ཉི་ཤུ་རྩ་བཞི་པ། གནས་གཙང་མ་པའི་ལེའུ།
དེ་ནས་གནས་གཙང་མའི་རིས་ཀྱི་ལྷ་རྣམས་ཀྱིས་དེའི་ཚེ་སེམས་ཅན་དཔག་ཏུ་མེད་པ་བྱང་ཆུབ་ཏུ་ཡང་དག་པར་ཞུགས་པར་རིག་ཅིང་སངས་རྒྱས་ཀྱི་ཆོས་རྣམས་ལ་ཐེ་ཚོམ་མེད་པར་གྱུར་པར་རིག་ནས་ཆིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་སོ་སོ་ནས་མངོན་པར་བསྟོད་དོ། །དེ་ལ་ལྷའི་བུ་སྦྱིན་པ་ལ་མོས་པས་གསོལ་པ། ཁྱོད་ཀྱིས་སྡུག་པའི་སྲས་རྣམས་དང་། །བཙུན་མོ་དང་ནི་སྲོག་ཕངས་བཏང་། །རྒྱལ་སྲིད་བཏང་བར་ཅི་སྨོས་ཏེ། །སྦྱིན་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་ཚུལ་ཁྲིམས་ལ་མོས་པས་གསོལ་པ། ཁྱོད་ཀྱིས་ཚུལ་ཁྲིམས་རྣམ་སྦྱངས་པ། །རྣམ་པ་ཀུན་དུ་བསྙེངས་མི་མངའ། །ཤིན་དུ་བསླབས་པས་མཐར་ཕྱིན་པ། །ཁྲིམས་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་བཟོད་པ་ལ་མོས་པས་གསོལ་པ། །ཁྱོད་ཀྱིས་བཟོད་པ་བསྟེན་མཛད་པས། །ཡན་ལག་གཏུབས་པའང་བཟོད་པར་མཛད། །ཟབ་མོར་སྒྱིད་ལུག་མ་ལགས་ཏེ། །བཟོད་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་བརྩོན་འགྲུས་ལ་མོས་པས་གསོལ་པ། །བརྩོན་པ་མ་བཏང་བརྩོན་འགྲུས་ཏེ། །སྟོབས་ཆེན་བརྩོན་འགྲུས་ལྡན་གྱུར་པས། །རྫོགས་པའི་བྱང་ཆུབ་མཆོག་བརྙེས་པ། །བརྩོན་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་བསམ་གཏན་ལ་མོས་པས་གསོལ་པ། །ཁྱོད་ཀྱིས་བསམ་གཏན་བསྟེན་མཛད་པ། །དེ་ལ་འཇིག་རྟེན་གཏིང་མི་རྙེད། །དུས་གསུམ་མཉམ་པ་ཉིད་བརྙེས་པ། །བསམ་གཏན་མཐར་ཕྱིན་ཕྱག་ཀྱང་འཚལ། །ལྷའི་བུ་གཟི་བརྗིད་དང་ལྡན་པས་གསོལ་པ། ། དགའ་བོས་ཤེས་རབ་ཕ་རོལ་ཕྱིན། །ཡང་དང་ཡང་ནི་བསྒོམས་པས་ན། །ཐམས་ཅད་མཁྱེན་པ་ཉིད་བརྙེས་པ། །ཤེས་རབ་མཐར་ཕྱིན་ཕྱག་ཀྱང་འཚལ། །ལྷའི་བུ་ཁམས་ཀྱི་བློ་གྲོས་ཀྱིས་གསོལ་པ། །སྦྱིན་པ་དག་དང་དག་སྙན་དང་། །དོན་སྤྱད་འཐུན་པའི་དོན་དག་གིས། །འཇིག་རྟེན་འདི་དག་ཁྱོད་ཀྱིས་བཏུལ། །
འདྲེན་པ་ཁྱོད་ལ་ཕྱག་ཀྱང་འཚལ། །ལྷའི་བུ་དགེ་བའི་བློ་གྲོས་ཀྱིས་གསོལ་པ། །བྱམས་ཆེན་ཐུགས་རྗེ་ཆེན་པོ་དག །ཡུན་རིང་དུས་ནས་སྒོམ་མཛད་དེ། །སེམས་ཅན་དཔག་ཡས་ཡོངས་སུ་བསྒྲལ། །གདོས་འཛིན་ཁྱོད་ལ་ཕྱག་ཀྱང་འཚལ། །ལྷའི་དག་པའི་སེམས་ཀྱིས་གསོལ་པ། །ཉོན་མོངས་མེད་པའི་མཐར་ཕྱིན་ཅིང་། །ཐུབ་ཆེན་དུལ་བའི་སེམས་མངའ་བས། །མ་དུལ་ཐམས་ཅད་དུལ་མཛད་པ། །ཁ་ལོ་སྒྱུར་ལ་ཕྱག་ཀྱང་འཚལ། །ལྷའི་བུ་བློ་གྲོས་དྲི་མ་མེད་ཀྱིས་གསོལ་པ། །སེམས་དག་མཉེན་པའི་སེམས་མངའ་བ། །སེམས་དུལ་དབང་པོ་ཞི་མངའ་བ། །སེམས་ཅན་ཀུན་གྱི་སེམས་མཁྱེན་པ། །སེམས་མཁྱེན་ཁྱོད་ལ་ཕྱག་ཀྱང་འཚལ། །ལྷའི་བུ་བློ་གྲོས་རྣམ་པར་དག་པས་གསོལ་པ། །ཤེས་དང་ལྡན་པའི་བློ་གྲོས་ཅན། །བློ་གྲོས་མཆོག་ལ་རབ་ཏུ་ཞུགས། །ཐུགས་གསལ་ཕུན་སུམ་ཚོགས་པའི་བློ། །མི་མཁས་རྟོགས་མཛད་ཕྱག་ཀྱང་འཚལ། །ལྷའི་བུ་སེམས་བརྒྱན་གྱིས་གསོལ་པ། །ཁྱོད་ཀྱི་སེམས་ནི་རྣམ་པར་སྦྱངས། །སངས་རྒྱས་ཞིང་ཡང་རྣམ་དག་མཛད། །སེམས་ཅན་བློ་ཡང་རྣམ་སྦྱངས་པ། །ཀུན་དགའ་ཁྱོད་ལ་ཕྱག་ཀྱང་འཚལ། །ལྷའི་བུ་ཕམ་པ་མེད་པས་གསོལ་པ། །དགོངས་པ་ཕམ་པ་མི་མངའ་བ། །ཁྱོད་ཀྱིས་བདུད་ཀྱི་དཔུང་ཡང་བཅོམ། །ཁྱོད་ཀྱིས་ལྷ་ཚོགས་ཐམས་ཅད་ཀྱང་། །རབ་ཏུ་དགའ་བའི་ཡིད་དུ་བསྒྱུར། །ལྷའི་བུ་མྱུར་དུ་བྱེད་པས་གསོལ་པ། །ཁྱོད་ཀྱིས་ཆོས་རྣམས་མྱུར་བར་མཁྱེན། །སེམས་ཅན་མྱུར་བར་རྣམ་པར་སྦྱངས། །ཟབ་ཅིང་ལྟ་དཀའི་ཆོས་དག་ལ། །མྱུར་དུ་མཛད་ལ་ཕྱག་ཀྱང་འཚལ། །ལྷའི་བུ་བརྩོན་འགྲུས་བརྟན་པས་གསོལ་པ། །བྲལ་གྱུར་ཡོངས་སུ་བྲལ་གྱུར་བ། །ཆུ་བོ་རྒལ་ཏེ་ཟག་པ་སྦྱངས། །ཕ་རོལ་ཕྱིན་ཅིང་ཐང་ལ་བཞུགས། །བརྩོན་འགྲུས་བརྟན་ལ་ཕྱག་ཀྱང་འཚལ། །ལྷའི་བུ་སྤྱོད་ལམ་དང་ལྡན་པས་གསོལ་པ། །འདོད་ཆགས་སྤངས་ཤིང་ཞེ་སྡང་སྤངས། །གཏི་མུག་སྤངས་པ་ཟག་མེད་པ། །སྦྱིན་གནས་བསོད་ནམས་ཞིང་གྱུར་པ། །འཇིག་རྟེན་མཆོད་འོས་ཕྱག་ཀྱང་འཚལ། །ལྷའི་
བུ་ཤིན་ཏུ་བརྟན་པས་གསོལ་པ། །ཁྱོད་ཀྱི་དམ་ཆོས་ཤིན་དུ་བརྟན། །འཇིག་རྟེན་གསུམ་དུ་རབ་ཏུ་མཆོད། །གཅིག་པུ་བགྲོད་པས་བདེ་བ་རྙེས། །དེ་ཕྱིར་ཁྱོད་ལ་ཕྱག་ཀྱང་འཚལ། །ལྷའི་བུ་མི་འཁྲུགས་པས་གསོལ་པ། །ལྷུན་སྟུག་གཅིག་ཏུ་གྱུར་པའི་རི། །རླུང་གིས་བསྐྱོད་པར་མི་ནུས་ཏེ། །དེ་བཞིན་བསྟོད་དང་སྨད་པ་ཡིས། །བདེ་གཤེགས་བསྐྱོད་པར་མི་ནུས་སོ། །ལྷའི་བུ་མཉམ་པ་ཉིད་ཐོབ་པས་གསོལ་པ། །དཔའ་བོ་ཆེན་པོ་ཟབ་ཅིང་མཉམ། །མཚན་རབ་སུམ་བཅུ་རྩ་གཉིས་ཅན། །ཤེས་རབ་ཟབ་མོ་བློ་ལྡན་པ། །རྒྱལ་བ་མཛེས་ལ་ཕྱག་ཀྱང་འཚལ། །ལྷའི་བུ་ཟབ་པའི་བློ་གྲོས་ཀྱིས་གསོལ་པ། །སྐུ་ཆེན་ཁྱོད་ལ་སྐུ་མི་མངའ། །དེ་བཞིན་ཉིད་ལ་རབ་ཏུ་བཞུགས། །ཡང་དག་མཐའ་ཡས་རབ་ཏུ་སྟོན། །ཁྱོད་མཚུངས་གང་ཟག་ཡོད་མ་མཆིས། །ལྷའི་བུ་བློ་གྲོས་དང་བས་གསོལ་པ། །གཉིས་སུ་མེད་པས་ཡང་དག་སྟོན། །དཔའ་བོ་དཔའ་བས་རྣམ་པར་གནོན། །གང་དག་ཟབ་ལ་ཞུམ་མ་མཆིས། །དེ་དག་ཁྱོད་ཆོས་ཕ་རོལ་ཕྱིན། །ལྷའི་བུ་རབ་ཏུ་དགའ་བས་གསོལ་པ། །མཆོག་ཏུ་དགའ་ཡིད་བརྟན་པ་དག །ཁྱོད་ཀྱི་སློབ་ལ་བསླབས་པའི་རྣམས། །སྦྲུལ་རྣམས་ལྤགས་པ་རྙིང་འདོར་བཞིན། །སྲིད་པ་གསུམ་པོ་འདི་དག་འདོར། །ལྷའི་བུ་ཞི་བའི་ཡིད་ཀྱིས་གསོལ་པ། །ཇི་ལྟར་མར་མེ་མར་ཟད་ཅིང་། །སྙིང་པོ་ཟད་པས་ཞིར་འགྱུར་བཞིན། །ཁྱོད་ཀྱིས་བསྟན་པ་མྱུར་ཐོས་ནས། །ཤེས་རབ་ཆེན་པོ་མྱ་ངན་འདའ། །ལྷའི་བུ་ཞི་གནས་ལ་གནས་པས་གསོལ་པ། །གང་གིས་ཀུན་མཁྱེན་ཁྱོད་མཐོང་བའི། །མི་རྣམས་འདོད་ཆགས་བཅིངས་པ་ཡང་། །ཤེས་རབ་མཚོན་གྱིས་མཁས་པ་དང་། །འདོད་ཆགས་ཞགས་པ་གཅོད་པར་འགྱུར། །ལྷའི་བུ་གནས་མང་གིས་གསོལ་པ། །ཞི་བའི་སེམས་མངའ་ཞི་ལ་སྤྱོད། །ཆོ་ག་སྤྱོད་ཡུལ་རབ་ཏུ་ཞི། །ཉོན་མོངས་ཐམས་ཅད་ཞི་གྱུར་པ། །དགྲ་རྣམས་ཞི་ལ་ཕྱག་ཀྱང་འཚལ། །ལྷའི་བུ་ཞི་གནས་འཇིག་མེད་ཀྱིས་གསོལ་པ། །ཁྱོད་ཀྱི་ཞི་གནས་བསླབས་པ་ཡི། །བྱང་ཆུབ་སེམས་དཔའ་གྲགས་ཆེན་དག །
ཞི་གནས་ཉིད་ཀྱིས་འབྱུང་འགྱུར་ཞིང་། །སེམས་ཞི་དེ་བཞིན་གཤེགས་པར་འགྱུར། །ལྷའི་བུ་ཞི་གནས་ཟས་ཀྱིས་གསོལ་པ། །ཆོས་རྣམས་ཀུན་ཀྱི་ཞི་བ་ནི། །དཔའ་བོ་ཁྱོད་ཀྱིས་རབ་ཏུ་བསྟན། །ཤེས་རབ་ཆེན་པོས་དེ་འཚལ་ན། །དེ་དག་དེ་བཞིན་གཤེགས་པར་འགྱུར། །ལྷའི་བུ་རྟག་ཏུ་རྣམ་པར་ལྟ་བས་གསོལ་པ། །ཁྱོད་ཀྱིས་སེམས་ཅན་རྟག་ཏུ་གཟིགས། །མཁས་པ་ཁྱོད་ལྟར་སློབ་པ་རྣམས། །ཡེ་ཤེས་མཆོག་གིས་མཉམ་བཞག་ཅིང་། །བྱང་ཆུབ་མཆོག་ཀྱང་ཐོབ་པར་འགྱུར། །ལྷའི་བུ་སྣང་འཛིན་གྱིས་གསོལ་པ། །ཤེས་རབ་ཕ་རོལ་ཕྱིན་གྱུར་པ། །ཐུབ་ཆེན་ཁྱོད་ལ་གང་སློབ་པ། །དེ་དག་འཇིག་རྟེན་སྣང་མཛད་ཅིང་། །སྒྲིབ་པ་མེད་པར་གཟིགས་པར་འགྱུར། །ལྷའི་བུ་འོད་བྱེད་ཀྱིས་གསོལ་པ། །འཇིག་རྟེན་སྒྲོན་མ་ཁྱོད་ཀྱིས་གསུངས། །ཡེ་ཤེས་རྒྱ་མཚོ་དེ་ཐོས་ནས། །དེ་དག་དྲི་མེད་བདེ་བ་འཐོབ། །བསམ་གྱིས་མི་ཁྱབ་འོད་ཀྱང་འབྱུང་། །ལྷའི་བུ་དྲི་མ་མེད་པའི་འོད་ཀྱིས་གསོལ་པ། །ཆོས་རྣམས་ཐམས་ཅད་རྣམ་མི་རྟོག ། ཐབས་ལ་མཁས་པས་དེ་དག་གསུངས། །དེ་འདྲའི་ཡེ་ཤེས་སྟོན་བགྱིད་པ། །དེ་དག་གང་ཟག་མཆོག་ཏུ་འགྱུར། །ལྷའི་བུ་རབ་ཏུ་མི་གནས་ཀྱིས་གསོལ་པ། །གནས་མ་མཆིས་ཤིང་བླང་མ་མཆིས། །ཆོས་རྣམས་ཐམས་ཅད་སེམས་མ་མཆིས། །བདག་དང་གཞན་གྱི་རྣམ་འགྱུར་བ། །དེ་དག་ཁྱོད་ཀྱིས་དེ་བཞིན་མཁྱེན། །ལྷའི་བུ་གནས་མེད་བློ་གྲོས་ཀྱིས་གསོལ་པ། །གནས་མ་མཆིས་ཤིང་བླང་མ་མཆིས། །ཆོས་རྣམས་ཐམས་ཅད་རྟེན་མ་མཆིས། །སེམས་ཅན་མ་མཆིས་ཕན་ཚུན་མིན། །ལག་མཐིལ་སྐྱུ་རུ་ར་བཞག་བཞིན། །ཡང་དག་ཇི་བཞིན་ཁྱོད་ཀྱིས་བསྟན། །ལྷའི་བུ་བར་སྣང་རྒྱུ་བས་གསོལ་པ། །བདེ་གཤེགས་ཁྱོད་ཀྱིས་ཆོས་ཀྱི་གནས། །བར་སྣང་ལྟ་བུར་སྣང་བ་སྟེ། །སྐྱེ་དང་འགོག་པ་མེད་པར་གཟིགས། །དེ་སླད་
འཇིག་རྟེན་ཆགས་མི་མངའ། །ལྷའི་བུ་ངར་འཛིན་པ་མེད་པས་གསོལ་པ། །ཁྱོད་ཀྱིས་འགྲོ་བ་འདི་དག་ཀུན། །ལུས་ཀྱི་ངོ་བོ་ཉིད་ཀྱིས་ནན། །གཡོ་བ་མེད་ཅིང་ངར་འཛིན་མེད། །སྤྱོད་མེད་རྩོལ་བ་མེད་པར་གཟིགས། །ལྷའི་བུ་བློ་གྲོས་རྣམ་པར་བསྒོམས་ཀྱིས་གསོལ་པ། །སྒྱུ་མ་སྣ་ཚོགས་ལེགས་བགྱིས་པ། །སྒྱུ་མའི་མཁན་པོས་བསྟན་གྱུར་ན། །དེ་བཞིན་མ་ལགས་དེ་བཞིན་གདའ། །ཐུབ་པ་དེ་ལྟར་མཉམ་མ་མཆིས། །ལྷའི་བུ་རབ་ཏུ་སད་པའི་ངང་ཚུལ་གྱིས་གསོལ་པ། །གཟུགས་བརྙན་ཇི་ལྟར་མེ་ལོང་ལ། །གདའ་ཡང་དེ་ལྟར་མ་མཆིས་པ། །དེ་བཞིན་ཆོས་རྣམས་ཁྱོད་ཀྱིས་གཟིགས། །དེ་བས་འཇིག་རྟེན་རྨོངས་མི་མངའ། །ལྷའི་བུ་ཡིད་གཉིས་རྣམ་པར་འཇིག་གིས་གསོལ་པ། །སངས་རྒྱས་གཟུགས་བརྙེན་ལྟ་བུ་སྟེ། །དེ་བཞིན་སངས་རྒྱས་ཆོས་ཀྱི་རྣམས། །དེ་བཞིན་ཁྱོད་ཀྱིས་བསྟན་པ་མཛད། ། དེ་ལྟར་འགྲོ་བ་ཀུན་ཀྱང་མཁྱེན། །ལྷའི་བུ་སྤོབས་པ་ཐོགས་མེད་ཀྱིས་གསོལ་པ། །ཆོས་ཉིད་ལ་ནི་ཁོར་ཟུག་ཏུ། །སྤོབས་པ་རབ་ཏུ་འབྱུང་འགྱུར་ཞིང་། །ཆོས་ཉིད་དེ་ནི་བརྙེས་པས་ན། །དེ་སྤང་ཁྱོད་ནི་སྤོབས་པ་ལྡན། །ལྷའི་བུ་ཆགས་མེད་བློ་གྲོས་ཀྱིས་གསོལ་པ། །ཁྱོད་ཀྱི་ཆོས་འདི་ཐམས་ཅད་ནི། །རང་བཞིན་མཚན་ཉིད་མ་མཆིས་པར། །ཡང་དག་ཇི་བཞིན་རབ་ཏུ་མཁྱེན། །དེ་བས་ཐུབ་པས་རབ་རིབ་བསལ། །ལྷའི་བུ་མྱ་ངན་བྲལ་གྱིས་གསོལ་པ། །མྱ་ངན་མེད་ཅིང་ཉེར་ལེན་མེད། །སྤོས་པ་མེད་མེད་ཅིང་རྙོག་པ་མེད། །ཆོས་རྣམས་ཀུན་དུ་ཉོན་མ་མོངས། །དེ་དག་རང་བཞིན་ཁྱོད་ཀྱིས་མཁྱེན། །ལྷའི་བུ་རྟོགས་པ་ཕུན་སུམ་ཚོགས་པས་གསོལ་པ། །ཆོས་རྣམས་ཡང་དག་མ་ལགས་དེ། །འགྲོ་དང་འོང་བ་མ་མཆིས་པ། །དེ་དག་ཁྱོད་ཀྱིས་ཡང་དག་མཁྱེན། །དེ་བཞིན་རབ་ཏུ་བསྟན་པ་མཛད། །ལྷའི་བུ་བློ་གྲོས་མཆོག་གི་གསོལ་པ། །ལྷུན་གྱིས་གྲུབ་ཅིང་བླ་ན་མེད། །རྨོངས་པ་མེད་ཅིང་ཤེས་པ་མེད། །ཆོས་རྣམས་ཅི་ཡང་མི་བགྱིད་པ། །ཁྱོད་ཀྱིས་རང་བཞིན་ཐུགས་སུ་ཆུད། །སྣང་
བ་མ་མཆིས་མུན་མ་མཆིས། །གཟུགས་མེད་མ་ལགས་གཟུགས་ཅན་མིན། །གཟུང་བ་མ་མཆིས་གྲོལ་མ་མཆིས། །ཁྱོད་ཀྱིས་རང་བཞིན་ཐུགས་སུ་ཆུད། །ལྷའི་བུ་མིག་གདངས་ཀྱིས་གསོལ་པ། །ཡུལ་དང་ཕྱོགས་ན་མི་གནས་པ། །ཡོད་དང་མེད་པ་མ་ལགས་པར། །རྨི་ལམ་འདོད་པ་ཇི་བཞིན་དུ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་མིག་མི་འཛུམ་གྱིས་གསོལ་པ། །ཡུལ་དང་ཕྱོགས་ན་མི་གནས་པ། །ཡོད་དང་མེད་པ་མ་ལགས་པར། །རྨི་ལམ་འདོད་པ་ཇི་བཞིན་དུ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་མིག་མི་འཛུམ་གྱིས་གསོལ་པ། །བྱིས་པ་རྣམས་ཀྱི་བློ་རྨོངས་པ། །མ་སྐྱེས་པ་དང་མ་འགགས་པ། །བར་ནའང་གནས་པ་མཆིས་པ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་སྟོང་པ་ཉིད་ལ་གནས་པས་གསོལ་པ། །གང་ཟག་སེམས་ཅན་མ་མཆིས་པ། །མ་མཆིས་ཐ་སྙད་མ་མཆིས་པ། །བསྟན་པའི་སླད་དུ་བརྗོད་བགྱིད་པ། །དེ་དག་རང་བཞིན་ཁྱོད་ཀྱིས་གཟིགས། ། ལྷའི་བུ་མཚན་མ་མེད་པ་ལ་གནས་པས་གསོལ་པ། །གང་གིས་ཐ་སྙད་གདགས་པ་ཡི། །མཚན་མ་མེད་དག་མ་མཆིས་ཏེ། །ཆོས་ཀུན་མཚན་མ་མ་མཆིས་པར། །རྣམ་པར་འདྲེན་པ་ཁྱོད་ཀྱིས་གཟིགས། །ལྷའི་བུ་སྨོན་པ་མེད་པ་ལ་གནས་པས་གསོལ་པ། །ཇི་ལྟར་མཚན་མ་སྟོང་གྱུར་ཅིང་། །སྨོན་པ་དམིགས་སུ་མ་མཆིས་དང་། །སུ་ལ་སྨོན་ལམ་མཆིས་གྱུར་དེ་ཡང་དེ་ལྟའི་ཚུལ་དུ་མཁྱེན། །ལྷའི་བུ་ཏིང་ངེ་འཛིན་ལ་གཞོལ་བས་གསོལ་པ། རྣམ་ཐར་སྒོ་ལ་བརྟེན་བགྱིས་ཤིང་། །གང་ཞིག་གྲོལ་འགྱུར་དེ་མ་མཆིས། །དེ་བཞིན་ཀུན་ནས་ཉོན་མོངས་པ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་མ་སྨད་པས་གསོལ་པ། །ཐུབ་ཁྱོད་གསུང་ནི་དོན་མཆིས་ཏེ། །ཆོས་ཀྱི་འཁོར་ལོ་རབ་ཏུ་བསྐོར། །ཤིན་དུ་བརྟག་ཏེ་མཛད་
པས་ན། །དེ་ནི་ཐམས་ཅད་མཁྱེན་པའི་མཚན། །ལྷའི་བུ་གློ་གྲོས་ཕུན་སུམ་ཚོགས་པས་གསོལ་པ། །ཆོས་རྣམས་ཐམས་ཅད་དངོས་ཉིད་ཀྱིས། །མ་སྐྱེས་འགག་པ་མ་ལགས་ཏེ། །དེ་དག་བདེ་གཤེགས་ཁྱོད་ཀྱིས་མཁྱེན། །གཞན་ཡང་དེ་བཞིན་རྟོགས་པར་མཛད། །ལྷའི་བུ་སེང་གེའི་ང་རོས་གསོལ་པ། །ཁྱོད་ཀྱིས་སྟོང་པ་ཉིད་བསྟན་ཏེ། །སེང་གེའི་ང་རོ་བསྒྲགས་མཛད་པས། །མུ་སྟེགས་ཅན་ཀུན་རབ་འཇིགས་པ། སེང་གེས་རི་དྭགས་ཕྲ་མོ་བཞིན། །ལྷའི་བུ་བག་ཡོད་ལས་གྱིས་གསོལ་པ། །བག་ཡོད་སྔོན་དུ་བཏང་མཛད་དེ། །ཁྱོད་ཀྱིས་སྤྱོད་པ་སྤྱད་བགྱིས་པས། །སངས་རྒྱས་ཆོས་ལ་འདྲེན་པ་ཁྱོད། །བག་ཡོད་པས་ནི་ངེས་པར་འབྱུང་། །ལྷའི་བུ་བག་ཡོད་རབ་གནས་ཀྱིས་གསོལ་པ། །བག་ཡོད་པ་ལ་རབ་གནས་ཏེ། །ཁྱོད་ཀྱིས་ཉིད་ཀྱི་ཆོས་ཀྱང་སྤེལ། །སྟོབས་བཅུ་གཞན་ཡང་སངས་རྒྱས་ཆོས། །བསམ་གྱིས་མི་ཁྱབ་རབ་ཏུ་སྤེལ། །ལྷའི་བུ་བག་ཡོད་སྐྱེས་ཀྱིས་གསོལ་པ། །བག་ཡོད་པ་ལ་བརྩོན་པས་ན། །བྱང་ཆུབ་ཕྱོགས་རྣམས་ཡང་དག་སྐྱེས། །ཐུབ་ཆེན་རང་ཡང་གྲོལ་གྱུར་ནས། །དེ་དག་རྣམས་ནི་འཇིག་རྟེན་འགྲེལ། །ལྷའི་བུ་བག་ཡོད་ངེས་པར་བྱུང་གིས་གསོལ་པ། །བྱང་ཆུབ་སེམས་དཔའ་ཉན་ཐོས་དག །ཇི་སྙེད་ཐར་ལ་རྟེན་པའི་རྣམས། །ཀུན་ཀྱང་ཁྱོད་ལ་བསླབས་པ་སྟེ། །བག་ཡོད་པས་ནི་ངེས་པར་འབྱུང་། །ལྷའི་བུ་བག་ཡོད་གནས་པས་གསོལ་པ། །བག་ཡོད་ཡོངས་སུ་མ་བཏང་བས། །རྣམ་པར་འདྲེན་པ་ཁྱོད་ཀྱི་སྲས། །འགྲོ་བ་འདི་ལ་མ་ཆགས་པར། །ཐམས་ཅད་མཁྱེན་དུ་ངེས་པར་བྱུང་། །ལྷའི་བུ་བག་ཡོད་བསྲུངས་ཀྱིས་གསོལ་པ། །བྱང་ཆུབ་ལམ་ལ་བསྟེན་མཛད་ཅིང་། །ཁྱོད་ནི་བག་གིས་བསྲུངས་པས་ན། །ཐུགས་རྗེ་ཆེན་པོ་མཁས་པ་ཡིས། །བྱང་ཆུབ་དམ་པ་བརྙེས་པར་གྱུར། །ལྷའི་བུ་བག་ཡོད་བརྩོན་གྱིས་གསོལ་པ། །བག་ཡོད་པ་ལ་རབ་བརྩོན་ཞིང་། །མཚན་ཉིད་གཅིག་པོ་རྟོགས་བགྱིས་པ། །དཔའ་བོ་ཆེན་པོ་ཁྱོད་ཀྱི་སྲས། །ཡབ་ཀྱི་དཀོར་ཡང་ཐོབ་པར་འགྱུར། །ལྷའི་བུ་བག་ཡོད་མངོན་པར་དགའ་བས་གསོལ་པ། །བག་ཡོད་དགའ་བའི་བརྟན་པ་
རྣམས། །དེ་དག་སངས་རྒྱས་ཡེ་ཤེས་ཀྱིས། །དཔའ་བོ་ཉོན་མོངས་རི་འཇིག་པས། །ང་རྒྱལ་རི་ཡང་དེ་བཞིན་བསྙིལ། །ལྷའི་བུ་བག་ཡོད་འཛིན་གྱིས་གསོལ་པ། །སངས་རྒྱས་ཡེ་ཤེས་ཚོལ་མཛོད་ཚེ། །ཁྱོད་ནི་བག་གིས་བཟུང་བས་ན། །བསྐལ་པ་བྱེ་བ་གྲངས་མེད་དུ། །ཁྱོད་ཀྱི་ཐུགས་ནི་སྐྱོར་མ་གྱུར། །ལྷའི་བུ་ཞི་གནས་བརྩོན་གྱིས་གསོལ་པ། །ཆོས་རྣམས་དེ་དག་རང་བཞིན་ཞི། །དེ་ནི་སངས་རྒྱས་སྤྱོད་ཡུལ་ལགས། །བྱང་ཆུབ་ཡང་དག་གང་ཞུགས་དང་། །ཐམས་ཅད་མཁྱེན་པ་དེར་མི་འཇིགས། །ལྷའི་བུ་ཞི་གནས་ལ་ཡང་དག་པར་གནས་པས་གསོལ་པ། །སངས་རྒྱས་ཞི་གནས་བཞུགས་པ་སྟེ། །འོན་ཀྱང་དེ་ལ་ཆགས་མི་མངའ། །སེམས་ཅན་ཉོན་མོངས་ཞི་བར་མཛད། །རྡུལ་འཐུལ་བ་ལ་ཆར་པ་བཞིན། །ལྷའི་བུ་ཞི་གནས་རབ་ཏུ་གནས་ཀྱིས་གསོལ་པ། །སངས་རྒྱས་ཞི་ལ་རབ་ཏུ་བཞུགས། །སུས་ཀྱང་མི་བསྐྱོད་རི་བོ་བཞིན། །ཁྱོད་ལ་གནོད་བགྱིས་མི་ནུས་ཏེ། །སེམས་ཞི་ཁྱོད་ལ་ཕྱག་ཀྱང་འཚལ། །ལྷའི་བུ་ཞི་གནས་དུལ་གྱིས་གསོལ་པ། །ཁྱོད་ཀྱི་སྲས་རྣམས་མ་སྨད་པ། །ཞི་གནས་ཀྱིས་ནི་ཡོངས་སུ་དུལ། །བདུད་རྣམས་བྱེ་བས་མི་ཚུགས་ཏེ། །འདོད་ཆགས་ཀྱིས་ནི་གནོད་མི་འགྱུར། །ལྷའི་བུ་ཞི་གནས་ངེས་པར་བྱུང་གིས་གསོལ་པ། །ཞི་བའི་ཡིད་མངའ་ཞི་གནས་ལ། །དཔའ་བོ་ཆེན་པོ་བསྒོམ་མཛད་པས། །ཅི་ལ་གནས་ཏེ་བསམ་གཏན་མཛད། །སུས་ཀྱང་ཁྱོད་ཀྱི་ཚུལ་མ་འཚལ། །ལྷའི་བུ་ཞི་གནས་སྔོན་དུ་འགྲོས་གསོལ་པ། །སྟོན་པས་སངས་རྒྱས་ཆོས་རྣམས་ཀྱི། །སྔོན་དུ་ཞི་གནས་འགྲོ་ཞེས་གསུངས། །བདག་གིས་བྱང་ཆུབ་འགྲུབ་འགྱུར་བའི། །ཆོས་གཞན་དེ་ཡི་རྗེས་སུ་འབྲང་། །ལྷའི་བུ་ཞི་གནས་རྗེས་སུ་འབྲང་གིས་གསོལ་པ། །འཇིག་རྟེན་སྒྲོན་མའི་གཞི་གནས་ནི། །སེམས་ཀྱི་རྙོག་པ་འདང་བར་བགྱིད། །ཞི་བའི་སེམས་ལྡན་རྣམས་ཀྱིས་འཆིང་། །དེ་ཁྱོད་མཐའ་ཡས་དབང་དུ་མཛད། །ལྷའི་བུ་ཞི་གནས་སྤྱོད་ཡུལ་གྱིས་གསོལ་པ། །ཆོས་རྣམས་ཀུན་གྱི་སྤྱོད་ཡུལ་ནི། །ཞི་གནས་ཡིན་ཞེས་འདྲེན་པས་གསུངས། །དེ་ལ་ཆགས་མེད་སྤྱོད་
པ་ནི། །རྣམ་པར་འདྲེན་པ་སངས་རྒྱས་འགྱུར། །ལྷའི་བུ་ཞི་གནས་བརླན་གྱིས་གསོལ་པ། །བསམ་གཏན་གྱིས་ནི་སྔོན་བརླན་ཏེ། །ཤེས་རབ་ཀྱིས་ནི་སེམས་བསྒོམས་པས། །དེ་ཕྱིར་རྫོགས་པའི་བྱང་ཆུབ་བརྙེས། །དེ་བཞིན་སྐྱེ་བོ་རྣམས་ཀྱང་འདྲེན། ། ལྷའི་བུ་ཞི་གནས་ལྷུར་ལེན་གྱིས་གསོལ་པ། །སངས་རྒྱས་ཆོས་རྣམས་གང་ལ་ཡང་། །ལམ་གཞན་བདག་གིས་མ་མཐོང་སྟེ། །ཞི་གནས་ཡེ་ཤེས་ཆེ་ཐོབ་ན། །རང་བྱུང་ཉིད་ཏུ་ངེས་པར་འབྱུང་། །ལྷའི་བུ་ལྷག་མཐོང་མངོན་དགས་གསོལ་བ། །དཔའ་བོ་ཆེན་པོ་ལྷག་མཐོང་ནི། །ཆོས་རྣམས་ཐམས་ཅད་སྟོན་པ་སྟེ། །དེ་ལ་ཁྱོད་ཀྱིས་སྲས་སྤྱོད་ཅིང་། །རང་བྱུང་ཉིད་ནི་ཐོབ་པར་འགྱུར། །ལྷའི་བུ་ལྷག་མཐོང་བྱུང་གིས་གསོལ་པ། །ཤེས་རབ་ཕ་རོལ་ཕྱིན་གནས་ཤིང་། །རྣམ་པར་འདྲེན་པ་འབྱུང་བར་འགྱུར། །སྨན་པའི་རྒྱལ་པོ་སྟོན་པ་སྟེ། །དེ་བས་ལྷག་མཐོང་དགེ་བ་ལགས། །ལྷའི་བུ་ལྷག་མཐོང་བར་གནས་ཀྱིས་གསོལ་པ། །ཆོས་རྣམས་ཐམས་ཅད་བཙལ་བགྱིས་ཏེ། །ཡང་དག་ཇི་བཞིན་མཐོང་གྱུར་ན། །བརྟན་པ་རྫོགས་པའི་བྱང་ཆུབ་ཐོབ། །བྱང་ཆུབ་ཉིད་ལ་གནས་པར་འདོང་། །ལྷའི་བུ་ལྷག་མཐོང་ངེས་གསུང་གིས་གསོལ་པ། །གང་ཟག་མཆོག་རྣམས་ཡེ་ཤེས་ཀྱིས། །བྱང་ཆུབ་མཆོག་ཏུ་ངེས་པར་བྱུང་། །རྫོགས་པའི་བྱང་ཆུབ་ཡེ་ཤེས་ཀྱིས། །བརྙེས་པའི་དྲན་པ་སྐྱེ་མི་འགྱུར། །ལྷའི་བུ་ལྷག་མཐོང་མངོན་དགས་གསོལ་པ། །ཡང་དག་ཇི་བཞིན་ཡང་དག་ཏུ། །ཆོས་རྣམས་རྣམ་པར་གཟིགས་པས་ན། །བྱང་ཆུབ་གཞལ་ཡས་བརྙེས་འགྱུར་ཏེ། །དེ་བས་རྣམ་འདྲེན་སངས་རྒྱས་ལགས། །ལྷའི་བུ་ལྷག་མཐོང་ལ་མངོན་པར་བརྩོན་པས་གསོལ་པ། །མཁས་པ་ཡེ་ཤེས་གང་བརྩོན་ཞིང་། །དཀའ་བ་མང་པོ་སྤྱོད་བགྱིད་པ། །དེ་དག་རྒོལ་ཚོགས་ཐམས་ཅད་ཀྱིས། །ཕམ་པར་བགྱི་བར་ཡོང་མི་ནུས། །ལྷའི་བུ་ལྷག་མཐོང་བྱུང་གིས་གསོལ་པ། །ཆོས་རྣམས་རྣམ་མཐོང་བགྱི་སླད་དུ། །རྒྱལ་སྲས་གང་དག་ཞུགས་པའི་རྣམས། །ཆོས་རྣམས་ངོ་བོ་ཉིད་འཚལ་ཅིང་། རབ་བྱུང་ཉིད་
ནི་ཐོབ་པར་འགྱུར། །ལྷའི་བུ་ལྷག་མཐོང་ལ་བསྟེན་པས་གསོལ་པ། ། རྣམ་འདྲེན་ཁྱོད་ཀྱིས་ཡུན་རིང་དུ། །ཡེ་ཤེས་ལ་ནི་བསྟེན་མཛད་པས། །ཐམས་ཅད་མཁྱེན་པ་བརྙེས་ནས་ནི། །སྲོག་ཆགས་བྱེ་བ་གྲོལ་བར་མཛད། །ལྷའི་བུ་ཁྱད་པར་ལྡན་གྱིས་གསོལ་པ། །སངས་རྒྱས་མཁྱེན་པས་ཐམས་ཅད་མཁྱེན། །འདྲེན་པ་དམ་པ་མངོན་པར་འཕགས། །སྲིད་པའི་རྒྱ་མཚོས་ཁྱེར་བ་ཡི། །འཇིག་རྟེན་དེ་ཡིས་སྒྲོལ་བར་མཛད། །ལྷའི་བུ་ལྷག་མཐོང་གནས་ཀྱིས་གསོལ་པ། །ལྷག་མཐོང་ལ་ནི་གནས་མཛད་ཅིང་། །ཆོས་ཀུན་རྣམ་པར་གཟིགས་པས་ན། །སངས་རྒྱས་ཆོས་རྣམས་འཕེལ་འགྱུར་ཏེ། །ས་བཟང་ནྱ་གྲོ་དྷ་སྐྱེས་འདྲ། །ལྷའི་བུ་ལྷག་མཐོང་དང་མ་བྲལ་བས་གསོལ་པ། །རྣམ་པར་འདྲེན་པ་ཁྱོད་ཀྱིས་སྲས། །ཡེ་ཤེས་ཀྱིས་ནི་ཡོངས་བཟང་སྟེ། །བྱང་ཆུབ་མཆོག་ནི་ཐོབ་བགྱིས་ཤིང་། །སྐྱེ་བོ་མང་པོ་འགྲེལ་པར་བགྱིད། །ལྷའི་བུ་ལྷག་མཐོང་ལ་རྣམ་པར་རྩེ་བས་གསོལ་པ། །སངས་རྒྱས་མཁྱེན་ལ་རྣམ་པར་རོལ། །ཆོས་རྣམས་ཀུན་ལ་འཇིགས་མི་མངའ། །ཞུམ་པ་མ་མཆིས་དང་མི་མངའ། །ཐུབ་པ་འཇིག་རྟེན་ཐམས་ཅད་མཁྱེན། །ལྷའི་བུ་ལྷག་མཐོང་ལ་ཡང་དག་པར་འཇུག་གིས་གསོལ་པ། །དཔའ་བོ་ཆེན་པོ་ཆོས་ཀུན་ནི། །ལྷག་མཐོང་ཉིད་ཏུ་ཡང་དག་འདུ། །རང་བཞིན་མེད་པར་རྣམ་མཐོང་ན། །དེ་ནི་རང་བྱུང་བྱང་ཆུབ་ལགས། །ལྷའི་བུ་ལྷག་མཐོང་སྙིང་པོས་གསོལ་པ། །སངས་རྒྱས་ལྷག་མཐོང་སྙིང་པོ་སྟེ། །ཆོས་རྣམས་ཀུན་ལ་འཇིགས་མི་མངའ། །འཇིག་རྟེན་སྡུག་བསྔལ་འདི་གཟིགས་ཤིང་། །ཐུགས་རྗེ་ཆེན་པོ་ཤིན་དུ་སྐྱེད། །ལྷའི་བུ་ལྷག་མཐོང་འགྲོས་ཀྱིས་གསོལ་པ། །བྱང་ཆུབ་ཕྱིར་ནི་ཤེས་འགྲོ་བའི། །འཇིག་རྟེན་མཁས་པ་ངེས་པར་བྱུང་། །དེ་དག་བྱང་ཆུབ་མཆོག་ཀྱང་འཐོབ། །གྲོལ་ནས་སྐྱེད་དགུ་འདི་དག་འགྲེལ། །ལྷའི་བུ་སྟོང་པ་ཉིད་ལ་བསྟེན་གྱིས་གསོལ་པ། །སྟོང་པ་ཉིད་ཀྱི་ཆོས་སྟེན་པའི། །མཁས་པ་བྱང་ཆུབ་འཚང་རྒྱ་སྟེ། །སེམས་ཅན་བཅིངས་ལས་འགྲོལ་བགྱིད་ཅིང་། ། བཅིངས་པ་ཐམས་ཅད་རྣམ་པར་གཅོད། །
ལྷའི་བུ་སྟོང་པ་ཉིད་ལ་མོས་ཀྱིས་གསོལ་པ། །སྟོང་པ་ཉིད་ལ་མོས་གྱུར་པ། །འགྲོ་བ་འདི་དག་སྲོག་མེད་གཟིགས། །དམིགས་མེད་ངོ་བོ་ཉིད་མེད་པ། །དེ་ལྟར་སྲོག་ཆགས་རྣམས་ལ་སྟོན། །ལྷའི་བུ་སྟོང་པ་ཉིད་ཀྱི་སྤྱོད་ཡུལ་གྱིས་གསོལ་པ། །སངས་རྒྱས་ཀུན་གྱི་སྤྱོད་ཡུལ་ནི། །ཆོས་རྣམས་རང་བཞིན་སྟོང་པ་སྟེ། །སྲོག་ཆགས་རྣམས་ལ་ཐུགས་བརྩེ་བས། །དཔའ་བོས་དེ་ལ་སྤྱད་པར་མཛད། །ལྷའི་བུ་སྟོང་པ་ཉིད་ཀྱི་བསམ་པས་གསོལ་བ། །སྐྱོན་དང་བྲལ་ཞིང་བཅིངས་མེད་ལ། །འཇིགས་སྐྲག་ཐམས་ཅད་རབ་ཏུ་སྤངས། །ཆོས་རྣམས་ཀུན་ལ་མི་གནས་ཤིང་། །ནམ་མཁའི་རླུང་བཞིན་སྤྱོད་པ་མཛད། །ལྷའི་བུ་སྟོང་པ་ཉིད་ལ་མངོན་པར་དགའ་བས་གསོལ་པ། །སྟོང་ཉིད་ཆོས་ལ་བསྟེན་བགྱིད་ཅིང་། །སངས་རྒྱས་སྤྱོད་ཡུལ་གང་མོས་པ། །དེ་དག་སྟོན་པ་མཆོད་པ་སྟེ། །མཆོད་པ་དེ་ནི་བླ་ན་མེད། །ལྷའི་བུ་སྟོང་པ་ཉིད་ཀྱིས་ཡང་དག་པར་འཕགས་ཀྱི་གསོལ་པ། །གང་གིས་འདྲེན་པ་འཕགས་གྱུར་པ། །དེ་ནི་ཡང་དག་འཕགས་ཤེས་གསུངས། །སྟོང་ཉིད་ཆོས་ལ་སྟེན་བགྱིད་པ། །མ་དམད་དེ་དག་སངས་རྒྱས་འགྱུར། །ལྷའི་བུ་སྟོང་པ་ཉིད་ཀྱིས་ལན་གྱིས་གསོལ་པ་དཔའ་བོ་ཆེན་པོ་ཆོས་རྣམས་གང་། །མྱ་ངན་འདས་མིན་སྟོན་མ་མཆིས། །ཀུན་ཀྱང་མྱ་ངན་འདས་པར་འདྲེན། །དྲང་སྲོང་ཆེན་པོའི་བྱང་ཆུབ་ལགས། །ལྷའི་བུ་སྟོང་པ་ཉིད་ཀྱིས་ཡང་དག་ཤར་གྱིས་གསོལ་པ། །སྟོང་ཉིད་ཞི་ལ་བརྟེན་ནས་ནི། །ཁྱོད་ཀྱི་སློབ་མ་ཡང་དག་ཤར། །སྟོང་པ་ཉིད་ལ་གང་བསྟེན་པ། །དེ་དག་རིམ་གྲོ་བགྱིད་པ་ལགས། །ལྷའི་བུ་སྟོང་པ་ཉིད་ལ་སྟེན་གྱིས་གསོལ་པ། །གང་རྣམས་སྟོང་པ་ཉིད་སྟེན་པ། །མཁས་པ་དེ་དག་རྨོངས་མི་འགྱུར། །ཉོན་མོངས་མེད་ཅིང་ལྟ་མེད་རྣམས། །བྱང་ཆུབ་རྡུལ་མེད་ཐོབ་པར་འགྱུར། །ལྷའི་བུ་སྟོང་པ་ཉིད་ཕུན་སུམ་ཚོགས་པས་གསོལ་པ། །གང་རྣམས་སྟོང་ཉིད་བསྟེན་བགྱིད་པ། །སངས་རྒྱས་ཆོས་རྣམས་ཕུན་སུམ་ཚོགས། །རང་བྱུང་ཕམ་པ་མེད་པར་འགྱུར། །འཇིག་རྟེན་དོན་ཀྱང་བགྱིད་པར་འགྱུར། །ལྷའི་བུ་སྟོང་པ་ཉིད་ལ་ཡང་དག་པར་ཞུགས་པས་
གསོལ་བ། སངས་རྒྱས་ཆོས་ལ་ཞུགས་གྱུར་ཏེ། སྟོང་པ་ཉིད་ལ་གང་སྟེན་པ། །དེ་ལ་བདུད་རྣམས་བྱེ་བ་ཕྲག །སྟོང་གིས་དཀྲུག་པར་མི་ནུས་སོ། །ལྷའི་བུ་མཚན་མ་མེད་ལ་དགའ་བས་གསོལ་པ། མཚན་མ་མེད་ལ་མངོན་དགྱེས་ཏེ། །དངོས་པོ་ཐམས་ཅད་རྣམ་བཤིག་ནས། །སངས་རྒྱས་འཇིག་རྟེན་རྣམས་ནས་བྱུང་། །མཚན་མ་རྣམས་ལ་ཆགས་མི་མངའ། །ལྷའི་བུ་མཚན་མ་མེད་ལ་གནས་པས་གསོལ་པ། །མཚན་མ་མེད་ལ་སྤྱོད་གྱུར་ཅིང་། །ཞི་བ་ཞི་ལ་སྤྱོད་པ་རྣམས། །མཚན་མ་རྣམ་པར་བཤིག་རྣམས་ཀྱིས། །ཚུལ་ནི་བདུད་ཀྱིས་ཤེས་མི་ནུས། །ལྷའི་བུ་མཚན་མ་མེད་པའི་སྤྱོད་ཡུལ་གྱིས་གསོལ་པ། །སངས་རྒྱས་ཀུན་གྱི་སྤྱོད་ཡུལ་ལ། །འདྲེན་པ་ཁྱོད་ནི་སྦྱོང་མཛད་དེ། །མཚན་མ་མི་མངའ་རྟོགས་དཀའ་ཞིང་། །ཞི་སྦྱོང་ཁྱོད་ལ་ཕྱག་ཀྱང་འཚལ། །ལྷའི་བུ་མཚན་མ་མེད་པས་སྒོམ་གྱིས་གསོལ་པ། །ཐུབ་པའི་འཁོར་འདི་ཐམས་ཅད་ནི། །མཚན་མ་མེད་པས་སྒོམ་གྱུར་ཏེ། །ཡབ་ཀྱི་དཀོར་ནི་འཚལ་གྱུར་ནས། །དེ་བཞིན་གཤེགས་ལ་བཀུར་སྟི་བགྱིད། །ལྷའི་བུ་མཚན་མ་མེད་པ་ལ་སྤྱོད་པས་གསོལ་པ། །མཚན་མ་མེད་ལ་ཉིན་མཚན་དུ། །གང་ཟག་མཆོག་ནི་སྦྱོང་མཛད་པས། །ལྷ་དང་དྲི་ཟ་མི་དག་ཀྱང་། །ཁྱོད་ཀྱི་ཚུལ་ནི་མ་ཚལ་ཏོ། །ལྷའི་བུ་མཚན་མ་མེད་པས་རྣམ་པར་གྲོལ་གྱིས་གསོལ་པ། །ཆོས་རྣམས་ཐམས་ཅད་རྣམ་པ་ཤིག་ཅིང་། །དཔའ་ཆེན་འཇིག་རྟེན་སྒྲོན་མ་ཁྱོད། །མཚན་མ་མེད་ལ་གནས་པར་མཛད། །དེ་བས་ཁྱོད་ལ་ཕྱག་ཀྱང་འཚལ། །ལྷའི་བུ་མཚན་མ་མེད་པ་ལ་རྣམ་པར་རྩེ་བས་གསོལ་པ། །ཐུབ་ཆེན་དཔའ་བོ་ཆེན་པོ་ཁྱོད། །མཚན་མ་མེད་ལ་རྣམ་པར་རོལ། །མི་རྣམས་ཡོངས་སུ་སྨིན་མཛད་ཅིང་། །སངས་རྒྱས་ཡེ་ཤེས་མཆོག་ལ་ཞུགས། །ལྷའི་བུ་མཚན་མ་མེད་པས་ཡོངས་སུ་གྲུབ་ཀྱིས་གསོལ་པ། ། གང་གིས་མཚན་མ་སྤངས་གྱུར་པ། །དེ་དག་བྱང་ཆུབ་གྲུབ་པ་སྟེ། །ཡབ་ཀྱི་ཆོས་ཀྱི་བརཏལ་ཞུགས་ཅན། །དེ་དག་རྫོགས་པའི་སངས་རྒྱས་མཆོད། །
ལྷའི་བུ་མཚན་མ་མང་བ་ལ་དགའ་བས་གསོལ་པ། །གང་གིས་མཚན་མ་རྣམ་བཤིག་པ། །དེ་དག་སངས་རྒྱས་ཆོས་ལ་དགའ། །བླ་མའི་གནས་ལ་གནས་པ་སྟེ། །སེམས་ཅན་ཀུན་གྱི་མཆོད་རྟེན་ལགས། །ལྷའི་བུ་མཚན་མ་མེད་པ་ལ་བརྟེན་པས་གསོལ་པ། །ཞི་ལ་སྤྱོད་ཅིང་རྣམ་གྲོལ་བ། །སངས་རྒྱས་འཇིག་རྟེན་བླ་ན་མེད། །འབྱུང་པོ་ཀུན་གྱི་སྐྱབས་དང་རྟེན། །དཔུང་གཉེན་དེ་བཞིན་གནས་ཀྱང་ལགས། །ལྷའི་བུ་མཚན་མ་མེད་པ་ལ་མོས་པས་གསོལ་པ། །མཚན་མ་མེད་པ་ལ་མོས་གྱུར་ཅིང་། །ཞི་བ་དགྲ་ལས་རྒྱལ་གྱུར་པ། །སངས་རྒྱས་རྒལ་བ་འགྲོ་སྒྲོལ་བ། །དེ་དག་ཚད་ནི་ག་ལ་མཆིས། །ལྷའི་བུ་སྨོན་པ་མེད་པ་རྟོགས་ཀྱིས་གསོལ་པ། །མགོན་པོ་གང་དག་སྨོན་ལམ་ནི། །རྣམ་པ་ཀུན་ཏུ་མི་དམིགས་པ། །དེ་དག་འཇིག་རྟེན་བྲལ་བ་སྟེ། །སངས་རྒྱས་འཇིག་རྟེན་ནང་ནས་བྱུང་། །ལྷའི་བུ་སྨོན་པ་མེད་པ་ལ་སྟོན་པས་གསོལ་པ། །ཞི་བའི་ཐུགས་དང་ལྡན་པ་ཁྱོད། །སྲིད་པ་རྣམས་སུ་སྨོན་མི་མཛད། །སྲེད་པ་ཡོངས་སུ་ཆད་པས་ན། །སངས་རྒྱས་འཇིག་རྟེན་ཡོང་མི་གོས། །ལྷའི་བུ་སྨོན་པ་མེད་པས་སྐྱེས་ཀྱིས་གསོལ་པ། །གང་གིས་སྲིད་པ་ཡོངས་བཅོམ་པ། །དེ་དག་གཟི་མཆོག་སྐྱེས་པ་སྟེ། །དེ་དག་འཇིག་རྟེན་མགོན་པོའི་སྲས། །རང་གི་ཡབ་ལ་ཕྱག་ཀྱང་འཚལ། །ལྷའི་བུ་སྨོན་པ་མེད་པས་བསྐྱེད་ཀྱིས་གསོལ་པ། །ཁྱོད་ཀྱི་སྲས་རྣམས་མ་སྨད་པ། །སྲེད་པ་ཡོངས་སུ་བཅད་པས་ན། །སྲིད་པ་འཇིག་བགྱིད་སྲིད་པ་ལ། །དེ་དག་སྨོན་མ་མི་འགྱིད་དོ། །ལྷའི་བུ་སྨོན་པ་མེད་པས་ཡོངས་སུ་གྲོལ་བས་གསོལ་པ། །གང་དག་སྨོན་པ་མི་བགྱིད་པ། །གཟི་ལྡན་ཁྱོད་ཀྱིས་སྲས་ཀྱི་རྣམས། །རེ་བ་བཏང་ཞིང་བཅིངས་གྲོལ་བ། །དེ་དག་ཡོངས་སུ་གྲོལ་བར་འགྱུར། །ལྷའི་བུ་སྨོན་པ་མེད་པས་བྱུང་གིས་གསོལ་པ། །གང་གིས་སྲིད་པ་རབ་བཅོམ་པ། །དེ་དག་མྱ་ངན་དགོན་པ་རྒལ། །དེ་དག་མི་སྐོམ་ཟང་ཟིང་མེད། །དཔའ་ཆེན་ཁྱོད་ལ་དེང་ཕྱག་འཚལ། །ལྷའི་བུ་སྨོན་པ་མེད་ལ་ངེས་པས་གསོལ་པ། །གང་གིས་སྲིད་དང་སྡུག་བསྔལ་དང་། །བདེ་
བ་དངོས་པོ་མེད་བསྒོམས་པ། །མགོན་ཁྱོད་དེ་དག་རྣམས་ཀྱི་ཡབ། །དེ་དག་ཁྱོད་ཀྱི་སྲས་ཀྱང་ལགས། །ལྷའི་བུ་སྨོན་པ་མེད་པའི་འཁོར་གྱིས་གསོལ་པ། །སྲིད་པའི་སྡུག་བསྔལ་སུས་མཐོང་བ། །དེ་དག་ཁྱོད་ཀྱི་བསྟན་ལ་དུས། །ཁ་ལོ་སྒྱུར་ཞིང་སྲིད་སེལ་བ། །སེམས་དུལ་ཁྱོད་ལ་ཕྱག་ཀྱང་འཚལ། །ལྷའི་བུ་སྨོན་པ་མེད་པས་བྱུང་གིས་གསོལ་པ། །སྲིད་པའི་དགོན་ལས་བྱུང་བ་རྣམས། །བདེ་བ་ཐོབ་ཅིང་ཞི་གནས་ཏེ། །ཉོན་མོངས་དགྲ་རྣམས་ཕམ་མཛད་པ། །འཇིག་རྟེན་མགོན་ལ་ཕྱག་ཀྱང་འཚལ། །ལྷའི་བུ་སྨོན་པ་མེད་པས་ཡ་མཚན་དུ་གྱུར་པས་གསོལ་པ། །གཡུལ་ལས་རྒྱལ་བར་གྱུར་པ་སྟེ། །ཁྱོད་ནི་རྣམ་རྒྱལ་ཕམ་མི་མངའ། །བདུད་ཀྱི་དཔུང་རྣམས་ཕམ་མཛད་ཅིང་། །སྲིད་པ་ཀུན་དུ་སྨོན་མི་མཛད། །ལྷའི་བུ་སྨོན་པ་མེད་པ་སྟོབས་ལྡན་གྱིས་གསོལ་པ། །ཐར་པའི་ཆོས་ལ་སྟོབས་ལྡན་པས། །བདུད་ཀྱི་ཞགས་པ་ཡོངས་བཅད་ཅིང་། །ཁྱོད་ཀྱི་སྲས་རྣམས་བདུད་དག་ལ། །བསྐྱབ་པའི་འདུ་ཤེས་མི་བགྱིད་དོ། །ལྷའི་བུ་ལུས་རྣམ་པར་བརྟགས་ཀྱིས་གསོལ་པ། །ལུས་མེད་འཆི་བ་མེད་ཚུལ་དུ། །ལུས་འདི་གང་གིས་མཐོང་གྱུར་པ། །དེ་དག་སངས་རྒྱས་སྤྱོད་ཡུལ་དགའ། །འདྲེན་པ་ཁྱོད་ཀྱི་རྗེས་སུ་ཞུགས། །ལྷའི་བུ་ལུས་ངེས་པར་སེམས་པས་གསོལ་པ། །མི་གཙང་རུལ་བ་རྣག་ཟག་པ། །ལུས་འདི་མི་བཟང་ངེས་བསམས་ཏེ། །ཡང་དག་ཇི་བཞིན་འཚལ་གྱུར་ནས། །རྣམ་འདྲེན་ཁྱོད་ལ་ཕྱག་ཀྱང་འཚལ། །ལྷའི་བུ་ལུས་རྟོགས་ཀྱིས་གསོལ་པ། །ལུས་ལ་མི་གཅང་བརྟགས་བགྱིས་ཏེ། ། ལུས་ལ་དྲན་པ་རྣམ་དཔྱད་ཅིང་། །ལུས་ཀྱི་སྡུག་བསྔལ་རྣམས་གྲོལ་ནས། །ངེས་པ་ཁྱོད་ལ་ཕྱག་ཀྱང་འཚལ། །ལྷའི་བུ་ལུས་ཡོངས་སུ་གཏོང་གིས་གསོལ་པ། །སྦྲུལ་གྱི་ལྤག་པ་རྙིང་བཞིན་དུ། །རྣག་ཅག་ལུས་འདི་སྤངས་ནས་ནི། །དེ་བཞིན་གཤེགས་པ་སྐུ་བོ་ཆེ། །སྐུ་མི་མངའ་ལ་ཕྱག་ཀྱང་འཚལ། །ལྷའི་བུ་ལུས་ལ་སྨོད་པས་གསོལ་པ། །མི་གཙང་དྲི་ང་རྣག་ཟག་ཅིང་། །རུས་པའི་ལུས་ལ་རྟག་སྨད་དེ། །མི་གཙང་གང་བ་རྣམ་སྤངས་ནས། །
འདྲེན་པ་ཁྱོད་ལ་ཕྱག་ཀྱང་འཚལ། །ལྷའི་བུ་ལུས་ཀྱིས་ཡོངས་སུ་སྐྱོ་བས་གསོལ་པ། །གང་དག་རུལ་པའི་ལུས་སྐྱོ་ཞིང་། །རྒྱལ་སྲས་གཙང་བ་འཚལ་བ་རྣམས། །ཆོས་ཀྱི་རབ་ཏུ་བསྐྱེད་པའི་སྲས། །དེ་དག་སངས་རྒྱས་ཕྱག་འཚལ་འགྱུར། །ལྷའི་བུ་ལུས་ཀྱིས་སྐྲག་པས་གསོལ་པ། །འབྱུང་བ་ཆེན་པོ་སྦྲུལ་གདུག་འདྲར། །གང་གིས་ཤིན་ཏུ་རྟོགས་གྱུར་པ། །དེ་དག་ལུས་ལས་འདས་པ་སྟེ། །རྐང་གཉིས་གཙོ་ལ་ཕྱག་ཀྱང་འཚལ། །ལྷའི་བུ་ལུས་ཀྱི་སྐྱོན་མཐོང་བས་གསོལ་པ། །ལུས་ཀྱི་སྐྱོན་ལ་མངོན་སུམ་སྟེ། །ཡེ་ཤེས་གཟིགས་པའི་སྤྱན་མངའ་བས། །སངས་རྒྱས་མཁྱེན་པས་མཁས་པ་དག །སྲིད་གསུམ་ཐམས་ཅད་ཡོངས་སུ་གཟིགས། །ལྷའི་བུ་ལུས་ལ་འདོད་ཆགས་དང་བྲལ་བས་གསོལ་པ། །ལུས་ཀྱི་འདུ་ཤེས་འདོད་ཆགས་བྲལ། །ཆོས་ཀྱི་འདུ་ཤེས་མི་གནས་པས། །ཀུན་སྦྱོར་ཀུན་ལས་འདས་པ་སྟེ། །རྣམ་འགྲེལ་སངས་རྒྱས་ཕྱག་ཀྱང་འཚལ། །ལྷའི་བུ་སྲིད་པའི་དགྲའི་བློ་གྲོས་ཀྱིས་གསོལ་པ། །སྲིད་པར་སྲིད་པ་འཇོམས་མཛད་པ། །ཁྱོད་ཀྱིས་དགྲ་ཡི་འདུ་ཤེས་མཁྱེན། །ཁྱོད་ཀྱི་སྲས་རྣམས་སྒོམ་བགྱིད་ཅིང་། །མཁས་པ་བྱང་ཆུབ་མངོན་འཚང་རྒྱ། །ལྷའི་བུ་སྲིད་པ་སེལ་བས་གསོལ་པ། །སྲིད་པ་རྣམས་ཀྱི་ཉེས་དམིགས་མཐོང་། །མྱ་ངན་འདས་པ་འཇིགས་མེད་མཐོང་། །ཁྱོད་ཀྱི་སྲས་རྣམས་འགྲོ་ཕན་ཕྱིར། །བྱང་ཆུབ་སྤྱད་པ་སྤྱོད་པ་བགྱིད། །ལྷའི་བུ་སྲིད་པ་རྣམ་པར་སྤངས་ཀྱི་གསོལ པ། །གང་གིས་སྲིད་པ་རྣམ་སྤངས་ཤིང་། །འཇིག་ལ་མངོན་པར་མི་དགའ་བ། །བྲལ་བར་གྱུར་ཅིང་སེམས་དག་པ། །མཁས་ཁྱོད་ཞབས་ལ་ཕྱག་ཀྱང་འཚལ། །ལྷའི་བུ་སྲིད་པ་བསལ་གྱིས་གསོལ་པ། །མི་ཡི་དམ་པ་ཁྱོད་ཀྱི་སྲས། །སྲིད་པར་ཁྲིད་པ་རབ་བསལ་ཏེ། །ཁྱོད་ཀྱི་བསླབ་ལ་བསླབས་པ་དག །སྟོང་གསུམ་འདི་ན་རྣམ་པར་མཛེས། །ལྷའི་བུ་སྲིད་པ་ལས་རྒལ་བས་གསོལ་པ། །སྲིད་པའི་རྒྱ་མཚོ་ལས་རྒལ་བ་ཡི། །འཇིག་རྟེན་མགོན་མཆོག་སྐྱོབ་རྣམས་ལ། །གྲངས་ཀྱིས་རྒྱུན་ཏུ་བགྲང་བ་ཡི། །གྲངས་ནི་འཇིག་རྟེན་འདི་ན་མེད། །ལྷའི་བུ་སྲིད་
པ་འཇོམས་ཀྱིས་གསོལ་པ། སྲིད་པ་ཐམས་ཅད་ཡོངས་བཅོམ་སྟེ། །གང་དག་རྟག་ཏུ་དྲན་སྤྱོད་པ། །དེ་དག་རྫོགས་པའི་སངས་རྒྱས་མཆོད། །སྲོག་ཆགས་རྣམས་ལ་ཆོས་ཀྱང་སྟོན། །ལྷའི་བུ་སྲིད་པ་ལས་རབ་ཏུ་གྲོལ་བས་གསོལ་པ། །སྲིད་པའི་རྒྱུན་ལས་རབ་ཏུ་གྲོལ། །རྣམ་པར་འདྲེན་པ་སྲིད་པ་རྒལ། །སྲིད་པ་མཐར་འབྱིན་སངས་རྒྱས་ཏེ། །སྲིད་པ་སིལ་ལ་ཕྱག་ཀྱང་འཚལ། །ལྷའི་བུ་སྲིད་པ་རབ་ཏུ་ཞི་བྱེད་ཀྱིས་གསོལ་པ། །སྲིད་པར་ཁྲིད་པ་རབ་ཞི་ཞིང་། །སྲིད་པ་ཕམ་པར་མཛད་ནས་གཤེགས། །བརྟེན་པ་སྲིད་པ་མཐར་འབྱིན་ན། །ཁྱོད་ལ་དོ་ཟླ་མ་མཆིས་སོ། །ལྷའི་བུ་སྲིད་པའི་མཐར་འགྲོ་བས་གསོལ་པ། །སྲིད་པ་མཐར་ཕྱིན་རབ་ཞི་བ། །མགོན་པོ་ཁྱོད་ཀྱི་སྲིད་པའི་མཐའ། །སྲིད་པ་ཕྱིན་འབྱིན་ཐམས་ཅད་མཁྱེན། །སངས་རྒྱས་འཇིག་རྟེན་རྟོགས་པར་མཛད། །ལྷའི་བུ་སྲིད་པའི་ཐ་མའི་ལུས་འཛིན་གྱིས་གསོལ་བ། །སྲིད་པའི་རྒྱུ་ནི་རྣམ་སྤངས་ནས། །སྲིད་པ་ཐ་མ་འཛིན་མཛད་པ། །གང་གིས་སྲིད་པ་ལེན་འགྱུར་བའི། །ཁྱོད་ཀྱིས་ཀུན་ཏུ་སྦྱོར་བ་མཐོང་། །ལྷའི་བུ་སྲིད་པར་རབ་ཏུ་ཞི་བ་ཐོབ་ཀྱིས་གསོལ་པ། །ཁྱོད་ཀྱིས་སྲིད་པ་སྟོང་མཁྱེན་ཏེ། །སྲིད་པའི་རྒྱུ་ཡང་དེ་བཞིན་ནོ། །ཞུམ་དང་རབ་ཏུ་ཞུམ་མི་མངའ། །མཉམ་ཉིད་གྱུར་ལ་ཕྱག་ཀྱང་འཚལ། །ལྷའི་བུ་སྲིད་པའི་ཕ་རོལ་ཏུ་འགྲོགས་གསོལ་པ། །སྲིད་པའི་ཕ་རོལ་རྒལ་བ་སྟེ། །སྲིད་པར་ཁྲིད་པ་ཡང་དག་བསལ། །རྣམ་པར་འདྲེན་པ་ཐུགས་བརྩེ་བས། །སྐྱེ་བོ་གཞན་ནི་སྒྲོལ་བ་མཛད། །བམ་པོ་བཅུ་པ། །ལྷའི་བུ་ཚོར་བས་མནར་གྱིས་གསོལ་པ། ཚོར་བ་བདག་ཏུ་བགྱི་མ་མཆིས། །སེམས་མ་མཆིས་ཤིང་རྩོལ་མ་མཆིས། །བསམ་གཏན་མཛད་པ་ཆེ་ཁྱོད་ཀྱིས། །ཚོར་བ་ཆུ་བུར་ལྟ་བུར་མཁྱེན། །ལྷའི་བུ་ཚོར་བ་སྟོན་པས་གསོལ་བ། །ངོ་བོ་ཉིད་ཀྱིས་དངོས་མེད་པར། །ཚོར་བ་ཁྱོད་ཀྱིས་རབ་ཏུ་མཁྱེན། །རྨི་ལམ་སྡུག་གི་དགའ་འདྲ་བ། །དེ་ལ་སོ་སོའི་སྐྱེ་བོ་ཆགས། །ལྷའི་བུ་ཚོར་བ་ལ་ཡོངས་སུ་རྟོགས་པས་གསོལ་པ། །ཤེས་རབ་བཅས་པས་ཡོངས་བརྟགས་ན། །ཚོར་བ་
འགྲོ་བར་མ་སོང་ཞིང་། །འོང་བ་མེད་ལ་དངོས་མེད་པར། །དེ་ནི་ཐུབ་ཆེན་ཁྱོད་ཀྱིས་གཟིགས། །ལྷའི་བུ་ཚོར་བ་དང་བྲལ་བས་གསོལ་པ། །ཚོར་བ་དང་ནི་ཚོར་བ་པོ། །རང་བཞིན་མེད་པར་ཁྱོད་ཀྱིས་གཟིགས། །ཟབ་མོ་བལྟ་དཀའི་ཚིག་དེ་ཡང་། །ཁྱོད་ཀྱིས་སེམས་ཅན་རྣམས་ལ་བསྟན། །ལྷའི་བུ་ཚོར་བའི་རྒྱུད་ལ་ངེས་པས་གསོལ་བ། །ཚོར་བ་དེ་ནི་ཀུན་རྫོབ་ཙམ། །དོན་དམ་ཉིད་དུ་མི་དམིགས་ཏེ། །ཁྱོད་ཀྱིས་སེམས་ཅན་དེ་རབ་ཏུལ་བས། །འགྲོ་བ་ཐེ་ཚོམ་མ་མཆིས་གྱུར། །ལྷའི་བུ་ཚོར་བ་ལ་མཁས་པས་གསོལ་པ། །ཚོར་བའི་ཕུང་པོ་མཁས་པ་པོ། །མཁའ་ལ་རླུང་གི་དཀྱིལ་འཁོར་བཞིན། །བྱིས་པའི་བླ་ོཅན་རྨོངས་བགྱིད་པ། །དེ་ནི་ཁྱོད་ཀྱིས་ཡང་དག་གཟིགས། །ལྷའི་བུ་ཚོར་བ་མངོན་པར་ཤེས་པས་གསོལ་པ། །ཚོར་བའི་ཕུང་པོ་མངོན་མཁྱེན་པ། །རིག་ཅིང་རིག་པའི་མཐར་བྱོན་པའི། །མཁས་པ་རྣམས་ཀྱི་མཆོག་ཁྱོད་ཀྱིས། །ཚོར་བ་བདག་མེད་རབ་ཏུ་གཟིགས། །ལྷའི་བུ་ཚོར་བ་ལས་རྒལ་བས་གསོལ་པ། །རྐང་གཉིས་གཙོ་བོ་དམ་པ་ཁྱོད། །རྒལ་དཀའ་ཚོར་བའི་མཚོ་ལས་རྒལ། །འདམ་ལས་རྒལ་ཅིང་སྡིག་མེད་པ། །བྱང་ཆུབ་མཆོག་འདི་སངས་རྒྱས་གྱུར། །ལྷའི་བུ་ཚོར་བ་ལས་བྱུང་གིས་གསོལ་པ། །རྣམ་པར་འདྲེན་པས་འཇིག་རྟེན་དུ། །ཚོར་བ་རྣམས་ནི་འབྱུང་མཁྱེན་ནས། །ཚོར་བའི་ཕུང་པོ་རབ་བརྒལ་ཏེ། །སངས་རྒྱས་འཇིག་རྟེན་ཆགས་མི་མངའ། །ལྷའི་བུ་ཚོར་བ་རིག་པས་གསོལ་པ། །མི་རྣམས་དག་ལ་གང་འཆིང་བའི། །ཚོར་བ་ཐམས་ཅད་ཁྱོད་ཀྱིས་མཁྱེན། །ཉོན་མོངས་ཞགས་པ་འཆིང་འགྱུར་བ། །དེ་ཡི་རང་བཞིན་ཁྱོད་ཀྱིས་གཟིགས། །ལྷའི་བུ་སེམས་ལ་མཁས་པས་གསོལ་པ། །ཁྱོད་ཀྱི་སེམས་ཀྱིས་ཉོན་མོངས་ཕམ། །བདུད་རྣམས་ཀྱང་ནི་དཔའ་བཀོང་སྟེ། །སེམས་དེ་རང་བཞིན་མ་མཆིས་པར། །ཐུབ་པ་ཆེན་པོ་ཁྱོད་ཀྱིས་གཟིགས། །ལྷའི་བུ་སེམས་ཡོངས་སུ་ཤེས་པས་གསོལ་པ། །ཇི་ལྟར་སྒྱུ་མའི་མཁན་པོ་ཡིས། །སྒྱུ་མ་སྣ་ཚོགས་སྤྲུལ་པ་བཞིན། །སེམས་ནི་བདེ་གཤེགས་ཁྱོད་ཀྱིས་མཁྱེན། །དེ་ཕྱིར་ཁྱོད་ལ་འཇིག་རྟེན་
མཆོད། །ལྷའི་བུ་སེམས་ལ་ཡང་དག་པར་རྟོགས་པས་གསོལ་པ། །སྒྱུ་མའི་མཁན་ནམ་སློབ་མ་བཞིན། །གང་གིས་འགྲོ་བ་འདི་བཅིངས་པའི། །སེམས་དེ་ཁྱོད་ཀྱིས་ཡང་དག་བརྟགས། །དེ་ནི་ཁྱོད་ཀྱིས་ཇི་བཞིན་མཁྱེན། །ལྷའི་བུ་སེམས་ཀྱི་སྤྱོད་ཡུལ་ལ་སྤྱོད་པས་གསོལ་པ། །སེམས་ཀྱི་སྤྱོད་ཡུལ་ཁྱོད་ཀྱིས་མཁྱེན། །རྣམ་པར་འདྲེན་པ་རྨི་ལམ་ན། །ཇི་ལྟར་ཚོགས་ཀྱི་གྲངས་བཞིན་དུ། །བྱིས་པའི་སེམས་རྨོངས་བགྱིད་པར་གཟིགས། །ལྷའི་བུ་སེམས་ཀྱི་དབང་ཕྱུག་གིས་གསོལ་པ། །དུལ་གྱུར་ལས་སུ་རུང་བ་ཡི། །སེམས་ཀྱི་རང་བཞིན་རྟོག་མེད་པ། །གང་ལ་འཇིག་རྟེན་གཏིང་མི་རྙེད། །མཚན་ཉིད་བརྟན་པ་ཁྱོད་ཀྱིས་གཟིགས། །ལྷའི་བུ་སེམས་ལ་དཔའ་བས་གསོལ་པ། །གང་གིས་སེམས་ལ་སེམས་མེད་ཤེས། །མཁས་པ་སྒྱིད་ལུག་མི་འགྱུར་ཞིང་། །བདུད་སྡེ་རབ་ཏུ་འདུལ་བགྱིད་པ། །དེ་དག་འདིར་ནི་དཔའ་ཞེས་བགྱི། །ལྷའི་བུ་སེམས་ཀྱིས་ཡང་དག་འཕགས་ཀྱིས་གསོལ་པ། །གང་དག་སེམས་ལ་སེམས་མེད་ཤེས། །དེ་དག་སངས་རྒྱས་སྲས་ལགས་ཏེ། །དཔའ་ཆེན་སངས་རྒྱས་ཆོས་རྣམས་ལ། །སྐྱེས་བུ་དེ་དག་ཡང་དག་འཕགས། །ལྷའི་བུ་ཞི་བའི་སེམས་ཀྱིས་གསོལ་པ། །གང་གིས་སེམས་ལ་དབང་བགྱིས་པ། །སེམས་ཅན་དེ་དག་ཞི་བར་ཞི། །བདུད་ཀྱི་ཞགས་ལས་རབ་གྲོལ་བས། །དེ་དག་བདུད་ཀྱི་དབང་མི་མཆི། །ལྷའི་བུ་སེམས་མཉེན་པས་གསོལ་པ། །མི་རྣམས་གང་དག་སེམས་མཉེན་ཞིང་། །བསྙེན་པར་དཀའ་དང་དཔའ་བ་དང་། །ཁྱོད་ཀྱི་བསྟན་ལ་གང་མོས་པས། །དེ་དག་འདོང་པར་ཞུམ་མི་འགྱུར། །ལྷའི་བུ་སེམས་དག་པས་གསོལ་པ། །སེམས་དག་ལས་རྣམས་གཙང་གྱུར་ཅིང་། །ཡང་དག་རྟོགས་པས་སྤྱོད་བགྱིད་པ། །དེ་དག་རྒྱལ་བའི་བསྟན་ཐོས་ནས། །ཟབ་མོ་རྣམས་ལ་ཞུམ་མི་འགྱུར། །ལྷའི་བུ་ཆོས་ཉིད་ལ་གནས་པས་གསོལ་པ། །གང་གི་ཡིད་ནི་ཆོས་ཉིད་ལ། །རབ་ཏུ་དགའ་ཞིང་ཐོགས་མེད་པ། །དེ་དག་མི་དབང་སྲས་པོ་སྟེ། །ཞི་བའི་སར་ནི་ཕྱིན་པ་ལགས། །ལྷའི་བུ་ཆོས་ལ་སེམས་པས་གསོལ་པ། །ཆོས་རྣམས་ཐམས་ཅད་ཆོས་དབྱིངས་སུ། །འདྲེན་པ་དེ་ལ་བསླབས་པ་རྣམས། །ཆོས་
ཉིད་ལ་ནི་གང་སེམས་པ། །དེ་དག་སྤྱོད་ཡུལ་མ་ཡིན་མེད། །ལྷའི་བུ་ཆོས་ཀྱི་དབྱིངས་ལ་ངེས་པར་བྱུང་གིས་གསོལ་པ། །མི་མཆོག་ཁྱོད་ཀྱི་སྲས་ཀྱི་རྣམས། །ཆོས་ཀྱི་དབྱིངས་ལ་ངེས་བྱུང་སྟེ། །འདྲེན་པ་ཁྱོད་ཀྱི་སྲས་དེ་དག །མཚན་ཉིད་གཅིག་གིས་ངེས་བྱུང་ལགས། །ལྷའི་བུ་ཆོས་ཀྱི་དབྱིངས་ཀྱི་སྤྱོད་ཡུལ་གྱིས་གསོལ་པ། །ཆོས་རྣམས་ཀུན་གྱི་སྤྱོད་ཡུལ་ནི། །ཆོས་ཀྱི་དབྱིངས་ཤེས་རྒྱལ་བས་གསུངས། །དཔའ་བོ་ཁྱོད་ནི་གང་སྤྱོད་པའི། །ཡེ་ཤེས་དེ་ནི་བསམ་མི་ཁྱབ། །ལྷའི་བུ་ཆོས་ཀྱི་དབྱིངས་ལ་ཞུགས་པས་གསོལ་པ། །ཆོས་ཀྱི་དབྱིངས་ལ་གང་ཞུགས་པ། །དེ་དག་ཡེ་ཤེས་བསམ་ཡས་ཏེ། །སངས་རྒྱས་ཆོས་ལ་ཐེ་ཚོམ་མེད། །སེམས་ཅན་བསམ་ལ་དེ་དག་མཁས། །ལྷའི་བུ་ཆོས་ཀྱི་དབྱིངས་ལ་བབ་ཀྱིས་གསོལ་པ། །གང་དག་ཆོས་ཀྱི་མཚན་ཉིད་གཅིག །ཆོས་ཀྱི་དབྱིངས་ལ་བབ་པ་རྣམས། །དེ་དག་སྤོབས་པའི་སྟོབས་བསྐྱེད་པ། །བསམ་གྱིས་མི་ཁྱབ་ཐོབ་པར་འགྱུར། །ལྷའི་བུ་ཆོས་ཀྱི་དབྱིངས་ལ་འཇིགས་པ་མེད་པས་གསོལ་པ། །གང་དག་དེ་དག་གནས་པ་ཡི། །འཇིགས་པ་མེད་པ་ཐོབ་མེད་པས། །དེ་དག་རྣམས་ཀྱི་སྤོབས་དང་སྟོབས། །དེ་ལ་མཚུངས་པ་མེད་པ་འབྱུང་། །ལྷའི་བུ་ཆོས་ཀྱི་དབྱིངས་ལ་མཁས་པས་གསོལ་པ། །ཁྱོད་ནི་ཆོས་དབྱིངས་མཁས་པ་སྟེ། །ཆོས་རྣམས་ཀུན་ལ་ཤིན་དུ་མཁས། །ལག་མཐིལ་སྐྱུ་ར་ར་བཞག་བཞིན། །ཆོས་ཀྱི་དབྱིངས་ཀྱང་རྣམ་པར་སྟོན། །ལྷའི་བུ་ཆོས་ཀྱི་དབྱིངས་ལ་གནས་པས་གསོལ་པ། །ཆོས་རྣམས་རང་བཞིན་མེད་གཟིགས་པས། །ཁྱོད་ནི་ཆོས་ཀྱི་དབྱིངས་ལ་ཞུགས། །མི་གནས་ཞུམ་པ་མ་མཆིས་ཏེ། །བཟུང་བ་མ་མཆིས་བཏང་མ་མཆིས། །ལྷའི་བུ་ཆོས་ཀྱི་དབྱིངས་ལ་སྤྱོད་པས་གསོལ་པ། །སངས་རྒྱས་སྤྱོད་ཡུལ་གང་ལགས་པའི། །ཆོས་ཀྱི་དབྱིངས་ལ་ཁྱོད་སྤྱོད་དེ། །བར་སྣང་མཁའ་དང་འདྲ་བ་ཡི། །འཇིག་རྟེན་མགོན་ལ་ཕྱག་ཀྱང་འཚལ། །ལྷའི་བུ་ཆོས་ཀྱི་དབྱིངས་ལ་རྟོན་པས་གསོལ། །གང་དང་གང་གི་སྒོ་དག་ནས། །སྐྱེས་བུ་དམ་པ་སྟོན་མཛད་པ། །དེ་ཡི་སྒོ་ནས་ཆོས་དབྱིངས་སྟོན། །དེ་ཕྱིར་རྟགས་དང་གཟུགས་མ་མཆིས། །ལྷའི་བུ་ཆོས་
ཀྱི་དབྱིངས་ལ་བརྩོན་པས་གསོལ་པ། །མངོན་པར་བརྩོན་པས་ཆོས་ཀྱི་དབྱིངས། །སྐྱེས་བུ་དམ་པ་ཁྱོད་ཀྱིས་མཁྱེན། །བརྩོན་པས་རྫོགས་པའི་སངས་རྒྱས་རྣམས། །ཡེ་ཤེས་ཕ་རོལ་ཕྱིན་པར་གྱུར། །ལྷའི་བུ་ཆོས་ཀྱིས་ཚིམ་གྱིས་གསོལ་པ། །དཔའ་བོ་ཁྱོད་ཀྱིས་སྐྱེ་བོ་འདི། །ཆོས་ཀྱིས་རབ་ཏུ་ཚིམ་པར་མཛད། །ཆོས་ཀྱི་དབྱིངས་ནི་རྣམ་མཁྱེན་པས། །འདྲེན་པ་བྱང་ཆུབ་མཆོག་ལ་བཞུགས། །ལྷའི་བུ་ཆོས་ཉིད་ཀྱི་གཏིང་རྙེད་པས་གསོལ་པ། །གཏིང་རྙེད་གྱུར་པའི་འགྲོ་བ་ཀུན། །འདྲེན་པ་ཁྱོད་ཀྱི་ཞལ་དུ་ལྟ། །ཆོས་དབྱིངས་རྣམ་པར་མཁྱེན་པ་ཡི། །འདྲེན་པ་ཁྱོད་ལ་ཕྱག་ཀྱང་འཚལ། །ལྷའི་བུ་གནས་ཤེས་པ་ལ་རབ་ཏུ་གནས་པས་གསོལ་པ། །མི་མཆོག་འདྲེན་པ་སངས་རྒྱས་ཀྱི། །ཡེ་ཤེས་གནས་འདི་ཆོས་དབྱིངས་ཏེ། །རྣམ་པར་འདྲེན་པ་སྟོབས་བཅུ་པོ། །གང་ལ་སྤྱོད་པ་དེ་ལགས་སོ། །ལྷའི་བུ་གནས་ལ་གནས་པས་གསོལ་པ། །ཆོས་ཀྱི་དབྱིངས་ནི་གནས་ཆེན་ཏེ། །ཐམས་ཅད་མཁྱེན་པ་བཞུད་པའི་ལམ། །དེ་ནི་ཆོས་རྣམས་ཐམས་ཅད་ཀྱང་། །མཚན་ཉིད་གཅིག་པར་ཤེས་པ་ལགས། །ལྷའི་བུ་གནས་མངོན་པར་ཤེས་པས་གསོལ་པ། །ཁྱོད་ནི་ཆོས་དབྱིངས་མངོན་པར་མཁྱེན། །མཚན་ཉིད་གཅིག་ལ་མཁས་པ་སྟེ། །སེམས་ཅན་ཀུན་གྱི་བསམ་པ་ཡང་། ། རྐང་གཉིས་གཙོ་བོ་ཁྱོད་ཀྱིས་མཁྱེན། །ལྷའི་བུ་གནས་ནས་ངེས་པར་བྱུང་གིས་གསོལ་པ། །རྣམ་པར་འདྲེན་པ་ཁྱོད་ཀྱི་སྲས། །གནས་སུ་བྱ་བ་ཆོས་དབྱིངས་ཤེས། །གསལ་བར་འཚལ་བའི་མཁས་པ་རྣམས། །རང་བྱུང་ཉིད་དུ་ངེས་པར་བྱུང་། །ལྷའི་བུ་གནས་ལ་བསླབས་པས་གསོལ་པ། །ཆོས་ཀྱི་དབྱིངས་ལ་གང་བསླབས་པའི། །སྐྱེས་བུ་དེ་དག་བྱང་ཆུབ་ཞུགས། །རང་བྱུང་ཉིད་དུ་གནས་རྙེད་པས། །དེ་དག་རྐང་གཉིས་མཆོག་ཏུ་འགྱུར། །ལྷའི་བུ་གནས་མེད་པ་ལ་མཁས་པས་གསོལ་པ། །གནས་མེད་པ་ནི་གང་འཚལ་པ། །དེ་དག་བདེ་གཤེགས་དགོངས་ལ་མོས། །བདུད་རྣམས་བྱེ་བ་སྟོང་གིས་ཀྱང་། །དེ་དག་རྨོངས་པར་ཡོད་མི་ནུས། །ལྷའི་བུ་གནས་མེད་པ་མངོན་པར་ཤེས་པས་གསོལ་པ། །གནས་མེད་གང་གིས་རིག་གྱུར་པ། །
དེ་དག་བདག་ཅག་བདུད་ཀྱི་ཚོགས། །བྱེ་བ་བྱང་ཆུབ་མི་སྐྱོད་ཅེས། །མཁས་པ་དེ་དག་ཤིན་དུ་དགའ། །ལྷའི་བུ་གནས་མེད་པའི་དགོངས་པ་ལ་མཁས་པས་གསོལ་པ། །གནས་མེད་འདུ་ཤེས་མཁས་པ་ནི། །ཆོས་ཉིད་ལ་ནི་རབ་གནས་ཏེ། །སྡིག་ཅན་བདུད་རྣམས་བཤལ་བ་ནི། །ཇི་ལྟར་རྟ་ཡིས་ཤིང་རྟ་བཞིན། །ལྷའི་བུ་གནས་མེད་པ་ལ་མཁས་པས་གསོལ་པ། །མཚན་ཉིད་གཅིག་ལ་མཁས་པ་པོ། །ཆོས་ཀྱི་དབྱིངས་ལ་བགེགས་བགྱིད་པའི། །བདུད་ཀྱི་ལས་ནི་གནས་མེད་དེ། །གནས་མེད་དོ་ཞེས་རྒྱལ་བས་གསུངས། །ལྷའི་བུ་གནས་དང་གནས་མ་ཡིན་པ་རྟོགས་པས་གསོལ་པ། །གནས་དང་དེ་བཞིན་གནས་མིན་པ། །བྱིས་པའི་བློ་ཅན་རྣམས་ལ་བསྟན། །རང་གིས་དེ་ནི་ཐུགས་ཆུད་ནས། །སེམས་ཅན་རྣམས་ལ་ཁྱོད་ཀྱིས་བསྟན། །ལྷའི་བུ་སྦྱིན་ལ་མཁས་པས་གསོལ་པ། །སྔོན་ཆད་རྒྱུ་ནི་གང་དག་དང་། །ལས་འདྲ་འབྱུང་བ་མ་འཚལ་བའི། །རྒྱུ་དེ་ཁྱོད་ཀྱིས་ཐུགས་སུ་ཆུད། །ལས་ཀྱི་གནས་ཀྱང་རབ་ཏུ་མཁྱེན། །ལྷའི་བུ་ལས་ལ་མཁས་པས་གསོལ་པ། །ཆགས་དང་ཞེ་སྡང་གཏི་མུག་ནི། །ལས་ཀྱི་རྒྱུ་ཞེས་ཁྱོད་ཀྱིས་མཁྱེན། །གང་གིས་རྒྱུ་ཡིས་བགྱིས་དེ་ཡང་། །གང་ཟག་མཆོག་གིས་ཐུགས་སུ་ཆུད། །ལྷའི་བུ་མ་འོངས་པ་ལ་མཁས་པས་གསོལ་པ། །མ་འོངས་པ་ཡི་དུས་དག་ན། །མི་རྣམས་ལས་གང་བགྱིད་འགྱུར་བ། །དེ་ཡི་རྒྱུ་དང་ལེན་པ་དང་། །གནས་དང་ལས་ཀྱང་ཁྱོད་ཀྱིས་མཁྱེན། །ལྷའི་བུ་ད་ལྟར་བྱུང་བ་ལ་ལྟ་བས་གསོལ་པ། །ཕྱོགས་བཅུའི་འཇིག་རྟེན་འདི་དག་གི །སེམས་ཅན་རྣམས་དང་རྒྱུ་དང་ལས། །གནས་དང་ལས་ཀྱི་ལེན་པ་རྣམས། །ཀུན་ཀྱང་འདྲེན་པ་ཁྱོད་ཀྱིས་མཁྱེན། །ལྷའི་བུ་སྟོབས་ཀྱི་སྤྱོད་ཡུལ་གྱིས་གསོལ་པ། །མི་དབང་ཁྱོད་ཀྱིས་མ་གཟིགས་པའི། །ལས་དང་རྒྱུ་དང་མ་མཆིས་ཏེ། །གནས་དང་སྐྱེ་བའང་མ་མཆིས་སོ། །དེ་བས་ཁྱོད་ནི་གང་ཟག་མཆོག །ལྷའི་བུ་སྟོབས་ལ་མངོན་པར་དགའ་བས་གསོལ་པ། །ལས་དང་རྒྱུ་དང་དེ་བཞིན་གནས། །དུས་ལ་རྣམ་སྨིན་རྣམ་གསུམ་དང་། །ཇི་ལྟར་དེ་ཡི་ལེན་པ་ཡང་། །ཁྱོད་ཀྱིས་མཁྱེན་པས་དེ་སླད་མཆོད། །ལྷའི་བུ་སྟོབས་
ཀྱི་བློ་གྲོས་ཀྱིས་གསོལ་པ། །རྒྱུ་དང་ལས་དང་ལེན་པ་དང་། །རྣམ་པར་སྨིན་དང་རྐྱེན་དང་གནས། །རང་བཞིན་བྲལ་བར་ཁྱོད་ཀྱིས་མཁྱེན། །དེ་ཕྱིར་རྒྱལ་བ་མཉམ་པ་མེད། །ལྷའི་བུ་སྟོབས་ཀྱིས་བྱུང་གིས་གསོལ་པ། །རྒྱུ་དང་ལས་དང་ལེན་པ་དང་། །གནས་དང་རྐྱེན་དང་རྒྱུ་རྣམས་དང་། །རྣམ་སྨིན་སོ་སོ་ཡང་དག་རིག །ཐམས་ཅད་སྟོང་པར་རབ་ཏུ་མཁྱེན། །ལྷའི་བུ་སྟོབས་ལ་དགའ་བས་གསོལ་པ། །རྒྱུ་དང་ལས་དང་ལེན་པ་དང་། །གནས་དང་རྐྱེན་དང་རྒྱུད་ཀྱི་རྣམས། །ཁྱོད་འདི་རང་གིས་མངོན་མཁྱེན་ཏེ། །རང་བཞིན་མེད་པར་བསྟན་པ་མཛད། །ལྷའི་བུ་སྟོབས་ཀྱིས་རྣམ་པར་རྩེ་བས་གསོལ་པ། །རྒྱུ་དང་ལས་དང་ལེན་པ་དང་། །གནས་དང་རྐྱེན་དང་རྒྱུད་ཀྱི་རྣམས། །འཕོ་མེད་དབང་ཕྱུག་མེད་པ་སྟེ། །རྟེན་ཅིང་འབྲེལ་བར་ཁྱོད་ཀྱིས་མཁྱེན། །ལྷའི་བུ་སྟོབས་ཀྱིས་འཕགས་ཀྱིས་གསོལ་པ། །རྒྱུ་དང་རྐྱེན་དང་ལས་རྣམས་དང་། །རྣམ་པར་སྨིན་པ་སྟེན་པ་རྣམས། །དེ་ཀུན་རང་བཞིན་སྟོང་ངོ་ཞེས། ། སེང་གེའི་ང་རོར་ཁྱོད་ཀྱིས་གསུངས། །ལྷའི་བུ་སྟོབས་ཀྱི་རྗེས་སུ་འབྲང་བས་གསོལ་པ། །འཇིག་རྟེན་ལས་ནི་གང་ཞིག་གིས། །ཁམས་ནི་གང་ཞིག་སྤེལ་གྱུར་པ། །དེ་དག་རྐང་གཉིས་གཙོ་བོས་མཁྱེན། །དེ་བས་ཁྱོད་ནི་དོ་ཟླ་མེད། །ལྷའི་བུ་སྟོབས་དང་ལྡན་གྱིས་གསོལ་པ། །ཁམས་གང་ལ་ནི་བསྟེན་བགྱིས་ཤིང་། །ཅི་འདྲའི་རང་བཞིན་གྱུར་པ་ཡི། །སེམས་ཅན་ཐམས་ཅད་ཁྱོད་ཀྱིས་མཁྱེན། །ཕྱག་གི་སོར་མོ་ལྔ་དང་འདྲ། །ལྷའི་བུ་སྟོབས་ལ་སྤྱོད་པས་གསོལ་པ། །ཁམས་གང་ལ་ནི་བརྟེན་བགྱིས་ཤིང་། །བཤེས་གཉེན་ཅི་འདྲ་རྙེད་གྱུར་ནས། །འདུ་འཛི་ཅི་འདྲ་བགྱིད་གྱུར་པ། །དེ་དག་བླ་ན་མེད་པས་མཁྱེན། །ལྷའི་བུ་སྟོབས་ཀྱི་བྱིན་གྱིས་བརླབས་པས་གསོལ་པ། །སྟོབས་ཀྱི་བྱིན་གྱི་བརླབས་མཁྱེན་ཅིང་། །འདྲེན་པ་དེ་ནི་ཁམས་དང་ནི། །འདུ་འཛི་བཤེས་གཉེན་ཚོགས་ཀྱི་རྣམས། །དེ་དག་མི་མཆོག་ཁྱོད་ཀྱིས་
མཁྱེན། །ལྷའི་བུ་ཁམས་ངེས་པས་གསོལ་པ། །ཁམས་དེ་དང་ནི་ལེན་པ་དང་། །བཤེས་གཉེན་དེ་དང་དེ་འགྲོགས་པ། །དེ་ལ་ཁྱོད་ཀྱི་མཁྱེན་པ་ངེས། །དེ་ཕྱིར་ཐེ་ཚོམ་ཡོད་མི་མངའ། །ལྷའི་བུ་ཁམས་ལ་བརྟེན་པས་གསོལ་པ། །སེམས་ཅན་གང་ན་གནས་གནས་པའི། །འཁོར་བ་དེ་དང་ཁམས་དེ་དང་། །སྤྱོད་དང་སྐད་དང་འགྲོ་བ་རྣམས། །མི་མཆོག་ཁྱོད་ཀྱིས་རབ་དུ་མཁྱེན། །ལྷའི་བུ་ཁམས་ལ་མཁས་པས་གསོལ་པ། །ཡེ་ཤེས་གང་གིས་ཁམས་དེ་ནི། །འདྲེན་པས་མངོན་པར་མཁྱེན་པ་ཡི། །མཁྱེན་དེ་མཁྱེན་པས་སྟོང་ངོ་ཞེས། །བླ་མཆོག་མངའ་བས་ཡང་དག་བསྟན། །ལྷའི་བུ་ཁམས་ནས་ངེས་པར་འབྱུང་གིས་གསོལ་པ། །ཁམས་གང་ལ་ནི་བསྟན་བགྱིས་ན། །འདུས་བྱས་དག་ལ་ཇི་སྲིད་གནས། །དེ་ནི་ཁྱོད་ཀྱིས་ཇི་བཞིན་མཁྱེན། །ཁྱོད་ལ་དོ་ཟླ་མ་མཆིས་སོ། །ལྷའི་བུ་ཁམས་ཀྱི་རྗེས་སུ་སོད་པས་གསོལ་པ། །ཁམས་གང་ལ་ནི་བསྟེན་བགྱིས་པས། །ཡོན་ཏན་ཇི་སྙེད་བསྐྱེད་པ་དང་། རྣམ་པར་སྨིན་དང་འབྲས་བུ་དག །དེ་དག་མ་ལུས་ཁྱོད་ཀྱིས་མཁྱེན། །ལྷའི་བུ་ཁམས་ལ་ཡང་དག་གཞུགས་པས་གསོལ་པ། །ཁམས་གང་ལ་ནི་བསྟེན་བགྱིད་ཅིང་། །འགྲོ་བ་ཅི་འདྲ་འདོང་བགྱིད་པ། །དེ་ཡང་ཁྱོད་ཀྱིས་ཐོགས་མེད་མཁྱེན། །དེ་ཕྱིར་ཁྱོད་ནི་མཁས་པས་མཆོད། །ལྷའི་བུ་ལམ་མངོན་པར་ཤེས་པས་གསོལ་པ། །ཁམས་གང་ལ་ནི་བསྟེན་བགྱིས་པས། །འགྲོ་བ་ཅི་འདྲ་མཆི་བ་ཡི། །སེམས་ཅན་རྣམས་ཀྱི་ལམ་དག་ཀྱང་། །ཡེ་ཤེས་མཁས་པ་ཁྱོད་ཀྱིས་མཁྱེན། །ལྷའི་བུ་ལམ་ལ་མི་འཇིགས་པས་གསོལ་པ། །སེམས་ཅན་ལོག་པ་ཉིད་ངེས་ཤིང་། །མྱ་ངན་འདས་འགྲོ་སྐལ་མེད་པ། །ཕུང་པོ་གསུམ་པོ་དེ་དག་ལ། །ཁྱོད་ཀྱི་ཡེ་ཤེས་ངེས་པར་འཇུག །ལྷའི་བུ་ལམ་གྱིས་ངེས་པར་བྱུང་གིས་གསོལ་པ། །སེམས་ཅན་ཡང་དག་ཉིད་ངེས་ཏེ། །ངན་འགྲོར་འགྲོ་བའི་སྐལ་མེད་པ། །དེ་ལ་འཇིག་རྟེན་སྒྲོལ་མ་ཁྱོད། །རྟོགས་པ་ཐོགས་པ་མེད་པར་འཇུག །ལྷའི་བུ་ལམ་ལ་མོས་པས་གསོལ་པ། །མ་ངེས་ཕུང་པོར་གྱུར་པ་ལ། །གང་ཟག་གང་རྣམས་གནས་པ་རྣམས། །དེ་ལ་ངན་སོང་ངན་འགྲོ་དང་། །མྱ་ངན་འདས་པའང་ཁྱོད་
ཀྱིས་བསྟན། །ལྷའི་བུ་སྟོབས་ཀྱི་བརྡས་གསོལ་པ། །སངས་རྒྱས་བརྡ་ཙམ་ཉིད་ལགས་ཏེ། །དེ་བཞིན་སྟོབས་དང་ཡེ་ཤེས་དང་། །མི་འཇིགས་བཞི་ཡང་དེ་བཞིན་དུ། །ཀུན་རྫོབ་ཅེས་ནི་ཐུབ་པས་གསུངས། །ལྷའི་བུ་ཡང་དག་པ་མཐོང་བས་གསོལ་པ། །སངས་རྒྱས་སངས་རྒྱས་ཆོས་རྣམས་མེད། །ཡེ་ཤེས་གནས་པ་གཞན་ཡང་མེད། །དོན་དམ་ཉིད་དུ་བསྟན་ཏོ་ཞེས། །དེ་བཞིན་གཤེགས་པ་ཁྱོད་ཀྱིས་མཁྱེན། །ལྷའི་བུ་སྟོབས་ལ་གནས་ཀྱིས་གསོལ་པ། །སངས་རྒྱས་ཆོས་ལ་སྟོབས་གནས་པས། །དེས་ན་དེ་ལ་འཇིགས་མེད་དེ། །རྒྱལ་བ་དེ་བཞིན་གཤེགས་ཀྱི་སྲས། །ཇི་ལྟར་འདོད་དགུར་རྣམ་པར་འཕྲུལ། །ལྷའི་བུ་ཆོས་ལ་འཇིགས་མེད་ཀྱིས་གསོལ་པ། །ཀུན་རྫོབ་དང་ནི་དོན་དམ་དང་། །དེ་དག་རབ་ཏུ་བསྟན་མཆིས་ཀྱང་། །ཀུན་རྫོབ་དང་ནི་དོན་དམ་དང་། །བརྡ་ཡང་དམིགས་སུ་མ་མཆིས་སོ། །ལྷའི་བུ་ཡེ་ཤེས་ལྷུར་ལེན་གྱིས་གསོལ་པ། །བརྗོད་པ་ཐམས་ཅད་རྣམ་པ་གཞན། །ཆོས་ཀྱི་མཚན་ཉིད་རྣམ་པ་གཞན། །མཚན་ཉིད་མ་མཆིས་བརྗོད་མ་མཆིས། །ཁྱོད་ཀྱིས་ཆོས་ཀྱི་མཚན་་ཉིད་གཟིགས། །ལྷའི་བུ་ལམ་ལ་བརྩོན་པས་གསོལ་པ། །ངེས་པར་གྱུར་པའི་སེམས་ཅན་རྣམས། །གཞན་གྱི་རྒྱུད་མཆིའི་གནས་མ་མཆིས། །ལོག་པར་ངེས་རྣམས་ཀུན་དུ་འགྲོར། །དྲང་སྲོང་ཆེན་པོ་ཁྱོད་ཀྱིས་གཟིགས། །ལྷའི་བུ་མི་སྡུག་པ་ལས་ངེས་པར་བྱུང་གིས་གསོལ་པ། །མ་མཆིས་ཡོངས་སུ་བརྟགས་པས་ན། །འདོད་ཆགས་ཁམས་ནི་རབ་ཏུ་བྱུང་། །དེ་ལ་མོས་པ་ངེས་འབྱུང་བ། །དེ་དག་ཁྱོད་ཀྱིས་ཇི་བཞིན་གཟིགས། །ལྷའི་བུ་བྱམས་པས་ངེས་པར་བྱུང་གིས་གསོལ་པ། །མ་མཆིས་ཡོངས་སུ་བརྟགས་པས་ན། །ཞེ་སྡང་ཁམས་ནི་རབ་ཏུ་བྱུང་། །དེ་ལ་མོས་པ་ངེས་འབྱུང་བ། །དེ་དག་ཁྱོད་ཀྱིས་ཇི་བཞིན་གཟིགས། །ལྷའི་བུ་རྐྱེན་འདིས་ངེས་པར་འབྱུང་
གིས་གསོལ་པ། མ་མཆིས་ཡོངས་སུ་བརྟགས་པས་ན། །གཏི་མུག་ཁམས་ནི་རབ་ཏུ་བྱུང་། །དེ་ལ་མོས་པ་ངེས་འབྱུང་བ། །དེ་དག་ཁྱོད་ཀྱིས་ཇི་བཞིན་གཟིགས། །ལྷའི་བུ་གཏོང་བས་ངེས་པར་བྱུང་གིས་གསོལ་པ། །འཚོ་མེད་འཇིགས་པ་རྙེད་པ་དག །སེར་སྣ་མངོན་པར་འཕེལ་འགྱུར་ཏེ། །དེ་ལ་མོས་པ་ངེས་འབྱུང་བ། །དེ་དག་ཐུབ་ཆེན་ཁྱོད་ཀྱིས་གཟིགས། །ལྷའི་བུ་དགེ་བའི་བཤེས་གཉེན་གྱིས་ངེས་པར་བྱུང་གིས་གསོལ་པ། ། སྡིག་པའི་གྲོགས་དང་འགྲོགས་པས་ན། །འཐུན་པའི་ཁམས་ནི་རབ་ཏུ་འབྱུང་། །དེ་ལ་མོས་པ་འཐོབ་འགྱུར་བ། །དེ་དག་འདྲེན་པས་རྣམ་པར་མཁྱེན། །ལྷའི་བུ་རྣམ་པར་ཤེས་པ་སྙིང་པོར་འཛིན་པས་གསོལ་པ། །འཁོར་བ་ན་ནི་འཁོར་རྣམས་ཀྱིས། །ཅི་འདྲའི་ཁམས་ལ་བསྟེན་པ་དང་། །མོས་པ་དེ་མཐར་ཕྱིན་པ་དག །ཁྱོད་ཀྱིས་མ་ལུས་རབ་ཏུ་མཁྱེན། །ལྷའི་བུ་ནན་ཏན་སྙིང་པོར་བྱེད་པས་གསོལ་པ། །འཁོར་བ་ན་ནི་འཁོར་རྣམས་ཀྱིས། །གང་གིས་རྒྱུས་བྱུང་ནན་ཏན་དང་། །མོས་པ་དེ་ལས་གྱུར་པ་ཡང་། །སྣང་བ་མེད་པ་ཁྱོད་ཀྱིས་གཟིགས། །ལྷའི་བུ་དབང་པོ་ལ་མོས་པས་གསོལ་པ། །སེམས་ཅན་གང་གིས་ཁམས་གང་ལ། །བསྟེན་ན་ཇི་ལྟར་འགྱུར་བ་ཡི། །རྒྱུ་དེ་ཁྱོད་ཀྱིས་རབ་ཏུ་མཁྱེན། །དེས་ན་ཁྱོད་ནི་དགའ་བར་མཛད། །ལྷའི་བུ་དབང་པོ་ལ་སྤྱོད་པས་གསོལ་པ། །སྦྱོར་བ་གང་གིས་སྐྱེ་བ་དང་། །གང་གིས་རྒྱ་ཆེན་སྐྱེ་བ་དང་། །དམིགས་པ་དང་ནི་ཞིང་རྣམས་དང་། །དབང་པོ་ཁྱོད་ཀྱིས་རབ་ཏུ་མཁྱེན། །ལྷའི་བུ་དབང་པོས་ངེས་པར་བྱུང་གིས་གསོལ་པ། །འདོད་པའི་སྡུག་བསྔལ་གནོད་གྱུར་དང་། །སྲེད་པ་མངོན་པར་འཇུག་པ་དང་། །སྲིད་པ་ཞི་བ་བགྱི་བའི་དོན། །དེ་དག་སྨྲ་བའི་མཆོག་གིས་མཁྱེན། །ལྷའི་བུ་དབང་པོའི་སྤྱོད་ཡུལ་གྱིས་གསོལ་པ། །དབང་པོ་ཉམ་ཆུང་རྣམ་དག་ནི། །གཟུགས་ཀྱི་འདོད་ཆགས་དབེན་པར་འཚལ། །སྲིད་པ་རྣམ་པར་གཞིག་པ་ཡང་། །རྐང་གཉིས་དམ་པས་བསྟན་པ་མཛད། །ལྷའི་བུ་དབང་པོ་རྣམ་པར་རྒྱལ་བས་གསོལ་པ། །དབང་པོ་
རྟུལ་པོ་དུར་ཁྲོད་བསྟེན། །རང་གི་འདོད་ཆགས་ཞི་བར་བགྱིད། །རྐང་གཉིས་གཙོ་བོའི་ཞལ་མཐོང་ནས། །སྲེད་དང་བཅས་པ་ཁྱོད་ལ་ལྟ། །ལྷའི་བུ་དབང་པོ་རྟོགས་ཀྱིས་གསོལ་པ། །འདོད་ཆགས་ཅན་དང་འདོད་ཆགས་དང་། །ཞི་དང་ཤེས་དང་མི་ཤེས་དང་། །སྲིད་པ་ཞི་དང་དབང་པོ་རྣམས། །རྣམ་པར་གཟིགས་ན་སྔོན་མ་དམིགས། །ལྷའི་བུ་དབང་པོ་ལ་གནས་པས་གསོལ་པ། །ཞེ་སྡང་གཉེན་པོར་གྱུར་པ་ཡི། །གནོད་སེམས་མེད་དང་དབེན་པ་དག །དབང་པོ་རཏལ་པོ་སྟེན་པའི་ཚེ། །ཁྱོད་ཀྱིས་འགྲོ་བའི་བསམ་པ་གཟིགས། །ལྷའི་བུ་དབང་པོ་ལ་བརྩོན་པས་གསོལ་པ། །ཞེ་སྡང་གཉེན་པོར་བྱམས་པ་གསུང་། །སེམས་ཅན་ཤེས་པ་རྗེས་སུ་སྐྱེ། །ཞེ་སྡང་ཁམས་ནི་ཞི་བར་བགྱིད། །དེ་དག་མི་མཆོག་ཁྱོད་ཀྱིས་མཁྱེན། །ལྷའི་བུ་དབང་པོ་ཚོལ་བས་གསོལ་པ། །གནོད་སེམས་མེད་དང་བྱམས་པ་དང་། །ཞི་བའི་ངོ་བོ་ཉིད་མ་གཟིགས། །དག་དང་ཉོན་མོངས་མ་དམིགས་ཏེ། །དེས་ན་འཇིག་རྟེན་ཁྱད་པར་འཕགས། །ལྷའི་བུ་དབང་པོ་རྗེས་སུ་འབྲང་གིས་གསོལ་པ། །ལོག་པར་རྣམ་པར་རྟོག་པ་དང་། །ལོག་པར་ཉེ་བར་སྟོན་པ་ཡང་། །ཉོན་མོངས་དམ་ཕྱིར་ཀུན་སྦྱོར་ཏེ། །བཟློག་པས་ཐར་པར་འགྱུར་བ་གཟིགས། །ལྷའི་བུ་ཡེ་ཤེས་ཡང་དག་ཤར་གྱིས་གསོལ་པ། །འདོད་ཆགས་ཞེ་སྡང་གཏི་མུག་དང་། །དངོས་ལ་འཛིན་པ་མུན་པ་སྟེ། །བཟློག་པས་སྣང་བ་ཆེན་པོར་འགྱུར། །དེ་ནི་གྲགས་ཆེན་ཁྱོད་ཀྱིས་མཁྱེན། །ལྷའི་བུ་ཡེ་ཤེས་འདོད་ཆགས་ཆད་པས་གསོལ་པ། འདོད་ཆགས་ཞེ་སྡང་གཏི་མུག་དང་། །མུན་པ་སྣང་བ་དངོས་པོ་རྣམས། །རང་བཞིན་ཉིད་ཀྱིས་མ་མཆིས་ཏེ། །དེ་ནི་རྐང་གཉིས་གཙོ་བོས་གཟིགས། །ལྷའི་བུ་སྣང་བ་འཛིན་གྱིས་གསོལ་པ། །སེམས་ཅན་གང་གི་ཤེས་པ་གང་། །ཇི་ཙམ་ཡོངས་སུ་བསྒྲུབ་བགྱིས་དང་། །སྣོད་ཏུ་གང་རུང་ཇི་སྙེད་པ། །དེ་དག་མི་མཆོག་ཁྱོད་ཀྱིས་མཁྱེན། །ལྷའི་བུ་དབང་པོ་དང་ཞེས་འགྲས་པས་གསོལ་པ། །ཉོན་མོངས་སྤང་ཕྱིར་ཤེས་གང་གིས། །ཤེས་པ་དེ་ལ་རྟོག་བགྱིད་པ། །དེ་ཡང་སྟོན་པ་ཁྱོད་ཀྱིས་མཁྱེན། །དེ་
བས་ཁྱོད་ལ་མངོན་པར་དགའ། །ལྷའི་བུ་དབང་པོ་ལ་དགའ་བས་གསོལ་པ། །ཡུལ་དང་དུས་དང་གནས་དག་དང་། །སྤྱོད་པ་རྣམ་པར་བསྒོམ་པ་དང་། །ཉོན་མོངས་སྙོན་རྨོངས་རྣམ་དག་པ། །ཐུབ་པ་ཁྱོད་ཀྱིས་སྟོང་པར་གཟིགས། །ལྷའི་བུ་ཡེ་ཤེས་རྒྱལ་མཚན་གྱིས་གསོལ་པ། །དབང་པོ་རྣོ་རཏལ་འབྲིང་དག་དང་། ། གང་ཟག་དག་གིས་བསམ་པ་དང་། །བཅིངས་དང་ཐར་དང་ཟད་དང་ཤེས། །གཡོ་བ་མེད་པར་ཁྱོད་ཀྱིས་མཁྱེན། །ལྷའི་བུ་དབང་པོའི་རྒྱལ་མཚན་གྱིས་གསོལ་པ། །དབང་པོ་རབ་འབྲིང་རཏལ་པོ་དང་། །ཉོན་མོངས་ཡེ་ཤེས་ཚོར་བ་དང་། །གདུལ་དང་གདུལ་བར་བགྱིད་པ་དག །ཁྱོད་ཀྱིས་མཚན་ཉིད་མེད་པར་གསུངས། །ལྷའི་བུ་དབང་པོ་རྣམ་པར་བརྟགས་ཀྱིས་གསོལ་པ། །སེམས་ཅན་རྣམས་ཀྱི་བསམ་གཏན་དང་། །རྣམ་ཐར་ཀུན་ནས་ཉོན་མོངས་དང་། །སྙོམས་འཇུག་ཏིང་འཛིན་ལྡང་བ་དང་། །རྣམ་བྱང་ཐུབ་པ་ཁྱོད་ཀྱིས་མཁྱེན། །ལྷའི་བུ་སྟོབས་ཀྱི་ཤུགས་ཀྱིས་གསོལ་པ། །ཞི་བའི་ཏིང་ངེ་འཛིན་བསྟེན་ཏེ། །ཆོས་ཀུན་ངོ་བོ་ཉིད་ཀྱིས་ནི། །རང་བཞིན་མེད་པར་ཁྱོད་ཀྱིས་མཁྱེན། །དེས་ན་ཐམས་ཅད་མཁྱེན་ཅེས་བགྱི། །ལྷའི་བུ་སྟོབས་ཀྱི་གཙོ་ཆས་གསོལ་པ། །ཆོས་རྣམས་གང་དང་རང་བཞིན་གང་། །ཆོས་གང་གིས་ནི་བརྗོད་བགྱིས་པ། །ཡང་དག་ཇི་བཞིན་ཐུགས་སུ་ཆུད། །དེས་ན་དུས་གསུམ་ཆགས་མི་མངའ། །ལྷའི་བུ་སྟོབས་འོད་ཀྱིས་གསོལ་པ། །ལོག་པར་བརྟགས་པས་ཀུན་ཉོན་མོངས། །རྣམ་པ་བཞི་ནི་སྐྱེ་བར་འགྱུར། །ལས་ལས་སྐྱེས་པར་དེ་དག་མཁྱེན། །དེས་ན་ཁྱོད་ལ་དོ་ཟླ་མེད། །ལྷའི་བུ་སྟོབས་ཤེས་ཀྱིས་གསོལ་པ། །ཉོན་མོངས་རྣམས་དང་ལས་རྣམས་ཀྱི། །གཉེན་པོ་རྣམ་པར་བྱང་བ་དང་། །བསྟན་པའང་ཁྱོད་ཀྱིས་རབ་ཏུ་མཁྱེན། །དེས་ན་ཁྱོད་ལ་དོ་ཟླ་མེད། །ལྷའི་བུ་སྟོབས་ཀྱི་འོད་ཀྱིས་གསོལ་པ། །བསམ་གཏན་རྣམ་ཐར་ལྡང་བ་དང་། །སྙོམས་པར་འཇུག་དང་ཏིང་འཛིན་དང་། །ཀུན་ནས་ཉོན་མོངས་རྣམ་བྱང་དག །མིང་ཙམ་མོ་ཞེས་ཁྱོད་ཀྱིས་བསྟན། །ལྷའི་བུ་སྟོབས་ལས་བྱུང་གིས་གསོལ་པ། །
བསམ་གཏན་རྣམ་ཐར་རྣམ་བྱང་དང་། །སྙོམས་པར་འཇུག་དང་ཏིང་ངེ་འཛིན། །བག་ཡོད་པ་ལས་བྱུང་བ་སྟེ། །དེ་ལ་ཁྱོད་ཀྱིས་ཡེ་ཤེས་འཇུག །ལྷའི་བུ་སྟོབས་རྣམ་པར་སྤེལ་གྱིས་གསོལ་པ། །དཔའ་བོ་ཁྱོད་ཀྱི་མཁྱེན་པ་ནི། །བསམ་གཏན་ལ་སོགས་དེ་དག་དང་། །ལྡང་དང་རྣམ་པར་བྱང་ལ་འཇུག །དེ་ནི་རླུང་ལྟར་ཆགས་པ་མེད། །ལྷའི་བུ་སྔོན་གྱི་མཐའ་ལ་མཁས་པས་གསོལ་པ། །བསྐལ་པ་བྱེ་བ་གྲངས་མེད་དུ། །སྲིད་པ་འདི་ན་སྔོན་བཞུགས་ཚེ། །སྲིད་པའི་སྐྱོན་དང་ཡོད་མ་འདྲེས། །དེས་ན་ཁྱོད་ལ་དོ་ཟླ་མེད། །ལྷའི་བུ་སྔོན་གྱི་མཐའ་ལ་གནས་པས་གསོལ་པ། །བསྐལ་པ་བྱེ་བ་གྲངས་མེད་དུ། །བྱང་ཆུབ་གཞལ་ཡས་ཚོལ་མཛད་ཅིང་། །འདྲེན་པས་ཡོངས་སུ་སྤྱད་པས་ན། །དེས་ན་ཁྱོད་ནི་དཔའ་བོ་ལགས། །ལྷའི་བུ་སྔོན་གྱི་མཐའ་ལ་རྟོགས་པས་གསོལ་པ། །སྔོན་མཐར་སྦྱིན་པ་སྣ་ཚོགས་དག །བློ་མཆོག་གསུང་ཚེ་གསོལ་པས་ན། །སྤོབས་པ་སྣ་ཚོགས་རབ་མདའ་བར། །རྣམ་པར་འདྲེན་པ་དེས་ངེས་བྱུང་། །ལྷའི་བུ་སྔོན་གྱི་མཐའ་ལ་བྱང་བས་གསོལ་པ། །སྔོན་ཆད་འཁོར་བར་སྤྱོད་པའི་ཚེ། །ཚུལ་རྣམས་ལ་ནི་ཚུལ་མཁས་པ། །འཇིག་རྟེན་སྒྲོན་རྣམས་ཁྱོད་ཀྱིས་གཟིགས། །དེས་ན་ཁྱོད་ནི་ཚུལ་ལ་མཁས། །ལྷའི་བུ་སྔོན་གྱི་མཐའ་ཚར་ཕྱིན་པས་གསོལ་པ། །སྔོན་མཐར་ཆོས་རྒྱལ་མང་པོ་ལ། །དབའ་བོས་སྔན་ཆད་སྤྱོད་མཛད་པས། །ཐམས་ཅད་མཁྱེན་དུ་ངེས་པར་ཡང་། །སེམས་ཅན་མཁས་ལ་ཕྱག་ཀྱང་འཚལ། །ལྷའི་བུ་སྔོན་གྱི་ཚུལ་ཕུན་སུམ་ཚོགས་པས་གསོལ་པ། །བྱང་ཆུབ་མཆོག་ནི་བཙལ་བའི་ཕྱིར། །བསྐལ་པ་བྱེ་བ་གྲངས་མེད་དུ། །སངས་རྒྱས་བྱེ་བ་མཐའ་ཡས་པ། །དེ་ལ་ཁྱོད་ཀྱིས་ས་བོན་བཏབ། །ལྷའི་བུ་སྔོན་གྱི་ཚུལ་ལ་ངེས་པས་གསོལ་པ། །བསྐལ་པ་བྱེ་བར་བརྟག་མཛད་པས། །ཆོས་ཀུན་སེམས་ཅན་མེད་པ་ཞེས། །ཆོས་རྣམས་ཐམས་ཅད་ངེས་པར་མཁྱེན། །འདུ་འཕྲོད་ཙམ་དུ་རྒྱལ་བས་གསུང་། །ལྷའི་བུ་སྔོན་གྱི་མཐའ་ལ་སེམས་པས་གསོལ་པ། །
བསྐལ་པ་བྱེ་བ་གྲངས་མེད་དུ། །གནས་དང་གནས་མིན་རབ་མཁྱེན་པར། །རྣམ་པར་འདྲེན་པ་སྦྱོང་མཛད་པས། །དེས་ན་འཇིག་རྟེན་རྨོངས་མི་མངའ། །ལྷའི་བུ་སྔོན་གྱི་མཐའ་ལ་དཔྱད་པས་གསོལ་པ། །གནས་དང་གནས་མིན་བརྟེན་བགྱིས་ནས། །ལས་དང་རྒྱུ་རྣམས་དཔྱད་པས་ན། །ཁམས་དང་དབང་པོ་མོས་པ་དང་། །བསམ་གཏན་སྔོན་གྱི་མཐའ་ཡང་མཁྱེན། །ལྷའི་བུ་སྔོན་གྱི་མཐའ་ལ་ཡོངས་སུ་རྟོག་པས་གསོལ་པ། །སྟོབས་ཀྱི་ཡེ་ཤེས་རྣམ་བཅུ་པོ། །དཔའ་བོ་ཆེན་པོས་རྣམ་པར་སྤེལ། །དེས་ནི་འཇིག་རྟེན་འདི་ལ་གཟིགས། །ལྷའི་བུ་སྔོན་གྱི་མཐའི་སྤྱོད་ཡུལ་གྱིས་གསོལ་པ། །དཔའ་བོ་སེམས་ཅན་ཐམས་ཅད་ཀྱི། །སྔོན་གྱི་མཐའ་ཡི་སྤྱོད་པ་དང་། །དགེ་དང་མི་དགེའི་རྒྱུ་བ་རྣམས། །མཁྱེན་པས་འཇིག་རྟེན་གསོ་བ་མཛད། །ལྷའི་བུ་སྔོན་གྱི་མཐའ་ཡི་སྤྱོད་པ་ལ་སོ་སོར་རྟོག་པས་གསོལ་པ། །ཐུབ་པས་སྔོན་གྱི་སེམས་ཅན་གྱི། །སྔོན་མཐའི་སྤྱོད་པ་རབ་མཁྱེན་ཅིང་། །ཁམས་དང་མོས་པ་མཁྱེན་པས་ན། །དེ་ཕྱིར་སེམས་ཅན་གསོ་བ་མཛད། །ལྷའི་བུ་མོས་པའི་སྟོབས་ཅན་གྱིས་གསོལ་པ། །བསྐལ་པ་བྱེ་བ་མཐའ་ཡས་སུ། །སྔོན་གྱི་མཐའ་ལ་བརྟག་བགྱིས་ཀྱང་། །ཁྱོད་ཀྱི་དགོངས་པ་ཆགས་མི་མངའ། །དེས་ན་མགོན་ལ་བདག་མོས་ལགས། །ལྷའི་བུ་ཡེ་ཤེས་ལ་མོས་པས་གསོལ་པ། །བསྐལ་པ་བྱེ་བ་གྲངས་མེད་དུ། །སྔོན་མཐའི་སྲིད་པ་བསམ་བགྱིས་ཀྱང་། །རྐང་གཉིས་གཙོ་བོའི་ཡོན་ཏན་གྱི། །ཕ་རོལ་ཕྱིན་ནུས་འགའ་མ་མཆིས། །ལྷའི་བུ་ཕྱི་མའི་མཐའ་ལ་མཁས་པས་གསོལ་པ། །ཕྱོགས་བཅུའི་འཇིག་རྟེན་འདི་དག་གི །སྐྱེ་དགུ་སྣ་ཚོགས་ལས་ལྡན་པ། །ཤི་འཕོ་སྐྱེ་བར་འགྱུར་པ་དག །ཁྱོད་ཀྱིས་སངས་རྒྱས་སྤྱན་གྱིས་གཟིགས། །ལྷའི་བུ་ཕྱི་མའི་མཐའ་ལས་ངེས་པར་བྱུང་གིས་གསོལ་པ། །རྒྱུ་གང་གིས་ནི་ལས་གང་ཞིག །དགྱེས་ཤིང་རྒྱུད་དྲུག་མཆིར་འགྱུར་བ། །དེ་དག་ཐམས་ཅད་རྒྱལ་བས་མཁྱེན། །དེས་ན་ཐམས་ཅད་མཁྱེན་ཅེས་བགྱི། །ལྷའི་བུ་ཤི་འཕོ་དང་སྐྱེ་བ་མངོན་པར་ཤེས་
པས་གསོལ་པ། །ཁམས་གང་གིས་ནི་སེམས་ཅན་གང་། །བསྒོས་པར་གྱུར་ཅིང་ལས་བགྱིད་པའི། །བག་ཆགས་ལས་དང་སེམས་ཅན་དག །ཁྱོད་ཀྱིས་གཡོ་བ་མེད་པར་མཁྱེན། །ལྷའི་བུ་འཆི་འཕོ་དང་སྐྱེ་བ་རིག་པས་གསོལ་པ། །བཤེས་གཉེན་ཅི་འདྲ་བསྟེན་བགྱིས་ཤིང་། །ལས་གང་མངོན་པར་འདུས་བགྱིས་པས། །འགྲོ་བ་གང་དུ་མཆི་འགྱུར་བ། །ཐུབ་པ་ཁྱོད་ཀྱིས་དེ་ཡང་མཁྱེན། །ལྷའི་བུ་དགོས་པ་ལ་མཁས་པས་གསོལ་པ། །ལས་དེ་ཡི་ནི་བགྱི་བ་གང་། །དགོས་པ་ཁྱོད་ཀྱིས་རབ་ཏུ་མཁྱེན། །གང་གིས་སླད་དུ་ལས་བགྱིས་པ། །དེ་ཡང་མ་ལུས་རབ་ཏུ་མཁྱེན། །ལྷའི་བུ་དངོས་པོ་ལ་མཁས་པས་གསོལ་པ། །དངོས་པོ་དེ་དག་དམིགས་པ་ཡང་། །ལས་གང་མངོན་པར་འདུས་བགྱིས་པ། །ཐམས་ཅད་མཁྱེན་པས་དེ་མཁྱེན་ཏེ། །དེ་ནི་སངས་རྒྱས་སྤྱོད་ཡུལ་ལགས། །ལྷའི་བུ་དངོས་པོ་རིག་པས་གསོལ་པ། །སེམས་ཅན་རྣམས་ཀྱིས་བསམ་མཁས་པ། །དངོས་དེ་ཇི་ལྟར་གནས་པ་དང་། །དེ་ནི་ཇི་ལྟར་གྲུབ་པ་ཡི། །ལས་དེ་ཁྱོད་ཀྱིས་མངོན་པར་མཁྱེན། །ལྷའི་བུ་ཤེས་པ་ལ་མཁས་པས་གསོལ་པ། །ཤེས་པ་གང་གིས་དངོས་པོ་དེ། །བརྟགས་པར་གྱུར་བ་རབ་ཏུ་མཁྱེན། །དེ་ལ་ཇི་ལྟར་ཆགས་གྱུར་པ་འང་། །ཐུབ་པ་ཁྱོད་ཀྱིས་ཤིན་དུ་མཁྱེན། །ལྷའི་བུ་མངོན་པར་འདུ་བྱེད་པ་ལ་མཁས་ཀྱིས་གསོལ་པ། །ཆགས་པ་གང་གིས་ལས་དེ་རྣམས། །ཉོན་མོངས་གང་གིས་འདུ་བགྱིས་པའི། །ཉོན་མོངས་དེ་དག་ཡང་དག་མཁྱེན། །དེ་བས་ཁྱོད་ནི་བདག་གི་མགོན། །ལྷའི་བུ་འགྲོ་བ་ལ་མཁས་པས་གསོལ་པ། །འགྲོ་བ་གང་དུ་ལས་གང་གིས། །མཆིས་ཤིང་སྒྲིབ་པ་གང་རྙེད་ནས། །འབྲས་བུ་ཐོབ་པར་མི་འགྱུར་བ། །དེ་ཀུན་སྤྱན་ལྡན་ཁྱོད་ཀྱིས་མཁྱེན། །ལྷའི་བུ་དམིགས་པ་ལ་མཁས་པས་གསོལ་པ། །འགྲོ་བ་དག་ཏུ་སྐྱེས་རྣམས་ཀྱི། །གང་གིས་ལས་རྣམས་སྨིན་འགྱུར་བའི། །དམིགས་པ་ཁྱོད་ཀྱིས་རབ་མཁྱེན་ཏེ། །དེ་ལ་ཁྱོད་ཀྱི་བློ་གྲོས་འཇུག །ལྷའི་བུ་བག་ཆགས་ལ་མཁས་ཀྱིས་གསོལ་པ། །འགྲོ་དང་འགྲོ་བར་མི་རྣམས་ཀྱིས། །སྔོན་
ཆག་བགྱིས་པའི་སྡིག་ལས་དང་། །དེ་བཞིན་དགེ་བའི་ལས་རྣམས་ཀྱི། །བག་ཆགས་ཁྱོད་ཀྱི་རབ་ཏུ་མཁྱེན། །ལྷའི་བུ་ལས་ལ་མཁས་ཀྱིས་གསོལ་པ། །འགྲོ་བ་འབྱུང་པོ་ཐམས་ཅད་ཀྱི། །རྙིང་དང་གསར་དད་སླད་མ་དང་། །ལས་རྣམས་གསུམ་པོ་ཁྱོད་ཀྱིས་མཁྱེན། །དེ་ལ་སོ་སོའི་སྐྱེ་བོ་འཁྲུལ། །ལྷའི་བུ་རྣམ་པར་སྨིན་པ་ལ་མཁས་ཀྱིས་གསོལ་པ། །ཆུང་ཞིང་རྣམ་སྨིན་ཆེ་བ་དང་། །ཆེ་ཞིང་རྣམ་སྨིན་ཆུང་བ་དང་། །ཆུང་ངམ་ཆེའམ་མཉམ་པའང་རུང་། །དེ་ལ་མུ་སྟེགས་ཅན་རྣམས་རྨོངས། །ལྷའི་བུ་ལས་ལ་མཁས་ཀྱིས་གསོལ་པ། །ཚེ་འདིའི་ལས་རྣམས་གང་ལགས་དང་། །སྐྱེ་བོའི་ལས་རྣམས་གང་ལགས་དང་། །ལན་གྲངས་གཞན་གྱི་གང་ལགས་པ། །དེ་དག་སྤྱན་ལྡན་ཁྱོད་ཀྱིས་མཁྱེན། །ལྷའི་བུ་ཚེ་འདི་ལ་མྱོང་བར་འགྱུར་བ་ལ་མཁས་ཀྱིས་གསོལ་པ། །ཚེ་འདི་ལ་ནི་བགྱིས་པ་ཡི། །ལས་ཀྱི་རྣམ་སྨིན་མི་གང་དག །མྱོང་བར་འགྱུར་བ་གང་དག་ལ། །སོ་སོའི་སྐྱེ་བོ་རྨོངས་པ་མཁྱེན། །ལྷའི་བུ་སྐྱེས་ནས་མྱོང་བར་འགྱུར་བ་ལ་མཁས་ཀྱིས་གསོལ་པ། །གང་གིས་ལས་གང་བསགས་གྱུར་ཏེ། །སྐྱེས་ནས་རྣམ་པར་སྨིན་གྱུར་པ། །གང་ལ་འཇིག་རྟེན་གཏིང་མི་རྙེད། །ཤེས་རབ་ཆེན་པོས་དེ་ཉིད་མཁྱེན། །ལྷའི་བུ་ལན་གྲངས་གཞན་ན་མྱོང་བར་འགྱུར་བ་ལ་མཁས་ཀྱིས་གསོལ་པ། །ལས་གང་བསྐལ་པ་བྱེ་བ་ཡི། །ཕྱི་དུས་རྣམ་པར་སྨིན་འགྱུར་ཞིང་། །དུས་གཞན་དག་ན་ཡང་འབྱུང་བ། ། དེ་དག་ཡང་དག་ཉིད་དུ་མཁྱེན། །ལྷའི་བུ་ཡོངས་སུ་མ་སྨིན་པ་མྱོང་བར་འགྱུར་བ་ལ་མཁས་ཀྱིས་གསོལ་པ། །ལས་རྣམས་གང་ཞིག་བགྱིས་གྱུར་པ། །ཡོངས་སུ་སྨིན་པར་མ་གྱུར་ན། །དེ་སྲིད་འབྲས་བུ་མི་འབྱིན་པ། །རྐང་གཉིས་མཆོག་གིས་དེ་ཡང་མཁྱེན། །ལྷའི་བུ་ཡོངས་སུ་མ་སྨིན་པ་མྱོང་བར་འགྱུར་བ་ལ་རྟོག་པས་གསོལ་པ། །ལས་གང་དང་ནི་ལྡན་པས་ན། །སེམས་ཅན་འདི་ནི་སྐྱེར་འགྱུར་བ། །ཕམ་པ་མེད་པས་དེ་མཁྱེན་ཏེ། །ཡོངས་སུ་བརྟགས་ནས་རབ་ཏུ་མཁྱེན། །ལྷའི་བུ་ཡོངས་སུ་སྨིན་པ་མྱོང་བར་འགྱུར་བ་ལ་མཁས་པས་གསོལ་པ། །ལས་ནི་ཇི་ལྟར་
ཡོངས་སྨིན་ན། །འབྲས་བུ་དཀར་བར་འགྱུར་བ་མཁྱེན། །དེ་ལ་ཁྱོད་ཀྱི་ཡེ་ཤེས་འཇུག །དེ་དག་སྟོང་བར་རྣམ་པར་མཁྱེན། །ལྷའི་བུ་ཡོངས་སུ་སྨིན་པ་མྱོང་བར་འགྱུར་བ་ལ་ངེས་པས་གསོལ་པ། །ཐམས་ཅད་མཁྱེན་པས་ལས་ཀྱི་རྣམས། །ལྕི་དང་ཡང་བར་རབ་ཏུ་མཁྱེན། །སེམས་ཅན་བསམ་པ་ཐུགས་སུ་ཆུད། །དེ་སླད་བཅོམ་ལྡན་བདག་གི་བླ། །ལྷའི་བུ་སེམས་ཅན་གྱི་སྤྱོད་པ་ལ་མཁས་ཀྱིས་གསོལ་པ། །སེམས་ཅན་སྤྱོད་པ་ཉེར་བཟུང་ཞིང་། །ལས་ཀྱི་ལྕི་དང་ཡང་བ་དག །དཔའ་བོ་ཁྱོད་ཀྱིས་རབ་ཏུ་མཁྱེན། །མུ་སྟེགས་ཅན་རྣམས་དེ་ལ་རྨོངས། །ལྷའི་བུ་སེམས་ཅན་གྱི་སྤྱོད་པ་ལ་དཔྱོད་པས་གསོལ་བ། སེམས་ཅན་སྤྱོད་པ་དཔྱད་མཛད་ཅིང་། །ལས་ཀྱི་རྣམ་པར་སྨིན་པ་བསྟན། །ཕོར་བུའི་ཆུ་དང་གང་གཱའི་ཆུ། །ལན་ཚྭས་རྣམ་པར་བསྟན་པ་བཞིན། །ལྷའི་བུ་ལས་ལ་མཁས་ཀྱིས་གསོལ་པ། །སློབ་དང་མི་སློབ་རྣམ་པར་སྨིན། །རྐང་གཉིས་དམ་པ་སྔོན་མཛད་ཅིང་། ། ཀུན་ནས་ཉོན་མོངས་ལས་མྱོང་ནས། །ལས་ནི་ཟད་པར་འགྱུར་བ་བསྟན། །ལྷའི་བུ་སངས་རྒྱས་ཡེ་ཤེས་ལ་རེག་པར་བྱེད་པས་གསོལ་པ། །སངས་རྒྱས་སྤྱན་གྱིས་ཁམས་གསུམ་ན། །ལས་ཀྱི་འབྲས་བུ་རྟེན་པ་ཡི། །བྱིས་པ་དག་དང་མཁས་པ་གཟིགས། །ཕྲ་གཟིགས་ཁྱོད་ལ་ཕྱག་འཚལ་ལོ། །ལྷའི་བུ་ལས་ཟད་པར་བྱེད་པས་གསོལ་པ། །འཇིག་རྟེན་དག་ན་རྣམ་འདྲེན་ཁྱོད། །སེམས་ཅན་རྣམས་ཀྱི་ཤི་འཕོ་དང་། །སྐྱེ་བ་ཀུན་ལ་ཡེ་ཤེས་འཇུག །མཁྱེན་པས་འཇིགས་མེད་ཕྱག་ཀྱང་འཚལ། །ལྷའི་བུ་དམིགས་པ་མེད་པ་ལ་སྦྱོར་པས་གསོལ་པ། །འཆི་འཕོ་བ་དང་སྐྱེ་དང་ལས། །འགྲོ་དང་དེ་བཞིན་སེམས་ཅན་དང་། །རྣམ་སྨིན་རྨི་ལམ་འདྲར་བསྟན་པ། །འདྲེན་པ་རྐང་གཉིས་མཆོག་གིས་མཁྱེན། །ལྷའི་བུ་ཉོན་མོངས་པ་ལ་རྟོག་པས་གསོལ་
པ། །ཇི་ལྟར་རྨི་ལམ་སྐོམ་པ་ཞིག །ཤིན་དུ་བསིལ་བའི་ཆུ་འཐུངས་བཞིན། །རྐང་གཉིས་མཆོག་ཁྱོད་འདོད་ཆགས་དང་། །ཞེ་སྡང་གཏི་མུག་རྣམས་ཀྱང་ཟད། །ལྷའི་བུ་ཡོངས་སུ་རྟོག་པ་དང་བྲལ་བས་གསོལ་པ། །འདོད་ཆགས་ཞེ་སྡང་གཏི་མུག་རྣམས། །ཡོངས་སུ་རྟོག་ལས་སྐྱེས་པ་སྟེ། །རྨི་ལམ་དགའ་བར་རྩེ་བ་བཞིན། །སྨྲ་མཆོག་ཁྱོད་ལ་ཕྱག་ཀྱང་འཚལ། །ལྷའི་བུ་ཡོངས་སུ་རྟོག་པ་ཞི་བར་བྱེད་པས་གསོལ་པ། །ཡོངས་སུ་རྟོག་པར་རབ་ཞི་བས། །ཉོན་མོངས་ཟད་པར་རབ་བསྟན་ཏེ། །རྨི་ལམ་ན་ནི་སྤྲིན་མེད་ལྟར། །མི་མཆོག་ཁྱོད་ཀྱིས་རབ་ཏུ་མཁྱེན། །ལྷའི་བུ་ཟག་པ་ལ་རྟོག་པས་གསོལ་པ། །རྨི་ལམ་ཆར་ཆེན་འབབ་པ་ལྟར། །དེ་བཞིན་ཟག་པ་རྣམས་འབྱུང་བར། །ཟག་པ་འབྱུང་ལ་མཁས་པ་པོ། །དཔའ་བོ་ཆེན་པོ་ཁྱོད་ཀྱིས་བསྟན། །ལྷའི་བུ་རྨི་ལམ་རྟོག་གིས་གསོལ་པ། །རྨི་ལམ་ཆར་ཆེན་འབབ་པ་ལྟར། །དེ་བཞིན་ཟག་པ་རྣམས་འབྱུང་སྟེ། །ནོར་པ་རྣམས་ལ་ཟག་འབྱུང་བར། །དཔའ་བོ་ཆེན་པོ་ཁྱོད་ཀྱིས་བསྟན། །ལྷའི་བུ་ཇི་ལྟ་བ་བཞིན་དུ་རྟོག་པས་གསོལ་པ། །ཇི་ལྟར་བུ་མོའི་རྨི་ལམ་ན་བུ་ཞིག་བྱུང་ལ་ཤི་འཕོས་ན། །དགའ་དང་སྡུག་བསྔལ་ཚོར་འགྱུར་དང་། །དེ་བཞིན་འགྲོ་བ་ཁྱོད་ཀྱིས་གཟིགས། །ལྷའི་བུ་རྨི་ལམ་རྟོགས་པས་གསོལ་པ། །རྨི་ལམ་དག་ན་མགོ་བཅད་བཞིན། །ཁྱོད་ཀྱིས་ཟག་པ་ཟད་པ་གཟིགས། །དེ་ནི་མཁས་པ་རྣམས་ལ་བསྟན། །ཐམས་ཅད་གཟིགས་པ་ཕྱག་ཀྱང་འཚལ། །ལྷའི་བུ་བློ་གྲོས་ངེས་པར་བརྟགས་ཀྱིས་གསོལ་པ། །ཆོས་ཀུན་མཁྱེན་པ་ཁྱོད་ཀྱིས་ནི། །ཇི་ལྟར་རྨི་ལམ་མཛའ་ཕྲད་དང་། །བྲལ་བ་ཡང་དག་མ་མཆིས་གཟིགས། །འགྲོ་བ་ཇི་བཞིན་ཚིམ་པར་མཛད། །ལྷའི་བུ་ཡེ་ཤེས་ཡིད་ཀྱིས་གསོལ་པ། །ཁྱོད་ཀྱི་དམ་པའི་ཆོས་སྟོང་པ། །ཐོས་ན་ཡིད་ནི་དགར་འགྱུར་ཏེ། །རྨི་ལམ་དག་ན་རྨི་བསྟན་བཞིན། །དེ་ལྟར་རྒྱལ་བས་བསྟན་པ་མཛད། །ལྷའི་བུ་ཡོངས་སུ་དགའ་བའི་ཡིད་ཀྱིས་གསོལ་པ། །མེ་ལོང་གཟུགས་བརྙན་སྣང་བ་བཞིན། །འགྲོ་བ་མཐའ་དག་གཟིགས་པས་ན། །བསམ་
གཏན་མངའ་བ་ཁྱོད་ལ་ནི། །ལྷར་བཅས་འཇིག་རྟེན་ཡིད་ཀྱང་དགའ། །ལྷའི་བུ་བློ་གྲོས་ངེས་པས་གསོལ་པ། །ཐུབ་པ་པི་བང་སྒྲ་འདྲ་བའི། །ཁྱོད་ཀྱི་དམ་ཆོས་ཐོས་གྱུར་ན། །ལྷ་བུ་རྣམས་ཀྱང་ཐེ་ཚོམ་བོར། །རྒྱལ་བ་མཆོག་ལ་ཕྱག་ཀྱང་འཚལ། །ལྷའི་བུ་སྒྱུ་མས་ཚིམ་གྱིས་གསོལ་པ། །སྒྱུ་མ་མཁན་པོས་སྒྱུ་མ་དག །བྱིས་པ་རྨོངས་བྱེད་ཡོངས་བསྟན་ན། །མི་མཁས་དེ་ལ་རྨོངས་པར་འགྱུར། །སྒྱུ་མ་བཞིན་དུ་ཁྱོད་ཀྱིས་བསྟན། །ལྷའི་བུ་སྤྲུལ་པ་ལ་སེམས་པས་གསོལ་པ། །ཇི་ལྟར་རྨི་ལམ་སྒྱུ་མཐོང་བ། །དེ་ལྟར་ཁྱོད་ཀྱིས་འགྲོ་བ་གཟིགས། །མགོན་པོའི་བསྟན་པ་དེ་ཐོས་ན། །བདག་ཅག་ཐེ་ཚོམ་མ་མཆིས་སོ། །ལྷའི་བུ་སྒྱུ་མ་ལས་ངེས་པར་བྱུང་གིས་གསོལ་པ། །སྒྱུ་མའི་མཁན་པོས་སྒྱུ་སྤྲུལ་ཀྱང་། །སྒྱུ་མ་ལགས་པར་འཚལ་པས་ན། །དེ་ལ་རྨོངས་པར་འགྱུར་མ་མཆིས། །དེ་བཞིན་ཁྱོད་ཀྱིས་འགྲོ་བ་གཟིགས། །ལྷའི་བུ་རྟོག་པའི་རྗེས་སུ་རྟོག་པས་གསོལ་པ། །ཇི་ལྟར་བརྩོན་པས་རྨི་ལམ་ན། །སངས་རྒྱས་སྐུ་གཟུགས་བརྟགས་པ་བཞིན། །དེ་ལྟར་རྟོག་པས་འཇིག་རྟེན་བསྐྱེད། །རྣམ་པར་འདྲེན་པ་ཁྱོད་ཀྱིས་གཟིགས། །ལྷའི་བུ་ཀུན་དུ་རྟོག་པ་འཇོམས་ཀྱིས་གསོལ་པ། །ཀུན་རྟོག་འདོད་ཆགས་རྒྱུ་ལགས་ཏེ། །འདོད་ཆགས་དངོས་པོས་བསྐྱེད་མ་ལགས། །རྟོག་པ་ངན་པས་འདོད་ཆགས་བྱུང་། །དེ་ནི་རྣམ་འདྲེན་ཁྱོད་ཀྱིས་གཟིགས། །ལྷའི་བུ་ཡོངས་སུ་ཤེས་པ་དང་ལྡན་པས་གསོལ་པ། །རི་སུལ་དག་ན་སྒྲ་བྱུང་བ། །བྲག་ཆ་སེམས་ཅན་སྒྲ་མ་ལགས། །དེ་བཞིན་འཇིག་རྟེན་ཁྱོད་ཀྱིས་གཟིགས། །དེ་སླད་འཇིག་རྟེན་ཆགས་མི་མངའ། །ལྷའི་བུ་སྟོན་པ་ལ་མཁས་པས་གསོལ་པ། །སྒྲ་ནི་གང་ཡང་མ་མཆིས་ཏེ། །སྒྲ་ནི་བྲག་ཆ་འདྲ་བ་ལགས། །འོན་ཀྱང་མི་དབང་ཁྱོད་ཀྱིས་བསྟན། །བྱིས་པ་མང་པོ་རབ་ཏུ་བཙུད། །ལྷའི་བུ་ནན་ཏན་ལ་མཁས་པས་གསོལ་པ། །ཆོས་རྣམས་དོན་ནི་གཞན་ལགས་ཀྱང་། །བྱིས་པ་རྣམས་ཀྱིས་གཞན་དུ་བརྟགས། །ནན་ཏན་ཆོས་ལས་ཤེས་པར་བགྱི །དེ་ལ་བདག་ནི་ཐེ་ཚོམ་ཆད། །ལྷའི་བུ་དོན་གྱི་རྗེས་སུ་འབྲང་བས་གསོལ་པ། །ཆོས་དོན་ཡང་དག་
གང་ལགས་པ། །དེ་ནི་སུས་ཀྱང་མ་རྟོགས་ཤིང་། །སུས་ཀྱང་མ་བསྟན་འཚལ་མ་གྱུར། །དེ་སྐད་ཐུབ་པའི་མཆོག་གིས་གསུངས། །ལྷའི་བུ་ཆོས་ཀྱི་བརྡ་རྟོགས་པས་གསོལ་པ། །ཟག་དང་དྲི་མ་ཉོན་མོངས་དང་། །བག་ཆགས་དང་ནི་རྟོག་དང་རྟོག །ཀུན་ནས་ཉོན་མོངས་རྣམ་དག་པ། །ཐུབ་པ་བརྡ་ཡི་ཆིག་ཀྱང་ལགས། །ལྷའི་བུ་ཀུན་དུ་རྟོག་པ་ལ་མཁས་པས་གསོལ་པ། །ཀུན་ནས་ཉོན་མོངས་རྣམ་དག་དང་། །ཟག་པ་དག་དང་ཉོན་མོངས་དང་། །དག་དང་བཤད་དང་ཉེ་དུ་དང་། །སྟོན་པ་འདི་ཀུན་མིང་ཙམ་ལགས། །ལྷའི་བུ་མི་གནས་པའི་བློ་གྲོས་ཀྱིས་གསོལ་པ། །ཁམས་གསུམ་རྣམས་ལ་མ་ཆགས་ཏེ། །ནམ་མཁའ་འདྲ་བའི་ཐུགས་མངའ་བ། །བྲལ་བར་གྱུར་ཅིང་སྦྱིན་པའི་གནས། །ཞི་བའི་སེམས་ལ་ཕྱག་ཀྱང་འཚལ། །ལྷའི་བུ་མ་གོས་པས་གསོལ་པ། ཐུབ་པ་ཁྱོད་ཀྱི་ཐུགས་ཡིད་ནི། །གཟུགས་དང་གཟུགས་མེད་མི་གནས་ཤིང་། །འདོད་དང་མྱ་ངན་འདས་པ་ལ། །གནས་པ་མ་མཆིས་བར་སྣང་འདྲ། །ལྷའི་བུ་རེ་བ་མེད་པས་གསོལ་པ། །འདོད་པའི་ཁམས་ལ་རེ་བ་སྤངས། །གཟུགས་དང་གཟུགས་མེད་གཉི་གར་མིན། །འདུ་འཛི་དག་དང་བྲལ་གྱུར་པ། སྲེད་ཟད་ཁྱོད་ལ་ཕྱག་ཀྱང་འཚལ། ལྷའི་བུ་སྲེད་པ་ཕྱུང་པས་གསོལ་པ། །འབྱུང་བ་དག་དང་འཇིག་པ་ལ། ཁྱོད་ཀྱི་སྲེད་པ་ཡང་དག་ཆད། ཁམས་གསུམ་ཀུན་ལ་ཆགས་མི་མངའ། རྣམ་པར་འདྲེན་ལ་ཕྱག་ཀྱང་འཚལ། །ལྷའི་བུ་སྲེད་པ་དང་བྲལ་བས་གསོལ་པ། ཀུན་དུ་སྦྱོར་དང་བྲལ་བ་སྟེ། ཡང་སྲིད་བས་པས་ཞི་གྱུར་པ། །དག་པའི་བདག་ཉིད་དག་པའི་སེམས། དུས་དང་བྲལ་ལ་ཕྱག་ཀྱང་འཚལ། ལྷའི་བུ་ཇི་ལྟ་བ་བཞིན་དུ་རིག་པས་གསོལ་པ། ཆོས་རྣམས་ཐམས་ཅད་དངོས་མེད་པ། ཇི་བཞིན་དཔའ་བོ་ཁྱོད་ཀྱིས་མཁྱེན། བཅིངས་པ་མ་མཆིས་གྲོལ་མ་མཆིས། །ཡང་དག་གཟིགས་ལ་ཕྱག་ཀྱང་འཚལ། །ལྷའི་བུ་འདམ་ལས་རྒལ་བས་
གསོལ་པ། འདོད་པའི་འདམ་ལས་རྒལ་བ་སྟེ། སྲིད་པའི་འདམ་ལས་དེ་བཞིན་བརྒལ། གཟིགས་པ་མི་མངའ་ལེན་མི་མངའ། །ཡང་སྲིད་ཟད་ལ་ཕྱག་ཀྱང་འཚལ། །ལྷའི་བུ་བཟང་ཟིང་སྤངས་ཀྱིས་གསོལ་པ། ཟང་ཟིང་སྤངས་ཤིང་དྲི་མ་སྤངས། རེ་བ་སྤངས་ཤིང་སྡིག་པའང་སྤངས། སངས་རྒྱས་སྒྲིབ་པ་རྣམ་སྤངས་པ། དོན་རྟོགས་ཁྱོད་ལ་ཕྱག་ཀྱང་འཚལ། ལྷའི་བུ་རེ་བ་སྤངས་པས་གསོལ་པ། དོན་དང་དོན་མ་ལགས་པ་སྤངས། ཆགས་པ་མི་མངའ་དེས་རྟོགས་པ། བདུད་ཀྱི་ཞགས་ལས་རྣམ་འདས་པ། ལེན་མེད་ཁྱོད་ལ་ཕྱག་ཀྱང་འཚལ། ལྷའི་བུ་ཕན་པར་འདོད་པས་གསོལ་པ། བདག་ཉིད་དང་ནི་གཞན་རྣམས་ཀྱི། ལམ་གང་ཉོན་མོངས་རིམས་མེད་པ། སྒྲིབ་པ་མེད་པར་གཟིགས་པ་པོ། །དཔའ་ཆེན་ཁྱོད་ཀྱིས་དེ་ཡང་གཟིགས། །ལྷའི་བུ་གྲགས་པ་ཐོབ་པས་གསོལ་པ། །འདྲེན་པ་འཇིག་རྟེན་རྣམ་གྲགས་པ། ཁྱོད་ཀྱི་མཁྱེན་ལ་བརྩོན་པ་རྣམས། ཇི་སྐད་བསྟན་བཞིན་རབ་རྟོག་ན། ཉོན་མོངས་རྣམས་ནི་ནུབ་པར་འགྱུར། ལྷའི་བུ་འཇིགས་པ་མེད་པས་གསོལ་པ། ཆོས་རྣམས་ཀུན་ལ་ངེས་པས་ན། སྔོ་བ་གང་ཡང་ཡོང་མ་གཟིགས། ཡེ་ཤེས་རྒྱ་མཚོ་མི་བསྙེངས་པར། །སེང་གེའི་སྒྲ་ནི་སྒྲོག་པ་མཛད། ལྷའི་བུ་གང་ནས་ཀྱང་འཇིགས་པ་མེད་པས་གསོལ་པ། འཇིགས་པ་ཀུན་ལས་ཡང་དག་རྒལ། ཟུག་རྔུ་ཐམས་ཅད་ཀུན་དུ་བཏོན། བསྙེངས་པ་མི་མངའ་ཞུམ་མི་མངའ། ཐམས་ཅད་ཟིལ་གནོན་ཕྱག་ཀྱང་འཚལ། ལྷའི་བུ་གནས་མེད་ཀྱིས་གསོལ་པ། ལྷ་རྣམས་དང་ནི་དྲི་ཟ་དང་། བདུད་དང་ཚངས་པར་བཅས་པ་ཡིས། ཁྱོད་ཀྱིས་ཆོས་ལ་རྒལ་མི་ནུས། དེ་བས་ཁྱོད་ལ་བསྙེངས་མི་མངའ། ལྷའི་བུ་སེང་གེའི་རྩལ་གྱིས་གསོལ་པ། ཆོས་རྣམས་ཐམས་ཅད་ཡོངས་མཁྱེན་པས། སངས་རྒྱས་གྱུར་ལ་འཇིགས་མི་མངའ། བདག་ལ་ཆོས་ཀྱིས་སུ་རྒོལ་ཞེས། །བདེ་གཤེགས་ཁྱོད་ལ་དོགས་མི་མངའ། ལྷའི་བུ་སྐྲག་མེད་ཀྱིས་གསོལ་པ། སེང་གེ་རི་སུ་ལ་གནས་པ་ནི། འཇིགས་པ་མ་མཆིས་སྐྲག་མ་མཆིས། རི་དགས་ཕྲ་མོ་
ཡོངས་བཏུལ་ཏེ། དཔའ་བཀོང་ནགས་ན་ང་རོ་སྒྲོག །དེ་བཞིན་ཐམས་ཅད་མཁྱེན་པ་ཡང་། མུ་སྟེགས་ཅན་རྣམས་ཡོངས་སྐྲག་ཏེ། ལྷ་ཀླུ་དྲི་ཟའི་འཇིག་རྟེན་ན། མཚུངས་མེད་གཟིགས་ནས་གསུང་ཡང་སྒྲོག །ལྷའི་བུ་ཐམས་ཅད་ཟིལ་གནོན་གྱིས་གསོལ་པ། འཇིག་རྟེན་རྣམ་འདྲེན་འཇིག་རྟེན་ན། །སངས་རྒྱས་ཉིད་ལ་སྔོ་བགྱིད་པ། འཇིག་རྟེན་གསུམ་ན་མ་མཆིས་ཏེ། དེས་ན་རྒྱལ་བ་བདག་གི་སྐྱབས། ལྷའི་བུ་སེང་གེ་བློ་གྲོས་ཀྱིས་གསོལ་པ། ཐམས་ཅད་མཁྱེན་པ་ཐམས་ཅད་གཟིགས། ཆོས་རྣམས་ཀུན་ལ་འཇིགས་མི་མངའ། །ཁྱོད་འདྲ་འཇིག་རྟེན་མ་མཆིས་ཏེ། །ཅིས་མི་བསྙེངས་ལ་ཕྱག་ཀྱང་འཚལ། །ལྷའི་བུ་རྗེས་སུ་འཐུན་པར་སྐྱེས་ཀྱིས་གསོལ་པ། །སངས་རྒྱས་ཉིད་དུ་དམ་བཅས་ན། །འདི་ན་ཁྱོད་ལ་རྒོལ་མ་མཆིས། །འཇིག་རྟེན་འདྲེན་པ་ཆོས་ཀྱིས་ནི། །ཁྱོད་ལ་གང་རྒོལ་དེ་མ་མཆིས། །ལྷའི་བུ་མཛོད་འཛིན་གྱིས་གསོལ་པ། །སེང་གེའི་ང་རོ་གསུང་བསྒྲགས་ཏེ། །ཁྱོད་ཀྱི་ཆོས་ཀྱི་མཛོད་བཟུང་བས། །སྲོག་ཆགས་བྱེ་བ་སྟོང་དག་གིས། །བྱང་ཆུབ་མཆོག་ཏུ་སེམས་ཀྱང་བསྐྱེད། །ལྷའི་བུ་བརཏལ་ཞུགས་རྗེས་སུ་འཐུན་གྱིས་གསོལ་པ། །སངས་རྒྱས་རྗེས་འཐུན་བརཏལ་ཞུགས་ཅན། །དཔའ་ཆེན་དེ་དག་ཐོབ་ཆེན་ཐོབ། །བྱང་ཆུབ་མཆོག་ཏུ་སེམས་བདུད་ཅིང་། །གང་ཟག་མཆོག་ཏུ་དེ་དག་འགྱུར། །ལྷའི་བུ་རྗེས་སུ་འཐུན་པའི་ཆོས་ལ་དགའ་བས་གསོལ་པ། །ཁྱོད་ཀྱི་བསྟན་པ་སུས་ཐོས་ཏེ། །བྱང་ཆུབ་མཆོག་ཏུ་སེམས་བདུད་པ། །དེ་དག་འཇིག་རྟེན་སེམས་ཅན་ཆེ། །གང་ཟག་མཆོག་ཏུ་དེ་དག་འགྱུར། །ལྷའི་བུ་སེམས་དག་པས་གསོལ་པ། །འཇིག་རྟེན་དག་ན་རྒོལ་མེད་པའི། །རྫོགས་པའི་སངས་རྒྱས་གསུང་ཐོས་ནས། །སྲོག་ཆགས་བྱེ་བ་སྟོང་དག་གིས། །བྱང་ཆུབ་མཆོག་ཏུ་སེམས་ཀྱང་བསྐྱེད། །ལྷའི་བུ་སེམས་རྒྱུད་ཡོངས་སུ་དག་པས་གསོལ་པ། །ཡུན་རིང་དུས་ནས་མི་དབང་གིས། །སངས་རྒྱས་བསློབ་ལ་ལེགས་བསླབ་པས། །དེ་སླད་ཁྱོད་ནི་ཐུགས་རྒྱུད་དག །མཚན་རབ་སུམ་བཅུ་གཉིས་དང་ལྡན། །ལྷའི་བུ་སེམས་རྒྱུད་ཡོངས་སུ་དག་པས་གསོལ་པ། །ཡུན་རིང་དུས་ནས་མི་དབང་གིས། །སངས་རྒྱས་བསློབ་ལ་ལེགས་བསླབ་པས། །དེ་སླད་ཁྱོད་ནི་ཐུགས་རྒྱུད་དག །མཚན་རབ་སུམ་བཅུ་གཉིས་དང་ལྡན། །ལྷའི་བུ་ཟག་པ་མེད་པའི་ཡིད་ཀྱིས་གསོལ་པ། །ཟག་པ་ཟད་པའི་སངས་རྒྱས་ཀྱིས། །སེང་གེའི་ང་རོ་བསྒྲགས་མཛད་དེ། །དམ་བཅས་པ་
ལ་མངོན་བཞུགས་ན། །རྒོལ་བ་འདི་ནི་ཡོད་མ་མཆིས། །ལྷའི་བུ་དེ་ཁོ་ནའི་རྗེས་སུ་སོང་བས་གསོལ་པ། །ཁྱོད་ཀྱི་གསུང་ལ་སྨྲ་འགྱུར་བའི། །ལྷ་དང་ལྷ་བུ་མི་དག་ནི། །འཇིག་རྟེན་གསུམ་ན་མ་མཆིས་ཏེ། །དེས་ན་ཐུབ་པ་སྟོབས་དང་ལྡན། །ལྷའི་བུ་ཟག་པ་ཟད་པ་ལ་མཁས་པས་གསོལ་བ། །དགེ་སྦྱོང་དམ་པའི་ཟག་པ་ནི། །མ་ལུས་ཡོངས་སུ་བསད་པ་སྟེ། འདི་ན་ཁྱོད་ལ་རྒོལ་མ་མཆིས། །དེས་ན་སངས་རྒྱས་བདག་གི་ཕ། །ལྷའི་བུ་རྟག་ཏུ་བརྩོན་པས་གསོལ་པ། །ཁྱོད་ལ་ཉོན་མོངས་ལུས་སོ་ཞེས། །མི་དབང་ཁྱོད་ལ་གང་རྒོལ་བ། །རྣམ་པ་ཀུན་དུ་མི་དམིགས་ཏེ། །དེས་ན་སངས་རྒྱས་བསྙེངས་མི་མངའ། །ལྷའི་བུ་སེམས་ཞི་བས་གསོལ་པ། །འདོད་ཆགས་ཞེ་སྡང་ཞི་བ་སྟེ། །གཏི་མུག་བག་ཆགས་བཅས་པ་ཞི། །ཉེས་སྤྱོད་ལས་ཀྱང་ཞི་བས་ན། །སེམས་ཞི་ཁྱོད་ལ་ཕྱག་འཚལ་ལོ། །ལྷའི་བུ་རྣལ་འབྱོར་སྤྱོད་པས་གསོལ་པ། །རྣལ་འབྱོར་གང་གིས་ཉོན་མོངས་གང་། །བས་པར་འགྱུར་བར་ལྟ་བའི་ཚེ། །དེ་ལ་ཁྱོད་ཀྱི་མཁྱེན་ཀུན་འཇུག །དེས་ན་ཁྱོད་ལ་ཕྱག་ཀྱང་འཚལ། །ལྷའི་བུ་རྣལ་འབྱོར་ལ་མཁས་པས་གསོལ་པ། །འདྲེན་པ་གང་ལ་བསླབས་པ་ཡི། །རྣལ་འབྱོར་ཚོགས་ནི་མཐའ་ཡས་ཏེ། །ཐམས་ཅད་མཁྱེན་པ་དེ་སླད་དུ། །ཉོན་མོངས་ཐམས་ཅད་མ་ལུས་པས། །ལྷའི་བུ་རྣལ་འབྱོར་བློ་གྲོས་ཀྱིས་གསོལ་པ། །འཇིག་རྟེན་སྒྲོན་མ་ཁྱོད་ཀྱི་བློ། །རྣལ་འབྱོར་ལས་ནི་ཉམས་མ་མཆིས། །དེས་ན་ཁྱོད་ཀྱི་ཉོན་མོངས་ཀུན། །བག་ཆགས་བཅས་པར་ཡོངས་སུ་བསལ། །ལྷའི་བུ་ཞི་བ་རིག་པས་གསོལ་པ། །ཉོན་མོངས་ཐམས་ཅད་ཞི་གྱུར་ནས། །བག་ཆགས་མ་ལུས་ཡོངས་སུ་བསལ། །བསྙེངས་པ་མི་མངའ་རྒྱལ་སྲས་དང་། །ཅིས་ཀྱང་མི་བསྙེངས་སྤྱོད་པ་མཛད། །ལྷའི་བུ་ཟད་པ་ལ་རྟོག་པས་གསོལ་པ། །ཐུབ་པ་ཐམས་ཅད་མཁྱེན་པ་ཁྱོད། །ཉོན་མོངས་བག་ཆགས་བཅས་པར་བས། །འཇིག་རྟེན་སྒྲོན་མ་ཁྱོད་ལ་ནི། །མཚུངས་པ་གང་ཡང་མི་དམིགས་སོ། །ལྷའི་བུ་བག་ལ་ཉལ་ཕྱུང་གིས་གསོལ་པ། །ཁྱོད་ཀྱིས་བག་ཆགས་མ་ལུས་བསལ། །ཁྱོད་ལ་སྐྱོན་དྲི་ཡོང་མ་མཆིས། །དེ་སླད་སངས་རྒྱས་ཐམས་ཅད་མཁྱེན། །ལྷ་རྣམས་ཀུན་གྱི་ཐུབ་པའི་ཐུབ། །ལྷའི་བུ་མཐའ་ན་གནས་པས་
གསོལ་པ། །ཟག་པ་རྣམས་ནི་སྤངས་པས་ན། །སྐྱེ་བའང་སྐྱེ་བ་མ་ལགས་ཏེ། །ཐུབ་པ་ཁྱོད་སྐྱེ་ཐ་མ་པ། །དེས་ན་མགོན་པོ་བསྙེངས་མི་མངའ། །ལྷའི་བུ་ཚད་སྲུང་གིས་གསོལ་པ། ། དཔའ་བོ་ཁྱོད་ཀྱིས་ས་བོན་སྤངས། །སྡུག་བསྔལ་མྱུ་གུ་ཚིག་པར་གྱུར། །མྱ་ངན་འཁྲི་ཤིང་རྣམ་པར་བསྐམས། །གདུང་བ་མེད་ལ་ཕྱག་ཀྱང་འཚལ། །ལྷའི་བུ་ཤིང་བཏགས་བཏོན་གྱིས་གསོལ་པ། །ཐུབ་པ་ཐམས་ཅད་མཁྱེན་པ་ཁྱོད། །མ་རིག་ཤིང་བཏགས་རྣམས་ཀྱང་བསལ། །སངས་རྒྱས་སྤྱོད་པ་རྣམ་པར་སྦྱངས། །དེ་བས་སྟོན་པ་བསྙེངས་མི་མངའ། །ལྷའི་བུ་སྲིད་པའི་ཕ་རོལ་དུ་སོང་བས་གསོལ་པ། །སྲིད་པའི་མཚོ་ལས་ཡང་དག་རྒལ། །རྣམ་པར་འདྲེན་པ་བྱ་བ་བྱས། །ཁྱོད་ཀྱིས་སྣང་བ་ཡང་དག་ཕྱུང་། །འཇིགས་མེད་ཁྱོད་ནི་དོན་ཀྱང་གྲུབ། །ལྷའི་བུ་མྱ་ངན་ལས་འདའ་བར་འགྲོ་བས་གསོལ་པ། །ཐམས་ཅད་མཁྱེན་པ་ཞིར་གྱུར་པ། །ཉོན་མོངས་ཐམས་ཅད་རབ་ཏུ་བཤིག །བག་ཆགས་རྡུལ་ཙམ་ཡོང་མི་མངའ། །མགོན་པོ་ཁྱོད་ལ་ཕྱག་ཀྱང་འཚལ། །ལྷའི་བུ་ཆོས་ཀྱི་རྒྱལ་མཚན་གྱིས་གསོལ་པ། ཁྱོད་ཀྱིས་ཆོས་ཀྱི་རྒྱལ་མཚན་བསྒྲེང་། །ང་རྒྱལ་རྒྱལ་མཚན་རབ་ཏུ་སྙལ། །ཆོས་ཀྱི་ལམ་སྲང་མཐའ་ཡས་པ། །དཔའ་བོ་ཆེན་པོ་ཁྱོད་ཀྱིས་བསྟན། །ལྷའི་བུ་ཆོས་ཀྱི་འབྱུང་གནས་ཀྱིས་གསོལ་པ། །སངས་རྒྱས་ཆོས་ཀྱི་འབྱུང་གནས་སོ། །ཐུབ་པ་ཆོས་རྣམས་ཀུན་མཁྱེན་པ། །སེམས་ཅན་ཀུན་གྱི་དགེ་བཤེས་གཉེན། །ཡེ་ཤེས་འཚོ་ལ་ཕྱག་ཀྱང་འཚལ། །ལྷའི་བུ་ཆོས་ཀྱི་གོས་ཅན་གྱིས་གསོལ་པ། །ཁྱོད་ཀྱི་སྲས་པོ་འཇིགས་མེད་པ། །སེང་གེ་ང་རོ་རྣམ་སྒྲོག་ཀྱང་། །རྒྱལ་སྲས་དེ་དག་ཆོག་མེད་ཅིང་། །སངས་རྒྱས་ཆོས་ཀྱི་དོན་གྱིས་སྒོམ། །ལྷའི་བུ་ཆོས་དོན་དུ་གཉེར་བས་གསོལ་པ། །སངས་རྒྱས་ཆོས་རྣམས་དོན་གཉེར་བ། །ཁྱོད་ཀྱི་སྲས་རྣམས་སེམས་བསྐྱེད་ཅིང་། །ཁྱོད་ཀྱི་མི་འཇིགས་ཐོབ་གྱུར་ནས། །མཁས་པ་དེ་དག་བྱང་ཆུབ་ཚོལ། །ལྷའི་བུ་ཆོས་ཀྱི་སྒོམ་གྱིས་གསོལ་པ། །ཁྱོད་ཀྱིས་མི་འཇིགས་ཐོས་གྱུར་ནས། །སངས་རྒྱས་ཆོས་རྣམས་བཙལ་བའི་ཕྱིར། །སྲོག་ཆགས་བྱེ་བ་སྐོམ་གྱུར་ཏེ། །བརྩོན་འགྲུས་བརྟན་པ་རབ་ཏུ་རྩོམ།། །།
བམ་པོ་བཅུ་གཅིག་པ། ལྷའི་བུ་ཆོས་ཀྱིས་འཕགས་ཀྱིས་གསོལ་པ། །སངས་རྒྱས་ཆོས་ཀྱིས་མངོན་འཕགས་ཤིང་། །འཇིགས་པ་མེད་པར་འདུལ་མཛད་པའི། །གསུང་པའི་མཆོག་གྱུར་ཁྱོད་མཐོང་ནས། །བརཏལ་ཞུགས་མཆོག་ཅན་བྱང་ཆུབ་ཚོལ། །ལྷའི་བུ་ཆོས་འཛིན་གྱིས་གསོལ་པ། །ཐུབ་པ་ཟབ་ཅིང་བལྟ་དཀའ་བའི། །ཆོས་ནི་ཁྱོད་ཀྱིས་རབ་བསྟན་པ། །ཁྱོད་ཀྱི་སྲས་ཀྱིས་ཐོས་གྱུར་ནས། །དེ་དག་བླ་མེད་བྱང་ཆུབ་ཚོལ། །ལྷའི་བུ་ལྟ་བ་མེད་པས་གསོལ་པ། །ཁྱོད་ཀྱི་སེང་གེའི་གསུང་ཐོས་ནས། །ཁྱོད་ཀྱི་སྲས་པོ་དཔའ་ངེས་པ། །ལུས་དང་སྲོག་ལ་མི་ལྟ་བར། །བྱང་ཆུབ་དོན་དུ་གཉེར་བ་བགྱིད། །ལྷའི་བུ་གཞན་དུ་མི་སེམས་པའི་བློ་གྲོས་ཀྱིས་གསོལ་པ། །ཐུབ་པ་བསྙེངས་པ་མི་མངའ་བ། །ཁྱོད་ཀྱི་དམ་ཆོས་འདི་ཐོས་ནས། །གཞན་དུ་སེམས་པ་མ་མཆིས་པར། །བརཏལ་ཞུགས་མཆོག་ཅན་བྱང་ཆུབ་ཚོལ། །ལྷའི་བུ་གཞན་དུ་མི་འགྲོ་བས་གསོལ་པ། །མི་དབང་ཁྱོད་ཀྱི་གསུང་ཐོས་ནས། །ཐེག་པ་གཉིས་པོ་སྤང་བགྱིས་ཤིང་། །ལམ་གཞན་དུ་ནི་མི་མཆི་བར། །བླ་ན་མེད་པའི་བྱང་ཆུབ་ཚོལ། །ལྷའི་བུ་ཉེ་བར་གནས་ཀྱིས་གསོལ་པ། །སེང་གེའི་ང་རོ་འདི་བསྒྲགས་པ། །རྒྱལ་བའི་སྲས་ཀྱིས་ཐོས་གྱུར་ན། །བྱང་ཆུབ་མཆོག་ལ་ཉེར་གྱུར་ཅིང་། །དེ་དག་རྐང་གཉིས་དམ་པར་འགྱུར། །ལྷའི་བུ་སྤོབས་པ་ཉེ་བར་གྱུར་པས་གསོལ་བ། །གྲགས་ཆེན་ཁྱོད་ཀྱིས་གསུང་བརྗོད་པའི། །སྤོབས་པ་དེ་ནི་ཐོས་གྱུར་ནས། །སངས་རྒྱས་ཆོས་ལ་ཁྱོད་ཀྱི་སྲས། །ཀུན་ཀྱང་དགའ་བ་རབ་ཏུ་བསྐྱེད། །ལྷའི་བུ་སྤོབས་པ་ཐོབ་པས་གསོལ་པ། །འཇིགས་མེད་ཁྱོད་ཀྱིས་གསུང་བསྒྲགས་པ། །མ་སྨད་སྲས་ཀྱིས་ཐོས་གྱུར་ན། །དེ་དག་སྤོབས་པ་ནམ་དུ་ཡང་། །སངས་རྒྱས་ཉིད་ལས་ཕྱིར་མི་ལྡོག །ལྷའི་བུ་རྟག་ཏུ་རབ་དགས་གསོལ་པ། །འཇིགས་མེད་ཁྱོད་ཀྱིས་གསུང་བསྒྲགས་པས། ། སྟོབས་ཆེན་ཁྱོད་ཀྱིས་སྲས་ཀྱི་རྣམས། །རྟག་ཏུ་རབ་ཏུ་དགའ་འགྱུར་ཅིང་། །མ་སྨད་དེ་དག་བྱང་ཆུབ་ཚོལ། །ལྷའི་བུ་ཡིད་ཞུམ་པ་མེད་པས་གསོལ་པ། །ཁྱོད་ཀྱིས་གསུང་བསྒྲགས་ཐོས་གྱུར་ནས། །རྐང་གཉིས་དམ་པ་ཁྱོད་ཀྱིས་སྲས། །དགའ་ཞིང་
ཞུམ་པ་མ་མཆིས་པར། །བྱང་ཆུབ་མཆོག་ནི་ཚོལ་བར་བགྱིད། །ལྷའི་བུ་ཐོགས་མེད་ཡིད་ཀྱིས་གསོལ་པ། །ཁྱོད་ཀྱིས་གསུང་བསྒྲགས་ཐོས་པ་ན། །སེམས་རངས་གྱུར་ཅིང་ཡིད་དགའ་སྟེ། །དེ་དག་ཡིད་ནི་ནམ་དུ་ཡང་། །བྱང་ཆུབ་ཉིད་དུ་ཐོགས་མ་མཆིས། །ལྷའི་བུ་ཆོས་ལ་བར་ཆད་མེད་ལ་མཁས་པས་གསོལ་པ། །ཆོས་རྣམས་གང་ལ་བསྟེན་བགྱིས་ཀྱང་། །དཀར་པོའི་ཕྱོགས་དག་མི་འགྲིབ་ཅིང་། །དེ་ཡི་བར་ཆད་མི་འགྱུར་བའི། །གནས་ནི་ཐུབ་པ་ཁྱོད་ཀྱིས་མཁྱེན། །ལྷའི་བུ་ཆོས་ངེས་པར་བསྟན་པ་ལ་མཁས་པས་གསོལ་པ། །དཀར་པོའི་ཕྱོགས་ལ་སྤྱོད་པ་ལ། །བར་ཆད་འབྱུང་བར་མི་འགྱུར་ཞིང་། །གནས་ཀྱང་མེད་པས་ཐུབ་པར་མཁྱེན། །དེས་ན་སྟོན་པ་བསྙེངས་མི་མངའ། །ལྷའི་བུ་ཆོས་ཀྱི་ངོ་བོ་ཉིད་ལ་མཁས་པས་གསོལ་པ། །དགེ་བ་ཀུན་ནས་ཉོན་མོངས་པ། །ནག་པོའི་ཕྱོགས་ཀྱི་རང་བཞིན་ཏེ། །ཁྱོད་ཀྱི་ཐུགས་ནི་དེས་མི་གོས། །གནས་ཀྱང་མེད་པར་ཐུབ་པས་མཁྱེན། །ལྷའི་བུ་རིག་པ་ལ་མཁས་པས་གསོལ་པ། །ནག་པོའི་ཆོས་ནི་ནམ་དུ་ཡང་། །དཀར་པོའི་ཆོས་དང་མི་འགྲོགས་པར། །རིགས་པར་བཅོམ་ལྡན་ཁྱོད་ཀྱིས་གསུངས། །དེས་ན་བཅོམ་ལྡན་བདག་གི་བླ། །ལྷའི་བུ་དགེ་བ་དང་མི་དགེ་བ་རིག་པས་གསོལ་པ། ཆོས་རྣམས་ཐམས་ཅད་མ་འདྲེས་པར། །དཔའ་བོ་ཆེན་པོ་ཁྱོད་ཀྱིས་མཁྱེན། །ཀུན་ནས་ཉོན་མོངས་བརྟགས་པས་ན། །དཀར་པོའི་ཕྱོགས་ལས་འགྲིབ་པར་འགྱུར། །ལྷའི་བུ་ལམ་ལ་མཁས་པས་གསོལ་པ། །ཀུན་ནས་ཉོན་མོངས་སྤྱོད་པ་ལ། །དཀར་པོའི་ཕྱོགས་ནི་མི་འབྱུང་སྟེ། །དེ་ལྟར་འཚལ་བར་མ་གྱུར་ལ། །བར་ཆད་དུ་ནི་འགྱུར་བར་གསུངས། །ལྷའི་བུ་ཐར་པ་འདོད་ཀྱིས་གསོལ་པ། ། ནག་པོའི་ཕྱོགས་ལ་བསྟེན་བགྱིད་ན། །ཐར་པར་འདོད་པ་མང་པོ་ཡི། །བར་དུ་གཅོད་པར་འགྱུར་ཞེས་གསུངས། །དེས་ན་རྒྱལ་ཁྱོད་ཐམས་ཅད་མཁྱེན། །ལྷའི་བུ་དག་པའི་སེམས་ཀྱིས་གསོལ་པ། །སེམས་གྲོལ་བགྱི་བར་གང་འཚལ་བས། །ཀུན་ནས་ཉོན་མོངས་ཤེས་བྱ་ཞེས། །དཔའ་བོ་ཆེན་པོ་ཁྱོད་ཀྱིས་གསུངས། །དེ་ཁྱོད་འཇིག་རྟེན་མཆོད་རྟེན་ལགས། །ལྷའི་བུ་ཉོན་མོངས་མཐོང་གིས་གསོལ་པ། །
ཀུན་ནས་ཉོན་མོངས་སྤྱོད་བགྱིད་ཅིང་། །ཀུན་ནས་ཉོན་མོངས་མ་འཚལ་ན། །དམ་པའི་ཆོས་ནི་ཤེས་མི་ནུས། །དེ་སྐད་བདེ་བར་གཤེགས་པས་གསུངས། །ལྷའི་བུ་སྡིག་མཐོང་གིས་གསོལ་པ། །སྡིག་པ་རྣམས་ལ་བསྟེན་བྱས་ཀྱང་། །དགེ་བ་མི་འགྲིབ་གང་སྨྲ་བ། །དེ་ནི་ཐར་ཆོས་སྐལ་མེད་ཅེས། །རྐང་གཉིས་དམ་པ་ཁྱོད་ཀྱིས་གསུངས། །ལྷའི་བུ་གདུལ་བར་བྱ་བས་གསོལ་པ། །ཆགས་པ་གདུལ་བར་གང་འདོད་དང་། །ཞེ་སྡང་གཏི་མུག་འདུལ་འདོད་པས། །ཐུབ་པའི་སྤོབས་པ་ཅི་འདྲ་བ། །དེ་ལྟ་བུར་ནི་ནན་ཏན་བགྱི། །ལྷའི་བུ་ཀུན་ནས་ཉོན་མོངས་པ་དག་པས་གསོལ་པ། །དག་དང་ཀུན་ནས་ཉོན་མོངས་པ། །མི་མཁས་གང་རྣམས་མི་ཤེས་པ། །དེ་དག་སྟོན་པ་སངས་རྒྱས་མིན། །དེ་སྐད་དྲང་སྲོང་མཆོག་གིས་གསུངས། །ལྷའི་བུ་ཐར་པ་ལ་བརྩོན་གྱིས་གསོལ་པ། །ཉོན་མོངས་འགྲིབ་པར་འགྱུར་བའི་ཆོས། །རྒྱལ་བ་ཡིས་ནི་གང་བསྟེན་པ། །དེ་བསྟན་ཉོན་མོངས་མི་ཟད་ཅེས། །ཁྱོད་ལ་རྒོལ་བ་ཡོང་མ་མཆིས། །ལྷའི་བུ་ཐར་པ་ལ་མངོན་པར་ཕྱོགས་པས་གསོལ་པ། །ཆོས་གང་ཉོན་མོངས་གང་གི་རྣམས། །ཟད་འགྱུར་ཐུབ་པས་བསྟན་པ་ལ། །ཡང་དག་བརྩོན་བྱས་མི་ཟད་ཅེས། །རྒོལ་བ་འདི་ནི་ཡོད་མི་དམིགས། །ལྷའི་བུ་རྣལ་འབྱོར་ལ་མངོན་པར་བརྩོན་པས་གསོལ་པ། །རྒྱལ་བ་ཁྱོད་ཀྱིས་ཉན་ཐོས་ལ། །གང་གི་དོན་དུ་ཆོས་བསྟན་པ། །དེ་བརྩོན་བགྱིས་པས་མི་འཐོབ་ཅེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་མི་འཇིགས་དཔལ་གྱིས་གསོལ་པ། །འདོད་ཆགས་སྤང་ཕྱིར་མི་སྡུག་པ། །བསྟན་ལ་ཡང་དག་བརྩོན་བགྱིས་ན། །འདོད་ཆགས་ཟད་པར་མི་འགྱུར་ཞེས། །ཁྱོད་ལ་རྒོལ་བ་ཡོང་མ་མཆིས། །ལྷའི་བུ་འགྲོ་བ་མེད་པར་རབ་ཏུ་ཤེས་ཀྱིས་གསོལ་པ། །ཤིན་དུ་བསྙེངས་པ་མི་མངའ་བས། །ཞེ་སྡང་སྤང་ཕྱིར་བྱམས་གསུངས་པ། །དེ་བསྒྲུབས་སེལ་བར་མི་འགྱུར་ཞེས། །དགྲ་འཇོམས་ཁྱོད་ལ་རྒོལ་མ་མཆིས། །ལྷའི་བུ་མིག་རྣམ་པར་དག་གིས་གསོལ་པ། །ཤེས་རབ་གཏི་མུག་སྤང་བའི་ཕྱིར། །གསུངས་པ་དེ་ལ་བསྟེན་བགྱིས་ཀྱང་། །གཏི་མུག་སེལ་བར་མི་འགྱུར་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་རྣམ་པར་
རྟོག་པ་འཛོམས་ཀྱིས་གསོལ་པ། །རྣམ་པར་རྟོག་པའི་གཉེན་པོར་ནི། །དབུགས་དབྱུང་རྔུབ་པ་དྲན་གསུངས་པ། །དེ་ལ་བརྩོན་བགྱིས་མི་ཞི་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་མཚན་མ་མེད་པ་ལྷུར་ལེན་པས་གསོལ་པ། །ང་སྙམ་ང་རྒྱལ་སྤང་སླད་དུ། །སྟོང་ཉིད་ཁྱོད་ཀྱིས་བཀའ་སྩལ་ཏེ། །དེས་ནི་དེ་ཞི་མི་འགྱུར་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་ངའོ་སྙམ་པའི་ང་རྒྱལ་སྤངས་ཀྱིས་གསོལ་པ། །ང་སྙམ་ང་རྒྱལ་སྤང་སླད་དུ། །མཚན་མ་མེད་པ་ཁྱོད་ཀྱིས་གསུངས། །བསྟེན་ཀྱང་ཞི་བར་མི་འགྱུར་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་སེམས་རྣམ་པར་དག་པས་གསོལ་པ། །ལྷག་པའི་བསམ་པས་དག་པ་ཡི། །ཉོན་མོངས་ཐམས་ཅད་འཇིག་པར་འགྱུར། །དེས་ནི་ཉོན་མོངས་མི་ཟད་ཅེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་འདུ་ཤེས་རྣམ་པར་བཤིག་གིས་གསོལ་པ། །ཕྱོགས་གང་གཉེན་པོའི་རྣམ་པ་དང་། །ཉོན་མོངས་ལས་དང་ལས་འཇུག་ལ། །འཇིགས་པ་མེད་པར་རྒོལ་བ་ནི། །ཐུབ་པ་ཆེན་པོ་མ་མཐོང་ངོ་། །ལྷའི་བུ་ཐ་སྙད་ཤིན་དུ་ཤེས་པས་གསོལ་པ། །བཅོམ་ལྡན་ཕྱོགས་དང་ཕྱོགས་མིན་དང་། །ཟད་དང་མ་ཟད་ཐ་སྙད་ཙམ། །འཇིགས་པ་མ་མཆིས་རྒོད་བགྱིད་པ། །ཐུབ་པ་དེ་ནི་མིང་ཙམ་མོ། ། ལྷའི་བུ་ལུས་ཀྱི་ལས་དུལ་བས་གསོལ་པ། །མཁྱེན་པས་ཡོངས་སུ་མཁྱེན་གྱུར་ནས། །ཁྱོད་ཀྱི་སྐུའི་ཕྲིན་ལས་འཇུག །ཐམས་ཅད་མ་ལུས་མཁྱེན་པས་ན། །དེས་ན་འདྲེན་པ་ཐམས་ཅད་མཁྱེན། །ལྷའི་བུ་ལུས་ཀྱི་ལས་ཡོངས་སུ་ཤེས་པས་གསོལ་པ། །སེམས་ཅན་རྣམས་ལ་ཐུགས་བརྩེ་བས། །དཔའ་བོ་ཁྱོད་སྐུའི་ཕྲིན་ལས་ནི། །མཐའ་དག་ཤིན་དུ་ངེས་པ་ལེགས། །འཇིག་རྟེན་མགོན་ལ་ཕྱག་ཀྱང་འཚལ། །ལྷའི་བུ་ལུས་ཀྱི་ལས་ཤིན་དུ་ངེས་པས་གསོལ་པ། །སྐུའི་ཕྲིན་ལས་རབ་ངེས་པར། །ལུས་ཅན་ཀུན་ལ་སྨན་སླད་དུ། །འཇིག་རྟེན་སྒྲོན་མ་ཁྱོད་མཛད་དེ། །དེས་ན་ཁྱོད་ནི་གང་ཟག་མཆོག །ལྷའི་བུ་ལུས་ཀྱི་ལས་ཀྱི་མཐའ་ཤིན་དུ་མཐོང་བས་གསོལ་པ། །སེམས་ཅན་ཀུན་ལ་སྨན་སླད་དུ། །འདྲེན་པ་ཐམས་ཅད་མཁྱེན་པ་ནི། །སྐུའི་ཕྲིན་ལས་དག་པ་དང་། །ལེགས་པར་ཡོངས་
སུ་བརྟགས་དང་ལྡན། །ལྷའི་བུ་ལུས་ཀྱི་ལས་ཀྱི་མཐའ་ཤིན་དུ་མཉམ་པར་བཞག་པས་གསོལ་པ། །ཤིན་ཏུ་མཉམ་པར་བཞག་སྐུ་དང་། །སྐུ་ཡི་ཕྲིན་ལས་རྣམ་དག་དང་། །ལྡན་པར་སེམས་ཅན་བདེ་དོན་དུ། །གང་ཟག་མཆོག་ནི་སྤྱོད་པར་མཛད། །ལྷའི་བུ་ཚིག་གྲུབ་ཀྱིས་གསོལ་པ། །སྙན་ཅིང་ཡོན་ཏན་ལྡན་པ་དང་། །རྩུབ་པ་ཡོངས་སུ་སྤངས་པའི་གསུངས། །མཁྱེན་པས་ཤིན་དུ་ཡོངས་བརྟགས་ཤིང་། །མགོན་པོ་ཁྱོད་ནི་གསུང་བར་མཛད། །ལྷའི་བུ་དུས་སུ་སྨྲས་པས་གསོལ་པ། །དུས་སུ་དོན་དང་ལྡན་པ་དང་། །དོན་མེད་ཡོངས་སུ་སྤངས་པའི་གསུང་། །གསུང་བར་འོས་དང་བླང་འོས་པ། །འདྲེན་པ་ཁྱོད་ནི་གསུང་བར་མཛད། །ལྷའི་བུ་སྡུམ་སྲ་བྱེད་བློ་གྲོས་ཀྱིས་གསོལ་པ། །དབྱེན་དུ་འགྱུར་བ་ཡོངས་སྤངས་ཏེ། །འདུམ་པར་འགྱུར་དང་ཡིད་འོང་བ། །དབྱེན་མེད་འབྲས་བུ་རྣམ་པར་སྨིན། །སྔོན་ཆད་ཁྱོད་ཀྱིས་གསུང་དུ་བརྗོད། །ལྷའི་བུ་མི་སླུ་བས་གསོལ་པ། །སྲོག་གི་དོན་དུའང་ཁྱོད་ཀྱིས་ནི། །སྲིད་པ་རྣམས་སུ་བརྫུན་མ་གསུངས། །དེ་བས་ཁྱོད་ཀྱི་གྲགས་པ་ཀུན། ། འཇིག་རྟེན་དག་ན་ཐོགས་མ་མཆིས། །ལྷའི་བུ་ཡང་དག་པར་སྨྲ་བས་གསོལ་པ། །འདི་ལྟར་འགྲོ་བ་ཐམས་ཅད་ཀྱང་། །སངས་རྒྱས་ཆོས་རྣམས་བཙལ་སླད་དུ། །ཐུབ་པའི་གསུང་ལ་བསྟོད་པ་ནི། །ཡང་དག་གསུངས་པའི་རྒྱུ་འཐུན་ལས། །ལྷའི་བུ་ཡང་དག་པའི་མཐའ་ལས་ངེས་པར་བྱུང་གིས་གསོལ་པ། །མི་མཆོག་ཁྱོད་ཀྱིས་བདེན་པ་ཡིས། །རྫོགས་པའི་བྱང་ཆུབ་འདི་བསྒྲུབས་ཏེ། །ཆོས་ཀྱི་ཡང་དག་རང་བཞིན་ཡང་། །རྐང་གཉིས་དམ་པ་ཁྱོད་ཀྱིས་མཁྱེན། །ལྷའི་བུ་ཡང་དག་པ་རཏལ་པས་གསོལ་པ། །འདུས་བྱས་དག་གི་ཆོས་ཀྱི་རྣམས། །ཡང་དག་ཇི་བཞིན་བལྟ་བ་དང་། །ཆོས་རྣམས་ཡང་དག་མཚན་ཉིད་ཀྱང་། །མི་ཡི་དབང་པོས་རབ་ཏུ་མཁྱེན། །ལྷའི་བུ་ལས་ལ་རྟོག་པས་གསོལ་པ། །ཡེ་ཤེས་ཡོངས་སུ་དག་པ་ཡིས། །བདག་ཉིད་དང་ནི་གཞན་དག་གི །ཚིག་གི་ལས་ཀྱང་རབ་ཏུ་མཁྱེན། །དེས་ན་རྒྱལ་བ་མཉམ་མ་མཆིས། །ལྷའི་བུ་ཡིད་ལ་རྟོག་པས་གསོལ་པ། །མི་ཡི་དབང་པོའི་ཐུགས་ཀྱི་ལས། །ཇི་སྙེད་གང་དག་འཇུག་པ་ནི། །དེ་དག་འགྲོ་ལ་
ཐུགས་རྗེས་འཇུག །འགྲོ་ཕན་ཁྱོད་ལ་ཕྱག་ཀྱང་འཚལ། །ལྷའི་བུ་ཡིད་ཀྱི་རྣམ་པར་རྟོག་པ་ལ་མཁས་པས་གསོལ་པ། །འགྲོ་ལ་ཐུགས་རྗེ་སྐྱེད་ནས་ནི། །གང་ལ་ཁྱོད་ནི་སྤྱོད་མཛད་པ། །དེ་ལ་ཐུགས་ནི་དུལ་བར་འགྱུར། །འགྲོ་ཕན་ཁྱོད་ལ་ཕྱག་ཀྱང་འཚལ། །ལྷའི་བུ་ཐབས་ལ་མཁས་པས་གསོལ་པ། །འགྲོ་བའི་བསམ་པ་རྣམ་བྱང་ནས། །རྣམ་འདྲེན་ཐུགས་ཀྱི་ཕྲིན་ལས་འཇུག །ཐུབ་པ་ཡེ་ཤེས་སྣ་ཚོགས་ནི། །མཁྱེན་བཞིན་ཀུན་དུ་རབ་ཏུ་འཇུག །ལྷའི་བུ་ཡེ་ཤེས་རྣམ་པར་བཤིག་གིས་གསོལ་པ། །སངས་རྒྱས་ས་དང་ཡིད་ཀྱི་ལས། །སེམས་ཅན་ཐུགས་རྗེས་གཟིགས་པས་འབྱུང་། །སངས་རྒྱས་ཉིད་ལ་ཡེ་ཤེས་ཐབས། །རང་བཞིན་མེད་པར་རབ་ཏུ་མཁྱེན། །ལྷའི་བུ་འདས་པ་ལ་མཁས་པས་གསོལ་པ། །སྦྱིན་དང་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་དག་ལ་ཡང་། །གང་གིས་གང་ལ་སྔོན་སྤྱད་པ། །སྔོན་གྱི་དུས་ཀྱང་རབ་ཏུ་མཁྱེན། །ལྷའི་བུ་འདས་པ་ལ་རྟོག་པས་གསོལ་པ། །བྱང་ཆུབ་མཆོག་ནི་ཚོལ་མཛད་ཅིང་། །གང་དུ་ཁྱོད་ཀྱིས་སྔོན་སྤྱད་པ། །སྔོན་གྱི་སྤྱོད་པ་ཡོངས་བརྟགས་ནས། །སངས་རྒྱས་བྱེ་བ་རབ་ཏུ་མཁྱེན། །ལྷའི་བུ་སྔོན་གྱི་ཚུལ་ཕུན་སུམ་ཚོགས་པས་གསོལ་པ། །བསྐལ་པ་བྱེ་བ་གྲངས་མེད་དུ། །གང་དུ་ཁྱོད་ཀྱིས་སྔོན་སྤྱད་པ། །སྔོན་གྱི་ཚུལ་ནི་དགོངས་མཛད་ཀྱང་། །ཁྱོད་ཀྱི་ཐུགས་ཡིད་ཐོགས་མི་མངའ། །ལྷའི་བུ་སྔོན་གྱི་ཚུལ་ལ་ཡོངས་སུ་རྟོག་པས་གསོལ་པ། །སངས་རྒྱས་མང་ལས་བྱུང་བ་ཡི། །ཏིང་འཛིན་མངོན་པར་བསྒྲུབ་བྱ་བ། །སངས་རྒྱས་བྱེ་བ་གྲངས་མེད་ལ། །རྣམ་པར་འདྲེན་པ་ཁྱོད་ཀྱིས་ཞུས། །ལྷའི་བུ་སྔོན་གྱི་སྦྱོར་བ་ལས་ངེས་པར་བྱུང་གིས་གསོལ་པ། །སྔོན་གྱི་སངས་རྒྱས་དྲུང་དག་ཏུ། །གྲངས་མེད་དཔག་ཏུ་མེད་པ་ཡི། །ཏིང་འཛིན་སྒོ་དག་འདྲེན་པ་ཡིས། །ཞུས་ཤིག་བསྒོམ་པ་མཛད་པར་འགྱུར། །ལྷའི་བུ་སྔོན་གྱི་གནས་ལ་རྟོག་པས་གསོལ་པ། །འཁོར་བའི་ཉེས་པ་རབ་མང་དང་། བཀུར་སྟི་རྣམ་པ་སྣ་ཚོགས་དག །གཟིགས་པས་སེམས་ཅན་རྣམས་ལ་སྟོན། །སེམས་ཅན་ལོང་བ་རྣམས་ཀྱང་འགྲེལ། །ལྷའི་བུ་སྔོན་གྱི་དུས་ན་འཕྲུལ་བས་གསོལ་པ། །གཞན་དང་གཞན་དག་ཟོས་ཤིང་འཚལ། །རྩེ་ཞིང་རབ་ཏུ་
དགའ་བ་བགྱིས། །གནོད་པ་མི་བཟད་བགྱིས་པ་དག །གཞན་དང་གཞན་ཡང་ཁྱོད་ཀྱིས་གཟིགས། །ལྷའི་བུ་སྔོན་གྱི་སྤྱོད་པས་ཡང་དག་པར་བྱུང་བས་གསོལ་པ། །ཐམས་ཅད་མཁྱེན་པ་འགྲོ་རྟོགས་པ། །ཁྱོད་ཀྱི་ཡེ་ཤེས་འདས་དུས་ཀྱི། །ལས་དང་བསམ་གཏན་སྙོམས་འཇུག་དང་། །འགྲོ་བ་རྣམས་ལ་ཐོགས་མ་མཆིས། །ལྷའི་བུ་ཕྱི་མའི་མཐའ་ལ་མཁས་པས་གསོལ་པ། །འདྲེན་པ་ཁྱོད་ཀྱི་མཁྱེན་པ་ནི། །མ་འོངས་དུས་ཀྱི་འཆི་འཕོ་དང་། །སྐྱེ་དང་ལས་ཀྱི་རྣམ་སྨིན་ལ། །ཐོགས་པར་འགྱུར་བ་མ་མཆིས་སོ། །ལྷའི་བུ་མ་འོངས་པའི་སྤྱོད་ཡུལ་གྱིས་གསོལ་པ། །བརྟེན་པ་འགྲོ་བ་མཁས་ཁྱོད་ཀྱི། །མཁྱེན་པ་ཕྱི་དུས་སེམས་ཅན་གྱི། །བསམ་དང་ལས་ཀྱི་འབྲས་བུ་དང་། །འགྲོ་བ་རྣམས་ལ་ཐོགས་མ་མཆིས། །ལྷའི་བུ་སྲིད་པ་ལས་བསྐྱོད་ཀྱིས་གསོལ་པ། །ཁམས་རྣམས་གསུམ་པོ་འདི་དག་དང་། །དུས་གསུམ་ཀུན་ལ་མཁས་ཁྱོད་ཀྱི། །ཡེ་ཤེས་མཆོག་ནི་མི་ཆགས་ཏེ། །སྲིད་པའི་སྤྱོད་ཡུལ་ཁྱོད་ཀྱིས་མཁྱེན། །ལྷའི་བུ་ཐ་སྙད་ལ་སྤྱོད་པས་གསོལ་པ། །ལས་དང་སེམས་ཅན་འགྲོ་བ་དང་། །རྣམ་པར་སྨིན་པ་མྱོང་བ་དག །དེ་དག་ཐམས་ཅད་མིང་ཙམ་དུ། །རྐང་གཉིས་དམ་པ་བསྟན་པ་མཛད། །ལྷའི་བུ་ད་ལྟར་བྱུང་བ་ཡང་དག་པར་རྟོག་པས་གསོལ་པ། །དཔའ་བོ་ཁྱོད་ཀྱི་མཁྱེན་པ་ནི། །ད་ལྟ་བྱུང་ལ་ཐོགས་མ་མཆིས། །གྲངས་མེད་སངས་རྒྱས་ཞིང་རྣམས་ནི། །འཇིག་རྟེན་མགོན་པོས་རབ་ཏུ་མཁྱེན། །ལྷའི་བུ་ད་ལྟར་བྱུང་བ་ལ་རྣམ་པར་དཔྱོད་པས་གསོལ་པ། །མི་ཡི་དབང་པོས་རྣམ་དཔྱད་ནས། །བྱིས་པའི་བློ་གྲོས་རྨོངས་བགྱིད་པ། །དུས་གསུམ་དངོས་པོ་མ་མཆིས་པར། །ངེས་པར་མཉམ་པ་ཉིད་དུ་གཟིགས། །ལྷའི་བུ་མི་གནས་པའི་བློ་གྲོས་ཀྱི་གསོལ་པ། །འདས་པ་དག་དང་མ་འོངས་དང་། །ད་ལྟར་བྱུང་བའི་ཕུང་པོ་རྣམས། །མ་མཆིས་དངོས་པོ་མ་མཆིས་པར། །སྐྱེས་བུ་དམ་པས་བསྟན་པ་མཛད། །ལྷའི་བུ་ཆགས་མེད་ཡིད་ཀྱིས་གསོལ་པ། །དུས་གསུམ་སེམས་ཅན་ཐམས་ཅད་ལ། །སྙིང་པོ་མཆིས་པར་
མ་བསྟན་ཏེ། །སྒྱུ་མ་སྨིག་སྒྱུ་མིག་གཡོར་དང་། །བྲག་ཅ་ལྟ་བུར་ཁྱོད་ཀྱིས་བསྟན། །ལྷའི་བུ་དུས་གསུམ་དཔོག་གིས་གསོལ་པ། །འདྲེན་པ་ཁྱོད་ཀྱི་མཁྱེན་པ་ནི། །དུས་གསུམ་པོ་དག་ཀུན་དུ་ཡང་། །སྒྱུ་མ་ལྟ་བུར་མཁྱེན་པས་ན། །ཁྱོད་ཀྱི་དབང་པོ་ཆགས་མི་མངའ། །ལྷའི་བུ་མོས་པ་ཡོངས་སུ་རིག་པར་བྱེད་ཀྱིས་གསོལ་པ། །གང་གི་ནུབ་མོ་དཔལ་ཁྱོད་ཀྱི། །བྱང་ཆུབ་མངོན་དུ་བགྱིས་གྱུར་པ། །དེ་དུས་ཚུན་ཆད་མོས་པ་ལ། །བྲི་བར་གྱུར་པར་ཡོང་མི་དགའ། །ལྷའི་བུ་མོས་པ་ཡང་དག་ཐོབ་ཀྱིས་གསོལ་པ། །འཇིག་རྟེན་སྒྲོན་མའི་མོས་པ་ནི། །བར་དུ་རྒྱུན་ཆད་མི་འགྱུར་ཏེ། །རྟག་པར་ཁྱོད་ཀྱི་མོས་པ་ངེས། །ཁྱོད་ཀྱི་སྲས་རྣམས་མོས་པ་ཆེ། །ལྷའི་བུ་མོས་པས་མངོན་འཕགས་ཀྱིས་གསོལ་པ། །ཆབ་ལས་པད་མ་ཇི་བཞིན་དུ། །ཁྱོད་ནི་མོས་པས་མངོན་དུ་འཕགས། །འཇིག་རྟེན་དག་གིས་མི་གོས་ཏེ། །པད་མ་ཆབ་ཀྱིས་ཇི་བཞིན་ནོ། །ལྷའི་བུ་མོས་པས་ཡོངས་སུ་གྲོལ་གྱིས་གསོལ་པ། །འཇིག་རྟེན་མགོན་དང་མོས་པ་ནི། །ཆོས་ཀྱི་དབྱིངས་ཤེས་བརྗོད་པ་སྟེ། །གཉིས་མེད་གཉིས་སུ་བགྱིད་མ་མཆིས། །སྨད་པ་མེད་པ་ཁྱོད་ཀྱིས་གཟིགས། །ལྷའི་བུ་བརྩོན་འགྲུས་ཡང་དག་ཐོབ་ཀྱིས་གསོལ་པ། །གཟི་བརྗིད་ཆེན་པོ་བརྩོན་འགྲུས་ཀྱིས། །བྱང་ཆུབ་ཡང་དག་བརྙེས་པར་གྱུར། །མཛད་པ་མཛད་ཀྱང་མགོན་པོ་ཁྱོད། །བརྩོན་འགྲུས་བཏང་བ་ཡོང་མ་མཛད། །ལྷའི་བུ་དྲན་པ་ཕུན་སུམ་ཚོགས་པས་གསོལ་པ། །དཔའ་བོ་ཆེན་པོའི་དགོངས་པ་ནི། །ཐམས་ཅད་ཀུན་ཀྱི་རྗེས་སུ་འཇུག །མཛད་པ་མཛད་ཀྱང་མགོན་པོ་ཁྱོད། །དགོངས་པ་བྲི་བ་ཡོངས་མ་མཆིས། །ལྷའི་བུ་སེམས་མཉམ་པར་བཞག་པས་གསོལ་པ། །མགོན་པོ་རྟག་ཏུ་མཉམ་བཞག་སྟེ། །སེམས་ཅན་རྣམས་ཀྱི་སྤྱོད་པ་མཁྱེན། །འདྲེན་པ་སྤྱོད་པའི་དབང་གིས་ནི། །སེམས་ཅན་རྣམས་ལ་ཆོས་ཀྱང་སྟོན། །ལྷའི་བུ་ཤེས་རབ་ལྷུར་ལེན་གྱིས་གསོལ་པ། །འཇིག་རྟེན་སྒྲོན་མར་གྱུར་ཁྱོད་ཀྱི། །ཡེ་ཤེས་རྒྱ་མཚོའི་མཐའ་མ་ནི། །བསྐལ་པ་བྱེ་བར་བརྗོད་བགྱིས་ཀྱང་། །སངས་རྒྱས་རྣམས་ཀྱིས་བཤད་མི་སྤྱོད། །ལྷའི་བུ་རྣམ་པར་གྲོལ་བ་མཁས་པས་གསོལ་པ། །རྣམ་པར་གྲོལ་དང་མ་གྲོལ་བ། །གང་སླད་ཁྱོད་ཀྱིས་མ་བརྙེས་པས། །མཚུངས་པ་མེད་པ་ཁྱོད་ལ་ནི། །རྣམ་གྲོལ་ཡོངས་སུ་ཉམས་མི་མངའ། །
ལྷའི་བུ་རྣམ་པར་གྲོལ་བའི་ཡེ་ཤེས་ལ་བརྩོན་པས་གསོལ་པ། །ཐུབ་པ་ཁྱོད་ནི་རྣམ་གྲོལ་ནས། །ངོ་བོ་ཉིད་མེད་མཁྱེན་པས་ན། །རྣམ་གྲོལ་ཡེ་ཤེས་གཟིགས་པ་ནི། །ཡང་དག་མཁྱེན་པ་ཉམས་མི་མངའ། །ལྷའི་བུ་སྔོན་གྱི་སྲིད་པ་རྣམ་པར་དཔྱོད་ཀྱིས་གསོལ་པ། །མར་མེ་མཛད་པ་ཚུན་ཆད་དུ། །དཔའ་བོ་ཡང་དག་གཟིགས་ཁྱོད་ཀྱི། །སྤྱོད་ལ་འཁྲུལ་པ་མི་མངའ་སྟེ། །དེས་ན་སངས་རྒྱས་ལགས་ཤེས་བསྟོད། །ལྷའི་བུ་ཟབ་མོ་ལ་སྤྱོད་པས་གསོལ་པ། །སྲོག་ཆགས་གཞན་དག་ཇི་བཞིན་དུ། །བདེ་གཤེགས་ཁྱོད་ལ་ཆགས་མི་མངའ། །ཆོས་ཀྱི་རང་བཞིན་མཁྱེན་པས་ན། །རང་བཞིན་དེ་ལ་རྨོངས་མི་མངའ། །ལྷའི་བུ་བློ་གྲོས་ཡངས་པས་གསོལ་པ། །ཐམས་ཅད་མཁྱེན་པ་ཁྱོད་ལ་ནི། །རྣམ་པ་ཀུན་དུ་བསྙེལ་མི་མངའ། །མགོན་པོའི་དགོངས་པ་ཉེར་བཞག་པས། །ཐུབ་པ་འབྲུ་མར་སྣོད་དང་འདྲ། །ལྷའི་བུ་སེམས་གཡེང་བ་མེད་ཀྱིས་གསོལ་པ། །འཇིག་རྟེན་སྒྲོན་མ་ཁྱོད་ལ་ནི། །མ་བརྟགས་བཏང་སྙོམས་མི་མངའ་སྟེ། །མི་ཡི་དབང་པོའི་སངས་རྒྱས་ཆོས། །མ་འདྲེས་པ་ནི་བསམ་མི་ཁྱབ། །ལྷའི་བུ་ཐམས་ཅད་ཟིལ་གནོན་གྱིས་གསོལ་པ། །སྐྱེས་བུ་ཁྱུ་མཆོག་ཁྱོད་ལ་ནི། །འཇིག་རྟེན་གསུམ་ན་མཚུངས་མ་མཆིས། །ཐམས་ཅད་མཁྱེན་པ་མ་ཕམ་པ། །ཁྱོད་ཀྱིས་ཆོས་རྣམས་ཐམས་ཅད་མཁྱེན། །ལྷའི་བུ་སྙིང་པོ་བླངས་པས་གསོལ་པ། །སེམས་ཅན་སྙིང་པོ་བླ་ན་མེད། །ཆོས་རྣམས་ཀུན་ལ་འཇིགས་མི་མངའ། །སངས་རྒྱས་ཀུན་དང་མཉམ་བརྙེས་པ། །སངས་རྒྱས་བྱང་ཆུབ་ཕྱག་འཚལ་ལོ། །གནས་གཙང་མའི་ལེའུ་སྟེ་ཉི་ཤུ་རྩ་བཞི་པའོ། །