དགུ་པ། གྲུལ་བུམ་ལུང་བསྟན་པའི་ལེའུ།
དེ་ནས་གྲུལ་བུམ་བྱེ་བ་ཕྲག་བཅུ་བརྒྱད་ཀྱི་ལྷ་མ་ཡིན་རྣམས་དང་། ནམ་མཁའ་ལྡིང་རྣམས་དང་། ཀླུའི་བུ་མོ་རྣམས་དང་། ཀླུ་རྣམས་ཆོས་ཀྱི་མཆོད་པ་ཡང་མཐོང་། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེ་ནས་ངོ་མཚར་ཐོབ་པར་གྱུར་ཏེ། འདི་ལྟར་དེ་བཞིན་གཤེགས་པ་ལ་ཤེས་རབ་ཀྱི་མངའ་བ་ཆེན་པོ་མངའ་ཞིང་། འདི་ལྟར་བཅོམ་ལྡན་འདས་ལ་མཆོད་པ་རྒྱ་ཆེན་པོ་འདི་ལྟ་བུ་བྱས་པས་ཀྱང་ངོ་མཚར་དུ་མི་དགོངས་ཏེ། འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་རྒྱ་ཆེ་ཞིང་ཡོངས་སུ་རྒྱས་པ་ཡིན་པས་མཐོ་བའམ་དམ་པར་མི་འགྱུར་རོ། །དེ་བཞིན་དུ་བཅོམ་ལྡན་འདས་ཀྱང་ཆོས་ཐམས་ཅད་ལ་ཐེ་ཚོམ་མི་མངའ་ཞིང་ཡོན་ཏན་ཐམས་ཅད་ཡོངས་སུ་རྫོགས་ལ། ཐམས་ཅད་མཁྱེན་པའི་ཡེ་ཤེས་ཡངས་པ་མངའ་བས་མཆོད་པ་འདི་ལྟ་བུ་དག་བཞེས་ཀྱང་མཐོ་བའམ་དམའ་བར་མི་འགྱུར་ཞིང་ངོ་མཚར་དུ་མི་དགོངས་པ་ནི་ངོ་མཚར་ཤིན་ཏུ་ཆེའོ་སྙམ་མོ། །དེ་ནས་གྲུལ་བུམ་བྱེ་བ་ཕྲག་བཅུ་བརྒྱད་པོ་དེ་དག་གིས་བདག་ཅག་ཉིད་ཀྱི་མཆོད་པས་བཅོམ་ལྡན་འདས་ལ་མཆོད་པའི་ཕྱིར་རིན་པོ་ཆེ་སྣ་བདུན་གྱི་བླ་རེ་བྱེ་བ་ཕྲག་བཅུ་བརྒྱད་མངོན་
པར་སྤྲུལ་ཏེ། འདི་ལྟ་སྟེ། གསེར་གྱི་སྐུད་པའི་བླ་རེ་དང་། དངུལ་གྱི་སྐུད་པའི་བླ་རེ་དང་། བཻ་དཱུ་ཪྻའི་བླ་རེ་དང་། ཤེལ་གྱི་བླ་རེ་དང་། མུ་ཏིག་དམར་པོའི་བླ་རེ་དང་། སྤུག་གི་བླ་རེ་དང་། རྡོའི་སྙིང་པོའི་བླ་རེ་ཤ་སྟག་གོ །རིན་པོ་ཆེའི་བླ་རེ་དེ་དག་ལ་ཡང་མེ་ཏོག་སྣ་ཚོགས་ཀྱི་ཕྲེང་བའི་ལྡ་ལྡི་མངོན་པར་སྤྲུལ་ཏེ། གསེར་གྱི་སྐུད་པའི་བླ་རེ་རྣམས་ལ་ནི་དངུལ་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ། །དངུལ་གྱི་སྐུད་པའི་བླ་རེ་རྣམས་ལ་ནི་གསེར་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ། བཻ་དཱུཪྻའི་བླ་རེ་རྣམས་ལ་ནི་ཤེལ་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ། ཤེལ་གྱི་བླ་རེ་རྣམས་ལ་ནི་བཻ་དཱུ་ཪྻའི་མེ་ཏོག་གི་ཕྲེང་བའི་ལྡ་ལྡི་བཀྱེ། མུ་ཏིག་དམར་པོའི་བླ་རེ་རྣམས་ལ་ནི་སྤུག་གི་མེ་ཏོག་གི་ཕྲེང་བའི་ལྡ་ལྡི་བཀྱེ། སྤུག་གི་བླ་རེ་རྣམས་ལ་ནི་མུ་ཏིག་དམར་པོའི་མེ་ཏོག་གི་ཕྲེང་བའི་ལྡ་ལྡི་བཀྱེ། རྡོའི་སྙིང་པོའི་བླ་རེ་རྣམས་ལ་ནི་ཤེལ་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ་བ་ཤ་སྟག་མངོན་པར་སྤྲུལ་ཏོ། །འདི་རྟ་བཀྲ་བ། བལྟ་ན་སྡུག་པ་བྱེ་བ་ཕྲག་བཅུ་བརྒྱད་ཀྱང་མངོན་པར་སྤྲུལ་ཏེ། དེ་དག་ཀྱང་གསེར་ནས་རྡོའི་སྙིང་པོའི་བར་དུ་ཤིང་རྟ་དེ་དག་གི་སྟེང་དུ་རིན་པོ་ཆེ་སྣ་བདུན་གྱི་གདུགས་ཐུར་མ་བརྒྱད་པ་གསེར་གྱི་ཡུ་བ་ཅན་དང་། བཻ་དཱུ་ཪྻའི་ཡུ་བ་ཅན་དང་། ཤེལ་གྱི་ཡུ་བ་ཅན་བྱེ་བ་ཕྲག་བཅུ་བརྒྱད་མངོན་པར་སྤྲུལ་ཏོ། །གདུགས་དེ་དག་ལ་ཡང་རིན་པོ་ཆེ་རྣམ་པ་སྣ་ཚོགས་ཀྱི་མེ་ཏོག་གི་ལྡ་ལྡི་མངོན་པར་སྤྲུལ་ཏེ། གསེར་གྱི་མེ་ཏོག་གི་ལྡ་ལྡི་དང་། དངུལ་གྱི་མེ་ཏོག་གི་ལྡ་ལྡི་དང་། བཻ་དཱུ་ཪྻའི་མེ་ཏོག་གི་ལྡ་ལྡི་དང་། མུ་ཏིག་དམར་པོའི་མེ་ཏོག་གི་ལྡ་ལྡི་དང་། ཀླུའི་ནོར་བུའི་མེ་ཏོག་གི་ལྡ་ལྡི་ཤ་སྟག་གོ །མུ་ཏིག་དམར་པོའི་འདྲ་བ་དག་ཀྱང་མངོན་པར་སྤྲུལ་ཏེ། དེ་དག་གིས་གདུགས་དེ་དག་དང་། མེ་ཏོག་གི་ཕྲེང་བ་དེ་དག་གི་གཟུངས་བྱས་སོ། །གྲུབ་བུམ་གྱི་རོལ་མོའི་སིལ་སྙན་དག་ཀྱང་མངོན་པར་སྤྲུལ་ཏོ། །ཤིང་རྟ་དེ་དག་རེ་རེ་ཞིང་བླ་རེ་དེ་དག་རེ་རེ་རྗེས་སུ་འབྲང་བར་གྱུར་ཏོ། དེ་ནས་གྲུལ་བུམ་དེ་དག་རིན་པོ་ཆེ་སྣ་བདུན་གྱི་ཤིང་རྟ་དེ་དག་ལ་ཞོན་ཏེ། རིན་པོ་ཆེ་སྣ་བདུན་གྱི་གདུགས་དང་། བླ་རེ་དང་། མེ་ཏོག་དེ་དག་གིས་བཅོམ་ལྡན་འདས་ལ་མངོན་པར་གཏོར་ཏེ་མཆོད་པ་བྱེད་ཅིང་། བཅོམ་ལྡན་འདས་ལ་སྟེང་གི་བར་སྣང་ལས་ལན་གསུམ་བསྐོར་ཏོ། བསྐོར་ནས་ཤི་རྟ་དེ་དག་ལ་བབས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ཕྱོགས་གཅིག་ཏུ་འཁོད་དེ། བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། ཐམས་ཅད་དུ་ཡང་མི་བསྙེངས་མངའ་དབང་ཅན། ཐུབ་པ་ཆེན་པོ་མི་མཐོ་མི་དམའ་སྟེ། རི་ཡི་རྒྱལ་པོ་ལྷུན་པོའི་
རི་འདྲ་བ། མཆོད་པ་རྒྱ་ཆེན་འདི་དག་བཞེས་སུ་གསོལ། །འགྲོ་བ་ཐམས་ཅད་མིང་དང་མཚན་མ་དང་། ཐ་སྙད་ཙམ་མཁྱེན་ཐུབ་པ་ཆགས་མི་མངའ། འདྲེན་པ་ཁྱོད་ཀྱིས་ཏིང་འཛིན་ཞི་བ་བསྒྲུབས་པས། ཤེས་རབ་ལྡན་ལ་དྲེགས་པ་ཡོད་མི་མངའ། །རྒྱལ་བ་ཁྱོད་ཀྱིས་འགྲོ་བ་སྒྱུ་འདྲར་མཁྱེན། །རང་བཞིན་སྟོང་སྟེ་རྨི་ལམ་དགའ་འདྲ་དང་། ཆུ་ཟླ་ནམ་མཁའི་སྨྱིག་རྒྱུ་ལྟ་བུར་ནི། བདེ་བར་གཤེགས་པས་འགྲོ་བ་འདི་དང་གཟིགས། དྲི་ཟའི་གྲོང་ཁྱེར་ཇི་ལྟར་སྣང་གྱུར་ཀྱང་། གྲོང་ཁྱེར་དེ་ནི་ཕྱོགས་བཅུ་ཀུན་ན་མེད། །གཞན་དུ་གྲོང་ཁྱེར་དེ་ནི་མིང་ཙམ་སྟེ། །དེ་བཞིན་བདེ་བར་གཤེགས་པས་འགྲོ་འདི་གཟིགས། །མཆོད་པ་འདི་ཀུན་བྲག་ཅ་ཇི་བཞིན་ཏེ། ཤིང་རྟ་གདུགས་དང་སིལ་སྙན་དང་། །མེ་ཏོག་རྒྱལ་མཚན་ཐལ་མོ་སྦྱར་བགྱིས་པ། །བྲག་ཅ་ཇི་བཞིན་དེ་དག་དེ་ལྟར་གདའ། །འདྲེན་པ་མཆོད་པ་འདི་བགྱིས་བདག་ཅག་ཀྱང་། སངས་རྒྱས་རྐང་གཉིས་མཆོག་ཏུ་མྱུར་འགྱུར་ཤོག །རྨི་ལམ་འདྲ་བར་འགྲོ་བ་བདག་ཅག་གིས། རྟོགས་བགྱིས་རྒྱལ་བ་ཁྱོད་བཞིན་བསྟན་པར་བགྱི །ན་དང་རྒ་ཤིས་ཡོངས་སུ་གཙེས་གྱུར་པའི། །སྐྱེ་བོ་མཐོང་ནས་བདག་ཅག་རྣམས་ཀྱིས་ཀྱང་། བྱང་ཆུབ་མྱུར་ཐོབ་རྒ་ཤི་མེད་པའི་གནས། །གང་ཐོས་གྲོལ་འགྱུར་འགྲོ་ལ་བསྟན་པར་བགྱི །བདག་ཅག་བྱང་ཆུབ་ལམ་མཆོག་སངས་རྒྱས་ནས། སེམས་ཅན་བློ་སྟོར་རྣམས་ལ་བསྟན་པར་བགྱི །ཐུབ་པ་འཁྲུགས་མེད་ཆོས་རྣམས་རབ་སྟོན་པ། མྱ་ངན་འདས་མཆོག་སེམས་ཅན་བསྟན་པར་བགྱི །དེ་ནས་བཅོམ་ལྡན་འདས་ཀྱིས་གྲུལ་བུམ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། སྟོན་པ་རྒྱུ་མེད་འཛུམ་པ་མི་མཛད་དེ། རྣམ་འདྲེན་འཇིག་རྟེན་མཁས་ལ་མཚར་མི་མངའ། ངོ་མཚར་འགྱུར་མེད་རྒྱལ་བས་འཛུམ་མཛད་ན། །འཛུམ་རྒྱུ་ལེགས་པར་བཀའ་སྩོལ་ཉན་པར་འཚལ། རྒྱལ་བའི་ཞལ་ནས་འཛུམ་པ་མཛད་མཐོང་ནས། །འགྲོ་བ་འདི་དག་ཐེ་ཚོམ་སོམ་ཉི་འཚལ། ཐེ་ཚོམ་འཚལ་བ་རྣམས་ཀྱི་ཐེ་ཚོམ་ཁུམ། མི་ཡི་དབང་པོ་འཛུམ་པའི་རྒྱུ་ཡང་གསུངས། །གང་གིས་དེ་རིང་ཆོས་ལ་ཡིད་བཞག་གྱུར། །དེ་རིང་གང་གིས་ཆོས་ཀྱི་རྒྱལ་ཡང་མཐོང་། །དེང་དུས་སངས་རྒྱས་བསྔགས་པའི་མཆོད་པ་བགྱི །མི་ཡི་དམ་པ་བདག་ནི་ཉན་པར་འཚལ། དེ་རིང་འདུས་བྱས་སྡུག་བསྔལ་ཤེས་གྱུར་ནས། གང་གིས་དུ་བྱེད་གྱུར་པའི་ཡིད་གཅིག་བཅོམ། གང་ཞིག་ཡང་དག་མཐའ་ལ་མི་
གཡོ་གནས། རྣམ་དག་ཐུགས་མངའ་བདག་ནི་ཉན་པར་འཚལ། དེ་རིང་སུ་ཡིས་འཁོར་བཅས་བདུད་རྣམས་བཅོམ། ཐུབ་པ་སྟོན་པ་དེང་སུས་མཉེས་པར་བགྱིས། འདྲེན་པ་སུ་ཞིག་དེ་རིང་གཏིང་རྙེད་གྱུར། ཐེ་ཚོམ་མཆིས་ཏེ་དེང་བར་གང་ཉན་འཚལ། །འཛུམ་མཛད་དེ་ཡི་དོན་ནི་མཉན་སླད་དུ། འགྲོ་བ་ཀུན་ཀྱང་ཐལ་མོ་སྦྱར་ཅིང་གནས། འདྲེན་པ་ཐེ་ཚོམ་འཆལ་བའི་ཐེ་ཚོམ་སོལ། །རྐང་གཉིས་དམ་པས་ལུང་ཡང་བསྟན་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། འཛུམ་པའི་རྒྱུ་འདི་ཡོངས་སུ་དྲིས་པས་ན། འགྲོ་བའི་དོན་ཡང་ཁྱོད་ཀྱིས་བྱས་པར་གྱུར། །དེ་དོན་བསྟན་བྱས་རྟ་ཐུལ་མཉན་པར་གྱིས། གྲུལ་བུམ་མཆོག་ཀྱིས་ང་ལ་མཆོད་བྱས་ཏེ། ཞི་བའི་ཆོས་ལ་དེ་དག་ཡིད་ཀྱང་བཞག །མཚར་མེད་ང་མཐོང་ནས་ནི་དམ་གྱུར་ཏེ། ཞི་བའི་ཆོས་ལ་དེ་དག་ཡིད་ཀྱང་བཞག །དེ་དག་རྣམས་ཀྱིས་དེ་རིང་ང་མཆོད་དེ། ཞི་བའི་ཆོས་ལ་བློ་གྲོས་རྣམ་པར་བཏང་། ལམ་སྟོར་སྐྱེ་བོ་རྣམས་ལ་སྙིང་བརྩེ་ཞིང་། བསམ་པ་ཐག་པས་སྙིང་རྗེ་ཆེན་པོ་བསྐྱེད། སྙིང་རྗེ་བས་ན་ང་ལ་མཆོད་པ་བྱས། རབ་ཏུ་ལམ་སྟོར་རྣམས་ལ་བྱམས་པར་བསམས། མཁས་པ་དེ་དག་ལས་དེ་བྱས་པས་ན། གྲུལ་བུམ་སྐྱེ་གནས་ཤི་འཕོས་བརཏལ་ཞུགས་བཟང་། བརྒྱ་བྱིན་ལྷ་ཡི་དྲུང་དུ་འདོང་པར་འགྱུར། །ཐུགས་རྗེ་བྱམས་དོན་མཛད་སྐྱོབ་དྲུང་དུའང་འདོང་། །དེ་ནི་ཅུང་ཟད་ཡང་དང་ཡང་བསྟན་ཏེ། ཕྱིར་ཞིང་ཆོས་ལ་ཐེ་ཚོམ་མེད་པར་འགྱུར། དེ་དག་བསྐལ་པ་གང་གཱའི་བྱེ་སྙེད་དུ། ཞིང་ནས་ཞིང་དུ་རྣམ་པར་རྒྱུ་བྱེད་ཅིང་། །བདག་ཉིད་ཆེན་པོའི་ཆོས་ལ་མཆོད་པ་བྱེད། གོ་ཆ་ཆེན་པོ་རབ་དུ་བགོས་ཡིད་ཀྱིས། དེ་དག་སྐྱོ་བ་མེད་པར་འཇིག་རྟེན་ཁམས། ཁྲག་ཁྲིག་མཐའ་ཡས་རྣམ་པར་སྦྱོང་བར་འགྱུར། སྐྱེ་བོ་མང་པོའི་དོན་བྱེད་འདྲེན་འགྱུར་ཏེ། ངོ་མཚར་མེད་ཅེས་བྱ་བའི་རྒྱལ་བར་འགྱུར། །དེ་དག་ཞིང་རྣམས་གང་དུ་འགྲོ་རྒྱུ་བ། དེར་ནི་འགྲོ་བས་རྒྱལ་བ་བྱུང་བར་ཤེས། །དེ་དག་ཐབས་ཀྱིས་མ་འོངས་དུས་དག་ན། ངོ་མཚར་མེད་པར་སྐྱོ་བོ་རྣམ་གྲོལ་བྱེད། རྒྱལ་བ་ངོ་མཚར་མེད་པར་ཞིང་སྦྱོང་ཞིང་། རྫོགས་པའི་བྱང་ཆུབ་བླ་མེད་ཞི་བ་འཚོལ། །དེ་དག་ཚོལ་བ་ལ་ཡང་མི་གནས་ཏེ། འདི་ལྟར་བླ་མེད་བྱང་ཆུབ་གནས་ཕྱིར་རོ། །དེ་ལྟར་འཛུམ་རྒྱུ་རྒྱལ་བས་ལུང་བསྟན་ཅིང་། །བདེ་བར་གཤེགས་པས་འཇིག་རྟེན་དོགས་བསལ་ཏེ། གྲུལ་བུམ་མཆོད་པའི་འབྲས་བུ་དེས་ཐོས་ནས། འགྲོ་བ་ཐེ་ཚོམ་བསལ་ཏེ་དགའ་བར་གྱུར། གྲུལ་བུམ་
ལུང་བསྟན་པའི་ལེའུ་སྟེ་དགུ་པའོ།། །།