དྲུག་པ། ནམ་མཁའ་ལྡིང་ལུང་བསྟན་པའི་ལེའུ།
དེ་ནས་བྱ་བའི་རྒྱལ་པའི་འདབ་བཟངས་བརྒྱད་ཁྲི་དྲུག་སྟོང་གིས་ལྷ་མ་ཡིན་གྱི་དབང་པོ་དེ་དག་མཆོད་པ་ཡང་མཐོང་། ལུང་བསྟན་པ་ཡང་ཐོས་ནས། །བཅོམ་ལྡན་འདས་ལ་གཞལ་དུ་མེད་པའི་དད་པ་སྐྱེས་ཏེ། བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ནས། བཅོམ་ལྡན་འདས་ལ་མཆོད་པའི་དོན་དུ་རིན་པོ་ཆེ་སྣ་བདུན་གྱི་ཁང་པ་བརྩེགས་པ་ཤིན་དུ་བཀྲ་བ་བལྟ་ན་སྡུག་པ་བརྒྱད་ཁྲི་དྲུག་སྟོང་མངོན་པར་སྤྲུལ་ཏོ། ལྷའི་རིན་པོ་ཆེ་སྣ་བདུན་ནི་འདི་ལྟ་སྟེ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་དང་། སྤུག་དང་། མུ་ཏིག་དམར་པོ་དང་། རྡོའི་སྙིང་པོ་དང་བདུན་ནོ། །ཁང་པ་བརྩེགས་པ་དེ་དག་ཀྱག་རིན་པོ་ཆེ་སྣ་བཞིའི་ལན་ཀན་གྱི་དྲ་བ་
རིས་བཀྲ་བ། བལྟ་ན་སྡུག་པ་རིམ་པ་བདུན་གྱིས་ཀུན་ནས་བསྐོར་ཏོ། རིན་པོ་ཆེ་སྣ་བཞི་ནི་འདི་ལྟ་སྟེ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་ལོ། གསེར་གྱི་ལན་ཀན་རྣམས་ཀྱི་ཀ་བ་དང་། གདང་བུ་རྣམས་ནི་གསེར། ཤར་བ་རྣམས་ནི་དངུལ། དངུལ་གྱི་ལན་ཀན་རྣམས་ཀྱི་ཀ་བ་དང་གདང་བུ་རྣམས་ནི་དངུལ། ཤར་བ་རྣམས་ནི་གསེར། བཻ་དཱུཪྻའི་ལན་ཀན་རྣམས་ཀྱི་ཀ་བ་དང་གདང་བུ་ནི་བཻ་དཱུཪྻ། ཤར་བ་རྣམས་ནི་ཤེལ། ཤེལ་གྱི་ལན་ཀན་རྣམས་ཀྱི་ཀ་བ་དང་གདང་བུ་རྣམས་ནི་ཤེལ། ཤར་བ་རྣམས་ནི་དངུལ་ལས་བྱས་པའོ། །ཁང་པ་བརྩེགས་པ་དེ་དག་དྲིལ་བུ་གཡེར་ཀའི་དྲ་བ་བ་བལྟ་ན་སྡུག་པ་རིམ་པ་བདུན་གྱིས་ཀུན་ནས་བསྐོར་ཏོ། དེ་དག་ཀྱང་རིན་པོ་ཆེ་སྣ་བདུན་ལས་བྱས་པ་ཤ་སྟག་སྟེ། འདི་ལྟར་གསེར་དང་། དངུལ་དང་། བཻདཱུ་ཪྻ་དང་། ཤེལ་དང་། སྤུག་དང་། མུ་ཏིག་དམར་པོ་དང་། རྡོའི་སྙིང་པོ་དང་བདུན་ནོ། །ཁང་པ་བརྩེགས་པ་དེ་དག་རིན་པོ་ཆེ་སྣ་བདུན་གྱི་དྲ་བ་བཀྲ་བ། བལྟ་ན་སྡུག་པ། འདི་ལྟ་སྟེ། གསེར་གྱི་དྲ་བ་དང་། དངུལ་གྱི་དྲ་བ་དང་། བཻ་དཱུཪྻའི་དྲ་བ་དང་། ཤེལ་གྱི་དྲ་བ་དང་། མུ་ཏིག་དམར་པོའི་དྲ་བ་དང་། སྤུག་གི་དྲ་བ་དང་། རྡོའི་སྙིང་པོའི་དྲ་བས་ཀུན་ནས་བཀབ་པར་གྱུར་ཏོ། གདུགས་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་མངོན་པར་སྤྲུལ་ཏེ། དེ་དག་ཀྱང་འདི་ལྟར་གསེར་ནས་རྡོའི་སྙིང་པོའི་བར་གྱི་རིན་པོ་སྣ་བདུན་ལས་བསྒྲུབས་པ་ཤ་སྟག་སྟོ། རྒྱལ་མཚན་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་ཡང་མངོན་པར་སྤྲུལ་ཏེ། རྒྱལ་མཚན་དེ་དག་ཀྱང་གསེར་དང་། དངུལ་དང་། བཻ་དཱུཪྻ་དང་། ཤེལ་དང་། རིན་པོ་ཆེ་སྣ་བཞིའི་རྒྱུ་ལས་བསྒྲུབས་པ་ཤ་སྟག་སྟེ། རྒྱལ་མཚན་སྔོན་པོ་རྣམས་ནི་ཏོག་སེར་པོ་ཅན། རྒྱལ་མཚན་སེར་པོ་རྣམས་ནི་ཏོག་སྔོན་པ་ཅན། རྒྱལ་མཚན་དམར་པོ་རྣམས་ནི་ཏོག་དཀར་པོ་ཅན་ཤ་སྟག་མངོན་པར་སྤྲུལ་ཏོ། །བ་དན་ཁ་དོག་སྣ་ཚོགས་ཅན་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་ཡང་མངོན་པར་སྤྲུལ་པར་གྱུར་ཏོ། བླ་རེ་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་ཡང་མངོན་པར་སྤྲུལ་པར་གྱུར་ཏེ། བླ་རེ་དེ་དག་ཀྱང་གསེར་སྐུད་ཀྱི་བླ་རེ་དང་། དངུལ་སྐུད་ཀྱི་བླ་རེ་དང་། བཻ་དཱུ་ཪྻའི་བླ་རེ་དང་། ཤེལ་གྱི་བླ་རེ་དང་། མུ་ཏིག་
དམར་པོའི་བླ་རེ་དང་། སྤུག་གི་བླ་རེ་དང་། རྡོའི་སྙིང་པོའི་བླ་རེ་སྟེ། རིན་པོ་ཆེ་སྣ་བདུན་ལས་བསྒྲུབས་པ་ཤ་སྟག་གོ །དེ་ནས་བྱའི་རྒྱལ་པོ་འདབ་བཟངས་དེ་དག་གིས་ཁང་པ་བརྩེགས་པ་བརྒྱད་ཁྲི་དྲུག་སྟོང་པོ་དེ་དག་དང་། བླ་རེ་བརྒྱད་ཁྲི་དྲུག་སྟོང་དེ་དག་བཅོམ་ལྡན་འདས་ལ་ཕུལ་བ་དང་། དེ་དག་ཐམས་ཅད་སྟེང་གི་བར་སྣང་ལ་ལྡིང་ཞིང་བཅོམ་ལྡན་འདས་ལ་ལན་གསུམ་བསྐོར་བ་བྱས་སོ། །འདི་ལྟ་སྟེ། དཔེར་ན་གླང་པོ་ཆེའི་རྒྱལ་པོ་ས་སྲུང་གི་བུ་ནི་སུམ་ཅུ་རྩ་གསུམ་གྱི་ལྷ་རྣམས་མགོ་ལ་ཁྱེར་ཞིང་ནམ་མཁའ་ལས་སོང་སྟེ། ཡོངས་འདུས་བརྟོལ་དུ་གཞོག་གོ །དེ་བཞིན་དུ་ཁང་པ་བརྩེགས་པ་དེ་དག་དང་། གདུགས་དེ་དག་དང་། རྒྱལ་མཚན་དེ་དག་དང་། བ་དན་དེ་དག་དང་། བླ་རེ་དེ་དག་བར་སྣང་གི་ནམ་མཁའ་ལ་ལྡིང་ཞིང་བཅོམ་ལྡན་འདས་ལ་ལན་གསུམ་སྐོར་བ་བྱེད་པར་གྱུར་ཏོ། དེ་ནས་འདབ་བཟངས་བརྒྱད་ཁྲི་དྲུག་སྟོང་པོ་དེ་དག་གིས་བཅོམ་ལྡན་འདས་ལ་མཆོད་པ་བྱས་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དེ་ཐལ་མོ་སྦྱར་ནས་ཕྱག་འཚལ་ཞིང་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། རྒ་དང་འཆི་ལས་རྣམ་བྲལ་ཁྱོད་ལ་ཕྱག་འཚལ་ལོ། །རྒ་དང་འཆི་ལས་རྣམ་གྲོལ་ཁྱོད་ལ་ཕྱག་འཚལ་ལོ། །སེམས་ཅན་གཞལ་ཡས་ཁ་ལོ་སྒྱུར་ལ་ཕྱག་འཚལ་ལོ། །ཁྱོད་དང་མཚུངས་པ་མ་མཆིས་ལྷག་པའང་མ་མཆིས་སོ། །བདག་ཅག་རྣམས་ཀྱང་སྲེད་མེད་བུ་ཡི་ལུས་ལྡན་ཞིང་། །སུམ་ཅུ་རྩ་གཉིས་མཚན་གྱིས་ཡན་ལག་བརྒྱན་པ་དང་། །དཔེ་བྱད་བཟང་པོ་བརྒྱད་ཅུས་ཤིན་ཏུ་མཛེས་བྱས་པའི། །སངས་རྒྱས་རྣམ་པར་འདྲེན་པ་ཁྱོད་འདྲར་གྱུར་པར་ཤོག །བདག་ཅག་འདོམ་གང་འོད་ཀྱི་གཟི་ལྡན་ཞིང་། །མངོན་འཕགས་གཟུགས་ཀྱི་དམ་པས་མཛེས་གྱུར་ཏེ། །སྤྱོད་ལམ་མཆོག་དང་བདག་བཅག་ལྡན་གྱུར་ཅིང་། །འགྲོ་བ་རྣམས་སྤྱོད་མྱ་ངན་ཟློ་རབ་ཤོག བདག་ཅག་ཚུལ་ཁྲིམས་ཏིང་འཛིན་རབ་ལྡན་ཞིང་། །ཤེས་རབ་ལྡན་པས་མཆོག་ཏུ་གྱུར་པར་ཤོག །དེ་ལྟར་རྣམ་པར་འདྲེན་པ་ཁྱོད་ལྟ་བུར། །སྐྱེ་བོ་རབ་འགྲེལ་སངས་རྒྱས་གྲུབ་པར་ཤོག །འདྲེན་པ་འཇིག་རྟེན་མཁས་པ་
ཁྱོད་ལྟ་བུར། །བདག་ཅག་འདྲེན་པ་སྟོབས་བཅུ་ལྡན་པ་དང་། །མ་འདྲེས་བཅུ་བརྒྱད་ཆོས་ཀྱི་མཐར་ཕྱིན་ཅིང་། །འཇིག་རྟེན་མཁས་པ་ཐམས་ཅད་མཁྱེན་དུ་ཤོག །བདག་ཅག་ཀུན་ཀྱང་འགྲོ་བ་དངོས་མེད་དང་། །རྨི་འདྲ་སྒྱུ་འདྲ་གནས་པ་མེད་པ་དང་། །བྲག་ཆ་ནམ་མཁའ་འདྲ་བར་སྟོན་བྱེད་ཅིང་། །ཇི་ལྟར་རྣམ་འདྲེན་ཁྱོད་སྟོན་བཞིན་དུ་ཤོག །དེ་ནས་བཅོམ་ལྡན་འདས་ཀྱིས་བྱའི་རྒྱལ་པོ་འདབ་བཟངས་དེ་དག་གི་ལྷག་པའི་བསམ་པ་མཁྱེན་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། །རྒྱལ་བ་རྣམ་འདྲེན་གཙོ་བོ་སངས་རྒྱས་རྣམས། །རྒྱུ་མ་མཆིས་པར་བཞད་པ་མི་མཛད་ན། །འཛུམ་མཛད་འདི་ལ་རྒྱུ་རྐྱེན་གང་ལགས་པ། །འཇིག་རྟེན་ཕན་མཛད་ཐུགས་རྗེ་མངའ་བས་གསུངས། །འདབ་བཟངས་རྣམས་ཀྱིས་རྒྱལ་བ་མཆོད་བགྱིས་ཏེ། །བླ་རེ་ནམ་མཁའ་རྒྱས་པར་གང་བ་བསྟན། །ལྷར་བཅས་འཇིག་རྟེན་འདི་ལ་ངོ་མཚར་སྐྱེད། །རྐང་གཉིས་དམ་པས་དེ་དག་ལུང་བསྟན་གསོལ། །འགྲོ་བ་ཐམས་ཅད་ཐལ་མོ་རབ་སྦྱར་ཅིང་། །དགའ་བའི་སེམས་དང་མགུ་བའི་སེམས་ཀྱིས་འཁོད། །མཁའ་ལྡིང་འགྲོ་བ་ཅིར་འགྱུར་ཉན་པར་འཚལ། །རྐང་གཉིས་དམ་པས་དེ་དག་ལུང་བསྟན་གསོལ། །མི་མཆོག་ཁྱོད་ལ་ཁྱོད་དག་མཆི་བ་ནི། ། འགྲོ་བ་ཐམས་ཅད་ཐེ་ཚོམ་མེད་གྱུར་ཞིང་། །ཐེ་ཚིམ་མེད་པས་འཁོར་དུ་འཇིགས་མེད་འགྱུར། །འདིས་ནི་སངས་རྒྱས་མཉེས་པར་བགྱིས་ཤེས་མཆི། །འཁོར་འདིར་འཇིགས་མེད་རབ་ཏུ་དགའ་བར་འགྱུར། །ཡོངས་སུ་སྦྱངས་ཤིང་ཤིན་ཏུ་སྐྱོན་བསལ་ནས། །རྒྱལ་བ་ལུང་བསྟན་དེ་དག་མངོན་དགའ་སྟེ། །སློབ་མ་མཆོག་ལ་བླ་མས་བསྟན་པ་བཞིན། །ཐེ་ཚོམ་འཚལ་བའི་ཐེ་ཚོམ་གཅད་དུ་གསོལ། །རབ་ཏུ་དགའ་མཛད་རྗེས་སུ་སྨོན་པ་མཛོད། །དགའ་བའི་སེམས་ཀྱིས་འཁོར་འདི་འདུས་གྱུར་གྱིས། །རང་འབྱུང་མཁའ་ལྡིང་འགྲོ་བ་ཅིར་འགྱུར་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ཐམས་ཅད་ཟིལ་གནོན་སྟོབས་བཅུ་བརྩོན་འགྲུས་བདེན། རྒྱལ་བ་དབང་པོ་ཐུབ་པ་དེ་བཞིན་གཤེགས། འདྲེན་པས་ཡན་ལག་བརྒྱད་ལྡན་གསུངས་དབྱངས་ཀྱིས། མདབ་བཟངས་འགྲོ་བ་རྟ་ཐུལ་བཀའ་སྩལ་པ། རྟ་ཐུལ་ཁྱོད་ཀྱིས་དྲི་པ་ལེགས་པར་དྲིས། འཇིག་རྟེན་ཕན་ཕྱིན་འཛུམ་གང་ངས་བསྟན་པ། དེ་ཡི་
འབྲས་བུ་དགའ་བའི་ཡིད་ཀྱི་ཉོན། ཐེ་ཚོམ་སོལ་ལ་རབ་ཏུ་དགའ་བ་སྐྱེད། བླ་ན་མེད་པའི་བྱང་ཆུབ་ཞི་ཚོལ་ཞིང་། སྟོབས་དག་མི་འཇིགས་བཞི་པོ་གང་རྣམས་ཀྱིས། འདྲེན་པ་འཇིགས་མེད་འགྱུར་བ་བཙལ་བའི་ཕྱིར། མདབ་ཆགས་དབང་པོས་ང་ལ་མཆོད་ལེགས་བྱས། མ་འདྲེས་བཅུ་བརྒྱད་ཆོས་ནི་སྨྲ་བ་ཡི། སྲེད་མེད་བུ་ལུས་ཤིན་དུ་འཁྲེགས་པ་དང་། སུམ་ཅུ་གཉིས་མཚན་དཔེ་བྱད་བཟང་པོ་རྣམས། ཡོངས་སུ་བཙལ་ཕྱིར་ང་ལ་མཆོད་པ་བྱས། རྒྱལ་བའི་ཚུལ་ཁྲིམས་ཏིང་འཛིན་བཙལ་བ་དང་། གཞན་ཡང་སངས་རྒྱས་སྤྱོད་ཡུལ་ཤེས་རབ་དང་། ཕུན་སུམ་ཞིང་དང་འགྲོ་བ་རྣམ་དགྲོལ་བ། འདི་དག་ཀུན་བཙལ་དོན་དུ་མཆོད་པ་བྱས། དེ་དག་ང་ལ་དགའ་བས་མཆོད་བྱས་པས། དུད་འགྲོའི་གནས་ནས་དེ་དག་ཤི་འཕོས་ནས། ལྷ་དང་བརཏལ་ཞུགས་འཐུན་པར་དེ་དག་འདོང་། འདི་ནི་ངན་སོང་སྲིད་པའི་ཐ་མ་ཡིན། བསྐལ་པ་བྱེ་བ་གང་གཱའི་བྱེ་སྙེད་དུ། དེ་དག་ལྷ་མིའི་ནང་ན་གནས་གྱུར་ཅིང་། རྣམ་འདྲེན་ཁྲག་ཁྲིག་མཐའ་ཡས་མཆོད་བྱས་ནས། དེ་དག་དབང་པོ་ཐུལ་བའི་རྒྱལ་བར་འགྱུར། དེ་དག་ཞིག་དུ་ངན་སོང་མི་འབྱུང་སྟེ། མི་ཁོམ་མི་འབྱུང་མཚན་དང་མི་ལྡན་མེད། རྒྱལ་བ་དེ་དག་མཚན་ནི་ཀུན་དུ་མཛེས། རི་རབ་རྒྱལ་མཚན་བསྐལ་ལ་རང་འབྱུང་འགྱུར། ལོ་ནི་བྱེ་བ་བརྒྱད་ཅུ་བཞི་བགྲངས་པར། འཇིག་རྟེན་ཕན་ཕྱིར་འདྲེན་པ་དེ་དག་བཞུགས། འཇིག་རྟེན་ཕན་ཕྱིར་རྣམ་འདྲེན་མཉམ་བཞག་པས། ལུས་ཅན་རྣམས་ལ་མཉམ་པའི་དོན་མཛད་འགྱུར། སྐྱོབ་པ་རྡུལ་མེད་གྱུར་པ་དེ་དག་གི །འདུས་པ་ང་རྒྱལ་སྤངས་པ་བརྒྱད་ཅུར་འགྱུར། དེ་ཚེ་སྐྱོབ་པ་རྡུལ་དང་བྲལ་རྣམས་ཀྱི། ཤིན་ཏུ་སེམས་དུལ་བྱེ་བ་བརྒྱད་ཅུ་འབྱུང་། འདྲེན་པ་དེ་དག་འགྲོ་བའི་ང་བསལ་ཕྱིར། ཆོས་ཀྱི་འཁོར་ལོ་རབ་ཏུ་བསྐོར་བར་འགྱུར། མི་དག་དེ་ལྟར་འདི་རྣམས་ང་རྒྱལ་ཆེ། མདབ་བཟངས་ལུས་སུ་གྱུར་ནས་སྟོབས་པོ་ཆེ། འདི་དག་སྔོན་ཚེ་འདས་པའི་དུས་ཤིག་ན། དྲང་སྲོང་དཀའ་ཐུབ་དྲག་པོའི་ཚོགས་ཆེན་གྱུར། སྟོང་ཕྲག་བརྒྱད་ཅུ་རྩ་དྲུག་ཚང་བ་སྟེ། དཀའ་ཐུབ་སྤྱོད་དེ་རྫུ་འཕྲུལ་ཕུན་སུམ་བཙལ། དེ་དག་རྫུ་འཕྲུལ་ཐོབ་ནས་ང་རྒྱལ་གྱིས། དགའ་བས་དཀའ་ཐུབ་དྲག་དང་ལྡན་པར་གྱུར། ཚུལ་ཁྲིམས་མ་ཞིག་དེ་དག་ནགས་འདབ་ཏུ། ཚེ་ཟད་ཤི་འཕོས་གྱུར་ཏེ་ལུས་ཀྱང་ཞིག །ང་རྒྱལ་དེས་ནི་མཁའ་ལྡིང་མཁའ་འགྲོར་གྱུར། རྫུ་འཕྲུལ་སེམས་ཀྱིས་རྫུ་འཕྲུལ་ལྡན་པར་སྐྱེས། ཚུལ་
ཁྲིམས་དག་པས་རྒྱལ་བའི་བསྟན་ལ་དད། ང་རྒྱལ་གྱིས་ནི་བྱང་ཆུབ་སེམས་ཀྱང་བསྐྱེད། ནམ་མཁའ་ལྡིང་ལུང་བསྟན་པའི་ལེའུ་སྟེ་དྲུག་པའོ། །