགྱུར་རོ། །
གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྔོན་གྱི་སྨོན་ལམ་གྱིས་སེམས་ཅན་ལ་བྱམས་པ་དང་། སྙིང་རྗེ་ཆེན་པོ་བསྐྱེད་པ་དང་། ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་རྣམས་ཐབས་གཅིག་ཏུ་བསྔགས་པ་བརྗོད་ནས་གལ་ཏེ་རྡོ་རྗེ་ཆེན་པོའི་དཀྱིལ་འཁོར་ཆེན་པོ་དང་། རི་རབ་དང་། རིན་པོ་ཆེའི་རི་ཐམས་ཅད་དང་། དེ་ལས་གཞན་པའི་རིའི་རྒྱལ་པོ་རྣམས་བྱིན་གྱིས་བརླབས་པར་མ་གྱུར་ན་གོ་ཆ་ཆེན་པོ་དང་། ཐེག་པ་ཆེན་པོའི་ལམ་ཆེན་པོ་འདི་དག་འདེབས་བའི་འོས་སུ་མི་འགྱུར་རོ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྔོན་གྱི་སྨོན་ལམ་གྱི་མཐུའི་ཕྱིར། དེ་བཞིན་གཤེགས་པ་རྣམས་ཀྱི་སྔོན་གྱི་སྨོན་ལམ་གྱི་མཐུས་བྱིན་གྱིས་བརླབས་པའི་ཕྱིར་དང་། སེམས་ཅན་རྣམས་ལ་རྣམ་པར་མི་འཚེ་བའི་ཕྱིར་དང་། གནོད་པ་མི་བྱེད་པའི་ཕྱིར་དང་། མཉམ་བར་མི་བྱེད་པའི་ཕྱིར་དང་། སྐྲག་པར་མི་བྱེད་པའི་ཕྱིར་དང་། འཁོར་དུ་མི་འཛིན་བའི་ཕྱིར་དང་། མནར་པར་མི་བྱེད་པའི་ཕྱིར་དང་། ཉོན་མོངས་པར་མི་བྱེད་པའི་ཕྱིར་དང་། སེམས་ཅན་རྣམས་བདེ་བ་ཐོབ་པར་བྱ་བའི་ཕྱིར་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ། ལམ་འདི་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་བགོས་པ་ན་ཤེས་རབ་ཀྱི་གོ་ཆ་བགོས་ནས་ཤེས་རབ་ཀྱི་མཚོན་ཆ་ཐོགས་ཏེ། ཤེས་རབ་ཆེན་པོས་ཡོངས་སུ་བསྔོ་བར་བྱེད་དོ། ཡོངས་སུ་བསྔོ་བའི་ཐེག་པ་ལ་ཞོན་ནས། ཤེས་རབ་ཀྱི་སྣང་བ་སྐྱེད་པར་བྱེད་དོ། སྣང་བའི་ལམ་ལ་གནས་ནས་ཤེས་རབ་ཀྱི་སྣང་བའི་མིག་གིས་ཆོས་རྣམས་སོ་སོར་བརྟགས་ཏེ། ཐམས་ཅད་མཁྱེན་པའི་ཡེ་ཤེས་ལ་རབ་ཏུ་གཞོལ་བར་བྱེད་དོ། ཐམས་ཅད་མཁྱེན་པའི་ཡེ་ཤེས་དང་། སེམས་ཅན་རྣམས་ཡོངས་སུ་བསྡུ་བའི་ཕྱིར་སྦྱིན་བའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང་། བཟོད་པའི་ཕ་རོལ་དུ་ཕྱིན་པ་དང་། བརྩོན་འགྲུས་ཀྱི་ཕ་རོལ་དུ་ཕྱིན་བ་དང་། བསམ་གཏན་གྱི་ཕ་རོལ་ཏུ་ཕྱིན་པ་རྣམས་སྒོམ་པར་བྱེད་དེ།
ཐམས་ཅད་ཀྱང་ཤེས་རབ་སྔོན་དུ་འགྲོ་ཞིང་ཤེས་རབ་ཀྱིས་མངོན་པར་བསྒྲུབ་པ་དང་། ཤེས་རབ་ཀྱིས་ཡོངས་སུ་བསྡུས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་དོ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་འདི་སྐད་ཅེས་གསོལ་ཏོ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཤེས་རབ་རྣམ་པ་སྣ་ཚོགས་ཐམས་ཅད་དུ་ཁྱབ་ཅིང་སངས་རྒྱས་ཀྱི་ཆོས་ཚད་མ་མཆིས་པ་རྣམས་ཡོངས་སུ་སྡུད་ཅིང་མངོན་བར་བསྒྲུབ་པར་བགྱིད་པ་ནི་ཤིན་དུ་ངོ་མཚར་ཆེ་ལགས་སོ། དེ་ནས་བཅོམ་ལྡན་འདས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་པ། བློ་གྲོས་མཐའ་ཡས་དེ་དེ་བཞིན་ནོ། དེ་དེ་བཞིན་ཏེ། ཁྱོད་ཀྱིས་ཇི་སྐད་སྨྲས་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཤེས་རབ་རྣམ་པ་སྣ་ཚོགས་ཀྱིས་ཀུན་དུ་ཁྱབ་ཅིང་ཆོས་ཐམས་ཅད་ཡོངས་སུ་བསྡུས་ཏེ། གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ། ལམ་ཆེན་པོ་འདི་ལ་གནས་ནས་ཐམས་ཅད་ཀྱང་ཤེས་རབ་སྔོན་དུ་འགྲོ་བས་རབ་ཏུ་གཞོལ་བར་བྱེད་དོ། བློ་གྲོས་མཐའ་ཡས་གལ་ཏེ་ཤེས་རབ་དང་ལྡན་ཡང་ཤེས་རབ་སྔོན་དུ་འགྲོ་བ་མེད་ན་ལམ་འདི་ལ་རབ་ཏུ་གཞོལ་བར་མི་འགྱུར་གྱི། གལ་ཏེ་ཤེས་རབ་དང་ལྡན་ཞིང་ཤེས་རབ་སྔོན་དུ་འགྲོ་བས་ཐམས་ཅད་དུ་ཁྱབ་པར་གྱུར་ན་རྗེས་སུ་འཇུག་པ་དང་། རྗེས་སུ་སྤྱོད་པ་དང་། ཤེས་རབ་ཀྱིས་ཡོངས་སུ་བསྡུས་ཤིང་། ཤེས་རབ་ཀྱིས་རབ་ཏུ་བསྡམས་པར་གྱུར་ནས་གདོད་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་པ་དང་། ལམ་ཆེན་པོ་འདི་ལ་གནས་པ་ཞེས་བྱ་སྟེ། རབ་ཏུ་བདེ་བའི་ཆོས་ཀྱིས་འཇིག་རྟེན་ལ་ཕན་འདོགས་ཤིང་ཤེས་རབ་ཀྱི་མིག་འབྱེད་པར་བྱེད་དོ། ཤེས་རབ་ཀྱི་མིག་གིས་སོ་སོར་བརྟགས་ནས་ཤེས་རབ་ཀྱིས་ལུས་གསལ་བར་གྱུར་པས་འོད་ཟེར་ཆེན་པོ་བཀྱེ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དེ། བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བགོ་བར་བྱ་བའི་གོ་ཆ་དང་། གོ་ཆའི་བཀོད་པ་དང་། བཞོན་བར་བྱ་བའི་
ཐེག་པ་ཆེན་པོ་དང་། ཐེག་པ་ཆེན་པོའི་བཀོད་པ་དང་། བགྲོད་པར་བྱ་བའི་ལམ་ཆེན་པོ་དང་། ལམ་ཆེན་པོའི་བཀོད་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་བ་ཡིན་ནོ། བློ་གྲོས་མཐའ་ཡས་སྐྱེས་བུ་དམ་པ་གང་གོ་ཆའི་བཀོད་པ་དང། ཐེག་པ་ཆེན་པོའི་བཀོད་པ་དང་། ལམ་ཆེན་པོའི་བཀོད་པ་དང་། ཡོན་ཏན་རྣམ་པ་སྣ་ཚོགས་ཐམས་ཅད་ཀྱིས་རབ་ཏུ་བརྒྱན་པ་གང་ཡིན་བ་དེ་དག་ངས་ཡོངས་སུ་རྫོགས་པར་བརྗོད་པར་གྱུར་ན་བསྐལ་པ་ཚད་མེད་པ་རྣམས་སུ་བརྗོད་ཀྱང་མཐར་ཐུག་པར་མི་འགྱུར་མོད་ཀྱི། འོན་ཀྱང་ཁྱེད་ལ་སོགས་པས་རབ་ཏུ་རྟོགས་པར་བྱ་བའི་ཕྱིར་དང་། མ་འོངས་པའི་སྐྱེས་བུ་དམ་པ་རྣམས་གོ་ཆའི་བཀོད་པ་དང་། ཐེག་པ་ཆེན་པོའི་བཀོད་པ་དང་། ལམ་ཆེན་པོའི་བཀོད་པ་དང་། ཡོན་ཏན་དཔག་ཏུ་མེད་པའི་ཚོགས་ཀྱི་བཀོད་པ་ཐོབ་པར་བྱ་བའི་ཕྱིར་ངས་དེང་འདིར་ཕྱོགས་ཅུང་ཟད་ཙམ་ཞིག་མདོར་བསྟན་པར་བྱ་སྟེ། སྐྱེས་བུ་དམ་པ་དེ་དག་གལ་ཏེ་ངས་བསྟན་པའི་ཆོས་ཐོས་པར་གྱུར་ན་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ། ལམ་ཆེན་པོ་འདི་ལ་གནས་པར་འགྱུར་ཞིང་ཡོན་ཏན་གྱིས་རབ་ཏུ་བརྒྱན་ནས་རབ་ཏུ་གཞོལ་བར་འགྱུར་རོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚེགས་སུ་བཅད་དེ་བཀའ་སྩལ་པ། །ངས་ནི་ཡང་དག་སྤོང་བ་དང་། །དྲན་པ་ཉེར་གཞག་རྣམ་བཞི་དང་། །ཐབས་མཁས་ཐམས་ཅད་བཤད་པས་ན། །དེ་ཕྱིར་བག་ཡོད་བཅས་པར་འགྱུར། །ཡང་དག་དྲན་པ་ཕུན་ཚོགས་ཤིང་། །ཆོས་མཁས་མཚུངས་པར་ལྡན་བ་དང་། །རབ་བརྩོན་ངེས་པར་འབྱུང་བྱེད་པས། །དེ་ཕྱིར་བག་ཡོད་བཅས་པར་འགྱུར། །དབང་པོ་སྟོབས་དང་བྱང་ཆུབ་ཕྱོགས། །གོ་བགོས་ཐེག་ཆེན་བཞོན་བྱས་ཏེ། །འདི་ཡིས་བསྲུང་བ་རབ་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །བསམ་གཏན་ཟིལ་གནོན་རྣམ་མཐར་དང་། །ཏིང་འཛིན་སྙོམས་པར་རབ་ཞུགས་ཏེ། །འདི་ཡིས་བསྲུང་བ་རབ་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །སྙིང་རྗེ་བྱམས་དང་དགའ་བཏང་སྙོམས། །གོ་བགོས་ཐེག་ཆེན་བཞོན་བྱས་ཏེ། །འདི་
ཡིས་བསྲུང་བ་རབ་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །ཞི་གནས་ལྷག་མཐོང་རྫུ་འཕྲུལ་རྐང་། །ཆོ་འཕྲུལ་དག་ནི་རྫོགས་བྱས་ཏེ། འདི་ཡིས་བསྲུང་བ་རབ་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །ཚད་མེད་ཡོན་ཏན་རྣམས་དང་ནི། །གོ་བགོས་ཐེག་ཆེན་བཞོན་བྱས་ཏེ། །ལམ་ལ་ངལ་བ་མེད་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །བརྩོན་འགྲུས་དག་ནི་བག་ཡོད་དང་། གོ་བགོས་ཐེག་ཆེན་བཞོན་བྱས་ཏེ། །དྲན་ནས་དེ་དག་ཤེས་བྱས་ནས། །བྱང་ཆུབ་སེམས་དཔའ་གཞོལ་བར་བྱ། །སྣང་བ་གོ་ཆ་ཆེན་པོ་ཡིས། །འཇིག་རྟེན་དག་ནི་རབ་བཏུལ་ཏེ། གོ་ཆ་འདི་ནི་བགོ་བྱས་བ། །འདི་ནི་བློ་ལྡན་ཞེས་བྱའོ། །ཐམས་ཅད་མཁྱེན་ལ་ཡང་དག་ཕྱོགས། །ཁམས་གསུམ་ལས་ནི་ངེས་འབྱུང་ཕྱིར། །ཐེག་ཆེན་འདི་ལ་གང་ཞོན་པ། །འདི་ནི་བློ་ལྡན་ཞེས་བྱའོ། །ལམ་ཆེན་རྣམ་པར་དག་བའི་ལམ། །ལྷ་དང་མི་དང་ལྷ་མ་ཡིན། །འཇིག་རྟེན་ཟིལ་གྱིས་མནན་པ་ནི། །ཀུན་དུ་གྲགས་པ་ཞེས་བྱའོ། །འདི་འདྲའི་བྱང་ཆུབ་སེམས་དཔའ་ནི། །སེམས་ཅན་རྣམས་ནི་ཀུན་གྱི་ཕྱིར། །དུས་རྣམས་ཐམས་ཅད་དག་དུ་ཡང་། །གོ་ཆ་བརྩོན་འགྲུས་བགོ་བར་བྱེད། །གལ་ཏེ་བྱང་ཆུབ་སེམས་དཔའ་རྣམས། །བྱམས་དག་སྙིང་རྗེ་དགའ་དང་། གཏད་སྙོམས་ཆེན་པོ་མི་སྒོམ་ན། །ས་ཆེན་དག་ནི་ཤོང་མི་འགྱུར། །གལ་ཏེ་བྱང་ཆུབ་སེམས་དཔའ་རྣམས། སེམས་ཅན་རྣམས་ནི་དེ་དག་ལ། །དུས་རིག་ཕན་འདོགས་མི་བྱེད་ན། ས་ཆེན་དག་ནི་ཤོང་མི་འགྱུར། །གལ་ཏེ་བྱང་ཆུབ་སེམས་དཔའ་རྣམས། །སྙིང་རྗེ་ཐེག་ཆེན་མི་ཞོན་ན། །རི་དང་རྒྱ་མཚོ་ཆེན་པོ་རྣམས། །ས་ཆེན་དག་ནི་ཤོང་མི་འགྱུར། །གལ་ཏེ་བྱང་ཆུབ་སེམས་རྣམས། །བྱམས་པས་སེམས་ཅན་དྲན་བྱེད་ཅིང་། །ཐེག་ཆེན་འདི་ལ་མི་ཞོན་ན། །སེམས་ཅན་གང་ཡང་བརྟེན་མི་འགྱུར། །གལ་ཏེ་གོ་ཆ་འདི་བགོས་ནས། །བྱམས་འོད་གསལ་བར་མ་བྱས་ན། །གོ་བ་ཆེན་པོ་དེ་དག་ལ་། །སེམས་ཅན་གང་ཡང་བསྟེན་མི་འགྱུར། །གོ་ཆ་འདི་ནི་རབ་བགོས་ནས། །ཡོན་ཏན་རྒྱ་མཚོ་དཔག་མེད་ཀྱིས། །འབྱུང་ཆེན་ཁམས་བཞི་བྱིན་བརླབས་པས། །དེ་འདེག་འོས་སུ་གྱུར་པ་ཡིན། །སེམས་ཅན་ཡོངས་སུ་བསྡུ་བའི་ཕྱིར། །སྙིང་རྗེའི་འོད་ཀྱིས་ཀུན་ཁྱབ་ཅིང་། །འབྱུང་ཆེན་ཁམས་བཞི་བྱིན་བརླབས་པས། །དེ་འདེག་འོས་སུ་གྱུར་པ་
ཡིན། །སེམས་ཅན་ཡོངས་སུ་བསྡུ་བའི་ཕྱིར། །བྱང་ཆུབ་ཆེན་པོ་མངོན་བསྒྲུབས་ནས། །འབྱུང་ཆེན་ཁམས་བཞི་བྱིན་བརླབས་པས། །དེ་འདེག་འོས་སུ་གྱུར་པ་ཡིན། །སེམས་ཅན་མི་སྨོན་གནོད་མི་བྱེད། །གོ་ཆ་ཆེན་པོ་འདི་བགོས་ནས། །ཐེག་ཆེན་གྱིས་ནི་ངེས་འབྱུང་བ། །འདི་ནི་བློ་ལྡན་ཞེས་བྱའོ། །ཐབས་ལ་མཁས་པ་ཆེན་པོ་ཡིས། ཐམས་ཅད་བྱིན་གྱིས་རབ་བརླབས་ནས། །བླ་ན་མེད་པར་ངེས་འབྱུང་བ། །འདི་ནི་བློ་ལྡན་ཞེས་བྱའོ། །དེས་ན་ས་ནི་ཆེན་པོ་འདི། །མི་འབྱིང་རབ་ཏུ་མི་གཡོ་ཞིང་། །ཆུ་དང་མེ་དང་རླུང་གི་ཁམས། །བྱ་བ་དག་ནི་བྱེད་པ་ཡིན། །བྱང་ཆུབ་སེམས་དཔའ་ཆེན་པོ་རྣམས། །གོ་ཆ་དཔག་མེད་བགོས་ནས་ནི། །ཐེག་ཆེན་འདི་ལ་བཞོན་བྱས་ནས། །ལམ་གྱིས་རབ་ཏུ་གཞོལ་བར་བྱེད། །ཚེ་གཅིག་ཐོགས་པ་མངོན་བསྒྲུབས་ཏེ། །ཐ་མའི་ལུས་ནི་ཐོབ་གྱུར་ནས། །བྱང་ཆུབ་ཤིང་རྒྱལ་དྲུང་སོང་སྟེ། །རབ་བརྟན་ས་ལ་འདུག་ནས་ནི། །བྱང་ཆུབ་སྙིང་པོ་དེ་དག་ཏུ། །རྡོ་རྗེ་བཞིན་དུ་རབ་གནས་ནས། །ལུས་དང་སེམས་ནི་ངལ་མེད་པར། །ཐམས་ཅད་མཁྱེན་པ་མངོན་དུ་བྱེད། །བྱང་ཆུབ་སེམས་དཔའ་འཇིགས་མེད་པས། །གལ་ཏེ་བྱིན་གྱིས་མ་བརླབས་ན། །ས་ཆེན་པོ་དག་གཡོ་འགྱུར་ཞིང། །ཞི་གནས་ཕྱིར་ཡང་ཆགས་མི་འགྱུར། །ས་ཆེན་ཁམས་ནི་ཐམས་ཅད་ཀུན། །གལ་ཏེ་བྱིན་གྱིས་མ་བརླབས་ན། །རྡོ་རྗེ་ལས་ནི་གྲུབ་གྱུར་ཀྱང། །མི་གཡོ་མི་འཁྲུག་གང་ཡང་མེད། །བྱང་ཆུབ་སེམས་དཔའ་འདས་པའི་དུས། །སྨོན་ལམ་ཆེན་པོས་རབ་བརྒྱན་པས། །སེམས་ཅན་རྣམས་མི་དེ་དག་ལ། །བྱམས་པ་ཆེན་པོས་དྲན་པར་བྱེད། །མངོན་སུམ་ཕྱོགས་བཅུའི་ཞིང་ཁམས་ན། །སངས་རྒྱས་དག་ནི་ཐམས་ཅད་མཁྱེན། །རྐང་གཉིས་གཙོ་བོ་གང་བཞུགས་པ། །ཐམས་ཅད་སྲུང་ཞིང་དགོངས་པར་འགྱུར། །གལ་ཏེ་དེ་ལས་གཞན་བའི་རི། །རི་རབ་རིན་པོ་ཆེ་ཡི་རི། །རྡོ་རྗེའི་དཀྱིལ་འཁོར་ཁོར་ཡུག་རི། །ཤིན་དུ་བརྟན་པར་གང་གནས་པ། །བྱང་ཆུབ་སེམས་དཔའ་བློ་ལྡན་དག། །གལ་ཏེ་
བྱིན་གྱིས་མ་བརླབས་ན། །གོ་ཆ་ཆེན་པོ་འདི་བགོས་པ། །འདེག་པའི་འོས་སུ་མི་འགྱུར་རོ། །སངས་རྒྱས་བྱང་ཆུབ་སེམས་དཔའ་རྣམས། །རྫུ་འཕྲུལ་སྟོབས་ཀྱི་བྱིན་བརླགས་པ། །སེམས་ཅན་དང་ནི་ས་ཆེན་པོ། །བསྟེན་འདེག་འོས་སུ་གྱུར་པ་ཡིན། །གོ་ཆ་ཆེན་པོ་གང་བགོས་པ། །སེམས་ཅན་འཚེ་བ་མི་བྱེད་པས། །གོ་ཆ་དག་ནི་གོང་ན་མེད། །ཐེག་པ་དག་གིས་གཞོལ་བར་བྱ། །གོ་ཆ་ཆེན་པོ་གང་བགོས་པ། །སེམས་ཅན་གནོད་པ་མི་བྱེད་པས། །གོ་ཆ་དག་ནི་བསམ་མི་ཁྱབ། །ཐེག་པ་དག་གིས་གཞོལ་བར་བྱ། །གོ་ཆ་ཆེན་པོ་གང་བགོས་པ། །སེམས་ཅན་དག་ལ་འཁོན་མི་འཛིན། །སེམས་ཅན་ནད་ནི་བསལ་པའི་ཕྱིར། །ཐེག་པ་དག་གིས་གཞོལ་པར་བྱ། །ལམ་མཆོག་དག་ནི་ཕུན་ཆོགས་པ། །བླ་མེད་མཆོག་ཏུ་སྦྱོང་བས་ན། །མི་འཚེ་འཁོན་འཛིན་མེད་པ་དང། །གནོད་མི་བྱེད་པ་ཡང་དག་གནས། །ཤེས་རབ་ཆེན་པོའི་གོ་བགོས་ཏེ། །ཤེས་རབ་བསྔོ་བའི་ཐེག་བཞོན་པ། །གོ་ཆ་འཛིན་པར་མི་འགྱུར་བས། །བསྔོ་བའི་ནང་ན་མཆོག་ཏུ་འགྱུར། །བྱང་ཆུབ་སེམས་དཔའ་སྐྱབས་བྱེད་པས། །ཤེས་རབ་སྣང་བ་ལ་གནས་ཏེ། །ཤེས་རབ་ཆོས་རྣམས་རབ་བརྟགས་ནས། །བླ་ན་མེད་པར་གཞོལ་བར་འགྱུར། །བྱང་ཆུབ་སེམས་དཔའ་ལམ་མཆོག་དང། །གོ་ཆ་དང་ནི་ཐེག་ཆེན་དག། །ཤེས་རབ་འོད་ལས་བྱུང་བས་ན། །དེ་ཕྱིར་སེམས་ནི་རྣམ་པར་དག། །ཕ་རོལ་ཕྱིན་ལ་རབ་ཞོན་ནས། །བྱང་ཆུབ་ཆེན་པོ་བགྲོད་བྱེད་ཅིང། །ཤེས་རབ་ཡོངས་སྡུད་ཤེས་རབ་གཙང་། །ཤེས་རབ་དག་ནི་སྔོན་དུ་འགྲོ། །ཕ་རོལ་ཕྱིན་པ་ཐམས་ཅད་ཀྱི། །ཤེས་རབ་འདི་ནི་སྔོན་དུ་འགྲོ། །ཤེས་རབ་ཡོངས་སྡུད་ཤེས་རབ་གཙང་། །བླ་མེད་ཡེ་ཤེས་ལེན་པར་བྱེད། །བྱང་ཆུབ་སེམས་དཔའ་བསམ་མི་ཁྱབ། །ཤེས་རབ་སྣང་བ་སྐྱེད་བྱེད་ཅིང། །ཤེས་རབ་སྒྲོན་ཆེན་སྤར་བྱེད་བས། །བདེ་བར་རབ་ཏུ་གཞོལ་བར་འགྱུར། །ཤེས་རབ་སྣང་པ་སྐྱེད་པའི་ཕྱིར། །དེས་ན་ཤེས་རབ་མིག་ཀྱང་འབྱེད། །སངས་རྒྱས་བླ་མེད་ཡེ་ཤེས་དག། །གསལ་མཐོང་རབ་ཏུ་གཞོལ་བར་འགྱུར། །བྱང་ཆུབ་སེམས་དཔའ་དཔའ་བོ་དག། །གོ་ཆ་དཔག་ཏུ་
མེད་པ་ཡིས། །ཆད་མེད་པར་ནི་བརྒྱན་བའི་ཕྱིར། །གོ་ཆ་བགོས་པ་ཞེས་བྱའོ། །བྱང་ཆུབ་སེམས་དཔའ་བློ་ཆེན་དག། །ཐེག་ཆེན་རབ་ཏུ་བརྒྱན་བས་ན། །སངས་རྒྱས་ཐམས་ཅད་མཁྱེན་པ་ལ། །གོས་པ་མེད་པར་གཞོལ་བར་བྱེད། །བྱང་ཆུབ་སེམས་དཔའ་བློ་ཆེན་དག། ལམ་ཆེན་རབ་ཏུ་བརྒྱན་པས་ན། །བསམ་གྱིས་མི་ཁྱབ་མཆོག་དག་ལ། །རྣམ་པར་དག་བས་གཞོལ་བར་བྱེད།། །།བམ་པོ་བཞི་པ།། གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གོ་ཆའི་སྤྱོད་ཡུལ་དཔག་ཏུ་མེད་པ་དང། ཐེག་པ་ཆེན་པོའི་སྤྱོད་ཡུལ་དཔག་ཏུ་མེད་པ་དང་། ལམ་ཆེན་པོའི་སྤྱོད་ཡུལ་དཔག་ཏུ་མེད་པ་དག་ལ་རབ་ཏུ་གཞོལ་བར་བྱའོ། དེ་ཅེའི་ཕྱིར་ཞེ་ན། ཐམས་ཅད་དུ་རྗེས་སུ་འཇུག་པར་འགྱུར་བའི་ཕྱིར་རོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་གོ་ཆ་ཆེན་པོ་བགོ་བར་བྱེད་དོ། ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་ཐེག་པ་ཆེན་པོ་ལ་གཞོལ་བར་བྱེད་དོ། ཆོས་ཐམས་ཅད་ཀྱི་རྗེས་སུ་འཇུག་པར་འདོད་པའི་ཕྱིར་ལམ་ཆེན་པོ་ལ་རབ་ཏུ་གནས་པར་བྱེད་དོ། ཆོས་ཐམས་ཅད་ལ་མཉམ་པ་ཉིད་རབ་ཏུ་ཐོབ་པར་བྱ་བའི་ཕྱིར་རབ་ཏུ་གཞོལ་བར་བྱེད་དོ། འོན་ཀྱང་གོ་ཆ་དེས་ཆོས་ཅུང་ཟད་ཙམ་ཡང་ནང་ངམ། ཕྱི་རོལ་ལམ། རགས་པ་འམ། ཕྲ་བ་འམ། ཐག་རིང་བ་འམ། ཐག་ཉེ་བ་འམ། འདས་པ་འམ། ད་ལྟར་བྱུང་བ་འམ། མ་འོངས་པ་འམ། འདུས་བྱས་སམ། འདུས་མ་བྱས་སམ། གནས་པ་འམ། མི་གནས་པ་ཞེས་བྱ་བ་ཡང་དག་པར་རྗེས་སུ་མི་དམིགས་སོ། གལ་ཏེ་གོ་ཆ་འདིས་ཆོས་ཐམས་ཅད་རབ་ཏུ་རྣམ་པར་འབྱེད་མི་ནུས་སམ། གཏན་ལ་འབེབས་པར་མི་ནུས་སམ། ཡོངས་སུ་མི་ཤེས་སམ། རྗེས་སུ་འཇུག་པར་མི་ནུས་སམ། མངོན་སུམ་དུ་བྱེད་མི་ནུས་སམ། ཡང་དག་པར་འདའ་བར་མི་ནུས་ན། གོ་ཆ་ཆེན་པོ་བགོས་བ་ཞེས་མི་བྱའོ། ཆོས་ཐམས་ཅད་རབ་ཏུ་རྣམ་པར་འབྱེད་བར་བྱེད་དམ། གཏན་ལ་འབེབས་སམ། ཡོངས་སུ་ཤེས་པར་གྱུར་
ཏམ། རྗེས་སུ་འཇུག་པར་བྱེད་དམ། མངོན་སུམ་དུ་བྱེད་དམ། ཡང་དག་པར་འདའ་བར་བྱེད་ན་གོ་ཆ་ཆེན་པོ་བགོས་པ་ཞེས་བྱའོ། ཐེག་པ་ཆེན་པོ་དེས་ཀྱང་ཆོས་འགའ་ཙམ་ཡང་ནང་ངམ་ཕྱི་རོལ་ཞེས་བྱ་བ་ནས་ཐམས་ཅད་མཁྱེན་པའི་ཡེ་ཤེས་སུ་བསྔོ་བ་ཞེས་བྱ་བའི་བར་ཏུ་ཡང་དག་པར་མི་དམིགས་ཤིང་ཡོངས་སུ་ཤེས་པ་དང་། རྗེས་སུ་འཇུག་པ་དང་། མངོན་སུམ་དུ་བྱེད་པ་དང་། ཡང་དག་པར་འདའ་བར་བྱེད་པས་དེའི་ཕྱིར་ཐེག་པ་འདི་ནི་ཐེག་པ་ཆེན་པོ་དང་། ཆོས་ལ་རབ་ཏུ་མཁས་པའི་ཐེག་པ་དང་། མྱ་ངན་ལས་འདས་བར་ཕྱིན་པར་བྱེད་པའི་ཐེག་པ་དང། གོང་ན་མེད་པའི་ཐེག་པ་དང་། མཚུངས་པ་མེད་པའི་ཐེག་པ་ཞེས་བྱའོ། ལམ་ཆེན་པོ་དེས་ཀྱང་ཅུང་ཟད་ཙམ་དང་ངམ་ཕྱི་རོལ་ཞེས་བྱ་བ་ནས་ཆོས་ཐམས་ཅད་མཉམ་བ་ཉིད་ཀྱི་ལམ་ཆེན་པོར་གྱུར་ནས་གཞོལ་བར་བྱེད་པ་ཞེས་བྱ་བའི་བར་ཡང་དག་པར་མི་དམིགས་ཤིང་མཉམ་པ་ཉིད་ཀྱི་ལམ་འདིས་ཆོས་འགའ་ཙམ་ཡང་ཡོངས་སུ་མི་ཤེས་པ་མེད་པས་དེའི་ཕྱིར་ལམ་འདི་ནི་བླ་ན་མེད་པའི་ལམ་དང་། གྲངས་དང་། ཚད་མེད་པའི་ལམ་དང་། མཚུངས་པ་མེད་པའི་ལམ་ཞེས་བྱའོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་ནི་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བའི་སྤྱོད་པ་ཀུན་གྱི་རྗེས་སུ་ཡང་དག་པར་འཇུག་པར་བྱེད་དོ། སེམས་ཅན་ཐམས་ཅད་ཀྱི་ཉོན་མོངས་པའི་ཀུན་ནས་ཉོན་མོངས་པ་སྤོང་ཞིང་ཡོངས་སུ་དག་པར་བྱེད་དོ། ཐེག་པ་ཆེན་པོ་ལ་ཞོན་ནས་སེམས་ཅན་རྣམས་ཀྱི་དགེ་བའི་རྩ་བ་ཐམས་ཅད་ཡང་དག་པར་འཕེལ་བར་བྱེད་དོ། ལམ་ཆེན་པོ་འདི་ལ་གནས་ནས་སེམས་ཅན་རྣམས་དགེ་བའི་རྩ་བ་ཐམས་ཅད་སྒྲུབ་པར་ཡང་དག་པར་སྐུལ་བར་བྱེད་དོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་རེ་རེའི་ཕྱིར་སེམས་ཀྱི་སྤྱོད་བ་རེ་རེའི་ཕྱིར་ཡང་འཁོར་བའི་མཐའ་ཇི་སྲེད་པ་དེ་སྲེད་དུ་ཡུན་རིང་པོར་འཁོར་བ་ན་འཁོར་ཞིང་། ཤེས་རབ་ཀྱི་སྨན་ཡོངས་སུ་ཚོལ་བ་དང་། གོ་ཆ་མི་སྤོང་བར་ཤིན་ཏུ་བརྟན་བར་བྱས་ནས་གོ་ཆ་ཆེན་པོ་དང་། ཚད་མེད་པའི་གོ་ཆ་དང་། བསམ་བར་དཀའ་བའི་གོ་ཆ་དང་། རྣམ་
པར་དག་པའི་གོ་ཆ་དང་། དཔག་ཏུ་མེད་པའི་གོ་ཆ་དང་། བླང་བ་མེད་པའི་གོ་ཆ་དང་། སེམས་ཅན་གྱི་འདུ་ཤེས་རིག་པའི་གོ་ཆ་དང་། སེམས་ཅན་མེད་པར་ཤེས་པའི་གོ་ཆ་དང་། བདག་མེད་པར་ཤེས་པའི་གོ་ཆ་དང་། སེམས་ཅན་གྱི་རང་བཞིན་ཤེས་བའི་གོ་ཆ་དང་། སེམས་ཅན་གྱི་རང་བཞིན་རྗེས་སུ་རྟོགས་པའི་གོ་ཆ་དང་། བདག་གི་རང་བཞིན་ཤེས་པའི་གོ་ཆ་དང་། ནང་གི་རང་བཞིན་ཤེས་པའི་གོ་ཆ་དང་། ནང་གི་རང་བཞིན་རྗེས་སུ་རྟོགས་པའི་གོ་ཆ་དང་། ཕྱི་རོལ་གྱི་རང་བཞིན་ཤེས་པའི་གོ་ཆ་དང་། ཕྱི་རོལ་གྱི་རང་བཞིན་རྗེས་སུ་རྟོགས་པའི་གོ་ཆ་དང་། ནང་དང་ཕྱི་རོལ་གཉིས་གའི་རང་བཞིན་ཤེས་པའི་གོ་ཆ་དང་། ནང་དང་ཕྱི་རོལ་གཉིས་གའི་རང་བཞིན་རྗེས་སུ་རྟོགས་པའི་གོ་ཆ་དང་། ཆོས་ཐམས་ཅད་ཀྱི་རང་བཞིན་ཤེས་པའི་གོ་ཆ་དང་། ཆོས་ཐམས་ཅད་ཀྱི་རང་བཞིན་རྗེས་སུ་རྟོགས་པའི་གོ་ཆ་དང། ཆོས་ཐམས་ཅད་དམིགས་སུ་མེད་པར་ཤེས་པའི་གོ་ཆ་དང་། ཆོས་ཐམས་ཅད་ཀྱི་རང་བཞིན་དམིགས་སུ་མེད་པར་ཤེས་པའི་གོ་ཆ་དང་། ཆོས་ཐམས་ཅད་རྟོགས་པར་ཁོང་དུ་ཆུད་པའི་གོ་ཆ་དང་མཐའ་མེད་པའི་གོ་ཆ་དང་། དབུས་མེད་པའི་གོ་ཆ་དང་། དབུས་དང་མཐའ་མེད་པའི་གོ་ཆ་དང་། འདས་པ་མ་ཡིན་བའི་གོ་ཆ་དང་། མ་འོངས་པ་མ་ཡིན་བའི་གོ་ཆ་དང་། ད་ལྟར་བྱུང་བ་ཡིན་བའི་གོ་ཆ་དང་། བྱ་བ་མེད་པའི་གོ་ཆ་དང་། བྱེད་པ་མེད་པའི་གོ་ཆ་ཡག་དག་པར་བགོ་བར་བྱེད་དོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་འདི་ལ་བགོས་པར་མི་བྱེད། རྗེས་སུ་རྟོགས་པར་ཡང་མྱི་བྱེད། གཏན་ལ་འབེབས་པར་ཡང་མི་བྱེད། ངེས་པར་འབྱུང་བར་མི་བྱེད། མངོན་སུམ་དུ་ཡང་མི་བྱེད་དེ། གོ་ཆ་ཉིད་ཡོད་པ་མ་ཡིན་བའི་ཕྱིར་རོ། གོ་ཆ་བགོས་པ་གང་ཡིན་པ་དེ་དག་ནི་རྗེས་སུ་རྟོགས་པར་མི་བྱེད་བའི་ཕྱིར་རྗེས་སུ་རྟོགས་པར་བྱེད་དོ། གཏན་ལ་འབེབས་པར་མི་བྱེད་པའི་ཕྱིར་གཏན་ལ་འབེབས་པར་བྱེད་དོ། ངེས་པར་འབྱུང་བར་མི་བྱེད་པའི་ཕྱིར་ངེས་བར་འབྱུང་བར་བྱེད་དོ། མངོན་སུམ་དུ་མི་བྱེད་པའི་ཕྱིར་མངོན་སུམ་དུ་བྱེད་དོ། གདེག་པར་བྱ་བ་མེད་པའི་ཕྱིར་ཐེག་པ་ཆེན་པོ་ལ་ཞོན་པར་བྱེད་དོ། །ཐེག་པ་ཆེན་པོ་
ལ་གདགས་པར་མི་བྱེད་དེ། གདགས་བ་མེད་པས་གདགས་པར་བྱེད་ཀྱང་ཐེག་པ་ཆེན་པོ་ལ་ནི་གདགས་པར་བྱ་བ་ཅི་ཡང་མེད་དོ། གལ་ཏེ་གདགས་པ་དང་བཅས་པར་གྱུར་ན་དེ་ཉིད་གདགས་པ་མ་ཡིན་ཏེ། གདགས་པ་དེ་དག་དམིགས་སུ་མེད་པའི་ཕྱིར་དང། བལྟར་མེད་པའི་ཕྱིར་རོ། ཐེག་པ་ཡང་ཡོང་པ་མ་ཡིན་པ་སྟེ། ཐེག་པ་ལ་གནས་པ་དག་ནི་དམིགས་སུ་མེད་པས་ཐེག་པ་ཆེན་པོ་ལ་གནས་པར་བྱས་པས་གཞོལ་བར་བྱས་པ་སྤོང་ཞིང་མཐར་ཕྱིན་པར་ཡང་མི་བྱེད་ལ། མྱ་ངན་ལས་འདས་བར་ཕྱིན་པར་ཡང་མི་བྱེད་དེ། དམིགས་སུ་མེད་པའི་ཕྱིར་རོ། ལམ་མ་ཡིན་པས་ལམ་མེད་དེ། ལམ་ལ་གཞོལ་བར་བྱེད་པ་ཉིད་ཡང་དག་པར་མཉམ་པའི་ཕྱིར་རོ། ཡང་དག་པའི་ལམ་འདི་ནི་གདགས་སུ་མེད་པས་སུ་ཞིག་གང་དུ་གང་ལས་གདགས་པར་བྱེད་དེ། བྱ་བ་ཡང་མེད། བྱེད་པ་ཡང་མེད། འདུས་པ་ཡང་མ་ཡིན། འདུས་པ་མེད་པ་ཡང་མ་ཡིན། ཐམས་ཅད་ལ་སྐྱོ་ཞིག་ཐམས་ཅད་ཡོངས་སུ་མི་འཚལ་བ་ཡིན་ནོ། དེ་ཅིའི་ཕྱིར་ཞེ་ན། ཡང་དག་པར་མཉམ་བའི་ལམ་འདི་ནི་ཆོས་ཐམས་ཅད་དང་གཅིག་པ་ཡང་མ་ཡིན། ཐ་དད་པ་ཡང་མ་ཡིན་ཞིང་མཚུངས་པར་མི་ལྡན་པའི་ཕྱིར་རོ། ཆོས་ཀྱི་འདུ་ཤེས་མི་སྐྱེད་ཅིང་ཆོས་ཐམས་ཅད་སྤོང་བར་བྱེད་པས་གཙང་བ་ཡང་མེད་མི་གཙང་བ་ཡང་མེད་དོ། ཆོས་ཉིད་ཀྱང་དེ་བཞིན་ཏེ། གཙག་བ་མེད། མི་གཙང་བ་མེད་པས་དེའི་ཕྱིར་ལམ་འདི་ནི་ཀུན་ནས་ཉོན་མོངས་པ་མེད་པའི་ལམ་ཞེས་བྱ་སྟེ། བགྲོད་པ་མེད་པས་བགྲོད་པར་བྱེད་དོ། ཡོངས་སུ་བཟུང་བ་མེད་པས་ཡོངས་སུ་བཟུང་བར་བྱེད་དོ། ལམ་འདི་ནི་ཤིན་ཏུ་ཟབ་པས་སྐྱེ་བ་མེད་པ། འབྱུང་བ་མེད་པ། བྱེད་པ་མེད་པ། ཐོབ་པ་མེད་པ། མངོན་པར་འདུ་བྱེད་པ་མེད་པ། གནས་མེད་པ་སྒྲིབ་པ་མེད་པ། དངོས་པོ་མེད་བ་དངོས་པོ་ཐམས་ཅད་རབ་ཏུ་སྟོན་པ། དངོས་པོ་ཐམས་ཅད་དབྱེར་མེད་པ། དངོས་པོའི་རྗེས་སུ་མི་འཇུག་པ་ཡིན་ཏེ། དངོས་པོ་མེད་པའི་ཕྱིར་བླ་ན་མེད་པའི་གནས་སུ་ཕྱིན་པར་བྱེད་པ་ཡིན་ནོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གོ་ཆ་འདི་དང། ཐེག་པ་འདི་དང་། ལམ་འདི་
དེ་ལྟར་རིག་པར་བྱའོ། འོན་ཀྱང་གོ་ཆ་འདི་དང་། ཐེག་པ་འདི་དང་། ལམ་འདི་ནི་བལྟར་མེད་ཅིང་ཤེས་པར་བྱར་མེད་པ་དང། དམིགས་སུ་མེད་པའི་ཕྱིར་སུ་ཞིག་གོ་ཆ་བགོ་བར་བྱེད། སུ་ཞིག་ཐེག་པ་འདི་ལ་ཞོན་པར་བྱེད། སུ་ཞིག་ལམ་འདི་ལ་སྤྱོད་པར་བྱེད་དེ། བལྟར་མེད་ཅིང་ཤེས་པར་བྱར་མེད་པ། དམིགས་སུ་མེད་པས་སོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་ཆོས་འདི་ཐོས་ནས་མི་སྐྲག་མི་དང་བར་ཀློག་པ་དང་། ཁ་ཏོན་དུ་འདོན་པ་དང། ཡང་དག་པར་རབ་ཏུ་སྟོན་པ་དང། ཆོས་ཀྱི་ཚུལ་དང་འགལ་བ་མེད་ཅིང་རྗེས་སུ་འཐུན་བར་བསྒྲུབས་པ་དང་། རབ་ཏུ་དགའ་བར་མོས་པར་བྱེད་པ་དང་། ཆོས་འདི་འི་ཕྱིར་རབ་ཏུ་བརྩོན་བར་བྱེད་པ་དང་། ཆོས་ཀྱི་ཚིལ་ངེས་པ་འདི་ལ་ཐབས་མཁས་པའི་ནུས་པ་དང་ལྡན་པར་གྱུར་པ་གང་ཡིན་བ་དེ་དག་ནི་གོ་ཆ་འདི་བགོས་ཏེ། ཐེག་པ་འདི་ལ་ཞོན་ནས་ལམ་འདེར་ཞུགས་ཏེ། ཆོས་ཟབ་མོ་དམིགས་སུ་མེད་པ་འདི་ལ་གཞོལ་བར་བྱེད་པས་འཁོར་བའི་མཐའ་གཏུགས་ནས་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་ཡོན་ཏན་དཔག་ཏུ་མེད་པས་རབ་ཏུ་བརྒྱན་ནས་འཇིག་རྟེན་དུ་འབྱུང་བར་འགྱུར་རོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཆོས་འདི་ལ་རབ་ཏུ་དགའ་བས་བརྩོན་འགྲུས་བསྐྱེད་ནས་བག་ཡོད་པར་བསྒྲུབ་པར་བྱའོ། སེམས་ཅན་གང་ལ་ལ་ཞིག་ཆོས་ཟབ་མོ་འདི་ཐོབ་མ་ཐག་ཏུ་དགའ་བ་བསྐྱེད་པ་གང་ཡིན་བ་དེ་དག་ཀྱང་ངས་ཕན་པ་ཆེན་པོ་ཐོབ་པར་རབ་ཏུ་བསྟན་ནས་གང་ཞིག་ནན་ཏན་བརྩོན་འགྲུས་ཀྱི་བག་ཡོད་པ་དང་བཅས་པ་དང་། ཚུལ་ཁྲིམས་ཀྱི་སྤྱོད་པ་རྣམ་པར་དག་པས་གཞོལ་བར་བྱེད་པ་ལྟ་སྨོས་ཀྱང་ཅི་དགོས། བློ་གྲོས་མཐའ་ཡས་ཁྱོད་ཀྱིས་ཆོས་འདི་ཤིན་ཏུ་ཡངས་ཤིང་རྒྱ་ཆེ་བ་རྣམ་པ་དུ་མ་དང་། ཁྱད་བར་དུ་འཕགས་པ་རྣམ་པ་དུ་མ་དང་། རྣམ་པར་དག་ཏུ་མ་དང་ལྡན་བ་ལ་ལྟོས། ངས་ཆོས་འདི་ལ་ནན་ཏན་གྱིས་བསྔགས་པ་རབ་ཏུ་བརྗོད་པ་ནི་སེམས་ཅན་རྣམས་རབ་ཏུ་དགའ་བ་བསྐྱེད་པས་ཡིན་རིང་པོའི་ཕན་པ་དང་། བདེ་བ་ཐོབ་ནས་ཡོངས་སུ་སྐྱོ་བར་བྱ་བའི་ཕྱིར་དང་། རབ་ཏུ་ཞི་བར་བྱ་
བའི་ཕྱིར་དང་། ཡོངས་སུ་ཤེས་པར་བྱ་བའི་ཕྱིར་རོ། བློ་གྲོས་མཐའ་ཡས་ཡང་ཁྱོད་ཀྱིས་ཆོས་འདི་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པའི་བདེ་བ་སྦྱིན་པ་བྱེད་པ་ཡིན་ཡང་སྲེད་པ་རྣམས་སུ་དབུལ་ཕོངས་པ་སྣ་ཚོགས་སྣང་བར་གྱུར་པ་ནི་སེམས་ཅན་རྣམས་ཆོས་ཟབ་མོ་འདི་ལས་རབ་ཏུ་ཉམས་པར་གྱུར་པའི་ཕྱིར་འཇིག་རྟེན་པ་དང་འཇིག་རྟེན་ལས་འདས་པའི་ཕུན་སུམ་ཚོགས་པ་དང་། འབྱོར་པ་དང་། བདེ་བ་རྣམས་སྤངས་བ་ཡིན་བར་བལྟ་བར་བྱའོ། བློ་གྲོས་མཐའ་ཡས་ཡང་ཁྱོད་ཀྱིས་དེ་བཞིན་གཤེགས་པ་མངོན་སུམ་དུ་བཞུགས་པས། ཆོས་རིན་པོ་ཆེ་ཟབ་མོ་འདི་འབྱོར་པ་དུ་མ་རྙེད་སླ་བར་གྱུར་ཏོ་སྙམ་དུ་བལྟ་བར་བྱ་ཞིང་། ཁྱོད་ཀྱིས་ཆོས་ཟབ་མོ་འདི་ལ་ནན་ཏན་གྱིས་རབ་ཏུ་བསྒྲུབ་པར་བྱའོ། བྱིས་པ་སོ་སོའི་སྐྱེ་བོ་རྣམས་ནི་ངས་ཆོས་རིན་པོ་ཆེ་འདི་ཡང་དག་པར་བསྟན་པ་ན་ཐོས་པར་ཡང་མི་འདོད་ན། ལེན་པ་དང་འཛིན་པ་ལྟ་སྨོས་ཀྱང་ཅི་དགོས། དེ་བཞིན་གཤེགས་པ་མངོན་སུམ་དུ་བཞུགས་ཤིང་ཆོས་རིན་པོ་ཆེ་འབྱོར་བའི་དུས་སུ་ཡང་མཉན་པར་མོས་པ་དང་། འདྲི་བར་ཡང་འདུན་པར་མི་འགྱུར་ན་མ་འོངས་པའི་དུས་ལྔ་བརྒྱ་ཐམ་ལ་ཡང་དག་པའི་ཆོས་རབ་ཏུ་རྣམ་པར་འཇིག་པའི་ཚེ་སངས་རྒྱས་དང་། ཆོས་དཀོན་མཆོག་དང་། ཆོས་འཛིན་པར་བྱེད་པ་རྣམ་པ་གསུམ་མངོན་དུ་མི་འགྱུར་བའི་དུས་སུ་མཉན་པ་དང་། འདྲི་བར་མོས་པར་ལྟ་ག་ལ་འགྱུར། བློ་གྲོས་མཐའ་ཡས་འོན་ཀྱང་མ་འོངས་པའི་དུས་ན་གལ་ཏེ་དེ་བཞིན་གཤེགས་པས་ལེགས་པར་བྱིན་གྱིས་བརླབས་པར་གྱུར་ན་ཆོས་རིན་པོ་ཆེ་ཟབ་མོ་འདི་རྙེད་པར་འགྱུར་རོ། བློ་གྲོས་མཐའ་ཡས་ཤིན་དུ་འཇིགས་པའི་དུས་དེའི་ཚེ་ཆོས་རིན་པོ་ཆེ་ཟབ་མོ་འདི་ཡང་དག་པར་ཉམས་ཤིག་འགྲིབ་པ་འམ་ཟད་པར་གྱུར་བ་མེད་མོད་ཀྱི། འོན་ཀྱང་ཆོས་ལ་ཉན་པ་དང་འཛིན་པར་བྱེད་པ་མེད་དེ། ངའི་སྤྱན་སྔར་སེམས་རྩེ་གཅིག་ཏུ་མཉན་པར་མོས་པ་དང་། གོ་ཆ་བགོས་པ་ནི་མ་གཏོགས་ཏེ། དེ་དག་དེའི་ཚེ་ཆོས་འདི་ལ་རབ་ཏུ་དགའ་བས་ཉན་པ་དང་། ལེན་པར་འགྱུར་བས་སོ། །དེའི་ཚེ་སེམས་ཅན་གང་དག་ཆོས་འདི་ཐོས་ནས་རབ་ཏུ་དང་བ་ཙམ་སྐྱེད་པར་བྱེད་ན་ཡང་། ངས་དེ་དག་ཆོས་རྒྱ་ཆེན་པོ་འདི་
མངོན་པར་བསྒྲུབ་པར་འགྱུར་པར་བསྟན་ན་ད་ལྟར་ཆོས་འདི་ལ་ཡོངས་སུ་དང་བ་བསྐྱེད་ནས་ནན་ཏན་གྱིས་སྒྲུབ་པར་བྱེད་པ་ལྟ་སྨོས་ཀྱང་ཅི་དགོས། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་བླ་ན་མེད་པའི་གོ་ཆ་དང་། །གོ་ཆ་ཆེན་པོ་ཚད་མེད་པ་རྣམས་ཡང་དག་པར་བགོས་པ་ན། འདི་སྙམ་དུ་སེམས་ཏེ། བདག་ནི་སེམས་ཅན་དབུལ་ཕོངས་པར་གྱུར་པ་འདི་ལྟ་སྟེ། ཚུལ་ཁྲིམས་ཀྱིས་རྒུད་པ་དང་། ཐོས་པས་རྒུད་པ་དང་། ཤེས་རབ་ཀྱིས་རྒུད་པ་དང་། རྣམ་པར་གྲོལ་བས་རྒུད་པ་དང་། རྣམ་པར་གྲོལ་བའི་ཡེ་ཤེས་མཐོང་བས་རྒུད་པ་དེ་དག་ཐམས་ཅད་ལས་ཆོས་ཆེན་པོ་འདིས་ཕོངས་པ་མེད་པར་བྱའོ། ཆོས་ཆེན་པོ་འདིས་ཕོངས་པ་མེད་པར་བྱ་བའི་ཕྱིར་རྒུད་པ་ཐམས་ཅད་སྤངས་ནས། ཚུལ་ཁྲིམས་ཀྱི་ནོར་དང་། ཐོས་པའི་ནོར་དང་། ཤེས་རབ་ཀྱི་ནོར་དང་། རྣམ་པར་གྲོལ་པའི་ནོར་དང་། རྣམ་པར་གྲོལ་བའི་ཡེ་ཤེས་མཐོང་བའི་ནོར་གྱིས་ཕྱུག་པར་བྱའོ། འདོད་ཆགས་དང་། ཞེ་སྡང་དང་། གཏི་མུག་གི་མེ་རྣམས་རབ་ཏུ་ཞི་བར་བྱའོ། ནད་ཐམས་ཅད་ལས་སོས་པར་བྱའོ། བླ་ན་མེད་པའི་སྨན་གྱ་ནོམ་བ་གཏང་བར་བྱའོ། སྨན་འདིའི་དབང་གིས་ནད་རྣམ་པ་སྣ་ཚོགས་བསལ་ནས་བདེ་བ་ཆེན་པོ་ཐོབ་པར་བྱའོ། ལྷག་མ་དང་བཅས་པ་གཏན་དུ་སྤངས་ཏེ། ཤིན་དུ་བསིལ་བའི་ངོ་བོ་ཉིད་བླ་ན་མེད་པའི་མྱ་ངན་ལས་འདས་པ་མངོན་དུ་བྱས་ནས་ཡིད་ལ་སེམས་པ་དང་། སོ་སོར་རྟོག་པའི་ལྷག་མ་ཅི་ཡང་ལུས་པ་མེད་པ་དང་། འདུས་བྱས་དང་། འདུས་མ་བྱས་ཐམས་ཅད་ཡོངས་སུ་ཚོལ་བ་མེད་པ་ལ་དགོད་པར་བྱའོ་སྙམ་མོ། མྱ་ངན་ལས་འདས་པ་འདི་ནི་མཆོག་ཏུ་བདེ་ཞིང་ཚོལ་བ་ཐམས་ཅད་ལུས་པ་མེད་པའི་ཕྱིར་དང་། ཡོངས་སུ་ཚོལ་བ་གཏན་དུ་ཞི་ཞིང་ཡོངས་སུ་ཟད་པའི་ཕྱིར་རོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཆེན་པོ་དེ་ལྟ་བུ་བགོས་ནས་གཞན་ཡང་སེམས་ཅན་ཐམས་ཅད་ལ་སྙིང་བརྩེ་བས་ཡོངས་སུ་བསྡུ་བའི་ཕྱིར། ཐེག་པ་ཆེན་པོ་ལ་ཞོན་ནས་འདི་སྙམ་དུ་ཐེག་པ་ཆེན་པོ་འདི་ལ་ནི་འདས་པའི་སངས་རྒྱས་རྣམས་ཀྱིས་ཀྱང་
བཅིབས་ནས་ངེས་པར་བྱུང་བར་གྱུར་ཏོ། མ་བྱོན་པའི་སངས་རྒྱས་རྣམས་ཀྱང་འདི་ལ་བཅིབས་ནས་ངེས་པར་འབྱུང་བར་འགྱུར་རོ། ད་ལྟར་བཞུགས་པའི་སངས་རྒྱས་རྣམས་ཀྱིས་ཀྱང་འདི་ལ་བཅིབས་ནས་དེས་པར་བྱུང་བར་གྱུར་ཀྱང་གཤེགས་པར་གྱུར་པ་ཡང་མེད་ལ། བཅིབས་པ་དང་། ངེས་པར་འབྱུང་བ་ཡང་མེད་དོ་སྙམ་མོ། དེ་ཅིའི་ཕྱིར་ཞེ་ན། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། སྐྱེ་བ་མེད་པ་དང་། བྱེད་པ་མེད་པའི་ཕྱིར་ངེས་པར་བྱུང་བར་གྱུར་བ་ཡང་མ་ཡིན། ངེས་པར་འབྱུང་བ་ཡང་མ་ཡིན། ངེས་པར་འབྱུང་བར་འགྱུར་བ་ཡང་མ་ཡིན་ནོ། ཐེག་པ་འདི་ལ་ཞོན་ནས་དེ་ལྟར་དེས་པར་འབྱུང་བ་གང་ཡིན་པ་དེ་དག་ནི་ལེགས་པར་བྱུང་བ་ཡིན་ཏེ། མངོན་པར་ཞེན་པ་མེད་པས་ཆོས་ཐམས་ཅད་འདུས་པ་ཡང་མ་ཡིན། འདུས་པ་མེད་པ་ཡང་མ་ཡིན་པས་འོད་པ་མེད་པ་འགྲོ་བ་མེད་པ་ཡིན་ནོ། ཐེག་པ་འདི་ལམ་གང་གིས་ངེས་པར་འབྱུང་བའི་ཚེ་ཡང་འདུས་པ་མ་ཡིན་པས་འོད་པ་མེད་པ་འགྲོ་བ་མེད་པ་ཡིན་ནོ། ཐེག་པ་འདི་དང་། ལམ་འདིས་གོ་ཆ་ཆེན་པོ་བྱས་ནས་ངེས་པར་འབྱུང་བའི་ཚེ། ། །ཡང་འདུས་པ་ཡང་མ་ཡིན། འདུས་པ་མེད་པ་ཡང་མ་ཡིན་པས་འོད་པ་མེད་པ་འགྲོ་བ་མེད་པ་ཡིན་ཏེ། དམིགས་སུ་མེད་པའི་ཕྱིར་རོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་འདི་དང་། ཐེག་པ་འདི་དང་ལམ་འདིས་དེ་ལྟར་གཞོལ་བར་བྱེད་དོ། གཞན་ཡང་གོ་ཆའི་དང་། ཐེག་པ་འདི་དང་ལམ་འདིས་གཞོལ་བར་བྱེད་པའི་ཚེ་འདི་སྙམ་དུ་སོ་སོའི་སྐྱེ་བོའི་ཆོས་གང་ཡིན་པ་དང་། ཉན་ཐོས་ཀྱི་ཆོས་གང་ཡིན་པ་དང་། རང་སངས་རྒྱས་ཀྱི་ཆོས་གང་ཡིན་པ་དང་། སངས་རྒྱས་ཀྱི་ཆོས་གང་ཡིན་པའི་ཆོས་དེ་དག་བདག་དང་ཉེ་བ་ཞིག་གམ། འོན་ཏེ་ཐག་རིང་བ་ཞིག་ཅེས་ཡོངས་སུ་རྟོགས་པར་མི་བྱེད་དོ། སྟོད་པ་དང་། མཚན་མ་མེད་པ་དང་། སྨོན་པ་མེད་པ་དང་། སྐྱེ་བ་མེད་པ་དང་། མངོན་པར་འདུ་བྱ་བ་མེད་པའི་ཆོས་གང་ཡིན་པ་དེ་དག་བདག་དང་ཉེ་བ་ཞིག་གམ། འོན་ཏེ་ཐག་རིང་བ་ཞིག་ཅེས་ཡོངས་སུ་རྟོག་པར་མི་བྱེད་དོ། ཡོངས་སུ་སྐྱོ་བ་དང་བྲལ་བ་དང་འགག་པར་འགྱུར་
བ་ནས། མྱ་ངན་ལས་འདས་པ་ཆེན་པོའི་བར་གྱི་གོ་ཆ་དེ་དག་ལ་ཡང་བདག་དང་ཉེ་བ་ཞིག་གམ་འོན་ཏེ་ཐག་རིང་བ་ཞིག་ཅེས་ཡོངས་སུ་རྟོག་པར་མི་བྱེད་དོ། བློ་གྲོས་མཐའ་ཡས་གོ་ཆ་ཆེན་པོ་འདི་དང་། ཐེག་པ་འདི་དང་། ལམ་འདི་དག་ལ་ནི་བྱང་ཆུབ་སེམས་དཔའ་ཐམས་ཅད་དང་། ཉན་ཐོས་ཐམས་ཅད་དང་། རང་སངས་རྒྱས་ཐམས་ཅད་དང་། སེམས་ཅན་ཐམས་ཅད་གང་གིས་ཀྱང་བསྒུལ་བར་མི་ནུལ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། བློ་གྲོས་མཐའ་ཡས་སངས་རྒྱས་བཅོམ་ལྡན་འདས་རྣམས་ནི་གོ་ཆ་འདི་དང་། ཐེག་པ་འདི་དང་། ལམ་འདི་ལ་གཡོ་བ་མི་མངའ་བ་བརྙེས་པས་ཡོངས་སུ་མྱ་ངན་ལས་འདས་པ་ཡིན་ནོ། དེ་ཅིའི་ཕྱིར་ཞེ་ན། ཆོས་ཐམས་ཅད་གཡོ་བ་མེད་པའི་ཕྱིར་དང་། ཆོས་ཐམས་ཅད་ཀྱི་ངོ་བོ་ཉིད་དང་། ཆོས་ཉིད་ཀྱི་མཚན་ཉིད་མི་མཐུན་པ་དང་དྲལ་བའི་ཕྱིར་དང་། མཚན་མ་རྣམ་པར་དག་པའི་ཕྱིར་དང་། ཡོངས་སུ་རྣམ་པར་དག་པའི་ཕྱིར་དང་། མཚན་མ་དག་གིས་སོ་སོར་བརྟག་པ་དང་། མཆོག་ཏུ་སོ་སོར་བརྟག་པ་དང་། ཀུན་དུ་སོ་སོར་བརྟག་པར་བྱ་བ་མ་ཡིན་ནོ། ཆོས་ཐམས་ཅད་ཀྱི་ཆོས་ཀྱི་མཚན་ཉིད་ཀྱི་ངོ་བོ་ཉིད་ཀྱང་ངོ་བོ་ཉིད་ཀྱིས་སོ་སོར་བརྟག་པ་དང་། མཆོག་ཏུ་སོ་སོར་བརྟག་པ་དང་། ཀུན་དུ་སོ་སོར་བརྟག་པར་བྱ་བ་མ་ཡིན་ནོ། ཆོས་ཐམས་ཅད་ཀྱི་ངོ་བོ་ཉིད་མེད་པ་དང་། མཚན་མ་མེད་པ་དང་། བསྟན་དུ་མེད་པ་དང་། བརྗོད་དུ་མེད་པ་གང་ཡིན་པ་འདི་ནི་ཆོས་རྣམས་ཀྱི་དེ་ཁོ་ན་ཉིད་ཀྱི་མཚན་ཉིད་ཅེས་བྱའོ། བློ་གྲོས་མཐའ་ཡས་གོ་ཆ་འདི་དང་། ཐེག་པ་འདི་དང་། ལམ་འདི་ལྟ་བུ་འདི་དག་གིས་དེ་ཁོ་ན་ཉིད་ཀྱི་མཚན་ཉིད་ཀྱང་དེ་བཞིན་དུ་བསྟན་དུ་མེད་ཅིང་བརྗོད་དུ་མེད་པ་ཡིན་ཡང་སེམས་ཅན་རྣམས་ཁོང་དུ་ཆུད་པར་བྱ་བའི་ཕྱིར་དང་། ཆོས་ཐམས་ཅད་ཀྱི་སྣང་བ་འཕེལ་བར་བྱ་བའི་ཕྱིར་གོ་ཆ་འདི་དང་། ཐེག་པ་འདི་དང་། ལམ་འདི་དག་བཏགས་པ་ཙམ་དུ་མདོར་བསྟན་པ་ཡིན་ནོ། དེད་ཁྱོད་ཀྱིས་གལ་ཏེ་གོ་ཆ་འདི་དང་། ཐེག་པ་འདི་དང་། ལམ་འདིའི་དོན་གྱི་རྗེས་སུ་འཇུག་ཅིང་སྤྱོད་པར་འདོད་ན་གདགས་པ་མེད་པ་དང་། བསྟན་པ་མེད་པ་དང་། བརྗོད་པ་མེད་པར་དོན་གྱི་རྗེས་སུ་འབྲང་བར་བྱའོ། །
དོན་གྱི་རྗེས་སུ་འབྲང་བ་གང་ཡིན་པ་དེ་དག་ལ་ནི་འདི་ནི་སྤྱད་པར་བྱའོ། ཞེས་བྱ་བ་ཡང་ཅུང་ཟད་ཀྱང་མེད་ལ། འདི་ནི་རྗེས་སུ་འབྲང་བར་བྱའོ་ཞེས་བྱ་བ་ཡང་ཅུང་ཟད་ཀྱང་མེད་པས་དོན་མ་ཡིན་པ་དེ་དག་གི་རྗེས་སུ་ནི་འབྲང་བར་མི་བྱེད་ལ་དོན་གང་ཡིན་པ་དེ་དག་གི་རྗེས་སུ་འབྲང་བར་བྱེད་དོ། དོན་གྱི་རྗེས་སུ་འབྲང་བའི་ཚེ་སྒྲའི་རྗེས་སུ་འབྲང་བར་མི་བྱེད་དོ། ཡི་གེའི་རྗེས་སུ་འབྲང་བར་མི་བྱེད་དོ། ངག་གི་རྗེས་སུ་འབྲང་བར་མི་བྱེད་དེ། རྗེས་སུ་མི་འབྲང་བ་དེའི་རྗེས་སུ་མི་འཇུག་པ་གང་ཡིན་པའོ། དེ་ལ་དོན་གང་ཡིན་ཞེ་ན། འདི་ལྟ་སྟེ། གསང་སྟེ། བསྟན་པ་གང་ཡིན་པ་དག་ཡིན་པས་གསང་སྟེ། བསྟན་པ་རྣམས་རྗེས་སུ་རྟོགས་པར་བྱས་ནས་མངོན་པར་ཡིད་ཆེས་པས་སྤྱང་པར་བྱའོ། མངོན་པར་ཡིད་ཆེས་པས་སྤྱོད་པ་གང་ཡིན་པ་དེ་དག་ནི་དོན་དེ་དག་ལ་རྣམ་པར་རྟོག་པར་མི་བྱེད་པས་རྣམ་པར་མི་རྟོག་པའི་རྗེས་སུ་འབྲང་བར་བྱེད་དེ། རྗེས་སུ་འབྲང་བར་བྱེད་པ་གང་ཡིན་པ་དེ་ནི་སྤྱོད་པ། མེད་པ་དང་། རྗེས་སུ་འབྲང་བ་མེད་པ་ཞེས་བྱའོ། དེ་ཅིའི་ཕྱིར་ཞེ་ན། དོན་དེ་དག་ལ་སྤྱོད་པ་ཞེས་བྱ་བ་ཡང་ཅུང་ཟད་ཀྱང་མེད་ལ། རྗེས་སུ་འབྲང་བ་དང། ཀུན་དུ་འགྲོ་བ་ཞེས་བྱ་བ་ཡང་ཅུང་ཟད་ཀྱང་མེད་དེ། སྤྱོད་པ་ཡོངས་སུ་སྦྱངས་བའི་ཕྱིར་རྗེས་སུ་འབྲང་བར་མི་བྱེད་དོ། བྱང་ཆུབ་ཀྱི་རྗེས་སུ་འཐུན་པར་ཡང་མི་སྤྱོད་ལ་འཁོར་བའི་རྗེས་སུ་འཐུན་བར་ཡང་མི་སྤྱོད་དེ། རྗེས་སུ་འཐུན་པ་དང་། རྗེས་སུ་མི་མཐུན་པ་དེ་དག་ནི་ཡིད་ལ་བྱེད་པ་ཡང་མ་ཡིན། ཡང་དག་པའི་དྲན་བ་ཡང་མ་ཡིན་ཏེ། བསམ་པ་ཡོངས་སུ་དག་པར་གྱུར་པའི་ཕྱིར་ཏེ། རྗེས་སུ་འབྲང་བར་མི་བྱེད་དོ། བློ་གྲོས་མཐའ་ཡས་ཁྱོད་ཀྱིས་དོན་འདིའི་རྗེས་སུ་འབྲང་བར་བྱའི་ཐ་དད་པའི་སྤྱོད་པ་དང་ལྡན་པར་མི་བྱའོ། གལ་ཏེ་ཐ་དད་པའི་རྗེས་སུ་འབྲང་བར་བྱེད་ན་དེ་ནི་བརྗེད་ངས་པ་ཡིན་པས་སྒྲའི་རྗེས་སུ་འབྲང་བ་དང་། ཚིག་འབྲུ་དང་། ཡི་གེའི་རྗེས་སུ་འབྲང་བ་དང་། ངག་གི་རྗེས་སུ་འབྲང་བར་འགྱུར་ཏེ། ཚིག་གི་བརྗོད་པ་དེ་དག་ཀྱང་ཡོངས་སུ་སྤྱོད་པར་མི་འགྱུར་རོ། སྒྲ་ཡོངས་སུ་ཤེས་པ་དང་། ཚིག་འབྲུ་དང་། ཡི་གེ་ལས་ཡང་དག་པར་འདས་པ་དང་། ཚིག་གི་བརྗོད་པ་རྗེས་སུ་རྟོགས་པ་གང་ཡིན་པ་དེ་དག་ནི་དེ་ལྟར་རྗེས་སུ་འབྲང་བར་མི་བྱེད་པས། འཁོར་བར་འཇུག་པར་མི་འགྱུར་རོ། །དོན་
འདི་ལ་དེ་ལྟར་རྗེས་སུ་འབྲང་བ་དང་། དེ་ལྟར་རྗེས་སུ་འཇུག་པ་གང་ཡིན་པ་དེ་དག་ལ་ནི་སྤྱོད་པ་ཅུང་ཟད་ཀྱང་མེད་དེ། སྤྱོད་པ་ཉེ་བར་ཞི་བར་གྱུར་པའི་ཕྱིར་རོ། བློ་གྲོས་མཐའ་ཡས་དོན་གྱི་རྗེས་སུ་འཇུག་པའི་ཚེ་མངོན་པར་འདུས་བྱས་བ་དང་བཅས་པས་དོན་གྱི་རྗེས་སུ་འབྲང་བར་མི་བྱའོ། གས་ཏེ་མངོན་བར་འདུ་བྱེད་པ་མེད་པར་དོན་གྱི་རྗེས་སུ་འབྲང་བར་བྱེད་ན་དེ་ནི་འོང་པ་མེད་པ་དང་། ཕྱིར་མི་ལྡོག་པར་མི་འགྱུར་བ་ཞེས་བྱ་སྟེ། འོང་པ་མེད་པ་དང་། ཕྱིར་ལྡོག་པར་མི་འགྱུར་བ་གང་ཡིན་པ་དེ་དག་ནི་གོ་ཆ་འདི་དང་། ཐེག་པ་འདི་དང་། ལམ་འདི་དང་། རྗེས་སུ་འཐུན་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་བར་བྱེད་པ་ཡིན་པས་སེམས་ཅན་རྣམས་ལ་ཕན་པ་ཆེན་པོ་བྱེད་པར་འགྱུར་རོ། བློ་གྲོས་མཐའ་ཡས་གང་གིས་ཆོས་འདི་དེ་ལྟར་སྟོན་པ་དང་། དོན་གྱི་རྗེས་སུ་འབྲང་བར་བྱེད་པ་དང་། རྗེས་སུ་འཇུག་པར་བྱེད་པ་གང་ཡིན་བ་དེ་དག་ནི་སེམས་ཕྱིན་ཅི་ལོག་མེད་པ་དང་། ཐེ་ཚོམ་མེད་པའི་མོས་པ་ཡོངས་སུ་བསྒྲུབ་པ་ཡིན་པས་གོ་ཆ་འདི་དང་། ཐེག་པ་འདི་དང་། ལམ་འདི་ཡོངས་སུ་མ་བསྡུས་པ་གང་ཡིན་པ་དེ་དག་ནི་ཡོངས་སུ་བསྡུས་ནས་མྱུར་དུ་གཞོལ་བར་བྱེད་པས་གོ་ཆ་འདི་མ་བགོས་པར་ཡང་མྱུར་དུ་བགོ་བར་བྱེད་དོ་ཐེག་པ་འདི་ལ་ད་དུང་ཞོན་པར་མ་གྱུར་པ་ཡང་མྱུར་དུ་ཞོན་པར་བྱེད་དོ། ལམ་འདི་ལ་གནས་པར་མ་གྱུར་པ་ཡང་མྱུར་དུ་གནས་པར་བྱེད་དོ། བློ་གྲོས་མཐའ་ཡས་སེམས་ཅན་དེ་དག་ནི་བསོད་ནམས་ཀྱི་ཚོགས་རྒྱ་ཆེན་པོ་ཡོངས་སུ་སྡུད་པ་དང་། སངས་རྒྱས་བཅོམ་ལྡན་འདས་རྣམས་ཀྱིས་རྗེས་སུ་བསྲུང་ཞིང་དགོངས་པར་འགྱུར་བས་ཆོས་དང་འགལ་བ་མེད་པ་དང་། དགེ་འདུན་དང་འཐུན་པར་སྤྱོད་པར་འགྱུར་རོ། བློ་གྲོས་མཐའ་ཡས་ཁྱོད་ནི་དགེ་བའི་རྩ་བ་ཚད་མེད་པ་རྣམས་ཡོངས་སུ་བསྡུས་པ་ཡིན་པས་མ་འོངས་པའི་དུས་སུ་ཆོས་འདིས་སེམས་ཅན་རྣམས་ཡོངས་སུ་བསྡུས་ནས་སེམས་ཅན་རྣམས་ཀྱི་ཆེད་དུ་ཁུར་ལྕི་བ་བསྐུར་བར་བྱའོ། དེ་ནས་བསོད་ནམས་ཀྱི་ཚད་ཤིན་དུ་བརྗོད་པར་དཀའ་བ་དག་རབ་ཏུ་འཐོབ་པར་འགྱུར་རོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་
པ། བྱང་ཆུབ་སེམས་དཔའ་འཇིགས་མེད་པས། །དེ་ལྟར་གོ་ཆ་བགོས་པའི་ཚེ། །སེམས་ཅན་རྣམས་ལ་ཕན་གདགས་ཕྱིར། །གོ་ཆ་དཔག་མེད་བགོ་པར་བྱེད། །སེམས་ཅན་གལ་ཏེ་ཕོངས་གྱུར་ཏམ། །སྡུག་བསྔལ་ཆོས་ནི་མེད་པའི་ཚེ། །ཚུལ་ཁྲིམས་དང་ནི་མང་དུ་ཐོས། །ཤེས་རབ་རྣམས་གྲོལ་ཚད་མེད་པ། །གོ་ཆ་དཔག་མེད་རབ་བགོས་ནས། །ཆོས་ཀྱིས་རབ་ཏུ་ཕྱུག་པོར་བྱེད། །ཆོས་ཀྱིས་ཕྱུག་པོར་གྱུར་པའི་ཕྱིར། །ཐམས་ཅད་བདེ་བ་ཐོབ་པར་བྱེད། །དབུལ་བའི་སྡུག་བསྔལ་སྤོངས་པའི་ཕྱིར། །བླ་མེད་ཆོས་ནི་སྟོན་བྱེད་པས། །ཐོས་པ་དག་ནི་རྔུལ་སྤངས་ནས། བདེ་ལམ་འདི་ལ་བཀོད་པར་བྱེད། །ཚུལ་ཁྲིམས་ཕུང་པོ་རབ་རྒྱས་ཤིང་། །མང་དུ་ཐོས་པ་རྒྱ་མཚོ་འདྲ། །ཤེས་རབ་མཆོག་ནི་ཐོབ་པས་ནས། །དེས་ན་འཆིང་བ་གཅོད་པར་བྱེད། །རྣམ་གྲོལ་ཀུན་དུ་གསལ་བྱེད་དང་། །རྣམ་གྲོལ་ཡང་དག་ཤེས་མཐོང་བ། །གང་གིས་མངོན་སུམ་བྱེད་པ་ནི། །ཐམས་ཅད་བདེ་བ་འཐོབ་པར་འགྱུར། །འདོད་ཆགས་ཞེ་སྡང་གཏི་མུག་མེས། །རྟག་ཏུ་སྲེག་ཅིང་ཀུན་གདུངས་པས། །དེས་ན་སེམས་ཅན་སྡུག་བསྔལ་འགྱུར། །མེ་དེ་བདག་གིས་བསད་པར་བྱ། །སེམས་ཅན་རྣམས་ལ་སྨན་བཏང་ནས། །ནད་རྣམས་ཐམས་ཅད་གསལ་པར་བྱ། །གལ་ཏེ་ནད་ནི་ཞི་གྱུར་ན། །མྱ་ངན་འདས་དབྱིངས་ཕྱིན་པར་འགྱུར། །ལྷག་མ་ཐམས་ཅད་གཏན་སྤངས་ནས། །བདེ་གནས་ལ་ནི་གཞོལ་བར་བྱེད། །བདེ་བའི་གནས་སུ་བཞག་པས་ན། །ལྡོག་པར་གྱུར་པ་གང་ཡང་མེད། །འདུས་བྱས་བདེ་བ་ཐམས་ཅད་ལ། །ཡོངས་སུ་ཚོལ་བར་མི་བྱེད་ཅིང་། །བླ་ན་མེད་པའི་བདེ་ཆེན་དག། །ཐམས་ཅད་མངོན་སུམ་བྱེད་པར་འགྱུར། །སྤྲོས་པ་མེད་པའི་ཆོས་དག་གིས། །སེམས་ཅན་ཡོངས་སུ་སྨིན་བྱེད་པས། །མཐར་ཕྱིན་པ་ཡི་བདེ་བ་དག། །ཐམས་ཅད་རབ་ཏུ་འཐོབ་པར་བྱེད། །དེ་ལྟ་བུར་ནི་གང་གཞོལ་བ། །ལན་ཅིག་སོང་ནས་ཕྱིར་མི་ལྡོག། །གཞོལ་བ་ལས་ནི་ཡང་དག་འདས། །མཆོག་ཏུ་བདེ་བ་རྟག་ཏུ་ཐོབ། །བདེ་བ་ཆེན་པོ་དག་གིས་ནི། །མོས་པ་དང་ནི་མི་མོས་པ། །གཞོལ་བ་དང་ནི་གཞོལ་མེད་པ། །ཐམས་ཅད་རབ་ཏུ་སྤོང་བར་བྱེད། །དེ་ལྟར་གོ་ཆ་བགོས་ནས་ཀྱང་། །
ཐེག་པ་འདི་ལ་ཞོན་ནས་ནི། །སེམས་ཅན་རྣམས་ལ་སྙིང་བརྩེའི་ཕྱིར། །ཐམས་ཅད་ཡོངས་སུ་གཟུང་བར་བྱ། །འདས་བའི་ཐམས་ཅད་མཁྱེན་པ་རྣམས། །ཐེག་པ་འདི་ཡིས་ངེས་བྱུང་གྱུར། །མ་བྱོན་ཐམས་ཅད་མཁྱེན་རྣམས་ཀྱང་། །ཐེག་པ་འདི་དབང་ངེས་འབྱུང་འགྱུར། །ད་ལྟར་སངས་རྒྱས་བཅོམ་ལྡན་འདས། །ཐེག་པ་འདི་དབང་ངེས་འབྱུང་བརྙེས། །དེ་ཕྱིར་ཐེག་པ་འདི་ལ་ནི། །མ་བཅིབས་པ་ནི་གང་ཡང་མེད། །འཇིག་རྟེན་དག་ལ་མགོན་མཛད་པས། །རྒྱལ་བ་དག་ནི་ཐམས་ཅད་ཀུན། །ཐེག་པ་འདི་ཡིས་ངེས་བྱུང་ཡང་། །ཐེག་པའི་འདུ་ཤེས་སྐྱེད་མི་མཛད། །ཐེག་པ་མེད་པས་ཐེག་པ་མཛད། །ལམ་མེད་པ་ལ་ལམ་དུ་མཛད། །ངེས་འབྱུང་མེད་པར་ངེས་པར་འབྱུང་། །དེ་ཕྱིར་ངེས་འབྱུང་བླ་ན་མེད། །ཐེག་པ་འདི་ནི་ངེས་འབྱུང་ཚེ། །ངེས་འབྱུང་ཅུང་ཟད་ཡོད་མ་ཡིན། །སྟོང་པ་མཚན་མ་མེད་པ་དང་། །སྨོན་མེད་བྱེད་པ་མེད་ཕྱིར་རོ། །ཐེག་མིན་ངེས་འབྱུང་མ་ཡིན་པ། །དེས་ནི་ཐེག་ཆེན་ཞེས་བྱའོ། །ཐམས་ཅད་རབ་ཏུ་མཉམ་པས་ན། །དེས་ན་ཡང་དག་གཞོལ་བར་བྱེད། །ཐེག་པ་འདི་ལ་འདུས་པ་མེད། །མ་འདུས་པ་ཡང་ཡོད་མ་ཡིན། །བླ་མེད་ལམ་ལ་གཞོལ་བྱེད་པས། །བདེ་བ་ཆེན་པོ་མངོན་དུ་བྱེད། །ཐེག་པ་འདི་ལ་མཚུངས་ལྡན་མེད། །མཚུངས་མི་ལྡན་པ་ཡོད་མ་ཡིན། །གནས་པ་མེད་ཅིང་རྟེན་པ་མེད། །དེས་ན་རབ་ཏུ་གཞོལ་བར་བྱེད། །ལམ་འདི་ལ་ནི་འོད་པ་མེད། །ལམ་འདི་ལ་ནི་བགྲོད་པ་མེད། །ཡང་དག་ལམ་འདི་གང་སྤྱོད་པ། །རབ་དབེན་ཡང་དག་གཞོལ་བར་འགྱུར། །དས་ནི་ལམ་འདི་ཐེག་འདི་དང་། །གོ་ཆ་ཆེན་པོ་འདི་དག་ནི། །ཆོས་ལ་རྟེན་པར་མི་བྱེད་པས། །རབ་དབེན་བླ་མེད་མཆོག་ཏུ་བསྟན། །སོ་སོའི་སྐྱེ་བོའི་ཆོས་རྣམས་དང་། །ཉན་ཐོས་ཆོས་ནི་ཐམས་ཅད་དང་། །རང་རྒྱལ་ཆོས་ནམས་ཐམས་ཅད་ཀྱང་། །ཐམས་ཅད་དམིགས་སུ་མེད་པ་ཡིན། །སངས་རྒྱས་ཆོས་ནི་ཐམས་ཅད་དང་། །དྲི་མེད་བླ་ན་མེད་པའི་ཆོས། །རིང་བ་མ་ཡིན་ཉེ་མིན་པས། །ཐམས་ཅད་དམིགས་སུ་མེད་པ་ཡིན། །སྟོད་དང་མཚན་མ་མེད་པའི་ཆོས། །སྨོན་དང་བྱེད་པ་མེད་ཆོས་ཀྱང་། །རིང་བ་མ་ཡིན་ཉེ་མིན་པས། །ཐམས་ཅད་
དམིགས་སུ་མེད་པ་ཡིན། །སྐྱོན་བྲལ་དང་ནི་འགགས་པའི་ཆོས། །རབ་དབེན་མྱ་ངན་འདས་པའི་ཆོས། །རིང་བ་མ་ཡིན་ཉེ་མིན་པས། །ཐམས་ཅད་དམིགས་སུ་མེད་པ་ཡིན། །ཐེག་པ་འདི་དང་གོ་ཆ་འདི། །ལམ་འདི་ལ་ནི་འཛིན་མེད་ཅིང་། །བླ་མེད་གཡོ་བ་མེད་པས་ན། །མཐར་ནི་གང་ཡང་དམིགས་སུ་མེད། །ཆོས་ཀྱི་རང་བཞིན་ཐམས་ཅད་དང་། །དེ་ཁོ་ན་ཡི་མཚན་ཉིད་ནི། །གདགས་སུ་རུང་བ་མ་ཡིན་ཏེ། །ཆོས་ཉིད་རྣམས་ནི་སྟོང་ཕྱིར་རོ། །ཐེག་པ་འདི་དང་གོ་ཆ་འདི། །ལམ་འདི་བསྟན་དུ་མེད་པ་ཡིན། །ཆོས་རྣམས་རང་བཞིན་ཇི་ལྟ་བ། །དེ་ཡི་རང་བཞིན་དེ་བཞིན་ནོ། །ཆོས་རྣམས་དག་ནི་ཐམས་ཅད་ལ། །མཚན་ཉིད་རང་བཞིན་མེད་པའི་ཆོས། །ང་ཡིས་མདོར་ནི་བསྟན་པ་ཡིན། །ཆོས་རྣམས་ཐམས་ཅད་དག་ལ་ནི། །རང་བཞིན་མཚན་ཉིད་ཐམས་ཅད་ཀུན། །ཇི་ལྟར་དས་ནི་བཤད་པ་བཞིན། །མཐར་ནི་ཡོད་པར་མི་འགྱུར་རོ། །ཐེག་པ་འདི་དང་ལམ་འདི་དང་། ། གོ་ཆའི་རང་བཞིན་མཚན་ཉིད་ལ། །ཚིག་གིས་བརྗོད་པ་རབ་བསལ་ནས། །མཐར་ནི་དམིགས་པར་འགྱུར་མ་ཡིན། །ཚིག་ནི་ཡོད་པ་མ་ཡིན་ཕྱིར། །ངོ་མཚར་རབ་ཏུ་གྱུར་པ་ཡིན། །ཚིག་གི་བརྗོད་པ་དེ་དག་ལ། །དག་གི་མཚན་ཉིད་ཡོད་མ་ཡིན། །ཆོས་རྣམས་དག་ནི་གཞལ་དུ་མེད། །མཆོག་དང་ཀུན་དུ་གཞལ་དུ་མེད། །ཐམས་ཅད་དཔག་ཏུ་མེད་པས་ན། དེ་ཕྱིར་ཆོས་ནི་བླ་ན་མེད། །ཐེག་པ་འདི་དང་གོ་ཆ་འདི། །ལམ་འདི་ཡང་ནི་དེ་བཞིན་དུ། །མཚན་མ་མེད་པ་དེ་དག་ལ། །དེ་ལྟར་རྗེས་སུ་འཇུག་པར་བྱ། །སེམས་ཅན་རྣམས་ནི་ཀུན་གྱིས་ཀྱང་། །ཡོངས་ཤེས་ནན་ཏན་བསྒྲུབ་པ་དང་། །མྱུར་དུ་ཆོས་སྣང་ཐོབ་བྱའི་ཕྱིར། །དེ་ཕྱིར་དས་ནི་དེ་སྐད་བསྟན། །ཆོས་རྣམས་ལ་ནི་ཚིག་མེད་པས། །ཐམས་ཅད་བརྗོད་དུ་མེད་པ་ཡིན། །ཆོས་རྣམས་དེ་དག་ཀུན་ལ་ནི། །ཐམས་ཅད་རྗེས་སུ་འཇུག་པར་བྱ། །ཆོས་ལ་ཚིག་ནི་མེད་པའི་ཕྱིར། །དེ་ཡི་རྗེས་སུ་འབྲང་བར་བྱ། །སྤྱོད་ཀྱང་སྤྱོད་པ་ཅུང་ཟད་མེད། །ཚོལ་བ་མེད་ཅིང་མོས་ཚོལ་མེད། །འགྲོ་བ་མེད་པས་རྗེས་སུ་འབྲང་། །དེ་ལྟར་རྗེས་སུ་གང་འབྲང་བ། དོན་ལ་སོ་སོར་རྟོག་མི་བྱེད། །ཁྱོད་
ཀྱིས་ཡང་དག་བདེན་པའི་དོན། །ཐམས་ཅད་རྗེས་སུ་འབྲང་བར་བྱ། །སྒྲ་རྣམས་དང་ནི་ཚིག་གི་ནི། །རྗེས་སུ་འཇུག་པར་མི་བྱའོ། །སྒྲ་རྣམས་དང་ནི་ཚིག་དག་གི། །རྗེས་སུ་གལ་ཏེ་མི་འཇུག་ན། དོན་གྱི་རྗེས་སུ་འབྲང་བྱེད་པས། །འདི་ནི་དོན་ཚོལ་ཞེས་ཀྱང་བྱ། །དོན་ཅས་བྱ་བ་གང་ཞེ་ན། །གསང་སྟེ་གསུངས་པར་རིག་པར་བྱ། །རྣམ་རྟོག་མེད་ལ་ཡིད་ཆེས་པས། །དོན་དེའི་རྗེས་སུ་འབྲང་བར་བྱ། །དོན་དེ་གསལ་བར་རབ་རྟོགས་ན། །གསང་སྟེ་གསུངས་པ་དེ་དག་ལ། །འཛིན་མེད་ཞེན་པ་མེད་པ་དང་། །འབྲང་དང་རྗེས་སུ་འཇུག་མི་འགྱུར། །གལ་ཏེ་རྗེས་སུ་འབྲང་བྱེད་ན། །མངོན་ཤེས་རྗེས་སུ་འབྲང་བར་བྱེད། །གལ་ཏེ་རྗེས་སུ་མི་འབྲང་ན། །ཐམས་ཅད་རྗེས་སུ་འཇུག་མི་འགྱུར། །ཡང་དག་དྲན་པ་དེ་དབང་གིས། །རྗེས་སུ་འཇུག་པ་སྤོང་བར་བྱེད། །བྱང་ཆུབ་དང་ནི་འཁོར་བ་དང་། །གཉིས་ག་ཡང་ནི་མཚུངས་མི་ལྡན། །དེ་ལ་བསམ་པར་མི་བྱེད་པས། །བསམ་མེད་ཡང་དག་དྲན་པ་ཡིན། །བསམ་པ་ཡོངས་སུ་དག་པའི་ཕྱིར། །རྣམ་པར་དག་པ་ཞེས་བྱའོ། །འདི་དང་ཐ་དད་སྒྲུབ་བྱེད་ན། །བླ་མེད་ཆོས་ནི་སྤོང་བར་འགྱུར། །ཁྱོད་ཀྱིས་དོན་དེ་དག་ལ་ནི། །ཇི་སྐད་བསྟན་བཞིན་བསྒྲུབ་པར་བྱ། །གལ་ཏེ་ཚིག་གི་རྗེས་འབྲང་ན། །དེ་ནི་སྒྲ་ཡི་རྗེས་འབྲང་བས། །དེ་ལས་ཡང་དག་མི་འདའ་ཞིང་། །འཇིག་རྟེན་ཆོས་དང་མཚུངས་པར་འགྱུར། །སྒྲ་དང་ཚིག་འབྲུ་ཡི་གེ་རྣམས། །དེ་དག་རྗེས་སུ་འཇུག་མི་བྱ། །ཡང་དག་དོན་ནི་རྟོགས་བྱས་ཏེ། །བགྲོད་པ་མེད་པས་རྗེས་འབྲང་བྱ། །ཡང་དག་དོན་ལ་སྒྲ་ཡང་མེད། །ཚིག་འབྲུ་ཡི་གེ་ཡོད་མ་ཡིན། །ཚིག་ལས་ཡང་དག་འདས་པའི་ཕྱིར། །ཡང་དག་དོན་ཅེས་བྱ་བ་ཡིན། །དོན་དེའི་རྗེས་སུ་འབྲང་བྱེད་ཀྱང་། །རྗེས་སུ་འབྲང་བ་ཅི་ཡང་མེད། །འབྲང་བར་བྱ་བ་ཞི་བའི་ཕྱིར། །ཡང་དག་དོན་ཅེས་བྱ་བ་ཡིན། །ཡང་དག་དོན་ནི་དེ་དག་ལ། །འབྲང་བ་མེད་པ་འབྲང་མེད་པས། །དེ་ནི་ཕྱིར་ལྡོག་མི་འགྱུར་ཞིང་། །གོ་ཆ་སྤོང་བར་མི་བྱེད་དོ། །གོ་ཆ་ཆེན་པོ་ཐེག་ཆེན་དང། །
ལམ་ཆེན་རྗེས་སུ་གང་འབྲང་བ། །བདེ་བའི་གནས་སུ་བགྲོད་བྱས་ནས། །སེམས་ཅན་རྣམས་ལ་ཕན་བྱེད་འགྱུར། །རབ་ཏུ་བདེ་བའི་ཆོས་འདི་དག། །ངས་ནི་ཁྱོད་ལ་རབ་ཏུ་བཤད། །ཁྱོད་དོན་རྗེས་སུ་འབྲང་བྱེད་ན། །ཁྱོད་ཀྱི་ཐེ་ཚོམ་ཆད་པར་འགྱུར། །ཐེག་པ་འདི་ལ་གང་ཞོན་པ། །ཞོན་ནས་རབ་ཏུ་བགྲོད་བྱེད་ན། །བྱང་ཆུབ་ཆེན་པོར་མྱུར་ཕྱིན་ནས། །བླ་མེད་སངས་རྒྱས་མངོན་སུམ་བྱེད། །ཐེག་པ་མཆོག་ཏུ་གྱུར་པ་འདི། །བཞོན་བྱེད་གང་ཡིན་མྱུར་ཞོན་བྱེད། །ལམ་དང་གོ་ཆ་ཆེན་པོ་ཡི། །དོན་དག་ཀྱང་ནི་དེ་བཞིན་ནོ། །བླ་ན་མེད་པའི་ཆོས་འདི་ལ། །ནན་ཏན་གྱིས་ནི་གང་སྒྲུབ་པ། །སེམས་ཅན་དེ་དག་ཐམས་ཅད་ལ། །སངས་རྒྱས་རྣམས་ཀྱིས་དགོངས་པར་འགྱུར། །མ་འོངས་འཇིག་པའི་དུས་ཀྱི་ཚེ། །ཁྱོད་ཀྱིས་ཆོས་འདི་རབ་ཕྱེ་ནས། །སེམས་ཅན་རྣམས་ལ་རྒྱ་ཆེར་ནི། །ཕན་པ་དག་ནི་རབ་ཏུ་བྱོས། །མ་འོངས་འཇིག་པའི་དུས་ཀྱི་ཚེ། །གལ་ཏེ་ཆོས་འདི་རབ་ཕྱེ་ནས། །བླ་མེད་བསོད་ནམས་སྐྱེ་འགྱུར་བས། །དེ་ཡི་གྲངས་ནི་གཞལ་མི་ནུས། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བགོས་པའི་གོ་ཆ་གང་ཡིན་པ་དེ་ནི་རྒྱལ་པོ་ཆེན་པོ་ཞེས་བྱའོ། །དཔག་ཏུ་མེད་པའི་རྒྱལ་པོ་ཞེས་ཀྱང་བྱའོ། །བཀོད་པ་ཆེན་པོ་དང་ལྡན་པས་བཞོན་པའི་ཐེག་པ་ཞེས་ཀྱང་བྱའོ། དེད་དཔོན་ཆེན་པོ་ཞེས་ཀྱང་བྱའོ། དཔག་ཏུ་མེད་པའི་འོད་ཅེས་ཀྱང་བྱའོ། བཀོད་པ་དམ་པ་དང་ལྡན་པ་བགྲོད་བར་བྱ་བའི་ལམ་ཞེས་ཀྱང་བྱའོ། བཀོད་པ་ཚད་མེད་པའི་ཚོགས་ཤེས་ཀྱང་བྱའོ། ཐབས་ཚད་མེད་པའི་ཆོགས་ཤེས་ཀྱང་བྱ་སྟེ། ལམ་འདིའི་དབང་གིས་སྐྱེས་བུ་དམ་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱའོ། །གཞན་ཡང་བློ་གྲོས་མཐའ་ཡས་སྔོན་འདས་པའི་དུས་ཀྱི་བསྐལ་པ་ཚད་མེད་ཅིང་གྲངས་མེད་པའི་ཡང་ཆེས་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་འདུལ་བ་ཁ་
ལོ་སྒྱུར་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཙན་དན་སྤོས་ཀྱི་འོད་ཟེར་ཞེས་བྱ་བ་འཇིག་རྟེན་དུ་བྱུང་སྟེ། བསྐལ་པའི་མིང་ནི་གློག་གི་འོད་ཅེས་བྱའོ། །འཇིག་རྟེན་གྱི་ཁམས་ནི་རབ་ཏུ་སྣང་བ་ཞེས་བྱ་སྟེ། དེའི་ཚེ་ཞིང་དེས་གཞི་ལག་མཐིལ་ལྟར་མཉམ་ཞིག་མི་གཙག་བ་རྣམ་པ་སྣ་ཚོགས་དང་། གྱོ་མོ་དང་། གསེག་མ་དང་། ཚེར་མ་དང་། སྡོང་དུ་མ་ལ་སོགས་པ་མེད་དེ་གསེར་དང་། དངུལ་གྱི་བྱེ་མ་གཅལ་དུ་བཀྲམ་པས་འཇིག་རྟེན་གྱི་ཁམས་དེ་གང་གིས་མཐོང་བ་རབ་ཏུ་དགའ་བར་གྱུར་ཏོ། དེའི་ཚེ་གླིང་བཞི་པོ་རྣམས་ཡངས་ཤིང་རྒྱ་ཆེ་བས་ཐམས་ཅད་ཀྱང་དཔག་ཚད་འབུམ་ཕྲག་གཉིས་གཉིས་ཀྱིས་འཁོར་བར་གྱུར་ཏེ། གླིང་རེ་རེ་ན་ཡང་གྲོང་ཁྱེར་ཆེན་པོ་བཞི་ཁྲི་བརྒྱད་སྟོང་ཡོད་དེ། གྲོང་ཁྱེར་རེ་རེའི་ཚད་ཀྱང་ཞེང་དུ་དཔག་ཚད་བཅུ་དང་། སྲིད་དུ་དཔག་ཚད་བཅུ་གཉིས་ཡོད་དེ། ཐ་མའི་ར་བ་ཡང་ཤིན་དུ་མཐོ་ཞིང་བཀོད་པ་དང་ལྡན་པར་གྱུར་ཏོ། གྲོང་ཁྱེར་རེ་རེ་ན་ཡང་མི་བྱེ་བ་ཕྲག་བརྒྱད་བརྒྱད་གནས་ཏེ། དེ་ཡང་གྲོང་རྡལ་ཁྲི་དང་། བསྐྱེད་མོས་ཚ་ལ་སྟོང་གིས་བསྐོར་ནས་རབ་ཏུ་བརྒྱན་པར་གྱུར་ཏོ། གཞན་ཡང་ཞིང་ཁམས་དེ་ན་མེ་ཏོག་གི་ལྗོན་ཤིག་དང་། འབྲས་བུའི་ལྗོན་ཤིང་དང་། སྤོས་ཀྱི་ལྗོན་ཤིང་དང་། གོས་ཀྱི་ལྗོན་ཤིང་དང་། རོ་མཆོག་ཏུ་གྱུར་པའི་ལྗོན་ཤིང་དང་། རྡོ་རྗེའི་ལྗོན་ཤིང་རྣམ་པ་སྣ་ཚོགས་ཀྱིས་བཀོད་པ་དང་། རྫིང་དང་རྫིང་བུ་དང་། ཆུ་མིག་དང་། འབབ་ཆུ་རྣམས་ཀྱང་གཡས་གཡོན་གྱི་འགྲམ་དྲང་ཞིང་མཛེས་པ་དང་། ཡོན་ཏན་བརྒྱད་དང་ལྡན་པའི་ཆུས་རབ་ཏུ་གང་བ་དང་། དེ་ན་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་ཁ་དོག་སྣ་ཚོགས་ཀྱི་འོད་དང་ལྡན་པས་ཀུན་དུ་ཁྱབ་པར་གྱུར་ཏོ། དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་དེའི་སྐུའི་ཚེའི་ཚད་ནི་ལོ་བྱེ་བ་ཁྲག་ཁྲིག་ཕྲག་དྲུག་བཅུ་རྩ་བརྒྱད་ཐུབ་པར་གྱུར་ཏོ། ཉན་ཐོས་ཀྱི་འཁོར་ནི་བྱེ་བ་ཁྲག་ཁྲིག་ཕྲག་དྲུག་བཅུ་མངའ་བར་གྱུར་ཏོ། དེའི་ཚེ་མི་རྣམས་བྱད་བཞིན་སྤུག་ཅིང་མཛེས་པ་དང་། རབ་ཏུ་བདེ་བ་དང་ལྡན་པ་དང་། འདོད་
ཆགས་དང་། ཞེ་སྡང་དང་། གཏི་མུག་སྲབ་པས་གདུལ་སླ་བ་དང་། ཅུང་ཟད་ཙམ་ཞིག་བཤད་ཅིང་བསྟན་པས་ཀྱང་ཆོས་རྣམས་ཀྱི་རང་བཞིན་གྱི་མཚན་ཉིད་ཡོངས་སུ་ཤེས་པར་གྱུར་ཏོ། བློ་གྲོས་མཐའ་ཡས་གཞན་ཡང་དེའི་ཚེ་འཁོར་ལོས་སྒྱུར་བའི་རྒྱལ་པོ་དོན་ཐམས་ཅད་གྲུབ་པ་ཞེས་བྱ་བ་རིན་པོ་ཆེ་སྣ་བདུན་དང་ལྡན་པ། གླིང་བཞི་པ་རྣམས་སྐྱབས་སུ་དོད་པ་ཞིག་བྱུང་སྟེ། འཇམ་བུའི་གླིང་དེ་ན་གྲོང་ཁྱེར་ཆེན་པོ་ཆུ་ཞིང་དུ་དཔག་ཚད་བཞི་བཅུས་འཁོར་བ་ཞིག་ཡོད་དེ། མིས་རབ་ཏུ་གང་བ། བདེ་ཞིང་འབྱོར་པ་དང་ལྡན་པ། གྲོང་ཁྱེར་གྱི་ནང་དུ་དཔག་ཚད་ལྔ་ཚུན་ཆད་རིན་པོ་ཆེ་སྣ་བདུན་གྱིས་གཅལ་དུ་བཀྲམ་པ། ཤིང་ཏ་ལ་མཆོག་རྣམས་ཀྱང་དྲིལ་བུ་གཡེར་ཀ་སྤྱངས་ཤིང་གསེར་ཡང་དག་པའི་དྲ་བས་གཡོགས་པ་དག་གིས་ཀུན་དུ་གང་བར་གྱུར་ཏོ་རྒྱལ་པོ་དེའི་ཕོ་བྲང་ནི་བཻ་དཱུ་རྻ་འབའ་ཤིག་ལས་བྱས་ཤིང་ཞེང་དུ་དཔག་ཚད་གཅིག་ཡོད་དེ། ངོས་བཞིན་ཀ་བ་སྟོང་སྟོང་ཡོད་དོ། ཕོ་བྲང་གཞལ་མེད་ཁང་དེའི་སྟེང་ན་ཡང་ཁང་པ་བརྩེག་མ་ཤིན་དུ་མཐོ་ཞིང་རིན་པོ་ཆེ་སྣ་ཚོགས་ཀྱིས་རབ་ཏུ་བརྒྱན་པ་སྟོང་ཡོད་དོ། ཕོ་བྲང་གཞལ་མེད་ཁང་དེའི་མདུན་ན་སྤོས་ཀྱི་རྫིང་ཆེན་པོ་ཤིན་དུ་ངང་བ་ཞིག་ཡོད་དོ། དེའི་ཉེ་འཁོར་ན་གཞན་ཡང་སྤོས་ཀྱི་འོད་དང་ལྡན་པའི་རྫིང་བུ་ཕྲ་མོ་རིན་པོ་ཆེ་སྣ་བདུན་ལས་མངོན་པར་གྲུབ་པ་བཅུ་དྲུག་ཡོད་དེ། དེ་དག་གིས་མཐའ་མ་འཁོར་བར་བསྐོར་ཏོ། རྫིང་བུ་རེ་རེ་ལས་ཀྱང་འབབ་ཆུ་དག་རབ་ཏུ་འབབ་པས་དེ་ལས་དཔེར་ན་རོལ་མོ་མང་པོ་བྱས་པ་ལྟ་བུའི་སྒྲ་སྙན་པ་དག་བྱུང་བར་གྱུར་ཏོ། རྫིག་བུ་ཕྲ་མོ་རེ་རེ་ལ་ཡང་ལམ་སྟེགས་བརྒྱད་བརྒྱད་ཡོད་དོ། སྤོས་ཀྱི་འོད་ཀྱི་རྫིང་བུ་ཆེན་པོ་ནི་ལམ་སྟེགས་སུམ་བཅུ་རྩ་གཉིས་ཡོད་དེ། ལམ་སྟེགས་ཐམས་ཅད་ཀྱང་གསེར་འབའ་ཤིག་ལས་མངོན་པར་གྲུབ་པ། རིན་པོ་ཆེའི་ཤིང་ལྗོན་པ་ཕྲེང་དུ་དཀྲིགས་པ། རིན་པོ་ཆེའི་དྲ་བས་གཡོགས་པ། སྤོས་མཆོག་དམ་པའི་དྲིས་གྲོང་ཁྱེར་ཀུན་དུ་གང་བར་བྱེད་པའི་ཕྱིར་རྫིང་དེ་དག་སྤོས་ཀྱི་འོད་ལྡན་ཞེས་བྱའོ། བློ་གྲོས་མཐའ་ཡས་འཁོར་ལོས་སྒྱུར་བའི་རྒྱལ་པོ་དེ་
ལ་བཙུན་མོ་བཞི་ཡོད་དེ། དཔག་མེད་སྤོས་དང། ལེགས་པའི་དབྱངས་དང། དམ་པ་སྣ་ཚོགས་ཀྱི་དབྱངས་དང། ངང་པའི་རྒྱལ་པོ་ལྟ་བུའི་དབྱངས་ཤེས་བྱ་བ་དག་ཡིན་ནོ། བཙུན་མོ་རེ་རེ་ལ་ཡང་བུ་གཉིས་གཉིས་ཡོད་དེ། གདོན་མི་ཟ་བའི་མཆོག་དང། བཟང་པོའི་མཆོག་དང་། ཀླུའི་མཆོག་དང། མཆོག་གི་དབྱངས་དང། དམ་པའི་དབྱངས་དང་། ཚངས་པའི་དབྱངས་དང། མཆོག་གི་སྤྲིན་དང། སྤྲིན་གྱི་དབྱངས་ཤེས་བྱ་བ་དག་ཡིན་ནོ། དེ་ལ་སླས་ནི་འབུམ་ཕྲག་དྲུག་ཡོད་དེ། བུ་དེ་སྟོང་ཕྲག་བཅུ་ཡོད་དོ། དེའི་ཚེ་རྒྱལ་པོའི་ཕོ་བྲང་གི་ནང་དུ་འཁོར་རྣམས་ལྷན་ཅིག་ཏུ་དགའ་བ་མྱོང་ཞིང་རྩེ་བ་ལས་ནམ་མཁའ་ལས་དེ་བཞིན་གཤེགས་པའི་སྐུ་ཤིན་ཏུ་མཛེས་པ་ཞིག་མཐོང་ངོ། དེ་ནས་དེ་བཞིན་གཤེགས་པ་དེས་རྒྱལ་པོ་དེ་ལ་འདི་སྐད་ཅེས་བཀའ་སྩལ་ཏོ། ཀྱེ་རྒྱལ་པོ་ཆེན་པོ་བླ་ན་མེད་པའི་གོ་ཆ་བགོས་ཏེ། བླ་ན་མེད་པའི་ཐེག་པ་ལ་ཞོན་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གཞོལ་ཞིང་སེམས་ཅན་རྣམས་ལ་ཤེས་རབ་ཀྱི་སྨན་གཏང་པར་བྱའི། ལྷ་དང་མིའི་འདོད་པའི་ཡོན་ཏན་ལྔ་པོ་དག་ལ་མངོན་པར་ཞེན་པར་མི་བྱའོ། གོ་ཆ་ཆེན་པོ་འདིས་ནི་བླ་ན་མེད་པའི་བདེ་བ་ཡོངས་སུ་སྟུད་པར་བྱེད་དོ། བླ་ན་མེད་པའི་ཐེག་པ་འདིས་ཀྱང་སྐྱེ་དགུ་རྣམས་བླ་ན་མེད་པའི་བསྐྱེད་མོས་ཚལ་དུ་རབ་ཏུ་འདྲེན་པར་བྱེད་དེ། གང་གིས་དེར་ཞུགས་པས་དེ་དག་ནི་ཕྱིར་ལྡོག་པར་མི་འགྱུར་རོ། ལྷ་དང་མི་ཐམས་ཅད་ཀྱི་འདོད་པ་རྣམས་པ་སྣ་ཚོགས་མི་རྟག་པ། རྣམ་པར་འཇིག་ཅིང་ཡོངས་སུ་འགྱུར་བའི་ཆོས་ཅན། མཐུ་ཡུན་རིང་དུ་མི་གནས་པ། དེ་མ་ཐག་ཏུ་འགག་པའི་ཆོས་ཅན་ཡིན་ནོ་ཞེས་གསུངས་སོ། བློ་གྲོས་མཐའ་ཡས་དེའི་ཚེ་རྒྱལ་པོ་ཆེན་པོ་དོན་ཐམས་ཅད་གྲུབ་པས་དེ་སྐད་ཅེས་བཀའ་སྩལ་པ་ཐོས་པ་དང། དེ་བཞིན་གཤེགས་པ་དེ་ལ་འདི་སྐད་ཅེས་གསོལ་ཏོ། སུ་ཞིག་གོ་ཆ་ཆེན་པོ་དེ་ལྟ་བུ་རབ་ཏུ་སྟོན་པར་བགྱིད། གོ་ཆ་དེ་ཇི་ལྟ་བ་བཞིན་དུ་རབ་ཏུ་བགོ་བར་བགྱིའོ། སུ་ཞིག་ཐེག་པ་ཆེན་པོ་དེ་ལྟ་བུ་རབ་ཏུ་སྟོན་པར་བགྱིད། ཐེག་པ་ཆེན་པོ་དེ་ཇི་ལྟ་
བ་བཞིན་དུ་དེ་ལ་འཚལ་པར་བགྱིའོ། སུ་ཞིག་ལམ་ཆེན་པོ་དེ་ལྟ་བུ་རབ་ཏུ་སྟོན་པར་བགྱིད། ལམ་ཆེན་པོ་དེ་ཇི་ལྟ་བ་བཞིན་དུ་རབ་ཏུ་གཞོལ་བར་བགྱིའོ། དེ་སྐད་ཅེས་གསོལ་པ་དང་། དེའི་ཚེ་དེ་བཞིན་གཤེགས་པ་དེས་རྒྱལ་པོ་ཆེན་པོ་དེ་ལ་འདི་སྐད་ཅེས་བཀའ་སྩལ་ཏོ། ཀྱེ་རྒྱལ་པོ་འདི་ལྟར་ཤེས་པར་གྱིས་ཤིག། དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་ཞེས་བྱ་བ་ཡོད་ཀྱིས་རྒྱལ་པོ་དེའི་ཐར་དུ་སོང་ཤིག་དང། རྒྱལ་པོ་ཆེན་པོ་ལ་ཇི་ལྟར་གོ་ཆ་ཆེན་པོ་བགོས་པ་དང་། ཐེག་པ་ཆེན་པོ་ལ་ཞོན་པ་དང། ལམ་ཆེན་པོ་ལ་གཞོལ་བར་བྱ་བའི་ཆོས་དེ་ཡང་དག་པར་སྟོན་པར་འགྱུར་རོ། དེ་ནས་དེ་བཞིན་གཤེགས་པ་དེས་དེ་སྐད་ཅེས་བཀའ་སྩལ་ནས་མི་སྣང་བར་གྱུར་ཏོ། བློ་གྲོས་མཐའ་ཡས་དེའི་ཚེ་རྒྱལ་པོ་ཆེན་པོ་དོན་ཐམས་ཅད་གྲུབ་པ་དངོས་པོ་དེ་ལྟ་བུ་མཐོང་བ་དང། བ་སྤུ་ཟིང་ཞེས་བྱེད་ནས་ངོ་མཚར་གྱི་བསམ་པ་དང། འཇིགས་པའི་སེམས་སྐྱེས་བས་ལྷ་དང་། མིའི་འདོད་པའི་བདེ་བ་སྣ་ཚོགས་ལ་མོས་ཤིང་འདུས་བྱས་ཐམས་ཅད་ལ་ཡོངས་སུ་སྐྱོ་བར་གྱུར་ནས་གོ་ཆ་ཆེན་པོ་དང་། ཐེག་པ་ཆེན་པོ་དང། ལམ་ཆེན་པོ་ཡོང་སུ་གཉེར་བའི་ཕྱིར་རྒྱལ་བུ་བརྒྱད་དང། བཙུན་མོ་བཞི་དང་། བུ་གཞན་རྣམས་དང་། སླས་དང་། གཡོག་འཁོར་རྣམས་དང་ལྷན་ཅིག་ཏུ་དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་ག་ལ་བ་དེ་ལོགས་སུ་དོད་དོ། དེར་ཕྱིན་པ་དང་། འཁོར་དང་བཅས་ཏེ་གུས་པས་བཅོམ་ལྡན་འདས་དེའི་ཞབས་ལ་མགོ་བོས་གཏུགས་ཏེ་ཕྱག་བྱས་ནས་རིན་པོ་ཆེ་སྣ་བདུན་གྱི་མེ་ཏོག་རྣམ་པ་སྣ་ཚོགས་བརྒྱ་སྟོང་དུ་མས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་མངོན་བར་གཏོར་ཏོ། གཞན་ཡང་ན་བཟའ་ཚད་མེད་པ་སྙེང་དེ་བཞིན་གཤེགས་པ་དང། ཉན་ཐོས་ཀྱི་དགེ་བདུན་རྣམས་ལ་ཕུལ་ལོ། གཞན་ཡང་བདེ་བའི་ཡོ་བྱང་ཐམས་ཅད་ཀྱིས་ལོ་སྟོང་ཕྲག་བཅུའི་བར་དུ་བསྙེན་བཀུར་བ་དང་། རིམ་གྲོ་དང་། མཆོད་པ་བྱས་སོ། དེའི་འོག་ཏུ་རྒྱལ་
ཐབས་སྤངས་ནས་འཁོར་དག་བཅས་དེ། དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་གྱི་གསུང་རབ་ལས་རབ་ཏུ་བྱུང་གོ། །བློ་གྲོས་མཐའ་ཡས་དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་དེས་དགེ་སློང་དོན་ཐམས་ཅད་གྲུབ་པ་དང་། འཁོར་རྣམས་ཀྱི་མོས་པའི་བསམ་བ་ཐུགས་སུ་ཆུང་ནས་གོ་ཆའི་བཀོད་པ་དང་། ཐེག་པ་ཆེན་པོའི་བཀོད་པ་གང་ཡིན་བ་རྣམ་པར་ཕྱེ་སྟེ། དེ་དག་ལ་ཡང་དག་པར་བསྟན་ཏོ། དེ་དག་གིས་ཐོས་པར་གྱུར་པ་དང། ཤིན་ཏུ་བརྟན་པའི་སེམས་བསྐྱེད་ནས་ཆོས་ཟབ་མོའི་ཕྱིར་ཇི་སྲིང་འཚོའི་བར་དུ་ལུས་དྲང་པོར་བསྲང་སྟེ། ནན་ཏན་གྱིས་ནུར་བ་མེད་བར་བསྒོམས་པ་དང་། རྟག་ཏུ་དེ་བཞིན་གཤེགས་པ་ལ་བརྟེན་པས་འཇིག་རྟེན་པའི་འདོད་པ་ཐམས་ཅད་ཀྱིས་མི་གཡོས་པའི་ཡིད་ལ་བྱེད་པ་ཐོབ་པར་གྱུར་ཏོ། བློ་གྲོས་མཐའ་ཡས་དེའི་ཚེ་དེ་བཞིན་གཤེགས་པ་དེས་དགེ་སློང་དོན་ཐམས་ཅད་གྲུབ་པ་ལ་བཀའ་སྩལ་པ། རིགས་ཀྱི་བུ་དེང་ཁྱོད་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ། ལམ་ལ་ཡང་དག་པར་གཞོལ་བར་བྱེད་ན་ལམ་འདིའི་དབང་གིས་ཐམས་ཅད་མཁྱེན་པའི་ཡེ་ཤེས་དང་མཚུངས་པ་མེད་པའི་ཡེ་ཤེས་མངོན་པར་འགྲུབ་པར་འགྱུར་གྱིས་ཁྱོད་ཀྱིས་ཚུལ་བཞིན་དུ་ནན་ཏན་བརྩོན་འགྲུས་ཀྱིས་བསྒོམ་པར་བྱའོ། དེ་སྐད་ཅེས་བཀའ་སྩལ་པ་དང། དགེ་སློང་དོན་ཐམས་ཅད་གྲུབ་པ་དེས་དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་ལ་འདི་སྐད་ཅེས་གསོལ་ཏོ། བཅོམ་ལྡན་འདས་བདག་གིས་ནི་ད་ལྟར་གོ་ཆ་ཞེས་བགྱི་བའི་ཆོས་ཡང་དག་པར་རྗེས་སུ་མ་མཐོང་། གོ་ཆ་བགོས་པར་བགྱིད་པ་ཡང་ཡང་དག་པར་རྗེས་སུ་མ་མཐོང་། གོ་ཆ་བགོས་ནས་བགྲོད་པར་བགྱིད་པའི་ཕྱོགས་ཀྱང་ཡང་དག་པར་རྗེས་སུ་མ་མཐོང་ངོ། གོ་ཆ་བགོས་པའི་གནས་ཀྱང་ཡང་དག་པར་རྗེས་སུ་མ་མཐོང་ལགས་སོ། བཅོམ་ལྡན་འདས་བདག་གིས་ནི་ཐེག་པ་ཞེས་བགྱི་པའི་ཆོས་ཀྱང་ཡང་དག་པར་རྗེས་སུ་མ་མཐོང། ཐེག་པ་
ཆེན་པོ་ལ་བཞོན་པར་བགྱིད་པ་ཡང་ཡང་དག་པར་རྗེས་སུ་མ་མཐོང། ཐེག་པས་བགྲོད་པར་བགྱིད་པའི་ཕྱོགས་ཀྱང་ཡང་དག་པར་རྗེས་སུ་མ་མཐོང་། ཐེག་པ་ཆེན་པོ་ལ་འཚལ་བའི་གནས་ཀྱང་ཡང་དག་པར་རྗེས་སུ་མ་མཐོང་ལགས་སོ། བཅོམ་ལྡན་འདས་བདག་གིས་ནི་ལམ་ཞེས་བགྱི་བའི་ཆོས་ཀྱང་ཡང་དག་པར་རྗེས་སུ་མ་མཐོང་། ལམ་འདིའི་དབང་གིས་གཞོལ་བར་གྱུར་པ་དང་། གཞོལ་བར་འགྱུར་བ་དང། གཞོལ་བར་བགྱིད་པ་ཡང་ཡང་དག་པར་རྗེས་སུ་མ་མཐོང། ལམ་གྱིས་བགྲོད་པར་བགྱི་པའི་ཕྱོགས་ཀྱང་ཡང་དག་པར་རྗེས་སུ་མ་མཐོང། ལམ་གྱིས་གནས་ཀྱང་ཡང་དག་པར་རྗེས་སུ་མ་མཐོང་ལགས་སོ། བཅོམ་ལྡན་འདས་བདག་གིས་ནི་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ལ་ཐག་རིང་བ་ཞེས་བགྱི་བ་འམ། ཐག་ཉེ་བར་བགྱི་བ་འམ། འདས་པ་དང། མ་འོངས་པ་དང། ད་ལྟར་བྱུང་བ་ཞེས་བགྱི་བ་ཡང་དག་པར་མི་དམིགས་ཤིང་ཡང་དག་པར་རྗེས་སུ་མ་མཐོང་ལགས་སོ། བདག་དེ་ལྟར་རྣམ་པར་ལྟ་བ་ན་ཆོས་ཅུང་ཟད་ཙམ་ཡང་རྙེད་པར་བགྱི་བ་འམ་མངོན་དུ་བགྱི་བ་ཡང་དག་པར་མ་མཐོང་ལགས་སོ། བདག་ལ་ནི་མངོན་དུ་བགྱི་བ་ཅི་ཡང་མ་མཆིས་ན། བཅོམ་ལྡན་འདས་ཅིའི་སླད་དུ་བདག་ལ་གོ་ཆ་ཆེན་པོ་བགོས་ནས་ཐེག་པ་ཆེན་པོ་ལ་ཞོན་ཏེ་ལམ་ལ་ཡང་དག་པར་གཞོལ་བར་བྱེད་དམ་ཞེས་བཀའ་སྩལ་ལགས། བཅོམ་ལྡན་འདས་ནི་ཐམས་ཅད་མཁྱེན་པ། ཐམས་ཅད་གཟིགས་པ་ལགས་པས་ཇི་ལྟར་བདག་ཅག་ལ་སོགས་པས་ཆོས་ལས་མངོན་བར་བསྒྲུབ་པར་བགྱིད་པ་ནི་དེ་བཞིན་གཤེགས་པ་ཉག་གཅིག་གིས་ཐུགས་སུ་ཆུད་ཀྱི། ཉན་ཐོས་དང་། རང་སངས་རྒྱས་རྣམས་ཀྱི་སྤྱོད་པ་ལ་ནི་མ་ལགས་སོ་ཞེས་གསོལ་ཏོ། བློ་གྲོས་མཐའ་ཡས་དགེ་སློང་དོན་ཐམས་ཅད་གྲུབ་པས་དེ་བཞིན་གཤེགས་པ་དེའི་སྤྱན་སྔར་དེ་སྐད་སྨྲས་པའི་ཚེ་དང་འཁོར་དང་བཅས་པ་ཐམས་ཅད་ཀྱིས་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། ཆོས་ཀྱི་བཟོད་པ་
ཐོབ་པའི་ཕྱིར་ཐམས་ཅད་ཕྱིར་མི་ལྡོག་པ་ཐོབ་པར་གྱུར་ཏོ། དེ་ནས་དེ་བཞིན་གཤེགས་པ་ཙན་དན་སྤོས་ཀྱི་འོད་ཟེར་གྱིས་ཀྱང་ཁྱོད་བསྐལ་བ་གྲངས་མེད་པ་ལྔ་བརྒྱ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་ལུང་བསྟན་ཏོ། དེ་དག་གིས་ལུང་བསྟན་པ་ཐོས་པས་རབ་ཏུ་དགའ་བར་གྱུར་ནས་ནམ་མཁའ་ལ་ཏ་ལ་བདུན་ཙམ་དུ་འཕགས་ཏེ། དེ་བཞིན་གཤེགས་པ་ལ་ཚེགས་སུ་བཅད་དེ་མངོན་བར་སྟོང་པ། །གྲགས་བ་ཆེན་པོ་ཆད་མེད་པས། །རི་རྒྱལ་བཞིན་དུ་མངོན་བར་འཕགས། །བཅོམ་ལྡན་ཐམས་ཅད་མཁྱེན་པ་ཡིས།། ཡོན་ཏན་རྣམས་ནི་སྟོན་པར་མཛད། །སངས་རྒྱས་སྤྱན་ནི་གསལ་གཟིགས་བས། ཉི་མ་བཞིན་དུ་སྣང་བར་མཛད། །གཙོ་བོ་འཁོར་འདུས་བཞུགས་བ་ཡི། །ཞབས་ལ་བདག་ནི་ཕྱག་འཚལ་ལོ། །ཡོན་ཏན་ཚོགས་ནི་ཚད་མེད་ཅིང་། །སངས་རྒྱས་མཁྱེན་པ་ཡོངས་རྫོགས་བས། །བདག་ལ་སོགས་པས་སངས་རྒྱས་ཀྱི། །བླ་མེད་ཡེ་ཤེས་ཐོབ་བར་འགྱུར། །བླ་མེད་སྣང་བ་ཆེན་པོ་ཡིས། །ལྷ་མི་མ་ལུས་གསལ་མཛད་པས། །ཆོས་ཀྱི་གཏེར་ནི་རབ་ཕྱི་ནས། །ཡོན་ཏན་རྒྱ་མཚོ་དཔག་མེད་སྟོན། །མཁྱེན་པ་རྟག་ཏུ་མི་ཉམས་ཤིང། །ཡང་དག་སངས་རྒྱས་ཉོན་མོངས་སྤངས། །ཤེས་རབ་འོད་ལྡན་བརྩོན་འགྲུས་ཆེ། །ཡོན་ཏན་ཟབ་ལ་བདག་ཕྱག་འཚལ། །ཀླུ་ཆེན་བཀོད་པ་ཆེན་པོ་སྟེ། །མཚན་མང་དག་གིས་སྐུ་རབ་བརྒྱན། །བཞུགས་པ་དག་ནི་རི་རབ་འདྲ། །འཁོར་བཞུགས་དཔེ་ཟླ་ཡོང་མ་མཆིས། །འཇིག་རྟེན་འདྲེན་པ་རབ་མཛད་པས། །ལྷ་མིན་འཁོར་ནི་ཟིལ་གྱིས་གནོན། །ཆོས་སྟོན་པ་ལ་བསྙེངས་མི་མངའ། །སྐྱེས་མཆོག་ལ་ནི་བདག་ཕྱག་འཚལ། །བཅོམ་ལྡན་ཐུབ་པ་ཆེན་པོ་ནི། །ཡོན་ཏན་དཔག་མེད་མཚོ་ལགས་པས། །བདག་ཅག་ཆོས་མིག་རྣམ་པར་ཕྱེ། །བདག་ཅག་གོ་ཆ་རབ་ཏུ་བཀོད། །བདག་ཅག་དུས་ནི་ཐམས་ཅད་དུ། །ཐེག་པ་ཆེ་ལ་རབ་འཚལ་ནས། །རྟག་ཏུ་ལམ་མཆོག་འདི་དག་
ལ། །གཞོལ་བགྱིད་གཞན་དུ་མི་མཆིའོ། །ཐུབ་པ་ཆེན་པོ་དཔའ་བོའི་གཙོ། །ཆོས་རྣམས་ཐམས་ཅད་ཐུགས་སུ་ཆུད། །འཇིག་རྟེན་དག་ན་ལྷག་མ་མཆིས། །བདག་ཅག་སྲོག་ཕྱོགས་སྐྱབས་སུ་མཆིའོ། བློ་གྲོས་མཐའ་ཡས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙན་དན་སྤོས་ཀྱི་འོད་ཟེར་ངེས་ཆོས་འདི་བསྟན་པས། སེམས་ཅན་ཚད་མེད་གྲངས་མེད་པ་རྣམས་ཡོངས་སུ་སྨིན་པར་མཛད་དོ། དགེ་སློང་དོན་ཐམས་ཅད་གྲུབ་པ་དེ་ཕྱིན་ཅད་འཁོར་དང་བཅས་ཏེ། སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་སྙེད་ལ་རིམ་གྲོ་དང་། མཆོད་པ་བྱས་པས་བསྐལ་པ་གྲངས་མེད་པ་ལྔ་བརྒྱ་འདས་ནས་བླ་ན་མེད་པ་ཡང་དག་བར་རྫོགས་པའི་བྱང་ཆུབ་མངོན་བར་རྫོགས་པར་སངས་རྒྱས་པར་གྱུར་ཏེ། མཚན་ཡང་དེ་བཞིན་གཤེགས་པ་སྤྱོད་ཡུལ་དཔག་ཏུ་མེད་པ་ལས་ཡང་དག་པར་འདས་པའི་རྒྱལ་པོ་ཞེས་བྱ་བར་གྱུར་ཏོ། སངས་རྒྱས་དེའི་ཞིང་གི་ཡོན་ཏན་དང་། ཆུ་ཞིང་གི་མཚན་ཉིད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙན་དན་སྤོས་ཀྱི་འོད་ཟེར་གྱི་ཞིང་ཁམས་རབ་ཏུ་སྣང་བ་དང་ཐ་དད་པ་མེད་པར་གྱུར་ཏོ། ཉན་ཐོས་རྣམས་ཀྱི་གྲངས་ཀྱང་ཚད་མེད་པར་གྱུར་ཏོ། རྒྱལ་པོའི་བཙུན་མོ་དང་། རྒྱལ་བུ་དང་འཁོར་རྣམས་ཀྱང་བསྐལ་པ་གྲངས་མེད་བ་ལྔ་བརྒྱ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་བར་རྫོགས་པར་སངས་རྒྱས་པར་གྱུར་ཏོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གོ་ཆ་ཆེན་པོ་བགོས་པས་ཐེག་པ་ཆེན་པོ་ལ་ཞོན་ཏེ། ལམ་འདི་ཆོས་ཀྱི་སྒྲོན་མ་ཆེན་པོ་བཟུང་ནས་ཆོས་ཀྱི་སྣང་བ་ཆེན་པོ་བྱེད་པ་དང། ཆོས་ཀྱི་འོད་ཟེར་ཆེན་པོ་འགྱེད་པ་དང་། ཆོས་ཀྱི་རྒྱལ་མཚན་ཆེན་པོ་བསྒྲེང་བ་དང་། ཆོས་ཀྱི་རྔ་ཆེན་པོ་རྡུང་བ་དང་། ཆོས་ཀྱི་གྲུ་ཆེན་པོར་ཞུགས་ནས་ཆོས་ཆེན་པོ་ཡོངས་སུ་བསྡུས་ཏེ། རབ་ཏུ་གཞོལ་བར་བྱེད་པ་དང་། སྐྱེས་བུ་དམ་བའི་རྣམ་པར་རྩེན་བས་རྣམ་པར་རྩེ་བ་དང་། ཆོས་ཀྱི་ཆར་
གྱིས་སེམས་ཅན་རྣམས་ཚིམ་བར་བྱས་ནས་རབ་ཏུ་དགའ་བར་བྱེད་པ་དང་། ནན་ཏན་བརྩོན་འགྲུས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་འདི་ལ་གནས་པའི་ཚེ་ཆོས་ཀྱི་སྣང་བ་ཆེན་པོ་འཐོབ་པར་འགྱུར་ཏེ། སྣང་བ་འཐོབ་པར་འགྱུར་བའི་ཕྱིར་རྟེན་ཅིང་འབྲེལ་པར་འབྱུང་བའི་ཆོས་ཐམས་ཅད་རང་བཞིན་གྱིས་གཟོད་མ་ཉིད་ནས་སྟོང་པ་དང་། རང་བཞིན་གྱིས་མཚན་མ་མེད་པ་དང་། རང་བཞིན་གྱིས་འབྱུང་བ་མེད་བར་མཐོང་བས་གཟུགས་ལ་གཟུགས་ཉིད་དུ་མི་མཐོང་སྟེ། ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ལ་ཡང་དེ་བཞིན་ནོ། རྣམ་བར་ཤེས་པ་ལ་ཡང་རྣམ་པར་ཤེས་པ་ཉིད་དུ་མི་མཐོང་བས་རྣམ་པར་ཤེས་པ་ཐ་དད་བའི་རྐྱེན་ལས་འབྱུང་བ་དང་། རྣམ་པར་ཤེས་པའི་མཚན་ཉིད་རང་བཞིན་གྱིས་གཟོང་མ་ཉིད་ནས་སྟོང་བ་དང་། རང་བཞིན་གྱིས་མཚན་མ་མེད་པ་དང་། རང་བཞིན་གྱིས་འབྱུང་བ་མེད་དེ་རྒྱུ་རྐྱེན་མང་པོར་གཏོགས་པ་ཙམ་ཡིན་པ་རབ་ཏུ་རྟོགས་སོ། རྒྱུ་རྐྱེན་འདུས་པར་མཐོང་བ་ན་རྒྱུ་རྐྱེན་ཉིད་ཀྱང་སྟོང་པ་དང་། མཚན་མ་མེད་པ་དང་། འབྱུང་བ་མེད་པར་རབ་ཏུ་ཤེས་སོ། དེ་ལྟར་མཐོང་བའི་ཚེ་མིག་ལ་མིག་ཉིད་དུ་མི་ལྟ་སྟེ། རྣ་བ་དང་། སྣ་དང་། ལྕེ་དང་། ལུས་དང་། ཡིད་ལ་ཡང་དེ་བཞིན་ནོ། ཡིད་ལ་ཡང་ཡིད་ཉིད་དུ་མི་མཐོང་བས་ཡིད་ཐ་དད་པའི་རྐྱེན་ལས་བྱུང་བ་དག་ཡིད་ཀྱི་མཚན་ཉིད་རང་བཞིན་གྱིས་གཟོད་མ་ཉིད་ནས་སྟོང་པ་དང་། རང་བཞིན་གྱིས་མཚན་མ་མེད་པ་དང་། རང་བཞིན་གྱིས་འབྱུང་བ་མེད་པར་རབ་ཏུ་རྟོགས་སོ། སའི་ཁམས་དང། ཆའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཀྱི་བར་ལ་ཡང་བྱེད་པ་མེད་པ་དང་། མྱོང་བ་མེད་པར་རབ་ཏུ་ཤེས་སོ། ཆོས་ཅུང་ཟད་ཙམ་ལ་ཡང་
ཆོས་ཅུང་ཟད་ཙམ་དུ་མི་མཐོང་སྟེ། ཐ་དད་བའི་རྐྱེན་ལས་བྱུང་ཞིང་རྒྱུ་དང་རྐྱེན་མང་པོར་གཏོགས་པས་རང་བཞིན་གྱིས་མཚན་མ་མེད་པ་དང་། རང་བཞིན་གྱིས་འབྱུང་བ་མེད་པ་ཞེས་བྱའོ། རྟེན་ཅིང་འབྲེལ་བར་འབྱུང་བ་ཉིད་ཀྱང་སྟོང་པ་དང། མཚན་མ་མེད་པ་དང་། འབྱུང་བ་མེད་པར་རབ་ཏུ་ཤེས་སོ། བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལམ་དེ་ལ་གནས་པའི་ཚེ་རྟེན་ཅིང་འབྲེལ་བར་འབྱུང་བ་ལ་སོ་སོར་རྟོག་པར་བྱེད་པ་ཡིན་ཏེ། དེ་ལྟར་བརྟགས་པས་ཤེས་རབ་ཀྱིས་རྟེན་ཅིང་འབྲེལ་བར་འབྱུང་བའི་དེ་ཁོ་ན་ཉིད་ཀྱི་མཐའ་མངོན་སུམ་དུ་རྟོགས་པར་འགྱུར་ཏེ། ཆོས་ཀྱི་སྣང་བ་དེ་དག་ཐམས་ཅད་ཀྱི་དབང་གིས་དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང། བྱམས་པ་ཆེན་པོ་དང་། སྙིང་རྗེ་ཆེན་པོ་དང། དགའ་ཆེན་པོ་དང་། བཏང་སྙོམས་ཆེན་པོ་ནས་སངས་རྒྱས་ཀྱི་ཆོས་ཇི་སྙེད་པ་ཐམས་ཅད་ཀྱི་བར་རྣམས་ཀྱང་མྱུར་དུ་ཡོངས་སུ་རྫོགས་པར་བྱེད་དོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་ཆུབ་སེམས་དཔའ་འཇིགས་མེད་པས། །དེ་ལྟར་གནས་པ་མེད་པས་ན། །ཆོས་ཀྱི་སྣང་ཆེན་རབ་བྱས་ནས། །ཤེས་པ་དམ་པས་གཞོལ་བར་བྱེད། །ཆོས་ཆེན་རྒྱལ་མཚན་འཛུགས་བྱེད་པས། །རྒྱལ་མཚན་འདི་ནི་བླ་ན་མེད། །སངས་རྒྱས་ཆོས་ནི་ཐམས་ཅད་ལ། །ཡང་དག་དྲན་པས་གཞོལ་བར་བྱེད། །ཤེས་རབ་ལེགས་པར་རྣམ་པར་རྩེན། །ཆོས་ཀྱིས་སེམས་ཅན་སྦྱིན་བ་གཏོང་། །ཆོས་ཆེན་ཆར་ནི་རབ་འབེབས་ཤིང་། །འཇིགས་པ་མེད་པས་གཞོལ་བར་བྱེད། །དེ་ལྟར་བྱང་ཆུབ་སེམས་དཔའ་རྣམས། །ཆོས་ཀྱི་སྣང་ཆེན་ཐོབ་པས་ན། །ཡང་དག་པ་ཡི་ཆོས་དག་ལ། །དཔའ་བོས་ལེགས་པར་གནས་པར་བྱེད། །ཆོས་ཀྱི་སྣང་བ་དེ་དབང་གིས། །ཆོས་རྣམས་ཐམས་ཅད་རྟོགས་པར་བྱེད། །རྐྱེན་ནི་མང་ལས་བྱུང་བའི་ཕྱིར། །ཐམས་ཅད་བརྟན་བདེན་གང་
ཡང་མེད། །ཆོས་རྣམས་རང་བཞིན་ཉིད་ཀྱིས་སྟོང། །རང་བཞིན་ཉིད་ཀྱིས་མཚན་མ་མེད། །རང་བཞིན་ཉིད་ཀྱིས་སྐྱེ་བ་མེད། །རང་བཞིན་ཉིད་ཀྱིས་ངོ་བོ་མེད། །ཆོས་རྣམས་རྐྱེན་ནི་མང་པོ་དག། །ལྷན་ཅིག་འདུས་ལས་བྱུང་བ་ཡིན། །རྐྱེན་ནི་མང་པོ་འདུས་པའི་ཕྱིར། །རང་བཞིན་གྱིས་ནི་མེད་པ་ཡིན། །བྱང་ཆུབ་སེམས་དཔའི་རྐྱེན་རྣམས་ལ། །སོ་སོར་རྟོག་བས་སྟོང་པར་རིག། །རྐྱེན་རྣམས་རང་བཞིན་གྱིས་སྟོང་བས། །རང་བཞིན་གྱིས་ནི་མཚན་མ་མེད། །སྐྱེ་བ་དག་ནི་ཡོད་མ་ཡིན། །བྱ་བ་དག་ཀྱང་ཡོད་པ་མིན། །དེ་ལྟར་སོ་སོར་གང་རྟོགས་པ། །ཆོས་ལ་ནན་ཏན་སྒྲུབ་བར་བྱེད། །རྟེན་འབྲེལ་ངོ་བོ་ཉེད་མེད་ཕྱིར། །རྐྱེན་རྣམས་ཀྱང་ནི་རྐྱེན་མ་ཡིན། །དེ་ལྟར་ཚུལ་བཞིན་གང་རྟོག་པ། །ཆོས་རྣམས་ཐམས་ཅད་ཤེས་པར་འགྱུར། །གཟུགས་དང་ཚོར་བ་འདུ་ཤེས་དང་། འདུ་བྱེད་རྣམ་ཤེས་དེ་བཞིན་རྟོག། །རྒྱུ་དང་རྐྱེན་ནི་མང་པོ་ལས། །ཕུང་པོ་རྣམས་ནི་བྱུང་བ་ཡིན། །ཕུང་པོ་ཡང་དག་མེད་པ་ན། །རང་བཞིན་ངོ་བོ་ཉིད་ཀྱིས་སྟོང་། །ངོ་བོ་སྟོང་ཕྱིར་མཚན་མ་མེད། །ཐམས་ཅད་སྐྱེ་བ་གང་ཡང་མེད། ཕུང་པོ་རྣམས་ནི་མཚན་མ་སྤངས། །མཚན་མ་སྤངས་པས་སྐྱེ་བ་མེད། །སྐྱེ་བ་མེད་པས་འགག་པ་མེད། ཕུང་པོ་མཚན་ཉིད་དེ་འདྲའོ། །མཚན་མེད་མི་བདེན་མཚན་མར་མཐོང། །མཚན་མ་དེ་ནི་གང་ལས་ཡོད། །ཆོས་རྣམས་ངོ་བོ་ཉིད་མེད་ཕྱིར། །ཕུང་པོ་འདི་ཡང་རང་བཞིན་མེད། དེ་བཞིན་ཁམས་དང་སྐྱེ་མཆེད་ཀྱང་། །ཐམས་ཅད་རྐྱེན་ལས་བྱུང་བས་ན། །རང་བཞིན་ངོ་བོ་ཉིད་ཀྱིས་སྟོང་། །མཚན་མ་མེད་ཅིང་ངོ་བོ་མེད། །ཆོས་རྣམས་དག་ནི་ཐམས་ཅད་ལ། །ཆོས་ཀྱི་ངོ་བོ་མི་དམིགས་པར། །ཆོས་རྣམས་ཐམས་ཅད་གང་ཤེས་པ། །དེ་ནི་དོན་སེམས་པ་ཞེས་བྱ། །འདོད་དང་གཟུགས་དང་གཟུགས་མེད་ཁམས། །ཐམས་ཅད་རྐྱེན་ལས་བྱུང་བས་ན། །རང་བཞིན་ངོ་བོ་ཉིད་ཀྱིས་སྟོང་། །མཚན་མ་མེད་ཅིང་ངོ་བོ་མེད། །འདི་ལ་རྟོག་པའི་ཡེ་ཤེས་དེ། །ཇི་
ལྟར་ཡུལ་དེ་ཤེས་པར་འགྱུར། །ཡེ་ཤེས་འདི་དང་ཡུལ་དེ་དག། །རང་བཞིན་རྟག་ཏུ་སྤངས་པས་ན། །སྐྱེ་བ་དང་ནི་རྐྱེན་མང་པོ། །འདི་གཉིས་ལ་ཡང་བྱེད་པ་མེད། ཁྱེད་མེད་དེ་ལྟར་གང་ཤེས་པ། །དེ་ནི་ཡང་དག་མཚན་ཉིད་ཡིན། །མཚན་ཉིད་མེད་ཀྱང་མཚན་ཉིད་བཤད། །བྱང་ཆུབ་སེམས་དཔའ་དེས་ཞུགས་ཀྱང་། །མཚན་ཉིད་མཚན་ཉིད་མེད་པར་ཡང་། །རྣམ་བར་རྟོག་པར་མི་བྱེད་དོ། །དེ་ལྟར་རབ་ཏུ་གང་ཤེས་པ། །ཡང་དག་མཚན་ཉིད་མཐོང་བས་ན། །ཆོས་རྣམས་ཀྱི་ནི་དབྱིངས་དག་ལ། །ཆོས་ཀྱི་འདུ་ཤེས་ཅུང་ཟད་མེད། །ཆོས་རྣམས་དང་ནི་ཆོས་ཀྱི་དབྱིངས། །འདི་གཉིས་ལ་ཡང་མཚན་མ་མེད། །ཆོས་རྣམས་མཚན་མ་སྤངས་པས་ནི། །ཆོས་ཀྱི་དབྱིངས་ཤེས་བཤད་པ་ཡིན། །ཆོས་ཀྱི་དབྱིངས་ཤེས་གང་བཤད་པ། །དབྱིངས་མེད་དབྱིངས་མེད་པ་ཡང་མིན། །ཆོས་ཀྱི་དབྱིངས་ཤེས་རབ་བསྟན་ཀྱང། །ཡང་དག་པར་ནི་དམིགས་སུ་མེད། །དོན་འདི་རབ་ཏུ་སེམས་པའི་ཚེ། །དམིགས་སུ་མེད་པར་མི་སེམས་ཤིང་། རྣམ་རྟོག་རྣམས་ནི་སྤངས་བའི་ཕྱིར། །ཆོས་ཀྱི་སྣང་ཆེན་ཐོབ་པར་འགྱུར། །ཆོས་རྣམས་རང་བཞིན་མེད་པའི་ཕྱིར། །སྣང་བ་ལ་ཡང་རང་བཞིན་མེད། །དེ་ལྟར་སོ་སོར་རྟོག་པའི་ཕྱིར། །ཆོས་ཀྱི་སྣང་བ་ཐོབ་པོ་ཡིན། །རྟོག་མེད་ཡེ་ཤེས་མི་མཐོང་ཞིང། ལྟ་བ་འདི་ཡང་མི་མཐོང་བ། །ཆོས་རྣམས་མི་བདེན་མཐོང་བའི་ཕྱིར། །འདི་ལ་རྟོག་པར་བྱེད་ཅེས་བསྟན། །ཆོས་ཀྱི་སྣང་བ་བསམ་མི་ཁྱབ། །མཐའ་མེད་ཅིང་མི་ཚད་ཀྱང་མེད། །ཆོས་རྣམས་སྟོང་པར་མཐོང་བས་ན། །རྣམ་པར་མི་རྟོག་པ་ཞེས་བཤད། །ཆོས་རྣམས་དང་ནི་མཚན་ཉིད་རྣམས། རྟག་ཏུ་ཐོབ་དང་འཇུག་མེད་པའི། །རྣམ་དག་ཆོས་སྒྲ་འདི་ཐོས་ནས། །དགའ་བ་ཆེན་པོ་རབ་ཏུ་བསྐྱེད། །གལ་ཏེ་ཆོས་ནི་སྐྱེ་མེད་དང་། །རྟག་ཏུ་རྣམ་རྟོག་མེད་པ་ཡི། །རྣམ་དག་ཆོས་སྒྲ་འདི་ཐོས་ནས། །རབ་དབེན་བདེ་བ་ཐོབ་པར་འགྱུར། །གལ་ཏེ་མ་འོངས་དུས་ཀྱི་ཚེ། །བླ་མེད་ཆོས་ནི་ཐོས་གྱུར་ན། །སེམས་ཅན་དེ་དག་ཡུན་རིང་ནས། །ཡོན་བསགས་པ་ཡང་བཤད་པར་བྱ། །གལ་ཏེ་མ་འོངས་དུས་ཀྱི་ཚེ། །བླ་མེད་ཆོས་འདི་ཐོས་གྱུར་ན། །དེ་ནས་ཡང་དག་ཆོས་འདི་ལ། །མྱུར་བར་ཁོ་ནར་གཞོལ་བར་འགྱུར། །བམ་པོ་ལྔ་པ།
གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དེ་ལྟར་ཆོས་ཐམས་ཅད་ལ་སོ་སོར་རྟག་ཏུ་རྟོག་པར་བྱེད་པའི་ཚེ་ཆོས་རྣམས་ལ་ཆོས་ཀྱི་སྣང་བ་ཐོབ་པས་སྟོང་པ་ཉིད་ལ་སྟོང་པ་ཉིད་དུ་མི་བལྟའོ། །སྟོང་པ་ཉིད་ལས་ལོགས་ཤིག་ན་ཡང་སྟོང་པ་ཉིད་དུ་མི་བལྟའོ། ཆོས་འགའ་ཙམ་ཡང་སྟོང་པ་ཉིད་དང་མཚུངས་པར་ལྡན་པ་འམ། མཚུངས་པར་མི་ལྡན་པར་ཡང་དག་པར་རྗེས་སུ་མི་བལྟའོ། སྟོང་པ་ཉིད་ཀྱིས་སྟོང་པ་ཉིད་སྟོང་པ་འམ་མི་སྟོང་པར་ཡང་ཡང་དག་པར་རྗེས་སུ་མི་བལྟའོ། ལྟ་བ་ཉིད་ཆོས་ཐམས་ཅད་ལ་ལྟ་བར་ཡང་མི་བྱེད་དོ། དེ་ལྟར་ལྟ་བའི་ཚེ་མཚན་མ་མེད་པ་ལ་མཚན་མ་མེད་པར་ཡང་དག་པར་རྗེས་སུ་མི་བལྟའོ། མཚན་མ་མེད་པ་ལས་ལོགས་ཤིག་ན་ཡང་མཚན་མ་མེད་པར་ཡང་དག་པར་རྗེས་སུ་མི་བལྟའོ། ཆོས་འགའ་ཙམ་ཡང་མཚན་མ་མེད་པ་དང་མཚུངས་པར་ལྡན་པ་འམ་མཚུངས་པར་མི་ལྡན་པར་ཡང་དག་པར་རྗེས་སུ་མི་བལྟའོ། མཚན་མ་མེད་པས་མཚན་མ་མེད་པར་ཡང་དག་པར་རྗེས་སུ་མི་བལྟའོ། མཚན་མ་དང་བཅས་པས་མཚན་མ་དང་བཅས་པའི་ལྟ་བ་དང་། མཚན་མ་མེད་པའི་ལྟ་བ་དང་། མཚན་མ་མེད་པ་མ་ཡིན་པ་ཡང་མ་ཡིན་པའི་ལྟ་བར་ཡང་དག་པར་རྗེས་སུ་ལྟ་བར་མི་བྱེད་དེ། སྐྱེ་བ་མེད་པ་དང་། བྱེད་པ་མེད་པ་ལ་ཡང་དེ་བཞིན་ནོ། ཟད་པ་ལ་ཡང་ཟད་པར་ཡང་དག་པར་རྗེས་སུ་མི་བལྟའོ། ཟད་པ་ལས་ལོགས་ཤིག་ན་ཡང་ཟད་པར་ཡང་དག་པར་རྗེས་སུ་མི་བལྟའོ། ཆོས་འགའ་ཙམ་ཡང་ཟད་པ་དང་མཚུངས་པར་ལྡན་པ་འམ་མཚུངས་པར་མི་ལྡན་པར་ཡང་ཡང་དག་པར་རྗེས་སུ་མི་བལྟའོ། ཟད་པས་ཟད་པར་ཡང་དག་པར་རྗེས་སུ་མི་བལྟའོ། ཟད་པ་ལ་ཟད་པ་མེད་པར་ཡང་ཡང་དག་པར་རྗེས་སུ་མི་བལྟའོ། ཟད་པ་ཡང་མ་ཡིན། ཟད་པ་མེད་པ་ཡང་མ་ཡིན་པར་ཡང་དག་པར་རྗེས་སུ་མི་བལྟའོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་ལྟ་བའི་ཚེ་ཆོས་ཅུང་ཟད་ཙམ་ཡང་བལྟར་ཡོད་པ་འམ། བལྟར་མེད་པ་འམ། བསྟན་དུ་ཡོད་པ་འམ། བསྟན་དུ་མེད་པ་འམ། འཇུག་ཏུ་རུང་བ་འམ། འཇུག་ཏུ་མི་རུང་བ་འམ། རྟོགས་པར་བྱར་རུང་བ་འམ། རྟོགས་པར་བྱར་མི་རུང་བ་ཞེས་བྱ་བ་གང་ཡང་མི་དམིགས་ཏེ། བློ་གྲོས་མཐའ་ཡས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ཀྱི་ལམ་འདི་ལ་གནས་པའི་ཆོས་ཀྱི་སྣང་བ་ཆེན་པོ་ཞེས་བྱའོ། ཆོས་ཀྱི་སྣང་བ་ཐོབ་པའི་ཕྱིར་ཆོས་ཐམས་ཅད་ལ་མཐའ་ཅི་ཡང་མེད་པར་མཐོང་ཞིང་མཐའ་དང་དབུས་ལ་ཡང་མངོན་པར་ཞེན་པར་མི་བྱེད་དོ། མངོན་པར་ཞེན་པ་མེད་པའི་ཕྱིར་སངས་རྒྱས་ཀྱི་ཆོས་ལ་ཡང་རབ་ཏུ་གཞོལ་བར་འགྱུར་རོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།། །སྟོང་པ་ཉིད་ལ་སྟོང་མི་ལྟ། །སྟོང་ལས་གུད་ན་སྟོང་མི་ལྟ། །དེ་ལྟ་བུར་ནི་གང་ལྟ་བ། །སྟོང་པ་མཐོང་བ་ཞེས་བྱའོ། །ཆོས་འགའ་ལ་ཡང་མི་གནས་ཤིང་། །ཆོས་འགའ་ཙམ་ཡང་སྟོང་དེ་དང་། །མཚུངས་པར་ལྡན་དང་མཚུངས་མི་ལྡན། །གང་ཡང་དམིགས་པར་མི་བྱེད་དོ། །སྟོང་པ་ཉིད་ནི་རང་བཞིན་སྟོང། །སྟོང་པ་ཉིད་ལ་འཛིན་མི་བྱེད། །ཡོངས་སུ་འཛིན་པ་མེད་པའི་ཕྱིར། །ཆོས་རྣམས་ཐམས་ཅད་ཤེས་པར་འགྱུར། །ལྟ་བ་དག་ལ་ལེན་མེད་ཅིང་། །སོ་སོར་རྟོག་ལ་འཛིན་མི་བྱེད། །ལྟ་དང་རྟོག་པ་རབ་ཤེས་པས། །དེ་གཉིས་ལེན་པར་མི་བྱེད་དོ། །ལྟ་བ་དག་ནི་རྣམ་དག་ཅིང་། །རྟོག་པ་དག་ནི་མི་དམིགས་པར། །དེ་ལྟར་ཆོས་རྣམས་གང་རྟོག་པ། །མཐར་ནི་གང་ཡང་འཛིན་མི་བྱེད། །མཚན་མ་མེད་པར་མི་ལྟ་ཞེང། མཚན་མ་མེད་པར་རྟོག་མི་བྱེད། །མཚན་མ་མེད་པ་དག་ལ་ཡང་། །མཚན་མ་མེད་པར་སྒོམ་མི་བྱེད། །མཚན་མ་མེད་ཅིང་བསྟན་དུ་མེད། །སྨོན་པ་མེད་ཅིག་མི་དམིགས་པས། །ཆོས་ཀྱི་ངོ་བོ་འགའ་ཙམ་ཡང་། །བསྒོམ་པར་བྱ་བ་ཅི་ཡང་མེད། །མཚན་མ་མེད་པ་མི་སེམས་ཤིང་། །སྨོན་པ་མེད་པའང་སེམས་མི་བྱེད། །དེ་ལྟར་རྣམ་པར་མི་རྟོག་པས། །མཚན་དང་མཚན་མེད་རབ་རྟོགས་འགྱུར། །མཚན་མ་མེད་ལ་མི་གཞོལ་ཞིང་། །མཚན་མ་མེད་ལ་འཇུག་མི་བྱེད། །གཞོལ་དང་འཇུག་པ་མེད་པས་ན། །རབ་རྟོགས་མཉམ་ཉིད་གནས་པར་འགྱུར། །བློ་ལྡན་མཚན་མ་མི་མཐོང་ཞིང་། །མཚན་མ་མེད་པའང་མཐོང་མི་འགྱུར། །གང་ཞིག་མི་མཐོང་མི་སེམས་པ། །ཐམས་ཅད་མེད་པར་རབ་ཏུ་རྟོགས། །གང་ཞིག་རྟག་ཏུ་འདི་སྙམ་དུ། བསམ་མེད་བརྟན་མེད་གང་སེམས་པ། །བསམ་དང་བརྟན་པ་དག་ལ་ནི། །མཉམ་དང་མཉམ་པར་རབ་ཏུ་གནས། །མཚན་མ་མེད་པ་ཇི་ལྟ་བ། །བྱས་པ་མེད་པའང་དེ་བཞིན་ཏེ། །རབ་ཏུ་བསྟན་ཀྱང་བསྟན་དུ་མེད། བསམས་ནས་རབ་ཏུ་རྟོགས་ཕྱིར་རོ། །སྐྱེ་བ་མེད་
པའང་དེ་བཞིན་དུ། །ཆོས་འགའ་ཙམ་ཡང་སྐྱེ་བ་མེད། །རང་བཞིན་ཅི་ཡང་མེད་པས་ན། །ངོ་བོ་མེད་པར་རབ་ཏུ་རྟོགས། །སྐྱེ་བ་དང་ནི་སྐྱེ་བ་མེད། བྱེད་བཅས་བྱེད་པ་མེད་པ་ཡང་། །གཟུང་བར་བྱ་བ་ཅུང་ཟད་མེད། །བློ་ལྡན་རྣམ་པར་རྟོག་མི་བྱེད། །དྲན་དང་ཤེས་རབ་གཡོ་བ་མེད། །རྣམ་འབྱེད་མེད་པར་རབ་རྟོགས་པས། །ངོ་བོ་ཡོད་དང་ངོ་བོ་མེད། །མཉམ་པ་ངོ་བོ་རྣམས་དང་བྲལ། །ཟད་པ་ལ་ཡང་ཟད་མི་ལྟ། །ཟད་པ་མེད་པར་ཡང་མི་ལྟ། །ལྟ་བ་མེད་པར་རབ་རྟོགས་པས། །ཟད་པའི་ཡེ་ཤེས་གོང་ན་མེད། །ཟད་པ་དང་ནི་མ་ཟད་པ། །གཉིས་ག་ལ་ཡང་རྟོག་མི་བྱེད། །རྣམ་པར་རྟོག་པ་མེད་པའི་ཕྱིར། །བསམ་མེད་མཉམ་པར་རབ་ཏུ་གནས། །ཟད་པ་ལ་ཡང་ཟད་ལྟ་མེད། །ཟད་མེད་ལྟ་བའང་ཡོད་མ་ཡིན། །དེ་ལྟར་ལྟ་བ་ཟད་པའི་ཕྱིར། །ཟད་དང་མ་ཟད་འཛིན་མི་བྱེད། །བསམ་མེད་མཉམ་པར་རབ་ཏུ་གནས། །ཟད་པ་ལ་ཡང་ཟད་ལྟ་མེད། །ཟད་མེད་ལྟ་བའང་ཡོད་མ་ཡིན། །དེ་ལྟར་ལྟ་བ་ཟད་པའི་ཕྱིར། །ཟད་དང་མ་ཟད་འཛིན་མི་བྱེད། །གལ་ཏེ་ཟད་དང་མ་ཟད་ལ། །ཐམས་ཅད་འཛིན་པར་མི་བྱེད་ན། །ཡོངས་སུ་འཛིན་པ་མེད་པའི་ཕྱིར། །ཟད་པའི་ཡེ་ཤེས་གསལ་རྟོགས་འགྱུར། །ཟད་པའི་ཡེ་ཤེས་སྤྱོད་ཡུལ་ནི། །འཇིགས་པ་མེད་པས་འཐོབ་པར་འགྱུར། །ཆོས་འདི་རབ་ཏུ་རྟོགས་པའི་ཕྱིར། །བྱང་ཆུབ་སེམས་དཔའ་བདེ་བར་གནས། །དེ་ནས་འཁོར་འདུས་པ་དེར་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ཞེས་བྱ་བ་འདུས་པར་གྱུར་པ་སྟན་ལས་ལངས་ནས། བློ་གྲོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། བྱང་ཆུབ་སེམས་དཔའ་ཆེན་པོ་རྣམས་ཀྱི་ཆོས་རྣམས་ཀྱི་ཡེ་ཤེས་ཡོངས་སུ་བསྡུ་བར་འཚལ་བའི་སླད་དུ་བསྒྲུབ་པ་བསྐྱེད་པས་ཆོས་ཀྱི་སྣང་བ་ཆེན་པོ་དེ་ཐོབ་པར་འགྱུར་པ་ལགས་ཀྱིས་ཀྱང་ཆོས་ཀྱི་སྣང་བ་དེ་ལ་ལྟ་ཅུང་ཟད་པ་མ་མཆིས་ཏེ། ཆོས་ཀྱི་སྣང་བའི་དབང་གིས་འདུས་བྱས་དང་འདུས་མ་བྱས་དང་། འཇིག་རྟེན་པ་དང། འཇིག་རྟེན་ལས་འདས་པ་དང་། རྗེས་སུ་འཐུན་པ་དང། རྗེས་སུ་མི་མཐུན་བ་དང། སྤྲོས་པ་དད་བཅས་པ་དང། སྤྲོས་པ་མ་མཆིས་པའི་ཆོས་ཐམས་ཅད་རྟོགས་པར་གྱུར་པ་ལགས་ན་བཅོམ་ལྡན་འདས་ཆོས་ཀྱི་སྣང་བ་དེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསྒྲུབ་པ་མ་མཆིས་པར་མཐོང་བར་འགྱུར་བ་ལྟ་མཆིས་
ལགས་སམ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ལ་འདི་སྐད་ཅེས་བཀའ་སྩལ་ཏོ། བློ་གྲོས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་བསྒྲུབ་པ་ཅུང་ཟད་ཀྱང་མེད། ཁྱད་པར་དུ་བསྒྲུབ་པ་ཡང་མེད། བསྒྲུབ་པའི་རྗེས་སུ་འབྲང་བ་ཡང་མེད། ཀུན་ཏུ་ཁྱབ་པར་བསྒྲུབ་པ་ཡང་མེད་པར་ཆོས་ཀྱི་སྣང་བ་ཆེན་པོ་དཔག་ཏུ་མེད་པ་ཐོབ་པར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཉིད་ཀྱང་དམིགས་སུ་མེད་ཅིང་མཐོང་བར་མི་འགྱུར་ན་བྱང་ཆུབ་སེམས་དཔའི་སྤྱོད་པ་མི་དམིགས་ཤིག་མ་ཐོག་བར་མི་འགྱུར་བ་ལྟ་སྨོས་ཀྱང་ཅི་དགོས་ཏེ། དེའི་ཕྱིར་བསྐལ་པ་དུ་མར་མངོན་བར་བསྒྲུབ་པས་ཆོས་ཀྱི་སྣང་བ་ཆེན་པོ་དཔག་ཏུ་མེད་པ་འཐོབ་པར་འགྱུར་བར་ལྟ་བར་བྱེད་དོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྤྱོད་པ་ཐམས་ཅད་ཉེ་བར་ཞི་ཞིང་སྤྱོད་པ་རྣམ་པར་དག་པར་གྱུར་པས་ན་ཆོས་ཀྱི་སྣང་བའི་ཐོབ་པ་ཡིན་ནོ། ཆོས་ཀྱི་སྣང་བའི་སྤྱོད་པ་ནི་གྲངས་ཀྱི་ཚད་དང་ལྡན་བའི་སྤྱོད་པ་ཡང་མ་ཡིན། མཚན་མའི་རྗེས་སུ་འབྲང་བའི་སྤྱོད་པ་ཡང་མ་ཡིན་ན་གང་ལས་སྤྱོད་པ་ཐམས་ཅད་ཅེས་ཉེ་བར་འདོགས། མངོན་བར་བསྒྲུབ་པ་ཞེས་བྱ་བ་ནི་ཉེ་བར་འདོད་པའི་སྤྱོད་པ་ཡང་མ་ཡིན་ལ། དེ་དང་བྲལ་བ་ཡང་མ་ཡིན་ནོ། བློ་གྲོས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྤྱོད་པ་འདི་གནས་པའི་ཚེ་སྤྱོད་པ་ཐམས་ཅད་སྤོང་བར་བྱེད་བས་ཡོངས་སུ་འཛིན་པར་མི་བྱེད་དོ། སྤྱོད་པ་འདི་དང་ལྡན་པ་ནི་གྲངས་ཀྱི་ཚད་དང་ལྡན་བའི་སྤྱོད་པ་ཡང་མ་ཡིན། མཚན་བའི་རྗེས་སུ་འབྲང་བའི་སྤྱོད་པ་ཡང་མ་ཡིན་པས་མཚན་མ་མེད་པ་སྤྱོད་པ་མེད་པས་ཆོས་ཀྱི་སྣང་བ་ཆེན་པོ་འདི་ཐོབ་པར་འགྱུར་རོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་ཆུབ་སེམས་དཔའ་སྤྱོད་མེད་ལ། །སྤྱོད་པ་དག་ནི་ཅི་ཡང་མེད། །སྤྱོད་པ་མེད་པ་གང་ཐོབ་པ། །འཇིགས་པ་མེད་པས་གཞོལ་བར་བྱེད། །ཁྱད་པར་སྒྲུབ་པ་ཡོད་མ་ཡིན། །ཀུན་ཏུ་སྒྲུབ་པ་ཅི་ཡང་མེད། །སྤྱོད་མེད་ཁྱད་པར་སྒྲུབ་མེད་པས། མཉམ་པ་ཉིད་དུ་གཞོལ་བར་བྱེད། །སྤྱོད་པ་འདི་ནི་བསྟན་དུ་མེད། །མཚན་མ་རྣམས་ཀྱང་ཡོད་མ་ཡིན། །སྤྱོད་དང་མཚན་མ་མེད་གྱུར་པ། །འདི་
ནི་སྤྱོད་པའི་མཚན་ཉིད་ཡིན། །བྱང་ཆུབ་སེམས་དཔའ་མཚན་མེད་སྤྱོད། །དངོས་པོ་རྣམས་ལ་ཡོངས་མི་གནས། །སྤྱོད་མེད་གནས་བ་མེད་པས་ན། བློ་ལྡན་མངོན་བར་སྒྲུབ་པར་བྱེད། །སྤོད་པ་མེད་པས་གཡོ་པ་མེད། །སྤྱོད་པ་འདི་ནི་བླ་ན་མེད། །གཡོ་མེད་སྤྱོད་ལ་གང་སྤྱོད་པ། །འབད་པས་རབ་ཏུ་གཞོལ་བར་བྱེད། །བྱང་ཆུབ་སེམས་དཔའ་དམིགས་སུ་མེད། །སྤྱོད་པ་དག་ནི་བལྟར་མི་མཐོང་། གཟུགས་ཀྱི་ལུས་ཀྱང་མི་མཐོང་བ། །འདི་ནི་ལེགས་པར་རྗེས་འབྲང་ཡིན། །གཟུགས་མེད་ཁ་དོག་མཚན་མ་མེད། །དེ་ཕྱིར་སྤྱོད་པ་ཐམས་ཅད་མེད། །ལྟ་བ་དག་ལ་འཛིན་པ་མེད། འདི་ནི་སྤྱོད་པ་དཔེ་མེད་ཡིན། །བྱང་ཆུབ་སེམས་དཔའ་བླ་མེད་སྤྱོད། །གདགས་པ་དག་ཏུ་མི་ལྟུང་ཞིང། །རྣམ་པར་འགྱུར་བའང་མེད་པས་ན། །དེ་ན་འཛིན་པ་ཅི་ཡང་མེད། །སྤྱོད་ལ་གདགས་པ་མེད་པའི་ཕྱིར། །བླ་མེད་སྤྱོད་པ་ཞེས་བྱའོ། །གལ་ཏེ་སྤྱོད་པ་འདི་ཐོབ་ན། །ཆོས་ཀྱི་སྣང་ཆེན་འཐོབ་པར་འགྱུར། །བྱང་ཆུབ་སེམས་དཔའ་སྤྱོད་གྲུབ་པ། །ཚིག་མེད་བསྐལ་པའི་ཚད་ཀྱང་མེད། །བསྐལ་པ་ཚད་མེད་སྙེད་དུ་ཡང། །སྤྱོད་པ་རྣམས་ནི་སྟོན་པར་བྱེད། །བྱང་ཆུབ་སེམས་དཔའི་སྤྱོད་གཙང་བས། །རྣམ་པར་དག་ལ་རབ་ཏུ་གནས། །སྤྱོད་པ་ཐམས་ཅད་སྤངས་པས་ན། གཟུང་བར་བྱ་བ་ཅི་ཡང་མེད། །བྱང་ཆུབ་སེམས་དཔའ་བཏང་སྙོམས་གནས། །སྤྱོད་པ་རྣམས་ནི་སྲུང་བར་བྱེད། །སྤྱོད་པ་ཐམས་ཅད་སྤངས་པས་ན། །བཏང་སྙོམས་ལ་ནི་རབ་ཏུ་གནས། །བྱང་ཆུབ་སེམས་དཔའི་སྤྱོད་དཔག་མེད། །མཐའ་དང་མཐའ་མེད་རབ་ཏུ་སྤངས། །སྤྱོད་པ་དེ་ལ་གཡོ་མེད་པས། །སྤྱོད་པ་བླ་ན་མེད་ཅེས་བྱ། །བྱང་ཆུབ་སེམས་དཔའི་མཚན་མེད་སྤྱོད། །སྤྱོད་པོ་འདི་ནི་བླ་ན་མེད། །སྤྱོད་པ་འདི་ནི་སྤྱོད་པ་ན། །བདུད་གྱི་སྤྱོད་ཡུལ་ཡང་དག་འདས། །བྱང་ཆུབ་སེམས་དཔའི་མཚན་མེད་སྤྱོད། །མཚན་མ་མེད་པ་གསལ་རྟོགས་པས། །མཚན་མ་དང་ནི་མཚན་མ་མེད། །ཐམས་ཅད་ལ་ནི་རྟེན་མི་བྱེད། བྱང་ཆུབ་སེམས་དཔའ་ཤེས་འདི་གནས། སྤྱོད་པ་འདི་ནི་ལེགས་པར་གྲུབ། །སྤྱོད་པ་ཅུང་ཟད་མེད་པས་ན། །སྤྱོད་པ་མེད་པ་ཞེས་བརྗོད་དོ། །བྱང་ཆུབ་སེམས་དཔའ་རྣམ་དག་པ། །སྤྱོད་པ་དག་ལ་འཇིགས་པ་མེད། །ཡང་དག་
དྲན་པས་གཞོལ་བྱེད་པས། །འདི་ནི་ལེགས་པར་གནས་པ་ཡིན། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པས་འདི་སྐད་ཅེས་གསོལ་ཏོ། བཅོམ་ལྡན་འདས་སྐྱེས་བུ་དམ་པ་རྣམས་སྤྱོད་པ་རྣམ་པ་དུ་མ་མངོན་པར་བསྒྲུབ་པར་བགྱིད་པ་གང་ལགས་པ་འདི་ཤིན་དུ་ཟབ་པས་བྱིས་པ་སོ་སོའི་སྐྱེ་བོ་མཚན་མ་དང་བཅས་ཤིང་མངོན་བར་འདུ་བགྱི་བ་དང་བཅས་པའི་མངོན་པར་བསྒྲུབ་པ་དག་གིས་ཅུང་ཟད་ཙམ་ཡང་སྤྱོད་པར་མི་འགྱུར་བ་ནི་ངོ་མཚར་ཆེ་ལགས་སོ། བཅོམ་ལྡན་འདས་ཆོས་འགའ་ཙམ་ཡང་སྤྱོད་པ་འདིའི་ནང་དུ་འཇུག་པར་འགྱུར་བ་གང་ཡང་མ་མཆིས་པས་དེའི་སླད་དུ་སྤྱོད་པ་འདི་ནི་སྐྱེས་བུ་དམ་པ་རྣམས་ཀྱི་མཉམ་བ་ཉིད་ཀྱི་སྤྱོད་བར་གྱུར་པ་ལགས་སོ། བཅོམ་ལྡན་འདས་སྐྱེས་བུ་དམ་པ་རྣམས་ཀྱི་སྤྱོད་པ་གང་ལགས་པ་དེ་ནི་ཚད་མ་རྣམས་ཀྱིས་མཐའ་དཔག་བར་བགྱི་བ་མ་ལགས་སོ། དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པས་ཚིགས་སུ་བཅད་པ་འདི་དག་གིས་དེ་བཞིན་གཤེགས་པ་ལ་མངོན་པར་བསྟོད་པ།། །དཔའ་ཆེན་ཡང་དག་སངས་རྒྱས་ཏེ། །བླ་མེད་རྐང་གཉིས་ཀུན་གྱི་གཙོ། །སྤྱོད་པ་ཟབ་མོ་རབ་བསྟན་ནས། །བྱང་ཆུབ་སེམས་དཔའ་ཕན་འདོགས་མཛད། །བཅོམ་ལྡན་སྤོངས་པ་གྱ་ནོམ་བ། །དེ་ཡི་ཚད་ནི་དཔག་པར་དཀའ། །སྤོབས་པ་དག་ནི་མཐའ་མེད་པས། །སྐྱེས་བུ་ཆེན་པོ་མཆོག་ལགས་སོ། །ཆོས་རྗེ་གཏམ་གྱི་ཚུལ་མཁྱེན་པས། །དེས་ན་ཡང་དག་མ་ལུས་མཁྱེན། །བྱང་ཆུབ་སེམས་དཔའ་རྣམས་ལས་ནི། །བླ་མེད་སྤྱོད་པ་འདི་རབ་བཤད། །བཅོམ་ལྡན་མགོན་པོར་འགྱུར་བ་ཡི། །སྤྱོད་པའི་ཐབས་ནི་སྟོན་མཛད་ཅིང། །སྤྱོད་པ་དག་ལས་འདས་པས་ན། །བློ་ལྡན་གང་ཟག་གཞོལ་བར་བགྱིད། །ཀླུ་ཆེན་བསམ་གྱིས་མི་ཁྱབ་པ། །མཁྱེན་པའི་སྤྱོད་ཡུལ་མཐའ་མ་མཆིས། །ཐམས་ཅད་མཁྱེན་པ་རྐང་གཉིས་གཙོ། །སྤྱོད་པ་དམ་པ་འདི་རབ་ཕྱེ། །བཅོམ་ལྡན་ཐུབ་བ་མི་གཡོ་བའི། །སྤྱོད་པ་དག་ནི་གང་ཕྱི་བ། །སྤྱོད་པ་འདི་ནི་མི་སྒུལ་བས། །དེ་སླད་དཔེ་མེད་སྤྱོད་ཅེས་བགྱི། །དཔའ་ཆེན་ཐུབ་པ་ཆེན་པོ་སྟེ། །སྔོན་ཆད་བསྐལ་པ་མང་པོར་ནི། །སྤྱོད་པ་དག་ནི་གང་བསྒྲུབས་པས། །སུ་ཡང་དེར་
ནི་ཕྱིན་མི་འགྱུར། །བྱང་ཆུབ་སེམས་དཔའ་ཆོས་སྟོན་པས། །འཇིག་རྟེན་དག་ན་གནས་བགྱིད་ཀྱང་། །རྣམ་པ་ཐམས་ཅད་མཁྱེན་པ་དག། །རིག་པོར་མི་ཐོགས་འཐོབ་པར་འགྱུར། །བདག་ཅག་སེམས་ཅན་སྙིང་བརྩེའི་སླད། །མ་འོངས་ཐ་མ་དུས་ཀྱི་ཚེ། །བླ་ན་མ་མཆིས་ཆོས་འདི་ནི། །སྲུང་ཞིང་རབ་ཏུ་འཛིན་བར་བགྱིད། །བདག་ཅག་ཆོས་འདི་ཐོས་གྱུར་ནས། །མ་འོངས་ཐ་མ་དུས་ཀྱི་ཚེ། །སེམས་ཅན་རྣམས་ནི་ཀུན་གྱི་སླད། །སྤྱོད་ཅིང་རབ་ཏུ་སྟོན་པར་བགྱིད། །བདག་ཅག་ཆོས་ཀྱི་སྣང་བ་ཡིས། །མ་འོངས་ཐ་མ་དུས་ཀྱི་ཚེ། །ཆོས་རྣམས་ཡོངས་སུ་ཚོལ་བ་ལ། །ཕན་འདོགས་ཆེན་པོ་རབ་ཏུ་བགྱིད། །བདག་ཅག་ཡི་དམ་རབ་བསྐྱེད་ནས། །མ་འོངས་ཐ་མ་དུས་ཀྱི་ཚེ། །སེམས་ཅན་རྣམས་ནི་ཀུན་གྱི་སླད། །བསྲུང་བ་འཛིན་དང་འཇོག་པར་བགྱིད། །བདག་ཅག་རྟག་ཏུ་འདི་སྙམ་དུ། །མ་འོངས་ཐ་མ་དུས་ཀྱི་ཚེ། །སངས་རྒྱས་ཆོས་མཚོ་མཆོད་བགྱིས་ནས། །བླ་མེད་ཆོས་ནི་འཛིན་པར་སྟོན། །བདག་ཅག་ཆོས་ཀྱི་སྡེ་སྣོད་ཀྱི། །སྐྱེས་བུ་མཆོག་ནི་བགྱིས་འགྱུར་བས། ཆོས་ཀྱི་སྒོ་འདི་རབ་བཟུང་སྟེ། །བསྲུངས་ནས་ཡུན་རིངས་གནས་བར་སྨོན། །བདག་ཅག་ཆོས་ཀྱི་ཆུ་དག་ལ། །ཡི་དམ་བླངས་ཏེ་རབ་འཐུངས་ནས། །ཆོས་ཀྱི་སྒོ་མོ་འདི་དག་ལ། །བསྲུང་པ་དག་ནི་བགྱིད་འགྱུར་ཞིང། །བདག་ཅག་ཆོས་འདི་ཐོས་གྱུར་ནས། །མ་འོངས་ཐ་མ་དུས་ཀྱི་ཚེ། །སྐྱེས་བུ་ཆེན་པོ་རབ་བགྱིས་ནས། །ཡང་དག་ཆོས་ནི་འཛིན་པར་ཤོག། །བདག་ཅག་སྲོག་ནི་ཉམས་གྱུར་ཀྱང། །བླ་མེད་ཆོས་ནི་མི་སྤོང་ཞིང། །ཡང་དག་ཆོས་ནི་འདི་དག་གི། །ཆོས་འཛིན་པ་ནི་བགྱིད་པར་ཤོག། །བདག་ཅག་ཆོས་འཛིན་པ་ལ་ཡང། །ཆོས་སེམས་དག་ནི་མི་སྐྱེད་པར། །རབ་གདུད་ཟབ་མོས་འདི་ཐོས་ནས། །དེས་པར་འདོད་དང་འཐུན་བར་ཤོག། །བདག་ཅག་མ་འོངས་དུས་ཀྱི་ཚེ། །ཆོས་རྣམས་ཡོངས་སུ་ཚལ་བ་ལ། །ཡང་དག་ཆོས་འདི་རབ་བསྟན་ནས། །དེ་དག་ཀུན་ཀྱང་དགའ་བར་བགྱིད། །ཆོས་ཀྱི་མདའ་བདག་བསམ་མི་ཁྱབ། །སྐྱབས་ཆེན་དག་ནི་མཛད་པས་ན། །ཐུགས་རྗེས་བདག་ལ་བྱིན་བརླབས་ཏེ། །བདག་ཆོས་འཛིན་ལ་དགོངས་པར་སྨོན། །དེ་ནས་བཅོམ་
ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ལ་འདི་སྐད་ཅེས་བཀའ་སྩལ་ཏོ། བློ་གྲོས་འཕགས་པ་ཁྱོད་ཀྱིས་མ་འོངས་པའི་དུས་ཐ་མ་ལ་ཡང་དག་པའི་ཆོས་ཡོངས་སུ་གཟུང་བའི་ཕྱིར་གོ་ཆ་ཆེན་པོ་བགོས་བ་ནི་ཇི་ལྟར་སྔོན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྒྱལ་བ་རྣམས་ལ་མཆོད་པ་དང། རིམ་གྲོ་བྱས་ནས་དགེ་བའི་རྩ་བ་རྣམས་བསྐྱེད་དེ། ཡུན་རིང་པོར་ཚད་པར་སྤྱོད་པ་ཡང་དག་པར་སྤྱད་ནས་གོ་ཆ་ཆེན་པོ་བགོས་ཏེ། སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྲུང་ཞིང་ཡོངས་སུ་གཟུང་བར་འགྱུར་བ་དག་དང་བྱེ་བྲག་ཏུ་གྱུར་པ་ཅི་ཡང་མེད་པས་ལེགས་སོ་ལེགས་སོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།། །།མ་འོངས་འཇིག་པའི་དུས་ཀྱི་ཚེ། །ཁྱེད་ཀྱིས་ཆོས་འདི་རབ་བཟུང་སྟེ། །སེམས་ཅན་རྣམས་ལ་ཕན་གདགས་ཕྱིར། །ཆོས་འདི་རྣམ་པར་དབྱེ་བར་བྱ། །མ་འོངས་ཐ་མ་དུས་ཀྱི་ཚེ། །ཁྱོད་ཀྱི་རྒྱལ་བའི་ཆོས་ཟུང་ཤིག། །གལ་ཏེ་ཆོས་འདི་ཐོས་གྱུར་ན། །རབ་ཏུ་དགའ་བ་སྐྱེད་པར་འགྱུར། །མ་འོངས་ཐ་མ་དུས་ཀྱི་ཚེ། །ཁྱོད་ནི་ཆོས་འཛིན་པར་འགྱུར་བས། །དེས་ནི་ཆོས་ཟབ་བཤད་པར་བྱ། །ཁྱོད་ཀྱིས་དེ་བཞིན་གཟུང་བར་གྱིས། །གསང་སྟེ་གསུངས་པའི་མདོ་སྡེ་དག། །ཁྱོད་ཐོས་གྱུར་ན་ཡིད་ལ་ཟུང། །དོན་གྱི་ཚུལ་ནི་འདི་དག་ལ། །ཐེ་ཚོམ་དག་ནི་མེད་པར་གྱིས། །རྣམ་པར་ངེས་པའི་དོན་ཟབ་དག། །ཁྱོད་ཐོས་གྱུར་ན་ཡིད་ལ་ཟུང། །སེམས་ཅན་རྣམས་ལ་ཕན་གདགས་ཕྱིར། །ཆོས་ཀྱི་གཏེར་ནི་རབ་ཟུང་ཤིག། །ཆོས་ཀྱི་སྦྱིན་པ་ཡོངས་བཏང་ནས། །སེམས་ཅན་རྣམས་ནི་ཚིམ་པར་གྱིས། །ཐོས་པར་གྱུར་ན་ལུས་དང་སེམས། །ཀུན་དུ་ཁྱབ་པར་དགའ་བར་འགྱུར། །བྱང་ཆུབ་སེམས་དཔའི་ལམ་རྣམས་དང། །སྤྱོད་པ་རྣམས་ཀྱི་ཚུལ་དག་དང། །དེ་དག་གི་ནི་མོད་སྡེ་རྣམས། །མཐར་ཕྱིན་ཡོངས་སུ་འཛིན་པའི་ཕྱིར། །ཁྱོད་ཀྱིས་སེམས་ཅན་ཚད་མེད་རྣམས། །རྒྱ་ཆེར་རབ་ཏུ་སྒྲོལ་བར་འགྱུར། །འཇིག་རྟེན་དག་ནི་ཐམས་ཅད་དུ། །ཡོངས་སུ་མི་བཟློགས་གང་ཡང་མེད། །ཁྱོད་ཀྱིས་ཆོས་འདི་གཟུང་བའི་ཕྱིར། །འཇིག་རྟེན་རྣམས་ལ་ཕན་འདོགས་པས།། བསོད་
ནམས་ཕུང་པོ་མཆོག་ཐོབ་འགྱུར། །དེ་ཕྱིར་རབ་ཏུ་གཞོལ་བར་བྱ། །ངས་འདིར་ཆོས་ནི་གང་བསྟན་པ། །ཁྱོད་ཀྱིས་ཐམས་ཅད་རབ་བཟུང་སྟེ། །མ་འོངས་ཐ་མ་དུས་ཀྱི་ཚེ། །བློ་ལྡན་རྣམས་ལ་བཤད་པར་བྱ། །ད་ལྟར་མ་འོངས་དུས་ཀྱི་ཚེ། །ཆོས་འདི་གང་ཞིག་འཛིན་བྱེད་པ། །དེས་ནི་སངས་རྒྱས་སྟོང་རྣམས་ཀྱི། །ཡང་དག་ཆོས་ནི་འཛིན་པར་འགྱུར། །སེམས་ཅན་རྣམས་ལ་ཕན་གདགས་ཕྱིར། ཆོས་ཀྱི་སྒོ་འདི་བསྲུང་བར་བྱ། །མ་འོངས་ཐ་མ་དུས་ཀྱི་ཚེ། །ཕན་པ་ཆེན་པོ་བྱེད་པར་འགྱུར། །གལ་ཏེ་མ་འོངས་དུས་ཀྱི་ཚེ། །གང་ཞིག་ཆོས་འདི་འཛིན་བྱེད་པ། །དེ་ནི་སངས་རྒྱས་གཅིག་འགའ་ལས། །བསྙེན་ཅིང་རིམ་གྲོ་བྱས་པ་མིན། །གལ་ཏེ་མ་འོངས་དུས་ཀྱི་ཚེ། །གང་ཞིག་ཆོས་འདི་སྲུང་བྱེད་པས། །དེས་ནི་ཆོས་འདི་ལེགས་སྟོན་པས། །མང་པོ་རིམ་གྲོ་བྱས་པ་ཡིན། །གང་ཞིག་ཆོས་ནི་འདི་དག་ལ། །ཐེ་ཚོམ་ཅུང་ཟད་མི་སྐྱེད་ཅིང་། །མ་འོངས་ཆོས་ནི་སྲུང་བྱེད་པ། །དེ་ནི་བློ་དང་ལྡན་པ་ཡིན། །གོ་ཆ་དཔག་མེད་བགོས་ནས་ནི། །རྒོལ་བའི་དགྲ་ལས་གང་རྒྱལ་བ། །མ་འོངས་ཐ་མ་དུས་ཀྱི་ཚེ། །ཡང་དག་ཆོས་འདི་འཛིན་པར་འགྱུར། །སངས་རྒྱས་ཡང་དག་ཆོས་འདི་ལ། །ཐེ་ཚོམ་དྲི་མ་རབ་བསལ་ཏེ། །ཆོས་ཐོས་གང་ཞིང་འཇིགས་མེད་པ། །ཡང་དག་ཆོས་འདི་འཛིན་པར་འགྱུར། །དེ་ལྟ་བས་ན་བློ་གྲོས་འཕགས་པ་རིགས་ཀྱི་བུ་འམ་རིགས་ཀྱི་བུ་མོ་གང་དག་ནན་ཏན་གྱིས་ཡོན་ཏན་ཁྱད་པར་དུ་འཕགས་པ་ཆེན་པོ་ཡོངས་སུ་ཚོལ་བ་རྣམས་ཀྱིས་མ་འོངས་པའི་དུས་ཐ་མའི་ཚེ་ཆོས་ཟབ་མོའི་ཕྱིར་གོ་ཆ་བགོས་ནས་ཡོངས་སུ་གཟུང་བར་བྱ། །བཀླག་པར་བྱ། ཁ་ཏོན་དུ་གདོན་པར་བྱ། གཞན་དག་ལ་ཡང་དེའི་དོན་ཡང་དག་པར་རབ་ཏུ་བསྟན་པར་བྱའོ། གཞན་ཡང་བློ་གྲོས་འཕགས་པ་དས་མངོན་བར་དྲན་ཏེ། སྔོན་འདས་པའི་བསྐལ་པ་གྲངས་མེད་པའི་ཡང་ཆེས་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཀུན་དུ་སྣང་མཛད་ཅེས་བྱ་བ་ཞིག་
འཇིག་རྟེན་དུ་བྱུང་སྟེ། བསྐལ་པའི་མིང་ནི་ཡང་དག་པར་རྒྱལ་བ་ཞེས་བྱའོ། འཇིག་རྟེན་གྱི་ཁམས་ནི་དྲི་མ་མེད་པ་ཞེས་བྱ་སྟེ། ས་བཞི་ཡངས་ལ་ཤིན་དུ་མཛེས་པ་རིན་པོ་ཆེ་སྣ་བདུན་ལས་མངོན་པར་གྲུབ་པའོ། དེའི་ཚེ་གླིང་ཆེན་པོ་དེ་ཆུ་ཞེང་འདྲ་སྟེ། དཔག་ཚད་བདུན་ཁྲི་བདུན་ཁྲི་ཡོད་དོ། དེ་ནས་ཡང་གྲོང་ཁྱེར་ཆེན་པོ་དྲུག་ཁྲི་དྲུག་ཁྲི་ཡོད་དེ། གྲོང་ཁྱེར་རེ་རེའི་ཚད་ཀྱང་ཆུ་ཞེང་འདྲ་སྟེ། དཔག་ཚད་བཅུ་དྲུག་བཅུ་དྲུག་ཡོད་དོ། དེ་དག་ཀྱང་མཐའ་མ་ར་བས་འཁོར་བར་བསྐོར་ཅིང་། བ་གམ་གྱིས་བརྒྱན་པ། སྒོ་རབ་ཏུ་མཛེས་ཤིང་མཐོང་ན་དགའ་བ་དང་། ཤིང་ཏ་ལ་མཆོག་རྣམས་ཕྲེང་ཏུ་དཀྲིགས་པས་བསྐོར་བ། བསྐྱེད་མོས་ཚལ་བརྒྱ་སྟོང་དུ་མས་རབ་ཏུ་བརྒྱན་པ། བསྐྱེད་མོས་ཚལ་ཀུན་དུ་ཁྲི་དང་སྟན་ལེགས་པར་བཤམས་པ་རྫིང་དང། རྫིང་བུ་དང་། འབབ་ཆུ་རྣམས་རབ་ཏུ་གང་ཞིང་འགྲམ་གྱི་སྟེགས་དང། ལམ་རྣམས་རིན་པོ་ཆེ་སྣ་ཚོགས་གཅལ་དུ་བཀྲམ་བ། མཐའ་མའི་ས་གཞི་མཉམ་བ་འབྱུང་ཞིང་འཇུག་པའི་ཚེ་ཉམ་ང་བ་མེད་པ། །འགྲམ་གྱི་འོབས་རྣམས་སུ་ཙན་དན་དང་། ཏམ་ལ་ལ་སོགས་པ་སྤོས་སྣ་ཚོགས་ཀྱི་ལྗོན་ཤིང་རྣམས་ཕྲེང་དུ་དཀྲིགས་པར་གྱུར་ཏོ། གྲོང་ཁྱེར་རེ་རེ་ན་ཡང་མི་བྱེ་བ་སྟོང་ཕྲག་བཅུ་བཅུ་གནས་ཏེ། སེམས་ཅན་དེ་དག་ཐམས་ཅད་ཀྱང་དགེ་བ་བཅུའི་ལས་ཀྱི་ལམ་རྣམས་ཡོངས་སུ་རྫོགས་པར་གྱུར་བའི་ཕྱིར། དེ་ལྟ་བུའི་བདེ་བ་རབ་ཏུ་མྱོང་པར་གྱུར་ཏོ། དེའི་ཚེ་དེ་བཞིན་གཤེགས་པ་དེ་བསྐལ་པ་དང་པོ་ནས་བསྐལ་པ་ཉིས་བརྒྱ་འདས་ནས་དེར་བྱུང་བས་དེའི་ཕྱིར་བསྐལ་པ་དེའི་མིང་ཡང་ཡང་དག་པར་རྒྱལ་བ་ཞེས་བྱའོ། བསྐལ་པ་དེ་ལ་དེ་བཞིན་གཤེགས་པ་ལྔ་བརྒྱ་རིམ་བཞིན་དུ་བྱུང་སྟེ། དེ་རེ་རེའི་ཞིང་ཡང་རིན་པོ་ཆེ་སྣ་མདུན་ལས་མངོན་པར་གྲུབ་པ་ཤ་སྟག་གོ། དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་པའི་འོག་ཏུ་ཀུན་ཀྱང་འདྲ་སྟེ། ཡང་དག་པའི་ཆོས་ནི་ལོ་ཁྲིའི་བར་དུ་གནས་པར་གྱུར་ཏོ། དེ་ལྟར་དེ་བཞིན་གཤེགས་པ་ལྔ་བརྒྱ་པོ་དག་འཇིག་རྟེན་དུ་བྱུང་བ་དེ་དག་ལ་ཡང་ཉན་ཐོས་དང། བྱང་ཆུབ་སེམས་དཔའི་འཁོར་འདུས་པ་རབ་ཏུ་མང་སྟེ། འདུས་པ་རེ་རེའི་ཚེ་ཡང་བྱང་ཆུབ་སེམས་དཔའ་བྱེ་བ་ཁྲག་ཁྲིག་
ཚད་མེད་པ་སྙེད་ཐེག་པ་གཅིག་གི་ལམ་དུ་ཞུགས་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། དེའི་ཚེ་བསྐལ་པ་དེ་ལ་འཁོར་ལོས་བསྒྱུར་བའི་རྒྱལ་པོ་དཔའ་བོའི་སྡེ་ཞེས་བྱ་བ་རིན་པོ་ཆེ་བདུན་དང་ལྡན་བ། གླིང་བཞི་ལ་དབང་བྱེད་པ་ཞིག་བྱུང་ངོ། དེའི་ཚེ་འཛམ་བུའི་གླིང་ན་གྲོང་ཁྱེར་ཆེན་པོ་དཔག་ཚད་བཅུ་དྲུག་གིས་འཁོར་བ་ཞིག་ཡོད་དེ། མི་བྱེ་བ་ཕྲག་བརྒྱད་ཁྲི་གནས་པ། རབ་ཏུ་བདེ་ཞིང་དགའ་བ། འབྱོར་པ་རྒྱས་པ། འོབས་རིམ་པ་བདུན་དང་། ལྗོན་ཤིང་བཀྲིགས་པ་རིམ་པ་བདུན་དང་། ལམ་སྲད་རིམ་པ་བདུན་དང། བསྐྱེད་མོས་ཚལ་སྟོང་གིས་གྲོང་ཁྱེར་དེ་ཡོངས་སུ་བསྐོར་ཅིང་རབ་ཏུ་བརྒྱན་པར་གྱུར་ཏོ། བསྐྱེད་མོས་ཚལ་རེ་རེའི་ཚད་ཀྱང་ཆུ་ཞིང་འདྲ་སྟེ། དཔག་ཚད་ཉི་ཤུ་ཉི་ཤུ་ཡོད་དོ། དེ་རེ་རེ་ཡང་ར་བ་རིམ་བདུན་དང། དྲ་བ་རིམ་བདུན་དང་། བཀོད་པ་རྣམ་པ་སྣ་ཚོགས་དང་། རིན་པོ་ཆེ་སྣ་ཚོགས་ཤིན་དུ་གྱ་ནོམ་བ་དག་གིས་རབ་ཏུ་མཛེས་པར་བྱས་པས་དཔེར་ན་ལྷ་རྣམས་ཀྱི་བསྐྱེད་མོས་ཚལ་ཇི་ལྟ་བ་བཞིན་ནོ། དེ་དག་རེ་རེ་ལ་ཡང་རྫིང་དང་རྫིང་བུ་རིན་པོ་ཆེ་བཻ་དཱུ་རྻས་འོག་གཞི་དང་འགྲམ་བྱེད་པ། རྡོའི་སྙིང་པོ་དང་རིན་པོ་ཆེ་སྣ་ཚོགས་ཀྱིས་ལམ་སྟེགས་བྱས་ཤིང་བཅལ་དུ་བཀྲམ་པ། རིན་པོ་ཆེའི་ལྗོན་ཤིང་མེ་ཏོག་སྣ་ཚོགས་རབ་ཏུ་རྒྱས་པ་ཕྲེང་དུ་དཀྲིགས་པ་བརྒྱ་བརྒྱ་ཡོད་དོ། གྲོང་ཁྱེར་ཆེན་པོ་དེའི་ནང་ན་རྒྱལ་པོ་དེའི་ཕོ་བྲང་དཔག་ཚད་བདུན་གྱིས་འཁོར་བ་ཡོད་དེ་གསེར་དང་རིན་པོ་ཆེ་སྣ་ཚོགས་ལས་མངོན་པར་གྲུབ་པ། མཐའ་མ་རིན་པོ་ཆེས་རབ་ཏུ་བརྒྱན་པ། བཻ་དཱུ་རྻ་དང་། ཡིད་བཞིན་ཀྱི་ནོར་བུ་རིན་པོ་ཆེའི་དྲ་བས་གཡོགས་པ། ཤིང་ཏ་ལ་རྣམས་ཀྱིས་རབ་ཏུ་མཛེས་པར་བརྒྱན་པ། རྫིང་བུ་བཅུ་གཉིས་ཀྱིས་རབ་ཏུ་བསྐོར་བ། འོག་གཞི་གསེར་ཡང་དག་པས་གཅལ་དུ་བཀྲམ་པ། བཻ་དཱུ་རྻ་དང་རིན་པོ་སྣ་ཚོགས་ཀྱི་ཟམ་པ་བཏགས་པ། གསེར་ཤིན་ཏུ་གྱ་ནོམ་པ་འབའ་ཤིག་གིས་ལམ་སྟེགས་དང་ལམ་བྱས་པར་གྱུར་ཏེ། རྫིང་བུ་དེ་དག་གི་ནང་ན་མེ་ཏོག་ཨུད་པ་ལ་དང། ཀུ་མུ་ད་དང། པད་མ་དཀར་པོ་རབ་ཏུ་རྒྱས་པ་དག་གིས་གང་བར་གྱུར་ཏོ། འཁོར་ལོས་སྒྱུར་བའི་རྒྱལ་པོ་དེ་ལ་བཙུན་མོ་ནི་ཉིས་
སྟོང་ཡོད་དོ། བུ་ནི་དྲུག་ཁྲི་ཡོད་དེ། འཁོར་རྣམས་དང་བསྐྱེད་མོས་ཚལ་དེ་དག་ཏུ་འདོད་པ་ལྔའི་བདེ་བ་མྱོང་ཞིང་རབ་ཏུ་རྩེ་བ་ལས་རྒྱལ་པོ་དེ་འདི་སྙམ་དུ་འདོད་པ་རྣམས་ནི་མི་རྟག་ཅིང་རིང་པོར་མི་ཐོགས་པར་རྣམ་པར་འགྱུར་བ་ཡིན་པས་དག་གིས་གདོན་མི་ཟ་བར་སེམས་རྩེ་གཅིག་ཏུ་སངས་རྒྱས་ཀྱི་ཆོས་ཡོངས་སུ་བཙལ་བར་བྱའོ། གལ་ཏེ་ཆོས་ཐོས་ནས་བསྟན་པ་ཇི་ལྟ་བ་བཞིན་དུ་བསྒྲུབས་པར་གྱུར་ན་བདག་ལ་ཡུན་རིང་པོའི་ཕན་པ་དང། བདེ་བ་བྱེད་པར་འགྱུར་རོ། སྙམ་དུ་བསམས་མ་ཐག་ཏུ་ནམ་མཁའ་ལས་ལྷ་ཞིག་གིས་རྒྱལ་པོ་དེ་ལ་སྨྲས་བ། ཀྱེ་སྐྱེས་བུ་ཆེན་པོ་ལེགས་སོ་ལེགས་སོ། ད་ལྟར་དེ་བཞིན་གཤེགས་པ་ཀུན་དུ་སྣང་མཛད་ཅེས་བྱ་བ་འཇིག་རྟེན་དུ་བྱུང་སྟེ། ཐོག་མར་དགེ་བ། བར་དུ་དགེ་བ། ཐ་མར་དགེ་བའི་ཆོས་ཡང་དག་པར་རབ་ཏུ་སྟོན་པར་མཛད་ཀྱིས། རྒྱལ་པོ་མྱུར་དུ་དེ་བཞིན་གཤེགས་པ་དེའི་སྤྱན་སྔར་སོང་ལ་ཡང་དག་པའི་ཆོས་ཞུས་ཤིག་དང་རྒྱལ་པོས་ཡུན་རིང་པོའི་ཕན་བ་དང། བདེ་བ་ཡང་འཐོབ་པར་འགྱུར་ལ། སངས་རྒྱས་ཀྱི་ཆོས་མངོན་པར་སྒྲུབ་ཅིང་སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པར་ཡང་འགྱུར་རོ། རྒྱལ་པོ་དེ་ལྷས་དེ་སྐད་སྨྲས་པ་ཐོས་པ་དང། རབ་ཏུ་དགའ་བར་གྱུར་ནས་གཡོག་འཁོར་རྣམས་ཀྱིས་བསྐོར་ཏེ། དེ་བཞིན་གཤེགས་པ་ཀུན་དུ་སྣང་མཛད་ག་ལ་བ་དེ་ལོགས་སུ་དོད་ནས་ཞབས་ལ་མགོ་བོས་གཏུགས་ཏེ་ཕྱག་བྱས་ནས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། བཅོམ་ལྡན་འདས་ཆོས་ཇི་ལྟ་བུ་ཞིག་གིས་ཆོས་རྣམས་ཀྱི་ཐབས་མཁས་པ་ཡོངས་སུ་སྡུད་པ་དང། ཚངས་བར་སྤྱོད་པ་མྱུར་དུ་ཡོངས་སུ་རྫོགས་པར་བགྱིས་བར་འགྱུར། བདག་དེ་བཞིན་དུ་བསྒྲུབ་པར་འཚལ་ལོ། དེ་སྐད་ཅེས་གསོལ་པ་དང། དེའི་ཚེ་དེ་བཞིན་གཤེགས་པ་དེས་ཀྱང་རྒྱ་ཆེར་རྣམ་པར་ཕྱེ་སྟེ་རབ་ཏུ་བསྟན་ཏོ། རྒྱལ་པོ་དེས་ཆོས་ཐོས་པས་འཁོར་དང་བཅས་ཏེ། བདེ་བའི་ཡོ་བྱང་ཐམས་ཅད་ཀྱིས་དེ་བཞིན་གཤེགས་པ་ཀུན་དུ་སྣང་མཛད་དང། ཉན་ཐོས་ཀྱི་དགེ་འདུན་རྣམས་ལ་ལོ་ཉི་ཁྲིའི་བར་དུ་གུས་པས་རིམ་གྲོ་དང། མཆོད་པ་བྱས་སོ། །དེ་བཞིན་གཤེགས་པ་ཀུན་དུ་སྣང་མཛད་ཀྱི་གསུང་རབ་ལས་རབ་ཏུ་བྱུང་ནས་ཡང་དག་པའི་ཆོས་ཐོས་ཏེ།
མངོན་བར་བསྒྲུབས་པའི་ཕྱིར་དེའི་ཚེ་ཆོས་ཡང་དག་པར་བླངས་པའི་དགེ་བའི་རྩ་བ་དང། ཆོས་ཡང་དག་པར་བཟུང་བའི་དགེ་བའི་རྩ་བ་དང། ཆོས་ཡང་དག་པར་བསྟན་པའི་དགེ་བའི་རྩ་བ་ཐོབ་བར་འགྱུར་པས་ཆོས་ཇི་སྙེད་ཐོས་པ་རྣམས་རབ་ཏུ་སེམས་ཤིང་མི་བརྗེད་པ་དང་། ཡོན་ཏན་ཚད་མེད་པ་རྣམས་ནན་ཏན་བརྩོན་འགྲུས་ཀྱིས་མངོན་བར་བསྒྲུབས་པར་གྱུར་ཏེ། དེ་བཞིན་གཤེགས་པས་དུས་གསུམ་དུ་གསུངས་པའི་ཡང་དག་པའི་ཆོས་རྣམས་སེམས་ཅན་རྣམས་ལ་རྣམ་པ་སྣ་ཚོགས་སུ་རབ་ཏུ་ཕྱེ་སྟེ། སྟོན་པར་གྱུར་ཅིག་ཅེས་ཀྱང་སྨོན་ལམ་བཏབ་བོ། དེ་ལྟར་སྨོན་ལམ་བཏབ་ནས་ཀྱང་བསྐལ་པ་ཡང་དག་པར་རྒྱལ་བ་ལ་བྱུང་བའི་དེ་བཞིན་གཤེགས་པ་ཇི་སྙེད་པ་དེ་དག་རེ་རེ་ལ་ཡང་རིམ་གྲོ་དང། མཆོད་པ་བྱས་ནས་དེ་བཞིན་གཤེགས་པ་དེ་དག་གིས་དུས་དང་པོར་གསུངས་པའི་ཆོས་ཡང་དག་པར་མངོན་སུམ་དུ་གསུངས་པ་དང། དུས་བར་མར་གསུངས་པའི་ཆོས་ཡང་དག་པ་དང། དུས་ཐ་མར་གསུངས་པའི་ཆོས་ཡང་དག་པ་རྣམས་ཀྱང་མ་ལུས་པར་ཡར་དག་པར་གཟུང་ནས་སེམས་ཅན་བྱེ་བ་ཁྲག་ཁྲིག་ཕྲག་བཞི་ཁྲི་བརྒྱ་སྟོང་སྙེད་ཡོངས་སུ་སྨིན་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱས་སོ། སེམས་ཅན་ཚད་མེད་པ་སྙེད་ཐབས་མཁས་བས་བཏུལ་ཏེ། ཉན་ཐོས་དང་རང་སངས་རྒྱས་ཀྱི་ཐེག་པ་ལ་རབ་ཏུ་བཀོད་དོ། བསྐལ་པ་དེ་ལས་ནང་གིས་ཐ་མར་དེ་བཞིན་གཤེགས་པ་གློག་གི་འོད་ཅེས་བྱ་བ་བྱུང་སྟེ། དགེ་སློང་དཔའ་བོའི་སྡེས་དེ་བཞིན་གཤེགས་པ་ཀློག་གི་འོད་ལས་ཆོས་ཡང་དག་པར་གསུངས་པ་ཐོས་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏེ། དེ་བཞིན་གཤེགས་པ་གློག་གི་འོད་ཀྱིས་ཀྱང་དཔའ་བོའི་སྡེ་ཁྱོད་མ་འོངས་པའི་དུས་ན་སངས་རྒྱས་བཅོམ་ལྡན་འདས་བརྒྱ་སྟོང་ཚད་མེད་པ་སྙེད་ལ་རིམ་གྲོ་དང། མཆོད་པ་བྱས་ནས་དེ་བཞིན་གཤེགས་པས་དུས་གསུམ་དུ་གསུངས་པའི་ཆོས་ཡང་དག་པ་རྣམས་ཡོངས་སུ་བཟུང་སྟེ། སེམས་ཅན་ཚད་མེད་གྲངས་མེད་པ་སྙེད་ལ་ཕན་གདགས་པ་དང། སེམས་ཅན་བྱེ་བ་ཁྲག་ཁྲིག་བརྒྱ་སྟོང་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་
བཀོད་པ་དང། སེམས་ཅན་ཚད་མེད་པ་རྣམས་ཉན་ཐོས་ཀྱི་ཐེག་པ་ལ་རབ་ཏུ་བཀོད་དེ། དེའི་འོག་ཏུ་བསྐལ་པ་གྲངས་མེད་པ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་བར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་བརྩོན་འགྲུབ་དཔག་ཏུ་མེད་པའི་འོད་ཟེར་རྣམ་པར་རྒྱལ་བའི་རྒྱལ་པོ་ཞེས་བྱ་བར་འགྱུར་རོ། ཞེས་ལུང་བསྟན་ཏེ། སངས་རྒྱས་དེའི་ཞིང་ནི་རྣམ་པར་དག་པའི་ཡོན་ཏན་ཚད་མེད་པ་བསགས་པ་ལས་མངོན་པར་གྲུབ་པས་མི་རྣམས་ཀྱིས་རབ་ཏུ་གང་ཞིག་བདེ་བ་དང་འབྱོར་བ་རབ་ཏུ་ལྡན་པ་ཉན་ཐོས་དང་བྱང་ཆུབ་སེམས་དཔའི་ཚོགས་རབ་ཏུ་མང་པོས་གྱུར་ཏོ། དེ་བཞིན་གཤེགས་པ་དེའི་སྐུ་ཆེའི་ཚད་ནི་བསྐལ་པ་ཆུང་ངུ་ལྔ་ཐུབ་པར་གྱུར་ཏོ། ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནི་བསྐལ་པ་ཆུང་ངུའི་བར་དུ་གནས་པར་གྱུར་ཏེ། བསྐལ་པར་གནས་པའི་ཆོས་ཀྱང་ལྷ་དང་། མི་རྣམས་ཀྱིས་ཡོངས་སུ་བཟུང་བར་གྱུར་ཏོ། རིང་བསྲེལ་གྱི་མཆོད་རྟེན་ཡང་ཞིང་ཁམས་ཀུན་དུ་གང་བར་གྱུར་ཏོ། དེ་ལྟ་བས་ན་བློ་གྲོས་འཕགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཤིན་ཏུ་རྣམ་པར་དག་པའི་ཆོས་ཟབ་མོ་འདི་ལ་གུས་པས་ཡང་དག་པར་བཟུང་ཞིང་བསྒོམས་ནས་ཆོས་ཀྱི་རྒྱན་གྱི་ཡོ་བྱད་ཀྱིས་ལུས་རབ་ཏུ་བརྒྱན་པར་བྱའོ་ཆོས་ཀྱི་རབ་ཏུ་བརྒྱན་པར་གྱུར་ན་དེ་བཞིན་གཤེགས་པའི་སྐུ་རྡོ་རྗེ་ལས་མངོན་པར་གྲུབ་པ་མཐུ་བོ་ཆེ་ཤིན་དུ་བརྟན་པ་འཐོབ་པར་འགྱུར་ཏེ། གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་ཐམས་ཅད་ལུས་ཀྱི་མཐུ་སྟོབས་གཏུགས་ཏེ། ཤིན་དུ་བརྟན་པའི་སྐུ་དེ་རྣམ་པར་གཞིག་པར་འདོད་ན་ཡང་གང་གིས་ཀྱང་རྣམ་པར་གཞིག་པར་མི་ནུས་སོ། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་འཁོར་གྱི་ནང་དུ་ཆོས་ཀྱི་སྣང་བ་རབ་ཏུ་བསྟན་ན་ཡང་གང་གིས་ཀྱང་བརྒལ་དུ་མེད་པར་འགྱུར་རོ། སེམས་ཅན་གང་གིས་ཆོས་ཟབ་མོ་འདི་ལེན་ཏམ། ཀློག་གམ་ཁ་ཏོན་དུ་འདོན་ཏམ། ནན་ཏན་བརྩོན་འགྲུས་ཀྱིས་སྒྲུབ་པར་བྱེད་ན་ཇི་ལྟར་མོས་པ་བཞིན་དུ་རིགས་ཤིན་དུ་མཐོ་བའི་རིགས་སུ་སྐྱེ་བར་འགྱུར་བ་ནས་བྱང་ཆུབ་ཀྱི་ཤིང་དྲུང་དུ་མངོན་པར་རྫོགས་པར་
སངས་རྒྱས་པའི་བར་དུ་ཡང་ཐོབ་ནས་གྲགས་པ་ཕུན་སུམ་ཚོགས་པ་དང་། འཇིག་རྟེན་གྱི་ཁམས་ཁྱད་པར་དུ་འཕགས་ཤིང་ལམ་ཐ་དད་བ་དང་། འདྲེས་བ་མེད་པ་དང་། བྲམ་ཟེད་དང་མུ་སྟེགས་ཅན་གྱི་མིང་ཡང་མེད་ན་ལྟ་བ་ངན་པས་ལོག་པར་། ཡོངས་སུ་ཚོལ་བ་ལྟ་སྨོས་ཀྱང་ཅི་དགོས་པ་དང་། མི་དགེ་བའི་ཆོས་རྣམས་ཀྱི་མིང་ཡང་མི་ཐོས་ན་མི་དགེ་བའི་རྩ་བ་མངོན་པར་བསྒྲུབ་པ་ལྟ་ཡོད་པར་ག་ལ་འགྱུར་པ་དང། ལག་པ་དང་། རྐང་པའི་སོར་མོ་ལས་འོད་ཟེར་བཀྱེ་ནས་འཇིག་རྟེན་གྱི་ཁམས་ཚད་མེད་པ་རྣམས་སྣང་བར་བྱེད་དེ། སེམས་ཅན་གང་གི་ལུས་ལ་རེག་པ་དེ་དག་ཐམས་ཅད་བདེ་བ་ཐོབ་པར་བྱེད་པ་དང་། །། ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་སུམ་དུ་བྱེད་པར་འགྱུར་རོ། །བློ་གྲོས་འཕགས་པ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་ངའི་བསྟན་པ་ལ་ནན་ཏན་གྱིས་སྒྲུབ་པར་བྱེད་པ་དེ་དག་ནི་ཡོན་ཏན་ཁྱད་པར་དུ་འཕགས་པ་དེ་དག་འཐོབ་པར་འགྱུར་ཏེ། གལ་ཏེ་ངས་ཡོངས་སུ་རྫོགས་པར་བརྗོད་པར་གྱུར་ན་ནམས་ཀྱང་མཐར་ཐུག་པར་མི་འགྱུར་རོ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་འཕགས་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་འཕགས་པ་གང་དག་བྱང་ཆུབ་སེམས་དཔའི་ལམ་འདི་ལ་གནས་པ་དེ་དག་གིས་ནི་རྣམ་པར་དག་པའི་ཆོས་ཟབ་མོ་འདི་ནན་ཏན་གྱིས་མངོན་པར་བསྒྲུབས་ནས་སྟོང་པ་ཉིད་དང་རྗེས་སུ་འཐུན་པ་དང་། རབ་ཏུ་དབེན་པ་དང་རྗེས་སུ་འཐུན་པར་གྱུར་ན་ཆོས་ཀྱི་སྣང་བ་རབ་ཏུ་འཐོབ་པར་འགྱུར་རོ། །ཆོས་ཀྱི་སྣང་བའི་དབང་གིས་ནི་ཆོས་ཐམས་ཅད་ཀྱི་ངོ་བོ་ཉིད་ཐ་དད་པ་མེད་པ་མཐོང་བར་འགྱུར་རོ། །ངོ་བོ་ཉིད་ཐ་དད་པ་མེད་པ་མཐོང་བའི་ཕྱིར་ནི་ལྟ་བ་རྣམ་པར་དག་པར་འགྱུར་རོ། །ལྟ་བ་རྣམ་པར་དག་པའི་ཕྱིར་ནི་ཆོས་སུ་ལྟ་བ་ཡང་མེད་ལ། ཆོས་གང་ཡང་རང་བཞིན་དང་བྲལ་བར་ལྟ་བ་ཡང་མེད་དོ། །ཆོས་སུ་ལྟ་བ་རྣམ་པར་དག་པས་རྣམ་པར་དག་པ་ཡང་མེད་དོ། །རྣམ་པར་དག་པ་ཡང་མེད་པ་གང་ཡིན་པ་དེ་ལ་ནི་རྣམ་པར་དག་པའི་ལུས་ཀྱང་མེད་པས་རྣམ་པར་དག་པའི་ཡེ་ཤེས་ཀྱི་སྤྱོད་ཡུལ་ཐོབ་ནས་ཆོས་ཀྱི་དབྱིངས་ཀྱང་མ་ཡིན། དབྱིངས་
མ་ཡིན་པ་ཡང་མ་ཡིན་པར་ཡང་ཡང་དག་པར་འཐོབ་པར་འགྱུར་རོ། །དབྱིངས་སུ་ལྟ་བ་རྣམ་པར་དག་པར་གྱུར་པས་དབྱིངས་རྣམ་པ་སྣ་ཚོགས་ཀྱི་ངོ་བོ་ཉིད་དུ་འདུ་ཤེས་པ་ཡོངས་སུ་སྤོང་བར་འགྱུར་རོ། །ངོ་བོ་ཉིད་དུ་ཤེས་པ་སྤངས་པའི་ཕྱིར་དབྱིངས་ཀྱི་ཚུལ་གྱི་གསང་ཚིག་གང་ཡིན་པ་རྟོགས་པར་གྱུར་ནས་ཆོས་རྣམས་དབྱིངས་མ་ཡིན་པར་ཡོངས་སུ་ཤེས་པར་གྱུར་ཏེ། འདི་ལྟར་ཆོས་ཀྱི་དབྱིངས་ལ་ཐ་དད་པ་མེད་པར་མཐོང་བའི་ཕྱིར་དང་། རྣམ་པར་འཇིག་པ་མེད་པར་མཐོང་བའི་ཕྱིར་དང་། འགྱུར་བ་མེད་པར་མཐོང་བའི་ཕྱིར་ཆོས་ཀྱི་དབྱིངས་ཀྱི་ཚུལ་ཐམས་ཅད་ལ་ཐབས་མཁས་པ་རབ་ཏུ་འཐོབ་པར་འགྱུར་རོ། །ཐབས་མཁས་པའི་དབང་གིས་ནི། ཆོས་ཀྱི་དབྱིངས་ཀྱི་ཚུལ་ཡོངས་སུ་ཤེས་ཤིང་ཏིང་ངེ་འཛིན་གྱི་སྟོབས་ཀྱིས་ཆོས་ཀྱི་དབྱིངས་རྣམས་ཀྱི་བྱེ་བྲག་གི་ཚུལ་གང་ཡིན་པ་དེ་དག་ལ་ཡང་རྗེས་སུ་འཇུག་པར་འགྱུར་རོ། སྤྱོད་པ་འདི་ལ་གནས་པའི་ཚེ་ཆོས་ཐམས་ཅད་ལ་ཐབས་མཁས་པས་ཆོས་ཐམས་ཅད་ལ་གནས་པ་མེད་པ་དང་། མངོན་པར་ཞེན་པ་མེད་པར་འགྱུར་རོ། མངོན་པར་ཞེན་པ་མེད་པའི་ཕྱིར་ཆོས་ཀྱི་དབྱིངས་ཀྱི་ཚུལ་ཐམས་ཅད་ཅི་རིགས་པར་རྣམ་པ་སྣ་ཚོགས་སུ་རབ་ཏུ་ཕྱེ་ནས་སྟོན་པར་འགྱུར་རོ། །ཏིང་ངེ་འཛིན་གྱི་མཐུའི་དབང་གིས་གཞན་ཡང་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་ལ་རྣམ་པར་རྩེན་པའི་རྫུ་འཕྲུལ་གྱིས་གཅིག་ལས་མང་པོར་སྒྱུར་བ་དང་། མང་པོ་ལས་གཅིག་ཏུ་སྒྱུར་བ་དང་། རི་དང་བྲག་དང་། བརྩིག་པ་དག་ལ་ཐོགས་པ་མེད་པར་འགྲོ་བ་དང་། འཕུར་བ་ལ་དབང་འཐོབ་པར་འགྱུར་རོ། ཁམས་བཞི་པོ་དག་འདུས་པ་ལ་རབ་ཏུ་མཁས་པར་འགྱུར་རོ། ཁམས་ལ་མི་གནས་བར་ཁམས་ཐམས་ཅད་རབ་ཏུ་ཤེས་པར་འགྱུར་རོ། ནམ་མཁའི་ཁམས་དང་གཅིག་ཏུ་གྱུར་ཀྱང་ནམ་མཁའི་ཁམས་ལ་མངོན་པར་ཞེན་པ་དང་། ཐོགས་པ་ཅི་ཡང་མེད་དོ། །ཁམས་འདུས་པ་ལ་རབ་ཏུ་མཁས་པར་གྱུར་པའི་ཕྱིར་ཁམས་ཐམས་ཅད་ཐབས་མཁས་པས་མངོན་པར་སྒྲུབ་པར་བྱེད་དོ། །མངོན་པར་བསྒྲུབས་པའི་ཕྱིར་ཆུའི་ཁམས་རབ་ཏུ་རྟོགས་པར་གྱུར་ནས་ཆུའི་ཁམས་ལས་དུད་པ་འཐུལ་བ་
དང་། མེ་རབ་ཏུ་འབར་བ་དང་། དུད་པ་འཐུལ་བ་དང་། མེ་རབ་ཏུ་འབར་བ་གཉིས་ཀ་སྟོན་པར་བྱེད་པས་རྣམ་པ་སྣ་ཚོགས་སུ་སྟོན་པའི་བར་དུ་བྱས་ནས་སེམས་ཅན་རྣམས་ལ་ཕན་གདགས་པ་ཆེན་པོ་བྱེད་དོ། །ཆོས་ཀྱི་དབྱིངས་ཀྱི་ཚུལ་གྱི་ཐབས་མཁས་པ་ལ་རབ་ཏུ་གནས་ནས་གཡོ་བ་མེད་པར་ཇི་ལྟར་མོས་པ་བཞིན་དུ་སངས་རྒྱས་ཀྱི་ཞིང་གང་དུ་མོས་པ་དེ་བཞིན་དུ་སྐྱེ་བར་འགྱུར་བས་སྲིད་པ་རྣམས་སུ་མངལ་དུ་སྐྱེ་བའི་ལུས་བཟློག་སྟེ། སྤྲུལ་པས་སྐྱེ་པའི་ལུས་བླངས་ནས་རྟག་ཏུ་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་རྣམས་མཐོང་ཞིང་དེ་བཞིན་གཤེགས་པ་དེ་དག་ཀྱང་མཚན་ནི་འདི་ལྟ་བུའོ། །རིགས་ནི་འདི་ལྟ་བུའོ། འཁོར་འདུས་བ་ནི་འདི་ལྟ་བུའོ། །ཆོས་སྟོན་པ་ནི་འདི་ལྟ་བུའོ། ཞེས་མ་འདྲེས་པར་རབ་ཏུ་ཤེས་སོ། །དེ་ནས་འཁོར་དེ་ཉིད་དུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད་པའི་རྒྱལ་བ་ཞེས་བྱ་བ་འདུས་པར་གྱུར་པ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཇི་ལྟ་བུ་ཞིག་ལ་གནས་པར་གྱུར་ན་བཅོམ་ལྡན་འདས་ཀྱིས་ཇི་སྐད་གསུངས་པའི་ཡོན་ཏན་མཆོག་དེ་དག་འཐོབ་པར་འགྱུར་ལགས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད་པའི་རྒྱལ་བ་ལ་འདི་སྐད་ཅེས་བཀའ་སྩལ་ཏོ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ལ་གནས་པ་མེད་པ་གང་ཡིན་པ་དེས་ངས་ཇི་སྐད་བསྟན་པའི་ཡོན་ཏན་མཆོག་ཏུ་གྱུར་པ་དེ་དག་འཐོབ་པར་འགྱུར་རོ། །དཔག་ཏུ་མེད་པའི་རྒྱལ་བ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གལ་ཏེ་གཟུགས་དང་། ཚོར་བ་དང། འདུ་ཤེས་དང་། འདུ་ཤེས་དང། རྣམ་པར་ཤེས་པ་ལ་གནས་པར་གྱུར་ཏམ། གལ་ཏེ་སའི་ཁམས་དང། ཆུའི་ཁམས་དང་། མེའི་ཁམས་དང། རླུང་གི་ཁམས་དང་། ནམ་མཁའི་ཁམས་ལ་གནས་པར་གྱུར་ཏམ། གལ་ཏེ་འདོད་པའི་ཁམས་དང་། གཟུགས་ཀྱི་ཁམས་དང། གཟུགས་མེད་པའི་ཁམས་ལ་
གནས་པར་གྱུར་ན་ངས་མདོ་སྡེ་འདི་ལས་བསྟན་པའི་ཡོན་ཏན་དེ་དག་དང་ལྡན་པར་མི་སྟོན་ཏོ། །གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ལ་གནས་པ་མེད་ཅིང་འབྱུང་བ་དང། འཇུག་པ་མེད་པར་གྱུར་ན་ངས་དེ་དག་གི་ཡོན་ཏན་གྱིས་རྒྱ་མཚོ་ཆེན་པོ་དཔག་ཏུ་མེད་པ་ཐོབ་པར་འགྱུར་བར་རབ་ཏུ་བསྟན་ཏོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཆེན་པོ་རྣམས་ལ་ནི་ཆོས་ཅུང་ཟད་ཙམ་ཡང་དམིགས་པར་བྱ་བ་དང་། གནས་པར་བྱ་བ་ཡང་མེད་ལ་ཆོས་ཅུང་ཟད་ཙམ་ཡང་འཇུག་པར་བྱ་བའམ། འབྱུང་བར་བྱ་བ་ཡང་མེད་པར་ཆོས་རྣམས་ཀྱི་ཚུལ་ལ་ལེགས་པར་གནས་ཤིང་གཡོ་བ་མེད་པས་སོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་གནས་པ་དང་། གཡོ་བ་མེད་དེ་གཡོ་བ་མེད་པའི་ཕྱིར་མཐོ་བ་ཡང་མེད། དམའ་བ་ཡང་མེད་དོ། མཐོ་བ་དང་དམའ་བ་མེད་པའི་ཕྱིར་མཐོ་བ་དང་། དམའ་བ་ལ་གནས་པ་ཡོངས་སུ་སྤོང་བར་བྱེད་དོ། །མཐོ་དམའ་ལ་མི་གནས་པའི་ཕྱིར་དགེ་བའི་གནས་སུ་གནས་པ་ཞེས་བྱའོ། །དགེ་བའི་གནས་སུ་གནས་པ་གང་ཡིན་པ་དེ་ནི་གནས་པ་མེད་པ་ལ་གནས་པ་ཡིན་ནོ། །གནས་པ་མེད་པ་ལ་གནས་པ་གང་ཡིན་པ་དེ་ནི་ཅི་ལ་ཡང་གནས་པ་མེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་འགའ་ཙམ་ཡང་རྣམ་པར་གཞག་པ་འམ། རྫོགས་པར་བྱེད་པ་མེད་པས་གནས་མེད་པ། གནས་པ་མེད་པ། འབྱུང་བ་མེད་པ། བྱེད་པ་མེད་པར་གྱུར་བ་ཡིན་ནོ། དེ་ཅིའི་ཕྱིར་ཞེ་ན། གནས་མི་དམིགས་པས་སོ། །གནས་མེད་པའི་ཕྱིར་རྣམ་པར་རྟོག་པར་ཡང་མེད་དོ། །རྣམ་པར་རྟོག་པ་མེད་པའི་ཕྱིར་མི་གཡོ་བའི་གནས་སུ་གནས་པར་བྱེད་དོ། །ཆོས་ཀྱི་དབྱིངས་ཇི་ལྟ་བ་བཞིན་དུ་གནས་པར་བྱེད་དོ། །གནས་མེད་པ་ལ་གནས་པར་བྱེད་པས་གནས་པ་ཅི་ཡང་མེད་དེ། གནས་དང། གནས་མེད་པ་ལ་མངོན་པར་ཞེན་པ་མེད་པས་ལེགས་པར་གནས་པ་ཞེས་བྱའོ། དཔག་ཏུ་མེད་པའི་རྒྱལ་བ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་ཚུལ་ལ་རབ་ཏུ་གནས་པ་ནི་དེ་ལྟར་གནས་པ་མེད་པ་རྣམ་པར་གཞག་ནས་
གནས་མེད་པ་ལ་གནས་པར་བྱེད་པས་ཆོས་ཐམས་ཅད་ལ་རྣམ་པར་རྟོག་པ་མེད་པར་མཐོང་ཞིང་རྣམ་པར་མི་རྟོག་པའི་སྤྱོད་པ་དེ་ལྟ་བུ་ལ་གནས་པར་བྱེད་དེ། སྤྱོད་པ་དེས་ཆོས་ཐམས་ཅད་གཡོ་བ་མེད་པར་མཐོང་བས་ཚུལ་བཞིན་དུ་གནས་པའི་རྗེས་སུ་འཐུན་པ་དང་། ཚུལ་བཞིན་དུ་མི་གཡོ་བའི་རྗེས་སུ་འཐུན་པ་དང་། ཚུལ་བཞིན་དུ་མི་ལེན་པའི་རྗེས་སུ་འཐུན་པར་གྱུར་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་ཆུབ་སེམས་དཔའ་ཡང་དག་དྲན། །དོན་ལ་ལེགས་པར་སེམས་བྱེད་ཅིང། །ཆོས་རྣམས་ལ་ནི་མི་གནས་པས། །བློ་དང་ལྡན་པ་ཞེས་བྱའོ། །ཆོས་ནི་ཅུང་ཟད་འགའ་ཙམ་ཡང་། །རྣམ་པར་གཞག་པར་བྱ་བ་མེད། །རྣམ་པར་གཞག་པ་མེད་པའི་ཕྱིར། །འཇིགས་པ་མེད་པར་གཞོལ་བར་བྱེད། །གཟུགས་ནི་རྣམ་པར་མི་གཞག་ཅིང། །ཚོར་བ་རྣམས་ཀྱང་གཞག་པ་མེད། །འདུ་ཤེས་དང་ནི་འདུ་བྱེད་དང་། །རྣམ་པར་ཤེས་པ་འང་དེ་བཞིན་ནོ། །ཕུང་པོ་རྣམས་ལ་མི་གནས་ཤིང། །ཁམས་རྣམས་དང་ནི་སྐྱེ་མཆེད་དང་། ། གནས་དང་གནས་མ་ཡིན་ལ་ཡང། །རྟག་ཏུ་གནས་པ་མེད་པ་ཡིན། །ས་ཡི་ཁམས་ལ་མི་གནས་ཤིང། །ཆུ་ཡི་ཁམས་ལ་འང་གནས་པ་མིན། །མེ་དང་རླུང་གི་ཁམས་ལ་ཡང། །རྟག་ཏུ་གནས་པ་མེད་པ་ཡིན། འདོད་པའི་ཁམས་དང་གཟུགས་ཀྱི་ཁམས། །གཟུགས་མེད་ཁམས་ལ་མི་གནས་ཏེ། །རྣམ་གཞག་མེད་པ་ཐོབ་པའི་ཕྱིར། ཁམས་གསུམ་དག་ལ་གནས་མི་བྱེད། །ནམ་མཁའི་ཁམས་ནི་དེ་དག་ལ། །གནས་པར་ཡང་ནི་མི་བྱེད་དེ། གནས་པར་བྱེད་པ་མེད་པས་ན། མཉམ་པ་ཉིད་དུ་གཞོལ་བར་བྱེད། །དེ་ཕྱིར་ཆོས་ནི་ཅུང་ཟད་ཙམ། །གནས་པར་བྱ་བ་ཅི་ཡང་མེད། །གནས་པ་མེད་པ་གང་ཐོབ་པ། །དེ་ནི་ཡེ་ཤེས་དམ་པ་ཡིན། །ཡེ་ཤེས་དམ་པ་གནས་པ་མེད། །གནས་པ་མེད་པས་ལེགས་གནས་ཡིན། །དེ་ལྟའི་གནས་པ་གང་ཐོབ་པ། །ཆོས་ཀྱི་དབྱིངས་ལ་གནས་པ་ཡིན། གནས་པ་མེད་དང་མཚུངས་ལྡན་ཕྱིས། དེ་ནི་རྟག་ཏུ་ལེགས་གནས་འགྱུར། །གནས་པ་མེད་ཅིང་རྟེན་པ་མེད། །ཆོས་ལ་གནས་པ་འཐོབ་པར་
འགྱུར། །གལ་ཏེ་རྟེན་མེད་ཐོབ་གྱུར་ན། །རྟག་ཏུ་གཡོ་མ་མེད་པར་འགྱུར། །འཇུག་པ་མེད་ཅིག་འབྱུང་བ་མེད། །མཉམ་པ་ཉིད་དུ་རབ་ཏུ་གནས། །ཆོས་ལ་དེ་ལྟར་གང་གནས་པ། །དེ་ནི་དཔའ་བོ་ཞེས་བྱའོ། །ཆོས་རྣམས་ཀུན་ལ་མཐོ་བ་མེད། །ཆོས་རྣམས་ཀུན་ལ་དམའ་བ་མེད། །དེ་ལྟར་གཡོ་བ་མེད་གྱུར་པས། ཆོས་ཀྱི་དབྱིངས་ལ་རབ་ཏུ་གནས། །གཡོ་བ་མེད་ལ་གནས་པའི་ཕྱིར། །བླ་མེད་གནས་པ་འཐོབ་པར་འགྱུར། །མི་གནས་གནས་དང་རྗེས་འཐུན་པ། །དེ་ནི་དཔའ་བོ་ཞེས་བྱའོ། །གནས་པ་ལ་ནི་མི་གནས་ཤིང། །གནས་ལ་གཡོ་བ་མེད་གྱུར་པ། །གནས་པ་མེད་པས་གྲུབ་པས་ན། །ལེགས་པར་གནས་པ་འཐོབ་པར་འགྱུར། །གནས་དང་གནས་མ་ཡིན་ལ་ཡང། །ཐམས་ཅད་དུ་ནི་གཡོ་བ་མེད། གཡོ་བ་མེད་ལ་གནས་པས་ན། །གཡོ་བ་མེད་པ་ཞེས་བྱའོ། །གལ་ཏེ་མི་གཡོ་གནས་འགྱུར་ན། །ཐམས་ཅད་ལ་ཡང་གནས་མི་འགྱུར། །གནས་དང་གནས་མིན་མི་སེམས་པས། །རྣམ་རྟོག་མེད་ལ་རྟག་ཏུ་གནས། །གནས་ལ་གནས་པར་མི་བྱེད་ཕྱིར། །གཡོ་བར་གྱུར་པ་ཅི་ཡང་མེད། །གནས་ཀྱིས་གཡོ་བ་མེད་པས་ན། །ཐམས་ཅད་ལ་ཡང་གནས་མི་འགྱུར། །གལ་ཏེ་མི་གནས་ཐོབ་འགྱུར་ན། །གནས་དང་གནས་མིན་གྱིས་མི་གཡོས། །གནས་ཀྱིས་མི་གཡོས་གང་ཡིན་པ། །གནས་ལ་རབ་གནས་ཞེས་བྱའོ། །གནས་ལ་རབ་ཏུ་གང་གནས་པ། །གནས་པ་མེད་ལ་གནས་པས་ན། །ཆོས་རྣམས་ཐམས་ཅད་མཐོང་འགྱུར་ཞིང། །ཆོས་ཀྱི་རྗེས་སུ་འཐུན་ལ་གནས། །དེ་ལྟར་ཆོས་རྣམས་མཐོང་བས་ན། །སྣ་ཚོགས་དག་ལ་མི་གནས་ཤིང། །གནས་མེད་རབ་ཏུ་གནས་པ་མེད། །ཆོས་གནས་པ་ལ་མཁས་པར་འགྱུར། །རྟག་ཏུ་ཆོས་ལ་རབ་གནས་པས། །རྣམ་པར་རྟོག་པ་ཅི་ཡང་མེད། །རྣམ་པ་རྟོག་པ་སྤངས་པའི་ཕྱིར། །འདི་ནི་མི་གཡོས་པ་ཞེས་བྱ། །གལ་ཏེ་མི་གཡོས་གནས་གྱུར་ན། །སྤྱོད་པ་དག་ལ་རྣམ་མི་རྟོག །གནས་དག་གནས་མིན་ཡོངས་སུ་སྤོང། །འདི་ནི་སོ་སོར་རྟོག་བྱེད་ཡིན། །གལ་ཏེ་མི་གཡོ་རབ་རྟོག་ན། །ཐམས་ཅད་གཡོ་བ་མེད་པར་འགྱུར། །ཆོས་རྣམས་རྟག་ཏུ་མཉམ་པ་ལ། །དེ་བཞིན་རབ་ཏུ་གཞོལ་བར་འགྱུར། །ཚུལ་
བཞིན་རྗེས་མཐུན་གནས་པ་དང། །ཚུལ་བཞིན་རྣམ་པར་མི་གཡོ་དང། །མི་གཡོ་གནས་ནི་གང་ཐོབ་པ། །གནས་མེད་ལ་ནི་རྟག་ཏུ་གནས། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་ཚུལ་འཆིང་བ་མ་མཆིས་པ་དང། གྲོལ་བམ་མཆིས་པ་ལ་རབ་ཏུ་འགོད་པར་མཛད་པ་ཤིན་ཏུ་ངོ་མཚར་ཆེ་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་ཚུལ་རྣམ་པར་གཞག་པ་ལ་རབ་ཏུ་མཁས་པ་ནི་ཆོས་ཅུང་ཟད་ཙམ་ཡང་མཚུངས་པར་ལྡན་པའམ། མཚུངས་པར་མི་ལྡན་པ་འམ། མཐུན་པར་གྱུར་པ་འམ། ཡོངས་སུ་བསྡུས་པ་འམ། ཡོངས་སུ་མ་བསྡུས་པ་འམ། སྐྱབས་སུ་འགྲོ་བ་དང་མི་ལྡན་པ་འམ། འདོད་ཆགས་དང་བཅས་པའམ། འདོད་ཆགས་དང་བྲལ་བ་འམ། ཞེ་སྡང་དང་བཅས་པ་འམ། ཞེ་སྡང་དང་བྲལ་བ་ཞེས་བགྱི་བ་ཡང་དག་པར་རྗེས་སུ་མི་དམིགས་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་ཚུལ་ཐམས་ཅད་རྣམ་པར་གཞག་པ་ལ་རབ་ཏུ་མཁས་པ་ནི་གལ་ཏེ་སེམས་ཅད་རྣམས་ཀྱིས་གུས་པས་མཆོད་པ་བགྱིས་པ་ན་ཡང་འདོད་ཆགས་ཀྱི་སྲེད་པ་སྐྱེ་བར་མི་འགྱུར་ལ། །སྨོད་ཅིང་གནོད་པར་བགྱིད་ན་ཡང་ཞེ་སྡང་སྐྱེ་བར་མི་འགྱུར་ཏེ། འདུ་ཤེས་སྣ་ཚོགས་མ་མཆིས་ཤིང་ཆོས་སུ་ལྟ་བ་ཐམས་ཅད་ཡོངས་སུ་སྤངས་བས་ཆོས་འགའ་ཙམ་ཡང་ཆོས་འགའ་ཙམ་དང་མཚུངས་པར་ལྡན་པ་འམ་མཚུངས་པར་མི་ལྡན་པར་ཡང་དག་པར་རྗེས་སུ་མི་དམིགས་ལགས་སོ། །མཚུངས་པར་ལྡན་པ་དང། མཚུངས་པར་མི་ལྡན་པ་ལས་ཀྱང་ཡང་དག་པར་འདས་པའི་སླད་དུ་མཚུངས་པར་ལྡན་པ་དང། མཚུངས་པར་མི་ལྡན་བའི་འདུ་ཤེས་སྤོང་ཞིང་མཚུངས་པར་ལྡན་པ་དང། མཚུངས་པར་མི་ལྡན་པའི་འདུ་ཤེས་ཀྱང་ཡང་དག་པར་ཁོང་དུ་ཆུད་པར་འགྱུར་རོ། ཁོང་དུ་ཆུང་པ་ལས་ཡང་དག་པར་འདས་ནས་ཀྱང་ཆོས་འགའ་ཙམ་ལ་ཡང་རྩོལ་བ་འམ། ལྡོག་བ་འམ། བགྲོད་པར་བགྱི་བ་དང་
བཅས་པའམ། བགྲོད་པར་བགྱི་བ་མ་མཆིས་པ་ཞེས་མཚུངས་པར་ལྡན་པར་བགྱིད་ལགས་སོ། །ཆོས་ཐམས་ཅད་ཀྱི་ཚུལ་ཡང་ཡང་དག་པ་མ་ལགས་བའི་བསམ་པ་མཆིས་ཤིང་ཡོངས་སུ་འཛིན་བ་མ་མཆིས་པས་ཐབས་མཁས་པས་ཆོས་ཀྱི་ངོ་བོ་ཉིད་རྣམ་པར་འཇིག་པར་མི་བགྱིད་ལགས་སོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་ལ་དེ་ལྟར་གནས་པའི་ཚེ་ཐབས་མཁས་པས་ཆོས་ཐམས་ཅད་ཀྱི་དབྱིངས་ཀྱི་ཚུལ་ཡང་དག་པར་སྟོན་པར་བགྱིད་ལགས་པས་སངས་རྒྱས་ཀྱི་ཆོས་ཐམས་ཅད་མྱུར་ཏུ་ཡོངས་སུ་རྫོགས་པར་བགྱིད་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་བཀའ་སྩལ་བ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་ཆོས་ལ་རྣམ་པར་གཞག་པར་བྱ་བ་མེད་ཅིང་གནས་པར་བྱ་བ་མེད་པར་མཐོང་བར་གྱུར་ན། སངས་རྒྱས་ཀྱི་ཆོས་ལ་རྣམ་པར་གཞག་པར་བྱ་བ་མེད་པ་དང། གནས་པར་བྱ་བ་མེད་པ་དང་། ཁྱད་པར་དུ་གནས་པ་མེད་པར་ཡང་དག་པར་མཐོང་བར་གྱུར་ཏེ། སངས་རྒྱས་ཀྱི་ཆོས་གནས་པ་མི་གཡོ་བར་མཐོང་བའི་ཕྱིར་དང། འཁོར་བར་མི་འཇུགས་པའི་ཕྱིར་དང། ཡོངས་སུ་མི་འགྱུར་བའི་ཕྱིར་ཆོས་ཐམས་ཅད་ཀྱི་དབྱིངས་དང་རྗེས་སུ་འཐུན་པར་གནས་པར་གྱུར་བས་ཆོས་ཐམས་ཅད་ཀྱི་དབྱིངས་ཀྱི་ཚུལ་རྣམ་པར་གཞག་པ་ལ་མཁས་པ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་སངས་རྒྱས་ཀྱི་ཆོས་ལ་གནས་པ་མེད་པ་དང། །མི་གནས་པ་མེད་པ་དང། ཁྱད་པར་དུ་གནས་པ་མེད་པ་དང། ཁྱད་བར་གནས་མེད་པ་དང། གནས་བའི་གནས་པ་མེད་པ་དང། གནས་པ་མ་ཡིན་པར་གནས་པ་མེད་པ་དང། གཡོ་བ་མེད་པ་དང། རྣམ་པར་རྟོག་པ་མེད་པ་དང། ཁྱད་བར་དུ་རྣམ་པར་རྟོག་པ་མེད་པ་དང། ཀུན་ཏུ་རྟོག་བ་མེད་པར་གྱུར་ན། གདོད་ཆོས་ཐམས་ཅད་ཀྱི་དབྱིངས་ཀྱི་ཚུལ་རྣམ་པར་གཞག་པ་ལ་རབ་ཏུ་མཁས་པ་ཞེས་བྱའོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་
དཔའ་ཆེན་པོ་གང་ཆོས་འགའ་ཙམ་ཡང་རྣམ་པར་གཞག་པ་མི་མཐོང་ལ། ཆོས་ཐམས་ཅད་ཀྱི་གནས་མཆོག་ཏུ་རྣམ་པར་གཞག་ཏུ་ཡོད་པར་ཡང་མི་མཐོང་ཞིང་རྣམ་པར་རྟོག་པ་མེད་པ་དང། མཆོག་ཏུ་རྣམ་པར་རྟོག་པ་མེད་པ་དང། ཀུན་ཏུ་རྣམ་པར་རྟོག་པ་མེད་པར་གྱུར་ན། གདོད་ཆོས་ཐམས་ཅད་ཀྱི་དབྱིངས་ཀྱི་ཚུལ་རྣམ་པར་གཞག་བ་ལ་མཁས་པ་ཞེས་བྱའོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་འགའ་ཙམ་ཡང་འདུག་པ་འམ། འགྲོ་བ་ཞེས་བྱ་བ་ཡང་དག་པར་མི་མཐོང་ལ་རྣམ་པར་རྟོག་པ་ཡང་མེད། ཁྱད་པར་དུ་རྣམ་པར་རྟོག་པ་ཡང་མེད། ཀུན་ཏུ་རྣམ་པར་རྟོག་པ་ཡང་མེད་དེ། ཆོས་ཐམས་ཅད་ནམ་མཁའ་ཡོངས་སུ་དག་པ་ལྟར་མཐོང་ཞིང་འོད་ཀྱིས་རབ་ཏུ་གསལ་བར་གྱུར་བས་ཉོན་མོངས་པ་ཡོངས་སུ་སྤོང་བ་དང། ཆོས་ཐམས་ཅད་འོད་ཀྱིས་རབ་ཏུ་གསལ་བར་བྱེད་པའི་ཕྱིར་གདོད་ཆོས་ཐམས་ཅད་ཀྱི་དབྱིངས་ཀྱི་ཚུལ་ལ་ཐབས་མཁས་པ་ཐོབ་པ་ཞེས་བྱ་སྟེ། རྣམ་པར་གཞག་པས་ཆོས་ཀྱི་དབྱིངས་ལ་སོ་སོར་རྟོག་པར་མི་བྱེད་དོ། དེ་ཅིའི་ཕྱིར་ཞེ་ན། ཆོས་ཀྱི་དབྱིངས་ལ་རྣམ་པར་གཞག་པ་ཅུང་ཟད་ཙམ་ཀྱང་མེད་པའི་ཕྱིར་རོ། །འདི་ལྟ་སྟེ། དཔེར་ན་ནམ་མཁའ་དང། རླུང་གི་ཁམས་ལ་ནི་གནས་ཀྱང་མེད། བལྟར་ཡང་མི་མཐོང་རྣམ་པར་གཞག་པའི་གནས་ཀྱང་མེད། རྟེན་པའི་གནས་ཀྱང་མེད། བསྟན་དུ་ཡང་མེད་དོ། དེ་བཞིན་དུ་ཆོས་ཀྱི་དབྱིངས་ཀྱང་འཇུག་པར་བྱ་བའི་གནས་ཀྱང་མེད། ། །།ལྟ་བར་བྱ་བའི་གནས་ཀྱང་མེད། རྣམ་པར་གཞག་པའི་གནས་ཀྱང་མེད། བསྟེན་པའི་གནས་ཀྱང་མེད། ། ཁོང་དུ་ཆུད་བར་བྱ་བ་ཡང་མེད། བསྟན་དུ་ཡང་མེད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་བསྟན་པར་བྱ་བ་མེད་པའི་ཕྱིར། དེ་བཞིན་ཉིད་ཀྱི་དབྱིངས་དང་མཚུངས་པར་ལྡན་པར་གནས་སོ། བློ་གྲོས་མཐའ་ཡས་ཆོས་ཐམས་ཅད་ཀྱི་དབྱིངས་ནི་སྐྱེ་བ་མེད་པ། སྲོག་མེད་པ། རྒ་བ་མེད་པ། འཆི་བ་མེད་པ། རྒོད་པ་མེད་པ། བྱིང་བ་མེད་པ། བསྟན་དུ་མེད་པའི་དབྱིངས་ཡིན་བས་ཆོས་ཀྱི་དབྱིངས་ཤེས་བྱའོ། རྣམ་པར་འགྱུར་བ་མེད་པའི་དབྱིངས་
ཡིན་བས་ཆོས་ཀྱི་དབྱིངས་ཤེས་བྱ་སྟེ། ཆོས་ཀྱི་དབྱིངས་ནི་གནས་ཐམས་ཅད་དུ་ཁྱབ་པ་ཡིན་ནོ།། བློ་གྲོས་མཐའ་ཡས་ཆོས་ཀྱི་དབྱིངས་ནི་འགྲོ་བའི་གནས་མེད་དེ། འགྲོ་བ་དང། གནས་པ་མེད་པའི་ཕྱིར་ཆོས་ཀྱི་དབྱིངས་དང་མཚུངས་པར་ལྡན་པར་གནས་པ་ཞེས་བྱའོ། །དེ་བཞིན་ཉིད་ཀྱི་ཆོས་ཀྱི་དབྱིངས་ལ་ནི་གནས་ཀྱང་མེད། གནས་མ་ཡིན་བ་ཡང་མེད་དོ། །དེ་ཅིའི་ཕྱིར་ཞེ་ན། དེ་བཞིན་ཉིད་ཀྱི་ཚེས་ཀྱི་དབྱིངས་དང། དེ་བཞིན་ཉིད་ཀྱི་རང་བཞིན་ནི་ཡོད་པ་མ་ཡིན་བའི་ཕྱིར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ངས་བསྟན་པ་འདི་ཐོས་པར་གྱུར་ན་ཆོས་ཐམས་ཅད་ཀྱི་དབྱིངས་ཀྱི་ཚུལ་གྱི་ཆོས་ཀྱི་སྣང་བ་ཆེན་པོ་འཐོབ་པར་འགྱུར་ལ། ཆོས་ཀྱི་སྣང་བ་ཐོབ་བའི་དབང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་ནས་མྱུར་དུ་དེ་བཞིན་གཤེགས་པའི་སྟོབས་བཅུ་དང། མ་འདྲེས་པ་བཅྭ་བརྒྱད་དང། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་དོ། །སེམས་ཅན་ཐམས་ཅད་ཀྱི་དགེ་བའི་རྩ་བ་རྒྱ་ཆེན་པོ་དང། ཚོགས་ཁྱད་པར་དུ་འཕགས་པ་ཡོངས་སུ་སྨིན་པར་བྱ་བའི་ཕྱིར་དང། དེ་བཞིན་གཤེགས་པའི་གདུང་རྒྱུན་མི་འཆད་པར་བྱ་བའི་ཕྱིར་མྱུར་དུ་བྱང་ཆུབ་ཀྱི་སྙིང་པོར་སོང་ནས་ཆོས་ཀྱི་འཁོར་ལོ་བསྐོར་བ་དང། བདུད་ཀྱིས་གནས་རྣམས་ཟིལ་གྱིས་གནོན་པ་དང། །ཐ་དད་པར་སྨྲ་བ་རྣམས་ཚར་གཅོད་པ་དང། སྐྱེ་བུ་དམ་པའི་སེང་གེའི་སྒྲ་ཆེན་པོ་སྒྲོགས་ཤིང་སེམས་ཅན་རྣམས་ཀྱི་མོས་པ་ཇི་ལྟ་བ་དང། སྨོན་ལམ་ཇི་ལྟ་བ་དང། སེམས་བསྐྱེད་པ་ཇི་ལྟ་བ་བཞིན་དུ་ཡང་དག་པར་རྣམ་པར་གྲོལ་བར་བྱ་བའི་ཕྱིར་དམ་པའི་ཆོས་བསྟན་ནས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་འགོད་པར་བྱེད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། །བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་ཀུན་ལ་མི་གནས་པས། །སངས་རྒྱས་ཀྱི་ནི་ཆོས་དག་ལ། །རྣམ་པར་གཞག་པ་ཅི་ཡང་མེད། །བྱང་ཆུབ་སེམས་དཔའ་ཐམས་ཅད་ནི། །རྣམ་པར་གཞག་པ་མེད་པའི་ཕྱིར། །སངས་རྒྱས་ཀྱི་ནི་
ཆོས་དག་ལ། །འཇིགས་པ་མེད་པར་གཞོལ་བར་བྱེད། །བྱང་ཆུབ་སེམས་དཔའ་ཐམས་ཅད་ནི། །སངས་རྒྱས་ཆོས་ལ་གནས་པ་དང། །གནས་ཀྱང་མེད་པར་མཐོང་བས་ན། །ཤིན་ཏུ་ལེགས་པར་གནས་པར་བྱེད། །བྱང་ཆུབ་སེམས་དཔའ་ཐམས་ཅད་ནི། །གནས་དག་ལ་ནི་མི་གནས་པར། །ཆོས་རྣམས་རབ་ཏུ་མཐོང་བས་ན། །གནས་པ་མེད་ཅིང་ལྡོག་པ་མེད། །བྱང་ཆུབ་སེམས་དཔའ་ཐམས་ཅད་ནི། །ཆོས་ལ་གནས་པ་མེད་མཐོང་བས། །སངས་རྒྱས་ཆོས་ལ་མི་གཡོས་ཤིང། སངས་རྒྱས་ཆོས་ཀྱང་ཚོལ་མི་བྱེད། །བྱང་ཆུབ་སེམས་དཔའ་ཐམས་ཅད་ནི། །ཆོས་ནི་ཐ་དད་མི་མཐོང་བས་། །སངས་རྒྱས་ཆོས་ལས་མ་གཡོས་ཤིང། །ཡོངས་སུ་འཚོལ་བར་མི་བྱེད་དོ། །བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་དེ་ལྟར་མཐོང་བས་ན། །ཆོས་རྣམས་མཁས་པར་བྱ་བ་ལ། །ཐབས་མཁས་པས་ནི་གནས་པར་བྱེད། །བྱང་ཆུབ་སེམས་དཔའ་ཐམས་ཅད་ནི། །རྟག་ཏུ་མཉམ་པར་མཐོང་བས་ན། །སངས་རྒྱས་ཆོས་ལ་མི་གནས་ཤིང། །མི་གནས་པ་ཡང་མ་ཡིན་ནོ། །རྟག་ཏུ་གནས་མེད་ལ་གནས། །གནས་མེད་པ་ཡང་མ་ཡིན་ནོ། །རྟག་ཏུ་རྣམ་བར་རྟོག་མི་བྱེད། །རྣམ་པར་མི་རྟོག་པ་ཡང་མིན། །རྣམ་པར་རྟོག་པ་སྣ་ཚོགས་དག། །རྟག་ཏུ་མེད་པར་གྱུར་པ་ཡིན། །བྱང་ཆུབ་སེམས་དཔའ་ཐམས་ཅད་ནི། །གནས་པ་མེད་དང་མཚུངས་ལྡན་བས། །དུས་དང་གནས་རྣམས་ཀུན་ཏུ་ཡང། །གཡོ་བ་མེད་པར་གྱུར་པ་ཡིན། །བྱང་ཆུབ་སེམས་དཔའ་ཐམས་ཅད་ཀྱིས། །ནམ་ཞིག་ཆོས་ཀྱི་ཚུལ་དག་ལ། །མཉམ་པ་ཉིད་དུ་གནས་པའི་ཚེ། །ལེགས་པར་གནས་པ་ཞེས་བྱའོ། །བྱང་ཆུབ་སེམས་དཔའ་ཐམས་ཅད་ཀྱིས། །ནམ་ཞིག་ཆོས་ཀྱི་ཚུལ་དག་ལ། །ཆོས་འགའ་ཙམ་ཡང་མི་མཐོང་ན། །མཉམ་པ་ཉིད་ལ་གནས་པ་ཡིན། །བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་ཀུན་ལ་གནས་མེད་པར། །རབ་ཏུ་མཐོང་བར་གྱུར་ཀྱང་ནི། །གནས་ནི་ཡོངས་སུ་སྤོང་མི་བྱེད། །གཡོ་བ་མེད་པ་ཐོབ་པས་ན། །བསྟན་པར་བྱ་བ་ཅི་ཡང་
མེད། །བྱང་ཆུབ་སེམས་དཔའ་ཐམས་ཅད་ནི། །ཆོས་རྣམས་ཀུན་གྱི་ཚུལ་དག་ལ། །རབ་ཏུ་མཁས་པར་གྱུར་པས་ན། །ཐབས་མཁས་པས་ནི་གནས་པར་བྱེད། །གནས་པ་མེད་ལ་གནས་པས་ན། །བྱང་ཆུབ་སེམས་དཔའ་ཞེས་བྱའོ། །བྱང་ཆུབ་སེམས་དཔའ་ཐམས་ཅད་ནི། །ཆོས་ནི་ཅུང་ཟད་ཙམ་ལ་ཡང། །འགྲོ་འམ་འོང་ཞེས་བྱ་བ་ཡིན། །རྣམ་རྟོག་དག་ལ་མི་གནས་པས། །དེ་ཚེ་ཆོས་རྣམས་ཐམས་ཅད་ཀྱི། །ཚུལ་ལ་རབ་ཏུ་གནས་པ་ཡིན། །བྱང་ཆུབ་སེམས་དཔའ་ཐམས་ཅད་ནི། །ཆོས་ཀྱི་ཚུལ་ནི་ཀུན་ལ་ཡང། །རྣམ་པ་སྣ་ཚོགས་གནས་བྱེད་པས། །ཆོས་ཀྱི་སྣང་བ་ཆེན་པོ་ནི། །དཔག་ཏུ་མེད་པ་སྐྱེད་པར་བྱེད། །ཆོས་ཀྱི་སྣང་བའི་དབང་གིས་ནི། །མཉམ་བའི་ལྟ་བ་རབ་གནས་པས། །ཆོས་རྣམས་ཐམས་ཅད་ཀུན་ལ་ནི། །ཆོས་རྣམས་ཀུན་གྱི་ཚུལ་རྣམས་ཀྱང། །ནམ་མཁའ་དག་པ་ལྟ་བུ་དང། །གྲིབ་མ་དང་ནི་གཟུགས་བརྙན་དང། །མཉམ་ཞིང་དྲི་མ་མེད་པར་མཐོང། །བྱང་ཆུབ་སེམས་དཔའ་ཐམས་ཅད་ནི། །ལྟ་བ་དག་ནི་རྟོགས་གྱུར་ཀྱང། །རྟོགས་པ་དག་ནི་མེད་པས་ན། །རང་བཞིན་ཡོངས་སུ་སྤོང་བར་བྱེད། །བྱང་ཆུབ་སེམས་དཔའ་ཐམས་ཅད་ནི། །ཇི་ལྟར་མཐོང་ཞིང་རྟོགས་བྱེད་པས། །ཆོས་ཀྱི་ཚུལ་ནི་ཐམས་ཅད་ལ། །རབ་ཏུ་གནས་པར་གྱུར་པ་ཡིན། །ཆོས་རྣམས་ཀུན་གྱི་དབྱིངས་དག་ལ། །བརྟན་པས་ནན་ཏན་བསྒྲུབས་པས་ན། །ཆོས་ཀྱི་དབྱིངས་ཀྱི་ཚུལ་དག་ལ། །ཐབས་མཁས་པ་ཞེས་བརྗོད་པ་ཡིན། །བྱང་ཆུབ་སེམས་དཔའ་ཐམས་ཅད་ནི། །ཆོས་ཀྱི་དབྱིངས་ལ་མི་གནས་པས། །ཆོས་ཀྱི་དབྱིངས་རྣམས་ཐམས་ཅད་ཀུན། །གཏན་དུ་ཡོད་མིན་ལྟ་བར་བྱེད། །བྱང་ཆུབ་སེམས་དཔའ་ཐམས་ཅད་ནི། །ཆོས་ཀྱི་དབྱིངས་རྣམས་རྟོགས་པས་ན། །ཆོས་རྣམས་ནམ་མཁའ་རླུང་རྣམས་ལ། །རྣམ་གཞག་མེད་ཅིང་ཐམས་ཅད་དུ། །ཁྱབ་པར་གྱུར་པ་བཞིན་དུ་མཐོང། །ཆོས་ཀྱི་དབྱིངས་ཀྱང་དེ་བཞིན་ཏེ། །ཐམས་ཅད་དུ་ནི་ཁྱབ་པ་ཡིན། །ཆོས་ཀྱི་དབྱིངས་ནི་བསམ་དཀའ་བས། །བསྟན་པར་བྱ་བར་རུང་མ་ཡིན། །བློ་ལྡན་དག་ནི་ཐམས་ཅད་
ཀུན། །རྟེན་པར་ཡང་ནི་མི་བྱེད་དོ། །བསྟན་མེད་དབྱིངས་ནི་གང་ཡིན་པ། །དེ་ནི་ཆོས་ཀྱི་དབྱིངས་ཤེས་བྱ། །གནས་པའི་གནས་ནི་མེད་པས་ན། །དེ་ནི་གནས་པ་ཞེས་བྱའོ། །ཆོས་ཀྱི་དབྱིངས་ལ་སྐྱེ་བ་མེད། །སྲོག་ཀྱང་མེད་ལ་རྒ་བའང་མེད། །འཆི་བ་མེད་ཅིང་བྱིང་བ་མེད། །ངེས་བར་འབྱུང་བའང་ཡོད་མ་ཡིན། །ཆོས་ཀྱི་དབྱིངས་ནི་བསམ་དཀའ་བས། །འོང་བ་མེད་ཅིང་འགྲོ་བ་མེད། །ཆོས་ཀྱི་དབྱིངས་ནི་ཕུང་པོ་མིན། །ཁམས་དང་སྐྱེ་མཆེད་ཀྱང་མ་ཡིན། །གནས་ཀྱང་སྤོང་པར་མི་བྱེད་པས། །གཡོ་བ་མེད་པར་གྱུར་པ་ཡིན། །ཆོས་ཀྱི་དབྱིངས་ཀྱི་དེ་བཞིན་ཉིད། །རང་བཞིན་དག་ནི་ཡོད་མ་ཡིན། །བྱང་ཆུབ་སེམས་དཔའ་ཐམས་ཅད་ཀྱིས། །ཆོས་ཀྱི་དབྱིངས་ནི་བསམ་དཀའ་བས། །དེ་ལྟར་ཁོང་དུ་ཆུད་གྱུར་ན། །ཆོས་ཀྱི་སྣང་བ་འཐོབ་པར་འགྱུར། །དེ་ཡི་དབང་གིས་བྱང་ཆུབ་ཀྱི། །སྙིང་པོར་ཡང་ནི་བགྲོད་པར་འགྱུར། སངས་རྒྱས་རྣམས་ཀྱི་ཆོས་ལ་ཡང། །ཐེ་ཚོམ་དག་ནི་མེད་པར་འགྱུར། །གཡོ་བ་དག་ནི་མེད་པར་ཡང། །ཆོས་ཀྱི་སྣང་བ་དག་གིས་ཀྱང། །སེམས་ཅན་དག་ནི་ཐམས་ཅད་ཀུན། །བདེ་བ་ཆེན་པོ་འཐོབ་པར་བྱེད། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཟབ་མོ་འདི་ལྟ་བུ་དག་ལ་ནན་ཏན་གྱིས་མངོན་པར་སྒྲུབ་པར་བྱེད་ན། །ཆོས་ཀྱི་སྣང་བ་དེ་ལྟ་བུ་འཐོབ་པར་འགྱུར་ཏེ། །ཤེས་རབ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ།། །། །།བམ་པོ་དྲུག་པ་སྟེ་ཐ་མ།། །།གཞན་ཡང་བློ་གྲོས་མཐའ་ཡས་དས་མངོན་བར་དྲན་ཏེ། སྔོན་བསྐལ་པ་གྲངས་མེད་པ་གཉིས་འདས་པ་ན་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ་བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཟླ་བའི་སྒྲོན་མའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། བསྐལ་པའི་མིང་ནི་བདུད་རྩི་ཞེས་བྱའོ། །འཇིག་རྟེན་གྱི་ཁམས་ནི་ཡོངས་སུ་དག་པར་བྱེད་པ་
ཞེས་བྱའོ། །སངས་རྒྱས་དེའི་ཞིང་ཆུ་ཤེལ་ལས་མངོན་བར་གྲུབ་པས་རྟག་ཏུ་འོད་ཟེར་གྱིས་ཞིང་དེ་ཀུན་དུ་གསལ་བར་བྱེད་དེ། །སེམས་ཅན་གང་འོད་ཟེར་དེས་རེག་པར་གྱུར་པ་དེ་དག་ཤིན་དུ་མཛེས་ཤིང་བྱང་བཞིན་བཟང་པོར་གྱུར་པས་དེའི་ཕྱིར་འཇིག་རྟེན་གྱི་ཁམས་དེ་ཡོངས་སུ་དག་པར་བྱེད་པ་ཞེས་བྱའོ། །དེ་ན་ལོགས་ཤིག་ན་གྲོང་ཁྱེར་དང། གྲོང་རྡལ་ཞེས་བྱ་བའི་མིང་ཡང་མེད་དེ། །ལམ་རྣམས་གྱ་ནོམ་ཞིང་གསེར་གྱི་ཐིག་པ་ཀྱེ་བ་ལམ་རྣམས་ཀྱི་བར་རེ་རེའི་ཚད་རྒྱང་གྲགས་ཕྱེད་ཕྱེད་ཡོད་དོ། །ལམ་རེ་རེའི་བར་ཏུ་ཡང་རིན་པོ་ཆེའི་ཀ་བ་དང། །ཏ་ལ་སྣ་ཚོགས་ཀྱི་ལྗོན་ཤིང་འོད་དང་ལྡན་པ་བརྒྱད་བཅུ་རྩ་བཞི་ཕྲེང་དུ་དཀྲིགས་སོ། །གཞན་ཡང་རྫིང་བུ་བཞི་ལམ་སྟེགས་ཀྱིས་བསྐོར་བ་ཡོད་དོ། །མི་རྣམས་ནི་རིན་པོ་ཆེ་སྣ་བདུན་གྱི་གཞལ་མེད་ཁང་དྲ་བས་གཡོགས་ཤིང་དར་གྱིས་ལྡ་ལྡི་སྤྱངས་པ། །མེ་ཏོག་གིས་རབ་ཏུ་མཛེས་པར་བྱས་པ་དག་ན་གནས་པས་དཔེར་ན་ལྷ་རྣམས་ཇི་ལྟ་བ་བཞིན་ནོ། །འཇིག་རྟེན་གྱི་ཁམས་དེའི་སེམས་ཅན་རྣམས་ནི་རབ་ཏུ་བདེ་ཞིང་བདེ་བ་དང་ལྡན་བས་དགེ་བ་བཅུའི་ལས་ཀྱི་ལམ་རྣམས་ཡོངས་སུ་རྫོགས་ཤིང་བྱང་བཞིན་ཤིན་དུ་སྡུག་པ། ཚེ་ཤིན་དུ་རིང་བ། འདོད་ཆགས་དང། ཞེ་སྡང་དང། གཏི་མུག་སྲབ་བ། གདུལ་སླ་བ། སྦྱོར་བ་ཆུང་ངུས་ཆོས་རྣམས་རྒྱ་ཆེར་རྟོགས་པ་ཤ་སྟག་གོ །དེ་བཞིན་གཤེགས་པ་དེའི་སྐུ་ཚེའི་ཚད་ནི་ལོ་བྱ་བ་ཕྲག་སྟོང་ཐུབ་པར་གྱུར་ཏོ། །ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནི་འཇིག་རྟེན་ན་ལོ་བྱེ་བ་སྙེང་གནས་པར་གྱུར་ཏོ། །འདུལ་པ་ལན་བཅུའི་ཆོས་བཤད་དེ། །འདུལ་བ་རེ་རེ་ལ་ཡང་ཉན་ཐོས་ཀྱི་འཁོར་སློབ་པའི་ས་ལ་གནས་པ་ནི་བྱེ་བ་ཁྲག་ཁྲིག་ཕྲག་ཉི་ཤུ་ཡོད་པར་གྱུར་ཏོ། །བྱང་ཆུབ་སེམས་དཔའི་འཁོར་ཐེག་པ་ཅིག་གི་ལམ་ལ་བགྲོད་པར་གྱུར་པ། དེའི་གྲངས་ནི་ཚད་ཀྱང་མེད་དོ། བློ་གྲོས་མཐའ་ཡས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་དེའི་བྱང་ཆུབ་ཀྱི་ཤིང་རིན་པོ་ཆེའི་ཚད་ཀྱང་རྒྱར་ནི་དཔག་ཚད་ལྔ་བཅུ་ཡོད་དོ། །སྲིང་དུ་ནི་དཔག་ཚད་བརྒྱ་ཡོད་དེ། རྩ་བ་ནི་བྱི་རུ་ལས་བྱས་པ། །སྡོག་པོ་ནི་བཻ་དཱུ་རྻ་ལས་བྱས་པ། །ཡལ་ག་ནི་གསེར་ལས་བྱས་པ། །ལོ་མ་ནི་རྡོའི་སྙིང་པོ་
ལས་བྱས་པའོ། བྱང་ཆུབ་ཀྱི་གདན་གྱི་ཚད་ཀྱང་ཆུ་ཞིང་འདྲ་སྟེ། དཔག་ཚད་བརྒྱ་བརྒྱ་ཡོད་དོ། །གདན་དེའི་མཐའ་མ་ནི་ལན་གན་གྱིས་འཁོར་བར་བསྐོར་ཏོ། །ཏ་ལའི་ལྗོན་ཤིང་མཆོག་རྣམས་ཀྱིས་ནི་ཕྲེང་དུ་དཀྲིགས་ཏེ། །གསེར་གྱི་དྲིལ་བུ་དང། རིན་པོ་ཆེའི་དྲ་བས་གཡོགས་ཤིང་རབ་ཏུ་བརྒྱན་པར་གྱུར་ཏོ། །བྱང་ཆུབ་ཆེན་པོའི་གདན་དེ་འཕང་དུ་ནི་དཔག་ཚད་གསུམ་ཡོད་དེ། གདན་ཤིན་ཏུ་ཕྲ་ཞིང་འཇམ་པ་དག་དེའི་སྟེང་དུ་བཏིང་ངོ། །གོས་མཆོག་དམ་པ་བརྒྱ་སྟོང་སྙེད་ཀྱིས་བརྒྱན་ཅིང་སྦྱངས་པར་གྱུར་ཏེ། གདུགས་དང། རྒྱལ་མཆན་དང། བ་དན་ཉི་ཤུ་ནི་གཡས་གཡོན་དུ་དཀྲིགས་སོ། །དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་གདན་དེ་ལ་བཞུགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེའི་ཚེ་འཇིག་རྟེན་གྱི་ཁམས་དེ་ན་ངན་སོང་གསུམ་ཡང་མེད། ངན་སོང་གསུམ་གྱི་མིང་ཡང་མེད། །མི་ཁོམ་པ་རྣམས་ཀྱང་མེད། མི་ཁོམ་པ་རྣམས་ཀྱི་མིང་ཡང་མེད་དེ། །དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་དེ་ནི་རྟག་པར་འཇིག་རྟེན་གྱི་ཁམས་ཐམས་ཅད་དུ་སྤྲུལ་པའི་སྐུ་བསྟན་ནས་ཆོས་ཀྱི་འཁོར་ལོ་བསྐོར་བར་མཛད་དོ། །བློ་གྲོས་མཐའ་ཡས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་དེ་ལ་བྱང་ཆུབ་སེམས་དཔའ་གཉིས་ཡོད་དེ། གཅིག་གིས་མིང་ནི་སྤྲིན་གྱི་དབྱངས་ཤེས་བྱའོ། །གཅིག་གི་མིང་ནི་དཔག་མེད་དབྱངས་ཤེས་བྱའོ། །བྱང་ཆུབ་སེམས་དཔའ་དེ་གཉིས་ཀྱིས་དེ་བཞིན་གཤེགས་པ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པ་འཐོབ་པར་འགྱུར་ལགས། དེ་སྐད་ཅེས་གསོལ་པ་དང། དེའི་ཚེ་དེ་བཞིན་གཤེགས་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་མཁས་པ་འཐོབ་པར་བྱ་བའི་ཕྱིར་བྱང་ཆུབ་སེམས་དཔའ་དེ་གཉིས་ལ་ཆོས་དེ་རྒྱ་ཆེར་ཡང་དག་པར་རབ་ཏུ་བསྟན་ཏེ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་དེ་ཐོས་པས་ཆོས་ཐམས་ཅད་ཀྱི་རྣམ་པར་གཞག་པའི་ཐབས་ལ་
མཁས་པ་ཐོབ་པར་གྱུར་ཏེ། །བྱང་ཆུབ་སེམས་དཔའ་དེ་གཉིས་ཀྱང་དེའི་འོག་ཏུ་ལོ་ཉི་ཁྲིའི་བར་དུ་གཉིད་ཀྱང་མེད། འདོད་པ་དང། ཁོང་ཁྲོ་བ་དང། རྣམ་པར་འཚེ་བའི་བསམ་པ་ཡང་མེད། ཟས་ཀྱི་འདུ་ཤེས་ཀྱང་མེད། ཉལ་བའི་འདུ་ཤེས་ཀྱང་མེད། ན་བའི་རྐྱེན་ཡང་མེད། སྨན་ལ་སོགས་པ་ཡོངས་སུ་ཚོལ་བའི་འདུ་ཤེས་ཀྱང་མེད། འཇིག་རྟེན་པའི་ལྟད་མོ་དང། གཏམ་དང། རྩེད་མོ་ལ་ཡང་དགའ་བ་མེད་པར་དེ་བཞིན་གཤེགས་པ་དེས་ཆོས་བསྟན་པ་རྩེ་གཅིག་ཏུ་མཉམ་པས་སྟན་ལས་མ་ལངས་པར་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་དེ་བཞིན་གཤེགས་པ་དེས་བཀའ་སྩལ་པ། རིགས་ཀྱི་བུ་ཆོས་ཐམས་ཅད་ཀྱི་ཚུལ་རྣམ་པར་གཞག་པ་ལ་འདི་ལྟར་ཐབས་མཁས་པར་གྱུར་དེ་དེད་ཁྱེད་ཡོངས་སུ་ཚོལ་བར་བྱེད་དམ། བྱང་ཆུབ་སེམས་དཔའ་དེ་གཉིས་ཀྱིས་གསོལ་པ་བཅོམ་ལྡན་འདས་བདག་ཅག་ནི་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པའི་མིང་ཡང་ཡང་དག་པར་རྗེས་སུ་མི་མཐོང་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པའི་ཆོས་མཆིས་པར་ཡང་ཡང་དག་པར་རྗེས་སུ་མི་མཐོང་ན་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་ལ་མཁས་པ་ལྟ་སྨོས་ཀྱང་ཅི་འཚལ་ལགས། བཅོམ་ལྡན་འདས་བདག་ཅག་ནི་ཆོས་ཐམས་ཅད་ཀྱང་ཡང་དག་པར་མི་དམིགས། །ཆོས་རྣམས་ཀྱི་རྣམ་པར་གཞག་པ་ཡང་ཡང་དག་པར་མི་དམིགས་པས་ཆོས་ཐམས་ཅད་ལ་གནས་པ་ཡང་མ་ལགས། །མི་གནས་པ་ཡང་མ་ལགས་སོ། །བཅོམ་ལྡན་འདས་བདག་ཅག་དེ་ལྟར་མཐོང་བ་ལ་ཆོས་ཐམས་ཅད་ཀྱི་ཚུལ་རྣམ་པར་གཞག་པ་འདི་ལྟར་ཐབས་མཁས་པ་དེ་ཡོངས་སུ་ཚོལ་བར་བགྱིད་པ་འམ། ཡོངས་སུ་ཚོལ་བར་མི་བགྱིད་པ་ལྟ་མཆིས་པར་ག་ལ་འགྱུར། །བཅོམ་ལྡན་འདས་བདག་ཅག་ནི་ཆོས་ཐམས་ཅད་ཀྱི་ཚུལ་རྣམ་པར་གཞག་ལ་དེ་ལྟར་ཐབས་མཁས་པ་ཡོངས་སུ་ཚོལ་བར་བགྱིད་པ་ཡང་ཡང་དག་པར་རྗེས་སུ་མི་མཐོང། ནང་ངམ། ཕྱི་རོལ་ལམ། དེ་གཉིས་ཀྱི་བར་རམ། ཆོས་ཐམས་ཅད་ཅེས་བགྱི་བ་འམ། ཆོས་ཀྱི་ཚུལ་ལ་དེ་ལྟར་ཐབས་མཁས་པ་རྣམ་པར་གཞག་པ་
ཞེས་བགྱི་བ་ཡང་དག་པར་རྗེས་སུ་མི་མཐོང། ཆོས་འགའ་ཡང་ནང་ངམ། སླད་རོལ་ལམ། དེ་གཉིས་ཀྱི་བར་རམ། ཆོས་ཐམས་ཅད་ཅེས་བགྱིད་བའམ། ཆོས་ཀྱི་ཚུལ་ལ་ཐབས་མཁས་པ་རྣམ་པར་གཞག་པ་ཞེས་བགྱི་བ་ཡང་ཡང་དག་པར་རྗེས་སུ་མི་མཐོང་ལགས་སོ། བཅོམ་ལྡན་འདས་བདག་ཅག་ནི་ཐ་ན་ཆོས་ཅུང་ཟད་ཙམ་ཡང་ནང་ངམ། སླང་རོལ་ལམ། དེ་གཉིས་ཀྱི་བར་རམ། ཆོས་ཀྱི་ཚུལ་ལ་ཐབས་མཁས་པ་རྣམ་པར་གཞག་པ་ཞེས་བགྱི་བ་བགྲོད་པར་བགྱིར་རུང་བ་འམ་སྟེན་པར་བགྱིར་རུང་བ་ཡང་ཡང་དག་པར་རྗེས་སུ་མ་མཐོང་ལགས་སོ། །བཅོམ་ལྡན་འདས་དེ་ལྟར་ཆོས་འགའ་ཙམ་ཡང་གཞོལ་བར་བགྱིད་པ་འམ་བསྟེན་བར་བགྱིད་རུང་བ་མ་མཆིས་ན་བདག་ཅག་གིས་ཇི་ལྟར་དེ་རྣམ་པར་གཞག་པར་བགྱི་ལགས། བཅོམ་ལྡན་འདས་དག་ཅག་གིས་ནི་འདས་པ་འམ། ད་ལྟར་བྱུང་བ་འམ། མ་འོངས་པ་གང་ཡང་རྣམ་པར་གཞག་པའི་གནས་སུ་གྱུར་པར་ཡང་ཡང་དག་པར་རྗེས་སུ་མ་མཐོང་ལགས་སོ། །གལ་ཏེ་རྣམ་པར་གཞག་པའི་གནས་ཡང་དག་པར་མཆིས་པ་མ་ལགས་ན་བདག་ཅག་གིས་གང་དུ་ཅི་ཞིག་རྣམ་པར་གཞག་པར་གྱི་ལགས། བཅོམ་ལྡན་འདས་རྣམ་པར་གཞག་པ་མ་མཆིས་པའི་སླད་དུ་རྗེས་སུ་འཐུན་པ་ལ་གནས་པ་ཡང་མ་ལགས། རྗེས་སུ་མི་མཐུན་བ་ལ་མི་གནས་པ་ཡང་མ་ལགས་བས་བསམ་པ་མ་མཆིས་པ་དང་མཚུངས་པར་ལྡན་པ་དང། སྐྱེ་བ་མ་མཆིས་པ་དང་མཚུངས་པར་ལྡན་བར་གྱུར་པ་ལགས་སོ། །བཅོམ་ལྡན་འདས་བདག་ཅག་ནི་གང་ལས་གང་གིས་གང་དུ་གང་གི་ཚེ་བདག་ཅག་གི་སེམས་དང། ཡིད་དང། རྣམ་པར་ཤེས་པ་སྐྱེ་བ་འམ། འགག་པ་ཞེས་བགྱི་པ་ཡང་དག་པར་རྗེས་སུ་མ་མཐོང་ན་སེམས་དང་ཡིད་དང། རྣམ་པར་ཤེས་པས་ཆོས་ཐམས་ཅད་ཀྱི་ཚུལ་ལ་ཐབས་མཁས་པ་རྣམ་པར་གཞག་པ་ཞེས་ཇི་སྐད་དུ་བརྗོད་པར་བགྱི་ལགས། བློ་གྲོས་མཐའ་ཡས་བྱང་ཆུབ་སེམས་དཔའ་དེ་གཉིས་ཀྱིས་དེ་བཞིན་གཤེགས་པ་དེའི་སྤྱན་སྔར་དེ་སྐད་སྨྲས་པའི་ཚེ་བྱང་ཆུབ་སེམས་དཔའ་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་བྱེ་བ་ཕྲག་སྟོང་གིས་ནི་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོས་ཡང་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཇི་ལྟར་ཁྱེད་གནས་པ་མེད་པས་གནས་མེད་པ་ལ་གནས་ནས་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་མཁས་པ་ལ་གནས་པ་དེ་བཞིན་དུ་རིགས་ཀྱི་བུ་ཆོས་ཐམས་ཅད་ཀྱང་དེ་བཞིན་ཏེ། དེ་བཞིན་གཤེགས་པ་འཇིག་རྟེན་པའི་རྗེས་སུ་འཐུན་པར་མཛད་པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་བརྙེས་པར་སྟེན་པར་མཛད་དོ། །གལ་ཏེ་དེ་བཞིན་གཤེགས་པ་འཇིག་རྟེན་པའི་རྗེས་སུ་འཐུན་བར་མི་མཛད་ན་དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་བ་མངོན་དུ་མཛད་པ་ཡང་མི་སྟོན་ཏོ། རིགས་ཀྱི་བུ་ཆོས་རྣམས་ལ་ནི་གནས་མེད་དོ། །གནས་མེད་པ་ཡང་མ་ཡིན་ནོ། །གནས་དང་གནས་མེད་པ་ཞེས་བྱ་བ་གང་ཡིན་བ་དེ་དག་ཐམས་ཅད་ནི་འཇིག་རྟེན་པའི་རྫེས་སུ་འབྲང་བའོ། འཇིག་རྟེན་པའི་རྗེས་སུ་འབྲང་བ་གང་ཡིན་པ་དེ་ལ་ནི་ཆོས་འགའ་ཙམ་ཡང་སྐྱེ་བར་བྱ་བ་འམ། ཁོང་དུ་ཆུད་པར་བྱ་བ་མེད་པས་དེའི་ཕྱིར་རིགས་ཀྱི་བུ་ནན་ཏན་བརྩོན་འགྲུས་བསྐྱེད་ནས་མྱུར་དུ་ཆོས་རྣམས་ལས་རྣམ་པར་གྲོལ་བ་འཐོབ་པར་བྱའོ། །བྱང་ཆུབ་སེམས་དཔའ་དེ་གཉིས་དེ་བཞིན་གཤེགས་པ་དེ་ལས་ཆོས་དེ་ལྟ་བུ་ཐོས་པ་དང། ནམ་མཁའ་ལ་འཕགས་ནས་ཚིགས་སུ་བཅད་དེ་དེ་བཞིན་གཤེགས་པ་ལ་མངོན་པར་བསྟོད་པ། །ཆོས་ཀྱི་རྒྱལ་པོ་བསམ་མི་ཁྱབ། །ངོ་མཚར་ཆོས་ནི་རབ་ཏུ་བརྙེས། །ཐམས་ཅད་མཁྱེན་པ་རྐང་གཉིས་གཙོ། །སངས་རྒྱས་ཆོས་ནི་བླ་ན་མེད། །ཆོས་ཉིད་བླ་ན་མ་མཆིས་སླད། །དེ་བཞིན་གཤེགས་དང་མཚུངས་མ་མཆིས། །ཆོས་རྣམས་སྐྱེ་བ་མ་མཆིས་པས། །དིང་བདག་བཟོད་པ་འདི་ཐོབ་ལགས། །བདག་ནི་རྟག་ཏུ་སྐྱེ་བ་དང། །སྐྱེ་བ་མ་མཆིས་རྟོག་མི་བགྱིད། །དེ་བཞིན་རྣམ་མི་རྟོག་ལ་ཡང། །ཐམས་ཅད་བསམ་བར་མི་བགྱིད་དོ། །ཆོས་རྒྱལ་ཐུབ་པ་ཆེན་པོ་ཏེ། །ཡོན་ཏན་ཚིག་དང་རྟོག་སྤངས་པ། །རྣམ་པར་དག་པའི་ཆོས་
བསྟན་ནས། །འཁོར་རྣམས་དགའ་བར་མཛད་དུ་གསོལ། །སངས་རྒྱས་ཡོན་ཏན་མཆོག་དག་གི། །མཐའ་ནི་གང་ཞིག་རྟོགས་འཚལ་བས། །བསྐལ་པ་ཚད་མེད་རབ་བརྟགས་ཀྱང། །དམིགས་པར་ཡང་ནི་མི་འགྱུར་རོ། །ཡོན་ཏན་དཔག་ཏུ་མ་མཆིས་སླད། ཁྱད་པར་འཕགས་ཤིང་བླ་ན་མེད། །ཆོས་རྣམས་སྐྱེ་བ་མ་མཆིས་ལ། །བདག་ནི་རྟོག་པར་མི་བགྱིད་དོ། །བདག་ནི་སངས་རྒྱས་ཆོས་དག་ལ། །རྣམ་པར་འཛིན་པར་མི་བགྱིད་པས། །དགེ་བའི་རྩ་བ་མང་པོ་དག །ཇི་ལྟར་འཐོབ་སྙམ་སེམས་མི་བགྱིད། །ཆོས་རྣམས་བསྟན་དུ་མ་མཆིས་ཤིང་། །སྐྱེ་དང་མཚན་མ་མ་མཆིས་པས། །འདི་ལྟར་མཚན་མ་མ་མཆིས་བཟོད། །འདི་ནི་ཐམས་ཅད་མངོན་དུ་གྱུར། །དེང་བདག་ཐོབ་པའི་བཟོད་པ་འདི། །ནམས་ཀྱང་ལྡོག་པར་མི་འགྱུར་བས། །དེ་སླད་ཐམས་ཅད་མཁྱེན་པ་ལ། །དེས་ན་དགའ་བ་སྐྱེས་པ་ལགས། །དེ་བཞིན་གཤེགས་པའི་ཆོས་ལ་བདག །དེས་བར་སོམ་ཉི་མ་མཆིས་པས། །ཆོས་རྣམས་ཐམས་ཅད་དག་ལ་ཡང། །ཐེ་ཚོམ་མང་པོ་རབ་ཏུ་སྤངས། །བླ་མེད་སངས་རྒྱས་ཆོས་དག་ལས། །དིང་བདག་བཟོད་པ་འདི་ཐོབ་ཀྱང། །བདག་ནི་རྟོག་པར་ཡོད་མི་བགྱིད། །རྟོག་པ་མ་མཆིས་པ་ཡང་མིན། །བློ་གྲོས་མཐའ་ཡས་བྱང་ཆུབ་སེམས་དཔའ་དེ་གཉིས་ཀྱིས་ཚིགས་སུ་བཅད་པ་འདི་དག་སྨྲས་ནས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་ལ་ལན་གསུམ་བསྐོར་བ་བྱས་ཏེ། ལྷའི་མེ་ཏོག་དང། ཙན་དན་གྱི་ཕྱེ་བས་དེ་བཞིན་གཤེགས་པ་ལ་མངོན་པར་གཏོར་ཏོ། །དེ་ནས་དེ་བཞིན་གཤེགས་པ་དེས་ཀྱང་འདི་སྐད་དུ་ཁྱེད་བསྐལ་པ་ཉི་ཁྲི་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་བར་རྫོགས་པར་འཚང་རྒྱ་བར་འགྱུར་ཏོ། །ཞེས་ལུང་བསྟན་ཏོ། །བྱང་ཆུབ་སེམས་དཔའ་དེ་གཉིས་ཀྱང་དེ་བཞིན་གཤེགས་པས་ལུང་བསྟན་པ་ཐོབ་པས་རབ་ཏུ་དགའ་བར་གྱུར་ཏེ། དེ་བཞིན་གཤེགས་པ་ལ་སེམས་རྩེ་གཅིག་ཏུ་བརྟགས་ནས་བསམ་གཏན་རྣམས་ལ་ཞུགས་པས་རྫུ་འཕྲུལ་གྱིས་རྣམ་པར་རྩེན་པ་དང། །དུད་པ་འཐུལ་བ་དང། འོང་འབྱིན་པ་དག་ལ་རང་དབང་ཐོབ་པར་གྱུར་ཏོ། །གཞན་ཡང་སེམས་ཅན་
རྣམས་ལ་ཆོས་ཡང་དག་པར་རྣམ་པར་ཕྱེ་སྟེ་བསྟན་པས་ལྷ་དང། མི་བྱེ་བ་ཕྲག་ཉི་ཤུ་རྩ་བཞི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་གྱུར་ཏོ། །བྱང་ཆུབ་སེམས་དཔའ་དེ་གཉིས་ཇི་སྲེད་འཚོའི་བར་དུ་ནན་ཏན་གྱིས་ཚངས་པར་སྤྱོད་པ་ཡང་དག་པར་སྤྱད་ནས་དེ་བཞིན་གཤེགས་པ་དེས་དུས་བར་མར་གསུངས་པའི་ཡང་དག་པའི་ཆོས་དང། དུས་ཐ་མར་གསུངས་པའི་ཡང་དག་པའི་ཆོས་རྣམས་རབ་ཏུ་བསྲུངས་ཤིང་ཡོངས་སུ་བཟུང་ངོ། གཞན་ཡང་དེའི་ཚེ་དེ་དག་གིས་སེམས་ཅད་བྱེ་བ་ཕྲག་བཞིའི་བར་དུ་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱས་སོ། །བྱང་ཆུབ་སེམས་དཔའ་དེ་གཉིས་རིམ་གྱིས་སངས་རྒྱས་བརྒྱ་སྟོང་མང་པོ་ལ་རིམ་གྲོ་དང། མཆོད་པ་བྱས་ནས་དེ་བཞིན་གཤེགས་པ་རྣམས་ཀྱི་ཏིང་ངེ་འཛིན་དང། ཡང་དག་པའི་ཆོས་རྣམས་མ་ལུས་པར་ཡོངས་སུ་བཟུང་བས་བསྐལ་པ་ཉི་ཁྲི་འདས་ནས་དེ་བཞིན་གཤེགས་པ་རིན་པོ་ཆེའི་ཏོག་ཅེས་བྱ་བ་ཆོས་ཀྱི་འཁོར་ལོ་རྗེས་སུ་བསྐོར་བ་དང་ཕྲད་པར་གྱུར་པས་སེམས་ཅན་ཚད་མེད་པ་སྙེད་བཏུལ་ཏེ། །ཡོངས་སུ་སྨིན་པར་བྱས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་གྱུར་ཏོ། །དེ་བཞིན་གཤེགས་པ་རིན་པོ་ཆེའི་ཏོག་དེའི་ཞིང་ནི་ཤིན་ཏུ་རྣམ་པར་དག་ཅིང་ཉན་ཐོས་ཀྱི་མིང་ཡང་མེད་པས་ཚེ་གཅིག་གིས་ཐོགས་པའི་བྱང་ཆུབ་སེམས་དཔའ་འབའ་ཤིག་གིས་གང་བར་གྱུར་ཏོ། །དེ་བཞིན་གཤེགས་པ་རིན་པོ་ཆེའི་ཏོག་ཡོངས་སུ་མྱ་ངན་ལས་འདས་པའི་ཚེ་འདི་སྐད་དུ་ད་ཡོངས་སུ་མྱ་ངན་ལས་འདས་པའི་འོག་ཏུ་བྱང་ཆུབ་སེམས་དཔའ་སྤྲིན་གྱི་དབྱངས་ཤེས་བྱ་བའི་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མཚན་ཡང་དེ་བཞིན་གཤེགས་པ་ཉི་མའི་སྒྲོན་མའི་རྒྱལ་པོ་ཞེས་བྱ་བར་འགྱུར་རོ། སངས་རྒྱས་དེའི་ཞིང་ནི་བཀོད་པ་ཕུན་སུམ་ཚོགས་པ། ཡོན་ཏན་དཔག་ཏུ་མེད་པ་ལས་མངོན་པར་གྲུབ་པ། བྱང་ཆུབ་སེམས་དཔའ་དང། ཉན་ཐོས་ཀྱི་འཁོར་ཕུན་སུམ་ཚོགས་པར་མ་གྱུར་པ་མེད་དོ། །དེ་བཞིན་གཤེགས་པ་ཉི་མའི་སྒྲོན་མའི་རྒྱལ་པོ་ཡོངས་སུ་མྱ་ངན་ལས་
འདས་པའི་འོག་ཏུ་བྱང་ཆུབ་སེམས་དཔའ་དཔག་ཏུ་མེད་པའི་དབྱངས་ཤེས་བྱ་བ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་བར་རྫོགས་པར་འཚང་རྒྱ་བར་འགྱུར་ཏོ། ཞེས་ལུང་བསྟན་ཏོ། བློ་གྲོས་མཐའ་ཡས་ཆོས་ཀྱི་རྣམ་གྲངས་འདི་ནི་དམིགས་སུ་མེད་པའི་ཕྱིར་དང། ཚིག་མེད་པའི་ཕྱིར་བསྟན་དུ་མེད་པ། སྐྱེ་བ་མེད་པ། འགག་པ་མེད་པ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ནན་ཏན་བརྩོན་འགྲུས་ཀྱིས་ཚུལ་བཞིན་དུ་བསྒྲུབ་པར་བྱའོ། །བྱང་ཆུབ་སེམས་དཔའ་གང་ཆོས་ཐམས་ཅད་ཀྱི་ཚུལ་རྣམ་པར་གཞག་པའི་ཐབས་མཁས་པ་ལ་གནས་ཤིང་དམིགས་སུ་མེད་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ན་སངས་རྒྱས་ཀྱི་ཆོས་ཡོངས་སུ་རྫོགས་པ་དང། ཡོན་ཏན་ཚད་མེད་པས་རབ་ཏུ་བརྒྱན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། བློ་གྲོས་མཐའ་ཡས་ང་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཆོས་འདི་མ་གཏོགས་པར་གུད་ན་ཆོས་ཅུག་ཟད་ཙམ་ཡང་ཐམས་ཅད་མཁྱེན་པའི་ཡེ་ཤེས་མངོན་བར་བསྒྲུབ་པར་འགྱུར་བ་ཡོད་པར་ཡང་རག་པར་མི་སྨྲ་འོ། །གང་ལ་ལ་ཞིག་སྐྱེ་བ་མེད་པ། འགག་པ་མེད་པ། ། ཤིན་ཏུ་ཟབ་པ། སྟོང་པ་ཉིད་ཀྱི་ཆོས་འདི་ནན་ཏན་བརྩོན་འགྲུས་ཀྱིས་ཡང་དག་པར་བསྒྲུབ་པར་བྱེད་པ་ན་མྱུར་དུ་བྱང་ཆུབ་སེམས་དཔའ་ཆོས་ཀྱི་ཚུལ་ལ་ཐབས་མཁས་པ་དང། གཟུགས་དང། སྤོབས་པ་ཕུན་སུམ་ཚོགས་པ་དང། བླ་ན་མེད་པའི་ཡོངས་སུ་སྡུད་པ་འཐོབ་པར་འགྱུར་ཞིང་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་བསྔགས་པ་བརྗོད་པ་དང། ཆོས་ཀྱི་བཀོད་པའི་ཡོ་བྱང་ཀྱིས་རབ་ཏུ་བརྒྱན་པ་དང། སྦྱིན་པ་ཡོངས་སུ་ཚོགས་པ་དང། ཚུལ་ཁྲིམས་རྣམ་པར་དག་ལ་གནས་པ་དང། བཟོད་པ་རྣམ་པར་དག་པ་དང། བླ་ན་མེད་པའི་བརྩོན་འགྲོས་དང། དམིགས་པ་མེད་པའི་བསམ་གཏན་དང། ཤེས་རབ་ཆེན་པོ་ཐོབ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་བས་མཆོག་ཏུ་གྱུར་པའི་ནང་ན་རབ་མཆོག་ཏུ་གྱུར་པ་དང། མྱུར་དུ་ཐམས་ཅད་མཁྱེན་པ་ཞེས་བྱ་བའི་མིང་ཐོབ་ནས་བྱང་ཆུབ་ཀྱི་སྙིང་པོ་ལ་འདུག་པར་འགྱུར་བས་རྒྱལ་པོ་
ཆེན་པོ་བཞི་གདུགས་ཐོགས་ནས་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པས་ལྷ་དང་མི་རྣམས་ལ་སྣང་བ་ཆེན་པོ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་འགོད་པར་འགྱུར་ཏོ། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་བརྩོན་འགྲུས་ཀྱིས་སྒྲུབ་པར་བྱེད་ན་ཆོས་ཐམས་ཅད་ཆོས་ཀྱི་དབྱིངས་དང་མཚུངས་པ་ཉིད་དུ་མཐོང་པར་འགྱུར་ཏེ། དེ་ལྟར་མཐོང་བའི་ཚེ་ཆོས་ཀྱི་དབྱིངས་ལ་ཡང་ཆོས་ཐམས་ཅད་དུ་མི་མཐོང་ལ། ཆོས་རྣམས་ལ་ཡང་ཆོས་ཀྱི་དབྱིངས་སུ་མི་མཐོང་བས་བརྩོན་འགྲུས་ཀྱིས་མངོན་པར་སྒྲུབ་པར་བྱེད་དོ། ཆོས་ཐམས་ཅད་ཀྱི་ཁམས་འདུས་པ་ལ་ཐབས་མཁས་པས་ཆོས་ཐམས་ཅད་ཀྱི་ཁམས་ལ་ཡང་མངོན་པར་ཞེན་པ་ཡང་མེད་གཡོའ་བ་ཡང་མེད་དོ།། ཆོས་ཐམས་ཅད་ཀྱི་ཁམས་འདུས་པ་ལ་ཐབས་མཁས་ཤིང་མངོན་བར་ཞེན་པ་ཡང་མེད། རྣམ་པར་རྟོག་པ་ཡང་མེད་པས་ཆོས་གཅིག་ཏུ་འདུས་པའི་ནང་དུ་ཆོས་ཐམས་ཅད་འདུས་པར་མཐོང་ལ། །ཆོས་ཐམས་ཅད་འདུས་པའི་ནང་དུ་ཆོས་གཅིག་འདུས་པར་མཐོང་ཡང་ཆོས་ཐམས་ཅད་འདུས་པས་ཆོས་གཅིག་འདུས་པ་ལ་བསྟེན་པར་ཡང་མི་བྱེད་ལ། ཆོས་གཅིག་གི་འདུལ་པས་ཀྱང་ཆོས་ཐམས་ཅད་ཀྱི་འདུས་པ་ལ་སྟེན་པར་མི་བྱེད་དོ། །ཆོས་འདི་གཅིག་རབ་ཏུ་རྟོགས་པའི་ཕྱིར་ཡང་ཆོས་ཐམས་ཅད་རབ་ཏུ་རྟོགས་པར་འགྱུར་ལ། ཆོས་ཐམས་ཅད་རབ་ཏུ་རྟོགས་པའི་ཕྱིར་ཡང་ཆོས་འདི་གཅིག་ཤེས་པར་བྱ་བའི་གནས་རྣམས་རབ་ཏུ་རྟོགས་པར་འགྱུར་ཡང་ཆོས་རྣམས་ཀྱིས་ཆོས་ཐམས་ཅད་ལ་སྟེན་པར་མི་བྱེད་དོ། །ཉེ་བར་ལེན་པའི་ཕུང་པོ་རྣམས་འདུས་པ་རྟོགས་པར་ཁོང་དུ་ཆུང་པས་ཉེ་བར་ལེན་པའི་ཕུང་པོ་སྣ་ཚོགས་ཀྱི་ངོ་བོ་ཉིད་ཀྱི་མཚན་ཉིད་ལ་ཡང་འདུས་པ་ཡོད་པ་འམ། འདུས་པ་མེད་པ་པར་མངོན་བར་ཞེན་པ་སྐྱེད་པར་མི་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་སྤྱོད་པའི་ཚེ་ཆོས་གང་རྒྱུ་དང། རྐྱེན་མང་པོ་འདུས་པ་ལས་སྐྱེ་བ་དང། ཆོས་གང་རྒྱུ་དང། རྐྱེན་མང་པོ་འདུས་པ་ལས་མངོན་བར་སྒྲུབ་པར་འགྱུར་བའི་ཆོས་དེ་དག་ཀྱང་རྟོགས་པར་
ཁོང་དུ་ཆུད་ངོ་། །ཆོས་གང་རྒྱུ་དང། རྐྱེན་འདུས་པ་ལས་རྣམ་པ་སྣ་ཚོགས་ཀྱི་ངོ་བོ་ཉིད་མཚུངས་པར་ལྡན་བར་འབྱུང་བར་འགྱུར་བའི་ཆོས་གང་ཡིན་པ་དེ་དག་རྟོགས་པར་ཁོང་དུ་ཆུང་ཀྱང་མངོན་པར་ཞེན་པ་ཡང་མེད་ལ། ཆོས་ཐམས་ཅད་ཅེས་གང་གས་པའི་མཚན་ཉེད་ཀྱང་རྗེས་སུ་རྟོགས་པར་བྱེད་ངོ། མཚན་མ་དང་བཅས་པ་དང། མཚན་མ་མེད་པ་ཡང་རབ་ཏུ་རྟོགས་པར་བྱེད་དོ། །ཁམས་རྣམས་ཀྱི་བྱེ་བྲག་དང། ཁམས་སྣ་ཚོགས་ཀྱི་ངོ་བོ་ཉིད་ཀྱིས་མཚན་ཉིད་ཀྱི་བྱེ་བྲག་ཀྱང་རབ་ཏུ་རྟོགས་པར་འགྱུར་རོ། །གང་གིས་རྒྱུ་བྱས་ནས་ཉོན་མོངས་པས་རྟེན་ཅིང་འབྲེལ་པར་འབྱུང་བའི་ཆོས་རྣམས་ལ་སྟེན་པ་དང། གཞོལ་བར་མི་འགྱུར་བ་ཡང་ཁོང་དུ་ཆུད་པར་འགྱུར་རོ། འཇིག་རྟེན་དང། འཇིག་རྟེན་ལས་འདས་པའི་ཆོས་རྣམས་ཕན་ཚུན་མི་འགལ་བར་ཡང་རྗེས་སུ་རྟོགས་པར་འགྱུར་ཏོ། །འཇིག་རྟེན་དང། འཇིག་རྟེན་ལས་འདས་པའི་ཆོས་ཐམས་ཅད་དང། འཇིག་རྟེན་པའི་མཚན་ཉིད་ཀྱི་ཕྱག་རྒྱ་ཡང་ཡོངས་སུ་རྟོགས་པར་འགྱུར་རོ། །ཆོས་ཀྱི་རྣམ་གྲངས་གཅིག་གིས་ཀྱང་ཆོས་ཐམས་ཅད་ཀྱི་རྣམ་གྲངས་ཁོང་ཆུད་པར་བྱེད་ལ། ཆོས་ཀྱི་གྲངས་མང་པོས་ཀྱང་ཆོས་གཅིག་གིས་རྣམ་གྲངས་ཁོང་དུ་ཆུད་པར་བྱེད་དོ། ཆོས་ཐམས་ཅད་ཀྱི་རྣམ་གྲངས་ཀྱིས་ཀྱང་ཆོས་གཅིག་གི་རྣམ་གྲངས་ལ་སྟེན་པར་མི་བྱེད་ལ། ཆོས་གཅིག་གི་རྣམ་གྲངས་ཀྱིས་ཀྱང་ཆོས་རྣམས་ཀྱི་རྣམ་གྲངས་ལ་སྟེན་པར་མི་བྱེད་དོ། །ཆོས་ཀྱི་རྣམ་གྲངས་དེ་ལྟ་བུ་དག་མ་ལུས་པར་ཡོངས་སུ་སྦྱོང་པར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་འདི་ནན་ཏན་གྱིས་སྒྲུབ་པར་བྱེད་པ་དེ་དག་ནི་ཚུལ་གཅིག་བའི་ཚིག་གཅིག་པའི་ཚིག་གི་བསྟན་པའི་རྣམ་གྲངས་གཅིག་གིས་ཆོས་ཐམས་ཅད་ཀྱི་ངོ་བོ་ཉིད་རོ་གཅིག་པ་ཁོང་དུ་ཆུད་པར་འགྱུར་བས་ཆོས་ཐམས་ཅད་ལ་རྩོད་པ་མེད་པ་ཚུལ་བཞིན་གྱིས་རབ་ཏུ་དབེན་པའི་མཆོག་འཐོབ་པར་འགྱུར་ཏེ། ཕན་ཚུན་འགལ་བ་མེད་པར་འཁོར་མང་པོའི་ནང་དུ་ཆོས་འདིའི་བསྔགས་པ་བརྗོད་ནས་ཡང་དག་པར་བསྟན་པ་དང། ནན་ཏན་གྱིས་བསྒྲུབས་པས་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཡང་རབ་ཏུ་འཐོབ་བར་འགྱུར་རོ། །དེ་ལྟར་མངོན་པར་བསྒྲུབས་པས་རྩོད་པ་
དང་བཅས་པ་འམ། རྩོད་པ་མེད་པར་ཡང་རུང་སྟེ། དེ་དག་ཐམས་ཅད་ཉེ་བར་ཞི་བར་གྱུར་བས་ཚུལ་བཞིན་དུ་གནས་པར་འགྱུར་རོ། །ང་རྒྱལ་དང་། བག་མེད་པ་དག་ཀྱང་རྗེས་སུ་འཐུན་པས་ཡོངས་སུ་སྤོང་བར་བྱེད་དོ། །དེས་བར་བཤད་པ་དག་ཀྱང་ལེགས་པར་ཡོངས་སུ་འཛིན་པར་བྱེད་དོ། །མིང་དང་། ཚིག་ཐ་དད་པ་དག་ཀྱང་ཡོངས་སུ་རྟོགས་པར་འགྱུར་རོ། །ཆོས་ཀྱི་དབྱིངས་ཀྱི་ཚུལ་དག་ལ་ཡང་ཐབས་མཁས་པས་ནན་ཏན་གྱིས་སྒྲུབ་པར་བྱེད་དོ། །ཆོས་ཀྱི་སྒོ་རྣམས་ཀྱང་ལེགས་པར་ཡིད་ལ་བྱེད་དོ། །ཆོས་གང་དང་མཚུངས་པར་ལྡན་པ་འམ། མཚུངས་པར་མི་ལྡན་པ་ཡང་རུང་སྟེ། ཐབས་མཁས་པས་དེས་བའི་དོན་ལ་བསམ་བ་རྣམ་པར་དག་པས་རབ་ཏུ་གནས་པར་བྱེད་དོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་སྒོ་འདི་ལ་དེ་ལྟར་གནས་པ་དེ་དག་ནི་སྤྱོད་པ་ཆུང་དུས་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐོབ་ནས་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཚད་མེད་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱེད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཁྱེད་ཀྱིས་ཆོས་རྣམས་ཐམས་ཅད་ནི། །ཆོས་ཀྱི་དབྱིངས་སུ་འཇུག་པར་ལྟོས། །ཆོས་རྣམས་ཆོས་དབྱིངས་མཚུངས་པས་ན། ཚུལ་ནི་ཀུན་ཀྱང་མཉམ་པ་ཡིན། །གཞན་ཡང་ཆོས་ཀྱི་དབྱིངས་རྣམས་ནི། །ཆོས་རྣམས་ཀུན་དུ་འཇུག་པར་བལྟོས། །ཆོས་དབྱིངས་ཆོས་དང་མཚུངས་པས་ན། །ཚུལ་ནི་ཀུན་དུ་མཉམ་པ་ཡིན། །ཆོས་ཀྱི་དབྱིངས་རྣམས་ལ་ཡང་ནི། །ཐམས་ཅད་ཆོས་སུ་ལྟ་མི་བྱེད། །ཆོས་ཀྱི་དབྱིངས་ལས་མ་གཏོགས་པར། །ཆོས་རྣམས་སུ་ཡང་ལྟ་མི་བྱེད། །ཆོས་རྣམས་ཐམས་ཅད་ཀུན་ལ་ཡང་། །ཆོས་ཀྱི་དབྱིངས་སུ་ལྟ་མི་བྱེད། །ཆོས་རྣམས་མ་གཏོགས་གུང་ན་ཡང་། ཆོས་ཀྱི་དབྱིངས་སུ་ལྟ་མི་བྱེད། །ཁམས་ནི་རྣམ་པ་སྣ་ཚོགས་དང་། །ཆོས་ཀྱི་དབྱིངས་ནི་སྣ་ཚོགས་ཉིད། །ཆོས་འདུས་རྣམས་ནི་རྟོགས་པས་ན། །ཐབས་མཁས་གནས་པ་ཅི་ཡང་མེད་དུས་དང་གནས་ནི་ཐམས་ཅད་དུ། སྣ་ཚོགས་ངོ་བོ་འདུས་པ་ཡང་། གནས་པ་མེད་ཅིང་རྟེན་པ་མེད། །བླང་བར་བྱ་བ་ཅི་ཡང་མེད། །འདུས་པ་ཐ་
དད་ངོ་བོ་ཉིད། །རྣམ་པར་རྟོག་དང་མི་རྟོག་པ། །དེ་ལ་གཉིས་ག་ཡོད་མ་ཡིན། །བློ་དང་ལྡན་བསམ་མཉམ་པར་མཐོང་། །འདུས་པ་གཅིག་ནི་ཤེས་པའི་ཕྱིར། །འདུས་པ་མང་པོ་ཤེས་པར་འགྱུར། །འདུས་པ་མང་པོ་ཤེས་པའི་ཕྱིར། །འདུས་པ་གཅིག་ཀྱང་ཤེས་པར་འགྱུར། །འདུས་པ་དང་ནི་མ་འདུས་དང་། །རང་བཞིན་གཅིག་དང་ཐ་དད་ལ། །སྟེན་པར་མི་བྱེད་རྟོག་མི་བྱེད། །འཛིན་པ་མེད་ཅིང་ཞེན་པ་མེད། །ཆོས་རྣམས་ཐམས་ཅད་དེ་དག་ལ། །འདུས་པ་མེད་པར་རྟོགས་པས་ན། །འདུས་པ་ཉིད་དུ་མི་སེམས་ཤིང་། །འཛིན་པ་མེད་ཅིང་ཞེན་པ་མེད། །ཆོས་ཀྱི་རྣམ་པ་ཐམས་ཅད་ཀྱི། །གདགས་པའི་མཚན་ཉིད་དེ་ཤེས་པས། །སེམས་དཔའ་མེད་ཅིང་སྟེན་པ་མེད། །འཇིགས་པ་མེད་ཅིང་ཞེན་པ་མེད། །ལས་དང་ལས་ཀྱི་རྣམ་སྨིན་དག། །ཐམས་ཅད་མ་ལུས་རྟོགས་ཤེས་ཤིང་། །དེ་དང་འགལ་བར་མི་བྱེད་པས། །འདི་ནི་བརྩོན་འགྲུས་ལྡན་པ་ཡིན། །ལས་དང་ལས་ནི་གང་བྱས་པ། །འདི་གཉིས་འདུས་པའི་མཚན་ཉིད་ཡིན། །མཚན་དེ་མཚན་མེད་གང་ཤེས་པ། །འདི་ནི་བརྩོན་འགྲུས་ལྡན་པ་ཡིན། །ཁམས་རྣམས་འདུས་པ་དག་དང་ནི། །ཁམས་ཀྱི་བྱེ་བྲག་ངོ་བོ་ལ། །དེ་དག་རྟག་ཏུ་མཉམ་ཤེས་པ། །འདི་ནི་བརྩོན་འགྲུས་ལྡན་པ་ཡིན། །རྒྱུ་འབྲས་ཕན་ཚུན་འབྲེལ་པ་ནི། །ཐམས་ཅད་ཁོང་དུ་ཆུད་པས་ན། །རྒྱུ་རྐྱེན་ཆོས་ནི་དེ་དག་ལ། །གོ་དགོས་ཚུལ་བཞིན་གནས་པར་བྱེད། །འཇིག་རྟེན་འདས་པའི་ཆོས་རྣམས་དང་། །འཇིག་རྟེན་པ་འི་ཆོས་རྣམས་ནི། །འགལ་བ་ཅུང་ཟད་མེད་རྟོགས་པས། །དེ་བཞིན་མཉམ་པར་གནས་པར་བྱེད། །འཇིག་རྟེན་ཇི་ཙམ་གནས་པ་ཡིན། །མཚན་ཉིད་ཕྱག་རྒྱ་ཐམས་ཅད་ཀྱང་། །རྗེས་འཐུན་སོ་སོར་རྟོག་བྱེད་པས། ཡོངས་ཤེས་མཉམ་པར་གནས་པར་བྱེད། །ཆོས་ཀྱི་རྣམ་གྲངས་གཅིག་གིས་ནི། །ཆོས་རྣམས་རྣམ་གྲངས་རབ་ཤེས་ཀྱང་། །ཆོས་ཀྱི་རྣམ་གྲངས་མང་པོ་ཡིས། །རྣམ་གྲངས་གཅིག་ནི་ཤེས་མི་
བྱེད། །ཆོས་ཀྱི་རྣམ་གྲངས་གཅིག་གིས་ནི། །རྣམ་གྲངས་མང་པོ་སྟེན་མི་བྱེད། །ཆོས་ཀྱི་རྣམ་གྲངས་མང་པོས་ཀྱང་། །རྣམ་གྲངས་གཅིག་ལ་སྟེན་མི་བྱེད། །ཆོས་ཀྱི་རྣམ་གྲངས་ཐམས་ཅད་ལ། །མཉམ་དང་ཡོངས་སུ་དག་པ་དང། །ཐ་དད་འདུ་ཤེས་མེད་གྱུར་པ། །འདི་ནི་སོ་སོར་རྟོག་པ་ཡིན། །ཚིག་གིས་བསྟན་པའི་ཆོས་རྣམས་ལ། མཉམ་པ་ཉིད་དུ་སྟོན་བྱེད་ཅིང། མཉམ་པ་ཉིད་ལ་གང་གནས་པ། འདི་ནི་སོ་སོར་རྟོག་པ་ཡིན། །ཚིག་གིས་བསྟན་པའི་ཆོས་རྣམས་ལ། །ཚུལ་བཞིན་དུ་ནི་ཤེས་མཐོང་བ། །རྗེས་འཐུན་རབ་ཏུ་ཐོབ་པས་ན། །འདི་ནི་ཐབས་དང་ལྡན་ཞེས་བྱ། །རྩོད་པའི་སྨྲ་བ་མི་སྐྱེད་ཅིང་། །རྩོད་པའི་རྒྱུ་རྐྱེན་མི་བྱེད་པ། །ཐམས་ཅད་འགལ་བར་མི་བྱེད་པས། །འདི་ནི་རྗེས་མཐུན་ཞེས་བྱའོ། །རྟག་ཏུ་རྩོད་པ་མེད་སྐྱེད་ཅིང་། །རྩོད་པ་མེད་དང་མཚུངས་ལྡན་པ། །མཉམ་ཞིང་འགལ་བར་མི་བྱེད་པས། །འདི་ནི་བློ་ལྡན་ཞེས་བྱའོ། །ཆོས་རྣམས་ཀུན་གྱི་ཚུལ་དག་ལ། །རྩོད་པས་སྨྲ་བ་ཉེར་ཞི་ཞིང་། །གོ་དགོས་ཚུལ་བཞིན་གང་སྒྲུབ་པ། །འདི་ནི་དཔའ་བོ་ཞེས་བྱའོ། །དེ་ལྟར་སོ་སོར་རབ་བརྟགས་ན། །གཅིག་ཏུ་རྩོད་པ་མེད་གྱུར་པ། །འཁོར་འདུས་མང་པོ་རྣམས་སུ་ནི། །བླ་མེད་ཆོས་ནི་བསྔགས་པར་འགྱུར། །འདི་ནི་བྱང་ཆུབ་སེམས་དཔའ་རྣམས། །ཆོས་ཀྱི་རྒྱ་མཚོ་ཐམས་ཅད་ཀྱི། །ཕྱག་རྒྱའི་ཏིང་འཛིན་མངོན་སྒྲུབ་པ། །འདི་ནི་ཡང་དག་དྲན་ལྡན་ཡིན། །འདི་ལྟར་གཅིག་ཏུ་རྩོད་པ་མེད། །ནན་ཏན་གྱིས་ནི་སྒྲུབ་བྱེད་ཅིང། །རྩོད་སྨྲ་ཉེར་བཞི་མཚུངས་ལྡན་པ། །ཏིང་འཛིན་འདི་ནི་རྫོགས་པར་བྱེད། །ཚུལ་བཞིན་དུ་ནི་རབ་གནས་ཤིང། །གསུངས་ཏེ་གསུངས་པ་གང་ཤེས་པ། །བདག་དང་ང་རྒྱལ་ཤེས་པས་ན། །ང་རྒྱལ་སེམས་མཐོ་སྤོང་བར་བྱེད། །དེས་པར་གསུངས་པའི་གསུང་རབ་ལས། །ཐབས་མཁས་ཡོངས་སུ་རྫོགས་བྱེད་ཅིང། །བྱེ་བྲག་མིང་ནི་གང་ཤེས་པ། །འདི་ནི་བློ་ལྡན་ཞེས་བྱའོ། །ཆོས་རྣམས་ཀུན་གྱི་ཚུལ་
ལ་ནི། །ཚུལ་བཞིན་ནན་ཏན་གང་སྒྲུབ་པ། །ཆོས་རྣམས་ཀུན་གྱི་སྒོ་མཐོང་བས། །འདི་ནི་ཆོས་མཐོང་ཞེས་བྱའོ། །དེ་སྟར་ནན་ཏན་གང་སྒྲུབ་པ། །ཆོས་གང་མཚུངས་པར་ལྡན་པ་དང། །ཆོས་གང་མཚུངས་པར་མི་ལྡན་པ། །ཆོས་དེ་ཐམས་ཅད་ཤེས་པར་འགྱུར། །ཆོས་རྣམས་ཐམས་ཅད་ཀུན་ལས་ནི། །ལས་ནི་དག་པར་གང་དྲན་པ། །ངེས་པར་གསུངས་པའི་དོན་དག་ལ། །ཐབས་མཁས་པ་ནི་འཐོབ་པར་འགྱུར། །ཆོས་རྣམས་ཐམས་ཅད་ཀུན་ལ་ནི། །བརྩོན་འགྲུས་བསྐྱེད་ནས་གང་སེམས་པ། །ཆོས་རྣམས་ཐམས་ཅད་རྟོགས་པས་ན། །ཏིང་འཛིན་འདི་ནི་འཐོབ་པར་འགྱུར། །གཞན་ཡང་བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་འདི་ལ་ནན་ཏན་གྱིས་སྒྲུབ་པར་བྱེད་ན་གཞན་ཡང་ཏི་ངེ་འཛིན་གྱི་ཆོས་ཡོངས་སུ་སྡུད་པར་འགྱུར་གྱིས་ལེགས་པར་ཉོན་ལ་ཡིད་ལ་ཟུང་ཤིག་དང་། དས་ཡང་དག་པར་བཤད་པར་བྱའོ། །བཅོམ་ལྡན་འདས་དེ་བཞིན་དུ་ཐོས་པར་འཚལ་ལོ་ཞེས་གསོལ་པ་དང་། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཆོས་ཀྱི་སྣང་བའི་སྒོ་ཡོད་དེ། ཆོས་ཀྱི་ཚུལ་ལ་ཐབས་མཁས་པ་འབྱུང་བར་བྱེད་དོ། །ཆོས་ཐམས་ཅད་ཀྱི་ཕྱག་རྒྱ་རབ་ཏུ་འབྱུང་བར་བྱེད་དོ། །ཆོས་ཀྱི་ཕྱག་རྒྱའི་སྒོ་ཐམས་ཅད་དུ་འཇུག་པར་འགྱུར་རོ། ། ཆོས་ཐམས་ཅད་ཀྱི་བྱ་བ་རྣམས་ཁོང་དུ་ཆུད་ཅིང་རབ་ཏུ་འཇིག་པར་འགྱུར་རོ། །ཆོས་ཀྱི་སྣང་བ་འཐོབ་པར་ནུས་ཤིང་ཡང་དག་པར་རབ་ཏུ་སྟོན་པར་བྱེད་དོ། །ཆོས་ཀྱི་སྣང་བའི་དབང་གིས་ཆོས་ཀྱི་ཚིག་གི་སྒོ་རྣམས་ལ་རྗེས་སུ་གཞོལ་བར་བྱེད་དོ། །ཐབས་མཁས་པའི་སྣང་བ་ཡང་དག་པར་འབྱུང་བར་བྱེད་པའི་ཆོས་ཀྱི་སྣང་བའི་སྒོ་དེ་ཡང་གང་ཞེ་ན། འདི་ལྟ་སྟེ། མིང་ཐ་དད་པ་
བསྟན་པའི་སྒོ་དང་། གསང་བ་བསྡམས་པའི་སྒོ་དང། མིང་ཐ་དད་པའི་དངོས་པོའི་སྒོ་དང་། དངོས་པོ་ཡོངས་སུ་བསྡུ་པའི་སྒོ་དང་། བྱེ་བྲག་རྣམས་ཀྱི་སྒོ་རབ་ཏུ་རྟོགས་པ་གང་ཡིན་པའོ། ཇི་ལྟར་དེ་དག་ཁོང་དུ་ཆུད་ནས་ཏིང་ངེ་འཛིན་གྱི་སྒོ་ཡང་དག་པར་སྐྱེ་བར་འགྱུར་རོ། ཞེ་ན་ཆོས་ཀྱི་དབྱིངས་ཀྱི་ཚུལ་གྱི་སྒོ། ཐམས་ཅད་ནི་དོན་གཅིག་ཏུ་འཇུག་པར་འགྱུར་བས་ཆོས་ཀྱི་སྣང་བ་རྣམས་རྗེས་སུ་རྟོགས་པར་འགྱུར་རོ། །བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཟབ་མོའི་ཚུལ་ལ་ཐབས་མཁས་པ་འདི་སྒྲུབ་པར་བྱེད་པ་དང་། སྒྲུབ་པར་འགྱུར་པ་དང་། ཡོངས་སུ་ཚོལ་བ་དང་། ཡོངས་སུ་ཚོལ་བར་འགྱུར་བ་དེ་དག་ཆོས་ཀྱི་རྣམ་གྲངས་འདི་ཐོབ་པར་གྱུར་ན་སྦྱོར་བ་ཆུང་དུས་སྣད་བ་ཆེན་པོ་ཐོབ་ནས་ཆོས་ཀྱི་སྒོར་རབ་ཏུ་འཇུག་པར་འགྱུར་རོ། །ཆོས་ཀྱི་སྒོ་འདི་ལས་ཀྱང་ཡང་སྣང་བ་བྱུང་ནས་སྣང་བ་དེས་ཀྱང་ཆོས་ཀྱི་སྒོ་ཇི་ལྟ་བུ་དང་། སྤྱོད་པ་ཇི་ལྟ་བ་བཞིན་དུ་རྗེས་སུ་འཇུག་ཅིང་རྗེས་སུ་སྤྱོད་པར་འགྱུར་བས་ཚུལ་ཇི་ལྟ་བ་བཞིན་དུ་ཏིང་ངེས་འཛིན་གྱི་སྟོབས་ཀྱིས་ཆོས་ཀྱི་སྒོ་རྣམས་ལ་སོ་སོར་རབ་ཏུ་རྟོགས་པར་བྱེད་དོ། ཏིང་ངེ་འཛིན་གྱི་སྒོ་ནས་ཤེས་རབ་སྐྱེས་པས་ཀྱང་དེ་ཁོ་ན་ཉིད་ཀྱི་ཚུལ་གང་ཡིན་པ་དག་རབ་ཏུ་རྟོགས་པར་འགྱུར་ཏེ། ཏིང་ངེ་འཛིན་གྱི་མཐུའི་ཕྱིར་དང་། ཆོས་ཀྱི་སྒོ་ལ་སོ་སོར་རབ་ཏུ་རྟོགས་པར་བྱེད་པའི་ཕྱིར་དང་། ཤེས་རབ་སྐྱེད་པར་།བྱེད་པའི་ཕྱིར་ཏིང་ངེ་འཛིན་གྱི་སྒོ་ནས་ཆོས་ཀྱི་དབྱིངས་རྟོགས་ཤིང་ཐབས་མཁས་པ་ལ་གནས་པར་འགྱུར་བས་ཆོས་ཀྱི་སྒོའི་སྣང་པ་ཐམས་ཅད་རབ་ཏུ་སྐྱེད་པ་དང། ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་ཀྱང་རབ་ཏུ་འཐོབ་པར་འགྱུར་ཏོ། །བློ་གྲོས་མཐའ་ཡས་ཆོས་གྱི་ཞེས་བྱ་བ་གང་ཞེ་ན། འདི་ལྟ་སྟེ་ཡི་གེ་ཨ་ཞེས་བྱ་བའི་ཕྱག་རྒྱས་བཏབ་ནས་མ་རིག་པས་མངོན་བར་འདུས་བྱས་པས་འདུ་བྱེད་ཡོངས་སུ་རྫོགས་པར་འགྱུར་
བ་གང་ཡིན་པ་ཡི་གེ་ཨ་ཞེས་བྱ་བའི་སྔོན་དུ་འགྲོ་བས་མ་རིག་པ་ཉེ་བར་ཞི་བར་བྱེད་དོ། །གནས་པར་བྱ་བ་ཅི་ཡང་མེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མཚན་མ་མེད་པའི་ཕྱག་རྒྱའི་སྒོར་འཇུག་པར་བྱའོ། །ཡི་གེ་ཨི་ཞེས་བྱ་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ལས་ཀྱི་རྣམ་པར་སྨིན་པའི་འབྲས་བུ་དང། ལས་ཀྱི་བྱ་བ་དང། ལས་དང། འབྲས་བུ་དང། ཚོགས་པ་རྣམས་འགྲུབ་པར་བྱེད་པ་དང། ལས་དང་འབྲས་བུ་དང། ཚོགས་པ་དང། རྐྱེན་རབ་ཏུ་རྟོགས་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལས་མེད་པ་དང། འབྲས་བུ་མེད་པ་དང། ཚོགས་པ་མེད་པ་དང། རྐྱེན་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་འདུ་བྱེད་རྣམས་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ལམ་རྣམ་པ་སྣ་ཚོགས་དང། །ལས་ཀྱི་བྱ་བ་དག་ལས་ཆོས་ཀྱི་ཡེ་ཤེས་ཀྱི་སྣང་བ་ཐམས་ཅད་རབ་ཏུ་སྐྱེད་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་རྣམས་འདུ་བྱེད་ཐམས་ཅད་ལ་ཐབས་མཁས་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་ཡི་གེ་དྷ་ཞེས་བྱ་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ནས་ཡི་གེ་མཱ་ཞེས་བྱ་བས་མིང་དང་ཚིག་ཏུ་གདགས་པའི་གྲོགས་བྱས་པས་ཆོས་སྣ་ཚོགས་དང་མཚུངས་པར་ལྡན་བར་འགྱུར་བ་དང། ཡི་གེ་དྷ་དང་མས་གྲོགས་བྱས་པར་རབ་ཏུ་རྟོགས་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུས་པ་མེད་པ་དང། གྲོགས་མེད་པ་དང། མིང་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་ཕྱག་རྒྱ་དཔག་ཏུ་མེད་པས་ཆོས་ཐམས་ཅད་ཕྱག་རྒྱས་བཏབ་པས་རྣམ་པར་རྟོག་པ་ཐམས་ཅད་མི་དམིགས་ཤིང་རྣམ་པར་རྟོག་པ་ཡོངས་སུ་སྤོང་བར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྣམ་པར་མི་རྟོག་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་མཐའ་མེད་པའི་ཕྱག་རྒྱས་
ཆོས་ཐམས་ཅད་ཕྱག་རྒྱས་བཏབ་ནས་མཐའ་འདུས་པ་མེད་ཅིང་མཐའ་ཡོངས་སུ་ཟད་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྟོག་པ་མེད་པ་དང། དཔྱོད་པ་མེད་པ་དང། ཚིག་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་རང་བཞིན་སྣ་ཚོགས་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པས་རང་བཞིན་གཅིག་གིས་མངོན་པར་འདུས་བྱས་པའི་མཚན་མ་དང། རང་བཞིན་སྣ་ཚོགས་ཀྱི་འདུ་ཤེས་རབ་ཏུ་སེལ་པར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རང་བཞིན་སྣ་ཚོགས་ཀྱི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་འདུན་པ་དང། མཚུངས་པར་ལྡན་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པས་འདུས་བྱས་ཀྱི་སྤྱོད་པ་མངོན་དུ་བྱུང་བ་རྣམས་ཡོངས་སུ་རྫོགས་པར་བྱེད་པ་དང། འདོད་པ་སྤངས་ནས་རབ་ཏུ་དབེན་བར་གྱུར་པ་དང། ཚོགས་པ་ཉིད་ཡོད་པ་མ་ཡིན་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདོད་པ་ཟད་པར་བྱེད་པའི་ཤེས་པ་དང། མཐོང་བ་དང། ཚོགས་པ་མེད་པའི་ཕྱག་རྒྱའི་སྒོར་འཇུག་པར་བྱ་སྟེ། བློ་གྲོས་མཐའ་ཡས་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཕྱག་རྒྱའི་སྒོས་ཆོས་ཐམས་ཅད་ཕྱག་རྒྱས་བཏབ་པ་ཡིན་ཏེ། ཕྱག་རྒྱའི་སྒོ་འདིས་ཆོས་ཐམས་ཅད་ལ་རབ་ཏུ་འཇུག་པར་བྱེད་དོ། །བློ་གྲོས་མཐའ་ཡས་གཞན་ཡང་ཐོགས་པ་མེད་པའི་སྒོ་དང། རྗེས་སུ་འཐུན་པ་མེད་པའི་སྒོ་ཞེས་བྱ་བ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཁོང་དུ་ཆུག་པར་བྱས་ནས་རྗེས་སུ་འཇུག་པར་བྱའོ། །དེ་ལ་ཐོགས་པ་མེད་པའི་སྒོ་དང། ཚོགས་པ་མེད་པའི་སྒོ་ཞེས་བྱ་བ་གང་ཞེ་ན། འདི་ལྟ་སྟེ་ནམ་མཁའི་ཕྱག་རྒྱས་བཏབ་པ་ཡིན་པས་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཉིས་སུ་མེད་པའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་རབ་ཏུ་ཞི་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རབ་ཏུ་ཞི་བའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་རབ་ཏུ་ཞི་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རབ་ཏུ་ཞི་བའི་ཕྱག་རྒྱའི་སྒོར་འཇུག་པར་བྱའོ། །འདི་ལྟར་རྣམ་པར་ཕྱེ་བ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཡོ་བ་མེད་པའི་ཕྱག་རྒྱའི་སྒོར་འཇུག་པར་བྱའོ། འདི་ལྟར་གནས་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀུན་ནས་ཉོན་མོངས་པ་མེད་པའི་ཕྱག་རྒྱའི་སྒོར་འཇུག་པར་བྱའོ། །ངོ་བོ་ཉིད་ཀྱི་སྟོང་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐོབ་པ་མེད་པའི་ཕྱག་རྒྱའི་སྒོར་འཇུག་པར་བྱའོ། །མཚན་མ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐབས་མཁས་པས་སྒོམ་པའི་ཕྱག་རྒྱའི་སྒོར་འཇུག་པར་བྱའོ། །སྨོན་བ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རབ་ཏུ་ཞི་བའི་སྨོན་ལམ་གྱི་སྣང་བའི་ཕྱང་རྒྱའི་སྒོར་འཇུག་པར་བྱའོ། །འདོད་ཆགས་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྣམ་པར་རྟོག་པ་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པའི་ཕྱག་རྒྱའི་སྒོར་འཇུག་པར་བྱའོ། །སྐྱེ་བ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ཤེས་པ་དང། མཐོང་བ་སྐྱེ་བ་དང། སྐྱེ་བ་མེད་པའི་ཕྱག་རྒྱའི་སྒོར་འཇུག་པར་བྱའོ། །ཉེ་བར་ཞི་བར་འགྱུར་བའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཕུང་པོ་ཡོངས་སུ་སྤོང་བའི་ཕྱག་རྒྱའི་སྒོར་འཇུག་པར་བྱའོ། །མཚན་མ་ཟད་པར་བྱེད་པའི་
ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྐྱེ་བ་ཟད་པར་བྱེད་པའི་ཕྱག་རྒྱའི་སྒོར་འཇུག་པར་བྱའོ། །ཆོས་ཀྱི་དབྱིངས་ཀྱི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དབྱིངས་རབ་ཏུ་རྟོགས་པ་ལ་མཁས་པའི་ཕྱག་རྒྱའི་སྒོར་འཇུག་པར་བྱའོ། །རྗེས་སུ་དྲན་པ་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པར་རྟོག་པ་མེད་ཅིང་མཉམ་བ་ཉིད་དུ་གྱུར་པའི་ཕྱག་རྒྱའི་སྒོར་འཇུག་པར་བྱའོ། །ངོ་བོ་ཉིད་མེད་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རང་བཞིན་ཐམས་ཅད་ཡོངས་སུ་ཤེས་པའི་ཕྱག་རྒྱའི་སྒོར་འཇུག་པར་བྱའོ། །ཡོངས་སུ་མྱ་ངན་ལས་འདས་པའི་ཕྱག་རྒྱས་ཆོས་ཐམས་ཅད་ཕྱག་རྒྱས་བཏབ་པ་ཡིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཞི་བ་དང། འགོག་པའི་རྗེས་སུ་འབྲང་བའི་ཕྱག་རྒྱའི་སྒོར་འཇུག་པར་བྱ་སྟེ། བློ་གྲོས་མཐའ་ཡས་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཐམས་ཅད་ལ་ཐོགས་པ་མེད་པའི་སྒོ་དང། རྗེས་སུ་འཐུན་པའི་སྒོ་དང། རྟག་པ་དང། ཆད་པར་ལྟ་བ་ཐམས་ཅད་ལས་ཡང་དག་པར་པའི་སྒོ་དང། མཐའ་མེད་པའི་སྒོ་དང། སྔོན་དང་ཕྱི་མའི་མཐའ་མེད་པའི་སྒོ་ཡིན་ཏེ། འདི་ལྟར་ཡོངས་སུ་སྐྱོ་བར་གྱུར་པའི་ཕྱིར་དང། འགོག་པར་བྱེད་པའི་ཕྱིར་དང། ཞི་བར་བྱེད་པའི་ཕྱིར་དང་བསིལ་བར་བྱེད་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཕྱག་རྒྱའི་སྒོ་འདིའི་རྗེས་སུ་བསླབ་པར་བྱ་སྟེ། རྗེས་སུ་འཇུག་པར་བྱ། ལེགས་པར་བསྒོམ་པར་བྱའོ། ཆོས་ཀྱི་སྒོ་འདི་རྣམས་ཀྱིས་ནི་ཆོས་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་རབ་ཏུ་ཐོབ་པར་བྱེད་དོ། ཏིང་ངེ་འཛིན་འདི་ཡང་དག་པ་ཇི་ལྟ་བ་བཞིན་དུ་རྗེས་སུ་ཐོབ་པར་གྱུར་ན། ཆོས་རྣམས་ལ་ཐབས་མཁས་པའི་ཤེས་པ་ཡོངས་སུ་སྡུད་པར་བྱེད་དོ། །དེ་ལྟ་བས་ན་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཕྱག་རྒྱའི་སྒོ་འདི་ལེགས་པར་བསྒོམས་ནས་ཆོས་ཀྱི་རྒྱ་མཚོའི་ཏིང་ངེ་འཛིན་ཐམས་ཅད་ལ་གནས་ཏེ། ཆོས་ཐམས་ཅད་ལ་སོ་སོར་རབ་ཏུ་རྟོག་པར་བྱེད་ན། ཆོས་ཀྱི་སྣང་བ་ཆེན་པོ་ཚད་མེད་དཔག་ཏུ་མེད་པ་སྐྱེ་ཞིང་རབ་ཏུ་འབྱུང་བར་འགྱུར་རོ། བློ་གྲོས་མཐའ་ཡས་འདི་ལྟ་སྟེ། དཔེར་ན་རྒྱ་མཚོ་ཆེན་པོའི་ཆུ་ནི་ཚང་མེད་པས་དེའི་ཚད་གང་གིས་ཀྱང་དཔག་པར་མི་ནུས་སོ། དེ་བཞིན་དུ་ཆོས་ཐམས་ཅད་ཀྱང་གང་གིས་ཀྱང་དེའི་ཚད་དཔག་པར་མི་ནུས་སོ། གཞན་ཡང་འདི་ལྟ་སྟེ། དཔེར་ན་ཆུ་ཀླུང་ཐམས་ཅད་ནི་རྒྱ་མཚོ་པོར་འབབ་ཅིང་འཇུག་པར་འགྱུར་རོ། དེ་བཞིན་དུ་ཆོས་ཐམས་ཅད་ཀྱང་ཆོས་ཀྱི་ཕྱག་རྒྱར་འཇུག་པར་འགྱུར་བས་དེའི་ཕྱིར་རྒྱ་མཚོའི་ཕྱག་རྒྱ་ཞེས་བྱ་སྟེ། ཆོས་ཐམས་ཅད་ཕྱག་རྒྱས་བཏབ་ནས་ཆོས་རྣམས་ཀྱི་རྒྱ་མཚོའི་ཕྱག་རྒྱར་ཞུགས་པར་གྱུར་ན་ཕྱག་རྒྱ་འདིས་ཆོས་ཐམས་ཅད་ཆོས་ཀྱི་ཕྱག་རྒྱ་དང་མཚུངས་པར་མཐོང་བས་སོ། གཞན་ཡང་འདི་ལྟ་སྟེ། དཔེར་ན་ཀླུ་ཆེན་པོ་དང་། ཀླུའི་འཁོར་ལུས་ཆེན་པོ་དང་ལྡན་པ་རྣམས་ནི་རྒྱ་མཚོ་དང་ལྡན་ཞིང་རྒྱ་མཚོར་འཇུག་པར་ནུས་སམ། རྒྱ་མཚོ་ཆེན་པོ་དེ་དག་ལ་གནས་སུ་བྱེད་དོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་དེ་བཞིན་དུ་བསྐལ་པ་བརྒྱ་སྟོང་ཚད་མེད་པ་སྙེད་དུ་ཐེག་པ་རྣམས་ལེགས་པར་བསྒོམས་པས་ཏིང་ངེ་འཛིན་གྱི་ཕྱག་རྒྱའི་སྒོ་འདིར་འཇུག་པར་ནུས་ཤིང་ཕྱག་རྒྱའི་སྒོ་འདི་ཉིད་ལ་གནས་པར་བྱེད་དེ། སངས་རྒྱས་ཀྱི་ཆོས་རྣམས་མངོན་དུ་བྱ་བའི་ཕྱིར་དང་། ཐམས་ཅད་མཁྱེན་པ་ལེགས་པར་ཡོངས་སུ་རྫོགས་པར་བྱ་བའི་ཕྱིར་ཆོས་རྣམས་ཀྱིས་ཕྱག་རྒྱའི་སྒོ་དེ་ལྟ་བུ་དག་མངོན་པར་སྒྲུབ་པར་བྱེད་དོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་སྒོ་འདི་ནན་ཏན་གྱིས་སྒྲུབ་པར་བྱེད་ན་ཆོས་ཐམས་ཅད་ཀྱི་སྒོ་ལ་ཡང་དག་པར་སློབ་པར་འགྱུར་རོ། ཆོས་ཀྱི་སྒོ་རྣམས་ཆོས་ཀྱི་སྒོ་འདིར་འདུ་བར་མཐོང་བའི་ཕྱིར་ཆོས་ཀྱི་སྣང་བ་རྣམས་བསྐྱེད་ནས་ཆོས་ཀྱི་རྒྱ་མཚོ་ཐམས་ཅད་དུ་འཇུག་པར་འགྱུར་བས་དེའི་ཕྱིར་ཆོས་ཀྱི་རྣམ་གྲངས་འདི་ཆོས་ཐམས་ཅད་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཅེས། བྱའོ། གཞན་ཡང་འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་རིན་པོ་ཆེ་ཆེན་པོ་རྣམས་འདུ་བའི་གནས་སུ་གྱུར་པ་ཡིན་ནོ། །ཏིང་ངེ་འཛིན་འདི་ཡང་དེ་བཞིན་དུ་ཆོས་ཐམས་ཅད་
དང་། ཆོས་ལ་ཐབས་མཁས་པ་རྣམས་འདུ་བའི་གནས་སུ་གྱུར་པ་ཡིན་ནོ། །བློ་གྲོས་མཐའ་ཡས་སེམས་ཅན་གང་ལ་ལ་ཞིག་སངས་རྒྱས་ཀྱི་མཁྱེན་པ་དང་། གཟིགས་པ་བླ་ན་མེད་པ་འཐོབ་པར་བྱ་བའི་ཕྱིར་ཏིང་ངེ་འཛིན་འདི་ཡོངས་སུ་ཚོལ་བར་གྱུར་པ་དང་། ཡོངས་སུ་ཚོལ་བར་འགྱུར་བ་དང་། ཡོངས་སུ་ཚོལ་བར་བྱེད་པ་དེ་དག་ནི་ཆོས་ཀྱི་རྒྱ་མཚོ་ཡོངས་སུ་རྫོགས་པའི་ཤེས་རབ་ཐམས་ཅད་ཡོངས་སུ་ཚོལ་བར་བྱེད་པ་ཡིན་པས་དོན་དེའི་ཕྱིར་ངས་ཆོས་ཀྱི་ཕྱག་རྒྱ་འདི་ཁྱོད་ལ་གཏད་པ་ཡིན་གྱིས་ཁྱོད་ཀྱིས་ཀྱང་མ་འོངས་པའི་དུས་ལྔ་བརྒྱ་ཐ་མ་ལ་ཡང་དག་པའི་ཆོས་འཇིག་པར་འགྱུར་བའི་ཚེ་ཆོས་ཀྱི་ཕྱག་རྒྱ་འདིས་སེམས་ཅན་རྣམས་ལ་ཡོངས་སུ་གདབ་པར་བྱའོ། ཆོས་ཀྱི་ཕྱག་རྒྱ་འདིས་གང་ལ་བཏབ་བར་གྱུར་ན་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་མི་འགྱུར་ཞིང་སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པས་མྱུར་དུ་བྱང་ཆུབ་ཀྱི་སྙིང་པོར་འགྲོ་བ་དང་། བླ་ན་མེད་པའི་ཆོས་ཀྱི་འཁོར་ལོ་བསྐོར་བ་དང་། སངས་རྒྱས་ཀྱི་གདུང་བསབ་པ་དང་། ཐམས་ཅད་མཁྱེན་པའི་ས་ལ་རྗེས་སུ་མཐུན་པར་གནས་པ་དང་། བླ་ན་མེད་པའི་ཡོངས་སུ་མྱ་ངན་འདས་པ་ཆེན་པོས་ཡོངས་སུ་མྱ་ངན་ལས་འདས་པ་དང་། ལྷ་དང་མི་རྣམས་ཀྱང་ཡང་དག་པའི་ཆོས་ཡོངས་སུ་འཛིན་པ་ལ་གཟུང་པར་བྱེད་དོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཡོན་ཏན་ཁྱད་པར་དུ་འཕགས་པ་དེ་ལྟ་བུ་ཡོངས་སུ་སྡུད་བར་འདོད་པ་དེས་ཆོས་ཟབ་མོ་འདི་ལ་ནན་ཏན་གྱིས་བསླབ་པར་བྱ་ཞིང་བག་ཡོད་པ་དང་ལྡན་པར་བྱའོ། གཞན་ཡང་བློ་གྲོས་མཐའ་ཡས་ངས་མངོན་པར་དྲན་ཏེ། སྔོན་འདས་པའི་དུས་བསྐལ་པ་གྲངས་མེད་པའི་ཡང་ཆེས་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རི་རབ་ཀྱི་འོད་ལས་ཡང་དག་པར་འདས་པའི་རྒྱལ་
པོ་ཞེས་བྱ་བ་འཇིག་རྟེན་དུ་བྱུང་སྟེ། བསྐལ་པའི་མིང་ནི་དགེ་བ་ལ་གནས་པ་ཞེས་བྱའོ། །འཇིག་རྟེན་གྱི་ཁམས་ནི་ཡིད་དགའ་བར་བྱེད་པ་ཞེས་བྱའོ། བསྐལ་པ་དེའི་སེམས་ཅན་རྣམས་ཚེ་རིང་ཞིང་ཚེའི་ཚད་མེད་པ་དང་། རབ་ཏུ་བདེ་ཞིང་འབྱོར་བ་དང་ལྡན་པ་དང་། དགེ་བའི་ཆོས་ལ་རབ་ཏུ་གནས་པས་དེའི་ཕྱིར་བསྐལ་པ་དེའི་མིང་དགེ་བ་ལ་གནས་པ་ཞེས་བྱའོ། །སངས་རྒྱས་ཀྱི་ཞིང་དེ་ཡངས་ཤིང་རྒྱ་ཆེ་བ་དང་། ཤིན་དུ་མཛེས་པས་མཐོང་བ་རྣམས་ཡིད་བདེ་ཞིང་དགའ་བར་བྱེད་པ་དང་། སྤོས་ཀྱི་ངང་དང་ལྡན་པར་ཀུན་དུ་ཁྱབ་པར་བྱེད་པས་དེའི་ཕྱིར་འཇིག་རྟེན་གྱི་ཁམས་དེ་ཡིད་དགའ་བར་བྱེད་པ་ཞེས་བྱའོ། དེའི་ཚེ་གླིང་བཞི་ལས་གླིང་གསུམ་གྱི་ཚད་མཉམ་སྟེ། དཔག་ཚད་བརྒྱད་ཁྲི་བརྒྱད་ཁྲི་ཡོད་དོ། །གླིང་རེ་རེ་ན་ཡང་གྲོང་ཁྱེར་ཉི་ཁྲི་ཉི་ཁྲི་ཡོད་དེ། གྲོང་ཁྱེར་རེ་རེ་འི་ཚད་ཀྱང་དཔག་ཚད་བཅུ་བཅུ་ཡོད་དོ། འཛམ་བུའི་གླིང་གི་ཚད་ནི་དཔག་ཚད་བྱེ་བ་ཡོད་དོ། །དེ་ན་གྲོང་ཁྱེར་བརྒྱད་ཁྲི་ཡོད་དོ། གྲོང་ཁྱེར་རེ་རེའི་ཚད་ཀྱང་དཔག་ཚད་ཉི་ཤུ་ཉི་ཤུ་ཡོད་དོ། དེ་དག་ཀྱང་གཞལ་མེད་ཁང་བརྩེག་མ་དང་། ར་བས་འཁོར་པར་བསྐོར་བ། གོས་སྣ་ཚོགས་འབྱུང་བའི་ཤིང་ལྗོན་པ་དང་། རོ་སྣ་ཚོགས་འབྱུང་བའི་ཤིང་ལྗོན་པ་དང་། མེ་ཏོག་སྣ་ཚོགས་ཀྱི་ཤིང་ལྗོན་པ་དང་། རིན་པོ་ཆེའི་ཤིང་ཏ་ལ་དག་གིས་རབ་ཏུ་བརྒྱན་པ། ། ཡུལ་བདེ་ཞིང་མེས་རབ་ཏུ་གད་པར་གྱུར་ཏོ། །དེ་ན་གྲོང་ཁྱེར་མཆོག་ཏུ་ཆེ་བ་དཔག་ཚད་བརྒྱས་འཁོར་བ་ཡོད་དེ། དེ་ཡང་བསྐྱེད་མོས་ཚལ་ཉི་ཁྲིས་འཁོར་བར་བསྐོར་བ། བསྐྱེད་མོས་ཚལ་དེ་ཀུན་དུ་ཡང་འབབ་ཆུ་དག་རབ་ཏུ་འབབ་ཅིང་མེ་ཏོག་དང་། འབྲས་བུ་དག་རབ་ཏུ་རྒྱས་པ། སྤོས་མཆོག་དམ་པའི་ངང་ལྡང་པས་ཡིད་དགའ་བར་བྱེད་པ། བྱ་དང་རི་དགས་རྣམས་སྒྲ་སྙན་པ་འབྱིན་པས་རབ་ཏུ་གང་བར་གྱུར་ཏོ། དེའི་ཚེ་དེ་བཞིན་གཤེགས་པ་དེ་བསྐྱེད་མོས་ཚལ་དེ་གཅིག་ཏུ་བཞུགས་ནས་འཁོར་རྣམས་ལ་ཆོས་བསྟན་པར་གྱུར་ཏོ། །བློ་གྲོས་མཐའ་ཡས་དེ་བཞིན་གཤེགས་པ་རི་རབ་ཀྱི་
འོད་ལས་ཡང་དག་པར་འདས་པའི་རྒྱལ་པོའི་སྐུ་ཚེའི་ཚད་ནི་བསྐལ་པ་ཆུང་ངུ་བཅུ་ཐུབ་པར་གྱུར་ཏོ། ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནི་བསྐལ་པ་ཆུང་ངུ་གཅིག་གི་བར་དུ་འཇིག་རྟེན་དུ་གནས་པར་གྱུར་ཏོ། དེ་བཞིན་གཤེགས་པ་དེས་འཁོར་འདུས་པ་ལ་ལན་བཞིར་ཆོས་བསྟན་ཏེ། འཁོར་འདུས་པ་རེ་རེ་ལ་ཡང་ཉན་ཐོས་སློབ་པའི་ས་ལ་གནས་པ་བྱེ་བ་ཁྲག་ཁྲིག་ཕྲག་ལྔ་ཡོད་དོ། །དགྲ་བཅོམ་པ་དང་། བྱང་ཆུབ་སེམས་དཔའི་འཁོར་ནི་བྱེ་བ་ཁྲག་ཁྲིག་ཕྲག་ལྔ་བཅུ་ལྔ་བཅུ་ཡོད་དོ། དེའི་ཚེ་དེ་བཞིན་གཤེགས་པ་དེ་ལ་བྱང་ཆུབ་སེམས་དཔའ་གཉིས་ཡོད་དོ། གཅིག་གི་མིང་ནི་དཔའ་བོའི་སྡེ་ཞེས་བྱའོ། གཅིག་གི་མིང་ནི་དཔའ་བོའི་སྟོབས་ཤེས་བྱ་སྟེ། བྱང་ཆུབ་སེམས་དཔའ་དེ་གཉིས་ཀྱང་རྫུ་འཕྲུལ་དང་ལྡན་ཞིང་མི་སྐྱེ་བའི་ཆོས་ལ་བཟོད་པ་ཐོབ་པ་ཡིན་པས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། བཅོམ་ལྡན་འདས་ཆོས་ཇི་ལྟ་བུ་ཞིག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་ཡོངས་སུ་རྫོགས་པར་བགྱིད་པར་འགྱུར་ལགས། དེ་ནས་དེ་བཞིན་གཤེགས་པ་དེས་ཚིག་གི་རྣམ་གྲངས་འདི་རྒྱ་ཆེར་ཡང་དག་པར་རབ་ཏུ་བསྟན་ཏོ། །འདི་ཡང་དག་པར་རབ་ཏུ་བསྟན་པ་ན་བྱང་ཆུབ་སེམས་དཔའ་སྟོང་ཕྲག་བཅུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་དེ་གཉིས་ཀྱིས་ནི་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་དང་། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ཐོབ་པར་གྱུར་ཏོ། ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་རྣམས་དང་། བྱང་ཆུབ་སེམས་དཔའི་ཏིང་ངེ་འཛིན་རྣམས་མངོན་དུ་གྱུར་པའི་ཕྱིར་སངས་རྒྱས་ཀྱི་ཞིང་ཐམས་ཅད་དུ་རྫུ་འཕྲུལ་ཆེན་པོ་བསྟན་པ་དང་། འོད་ཟེར་ཆེན་པོ་བཀྱེ་བ་དང་། ཚངས་པའི་སྒྲ་ཤིན་དུ་གྱ་ནོམ་པ་བསྒྲགས་ནས་སེམས་ཅན་རྣམས་ལ་ཡང་དག་པའི་ཆོས་བསྟན་ཅིང་ཡོངས་སུ་སྨིན་པར་བྱས་པས་སྲོག་ཆགས་བྱེ་བ་ཕྲག་
བརྒྱད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་གྱུར་ཏོ། དེ་ནས་དེ་བཞིན་གཤེགས་པ་དེས་འདི་སྐད་དུ་ཁྱེད་བསྐལ་པ་བརྒྱ་འདས་པའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བསྐལ་པ་དེ་རེ་རེ་ལ་ཡང་དེ་བཞིན་གཤེགས་པ་ལྔ་བརྒྱ་ལྔ་བརྒྱ་ལ་མཆོད་པ་དང་། རིམ་གྲོ་བྱེད་པ་དང་། དེ་བཞིན་གཤེགས་པ་དེ་དག་གིས་དུས་བར་མར་གསུངས་པའི་ཆོས་ཡང་དག་པ་གང་ཡིན་པ་དང་། དུས་ཐ་མར་གསུངས་པའི་ཆོས་ཡང་དག་པ་གང་ཡིན་པ་དེ་དག་ཀྱང་མ་ལུས་པར་ཡོངས་སུ་བཟུང་ནས་སེམས་ཅན་རྣམས་ལ་ཕན་པ་ཆེན་པོ་བྱེད་པར་འགྱུར་རོ། བསྐལ་པ་རེ་རེ་ལ་ཡང་སེམས་རྩེ་གཅིག་ཏུ་གྱུར་ཅིང་རྣམ་པར་གཡེང་བ་མེད་པས་སྐྱེ་བ་ཐམས་ཅད་དུ་ཡང་རྫུས་ཏེ་སྐྱེ་བར་འགྱུར་རོ། སྐྱེ་བ་ཐམས་ཅད་དུ་ཡང་ཏིང་ངེ་འཛིན་ལས་ལྡོག་པར་མི་འགྱུར་ཞིང་རྫུ་འཕྲུལ་གྱིས་ཆོས་སྟོན་པས་སེམས་ཅན་མང་པོ་རྣམས་ཡོངས་སུ་ཟློས་པར་འགྱུར་རོ། བསྐལ་པ་བརྒྱ་འདས་ནས་གཞན་ཡང་དེ་བཞིན་གཤེགས་པ་ཡོན་ཏན་དཔག་ཏུ་མེད་པ་ཞེས་བྱ་བ་ལ་མཆོད་པ་དང་། རིམ་གྲོ་བྱས་པས་ཏིང་ངེ་འཛིན་དང་། རྫུ་འཕྲུལ་དང་། རྣམ་པར་ཐར་པ་ཚད་མེད་པ། རྣམས་ལ་རྣམ་པར་རྩེན་པར་འགྱུར་རོ། ཞེས་ལུང་བསྟན་ཏོ། བྱང་ཆུབ་སེམས་དཔའ་དེ་གཉིས་དེ་བཞིན་གཤེགས་པ་དེ་དང་ཕྲད་པར་གྱུར་པའི་ཆེ་གཅིག་གི་མིང་ནི་མྱ་ངན་མེད་པ་ཞེས་བྱའོ། གཅིག་གི་མིང་ནི་རབ་ཏུ་གནས་པ་ཞེས་བྱ་སྟེ། དེ་བཞིན་གཤེགས་པའི་རྗེས་སུ་ཆོས་ཀྱི་འཁོར་ལོ་བསྐོར་ནས་སེམས་ཅན་ཚད་མེད་གྲངས་མེད་པ་རྣམས་བཏུལ་ཏེ། ཐེག་པ་གསུམ་པོ་དག་ལ་རབ་ཏུ་བཀོད་པས་དེའི་ཚེ་དེ་བཞིན་གཤེགས་པ་དེས་ཀྱང་འདི་སྐད་དུ་ང་ཡོངས་སུ་མྱ་ངན་ལས་འདས་པའི་འོག་ཏུ་མྱ་ངན་མེད་པ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་སྤོབས་པ་དཔག་ཏུ་མེད་པ་ཞེས་བྱ་བར་འགྱུར་རོ། །དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་པའི་འོག་ཏུ་རབ་ཏུ་གནས་པ་འདི་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། །དེ་བཞིན་གཤེགས་པ་འོད་ཟེར་ཁྱད་པར་དུ་འཕགས་པ་ཞེས་བྱ་བར་འགྱུར་རོ། དེ་བཞིན་གཤེགས་པ་དེ་དག་གི་སྐུ་ཚེའི་ཚད་ཀྱང་བསྐལ་པ་རེ་རེ་ཐུབ་པར་འགྱུར་ཏེ། སངས་རྒྱས་ཀྱི་ཞིང་དེ་དག་ཀྱང་ཡོན་ཏན་ཚད་མེད་པ་བསགས་པ་ལས་མངོན་པར་གྲུབ་པ་ཡིན་ནོ། ཞེས་ལུང་བསྟན་ཏོ། བྱང་ཆུབ་སེམས་དཔའ་དེ་གཉིས་ཀྱང་དེ་བཞིན་གཤེགས་པའི་སྤྱན་སྔར་ལུང་བསྟན་པ་ཐོབ་པས་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཏོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་འཐོབ་པར་འདོད་པས་རབ་ཏུ་དགའ་བ་དང་། བརྩོན་འགྲུས་ཆེན་པོ་བསྐྱེད་ནས་ལུས་དང་སྲོག་ལ་འཕངས་པ་མེད་པ་དང་། བག་ཡོད་པས་མངོན་པར་བསྒྲུབ་པར་བྱའོ། དེ་ནས་དེའི་ཚེ་འཁོར་འདུས་པ་དེ་ཉིད་དུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དོན་གྱི་བློ་གྲོས་ཤེས་བྱ་བ་འདུས་པར་གྱུར་པ་དེ་འདུག་པ་བསྟན་ལས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་ཀྱི་ཡེ་ཤེས་ལ་ཐབས་མཁས་པ་འཐོབ་པར་བགྱི་བ་དང་། དེ་བཞིན་གཤེགས་པའི་ཐམས་ཅད་མཁྱེན་པ་ཐོབ་པར་བགྱི་བའི་སླད་དུ་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་ཡང་དག་པར་གསུངས་པ་ནི་ངོ་མཚར་ཆེ་ལགས་སོ། །བཅོམ་ལྡན་འདས་གལ་ཏེ་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་རྣམས་ཐོབ་པར་གྱུར་ན་གདོན་མི་མཚལ་བར་ཆོས་རྣམས་ཀྱི་ཚུལ་ལ་ཐབས་མཁས་པ་ཐོབ་ནས་མྱུར་དུ་བྱང་ཆུབ་ཀྱི་སྙིང་པོར་མཆི་བར་འགྱུར་བས་ཡོན་ཏན་གྱི་རྒྱ་མཚོ་དཔག་ཏུ་མ་མཆིས་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བགྱིད་པ་དང། རྟག་ཏུ་སངས་རྒྱས་རྣམས་མཐོང་ཞིང་ནན་ཏན་གྱིས་ཆོས་ཡང་དག་པར་མངོན་པར་བསྒྲུབ་པ་དང་། དགེ་འདུན་དང་སྤྱོད་པ་མཚུངས་པས་དེ་བཞིན་གཤེགས་པའི་མཆོད་པ་ཆེན་པོ་ཡོངས་སུ་སྦྱོང་བར་འགྱུར་པ་དང་། ཉན་ཐོས་དང་། རང་སངས་
རྒྱས་ཀྱི་ས་ལས་ཡང་དག་པར་འདའ་བར་འགྱུར་ལགས་སོ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་གྱི་བློ་གྲོས་ལ་འདི་སྐད་ཅེས་བཀའ་སྩལ་ཏོ། དེ་དེ་བཞིན་ནོ། དེ་དེ་བཞིན་ཏེ། ཁྱོད་ཀྱི་ཇི་སྐད་སྨྲས་པ་དེ་བཞིན་དུ་དོན་གྱི་བློ་གྲོས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་ཐམས་ཅད་ཐོབ་པར་གྱུར་ན་ཡོན་ཏན་ཁྱད་པར་དུ་འཕགས་པ་ཚད་མེད་པ་རྣམས་རབ་ཏུ་འཐོབ་པར་འགྱུར་རོ། །གལ་ཏེ་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་རྣམས་ལ་གནས་པར་གྱུར་ན་ཆོས་ཀྱི་རྒྱ་མཚོའི་ཕྱག་རྒྱའི་ཏིང་ངེ་འཛིན་རྣམས་ལ་ཐབས་མཁས་པས་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་འགྱུར་རོ། དོན་གྱི་བློ་གྲོས་འདི་ལྟ་སྟེ། དཔེར་ན་རིའི་རྒྱལ་པོ་རི་རབ་ནི་རིན་པོ་ཆེ་སྣ་ཚོགས་ལས་མངོན་པར་གྲུབ་པ་རྒྱ་མཚོ་ཆེན་པོ་ལས་དཔག་ཚད་བརྒྱད་ཁྲི་བཞི་སྟོང་གིས་གྱེན་དུ་འཕགས་ཤིང་མཆོག་ཏུ་གསལ་བར་གནས་སོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་དེ་བཞིན་དུ་ཏིང་ངེ་འཛིན་འདིས་ལེགས་པར་གཞོལ་བར་བྱེད་པའི་ཕྱིར་ཆོས་ཀྱི་གཏེར་གྱི་རྒྱ་མཚོ་ཆེན་པོ་ཐམས་ཅད་ལས་མངོན་པར་འཕགས་ནས་ལྷ་དང་མིར་བཅས་པའི་འཇིག་རྟེན་ཐམས་ཅད་ཟིལ་གྱིས་གནོན་ཅིང་བླ་ན་མེད་པའི་གནས་པས་མཆོག་ཏུ་གསལ་བར་གནས་སོ། གཞན་ཡང་འདི་ལྟ་སྟེ། དཔེར་ན་ཟླ་བའི་དཀྱིལ་འཁོར་ནི་སྐར་མའི་ཚོགས་མང་པོས་ཡོངས་སུ་བསྐོར་བ་ཡིན་ནོ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་དེ་བཞིན་དུ། ལྷ་དང་མིར་བཅས་པའི་འཇིག་རྟེན་གྱི་འཁོར་འདུས་པ་ཆེན་པོ་ཐམས་ཅད་དུ་རབ་ཏུ་གསལ་བར་གནས་སོ། །དོན་གྱི་བློ་གྲོས་ཁྱོད་ཀྱིས་ཆོས་འདི་ཐོས་པར་གྱུར་ན་འདི་ལས་སུ་ཡང་མི་དགའ་ཞིང་མོས་པ་མི་སྐྱེ་བ་འམ། བརྩོན་འགྲུས་མི་སྐྱེད་པ་འམ། བག་ཡོད་པ་དང་བཅས་པར་མི་འགྱུར་བ་གང་ཡང་མེད་པར་བལྟ་བར་བྱ་སྟེ། སེམས་ཅན་བསོད་ནམས་ཆུང་ཞིང་དམན་པ་ལ། མོས་པ་ནི་མ་གཏོགས་སོ། །སེམས་ཅན་གང་ཤེས་རབ་ཆེན་པོ་དང་ལྡན་པ་
དག་གིས་ནི་ཆོས་རྒྱ་ཆེན་པོ་འདི་མངོན་པར་སྒྲུབ་པར་བྱེད་ལ། ཆོས་རྒྱ་ཆེན་པོ་མངོན་པར་སྒྲུབ་པ་གང་ཡིན་པ་དེ་དག་ནི་ཡོན་ཏན་ཕུན་སུམ་ཚོགས་པའི་སྐྱེས་བུ་དམ་པ་རྣམས་ཀྱིས་ཡོངས་སུ་གཟུང་བར་འགྱུར་ཏེ། དས་ཇི་སྐད་དུ་གང་གིས་ཆོས་ཀྱི་ནོར་རྒྱ་ཆེན་པོ་འདི་ཡོངས་སུ་འཛིན་པར་བྱེད་པ་དེ་དག་ནི་ལྷ་དང་མི་རྣམས་ཀྱིས་ཡོངས་སུ་བསྲུང་ཞིང་རིམ་གྲོ་བྱེད་པ་དང་། ཕྱོགས་བཅུའི་སངས་རྒྱས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་རྗེས་སུ་དགོངས་པར་འགྱུར་རོ་ཞེས་བསྟན་པ་ལྟ་བུ་འོ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་རྣམ་གྲངས་འདི་ལ་ནན་ཏན་གྱིས་སྒྲུབ་ཅིང་སློབ་པར་བྱེད་པ་དེ་དག་ནི་སེམས་ཅན་རྣམས་ལ་ཕན་པ་ཆེན་པོ་བྱེད་ཅིང་ཐེ་ཚོམ་ཐམས་ཅད་རབ་ཏུ་སེལ་པ་དང་། མདུད་པ་ཐམས་ཅད་རབ་ཏུ་དགྲོལ་བ་དང་། བག་ཆགས་རྣམས་སྤོང་བ་དང་། བག་ལ་ཉལ་བ་རྣམས་གཅོད་པ་དང་། སྲིད་པའི་དགའ་བ་རྣམས་ལས་ཡང་དག་པར་འདས་པ་དང་། སྲེད་པའི་རྒྱ་མཚོ་ལས་ཡང་དག་པར་རྒལ་བ་དང་། མུན་ནག་རྣམས་གཏན་ཏུ་བསལ་བ་དང་། སྐྲག་ཅིང་འཇིགས་པ་རྣམས་རབ་ཏུ་སྤོང་བ་དང་། ཐབས་མཁས་པས་སེམས་ཅན་ཐམས་ཅད་ཀྱི་སེམས་རབ་ཏུ་ཤེས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འོད་ཟེར་ཆེན་པོ་བཀྱེ་བས་འོད་ཟེར་དེས་འཇིག་རྟེན་གྱི་ཁམས་གྲངས་མེད་པ་གསལ་བར་མཛད་ཅིང་ཉི་མ་དང་ཟླ་བའི་འོད་ཟེར་ཐམས་ཅད ཀྱང་ཟིལ་གྱིས་མནན་ཏོ། འོད་ཟེར་བཀྱེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་གང་རྒྱ་མཚོའི་ཕྱག་རྒྱའི་ཏིང་ངེ་འཛིན་འདི་ལ་ནན་ཏན་གྱིས་སྒྲུབ་པར་བྱེད་པ་དེ་དག་ཀྱང་དེ་བཞིན་དུ་རྫུ་འཕྲུལ་ཆེན་པོ་རབ་ཏུ་སྟོན་ཅིང་འོད་ཟེར་ཆེན་པོ་འགྱེད་པ་དང་། སེང་གེའི་སྒྲ་ཆེན་པོ་བསྒྲགས་ནས་ཆོས་འདི་ཡང་དག་པར་སྟོན་པར་བྱེད་པས་ཁམས་གསུམ་ལས་
ཡང་དག་པར་འདས་ཤིང་སྣང་བ་ཆེན་པོ་བྱེད་པར་འགྱུར་ཏེ། དེ་དང་ཇི་ལྟ་བ་བཞིན་པས་བྱེ་བྲག་ཏུ་གྱུར་པ་ཅི་ཡང་མེད་དོ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ཀྱིས་འདི་སྐད་ཅེས་གསོལ་ཏོ། བཅོམ་ལྡན་འདས་དེ་བཞིན་གཤེགས་པས་ཆོས་ཀྱིས་རྣམ་གྲངས་འདི་བྱིན་གྱིས་བརླབས་ནས་སླད་མའི་དུས་ཀྱི་ཚེ་སེམས་ཅན་གང་དག་ཆོས་ཀྱི་རྣམ་གྲངས་འདིའི་མིང་ཐོས་པ་ཙམ་གྱིས་ཀྱང་ཡོན་ཏན་དཔག་ཏུ་མ་མཆིས་པ་ཐོབ་པར་འགྱུར་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་པའི་ཕྱིར་ཡང་འོད་ཟེར་ཆེན་པོ་རབ་ཏུ་བཀྱེ་འོ། གཞན་ཡང་ཕྱག་སོར་གཅིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་ཁམས་རྣམས་རབ་ཏུ་གཡོ་བར་མཛད་པས་སེམས་ཅན་རྣམས་བདེ་བ་ཆེན་པོ་ཐོབ་པར་གྱུར་ཏོ། དེའི་ཚེ་འཁོར་དེར་འདུས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་ཕྱེ་ཆེན་པོ་ལ་སོགས་པའི་འཁོར་རྣམས་ཀྱིས་ལྷའི་མེ་ཏོག་དམ་པ་དང་། ལྷའི་གོས་དམ་པ་དག་གིས་མངོན་པར་གཏོར་ནས་དུས་གཅིག་ཏུ་ལྷའི་རོལ་མོ་རྣམས་བྱས་སོ། ལྷ་ཚད་མེད་པ་རྣམས་ཀྱིས་ཀྱང་ལྷའི་གོས་རྒྱང་ནས་མངོན་པར་གཏོར་བས་ནམ་མཁའ་ཀུན་དུ་གད་བར་གྱུར་ཏེ། སྐད་འཐུན་པར་འདི་སྐད་དུ་ཀྱེ་མ་སངས་རྒྱས་རྣམས་ཀྱི་སྤྱོད་ཡུལ་ནི་བསམ་གྱིས་མི་ཁྱབ་བོ། །གང་གིས་ཆོས་ཟབ་མོ་འདི་ཡོངས་སུ་འཛིན་པར་བྱེད་པ་དེ་དག་ནི་སེམས་ཅན་ཐམས་ཅད་ཀྱིས་གུས་པར་མཆོད་ཅིང་ཕྱག་བྱ་བའི་འོས་སུ་གྱུར་པར་རིག་པར་བྱའོ། ཞེས་སྨྲས་སོ། དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །བློ་གྲོས་མཐའ་ཡས་མ་འོངས་པའི་དུས་ན་གང་བསོད་ནམས་ཆུང་བའི་སེམས་ཅན་དེ་དག་གིས་ནི་གོ་ཆའི་བཀོད་པ་དང། ཏིང་ངེ་འཛིན་གྱི་བཀོད་པ་འདི་ཐོས་པར་མི་འགྱུར་གྱི། སེམས་ཅན་གང་ཐབས་མཁས་པ་དང་ལྡན་པ་དང། ཚོགས་ཆེན་པོ་ཡོངས་སུ་སྡུད་པ་
གང་ཡིན་བ་དེ་དག་གིས་མ་འོངས་པའི་དུས་ན་ཆོས་འདི་ཐོས་པར་འགྱུར་རོ། ཆོས་འདི་ལ་གང་གིས་ནན་ཏན་དུ་སྒྲུབ་པར་བྱེད་པ་དེ་དག་ནི་དུས་གསུམ་གྱི་སངས་རྒྱས་བཅོམ་ལྡན་འདས་ཀྱིས་ཡོངས་སུ་བཟུང་པར་འགྱུར་རོ། །བློ་གྲོས་མཐའ་ཡས་མ་འོངས་པའི་དུས་ན་འཇིགས་པ་ཆེན་པོ་འབྱུང་བའི་ཚེ་ངའི་ཆོས་ཀྱི་རྣམ་གྲངས་འདི་ཁྱོད་ལ་སོགས་པ་ལ་ཡོངས་སུ་གཏད་དོ། ངས་བསྐལ་པ་བྱེ་བ་ཁྲག་ཁྲིག་གྲངས་མེད་པ་ནས་བླ་ན་མེད་པའི་ཆོས་ཀྱི་གཏེར་རབ་ཏུ་བསགས་པས་ཡོན་ཏན་ཕུན་སུམ་ཚོགས་པ་དང། དཔག་ཏུ་མེད་པའི་བདེ་བ་ཐོབ་པ་གང་ཡིན་པ་དེ་དག་ཁྱོད་ཀྱིས་ཀྱང་འཐོབ་པར་འགྱུར་གྱིས་སྡུག་བསྔལ་གྱི་ཕུང་པོ་ཐམས་ཅད་ཁྱོད་ཀྱིས་རབ་ཏུ་སྤངས་ཏེ་ཡོན་ཏན་གྱི་རྒྱ་མཚོ་དཔག་ཏུ་མེད་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་གཞོལ་བར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ། བློ་གྲོས་མཐའ་ཡས་བྱང་ཆུབ་སེམས་དཔའ་སེམས་དཔའ་ཆེན་པོ་ལྔ་བརྒྱ་དང་བཅས་པ་དང། ཁྱིམ་བདག་མ་སྨད་པ་དང། ཚོང་དཔོན་བཟང་སྐྱོད་ལ་སོགས་པ་གཙོ་བོར་གྱུར་པ་རྣམས་ཀྱིས་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་འདི་སྐད་ཅེས་གསོལ་ཏོ། བཅོམ་ལྡན་འདས་བདག་ཅག་རྣམས་མཐུ་ཅི་མཆིས་པས་དེ་བཞིན་གཤེགས་པའི་བྱང་ཆུབ་ཆེན་པོའི་ཆོས་ཡོངས་སུ་བཟུང་ནས་སླད་མའི་དུས་ཀྱི་ཚེ་སེམས་ཅན་རྣམས་ལ་ཕན་གདགས་པར་བགྱིའོ་ཞེས་གསོལ་ཏོ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འདུག་པ་སྟན་ལས་ལངས་ཏེ། མེ་ཏོག་རྣམ་པ་སྣ་ཚོགས་ཀྱིས་དེ་བཞིན་གཤེགས་པ་ལ་མངོན་པར་གཏོར་ནས་ལུས་ཀྱི་གོས་མཆོག་དམ་པ་ཕུང་དེ། མཆོད་པ་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་དགེ་བའི་རྩ་བ་འདིས་སེམས་ཅན་ཐམས་ཅད་ལ་ཡོངས་སུ་བསྔོ་སྟེ། སེམས་ཅན་རྣམས་བྱང་ཆུབ་ཀྱི་ཕྱོགས་ཀྱི་ཆོས་ཕུན་སུམ་ཚོགས་པ་འཐོབ་པར་འགྱུར་བ་དང། དེ་བཞིན་གཤེགས་པའི་ཐམས་ཅད་མཁྱེན་པའི་ཡེ་ཤེས་མངོན་པར་སྒྲུབ་པར་འགྱུར་བ་དང། སླད་མའི་དུས་ཀྱི་ཚེ་སེམས་ཅན་ཐམས་ཅད་ཀྱི་དགེ་བའི་རྩ་བ་ཇི་སྙེད་པ་དེ་དག་ཡོངས་སུ་རྫོགས་པར་འགྱུར་བར་སྨོན་ལམ་འདེབས་ལགས་སོ། །དེ་སྐད་ཅེས་གསོལ་བ་དང། དེ་ནས་དེའི་ཆོ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་རབ་ཏུ་དགའ་བ་བསྐྱེད་པའི་ཕྱིར་ཚིགས་སུ་བཅད་དེ་བཀའ་སྩལ་པ། །སེམས་ཅན་ཐམས་ཅད་ཀུན་ལ་ནི། །ཕན་པ་ཆེན་པོ་བྱ་བའི་ཕྱིར། །ང་ཡི་བྱང་ཆུབ་ཆོས་བཟུང་ནས། །ཆོས་རྒྱལ་སེག་གེའི་སྒྲ་སྒྲོགས་ཤིང། །མ་འོངས་མ་ཐའི་དུས་ཀྱི་ཚེ། །གང་ཞིག་ཆོས་ནི་ཡོངས་ཚོལ་བ། རྒྱ་ཆེན་ཆོས་འདི་ཐོས་གྱུར་ན། ། ཐམས་ཅད་བདེ་བ་ཐོབ་པར་འགྱུར། །དས་ནི་ཇི་སྐད་བསྟན་པ་བཞིན། །གང་གིས་ཐེག་པ་འདི་མཐོང་ཞིང་། །མདོ་སྡེའི་ཆོས་འདི་ཐོས་གྱུར་ན། །ཇི་ལྟར་མོས་པའི་བདེ་བ་འཐོབ། །བློ་དང་ལྡན་པ་གང་ཞིག་གིས། །ཐབས་མཁས་དག་ནི་རབ་བསྒོམས་ཏེ། །ཆོས་མཆོག་འདི་ནི་ཐོས་གྱུར་ན། །ལུས་དང་སེམས་ནི་རབ་བདེར་འགྱུར། །གང་ཞིག་འཁོར་འདིར་འདུས་གྱུར་པ། །ང་ཡིས་མངོན་སུམ་བཤད་མཐོང་དང་། །ཆོས་འདི་ཐོས་པར་གྱུར་ནས་ནི། །རབ་ཏུ་དགའ་བ་གང་སྐྱེད་པ། །མ་འོངས་ཐ་མའི་དུས་ཀྱི་ཚེ། །ཁྱོད་ཀྱིས་བསོད་རྣམས་ཚད་མེད་པའི། །ཕུང་པོ་དག་ནི་རབ་བསྐྱེད་ཅིང་། །འཁོར་བ་མཐའ་མེད་སྒྲོལ་བར་འགྱུར། །མ་འོངས་ཐ་མའི་དུས་ཀྱི་ཚེ། །ཆོས་རྗེས་རབ་ཏུ་གསུངས་པ་ཡི། །ཆོས་འདི་གང་ཞིག་འཛིན་བྱེད་པ། །སངས་རྒྱས་རྣམས་ཀྱིས་གཟུང་པར་འགྱུར། །མ་འོངས་ཐ་མའི་དུས་ཀྱི་ཚེ། །ང་ཡི་བྱང་ཆུབ་ཆོས་འཛིན་པ། །དེ་ནི་སངས་རྒྱས་ཚད་མེད་པའི། །ཐ་མའི་དུས་ཀྱི་ཆོས་འཛིན་འགྱུར། །བཅོམ་ལྡན་འདས་ཀྱིས་ཆོས་འདི་བསྟན་པ་ན། །བྱང་ཆུབ་སེམས་དཔའ་ཚད་མེད་པ་སྙིང་མི་སྐྱེ་བའི་ཆོས་ཀྱི་བཟོད་པ་ཐོབ་པར་གྱུར་ཏོ། སེམས་ཅན་ཚད་མེད་པ་སྙེད་ནི་དགེ་བའི་རྩ་བ་ཡོངས་སུ་སྨིན་པར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མཐའ་ཡས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། གོ་ཆའི་བཀོད་པ་བསྟན་པ་ཞེས་བྱ་བའི་ལེའུ་སྟེ་མདུན་པ་རྫོགས་སོ།། །།