བཅོ་བརྒྱད་པ། འཕྲུལ་དགའ་བ་ལུང་བསྟན་པའི་ལེའུ།
དེ་ནས་དེའི་ཚེ་རབ་འཕྲུལ་ལ་སོགས་པ་འཕྲུལ་དགའ་བ་བྱེ་བ་ཕྲག་བདུན་བཅུས་ལྷ་མ་ཡིན་རྣམས་ནས་དགའ་ལྡན་རིས་ཀྱི་ལྷ་དེ་དག་གི་མཆོད་པ་ཡང་མཐོང་། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་ཡང་དག་པའི་མཐའ་ལ་གནས་ཤིང་དེ་བཞིན་ཉིད་ལ་ཐེ་ཚོམ་མེད་པར་གྱུར་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་ལོ་སྦྱར་བ་བཏུད་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན་ཆོས་ཐམས་ཅད་ནི་ཡང་དག་པའི་མཐའ་དང་། སྒྲིབ་པ་མ་མཆིས་པའི་མཐའ་དང་། མཐའ་ཡས་པའི་མཐའ་དང་། མི་གནས་པའི་མཐའ་དང་། མི་ཟད་པའི་མཐའ་དང་། མི་གཉིས་པའི་མཐའ་སྟེ། མཐའ་མ་མཆིས་པའོ། །བཅོམ་ལྡན་འདས་དེ་ལ་མ་ནོར་བའི་སླད་དུ་ཡང་དག་པའི་མཐའ་ཞེས་བགྱིའོ། །ཚད་མ་མཆིས་པའི་སླད་དུ་མཐའ་ཡས་པའི་མཐའ་ཞེས་བགྱིའོ། །ཆགས་པ་མ་མཆིས་པའི་སླད་དུ་སྒྲིབ་པ་མ་མཆིས་པའི་མཐའ་ཞེས་བགྱིའོ། །ངོ་བོ་ཉིད་མ་མཆིས་པའི་སླད་དུ་མི་གནས་པའི་མཐའ་ཞེས་བགྱིའོ། །འབྱུང་བ་མཆིས་པའི་སླད་དུ་མི་ཟད་པའི་མཐའ་ཞེས་བགྱིའོ། །རོ་གཅིག་པའི་སླད་དུ་མི་གཉིས་པའི་མཐའ་ཞེས་བགྱིའོ། །མ་མཆིས་པའི་སླད་དུ་མ་མཆིས་པ་ཞེས་བགྱིའོ། །བཅོམ་ལྡན་འདས་ཡང་དག་པའི་མཐའ་འདི་ནི་ཐམས་ཅད་ཀྱི་རྗེས་སུ་སོང་བ་ལགས་ཏེ། ཆོས་གང་ཡང་དག་པའི་མཐའ་མ་ལགས་པའི་ཆོས་དེ་གང་ཡང་མ་མཆིས་སོ། །བཅོམ་ལྡན་འདས་བྱང་ཆུབ་ཅེས་བགྱི་བ་འདི་ནི་ཡང་དག་པའི་མཐའ་སྟེ། བྱང་ཆུབ་གང་ཞེ་ན། བཅོམ་ལྡན་
འདས་ཆོས་ཐམས་ཅད་རང་བཞིན་མ་མཆིས་པ་ནི་བྱང་ཆུབ་ལགས་པར་རིག་པར་བགྱིའོ། །ཐ་ན་མཚམས་མེད་པ་རྣམས་ཀྱང་བྱང་ཆུབ་བོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བྱང་ཆུབ་ནི་རང་བཞིན་མ་མཆིས་པ་སྟེ། མཚམས་མེད་པ་རྣམས་ཀྱང་རང་བཞིན་མ་མཆིས་པ་ལགས་པས་དེའི་སླད་དུ་མཚམས་མེད་ཀྱང་བྱང་ཆུབ་ཅེས་བགྱིའོ། །བཅོམ་ལྡན་འདས་ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་ནི་རང་བཞིན་མ་མཆིས་པ་སྟེ། མཚམས་མེད་པ་རྣམས་ཀྱང་དེའི་རང་བཞིན་ནོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་ཏེ། མཚམས་མེད་པ་རྣམས་ཀྱང་དེའི་རང་བཞིན་ནོ། །བཅོམ་ལྡན་འདས་གང་སུ་དག་ཡོངས་སུ་མྱ་ངན་ལས་འདའ་བར་འཚལ་བ་དེ་དག་ནི་གནོད་པར་འགྱུར་བའི་ཆོས་ཅན་ཏེ། དེ་ཅིའི་སླད་དུ་ཞེ་ན། གལ་ཏེ་འཁོར་བར་ཞུགས་པ་ཞིག་མཆིས་ན་ནི་མྱ་ངན་ལས་འདས་པ་ཡང་བཙལ་བར་འགྱུར་ན། ཡང་དག་པའི་མཐའ་ལ་ནི་འཁོར་བར་ཞུགས་པ་གང་ཡང་མ་མཆིས་ན་ནི་དེ་མྱ་ངན་ལས་འདས་པ་ཅི་ཞིག་ཚོལ་བར་འགྱུར། བཅོམ་ལྡན་འདས་ཡང་དག་པའི་མཐའ་ནི་གཉིས་སུ་མ་མཆིས་པ་སྟེ། བཅོམ་ལྡན་འདས་དེ་ལ་བདག་ཅག་སོམ་ཉིས་མ་མཆིས་ཐེ་ཚོམ་མ་མཆིས་སོ། །བཅོམ་ལྡན་འདས་གང་ལ་ལ་ཞིག་ཆོས་འདི་ལ་ནེམ་ནུར་དང་ཐེ་ཚོམ་མ་མཆིས་ན་དེ་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འཚལ་བར་བགྱིའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ལྷའི་རྒྱལ་པོ་རབ་འཕྲུལ་ལ་སོགས་པ། འཕྲུལ་དགའ་རིས་ཀྱི་ལྷ་བྱེ་བ་ཕྲག་བདུན་བཅུ་པོ་དེ་དག་རང་གིས་ལུང་བསྟན་པ་གསན་ནས་འགྲོ་བ་ཐམས་ཅད་རབ་ཏུ་དགའ་བར་བྱ་བའི་ཕྱིར་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག་རྟེན་ཕན་པར་བཞེད་པས་འཛུམ་པ་མཛད། །འཛུམ་པའི་རྒྱུ་ནི་ཁྱོད་ཀྱིས་མ་བསྟན་ཏེ། །རང་བྱུང་སྐྱེས་བུ་དམ་པ་གང་དག་ཀྱང་། །རྒྱུ་མ་མཆིས་པར་འཛུམ་པ་མི་མཛད་པས། །
ཁྱོད་ཀྱི་ཞལ་ནས་འཛུམ་པ་དེ་མཛད་པ། །མཐོང་ནས་ལྷར་བཅས་འཇིག་རྟེན་ཐེ་ཚོམ་འཚལ། །འཛུམ་པའི་རྒྱུ་དེ་གང་ལགས་རང་བྱུང་གསུངས། །ཐེ་ཚོམ་འཚལ་བའི་ཐེ་ཚོམ་བསལ་དུ་གསོལ། །ཁྱོད་ཀྱིས་འཛུམ་མཛད་རྒྱུ་དེ་ཐོས་གྱུར་ན། །འཁོར་འདི་ཐམས་ཅད་ངོ་མཚར་ཐོབ་པར་འགྱུར། །བྱང་ཆུབ་མཆོག་ནི་ཡོངས་སུ་བསྒྲུབ་སླད་དུ། །དེ་དག་ལམ་མཆོག་ཤིན་དུ་རྣམ་དག་འགྱུར། །ཐེ་ཚོམ་འཚལ་བ་དག་ནི་ནམ་དུ་ཡང་། །བྱང་ཆུབ་ཡིད་བཞིན་བདེ་བར་མི་འགྲུབ་སྟེ། །ཐེ་ཚོམ་སོམ་ཉི་བསལ་ནས་མཁས་པ་རྣམས། །བྱང་ཆུབ་མཆོག་གི་རྒྱུ་དང་སྐལ་ལྡན་འགྱུར། །རྐང་གཉིས་དབང་པོ་ཁྱོད་ཀྱིས་འཁོར་འདི་དག །སྡིག་པ་ཡོངས་སྤངས་བྱང་ཆུབ་སེམས་དང་ལྡན། །ལྷ་རྣམས་ལུང་བསྟན་དེ་དག་ཐོས་གྱུར་ན། །རྒྱལ་བའི་གོ་འཕང་རྒྱ་ཆེན་ཐོབ་པར་འགྱུར། །དེ་བས་རྒྱལ་བས་ཐུགས་རྗེ་ཆེ་བསྐྱེད་ཅིང་། །ཐེ་ཚོམ་འཚལ་བ་རྣམས་ལ་ཐུགས་བརྩེ་བས། །ལྷ་ཚོགས་འདི་དག་ཐམས་ཅད་ལུང་བསྟན་ཅིང་། །འགྲོ་བ་འདི་དག་ཐམས་ཅད་དགའ་བར་མཛོད། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །ངས་ནི་འཇིག་རྟེན་ཕན་ཕྱིར་འཛུམ་པ་མཛད། །རྟ་ཐུལ་ཁྱོད་ཀྱིས་ཞུ་བ་དེ་ཞུས་པ། །ལུང་བསྟན་དེ་ནི་ཁྱོད་ལ་མ་ལུས་པར། །བསྟན་པར་ངས་བྱས་དང་བས་ཀུན་ཀྱང་ཉོན། །འཕྲུལ་དགའི་རིས་ཀྱི་ལྷ་ཚོགས་འདི་རྣམས་ཀྱིས། །ཐམས་ཅད་མཁྱེན་པར་བདག་ཅག་ལུང་བསྟན་ཏེ། །མུ་སྟེགས་ཚོགས་ཀྱིས་བསམ་པ་ཟིལ་མནན་ནས། །འཁོར་འདིར་སེང་གེའི་ང་རོ་ཆེན་པོ་བསྒྲགས། །གནམ་དུ་རྡོ་འཕངས་ས་ལ་ལྟུང་བ་ལྟར། ། དེ་ལ་ཐེ་ཚོམ་ཟ་བར་མི་འགྱུར་ཏེ། །དེ་ལྟར་ཐེ་ཚོམ་མེད་པའི་ཚུལ་ཐོབ་པ། །བདག་ཅག་ཉིད་ནི་སྟོབས་བཅུར་འགྱུར་བར་ཤེས། །ཉི་མ་ནུབ་གྱུར་ནམ་སྲོས་གྱུར་པའི་ཚེ། །མི་རྣམས་ཟླ་བ་མྱུར་དུ་འཆར་བར་ཤེས། །དེ་བཞིན་རྒྱལ་བའི་སྲས་པོ་ཚུལ་ཐོབ་དག །བདག་ཅག་ཉིད་ནི་སྟོབས་བཅུར་འགྱུར་བར་ཤེས། །སྐར་ཚོགས་དབུས་ན་ཟླ་བ་གནས་པ་ནི། །སེམས་ཅན་མཚུངས་པར་འདི་ལ་ཐེ་ཚོམ་མེད། །དེ་བཞིན་རྒྱལ་བའི་སྲས་པོ་ཚུལ་ཐོབ་དག །བདག་ཅག་ཐམས་ཅད་མཁྱེན་དུ་འགྱུར་བར་ཤེས། །ཇི་
ལྟར་ཉི་མ་ནུབ་པར་གྱུར་པའི་ཚེ། །ཉི་མ་མི་མཐོང་སེམས་ཅན་དེ་དག་ཤེས། །དེ་བཞིན་དེ་གཤེགས་སྲས་པོ་ཚུལ་ཤེས་པ། །ཡེ་ཤེས་དམ་པ་ཐོབ་པར་འགྱུར་དུ་ཤེས། །ཆུ་ཀླུང་ཇི་ལྟར་གཞོལ་བར་འབབ་འགྱུར་ཞིང་། །རྒྱ་མཚོར་འབབ་པར་མཁས་པ་རྣམས་ཀྱིས་ཤེས། །དེ་བཞིན་དེ་གཤེགས་སྲས་པོ་ཚུལ་ཤེས་པ། །བྱང་ཆུབ་རྒྱ་ཆེན་ཐོབ་པར་འགྱུར་བར་ཤེས། །ཇི་ལྟར་གནམ་དུ་བོང་བ་འཕངས་པ་ནི། །ས་ལ་ལྷུང་བར་འགྱུར་དུ་ཐེ་ཚོམ་མེད། །དེ་བཞིན་རྒྱལ་སྲས་མཁས་པ་དེ་དག་ཀྱང་། །འཇིག་རྟེན་མཁས་པ་མྱུར་འགྱུར་ཡེ་ཤེས་འཇུག །གང་ཐོས་ནས་ནི་ཐེ་ཚོམ་མེད་འགྱུར་ཞིང་། །སངས་རྒྱས་ཡོན་ཏན་གནས་པར་བདག་ཤེས་ལ། །རང་གི་སར་ཉེ་ལག་སྟོང་མ་ཡིན་པར། །མཁས་པ་རྣམས་ཀྱི་ཆོས་ཉིད་རབ་ཏུ་མཐོང་། །གལ་ཏེ་བདུད་ཀྱི་ཚོགས་ནི་བྱེ་བ་དག །སངས་རྒྱས་གཟུགས་བསྒྱུར་བར་ཆད་སྨྲས་བྱས་ཀྱང་། །ཆོས་ལ་མཁས་པ་ཆོས་ཉིད་རབ་མཐོང་བ། །དེ་དག་བྱང་ཆུབ་ལས་ནི་བཟློག་མི་ནུས། །དེ་ལྟར་སངས་རྒྱས་ཡོན་ཏན་རབ་གནས་ཤིང་། །བདག་གིས་བདག་ཉིད་ལུང་བསྟན་བརྗོད་བྱེད་གང་ལ་འདྲེན་པ་ཆོ་ག་ཚུལ་མཁྱེན་པ། །མི་དབང་ལུང་བསྟན་དེ་ལ་ཡི་རང་མཛོད། །དེ་ལྟར་ལྷ་ཚོགས་འདི་དག་ཚུལ་འདི་ལ། །གཞན་གྱི་དྲིང་ལ་མི་འཇོག་མངོན་ཤེས་ཤིང་། །དེ་དག་བདེ་གཤེགས་འགྱུར་ཞེས་རང་སྨྲ་ལ། །འཇིག་རྟེན་མཁས་པ་རྗེས་སུ་ཡི་རང་མཛད། རྟ་ཐུལ་དེ་བས་མཁས་པ་གང་གི་རྣམས། །བླ་མེད་བྱང་ཆུབ་ཐོབ་པར་བྱར་སེམས་པ། །དེ་དག་ཚུལ་འདི་ཤེས་པ་དགང་གྱུར་པའི། །འཕགས་པའི་སྐྱེ་བོ་མཁས་ལ་བསྟེན་པར་བྱ། །གང་དག་ཚུལ་ལ་འཇུག་པ་རབ་མཐོང་ཞིང་། །མཁས་པ་གང་དག་དགེ་བཤེས་བསྙེན་བཀུར་བ། །དེ་དག་བྱང་ཆུབ་ལགས་མཐིལ་འདྲ་བར་གསལ། །ཚུལ་ཤེས་དེ་དག་རང་གིས་རང་འབྱུང་འགྱུར། །གང་གིས་བསྐལ་པ་སྟོང་དུ་དགའ་ཐུབ་སྤྱད། །ཤ་ཁྲག་ལྤགས་ལ་མི་ལྟ་བྱས་པ་བས། །གང་གིས་ཚུལ་འདི་སྐད་ཅིག་རྟོགས་གྱུར་ན། །དེ་ནི་ཁྱད་འཕགས་དཀའ་ཐུབ་དེ་ལྟར་མིན། །འདས་པའི་རང་བྱུང་གང་རྣམས་བྱུང་བ་དང་། །མ་འོངས་སེམས་ཅན་ཕན་བཞེད་གང་བྱུང་དང་། །
ད་ལྟར་དུས་ན་འདྲེན་པ་གང་བཞུགས་པ། །ཀུན་ཀྱང་ཚུལ་གྱིས་བདེ་བར་གཤེགས་པ་ཐོབ། །རབ་འཕྲུལ་ལྷ་ཚོགས་ཐུབ་པའི་ཚུལ་ཤེས་པ། །འདི་དག་གང་ལ་མཆོད་པ་མཆོག་བྱས་ཤིང་། །འདྲེན་པ་ཐམས་ཅད་བསྙེན་བཀུར་རབ་བྱས་ན། །ཚུལ་གྱིས་སུ་ནི་རང་འབྱུང་ཐོབ་པར་འགྱུར། །འཇིག་རྟེན་མཁས་པའི་ཏིང་འཛིན་གང་ཡིན་པ། །དེ་ཡིས་རྒྱལ་བ་རང་བྱུང་གནས་པའི་རྣམས། །དེ་དག་ཐམས་ཅད་རྒྱལ་བའི་སྤྱོད་ཡུལ་པོ། ཚུལ་ཐོབ་རྣམས་ཀྱིས་མངོན་བསྟེན་མྱུར་དུ་འཐོབ། །དེ་ལ་རྟ་ཐུལ་སངས་རྒྱས་སྲས་རྣམས་ནི། །སངས་རྒྱས་གནས་པ་དེ་ལ་ནེམ་ནུར་མེད། །སངས་རྒྱས་ཚུལ་ལ་སེམས་ཅན་རྣམ་རྩེ་བ། །ཚུལ་ཤེས་པ་དག་སྟོན་པའི་ལམ་ལ་སྤྱོད། །དེ་ལྟས་ཚུལ་ལ་དད་པའི་ཡིད་བྱས་ཏེ། །བརྩམ་པར་བྱ་ཡི་སྡུག་བསྔལ་སྤྱོད་ལ་མིན། །རྟག་ཏུ་དགེ་བཤེས་མཁས་པ་བསྟེན་བྱས་ན། །བླ་མེད་བྱང་ཆུབ་མྱུར་དུ་ཐོབ་པར་འགྱུར། །བདེ་བར་གཤེགས་པའི་གསུང་མཆོག་ཐོས་ནས་ནི། །འཁོར་ཀུན་རྒྱལ་བའི་བྱང་ཆུབ་ཡི་རངས་ཏེ། །རྗེས་སུ་ཡི་རང་ཐེ་ཚོམ་མེད་གྱུར་ནས། །མཐར་ཕྱིན་བློ་གྲོས་ལ་ནི་ཞུགས་པར་གྱུར། །འཕྲུལ་དགའ་བ་ལུང་བསྟན་པའི་ལེའུ་སྟེ་བཅུ་བརྒྱད་པའོ། །