བཅུ་པ། དྲི་ཟ་ལུང་བསྟན་པའི་ལེའུ།
དེ་ནས་དེའི་ཚེ་དྲི་ཟ་བྱེ་བ་ཕྲག་སུམ་ཅུ་རྩ་དྲུག་གིས་ལྷ་མ་ཡིན་རྣམས་དང་ནམ་མཁའ་ལྡིང་རྣམས་དང་། ཀླུའི་བུ་མོ་རྣམས་དང་། རླུང་ལྷ་རྣམས་དང་། གྲུལ་བུམ་རྣམས་ཀྱིས་མཆོད་པ་ཡང་མཐོང་། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རང་ནས་རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་ངོ་མཚར་ཐོབ་པར་གྱུར་ཏེ། འདི་ལྟར་དེ་བཞིན་གཤེགས་པས་ཆོས་ཀྱི་དབྱིངས་འགྱུར་བ་མེད་པར་ཡང་ཡང་དག་པར་བཀའ་སྩལ་པ། བྱ་བ་རྣམས་ཀྱང་ཡང་དག་པར་སྟོན་དེ། དགེ་བའི་རྩ་བ་འཕེལ་བ་ཡང་བསྟན་ལ། ཆོས་གང་ལ་ཡང་ལུང་བསྟན་པ་མེད་པར་ཡང་དག་པར་བསྟན་པ་འདི་ནི་ངོ་མཚར་རྨད་དོ་སྙམ་ནས་དེ་དག་གིས་ཆོས་དེ་ལྟ་བུ་ཁོང་དུ་ཆུད་དེ། དེ་བཞིན་གཤེགས་པ་ལ་རིམ་གྲོ་བྱ་བའི་སེམས་རྒྱ་ཆེན་པོ་སྐྱེས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མོས་པར་གྱུར་ཏེ། རབ་ཏུ་དགའ་བ་ཡིད་དང་ལྡན་པ་དེ་དག་བཅོམ་ལྡན་འདས་ལ་མཆོད་པ་བྱ་བའི་ཕྱིར་བརྩོན་བར་གྱུར་ཏེ། གླང་པོ་ཆེའི་རྒྱལ་པོས་སྲུང་གི་བྱ་བ་ཕྲག་གསུམ་ཅུ་རྩ་དྲུག་མངོན་པར་སྤྲུལ་ཏོ། གླང་པོ་ཆེ་ས་སྲུང་གི་བུ་དེ་དག་རེ་རེ་ཞིང་མགོ་བོ་བྱེ་བ་ཕྲག་གསུམ་ཅུ་རྩ་དྲུག་མགོ་བོ་རེ་རེ་ཞིང་སོ་བྱེ་བ་ཕྲག་སུམ་ཅུ་རྩ་དྲུག་དྲུག །སོ་རེ་རེ་ལ་ཡང་རྫིང་བུ་བདུན་བདུན། རྫིང་བུ་རེ་རེ་ཞིང་ཡང་པད་མ་བདུན་བདུན། པད་མ་རེ་རེ་ཞིང་འདབ་མ་བྱེ་བ་ཕྲག་སྟོང་སྟོང་། འདབ་མ་རེ་རེ་ཞིང་ཡང་ལྷའི་བུ་མོ་བདུན་བདུན། ལྷའི་བུ་མོ་རེ་རེ་ཞིང་ཡང་འཁོར་རྒྱན་ཐམས་ཅད་ཀྱིས་བརྒྱན་པ་ལྷའི་བདུག་སྤོས་ཐོགས་པ་བདུན་བདུན་ཞིང་པད་མའི་ལོ་མའི་མཐའ་མཐའ་ན་འཁོད་པས་བསྐོར་བ་མངོན་པར་སྤྲུལ་ཏོ། གླང་པོ་ཆེ་ས་དྲུང་གི་བུ་དེ་དག་གི་མགོ་བོ་རེ་རེ་ལ་ཡང་རིན་པོ་ཆེ་སྣ་བདུན་གྱི་གདུགས་ནས་རིན་པོ་ཆེ་སྣ་བདུན་གྱི་དྲ་བ་དག་གིས་གཟུངས་བྱས་པ་དང་། རིན་པོ་ཆེ་སྣ་བདུན་གྱི་ལྡ་ལྡི་བྲས་པའི་བར་དང་ལྡན་པ་བྱེ་བ་ཕྲག་སུམ་ཅུ་རྩ་དྲུག་དྲུག་མངོན་པར་སྤྲུལ་ཏོ། །གླང་པོ་ཆེའི་མགོ་ཐམས་ཅད་ལ་ཡང་ལྷའི་སྤོས་ཀྱི་བླ་རེ་སྣ་ཚོགས་ཀྱི་ལྡ་ལྡི་བྲེས་པ་ཤ་སྟག་མངོན་པར་སྤྲུལ་ཏོ། དེ་ནས་དྲི་ཟ་དེ་དག་གླང་པོ་ཆེ་ས་སྲུང་གི་བུ་བྱེ་བ་ཕྲག་སུམ་ཅུ་རྩ་དྲུག་པོ་དེ་དག་ལ་
ཞོན་ཏེ། ལྷའི་རོལ་མོ་སིལ་སྙན་ལེན་ཅིང་ནམ་མཁའ་ལས་རྒྱུ་སྟེ། བཅོམ་ལྡན་འདས་ལ་ལན་གསུམ་ཅུ་རྩ་དྲུག་ཏུ་བསྐོར་བ་བྱས་ནས་ལྷའི་ཙན་དན་གྱི་ཕྱེ་མས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ་ལྷའི་ཨ་ག་རུའི་ཕྱེ་མ་དང་། ལྷའི་ཏ་མ་ལའི་ལོ་མ་དང་། ཨུད་པ་ལའི་ཕྱེ་མ་དང་། ལྷའི་མེ་ཏོག་མཱན་དཱ་ར་བ་དང་། མཱན་དཱ་ར་བ་ཆེན་པོ་དང་། མན་ཛུཥཀ་དང་། མན་ཛུཥཀ་ཆེན་པོ་དང་། པ་རུ་ཤ་ཀ་དང་། པ་རུ་ཤ་ཀ་ཆེན་པོ་དང་། མདོག་དཀར་དང་། མདོག་དཀར་ཆེན་པོ་དག་གིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་དང་། སྤུག་དང་། མུ་ཏིག་དམར་པོ་དང་། རྡོའི་སྙིང་པོ་མེ་ཏོག་རྣམས་དང་། སྤྲུལ་པའི་མེ་ཏོག་རྣམས་ཀྱིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། སྤོས་ཀྱི་བླ་རེ་དེ་དག་ལས་སྤོས་ཀྱི་ངད་འབྱུང་སྟེ་འགྲོ་ཞིང་ལྡོག་གོ །ལྷའི་སྤོས་ཆུ་རྣམ་པ་སྣ་ཚོགས་ཀྱི་ཆར་ཡང་སྟེང་གི་བར་སྣང་ལས་མངོན་པར་བབ་པོ། སྤོས་ཆུའི་ཆར་དེ་མངོན་པར་འབབ་པས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཁོར་ཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་སྤོས་ཆུས་རྡབ་ཏུ་གྱུར་ཏེ། སྤོས་ཆུའི་རྫབ་དེའི་འདྲིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་གང་བར་གྱུར་ནས་སེམས་ཅན་གང་དག་གིས་སྤོས་ཀྱི་དྲི་དེ་ཚོར་བར་གྱུར་པ་དང་། རོལ་མོའི་སིལ་སྙན་དེ་དག་གི་སྒྲ་ཐོས་པར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། དེ་ལྟར་དྲི་ཟ་རེ་རེས་ཀྱང་བཅོམ་ལྡན་འདས་ལ་མཆོད་པའི་ཕྱིར་གླང་པོ་ཆེ་ས་སྲུང་གི་བུ་མགོ་བྱེ་བ་ཕྲག་སུམ་ཅུ་རྩ་དྲུག་ལ་ལྷའི་བུ་མོ་གླུ་ལེན་པ་དང་། གར་བྱེད་པ་འཁོད་པ་དག་གིས་མཆོད་དེ་སྐྱེ་བོ་ཐམས་ཅད་ཀྱང་འདུན་པར་བྱས་སོ། །ལྷའི་བུ་མོ་དེ་དག་ལས་ལ་ལ་ནི་ལུས་ཀྱི་ཚུལ་སྒྱུར། ལ་ལ་ནི་ཙན་དན་དང་། ཨ་ག་རུ་དང་། ཏ་མ་ལའི་ལོ་མའི་ཕྱེ་མ་འཐོར། ལ་ལ་ནི་ལྷ་མ་ཡིན་གྱི་ལྷ་རྫས་ཀྱི་ཕྱེ་མ་དང་། སྤོས་རྣམ་པ་སྣ་ཚོགས་ཀྱི་ཕྱེ་མ་འཐོར། ལ་ལ་ནི་མེ་ཏོག་མ་ན་དཱ་ར་བ་དང་། མན་དཱ་ར་བ་
ཆེན་པོ་ནས། སྐྱ་སྣར་ཁྲ་བོ་དང་། སྐྱ་སྣར་བཀྲ་ཆེན་གྱི་བར་གྱི་མེ་ཏོག་དང་། སྤྲུལ་པའི་མེ་ཏོག་རྣམས་འཐོར། ལ་ལ་ནི་གསེར་གྱི་མེ་ཏོག་ནས་རྡོའི་སྙིང་པོའི་བར་གྱི་མེ་ཏོག་དང་། དབྱིག་དང་། གསེར་དང་། རིན་པོ་ཆེ་སྙིམ་པས་བླངས་ཏེ། བཅོམ་ལྡན་འདས་ལ་མངོན་པར་འཐོར། ལ་ལ་ནི་ན་བཟའ་དག་འཐོར། ལ་ལ་ནི་ཞབས་ཀྱི་རྒྱན་དང་། སྐུ་རགས་དང་། གསེར་གྱི་ཕྲེང་བ་རིན་པོ་ཆེས་སྤྲས་པའི་བར་དག་འབུལ་ལོ། །ལ་ལ་ནི་གསེར་གྱི་དྲ་བ་དག་འཛིན། ལ་ལ་ནི་རིན་པོ་ཆེ་ཐམས་ཅད་ཀྱི་རྒྱལ་མཚན་དང་། རིན་པོ་ཆེའི་བ་དན་ཁ་དོག་སྣ་ཚོགས་དང་། ཚོན་སྣ་ཚོགས་ཅན་འཛིན། ལ་ལ་ནི་ལྷའི་སྤོས་ཆུའི་ཆར་འབེབས་ཏེ། ལྷ་མ་ཡིན་གྱི་བུ་མོས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པའི་བར་དུ་སྔ་མ་བཞིན་ནོ། །དེ་ནས་དྲི་ཟ་དེ་དག་གླང་པོ་ཆེའི་རྒྱལ་པོ་ས་སྲུང་གི་བ་དེ་དག་ལ་ཞོན་ནས། བཅོམ་ལྡན་འདས་ལ་སྐོར་བ་བྱེད་བྱེད་པ་ལས་གླང་པོ་ཆེས་སྲུང་གི་བུ་དེ་དག་ལས་བབས་ཏེ། ཡང་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཞབས་ལ་མགོ་བོས་ཕྱག་འཚལ་ཏེ་ཐལ་མོ་སྦྱར་ནས་ཕྱོགས་གཅིག་ཏུ་འཁོད་དེ། བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། བཅོམ་ལྡན་བདེ་གཤེགས་སྲིད་པ་མཐའ་འབྱིན་པ། སྲིད་པའི་བཅིངས་ལས་འགྲོ་བ་རྣམ་གྲོལ་མཛད། ཁྱོད་འདྲ་སྲིད་གསུམ་གང་ནའང་མ་མཆིས་ཏེ། ཁྱུ་མཆོག་ཁྱོད་ནི་གཟུགས་དང་མཚན་མཆོག་མངའ། མི་མཆོག་ཁྱོད་ཀྱིས་ས་ཆེན་འདི་སྟེང་དུ། གྲགས་པ་མཐའ་ཡས་མངའ་བས་ངོ་མཚར་བསྟན། འགྱུར་བགྱིད་ཆོས་ནི་གང་ཡང་མ་མཆིས་ལ། དགེ་བའི་ཚོགས་ལ་འགྲོ་བ་རབ་ཏུ་བཀོད། །བདེ་གཤེགས་འགྱུར་བ་མེད་པའི་དེ་བཞིན་ཉིད། བརྗེད་པ་ཙམ་སྟེ་གཞན་ནི་ཅི་མ་མཆིས། ཐ་སྙད་གདགས་དང་ཐ་སྙད་འདོགས་མ་མཆིས། འོན་ཀྱང་བདེ་གཤེགས་ཁྱོད་ནི་འགྲོ་བ་སྦྱོང་། །བདེ་བར་གཤེགས་པས་སོང་མེད་འོང་མེད་དང་། གནས་མེད་རང་བཞིན་གྱིས་ནི་སྟོང་པ་དང་། ཆོས་རྣམས་འདི་དག་རང་བཞིན་མེད་ཅེས་བསྟན། །རྒྱལ་བ་མཆོག་གིས་བྱ་བ་རྣམས་ཀྱང་བསྟན། ཆོས་རྣམས་གང་ཡང་བྱ་བ་
བྱེད་མ་མཆིས། །འཇིག་རྟེན་གཙོ་བོས་བྱ་བའང་ཡོངས་སུ་བསྟན། །བདག་དང་གཞན་གྱི་ཡོན་ཏན་མི་དགོངས་ལ། །བཅོམ་ལྡན་འདས་ཀྱིས་བགྱི་བ་ཀུན་ཀྱང་བསྟན། །ཤིང་རྟའི་ཡན་ལག་རྣམ་པ་སྣ་ཚོགས་དག །བདག་དང་གཞན་གྱི་ཡོན་ཏན་མི་སེམས་ཀྱང་། །ཤིང་རྟའི་བགྱི་བ་དག་ཀྱང་བགྱིད་པར་འགྱུར། །དེ་བཞིན་ཆོས་ཀུན་བདེ་བར་གཤེགས་པས་གསུངས། ཆོས་ནི་ཆོས་ལ་ཡོངས་སུ་སྐུལ་མི་བགྱིད། །ཆོས་ནི་ཆོས་ལ་དྲན་པར་བགྱིད་མ་མཆིས། །ཆོས་རྣམས་ཆོས་ལ་ཉེ་བར་མི་རྟེན་ཏེ། །ཆོས་རྣམས་གང་ཡང་མ་སྐྱེས་འཆི་མ་མཆིས། །འགྲོ་བ་འདི་དག་ཀུན་རྫོབ་མངོན་པར་གསུངས། །ཀུན་རྫོབ་དེ་ཡང་དེ་ན་མ་མཆིས་ཏེ། །འགྲོ་བ་འདི་ཀུན་ཀུན་རྫོབ་ཇི་བཞིན་ཞེས། །ཚོགས་ཀྱི་སློབ་དཔོན་ཁྱོད་ཀྱིས་ཡོངས་དག་གསུངས། །མིག་གི་རང་བཞིན་གང་ནའང་མ་མཆིས་ལ། །བདེ་བར་གཤེགས་པས་བྱ་བ་རྣམ་པར་གཞག །ཆོས་ཚུལ་འདི་འདྲ་ཡོངས་སུ་བསྟན་པས་ན། །འཇིག་རྟེན་མཁས་པས་ཤིང་དུ་ངོ་མཚར་མཛད། །དེ་བཞིན་བདག་ཅག་བདེ་གཤེགས་ཉིད་གྱུར་ཏེ། ནོར་བའི་འགྲོ་བ་བློ་གྲོས་སྟོར་བ་རྣམས། །ཆོས་ཀྱིས་ཆོས་ཀྱི་ཚུལ་ལ་གཟུང་བགྱིས་ཏེ། །ཞི་བའི་གོ་འཕང་འཆི་མེད་ཐོབ་པར་བགྱི །རྣམ་པར་འདྲེན་པ་ཁྱོད་ནི་ཅི་འདྲ་བར། །འདྲེན་པ་བདེ་གཤེགས་གྲགས་པ་མཐའ་ཡས་པ། །ཐུགས་རྗེ་ལྡན་པ་ཕན་བཞེད་འཇིག་རྟེན་མཁས། བསོད་ནམས་བརྒྱ་ཡི་མཚན་དང་ལྡན་པར་ཤོག །ཇི་ལྟར་བདེ་གཤེགས་ཁྱོད་བཞིན་བདག་ཅག་གིས། །ང་རྒྱལ་བསྒྲིབས་པའི་འགྲོ་བ་སྡུག་བསྔལ་བ། །འདོད་པའི་ཡོན་ཏན་རྒྱུན་གྱི་རྗེས་འགྲོ་བ། །མངོན་དགའ་སྡུག་བསྔལ་བརྒྱད་ལྡན་ཡོངས་སུ་དགྲོལ། །ཇི་ལྟར་བདེ་གཤེགས་ཁྱོད་བཞིན་བདག་ཅག་གིས། །འགྲོ་བ་སྡུག་བསྔལ་གནོད་པ་མྱོང་གྱུར་ལ། །དེ་དག་རྣམས་ཀྱང་འདྲེན་པས་རབ་ཏུ་གཟིགས། །གཡོ་ཡི་ཞགས་པས་ཟིན་ཅིང་མ་མ་མཐོང་། །ཡོངས་འཐོམ་སྤྲེའུ་ལྟར་རྒོད་པ་ཡོངས་སུ་དགྲོལ། །ཇི་ལྟར་བདེ་གཤེགས་ཁྱོད་བཞིན་བདག་ཅག་གིས། །འགྲོ་བ་མི་མཁས་མིག་དང་བྲལ་བ་ཡི། །ལྷ་ཚོགས་ཡོངས་སྐྱོ་གཉིད་ཀྱིས་ལོག་གྱུར་ཅིང་། །བདག་ཉིད་ལས་ཀྱི་འབྲས་བུར་ཆུད་གཟོན་དགྲོལ། །དེ་ནས་
བཅོམ་ལྡན་འདས་ཀྱིས་དྲི་ཟ་བྱེ་བ་ཕྲག་སུམ་ཅུ་རྩ་དྲུག་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་བ། བདེ་གཤེགས་མཐའ་ཡས་གཟིགས་པས་འཛུམ་པ་མཛད། །འདྲེན་པ་རྒྱུ་མ་མཆིས་པར་མི་འཛུམ་ན། །བདེ་གཤེགས་འཛུམ་པའི་རྒྱུ་ནི་མྱུར་དུ་གསུངས། །ནེ་མ་ནུར་གནོད་གྱུར་རྣམས་ཀྱི་ཐེ་ཚོམ་སོལ། །བདེ་གཤེགས་ཁྱོད་ཀྱི་ཞལ་གྱི་འཛུམ་མཐོང་ནས། །སྐྱེ་བོ་འདི་དག་ཐེ་ཙོམ་རྙེད་པར་འགྱུར། །འཛུམ་པའི་དོན་ནི་དེ་དག་ཉན་པར་འཚལ། །ཐུབ་ཆེན་འགྲོ་བའི་ཐེ་ཚོམ་བསལ་དུ་གསོལ། །བདེ་བར་གཤེགས་ཀྱི་བསྟན་ལ་སུ་ཞིག་ཞུགས། །ཐེ་ཚོམ་བྲལ་ཞིང་སོམ་ཉི་བསལ་བར་གྱུར། །བཅོམ་ལྡན་འདས་ཀྱིས་གང་གི་བསམ་མཁྱེན་ནས། །མི་ཡི་མཆོག་གིས་འཛུམ་པ་བསྟན་པ་མཛད། །སུ་ཞིག་བདེ་གཤེགས་བཀའ་རྩལ་ཚུལ་བཞིན་དུ། །བློ་གྲོས་རྟོགས་པ་ཆོས་བཞིན་གནས་པར་གྱུར། །གང་གིས་བློ་གྲོས་དྲན་རྟོགས་བློ་མཁྱེན་ནས། །བདེ་གཤེགས་འགྲོ་བའི་ནང་དུ་འཛུམ་པ་མཛད། །འགྲོ་བ་འདི་དག་བློ་གཞན་ཡོངས་བཏང་སྟེ། །བདེ་གཤེགས་འཛུམ་དོན་ཞལ་ནས་ཐོས་པར་དགའ། །སོར་བཅུ་ཐལ་སྦྱར་མགོ་ལ་བཞག་བགྱིས་ཤིང་། །དགའ་བའི་ཡིད་ཀྱིས་སྟོན་པའི་ཞལ་དུ་ལྟ། །ཉོན་མོངས་བྲལ་ཞིང་མྱ་ངན་རབ་སྤངས། །དགྱེས་པའི་ཐུགས་མངའ་ཐུབ་ཆེན་འཇིག་རྟེན་མིག །འགྲོ་བའི་ཡིད་གཉིས་སོམ་ཉི་བསལ་དུ་གསོལ། །རྒྱལ་བ་ཐུགས་རྗེ་ལྡན་པས་འཛུམ་རྒྱུ་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་བ། འགྲོ་བའི་དོན་དུ་འཛུམ་པ་ངས་མཛད་པ། །ཁྱོད་ཀྱིས་དོན་དྲིས་འཐུན་ཞིང་ལེགས་པ་སྟེ། །འཛུམ་པ་དེ་ཡི་དོན་ནི་ལུང་བསྟན་པས། །སྐྱེ་བོའི་ཚོགས་ཆེན་དོན་ནི་དེ་རིང་འཕེལ། །འཛུམ་མཛད་རྒྱུ་དེ་རྟ་ཐུལ་མཉན་པར་གྱིས། །རྣམ་པར་འདྲེན་པས་འཛུམ་པ་འདི་མཛད་པ། །དེ་ནི་མ་ལོག་པར་ཡང་ངས་བསྟན་གྱིས། །བསྟན་པ་དེ་ལ་དགའ་བའི་སེམས་ཀྱིས་ཉོན། །དྲི་ཟ་འདི་རྣམས་ཆོས་ཀྱི་རྗེས་སྙེགས་ཤིང་། །བདེ་
བར་གཤེགས་ལ་མཆོད་པ་འདི་དག་བྱས། །ཆོས་ཉིད་བྱུང་བར་གྱུར་པ་མེད་པ་སྟེ། །ཆོས་ཉིད་ཟད་པར་འགྱུར་བའང་མེད་པ་ཡིན། །རྒྱལ་བ་རྣམ་རྟོག་སྒྱུ་མ་ལྟ་བུར་གནས། །རྟོག་པ་མི་བྱེད་དེ་དག་རྨོངས་པ་འགྱུར། །གང་གིས་ཆོས་གང་རྗེས་སུ་བརྗོད་བྱ་བ། །དེས་ནི་དེ་ཉིད་སྟོང་ཞེས་བདེ་གཤེགས་གསུངས། །དེ་དག་ང་ཡི་ཚིག་དེ་རྟོགས་གྱུར་ནས། །རྟ་མེད་གླང་པོ་མཆོག་གིས་མཆོད་པ་བྱས། །བྱང་ཆུབ་རྒ་མེད་འཆི་མེད་ཚོལ་བྱེད་ཅིང་། །དྲི་ཟའི་རྒྱལ་པོ་རྣམས་ཀྱིས་ང་མཆོད་དོ། །ནོར་བའི་འགྲོ་ལ་སྙིང་རྗེ་བསྐྱེད་ནས་ནི། །ཐམས་ཅད་མཁྱེན་པ་ཉིད་དུ་འདི་དག་མོས། །འདི་དག་ང་ལ་མཆོད་པ་འདི་བྱས་པས། །དྲི་ཟའི་རིས་བོར་དགའ་བའི་ཡིད་གྱུར་ཏེ། །བློ་གྲོས་བཟང་རྣམས་ལྷ་གནས་ལྷ་ཡུལ་བ། །བརྒྱ་བྱིན་ལྷ་འདུས་པར་ནི་འགྲོ་བར་འགྱུར། །དེ་དག་སངས་རྒྱས་བདེ་གཤེགས་རྡུལ་མེད་པ། །བྱེ་བ་ཁྲག་ཁྲིག་མང་ལ་མཆོད་བྱེད་འགྱུར། །ཞིང་ནས་ཞིང་དུ་རྗེས་སུ་རྒྱུ་བྱེད་ཅིང་། །དེ་དག་ལ་ནི་མཁས་པ་ཆོས་ཀྱང་ཉན། །དེ་དག་བདེ་གཤེགས་སྤྱོད་པ་ཡོངས་སུ་སྤྱོད། །དེ་དག་ཞིང་ཡང་རྟག་པར་ཡོངས་དག་འགྱུར། །རྒྱལ་བའི་གདུང་འཛིན་དེ་དག་སེམས་ཅན་ནི། །ཁྲག་ཁྲིག་མང་པོ་དག་ལ་བྱང་ཆུབ་སྟོན། །འགྲོ་བ་འདི་དག་རང་བཞིན་སྟོང་རིག་ནས། །བདེ་གཤེགས་འགྲོ་བ་དག་ལ་སྟོན་པར་འགྱུར། །རྒྱལ་བ་ཐམས་ཅད་མཁྱེན་ཅིང་ཀུན་གཟིགས་པ། །རྡུལ་མེད་བསྐལ་པ་ཁྲག་ཁྲིག་བཞུགས་པར་འགྱུར། །སངས་རྒྱས་མཚན་ནི་མཐའ་ཡས་རྟོགས་པ་སྟེ། །སངས་རྒྱས་རེ་རེ་ཁྲག་ཁྲིག་ཕྲག་མང་བའི། །བསྐལ་པ་རྣམས་སུ་རྡུལ་མེད་གནས་པར་འགྱུར། །ཐམས་ཅད་མཁྱེན་པའི་ལམ་འདི་རྗེས་སུ་སྟོན། །རྒྱལ་བ་ཐུབ་པ་ཉོན་མོངས་བཅོམ་པ་ཡིས། །དེ་ལྟར་དེ་ཚེ་དྲི་ཟས་མཆོད་ལུང་བསྟན། །རྟ་ཐུལ་གྱིས་ནི་མཛུམ་པའི་དོན་ཞུས་པ། །དྲ་ཟ་ལུང་བསྟན་པ་ནི་བཤད་པ་མཛད། །དྲི་ཟ་ལུང་བསྟན་ཡིད་དུ་འཐད་འགྱུར་བ། །དེ་ཐོས་ནས་ནི་འགྲོ་བ་ཐམས་ཅད་དགའ། །དེར་ནི་བདེ་བར་གཤེགས་ཀྱི་གསུང་ཐོས་ནས། །ཤཱཀྱ་ཐུབ་ལ་ཐམས་ཅད་སྐྱབས་སུ་དོང་། །དྲི་ཟ་ལུང་བསྟན་པའི་ལེའུ་སྟེ་བཅུ་པའོ།། །།