འཕགས་པ་ཆོས་བཅུ་པ་ཞེསབྱ་བ་ཐེག་པ་ཆེན་པོའི་མདོ།
འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་དགུ་པ་སྟེ་འཕགས་པ་ཆོས་བཅུ་པ་ཞེས་བྱ་བ། བམ་པོ་དང་པོ། རྒྱ་གར་སྐད་དུ། ཨཱ་རྻ་ད་ཤ་དྷ་རྨཱ་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཆོས་བཅུ་པ་ཞེས་བྱ་བ་ཐེག་པ་ཆེན་པོའི་མདོ།། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། །བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་
ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་གཅིག་ཏུ་བཞུགས་ཏེ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་སྟན་ལས་ལངས་ཏོ། བློ་གྲོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་པད་མའི་སྙིང་པོ་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ལས་བརྩམས་ཏེ་ཞུ་ལགས་སོ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། རིགས་ཀྱི་བུ་དེ་བཞིན་གཤེགས་པས་ཁྱོད་ལ་རྟག་ཏུ་སྐབས་ཕྱེས་ཅི་དང་ཅི་འདོད་པ་དྲིས་ཤིག་དང། །ངས་དྲིས་པ་དེ་དང་དེ་ཉིད་ཀྱིས་ལུང་བསྟན་པས་ཁྱོད་ཀྱི་སེམས་རངས་པར་བྱའོ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་ཐེག་པ་ཆེན་པོ་ལ་ཡང་དག་པར་ཞུགས་པ་དགེ་སློང་ཐེག་པ་ཆེན་པོ་ལ་ཡང་དག་པར་ཞུགས་པ་ཞེས་བགྱི་བ་བཅོམ་ལྡན་འདས་ཇི་ཙམ་གྱིས་ན་དགེ་སློང་ཐེག་པ་ཆེན་པོ་ལ་ཡང་དག་པར་ཞུགས་པ་ལགས། དེ་བཞིན་གཤེགས་པས་ཇི་ལྟར་ཐེག་པ་ཆེན་པོ་ལ་ཡང་དག་པར་ཞུགས་པ་ལགས་པར་འདོགས་པར་མཛད། དོན་གང་གིས་ན་ཐེག་པ་ཆེན་པོ་འདི་ལ་ཐེག་པ་ཆེན་པོ་ཞེས་བགྱི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་
ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ལ་ལགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ཁྱོད་ཀྱི་ལྷག་པར་གཡོ་བ་ནི་བཟང་བ་ཡིན་། ཡོངས་སུ་དཔྱད་པ་ཡང་བཟང་བ་ཡིན། དྲིས་པ་ལུང་བསྟན་པ་ལ་སྤོབས་པ་ཡང་བཟང་བ་ཡིན་ཏེ། རིགས་ཀྱི་བུ་ཁྱོད་འདི་ལྟ་སྟེ། ཀྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་། མི་རྣམས་ལ་ཕན་པ་དང་། བདེ་བའི་ཕྱིར་ཞུགས་ཏེ། ཁྱོད་དེ་བཞིན་གཤེགས་པ་ལ་དོན་དེ་ལྟ་བུ་ཡོངས་སུ་དྲི་བར་སེམས་པ་ནི་ལེགས་སོ་ལེགས་སོ། རིགས་ཀྱི་བུ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་བཅོམ་ལྡན་འདས་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ་བྱང་ཆུབ་སེམས་དཔའ་ཆོས་བཅུ་དང་ལྡན་ན་ཐེག་པ་ཆེན་པོ་ལ་ཡང་དག་པར་ཞུགས་པ་ཡིན་ཏེ། བཅུ་གང་ཞེ་ན། འདི་ལྟ་སྟེ། དད་པ་དང་ལྡན་པ་ཡིན། ནན་ཏན་སྙིང་པོར་བྱེད་པ་ཡིན། །རིགས་ཕུན་སུམ་ཚོགས་པ་ཡིན། བྱང་ཆུབ་ཀྱི་སེམས་འདོད་པ་ཡིན། ཆོས་འདོད་པ་ཡིན། ཆོས་ལ་ཉེ་བར་རྟོག་པར་བྱེད་པ་ཡིན། ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ་ཡིན། ང་རྒྱལ་དང་། ཆེ་བའི་ང་རྒྱལ་དང་བྲལ་བ་ཡིན། དགོངས་ཏེ་གསུངས་པ་རྟོགས་པར་བྱ་བ་ལ་མཁས་པ་ཡིན། ཉན་ཐོས་དང་། རང་སངས་རྒྱས་དང་ལྡན་པའི་ཐེག་པས་ཡོངས་སུ་མྱ་ངན་ལས་འདའ་བར་མི་འདོད་པ་ཡིན་ནོ། །གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་དད་པ་དང་ལྡན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རང་བཞིན་གྱིས་གཡོ་མེད་ཅིང་རྒྱུ་མེད་ལ། དྲང་ཞིང་དྲང་པོའི་རང་བཞིན་ཅན་ཡིན་ཏེ། དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་རྣམས་ཀྱི་བྱང་ཆུབ་ལ་ཡང་མངོན་པར་ཡིད་ཆེས། དེ་བཞིན་གཤེགས་པ་རྣམས་ཀྱི་ཡེ་ཤེས་སྐད་ཅིག་ལ་དུས་གསུམ་དང་ལྡན་པ་ལ་ཡང་མངོན་པར་ཡིད་ཆེས། དེ་བཞིན་གཤེགས་པའི་སྙིང་པོ་རྒ་བ་མེད་པ་དང་། འཆི་བ་མེད་པ་དང་། ཟད་པ་མེད་པ་དང་། འགོག་པ་མེད་པ་དང་། ཆད་པ་མེད་པ་ལ་ཡང་མངོན་པར་ཡིད་ཆེས། ཡང་དག་པའི་མཐའ་དང་། ཆོས་ཀྱི་དབྱིངས་དང་། ཐམས་ཅད་ཤེས་པ་ཉིད་དང་། རྣམ་པ་ཐམས་ཅད་མཁྱེན་པ་ཉིད་དང་། སྟོབས་རྣམས་དང་། མི་འཇིགས་པ་རྣམས་དང་། སངས་རྒྱས་ཀྱི་ཆོས་མ་འདྲེས་པ་རྣམས་ལ་ཡང་མངོན་པར་ཡིད་ཆེས། དེ་བཞིན་གཤེགས་པ་རྣམས་ཀྱི་དབུའི་གཙུག་ཏོར་བལྟར་མི་མཐོང་བ་ལ་ཡང་མངོན་པར་ཡིད་ཆེས། དེ་བཞིན་གཤེགས་པ་རྣམས་ཀྱི་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་བརྒྱན་པ་དང་། དཔེ་བྱད་བཟང་པོ་བརྒྱད་བཅུ་ཕུན་སུམ་ཚོགས་པ་དང་། འོད་འདོམ་གང་བ་ཉིད་ལ་ཡང་མངོན་པར་ཡིད་ཆེས། ཉན་ཐོས་ཀྱིས་བཤད་པ་འམ། རང་སངས་རྒྱས་ཀྱིས་བཤད་པ་འམ། བྱང་ཆུབ་སེམས་དཔའ་བཤད་པ་འམ། དེ་ལས་གཞན་བ་དྲང་སྲོང་ཆེན་པོ་དག་གིས་སྨྲས་པ་ལེགས་པར་བཤད་པ་ལ་ཡང་མངོན་པར་ཡིད་ཆེས། འཇིག་རྟེན་འདི་དང་། འཇིག་རྟེན་ཕ་རོལ་ལ་ཡང་མངོན་པར་ཡིད་ཆེས། དགེ་སྦྱོང་དང་། བྲམ་ཟེ་ཡང་དག་པར་སོང་བ་རྣམས་དང་། ཡང་དག་པར་ཞུགས་པ་དག་ལ་ཡང་མངོན་པར་ཡིད་ཆེས། དགེ་བའི་ལས་ཀྱི་རྣམ་པར་སྨིན་པ་འདོད་པ་དང་། དགའ་བ་དང་། ཡིད་དུ་འོང་བ་རྣམས་ཀྱི་ནང་དུ་ལྷའི་དབང་པོ་འམ་མི་རྣམས་ཀྱི་ནང་དུ་མིའི་དབང་པོར་འགྱུར་བའི་འབྲས་བུ་ལ་ཡང་མངོན་པར་ཡིད་ཆེས། མི་དགེ་བའི་ལས་ཀྱི་རྣམ་པར་སྨིན་པའི་འབྲས་བུ་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ནང་དུ་མི་འདོད་པ་དང་། མི་སྡུག་པ་དང་། མི་དགའ་བ་དང་། ཡིད་དུ་མི་འོང་བ་དང་། མི་བཟང་བ་དང་། དྲག་པ་དང་། རྩུབ་པ་དང་། ཚ་བར་འགྱུར་བ་ལ་ཡང་མངོན་པར་ཡིད་ཆེས་སོ། དེ་དེ་ལྟར་མངོན་པར་ཡིད་ཆེས་པས་ཆོས་
གསུམ་སྤངས་པ་ཡིན་ཏེ། གསུམ་གང་ཞེ་ན། འདི་ལྟ་སྟེ། ནེམ་ནུར་དང་། ཡིད་གཉིས་དང་། ཐེ་ཚོམ་མོ། རིགས་ཀྱི་བུ་དེ་ནི་བྱང་ཆུབ་སེམས་དཔའ་དད་པས་རྗེས་སུ་འབྲང་བ་ཞེས་བྱ་སྟེ། རིགས་ཀྱི་བུ་ད་ལྟར་ན་བྱང་ཆུབ་སེམས་དཔའ་དད་པ་དང་ལྡན་པ་ཡིན་ནོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། ། དད་པ་ཐེག་པ་མཆོག་ཡིན་ཏེ། །དེས་ནི་འདྲེན་རྣམས་ངེས་པར་བྱུང་། །དེ་ཕྱིར་བློ་གྲོས་ལྡན་པའི་མིས། །དད་པའི་རྗེས་འབྲང་ཉིད་ལ་བསྟེན། །འཇིག་རྟེན་དག་ན་དད་པ་མཆོག །དད་ལྡན་རྣམ་པར་ཉམས་པ་མེད། །དེ་ལྟ་བས་ན་མཁས་པའི་མིས། །དད་པས་རྗེས་སུ་འབྲང་བ་སྟེན། །དད་པ་མེད་པའི་མི་ལ་ནི། །དཀར་པོའི་ཆོས་རྣམས་མི་སྐྱེ་སྟེ། །མེ་ཡིས་ས་བོན་ཚིག་རྣམས་ལ། །མྱུ་གུ་སྔོན་པོ་ཇི་བཞིན་ནོ། །རིགས་ཀྱི་བུ་ཇི་ལྟར་ན་བྱང་ཆུབ་སེམས་དཔའ་ནན་ཏན་སྙིང་པོར་བྱེད་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སྐྲ་དང་། ཁ་སྤུ་བྲེགས་ཏེ། གོས་ངུར་སྨྲིག་དག་བགོས་ནས་དད་པས་ཁྱིམ་ནས་ཁྱིམ་མེད་པར་ལེགས་པ་ཁོ་ནར་རབ་ཏུ་འབྱུང་ངོ། རབ་ཏུ་བྱུང་ནས་ཀྱང་ཉན་ཐོས་ཀྱི་བསླབ་པ་དང་། ཆོ་ག་དང་། སྤྱོད་ཡུལ་དང་། ཀུན་སྤྱོད་པ་དག་ལ་ཡང་སློག་པར་བྱེད། རང་སངས་རྒྱས་ཀྱི་བསླབ་པ་དང་། ཆོ་ག་དང་། སྤྱོད་ཡུལ་དང་། ཀུན་སྤྱོད་པ་དག་ལ་ཡང་སློབ་པར་བྱེད་དོ། །དེ་དེ་ལྟར་སློབ་པས་ལུས་དང་། ངག་དང་། སེམས་དང་ལྡན་པའི་གནས་ངན་ལེན་དག་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་སྤངས་པ་ཡིན་ནོ། དེ་ལ་ལུས་དང་ལྡན་པའི་གནས་ངན་ལེན་གང་ཞེ་ན། འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། དབྱིག་པ་དང་། མཚོན་ཆ་དང་། བོང་བ་དང་། ལག་པ་དག་གིས་གཞན་ལ་གནོད་པར་བྱེད་པ་དང་། ལག་པ་རྒོད་པ་དང་། རྐང་པ་རྒོད་པ་དང་། རྒྱུག་པ་དང་། དཀྱུ་བ་དང་། མཆོང་བ་དང་། མགྱོག་པར་འགྲོ་བ་དང་། རྐྱལ་བ་སྟེ། དེ་དག་ནི་ལུས་དང་ལྡན་པའི་
གནས་ངན་ལེན་ཅེས་བྱའོ། དེ་ལ་ངག་གི་གནས་ངན་ལེན་གང་ཞེ་ན། འདི་ལྟ་སྟེ། བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་ཀྱལ་བ་དང་། ཉེས་པར་སྨྲ་བ་བརྗོད་པ་དང་། ། མདོ་སྡེ་ཟབ་མོ་ཟབ་མོ་དག་སྤོང་པར་བྱེད་པ་དང་། མཁན་པོ་དང་། སློབ་དཔོན་དང་། བླ་མ་ལྟ་བུ་རྣམས་དང་། ཚངས་པ་མཚུངས་པར་སྤྱོད་པ་རྣམས་ལ་མི་སྙན་བརྗོད་པར་བྱེད་པ་སྟེ། དེ་ནི་དག་གི་གནས་ངན་ལེན་ཅེས་བྱའོ། །དེ་ལ་ཡིད་ཀྱི་གནས་ངན་ལེན་གང་ཞེ་ན། འདི་ལྟ་སྟེ། བརྣབ་སེམས་དང་། གནོད་སེམས་དང་། ལོག་པར་ལྟ་བ་དང་། ཕྲག་དོག་དང་། སེར་སྣ་དང་། རྙིད་པ་འདོད་པ་དང་། གྲགས་པ་འདོད་པ་དང་། ཤེས་ཀྱི་ཁེ་འདོད་པ་དང་། རིགས་ཀྱིས་རྒྱགས་པ་དང་། གཟུགས་ཀྱིས་རྒྱགས་པ་དང་། ལང་ཚོས་རྒྱགས་པ་དང་། ནད་མེད་པས་རྒྱགས་པ་དང་། གསོན་པས་རྒྱགས་པ་དང་། མང་དུ་ཐོས་པས་རྒྱགས་པ་དང་། བསྒོམས་པས་རྒྱགས་པ་དང་། འདོད་པའི་རྣམ་པར་རྟོག་པ་དང་། གནོད་སེམས་ཀྱི་རྣམ་པར་རྟོག་པ་དང་། རྣམ་པར་འཚེ་བའི་རྣམ་པར་རྟོག་པ་དང་། ཉེ་དུའི་རྣམ་པར་རྟོག་པ་དང་། ཡུལ་གྱི་རྣམ་པར་རྟོག་པ་དང་། ཆོས་གོས་དང་། བསོད་སྙོམས་དང་། མལ་ཆ་དང་། སྟན་དང་། ན་བའི་གསོས་སྨན་དང་། ཡོ་བྱད་ཀྱི་རྣམ་པར་རྟོག་པ་དང་། གནས་ལ་ལྷག་པར་ཞེན་པ་དང་། བཞོན་བ་ལ་ལྷག་པར་ཞེན་པ་དང་། མལ་ཆ་ལ་ལྷག་པར་ཞེན་པ་དང་། བཏུང་བ་ལ་ལྷག་པར་ཞེན་པ་དང་། བཟའ་བ་ལ་ལྷག་པར་ཞེན་པ་དང་། ཚེ་བའི་བདག་ཉིད་ལ་ལྷག་པར་ཞེན་པ་དང་། །ཆུང་མ་དང་། བུ་དང་། བུ་མོ་དང་། ཐོང་གཤོལ་དང་། ཞིང་ལས་དང་། བྲན་དང། བྲན་མོ་དང་། ལས་མི་དང་། ཞོ་ཤས་འཚོ་བ་དང་། མཛའ་བཤེས་དང་། གྲོས་གྲོགས་དང་། ཉེ་དུ་དང་། སྣག་གི་གཉེན་མཚམས་དག་ལ་ལྷག་པར་ཞེན་པ་དང་། ནོར་དང་། འབྲུ་དང་། མཛོད་དང་། བང་བ་དག་ལ་ལྷག་པར་ཞེན་པ་དང་། འཚོ་བའི་ཡོ་བྱད་རྣམ་པ་སྣ་ཚོགས་ཀྱི་བར་དག་ལ་ལྷག་པར་ཞེན་པ་སྟེ། ། དེ་དེ་ལྟར་ལྷག་པར་ཞེན་པས་ཇི་སྐད་སྨོས་པའི་དངོས་པོ་དེ་དག་ལས་དངོས་པོ་གང་ཡང་རུང་བ་དག་ཆུད་ཟོས་པ་ན་མྱ་ངན་དང་། སྨྲེ་སྔགས་འདོན་པ་དང་། སྦུག་བསྔལ་བ་དང་། ཡིད་མི་བདེ་བ་དང་། །འཁྲུག་པ་
དག་འབྱུང་བར་འགྱུར་ཞིང་དེ་ལྟར་དེའི་ཡིད་སྲེད་པའི་བརླན་གྱིས་ཡོངས་སུ་བརླན་པས་སྲེད་པར་ཉིད་མཚམས་སྦྱོར་བར་འགྱུར་བ་སྟེ། རིགས་ཀྱི་བུ་མདོར་ན་ཡིད་ཀྱི་ལས་ཀྱི་འཁྲུལ་འཁོར་གྱིས་འཕངས་ནས་འཁོར་བའི་འཁོར་ལོར་ཡོངས་སུ་འཁྱམ་པར་འགྱུར་བ་དེ་ནི་ཡིད་ཀྱི་གནས་ངན་ལེན་ཅེས་བྱའོ། །དེ་དེ་ལྟར་ལུས་དང་། ངག་དང་། སེམས་ཀྱི་གནས་ངན་ལེན་དང་བྲལ་པས་ན་མཁན་པོ་ལ་སྟོན་པའི་འདུ་ཤེས་སྐྱེད་པ་དང་། སློབ་དཔོན་ལ་མཁན་པོའི་འདུ་ཤེས་སྐྱེད་པ་དང་། ཚངས་པ་མཚུངས་པར་སྤྱོད་པ་རྒན་རབས་དང་། བར་མ་དང་། གསར་བུ་རྣམས་ལ་རྗེས་དང་བཅས་པ་དང་། གུས་པ་དང་བཅས་པར་འགྱུར་ཞིང་དེ་གཅིག་པུ་དབེན་པར་གནས་ནས་འདི་སྙམ་དུ་སེམས་ཏེ། འདི་ལྟར་བདག་སེམས་ཅན་ཐམས་ཅད་བསྒྲལ་བའི་ཕྱིར་བརྩོན་པ་དང་། སེམས་ཅན་ཐམས་ཅད་དགྲོལ་བའི་ཕྱིར་བརྩོན་པ་དང་། སེམས་ཅན་ཐམས་ཅད་དུལ་བ་དང་ཞི་བ་ལ་དགོད་པའི་ཕྱིར་བརྩོན་པར་བྱེད་པ་ན་བདག་ཉིད་མ་དུལ་བ་དང་། མ་ཞི་བ་དང་། མ་སྲུངས་པ་དང་། མ་བཏུལ་བ་ནི་བདག་གི་ཆ་མ་ཡིན་པས་བདག་གིས་ཅི་ནས་ཀྱང་བདག་མཐོང་བ་ཙམ་གྱིས་སེམས་ཅན་རྣམས་འདུལ་བར་འགྱུར་པ་དང་། དེ་བཞིན་གཤེགས་པ་རྣམས་ཀྱི་བཀའ་བཞིན་བྱེད་པར་གྱུར་པ་དང་། ལྷ་དང་། ཀླུ་དང་། གནོད་སྦྱིན་དག་། དྲི་ཟ་ལ་སོགས་པ་དག་ཡི་རངས་པར་འགྱུར་པ་དེ་ལྟར་བྱ་ཞིང་། དེ་ལྟར་བསྒྲུབ་པར་བྱ། དེ་ལྟར་བརྩོན་འགྲུས་བརྩམ་པར་བྱའོ། སྙམ་དུ་སེམས་ཏེ། རིགས་ཀྱི་བུ་དེ་ནི་བྱང་ཆུབ་སེམས་དཔའི་ངོ་ཚ་ཤེས་པ་ཡིན་ནོ། དེ་ཡང་འདི་སྙམ་དུ་སེམས་ཏེ། བདག་ལ་ཁྱིམ་པ་འམ་རབ་ཏུ་བྱུང་བ་འགའ་ཡང་འདི་ལྟ་སྟེ། ཚུལ་ཁྲིམས་ཉམས་པ་ཀུན་དུ་སྤྱོད་པ་འམ། ལྟ་བ་ཉམས་པ་ཀུན་དུ་སྤྱོད་པ་འམ། འཚོ་བ་ཉམས་པ་ཀུན་དུ་སྤྱོད་པ་འམ། ཆོ་ག་ཉམས་པ་ཀུན་དུ་སྤྱོད་པ་འམ། སྤྱོད་ཡུལ་ཉམས་པ་ཀུན་དུ་སྤྱོད་པ་འམ། ཉམས་པ་ཀུན་དུ་སྤྱོད་པ་གང་ཡང་རུང་བ་དག་གིས་ཀུན་དུ་གླེང་བར་མི་འགྱུར་བར་བྱའོ། སྙམ་དུ་སེམས་ཏེ། དེ་དེ་ལྟར་ཁྲེལ་ཡོད་པར་གྱུར་པ་ན་ཉིད་ལན་གསུམ། མཚན་ལན་གསུམ་ཚུལ་ཁྲིམས་ལ་སོ་སོར་རྟོག་པར་བྱེད་དོ། །དེ་ཚུལ་
ཁྲིམས་ཡོངས་སུ་དག་པས་འགྱོད་པ་མེད་ཅིང་དེ་སྒྲིབ་པ་མེད་ལ་ལམ་གྱི་རྒྱུན་བཅད་དེ། དེ་བཞིན་གཤེགས་པའི་ཆོས་འདུལ་བ་ལ་ཉེ་བར་རྟེན་ཅིང་གནས་པར་བྱེད་དོ། རིགས་ཀྱི་བུ་དེ་ནི་བྱང་ཆུབ་སེམས་དཔའི་ཁྲེལ་ཡོད་པ་ཞེས་བྱ་སྟེ། རིགས་ཀྱི་བུ་དེ་ལྟར་བྱང་ཆུབ་སེམས་དཔའ་ནན་ཏན་སྙིང་པོར་བྱེད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ།། །།རྫོགས་སངས་རྒྱས་དང་སངས་རྒྱས་ཀྱི། །ཉན་ཐོས་ནན་ཏན་སྙིང་པོར་བྱེད་། །དེ་ཕྱིར་ནན་ཏན་ཐོབ་བྱའི་ཕྱིར། །ཤེས་རབ་ཅན་གྱིས་རྟག་བརྩོན་གྱིས། །ནན་ཏན་ལ་ནི་འཇིགས་མེད་པའི། །བྱང་ཆུབ་སེམས་དཔའ་ཤེས་རབ་ཆེ། །སངས་རྒྱས་ཀུན་གྱིས་བསྟེན་པ་ཡི། །བྱང་ཆུབ་རྔུལ་མེད་རྟོགས་པར་འགྱུར་། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་རིགས་ཕུན་སུམ་ཚོགས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་རང་བཞིན་གྱིས་འདོད་ཆགས་དང་། ཞེ་སྡང་དང་། གཏི་མུག་ཆུང་བ་དང་། ཕྲག་དོག་མེད་པ་དང་། སེར་སྣ་མེད་པ་དང་། གཡོ་མེད་པ་དང་། སྒྱུ་མེད་པ་ཡིན། མི་རྩུབ་པ་དང། མི་བརླང་པ་དང་། མི་རྒོད་པ་དང་། མ་ཁེངས་པ་ཡིན། མི་ཅོར་ཞིང་མུ་ཅོར་མི་སྨྲ་བ་ཡིན། དྲང་བ་དག་མཉན་པ་ཡིན། དེས་པ་དང་། འགྲོགས་ན་བདེ་བ་ཡིན། རང་བཞིན་གྱིས་མཆོད་པ་དང་། རིམ་གྲོ་བྱ་བ་རྒྱ་ཆེན་པོ་དག་ལ་སེམས་འཇུག་པ་དང་། ལོངས་སྤྱོད་པ་དང་། འཚོ་བའི་ཡོད་ཅིང་བདོག་པ་དག་གཞན་དག་ལ་བགེད་པའི་དད་ཚུལ་ཅན་ཡིན། ལག་པ་དང་། རྐང་པ་དང་། མིག་དང་། ཡན་ལག་གི་དམ་པ་མགོ་ཤིན་དུ་དང་ཞིང་གསལ་བ་ཡིན། དེས་དེ་བཞིན་གཤེགས་པ་འམ། དེ་བཞིན་གཤེགས་པའི་ཉན་ཐོས་དག་མཐོང་ན་མཐོང་མ་ཐག་ཁོ་ནར་དད་པ་དང་། དང་བ་ཐོབ་པར་འགྱུར་ཞིང་། དེ་དད་པ་དང་དང་བ་དེས་རིགས་ཕུན་སུམ་ཚོགས་པ་འཐོབ་པར་འགྱུར་བ་སྟེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་རིགས་ཕུན་སུམ་ཚོགས་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །དུ་བ་ལས་ནི་མེར་ཤེས་ཤིང། །ཆུ་སྐྱར་ལས་ནི་ཆུར་ཤེས་ལྟར། །བློ་ལྡན་བྱང་ཆུབ་སེམས་དཔའ་ཡི། །རིགས་ནི་མཚན་མ་རྣམས་ལས་ཤེས། །མི་
རྩུབ་བརླང་བ་མ་ཡིན་ལ། །གཡོ་དང་སྒྱུ་ནི་རྣམ་སྤངས་ཤིང་། །སེམས་ཅན་ཀུན་ལས་རབ་དང་བ། །དེ་ནི་བྱང་ཆུབ་སེམས་དཔའ་ཡིན། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་བྱང་ཆུབ་ཀྱི་སེམས་འདོད་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་རིགས་ལ་གནས་ཤིང་བྱང་ཆུབ་ཏུ་སེམས་བསྐྱེད་པའི་ཚེ་དེ་བཞིན་གཤེགས་པ་འམ། དེ་བཞིན་གཤེགས་པའི་ཉན་ཐོས་ཀྱིས་ཡང་དག་པར་བསྐུལ་བ་དང་། ཡང་དག་པར་སྐྱོ་བ་སྐྱེད་པ་དང་། ཡང་དག་པར་འཛིན་དུ་འཇུག་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ན། དེ་ནི་བྱང་ཆུབ་སེམས་འདོད་པའི་རྒྱུ་དང་པོ་ཡིན་ནོ། གཞན་ཡང་བྱང་ཆུབ་དང་བྱང་ཆུབ་ཀྱི་སེམས་ཀྱི་བསྔགས་པ་བརྗོད་པ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ན་དེ་ནི་བྱང་ཆུབ་ཀྱི་སེམས་འདོད་པའི་རྒྱུ་གཉིས་པ་ཡིན་ནོ། གཞན་ཡང་སེམས་ཅན་སྐྱོབ་པ་མེད་པ་དང་། སྐྱབས་མེད་པ་དང་། གནས་མེད་པ་དང་། དཔུང་གཉེན་མེད་པ་དང་། གླིང་མེད་པ་དག་མཐོང་ན་བདག་སེམས་ཅན་འདི་དག་གི་སྐྱོབ་པ་དང་། སྐྱབས་དང་། གནས་དང་། དཔུང་གཉེན་དང་། གླིང་དུ་གྱུར་ཅིག་ཅེས་སྙིང་རྗེའི་སེམས་ཉེ་བར་གཞག་ནས་རྒྱུ་དེ་དང་། རྐྱེན་དེ་དང་། གཞི་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ན་དེ་ནི་བྱང་ཆུབ་ཀྱི་སེམས་འདོད་པའི་རྒྱུར་གསུམ་པ་ཡིན་ནོ། གཞན་ཡང་དེ་བཞིན་གཤེགས་པའི་སྐུ་རྣམ་པ་ཐམས་ཅད་ཡོངས་སུ་རྫོགས་པ་མཐོང་ན་དགའ་བ་སྐྱེད་པར་བྱེད། མཆོག་ཏུ་དགའ་བ་སྐྱེད་པར་བྱེད། སེམས་ཤིན་དུ་སྦྱངས་པ་སྐྱེད་པར་བྱེད། །སེམས་སྤྲོ་བ་སྐྱེད་པར་བྱེད་ཅིང་དེ་རྒྱུ་དེ་དང་། རྐྱེན་དེ་དང་། གཞི་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ན་དེ་ནི་བྱང་ཆུབ་ཀྱི་སེམས་འདོད་པའི་རྒྱུ་བཞི་པ་ཡིན་ནོ། །གཞན་ཡང་དེ་སེམས་ཅན་རྣམས་ལ་ཕན་པ་དང་། བདེ་བ་ཁོ་ནའི་དོན་དུ་སྦྱིན་པ་སྦྱིན་པར་བྱེད། ཚུལ་ཁྲིམས་སྲུང་བར་བྱེད། བཟོད་པ་སྒོམ་པར་བྱེད། བརྩོན་འགྲུས་རྩོམ་པར་བྱེད། བསམ་གཏན་ལ་མཉམ་པར་འཇོག་པར་བྱེད། ཤེས་རབ་སྒོམ་པར་བྱེད་པ་ཡིན་ཏེ། དེ་ལ་ཇི་
ལྟར་ན་སྦྱིན་པ་སྦྱིན་པར་བྱེད་པ་ཡིན་ཞེ་ན། ཟས་འདོད་པ་རྣམས་ལ་ཟས་དང་། སྐོམ་འདོད་པ་རྣམས་ལ་སྐོམ་དང་། གཞོན་པ་འདོད་པ་རྣམས་ལ་གཞོན་པ་དང་། མལ་ཆ་འདོད་པ་རྣམས་ལ་མལ་ཆ་དང་། གོས་འདོད་པ་རྣམས་ལ་གོས་དང་། གདུ་བུ་དང་། དཔུང་རྒྱན་དང་། རྣ་ཆ་གདུབ་ཀོར་དང་། རྒྱན་འདོད་པ་རྣམས་ལ་རྒྱན་སྦྱིན་པར་བྱེད་པ་ཡིན་ཏེ། རིགས་ཀྱི་བུ་མདོར་ན་རང་གི་ཤ་དག་གིས་ཀྱང་སེམས་ཅན་རྣམས་ལ་ཕན་འདོགས་པར་བྱེད་དེ། དེ་ལྟར་སྦྱིན་པ་སྦྱིན་པར་བྱེད་དོ། སྦྱིན་པ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་ལ་སྦྱིན་པ་དེས་ཀྱང་རློམ་སེམས་སུ་མི་བྱེད་དོ། །དེ་ལ་ཇི་ལྟར་ན་ཚུལ་ཁྲིམས་སྲུང་བར་བྱེད་པ་ཡིན་ཞེ་ན། དེ་ལུས་ཀྱིས་ལེགས་པར་བསྡམས་པ་དང་། དག་གི་ལེགས་པར་བསྡམས་པ་དང་། ཡིད་ཀྱི་ལེགས་པར་བསྡམས་པ་དང་། དེ་ལུས་ཀྱིས་ཉེས་པར་སྤྱོད་པ་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་ཡོངས་སུ་སྤྱོད་པར་བྱེད་པ་དང་། དག་གིས་ཉེས་པར་སྤྱོད་པ་དང་། ཡིད་ཀྱིས་ཉེས་པར་སྤྱོད་པ་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་ཡོངས་སུ་སྤོང་བར་བྱེད་ལ་ཚུལ་ཁྲིམས་མ་ཉམས་པ་དང་། མ་རལ་པ་དང་། མ་འདྲེས་པ་དང་། ནག་ནོག་ཏུ་མ་གྱུར་པར་སྲུང་བར་བྱེད་དེ། དེ་ལྟར་ཚུལ་ཁྲིམས་སྲུང་བར་བྱེད་དོ། ཚུལ་ཁྲིམས་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་ལ་ཚུལ་ཁྲིམས་དེས་ཀྱང་རློམ་སེམས་སུ་མི་བྱེད་དོ། །དེ་ལ་ཇི་ལྟར་ན་བཟོད་པ་སྒོམ་པར་བྱེད་པ་ཡིན་ཞེ་ན། དེ་ལ་ཁྱིམ་ན་གནས་པ་འམ། རབ་ཏུ་བྱུང་བ་དག་གིས་སྤྱོས་སམ། བརྒྱད་བཀག་གམ། བརྡེགས་སམ། བཅོགས་སམ། བཅིངས་སམ། གོ་དར་བཅུག་གམ། གཞུས་སམ། རྣམ་པར་གཙེས་ན་ཡང་བཟོད་པར་བྱེད། དང་དུ་ལེན་པར་བྱེད་དེ། དེ་ལྟར་བཟོད་པ་སྒོམ་པར་བྱེད་དོ། །བཟོད་པ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་ལ་བཟོད་པ་དེས་ཀྱང་རློམ་སེམས་སུ་མི་བྱེད་དོ། །དེ་ལ་ཇི་ལྟར་ན་བརྩོན་འགྲུས་རྩོམ་པར་བྱེད་པ་ཡིན་ཞེ་ན། དེ་འདི་སྙམ་དུ་སེམས་ཏེ། འདི་ལྟ་སྟེ།
དཔེར་ན་ནམ་མཁའི་ཁམས་མཐའ་ཡས་མུ་མེད་པ་དེ་བཞིན་དུ་སེམས་ཅན་གྱི་ཁམས་ཀྱང་མཐའ་ཡས་མུ་མེད་པ་ཡིན་པས། དེ་དག་བདག་གཅིག་པུ་གཉིས་སུ་མེད་པས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་དགོད་པར་བྱའོ་སྙམ་དུ་སེམས་ཏེ། དེ་རྒྱུ་དེ་དང་། རྐྱེན་དེ་དང་། གཞི་དེས་བརྩོན་འགྲུས་རྩོམ་པར་བྱེད་ཅིང་དེ་ལུས་ཀྱི་ཚོར་བ་ལ་ལུས་དང་ལྡན་པའི་དྲན་བས་ཉེ་བར་རྟོག་པར་བྱེད་དོ། །དེ་ཚོར་བ་ལ་ཉེ་བར་རྟོག་པ་ལ་བརྩོན་བར་བྱེད་པ་ན་སེམས་ཀྱི་རྗེས་སུ་ལྟ་ཞིང་གནས་པ་དང་། ཆོས་ལ་ཆོས་ཀྱི་རྗེས་སུ་ལྟ་བ་ལ་ཡང་བརྩོན་བར་བྱེད་དོ། དེ་དེ་ལྟར་དྲན་པ་ཤིན་ཏུ་ཉེ་བར་གཞག་པ་དང་། སྡིག་པ་མི་དགེ་བའི་ཆོས་མ་སྐྱེས་པ་རྣམས་མི་སྐྱེད་པར་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན་ཅིང་ཡང་དག་པར་རབ་ཏུ་འཇོག་པར་བྱེད་དོ། སྡིག་པ་མི་དགེ་བའི་ཆོས་སྐྱེས་པ་རྣམས་སྤང་བའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན་ཅིང་ཡང་དག་པར་རབ་ཏུ་འཇོག་པར་བྱེད་དོ། །དགེ་བའི་ཆོས་མ་སྐྱེས་པ་རྣམས་བསྐྱེད་པའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན་ཅིང་ཡང་དག་པར་རབ་ཏུ་འཇོག་པར་བྱེད་དོ། དགེ་བའི་ཆོས་སྐྱེས་པ་རྣམས་གནས་པ་དང་། ཕྱིར་ཞིང་འབྱུང་བ་དང་། ཉམས་པར་མི་འགྱུར་བ་དང་། བརྗེད་པར་མི་འགྱུར་བ་དང་། ཡོངས་སུ་རྫོགས་པར་བྱ་བའི་ཕྱིར་འདུན་པ་སྐྱེད། འབད་པར་བྱེད། བརྩོན་འགྲུས་རྩོམ། སེམས་རབ་ཏུ་འཛིན་ཅིང་ཡང་དག་པར་རབ་ཏུ་འཇོག་པར་བྱེད་དོ། དེ་དེ་ལྟར་བརྩོན་འགྲུས་བརྩམས་པ་ན་རྫུ་འཕྲུལ་གྱི་རྐང་པ་དང་པོ་སྒོམ་པར་བྱེད་དོ། དེ་བཞིན་དུ་རྫུ་འཕྲུལ་གྱི་རྐང་པ་གཉིས་པ་དང་། གསུམ་པ་དང་། བཞི་པ་ཡང་སྒོམ་པར་བྱེད་དོ། དེ་དེ་ལྟར་རྫུ་འཕྲུལ་གྱི་རྐང་པ་ཡོངས་སུ་གྲུབ་པས་བསྐལ་པ་འམ། བསྐལ་པ་ལས་ལྷག་པར་གནས་ཤིང་དེ་བསྐལ་པ་འམ། བསྐལ་པ་ལས་ལྷག་པར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། དེ་ལྟར་བརྩོན་འགྲུས་རྩོམ་པར་བྱེད་དོ། བརྩོན་འགྲུས་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་ལ་
བརྩོན་འགྲུས་དེས་ཀྱང་རློམས་སེམས་སུ་མི་བྱེད་དོ། དེ་ལ་ཇི་ལྟར་ན་བསམ་གཏན་ལ་མཉམ་པར་འཇོག་པར་བྱེད་པ་ཡིན་ཞེ་ན། འདོད་ཆགས་དང་བྲལ་བ་ལ་མི་གནས་པ་དང་། འགོག་པ་ལ་མི་གནས་པ་དང་། ། རྣམ་པར་སྤངས་པར་ཡོངས་སུ་མ་བསྔོས་པ་དང་། ནང་ལ་མི་གནས་པ་དང་། ཕྱི་རོལ་ལ་མི་གནས་པ་དང་། གཟུགས་ལ་མི་གནས་པ་དང་། ཚོར་བ་ལ་མི་གནས་པ་དང་། འདུ་ཤེས་ལ་མི་གནས་པ་དང་། འདུ་བྱེད་ལ་མི་གནས་པ་དང་། རྣམ་པར་ཤེས་པ་ལ་མི་གནས་པ་དང་། འདོད་པའི་ཁམས་ལ་མི་གནས་པ་དང་། གཟུགས་ཀྱི་ཁམས་ལ་མི་གནས་པ་དང་། གཟུགས་མེད་པའི་ཁམས་ལ་མི་གནས་པ་དང་། སྟོང་པ་ཉིད་ལ་མི་གནས་པ་དང་། མཚན་མ་མེད་པ་ལ་མི་གནས་པ་དང་། སྨོན་པ་མེད་པ་ལ་མི་གནས་པ་དང་། འཇིག་རྟེན་འདི་ལ་མི་གནས་པ་དང་། འཇིག་རྟེན་ཕ་རོལ་ལ་མི་གནས་པ་དང་། གཟུགས་ལ་མི་གནས་པ་དང་། སྒྲ་ལ་མི་གནས་པ་དང་། དྲི་ལ་མི་གནས་པ་དང་། རོ་ལ་མི་གནས་པ་དང་། རེག་ལ་མི་གནས་པ་དང་། ཆོས་ལ་མི་གནས་པ་དང་། སྦྱིན་པ་ལ་མི་གནས་པ་དང་། ཚུལ་ཁྲིམས་ལ་མི་གནས་པ་དང་། བཟོད་པ་ལ་མི་གནས་པ་དང་། བརྩོན་འགྲུས་ལ་མི་གནས་པ་དང་། བསམ་གཏན་ལ་མི་གནས་པ་དང་། ཤེས་རབ་ལ་མི་གནས་པ་ཡིན་ནོ། རིགས་ཀྱི་བུ་མདོར་ན་ཆགས་པ་ཐམས་ཅད་སྤངས་ནས་མི་གནས་པར་བསམ་གཏན་བྱེད་དེ། དེ་ལྟར་བསམ་གཏན་ལ་བསམ་གཏན་དུ་བྱེད་དོ། བསམ་གཏན་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་ལ་བསམ་གཏན་དེས་ཀྱང་རློམ་སེམས་སུ་མི་བྱེད་དོ། །རིགས་ཀྱི་བུ་དེ་ལ་ཇི་ལྟར་ན་ཤེས་རབ་སྒོམ་པར་བྱེད་པ་ཡིན་ཞེ་ན་དེ་འདི་སྙམ་དུ་སེམས་ཏེ། སེམས་ཅན་གྱི་ཁམས་མུ་མེད་པ་དག་ཡོངས་སུ་མྱ་ངན་ལས་བཟླས་ཀྱང་སེམས་ཅན་གཅིག་ཀྱང་ཡོངས་སུ་མྱ་ངན་ལས་བཟླས་པ་མེད་དོ། དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱིས་ཆོས་ཐམས་ཅད་ནི་བདག་མེད་པའོ། ཆོས་ཐམས་ཅད་ནི་སེམས་ཅན་མེད་པའོ། །
ཆོས་ཐམས་ཅད་ནི་གང་ཟག་མེད་པའོ་ཞེས་གསུངས་པའི་ཕྱིར་རོ་སྙམ་སྟེ། དེ་ལྟར་ཤེས་རབ་སྒོམ་པར་བྱེད་དོ། ཤེས་རབ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་ལ་ཤེས་རབ་དེས་ཀྱང་རློམས་སེམས་སུ་མི་བྱེད་དེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་བྱང་ཆུབ་ཀྱི་སེམས་འདོད་པ་ཡིན་ནོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། ནོར་བུ་རིན་ཆེན་རང་བཞིན་གྱིས། འོད་འབར་འབྱུང་གནས་ཉིད་ན་འདུག། བྱི་དོར་བྱས་ན་དེ་བས་ནི། ཉིས་འགྱུར་གྱིས་ཀྱང་མཛེས་པ་ལྟར། །དེ་བཞིན་རིགས་དང་ལྡན་པ་ཡང་། བྱང་ཆུབ་སེམས་ནི་ཚོལ་བྱེད་དེ། མཐའ་གཉིས་རྣམ་པར་དག་པ་ཡི། སྤྱོད་ཡུལ་དུ་ནི་བདུད་མི་འོང་། རིགས་གྱི་བུ་དེ་ལ་ཇི་ལྟར་བྱང་ཆུབ་སེམས་དཔའ་ཆོས་འདོད་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་རང་བཞིན་གྱིས་ཆོས་དོན་དུ་གཉེར་བ་དང་། ཆོས་འདོད་པ་དང་། ཆོས་ལ་དགའ་བ་དང་། ཆོས་ཀྱི་ཀུན་དགའ་བ་ལ་སྦྱོར་བའི་རྗེས་སུ་བརྩོན་པ་ཡིན་ཏེ། དེས་དགེ་སྦྱོང་ངམ། བྲམ་ཟེ་འམ། བཀྲེས་པས་ཉེན་ཅིང་ཟས་འདོད་པ་གཞན་དག་མཐོང་ན་དེས་དེ་དག་ལ་ལྡམ་ལྡུམ་འམ། སྔོ་རྔད་དམ། བཟའ་བཅའ་ཅི་བདོག་ཅིང་ཡོད་པ་དག་སྦྱིན་པར་བྱེད་ཅིང་དེ་འཇིག་རྟེན་གྱི་འཚོ་བ་དང་། ཡོ་བྱད་འདི་ལྟ་སྟེ། རྩ་བ་དང་འབྲས་བུ་དང་། སྡོང་བུ་ལ་སོགས་པ་གང་དག་ཡིན་པ་དེ་དག་ཀྱང་བསགས་ཤིང་བསགས་ཤིང་སེམས་ཅན་རྣམས་ལ་སྦྱིན་པར་བྱེད་པ་དང་། དེ་དམ་པའི་ཆོས་འཛིན་པ་རྣམས་ཀྱི་དྲུང་དུ་སོང་སྟེ་གུས་པར་སྨྲ་བ་དང་། ཕྱག་བྱ་བ་དང་། མངོན་པར་ལྡང་བ་དང་། ཐལ་མོ་སྦྱར་བ་དང་། གུས་པར་བྱ་བའི་ལས་དག་བྱས་ནས་རྗེས་དང་བཅས། གུས་པ་དག་བཅས་པས་ཚུལ་བཞིན་དུ་དྲི་བ་འདྲི་བར་བྱེད་ཅིང་དེའི་འོག་ཏུ་དེ་ལ་དམ་པའི་ཆོས་འཛིན་པ་དེ་ཡང་ཇི་ལྟར་དྲི་བ་དྲིས་པ་དེ་བཞིན་དུ་ལན་འདེབས་པར་བྱེད་ལ། དེ་ཡང་དམ་པའི་ཆོས་འཛིན་པ་དེ་ལ་སྟོན་པར་འདུ་ཤེས་སྐྱེད་པར་བྱེད། དགེ་བའི་བཤེས་གཉེན་དུ་འདུ་
ཤེས་སྐྱེད་པར་བྱེད། འཁོར་བའི་རྒྱ་མཚོ་ལས་སྒྲོལ་བར་བྱེད་པར་འདུ་ཤེས་སྐྱེད་པར་བྱེད། མཁན་པོར་འདུ་ཤེས་སྐྱེད་པར་བྱེད། སློབ་དཔོན་དུ་འདུ་ཤེས་སྐྱེད་པར་བྱེད། བདག་ཡུན་རིང་པོ་ནས་འཁོར་པའི་དགོན་པར་འཁྱམས་པ་ཚོལ་བར་བྱེད་པ་ཡིན་པར་འདུ་ཤེས་སྐྱེད་པར་བྱེད་བདག་ཡུན་རིང་པོ་ནས་གཏི་མུག་གིས་བསྒྲིབས་ཤིང་གཉིད་ལོག་པའི་གཉིད་སད་བར་བྱེད་པ་ཡིན་ནོ་ཞེས་སད་པར་བྱེད་པ་ཡིན་པར་འདུ་ཤེས་སྐྱེད་པར་བྱེད། བདག་འཁོར་བའི་རྒྱ་མཚོའི་འདམ་དུ་བྱིད་བའི་འབྱིན་པར་བྱེད་པ་ཡིན་ནོ་འབྱིན་པར་བྱེད་པ་ཡིན་པར་འདུ་ཤེས་སྐྱེད་པར་བྱེད། བདག་ལམ་ངན་པར་ཞུགས་པ་ལ་ལམ་བཟང་པོ་སྟོན་པར་བྱེད་པ་ཡིན་ནོ་ཞེས་ལམ་སྟོན་པར་བྱེད་པ་ཡིན་པར་འདུ་ཤེས་སྐྱེད་པར་བྱེད། བདག་འཁོར་བའི་བཙོན་རར་བཅིངས་པ་འགྲོལ་པ་ཡིན་ནོ་ཞེས་འགྲོལ་བར་བྱེད་པ་ཡིན་པར་འདུ་ཤེས་སྐྱེད་པར་བྱེད། བདག་ཡུན་རིང་པོ་ནས་ཉམ་ཐག་པའི་སྨན་པ་དམ་པ་ཡིན་ནོ་ཞེས་སྨན་པ་དམ་པ་ཡིན་པར་འདུ་ཤེས་སྐྱེད་པར་བྱེད། བདག་འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་དུ་འབར་བར་འགྱུར་བ་རབ་ཏུ་ཞི་བར་བྱེད་པ་ཡིན་ནོ་ཞེས་ཆར་སྤྲིན་ཆེན་པོ་ཡིན་པར་འདུ་ཤེས་སྐྱེད་པར་བྱེད་ཅིང་དེ་ཆོས་ཀྱི་རྒྱུ་དང་། ཆོས་ཀྱི་གཞི་དང་། ཆོས་ཀྱི་ཆེད་ཀྱི་ཕྱིར་ཚབ་ཡང་ཁྱད་དུ་གསོང་། གྲང་བ་དང་། རླུང་དང་། ཉི་མ་དང་། ཤ་སྤྲང་དང་། སྤྲང་བུ་མཆུ་རིངས་དང་། སྡིག་སྤྲུལ་གྱིས་རེག་པ་ཡང་ཁྱད་དུ་གསོང་། བཀྲེས་པ་ཡང་ཁྱད་དུ་གསོང་། སྐོམ་པ་ཡང་ཁྱད་དུ་གསོང་། གཞན་དག་བདེ་བ་དག་མཐོང་ན་ཡང་འདོད་པའི་སེམས་སྐྱེད་པར་མི་བྱེད་པར་དེ་འདི་སྙམ་དུ་སེམས་ཏེ། བདག་ལ་དམ་པའི་ཆོས་མཉམ་པའི་སྣང་བ་འཆར་བས་ན་བདག་ནི་འཇིག་རྟེན་ན་བདེ་བ་ཡིན་ནོ་སྙམ་དུ་སེམས་ཏེ། དེ་རྒྱུ་དེ་དང་། རྐྱེན་དེ་དང་། གཞི་དེས་མྱ་ངན་མི་བྱེད། སྨྲེ་སྔགས་མི་འདོན་ཅིང་སྡུག་བསྔལ་བ་དང་། ཡིད་མི་བདེ་བའི་སེམས་སྐྱེད་པར་མི་བྱེད་ལ་དེ་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་བྲལ་བས་བདག་དེ་བཞིན་
གཤེགས་པས་གསུངས་པའི་ཆོས་ཚིག་ཅིག་ཙམ་གྱི་ཕྱིར་ཡང་བསྐལ་བ་འམ། བསྐལ་བ་ལས་ལྷག་པར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་སྤྲོ་འོ་སྙམ་པ་དེ་ལྟ་བུའི་སེམས་སྐྱེ་བར་འགྱུར་ཞིང་དེ་དེ་ལྟར་ཡིད་ཡོངས་སུ་སྐྱོ་བ་མེད་པས་ན་བསྒྲིམ་མི་དགོས་པ་ཁོ་ནར་རྣམ་པ་ཐམས་ཅད་མཁྱེན་པ་ཉིད་ཡང་དག་པར་སྒྲུབ་པར་བྱེད་ཅིང་སངས་རྒྱས་ཀྱི་ཆོས་མ་ཐོབ་པ་རྣམས་ཀྱང་ཐོབ་པར་བྱེད་པ་ཡིན་ཏེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཆོས་འདོད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །རྒྱལ་བའི་སྲས་པོ་ཤེས་རབ་ཆེ། །ཆོས་འདོད་པར་ནི་གྱུར་པ་རྣམས། །དམ་ཆོས་ཡོངས་སུ་ཚོལ་བ་ན། །སྐྱོ་བ་སྐྱེད་པར་མི་བྱེད་དོ། །གུས་བས་དམ་ཆོས་ཡོངས་ཚོལ་བའི། །རྒྱལ་བའི་ཐུགས་ལས་སྐྱེས་པ་རྣམས། །སེམས་ཀྱིས་འཛིན་པར་བྱེད་པ་དང་། །ནན་ཏན་གྱིས་ནི་སྒྲུབ་པ་ཡིན། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ཆོས་ལ་ཉེ་བར་རྟོག་པར་བྱེད་པ་ཡིན་ཞེ་ན། །རིགས་ཀྱི་བུ་འདི་ལ་བྱང་ཆུབ་སེམས་དཔའ་ཆོས་ལ་ཉེ་བར་རྟོག་པར་བྱེད་དེ། ཆོས་ཐམས་ཅད་ནི་བྱིས་པ་སོ་སོའི་སྐྱེ་བོ་ཀུན་དུ་རྨོངས་པར་བྱེད་པའི་ཕྱིར་སྒྱུ་མ་ལྟ་བུ་འོ། ཆོས་ཐམས་ཅད་ནི་ཡོད་པ་མ་ཡིན་པའི་ཕྱིར་རྨི་ལམ་ལྟ་བུའོ། ཆོས་ཐམས་ཅད་ནི་དངོས་པོ་མེད་པའི་ཕྱིར་ཆུ་ཟླ་ལྟ་བུའོ། །ཆོས་ཐམས་ཅད་ནི་སེམས་ཅན་མེད་པའི་ཕྱིར་མིག་ཡོར་ལྟ་བུའོ། ཆོས་ཐམས་ཅད་ནི་ཡང་དག་པ་མ་ཡིན་པ་ཀུན་དུ་བརྟགས་པའི་ཕྱིར་གཟུགས་བརྙན་ལྟ་བུའོ། །ཆོས་ཐམས་ཅད་ནི་བྱུང་ནས་འཇིག་ཅིང་འཇུ་བའི་ཕྱིར་བྲག་ཆ་ལྟ་བུའོ། །ཆོས་ཐམས་ཅད་ནི་རྟེན་ཅིང་འབྲེལ་པར་འབྱུང་བ་ཡིན་བའི་ཕྱིར་བྱུང་ནས་འཇིག་ཅིང་འཇུ་བ་ཡིན་ནོ། ཆོས་ཐམས་ཅད་ནི་དེ་བཞིན་ཉིད་ལ་ཡང་དག་པར་གཞོལ་བའི་ཕྱིར་མ་སྐྱེས་པ་ཡིན་ནོ། ཆོས་ཐམས་ཅད་ནི་མི་སྐྱེས་པའི་ཕྱིར་མ་འགགས་པ་ཡིན་ནོ། །ཆོས་ཐམས་ཅད་ནི་བྱེད་པ་པོ་མེད་པའི་ཕྱིར་བཅོས་མ་མ་ཡིན་ནོ། ཆོས་ཐམས་ཅད་ནི་གོས་པ་མེད་པའི་ཕྱིར་ནམ་མཁའ་ལྟ་བུ་ཡིན་ནོ། ཆོས་ཐམས་ཅད་ནི་རང་བཞིན་
གྱིས་ཀུན་དུ་འབར་བ་མ་ཡིན་པའི་ཕྱིར་ཞི་བ་ཡིན་ནོ། ཆོས་ཐམས་ཅད་ནི་རང་བཞིན་གྱིས་ཀུན་ནས་ཉོན་མོངས་པ་ཅན་མ་ཡིན་པའི་ཕྱིར་གཟོད་མ་ནས་ཡོངས་སུ་དག་པ་ཡིན་ནོ། ཆོས་ཐམས་ཅད་ནི་དྲི་མ་ཐམས་ཅད་དང་བྲལ་བའི་ཕྱིར་དྲི་མ་མེད་པ་ཡིན་ནོ། །ཆོས་ཐམས་ཅད་ནི་ཉོན་མོངས་པ་དང་བྲལ་བའི་ཕྱིར་གཟོད་མ་ནས་ཡོངས་སུ་མྱ་ངན་ལས་འདས་པ་ཡིན་ནོ། །ཆོས་ཐམས་ཅད་ནི་ངེས་པར་སྣང་བ་མ་ཡིན་པའི་ཕྱིར་གཟུགས་ཅན་མ་ཡིན་ནོ། ཆོས་ཐམས་ཅད་ནི་ལུས་མེད་པའི་ཕྱིར་རྣམ་པར་ཤེས་པའི་ཡུལ་ལས་ཡང་དག་པར་འདས་པ་ཡིན་ནོ། ཆོས་ཐམས་ཅད་ནི་གནས་ཡང་དག་པར་བཅོམ་པའི་ཕྱིར་མི་གནས་པ་ཡིན་ནོ། །ཆོས་ཐམས་ཅད་ནི་རྗེས་སུ་ཆགས་པ་དང་། ཁོང་ཁྲོ་བ་སྤངས་པའི་ཕྱིར་རྣམ་པར་ཤེས་པར་བྱ་བ་མ་ཡིན་པ་ཡིན་ནོ། ཆོས་ཐམས་ཅད་ནི་ཉོན་མོངས་པའི་སྤྱོད་ཡུལ་ལས་ཡང་དག་པར་འདས་པའི་ཕྱིར་གནས་མེད་པ་ཡིན་ནོ། །ཆོས་ཐམས་ཅད་ནི་ཐབས་ལ་མཁས་པའི་རིག་པ་དང་བྲལ་བའི་ཕྱིར་སྤྲུལ་གདུག་པ་ལྟ་བུ་ཡིན་ནོ། ཆོས་ཐམས་ཅད་ནི་སྙིང་པོ་མེད་པའི་ཕྱིར་ཆུ་ཤིང་གི་སྡོང་བུ་ལྟ་བུ་ཡིན་ནོ། ཆོས་ཐམས་ཅད་ནི་རང་བཞིན་གྱིས་ཉམ་ཆུང་བའི་ཕྱིར་དབུ་བ་རྡོས་པ་ལྟ་བུ་ཡིན་ནོ། ཞེས་ཉེ་བར་རྟོག་པར་བྱེད་པ་ཡིན་ཏེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཆོས་ལ་ཉེ་བར་རྟོག་པར་བྱེད་པ་ཡིན་ནོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བདའ་སྩལ་ཏོ། །ཆོས་ཀུན་སྒྱུ་མ་ལྟ་བུ་སྟེ། །བྱིས་པ་རྣམས་ཀྱི་སེམས་རྨོངས་བྱེད། །ཡང་དག་མ་ཡིན་རྨི་འདྲ་བ། །དེ་ལྟར་ལྟོས་ཤིག་དགེ་སློང་དག །ཆོས་རྣམས་ཆུ་ཟླ་ལྟ་བུ་སྟེ། །མིག་ཡོར་གྱིས་ནི་ཀུན་ནས་བསླང། །ཆོས་རྣམས་གཟུགས་བརྙན་ལྟ་བུར་ནི། །མཁས་པ་སུ་ཞིག་རྟོག་མི་བྱེད། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་གཟུགས་མི་རྟག་གོ་ཞེས་
ཡང་དག་པར་རྗེས་སུ་ལྟ་ཞིང་གཟུགས་ལ་འདོད་ཆགས་དང་བྲལ་བའི་ཕྱིར་ཆོས་ཀྱི་དབྱིངས་མངོན་སུམ་དུ་མི་བྱེད་པར་ཆོས་ཀྱི་དབྱིངས་ཀྱི་འཁོར་གྱི་ཆོས་རྣམས་ཡང་དག་པའི་ཤེས་རབ་ཀྱིས་ལེགས་པར་རྟོགས་པར་བྱེད་ཅིང་དེ་དག་གིས་ཚད་མ་རྣམས་དང། ལེགས་པར་བཤད་པ་རྣམས་དང་། ལེགས་པར་མཚན་བཏབ་པ་རྣམས་ལེགས་པར་ཟིན་པར་བྱེད་ལ་མཚན་མ་དང་ལེགས་པར་བཤད་པ་དང་། ལེགས་པར་མཚན་བཏབ་པ་ལེགས་པར་བཟུང་བ་དེ་དག་ལ་དེའི་ཆོས་ཀྱི་དབྱིངས་ཀྱི་ལམ་རྩོམ་པ་མེད་པ་ཁོ་ནར་འཇུག་པ་དང་། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་མི་རྟག་གོ་ཞེས་ཡང་དག་པར་རྗེས་སུ་ལྟ་ཞིང་རྣམ་པར་ཤེས་པ་ལ་འདོད་ཆགས་དང་བྲལ་བའི་ཕྱིར་ཆོས་ཀྱི་དབྱིངས་མངོན་སུམ་དུ་མི་བྱེད་པར་ཆོས་ཀྱི་དབྱིངས་ཀྱི་འཁོར་གྱི་ཆོས་རྣམས་ཡང་དག་པའི་ཤེས་རབ་ཀྱིས་ལེགས་པར་རྟོགས་པར་བྱེད་ཅིང་དེ་དག་གི་མཚན་མ་དང་། ལེགས་པར་བཤད་པ་དང་། ལེགས་པར་མཚན་བཏབ་པ་དེ་དག་ལེགས་པར་ཟིན་པར་བྱེད་ལ་མཚན་མ་དང་། ལེགས་པར་བཤད་པ་དང་། ལེགས་པར་མཚན་བཏབ་པ་ལེགས་པར་བཟུང་བ་དེ་དག་ལ་དེའི་ཆོས་ཀྱི་དབྱིངས་ཀྱི་ལམ་རྩོམ་པ་མེད་པ་ཁོ་ནར་འཇུག་པ་དང་། མི་རྟག་པ་ལ་ཇི་ལྟ་བ་བཞིན་དུ་སྡུག་བསྔལ་བ་དང་། སྟོང་པ་དང་། བདག་མེད་པ་ལ་ཡང་དེ་བཞིན་ཏེ། དེ་གཟུགས་བདག་མེད་དོ་ཞེས་ཡང་དག་པར་རྗེས་སུ་ལྟ་ཞིང་གཟུགས་བདག་མེད་དོ། ཞེས་ཡང་དག་པར་རྗེས་སུ་ལྟ་བ་ན་གཟུགས་ཀྱིས་མི་སྐྲག་མི་དངང་ཞིང་དངང་བར་མི་འགྱུར་རོ། དེ་ཅིའི་ཕྱིར་ཞེ་ན། གཟུགས་ནི་ཡང་དག་པ་མ་ཡིན་པའི་ཡོངས་སུ་རྟོགས་པས་ཀུན་ནས་བསླང་བ་ཡིན་ལ། དེས་དེ་ཡང་དག་པ་ཇི་ལྟ་བ་བཞིན་དུ་ཤེས་པའི་ཕྱིར་རོ། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་བདག་མེད་དོ། །ཞེས་
བྱ་བར་ཡང་དག་པར་རྗེས་སུ་ལྟ་ཞིང་རྣམ་པར་ཤེས་པ་བདག་མེད་དོ། ཞེས་ཡང་དག་པར་རྗེས་སུ་ལྟ་བ་ན་རྣམ་པར་ཤེས་པས་མི་སྐྲག་མི་དངང་ཞིང་དངང་བར་མི་འགྱུར་རོ། དེ་ཅིའི་ཕྱིར་ཞེ་ན། རྣམ་པར་ཤེས་པ་ནི་ཡང་དག་པ་མ་ཡིན་པ་ཡོངས་སུ་རྟོག་པས་ཀུན་ནས་བསླང་བ་ཡིན་ལ། དེས་དེ་ཡང་དག་པ་ཇི་ལྟ་བ་བཞིན་དུ་ཤེས་པའི་ཕྱིར་རོ། རིགས་ཀྱི་བུ་འདི་ལྟ་སྟེ། དཔེར་ན་སྒྱུ་མ་མཁན་ནམ་སྒྱུ་མ་མཁན་གྱི་སློབ་མ་མཁས་པ་ཞིག་གིས་སྐེ་བོ་ཕལ་པོ་ཆེའི་མདུན་དུ་སྒྱུ་མར་བྱས་པ་རྣམ་པ་སྣ་ཚོགས་འདི་ལྟ་སྟེ། གླང་པོ་ཚེའི་ཆོགས་སམ། རྟའི་ཆོགས་སམ། ཤིང་རྟའི་ཚོགས་སམ། དཔུང་བུ་ཆུང་གི་ཚོགས་དག་མངོན་པར་སྤྲུལ་ཏེ་བསྟན་པར་གྱུར་ན་སྐྱེས་བུ་མཁས་པའི་རང་བཞིན་ཅན་ནི་དེ་མཐོང་ན་མི་སྐྲག་མི་དངང་ཞིང་དངང་བར་མི་འགྱུར་རོ། །དེ་ཅིའི་ཕྱིར་ཞེ་ན། དེས་དེ་ནི་སྒྱུ་མར་བྱས་པ་སྟེ། ཡང་དག་པ་མ་ཡིན་པ་དང་། ཡོད་པ་མ་ཡིན་པ་དང་། བརྫུན་པ་དང་། སླུ་བར་བྱེད་པའི་ཆོས་ཡིན་པར་རིག་ཅིང་ཀུན་དུ་ཤེས་པའི་ཕྱིར་རོ། རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་ཡང་གཟུགས་བདག་མེད་དོ་ཞེས་ཡང་དག་པར་རྗེས་སུ་ལྟ་བ་ན་མི་སྐྲག་མི་དངང་ཞིང་དངང་བར་མི་འགྱུར་རོ། དེ་ཅིའི་ཕྱིར་ཞེ་ན། གཟུགས་ནི་ཡང་དག་པ་མ་ཡིན་པ་ཡོངས་སུ་རྟོག་པས་ཀུན་ནས་བསླང་པ་ཡིན་ལ། །དེས་དེ་ཡང་དག་པ་ཇི་ལྟ་བ་བཞིན་དུ་ཤེས་པའི་ཕྱིར་རོ། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་བདག་མེད་དོ། ཞེས་ཡང་དག་པར་རྗེས་སུ་ལྟ་བ་ན། རྣམ་པར་ཤེས་པས་མི་སྐྲག་མི་དངང་ཞིང་དངང་བར་མི་འགྱུར་རོ། །དེ་ཅིའི་ཕྱིར་ཞེ་ན། རྣམ་པར་ཤེས་པ་ནི་ཡང་དག་པ་མ་ཡིན་པ་ཡོངས་སུ་རྟོག་པས་ཀུན་ནས་བསླང་བ་ཡིན་ལ། དེས་དེ་ཡང་དག་པ་ཇི་ལྟ་བ་བཞིན་དུ་ཤེས་པའི་ཕྱིར་རོ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་གཟུགས་མི་རྟག་པར་ཡང་དག་པར་རྗེས་སུ་ལྟ་ཞིང་གཟུགས་ལ་འདོད་ཆགས་དང་བྲལ་བའི་སླད་དུ་ཆོས་ཀྱི་དབྱིངས་
མངོན་སུམ་དུ་མི་བགྱིད་པར་ཆོས་ཀྱི་དབྱིངས་ཀྱི་འཁོར་གྱི་ཆོས་རྣམས་ཡང་དག་པའི་ཤེས་རབ་ཀྱིས་ལེགས་པར་རྟོགས་པར་བགྱིད་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། རིགས་ཀྱི་བུ་འདི་ན་སྐྱེས་བུ་མཁའ་པ་ལ་ལ་དཔེས་བཤད་པའི་དོན་ཀུན་ཤེས་པར་འགྱུར་བས་ན་དེའི་ཕྱིར་དཔེ་བརྗོད་པར་བྱས་ཉོན་ཅིག་རིགས་ཀྱི་བུ་འདི་ལྟ་སྟེ་དཔེར་ན་ཤེས་རབ་དང་ལྡན་པའི་རང་བཞིན་ཅན་གྱི་མི་ལ་ལ་ཞིག་དུག་སྤྱོད་པར་གྱུར་ན་དེས་དུས་དུས་སུ་དུག་དེ་བྱི་དོར་བྱེད། སྦེད་པར་བྱེད། ནོར་དུ་བྱེད། བདག་གིར་བྱེད་ཅིང་ཡོ་བྱད་རྣམ་པ་སྣ་ཆོགས་དག་ཏུ་འཚོད་པར་བྱེད་ཀྱི་དེ་ཟ་བར་མི་བྱེད་དོ། དེ་ཅིའི་ཕྱིར་ཞེ་ན། གཞི་འདིས་བདག་གི་སྲོག་གི་བར་ཆད་དུ་འགྱུར་དུ་འོང་ངོ་སྙམ་དུ་སེམས་པའི་ཕྱིར་རོ། རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་ཡང་མྱ་ངན་ལས་འདས་པ་ལ་སེམས་པ་དང་། མྱ་ངན་ལས་འདས་པ་ལ་གཞོལ་བ་དང་། མྱ་ངན་ལས་འདས་པ་ལ་འབབ་པ་དང་། མྱ་ངན་ལས་འདས་པ་འབབ་པར་ཡང་བྱེད་མོད་ཀྱི། མྱ་ངན་ལས་འདས་པ་དེ་མངོན་སུམ་དུ་ནི་མི་བྱེད་དོ། དེ་ཅིའི་ཕྱིར་ཞེ་ན། གཞི་འདིས་བདག་བྱང་ཆུབ་ལས་ལྡོག་པར་འགྱུར་དུ་འོང་ངོ་སྙམ་དུ་སེམས་པའི་ཕྱིར་རོ། རིགས་ཀྱི་བུ་འདི་ལྟ་སྟེ། དཔེར་ན་ཤེས་རབ་དང་ལྡན་པའི་རང་བཞིན་ཅན་གྱི་མི་ལ་ལ་ཞིག་མེ་སྤྱོད་པར་གྱུར་ན་དེ་དུས་དུས་སུ་མེ་དེ་ལ་བཀུར་སྟི་བྱེད། བླ་མར་བྱེད། རི་མོར་བྱེད། མཆོད་པ་བྱེད། ལེགས་པར་རིམ་གྲོ་བྱེད་ཀྱང་། དེ་འདི་སྙམ་དུ་བདག་གིས་མེ་འདི་ལ་བཀུར་སྟི་བྱས། བླ་མར་བྱས། རི་མོས་བྱས། མཆོད་པ་བྱས། ལེགས་པར་རིམ་གྲོ་བྱས་མོད་ཀྱི། འདི་ལ་ལག་པ་གཉོས་ཀྱིས་ནི་གཟུང་བར་མི་བྱའོ་སྙམ་དུ་སེམས་སོ། །དེ་ཅིའི་ཕྱིར་ཞེ་ན། གཞི་འདིས་བདག་ལ་ལུས་ཀྱི་སྡུག་བསྔལ་དང་། ཡི་སེམས་ཀྱི་ཡིད་མི་བདེ་བ་འབྱུང་བར་འགྱུར་དུ་འོང་ངོ་སྙམ་དུ་སེམས་པའི་ཕྱིར་རོ། རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་
ཡང་མྱ་ངན་ལས་འདས་པ་ལ་སེམས་པ་དང་། མྱ་ངན་ལས་འདས་པ་ལ་གཞོལ་བ་དང་། མྱ་ངན་ལས་འདས་པ་ལ་འབད་པ་དང་མྱ་ངན་ལས་འདས་པ་ལ་བབ་པར་ཡང་བྱེད་མོད་ཀྱི། མྱ་ངན་ལས་འདས་པ་དེ་མངོན་སུམ་དུ་ནི་མི་བྱེད་དོ། དེ་ཅིའི་ཕྱིར་ཞེ་ན། གཞི་འདིས་བདག་བྱང་ཆུབ་ལས་ལྡོག་པར་གྱུར་དུ་འོང་ངོ་སྙམ་དུ་སེམས་པའི་ཕྱིར་རོ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་འདས་ཀྱིས་གསུངས་པའི་དོན་འཚལ་བ་ལྟར་ན། བྱང་ཆུབ་སེམས་དཔའི་ནི་འཁོར་བ་ཁོ་ནར་གནས་པར་བགྱི་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། ཇི་སྐད་སྨྲས་པ་དེ་བཞིན་ཏེ། བྱང་ཆུབ་སེམས་དཔའ་ནི་འཁོར་བ་ཁོ་ནར་གནས་པར་བྱ་བ་ཡིན་ནོ། གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་འཁོར་བ་ན་འཁོར་བའི་ཚེ་འཁོར་བའི་སྐྱོན་རྣམས་ཀྱིས་མི་གོས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེའི་ཕྱིར་དཔེ་བརྗོད་བར་བྱས་ཉོན་ཅིག་རིགས་ཀྱི་བུ་འདི་ལྟ་སྟེ། དཔེར་ན་སྤྲུལ་འཛིན་པའི་མིས་གསང་སྔགས་དང་། སྨན་གྱི་སྟོབས་བསྐྱེད་པ་ཆེན་པོ་དང་ལྡན་པ་ནི་སྤྲུལ་གདུག་པ་དག་དང་། ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྐྱོད་པར་བྱེད་ཀྱང་གཞི་དེས་དེའི་སྲོག་གི་བར་ཆད་བྱེད་པར་ཡང་མི་འགྱུར་རོ། དེ་ཅིའི་ཕྱིར་ཞེ་ན། འདི་ལྟ་སྟེ། ཤེས་རབ་དང་། ཐབས་དང་། རིག་པའི་གསང་སྔགས་དང་། སྨན་གྱི་སྟོབས་བསྐྱེད་པའི་ཕྱིར་རོ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་མྱ་ངན་ལས་འདས་པ་དེ་ཡང་མངོན་སུམ་དུ་མི་བགྱིད་ལ། འཁོར་བའི་སྐྱོན་དེ་དག་གིས་ཀྱང་མི་གོས་པ་ནི་བཅོམ་ལྡན་
འདས་ངོ་མཚར་ལགས་སོ། བདེ་བར་གཤེགས་པ་ངོ་མཚར་ལགས་སོ། །བཅོམ་ལྡན་འདས་ཤིན་དུ་ངོ་མཚར་ལགས་སོ། །བདེ་བཞིན་གཤེགས་པ་ཤིན་དུ་ངོ་མཚར་ལགས་ཏེ། བཅོམ་ལྡན་འདས་བདག་བྱང་ཆུབ་སེམས་དཔའ་དེ་དག་ལ་སྐྱབས་སུ་མཆི་ལགས་སོ། བཅོམ་ལྡན་འདས་སེམས་ཅན་གང་དག་ཆོས་ཀྱི་རྣམ་གྲངས་འདི་ཐོས་ནས་ཐ་ན་སེམས་དང་བ་གཅིག་ཙམ་རྙེད་པར་གྱུར་པ་དེ་དག་ནི་དགེ་བའི་རྩ་བ་ངན་དོན་དང་ལྡན་པ་མ་ལགས་སོ། བཅོམ་ལྡན་འདས་རིགས་ཀྱི་བུ་དང་། རིགས་ཀྱི་བུ་མོ་གང་དག་ཆོས་བསྟན་པ་འདི་བཤད་པ་ན་ཉན་པར་བགྱིད་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། ཇི་སྐད་སྨྲས་པ་དེ་བཞིན་ཏེ། རིགས་ཀྱི་བུ་དང། རིགས་ཀྱི་བུ་མོ་གང་དག་ཆོས་བསྟན་པ་འདི་བཤད་པ་ན་ཉན་པར་བྱེད་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་པ་ཡིན་ནོ། ཆོས་བསྟན་པ་འདི་བཤད་པ་ན་དགེ་སློང་ལྔ་བརྒྱ་པོ་དེ་དག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་གྱུར་ནས་སེམས་རྣམ་པར་གྲོལ་བ་དེ་དག་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་དག་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་དག་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཕྱག་བགྱི་བར་འོས་པ་ལགས་སོ། །བདེ་བར་གཤེགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཕྱག་བགྱི་བར་འོས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དེ་བཞིན་ཏེ། ཇི་སྐད་སྨྲས་པ་དེ་བཞིན་ནོ། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །གྲགས་ཆེན་ཐབས་ལ་མཁས་པ་དང་། །ཤེས་རབ་ཁྱད་པར་འཕགས་པ་ཡིས། །ཉན་ཐོས་རྣམས་ཀྱི་ས་དག་ལས། །ཡང་དག་འདས་པར་གྱུར་
པ་དང་། །ཕུང་པོ་སྐྱེ་འཇིག་ཟད་འགྱུར་བར། །ཡང་དག་ཇི་བཞིན་ཤེས་གྱུར་ཀྱང་། །འགྲོ་བ་ཉམ་ཐག་འདི་མཐོང་ནས། །མྱ་ངན་འདའ་བར་མི་འགྲོ་བའི། །ཤེས་རབ་ཆེ་རྣམས་ཕྱག་བྱའི་འོས། །འཇིགས་པ་མེད་རྣམས་ཕྱག་བྱའི་འོས། །སྤྱན་ཡངས་ལྡན་རྣམས་ཕྱག་བྱའི་འོས། །རྒྱལ་བའི་སྲས་རྣམས་ཕྱག་བྱའི་འོས། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ང་རྒྱལ་དང་། ཆེ་བའི་ང་རྒྱལ་དང་བྲལ་བ་ཡིན་ཞེ་ན། རིགས་ཀྱི་བུ་འདི་ལ་ང་རྒྱལ་ཞེས་བྱ་བ་ནི་བདག་ནི་གཞན་དག་དང་། རིགས་དང་། རུས་དང་། གཟུགས་དང་། མགྲོན་བུ་དང་། གསེར་དང་། ནོར་དང་། ཡོ་བྱད་གང་ཡང་རུང་བ་དག་གམ། གླང་པོ་ཆེའི་ཚོགས་སམ། རཏའི་ཚོགས་སམ། ཤིང་རཏའི་ཚོགས་སམ། དཔུང་བུ་ཆུང་གི་ཚོགས་དག་མི་མཚུངས་སོ་སྙམ་དུ་འགྲན་པར་བྱེད་ཅིང་དེ་ལྟར་སེམས་མངོན་པར་མཐོ་བར་བྱེད་པ་གང་ཡིན་པ་སྟེ། དེ་ནི་ང་རྒྱལ་ཞེས་བྱའོ། །ཆེ་བའི་ང་རྒྱལ་ཞེས་བྱ་བ་ནི་བདག་ནི་གཞན་དག་པས་རིགས་དང་། རུས་དང་། གཟུགས་དང་། འགྲོན་བུ་དང་། གསེར་དང་། ནོར་དང་། འབྲུ་ཕུན་སུམ་ཚོགས་པ་དག་གམ། གླང་པོ་ཆེའི་ཚོགས་སམ། རྟའི་ཚོགས་སམ། ཤིང་རཏའི་ཚོགས་སམ། དཔུང་བུ་ཆུང་གི་ཚོགས་དག་གིས་ཁྱད་པར་དུ་འཕགས་པ་ཡིན་ནོ་སྙམ་དུ་སེམས་ལ། དེ་ལྟར་སེམས་ཁེངས་ཤིང་མི་འདུད་པ་གང་ཡིན་པ་སྟེ། དེ་ནི་ཆེ་བའི་ང་རྒྱལ་ཞེས་བྱའོ། བྱང་ཆུབ་སེམས་དཔའི་ནི་དེ་དག་བྲལ་བས་ན་དེའི་ཕྱིར་ང་རྒྱལ་དང་། ཆེ་བའི་ང་རྒྱལ་དང་བྲལ་བ་ཞེས་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱི་ཚིགས་སུ་བཅད་པ་འདི་དག་བཀའ་སྩལ་ཏོ། ང་རྒྱལ་ཆེ་བའི་ང་རྒྱལ་བྲལ་ཞིང་རྟག་ཏུ་བྱམས་པའི་སེམས། །སྙིང་རྗེའི་ཡིད་དང་ལྡན་ཞིང་འགྲོ་བ་དག་ལ་བག་ཡོད་པའི། །སེམས་དཔའ་གཙོ་བོ་ཡངས་པ་འདི་ན་བསོད་སྙོམས་སྤྱོད་བྱེད་ཅིང་། །ལྷ་དང་མི་རྣམས་དག་ལ་ཕན་བརྗོད་པར་བྱེད་པ་ཡིན།། །།
བམ་པོ་གཉིས་པ། རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་དགོངས་ཏེ་གསུངས་པ་རྟོགས་པར་བྱ་བ་ལ་མཁས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་བཞིན་གཤེགས་པས་དགོངས་ཏེ་གསུངས་བའི་མདོ་སྡེ་ཟབ་མོ་ཟབ་མོ་གང་དག་ཡིན་པ་དེ་དག་ལ་སྒྲ་ཇི་བཞིན་ཁོ་ནར་མངོན་པར་ཞེན་པར་མི་བྱེད་པ་ཡིན་ཏེ། དེ་ལ་དེ་བཞིན་གཤེགས་པས་དགོངས་ཏེ་གསུངས་པ་དེ་དག་ཀྱང་གང་ཞེ་ན། འདི་ལྟ་སྟེ། དེ་བཞིན་གཤེགས་པས་ཉན་ཐོས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། ཞེས་གསུངས་པ་ནི་དེ་ལྟར་མི་བལྟ་འོ། ཀུན་དགའ་བོ་ད་ནི་རོ་རྒྱབ་ན་འོ་ཞེས་གསུངས་པ་ཡང་དེ་ལྟར་མི་བལྟའོ། །ང་ནི་རྒས་འཁོགས་ཏེ་གཏུགས་པ་ཡིན་གྱིས། ངའི་བསྙེན་བཀུར་བ་ཚོལ་ཅིག་ཅེས་གསུངས་པ་ཡང་དེ་ལྟར་མི་བལྟའོ། །མཽང་གལ་གྱི་བུ་ཁྱོད་སོང་ལ་སྨན་པའི་རྒྱལ་པོ་འཚོ་བྱེད་ཀྱི་གན་ནས་སྨན་ལོང་ཤིག་དང་བཟའ་བར་བྱའོ། ཞེས་གསུངས་པ་ཡང་དེ་ལྟར་མི་བལྟའོ། དེ་བཞིན་གཤེགས་པ་ནི་གཞན་མུ་སྟེགས་ཅན་སྤྱོད་པ་པོ་དང་། ཀུན་དུ་རྒྱུ་དག་དང་ལྷན་ཅིག་ཏུ་ཚིགས་གིས་རྩོད་པར་བྱེད་དོ། ཞེས་གསུངས་པ་ཡང་དེ་ལྟར་མི་བལྟའོ། །དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་གོ་ཞེས་གསུངས་པ་ཡང་དེ་ལྟར་མི་བལྟའོ། །སྐྱེས་བུ་དམ་པ་མ་ཡིན་པ་ལྷས་བྱིན་ནི་ཡུན་རིང་པོ་ནས་དེ་བཞིན་གཤེགས་པའི་གཤེད་མ་དང་། གཅུགས་ཅན་དང་། ཕྱིར་རྒོལ་བ་དང་། དགྲ་བོར་གྱུར་པ་ཡིན་ནོ། ཞེས་གསུངས་པ་ཡང་དེ་ལྟར་མི་བལྟའོ། དེ་བཞིན་གཤེགས་པ་ནི་བསོད་སྙོམས་ཀྱི་ཕྱིར་བྲམ་ཟེའི་གྲོངས་ལ་ཅན་དུ་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་བྱུང་ངོ་། །ཞེས་གསུངས་པ་ཡང་དེ་ལྟར་མི་བལྟའོ། །བྲམ་ཟེའི་བུ་མོ་དྲ་གེས་མས་ཤིང་གི་གཞོང་བུ་ལྟོ་བར་བཅིངས་ཏེ། དེ་བཞིན་གཤེགས་པའི་སྐུར་བཏབ་པོ་ཞེས་གསུངས་པ་ཡང་དེ་ལྟར་མི་བལྟའོ། ། དེ་བཞིན་གཤེགས་པ་ཉོན་མོངས་མེད་ཀྱི་ལྗོངས་སུ་དབྱར་གནས་པར་ཞལ་གྱིས་བཞེས་པ་ན་ཟླ་བ་གསུམ་དུ་རྟ་ཆས་ཀྱི་ནས་དག་གསོལ་ཏོ། ཞེས་གསུངས་པ་ཡང་དེ་ལྟར་མི་བལྟའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་
པོས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་ཉན་ཐོས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀི་བུ་ངས་ཉན་ཐོས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་གང་ཡིན་པ་དེ་ནི་རིགས་ལས་བརྟག་ཏེ་ལུང་བསྟན་ཏོ། །གསོལ་པ་བཅོམ་ལྡན་འདས་ཉན་ཐོས་ཟག་པ་ཟད་པ། སྲིད་པར་ཀུན་དུ་སྦྱོར་པ་ཡང་དག་པར་རྒྱུན་ཆད་པ་དག་ལ་རིགས་མཆིས་སུ་ལགས་ཀྱང་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེའི་ཕྱིར་དཔེ་ཉོན་ཅིག་རིགས་ཀྱི་བུ་འདི་ལྟ་སྟེ། དཔེར་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཞིག་ལ་བུ་ཞིག་བདོག་པར་གྱུར་ལ་དེ་ཡང་བཟོའི་གནས་ཐམས་ཅད་སློབ་པར་བྱེད་ཅིང་དེ་དབང་པོ་རཏལ་ལ་དབང་པོ་མི་རྣོ་བ་ཞིག་ཡིན་པས་དེ་ཕྱིས་བསླབ་པར་བྱ་བ་གང་ཡིན་པ་དེ་ནི་སྔར་སློབ་པར་བྱེད་ལ། །སྔར་བསླབ་པར་བྱ་བ་གང་ཡིན་པ་དེ་ནི་ཕྱིས་སློབ་པར་བྱེད་ན་རིགས་ཀྱི་བུ་འདི་ཇི་སྙམ་དུ་སེམས། དེ་གཞི་ངེས་རྒྱལ་པོའི་བུམ་ཡིན་ནོ། ཞེས་བརྗོད་པར་བྱ་བ་ཡིན་སྙམ་འམ་གསོལ་པ་བཅོམ་ལྡན་འདས་དེ་ནི་མ་ལགས་སོ། བདེ་བར་གཤེགས་པ་དེ་ནི་མ་ལགས་ཏེ། དེ་ནི་རྒྱལ་པོའི་བུ་ཞེས་བགྱི་ལགས་སོ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་དུ་རིགས་དང་ལྡན་པའི་བྱང་ཆུབ་སེམས་དཔའ་དབང་པོ་རཏལ་པོ་ཡང་སྒོམ་པའི་ལམ་གྱིས་སྔར་ཉོན་མོངས་པ་རྣམས་ཟད་པར་བྱེད་ཅིང་ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱེད་ན་རིགས་ཀྱི་བུ་འདི་ཇི་སྙམ་དུ་སེམས། ངེས་གཞི་ངེས་མངོན་པར་རྫོགས་པར་འཚང་མི་རྒྱའོ་ཞེས་བྱ་སྙམ་འམ། གསོལ་པ། བཅོམ་ལྡན་འདས་དག་གིས་གང་འདོད་ཆེན་པ་མ་གཏོགས་པར་མངོན་པར་རྫོགས་པར་འཚང་མི་རྒྱའོ་ཞེས་དེ་སྐད་མཆི་པའི་སེམས་ཅན་དེ་དག་ནི་ལྷ་དང་བཅས་པ་དང་། བདུད་དང་བཅས་པ་དང་། དགེ་སྦྱོང་དང་། བྲམ་ཟེད་བཅས་པའི་སྐྱེ་དགུ་དང་། ལྷ་དང་མི་དང་། ལྷ་མ་ཡིན་དུ་བཅས་པའི་འཇིག་རྟེན་ན་ཡང་དག་པར་རྗེས་སུ་མ་
མཐོང་ལགས་སོ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེ་གཞན་ཡང་ཉོན་ཅིག །རིགས་ཀྱི་བུ་འདི་ཇི་སྙམ་དུ་སེམས། བྱང་ཆུབ་སེམས་དཔའ་ས་བཅུ་པ་ལ་གནས་པ་ཉོན་མོངས་པའི་སྒྲིབ་པ་ཟད་ནས་བྱང་ཆུབ་ཀྱི་སྙིང་པོ་ལ་འཇུག་གམ། འོན་ཏེ་མ་ཟད་པས་འཇུག་སྙམ། གསོལ་པ། བཅོམ་ལྡན་འདས་བས་ན་ས་མཆིས་ལགས་སོ། བདེ་བར་གཤེགས་པ་བས་ནས་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཇི་སྙམ་དུ་སེམས། དེ་བཞི་ངེས་མངོན་པར་རྫོགས་པར་འཚང་མི་རྒྱ་སྙམ་འམ། གསོལ་པ། བཅོམ་ལྡན་འདས་མངོན་པར་རྫོགས་པར་འཚང་རྒྱ་ལགས་སོ། བདེ་བར་གཤེགས་པ་མངོན་པར་རྫོགས་པར་འཚང་རྒྱ་ལགས་སོ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལ་ཡང་དེ་དང་འདྲ་བར་བལྟ་བར་བྱའོ། གསོལ་པ། བཅོམ་ལྡན་འདས་ཀུན་དགའ་བོ་ང་ནི་རོ་རྒྱབ་ནའོ་ཞེས་གསུངས་པ་དེ་ཇི་ལྟར་བལྟ་བར་བགྱི་ལགས་བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་ཕྱི་མའི་སྐྱེ་བོ་དེ་བཞིན་གཤེགས་པའི་སྐུ་རྡོ་རྗེ་ལྟར་སྲ་བ་ཡང་སྐུ་རོ་རྒྱབ་བསྙུང་ན་གཞན་དག་ལྟ་སྨོས་ཀྱང་ཅི་དགོས་སྙམ་དུ་སེམས་པ་ལ་ཐུགས་བརྩེ་བས་དེ་སྐད་གསུངས་པ་ཡིན་ན། དེ་ལ་མི་བླུན་པོ་ཁ་ཅིག་དེ་བཞིན་གཤེགས་པའི་སྐུ་རོ་རྒྱབ་བསྙུང་ཞེ་འོ། ཞེས་སྒྲ་ཇི་བཞིན་ཁོ་ནར་འཛིན་པར་བྱེད་དེ། དེ་དག་ནི་རང་ཡང་ཉམས་པར་བྱས་ལ་གཞན་ཡང་ཉམས་པར་བྱེད་པ་ཡིན་ཏེ། དེ་བཞིན་གཤེགས་པས་དེ་ལས་དགོངས་ནས་དེ་སྐད་གསུངས་སོ། གསོལ་པ་བཅོམ་ལྡན་འདས་ང་ནི་རྒས་འཁོགས་ཏེ་གཏུགས་པ་ཡིན་གྱིས། ངའི་བསྙེན་བཀུར་བ་ཚོལ་ཅིག་ཅེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཡང་ངས་ཕྱི་མའི་སྐྱེ་བོ་རྣམས་ལ་ཐུགས་བརྩེ་བས་ངའི་ཉན་ཐོས་རྒས་འཁོགས་ཏེ་གཏུགས་པ་གང་དག་གི་ལུས་ལ་བསྙེན་བཀུར་བ་དགོས་པ་དག་འབྱུང་བར་འགྱུར་བ་དེ་དག་དེ་བཞིན་གཤེགས་པས་རྗེས་སུ་མ་གནང་ངོ་། །ཞེས་འཕོངས་པར་མི་འགྱུར་བར་བྱ་བའི་ཕྱིར་དེ་སྐད་གསུངས་ཏེ། དེ་བཞིན་གཤེགས་པས་དེ་ལས་དགོངས་ནས་དེ་སྐད་གསུངས་པ་ཡིན་ན།
དེ་ལ་མི་བླུན་པོ་ཁ་ཅིག་དེ་བཞིན་གཤེགས་པ་བགྲེས་འཁོགས་ཏེ། གཏུགས་སོ་ཞེས་སྒྲ་ཇི་བཞིན་ཁོ་ནར་འཛིན་པར་བྱེད་དེ། དེ་དག་ཀྱང་རང་ཡང་ཉམས་པར་བྱས་ལ་གཞན་ཡང་ཉམས་པར་བྱེད་པ་ཡིན་ནོ། གསོལ་པ། བཅོམ་ལྡན་འདས་མཽང་གལ་གྱི་བུ་ཁྱོད་སོང་ལ་སྨན་པའི་རྒྱལ་པོ་འཚོ་བྱེད་ཀྱི་གན་ནས་སྨན་ལོང་ཤིག་དང་། བཟའ་བར་བྱའོ་ཞེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཡང་ངས་ཕྱི་མའི་སྐྱེ་བོ་རྣམས་ལ་ཐུགས་བརྩེ་བས་ངའི་ཉན་ཐོས་གང་དག་ལ་སྨན་དགོས་པ་དག་འབྱུང་བར་འགྱུར་བ་དེ་དག་དེ་བཞིན་གཤེགས་པས་རྗེས་སུ་མ་གནང་ངོ། ཞེས་འཕོངས་བར་མི་འགྱུར་བར་བྱ་བའི་ཕྱིར་དེ་སྐད་གསུངས་ཏེ། དེ་བཞིན་གཤེགས་པས་དེ་ལས་དགོངས་ནས་དེ་སྐད་གསུངས་པ་ཡིན་ན། ། དེ་ལ་མི་བླུན་པོ་ཁ་ཅིག་སྨན་པའི་རྒྱལ་པོ་འཚོ་བྱེད་ཀྱིས་དགེ་སློང་མཽང་གལ་གྱི་བུ་ལ་རྗེས་མེད་པ་དང་། གུས་པར་སྒྲིམ་པ་མེད་པ་མ་ཡིན་པར་བསྟན་ཅིང་དྲིས་ན་ཡང་རིངས་པ་རིངས་པ་ཁོ་ནར་བསྙུན་གྱི་གསོས་སྨན་བསྟན་པ་ལས་ན། དེ་བཞིན་གཤེགས་པ་ནི་སྐུ་ལ་བསྙུན་མངའ་བ་ཡིན་ནོ་སྙམ་པ་དང་། དེ་བཞིན་གཤེགས་པའི་སྐུ་དེ་ལ་ཡང་ཉེ་དམིགས་དག་སྣང་སྟེ། ཆེས་མཐོང་བ་རྣམས་ལ་ཡང་དེ་ལྟ་བུའི་བག་མེད་པ་དག་འབྱུང་བར་གྱུར་ན། སོ་སོའི་སྐྱེ་བོ་དག་ལ་ལྟ་སྨོས་ཀྱང་ཅི་དགོས། ཞེས་སྒྲ་ཇི་བཞིན་ཁོ་ནར་འཛིན་པར་བྱེད་དེ། དེ་དག་ཀྱང་རང་ཡང་ཉམས་པར་བྱས་ལ་གཞན་ཡང་ཉམས་པར་བྱེད་པ་ཡིན་ནོ། གསོལ་པ། བཅོམ་ལྡན་འདས་དེ་བཞིན་གཤེགས་པ་ནི་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་ངག་དང་ལྷན་ཅིག་ཏུ་ཚིག་གིས་རྩོད་པར་བྱེད་དོ། ཞེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཡང་ངས་ཕྱི་མའི་སྐྱེ་བོ། དེ་བཞིན་གཤེགས་པ་ཉིད་ལ་སྐྱེ་བོ་དགྲ་བོ་དང་། ཕྱིར་རྒོལ་བ་དག་ཡོད་ན་བདག་ཅག་ལ་ལྟ་སྨོས་ཀྱང་ཅི་དགོས། སྙམ་དུ་སེམས་པ་དག་ལ་ཐུགས་བརྩེ་བས་དེ་སྐད་ཅེས་གསུངས་པ་དག་ཡིན་ན། དེ་ལ་མི་བླུན་པོ་དེ་དག་དེ་བཞིན་གཤེགས་པ་ལ་ཡང་དགྲ་བོ་དང་། ཕྱིར་རྒོལ་བ་དག་ཡོད་དོ། ཞེས་སྒྲ་ཇི་བཞིན་ཁོ་ནར་འཛིན་པར་བྱེད་དེ། རིགས་ཀྱི་
བུ་འཁོར་ལོས་བསྒྱུར་བའི་རྒྱལ་པོ་དགེ་བའི་རྩ་བ་ཆུང་ངུ་དང་ལྡན་པ་ལ་ཡང་དགྲ་བོ་དང་། ཕྱིར་རྒོལ་བ་བདག་མེད་ན་དེ་བཞིན་གཤེགས་པ་བསོད་ནམས་ཀྱི་ཆུ་བོ་ཆེན་པོ་དང་ལྡན་པ་ལ་ལྟ་སྨོས་ཀྱང་ཅི་དགོས། གསོལ་པ། བཅོམ་ལྡན་འདས་དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་གོ། ཞེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ནི་ལས་བདག་གིར་བྱ་བ་ཉིད་སྟོན་པར་མཛད་དེ། །དེ་བཞིན་གཤེགས་པ་ཉིད་ལ་ཡང་སྔོན་བྱས་པའི་ལས་དག་ཡོད་ན། གཞན་དག་ལ་ལྟ་སྨོས་ཀྱང་ཅི་དགོས། ཤེས་རྒྱུ་དེ་དང་རྐྱེན་དེ་དང་། གཞི་དེས་སྡིག་པའི་ལས་ལ་མི་དགའ་ཞིང་དགའ་བར་མི་འགྱུར་པའི་དོན་གྱི་དབང་དེ་གཟིགས་པས་ན། དེ་བཞིན་གཤེགས་པ་ལས་བདག་གིར་བྱ་བ་ཉིད་སྟོན་པར་མཛད་པ་ཡིན་ན། དེ་ལ་མི་བླུན་པོ་དེ་དག་དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་གོ། ཞེས་སྒྲ་ཇི་བཞིན་ཁོ་ནར་འཛིན་པར་བྱེད་དོ། གསོལ་པ། བཅོམ་ལྡན་འདས་སྐྱེས་བུ་དམ་པ་མ་ཡིན་བ་ལྟས་བྱིན་ནི་ཡན་རིང་པོ་ནས་དེ་བཞིན་གཤེགས་པའི་གཤེད་མ་དང་། གཅུགས་ཅན་དང་། ཕྱིར་རྒོལ་བ་དང་། དགྲ་བོར་གྱུར་པ་ཡིན་ནོ། ཞེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གལ་ཏེ་སྐྱེས་བུ་དག་པ་ལྷས་བྱིན་མེད་པར་གྱུར་ན། དེ་བཞིན་གཤེགས་པ་ལ་སངས་རྒྱས་ཀྱི་ཆེ་བའི་བདག་ཉིད་གཅིག་ཀྱང་ཡོད་པར་མི་མངོན་ཏེ། རིགས་ཀྱི་བུ་གང་གི་ཕྱིར་སྐྱེས་བུ་དམ་པ་ལྷས་བྱིན་གྱིས་དེ་བཞིན་གཤེགས་པ་ལ་བརྩད་པ་དང་། བསྒྲུན་བ་དང་། ཕྱིར་བརྒལ་བ་དག་བསྟན་པ་དེའི་ཕྱིར། དེ་བཞིན་གཤེགས་པ་ལ་སངས་རྒྱས་ཀྱི་ཆེ་བའི་བདག་ཉིད་དག་ཡོད་པར་མངོན་ནོ། རིགས་ཀྱི་བུ་རྒྱལ་པོའི་ཚིག་གིས་སྐྱེས་བུ་དམ་པ་ལྷས་བྱིན་འདིས་དེ་བཞིན་གཤེགས་པ་རྣམ་པར་གཞོམ་པར་བྱའོ། སྙམ་ནས་གྲོང་བར་གྱི་དབུས་ནས་དེ་བཞིན་གཤེགས་པ་ལ་གླང་པོ་ཆེ་ཆེན་པོ་ནོར་སྐྱོང་སྤང་པར་གྱུར་གང་ཡིན་པ་དེ་དེ་བཞིན་གཤེགས་པས་བཏུལ་ཅིང་རྣམ་པར་བཏུལ་ནས་དུལ་བར་མཛད་དེ། སྐྱེ་བོ་ཕལ་པོ་ཆེས་དེ་མཐོང་ནས་ངོ་
མཚར་དུ་འཛིན་ཅིང་རྨང་དུ་བྱུང་བར་མཛད་ནས་དཀོན་མཆོག་གསུམ་པོ་འདི་ལྟ་སྟེ། སངས་རྒྱས་དཀོན་མཆོག་དང་། ཆོས་དཀོན་མཆོག་དང་། དགེ་འདུན་དཀོན་མཆོག་ལ་སྐྱབས་སུ་དངོས་སྟེ། དེ་ཡང་སྐྱེས་བུ་དམ་པ་ལྷས་བྱིན་གྱི་སྐྱེས་བུའི་རྩལ་ཡིན་བར་བལྟ་བར་བྱའོ། དེ་ལ་མི་བླུན་པོ་དེ་དག་ནི་དེ་བཞིན་གཤེགས་པའི་གཤེད་མ་དང་། གཅུགས་ཅན་དང་། ཕྱིར་རྒོལ་བ་ཡིན་ནོ། ཞེས་སྒྲ་ཇི་བཞིན་ཁོ་ནར་འཛིན་པར་བྱེད་དོ། དེ་བཞིན་དུ་དེ་བཞིན་གཤེགས་པ་བྱང་ཆུབ་སེམས་དཔར་གྱུར་པ་ན་ཚེ་རབས་ལྔ་བརྒྱར་སྐྱེས་བུ་དམ་པ་ལྷས་བྱིན་གྱིས་གནོད་པ་བྱས་པ་གང་ཡིན་པ་དེ་ཡང་བྱང་ཆུབ་སེམས་དཔའི་ཡོན་ཏན་ཐམས་ཅད་བསྟན་པར་བྱ་བའི་ཕྱིར་བྱས་པ་ཡིན་ན་དེ་ལ་མི་བླུན་པོ་ཁ་ཅིག་ཀྱི་མ་ལྷས་བྱིན་ནི་དེ་བཞིན་གཤེགས་པའི་གཤེད་མ་དང་། གཅུགས་ཅན་དང་། ཕྱིར་རྒོལ་བ་ཡིན་ནོ། ཞེས་སྒྲ་ཇི་བཞིན་ཁོ་ནར་འཛིན་ཏེ། དེ་དག་ནི་གཞི་དེས་ལུས་ཞིག་ནས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་སུ་སྐྱེ་བར་འགྱུར་རོ། དེ་ཅིའི་ཕྱིར་ཞེ་ན། འདི་ལྟར་སྐྱེས་བུ་དམ་པ་ལྷས་བྱིན་ཀྱི་ཚོགས་ཤིན་དུ་བསགས་པ། དགེ་བའི་རྩ་བ་ཤིན་དུ་བསགས་པ། རྒྱལ་བ་དུ་མ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། ཐེག་པ་ཆེན་པོ་ལ་ཡང་དག་པར་ཞུགས་པ། བྱང་ཆུབ་ཆེན་པོ་ལ་གཞོལ་པ། བྱང་ཆུབ་ཆེན་པོ་ལ་འབབ་པ། བྱང་ཆུབ་ཆེན་པོ་ལ་བབ་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བ་ཡིན་བས་ན་དེ་ལ་སྡང་བའི་སེམས་བསྐྱེད་པ་དེ་དག་ནི་ལུས་ཞིག་ནས་སེམས་ཅན་དམྱལ་བ་དང་། དུད་འགྲོ་དང་ཡི་དགས་རྣམས་སུ་སྐྱེ་བར་འགྱུར་བའི་ཕྱིར་རོ། གསོལ་པ། བཅོམ་ལྡན་འདས་དེ་བཞིན་གཤེགས་པ་གསོང་སྙོམས་ཀྱི་ཕྱིར་བྲམ་ཟེའི་གྲོངས་ལ་ཅན་དུ་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་བྱུང་ངོ་ཞེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ཡང་ངས་ཕྱི་མའི་སྐྱེ་བོ་རྣམས་ལ་བལྟས་ཏེ་དེ་ལྟ་བུ་བསྟན་ཏོ། །དེ་ཅིའི་ཕྱིར་ཞེ་ན། རིགས་ཀྱི་བུ་དེ་བཞིན་གཤེགས་པ་ལ་ལས་ཀྱི་སྒྲིབ་པ་ཅུང་ཟད་ཀྱང་མེད་པའི་ཕྱིར་ཏེ། འོན་ཀྱང་དེ་བཞིན་གཤེགས་པས་ཕྱི་མའི་སྐྱེ་བོ་རྣམས་ལ་བལྟས་ནས་དེ་ལྟ་བུ་བསྟན་ཏེ། དགེ་སློང་བསོད་སྙོམས་པ་ཁ་ཅིག་
བསོད་སྙོམས་ཀྱི་ཕྱིར་གྲོང་དང་། གྲོང་ཁྱེར་དང་། གྲོང་བརྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ཏུ་ཞུགས་པའི་ཚེ་བདག་ཉིད་བསོད་ནམས་ཆུང་བས་བསོད་སྙོམས་མ་རྙེད་པ་ན། དེ་དག་དེའི་ཚེ་དེ་བཞིན་གཤེགས་པ་ཡིད་ལ་བྱས་ནས་འདི་སྐད་ཅེས་དེ་བཞིན་གཤེགས་པ་དགེ་བའི་རྩ་བའི་ཚོགས་ཐམས་ཅད་ཡོངས་སུ་རྫོགས་པ་དེ་ཉིད་ཀྱང་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་བྱུང་ན། བདག་ཅག་དགེ་བའི་རྩ་བ་ཆུང་ངུ་དང་། །ལྡན་པ་རྣམས་ལྟ་སྨོས་ཀྱང་ཅི་དགོས་ཏེ། བསོད་སྙོམས་མ་རྙེད་པ་འདིས་བདག་ཅག་ཡོངས་སུ་གདུང་བར་མི་བྱའོ་ཞེས་བརྗོད་པར་འགྱུར་པའི་དོན་གྱི་དབང་འདི་གཟིགས་པས་དེ་བཞིན་གཤེགས་པ་བསོད་སྙོམས་ཀྱི་ཕྱིར་བྲམ་ཟེའི་གྲོངས་ལ་ཅན་དུ་ཇི་ལྟར་ལྷུང་བཟེད་བཀྲུས་པས་ཞུགས་པ་བཞིན་དུ་ཕྱིར་བྱུང་བར་བསྟན་ཏོ། །གཞན་ཡང་བདུད་སྡིག་ཅན་གྱིས་བྲམ་ཟེ་དང་། ཁྱིམ་བདག་རྣམས་བྱིན་གྱིས་བརླགས་པས་ན་དེ་ལྟར་བསོད་སྙོམས་མི་སྟེར་ཏོ། ཞེས་ཟེར་ན་དེ་ཡང་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བདུད་སྡིག་ཅན་གྱིས་དེ་བཞིན་གཤེགས་པའི་བསོད་སྙོམས་ཀྱི་བར་ཆད་བྱེད་པར་མི་ནུས་པའི་ཕྱིར་ཏེ། འོན་ཀྱང་དེ་བཞིན་གཤེགས་པའི་བྱིན་གྱི་བརླབས་ཀྱིས་བདུད་སྡིག་ཅན་གྱིས་བྲམ་ཟེ་དང་ཁྱིམ་བདག་རྣམས་ཀུན་དུ་བྱིན་གྱིས་བརླབས་པ་ཡིན་གྱི། དེ་བཞིན་གཤེགས་པ་ལ་ནི་ལས་ཀྱི་སྒྲིབ་པ་ཅུང་ཟད་ཀྱང་མེད་དེ། སེམས་ཅན་དེ་དག་ཉིད་ཡོངས་སུ་སྨིན་པར་བྱ་བའི་ཕྱིར་དེ་བཞིན་གཤེགས་པས་ཐབས་ལ་མཁས་པ་དེ་ལྟ་བུ་བསྟན་པར་མཛད་དོ། །དེ་བཞིན་གཤེགས་པས་ཞལ་ཟས་བཅད་ཅིང་ཆད་པ་དེ་ན་བདུད་དང་བདུད་ཀྱི་རིས་ཀྱི་ལྷ་དང་། ལྷའི་བུ་གཞན་དག་ཀྱང་དགེ་སྦྱོང་གཽ་ཏ་མ་དང་། །ཉན་ཐོས་དག་ཡིད་མི་བདེ་བར་མི་འདུག་གམ་ཞེས་དེ་བཞིན་གཤེགས་པ་ཉན་ཐོས་ཀྱི་དགེ་འདུན་དང་བཅས་པའི་ཐུགས་ལ་སེམས་པར་བྱེད་དེ། དེ་དག་ཉིན་མཚན་དུ་དེ་བཞིན་གཤེགས་པ་ཉན་ཐོས་ཀྱི་དགེ་འདུན་དང་བཅས་པའི་ཐུགས་ལ་སེམས་ཀྱིས་སེམས་པར་བྱེད་པ་ན་ཐུགས་ཀྱི་གནས་གཅིག་ཙམ་ལ་ཡང་མཐོ་པ་མེད་ཅིང་དམའ་བ་མེད་ལ་སྡོན་ཇི་ལྟ་བ་བཞིན་དུ་ཕྱིས་ཀྱང་དེ་བཞིན། ཕྱིས་ཇི་ལྟ་བ་བཞིན་སྔོན་ཡང་དེ་བཞིན་ཏེ། ཡིད་མི་བདེ་བ་མེད་པར་ཡང་དག་
པར་རྗེས་སུ་མ་ཐོང་ནས་དེའི་ཚེ་ན་ལྷའི་བུ་བདུན་ཁྲི་འདུས་པར་གྱུར་པ་དག་གིས་དེ་བཞིན་གཤེགས་པ་ལ་རབ་ཏུ་བཏུད་པ་དང་། དེ་བཞིན་གཤེགས་པས་ཀྱང་དེ་དག་ལ་ཅི་ནས་ཀྱང་དེ་དག་ཐམས་ཅད་ཆོས་རྣམས་ལ་ཆོས་ཀྱི་མིག་རྣམ་པར་དག་པར་འགྱུར་པ་དེ་ལྟ་དེ་ལྟར་ཆོས་བཤད་དེ། །དེ་ལྟར་ན་དེ་བཞིན་གཤེགས་པ་ཕྱི་མའི་སྐྱེ་བོ་ལ་གཟིགས་པ་ཡིན་གྱི། དེ་བཞིན་གཤེགས་པ་ལ་ལས་ཀྱི་སྒྲིབ་པ་ཡོད་པ་མ་ཡིན་ནོ། །གསོལ་པ། བཅོམ་ལྡན་འདས་བྲམ་ཟེའི་བུ་མོ་དྲེགས་མས་ཤིང་གི་གཞོང་བུ་ལྟོ་བར་བཅིངས་ཏེ། དེ་བཞིན་གཤེགས་པ་ལ་སྐུར་པ་བཏབ་བོ་ཞེས་གསུངས་པ་དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ལ་ནི་ལས་ཀྱི་སྒྲིབ་པའི་ཉེས་པ་མེད་དེ། དེ་བཞིན་གཤེགས་པས་བྲམ་ཟེའི་བུ་མོ་དྲེགས་མ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དུ་འཕང་བར་ཡང་སྤྱོད་མོད་ཀྱི། དེ་བཞིན་གཤེགས་པས་ཐབས་ལ་མཁས་པས་ལས་ཀྱི་བྱ་བ་བསྟན་ཏེ། ངའི་བསྟན་པ་འདི་ལ་རབ་ཏུ་བྱུང་བ་ལ་སྐུར་པ་བཏབ་པ་དག་འབྱུང་བར་འགྱུར་བ་དེ་དག་ཡང་དག་པ་མ་ཡིན་པའི་བསྐུར་པས་སྐུར་པར་འགྱུར་པས་དེ་དག་འགྱོད་པ་ཙམ་དུ་གྱུར་པའི་ཚེ་དེ་དག་སྐུར་པ་བཏབ་པ་ན་འདི་སྐད་དུ་དེ་བཞིན་གཤེགས་པ་དཀར་པོའི་ཆོས་ཐམས་ཅད་དང་ལྡན་པ་དེས་ཀྱང་རེ་ཤིག་མངོན་སུམ་དུ་སྐུར་པ་བརྙེས་པར་གྱུར་ན་བདག་ཅག་གིས་ལྟ་ཅིའི་ཕྱིར་མི་རྙེད་ཅེས་ཟེར་ཞིང་དེ་དག་དེའི་ཚེ་སྐུར་པ་དེ་ཟིལ་གྱིས་མནན་ནས་ཚངས་པར་སྤྱོད་པ་ཡོངས་སུ་དག་པ། ཡོངས་སུ་བྱང་པ་སྤྱོད་པར་འགྱུར་པ་དང་། ཉམས་པར་མི་འགྱུར་པར་བྱ་བའི་ཕྱིར་རོ། །བྲམ་ཟེའི་བུ་མོ་དྲེགས་མ་ནི་རེ་ཤིག་སྡིག་པའི་ལས་ཀུན་དུ་རྒྱས་པ་ཡིན་པས་རྨི་ལམ་ན་ཡང་དེ་བཞིན་གཤེགས་པ་ལ་སྐུར་པ་འདེབས་པར་བྱེད་པ་ཡིན་ཏེ། ཤི་འཕོས་ནས་ཀྱང་སེམས་ཅན་དམྱལ་བར་འགྲོ་བར་འགྱུར་རོ། །རིགས་ཀྱི་བུ་གལ་ཏེ་དེ་བཞིན་གཤེགས་པ་དེ་ཀུན་དུ་སྲུང་བར་སྤྱོད་དོ་ཞེས་མཁྱེན་པར་གྱུར་ན་ནི་དེ་ཀུན་དུ་སྲུང་བར་ཡང་མཛད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་སེམས་ཅན་འགའ་ཡང་ཡོངས་སུ་མ་བཏང་བའི་ཕྱིར་རོ། །གསོལ་པ། བཅོམ་ལྡན་འདས་དེ་བཞིན་གཤེགས་པ་ཉོན་མོངས་མེད་ཀྱི་ལྗོངས་སུ་དབྱར་གནས་པར་ཞལ་གྱིས་བཞེས་
པ་ན་ཟླ་བ་གསུམ་དུ་རྟ་ཆོས་ཀྱི་ནས་དག་གསོལ་ཏོ་ཞེས་གསུངས་པ། དེ་ཇི་ལྟར་བལྟ་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དམ་བྲམ་ཟེ་དང་། ཁྱིམ་བདག་དེ་དག་དེ་བཞིན་གཤེགས་པ་སྤྱན་དྲང་བར་མི་སེམས་པར་ཤེས་ཏེ། ཤེས་བཞིན་དུ་དེ་བཞིན་གཤེགས་པ་དེར་དབྱར་གནས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པས་ཟླ་བ་གསུམ་གྱི་བར་དུ་གང་དག་གི་ཆས་གསོལ་པའི་རྟ་ལྔ་བརྒྱ་པོ་དེ་དག་ཐམས་ཅད་ནི་བྱང་ཆུབ་སེམས་དཔའི་ཐེག་པ་པ་སྔོན་གྱི་རྒྱལ་པོ་ལ་བསྙེན་བཀུར་བྱས་པ་ཤ་སྟག་ཡིན་ཏེ། དེ་དག་སྡིག་པའི་གྲོགས་པོའི་དབང་དུ་སོང་ནས་སྡིག་པའི་ལས་བྱས་པས་དེས་དེ་དག་དུད་འགྲོའི་སྐྱེ་གནས་སུ་སྐྱེས་ཏེ། རྟ་ལྔ་བརྒྱ་པོ་དག་གི་ནང་ན་རྟ་ཅང་ཤེས་གང་ཡིན་པ་དེ་ནི་བྱང་ཆུབ་སེམས་དཔའ་ཉི་མའི་སྙིང་པོ་ཞེས་བྱ་བ་སྨོན་ལམ་གྱི་དབང་གིས་བསམས་བཞིན་དུ་དེར་སྐྱེས་པ་ཡིན་ལ། རྟ་ལྔ་བརྒྱ་པོ་དེ་དག་ཀྱང་བྱང་ཆུབ་སེམས་དཔའ་ཉི་མའི་སྙིང་པོ་དེ་ཉིད་ཀྱིས་བྱང་ཆུབ་ཡང་དག་པར་འཛིན་དུ་བཅུག་པ་ཡིན་པས་དེ་དེ་དག་ཡོངས་སུ་སྨིན་པར་བྱ་བའི་ཕྱིར་དེར་སྐྱེས་ཏེ་རྟ་ཅང་ཤེས་དེ་ཉིད་ཀྱི་མཐུས་རྟ་ལྔ་བརྒྱ་པོ་དེ་དག་ཐམས་ཅད་ཀྱིས་སྔོན་གྱི་ཚེ་རབས་རྗེས་སུ་དྲན་པར་གྱུར་ཅིང་དེ་དག་གི་བྱང་ཆུབ་ཀྱི་སེམས་དེ་ཡང་མངོན་དུ་གྱུར་པའི་ཕྱིར་ཏེ། རིགས་ཀྱི་བུ་དེ་ལྟ་བས་ན་དེ་བཞིན་གཤེགས་པ་རྟ་ལྔ་བརྒྱ་པོ་དེ་དག་ལ་ཐུགས་བརྩེ་བའི་ཕྱིར་དབྱར་དེར་གནས་སོ། །དེ་ན་རྟ་ཅང་ཤེས་ཀྱི་ཆས་ཀྱི་ནས་གང་དག་ཡིན་པ་དེ་དག་ལས་ཕྱེད་ནི་དེ་བཞིན་གཤེགས་པ་ལ་འབུལ་ལོ། །རྟ་ལྔ་བརྒྱ་པོ་དེ་དག་གི་ཆས་ཀྱི་ནས་གང་དག་ཡིན་པ་དེ་དག་ལས་ཕྱེད་ཕྱེད་ནི་དགེ་སློང་ལྔ་བརྒྱ་པོ་དག་ལ་འབུལ་ཞིང་རྟ་ཅང་ཤེས་དེས་རཏའི་སྐད་དེས་རྟ་ལྔ་བརྒྱ་པོ་དེ་དག་སྡིག་པ་འཆགས་སུ་བཅུག་ཅིང་སངས་རྒྱས་ལ་སོགས་པ་དགེ་སློང་ལྔ་བརྒྱ་པོ་དག་ལ་ཕྱག་འཚལ་དུ་བཅུག་གོ། །རིགས་ཀྱི་བུ་དེ་ནས་ཟླ་བ་གསུམ་པོ་དེ་དག་འདས་པ་དང་། རྟ་ལྔ་བརྒྱ་པོ་དེ་དག་ཤི་འཕོས་ཏེ། དགའ་ལྡན་གྱི་ལྷ་རྣམས་དང་བསྐལ་པ་མཉམ་པར་སྐྱེས་ནས་ལྷར་གྱུར་དེ་དག་གིས་ཡང་དེ་བཞིན་གཤེགས་པ་ལ་བཀུར་བ་སྟི་བྱས། །བླ་མར་བྱས། རི་མོར་བྱས། མཆོད་པ་བྱས་པ་དང་། །དེ་བཞིན་གཤེགས་པས་ཀྱང་དེ་དག་ལ་ཅི་ནས་ཀྱང་དེ་དག་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ངེས་པར་འགྱུར་བ་དེ་ལྟ་དེ་ལྟར་ཆོས་བསྟན་ཏོ། །རྟ་ལྔ་བརྒྱ་པོ་དེ་དག་འདུལ་ཞིང་འཚོ་བར་བྱེད་པའི་རྟ་རྫི་།། གང་ཡིན་པ་དེ་ཡང་དེ་བཞིན་གཤེགས་པས་རང་སངས་རྒྱས་རབ་ཏུ་སེམས་དུལ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །རིགས་ཀྱི་བུ་དེ་ལྟ་མོད་ཀྱི་འོན་ཀྱང་དེ་བཞིན་གཤེགས་པའི་ཞལ་ཟས་གང་ཡིན་པ་དེ་ལ་ནི་མི་བསོད་པ་ཅུང་ཟད་ཀྱང་མེད་དེ། རིགས་ཀྱི་བུ་གལ་ཏེ་དེ་བཞིན་གཤེགས་པས་ཤིང་དང་། བོད་པ་དང་། གསེག་མ་དང་། གྱོ་མོ་ལ་སོགས་པ་ཡོངས་སུ་ལོངས་སྤྱད་པར་གྱུར་ན་ཡང་ཤིང་དང་། བོད་པ་དང་། གསེག་མ་དང་། གྱོ་མོ་ལ་སོགས་པ་དེ་དག་གི་རོ་དེ་ལྟ་བུ་དང་། རོ་བྲོ་བའི་མཆོག་གང་དག་ཡིན་པ་དེ་ལྟ་བུ་དག་ནི་སྟོང་ཆེན་པོའི་འཇིག་གྱི་ཁམས་ན་ཡང་མེད་དོ། །དེ་ཅིའི་ཕྱིར་ཞེ་ན། འདི་ལྟར་དེ་བཞིན་གཤེགས་པས་སྐྱེས་བུ་ཆེན་པོའི་མཚན་རོ་བྲོ་བའི་མཆོག་དང་ལྡན་པ་ཞེས་བྱ་བ་བརྙེས་པའི་ཕྱིར་ཏེ། རིགས་ཀྱི་བུ་དེའི་ཕྱིར་རྣམ་གྲངས་དེས་ན་ཁྱེད་ཀྱིས་འདི་ལྟར་འདི་ལྟ་སྟེ། དེ་བཞིན་གཤེགས་པའི་ཞལ་ཟས་ཐམས་ཅད་ནི་བསོད་པ་ཡིན་པར་རིག་པར་བྱའོ། །རིགས་ཀྱི་བུ་གཞན་ཡང་དགེ་སློང་ཀུན་དགའ་བོ་འདི་སྙམ་དུ་དེ་བཞིན་གཤེགས་པས་འཁོར་ལོས་སྒྱུར་བའི་རྒྱལ་སྲེས་སྤངས་ནས་རྟ་ཆས་ཀྱི་ནས་དག་གསོལ་པར་མཛད་པ་ལྟ་ཞེས་སྙིང་རྗེ་བར་གྱུར་བ་དང་། དེ་བཞིན་གཤེགས་པས་དེ་འི་སེམས་ལ་རྣམ་པར་གཟིགས་ནས་ཀུན་དགའ་བོ་འདི་ཅིའི་རོ་ཡིན་ཤེས་སམ་ཞེས་ནས་ཀྱི་འབྲུ་ཅིག་བྱིན་པ་དང་། དེས་དེ་ཟོས་ནས་ངོ་མཚར་དུ་འཛིན་པར་འགྱུར་ཏེ། །ང་ལ་འདི་སྐད་ཅེས་བཅོམ་ལྡན་འདས་བདག་ནི་རྒྱལ་པོའི་ཁྱིམ་དུ་སྐྱེས་ཤིང་རྒྱལ་པོའི་ཁྱིམ་དུ་ལེགས་པར་རྒྱས་པ་ལགས་ན་བདག་གིས་རོ་འདི་ལྟ་བུ་ནི་སྔོན་ཆད་མ་མྱོང་པ་ལགས་སོ་ཞེས་ཟེར་ཏེ། དེ་བྱིན་པས་ཚེ་དང་ལྡན་པ་ཀུན་དགའ་བོ་ཟས་མི་ཟ་བར་དགའ་བ་དང་བདེ་བས་ཞག་བདུན་འདས་པར་འགྱུར་ཏོ། །རིགས་ཀྱི་བུ་དེའི་ཕྱིར་རྣམ་གྲངས་དེས་ཀྱང་ཁྱོས་ཀྱིས་འདི་ལྟར་འདི་ལྟ་སྟེ། དེ་བཞིན་གཤེགས་པ་ནི་གང་ལ་ཡང་ལས་ཀྱི་སྒྲིབ་པ་མི་མངའ་བ་ཡིན་པར་རིག་པར་བྱ་སྟེ། སེམས་ཅན་གང་དག་དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་པ་དག་མགྲོན་དུ་གཉེར་ལ་ཟས་འབུལ་བར་མི་བྱེད་པ་དེ་དག་གིས་ཇི་སྐད་སྨྲས་པ་དེ་བཞིན་བྱེད་པ་ཉིད་ཀུན་དུ་བསྟན་པར་བྱ་བའི་ཕྱིར་
ལས་ཀྱི་རྒྱུད་དེ་ལྟ་བུ་དག་ཉེ་བར་སྟོན་པར་མཛད་དོ། །རིགས་ཀྱི་བུ་གང་གིས་དེ་བཞིན་གཤེགས་པ་སྤྱན་དྲངས་ལ་ཞལ་ཟས་མ་གསོལ་བ་དེ་ཡང་དེ་བཞིན་གཤེགས་པས་ལོག་པར་ལྟུང་བར་མི་འགྱུར་བའི་ཆོས་སུ་ལུང་བསྟན་པའི་དེ་བཞིན་གཤེགས་རྣམས་ཀྱི་དེ་བཞིན་གཤེགས་པའི་ཚ་བའི་བདག་ཉིད་ཀྱི་ཁྱད་པར་ལ་ལྟོས། རིགས་ཀྱི་བུ་གཞན་ཡང་དེ་བཞིན་གཤེགས་པ་དང་ཐབས་གཅིག་ཏུ་དབྱར་ཟླ་བ་གསུམ་གནས་པར་ཁས་བླངས་པའི་དགེ་སློང་ལྔ་བརྒྱ་པོ་གང་དག་ཡིན་པ་དེ་དག་ལས་དགེ་སློང་བཞི་བཅུ་ནི་འདོད་ཆགས་སྤྱོད་པ་དང་། སྡུག་པའི་མཚན་མ་སྤྱོད་པ་ཡིན་པས་གལ་ཏེ་དེའི་ཚེ་ན་དེ་དག་གིས་ཟས་བསོད་པ་དག་ཟོས་པར་གྱུར་ན། འདོད་ཆགས་དང་ལྡན་པའི་རྣམ་པར་རྟོག་པ་ཤིན་དུ་ཤས་ཆེན་པོ་དག་སྐྱེ་བར་འགྱུར་བ་ཞིག་ན་དེ་དག་གིས་ཟས་ངན་པ་ཟོས་པ་དེས་འདོད་ཆགས་དང་ལྡན་པའི་རྣམ་པར་རྟོག་པ་དེ་དག་སྲབ་མོར་གྱུར་ནས་དེ་དག་གིས་ཞག་བདུན་གྱིས་དགྲ་བཅོམ་པ་ཉིད་མངོན་དུ་བྱས་སོ། །རིགས་ཀྱི་བུ་དེ་ལྟ་བས་ན་གང་གིས་དེ་བཞིན་གཤེགས་པ་རྣམས་ཀྱིས་གསུངས་པ་ངེས་པར་རྟོགས་པ་དེས་ནི་ལེགས་པ་ཁོ་ནར་ངེས་པར་རྟོགས་པ་ཡིན་ཏེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔས་དགོངས་ཏེ་གསུངས་པ་རྟོགས་པར་བྱ་བ་ལ་མཁས་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །བྱང་ཆུབ་སེམས་དཔའ་སྙིང་རྗེའི་བདག། །བཀྲི་དོན་གསུངས་པ་གང་ཡིན་དང་། །ངེས་དོན་གསུངས་པ་གང་ཡིན་པ། །ལེགས་པ་ཁོ་ནར་རྟོགས་པར་བྱེད། །བརྟན་པ་དགོངས་ལ་མཁས་གྱུར་པ། །ཉིང་མཚམས་སྦྱོང་བ་སྤངས་པ་རྣམས།། རྫོགས་པའི་སངས་རྒྱས་གྲགས་ལྡན་གྱིས། །གསུངས་པ་ཁོང་དུ་ཆུད་པ་ཡིན། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ཉན་ཐོས་དང་། རང་སངས་རྒྱས་དང་ལྡན་པའི་ཐེག་པས་ཡོངས་སུ་མྱ་ངན་ལས་འདའ་བར་མི་འདོད་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ནི་སེམས་ཅན་དམྱལ་བའི་སྡུག་བསྔལ་དག་གམ། དུད་འགྲོའི་སྡུག་བསྔལ་དག་གམ། ཡི་དགས་ཀྱི་སྡུག་བསྔལ་དག་གིས་ཀུན་དུ་གདུངས་ཤིང་ཚ་བར་གྱུར་ཀྱང་ཉན་ཐོས་དང་། རང་སངས་རྒྱས་དང་ལྡན་པའི་ཐེག་པས་མྱ་ངན་ལས་འདའ་བར་འདོད་པ་མི་སྐྱེད་
ཅིང་ཨེ་མའོ་ཀྱེ་མ་བདག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་གྱུར་ཅིག་ཅེས་དོན་ཉུང་ངུར་མི་བྱེད་བྱ་བ་ཉུང་ངུར་མི་བྱེད་ཅིང་དོན་ཉུང་བ་ཉིད་དང་། བྱ་བ་ཉུང་བ་ཉིད་ལ་བརྩོན་པར་མི་བྱེད་ཀྱི། དེ་ནི་སེམས་ཅན་རྣམས་ཀྱི་དགེ་བའི་ལས་བྱ་བ་དག་ལ་གྲོགས་སུ་འགྱུར་ཞིང་སེམས་ཅན་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག། ཡང་དག་པར་གཟེད་སྟོང། ཡང་དག་པར་རབ་ཏུ་དགའ་བར་བྱེད་དེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཉན་ཐོས་དང་། རང་སངས་རྒྱས་དང་ལྡན་པའི་ཐེག་པས་ཡོངས་སུ་མྱ་ངན་ལས་འདའ་བར་མི་འདོད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །སྙིང་རྗེའི་བདག་ཉིད་ཅན་དང་ནི། རི་འདྲའི་སེམས་ཀྱིས་སྤྱོད་བྱེད་ལ། །སེམས་ཅན་དོན་ལ་མི་སྐྱོ་ཞིང་། །བྱང་ཆུབ་ལས་ནི་ཕྱིར་མི་ལྡོག། །བྱང་ཆུབ་སེམས་དཔའ་སེམས་ཅན་ལ། །ཕན་པར་འདོད་པས་སྐྱོ་མི་བྱེད། སེམས་ཅན་གཞན་ལ་ཕན་པའི་ཕྱིར། །བག་མེད་པ་ཡང་མི་བྱེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཆོས་གང་དག་དང་ལྡན་ན་ཐེག་པ་ཆེན་པོ་ལ་ཡང་དག་པར་ཞུགས་པའི་ཆོས་བཅུ་པོ་དག་ནི་བཅོམ་ལྡན་འདས་ཀྱིས་བཀའ་སྩལ་ལགས་ན། དོན་གང་གིས་ན་ཐེག་པ་ཆེན་པོ་འདི་ལ་ཐེག་པ་ཆེན་པོ་ཞེས་བགྱི་བ་དེ་ནི་བཅོམ་ལྡན་འདས་ཀྱིས་བཀའ་སྩལ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེའི་ཕྱིར་དེ་ཁྱོད་ཉིད་ལ་དྲི་ཡིས་ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་ཐོབ་ཤིག། རིགས་ཀྱི་བུ་འདི་ཇི་སྙམ་དུ་སེམས། འཁོར་ལོས་སྒྱུར་བའི་རྒྱལ་པོ་དཔུང་གི་ཚོགས་ཡན་ལག་བཞི་དང་ལྷན་ཅིག་ཏུ་ལམ་གང་ནས་འགྲོ་བའི་ལམ་དེ་ཇི་སྐད་བརྗོད་པར་བྱ་སྙམ། གསོལ་པ། བཅོམ་ལྡན་འདས་དེ་ནི་རྒྱལ་པོའི་གཤེགས་ཤུལ་ཞེས་བརྗོད་པར་བགྱི་ལགས་སོ། །ཤུལ་པོ་ཆེ་ཞེས་བརྗོད་པར་བགྱི། ཤུལ་བདེ་བ་ཞེས་བརྗོད་པར་བགྱི། ཤུལ་བཟང་པོ་
ཞེས་བརྗོད་པར་བགྱི། ཞེ་འགྲས་པ་མ་མཆིས་པའི་ཤུལ་ཞེས་བརྗོད་པར་བགྱི། འཁྲུགས་ལོང་མ་མཆིས་པའི་ཤུལ་ཞེས་བརྗོད་པར་བགྱི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐེག་པ་གང་གིས་གཤེགས་པའི་ཐེག་པ་དེ་ཡང་ཐེག་པ་ཆེན་པོ་ཞེས་བྱའོ། །ཐེག་པ་མཆོག་ཅེས་བྱ། །ཐེག་པ་རབ་ཅེས་བྱ། ཐེག་པ་རབ་མཆོག་ཅེས་བྱ། ཐེག་པ་ཐུ་བོ་ཞེས་བྱ། ཐེག་པ་གཙོ་བོ་ཞེས་བྱ། ཐེག་པ་བླ་ན་མེད་པ་ཞེས་བྱ། ཐེག་པ་གོང་ན་མེད་པ་ཞེས་བྱ། ཐེག་པ་མཉམ་པ་ཞེས་བྱ། ཐེག་པ་མི་མཉམ་པ་མེད་པ་ཞེས་བྱ། ཐེག་པ་མི་མཉམ་པ་དང་མཉམ་པ་ཞེས་བྱ་སྟེ།། རིགས་ཀྱི་བུ་དེའི་ཕྱིར་ཐེག་པ་ཆེན་པོ་འདི་ལ་ཐེག་པ་ཆེན་པོ་ཞེས་བྱའོ། །གསོལ་པ། བཅོམ་ལྡན་འདས་ཐེག་པ་ཆེན་པོ་ནི་བཟང་བ་ལགས་སོ། །བདེ་བར་གཤེགས་པ་ཐེག་པ་ཆེན་པོ་འདི་ནི་བཟང་བ་ལགས་སོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། དགེ་སྦྱོང་གཽ་ཏམ་ནི་བདག་གི་བདུད་ཀྱི་ཡུལ་ལས་ཡང་དག་པར་འདས་ཤིང་གཞན་དག་ཀྱང་ཡང་དག་པར་འདའ་བར་བྱེད་པ་ཡིན་གྱིས་དཔུང་གི་ཚོགས་ཡན་ལག་གཞི་དང་བཅས་ཏེ། དགེ་སྦྱོང་གཽ་ཏམ་དེ་དང་། ཆོས་ཀྱི་རྣམ་གྲངས་དེ་ལ་མཐོ་བརྩམ་དུ་འགྲོ་བར་བྱའོ་སྙམ་མོ། །དེ་ནས་བདུད་སྡིག་ཅན་དཔུང་གི་ཚོགས་ཡན་ལག་བཞི་དང་བཅས་པ་གོ་གྱོན་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་། བྱ་རྒོད་ཀྱི་ཕུང་པོའི་རི་ག་ལ་བ་དེ་ལོགས་སུ་སོང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་བདུད་སྡིག་ཅན་དཔུང་གི་ཚོགས་ཡན་ལག་བཞི་དང་བཅས་པ་བཅོམ་ལྡན་འདས་ལ་མཐོ་བརྩམ་པ་དང་། ཆོས་ཀྱི་རྣམ་གྲངས་འདི་ནུབ་པར་བྱ་བའི་བསམ་པས་འོང་བར་མཐོང་ངོ། །མཐོང་ནས་ཀྱང་རྫུ་འཕྲུལ་མངོན་པར་འདུ་བྱ་བ་འདི་ལྟ་བུ་མངོན་པར་འདུ་བྱས་ཏེ། ཇི་ལྟ་བུའི་རྫུ་འཕྲུལ་མངོན་པར་འདུ་བྱས་བ་མངོན་པར་དུ་བྱས་པས་བདུད་སྡིག་ཅན་དཔུང་གི་ཚོགས་ཡན་ལགས་བཞི་དང་བཅས་པ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་སོང་ནས་ལམ་པོ་ཆེ་དང་། ལམ་སྲང་གི་བཞི་མོང་དང་། སུམ་མདོ་དག་ཏུ་སྒྲ་སྒྲོགས་པར་བྱེད། དབྱངས་བརྗོད་པར་
བྱེད་ཅིང་འདི་སྐད་ཅེས་རྒྱལ་པོའི་ཁབ་ཀྱི་མི་ཁྱེར་ཅག་ཤེས་པར་གྱིས་ཤིག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ནི་བྱ་རྒོད་ཀྱི་ཕུང་པའི་རི་ལ་འཁོར་བཞི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་དང་། གཞན་མུ་སྟེགས་ཅན་རྣམས་ལ་ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ་ཡོངས་སུ་དག་པ། ཡོངས་སུ་བྱང་བའི་ཆོས་སྟོན་པར་མཛད་རབ་ཏུ་སྟོན་པར་མཛད་ཀྱིས་དེའི་ཕྱིར་ཁྱེར་ཅག་ཀྱང་དམ་པའི་ཆོས་མཉམ་པའི་ཕྱིར་དེ་བཞིན་གཤེགས་པའི་སྤྱན་སྔར་དིང་ཤིག་དང་། དེས་ཁྱེད་ཅག་ལ་ཡུན་རིང་པོའི་དོན་དང་། ཕན་པ་དང་། བདེ་བར་འགྱུར་རོ། ཞེས་ཀྱང་རྗེས་སུ་བསྒྲགས་སོ། །དེ་ནས་རྒྱལ་པོའི་ཁབ་ཀྱི་རྒྱལ་རིགས་དང་། བྲམ་ཟེ་དང་། ཁྱིམ་བདག་དང་། གྲོང་རྡལ་གྱི་མི་དང་། ཡུལ་གྱི་མི་རྣམས་བདུད་སྡིག་ཅན་གྱིས་བསྐུལ་བ་ན་མེ་ཏོག་དང་། བདུག་པ་དང་། སྤོས་པ་དང་། མེ་ཏོག་ཕྲེང་དང་། བྱུག་པ་དང་། ཕྱེ་མ་དང་། མ་བཟའ་དང་། གདུགས་དང། རྒྱལ་མཚན་དང་། བ་དན་དག་ཐོགས་ཏེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ནས་བྱ་རྒོད་ཀྱི་ཕུང་པོའི་རི་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ཕྱག་བྱས། བླ་མར་བྱས། རི་མོར་བྱས། མཆོད་པ་བྱས་ནས་ཕྱོགས་གཅིག་ཏུ་འཁོད་དོ། །བདུད་སྡིག་ཅན་ཡང་དཔུང་གི་ཚོགས་ཡན་ལག་བཞི་དང་བཅས་པར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ནས་བྱ་རྒོད་ཀྱི་ཕུང་པོའི་རི་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། ལྷའི་མེ་ཏོག་མན་དཱ་ར་བ་དག་མངོན་པར་སྤྲུལ་ནས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ནས་དཔུང་གི་ཚོགས་ཡན་ལག་བཞི་དང་ལྷན་ཅིག་ཏུ་ཕྱོགས་གཅིག་ཏུ་འདུག་གོ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་བདུད་སྡིག་ཅན་ཕྱོགས་གཅིག་ཏུ་འདུག་པ་དེ་ལ་འདི་སྐད་ཅེས་སྨྲས་སོ། །སྡིག་ཅན་ཁྱོད་དཔུང་
གི་ཚོགས་ཡན་ལག་བཞི་དང་བཅས་ཏེ་བཅོམ་ལྡན་འདས་ཀྱི་སྤྱན་སྔར་ཅི་ལ་འོངས། བདུད་ཀྱིས་སྨྲས་པ། བཅོམ་ལྡན་འདས་ལ་མཐོ་བ་རྩམ་པ་དང་། ཆོས་ཀྱི་རྣམ་གྲངས་འདི་ལ་བར་ཆད་བྱ་བའི་བསམ་པས་འོངས་སོ། །བྱང་ཆུབ་སེམས་དཔའ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་སྨྲས་པ། སྡིག་ཅན་དེ་བཞིན་གཤེགས་པ་ལ་མཐོ་བ་རྩམ་པ་དང་ཆོས་ཀྱི་རྣམ་གྲངས་འདིའི་བར་ཆད་བྱས་པས་ཁྱོད་ལ་ཅི་བྱ། སྡིག་ཅན་ཁྱོད་ལ་དེས་ཡུན་རིང་པོར་དོན་མེད་པ་དང་། གནོད་པ་དང་། སྡུག་བསྔལ་བར་མི་འགྱུར་པར་ཁྱོད་ཀྱིས། །བཅོམ་ལྡན་འདས་ཀྱི་སྤྱན་སྔར་ཉེས་པ་ལ་ཉེས་པར་ཤོགས་ཤིག །དེ་ནས་བདུད་སྡིག་ཅན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དག་པ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་ལས་རྗེས་སུ་འཐུན་པའི་གདམས་ངག་རྗེས་སུ་བསྟན་པ་དེ་ཐོས་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ཀྱི་ཞབས་ལ་གཏུགས་ནས་བཅོམ་ལྡན་འདས་ཀྱི་སྤྱན་སྔར་བཅོམ་ལྡན་འདས་བྱིས་པ་རྨོངས་པ། མི་གསལ་པ། མི་མཁས་པ། བདག་གི་ཆོད་མ་འཚལ་བ། །བདག་གིས་བཅོམ་ལྡན་འདས་ལ་ཞེ་སྡང་གི་སེམས་བསྐྱེད་པ་དང་། མདོ་སྡེ་འདི་ལྟ་བུ་ལ་བར་ཆད་བགྱི་པར་འཚལ་བ། བཅོམ་ལྡན་འདས་ནོངས་པ་ལ་ནོངས་པར་བཤགས་པར་འཚལ་ལོ། །བདེ་བར་གཤེགས་པ་ནོངས་པ་ལ་ནོངས་པར་བཤགས་པར་འཚལ་ཞིང་སླན་ཆད་ཀྱང་སྡོམ་པར་འཚལ་ལགས་ན། བཅོམ་ལྡན་འདས་ཀྱིས་བདག་གི་ནོངས་པ་ལ་ནོངས་པར་བཤགས་པ་དེ་ལེགས་པར་རྗེས་སུ་གཟུང་བར་གསོལ་ཞེས་ཉེས་པ་ལ་ཉེས་པའི་སྒོ་ནས་བཤགས་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན་འདི་ལྟ་སྟེ། རིགས་ཀྱི་བུ་འམ་རིགས་ཀྱི་བུ་མོ་ཉེས་འབྱུང་ན་རྣམ་པར་ལྟ་བ་དང་། ཉེས་པ་ལ་ཉེས་པར་ལྟ་བ། ན་འཆགས་པར་བྱེད། སྤྱོད་པར་བྱེད་ཅིང་ཕྱེ་ན་ཆང་ཀྱང་སྡོམ་པར་བྱེད་ན་འཕགས་པ་ལེགས་པར་གསུངས་པའི་ཆོས་འདུལ་བ་འདི་འཕེལ་པར་འགྱུར་རོ། །དེ་ནས་བདུད་སྡིག་ཅན་སྟན་ལས་ལངས་ཏེ། བཅོམ་ལྡན་འདས་ཀྱི་སྤྱན་སྔར་འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་
འདས་ཀྱིས་དག་རྩུབ་པོ་ནི་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་མི་དགེ་བའི་ལས་ཀྱི་ལམ་དུ་གདགས་པ་མཛད་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན་དེ་དེ་བཞིན་ནོ། །བདུད་ཀྱིས་གསོལ་པ། བཅོམ་ལྡན་འདས་དེ་ལྟ་ལགས་ན་བཅོམ་ལྡན་འདས་ཆོས་ཀྱི་མངའ་བདག་ཅིའི་སླད་དུ་བདག་ལ་སྡིག་ཅན་ཞེས་བགྱི་བའི་སྒྲས་ཀུན་དུ་རྗོད་པར་མཛད་ལགས། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན་དེའི་ཕྱིར་འདི་ནི་སྐྱེས་བུ་མཁས་པ་ལ་ལ་བཤད་པའི་དོན་དཔེས་ཀུན་ཤེས་པར་འགྱུར་བ་དག་ཡོད་པས་དཔེ་ཉོན་ཅིག །སྡིག་ཅན་འདི་ལྟ་སྟེ། །དཔེར་ན་ཚོང་དཔོན་ནམ། ཁྱིམ་བདག་ཕྱུག་པ་ནོར་མང་བ་ལོངས་སྤྱོད་ཆེ་བ་ཞིག་ལ་བུ་སྡུག་པ། འདོད་པ། དགའ་བ། ཡིད་དུ་འོང་བ། མཐོང་ན་མི་མཐུན་པ་མེད་པ། གཅིག་པུ་ཞིག་བདོག་པར་གྱུར་ཅིང་དེ་ཡང་དེ་དང་འབྲེལ་བའི་འཚོ་བས་འཚོ་བར་འགྱུར་ལ། དེའི་བུ་གཅིག་པ་དེ་ཡང་གདུལ་དཀའ་བ་དང་། བཅོས་དཀའ་བ་དང་། གཡོ་སྒྱུ་ཅན་ཞིག་ཡིན་པར་གྱུར་ནས་ཚོང་དཔོན་ནམ་ཁྱིམ་བདག་དེས་བུ་གཅིག་པ་དེ་འདི་ལྟ་སྟེ། ཉེས་པ་དེ་ལས་བཟློག་པར་བྱ་བའི་ཕྱིར་ལག་པས་ཀྱང་རྡེག་པར་བྱེད། དབྱིག་པ་དང་། ཁུ་ཚུར་དང་། རྡེག་པ་གང་ཡང་རུང་བ་དག་གིས་ཀྱང་རྡེག་པར་བྱེད་ཅིང་ངག་རྩུབ་པོ་དག་གིས་ཀྱང་སྡིགས་པར་བྱེད་ན་སྡིག་ཅན་འདི་ཇི་སྙམ་དུ་སེམས། ཚོང་དཔོན་ནམ། ཁྱིམ་བདག་དེ་བུ་གཅིག་པ་དེ་ལ་ཁྲོ་བ་དང་། འཁྲུག་པ་དང་། སྡང་བ་དང་། རྔམ་པའི་བསམ་པས་རྡེག་པར་བྱེད་པ་ཡིན་སྙམ་འམ། །བདུད་ཀྱིས་གསོལ་པ། བཅོམ་ལྡན་འདས་དེ་ལྟ་མ་ལགས་སོ། བདེ་བར་གཤེགས་པ་དེ་ལྟ་མ་ལགས་ཏེ། བཅོམ་ལྡན་འདས་དེ་ནི་དེ་ལ་སྨན་པར་བགྱི་བའི་སླད་དུ་རྡེག་ལགས་སོ། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན་དེ་བཞིན་དུ་དེ་བཞིན་གཤེགས་པ་སེམས་ཅན་ཐམས་ཅད་ཀྱི་བསམ་པ་དང་བག་ལ་ཉལ་མཁྱེན་པ་ཡང་སེམས་ཅན་ངག་རྩུབ་པོས་གདུལ་བ་རྣམས་ནི་ངག་རྩུབ་པོས་འདུལ་བར་མཛད་དོ། སེམས་ཅད་སྨ་དབབ་པས་འདུལ་བ་རྣམས་ནི་སྨ་དབབ་པས་འདུལ་བར་མཛད་དོ། སེམས་ཅན་བསྡུ་བས་འདུལ་བ་རྣམས་ནི་བསྡུ་བས་འདུལ་
བར་མཛད་དོ། སེམས་ཅན་གཟུགས་ཀྱིས་འདུལ་བ་རྣམས་ནི་གཟུགས་ཀྱིས་འདུལ་བར་མཛད་དོ། སེམས་ཅན་སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱིས་འདུལ་པ་རྣམས་ནི་སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱིས་འདུལ་བར་མཛད་དོ། དེ་ནས་བདུད་སྡིག་ཅན་དགའ་བ་དང་། མགུ་པ་དང་། ཡི་རངས་པ་དང་། མཆོག་ཏུ་ཡི་རངས་པ་དང་། རབ་ཏུ་དགའ་བ་དང་། དགའ་བ་དང་། ཡིད་བདེ་བ་སྐྱེས་ནས་ཡང་བཅོམ་ལྡན་འདས་ཀྱི་ཞབས་ལ་མགོ་བོས་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། ལྗོངས་ཀྱི་ཕྱོགས་གང་ཡང་རུང་བ་ན་ཆོས་ཀྱི་རྣམ་གྲངས་འདི་ཀློག་གམ། འཆད་པ་དེར་བདག་ཀྱང་ཆོས་མཉམ་པ་དང་། ཆོས་ཀྱི་རྣམ་གྲངས་འདི་བསྲུང་ཞིང་བསྐྱབ་པ་དང་། སྦ་བ་དང་། ཆོས་སྨྲ་བ་དེ་ལ་ཡང་སྨན་གདགས་པའི་སླད་དུ་མཆི་བར་བགྱི་ལགས་སོ། དེ་ལ་སྔ་ལྟས་ནི་འདི་དག་ལགས་པར་རིག་པར་བགྱི་སྟེ། དེའི་འཁོར་ཞི་བ་དང་། གཉིད་དང་རྨུགས་པ་དང་བྲལ་བ་དང་། དེ་ལ་ཆོས་ཉན་པ་རྒྱ་ཆེན་པོ་དག་འབྱུང་བར་འགྱུར་བ་དང་། འཛིན་པ་དང་། འཆང་བ་དང་། ཀློག་པ་དང་། འཆང་པ་དག་གིས་དེའི་ལུས་དུབ་པར་མི་འགྱུར་བ་དང་། སེམས་ཀྱང་དུབ་པར་མི་འགྱུར་བ་དང་། ཇི་ལྟ་ཇི་ལྟར་ཆོས་ཀྱི་རྣམ་གྲངས་འདི་ཀློག་པ་དང་། སྟོན་པ་དང་། གཞན་དག་ལ་རྒྱ་ཆེར་ཡང་དག་པར་རབ་ཏུ་སྟོན་པར་བགྱིད་པ་དེ་ལྟ་དེ་ལྟར་དེའི་སེམས་དགའ་བ་དང་། མཆོག་ཏུ་དགའ་བ་དང་། གཟེད་མཐོ་བ་ཉིད་དུ་ཡང་འགྱུར་ལགས་སོ། དེ་ནས་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་གང་དག་འཁོར་དེར་འདུས་པར་གྱུར་པ་དེ་དག་གིས་བདུད་ཀྱིས་བཤད་པ་འདི་ཐོས་ནས་དེ་བཞིན་གཤེགས་པ་ལ་དང་བ་དང་། དགའ་བ་དང་། མཆོག་ཏུ་དགའ་བ་ཐོབ་པར་གྱུར་ཏོ། དེ་ནས་བཅོམ་ལྡན་འདས་ལ་ཚེ་དང་ལྡན་བ་ཀུན་དགའ་བོས་འདི་སྐད་ཅེས་གསོལ་ཏོ། བཅོམ་ལྡན་འདས་རྒྱུ་གང་དང་། རྐྱེན་གང་གིས་ཆོས་ཀྱི་རྣམ་གྲངས་འདི་བཤད་པ་ལ་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་འདི་དག་གིས་དགའ་བ་དང་། མཆོག་ཏུ་དགའ་བ་ཐོབ་པར་གྱུར་ལགས། བཅོམ་
ལྡན་འདས་ཀྱིས་བཀའ་སྩལ་པ། ཀུན་དགའ་བོ་སྔོན་བྱུང་བ་འདས་པའི་དུས་ན་རྒྱལ་པོའི་ཁབ་འདི་ཉིད་དང་བྱ་རྒོད་ཀྱི་ཕུང་པོའི་རི་འདི་ཉིད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རབ་ཀྱི་རྩལ་གྱིས་རྣམ་པར་གནོན་པ་ཞེས་བྱ་བ་ཞིག་བྱུང་བས་ཆོས་ཀྱི་རྣམ་གྲངས་འདི་ཉིད་བཤད་དོ། དེས་ཆོས་ཀྱི་རྣམ་གྲངས་འདི་བཤད་པ་ན་ཡང་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་མཐོ་བརྩམ་པའི་བསམ་པ་ཅན་དག་ལྷགས་ཏེ། ལྷགས་པ་དེ་དག་གིས་ཀྱི་རྣམས་གྲངས་འདི་ཐོས་ནས་ལེགས་སོ་ལེགས་པར་གསུངས་སོ་ཞེས་བྱ་བའི་ཚིག་ནི་བརྗོད་ཀྱི། དེ་བཞིན་གཤེགས་པ་དེ་ལ་སེམས་དང་བ་དང་། དགའ་བ་དང་། མཆོག་ཏུ་དགའ་བ་ནི་མ་ཐོབ་བོ། །དེ་དག་རྒྱུ་དེ་དང་རྐྱེན་དེས་བསྐལ་པ་དྲུག་བཅུ་རྩ་བརྒྱད་ཀྱི་རབ་དུ་ལྷ་དང་། མི་རྣམས་སུ་སྐྱེས་པ་མ་གཏོགས་པར་ནམ་ཡང་སེམས་ཅན་དམྱལ་བ་རྣམས་དང་། དུད་འགྲོ་རྣམས་དང་། ཡི་དགས་རྣམས་སུ་མ་སྐྱེས་སོ། །དེ་དག་དེ་བཞིན་གཤེགས་པ་ལ་སེམས་དང་བ་དང་། དགའ་བ་དང་། མཆོག་ཏུ་དགའ་བ་མ་ཐོབ་པས་ནི་ཚེ་རབས་གཞན་དེ་དང་། དེ་དག་ཏུ་དགེ་བའི་བཤེས་གཉེན་དང་བྲལ་བར་གྱུར་ཏོ། །ཀུན་དགའ་པོ་དེའི་ཚེ་དེའི་དུས་ན་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུར་པ་དེ་དག་གཞན་དག་ཅིག་ཡིན་སྙམ་དུ་ཁྱོད་ནེམ་ནུར་དང་། ཡིད་གཉིས་དང་། ཐེ་ཚོམ་ཟ་བར་གྱུར་ན་ཀུན་དགའ་བོ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ་འདི་དག་ཉིད་དེའི་ཚེ་དེའི་དུས་ན་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་དེ་དག་ཏུ་གྱུར་པའི་ཕྱིར་རོ། །ཀུན་དགའ་པོ་འདི་དག་ནི་དེ་བཞིན་གཤེགས་པ་ལ་སེམས་དང་བ་སྐྱེས་ཤིང་དགའ་བ་ཡང་སྐྱེས། མཆོག་ཏུ་དགའ་བ་ཡང་སྐྱེས་པས་དེ་བཞིན་གཤེགས་པས་འདི་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་ཡང་མཛད་དོ། །དེ་ནས་གཞན་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་དེ་དག་ལ་ལུང་བསྟན་པའི་མདོ་ལ་སྐྱེས་པའི་དང་བ་དང། དགའ་བ་དང་། མཆོག་ཏུ་དགའ་བ་དེ་ཉིད་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཆོས་ཀྱི་རྣམ་གྲངས་འདི་བཤད་པ་ན་སྲོག་ཆགས་ཁྲི་ཉིས་སྟོང་ཆོས་རྣམས་ལ་
ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །སྔོན་སེམས་མ་བསྐྱེད་པའི་སྲོག་ཆགས་ཉི་ཁྲི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ །རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་སྟོན་པར་བགྱི་པ་དེ་བསོད་ནམས་ཇི་ཙམ་ཞིག་སྐྱེད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་སེམས་ཅན་གྱི་ཁམས་མ་ལུས་པ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་པ་དེ་བས་ནི་རིགས་ཀྱི་བུ་མོ་གཞན་གང་ཞིག་གིས་ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། གཞན་དག་ལ་རྒྱ་ཆེར་ཡང་དག་པར་སྟོན་པར་བྱེད་པ་དེ་བསོད་ནམས་ཆེས་གྲངས་མེད་པ་དང་ཆེས་མང་དུ་སྐྱེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ཆོས་ཀྱི་རྣམ་གྲངས་འདི་ནི་ཐམས་ཅད་མཁྱེན་པའི་ཡེ་ཤེས་འདྲེན་པར་བྱེད་པ་ཡིན་པའི་ཕྱིར་རོ། །ཀུན་དགའ་བོས་གསོལ་པ། བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་གང་ཞིག་ཆོས་ཀྱི་རྣམས་གྲངས་འདི་དང་། ཆོས་སྨྲ་བ་དེ་ལ་སྡང་བའི་སེམས་སྐྱེད་པར་བགྱིད་ན། བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་དེས་བསོད་ནམས་ལགས་པ་ཇི་ཙམ་ཞིག་སྐྱེད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་སེམས་ཅན་ཐམས་ཅད་ཀྱི་མིག་ཕྱུང་བར་གྱུར་པ་དེ་བས་ནི་རིགས་ཀྱི་བུ་འམ། རིགས་ཀྱི་བུ་མོ་གང་གིས་ཆོས་ཀྱི་རྣམ་གྲངས་འདི་དང་། ཆོས་སྨྲ་བ་དེ་ལ་སྡང་པའི་སེམས་སྐྱེད་པར་བྱེད་པ་དེ་བསོད་ནམས་མ་ཡིན་པ་ཆེས་གྲངས་མེད་པ་དང་། ཆེས་མང་དུ་སྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ཆོས་ཀྱི་རྣམ་གྲངས་འདི་ནི་སེམས་ཅན་ཐམས་ཅད་ཀྱི་སྣང་བར་གྱུར་པ་ཡིན་པའི་ཕྱིར་རོ། །ཀུན་དགའ་བོས་གསོལ་པ།
བཅོམ་ལྡན་འདས་ཆོས་ཀྱི་རྣམ་གྲངས་འདི་ནི་མ་དད་པ་རྣམས་ཀྱི་མདུན་དུ་བརྗོད་པར་མི་བགྱི་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སེམས་ཅན་ཐམས་ཅད་ཀྱིས་ཆོས་ཀྱིས་ཕོངས་པར་འགྱུར་པའི་སུག་ལས་བགྱིས་ནས་ལུས་ཞིག་སྟེ། གུམ་པའི་འོག་ཏུ་སེམས་ཅན་དམྱལ་བ་རྣམས་སུ་སྐྱེ་བར་མི་འགྱུར་བར་རྗེས་སུ་བསྲུང་བར་བགྱི་འཚལ་བའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ནི་དེ་དག་གི་མདུན་དུ་བརྗོད་པར་བྱ་བ་ཁོ་ན་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ནི་སྐྱེས་བུ་དམ་པ་མ་ཡིན་པ་དེ་དག་གི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུར་འགྱུར་བ་ཡིན་པའི་ཕྱིར་རོ། །ཀུན་དགའ་བོས་གསོལ་པ། །བཅོམ་ལྡན་འདས་ཆོས་ཀྱི་རྣམ་གྲངས་འདི་འི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་འོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་ཆོས་བཅུ་པ་ཞེས་བྱ་བར་ཟུང་ཤིག །བྱང་ཆུབ་སེམས་དཔའི་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོས་ཞུས་པ་ཞེས་བྱ་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མེད་རྣམ་དག་རིན་ཆེན་ཟླ་འོད་རྒྱལ་པོ་དང་། དགེ་སློང་དེ་དག་དང་། བྱང་ཆུབ་སེམས་དཔའ་དེ་དག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། ཆོས་བཅུ་པའི་ལེའུ་སྟེ་དགུ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་སུ་རེ་ན་དྲ་བོ་དྷི་དང་ཞུས་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།