གཉིས་པ། གནོད་སྦྱིན་ཅི་འཇིགས་ཀྱི་ལེའུ།
དེ་ནས་བཅོམ་ལྡན་འདས་ཀྱིས་ལམ་གྱི་བར་དུ་ཁྱིམ་བདག་ལྔ་བརྒྱ་པོ་མི་གཡོ་བའི་གནས་ལ་བཀོད་ནས་ཀུན་ནས་མཛས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་སོ། དེ་ནས་རྒྱལ་པོའི་ཁབ་ཀྱི་གྲོང་ཁྱེར་གྱི་ལྷ་རྣམས་དང་། གནོད་སྦྱིན་ཅི་འཇིགས་འདི་སྙམ་དུ་སེམས་ཏེ། བདག་ཅག་གིས་འདི་ལྟ་བུ་སྦྱིན་གནས་འཇིག་རྟེན་ཤིན་དུ་དཀོན་པའི་བཅོམ་ལྡན་འདས་ལ་བསོད་སྙོམས་དབུལ་ལོ་སྙམ་མོ། །དེ་ནས་གནོད་སྦྱིན་ཅི་འཇིགས་ཀྱིས་བསོད་སྙོམས་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ། རེག་ཕུན་སུམ་ཚོགས་པ། བཅོམ་ལྡན་འདས་ལ་ཕུལ་ནས་གནོད་སྦྱིན་ཅི་འཇིགས་ལ་ཐུགས་བརྩེ་བའི་སླད་ཏུ་བཅོམ་ལྡན་འདས་ཀྱིས་བསོད་སྙོམས་དེ་བཞེས་སོ། །བཅོམ་ལྡན་འདས་ལ་གནོད་སྦྱིན་ཅི་འཇིགས་ཀྱི་བསོད་སྙོམས་ཕུལ་མ་ཐག་ཏུ་དེ་ནས་དེའི་ཚེ་སྟེང་གི་བར་སྣང་ལས་ཅི་འཇིགས་ཀྱི་འཁོར་མང་པོ་གནོད་སྦྱིན་དྲུག་ཁྲི་བརྒྱད་སྟོང་གིས་ལེགས་སོ་ཞེས་བྱ་བ་བྱིན་ཏེ། རྗེས་སུ་ཡི་རང་བའི་སྒྲ་ཕྱུང་ངོ། །དེ་ནས་དེའི་ཕྱིར་གནོད་སྦྱིན་ཅི་འཇིགས་ཀྱིས་རང་གི་འཁོར་རྣམས་ལ་བོས་ཏེ། བདག་གིས་ནི་བཟོད་དེ་བཞིན་གཤེགས་པ་ལ་བསོད་སྙོམས་ཕུལ་གྱིས། །ཁྱེད་ཀྱིས་ནི་དགེ་སློང་གི་དགེ་འདུན་རྣམས་ལ་ཕུལ་ཅིག། དེ་ནི་ཁྱེར་རྣམས་ཀྱི་ཡུན་རིང་པོའི་དོན་དང་། ཕན་པ་དང་བདེ་བར་འགྱུར་རོ། །གནོད་སྦྱིན་རྣམས་ཀྱིས་དགེ་སློང་གི་དགེ་འདུན་ལ་བསོད་སྙོམས་ཕུལ་ནས་གནོད་སྦྱིན་དེ་དག་ལ་སྙིང་བརྩེ་བའི་ཕྱིར་དགེ་སློང་གི་དགེ་འདུན་གྱིས་ཀྱང་བསོད་སྙོམས་བླངས་སོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་པ་ལས་དེས་བསོད་སྙོམས་བླངས་པར་མཁྱེན་ནས་ཕྱོགས་དེ་ནས་སླར་ལོག་གོ། །དེ་ལྟར་དེའི་ཚེ་ལྷ་སྟོང་ཕྲག་དུ་མང་བ་ཀླུ་སྟོང་ཕྲག་དུ་མ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་ཕྱེ་ཆེན་པོ་སྟོང་ཕྲག་དུ་མ་དང་། མི་དང་མི་མ་ཡིན་པ་སྟོང་ཕྲག་དུ་མ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་
ཕྲག་དུ་མ་རྣམས་བཅོམ་ལྡན་འདས་གཤེགས་པའི་ཞབས་འབྲིང་དུ་དོད་དོ། །དེ་ནས་བཅོམ་ལྡན་འདས་ས་ཕྱོགས་ཡངས་ཤིང་རྒྱ་ཆེ་བ་ཞིག་ཏུ་གཤེགས་ཏེ། བྱོན་ནས་གང་ན་བཤམས་པ་ལ་བཞུགས་སོ། །དེ་ནས་གནོད་སྦྱིན་ཅི་འཇིགས་འཁོར་དང་བཅས་པས་ལྷའི་མེ་ཏོག་མན་དཱ་ར་དང་། ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། ལྷའི་ཙན་དན་གྱི་ཕྱེ་མ་བླངས་ཏེ། བཅོམ་ལྡན་འདས་ལ་མཆོད་པ་བྱ་བའི་ཕྱིར། བཅོམ་ལྡན་འདས་ལ་གཏོར་མངོན་པར་གཏོར། མངོན་པར་རབ་ཏུ་གཏོར་ཏོ། །གཏོར་མངོན་པར་གཏོར། །མངོན་པར་རབ་ཏུ་གཏོར་ནས་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་བཅོམ་ལྡན་འདས་ཀྱིས་གནོད་སྦྱིན་ཅི་འཇིགས་ཀྱི་བསམ་པ་ཡང་མཁྱེན། དེའི་འཁོར་གནོད་སྦྱིན་མང་པོའི་བསམ་པ་ཡང་མཁྱེན་ནས་འཇུམ་པ་མཛད་དོ། །ཆོས་ཉིད་ནི་འདི་ཡིན་ཏེ། ནམ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེ་ན་ཞལ་གྱི་སྒོ་ནས་འོད་ཟེར་ཁ་དོག་དུ་མ་ཁ་དོག་སྣ་ཚོགས་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བ་རྒན་དང་། ཤེལ་དང་། དངུལ་གྱི་ཁ་དོག་ལྟ་བུར་བྱུང་སྟེ། དེས་འཇིག་རྟེན་གྱི་ཁམས་མཐའ་ཡས་མུ་མེད་པ་སྣང་བས་ཁྱབ་པར་བྱས་ནས་ཉི་མ་དང་ཟླ་བའི་གཟི་བརྗིད་མེད་པར་བྱས་ཏེ། སེམས་ཅན་དམྱལ་བ་པའི་སེམས་ཅན་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ། སླར་ལོག་ནས་བཅོམ་ལྡན་འདས་ལ་ལན་བདུན་བསྐོར་བ་བྱས་ཏེ། ཁ་ཅིག་ནི་བཅོམ་ལྡན་འདས་གྱིས་དབུའི་གཙུག་ཏུ་ནུབ་པོ། །ཁ་ཅིག་ནི་ཕྲག་པར་ནུབ་པོ། །ཁ་ཅིག་ནི་པུས་མོར་ནུབ་པོ། །ཆོས་ཉིད་ནི་འདི་ཡིན་ཏེ། ནམ་སངས་རྒྱས་བཅོམ་ལྡན་འདས་རྣམས་སེམས་ཅན་དམྱལ་བ་པའི་སེམས་ཅན་རྣམས་ལ་ལུང་སྟོན་པ་དེ་ན་འོད་ཟེར་ཞབས་གཉིས་ཀྱི་འོག་ཏུ་ནུབ་པར་འགྱུར་རོ། །ནམ་དུད་འགྲོའི་སྐྱེ་གནས་པའི་སེམས་ཅན་རྣམས་ལ་ལུང་སྟོན་པ་དེ་ན་འོད་ཟེར་སྣམ་ལོགས་སུ་ནུབ་པར་འགྱུར་རོ། ནམ་གཤིན་རྗེའི་འཇིག་རྟེན་པའི་སེམས་ཅན་རྣམས་ལ་ལུང་སྟོན་པ་དེ་ན་འོད་ཟེར་མདུན་དུ་ནུབ་པར་འགྱུར་རོ། །
ནམ་མི་རྣམས་ལ་ལུང་སྟོན་པ་དེ་ན་འོད་ཟེར་གཡོན་དུ་ནུབ་པར་འགྱུར་རོ། །ནམ་ལྷ་རྣམས་ལ་ལུང་སྟོན་པ་དེ་ན་འོད་ཟེར་གཡས་སུ་ནུབ་པར་འགྱུར་རོ། །ནམ་ཉན་ཐོས་རྣམས་ལ་ལུང་སྟོན་པ་དེ་ན་འོད་ཟེར་པུས་མོར་ནུབ་པར་འགྱུར་རོ། །ནམ་རང་སངས་རྒྱས་རྣམས་ལ་ལུང་སྟོན་པ་དེ་ན་འོད་ཟེར་ཕྲག་པ་ནུབ་པར་འགྱུར་རོ། །ནམ་སངས་རྒྱས་བཅོམ་ལྡན་འདས་རྣམས་ཀྱིས་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་དེ་ན་འོད་ཟེར་སྟེང་གི་དབུའི་གཙུག་གི་མཚམས་སུ་ནུབ་པར་འགྱུར་རོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་འཇུམ་པ་མཛད་པ་མཐོང་སྟེ། མཐོང་ནས་ཆོས་གོས་ཕྲག་པ་གཅིག་ཏུ་བགོས་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །ཅི་རྒྱུས་འཇིག་རྟེན་སྣང་མཛད་པ། །འཇིག་རྟེན་ཀུན་ལ་སྨན་པའི་སླད། །འཇིག་རྟེན་མགོན་པོ་འོད་མཛད་པ། །ཅི་ཞིག་སླད་དུ་འཛུམ་པ་བསྟན། །སངས་རྒྱས་ཀྱི་ནི་བྱང་ཆུབ་ཕྱིར། །དེ་རིང་སུ་ཡིས་ས་བོན་བཏབ། །དེ་རིང་སུ་ལ་ལུང་ཡང་སྟོན། །གང་ཞིག་ཐར་ཕྱིར་རབ་ཏུ་ཞུགས། །དཔའ་བོ་རྣམ་པར་འདྲེན་པ་རྣམས། །རྒྱུ་མ་མཆིས་པར་འཛུམ་མི་མཛད། །ཐུབ་པ་ཅི་སླད་འཛུམ་པ་བསྟན། །འོད་ཟེར་དོན་ནི་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་པ་འདི་དག་གིས་སླར་གསུངས་པ། །འཇིག་རྟེན་མགོན་པོ་སྐྱོབ་པ་ལ། །ཅི་འཇིགས་རབ་ཏུ་དང་སེམས་ཀྱིས། །བསོད་སྙོམས་དག་ནི་ཕུལ་བས་ན། །དེ་ལྟར་དེ་ཕྱིར་འཛུམ་པ་མཛད། །གནོད་སྦྱིན་འདི་ནས་ཤི་འཕོས་ནས། །སུམ་བཅུ་རྩ་གསུམ་འགྲོ་བར་འགྱུར། །སུམ་བཅུ་གསུམ་ནས་ཤི་འཕོས་ནས། །འཐབ་བྲལ་དུ་ཡང་འགྲོ་བར་འགྱུར། །འཐབ་བྲལ་ནས་ནི་དགའ་ལྡན་འགྲོ། །འདོད་ལ་འདོད་པས་དགར་བྱས་ནས། །མི་ཡི་ནང་དུ་སྐྱེ་འགྱུར་ཏེ། །རྒྱལ་པོ་རྫུ་འཕྲུལ་ལྡན་པར་འགྱུར། །འཁོར་ལོས་སྒྱུར་བ་མི་ཡི་དབང་། །གླིང་བཞི་དག་གི་དབང་པོ་སྟེ། མི་ཡི་འཇིག་རྟེན་ཤི་འཕོས་
ནས། །ཚངས་པའི་འཇིག་རྟེན་འགྲོ་བར་འགྱུར། །བསྐལ་པ་བྱེ་བ་ཉི་ཤུར་ནི། །རྟག་ཏུ་སྟི་སྟང་བྱས་པར་འགྱུར། །ལྷ་ཡི་ནང་དང་མི་ནང་དུ། །ཡང་དང་ཡང་ནི་ཀུན་ཏུ་འགྲོ། །ཕྱིས་དེ་རྒྱལ་སྲིད་བོར་ནས་ནི། །ཁྱིམ་མེད་པར་ཡང་རབ་ཏུ་འབྱུང་། །རྐྱེན་གྱིས་བྱང་ཆུབ་ཐོབ་འགྱུར་ཏེ། །དེར་ནི་མཐའ་ཡང་ཐུག་པར་འགྱུར། །གནོད་སྦྱིན་དག་ནི་སུམ་ཁྲི་རྣམས། །གནོད་སྦྱིན་སྐྱེ་གནས་འཕོས་གྱུར་ནས། །སུམ་བཅུ་རྩ་གསུམ་སྐྱེ་བར་འགྱུར། །སངས་རྒྱས་ལ་ནི་གུས་བྱས་ནས། །སངས་རྒྱས་བྱམས་པ་མཐོང་གྱུར་ཅིང་། །དེ་ན་མཐར་ནི་ཐུག་འགྱུར་ཏེ། །དགྲ་བཅོམ་པ་ཡང་ཐོབ་འགྱུར་ན། །སྟོན་པ་ལ་ནི་སུ་མི་མཆོད། །གནོད་སྦྱིན་སྟོང་དུ་ཚངས་པ་རྣམས། །བྱང་ཆུབ་མཆོག་ལ་རབ་ཞུགས་པས། །དེ་དག་དགེ་བའི་རྩ་བ་དེས། །ནམ་དུའང་ངན་འགྲོར་འགྲོ་མི་འགྱུར། །ཁ་ཅིག་སྲོག་ཆགས་ཀུན་ཕན་ཕྱིར། །བྱང་ཆུབ་དམ་པ་རབ་ཆོལ་ཞིང་། །སངས་རྒྱས་འདྲེན་པ་སྟོང་རྣམས་ལ། །བཀུར་སྟི་དག་ནི་བྱེད་པར་འགྱུར། །ཁ་ཅིག་སངས་རྒྱས་བྱང་ཆུབ་ཕྱིར། །སྟོང་ཕྲག་གཉིས་དང་གསུམ་དག་ཀྱང་། །མེ་ཏོག་ཕྲེང་བ་དྲི་རྣམས་ཀྱིས། །མཆོད་པ་དག་ནི་བྱེད་པར་འགྱུར། དག་པ་བསྒོམས་པའི་བདག་ཉིད་ཅན། །འདྲེན་པ་བྱེ་བ་ཕྲག་སྟོང་ལ། །ཁ་ཅིག་བཀུར་སྟི་བྱེད་འགྱུར་ཏེ། །འདི་དག་ཕྱིས་ནི་བྱང་ཆུབ་རེག །དེ་ན་ཅི་འཇིག་དེ་ཡི་བུ། །རི་བོ་ཞེས་བྱ་རྫུ་འཕྲུལ་ཆེ། །འཇིག་རྟེན་སངས་རྒྱས་བདག་འགྱུར་ཅེས། དེས་ཀྱང་སེམས་ནི་བསྐྱེད་པར་འགྱུར། །དེས་ནི་སངས་རྒྱས་སྟི་སྟང་བྱས། །ཐམས་ཅད་དུ་ཡང་སྨོན་ལམ་བཏབ། །ང་མཐོང་ནས་ནི་མཆོད་བྱས་ཏེ། །བྱང་ཆུབ་ཕྱིར་ནི་སེམས་བཏུད་དོ། །དེ་ནི་དགེ་བའི་རྩ་བ་དེས། །ངན་འགྲོ་ཐམས་ཅད་སྤངས་གྱུར་ནས། །སངས་རྒྱས་བྱམས་པ་མཐོང་ནས་ནི། །གདུགས་རྣམས་བྱེ་བ་འབུལ་བར་འགྱུར། །གདུགས་རྣམས་བྱེ་བ་ཕུལ་ནས་ནི། །ན་བཟའ་བྱེ་བ་འབུལ་བར་འགྱུར། །ན་བཟའ་བྱེ་བ་ཕུལ་ནས་ནི། །དེ་ཉིད་ཏུ་ཡང་རབ་ཏུ་འབྱུང་། །སྲོག་ཆགས་ཀུན་པ་ཕན་པའི་ཕྱིར། །བྱང་ཆུབ་དམ་པ་རབ་ཚོལ་ཞིང་། །ལོ་ཡང་ལྔ་
བརྒྱ་ཚང་བར་ནི། །ཚངས་པར་སྤྱད་པ་སྤྱོད་པར་འགྱུར། འདི་ལྟ་བུ་ཡི་རྣམ་གྲངས་ཀྱིས། །སྦྱིན་དང་ཚུལ་ཁྲིམས་ཡང་དག་སྤྱོད། །གང་གཱའི་བྱེ་མ་ཇི་སྙེད་པ། །དེ་སྙེད་བསྐལ་པར་སྤྱོད་པར་འགྱུར། །དཔེར་གསུངས་པ་ནི་དེ་སྙེད་དུ། །དེ་དག་ཁྱེད་ཀྱིས་ཤེས་པར་གྱིས། །དེ་དག་དཔེར་ཡང་ཤེས་ནས་ནི། །དེ་བས་ལྷག་པར་སྤྱད་པར་གྱིས། །སྡར་ནི་དཔེ་རྣམས་གང་བརྗོད་པ། གང་གཱ་ཡེ་ནི་བྱེ་སྙེད་ཀྱི། །དེ་སྙེད་སངས་རྒྱས་མཐོང་གྱུར་ནས། །དེ་དག་ཀུན་ལ་སྟི་སྟང་བྱེད། །ཨེ་མའོ་ཡེ་ཤེས་ཨེ་མ་ཤེས། །ཨེ་མའོ་བླ་ན་མེད་པའི་སེམས། །སེམས་ཅན་ཀུན་གྱི་འདྲེན་པ་ནི། །དེ་ལྟར་ཞུམ་པར་མི་འགྱུར་རོ། །དེ་ཕྱིས་སེམས་ཅན་ཀུན་གྱི་མཆོག །སངས་རྒྱས་སུ་ཡང་དེ་འགྱུར་ཏེ། །དེ་ནི་དེ་ཡི་མཚན་བཏགས་པ། །སྨན་པའི་རྒྱལ་པོར་རྣམ་པར་གྲགས། །ལོ་ནི་བྱེ་བ་བདུན་བཅུར་ཡང་། །སྲོག་ཆགས་རྣམས་ལ་ཆོས་བསྟན་ཏེ། །ཕྱིས་གདོད་རྐང་གཉིས་གཙོ་བོ་ནི། །དེ་ན་མྱ་ངན་འདས་པར་འགྱུར། །རབ་ཏུ་དུལ་བའི་སེམས་རྣམས་ཀྱི། །འདུས་པ་དག་ནི་ཉི་ཤུར་འགྱུར། །དེ་ལ་ཐ་མ་གཅིག་པོ་ནི། །དགེ་སློང་བྱེ་བ་ཉི་ཤུར་འགྱུར། །འདུས་པ་རྣམས་ནི་གང་བརྗོད་པའི། །ཉན་ཐོས་དཔག་ཏུ་མེད་པ་སྟེ། །དེ་ཡི་ཉན་ཐོས་ཇི་སྙེད་པ། །བྱང་ཆུབ་ཞུགས་པའང་དེ་སྙེད་དོ། །སེམས་ཅན་རྣམས་ཀྱི་དོན་མཛད་ནས། །དེ་བཞིན་གཤེགས་པ་མྱ་ངན་འདས། །ལོ་ནི་བརྒྱ་ཕྲག་སྟོང་དག་དུ། །དེ་ཡི་དམ་ཆོས་གནས་པར་འགྱུར། །བསྐལ་པ་ལྔ་བརྒྱ་ཆད་པ་ནི། །སངས་རྒྱས་མང་པོར་འབྱུང་བར་འགྱུར། །བསྐལ་པ་ཅིག་ལའང་འབྱུང་བ་ནི། །དེ་ན་སྟོང་རྣམས་འབྱུང་བར་འགྱུར། །མི་རྣམས་མཁས་པ་གང་དག་ནི། །སངས་རྒྱས་ཆོས་རྣམས་བསྙེན་འདོད་པ། །ཚུལ་བཞིན་མང་དུ་ཐོས་པ་དང་། །རབ་ཏུ་འདུན་པ་ཉིད་དུ་བྱ། །ཚུལ་བཞིན་མ་ཡིན་རྣམ་པར་སྤོངས། །ཚུལ་བཞིན་ལ་ནི་རྟག་ཏུ་སྒོམས། །མང་དུ་ཐོས་པ་རབ་ཏུ་བྱ། །དེས་ནི་ཤེས་རབ་རྣམ་པར་འཕེལ། །བྱང་ཆུབ་སེམས་དཔའ་སྐྱོབ་པ་ཡི། །རྩ་བའི་དོན་ནི་ཆོས་བཞི་སྟེ། །སྦྱིན་དང་ཚུལ་ཁྲིམས་ཐོས་
དང་གཏོང། །བྱང་ཆུབ་ཀྱི་ནི་ལམ་ལ་བཟང་། །བླ་ན་མེད་པའི་ཐེག་པ་མཆོག །བྱང་ཆུབ་ཀྱི་ནི་ལམ་ཡང་བསྟན། །ཐེ་ཚོམ་གཅོད་པ་བཟང་པོ་ཡིས། ཉན་ཐོས་ཀྱིས་ནི་ལམ་བསྟན་ཏོ། །སེམས་ཅན་གང་དག་འདི་འདོད་པ། །དེ་ལ་ངས་ནི་སྐབས་དབྱེ་འོ། །ཆོས་རྣམས་ཀྱི་ནི་མཆོག་སྟོན་པ། །འཇིག་རྟེན་སྣང་མཛད་རྙེད་པར་དཀའ། །དེ་ནས་གནོད་སྦྱིན་ཅིང་འཇིགས་ཀྱི་བུ་རི་བོ་འདི་སྙམ་དུ་སེམས་པར་གྱུར་ཏེ། །བཅོམ་ལྡན་འདས་འདི་ནས་རིའི་རྒྱལ་པོ་བྱ་རྒོད་ཀྱི་ཕུང་པོའི་རི་ལ་གཤེགས་ཤེས་གྲག་གིས། བདག་གིས་བཅོམ་ལྡན་འདས་ལ་དགེ་བའི་རྩ་བ་རྒྱ་ཆེན་པོ་ཞིག་བསྐྱེད་དོ་སྙམ་མོ། །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོས་རང་གི་འཁོར་ལ་སྨྲས་པ། །གྲོགས་པོ་དག་ཤེས་པར་གྱིས་ཤིག །བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་རིའི་རྒྱལ་པོ་བྱ་རྒོད་ཀྱི་ཕུང་པོའི་རི་ལ་གཤེགས་ཀྱིས། དེ་ལ་གྲོགས་པོ་དག་མཐུ་ཅི་ཡོད་པ་དང་། ཅི་ནུས་ཀྱིས་བཅོམ་ལྡན་འདས་ལ་མཆོད་པའི་ལས་ལ་སྤྲོ་བ་སྐྱེད་ཅིག །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོ་གཡོགས་དང་བཅས་པས་རྒྱལ་པོའི་ཁབ་ཀྱི་གྲོང་ཁྱེར་ཆོན་པོ་ནས་གཟུང་སྟེ། རིའི་རྒྱལ་པོ་བྱ་རྒོད་ཀྱི་ཕུང་པོའི་བར་གྱི་ལམ་དེ་ཐམས་ཅད་གསེག་མ་དང་། གྱོ་མོ་དང་། སྡོང་དུམ་དང་། ཚེར་མ་རྣམས་མེད་པར་བྱས་སོ། །མེ་ལོག་གི་དཀྱིལ་འཁོར་ལྟར་དག་པར་བྱས་སོ། ལམ་དེ་དག་ཐམས་ཅད་བསལ་ནས་སྤོས་ཀྱི་ཆུས་ཀུན་དུ་ཆག་ཆག་བཏབ་པོ། ལམ་དེར་གོས་ནི་མཚམས་མེད་པར་བཏིང་ངོ་། ལམ་དེར་མི་གང་ཙམ་དུ་མེ་ཏོག་གིས་ཆལ་པར་བཀྲམ་མོ། ལམ་དེ་དག་གདུགས་དང་། རྒྱལ་མཚན་དང་། བ་དན་གྱིས་ཤིན་དུ་བརྒྱན་ཏོ། ལམ་དེ་བདུག་སྤོས་དམ་པའི་སྙིང་པོ་རབ་ཀྱི་སྣོད་ནས་བདུགས་སོ། སྟེང་གི་བར་སྣང་ལས་དར་གྱི་ལྔ་ལྡིར་སྦྱངས་ཏེ། ཤིན་ཏུ་བརྒྱན་ཏོ། ལམ་དེར་སིལ་སྙན་སྣ་ཚོགས་ཀྱི་སྒྲ་འཁྲོལ་བར་བྱས་སོ། ལམ་དེ་ནས་མདའ་རྒྱང་གང་ཚུན་ཆད་ཙམ་མེ་ཏོག་ཨུད་པ་ལ་དང་། ཀུ་མུ་ཏ་དང་། པད་མ་དཀར་པོས་ཁེབས་ཤིང་དུར་པ་སྒྲ་འབྱིན་པར་བྱས་སོ། ལམ་དེ་གསེར་གླེབས་
པས་རབ་ཏུ་གཡོགས་སོ། ལམ་དེ་གསེར་གྱི་དྲ་བ་དང་། རིན་པོ་ཆེ་སྣ་བདུན་གྱི་དྲ་བས་རབ་ཏུ་གཡོགས་སོ། དེ་ནས་གནོད་སྦྱིན་ཅི་འཇིགས་ཀྱི་བུ་དེ་ལྟ་བུའི་བཀོད་པ་བྱས་ནས་ལུས་ཆེན་པོ་མངོན་པར་སྤྲུལ་ཏེ། འཁོར་དང་བཅས་པ་དགའ་མགུ་རངས་རབ་ཏུ་དགའ་སྟེ། མོས་ཤིང་ཡིད་བདེ་བ་སྐྱེས་ནས། །དགའ་བའི་སེམས་དང་། བདེ་བའི་སེམས་དང་། མཉེན་པའི་སེམས་དང་། རྣམ་པར་དང་བའི་སེམས་དང་། སྒྲིབ་པ་མེད་པའི་སེམས་དང་། རབ་ཏུ་སིམ་པའི་སེམས་དང་། སངས་རྒྱས་ལ་གཞོལ་བའི་སེམས་དང་། ཆོས་ལ་གཞོལ་བའི་སེམས་དང་། དགེ་འདུན་ལ་གཞོལ་བའི་སེམས་དང་། །བྱང་ཆུབ་ལས་མི་གཡོ་བའི་སེམས་དང་། མི་བསྐྱོད་བའི་སེམས་དང་། མི་མཉམ་པ་དང་མཉམ་པའི་སེམས་དང་། འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་སེམས་དང་། སེམས་ཅན་ཐམས་ཅད་ལ་བྱམས་པའི་སེམས་དང་། སྙིང་རྗེའི་སེམས་དང་། དགའ་བའི་སེམས་དང་། བཏང་སྙོམས་ཀྱི་སེམས་དང་། སངས་རྒྱས་ཀྱི་ཆོས་ཐམས་ཅད་ཀྱི་སྣོད་ཏུ་གྱུར་པའི་སེམས་དང་། སྙིང་པོའི་སེམས་དང་། བརྟན་པའི་སེམས་དང་། མི་ཕྱེད་པའི་སེམས་དང་། མ་ཞིགས་པའི་སེམས་དང་། ཉན་ཐོས་དང་། རང་སངས་རྒྱས་ཀྱི་སར་མི་ལྟུང་བའི་སེམས་དང་། བྱང་ཆུབ་སེམས་དཔའི་ས་ཐམས་ཅད་བསྒྲུབ་པའི་སེམས་ཀྱིས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་གནོད་སྦྱིན་ཅི་འཇིགས་ཀྱི་བུ་རི་བོས་ཐལ་མོ་སྦྱར་ཏེ། བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །སངས་རྒྱས་འཇིག་རྟེན་རྣམས་ཀྱི་མཆོག །ཆོས་རྣམས་ཀྱི་ནི་དམ་པ་སྟོན། །འཇིག་རྟེན་མགོན་ལ་བདག་གིས་ནི། །བླ་ན་མ་མཆིས་མཆོད་པ་བགྱིས། །འདྲེན་པ་ཇི་ལྟར་མཛད་པ་བཞིན། །སྟོབས་བཅུ་དང་ནི་རབ་ལྡན་ཏེ། །མི་འཇིགས་པ་ལ་བར་
གནས་ནས། །སེམས་ཅན་དོན་རྣམས་བགྱིད་པར་ཤོག །སུམ་བཅུ་རྩ་གཉིས་མཚན་རྣམས་དང་། །དཔེ་བྱད་བཟང་པོ་བརྒྱད་བཅུར་ལྡན། །འཇིག་རྟེན་མགོན་པོ་འོད་བྱེད་པ། །འཇིག་རྟེན་སྣང་བར་བྱེད་པར་ཤོག །སྲོག་ཆགས་ཀུན་ལ་ཕན་པའི་ཕྱིར། །སྙན་པའི་ཆོས་ནི་རབ་སྟོན་ཅིང་། །རྣམ་པ་བཅུ་དང་གཉིས་དམ་པ་ཡི། །ཆོས་ཀྱི་འཁོར་ལོ་བསྐོར་པར་ཤོག །རྒྱལ་པ་ཇི་ལྟར་དེ་བཞིན་དུ། །ཆོས་འཕྲུལ་རྣམས་ནི་རབ་སྟོན་ཅིང་། །སྲོག་ཆགས་བྱེ་བ་དུ་མ་ཡི། །སེམས་ཅན་རྣམས་ཀྱི་དོན་བགྱིད་ཤོག །དཔའ་ཆེན་གང་རྣམས་མ་བྱོན་པ། །འཇིག་རྟེན་མགོན་པོ་འོད་མཛད་ལྟར། །བྱང་ཆུབ་དམ་པ་རྟོགས་ནས། །ལམ་དེ་རབ་ཏུ་སྟོན་པར་ཤོག །སེམས་ཅན་ལྡོངས་པ་ཀུན་གྱི་ཕྱིར། །མིག་དང་ལྡན་པ་ཉིད་གྱུར་ཏེ། །གནས་དང་རྟེན་དང་སྐྱབས་དག་དང་། །དེ་བཞིན་དཔུང་གཉེན་འགྱུར་བར་ཤོག །ཇི་ལྟར་འདྲེན་པ་གྲོལ་མཛད་བཞིན། །འགྲོ་བ་ལྔར་ནི་སྐྱེས་པ་ཡི། །སྲོག་ཆགས་རྣམས་ཀྱི་མགོན་དུ་ཤོག །བདག་གིས་སྡུག་བསྔལ་ཀུན་ལས་དགྲོལ། །འཇིག་རྟེན་ན་ནི་མཚུངས་པ་ཡོད་མེད་པ། །ལྷ་དབང་ལྷ་མ་ཡིན་དང་ཀླུས་མཆོད་པ། །གཟི་བརྗིད་དག་ནི་མཐའ་ཡས་འོད་མཛད་པ། །རྐང་གཉིས་མཆོག་ལ་བདག་གིས་མཆོད་པ་བགྱིས། །བདག་ནི་ལས་མཆོག་དམ་པ་འདི་དག་གིས། །མི་དབང་ས་སྟེང་མཆོག་ཏུ་གྱུར་པ་བཞིན། །བསོད་ནམས་རབ་མཆོག་སུམ་བཅུ་གཉིས་མཚན་ལྡན། །ཆོས་ཀྱི་བདག་པོ་དེ་དང་འདྲ་བར་ཤོག །དེ་ནས་བཅོམ་ལྡན་འདས་ཀྱིས་གནོད་སྦྱིན་ཅི་འཇིགས་ཀྱི་བུ་རི་བོ་ལ་ཚིགས་སུ་བཅད་པ་དག་གིས་གསུངས་པ། །ཆོས་ཀྱི་དམ་པ་རྣམས་ཀྱི་ཕྱིར། །སྟོན་པའི་རིམ་གྲོ་གང་བྱེད་པ། སེམས་ཅན་རྣམས་ཀྱི་མཆོག་ཡིན་ཏེ། །དེ་དག་བྱང་ཆུབ་རྙེད་མི་དཀའ། །འཇིག་རྟེན་མགོན་པོ་འོད་མཛད་པ། །འཇིག་རྟེན་སྣང་མཛད་མཆོག་ལ་ནི། །ལྷ་དང་ཀླུ་དང་མི་རྣམས་ཀྱིས། །མཆོད་པར་བྱ་བར་འོས་པར་འགྱུར། །བྱང་ཆུབ་མཆོག་ཏུ་སངས་རྒྱས་ནས། །ཤིང་མཆོག་དྲུང་དུ་རབ་འདུག་སྟེ། །སྡིག་ཅན་འདུད་ལས་རྒྱལ་ནས་སུ། །སྲོག་ཆགས་
རྣམས་ལ་ཆོས་སྟོན་ཏོ། །དེ་ནས་བཅོམ་ལྡན་འདས་ལྷ་སྟོང་ཕྲག་དུ་མ་དང་། གནོད་སྦྱིན་དང་། སྲིན་པོ་སྟོང་ཕྲག་དུ་མ་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་སྟོང་ཕྲག་དུ་མ་དང་། །མི་དང་མི་མ་ཡིན་པ་སྟོང་ཕྲག་དུ་མ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་བསྐོར་ཅིང་མདུན་དུ་བདར་ནས་སངས་རྒྱས་ཀྱི་མཐུ་ཆེན་པོ་དང་། སངས་རྒྱས་ཀྱི་རྫུ་འཕྲུལ་ཆེན་པོ་དང་། །སངས་རྒྱས་ཀྱི་ཆོས་འཕྲུལ་ཆེན་པོ་དང་། སངས་རྒྱས་ཀྱི་རྣམ་པར་འཕྲུལ་བ་ཆེན་པོ་དང་། སངས་རྒྱས་ཀྱི་གཟི་བརྗིད་ཆེན་པོས། འོད་ཟེར་ནི་རབ་ཏུ་འགྱེ། ཞིང་ནི་རབ་ཏུ་གཡོ་བར་བྱས། མེ་ཏོག་གི་ཆར་ནི་རབ་ཏུ་འབེབས། སིལ་སྙན་བྱེ་བ་ཁྲག་ཁྲིག་ནི་རབ་ཏུ་འཁྲོལ་བར་བྱས་ཏེ། གནོད་སྦྱིན་ཅི་འཇིགས་ཀྱི་བུ་རི་བོས་ལམ་དུ་བཀོད་པ་ཇི་ལྟར་མངོན་པར་བྱས་པ་བཞིན་དུ་ཤིང་རཏའི་འཕང་ལོ་ཙམ་གྱི་པད་མ་ལ་ཞབས་བཞག་སྟེ། རིའི་རྒྱལ་པོ་བྱ་རྒོད་ཀྱི་ཕུང་པོ་ག་ལ་བ་དེར་གཤེགས་ཏེ་བྱོན་ནས། ཚེ་དང་ལྡན་པ་ཀུན་དགའ་བོ་ལ་ཀུན་དགའ་བོ་ཁྱོད་ཀྱིས་དེ་བཞིན་གཤེགས་པའི་གདན་མཆོག་ཆོས་ཀྱི་གདན། གདན་དམ་པ། གདན་བཟང་པོ། འཇིག་རྟེན་གསུམ་པོ་ཀུན་ལས་ཁྱད་པར་དུ་འཕགས་པའི་གདན། སངས་རྒྱས་ཀྱི་གདན་ཤོམས་ཤིག །དེ་བཞིན་གཤེགས་པ་གདན་དེ་ལ་བཞུགས་ཏེ། སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་རྣམས་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་དོན་དང་། ཕན་པའི་ཕྱིར་བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་མདོ་སྡེ་སེམས་ཅན་ཐམས་ཅད་ལ་ཕན་པར་རབ་ཏུ་བསྔགས་པ། བྱང་ཆུབ་སེམས་དཔའི་སྤྱོད་པའི་རྒྱུ་འཐུན་པ་འཆད་པར་འགྱུར་ཏེ། དེ་ཡང་སེམས་ཅན་ཐམས་ཅད་ཐེ་ཚོམ་དུ་གྱུར་པ་ལ་རབ་ཏུ་སྟོན་པ། །སེམས་ཅན་ཐམས་ཅད་ཀྱི་ཐེ་ཚོམ་གཅོད་པ། སེམས་ཅན་ཐམས་ཅད་ཀྱི་ཐེ་ཚོམ་སྐྱེ་བ་གཅོད་པ། དེ་བཞིན་གཤེགས་པའི་མདོ་སྡེ་འདི་འཆད་པར་འགྱུར་རོ། །ཞེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་གདན་བཤམས་ཏེ། དེ་ན་ལྷ་བྱེ་བ་དྲུག་བཅུ་རྩ་བརྒྱར་ཀྱིས་རས་བཅོས་མ་རེ་རེ་དེ་བཞིན་
གཤེགས་པ་ལ་ཕུལ་ཏེ། དེ་དག་ཀྱང་དེར་གདན་དུ་བཏིང་བར་གྱུར་ནས་བཅོམ་ལྡན་འདས་གདན་བཤམས་པ་དེ་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ལྷའི་བུ་དེ་རྣམས་ལ་ཚིགས་སུ་བཅད་པ་དག་གིས་གསུངས་པ། ། འཇིག་རྟེན་མགོན་གྱི་གདན་དུ་ནི། །ལྷ་ཡི་གོས་རབ་དམ་པ་མཆོག །ལྷ་ཡིས་རབ་ཏུ་བཏིང་བ་ལ། །དེ་ལ་རྣམ་པར་འདྲེན་པ་བཞུགས། །ཐམས་ཅད་ཆོས་ཀྱི་ཕ་རོལ་ཕྱིན། །སངས་རྒྱས་བཞུགས་པར་གྱུར་མ་ཐག །འཇིག་རྟེན་རྣམ་པ་དྲུག་གཡོས་ཤིང་། །སྐྱེ་བོ་རབ་ཏུ་དགའ་བར་གྱུར། སངས་རྒྱས་ཞིང་ནི་རི་དང་བཅས། །དེ་ན་རབ་ཏུ་སྣང་བར་གྱུར། །དེ་ན་ཆོས་འདོད་རྣམས་ལ་ནི། །སྐྱོབ་པ་སངས་རྒྱས་རྫུ་འཕྲུལ་སྟོན། །ལྷ་དང་ཀླུ་དང་མི་རྣམས་དང་། །གྲུལ་བུམ་ཡི་དགས་སྲུལ་པོ་རྣམས། །དེ་དག་གཅིག་གིས་གཅིག་མཐོང་སྟེ། །སྒྲིབ་པ་དག་ནི་མེད་པར་གྱུར། །ལྷ་རྣམས་བྱེ་བ་ཕྲག་སྟོང་དང་། ཁྲག་ཁྲིག་ཕྲག་ནི་བརྒྱ་རྣམས་དག །རྙེད་དགའ་ཡི་ནི་ཚིག་གསུང་པ། །སངས་རྒྱས་ལ་ནི་དགའ་བས་ལྟ། །རྒྱལ་པོ་གཟུགས་ཅན་སྙིང་པོ་ཡང་། དེ་ཚེ་བློན་པོས་ཡོངས་བསྐོར་ཅིང་། །འཇིག་རྟེན་གྱི་ནི་མགོན་པོ་མཆོག །སངས་རྒྱས་དྲུང་དུ་འོངས་པར་གྱུར། །སྟོན་པས་ལྷ་དང་ཀླུ་རྣམས་དང་། །མི་རྣམས་འདུས་པར་མཁྱེན་པ་དང་། སྲོག་ཆགས་ཀུན་ལ་ཕན་པའི་ཕྱིར། །ཕྱོགས་བཞི་དག་ཏུ་རབ་གཟིགས་ནས། །འཇིག་རྟེན་ཐེ་ཚོམ་གང་ཡོད་པ། །རྐང་གཉིས་མཆོག་ལ་དྲིས་ཤིག་དང་། །ཐེ་ཚོམ་དག་ནི་དྲིས་པ་རྣམས། །རྣམ་པར་འདྲེན་པ་དས་བཅད་དོ། །དེ་ལྟར་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་འདུས་ནས། ཆོས་ཉན་པ་དེ་དག་ཐམས་ཅད་ཀྱིས་དལ་བར་ཤེས་ནས། སེམས་ཅན་ཐམས་ཅད་ཀྱིས་བསམས་ཏེ། ཕྱག་འཚལ་ནས་ཆོས་མཉན་པའི་ཕྱིར་རྣ་བ་བླགས་ཏེ་འདུག་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽང་གལ་གྱི་བུ་ཆེན་པོ་ལ་བཀའ་སྩལ་པ། །མཽང་གལ་གྱི་བུ་ཆེན་པོ་དགེ་སློང་མ་འདུས་པ་རྣམས་ལ་སོམས་ལ་མ་ལྷགས་པ་རྣམས་ཀྱང་ཚོལ་ཏེ། རྒྱང་རིང་པོ་ན་གནས་པ་རྣམས་ཀྱང་
སྡུས་ཤིག། །དེའི་ཚེ་ཚེ་དང་ལྡན་པ་འོད་སྲུང་ཆེན་པོ་རིའི་རྒྱལ་པོ་ཁ་བ་ཅན་གྱི་ལྷོ་ཕྱོགས་ཀྱི་དོས་ལ་གནས་སོ། །དེ་ནས་ཚེ་དང་ལྡན་པ་མཽང་གལ་གྱི་བུ་ཆེན་པོས་བསམས་ཏེ། བསམས་ནས་རྫུ་འཕྲུལ་གྱི་སྟོབས་ཀྱི་ཚེ་དང་ལྡན་པ་འོད་སྲུང་ཆེན་པོ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་ཆེན་པོ་ལོངས་ཤིག བཅོམ་ལྡན་འདས་འདི་ལྷར་བཅས་པའི་འཇིག་རྟེན་དང་། བདུད་ཏུ་བཅས་པ་དང་། ཚངས་པར་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་རྣམས་དང་། ལྷ་དང་མི་དང་ལྷ་མ་ཡིན་དུ་བཅས་པའི་འཁོར་གྱི་མདུན་དུ་ཆོས་སྟོན་ཏེ། སྟོན་པས་བཀའ་སྩལ་གྱིས། བཙུན་པ་འོད་སྲུང་བདག་ཅག་གཉིས་ཀྱི་ཆོས་ཀྱི་བར་ཆད་ཏུ་འགྱུར་དུ་འོད་གིས་འདོད་དོ། །དེ་སྐད་ཅད་སྨྲས་པ་དང་། ཚེ་དང་ལྡན་པ་འོད་སྲུང་ཆེན་པོས་ཚེ་དང་ལྡན་པ་མཽང་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽང་གལ་གྱི་བུ་ཆེན་པོ་ཁྱོད་སོང་ཤིག་དང་། ཁོ་བོ་ཡང་ཁྱོད་སོང་བའི་རྗེས་བཞིན་དུ་འོང་ངོ་། དེ་ནས་ཚེ་དང་ལྡན་པ་འོད་སྲུང་ཆེན་པོས་སྟན་དེ་ལ་འཕྲུལ་བ་སྤྲུལ་ཏེ། རྫུ་འཕྲུལ་གྱི་སྟོབས་ཀྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་བཞུགས་སོ། དེ་ནས་ཚེ་དང་ལྡན་པ་འོད་སྲུང་ཆེན་པོ་འཁོར་བཞིས་བསྐོར་ཅིང་མདུན་དུ་བདར་ནས་རིའི་རྒྱལ་པོ་བྱ་རྒོད་གྱི་ཕུང་པོ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་འཁོར་གྱི་ནང་དུ་ཧ་ཅང་ཡང་མི་རིང་བ་ཞིག་ཏུ་ཕྱོགས་གཅིག་ཏུ་གདུག་གོ། །དེ་ནས་ཚེ་དང་ལྡན་པ་མཽང་གལ་གྱི་བུ་ཆེན་པོས་སྤྲུལ་པ་དེ་མཐོང་ནས་རྫུ་འཕྲུལ་གྱི་སྟོབས་ཀྱིས་བཅོམ་ལྡན་འདས་ག་ལ་བ་དེར་སོང་ངོ་། །ཚེ་དང་ལྡན་པ་མཽང་གལ་གྱི་བུ་ཆེན་པོས། ཚེ་དང་ལྡན་པ་འོད་སྲུང་ཆེན་པོ་བཅོམ་ལྡན་འདས་ཀྱི་སྤྱན་སྔར་ཧ་ཅང་ཡང་མི་རིང་བ་ཞིག་ཏུ་འཁོར་གྱི་ནང་ན་ཕྱོགས་གཅིག་ཏུ་འདུག་པར་མཐོང་སྟེ། མཐོང་ནས་འདི་སྐད་ཅེས་སྨྲས་སོ། །བཙུན་པ་འོད་སྲུང་ཁྱོད་སྟན་ག་ལ་བ་དེ་ནས་སྤྲུལ་ཏེ། སྤྲུལ་ནས་མགྱོགས་པར་བཅོམ་ལྡན་འདས་ཀྱི་དྲུང་དུ་ཕྱིན་ཏེ། སྤྱན་སྔར་ཧ་ཅང་
ཡང་མི་རིང་བཞིན་ཏུ་འཁོར་ཀྱི་ནང་ན་ཕྱོགས་གཅིག་ཏུ་འདུག་པ་ནི་མྱུར་བ་ལ་སྟེན་པའི་རྫུ་འཕྲུལ་དང་ལྡན་ནོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་འོད་སྲུང་ཆེན་པོས་ཚེ་དང་ལྡན་པ་མཽང་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽང་གལ་གྱི་བུ་ཆེན་པོ་ནི། བཅོམ་ལྡན་འདས་ཀྱིས་རྫུ་འཕྲུལ་དང་ལྡན་པའི་མཆོག་ཏུ་གསུངས་ན་འདི་ལ་ཁོ་བོའི་རྫུ་འཕྲུལ་རྣམ་པར་སྤྲུལ་པ་ལྟ་ཅི་ཞིག་ཏུ་འགྱུར། གནོད་སྦྱིན་ཅི་འཇིགས་ཀྱི་ལེའུ་སྟེ། གཉིས་པའོ།། །།