བདུན་པ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ལེའུ།
བམ་པོ་དགུ་པ། དེ་ལ་གང་ལ་བརྩོན་པས་བྱང་ཆུབ་སེམས་དཔའ་བྱང་ཆུབ་ཀྱི་སྤྱད་པ་སྤྱོད་པར་འགྱུར་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཞེ་ན། ཤཱ་རིའི་བུ་འདི་གསུམ་ནི། བྱང་ཆུབ་སེམས་དཔའ་རྣམས་ཀྱི་ལེགས་པར་སྤྱོད་པ་སྟེ། གསུམ་གང་ཞེ་ན། ལུས་ཀྱིས་ལེགས་པར་སྤྱོད་པ་དང་། ངག་གིས་ལེགས་པར་སྤྱོད་པ་དང་། ཡིད་ཀྱི་ལེགས་པར་སྤྱོད་པའོ། དེ་ལ་ལུས་ཀྱི་ལེགས་པར་སྤྱོད་པ་གང་ཞེ་ན། འདི་ལ་ཤཱ་རིའི་བུ་བྱང་ཆུབ་སེམས་དཔའི་ནི། སྲོག་བཅད་པ་སྤངས་པ་ཡིན། མ་བྱིན་པར་ལེན་པ་སྤངས་པ་ཡིན། འདོད་པ་ལ་ལོག་པར་གཡེམ་པ་སྤངས་པ་ཡིན་ཏེ། འདི་ནི་ལུས་ཀྱིས་ལེགས་པར་སྤྱོད་པ་ཞེས་བྱའོ། གཞན་ཡང་ཤཱ་རིའི་བུ་བྱང་ཆུབ་དཔའ་ནི། བརྫུན་དུ་སྨ་བ་སྤངས་པ་ཡིན། ཕྲ་མ་དང་ངག་རྩུབ་པོ་དང་། ཚིག་ཀྱལ་པ་སྤངས་པ་ཡིན་ཏེ། འདི་ནི་ངག་གིས་ལེགས་པར་སྤྱོད་པ་ཞེས་བྱའོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་ནི། བརྣབ་སེམས་མེད། གནོད་སེམས་མེད་ཅིང་། ཡང་དག་པར་ལྟ་བ་ཡིན་ཏེ། འདི་ནི་ཡིད་ཀྱིས་ལེགས་པར་སྤྱོད་པ་ཞེས་བྱའོ། དེ་འདི་སྙམ་དུ་སེམས་ཏེ། ལུས་ཀྱིས་ལེགས་པར་སྤྱོད་པ་གང་། ངག་གིས་ལེགས་པར་སྤྱོད་པ་གང་། ཡིད་ཀྱིས་ལེགས་པར་སྤྱོད་པ་གང་། གང་ཡིན་སྙམ་མོ། དེ་ཡང་འདི་སྙམ་དུ་སེམས་ཏ་ེ། སྲོག་གཅོད་པ་དང་། མ་བྱིན་པ་ལེན་པ་དང་། འདོད་པ་ལ་ལོག་པར་གཡེམ་པ་མ་བྱས་པ་དེ་ནི། ལུས་ཀྱིས་ལེགས་པར་སྤྱོད་པ་ཞེས་བྱའོ། སྙམ་མོ། དེ་ལ་ངག་གིས་ལེགས་པར་སྤྱོད་པ་གང་ཞེ་ན། དེ་འདི་སྙམ་དུ་སེམས་ཏེ། ངག་གིས་ལས་གང་བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་ཚིགས་ཀྱལ་པ་མ་སྨྲས་པ་དེ་ནི། ངག་གིས་ལེགས་པར་སྤྱོད་པ་ཞེས་བྱའོ། སྙམ་མོ་དེ་ལ་ཡིད་ཀྱིས་ལེགས་པར་སྤྱོད་པ་གང་ཞེ་ན། དེ་འདི་སྙམ་དུ་སེམས་ཏེ།
ཡིད་ཀྱིས་ལས་གང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་ན་བྱས་པ་དེ་ནི་ཡིད་ཀྱིས་ལེགས་པར་སྤྱོད་པ་ཞེས་བྱའོ། སྙམ་མོ། དེ་འདི་ལྟར་ཚུལ་བཞིན་དུ་སོ་སོར་རྟོག་སྟེ། ལས་གང་ལུས་ཀྱིས་མ་བྱས་པ་དང་། ལས་གང་དག་དང་། ཡིད་ཀྱིས་མ་བྱས་པ་དེ་ཅི་གདགས་པར་ནུས་སམ། དེ་འདི་ལྟར་ཚུལ་བཞིན་གྱིས། རྟོག་པ་ན་འདི་སྙམ་དུ་སེམས་ཏེ། ལས་གང་ལུས་ཀྱིས་མ་བྱས་པ་དང་། ལས་གང་དག་གང་ཡིད་ཀྱིས་མ་བྱས་པ་དེ་སྔོན་པོ་འམ། སེར་པོ་འམ། དམར་པོ་འམ། དཀར་པོ་འམ། ལེ་བ་རྒན་ནམ། ཤེལ་གྱི་ཁ་དོག་ཏུ་གདགས་པར་མི་ནུས་ཏེ། མིག་གིས་ཤེས་པར་བྱ་བ་མ་ཡིན། རྣམ་ཤེས་པར་བྱ་བ་མ་ཡིན། སྣས་ཤེས་པར་བྱ་བ་མ་ཡིན། ལྕེས་ཤེས་པར་བྱ་བ་མ་ཡིན། ལུས་ཀྱིས་ཤེས་པར་བྱ་བ་མ་ཡིན། ཡིད་ཀྱིས་ཤེས་པར་བྱ་བ་མ་ཡིན། དེ་ཅིའི་ཕྱིར་ཞེ་ན། འདི་ལྟར་དེ་ནི་སྐྱེས་པ་མ་ཡིན། བསྐྱེད་པ་མ་ཡིན། བྱུང་བ་མ་ཡིན། ཟིན་པ་མ་ཡིན་ཏེ། དེ་ནི་ལས་གང་གིས་ཀྱང་ཤེས་པར་བྱ་བ་མ་ཡིན་ནོ། དེ་འདི་སྙམ་དུ་སེམས་ཏེ། ཚུལ་ཁྲིམས་དེ་ནི། གང་མངོན་པར་འདུས་མ་བྱས་པའོ། གང་མངོན་པར་འདུས་མི་བྱེད་པ་དེ་ལ་གདགས་པ་ཡང་མེད་ོ། གང་གདགས་པ་མེད་པ། དེ་ལ་བདག་མངོན་པར་ཆགས་པར་མི་བྱའོ། སྙམ་ནས། དེ་འདི་ལྟར་ལེགས་པར་སྤྱད་པའི་ཚུལ་ཁྲིམས་ཀྱང་ཡང་དག་པར་རྗེས་སུ་མི་མཐོང་། གང་གིས་ཚུལ་ཁྲིམས་དེ་དང་། ཚུལ་ཁྲིམས་དེ་གང་དུ་བསྔོ་བ། དེ་ཡང་ཡང་དག་པར་རྫེས་སུ་མི་མཐོང་ངོ་། དེ་དེ་ལྟར་མཐོང་བས། འཇིགས་ཚོགས་ལ་ལྟ་བ་གང་གིས། ཚུལ་ཁྲིམས་སམ། འཆལ་པའི་ཚུལ་ཁྲིམས་ལ། སོ་སོར་རྟོག་པར་འགྱུར་བའི་འཇིགས་ཆོགས་ལ་ལྟ་བ་མི་སློད་དོ། དེ་དེ་ལྟར་མཐོང་བས་སྡོམས་པ་དང་། ཆོ་ག་དང་། སྤྱོད་པ་དང་། སྤྱོད་ཡུལ་ཤེས་བཞིན་དུ་སྤྱོད་པར་འགྱུར་ཏེ། ཤེས་བཞིན་དུ་སྤྱོད་པས་ཚུལ་ཁྲིམས་དང་ལྡན་པས་ཞེས་བྱའོ། དེ་བདག་ཏུ་དམིགས་ཤིང་མི་སྤྱོད། ཕ་རོལ་ཏུ་དམིགས་ཤིང་མི་སྤྱོད་དེ། དེ་ཚུལ་ཁྲིམས་མ་ཉམས་པ་དང་། ཚུལ་ཁྲིམས་མཆོག་ཏུ་མི་འཛིན་པ་ཡིན་ནོ། །བདག་ཏུ་
དམིགས་ཚུལ་ཁྲིམས་སུ་དམིགས་པར་འགྱུར་གྱི། གང་བདག་ཏུ་མི་དམིགས་པ་དེ་ནི་ཚུལ་ཁྲིམས་སུ་མི་དམིགས་སོ། གང་ཚུལ་ཁྲིམས་སུ་མི་དམིགས་པ་དེ་ནི་བསླབ་པ་ཉམས་པར་མི་བྱེད་དོ། གང་བསླབ་པ་ཉམས་པར་མི་བྱེད་པ་དེ་ཚུལ་ཁྲིམས་ཉམས་པར་མི་བྱེད་དེ། ཚུལ་ཁྲིམས་མཆོག་ཏུ་མི་འཛིན་ཏོ། ཅིའི་ཕྱིར་མཆོག་ཏུ་མི་འཛིན་ཅེ་ན། དེས་གཞན་ལས་ཆོས་ཐམས་ཅད་ཤེས་སོ། གཞན་གང་ཡིན་པ་དེ་ལ་བདག་མེད་དོ། གང་བདག་མེད་པ་དེ་ལ་ཅི་ཞིག་ཡོངས་སུ་གཟུང་བར་བྱ། དེ་ནས་བཅོམ་ལྡན་འདས་ཀྱིས་དེའི་ཚེ། ཚོགས་སུ་བཅད་པ་འདི་དག་གསུངས་སོ། ལུས་ཀྱིས་དག་ཅིང་དག་གིས་དག་པ་དང་། ཡིད་ཀྱིས་དག་ཅིང་རྟག་ཏུ་སྤྱོད་པ་དག། དག་པའི་བརཏལ་ཞུགས་ལ་ནི་རྟག་གནས་པ། དེ་ནི་བྱང་ཆུབ་སེམས་དཔའ་ཚུལ་ཁྲིམས་ལྡན། ཤིན་དུ་བཟང་པོའི་ལས་ལམ་བཅུ་པོ་འདི། གང་དག་སྲུང་བ་བྱང་ཆུབ་སེམས་མཁས། ལུས་དང་ངག་དང་ཡིད་ཀྱིས་གང་མ་བྱས། དེ་ནི་མཁས་པ་ཚུལ་ཁྲིམས་ལྡན་ཞེས་བྱ། གང་དག་མ་བྱས་མ་སྐྱེད་མི་ལེན་པ། དེ་ལ་ཁ་དོག་མེད་ཅིང་དབྱིབས་ཀྱང་མེད། གང་ལ་ཁ་དོག་མེད་ཅིང་དབྱིབས་མེད་པ། དེ་ལ་གདགས་པ་ནམ་ཡང་མི་དམིགས་སོ། རྟག་ཏུ་ཚུལ་ཁྲིམས་མ་བྱས་འདུས་མ་བྱས། དེ་ནི་མིག་གིས་བལྟ་བར་མི་ནུས་ཏེ། རྣ་བ་སྣ་དང་ལྕེ་ཡིད་ཤེས་མ་ཡིན། ལུས་དང་ངག་ཡིད་ཀྱིས་ཤེས་པར་བྱ་མ་ཡིན། གང་དེ་དབང་པོས་ཤེས་པར་མི་ནུས་པ། དེ་ལ་སྙིང་རྗེ་འཇུག་པ་ནུས་མ་ཡིན་ཏེ། དེ་ལྟར་ཚུལ་ཁྲིམས་ཡོངས་དག་མཐོང་བ་དེ། ནམ་ཡང་ཚུལ་ཁྲིམས་དམིགས་པར་མི་གནས་སོ། ཚུལ་ཁྲིམས་ལྡན་ཞེས་ཡིད་ཀྱིས་མི་སྙེམས་ཤིང་བདག་ཏུ་འཛིན་པའི་ཚུལ་ཁྲིམས་མི་སྲུང་སྟེ། ཚུལ་ཁྲིམས་སྲུང་ཡང་ཚུལ་ཁྲིམས་འདུ་ཤེས་མེད། དེ་ནི་ཁྲིམས་ལྡན་བྱང་ཆུབ་སྤྱད་སྤྱོད་པ། འཇིག་ཚོགས་ལ་ནི་ལྟ་བ་གང་སེལ་པ། དེ་ནི་ལྟ་བར་ནམ་དུ་འང་མི་འགྱུར་རོ། གང་ལ་ལྟ་མེད་དེ་ལ་གནས་མེད་དེ། ཚུལ་ཁྲིམས་འཆལ་དང་ཚུལ་ཁྲིམས་དི་མི་སྙེམས། ཆོས་ཀྱི་ཚུལ་ལ་འཇུག་པ་ཀུན་སྲུང་བ། དེ་ཡི་ཆོ་ག་བསམ་དུ་མེད་པར་འགྱུར། རབ་ཏུ་འབྱུང་ཞིང་རབ་ཏུ་བསྲུངས་པ་ནི།
ཚུལ་ཁྲིམས་ལྡན་ཏེ་གཞན་ལ་རྩོད་མི་བྱེད། བདག་མེད་འདུ་ཤེས་ཚུལ་ཁྲིམས་མི་དམིགས་ཏེ། བདག་མེད་དེ་ལ་ཚུལ་ཁྲིམས་དམིགས་པ་འང་མེད། བདག་དང་དེ་བཞིན་ཚུལ་ཁྲིམས་གང་སྙེམས་པ། རྟག་ཏུ་འཇིག་པའི་མཐའ་ཞེས་ངས་བཤད་དོ། བདག་མེད་སྨྲ་བ་ཚུལ་ཁྲིམས་མི་སེམས་ཏེ། བདག་མེད་སྨྲ་བ་ཚུལ་ཁྲིམས་གནས་མ་ཡིན། བདག་མེད་སྨྲ་བ་ཚུལ་ཁྲིམས་མི་སེམས་ཏེ། བདག་མེད་སྨྲ་བ་ཚུལ་ཁྲིམས་རྟོག་མ་ཡིན། ཚུལ་ཁྲིམས་མ་ཉམས་ཚུལ་ཁྲིམས་སྐྱོན་མེད་པ། བདག་ནི་ཚུལ་ཁྲིམས་ལྡན་ཞེས་མི་སླད་དོ། བདག་མེད་ཚུལ་ཁྲིམས་འདུ་ཤེས་མེད། ཤེས་རབ་ཟབ་མོ་བྱང་ཆུབ་སྤྱད་པ་སྤྱོད། འཇིགས་མེད་གང་དག་ཚུལ་ཁྲིམས་འདི་འདྲ་བ། ནམ་ཡང་ཚུལ་ཁྲིམས་འཆལ་བར་དེ་མི་འགྱུར། ཐམས་ཅད་ཆོས་ནི་གང་དག་མི་དམིགས་པ། དེ་ཡི་ཚུལ་ཁྲིམས་དེ་ནི་འཕགས་པས་བསྔགས། བྱིས་པ་གང་དག་བདག་ཏུ་ལྟ་གནས་ཏེ། བདག་ནི་ཚུལ་ཁྲིམས་འཆལ་བར་དེ་མི་འགྱུར། བསྲུང་ནས་ཚུལ་ཁྲིམས་འབྲས་བུ་མྱོང་བ་དེ། ངན་འགྲོ་གསུམ་པོ་ཀུན་ལས་མི་ཐར་ཏོ། གང་དག་བདག་ཏུ་ལྟ་བ་ཀུན་སྤངས་པ། དེ་ནི་ང་དང་ང་ཞེས་བྱ་མི་འབྱུང་། ཚུལ་ཁྲིམས་ལྡན་པ་དེ་ལ་ལྟ་མེད་དེ། དེ་ནི་ཕྱིར་ཡང་ལོག་ལྟུང་མི་འཇིགས་སོ། འདི་འདྲ་བ་ཡི་ཚུལ་ཁྲིམས་གང་ཤེས་པ། དེ་ལ་འཆལ་པའི་ཚུལ་ཁྲིམས་བལྟ་མི་ནུས། སྲིད་པ་གསུམ་ན་དེ་བདག་མི་མཐོང་ན། ཁྲིམས་དང་ཚུལ་འཆལ་མཐོང་འགྱུར་སྨོས་ཅི་དགོས། ཤཱ་རིའི་བུ་དེ་ལྟར་ཚུལ་ཁྲིམས་སྤྱོད་པའི་བྱང་ཆུབ་སེམས་དཔའི་ཆོས་བཅུ་འདུས་པར་འགྱུར་རོ། བཅུ་གང་ཞེ་ན། དད་པའི་བསམ་པ་འདུས་པར་འགྱུར་བ་དང་། བརྩོན་འགྲུས་ཀྱི་བསམ་པའི་འདུས་པར་འགྱུར་བ་དང་། རབ་ཏུ་འདུན་པ་དང་། ལས་ཀྱི་རྣམ་པར་སྨིན་པ་རྒྱ་ཆེན་པོ་ལ་དད་པ་དང་། འཕགས་པ་ལ་ལྡང་བ་བྱེད་པ་དང་། བླ་མ་ལ་རིམ་གྲོ་བྱེད་པ་དང་། སློབ་དཔོན་ལ་བསྙེན་བཀུར་བྱེད་པ་དང་། ཆོས་ཚོལ་བ་ལ་འཇུག་པར་བྱེད་པ་དང་། བྱང་ཆུབ་ཡོངས་སུ་ཚུལ་ཞིང་ལུས་དང་སྲོག་ལ་མི་ལྟ་བར་བྱེད་པ་སྟེ། ཤཱ་རིའི་བུ་དེ་ལྟར་ཚུལ་ཁྲིམས་སྤྱོད་
པའི་བྱང་ཆུབ་སེམས་དཔའི་བསམ་པ་ཆོས་བཅུ་པོ་དེ་དག་འདུས་པར་འགྱུར་རོ། དེ་ཆོས་བཅུ་པོ་དེ་དག་ལ་རབ་ཏུ་གནས་ནས་དགེ་བའི་ཆོས་རྣམས་ཡང་དག་པར་སྒྲུབ་བོ། དགེ་བའི་ཆོས་གང་ཞེ་ན། འདི་ལྟ་སྟེ། ལེགས་པར་སྤྱོད་པ་གསུམ་པོ་འདི་དག་ཉིད་དེ་ལུས་དང་ངག་དང་ཡིད་ཀྱིས་ལེགས་པར་སྤྱོད་པའོ། ལེགས་པར་སྤྱོད་པ་གསུམ་པོ་དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་དེའི་བྱང་ཆུབ་གང་དང་འབྲེལ་བསྔགས་པ་ཡི། དགེ་བའི་ལས་རྣམས་ལུས་ཀྱིས་བྱེད། གང་ལས་ཐོས་པ་རྙེད་འགྱུར་བའི། སློབ་དཔོན་ནལ་ཡང་རིམ་གྲོ་བྱེད། སེམས་ཅན་ཐམས་ཅད་དོན་གྱི་ཕྱིར། བྱམས་པའི་སེམས་ཅན་ལྡན་ཕྲ་དོག་མེད། ཆོས་ལས་བརྩམས་ཏེ་གང་ཟག་ལ། རི་མོ་དག་ནི་རབ་ཏུ་བྱེད། དག་ནི་ཤིན་དུ་སྡོམ་གྱུར་ཏེ། དེ་ནི་མི་སྙན་ཚིག་མི་སྨྲ། འདི་ནི་འདུན་དང་ལྡན་པའི་མཚན། ནམ་དུའང་དག་རྩུབ་མོ་སྨྲའོ། ཡིད་ནི་དགེ་བའི་ཡིད་དུ་འགྱུར། ནམ་དུའང་སྡིག་པ་མི་འདོད་དོ། བྱམས་སེམས་གུས་དང་བཅས་པ་ཡི། བསམ་པ་ཉིད་ཀྱིས་རྟག་ཏུ་ལྟ། རྒྱལ་བས་བསྟན་པ་ཐོས་གྱུར་ནས། ཆོས་འདི་ལ་ནི་གུས་དང་བཅས། ཆོས་ལ་གུས་པར་བྱས་པས་ན། མྱུར་དུ་བྱང་ཆུབ་རྣམ་འཚང་རྒྱ། ཆོས་བཅུ་པོ་དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་སྡོ་སྣོད་ཀྱི་ཆོས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང་བསྙེན་བཀུར་བྱེད་དེ། ཐ་ན་ཆུ་རྫ་གང་ཙམ་ཡག་འབུལ་ལོ། གཞན་ཡག་ཤཱ་རིའི་བུ་བྱང་ཆུབ་སེམས་དཔའ་སེམས་བསྐྱེད་པ་བཅུ་བསྐྱེད་དེ། བཅུ་གང་ཞེ་ན། ཀྱེ་མའོ་ལུས་འདི་ནི་ན་བ་སྟེ། ཁམས་ནི་སྦྲུལ་གདུགས་པ་བཞིན་དུ་རྟག་པར་ཕན་ཚུན་མི་འཕྲོད་པའོ།། སྡུག་བསྔལ་མང་པའོ།། ཉེས་པ་མང་བའོ།། །། །། །། །། །། སྨྱོ་བ་དང་། འབྲས་དང་། ཕོལ་མིག་དང་། མེད་པ་ལ་དང་། གཡན་པ་དང་། རླུང་དང། མཁྲིས་པ་དང་། བད་ཀན་གྱིས་གང་སྟེ། ནད་དང་འདྲ། ཕོལ་མིག་དང་འདྲ། ཟུག་རྔུ་དང་འདྲ། ཆུ་བོ་དང་འདྲ། གནོད་པ་དང་འདྲ། གཡོ་བ།
འཇིག་པ། སྙིང་པོ་མེད་པ། ཉམ་ཆུང་བ། ཤིག་ཤིག་པོ། ཡུན་ཐུང་བ། སྐད་ཅིག་པ། དུར་ཁྲོད་དུ་འཇིག་པ་སྟེ། སྙིང་པོ་མེད་པས་ལུས་ལས་སྙིང་པོ་བླང་པོ་བླང་ངོ་སྙམ་དུ་སེམས་བསྐྱེད་པ་དང་པོ་དེ་བསྐྱེད་ནས། བྱང་ཆུབ་སེམས་བྱང་ཆུབ་སེམས་དཔའི་སྡེ་སྣོད་ཡོངས་སུ་ཚོལ་བས་སློབ་དཔོན་རིམ་གྲོ་དང། བསྙེན་བཀུར་བྱེད་དེ། ཐ་ན་ཆུ་ཕོར་གང་ཙམ་ཡང་འབུལ་ལོ། །བཅོལ་ལྡན་འདས་ཀྱིས་དེ་སྐད་གསུངས་ཏེ། བདེ་བར་གཤེགས་པས་དེ་སྐད་བཀའ་སྩལ་ནས་སྟོན་པ་ཡང་འདི་སྐད་གསུང་ངོ་། །ཁམས་ནི་སྦྲུལ་གདུག་མ་རུང་བ། །བཞི་པོ་གཅིག་ལ་གཅིག་བརྟེན་ཏེ། །རེ་རེ་ཡང་ནི་འཁྲུགས་པ་ལས། །ནད་པོ་ཚེ་ནི་འབྱུང་བར་འགྱུར། །མིག་ནད་དང་ནི་རྣ་ནད་དང་། །སྣ་ནང་དང་ནི་དེ་བཞིན་དུ། །སོ་ན་དང་ནི་མཆུ་ནད་རྣམས། །གཞན་ཡང་ལུས་ལས་འབྱུང་བར་འགྱུར། །སྨྱོན་དང་འབྲས་དང་པོ་ལ་མིག་དང་། །མེ་དཔལ་གཡན་པ་རྣམས་དང་ནི། །ནན་གཞན་རྣམ་པ་མང་པོ་དག། །ལུས་ལས་སུ་ནི་འབྱུང་བར་འགྱུར། །ལུས་ནི་ནད་དང་མཚུངས་པ་སྟེ། །ལུས་འདི་ནད་དང་མཚུངས་པ་སྟེ། །ལུས་ནི་འབྲུམ་དུ་འདྲ་བའོ། །ལུས་འདི་གནོད་པ་འདྲ་བ་སྟེ། །ཡུན་ཐུང་སྐད་ཅིག་འདུས་པའོ། །རུང་ཁྲོད་དུ་ནི་འགོ་ཞིང་འཇིག། །མི་རྟག་མི་བརྟན་གཡོ་སྟེ། རབ་ཏུ་འཇིག་ཅིང་ན་བ་དང་། །ལུས་འདི་རྣག་གིས་གང་བ་སྟེ། །ཤིག་ཤིག་པོ་དང་ཡུན་ཐུང་བ། །རྣག་གིས་གང་བའི་ལུས་འདི་ཡིས། །སངས་རྒྱས་ཀྱི་ནི་སྐུ་ཡི་ཕྱིར། །དགེ་བའི་ལས་རྣམས་བསྒྲུབ་པར་བྱ། ཐམས་ཅད་ཏུ་ནི་ནད་པ་ཟག་པ། རྣག་གིས་གང་བའི་ལུས་འདི་ཡིས། །ཆོས་སྐུ་བསམ་གྱིས་མི་ཁྱབ་པ། །སངས་རྒྱས་ཀྱི་ནི་སྐུ་འགྲུབ་བོ། །གང་ན་གཞན་གྱིས་ཐོབ་མེད་པ། དེ་འདྲའི་ལུས་ནི་ཐོབ་པར་བྱ། །ཚ་བ་དག་ཀྱང་གང་སྒྲིབ་དང་། །བསིལ་བ་དག་ཀྱང་རབ་སྲུང་བ། ལུས་འདི་ཡང་ནི་དགའ་བ་དང་། །འཆི་བདག་གིས་གཞོམ་པར་འགྱུར། །གང་དག་གྲང་དང་ཚ་བཟོད་པ། །ལུས་ཀྱིས་སུ་ནི་ཐམས་ཅད་ཏུ། །སྐྱེས་བུའི་བྱ་བ་བྱེད་པ་ཡི། །མཆོག་གི་ལུས་ནི་ཐོབ་པར་འགྱུར། །འཇིག་རྟེན་གྲགས་པའི་བླ་མ་ལ། །རིམ་གྲོ་དག་ནི་རབ་བྱ་སྟེ། །སྙིང་པོ་མེད་པའི་ལུས་ལས་སུ། །སྙིང་པོ་དག་ནི་
བླངས་པར་འགྱུར། །ཤཱ་རིའི་བུ་སེམས་བསྐྱེད་པ་དང་པོ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡོ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང་། བསྙེན་བཀུར་བྱེད་ནི། ཐ་ན་ཆུ་རྫ་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ་བྱང་ཆུབ་སེམས་འདི་ལྟར་སེམས་བསྐྱེད་དེ། ཀྱེ་མའོ་ལུས་འདི་ནི་སྙིང་པོ་མེད་པ་སྟེ། རྟག་ཏུ་དྲིལ་བ་དང་། བཀྲུ་བ་དང་། མཉེ་པ་དང་། འཇིག་པ་དང་། འགྱེས་པ་དང་འདྲ་ལ་བའི་ཆོས་ཅན་ནོ། །ཤཱ་རིའི་བུ་འདི་ལྟ་སྟེ། དཔེར་ན་ཇི་ཙམ་དུ་རྫ་མཁན་གྱིས་བུམ་ཆུང་ཚད་དང་། ཆེ་ཚད་བྱས་པ་ཐམས་ཅད་ཀྱང་མཐར་འཇོག་གོ། །དེ་བཞིན་དུ་ཀྱེ་མའོ་ལུས་འདི་ཡང་སྙིང་པོ་མེད་པ་སོ་མ་བཏང་བའི་སྣོད་བཞིན་ཏ་ེ། མཐར་འཇིག་པའོ །ཤཱ་རིའི་བུ་འདི་ལྟ་སྟེ། དཔེར་ན་ཤིང་གི་ཡལ་གའི་འདབ་མ་དང་། མི་ཏོག་དང་། འབྲས་བུ་ཇི་སྙེད་པ་དེ་ཐམས་ཅད་ཀྱང་ཉི་མཐར་ལྟུང་བར་འགྱུར་རོ། །ཤཱ་རིའི་བུ་དེ་བཞིན་དུ་ཀྱེ་མའོ་ལུས་འདི་ན་སྙིང་པོ་མེད་དེ། འབྲས་བུ་སྨིན་པ་བཞིན་དུ་ལྟུང་བའི་ཆོས་ཅན་ནོ། །ཤཱ་རིའི་བུ་འདི་ལྟ་སྟེ། དཔེར་ན་རྩེ་མོའི་ཟིལ་པའི་ཐིགས་པ་ཇི་སྙེད་པ་དེ་ཐམས་ཅད་ཀྱང་ཉི་མས་ཕོག་ན་རིང་པོར་མི་གནས་སོ། །ཤཱ་རིའི་བུ་དེ་བཞིན་དུ་ཀྱེ་མའོ་ལུས་འདི་ནི་སྙིང་པོ་མེད་པ་སྟེ། ཟིལ་པའི་ཐིག་པ་བཞིན་དུ་རིང་པོར་མི་གནས་པའོ། ཤཱ་རིའི་བུ་འདི་ལྟ་སྟེ། དཔེར་རྒྱ་མཚོ་ཆེན་པོ་དང་། འབབ་ཆུ་དང་། འབབ་ཆུའི་རྒྱུན་ལ་དབུབ་རྔོས་པ་ཡོད་པ་ཇི་སྙེད་པ་དེ་དག་ཐམས་ཅད་ཀྱང་སྙིང་པོ་མེད་དེ་རང་བཞིན་གྱིས་ཉམ་ཆུད་པའོ། །ཤཱ་རིའི་བུ་དེ་བཞིན་དུ་ཀྱེ་མའོ་ལུས་འདི་ནི་སྙིང་པོ་མེད་པ་སྟེ། དབུབ་རྔོས་པ་ལྟར་རང་བཞིན་གྱིས་ཉམ་ཆུང་པའོ་ཤཱ་རིའི་འདི་ལྟ་སྟེ། དཔེར་ན་ཆར་བབ་པའི་ཆུའི་ཆུ་བུར་གཞན་སྐྱེ་ཞིང་གཞན་འགག་གོ། །ཤཱ་རིའི་བུ་དེ་བཞིན་དུ་ཀྱེད་མའོ་ལུས་ནི་སྙིང་པོ་མེད་པ་སྟེ། ཆུའི་ཆུ་བུར་ལྷར་རང་བཞིན་གྱི་ཉམ་ཆུང་བའོ། །དེ་ལྟར་སྙིང་པོ་མེད་པའི་ལུས་ལས་སྙིང་པོ་བླང་ངོ་སྙམ་དུ་སེམས་བསྐྱེད་པ་གཉིས་པ་དེ་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡོ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང་བསྙེན་བཀུར་བྱེད་དོ། །དེ་ནས་བཅོམ་ལྡན་
འདས་ཀྱིས་དོན་དེ་ཉིད་རྒྱ་ཆེར་རབ་ཏུ་བསྟན་པའི་ཕྱིར། དེ་ཚེ་ཚིགས་སུ་བཅད་པ་འདི་དག་གསུངས་སོ། །ཇི་ལྟར་རྫ་མའི་མཁན་པོ་ཡིས། །ས་ལ་སྣོད་རྣམས་བྱས་པ་དག། །དེ་དག་ཐམས་ཅད་མཐར་འཇིག་སྟེ། །སེམས་ཅན་སྲོག་ཀྱང་དེ་དང་འདྲ། །ཇི་ལྟར་ཤིང་གི་ཡ་ལག་ཡི། །ལོ་མ་མེ་ཏོག་འབྲས་བུ་རྣམས། །ཐམས་ཅད་ལྟུང་བའི་ཆོས་ཅན་ཏེ། །མི་ཡི་སྲོག་ཀྱང་དེ་བཞིན་ནོ། །རྩྭ་མཆོག་དག་གི་ཟིལ་པའི་ཐིགས། །ཉི་མས་ཡོངས་སུ་བབ་པ་ན། །ཡིད་ཙམ་གྱིས་ནི་མེད་འགྱུར་ཏེ། །མི་ཡི་སྲོག་ཀྱང་དེ་བཞིན་ནོ། །ཇི་ལྟར་བབ་པ་ཆུའི་རྒྱུན་རྣམས་ཀྱི། །དབུ་བ་རྔོས་པ་ཉམ་ཆུང་ལྟར། །དེ་ལྟར་ལུས་ནི་ཉམ་ཆུང་སྟེ། །སྙིང་པོ་མེད་པ་དབུ་དང་འདྲ། །ཇི་ལྟར་ཆར་པ་བབ་པ་ཡི། །ཆུའི་ཆུ་བུར་སྐྱེས་པ་ཡང་། །སྐད་ཅིག་གི་ནི་དེ་འཇིག་འགྱུར། །དེ་བཞིན་ལུས་ཀྱང་སྙིང་པོ་མེད། །སྙིང་པོ་མ་ཡིན་སྙིང་པོར་ཤེས། །སྙིང་པོ་སྙིང་པོ་མ་ཡིན་འཛིན། །དེ་དག་ལོག་རྟོག་སྤྱོད་ཡུལ་ཏེ། །སྙིང་པོ་ཁོང་དུ་ཆུད་མ་ཡིན། །སྙིང་པོ་མེད་ལ་སྙིང་པོ་མེད་པ། །སྙིང་པོ་སྙིང་པོར་ཤེས་པ་ནི། །དེ་དག་ཡང་དག་རྟོག་པའི་ཡུལ། །སྙིང་པོ་ཁོང་དུ་ཆུད་པ་ཡིན། །སྙིང་པོ་འདུ་ཤེས་བྱས་གྱུར་ཏེ། རྫ་གང་ཙམ་གྱི་ཆུ་འབུལ་པ། །སྙིང་པོ་མེད་པའི་ལུས་ལས་ནི། སྙིང་པོ་དག་ནི་ལེན་པར་འགྱུར། །ཤཱ་རིའི་བུ་སེམས་བསྐྱེད་པ་གཉིས་པའི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བའི་སློབ་དཔོན་ལ་རིམ་གྲོ་དང་། བསྙེན་བཀུར་བྱེད་དེ། ཐ་ན་ཆུ་ཕོར་གང་ཙམ་ཡང་དབུལ་ལོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། །བདག་ཡུན་རིང་པོར་དགེ་བའི་བཤེས་གཉེན་དང་བྲལ་ཞིང་མི་དགེ་བའི་བཤེས་གཉེན་གྱི་དབང་དུ་སོང་སྟེ། ལེ་ལོ་ཅན། བརྩོན་འགྲུས་ཉམས་པ། སྙོམ་ལས་ཅན། བླུན་པ། ལོག་པར་ལྟ་བ་སྟེ། མཆོད་སྦྱིན་ཡང་མེད། སྦྱིན་སྲེག་ཀྱང་མེད། ལེགས་བྱས་དང་། ཉེས་བྱས་ཀྱི་ལས་རྣམས་བྱས་པའི་འབྲས་བུ་རྣམ་པར་སྨིན་པ་བསགས་པ་ཡང་མེད་པར་ལྟ་བ་དང་། འདོད་པའི་ཟིལ་གྱིས་ནོན་ཏེ། བདག་གིས་མི་དགེ་བའི་ལས་མང་པོ་མངོན་པར་འདུས་བྱས་ཏེ། མི་དགེ་བའི་ལས་ཀྱི་རྣམ་པར་
སྨིན་པ་དེས་འདི་ལྟ་སྟེ། ཡི་དགས་ཀྱིས་ཡུལ་དུ་སྦྱིན་གནས་ཐམས་ཅད་གསོ་བ་མ་ཡིན་པ་འཇིགས་སུ་རུང་བའི་ལུས་ཐོབ་སྟེ། འདི་ལྟ་བུའི་སྦྱིན་གནས་མ་ཉེས་པར་མ་བྱས་པས་དེ་ནི་བདག་ཡི་དགས་སུ་གྱུར་ཏེ། ལོ་མང་པོ། ལོ་སྟོང་ཕྲག་མང་པོ། ལོ་བརྒྱ་སྟོང་ཕྲག་མང་པོར་མེ་མུར་ཟ་ཞིང་ཆུའི་སྦ་ཡང་མི་ཐོས་ན། ལུས་ཀྱིས་ལྟ་ག་ལ་ཞིག་རེག་སྟེ། བདག་གིས་ནི་ད་ལྟར་མཉེས་པར་བྱས་པས་བདག་དགེ་བའི་ལུས་ཐོབ་ཀྱིས་སྦྱིན་གནས་ཐམས་ཅད་ཀྱི་ཉེ་བར་འཚོ་བར་བྱ་ཞིང་། །ལུས་དང་སྲོག་ལ་མི་ལྟ་བར་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་བཙལ་བའི་ཕྱིར་སློབ་དཔོན་ལ་རིམ་གྲོ་བྱའོ་སྙམ་དུ་སེམས་བསྐྱེད་པ་གསུམ་པ་འདི་བསྐྱེད་ནས། བྱང་ཆུབ་སེམས་དཔའ་སློབ་དཔོན་ལ་རིམ་གྲོ་དང་། །ཐ་ན་ཆུ་རྫ་གང་ཙམ་ཡང་འབུལ་ལོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། ། ཇི་ལྟར་གྲོགས་པོ་བསྟན་པ་དང་། །ཇི་ལྟར་ཉེ་བར་བསྟེན་པ་ལྟར། །དེ་དག་དང་ཡང་བསྙེན་པས། །དེ་ཡང་དེ་དང་འདྲ་བར་འགྱུར། །སྡིག་པའི་གྲོགས་པོའི་དབང་སོང་ནས། །དགེ་བའི་བཤེས་གཉེན་རྣམ་པར་སྤངས། །ལེ་ལོ་རྐྱེ་ཞིང་བརྩོན་འགྲུས་ཉམས། །གཡོ་དང་ཕྲག་དོག་སེར་སྣ་ཅན། །བྱིན་ཡོང་བར་གང་ལྟ་བ། །ཐམས་ཅད་ཏུ་ནུ་རྣམ་སྤངས་པས། །བདག་ནི་སྐྱེ་གནས་སུ། །འཇིགས་སུ་རུང་བའི་ལུས་ཐོབ་བོ། །ཡུན་རིང་དུས་སུ་འཁོར་བ་ཡི། །མུན་ནག་ཕུང་པོ་འཇིགས་པས་ན། །བཀྲེས་པ་དང་ནི་སྐོན་པས་གཟིར། །སྡུག་བསྔལ་མང་པོ་རྗེས་སུ་མྱོང་། །སྦྱིན་གནས་རྣམ་ནི་མ་མཐོང་ཞིང་། །བདག་གིས་འདི་འདྲ་དལ་མ་ཐོབ། །ལོ་ནི་མང་པོ་སྟོང་རྣམས་སུ། །ཆུ་ཡི་སྒྲ་ཡང་ཡོངས་མ་ཐོས། །ད་ལྟར་བདག་གིས་འཇིག་རྟེན་ན། །ཤིན་དུ་དཀོན་པ་རབ་རྙེད་དེ། །བདག་གིས་སློབ་དཔོན་མཉེས་བྱས་པས། །དལ་འབྱོར་པ་བདག་གིས་ཐོབ། །སྡིག་པའི་གྲོགས་པོ་རྣམ་སྤངས་པས། །བདག་གིས་དགེ་བའི་བཤེས་གཉེན་རྙེད། །བྱང་ཆུབ་ཐོབ་པར་བྱ་བའི་ཕྱིར། །ལུས་དང་སྲོག་ལ་མ་བལྟའོ། །སངས་རྒྱས་ཀྱི་ནི་བྱང་ཆུབ་ཕྱིར། །སློབ་དཔོན་བླ་མ་མཆོད་གནས་ལ། །རྣམ་པར་དང་བའི་སེམས་ཀྱིས་སུ། །
སྟི་སྟང་གུས་པར་རབ་ཏུ་བྱ། །ཤཱ་རིའི་བུ་སེམས་སྐྱེད་པ་གསུམ་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང་། །བསྙེན་བཀུར་བྱེད་དེ། ཐ་ན་ཆུ་བོར་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་འདི་ལྟར་སེམས་སྐྱེད་དེ། བདག་ཡུན་རིང་པོར་དགེ་བའི་བཤེས་གཉེན་དང་བྲལ་ཞིང་སྡིག་དའི་གྲོགས་པོས་ཟིན་དས་ལེ་ལོ་ཅན། བརྩོན་འགྲུས་ཉམས་པ། སྙོམ་ལས་ཅན། བླུན་པས་སེམས་ཅན་ལ་ཁུ་ཚུར་དང་། ཐལ་མོས་བརྡེགས་ཤིང་གཙེས་ནས་བསྡུས་ཤིང་ཚོད་བཏོན་ཏེ། དེའི་གཞི་ལས་སྡིག་པ་ཡང་མེད། དེའི་གཞི་ལས་སྡིག་པ་འབྱུང་བ་ཡང་མེད་དོ། །ཞེས་དེ་ལྟར་ལྟ་བ་དང་། དེ་ལྟར་མོས་ཤིང་ཞེ་སྡང་གི་ཟིལ་གྱིས་ནོན་པས་མི་དགེ་བའི་ལས་རྣམས་མངོན་དར་འདུས་བྱས་ཏེ། མི་དགེ་བའི་ལས་ཀྱི་རྣམ་པར་སྨིན་ད་དེས་འདི་ལྟ་སྟེ་དུད་འགྲོའི་སྐྱེ་གནས་སུ། སྦྱིན་གནས་ཐམས་ཅད་ཉེ་བར་འཚོ་བ་མ་ཡིན་པ། འཇིགས་སུ་རུང་བའི་ལུས་ཐོབ་སྟེ། འདི་ལྟར་སྦྱིན་གནས་མགུ་བར་མ་བྱས་པས། དེས་ན་བདག་རྔ་མོ་དང་། བ་ལང་དང་། བོང་བུར་གྱུར་ཏེ། རྩྭབ་ཞིང་དབྱིག་བས་བསྡིགས། འཇིགས་པས་བསྡིགས་ནས། མི་འདོད་བཞིན་དུ་ཁལ་བཀལ་ཏོ། །བདག་གིས་ནིང་ལྟར་མཉེས་པར་བྱས་ཏེ། དགེ་བའི་ལུས་ཐོབ་ཀྱིས་ལུས་དང་སྲོག་ལ་མི་བལྟ་བར་སློབ་དཔོན་ལ་ནི་རིམ་གྲོ་དང་། བསྙེན་བཀུར་བྱའོ་ཞེས། ཤཱ་རིའི་བུ་སེམས་བསྐྱེད་པ་བཞི་པ་དེ་བསྐྱེད་ནས་བྱང་ཆུབ་སེམས་དཔའ་སློབ་དཔོན་ལ་རིམ་གྲོ་དང་བསྙེན་བཀུར་བྱེད་དེ། ཐ་ན་ཆུ་བུམ་གང་ཙམ་ཡང་འབུལ་ལོ། །འདི་ལ་ཆོས་ཉིད་ནི་འདི་ཡིན་ཏེ། དེ་ལ་འདི་སྐད་ཅེས་བྱའོ། །ཡུན་རིང་པོར་ནི་འཕགས་པའི་ལམ། །མ་རིག་དར་ནི་གནས་པས་ན། །རྔ་མོང་གང་དབོང་བུར་འགྱུར། །སྡུག་བསྔལ་མང་པོ་རྗེས་སུ་མྱོང་། །མིར་གྱུར་པ་ཡང་བདག་གིས་རྙེད། །གང་གིས་བྱང་ཆུབ་རེག་འགྱུར་བའི། །བཟང་པོ་ཡི་ནི་ལས་བྱ་སྟེ། །དེ་ནི་མཁས་པའི་མཚན་ཉིད་དོ། །སངས་རྒྱས་ཆོས་ལ་རབ་གནས་ཤིང་། །གུས་པ་དང་ནི་ལྡན་པར་བྱ། །བྱང་ཆུབ་ཕྱིར་སློབ་དཔོན་ལ། །
རིམ་གྲོ་དང་ནི་སྟི་སྟང་བྱ། །འདས་པའི་དུས་ཀྱི་བསྐལ་པ་བསམ་མེད་ནས། །འཁོར་བའི་འཁོར་ལོར་ཡོངས་སུ་འཁྱམ་པ་ན། །སྐྱེ་མཆེད་དག་ནི་དོན་མེད་འདས་གྱུར་ཏེ། །སྦྱིན་གནས་ངག་ནི་ཉེ་བར་འཚོ་བ་མིན། །དགེ་བའི་བཤེས་གཉེན་ཡོངས་སུ་སྤངས་གྱུར་ནས། །རྟག་ཏུ་སྡིག་པའི་གྲོགས་པོ་རབ་བསྟེན་ཏེ། །དེ་དག་གི་ནི་བསྟན་པའི་རྗེས་འཇུག་ཅིང་། །རྒྱུན་མི་འཆད་པར་ངན་སོང་ལ་གནས། །གཙེ་བ་དང་ནི་ཞིང་བརྡེགས་པ་རྣམས། །བྱེད་ཏུ་བཅུག་ཅིང་གཞན་ལ་སྤྱོས་བྱས་ནས། །དེ་ཡི་འབྲས་བུ་ངན་སོང་སྐྱེ་གནས་འགྲོ། །སྡིག་པའི་ལས་ཀྱིས་སྡུག་བསྔལ་རྗེས་སུ་མྱོང་། །དགེ་བའི་བཤེས་གཉེན་རྣམས་ནི་མ་བསྟེན་པས། །རྔ་མོ་བ་ལང་དེ་བཞིན་བོང་བུ་ཡི། །ངན་པའི་མཚམས་ཀྱི་སྐྱེ་མཆེད་བཟུང་གྱུར་ནས། དབྱུག་པ་དག་གིས་བརྡེགས་ཤིང་ཁལ་ཀྱང་བཀལ། །མིག་འགྱུར་བ་ནི་ཤིན་དུ་རྙེད་དཀའ་དང་། །འཐུན་པའི་ཡུལ་དག་དགེ་བའི་བཤེས་གཉེན་རྙེད། །ཤིན་དུ་ཡུན་རིང་དལ་བརྙེད་གྱུར་ཏེ། །དཀའ་བའི་ལས་ཀྱི་བུ་གར་ཆུད་པ་བཞིན། །ལུས་དང་དག་ནི་ཤིན་དུ་བསྡམས་གྱུར་ནས། །ཞན་པ་མེད་པའི་སེམས་ཀྱིས་བརྩོན་འགྲུས་བརྩམ། །དགེ་བའི་བཤེས་གཉེན་དག་ལ་གཡོ་མེད་པས། །བདག་གི་ལུས་ནི་ཉེ་བར་འཚོ་བར་བྱ། །བདག་གི་སློབ་དཔོན་བླ་མ་གང་དག་དང་། །གང་བདག་གི་བྱང་ཆུབ་སེམས་བསྐྱེད་པ། །བྱང་ཆུབ་དམ་པ་མཆོག་གི་ལམ་སྟོན་པ། །སྟོན་པ་བཞིན་དུ་དགའ་བས་བསྙེན་བཀུར་བྱ། །རྣམ་པ་སྣ་ཚོགས་དག་གི་བྱུག་པ་ད་ག། །དྲི་དང་ཕྱེ་མ་རྣམ་པ་སྣ་ཚོགས་དང་། །གོས་དང་མེ་ཏོག་དག་གི་ཆུན་པོ་ཡིས། །རྐང་གཉིས་དམ་པ་ལ་ནི་མཆོད་པར་བྱ། །ཕྱོགས་བཅུ་དག་ན་སངས་རྒྱས་གང་བཞུགས་པ། །སེམས་ཅན་དོན་ལ་བརྩོན་ཞིང་དོན་དམ་གཟིགས། །གསེར་གྱི་ཁ་དོག་ལྟ་བུའི་འོད་མཛེས་པ། །ཁ་དོག་མཐའ་ཡས་པ་ལ་མཆོད་པར་བྱ། །སངས་རྒྱས་མི་ཡི་ཁ་ལོ་སྒྱུར་རྣམས་ལ། །འཇིག་རྟེན་སྤྱོད་དང་མཆོད་པ་ཆེར་བྱས་པས། །གང་གིས་བྱང་ཆུབ་སྙིང་པོར་བདག་འགྲོ་བའི། །བྱང་ཆུབ་ལམ་ནི་ཤིན་དུ་སྦྱངས་པར་འགྱུར། །ཤཱ་རིའི་བུ་སེམས་བསྐྱེད་པ་བཞི་པ་འདི་བསྐྱེད་ནས།
བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བདག་ཡུན་རིང་པོར་དགེ་བའི་བཤེས་གཉེན་དང་བྲལ་ཞིང་སྡིག་པའི་གྲོགས་པོས་ཟིན་པས། ལེ་ལོ་ཅན་བརྩོན་འགྲུས་ཉམས་ལ། སྙོམ་ལས་ཅན། བླུན་པས། འདི་ལྟ་བུའི་ལྟ་བ་དང་། འདི་ལྟ་བུའི་འདོད་པས་སེམས་ཅན་ཐམས་ཅད་དང་། སྲོག་ཆགས་ཐམས་ཅད་ཀྱི་ཤ་གཅིག་ཏུ་སྤུངས་ཤིང་ཤ་གཅིག་ཏུ་བཅེར་ཏེ། བསོད་ནམས་མ་ཡིན་པའི་ལས་བྱེད་ཀྱང་། དེའི་གཞི་ལས་སྡིག་པ་མེད། དེའི་གཞི་ལས་སྡིག་པའི་རྣམ་པ་མེད་དོ། རྒྱ་མཚོའི་ཚུ་རོལ་གྱི་སེམས་ཅན་ཇི་སྙེད་པ་དེ་དག་ཐམས་ཅད་སྦྱིན་པས་ཚིམ་པར་བྱས་ཀྱང་། དེའི་གཞི་ལས་བསོད་ནམས་མེད། དེའི་གཞི་ལས་བསོད་ནམས་ཀྱི་རྣམ་པ་མེད་དོ།། རྒྱ་མཚོའི་ཕ་རོལ་གྱི་སེམས་ཅན་ཇི་སྙེད་པ་དེ་དག་ཐམས་ཅད་བསད་ཅིང་བཏུབ་ཀྱང་དེའི་གཞི་ལས་སྡིག་པ་མེད། དེའི་གཞི་ལས་སྡིག་པའི་རྣམ་པ་མེད་དོ། །སྙམ་པས་དེ་ལྟར་བྱས་ཀྱང་བསོད་ནམས་དང་སྡིག་པ་ཡོངས་སུ་ཤེས་པར་མ་ནུས་ཏེ་སྡིག་པའི་ལྟ་བ་བསྙེན་པ་དང་། གཏི་མུག་གི་ཟིལ་གྱིས་ནོན་པས་བདག་གིས་སྡིག་པ་མི་དགེ་བའི་ལས་མང་པོ་མངོན་པར་འདུས་བྱས་ཏེ། མི་དགེ་བའི་ལས་དེའི་རྣམ་པར་སྨིན་པས་འདི་ལྟ་སྟེ། སེམས་ཅན་དམྱལ་བར་དམན་པ་འཇིགས་སུ་རུང་བའི་ལུས་ཐོབ་སྟེ། དེ་ལ་འདི་ལྟ་བུའི་སྦྱིན་གནས་མཉེས་པར་མ་བྱས་པས་དེ་ན་བདག་ནི་སེམས་ཅན་དམྱལ་བར་གྱུར་པས་ལྕག་ཀྱི་ཐུ་ལུམ་བསྲེགས་པ་ཟ་ཞིང་གཅིག་ཏུ་སྡུག་བསྔལ་བརྩུབ་པ། མི་བཟད་པ་འཚོགས་པ། འཆི་བའི་མཐར་ཁྲིད་པ་མྱོང་ཞིང་ལོ་སྟོང་ཕྲག་མང་པོའི་བར་དུ་བདེ་བའི་སྒྲ་ཡང་མི་ཐོས་ན། ལུས་ཀྱིས་ལྟ་ག་ལ་ཞིག་རེག་སྟེ། བདག་གིས་ནི་ད་ལྟར་མཉེས་པར་བྱས་པས། དགེ་བའི་ལུས་ཐོབ་ཀྱིས། སྦྱིན་གསན་རྣམས་ཀྱི་ཉེ་བར་འཚོ་བར་བྱ་ཞིང་སྲོག་ལ་མི་ལྟ་བར་སློབ་དཔོན་ལ་རིན་གྲོ་དང་བསྙེན་བཀུར་བྱའོ་ཞེས། ཤཱ་རིའི་བུ་སེམས་བསྐྱེད་པ་ལྔ་པ་དེ་བསྐྱེད་ནས་བྱང་
ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང་། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་འབུལ་ལོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། སྡིག་པའི་གྲོགས་པོ་བསྙེན་པ་དང་། །སྡིག་པའི་སེམས་ཀྱིས་བསླུས་པས་ན། །སྡིག་པའི་ལྟ་ལ་བསྟེན་གྱུར་ཏེ། །བདག་གིས་སྡིག་པའི་ལས་བྱས་སོ། །རྒྱ་མཚོ་ཡི་ནི་ཚུ་རོལ་ན། །སེམས་ཅན་གནས་པ་ཇི་སྙེད་པ། །ཟས་དང་སྐོམ་གྱིས་ཚིམ་བྱས་ཀྱང་། །བསོད་ནམས་དག་གི་འབྱུང་གནས་མེད། །རྒྱ་མཚོ་ཡི་ནི་ཕ་རོལ་ན། །སེམས་ཅན་གནས་པ་ཇི་སྙེད་པ། །ཐམས་ཅད་བསད་ཅིང་བཅོམ་གྱུར་ཀྱང་། །སྡིག་པའི་འབྱུང་གནས་མེད་དོ་ཞེས། །སྡིག་པར་ལྟ་བ་འདི་ལྟ་བུ། །ཡང་དང་ཡང་དུ་བསྟེན་པས་ན། །གཅིག་ཏུ་མི་བཟད་མ་རུངས་པའི། །སེམས་ཅན་དམྱལ་བར་རིང་དུ་དེངས། །རྫོགས་པའི་སངས་རྒྱས་འཇིག་རྟེན་གྱི། །ཡོངས་སུ་འདྲེན་པ་མ་མཐོང་བས། །བདག་གི་ལུས་ནི་སྟོང་རྣམས་ཀྱང་། ངན་འགྲོ་དག་ནི་གསུམ་དུ་དེངས། །འདི་ནི་འཇིག་རྟེན་དགེ་བ་སྟེ། །དེ་ཡི་སྒྲ་ནི་ཐོས་གྱུར་ནས། །བདག་གིས་མིར་སྐྱེ་དཀའ་བ་ཡི། །ཚེ་ཐོབ་པ་ནི་གཡོ་ཞིང་འགྱུར། །བདག་གིས་སངས་རྒྱས་འབྱུང་བ་དང་། །རྒྱལ་བ་ཀུན་མཁྱེན་བསྟན་པ་རྙེད། །ལུས་ཀྱི་ལས་དང་དག་གི་ལས། ཡིད་ཀྱི་ལས་ཀྱང་སྡིག་པ་ཅན། །མི་འདོད་མི་ཟད་འབྲས་བུར་འགྱུར། །ཕྱིན་ཅད་སྤྱད་པར་མི་བྱའོ། །བསམ་པ་རྣམ་པར་དག་པ་ཡི། །ལུས་དག་ངག་དང་ཡིད་རྣམས་ཀྱིས། །འཇིག་རྟེན་རབ་ཏུ་དཀའ་སྤྱོད་པ། །བཟང་པོ་དག་གི་ལས་བྱའོ། །སངས་རྒྱས་ཀྱི་ནི་བྱང་ཆུབ་ཕྱིར། །བདག་གི་བླ་མར་གང་གྲགས་པའི། །བཀའ་ལས་འདའ་བར་མི་བྱ་སྟེ། །བསྙེན་བཀུར་དག་ནི་རབ་ཏུ་བྱ། །ལམ་ནི་དྲང་པོ་ཞེས་བྱ་བ། །གཡོ་མེད་པས་ནི་རབ་བསྟན་ཏེ། །སངས་རྒྱས་ཀྱི་ནི་བྱང་ཆུབ་ཕྱིར། །སྒྱུ་མར་
འགྱུར་བར་མི་བྱའོ། །ཐབས་དང་ཤེས་རབ་ལྡན་པ་ཡི། །བྱང་ཆུབ་སེམས་དཔའ་མི་འཇིགས་པ། །དེ་ལྟ་བུར་ནི་སེམས་བསྐྱེད་ནས། །སྣོད་གང་ཙམ་གྱི་ཆུ་ཡང་འབུལ། །ཤཱ་རིའི་བུ་སེམས་བསྐྱེད་པ་ལྔ་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང་། བསྙེན་བཀུར་བྱེད། ཐ་ན་ཆུ་བུམ་པ་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བདག་ཡུན་རིང་པོར་དགེ་བའི་བཤེས་གཉེན་དང་བྲལ་ཞིང་སྡིག་པའི་གྲོགས་པོས་ཟིན་པས་འདུད་པ་དང་། རབ་ཏུ་འདུད་པ་དང་། །གུས་པར་སྨྲ་བ་དང་། ཕྱག་བྱ་བ་དང་། ལྡང་བ་དང་། ཐལ་མོ་སྦྱར་བའི་ལས་ཀྱི་རྣམ་པར་སྨིན་པ་མེད་དོ། ཞེས་དེ་ལྟར་མོས་པའི་བར་གྱིས་ང་རྒྱལ་གྱི་ཟིལ་གྱིས་ནོན་པས་སྡིག་པ་མི་དགེ་བའི་ལས་མང་པོ་མངོན་འདུས་བྱས་ཏེ། མི་དགེ་བའི་ལས་དེའི་རྣམ་པར་སྨིན་པས། འདི་ལྟ་སྟེ། མིའི་ནང་དུ་སྦྱིན་གནས་ཐམས་ཅད་ཉེ་བར་འཚོ་བ་མ་ཡིན་པ་སྨད་པའི་ལུས་ཐོབ་སྟེ། འདི་ལྟ་བུའི་སྦྱིན་གནས་མཉེས་པར་མ་བྱས་པས་ན་དེར་བདག་མིར་གྱུར་པ་ན། མི་བཀྲེན་པ་དང་། མི་དབུལ་པོ་དང་། བྲན་དུ་གྱུར་པ་དང་། གཞན་གྱི་དབང་དུ་སོང་བ་དང་། འདོད་པ་ལ་ཞེན་པའི་སེམས་ཅན་རྣམས་དང་། འདོད་པ་ལ་ཆགས་པ་རྣམས་དང་། མི་རིགས་པའི་སྤྱོད་པ་ལ་གནས་པ་རྣམས་དག་། ལོག་པར་ལྟ་བ་རྣམས་དང་། ཚུལ་ཁྲིམས་ལོག་པར་ཕར་ཞུགས་པ་རྣམས་དང་། ལྟ་བ་ལོག་པར་ཞུགས་པ་རྣམས་དང་། མི་དགེ་བའི་རྩ་བ་གསུམ་ལ་རབ་ཏུ་གནས་པ་རྣམས་དང་། འགྲོ་བར་བྱ་མ་ཡིན་པའི་འགྲོ་བ་བཞི་ལ་འགྲོ་བར་ཞུགས་པ་རྣམས་དང་། སྒྲིབ་པ་ལྔས་བསྒྲིབས་པ་རྣམས་དང་། བླ་མ་དྲུག་ལ་གུས་པར་མི་གནས་པ་རྣམས་དང་། དམ་པའི་ཆོས་མ་ཡིན་པ་བདུན་ལ་འཇུག་པ་རྣམས་དང་། ལོག་པ་བརྒྱད་ལ་ལོག་པར་ངེས་པ་རྣམས་དང་། གནོད་པ་དགུའི་དངོས་པོས་གནོད་པར་གྱུར་པ་རྣམས་དང་། མི་དགེ་བ་བཅུའི་ལས་ཀྱི་ལམ་ལ་ལམ་ངན་པར་ཞུགས་པ་རྣམས་དང་། སེམས་ཅན་དམྱལ་བའི་ལམ་ལ་མངོན་པར་ཕྱོགས་པ་རྣམས་དང་། མཐོ་རིས་ཀྱི་ལམ་
ལ་མ་ཕྱོགས་པ་རྣམས་དང་། དགེ་བའི་བཤེས་གཉེན་དང་བྲལ་བ་རྣམས་དང་། སྡིག་པའི་གྲོགས་པོའི་ལག་ཏུ་སོང་བ་རྣམས་དང་། བདུད་ཀྱི་དབང་དུ་སོང་བ་རྣམས་དང་། དགེ་བའི་ཆོས་ཡོངས་སུ་སྤངས་པ་རྣམས་དང་། མི་དགེ་བའི་ཆོས་ལ་སྤྱོད་པ་རྣམས་ཀྱི་དབྱུག་པས་བསྡིགས། འཇིགས་པས་བསྡིགས་ནས་མི་འདོད་བཞིན་དུ་བྱེད་ཅིང་རིམ་གྲོ་དང་། བསྙེན་བཀུར་བྱེད་པར་གྱུར་ཏེ། བདག་གིས་ནི་ད་ལྟར་དེ་དག་མཉེས་པར་བྱས་པས་དགེ་བའི་ལས་ཐོབ་ཀྱིས་སྦྱིན་གནས་ཐམས་ཅད་ཉེ་བར་འཚོ་བར་བྱའོ། ལུས་དང་སྲོག་ལ་མི་བལྟ་བར་སློབ་དཔོན་ལ་རིན་གྲོ་དང་། བསྙེན་བཀུར་བྱའོ་ཞེས། ཤཱ་རིའི་བུ་སེམས་བསྐྱེད་པ་དྲུག་པ་དེ་བསྐྱེད་ནས་བྱང་ཆུབ་སེམས་དཔའ་སློབ་དཔོན་ལ་རིམ་གྲོ་དང་། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་འབུལ་ལོ། དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་རབ་ཏུ་རྟོག་ཏུ་གཞུག་པའི་ཕྱིར། དེའི་ཚེ་ཚིགས་སུ་བཅད་པའི་འདི་དག་གསུངས་སོ། །སྡིག་པའི་གྲོགས་ནི་ང་རྒྱལ་རྒྱགས་འཕེལ་བ། །བསྐལ་པ་མང་པོ་རྒྱ་མཚོར་བསྟན་པས་ན། །མི་ཡི་ནང་དུ་སྐྱེས་ཀྱང་བྲན་དུ་འགྱུར། །འཁོར་བའི་རྒྱུན་དུ་ཡུན་རིང་དུས་སུ་འཁོར། །མི་ལུས་རབ་ཏུ་རྙེད་པར་དཀའ་བ་ཡང་། །དེ་ནི་བདག་གིས་དཀའ་བས་ཐོབ་གྱུར་ཏེ། །གནས་པའི་ཡུལ་ནི་འཐུན་པ་བཟང་པོ་དང་། །སངས་རྒྱས་འབྱུང་དང་དལ་འབྱོར་དེ་བཞིན་ནོ། ། གྲོགས་པོ་གང་དག་མཆོག་ཏུ་རབ་བཟང་བ། །བྱང་ཆུབ་སེམས་དཔའི་སྤྱོད་དང་ལམ་སྟོན་ཅིང་། །བྱང་ཆུབ་སེམས་ནི་རིན་ཆེན་འཕེལ་བྱེད་པ། །དེ་དག་བསྐལ་པ་བྱེ་བ་མང་པོས་རྙེད། །ལུས་ནི་ཉམས་ཆུང་མི་རྟག་མི་བརྟེན་ཏེ། །དབུ་བ་རྔའོ་དང་ཆུ་ཡི་ཆུ་བུར་འདྲ། །གྱུ་མ་ལྟ་བུ་གར་ལ་ལྟ་དང་མཚུངས། །རྨི་ལམ་མཐོང་དང་འདྲིང་བར་སྨྲ་བ་བཞིན། །སྲོག་ནི་ཡུན་ཐུང་ཚེ་ཡང་ཟད་པར་འགྱུར། །ཇི་ལྟར་སྤྲིན་དང་གློག་ནི་མི་གནས་ལྟར། །སྐད་ཅིག་ཏུ་ནི་དེ་བཞིན་སྲོག་ཀྱང་འགྱུར། །སྙིང་པོ་མདོ་ལས་སྙིང་པོ་ལེན་པར་བྱེད། །གང་གིས་འདས་པའི་དུས་ཀྱི་བསྐལ་པ་ཡང་། །རྒྱ་མཚོ་བརྒྱ་ཕྲག་བསམ་ཡས་བསླུས་གྱུར་པ། །ང་རྒྱལ་རི་བོ་མན་དང་གཞོམ་པ་ཡི། །དུས་དང་ཚོང་དང་མན་ནི་ཉེར་གནས་ཀྱིས། །ལུས་ལ་སྡུག་པ་ཐམས་ཅད་རབ་སྤངས་ནས། །
སྲོག་ལ་ཆགས་པ་མེད་པའི་ཡིད་ཀྱིས་ནི། །ང་དང་རྒྱགས་དང་དྲེགས་པ་སྤངས་གྱུར་ནས། །ཡོན་ཏན་ལྡན་ལ་གུས་བཅས་རིམ་གྲོ་བྱ། །ང་དང་རྒྱགས་དང་དྲེགས་པ་སྤངས་གྱུར་ནས། །ཕ་དང་མ་དང་བུ་ཕོ་རྣམས་དང་ནི། །འཇིག་རྟེན་བླ་མ་མཆོག་ཏུ་གང་གྲགས་པ། །གུས་དང་བཅས་ཤིང་མཆོག་གི་རིམ་གྲོ་བྱ། །བྱང་ཆུབ་སེམས་དཔའ་བྱང་ཆུབ་མཆོག་ཞུགས་པ། །གང་དག་བདག་དང་བྱང་ཆུབ་འཐུན་སྤྱོད་ལ། །དགའ་དང་གུས་པ་བརྟན་པ་བསྐྱེད་བྱ་སྟེ། །རིམ་གྲོ་བྱ་བའི་ཕྱིར་ནི་བརྩོན་པར་བྱ། །སྐྱེ་དགུ་ང་རྒྱལ་ལྡན་པ་ང་རྒྱལ་སྤངས། །མི་མཁས་ང་རྒྱལ་གཅད་ཅིང་གདུལ་བའི་ཕྱིར། ཡེ་ཤེས་རྡོ་རྗེ་དག་གིས་བཅོམ་བྱས་ནས། །རྒྱགས་དང་ང་རྒྱལ་རི་ནི་བསྙིལ་བར་བྱ། །བྱང་ཆུབ་སྤྱོད་པ་ཡོངས་སུ་རྫོགས་བྱས་ཏེ། །བྱང་ཆུབ་སྙིང་པོ་མཆོག་ལ་གནས་གྱུར་ནས། །བདུད་ཀྱི་དཀྱིལ་འཁོར་རྩོད་པ་རྣམས་བཏུལ་ཏེ། །ཆུ་བོ་བཞི་ལས་སྲོག་ཆགས་བསྒྲལ་བར་བྱ། །ཕྱོགས་བཅུ་དག་ན་མི་གང་ན་བ་རྣམས། རང་གི་མི་གཙང་བར་ལྷུང་སྨད་པ་ལ། །བྱམས་པ་དང་ནི་སྙིང་རྗེའི་ཡིད་ཀྱིས་སུ། །མགོན་དང་སྐྱབས་དང་དཔུང་གཉེན་འགྱུར་བ་བྱ། །སྦྱིན་པའི་ཕ་རོལ་ཕྱིན་པའི་དུས་ལ་བབ། །སངས་རྒྱས་ཡོན་ཏན་བསླབ་པ་བསླབ་ནུས་ཤེས། །བཟོད་པ་བསྒོམས་པར་བྱ་བ་ཕུན་སུམ་ཚོགས། །མདུད་པ་མེད་པའི་བརྩོན་འགྲུས་བརྩམས་པར་བྱ། །བསམ་གཏན་ཕ་རོལ་ཕྱིན་ཐོབ་ཕུན་སུམ་ཚོགས། །སེམས་གདུལ་བ་ཡི་དུས་ནི་ཉེ་བར་གནས། ཐབས་དང་ཤེས་རབ་མཁས་ལ་གནས་གྱུར་ཏེ། །བླ་མ་ཐམས་ཅད་ལ་ནི་བསྐོར་བ་བྱ། །དེ་ལྟར་བསོད་ནམས་སྟོབས་དང་གཟི་བརྗིད་སྤེལ། །ཤེས་རབ་ཡེ་ཤེས་མཁས་པ་བསམ་མི་ཁྱབ། །རང་དབང་དམ་པ་དག་གིས་མངོན་འཕགས་ཏེ། བྱུར་བུར་ཡོངས་སུ་བཀང་བའི་སྣོད་བྱིན་ནོ། །ཤཱ་རིའི་བུ་བྱང་ཆུབ་སེམས་དཔའི་སེམས་བསྐྱེད་པ་དྲུག་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཡོངས་སུ་ཚོལ་བས་སློབ་དཔོན་ལ་རིམ་གྲོ་དང་། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་འབུལ་ལོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བདག་ཡུན་རིང་པོར་དགེ་བའི་བཤེས་གཉེན་དང་བྲལ་
ཞིང་སྡིག་པའི་གྲོགས་པོ་དང་ཕྲད་པས་ལེ་ལོ་ཅན། བརྩོན་འགྲུས་ཉམས་པ། སྙོམ་ལས་ཅན། བླུན་པ། ལྐུག་པར་གྱུར་ཏེ། ལས་ནག་པ་ོ་དང་། ནག་པོའི་རྣམ་པར་སྨིན་པའང་མེད། ལས་དཀར་པོ་དང་། དཀར་པོའི་རྣམ་པར་སྨིན་པ་འང་མེད། ལས་དཀར་གནག་དང་། དཀར་གནག་གི་རྣམ་པར་སྨིན་པ་འང་མེད། མི་གནག་ཅིང་དཀར་བའི་ལས་དང་། མི་གནག་ཅིང་དཀར་བའི་རྣམ་པར་སྨིན་པ་ཡང་མེད་དོ། ཞེས་དེ་ལྟར་མོས་པས། དགེ་སྦྱོང་དང་། བྲམ་ཟེ་ལ། བཙུན་པ་དག་དགེ་བ་གང་། མི་དགེ་བ་གང་། ཁ་ན་མ་ཐོ་བ་དང་བཅས་པ་གང་། ཁ་ན་མ་ཐོ་བ་མེད་པ་གང་། བསྟེན་པར་བྱ་བ་གང་། བསྟེན་པར་མི་བྱ་བ་གང་། བྱ་བའི་རིགས་པ་གང་། བྱ་བའི་མི་རིགས་པ་གང་། ཅི་བྱས་ན་ཡུན་རིང་པོར་གནོད་པ་དང་། མི་ཕན་པ་དང་། སྡུག་བསྔལ་བར་འགྱུར། ཅི་བྱས་ན་དོན་དང་། ཕན་པ་དང་། བདེ་བར་འགྱུར། ཞེས་མི་འདྲི་བ་དང་། ང་རྒྱལ་གྱིས་ཟིལ་གྱིས་ནོན་པས་སྡིག་པ་མི་དགེ་བའི་ལས་མངོན་པར་འདུས་བྱས་ཏེ།། མི་དགེ་བའི་ལས་དེའི་རྣམ་པར་སྨིན་པས་འདི་ལྟ་སྟེ། སྦྱིན་གནས་ཐམས་ཅད་ཉེ་བར་འཚོ་བ་མ་ཡིན་པ། དབང་པོ་མ་ཚང་བའི་མིར་གྱུར་ནས་འདི་ལྟ་བུའི་སྦྱིན་གནས་མཉེས་པར་མ་བྱས་པས། བདག་མིར་གྱུར་པ་ན་ཡང་ལོང་བ། ལྐུག་པ། བླུན་པ། རྐུབ། རིག་པ། རྨོངས་པ། འོན་པར་གྱུར་ཏེ། ལེགས་པར་བཤད་པ་དང་། ཉེས་པར་བཤད་པའི་དོན་ཤེས་པར་མི་ནུས་སོ། བདག་གིས་ནི་ད་ལྟར་མ་ཉེས་པར་བྱས་པས་འདི་ལྟ་སྟེ། དབང་པོ་ཚང་བ་དགེ་བའི་ལུས་ཐོབ་ཀྱིས། སྦྱིན་གནས་ཐམས་ཅད་ཀྱི་ཉེ་བར་འཚོ་བར་བྱ། ལུས་དང་སྲོག་ལ་མི་བལྟ་བར་བྱ། ལེགས་པར་བཤད་པ་དང་། ཉེས་པར་བཤད་པའི་དོན་ཀུན་ཤེས་པའི་མཐུ་ཡོད་པར་བྱ། སློབ་དཔོན་ལ་བཙུན་པ་དགེ་བ་གང་། མི་དགེ་བ་གང་། ཁ་ན་མ་ཐོ་བ་དང་བཅས་པ་གང་། ཁ་ན་མ་ཐོ་བ་མེད་པ་གང་། བསྟེན་པ་གང་། མི་བསྟེན་པ་གང་། བྱ་བ་གང་། མི་བྱ་བ་གང་། ཅི་བྱས་ན་ཉན་ཐོས་དང་། རང་སངས་རྒྱས་ཀྱི་ཆོས་མངོན་དུ་འགྱུར། ཅི་བྱས་ན་བྱང་ཆུབ་སེམས་དཔའི་ཆོས་མངོན་དུ་འགྱུར་ཞེས་འདྲི་ཞིང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་དོན་གྱི་ཕྱིར་སློབ་དཔོན་ལ་
རིམ་གྲོ་དང་། བསྙེན་བཀུར་བྱེད་དེ། འདི་ལྟར་སྙིང་པོ་མེད་པའི་ལུས་ལས་སྙིང་པོ་བླང་ངོ་སྙམ་ནས། ཐ་ན་ཆུ་བུམ་པ་གང་ཙམ་ཡང་འབུལ་ལོ། །བཅོམ་ལྡན་འདས་ཀྱིས་དེ་སྐད་གསུངས་ཏེ། བདེ་བར་གཤེགས་པས་དེ་སྐད་བཀའ་སྩལ་ནས། སྟོན་པ་ཡང་འདི་སྐད་གསུང་ངོ་། ཕན་པ་འདོད་ཕྱིར་བསྐལ་པ་བརྒྱ་མང་པོར། །དགེ་བའི་བཤེས་གཉེན་ཡོངས་སུ་སྤངས་གྱུར་ནས། དགེ་དང་མི་དགེ་ཁ་ན་མ་ཐོ་དང་། །ཁ་ན་མ་ཐོ་མེད་བྱས་འབྲས་མི་འདྲི། །ལྷག་པའི་ང་རྒྱལ་དབང་དུ་སོང་བ་ནི། །སེམས་དམྱལ་དུང་འགྲོ་གཤིན་རྗེའི་དབང་དུ་སོང་། །སྡིག་སེམས་གྲོགས་པོ་བསྟེན་པར་བྱས་པས་ན། །བསྐལ་པ་བརྒྱ་མང་གིས་ནི་ངན་འགྲོ་འཕོས། །མི་ཡི་འཇིག་རྟེན་དབང་པོ་མ་ཚང་གྱུར། །བསྐལ་པ་སྟོང་ཕྲག་མང་པོར་འཁྱམས་པའི་ལུས། །དེ་དག་དང་མི་དགེ་ཁ་ན་མ་ཐོ་དང་། །ཁ་ན་མ་ཐོ་མེད་བྱས་འབྲས་མེད་མི་ཤེས། །རུ་སྦལ་མགྲིན་པ་ཤིང་མིག་ཆུང་འདྲ་བར། །མི་ཡི་ལུས་ནི་ཤིན་དུ་དཀའ་བར་ཐོབ། །དབང་པོ་དག་ནི་ཚང་ཞིང་སྐྱེ་མཆེད་དགེ། །མིང་ལ་ཡོངས་སུ་ནས་དལ་བ་རྙེད། །འཇིག་རྟེན་སྒྲོན་མ་མཛད་པ་མཉེས་བྱས་ནས། །རྒྱལ་བས་བསྟན་ཆོས་འདོད་ཆགས་བྲལ་བ་ཐོབ། །དགེ་དང་མི་དགེ་བའི་འབྲས་བུ་དག། །འཇིག་རྟེན་གཙོ་ལ་བདག་དྲི་དུས་ལ་བབ། །འགྲོ་བར་སེར་སྣའི་མིར་འགྱུར་ཇི་ལྟ་བུ། །ཇི་ལྟར་སྦྱིན་པ་དག་སེར་སྣ་མེད་པར་འགྱུར། །ཇི་ལྟར་གཡོ་ངན་བརྐམ་པ་ཚུལ་ཁྲིམས་འཆལ། །ཚུལ་ཁྲིམས་ནོར་ཀུན་སྲུང་བ་ཇི་ལྟ་བུ། །མི་ནི་ཁྲོ་དང་འཁྲུག་པར་ཇི་ལྟར་འགྱུར། །ཁྲོ་མེད་བཟོ་བའི་སྟོབས་སུ་ཇི་ལྟར་འགྱུར། །ཇི་ལྟར་ལེ་ལོ་ཅན་དང་གཡེང་ཡིད་འགྱུར། །བརྩོན་འགྲུས་བསམ་གཏན་དགའ་བ་ཇི་ལྟ་བུ། །ཇི་ལྟར་འཆལ་བའི་ཤེས་རབ་བླུན་ལྐུག་འགྱུར། །ཇི་ལྟར་ཤེས་རབ་ལྡན་ཞིང་བདེན་གཏམ་དགའ། །ཇི་ལྟར་བྱང་ཆུབ་སྤྱོད་པ་གཅིག་སེམས་པས། །སྤྱོད་པ་བཟང་པོ་ཐམས་ཅད་ཚོལ་བར་འགྱུར། །ཇི་ལྟར་འགྲོ་བ་ཀུན་ལ་བྱམས་པ་བགྱིད། །ཇི་ལྟར་ངན་སོང་སོང་བའི་སེམས་ཅན་འདྲེན། ཇི་ལྟར་ཆོས་ཀྱི་དགའ་བས་མི་ངོམས་ཡིད། །བྱང་ཆུབ་སྤྱོད་པ་སྡེ་སྣོད་ཡོངས་སུ་ཚོལ། །ཕྱོགས་དང་ཕྱོགས་
མཚམས་རབ་འབྱམས་ཞིང་རྣམས་ན། །འཇིག་རྟེན་བླ་མ་བཞུགས་པར་ཇི་ལྟར་འགྲོ། །ཕྱག་འཚལ་བསོད་ནམས་བྱེད་པ་ཇི་ལྟ་བུ། །ཀུན་དུ་བཟང་པོ་སྤྱོད་པ་ཅི་འདྲ་འདྲི། །སློབ་དཔོན་བླ་མ་དག་ལ་བདག་འདྲི་བ། །དེ་ཡི་དུས་ནི་དི་རིང་ཉེར་གནས་ཏེ། །བླ་མའི་གནས་སུ་གནས་ལས་ཉན་དགའ་སྟེ། །སློབ་དཔོན་ཡིད་མགུ་བྱེད་པ་ཇི་ལྟ་བུ། །སངས་རྒྱས་སྲས་ཀྱི་སེམས་ནི་བསྐྱེད་གྱུར་ནས། །སྟོབས་དང་བསོད་ནམས་ཡངས་པའི་བློ་གྲོས་ཅན། །ངེས་པར་མཆོག་གི་ཡེ་ཤེས་སྟོབས་ལྡན་པས། །དགའ་བའི་ཡིད་ཀྱིས་སྣོད་གང་ཆུ་ཡང་འབུལ། །ཤཱ་རིའི་བུ་སེམས་བསྐྱེད་པ་བདུན་པ་འདི་བསྐྱེད་ནས། །བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་དོན་གྱི་ཕྱིར་སློབ་དཔོན་ལ་ནི་རིམ་གྲོ་དང་། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་འབུལ་ལོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བདག་ཡུན་རིང་པོར་དགེ་བའི་བཤེས་གཉེན་དང་བྲལ་ཞིག་སྡིག་པའི་གྲོགས་པོས་ཟིན་པས་ལེ་ལོ་ཅན། བརྩོན་འགྲུས་ཉམས་པ། སྙོམས་ལས་ཅན། ལྐུག་པས་གང་ཚིག་དང་། ཡི་གེ་དང་། དོན་དང་། ཚིག་ཏུ་ལྡན་པ་དང་། ཆོས་དང་ཚིག་ཏུ་ལྡན་པ་དང་། མྱ་ངན་ལས་འདས་པ་དང་ལྡན་པ་དང་། འདོད་ཆགས་དང་བྲལ་བ་ལྡན་པ་དང་། འགོག་པ་དང་། ཞི་བ་དང་། རྫོགས་པའི་བྱང་ཆུབ་དང་། དགེ་སྦྱོང་དང་། བྲམ་སེ་དང་། མྱ་ངན་ལས་འདས་པ་དང་ལྡན་པ་དང་། ཐམས་ཅད་ལ་བྱ་སྟེ། དེ་དག་སྤངས་ནས་དོན་དང་ཚིག་ཏུ་མི་ལྡན་པ་དང་། ཆོས་ཀྱི་ཚིག་དང་མི་ལྡན་པ་ནས། མྱ་ངན་ལས་འདས་པ་དང་མི་ལྡན་པའི་བར་གྱིས་ཚིག་དང་། ཡི་གེ་དེ་དག་འཛིན་པ་དང་། ལེན་པ་དང་། ཀློག་པ་དང་། ཀུན་ཆུབ་པར་བྱེད་པ་ནི་འདི་ལྟ་སྟེ། སྟོབས་མེད། བརྩོན་འགྲུས་མེད། སྐྱེས་བུའི་སྟོབས་མེད། སྐྱེས་བུའི་མཐུ་མེད། སྐྱེས་བུའི་བརཏལ་བ་མེད། སྤྱོད་པ་མེད། རཏལ་བ་མེད། སྤྱོད་པ་ལ་མཐུ་མེད། རྒྱུ་མེད། རྐྱེན་མེད་དེ། སེམས་ཅན་ཀུན་ནས་ཉོན་མོངས་པ་ཡང་རྒྱུ་མེད་རྐྱེན་མེད་པར་སེམས་ཅན་ཀུན་ནས་ཉོན་མོངས་པར་གྱུར་ཏེ། རྒྱུ་མེད་དེ། རྐྱེན་མེད་དོ། སེམས་ཅན་རྣམས་རྣམ་པར་དག་པ་ཡང་རྒྱུ་མེད། རྐྱེན་མེད་པར་སེམས་ཅན་རྣམ་པར་དག་གོ། །
ཞེས་འདི་ལྟར་རྒྱུ་མེད་པར་ལྟ་བ་ལ་གནས་ནས། བདག་གིས་མི་དགེ་བའི་ལས་མང་པོ་མངོན་པར་འདུས་བྱས་ཏེ། ལས་དེའི་རྣམ་པར་སྨིན་པས་འདི་ལྟ་སྟེ། མིའི་ནང་དུ་སྦྱིན་གནས་ཐམས་ཅད་ཉེ་བར་འཚོ་བ་མ་ཡིན་པ། དབང་པོ་མ་ཚང་བའི་མིའི་ལུས་ཐོབ་སྟེ། དེ་ན་བདག་གླེན་པ། གཡེང་བ། དིག་པ། ལྐུག་པ། རྨོངས་པ། བླུན་པ། ལོང་བ། འོན་པར་གྱུར་པས། གང་ཚིག་དང་། ཡི་གེ་དང་། དོན་དུ་ལྡན་པ་ནས། མྱ་ངན་ལས་འདས་པ་དང་ལྡན་པའི་བར་དུ་དེ་དག་འཛིན་པ་དང། ལེན་པ་དང་། ཀློག་པ་དང་། ཀུན་ཆུབ་པར་བྱེད་པའི་མཐུ་མེད་པས་འདི་ལྟ་བུའི་སྦྱིན་གནས་མཉེས་པར་མ་བྱས་སོ། བདག་གིས་ནི་ད་ལྟར་སྦྱིན་གནས་མཉེས་པར་བྱས་ཀྱིས། ལུས་དང་སྲོག་ལ་མི་ལྟ་བའི་བར་དུ་བྱས་ཏེ། གང་ཚིག་དང་། ཡི་གེ་དང་། དོན་དུ་ལྡན་པ་ནས་མྱ་ངན་ལས་འདས་པ་དང་ལྡན་པའི་བར་དུ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཉིད་གཟུང་བ་ནས། ཀུན་ཆུབ་པར་བྱ་བའི་བར་དུ་ནུས་ཀྱིས། འོན་བདག་གིས་བརྩོན་འགྲུས་བརྩམས་ཏེ། འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཀྱི་ཆོས་རྣམ་གྲངས་འདི་ཉིད་བླང་བའི་ཕྱིར་ལུས་ཀྱི་སློབ་དཔོན་ལ་རིམ་གྲོ་དང་། བསྙེན་བཀུར་བྱའོ། འཛིན་པ་དང་། ཀློག་པ་དང་། ཁ་ཏོན་དང་། བསྙེན་བཀུར་བྱས་ཏེ། སྙིང་པོ་མེད་པའི་ལུས་ལས་སྙིང་པོ་བླངས་པར་འགྱུར། བསོད་ནམས་དང་ཡེ་ཤེས་ཀྱི་སྟོབས་ཀྱིས་ཉེ་བར་བརྟེན་པར་བྱས་པར་འགྱུར་ཏེ། བསོད་ནམས་དང་། ཡེ་ཤེས་ཀྱི་སྟོབས་དེས་ཉེ་བར་བརྟན་པས་བྱང་ཆུབ་སེམས་དཔའི་སྡེ་སྣོད་འདི་དང་ཉེ་བར་འགྱུར་རོ་སྙམ་ནས་ཆེད་དུ་བསམ་ཏེ། སློབ་དཔོན་ལ་རིམ་གྲོ་དང་། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་འབུལ་ལོ། འདི་ལ་དེའི་ཆོས་ཉིད་ནི་འདི་ཡིན་ཏེ། དེ་ལ་འདི་སྐད་ཅེས་བྱའོ། །ཆོས་གང་ན་དོན་དང་ལྡན་པ་དང་། ལམ་གྱི་ཡན་ལག་ལམ་སྒོམ་དང་། འགོག་པ་མངོན་དུ་བྱེད་པ་དང་། མྱ་ངན་འདས་ལམ་སྙིང་པོ་ཅན། །ཆོས་དེ་དག་ནི་ཡོངས་སྤོངས་ནས། །གང་ཆོས་ཕན་པ་མེད་པ་དང་། །དོན་དང་ཚིག་ཏུ་མི་ལྡན་པ། །ཆོས་དེ་དག་ནི་བདག་གིས་བསྙེན། །བརྩོན་འགྲུས་དང་ནི་
སྟོབས་མེད་དེ། །སྐྱེས་བུ་ཡི་ནི་མཐུ་ཡང་མེད། །ཤིན་དུ་རཏལ་བ་མཆོག་རྣམས་དང་། དེ་དག་ཐམས་ཅད་མི་དམིགས་སོ། །སངས་རྒྱས་དང་ནི་ཆོས་ཀྱང་མེད། །ཕ་མ་མེད་པ་དེ་བཞིན་དུ། །དཀར་པོ་དང་ནི་ནག་པོའི་ལས། །རྣམ་པར་སྨིན་པ་ཀུན་མེད་ཅེས། །འདི་འདྲའི་སྡིག་པར་ལྟ་བ་དག། །ཡང་དང་ཡང་དུ་བསྟེན་པས་ན། །གཅིག་ཏུ་མི་བཟད་མ་རུངས་པ། །སེམས་ཅན་དམྱལ་བར་ཡུན་རིང་གནས། །དེ་བཞིན་དུད་འགྲོའི་སྐྱེ་གནས་དང་། །གཤིན་རྗེའི་འཇིག་རྟེན་སྡིག་ཅན་ཏེ། །ནམ་ཚེ་འང་མིར་ནི་སྐྱེས་གྱུར་ཀྱང་། །བླུན་ཞིང་ལྕེ་མེད་པར་འགྱུར། །གཡེང་བ་དང་ནི་འོན་པར་འགྱུར། །དིག་པ་ལྐུག་པ་རྨོངས་པར་འགྱུར། །ཡུན་རིང་སེམས་དམྱལ་མ་རུངས་པར། །མི་ཤིས་པས་ནི་རབ་ཏུ་ལྟུང་། །དབང་པོ་ཐམས་ཅད་ཕན་ཚོགས་ཤིང་། །བདག་གི་ལུས་འདི་རབ་མཛེས་པ། །ཡུན་རིང་་དུས་ན་བདག་གིས་ཐོག་འདི་ནི་བདག་གིས་བརྩོན་བྱའི། །ཆོས་གང་དོན་དང་ལྡན་པ་དང་། །མྱ་ངན་འདའ་བའི་གྲོགས་བྱེད་པ་བྱང་ཆུབ་ལམ་དང་བྱང་ཆུབ་ལ། །བདག་ནི་འབད་པར་བྱ་བའི་དུས། །བྱང་ཆུབ་སེམས་དཔའི་སྡེ་སྣོད་ནི། །ཟབ་མོའི་དོན་དང་ལྡན་པ་སྟེ། །བསྐལ་པ་སྟོང་ཕྲག་བྱེ་བར་ཡང་། །དེ་ནི་ཤིན་དུ་ཐོས་པར་དཀའ། །སངས་རྒྱས་ཀྱི་ནི་བྱང་ཆུབ་ཕྱིར། །སངས་རྒྱས་ཆོས་མང་འདི་དང་ནི། །གཞན་ཡང་བསམ་གྱིས་མི་ཁྱབ་ལ། །རབ་ཏུ་འཇུག་ཅིང་གཟུང་བར་བྱ། །སློབ་དཔོན་ལ་ནི་གུས་པ་བཅས་ཤིང་། །བསྙེན་བཀུར་དག་ནི་བྱས་པ་ན། །སངས་རྒྱས་བྱང་ཆུབ་སེམས་དཔའ་རྣམས། །ཐོས་པ་དེ་ནི་རྙེད་པར་འགྱུར། །བྱང་ཆུབ་སེམས་དཔའ་མི་འཇིགས་པ། །ཐབས་དང་ཤེས་རབ་ལྡན་པ་ཡི། །འདི་ལྟ་བུར་ནི་སེམས་བསྐྱེད་ནས། །རྫ་གང་ཙམ་གྱི་ཆུ་ཡང་འབུལ། །ཤཱ་རིའི་བུ་སེམས་བསྐྱེད་པ་བརྒྱད་པ་འདི་བསྐྱེད་ནས་བྱང་ཆུབ་སེམས་དཔའི་སྡེ་སྣོད་ཀྱི་ཕྱིར་སློབ་དཔོན་ལ་རིམ་གྲོ་དང་། བསྙེན་བཀུར་བྱེད་དེ། ཐ་ན་ཆུ་རྫ་གང་ཙམ་ཡང་འབུལ་ལོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། ཀྱེ་མའོ་སེམས་ཅན་འདི་དག་ནི་དོན་མེད་པས་ཡོངས་སུ་བསྐོར་བ། ལུས་དང་སྲོག་ལ་ལྟ་བའོ། །
དོན་གྱིས་ཡོངས་སུ་བསྐོར་བ་ནི་ལུས་དང་སྲོག་ལ་མི་ལྟའོ། དོན་མེད་པས་ཡོངས་སུ་བསྐོར་བ་གང་ཞེ་ན། འདི་ལྟ་སྟེ། ལུས་དང་སྲོག་་ལ་ལྟའི། བྱང་ཆུབ་ཀྱི་ཕྱོགས་ཀྱི་ཆོས་རྣམས་ལ་མི་ལྟ་ཞིང་ང་ཡིར་འཛིན་པ་སྔོན་དུ་འགྲོ་བས་བདག་སྦ་བ་དང་། དྲིལ་བ་དང་། མཉེ་བ་དང་། བཀྲུ་བ་དང་། བརྫི་བས་ཡོངས་སུ་བསྐོར་བ་དེ་ནི་དོན་མེད་པས་ཡོངས་སུ་བསྐོར་བ་ཞེས་བྱའོ། གཞན་ཡང་དོན་མེད་པས་ཡོངས་སུ་བསྐོར་བ་ནི་འདི་ལྟ་སྟེ། ལུས་དང་སྲོག་ལ་ལྟ་ཞིང་ང་ཡིར་འཛིན་པ་སྔོན་དུ་འགྲོ་བས་ཆུང་མ་དང་། བུ་ཕོ་དང་། བུ་མོ་དང་། མཛའ་བོ་དང་། ཉེ་དུ་དང་། སྣག་གི་གཉེན་མཚམས་སྦེད་པ་དང་། དྲིལ་བ་ནས་ཡོ་བྱད་དང་། ལོངས་སྤྱོད་ཐམས་ཅད་ཀྱི་བར་གྱིས་ཡོངས་སུ་བསྐོར་བ་དེ་ནི་དོན་མེད་པས་ཡོངས་སུ་བསྐོར་བ་ཞེས་བྱའོ། །གཞན་ཡང་ང་ཡིར་འཛིན་པ་སྔོན་དུ་འགྲོ་བ་ནས། བྲན་ཕོ་དང་། བྲན་མོ་དང་། ལས་བྱེད་པའི་མི་སྦེད་པ་དང་། མངག་པ་དང་། ཀུན་དུ་སྲུང་བ་དེ་ནི་དོན་མེད་པས་ཡོངས་སུ་བསྐོར་བ་ཞེས་བྱའོ། །དེ་ལ་དོན་གྱི་ཡོངས་སུ་བསྐོར་བ་གང་ཞེ་ན། འདི་ལྟ་སྟེ། ལུས་དང་སྲོག་ལ་མི་ལྟ་ཡི། བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་བྱང་ཆུབ་ཀྱི་སེམས་སྔོན་དུ་འགྲོ་བའི་ལུས་ཀྱི་ལས་དང་། ངག་གིས་ལས་དང་། ཡིད་ཀྱི་ལས་ཡོངས་སུ་བསྐོར་བ་དེ་ནི་དོན་གྱིས་ཡོངས་སུ་བསྐོར་བ་ཞེས་བྱའོ། གཞན་ཡང་དོན་གྱིས་ཡོངས་སུ་བསྐོང་བ་ནི། འདི་ལྟ་སྟེ། ལུས་དང་སྲོག་ལ་མི་ལྟ་ཡི། བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་བྱང་ཆུབ་ཀྱི་སེམས་སྔོན་དུ་འགྲོ་བའི་སྦྱིན་པའི་ཕ་རོལ་དུ་ཕྱིན་པ་བསྒྲུབས་པ་ནས། ཤེས་རབ་ཀྱི་ཕ་རོལ་དུ་ཕྱིན་པའི་བསྒྲུབ་པའི་བར་གྱིས་ཡོངས་སུ་བསྐོར་བ་དེ་ནི་དོན་གྱིས་ཡོངས་སུ་བསྐོར་བ་ཞེས་བྱའོ། །གཞན་ཡང་དོན་གྱིས་ཡོངས་སུ་བསྐོར་བ་ནི་ལུས་དང་སྲོག་ལ་མི་ལྟ་ཡི་བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་བྱང་ཆུབ་ཀྱི་སེམས་སྔོན་དུ་འགྲོ་བའི་སྦྱིན་པ་དང་། སྙན་པར་སྨྲ་བ་དང་། དོན་བྱ་བ་དང་། དོན་འཐུན་པས་སེམས་ཅན་ཐམས་ཅད་སྡུད་པས་སེམས་སུ་བསྐོར་བ་དེ་ནི་དོན་གྱིས་ཡོངས་སུ་བསྐོར་བ་ཞེས་བྱའོ། །གཞན་དོན་གྱིས་ཡོངས་སུ་བསྐོར་བ་ནི་འདི་ལྟ་སྟེ། ལུས་དང་སྲོག་ལ་མི་ལྟ་ཡི། བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་
བྱང་ཆུབ་ཀྱི་སེམས་སྔོན་དུ་འགྲོ་བའི་དྲན་པ་ཉེ་བར་བཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་བསྒོམ་པས་ཡོངས་སུ་བསྐོར་བ་དེ་ནི་དོན་གྱིས་ཡོངས་སུ་བསྐོར་བ་ཞེས་བྱའོ། །གཞན་ཡང་དོན་གྱིས་ཡོངས་སུ་བསྐོར་བ་ནི་འདི་ལྟ་སྟེ། ལུས་དང་སྲོག་ལ་མི་ལྟའི། བྱང་ཆུབ་ཀྱི་ཕྱོགས་ཀྱི་ཆོས་ལ་ལྟ་ཞིང་། བྱང་ཆུབ་ཀྱི་སེམས་སྡོན་དུ་འགྲོ་བའི་ཕ་མ་དང་། སློབ་དཔོན་ལ་རིམ་གྲོ་བྱེད་ཅིང་བླ་མའི་གནས་ལ་བསྙེན་བཀུར་བྱེད་པ་དང་། འདུད་པ་དང་། རབ་ཏུ་འདུད་པ་དང་། གུས་ཕར་སྨྲ་བ་དང་། ཕྱག་འཚལ་བ་དང་། ལྡང་བ་དང་། ཐལ་མོ་སྦྱོང་བའི་ལས་ཀྱིས་ཡོངས་སུ་བསྐོར་བ་དེ་ནི་དོན་གྱིས་ཡོངས་སུ་བསྐོར་བ་ཞེས་བྱའོ། །གཞན་ཡང་དོན་གྱིས་ཡོངས་སུ་བསྐོར་བ་ནི་འདི་ལྟ་སྟེ། ལུས་དང་སྲོག་ལ་མི་ལྟ་ཡི། བྱང་ཆུབ་ཀྱི་ཕྱོགས་ཀྱི་ཆོས་ལ་ལྡ་ཞིང་བྱང་ཆུབ་སེམས་སྔོན་དུ་འགྲོ་བའི་དཀོན་མཆོག་གྱི་ཞལ་ཏུ་བྱས་པས་ཡོངས་སུ་བསྐོར་བའོ། དེ་ལྟར་ཀྱེ་མའོ་སེམས་ཅན་འདི་དག་ནི་དོན་མེད་པས་ཡོངས་སུ་བསྐོར་བ། ལུས་དང་སྲོག་ལ་ལྟ་བའོ། ཀྱེ་མའོ་བདག་ནི་དོན་གྱིས་ཡོངས་སུ་བསྐོར་བས་ཡོངས་སུ་གྱི་བདག་གང་བརྩོན་འགྲུས་བརྩམས་ལ་སློབ་དཔོན་ལ་ལུས་ཀྱི་རིམ་གྲོ་དང་། བསྙེན་བཀུར་བྱ་སྟེ། དེ་ལྟར་ན་སྙིང་པོ་མེད་པའི་ལུས་ལས་སྙིང་པོ་བླངས་པ་དང་། བསོད་ནམས་དང་། ཡེ་ཤེས་ཀྱི་སྟོབས་ཀྱིས་ཉེ་བར་བརྟན་པར་བྱས་པར་འགྱུར་ཏེ། བསོད་ནམས་དང་ཡེ་ཤེས་ཀྱི་སྟོབས་དེས་ཉེ་བར་བརྟན་པས་བྱང་ཆུབ་ཀྱི་སྙིང་པོ་དང་ཉེ་བར་འགྱུར་རོ།། སྙམ་པ་དེ་ནི་ཤཱ་རིའི་བུ་སེམས་བསྐྱེད་པ་དགུ་པ་འདི་བསྐྱེད་ནས་སློབ་དཔོན་ལ་རིམ་གྲོ་དང་བསྙེན་བཀུར་བྱེད་དེ། ཐ་ན་ཆུ་རྫ་གང་ཡང་འབུལ་ལོ།། དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུང་སོ།། བྱིས་པ་སོ་སོའི་སྐྱེ་བོ་ཀུན། །ལུས་དང་སྲོག་ལ་ལྟ་ལྡན་ཞིང་། །བྱང་ཆུབ་ཕྱོགས་ལ་མི་ལྟ་སྟེ། རྣམ་པ་སྣ་ཚོགས་ལས་ཀྱང་བྱེད། །སོ་སོའི་སྐྱེ་བོ་དེ་དག་ནི། །བདག་གི་དོན་དང་ཆུང་མའི་དོན། །བུ་ཕོ་དང་ནི་བུ་མོའི་ཕྱིར། །དོན་མེད་པ་ལ་ཆགས་པར་འགྱུར། །
བྲན་དག་ལས་བྱེད་མངག་བདག། མི་མཁས་པས་ནི་ཀུན་དུ་མངགས། །རྐང་བཞི་པ་དག་གོས་བྱེད་དེ། དེ་དག་དོན་མེད་ཆགས་པར་འགྱུར། །ནོར་དང་འབྲུ་རྣམས་རབ་སོགས་ཤིང་། །སྦྱིན་པ་མི་བྱེད་མི་སྤྱོད་དེ། །དོན་མེད་ཆགས་པ་དེ་དག་ནི། །གདེང་གྱི་སྲུངས་མར་བརྗོད་པ་ཡིན། །འདི་ནི་དོན་མེད་ཆགས་པ་སྟེ། །སོ་སོའི་སྐྱེ་བོ་དེ་ལ་ཆགས། །བྱང་ཆུབ་སེམས་དཔའ་བློ་ལྡན་ནི། །དོན་ལ་ཆགས་ཤིང་བརྩོན་པར་བྱེད། །ལུས་དང་སྲོག་ལ་མི་ལྟ་ཡི། །བྱང་ཆུབ་ཕྱོགས་ལ་ལྟ་བྱེད་ཅིང་། །རྣམ་པ་སྣ་ཚོགས་ལས་བྱེད་པ། །དོན་ལ་ཡོངས་སུ་ཆགས་ཤེས་བྱ། །སྦྱིན་དང་ཚུལ་ཁྲིམས་བརྩོན་འགྲུས་བཟོད། །བསམ་གཏན་ཤེས་རབ་དེ་བཞིན་དུ། །ཐབས་དང་རབ་ཏུ་ལྡན་པ་ནི། །དོན་ལ་ཡོངས་སུ་ཆགས་ཤེས་བྱ། །ཕ་དང་མ་ལ་བསྙེན་བཀུར་བྱེད། །བླ་མ་རྒན་རབས་རྗེས་སུ་བསྐྱངས། །དཀོན་མཆོག་གསུམ་གྱི་ཞལ་ཏ་བྱེད། །དོན་ལ་ཡོངས་སུ་ཆགས་ཤེས་བྱ། །ཆོས་ཀུན་ཡང་དག་བསྡུས་པ་ཡི། །བྱང་ཆུབ་སེམས་དཔའི་སྡེ་སྣོད་འདི། །ཀློག་ཅིང་རབ་ཏུ་སྟོན་པ་ནི། །དོན་ལ་ཡོངས་སུ་ཆགས་ཤེས་བྱ། །དོན་ལ་ཆགས་པ་དེ་དག་ནི། །སངས་རྒྱས་ཀུན་གྱིས་བསྔགས་པ་སྟེ། །དེ་ལ་བརྩོན་དང་ལྡན་པ་ནི། །རྒྱལ་སུས་འཇིགས་པ་མེད་པའོ། །དེ་ལྟ་བུ་ཡི་སེམས་བསྐྱེད་ནས། །རབ་ཏུ་དང་བའི་སེམས་ཀྱིས་ནི། །བླ་མ་རྣམས་ལ་བསྙེན་བཀུར་བྱེད། །སྣོད་གང་ཙམ་གྱི་ཆུ་ཡང་འབུལ། །ཤཱ་རིའི་བུ་སེམས་བསྐྱེད་པ་དགུ་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཕྱིར་སློབ་དཔོན་ལ་རིམ་གྲོ་དང་། བསྙེན་བཀུར་བྱེད་དེ། ཐ་ན་ཆུ་བུམ་པ་གང་ཙམ་ཡང་འབུལ་ལོ། །གཞན་ཡང་ཤ་རིའི་བུ་བྱང་ཆུབ་སེམས་དཔའི་འདི་ལྟར་སེམས་བསྐྱེད་དེ། ཀྱེ་མའོ་སེམས་ཅན་འདི་དག་ནི་བཀའ་བློ་མི་བདེ་བ་སྟེ། སློབ་དཔོན་གྱི་རྗེས་སུ་བསྟན་པ་དང་མི་འཐུན་པར་འཛིན་པས་དེ་དག་ཁོང་དུ་མི་ཆུད་དོ་ཅི་ཁོང་དུ་མི་ཆུད་ཅེ་ན་འདི་ལྟ་སྟེ། སློབ་དཔོན་གྱི་ནོར་ཁོང་དུ་མི་ཆུད་དོ། །སློབ་དཔོན་གྱི་ནོར་གང་ཞེ་ན། འདི་ལྟ་སྟེ། དད་པའི་ནོར་དང་། ཚུལ་ཁྲིམས་ཀྱི་ནོར་དང་། ཐོས་པའི་ནོར་དང་། ཁྲེལ་ཡོད་
པའི་ནོར་དང་། གཏོང་བའི་ནོར་དང་། ཤེས་རབ་ཀྱི་ནོར་ཏེ། དེ་དག་ནི་སློབ་དཔོན་ནོར་ཞེས་བྱ་སྟེ། དེ་དག་ཁོང་དུ་ཆུད་པས་ན་རབ་ཏུ་དབུལ་བ་ཞེས་བྱའོ། །བདག་ནི་བཀའ་བློ་བདེ་ཞིང་སློབ་དཔོན་གྱི་རྗེས་སུ་བསྟན་པ་དང་མཐུན་པ་དང་མཐུན་པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་ཤིན་དུ་བཀའ་བློ་བདེ་བ་སྟེ། སློབ་དཔོན་གྱི་རྗེས་སུ་བསྟན་པ་དང་འཐུན་པར་འཛིན་ཅིང་ཁོང་དུ་ཆུད་པར་བྱེད་དོ། །ཅི་ཁོང་དུ་ཆུད་ཅེ་ན། འདི་ལྟ་སྟེ། སློབ་དཔོན་གྱི་ནོར་རོ། །བྱང་ཆུབ་སེམས་དཔའི་སློབ་དཔོན་གྱི་ནོར་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་སོ། །སློབ་དཔོན་གྱིས་བྱང་ཆུབ་སེམས་དཔའ་རྣམ་པ་ཐམས་ཅད་ཏུ་བཀའ་བློ་བདེ་བར་རིག་ནས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་རྒྱ་ཆེར་སྟོན་ཏོ། །རབ་ཏུ་སྟོན་ཏོ། །རབ་ཏུ་འཆད་དོ། །རབ་ཏུ་གཞོག་གོ། རྣམ་པར་འགྲེལ་ཏོ། །རྣམ་པར་འབྱེད་དོ། །གསལ་པོར་གོ་བར་བྱེད་དོ། །ཡང་དག་པར་རབ་ཏུ་སྟོན་ཏོ། བྱང་ཆུབ་སེམས་དཔའི་སྡེ་སྣོད་ལ་རབ་ཏུ་གནས་པའི་བྱང་ཆུབ་སེམས་དཔའ་ནི་དབུལ་བ་ཡོངས་སུ་ཆད་པ་ཁོང་དུ་ཆུད་པར་འགྱུར་ཏེ། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །དེ་དེ་ལྟར་སེམས་བསྐྱེད་དེ་བཀའ་བློ་བདེ་ཞིང་སློབ་དཔོན་གྱི་བསྟན་པ་དང་འཐུན་པར་འཛིན་པ་ནི་སྙིང་པོ་མེད་པའི་ལུས་ལས་སྙིང་པོ་བླངས་པར་འགྱུར་རོ་སྙམ་ནས་སློབ་དཔོན་ལ་རིམ་གྲོ་དང་། བསྙེན་བཀུར་བྱེད་དེ་ཐ་ན་ཆུ་རྫ་གང་ཙམ་ཡང་འབུལ་ལོ། །ཤཱ་རིའི་བུ་སེམས་བསྐྱེད་པ་བཅུ་པ་འདི་བསྐྱེད་ནས་བྱང་ཆུབ་སེམས་དཔའི་སྡེ་སྣོད་ཡོངས་སུ་ཚོལ་བས་སློབ་དཔོན་ལ་བསྙེན་བཀུར་དང་རིམ་གྲོ་བྱེད་དེ། ཐ་ན་ཆུ་རྫ་གང་ཙམ་ཡང་འབུལ་ལོ། །བཅོམ་ལྡན་འདས་ཀྱིས་དེ་སྐད་གསུངས་ཏེ། བདེ་བར་གཤེགས་པས་དེ་སྐད་བཀའ་སྩལ་ནས་སྟོན་པ་ཡང་འདི་སྐད་གསུང་། བཀའ་བློ་མི་བདེ་སེམས་ཅན་གང་། མི་དྲང་སྒྱུ་དག་གཡོ་ངན་ཅིང་། །བླ་མ་རྣམས་དང་མི་མཐུན་པ། །ཚིག་བཞིན་དུ་ནི་བྱེད་མི་འགྱུར། །བསྟན་པ་དང་ནི་མི་མཐུན་ཞིང་། །བཀའ་བློ་མི་བདེ་ཤེས་གྱུར་ནས། །
དྲང་སྲོང་ནོར་ནི་གང་ཡིན་པ། །དེ་ནི་དེ་ལ་མི་སྟོན་ཏོ། །དད་པའི་ནོར་དང་ཚུལ་ཁྲིམས་ནོར། །ཁྲེལ་ཡོད་ངོ་ཚ་ཤེས་པའི་ནོར། །ཐོས་པའི་ནོར་དང་གཏོང་ནོར་དང་། །ཤེས་རབ་ཉིད་ནི་ནོར་བདུན་པ། །ནོར་གྱི་རྣམ་པ་འདི་དག་ནི། །མི་ཟད་པ་ཡི་གཏེར་བདུན་ཏེ། །སྣོད་མ་ཡིན་པར་རིག་ནས་ནི། །དེ་ནི་དེ་ལ་མི་སྟོན་ཏོ། །སེམས་ཅན་གང་དག་རྣམ་པ་ཀུན། །སངས་རྒྱས་ཆོས་ཀྱི་སྣོད་གྱུར་ཅིང་། །གཡོ་མིད་ཚིག་འཇམ་སྒྱུ་མེད་ལ། །བཀའ་བློ་བདེ་ཞིང་རབ་འཐུན་པ། །སངས་རྒྱས་ཀྱི་ནི་བྱང་ཆུབ་ཕྱིར། །ལུས་དང་སྲོག་ལ་མི་ལྟ་བར། །གུས་དང་བཅས་པའི་ཆོས་འདོད་ཅིང་། །བརྩོན་འགྲུས་རྩོམ་པ་རབ་ཏུ་སེམས། །ཚུལ་འདི་འཛིན་པར་འགྱུར་བ་ཡི། །སྣོད་ཏུ་རུང་བའི་རིག་གྱུར་ནས། །ཆོས་ཀྱི་དབྱིངས་ནི་དབྱེར་མེད་པ། །འདྲེན་པས་ཡང་དག་རབ་ཏུ་སྟོན། །གང་ལ་བྱང་ཆུབ་གནས་པ་ཡི། །སངས་རྒྱས་རྣམས་ཀྱི་སྙིང་པོའི་ནོར། །བྱང་ཆུབ་སེམས་དཔའི་སྡེ་སྣོད་ནི། །རྒྱས་པར་རབ་ཏུ་སྟོན་པར་བྱེད། །ཆོས་རྣམས་ཐམས་ཅད་བདག་མེད་དེ་མཚན་མེད་སྟོང་པའི་མཚན་ཉིད་ཅན། །སྲོག་ཀྱང་མེད་ཅིང་འགྱུར་བ་མེད། །སྤྲོས་པ་མེད་དེ་ཀུན་གཞི་མེད། །ཆོས་རྣམས་ཐམས་ཅད་རང་བཞིན་གྱིས། །མ་སྐྱེས་ཤིང་ནི་མཚན་ཉིད་མེད། །བྱུང་བ་མེད་ཅིང་གྲུབ་པ་མེད། །མཚན་མ་མེད་པས་ཕྱེ་བ་སྟེ། །མི་གང་བཀའ་བློ་བདེ་ཞིང་མི་འགལ་བ། །བསྟན་པ་ལ་ནི་རྗེས་སུ་འཐུན་འཛིན་པ། །དེ་དག་ལ་ཡང་རྒྱལ་བ་རང་འབྱུང་རྣམས། །ཐར་སྒོ་སླེབས་ཤེས་རང་གི་སྤྱོད་ཡུལ་སྟོན། །དད་ནོར་ཚུལ་ཁྲིམས་ནོར་དང་ཁྲེལ་ཡོད་དང་། །ངོ་ཚ་ཤེས་དང་ཐོས་གཏོང་ཤེས་རབ་དང་། །དེ་ལ་ནོར་འདི་རྣམས་ནི་ཀུན་འགེད་ཅིང་། །བདུན་པོ་མི་ཟད་ཆོས་ཀྱི་མཛོད་ཀྱང་འབྱིང་། མི་འགའ་བཀའ་བློ་བདེ་ཞིང་རྗེས་སུ་འཐུན། །དགེ་བའི་བཤེས་གཉེན་སྙམ་དུ་རྟག་བསམས་ནས། བླ་ན་མེད་པའི་བྱང་ཆུབ་ཚོལ་བའི་ཕྱིར། བླ་མ་དག་བདག་གི་རིམ་གྲོ་བྱ། དེ་ལྟ་བུ་ཡི་སེམས་ནི་བསྐྱེད་བྱས་ལ། སྙིང་རྗེ་དགའ་བ་རྒྱ་ཆེར་རབ་བསྐྱེད་དེ། ཁམ་སྣོད་དང་བའི་ཆུ་ཡིས་བཀང་བ་ཡང་། །སྐོམ་པ་དག་ལ་ཉེ་བར་སྦྱིན་པར་བྱ། །ཤཱ་རིའི་བུ་སེམས་བསྐྱེད་པ་བཅུ་པ་འདི་བསྐྱེད་ནས་བྱང་ཆུབ་
སེམས་དཔའི་སྡེ་སྣོད་ཡོངས་སུ་ཚོལ་བས་སློབ་དཔོན་ལ་ལུས་ཀྱིས་བསྙེན་བཀུར་དག་རིམ་འགྲོ་བྱེད་དེ། ཐ་ན་ཆུ་རྫ་གང་ཙམ་ཡང་འབུལ་ལོ། །དེ་དགེ་བའི་རྩ་བ་དེས་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། མྱུར་དུ་དགེ་བའི་ཆོས་ལ་འཇུག་པ་དང་། སློབ་དཔོན་གྱི་བསྔགས་པ་བརྗོད་པར་འགྱུར་བ་དང་། ནན་ཏན་གྱིས་སྒྲུབ་ཀྱི་ལོག་པའི་ནན་ཏན་གྱིས་མ་ཡིན་པ་དང་། ཆོས་ཀྱི་ཕྱིར་སྡུག་བསྔལ་གྱི་གཞན་དུ་ཕྱོགས་བར་མི་འགྱུར་བ་སྟེ། ཤཱ་རིའི་བུ་བྱང་ཆུབ་སེམས་དཔའ་མི་གྱུར་བ་ན་ཆོས་བཞི་པོ་དེ་དག་ཐོབ་པར་འགྱུར་རོ། གཞན་ཡང་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། སྐྱེ་བོ་མང་པོའི་རྗེས་སུ་བསླབས་ནས་དཀར་པོའི་ཆོས་ལ་གནས་པ་དང་། སྦས་ཤིང་བཞག་པའི་གནས་སྐྱེ་བོ་མང་པོ་མགུ་བ་དང་། རབ་ཏུ་དགའ་བར་བྱེད་པ་མྱུར་རུ་འཐོབ་པ་དང་། སེམས་དགའ་བཞིན་དུ་ཉིན་མཚན་ཟད་པར་འགྱུར་བ་དང་། ཀུན་ནས་ལྡང་བ་མེད་པར་འཆི་བའི་དུས་བྱས་ནས་བདེ་འགྲོ་མཐོ་རིས་སུ་སྐྱེ་བར་འགྱུར་བ་སྟེ། ཤཱ་རིའི་བུ་བྱང་ཆུབ་སེམས་དཔའ་ཆོས་བཞི་པོ་དེ་དག་ཐོབ་པར་འགྱུར་རོ། །དེ་ལྟར་གྱུར་བ་ན་ཆོས་བཞི་པོ་ཐོབ་པར་འགྱུར་ཏེ། བཞི་གང་ཞེ་ན། ལྷའི་འཁོར་གྱི་སྟན་མཆོག་རྙེད་པར་འགྱུར་བ་དང་། ལྷའི་འཁོར་ཐམས་ཅད་དེའི་གདོང་དུ་ལྟ་ཞིང་ཅི་བཤད་པ་དེ་དག་ཐོས་ནས་ཤེས་པར་བྱའོ་སྙམ་དུ་སེམས་པར་འགྱུར་བ་དང་། ལྷའི་དབང་པོ་བརྒྱ་བྱིན་དང་དེ་བཞིན་དུ་ལྷའི་བུ་གཞན་ཡང་དེའི་དྲུང་དུ་འོང་གིས། དེ་ལྷའི་བུ་གཞན་གྱི་དྲུང་དུ་ཐེ་ཚོམ་ཡོངས་སུ་འདྲི་ཞིང་གཅང་བའི་ཕྱིར་འགྲོ་བ་མ་ཡིན་པ་དང་། དེའི་ལོངས་སྤྱོད་ཀྱི་ཕྱིར་གཞལ་མེད་ཁང་ཆེན་པོར་འབྱུང་བ་སྟེ། ཤཱ་རིའི་བུ་བྱང་ཆུབ་སེམས་དཔའ་ཆོས་བཞི་པོ་དེ་དག་ཐོབ་པར་འགྱུར་ཏེ། ལྷར་གྱུར་པ་དང་། མིར་གྱུར་པ་ན་ཆོས་ཀྱི་སྒོ་བརྒྱ་སྟོང་ཕྲག་དཔག་ཏུ་མེད་པ་འཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །དེ་ཡི་སྟན་ནི་མཐོན་པོར་འགྱུར། །ལྷ་ཡིས་མངོན་པར་ཕྱག་བྱས་ནས། །གང་དག་ཆོས་འདི་འཆད་པ་ལ། །ལྷ་རྣམས་དེ་ལ་ལྟ་བར་འགྱུར། །མཁས་པ་སེར་སྣ་བྲལ་བ་ལ། །ཀུན་གྱི་སྟི་སྟང་བྱས་པར་འགྱུར། །བརྒྱ་བྱིན་དེ་གན་
འདིར་འོང་ཞིང་། གཞལ་མེད་ཁང་ཡང་ཡིད་འོད་བཟང་། །ལྷའི་འཇིག་རྟེན་གནས་འཕོས་ཏེ། །མི་ཡི་སྲིད་པར་འོངས་གྱུར་ནས། །འཁོར་ལོས་བསྒྱུར་བ་སེར་སྣ་མེད། །རྒྱལ་པོ་རྫུ་འཕྲུལ་ཆེན་པོར་འགྱུར། །མི་ཡི་འཇིག་རྟེན་འཕོས་ནས་ཀྱང་། །ལྷའི་ནང་དུ་ཡང་འགྲོ་སྟེ། །བླ་མ་དག་ལ་གུས་བྱས་པས། །ནམ་ཡང་སྡུག་བསྔལ་མི་འགྱུར་རོ། །ཞུམ་པ་མེད་པའི་སེམས་ཀྱིས་སུ། །བླ་མ་དག་ལ་གུས་བྱས་པས། །གནས་བཞི་པོ་ནི་དེ་དག་རྣམས། །རྒྱ་ཆེར་རྟག་ཏུ་རྙེད་པར་འགྱུར། །དགའ་བ་དང་ནི་གུས་པ་ཡིས། །སྣོད་གང་ཙམ་གྱི་ཆ་བྱིན་ན། །ལྷ་དང་མི་དང་ཀླུ་རྣམས་ཀྱིས། །མཆོད་པ་དག་ཏུ་འོས་པ་ཡིན། །བམ་པོ་བཅུ་པ། དེ་ལྟར་གྱུར་ན་གཞན་ཡང་ཆོས་བཞི་འཐོབ་པར་འགྱུར་ཏེ། ཆོས་བཞི་གང་ཞེ་ན། སྔོན་གྱི་ལས་མངོན་པར་འདུས་བྱས་པའི་དགེ་བའི་རྩ་བ་གང་གིས་སྐྱེས་པ་རབ་ཏུ་ཤེས་པ་དང་། དེ་ན་དགེ་བའི་ཆོས་རྣམས་ཡོངས་དུ་འདྲི་བ་ཡང་རབ་ཏུ་ཤེས་པ་དང་། དེ་ནས་ཤི་འཕོས་ནས་གང་དུ་སྐྱེ་བར་འགྱུར་བ་དེ་ཡང་རབ་ཏུ་ཤེས་པ་དང་། ལྷའི་འཁོར་ལ་ཆོས་ཀྱི་གཏམ་ཡང་དག་པར་བསྟན། ཡག་དག་པར་འཛིན་དུ་བཅུག། ཡང་དག་པར་གཟེད་པ་སྟོད། ཡང་དག་པར་རབ་ཏུ་དགའ་བར་བྱས་ནས་ལྷའི་འཇིག་རྟེན་ནས་འཆི་འཕོ་བར་འགྱུར་བ་སྟེ། ཤཱ་རིའི་བུ་བྱང་ཆུབ་སེམས་དཔའ་ཆོས་བཞི་པོ་དེ་དག་འཐོབ་པར་འགྱུར་རོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་ཆོས་བཞི་འཐོབ་པར་འགྱུར་ཏེ། བཞི་གང་ཞེ་ན། དེ་ལྷའི་གནས་ནས། ཤི་འཕོས་ནས་མི་རྣམས་དང་སྐལ་པ་མཉམ་པར་སྐྱེ་བ་དང་། དེ་མིར་གྱུར་བཙུན་པར་བྱེད་པ་ལྔ་འཐོབ་པར་འགྱུར་རོ། ལྔ་གང་ཞེ་ན། འདི་ལྟ་སྟེ། དེ་རིག་བཙུན་པར་སྐྱེ་བར་འགྱུར་བ་དང་། གཟུགས་བཙུན་པར་འགྱུར་བ་དང་། ཚུལ་ཁྲིམས་བཙུན་པར་འགྱུར་བ་དང་། དེའི་འཁོར་བཙུན་པར་འགྱུར་བ་དང་། དེའི་སེམས་ཅན་བཙུན་པ་རྣམས་ལ་བྱམས་པ་སྒོམ་པར་འགྱུར་བ་སྟེ། ཤཱ་རིའི་བུ་བཙུན་པར་བྱེད་པའི་ཆོས་ལྔ་པོ་དེ་དག་འཐོབ་པར་འགྱུར་རོ། གཞན་ཡང་མི་ཕྱེད་པར་བྱེད་པའི་ཆོས་ལྔ་འཐོབ་པར་འགྱུར་ཏེ། ལྔ་གང་ཞེ་ན། འདི་ལྟ་
སྟེ། དེའི་མཛའ་བོ་མི་ཕྱེད་པ་དང་། ལུས་མྱུར་དུ་འཇིག་པར་མི་འགྱུར་བ་དང་། དེའི་ལོངས་སྤྱོད་ཡོངས་སུ་ཉམས་པར་མི་འགྱུར་བ་དང་། བྱང་ཆུབ་ཀྱི་སེམས་དང་འབྲལ་བར་མི་ནུས་པ་དང་། ཆོས་ཀྱི་མུ་གེ་འབྱུང་བ་ན་དེ་ལ་ཆོས་ཀྱི་ལོ་ལེགས་པར་འགྱུར་ཏེ། ཤཱ་རིའི་བུ་མི་ཕྱེད་པར་བྱེད་པའི་ཆོས་ལྔ་པོ་དེ་དག་འཐོབ་པར་འགྱུར་རོ། གཞན་ཡང་ངོ་མཚར་ཡོངས་སུ་རྫོགས་པའི་ཆོས་ལྔ་འཐོབ་པར་འགྱུར་ཏེ། ལྔ་གང་ཞེ་ན། འདི་ལྟ་སྟེ། གང་སྣོད་སྟོང་པ་གསོག་བཞག་པར་གྱུར་པ་རྣམས་སུ་དེའི་ལག་པ་གང་དུ་བཅུག་པ་དེ་དག་ཐམས་ཅད་རིན་པོ་ཆེས་ཡོངས་སུ་གང་བར་འགྱུར་ཏེ། ངོ་མཚར་ཡོངས་སུ་རྫོགས་པ་དང་པོ་འདི་འཐོབ་པར་འགྱུར་རོ། དེ་སྒོམ་པར་གྱུར་ན་ཡན་ལག་བརྒྱད་དང་ལྡན་པའི་ཆུའི་རྫིང་བུ་འབྱུང་སྟེ། ངོ་མཚར་ཡོངས་སུ་རྫོགས་པ་གཉིས་པ་འདི་འཐོབ་པར་འགྱུར་རོ། གཞན་ཡང་དེའི་ལུས་ལ་གཞན་གིས་གནོད་པར་བྱ་བར་མི་འགྱུར་ཏེ། འདི་ལྟ་སྟེ། དུག་དང་། མཚོན་དང་། མེ་དང་། ཆུ་དང་། མདངས་འཕྲོག་པའི་གནོད་སྦྱིན་གྱིས་གཙེ་བ་མེད་པ་སྟེ། ངོ་མཚར་ཡོངས་སུ་རྫོགས་པ་གསུམ་པ་འདི་འཐོབ་པར་འགྱུར་རོ། གཞན་ཡང་མཚོན་གྱི་བསྐལ་པ་བར་མ་བྱུང་བ་འམ། ནད་ཀྱི་བསྐལ་པ་བར་མ་བྱུང་བ་འམ། མུ་གེའི་བསྐལ་པ་བར་མ་བྱུང་བ་འམ། མེའི་བསྐལ་པ་བར་མ་བྱུང་བ་འམ། ཆུའི་བསྐལ་པ་བར་མ་བྱུང་བ་འམ། རླུང་གིས་བསྐལ་པ་བར་མ་བྱུང་བ་འམ། སྐོམ་པའི་བསྐལ་པ་བར་མ་འམ། ཀུན་དུ་གདུང་བའི་བསྐལ་པ་བར་མ་འམ། གནོད་སྦྱིན་གྱི་བསྐལ་པ་བར་མ་བྱུང་བ་ན་འཛམ་བུའི་གླིང་དུ་སྐྱེ་བར་མི་འགྱུར་གྱི། དེ་བདེ་བ་དང་། མཐུ་དང་ལྡན་པར་འགྱུར་ཞིང་བདེ་བ་དང་། མཐུ་མང་བར་འགྱུར་ཏེ། ངོ་མཚར་ཡོངས་སུ་རྫོགས་པ་བཞི་པོ་འདི་འཐོབ་པར་འགྱུར་རོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་གྱིས་མི་དལ་བར་མི་སྐྱེ། ངན་འགྲོར་མི་སྐྱེ། སེམས་ལ་འགྱོད་པས་ཀུན་དུ་དཀྲི་བར་མི་ནུས་ཤིང་ངེས་པར་འབྱུང་བ་མྱུར་དུ་མཐོང་བར་འགྱུར་ཏེ། ངོ་མཚར་ཡོངས་སུ་རྫོགས་པ་ལྔ་པ་
འདི་འཐོབ་པར་འགྱུར་རོ། ཤཱ་རིའི་བུ་བྱང་ཆུབ་སེམས་དཔའི་ངོ་མཚར་ཡོངས་སུ་རྫོགས་པ་ལྔ་པོ་འདི་དག་འཐོབ་པར་འགྱུར་རོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་ཀྱིས་ཆོས་བཞི་དང་མི་འབྲལ་བར་འགྱུར་ཏེ། བཞི་གང་ཞེ་ན། བྱང་ཆུབ་སེམས་དཔའི་སྡུག་བསྔལ་བའི་སེམས་ཅན་རྣམས་མཐོང་མ་ཐག་ཏུ་སྙིང་རྗེ་ཆེན་པོ་འཐོབ་པ་དང་། དེ་ལ་དེའི་བུ་དང་བུ་མོ་གུས་པ་དང་བཅས་ཤིང་ཞེས་བྱེད་པར་འགྱུར་བ་དང་། རྒ་བས་བཅོམ་ཡང་བརྙས་པར་མི་འགྱུར་བ་དང་། དེ་ལས་ཀྱི་མཐའ་གང་བྱེད་པ་དེ་དག་ཀྱང་ཉིས་འགྱུར་སུམ་འགྱུར་དུ་འཐོབ་པར་འགྱུར་བ་སྟེ། ཆོས་བཞི་པོ་དེ་དག་དང་རྟག་ཏུ་རྒྱུན་མི་འཆད་པར་མི་འབྲལ་བར་འགྱུར་རོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་པས་ཆོས་གསུམ་གྱིས་མི་འཕྲོགས་ཏེ། གསུམ་གང་ཞེ་ན། ཆགས་པས་མི་འཕྲོགས་པ་དང་། ཞེ་སྡང་དང་། གཏི་མུག་གིས་མི་འཕྲོག་པ་སྟེ། ཆོས་གསུམ་པོ་དེ་དག་གིས་འཕྲོགས་སོ། གཞན་ཡང་ཤཱ་རིའི་བུ་བྱང་ཆུབ་དཔའ་དགེ་བའི་རྩ་བ་དེ་ཉིད་དང་ལྡན་བས་ནད་མེད་པར་བྱེད་པའི་ཆོས་བཞི་འཐོབ་བར་འགྱུར་ཏེ། བཞི་གང་ཞེ་ན། ནད་རྒྱུན་རིང་པོ་མེད་པ་དང་། ཡན་ལག་སྐམ་པར་མི་འགྱུར་བ་དང་། ལོངས་སྤྱོད་ཉམས་བར་མི་འགྱུར་བ་དང་། རྒྱལ་པོ་འམ། རྐུན་པོ་འམ། དེ་མ་ཡིན་པའི་སེམས་ཅན་འཚེ་བར་བྱེད་པ་གཞན་གྱིས་སྡུག་བསྔལ་བ་དང་གནོད་པར་བྱ་བར་མི་འགྱུར་ཏེ། ཤཱ་རིའི་བུ་བྱང་ཆུབ་སེམས་དཔའ་ནད་མེད་པར་བྱེད་པའི་ཆོས་བཞི་པོ་དེ་དག་འཐོབ་བར་འགྱུར་རོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་བས་བླ་མའི་གནས་བཞི་འཐོབ་བར་འགྱུར་ཏེ། བཞི་གང་ཞེ་ན་། འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་ཞིང་ཆོས་ཅན་ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་བར་འགྱུར་ཏེ་། དེའི་རིན་ཆེ་སྣ་བདུན་ནི་འདི་རྣམས་ཡིན་ནོ་། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆི་དང་། ནོར་བུ་རིན་པོ་ཆི་དང་། བུད་མེད་རིན་པོ་ཆི་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་སྟེ། བདུན་པོ་དེ་
དག་གོ། །དེའི་བུ་དཔའ་བ། རཏལ་ཕོད་པ། ཡན་ལག་མཆོག་གི་གཟུགས་ཅན་། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཐམ་པར་འགྱུར་རོ། གླིང་བཞི་པ་ཡང་དེའི་རྗེས་སུ་འབྲང་བར་འགྱུར་། དེ་ལ་གུས་པར་བྱེད་པར་འགྱུར་། སྐར་མཁན་དང་། བློན་པོ་ཆེན་པོ་དང། སྒོ་བ་དང་། འཁོར་དང་། གྲོང་རྡལ་གྱི་མི་དང་ལྗོངས་ཀྱི་མི་དག་དང། ཁམས་ཀྱི་རྒྱལ་པོ་ཐམས་ཅད་ཀྱིས་ཀྱང་གུས་པར་བྱེད་པར་འགྱུར་ཏེ། བླ་མའི་གནས་དང་པོ་འདི་འཐོབ་བར་འགྱུར་རོ། གཞན་ཡང་ཤཱ་རི་འི་བུ་བྱང་ཆུབ་སེམས་དཔའ་འདོད་པའི་ཡོན་ཏན་ལྔ་ལ་ཆགས་པར་མི་འགྱུར་ཏེ། ལྔ་གང་ཞེ་ན། འདི་ལྟ་སྟེ། མིག་གིས་ཤེས་པར་བྱ་བའི་གཟུགས་དང་། རྣ་བས་ཤེས་པར་བྱ་བའི་སྒྲ་དང། སྣས་ཤེས་པར་བའི་དྲི་དང་། ལྕེས་ཤེས་པར་བྱ་བའི་རོ་དང་། ལུས་ཀྱིས་ཤེས་པར་བྱ་བའི་རེག་རྣམས་ཏེ། དེ་ལྟར་འདོད་པའི་ཡོན་ཏན་ལྔ་པོ་ལ་ཆགས་པར་མི་འགྱུར་གྱི །དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། མྱུར་དུ་མངོན་པར་ཤེས་པ་ལྔ་འཐོབ་བར་འགྱུར་ཞིང། དེ་ལ་མི་དང་མི་མ་ཡིན་པ་རྣམས་གུས་པར་བྱེད་འགྱུར་ཏེ། བླ་མའི་གནས་གཉིས་པ་འདི་རྗེས་སུ་འཐོབ་བར་འགྱུར་རོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་གང་དང་གང་དུ་སྐྱེས་པ་ཐམས་ཅད་ཏུ་བློས་མཆོག་ཏུ་འགྱུར་། ཤེས་རབ་ཀྱིས་མཆོག་ཏུ་འགྱུར། སྤོབས་པས་མཆོག་ཏུ་འགྱུར་། དེ་རྒྱལ་པོར་གྲགས་པར་འགྱུར་རོ། འདི་ལྟ་སྟེ། འདས་པའི་དུས་ན་སྨན་ཆེན་པོ་ཞེས་བྱ་བ་ཞིག་བྱུང་བ་དེ་བཞིན་དུ་དེ་རྒྱལ་པོའི་ཕོ་བྲང་གི་སྟན་མཆོག་འཐོབ་སྟེ། དེ་ལ་རྒྱལ་པོ་དང་། གང་དེ་མ་ཡིན་བ་གཞན་སྐར་མཁན་དང། བློན་པོ་ཆེན་པོ་དང་། སྒོ་བ་དང། འཁོར་དང། གྲོང་རྡལ་གྱི་མི་དང། ཡུལ་གྱི་མི་རྣམས་གུས་པ་བྱེད་པར་འགྱུར་ཏེ། བླ་མའི་གནས་གསུམ་པ་འདི་རྗེས་སུ་འཐོབ་བར་འགྱུར་རོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་བ་དང། སེམས་ཅན་ཐམས་ཅད་ཀྱི་
མཆོག་ཏུ་འགྱུར་། མངོན་བར་འཕགས་བར་འགྱུར། ཚུལ་ཁྲིམས་དང། ཏིང་ངེ་འཛིན་དང། ཤེས་རབ་དང། རྣམ་པར་གྲོལ་བ་དང། རྣམ་པར་གྲོལ་བའི་ཡེ་ཤེས་མཐོང་བས་མངོན་པར་འཕགས་པར་འགྱུར། ཚུལ་ཁྲིམས་རྣམ་བར་འཕེལ་བས་མངོན་པར་འཕགས་པར་འགྱུར། ཏིང་ངེ་འཛིན་དང། ཤེས་རབ་དང། རྣམ་པར་གྲོལ་བ་དང། རྣམ་པར་གྲོལ་བའི་ཡེ་ཤེས་མཐོང་བ་རྣམ་པར་འཕེལ་བས་མངོན་པར་འཕགས་པར་འགྱུར་ཏེ། བླ་མའི་གནས་བཞི་པ་དེ་འཐོབ་པར་འགྱུར་ཏེ། བླ་མའི་གནས་བཞི་པོ་དེ་དག་འཐོབ་པར་འགྱུར་རོ། ཤཱ་རིའི་བུ་བྱང་ཆུབ་སེམས་དཔས་འདི་ལྟ་སྟེ། ཆོས་འདོད་པའི་ཕྱིར་མཁན་པོ་དང། སློབ་དཔོན་ལ་ཆུ་བུམ་པ་གང་ཙམ་ཕུལ་ན་དེ་ལྟ་བུའི་ཡོན་ཏན་གྱི་ཆོས་ཚད་མེད་པ་ལེན་པར་འགྱུར་རོ། ཚུལ་ཤོག་ཅེས་བྱས་ན་ཡང་འོང་ཞིང་ཇི་ལྟར་སྨྲས་པ་ལས་འགལ་བར་མི་བྱེད་པའི་དགེ་བའི་རྩ་བ་དེ་ཉིད་ཀྱིས་དེ་ཡོ་བྱད་བཞི་ཐོབ་པ་འགྱུར་ཏེ། བཞི་གང་ཞེ་ན། སྐྱེ་བོ་མ་རབས་ཀྱི་ཡོ་བྱད་མ་ཡིན་གྱི་རྒྱལ་པོའི་ཡོ་བྱད་འཐོབ་པར་འགྱུར་། དྲང་སྲོང་གི་ཡོ་བྱད་འཐོབ་པར་འགྱུར་ཏེ། འདོད་པ་སྤོང་བ་ལ་འཛུད་པ་འདི་ལྟ་སྟེ། དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བ་དེ་ནི་ཆོས་ཀྱི་ཡོ་བྱད་ཅེས་བྱའོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་སྐྱེ་བ་གང་དང་གང་དུ་སྐྱེས་པ་ན་སྐྱེ་བ་ཐམས་ཅད་ཏུ་སྐྱེ་བ་དྲན་པར་འགྱུར་ཏེ། དེ་སྐྱེ་བ་དྲན་བས་སྐྱེ་བ་དེ་དང་དེ་དག་ཏུ་བྱང་ཆུབ་ཀྱི་སེམས་བརྗེད་པར་མི་འགྱུར་བ་དེ་ནི་དྲན་པའི་ཡོ་བྱད་ཅེས་བྱའོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཁོར་བཞིས་བསྐོར་ཅིང་། མདུན་དུ་བདར་བར་འགྱུར། ལྷ་དང། ཀླུ་དང། གནོད་སྦྱིན་དང། དྲི་ཟ་དང། ལྷ་མ་ཡིན་དང་། ནམ་མཁའ་ལྡིང་དང་མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་བས་ཀུན་ནས་བསྐོར་ཅིང་མདུན་དུ་བདར་བར་འགྱུར་ཏེ། ཡོ་བྱད་བཞི་པོ་དེ་དག་འཐོབ་པར་འགྱུར་རོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་སློབ་དཔོན་གང་དང་གང་ལས་ཚིག་བཞི་བའི་ཚིགས་སུ་བཅད་པ་རྙེད་ཅིང་འཛིན་པར་འགྱུར་ཏེ། དེ་
ཚུར་ཤོག་ཅེས་བསྒོ་ན་ཡང་དེ་འོང་། སོང་ཤིག་ཅེས་བསྒོ་ན་ཡང་དེ་འགྲོ་བ་དང་། འདི་ནི་དགེ་བ། འདི་ནི་མི་དགེ་བ། འདི་ནི་ཁ་ན་མ་ཐོ་བ་དང་བཅས་པ་འདི་ནི་ཁ་ན་མ་ཐོ་བ་མེད་པ། འདི་ནི་བསྟེན་པ་བྱ་བ། འདི་ནི་བསྟེན་པར་བྱ་བ་མ་ཡིན་པ་ཞེས་བྱ་བ་ནས་གོང་མ་བཞིན་དུ་སྦྱར་ཏེ་བྱ་བ་འདི་ནི་གནོད་པ། ཕན་པ་མེད་པ། སྡུག་བསྔལ་བར་འགྱུར་རོ། འདི་བྱས་ན་ཡུན་རིང་པོའི་དོན་དང་ཕན་བ་དང་བདེ་བར་འགྱུར་རོ། ཞེས་ཇི་ལྟར་བསྒོམ་བཞིན་དུ་མི་དགེ་བ་མི་བྱེད་ཅིང་དགེ་བ་ལ་སྟེན་ཏེ། སླར་མི་ཟློག་ཅིང་མི་མཐུན་པར་མི་བྱེད་པ་དེ་དགེ་བའི་རྩ་བ་དེ་དང་ལྡན་བས་མཐོན་པོར་བྱེད་པའི་ཆོས་བཞི་འཐོབ་པར་འགྱུར་ཏེ། བཞི་གང་ཞེ་ན་། ཚུལ་ཁྲིམས་མཐོན་པོར་བྱེད་པའི་ཆོས་འཐོབ་པར་འགྱུར་། ལུས་མཐོན་པོར་བྱེད་པའི་ཆོས་འཐོབ་བར་འགྱུར་ཏེ། དེའི་ལུས་རིང་ཞིང་ལུས་ཐམས་ཅད་རྒྱས་པར་འགྱུར། ཤེས་རབ་ཆེ་བར་འགྱུར་ཏེ། ཤེས་རབ་མཐོ་བ། ཤེས་རབ་རྒྱ་ཆེ་བ། ཤེས་རབ་ཡངས་པ། ཤེས་རབ་མགྱོགས་པ། ཤེས་རབ་རྣོ་བ་། ཤེས་རབ་མྱུར་བ་། ཤེས་རབ་ཟབ་པ། ཤེས་རབ་ངེས་པར་རྟོགས་པར་འགྱུར་། ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར་ཏེ། མཐོན་པོར་བྱེད་པའི་ཆོས་བཞི་པོ་དེ་དག་འཐོབ་པར་འགྱུར་རོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་ལྡན་བས་བལྟར་མི་སྣང་བར་བྱེད་པའི་ཆོས་བཞི་འཐོབ་བར་འགྱུར་ཏེ། བཞི་གང་ཞེ་ན། འདོམས་ཀྱི་སྦ་བ་སྦུབས་ནུབ་པ་འཐོབ་སྟེ། འདི་ནི་བལྟར་མི་སྣང་བར་བྱེད་པའི་ཆོས་འཐོབ་པར་འགྱུར་བ་དང་པོའོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་པའི་བྱང་ཆུབ་སེམས་དཔའ་སྐྱེས་ནས་ཕ་དང་མ་དང་། གཞན་ཉེ་དུ་རྣམས་དང་། ལྷ་དང་། ཀླུ་དང། དྲི་ཟ་དང། གནོད་སྦྱིན་དང་། སྲིན་པོ་དང། ནམ་མཁའ་ལྡིང་དང། མིའམ་ཅི་དང། ལྟོ་འཕྱེ་ཆེན་པོ་དང། མི་དང་མི་མ་ཡིན་པ་རྣམས་ཀྱིས་དད་པའི་སེམས་ཀྱིས་ཀྱང་རུང་། མ་དད་པའི་སེམས་ཀྱིས་ཀྱང་རུང་སྟེ། སེམས་ཅན་གང་གིས་ཀྱང་བྱང་ཆུབ་སེམས་དཔའི་སྤྱི་གཙུག་མཐོང་བར་མི་ནུས་ཏེ། འདི་ནི་བལྟར་མི་སྣང་བར་
བྱེད་པའི་ཆོས་པར་འགྱུར་བ་གཉིས་པའོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་བས་སྐྱེས་པ་ནས་རྒྱས་པར་བྱས་ཏེ། ཕ་མ་ནས་མི་དང་མི་མ་ཡིན་པའི་བར་གྱིས་དང་བའི་སེམས་ཀྱིས་རུང། མ་དད་པའི་སེམས་ཀྱིས་ཀྱང་རུང་སྟེ། གང་གིས་ཀྱང་བྱང་ཆུབ་སེམས་དཔའི་ཁའི་བྱི་དོར་བྱེད་མི་ནུས་ཏོ། དེ་ཁའི་བྱི་དོར་བྱ་འོ་སྙམ་པ་དང། རྐང་པ་གཉིས་ལ་ཁའི་སྒོ་འབྱུང་ངོ། དེ་ཅིའི་ཕྱིར་ཞེ་ན། ཤཱ་རིའི་བུ་སྐྱེས་བུ་དམ་པ་དེ་དག་འདི་ལྟ་བུའི་ངོ་མཚར་དང་རྨད་ཀྱི་ཆོས་དང་ལྡན་ཞིང་སྐྱེས་བུ་དམ་པའི་ངག་མཆོག་དང་ལྡན་བར་འགྱུར་ཏེ་། འདི་བལྟར་མི་སྣང་བར་བྱེད་པའི་ཆོས་གསུམ་པ་འོ། གཞན་ཡང་ཤཱ་རིའི་བུ་བྱང་ཆུབ་སེམས་དཔའ། །དགེ་བའི་རྩ་བ་དེ་ཉིད་དང་ལྡན་པས་བྱང་ཆུབ་སེམས་དཔའ་སྐྱེས་མ་ཐག་ཏུ་གཞན་གྱིས་མ་བཟུང་བར་ས་ལ་འདུག་ནས་ཕྱོགས་བཞིར་རྣམ་པར་ལྟ་སྟེ། དེ་ཡེ་ཤེས་འབར་བ་རྙེད་དོ། དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེས་སྔོན་གཡོ་མེད་པར་ཐོས་པ་བཙལ་བས་གཡོ་མེད་པའི་མིག་ཐོབ་སྟེ། བྱང་ཆུབ་སེམས་དཔའ་གཡོ་མེད་པའི་མིག་དེ་དང་ལྡན་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་ལྷའི་མིག་རྣམ་པར་དག་པར་མིའི་ལས་འདས་བས་མཐོང་ངོ། དེ་ལྟར་བྱང་ཆུབ་སེམས་དཔའ་མྱུར་བའི་ཆ་དང་ལྡན་བའི་ཡེ་ཤེས་ཆེན་པོ་འཐོབ་སྟེ། བྱང་ཆུབ་སེམས་དཔའ་ཡེ་ཤེས་ཆེན་པོ་དེ་དང་ལྡན་བས་སེམས་ཅན་ཐམས་ཅད་ཀྱི་དུས་གསུམ་གྱི་སེམས་ཀྱི་ཚུལ་རབ་ཏུ་ཤེས་སོ། དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་དེས་སྔོན་དོན་དུ་གཉེར་བར་བྱས། ཡིད་ལ་བྱས། སེམས་ཐམས་ཅད་ཀྱིས་བསམ་ཤིང་རི་མོར་བྱས་ནས་ཆོས་ལ་སྨན་དུ་འདུ་ཤེས་པ་དང་། རིན་པོ་ཆེར་འདུ་ཤེས་པ་དང། དཀོན་བར་འདུ་ཤེས་པ་དང། ཇི་ལྟ་བ་བཞིན་དུ་འདུ་ཤེས་བསྐྱེད་དེ་ཐོས་པ་ཡོངས་སུ་བཟུང་ངོ། དེ་བས་ན་བྱང་ཆུབ་སེམས་དཔའ་མྱུར་དུ་རབ་ཏུ་རྣམ་པར་འབྱེད་པའི་ཡེ་ཤེས་རྙེད་དོ། རབ་ཏུ་རྣམ་པར་འབྱེད་པའི་ཡེ་ཤེས་དེ་དང་ལྡན་པའི་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་ཚུལ་ཁྲིམས་ལ་ཡོངས་སུ་འཇལ་བ་ནས་ཐོས་པ་དང། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང། རྣམ་པར་གྲོལ་བའི་ཡེ་ཤེས་མཐོང་བའི་བར་ལ་ཡོངས་སུ་འཇལ་ལོ། ཚུལ་ཁྲིམས་ཀྱི་སྤྱིར་ཡོངས་སུ་འཇལ་བ་ནས། ཐོས་པ་དང། ཏིང་ངེ་འཛིན་དང། ཤེས་རབ་དང། རྣམ་བར་
གྲོལ་བ་དང། རྣམ་པར་གྲོལ་བའི་ཡེ་ཤེས་མཐོང་བའི་བར་གྱི་སྤྱིར་ཡོངས་སུ་འཇལ་ལོ། སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་རྒྱུ་འཐུན་པ་ལ་ཡོངས་སུ་འཇལ་བ་ནས་ཐོས་པ་དང། ཏིང་ངེ་འཛིན་དང། ཤེས་རབ་དང། རྣམ་པར་གྲོལ་བ་དང། རྣམ་བར་གྲོལ་བའི་ཡེ་ཤེས་མཐོང་བའི་རྒྱུ་འཐུན་པའི་བར་ལ་ཡོངས་སུ་འཇལ་ལོ་།གང་སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་རྒྱུ་འཐུན་པ་ལས་ཤིན་དུ་ལྷག་པར་ཡོངས་སུ་འཇལ་བ་ནས་ཐོས་པ་དང། ཏིང་ངེ་འཛིན་དང། ཤེས་རབ་དང། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་རྒྱུ་འཐུན་པའི་བར་ལ་ཡོངས་སུ་འཇལ་ལོ། གང་སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་རྒྱུ་འཐུན་པ་ལས་ཤིན་དུ་ལྷག་པར་ཡོངས་སུ་འཇལ་བ་ནས་ཐོས་པ་དང། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང། རྣམ་པར་གྲོལ་བའི་ཡེ་ཤེས་མཐོང་བའི་རྒྱུ་འཐུན་པ་ལས་ཤིན་དུ་ལྷག་པའི་བར་ལ་ཡོངས་སུ་འཇལ་ལོ། སེམས་ཅན་ཐམས་ཀྱི་སྤྱོད་ལམ་དང་། སྤྱོད་པ་དང། ནན་ཏན་དང་། རཏལ་པ་ལ་ཡོངས་སུ་འཇལ་ལོ། སེམས་ཅན་ཐམས་ཅད་ཕན་ཚུན་བརྩལ་ན་གང་སེམས་ཅན་ཐམས་ཅད་ཀྱི་ཚུལ་ཁྲིམས་དང་ཐོས་པ་ནས། རྣམ་པར་གྲོལ་བའི་ཡེ་ཤེས་མཐོང་བའི་བར་དང། སེམས་ཅན་ཐམས་ཅད་ཀྱི་སྤྱིའི་ཚུལ་ཁྲིམས་ནས། སྤྱིའི་ཐོས་པ་དང། ཏིང་ངེ་འཛིན་དང། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་བར་དང་། གང་སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་རྒྱུ་འཐུན་པ་ལས་ཤིན་དུ་ལྷག་པ་ནས། ཐོས་པ་དང། ཏིང་ངེ་འཛིན་དང། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་ཡེ་ཤེས་མཐོང་བའི་བར་གྱི་རྒྱུ་འདྲ་བ་དང་། གང་སེམས་ཅན་ཐམས་ཅད་ཀྱི་ཚུལ་ཁྲིམས་ཀྱི་འཐུན་པ་ལས་ཤིན་དུ་ལྷག་པ་ནས་ཐོས་པ་དང་། ཏིང་ངེ་འཛིན་དང། ཤེས་རབ་དང་། རྣམ་པར་གྲོལ་པ་དང་། རྣམ་པར་གྲོལ་བའི་ཡེ་ཤེས་མཐོང་བའི་རྒྱུ་འཐུན་པ་ལས་ཤིན་དུ་ལྷག་པའི་བར་དང་། གང་སེམས་ཅན་ཐམས་ཅད་ཀྱི་སྤྱོད་ལམ་དང་། སྤྱོད་པ་དང། རཏལ་པ་དེ་དག་ཐམས་ཅད་དང། བདག་གིས་བསོད་ནམས་དད་བསྒྲུན་ཅིང་ཡོངས་སུ་བཙལ་ན་བདག་དང་མཚུངས་ཤིང་
མཚུངས་ཤིང་མཉམ་པ་ཡང་དག་པར་རྗེས་སུ་མི་མཐོང་ངོ་། དེ་ཡང་སེམས་ཅན་ཐམས་ཅད་ཀྱི་རྩ་བ་ལ་ལྷག་པར་གནས་པ་ཡོངས་སུ་ཆོལ་ཏེ། དེས་ཐམས་ཅད་ཡོངས་སུ་བཙལ་ན་བདག་དང་མཚུངས་ཤིང་མཉམ་པ་ཡང་དག་པར་རྗེས་སུ་མི་མཐོང་ངོ་། དེ་ལྟར་ཤཱ་རིའི་བུ་བྱང་ཆུབ་སེམས་དཔའ་མྱུར་དུ་དེའི་སྐད་ཅིག་གཉིད་ལ་ལས་ཀྱི་རྣམ་པར་སྨིན་པས་གྲུབ་པའི་ཡེ་ཤེས་སྐྱེ་སྟེ་། དེས་སེ་གོལ་གཏོགས་པ་སྲིད་ཀྱིས་སེམས་ཅན་ཐམས་ཅད་ཀྱི་སེམས་ཀྱི་སེམས་རྣམ་པ་སྟོང་རབ་ཏུ་ཤེས་ཏེ། དེས་ཐམས་ཅད་ཡོངས་སུ་བཙལ་ན་བདག་དང་མཚུངས་ཤིང་མཉམ་པ་ཡང་དག་པར་རྗེས་སུ་མི་མཐོང་ངོ། བདག་བླ་མའི་གནས་ལ་གནས་པར་ཤེས་ཤིང་མ་བཟུང་བར་སེང་གེ་དང་། གླང་པོ་ཆེའི་འགྲོས་ལྟ་བུས་ས་ལ་གོམ་པ་བདུན་པོར་ཏེ། དེ་བྱང་ཆུབ་ཀྱི་སྙིང་པོ་གང་ན་བ་དེར་ལས་ཀྱི་རྣམ་པར་སྨིན་པ་བདུན་དུ་བྱས་ནས་གནས་ཏེ། བདག་ནི་འཇིག་རྟེན་གྱི་མཆོག་སྟེ། སྐྱེ་བ་དང་། རྒ་བ་དང་། ན་བ་དང་། འཆི་བ་མཐར་བྱའོ། །སེམས་སྐྱེ་བ་དང། རྒ་བ་དང། ན་བ་དང། འཆི་བས་གཟིར་བ་རྣམས་ཐར་བར་བྱའོ། །ཆོས་བཟང་པོ་བསྟན་པར་བྱའོ་ཞེས་སྨྲས་ཏེ། ཤཱ་རིའི་བྱང་ཆུབ་སེམས་དཔས་ཚིག་དེ་སྨྲས་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དབྱངས་ཀྱིས་གོ་བར་བྱས་པར་འགྱུར། ས་གཡོ་བས་འཇིགས་ཤིང་སྤུ་ཟིང་ཞེས་བྱེད་པ་ཡང་འཇིག་རྟེན་དུ་འབྱུང་བར་འགྱུར་རོ། །ལྷའི་རྔ་ཡང་རྒྱུན་མི་འཆད་པར་རྡུང་ངོ། །ས་ཕྱོགས་གང་ན་བྱང་ཆུབ་སེམས་དཔའ་གནས་པར་འགྱུར་བའི་ས་ཕྱོགས་དེར་འཁོར་ལོ་ཙམ་ཞིག་མི་གཡོའོ། །ཆུའི་ཕུང་པོ་གང་ལ་གནས་པའི་ཆུའི་ཕུང་པོ་དེ་རླུང་གིས་བསྐྱོད་པར་མི་འགྱུར་རོ། དེས་ཐམས་ཅད་ཏུ་བལྟས་ན་བདག་སྣང་བར་གྱུར་ཅིང་གནས་པར་མཐོང་ངོ། །དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་ན་དེ་ལ་སེམས་ཅན་ཐམས་ཅད་ཀྱི་ལྟ་པར་མི་ནུས་སོ། །འདི་ནི་བལྟར་མི་སྣང་བར་བྱེད་པའི་ཆོས་འཐོབ་བར་བྱེད་པ་བཞི་པ་སྟེ། ཤཱ་རིའི་བུ་བལྟར་མི་སྣང་བར་བྱེད་པའི་ཆོས་བཞི་པོ་དེ་དག་འཐོབ་པར་འགྱུར་རོ། །དེ་ཅིའི་ཕྱིར་ཞེ་ན། ཇི་ལྟར་སློབ་དཔོན་གྱིས་ཆུར་ཤོག་ཤིག་ཅེས་བྱས་
ན་ཡང་འོང། སོང་ཤིག་ཅེས་བྱས་ན་ཡང་འགྲོ་བའི་ཕྱིར་རོ། །དེ་དགེ་བའི་རྩ་བ་དེ་ཉིད་དང་ལྡན་བས་ཡང་བ་བཞི་འཐོབ་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། སངས་རྒྱས་བཅོམ་ལྡན་འདས་རྣམས་ཀྱིས་བསྟན་པ་མཚན་ཉིད་མ་ཚང་བ་མེད་ཅིང་སངས་རྒྱས་བཅོམ་ལྡན་འདས་རྣམས་ཀྱི་ཆོས་བསྟན་པ་འབྲས་བུ་ཡོད་པ་ཡང་བ་དང་པོ་འདི་ཐོབ་བོ། དགེ་བའི་རྩ་བ་དེ་ཉིད་དང་ལྡན་བས་དེ་བཞིན་གཤེགས་པ་ལ་དགེ་སློང་ཚུར་ཤོག་ཅེས་གསུང་བར་འགྱུར་ཏེ། དགེ་སློང་ཚུར་ཤོག་ཅེས་བྱས་ན་སྐྲ་བྲེགས་པར་འགྱུར། ངུར་སྨྲིག་གྱོན་ཅིང་ལྷུང་བཟེད་ཐོགས་པར་འགྱུར་ཏེ། ཡང་བ་གཉིས་པ་འདི་འཐོབ་བོ། ། དགེ་བའི་རྩ་བ་དེ་ཉིད་དང་ལྡན་བས་དེ་བཞིན་གཤེགས་པས་སེམས་ཅན་ཐམས་ཅད་ཀྱི་དུས་གསུམ་གྱི་སེམས་རབ་ཏུ་མཁྱེན་ཏེ། ཡང་བ་གསུམ་པ་འདི་འཐོབ་བོ། དགེ་བའི་རྩ་བ་དེ་ཉིད་དང་ལྡན་བས་དེ་བཞིན་གཤེགས་པ་སེམས་ཅན་ཐམས་ཅད་ཀྱི་སྨན་ཇི་ལྟ་བ་བཞིན་དུ་རབ་ཏུ་མཁྱེན་ཏེ། ཡང་བ་བཞི་པ་འདི་འཐོབ་བོ། །དེ་དག་ནི་ཡང་དེ་དག་ནི་ཡང་བ་བཞི་སྟེ། དེ་ཅིའི་ཕྱིར་ཞེ་ན། དེ་ལྟར་དེ་ལེགས་པར་ཞུགས་པས་སློབ་དཔོན་དང་མཁན་པོ་ལ་ཐ་ན་ཆུ་བུམ་པ་གང་ཙམ་ཡང་འབུལ་བའི་ཕྱིར་རོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་དགེ་བའི་རྩ་བ་དེ་ཉིད་དང་ལྡན་བས་གཞན་གྱིས་མི་ཚུགས་པའི་ཆོས་བཞི་འཐོབ་པར་འགྱུར་ཏེ། བཞི་གང་ཞེ་ན། ཤཱ་རིའི་བུ་དེ་བཞིན་གཤེགས་པའི་སྐུ་ལ་མེ་དང། མཚོན་དང། དུག་གིས་ཚུགས་པ་ནི་གནས་མ་ཡིན་ཞིང་སྐབས་མེད་པ་དང། ཕ་རོལ་གྱིས་གནོད་པ་བྱས་པས་འཆི་བའི་དུས་བྱེད་པར་འགྱུར་བ་དེ་ལྟ་བུའི་གནས་མེད་དོ། །ཕ་རོལ་གྱིས་མི་ཚུགས་པའི་ཆོས་བཞི་པོ་དེ་དག་འཐོབ་པར་འགྱུར་རོ། །དེ་ཡང་ཕ་རོལ་གྱིས་མི་ཚུགས་པའི་ཆོས་བཞི་འཐོབ་པར་འགྱུར་ཏེ། བཞི་གང་ཞེ་ན། ཤཱ་རིའི་བུ་སེམས་ཅན་ཐམས་ཅད་ཀྱིས་དེ་བཞིན་གཤེགས་པས་མ་གསན་པའི་ཆོས་ཐ་ན་ཆོས་ཀྱི་ཚིག་གཅིག་ཙམ་ཡང་ཐོས་པར་བྱེད་ནུས་པ་གནས་མ་ཡིན་ཞིང་སྐབས་མེད་དེ། དེ་ལྟ་བུའི་གནས་མེད་དོ། །སེམས་ཅན་ཐམས་ཅད་ཀྱིས་ཐ་ན་སེམས་བསྐྱེད་པ་གཅིག་ཙམ་ཡང་མཉམ་བར་མ་བཞག་པའི་སེམས་རྙེད་པར་འགྱུར་བའི་བར་དུ་དེ་ལྟ་བུའི་
གནས་མེད་དོ། །གཞན་ཡང་ཤཱ་རིའི་བུ་དེ་བཞིན་གཤེགས་པ་ནི་རྟག་ཏུ་མཉམ་པར་བཞག་པ་སྟེ། དེ་བཞིན་གཤེགས་པ་ནི་བྱམས་པ་ལ་གནས། སྙིང་རྗེ་ལ་གནས། དགའ་བ་ལ་གནས། བཏང་སྙོམས་ལ་གནས་སོ། ཤཱ་རིའི་བུ་སེམས་ཅན་ཐམས་ཅད་ཀྱིས་དེ་བཞིན་གཤེགས་པའི་ལུས་སམ། གཟུགས་ལ་མཚན་མར་འཛིན་ནུས་པ་ནི་གནས་མ་ཡིན་ཞིང་སྐབས་མེད། དེ་ལྟ་བུའི་གནས་མེད་དེ། གཞན་གྱིས་མི་ཚུགས་པར་བྱེད་པའི་ཆོས་བཞི་པོ་དེ་དག་འཐོབ་པར་འགྱུར་རོ། །ཤཱ་རིའི་བུ་འདི་ལྔ་ནི་དེ་བཞིན་གཤེགས་པའི་ཚད་མེད་པར་བྱེད་པའི་ཆོས་སོ། །ལྔ་གང་ཞེ་ན། ཤཱ་རིའི་བུ་དེ་བཞིན་གཤེགས་པའི་ཚུལ་ཁྲིམས་ཚད་མེད་པ་དང། ཤཱ་རིའི་བུ་དེ་བཞིན་གཤེགས་པའི་ཐོས་པ་ཚད་མེད་པ་དང། དེ་བཞིན་གཤེགས་པའི་ཏིང་ངེ་འཛིན་དང། ཤེས་རབ་ཀྱིས་རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་ཚད་མེད་པ་སྟེ། ཤཱ་རིའི་བུ་ལྔ་པོ་དེ་དག་ནི་དེ་བཞིན་གཤེགས་པའི་ཚད་མེད་བར་བྱེད་པའི་ཆོས་སོ། ཚུར་ཤོག་ཅེས་བྱས་ན་ཡང་འོང་བའི་དགེ་བའི་རྩ་བ་དེ་ཉིད་ལྡན་པས་ཐོགས་པ་མེད་པའི་ཡེ་ཤེས་བཞི་འཐོབ་པར་འགྱུར་ཏེ། བཞི་གང་ཞེ་ན། སངས་རྒྱས་བཅོམ་ལྡན་འདས་རྣམས་འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང། སངས་རྒྱས་བཅོམ་ལྡན་རྣམས་མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང། སངས་རྒྱས་བཅོམ་ལྡན་འདས་རྣམས་ད་ལྟར་བྱུང་བའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང། དེ་བཞིན་གཤེགས་པའི་སེམས་མཉམ་པར་བསྒྲུབ་པ་སྟེ། སེམས་མཉམ་བར་བསྒྲུབ་པ་དེས་དེ་བཞིན་གཤེགས་པའི་དུས་གསུམ་མཉམ་པ་ཉིད་ཀྱི་ཡེ་ཤེས་དང། ཡང་དག་པའི་ཡེ་ཤེས་དང་ལྡན་ནོ། ཡང་དག་པའི་ཡེ་ཤེས་དེས་གཞན་ལ་རག་མ་ལས། གཞན་གྱི་ཁར་མ་ལས་པར་ཆོས་ཐམས་ཅད་ཤེས་ཏེ། དེ་བཞིན་གཤེགས་པའི་ཡེ་ཤེས་བསམ་གྱི་མི་ཁྱབ་བོ། །བསམ་གྱིས་མི་ཁྱབ་པའི་ཡེ་ཤེས་དེ་དང་ལྡན་བས་རླུང་དང་། ཆར་རབ་ཏུ་མཁྱེན་ཏེ། རྗེས་སུ་འཐུན་པ་ཞེས་བྱ་བའི་རླུང་ལྡང་སྟེ། སེམས་
ཅན་ཇི་སྙེད་པས་ཅུང་ཟད་སོ་སོར་རྗེས་སུ་མྱོང་བར་འགྱུར་ཏེ། རླུང་དེའི་འཕང་དུ་རྒྱང་གྲགས་གསུམ་མོ། །དེའི་སྟེང་གི་བར་སྣང་ལ་རླུང་སྤྲིན་ཅེས་བྱ་བའི་རླུང་ལྡང་སྟེ། དེའི་འཕང་དུ་རྒྱང་གྲགས་ལྔའོ། དེའི་སྟེང་གི་བར་སྣང་ལ་འཇོམ་པ་ཞེས་བྱ་བའི་རླུང་ལྡང་སྟེ། རླུང་དེའི་དཀྱིལ་འཁོར་གྱི་འཕང་དུ་དཔག་ཚད་བཅུའོ། །དེའི་སྟེང་གི་བར་སྣང་ལ་སྐྱེ་བྲལ་ཞེས་བྱ་བའི་རླུང་ལྡང་སྟེ། རླུང་གི་དཀྱིལ་འཁོར་དེའི་འཕང་དུ་དཔག་ཚད་སུམ་བཅུའོ། དེའི་སྟེང་གི་བར་སྣང་ལ་དེ་བཞིན་གཤེགས་པ་ཞེས་བྱ་བའི་རླུང་ལྡང་སྟེ། རླུང་གི་དཀྱིལ་འཁོར་དེའི་འཕང་དུ་དཔག་ཚད་བཞི་བཅུའོ། །ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཤེས་རབ་ལ་སྟོན་པ་སྟེ། རླུང་གི་དཀྱིལ་འཁོར་བྱེ་བ་སྟོང་ཕྲག་དྲུག་བཅུ་རྩ་བརྒྱད་རབ་ཏུ་མཁྱེན་ཏེ། དེ་ལ་ཐ་མའི་རླུང་གི་དཀྱིལ་འཁོར་ཀུན་ཏུ་ཁྱབ་ཅེས་བྱ་སྟེ། གང་ལས་ཆེན་པོ་གནས་པའི་ཆུའི་ཕུང་པོ་འཕང་དུ་དཔག་ཚད་སྟོང་ཕྲག་དྲུག་བཅུ་རྩ་བརྒྱད་ཡོད་དེ། ས་ཆེན་པོའི་འཕང་དུ་ཡང་དཔག་ཚད་སྟོང་ཕྲག་དྲུག་བཅུ་རྩ་བརྒྱད་དོ། དེ་ལྟར་ཤཱ་རིའི་བུ་གྲངས་དང། བགྲང་བ་བསྟན་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཏེ། དེ་ན་ཕུང་པོ་ཆེན་པོ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་བཞུགས་ཏེ་འཚོ་ཞིང་བཞེས་སོ། །དེའི་ཚེའི་ཚད་ནི་ལོ་བྱེ་བ་ཕྲག་སུམ་བཅུའོ། །དེའི་འཁོར་ཉན་ཐོས་ནི་བྱེ་བ་ཁྲག་ཁྲིག་ཕྲག་སུམ་བཅུ་སྟེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པའི་བར་ཏུ་སྟེ། ཉན་ཐོས་ཆེན་པོ་རྣམས་ཀྱི་ཉན་ཐོས་འདུས་པ་ཆེན་པོ་ཡོད་དོ།། དེའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་བརྒྱ་བྱང་ཆུབ་སེམས་དཔའི་སྡེ་སྣོད་ཐོབ་པ་དོན་ལ་ཤིན་དུ་རྣམ་པར་ངེས་པ། ཐོས་པ་རྒྱ་མཚོ་ཆོས་སྨྲ་བ། སྟོང་པ་ཉིད་ལ་གནས་པ་། མཚན་མ་མེད་པ་ལ་གནས་པ། སྨོན་པ་མེད་པ་ལ་གནས་པ་ཆེན་པོ་ཤ་སྟག་འདུས་པ་ཡོད་དོ། དེ་ཡོངས་སུ་མྱང་ན་ལས་འདས་ནས་དམ་པའི་ཆོས་ལོ་སྟོང་དུ་གནས་པར་འགྱུར་ཤིང་ཡོངས་སུ་མྱ་ངན་ལས་
འདས་ནས་ལོ་སྟོང་ན་དེ་ཡོངས་སུ་མྱ་ངན་ལས་འདའ་བར་འགྱུར་ཏེ། དེའི་རིང་བསྲེལ་ཡང་རྒྱས་པར་འགྱུར་རོ། འདི་ལྟ་སྟེ་། དཔེར་ན། ང་ད་ལྟར་ཡོངས་སུ་མྱ་ངན་ལས་འདས་པའི་རིང་བསྲེལ་རབ་ཏུ་རྒྱས་པར་འགྱུར་བ་བཞིན་ནོ་། ཤཱ་རིའི་བུ་དེ་བཞིན་གཤེགས་པ་ནི་ཡེ་ཤེས་ཐོག་པ་མེད་པ་སྟེ། དེ་བས་ཀྱང་ལྷག་པར་དེ་བཞིན་གཤེགས་པའི་ཡེ་ཤེས་དཔག་ཏུ་མེད་དོ།། རླུང་གི་དཀྱིལ་འཁོར་ཡོངས་སུ་ཁྱབ་པས་སངས་རྒྱས་ཀྱི་ཞིང་ཡོངས་སུ་ཁྱབ་བོ།། ཤཱ་རིའི་བུ་སྟེང་གི་ཕྱོགས་ཀྱི་འཇིག་བརྟེན་གྱི་ཁམས་ན་ད་ལྟར་དེ་བཞིན་གཤེགས་པ་མེད་པ་ཡང་ཡོད་དོ། དེ་ན་རང་སངས་རྒྱས་བརྒྱ་ཕྲག་སྟོང་ཡོད་དོ། དེ་དག་ལ་སེམས་ཅན་རྣམས་དགེ་བའི་རྩ་བ་སྐྱེད་དོ། ཤཱ་རིའི་བུ་དེ་བཞིན་དེ་བཞིན་གཤེགས་པ་ནི་ཡེ་ཤེས་ལ་རྟོན་པ་སྟེ།། དེའི་ཡང་སྟེང་གི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་དང་མཉམ་པ་ད་ལྟར་བྱུང་བ་རྣམས་རབ་ཏུ་མཁྱེན་ཏོ། དེ་བཞིན་དུ་ཕྱོགས་བཅུ་ཀུན་ཏུ་ཚད་མེད་གྲངས་མེད་གཞལ་དུ་མེད་དཔག་ཏུ་མེད་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ད་ལྟར་བྱུང་དེ་དག་རབ་ཏུ་མཁྱེན། སངས་རྒྱས་ཀྱི་ཞིང་ཚིག་པ་དེ་སྙེད་ཀྱང་རབ་ཏུ་མཁྱེན་ཏོ། དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་གསོལ་ཏོ།བཅོམ་ལྡན་འདས་དགེ་བའི་རྩ་བ་གང་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་ལྟ་བུར། སྒྲིབ་པ་མེད་པའི་ཡེ་ཤེས་དང་ལྡན། བཅོམ་ལྡན་འདས་ཀྱིས་བཀའ་སྩལ་པ་ཤཱ་རིའི་བུ་དང་ང་ལ་རབ་ཏུ་གནས་ཏེ། ཆོས་ལ་གུས་པ་འདུ་ཤེས་པ་དང་། རི་མོར་བྱས་ཏེ་སྨན་དུ་འདུ་ཤེས་པ་དང་། རིན་པོ་ཚར་འདུ་ཤེས་པ་དང་། དཀོན་བར་འདུ་ཤེས་པ་དང་། དགེ་བའི་རྩ་བར་འདུ་ཤེས་པ་དང་། ཇི་ལྟ་བ་བཞིན་ཏུ་འདུ་ཤེས་བསྐྱེད་ནས་གུས་པའི་འདུ་ཤེས་དང་། ཆོས་སུ་འདུ་ཤེས་ཡོངས་སུ་བཟུང་བ་ལ་གནས་ཏེ། ཤཱ་རིའི་བུ་དེ་ལྟར་དེ་བཞིན་གཤེགས་པའི་ཡེ་ཤེས་འབར་བས། ཤཱ་རིའི་བུ་དེ་བཞིན་གཤེགས་པས་ཤིན་ཏུ་མང་པོ་དང་དེ་བས་ཀྱང་ལྷག་པར་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་རྒྱུན་མི་ཆད།
དཔག་ཏུ་མེད་། གྲངས་མེད་། གཞལ་ཏུ་མེད་། བརྗོད་ཏུ་མེད་པར་རབ་ཏུ་མཁྱེན་ཏོ།། ཚུར་ཤོག་ཅེས་བྱས་ན་ཡང་འོང་བའི་དབང་དེས་སེ་གོལ་གཏོགས་པ་སྲིད་ཀྱིས་དེ་བཞིན་གཤེགས་པ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་དང་མཉམ་པར་འཆག་ཅིང་སླར་ཡང་འོང་ངོ་། ཤཱ་རིའི་བུ་དེས་མོས་པས་ཐོས་པ་བཟུང་བས་དེ་ཉིད་ཀྱིས། མྱུར་དུ་རྣམ་པར་གྲོལ་བ་ཐོབ་སྟེ། རྣམ་པར་གྲོལ་བ་དེས་ཤིན་ཏུ་རྣམ་པར་གྲོལ་ལོ།། ཅི་ལས་རྣམ་པར་གྲོལ་ཞེ་ན། སྡུག་བསྔལ་ཐམས་ཅད་ལས་ཤིན་དུ་རྣམ་པར་གྲོལ་ལོ།། ཤཱ་རིའི་བུ་གང་ལ་ལས་གུས་པའི་གནས་བཞི་ཐོབ་པ་ཙམ་གྱིས་དད་པ་ཐོབ་ནས་ཇི་ལྟར་སངས་རྒྱས་ཀྱི་ཆོས་དང་འབྲེལ་བར་མི་འགྱུར་བ་དེ་ལྟར་གནས། དེ་བཞིན་དུ་གནས་དེ་ལྟ་བུའི་ཚུལ་དུ་གནས་པར་བྱའོ།། སྙམ་དུ་སེམས་བསྐྱེད་ན་ཡང་འདི་ལྟ་བུའི་མདོ་སྡེའི་ཆོས་ཀྱི་རྣམ་གྲངས་ཀྱི་ཚིག་དང་ཡི་གེ་མི་འཛིན་ཀྱང་དེ་དགེ་བའི་རྩ་དེ་ཉིད་ཀྱིས་ཤེས་རབ་བྱེད་པའི་ཆོས་བཞི་འཐོབ་པར་འགྱུར་ཏེ། བཞི་གང་ཞེ་ན། ཤེས་རབ་ཅན་ཤེས་རབ་ཆེན་པོ་དང་ལྡན་པར་འགྱུར་བ་དང་། ཤེས་རབ་ཅན་སངས་རྒྱས་མཐོང་ཞིང་ཕྲད་ནས་མཉེས་པར་བྱེད་པ་དང་། ཤེས་རབ་ཅན་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བ་དང། ཤེས་རབ་ཅན་བླ་ན་མེད་པ་ཡང་དག་རྫོགས་པའི་བྱང་ཆུབ་མངོན་བར་འཚང་རྒྱ་བ་སྟེ། ཤེས་རབ་བྱེད་པའི་ཆོས་བཞི་པོ་དེ་དག་འཐོབ་པར་འགྱུར་རོ་། དེ་མང་པོར་བྱེད་པའི་ཆོས་བཞི་ཐོབ་པར་འགྱུར་ཏེ། བཞི་གང་ཞེ་ན། མིར་འགྱུར་བ་མང་པོ་རྙེད་པ་དང་། སངས་རྒྱས་འབྱུང་བ་མཉེས་པར་བྱེད་པ་མང་པོ་དང་། དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བ་མང་པོ་དང། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་མང་པོ་སྟེ། མང་པོར་བྱེད་པའི་ཆོས་བཞི་པོ་དེ་དག་འཐོབ་པར་འགྱུར་རོ།། དེ་ཡན་ལག་བཞི་རྗེས་སུ་འཐོབ་པར་འགྱུར་ཏེ། བཞི་གང་ཞེ་ན། འཁོར་ལོས་སྒྱུར་བའི་ཡན་ལག་རྗེས་སུ་འཐོབ་སྟེ།། འཁོར་ལོས་སྒྱུར་བའི་རྒྱལ་པོར་འགྱུར་བ་དང་། ཚངས་པའི་འཇིག་རྟེན་དུ་འཚངས་པར་འགྱུར་བ་དང་། ལྷའི་དབང་པོ་བརྒྱ་བྱིན་དུ་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ཆོས་ཐམས་ཅད་ཡོངས་
སུ་རྫོགས་པ་རྗེས་སུ་འཐོབ། སྟོབས་བསྔགས་པ་རྗེས་སུ་འཐོབ།། སེམས་ཅན་ཡོངས་སུ་རྟོགས་པའི་ཡེ་ཤེས་རྗེས་སུ་འཐོབ།། རྫུ་འཕྲུལ་གྱི་སྤྱོད་ཡུལ་ཡང་རབ་ཏུ་མཁྱེན་ཅིང་ལྷར་བཅས་པའི་འཇིག་རྟེན་གྱི་མིག་ཏུ་འགྱུར་རོ།། དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་རབ་ཏུ་བསྟན་པའི་ཕྱིར། དེའི་ཚེ་ཚིགས་སུ་བཅད་པ་འདི་དག་གསུངས་སོ།། འཇིག་རྟེན་གྱི་ནི་སྐྱབས་དང་མིག། སེམས་ཅན་ཀུན་གྱི་དམ་པ་སྟེ། །གང་རེག་མྱ་ངན་འདའ་འགྱུར་བའི། །གསོ་བ་ཐམས་ཅད་རབ་ཏུ་ཤེས།། ཚུར་ཤོག་ཅེས་བྱས་འོང་གྱུར་པའི། །རྣམ་པར་སྨིན་པ་འདི་འདྲ་སྟེ། །ནམ་ཡང་སྡུག་བསྔལ་མི་འགྱུར་ཞིང་། །བཀའ་བློ་མི་བདེར་ཡོང་མི་འགྱུར།། །། ལྷ་ཡི་ནང་དུ་མྱུར་འགྲོ་ཞིང། །མི་ཡི་ནང་དུ་འང་མྱུར་དུ་འགྲོ། །སངས་རྒྱས་དག་ཀྱང་མྱུར་མཐོང་ཞིང་། །མི་ཁོམ་རྣམ་པར་སྤོང་བར་འགྱུར་། །འབྱོར་ཅིང་ནོར་ཡང་ཆེན་པོར་འགྱུར། གཏེར་གྱི་རྣམས་ནི་མང་མཐོང་ཞིང་། །གང་དུ་ལག་པ་བཅུག་པ་རྣམས། །ཐམས་ཅད་རིན་ཆེན་གང་བར་འགྱུར། །ཡན་ལག་བརྒྱད་ཀྱི་ཆུས་གང་པའི་རྫིང་བུ་རབ་ཏུ་བསགས་པར་འགྱུར། །ནམ་ཡང་མྱ་ངན་མི་མྱོང་སྟེ། །བཀའ་བློ་བདེ་བའི་འབྲས་བུ་འདི། །ཐིང་པོ་ཞ་བོར་མི་འགྱུར་ཞིང། །རྐང་པ་འཁུམས་དང་འབུབ་པ་དང། །ཡན་ལག་སྐམ་པར་མི་འགྱུར་ཞིང། །ཡན་ལག་ཉམས་པར་མི་འགྲོའོ། སོར་མོ་དགུ་པར་མི་འགྱུར་ཞིང། །སྒུར་པོ་ཞར་བར་མི་འགྱུར་རོ། །གླང་པོའི་མོག་ལྟར་མི་འགྱུར་ཏེ། །བཀའ་བློ་བདེ་བའི་འབྲས་བུ་འདི། །དེའི་ཡན་ལག་རྒྱས་ཤིང་དཀར་། །ལྕགས་ཀྱི་དངོས་པོ་འདྲ་བར་འགྱུར། །རབ་ཏུ་མཛེས་ཤིང་བལྟ་ན་སྡུག། །ཁ་དོག་ལྡན་ཞིང་མཛེས་པར་གནས། །ལྷ་ཡིས་མངོན་བར་མཆོད་པར་འགྱུར། །མི་རྣམས་ཤིན་དུ་སྟི་སྟང་བྱེད། །ཀླུ་རྣམས་ཀྱིས་ནི་མངོན་མཆོད་འགྱུར། །བཀའ་བློ་བདེ་བའི་འབྲས་བུ་འདི་། །ངན་འགྲོ་ཐམས་ཅད་སྤངས་ནས་ནི། །མི་དེ་མཐོ་རིས་འགྲོ་བར་འགྱུར། །མྱུར་དུ་བྱང་ཆུབ་འཚང་རྒྱ་སྟེ། །བཀའ་བློ་བདེ་བའི་འབྲས་བུ་འདི་། །མི་དེས་སེམས་ཅན་ཐམས་ཅད་ཀྱི། །སེམས་རྣམས་ཐམས་ཅད་རབ་ཏུ་ཤེས་། །གོམ་པ་དག་ནི་
བདུན་པོར་ནས།། འཇིག་རྟེན་དབྱངས་ཀྱིས་གོ་བར་བྱེད། །དེ་ཡི་ཡེ་ཤེས་མཆོག་འགྱུར་ཞིང་། །ཤེས་རབ་དག་ཀྱང་མཆོག་ཏུ་འགྱུར། །རྣམ་པར་གྲོལ་བ་མཆོག་འགྱུར་ཏེ། །སེམས་ཅན་རྣམས་ནི་ཀུན་གྱི་མཆོག། །ཤེས་རབ་ཀྱིས་ནི་ཤེས་རབ་སྤྱོད་། །ཤེས་རབ་ཡེ་ཤེས་གནས་པ་སྟེ། །ཤེས་རབ་ཡེ་ཤེས་རྣམ་པར་གྲོལ། །སངས་རྒྱས་ཀུན་གྱི་བརྙེས་པ་ཡིན། །ཤེས་རབ་ཀྱི་ནི་རང་བཞིན་གཤེགས། ཡེ་ཤེས་ཀྱིས་ནི་ཤེས་བྱ་ཤེས། །གང་དག་ཤེས་རབ་ཡེ་ཤེས་དག །།ཐམས་ཅད་དེ་ལ་དཀོན་མི་འགྱུར། འདི་འདྲའི་དགེ་བ་འདི་དག་གི། །དོན་ནི་ཁྱོད་ལ་ངས་བཤད་དོ། །དེ་ནི་མོས་པ་ཆུང་བ་ཡི། སེམས་ཅན་རྣམས་ཀྱི་དོན་མ་ཡིན ། གཏི་མུག་གིས་ནི་རྨོངས་པ་དང། །སྡིགས་པས་མངོན་པར་གཙེས་པ་རྣམས། །ཞེ་སྡང་ཁྲོ་བ་བསྐྱེད་བྱས་ནས། །ཆོས་ལ་གུས་པར་མི་འགྱུར་རོ། །ནམ་ཞིག་སེམས་ཅན་མོས་ཆུད་ཚེ། །འདི་འདྲ་བ་ཡི་ཆོས་འབྱུང་སྟེ། །དེ་ན་ཕྱིར་ཞིང་གཅིག་ལ་གཅིག། །གུས་པ་བྱེད་པར་མི་འགྱུར་ཏེ། །གང་ཚེ་སེམས་ཅན་མི་གུས་ཤིང་། །ཁྲོ་བའི་ཉེས་ལ་ཡིད་དགའ་སྟེ། །ཀུན་ནས་ཉོན་མོངས་སེམས་ཀྱིས་ཀྱང། །དེ་དག་བདག་ཅག་དགྲ་བཅོམ་འཛེར། །གནས་བརྟེན་གང་དག་རྒས་པ་དང། །རྒས་ཤིང་འཁོགས་པ་གཏུགས་པ་དག། །དེ་དག་འཆི་བའི་དུས་བྱེད་ཚེ། །སྲིད་པའི་ཐ་མར་གྱུར་ཅེས་ཟེར། །གནས་བརྟེན་གང་དག་རྒས་པ་དང། །རྒས་ཤིང་འཁོགས་པ་གཏུགས་པ་དག །། དགྲ་བཅོམ་བསོད་སྙོམས་ཟོས་གྱུར་ནས། །སེམས་ཅན་དམྱལ་བར་མྱུར་དུ་འགྲོ།། །དེ་དག་ཚུལ་ཁྲིམས་རབ་དཀོན་ན།། །དགྲ་བཅོམ་པར་ལྟ་ག་ལ་འགྱུར། །དད་པས་མཆོད་རྟེན་བྱེད་འགྱུར་ཏེ། །དེ་དག་ངན་འགྲོ་རྣམས་སུ་འགྲོ།། །ཤཱ་རིའི་བུ་དེ་ལྟར་ཚུལ་ཁྲིམས་སྤྱོད་པའི་བྱང་ཆུབ་སེམས་དཔའི་སྡེ་སྣོད་ཀྱི་དོན་གྱི་ཕྱིར་སློབ་དཔོན་ལ་བསྙེན་བཀུར་དང། །རིམ་གྲོ་བྱེད་པ་ནི་འདི་འདྲ་བའི་ཕན་ཡོན་དེ་དག་དང་། །དེ་བས་ཀྱང་ལྷག་པ་དཔག་ཏུ་མེད། །བསམ་གྱི་མི་ཁྱབ། །ཚད་མེད་པ་འཐོབ་པར་འགྱུར་རོ།། །དེ་ལྟར་ཤཱ་རིའི་བུ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་དོན་གྱི་ཕྱིར་སློབ་དཔོན་ལ་བསྙེན་བཀུར་དང་། རིམ་གྲོ་བྱེད་པ་ནི་འདི་འདྲ་བའི་ཕན་ཡོན་དེ་དག་དང་། །དེ་བས་ཀྱང་ལྷག་པ་དཔག་ཏུ་མེད། །བསམ་གྱིས་མི་ཁྱབ། །ཚད་མེད་པ་འཐོབ་པར་འགྱུར་རོ།། །དེ་ལྟར་ཤཱ་རིའི་བུ་བྱང་ཆུབ་སེམས་དཔའི་སྡེ་སྣོད་ལ་རབ་ཏུ་གནས་པའི་བྱང་ཆུབ་སེམས་དཔའ་རབ་ཏུ་དབང་དུ་འགྱུར་པ།
ཚུལ་ཁྲིམས་ཡོངས་སུ་དག་པ། །བྱང་ཆུབ་སེམས་དཔའི་སྤྱད་པ་སྤྱོད་དོ།། །དེ་ལ་ཚུལ་ཁྲིམས་ཡོངས་སུ་དག་པ་གང་ཞེ་ན། །ཤཱ་རིའི་བུ་རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ།། །བཅུ་གང་ཞེ་ན། །སེམས་ཅན་ཐམས་ཅད་ལ་མི་འཚེ་བ་ཡིན། །གཞན་གྱིས་རྫས་ལ་མི་རྐུ་བ་ཡིན། །གཞན་གྱིས་ཆུང་མ་སྤངས་པ་ཡིན། །སེམས་ཅན་ཐམས་ཅད་ལ་མི་སླུ་བ་ཡིན། །གཞན་གྱི་གཡོག་འཐུན་པ་ལ་ཕྲ་མ་མི་ཟེར་བ་ཡིན། །ཚིག་དྲག་པོ་བཟོད་པའི་ཕྱིར་དག་མི་རྩུབ་པ་ཡིན། །ཚིག་བསྡམས་པས་ཚིག་འཁྱལ་པ་སྤངས་པ་ཡིན། །གཞན་གྱི་ལོངས་སྤྱོད་ལ་ང་ཡིར་མི་འཛིན་པས་བརྣབ་སེམས་མེད་པ་ཡིན། །ཚིག་ངན་པར་སྨྲས་པ་བཟོད་པས་གནོད་སེམས་སྤངས་པ་ཡིན། ལྷ་གཞན་མི་འདོད་པས་ལོག་པར་ལྟ་བ་སྤངས་པ་ཡིན་ཏེ་ཤཱ་རིའི་བུ་རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ་གཞན་ཡང་རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། མི་ཤེས་པ་མི་འདོད་པས་མ་ཉམས་པའི་ཚུལ་ཁྲིམས་ཡིན། ངན་བར་སྐྱེ་བ་ཡོངས་སུ་སྤངས་པས་སྐྱོན་མེད་པའི་ཚུལ་ཁྲིམས་ཡིན། ཉན་མོངས་པ་ཐམས་ཅད་དང་མ་འདྲེས་པས་འདྲེན་མ་མ་ཡིན་པའི་ཚུལ་ཁྲིམས་ཡིན། གཅིག་ཏུ་དཀར་པོའི་ཆོས་རྣམ་པར་སྤེལ་བས་སྲ་སྲེ་མེད་པའི་ཚུལ་ཁྲིམས་ཡིན། ཇི་ལྟར་འདོད་པ་བཞིན་དུ་འགྲོ་བས་རང་དབང་གི་ཚུལ་ཁྲིམས་ཡིན། མཁས་པས་མ་སྨད་པས་བསྔགས་པའི་ཚུལ་ཁྲིམས་ཡིན། ཉེས་པ་ཐམས་ཅད་མི་སྒྲུབ་པས་མ་སྨད་པའི་ཚུལ་ཁྲིམས་ཡིན། དབང་པོ་བསྲུངས་པ་ཤིན་དུ་སྦས་པའི་ཚུལ་ཁྲིམས་ཡིན། དྲན་པ་དང། ཤེས་བཞིན་གྱི་ཕྱིར་ཤིན་དུ་བསྲུངས་པའི་ཚུལ་ཁྲིམས་ཡིན་ཏེ། ཤཱ་རིའི་བུ་རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། ཤཱ་རིའི་བུ་གཞན་ཡང་རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། རུང་བའི་ཚོད་ཤེས་པས་འདོད་པ་ཉུང་བའི་ཚུལ་ཁྲིམས་ཡིན། འདོད་པ་སྤོང་བས་ཆོག་
ཤེས་པའི་ཚུལ་ཁྲིམས་ཡིན། ལུས་དང་སེམས་རབ་ཏུ་དབེན་བས་ནན་ཏན་གྱི་ཚུལ་ཁྲིམས་ཡིན། འདུ་འཛི་ལ་སྨོད་པས་དགོན་པར་གནས་པའི་ཚུལ་ཁྲིམས་ཡིན། བདག་གི་ཁར་ལས་པའི་དགེ་བའི་རྩ་བ་སྒྲུབ་བའི་ཕྱིར་སྦྱངས་པའི་ཡོན་ཏན་དང་ཡོ་བྱད་བསྙུངས་པའི་ཚུལ་ཁྲིམས་ཡིན། ཕ་རོལ་གྱི་གདོད་དུ་མི་ལྟ་བས་འཕགས་པའི་རིགས་ལ་དགའ་བའི་ཚུལ་ཁྲིམས་ཡིན། ལྷ་དང་མི་རྣམས་ལ་མི་སླུ་བས་ཇི་ལྟར་སྨྲས་པ་དེ་ལྟར་བྱེད་པའི་ཚུལ་ཁྲིམས་ཡིན། རང་གི་སེམས་ངེས་པར་རྟོག་པས་བདག་གི་འཁྲུལ་པ་ལ་སོ་སོར་རྟོག་པའི་ཚུལ་ཁྲིམས་ཡིན། ཕ་རོལ་གྱི་སེམས་སྲུང་བས་གཞན་གྱི་འཁྲུལ་པ་ལ་ཉེས་པར་མི་ལྟ་བའི་ཚུལ་ཁྲིམས་ཡིན། བསྡུ་བའི་དངོས་པོ་རྗེས་སུ་མི་གཏོང་བས་སེམས་ཅན་ཡོངས་སུ་སྨིན་པར་བྱེད་པའི་ཚུལ་ཁྲིམས་ཡིན་ཏེ། ཤཱ་རིའི་བུ་རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ་གཞན་ཡང་རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། འདི་ལྟ་སྟེ། ཐ་བའི་སེམས་མེད་པས་སངས་རྒྱས་ལ་དད་པའི་ཚུལ་ཁྲིམས་ཡིན། དམ་པའི་ཆོས་སྲུང་བས་ཆོས་ལ་དད་པའི་ཚུལ་ཁྲིམས་ཡིན། འཕགས་པ་འདུས་པ་ལ་གུས་པས་དགེ་འདུན་ལ་དད་པའི་ཚུལ་ཁྲིམས་ཡིན། སངས་རྒྱས་དང་བྱང་ཆུབ་སེམས་དཔའ་ཡིད་ལ་བྱེད་པ་དང་མ་བྲལ་བས་འདུད་པའི་ཚུལ་ཁྲིམས་ཡིན། བྱང་ཆུབ་ཀྱི་ཡན་ལག་གི་ཚོགས་པས་དགེ་བའི་བཤེས་གཉེན་ལ་བསྟེན་པའི་ཚུལ་ཁྲིམས་ཡིན། མི་དགེ་བའི་ཆོས་ཐམས་ཅད་ཡོངས་སུ་སྤངས་པས་སྡིག་པའི་གྲོགས་པོ་ཡོངས་སུ་སྤོང་བའི་ཚུལ་ཁྲིམས་ཡིན། སེམས་ཅན་ཐམས་ཅད་ཡོངས་སུ་སྨིན་བར་བྱེད་པས་བྱམས་པའི་ཚུལ་ཁྲིམས་ཡིན། ཉམ་ཐག་པར་གྱུར་པའི་སེམས་ཅན་ཡོངས་སུ་སྨིན་བར་བྱེད་པས་སྙིང་རྗེའི་ཚུལ་ཁྲིམས་ཡིན། ཆོས་ལ་དགའ་ཞིང་རབ་ཏུ་མོས་པས་དགའ་བའི་ཚུལ་ཁྲིམས་ཡིན། རྗེས་སུ་ཆགས་པ་དང། ཁོང་ཁྲོ་བ་སྤངས་པས་བཏང་སྙོམས་ཀྱི་ཚུལ་ཁྲིམས་ཡིན་ཏེ། ཤཱ་རིའི་བུ་རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ་གཞན་ཡང་
རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། སེམས་ཅན་ཡོངས་སུ་སྨིན་པར་བྱེད་པས་སྦྱིན་པའི་ཚུལ་ཁྲིམས་ཡིན། སེམས་ཀུན་དུ་སྲུང་བས་བཟོད་པའི་ཚུལ་ཁྲིམས་ཡིན། མི་ཟློགས་པས་བརྩོན་འགྲུས་ཀྱི་ཚུལ་ཁྲིམས་ཡིན། བསམ་གཏན་གྱི་ཚོགས་ཡང་དག་པར་རྫོགས་པར་བྱེད་པས་བསམ་གཏན་གྱི་ཚུལ་ཁྲིམས་ཡིན། ཐོས་པ་དང་ཚུལ་ཁྲིམས་ཀྱིས་མི་ངོམས་པས་ཤེས་རབ་ཀྱི་ཚུལ་ཁྲིམས་ཡིན། བྱང་ཆུབ་སེམས་དཔའི་སྡེ་སྣོད་ཡོངས་སུ་ཚོལ་བས་ཐོས་པ་ཡོངས་སུ་ཚོལ་བའི་ཚུལ་ཁྲིམས་ཡིན། མི་རྟག་པའི་འདུ་ཤེས་སོ་སོར་རྟོག་པས་ལུས་ལ་མི་ལྟ་བའི་ཚུལ་ཁྲིམས་ཡིན། སེམས་ལ་སྒྱུ་མ་ལྟ་བུར་སོ་སོར་རྟོག་པས་སྲོག་ལ་ཡིད་མི་རྟོན་བའི་ཚུལ་ཁྲིམས་ཡིན། ཐོག་མ་ནས་ཚུལ་ཁྲིམས་ཡོངས་སུ་དག་པས་བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་ཚུལ་ཁྲིམས་ཡིན། ཚུལ་ཁྲིམས་ཐམས་ཅད་ཡོངས་སུ་བསྔོ་བས་དེ་བཞིན་གཤེགས་པ་དང་ཕྲད་པའི་ཚུལ་ཁྲིམས་ཡིན་ཏེ། ཤཱ་རིའི་བུ་རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ།། ཤཱ་རིའི་བུ་དེ་ལྟར་ཚུལ་ཁྲིམས་ཤིན་ཏུ་ཡོངས་སུ་དག་པའི་བྱང་ཆུབ་སེམས་དཔའ་ལྷ་དང་མིའི་དཔལ་ཕུན་སུམ་ཚོགས་པ་མྱོང་བར་མི་འགྱུར་བ་གང་ཡང་མེད་དོ།། འཇིག་རྟེན་གྱི་བཟོའི་གནས་དང། ལས་ཀྱི་གནས་མི་ཤེས་པ་གང་ཡང་མེད་དོ།། དེས་སེམས་ཅན་ཐམས་ཅད་ལོངས་སྤྱོད་དང། ཉེས་པར་སྤྱོད་པ་ཐོབ་པར་མི་བྱེད་པ་གང་ཡང་མེད་དོ། སོ་སོའི་སྐྱེ་བོ་ཕན་ཚུན་མི་མཛའ་བར་མི་འགྱུར་བ་དེ་གང་ཡང་མེད་དེ། དེ་ལ་བྱང་ཆུབ་སེམས་དཔའ་ཁོང་ཁྲོ་བ་མེད་དོ། །གང་ལ་བྱང་ཆུབ་སེམས་དཔའ་མ་དད་པར་འགྱུར་བའི་བརྫུན་དུ་སྨྲ་བ་དེ་གང་ཡང་མེད་དོ།། དེ་སེམས་ཅན་གང་ལ་ཡང་མར་འདུ་ཤེས་མི་སྐྱེད་པ་མེད་དོ།། དེ་སེམས་ཅན་གྱི་རིས་ན་སེམས་ཅན་གང་ལ་ཡང་ཕར་འདུ་ཤེས་མི་སྐྱེད་པ་མེད་དོ།། དེ་སེམས་ཅན་གང་ལ་ཡང་ཡིད་རྟོན་པའི་འདུ་ཤེས་མི་སྐྱེད་པ་མེད་དོ། དེ་འདུས་བྱས་ཀྱི་ཆོས་གང་ལ་ཡང་མི་རྟག་པར་འདུ་ཤེས་མི་སྐྱེད་པ་མེད་དོ།། དེ་ཐམས་ཅད་འདུ་བྱེད་དུ་
གཏོགས་པར་ཤེས་ནས་ལུས་དང་སྲོག་ལ་མི་ལྟ་སྟེ། ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་སྤྱོད་དོ།། བཅོམ་ལྡན་འདས་ཀྱིས་དེ་སྐད་གསུངས་ཏེ། བདེ་བར་གཤེགས་པས་དེ་སྐད་བཀའ་སྩལ་ནས་སྟོན་པ་ཡང་འདི་སྐད་གསུང་ངོ།། ཚུལ་ཁྲིམས་འདི་ལ་གང་གནས་པ་སྐྱོབ་པ་ཡི་ནི་ཆོས་སྐུ་དང། དབྱངས་དང། ཁ་དོག་གཟུགས་རྣམས་ནི། དེ་དག་ལ་ནི་རྙེད་མི་དཀའ། ལྗོངས་ཤིང་དམུས་ལོང་མི་འགྱུར་ལ། ཞར་སྒུར་ཞ་བར་མི་འགྱུར་རོ། འབྱུང་བ་རྣམ་པར་དག་འགྱུར་ཞིང། དེ་ཡི་ལུས་ནི་མཛེས་པར་འགྱུར།། སྟོབས་ཆེ་ཞིང་ནི་མཐུ་ཆེ་སྟེ། གཟི་ཆེ་ཞིང་ནི་གཟི་བརྗིད་རབ། ཤེས་རབ་དང་ནི་བརྩོན་འགྲུས་ཀྱིས།། སྡིག་ཅན་བདུད་ནི་སྐྲག་པར་བྱེད།། རྒྱལ་པོ་ཡིས་ནི་མངོན་མཆོད་ཅིང།། ལྷ་ཀླུ་རྣམས་ཀྱི་བཀུར་སྟི་བྱས། ཐེ་ཚོམ་ཐམས་ཅད་ཆད་པར་འགྱུར།། དེ་དག་བྱམས་པ་ཤིན་ཏུ་བསྒོམས། ཚུལ་ཁྲིམས་ཕུང་པོ་རབ་གནས་ནས། གསོད་པར་བྱེད་ཀྱང་འཇིགས་པ་མེད། གྲགས་པ་ཆེན་པོ་ཆོས་སྤྱོད་པ། ངན་འགྲོ་དག་ཏུ་མི་འགྲོ་འོ། སེམས་ཅན་ཐམས་ཅད་གཉིད་ལོག་ཀྱང་། སྙོས་པ་མེད་ཅིང་མི་ཉལ་ཏེ། ཕྱོགས་བཞི་དག་ནི་ཀུན་ཏུ་ཡང། ལེགས་པར་བཤད་པ་ཡོངས་སུ་ཚོལ། ཚུལ་ཁྲིམས་ཕུང་པོར་གནས་པ་དག། རིན་ཆེན་མཆོག་དང་ཆུང་མ་དང། བདག་གི་ཤ་ཡང་རབ་གཏོང་ཞིང་། བྱང་ཆུབ་ལམ་ནི་ཀུན་ཏུ་ཚོལ། སངས་རྒྱས་ཆོས་ནི་བླ་མེད་པ། མཆོག་གི་ཆོས་རྣམས་ཡོངས་སུ་ཚོལ། འཇིག་རྟེན་དག་གི་མགོན་འགྱུར་ཞིང་། མཆོད་རྟེན་དང་ནི་སྦྱིན་བར་འོས། གཤེ་ཞིང་ཡོངས་སུ་སྦྱོང་བ་དང་། ཉེས་པ་བྱས་པ་ཐམས་ཅད་བཟོད། བཟོད་པ་ཉིད་ལ་རབ་གནས་ཤིང་། བཟོད་པ་ཡི་ནི་བསྔགས་བརྗོད། མི་བདེན་པར་ནི་མི་སྨྲ་སྟེ། ཇི་ལྟར་སྨྲས་པ་དེ་བཞིན་བྱེད། བྱང་ཆུབ་སྙིང་པོར་འདུག་ནས་ནི། ས་འདི་དག་ཀྱང་གཡོ་བར་བྱེད། སངས་རྒྱས་ཆོས་ལ་ནེམ་ནུར་མེད།། ལྷ་གཞན་དག་ནི་རབ་ཏུ་སྤོང་།། རྟག་ཏུ་སངས་རྒྱས་བཅོམ་ལྡན་འདས་ལས། ལྷ་གཞན་ཡོད་པར་མི་འགྱུར་རོ།། མཚོན་དག་དང་ནི་དུག་རྣམས་ཀྱིས། ཕན་ཚུན་གནོད་པ་བྱེད་པ་ཡི། །
སྡུམས་ནི་བྱེད་པར་འགྱུར་བ་དག། །དེ་ནི་མཁས་པའི་མཚན་ཉིད་དོ། སེམས་ཅན་སྡུག་བསྔལ་རྣམས་མཐོང་ན། བསྐལ་པ་བྱེ་བ་མང་པོར་ཡང་། བདག་གི་དོན་ནི་མེད་འགྱུར་ཀྱང་། ཡལ་བར་འདོར་བར་མི་འགྱུར་རོ། དོན་རྙེད་ན་ནི་མཛའ་བོ་ཞེས། ཕན་ཚུན་དུ་ནི་རབ་ཏུ་སྨྲ། དོན་ནི་བྱེད་པར་མ་འགྱུར་ན། གཅིག་ལ་གཅིག་ནི་གསོད་པར་བྱེད། འཛམ་བུ་ཡི་ནི་གླིང་འདི་དང་། སངས་རྒྱས་ཀྱི་ནི་ཞིང་ཀུན་དུ། རིན་ཆེན་བཀང་སྟེ་སྦྱིན་བྱས་ནས། རྟག་ཏུ་བདག་གི་གྲོགས་སུ་འགྱུར། །གང་དག་མཚོན་རྣམས་རྣོན་པོ་ཡིས། ཡན་ལག་གཉིད་ལག་གཅོད་པ་ཡི། །སེམས་ཅན་དག་ནི་ཐམས་ཅད་ལ། །སེམས་ནི་མཉམ་པར་རབ་ཏུ་འཇུག། །སངས་རྒྱས་དག་ནི་ཆོས་རྣམས་ཕྱིར། །བྱིས་པ་རྣམས་ཀྱི་ཆོས་སྤོང་སྟེ། །ཆོས་ལ་ཤིན་ཏུ་གནས་འགྱུར་པས། །ཚུལ་ཁྲིམས་རྟག་ཏུ་དག་པར་འགྱུར། །ཆོས་ཀྱི་རྗེས་འཐུན་ཆོས་ཞུགས་ནས། །བྱང་ཆུབ་ཀྱི་ནི་སྤྱད་པ་སྤྱོད། །སངས་རྒྱས་ཀྱི་ནི་བྱང་ཆུབ་ཕྱིར། །རིགས་གསུམ་བདུད་རྩི་རབ་ཏུ་སྦྱིན། །ཚུལ་ཁྲིམས་ཕུང་པོ་གནས་བྱས་ནས། །ཆོས་རྣམས་ཐམས་ཅད་མངོན་པར་བསླབས་། མཁས་པ་ལྷ་དང་བཅས་པ་ཡི། །འཇིག་རྟེན་ན་ནི་མཆོད་པར་འོས། །ཆོས་རྣམས་ཀུན་ལ་ཐེ་ཚོམ་མེད། །བཟོ་ཀུན་ལ་ཡང་རབ་ཏུ་མཁས། །སེམས་ཅན་བསམ་པ་ཤེས་འགྱུར་ནས། །སྙན་པའི་ཚིག་ནི་སྟོན་པར་བྱེད། །ཚུལ་ཁྲིམས་ཕུང་པོ་རྣམས་སྦྱངས་ནས་བྱང་ཆུབ་དམ་པ་སངས་རྒྱས་ཏེ། །ཤིང་མཆོག་དྲུང་དུ་འདུག་བྱས་ནས། །སྡིག་ཅན་བདུད་ནི་སྐྲག་པར་བྱེད། །ཉི་ཟླ་དག་ནི་སྣང་བར་ལྟར། །གཟི་བརྗིད་དྲག་པོའི་འོད་བྱེད་པ། །དེ་ལྟར་སེམས་ཅན་མཆོག་འགྱུར་ཞིང་། །ཤེས་རབ་ཀྱི་ནི་མིག་ལས་བྱུང་། །སེམས་ཅན་རྣམས་ལ་ལག་བྱིན་ཏེ། །དྲིས་པ་ལ་ནི་ལམ་རྣམས་སྟོན། །རྟག་ཏུ་གསོང་པོར་སྨྲ་འགྱུར་ཏེ། །དེ་དག་ལ་ནི་ཕྲག་དོག་མེད། །བདག་དང་རིན་ཆེན་གཞན་དག་ཀྱང་། །མང་པོ་རྣམས་ནི་མྱུར་དུ་གཏོང་། །དེ་ནི་བརྒྱ་ལམ་བྱང་ཆུབ་མཆོག། །གཏོང་བར་འགྱུར་བ་མ་ཡིན་ནོ། །དད་དང་ཚུལ་ཁྲིམས་ཕུན་སུམ་ཚོགས། །བདེན་པའི་ཚིག་ལ་
རབ་ཏུ་གནས། །ཚུལ་ཁྲིམས་ཕུང་པོ་རབ་གནས་པས་། །དེ་དག་ལ་ནི་རྒྱུ་མེད་དོ། །བརྫུན་ཟེར་བ་དག་འོངས་གྱུར་ནས། །སྦྱིན་ཞིང་བྱ་ཞེས་ཟེར་ཡང་ན། །བདེན་པའི་ཚིག་ལ་གནས་པས་ན། །དད་པས་དེ་ལ་དད་པར་འགྱུར། །ཕན་ཚུན་གཅིག་ལ་གཅིག་སྨྲ་བ། །ཆོས་གོས་དང་ནི་བསོད་སྙོམས་རྣམས། །འདི་སྦྱིན་སྨྲས་ཏེ་མ་བྱིན་ཡང་། །དེ་ལ་ཡིད་ནི་འཁྲུགས་པ་མེད། །གཞན་ཡང་ཤཱ་རིའི་བུ་དེ་ལྟར་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་ནི་འདུ་བྱེད་ཐམས་ཅད་ལ་མངོན་པར་མི་དགའ་བའི་འདུ་ཤེས་སྐྱེད་དོ། །སེམས་ཅན་ཐམས་ཅད་ལ་ཕ་མར་འདུ་ཤེས་སྐྱེད་དོ། །ཚོར་བ་དང་། རྣམ་པར་རིག་པ་ལ་རྣམ་པར་རིག་པ་མེད་པར་འདུ་ཤེས་སྐྱེད་དོ། །དེ་མཉམ་པ་དང་། །མི་མཉམ་བར་ཡང་སེམས་ཀྱི་མངོན་བར་མི་སྒྲུབ་བོ། །དེ་ཅིའི་ཕྱིར་ཞེ་ན། གལ་ཏེ་སེམས་ཀྱིས་མཉམ་བར་བྱེད་ན་མྱ་ངན་ལས་འདས་པ་སེམས་ལས་འདས་པར་འགྱུར་རོ། །སེམས་ཀྱིས་མི་མཉམ་བར་བྱེད་ན་ནི་ཆགས་པའི་སེམས་སུ་གྱུར་བས་ཆེས་མི་མཉམ་བར་འགྱུར་རོ། །མིག་དང་གཟུགས་ལ་རྟེན་ནས་མིག་གི་རྣམ་པར་ཤེས་པ་སྐྱེ་སྟེ། །ཆགས་པའི་སེམས་བསྐྱེད་ནས་འགགས་པ་དེའི་བག་ལ་ཉལ་གྱི་སེམས་དེའི་རང་བཞིན་དུ་སྐྱེ་སྟེ། །མི་བདེན་པའི་དམིགས་པ་ལ་མི་བདེན་པའི་སེམས་སྡུག་གོ་ཞེས་རྟོག་སྟེ། དེ་ནི་ཚུལ་བཞིན་མ་ཡིན་པའོ། །མི་སྡུག་པའོ་ཞེས་མོས་པར་བྱེད་པ་ནི་རྣམ་པར་གྲོལ་བའོ། །རྣམ་པར་གྲོལ་གང་ན་བདེན་ཟད་པའོ། །ཅི་ཟད་ཅེ་ན། གང་ཟད་པ་དེ་ནི་འདོད་ཆགས་ཟད་པ། ཞེ་སྡང་ཟད་པ། གཏི་མུག་ཟད་པའོ། །དེ་ཅིའི་ཕྱིར་ཞེ་ན། འདོད་ཆགས་སྐད་ཅིག་གིས་ཟད་པར་འགྱུར་ཏེ། འདོད་ཆགས་ཀྱང་གཞན་ལ་ཟད་པ་ཡང་གཞན་ཞིག་ཡིན་དུ་ཟིན་ན་འདོད་ཆགས་ཡང་དག་པར་ཉིད་དུ་འགྱུར་རོ། །དེ་ལྟར་འདོད་ཆགས་ཡང་དག་པ་མ་ཡིན་བས་ཟད་པར་འགྱུར་ཡང་ཤཱ་རིའི་བུ་འདོད་ཆགས་ནི་ཚུལ་བཞིན་མ་ཡིན་པར་ཡིད་ལ་བྱེད་པ་ལས་བྱུང་བ། ཀུན་ཏུ་རྟོག་པས་ཕྱེ་བ་སྟེ། གང་ཀུན་མི་རྟོག་པ་དེ་ནི་མི་རྟོག་གོ། །རྟོག་པ་སྤངས་པ་ནི་ཡང་དག་པ་མ་ཡིན་པ་སྟེ། དེ་ལ་འདོད་ཆགས་བྱེད་པ་དེ་ནི་
ཡང་དག་པ་མ་ཡིན་ནོ། །གང་ཡང་དག་མ་ཡིན་བ་དེ་ལ་སྡུག་བསྔལ་མེད། ཡོངས་སུ་གདུང་བ་མེད་དོ། །གང་ཡོངས་སུ་གདུང་བ་མེད་པ་དེ་ནི་ཡང་དག་པ་མ་ཡིན་པའོ། གང་ཡང་དག་པ་མ་ཡིན་པ་དེ་ལ་གདུང་བ་མེད་དེ། དེ་ནི་བསིལ་བ་འགྱུར་པ་མྱ་ངན་ལས་འདས་པ་ཡིན་པས་དེ་ལ་འདོད་ཆགས་མེད་དོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ནི་སེམས་དང་ལྡན་པ་མ་ཡིན་ཏེ། འདི་ལྟར་འདོད་ཆགས་ཟད་པར་འགྱུར་རོ། མྱ་ངན་ལས་འདས་པ་ནི་འདོད་ཆགས་ཟད་པ་སྟེ། དེ་ལྟར་འདོད་ཆགས་ཀྱང་གཞན། མྱ་ངན་ལས་འདས་པ་ཡང་གཞན་ཏེ། གང་གཞན་པ་དེ་ནི་ཕ་རོལ་བས་ཀྱང་ཕ་རོལ་ལོ། །ཕ་རོལ་བས་ཀྱང་ཕ་རོལ་གང་ཡིན་པ་དེ་ནི་མཁས་པ་རྣམས་ཡོངས་སུ་ཚོལ་ཏེ་ཡོངས་སུ་ཚོལ་བ་ན་སྙིང་པོ་མི་དམིགས་སོ། །གང་སྙིང་པོ་མེད་པ་ནི་གསོག་གོ། །གསོག་གང་ཡིན་པ་དེ་ནི་གསོབ་བོ། །གསོབ་གང་ཡིན་པ་དེ་ནི་སྟོང་པའོ། །ཅིས་སྟོང་ཞེ་ན། བདག་དང་བདག་གི་དང་། རྟག་པ་དང་། བརྟན་པ་དང་། ཐེར་ཟུག་དང་། མི་འགྱུར་བའི་ཆོས་ཀྱིས་སྟོང་སྟེ། གང་སེམས་ཅན་མེད་པ་དེ་ནི་སྲོག་མེད་པ་སྟེ། དེ་ལས་འདོད་ཆགས་མི་སྐྱེ་ཞེ་སྡང་མི་སྐྱེ་སྟེ། གཏི་མུག་མི་སྐྱེའོ། །ཅི་ཡོད་པས་ང་ཞེས་བྱ་བའམ། ངའི་ཞེས་བྱ་བ་འམ། འདི་ནི་ང་། འདི་ནི་ངའི་འོ་ཞེས་ངར་འཛིན་པ་དང་། ང་ཡིར་འཛིན་པ་ལོག་པ་འདི་འབྱུང་ཞེ་ན། ང་ཡིར་འཛིན་པ་ལས་མངོན་པར་འདུ་བྱེད་པ་འབྱུང་སྟེ། དེ་ལ་མངོན་བར་འདུ་བྱེད་པ་ནི་བཞིའོ། །བཞི་གང་ཞེ་ན་ལུས་ཀྱིས་མངོན་པར་འདུ་བྱེད་དོ། །ངག་གིས་མངོན་པར་འདུ་བྱེད་དོ། །ཡིད་ཀྱིས་བརྟགས་ནས་ངག་རྩུབ་བོ་སྨྲས་ཏེ། །དེ་ནས་ཕྱིས་ལུས་ཀྱིས་གནོད་པར་བྱེད་དོ། །དེ་ལྟར་བདག་དང་གཞན་དུ་འདུ་ཤེས་པ་ལ་འདུ་ཤེས་འཛིན་པར་འགྱུར་རོ། །ཡང་ཤཱ་རིའི་བུ་བྱིས་པ་སོ་སོའི་སྐྱེས་བོ་ཐམས་ཅད་ནི་འདུ་ཤེས་ཀྱིས་མདུད་པ་ཡིན་ཏེ། ཤཱ་རིའི་བུ་དེ་ལ་བྱང་ཆུབ་སེམས་དཔས་ཕྱིན་ཅི་ལོག་གི་འདུ་ཤེས་འདི་ལྟ་བུ་རིག་ནས་སུ་ཡང་སྟེན་པར་མི་བྱེད་དོ། །དེ་ཅིའི་ཕྱིར་ཞེ་ན། སྟེན་པ་ལས་འཇིགས་པ་བྱུང་སྟེ། བདག་ནི་འཇིགས་པ་མི་འདོད་དོ་ཞེས་ཤཱ་རིའི་བུ་འདི་ཕྱིར་བྱང་ཆུབ་སེམས་དཔའ་སེམས་ཅན་ཐམས་ཅད་ལ་ཡིད་མི་རྟོན་པ་ཡིན་ནོ། །ཤཱ་རིའི་བུ་ཇི་ལྟར་ན་བྱང་ཆུབ་སེམས་
དཔའ་སེམས་ཅན་ཐམས་ཅད་ལ་ཕ་མར་འདུ་ཤེས་སྐྱེས་ཅེ་ན། ཤཱ་རིའི་བུ་འདི་ལ་ཡུན་རིང་པོའི་དུས་ན་མར་མ་གྱུར་པ་དང་། ཕར་མ་གྱུར་པའི་སེམས་ཅན་གང་ཡང་རྙེད་པར་སླ་བ་མ་ཡིན་ཏེ། སེམས་ཅན་ཐམས་ཅད་ཀྱང་ཕ་མར་གྱུར་ཏོ། དེ་དག་ལ་འདོད་ཆགས་ཀྱི་སེམས་སྐྱེས་ན་མར་འདུ་ཤེས་པ་སྤང་ངོ་། །ཞེ་སྡང་གི་སེམས་སྐྱེས་ན་ཕར་འདུ་ཤེས་པས་སྤོང་སྟེ། ཤཱ་རིའི་བུ་རྣམ་གྲངས་འདིས་ཅི་ནས་སེམས་ཅན་ཐམས་ཅད་བྱང་ཆུབ་སེམས་དཔའི་གཉེན་ཡིན་པར་དེ་ལྟར་རིག་པར་བྱའོ། །ཤཱ་རིའི་བུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ་ཡངས་པ། ཚད་མེད་པ། བསམ་གྱི་མི་ཁྱབ་པའི་དེའི་དུས་དེའི་ཚེ་ན། མཆོག་གི་ཚོགས་ཅན་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་ལོ་བྱེ་བ་ཕྲག་དགུ་བཅུའི་བར་དུ་བཞུགས་སོ། དེའི་ཉན་ཐོས་བྱེ་བ་ཁྲག་ཁྲིག་ཕྲག་དགུ་བཅུའི་འདུས་པ་ཆེན་པོ་བྱུང་ངོ་། ཡང་དེའི་ཚེ་བྱང་ཆུབ་སེམས་དཔའ་དྲན་པ་རྙེད་ཅེས་བྱ་བ་ཞིག་རྒྱལ་པོའི་རིགས་སུ་སྐྱེས་ཏེ། གཟུགས་བཟང་ཞིང་མཛེས་ལ་བལྟ་ན་སྡུག་སྟེ། ཁ་དོག་བཟང་པོ་རྒྱས་པའི་མཆོག་དང་ལྡན་པ་ཞིག་བྱུང་སྟེ། དེ་བཙས་མ་ཐག་ཏུ་མས་བུ་མོ་བརྒྱད་ཁྲི་བཞི་སྟོང་བྱིན། ཕས་བུ་མོ་བརྒྱད་ཁྲི་བཞི་སྟོང་བྱིན། མཛའ་བོ་དང་། ཉེ་དུ་དང་། སྣག་གི་གཉེན་མཚམས་ཀྱིས་བུ་མོ་བརྒྱད་ཁྲི་བཞི་སྟོང་བྱིན། ཕ་མའི་གཉེན་བཤེས་ཀྱིས་ཀྱང་བུ་མོ་བརྒྱད་ཁྲི་བཞི་སྟོང་གཉེན་གྱི་གཡོག་ཏུ་བྱིན་ནོ། ཤཱ་རིའི་བུ་བྱང་ཆུབ་སེམས་དཔའི་ཕས་ཁང་པ་གསུམ་བྱེད་དུ་བཅུག་པ་འདི་ལྟ་སྟེ། དཔྱིད་ས་དང་། དབྱར་ས་དང་། དགུན་ས་བྱས་སོ། བྱང་ཆུབ་སེམས་དཔའ་དུས་བཞིན་དུ་ཁང་པའི་སྟེང་ན་འདུག་སྟེ། གང་ན་འདུག་པ་འདིར་སིལ་སྙན་ཐོགས་པ་བརྒྱ་སྟོང་དུ་མ་འོངས་ནས། བསྙེན་བཀུར་དང་། རིམ་གྲོ་བྱེད་དེ། རོལ་མོའི་སྒྲ་ཕྱུང་མ་ཐག་ཏུ་བྱང་ཆུབ་སེམས་དཔའ་དེ་སྐྱེ་བ་དང་། འཇིག་པའི་འདུ་ཤེས་སྐྱེས་སོ། །
སྒྲ་འགགས་མ་ཐག་ཏུ་སྒྲ་འདི་ག་ལས་བྱུང་། གང་དུ་བྱུང་། གང་ནས་འགགས། གང་དུ་འགགས་ཤེས་ཡོངས་སུ་ཚོལ་ཏེ། དེ་མཚན་མོའི་འདུ་ཤེས་ཀྱང་མི་སྐྱེ། ཉིན་མོའི་འདུ་ཤེས་ཀྱང་མི་སྐྱེ་ཞིང་། གཞན་དུ་ན་མི་རྟག་པར་འདུ་ཤེས་སྐྱེ་སྟེ། དེ་མངོན་པར་མི་དགའ་བའི་འདུ་ཤེས་སྐྱེའོ། །ཤཱ་རིའི་བུ་དེ་ལྟར་བྱང་ཆུབ་སེམས་དཔའ་དྲན་པ་ཐོབ་པ་དེ་ལོ་སྟོང་ཕྲག་བཞི་བཅུར་ནམ་ཡང་ཡིད་རོལ་མོ་ལ་ཆགས་པར་མ་གྱུར་ཏོ། །ལོ་སྟོང་ཕྲག་བཞི་བཅུར་ནམ་ཡང་འདོད་པ་ལ་མ་སྤྱོད་དོ། །དེ་ཉིད་ན་དེ་ཁྱིམ་ན་གནས་བཞིན་དུ་བསམ་གཏན་བཞི་རྣམས་ལ་བསམ་གཏན་བྱེད་དེ། མངོན་བར་ཤེས་པ་ལྔ་བསྒྲུབས་ནས་དེ་ཁྱིམ་དེ་ནས་རྫུ་འཕྲུལ་གྱིས་སྟེང་གི་བར་སྣང་ལས་བཅོམ་ལྡན་འདས་མཆོག་གི་ཚོགས་ཅན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ག་ལ་བ་དེར་སོང་སྟེ་བཅོམ་ལྡན་འདས་མཆོག་གི་ཚོགས་ཅན་དེ་བཞིན་གཤེགས་པ་ལ་དགེ་བའི་རྩ་བའི་དངོས་པོ་ཅུང་ཟད་ཅིག་ཞུའོ་སྙམ་པ་དང་། ཤཱ་རིའི་བུ་བཅོམ་ལྡན་འདས་མཆོག་གི་ཚོགས་ཅན་དེ་བཞིན་གཤེགས་པ་དེ་ཉིད་ཀྱི་ཉིན་བར་ཡོངས་སུ་མྱ་ངན་ལས་འདས་ཏེ། དེ་ཡོངས་སུ་མྱ་ངན་ལས་འདས་པའི་དྲུང་དུ་ཕྱིན་ནས་དགེ་སློང་དག་དེ་བཞིན་གཤེགས་པ་ལ་བསྙེན་བཀུར་བགྱིའོ་ཞེས་དྲིས་ན། དེ་ལ་དགེ་སློང་དེ་དག་ན་རེ་རིགས་བུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སོ་ཞེས་ཟེར་རོ། ང་ཡོངས་སུ་མྱ་ངན་ལས་འདས་ཤེས་ཐོས་ནས་ས་ཕྱོགས་དེ་ཉིད་དུ་ངུ་ཞིང་བརྒྱལ་ནས། ཁ་བུབ་ཏུ་སའི་སྟེང་དུ་འགྱེལ་ནས་དེའི་ཚེ་ཚིགས་སུ་བཅད་འདི་དག་སྨྲས་སོ།། འཇིག་རྟེན་སྒྲོན་མཛད་འདི་ལྟ་བུ། ཆོས་རྣམས་ཀུན་གྱི་ཕ་རོལ་ཕྱིན། བག་མེད་གནས་སུ་བདག་སོང་བས། བདག་ཉིད་ཡོངས་སུ་བསླུས་བར་གྱུར།། བསྐལ་པ་བྱེ་བ་ཕྲག་སྟོང་གིས། དེ་བཞིན་གཤེགས་པ་འབྱུང་འགྱུར་ན། མགོན་པོ་བདག་གི་མཉེས་མ་བྱས། བདག་གི་སྐྱབས་གྱུར་སུ་ཞིག་ཡོད། བདག་ལ་སངས་རྒྱས་མ་བརྗོད་པ། མ་ནི་བདག་གི་དགྲ་ཡིན་སྙམ། སྐྱེས་མ་ཐག་ཏུ་དེ་ཡི་ཚེ།། དེ་བཞིན་གཤེགས་པ་བལྟ་བ་ཞིག། གང་གིས་འདོད་ལ་བདག་སྦྱར་བ། །ཕ་ནི་བདག་གི་དགྲར་
སེམས་ཏེ། །དེ་དག་དབང་དུ་གྱུར་པས་ན། འཇིག་རྟེན་མགོན་པོ་མ་མཉེས་བྱས། །འདི་ལྟར་སངས་རྒྱས་གསུང་སྒྲ་ནི། ཡན་ལག་དྲུག་བཅུ་བདག་མ་ཐོས། བདག་གིས་སངས་རྒྱས་མ་མཉེས་བྱས། །བདག་ལ་ཉམས་པ་ཆེན་པོ་བྱུང་། །འཇིག་རྟེན་ཕན་མཛད་ཐུགས་བརྩེ་དེ་ལྟ་བུ། །ཆོས་རྣམས་ཀུན་གྱི་ཕ་རོལ་ཕྱིན་པ་ནི། བག་མེད་པ་ཡིས་དེ་རིང་དུས་འདས་ཏེ། །རྐང་གཉིས་གཙོ་བོ་བདག་གིས་མ་མཉེས་བྱས། །བསྐལ་པ་ཁྲག་ཁྲིག་བྱེ་བ་ཕྲག་བརྒྱར་ཡང་། །སངས་རྒྱས་བརྒྱ་ལམ་མཐོང་བ་རྙེད་པར་དཀའ། བདེ་གཤེགས་མྱ་ངན་འདས་ནས་ཕྱིན་པ་ནི། །རྒྱལ་བ་དེང་འདིར་བདག་གིས་མ་མཉེས་བྱས། །སྐྱེས་མ་ཐག་ཏུ་སངས་རྒྱས་མ་བརྗོད་པ། །ཕ་དང་མ་ནི་དེ་རིང་དགྲ་ཡིན་སྙམ། །གལ་ཏེ་རྒྱལ་བ་བཞུགས་པ་མཐོང་གྱུར་ན། །ཆོས་རྣམས་ཉན་ཅིང་མཆོད་པ་བྱ་བ་ཞིག། བདེ་གཤེགས་མྱ་ངན་འདས་ནས་འདོང་འོངས་པས། །དེ་བཞིན་གཤེགས་པའི་ཡན་ལག་དྲུག་བཅུ་པོ། །དེ་དག་ཀུན་དང་ལྡན་པའི་དབྱངས་བྱུང་བ། རྒྱལ་བའི་དེ་དག་བདག་གིས་དེང་མ་ཐོས། མྱ་ངན་འདས་ནས་འདིར་ནི་བདག་ཕྱིན་པ། །དེ་རིང་བདག་ལ་ཉམས་པ་ཆེན་པོ་བྱུང། སྔོན་གི་སངས་རྒྱས་བདག་གི་རྟག་བསྟན་པ། །གྱ་ནོམ་ཆོས་རྣམས་བདག་ལ་མི་སྟོན་ཏོ། །དེ་ནས་ཤཱ་རིའི་བུ་བྱང་ཆུབ་སེམས་དཔའ་དེ་ས་ཕྱོགས་དེ་ནས་མྱུར་དུ་ལངས་ཏེ། བཅོམ་ལྡན་འདས་མཆོག་གི་ཚོགས་ཅན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ག་ལ་བ་དེར་སོང་སྟེ་ཕྱིན་ནས་དེ་བཞིན་གཤེགས་པའི་ཁྲི་ལ་ངུ་ཞིང་ལན་བརྒྱ་སྟོང་དུ་མ་བསྐོར་བ་བྱས་ནས་ས་ཕྱོགས་གཅིག་ཏུ་འདུག་སྟེ། ཚིགས་སུ་བཅད་པ་འདི་དག་གསོལ་ཏོ། །སེམས་ཅན་མཆོག་ནི་ཡང་དག་སྟེ། །ཡང་དག་ཆོས་རྣམས་བསྟན་པ་མཛད། །བྱང་ཆུབ་དམ་པ་མཆོག་གི་ཕྱིར། །བདག་གི་སེམས་ནི་ཡང་དག་སྐྱེ། །ཤེས་རབ་ཆེན་པོ་ཡང་དག་གསུང། །དེ་བཞིན་གཤེགས་པ་མི་མཐོང་སྟེ། །རྒྱལ་བ་ཁྱོད་ཀྱི་ཅི་འདྲ་བ། །བདག་གི་ཤེས་པ་འདི་འདྲར་གྱུར། །བདག་སྔོན་སྟོབས་ཀྱང་ཆུང་བ་སྟེ། །ཤེས་རབ་ཞན་པ་བདུད་ཀྱི་ཕྱོགས། །ཁྱིམ་གྱི་གནས་ན་མཆིས་པས་
ན། །མི་ཡི་གཙོ་བོ་མ་མཉེས་བགྱིས། །སྔོན་བགྱིས་བསོད་ནམས་མཆིས་བས་ནི། །དེ་བཞིན་གཤེགས་པ་བདག་གིས་མཐོང། །ཆོས་རྣམས་བདག་ལ་མི་སྟོན་པས། །དེ་ཕྱིར་ཤིན་དུ་སྡུག་བསྔལ་ལོ། ལྷ་དང་ཀླུ་ཡི་མདུད་དུ་ནི། །བདེན་པའི་ཚིག་རྣམས་བདག་གིས་བརྗོད། །ཇི་སྟེ་བདག་ནི་ཡང་དག་ཏུ། །ཇི་སྐད་སྨྲས་པ་བཞིན་གྱུར་ཏེ། །མ་འོངས་པ་ཡི་དུས་ཀྱི་ཚེ། །གླང་པོ་ཆེན་པོ་དོན་གཟིགས་པ། །ཡང་དག་ཉིད་ཀྱི་ཆོས་སྟོན་པ། །མོ་མཆོག་སངས་རྒྱས་འགྱུར་བར་བགྱི། མི་ཁོམ་བར་ནི་མི་སྐྱེ་ཞིང་། །སྐྱེས་ནས་འདོད་པ་བསྟེན་མི་བགྱིད། །བུད་མེད་དངོས་པོར་མི་འགྱུར་ཞིང་། །བདུད་ཀྱི་བཅིངས་པ་བཅད་པར་བགྱི །མངོན་སུམ་དུ་ནི་ཆོས་སྟོན་པ། །སངས་རྒྱས་རྣམས་ནི་རྟག་ཏུ་བལྟ། །མཐོང་ནས་རབ་ཏུ་དད་པར་བགྱི། །དད་ནས་སྟི་སྟང་རིམ་གྲོ་བགྱི །བདག་གིས་གང་སྨྲས་ཚིག་འདི་ནི། ཡང་དག་བདེན་པར་འགྱུར་ཞེ་ན། །བདེན་པ་དེས་ནི་སངས་རྒྱས་འདི། །བྱང་ཆུབ་བཞིན་དུ་བཞུགས་པར་ཤོག །ཚིག་འདི་རྣམས་ནི་སྨྲས་པ་དང་། །དེ་བཞིན་གཤེགས་པ་ཅོག་གེར་བཞུགས། །ལྷ་རྣམས་བྱེ་བ་སྟོང་ཕྲག་གིས། །དེ་ཚེ་རབ་ཏུ་གོས་རབ་གཏོར། །དེ་ནི་རབ་ཏུ་ཡིད་དགའ་ནས། །བར་སྣང་ལ་ནི་འདུག་ནས་སུ། །རྒྱལ་བ་དེ་ལ་ཚིགས་བཅད་བསྟོད། །སྣང་བར་གྱུར་ཕན་པའི་ཐུགས། །རྫུ་འཕྲུལ་ཆེན་པོ་དམ་པ་གསུང་། །མཆོག་གི་ཆོས་རྣམས་སྟོན་མཛད་པ། །སངས་རྒྱས་སྨྲ་བ་མགོན་པོ་དྲན། །དེས་ཚིགས་སུ་བཅད་པ་དེ་དག་སྨྲས་ནས་འཁོར་རྣམས་རྒྱ་ཆེར་ཚིམ་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བདག་ནི་མི་གཙོས་ལུང་བསྟན་ཏེ། །འཇིག་རྟེན་དུ་ཡང་སངས་རྒྱས་འགྱུར། །བདག་གི་རྗེས་སུ་སློབ་གྱིས་ལ། །དེ་བཞིན་གཤེགས་ལ་རིམ་གྲོ་གྱིས། །བདག་ལ་ཐུགས་བརྩེའི་ཕྱིར། །མྱ་ངན་འདས་པ་ཡང་བཞེངས་གྱུར་ན། །འཇིག་རྟེན་མགོན་པོ་བསམ་མི་ཁྱབ། །སུ་ཞིག་སངས་རྒྱས་དད་མི་བྱེད། །དེ་བཞིན་གཤེགས་པ་ལ་དེས་དགེ་བའི་རྩ་བ་བསྐྱེད་དེ་མཆོད་པ་དང་། །རིམ་གྲོར་ཆེར་བྱས་ནས་དགེ་
བའི་རྩ་བ་དེ་ཉིད་ཀྱིས་དེ་ནས་ཤི་འཕོས་པ་དང་། བདེ་འགྲོ་མཐོ་རིས་སུ་སྐྱེས་ཏེ། དེ་བསྐལ་པ་བྱེ་བ་ཕྲག་ཉི་ཤུར་ངན་འགྲོ་ལོག་པར་ལྟུང་བར་མ་སོང་ངོ་། །བསྐལ་པ་བྱེ་བ་ཕྲག་ཉི་ཤུར་འདོད་པ་ལ་ནམ་ཡང་ཡོངས་སུ་མ་སྤྱད་དོ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་རབ་ཏུ་འདོད་པའི་ཕྱིར་དེ་དག་ཐམས་ཅད་ལ་ཡང་མཆོད་པ་དང་། རིམ་གྲོ་ཆེར་བྱས་ཏེ་ཐམས་ཅད་ཏུ་ཡང་ཚངས་པར་སྤྱོད་བ་སྤྱད་ནས། དེ་བསྐལ་པ་ཐ་མ་དུས་ཐ་མ་ལ་ལུས་ཐ་མ་བདག་གི་དངོས་པོ་ཐ་མ་ཐོབ་པའི་ཚེ་རང་གི་དགེ་བའི་རྩ་བས་བསྐུལ་ནས་ས་ལའི་རྒྱལ་པོ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། ཤཱ་རིའི་བུ་བཅོམ་ལྡན་འདས་ས་ལའི་རྒྱལ་པོའི་ཚེའི་ཚད་ནི་བསྐལ་པ་བྱེ་བ་ཕྲག་ཉི་ཤུར་གྱུར་ཏོ། །ཤཱ་རིའི་བུ་དེ་བཞིན་གཤེགས་པ་ས་ལའི་རྒྱལ་པོའི་ཉན་ཐོས་འདུས་པ་ནི་གཉིས་བྱུང་སྟེ།ཉན་ཐོས་འདུས་པ་གཅིག་ལ་ནི་དགེ་སློང་བྱེ་བ་ཕྲག་ཉི་ཤི་ཡོད་དོ། །ཉན་ཐོས་འདུས་པ་གཉིས་པ་ལ་ནི་དགེ་སློང་སྟོང་ཕྲག་བཞི་བཅུ་ཡོད་དོ། །ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་མེད་པ། དབང་དང་ལྡན་པར་གྱུར་བ་ནས། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པའི་བར་དུའོ། །ཡོངས་སུ་མྱ་ངན་ལས་འདས་པའི་རིང་བསྲེལ་ཡང་རྒྱས་པར་གྱུར་ཏོ། །ཤཱ་རིའི་བུ་དེ་བཞིན་གཤེགས་པ་ས་ལའི་རྒྱལ་པོ་ཡོངས་སུ་མྱ་ངན་ལས་འདས་པའི་དམ་པའི་ཆོས་ལོ་སྟོང་ཕྲག་བཅུར་གནས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བསྐལ་པ་བྱེ་བ་ཉི་ཤུར་ནི། །ངན་འགྲོར་ནམ་ཡང་མ་སོང་སྟེ། །བསྐལ་པ་བྱེ་བ་ཉི་ཤུར་ཡང་། །འདོད་པ་དག་ལ་ཡོང་མ་སྟེན། །དེ་ཡི་བར་དུ་སངས་རྒྱས་ནི། །སྟོང་ཕྲག་བདུན་མྱ་ངན་འདས། །དེར་ནི་ཚངས་པར་སྤྱོད་སྤྱད་དེ། །ཆོས་འདོད་པར་ཡང་རྟག་ཏུ་གྱུར། །དེ་ཕྱིར་བྱང་ཆུབ་
སངས་རྒྱས་ནས། །རྒྱལ་བའི་ས་ལའི་དབང་པོར་གྱུར། །བྱེ་བ་སྟོང་ཕྲག་སུམ་བཅུ་རྣམས། །བྱང་ཆུབ་མཆོག་ལ་རབ་ཏུ་བཀོད། །སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་དམ་སངས་རྒྱས་ནས། །བསྐལ་པ་བྱེ་བ་ཉི་ཤུར་ནི། །སྲོག་ཆགས་རྣམས་ལ་ཆོས་སྟོན་ཏོ། །སྟོང་ཕྲག་དག་ནི་བཞི་བཅུ་དང་། །གཞན་ཡང་བྱེ་བ་ཉི་ཤུ་རྙེད། །ཐམས་ཅད་ཟག་ཟད་དྲང་སྲོང་གི། །དགེ་འདུན་དེ་ཚེ་དེ་ཡི་བྱུང་། །སྟོན་པ་མྱ་ངན་འདས་ནས་ཀྱང་། །རིང་བསྲེལ་ཤིན་ཏུ་རྒྱས་པར་གྱུར། །མཆོད་རྟེན་སྟོང་ཕྲག་དྲུག་བཅུ་དང་། །བྱེ་བ་དག་ཀྱང་དེར་བྱུང་ངོ་། །མྱ་ངན་འདས་ནི་དམ་པའི་ཆོས། །ལོ་ནི་སྟོང་ཕྲག་བཅུར་གནས་ཏེ། །རྒྱལ་བའི་བསྟན་པ་ཐོས་ནས་ནི། །སུ་ཞིག་དེ་ལ་དད་མི་བྱེད། །སངས་རྒྱས་ཀྱིས་ནི་ཆོས་ཐོས་ནས། །མཁས་པ་སུ་དག་ནེམ་ནུར་བྱེད། །དེ་དག་ངན་འགྲོར་མི་འགྲོ་སྟེ། །མྱུར་དུ་མྱ་ངན་འདས་པར་རེག །ཤཱ་རིའི་བུ་དེ་ལྟར་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་སེམས་ཅན་ཐམས་ཅད་ལ་མ་དང་ཕར་འདུ་ཤེས་སྐྱེད་དེ། །འདོད་ཆགས་ཀྱིས་སེམས་སྐྱེས་པ་ནི་མར་འདུ་ཤེས་པས་སྤོང་ངོ་། ཞེ་སྡང་གིས་སེམས་སྐྱེས་པ་ནི་ཕར་འདུ་ཤེས་པས་སྤོང་ངོ།། །བམ་པོ་བཅུ་གཅིག་པ། ཤཱ་རིའི་བུ་གཞན་ཡང་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་བདག་ཉིད་ལ་མི་མཐུན་པ་མང་དུ་གནས་པ་ཡིན་ཏེ། །དེ་འདོད་ཆགས་ཀྱི་ཕྱིར་ཚུལ་བཞིན་ཡིད་ལ་བྱེད་པས་འདོད་པ་ལ་ཡང་དག་པར་མི་མཐུན་པ་སྐྱེད་དོ། །དེ་འདོད་པ་དང་། །འདོད་པའི་མི་མཐུན་པ་ཡང་རབ་ཏུ་ཤེས་སོ། །དེ་ལ་འདོད་པ་གང་། །འདོད་པའི་མི་མཐུན་པ་གང་ཞེ་ན། །འདོད་པ་ཞེས་བྱ་བ་ནི་གང་མིག་གིས་ཤེས་པར་བྱ་བའི་གཟུགས་པ་མངོན་པར་ཆགས་པ་དེ་ནི་འདོད་པ་ཞེས་བྱའོ། །གཞན་ཡང་འདོད་པ་ཞེས་བྱ་བ་ནི་གང་རྣ་བས་ཤེས་པར་བྱ་བའི་སྒྲ་ལ་མངོན་པར་ཆགས་པའོ། །དེ་བཞིན་དུ་སྦྱར་ཏེ། །གང་སྣས་ཤེས་པར་བྱ་བའི་དྲི་དང་། ལྕེས་ཤེས་པར་བྱ་བའི་རོ་དང་། ལུས་ཀྱིས་ཤེས་པར་བྱ་བའི་རེག་བྱ་ལ་མངོན་པར་ཆགས་པ་དེ་ནི་འདོད་པ་ཞེས་བྱ་བའོ། །དེ་ལ་གང་མངོན་བར་ཆགས་པ་དེ་ནི་ལྷག་
པར་ཞེན་པའོ། །གང་ལྷག་པར་ཞེན་པ་དེ་ནི་ཀུན་དུ་སྦྱོར་བའོ། །གང་ཀུན་དུ་སྦྱོར་བ་དེ་ནི་མངོན་པར་འགྲུབ་པའོ། །གང་མངོན་པར་འགྲུབ་པ་དེ་ནི་འཆིང་བ་སྟེ། །དེ་ཡང་དག་པ་མ་ཡིན་བ་འདྲིད་པའོ། །དེ་ལྟར་ཀྱེ་མའོ་སེམས་ཅན་འདི་དག་ནི་ཡང་དག་པ་མ་ཡིན་པ་འདྲིད་པའི་འཆིང་བས་བཅིང་པ་སྟེ། །བཅིངས་པ། ངེས་པར་བཅིངས་པ། ཤིན་དུ་ངེས་པར་བཅིངས་པའོ། །ཅིས་བཅིངས་ཞེ་ན། གཟུགས་ཀྱིས་བཅིང་བས་བཅིངས་པ་ནི་བཅིངས་ཤེས་བྱ་བ་ནས་སྒྲ་དང་། དྲི་དང་། རོ་དང་། རེག་གི་བར་གྱི་འཆིང་པས་བཅིངས་པ་ནི་བཅིངས་པ་ཤེས་བྱ་བའོ། གཟུགས་ཀྱིས་བཅིངས་པ་གང་ཞེ་ན། འདི་ལྟ་སྟེ། ལུས་ཐོབ་པའི་གཟུགས་དེ་ལ་གང་བདག་ཏུ་འདུ་ཤེས་པ་དང་། སྲོག་ཏུ་འདུ་ཤེས་པ་དང་། གང་ཟག་ཏུ་འདུ་ཤེས་པ་དང་། རྟག་པར་འདུ་ཤེས་པ་དང་། བརྟན་པར་འདུ་ཤེས་པ་དང་། ཐེར་ཟུག་འདུ་ཤེས་པ་དང་། རྫེས་སུ་འདུ་ཤེས་པ་དང་། རིལ་པོར་འདུ་ཤེས་པ་དང་། གོང་བུར་འདུ་ཤེས་པ་དེ་ནི་གཟུགས་ཀྱིས་བཅིངས་པ་ཞེས་བྱའོ། ཡང་གཟུགས་ཀྱི་འཆིང་པ་གང་ཞེ་ན། །འདི་ལྟ་སྟེ། ལུས་མངོན་པར་གྲུབ་པ་དེ་ལ་རིམ་གྲོ་བྱའོ་སྙམ་ནས། དེ་བདག་ལ་བྱམས་པས་ཆུང་མ་ལ་མངོན་པར་ཆགས་པར་བྱེད་དེ། གཟུགས་ཀྱིས་འཆིང་བས་བཅིངས་ནས། འདོད་པའི་ལོངས་སྤྱོད་ཐོབ་པས་མི་དགེ་བའི་ལས་མངོན་པར་འདུ་བྱེད་དེ། འདོད་པའི་ཉེས་པ་མི་ཤེས་སོ། དེ་ལ་འདོད་པའི་ཉེས་པ་གང་ཞེ་ན། ཉེས་པ་དག་ལ་འདོད་པ་དང་། ཉེས་པ་ལ་འདོད་པ་མེད་མོད་ཀྱིས། གང་ངན་སོང་གཞོལ་བའི་འདོད་པའི་ཉེས་པ་དེ་དག་བསྟན་པར་བྱའོ་སྙམ་མོ། དེ་ལ་ངན་སོང་གཞོལ་བའོ་འདོད་པའི་ཉེས་པ་གང་ཞེ་ན། ཤཱ་རིའི་བུ་འདོད་པ་བསྟེན་པ་ནི་སྡིག་པ་མི་བྱེད་པ་ཅུང་ཟད་ཀྱང་མེད་དེ། དེའི་རྣམ་པར་སྨིན་པས་སྡུག་བསྔལ་ཡོངས་སུ་བཟུང་བར་མ་གྱུར་པ་གང་ཡང་མེད་ཅེས་བཤད་དོ། །དེ་ལྟར་ཤཱ་རིའི་བུ་སྟོང་གི་འཇིག་རྟེན་གྱི་ཁམས་སུ་རབ་ཏུ་བརྟགས་ན། ཇི་ལྟར་བདག་གི་ཆུང་མ་ལྟ་བུར་དགྲར་གྱུར་པ་ནི་གཞན་གང་ཡང་མེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་བཞིན་གཤེགས་པ་ནི་ཡེ་ཤེས་དང་ལྡན་ནོ། །སེམས་ཅན་
ཐམས་ཅད་ནི་མི་ཤེས་པ་སྟེ། གང་ཡེ་ཤེས་དང་ལྡན་པས་མེད་པ་དེ་ནི་རབ་ཏུ་ཡང་དག་པའོ། གང་མི་ཤེས་པས་ཡོངས་སུ་ཟིན་པ་དེ་ནི། ཡང་དག་པ་མ་ཡིན་པའོ། །མི་ཤེས་པས་གང་ཡོངས་སུ་བཟུང་ཞེ་ན། །འདུས་བྱས་ཡོངས་སུ་བཟུང་ངོ་། །བུ་དང་། བུ་མོ་དང་། །ཆུང་མ་ཡོངས་སུ་བཟུང་ངོ་། །དེས་དེ་ལྟར་ཡོངས་སུ་བཟུང་ངོ་། །ཕན་ཚུན་དུ་དེ་ལྟར་ཡོངས་སུ་བཟུང་། །འཕགས་པའི་ལམ་གྱིས་ཀུན་དུ་མ་བཟུང་སྟེ། །བུ་ཕོ་དང་། །བུ་མོ་དང་། ཆུང་མས་ཀུན་ཏུ་བསྐོར་ཅིང་། སྲེད་པ་ཉེ་བར་ལེན་པ་ནི་རབ་ཏུ་འབྱུང་བའི་བར་དུ་གཅོད་དོ། །ཚུལ་ཁྲིམས་ཀྱི་བར་དུ་གཅོད། །བསམ་གཏན་གྱི་བར་དུ་གཅོད། །མཐོ་རིས་ཀྱི་བར་དུ་གཅོད། །མྱ་ངན་ལས་འདས་པའི་བར་དུ་གཅོད་པའོ། །བྲན་ཕོ་དང་། བྲན་མོ་ཡོངས་སུ་འཛིན་པ་དང་། བུ་ཕོ་དང་། བུ་མོ་དང་། ཆུང་མ་ཡོངས་སུ་འཛིན་པ་ནི་དགེ་བའི་ཆོས་ཐམས་ཅད་ཀྱི་བར་དུ་གཅོད་པའོ། །གོང་མ་བཞིན་དུ་སྦྱར་ཏེ། །བུ་ཕོ་དང་། བུ་མོ་དང་། ཆུང་མ་ཡོངས་སུ་འཛིན་པ་ནི་དགྲར་གྱུར་པ་ཡོངས་སུ་འཛིན་པའོ། །སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ཡོངས་སུ་འཛིན་པའོ། །མདོར་ན་མི་དགེ་བ་ཐམས་ཅད་ཡོངས་སུ་འཛིན་པ་སྟེ། ཐ་ན་ཟས་བཟང་པོའི་ཡང་བར་དུ་གཅོད་པའོ། །སངས་རྒྱས་མཐོང་བའི་བར་དུ་གཅོད་པའོ། །གོང་མ་བཞིན་དུ་སྦྱར་ཏེ། ཆོས་མཉན་པ་དང་། དགེ་འདུན་ལ་བསྙེན་བཀུར་བྱ་བ་དང་། །སངས་རྒྱས་བལྟ་བར་དད་པ་རྙེད་པ་དང་། ཆོས་ཉན་པར་དད་པ་རྙེད་པ་དང་། དགེ་འདུན་ལ་བསྙེན་བཀུར་བྱ་བར་དད་པ་རྙེད་པ་དང་། དལ་བ་འབྱོར་བ་རྙེད་པའི་བར་དུ་གཅོད་པའོ། གོང་མ་བཞིན་དུ་སྦྱར་ཏེ། དད་པའི་ནོར་དང། ཚུལ་ཁྲིམས་ཀྱི་ནོར་དང་། ཐོས་པའི་ནོར་དང་། ཤེས་རབ་ཀྱི་ནོར་དང་། གཏོང་བའོ་ནོར་དང་། ཁྲེལ་ཡོད་པའི་ནོར་དང་། ངོ་ཚ་ཤེས་པའི་ནོར་རྙེད་པའི་བར་གཅོད་པའོ།། ཆུང་མ་དང་། བུ་དང་། བུ་མོ་དང་ཡོངས་སུ་འཛིན་པ་ནི་མ་དད་པ་ཡོངས་སུ་འཛིན་པའོ། ཆུང་མ་དང་། བུ་དང་། བུ་མོ་ཡོངས་སུ་འཛིན་པ་ནི་འཆལ་བའི་ཚུལ་ཁྲིམས་དང་། སེར་སྣ་དང་།
འཆལ་བའི་ཤེས་རབ་དང་། །། ཁྲེལ་མེད་པ་དང་། ངོ་ཚ་མི་ཤེས་པ་ཡོངས་སུ་འཛིན་པའོ། །ཆུང་མ་དང་།བུ་དང་། བུ་མོ་ཡོངས་སུ་འཛིན་པ་ནི་ནད་དང་། འབྲས་དང་། ཟུག་རྔུ་ཡོངས་སུ་འཛིན་པའོ། མའི་ཕུང་པོ་ཡོངས་སུ་འཛིན་པའོ། སྦྲུལ་གདུག་པ་ཡོངས་སུ་འཛིན་པའོ། ཁྱིམ་གྱི་གནས་ནི་དུར་ཁྲོད་ཀྱི་གནས་སོ། །དུར་ཁྲོད་དང་། ཁྱིམ་ནི་མྱ་དམ་དགོན་པ་སྨྲེ་བའི་ས་མེད་པ་སྟེ། ཆོས་དཀར་པོ་ཐམས་ཅད་རྒུད་པའོ་ཞེས་དེས་བཤད་དོ། བུ་དང་། བུ་མོ་དང་། ཆུང་མ་ལ་ཆགས་པ་ནི་རྡོའི་སེར་བ་འབབ་པ་ལ་ཆགས་པའོ། །རལ་གྲིའི་སོ་ལ་ཆགས་པའོ། ལྕགས་ཀྱི་ཁྲི་བསྲེགས་པ་ལ་ཆགས་པའོ། དེའི་མེ་ཏོག་དང་། སྤོས་དང་། ཕྲེང་བ་དང་། བྱུག་པ་ལ་ཆགས་པ་ནི་ལྕགས་ཀྱི་ཁྲི་དང་། ལྕགས་ཀྱི་ཐུ་ལུམ་གྱི་ཕྲེང་བ་དང་། བཤང་གཅིས་བྱུགས་པ་ལ་ཆགས་པའོ། ཁྱིམ་ཡོངས་སུ་འཛིན་པ་ནི་ལྕགས་ཟངས་ཡོངས་སུ་འཛིན་པའོ། །བྲན་ཕོ་དང་། བྲན་མོ་དང་། ལས་བྱེད་པའི་མི་ཡོངས་སུ་འཛིན་པ་ནི་སེམས་ཅན་དམྱལ་བའི་སྲུངས་མ་ཡོངས་སུ་འཛིན་པའོ། །གླང་པོ་ཆེ་དང་། །རྟ་དང་། རྔ་མོ་དང་། བ་ལང་དང་། བོང་བུ་དང་། ལུག་དང་། ཁྱིམ་བྱ་དང་། །ཕག་ཡོངས་སུ་འཛིན་པ་ནི་སྲོག་ཆགས་སྲེ་བོ་དང་། ཁྲ་བོ་དཔག་ཚད་བརྒྱ་བ་ཡོངས་སུ་འཛིན་པའོ། །ཆུང་མ་དང་། །བུ་དང་། བུ་མོ་ཡོངས་སུ་འཛིན་པ་ནི་སྡུག་བསྔལ་དང་། ཡིད་མི་བདེ་བ་དང་། འཁྲུག་པ་ཐམས་ཅད་ཡོངས་སུ་འཛིན་པའོ། ཤཱ་རིའི་བུ་ལྕགས་ཀྱི་ཁྲི་དཔག་ཚད་སྟོང་པ་རབ་ཏུ་ཚ་བ། ཀུན་ཏུ་རབ་ཏུ་འབར་བ། མེ་དང་འདྲ་བར་གྱུར་པ་དང་མཐད་སྦྱར་ཀྱང་བླའི། ཕ་དང་མས་བྱིན་པའི་ཆུང་མ་ལ་རྒྱང་རིང་པོ་ནས་ཀུན་དུ་ཆགས་པའི་སེམས་ཀྱིས་ལྟ་བ་ཡང་དེ་ལྟ་མ་ཡིན་ན་མཐད་སྦྱར་བ་ལྟ་ཅི་སྨོས། དེ་ཅིའི་ཕྱིར་ཞེ་ན། ཆུང་མ་ནི་སྡུག་བསྔལ་གྱི་རྩ་བའོ། ཆུང་མ་ནི་ཀུན་ནས་མནར་སེམས་ཀྱི་རྩ་བའོ། ཆུང་མ་ནི་འཆིང་བའི་རྩ་བའོ། ཆུང་མ་ནི་མྱ་ངན་གྱི་རྩ་བའོ། ཆུང་མ་ནི་དགྲའི་རྩ་བའོ།། ཆུང་མ་ནི་དམུས་ལོང་གི་རྩ་བའོ། ཆུང་མ་ནི་ཤེས་རབ་ཀྱི་མིག་དང་མི་མཐུན་པའི་རྩ་བའོ། ཆུང་མ་ནི་
ལྕགས་དང་རྡོ་བསྲེགས་པ་བཀྲམ་པའི་སའོ། །ཆུང་མ་ནི་ཕ་རོལ་གནོད་པར་བྱེད་པ་དང་འདྲ་བའོ།། ཆུང་མ་ནི་ལོག་པའི་ལས་ཀྱིས་རབ་ཏུ་གཟིར་བའོ། །ཅིའི་ཕྱིར་ཆུང་མ་ཞེས་བྱ་ཞེ་ན། །ཁུར་སྐུར་བ་དང་། ཁུར་ཁྱེར་བ་དང་། ཁུར་རབ་ཏུ་ལིན་པ་དང་། ཁུར་ཐོགས་པ་དང་། ཁུར་ཡོངས་སུ་ཐོགས་པ་དང་། ཁུར་གྱིས་ཉོན་མོངས་པ་དང་། ཁུར་གྱིས་ཉན་པ་དང་། ཁུར་གྱིས་བསྲབས་པས་ན་དེའི་ཕྱིར་ཆུང་མ་ཞེས་བྱའོ། སེམས་ཅན་དག་དེ་ལ་གསོ་བར་བྱེད་པ་ཞེས་ཀྱང་བྱ་སྟེ། སྲེད་པས་འཁོལ་བས་ཆུང་མ་ལ་གཞོལ་ཞིང་ཆུང་མས་ཡོངས་སུ་ཟིན། ཆུང་མས་ཕམ་བར་བྱས། ཆུང་མས་ཡོངས་སུ་བསྡུས། ཆུང་མས་དབང་བྱས། ཆུང་མས་འཁོལ། ཆུང་མའི་རྗེས་སུ་འབྲང་སྟེ། དེའི་ཕྱིར་ཆུང་མ་ཞེས་བྱའོ། ཆུང་མའི་ཕྱིར་ཁུར་ཆེན་པོ་མི་འདོར་རོ། ཁུར་གང་མི་འདོར་ཞེ་ན། འདི་ལྟ་སྟེ། ཕུང་པོ་ལྔའོ། ཕུང་པོ་ལྔ་གང་ཞེ་ན། གཟུགས་ཀྱི་ཕུང་པོ་དང་། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་སྟེ། ཕུང་པ་ལྔ་པོ་དེ་དག་གི་ཁུར་མི་འདོར་བས་འདི་ཕྱིར་ཆུང་མ་ཞེས་བྱའོ། ཅིའི་ཕྱིར་གོང་རྙིང་གཉིས་པ་ཞེས་བྱ་ཞེ་ན། འདི་ལྟར་ཤཱ་རིའི་བུ་ཚུལ་ཁྲིམས་ཉམས་པ་གཉིས་པའོ། ཆོས་ཉམས་པ་གཉིས་པའོ། ཡང་དག་པའི་ལྟ་བ་ཉམས་པ་གཉིས་པའོ། བཟའ་བ་དང་། བཏུང་བ་གཉིས་པའོ། སེམས་ཅན་དམྱལ་བ་དང་། དུད་འགྲོའི་སྐྱེས་གནས་དང་། གཤིན་རྗེའི་འཇིག་རྟེན་དུ་འགྲོ་བ་གཉིས་པའོ། འཕགས་པའི་ཤེས་རབ་ཀྱི་བར་ཆད་བྱེད་པའོ། མྱ་ངན་ལས་འདའ་བའི་བདེ་བ་ལ་མི་མཐུན་པའི་ཕྱོགས་བྱེད་པའོ། སྡུག་བསྔལ་ཐམས་ཅད་ཡང་དག་པར་སྡུད་པ་གཉིས་པ་སྟེ། དེའི་ཕྱིར་གོང་རྙིད་གཉིས་པ་ཞེས་བྱའོ། ཅིའི་ཕྱིར་བུད་མེད་ཅེས་བྱ་ཞེ་ན། ཉེས་པ་མང་ཞིང་སྒྱུ་མཐའ་ཡས་པས་དེའི་ཕྱིར་འདི་ནི་སྒྱུ་མ་སྟེ་བུད་མེད་ཅེས་བྱའོ། གང་བུད་མེད་ཀྱི་ལག་ཏུ་སོང་བ་དེ་དག་བདུད་ཀྱི་ལག་ཏུ་སོང་བའོ། །གང་བདུད་ཀྱི་ལག་ཏུ་སོང་བ་དེ་དག་སྡིག་ཅན་གྱི་དབང་དུ་སོང་བ་སྟེ། བུད་མེད་ནི་
ཉེས་པ་མང་བ། སྒྱུ་མཐའ་ཡས་པ། སེམས་ཡང་བ། སེམས་འགྱུར་བ། སེམས་མི་བརྟན་པ། སེམས་རབ་ཏུ་གཡོ་ཞིང་མི་བརྟན་པ། སྤྲེའུ་ཡི་སེམས། སྤྲེའུ་དང་མཚུངས་པ། སྒྱུ་མ་སྟོན་པ་ལ་མཁས་པ་སྟེ། དེའི་ཕྱིར་བུད་མེད་ཅེས་བྱའོ། ཤཱ་རིའི་བུ་བུད་མེད་ནི་སྒྱུ་མའི་གྲོང་ཁྱེར། སྒྱུ་མའི་རྒྱལ་པོ་ཕོ་བྲང་འཁོར། སྒྱ་མའི་གྲོང་རྡལ། སྒྱུ་མའི་རྒྱལ་པའི་ཡུལ་འཁོར། སྒྱུ་མའི་རྒྱལ་སྲིད། སྒྱུ་མའི་ཡུལ། སྒྱུ་མའི་འཇིག་རྟེན། སྒྱུ་མའི་འཇིག་རྟེན་གྱི་ཁམས་སྒྱུ་མ་མཐས་ཡས་པ། སྒྱུ་མའི་རྒྱས་པ། སྒྱུ་མ་དཔག་ཏུ་མེད་པ། སྒྱུ་མ་བསམ་གྱི་མི་ཁྱབ་པ་སྟེ། དེའི་ཕྱིར་བུད་མེད་ཅེས་བྱའོ། ཤཱ་རིའི་བུ་དེ་ལྟར་འདོད་པའི་ཉེས་པ་དེ་དག་ནི་ངན་སོང་དུ་འགྲོ་བའོ། ཞེས་བྱའོ་འདི་ལྟ་སྟེ། ཤཱ་རིའི་བུ་སྒྱུ་མ་བྱེད་པ་ཤིན་ཏུ་བསླབས་པ་ཞིག་ལྟད་མོ་པའི་ནང་དུ་སོང་ནས་སྒྱུ་མ་རྣམ་པ་སྣ་ཚོགས་ཉེ་བར་སྟོན་པ་དེ་བཞིན་དུ། ཤཱ་རིའི་བུ་བུད་མེད་བུད་མེད་ཀྱི་སྒྱུ་མ་ཤིན་ཏུ་བསླབས་པ་ཡང་མཐོང་བས་ཀྱང་སྐྱེས་བུ་འཆིང་བར་བྱེད། ཐོས་པས་ཀྱང་སྐྱེས་བུ་འཆིང་བར་བྱེད། རིག་པས་ཀྱང་སྐྱེས་བུ་འཆིང་ཞིང་དབང་དུ་བྱེད། གླུ་ལོན་པས་ཀྱང་སྐྱེས་བུ་ལ་དབང་དུ་བྱེད། གར་བྱེད་པས་ཀྱང་སྐྱེས་བུ་ལ་དབང་དུ་བྱེད། རྒོད་པས་ཀྱང་སྐྱེས་བུ་ལ་དབང་དུ་བྱེད་པ་ནས་ངུ་བ་དང་། འགྲོ་བ་དང། འོང་བ་དང་། འགྲེང་བ་དང་། འདུག་པ་དང་། ཉལ་བ་དང་། རྣམ་པ་ཐམས་ཅད་ཀྱིས་ཀྱང་སྐྱེས་བུ་ལ་འཆིང་ཞིང་དབང་དུ་བྱེད་དོ། འདི་ལྟ་སྟེ། ཤཱ་རིའི་བུ་འབྲས་སཱ་ལའི་ཞིང་ཕུན་སུམ་ཚོགས་པ་སྨིན་པ་ལ་སེར་བ་ཆེན་པོ་བབ་ན་བརླག་པ་དེ་བཞིན་དུ། ཤཱ་རིའི་བུ་བུད་མེད་ཀྱི་སེར་བ་ཡང་དེ་དང་འདྲ་སྟེ། སྐྱེས་བུའི་ཞིང་ལ་བབ་ན་ཆོས་དཀར་པོ་ཐམས་ཅད་རྣམ་པར་འཇིག་པར་འགྱུར་རོ། ཤཱ་རིའི་བུ་དེ་དག་ནི་ངན་སོང་དུ་གཞོལ་བའི་འདོད་པའི་ཉེས་པ་ཡིན་ན། གང་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་མི་ཤེས་པས་ཆུང་མ་ཡོངས་སུ་འཛིན་ཏོ། དེ་ལ་ཤཱ་རིའི་བུ་བྱང་ཆུབ་སེམས་དཔའ་མཁས་པས་ནི་འདོད་པའི་ཉེས་པ་འདི་དང་རིག་ནས་འདུ་ཤེས་གཉིས་སྐྱེད་དེ། གཉིས་གང་ཞེ་ན། བྱིས་པ་སོ་སོའི་སྐྱེ་བོ་ཐམས་ཅད་ལ་སྐྱེས་བུ་ངན་པར་འདུ་ཤེས་སྐྱེད་པ་
དང་། འཕགས་པའི་སེམས་ཅན་ཐམས་ཅད་ལ་སྐྱེས་བུ་དམ་པར་འདུ་ཤེས་སྐྱེད་པའོ། །དེ་འདུ་ཤེས་འདི་གཉིས་བསྐྱེད་ནས། འདི་སྙམ་དུ་སེམས་ཏེ། བདག་ནི་སྐྱེས་བུ་དམ་པའི་འགྲོས་སུ་འགྲོ་བར་བྱ་ཡི་སྐྱེས་བུ་ངན་པའི་འགྲོས་སུ་ནི་མ་ཡིན་ནོ། བདག་སེམས་ཅན་དམྱལ་བའི་འགྲོས་སུ་འགྲོས་སུ་འགྲོ་བར་མི་བྱ། དུད་འགྲོའི་སྐྱེ་གནས་ཀྱི་འགྲོས་སུ་མ་ཡིན། གཤིན་རྗེའི་འཇིག་རྟེན་གྱི་འགྲོས་སུ་འགྲོས་སུ་འགྲོ་བར་མི་བྱ། བདག་འཆལ་བའི་ཚུལ་ཁྲིམས་ཀྱི་འགྲོས་སུ་འགྲོ་བར་མི་བྱ། བདག་ཚུལ་ཁྲིམས་འཆལ་པ་དང་འགྲོགས་ཤིང་འགྲོ་བར་མི་བྱ་ཡི། མཆོག། དམ་པ། གཙོ་བོ། ཆོས་ཐམས་ཅད་སྒྲིབ་པ་མེད་པར་རྟོག་པ་སངས་རྒྱས་ཀྱི་ཡེ་ཤེས་ཀྱི་འགྲོགས་སུ་འགྲོ་བར་བྱའོ། བདག་རྒྱུན་ལས་བཟློག་པ་སྤྱོད་པར་བྱའི། རྒྱུན་གྱི་རྗེས་སུ་སྤྱོད་པར་མི་བྱ་བ་དག་སེང་གེའི་སྒྲ་སྒྲོགས་པར་བྱའི་ཝའི་སྒྲ་སྒྲོག་བར་མི་བྱ། བདག་ནམ་མཁའ་ལྡིང་གི་མཐུ་སྟོན་པར་བྱའི། སྲོག་ཆགས་ཕྲ་མོ་ལྟར་མི་བྱ། བདག་མི་ཅད་ཤེས་སུ་འགྱུར་བར་བྱ་ཡི། མི་མ་རུངས་པར་འགྱུར་བར་མི་བྱ། བདག་ཅང་ཤེས་ཀྱི་ཟས་དང་། ཟས་ངན་པ་མ་ཡིན་པ་བཟའ་བར་བྱ་སྟེ། བདག་ཅང་ཤེས་མ་ཡིན་བའི་ཟས་དང་། ཟས་ངན་པ་བཟའ་བར་བི་བྱའོ། བདག་བསམ་གཏན་བཟང་པོ་དང་། བསམ་གཏན་མཆོག་དང་། བསམ་གཏན་རབ་དང་། ཏིང་ངེ་འཛིན་དམ་པ་ཐོབ་པར་འགྱུར་པ་དེའི་རང་བཞིན་གྱི་བསམ་གཏན་དག་ལ་བསམ་གཏན་དུ་བྱ་སྟེ། དེའི་རང་བཞིན་མ་ཡིན་པའི་བསམ་གཏན་དང་། དམན་པའི་བསམ་གཏན་ལ་བསམ་གཏན་མི་བྱའོ། བདག་སངས་རྒྱས་ཀྱི་བསམ་གཏན་གྱིས་རྩེ་བར་བྱ་ཡི། ཉན་ཐོས་དང་། རང་སངས་རྒྱས་དང་། བྱིས་པ་སོ་སོའི་སྐྱེས་བོ་ཐམས་ཅད་ཀྱི་བསམ་གཏན་གྱིས་ནི་མ་ཡིན་ནོ། བདག་མི་གནས་པར་བསམ་གཏན་བྱ་སྟེ། གཟུགས་ལ་མི་གནས། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་མི་གནས། སའི་ཁམས་ལ་མི་གནས་པར་བསམ་གཏན་བྱའོ། ཆུའི་ཁམས་དང་། མེའི་ཁམས་དང་། རླུང་གི་ཁམས་ལ་མི་གནས་པར་བསམ་གཏན་བྱའོ། །འདོད་པའི་ཁམས་
ལ་མི་གནས། གཟུགས་ཀྱི་ཁམས་ལ་མི་གནས། གཟུགས་ཀྱི་ཁམས་ལ་མི་གནས། གཟུགས་མེད་པའི་ཁམས་ལ་མི་གནས། འཇིག་རྟེན་འདི་ལ་མི་གནས། འཇིག་རྟེན་ཕ་རོལ་ལ་མི་གནས། གང་མཐོང་བ་དང་། ཐོས་པ་དང་། དྲན་པ་དང་། རྣམ་པར་ཤེས་པ་དང་། ཐོབ་པ་དང་། རེག་པ་དང་། མངོན་སུམ་དུ་བྱས་པ་དེ་དག་ལ་ཡང་མི་གནས་པར་བསམ་གཏན་བྱའོ། བསམ་གཏན་བྱེད་ན་ཇི་ལྟར་བདག་ལ་གནོད་པར་མི་འགྱུར་བ་དང་། གཞན་ལ་གནོད་པར་མི་འགྱུར་བ་དང་། གཉིས་ག་ལ་གནོད་པར་མི་འགྱུར་བར་བྱའོ། བདག་སངས་རྒྱས་ཀྱི་ཡེ་ཤེས་ཡོངས་སུ་གྲུབ་བ་ཀུན་དུ་ཚོལ་གྱི། བདག་ལ་འདོད་པ་ཚོལ་བས་ནི་ཆོག་གོ། དེ་ལ་ཤཱ་རིའི་བུ་བྱང་ཆུབ་སེམས་དཔའ་མཁས་པས་ནི་ལྡོག་པ་བཞི་སྐྱེད་དེ། བཞི་གང་ཞེ་ན། འདོད་པ་ལས་ལྡོག་པ་དང་། སྲེད་པ་ལས་ལྡོག་པ་དང་། བྱས་པ་མི་གཟོ་བའི་སེམས་ལས་ལྡོག་པ་དང་། འདུ་བྱེད་ཏུ་གཏོགས་པའི་སྡུག་བསྔལ་ཐམས་ཅད་ལས་ལྡོག་པ་སྟེ། ལྡོག་པ་བཞི་པོ་དེ་དག་བསྐྱེད་དོ། ཤཱ་རིའི་བུ་བྱང་ཆུབ་སེམས་དཔའ་ངན་སོང་ན་གནས་པས་ཀྱང་ཁ་དོག་རྒྱས་པའི་བུད་མེད་མཐོང་ན་འདུ་ཤེས་བཞི་སྐྱེད་དེ། བཞི་གང་ཞེ་ན། ཉམས་པར་འདུ་ཤེས་པ་དང་། གཡང་སར་འདུ་ཤེས་པ་དང་། ཕྱི་ས་ཁུད་དུ་འདུ་ཤེས་པ་དང་། རྣག་ཏུ་བློས་ཉེ་བར་དཔྱོད་ཅིང་འདུ་ཤེས་པའོ། ཤཱ་རིའི་བུ་བྱང་ཆུབ་སེམས་དཔའ་ངན་སོང་ན་གནས་པ་ན་ཡང་ཁ་དོག་རྒྱས་པའི་བུད་མེད་མཐོང་ན་འདུ་ཤེས་འདི་བཞི་སྐྱེད་ན། མིར་གྱུར་པ་ན་ལྟ་ཅི་སྨོས་ཐེག་པ་ཆེན་པོ་ལ་ཞུགས་པའི་རིགས་བུས་ཁ་དོག་རྒྱས་པའི་བུད་མེད་མཐོང་ན་འདུ་ཤེས་འདི་བཞི་སྐྱེད་དེ། ཉམས་པར་འདུ་ཤེས་པ་དང་། གཡང་སར་འདུ་ཤེས་པ་དང་། ཕྱི་ས་ཁུང་དུ་འདུ་ཤེས་པ་དང་། རྣག་ཏུ་བློས་ཉེ་བར་དཔྱོད་ཅིང་འདུ་ཤེས་པའོ། གལ་ཏེ་དེ་ལྟར་བརྟགས་ཀྱང་འདོད་ཆགས་ཀྱི་སེམས་སྐྱེ་བ་ལྟ་ན། དེས་འདུ་ཤེས་གསུམ་བསྐྱེད་པར་བྱའོ། གསུམ་གང་ཞེ་ན། མ་འདྲ་བ་ལ་མར་འདུ་ཤེས་པ་དང་། སྲིད་མོ་འདྲ་བ་ལ་སྲིད་མོར་འདུ་ཤེས་པ་དང་། བུ་མོ་འདྲ་བ་ལ་བུ་མོར་འདུ་ཤེས་པ་སྟེ། འདུ་ཤེས་དེ་གསུམ་བསྐྱེད་པར་བྱའོ་ཞེས་དེ་ལྟར་ཤཱ་རིའི་བུ་བྱང་
ཆུབ་སེམས་དཔའ་དེས་ལེགས་པར་བཤད་པ་ཁོང་དུ་ཆུད་ནས་མདོ་སྡེ་དང་མཐུན་པར་བྱའོ། ཡུན་རིང་པོ་ནས་བདག་གི་མར་མ་གྱུར་པ་འམ། ཕར་མ་གྱུར་པའི་སེམས་ཅན་དེ་ལྟ་བུ་རྙེད་པར་སླ་བ་མ་ཡིན་ཏེ། སེམས་ཅན་ཐམས་ཅད་བདག་གི་མ་དང་། ཕར་གྱུར་པས་མ་ཉིད་ཆུང་མར་བྱ་བའི་མི་རིགས་སོ་ཞེས་དེ་ལྟར་བསླབ་པར་བྱའོ། བྱིས་པ་སོ་སོའི་སྐྱེ་བོ་ཐམས་ཅད་ནི་མི་མཐུན་པ་ལ་གནས་ཀྱིས། བདག་གི་མི་མཐུན་པ་ལ་གནས་པར་མི་བྱའོ། དེ་ལྟར་སྤྱད་ཀྱང་འདོད་ཆགས་ཀྱི་སེམས་དེ་ཉིད་ཀྱི་རྗེས་སུ་འབྲང་བ་ལྟ་ན། དེས་ཚུལ་བཞིན་དུ་སོ་སོར་བརྟགས་པར་བྱའོ། །འདི་ལྟ་སྟེ། འདོད་ཆགས་ཀྱི་སེམས་སྐྱེས་ན་དེ་ཅི་མཐོང་བ་ལས་སྐྱེས། འོན་ཏེ་འདོད་ཆགས་དེ་དམིགས་ལས་གྱུར་ན་དེས་འདི་ལྟར་ཚུལ་བཞིན་དུ་སོ་སོར་བརྟགས་པར་བྱའོ། བདག་མིག་ལ་ཆགས་ན་ཅི་མིག་གིས་མིག་མཐོང་ངམ། དེ་ཅི་རང་བཞིན་གྱིས་རང་བཞིན་མཐོང་ངམ། དེ་ཅིའི་ཕྱིར་ཞེ་ན། དེ་ཡང་མིག། འདི་ཡང་མིག་གོ། དེ་ཡང་འབྱུང་བ་ཆེན་པོ་ལས་གྱུར་པ་སྟེ། དེ་ཡང་འབྱུང་བ་ཆེན་པོ་ལས་བྱུང་བའོ། འདི་ཡང་འབྱུང་བ་ཆེན་པོ་ལས་བྱུང་བ་སྟེ། རང་བཞིན་གྱིས་རང་བཞིན་ལ་མི་ཆགས། བདག་གིས་བདག་རང་ལ་འང་མ་ཡིན་ནོ། དེ་ཅིའི་ཕྱིར་ཞེ་ན། དེ་ཇི་ཙམ་པ་འདི་ཡང་དེ་ཙམ་སྟེ། དེ་ལ་ཆགས་པ་དང་། འདི་ལ་ཆགས་པ་དེ་དག་ནི་ཁྱེད་པར་མེད་དེ་བྱིས་པ་སོ་སོའི་སྐྱེ་བོ་ཐམས་ཅད་ནི་ཁྱད་པར་མེད་པར་གནས་སོ། བདག་ནི་ཁྱད་པར་ཅན་དུ་འདོད་དོ། དེ་ཅིར་ཕྱིར་ཞེ་ན། འདི་ལྟ་སྟེ། འདོད་པ་ལ་རྣམ་པར་རྟོག་པ་དེ་ལྟ་བུ་ནི་ཡོན་ཏན་མ་ཡིན་ནོ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཕན་ཚུན་དག་ནི་དོན་གཅིག་སྟེ། དེ་ལ་ཁྱད་པར་ཡོད་མེད་པ། དེ་ནི་ཚུལ་བཞིན་མ་ཡིན་འཛིན། འདོད་ཆགས་སེམས་ནི་ཀུན་ནས་ལངས། འདི་ནི་འབྱུང་ལས་གྱུར་པ་སྟེ། འབྱུང་བ་ཆེ་ལ་ཇི་ལྟར་ཆགས། ཆོས་འདི་རྣམས་ནི་ཤིང་འདྲ་སྟེ། དེ་ལ་ཆགས་གྱུར་གང་ཡང་མེད། འདི་ནི་བདག་གིས་བརྟགས་པ་སྟེ། ཡང་དག་མིན་གྱིས་ཀུན་ནས་ལངས། མེད་པ་ལ་ནི་འདོད་ཆགས་སྐྱེ།
འདོད་ཆགས་ཉིད་ཀྱང་ཡོད་མ་ཡིན། ཕྱོགས་སུ་རྣམས་སུ་ཡོད་མ་ཡིན། འདོད་ཆགས་ཡོད་པ་མ་ཡིན་ཏེ། ཡང་དག་མ་ཡིན་ཡོངས་བརྟགས་པས། འདོད་ཆགས་སེམས་ནི་ཀུན་ནས་ལངས། གལ་ཏེ་དེ་ལྟར་སོ་སོར་བརྟགས་ཀྱང་འདོད་ཆགས་ཀྱི་སེམས་དེ་ཉིད་རྗེས་སུ་འབྲང་བ་ལྟ་ན་དེས་དམ་པ་རྒྱ་ཆེར་ལེགས་པར་བཤད་པ་ཁོང་དུ་ཆུད་ཅིང་མདོ་སྡེ་ལས་མཁས་པས་རབ་ཏུ་མདོ་སྡེ་དང་རྗེས་སུ་འཐུན་པར་བྱའོ། མིག་འདི་ནི་དབུ་བ་དང་འདྲ་སྟེ། མ་ཉེར་མི་བཟོད་དོ། དབུ་བ་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། སྐྱེས་བུ་མེད་ཤིང་ལས་སྐྱེས་མེད་ཤེད་བུ་མེད། བྱེད་པ་པོ་མེད། ཚོར་བ་པོ་མེད། དེ་ལྟར་བྱེད་པ་མེད་པའི་ཆོས་ལ་སུ་ཞིག་ཆགས་པར་འགྱུར། མིག་འདི་ནི་ཆུའི་ཆུ་བར་དང་འདྲ་སྟེ། རང་བཞིན་གྱིས་སྙིང་པོ་མེད་པའོ། ཆུའི་ཆུ་བུར་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། སྐྱེས་བུ་མེད། ཤིང་ལས་སྐྱེས་པ་མེད། ཤེད་བུ་མེད། བྱེད་པ་པོ་མེད། ཚོར་བ་པོ་མེད་དེ། དེ་ལྟར་བྱེད་པ་མེད་པ། གཡོ་བ་མེད་པའི་ཆོས་ལ་སུ་ཞིག་ཆགས་པར་འགྱུར། མིག་འདི་ནི་སྨིག་སྒྱུ་དང་འདྲ་སྟེ། ལས་དང་། ཉོན་མོངས་པ་དང་། སྲེད་པ་ལས་བྱུང་བའོ། སྨིག་སྒྱུ་ལ་ཡང་བདག་མེད། སེམས་མེད། སྲོག་མེད། གང་ཟག་མེད། སྐྱེས་བུ་མེད། ཤེད་ལས་སྐྱེས་མེད། ཤིང་བུ་མེད། བྱེད་པ་པོ་མེད། ཚོར་བ་པོ་མེད་དེ། དེ་ལྟར་བྱེད་པ་མེད་པ། གཡོ་བ་མེད་པའི་ཆོས་ལ་སུ་ཞིག་ཆགས་པར་འགྱུར། མིག་འདི་ནི་ཆུ་ཤིང་འདྲ་སྟེ། རང་བཞིན་གྱིས་སྙིང་པོ་མེད་པའོ། ཆུ་ཤིང་ལ་ཡང་བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར་བའི་བར་དུའོ། མིག་འདི་ནི་སྒྱུ་མ་དང་འདྲ་སྟེ། ཕྱིན་ཅི་ལོག་ལས་འབྱུང་བའོ།། སྒྱུ་མ་ལ་ཡང་བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར་བའི་བར་དུའོ། མིག་འདི་ནི་རྨི་ལམ་དང་འདྲ་སྟེ། མི་བདེན་པ་ཡང་དག་པ་མ་ཡིན་པ་མཐོང་བའོ། རྨི་ལམ་ལ་ཡང་བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་
འགྱུར་བའི་བར་དུའོ། མིག་འདི་ནི་བྲག་ཆ་དང་འདྲ་སྟེ། རྐྱེན་གྱི་ཁ་ན་ལུས་པའོ། བྲག་ཆ་ལ་ཡང་བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། མིག་འདི་ནི་གཟུགས་བརྙན་དང་འདྲ་སྟེ། ལས་ཀྱི་གཟུགས་བརྙན་གྱིས་ཀུན་དུ་སྣང་བའོ། ། གཟུགས་བརྙན་ལ་ཡང་བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། མིག་འདི་ནི་སྤྲིན་དང་འདྲ་སྟེ། གསལ་བ་འཁྲུག་པ་དང་བྲལ་བའི་མཚན་ཉིད་དོ། སྤྲིན་ལ་ཡང་བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། མིག་འདི་ནི་གློག་དང་འདྲ་སྟེ། སྐད་ཅིག་གིས་འཇིགས་པ་དང་ལྡན་པའོ། གློག་ལ་ཡང་བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། མིག་འདི་ནི་སྟོང་པ་དང་འདྲ་སྟེ། བདག་དང་བདག་གི་བྲལ་བའོ། དེ་ལྟར་ཆེས་རྣམས་སྟོང་པ་སྟེ། བདག་མེད་སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། མིག་འདི་ནི་བེམས་པོ་ལྟ་བུ་སྟེ། རྩ་དང་། ཤིང་དང་།རྩིག་པ་དང་། རྡོ་བ་དང་། མིག་ཡོར་ལྟ་བུའོ། དེ་ལྟར་ཆོས་ཐམས་ཅད་བེམས་པོ་སྟེ། བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར། གད་དུ་ཆགས་པར་འགྱུར་ཝའི་དུའོ། མིག་འདི་ནི་གཡོ་བ་མེད་པ་སྟེ། རླུང་གིས་འཁྲུལ་འཁོར་དང་ལྡན་བས་འཇུག་པའོ། དེ་ལྟར་ཆོས་ཐམས་ཅད་བྱེད་པ་མེད་དེ། བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། མིག་འདི་ནི་གསོབ་སྟེ། མི་གཙང་བ་དང་། རྣག་གི་ཚོགས་སོ། དེ་ལྟར་ཆོས་ཐམས་ཅད་གསོབ་སྟེ། བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། མིག་འདི་ནི་གསོག་སྟེ། འཇིག་པ་དང། འགྱེས་པ་དང། འབྱེ་བ་དང། འཐོར་བ་དང། འཇོམས་
པའི་ཆོས་ཅན་ནོ། དེ་ལྟར་ཆོས་ཐམས་ཅད་གསོག་སྟེ། བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། མིག་འདི་ནི་ཁྲོན་པ་རྙིང་པ་དང་འདྲ་སྟེ། རྟག་ཏུ་རྒ་བའི་ཟིལ་གྱིས་གནོན་ཏོ། དེ་ལྟར་ཆོས་ཐམས་ཅད་ཁྲོན་པ་རྙིང་པ་དང་འདྲ་སྟེ། བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། མིག་འདི་ནི་ཐ་མར་མི་གནས་པ་སྟེ། ཐ་མར་འཆི་བའོ། དེ་ལྟར་ཆོས་ཐམས་ཅད་ནི་མཐར་མི་གནས་པ་སྟེ། བདག་མེད། སེམས་ཅན་མེད། སྲོག་མེད། གང་ཟག་མེད། སྐྱེས་བུ་མེད། ཤེད་ལས་སྐྱེས་མེད། ཤེད་བུ་མེད། བྱེད་པ་པོ་མེད། ཚོར་བ་པོ་མེད་དེ། དེ་ལྟར་བྱེད་པ་མེད་ཅིང་རྐྱེན་འདུས་པ་ལས་བྱུང་བ་དེ་ལ་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་དེ་བཞིན་དུ་ནང་དང་། ཕྱིའི་སྐྱེ་མཆེད་ཐམས་ཅད་ལ་ཡང་རྒྱས་པར་སྦྱར་བར་བྱའོ། ཤཱ་རིའི་བུ་དེ་ལྟར་ཚུལ་བཞིན་དུ་རབ་ཏུ་སྦྱོར་བའི་བྱང་ཆུབ་སེམས་དཔའ་འདོད་ཆགས་ཀྱི་མི་འཕྲོགས་ཏེ། དེ་ལྟ་བུའི་གནས་མེད་དོ། དེ་ཆོས་ཐམས་ཅད་ལ་འདོད་ཆགས་དང་བྲལ་བ་ཡིན་ནོ། ཤཱ་རིའི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཡོངས་སུ་དག་པའོ། ཤཱ་རིའི་བུ་དེ་ལྟར་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རྣམ་པ་ཐམས་ཅད་ཏུ་སྲོག་ཆགས་ལ་གསོད་པར་མི་བྱེད་དེ། སྲོག་ཆགས་སུ་གྱུར་པ་ཐམས་ཅད་ལ་གནོད་པ་མ་ཡིན་ནོ། སྲོག་གི་ཕྱིར་ཡང་རྣམ་པ་ཐམས་ཅད་ཏུ་མ་བྱིན་བར་མི་ལེན་ཏེ། གཞན་གྱི་ལོངས་སྤྱོད་ལ་མི་རྐུ་བ་ཡིན་ནོ། སྲོག་གི་ཕྱིར་ཡང་རྣམ་པ་ཐམས་ཅད་ཏུ་འདོད་པས་ལོག་པར་གཡེམ་བ་མི་སྟེན་ཏེ། གཞན་གྱི་ཆུང་མ་ལ་སྙིང་ཆགས་པར་མི་བྱེད་དོ། སྲོག་གི་ཕྱིར་ཡང་བརྫུན་གྱི་ཚིག་མི་སྨྲ་སྟེ། སེམས་ཅན་ཐམས་ཅད་ལ་མི་བསླུ་བ་ཡིན་ནོ། བདག་གི་གཡོག་གིས་ཆོག་པས་ཕྲ་མའི་ཚིག་མི་ཟེར་བ་ཡིན་ནོ། སྲོག་གི་ཕྱིར་ཡང་ཕྲ་མའི་ཚིག་མེད་པ་ཡིན། ཚིག་གཞན་མི་སྨྲ་བས་ཚིག་ཚོད་བཟུང་བ་ཡིན། སྲོག་གི་ཕྱིར་གཞན་
གྱི་ལོངས་སྤྱོད་ལ་བརྣབ་སེམས་མི་བསྐྱེད་པས་གཞན་གྱི་ལོངས་སྤྱོད་ལ་བརྣབ་སེམས་མེད་པ་ཡིན། སྲོག་གི་ཕྱིར་ཡང་ངན་དུ་སྨྲ་བ་དང་། ངན་དུ་རྗོད་པའི་ཚིག་དང་དུ་ལེན་པས་མི་ཁྲོ་ཞིང་བཟོད་པ་ཡིན། སངས་རྒྱས་ལ་སྐྱབས་སུ་སོང་བས་སྲོག་གི་ཕྱིར་ལོག་པར་ལྟ་བ་མི་སྤྱོད་དེ་ལྷག་གཞན་མེད་པ་ཡིན། དེ་ཡེ་ཤེས་གཞན་ལ་རེ་བ་མེད་པས་མ་ཉམས་པའི་ཚུལ་ཁྲིམས་ཡིན། ངན་པར་སྐྱེ་བ་ཡོངས་སུ་སྤངས་པས་སྐྱོན་མེད་པའི་ཚུལ་ཁྲིམས་ཡིན། འགྲོ་བ་ངན་བ་ཉོན་མོངས་པ་རྣམས་དང་མ་འདྲེས་པས་འདྲེན་མ་མ་ཡིན་པའི་ཚུལ་ཁྲིམས་ཡིན། ཆོས་དཀར་པོ་གཅིག་ཏུ་རྣམ་པར་འཕེལ་བས་སྲ་སྲེ་མེད་པའི་ཚུལ་ཁྲིམས་ཡིན། ཇི་ལྟར་འདོད་པ་བཞིན་དུ་འགྲོ་བས་རང་དབང་གི་ཚུལ་ཁྲིམས་ཡིན། འགྲོ་བ་མཁས་པས་མ་སྨད་པས་བསྔགས་པའི་ཚུལ་ཁྲིམས་ཡིན། དྲན་པ་དང་ཤེས་བཞིན་དང་ལྡན་བས་ཤིན་དུ་བསྲུངས་པའི་ཚུལ་ཁྲིམས་ཡིན། ཉེས་པ་ཐམས་ཅད་ཏུ་མི་སྐྱེ་བས་མ་སྨད་པའི་ཚུལ་ཁྲིམས་ཡིན། དབང་པོའི་སྒོ་བསྡམས་པས་ཤིན་ཏུ་སྦས་པའི་ཚུལ་ཁྲིམས་ཡིན། སངས་རྒྱས་ཐམས་ཅད་ཀྱིས་དགོངས་པས་རྣམ་པར་བསྒྲགས་པའི་ཚུལ་ཁྲིམས་ཡིན། རུང་བ་ལ་ཆོག་ཤེས་པས་འདོད་པ་ཉུང་བའི་ཚུལ་ཁྲིམས་ཡིན། སྤོང་བ་ལ་དགའ་བའི་ཆོག་ཤེས་པའི་ཚུལ་ཁྲིམས་ཡིན། ལུས་དེང་སེམས་རབ་ཏུ་དབེན་བས་ནན་ཏན་གྱི་ཚུལ་ཁྲིམས་ཡིན། འདུ་བ་ལ་མི་དགའ་བས་དགོན་པ་ལ་གནས་པའི་ཚུལ་ཁྲིམས་ཡིན། གཞན་གྱི་གདོང་དུ་མི་ལྟ་བས་འཕགས་པའི་རིགས་ལ་དགའ་བའི་ཚུལ་ཁྲིམས་ཡིན། བདག་གི་ཁ་ན་ལས་པའི་དགེ་བའི་རྩ་བ་སྐྱེད་པས་སྦྱངས་པའི་ཡོན་ཏན་གྱི་ཚུལ་ཁྲིམས་ཡིན། ལྷ་དང་མི་རྣམས་མི་སླུ་བས་ཇི་ལྟར་སྨྲས་པ་དེ་ལྟར་བྱེད་པའི་ཚུལ་ཁྲིམས་ཡིན། སེམས་ཅན་ཐམས་ཅད་ལ་མི་འཚེ་བས་བྱམས་པའི་ཚུལ་ཁྲིམས་ཡིན། སྡུག་བསྔལ་ཐམས་ཅད་དང་དུ་ལེན་པས་སྙིང་རྗེའི་ཚུལ་ཁྲིམས་ཡིན། ཆོས་ལ་དགའ་ཞིང་ཞུམ་པ་མེད་པས་དགའ་བའི་ཚུལ་ཁྲིམས་ཡིན། རྗེས་སུ་ཆགས་པ་དང་། ཁོང་ཁྲོ་བ་སྤོངས་བས་བཏང་སྙོམས་ཀྱི་ཚུལ་ཁྲིམས་ཡིན། རང་གི་སེམས་ངེས་པར་རྟོགས་པས་བདག་གིས་འཁྲུལ་པ་ལ་སོ་སོར་རྟོག་པའི་ཚུལ་ཁྲིམས་ཡིན། གཞན་གྱི་
སེམས་རྗེས་སུ་སྲུང་བས་གཞན་གྱི་འཁྲུལ་པ་ལ་ཉེས་པར་མི་ལྟ་བའི་ཚུལ་ཁྲིམས་ཡིན། སྦྱིན་པའི་ཕ་རོལ་ཏུ་ཕྱིན་པས་སེམས་ཅན་ཡོངས་སུ་སྦྱིན་བར་བྱེད་པའི་ཚུལ་ཁྲིམས་ཡིན། ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་ཤིན་ཏུ་བསྲུངས་པའི་ཚུལ་ཁྲིམས་ཡིན། བཟོད་པའི་ཕ་རོལ་ཏུ་ཕྱིན་པས་ཁོང་ཁྲོ་མེད་པའི་ཚུལ་ཁྲིམས་ཡིན། བརྩོན་འགྲུས་ཀྱི་ཕ་རོལ་ཏུ་ཕྱིན་པས་དགེ་བའི་ཆོས་མི་ཟློགས་པའི་ཚུལ་ཁྲིམས་ཡིན། བསམ་གཏན་གྱི་ཕ་རོལ་ཏུ་ཕྱིན་པས་བསམ་གཏན་གྱི་ཡན་ལག་ཡོངས་སུ་རྫོགས་པའི་ཚུལ་ཁྲིམས་ཡིན། ཤེས་རབ་ཀྱི་ཕ་རོལ་ཏུ་ཕྱིན་པས་ཐོས་པ་རབ་ཀྱི་ཚུལ་ཁྲིམས་ཡིན། བྱང་ཆུབ་ཀྱི་ཡན་ལག་གི་ཚོགས་བསགས་པས་དགེ་བའི་བཤེས་གཉེན་ལ་སྟེན་པའི་ཚུལ་ཁྲིམས་ཡིན། ལམ་ངན་པ་ཡོངས་སུ་སྤོང་བས་སྡིག་པའི་གྲོགས་པོ་ཡོངས་སུ་སྤོང་བའི་ཚུལ་ཁྲིམས་ཡིན། མི་རྟག་པའི་འདུ་ཤེས་སོ་སོར་རྟོག་པས་ལུས་ལ་མི་ལྟ་བའི་ཚུལ་ཁྲིམས་ཡིན། ཡིད་མི་རྟོན་པས་སྲོག་མི་ལྟ་བའི་ཚུལ་ཁྲིམས་ཡིན། བསམ་པ་ཤིན་ཏུ་ཡོངས་སུ་དག་པས་མི་འགྱོད་པའི་ཚུལ་ཁྲིམས་ཡིན། རབ་ཏུ་སྦྱོར་བ་ཤིན་དུ་ཡོངས་སུ་དག་པས་བཅོས་མ་ཡིན་པའི་ཚུལ་ཁྲིམས་ཡིན། ལྷག་པའི་བསམ་པ་ཤིན་དུ་ཡོངས་སུ་དག་བས་ཡོངས་སུ་གདུང་བ་མེད་པའི་ཚུལ་ཁྲིམས་ཡིན། འདོད་ཆགས་དང་བྲལ་བས་མི་རྒོད་པའི་ཚུལ་ཁྲིམས་ཡིན། སྒྲུབ་པས་མི་སྙེམས་པའི་ཚུལ་ཁྲིམས་ཡིན། ཅང་ཤེས་པས་མུ་ཅོར་མི་སྨྲ་བའི་ཚུལ་ཁྲིམས་ཡིན། ཁྲོ་བ་མེད་པས་དུལ་བའི་ཚུལ་ཁྲིམས་ཡིན། ཉེ་བར་ཞི་བའི་ཚུལ་ཁྲིམས་ཡིན། ཇི་ལྟར་བསྒོ་བ་བཞིན་ལས་འགལ་བར་མི་བྱེད་པས་བཀའ་བློ་བདེ་བའི་ཚུལ་ཁྲིམས་ཡིན། བསྡུ་བའི་དངོས་པོ་རྗེས་སུ་མི་གཏོང་བས་སེམས་ཅན་ཡོངས་སུ་སྨིན་པར་བྱེད་པའི་ཚུལ་ཁྲིམས་ཡིན། རང་གི་ནོར་རབ་ཏུ་མི་འཇིགས་པས་ཆོས་རྗེས་སུ་སྲུང་པའི་ཚུལ་ཁྲིམས་ཡིན་ནོ། ཤཱ་རིའི་བུ་བྱང་ཆུབ་བྱང་ཆུབ་སེམས་དཔའ་མཁས་པ་ནི་འདི་ལྟ་བུའི་ཚུལ་ཁྲིམས་ཀྱི་ཕུང་པོ་དང་ལྡན་བས་བྱང་ཆུབ་སེམས་དཔའི་སྤྱོད་དོ། ཤཱ་རིའི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྟེ། བྱང་ཆུབ་སེམས་དཔའ་དེ་ལ་བརྩོན་པ་བྱང་ཆུབ་སེམས་
དཔའི་སྤྱད་པ་སྤྱོད་པ་རྣམས་བདུད་དང་། བདུད་ཀྱི་རིས་ཀྱི་ལྷའི་བུས་མི་ཐུབ་པ་ཡིན། ཕས་ཀྱི་རྒོལ་བ་གཞན་དག་གིས་ཀྱང་མི་ཐུབ་པ་ཡིན་ནོ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ལེའུ་སྟེ། བདུན་པའོ།། །།