བཞི་པ། དེ་བཞིན་གཤེགས་པའི་བསམ་གྱིས་མི་ཁྱབ་པའི་ལེའུ། སྟོད་ཆ།
གཞན་ཡང་ཤཱ་རིའི་བུ་དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བསམ་གྱིས་མི་ཁྱབ་པའི་ཆོས་བཅུ་ལ་མངོན་པར་དང་། ཡིད་ཆེས་རབ་ཏུ་རྟོག ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་རྨད་ཏུ་འདུ་ཤེས་སྐྱེད་དོ། བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་པར་དང་། ཡིད་ཆེས་རབ་ཏུ་རྟོག ཐེ་ཚོམ་མ་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས། ངོ་མཚར་དང་རྨད་ཏུ་འདུ་ཤེས་སྐྱེད་དོ། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་དབྱངས་བསམ་གྱིས་མི་ཁྱབ་པ་ལ་མངོན་པར་དད་པ་ནས་ངོ་མཚར་དང་། རྨད་ཏུ་འདུ་ཤེས་སྐྱེད་པའི་བར་དུའོ། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་འོད་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཚུལ་ཁྲིམས་དང་། ཏིང་ངེ་འཛིན་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་རྫུ་འཕྲུལ་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྙིང་རྗེ་ཆེན་པོ་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་
ཀྱི་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བསམ་གྱིས་མི་ཁྱབ་པ་ལ་མངོན་པར་དང་། ཡིད་ཆེས་རབ་ཏུ་རྟོག ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་། རྨད་ཏུ་འདུ་ཤེས་སྐྱེད་པའོ། དེ་བཞིན་གཤེགས་པའི་ངོ་མཚར་དང་། རྨད་ཀྱི་ཆོས་བཅུ་པོ་འདི་རྣམས་ཀྱི་ཕྱིར་བརྩོན་འགྲུས་ཚར་རྩོམ་ཞིང་མི་ཞམ་མི་འགོང་མི་སྐྱོ་སྟེ། དེ་བཞིན་གཤེགས་པའི་བསམ་གྱིས་མི་ཁྱབ་པ། ངོ་མཚར་དང་རྨད་ཀྱི་ཆོས་བཅུ་པོ་མ་ཐོབ་ཀྱི་བར་དུ་ལུས་ཀྱི་ལྤགས་པ་དང་། རྒྱུས་པ་དང་། བྲི་དང་། དབུགས་དང་། རུས་པ་དག་ཞིག་ལ། ལུས་ཀྱི་ཤ་དང་། ཁྲག་སྐབས་ཀྱང་སླའི། བརྩོན་འགྲུས་ཉམས་པར་མི་བྱའོ། སྙམ་དུ་དེ་ལྟར་སེམས་སྐྱེད་དོ། ཤཱ་རིའི་བུ་དེ་ལྟར་དད་པས་མོས་པའི་བྱང་ཆུབ་སེམས་དཔའ་ནི་དེ་བཞིན་གཤེགས་པའི་བསམ་གྱིས་མི་ཁྱབ་པ་ངོ་མཚར་དང་རྨད་ཀྱི་ཆོས་བཅུ་པོ་འདི་རྣམས་ལ་མངོན་པར་དང་། ཡིད་ཆེས་རབ་ཏུ་རྟོག ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་དོ། དེ་ནས་བཅོམ་ལྡན་འདས་ཀྱི་དོན་འདི་ཉིད་རྒྱ་ཆེར་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སངས་རྒྱས་སྐུ་ནི་བསམ་མི་ཁྱབ། །ཆོས་ཀྱི་སྐུ་ཡིས་རབ་ཏུ་ཕྱེ། །མཚན་མ་མེད་ཅིང་སྣང་མེད་ལ། །རྒྱལ་བའི་ཐུགས་སྲས་དང་པར་བྱེད། །འགྲོ་བ་ཐ་དད་ཇི་སྙེད་ཀྱི། །སྒྲ་སྐད་བསམ་གྱིས་མི་ཁྱབ་པ། །ཐམས་ཅད་ཏུ་ནི་ཆོས་སྒྲོགས་ཏེ། །སངས་རྒྱས་ཀྱི་ནི་སྤྱོད་ཡུལ་དང་། །ཇི་ཙམ་སེམས་ཅན་ཐམས་ཅད་ཀྱི། དུས་གསུམ་དག་གི་དབང་པོ་ཀུན། །སངས་རྒྱས་ཀྱིས་ནི་རབ་མཁྱེན་ཏེ། བསམ་མི་ཁྱབ་ལ་རབ་ཏུ་དང་། སངས་རྒྱས་རྣམས་ཀྱི་འོད་མཐའ་ཡས། འོད་ཟེར་དྲ་བས་བསམ་མི་ཁྱབ། ཞིང་རྣམས་རྒྱ་མཚོ་མཐའ་ཡས་པ། །ཐམས་ཅད་ཀྱི་ནི་ཕྱོགས་སུ་ཁྱབ་། །ཐུབ་པའི་ཚུལ་ཁྲིམས་འཇིག་རྟེན་འདས། །འཇིག་རྟེན་ཆོས་ལ་མི་གནས་ཏེ། །རྫུ་འཕྲུལ་རྐང་པ་བསམ་ཡས་ལ། བྱང་ཆུབ་སེམས་དཔའ་རབ་ཏུ་དང་། །སངས་རྒྱས་རྟག་ཏུ་མཉམ་པར་གཞག། །རྣམ་པར་ཐར་པ་བསམ་མི་ཁྱབ། །སངས་རྒྱས་རྣམས་ཀྱི་སྤྱོད་ཡུལ་ནི། སེམས་ཅན་ཀུན་གྱིས་ཤེས་མི་ནུས། །ཆོས་ཀྱི་དབྱིངས་ནི་དབྱེར་མེད་ལ། གང་གི་སྟོབས་ཀྱིས་ཤེས་འགྱུར་པ། །དྲང་སྲོང་ཆེན་པོའི་ཡེ་ཤེས་སྟོབས། །ནམ་མཁའ་བཞིན་དུ་མཐའ་ཡས་པ། །སེམས་ཅན་
གཅིག་གི་དོན་ཕྱིར་ཡང་། །བསྐལ་པ་རྒྱ་མཚོ་མཐའ་ཡས་པར། །འདུལ་བའི་དོན་ཕྱིར་བཞུགས་པས་ན། །དེ་དག་སྙིང་རྗེ་དེ་འདྲའོ། །སེམས་ཅན་ཐམས་ཅད་གཞན་དང་གཞན། །དྲི་བ་རྒྱ་མཚོ་འདྲི་བྱེད་ཀྱང་། །དྲིས་ལན་གཅིག་གི་ཚིན་བྱེད་དེ། །མི་འཇིགས་པ་ནི་བསམ་མི་ཁྱབ། །རྣམ་པ་ཐམས་ཅད་མཆོག་ལྡན་པ། །ཆོས་རྣམས་ཐམས་ཅད་ཐུགས་སུ་ཆུད། །སངས་རྒྱས་ཆོས་རྣམས་མ་འདྲེས་པ། །ཐམས་ཅད་ཏུ་ནི་ཡེ་ཤེས་གཟིགས། །དད་པ་ལ་ནི་རབ་གནས་པས། །སངས་རྒྱས་ཀུན་ཆོས་ཆོས་ཉིད་རྣམས། །བསམ་གྱིས་མི་ཁྱབ་འདི་དག་ལ། །དེ་དག་ཐམས་ཅད་དང་བར་བྱེད། །ཤཱ་རིའི་བུ་ཇི་ལྟར་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་པར་དང་། ཡིད་ཆེས། རབ་ཏུ་རྟོག ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་རྨད་ཏུ་འདུ་ཤེས་སྐྱེ་ཅེ་ན། འདི་ལྟ་སྟེ། དེ་བཞིན་གཤེགས་པའི་སྐུ་ནི་མི་དགེ་བའི་ཆོས་ཐམས་ཅད་སྤངས་པ་དགེ་བའི་ཆོས་ཐམས་ཅད་དང་ལྡན་པའོ། འདི་ལྟ་སྟེ། མི་གཙང་བ་དང་། མཆིལ་མ་དང་། དར་སྣབས། སྣབས་དང་། རྣག་དང་། ཁྲག་དང་། བཤང་བ་དང། གཅི་བ་དང་བྲལ་བ། རུས་པ་དང། ཤ་དང་། ཁྲག་དང་། རྒྱུས་པ་ལས་རྣམ་པར་གྲོལ་པའོ། འདི་ལྟ་སྟེ། དེ་བཞིན་གཤེགས་པའི་སྐུ་ནི་རང་བཞིན་གྱིས་འོད་གསལ་བ། ཡོངས་སུ་དག་པ། ཉོན་མོངས་པ་ཐམས་ཅད་ཀྱི་དྲི་མ་དང་བྲལ་བའོ། འདི་ལྟ་སྟེ། དེ་བཞིན་གཤེགས་པའི་སྐུ་ནི་འཇིག་རྟེན་ལས་འདས་པ་སྟེ། འཇིག་རྟེན་གྱི་ཆོས་ཐམས་ཅད་ཀྱི་མགོན་པའོ། འདི་ལྟ་སྟེ། དེ་བཞིན་གཤེགས་པའི་སྐུ་ནི་ཡོན་ཏན་དཔག་ཏུ་མེད་པ་དང་། བསོད་ནམས་དང་། ཡེ་ཤེས་ཀྱི་ཚོགས་བསགས་བས་སེམས་ཅན་ཐམས་ཅད་ཀྱི་འཚོ་བའོ། འདི་ལྟ་སྟེ། དེ་བཞིན་གཤེགས་པའི་སྐུ་ནི་ཚུལ་ཁྲིམས་དཔག་ཏུ་མེད་པ་ཡོངས་སུ་བསྒོམས་པ་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་གཟིགས་པ་དཔག་ཏུ་མེད་པ། ཡོངས་སུ་བསྒོམས་པས་ཡོན་ཏན་ཐམས་ཅད་རབ་ཏུ་རྒྱས་པའོ། འདི་ལྟ་སྟེ། དེ་བཞིན་གཤེགས་པའི་སྐུ་ནི་ཡོངས་སུ་དག་པའི་མེ་ལོང་གི་དཀྱིལ་འཁོར་གྱི་གཟུགས་བརྙན་ལྟ་བུ་དང་། ཆུ་ལ་ཟླ་
བ་སྣང་བ་ལྟ་བུའོ། འདི་ལྟ་སྟེ། དེ་བཞིན་གཤེགས་པའི་སྐུ་ནི་ནམ་མཁའི་དབྱིངས་སུ་ཡང་དག་པར་འདུ་ཞིང་ཆོས་ཀྱི་དབྱིངས་ཀྱིས་ཀླས་པས་བསམ་གྱིས་མི་ཁྱབ་པའོ། འདི་ལྟ་སྟེ། དེ་བཞིན་གཤེགས་པའི་སྐུ་ནི་ཟག་པ་ཐམས་ཅད་ལས་ལོག་པས་ཟག་པ་མེད་པའོ། འདི་ལྟ་སྟེ། དེ་བཞིན་གཤེགས་པའི་སྐུ་ནི་འདུས་བྱས་ཐམས་ཅད་དང་བྲལ་བས་འདུས་མ་བྱས་པའོ། ནམ་མཁའི་ལྟ་བུའི་སྐུའོ། མཉམ་པ་མེད་པའི་སྐུའོ། འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་སྐུའོ། དེ་བཞིན་གཤེགས་པའི་སྐུ་ནི་དཔེ་མེད་པ། ཟླ་མེད་པ། མཚུངས་པ་མེད་པའི་སྐུ་སྟེ། དག་པ། དྲི་མ་མེད་པ། ཀུན་ནས་ཉོན་མོངས་པ་མེད་པ། རང་བཞིན་གྱི་འོད་གསལ་བའོ། དེ་ནི་སྲོན་གྱི་མཐས་རབ་ཏུ་ཕྱེ་བ་མ་ཡིན། ཕྱི་མའི་མཐས་རབ་ཏུ་ཕྱེ་བ་མ་ཡིན། ད་ལྟར་བྱུང་བས་རབ་ཏུ་ཕྱེ་བ་མ་ཡིན། སྐྱེ་བ་དང་། རུས་དང་། རིགས་ཀྱིས་རབ་ཏུ་ཕྱེ་བ་མ་ཡིན། གཟུགས་ཀྱི་རབ་ཏུ་ཕྱེ་བ་མ་ཡིན། མཚན་གྱིས་རབ་ཏུ་ཕྱེ་བ་མ་ཡིན། དཔེ་བྱད་བཟང་པོས་རབ་ཏུ་ཕྱེ་བ་མ་ཡིན། སེམས་ཀྱིས་རབ་ཏུ་ཕྱེ་བ་མ་ཡིན། ཡིད་ཀྱིས་རབ་ཏུ་ཕྱེ་བ་མ་ཡིན། རྣམ་པར་ཤེས་པས་རབ་ཏུ་ཕྱེ་བ་མ་ཡིན། ལྟ་བས་རབ་ཏུ་ཕྱེ་བ་མ་ཡིན། ཐོས་པས་རབ་ཏུ་ཕྱེ་བ་མ་ཡིན། དྲན་པས་རབ་ཏུ་ཕྱེ་བ་མ་ཡིན། རྣམ་པར་རིག་པས་རིག་པས་རབ་ཏུ་ཕྱེ་བ་མ་ཡིན། ཕུང་པོས་རབ་ཏུ་ཕྱེ་བ་མ་ཡིན། ཁམས་ཀྱིས་རབ་ཏུ་ཕྱེ་བ་མ་ཡིན། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན། སྐྱེ་བས་རབ་ཏུ་ཕྱེ་བ་མ་ཡིན། གནས་པས་རབ་ཏུ་ཕྱེ་བ་མ་ཡིན། འཇིག་པས་རབ་ཏུ་ཕྱེ་བ་མ་ཡིན། འཛིན་པས་རབ་ཏུ་ཕྱེ་བ་མ་ཡིན། འདོར་བས་རབ་ཏུ་ཕྱེ་བ་མ་ཡིན། ངེས་པར་འབྱུང་བས་རབ་ཏུ་ཕྱེ་བ་མ་ཡིན། སྤྱོད་པས་རབ་ཏུ་ཕྱེ་བ་མ་ཡིན། ཁ་དོག་གིས་རབ་ཏུ་ཕྱེ་བ་མ་ཡིན། རྟགས་ཀྱིས་རབ་ཏུ་ཕྱེ་བ་མ་ཡིན། དབྱིབས་ཀྱིས་རབ་ཏུ་ཕྱེ་བ་མ་ཡིན། འོད་བས་རབ་ཏུ་ཕྱེ་བ་མ་ཡིན། འགྲོ་བས་རབ་ཏུ་ཕྱེ་བ་མ་ཡིན། ཚུལ་ཁྲིམས་ཡིད་ལ་བྱེད་པས་རབ་ཏུ་ཕྱེ་བ་མ་ཡིན། ཏིང་ངེ་འཛིན་གྱིས་རབ་ཏུ་ཕྱེ་བ་མ་ཡིན། ཤེས་རབ་ཀྱིས་རབ་ཏུ་ཕྱེ་བ་མ་ཡིན། རྣམ་པར་གྲོལ་བས་རབ་ཏུ་ཕྱེ་བ་མ་ཡིན། རྣམ་པར་གྲོལ་བའི་ཡེ་ཤེས་མཐོང་བ་ཡིད་ལ་བྱེད་པས་རབ་ཏུ་ཕྱེ་བ་མ་ཡིན། མཚན་ཉིད་ཀྱིས་རབ་ཏུ་ཕྱེ་བ་མ་ཡིན། མཚན་ཉིད་མི་འཐུན་པས་རབ་ཏུ་ཕྱེ་བ་མ་ཡིན། ཆོས་ཀྱི་མཚན་ཉིད་ཀྱིས་རབ་ཏུ་ཕྱེ་བ་
མ་ཡིན། སྟོབས་སུ་སྒྲོ་བཏགས་པས་རབ་ཏུ་ཕྱེ་བ་མ་ཡིན། མི་འཇིགས་པས་རབ་ཏུ་ཕྱེ་བ་མ་ཡིན། སོ་སོ་ཡང་དག་པར་རིག་པས་རབ་ཏུ་ཕྱེ་བ་མ་ཡིན། རྫུ་འཕྲུལ་གྱིས་རབ་ཏུ་ཕྱེ་བ་མ་ཡིན། སྙིང་རྗེ་ཆེན་པོས་རབ་ཏུ་ཕྱེ་བ་མ་ཡིན། སངས་རྒྱས་ཀྱི་ཆོས་མ་འདྲེས་པར་སྒྲོ་བཏགས་པས་རབ་ཏུ་ཕྱེ་བ་མ་ཡིན། སྒྱུ་མ་དང་། སྨིག་རྒྱུ་དང་། ཆུ་ཟླ་དང་། རྨི་ལམ་གྱི་རང་བཞིན་ལྟ་བུར་སྐྱེ་བའི་སྐུའོ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ལས་བྱུང་བའི་སྐུའོ། མི་འགྱུར་བའི་སྐུའོ། མི་འཁྲུགས་པའི་སྐུའོ། རྣམ་པར་མི་རྟོག་པའི་སྐུའོ། མི་གནས་པའི་སྐུའོ། མི་སྙེམས་པའི་སྐུའོ། གནས་པ་དང་། རབ་ཏུ་གནས་པ་དང་། མི་གཡོ་བ་ཐོབ་པའི་སྐུའོ། གཟུགས་མེད་པ་གཟུགས་ཀྱི་རང་བཞིན་མ་ཡིན་པའི་སྐུའོ། ཚོར་བ་མ་ཡིན། འདུ་ཤེས་མ་ཡིན། འདུ་བྱེད་མ་ཡིན། རྣམ་པར་ཤེས་པ་མ་ཡིན། རྣམ་པར་ཤེས་པའི་རང་བཞིན་མ་ཡིན་པའི་སྐུའོ། བྱུང་བ་མ་ཡིན། ཀུན་དུ་བྱུང་བ་མ་ཡིན། མ་བྱུང་བ་མ་ཡིན་པའི་སྐུའོ། རྨད་ཏུ་བྱུང་བ་རྨད་ཏུ་བྱུང་བའི་ཆོས་ཀྱི་སྐུའོ། མིག་ལས་བྱུང་བ་མ་ཡིན། གཟུགས་སུ་གཏོགས་པ་མ་ཡིན། ཕྱི་རོལ་མ་ཡིན། རྣ་བ་ལས་གནས་པ་མ་ཡིན། སྒྲར་གཏོགས་པ་མ་ཡིན། ཕྱི་རོལ་མ་ཡིན། སྣས་རྣམ་པར་ཤེས་པར་བྱ་བ་མ་ཡིན། དྲིར་གཏོགས་པ་མ་ཡིན། ཕྱིར་རོལ་མ་ཡིན། ལྕེས་བསྐྱེད་པ་མ་ཡིན། རོར་གཏོགས་པ་མ་ཡིན། ཕྱི་རོལ་མ་ཡིན། ལུས་དང་ལྡན་པ་མ་ཡིན། རེག་བྱར་གཏོགས་པ་མ་ཡིན། ཕྱི་རོལ་མ་ཡིན། སེམས་ལ་འཇུག་པ་མ་ཡིན། ཡིད་ལ་འཇུག་པ་མ་ཡིན། རྣམ་པར་ཤེས་པ་ལ་འཇུག་པ་མ་ཡིན། ལྡོག་པ་མ་ཡིན། རྗེས་སུ་འཇུག་པ་མ་ཡིན། གནས་པ་དང་། མི་གཡོ་བ་ཐོབ་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་ཁམས་ཀྱི་མཐའ་གཏུགས་པ། ནམ་མཁའ་དང་མཉམ་པའི་སྐུ་སྟེ། ཤཱ་རིའི་བུ་འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་སྟེ། དེ་ལ་བྱང་ཆུབ་སེམས་དཔའ་མངོན་པར་དང་། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་། རྨད་ཏུ་འདུ་ཤེས་སྐྱེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས་སྟོན་པ་ཡང་འདི་སྐད་གསུང་ངོ་། །བསྐལ་པ་བྱེ་བ་ཁྲག་ཁྲིག་དཔག་མེད་པར། །བྱང་ཆུབ་སེམས་དཔའི་སྤྱོད་པ་རྣམས་སྤྱད་ཅིང་། །
ལས་རྣམས་གསུམ་ནི་ཤིན་ཏུ་ཡོངས་དག་པར། །མཚུངས་མེད་བདེ་བར་གཤེགས་པའི་སྐུ་ཚོལ་ལོ། ཕྱོགས་བཅུ་འགྲོ་བ་ཀུན་ལ་བྱམས་པ་དང་། །སྙིང་རྗེ་རྒྱ་ཆེར་བསྐྱེད་ནས་སྦྱིན་པ་བྱིན། །འདོད་ལ་ལོག་པར་གཡེམ་པ་བརྟག་སྤོང་ཞིང་། །ནམ་མཁའ་ལྟ་བུ་མཆོག་གི་སྐུལ་ཚོལ་ལོ། །གསེར་ལྟར་དག་ཅིང་མཛེས་པའི་གོས་རྣམས་ནི། །དཔག་ཏུ་མེད་པ་གང་གཱའི་བྱེད་མ་སྙེད། །སྦྱིན་པའི་ཕ་རོལ་ཕྱིན་པ་རབ་སྦྱོར་ཅིང་། །རྒྱལ་བའི་སྲས་ཀྱིས་འཇིག་རྟེན་མཆོག་ལ་ཕུལ། གཡག་གི་རྔ་མ་བཞིན་དུ་ཚུལ་ཁྲིམས་སྲུང་། །ཡན་ལག་ཉིད་ལག་བཅད་ཀྱང་དགྲ་ལ་བཟོད། །བརྩོན་འགྲུས་ཀྱི་ནི་ཕ་རོལ་ཕྱིན་སྤྱོད་ཅིང་། །སངས་རྒྱས་སྐུ་ལ་སྨོན་པས་ཡོངས་མི་སྐྱོ། །ཤེས་རབ་ཐབས་དགའ་རྒྱ་ཆེན་བསམ་གཏན་པ། །བསམ་གཏན་སྤྱོད་ཡུལ་དགའ་རྒྱལ་རྣམ་པ་ལྟ། །ཆོས་དབྱིངས་དམ་པ་བདེ་བར་གཤེགས་པའི་སྐུ། །དེ་འདྲར་བདག་གྱུར་ཅེས་ནི་དེ་ལ་སྨོན། །སྲིད་པར་འགྲོ་བ་དག་ཏུ་དགེ་བྱེད་ཅིང་། །མི་མཆོག་གིས་ནི་བྱང་ཆུབ་མཚུངས་མེད་ཐོབ། །དག་པ་དྲི་མེད་གཙང་ཞིང་རྡུལ་གྲོལ་བ། །ནམ་མཁའ་འདྲ་བ་ཡངས་པའི་སྐུ་ཐོབ་བོ། །རང་བཞིན་སྟོང་པ་དག་དང་སེམས་ཅན་བྲལ། །མཚན་མ་མེད་ཅིང་སྒྲ་དང་བྲལ་བ་ཐོབ། །མིག་གི་ཡུལ་ཀུན་ལས་ནི་རབ་འདས་པ། །དེ་འདྲའི་སྐུ་ནི་ཐུབ་པས་ཡང་དག་ཐོབ། །གཟོད་མ་ནས་སྟོང་མ་བྱས་མ་བྱུང་བ། །གཟུགས་དང་སྒྲ་བྲལ་ཡིད་ཀྱང་རྣམ་དག་པ། །དེ་བཞིན་གཤེགས་སྐུ་མི་གཡོ་གང་མཐོང་བ། །དེས་ནི་ཕྱོགས་བཅུའི་བདེ་བར་གཤེགས་པ་མཐོང་། །ཇི་ལྟར་སྒྱུ་མ་སྤྲུལ་པ་སྣ་ཚོགས་ལུས། །རྟ་དང་གླང་པོ་བུད་མེད་སྐྱེས་པའི་གཟུགས། །བྱིས་པ་སླུ་བ་བརྫུན་ཞིང་ཕྱིན་ཅི་ལོག། །དེ་བཞིན་སྟོབས་བཅུ་རྣམས་ལ་བལྟ་བར་བྱོས། །གང་དག་འདས་པའི་བདེ་གཤེགས་དཔག་མེད་དང་། །མ་བྱོན་རྒྱལ་བ་དེ་བཞིན་གང་སྣང་དག། །ཆོས་ཉིད་གཅིག་གྱུར་མཉམ་པ་མེད་པའི་སྐུ། །ཆོས་ཀྱི་དབྱིངས་ཀྱིས་ཀླས་ཤིང་ནམ་མཁའ་འདྲ། །དེ་ལྟར་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་པར་དང་། ཡིད་ཆེས་རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་། རྨད་ཏུ་འདུ་ཤེས་སྐྱེད་དོ། །ཤཱ་རིའི་བུ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་
དབྱངས་བསམ་གྱིས་མི་ཁྱབ་པ་ལ་མངོན་པར་དང་། ཡིད་ཆེས། རབ་ཏུ་རྟོག་པ་ནས་ངོ་མཚར་དང་རྨད་ཏུ་འདུ་ཤེས་ཀྱི་བར་དུ་འདུ་ཤེས་སྐྱེད་ཅེ་ན། འདི་ལྟར་ཤཱ་རིའི་བུ་དེ་བཞིན་གཤེགས་པ་ནི་འདུལ་བའི་དབང་གི་ཕྱིར་འཁོར་ཇི་ལྟ་བ་དེ་བཞིན་དུ་སྒྲ་འབྱུང་སྟེ། སེམས་ཅན་ཐམས་ཅད་རབ་ཏུ་དགའ་བར་བྱ་བའི་ཕྱིར་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཏུ་ཁྱབ་པར་བྱེད་མོད་ཀྱི། ཤཱ་རིའི་བུ་དེ་བཞིན་གཤེགས་པ་འདི་སྙམ་དུ་ངས་དགེ་སློང་གི་འཁོར་ལོ་ནི་འདི་བཤད། དགེ་སློང་མའི་འཁོར་ལོ་ནི་འདི། དགེ་བསྙེན་གྱི་འཁོར་ལོ་ནི་འདི། དགེ་བསྙེན་མའི་འཁོར་ལོ་ནི་འདི། བྲམ་ཟེའི་འཁོར་ལོ་ནི་འདི། རྒྱལ་རིགས་ཀྱི་འཁོར་ལོ་ནི་འདི། ཁྱིམ་བདག་གི་འཁོར་ལོ་ནི་འདི། ལྷའི་འཁོར་ལོ་ནི་འདི། ཚངས་པའི་འཁོར་ལོ་ནི་འདི་སྟེ། འདི་ལྟ་སྟེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་ཏུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པའི་རབས་ཀྱི་སྡེ་དང་། ཤིན་དུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་། གཏན་ལ་དབབ་པར་བསྟན་པའི་སྡེ་རྣམས་བཤད་པར་བྱའོ་སྙམ་དུ་མི་དགོངས་མོད་ཀྱི། འོན་ཀྱང་ཤཱ་རིའི་བུ་འཁོར་ཇི་ལྟ་བུ་འདུས་པར་གྱུར་པ། ཚངས་པའི་འཁོར་གྱི་བར་དུ་འདུས་པར་གྱུར་པ། དེ་དག་གི་དབང་པོའི་རིམ་པ་ཅི་འདྲ་བ་དང་། སེམས་ཅན་དེ་དག་ལ་ཆོས་ཀྱི་མདོ་ཇི་ལྟ་བུ་ཐོས་པར་བྱ་དགོས་པར་འགྱུར་བ་དེ་ལྟ་བུའི་ཆོས་ཀྱི་མདོ་ཐོས་པར་བྱ་བ་དེ་བཞིན་གཤེགས་པའི་ཞལ་གྱི་སྒོ་ནས་འབྱུང་བར་ཡང་དག་པར་ཤེས་ཀྱང་ཆོས་བསྟན་པ་དེ་གཅིག་ངེས་པའི་ཚིག་གནོད་པར་གྱུར་པ་ཡང་མེད་དེ། ཐམས་ཅད་ཀྱང་རང་རང་གི་ཆོས་རྣམ་པར་རིག་པར་ཀུན་ཤེས་སོ། །དེ་བཞིན་གཤེགས་པའི་དབྱངས་ནི་དེ་བཞིན་གཤེགས་པའི་སྔོན་གྱི་བསོད་ནམས་ཀྱི་འབྲས་བུ་རྣམ་པར་སྨིན་པ་ལས་མངོན་པར་གྲུབ་པ་བདེན་པའི་རྗེས་སུ་འབྲང་བས་འཇུག་གོ། །ཡང་ཤཱ་རིའི་བུ་དེ་བཞིན་གཤེགས་པའི་དབྱངས་དེ་ནི་འཇམ་པར་འབྱུང་། ཡིད་ཏུ་འོང་བ་དང་། ཡིད་དགའ་བ་དང་། དག་པ་དང་། དྲི་མ་མེད་པ་དང་། སྙན་པ་དང་། མཉན་པར་འོས་པ་དང་། ཤེས་པར་བྱ་
བར་འོས་པ་དང་། མི་རྩུབ་པ་དང་། མི་བརླང་བ་དང་། ལུས་སིམ་པར་བྱེད་པ་དང་། སེམས་ཚིམ་པར་བྱེད་པ་དང་། སྙིང་དགའ་བར་བྱེད་པ་དང་། དགའ་བ་དང་བདེ་བ་སྐྱེད་པ་དང་། ཀུན་ཤེས་པར་བྱེད་པ་དང་། གསལ་ཞིང་འཐད་པ་དང་། མངོན་པར་དགའ་བར་འགྱུར་བ་དང་། ཡིད་དུ་འོང་བ་དང་། སེ་གེའི་སྐད་ཀྱི་དྲག་ཤུལ་གྱི་ང་རོའི་སྒྲ་དང་། སྤྲིན་གྱི་སྒྲ་དབྱངས་དང་། རྒྱ་མཚོའི་སྒྲ་བསྒྲགས་པའི་དབྱངས་དང་། མིའམ་ཅིའི་གླུའི་དབྱངས་དང་། ཀ་ལ་བིང་ཀའི་ང་རོའི་སྒྲ་དབྱངས་དང་། ཚངས་པའི་ང་རོའི་སྒྲ་དབྱངས་དང་། རྔའི་སྒྲ་དབྱངས་དང། དཔལ་དང་ལྡན་པ་དང་། མཉེན་པ་དང་། ཟུར་ཕྱིན་པ་དང་། བསྒྲགས་པ་དང་། སེམས་ཅན་ཐམས་ཅད་ཀྱི་དབང་པོ་མགུ་བར་བྱེད་པ་དང་། འཁོར་ཐམས་ཅད་ཏུ་གྲགས་པ་དང་། རྣམ་པ་ཐམས་ཅད་ཀྱི་མཆོག་དང་ལྡན་པ་དང་། དེ་དག་དང་གཞན་ཡོན་ཏན་དཔག་ཏུ་མེད་པ་དང་ལྡན་པའི་དེ་བཞིན་གཤེགས་པའི་གསུང་གི་དབྱངས་འབྱུང་སྟེ། ཤཱ་རིའི་བུའང་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་དབྱངས་བསམ་གྱིས་མི་ཁྱབ་པ་སྟེ། དེ་ལ་བྱང་ཆུབ་སེམས་དཔའ་མངོན་པར་དང་། ཡིད་ཆེས། རབ་ཏུ་རྟོག། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་རྨད་ཏུ་འདུ་ཤེས་སྐྱེད་དོ། །འདི་ལ་ཆོས་ཉིད་ནི་འདི་ཡིན་ཏེ། །དེ་ལ་འདི་སྐད་ཅེས་བྱའོ། ཚངས་པ་ཡི་ནི་སྒྲ་དབྱངས་སུ། འདྲེན་པ་གསུང་སྒྲ་རབ་འབྱིན་ཏེ། ཚངས་པ་རྣམས་ནི་ཚིམ་པར་བྱེད། འདི་འདྲའི་ཆོས་ནི་ཕུན་སུམ་ཚོགས། །དེ་ཡི་དབྱངས་ནི་བྱམས་དང་ལྡན། །སྙིང་རྗེ་ལས་ནི་ཡང་དག་འབྱུང་། །བཏང་སྙོམས་དང་ནི་དགའ་ལྡན་པ། ཐུབ་པའི་དབྱངས་ནི་རབ་ཏུ་འབྱུང་། །སྲོག་ཆགས་ཀུན་གྱི་འདོད་ཆགས་མེ། །ཞེ་སྡང་དུག་ནི་ཞི་བྱེད་ཅིང་། །གཏི་མུག་མུན་པ་སེལ་པ་སྟེ། །ཕུན་སུམ་ཚོགས་དབྱངས་འདི་འདྲའོ། །འཛམ་བུའི་གླིང་གི་སྣ་ཚོགས་ཕྱོགས་རྣམས་ན། །མིར་གྱུར་པ་ཡི་སྐད་ནི་མཐའ་ཡས་པ། །ཀུན་ནི་དེ་ཡི་སྒྲ་རྣམས་སྣ་ཚོགས་པ། །དབྱངས་འདི་ཐོས་ན་རྗེས་སུ་རྟོགས་པར་འགྱུར། །ས་བླ་དང་ནི་དེ་བཞིན་བར་སྣང་ལྷ། །དེ་དག་ཅི་འདྲའི་སྐད་ལ་འཇུག་པ་ལྟར། །དེ་ཕྱིར་ཐུབ་དབང་དབྱངས་ནི་རབ་ཞུགས་ཏེ། །རྣམ་པར་དེས་ཐོས་མྱ་ངན་འདས་རེག་འགྱུར། །རྐང་གཉིས་དག་དང་རྐང་བཞི་རྣམས་དང་ནི། །རྐང་
མདས་དག་དང་རྐང་པ་མེད་པ་རྣམས། །ཐམས་ཅད་ལ་ནི་དེ་ཡི་སྒྲ་དབྱངས་འཇུག། །བསྐུལ་ནས་རབ་ཏུ་འཆོས་ཤིང་ཚར་གཅོད་བྱེད། །སྟོང་གསུམ་འདི་ཡི་སྒྲ་རྣམས་ཇི་སྙེད་པ། ཐ་མ་དང་ནི་འབྲིད་དང་དེ་བཞིན་རབ། །དེ་དག་རྗེས་སུ་འཇུག་དབྱངས་དེ་སྒྲོག་སྟེ། །འདུལ་བའི་སེམས་ཅན་ཐར་པ་རེག་པར་བྱེད། །རྟོག་པ་མེད་ཅིང་རྣམ་པར་མི་རྟོག་སྟེ། །གཟུང་པ་དང་ནི་བཅིངས་ལས་བྱུང་མ་ཡིན། །མཉམ་པར་བཞག་པས་འཕགས་པའི་བདེན་པ་འཆང་། །སེམས་ཅན་ཐོས་ན་ཉོན་མོངས་ཞི་བར་བྱེད། །སངས་རྒྱས་ཆོས་དང་དེ་བཞིན་དགེ་འདུན་སྒྲ། །སྦྱིན་ཐོས་ཚུལ་ཁྲིམས་དེ་བཞིན་བཟོད་པ་དག །མཐའ་ཡས་སྒྲ་ནི་སེམས་ཅན་ཐོས་བྱེད་དེ། །དེ་བཞིན་གཤེགས་པའི་དབྱངས་ནི་དེ་འདྲའོ། །དབྱངས་ཀྱང་མཐའ་ཡས་ཡེ་ཤེས་མཐའ་ཡས་པ། །དེ་ཡི་དབྱངས་ཀྱི་ཚད་ནི་ཡོད་མེད་དེ། །དེ་ལ་བྱང་ཆུབ་སེམས་དཔའ་མཁས་དད་ཅིང་། །དེ་བཞིན་གཤེགས་པའི་དབྱངས་ལ་ཐེ་ཚོམ་མེད། །ཤཱ་རིའི་བུ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག ཐེ་ཚོམ་མི་ཟ། ཐོས་ན་རྒྱ་ཆེར་དགའ་མགུ་སྟེ། །རངས་པ་རྙེད་ནས་ངོ་མཚར་དང་། རྨད་ཏུ་འདུ་ཤེས་སྐྱེད་ཅེས་ན། འདི་ལྟར་ཤཱ་རིའི་བུ་ཆོས་ཐམས་ཅད་ལ་དེ་བཞིན་གཤེགས་པའི་ཆགས་པ་མེད་པའི་ཡེ་ཤེས་གཟིགས་པ་འཇུག་སྟེ། དེ་ལ་བྱང་ཆུབ་སེམས་དཔའ་མངོན་པར་དད། ཡིད་ཆེས། རབ་ཏུ་རྟོག་པ་ནས། དད་པས་ངོ་མཚར་དང་། རྨད་ཀྱི་བར་དུ་འདུ་ཤེས་སྐྱེད་དོ། དེ་བཞིན་གཤེགས་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་བརྩམས་ཏེ་ཁྱོད་ལ་དཔེ་བསྟན་པར་བྱའོ། ཤཱ་རིའི་བུ་ཡོངས་སུ་བརྟག་པ་བཟུང་སྟེ། གང་གཱའི་ཀླུང་གིས་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་རྩྭ་དང་། ཤིང་དང་། ཡལ་ག་དང་། ལོ་མ་དང་། འདབ་མ་དང་། ཆུང་ངུ་ན་སོར་བཞིའི་ཚད་ཙམ་ཡན་ཆད་ཇི་སྙེད་ཡོད་པ་སྐྱེས་བུ་ལ་ལ་ཞིག་གིས་དེ་དག་གཅིག་ཏུ་སྤུངས་ཏེ། གཅིག་ཏུ་སྤུངས་ནས་མེས་བསྲེགས་ཏེ་ཚིག་པར་གྱུར་ནས་ཐལ་བར་བྱས་སོ།། ཐལ་བར་བྱས་ནས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱི་རྒྱ་མཚོ་ཆེན་པོ་གང་ན་ཡོད་པ་དེ་དག་ཏུ་བླུགས་ཏེ། ལོ་སྟོད་དུ་དཀྲུགས་
ཀྱང་ཤཱ་རིའི་བུ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་འདི་ལྟ་བུ་ཡོད་དེ། དེ་བཞིན་གཤེགས་པ་ཡེ་ཤེས་དེ་དང་ལྡན་པས་རྒྱ་མཚོ་ཆེན་པོ་དད། དེ་དག་ནས་ཐལ་བ་དེ་དག་བླངས་ཏེ། འཇིག་རྟེན་གྱི་ཁམས་དེ་དང་དེ་དག་ཏུ་འདི་ནི་འཇིག་རྟེན་གྱི་ཁམས་ཆེ་གེ་མོ་ཞིག་གི་ཤིང་འདི་འདྲ་བ་ཞིག་གི་ཐལ་བའོ།། འདི་ནི་འཇིག་རྟེན་གྱི་ཁམས་ཆེ་གེ་མོ་ཞིག་གི་ཤིང་ཆེ་གེ་མོ་ཞིག་གི་རྩ་བ་དང་། ཆེ་གེ་མོ་ཞིང་གི་སྡོད་པོ་དང་། ཆེ་གེ་མོ་ཞིག་གི་ཡལ་ག་དང་། ཆེ་གེ་མོ་ཞིག་གི་ལོ་མ་དང་། ཆེ་གེ་མོ་ཞིག་གི་འབྲས་བུའི་ཐལ་བའོ། འདི་ནི་ཕྱོགས་ཆེ་གེ་མོ་ཞིག་གི་འདབ་མ་འདི་འདྲ་བ་ཞིག་གི་ཐལ་བའོ།། ཞེས་རབ་ཏུ་འབྱེད་དོ།། དེ་ཅིའི་ཕྱིར་ཞེ་ན། འདི་ལྟར་ཤ་རིའི་བུ་དེ་བཞིན་གཤེགས་པས་ཆོས་ཀྱི་དབྱངས་རབ་ཏུ་རྟོགས་ཏེ། དེ་རབ་ཏུ་རྟོགས་ནས། དེ་བཞིན་གཤེགས་པས་འདི་ལྟར་འདི་ནི་འཇིག་རྟེན་ཀྱི་ཁམས་ཆེ་གེ་མོ་ཞིག་གི་ཐལ་བའོ།། ཞེས་རབ་ཏུ་མཁྱེན་པ་ནས་རྒྱས་པར་བྱས་ཏེ། དེ་ལྟར་ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་དེ་ལྟར་རྫུ་འཕྲུལ་ཆེའོ། དེ་ལྟར་མཐུ་ཆེའོ། འདི་ལྟར་དབང་ཆེ་བར་གྲགས་པ་སྟེ། ཤཱ་རིའི་བུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་དེ་བཞིན་གཤེགས་པའི་ཡེ་ཤེས་འདི་ལ་དད། ཡིད་ཆེས། རབ་ཏུ་རྟོག་ཅིང་དེ་བཞིན་གཤེགས་པ་བྱམས་པས་ཡིད་ལ་བྱེད་པ་དགེ་ཐམས་ཅད་ནི། དགེ་བའི་རྩ་བ་འདིའི་མཐའ་མ་ཐོབ་པར་སྡུག་བསྔལ་མཐར་འབྱིན་ཏོ།། དེ་ཅིའི་ཕྱིར་ཞེ་ན། འདི་ལྟར་ཤཱ་རིའི་བུ། དེ་བཞིན་གཤེགས་པས་ཆོས་ཀྱི་དབྱངས་ཤིན་དུ་རྟོགས་ཏེ། དེ་ཤིན་དུ་རྟོགས་པས། དེ་བཞིན་གཤེགས་པ་རྣམས་ལས་སེམས་བསྐྱེད་པ་ཅིག་ཀྱང་ཆུང་མི་ཟའོ།། ཤཱ་རིའི་བུ་ཁྱོད་ལ་དཔེར་བྱ་སྟེ། འདི་ལ་སྐྱེས་བུ་མཁས་པ་ཁ་ཅིག་དཔེས་བཤད་པའི་དོན་རྣམས་ཀུན་ཤེས་ཏེ། འདི་ལྟ་སྟེ། དཔེར་ན་ཤཱ་རིའི་བུ་སྐྱེས་བུ་ལ་ལ་ཚེ་ལོ་བརྒྱ་པ་ལོ་བརྒྱར་འཚོ་བ་ཞིག་གིས་སྐྲའི་རྩེ་མོ་བྱེ་བ་བརྒྱར་བཙལ་པས་ཆུའི་ཐིགས་པ་བླངས་ཏེ། ང་གང་ན་བ་དེར་འོངས་ནས་ཕྱིན་པ་དང་། འདི་སྐད་ཅེས་ཀྱེ་གཽ་ཏ་མ་བདག་གིས་ཆུའི་ཐིགས་པ་འདི་ཁྱོད་ལ་གདམས་ཀྱིས་ནམས་བདག་ལ་དགོས་པར་གྱུར་པ་དེ་ན་སླར་བྱིན་ཅིག་
ཅེས་ཟེར་བ་དང་། དེ་བཞིན་གཤེགས་པས་དེ་བླངས་ཏེ་རྒྱ་མཚོ་ཆེན་པོར་བོར་ནས་དེ་ཆུའི་རྒྱུན་གྱིས་བངས་ཏེ་འདྲེས་ནས་ལྷན་ཅིག་ཏུ་མཐར་གྱིས་རྒྱ་མཚོ་ཆེན་པོར་ཞུགས་སོ།། དེ་ནས་སྐྱེས་བུ་ཚེ་ལོ་བརྒྱ་པ་དེ་ལོ་བརྒྱ་ལོན་པ་དང་ང་ག་ལ་བ་དེར་འོངས་ཏེ། ཕྱིན་ནས་འདི་སྐད་ཅེས་གཽ་ཏ་མ་བདག་གི་ཆུའི་ཐིགས་པ་དེ་དགོས་ཀྱིས་བདག་ལ་བྱིན་ཅིག་ཅེས་ཟེར་ན། ཤཱ་རིའི་བུ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་ཡོད་དེ། ཡེ་ཤེས་དེ་དང་ལྡན་པས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྐྲའི་རྩེ་མོ་བྱེ་བ་བརྒྱར་བཙལ་བས་ཆུའི་ཐིགས་པ་དེ་རྒྱ་མཚོ་ཆེན་པོ་དེ་ནས་ཆུ་གཞན་དང་མ་འདྲེས་པར་བླངས་ཏེ་སྐྱེས་བུ་དེ་ལ་སླར་བྱིན་ནོ།། ཤཱ་རིའི་བུ་འདི་ལྟར་དོན་ཤེས་པར་བྱ་བའི་ཕྱིར་ཁྱོད་ལ་དཔེར་བསྟན་ཏེ། དེ་གང་གི་དོན་དུ་བལྟ་ཞེ་ན། འདི་ལྟ་སྟེ། ཤཱ་རིའི་བུ་སྐྱེས་བུའི་ཆུའི་ཐིགས་པ་དེ་བཞིན་གཤེགས་པའི་ལག་ཏུ་བཞག་པ་ཡུན་རིང་མོ་ཞིག་ལོན་ཡང་ཆུད་མི་ཟ་བ་དེ་བཞིན་དུ་ཤཱ་རིའི་བུ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དེ་བཞིན་གཤེགས་པའི་ཡེ་ཤེས་འདི་ལྟ་བུ་ལ་དང། ། ཡིད་ཆེས། རབ་ཏུ་རྟོག་ཅིང་དེ་བཞིན་གཤེགས་པ་བྱམས་པས་ཡིད་ལ་བྱེད་པ་དང་། དེ་བཞིན་གཤེགས་པ་ཉིད་ལ་དམིགས་ནས་དེའི་ཕྱིར་ནམ་མཁའ་ལ་མེ་ཏོག་འཐོར་བ་དེ་དག་ཐམས་ཅད་དགེ་བའི་རྩ་བ་འདི་མཐའ་མ་ཐོབ་པར་སྡུག་བསྔལ་མཐར་འབྱིན་པར་འགྱུར་རོ།། དེ་ཅིའི་ཕྱིར་ཞེ་ན། འདི་ལྟར་ཤཱ་རིའི་བུ་དེ་བཞིན་གཤེགས་ལས་ཆོས་ཀྱི་དབྱིངས་རབ་ཏུ་རྟོགས་ཏེ། དེ་རབ་ཏུ་རྟོགས་པས་དེ་བཞིན་གཤེགས་པ་རྣམས་ལས་སེམས་གཅིག་བསྐྱེད་པ་ཡང་ཆུང་མི་ཟའོ།། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ།། བཅོམ་ལྡན་འདས་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་གང་རྣམ་པར་ཤེས་པ་མ་མཆིས་པར་འཇུག་པ་མཆིས་སམ། བཀའ་སྩལ་པ། ཤཱ་རིའི་བུ་དེ་ནི་མ་ཡིན་ནོ།། བཅོམ་ལྡན་འདས་ཡེ་ཤེས་ནི་གང་ལགས། རྣམ་པར་ཤེས་པ་ནི་གང་ལགས། ཤཱ་རིའི་བུ་འདི་བཞི་ནི་རྣམ་པར་ཤེས་པའི་གནས་ཏེ། རྣམ་པར་ཤེས་པ་
དེ་ལ་གནས་སོ། །འདི་ལྟ་སྟེ། རྣམ་པར་ཤེས་པའི་གཟུགས་ལ་ཉེ་བར་སོང་ཞིང་གནས། གཟུགས་ལ་དམིགས། གཟུགས་ལ་གནས། དགའ་བ་ལ་བསྟེན་པས་སྐྱེ་ཞིང་འཕེལ་ཏེ་རྒྱས་པར་འགྱུར་བ་དང་། རྣམ་པར་ཤེས་པ་ཚོར་བ་ལ་ཉེ་བར་སོང་ཞིང་གནས། ཚོར་བ་ལ་དམིགས། ཚོར་བ་ལ་གནས། དགའ་བ་ལ་བསྟན་པས་སྐྱེ་ཞིང་འཕེལ་ཏེ་རྒྱས་པར་འགྱུར་བ་དང་། རྣམ་པར་ཤེས་པ་འདུ་ཤེས་ལ་ཉེ་བར་སོང་ཞིང་གནས། འདུ་ཤེས་ལ་དམིགས། འདུ་ཤེས་ལ་གནས། དགའ་བ་ལ་བསྟེན་པས། སྐྱེ་ཞིང་འཕེལ་ཏེ་རྒྱས་པར་འགྱུར་བ་དང་། རྣམ་པར་ཤེས་པ་འདུ་བྱེད་ལ་ཉེ་བར་སོང་ཞིང་གནས། འདུ་བྱེད་ལ་དམིགས། འདུ་བྱེད་ལ་གནས། དགའ་བ་ལ་བསྟེན་པས་སྐྱེ་ཞིང་འཕེལ་ནས་རྒྱས་པར་འགྱུར་བ་སྟེ། ཤཱ་རིའི་བུ་འདི་ནི་རྣམ་པར་ཤེས་པ་ཞེས་བྱའོ།། གང་ལེན་པའི་ཕུང་པོ་ལྔ་ལ་མི་གནས་པར། རྣམ་པར་ཤེས་པའི་ཕུང་པོ་ཡོངས་སུ་ཤེས་པ་དེ་ནི་ཡེ་ཤེས་ཞེས་བྱའོ།། གཞན་ཡང་རྣམ་པར་ཤེས་པ་ཞེས་བྱ་བ་ནི་སའི་ཁམས་རྣམ་པར་ཤེས་པ་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་རྣམ་པར་ཤེས་པ་སྟེ། འདི་ནི་རྣམ་པར་ཤེས་པ་ཞེས་བྱའོ།། གང་ཁམས་བཞི་ལ་མི་གནས་པར་རྣམ་པར་ཤེས་པའི་ཆོས་ཀྱི་ཁམ་ཀུན་དུ་དབྱེ་བ་ཤེས་པ་འདི་ནི་ཡེ་ཤེས་ཞེས་བྱའོ།། གཞན་ཡང་ཤཱ་རིའི་བུ་རྣམ་པར་ཤེས་པ་ཞེས་བྱ་བ་ནི་གང་མིག་གིས་ཤེས་པར་བྱ་བའི་གཟུགས་རྣམ་པར་རིག་པ་དང་། རྣ་བས་ཤེས་པར་བྱ་བའི་སྒྲ་རྣམ་པར་རིག་པ་དང་། སྣས་ཤེས་པར་བྱ་བའི་དྲི་རྣམ་པར་རིག་པ་དང་། ལྕེས་ཤེས་པར་བྱ་བའི་རོ་རྣམ་པར་རིག་པ་དང་། ལུས་ཀྱིས་ཤེས་པར་བྱ་བའི་རེག་བྱ་རྣམ་པར་རིག་པ་དང་། ཡིད་ཀྱིས་ཤེས་པར་བྱ་བའི་ཆོས་རྣམ་པར་རིག་པ་སྟེ། འདི་ནི་རྣམ་པར་ཤེས་པ་ཞེས་བྱའོ།། གང་ནང་ཉེ་བར་ཞི་ཞིང་ཕྱི་རོལ་དུ་མི་རྒྱུ་སྟེ། ཡེ་ཤེས་ཀྱི་ཕྱིར་འབྲང་ཞིང་ཆོས་གང་ལ་ཡང་མི་རྟོག །རྣམ་པར་མི་རྟོག་པ་དེ་ནི་ཡེ་ཤེས་ཤེས་བྱའོ། །རྣམ་པར་ཤེས་པ་ནི་དམིགས་པ་ལས་སྐྱེའོ། །རྣམ་པར་ཤེས་པ་ནི་ཡིད་ལས་བྱེད་པ་ལས་སྐྱེའོ། རྣམ་པར་ཤེས་པ་ནི་ཡོངས་སུ་རྟོག་པ་ལས་སྐྱེ་སྟེ། དེ་ནི་རྣམ་པར་ཤེས་པ་ཞེས་བྱའོ།། གང་འཛིན་པ་མེད་པས་སྙེམས་པ་དང་། དམིགས་པ་མེད། རྣམ་པར་རིག་པ་མེད་ཅིང་མི་རྟོག་པ་དེ་ནི་ཡེ་ཤེས་ཤེས་བྱའོ།། གཞན་ཡང་འདུས་
བྱས་ལ་སྤྱོད་པའི་ཆོས་ལ་རྣམ་པར་ཤེས་པ་ལ་གནས་ཤིང་གང་འདུས་བྱས་ལ་སྤྱོད་པའི་ཆོས་རྣམ་པར་ཤེས་པ་དེ་ནི་རྣམ་པར་ཤེས་པ་ཞེས་བྱའོ།། འདུས་མ་བྱས་ལ་ནི་རྣམ་པར་ཤེས་པ་རྒྱུ་བ་མེད་དེ། གང་འདུས་མ་བྱས་ཤེས་པ་དེ་ནི་ཡེ་ཤེས་ཞེས་བྱའོ།། གཞན་ཡང་གང་སྐྱེ་བ་དང་། འཇིག་པ་ལ་རབ་ཏུ་གནས་པ་དེ་ནི་རྣམ་པར་ཤེས་པའོ།། གང་སྐྱེ་བ་མེད་པ་དང་། འགག་པ་མེད་པ་ལ་གནས་པ་དེ་ནི་ཡེ་ཤེས་ཞེས་བྱའོ།། དེ་ལྟར་ཤཱ་རིའི་བུ་འདི་ནི་རྣམ་པར་ཤེས་པ། འདི་ནི་ཡེ་ཤེས་ཏེ། བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པ་དེ་ལ་མངོན་པར་དང་། ཡིད་ཆེས། རབ་ཏུ་རྟོག ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ངོ་མཚར་དང་། རྨད་ཏུ་འདུས་ཤེས་སྐྱེད་དོ།། དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར། དེའི་ཚེ་ཚིགས་སུ་བཅད་པ་འདི་དག་གསུངས་སོ།། ཇི་ལྟར་གང་གཱའི་ཀླུང་གི་བྱེ་མ་དཔག་མེད་པ། །དེ་བཞིན་ཕྱོགས་བཅུའི་འཇིག་རྟེན་ཁམས་ཀྱི་རྩྭ་རྣམས་ནི། །དེ་དག་སྐྱེས་བུ་ལ་ལས་མེར་བསྲེགས་ཐལ་བར་བྱས། །ལོ་ནི་བརྒྱ་སྟོང་དག་ཏུ་རྒྱ་མཚོར་དཀྲུགས་པ་རྣམས། །དེ་འདྲ་བ་ཡི་སྟོབས་བཅུ་ཡེ་ཤེས་ཕྲ་མངའ་བས། །ཐལ་བ་བླངས་ནས་འགྲོ་བ་དག་ལ་ལུང་སྟོན་པ། །ཞིང་རྣམས་རབ་འབྱམས་དག་གི་ཤིང་རིགས་འདི། །དེ་ཚིག་ཐལ་བ་འདི་ཞེས་རྣམ་པ་ཐམས་ཅད་མཁྱེན། །འདི་ལྟར་ཕྱོགས་བཅུ་དག་གི་འཇིག་རྟེན་ཁམས་ཀྱི་རྡུལ། །ཐམས་ཅད་རྡུལ་དུ་བྱས་ནས་རྒྱལ་བ་རྣམས་སྟོན་ཏེ། །དེ་དག་ཐམས་ཅད་འགྲང་ཡང་ཆགས་མེད་ཐེ་ཚོམ་མེད། །དེ་ལྟར་བདེ་བར་གཤེགས་ཀྱི་ཡེ་ཤེས་ནམ་མཁའ་བཞིན། །ཇི་སྙེད་ཕྱོགས་བཅུའི་འགྲོ་བ་རྣམས་ཀྱི་སེམས་ཀྱི་རྒྱུད། །གང་དག་འདོད་ཆགས་སྤྱོད་དང་ཞེ་སྡང་གཏི་མུག་ལྡན། །སྤྱོད་པ་ཀུན་གྱི་ཚུལ་ཤེས་བསམ་པ་རྣམས་དང་ནི། །གང་གིས་བློ་ཉམས་གང་གིས་ཐར་བར་འགྱུར་བ་མཁྱེན། །འཇིག་རྟེན་ཀུན་མཆོག་སྟོབས་བཅུ་རྣམས་ཀྱི་ཡེ་ཤེས་ནི། །ཇི་སྙེད་ཕྱོགས་བཅུའི་ཆོས་ཀྱི་དབྱིངས་སུ་རབ་ཞུགས་ཀྱང་། །འདྲེན་པ་རྣམས་ལ་རྟོག་དང་རྣམ་པར་རྟོག་མི་འབྱུང་། །བདེ་གཤེགས་སྲས་པོ་དད་པ་རྒྱལ་ལ་དད་པར་བྱེད།