བཅུ་བཞི་པ། རྒྱལ་ཆེན་བཞིའི་རིས་ལུང་བསྟན་པའི་ལེའུ།
དེ་ནས་རྒྱལ་ཆེན་བཞིའི་རིས་ཀྱི་ལྷ་དགུ་ཁྲིས་ལྷ་མ་ཡིན་རྣམས་ནས་ཕྲེང་ལྡན་གླང་པོ་ཅན་གྱི་ལྷའི་བར་དེ་དག་གི་མཆོད་པ་ཡང་མཐོང་། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། །རབ་ཏུ་དགའ་ཞིང་དགའ་བ་དང་། །ཡིད་བདེ་བ་སྐྱེས་ནས་སངས་རྒྱས་ཀྱི་ཆོས་རྣམས་ཐོབ་པར་བྱ་བའི་ཕྱིར་མོས་པ་དྲག་པོ་བསྐྱེད་དེ་འདི་ལྟ་སྟེ། དཔེར་ན་ཁམ་པའི་གྲུ་ལ་ཞོན་པའི་མི་ཞིག་ཆུའི་དབུས་སུ་ཕྱིན་ན་གྲུ་ཆག་ཏུ་འོང་ཞེས་ཚུ་རོལ་ནས་ཕ་རོལ་དུ་འགྲོ་བར་བྱ་བའི་ཕྱིར་མོས་པ་དྲག་པོ་སྐྱེས་བདེ་བཞིན་དུ་རྒྱལ་ཆེན་བཞིའི་རིས་ཀྱི་ལྷ་དགུ་ཁྲི་པོ་དེ་དག་ཀྱང་སངས་རྒྱས་ཀྱི་ཆེ་བ་ཉིད་ལ་དང་བ་སྐྱེས་ནས་སངས་རྒྱས་ཀྱི་ཆོས་རྣམས་ཐོབ་པར་བྱ་བའི་ཕྱིར་མོས་པ་དྲག་པོ་སྐྱེས་པར་གྱུར་ནས་དེ་དག་སངས་རྒྱས་ཀྱི་ཆོས་ཚོལ་ཞིང་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། དེ་དག་རྒྱལ་པོ་ཆེན་པོ་བཞི་དང་ལྷན་ཅིག་ཏུ་རིན་པོ་ཆེའི་བཀྲ་བ་བལྟ་ན་སྡུག་པ་དགུ་ཁྲི་མངོན་པར་སྤྲུལ་ཏོ། །དེ་དག་ཀྱང་ཕལ་ཆེར་མུ་ཏིག་དམར་པོ་དང་། སྐར་མདོག་དང་། བཻདཱུ་ཪྻ་དང་། གསེར་དང་། རྡོ་རྗེའི་རང་བཞིན་ཅན་ཤ་སྟག་གོ །ལྷའི་རོལ་མོ་སིལ་སྙན་དགུ་ཁྲི་ཡང་མངོན་པར་སྤྲུལ་ཏེ། དེ་དག་ནོར་བུ་རིན་པོ་ཆེ་སྣ་ཚོགས་ཀྱི་བླ་རེ་དགུ་ཁྲི་པོ་དེ་དག་ཐོགས་ནས་རོལ་མོ་སིལ་སྙན་དགུ་ཁྲི་པོ་དེ་དག་བྱེད་ཅིང་སྟེང་གི་བར་སྣང་ལས་དོང་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། མན་འཛུ་ཤ་ཀ་དང་། མན་འཛུ་ཤཀ་ཆེན་པོ་དང་། པ་རུ་ཤ་ཀ་དང་། པ་རུ་ཤ་ཀ་ཆེན་པོ་དང་། སྤྲུལ་པའི་མེ་ཏོག་རྣམས་ཀྱིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏེ། དེ་དག་གིས་མཆོད་པ་བྱས་ནས་ཡང་བཅོམ་ལྡན་འདས་ལ་ལན་གསུམ་
བསྐོར་བ་བྱས་ཏེ། ཚིགས་སུ་བཅད་པ་དག་གིས་མངོན་པར་བསྟོད་པ། །རྒྱལ་བའི་ཡོན་ཏན་མཐོང་བ་ཡི། །ལྷ་ནི་དགུ་ཁྲི་ཐམ་པ་དག །འདྲེན་པ་ཁྱོད་ཀྱི་སྤྱན་སྔ་ན། །ཐལ་མོ་རབ་ཏུ་སྦྱར་ནས་མཆིས། །རྒོད་པ་མ་མཆིས་ཞུམ་མ་མཆིས། །འདོད་པ་མ་མཆིས་འགྱོད་མ་མཆིས། །མི་བླུན་ངོ་མཚར་མ་མཆིས་པ། །རྐང་གཉིས་མཆོད་ལ་ཕྱག་ཀྱང་འཚལ། །ཁྱོད་ནི་སྲིད་པའི་རྒྱུད་རྣམས་བཀུམ། །མི་ཤེས་པ་ནི་རྣམ་པར་སྦྱངས། །སྲེད་པའི་ཕུར་པ་རབ་ཏུ་ཕྱུང་། །ང་རྒྱལ་རྒྱལ་མཚན་ཁྱོད་ཀྱིས་བསྙལ། །ཁྱོད་ནི་ཟུག་རྔུ་ཕྱུང་བ་སྟེ། །རྨ་ལ་གདུག་པ་ཁྱོད་ཀྱིས་སྤངས། །ཁྱོད་ནི་མཁྱེན་བཞིན་སྤྱོད་པ་སྟེ། །འདྲེན་པ་ཁྱོད་ཀྱིས་རྨ་རྣམས་སོས། །ཁྱོད་ཀྱིས་ཉོན་མོངས་ཐམས་ཅད་སྤངས། །འཆིང་བ་དག་ནི་ཐམས་ཅད་བཅད། །སྦྱོར་བ་ཀུན་དང་བྲལ་བ་སྟེ། །ཐུབ་པ་ཆགས་པ་ཀུན་ལས་འདས། །རྒྱལ་བ་ཁྱོད་ཀྱི་སྤྱོད་ཡུལ་ནི། །སྟོང་པ་ཉིད་དང་མཚན་མ་མེད། །བཅོམ་ལྡན་ཁྱོད་ལ་སྨོན་པ་ཡང་། །རྣམ་པ་ཀུན་དུ་མིང་མངའོ། །ཁྱོད་ཀྱིས་སྲེད་པ་དྲུངས་ནས་ཕྱང་། །མ་རིག་པས་ནི་ཐུགས་ཀྱང་ཕྱུང་། །རྣམ་པ་བཞི་པོའི་ཕྱིན་ཅི་ལོག །རྣམ་པ་ཀུན་དུ་ཡོངས་སུ་སྤངས། །གང་དུ་འཇིག་རྟེན་མི་ཆུང་དེ། །རིག་དྭགས་རྔོན་པས་ཇི་བཞིན་དུ། །འཇིགས་ཤིང་སྐྲག་པར་འགྱུར་བ་ཡིན། །ཡང་དག་མཐའ་ནི་ཁྱོས་ཀྱིས་གཟིགས། །སེམས་ཅན་འཇིག་ཚོགས་ལྟར་ལྷུང་སྟེ། །སྟོད་པ་ཉིད་ནི་མ་འཚལ་བས། །མ་རིག་པའི་མུན་པས་གཏིབས། །འཁོར་བའི་བཙོན་རར་དགའ་བར་བགྱིད། །ཁྱོད་ཀྱིས་ཡང་དག་ཇི་བཞིན་དུ། །འགྲོ་དེ་ཆད་པ་སྟོང་དྲར་གཟིགས། །གང་གིས་རྣམ་དག་མིག་འགྱུར་བའི། །ཡེ་ཤེས་སྣང་བ་རབ་ཏུ་བསྟན། །ཕུང་པོ་སྟོང་པར་རྣམ་པར་
བཤིག །མིང་དང་གཟུགས་ཀྱང་གསོག་འདྲ་ཞིང་། །ཁམས་རྣམས་དང་ནི་སྐྱེ་མཆེད་དག །བདག་མེད་སྟོང་པར་རྣམ་པར་བཤིག །ཆོས་གང་དང་ནི་མིང་གང་གིས། །ཆོས་གང་མངོན་པར་བརྗོད་བགྱི་བ། །ཆོས་དེ་ཆོས་དེས་སྟོང་པ་སྟེ། །ཐུབ་པ་ཁྱོད་ཀྱིས་སྟོང་པར་བསྟན། །སྒྱུ་མའི་མཁན་པོས་མེད་པ་ལ། །སྐྱེ་བོའི་ཚོགས་ཆེན་མངོན་སྤྲུལ་ན། །དེ་ལ་སེམས་ཅན་གདམས་མ་མཆིས། །སྲོག་དང་གང་ཟག་མ་མཆིས་ལྟར། །དེ་བཞིན་ཕུང་པོ་ཁམས་རྣམས་དང་། །དབང་པོ་དག་དང་སྐྱེ་མཆེད་ཀྱང་། །ཡང་དག་མ་ཡིན་སྒྱུ་མ་ཞེས། །སྐྱེས་བུ་དམ་པས་བསྟན་པ་མཛད། །ཇི་ལྟར་རི་མོ་མཁན་ཞིག་གིས། །བུད་མེད་གཟུགས་ནི་རྣམ་བྲིས་ཤིང་། །མཉམ་པ་དང་ནི་མི་མཉམ་དང་། །ལྕི་དང་ཡང་བ་བསྟན་བགྱིས་ཀྱང་། །བྱིས་པའི་མིག་ནི་བསླུས་པ་སྟེ། །དེ་ལ་མི་མཉམ་ཅི་མ་མཆིས། །དེ་བཞིན་ཆོས་དབྱིངས་མཉམ་ལགས་ན། །བྱིས་པ་རྣམས་ནི་དེ་ལ་རྨོངས། །གང་ཤེས་ཁྱོད་ཀྱི་བསླབ་པ་ལ། །ལེགས་བསླབས་རྨོངས་པར་མི་འགྱུར་བ། །ལག་མཐིལ་སྐྱུ་རུ་ར་བཞིན་དུ། །དེ་ནི་ཀུན་མཁྱེན་ཁྱོད་ཀྱིས་བསྟན། །ཤེས་རབ་ཆེན་པོ་ཁྱོད་ཀྱིས་ནི། །ཡེ་ཤེས་སྒྲོན་མ་རབ་བུས་ཏེ། །ཆོས་ཀྱི་འཁོར་ལོ་རབ་བསྐོར་ནས། །སེམས་ཅན་རྣམས་ལ་ཆོས་བསྟན་པ། །དེ་ལྟར་བདག་ཅག་མྱུར་དུ་ནི། །བླ་མེད་བྱང་ཆུབ་ཞི་ཐོབ་སྟེ། །ཇི་ལྟར་འདྲེན་པ་ཁྱོད་བཞིན་དུ། །ཆོས་ཀྱི་འཁོར་ལོ་བསྐོར་བར་བགྱི །འཁོར་བའི་ལམ་ལོག་འདི་དག་ཏུ། །འཁྱམས་པར་གྱུར་བའི་སེམས་ཅན་ལ། །ཇི་ལྟར་འདྲེན་པས་བསྟན་པ་བཞིན། །བདག་ཅག་གིས་ཀྱང་ཆོས་མྱུར་བསྟན། །དེ་ནས་བཅོམ་ལྡན་འདས་ཀྱིས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས། བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། །རྒྱུ་མ་མཆིས་པར་རྫོགས་སངས་རྒྱས། །འདྲེན་པ་འཛུམ་པ་མི་མཛད་ན། །འཛུམ་པ་མཛད་པའི་འཛུམ་གྱི་རྒྱུ། །དཔའ་བོ་ཆེན་པོས་ལུང་བསྟན་གསོལ། །སྐྱེས་བུ་དམ་པ་འཁོར་འདི་དག །བདེ་གཤེགས་དེང་བཞད་མཐོང་ནས་
ནི། །ཡིད་གཉིས་ཆེན་པོ་འཚལ་གྱུར་ཏེ། །ཀུན་ཀྱང་ཐེ་ཚོམ་འཚལ་བར་གྱུར། །དེ་རིང་སུ་ཡིས་བདུད་ཕམ་བགྱིས། །ནེམ་ནུར་གང་གིས་བཅད་པར་གྱུར། །སུ་ཞིག་དེ་རིང་ཆོས་རྟོགས་གྱུར། །སྐྱེས་བུ་མཆོག་གིས་ལུང་བསྟན་གསོལ། །དེ་རིང་ཁྱོད་ལ་སུ་ཡིས་མཆོད། །སྟོན་པ་གང་གིས་བསྙེན་བཀུར་བགྱིས། །འགྲོ་ཀུན་ནེམ་ནུར་འཚལ་གྱུར་ན། །རྣམ་པར་འདྲེན་པས་ལུང་བསྟན་གསོལ། །ཇི་ལྟར་རྐང་གཉིས་མཆོག་ཁྱོད་ཀྱིས། །ལུང་བསྟན་འདི་དག་ཐོས་གྱུར་ན། །འགྲོ་བ་ཐེ་ཚོམ་འཆད་འགྱུར་བ། །འདྲེན་པས་དེ་ལྟར་ལུང་བསྟན་གསོལ། །ཅི་ནས་རྣམ་པ་ཐམས་ཅད་དུ། །ཀུན་མཁྱེན་ལམ་ལ་གནས་པ་རྣམས། །མྱུར་དུ་བྱང་ཆུབ་ཐོབ་འགྱུར་བ། །དེ་ལྟར་འདྲེན་པས་བསྟན་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །འགྲོ་བ་རྣམས་ལ་ཕན་པའི་ཕྱིར། །རྫོགས་པའི་སངས་རྒྱས་མགོན་པོ་ལ། །འཛུམ་པ་རྒྱུ་རྣམས་དྲི་བྱ་ཞེས། །རྟ་ཐུལ་ཁྱོད་ཀྱིས་དྲིས་པ་ལེགས། །འཇིག་རྟེན་ཀུན་ལ་ཕན་པའི་ཕྱིར། །བསྟན་པ་ཡིད་དུ་འོང་འགྱུར་ཞིང་། །ཉམས་དགའ་བྱེད་པ་དེ་བཤད་ཀྱིས། །དྲན་པ་མངོན་བྱོས་མཉན་པར་གྱིས། །དགུ་ཁྲི་ཐམ་པའི་ལྷ་རྣམས་ཀྱིས། །མཆོད་པའི་རྣམ་པ་འདི་ལྟ་བུ། །དེ་རིང་དེ་བཞིན་གཤེགས་པ་ལ། །ཤིན་དུ་དང་བའི་ཡིད་ཀྱིས་བྱས། །སངས་རྒྱས་མངོན་པར་བསྟོད་པ་བྱས། །སྟོང་པ་ཉིད་ཀྱང་ཤེས་པར་གྱུར། །ཆོས་རྣམས་ལ་ནི་ངེས་པ་རྙེད། །ང་ཡི་བསྟན་ལ་རབ་ཏུ་གནས། །སྔོན་ཡང་སངས་རྒྱས་བྱེ་བ་ཕྲག །བརྒྱད་ཅུ་དག་ལ་འདི་དག་མཆོད། །མ་འོངས་དུས་ནའང་སངས་རྒྱས་ནི། །བྱེ་བ་མཐའ་ཡས་མཆོད་པར་འགྱུར། །འདྲེན་པ་དེ་དག་ཇི་སྲིད་དུ། །སངས་རྒྱས་བྱེ་བ་མ་མཆོད་ཅིང་། །བསྙེན་བཀུར་བྱས་པར་མ་གྱུར་པ། །དེ་སྲིད་བྱང་ཆུབ་འཚང་མི་རྒྱ། །དེ་བས་ཤིན་ཏུ་འཕྱི་བ་ནི། །ཀུན་ཀྱང་གང་ཟག་མཆོག་ཏུ་འགྱུར། །མཚན་ནི་འོད་ཟེར་འཆང་བ་སྟེ། །འཇིག་རྟེན་ཀུན་མཁྱེན་ཐུབ་པར་འགྱུར། །འཇིག་རྟེན་སྒྲོན་མ་དེ་དག་གི །ཉན་ཐོས་འདུས་པར་འགྱུར་བ་ནི། །བློ་
ཡི་མཆོག་དང་ལྡན་པ་དག ། འདུས་པ་བརྒྱད་ཅུ་འབྱུང་བར་འགྱུར། །སྒྲིབ་མེད་གཟིགས་པ་དེ་དག་གི །མི་རྣམས་དེ་ཡི་དུས་ཀྱི་ཚེ། །ལོ་གྲངས་བྱེ་བ་བརྒྱད་ཅུ་ཐམ། །སྲོག་གི་དབང་པོ་གནས་པར་འགྱུར། །ཤེས་རབ་མཐའ་ཡས་དེ་དག་གི །ཉན་ཐོས་འདོད་ཆགས་བྲལ་བ་རྣམས། །ལུས་ཀྱི་ཐ་མ་འཛིན་པ་དག བྱེ་བ་ཚད་མེད་འབྱུང་བར་འགྱུར། །སེམས་ཅན་རྣམས་ལ་ཐུགས་བརྩེ་བའི། །འཇིག་རྟེན་མགོན་པོ་དཔལ་ལྡན་རྣམས། །མྱ་ངན་འདས་པའི་རིང་བསྲེལ་ཡང་། །ཤིན་དུ་རྒྱ་ཆེར་འབྱུང་བར་འགྱུར། །མི་དབང་མྱ་ངན་འདས་གྱུར་ནས། །རྣམ་པར་འདྲེན་པ་དཔལ་ལྡན་པ། །རྒྱལ་བའི་མཆོད་རྟེན་རྣམས་ཀྱིས་ནི། །སངས་རྒྱས་ཞིང་རྣམས་ལེགས་བརྒྱན་འགྱུར། །འཇིག་རྟེན་མགོན་པོ་སྐྱོབ་རྣམས་ཀྱིས། །མཆོད་རྟེན་དེ་དག་ཐམས་ཅད་ལ། །སྲོག་ཆགས་བརྒྱ་དང་སྟོང་རྣམས་དང་། །ཁྲག་ཁྲིག་རྣམས་ཀྱིས་མཆོད་བྱས་ནས། །བྱང་ཆུབ་མཆོག་ཏུ་སེམས་བསྐྱེད་དེ། །མྱ་ངན་འདས་པ་ཐོབ་པར་འགྱུར། །རང་བྱུང་མྱ་ངན་འདས་ནས་ཀྱང་། །དེ་དག་དམ་ཆོས་གནས་འགྱུར་བ། །ལོ་གྲངས་བྱེ་བ་ཁྲག་ཁྲིག་ཕྲག །བརྒྱད་ཅུ་ཚང་བར་གནས་པར་འགྱུར། །ཆོས་ཀྱི་རྒྱལ་པོའི་སྲས་རྣམས་ཀྱིས། །བཟུང་ཞིང་ཡོངས་སུ་བསྲུངས་པར་གནས། །འཇིག་རྟེན་ཐུགས་བརྩེ་མཛད་པ་དང་། །ཤཱཀྱ་ཡོངས་སུ་སྨིན་མཛད་ཕྱིར། །རྒྱལ་ཆེན་བཞི་ཡི་རིས་རྣམས་ལ། །འཇིག་རྟེན་སྒྲོན་མས་ལུང་བསྟན་མཛད། །དེ་ཐོས་ནས་ནི་སྐྱེ་བོ་ཀུན། །ཀུན་དུ་དགའ་ཞིང་རབ་དགའ་སྟེ། །སེམས་མགུ་ཡིད་ཀྱང་རངས་གྱུར་ནས། །སྟོན་པ་ལ་ནི་མངོན་པར་བསྟོད། །རྒྱལ་ཆེན་བཞིའི་རིས་ལུང་བསྟན་པའི་ལེའུ་སྟེ་བཅུ་བཞི་པའོ།། །།