བཅུ་གཅིག་པ། གནོད་སྦྱིན་ལུང་བསྟན་པའི་ལེའུ།
འཕགས་པ་ཡབ་དང་སྲས་
མཇལ་བ་ཞེས་བྱ་བ་ཐེག་པ་ཆེན་པོའི་མདོ། བམ་པོ་ལྔ་པ། དེ་ནས་གནོད་སྤྱིན་བྱེ་བ་ཕྲག་བརྒྱད་ཅུས་ལྷ་མ་ཡིན་རྣམས་ནས་དྲི་ཟའི་བར་དེ་དག་གི་མཆོད་པ་ཡང་མཐོང་། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བཅོ་ལྡན་འདས་ཀྱི་ཤེས་རབ་ཀྱི་རྣམ་པ་ལ་རིམ་གྲོ་ཆེན་པོ་བསྐྱེད་དེ་ཆོས་ཉིད་ལ་འཇུག་པ་ཡང་ཐོས་པས་སྟོན་པའི་འདུ་ཤེས་སྐྱེས་པར་གྱུར་ཏོ། །བཅོམ་ལྡན་འདས་ཀྱང་བློ་ཟད་མི་ཤེས་པའི་འདུ་ཤེས་སྐྱེས་པར་གྱུར་ཏེ། དེ་དག་གི་བཅོམ་ལྡན་འདས་བློ་ཟད་མི་ཤེས་པ་ཞེས་བྱ་བར་རིག་ནས་སངས་རྒྱས་ཀྱི་ཆོས་རྣམས་ལ་འདོད་པ་སྐྱེས་པར་གྱུར་ཏོ། །སངས་རྒྱས་ཀྱི་ཆོས་རྣམས་ལ་འདོད་པ་སྐྱེས་པར་གྱུར་ནས་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། མངོན་ཤེས་སྟོབས་ནི་ཀུན་དུ་མཐའ་ཡས་ཏེ། །རྒྱ་མཚོ་ཆུ་འཛིན་བས་མ་འཚལ་དང་འདྲ། །དེ་བས་མཚུངས་མེད་འཇིག་རྟེན་ཕན་མཛད་པ། །མི་ཡི་སེང་གེ་ཁྱོད་ལ་འདི་ལྟར་བསྟོད། །རི་རབ་སྲང་ལ་གཞལ་བར་ནུས་ཀྱང་གདའ། །གཟི་བརྗིད་ཆེན་པོ་ནམ་མཁའ་གཞལ་རུང་གདའ། །ཤེས་རབ་མཆོག་མངའ་བདེ་གཤེགས་ཡེ་ཤེས་སྟོབས། །ཚད་གཟུང་དཔག་པར་ནུས་པ་ཡོང་མ་མཆིས། །འགྲོ་བ་ཀུན་གྱི་བསམ་པ་ཐུགས་སུ་ཆུད། །སྐྱེ་བོ་དྲང་རུང་མི་རུང་གདུལ་མིན་པ། །དེ་དག་ལས་ཀྱི་རྣམ་པ་མངོན་པར་མཁྱེན། །དེ་བས་མཚུངས་མེད་ཀུན་ཏུ་མཐའ་ཡང་ཡས། །དེ་དག་ཅི་འདྲའི་ཁམས་ལ་བསྟེན་པ་དང་། །དེ་དག་སེམས་རྒྱུད་ཅི་འདྲར་འབྱུང་བ་དང་། །དེ་དག་མོས་པ་ཅི་འདྲ་མ་ལུས་མཁྱེན། །དེ་བས་མཚུངས་མེད་ཀུན་ཏུ་མཐའ་ཡང་ཡས། །འདོད་ཆགས་སྤྱོད་དང་དེ་བཞིན་ཞེ་སྡང་སྤྱོད། །མི་ཡི་གཏི་མུག་སྤྱོད་པ་དེ་བཞིན་མཁྱེན། །ཕྲག་དོག་རྣམ་པའང་དེ་བཞིན་མཁྱེན་པ་སྟེ། །དེ་བས་མཚུངས་མེད་ཀུན་ཏུ་མཐའ་ཡང་ཡས། །འགྲོ་བ་འདི་དག་ལམ་རྒྱུད་གར་འཁྱམས་པ། །དེ་ལ་ཡེ་ཤེས་རྒྱུན་ཏུ་རབ་འབྱུང་བས། །དེ་
བས་མཚུངས་མེད་ཀུན་ཏུ་མཐའ་ཡང་ཡས། །བདེ་བར་གཤེགས་པས་འགྲོ་ཀུན་རབ་ཏུ་གཟིགས། །ཆུད་ཟའི་ལམ་རྒྱུད་གང་དུ་འཁྱམས་གྱུར་ཅིང་། །བྱམས་པའི་སྟོབས་ལས་རབ་ཏུ་ཉམས་གྱུར་པ། །དེ་དག་མ་ལུས་ཁྱོད་ཀྱིས་རབ་ཏུ་གཟིགས། །འགྲོ་བ་རྣམས་ནི་ཇི་སྲིད་དུས་གནས་ཤིང་། ༏ཅི་འདྲའི་སྡུག་བསྔལ་དེ་དག་རེག་འགྱུར་དང་། །ལུས་ཀྱི་རྣམ་པ་ཅི་འདྲ་འཆང་བ་རྣམས། །དེ་དག་འདྲེན་པ་ཁྱོད་ཀྱིས་རབ་ཏུ་གཟིགས། །མི་ཡི་སེང་གེས་ལྟ་བ་ཅི་འདྲ་དང་། །གང་གིས་སྡུག་བསྔལ་རྣམ་པ་འཐོབ་འགྱུར་བར། །གང་ལ་རྟེན་ཅིང་ལས་རྣམས་བགྱིད་འགྱུར་བ། །དེ་དག་རྣམས་ཀྱང་འདྲེན་པས་རབ་ཏུ་གཟིགས། །དེ་དག་རྒྱལ་བའི་བསྟན་ལ་རབ་བྱུང་སྟེ། །རྣམ་པར་ཐར་པའི་སྒོ་ནི་གང་ཞིག་གིས། །ཅི་འདྲའི་ལམ་ལ་དེ་དག་བསྟེན་བགྱིས་ཤིང་། །ཅི་འདྲའི་ཞི་བ་འཐོབ་འགྱུར་ཁྱོད་ཀྱིས་མཁྱེན། །བྱིས་པ་གང་རྣམས་བདེ་གཤེགས་བསྟན་པ་ལ། །རབ་ཏུ་བྱུང་ཞིང་འཇིག་རྟེན་མཁས་པ་ཡིས། །བསྟན་པ་རབ་ཕྲ་ཇི་ལྟར་སྤོང་འགྱུར་བ། །དེ་དག་རྣམས་ཀྱང་འདྲེན་པས་རབ་ཏུ་གཟིགས། །འཇིག་རྟེན་ཕན་པའི་བསྟན་ལ་བརྙས་བགྱིས་པས། །དམྱལ་བ་ཆེན་པོར་ཇི་སྲིད་གནས་པ་དང་། །ཅི་འདྲའི་སྡུག་བསྔལ་དེ་དག་མྱོང་འགྱུར་བ། །དེ་དག་རྣམས་ཀྱང་འདྲེན་པས་རབ་ཏུ་གཟིགས། །གང་དག་རྒྱལ་བ་རྣམས་ལ་དད་བསྐྱེད་དེ། །རབ་ཏུ་བྱུང་ནས་རྒྱལ་བའི་བསྟན་འཛིན་ཅིང་། །ཆོས་ཀུན་སྟོང་པ་ཉིད་དུ་རབ་བརྟགས་ནས། །མཚན་མ་ཐམས་ཅད་རྣམ་པར་གཞིག་བགྱིས་ཤིང་། །འགྲོ་རྒྱུད་ཀུན་དུ་སྨོན་པ་རྣམ་སྤངས་ཏེ། །ལུས་འདི་སྒྱུ་མ་འདྲ་བར་རབ་བརྟགས་ནས། །ཕུང་པོ་བྲག་ཅ་འདྲ་བར་རྟོགས་གྱུར་ཏེ། །བྱང་ཆུབ་སེམས་ལྡན་དེ་དག་རབ་ཏུ་གཟིགས། །མགོན་པོ་ཁྱོད་ལ་བསྟོད་པའི་བསོད་ནམས་གང་། །མཚུངས་མེད་ཁྱོད་ཀྱིས་ཇི་ལྟར་ཐུགས་ཆུད་པ། །དེ་ཡིས་བླ་མེད་སངས་རྒྱས་འགྲུབ་པར་ཤོག །འགྲོ་བ་ཀུན་ཀྱང་རང་བྱུང་ཐོབ་གྱུར་ཅིག །དེ་ནས་བཅོམ་ལྡན་འདས་ཀྱིས་དེའི་ཚེ་གནོད་སྦྱིན་བྱེ་བ་ཕྲག་བརྒྱད་ཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ།
མི་ཡི་སེང་གེས་འཛུམ་པ་འདི་མཛད་པ། །མི་ཡི་ཟླ་བ་རང་བྱུང་གྱུར་པ་ནི། །རྒྱུ་མ་མཆིས་པར་འཛུམ་པ་མི་མཛད་ན། །འཛུམ་པ་དེ་ཡི་རྒྱུ་ནི་བཀའ་སྩལ་གསོལ། །སྟོན་པའི་ཞལ་ནས་འཛུམ་པ་དེ་མཐོང་ནས། །བཅོམ་ལྡན་འཇིག་རྟེན་འདི་དག་ཐེ་ཚོམ་འཚལ། །མགོན་པོས་དེ་དག་ཐེ་ཚོམ་བསལ་དུ་གསོལ། །འཇིག་རྟེན་འདི་དག་དགའ་བའི་ཡིད་དུ་འགྱུར། །དེ་རིང་སུ་ཞིག་རྒྱལ་ལ་དང་བ་སྐྱེད། །གང་གིས་ཆོས་རྒྱ་ཆེན་པོ་རྣམ་པར་རྟོགས། །གང་གིས་སེམས་ནི་མི་སྒུལ་གནས་པར་འགྱུར། །དེ་དག་རྒྱལ་བས་འགྲོ་བ་བསྟན་དུ་གསོལ། །དེ་རིང་འཁོར་རྣམས་ཐེ་ཚོམ་ཆེ་འཚལ་ཞིང་། །ཀུན་ཀྱང་རྒྱལ་བའི་ཞལ་དུ་ལྟ་ཞིང་སྡོང་། །ཅི་ནས་ཐེ་ཚོམ་མ་མཆིས་ཀུན་འགྱུར་པ། །དེ་ལྟར་དཔའ་བོས་ཐེ་ཚོམ་བསལ་དུ་གསོལ། །དེ་རིང་འདི་ནི་གང་གི་རྣམ་འཕྲུལ་ལགས། །གང་གིས་བརྩོན་འགྲུས་བཟང་པོ་འདིར་བསྟན་ལགས། །གང་ཞིག་ཁྱོད་དང་འདིར་མཇལ་དོན་མཆིས་གྱུར། །དེ་ནི་ལེགས་པར་འགྲོ་ལ་བཀའ་སྩལ་གསོལ། །རྒྱལ་བ་འགྲོ་བ་དག་ལ་ཕན་བཞེད་པ། །ཐེ་ཚོམ་འཚལ་བའི་ཡིད་གཉིས་ལེགས་བསལ་གསོལ། །དེ་ཐོས་ལྷ་དང་བཅས་པའི་འཇིག་རྟེན་རྣམས། དགའ་ཞིང་མགུ་བ་དག་ཀྱང་འཐོབ་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། །དེ་རིང་འགྲོ་བ་དག་གི་དོན་ཆེན་བྱས། །རང་བྱུང་འཛུམ་མཛད་རྒྱུ་ནི་དྲིས་པས་ན། །སྟོན་པའི་དགོངས་པའང་ཁྱོད་ཀྱིས་ལེགས་པར་མཐོང་། །དེ་དག་ལུང་བསྟན་མ་ལུས་བསྟན་པར་བྱས། །གནོད་སྦྱིན་ཚོགས་ཀྱི་ཡིད་ནི་གཟིགས་གྱུར་ནས། །འགྲོ་ལ་ཕན་པའི་དོན་དུ་འཛུམ་མཛད་པ། །དད་པའི་ཡིད་ཀྱིས་རྟ་ཐུལ་མཉན་པར་གྱིས། །རྒྱལ་བའི་བྱང་ཆུབ་ཞི་བ་ཤེས་གྱུར་ནས། །གནོད་སྦྱིན་ཚོགས་ཀྱིས་མོས་པའི་སེམས་བསྐྱེད་དེ། །འབྱུང་པོའི་ཚོགས་དབུས་སངས་རྒྱས་བསྟོད་བྱས་ནས། །རང་བྱུང་དམ་པ་མཆོག་ཏུ་ཡིད་ཀྱང་བཏང་། །ཆོས་རྣམས་སྟོང་པ་ཉིད་དུ་ཤེས་བྱ་དང་། །མཚན་མ་ཐམས་ཅད་རྣམ་པར་གཞིག་པའི་ཕྱིར། །འགྲོ་བ་ཀུན་དུ་སྨོན་པ་རྣམས་སྤངས་ཤིང་། །བྱང་ཆུབ་མཆོག་ཏུ་དེ་
དག་ཡིད་ཀྱང་བཏང་། ། རྣལ་འབྱོར་སྟོབས་ཀྱིས་ཕུང་པོ་རྣམ་ཤིག་ཅིང་། །ཀུན་རྫོབ་ཙམ་དུ་རིག་ནས་མི་ཆགས་ཏེ། །སྲིད་པ་ཀུན་དུ་ཆུ་ལ་པད་མོ་བཞིན། །བྱང་ཆུབ་མཆོག་ཏུ་དེ་དག་ཡིད་ཀྱང་བཏང་། །དེ་དག་སྲིད་པ་གང་དུ་ཆགས་འགྱུར་པ། །སྟོང་པར་བཤིག་སྟེ་ཐམས་ཅད་ལེགས་རྟོགས་པ། །དེ་ཉིད་རྒྱལ་བའི་བླ་མེད་བྱང་ཆུབ་སྟེ། །བྱང་ཆུབ་ཕྱིར་ནི་དབེན་པའི་བརཏལ་ཞུགས་ཤེས། །སྐྱེ་དང་རྒ་ཤི་ཡོང་གིས་སྟོང་པ་སྟེ། །དེ་ནི་རྒྱལ་བའི་བླ་མེད་བྱང་ཆུབ་ཡིན། །དངོས་པོའི་རང་བཞིན་སྟོང་པར་ཤེས་གྱུར་ནས། །ཞི་བ་བླ་མེད་བྱང་ཆུབ་འཐོབ་པར་འགྱུར། །ཕུང་པོའི་རང་བཞིན་དབེན་ཞིང་སྟོང་པ་ཉིད། །བྱང་ཆུབ་རང་བཞིན་དབེན་ཞིང་སྟོང་པ་ཉིད། །གང་སྤྱོད་དེ་ཡང་རང་བཞིན་སྟོང་པ་སྟེ། །ཡེ་ཤེས་ལྡན་པས་ཤེས་ཀྱི་བྱིས་པས་མིན། །ཡེ་ཤེས་རང་བཞིན་སྟོང་པར་རིག་གྱུར་ཏེ། །ཤེས་བྱའི་རང་བཞིན་སྟོང་པར་རིག་གྱུར་ནས། །ཤེས་པ་པོ་དང་འདྲ་བར་རྟོགས་གྱུར་ནས། །བྱང་ཆུབ་ལམ་ལ་དེ་དག་སྤྱོད་ཅེས་བྱ། །སྟོང་པའི་རང་བཞིན་སྟོང་པར་ཤེས་པར་བྱ། །མཚན་མ་མེད་པའང་རང་བཞིན་ཉིད་ཀྱིས་སྟོན། །སྨོན་པ་མེད་པའང་རང་བཞིན་སྟོང་པ་སྟེ། །དེ་ལྟར་སྤྱོད་ན་གཞིན་མིན་སྤྱོད་པ་ཡིན། །དེ་ཐོས་ལྷ་དང་བཅས་པའི་འཇིག་རྟེན་རྣམས། །དགའ་ཞིང་དེ་དག་སྟོབས་དང་ལྡན་པར་གྱུར། །རང་བྱུང་ཆོས་ལ་དེ་དག་ཡིད་ཆེས་ཏེ། །ཞི་བའི་གནས་ཤེས་བྱང་ཆུབ་ཡིད་ལྡན་གྱུར། །གནོད་སྦྱིན་ཚོགས་རྣམས་དེད་མོས་ཡིད་གྱུར་ཏེ། །འདི་ལྟར་ང་ལ་མཆོད་པ་རབ་བྱས་པས། །གནོད་སྦྱིན་རྒྱུ་ནས་ཤི་འཕོས་བློ་ཆེན་རྣམས། །མཐོ་རིས་དོང་ཞིང་ཡུན་རིང་དགའ་བར་འགྱུར། །དེ་དག་མ་འོངས་དུས་ན་རྫུ་འཕྲུལ་གྱིས། །ཞིང་དུ་དོད་ཞིང་སྐད་ཅིག་གཅིག་ལ་ཡང་། །བློ་ཆེན་དེ་དག་རྒྱལ་བ་བྱེ་བ་མཆོད། །དེ་དག་གཟོད་མཁྱེན་རྒྱལ་བ་གདམས་ངག་སྟོན། །དེ་དག་འཇིག་རྟེན་ཕྱོགས་བཅུར་རྫུ་འཕྲུལ་གྱིས། །མཚན་མ་མེད་པར་སྤྱོད་ཅིང་འདོང་འགྱུར་ཏེ། །འཇིག་རྟེན་འདི་དག་སྤྲུལ་པ་འདྲར་ཤེས་ནས། །འཇིག་རྟེན་ཆགས་མེད་མཁས་པ་སྤྱད་པ་སྤྱོད། །དེ་ལྟར་བརྟན་པས་རྒྱལ་བ་རབ་མཆོད་ནས། །བྱང་ཆུབ་བླ་མེད་
དེ་ཡང་ཐོབ་འགྱུར་ཏེ། །དེ་དག་རྣམས་ཀྱི་ཞིང་ནི་མཐའ་ལས་འགྱུར། །སེམས་ཅན་མཐའ་ཡས་པ་དག་རྣམ་པར་འགྲེལ། །སངས་རྒྱས་མཁྱེན་པ་མཐའ་ཡས་གྲགས་པ་ཅན། །དེ་དག་མིང་ནི་འཇིག་རྟེན་མཁས་ཤེས་བྱ། །ཞི་བའི་བློ་ལྡན་རྒྱལ་བ་དེ་དག་གི །ཚེ་ཚད་བསྐལ་པ་སྟོང་ནི་ཚང་བར་འགྱུར། །དེ་དག་ཉན་ཐོས་དགེ་འདུན་འགྱུར་བ་ནི། །རྒྱལ་སྲས་མང་པོ་སྐར་མའི་ཚོགས་སྙེད་དེ། །ཀུན་ཀྱང་བདེ་བས་བསམ་པ་ཐོབ་པར་འགྱུར། །འཇིག་རྟེན་མཁས་པ་རྣམས་ལ་སྡུག་བསྔལ་མེད། །དེ་སྐད་ཐོས་ནས་ལྷར་བཅས་འཇིག་རྟེན་དག །རབ་ཏུ་དགའ་བའི་སེམས་ཀྱིས་བྱང་ཆུབ་ཆོལ། །ངོམས་པར་གྱུར་ནས་བརྩོན་འགྲུས་བརྟན་བརྩམས་ཏེ། །ཀུན་ཀྱང་བརྩོན་འགྲུས་སྟོབས་ཀྱིས་བརྟན་པར་གྱུར། །གནོད་སྦྱིན་ལུང་བསྟན་པའི་ལེའུ་སྟེ་བཅུ་གཅིག་པའོ།། །།