འཕགས་པ་བྱང་ཆུབ་སེམས་དཔའི་སྡེ་སྣོད་ཅེས་བྱ་བ་ཐེག་པ་ཆེན་པོའི་མདོ་ལས། དང་པོ། ཁྱིམ་བདག་གི་ལེའུ།
འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཅུ་གཉིས་པ་སྟེ། །བྱང་ཆུབ་སེམས་དཔའི་སྡེ་སྣོད་བསྟན་པ། བམ་པོ་དང་པོ། །རྒྱ་གར་སྐད་དུ། །ཨ་རྻ་བོ་དྷི་ས་ཏྭ་པི་ཊ་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བྱང་ཆུབ་སེམས་དཔའི་སྡེ་སྣོད་ཅེས་བྱ་བ་ཐེག་པ་ཆེན་པོའི་མདོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། །བཅོམ་ལྡན་འདས་མཉན་ཡོད་ན་དབྱར་གནས་སུ་གནས་ནས་ཟླ་བ་གསུམ་འདས་ཏེ་དགག་དབྱེ་མཛད་ནས། །ཆོས་གོས་མཛད་དེ། ཆོས་གོས་ཟིན་ནས་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་ལྗོངས་རྒྱུ་ཞིང་གཤེགས་ཏེ། །བཅོམ་ལྡན་འདས་ལ་དགེ་སློང་དང་། །དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། རྒྱལ་པོ་དང་། །བློན་པོ་དང་། ་མུ་སྟེགས་ཅན་སྣ་ཚོགས་དང་། དགེ་སྦྱོང་དང་། བྲམ་ཟེ་དང་། ཁྱིམ་བདག་རྣམས་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་ཀྱིས་བླ་མར་བྱས། བཀུར་སྟིར་བྱས། །རི་མོར་བྱས། མཆོད་པར་བས་སོ། །བཅོམ་ལྡན་འདས་ཀྱིས་ཆོས་གོས་དང་། ཞལ་ཟས་དང་། མལ་སྟན་དང་། ན་བའི་གསོས་སྨན་དང་། ཡོ་བྱད་བཟང་པོ་མང་པོ་ཡང་བརྙེས་སོ། །འདི་ལྟར་བཅོམ་ལྡན་འདས་དེ་ནི་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་པ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡིན་ཏེ། དེས་ལྷར་བཅས་པ་དང་། བདུད་དུ་བཅས་པ་དང་། ཚངས་པར་བཅས་པ་དང་། དགེ་སྦྱོང་དང་། བྲམ་ཟེར་བཅས་པའི་སྐྱེ་དགུའི་འཇིག་རྟེན་འདི་དང་། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་རྣམས་ཟིལ་གྱིས་མནན་ཏེ། རང་གི་མངོན་པར་ཤེས་པས་མངོན་དུ་བྱས་ནས་བསྒྲུབས་ཏེ་བཞུགས་ཤིང་དེ་ཆོས་སྟོན་པ་
ནི་ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། །ཡོངས་སུ་དག་པ། ཡོངས་སུ་བྱང་པ་རབ་ཏུ་སྟོན་ཏོ་ཞེས་བཅོམ་ལྡན་འདས་ཀྱི་དགེ་བར་གྲགས་པའི་སྒྲ་ཚིགས་སུ་བཅད་པ་རྒྱ་ཆེན་པོ་ཡང་མངོན་པར་བྱུང་ངོ། །དེ་ནས་བཅོམ་ལྡན་འདས་ཡུལ་མ་ག་དྷཱའི་ལྗོངས་རྒྱུ་ཞིང་མཐར་ཀྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་གང་ན་ཡོད་པ་དེར་གཤེགས་ཏེ་བྱོན་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་བྱ་རྒོད་ཕུང་པོའི་རི་ལ་བཞུགས་སོ། །དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་ཁྱིམ་བདག་ཚོང་དཔོན་བཟང་སྐྱོང་ཞེས་བྱ་བ། སྔོན་དགེ་བའི་རྩ་བ་བསྐྱེད་པ། སྔོན་གྱི་སངས་རྒྱས་ལ་བྱ་བ་བྱས་པ། ཕྱུག་ཅིང་ནོར་མང་བ། ལོངས་སྤྱོད་ཆེ་བ། བདག་དབང་པ་མང་བ། ནོར་དང་། ཡོ་བྱད་མང་བ། གསེར་དངུལ་མང་བ། ནོར་དང་འབྲུས་ཡོངས་སུ་གང་བའི་མཛོད་དང་། བདེ་བ་མང་བ། ནོར་བུ་དང་། མུ་ཏིག་དང་། བཻ་དཱུ་རྻ་དང། དུང་དང་། མན་ཤེལ་དང་། བྱི་རུ་མང་བ། གླང་པོ་ཆེ་དང་། རྟ་དང་། བ་ལང་དང་། ལུག་མང་བ། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་མང་པ་ཞིག་གནས་ཏེ། དགེ་སྦྱོང་གཽ་ཏ་མ་ཤཱཀྱའི་རིགས་ལས་མངོན་པར་བྱུང་ནས། །དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་ཏེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པར་བྱོན་ནས་དེ་རྒྱལ་པའི་ཁབ་ཀྱི་གྲོང་ཁྱེར་ཆེན་པོ་ན་བྱ་རྒོད་ཕུང་པོའི་རི་ལ་བཞུགས་ཏེ། འདི་ལྟར་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བ་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡིན་ཏེ། དེ་ཆོས་སྟོན་པ་ནི་ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིགས་འབྲུ་བཟང་པོ། མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་པ་རབ་ཏུ་
སྟོན་ཏོ་ཞེས་དགེ་སྦྱོང་གཽ་ཏ་མ་དེའི་དགེ་པར་གྲགས་པའི་སྒྲ་ཚིགས་སུ་བཅད་པ་རྒྱ་ཆེན་པོ་དེ་ལྟ་བུ་ཡང་མངོན་པར་བྱུང་པ་ཁྱིམ་བདག་བཟང་སྐྱོང་གིས་ཐོས་ནས་དེ་འདི་སྙམ་དུ་སེམས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལྟ་བུ་དག་མཐོང་ན་ལེགས་པར་འགྱུར་གྱིས་བདག་དགེ་སྦྱོང་གཽ་ཏ་མ་དེ་བལྟ་བའི་ཕྱིར་འགྲོའོ་སྙམ་མོ། །དེ་ནས་ཁྱིམ་བདག་ཚོང་དཔོན་བཟང་སྐྱོང་ཁྱིམ་བདག་ལྔ་བརྒྱ་ཙམ་དང་ལྷན་ཅིག་ཏུ་བཅོམ་ལྡན་འདས་ལ་བལྟ་པའི་ཕྱིར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ངོ། །བཅོམ་ལྡན་འདས་ཀྱང་སྔ་དྲོའི་དུས་ཀྱི་ཚེ། ཤ་མ་ཐབས་མན་པས། ཆོས་གོས་དང་། ལྷུང་བཟེད་བསྣམས་ནས་དགེ་སློང་གི་དགེ་འདུན་གྱིས་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ། སྤྱོད་ལམ་མཛེས་པ་དང་། མངོན་དུ་གཤེགས་པ་དང་། ཕྱིར་ལྡོག་པ་མཛེས་པ་དང་། གཟིགས་པས་རྣམ་པར་གཟིགས་པ་མཛེས་པ་དང་། སྙད་པ་དང་། བསྐུམ་པ་མཛེས་པ་དང་། ཆོས་གོས་སྣམ་སྦྱར་དང་། ན་བཟའ་དང་། ལྷུང་བཟེད་བསྣམས་པ་མཛེས་པ་དང་། ཀུན་ནས་མཛེས་པ་བསོད་སྙོམས་ཀྱི་ཕྱིར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་སོ་ཁྱིམ་བདག་ཚོང་དཔོན་བཟང་སྐྱོང་དང་། ཁྱིམ་བདག་ལྔ་བརྒྱ་ཙམ་པོ་དེ་དག་གིས་བཅོམ་ལྡན་འདས་མཛེས་ཤིང་དགའ་བར་འགྱུར་བ། དབང་པོ་ཞི་བ། ཡིད་ཞི་བ། དུལ་བ་དང། ཞི་གནས་དམ་བརྙེས་པ། གླང་པོ་ལྟར་དབང་པོ་ཐུལ་བ། མཚོ་ལྟར་དང་ཞིང་གསལ་པ། རྙོག་པ་མེད་པ། ལྷ་དུ་མས་མཆོད་པ། གནོད་སྤྱིན་དུ་མས་མཆོད་པ། མི་དུ་མས་མཆོད་པ། གསེར་གྱི་ཁ་དོག་གི་སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་པ། དཔེ་བྱད་བཟང་པོ་བརྒྱད་བཅུས་བརྒྱན་བ། མེ་ཏོག་གི་ཆར་རབ་ཏུ་འབེབས་ཤིང། མེ་ཏོག་གི་ཆུ་བོ་ཆེན་པོ་རབ་ཏུ་འབེབས་བཞིན་དུ་རིན་པོ་ཆེ་སྣ་བདུན་གྱི་པད་མ་འདབ་མ་བྱེ་བ་བརྒྱ་ཕྲག་སྟོང་ཡོད་པ་ལ་ཞབས་འདོར་ཞིང་གཤེགས་པ་རྒྱང་རིང་པོ་ནས་མཐོང་སྟེ། སྤྱོད་ལམ་བརྒྱ་སྟོང་མང་པོས་གཤེགས་པ་རྒྱང་རིང་པོ་ནས་མཐོང་ནས་བཅོམ་ལྡན་འདས་ལ་སེམས་དད་པར་གྱུར་ཏོ། །དེ་དག་སེམས་དད་པར་གྱུར་ནས། བཅོམ་ལྡན་འདས་ག་ལ་དེར་
དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་ཁྱིམ་བདག་བཟང་སྐྱོང་དང། ཁྱིམ་བདག་ལྔ་བརྒྱ་ཙམ་པོ་དེ་དག་གིས་འདི་སྐད་ཅེས་གསོལ་ཏོ། བཅོམ་ལྡན་འདས་གཽ་ཏ་མ་དཔལ་གྱིས་འཁོར་འདི་ཟིལ་གྱིས་གནོན་བར་མཛད་དོ། །བཅོམ་ལྡན་འདས་གཽ་ཏ་མ་གཟི་བརྗིད་ཀྱིས་འཁོར་འདི་ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་འོད་ཀྱིས་འཁོར་འདི་ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་གཟུགས་ཀྱིས་འཁོར་འདི་ཟིལ་གྱིས་མནོན་པར་མཛད་དོ། ། བཅོམ་ལྡན་འདས་གཽ་ཏ་མ་ནི་སྐུའི་ཁ་དོག་གསེར་ལྟ་བུའོ། །བཅོམ་ལྡན་འདས་གཽ་ཏ་མ་ནི་སྐུ་ལུས་ཅན་བདེ་བ་མྱོང་བར་མཛད་པའོ། བཅོམ་ལྡན་འདས་གཽ་ཏ་མ་ནི་དངོས་པོ་ཐམས་ཅད་ཀྱིས་མི་མཉམ་པ་དང་མཉམ་པའོ། །བཅོམ་ལྡན་འདས་གཽ་ཏ་མ་ནི་འཇིག་རྟེན་ཐམས་ཅད་ཀྱིས་ངོ་མཚར་རྨད་ཏུ་བྱུང་བའི་ཆོས་དང་ལྡན་པ་ལགས་ན། བཅོམ་ལྡན་འདས་གཽ་ཏ་མ་བདག་འདི་སྙམ་དུ་སེམས་ཏེ། བཅོམ་ལྡན་འདས་གཽ་ཏ་མ་ཅི་ཞིག་གཟིགས་ན་ཁབ་ནས་ཁབ་མ་མཆིས་པར་རབ་ཏུ་བྱུང་སྙམ་སེམས་སོ། །དེ་ནས་བཅོམ་ལྡན་འདས་ལ་ཁྱིམ་བདག་ཚོང་དཔོན་བཟང་སྐྱོང་གིས་ཚིགས་སུ་བཅད་པ་དག་གིས་མངོན་པར་བསྟོད་དོ། །རྒྱལ་པོའི་དཔལ་དང་གྲགས་དང་གཟུགས་དག་ནི། །སྔོན་ཆད་བདག་གིས་ཇི་སྐད་ཐོས་པ་བས། །དེ་བས་ལྷག་པར་གསེར་གྱི་གཟུགས་བཞིན་དུ། །མཛེས་དང་ལྡན་པར་ལྷམ་མེད་རབ་ཏུ་གདའ། །གཟུགས་ནི་ཤིན་དུ་མཛེས་ཤིང་བལྟ་ན་སྡུག། །སྐུ་ཡི་ཁ་དོག་གསེར་གྱི་མདོག་འདྲ་བས། །སྐར་མང་དག་གི་དབུས་ན་ཟླ་བ་ལྟར། །དགེ་སློང་མང་པོ་འདི་བུས་ན་མཛེས་པར་མཛད། །མི་མཆོག་གི་ནི་སྤྱི་བོ་བལྟར་མི་གདའ། །རི་རབ་བཞིན་དུ་མངོན་པར་འཕགས་པར་གདའ། །གཙུག་གི་སྤྱི་བོ་ལྷ་ཡི་གདུགས་བཞིན་དུ། །ཀུན་ནས་བྱིན་གྱིས་གཞོལ་བར་གྱུར་པ་ལགས། །དབུ་ཡི་སྐྲ་ནི་འཇམ་ཞིང་རབ་མཉེན་ལ། །ཨན་ད་རྙིལ་དང་སྟང་ཟིལ་ཁ་དོག་འདྲ། །གཡས་སུ་འཁྱིལ་ལ་ཤིན་དུ་འཇམ་པ་སྟེ། །རྨ་བྱའི་མགྲིན་པ་ཇི་བཞིན་ཉིད་ཏུ་
གདའ། །སྨྲ་བ་མཆོག་གི་དཔྲལ་བ་ཤིན་དུ་མཉམ། །ཁྱོད་ཀྱི་སྨིན་ཚུགས་འཇའ་ཁུགས་ལྟ་བུ་སྟེ། །འོད་གསལ་བ་ནི་སྐར་མའི་རྒྱལ་པོ་ལྟར། །རྡུལ་བྲལ་སྨན་མཚམས་སྤུ་ནི་ཤིན་དུ་མཛེས། །སྤྱན་བཟང་ཁྱོད་ཀྱི་སྤྱན་ནི་དགར་འགྱུར་བ། །འགྲོ་བ་རྣམས་ལ་མཛེས་ཤིག་མཐོང་ན་དགའ། །བདག་ནི་ལྟ་བས་ངོམས་པར་མི་འགྱུར་ཏེ། །མགོ་བོ་རྣམ་དག་སྤྱན་ལ་བདག་ཕྱག་འཚལ། །སྐྱེས་བུ་དམ་པའི་ཤངས་ནི་བྱིན་གྱིས་མཉམ། །ཇི་ལྟར་གསེར་གྱི་རི་ལྟར་རབ་ཏུ་གདའ། །ཁྱོད་ཀྱི་སྒྲོས་ནི་བིམ་པ་བྱི་རུ་བཞིན། །དག་ཅིང་རྣམ་དག་ནོར་བུ་རིན་ཆེན་འདྲ། །དུལ་ལ་དགྱེས་པའི་ཚེམས་ནི་མཛེས་པ་སྟེ། །སྣང་བར་བྱེད་པ་རབ་ཏུ་དཀར་བའི་ཚེམས། །པད་མའི་རྩ་བ་བ་ཞོ་ཆུ་སྐྱར་འདྲ། །སྲ་ཞིང་དམ་ལ་ཐགས་བཟངས་ཤིན་དུ་དག། །ཚེམས་དང་ཚེམས་ཀྱི་བར་ནི་ཤིན་དུ་འབྱོར། །རྒྱལ་བའི་མཚེ་བ་མཛེས་ཤིང་རྡུལ་མི་མངའ། །ངང་པའི་ཁྱུ་ན་ངང་པའི་རྒྱལ་པོ་ནི། །རྣམ་དག་དཀར་ཞིང་རབ་ཏུ་དཀར་བ་བཞིན། །བདེ་བར་གཤེགས་པའི་ལྗགས་ཀྱིས་ཞལ་ཁེབས་ཏེ། །སྲབ་ལ་དམར་པོ་རྣམ་དག་ཟངས་ཀྱི་མདོག། ཉི་མ་འཆར་ཚེ་ནོར་བུ་དག་མདོག་བཞིན། །སྲབ་ལ་རིང་ཞིང་སྐྱོན་མེད་ཤིན་དུ་ཡངས། །གཽ་ཏ་མའི་སྙན་ནི་རབ་ཏུ་ལེགས། །སེང་གེའི་འགྲམ་པ་སེང་གེའི་འཇིགས་མེད་བཞིན། །ཚངས་བཅས་འཇིག་རྟེན་ལྷ་དང་མི་ལ་ཡང། །བདག་གིས་གང་ཡང་མ་ཐོས་མ་མཐོང་ངོ། །བདེ་གཤེགས་མཐུ་ཡིས་མགུར་ན་མཐོང་བ་ནི། །མགུར་གྱི་མིང་པ་གཙང་ལ་འོད་གསལ་ཏེ། །དྲང་པོ་དབུས་སུ་འགྲོ་བ་ཡོན་པོ་བསལ། །རོ་ཡི་རོ་མཆོག་མི་དང་ལྷ་ཡི་ལྷ། །དཔུང་མགོ་རབ་ཏུ་ཟླུམ་ཞིང་ཐལ་གོང་རྒྱས། །བདུན་པོ་མཐོ་བ་འཇིག་རྟེན་ཀུན་དུ་གྲགས། །མགོན་པོ་མི་དབང་སྙིང་པོ་དཔལ་གྱིས་ཀྱང། །རི་ཡི་རྩེ་ལ་ཉི་མ་འཆར་བ་བཞིན། །མཐོ་པ་གཉིས་ནི་ཞབས་ཀྱི་མཐིལ་ནས་སྐྱེས། །ཕྱགས་ལས་གཉིས་སྐྱེས་ཐལ་གོང་གཉིས་སྐྱེས་ཏེ། །མཐོ་བ་གཅིག་ནི་ལྟག་པ་ཉིང་ན་གཅིག། །དགེ་ཞིང་དག་སྟེ་འོད་གསལ་རབ་ཏུ་རྒྱས། །བཅོམ་ལྡན་གཽ་ཏ་མ་ཡི་ཕྱག་རིང་བ། །ཇི་ལྟར་གླང་པོ་རྒྱལ་པོའི་སྣ་བཞིན་ཏེ། །ཕྱག་གཉིས་པོ་ནི་འདུད་པ་མ་བགྱིས་པར། །པུས་
མོ་གཉིས་སུ་ཕྱག་གིས་རབ་ཏུ་རེག། །སྐུ་ཡི་རོ་སྟོད་སེང་གེ་བཞིན་དུ་འཕགས། །སྐུ་ནི་སྲེད་མེད་བུ་ལྟར་རབ་ཏུ་བརྟན། །ནྱ་གྲོ་དྷ་བཞིན་ཆུ་ཤེ་དགས་པའི་སྐུ། །བཟོད་པའི་སྟོབས་དང་ལྡན་པ་སྟོབས་པོ་ཚེ། །སྐུ་ཡི་སྤུ་རྣམས་གཡས་འཁྱིལ་གྱེན་དུ་ཕྱོགས། །རེ་རེར་སྐྱེས་ཤིང་ཤིན་དུ་འཇམ་པ་སྟེ། །ཇི་ལྟར་པད་མ་ཆུ་དང་འདམ་མི་གོས། །དེ་བཞིན་རྡུལ་དང་དུ་བས་མི་གོས་སོ། །རྟ་མཆོག་དུལ་བ་ཡི་ནི་ཇི་ལྟ་བར། །འདོམས་ཀྱི་སྦ་བ་སྦུབས་སུ་ནུབ་ཅེས་གདའ། །བརླ་ནི་རབ་ཟླུམ་སྨྱིག་མའི་སྙིང་པོ་བཞིན། །ཁྱོད་ཀྱི་རྗེ་དར་བྱིན་གྱིས་རིམ་བཞིན་མཆིས། །ཞབས་གོང་དུད་ལྟར་མཐོ་ཞིང་རྟིང་པ་ཆེ། །ཁྱོད་ཀྱི་ཕྱག་དང་ཞབས་ནི་དྲ་བས་འབྲེལ། །སོར་མོ་རིང་ཞིང་སོར་མོ་ཉི་ཤུ་མཉམ། །སེན་པོ་ཟགས་འདྲ་སོར་སེན་མེ་ཏོག་ཅན། །ཁྱོད་ཀྱི་ཞབས་མཐིལ་འཁོར་ལོ་རབ་ཀྱི་མཚན། །རྩིབ་མ་སྟོད་ལྡན་རབ་ཏུ་འོད་གསལ་བ། །ལོང་བུས་ལོང་བུ་འཐབ་པར་མི་འགྱུར་ཞིང། །གོམ་པས་གོམ་པ་ས་ལ་ཡོད་མི་འདོར། །ས་ལ་ཀུན་དུ་སོར་བཞིས་མི་རེག་པར། །འཇིག་རྟེན་རྣམས་ཀྱི་གཙོ་བོ་རབ་གཤེགས་ཏེ། །ཁྱོད་ནི་གང་དུ་གོམ་པ་བོར་བ་ཡང། །རིན་ཆེན་པད་མ་སྐྱེས་པ་ངོ་མཚར་ཏོ། །རྒོད་པར་མ་གྱུར་དལ་ཞིང་བརྟན་བར་གཤེགས། །སྟག་དང་ལྷ་དབང་འགྲོས་ཀྱིས་གཞན་གནོན་ཅིང། །བག་ཆ་མེད་པར་སྟབས་ནི་བསྒྱིང་ཏེ་གཤེགས། །དཔའ་བོ་ཁྱོད་ཀྱི་འགྲོས་འདྲ་སུ་ལའང་མེད། །མི་མ་ལགས་པ་རྣམས་ཀྱིས་བར་སྣང་ལ། །ལྷ་ཡི་མེ་ཏོག་ཆར་ནི་རབ་འབེབས་ཤིང། །གླུ་དབྱངས་སྒྲས་ནི་ཁྱོད་ལ་མཆོད་པར་བགྱིད། །ཆོ་འཕྲུལ་འདི་དྲ་འདི་དག་རྨད་ཏུ་བྱུང། །ཁྱོད་ཀྱི་གཟུགས་ནི་རྣམ་ཐོས་བུ་བས་ལྷག། །གཟེ་བརྗིད་དག་ནི་ཉི་མ་བརྒྱ་པས་འཕགས། །ཚངས་བཅས་ལྷ་མིར་བཅས་པའི་འཇིག་རྟེན་ན། །ཁྱོད་འདྲའང་མེད་ན་ལྷག་པ་ག་ལ་མཆིས། །བདག་གིས་ཁྱོད་ཀྱི་ཆོ་འཕྲུལ་མཆོག་མཐོང་ནས། །ཡོན་ཏན་ལྷག་པ་གང་དག་གཟིགས་གྱུར་ན། །དེ་བཞེད་པས་ན་མི་དབང་རབ་བྱུང་སྙམ། །བདག་ནི་དེ་ལ་ཐེ་ཆོམ་འཚལ་བར་གྱུར། །དེ་ནས་བཅོམ་ལྡན་འདས་ཀྱིས་ཁྱིམ་བདག་ཚོང་དཔོན་བཟང་སྐྱོང་ལ་འདི་སྐད་ཅེས་བཀའ་སྩལ་
ཏོ། །ཀྱེ་མའོ་ཁྱིམ་བདག་འཇིག་རྟེན་གནས་པ་འདི་གཙེ་པ་བཅུས་གཙེས་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྐྱེ་བས་གཙེ་བ་དང་། རྒ་བས་གཙེ་བ་དང་། ན་བས་གཙེ་བ་དང་། འཆི་བས་གཙེ་བ་དང་། མྱ་ངན་གྱིས་གཙེ་བ་དང་། སྨྲེ་སྔགས་འདོན་པས་གཙེ་བ་དང་། སྡུག་བསྔལ་གྱིས་གཙེ་བ་དང་། ཡིད་མི་བདེ་བས་གཙེ་བ་དང་། འཁྲུག་པས་གཙེ་བ་དང་། འཁོར་བའི་གཙེ་བ་དང་བཅུ་སྟེ། ཁྱིམ་བདག་འཇིག་རྟེན་གནས་པ་གཙེ་བ་འདི་བཅུས་གཙེས་པར་མཐོང་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ་ཞེས་དང་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ།། །འཁོར་བའི་སྒྲོམ་དུ་ཆུད་པ་ཡི། །བྱིས་པ་སོ་སོའི་སྐྱེ་བོ་ཀུན། སྐྱེ་བས་ཉེ་བར་གཙེ་བ་དང་། ནད་དང་རྒ་བས་རབ་དུ་གཟིར། །མྱ་ངན་བྱེད་ཅིང་སྨྲེ་སྔགས་འདོན། །འཆི་བའི་དབང་དུ་སོད་མཐོང་ནས། །སྲིད་པའི་སྒྲོམ་ལས་ཐར་བྱ་ཞེས། །བསྐྱབ་པའི་ཕྱིར་ནི་མངོན་པར་བྱུང་། །ཀྱེ་མའོ་ཁྱིམ་བདག་གི་འཇིག་རྟེན་གནས་པའི་འདི་ནི་ཞེ་སྡང་ཞིང་ཀུན་ནས་མནར་སེམས་ཀྱི་དངོས་པོ་བཅུས་གཅིག་ལ་གཅིག་མནར་སེམས་སུ་བྱེད་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། བདག་ཉིད་གནོད་པ་བྱས་ཤེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པ་བྱེད་དོ། ཞེས་སེམས་ལ་ཀུན་ནས་མནར་སེམས་སྐྱེ་བ་དང་། །གནོད་པ་བྱེད་པར་འགྱུར་རོ། ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་གི་མཛའ་བོ་ལ་གནོད་པ་བྱས་སོ། ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་གི་མཛའ་བོ་ལ་གནོད་པ་བྱེད་དོ། ཞེས་སེམས་ལ་ཀུན་མནར་སེམས་སྐྱེ་བ་དང་བདག་གི་མཛའ་བོ་ལ་གནོད་པ་བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱས་སོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱེད་དོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པའི་རབ་
ཏུ་སྡང་བ་ཉིད་དང་བཅུའོ། །ཁྱིམ་བདག་ཀུན་ནས་མནར་སེམས་ཀྱི་དངོས་པོ་བཅུ་ནི་དེ་དག་ཡིན་ཏེ། ཀུན་ནས་མནར་སེམས་ཐམས་ཅད་སེལ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ། ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། དེ་ནས་བཅོམ་ལྡན་འདས་ཀྱིས་དོན་དེ་ཉིད་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ།། །།ཀྱེ་མའོ་སེམས་ཅན་ཞེ་སྡང་སྟེ། གཅིག་ལ་གཅིག་ནི་ཕན་ཚུན་དུ། །ཀུན་ནས་མནར་སེམས་དངོས་པོ་བཅུས། །ཀུན་ལ་ཀུན་ནས་མནར་སེམས་གྱུར། །བདག་དང་བདག་གི་ཉེ་དུ་ལ། །གནོད་པ་བྱས་དང་བྱེད་པ་དང་། གནོད་པ་བྱེད་པར་འགྱུར་རོ་ཞེས། །དེ་ཡི་ཀུན་ནས་མནར་སེམས་སྐྱེ། །གང་རྣམས་བདག་དང་མི་མཛའ་པ། །དེ་དག་གི་ནི་དོན་བྱས་དང་། །བྱེད་དོ་བྱེད་པར་འགྱུར་རོ་ཞེས། །དེ་ཡི་ཀུན་ནས་མནར་སེམས་སྐྱེ། །གནོད་པའི་སྡང་དང་བཅུ་ཡིན་ཏེ། །གང་གིས་མནར་སེམས་འཕེལ་འགྱུར་བ། །དེ་མཐོང་ཀུན་ནས་མནར་སེམས་རྣམས། །མི་འདོད་པས་ན་རབ་ཏུ་བྱུང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ལྟ་བར་བྱས་པ་ལྟ་བ་ངན་པ་ཐིབས་པོ་བཅུས་ལྟ་བར་བྱས་པ་སྣ་ཚོགས་དང་། ལྟ་བ་ངན་པ་ཐིབས་པོ་དག་གིས་ནོན་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། །བདག་ཏུ་ལྟ་བར་གྱུར་བ་ལྟ་བ་ངན་པ་ཐིབས་པོ་དང་། སེམས་ཅན་དུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། སྲོག་ཏུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། གང་ཟག་ཏུ་ལྟ་བར་གྱུར་བ་ལྟ་ངན་པ་ཐིབས་པོ་དང་། །ཚད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། རྟག་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། བྱ་བ་མེད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། རྒྱུ་མེད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། མི་མཐུན་པའི་རྒྱུར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། ལོག་པར་ལྟ་བར་གྱུར་པ་ལྟ་བ་ངན་པའི་ཐིབས་པོ་དང་བཅུའོ། ཁྱིམ་བདག་ལྟ་བར་གྱུར་པ་ལྟ་བ་ངན་པའི་ཐིབས་པོ་དེ་དག་ཡིན་ཏེ། ལྟ་བ་ཐམས་ཅད་གཞིག་པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ། ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ། །
དེ་ནས་བཅོམ་ལྡན་འདས་ཀྱི་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ།། །བྱིས་པ་སོ་སོའི་སྐྱེ་བོ་ཀུན། བདག་ཏུ་ལྟ་དང་སེམས་ཅན་ལྟ། །སྲོག་ཏུ་ལྟ་བ་རྣམས་ཀྱི་ཡང་། །ལྟ་བ་ཐིབས་པོས་རབ་ཏུ་གཡོགས། རྟག་དང་ཆད་པར་ལྟ་བ་དང་། །བྱ་མེད་ལྟ་ལ་གནས་པ་དག། །ཡང་དག་ལྟ་བར་དགོད་དོ་ཞེས། །དེ་ཕྱིར་ང་ནི་རབ་ཏུ་བྱུང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ཟུག་རྔུ་ཆེན་པོ་བཅུས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཟུག་རྔུས་ཟུག་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྲིད་པའི་ཟུག་རྔུ་དང་། མ་རིག་པའི་ཟུག་རྔུ་དང་། འདོད་པའི་ཟུག་རྔུ་དང་། འདོད་ཆགས་ཀྱི་ཟུག་རྔུ་དང་། ཞེ་སྡང་གི་ཟུག་རྔུ་དང་། གཏི་མུག་གིས་ཟུག་རྔུ་དང་། ང་རྒྱལ་གྱི་ཟུག་རྔུ་དང་། ལྟ་བའི་ཟུག་རྔུ་དང་། འབྱུང་བའི་ཟུག་རྔུ་དང་། འཇིགས་པའི་ཟུག་རྔུ་དང་བཅུའོ། །ཁྱིམ་བདག་ཟུག་རྔུ་ཆེན་པོ་བཅུ་པོ་ནི་དེ་དག་ཡིན་ཏེ། ཟུག་རྔུ་ཐམས་ཅད་བསལ་པའི་ཕྱིར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ་ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྲིད་པའི་ཟུག་རྔུས་ཟུག་པ་རྣམས། །ཐོག་མའི་མཐའ་ནི་མི་ཤེས་ཏེ། །མ་རིག་པ་ཡིས་ལྡོངས་བྱས་ནས། །མུན་པ་ནས་ནི་མུན་པར་འགྲོ། སྲེད་པའི་ཟུག་རྔུས་ཟུག་པ་དང་། །འདོད་ཆགས་ཟུག་རྔུས་རྒྱུས་པ་དང། ཞེ་སྡང་ཟུག་རྔུས་བརྒྱལ་བས་ན། །ཕུང་པོ་དག་ནི་ལེན་པར་བྱེད། །གཏི་མུག་གི་ནི་ཟུག་རྔུས་དཀྲིས། །ང་རྒྱལ་དག་གི་ཟུག་རྔུས་སྙེམས། །འབྱུང་བ་དང་ནི་འཇིག་པ་ན། །ལྟ་བའི་ཟུག་རྔུས་མེ་འཕྲོད་འགྱུར། །བྱིས་པ་སོ་སོའི་སྐྱེ་བོ་ཀུན། ཕན་ཚུན་ཚིག་གི་མཚོན་ཆ་ཡིས། །འདི་ནི་བརྫུན་གྱིས་འདི་བདེན་ཞེས། །ཕན་ཚུན་དུ་ནི་རྩོད་པར་བྱེད། །ཟུག་རྔུས་ཟུག་པའི་སེམས་ཅན་གྱི། སྐྱབས་དང་དཔུང་གཉེན་འགྱུར་བ་ཡི། །ཟུག་རྔུ་འབྱིན་པ་དེ་བཞིན་གཤེགས། །འཇིག་རྟེན་འདིར་ནི་འབྱུང་བར་འགྱུར། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི། སྲེད་པའི་རྩ་བ་ལས་བྱུང་བའི་ཆོས་བཅུ་
པོ་དག་གིས་རྩ་བའི་གནས་ལ་རབ་ཏུ་གནས་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྲེད་པ་ལ་བརྟེན་ནས་ཀུན་དུ་འཆོལ་བ་དང་། ཀུན་ཏུ་ཚོལ་བ་ལ་བརྟེན་ནས་རྙེད་པ་དང་། རྙེད་པ་ལ་བརྟེན་ནས་ང་ཡིར་འཛིན་པ་དང་། ང་ཡིར་འཛིན་པ་ལ་བརྟེན་ནས་རྣམ་པར་ངེས་པ་དང་། རྣམ་པར་གདོན་མི་ཟབ་ལ་བརྟེན་ནས་འདུན་པའི་འདོད་ཆགས་དང་། འདུན་པའི་འདོད་ཆགས་ལ་བརྟེན་ནས་ལྷག་པར་ཆགས་པ་དང་། ལྷག་པར་ཆགས་པ་ལ་བརྟེན་ནས་སེར་སྣ་དང་། སེར་སྣ་ལ་བརྟེན་ནས་ཡོངས་སུ་འཛིན་པ་དང་། ཡོངས་སུ་འཛིན་པ་ལ་བརྟེན་ནས་ཡོངས་སུ་སྲུང་བ་དང་། ཡོངས་སུ་སྲུང་བ་ལ་བརྟེན་ནས་སྡུག་བསྔལ་བ་སྟེ། ཡོངས་སུ་སྲུང་བའི་གཞི་ལས་དབྱིག་པ་ཐོགས་པ་དང་། མཚོན་ཆ་ཐོགས་པ་དང་། འཐབ་པ་དང་། འཆང་འདྲུ་བ་དང་། འགྱེད་པ་དང་། བརྩོན་པ་རྣམས་འབྱུང་ངོ། དེའི་ཕྱིར་ཕྲ་མ་ལ་སོགས་པ་སྡིག་པ་མི་དགེ་བའི་ཆོས་རྣམ་པ་མང་མོ་འབྱུང་བར་འགྱུར་ཏེ། ཁྱིམ་བདག་སྲེད་པའི་རྩ་བ་ལས་བྱུང་བའི་ཆོས་བཅུ་པོ་དེ་དག་གིས་འཇིག་རྟེན་གནས་པ་རབ་ཏུ་གནས་པར་མཐོང་ནས་རྩ་བ་མེད་པ་གནས་མེད་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ་ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ། །འདི་ལ་ཆོས་ཉིད་ནི་འདི་ཡིན་ཏེ། །དེ་ལ་འདི་སྐད་ཅེས་བྱའོ། །སྲེད་པས་མིང་པའི་སེམས་ཅན་རྣམས། །འདི་ནས་འདི་ནི་ཀུན་དུ་ཚོལ། །རྙེད་པ་རྙེད་ནས་ང་ཡིར་འཛིན། །དེ་ལས་རྣམ་པར་ངེས་པར་འགྱུར། །བྱ་བ་འདི་དག་བྱའོ་ཞེས། །འདུན་པའི་འདོད་ཆགས་རབ་ཏུ་འཕེལ། །འདུན་པའི་འདོད་ཆགས་འཕེལ་བས་ན། །ལྷག་པར་ཆགས་ཕྱིར་སེར་སྣ་འགྱུར། །སེར་སྣའི་ཉེས་པས་འཇིག་རྟེན་ན། །ཀུན་ཏུ་འཛིན་པ་སྲ་བར་འགྱུར། །ཡོངས་སུ་འཛིན་པས་ཀུན་སྲུང་བ། །རྒྱུན་མི་འཚང་པར་འབྱུང་བར་འགྱུར། བྱིས་པ་ཀུན་དུ་བསྲུང་བའི་ཕྱིར། དབྱིག་པ་དང་ནི་མཚོན་འདེབས་ཤིང། །སྡིག་པ་ཐམས་ཅད་བྱེད་པས་ན། །དེ་ལས་སྡུག་བསྔལ་འཕེལ་བར་འགྱུར། །སྲིད་པའི་གཞིལ་ས་སྡུག་བསྔལ་ཀུན། ཤིན་དུ་འབྱུང་བར་མཐོང་བས་ན། །རྩ་བ་མེད་ཅིང་གནས་མེད་པའི། །བྱང་ཆུབ་དམ་པ་རྟོགས་པར་འདོད། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་
པ་འདི་ནི་ལོག་པའི་ཆོས་བཅུས་ལོག་པ་ཉིད་དུ་ངེས་པར་མཐོང་སྟེ། བཅུ་གང་ཞེ་ན། །འདི་ལྟ་སྟེ། ལོག་པའི་ལྟ་བ་དང་། ལོག་པའི་རྟོག་པ་དང་། ལོག་པའི་ངག་དང་། ལོག་པའི་ལས་ཀྱི་མཐའ་དང་། ལོག་པའི་འཚོ་བ་དང་། ལོག་པའི་རྩོལ་བ་དང་། ལོག་པའི་དྲན་པ་དང་། ལོག་པའི་ཏིང་ངེ་འཛིན་དང་། ལོག་པའི་རྣམ་པར་གྲོལ་བ་དང་། ལོག་པའི་ཤེས་པ་དང་བཅུ་སྟེ། ཁྱིམ་བདག་འཇིག་རྟེན་གནས་པ་འདི་ནི་ལོག་པའི་ཆོས་བཅུ་པོ་དེ་དག་གིས་ལོག་པར་ངེས་པར་མཐོང་ནས། ལོག་པ་ཐམས་ཅད་ལས་ཡང་དག་པར་བཟླ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །གང་དག་ལོག་པའི་ལྟ་ཆགས་དང་། །ལོག་པར་རྟོག་པའི་སྤྱོད་ཡུལ་དང་། །ལོག་པའི་ཚིག་ཏུ་སྨྲ་བ་དང་། །ལོག་པའི་ལས་མཐའ་སྤྱོད་པ་དང་། །ལོག་པའི་འཚོ་དང་ལོག་པའི་རྩོལ། །ལོག་པའི་དྲན་དང་མཉམ་པར་འཇོག། །ལོག་པའི་རྣམ་གྲོལ་རྫོགས་པ་དང་། །ལོག་པའི་ཤེས་ལ་གཞོལ་པ་ཡི། །ལོག་པར་ངེས་པའི་ཕུང་པོ་ནི། །བྱིས་པ་དེ་ལ་གནས་པ་དག །ཡང་དག་ཉིད་ལ་དགོང་ངོ་ཞེས། །དེ་ཕྱིར་ང་ནི་རབ་ཏུ་བྱུང་། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ལམ་ངན་པར་ཞུགས་ཤིང་། མི་དགེ་བ་བཅུའི་ལས་ཀྱི་ལམ་རྣམས་ཀྱིས་ཕལ་ཆེར་ངན་སོང་དུ་གཞོལ་བ། ངན་སོང་དུ་འབབ་པ། ངན་སོང་དུ་འབབ་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་ཟེར་བ་དང་། ངག་རྩུབ་པོ་དང་། ཚིག་ཀྱལ་བ་དང་། བརྣབ་སེམས་དང་གནོད་སེམས་དང་། ལོག་པར་ལྟ་བ་དང་བཅུ་སྟེ། ཁྱིམ་བདག་མི་དགེ་བའི་བཅུའི་ལས་ཀྱི་ལམ་རྣམས་ཀྱིས་འཇིག་རྟེན་གནས་པ་འདི་ལམ་ངན་པར་ཞུགས་ཤིང་ཕལ་ཆེར་ངན་སོང་དུ་གཞོལ་བ། ངན་སོང་དུ་འབབ་པ། ངན་སོང་དུ་བབ་པར་མཐོང་ནས་ངན་སོང་ཐམས་ཅད་ལས་ཡང་དག་པར་ཟླ་བའི་ཕྱིར་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་ཞེས་དད་པས་ཁྱིམ་ནས་ཁྱིམ་མེད་པར་རབ་དུ་བྱུང་ངོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། སྲོག་གཅོད་པའི་སེམས་ཅན་དང་། །གཞན་གྱི་ནོར་ལ་ཕྲོག་པ་དང་། །འདོད་པ་ལོག་པར་གཡེམ་པ་དག །སེམས་ཅན་དམྱལ་བར་མྱུར་དུ་འགྲོ། །དབྱེན་བྱེད་པ་དང་ཚིག་རྩུབ་དང་། །བརྫུན་དུ་སྨྲ་ཞིང་མི་སྡོམ་པ། །བྱིས་པ་ཀྱལ་བ་སྨྲ་བ་རྣམས། །སོ་སོ་སྐྱེ་བོ་སླུ་བས་བཅིངས། །གཞན་གྱི་སྤྱོད་ལ་བརྣབ་སེམས་དང་། །གནོད་སེམས་དག་ནི་མང་བ་དང་། །མི་མང་ལྟ་བ་ལོག་ཞུགས་པ། །ངན་འགྲོ་དག་ཏུ་འགྲོ་བར་འགྱུར། །ལུས་ཀྱི་སྡིག་པ་རྣམས་གསུམ་དང་། །དག་གིས་སྡིག་པ་རྣམ་བཞི་དང་། །ཡིད་ཀྱིས་སྡིག་པ་རྣམས་གསུམ་ནི། །སྡིག་བྱེད་པ་དག་རབ་ཏུ་བྱེད། །སྡིག་པའི་ལས་རྣམས་བྱས་པས་ན། །དེ་ཕྱིར་ངན་འགྲོར་འགྲོ་བར་འགྱུར། །ཅི་ནས་ངན་འགྲོར་མི་གཏང་བར། །བསྐྱབ་པའི་ཕྱིར་ན་རབ་ཏུ་བྱུང་། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ཉོན་མོངས་པ་བཅུ་དག་གིས་ཉོན་མོངས་པ་དང་། ཉེ་བའི་ཉོན་མོངས་པ་དང་། ཀུན་ནས་ཉོན་མོངས་པའི་འདྲི་མ་དང་ལྡན་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སེར་སྣའི་དྲི་མ་ཀུན་ནས་ཉོན་མོངས་པ་དང་། འཆལ་བའི་ཚུལ་ཁྲིམས་ཀྱི་དྲི་མ་ཀུན་ནས་ཉོན་མོངས་པ་དང་། གནོད་སེམས་ཀྱི་དྲི་མ་ཀུན་ནས་ཉོན་མོངས་པ་དང་། ལེ་ལོའི་དྲི་མ་ཀུན་ནས་ཉོན་མོངས་པ་དང་། གཡེང་བའི་དྲི་མ་ཀུན་ནས་ཉོན་མོངས་པ་དང་། འཆལ་བའི་ཤེས་རབ་ཀྱི་དྲི་མ་ཀུན་ནས་ཉོན་མོངས་པ་དང་། སྲི་ཞུ་མེད་པའི་དྲི་མ་ཀུན་ནས་ཉོན་མོངས་པ་དང་། ཐེ་ཚོམ་གྱི་དྲི་མ་ཀུན་ནས་ཉོན་མོངས་པ་དང་། མ་མོས་པའི་དྲི་མ་ཀུན་ནས་ཉོན་མོངས་པ་དང་། ། མ་གུས་པའི་དྲི་མ་ཀུན་ནས་ཉོན་མོངས་པ་དང་བཅུ་སྟེ། ཁྱིམ་བདག་འཇིག་རྟེན་གནས་པ་འདི་ནི་ཀུན་ནས་ཉོན་མོངས་པ་བཅུ་པོ་དེ་དག་གིས་ཀུན་ནས་ཉོན་མོངས་པར་མཐོང་ནས་ཀུན་ནས་ཉོན་མོངས་པ་མེད་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །ཞེས་དད་པས་
ཁྱིམ་ནས་ཁྱིམ་མེད་པར་རབ་ཏུ་བྱུང་ངོ། །འདི་ལ་ཆོས་ཉིད་ནི་འདི་ཡིན་ཏེ། དེ་ལ་འདི་སྐད་ཅེས་བྱའོ། །འཇིག་རྟེན་འདི་དག་ཕལ་ཆེར་ནི། །ཀུན་ནས་ཉོན་མོངས་བཅུ་ཡིས་གཟེར། །འདུས་བྱས་ཀུན་ནས་ཉོན་མོངས་དགའ། །ནམ་ཡང་སྐྱེ་བར་བྱེད་མི་འགྱུར། །བྱིས་པ་སོ་སོའི་སྐྱེ་བོ་ཀུན། །སེར་སྣའི་དྲི་མས་ཉོན་མོངས་ཏེ། །བསླབ་པ་ཡང་དག་བཟུང་ནས་ཀྱང་། །སྡོམ་པ་མེད་ཅིང་ཉམས་པར་སྤྱོད། །བྱིས་པ་བཟོད་ལ་རྒྱབ་ཀྱིས་ཕྱོགས། །བརྩོན་འགྲུས་ཆུང་བ་ལེ་ལོ་ཅན། །སེམས་ཀྱང་གནས་པ་མ་ཡིན་པ། །ཤེས་རབ་འཆལ་བ་བླུན་ཞིང་རྨོངས། །ཕ་དང་མ་དང་བུ་མོ་དང་། །བླ་མ་ལ་ནི་སྲི་ཞུམ་སྤངས། །འཇིག་རྟེན་སྣང་མཛད་སངས་རྒྱས་དག །མཐོང་ནས་བློ་ངན་ནེམ་ནུར་བྱེད། །ཟབ་མོ་རྒྱལ་བས་གསུངས་པ་ཡི། །དམ་པའི་ཆོས་ནི་སྤོང་བར་བྱེད། །མུན་པའི་ཕུང་པོས་རབ་ཏུ་ཁེབས། །འཕགས་པའི་ཆོས་ལ་གུས་མི་བྱེད། །ཀུན་ནས་ཉོན་མོངས་འདི་གཟིགས་ནས། །འདུས་བྱས་གང་ལ་འདི་མི་དགའ་སྟེ། །ཉོན་མོངས་མེད་པ་འདུས་མ་བྱས། །མྱ་ངན་འདས་པ་ཐོབ་པར་བྱ། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། །ཕྲག་དོག་དང་སེར་སྣའི་ཀུན་དུ་སྦྱོར་བ་དང་ལྡན་པར་ཤེས། །ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། །མ་རིག་པའི་ལིང་ཏོག་གེས་ཁེབས་པར་མཐོང་། །ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། །གཏི་མུག་གི་འོབས་སུ་ནུས་པར་མཐོང་། །ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། འདོད་པའི་ཀླུང་གིས་དེད་པར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། འདོད་པའི་ཟུག་རྔུས་གཤིས་སུ་ཟུག་པར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། ཁྲོ་བ་དང་འཁོན་དུ་འཛིན་པའི་དུ་བས་ཤིན་དུ་བདུགས་པར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། འདོད་ཆགས་ཀྱི་མེས་ཀུན་དུ་འབར་བར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། ཞེ་སྡང་གི་དུག་གིས་ཀུན་དུ་ཁེབས་པར་མཐོང་། ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། སྒྲིབ་པའི་ཚེར་མས་བསྐོར་བར་མཐོང་། ཀྱེ་
མའོ་ཁྱིམ་བདག་འཇིག་རྟེན་གནས་པ་འདི་ནི་འདི་ལྟ་སྟེ། འཁོར་བའི་འབྲོག་དགོན་པས་བརྩོན་འགྲུས་ཉམས་པར་མཐོང་སྟེ། ཁྱིམ་བདག་འཇིག་རྟེན་གནས་པའི་ཡོངས་སུ་འཁྲི་བ་བཅུ་པོ་དེ་དག་གིས་ཡོངས་སུ་བཀྲིས་པར་མཐོང་ནས་དད་པའི་ཁྱིམ་མེད་པར་རབ་ཏུ་བྱུང་ངོ་། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །རྒ་བས་སྐྱེས་བུ་རྣམས་ཀྱི་གཞོན་པ་འཇོམ། །གཟུགས་ཀྱང་རྣམ་པར་འཇིག་ཅིང་གཟུགས་ངན་བྱེད། །དྲན་དང་བློ་དང་དགའ་བ་མེད་པར་བྱེད། འགྲོ་བ་རྣམས་ནི་འཆི་བའི་སྒོ་མོར་ཁྲིད། །ནད་ནི་སྟོབས་དང་དྲག་ཤུལ་རབ་ཏུ་འཇོམ། །མཐུ་དང་ཕ་རོལ་གནོད་པ་ཐམས་ཅད་འཕྲོག །དབང་པོའི་གྲོང་རྣམས་མཐའ་དག་འཇོམ་པར་བྱེད། །མགོན་མེད་ཤིན་ཏུ་བརཏལ་བ་ཞན་པར་འགྱུར། །འཆི་བ་སྲིན་མོ་ལྟ་བུར་མི་བཟད་དེ། །རྟག་ཏུ་སྐྱེ་དགུ་རྣམས་ཀྱི་ཕྱི་བཞིན་འབྲང་། སྟོབས་ཀྱིས་རབ་ཏུ་མནན་ནས་འགྲོ་བ་ཡི། །ཕངས་པའི་ཚེ་ནི་མ་ལུས་ཟད་པར་འཐུང་། ། རྒ་བ་དང་ནི་འཆི་བས་སྐྱོ་གྱུར་ཏེ། །འཇིག་རྟེན་དག་ནི་ནང་ཀྱིས་གཙེས་རིག་ནས། །མི་རྒ་མི་འཆི་ཞི་ཞིང་བདེ་བ་ཡིས། །ཆོས་རྣམས་ཚོལ་ཕྱིར་ང་ནི་རབ་ཏུ་བྱུང་། །མེ་གསུམ་གྱིས་ནི་འཇིག་རྟེན་རབ་ཚིག་པ། །འགྲོ་བ་དག་ལ་སྐྱབས་གཞན་མ་མཐོང་ནས། །ང་ནི་སྐྱབས་དང་དཔུང་གཉེན་གྱུར་བྱས་ཏེ། །བདུད་རྩིའི་ཆར་ཕབ་མེ་རྣམས་ཞི་བར་བྱ། །སྐྱེ་དགུ་དག་ནི་ལམ་རྣམས་རབ་སྟོར་ཅིང་། །མིག་མེད་ལྡོངས་པ་རྨོངས་པར་གྱུར་པར་མཐོང་། །ང་ནི་འཇིག་རྟེན་དག་ལ་མིག་སྦྱིན་ཅིང་། །ལམ་རྣམས་བསྟན་ཕྱིར་ང་ནི་རབ་ཏུ་བྱུང་། །སྒྲིབ་པ་དག་གིས་སྒྲིབས་ཤིང་ཀུན་སྒྲིབས་ནས། །ཐེ་ཚོམ་ཀུན་ནས་ལངས་པའི་སེམས་ཅན་དག །ཐེ་ཚོམ་རབ་ཏུ་བསལ་བར་འགྱུར་བ་དང་། །ཆོས་རྣམས་བསྟན་ཕྱིར་ང་ནི་རབ་ཏུ་བྱུང་། །སེམས་ཅན་འདི་དག་ཕན་ཚུན་མི་མཐུན་ཏེ། །གླགས་དང་སྐབས་ཚོལ་གནོད་པའི་ཉེས་པ་ཅན། །འགྲས་པ་དག་གི་སྡུམས་ནི་བྱ་བ་དང་། །འགྲོ་ལ་ཕན་འདོད་ཕྱིར་ནི་ང་རབ་བྱུང་། །ཕ་དང་མ་དང་སྡུག་པའི་མཆོག་རྣམས་ལ། །
ང་རྒྱལ་དབང་གིས་མི་གུས་སེམས་ཅན་ལ། །ང་རྒྱལ་རྒྱལ་མཚན་རབ་ཏུ་བསྙལ་བའི་ཕྱིར། །ཁྱིམ་བདག་དེ་ཕྱིར་ང་ནི་རབ་ཏུ་བྱུང་། །ཆགས་པ་ཡིས་ནི་སྒྲིབས་པའི་སེམས་ཅན་རྣམས། །རྫས་ཕྱིར་ལྟུང་བར་བྱེད་པ་མཐོང་བ་དང་། །ནོར་བདུན་རྒྱ་ཆེར་རབ་ཏུ་རྙེད་གྱུར་ཏེ། །ངེས་ནི་སེམས་ཅན་དབུལ་བ་མེད་པར་བྱ། །སེམས་ཅན་འདི་དག་ཕན་ཚུན་གསོང་བྱེད་ཅིང་། །ལུས་ནི་གདོན་མི་ཟ་བར་དོར་དགོས་ཀྱང་། །བྱིས་པ་དོན་མེད་བདག་ལུས་གསོ་མཐོང་ནས། །སྲིད་པ་གསུམ་ལས་ང་ནི་རྣམ་པར་ལོག །ཇི་ལྟར་ཁྱོད་ནི་དོན་མི་ཤེས་པ་བཞིན། །དེ་འདྲ་བས་ནི་འཇིག་རྟེན་གསུམ་པོ་གང་། འཇིག་རྟེན་དག་ལ་དོན་རྣམས་བསྟན་པའི་ཕྱིར། །ཕན་པར་འདོད་པས་ནི་ང་ནི་རབ་ཏུ་བྱུང་། །སེམས་ཅན་དམྱལ་བར་ལྟུང་བའི་སེམས་ཅན་དག །མི་བཟད་རྣམ་པ་སྣ་ཚོགས་མཐའ་ཡས་ཀྱི། །སྡུག་བསྔལ་དྲག་པོ་བྱེད་པར་མཐོང་བས་ན། །དེ་དག་ཐར་པར་བྱ་ཕྱིར་ང་རབ་བྱུང་། །གཅིག་ལ་གཅིག་ནི་གནོད་བྱེད་སེམས་ཅན་རྣམས། ། བྱོལ་སོང་འགྲོ་བར་རྣམ་པར་སྤྱོད་མཐོང་ནས། །སྐྱེ་དགུ་མགོན་མེད་མགོན་ནི་བྱ་བའི་ཕྱིར། །སྙིང་རྗེའི་བསམ་བས་ང་ནི་རབ་ཏུ་བྱུང་། །གཤེན་རྗེ་ཡིས་ནི་གཙེས་པའི་སེམས་ཅན་རྣམས། །བཀྲེས་སྐོམ་མི་བཟད་སྡུག་བསྔལ་གཟེར་མཐོང་སྟེ། །བྱང་ཆུབ་དམ་པ་ཐོབ་ནས་དེ་དག་ལ། །བདུད་རྩིའི་རོ་མཆོག་ཁ་ཟས་སྦྱིན་པར་བྱ། །མི་ཡི་ཀུན་དུ་ཚོལ་བའི་སྡུག་བསྔལ་དང་། །ལྷ་རྣམས་འཆི་འཕོ་སྡུག་བསྔལ་རིག་ནས་ནི། །འཇིག་རྟེན་གསུམ་ཀུན་སྡུག་བསྔལ་སྡུག་བསྔལ་གྱིས། །ཉེན་པར་མཐོང་ནས་ང་ནི་རབ་ཏུ་བྱུང་། །ཁྲེལ་བ་དང་ནི་ངོ་ཚ་མེད་པ་དག །འདོད་པས་རབ་ཏུ་བརྒྱལ་བའི་སེམས་ཅན་རྣམས། །མ་དང་སྲིང་མོ་བླ་མའི་ཆུང་མ་ལ། །ཉལ་བ་ཁྱི་དང་ཕག་རྣམས་ཇི་བཞིན་ནོ། །འདོད་བའི་དགའ་བ་ཡིས་ནི་འདི་དག་མེད། །སེམས་ཅན་བུང་མེད་དབང་སོང་འདི་མཐོང་ནས། །ཚོང་དཔོན་བུད་མེད་དག་ནི་མི་འདོད་པས། །ཁྱིམ་ཡང་སྤངས་ནས་ང་ནི་རབ་ཏ་བྱུང་། །བྱིས་པ་རྣམས་ནི་འདོད་པའི་དགའ་ལ་གནས། །ཐམས་ཅད་སྡིག་པ་རྩོད་པའི་དབང་དུ་སོང་། །བདུད་རྣམས་ཐམས་
ཅད་ལ་ནི་དབང་བྱས་ཏེ། བྱང་ཆུབ་རིམ་པར་འཚང་རྒྱར་ང་རབ་བྱུང་། །ཁྱིམ་ན་གནས་པ་དག་ནི་ཉེས་པ་སྟོང་། འདི་འདྲ་བ་ཡི་གནོད་པ་འདི་མཐོང་ནས། །ས་རྣམས་ཐམས་ཅད་རྣམ་པར་སྤངས་ནས་ནི། །སྐྱེ་བ་ཟད་པར་བྱ་ཕྱིར་ང་རབ་ཏུ་བྱུང་། །དེ་ནས་ཁྱིམ་བདག་ལྔ་བརྒྱ་ཙམ་པོ་དེ་དག་ཀྱེ་མའོ་འདི་ནི་སངས་རྒྱས་ཡིན་ནོ་ཞེས་ངོ་མཚར་ཐོབ་པར་གྱུར་ཏེ། །དེ་དག་གིས་སངས་རྒྱས་སོ་སངས་རྒྱས་སོ་སྙམ་དུ་རིག་ནས་སྒྲ་སྐད་མགྲིན་གཅིག་ཏུ་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །ཚོང་དཔོན་འདུས་པ་ལྔ་བརྒྱ་ཙམ་པོ་དག །རྒ་བས་འཇིགས་སྐྲག་རྒྱལ་བའི་དྲུང་དུ་མཆིས། །འདི་ལ་ཆོས་མཆོག་དམ་པ་རྒྱ་ཆེ་བ། །རྒ་ཤིས་མཐར་འབྱིན་རབ་ཏུ་བཤད་དུ་གསོལ། །སྲིད་པའི་འགྲོ་བ་ཡོངས་དག་བསམ་པ་དག། །བཅོམ་ལྡན་སྲིད་བྲལ་འཇིགས་ལས་རྣམ་པར་གྲོལ། །འབྱུང་བ་འཇིག་པར་མཛད་པ་སྐྱབས་མཛོད་དེ། །སྲིད་པའི་ཁྱིམ་ཞུགས་འགྲོ་བ་ཐར་བར་མཛོད། །དཔའ་བོ་འདོད་ཆགས་བྲལ་ཞིང་རྣམ་པར་གྲོལ། །རྡུལ་བྲལ་དྲི་མ་མི་མངའ་རྣམ་དག་སེམས། །འདུལ་ལ་མཁས་པ་ཁ་ལོ་སྒྱུར་བའི་མཆོག །བདུད་རྩི་དམ་པ་ཆོས་ཀྱི་རྒྱུན་ཕྱེ་ཤིག །སྐྱེས་བུ་དམ་པ་གཟུགས་རབ་མཆོག་འཛིན་པ། །ཁྱོད་འདྲ་ས་དང་ལྷ་ཡུལ་གང་ནའང་མེད། །མི་མཉམ་མཉམ་པ་དམ་པའི་འཇིག་རྟེན་གཙོ། །བདེ་བར་གཤེགས་པ་རབ་མཆོག་ཆོས་གསུངས་ཤིག །དྲི་གསུམ་དྲི་མ་སྤངས་ཤིང་སྐྱོན་མི་མངའ། །མུན་པ་རབ་རིབ་མི་མངའ་རྣམ་དག་སྤྱན། །མུན་དང་བྲལ་ཞིང་གཏི་མུག་དྲ་བ་བསལ། །རྡུལ་མི་མངའ་བ་མཚུངས་མེད་ཆོས་རྣམས་གསུངས། །འགྲོ་བ་མགོན་མེད་སྡུག་བསྔལ་གྱུར་པ་རྣམས། །སྲིད་པའི་མཚོར་ལྷུང་སྐྱབས་མེད་ཐམས་ཅད་ལ། །ཐུགས་རྗེ་བརྩེ་བ་བསྐྱེད་དེ་བྱམས་པའི་ཐུགས། །རྒྱལ་ང་མྱུར་དྲོངས་ཕ་རོལ་དགོད་པར་མཛོད། །ང་རྒྱལ་གཏི་མུག་རྒྱགས་བས་རྒལ་བཀའ་ཞིང་། །ནད་དང་རྩོད་མང་དབའ་ཀློང་སྲིད་པའི་ཆུང་། །འགྲོ་བ་ལྷུང་ནས་ཁྱེར་བ་སྐྱབས་མེད་ལ། །ཐུགས་བརྩེ་སྐྱེད་ལ་སྲིད་པའི་རྒྱུན་ལས་སྒྲོལ། །གསེར་གྱི་རི་ལྟར་རྣམ་པར་དག་པའི་སྐུ། །གཟི་བརྗིད་ཉི་མ་བྱེ་བ་བརྒྱ་བས་ལྷག །འཇམ་
ཞིང་སྙན་པ་ཚངས་དབྱངས་མཆོག་མངའ་བ། །ཆོས་མཆོག་བརྗོད་པ་མཛེས་པ་རབ་ཏུ་གསུངས། །ཆོས་འདི་ཀུན་ནི་རང་བཞིན་རྣམ་པར་དག །རང་བཞིན་འོང་གསལ་ཡེ་ནས་རྩ་བ་དག །མ་བྱས་བྱེད་དང་ཚོར་བ་པོ་དང་བྲལ། །གཞན་ལས་མ་གསན་རྣམ་དག་ཐམས་ཅད་གཟིགས། །སྤྱད་པ་རབ་སྤྱད་གྲགས་པ་མཐའ་ཡས་པ། རབ་བྱུང་སྟོབས་བཅུ་མངའ་ཞིང་འཇིགས་མེད་བ། །མཐའ་ཡས་ཡེ་ཤེས་ནམ་མཁའ་མཚུངས་པའི་ཐུགས། །རབ་སྦྱིན་དགེ་སྦྱོང་མཆོག་གི་ཆོས་བཤད་གསོལ། །དེ་ནས་བཅོམ་ལྡན་འདས་འདི་སྙམ་དུ་གྱུར་ཏེ། ཨེ་མའོ་ཁྱིམ་བདག་ལྔ་བརྒྱ་ཙམ་པོ་འདི་དག་དགེ་བའི་རྩ་བ་ཡོངས་སུ་སྨིན་གྱིས་ཅི་ནས་ས་ཕྱོགས་འདི་ཉིད་དུ་ཁྱིམ་པའི་མཚན་མ་སྤངས་ཏེ་རབ་ཏུ་བྱུང་བ་ཐོབ་ནས་ཐམས་ཅད་ཟག་པ་ཟད་པའི་མཐར་བྱེད་པ་དེ་ལྟ་དེ་ལྟ་བུར་ངས་ཆོས་བསྟན་ཏོ། །སྙམ་དུ་དགོངས་སོ། །དེ་ནས་བཅོམ་ལྡན་འདས་དེའི་ཚེ་སྟེང་གི་བར་སྣང་ལ་སྐྱིལ་མོ་དཀྲུང་བཅས་ཏེ་བཞུགས་སོ། །དེ་ནས་ཁྱིམ་བདག་ལྔ་བརྒྱ་ཙམ་པོ་དེ་དག་བཅོམ་ལྡན་འདས་ལ་ལྷག་པར་དགའ་བ་དང་། དད་པ་དང་། རི་མོ་དང་། གུས་པ་ཉེ་བར་གཞོག་གོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་ལྔ་བརྒྱ་ཙམ་པོ་དེ་དག་ལ་བཀའ་བསྩལ་པ། ཁྱིམ་བདག་ཁྱེད་རྣམས་གཙེ་བ་བཅུ་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། སྐྱེ་བས་གཙེ་བ་དང་། རྒ་བས་གཙེ་བ་དང་། ན་བས་གཙེ་བ་དང་། འཆི་བས་གཙེ་བ་དང་། མྱ་ངན་གྱིས་གཙེ་བ་དང་། སྨྲེ་སྔགས་འདོན་པས་གཙེ་བ་དང་། སྡུག་བསྔལ་གྱིས་གཙེ་བ་དང་། ཡིད་མི་བདེ་བས་གཙེ་བ་དང་། འཁྲུག་པས་གཙེ་བ་དང་། འཁོར་བར་གཙེ་བ་སྟེ། ཁྱིམ་བདག་ཁྱེད་རྣམས་གཙེ་བ་བཅུ་པོ་འདི་དག་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་ཀུན་ནས་མནར་སེམས་ཀྱི་དངོས་པོ་བཅུ་ལས་ཐར་པར་འདོད་དམ། །བཅུ་གང་ཞེ་ན། འདི་ལྟ་སྟེ། བདག་ཉིད་ལ་གནོད་པ་བྱས་ཤེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པ་བྱེད་དོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པ་བྱེད་པར་འགྱུར་རོ། །ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་གི་མཛའ་བོ་
ལ་གནོད་པ་བྱས་ཤེས་སེམས་ཀུན་ནས་མནར་སེམས་སྐྱེ་བ་དང་། བདག་གི་མཛའ་བོ་ལ་གནོད་པ་བྱེད་དོ་ཞེས་སེམས་ཀུན་ནས་མནར་སེམས་སྐྱེ་བ་དང་། བདག་གི་མཛའ་བོ་ལ་གནོད་པ་བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱས་ཤེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱེད་དོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། བདག་དང་མི་མཛའ་བའི་དོན་བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེ་བ་དང་། གནོད་པའི་རབ་ཏུ་སྡང་བ་ཉིད་དང་བཅུ་སྟེ། ཁྱིམ་བདག་ཁྱེད་རྣམས་ཀུན་ནས་མནར་སེམས་ཀྱི་དངོས་པོ་བཅུ་པོ་འདི་དག་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་ལྟ་བ་སྣ་ཚོགས་སུ་གྱུར་པ། ལྟ་བ་ངན་པའི་ཐིབས་པོ་བཅུ་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། བདག་ཏུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། སེམས་ཅན་དུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། སྲོག་ཏུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། གང་ཟག་ཏུ་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། ཆད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། རྟག་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། བྱ་བ་མེད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། རྒྱུ་མེད་པར་ལྟ་བར་གྱུར་པ་ལྟ་བ་ངན་པ་ཐིབས་པོ་དང་། མི་མཐུན་པའི་རྒྱུར་ལྟ་བར་གྱུར་པ་ངན་པ་ཐིབས་པོ་དང་། ལོགས་པར་ལྟ་བར་གྱུར་པ་ལྟ་བ་ངན་པ་ཐིབས་པོ་སྟེ། ཁྱིམ་བདག་ཁྱེད་རྣམས་ལྟ་བར་གྱུར་པ་ལྟ་བ་ངན་པ་ཐིབས་པོ་བཅུ་པོ་འདི་དག་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་ཟུག་རྔུ་བཅུ་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། སྲིད་པའི་ཟུག་རྔུ་དང་། མ་རིག་པའི་ཟུག་རྔུ་དང་། འདོད་པའི་ཟུག་རྔུ་དང་། འདོད་ཆགས་ཀྱི་ཟུག་རྔུ་དང་། ཞེ་སྡང་གི་ཟུག་རྔུ་དང་། གཏི་མུག་གི་ཟུག་རྔུ་དང་། ང་རྒྱལ་གྱི་ཟུག་རྔུ་དང་། ལྟ་བའི་ཟུག་རྔུ་དང་། འབྱུང་བའི་ཟུག་རྔུ་དང་། འཇིག་པའི་ཟུག་རྔུ་དང་བཅུ་སྟེ། ཁྱིམ་བདག་ཁྱེད་རྣམས་ཟུག་རྔུ་བཅུ་པོ་དག་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་
སྲེད་པའི་རྩ་བ་ལས་བྱུང་བའི་ཆོས་བཅུ་པོ་འདི་དག་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། སྲིད་པ་ལ་བརྟེན་ནས་ཀུན་དུ་ཚོལ་བ་དང་། ཀུན་དུ་ཚོལ་བ་ལ་བརྟེན་ནས་རྙེད་པ་དང་། རྙེད་པ་ལ་བརྟེན་ནས་ང་ཡིར་འཛིན་པ་དང་། ང་ཡིར་འཛིན་པ་ལ་བརྟེན་ནས་རྣམ་པར་ངེས་པ་དང་། རྣམ་པར་ངེས་པ་ལ་བརྟེན་ནས་འདུན་པའི་འདོད་ཆགས་དང་། འདུན་པའི་འདོད་ཆགས་ལ་བརྟེན་ནས་ལྷག་པར་ཆགས་པ་དང་། ལྷག་པར་ཆགས་པ་ལ་བརྟེན་ནས་སེར་སྣ་དང་། སེར་སྣ་ལ་བརྟེན་ནས་ཡོངས་སུ་འཛིན་པ་དང་། ཡོངས་སུ་འཛིན་པ་ལ་བརྟེན་ནས་ཡོངས་སུ་སྲུང་བ་དང་། ཡོངས་སུ་སྲུང་བ་ལ་བརྟེན་ནས་སྡུག་བསྔལ་བ་དང་བཅུ་སྟེ། ཡོངས་སུ་སྲུང་བའི་གཞི་ལས་དབྱུག་པ་ཐོགས་པ་དང་། མཚོན་ཆ་ཐོགས་པ་དང་། འཐབ་པ་དང་འཚང་འདྲུ་བ་དང་། འགྱེད་པ་དང་རྩོད་པ་རྣམས་འབྱུང་ངོ་། །དེའི་ཕྱིར་ཕྲ་མ་ལ་སོགས་པ་སྡིག་པ་མི་དགེ་བའི་ཆོས་རྣམ་པ་མང་པོ་འབྱུང་བར་འགྱུར་ཏེ། ཁྱིམ་བདག་ཁྱེད་རྣམས་སྲེད་པའི་རྩ་བ་ལས་བྱུང་བའི་ཆོས་བཅུ་པོ་འདི་དག་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་ལོག་པ་ཉིད་བཅུ་ལས་ཐར་པར་འདོད་དམ། བཅུ་གང་ཞེ་ན་འདི་ལྟ་སྟེ། ལོག་པའི་ལྟ་བ་དང་། ལོག་པའི་རྟོག་པ་དང་། ལོག་པའི་ངག་དང་། ལོག་པའི་ལས་ཀྱི་མཐའ་དང་། ལོག་པའི་འཚོ་བ་དང་། ལོག་པའི་རྩོལ་བ་དང་། ལོག་པའི་དྲན་པ་དང་། ལོག་པའི་ཏིང་ངེ་འཛིན་དང་། ལོག་པའི་རྣམ་པར་གྲོལ་བ་དང་། ལོག་པའི་ཤེས་པ་དང་བཅུ་སྟེ། ཁྱིམ་བདག་ཁྱེད་རྣམས་ལོག་པ་ཉིད་བཅུ་པོ་འདི་དག་ལས་ཐར་པར་འདོད་དམ། གཞན་ཡང་ཁྱིམ་བདག་ཁྱེད་རྣམས་མི་དགེ་བའི་ལས་ཀྱི་ལམ་བཅུ་ལས་ཐར་པར་འདོད་དམ། བཅུ་གང་ཞེ་ན། འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་ཁྱལ་བ་ད་ང། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྟེ། ། ཁྱིམ་བདག་ཁྱེད་རྣམས་མི་དགེ་བའི་ལས་ཀྱི་ལམ་བཅུ་པོ་འདི་དག་ལས་ཐར་བར་འདོད་དམ། གཞན་ཡང་ཁྱིམ་བདག་ཁྱེད་རྣམས་ཀུན་ནས་ཉོན་མོངས་པ་བཅུ་ལས་ཐར་བར་འདོད་དམ། བཅུ་གང་ཞེ་ན། འདི་ལྟ་སྟེ། སེར་སྣའི་དྲི་མ་ཀུན་ནས་ཉོན་
མོངས་པ་དང་། འཆལ་བའི་ཚུལ་ཁྲིམས་ཀྱི་དྲི་མ་ཀུན་ནས་ཉོན་མོངས་པ་དང་། གནོད་སེམས་ཀྱི་དྲི་མ་ཀུན་ནས་ཉོན་མོངས་པ་དང་། ལེ་ལོའི་དྲི་མ་ཀུན་ནས་ཉོན་མོངས་པ་དང་། གཡེང་བའི་དྲི་མ་ཀུན་ནས་ཉོན་མོངས་པ་དང་། འཆལ་བའི་ཤེས་རབ་ཀྱི་དྲི་མ་ཀུན་ནས་ཉོན་མོངས་པ་དང་། སྲི་ཞུ་མེད་པའི་དྲི་མ་ཀུན་ནས་ཉོན་མོངས་པ་དང་། ཐེ་ཚོམ་གྱི་དྲི་མ་ཀུན་ནས་ཉོན་མོངས་པ་དང་། མ་མོས་པའི་དྲི་མ་ཀུན་ནས་ཉོན་མོངས་པ་དང་། མ་གུས་བའི་དྲི་མ་ཀུན་ནས་ཉོན་མོངས་པ་སྟེ། ཁྱིམ་བདག་ཁྱེད་རྣམས་ཀུན་ནས་ཉོན་མོངས་པ་བཅུ་པོ་འདི་དག་ལས་ཐར་བར་འདོད་དམ། གཞན་ཡང་ཁྱིམ་བདག་ཁྱེད་རྣམས་འཁོར་བའི་འཇིགས་པ་བཅུ་ལས་ཐར་བར་འདོད་དམ། བཅུ་གང་ཞེ་ན། འདི་ལྟ་སྟེ། ཕྲག་དོག་དང་། སེར་སྣའི་ཀུན་དུ་སྦྱོར་བ་ལས་ཐར་བར་འདོད་དམ། འདི་ལྟ་སྟེ་ཁྱིམ་བདག་ཁྱེད་རྣམས་མ་རིག་པའི་ལིང་ཏོག་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་གཏི་མུག་གི་འོབས་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་འདོད་པའི་ཆུ་བོ་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་ལོག་པའི་ཟུག་རྔུ་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་ཁྲོ་བ་དང་འཁོན་དུ་འཛིན་པ་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་འདོད་ཆགས་ཀྱི་མེ་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་ཞེ་སྡང་གི་དུག་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་སྒྲིབས་པའི་ཚེར་མ་ལས་ཐར་བར་འདོད་དམ། འདི་ལྟ་སྟེ། ཁྱིམ་བདག་ཁྱེད་རྣམས་འཁོར་བའི་འབྲོག་དགོན་པ་ལས་ཐར་བར་འདོད་དམ། ཁྱིམ་བདག་ཁྱེད་རྣམས་འཁོར་བའི་འཇིགས་པ་བཅུ་པོ་འདི་དག་ལས་ཐར་བར་འདོད་དམ། དེ་ནས་བཅོམ་ལྡན་འདས་ལ་ཁྱིམ་བདག་ལྔ་བརྒྱ་ཙམ་པོ་དེ་དག་གིས་སྒྲ་སྐད་མགྲིན་གཅིག་ཏུ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གཙེ་བ་བཅུ་ལས་ཐར་བར་འཚལ་ཏེ། བཅུ་གང་ཞེ་ན། འདི་ལྟ་སྟེ། སྐྱེ་བས་གཙེ་བ་དང་། རྒ་བས་གཙེ་བ་དང་། ན་བས་གཙེ་བ་དང་། འཆི་བས་གཙེ་བ་དང་། མྱ་ངན་གྱིས་གཙེ་བ་དང་། སྨྲེ་སྔགས་འདོན་པས་
གཙེ་བ་དང་། སྡུག་བསྔལ་གྱིས་གཙེ་བ་དང་། ཡིད་མི་བདེ་བས་གཙེ་བ་དང་། འཕྲུགས་པས་གཙེ་བ་དང་། འཁོར་བའི་གཙེ་བ་ལས་བཅོམ་ལྡན་འདས་བདག་ཅག་ཐར་བར་འཚལ་ལོ། །དེ་བཞིན་དུ་འཁོར་བའི་འབྲོག་དགོན་པའི་བར་དུ་ཆོས་བཅུ་པོ་འདི་དག་ལས་ཐམས་ཅད་རྒྱས་པར་བྱའོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་ལྔ་བརྒྱ་ཙམ་པོ་དེ་དག་ལ་བཀའ་སྩལ་པ། ཁྱིམ་བདག་རྣམས་མིག་ནི་ཐར་བར་མི་འདོད་དོ། །དེའི་ཅིའི་ཕྱིར་ཞེ་ན། མིག་ནི་བྱེད་པ་མེད་པ་གཡོ་བ་མེད་པ་སྟེ། མིག་ནི་མི་སེམས་ཤིང་རྣམ་པར་མི་རིག་གོ །དེ་བས་ན་ཁྱིམ་བདག་རྣམས་མིག་ལ་བདག་མེད་དོ་ཞེས་གནས་པར་བྱའོ། ཁྱིམ་བདག་རྣམས་རྣ་བ་དང་། སྣ་དང་། ལྕེ་དང་། ལུས་དང་ཡིད་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། ཡིད་ནི་བྱེད་པ་མེད་པ་གཡོ་བ་མེད་པ་སྟེ། ཡིད་ནི་མི་སེམས་ཤིང་རྣམ་པར་མི་རིག་གོ །དེ་བས་ན་ཁྱིམ་བདག་རྣམས་ཡིད་ལ་ཡང་བདག་མེད་དོ་ཞེས་གནས་པར་བྱའོ། །ཁྱིམ་བདག་རྣམས་གཟུགས་ནི་ཐར་བར་འདོད་དོ། །དེ་ཅིའི་ཕྱིར་ཞེ་ན། གཟུགས་ནི་བྱེད་པ་མེད་པ་གཡོ་བ་མེད་པ་སྟེ། གཟུགས་ནི་མི་སེམས་ཤིང་རྣམ་པར་མི་རིག་གོ །དེ་བས་ན་ཁྱིམ་བདག་རྣམས་གཟུགས་ལ་ཡང་བདག་མེད་དོ་ཞེས་གནས་པར་བྱའོ། ། ཁྱིམ་བདག་རྣམས་སྒྲ་དང་། དྲི་དང་། རོ་དང་། རེག་བྱ་དང་ཆོས་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། ཆོས་ཀྱི་བར་དུ་བྱེད་པ་མེད་པ་གཡོ་བ་མེད་པ་སྟེ། ཆོས་ནི་མི་སེམས་ཤིང་རྣམ་པར་མི་རིག་གོ །དེ་བས་ན་ཁྱིམ་བདག་རྣམས་ཆོས་ཀྱི་བར་དུ་ཡང་བདག་མེད་དོ་ཞེས་གནས་པར་བྱའོ། ཁྱིམ་བདག་རྣམས་གཟུགས་ཀྱི་ཕུང་པོ་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། གཟུགས་ཀྱི་ཕུང་པོ་ནི་བྱེད་པ་མེད་པ་གཡོ་བ་མེད་པ་སྟེ། གཟུགས་ཀྱི་ཕུང་པོ་ནི་མི་སེམས་ཤིང་རྣམ་པར་མི་རིག་གོ །དེ་བས་ན་ཁྱིམ་བདག་རྣམས་གཟུགས་ཀྱི་ཕུང་པོ་ལ་ཡང་བདག་མེད་དོ་ཞེས་གནས་པར་བྱའོ། །ཁྱིམ་བདག་རྣམས་ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། རྣམ་པར་ཤེས་པའི་ཕུང་པོ་ནི་བྱེད་པ་མེད་
པ་གཡོ་བ་མེད་པ་སྟེ། རྣམ་པར་ཤེས་པའི་ཕུང་པོ་ནི་མི་སེམས་ཤིང་རྣམ་པར་མི་རིག་གོ །དེ་བས་ནས་ཁྱིམ་བདག་རྣམས་རྣམ་པར་ཤེས་པའི་ཕུང་པོ་ལ་ཡང་བདག་མེད་དོ་ཞེས་གནས་པར་བྱའོ། །ཁྱིམ་བདག་རྣམས་སའི་ཁམས་ནི་ཐར་བར་མི་འདོད་དོ། དེ་ཅིའི་ཕྱིར་ཞེ་ན། སའི་ཁམས་ནི་བྱེད་པ་མེད་པ་གཡོ་བ་མེད་པ་སྟེ། སའི་ཁམས་ནི་མི་སེམས་ཤིང་རྣམ་པར་མི་རིག་གོ །དེ་བས་ན་ཁྱིམ་བདག་རྣམས་སའི་ཁམས་ལ་ཡང་བདག་མེད་དོ་ཞེས་གནས་པར་བྱའོ། །ཁྱིམ་བདག་རྣམས་ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་ནི་ཐར་བར་མི་འདོད་དོ། །དེ་ཅིའི་ཕྱིར་ཞེ་ན། རྣམ་པར་ཤེས་པའི་ཁམས་ནི་བྱེད་པ་མེད་པ་གཡོ་བ་མེད་པ་སྟེ། རྣམ་པར་ཤེས་པའི་ཁམས་ནི་མི་སེམས་ཤིང་རྣམ་པར་མི་རིག་གོ །དེ་བས་ན་ཁྱིམ་བདག་རྣམས་རྣམ་པར་ཤེས་པའི་ཁམས་ལ་ཡང་བདག་མེད་དོ་ཞེས་གནས་པར་བྱའོ། དེ་ལྟར་ཁྱིམ་བདག་རྣམས་ཆོས་ཐམས་ཅད་ནི་ཡང་དག་པ་མ་ཡིན་པ་ཡོངས་སུ་རྟོག་པ་ལས་བྱུང་སྟེ། རྐྱེན་ལ་རག་ལས་པ་སྟོབས་མེད་པ། ཉམས་ཆུང་བ། རྐྱེན་རྣམས་ལས་བྱུང་བ། རྐྱེན་རྣམས་ཡོད་ན་ཆོས་རྣམས་གདགས་པར་འགྱུར་གྱི། རྐྱེན་མེད་ན་ཆོས་རྣམས་གདགས་པར་མི་འགྱུར་རོ། །ཁྱིམ་བདག་རྣམས་ཆོས་ཐམས་ཅད་ནི་བཏགས་པ་ཙམ་སྟེ། འདི་ལ་ལམ་ཆད་པ་མྱ་ངན་ལས་འདས་པ་མ་གཏོགས་པར་སྐྱེ་བའམ། རྒ་བའམ། འཆི་བའམ། འཕོ་བའམ། འབྱུང་བ་གང་ཡང་མེད་དོ། །དེ་ལྟར་ཁྱིམ་བདག་རྣམས་ཁྱེད་རྣམ་གྲངས་འདིས་ཆོས་ཐམས་ཅད་ནི་ཡང་དག་པ་མ་ཡིན་པ། ཀུན་བརྟགས་པ་ལས་བྱུང་བ། རྐྱེན་ལ་རག་ལས་པ། སྟོབས་མེད་པ། ཉམ་ཆུང་བ། རྐྱེན་རྣམས་ལས་བྱུང་བ་སྟེ། རྐྱེན་རྣམས་ཡོད་ན་ཆོས་རྣམས་བདག་པར་འགྱུར་གྱི་རྐྱེན་མེད་ན་ཆོས་རྣམས་བདགས་པར་མི་འགྱུར་རོ། །ཆོས་ཐམས་ཅད་ནི་བཏགས་པ་ཙམ་སྟེ། འདི་ལ་ལམ་ཆད་པ། མྱ་ངན་ལས་འདས་པ་མ་གཏོགས་པར་སྐྱེ་བའམ། རྒ་བའམ། འཆི་བའམ། འཕོ་བའམ། འབྱུང་བ་གང་ཡང་མེད་པར་རིག་པར་བྱའོ། །དེ་ལྟར་ན་ཁྱིམ་བདག་རྣམས་ཡང་དག་པ་མ་
ཡིན་པར་ཀུན་རྟོག་པ་ཡོད་ན། ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་འགྱུར་གྱི། ཡང་དག་པ་མ་ཡིན་པ་ཀུན་རྟོག་པ་མེད་ན་ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་མི་འགྱུར་རོ། །ཚུལ་བཞིན་མ་ཡིན་པ་ཡིད་ལ་བྱེད་པ་ཡོད་ན་མ་རིག་པ་གདགས་པར་འགྱུར་གྱི། ཚུལ་བཞིན་མ་ཡིན་པ་ཡིད་ལ་བྱེད་པ་མེད་ན་མ་རིག་པ་གདགས་པར་མི་འགྱུར་རོ། །མ་རིག་པ་ཡོད་ན་འདུ་བྱེད་རྣམས་གདགས་པར་འགྱུར་གྱི། མ་རིག་པ་མེད་ན་འདུ་བྱེད་རྣམས་སུ་གདགས་པར་མི་འགྱུར་རོ། །འདུ་བྱེད་ཡོད་ན་རྣམ་པར་ཤེས་པ་གདགས་པར་འགྱུར་གྱི། འདུ་བྱེད་མེད་ན་རྣམ་པར་ཤེས་པ་གདགས་པར་མི་འགྱུར་རོ། ། རྣམ་པར་ཤེས་པ་ཡོད་ན་མིང་དང་གཟུགས་གདགས་པར་འགྱུར་གྱི། རྣམ་པར་ཤེས་པ་མེད་ན་མིང་དང་གཟུགས་སུ་གདགས་པར་མི་འགྱུར་རོ། །མིང་དང་གཟུགས་ཡོད་ན་སྐྱེ་མཆེད་དྲུག་གདགས་པར་འགྱུར་གྱི། མིང་དང་གཟུགས་མེད་ན་སྐྱེ་མཆེད་དྲུག་ཏུ་གདགས་པར་མི་འགྱུར་རོ། །སྐྱེ་མཆེད་དྲུག་ཡོད་ན་རེག་པ་གདགས་པར་འགྱུར་གྱི། སྐྱེ་མཆེད་དྲུག་མེད་ན་རེག་པ་གདགས་པར་མི་འགྱུར་རོ། །རེག་པ་ཡོད་ན་ཚོར་བ་གདགས་པར་འགྱུར་གྱི། རེག་པ་མེད་ན་ཚོར་བ་གདགས་པར་མི་འགྱུར་རོ། །ཚོར་བ་ཡོད་ན་སྲེད་པ་གདགས་པར་འགྱུར་གྱི། ཚོར་བ་མེད་ན་སྲེད་པར་གདགས་པར་མི་འགྱུར་རོ། །སྲེད་པ་ཡོད་ན་ལེན་པ་གདགས་པར་འགྱུར་གྱི། སྲེད་པ་མེད་ན་ལེན་པར་གདགས་པར་མི་འགྱུར་རོ། །ལེན་པ་ཡོད་ན་སྲིད་པ་གདགས་པར་འགྱུར་གྱི། ལེན་པ་མེད་ན་སྲིད་པར་གདགས་པར་མི་འགྱུར་རོ། །སྲིད་པ་ཡོད་ན་སྐྱེ་བ་གདགས་པར་འགྱུར་གྱི། སྲིད་པ་མེད་ན་སྐྱེ་བར་གདགས་པར་མི་འགྱུར་རོ། སྐྱེ་བ་ཡོད་ན་རྒ་ཤི་གདགས་པར་འགྱུར་གྱི། སྐྱེ་བ་མེད་ན་རྒ་ཤི་གདགས་པར་མི་འགྱུར་རོ། །རྒ་བ་ཞེས་བྱ་བ་གང་ཞེ་ན་རྒས་པ་དང་། གཏུགས་པ་དང་། སྤྱི་ཐེར་བ་དང་། སྐྲ་སྐྱ་བ་དང་གཉེར་མ་མང་བ་དང་། ཚེ་ཉམས་པ་དང་། དབང་པོ་ཡོངས་སུ་སྨིན་པ་དང་། འདུ་བྱེད་རྣམས་ཀྱི་དངོས་པོ་རྙིངས་པ་སྟེ། དེ་ནི་རྒ་བ་ཞེས་བྱའོ། །འཆི་བ་ཞེས་བྱ་བ་གང་ཞེ་ན། འདི་ལྟ་སྟེ། འཆི་བ་དང་། འཕོ་བ་དང་། འཆི་བའི་དུས་བྱེད་པ་དང་། ཕུང་པོ་
རྣམས་ཞིག་པ་དང་། ལུས་བོར་བ་དང་རིས་མཐུན་པའི་སྐལ་པ་མཉམ་པ་དང་བྲལ་བ་སྟེ། འདི་ནི་འཆི་བ་ཞེས་བྱའོ། །དེ་ལ་རྒ་བ་འདི་དང་། འཆི་བ་འདི་ལ་རྒ་ཤི་ཞེས་བྱའོ། །དེ་ལྟར་སྐྱེ་བ་ཡོད་ན་རྒ་ཤི་གདགས་པར་འགྱུར་གྱི། སྐྱེ་བ་མེད་ན་རྒ་ཤི་གདགས་པར་མི་འགྱུར་ཏེ། སྐྱེ་བ་ཞེས་བྱ་བ་གང་ཞེ་ན། སྐྱེ་བ་དང་། རྫོགས་པར་སྐྱེ་བ་དང་། འཇུག་པ་དང་། མངོན་པར་འགྲུབ་པ་དང་། ཕུང་པོ་རྣམས་འབྱུང་བ་དང་། སྐྱེ་མཆེད་རྣམས་རབ་ཏུ་ཐོབ་པ་དང་། རིས་མཐུན་པ་དང་ཕྲད་པ་སྟེ། དེ་ནི་སྐྱེ་བ་ཞེས་བྱའོ། །སྲིད་པ་ཡོད་ན་སྐྱེ་བ་གདགས་པར་འགྱུར་གྱི། སྲིད་པ་མེད་ན་སྐྱེ་བར་གདགས་པར་མི་འགྱུར་ཏེ། སྲིད་པ་ཞེས་བྱ་བ་གང་ཞེ་ན། འདི་ལྟ་སྟེ། འདོད་པའི་སྲིད་པ་དང་། གཟུགས་ཀྱི་སྲིད་པ་དང་། གཟུགས་མེད་པའི་སྲིད་པ་སྟེ། དེ་ནི་སྲིད་པ་ཞེས་བྱའོ། །ལེན་པ་ཡོད་ན་སྲིད་པ་གདགས་པར་འགྱུར་གྱི། ལེན་པ་མེད་ན་སྲིད་པར་གདགས་པར་མི་འགྱུར་ཏེ། ལེན་པ་ཞེས་བྱ་བ་གང་ཞེ་ན། འདོད་པའི་ལེན་པ་དང་། ལྟ་བའི་ལེན་པ་དང་། ཚུལ་ཁྲིམས་དང་། བརཏལ་ཞུགས་ཀྱི་ལེན་པ་དང་། བདག་ཏུ་སྨྲ་བའི་ལེན་པ་སྟེ། དེ་ནི་ལེན་པ་ཞེས་བྱའོ། །སྲེད་པ་ཡོད་ན་ལེན་པ་གདགས་པར་འགྱུར་གྱི། སྲེད་པ་མེད་ན་ལེན་པར་གདགས་པར་མི་འགྱུར་ཏེ། སྲེད་པ་ཞེས་བྱ་བ་གང་ཞེ་ན་འདི་ལྟ་སྟེ། གཟུགས་ལ་སྲེད་པ་དང་། སྒྲ་ལ་སྲེད་པ་དང་། དྲི་ལ་སྲེད་པ་དང་། རོ་ལ་སྲེད་པ་དང་རེག་བྱ་ལ་སྲེད་པ་དང་། ཆོས་ལ་སྲེད་པ་སྟེ། དེ་ནི་སྲེད་པ་ཞེས་བྱའོ། །ཚོར་བ་ཡོད་ན་སྲིད་པ་གདགས་པར་འགྱུར་གྱི། ཚོར་བ་མེད་ན་སྲིད་པར་གདགས་པར་མི་འགྱུར་ཏེ། ཚོར་བ་ཞེས་བྱ་བ་གང་ཞེ་ན། འདི་ལྟ་སྟེ། མིག་གི་འདུས་ཏེ་རེག་པ་ལས་བྱུང་བའི་ཚོར་བ་དང་། རྣ་བའི་འདུས་ཏེ་རེག་པ་ལས་བྱུང་བའི་ཚོར་བ་དང་། སྣའི་འདུས་ཏེ་རེག་པ་ལས་བྱུང་བའི་ཚོར་བ་དང་། ལྕེའི་འདུས་ཏེ་རེག་པ་ལས་བྱུང་བའི་ཚོར་བ་དང་། ལུས་ཀྱི་འདུས་ཏེ་རེག་པ་ལས་བྱུང་བའི་ཚོར་བ་དང་། ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བ་སྟེ། དེ་ནི་ཚོར་བ་ཞེས་བྱའོ། །རེག་པ་ཡོད་ན་ཚོར་བ་གདགས་པར་འགྱུར་གྱི། རེག་པ་མེད་ན་ཚོར་བར་གདགས་པར་མི་
འགྱུར་ཏེ། རེག་པ་ཞེས་བྱ་བ་གང་ཞེ་ན། འདི་ལྟ་སྟེ། མིག་གི་འདུས་ཏེ་རེག་པ་དང་། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་འདུས་ཏེ་རེག་པ་སྟེ། དེ་ནི་རེག་པ་ཞེས་བྱའོ། །སྐྱེ་མཆེད་དྲུག་ཡོད་ན་རེག་པ་གདགས་པར་འགྱུར་གྱི། སྐྱེ་མཆེད་དྲུག་མེད་ན་རེག་པ་གདགས་པར་མི་འགྱུར་ཏེ། སྐྱེ་མཆེད་དྲུག་ཅེས་བྱ་བ་གང་ཞེ་ན། འདི་ལྟ་སྟེ། མིག་གི་སྐྱེ་མཆེད་དང་། རྣ་བའི་སྐྱེ་མཆེད་དང་། སྣའི་སྐྱེ་མཆེད་དང་། ལྕེའི་སྐྱེ་མཆེད་དང་། ལུས་ཀྱི་སྐྱེ་མཆེད་དེ། ཡིད་ཀྱི་སྐྱེ་མཆེད་དེ། དེ་ནི་སྐྱེ་མཆེད་དྲུག་ཅེས་བྱའོ། །མིང་དང་གཟུགས་ཡོད་ན་སྐྱེ་མཆེད་དྲུག་གདགས་པར་འགྱུར་གྱི། མིང་དང་གཟུགས་མེད་ན་སྐྱེ་མཆེད་དྲུག་ཏུ་གདགས་པར་མི་འགྱུར་ཏེ། མིང་དང་གཟུགས་ཤེས་བྱ་བ་གང་ཞེ་ན། འདི་ལྟ་སྟེ། ཚོར་བ་དང་འདུ་ཤེས་དང་། སེམས་དང་རེག་པ་དང་། ཡིད་ལ་བྱེད་པ་དང་། འབྱུང་བ་ཆེན་པོ་བཞི་དང་། འབྱུང་བ་ཆེན་པོ་བཞི་ལ་གནས་པའི་མིང་དང་གཟུགས་ཏེ། དེ་ནི་མིང་དང་གཟུགས་ཤེས་བྱའོ། །རྣམ་པར་ཤེས་པ་ཡོད་ན་མིང་དང་གཟུགས་གདགས་པར་འགྱུར་གྱི། རྣམ་པར་ཤེས་པ་མེད་ན་མིང་དང་གཟུགས་སུ་གདགས་པར་མི་འགྱུར་ཏེ། རྣམ་པར་ཤེས་པ་ཞེས་བྱ་བ་གང་ཞེ་ན། འདི་ལྟ་སྟེ། མིག་གི་རྣམ་པར་ཤེས་པ་དང་། རྣ་བའི་རྣམ་པར་ཤེས་པ་དང་། སྣའི་རྣམ་པར་ཤེས་པ་དང་། ལྕེའི་རྣམ་པར་ཤེས་པ་དང་། ལུས་ཀྱི་རྣམ་པར་ཤེས་པ་དང་། ཡིད་ཀྱི་རྣམ་པར་ཤེས་པ་སྟེ། དེ་ནི་རྣམ་པར་ཤེས་པ་ཞེས་བྱའོ། །འདུ་བྱེད་རྣམས་ཡོད་ན་རྣམ་པར་ཤེས་པར་གདགས་པར་འགྱུར་གྱི། འདུ་བྱེད་རྣམས་མེད་ན་རྣམ་པར་ཤེས་པར་གདགས་པར་མི་འགྱུར་ཏེ། འདུ་བྱེད་རྣམས་ཤེས་བྱ་བ་གང་ཞེ་ན། འདི་ལྟ་སྟེ། གཟུགས་ལ་ཀུན་སེམས་པ་དང་། སྒྲ་ལ་ཀུན་སེམས་པ་དང་། དྲི་ལ་ཀུན་སེམས་པ་དང་། རོ་ལ་ཀུན་སེམས་པ་དང་། རེག་བྱ་ལ་ཀུན་སེམས་པ་དང་། ཆོས་ལ་ཀུན་སེམས་པ་སྟེ། དེ་དག་ནི་འདུ་བྱེད་རྣམས་ཤེས་བྱའོ། །མ་རིག་པ་ཡོད་ན་འདུ་བྱེད་རྣམས་གདགས་པར་འགྱུར་ཏེ། མ་རིག་པ་མེད་ན་འདུ་བྱེད་རྣམས་སུ་གདགས་པར་མི་འགྱུར་ཏེ། མ་རིག་པ་ཞེས་བྱ་བ་གང་ཞེ་ན། འདི་ལྟ་སྟེ། སྔོན་གྱི་མཐའ་མི་ཤེས་པ་དང་། ཕྱི་མའི་མཐའ་མི་ཤེས་པ་དང་། སྔོན་དང་།
ཕྱི་མའི་མཐའ་མི་ཤེས་པ་དང་། ནང་མི་ཤེས་པ་དང་། ཕྱི་མི་ཤེས་པ་དང་། ནང་དང་ཕྱི་མི་ཤེས་པ་དང་། སྡུག་བསྔལ་མི་ཤེས་པ་དང་། ཀུན་འབྱུང་མི་ཤེས་པ་དང་། འགོག་པ་མི་ཤེས་པ་དང་། ལམ་མི་ཤེས་པ་སྟེ། དེ་ལྟར་རྐྱེན་མི་ཤེས་པ་དང་། རྟེན་ཅིང་འབྲེལ་བར་འབྱུང་བ་མི་ཤེས་པ་དང་། རྟེན་ཅིང་འབྲེལ་བར་འབྱུང་བའི་ཆོས་རྣམས་མི་ཤེས་པ་དང་། ནག་པོ་དང་། དཀར་པོ་དང་། རྐྱེན་དང་རྐྱེན་མ་ཡིན་པ་དང་། སྣང་བ་དང་། མི་སྣང་བ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། བསྟེན་པར་བྱ་བ་དང་། བསྟེན་པར་བྱ་བ་མ་ཡིན་པའི་ཆོས་རྣམས་གང་མི་ཤེས་པ་དང་། མི་མཐོང་བ་དང་། མངོན་པར་མི་རྟོགས་པ་དང་། ཁོང་དུ་མི་ཆུད་པ་དེ་ནི་མ་རིག་པ་ཞེས་བྱའོ། །ཚུལ་བཞིན་མ་ཡིན་པ་ཡིད་ལ་བྱེད་པ་ཡོད་ན་མ་རིག་པ་གདགས་པར་འགྱུར་གྱི། ཚུལ་བཞིན་མ་ཡིན་པ་ཡིད་ལ་བྱེད་པ་མེད་ན་མ་རིག་པར་གདགས་པར་མི་འགྱུར་ཏེ། ཚུལ་བཞིན་མ་ཡིན་པ་ཡིད་ལ་བྱེད་པ་ཞེས་བྱ་བ་གང་ཞེ་ན། འདི་ལྟ་སྟེ། བདག་འདས་པའི་དུས་ན་བྱུང་བ་ཞིག་གམ། བདག་འདས་པའི་དུས་ན་མ་བྱུང་བ་ཞིག་གམ། ཅི་བདག་འདས་པའི་དུས་ན་བྱུང་བ་ཞིག་ན། བདག་འདས་པའི་དུས་ན་གང་དུ་བྱུང་བ་ཞིག། བདག་འདས་པའི་དུས་ན་ཅིར་གྱུར་པ་ཞིག བདག་མ་འོངས་པའི་དུས་ན་འབྱུང་བར་འགྱུར་རམ། བདག་མ་འོངས་པའི་དུས་ན་འབྱུང་བར་མི་འགྱུར་རམ། ཅི་བདག་མ་འོངས་པའི་དུས་ན་འབྱུང་བ་ཞིག་ན། བདག་མ་འོངས་པའི་དུས་ན་གང་དུ་འབྱུང་བར་འགྱུར། བདག་མ་འོངས་པའི་དུས་ན་ཅི་འདྲ་བར་འགྱུར་ཞེས་ནང་དུ་བདག་ཅི། བདག་སུ་ཞིག་ཅི་ཡོད་དམ་ཅི་མེད་དམ་ཅི་བྱུང་ངམ་མ་བྱུང་ངམ། ཅིར་གྱུར་གང་དུ་བྱུང་། བདག་ཅིར་གྱུར། གང་དུ་བྱུང་བ་ཞིག། ཅི་བདག་བྱུང་བ་ཞིག་ན། བདག་གང་དུ་བྱུང་བ་ཞིག། བདག་ད་རེ་བྱུང་བ་ཞིག་གམ་ཞེས་ཐེ་ཚོམ་ཟ་ཞིང་ཡིད་གཉིས་སུ་འགྱུར་ཏེ། དེ་དེ་ལྟར་ཚུལ་བཞིན་མ་ཡིན་པ་ཡིད་ལ་བྱས་པས་ལྟ་བར་གྱུར་པ་དྲུག་ལས་ལྟ་བ་གང་ཡང་རུང་བས་གཅིག་འབྱུང་བར་འགྱུར་ཏེ། བདག་ཡོད་ཅེས་ལྟ་བར་འགྱུར་བ་དང་། བདག་མེད་ཅེས་ལྟ་བར་འགྱུར་བ་དང་། བདག་ལ་བདག་ཡང་དག་པར་རྗེས་སུ་མཐོང་ཞེས་ལྟ་བར་འགྱུར་བ་དང་། བདག་ལ་བདག་
ཡང་དག་པར་རྗེས་སུ་མི་མཐོང་ཞེས་ལྟ་བར་འགྱུར་བ་དང་། དེ་ནི་བདག་སྟེ་དེ་འཇིག་རྟེན་ནོ་ཞེས་ལྟ་བར་འགྱུར་བ་དང་། གལ་ཏེ་རྐྱེན་ལ་བརྟེན་ཏེ་འབྱུང་བ་ནི་རྟག་པ། བརྟན་པ། ཐེར་ཟུག་པ། མི་འགྱུར་བའི་ཆོས་ཅན། ཐེར་ཟུག་པ་ཡང་དག་པར་འདུག་པའམ། འདུག་པར་འགྱུར་བ་ཞེས་ལྟ་བར་འགྱུར་བ་དེ་ནི་ཚུལ་བཞིན་མ་ཡིན་པ་ཡིད་ལ་བྱེད་པ་ཞེས་བྱའོ། ཡང་དག་པ་མ་ཡིན་པ་ཀུན་དུ་རྟོག་པ་ཡོད་ན་ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་འགྱུར་གྱི། ཡང་དག་པ་མ་ཡིན་པ་ཀུན་དུ་རྟོག་པ་མེད་ན་ཚུལ་བཞིན་མ་ཡིན་པ་ཡིད་ལ་བྱེད་པར་གདགས་པར་མི་འགྱུར་ཏེ། ཡང་དག་པ་མ་ཡིན་པ་ཀུན་དུ་རྟོག་པ་གང་ཞེ་ན། འདི་ལྟ་སྟེ། བདག་དང་སེམས་ཅན་དང་སྲོག་དང་། སྐྱེས་བུ་དང་གང་ཟག་དང་། སྐྱེ་བ་པོ་དང་ཤེད་ལས་སྐྱེས་དང་། ཤེད་བུ་དང་བྱེད་པ་པོ་དང་། ཚོར་བ་པོ་སྟེ། དེ་ནི་ཡང་དག་པ་མ་ཡིན་པ་ཞེས་བྱའོ། །སོ་སོའི་སྐྱེ་བོ་ཐོས་པ་དང་། མི་ལྡན་པ་རྣམས་བདག་ཅེས་རྟོག་ཅིང་ཡོངས་སུ་རྟོག་པ་དང་། སེམས་ཅན་དང་སྲོག་དང་། སྐྱེས་བུ་དང་ཤེད་ལས་སྐྱེས་དང་། ཤེད་བུ་དང་བྱེད་པ་པོ་དང་། ཚོར་བ་པོ་ཞེས་རྟོག་ཅིང་ཡོངས་སུ་རྟོག་པ་དེ་ནི་ཡང་དག་པ་མ་ཡིན་པ་ཀུན་དུ་རྟོག་པ་ཞེས་བྱའོ། །དེ་ལྟར་ཡང་དག་པ་མ་ཡིན་པ་ཀུན་དུ་རྟོག་པ་ཡོད་ན་ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་འགྱུར་གྱི། ཡང་དག་པ་མ་ཡིན་པ་ཀུན་དུ་རྟོག་པ་མེད་ན་ཚུལ་བཞིན་མ་ཡིན་པ་ཡིད་ལ་བྱེད་པ་གདགས་པར་མི་འགྱུར་ཏེ། ཚུལ་བཞིན་མ་ཡིན་པ་ཡིད་ལ་བྱེད་པ་ཡོད་ན། མ་རིག་པ་གདགས་པར་འགྱུར་གྱི། ཚུལ་བཞིན་མ་ཡིན་པ་ཡིད་ལ་བྱེད་པ་མེད་ན། མ་རིག་པར་གདགས་པར་མི་འགྱུར་རོ། མ་རིག་པ་ཡོད་ན་འདུ་བྱེད་རྣམས་གདགས་པར་འགྱུར་གྱི། མ་རིག་མེད་ན་འདུ་བྱེད་རྣམས་སུ་གདགས་པར་མི་འགྱུར་བ་ནས། སྐྱེ་བ་ཡོད་ན་རྒ་ཤི་གདགས་པར་འགྱུར་གྱི། སྐྱེ་བ་མེད་ན་རྒ་ཤི་གདགས་པར་མི་འགྱུར་བའི་བར་དུ་གོང་མ་བཞིན་དུ་སྦྱར་རོ།། །།བམ་པོ་གཉིས་པ། དེ་ལྟར་ན་ཁྱིམ་བདག་རྣམས་ཆོས་ཐམས་ཅད་ནི་ཡང་དག་པ་མ་ཡིན་པ་ཀུན་དུ་རྟོག་པ་ལས་བྱུང་བ། རྐྱེན་ལ་རག་ལས་
པ། སྟོབས་མེད་པ། རྐྱེན་རྣམས་ལས་བྱུང་བ་ཡིན་ཏེ། རྐྱེན་མེད་ན་ཆོས་རྣམས་གདགས་པར་མི་འགྱུར་རོ། ཁྱིམ་བདག་རྣམས་ཆོས་ཐམས་ཅད་ནི་བཏགས་པ་ཙམ་སྟེ། འདི་ལ་ལམ་ཆད་པ་མྱ་ངན་ལས་འདས་པ་མ་གཏོགས་པར་སྐྱེ་བའམ། རྒ་བའམ། འཆི་བའམ། འཕོ་བ་འམ། འབྱུང་བ་གང་ཡང་མེད་དོ། །ཁྱིམ་བདག་རྣམས་འདི་ལྟ་སྟེ་དཔེར་ན་ཆུའི་མཚོ་ཆེན་པོ་ལ་ཉ་གནས་པར་གྱུར་པ་ཁྱིམ་བདག་རྣམས་དེ་ཅི་སྙམ་དུ་སེམས། ཉ་དེ་དག་ཅི་ཞིག་གི་མཐུ། དེ་དག་གིས་གསོལ་པ། བཅོམ་ལྡན་འདས་ཆབ་ཀྱི་མཐུ་འོ། །བདེ་བར་གཤེགས་པ་ཆབ་ཀྱི་མཐུ་འོ། །དེ་ལ་ཁྱིམ་བདག་རྣམས་ཅི་ཆུ་དེ་སེམས་སམ། དེ་དག་གིས་གསོལ་པ། བཅོམ་ལྡན་འདས་དེ་ལྟ་མ་ལགས་སོ། །བདེ་བར་གཤེགས་པ་དེ་ལྟ་མ་ལགས་སོ། །བཀའ་སྩལ་པ། ཁྱིམ་བདག་རྣམས་དེ་ལྟར་ཆུ་སེམས་པ་མེད་པ་ལ་ཅིའི་སྟོབས་ཤིག་ཡོད། །བཅོམ་ལྡན་འདས་སྟོབས་མ་མཆིས་སོ། །བདེ་བར་གཤེགས་པ་སྟོབས་ཆུང་ངོ་། །བཀའ་སྩལ་པ། ཁྱིམ་བདག་རྣམས་དེ་བཞིན་དུ་ཆོས་ཐམས་ཅད་ནི་ཡང་དག་པ་མ་ཡིན་པ། ཀུན་རྟོག་པ་ལས་བྱུང་བ། སྟོབས་མེད་པ། ཉམ་ཆུང་བ། རྐྱེན་རྣ་ལས་འབྱུང་བ་སྟེ། རྐྱེན་རྣམས་ཡོད་ན་ཆོས་རྣམས་གདགས་པར་འགྱུར་རོ། ཁྱིམ་བདག་རྣམས་ཆོས་ཐམས་ཅད་ནི་བཏགས་པ་ཙམ་སྟེ། འདི་ལ་ལམ་ཆད་པ་མྱ་ངན་ལས་འདས་པ་མ་གཏོགས་པར་སྐྱེ་བའམ། རྒ་བའམ། འཆི་བའམ། འཕོ་བའམ། འབྱུང་བ་གང་ཡང་མེད་དོ། །ཁྱིམ་བདག་ཁྱེད་རྣམས་དེ་བས་ན་རྐྱེན་དེ་དག་ལ་ཚུལ་བཞིན་སོ་སོར་རྟོགས་ལ་དེའི་ཚེ་ཡིད་བརྟན་དུ་མི་རུང་བ་དང་། ཡིད་བརྟན་པ་མ་ཡིན་པས་སྐྲག་པར་གྱིས་ཤིག སྐྲག་པར་གྱུར་པ་དེ་ན་འབྲོས་པར་གྱིས་ཤིག། ཆོས་གང་ལས་འབྲོས་པའི་ཆོས་དེ་གང་ཞེས་ཚུལ་བཞིན་དུ་སོ་སོར་རྟོགས་ཤིག །ཚུལ་བཞིན་སོ་སོར་རྟོག་པ་དེ་ན་ཆོས་གང་ཆོས་དེ་ལས་འབྲོས་པའི་ཆོས་དེ་རྟོགས་པར་གྱིས་ཤིག དེ་ཅིའི་ཕྱིར་ཞེ་ན། ཁྱིམ་བདག་རྣམས་རྣམ་པ་ཐམས་ཅད་ཏུ་མི་དམིགས་པའི་ཕྱིར་ཆོས་ཐམས་ཅད་ནི་དམིགས་སུ་མེད་པའོ། ཁྱིམ་བདག་རྣམས་རྡུལ་དང་བྲལ་བའི་ཕྱིར་ཆོས་ཐམས་
ཅད་ནི་བདག་མེད་པའོ། ཁྱིམ་བདག་རྣམས་བདག་དང་བྲལ་བའི་ཕྱིར་ཆོས་ཐམས་ཅད་ནི་སེམས་ཅན་མེད་པའོ། །ཁྱིམ་བདག་རྣམས་སྐྱེ་བ་དང་། རྒ་བ་དང་། ན་བ་དང་། འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་། ཡིད་མི་བདེ་བ་དང་འཁྲུག་པ་ལས་ཤིན་དུ་འདས་པའི་ཕྱིར་ཆོས་ཐམས་ཅད་ནི་སྲོག་མེད་པའོ། །ཁྱིམ་བདག་རྣམས་དུས་གསུམ་ཡང་དག་པར་ཆད་པའི་ཕྱིར་ཆོས་ཐམས་ཅད་ནི་གང་ཟག་མེད་པའོ། ཁྱིམ་བདག་རྣམས་སྒྲ་དང་། སྐད་དང་དབྱངས་དང་། ཚིག་གི་ལམ་ནས་བརྗོད་དུ་མེད་པའི་ཕྱིར་ཆོས་ཐམས་ཅད་ནི་ཡི་གེ་མེད་པའོ། ཁྱིམ་བདག་རྣམས་དམིགས་པ་མེད་པའི་ཕྱིར་ཆོས་ཐམས་ཅད་ནི་ཆགས་པ་མེད་པའོ། ཁྱིམ་བདག་རྣམས་ཉེ་བར་ཞི་བའི་མཚན་ཉིད་ཀྱི་ཕྱིར་ཆོས་ཐམས་ཅད་ནི་ཞི་བའོ། །ཁྱིམ་བདག་རྣམས་ནམ་མཁའི་རང་བཞིན་གྱི་ཕྱིར་ཆོས་ཐམས་ཅད་ནི་ཀུན་དུ་སོང་བའོ། ཁྱིམ་བདག་རྣམས་ངེས་པར་འབྱུང་བ་མ་ཡིན་པའི་ཕྱིར་ཆོས་ཐམས་ཅད་ནི་སྟོང་པ་ཉིད་ལ་ཡང་དག་པར་གནས་པའོ། ཁྱིམ་བདག་རྣམས་གནས་པ་མེད་པའི་ཕྱིར་ཆོས་ཐམས་ཅད་ནི་མ་གཡོས་པའོ། །ཁྱིམ་བདག་རྣམས་མི་གནས་ཤིང་གཡོ་བ་མེད་པ་དང་ལྡན་པའི་ཕྱིར་ཆོས་ཐམས་ཅད་ནི་ཡང་དག་པའི་མཐའ་ལ་གནས་པའོ། ཁྱིམ་བདག་རྣམས་རྦ་ཀློང་དང་བྲལ་བའི་ཕྱིར་ཆོས་ཐམས་ཅད་ནི་བརྗོད་དུ་མེད་པའོ། ཁྱིམ་བདག་རྣམས་མཚན་མ་མེད་དབྱིབས་མེད་པ་ལ་སྣང་བ་རྒྱུ་བ་དང་བྲལ་བའི་ཕྱིར་ཆོས་ཐམས་ཅད་ནི་ཁ་དོག་མེད་པའོ། ཁྱིམ་བདག་རྣམས་ང་ཡིར་འཛིན་པ་དང་བྲལ་བའི་ཕྱིར་ཆོས་ཐམས་ཅད་ནི་ངའི་མེད་པའོ། །ཁྱིམ་བདག་རྣམས་སེམས་དང་ཡིད་དང་རྣམ་པར་ཤེས་པ་དང་བྲལ་བའི་ཕྱིར་ཆོས་ཐམས་ཅད་ནི་ཤེས་པར་བྱ་བ་མ་ཡིན་པའོ། ཁྱིམ་བདག་རྣམས་མིག་གི་ལམ་ལས་ཤིན་དུ་འདས་པ་དང་། རྣ་བ་དང་སྣ་དང་ལྕེ་དང་ལུས་དང་། ཡིད་ཀྱི་ལམ་ལས་ཤིན་དུ་འདས་པའི་ཕྱིར། ཆོས་ཐམས་ཅད་ནི་ཀུན་གཞི་མེད་པའོ། ཁྱིམ་བདག་རྣམས་སྐྱེ་བ་དང་། འཇིག་པ་དང་གནས་པ་དང་བྲལ་བའི་ཕྱིར་ཆོས་ཐམས་ཅད་ནི་དོར་བ་མེད་ཅིང་བསྣན་པ་མེད་པའོ། །ཁྱིམ་བདག་རྣམས་སེམས་དང་
ཡིད་དང་རྣམ་པར་ཤེས་པ་དང་བྲལ་བའི་ཕྱིར་ཆོས་ཐམས་ཅད་ནི་བྱེད་པ་མེད་པ་གཡོ་བ་མེད་པའོ། ཁྱིམ་བདག་རྣམས་རང་བཞིན་གྱིས་ཉམས་ཆུང་བའི་ཕྱིར་ཆོས་ཐམས་ཅད་ནི་རྐྱེན་ལ་རག་ལས་པའོ། །ཁྱིམ་བདག་རྣམས་མིག་ནི་འབྱུང་བ་ཆེན་པོ་བཞི་ལས་གྱུར་པ། མི་རྟག་པ། མི་བརྟན་པ། ཐེར་ཟུག་མ་ཡིན་པ། ཉམ་ཆུང་བ། ཞིགས་པ། ཡུན་ཐུང་བ། ཡིད་བརྟན་དུ་མི་རུང་བ། སྡུག་བསྔལ་བ། ནད་མང་བ། གཙེ་བ་མང་བ་ཡིན་ཏེ། ཁྱིམ་བདག་ཁྱེད་རྣམས་ཀྱིས་མིག་དེ་ལ་གནས་པར་མི་བྱའོ། ཁྱིམ་བདག་རྣམས་རྣ་བ་དང་། སྣ་དང་ལྕེ་དང་ལུས་དང་ཡིད་ནི་འབྱུང་བ་ཆེན་པོ་བཞི་ལས་གྱུར་པ། མི་རྟག་པ། མི་བརྟན་པ། ཐེར་ཟུག་མ་ཡིན་པ། ཡིད་བརྟན་དུ་མི་རུང་བ། སྙིང་པོ་མེད་པ། ཞིགས་པ། ནད་ཅན། སྡུག་བསྔལ་བ། ནད་མང་བ། གཙེ་བ་མང་བ་ཡིན་ཏེ། ཁྱིམ་བདག་ཁྱེད་རྣམས་ཀྱིས་ཡིད་དེ་ལ་གནས་པར་མི་བྱའོ། །ཡང་ཁྱིམ་བདག་རྣམས་འདི་ལྟར་བསླབ་པར་བྱ་སྟེ། མིག་འདི་ནི་མཉེར་མི་བཟོད་དེ་དབུ་བ་རྡོས་པ་ལྟ་བུའོ། །མིག་འདི་ནི་རིང་དུ་མི་གནས་ཏེ་ཆུའི་ཆུ་བུར་ལྟ་བུའོ། །མིག་འདི་ནི་ལས་དང་ཉོན་མོངས་པ་དང་། སྲེད་པ་ལས་བྱུང་བ་སྟེ་སྨིག་རྒྱུ་ལྟ་བུའོ། །མིག་འདི་ནི་རང་བཞིན་གྱིས་སྙིང་པོ་མེད་དེ་ཆུ་ཤིང་ལྟ་བུའོ། །མིག་འདི་ནི་ཕྱིན་ཅི་ལོག་ལས་བྱུང་བ་སྟེ། སྒྱུ་མ་ལྟ་བུའོ། །མིག་འདི་ནི་ལོག་པ་དང་། ཡང་དག་པ་མ་ཡིན་པ་མཐོང་བ་སྟེ་རྨི་ལམ་ལྟ་བུའོ། །མིག་འདི་ནི་རྐྱེན་ལ་རག་ལས་པ་སྟེ་བྲག་ཆ་ལྟ་བུའོ། །མིག་འདི་ནི་ལས་ཀྱི་མིག་གཡོར་གྱིས་ཀུན་དུ་སྣང་བ་སྟེ་མིག་གཡོར་ལྟ་བུའོ། །མིག་འདི་ནི་སེམས་འཁྲུག་པ་མེད་པར་འགྱུར་བའི་མཚན་ཉིད་དེ་སྤྲིན་ལྟ་བུའོ། །མིག་འདི་ནི་སྐད་ཅིག་ཏུ་འཇིག་པ་དང་ལྡན་པ་སྟེ། གློག་ལྟ་བུའོ། །མིག་འདི་ནི་བདག་པོ་མེད་དེ། ས་དང་མཚུངས་སོ། །མིག་འདི་ནི་བདག་མེད་དེ་ཆུ་དང་མཚུངས་སོ། །མིག་འདི་ནི་སེམས་ཅན་མེད་དེ་མེ་དང་མཚུངས་སོ། །མིག་འདི་ནི་སྲོག་མེད་དེ་རླུང་དང་མཚུངས་སོ། །མིག་འདི་ནི་གང་ཟག་མེད་དེ་ནམ་མཁའ་དང་མཚུངས་སོ། །མིག་འདི་ནི་འབྱུང་པ་ཆེན་པོའི་ཀུན་གཞི་
སྟེ་ཡང་དག་པ་མ་ཡིན་པའོ། །མིག་འདི་ནི་བདག་དང་བདག་གི་དང་བྲལ་བ་སྟེ་སྟོང་པའོ། །མིག་འདི་ནི་རྩྭ་དང་བརྩིག་པ་དང་། ཤིང་དང་རྡོ་དང་། མིག་ཡོར་ལྟ་བུ་སྟེ་བེམས་པོའོ། མིག་འདི་ནི་རླུང་གི་འཁྲུལ་འཁོར་དང་ལྡན་པར་འབྱུང་སྟེ། བྱེད་པ་མེད་པའོ། མིག་འདི་ནི་གསོག་སྟེ་མི་གཙང་བ་དང་། རྣག་བསགས་པའོ། །མིག་འདི་ནི་གསོབ་སྟེ་གཡོག་པ་ཀུན་དུ་མཉེ་བ་གཞིག་པ་རྣམ་པར་འཐོར་འཇིག་པའི་ཆོས་ཅན་ནོ། མིག་འདི་ནི་རྟག་ཏུ་རྒ་བའི་ཟིལ་གྱིས་ནོན་པ་སྟེ་ཁྲོན་པ་རྙིང་པ་དང་མཚུངས་སོ། །མིག་འདི་ནི་མཐར་འཆི་བ་སྟེ་མཐར་མི་གནས་པའོ། །ཁྱིམ་བདག་རྣམས་མིག་ཇི་ལྟ་བ་དེ་བཞིན་དུ་རྣ་བ་དང་སྣ་དང་ལྕེ་དང་ལུས་དང་ཡིད་ཀྱང་རིག་པར་བྱའོ། །གོང་མ་བཞིན་དུ་སྦྱར་ཏེ་ཆོས་ཐམས་ཅད་ཀྱི་བར་དུ་རིག་པར་བྱའོ། །ཁྱིམ་བདག་རྣམས་གཞན་ཡང་འདི་ལྟ་སྟེ། མིག་འདི་དང་འདི་ལྟ་སྟེ། རྣ་བ་དང་སྣ་དང་ལྕེ་དང་ལུས་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། འདི་ལྟ་སྟེ། ཡིད་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། གཟུགས་འདི་དང་ལྟ་སྟེ། སྒྲ་དང་དྲི་དང་རོ་དང་རེག་བྱ་དང་། ཆོས་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་གཟུགས་ཀྱི་ཕུང་པོ་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་ཚོར་བའི་ཕུང་པོ་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་འདུ་ཤེས་ཀྱི་ཕུང་པོ་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་འདུ་བྱེད་ཀྱི་ཕུང་པོ་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་རྣམ་པར་ཤེས་པའི་ཕུང་པོ་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ། ཁྱིམ་བདག་རྣམས་སའི་ཁམས་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། འདི་ལྟ་སྟེ། ཁྱིམ་བདག་རྣམས་ཆུའི་ཁམས་དང་། མེའི་ཁམས་དང་རླུང་གི་ཁམས་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། །འདི་ལྟ་སྟེ།
ཁྱིམ་བདག་རྣམས་འདུས་བྱས་དང་། འདུས་མ་བྱས་ཀྱི་ཁམས་ཤེས་བྱ་བའི་ཆོས་འདི་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་འདོད་པ་ཙམ་མོ། ། དེ་བས་ན་ཁྱིམ་བདག་ཁྱེད་རྣམས་མི་འདོད་པར་གྱིས་ཤིག མི་འདོད་པར་གྱུར་ནས་བུ་དང་ཆུང་མ་རྣམས་ཉེ་བར་མ་ལེན་ཅིག །ནོར་རྣམས་མ་ལེན་ཅིག །དེ་དག་མི་ལེན་པར་གྱུར་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་གྱིས་ཤིག །དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་མི་འདོད་པར་གྱིས་ཤིག །ཁྱིམ་བདག་རྣམས་རབ་ཏུ་བྱུང་བའི་མི་འདོད་པ་གང་ཞེ་ན། གང་སོ་སོར་ཐར་བའི་སྡོམ་པས་བསྡམས་ཤིང་ཆོ་ག་དང་། སྤྱོད་ཡུལ་ཕུན་ཚོགས་པ། ཁ་ན་མ་ཐོ་བ་རྡུལ་ཙམ་ལ་ཡང་འཇིགས་པར་ལྟ་ཞིང་བསླབ་པའི་གཞི་ཡང་དག་པར་བཟུང་ནས་སློབ་སྟེ། ཚུལ་ཁྲིམས་དང་ལྡན་པར་གནས་པའོ། །ཚུལ་ཁྲིམས་ཀྱི་ཕུང་པོ་དང་ལྡན་པ་ནི་མིག་མི་ལེན། རྣ་བ་དང་སྣ་དང་། ལྕེ་དང་ལུས་དང་ཡིད་མི་ལེན། གཟུགས་མི་ལེན། སྒྲ་དང་དྲི་དང་རོ་དང་། རེག་བྱ་དང་ཆོས་མི་ལེན། གཟུགས་དང་། ཚོར་བ་དང་འདུ་ཤེས་དང་། འདུ་བྱེད་དང་རྣམ་པར་ཤེས་པའི་ཕུང་པོ་མི་ལེན། སའི་ཁམས་མི་ལེན་ཆུའི་ཁམས་མི་ལེན། མེའི་ཁམས་དང་། རླུང་གི་ཁམས་དང་ནམ་མཁའི་ཁམས་དང་། རྣམ་པར་ཤེས་པའི་ཁམས་མི་ལེན་ཏེ། ཁྱིམ་བདག་རྣམས་འདི་ནི་རབ་ཏུ་བྱུང་བའི་མི་འདོད་པའོ། །མི་འདོད་ནས་མིག་གི་ཁམས་མི་ལེན་ཏོ། །གོང་མ་བཞིན་དུ་སྦྱར་ཏེ། ཡིད་ཀྱི་ཁམས་ཀྱི་བར་དུ་མི་ལེན་ཏེ། གོང་མ་བཞིན་དུ་སྦྱར་ཏེ། གང་མི་ལེན་པ་དེ་ཡོངས་སུ་མི་སྤོང་ངོ། ཅི་ཡོངས་སུ་མི་སྤོང་ཞེ་ན། མིག་ཡོངས་སུ་མི་སྤོང་། རྣ་བ་དང་སྣ་དང་ལྕེ་དང་། ལུས་དང་ཡིད་ཡོངས་སུ་མི་སྤོང་། གཟུགས་ཡོངས་སུ་མི་སྤོང་། སྒྲ་དང་དྲི་དང་རོ་དང་རེག་བྱ་དང་། ཆོས་ཡོངས་སུ་མི་སྤོང་། གཟུགས་ཀྱི་ཕུང་པོ་ཡོངས་སུ་མི་སྤོང་། ཚོར་བའི་ཕུང་པོ་ཡོངས་སུ་མི་སྤོང་། འདུ་ཤེས་ཀྱི་ཕུང་པོ་ཡོངས་སུ་མི་སྤོང་། འདུ་བྱེད་ཀྱི་ཕུང་པོ་ཡོངས་སུ་མི་སྤོང་། རྣམ་པར་ཤེས་པི་ཕུང་པོ་ཡོངས་སུ་མི་སྤོང་། སའི་ཁམས་ཡོངས་སུ་མི་སྤོང་། ཆུའི་ཁམས་ཡོངས་སུ་མི་སྤོང་། མེའི་
ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་ཀྱི་བར་དུ་ཡོངས་སུ་མི་སྤང་ངོ་། དེ་ནས་མི་སྤོང་བ་དེ་ན་དེ་ཀུན་ནས་ཉོན་མོངས་པར་མི་འགྱུར། ཀུན་ནས་ཉོན་མོངས་པ་མེད་ན་ཡང་བར་འགྱུར་རོ། །དེ་ནམ་ཡང་བར་གྱུར་པ་དེ་དེ་མི་སྣང་བར་འགྱུར་རོ། །དེ་ནམ་མི་མང་བ་དེ་ན་གང་ལ་ཡང་ཁོང་ཁྲོ་བར་མི་བྱེད་དོ། །དེ་ནམ་ཁོང་ཁྲོ་བར་མི་བྱེད་པ་དེ་ན་བདག་ལ་གནོད་པར་མི་སེམས། གཞན་ལ་གནོད་པར་མི་སེམས། གཉིས་ག་ལ་གནོད་པར་མི་སེམས་ཏེ། དེ་གནོད་པར་མི་སེམས་པས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའོ། །ཁྱིམ་བདག་རྣམས་དེ་ལ་གང་ཡོངས་སུ་མྱ་ངན་ལས་འདའ་ཞེ་ན། དེ་ལ་མིག་ཡོངས་སུ་མྱ་ངན་ལས་མི་འདའ། རྣ་བ་དང་སྣ་དང་ལྕེ་དང་ལུས་དང་། ཡིད་ཡོངས་སུ་མྱ་ངན་ལས་མི་འདའ་མོད་ཀྱི། ཁྱིམ་བདག་རྣམས་གང་མིག་ལ་བརྟེན་ནས་ང་ཞེ་འམ། ངའི་ཞེས་ཡང་དག་པ་མ་ཡིན་པ་འཛིན་པ་དེ་དང་བྲལ་བ་ནི་ཡོངས་སུ་མྱ་ངན་ལས་འདའ་བའོ། གང་དང་བྲལ་བ་ཡོངས་སུ་མྱ་ངན་ལས་འདས་པ་ཡིན་ཞེ་ན། འདོད་ཆགས་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། །ཞེ་སྡང་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། །གཏི་མུག་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། །མི་ཤེས་པ་དང་བྲལ་བ་ནི་ཡོངས་སུ་མྱ་ངན་ལས་འདས་པ་སྟེ། ཡང་ཁྱིམ་བདག་རྣམས་མི་ཤེས་པ་ནི་འདས་པ་ལ་མེད་པར་མ་གྱུར། ད་ལྟར་བྱུང་བ་དང་མ་འོངས་པ་ལ་མེད་པར་མ་གྱུར་མོད་ཀྱི། མི་ཤེས་པ་དང་བྲལ་ནས་ཤེས་པ་སྐྱེས་སོ། །ཁྱིམ་བདག་རྣམས་དེ་ལ་ཤེས་པ་གང་ཞེ་ན། འདི་ལྟ་སྟེ། ཟད་པ་ཤེས་པའོ། །དེ་ལ་ཟད་པ་ཤེས་པ་གང་ཞེ་ན། ཟད་པ་ཤེས་པ་ནི་འདས་པ་མ་ཡིན། ། ཟད་པ་ཤེས་པ་ནི་མ་འོངས་པ་མ་ཡིན། ཟད་པ་ཤེས་པ་ནི་ད་ལྟར་བྱུང་བ་མ་ཡིན་མོད་ཀྱི། ཁྱིམ་བདག་རྣམས་གང་ལ་བརྟེན་ཏེ་མི་ཤེས་པ་དང་བྲལ་ནས་ཤེས་པ་སྐྱེས་པར་གྱུར་པ་དེ་ནི་མི་ཤེས་པ་དང་བྲལ་བའི་ཤེས་པའོ། །མིག་
ལ་བརྟེན་ནས་མི་ཤེས་པ་དང་བྲལ་ཞིང་ཤེས་པ་སྐྱེས་ཀྱང་མིག་ནི་ངའི་བ་མ་ཡིན་ནོ། གང་ངའི་བ་མ་ཡིན་པ་དེ་ཡོངས་སུ་མ་བཟུང་བའོ། གང་ཡོངས་སུ་མ་བཟུང་བ་དེ་སྤངས་པའོ། གང་སྤངས་པ་དེ་གྲོལ་བའོ། གང་ལས་གྲོལ་ཞེ་ན། བདག་ཏུ་འཛིན་པ་ལས་གྲོལ། སེམས་ཅན་དུ་འཛིན་པ་ལས་གྲོལ། སྲོག་ཏུ་འཛིན་པ་དང་། གང་ཟག་ཏུ་འཛིན་པ་དང་། ཆད་པར་འཛིན་པ་དང་། རྟག་པར་འཛིན་པ་ལས་གྲོལ། འཛིན་པ་ཐམས་ཅད་ལས་གྲོལ། ཡོངས་སུ་རྟོག་པ་ལས་གྲོལ་ཏེ། དེ་ཡོངས་སུ་མི་རྟོག་གོ །ཡོངས་སུ་མི་རྟོག་པས་མི་རྟོག་རྣམ་པར་མི་རྟོག་གོ །ཅི་ལ་མི་རྟོག་ཅེ་ན། ང་དང་ངའི་ཞེས་མི་རྟོག་སྟེ། དེ་མི་སོགས་ཤིང་སོགས་པར་མི་བྱེད་ལ་སྤོང་ཞིང་མི་ལེན་ཏོ། །སྤངས་པས་ཡོངས་སུ་མྱ་ངན་ལས་འདས་སོ། །གྲོལ་ལོ་བྱུང་ངོ་། །རབ་ཏུ་རྣམ་པར་གྲོལ་ལོ། །བྲལ་ལོ་གང་ལས་བྱུང་ཞེ་ན། སྡུག་བསྔལ་ཐམས་ཅད་ལས་བྱུང་ངོ་། །ཁྱིམ་བདག་ཁྱེད་རྣམས་འབྱུང་བར་འདོད་ན། ཆོས་གང་ཡང་བླང་བར་མི་བྱའོ། །དེ་ཅིའི་ཕྱིར་ཞེ་ན། ཁྱིམ་བདག་རྣམས་ལེན་པས་ནི་སྲིད་པར་འགྱུར་རོ། །མི་ལེན་པས་ནི་སྲིད་པ་མེད་དོ། །དེ་ལ་ཁྱིམ་བདག་རྣམས་མིག་ཡོངས་སུ་མྱ་ངན་ལས་འདས་པ་མ་ཡིན་ནོ། །གོང་མ་བཞིན་དུ་སྦྱར་ཏེ། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་བར་དུ་ཡོངས་སུ་མྱ་ངན་ལས་འདས་པ་མ་ཡིན་པ་ནས། རྣམ་པར་ཤེས་པའི་ཁམས་ཀྱི་བར་དུ་ཡོངས་སུ་མྱ་ངན་ལས་འདས་པ་མ་ཡིན་མོད་ཀྱི། ཁྱིམ་བདག་རྣམས་གང་རྣམ་པར་ཤེས་པ་ལ་བརྟེན་ཏེ། ང་དང་ངའི་ཞེས་ཡང་དག་པ་མ་ཡིན་པར་འཛིན་པ་དེ་དང་བྲལ་བ་དེ་ནི་ཡོངས་སུ་མྱ་ངན་ལས་འདས་པའོ། གང་དང་བྲལ་ན་ཡོངས་སུ་མྱ་ངན་ལས་འདས་པ་ཡིན་ཞེ་ན། འདོད་ཆགས་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། ཞེ་སྡང་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། །གཏི་མུག་དང་བྲལ་བ་ནི་ཡོངས་སུ་མྱ་ངན་ལས་འདས་པའོ། །མི་ཤེས་པ་དང་བྲལ་བ་ནི་ཡོངས་སུ་མྱ་ངན་ལས་འདས་པ་སྟེ། ཡང་ཁྱིམ་བདག་རྣམས་མི་ཤེས་པ་ནི་འདས་པ་
དང་། ད་ལྟར་དང་། མ་འོངས་པ་ལ་མེད་པར་གྱུར་པ་མ་ཡིན་མོད་ཀྱི། མི་ཤེས་པ་དང་བྲལ་ནས་ཤེས་པ་སྐྱེས་སོ། །ཁྱིམ་བདག་རྣམས་དེ་ལ་ཤེས་པ་གང་ཞེ་ན། འདི་ལྟ་སྟེ། ཟད་པ་ཤེས་པའོ། །དེ་ལ་ཟད་པ་ཤེས་པ་གང་ཞེ་ན། ཟད་པ་ཤེས་པ་ནི་འདས་པ་མ་ཡིན། ཟད་པ་ཤེས་པ་ནི་མ་འོངས་པ་མ་ཡིན། ཟད་པ་ཤེས་པ་ནི་ད་ལྟར་བྱུང་བ་མ་ཡིན་མོད་ཀྱི། ཁྱིམ་བདག་རྣམས་མིག་ལ་བརྟེན་ཏེ། མི་ཤེས་པ་དང་བྲལ་ནས་ཤེས་པ་སྐྱེས་པར་གྱུར་པ་དེ་ནི་མི་ཤེས་པ་དང་བྲལ་བའི་ཤེས་པའོ། མིག་ལ་བརྟེན་ཏེ་མི་ཤེས་པ་དང་བྲལ་ནས་ཤེས་པ་སྐྱེས་ཀྱང་ཤེས་པའི་དབྱིངས་ནི་ངའི་བ་མ་ཡིན་ནོ། །གང་ངའི་བ་མ་ཡིན་པ་དེ་ཡོངས་སུ་མ་བཟུང་བའོ། །གང་ཡོངས་སུ་མ་བཟུང་བ་དེ་སྤངས་པའོ། །གང་སྤངས་པ་དེ་གྲོལ་བའོ། །གང་ལས་གྲོལ་ཞེ་ན། བདག་ཏུ་འཛིན་པ་ལས་གྲོལ། སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པ་དང་། ཆད་པ་འཛིན་པ་དང་། རྟག་པར་འཛིན་པ་ལས་གྲོལ། ཡོངས་སུ་རྟོག་པ་ལས་གྲོལ་ཏེ། དེ་ཡོངས་སུ་མི་རྟོག་གོ ཡོངས་སུ་མི་རྟོག་པས་མི་རྟོག་རྣམ་པར་མི་རྟོག་ག།ོ ཅི་ལ་མི་རྟོག་ཅེ་ན། ང་ཞེས་མི་རྟོག །ངའི་ཞེས་མི་རྟོག་སྟེ། དེ་མི་སོགས་ཤིང་སོགས་པ་མེད་དེ། ལེན་པ་མེད་ཅིང་སྤངས་པས་ཡོངས་སུ་མྱ་ངན་ལས་འདས་སོ། །གྲོལ་ལོ། །བྱུང་ངོ་། །རབ་ཏུ་རྣམ་པར་གྲོལ་ལོ། །བྲལ་ལོ། །གང་ལས་བྱུང་ཞེ་ན། སྡུག་བསྔལ་ཐམས་ཅད་ལས་བྱུང་ངོ་། །ཁྱིམ་བདག་ཁྱེད་རྣམས་འབྱུང་བར་འདོད་ན་ཆོས་གང་ཡང་བླང་བར་མི་བྱའོ། །དེ་ཅིའི་ཕྱིར་ཞེ་ན། ཁྱིམ་བདག་རྣམས་ལེན་པས་ནི་སྲིད་པར་འགྱུར་གྱི། མི་ལེན་པས་ནི་མ་ཡིན་ནོ། །དེ་ནས་བཅོམ་ལྡན་འདས་ཀྱི་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ལེན་པ་ལས་ནི་འཇིགས་སྐྱེ་སྟེ། དེ་ཕྱིར་ངན་འགྲོར་འགྲོ་བར་འགྱུར། །འཇིགས་བཅས་གནས་ནི་འདི་མཐོང་ནས། མཁས་པས་དེ་ནི་མི་ལེན་ཏོ། །ལམ་གང་ཉིད་ལ་བསྒོམ་བྱ་བ། །ཤེས་རབ་ཀྱིས་ནི་དེ་བལྟ་སྟེ། །ཤེས་རབ་ཀྱིས་ནི་མཐོང་འགྱུར་བས། །རྣམ་པ་གཞན་དུ་མི་འགྱུར་
རོ། །སྐྱེ་མཆེད་ཐམས་ཅད་སྟོང་པ་སྟེ། །སྙིང་པོ་མེད་པ་གཡོ་ཞིང་གསོག །སྐྱེ་དགུ་རྣམས་ནི་སྲེད་པས་བསླུས། །དེ་ལ་ཆགས་པར་མི་བྱའོ། །ཆོས་རྣམས་སྟོང་པར་ངས་མཁྱེན་ཏེ། །ཆོས་རྣམས་སྙིང་པོ་མེད་པར་མཁྱེན། བདེ་བརྙེས་མྱ་ངན་མི་མཛད་དེ། །ངས་ནི་མི་གཡོ་བདེ་བ་བརྙེས། །གང་གིས་འདི་ལྟར་ཆོས་རྣམས་ཀུན། །སྟོང་པ་ཉིད་དུ་ཤེས་པ་དེ། །སྡུག་བསྔལ་དག་ནི་ཀུན་ལས་ཐར། །དེ་ལ་བརྩོད་པ་མེད་པ་ཡིན། །འདོད་པ་འདི་ནི་ཡོངས་སུ་འཛིན་ཀུན་དང་། གཙེ་བ་ཐམས་ཅད་ཀྱི་ཡང་སྐྱེ་བ་ཡིན། །ཡོངས་སུ་འཛིན་པ་དག་ལས་ལེན་པར་གསུངས། ལེན་པ་དག་ལས་སྲིད་པ་འབྱུང་བར་འགྱུར། །སྲིད་པ་ལས་ནི་རྫོགས་སྐྱེ་སྐྱེ་བ་སྟེ། །དེ་ནི་འཇུག་པ་དག་དང་འགྲུབ་པར་འགྱུར། །སྐྱེས་ནས་ནད་དང་རྒ་དང་འཆི་བ་དང་། །མི་འདོད་སྡུག་བསྔལ་ཆེན་པོ་གཞན་དག་གནོད། འདོད་པ་མེད་ན་ལེན་པ་ཡོད་མ་ཡིན། །ལེན་པ་མེད་ན་སྲིད་པར་མི་འགྱུར་ཏེ། །སྲིད་པ་མངོན་པར་འགྲུབ་པ་ལས་འདས་པ་ནི། །སྐྱེ་རྒ་ན་དང་འཆི་བར་མི་འགྱུར་རོ། །དེ་ཕྱིར་ཁྱེད་ཀུན་གཅིག་ཏུ་འདུས་གྱུར་ནས། །ཡོངས་སུ་འཛིན་པ་རྣམ་པར་སྤང་བྱོས་ལ། །བུ་དང་ཆུང་མ་དག་ལ་དགའ་སྤོངས་ཏེ། །དགེ་སློང་ཚུལ་འདི་མྱུར་དུ་བླང་བར་བྱོས། །ཤེས་ཀྱི་ཁེ་འདོད་རྙེད་པ་འདོད་མ་བྱེད། །ངན་དོན་ཙམ་དག་གིས་ནི་ཆོག་བྱོས་ལ། །གདོལ་པ་དག་དང་འདྲ་བའི་དམའ་སེམས་ཀྱིས། །གཞན་གྱི་གྲོང་དུ་ཉེ་བར་འགྲོ་བར་བྱ། །ང་ནི་ཚུལ་ཁྲིམས་ལྡན་ཞེས་བདག་གམ་སྙེམས། །འདི་ནི་ཚུལ་ཁྲིམས་ངན་ཞེས་གཞན་མ་བརྙས། །ཚུལ་ཁྲིམས་ཙམ་གྱིས་གཞན་ལ་གང་བརྙས་པ། །སྙེམས་ཕྱིར་དེ་ནི་ཚུལ་ཁྲིམས་འཆལ་ཅེས་བྱ། །ཇི་ལྟར་རི་དགས་དག་ནི་རྒྱས་ཟིན་པ། །དེ་དག་ཉིད་དུ་དེ་ཟིན་གསོད་པ་ལྟར། །དེ་བཞིན་བདུད་ཀྱི་ཞགས་པས་ཟིན་པ་དེ། །སྙེམས་པ་དེ་ཉིད་ཀྱིས་ནི་དེ་བཅོམ་མོ། །འཕྱ་བའི་བསམ་པ་ཅན་གྱི་གང་ཟག་དག །གཞན་ལ་བརྙས་པས་བདག་ཉིད་ཉམས་པར་བྱེད། །དེ་བས་ཚུལ་ཁྲིམས་འཆལ་ལའང་མི་བརྙས་ན། །ཁྲིམས་ལྡན་ཚངས་པར་སྤྱོད་ལ་སྨོས་ཅི་
དགོས། །དྲང་སྲོད་ངེས་པའི་རྗེས་སུ་སློབ་པ་དག །རྣམ་པར་གྲོལ་བ་ཞི་བ་འདི་ཚོལ་ཞིང་། །ལུས་དང་སྲོག་རྣམས་ལ་ཡང་མི་ལྟ་བར། །རྟག་ཏུ་དབེན་པ་དགོན་པར་གནས་པར་བྱ། །གནོད་པའི་རྩ་བ་གཅིར་བུའི་གསུང་ཚིག་དང་། །འཇིག་རྟེན་རྒྱང་པན་གསང་ཚིག་རྣམས་སྤོངས་ལ། །སྟོང་པ་ཉིད་དང་ལྡན་པར་གང་གསུངས་པ། །ཟབ་མོའི་ཆོས་ལ་དགའ་བ་བསྐྱེད་པར་བྱོས། །ནང་དང་ཕྱི་རོལ་དག་གི་སྐྱེ་མཆེད་ནི། །བཅུ་གཉིད་པོ་སྟེ་སེམས་ཀྱི་རྩ་བར་བཤད། །དེ་དག་ཀུན་ཀྱང་ལས་ཀྱི་རྒྱུ་ལས་བྱུང་ངོ་། །ལས་ཀྱང་ཡུན་རིང་སེམས་པས་བཞག་པའོ། །མིག་དང་གཟུགས་གཉིས་ལ་ནི་བརྟེན་བྱས་ནས། །རྐྱེན་རྣམས་ལས་ཀྱང་རྣམ་པར་ཤེས་པ་སྐྱེ། །འདུ་བ་མ་ཚང་བས་ནི་ནུབ་གྱུར་ཏེ། །ཇི་ལྟར་ཤིང་མེད་མེ་ནི་མི་འབར་བཞིན། །དེ་ལྟར་ཆོས་འདི་ཐམས་ཅད་རབ་སྐྱེས་པ། །ཕུན་ཚུན་འདུས་པ་ལས་ནི་འབྱུང་བར་འགྱུར། །བྱེད་པ་པོ་དག་ཚོར་བ་མི་དམིགས་ཏེ། །བྱ་བ་དག་ནི་སྒྱུ་མ་ལྟ་བུར་སྣང་། །དས་ནི་ནང་དང་ཕྱི་རོལ་ཆོས་རྣམས་ཀུན། །སྟོང་པ་ཉིད་དེ་སྒྱུ་མ་འདྲ་བར་མཁྱེན། །བྱིས་པ་མི་ཤེས་ལོག་པར་འཛིན་པ་དག །ང་དང་ང་ཡི་ཞེས་ཀྱང་རྣམ་པར་རྟོག །མིག་ནི་ནང་ན་ཅུང་ཟད་ཡོད་མ་ཡིན། །ཕྱི་རོལ་གང་དུའང་སེམས་ཅན་མི་དམིགས་ཏེ། །མིག་ནི་བདག་མེད་བྱེད་མེད་སྲོག་མེད་དེ། །ཆོས་རྣམས་ཀུན་ཀྱང་དེ་ལྟར་ཤེས་པར་བྱོས། །མིག་ནི་སེམས་ཤིང་གྲོལ་བར་འདོད་མ་ཡིན། །དེ་བཞིན་རྣ་བ་དང་ནི་སྣ་དང་ལྕེ། །ལུས་དང་ཡིད་དང་གཟུགས་ཀྱང་བྱེད་མེད་དེ། །ཆོས་རྣམས་ཐམས་ཅད་དེ་དང་འདྲ་བར་ལྟོས། །ཇི་ལྟར་རྒྱ་མཚོ་དག་གི་ཚུ་ལས་ནི། །དབུ་བ་རྔོས་པ་ཆེན་པོ་མང་བྱུང་བ། །དེ་ལ་མིག་ལྡན་ཚུལ་བཞིན་དེས་བརྟགས་ན། །དབུ་བ་རྔོས་པ་ཉམ་ཆུང་སྙིང་པོ་མེད། །དེ་བཞིན་ཕུང་པོ་ལྔ་ཡི་ངོ་བོ་ཉིད། །དབུ་བ་ལྟ་བུར་ཉམ་ཆུང་གང་ཤེས་པ། །གཙེ་བ་ཐམས་ཅད་དག་ནི་སྐྱེ་བ་དང་། །རྒ་དང་མྱ་ངན་གཙེ་ལས་གྲོལ་བར་འགྱུར། །གང་དང་ང་ཡི་བསྟན་ལ་རབ་བྱུང་ནས། །ཆོས་ཀུན་སྒྱུ་མ་ལྟ་བུར་ཤེས་པ་དེ། །ཡུལ་གྱི་བསོད་སྙོམས་འབྲས་བུ་ཡོད་པར་ཟ། །དེ་ནི་ཕྱོགས་
བཅུའི་སངས་རྒྱས་མཆོད་པར་བྱེད། དེ་ནས་ཁྱིམ་བདག་ལྔ་བརྒྱ་ཙམ་པོ་ས་ཕྱོགས་དེ་ཉིད་ན་གནས་པ་དེ་དག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །འདི་ལྟ་སྟེ་དཔེར་ན། གོས་དག་པ་ནག་པོ་དང་བྲལ་བ་ཚོན་དུ་བཅུག་ན་མྱུར་དུ་ཚོན་འཛིན་པ་དེ་བཞིན་དུ་ཁྱིམ་བདག་ལྔ་བརྒྱ་ཙམ་པོ་ས་ཕྱོགས་དེ་ཉིད་ན་གནས་པ་དེ་དག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །དེ་ནས་བཅོམ་ལྡན་འདས་ཀྱིས་ཁྱིམ་བདག་ལྔ་བརྒྱ་ཙམ་པོ་དེ་དག་ལ་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་གཟེད་སྟོང་། ཡང་དག་པར་རབ་ཏུ་དགའ་བར་བྱས་སོ། ། དེ་ལས་བཅོམ་ལྡན་འདས་ཀྱི་གཏམ་ནི་འདི་ཡིན་ཏེ། ཁྱིམ་བདག་རྣམས་མིག་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང་ཞེས་སྡང་གི་མེ་དང་། གཏི་མུག་གི་མེས་ཀུན་དུ་འབར་རོ། །སྐྱེ་བ་དང་། རྒ་བ་དང་། ན་བ་དང་། འཆི་བ་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པས་ཀུན་དུ་འབར་ཏེ། བདག་གིར་བྱ་བ་སྡུག་བསྔལ་ལོ་ཞེས་བཤད་དོ། །ཁྱིམ་བདག་རྣམས་རྣ་བ་དང་སྣ་དང་ལྕེ་དང་ལུས་དང་། ཡིད་ཀྱི་བར་དུ་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེ་དང་། སྐྱེ་བ་དང་རྒ་བ་དང་ན་བ་དང་འཆི་བ་དང་། མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པས་ཀུན་དུ་འབར་ཏེ། བདག་གིར་བྱ་བ་སྡུག་བསྔལ་ལོ་ཞེས་བཤད་དོ། །ཁྱིམ་བདག་རྣམས་གཟུགས་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་དུ་འབར་རོ། །དེ་ལྟར་སྒྲ་དང་དྲི་དང་རོ་དང་རེག་བྱ་དང། ཆོས་རྣམས་ཀྱང་གོང་མ་བཞིན་དུ་སྦྱར་རོ། ཁྱིམ་བདག་རྣམས་གཟུགས་ཀྱི་ཕུང་པོ་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང། ཞེ་སྡང་གི་མེ་དང། གཏི་མུག་གི་མེས་ཀུན་དུ་འབར་རོ། །ཚོར་བའི་ཕུང་པོ་དང་།
འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་ཡང་དེ་བཞིན་ནོ། ཁྱིམ་བདག་རྣམས་སའི་ཁམས་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་དུ་འབར་རོ། །ཁྱིམ་བདག་རྣམས་ཆུའི་ཁམས་དང་། མེའི་ཁམས་དང་རླུང་གི་ཁམས་དང་ནམ་མཁའི་ཁམས་ཀུན་དུ་འབར་ཏེ། ཅིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་དུ་འབར་རོ། །སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་། སྨྲེ་སྔགས་འདོན་དང་། སྡུག་བསྔལ་བ་དང་། ཡིད་མི་བདེ་བ་དང་འཁྲུག་པས་ཀུན་དུ་འབར་ཏེ། བདག་གིར་བྱ་བ་སྡུག་བསྔལ་ལོ་ཞེས་བཤད་དོ། དེ་བས་ན་ཁྱིམ་བདག་རྣམས་མིག་བླང་བར་མི་བྱའོ་ཞེས་ཁྱིམ་བདག་རྣམས་རྣམས་དེ་ལྟར་བསླབས་པར་བྱའོ། །དེ་བཞིན་དུ་ཁྱིམ་བདག་རྣམས་རྣ་བ་དང་སྣ་དང་ལྕེ་དང་ལུས་དང་ཡིད་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས་གཟུགས་བླང་བར་མ་བྱ། སྒྲ་དང་དྲི་དང་རོ་དང་རེག་བྱ་དང་། ཆོས་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །ཁྱིམ་བདག་རྣམས་གཟུགས་ཀྱི་ཕུང་པོ་བླང་བར་མི་བྱ། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས་སའི་ཁམས་བླང་བར་མི་བྱ། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས་རྣམ་པར་ཤེས་པའི་ཁམས་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས་འཇིག་རྟེན་འདི་བླང་བར་མི་བྱ། འཇིག་རྟེན་ཕ་རོལ་བླང་བར་མི་བྱའོ་ཞེས་ཁྱིམ་བདག་རྣམས་དེ་ལྟར་བསླབ་པར་བྱའོ། །ཁྱིམ་བདག་ཁྱེད་རྣམས་ནམ་མིག་མི་ལེན་ཅིང་། རྣ་བ་དང་སྣ་དང་ལྕེ་དང་ལུས་དང་ཡིད་མི་ལེན་པ་དེ་ན་ཁྱེད་རྣམས་མི་གནས་ཡིད་ཀྱི་
བར་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་གཟུགས་མི་ལེན་ཅིང་། སྒྲ་དང་དྲི་དང་རོ་དང་རེག་བྱ་དང་། ཆོས་རྣམས་མི་ལེན་པ་དེ་ན་ཁྱེད་རྣམས་ཆོས་ཐམས་ཅད་ལ་མི་གནས་པར་འགྱུར་རོ། ཁྱིམ་བདག་ཁྱེད་རྣམས་ནམ་གཟུགས་ཀྱི་ཕུང་པོ་མི་ལེན་ཅིང་ཚོར་བའི་ཕུང་པོ་དང་འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་མི་ལེན་པ་དེ་ན་ཁྱེད་རྣམས་ཕུང་པོ་རྣམས་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་རྣམ་པར་ཤེས་པའི་ཕུང་པོ་མི་ལེན་པ་དེ་ན་ཁྱེད་རྣམས་རྣམ་པར་ཤེས་པའི་ཕུང་པོ་ལ་མི་གནས་པར་འགྱུར་རོ། ཁྱིམ་བདག་ཁྱེད་རྣམས་ནམ་སའི་ཁམས་མི་ལེན་ཅིང་ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་མི་ལེན་པ་དེ་ན་ཁྱེད་རྣམས་ཁམས་རྣམས་ལ་མི་གནས་པར་འགྱུར་རོ། ཁྱིམ་བདག་ཁྱེད་རྣམས་ནམ་རྣམ་པར་ཤེས་པའི་ཁམས་མི་ལེན་པ་དེ་ན་ཁྱེད་རྣམས་རྣམ་པར་ཤེས་པའི་ཁམས་ལ་མི་གནས་པར་འགྱུར་རོ། ཁྱིམ་བདག་ཁྱེད་རྣམས་ནམ་འཇིག་རྟེན་འདི་ལི་ལེན་ཅིང་འཇིག་རྟེན་ཕ་རོལ་མི་ལེན་པ་དེ་ན་ཁྱེད་རྣམས་འཇིག་རྟེན་ཐམས་ཅད་ལ་མི་གནས་པར་འགྱུར་རོ། ཁྱིམ་བདག་ཁྱེད་རྣམས་ནམ་ཆོས་ཐམས་ཅད་མི་ལེན་པ་དེ་ན་ཁྱེད་རྣམས་ཆོས་ཐམས་ཅད་ལ་མི་གནས་པར་འགྱུར་རོ། ཁྱིམ་བདག་ཁྱེད་རྣམས་ནམ་ཆོས་ཐམས་ཅད་ལ་མི་གནས་པ་དེ་ན་ཁྱེད་རྣམས་མི་འབྱུང་མི་འཇིག་ག།ོ ཁྱེད་རྣམས་ནམ་མི་འབྱུང་མི་འཇིག་པ་དེ་ན་ཁྱེད་རྣམས་སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་ཐར་པར་འགྱུར་ཏེ། སྡུག་བསྔལ་ལས་ཡོངས་སུ་ཐར་པར་འགྱུར་རོ། །ཞེས་བཤད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྐྱེ་བ་དང་ནི་འཆི་བ་ཡིས། །འཇིག་རྟེན་འདི་ཀུན་ཀུན་ནས་འབར། །བྱིས་པ་སྐྱབས་མེད་གཙེ་བ་སྟེ། །དེ་དག་འཕགས་པའི་ལམ་ལས་ཉམས། །བརྒྱ་ལམ་འཇིག་རྟེན་སྣང་མཛད་དང་། །དེ་བཞིན་གཤེགས་པ་འབྱུང་
བར་འགྱུར། །དལ་བ་ཆུང་ཟོས་མ་བྱེད་བར། །བརྩོན་འགྲུས་བརྟན་པ་རྩོམ་བྱོས་ཤིག །གང་ལ་གནས་ཏེ་རྣམ་སྒོམ་པ། །ཤེས་རབ་ཀྱིས་ནི་དེ་ཡང་ལྟོས། ཤེས་རབ་ཀྱིས་ནི་དེ་མཐོང་སྟེ། །རྣམ་པར་གཞན་དུ་མི་འགྱུར་རོ། །གང་ལ་གནས་ཏེ་སེམས་སྒོམ་པ། །ཐམས་ཅད་སྟོང་པར་ཤེས་པར་བྱ། །ཆོས་རྣམས་སྟོང་པར་རིག་ནས་ནི། །བྱང་ཆུབ་ཉིད་ཀྱང་སྟོང་པ་ཡིན། །འདོད་ཆགས་ཞེ་སྡང་དེ་བཞིན་གཏི་མུག་དང་། །མེ་གསུམ་དེ་དག་ཤིན་དུ་མི་བཟད་པ། །དེས་ནི་འཇིག་རྟེན་འདི་ཀུན་རབ་འབར་ཡང་། །བྱིས་པ་རིང་ནས་གཉིད་ལོག་ཁོང་མི་ཆུད། སྐྱེ་དང་རྒ་དང་ན་དང་འཆི་བ་དང་། །སྨྲེ་སྔགས་འདོན་དང་སྡུག་བསྔལ་ཡིད་མི་བདེས། །འཇིག་རྟེན་འདི་དག་གཙེས་པར་རིག་ནས་ནི། །ཆོས་རྣམས་ཀུན་ལ་གནས་པར་མ་བྱེད་ཅིག །དེ་ནས་བཅོམ་ལྡན་འདས་ཁྱིམ་བདག་ལྔ་བརྒྱ་ཙམ་པོ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱིས་བཅོམ་ལྡན་འདས་ལས་རབ་ཏུ་བྱུང་བ་རྙེད་པར་གྱུར་ཅིག་བདག་ཅག་རྣམས་ཀྱིས་བདེ་བར་གཤེགས་པ་ལས་བསྙེན་པར་རྫོགས་པ་དགེ་སློང་གི་དངོས་པོ་རྙེད་པར་གྱུར་ཅིག །བཅོམ་ལྡན་འདས་ཀྱིས་དགེ་སྲོང་དག་ཚུར་ཤོག་ཅེས་གསུངས་པ་དང་། དེ་ཉིད་ཀྱིས་ཚེ་དང་ལྡན་པ་དེ་དག་རབ་ཏུ་བྱུང་བར་གྱུར་ཏེ། དེ་ཉིད་ཀྱིས་བསྙེན་པར་རྫོགས་པ་དང་། དེ་ཉིད་ཀྱིས་དགེ་སློང་གི་དངོས་པོར་གྱུར་ཏོ། །འདི་ལ་ཆོས་ཉིད་ནི་འདི་ཡིན་ཏེ། དེ་ལ་སྐད་ཅེས་བྱའོ། །དེ་དག་གིས་ནི་ངུར་སྨྲིག་བགོས། དེ་དག་གིས་ནི་སྐྲ་ཡང་བྲེགས། །ཀུན་ཀྱང་ལྷུང་བཟེད་ཐོགས་གྱུར་ནས། །དེ་ཉིད་ཏུ་ནི་དགྲ་བཅོམ་གྱུར། །སྟོན་པས་དགྲ་བཅོམ་རབ་མཁྱེན་ནས། །དགེ་སློང་གི་ནི་དགེ་འདུན་དང་། །ལྷ་རྣམས་མདུན་དུ་མངོན་སུམ་དུ། །ཆེད་དུ་རྗོད་པ་ཆེད་ཏུ་བརྗོད། །འཇིག་རྟེན་གྱི་ནི་མགོན་པོ་ལ། །སྔོན་ཆང་སྦྱིན་པ་བྱིན་པས་ན། །གང་ན་བདེ་བ་མང་བ་དེར། །ཤིན་དུ་དགའ་ཞིང་འོངས་པར་གྱུར། །དེ་དག་གིས་ནི་ང་མཐོང་ནས། །དད་པས་རབ་ཏུ་སྐྱེད་པར་གྱུར། །དེ་དག་སེམས་ནི་དད་པ་ལ། །ཆོས་རྣམས་ཀྱི་ནི་མཆོག་བསྟན་ཏོ། །དགྲ་བཅོམ་གྱི་ནི་གསུངས་ཐོས་ན། །བདག་ཏུ་ལྟ་བ་རྣམ་པར་ཤིག །སྟོང་ཉིད་མངོན་དུ་བྱས་
ནས་ནི། །དེ་དག་སྐྱེ་བ་ཀུན་ལས་གྲོལ། །ཁྱིམ་བདག་གི་ལེའུ་ཞེས་བྱ་སྟེ། །དང་པོའོ། །