བཅོ་ལྔ་པ། སུམ་ཅུ་རྩ་གསུམ་པ་ལུང་བསྟན་པའི་ལེའུ།
བམ་པོ་དྲུག་པ། དེ་ནས་ལྷའི་དབང་པོ་བརྒྱ་བྱིན་ལ་སོགས་པ་སུམ་བཅུ་རྩ་གསུམ་རིས་ཀྱི་ལྷ་བྱེ་བ་ཕྲག་བརྒྱད་བཅུས་ལྷ་མ་ཡིན་དག་དང་། །ནམ་མཁའ་ལྡིང་དང་། ཀླུའི་བུ་མོ་དག་དང་། ཀླུ་དག་དང་། གྲུལ་བུམ་དག་དང་། དྲི་ཟ་དག་དང་། གནོད་སྦྱིན་དག་དང་། མིའམ་ཅི་དག་དང་། ཕྲེང་ལྡན་གླང་པོ་ཅན་དག་དང་། རྒྱལ་ཆེན་བཞིའི་རིས་ཀྱི་ལྷ་དག་གི་མཆོད་པ་ཡང་མཐོང་།
ལུང་བསྟན་པ་ཡང་ཐོས་ནས་སངས་རྒྱས་ཀྱི་ཆོས་རྣམས་ལ་ཚིམ་ཞིག་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་ཡིད་བྱུང་བ་ཆེན་པོ་སྐྱེས་ཏེ། འདོད་པའི་ཚུལ་གྱིས་ལྷའི་དབང་པོ་བརྒྱ་བྱིན་ལ་སོགས་པ་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། དེ་དག་གི་རིན་པོ་ཆེའི་ཁང་པ་བཀྲ་བ། ས་གནས་རིམ་པ་བརྒྱད་དང་། བ་གམ་དང་། ཁང་པ་བརྩེགས་པ་དང་། སྐར་ཁུང་གིས་བརྒྱན་པ། གདུགས་དང་། རྒྱལ་མཚན་དང་། བ་དན་གིས་བརྒྱན་པ། ལྷ་རྫས་ཀྱི་སེང་གེའི་ཁྲིས་བརྒྱན་པ། བླ་རེ་ཆེན་པོ་དང་། དྲིལ་བུ་གཡེར་ཀའི་དྲ་བས་བརྒྱན་པ། ལྷའི་བུ་མོའི་ཚོགས་ཀྱིས་མཛེས་པར་བྱས་པ། ལྷའི་རོལ་མོ་སིལ་སྙན་སྒྲ་རབ་ཏུ་འབྱུང་བ་བྱེ་བ་ཕྲག་བརྒྱད་ཅུ་མངོན་པར་སྤྲུལ་ཏོ། །རྟ་ཅང་ཤེས་ཀྱིས་དྲད་པའི་ཤིང་རྟ་ལྷ་རྫས་ཀྱི་རྣམ་པས་འགས་པར་བརྒྱན་པ། གདུགས་དང་། རྒྱལ་མཚན་དང་། བ་དན་དག་གིས་མཛེས་པར་བྱས་པ་བྱེ་བ་ཕྲག་བརྒྱད་ཅུ་ཡང་མངོན་པར་སྤྲུལ་ཏོ། །སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་དང་ལྡན་པའི་ཁོར་ཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་མེ་ཏོག་མན་དཱ་ར་བ་དང་། ལྷའི་མཆོད་པ་དེ་དག་གིས་རྒྱས་པར་གང་པར་བྱས་སོ། །གླང་པོ་ཆེ་ས་སྲུང་གི་བུ་བྱེ་བ་ཕྲག་བརྒྱད་ཅུ་ཡང་མངོན་པར་སྤྲུལ་ཏེ། གླང་པོ་ཆེ་ས་སྲུང་གིས་བུ་དེ་དག་རེ་རེ་ཞིང་ཡང་མགོ་བྱེ་བ་ཕྲག་བརྒྱད་བཅུ་བརྒྱད་ཅུ། གླང་པོ་ཆེ་ས་སྲུང་གི་བུའི་མགོ་དེ་དག་རེ་རེ་ཞིང་ཡང་སོ་དྲུག་དྲུག། སོ་དེ་དག་རེ་རེ་ཞིང་ཡང་རྫིང་བུ་བདུན་བདུན། རྫིང་བུ་དེ་དག་རེ་རེ་ཞིང་ཡང་པད་མ་སྟོང།ཕྲག་བདུན་བདུན། པད་མ་དེ་དག་རེ་རེ་ཞིང་ཡང་མདབ་མ་བརྒྱད་ཁྲི་བརྒྱད་ཁྲི། འདབ་མ་རེ་རེ་ཞིང་ཡང་ལྷའི་བུ་མོ་མདུན་མདུན། ལྷའི་བུ་མོ་དེ་དག་རེ་རེ་ཞིང་ཡང་འཁོར་བདུན་བདུན་ཡོད་པ། རྒྱན་ཐམས་ཅད་ཀྱིས་བརྒྱན་པ་ཤ་སྟག་མངོན་པར་སྤྲུལ་ནས་རིན་པོ་ཆེའི་ཁང་པ་དེ་དག་མདུན་དུ་བྱས་ཏེ། དབུས་སུ་གླང་པོ་
ཆེ་ས་སྲུང་གི་བུ་དག་བཙུད་ནས་ཕྱི་བཞིན་ཤིང་རྟ་དེ་ལྟར་བཤམས་པ་དེ་དག་བཀྱེ་ནས་བཅོམ་ལྡན་འདས་ལ་མཆོད་པ་བྱས་སོ། །རིན་པོ་ཆེའི་ཁང་པ་དེ་དག་ལས་ཀྱང་ལྷའི་ཙན་དན་དང་། ཨ་ག་རུ་དང་། ཨུད་པ་ལ་དང་། ཏ་མ་ལའི་ལོ་མའི་ཕྱེ་མ་དང་། གསེར་ཕྱེའི་ཆར་མངོན་པར་བབ་པར་གྱུར་ཏོ། །ལྷའི་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། མཉ་ཛུ་ཤ་ཀ་དང་། མཉ་ཛུ་ཤ་ཀ་ཆེན་པོ་དང་། པ་རུ་ཤ་ཀ་དང་། པ་རུ་ཤ་ཀ་ཆེན་པོ་དང་། མདོག་དཀར་དང་། མདོག་དཀར་ཆེན་པོ་དང་། སྤྲུལ་པའི་མེ་ཏོག་གི་ཆར་ཡང་མངོན་པར་བབ་པར་གྱུར་ཏོ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་དང་། མུ་ཏིག་དམར་པོ་དང་། སྤུག་དང་། རྡོའི་སྙིང་པོ་དང་། རིན་པོ་ཆེ་སྣ་བདུན་གྱི་མེ་ཏོག་གི་ཆར་ཡང་མངོན་པར་བབ་པར་གྱུར་ཏོ། །ལྷའི་བུ་མོ་དེ་དག་ལས་ལ་ལ་ནི་གླུ་ལེན། ལ་ལ་ནི་གར་བྱེད། ལ་ལ་ནི་རོལ་མོ་བྱེད། ལ་ལ་ནི་ལུས་ཀྱི་ཚུལ་སྐྱུར་ཞིང་ལྷ་མ་ཡིན་གྱི་མཆོད་པ་ལྟ་བུ་དང་། གླང་པོ་ཆེ་ས་སྲུང་གི་བུ་དེ་དག་དང་། རིན་པོ་ཆེའི་ཁང་པ་རྣམས་ཀྱིས་མཆོད་པ་བྱས་ནས་དེའི་འོག་ཏུ་རྟ་ཅང་ཤེས་ཀྱིས་དྲང་པའི་ཤིང་རྟ་བྱེ་བ་ཕྲག་བརྒྱད་བཅུ་ལ་ཞོན་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ལྷའི་ཡོ་བྱད་རྣམ་པ་སྣ་ཚོགས་མང་པོ་ཡང་ཕུལ་བར་གྱུར་ཏོ། །ལྷའི་རོལ་མོ་སིལ་སྙན་བྱེ་བ་ཕྲག་བརྒྱད་བཅུ་ཡང་བར་སྣང་ལས་སྒྲ་འབྱིན་པར་གྱུར་ཏོ། །ཤིང་རྟ་བྱེ་བ་ཕྲག་བརྒྱད་བཅུ་པོ་དེ་དག་ལ་ཡང་ལྷའི་བུ་མོ་གཞན་བྱེ་བ་ཕྲག་བརྒྱད་བཅུ་མངོན་པར་སྤྲུལ་ཏོ། ལྷའི་བུ་མོ་དེ་དག་ཀྱང་ལ་ལ་གླུ་ལེན། ལ་ལ་ནི་གར་བྱེད། ལ་ལ་ནི་རོལ་མོ་བྱེད། ལ་ལ་ནི་ལུས་ཀྱི་ཚུལ་སྒྱུར་ཞིང་ལྷ་མ་ཡིན་གྱི་མཆོད་པ་ཇི་ལྟ་བ་བཞིན་དུ་བྱས་སོ། །དེ་ནས་སུམ་བཅུ་རྩ་གསུམ་རིས་ཀྱི་ལྷ་བྱེ་བ་ཕྲག་བརྒྱད་ཅུ་པོ་དེ་དག་འདི་སྙམ་དུ་སེམས་ཏེ། ཇི་ལྟར་སྤྲུལ་པའི་ལྷའི་བུ་མོ་འདི་དག་བཅོམ་ལྡན་འདས་ལ་མཆོད་པ་བྱེད་པ་ལས་ནི་ཆོས་ཐམས་ཅད་ཀྱང་སྤྲུལ་པ་དང་འདྲ་བ་ཡིན་དུ་ངེས་སོ་སྙམ་ནས་དེ་དག་འདི་སྙམ་དུ་ཆོས་འདི་དག་ཐམས་ཅད་ནི་ཇི་ལྟར་དེ་བཞིན་གཤེགས་པས་བསྟན་པ་དེ་བཞིན་ཏེ། སྤྲུལ་པ་དང་འདྲ་བ་ཡིན་ནོ་
སྙམ་དུ་སེམས་པར་གྱུར་ཅིང་དེ་དག་གིས་ཆོས་ཐམས་ཅད་སྤྲུལ་པ་དང་འདྲ་བར་ཤེས་ནས་ཆོས་ལ་ཐེ་ཚོམ་མེད་པ་ཐོབ་པར་འགྱུར་ཏོ། །དེ་ལྟར་དེ་དག་ཐེ་ཚོམ་མེད་ཅིང་ནེམ་ནུར་མེད་པར་གྱུར་ན་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་དག་ཆོམ་ཐམས་ཅད་སྤྲུལ་པ་དང་འདྲ་བར་རྟོག་ཅིང་བདག་ཅག་ཀྱང་སྤྲུལ་པ་དང་འདྲ་བར་མཐོང་། མཆོད་པ་དེ་དག་ཀྱང་སྤྲུལ་པ་དང་འདྲ་བར་མཐོང་། བཅོམ་ལྡན་འདས་ཀྱང་སྤྲུལ་པ་དང་འདྲ་བར་མཐོང་ནས་བཅོམ་ལྡན་འདས་ཀྱིས་ཆོས་གང་བསྟན་པ་དེ་དག་ཀྱང་སྤྲུལ་པ་དང་འདྲ་བར་ཡང་དག་པར་ཤེས་ཏེ། དེ་དག་གིས་ཆོས་ཐམས་ཅད་སྤྲུལ་པ་ལྟ་བུའོ་ཞེས་བྱ་བར་ཤེས་ནས་ཐེ་ཚོམ་མེད་ཅིང་ནེམ་ནུར་མེད་པར་གྱུར་ཏེ། དེའི་ཚེ་བཅོམ་ལྡན་འདས་ཚིགས་སུ་བཅད་པ་དག་གིས་མངོན་པར་བསྟོད་དོ། །འགྲོ་བ་ཀུན་གྱིས་མཆོད་པ་གང་བགྱིས་པ། །སྤྲུལ་པའི་མཆོད་པ་འདི་དག་གང་བགྱིས་དང་། །ལྷ་རྣམས་ཀྱིས་ནི་སངས་རྒྱས་མཆོད་བྱས་པ། །དེ་ལྟར་ཆོས་འདི་ཐམས་ཅད་སྤྲུལ་པ་ཉིད། །འདྲེན་པས་ཆོས་ཀུན་གསུངས་པ་གང་ལགས་དང་། །དེ་བཞིན་གཤེགས་པས་ལུང་བསྟན་མཐའ་དག་ཀྱང་། །འདི་དག་ཐམས་ཅད་སྤྲུལ་པ་འདྲའོ་ཞེས། །དེ་ལྟར་ལྷ་ཚོགས་དེ་དག་བློ་གྲོས་སྐྱེས། །བཅོམ་ལྡན་སྤྲུལ་པ་འདི་དག་ཇི་བཞིན་དུ། །སྟོན་པའང་དེ་བཞིན་སྤྲུལ་དང་འདྲ་བ་སྟེ། །རྒྱལ་བས་ལུང་བསྟན་བདག་ཅག་འཚལ་གྱུར་པས། །འདི་ལ་བདག་ཅག་ཐེ་ཚོམ་མ་མཆིས་སོ། །རྒྱལ་བས་སོ་སོའི་སྐྱེ་བོ་རྣམས་མཁྱེན་ནས། །བྱིས་པའི་ས་ཐོབ་ཐ་སྙད་གང་བཏགས་པ། །དེ་དག་ཀུན་ཀྱང་སྤྲུལ་པ་ཇི་བཞིན་ཏེ། །བདེ་གཤེགས་འགྲོ་བ་ལུང་བསྟན་དེ་བཞིན་ནོ། །སློབ་པ་རྣམས་དང་གང་དག་མི་སློབ་དང་། །བཅོམ་ལྡན་ཉན་ཐོས་དུལ་བའི་ས་ཐོབ་པ། །དེ་དག་ཀུན་ཀྱང་བཅོམ་ལྡན་སྤྲུལ་དང་འདྲ། །བཅོམ་ལྡན་བསྟན་ལ་ཐེ་ཚོམ་མ་མཆིས་སོ། །བཅོམ་ལྡན་གང་རྣམས་མི་སྨྲ་ལྷུར་ལེན་ཅིང་། །བསེ་རུ་ལྟ་བུར་གཉིས་མེད་ཉོན་མོངས་སྤངས། །དེ་དག་རྣམས་ཀྱང་སྤྲུལ་འདྲ་བཅོམ་ལྡན་འདས། །བདེ་
གཤེགས་བསྟན་ལ་ཐེ་ཚོམ་མ་མཆིས་སོ། །གང་རྣམས་འགྲོ་བ་ཀུན་ལ་བདེ་ཕན་ཕྱིར། །རྒྱལ་བའི་བྱང་ཆུབ་སྤྱད་སྤྱོད་བག་ཡོད་པའི། །བྱང་ཆུབ་སེམས་དཔའ་བདེ་གཤེགས་སྲས་དག་ཀྱང་། །ཁྱད་པར་མ་མཆིས་སྤྲུལ་པ་འདི་དང་འདྲ། །བདེ་གཤེགས་རང་བྱུང་རྣམ་པར་འདྲེན་པ་མཆོག །སྟོབས་བཅུ་ཤེས་རབ་མཐའ་ཡས་ཐུགས་རྗེ་ཅན། །ཡེ་ཤེས་སྟོབས་འཕགས་འཇིག་རྟེན་གཙོ་བོ་དག །སྤྲུལ་པ་འདི་འདྲ་དེ་དག་རང་བཞིན་མཚུངས། །འདྲེན་པས་འདི་ལ་ཆོས་རྣམས་གང་གསུངས་པ། །གནས་མེད་ཞི་བསིལ་ཉོན་མོངས་མེད་གྱུར་ཅིང་། །སྡུག་བསྔལ་ཞི་བྱེད་མཐར་ཐུག་གྲངས་མེད་པ། །དེ་ཡང་སྤྲུལ་པ་འདི་དག་ཇི་བཞིན་ནོ། །བཅོམ་ལྡན་འདི་ལ་ཆོས་རྣམས་གང་དག་ཀྱང་། །སྤྲུལ་པའི་རང་བཞིན་མ་ལགས་དེ་མ་མཆིས། །གང་ཚེ་གཽ་ཏ་མའི་བསྟན་པ་འདི། །བདག་ཅག་རྟོགས་ནས་ཐེ་ཚོམ་ཐམས་ཅད་སྤངས། །སྤྲུལ་པ་འདི་འདྲར་ཆོས་རྣམས་ཀུན་མཐོང་ནས། །བདག་ཅག་རྣམས་ཀྱང་འཇིག་རྟེན་མགོན་པོར་འགྱུར། །བདེ་གཤེགས་སྤྱོད་ཡུལ་འདི་ལ་སྤྱོད་པའི་རྣམས། །ཐེ་ཚོམ་མ་མཆིས་རང་བྱུང་འདྲེན་པར་འགྱུར། །དེ་ནས་བཅོམ་ལྡན་འདས་ཀྱིས་དེའི་ཚེ་སུམ་བཅུ་རྩ་གསུམ་རིས་ཀྱི་ལྷའི་བུ་བྱེ་བ་ཕྲག་བརྒྱད་བཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་བརྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཙད་དེ་གསོལ་པ། གཞལ་ཡས་གྲགས་མངའ་མཐའ་ཡས་གཟི་བརྗིད་ཅན། །བདེ་གཤེགས་རྣམས་ནི་རྒྱུ་མེད་འཛུམ་མི་མཛད། །རྣམ་པར་འདྲེན་པས་འདིར་ནི་འཛུམ་མཛད་ན། །རྒྱལ་བས་འཛུམ་པའི་ཚིགས་གསུངས་ཐེ་ཚོམ་ཁུམ། །རང་བྱུང་བདེ་གཤེགས་ཞལ་ནས་འཛུམ་པ་འདི། །བྱུང་བར་རིག་ནས་འཇིག་རྟེན་ཐེ་ཚོམ་འཚལ། །འགྲོ་བའི་ཐེ་ཚོམ་ཐུབ་པས་བསལ་དུ་གསོལ། །འགྲོ་བ་འདི་དག་ཐེ་ཚོམ་མ་མཆིས་མཛོད། །ལྷ་ཚོགས་འདི་དག་རབ་ཏུ་ཡིད་དགའ་བས། །རྒྱལ་བ་བསྟོད་དེ་ལྷ་རྫས་རྣམས་ཀྱིས་མཆོད། །བདེ་གཤེགས་དེ་དག་དོན་དུ་འཛུམ་པ་མཛད། །རྒྱལ་བ་འཁོར་འདི་དགའ་མཛད་བཀའ་སྩལ་གསོལ། །ཟླ་ལྟར་དྲི་མེད་འོད་
མངའ་མཐའ་ཡས་གཟི། །ཅི་ནས་བདེ་གཤེགས་བཀའ་ནི་འདི་ཐོས་པས། །མགོན་པོ་འགྲོ་བ་ཐམས་ཅད་དགའ་འགྱུར་བར། །རྒྱལ་བ་ལྷ་ཚོགས་མཆོད་མཁྱེན་བཀའ་སྩལ་གསོལ། །བདེ་གཤེགས་ལྷ་ཚོགས་འདི་ཡིས་ཆོས་རྣམས་ཀུན། །སྤྲུལ་པ་ལྟ་བུར་རྣམ་པར་རྟོགས་གྱུར་ནས། །སྟོབས་བཅུ་མངའ་བས་དོན་འདི་བཀའ་སྩོལ་ཏེ། །རབ་རིབ་བྲལ་བ་ལྷ་ཡི་བསླབ་པ་གསུངས། །སྐྱེ་བོ་འདི་དག་ཐེ་ཚོམ་བྲལ་གྱུར་ནས། །ཐུབ་པ་དེ་ལྟར་བྱང་ཆུབ་སྤྱོད་རྩོམ་འགྱུར། །རབ་ཏུ་དཔའ་བ་འཁོར་འདིས་ཐོས་གྱུར་ཏེ། །དགོས་པ་རི་གནས་རྒྱ་ཆེན་རྩོམ་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་བརྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །ལྷ་ཚོགས་འདི་དག་རབ་ཏུ་དགའ་ཤེས་ནས། །རྟ་ཐུལ་ཁྱོད་ཀྱིས་དུས་དང་ལྡན་པའི་ཚིག །སྨྲས་པ་དེ་ནི་དུས་ལ་བབ་པ་སྟེ། །འཛུམ་པ་དྲེས་པ་དེ་ནི་ལུང་བསྟན་ཏོ། །ལྷ་རྣམས་བསམ་ཤེས་འཛུམ་པ་དེ་དྲིས་པ། དེས་ནི་ཁྱོད་ཀྱིས་འགྲོ་བའི་དོན་ཆེན་བྱས། །འཛུམ་མཛད་པ་རྒྱུ་དེངས་བསྟན་གྱིས། །དགའ་ཞིང་དང་བའི་སེམས་ཀྱིས་དེ་ལ་ཉོན། །ལྷ་ཚོགས་རྣམས་ཀྱིས་ཆོས་རྣམས་འདི་དག་ནི། །མ་ལུས་སྤྲུལ་པ་ལྟ་བུས་ཤེས་གྱུར་ནས། །ཆགས་མེད་ཡེ་ཤེས་མཐོང་བ་དཔག་མེད་ཅིང་། །རབ་རིབ་བྲལ་བའི་འཇིག་རྟེན་མགོན་པོར་འགྱུར། །སྲིད་པའི་རྒྱུད་ན་སོང་ཡང་འཁོར་བའི་ཚེ། །མི་ཡི་གཙོ་བོ་གང་གཱའི་བྱེ་སྙེད་མཆོད། །སྲིད་རྒྱུན་དེ་ན་འདི་དག་ཐུབ་པ་ལས། །ཆོས་རྣམས་སྤྲུལ་པ་ལྟ་བུར་མ་མཐོང་ངོ་། །འདི་དག་གང་ལ་མཆོད་མཆོག་འདིར་བྱས་པས། །ཆོས་རྣམས་སྤྲུལ་པ་འདྲ་བར་མངོན་དུ་མཐོང་། །བདེ་གཤེགས་བསྟན་པ་འདི་ལ་བྱས་པ་ནི། །ཆུས་ཟོས་མི་འགྱུར་བར་ཆད་ཡོད་མི་འགྱུར། །ལྷ་ཚོགས་འདི་ཡིས་ང་ལ་མཆོད་བྱས་ཏེ། །ཆོས་རྣམས་ཐམས་ཅད་སྤྲུལ་པ་འདྲར་ཤེས་པས། །བསྐལ་པ་པད་མ་ཞེས་བྱ་བྱུང་བའི་ཚེ། །སྨྲ་བའི་ཟླ་བ་མི་ཡི་མཆོག་ཏུ་འགྱུར། །ཁྱུ་མཆོག་ལྡན་པའི་མིང་མཆོག་འགྱུར་བ་ནི། །བདེ་གཤེགས་རབ་མཁས་དབང་པོའི་ཏོག་རྒྱལ་པོ། །ཆོས་རྣམས་ཐམས་ཅད་སྤྲུལ་པ་འདྲར་སྟོན་ཅིང་། །འགྲོ་བ་ཁྲག་ཁྲིག་དཔག་མེད་འགྲེལ་བར་འགྱུར། །བདེ་གཤེགས་
དེ་དག་བསྟན་ལ་བག་ཡོད་པ། །ཆོས་རྣམས་འདི་དག་སྤྲུལ་པ་འདྲ་བར་སེམས། །ཞིག་ནས་དེ་ལ་སུ་སྟེན་བག་ཡོད་པ། །མྱུར་དུ་བླ་མེད་བྱང་ཆུབ་མཆོག་ཞི་འཐོབ། །སུམ་བཅུ་རྩ་གསུམ་ལུང་བསྟན་པའི་ལེའུ་སྟེ་བཅུ་ལྔ་པའོ།། །།