བཅུ་དགུ་པ། གཞན་འཕྲུལ་དབང་བྱེད་པ་ལུང་བསྟན་པའི་ལེའུ།
བམ་པོ་བདུན་པ། དེ་ནས་དེའི་ཚེ་ལྷའི་རྒྱལ་པོ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་རིས་ཀྱི་ལྷ་ཁྲག་ཁྲིག་བརྒྱད་བཅུས་ལྷ་མ་ཡིན་རྣམས་ནས་འཕྲུལ་དགའི་ལྷའི་བར་དག་གིས་མཆོད་པ་ཡང་མཐོང་། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་། ཡིད་བདེ་བ་བསྐྱེད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཕྲུལ་དགའི་ལྷ་རྣམས་ཀྱིས་ཡང་དག་པའི་མཐའ་ཞེས་གང་སྨྲས་པ་དེ་ལ་བདག་ཅག་གིས་ནི་ཡང་དག་པའི་ཡང་མི་དམིགས་ན་དེའི་མཐའ་ལྟ་སྨོས་ཀྱང་ཅི་འཚལ། དེ་ཅིའི་སླད་དུ་ཞེ་ན། བཅོམ་ལྡན་འདས་གང་ལ་ལ་ཞིག་གིས་ཡང་དག་པ་དམིགས་ན་ནི་མཐའ་ཡང་དེས་དམིགས་པར་འགྱུར་ཏེ་དེ་ནི་གཉིས་ཀྱིས་སྤྱོད་པའོ། །དེ་ལྟ་བུ་དེ་ནི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུ་དང་། རིགས་ཀྱི་བུ་མོ་རྣམས་ཀྱི་སྤྱོད་ཡུལ་མ་ལགས་སོ། །
བཅོམ་ལྡན་འདས་གང་ལ་ལ་ཞིག་གཉིས་སུ་མ་མཆིས་པའི་ཆོས་རྣམས་ནི་གཉིས་སུ་མེད་དོ་ཞེས་མི་སྤྱོད་མ་མོས་ན་དེ་འདི་སྙམ་དུ་བདག་གིས་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་སྙམ་དུ་སེམས་སུ་ལུགས་ཀྱང་། དེ་ནི་ལམ་ལོག་པར་ཞུགས་པར་འཚལ་བར་བགྱིས་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གང་འདི་བྱང་ཆུབ་ཏུ་སྨོན་པ་དེ་ནི་ལམ་ལོག་པར་ཞུགས་པ་ལགས་ཏེ། བཅོམ་ལྡན་འདས་གང་མངོན་པར་རྫོགས་པར་འཚང་རྒྱ་བར་བགྱི་བའི་ཆོས་དེ་གང་ཡང་མ་མཆིས་སོ། །དེ་ཅིའི་སླད་དུ་ཞེ་ན་བཅོམ་ལྡན་འདས་ཆོས་འགའ་ཞིག་དམིགས་པར་གྱུར་ན་བྱང་ཆུབ་མངོན་པར་རྫོགས་པར་འཚལ་རྒྱ་བར་མི་ནུས་སོ། །བཅོམ་ལྡན་འདས་ཆོས་ནི་འདས་པ་མ་ལགས། །མ་འོངས་པ་མ་ལགས། །ད་ལྟར་བྱུང་བ་མ་ལགས། འདུས་བྱས་མ་ལགས། འདུས་མ་བྱས་མ་ལགས། དངོས་པོ་མ་ལགས། །དངོས་པོ་མ་མཆིས་པ་མ་ལགས། །མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་ལགས། །སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། །མངོན་དུ་བགྱི་བ་མ་ལགས་སོ་བཅོམ་ལྡན་འདས་བྱང་ཆུབ་ཅེས་བགྱི་བ་དེ་ཡང་ཆོས་གང་གི་གཉེན་པོ་ཡང་མ་ལགས་ལ་ཆོས་གང་ཡང་ཆོས་དེའི་གཉེན་པོ་མ་ལགས་སོ། །དེ་ཅིའི་སླད་དུ་ཞེ་ན། ཆོས་དེ་ནི་ཀུན་ནས་ཉོན་མོངས་པ་མ་ལགས། རྣམ་པར་བྱང་བ་མ་ལགས་ཏེ། གང་གིས་ཆོས་གཞན་གྱི་གཉེན་པོར་གྱུར་པའི་ཆོས་དེ་ཡང་རང་བཞིན་གྱིས་མི་དམིགས་ལ་གང་ཆོས་དེའི་གཉེན་པོར་གྱུར་བའི་ཆོས་གཞན་དེ་གང་ཡང་རང་བཞིན་གྱིས་མི་དམིགས་སོ། དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་མཚན་མ་དང་བྲལ་བ་སྟེ། དེ་དག་ནི་མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་ལགས། སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། མངོན་དུ་བགྱི་བ་མ་ལགས་ཏེ། བཅོམ་ལྡན་འདས་གཟུགས་ནི་གཟུགས་ཀྱི་མཚན་མ་དང་བྲལ་བའོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ནི་རྣམ་པར་ཤེས་པའི་མཚན་
མ་དང་བྲལ་བའོ། །གཟུགས་ཀྱི་སྐྱེ་བའི་མཚན་མ་ནས་རྣམ་པར་ཤེས་པའི་བར་གྱི་སྐྱེ་བ་གང་ལགས་པ་དེ་ཡང་སྐྱེ་བའི་མཚན་མ་དང་བྲལ་བའོ། །གཟུགས་ཀྱི་འགག་པ་རྣམ་པར་ཤེས་པའི་བར་གྱི་འགག་པ་གང་ལགས་པ་དེ་ཡང་འགག་པའི་མཚན་མ་དང་བྲལ་བའོ། །བཅོམ་ལྡན་འདས་འདས་པ་དང་། མ་འོངས་པ་དང་། ད་ལྟར་བྱུང་བ་ཡང་འདས་པ་དང་། མ་འོངས་པ་དང་། ད་ལྟར་བྱུང་བ་དང་བྲལ་བའོ། །འདུས་བྱས་ཀྱང་འདུས་བྱས་ཀྱི་མཚན་མ་དང་བྲལ་བའོ། །འདུས་མ་བྱས་ཀྱང་འདུས་མ་བྱས་ཀྱི་མཚན་མ་དང་བྲལ་བའོ། །བཅོམ་ལྡན་འདས་དེ་ལྟར་ཇི་ཙམ་དུ་ཕུང་པོས་བཟུང་བའམ། སྐྱེ་བ་དང་། འགག་པས་བཟུང་བའམ། འདས་པས་བཟུང་བའམ། མ་འོངས་པས་བཟུང་བའམ། ད་ལྟར་བྱུང་བས་བཟུང་བའམ། འདུས་བྱས་ཀྱིས་བཟུང་བའམ། འདུས་མ་བྱས་ཀྱིས་བཟུང་བ་དེ་དག་ནི་རྣམ་པ་ཐམས་ཅད་དུ་མི་དམིགས་ཏེ། དེ་ལྟར་མི་དམིགས་པ་དེ་ནི་མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་ལགས། སྤང་བར་བགྱི་བ་མ་ལགས། བསྒོམ་པར་བགྱི་བ མ་ལགས། མངོན་དུ་བགྱི་བ་མ་ལགས་ཏེ། བཅོམ་ལྡན་འདས་གང་དག་དེ་ལྟར་ཞུགས་པའི་རིགས་ཀྱི་བུ་དང་། རིགས་ཀྱི་བུ་མོ་དེ་དག་ནི་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་ཞེས་བགྱིའོ། །དེ་ནས་གཞན་འཕྲུལ་དབང་བྱེད་རིས་ཀྱི་ལྷ་དེ་དག་གིས་ཇི་ལྟར་ཤེས་པའི་ཆོས་དེ་ལྟར་ལུང་བསྟན་ནས་དེའི་ཚེ། བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། བཅོམ་ལྡན་སྲིད་པ་མཐར་འབྱིན་ལེགས་པར་གསུངས། །འདྲེན་པས་སྲིད་པའི་སྙིང་པོ་མ་བརྙེས་ན། །སྐྱེ་བོ་མི་མཁས་དེ་དག་འཇིགས་པ་ཡིས། །འཁོར་བའི་ཕ་རོལ་བགྲོད་ཕྱིར་རབ་ཏུ་ཞུགས། །ཕུང་པོ་རྣམས་ནི་ཀུན་དུ་མི་དམིགས་ཏེ། །ཕུང་པོའི་མཚན་མས་ཕུང་པོ་སྟོང་པ་ཉིད། །ཆོས་གང་གང་གི་གཉེན་པོར་འགྱུར་བ་ནི། །མཚན་མས་སྟོང་སྟེ་གང་ཡང་མ་མཆིས་སོ། །ངོ་བོ་ཉིད་ཀྱིས་སྟོང་ཕྱིར་དངོས་པོ་གང་། །ཡོངས་ཤེས་བྱ་དང་སྤང་བསྒོམས་མངོན་བྱ་བ། །གང་ཡང་མ་མཆིས་གང་དུའང་མི་དམིགས་ཏེ། །
དངོས་པོ་རྣམས་ནི་དངོས་མེད་རང་བྱུང་གསུང་། །བྱང་ཆུབ་གང་ཡང་མཚན་མར་མི་དམིགས་ཏེ། །བྱང་ཆུབ་ཕྱོགས་ཀྱི་ཆོས་རྣམས་དེ་བཞིན་ནོ། །སངས་རྒྱས་གང་ཡང་མཚན་མར་མི་དམིགས་ཏེ། །བྱང་ཆུབ་སེམས་དཔའ་མཆན་མས་རྟོགས་མི་འགྱུར། །མི་མཁས་གང་དག་མཚན་མར་མངོན་ཞེན་པ། །དེ་དག་བྱང་ཆུབ་འཚར་རྒྱར་སེམས་བསྐྱེད་ཀྱང་། །མཚན་མར་སྤྱོད་ཅིང་སྤྱོད་ཡུལ་ལོག་པ་སྟེ། །བློ་གྲོས་ངན་པས་བྱང་ཆུབ་ལམ་མི་སྤྱོད། །མཚན་མ་ལུས་སྤངས་སངས་རྒྱས་སྤྱོད་ཡུལ་ལ། །སྤྱོད་པ་དེ་དག་སངས་རྒྱས་བསྟན་ལ་མཁས། །མཚན་མ་དེ་བཞིན་མཚན་མ་མེད་སྤངས་ཏེ། །སྟོང་དང་མི་སྟོང་དེ་བཞིན་དམིགས་མེད་པ། །མཁས་པ་དེ་དག་བྱང་ཆུབ་ལམ་ལ་སྤྱོད། །དེ་དག་བྱང་ཆུབ་དམ་པ་ཞི་བ་འཐོབ། །ཕས་ཀྱི་རྒོལ་བ་ཀུན་གྱི་སྤྱོད་ཡུལ་མིན། །གནས་དེ་ཉན་ཐོས་རྣམས་ཀྱིས་བགྲོད་བྱ་མིན། །རང་རྒྱལ་རྣམས་ཀྱང་དེ་ལ་མི་འགྲོ་སྟེ། །རྣམ་གྲོལ་སེམས་ལྡན་ཟག་མེད་ཐབ་མེད་པ། །དགྲ་བཅོམ་བསྟན་པ་འདི་ལ་གང་བརྩོན་དང་། །དེ་བཞིན་རང་རྒྱལ་སྐྱོབ་པར་གྱུར་པ་དག །མཁས་པའི་སྤྱོད་ཡུལ་དེ་ལ་སྤྱོད་ཡུལ་མེད། །གོ་འཕང་དེ་ནི་མཚན་མ་སྤྱོད་པ་དང་། །ཉི་ཚེའི་སྟོང་པ་ཉིད་ལ་སྒོམ་པ་དང་། །གང་རྣམས་སྟོང་པས་སྟོང་ཞེས་སྟོང་སྨྲ་དང་། །ཆོས་ཀུན་རང་བཞིན་ཡོད་སྨྲས་འཐོབ་མི་ནུས། །སངས་རྒྱས་མ་སྨད་རྣམས་ཀྱི་བསླབ་པ་ལ། །སློབ་དང་རྣམ་བྲལ་སློབ་པ་སློབ་པའི་རྣམས། །མཁས་དེ་རྟོགས་པ་མེད་པས་བྱང་ཆུབ་རྟོགས། །སྟོན་པས་བསྟན་པ་བཞིན་དུ་དགྱེས་བྱེད་ལགས། །སངས་རྒྱས་རྐང་གཉིས་གཙོ་བོ་སྟོང་བས་ན། །བདག་ཅག་བསོད་ནམས་མི་ཆུང་གང་ཐོབ་དེས། །འགྲོ་བ་བྱང་ཆུབ་དམ་པ་འཚང་རྒྱ་ཞིང་། མི་ཤེས་སྟོན་མཛད་སངས་རྒྱས་འགྲུབ་པར་ཤོག །དེ་ནས་བཅོམ་ལྡན་འདས་ཀྱིས་དེའི་ཚེ་ལྷའི་རྒྱལ་པོ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་རིས་ཀྱི་ལྷ་ཁྲག་ཁྲིག་ཕྲག་བརྒྱད་བཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་སྐྱེ་བོ་ཕལ་པོ་ཆེ་དེ་དག་གི་དགེ་བའི་རྩ་བ་བསྐྱེད་པའི་ཕྱིར་དེའི་ཚེ་འཛུམ་པ་མཛད་དོ། །དེ་ནས་
ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། གཞན་འཕྲུལ་དབང་བྱེད་ལྷ་ཡི་བསམ་མཁྱེན་ནས། །རྐང་གཉིས་གཙོ་བོ་ཁྱོད་ཡིས་འཛུམ་མཛད་ལ། །ཐུབ་པས་འཛུམ་པའི་རྒྱུ་དེ་མ་གསུངས་ན། །རྒྱལ་བ་འཛུམ་པའི་རྒྱུ་ནི་བསྟན་དུ་གསོལ། །འདྲེན་པ་རྒྱུ་མེད་འཛུམ་པ་མི་མཛད་ཅེས། །རྒྱལ་བ་ཁྱུ་མཆོག་དམ་པས་དེ་སྐད་གསུངས། །འཇིག་རྟེན་དོན་སླད་འཛུམ་པ་མཛད་པའི་རྒྱུ། །འདྲེན་པས་བཀའ་སྩོལ་ཐེ་ཚོམ་བསལ་དུ་གསོལ། །དྲང་སྲོང་ཆེན་པོའི་ཞལ་ནས་འཛུམ་རིག་ནས། །ཐུབ་ཆེན་ཁྱོད་ཀྱི་འཁོར་རྣམས་ཐེ་ཚོམ་འཚལ། །གཽ་ཏམ་རྒྱལ་བ་འདྲེན་པས་དེ་དག་ལ། །འཇིག་རྟེན་སྨན་སླད་འཛུམ་རྒྱུ་ལུང་བསྟན་གསོལ། །འདི་དག་འཁོར་བའི་རྒྱུད་ལས་རྒྱབ་ཕྱོགས་ཏེ། །མྱ་ངན་འདས་པའི་སེམས་ཀྱིས་ཐལ་སྦྱར་སྡོང་། །འཁོར་འདི་ཡངས་པའི་སེམས་ལྡན་ཐེ་ཚོམ་འཚལ། །དོན་ཡོང་གྲགས་མངའ་སོམ་ཉི་བསལ་དུ་གསོལ། །བདེ་གཤེགས་བསྟན་ལ་ཐེ་ཚོམ་མ་མཆིས་ཏེ། །ཕྱིར་ཞིང་དད་བསྐྱེད་རིམ་གྲོ་ཆེར་བགྱིད་དེ། །ཐེ་ཚོམ་མི་འཚལ་སེམས་ནི་གྲོལ་འགྱུར་བར། །རྒྱལ་བས་སྐྱེ་བོའི་ཐེ་ཚོམ་ལེགས་པར་ཁུམ། །བདེ་གཤེགས་བསྟན་ལ་འདི་དག་བདེར་གནས་ཤིང་། །གང་ལམ་རང་བྱུང་རྒྱལ་བ་གཤེགས་གྱུར་པ། །ལམ་དེ་ནས་ནི་ཐེ་ཚོམ་མ་མཆིས་མཆི། །དེ་བས་སྐྱེ་བོའི་ཐེ་ཚོམ་བཅད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །སྐྱེ་བོའི་ཚོགས་ཆེན་དོན་དབང་བརྟེན་བྱས་ནས། །ཚིགས་སུ་བཅད་དེ་དུས་སུ་གང་སྨྲས་ཤིང་། །འཛུམ་པའི་དོན་གྱི་རྒྱུ་ནི་ཡོངས་ཞུས་པ། །ཁྱོད་ཀྱི་ཚིག་ནི་དུས་དང་ལྡན་པ་ཡིན། །རྟ་ཐུལ་དྲི་བ་དེ་ཡི་དོན་དྲིས་པས། །སྐྱེ་བོ་ཚོགས་ཆེན་འདི་ཡི་དོན་བྱས་གྱུར། །ཁྱོད་ཀྱིས་དེ་དྲིས་སྐྱེ་བོ་ཚོགས་ཆེན་དག །བྱང་ཆུབ་མཆོག་ཏུ་ཡང་དག་ཞུགས་པར་འགྱུར། །གཞན་འཕྲུལ་དབང་བྱེད་བསམ་པ་ངས་མཁྱེན་ཏེ། །རྟ་ཐུལ་འཛུམ་པ་འདི་ནི་ངས་བསྟན་ཏོ། །འཇིག་རྟེན་མཁྱེན་པའི་བསྟན་པའི་ལམ་དེ་ནས། །དོན་དུ་གཉེར་བ་དེ་དག་དེ་བཞིན་འདོད། །གང་གིས་
འགྲོ་བ་འདི་དག་མཚན་མེད་པར། །སྨྱིག་རྒྱུ་ལ་ནི་ཇི་ལྟར་ཆུ་བཞིན་མཐོང་། །བྱིས་པའི་རྨོངས་པ་མཁས་པའི་ཚུལ་བཞིན་ཏེ། །དེ་དག་རྗེས་སུ་བྱང་ཆུབ་འདོད་པས་བསླབ། །མཚན་མའི་འདུ་ཤེས་སྤང་ཕྱིར་མི་རྣམས་གང་། རྟག་ཏུ་མཚན་མ་མངོན་དགའ་འཇིག་འགྱུར་ཞིང་། །མཚན་མའི་འདུ་ཤེས་ལོག་པའི་ལམ་དུ་འདོང་། །མཚན་མ་མེད་པ་བྱང་ཆུབ་མཆོག་ཐོབ་འགྱུར། །མེད་པའི་རྟོག་ལྡན་མཚན་མར་རྣམ་བརྟགས་ནས། །ཇི་ལྟར་བརྟགས་ནས་དེ་ལྟར་འཆིང་བ་ཡིན། །མཚན་མ་སྟོང་པར་རྣམ་མཐོང་མཁས་པ་ཡི། །ཞི་བ་དག་ནི་གྲགས་པ་དམ་པ་ཐོབ། །འདུ་ཤེས་མཚན་ཅན་མི་མཉམ་སེམས་རྒྱུད་ཀྱིས། །སྡིག་པ་བརྒྱ་དག་མི་མཁས་དེ་དག་བྱེད། །འགྲོ་བ་ཀུན་དུ་སྡུག་བསྔལ་མི་ཆུང་མྱོང་། །དེ་ལྟར་མི་མཁས་མཚན་མ་བརྟག་པ་བྱས། །མཚན་མར་འདུ་ཤེས་པ་ནི་ཕུང་པོ་དང་། །སངས་རྒྱས་བྱང་ཆུབ་བྱང་ཆུབ་སེམས་དཔའ་མཐོང་། །དེ་ལྟར་མཚན་མ་མེད་ཅིང་སྟོན་མཐོང་ན། །བྱང་ཆུབ་གཞལ་མེད་བླ་ན་མེད་པ་འཐོབ། །འདུ་ཤེས་མཚན་མ་ཅན་ལ་ཉོན་མོངས་འཕེལ། །མཚན་མ་མེད་པ་ཀུན་དུ་སྦྱོར་བ་སྤོང་། །མཚན་མ་ལས་ནི་ཀུན་སྦྱོར་གཞན་མེད་དེ། །ཀུན་དུ་སྦྱོར་བ་དེ་ཉིད་མཚན་མེད་ཡིན། །གང་རྣམས་བྱང་ཆུབ་ཐོབ་པར་བྱ་རྟོག་པ། །རྟོག་པ་དེ་ཉིད་མི་མཁས་བར་ཆད་ཡིན། །མཁས་པའི་ལོངས་སྤྱོད་རྣམ་པ་ཐོབ་བྱེད་ན། །ལོངས་སྤྱོད་དེ་ཉིད་མཚན་མ་མེད་པར་འགྱུར། །ཆོས་རྣམས་གང་ཡང་རང་བཞིན་ཉིད་ཀྱིས་མེད། །རྣམ་པར་རྟོག་པས་ཆོས་བྱུང་ཀུན་ཀྱང་སྟོང་། །རྟོག་པ་མེད་པས་མཚན་མ་མེད་པར་འགྱུར། །དེ་ཉིད་བྱང་ཆུབ་གཞན་དུ་མཁས་མེ་སྨྲ། །རྒྱལ་བས་གསུངས་པ་དེ་དག་ཐོས་གྱུར་ནས། །མི་འཇིགས་ལྡན་པའི་འཁོར་ནི་ཐེ་ཚོམ་བསལ། །དཔེར་ན་ཙམ་པའི་ཕྲེང་བ་འཛིན་པ་ལྟར། །མཁས་རྣམས་ཐུབ་པས་གསུངས་ལ་ལེགས་ཤེས་འཛིན། །འཇིགས་པ་མེད་པའི་ལྷ་ཚོགས་འདི་དག་གིས། །མཆོད་པ་འཕགས་པ་བླ་ན་མེད་བྱས་ཤིང་། །རྒྱལ་བའི་སྤྱོད་ཡུལ་ཆོས་རྣམས་ཡོངས་ཤེས་ནས། །འགྲོ་བ་རྣམ་པར་འདྲེན་པ་ཀུན་མཁྱེན་འགྱུར། །གཞན་འཕྲུལ་དབང་བྱེད་པ་ལུང་
བསྟན་པའི་ལེའུ་སྟེ་བཅུ་དགུ་པའོ།། །།