ཉི་ཤུ་རྩ་དྲུག་པ། ཤཱཀྱ་ལུང་བསྟན་པའི་ལེའུ།
དེ་ནས་རྒྱལ་པོ་ཟས་གཙང་མ་འཁོར་དང་བཅས་པས་ལྷ་མ་ཡིན་རྣམས་དང་། །ནམ་མཁའ་ལྡིང་རྣམས་ནས་ཀུན་དུ་རྒྱུ་རྣམས་ཀྱི་བར་གྱི་ལུང་བསྟན་པ་ཐོས་ནས་འདི་སྙམ་དུ་སེམས་པར་གྱུར་ཏེ། འདི་ལྟར་བཅོམ་ལྡན་འདས་ཀྱིས་ལེགས་པར་གསུངས་པས་འགྲོ་བ་ཐམས་ཅད་ཚིམ་པར་བྱས་པ་ནི་
ངོ་མཚར་སྙམ་ནས་དེ་ཡང་བུ་ལ་ཆགས་པས་ཀུན་དུ་བཀྲིས་པར་གྱུར་ཏོ། དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་མའི་སེམས་ཐུགས་སུ་ཆུད་ནས་རྒྱལ་པོ་ཟས་གཙང་མ་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ལ་ཆངས་པར་སྤྱོད་པ། །ཐོག་མར་དགེ་བ། བར་དུ་དགེ་བ། ཐ་མར་དགེ་བ། །དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་ཁྱད་པའི་ཆོས་འདི་ལྟ་སྟེ། ཁམས་དྲུག་རྣམ་པར་དབྱེ་བ་ཞེས་བྱ་བའི་ཆོས་ཀྱི་རྣམ་གྲངས་བཤད་ཀྱིས་དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས། རྒྱལ་པོ་ཟས་གཙང་མ་བཅོམ་ལྡན་འདས་ཀྱི་ལྟར་ཉན་པ་དང་། དེ་ལ་བཅོམ་ལྡན་འདས་ཀྱི་འདི་སྐད་ཅེས་བཀའ་སྩལ་ཏོ། རྒྱལ་པོ་ཆེན་པོ་ཁམས་དྲུག་རྣམ་པར་དབྱེ་བ་ཞེས་བྱ་བའི་ཆོས་ཀྱི་རྣམ་གྲངས་དེ་གང་ཞེ་ན། རྒྱལ་པོ་ཆེན་པོ་སྐྱེས་བུ་གང་ཟག་འདི་ནི་ཁམས་དྲུག་པ། རེག་པའི་སྐྱེ་མཆེད་དྲུག་པ། །ཡིད་ཀྱི་ཉེ་བར་སྤྱོད་པ་བཅུ་བརྒྱད་པ་སྟེ། སྐྱེས་བུ་འདི་ནི་ཁམས་དྲུག་པ་ཞེས་གང་སྨྲས་པ་དེའི་ལས་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ་ཁམས་དྲུག་ནི་འདི་དག་གོ །དྲུག་གང་ཞེ་ན། འདི་ལྟ་སྟེ། སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་རྣམས་སོ། །རྒྱལ་པོ་ཆེན་པོ་དེ་དག་ནི་ཁམས་དྲུག་སྟེ། སྐྱེས་བུ་འདི་ནི་ཁམས་དྲུག་པའོ་ཞེས་གང་ངས་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། སྐྱེས་བུ་འདི་ནི་རེག་པའི་སྐྱེ་མཆེད་དྲུག་པའོ་ཞེས་གང་སྨྲས་པ་དེ་ཅི་ལས་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ་རེག་པའི་སྐྱེ་མཆེད་དྲུག་ནི་འདི་དག་སྟེ། དྲུག་གང་ཞེ་ན། གཟུགས་རྣམས་ལ་ལྟ་བའི་ཕྱིར་མིག་རེག་པའི་སྐྱེ་མཆེད་དང་། སྒྲ་རྣམས་ལ་ཉན་པའི་ཕྱིར་རྣ་བ་རེག་པའི་སྐྱེ་མཆེད་དང་། དྲི་རྣམས་ལ་མ་ནོམ་པའི་ཕྱིར་སྣ་རེག་པའི་སྐྱེ་མཆེད་དང་། རོ་རྣམས་ལ་མྱོང་བའི་ཕྱིར་ལྕེ་རེག་པའི་སྐྱེ་མཆེད་དང་། རེག་བྱ་རྣམས་ལ་རེག་པའི་ཕྱིར་ལུས་རེག་པའི་སྐྱེ་མཆེད་དང་། ཆོས་རྣམས་རྣམ་པར་ཤེས་པའི་ཕྱིར་ཡིད་རེག་པའི་སྐྱེ་མཆེད་དོ། །རྒྱལ་པོ་ཆེན་པོ་དེ་དག་ནི་རེག་པའི་སྐྱེ་མཆེད་དྲུག་སྟེ།
སྐྱེས་བུ་འདི་ནི་རེག་པའི་སྐྱེ་མཆེད་དྲུག་པའོ་ཞེས་གང་ངས་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། །རྒྱལ་པོ་ཆེན་པོ་སྐྱེས་བུ་འདི་ནི་ཡིད་ཀྱི་ཉེ་བར་སྤྱོད་པ་བཅུ་བརྒྱད་པོ་ཞེས་གང་སྨྲས་པ་དེ་ཅི་ལས་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ་ཡིད་ཀྱི་ཉེ་བར་སྤྱོད་པ་བཅུ་བརྒྱད་ནི་འདི་ལྟ་སྟེ། བཅུ་བརྒྱད་གང་ཞེ་ན། འདི་ལ་མིག་གིས་གཟུགས་ན་མཐོང་ན་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་གཟུགས་ལ་ཉེ་བར་སྤྱོད་དོ། །རྣ་བས་སྒྲ་ཐོས་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་སྒྲ་ལ་ཉེ་བར་སྤྱོད་དོ། །སྣས་དྲི་ཚོར་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་དྲི་ལ་ཉེ་པར་སྤྱོད་དོ། །ལྕེས་རོ་མྱོང་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་རོ་ལ་ཉེ་བར་སྤྱོད་དོ། །ལུས་ཀྱིས་རེག་བྱ་ལ་རེག་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་རེག་བྱ་ལ་ཉེ་བར་སྤྱོད་དོ། །ཡིད་ཀྱིས་ཆོས་རེག་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་ཆོས་ལ་ཉེ་བར་སྤྱོད་དོ། །རྒྱལ་པོ་ཆེན་པོ་དེ་ལ་གང་དག་ཡིད་བདེ་བར་ཉེ་བར་སྤྱོད་པ་དྲུག་དང་། གང་དག་ཡིད་མི་བདེ་བར་ཉེ་བར་སྤྱོད་པ་དྲུག་དང་། གང་དག་བཏང་སྙོམས་སུ་འགྱུར་བར་ཉེ་བར་སྤྱོད་པ་དྲུག་པོ་དེ་དག་གཅིག་ཏུ་བསྡུས་ན་ཡིད་ཀྱི་ཉེ་བར་སྤྱོད་པ་བཅུ་བརྒྱད་དུ་འགྱུར་རོ། རྒྱལ་པོ་ཆེན་པོ་བཅུ་བརྒྱད་པོ་དེ་དག་ནི་ཡིད་ཀྱི་ཉེ་བར་སྤྱོད་པ་སྟེ། རྒྱལ་པོ་ཆེན་པོ་སྐྱེས་བུ་འདི་ནི་ཡིད་ཀྱི་ཉེ་བར་སྤྱོད་པ་བཅུ་བརྒྱད་པའོ་ཞེས་གང་དག་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། །རྒྱལ་པོ་ཆེན་པོ་དེ་ལ་སའི་ཁམས་ནི་རྣམ་པ་གཉིས་ཏེ་ནང་གི་ཡང་ཡོད། ཕྱི་རོལ་གྱི་ཡང་ཡོད་དོ། རྒྱལ་པོ་ཆེན་པོ་ནང་གི་སའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ན་སྲ་བ་དང་། མཁྲང་བའི་རྣམ་པ་དང་། ཉེ་བར་གྱུར་པ་དང་ཟིན་པའོ། དེ་ཡང་གང་ཞེ་ན། འདི་ལྟ་སྟེ་སྒྲ་དང་། སྤུ་དང་། སེན་མོ་དང་། སོ་དང་། རྡུལ་དང་། དྲི་མ་དང་། ལྤགས་པ་དང་། ཤ་དང་། རྩ་དང་། ཆུ་རྒྱུས་དང་། རུས་པ་དང་། རྐང་དང་། སྙིང་དང་། མཆིན་པ་དང་།
གློ་བ་དང་། མཁལ་མ་དང་། སུལ་མངས་དང་། རྒྱུ་མ་དང་། གཉེ་མ་དང་། ལྒང་བ་དང་། མཚེར་པ་དང་། ཕྱིས་དང་། གཞང་དང་། ཀླད་པ་དང་། ཀླད་རྒྱས་དང་། གཞན་གང་ཡང་ལུས་འདི་ལ་ནང་གི་ཁོང་ན་སྲ་བ་དང་། མཁྲང་བའི་རྣམ་པ་དང་། ལུས་སུ་གཏོགས་པར་གྱུར་པ་དང་། ཟིན་པ་འདི་ནི་ནང་གི་སའི་ཁམས་ཤེས་བྱའོ། །རྒྱལ་པོ་ཆེན་པོ་ཕྱི་རོལ་གྱི་སའི་ཁམས་གང་ཞེ་ན། གང་ཅི་ཡང་རུང་སྟེ། ཕྱི་རོལ་གྱི་སྲ་བ་དང་། མཁྲང་བའི་རྣམ་པ་དང་། ལུས་སུ་མ་གཏོགས་པ་དང་། མ་ཟིན་པ་འདི་ནི་ཕྱི་རོལ་གྱི་སའི་ཁམས་ཤེས་བྱའོ། །རྒྱལ་པོ་ཆེན་པོ་དེ་ལ་ནང་གི་སའི་ཁམས་འབྱུང་བའི་ཚེ་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་སོགས་པར་མི་འགྲོའོ། རྒྱལ་པོ་ཆེན་པོ་བུད་མེད་ནང་དུ་བདག་ནི་བུད་མེད་དོ་ཞེས་རྟོག་ཅིང་དེ་ནང་དུ་བུད་མེད་ཅེས་བརྟགས་ནས། ཕྱི་རོལ་དུ་སྐྱེས་པ་ལ་སྐྱེས་པའོ་ཞེས་རྟོག་གོ །དེ་ཕྱི་རོལ་དུ་སྐྱེས་པ་ལ་སྐྱེས་པ་ཞེས་བརྟགས་ནས་ཆགས་པར་གྱུར་ཏེ། ཕྱི་རོལ་གྱི་སྐྱེས་པ་དང་ཕྲད་པར་འདོད་དོ། སྐྱེས་པ་དེ་ཡང་ནང་དུ་བདག་སྐྱེས་པ་ཞེས་རྟོག་སྟེ། ནང་དུ་བདག་ནི་སྐྱེས་པ་ཞེས་བརྟགས་ནས་ཕྱི་རོལ་དུ་བུད་མེད་ལ་བུད་མེད་ཅེས་རྟོག་གོ། །ཕྱི་རོལ་དུ་བུད་མེད་ལ་བུད་མེད་ཅེས་བརྟགས་ནས་ཆགས་པར་གྱུར་ཏེ། ཕྱི་རོལ་གྱི་བུད་མེད་དང་ཕྲད་པར་འདོད་དོ། ཕྲད་པར་འདོད་པས་བྲང་བར་འགྱུར་རོ། །ཕྲད་པའི་རྐྱེན་གྱིས་མེར་མེར་པོ་སྐྱེ་བར་འགྱུར་བའི་དུས་དེ་ཡོད་དོ། རྒྱལ་པོ་ཆེན་པོ་གང་ལ་ཀུན་དུ་བརྟག་པ་དང་། གང་ཀུན་དུ་རྟོག་དེ་གཉིས་ཀ་ཡང་མེད་དོ། བུད་མེད་ལ་ནི་བུད་མེད་མེད་དོ། སྐྱེས་པ་ལ་ནི་སྐྱེས་པ་མེད་དོ། དེ་ལྟར་མེད་ཅིང་ཡང་དག་པ་མ་ཡིན་པར་ཀུན་དུ་རྟོག་པ་སྐྱེས་ཏེ། ཀུན་དུ་རྟོག་པ་དེ་ཡང་ངོ་བོ་ཉིད་ཀྱིས་མེད་དོ། ཀུན་དུ་རྟོག་པ་ཇི་ལྟ་བ་དེ་བཞིན་དུ་ཕྲད་པ་དང་། མེར་མེར་པོ་ཡང་ངོ་བོ་ཉིད་ཀྱིས་མེད་དོ། གང་ངོ་བོ་ཉིད་མེད་པ་ཇི་ལྟར་སྲ་བ་སྐྱེད་པར་འགྱུར། རྒྱལ་པོ་ཆེན་པོ་དེ་ལྟར་ཀུན་དུ་རྟོག་པ་ཤེས་པར་བྱས་ནས་སྲ་བ་ཉིད་རྟོགས་པར་བྱ་སྟེ། ཅི་ནས་སྲ་བ་ནི་སྐྱེ་བའི་ཚེ་གང་ནས་ཀྱང་མི་འོང་བར་ཤེས་པར་བྱའོ། རྒྱལ་པོ་ཆེན་པོ་འདི་ལྟར་གང་ལུས་འདི་དུར་ཁྲོད་ཀྱི་མཐར་འགྱུར་བའི་དུས་
དེ་ཡོད་དེ། དེའི་སྲ་བ་དེ་འཇིག་ཅིང་འགག་པར་འགྱུར་བའི་ཚེ་ཤར་ཕྱོགས་སུ་མི་འགྲོ། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། སྟེང་དང་འོག་དང་། ཕྱོགས་མཚམས་རྣམས་སུ་ཡང་མི་འགྲོ་སྟེ། རྒྱལ་པོ་ཆེན་པོ་ནང་གི་སའི་ཁམས་ནི་དེ་ལྟར་བལྟའོ། ། རྒྱལ་པོ་ཆེན་པོ་འཇིག་རྟེན་གནས་པ་འདི་ནམ་མཁར་གྱུར་པ་ལ་ཚངས་པའི་གཞལ་མེད་ཁང་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པ་གནས་སུ་དུས་དེ་ཡོད་དེ། རྒྱལ་པོ་ཆེན་པོ་དེའི་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་གཞལ་མེད་ཁང་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པ་བྱུང་ཡང་། རྒྱལ་པོ་ཆེན་པོ་དེའི་སྲ་བ་རེ་འབྱུང་བའི་ཚེ་གང་ནས་ཀྱང་མི་འདོད། །ཁོར་ཡུག་དང་ཁོར་ཡུག་ཆེན་པོའི་རི་རྡོ་རྗེའི་རྒྱུ་ལས་གྲུབ་པ་སྲ་ཞིང་བརྟན་ལ་ལྷུན་སྟུག་པ་རྣམས་གནས་པར་གྱུར་ཀྱང་དེ་དག་གི་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་ངོ་། རིའི་རྒྱལ་པོ་རི་རབ་དག་དང་། གཉའ་ཤིང་འཛིན་དག་དང་། མུ་ཁྱུད་འཛིན་དག་དང་། གཤོལ་མདའ་འཛིན་དག་དང་། རྡོ་རྗེ་འཛིན་དག་དང་། སེང་ལྡེང་ཅན་དག་དང་། རྣམ་པར་འདུད་དག་དང་། རི་རྟ་རྣ་ངག་དང་། བསྟན་སྡུག་དང་། བལྟ་ན་སྡུག་ཆེན་པོ་དག་དང་། ཐེར་སྒྲེ་དག་དང་། སྤོས་ཀྱི་ངད་ལྡང་དག་དང་། གངས་རི་དང་། དེ་མ་ཡིན་པའི་རི་ནག་པོ་དག་གནས་པ་དང་། ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གནས་པ་དང་། རྔམས་སུ་དཔག་ཚད་བརྒྱད་ཁྲི་བཞི་སྟོང་ཡོད་ལ། རྒྱར་དཔག་ཚད་དྲུག་ཁྲི་ཡོད་པའི་ས་ཆེན་པོ་གནས་བར་གྱུར་ཀྱང་། རྒྱལ་པོ་ཆེན་པོ་སྲ་བ་དེ་འབྱུང་བའི་ཚེ་གང་ནས་ཀྱང་མི་འདོད། རྒྱལ་པོ་འཇིག་རྟེན་འདི་འཇིག་པར་འགྱུར་བའི་ཚེ་ས་ཆེན་པོ་འདི་མེས་ཚིག་པའམ། ཆུས་བཤིག་པའམ། རླུང་གིས་གཏོར་བར་འགྱུར་པའི་དུས་དེ་ཡོད་དེ། དེ་མེས་ཚིག་ན་ནི་དུ་བ་ཡང་མི་མངོན། ཐལ་བའི་ལྷག་མ་ཡང་མི་མངོན་པར་འགྱུར་རོ། འདི་ལྟ་སྟེ། དཔེར་ན་ནམ་མཁའ་ལ་མར་རམ། འབྲུ་མར་གྱི་མེས་བསྲེགས་ན་དུ་བ་ཡང་མི་མངོན་ཞིང་ཐལ་བའི་ལྷག་མ་ཡང་མི་མངོན་པར་འགྱུར་རོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་འདི་མེས་ཚིག་པའི་ཚེ་དུ་བ་ཡང་མི་མངོན་ཞིང་ཐལ་བའི་ལྷག་མ་ཡང་མི་མངོན་པར་འགྱུར་རོ། །ཆུས་བཤིག་པའི་ཚེ་ཡང་ལྷག་མ་ཅི་ཡང་མི་མངོན་པར་འགྱུར་ཏེ། འདི་ལྟ་སྟེ། དཔེར་ན་ལན་ཚྭ་ཆུའི་ནང་དུ་ཞུ་བ་ནི་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་ཆུས་བཤིག་པའི་ཚེ་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །རླུང་གིས་གཏོར་བའི་ཚེ་ཡང་ལྷག་མ་ཅུང་ཟད་ཀྱང་མི་མངོན་པར་འགྱུར་ཏེ། འདི་ལྟ་སྟེ། དཔེར་ན་རྣམ་པར་འཐོར་རླུང་གིས་འདས་པའི་བྱེའུ་ནི་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རླུང་གིས་གཏོར་བའི་ཚེ་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །རྒྱལ་པོ་ཆེན་པོ་དེ་ལྟར་སའི་ཁམས་དེ་འབྱུང་བ་ཡང་སྟོང་། སའི་ཁམས་འཇིག་པ་དང་འབྱུང་བ་ཡང་ངོ་བོ་ཉིད་ཀྱིས་སྟོང་ངོ་། རྒྱལ་པོ་ཆེན་པོ་སའི་ཁམས་ནི་ཐ་སྙད་ཙམ་མ་གཏོགས་པར་སའི་ཁམས་ཉིད་དུ་མི་དམིགས་ཏེ། ཐ་སྙད་དེ་ཡང་བུད་མེད་མ་ཡིན། སྐྱེས་པ་མ་ཡིན། རྒྱལ་པོ་ཆེན་པོ་དེ་ལྟར་དེ་ཡང་དག་པ་ཇི་ལྟ་བ་བཞིན་གྱི་ཤེས་རབ་ཀྱིས་རྟོགས་ཤིག །རྒྱལ་པོ་ཆེན་པོ་དེ་ལ་ཆུའི་ཁམས་ནི་རྣམ་པ་གཉིས་ཏེ། ནང་གི་དང་། ཕྱི་རོལ་བགྱིའོ། ནང་གི་ཆུའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ན་ཆུ་དང་། ཆུའི་རྣམ་པ་དང་། ཆུ་ཉིད་དང་། བརླན་པ་དང་། བརླན་པའི་རྣམ་པ་དང་། བརླན་པ་ཉིད་དང་། གཤེར་བ་ཉིད་དང་། ལུས་སུ་གཏོགས་པ་དང་། ཟིན་པའོ། དེ་ཡང་གང་ཞེ་ན། འདི་ལྟ་སྟེ། མཆི་མ་དང་། རྡུལ་དང་། མཆིལ་མ་དང་། ངར་སྣབས་དང་། ཆུ་སེར་དང་། ཚིལ་དང་། མཁྲིས་པ་དང་། ངར་སྣབས་དང་། རྣག་དང་། ཁྲག་དང་། འོ་མ་དང་། གཅིན་དང་། གཞན་ཡང་གང་ལུས་འདི་ལ་ནང་གི་ཁོང་ན་ཆུ་དང་། ཆུའི་རྣམ་པ་དང་། ཆུ་ཉིད་དང་། བརླན་པ་དང་། བརླན་པའི་རྣམ་པ་དང་། གཤེར་བ་ཉིད་དང་། ལུས་སུ་གཏོགས་པ་དང་། ཟིན་པ་འདི་ནི་ནང་གི་ཆུའི་ཁམས་ཤེས་བྱའོ། ཕྱི་རོལ་གྱི་ཆུའི་ཁམས་
གང་ཞེ་ན། གང་ཕྱི་རོལ་གྱི་ཆུ་དང་། ཆུའི་རྣམ་པ་དང་། ཆུ་ཉིད་དང་། བརླན་པ་དང་། བརླན་པའི་རྣམ་པ་དང་། བརླན་པ་ཉིད་དང་། གཤེར་བ་དང་། ལུས་སུ་མ་གཏོགས་པ་དང་། མ་ཟིན་པ་འདི་ནི་ཕྱི་རོལ་གྱི་ཆུའི་ཁམས་ཤེས་བྱའོ། རྒྱལ་པོ་ཆེན་པོ་དེ་ལ་ནང་གི་ཆུའི་ཁམས་འབྱུང་བའི་ཚེ་གང་ནས་ཀྱང་མི་འོང་ངོ་། རྒྱལ་པོ་ཆེན་པོ་སྡུག་པ་མཐོང་ན་མཆི་མ་འབྱུང་བ་དང་། སྡུག་བསྔལ་གྱི་ཉེན་པ་དང་། ཆོས་ཀྱི་ཤུགས་ཀྱིས་མཆི་མ་འབྱུང་བ་དང་། རླུང་གིས་བཏབ་བམ། རྣམ་པ་གཞན་དག་གིས་ཀྱང་མཆི་མ་འབྱུང་སྟེ། དཔྱད་བྱས་པས་ཀྱང་ནང་གི་ཆུའི་ཁམས་དེ་འཕེལ་བར་འགྱུར་བའི་དུས་དེ་ཡོད་དེ། རྒྱལ་པོ་ཆེན་པོ་ཆུའི་ཁམས་དེ་འབྱུང་བའི་ཚེ་གང་ནས་ཀྱང་མི་འོང་ངོ་། རྒྱལ་པོ་ཆེན་པོ་གང་ནང་གི་ཆུའི་ཁམས་ཡོངས་སུ་སྐམ་པར་འགྱུར་བའི་དུས་དེ་ཡོད་དེ། དེ་ཡོངས་སུ་སྐམ་ཞིང་འགག་པའི་ཚེ་གང་དུ་ཡང་མི་འགྲོའོ། རྒྱལ་པོ་ཆེན་པོ་གང་ནང་གི་མེའི་ཁམས་ཤས་ཆེ་བར་གྱུར་ན་དེས་ཆུའི་ཁམས་སུ་གདུང་བར་འགྱུར་བའི་དུས་དེ་ཡོད་དེ། གདུངས་པའི་ཚེ་གང་དུ་ཡང་མི་འགྲོའོ། །རྒྱལ་པོ་ཆེན་པོ་དེ་བཞིན་དུ་ནང་གི་ཆུའི་ཁམས་འབྱུང་བའི་ཚེ་གང་ནས་ཀྱང་མི་འོང་། འགག་པའི་ཚེ་གང་དུ་ཡང་མི་འགྲོའོ། རྒྱལ་པོ་ཆེན་པོ་འཇིག་རྟེན་འདི་འཆགས་པར་འགྱུར་བའི་དུས་དེ་ཡོད་དེ། འཇིག་རྟེན་གྱི་ཁམས་འདི་འཆགས་པར་འགྱུར་བའི་ཚེ་ནམ་མཁའ་འདི་ལ་ཀུན་དུ་སྤྲིན་ཤིན་དུ་སྟུག་པོའི་ཚོགས་སུམ་བཅུ་རྩ་གཉིས་འཁྲིགས་པར་འགྱུར་ཏེ། དེ་དགའ་ཁྲིགས་པས་ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཡོག་པར་འགྱུར་ཏེ། དེ་ལ་བསྐལ་པའི་བར་མ་ལྔའི་བར་དུ་གཤོལ་མདའ་ཙམ་གྱི་ཆར་གྱི་རྒྱུན་འབབ་པོ། །བསྐལ་པ་བར་མ་ལྔའི་བར་དུ་གླང་པོ་ཆེའི་ཕོ་མཚན་ཙམ་གྱི་ཆར་འབབ་བོ། །བསྐལ་པ་བར་མ་ལྔའི་བར་དུ་རྒྱུན་མི་འཆད་པའི་ཆར་འབབ་བོ། །བསྐལ་པ་བར་མ་ལྔའི་བར་དུ་ཐིགས་པ་ཆེན་པོའི་ཆར་འབབ་བོ། དེས་ས་ཆེན་པོ་འདི་ནས་ཚངས་པའི་འཇིག་རྟེན་གྱི་བར་དུ་ཆུས་ཁྱབ་པར་གང་བར་འགྱུར་ཏེ། རྒྱལ་པོ་ཆེན་པོ་ཆུའི་ཕུང་པོ་ཆེན་པོ་དེ་འབྱུང་བའི་ཚེའང་
གང་ནས་ཀྱང་མི་འོང་ངོ་། །རྒྱལ་པོ་ཆེན་པོ་གང་འཇིག་རྟེན་འདི་འཇིག་པར་འགྱུར་བའི་དུས་དེ་ཡོད་དེ། འཇིག་རྟེན་གྱི་ཁམས་འདི་འཇིག་པར་འགྱུར་བའི་ཚེ་ཉི་མ་འཇིག་རྟེན་དུ་འབྱུང་བར་འགྱུར་ཏེ། ཉི་མ་གཉིས་འཇིག་རྟེན་དུ་བྱུང་བས་ཆུ་མིག་དང་། ཆུ་བྲན་རྣམས་སྐམ་པར་འགྱུར་རོ། །དེ་ནས་ཉི་མ་གསུམ་འཇིག་རྟེན་དུ་འབྱང་སྟེ། ཉི་མ་གསུམ་འཇིག་རྟེན་དུ་བྱུང་བས་ཆུ་མིག་ཆེན་པོ་དང་། ཆུ་ཀླུང་ཆེན་པོ་རྣམས་སྐམ་པར་འགྱུར་རོ། །དེ་ནས་ཉི་མ་བཞི་འཇིག་རྟེན་དུ་འབྱུང་སྟེ། ཉི་མ་བཞི་འཇིག་རྟེན་དུ་བྱུང་བས་གང་ན་ཆུ་ཀླུང་ཆེན་པོ་བཞི་པོ་དེ་དག་འབབ་པའི་མཚོ་ཆེན་པོ་མ་དྲོས་པ་དེ་ཡང་ཡོངས་སུ་སྐམ་པར་འགྱུར། ཐིམ་པར་འགྱུར་ཏེ་མེད་པར་འགྱུར་རོ། དེ་ནས་ཉི་མ་ལྔ་འཇིག་རྟེན་དུ་འབྱུང་སྟེ། ཉི་མ་ལྔ་འཇིག་རྟེན་དུ་བྱུང་བས་རྒྱ་མཚོ་ཆེན་པོ་ཡང་དཔག་ཚད་གཅིག་ཙམ་གྱི་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །དཔག་ཚད་གཉིས་དང་། གསུམ་དང་། བཞི་དང་། ལྔ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། དཔག་ཚད་ལྔ་བཅུ་ཙམ་གྱི་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། དཔག་ཚད་བརྒྱ་དང་། ཉིས་བརྒྱ་དང་། སུམ་བརྒྱ་དང་། བཞི་བརྒྱ་དང་། དཔག་ཚད་ལྔ་བརྒྱ་དང་། དཔག་ཚད་སྟོང་དང་། ཉིས་སྟོང་དང་། སུམ་སྟོང་དང་། དཔག་ཚད་བཞི་སྟོང་ཙམ་དུ་རྒྱ་མཚོ་ཆེན་པོ་ཡང་དཔག་ཚད་གཅིག་ཙམ་གྱི་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །དཔག་ཚད་གཉིས་དང་། གསུམ་དང་། བཞི་དང་། ལྔ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། དཔག་ཚད་ལྔ་བཅུ་ཙམ་གྱི་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །དཔག་ཚད་བརྒྱ་དང་། ཉིས་བརྒྱ་དང་། བཞི་བརྒྱ་དང་། དཔག་ཚད་ལྔ་བརྒྱ་དང་། དཔག་ཚད་སྟོང་དང་། ཉིས་སྟོང་དང་། སུམ་སྟོང་དང་། དཔག་ཚད་བཞི་སྟོང་ཙམ་དུ་རྒྱ་མཚོ་ཆེན་པོ་ལས་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །རྒྱལ་པོ་ཆེན་པོ་རྒྱ་མཚོ་ཆེན་པོ་ལ་དཔག་ཚད་བཞི་ཁྲིའི་ཆུ་ལས་པར་འགྱུར་བ་དང་། དཔག་ཚད་སུམ་ཁྲི་དང་། ཉི་ཁྲི་དང་། དགུ་སྟོང་དང་། བརྒྱད་སྟོང་དང་། བདུན་སྟོང་དང་། དྲུག་སྟོང་དང་། ལྔ་སྟོང་དང་། བཞི་སྟོང་དང་། སུམ་སྟོང་དང་། ཉིས་སྟོང་དང་། སྟོང་གི་ཆུ་ལས་བར་འགྱུར་བ་དང་། དཔག་ཚད་དགུ་བརྒྱའི་ཆུ་ལས་པར་འགྱུར་བ་དང་། དཔག་ཚད་བརྒྱ་བརྒྱད་དང་། བདུན་བརྒྱ་དང་། དྲུག་བརྒྱ་དང་། ལྔ་བརྒྱ་དང་། བཞི་བརྒྱ་དང་། སུམ་བརྒྱ་དང་། ཉིས་བརྒྱ་དང་། བརྒྱའི་ཆུ་ལས་པར་འགྱུར་བ་དང་། དཔག་ཚད་ལྔ་བཅུ་དང་། བཞི་བཅུ་དང་། སུམ་བཅུ་དང་། ཉི་ཤུ་དང་། བཅུ་དང་། དགུ་དང་། བརྒྱད་དང་།
བདུན་དང་། དྲུག་དང་། ལྔ་དང་། བཞི་དང་། གསུམ་དང་། གཉིས་དང་། དཔག་ཚད་གཅིག་གི་ཆ་ལས་པར་འགྱུར་བ་དང་། ཤིང་ཏ་ལ་བཅུ་དང་། དགུ་དང་། བརྒྱད་དང་། བདུན་དང་། དྲུག་དང་། ལྔ་དང་། བཞི་དང་། གསུམ་དང་། ཤིང་ཏ་ལ་གཉིས་ཙམ་གྱི་ཆུ་ལས་པར་འགྱུར་བ་དང་། མི་འགྲེང་བཅུ་དང་། དགུ་དང་། བརྒྱད་དང་། བདུན་དང་། དྲུག་དང་། ལྔ་དང་། བཞི་དང་། གསུམ་དང་། མིའི་འགྲེང་གཉིས་སམ་གྱི་ཆུ་ལས་པར་འགྱུར་བ་དང་། ལྐོག་མ་ནུབ་ཙམ་དང་། མཚན་ཁུང་ནུབ་ཙམ་དང་། ལྟེ་བ་ནུབ་ཙམ་དང་། པུས་མོ་ནུབ་ཙམ་གྱི་ཆུ་ལས་པར་འགྱུར་བ་ནས། བ་ལང་གི་རྨིག་རྗེས་ཀྱི་ཆུ་ཙམ་གྱི་བར་དུ་ལས་པར་འགྱུར་བའི་དུས་དེ་ཡོད་དོ། །རྒྱལ་པོ་ཆེན་པོ་གང་རྒྱ་མཚོ་ཆེན་པོ་ལས་ཟིལ་བ་ཕྲམ་ཕྲུམ་ཙམ་ལས་པར་འགྱུར་བའི་དུས་དེ་ཡོད་དེ། འདི་ལྟ་སྟེ། དཔེར་ན་ཆར་བའི་ཐིགས་པ་ཆེན་པོ་བབ་ནས་ཆེན་པོ་ལ་ཐོག་མར་ཟིལ་བ་ཕྲམ་ཕྲུམ་ཙམ་དུ་འགྱུར་རོ། རྒྱལ་པོ་ཆེན་པོ་དེ་བཞིན་དུ་རྒྱ་མཚོ་ཆེན་པོ་དེ་ཡང་ཟིལ་པ་ཕྲམ་ཕྲུམ་ཙམ་ལས་པར་འགྱུར་བའི་དུས་དེ་ཡོད་དོ། རྒྱལ་པོ་ཆེན་པོ་གང་རྒྱ་མཚོ་ཆེན་པོ་དེ་འཛུབ་མོ་སྨྱུགས་པ་ཙམ་གྱི་ཆུ་ཡང་མ་ལས་པར་འགྱུར་བའི་དུས་དེ་ཡོད་དོ། རྒྱལ་པོ་ཆེན་པོ་དེ་ཙམ་དུ་ཆུའི་ཁམས་དེ་འགག་པའི་ཚེ་ཡང་གང་དུ་ཡང་མི་འགྲོ་སྟེ། ཤར་ཕྱོགས་དང་། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། སྟེང་དང་། འོག་དང་། ཕྱོགས་མཚམས་རྣམས་སུ་ཡང་མི་འགྲོའོ། །རྒྱལ་པོ་ཆེན་པོ་ཆུའི་ཁམས་དེ་ནི་སྐྱེ་བ་ཡང་སྟོང་། །འཇིག་པ་ཡང་སྟོང་། གནས་པའི་ཚེ་ཡང་ཆུའི་ཁམས་དེ་རང་བཞིན་གྱིས་སྟོང་སྟེ། རྒྱལ་པོ་ཆེན་པོ་ཆུའི་ཁམས་དེ་ནི་ཐ་སྙད་ཙམ་མ་གཏོགས་པར་ཆུའི་ཁམས་ཀྱིས་སྟོང་ཞིང་མི་དམིགས་ཏེ། ཐ་སྙད་དེ་ཡང་བུད་མེད་མ་ཡིན། །སྐྱེས་པ་མ་ཡིན་ནོ། །དེ་ལྟར་ཡང་དག་པར་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་རྟོགས་ཤིག །རྒྱལ་པོ་ཆེན་པོ་དེ་ལ་མེའི་ཁམས་ནི་རྣམ་པ་གཉིས་ཏེ། ནང་གི་དང་། ཕྱི་རོལ་གྱིའོ། །ནང་གི་མེའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་མེ་དང་། མེའི་རྣམ་པ་དང་། དྲོ་བ་
དང་། དྲོ་བའི་རྣམ་པ་དང་། ལུས་སུ་གཏོགས་པ་དང་། ཟིན་པའོ། །དེ་ཡང་གང་ཞེ་ན། གང་གིས་ལུས་འདི་གདུང་བ་དང་། ཀུན་དུ་གདུང་བ་དང་། ཡོངས་སུ་གདུང་བ་དང་། གང་གིས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་པ་དེ་ཞིང་ལེགས་པར་ཞུ་བར་འགྱུར་བ་དང་། གང་གི་ཤས་ཆེ་ན་རིམས་སོ་རིམས་སོ་ཞེས་བྱ་བའི་གྲངས་སུ་འགྲོ་བ་དང་། གཞན་ཡང་གང་ལུས་འདི་ལ་ནང་གི་ཁོང་ན་མེ་དང་། མེའི་རྣམ་པ་དང་། དྲོ་བ་དང་། དྲོ་བའི་རྣམ་པ་དང་། ལུས་སུ་གཏོགས་པ་དང་། ཟིན་པ་འདི་ནི་ནང་གི་མེའི་ཁམས་ཤེས་བྱའོ། །ཕྱི་རོལ་གྱི་མེའི་ཁམས་གང་ཞེ་ན། གང་ཕྱི་རོལ་གི་མེ་དང་། མེའི་རྣམ་པ་དང་། དྲོ་བ་དང་། དྲོ་བའི་རྣམ་པ་དང་། ལུས་སུ་གཏོགས་པ་དང་། མ་ཟིན་པ་སྟེ། དེ་ནི་མི་དག་གཙུབ་ཤིང་དང་ལྡན་པའམ། རྩྭ་དང་ལྡན་པའམ། བ་ལང་གི་ལྕི་བའི་བུ་རམ་འམ། ཤིང་བལ་གྱི་སྒོ་དང་ལྡན་པར་བྱས་ཤིང་མེ་འབྱིན་ཏེ། དེ་བྱུང་ནས་གྲོང་ཚིག །གྲོང་གི་ཕྱོགས་ཀྱང་ཚིག །གྲོང་ཁྱེར་རམ། གྲོང་ཁྱེར་གྱི་ཕྱོགས་སམ། ཡུལ་ལམ། ཡུལ་གྱི་ཕྱོགས་སམ། གླིང་ངམ། རྩྭའི་གཏོས་སམ། ནགས་སམ། ཤིང་ངམ། རྩྭའམ། བ་ལང་གི་ལྕི་བ་དག་སྲེག་ཅིང་འགྲོ་བ་དང་། གཞན་ཡང་གང་ཚུལ་འདི་དང་འདྲ་བ་འདི་ནི་ཕྱི་རོལ་གྱི་མེའི་ཁམས་ཤེས་བྱའོ། རྒྱལ་པོ་ཆེན་པོ་དེ་ལ་ཕྱི་རོལ་གྱི་མེའི་ཁམས་ནི་འབྱུང་བའི་ཚེ་ཡང་གང་ནས་ཀྱང་མི་འོང་ངོ་། །འགག་པའི་ཚེ་ཡང་གང་དུ་ཡང་སོགས་པར་མི་འགྲོ་སྟེ། དེ་ནི་རང་བཞིན་དང་བྲལ་བའི་ཕྱིར་མེད་པ་ལས་ཡོད་པར་འགྱུར་ཞིང་། ཡོད་པར་གྱུར་ནས་ཀྱང་མེད་པར་འགྱུར་རོ། རྒྱལ་པོ་ཆེན་པོ་དེ་ལ་རླུང་གི་ཁམས་ཀྱང་རྣམ་པ་གཉིས་ཏེ། ནང་གི་དང་། ཕྱི་རོལ་གྱིའོ། དེ་ལ་ནང་གི་རླུང་གི་ཁམས་གང་ཞེ་ན། གང་ལུས་འདི་ལ་རླུང་དང་། རླུང་གི་རྣམ་པ་དང་། ཡང་བ་ཉིད་དང་། གཡོ་བ་ཉིད་དང་། ལུས་སུ་གཏོགས་པ་དང་། ཟིན་པའོ། །དེ་ཡང་གང་ཞེ་ན། འདི་ལྟ་སྟེ། གྱེན་དུ་འགྲོ་བའི་རླུང་དང་མཐུར་དུ་འགྲོ་བ་དང་། ཐད་ཀར་འགྲོ་བ་དང་།
རྒྱབ་ཏུ་འགྲོ་བ་དང་། རྒྱབ་ན་གནས་པ་དང་། ལྟོ་ན་གནས་པ་དང་། འཆད་པར་བྱེད་པ་དང་། འགས་པར་བྱེད་པ་དང་། གཟེར་བ་དང་། འདར་བུ་དང་། སྣ་སྐང་དང་། རླུང་སྐྲན་དང་། དབུག་འབྱུང་བ་དང་རྔུབ་པ་དང་ལྡན་པ་དང་། ཡན་ལག་དང་ཉིད་ལག་ལ་གནས་པའི་རླུང་དག་དང་། གཞན་ཡང་གང་དག་ལུས་འདི་ལ་ནང་གི་ཁོང་ན་རླུང་དང་། རླུང་གི་རྣམ་པ་དང་། ཡང་པ་ཉིད་དང་། གཡོ་བ་ཉིད་དང་། ལུས་སུ་གཏོགས་པ་དང་། ཟིན་པ་འདི་ནི་ནང་གི་རླུང་གི་ཁམས་ཤེས་བྱའོ། །ཕྱི་རོལ་གྱི་རླུང་གི་ཁམས་གང་ཞེ་ན། གང་ཕྱི་རོལ་གྱི་རླུང་དེ། རླུང་གི་རྣམ་པ་དང་། ཡང་བ་ཉིད་དང་། གཡོ་བ་ཉིད་དང་། ལུས་སུ་མ་གཏོགས་པ་དང་། མ་ཟིན་པ་དག་སྟེ། ཕྱི་རོལ་གྱི་རླུང་དེ་ཡང་ཤར་ཕྱོགས་ཀྱི་རླུང་ཡོད་དོ། །ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་ཀྱི་རླུང་ཡོད་དོ། རྡུལ་དང་བཅས་པ་དང་། རྡུལ་མེད་པ་དང་། ཆུང་བ་དང་། ཆེ་བའི་རླུང་ཡོད་དོ། ཀུན་ཏུ་ཁྱབ་པའི་རླུང་དང་། རྣམ་པར་འཐོར་བའི་རླུང་དང་། ཚུབ་མའི་རླུང་དག་ཀྱང་ཡོད་དོ། རྒྱལ་པོ་ཆེན་པོ་རླུང་གི་ཕུང་པོ་ཆེན་པོ་ལངས་ན་ཤིང་དག་ཀྱང་གཅོད་རྩིག་པའི་ཁ་དག་དང་། རིའི་རྩེ་མོ་དག་ཀྱང་སྙིལ་ཞིང་བསྙིལ་ནས་རྨེག་མེད་པར་འགྱུར་བ་དང་། ཡང་སེམས་ཅན་དག་གོས་ཀྱི་མཐའ་མ་འམ། སྦུད་པའམ། རླུང་ཡང་དག་གིས་རླུང་གཡོབ་པའི་དུས་དེ་ཡོད་དེ་གཞན་ཡང་གང་ཚུལ་འདི་དག་འདྲ་བ་དེ་ནི་ཕྱི་རོལ་གྱི་རླུང་གི་ཁམས་ཤེས་བྱའོ། །རྒྱལ་པོ་ཆེན་པོ་དེ་ལ་ནང་དང་ཕྱིའི་རླུང་གི་ཁམས་ནི་འབྱུང་བའི་ཚེ་ཡང་གང་ནས་ཀྱང་མི་འོང་ངོ་། འགག་པའི་ཚེ་ཡང་གང་དུ་ཡང་སོགས་པར་མི་འགྲོ་སྟེ། རང་བཞིན་དང་བྲལ་བའི་ཕྱིར་མེད་པ་ལས་ཡོད་པར་འགྱུར་ཞིང་། ཡོད་པར་གྱུར་ནས་མེད་པར་འགྱུར་རོ། རྒྱལ་པོ་ཆེན་པོ་དེ་ལ་ནམ་མཁའི་ཁམས་ཀྱང་རྣམ་པ་གཉིས་ཏེ། ནང་གི་དང་། ཕྱི་རོལ་གྱིའོ། ། ནང་གི་ནམ་མཁའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ནས་ལུས་ལ་ཡོད་པ་དང་། ཟིན་པ་དང་།
ནམ་མཁའ་དང་། ནམ་མཁའི་རྣམ་པ་ནང་ཞེས་བྱ་བའི་གྲངས་སུ་འགྲོ་བ། མ་གང་བ་དང་། ལྤགས་པ་དང་། ཤ་དང་ཁྲག་གིས་དགང་བར་བྱ་བ་མ་ཡིན་པའོ། །དེ་ཡང་གང་ཞེ་ན། ལུས་འདི་ལ་མིག་གི་ནང་ཞེའམ། རྣ་བ། སྣའི་ནང་ཞེས་འམ། ཁ་ཞེའམ། ཁའི་སྒོ་ཞེའམ། ལྐོག་མ་ཞེའམ། མིད་པ་ཞེའམ། གང་ན་མི་དང་གང་དུ་གནས་པ་དང་། བདག་གིས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་མཐུར་དུ་རྒྱུ་བར་བྱེད་པ་དང་། གཞན་ཡང་ལུས་འདི་ལ་ནང་གི་ཁོང་ན་ལུས་ལ་ཡོད་པ་དང་། ཟིན་པ་ཕུང་པོར་གྱུར་པའམ། ཁམས་སུ་གྱུར་བའམ། སྐྱེ་མཆེད་དུ་གྱུར་པ་དག་གི་ནམ་མཁའ་དང་། ནམ་མཁའི་རྣམ་པ་དང་། མ་གང་བ་དང་། ལྤགས་པ་དང་། ཤ་དང་། ཁྲག་གིས་དགང་བར་བྱ་བ་མ་ཡིན་པ་ནང་གི་གྲངས་སུ་འགྲོ་བ་ཁོང་སྟོད་དང་། བུ་ག་ཞེས་བྱ་བ་དག་སྟེ། དེ་ནི་ནང་གི་ནམ་མཁའི་ཁམས་སོ། ཕྱི་རོལ་གྱི་ནམ་མཁའི་ཁམས་གང་ཞེ་ན། གང་ཅི་ཡང་རུང་སྟེ། ཕྱི་རོལ་གྱི་ནམ་མཁའ་དང་། ནམ་མཁའི་རྣམ་པ་དང་། མ་གང་བ་དང་། གཟུགས་སུ་གྱུར་པས་དགང་བར་བྱ་བ་མ་ཡིན་པ་མ་འདྲེས་པ་ཁོང་སྟོང་དང་། བུ་གར་གྱུར་བ་འདི་ནི་ཕྱི་རོལ་གྱི་ནམ་མཁའི་ཁམས་ཤེས་བྱའོ། རྒྱལ་པོ་ཆེན་པ་གང་ལས་ཀྱི་རྐྱེན་གྱི་སྐྱེ་མཆེད་རྣམས་འབྱུང་བའི་དུས་དེ་ཡོད་དེ། དེ་དག་ནམ་མཁའི་ཁམས་ལ་སྒྲིབ་པར་འགྱུར་ཏེ། དེ་ནང་གི་ནམ་མཁའི་ཁམས་ཤེས་བྱའི་གྲངས་སུ་འགྲོ་ཡང་དེ་ནི་ག་ལས་ཀྱང་མ་འོངས་སོ། རྒྱལ་པོ་ཆེན་པོ་གཟུགས་ཞིག་ན་ཐམས་ཅད་ནམ་མཁར་འགྱུར་བའི་དུས་དེ་ཡོད་དོ། དེ་ཅིའི་ཕྱིར་ཞེ་ན། ནམ་མཁའི་ཁམས་ནི་ཟད་མི་ཤེས་པའི་ཕྱིར་རོ། །དེ་ནི་ནང་གི་ནམ་མཁའི་ཁམས་ཤེས་བྱ་བར་ཤེས་པར་བྱ་སྟེ། གནས་ཤིང་མི་གཡོ་བའོ། རྒྱལ་པོ་ཆེན་པོ་འདི་ལྟ་སྟེ། དཔེར་ན་འདུས་མ་བྱེད་ནི་མྱ་ངན་ལས་འདས་པའི་དབྱིངས་ཏེ། དེ་བཞིན་དུ་ནམ་མཁའི་ཁམས་ཀྱང་ཐམས་ཅད་དུ་སོང་བར་བལྟ་བར་བྱའོ། རྒྱལ་པོ་ཆེན་པོ་འདི་ལྟ་སྟེ། དཔེར་ན་མི་ཞིག་གིས་ཐང་ལ་ཁྲོན་པའམ། རྫིང་བུ་
འམ། ཁྲོན་རིངས་སམ། རྫིང་ཞིག་བརྐོས་ན། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། དེའི་ནམ་མཁའ་འདེག་ལས་འོངས། གསོལ་པ། བཅོམ་ལྡན་འདས་དེ་ནི་ག་ལས་ཀྱང་མ་མཆིས་སོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་མི་དེས་ཁྲོན་པ་ནས་རྫིང་གི་བར་དེ་དག་ཕྱིར་བཀང་ན། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། །དེའི་ནམ་མཁའ་འདི་གང་དུ་སོང་། གསོལ་པ། བཅོམ་ལྡན་འདས་དེ་ནི་གང་དུ་ཡང་མ་མཆིས་ཏེ། དེ་ཅིའི་སླད་དུ་ཞེ་ན། ནམ་མཁའི་ཁམས་ནི་འགྲོ་བའམ་འོང་བར་ཉེ་བར་གནས་པ་མ་ལགས། བུད་མེད་ཀྱི་དངོས་པོ་དང་། སྐྱེས་པའི་དངོས་པོར་ཉེ་བར་གནས་པ་མ་ལགས་པའི་སླད་དུའོ། །བཀའ་སྩལ་པ། རྒྱལ་པོ་ཆེན་པོ་དེ་ལྟར་ན་ཕྱི་རོལ་གྱི་ནམ་མཁའི་ཁམས་ནི་མིག་གཡོ་མི་འགྱུར་བའོ། །དེ་ཅིའི་ཕྱིར་ཞེ་ན། ནམ་མཁའི་ཁམས་ནི་ནམ་མཁའི་ཁམས་ཀྱིས་སྟོང་ཞིང་། ནམ་མཁའི་ཁམས་ནི་ནམ་མཁའི་ཁམས་དང་བྲལ་བ་སྟེ། ནམ་མཁའི་ཁམས་ནི་བུད་མེད་ཀྱི་དངོས་པོར་ཉེ་བར་མི་གནས། སྐྱེས་པའི་དངོས་པོར་ཉེ་བར་མི་གནས་ཀྱིས། དེ་ལྟར་ཡང་དག་པ་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་རྟོགས་ཤིག །རྒྱལ་པོ་ཆེན་པོ་དེ་ལ་རྣམ་པར་ཤེས་པའི་ཁམས་གང་ཞེ་ན། མིག་གི་དབང་པོ་ནི་བདག་པོ། གཟུགས་ནི་དམིགས་པ། གཟུགས་སོ་སོར་རྣམ་པར་རིག་པ་སྟེ། སྔོན་པོ་རྣམ་པར་རིག་པའམ། སེར་པོ་དང་། དམར་པོ་དང་། ཁྲ་བོ་རྣམ་པར་རིག་པའམ། རིང་པོ་དང་། ཐུང་ངུ་དང་། སྦོམ་པོ་དང་། ཕྲ་མོ་རྣམས་པར་རིག་པ་སྟེ། རྒྱལ་པོ་ཆེན་པོ་དེ་ལྟར་གང་ཅི་ཡང་རུང་། ཁ་དོག་དང་། དབྱིབས་རྣམ་པར་རིག་པ་འདི་ནི་མིག་གི་རྣམ་པར་ཤེས་པའི་ཁམས་ཤེས་བྱའོ། དེ་བཞིན་དུ་གང་ཅི་ཡང་རུང་རྣ་བའི་དབང་པོ་བདག་པོ་ནས ཡིད་ཀྱི་དབང་པོ་ནི་བདག་པོ། ཆོས་ནི་དམིགས་པ་སྟེ། སྒྲ་རྣམ་པར་རིག་པའམ། དྲི་རྣམ་པར་རིག་པའམ། རོ་རྣམ་པར་རིག་པའམ། རེག་རྣམ་པར་རིག་པའམ། ཆོས་རྣམ་པར་རིག་པ་འདི་ནི་རྣ་བའི་རྣམ་པར་ཤེས་པའི་ཁམས་ནས་
ཡིད་ཀྱི་རྣམ་པར་ཤེས་པའི་བར་གྱི་ཁམས་ཏེ། དེ་ལྟར་དབང་པོ་དྲུག་ནི་བདག་པོ། ཡུལ་དྲུག་ནི་དམིགས་པ་ཡིན་ལ། ཡུལ་རྣམ་པར་རིག་པ་འདི་ནི་རྣམ་པར་ཤེས་པའི་ཁམས་ཤེས་བྱའོ། །རྒྱལ་པོ་ཆེན་པོ་རྣམ་པར་ཤེས་པའི་ཁམས་དེ་ནི་དབང་པོ་ལ་མི་རྟེན། ཡུལ་རྣམས་ལས་མ་འོངས། བར་གྱི་དབུས་ན་མི་གནས་ཏེ། དེ་ནི་ནང་ན་མ་ཡིན། ཕྱི་རོལ་ན་མ་ཡིན། གཉིས་མེད་པ་ལ་ཡང་མ་ཡིན། རྣམ་པར་ཤེས་པའི་ཁམས་དེ་ནི་དངོས་པོ་སོ་སོར་རྣམ་པར་རིག་ནས་འགག་སྟེ། དེ་འབྱུང་བའི་ཚེ་གང་ནས་ཀྱང་མ་འོངས། འགག་པའི་ཚེ་གང་དུ་ཡང་མི་འགྲོའོ། །རྣམ་པར་ཤེས་པའི་ཁམས་དེ་འབྱུང་བ་ཡང་སྟོན། འཇིག་པ་ཡང་སྟོང་སྟེ། རྣམ་པར་ཤེས་པའི་ཁམས་དེ་བྱུང་ཡང་རང་བཞིན་གྱིས་སྟོང་ངོ་། རྒྱལ་པོ་ཆེན་པོ་དེ་ལྟར་ན་ཐ་སྙད་མ་གཏོགས་པར་རྣམ་པར་ཤེས་པའི་ཁམས་དེ་ནི་རྣམ་པར་ཤེས་པའི་ཁམས་ཉིད་ཀྱིས་སྟོང་སྟེ། ཐ་སྙད་དེ་ཡང་སྐྱེས་པ་མ་ཡིན། བུད་མེད་མ་ཡིན་གྱིས། དེ་ནི་དེ་ལྟར་ཡང་དག་པ་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་རྟོགས་ཤིག །རྒྱལ་པོ་ཆེན་པོ་དེ་ལ་མིག་གི་སྐྱེ་མཆེད་གང་ཞེ་ན། དེ་ནི་འབྱུང་བ་ཆེན་པོ་བཞི་དང་བ་སྟེ། འདི་ལྟར་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་སོ། དེ་ལ་སའི་ཁམས་དང་བ་ནི་མིག་གི་སྐྱེ་མཆེད་མ་ཡིན་ནོ། །ཆུའི་ཁམས་དང་བ་ཡང་མ་ཡིན་ནོ། མེའི་ཁམས་དང་བ་ཡང་མ་ཡིན་ནོ། རླུང་གི་ཁམས་དང་བ་ཡང་མིག་གི་སྐྱེ་མཆེད་མ་ཡིན་ནོ། དེ་ཅིའི་ཕྱིར་ཞེ་ན། སའི་ཁམས་དང་བ་ནི་ཆོས་གང་ལ་ཡང་སྐྱེ་མཆེད་དམ། སྐྱེ་མཆེད་ཐོབ་པར་བྱ་བར་ཉེ་བར་མི་གནས་སོ། །དེ་བཞིན་དུ་རླུང་གི་བར་གྱི་ཁམས་དང་བ་ནི་ཆོས་གང་ལ་ཡང་སྐྱེ་མཆེད་དམ། སྐྱེ་མཆེད་ཐོབ་པར་བྱ་བ་ཉེ་བར་མི་གནས་སོ། དེ་ཅིའི་ཕྱིར་ཞེ་ན། ཆོས་དེ་དག་ནི་སེམས་པ་མེད་ཅིང་བྱེད་པ་མེད་ལ་ཅི་ཡང་མི་ནུས་པ་སྟེ། རྒྱལ་པོ་ཆེན་པོ་ཆོས་རྣམས་
ནི་རེ་རེ་ནས་བཙལ་ན་ཐ་སྙད་ཙམ་མ་གཏོགས་པར་མིག་གི་སྐྱེ་མཆེད་མི་དམིགས་སོ། དེ་ཅིའི་ཕྱིར་ཞེ་ན། སའི་ཁམས་དང་བ་ནི་སའི་ཁམས་དང་བས་སྟོང་། རླུང་གི་ཁམས་དང་བའི་བར་ནི་རླུང་གི་ཁམས་དང་བས་སྟོང་སྟེ། ཆོས་གང་དག་རང་བཞིན་གྱིས་སྟོང་པ་དེ་དག་ལ་དང་བའམ། འཁྲུགས་པར་འགྱུར་བ་ཡང་ག་ལ་ཡོད་དེ། གང་ལ་ངང་བའམ། འཁྲུགས་པ་མི་དམིགས་པ་དེ་དག་ཇི་ལྟར་གཟུགས་ལ་ལྟ་བར་འགྱུར། དེ་ལྟར་མིག་གི་སྐྱེ་མཆེད་ཀྱི་རང་བཞིན་གྱི་ཤིན་དུ་སྟོང་སྟེ། དེ་ནི་འོང་བ་དང་། འགྲོ་བ་མེད་པའི་ཕྱིར་སྔོན་གྱི་མཐར་ཡང་མི་དམིགས་སོ། ཕྱི་མའི་མཐའ་ཡང་མི་དམིགས་སོ། རང་བཞིན་མེད་པའི་ཕྱིར་དེ་ལ་གནས་པ་ཡང་མི་དམིགས་སོ། གང་རང་བཞིན་གྱིས་མེད་པ་དེ་ནི་བུད་མེད་ཀྱང་མ་ཡིན། སྐྱེས་པ་ཡང་མ་ཡིན་ནོ། གང་བུད་མེད་ཀྱང་མ་ཡིན། སྐྱེས་པ་ཡང་མ་ཡིན་པ་ནི་དེས་རློམ་སེམས་སུ་ག་ལ་འགྱུར་ཏེ། རྒྱལ་པོ་ཆེན་པོ་རློམ་སེམས་ནི་བདུད་ཀྱི་སྤྱོད་ཡུལ་ལོ། རློམ་སེམས་མེད་པ་ནི་སངས་རྒྱས་ཀྱི་སྤྱོད་ཡུལ་ལོ། དེ་ཅིའི་ཕྱིར་ཞེ་ན། ཆོས་ཐམས་ཅད་ནི་རློམ་སེམས་དང་བྲལ་བའོ། །རྒྱལ་པོ་ཆེན་པོ་ཡང་དག་པ་ཇི་ལྟ་བ་བཞིན་དུ་རྟོགས་ན་མིག་གི་སྐྱེ་མཆེད་ནི་མིག་གི་སྐྱེ་མཆེད་ཀྱིས་སྟོང་ངོ་། དེ་ཅིའི་ཕྱིར་ཞེ་ན། མིག་གི་སྐྱེ་མཆེད་འདི་ལ་ནི་མཚན་མ་མེད་དེ། དེའི་ཕྱིར་མིག་གི་སྐྱེ་མཆེད་ཀྱི་མཚན་མ་འདི་ནི་མིག་གི་སྐྱེ་མཆེད་ཀྱིས་སྟོང་སྟེ། འདི་ནི་སྟོང་པ་ཉིད་དོ། མིག་གི་སྐྱེ་མཆེད་ནི་མཚན་མ་དང་བྲལ་བ་སྟེ། འདི་ནི་མཚན་མ་མེད་པའོ། དེ་ནི་སྨོན་པར་མི་བྱེད་པས་འདི་ནི་སྨོན་པ་མེད་པའོ། རྒྱལ་པོ་ཆེན་པོ་དེ་ལྟར་ན་མིག་གི་སྐྱེ་མཆེད་ནི་རྣམ་པར་ཐར་པའི་སྒོ་གསུམ་སྟེ། མིག་གི་སྐྱེ་མཆེད་ནི་རྣམ་པར་ཐར་པ་ལ་མངོན་པར་ཕྱོགས་པའོ། རྒྱལ་པོ་ཆེན་པོ་དེ་ལ་རྣ་བའི་སྐྱེ་མཆེད་ནས་ལུས་ཀྱི་སྐྱེ་མཆེད་ཀྱི་བར་གང་ཞེ་ན།
གང་འབྱུང་བ་ཆེན་པོ་བཞི་དང་བའོ། རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་ཀྱི་བར་ནི་རྣམ་པར་ཐར་པ་ལ་མངོན་པར་ཕྱོགས་པ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་ཀླས་པ། གདགས་སུ་མེད་པ། ཐ་སྙད་མེད་པ། བརྗོད་དུ་མེད་པ། བརྗོད་པར་བྱ་བ་མ་ཡིན་པའོ། རྒྱལ་པོ་ཆེན་པོ་གང་ལ་དབང་པོ་རྣམས་ཐོགས་པར་འགྱུར་བ་དེ་ནི་ཡུལ་རྣམས་ཤེས་བྱ་སྟེ། མིག་ནི་གཟུགས་རྣམས་ལ་ཐོགས་པར་འགྱུར་བས་དེའི་ཕྱིར་གཟུགས་རྣམས་ནི་མིག་གི་ཡུལ་ཞེ་བྱའོ། དེ་བཞིན་དུ་རྣ་བ་ནི་སྒྲ་རྣམས་ལ། སྣ་ནི་དྲི་རྣམས་ལ། ལྕེ་ནི་རོ་རྣམས་ལ། ལུས་ནི་རེག་བྱ་རྣམས་ལ། ཡིད་ནི་ཆོས་རྣམས་ལ་ཐོགས་པར་འགྱུར་བས་དེའི་ཕྱིར་ཆོས་རྣམས་ནི་ཡིད་ཀྱི་ཡུལ་ཞེས་བྱའོ། །དེ་ལ་མིག་གཟུགས་རྣམས་ལ་ཐོགས་སོ་ཞེས་བྱ་བ་འདི་ནི་འབབ་པའི་ཐོགས་པར་འགྱུར་བར་བསྟན་ཏེ། འདི་ལྟར་མིག་ནི་གཟུགས་རྣམས་ལ་རྣམ་པ་གསུམ་དུ་འབབ་སྟེ། འཐུན་པ་རྣམས་ལ་སྡུག་པའི་འདུ་ཤེས་ཀྱིས་འབབ་པ་དང་། མི་མཐུན་པ་རྣམས་ལ་ཁོང་ཁྲོད་པའི་འདུ་ཤེས་ཀྱིས་འབབ་པ་དང་། འཐུན་པ་ཡང་མ་ཡིན་མི་འཐུན་པ་ཡང་མ་ཡིན་པ་རྣམས་ལ་བཏང་སྙོམས་ཀྱི་འདུ་ཤེས་ཀྱིས་འབབ་པའོ། དེ་བཞིན་དུ་ཡིད་ནི་ཆོས་རྣམས་ལ་ཐོགས་པར་འགྱུར་རོ། ཞེས་བྱ་བ་འདི་ནི་འབབ་པའི་ཐོགས་པར་འགྱུར་བར་བསྟན་ཏེ། འདི་ལྟར་ཡིད་ནི་ཆོས་རྣམས་ལ་རྣམ་པ་གསུམ་དུ་འབབ་སྟེ། འཐུན་པ་རྣམས་ལ་རྗེས་སུ་ཆགས་པས་འབབ་པ་དང་། མི་མཐུན་པ་རྣམས་ལ་ཁོང་ཁྲོ་བས་འབབ་པ་དང་། འཐུན་པ་ཡང་མ་ཡིན་མི་མཐུན་པ་ཡང་མ་ཡིན་པ་རྣམས་ལ་རྨོངས་པས་འབབ་པའི་ཡུལ་དེ་དག་ནི་ཡིད་ཀྱི་སྤྱོད་ཡུལ་ཞེས་བྱ་སྟེ། དེ་ལ་ཡིད་སྤྱོད་ཅིང་རྣམ་པར་སྤྱོད་པས་དེའི་ཕྱིར་ཡིད་ཀྱི་སྤྱོད་ཡུལ་ཞེས་བྱའོ། རྒྱལ་པོ་ཆེན་པོ་ཡིད་དེ་འཐུན་པའི་གཟུགས་རྣམས་རྗེས་སུ་ཆགས་པར་སྤྱོད་པ་དེས་ནི་དེའི་འདོད་ཆགས་སྐྱེ་བར་འགྱུར།
མི་མཐུན་པའི་གཟུགས་རྣམས་ལ་ཁོང་ཁྲོ་བར་སྤྱོད་པ་དེས་ནི་དེའི་སྐྱེ་བར་འགྱུར། འཐུན་པ་ཡང་མ་ཡིན་མི་མཐུན་པ་ཡང་མ་ཡིན་པ་རྣམས་ལ་རྨོངས་པར་སྤྱོད་པ་དེས་ནི་དེའི་གཏི་མུག་སྐྱེ་བར་འགྱུར་ཏེ། དེ་བཞིན་དུ་སྒྲ་དང་། དྲི་དང་། རོ་དང་། རེག་བྱ་རྣམས་ལ་ཡང་ཆོས་རྣམ་པ་གསུམ་ལ་དམིགས་པ་མྱོང་བར་འགྱུར་ཏེ། རྗེས་སུ་ཆགས་པ་དང་། ཁོང་ཁྲོ་བ་དང་། རྨོངས་པར་འགྱུར་བའོ། ཡིད་ཀྱི་ཤེས་བྱ་འཐུན་པའི་ཆོས་རྣམས་ལ་རྗེས་སུ་ཆགས་པར་སྤྱོད་པ་དེས་ནི་དེའི་འདོད་ཆགས་སྐྱེ་བར་འགྱུར། མི་མཐུན་པའི་ཆོས་རྣམས་ལ་ཁོང་ཁྲོ་བར་སྤྱོད་པ་དེས་ན་དེའི་ཞེ་སྡང་སྐྱེ་བར་འགྱུར། འཐུན་པ་ཡང་མ་ཡིན་མི་མཐུན་པ་ཡང་མ་ཡིན་པའི་ཆོས་རྣམས་ལ་རྨོངས་པར་སྤྱོད་པ་དེས་ནི་དེའི་གཏི་མུག་སྐྱེ་བར་འགྱུར་རོ། །རྒྱལ་པོ་ཆེན་པོ་དེ་ལ་དབང་པོ་རྣམས་ནི་སྒྱུ་མ་ལྟ་བུ། ཡུལ་རྣམས་ནི་རྨི་ལམ་ལྟ་བུར་ཤེས་པར་བྱ་སྟེ། རྒྱལ་པོ་ཆེན་པོ་འདི་ལྟ་སྟེ། དཔེར་ན་མི་ཞིག་ཉལ་བའི་རྨི་ལམ་ན་ཡུལ་གྱི་བཟང་མོ་དང་ལྷན་ཅིག་ཏུ་ཡོངས་སུ་སྤྱོད་པ་རྨིས་ལ། དེ་ཉལ་བ་ལས་སད་ན་བུད་མེད་ཡུལ་གྱི་བཟང་མོ་དེ་རྗེས་སུ་དྲན་པར་གྱུར་ན་རྒྱལ་པོ་ཆེན་པོ་དེ་ལ་ཇི་སྙམ་དུ་སེམས་ནི་ལམ་ན་མཐོང་བའི་ཡུལ་གྱི་བཟང་མོ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། སྐྱེས་བུ་གང་རྨི་ལམ་ན་ཡུལ་གྱི་བཟང་མོ་རྨི་བའི་བུད་མེད་དེ་དང་ལྷན་ཅིག་རྩེ་བ་དང་། དགའ་བ་དང་། མངོན་པར་ཞེན་པར་འགྱུར་བ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་ཡུལ་གྱི་བཟང་མོ་དེ་ནི་ཤིན་ཏུ་མ་མཆིས་ཤིང་མི་དམིགས་ཅན་དེ་དང་ལྷན་ཅིག་ཏུ་ཡོངས་སུ་སྤྱོད་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། །བཅོམ་ལྡན་
འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་མིག་གིས་གཟུགས་མཐོང་ན་ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་འཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་རྣམ་པ་གསུམ་དག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱ་བ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང་། ནུབ་ཕྱོགས་དང་། འོག་དང་། སྟེང་དང་། ཕྱོགས་མཚམས་རྣམས་སུ་བརྟེན་དེ་གནས་པ་མ་ཡིན། འདི་ནི་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ། ཚེ་ཡང་ཡོངས་སུ་ཟད་ཅིང་དེ་དག་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན་ཉལ་ཉལ་བ་ལས་སད་པའི་ཡུལ་གྱི་བཟང་མོ་དང་འདྲ་བར་ཡིད་ཀྱིས་དམིགས་པར་འགྱུར་རོ་རྒྱལ་པོ་ཆེན་པ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དེ་ཡང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། ཡང་ན་ནི་སེམས་ཅན་དམྱལ་བར། ཡང་ན་ནི་དུད་འགྲོའི་སྐྱེ་གནས་སུ། ཡང་ན་ནི་གཤིན་རྗེའི་འཇིག་རྟེན་དུ། ཡང་ན་ནི་ལྷ་མ་ཡིན་གྱི་རིས་སུ། ཡང་ན་ནི་མིའི་ནང་དུ། ཡང་ན་ནི་ལྷའི་ནང་དུ་འབྱུང་བར་འགྱུར་ཏེ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པའང་འབྱུང་ངོ་། དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་
སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་སྟེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ན་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །རྣམ་པར་ཤེས་པ་དང་པོ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་། ལས་ནི་ལས་ཀྱིས་སྟོང་། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོས་སྟོང་། འཆི་འཕོ་ནི་འཆི་འཕོས་སྟོང་། སྐྱེ་བ་ནི་སྐྱེ་བས་སྟོང་ལ། ལས་རྣམས་འབྲས་བུ་མེད་པར་མི་འགྱུར་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་དགྲ་དང་འཐབ་པ་ཞིག་རྨིས་ལ། ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། རྨི་ལམ་དུ་རྨིས་པ་འདི་དགྲ་དེའམ། དགྲ་དེ་འཐབ་པ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། བཀའ་སྩལ་པ། རྒྱལ་པོ་ཆེན་པོ་འདི་ལ་ཇི་སྙམ་དུ་སེམས་འོ་ན་སྐྱེས་བུ་གང་རྨི་ལམ་གྱི་དགྲ་ལ་མངོན་པར་ཞེན་པའམ། དགྲ་དང་འཐབ་པར་གྱུར་པ་དེ་མཁས་པའི་རང་བཞིན་ཅན་མ་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་དགྲ་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན་དེ་དང་འཐབ་པ་ལྟ་ག་ལ་མཆིས། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ན་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་ལྡན་པ་ཡང་མིག་གིས་གཟུགས་མཐོང་ན་ཡིད་བདེ་བར་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་པར་གྱུར་ནས་ཁོང་ཁྲོ་བར་འགྱུར། ཁོང་ཁྲོ་
བར་གྱུར་ནས་ཞེ་སྡང་བར་འགྱུར། ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། །ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་དང་། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དག་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན་ཉལ་ཉལ་བ་ལས་སད་པའི་དགྲ་དང་འཐབ་དང་འདྲ་བར་ཡིད་ཀྱིས་དམིགས་པར་འགྱུར་རོ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པ་རྣམ་པར་ཤེས་པ་དང་པོ་འབྱུང་སྟེ་སྐྱེས་སོ་ཞེས་བྱ་བའི་གྲངས་སུ་འགྲོའོ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ་། དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ལ་ནི་སྐྱེ་བ་ཞེས་བྱ་སྟེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་མེད་ལ་འཆི་འཕོ་དང་སྐྱེ་བར་མངོན་པར་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། ལས་དེ་དང་། སྐྱེ་བ་དེ་དང་། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐམས་ཅད་སྟོང་། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོས་སྟོང་། ལས་ནི་ལས་ཀྱིས་སྟོང་། འཆི་འཕོ་ནི་འཆི་འཕོས་སྟོང་། སྐྱེ་བ་ནི་སྐྱེ་བས་སྟོང་ལ། ལས་རྣམས་འབྲས་བུ་མེད་པར་མི་འགྱུར་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ་ལ་མིང་གི་བརྡར་བྱ་བ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ།། །།
བམ་པོ་བཅུ་གསུམ་པ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་གཉལ་བའི་རྨི་ལམ་ན་འདྲེས་ནོན་པ་རྨིས་ཏེ། འཇིགས་པས་ཤིན་དུ་རྨོངས་པར་གྱུར་ལ། ཉལ་བ་ལས་སད་ནས་འདྲེ་དེ་དང་ཤིན་ཏུ་རྨོངས་པར་གྱུར་པ་དེ་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་འདྲེ་དང་ཤིན་ཏུ་རྨོངས་པར་གྱུར་པ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་དེ་ལྟར་རྨི་ལམ་ན་མཐོང་བའི་འདྲེ་ལ་མངོན་པར་ཞེན་ཅིང་ཤིན་ཏུ་རྨོངས་པར་གྱུར་པའི་མི་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་འདྲེ་ནི་ཤིན་དུ་མ་མཆིས་ན་ཤིན་དུ་རྨོངས་པ་ལྟ་ག་ལ་མཆིས་ཏེ། གཞན་དུ་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོ་སྐྱེ་བོ་ཐོས་པ་དང་མི་ལྡན་པ་ཡང་མིག་གིས་གཟུགས་མཐོང་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་པས་ཤིན་དུ་རྨོངས་པར་འགྱུར་རོ། །ཤིན་དུ་རྨོངས་ནས་ཀུན་ནས་ཉོན་མོངས་པར་འགྱུར་རོ། ཀུན་ནས་ཉོན་མོངས་ནས་གཏི་མུག་ལས་བྱུང་བའི་ལས་ལུས་ཀྱི་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་པ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། སྟེང་དང་། ཕྱོགས་མཚམས་སུ་བརྟེན་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མད་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་
འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་འདྲེ་དང་ཤིན་དུ་རྨོངས་པ་དང་འདྲ་བར་ཡིད་ཀྱིས་དམིགས་པར་འགྱུར་རོ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་པ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་མངོན་པའི་སེམས་ཀྱི་རྒྱུད་ལ་སྐལ་བ་འདྲ་བ་འབྱུང་ངོ་། དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་སྟེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། རྣམ་པར་ཤེས་པ་དང་པོ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་། ལས་ནི་ལས་ཀྱིས་སྟོང་། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོས་སྟོང་། འཆི་འཕོ་ནི་འཆི་འཕོས་སྟོང་། སྐྱེ་བ་ནི་སྐྱེ་བས་སྟོང་། ལས་འབྲས་བུ་མེད་པར་མི་འགྱུར་བར་ཡང་མངོན་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། རྒྱལ་པོ་ཆེན་པོ་འདི་ལྟ་སྟེ། དཔེར་ན་མིག་ཞིག་ཉལ་བའི་རྨི་ལམ་ན་ཡུལ་གྱི་བུད་མེད་བཟང་མོ་གླུ་ལེན་པའི་གླུ་སྙན་པ་དང་། པི་བང་ལེན་པའི་སྒྲ་སྙན་པ་ཉན་ཅིང་། དེ་གླུ་དང་རོལ་མོའི་སྒྲ་དེ་ཡོངས་སུ་སྦྱོང་བ་རྨིས་ལ། ཉལ་བ་ལས་སད་ནས་གླུ་དང་རོལ་མོ་དེ་ཉིད་ན་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་
ཡུལ་གྱི་བུད་མེད་བཟང་མོ་དང་། གླུ་དང་། རོལ་མོའི་སྒྲ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་འོ་ན་དེ་ལྟར་རྨི་ལམ་ན་མཐོང་བའི་ཡུལ་གྱི་བུ་མེད་བཟང་མོ་དང་། གླུ་དང་། རོལ་མོའི་སྒྲ་ལ་མངོན་པར་ཞེན་པའི་མི་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། རྨི་ལམ་ན་མཐོང་བའི་ཡུལ་གྱི་བུད་མེད་བཟང་མོ་དེ་ནི་ཤིན་དུ་མ་མཆིས་ཤིང་མི་དམིགས་ན་དེའི་གླུ་དང་རོལ་མོའི་སྒྲ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་ཞེན་པའི་མི་དེ་ནི་འཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་སྒྲ་ཐོས་ན་ཡིད་དུ་འོང་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་ཆགས་པར་འགྱུར་རོ། རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་དེ་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་དང་། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ། ཚེ་ཡང་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན་ཉལ་ཉལ་བ་ལས་སད་པའི་ཡུལ་གྱི་བཟང་མོའི་གླུ་དང་རོལ་མོའི་སྒྲ་ལྟ་བུར་ཡིད་ཀྱིས་དམིགས་པར་འགྱུར་རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་།
ལས་དམིགས་པ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པའི་འགགས་མ་ཐག་ཏུ་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་ངོ་། དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་སྟེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། རྣམ་པར་ཤེས་པ་དང་པོ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་། ལས་ནི་ལས་ཀྱིས་སྟོང་། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོས་སྟོང་། འཆི་འཕོ་བ་ནི་འཆི་འཕོས་སྟོང་། སྐྱེ་བ་ནི་སྐྱེ་བས་སྟོང་ལ་ལས་རྣམས་འབྲས་བུ་མེད་པར་མི་འགྱུར་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། ། རྒྱལ་པོ་ཆེན་འདི་ལྟ་སྟེ། དཔེར་ན་མི་ཞིག་ཉལ་བའི་རྨི་ལམ་ན་མ་ཤི་བའམ། ཕ་ཤི་བའམ། སྡུག་པ་གང་ཡང་རུང་བ་དག་དང་བྲལ་ཏེ། སྡུག་པ་དང་བྲལ་བས་མྱ་ངན་དུ་གྱུར་ནས་ཉམ་ཐག་པར་དུ་བ་ཞིག་རྨིས་ལ། དེ་ཉལ་བ་ལས་སད་ནས་སྡུག་པ་དང་བྲལ་བ་དེ་དང་། སྡུག་བསྔལ་ཞིང་དུ་དུ་བ་དེ་དྲན་ན། རྒྱལ་པོ་ཆེན་པོ་དེ་ཇི་སྙམ་དེ་སེམས། རྨི་ལམ་གྱི་སྡུག་པ་དང་བྲལ་བ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། བཀའ་སྩལ་པ། རྒྱལ་པོ་ཆེན་འོ་ན་སྐྱེས་བུ་གང་རྨི་ལམ་གྱི་སྡུག་པ་དང་བྲལ་བ་དང་། སྡུག་བསྔལ་བར་དུ་བ་ལ་མངོན་པར་ཞེན་པ་དེ་
མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་སྡུག་པ་ཉིད་ཀྱང་ཤིན་དུ་མ་མཆིས་ན། དེ་དང་བྲལ་བ་དང་། མྱ་ངན་བགྱིས་པ་དང་། ངུས་པ་དང་། སྨྲེ་སྔགས་བཏོན་པ་ལྟ་ག་ལ་མཆིས་ཏེ། གཞན་དུ་ན་གང་རྨི་ལམ་ན་མཐོང་བའི་སྡུག་པ་བྲལ་བ་དང་། སྡུག་བསྔལ་དང། ངུས་པ་ལས་མངོན་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་རྣ་བས་སྒྲ་ཐོས་ན་ཡིད་དུ་མི་འོང་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར། ཁོང་ཁྲོ་བར་གྱུར་ནས་ཞེ་སྡང་བར་འགྱུར། ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱི་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་པ་ཉིད་ནས་ཟད་ཙང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་དང་། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མདོ་ན་མ་ཡིན། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་སྡུག་པ་དང་བྲལ་བ་དང་། སྡུག་བསྔལ་བར་དུ་བ་ལྟ་བུར་ཡིད་ཀྱིས་དམིགས་པར་འགྱུར་རོ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དེ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱིས་རྒྱུད་སྐལ་པ་འདྲ་བ་འབྱུང་ངོ་། དེ་ལ་གང་རྣམ་
པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བ་མངོན་པར་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོངས། འགག་པའི་ཚེ་ཡང་གང་དུ་ཡང་མི་འགྲོའོ། ལས་དང་། རྣམ་པར་སྨིན་པ་དང་། རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང་། ལས་དང་། རྣམ་པར་སྨིན་པ་དང་། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོའི་རང་བཞིན་གྱིས་སྟོང་། འཆི་འཕོ་ནི་འཆི་འཕོའི་རང་བཞིན་གྱིས་སྟོང་། སྐྱེ་བ་དེ་ནི་སྐྱེ་བའི་རང་བཞིན་གྱིས་སྟོང་། འཁོར་བ་ཡང་འཁོར་བའི་རང་བཞིན་གྱིས་སྟོང་སྟེ། རྒྱལ་པོ་ཆེན་པོ་དེ་ལྟར་ཆོས་ཐམས་ཅད་སྟོང་པ་འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། གང་སྟོང་པ་ཉིད་ཀྱི་མཚན་མས་སྟོང་པ་འདི་ནི་རྣམ་པར་ཐར་པའི་སྒོ་མཚན་མ་མེད་པའོ། ། གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི་རྣམ་པར་ཐར་པའི་སྒོ་སྨོན་པ་མེད་པའོ། རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཚིག་གི་དོན་ཤེས་པའི་སྒྲ་ཞིག་ཐོས་ལ། ཉལ་བ་ལས་སད་ནས་སྒྲ་དེ་དྲན་པར་གྱུར་ན་རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་ཐོས་པའི་སྒྲ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་དོན་མ་ཤེས་པའི་སྒྲ་ཐོས་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་
ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་ཐོས་པའི་སྒྲ་དེ་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན། ཚིག་དེའི་དོན་ཤེས་པའམ། ཚིག་གི་དོན་མ་ཤེས་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་ཏེ། མངོན་པར་ཞེན་ནས་ཤིན་དུ་རྨོངས་པར་འགྱུར་རོ། ཤིན་དུ་རྨོངས་པས་གཏི་མུག་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་དང་། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་ཚིག་གི་དོན་མ་ཤེས་པའི་སྒོ་ལྟ་བུར་ཡིད་ཀྱིས་དམིགས་པར་འགྱུར་རོ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་དང་། ལས་དམིགས་པ་དེ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་
རྟེན་ཕ་རོལ་དུ་འཕོ་བ་ཡང་མེད་ལ་འཆི་འཕོ་དང་སྐྱེ་བར་མངོན་པར་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། རྣམ་པར་ཤེས་པ་དང་པོ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་། ལས་ནི་ལས་ཀྱིས་སྟོང་། རྣམ་པར་སྨིན་པ་ནི་རྣམ་པར་སྨིན་པའི་རང་བཞིན་གྱིས་སྟོང་། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོའི་རང་བཞིན་གྱིས་སྟོང་། འཆི་འཕོ་དང་སྐྱེ་བ་ནི་འཆི་འཕོ་དང་སྐྱེ་བའི་རང་བཞིན་གྱིས་སྟོང་། འཁོར་བ་ནི་འཁོར་བའི་རང་བཞིན་གྱིས་སྟོང་ལ། ལས་རྣམས་ཆུད་མ་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། རྒྱལ་པོ་ཆེན་པོ་འདི་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཙན་དན་ནམ། ཏ་མ་ལའི་ལོ་མ་དང་། སྤོས་ཀྱི་རྣམ་པ་གཞན་གང་ཡང་རུང་བས་བདག་གི་ལུས་བསྐུལ་པར་རྨིས་ལ། ཉལ་བ་ལས་སད་ནས་ཙན་དན་ནམ། ཏ་མ་ལའི་ལོ་མའམ། སྤོས་ཀྱི་རྣམ་པ་གཞན་གང་ཡང་རུང་བ་དེ་དག་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ཙན་དན་ནམ། ཏ་མ་ལའི་ལོ་མའམ། སྤོས་ཀྱི་རྣམ་པ་གཞན་གང་ཡང་རུང་བ་དེ་དག་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་དེ་ལྟར་ན་རྨི་ལམ་ན་མཐོང་བའི་ཙན་དན་ནམ། ཏ་མ་ལའི་ལོ་མའམ། སྤོས་ཀྱི་རྣམ་པ་གང་ཡང་རུང་བ་དེ་དག་ལ་མངོན་པར་ཞེན་ཅིང་དེས་བདག་གི་ལུས་སྐུར་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་ཙན་དན་ནམ། ཏ་མ་ལའི་ལོ་མའམ། སྤོས་ཀྱི་རྣམ་པ་གང་ཡང་རུང་བ་དེ་
དག་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན་དེས་སྐུད་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་སྣས་དྲི་ཚོར་ན་ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་འཆགས་པར་འགྱུར་རོ། རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་དང་། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་བ་ལས་སད་པའི་ཙན་དན་ནམ། ཏ་མ་ལའི་ལོ་མའམ། སྤོས་ཀྱི་རྣམ་པ་གང་ཡང་རུང་བ་སྟེ་དེ་ལྟ་བུར་ཡིད་ཀྱིས་དམིགས་པར་འགྱུར་རོ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དེ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་ངོ་། དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་
ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། ལས་དང་རྣམ་པར་སྨིན་པ་དང་། རྣམ་པར་ཤེས་པ་དང་པོ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་གྱིས་སྟོང་། ལས་ནི་ལས་ཀྱི་རང་བཞིན་གྱིས་སྟོང་། རྣམ་པར་སྨིན་པ་ནི་རྣམ་པར་སྨིན་པའི་རང་བཞིན་གྱིས་སྟོང་། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོའི་རང་བཞིན་གྱིས་སྟོང་། འཆི་འཕོ་དང་སྐྱེ་བ་ནི་འཆི་འཕོ་དང་སྐྱེ་བའི་རང་བཞིན་གྱིས་སྟོང་། འཁོར་བ་ནི་འཁོར་བའི་རང་བཞིན་གྱིས་སྟོང་ལ། ལས་རྣམས་ཆུད་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིག་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་མི་ཞིག་ཉལ་བའི་རྨི་ལམ་ན་ཁྱི་རོའམ། མི་རོའམ། སྦྲུལ་གྱི་རོ་མགུལ་དུ་བཏགས་པ་ཞིག་རྨིས་ལ། དེ་ཉལ་པ་ལས་སད་ནས་དེ་ཉིད་དྲན་པར་གྱུར་ན་རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་གྱི་ཁྱི་རོ་དང་། མི་རོ་དང་། སྦྲུལ་གྱི་རོ་དེ་དག་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་འོ་ན་སྐྱེས་བུ་གང་རྨི་ལམ་གྱི་ཁྱི་རོ་དང་། མི་རོ་དང་། སྦྲུལ་གྱི་རོ་མགུལ་དུ་བཏགས་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་ཁྱི་རོའམ། མི་རོའམ། སྦྲུལ་གྱི་རོ་དེ་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན། དེ་མགུལ་དུ་བཏགས་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་སྣས་དྲི་ཚོར་བ་
ན་ཡིད་དུ་མི་འོང་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །ཁོང་ཁྲོ་བར་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་རྣམ་པ་བཞི། ཡིད་ཀྱིས་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་དང་། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མདོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ། ཚེ་ཡང་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན་ཉལ་ཉལ་བ་ལས་སད་པའི་ཁྱི་རོ་དང་། མི་རོ་དང་། སྦྲུལ་གྱི་རོ་ལྟར་བུར་ཡིད་ཀྱིས་དམིགས་པར་འགྱུར་རོ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དེ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་ངོ་། དེ་ལ་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། ལས་དང་། རྣམ་པར་སྨིན་པ་དང་། རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན།
རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ནི་འཁོར་བའི་རང་བཞིན་གྱིས་སྟོང་པའི་བར་དུ་སྟེ། དེ་ནི་རྣམ་པར་ཤེས་པའི་སྒོ་སྟོང་པ་ཉིད་དོ། །གང་རང་བཞིན་གྱིས་སྟོང་ཞིང་མེད་པ་དེ་ནི་མཚན་མ་མེད་པའོ། །གང་མཚན་མ་མེད་པ་དེ་ནི་སྨོན་པ་མེད་པའོ། རྒྱལ་པོ་ཆེན་པོ་དེ་ལྟར་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨིས་ལམ་ན་བདག་ཉིད་སྣའི་དབང་པོ་ཉམས་པར་རྨིས་ལ་ཉལ་བ་ལས་སད་ནས་སྣའི་དབང་པོ་ཉམས་པར་གྱུར་པ་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་དེ་ལྟར་རྨི་ལམ་ན་སྣའི་དབང་པོ་ཉམས་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་སྣའི་དབང་པོ་ཉིད་ཀྱང་ཤིན་དུ་མ་མཆིས་ཤིང་མིང་དམིགས་ན་དེའི་ཉམས་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོ་སྐྱེ་བོ་ཐོས་པ་དང་མི་ལྡན་པ་ཡང་སྣས་དྲི་ཚོར་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་དུ་རྨོངས་པར་འགྱུར་རོ། ཤིན་དུ་རྨོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱེད་པ་དེ་ཡང་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས། འདི་ན་མ་ཡིན།
ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ་དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་སྣའི་དབང་པོ་ཉམས་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དེ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་ངོ་། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོས་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང་། རྣམ་པར་སྨིན་པ་དང་། རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། །འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་པ་ནས་འཁོར་བ་ནི་འཁོར་བའི་རང་བཞིན་གྱིས་སྟོང་པའི་ཕྱིར་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་བཀྲེས་པ་ལས་རོ་སྣ་བརྒྱ་དང་ལྡན་པའི་ཁ་ཟས་ལ་ཚིམ་ཚིམ་དུ་ཟོས་པ་ཞིག་རྨིས་ལ། ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ཁ་ཟས་རོ་བརྒྱ་དང་ལྡན་པ་དེ་ཡང་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །
བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་མཐོང་བའི་ཁ་ཟས་རོ་བརྒྱ་དང་ལྡན་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་ཁ་ཟས་རོ་སྣ་བརྒྱད་དང་ལྡན་པ་དེ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེས་དོན་དེ་ལ་ཡོངས་སུ་སྦྱོང་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོ་སྐྱེ་བོ་ཐོས་པ་དང་མི་ལྡན་པ་ཡང་ལྕེས་རོ་མྱོང་ན་ཡིད་བདེ་བར་འགྱུར་བ་རྣམས་ལ་མངོན་པར་ཞེན་ཏེ། དེ་ལ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། དེ་ནི་ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་བི་ན་མ་ཡིན། བར་མདོ་ན་མ་ཡིན་པའི་བར་དུ་སྟེ། དུས་གཞན་འཆི་བའི་དུས་དང་ཚོད་ཉེ་བར་གནས་པའི་སྲོག་གི་དབང་པོ་འགགས་ཏེ། ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་ཁ་ཟས་རོ་བརྒྱ་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དེ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགག་མ་ཐག་ཏུ་བར་མ་ཆད་པར་གང་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་ངོ་། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་
སུ་འགྱུར། གང་ལ་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པར་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང་། རྣམ་པར་སྨིན་པ་དང་། རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་། །འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ནི་འཁོར་བའི་རང་བཞིན་གྱིས་སྟོང་པའི་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡོད་དེ། དེ་ལ་ཀུན་རྫོབ་ཀྱི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཤིན་དུ་བཀྲེས་པར་གྱུར་ཏེ། སྐུ་བ་ཁ་བོའི་ས་བོན་ནམ། ཀོ་ཤཏ་ཀའི་ས་བོན་ནམ། པི་ཙུ་མར་ངའི་ས་བོན་ཞིག་ཟོས་པར་རྨིས་ལ། ཉལ་བ་ལས་སད་ནས་དེ་ཉིད་དྲན་པར་འགྱུར། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་གྱི་སྐུ་བ་ཁ་བོ་དང་། པི་ཙུ་མར་དའི་ས་བོན་གྱི་བར་དུ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་འོ་ན་སྐྱེས་བུ་གང་རྨི་ལམ་གྱི་སྐུ་བ་ཁ་བོ་དང་། པི་ཙུ་མར་དའི་ས་བོན་གྱི་བར་དུ་ཟོས་པ་དེ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་སྐུ་བ་ཁ་བོ་དང་། པི་ཙུ་མར་དའི་ས་བོན་གྱི་བར་དུ་དེ་དག་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན་དེ་དག་ཟ་བ་ལྟ་ག་ལ་མཆིས། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་ལྡན་པ་ཡང་ལྕེ་རོ་མྱོང་ན་ཡིད་དུ་མི་འོང་བ་རྣམས་ལ་ཡང་
མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །ཁོང་ཁྲོ་བར་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་འགྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུས་བྱས་པ་དེ་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་མ་ཡིན་པ་ནས་འདི་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་བ་ལས་སད་པའི་སྐུ་བ་ཁ་བོ་དང་། པི་ཙུ་མར་དའི་ས་བོན་གྱི་བར་དུ་ཟ་བ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱིས་རྒྱུད་སྐལ་བ་འདྲ་བ་འབྱུང་ངོ་། །དེ་ལ་གང་རྣམ་པར་ཤེས་མ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ་འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང་། རྣམ་པར་སྨིན་པ་དང་། རྣམ་པར་ཤེས་པ་དང་པོ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ནི་འཁོར་བའི་རང་བཞིན་གྱིས་སྟོང་
པའི་བར་དུ་སྟེ། རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་སྟོང་པ་འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི་རྣམ་པར་ཐར་པའི་སྒོ་མཚན་མ་ཡོད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི་རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པ་དེ་ལྟར་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་བདག་ཉིད་ལྕེའི་དབང་པོ་ཉམས་པར་རྨིས། ཉལ་བ་སད་ནས་ལྕེའི་དབང་པོ་ཉམས་པར་གྱུར་བ་དེ་ཉིད་དྲན་པར་གྱུར་ན་རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ལྕེའི་དབང་པོ་ཉམས་པ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་ལྕེའི་དབང་པོ་ཉམས་པར་གྱུར་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་ལྕེའི་དབང་པོ་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན་དེའི་ཉམས་པ་ལྟ་མཆིས་པར་ག་ལ་འགྱུར་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལྕེས་རོ་མྱོང་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་དུ་རྨོངས་པར་འགྱུར་རོ། །ཤིན་དུ་རྨོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་རྣམ་པ་བཞི། ཡིད་ཀྱིས་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་
གནས་པ་མ་ཡིན་པ་ནས་འདི་ན་མ་ཡིན། ཕ་བིན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་ལྕེ་འི་དབང་པོ་ཉམས་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དེ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ་། །དེ་ལ་གང་རྣམ་པར་ཤེས་པ་ཐ་མ་འགགས་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ན་འཇིག་རྟེན་ཕ་རོལ་དུ་འཕོ་བ་ཡང་མེད་ལ་འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མ་ནས་རྣམ་པར་ཤེས་པ་དང་པོའི་བར་དུ་སྐྱེས་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་པ་ནས་འཁོར་བ་ནི་འཁོར་བའི་རང་བཞིན་གྱིས་སྟོང་པའི་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་ཀུན་རྫོབ་ཀྱི་བརྡ་ཙམ་མ་གཏོགས་པར་བྱེད་པ་པོའམ། ཟད་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཡུལ་གྱི་བཟང་མོ་ཞིག་པང་དུ་འཁྱུད་པ་རྨིས་ལ། དེ་དག་རེག་པ་ཉམས་སུ་མྱོང་ནས་ཉལ་བ་སད་དེ་ཡུལ་གྱི་བཟང་མོ་དེ་ཉིད་དྲན་པར་འགྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ཡུལ་གྱི་བཟང་མོ་དང་རེག་པ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་
སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་མཐོང་བའི་ཡུལ་གྱི་བཟང་མོ་དེ་དང་རེག་པ་ལ་མངོན་པར་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་ཡུལ་གྱི་བཟང་མོ་དེ་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན་དེ་དང་རེག་པ་ལྟ་ག་ལ་མཆིས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལུས་ཀྱིས་རེག་བྱ་རྣམས་ལ་རེག་ན། ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་བ་ལས་སད་པའི་ཡུལ་གྱི་བཟང་མོ་ལ་རེག་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་བར་དང་། ལས་དམིགས་པ་དེ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ་། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་
བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་ཀུན་རྫོབ་ཀྱི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཟངས་ཀྱི་སྤང་ལེབ་ཤིན་དུ་འབར་བ་ཞིག་པང་དུ་འཁྱུད་པ་རྨིས་ལ། དེ་ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་གྱི་ཟངས་ཀྱི་སྤང་ལེབ་ཤིན་དུ་འབར་བ་ལ་རེག་པ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་འོ་ན་སྐྱེས་བུ་གང་རྨི་ལམ་གྱི་ཟངས་ཀྱི་སྤང་ལེབ་ཤིན་དུ་འབར་བ་པང་དུ་འཁྱུད་པ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་ཟངས་ཀྱི་སྤང་ལེབ་ཤིན་དུ་འབར་བ་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན་དེ་ལ་རེག་པ་ལྟ་ག་ལ་མཆིས་ཏེ། གཞན་དུ་ན་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོ་སྐྱེ་བོ་ཐོས་པ་དང་མི་ལྡན་པ་ཡང་ལུས་ཀྱིས་རེག་བྱ་རྣམས་ལ་རེག་ན་ཡིད་དུ་མི་འོང་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །ཁོང་ཁྲོ་བར་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་
འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན་ཉལ་ཉལ་བ་ལས་སད་པའི་ཟངས་ཀྱི་སྤང་ལེབ་ཤིན་དུ་འབར་བ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་ངོ་། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ། ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྣམ་པར་ཤེས་པ་ཐ་མ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ཡང་འཁོར་བའི་རང་བཞིན་གྱིས་སྟོང་པའི་བར་དུ་སྟེ། རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་སྟོང་པ་འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི་རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི་རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་
ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་བདག་ཉིད་ལུས་ཀྱི་དབང་པོ་ཉམས་པར་རྨིས་ལ། དེ་ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ལུས་ཀྱི་དབང་པོ་ཉམས་པ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་ལུས་ཀྱི་དབང་པོ་ཉམས་པར་གྱུར་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་ཕྱིར་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་ལུས་ཀྱི་དབང་པོ་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན་དེ་ཉམས་པ་ལྟ་ག་ལ་མཆིས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལུས་ཀྱིས་རེག་བྱ་རྣམས་ལ་རེག་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་དུ་རྨོངས་པར་འགྱུར་རོ། །ཤིན་དུ་རྨོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པ་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་ཅུང་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་སད་པའི་ལུས་ཀྱི་དབང་པོ་ཉམས་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་། ལས་དམིགས་པ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་
མྱོང་བར་འགྱུར་པ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་ངོ་། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཐ་མ་དེ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་པ་ནས། འཁོར་བ་ནི་འཁོར་བའི་རང་བཞིན་གྱིས་སྟོང་པའི་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པར་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ།། །།བམ་པོ་བཅུ་བཞི་པ། རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་སྒྱུ་མ་མཁན་པོས་སྤྲུལ་པའི་འདོད་པའི་ཡོན་ཏན་ལྔ་དང་ལྡན་པར་གྱུར་ཏེ། ཤིན་དུ་ཚིམ་པར་ཡོངས་སུ་སྤྱོད་པ་ཞིག་རྨིས་ལ། ཉལ་བ་སད་ནས་འདོད་པའི་ཡོན་ཏན་དེ་དག་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་འདོད་པའི་ཡོན་ཏན་ལྔ་སྒྱུ་མའི་མཁན་པོས་སྤྲུལ་པ་དེ་དག་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་མཐོང་བའི་འདོད་པའི་ཡོན་ཏན་ལྔ་པོ་སྒྱུ་མའི་མཁན་པོས་སྤྲུལ་པ་དེ་དག་ལ་མངོན་པར་ཞེན་པ་དེ་མཁས་པའི་རང་བཞིན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་སྒྱུ་མའི་མཁན་པོ་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན། སྤྲུལ་པའི་འདོད་པའི་ཡོན་ཏན་ལྔ་པོ་དེ་དག་དང་། དེ་དག་ལ་ཡོངས་སུ་སྤྱོད་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་
ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་ལྡན་པ་ཡང་ཡིད་ཀྱིས་ཆོས་རྣམས་རྣམ་པར་ཤེས་ན་ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་དུ་ན་འཆི་བའི་དུས་དང་ཚོད་ཉེ་རབ་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དག་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་སད་པའི་འདོད་པའི་ཡོན་ཏན་ལྔ་པོ་སྒྱུ་མ་མཁན་གྱི་སྤྲུལ་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དེ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་ཡང་ན་ནི་སེམས་ཅན་དམྱལ་བ་རྣམས་སུ། ཡང་ན་ནི་དུད་འགྲོའི་སྐྱེ་གནས་སུ། ཡང་ན་ནི་གཤིན་རྗེའི་འཇིག་རྟེན་དུ། ཡང་ན་ནི་ལྷ་མ་ཡིན་གྱི་རིས་སུ། ཡང་ན་ནི་མིའི་ནང་དུ། ཡང་ན་ནི་ལྷའི་ནང་དུ་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་ངོ་། །རྒྱལ་པོ་ཆེན་པོ་དེ་ལྟར་ན་ལས་ཀྱང་དམིགས་ཤིང་རྣམ་པར་སྨིན་པ་ཡང་དམིགས་ལ། དེ་ལ་མིང་གི་བརྡ་ཙམ་མ་གཏོགས་པར་ཚོར་བ་པོ་གང་ཡང་མེད་དོ། །རྒྱལ་པོ་ཆེན་པོ་དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་
འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་པ་ནས་འཁོར་བའི་བར་དུ་འཁོར་བའི་རང་བཞིན་གྱིས་སྟོང་། མྱ་ངན་ལས་འདས་པ་ཡང་མྱ་ངན་ལས་འདས་པའི་རང་བཞིན་གྱིས་སྟོང་། ཆོས་ཐམས་ཅད་ཀྱང་ཆོས་ཐམས་ཅད་ཀྱི་རང་བཞིན་གྱིས་སྟོང་སྟེ། རྒྱལ་པོ་ཆེན་པོ་དེ་ལྟར་ཆོས་ཐམས་ཅད་སྟོང་པ་འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། སྟོང་པ་ཉིད་དུ་ཡང་དག་པར་འདུ་བ། མཚན་མ་མེད་པའི་ངོ་བོ་ཉིད། སྨོན་པ་དང་བྲལ་བ། མྱ་ངན་ལས་འདས་པ་ལ་གཞོལ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་བདག་ཉིད་གཡོག་འཁོར་དང་བཅས་ཏེ་ཆུ་བོ་ཆེན་པོས་ཁྱེར་ནས་དེ་དེ་ན་སེམས་ལས་བྱུང་བའི་སྡུག་བསྔལ་དང་ཡིད་མི་བདེ་བ་རྣམ་པ་དུ་མ་མྱོང་བར་རྨིས་ལ། དེ་ཉལ་བ་ལས་སད་ནས་དེ་ཉིད་དྲན་པར་གྱུར་ན་རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་གྱི་ཆུ་ཆེན་པོ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་སྐྱེས་བུ་གང་རྨི་ལམ་ན་བདག་ཉིད་ཆུ་ཆེན་པོས་ཁྱེར་ཞིང་སྡུག་བསྔལ་དང་ཡིད་མི་བདེ་བ་མཐོང་བ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་ཆུ་གང་གིས་མི་དེ་ཁྱེར་བའི་ཆུ་ཆེན་པོ་དེ་ཉིད་ཀྱང་ཤིན་དུ་མ་མཆིས་ཤིང་མི་དམིགས་ན་དེའི་སྡུག་བསྔལ་དང་ཡིད་མི་བདེ་བ་
ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ཡིད་ཀྱིས་ཆོས་རྣམས་རྣམ་པར་ཤེས་ན་ཡིད་མི་བདེ་བར་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །ཁོང་ཁྲོ་བར་གྱུར་ནས་གནོད་སེམས་སུ་འགྱུར་རོ། །གནོད་སེམས་སུ་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་བ་ལས་སད་པའི་ཆུ་ཆེན་པོས་ཁྱེར་ཞིང་ཡིད་མི་བདེ་བ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དེ་དང་། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ་། །རྒྱལ་པོ་ཆེན་པོ་དེ་ལྟར་ན་ལས་ཀྱང་དམིགས་ལ། བྱེད་པ་པོ་ཡང་གང་ཡང་མེད། རྣམ་པར་སྨིན་པ་ཡང་དམིགས་ལ། མིང་གི་བརྡ་ཙམ་མ་གཏོགས་པར་འདི་ལ་ཚོར་བ་པོ་གང་ཡང་མེད་དོ། །རྒྱལ་པོ་ཆེན་པོ་དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བའི་དེ་ནི་སྐྱེ་བ་ཞེས་བྱ་བའི་གྲགས་སུ་འགྱུར་ཏེ། རྒྱལ་པོ་ཆེན་པོ་དེ་
ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དང་། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས། འཁོར་བའི་བར་དུ་ནི་འཁོར་བའི་རང་བཞིན་གྱིས་སྟོང་། མྱ་ངན་ལས་འདས་པ་ཡང་མྱ་ངན་ལས་འདས་པའི་རང་བཞིན་གྱིས་སྟོང་། ཆོས་ཐམས་ཅད་ཀྱང་ཆོས་ཐམས་ཅད་ཀྱི་རང་བཞིན་གྱི་སྟོང་སྟེ། འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི་རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི་རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། སྟོང་པ་ཉིད་དུ་ཡང་དག་པར་འདུ་བ། མཚན་མ་མེད་པའི་ངོ་བོ་ཉིད། སྨོན་པ་དང་བྲལ་བ། མྱ་ངན་ལས་འདས་པ་ལ་གཞོལ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱིས་མཐས་གཏུགས་པའོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཆང་གིས་ར་རོ་ཏེ་བདག་ཉིད་ཤིན་དུ་གཏི་མུག་པར་གྱུར་ནས་དེ་དེ་ན་དགེ་བ་ཡང་མི་ཤེས། མི་དགེ་བ་ཡང་མི་ཤེས། ཁ་ན་མ་ཐོ་བ་དང་བཅས་པ་ཡང་མི་ཤེས། ཁ་ན་མ་ཐོ་བ་མེད་པ་ཡང་མི་ཤེས། ཕན་པ་ཡང་མི་ཤེས། གནོད་པ་ཡང་མི་ཤེས། ཡོན་ཏན་དང་ཉེས་པ་ཡང་རྣམ་པ་ཐམས་ཅད་དུ་མི་ཤེས་པར་གྱུར་པ་ཞིག་རྨིས་ལ། དེ་ཉལ་བ་ལས་སད་ནས་ཆང་གིས་ར་རོ་བའི་གཏི་མུག་དེ་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ཆང་གིས་ར་རོ་ཞིང་གཏི་མུག་པ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་གྱི་ཆང་གིས་ར་རོ་བ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན།
བཅོམ་ལྡན་འདས་རྨི་ལམ་ན་མཐོང་བའི་ཆང་གི་ཀྱང་ཤིན་དུ་མ་མཆིས་ཤིང་དམིགས་ན་གཏི་མུག་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ཡིད་ཀྱིས་ཆོས་རྣམས་རྣམ་པར་ཤེས་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་དུ་རྨོངས་པར་འགྱུར་རོ། །ཤིན་དུ་རྨོངས་ནས་གཏི་མུག་ལས་བྱུང་བའི་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་ཞེན་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་སད་པའི་ཆང་གིས་ར་རོ་སྟེ་གཏི་མུག་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་། ལས་དམིགས་པ་དེ་དང་། རྐྱེན་གཉིས་ཀྱིས་རྣམ་པར་ཤེས་པ་དང་པོ་འགྲོ་བ་རྣམས་སུ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་ངོ་། །རྒྱལ་པོ་ཆེན་པོ་དེ་ལྟར་ན་ལས་ཀྱང་དམིགས་ལ། བྱེད་པ་པོ་ཡང་གང་ཡང་མེད། རྣམ་པར་སྨིན་པ་ཡང་དམིགས་ལ། མིང་གི་བརྡ་ཙམ་མ་གཏོགས་པར་འདི་ལ་ཚོར་བ་པོ་གང་ཡང་མེད་དོ། །རྒྱལ་པོ་ཆེན་པོ་དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར་རོ། །གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ཆོས་གང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་
ལ། འཆི་འཕོ་དང་སྐྱེ་བར་མངོན་པ་ཡང་ཡོད་དོ། །རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང་། རྣམ་པར་སྨིན་པ་དང་། འཆི་འཕོ་དང་། སྐྱེ་བ་དང་། རྣམ་པར་ཤེས་པ་དང་པོ་སྐྱེ་བའི་ཚེ་ཡང་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང་། སྐྱེ་བ་དང་འཇིགས་པ་དང་། ལས་དང་། རྣམ་པར་སྨིན་པ་དང་། རྣམ་པར་ཤེས་པ་དང་པོ་དང་། འཆི་འཕོ་དང་། སྐྱེ་བ་དང་། འཁོར་བ་དང་། མྱ་ངན་ལས་འདས་པ་ནི་མྱ་ངན་ལས་འདས་པའི་རང་བཞིན་གྱིས་སྟོང་། ཆོས་ཐམས་ཅད་ཀྱང་ཆོས་ཐམས་ཅད་ཀྱི་རང་བཞིན་གྱིས་སྟོང་སྟེ། འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི་རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི་རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། སྟོང་པ་ཉིད་དུ་ཡང་དག་པར་འདུ་བ། མཚན་མ་མེད་པའི་ངོ་བོ་ཉིད། སྨོན་ལམ་དང་བྲལ་བ། མྱ་ངན་ལས་འདས་པ་ལ་གཞོལ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ་ཁྱོད་ཀྱིས་འདི་ལ་སེམས་ངེས་པར་བཞག་པ་དང་། སེམས་ངེས་པར་བཞག་པ་ལ་བརྩོན་པར་བྱའོ། །གཞན་གྱི་དྲིང་ལ་མི་འཇོག་ཅིང་བདག་ཉིད་ཀྱིས་ཤེས་པར་བྱ་སྟེ། འདི་ནི་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་སྟེ། དབང་ཕྱུག་ལ་མངོན་པར་ཞེན་པ་ཐམས་ཅད་རབ་ཏུ་འཛོམས་པ། སྲེད་པ་ཐམས་ཅད་ཡོངས་སུ་སྐེམས་པ། །ང་རྒྱལ་ཐམས་ཅད་སྙིལ་བ། ལྟ་བའི་རྣམ་པ་དང་། ཐེ་ཚོམ་ཐམས་ཅད་ཡང་དག་པར་གཅོད་པ། ཆོས་ཐམས་ཅད་ཀྱི་མཉམ་པ་ཉིད་དེ། བྱིས་པ་སོ་སོའི་སྐྱེ་བོ་རྣམས་ཀྱིས་མ་ཡིན་པ། ཉན་ཐོས་རྣམས་ཀྱིས་མནོན་པ། རང་སངས་རྒྱས་རྣམས་ཀྱི་སྤྱོད་ཡུལ་མ་ཡིན་པ། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡང་དག་པར་
རྫོགས་པའི་སངས་རྒྱས་རྣམས་ཀྱིས་ཐུགས་ཆུ་ཆུད་པ་ཡིན་གྱིས། རྒྱལ་པོ་ཆེན་པོ་ཁྱོད་ཀྱིས་ཇི་ལྟར་ན་བདག་ལྷ་དང་བཅས་པའི་འཇིག་རྟེན་གྱི་མིག་དང་། སྒྲོན་མ་དང་། སྣང་བ་དང་། གྲུ་དང་། ངོགས་དང་། འབབ་སྟེགས་དང་། འདྲེན་པ་དང་། ཡོངས་སུ་འདྲེན་པ་དང་། སྟོན་པ་དང་། དེད་དཔོན་དང་། སྔོན་དུ་འགྲོ་བར་འགྱུར་སྙམ་པ་དང་། བདག་གྲོལ་ནས་དགྲོལ་བར་བྱའོ། །རྒལ་ནས་བསྒྲལ་བར་བྱའོ། །དབུགས་ཕྱིན་ནས་དབུགས་དབྱུང་བར་བྱའོ། །ཡོངས་སུ་མྱ་ངན་ལས་འདས་ནས་ཡོངས་སུ་མྱ་ངན་ལས་བཟླ་བར་བྱའོ་སྙམ་དུ་ཡིད་ལ་གཞག་པར་བྱའོ། །རྒྱལ་པོ་ཆེན་པོ་དབང་ཕྱུག་ལྟ་ཞིག་ནི་སྔོན་མྱོང་བར་གྱུར་བའི་མངའ་ཡང་མི་མངོན་ཏེ་རྒྱལ་པོ་ཆེན་པོ་དེ་ལྟར་དབང་པོ་རྣམས་ནི་སྒྱུ་མ་ལྟ་བུ་སྟེ། ཆོག་མི་ཤེས་པའོ། །ཚིམ་པར་མི་རུང་བའོ། །ཡུལ་རྣམས་ནི་རྨི་ལམ་ལྟ་བུ་སྟེ། ཚིམ་པར་མི་ནུས་པ། ངོམས་པར་མ་གྱུར་པའོ། །རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན་རྒྱལ་པོ་གྲགས་པ་མཐའ་ཡས་ཤེས་བྱ་བ་བྱུང་སྟེ། རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་དེ་ནི་འཁྱོགས་དང་། དཔུང་དང་། བཞོན་པ་མཐའ་ཡས་ཤིང་འཁོར་ལོ་ཐོགས་པ་མེད་པས་སྒྱུར་བ། མི་འཁྲུགས་པའི་ཐེག་པ་དང་ཚུལ་ཕུན་སུམ་ཚོགས་པ་དང་ལྡན་པ། སྔོན་གྱི་སངས་རྒྱས་ལ་དགེ་བའི་རྩ་བ་བསྐྱེད་པ། ཡིད་བཞིན་དུ་གྱུར་བའི་སྟོབས་དང་ལྡན་པ་སྟེ། དེ་གང་ཅི་སེམས་ཀྱང་རུང་། དེའི་དེ་ཐམས་ཅད་འགྲུབ་ཅིང་དེའི་བསམས་པ་དོན་མེད་པར་འགྱུར་བ་གང་ཡང་མེད་དོ། །འདི་ལྟར་རྒྱལ་པོ་དེ་ནི་རང་གི་དགེ་བའི་རྩ་བའི་གཟི་བརྗིད་ཀྱིས་བསམ་པ་ཡིད་བཞིན་དུ་དོན་མེད་པ་མ་ཡིན་པར་གྱུར་ཏོ། །རྒྱལ་པ་ཆེན་པོ་དེ་ནས་རྒྱལ་པོ་གྲགས་པ་མཐའ་ཡས་དེའི་སྙམ་དུ་བདག་གི་བསོད་ནམས་ཀྱི་སྟོབས་ཉམས་པ་མེད་པ་ལ་བརྟག་པར་བྱའོ་སྙམ་ནས་དེ་འདི་སྙམ་དུ་སེམས་ཏེ་ཀྱེ་ན་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་ཤིང་ལྗོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཡིད་བཞིན་དུ་འབྲས་བུ་ཆགས་པར་གྱུར་ཅིག་སྙམ་པ་དང་། རྒྱལ་པོ་གྲགས་པ་མཐའ་ཡས་དེའི་སེམས་སྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་ཤིང་ལྗོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཡིད་བཞིན་དུ་འབྲས་བུ་ཆགས་པར་
གྱུར་ཏོ། །རྒྱལ་པོ་ཆེན་པོ་གཞན་ཡང་རྒྱལ་པོ་གྲགས་པ་མཐའ་ཡས་དེས་ཡང་བདག་གི་དགེ་བའི་རྩ་བའི་སྟོབས་བསྐྱེད་པ་ལ་བརྟག་པར་འདོད་ནས་འདི་སྙམ་དུ་བསམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་ན་སེམས་ཅན་བཀོད་པ་འདི་དག་ཐམས་གནོད་པ་ཐམས་ཅད་རྒྱུན་ཆད་པར་གྱུར་ཏེ། ཡིད་ལ་བསམ་པ་དོན་ཡོད་པར་གྱུར་ཅིག་སྙམ་པ་དང་། རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་གང་ཇི་སྙེད་ཅིག་འཁོད་པ་དེ་དག་ཐམས་ཅད་གནོད་པ་ཐམས་ཅད་རྒྱུན་ཆད་དེ་ཡིད་ལ་བསམས་པ་ཐམས་ཅད་དོན་ཡོད་པར་གྱུར་ཏོ། །རྒྱལ་པོ་ཆེན་པོ་གཞན་ཡང་རྒྱལ་པོ་གྲགས་པ་མཐའ་ཡས་ཀྱིས་བདག་གི་དགེ་བའི་རྩ་བའི་སྟོབས་བསྐྱེད་པ་ལ་བརྟག་པར་འདོད་ནས། འདི་སྙམ་དུ་བསམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་སྤོས་ཆུའི་ཆར་རབ་ཏུ་འབབ་པར་གྱུར་ཅིག་སྙམ་པ་དང་། རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཐམས་ཅད་དུ་སྤོས་ཆུའི་ཆར་རབ་ཏུ་བབ་པར་གྱུར་ཏོ། །རྒྱལ་པོ་ཆེན་པོ་དེ་ནས་ཡང་རྒྱལ་པོ་གྲགས་པ་མཐའ་ཡས་ཀྱིས་བདག་གི་དགེ་བའི་རྩ་བའི་སྟོབས་བསྐྱེད་པ་ལ་རྒྱ་ཆེར་བརྟག་པར་འདོད་ནས་འདི་སྙམ་དུ་བསམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདིར་མེ་ཏོག་གི་ཆར་རབ་ཏུ་འབབ་པར་གྱུར་ཅིག་སྙམ་པ་དང་། རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཐམས་ཅད་དུ་མེ་ཏོག་གི་ཆར་རབ་ཏུ་བབ་པར་གྱུར་ཏོ། །རྒྱལ་པོ་ཆེན་པོ་གཞན་ཡང་རྒྱལ་པོ་གྲགས་པ་མཐའ་ཡས་ཀྱིས་འདི་སྙམ་དུ་བསམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདིར་ལྷའི་གོས་ཀྱི་ཆར་དང་། དབྱིག་གི་ཆར་དང་། གསེར་གྱི་ཆར་དང་། རིན་པོ་ཆེ་སྣ་ཚོགས་ཀྱི་ཆར་དང་། ཡོ་བྱད་ཐམས་ཅད་ཀྱི་ཆར་རབ་ཏུ་འབབ་པར་གྱུར་ཅིག་སྙམ་པ་དང་། རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་སེམས་ཅན་ཐམས་ཅད་དང་ཐུན་མོང་དུ་བསགས་པའི་དགེ་བའི་རྩ་བ་ཡངས་པ་དང་ལྡན་
པའི་རྒྱུས་ལྷའི་གོས་ཀྱི་ཆར་དང་། དབྱིག་གི་ཆར་དང་། གསེར་གྱི་ཆར་དང་། རིན་པོ་ཆེ་སྣ་ཚོགས་ཀྱི་ཆར་དང་། ཡོ་བྱད་ཐམས་ཅད་ཀྱི་ཆར་རབ་ཏུ་བབ་པོ། །རྒྱལ་པོ་ཆེན་པོ་དེའི་ཚེ་འཛམ་བུའི་གླིང་འདི་ནི་རྒྱར་དཔག་ཚད་ཁྲི་བརྒྱད་སྟོང་ཡོད་པར་གྱུར་ཏེ། དེའི་ཚེ་འཛམ་བུའི་གླིང་དེ་ན་གྲོང་ཁྱེར་བྱ་བ་ཕྲག་དྲུག་བཅུ་ཡོད་པར་གྱུར་ནས་འཛམ་བུའི་གླིང་དེའི་དབུས་ན་རིན་པོ་ཆེས་རབ་ཏུ་བརྒྱན་པ་ཞེས་བྱ་བའི་གྲོང་ཁྱེར་རྒྱལ་པོའི་ཕོ་བྲང་དུ་གྱུར་པ་ཆུ་ཞེང་དུ་དཔག་ཚད་བཅུ་གཉིས་བཅུ་གཉིས་ཡོད་པ། གྲུ་བཞི་ལྷམ་པ། དྲི་མ་མེད་པ་ཤིན་དུ་འབྲེལ་བར་བྲེས་པ་ཞིག་ཡོད་པར་གྱུར་ཏེ། རྒྱལ་པོ་ཆེན་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ནི་ཤིང་ཏ་ལའི་ཕྲེང་བ་རིམ་པ་བདུན་གྱིས་ཀུན་ནས་ཡོངས་སུ་བསྐོར་བ་སྟེ། ཏ་ལ་དེ་དག་ཀྱང་རིན་པོ་ཆེ་སྣ་བཞིའི་རྒྱུ་ལས་བྱུང་བ་སྟེ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་གྱི་ཏ་ལ་ཤ་སྟག་གོ། །དེ་ལ་གསེར་གྱི་ཏ་ལ་རྣམས་ནི་དངུལ་གྱི་ལོ་མ་དང་། མེ་ཏོག་དང་། འབྲས་བུ་དང་ལྡན་པར་གྱུར་ཏོ། །དངུལ་གྱི་ཏ་ལ་རྣམས་ནི་གསེར་གྱི་ལོ་མ་དང་། མེ་ཏོག་དང་། འབྲས་བུ་དང་ལྡན་པར་གྱུར་ཏོ། །བཻ་དཱུ་ཪྻའི་ཏ་ལ་རྣམས་ནི་ཤེལ་གྱི་ལོ་མ་དང་། མེ་ཏོག་དང་། འབྲས་བུ་ལྡན་པར་གྱུར་ཏོ། །ཤེལ་གྱི་ཏ་ལ་རྣམས་ནི་བཻ་དཱུཪྻའི་ལོ་མ་དང་། མེ་ཏོག་དང་། འབྲས་བུ་དང་ལྡན་པར་གྱུར་ཏོ། །རྒྱལ་པོ་ཆེན་པོ་ཕོ་བྲང་འཁོར་ནི་རིན་པོ་ཆེས་རབ་ཏུ་བརྒྱན་པ་དེ་རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བ་བཀྲ་བ། བལྟ་ན་སྡུག་པ་རིམ་པ་བདུན་སྟེང་དུ་བྲེས་པ་འགྱུར་རོ། །རིན་པོ་ཆེའི་འདྲ་བ་ཆེན་པོའི་རིན་པོ་ཆེ་སྣ་བདུན་ནི་འདི་ལྟ་སྟེ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་དང་། མུ་ཏིག་དམར་པོ་དང་། སྤུག་དང་། རྡོའི་སྙིང་པོ་དང་། རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ཀུན་ནས་འོབས་ཟབ་པ། ཆུ་འབྱུང་བ། ཐབས་སུ་དཔག་ཚད་ཕྱེད་ཡོད་པ། ཁ་ཚོན་དུ་དཔག་ཚད་གཅིག་ཡོད་པ། ཡན་ལབ་བརྒྱད་དང་ལྡན་པའི་ཆུས་བྱ་རོག་གིས་བཏུང་དུ་རུང་བ་ཙམ་དུ་ཁང་ཆད་དུ་ཡོངས་སུ་གང་བ། མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོས་ཀུན་དུ་གང་བ། གསེར་གྱི་བྱེ་མ་བརྡལ་པ་རིམ་པ་བདུན་གྱིས་ཡོངས་སུ་བསྐོར་བར་གྱུར་ཏེ། འོབས་
དེ་དག་གི་ཁོར་ཡུལ་ནས་འདི་ལྟ་སྟེ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་དང་། རིན་པོ་ཆེ་དེ་བཞི་ལས་བྱས་པའི་ཐེམ་སྐེས་བཀྲ་བ། བལྟ་ན་སྡུག་པ་ཤ་སྟག་བཀོད་པར་གྱུར་ཏོ། དེ་ལ་གསེར་གྱི་གཞི་ལ་ནི་དངུལ་གྱི་ཐེམ་པ་བཀྱེ། དངུལ་གྱི་གཞི་ལ་ནི་གསེར་གྱི་ཐེམ་པ་བཀྱེ། བཻ་དཱུ་ཪྻའི་གཞི་ལ་ནི་ཤེལ་གྱི་ཐེམ་པ་བཀྱེ། ཤེལ་གྱི་གཞི་ལ་ནི་བཻ་དཱུ་ཪྻའི་ཐེམ་པ་བཀྱེ་བ་ཤ་སྟག་སྟེ། ཐེམ་སྐས་དེ་དག་སོ་སོའི་ཁར་འཛམ་བུ་ཆུ་བོའི་གསེར་གྱི་ཆུ་ཤིང་ལྗོན་པ་བཀྲ་བ། བལྟ་ན་སྡུག་པ་ཤ་སྟག་བཙུགས་པར་གྱུར་ཏེ། འོབས་ཀྱི་ཆུ་དེ་དག་རེ་རེ་ཞིང་ཡང་རིན་པོ་ཆེ་སྣ་བདུན་གྱི་བཀྲ་བ་བལྟ་ན་སྡུག་པ་ཤ་སྟག་བཅས་པར་གྱུར་ཏོ། རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་ཀྱི་བསོད་ནམས་ཀྱི་གཟི་བརྗིད་ཀྱིས་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་ཁོར་ཡུག་ཏུ་བསྐྱེད་མོས་ཚལ་བཀྲ་བ་བལྟ་ན་སྡུག་པ། བདག་གིར་བྱེ་བ་མེད་པ། ཡོངས་སུ་བཟུང་བ་མེད་པ། བརྒྱད་ཁྲི་བྱས་པར་གྱུར་ཏོ། །དེ་དག་ཀྱང་རྒྱལ་པོ་གྲགས་པ་མཐའ་ཡས་ཀྱིས་སྐྱེ་བོ་ཐམས་ཅད་ཡོངས་སུ་ལོངས་སྤྱོད་པའི་ཕྱིར་བྱིན་ཏེ། མིང་དེ་དག་བསྐྱེད་མོས་ཚལ་དེ་དག་ཏུ་དོང་ནས་ཕུན་སུམ་ཚོགས་པའི་བདེ་བ་མཆོག་གི་རྩེ་དགའ་ཞིང་ཡོངས་སུ་སྤྱོད་པར་གྱུར་ཏོ། །བསྐྱེད་མོས་ཚལ་དེ་དག་རེ་རེ་ཞིང་ཡང་རྫིང་བུ་བརྒྱད་བརྒྱད་བཤམས་པར་གྱུར་ཏེ། རྫིང་བུ་དེ་དག་ཀུན་ཀྱང་རྒྱར་རྒྱང་གྲགས་ཕྱེད་ཕྱེད་ཡོད་པ་ཤ་སྟག་གོ། །རྫིང་བུ་དེ་དག་རེ་རེ་ཞིང་ཡང་རིན་པོ་ཆེ་སྣ་གཞི་འདི་ལྟ་སྟེ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་གྱི་ཐེམ་སྐས་བཀྲ་བ། བལྟ་ན་སྡུག་པ་བརྒྱད་བརྒྱད་དང་ལྡན་པར་གྱུར་ཏོ། །ཐེམ་སྐས་དེ་དག་གི་སྟེང་དུ་ཡང་རིན་པོ་ཆེ་སྣ་བདུན་གྱི་རྟ་བབས་བཀྲ་བ། བལྟ་ན་སྡུག་པ་ཤ་སྟག་བཙུགས་པར་གྱུར་ཏོ། །ཐེམ་སྐས་དེ་དག་རི་རེའི་འཁར་ཡང་འཛམ་བུ་ཆུ་བོའི་གསེར་གྱི་ཆུ་ཤིང་ལྗོན་པ་བཀྲ་བ་བལྟ་ན་སྡུག་པ་ཤ་སྟག་བཙུགས་པར་
གྱུར་ཏོ། །རྫིང་བུ་དེ་དག་ཀྱང་ཆུ་ཡན་ལག་བརྒྱད་དང་ལྡན་པས་བྱ་རོག་གིས་བཏུང་དུ་རུང་བ་ཙམ་དུ་ཁང་ཆད་དུ་ཡོངས་སུ་གང་བར་གྱུར་ཏོ། །རྫིང་བུ་དེ་དག་ཏུ་མེ་ཏོག་ཆུ་ལས་སྐྱེས་པ་འདི་ལྟ་བུ་དག་བསྐྱེད་པར་གྱུར་ཏོ། འདི་ལྟར་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། དྲི་ཞིམ་ལྡན་རྣམས་སོ། །ཁོར་ཡུག་ཏུ་ཡང་ཐང་ལས་སྐྱེས་པའི་མེ་ཏོག་འདི་ལྟ་བུ་དག་བསྐྱེད་པར་གྱུར་ཏེ། འདི་ལྟར་ཨ་ཏི་མུག་ཏ་ཀ་དང་། ཙམ་པ་ཀ་དང་། བར་ཤ་ཀ་དང་སྣ་མའི་མེ་ཏོག་དང་། མ་ཡུ་ཀ་དང་། ད་ནུ་སྐ་རི་དང་། དེ་མ་ཡིན་པའི་མེ་ཏོག་ཐང་ལས་སྐྱེས་པ་མང་པོ་དག་ཀྱང་བསྐྱེད་པར་གྱུར་ཏོ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེའི་སྟེང་གི་བར་སྣང་ལ་དྲིལ་བུ་གཡེར་ཀའི་དྲ་བ་ཆེན་པོ་བྲེས་པ་དང་། རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་ཤིང་ཏ་ལ་དེ་དག་དང་། རིན་པོ་ཆེའི་དྲ་བ་དེ་དག་དང་། དྲིལ་བུ་གཡེར་ཀའི་དྲ་བ་དེ་དག་རླུང་གིས་བསྐྱོད་པ་ལས་འདི་ལྟ་བུའི་སྒྲ་སྙན་ཅིང་ཡིད་དུ་འོང་ལ་མཉན་པ་བདེ་བ་འདི་ལྟ་སྟེ་དཔེར་ན་ཡན་ལག་ལྔ་དང་ལྡན་པའི་རོལ་མོ་སིལ་སྙན་མཁས་པས་ལེགས་པར་བླངས་པའི་སྒྲ་ལྟ་བུ་བྱུང་བར་གྱུར་ཏོ། །དེའི་ཚེ་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ན་མི་ཇི་སྙེད་ཅིག་འཁོད་པ་དེ་དག་ཐམས་ཅད་ཀྱང་སྒྲ་དེས་རྩེ་དགའ་ཞིང་ཡོངས་སུ་སྤྱོད་པར་གྱུར་ཏོ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ནི་འབྱོར་པ་རྒྱས་པ། བདེ་བ་ལོ་ལེགས་པ། སྐྱེ་བོ་མང་པོ་དང་། མིས་ཡོངས་སུ་གང་བ། མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོས་ཡོངས་སུ་གང་བར་གྱུར་ཏོ། །དེ་ནས་རྒྱལ་པོ་གྲགས་པ་མཐའ་ཡས་དེ་འདི་སྙམ་དུ་སེམས་ཏེ། འོ་ན་བདག་ནི་ཤར་གྱི་ལུས་འཕགས་གླིང་དུ་འགྲོའོ་སྙམ་པ་དང་། སེམས་བསྐྱེད་མ་ཐག་ཏུ་དཔུང་གི་ཚོགས། ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་ཤར་གྱི་ལུས་འཕགས་གླིང་ག་ལ་བ་དེར་སོང་སྟེ། དེས་དེར་ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོར་རྒྱལ་པོ་བྱས་སོ། །དེ་ནས་རྒྱལ་པོ་གྲགས་པ་མཐའ་ཡས་དེ་འདི་སྙམ་དུ་སེམས་ཏེ། འོ་ན་བདག་ནི་ནུབ་ཀྱི་བ་ལང་སྤྱོད་ཀྱི་གླིང་དུ་འགྲོའོ་སྙམ་པ་
དང་། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་ནུབ་ཀྱི་བ་ལང་སྤྱོད་ག་ལ་བ་དེར་སོང་སྟེ། དེས་དེར་ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོར་རྒྱལ་པོ་བྱས་སོ། །དེ་ནས་རྒྱལ་པོ་གྲགས་པ་མཐའ་ཡས་དེ་འདི་སྙམ་དུ་སེམས་ཏེ། འོ་ན་བདག་ནི་བྱང་གི་སྒྲ་མི་སྙན་གྱི་གླིང་དུ་འགྲོའོ་སྙམ་པ་དང་། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་བྱང་གི་སྒྲ་མི་སྙན་གྱི་གླིང་ཆེན་པོ་ག་ལ་བ་དེར་སོང་སྟེ། དེས་དེར་ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོར་རང་གི་དཔུང་གི་ཚོགས་ལ་རྗེས་སུ་བསྟན་ཏོ། །དེ་ནས་རྒྱལ་པོ་གྲགས་པ་མཐའ་ཡས་ཡུན་རིང་པོ་འདས་པའི་དུས་ཤིག་ན་འདི་སྙམ་དུ་སེམས་ཏེ། སུམ་བཅུ་རྩ་གསུམ་ཞེས་བྱ་བའི་ལྷ་རི་རབ་ཀྱི་ཟོམ་ལ་གནས་པ་དག་ཡོད་ན། བདག་ནི་སུམ་བཅུ་རྩ་གསུམ་པའི་ལྷ་ག་ལ་བ་དེར་འགྲོའོ་སྙམ་པ་དང་། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་གླང་པོ་རིན་པ་ཆེའི་བྱ་ལ་ཁར་ཞོན་ཏེ་རིའི་རྒྱལ་པོ་རི་རབ་ཀྱི་སྟེང་དུ་སོང་ངོ་། །དེ་ནས་རྒྱལ་པོ་གྲགས་པ་མཐའ་ཡས་ཀྱིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ་གླིང་ཆེན་པོ་བཞི་དང་། རིའི་རྒྱལ་པོ་རི་རབ་དང་། རྒྱ་མཚོ་ཆེན་པོ་ཇི་ལྟར་མཐོང་ལ་ཁ་ལོ་སྒྱུར་བས་སྨྲས་པ། རྒྱལ་པོ་ཆེན་པོ་འདི་ལྟ་སྟེ་དཔེར་ན་རྫ་མཁན་གྱི་འཁོར་ལོ་དབྱིག་པས་འཕངས་ན་ཡོངས་སུ་འཁོར་བ་དེ་བཞིན་དུ་གླིང་ཆེན་པོ་བཞི་དང་། རིའི་རྒྱལ་པོ་རི་རབ་དང་། རྒྱ་མཚོ་ཆེན་པོ་འདི་ཡང་ཡོངས་སུ་འཁོར་བར་མཐོང་ངོ་། །རྒྱལ་པོས་སྨྲས་པ། ཁ་ལོ་སྒྱུར་བ་འོ་ན་ད་དུང་གླང་པོ་རིན་པོ་ཆེས་འགྲོས་མ་ཕྱུང་ངོ་། །ཡང་རྒྱལ་པོ་གྲགས་པ་མཐའ་ཡས་ཀྱིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ་གླིང་ཆེན་པོ་བཞི་དང་། རིའི་རྒྱལ་པོ་རི་རབ་དང་། རྒྱ་མཚོ་ཆེན་པོ་འདི་ཇི་ལྟར་མཐོང་། ཁ་ལོ་སྒྱུར་བས་སྨྲས་པ། རྒྱལ་པོ་ཆེན་པོ་གླིང་ཆེན་པོ་བཞི་དང་། རིའི་རྒྱལ་པོ་རི་རབ་དང་། རྒྱ་མཚོ་ཆེན་པོ་དག་དེ་ནི་འགུལ་ཞིང་རབ་ཏུ་འགུ་བ་དང་། ཀུན་དུ་རབ་ཏུ་འགུལ་བར་མཐོང་ངོ་། །རྒྱལ་པོས་སྨྲས་པ། ཁ་ལོ་སྒྱུར་བ་འོ་ན་ད་དུང་
གླང་པོ་རིན་པོ་ཆེས་འགྲོས་མ་ཕྱུང་ངོ་། །ཡང་རྒྱལ་པོ་གྲགས་པ་མཐའ་ཡས་ཀྱིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ་གླིང་ཆེན་པོ་བཞི་དང་། རིའི་རྒྱལ་པོ་རི་རབ་དང་། རྒྱལ་པོ་ཆེན་པོ་འདི་ཇི་ལྟར་མཐོང་། ཁ་ལོ་སྒྱུར་བས་སྨྲས་པ། རྒྱལ་པོ་ཆེན་པོ་ད་ནི་གླིང་ཆེན་པོ་བཞི་དང་། རིའི་རྒྱལ་པོ་རི་རབ་དང་། རྒྱ་མཚོ་ཆེན་པོ་དག་ཀྱང་གཡོ་བའམ་འགུལ་བ་དང་། ལྡེག་པ་མ་མཆིས་པར་གནས་པར་མཐོང་ངོ་། །རྒྱལ་པོས་སྨྲས་པ། ཁ་ལོ་སྒྱུར་བ་ད་ནི་གླང་པོའི་རྒྱལ་པོས་འགྲོས་བསླད་པ་ལྟས་རིང་པོ་མི་ཐོགས་པར་རིའི་རྒྱལ་པོ་རི་རབ་ཀྱི་རྩེ་མོར་ཕྱིན་པར་འགྱུར་རོ། །དེ་ནས་རྒྱལ་པོ་གྲགས་པ་མཐའ་ཡས་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་རིང་པོ་མི་ཐོགས་པར་རིའི་རྒྱལ་པོ་རི་རབ་ཀྱི་རྩེ་མོར་ཕྱིན་པ་དང་ལྷའི་དབང་པོ་བརྒྱ་བྱིན་གྱིས་རྒྱལ་པོ་གྲགས་པ་མཐའ་ཡས་རྒྱང་རིང་པོ་ནས། འོང་བ་མཐོང་བ་ཡིན། །མཐོང་ནས་སྟན་གྱི་ཕྱེད་ལ་བདར་ཏེ་རྒྱལ་པོ་ཆེན་པོ་ཚུར་སྤྱོན། རྒྱལ་པོ་ཆེན་པོ་བྱོན་པ་ལེགས་སོ། །རྒྱལ་པོ་ཆེན་པོ་སྟན་གྱི་ཕྱེད་ལ་བཞུགས་ཤིག་ཅེས་སྨྲས་པ་དང་། རྒྱལ་པོ་གྲགས་པ་མཐའ་ཡས་ལྷའི་དབང་པོ་བརྒྱ་བྱིན་གྱི་སྟན་གྱི་ཕྱེད་ལ་འདུག་སྟེ། དེས་དེར་ལོ་བརྒྱ་སྟོང་ཕྲག་མང་པོར་སུམ་བཅུ་རྩ་གསུམ་པའི་ལྷའི་རྒྱལ་སྲིད་ཕྱེད་ཀྱི་དབང་ཕྱུག་ལ་དབང་བྱས་པར་གྱུར་ཏོ། །དེ་ནས་རྒྱལ་པོ་གྲགས་པ་མཐའ་ཡས་ཡུན་རིང་པོ་འདས་པའི་དུས་ཤིག་ན་འདི་སྙམ་དུ་སེམས་ཏེ། ཀྱེ་མ་བདག་གིས་བརྒྱ་བྱིན་གྱི་སྟན་ཐམས་ཅད་ལ་འདུག་པར་བྱའོ་སྙམ་པ་དང་། དེས་སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་སྟན་ཕྱེད་པོ་དེ་ལས་ཉམས་ནས་འཛམ་བུའི་གླིང་དུ་གནས་པར་གྱུར་ཏེ། རྒྱལ་པོ་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་སྐྱེད་མོས་ཚལ་གྱི་ར་བ་ན་འཁོད་པའི་མི་རྣམས་ཀྱིས་རྒྱལ་པོ་གྲགས་པ་མཐའ་ཡས་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་རིན་པོ་ཆེའི་བསྐྱེད་མོས་ཚལ་དུ་འོངས་ཤིང་དེ་ན་འདུག་པ་མཐོང་མ་ཐག་ཏུ་མྱུར་བར་རིངས་པའི་གཟུགས་ཀྱིས་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ན་རྒྱལ་པོ་དགའ་བྱེད་ཅེས་བྱ་བ་རྒྱལ་པོ་བྱེད་ཅིང་འདུག་པ་ལ་སྦྲན་ཏོ། །རྒྱལ་པོ་དགའ་བྱེད་དེས་རིན་པོ་ཆེའི་ཟ་མ་ཏོག་གི་བསྐྱེད་མོས་ཚལ་
ན་ལྷའི་མི་ཞིག་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་གནས་ཤེས་ཐོས་ནས་མྱུར་བ་མྱུར་བར་རིངས་པའི་གཟུགས་སུ་བཞོན་པའི་མཆོག་ལ་ཞོན་ཏེ། ཡན་ལག་བཞི་པའི་དཔུང་གི་ཚོགས་དང་ལྷན་ཅིག་ཏུ་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་ནས་བྱང་ནས་རིན་པོ་ཆེ་ཟ་མ་ཏོག་གི་བསྐྱེད་མོས་ཚལ་ག་ལ་བ་དེར་སོང་ངོ་། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་འཁོད་པ་ཐམས་ཅད་ཀྱང་ངོ་མཚར་དུ་གྱུར་ནས་རྒྱུག་པར་གྱུར་ཏོ། །དེ་ནས་རྒྱལ་པོ་དགའ་བྱེད་བཞོན་པ་ལས་བབས་ཏེ། རྒྱལ་པོ་གྲགས་པ་མཐའ་ཡས་ག་ལ་བ་དེར་སོང་ནས། དེས་སྤོས་དང་། མེ་ཏོག་དང་། ཕྲེང་བ་དང་། བྱུག་པ་དང་། བདུག་སྤོས་ཕུལ་ཏེ། གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་རྒྱལ་པོ་གྲགས་པ་མཐའ་ཡས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་རྒྱལ་པོ་གྲགས་པ་མཐའ་ཡས་ལ་ཁྱོད་སུ་ཞིག་ལགས་ཤེས་དྲིས་སོ། །རྒྱལ་པོས་དེ་ལ་སྨྲས་པ། རྒྱལ་པོ་གྲགས་པ་མཐའ་ཡས་ཤེས་བྱ་བ་ཞིག་བྱུང་བ་དེ་ཁྱོད་ཀྱིས་ཐོས་སམ། རྒྱལ་པོ་དགའ་བྱེད་ཀྱིས་སྨྲས་པ། བདག་གིས་རབ་ཏུའང་ཐོས་ཏེ། རྒན་རབས་དག་མཆི་ན་རྒྱལ་པོ་གྲགས་པ་མཐའ་ཡས་ཤེས་བགྱི་བ་འཁོར་ལོས་སྒྱུར་བ་ཁྱོགས་དང་དཔུང་དང་བཞོན་པ་དང་བཅས་ཏེ་མཐོ་རིས་སུ་བཞུད་དོ་ཞེས་ཐོས་སོ། །སྨྲས་པ། ང་ནི་རྒྱལ་པོ་གྲགས་པ་མཐའ་ཡས་ཞེས་བྱ་བ་དེ་ཡིན་ནོ། །དེ་ནས་རྒྱལ་པོ་གྲགས་པ་མཐའ་ཡས་དེ་མིའི་གཟི་བརྗིད་ཀྱིས་མིག་མ་གང་ལྟེ། མིའི་ལོངས་སྤྱོད་མི་བཟོད་པར་གྱུར་ནས་ཕྱི་ཞིང་མི་གནས་པར་གྱུར་ཏེ། འདི་ལྟ་སྟེ་དཔེར་ན་མར་གྱི་གོང་བུའམ། མར་སར་གྱི་གོང་དུ་བྱེ་མ་ཚལ་བ་ལ་བཞག་པ་ནི་འཛུ་ཞིང་མི་གནས་སོ། །དེ་བཞིན་དུ་རྒྱལ་པོ་གྲགས་པ་མཐའ་ཡས་ཀྱི་དབྱིང་ཞིང་མི་གནས་པར་གྱུར་ཏོ། །དེ་ནས་རྒྱལ་པོ་དགའ་བྱེད་ཀྱི་རྒྱལ་པོ་གྲགས་པ་མཐའ་ཡས་དེ་ལྟར་བྱེད་པ་དེ་ལ་འདི་སྐད་ཅེས་སྨྲས་སོ། །རྒྱལ་པོ་གྲགས་པ་མཐའ་ཡས་ཀྱིས་ལེགས་པར་བརྗོད་པ་ཇི་སྐད་གསུངས་ཤེས་མཆི་ན། བདག་གིས་འཇིག་རྟེན་རྣམས་ལ་ཇི་སྐད་ཅིག་ལུང་བསྟན་པར་བགྱི། དེས་སྨྲས་པ། རྒྱལ་པོ་ཆེན་པོ་གྲགས་པ་མཐའ་ཡས་ནི་གླིང་ཆེན་
པོ་བཞི་རྒྱལ་སྲིད་ཀྱི་དབང་ཕྱུག་ལ་དབང་བྱས་ཤིང་བསམ་པ་ཡིད་བཞིན་དུ་གྲུབ་ལ་དོན་མེད་པར་མ་གྱུར་བ་ཡང་མྱོང་། །ཤིང་ཐམས་ཅད་ཡིད་བཞིན་དུ་འབྲས་བུ་ཆགས་པ་དང་། གནོད་པ་ཐམས་ཅད་རྒྱུན་ཆད་པ་སེམས་ཅན་ཐམས་ཅད་ཀྱི་ཡིད་ལ་བསམས་པ་དོན་ཡོད་པ་དང་། སྤོས་ཆུའི་ཆར་འབབ་པ་དང་། ལྷ་ཡིད་བཞིན་གྱི་གོས་ཀྱི་ཆར་འབབ་པ་དང་། དབྱིག་གི་ཆར་འབབ་པ་དང་། གསེར་གྱི་ཆར་འབབ་པ་དང་། རིན་པོ་ཆེ་སྣ་ཚོགས་ཀྱི་ཆར་འབབ་པ་དང་། ཡོ་བྱད་ཐམས་ཅད་ཀྱི་ཆར་འབབ་པ་ཡང་མྱོང་བར་གྱུར་ནས་གླིང་ཆེན་པོ་བཞི་དག་ཏུ་གནས་ཏེ། གླིང་ཆེན་པོ་བཞིའི་རྒྱལ་སྲིད་ཀྱི་དབང་ཕྱུག་བ་དབང་བྱས་ནས་བརྒྱ་བྱིན་གྱི་སྟན་ཕྱེད་མནན་པ་ལས་འདོད་པ་ཆེན་པོས་མ་བཏང་སྟེ། འདོད་པས་མང་མོས་བཞིན་དུ་འཆི་བའི་དུས་བྱས་སོ་ཞེས་རྒྱལ་པོ་ཆེན་པོ་ཁྱོད་ཀྱིས་ལུང་སྟོན་ཅིག །དེ་སྐད་ཅེས་སྨྲས་ནས་རྒྱལ་པོ་གྲགས་པ་མཐའ་ཡས་དེ་འཆི་བའི་དུས་བྱས་པར་གྱུར་ཏོ། རྒྱལ་པོ་ཆེན་པོ་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་གྲགས་པ་མཐའ་ཡས་ཤེས་བྱ་བ་བྱུང་བ་དེ་གཞན་ཞིག་ཡིན་སྙམ་དུ་ཁྱོད་དགོས་ཤིང་ཐེ་ཚོམ་ཟ་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་དེ་ཉིད་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་གྲགས་པ་མཐའ་ཡས་ཤེས་བྱ་བར་གྱུར་ཏོ། །དེ་བས་ན་རྒྱལ་པོ་ཆེན་པོ་ཁྱོད་ཀྱིས་དབང་པོ་རྣམས་ནི་སྒྱུ་མ་ལྟ་བུ། ཡུལ་རྣམས་ནི་རྨི་ལམ་ལྟ་བུའོ་ཞེས་དེ་ལྟར་རིག་པར་བྱས་ནས་སེམས་ངེས་པར་བཞག་པར་བྱ་སྟེ། གཞན་གྱི་དྲིང་མི་འཇོག་པར་བྱའོ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། འདོད་པའི་དབང་ཕྱུག་རྣམ་པ་ལས། སེམས་ནི་མཁས་པས་བསྐྱོད་བྱས་ཏེ། ཆོས་ཀྱི་དབང་ཕྱུག་དགའ་བ་ལ། སེམས་ནི་ཡང་དག་ཉིད་དུ་གཏང་། འདོད་པའི་དབང་ཕྱུག་སྤང་བྱས་ཤིང་། ཆོས་ཀྱི་དབང་ལ་ཡིད་བཞག་སྟེ། སེམས་གདུལ་བ་ལ་རབ་བརྟེན་ན། ཉོན་མོངས་རབ་ཏུ་ཚར་ཆོད་འགྱུར། ཉོན་མོངས་ཚར་བཅད་བརྟེན་ནས་ནི། ལས་ཀྱི་ལམ་ཡང་ཆད་པར་འགྱུར། ལས་ཀྱི་ལམ་ནི་ཆད་གྱུར་ན། འཇིག་རྟེན་གྱི་ནི་མཆོད་རྟེན་འགྱུར། འདོད་ལ་ཀུན་ནས་ཉོན་མ་མོངས། །
འདོད་པའི་ཉེས་པ་རབ་བསྟན་ཏེ། སེམས་ཅན་རྣམས་ལ་ཕན་སེམས་པས། དེ་ཕྱིར་མཆོད་པའི་རྟེན་ཅེས་བྱ། འདོད་པའི་ཉེས་པ་ཐོས་གྱུར་ན། ། མི་ནི་འདོད་པའི་འདོད་ཆགས་ལས། སེམས་སྦྱོང་བྱེད་པ་ཐམས་ཅད་མཁྱེན། དེ་ཕྱིར་མཆོད་པའི་རྟེན་ཅེས་བྱ། སེམས་ཅན་རྣམས་ཀྱི་སྡང་སྤང་པ། གང་ཟག་མཆོག་གིས་རབ་ཏུ་མཁྱེན། སྡང་ལས་སེམས་ནི་གྲོལ་མཛད་པས། དེ་ཕྱིར་མཆོད་པའི་རྟེན་ཅེས་བྱ། སེམས་ཅན་རྣམས་ཀྱི་རྨོངས་སྤངས་པ། ཤཱཀྱའི་ཁྱུ་མཆོག་རབ་མཁྱེན་ཏེ། རྨོངས་ལས་སེམས་ནི་སྦྱོང་མཛད་པས། དེ་ཕྱིར་མཆོད་པའི་རྟེན་ཅེས་བྱ། སེམས་ཅན་ང་རྒྱལ་སྤང་པ་ཡང་། སེམས་ཅན་ཁ་ལོ་སྒྱུར་བས་མཁྱེན། ང་རྒྱལ་དག་ལས་སེམས་སྦྱོང་བས། དེ་ཕྱིར་མཆོད་པའི་རྟེན་ཅེས་བྱ། བཅོམ་ལྡན་འདས་ཀྱིས་གཞན་ཡང་རྒྱལ་པོ་ཟས་གཙང་མ་ལ་བཀའ་སྩལ་པ། རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན་རྒྱལ་པོ་སའི་ལྷ་ཞེས་བྱ་བ་ཆོས་དང་ལྡན་པ་ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་བྱུང་སྟེ། དེའི་རིན་པོ་ཆེ་སྣ་བདུན་ནི་འདི་དག་སྟེ། འདི་ལྟར་འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་དང་བདུན་ནོ། རྒྱལ་པོས་སའི་ལྷ་དེའི་ཕ་ནི་རྒྱལ་པོས་འབྱུང་ཞེས་བྱ་བར་གྱུར་ཏོ། རྒྱལ་པོས་འབྱུང་དེའི་ཐུ་བོ་ནི་གཞོན་ནུ་སའི་ལྷ་སྟེ། དེ་ནས་རྒྱལ་པོས་འབྱུང་འཆི་བའི་དུས་བྱེད་པའི་ཚེ་རྒྱལ་བུ་གཞོན་ནུ་སའི་ལྷ་རྒྱལ་སྲིད་ལ་དབང་བསྐུར་རོ། དེ་ནས་རྒྱལ་པོས་སའི་ལྷ་དེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བར་གྱུར་ཏོ། དེ་ནས་རྒྱལ་པོ་སའི་ལྷ་རྒྱལ་རིགས་སྤྱི་བོ་ནས་དབང་བསྐུར་བ་དེ་གསོ་སྦྱོང་གི་ཉི་མ་ཟླ་བ་ཉ་བའི་ཚེ་སྐྲ་བཀྲུས་ཏེ་རས་བཅོས་བུ་སར་པ་བགོས། སྐྲ་དང་ཁ་སྤུ་བཅོམ། ཕྲེང་བ་དང་རྒྱན་བཏགས། ནོར་བུ་དང་རྣ་ཆ་གདུབ་ཀོར་བཏགས་ནས་ཁང་སྟེང་ན་བུད་མེད་ཀྱི་འཁོར་ཀྱིས་བསྐོར་ཅིང་མདུན་དུ་བདར་ཏེ་འདུག་འདུག་པ་དང་། ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་རྩིབས་སྟོང་དང་ལྡན་པ། ལྟེ་བ་དང་བཅས་པ། མུ་ཁྱུད་དང་བཅས་པ། རྣམ་པ་ཐམས་ཅད་ཀྱི་མཆོག་དང་ལྡན་པ། འོད་ཟེར་དང་ལྡན་པ། འོད་གསལ་བ། འཕང་དུ་ཁྲུ་
བདུན་ཡོད་པ། ཐམས་ཅད་གསེར་ལས་བྱས་པ་བྱུང་བར་གྱུར་ཏོ། །རྒྱལ་པོས་སའི་ལྷ་ངེས་སྔོན་ཡང་རྒྱལ་པོ་རིགས་སྤྱི་བོ་ནས་དབང་བསྐུར་བ་གང་གསོ་སྦྱོང་ཉི་མ་ཟླ་བ་ཉ་བའི་ཚེ་ཞེས་བྱ་བ་ནས་བུད་མེད་ཀྱི་ཚོགས་ཀྱིས་བསྐོར་ཅིང་མདུན་དུ་བདར་བའི་བར་དུ་སྔ་མ་བཞིན་ཏེ། ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་རྩིབས་སྟོང་དང་ལྡན་པ་ཞེས་བྱ་བ་ནས་ཐམས་ཅད་གསེར་ལས་བྱས་པའི་བར་དང་ལྡན་པ་བྱུང་བར་གྱུར་བ་དང་། དེ་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ཐོས་པས་དེ་འདི་སྙམ་དུ་སེམས་ཏེ། བདག་འཁོར་ལོས་སྒྱུར་བའི་རྒྱལ་པོ་ལྷ་ཡིན་ནམ་དེ་ལ་བདག་གིས་སད་པར་བྱའོ་སྙམ་ནས་རྒྱལ་པོ་སའི་ལྷ་སྟན་ལས་ལངས་ཏེ། གོས་ཕྱོགས་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ལྷའི་འཁོར་ལོ་རིན་པོ་ཆེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ལྷའི་འཁོར་ལོ་རིན་པོ་ཆེ་དེ་ལ་འདི་སྐད་ཅེས་སྨྲས་སོ། །ཀྱེ་འཁོར་ལོ་རིན་པོ་ཆེ་བབས་ཏེ་ས་ལ་གནོས་ཤིག་ཅེས་བྱས་པ་དང་། དེ་ནས་ལྷའི་འཁོར་ལོ་རིན་པོ་ཆེ་ནམ་མཁའ་ལས་བབས་ཏེ་ས་ལ་གནས་པར་གྱུར་ཏོ། །དེ་ནས་རྒྱལ་པོ་སའི་ལྷ་ངེས་ལྷའི་འཁོར་ལོ་རིན་པོ་ཆེ་དེ་གོས་ཁྱེའུ་གཙང་གིས་ཕྱིས་ཏེ་ལག་པ་གཡས་པས་བསྐུལ་ནས་འདི་སྐད་ཅེས་སྨྲས་སོ། །ཀྱེ་འཁོར་ལོ་རིན་པོ་ཆེ་ཤར་ཕྱོགས་ལས་རྣམ་པར་རྒྱལ་བར་གྱིས་ཤིག །དེ་ནས་འཁོར་ལོ་རིན་པོ་ཆེ་དེ་ཤར་ཕྱོགས་སུ་གྱུར་པ་དང་། ཤར་ཕྱོགས་ཀྱི་གནས་རྣམས་སུ་དེ་ཉིད་ཀྱི་ཚེ་སྔོན་གྱི་འཁོར་ལོས་སྒྱུར་བ་རྣམས་ཀྱི་ལམ་མཉམ་ཞིང་ཤིན་དུ་བདེ་བ། ཉམས་དགའ་བ། རིན་པོ་ཆེ་བདུན་གྱི་རྒྱུ་ལས་གྲུབ་པ། མེ་ཏོག་སིལ་མ་སྣ་ཚོགས་ཀྱིས་གང་བ་བྱུང་བར་གྱུར་ཏེ། དེའི་གཤོང་དུ་གྱུར་པའི་ཕྱོགས་རྣམས་ནི་མཐོ་བར་གྱུར་ཏོ། །སྒང་དུ་གྱུར་པ་རྣམས་ནི་དམར་བར་གྱུར་ཏོ། །དེའི་ཁྲོན་པ་དང་། འབབ་ཆུའི་དོང་དང་། མཚོ་དང་། མཚེའུ་དང་། ཆུ་ཀླུང་སྐམས་པ་རྣམས་སུ་ནི་ཡན་ལག་བརྒྱད་དང་ལྡན་པའི་ཆུ་བྱུང་བར་གྱུར་ཏེ། འདི་ལྟ་སྟེ། བསིལ་བ་དང་། ཞིམ་པ་དང་། ཡང་བ་དང་། འཇམ་པ་དང་། དྲི་ང་བ་མེད་པ་དང་། འཐུངས་ན་ལྐོག་མར་མི་གནོད་པ་དང་། འཐུངས་ན་ལྟོ་བདེ་བས་
ཡོངས་སུ་གང་བར་གྱུར་ཏོ། །མེ་ཏོག་གི་ཤིང་ལྗོན་པ་རྣམས་ལ་ཡང་མེ་ཏོག་ཆགས་པར་གྱུར་ཏོ། །འབྲས་བུའི་ཤིང་ལྗོན་པ་རྣམས་ལ་ཡང་འབྲས་བུ་ཆགས་པར་གྱུར་ཏོ། །མེ་ཏོག་རྒྱས་པའི་ཤིང་རྣམས་ཀྱང་རྟག་ཏུ་མེ་ཏོག་རྒྱས་པར་གྱུར་ཏོ། །འབྲས་བུ་ཆགས་པའི་ཤིང་རྣམས་ཀྱང་རྟག་ཏུ་འབྲས་བུ་ཆགས་པར་གྱུར་ཏོ། །འཁོར་ལོས་སྒྱུར་བའི་རྒྱལ་པོ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་འཁོར་ལོ་རིན་པོ་ཆེ་དེའི་ཕྱི་བཞིན་སོང་སྟེ། ས་ཕྱོགས་གང་དུ་འཁོར་ལོ་རིན་པོ་ཆེ་དེ་འདུག་པར་གྱུར་པ་དེར་འཁོར་ལོས་སྒྱུར་བའི་རྒྱལ་པོ་ཡང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་འདུག་པར་གྱུར་ཏོ། །དེའི་ཚེ་ཤར་ཕྱོགས་ཀྱི་རྒྱལ་པོའམ། ཁམས་ཀྱི་རྒྱལ་པོའམ། གྲོང་རྡལ་གྱི་མིའམ། ཞིང་པ་དེ་དག་ཐམས་ཅད་གསེར་གྱི་གཞོང་པ་དངུལ་སིལ་མས་བཀང་བ་དང་། དངུལ་གྱི་གཞོང་པ་གསེར་ཕྱེས་བཀང་བ་དག་ཐོག་སྟེ། འཁོར་ལོས་སྒྱུར་བའི་རྒྱལ་པོ་དེ་བསུ་ཞིང་ལྷ་ཚུར་གཤེགས། ལྷ་གཤེགས་པ་ལེགས་སོ། །ལྷའི་ཆགས་འོག་ཏུ་མདའ་བ་འདི་དག་ནི་འབྱོར་ཅིང་རྒྱས་ལ་ལོ་ལེགས་ཤིང་སྐྱེ་བོ་མང་པོ་དང་མིས་གང་བ་སྟེ། འདི་དག་ངད་བདག་ཅག་ལ་ལྷ་མངའ་མཛད་དུ་གསོལ། །དེ་སྐད་ཅེས་སྨྲས་པ་དང་། འཁོར་ལོས་སྒྱུར་བའི་རྒྱལ་པོ་དེས་དེ་དག་ལ་འདི་སྐད་ཅེས་སྨྲས་སོ། །ང་ལ་ལོངས་སྤྱོད་འདི་དག་མི་དགོས་ཀྱིས། འདི་དག་ཁྱེད་ཀྱི་ལོངས་སྤྱོད་དུ་གྱུར་ཏེ་ཉེ་བར་འཚོ་བར་གྱིས་ཤིག །ཁྱེད་འདི་ལྟར་ངའི་རྗེས་སུ་འབྲང་བར་གྱིས་ཤིག །གལ་ཏེ་ཁྱེད་ཀྱིས་སྲོག་གཅོད་པ་སྤངས་ཏེ། མ་བྱིན་པར་ལེན་པ་སྤངས་ཤིང་ལོག་པར་ལྟ་བའི་བར་དུ་སྤངས་ནད་ཡང་བདག་གིས་ནི་ཡུལ་འདི་དག་ལས་རྒྱལ་ཏེ། མི་གང་དག་མར་འཛིན་པ་དང་། ཕར་འཛིན་པ་དང་། དགེ་སྦྱོང་དུ་འཛིན་པ་དང་། བྲམ་ཟེར་འཛིན་པ་དང་། རིགས་ཀྱི་གཙོ་བོ་ལ་རིམ་གྲོ་བྱེད་པ་དེ་དག་ནི་ངའི་རྗེས་སུ་འབྲང་བ་ཡིན་ནོ་སྙམ་དུ་སེམས་སོ། །ད་ཕན་ཆད་ཁྱེད་ཡུལ་འཁོར་དུ་ཆོས་མ་ཡིན་པའི་སྤྱོད་པ་དང་། མི་རིགས་པའི་སྤྱོད་པ་འདོད་པར་མ་བྱེད་ཅིག །དེ་ལྟར་བྱས་ན་ང་ཡང་ཡུལ་འདི་རྣམས་ལས་རྒྱལ་ཞིང་དེ་དག་ཀྱང་ངའི་རྗེས་སུ་འབྲང་བ་ཡིན་པར་སེམས་སོ། །དེ་དག་གིས་དེ་ལ་ལེགས་སོ་ཞེས་ནས་དེ་བཞིན་དུ་ནན་ཏན་
བྱེད་དོ། །དེའི་ལྷའི་འཁོར་ལོ་རིན་པོ་ཆེ་དེས་ཤར་ཕྱོགས་སུ་རྣམ་པར་རྒྱལ་བར་བྱས་ཏེ། ཤར་ཕྱོགས་ཀྱི་རྒྱ་མཚོ་ལས་རྒལ་ནས་མདུན་དུ་ཤིང་རྟའི་སྲོག་ཤིང་གཙུགས་པ་ལྟར་འདུག་པར་གྱུར་ཏོ། །དེ་བཞིན་དུ་ལྷོ་ཕྱོགས་སུ་ཡང་རྒྱ་ཆེར་རྣམ་པར་རྒྱལ་བར་བྱས་ནས། བྱང་ཕྱོགས་སུ་བྱང་གི་སྒྲ་མི་སྙན་གྱི་གླིང་ཆེན་པོའི་བར་ལས་རྣམ་པར་རྒྱལ་བར་བྱས་ཏེ། བྱང་ཕྱོགས་ཀྱི་རྒྱ་མཚོ་ལས་རྒལ་ནས་འཁོར་ལོས་སྒྱུར་བའི་རྒྱལ་པོའི་ཕོ་བྲང་གི་སྒོའི་སྟེང་དུ། ཤིང་རྟའི་སྲོག་ཤིང་བཙུགས་པ་བཞིན་དུ་འདུག་པར་གྱུར་ཏོ། །རྒྱལ་པོ་སའི་ལྷས་འཁོར་ལོ་རིན་པོ་ཆེ་བསྐོར་མ་ཐག་ཏུ་དེ་ནས་དེའི་མོད་ལ་གླིང་ཆེན་པོ་བཞི་པ་ཐམས་ཅད་རིན་པོ་ཆེའི་རང་བཞིན་བཀྲ་བ་བལྟ་ན་སྡུག་པར་གནས་པར་གྱུར་ཏེ། རིན་པོ་ཆེ་སྣ་བདུན་ནི་འདི་ལྟ་སྟེ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་དང་མུ་ཏིག་དམར་པོ་དང་། སྤུག་དང་། རྡོའི་སྙིང་པོ་དང་བདུན་ནོ། །རྒྱལ་པོ་སའི་ལྷས་འཁོར་ལོ་རིན་པོ་ཆེ་དེ་བསྐོར་མ་ཐག་ཏུ་སེམས་ཅན་དམྱལ་བ་ཐམས་ཅད་རྒྱུན་ཆད་པར་གྱུར། དུད་འགྲོའི་སྐྱེ་གནས་ཐམས་ཅད་དང་། གཤིན་རྗེའི་འཇིག་རྟེན་ཐམས་ཅད་དང་། ལྷ་མ་ཡིན་གྱིས་རིས་ཐམས་ཅད་དང་། མི་ཁོམ་པ་ཐམས་ཅད་ཀྱང་རྒྱུན་ཆད་པར་གྱུར་ཏོ། །མི་དགེ་བའི་སྒྲ་རྣམས་ཀྱང་ཡོངས་སུ་ནུབ་པར་གྱུར་ཏོ། །འདི་ལྟར་རྒྱལ་པོ་སའི་ལྷའི་སྔོན་གྱི་སྨོན་ལམ་གྱིས་གླིང་ཆེན་པོ་བཞི་པོ་ཐམས་ཅད་དུ་མ་རྨོས་ལ་བཏབ་པའི་འབྲས་བུ་སཱ་ལུའི་འབྲུ་ཡང་འབྱུང་བར་གྱུར། དཔག་བསམས་ཀྱི་ཤིང་རྣམ་པ་སྣ་ཚོགས་ཀྱང་བྱུང་བར་གྱུར་ཏོ། །སེམས་ཅན་དེ་དག་གི་ནད་ཀྱི་རྣམ་པ་འདི་ལྟ་སྟེ། འདོད་པ་དང་། ཁ་ཟས་མི་ཟ་བ་དང་། རྒ་བ་གསུམ་མ་གཏོགས་པར་ཐམས་ཅད་རྒྱུན་ཆད་པར་གྱུར་ཏོ། །སེམས་ཅན་དེ་དག་གི་ཚེའི་ཚད་ནི་ལོ་བྱེ་བ་ཚང་བར་གྱུར་ཏོ། །སེམས་ཅན་དེ་དག་ལ་སྡུག་བསྔལ་གྱི་སྡུག་བསྔལ་ཡང་ཐམས་ཅད་དུ་མི་མངོན་ཞིང་མི་གནོད་པར་གྱུར་ཏེ། དེའི་ཚེ་འདི་དག་རང་གཞན་ཡང་ངོ་མཚར་རྨད་དུ་བྱུང་བ་མཐའ་ཡས་བྱུང་བར་གྱུར་ཏོ། །རྒྱལ་པོ་ཆེན་པོ་དེ་ནས་རྒྱལ་པོ་སའི་ལྷ་དེ་འདི་སྙམ་དུ་སེམས་ཏེ། མིའི་འཇིག་རྟེན་ན་ལོངས་སྤྱོད་འདི་ལྟ་བུ་ཡོད་ན་ལོགས་སྤྱོད་འདི་བས་རྒྱ་ཆེ་བ་དང་། འདི་ལས་
ཁྱད་པར་འཕགས་པའི་ལོངས་སྤྱོད་གཞན་འགའ་ཞིག་ཡོད་དམ་མེད་སྙམ་ནས་དེ་འདི་སྙམ་དུ་སེམས་ཏེ། བདག་གིས་སུམ་བཅུ་རྩ་གསུམ་པའི་ལྷ་ཞེས་བྱ་བ་རི་རིབ་ཀྱི་རྩེ་མོ་ལ་གནས་པ་དག་ཅིག་ཡོད་ཅེས་ཐོས་ན་དེ་དག་གི་ལོངས་སྤྱོད་དེ་ཅི་འདྲ་བ་ཞིག་ཡོད་སྙམ་མོ། །དེ་ནས་རྒྱལ་པོ་སོའི་ལྷ་དེ་འདོད་པ་དེ་མ་སྤངས་པའི་ཕྱིར་མིའི་ལོངས་སྤྱོད་ལ་ནི་སྨོད། ལྷའི་ལོངས་སྤྱོད་ལ་ནི་སྨོན་ཅིང་འདི་སྙམ་དུ་འོ་ན་བདག་སུམ་བཅུ་རྩ་གསུམ་པའི་གནས་སུ་འགྲོ་བར་བྱའོ་སྙམ་དུ་སེམས་བསྐྱེད་པར་གྱུར་ཏོ། །རྒྱལ་པོ་ཆེན་པོ་སའི་ལྷ་དེས་སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་རིའི་རྒྱལ་པོ་རི་རབ་ཀྱི་རྩེ་མོ་ལ་ཕྱིན་པར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་གྱིས་རྒྱལ་པོ་སའི་ལྷ་རྒྱང་རིང་པོ་ནས་འོང་བ་མཐོང་ནས་འདི་སྐད་ཅེས་སྨྲས་ཏེ། རྒྱལ་པོ་ཆེན་པོ་ཚུར་སྤྱོན། རྒྱལ་པོ་ཆེན་པོ་བྱོན་པ་ལེགས་སོ་ཞེས་སྟན་གྱི་ཕྱེད་ལ་བདར་ཏེ། རྒྱལ་པོ་ཆེན་པོ་གང་གི་དུས་ལ་དབབ་པར་མཁྱེན་ན་སྟན་འདི་ལ་བཞུགས་ཤིག་ཅེས་སྨྲས་པ་དང་། རྒྱལ་པོ་སའི་ལྷ་ཡང་བརྒྱ་བྱིན་གྱི་སྟན་ཕྱེད་ལ་འདུག་སྟེ། ངེས་དེར་ལོ་བརྒྱ་སྟོང་ཕྲག་མང་པོར་སུམ་བཅུ་རྩ་གསུམ་པའི་ལྷའི་ནང་དུ་རྒྱལ་སྲིད་དབང་ཕྱུག་ཕྱེད་ལ་དབང་བྱས་སོ། །དེ་ཡུན་རིང་པོ་འདས་པའི་དུས་ཤིག་ན་འདོད་པ་ཆེན་པོའོ། ། དབང་གིས་འདི་སྙམ་དུ་སེམས་པར་གྱུར་ཏེ། ཀྱེ་མ་བདག་གིས་སུམ་བཅུ་རྩ་གསུམ་པའི་ནང་དུ་རྒྱལ་སྲིད་ཀྱི་དབང་ཕྱུག་ཐམས་ཅད་ལ་དབང་བྱའོ་སྙམ་དུ་སྙམ་པ་དང་། སེམས་བསྐྱེད་མ་ཐག་ཏུ་ལྷའི་དབང་པོ་བརྒྱ་བྱིན་གྱི་སྟན་ཕྱེད་ལས་ཉམས་ནས་ཕྱིར་འཛམ་བུའི་གླིང་གི་གྲོང་ཁྱེར་བདེ་བའི་ཁྱིམ་ཞེས་བྱ་བར་གནས་པར་གྱུར་ཏོ། །དེ་ལྟའི་གཟི་བརྗིད་དང་ལྡན་པ་ལས་འཛམ་བུའི་གླིང་དུ་གནས་པར་གྱུར་བས་གཟི་བརྗིད་མི་བཟོད་པར་གྱུར་ནས་དེ་བྱིང་ཞིང་མི་གནས་པར་གྱུར་ཏོ། །དེ་ནས་རྒྱལ་པོ་སའི་ལྷས་ལ་འབྱིང་བ་ན་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་སྲིད་དབང་ཕྱུག་རྒྱ་ཆེན་གྱིས། །འདོད་ལ་སྲེད་པ་ཞི་མི་འགྱུར། །མེ་ལ་རྩྭ་ཤིང་ཇི་བཞིན་ཏེ། །དེ་བས་འདོད་པ་རྣམ་པར་སྤང་། །ཡུན་རིང་རྒྱུད་ཀྱི་འདོད་པ་ལ། །བསྟེན་ན་ངོམས་པར་མི་འགྱུར་ཏེ། །སྐོམ་
པས་ཉེན་པ་ཚྭ་ཆུ་ལ། །རབ་ཏུ་འཐུངས་ཀྱང་ཡོངས་གདུང་བཞིན། །ཆུ་བོ་རྣམས་ཀྱིས་ནམ་དུ་ཡང་། །རྒྱ་མཚོ་ངོམས་པར་མི་འགྱུར་ཏེ། །དེ་བཞིན་འདོད་པ་བསྟེན་བྱས་ན། །གཞན་ཡང་ངོམས་པར་མི་འགྱུར་རོ། །ཤིང་དང་རྩྭ་དག་རབ་བསྲེགས་ཀྱང་། །མི་ནི་ངོམས་པར་མི་འགྱུར་རོ། །དེ་བཞིན་འདོད་པ་བསྟེན་བྱས་ན། །འདོད་པའི་ལོངས་སྤྱོད་ངོམས་མི་མྱོང་། །མེ་ལོང་ཇི་ལྟར་གཟུགས་བརྙན་གྱིས། །ནམ་ཡང་ངོམས་པར་མི་འགྱུར་བ། །དེ་བཞིན་གཟུགས་རྣམས་བསྟེན་བྱས་ན། །འདོད་པའི་ལོངས་སྤྱོད་ངོམས་མི་མྱོང་། །བྲག་ཅ་ཇི་ལྟར་སྒྲ་རྣམས་ཀྱིས། །ནམ་ཡང་ངོམས་བར་མི་འགྱུར་བ། །དེ་བཞིན་སྒྲ་རྣམས་བསྟེན་བྱས་ན། །འདོད་པའི་ལོངས་སྤྱོད་ངོམས་མི་མྱོང་། །ཇི་ལྟར་སྤོས་སྣོད་སྤོས་རྣམས་ཀྱིས། །ནམ་ཡང་ངོམས་པར་མི་འགྱུར་བ། །དེ་བཞིན་དྲི་རྣམས་བསྟེན་བྱས་ཀྱང་། །སྣ་ནི་དྲི་ཡིས་ངོམས་མི་མྱོང་། །ཇི་ལྟར་གཟར་བུ་རོ་མཆོག་གིས། །ནམ་ཡང་ངོམས་པར་མི་འགྱུར་བ། །དེ་བཞིན་ལྕེ་ནི་རོ་མཆོག་གིས། །ནམ་ཡང་ངོམས་པར་མི་འགྱུར་རོ། །ཇི་ལྟར་ནམ་མཁའ་རླུང་རྣམས་ཀྱིས། །ནམ་ཡང་ངོམས་པར་མི་འགྱུར་བ། །དེ་བཞིན་ལུས་ནི་རེག་རྣམས་ཀྱིས། ནམ་ཡང་ངོམས་པར་མི་འགྱུར་རོ། །དཔེར་ན་རྨི་ལམ་རྨིས་པ་ཡི། །ཆུ་འཐུངས་ངོམས་པར་མི་འགྱུར་བ། །དེ་བཞིན་ཆོས་ལ་ཆགས་པ་ཡི། །ཡིད་ཀྱང་ངོམས་པར་འགྱུར་བ་མེད། །སེམས་ཅན་འདོད་ལ་སྟེན་པ་ནི། །ཕྱིར་ཞིང་སྲེད་པ་འཕེལ་འགྱུར་ཏེ། །ཡུལ་ལ་ཉེ་བར་བསྟེན་བྱས་ན། །འདོད་པས་ནམ་ཡང་ངོམས་པ་མེད། །སྐོམ་དང་མེ་འདྲའི་འདོད་པ་ལས། །སྡུག་བསྔལ་འབྱུང་བས་སུས་མཐོང་བ། །དེ་དག་སྲེད་པ་ཞིར་འགྱུར་ཏེ། །མེ་ལ་ཆུས་ནི་བླུགས་པ་བཞིན། །རྒྱལ་པོ་ཆེན་པོ་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་སའི་ལྷ་ཞེས་བྱ་བ་བྱུང་བ་དེ་གཞན་ཞིག་ཡིན་སྙམ་དུ་དོགས་ཤིང་ཐེ་ཚོམ་ཟའམ་ཡིད་གཉིས་སུ་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་དེ་ཉིད་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་སའི་ལྷ་ཞེས་བྱ་བར་གྱུར་ཏོ། །དེ་ཙམ་དུ་ཆེ་ཞིང་ཙམ་དུ་ཡངས་པའི་དབང་ཕྱུག་ལ་དབང་བྱས་ཀྱང་དབང་ཕྱུག་གིས་མ་ངོམས་
བཞིན་དུ་འཆི་བའི་དུས་བྱས་པར་གྱུར་ཏོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་དབང་པོ་རྣམས་ནི་མ་ངོམས་ཤིང་ངོམས་པར་མི་རུང་བ། ཡུལ་རྣམས་ནི་ངོམས་པར་མི་བྱེད་པ་སྟེ། དབང་པོ་རྣམས་ནི་མེ་ལོང་དང་འདྲ། ཡུལ་རྣམས་ནི་གཟུགས་བརྙན་དང་འདྲ། དབང་པོ་རྣམས་ནི་བྲག་ཅ་དང་འདྲ། ཡུལ་རྣམས་ནི་སྒྲ་དང་འདྲ། དབང་པོ་རྣམས་ནི་སྒྱུ་མ་དང་འདྲ། ཡུལ་རྣམས་ནི་རྨི་ལམ་དང་འདྲ་བ་ཡིན་གྱིས། རྒྱལ་པོ་ཆེན་པོ་ཁྱོད་དེ་ལ་ཡིད་གཞག་ཅིང་གཞན་གྱི་དྲིང་མི་འཇོག་པར་གྱིས་ཤིག། །།བམ་པོ་བཅུ་ལྔ་པ་སྟེ་ཐ་མ། རྒྱལ་པོ་ཆེན་པོ་གཞན་ཡང་སྔོན་གྱི་བྱུང་བ་འདས་པའི་དུས་ན་རྒྱལ་པོ་ང་ལས་ནུ་ཞེས་བྱ་བ་རྫུ་འཕྲུལ་ཆེ་ཞིང་མཐུ་ཆེ་ལ་དབང་ཆེ་བར་གྲགས་པ། རྒྱལ་པོ་གསོ་སྦྱོང་འཕགས་ཀྱི་སྤྱི་བོ་ནས་བྱུང་བ། སྔོན་དགེ་བའི་རྩ་བ་བསགས་པ། སངས་རྒྱས་དཔག་ཏུ་མེད་པ་མཐོང་བ། དགེ་བའི་རྩ་བ་ཡང་དག་པར་བསྒྲུབས་པ། སངས་རྒྱས་བྱེ་བ་ཁྲག་ཁྲིག་མང་པོ་ལ་ཆོས་དཀར་པོ་ཡོངས་སུ་བསྒྲུབས་པ་ཞིག་བྱུང་སྟ།ེ དེས་གླིང་ཆེན་པོ་བཞི་དང་དབང་ཕྱུག་ལ་དབང་བྱས་སོ། །དེ་འཛམ་བུའི་གླིང་ན་གནས་པ་དེའི་ཚེ་འདོད་པའི་ཁམས་ཀྱི་སེམས་ཅན་མི་དང་ལྷ་ཇི་སྙེད་ཅིག་འདོད་པ་ལ་སྤྱོད་པར་གྱུར་པ་དེ་དག་གི་ནང་ན་རྒྱལ་པོ་ང་ལས་ནུ་དེ་འདི་ལྟར་འདོད་པ་ལ་ལོངས་སྤྱོད་པས་མཆོག་ཏུ་བརྗོད་དོ། །དེའི་ཚེ་འཛམ་བུའི་གླིང་ནི་འབྱོར་ཅིང་རྒྱས་ལ་བདེ་ཞིང་ལོ་ལེགས་པ་དང་། སྐྱེ་བ་མང་པོ་དང་མིས་གང་བ་དང་། གྲོང་དང་། གྲོང་ཁྱེར་དང་། གྲོལ་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་བ་ཡང་དམད་པ་ཉེ་བར་གྱུར། གྲོང་རྣམས་ཀྱང་བྱ་གག་གི་འཕུར་སྟབས་ཀྱིས་སོན་པ་ཙམ་དུ་ཉེ་བར་གྱུར་ཏོ། །འདི་ལྟར་ཆོས་ཀྱིས་གནས་པར་གྱུར་པས་ས་ཆེན་པོ་འདི་ཡང་གསེག་མ་དང་། གྱོ་མོ་མེད་ཅིང་གསེར་དངུལ་མང་པོ་དང་། ཀུན་དགའ་ར་བ་དང་། བསྐྱེད་མོས་ཚལ་དང་། རྫིང་བུ་དང་། མཚེའུ་དག་གིས་མཛེས་པར་བྱས་པར་གྱུར་ཏོ། །རྒྱལ་པོ་ང་ལས་ནུའི་རྒྱལ་པོ་ཕོ་བྲང་འཁོར་ནི་གྲོང་ཁྱེར་མི་ཚུགས་པ་ཞེས་བྱ་བར་གྱུར་ཏེ། ཤར་ནུབ་ཏུ་ཆུར་ནི་དཔག་ཚད་བཅུ་གཉིས། ལྷོ་བྱང་གི་ཞེང་དུ་ནི་དཔག་ཚད་བདུན་ཡོད་པར་
གྱུར་ཏོ། །དེ་ནི་བསྐལ་པའི་དང་པོ་ལ་བྱུང་བའི་འཁོར་ལོས་སྒྱུར་བའི་རྒྱལ་པོ་རིགས་ཆེན་པོར་གྲགས་པས་སྐྱེས་པའི་རྒྱལ་པོ་རྣམས་ཀྱི་དང་པོའི་གྲོང་ཁྱེར་དུ་གྱུར་པ་སྟེ། འདི་ལྟ་སྟེ་དཔར་ན་སུམ་བཅུ་རྩ་གསུམ་པའི་ལྷ་རྣམས་ཀྱི་གྲོང་ཁྱེར་ཆེན་པོ་བལྟ་ན་སྡུག་ཅེས་བྱ་བ་ནི་སྟེང་གི་ཕྱོགས་ནས་དྲིལ་བུ་གཡེར་ཀའི་དྲ་བ་བྲེས་པའི་བར་དུ་རྒྱ་ཆེར་ཏེ། དེ་བཞིན་དུ་རྒྱལ་པོ་ང་ལས་ནུའི་དཔྱིད་གནས་པ་ནི་ཟླ་བ་འཆར་བ་ཞེས་བྱ་བའི་ཁང་བཟངས་བཤམས་པར་གྱུར་ཏོ། །དབྱར་གནས་པ་ནི་བཻ་དཱུཪྻའི་སྙིང་པོ་ཞེས་བྱ་བའི་ཁང་པ་ཟངས་བཤམས་པར་གྱུར་ཏེ། འདི་ལྟ་སྟེ་དཔེར་ན་ལྷའི་དབང་པོ་བརྒྱ་བྱིན་གྱི་རྣམ་པར་རྒྱལ་བའི་ཁང་བཟངས་ལྟ་བུའོ། །རྒྱལ་པོ་ང་ལས་ནུའི་དགུ་ན་གནས་པ་ནི་ཉི་མའི་འོད་ཟེར་ཡང་དག་འཕགས་ཤེས་བྱ་བའི་ཁང་བཟངས་བཤམས་པར་གྱུར་ཏེ། འདི་ལྟ་སྟེ་དཔེར་ན་ལྷའི་དབང་པོ་བརྒྱ་བྱིན་གྱི་རྣམ་པར་རྒྱལ་བའི་ཁང་བཟངས་ལྟ་བུའོ། །རྒྱལ་པོ་ང་ལས་ནུ་ཁང་བཟངས་ཟླ་བ་འཆར་བར་གནས་པའི་ཚེ་ནི་བཙུན་མོ་དང་བཅས་པར་འདི་ལྟ་སྟེ་དཔེར་ན་ཙན་དན་གྱིས་བསྐུས་པའི་བཞིན་དུ་ལུས་བསིལ་བར་གྱུར་ཏོ། །ཁང་བཟངས་བཻ་དཱུཪྻའི་སྙིང་པོར་གནས་པའི་ཚེ་འདི་ལྟ་སྟེ་དཔེར་ན་ཏ་མ་ལའི་ལོ་མས་བསྐུས་པ་བཞིན་དུ་ལུས་དུས་དང་ལྡན་པར་བདེ་བར་གྱུར་ཏོ། །ཁང་བཟངས་ཉི་མའི་འོད་ཟེར་ཡང་དག་འཕགས་སུ་གནས་པ་དེའི་ཚེ་འདི་ལྟ་སྟེ་དཔེར་ན་ཨ་ག་རུས་བསྐུས་པ་བཞིན་དུ་ལུས་དྲོ་བར་གྱུར་ཏོ། །རྒྱལ་པོ་ཆེན་པོ་རྒྱལ་པོ་ང་ལས་ནུའི་བསམ་པའི་དབང་གིས་ཁང་བཟངས་དེ་དག་ཀྱང་ཉམས་སུ་ལེན་བདེ་བའི་རེག་པ་འབྱིན་པར་གྱུར་ཏོ། །བསམ་པའི་དབང་གིས་རླུང་ལྡང་བར་འགྱུར། ཆར་འབབ་པར་འགྱུར། རོལ་མོའི་སྒྲ་འབྱུང་བར་འགྱུར་རོ། །བསམ་པའི་དབང་གིས་སྐྱིད་པ་དང་། ལོངས་སྤྱོད་དང་། ཡོངས་སུ་སྤྱད་པའི་རྣམ་པ་འབྱུང་ངོ་། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ། ཀྱེ་མ་བདག་གི་ཕོ་བྲང་དུ་ཞག་བདུན་དུ་དབྱིག་གི་ཆར་འབབ་པར་གྱུར་ཅིག་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུའི་ཕོ་བྲང་དུ་ཞག་བདུན་དུ་དབྱིག་གི་ཆར་བབ་པར་གྱུར་ཏོ། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུས་ཞག་བདུན་པོ་དེ་
འདས་ནས་དབྱིག་གི་ཆར་བབ་པ་དེ་ལ་འདི་སྙམ་དུ་སེམས་ཏེ། ཇི་ཙམ་དུ་ཡོངས་སུ་དག་པའི་ལས་ཀྱི་རྣམ་པར་སྨིན་པས་བསམ་པ་ཡིད་བཞིན་དུ་ཡོངས་སུ་རྫོགས་པ་དམིགས་ཤིང་བསོད་ནམས་དག་ཀྱང་མི་སླུ་བ་འདི་ནི་ངོ་མཚར་རྨད་དུ་བྱུང་ངོ་སྙམ་ནས་དེ་ཡང་འདི་སྙམ་དུ་སེམས་སྟེ། བདག་གིས་གླིང་ཆེན་པོ་འཛམ་བུའི་གླིང་འབྱོར་ཅིང་རྒྱས་ལ། བདེ་ཞིང་ལོ་ལེགས་པ་དང་། སྐྱེ་བོ་མང་པོ་དང་མིས་གང་བ་ལ་ཡང་དབང་བྱས། བདག་གི་ཁྱིམ་ནི་ཞག་བདུན་དུ་དབྱིག་གི་ཆར་བབ་ན་ད་ནི་བདག་ནུབ་ཀྱི་བ་ལང་སྤྱོད་ཀྱི་གླིང་དུ་འགྲོའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ཆེན་པོ་རྒྱལ་པོ་ང་ལས་ནུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ཏེ། འཛམ་བུའི་གླིང་ནས་ནུབ་ཀྱི་བ་ལང་སྤྱོད་ཀྱི་གླིང་དུ་ཕྱིན་ནས། དེས་དེར་ལོ་བརྒྱ་སྟོང་ཕྲག་མང་པོར་མིའི་ལས་འདས་ཤིང་ལྷ་རྫས་སུ་མ་གྱུར་བའི་ལོངས་སྤྱོད་དང་ལྡན་པའི་རྒྱལ་པོ་བྱས་སོ། །དེ་ནུབ་ཀྱི་བ་ལང་སྤྱོད་ཀྱི་གླིང་ཆེན་པོ་དེ་ན་གནས་པའི་ཚེ་ཡང་སེམས་བསྐྱེད་མ་ཐག་ཏུ་འཛམ་བུའི་གླིང་དུ་བབ་པ་བཞིན་དུ་ཞག་བདུན་གྱི་བར་དུ་དབྱིག་གི་ཆར་བབ་པར་གྱུར་ཏོ། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུ་དེ་འདི་སྙམ་དུ་སེམས་ཏེ། བདག་གི་འཛམ་བུའི་གླིང་འབྱོར་ཅིང་རྒྱས་པ་ནས་སྐྱེ་བོ་མང་པོ་དང་མིས་གང་བའི་བར་ལ་ནི་དབང་བྱས། བདག་གི་ཁྱིམ་དུ་ཞག་པ་བདུན་དུ་དབྱིག་གི་ཆར་ནི་བབ། བདག་གིས་ནུབ་ཀྱི་བ་ལང་སྤྱོད་ཀྱི་གླིང་ཆེན་པོ་ལ་ཡང་དབང་བྱས་ཏེ། བདག་གི་ཁྱིམ་འདིར་ཡང་ཞག་བདུན་དུ་དབྱིག་གི་ཆར་བབ་ན་ཤར་གྱི་ལུས་འཕགས་ཤེས་བྱ་བའི་གླིང་ཆེན་པོ་ཡོད་ཀྱིས། བདག་ནི་གླིང་ཆེན་པོ་ཤར་གྱི་ལུས་འཕགས་པོ་ག་ལ་བ་དེ་ལ་འགྲོའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ཆེན་པོ་རྒྱལ་པོ་ང་ལས་ནུ་དེ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་ཤར་གྱི་ལུས་འཕགས་པོའི་གླིང་ཆེན་པོར་ཕྱིན་པར་གྱུར་ཏེ། དེས་དེར་ཡང་ལོ་བརྒྱ་སྟོང་ཕྲག་མང་པོར་མིའི་ལས་འདས་ཤིང་ལྷ་རྫས་སུ་མ་གྱུར་བའི་ལོངས་སྤྱོད་པ་དང་ལྡན་པར་རྒྱལ་པོ་བྱས་སོ། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུས་དེར་ཡང་འདི་སྙམ་དུ་
བསམས་ཏེ། བདག་གིས་འཛམ་བུའི་གླིང་དང་། ནུབ་ཀྱི་བ་ལང་སྤྱོད་དང་། ཤར་གྱི་ལུ་འཕགས་པོ་ལ་ནི་དབང་བྱས་ན་ད་ནི་བདག་བྱང་གི་སྒྲ་མི་སྙན་གྱི་གླིང་ཆེན་པོར་འགྲོའོ། །དེའི་མི་རྣམས་ནི་ང་ཡིར་བྱ་བ་མེད་ཅིང་ཡོངས་སུ་འཛིན་པ་མེད་མོད་ཀྱི། འོན་ཀྱང་དེར་སོང་སྟེ་རང་གི་དཔུང་གི་ཚོགས་ལ་རྗེས་སུ་བསྟན་པར་བྱའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དེ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་ཤར་གྱི་ལུས་འཕགས་པོའི་གླིང་ཆེན་པོ་ནས་བྱུང་གི་སྒྲ་མི་སྙན་གླིང་ཆེན་པོར་ཕྱིན་པར་གྱུར་ཏེ། དེས་དེར་ཡང་མི་རྣམས་ང་ཡིར་བྱ་བ་མེད་ཅིང་ཡོངས་སུ་འཛིན་པ་མེད་པའི་ནང་དུ་ལོ་བརྒྱ་སྟོང་ཕྲག་དུ་མར་བདག་གི་དཔུང་གི་ཚོགས་རྣམས་ལ་རྗེས་སུ་བསྟན་ཏོ། །རྒྱལ་པོ་ཆེན་པོ་དེ་ནས་ལོ་སྟོང་མང་པོ་འདས་པ་ཞིག་ན་རྒྱལ་པོ་ང་ལས་ནུ་དེ་འདི་སྙམ་དུ་སེམས་ཏེ། བདག་གིས་འཛམ་བུའི་གླིང་ལ་ནི་དབང་ཆེན་པོ་ལ་ཡང་དབང་བྱས་ན། ད་ནི་སུམ་བཅུ་རྩ་གསུམ་པ་ཞེས་བྱ་བའི་ལྷ་རི་རབ་ཀྱི་རྩེ་མོ་ལ་འཁོད་པ་ཅེས་གྲག་གིས་སུམ་བཅུ་རྩ་གྱི་གནས་སུ་འགྲོའོ་སྙམ་དུ་བསམས་སོ། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་རི་རབ་ཀྱི་རྩེ་མོ་ལ་ཕྱིན་པར་གྱུར་ཏོ། །དེའི་ཚེ་སུམ་བཅུ་རྩ་གསུམ་པའི་ལྷ་རྣམས་ཆོས་བཟང་ལྷའི་མདུན་ས་ཞེས་བྱ་བ་ན་འདུས་ཤིང་འཁོར་འཁོད་པ་ལས་ལྷའི་དབང་པོ་བརྒྱ་བྱིན་གྱིས་ང་ལས་ནུ་རྒྱང་རིང་པོ་ནས་འོང་བ་མཐོང་སྟེ། མཐོང་ནས་སྟན་གྱི་ཕྱེད་ལ་བདར་ཏེ་རྒྱལ་པོ་ཆེན་པོ་ཆུར་སྤྱོན། རྒྱལ་པོ་ཆེན་པོ་བྱོན་པ་ལེགས་སོ། །གང་གི་དུས་ལ་དབབ་པར་ཤེས་ན་སྟན་གྱི་ཕྱེད་ལ་བཞུགས་ཤིག་ཅེས་སྨྲས་པ་དང་། རྒྱལ་པོ་ང་ལས་ནུ་ལྷའི་དབང་པོ་བརྒྱ་བྱིན་གྱི་སྟན་གྱི་ཕྱེད་ལ་འདུག་གོ །རྒྱལ་པོ་ང་ལས་ནུ་བརྒྱ་བྱིན་གྱི་སྟེན་ཕྱེད་ལ་འདུག་མ་ཐག་ཏུ་སུམ་བཅུ་རྩ་གསུམ་
པའི་ལྷ་ཐམས་ཅད་ལྷའི་གནས་བཅུས་ཟིལ་གྱི་གནན་ཏོ། །བཅུ་གང་ཞེ་ན། ལྷའི་ཚེ་དང་། ལྷའི་གྲགས་པ་དང་། ལྷའི་ཁ་དོག་དང་། ལྷའི་བདེ་བ་དང་། ལྷའི་དབང་ཕྱུག་ལ་དབང་བ་དང་། ལྷའི་གཟུགས་དང་། ལྷའི་སྐྲ་དང་། ལྷའི་རོ་དང་། ལྷའི་རེག་དང་། རྣམ་པ་བཅུ་སྟེ། དེ་དག་གིས་ལྷའི་དབང་པོ་བརྒྱ་བྱིན་མ་གཏོགས་པ་ཐམས་ཅད་ཟིལ་གྱིས་མནན་ཏོ། །དེ་ཅིའི་ཕྱིར་ཞེ་ན། མིག་འཛུམས་པ་དང་། མིག་མི་འཛུམས་པ་ཙམ་ལས་ལྷ་རྣམས་ཀྱིས་འདི་ནི་རྒྱལ་པོ་ང་ལས་ནུའོ། །འདི་ནི་ལྷའི་དབང་པོ་བརྒྱ་བྱིན་ནོ་ཞེས་བྱ་བར་ཤེས་པ་མ་གཏོགས་པར་རྒྱལ་པོ་ང་ལས་ནུ་དེ་དང་། ལྷའི་དབང་པོ་བརྒྱ་བྱིན་གཉིས་ཀྱང་གཟུགས་མཉམ་པར་གྱུར་སྤྱོད་པ་མཉམ་པར་གྱུར། ལོངས་སྤྱོད་མཉམ་པར་གྱུར་ཏེ། རྒྱལ་པོ་ཆེན་པོ་མིར་གྱུར་པ་དང་། ལྷར་གྱུར་པ་གཉིས་ལུས་མཉམ་པར་གྲུབ་པ་དེ་ནི་ངོ་མཚར་ཆེའོ། །རྒྱལ་པོ་ཆེན་པོ་རྒྱལ་པོ་ང་ལས་ནུས་དེར་ལོ་བརྒྱ་སྟོང་ཕྲག་མང་པོར་སུམ་བཅུ་རྩ་གསུམ་པའི་ལྷའི་ནང་དུ་རྒྱལ་སྲིད་ཕྱེད་ལ་དབང་བྱས་ཀྱང་དབང་ཕྱུག་གིས་མ་ངོམས་ནས་འདི་སྙམ་དུ་སེམས་བསྐྱེད་དེ། ཀྱེ་མ་བདག་གིས་སུམ་བཅུ་རྩ་གསུམ་པའི་ལྷའི་རྒྱལ་སྲིད་ཀྱི་དབང་ཕྱུག་ཐམས་ཅད་ལ་དབང་བྱའོ་སྙམ་པ་དང་། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་སུམ་བཅུ་རྩ་གསུམ་གྱི་གནས་ནས་ཉམས་ཏེ། འཛམ་བུའི་གླིང་དུ་རྒྱལ་པོའི་སྐྱེད་མོས་ཚལ་མཆོག་ཏུ་ཕྱིན་པར་གྱུར་ཏོ། །དེ་འཛམ་བུའི་གླིང་དུ་གནས་པར་གྱུར་བའི་ཚེ་ཕྱོགས་ཐམས་ཅད་ཀྱང་སྣང་བར་གྱུར་ཏེ། ཉི་མའི་འོད་ཀྱང་ཟིལ་གྱིས་མནན་ནས་འདི་ལྟ་སྟེ་དཔེར་ཟླ་བའི་འོད་ཉི་མས་ཟིལ་གྱིས་མནན་པ་ལྟ་བུའོ། །ཉི་མ་ནམ་མཁའ་ལ་འདུག་པ་ཡང་ལྷམ་མེ་མ་ཡིན་ཏེ། འདི་ལྟ་སྟེ་དཔེར་ན་ཟླ་བའི་དཀྱིལ་འཁོར་སྟེང་གི་བར་སྣང་ལ་འདུག་པ་ཉི་མས་ཟིལ་གྱིས་ནོན་ན་མི་སྣང་བ་བཞིན་ནོ། །དེ་ནས་གྲོང་ཁྱེར་མི་ཚུགས་པའི་ཕོ་བྲང་དུམ་པ་ན་མི་འཁོད་པ་རྣམས་ཀྱིས་རྒྱལ་པོ་དེ་བསྐྱེད་མོས་ཚལ་དེར་ཕྱིན་པ་མཐོང་བར་གྱུར་ཏོ། །མཐོང་
ནས་ཀྱང་ངོ་མཚར་དུ་གྱུར་ཏེ། དེ་དག་གྲོང་དུ་དོང་ནས་ཀྱེ་གྲོགས་པོ་དག་འདི་ལྟར་ལྷའི་བུ་ཞིག་བར་སྣང་ལས་བབས་ཏེ། རྒྱལ་པོའི་སྐྱེད་མོས་ཚལ་འདིར་ཕྱིན་ཏོ་ཞེས་ཚིག་ཏུ་བརྗོད། སྒྲ་བསྒྲགས་སོ། །རྒྱལ་པོ་ཆེན་པོ་དེ་ནས་ཡུལ་འཁོར་གྱི་མི་དང་རྒྱལ་པོར་བཅས་པས་དེ་སྐད་ཐོས་ནས་མྱུར་བ་མྱུར་བར་རིངས་པའི་གཟུགས་སུ་གླུ་དང་། རོལ་མོ་དང་། མེ་ཏོག་དང་། སྤོས་དང་། ཕྲེང་བ་དང་། བདུག་སྤོས་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་དང་། བླ་རེ་དག་ཐོགས་ནས་གཙང་སྦྲའི་སྤྱོད་པས་གྲོང་ཁྱེར་དེ་ནས་བྱུང་སྟེ་བསྐྱེད་མོས་ཚལ་དེ་ག་ལ་བ་དེར་དོང་ངོ་། །རྒྱལ་པོ་ཆེན་པོ་ང་ལས་ནུ་དེ་བསྐྱེད་མོས་ཚལ་དེར་འདུག་མ་ཐག་ཏུ་ས་ཆེན་པོ་འདི་ཡང་རྣམ་པ་དྲུག་ཏུ་གཡོས་པར་གྱུར་ཏོ། །རྒྱལ་པོ་ཆེན་པོ་དེ་ན་ཡུལ་འཁོར་གྱི་མི་དང་རྒྱལ་པོར་བཅས་པ་མིའི་དྲི་ཁྱད་པར་དུ་འཕགས་པས་རྒྱལ་པོ་ང་ལས་ནུའི་དྲུང་དུ་དོང་བ་དང་། །རྒྱལ་པོ་ང་ལས་ནུ་ལྷའི་ལོངས་སྤྱོད་ལ་གོམས་པས་མིའི་ལོངས་སྤྱོད་མི་བཟོད་པར་གྱུར་ནས་ས་ལ་བྱིང་ཞིང་མི་གནས་པར་གྱུར་ཏེ། འདི་ལྟ་སྟེ་དཔེར་ན་མར་གྱི་གོང་བུའམ། མར་སར་གྱི་གོང་བུ་བྱེ་མ་ཚ་བ་ལ་བཞག་ན་ཞུ་ཞིང་མི་གནས་པ་དེ་བཞིན་དུ་ཡུལ་འཁོར་གྱི་མི་དང་རྒྱལ་པོར་བཅས་པས་དེ་ཕྱིར་བར་གྱུར་པ་མཐོང་ནས་ཁྱོད་སུ་ཞིག་ལགས་ཤེས་དྲིས་སོ། །དེ་ནས་རྒྱལ་པོ་ང་ལས་ནུ་རྒྱལ་པོ་དང་། ཡུལ་འཁོར་གྱི་མིར་བཅས་པ་དེ་དག་ལ་འདི་སྐད་ཅེས་སྨྲས་སོ། །ཁྱེད་ཀྱིས་རྒྱལ་པོ་ང་ལས་ནུས་ཞེས་བྱ་བ་ཞིག་བྱུང་བ་དེ་ཐོས་སམ། དེ་དག་གིས་སྨྲས་པ། བདག་ཅག་གིས་རྒན་རབས་དག་ལས་རྒྱལ་པོ་ང་ལས་ནུ་ཞེས་བགྱི་བ་ཞིག་ལུས་དེ་ཉིད་ཀྱིས་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་མཐོ་རིས་སུ་བཞུད་དོ་ཞེས་ཐོས་སོ། །རྒྱལ་པོ་ང་ལས་ནུས་དེ་དག་སྨྲས་པ། གྲོགས་པོ་དག་རྒྱལ་པོ་ང་ལས་ནུ་ཞེས་བྱ་བ་དེ་ནི་ཁོ་བོ་ཡིན་ཏེ། མཐོ་རིས་ནས་ཉམས་ནས་ལྷུང་བར་གྱུར་ཏོ་ཞེས་སྨྲས་ནས། རྒྱལ་པོ་དང་ཡུལ་འཁོར་གྱི་མིར་བཅས་པ་དེ་དག་གིས་གླུའི་དབྱངས་ཀྱི་ཚིགས་སུ་བཅས་པས་དེ་ལ་འདི་སྐད་ཅེས་སྨྲས་སོ། །བདག་ཅག་རྣམས་ཀྱིས་རྒན་རབས་ལས། །མི་ཡི་བདག་པོ་རྫུ་འཕྲུལ་ཆེ། ། མྱ་ངན་བྲལ་ཞིང་གྲགས་ཆེ་ལྡན། །
ང་ལས་ནུས་ཞེས་བྱ་བ་བྱུང་། །དེ་ནི་ཁྱོགས་དཔུང་བཞོན་དང་བཅས། །གཡོག་བཅས་མཐོ་རིས་འཇིག་རྟེན་བཞུད། །མི་དབང་གཙོ་བོ་ལྷ་གནས་བཞུགས། །ཆོས་ཀྱི་ས་ཡང་སྐྱོང་ཞེས་ཐོས། །དེ་སྨྲས་མི་ཡི་བདག་པོ་དེ། །མི་རྟག་ཉེན་ཏེ་ཕོངས་པར་གྱུར། །བདེ་བ་སྟོན་ཏེ་སྡུག་བསྔལ་ཐོབ། །རྒྱལ་པོ་དེ་ནི་ཁོ་བོ་ཡིན། །ང་སྨྲས་སྐྱེ་བོ་ཐམས་ཅད་ཀྱིས། །ཐལ་མོ་སྦྱར་ཏེ་རྐང་བར་གཏུགས། །རྒྱལ་པོ་བདག་ཅག་ཅི་བརྗོད་པ། །ཡ་མཚན་ངོ་མཚར་བཀའ་སྩལ་གསོལ། །དེ་སྨྲས་རྒྱལ་པོ་ལྷ་ལས་ཉམས། །སྡུག་བསྔལ་རྙེད་པའི་ངོ་མཚར་ཉོན། །ཡུན་རིང་བདེ་བར་འདོད་པ་ཡི། །མིས་ནི་རྟག་ཏུ་བག་ཡོད་བྱ། །ང་ལས་ནུ་བ་རྒྱལ་པོའི་མཆོག །རྒྱལ་པོས་གླིང་བཞིར་རབ་བསྟན་ནས། །འདོད་པའི་ལོངས་སྤྱོད་མཆོག་ལྡན་ཏེ། །འདོད་པས་མ་ངོམས་དེ་འདས་སོ། །དེ་ཡི་ཁྱིམ་དུ་བཞག་བདུན་དུ། །དབྱིག་གི་དྲ་བའི་ཆར་པ་བབ། །གླིང་བཞི་པ་ལ་རབ་བསྟན་ནས། །འདོད་པས་མ་ངོམས་དེ་བྱིང་ངོ་། །ལྷ་ཡི་དབང་པོ་བརྒྱ་བྱིན་གྱི །སྟན་ཕྱེད་ལ་ནི་རྒྱལ་པོ་འདུག །ཀུན་དུ་རྟོག་པའི་རྟོག་པས་བརླག །བདག་འདོད་ང་རྒྱལ་བཅོམ་ནས་རྒུད། །མི་མཁས་འཁོར་བའི་རྒྱ་མཚོ་འདིར། །འགྲོ་བ་དག་ཏུ་ཡང་ནུབ་སྟེ། །འདོད་པ་རབ་ཏུ་བསྟེན་བྱས་ན། །རྒྱལ་བས་བསྔགས་པའི་ངོམས་མི་རྙེད། །རྨི་ལམ་རྨིས་པའི་ཆུ་ལྟ་བུར། །འཐུངས་ཀྱང་ངོམས་པར་མི་འགྱུར་བ། །དེ་ལྟར་འདོད་པའི་ལོངས་སྤྱོད་རྣམས། །བསྟེན་ན་ངོམས་པར་མི་འགྱུར་རོ། །བློ་གྲོགས་ལྡན་པ་གང་དག་གིས། །ཤེས་པར་མུན་པ་རྣམས་བསལ་ཏེ། །ངོམས་པར་བྱ་ཕྱིར་བཅོམ་ལྡན་གྱི། །འཕགས་པའི་ཤེས་རབ་ཡང་དག་རྟོག །སྲིད་པ་རྣམ་བཤིག་བློ་གྲོས་ཅན། །རྒ་དང་ཤི་དང་སྐྱེ་ལ་རྟོག །སྲེད་པ་རབ་ཏུ་སྤངས་ནས་སུ། །སྲིད་པ་སྤངས་ཏེ་ལེན་མི་བྱེད། །ཚོར་བའི་རྣམ་པ་མེ་འདྲར་རིག །རེག་པའང་མི་འདྲར་རིག་ནས་ནི། །ཚོར་བ་འཕགས་པ་མ་ཡིན་དང་། རེག་པ་དེ་ལ་སྲེད་མི་བྱེད། །རོལ་མོའི་སིལ་སྙན་བརྡུངས་པ་ལྟར། །ཡུལ་དང་དབང་པོ་མི་བྱེད་དེ། །རྒྱལ་བསྟན་བྱེད་པ་དབང་པོ་རྟོགས། །རང་བཞིན་མཐོང་བ་དབང་པོ་འདོར། །སྐྱེ་མཆེད་དྲུག་པོ་ཡོད་མིན་ཡང་། །གཟུགས་དང་འབྲེལ་བར་
ཡིད་བསྐྱོད་དོ། །རྣམ་པར་ཤེས་པར་བརྟགས་པའི་ཕྱིར། །ཚོར་བ་ཀུན་དུ་རྟོག་ཅེས་བརྗོད། །དེ་ལྟར་རིག་ནས་འཕགས་པ་རྣམས། །སྲིད་པའི་རྒྱུད་ལ་ཡིད་མི་རྟོག །ཤེས་རབ་འཕགས་པས་ངོམས་གྱུར་ཏེ། །ཤིང་མེད་མེ་བཞིན་ཞི་བར་འགྱུར། །སྲེད་པ་མི་རྟག་བསྟན་བྱས་ཏེ། །རྒྱལ་པོ་ཡུལ་འཁོར་མིར་བཅས་ལ། །ང་ནུས་དེ་སྐད་ལུང་བསྟན་ནས། །མི་ཡི་བདག་པོ་ནུབ་པར་གྱུར། །རྒྱལ་པོ་ཆེན་པོ་དེའི་ཚེ་དེའི་དུས་ན་རྒྱལ་པོ་ང་ལས་ནུ་ཞེས་བྱ་བ་བྱུང་བ་དེ་གཞན་ཞིག་ཡིན་སྙམ་དུ་ངོམས་ཤིང་ཐེ་ཚོམ་ཟའམ། ནེམ་ནུར་དུ་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པ་དེ་ཉིད་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་ང་ལས་ནུ་ཞེས་བྱ་བར་གྱུར་ཏེ། རྒྱལ་སྲིད་ཀྱི་དབང་ཕྱུག་རྒྱ་ཆེན་པོ་ལ་དབང་བྱས་ཀྱང་འདོད་པས་མ་ངོམས་བཞིན་དུ་འཆི་བའི་དུས་བྱས་པར་གྱུར་པ་ཡིན་ནོ། །རྒྱལ་པོ་ཆེན་པོ་དེ་ལྟ་བས་ན་དེ་ལྟར་རིག་པར་བྱས་ལ་དབང་ཕྱུག་གི་དྲེགས་པ་སྤངས་ཏེ་བག་ཡོད་བྱའོ། །བག་ཡོད་པ་ལ་གནས་ཏེ་ཁྱོད་ཀྱི་དགེ་བའི་རྩ་བ་རྣམས་ཡང་དག་པར་བསྒྲུབས་པར་བྱའོ། །རྒྱལ་པོ་ཆེན་པོ་བག་ཡོད་པ་ལ་མངོན་པར་དགའ་བ་ནི་དོན་གྲུབ་པར་འགྱུར་གྱིས་རྒྱལ་པོ་ཆེན་པོ་བག་ཡོད་པར་ཁམས་མཉམ་པ་ཉིད་ཡང་དག་པར་བསྒྲུབ་པར་བྱ་སྟེ། རྒྱལ་པོ་ཆེན་པོ་འདུས་བྱས་ཀྱི་ཁམས་དང་། འདུས་མ་བྱས་ཀྱི་ཁམས་ནི་བུད་མེད་མ་ཡིན། སྐྱེས་པ་མ་ཡིན། འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་གྱིས། རྒྱལ་པོ་ཆེན་པོ་འདི་ལ་ཁྱོད་ཀྱིས་སེམས་ངེས་པར་གཞག་ཅིང་གཞན་གྱི་དྲིང་མི་འཇོག་པར་བྱའོ། །རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན་མུ་ཁྱུད་ཅེས་བྱ་བ་ཆོས་དང་ལྡན་པ་ཆོས་ཀྱི་རྒྱལ་པོ་བག་ཡོད་པར་ལྷུར་ལེན་པ་ཞིག་བྱུང་སྟེ། དེ་བྱ་བ་གང་དང་གང་རྩོམ་ཡང་དེ་དང་དེ་ཐམས་ཅད་ལ་བག་ཡོད་པར་སྤྱོད་ཅིང་བྱེད་དོ། །རྒྱལ་པོ་ཆེན་པོ་རྒྱལ་པོ་མུ་ཁྱུད་དེ་ཆོས་འདི་དག་ཐམས་ཅད་ནི་དུས་གསུམ་མཉམ་པ་ཉིད་ཀྱི་མཉམ་པ་སྟེ། འདས་པའི་དུས་ན་ཡང་ཆོས་ཐམས་ཅད་རང་བཞིན་དང་བྲལ་བའོ། །མ་འོངས་པ་དང་། ད་ལྟར་བྱུང་བའི་དུས་ན་ཡང་ཆོས་ཐམས་ཅད་རང་བཞིན་དང་བྲལ་བའོ་དུས་གསུམ་མཉམ་པ་ཉིད་ལ་བརྩོན་པར་གྱུར་ཏོ། །
དེས་ཆོས་ཐམས་ཅད་དུས་གསུམ་མཉམ་པ་ཉིད་དུ་མཐོང་བས་ཆོས་ཐམས་ཅད་ལ་མངོན་པར་ཞེན་པ་མེད་པར་གྱུར་ཏེ། དེས་སེམས་ཕྱིན་ཅི་ལོག་བཞིས་སེམས་ཕྱིན་ཅི་ལོག་ཏུ་གྱུར་ཅིང་མི་སྡུག་པ་ལ་སྡུག་པར་འདུ་ཤེས་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་དང་། མི་རྟག་པ་ལ་རྟག་པར་འདུ་ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པ་དག་མཐོང་ནས་དེ་འདི་སྙམ་དུ་སེམས་ཏེ། འདི་ལྟར་སེམས་ཅན་འདི་དག་ནི་ཆོས་ཐམས་ཅད་སྟོང་པར་མ་མཐོང་བས། །ཀྱེ་མ་ཀྱི་ཧུད་འཇིག་རྟེན་གནས་པ་འདི་ནི་ཕུང་ངོ་། །ཀྱེ་མ་འཇིག་རྟེན་གནས་པ་འདི་ནི་རྣམ་པར་ཕུང་ངོ་སྙམ་ནས་འདི་སྙམ་དུ་བསམ་ཏེ། །བདག་གིས་སེམས་ཅན་འདི་དག་བསྡུ་བའི་དངོས་པོ་བཞིས་བསྡུ་བར་བྱའོ། །བདག་གིས་དེ་དག་བསྡུ་བའི་དངོས་པོ་བཞིས་བསྡུས་ན་ཆོས་ལ་སྦྱར་བ་ལ་དབང་དུ་འགྱུར་རོ་སྙམ་མོ། །རྒྱལ་པོ་ཆེན་པོ་དེ་ནས་རྒྱལ་པོ་མུ་ཁྱུད་ཀྱིས་ཐབས་མཁས་པ་སྔོན་དུ་བཏང་སྟེ་སེམས་ཅན་རྣམས་བསྡུ་བའི་དངོས་པོ་བཞིས་བསྡུས་ནས་དུས་གསུམ་མཉམ་པ་ཉིད་དུ་གདམས་ངག་གིས་བསྟན་ཏེ། ཀྱེ་སེམས་ཅན་དག་ཆོས་ཐམས་ཅད་ནི་རང་བཞིན་གྱིས་སྟོང་པ་སྟེ། ཀྱེ་སེམས་ཅན་དག་ཆོས་གང་ལ་རང་བཞིན་མེད་པ་དེ་ནི་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན། དེ་ཅིའི་ཕྱིར་ཞེ་ན། རང་བཞིན་མེད་པའི་ཕྱིར་ཏེ། འདས་པ་ཞེས་གདགས་པར་བྱ་བ་མ་ཡིན་མ་འོངས་དང་། ད་ལྟར་བྱུང་བ་ཞེས་གདགས་པར་བྱ་བ་མ་ཡིན་ནོ། །རྒྱལ་པོ་ཆེན་པོ་དེ་ནས་སེམས་ཅན་དེ་དག་རྒྱལ་པོ་མུ་ཁྱུད་དེས་དེ་ལྟར་དུས་གསུམ་མཉམ་པ་ཉིད་ལ་བསྐུལ་བས་སྲོག་ཆགས་བྱ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེའི་ཚེ་སུམ་བཅུ་རྩ་གསུམ་པའི་ལྷ་རྣམས་ཆོས་བཟང་ལྷའི་མདུན་ས་ན་འདུས་ཤིང་འཁོད་པའི་ནང་དུ་བར་སྐབས་སུ་འདི་ལྟ་བུའི་གཏམ་བརྗོད་པ་བྱུང་སྟེ། འདི་ལྟར་ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་ལ་ཐབས་མཁས་པས་ཕྱིན་ཅི་ལོག་མེད་པ་ཡང་དག་བར་སྟོན་པ་ཆོས་ཆོས་ཀྱི་རྒྱལ་པོ་ཐབས་མཁས་པ་དང་ལྡན་པ་མུ་ཁྱུད་འདི་སུ་དག་གི་རྒྱལ་པོ་ཡིན་པའི་མི་རྣམས་ནི་ཀྱེ་མའོ་རྙེད་པ་དང་ལྡན་པ་སྟེ།
ཀྱེ་མ་མི་རྣམས་ནི་རྙེད་པར་ལེགས་པར་རྙེད་པའོ་ཞེས་ཟེར་བར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་ཆོས་བཟང་ལྷའི་མདུན་ས་ག་ལ་བ་དེར་སོང་སྟེ་ཕྱིན་ནས་རང་གི་སྟན་ལ་འདུག་སྟེ་སུམ་བཅུ་རྩ་གསུམ་པའི་ལྷ་རྣམས་ལ་སྨྲས་པ། ཁྱེད་ད་ལྟར་འདི་ན་འཁོད་པ་རྣམས་གཏམ་ཅི་ཞིག་བྱེད། དེ་སྐད་ཅེས་སྨྲས་པ་དང་། སུམ་བཅུ་རྩ་གསུམ་པའི་ལྷ་རྣམས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ལྷའི་དབང་པོ་བདག་ཅག་ཆོས་བཟང་ལྷའི་མདུན་ས་འདི་ན་མཆིས་པའི་ཚེ་བར་སྐབས་སུ་འདི་ལྟ་བུའི་གཏམ་བརྗོད་པ་བྱུང་སྟེ། འདི་ལྟར་ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་ལ་ཐབས་མཁས་པས་གང་འདི་ཆོས་ཐམས་ཅད་རང་བཞིན་མེད་པའོ་ཞེས་ཕྱིན་ཅི་མ་ལོག་པར་སྟོན་པ་ཆོས་ཅན་ཆོས་ཀྱི་རྒྱལ་པོ་ཐབས་མཁས་པ་དང་ལྡན་པ་མུ་ཁྱུད་འདི་སུ་དག་གི་རྒྱལ་པོ་ཡིན་པའི་མི་རྣམས་ནི་ཀྱེ་མའོ་རྙེད་པ་ལྡན་པ་སྟེ། ཀྱེ་མའོ་མི་རྣམས་ནི་རྙེད་པ་ལེགས་པར་རྙེད་པའོ་ཞེས་བགྱིས་སོ། །དེ་སྐད་སྨྲས་པ་དང་། ལྷའི་དབང་པོ་བརྒྱ་བྱིན་གྱིས་སུམ་བཅུ་རྩ་གསུམ་པའི་ལྷ་དེ་དག་ལ་འདི་སྐད་ཅེས་སྨྲས་སོ། །ཀྱེ་གྲོགས་པོ་དག་རྒྱལ་པོ་མུ་ཁྱུད་ཅེས་བྱ་བ་དེ་ནི་ཐབས་ལ་མཁས་པ་བསམ་གྱིས་མི་ཁྱབ་པ་དང་ལྡན་པ་ཡིན་ན་རྒྱལ་པོ་མུ་ཁྱུད་དེ་འདིར་འོངས་ནས་མཐོང་བར་ཁྱེད་འདོད་དམ་མི་འདོད། །སུམ་བཅུ་རྩ་གསུམ་པའི་ལྷ་རྣམས་ཀྱིས་སྨྲས་པ། ལྷའི་དབང་པོ་མུ་ཁྱུད་དེ་འདིར་མཆིས་ཏེ་མ་ཐོག་བར་བདག་ཅག་ཀྱང་འཚལ་ལོ། །དེ་ནས་ལྷའི་དབང་པོ་བརྒྱ་བྱིན་གྱིས་ཁ་ལོ་སྒྱུར་བ་མ་ཏ་ལི་ལ་སྨྲས་པ། མ་ཏ་ལི་ཚུར་ཤོག །ཁྱོད་ལྷའི་ཤིང་རྟ་ཅང་ཤེས་རྩིབས་སྟོང་དང་ལྡན་པ་ཁྲིད་ལ་རྒྱལ་པོ་མུ་ཁྱུད་ག་ལ་བ་དེར་སོང་སྟེ་རྒྱལ་པོ་མུ་ཁྱུད་ལ་འདི་སྐད་གྱིས་ཤིག །རྒྱལ་པོ་ཆེན་པོ་སུམ་བཅུ་རྩ་གསུམ་པའི་ལྷ་རྣམས་ཀྱི་ཤིག་རྟ་ཅང་ཤེས་རྩིབས་སྟོང་དང་ལྡན་པ་འདི་བཀྲི་སྟེ་མཆིས་ན་རྒྱལ་པོ་ཆེན་པོ་ཐགས་ཐོགས་མ་མཆིས་པར་འདི་ལ་བཅིབས་སུ་གསོལ། སུམ་བཅུ་རྩ་གསུམ་པའི་ལྷ་རྣམས་ནི་ཁྱོད་མཐོང་བར་དགའོ་ཞེས་གྱིས་ལ་ཤིང་རྟ་ལ་ཞོན་པ་དང་འདི་སྐད་ཅེས་གྱིས་ཤིག །རྒྱལ་པོ་ཆེན་པོ་ལམ་གང་ནས་གཤེགས་
པར་བགྱི །གང་གིས་ཕྱིན་ཅི་ལོག་ཏུ་གྱུར་པའི་ཕྱིན་ཅི་ལོག་གིས་ནས་བཞུད་དམ། ཕྱིན་ཅི་ལོག་མ་མཆིས་པ་རྣམས་ཀྱི་ཕྱིན་ཅི་ལོག་མ་མཆིས་པའི་ས་ནས་བཞུད་ཅེས་བགྱིས་ཤིག །ལེགས་སོ་ཞེས་སྨྲས་ནས། ཁ་ལོ་སྒྱུར་བ་མ་ཏ་ལིས་ལྷའི་དབང་པོ་བརྒྱ་བྱིན་གྱི་ལྟར་མཉེན་ནས་བབས་ཏེ་ཇི་སྐད་བསྒོ་བ་བཞིན་རྒྱལ་པོ་མུ་ཁྱུད་ལ་དེ་སྐད་ཅེས་སྨྲས་སོ། །དེ་སྐད་ཅེས་སྨྲས་པ་དང་། རྒྱལ་པོ་མུ་ཁྱུད་ཀྱིས་ཁ་ལོ་སྒྱུར་བ་མ་ཏ་ལི་ལ་འདི་སྐད་ཅེས་སྨྲས་སོ། །མ་ཏ་ལི་དེ་ལྟ་བས་ནས་ལམ་དེ་གཉིས་ག་ནས་འདོད་དོ་ཞེས་བྱས་པ་དང་། ཁ་ལོ་སྒྱུར་བ་མ་ཏ་ལིས་རྒྱལ་པོ་མུ་ཁྱུད་ཕྱིན་ཅི་ལོག་ཏུ་གྱུར་པ་རྣམས་ཀྱི་ཕྱིན་ཅི་ལོག་གིས་དང་། ཕྱིན་ཅི་ལོག་མེད་པ་རྣམས་ཀྱི་ཕྱིན་ཅི་ལོག་མེད་པའི་ས་དེ་གཉིས་གནས་དྲངས་ཏེ་དོང་ངོ་། །རྒྱལ་པོ་ཆེན་པོ་དེ་ནས་རྒྱལ་པོ་མུ་ཁྱུད་ཀྱིས་ཁ་ལོ་སྒྱུར་བ་མ་ཏ་ལི་ལ་སྨྲས་པ། མ་ཏ་ལི་དེ་བས་ན་ཕྱིན་ཅི་ལོག་ཏུ་གྱུར་བའི་ས་བལྟས་ཡུད་ཙམ་ཞིག་ཤིང་རྟ་སྡོད་དུ་ཆུག་ཤིག །དེ་ནས་ཁ་ལོ་སྒྱུར་བ་མ་ཏ་ལིས་ཤིང་རྟ་སྡོད་དུ་འཇུག་པའི་ཡུན་ཇི་སྲིད་པ་དེ་ཉིད་ཀྱི་བར་སྐབས་སུ་རྒྱལ་པོ་མུ་ཁྱུད་ཀྱིས་སྲོག་ཆགས་བྱེ་བ་ཕྲག་བརྒྱད་བཅུ་དེ་ཁོ་ན་ངེས་པར་བསྟན་པའི་ཏིང་ངེ་འཛིན་ལ་བཀོད་པར་གྱུར་ཏེ། འདི་ལྟར་བག་ཡོད་པ་དང་། མངོན་པར་ཤེས་པས་རྣམ་པར་རྩེ་བའི་ཕྱིར་རོ། །དེ་དག་གིས་ཀྱང་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཁ་ལོས་སྒྱུར་བ་མ་ཏ་ལིས་ནི་རྒྱལ་པོ་མུ་ཁྱུད་ཀྱིས་ལས་ཅི་བྱས་པ་ཤེས་པར་མ་གྱུར་ཏོ། །དེ་ནས་ཁ་ལོ་སྒྱུ་བ་མ་ཏ་ལིས་དེ་བཞིན་དུ་དེངས་ཏེ། རྒྱལ་པོ་མུ་ཁྱུད་དང་རི་རབ་ཀྱི་རྩེ་མོ་ལ་ཕྱིན་ཏོ། །དེ་ནས་རྒྱལ་པོ་མུ་ཁྱུད་ཀྱིས་རྒྱང་རིང་པོ་ནས་ནགས་ཚལ་སྟུག་པོ་རྣམ་པ་ཐམས་ཅད་དུ་སྔོ་མ་མཐོང་སྟེ་མཐོང་ནས་ཁ་ལོ་སྒྱུར་བ་མ་ཏ་ལི་ལ་འདི་སྐད་ཅེས་སྨྲས་སོ། །མ་ཏ་ལི་ནགས་ཚལ་སྟུག་པོ་འདི་ནི་ཐེ་ཚོམ་མེད་པར་ཕྱིན་ཅི་ལོག་མེད་པའི་སེམས་ཅན་རྣམས་ཀྱི་གནས་ཡིན་ནོ། །མ་ཏ་ལིས་སྨྲས་པ། རྒྱལ་པོ་ཆེན་པོ་འདི་ནི་སུམ་བཅུ་རྩ་གསུམ་པའི་ལྷ་རྣམས་ཀྱི་ཆོས་བཟད་ལྷའི་འདུན་ས་ལགས་ཏེ། སུམ་བཅུ་རྩ་གསུམ་པའི་ལྷ་རྣམས་ཀྱང་འདིར་དུས་ཀྱིས་རྒྱལ་པོ་ཆེན་པོ་ཐགས་ཐོགས་མ་མཆིས་པར་བཞུད་ཅིག །སུམ་བཅུ་རྩ་གསུམ་པའི་ལྷ་རྣམས་ནི་ཁྱོད་མཐོང་བར་འཚལ་ལོ། །རྒྱལ་པོ་ཆེན་པོ་དེ་ནས་རྒྱལ་པོ་མུ་ཁྱུད་དེ་
ཐགས་ཐོགས་མེད་པར་ནང་དུ་སོང་བ་དང་། ལྷའི་དབང་པོ་བརྒྱ་བྱིན་གྱིས་རྒྱལ་པོ་མུ་ཁྱུད་རིང་པོ་ནས་འོང་བ་མཐོང་ངོ་། །མཐོང་ནས་སྟན་གྱི་ཕྱེད་ལ་བདར་ཏོ། །དེ་ནས་རྒྱལ་པོ་མུ་ཁྱུད་ཀྱང་བརྒྱ་བྱིན་གྱི་སྟན་ཕྱེད་ལ་འདུག་གོ། །དེ་ནས་ལྷའི་དབང་པོ་བརྒྱ་བྱིན་གྱིས་རྒྱལ་པོ་མུ་ཁྱུད་སྟན་ལ་འདུག་པར་ཤེས་ནས་ལེགས་པར་ཤིན་དུ་དགའ་བར་བྱས་ཏེ། རྒྱལ་པོ་ཆེན་པོ་ཁྱོད་ཀྱིས་དེ་ལྟར་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་འཇིག་རྟེན་དུ་བཞག་པ་ནི་ཁྱོད་ཀྱིས་རྙེད་པ་ལེགས་པར་རྙེད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་སུམ་བཅུ་རྩ་གསུམ་པའི་ལྷ་རྣམས་ལ་སྨྲས་པ། ཀྱེ་གྲོགས་པོ་དག །རྒྱལ་པོ་མུ་ཁྱུད་འདི་ནི་ཐབས་བསམ་གྱིས་མི་ཁྱབ་པ་དང་ལྡན་པ་སྟེ། འདི་ལྟར་སྐད་ཅིག་ཙམ་ལ་སྲོག་ཆགས་བྱེ་བ་ཕྲག་བརྒྱད་བཅུ་སངས་རྒྱས་ཀྱི་ཆོས་ལ་བཏུལ་བར་གྱུར་ཏོ། ། དེ་ནས་རྒྱལ་པོ་མུ་ཁྱུད་ཀྱིས་ལྷའི་དབང་པོ་བརྒྱད་བྱིན་ལ་འདི་སྐད་ཅེས་སྨྲས་སོ། །ལྷའི་དབང་པོ་བདག་ནི་ཕྱིར་འཛམ་བུའི་གླིང་དུ་འགྲོ་བར་འདོད་དོ། །དེ་ཅིའི་ཕྱིར་ཞེ་ན། བདག་དེར་སོང་སྟེ། དེ་བཞིན་གཤེགས་པའི་བསྟན་པ་ཡོངས་སུ་གཟུང་བར་བྱའོ། །བརྒྱ་བྱིན་གྱིས་དེ་ལ་སྨྲས་པ། རྒྱལ་པོ་ཆེན་པོ་ཁྱོད་གང་གི་དུས་ལ་དབབ་པར་མཁྱེན་ན་བཞུད་ཅིག དེ་ནས་རྒྱལ་པོ་མུ་ཁྱུད་དེ་ཕྱིར་འཛམ་བུའི་གླིང་དུ་ཕྱིན་ནས་སྙིང་རྗེ་ཆེན་པོ་དང་ལྡན་ཞིང་ཐབས་མཁས་པ་ལ་ཤིན་དུ་བསླབས་པས་སེམས་ཅན་བྱེ་བ་ཕྲག་དཔག་ཏུ་མེད་པ་དག་སངས་རྒྱས་ཀྱི་བསྟན་པ་ལ་བཏུལ་བར་གྱུར་ཏོ། །རྒྱལ་པོ་ཆེན་པོ་དེའི་ཚེ་དེའི་དུས་ན་རྒྱལ་པོ་མུ་ཁྱུད་ཅེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་ཐེ་ཚོམ་འམ། ནེམ་ནུར་ཟ་ན་རྒྱལ་པོ་ཆེན་པོ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་དེ་ཉིད་དེའི་ཚེ་དེའི་དུས་ན་རྒྱལ་པོ་མུ་ཁྱུད་ཅེས་བྱ་བར་གྱུར་ཏོ། །རྒྱལ་པོ་དེ་ལྟར་རྒྱལ་པོ་མུ་ཁྱུད་ལྷའི་དབང་པོ་བརྒྱ་བྱིན་གྱི་སྟན་ཕྱེད་ལ་དགའ་བ་མེད་པས་མུ་ཁྱུད་ཀྱི་བག་ཡོད་པའི་སྟོབས་བསྐྱེད་པ་ལ་ལྟོས། །རྒྱལ་པོ་ཆེན་པོ་དེ་ལྟ་བས་ན་ཁྱོད་ཀྱིས་བག་ཡོད་པར་སངས་རྒྱས་ཀྱི་ཆོས་རྣམས་ལ་བརྩོན་པར་བྱའོ། །རྒྱལ་པོ་ཆེན་པོ་སངས་རྒྱས་ཀྱི་ཆོས་དེ་དག་ཀྱང་གང་ཞེ་ན་རྒྱལ་པོ་ཆེན་པོ་ཆོས་ཐམས་ཅད་ནི་སངས་རྒྱས་ཀྱི་ཆོས་སོ། །དེ་སྐད་ཅེས་བཀའ་སྩལ་པ་དང་། རྒྱལ་པོ་ཟས་གཙང་མས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་དེའི་སླད་དུ་གལ་ཏེ་ཆོས་ཐམས་ཅད་སངས་རྒྱས་ཀྱི་ཆོས་ལགས་ན་དེ་ལྟ་ན་ནི་སེམས་ཅན་ཐམས་ཅད་ཀྱང་སངས་རྒྱས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གང་དག་ཕྱིན་ཅི་མ་ལོག་པ་དེ་དག་ནི་སངས་རྒྱས་སོ། །རྒྱལ་པོ་ཆེན་པོ་སངས་རྒྱས་ཤེས་བྱ་བ་དེ་ནི་དེ་ཁོ་ན་མཐོང་བའི་ཚིགས་གསུངས་སོ། །དེ་ཁོ་ན་མཐོང་བ་ཞེས་བྱ་བ་དེ་ནི་ཡང་དག་པའི་མཐའི་ཚིག་བླ་དྭགས་སོ། །ཡང་དག་པའི་མཐའ་ཞེས་བྱ་བ་དེ་ནི་ཆོས་ཀྱི་དབྱིངས་ཀྱི་ཚིག་བླ་དྭགས་སོ། །རྒྱལ་པོ་ཆེན་པོ་པོ་ཆོས་ཀྱི་དབྱིངས་ཤེས་བྱ་བ་དེ་ནི་གཞན་དུ་ན་མིང་ཙམ་འམ། བརྡ་ཙམ་འམ། ཐ་སྙད་ཙམ་འམ། ཀུན་རྫོབ་པ་ཙམ་འམ། བརྗོད་པ་ཙམ་འམ། གདས་པ་ཙམ་མ་གཏོགས་པར་བསྙན་པར་མི་ནུས་སོ། །རྒྱལ་པོ་ཆེན་པོ་ཆོས་ཐམས་ཅད་སྐྱེ་བ་མེད་པ་འདི་ནི་གཟུགས་ཀྱི་སྒོ་སྟེ། དེ་ཅིའི་ཕྱིར་ཞེ་ན། དེ་ལ་ནི་ཆོས་ཐམས་ཅད་མི་གཡོ་མི་འགུལ་ཞིང་རློམ་སེམས་མེད་པས་དེའི་ཕྱིར་དེ་ནི་གཟུངས་ཀྱི་སྒོའོ། །རྒྱལ་པོ་ཆེན་པོ་ཆོས་ཐམས་ཅད་འགག་པ་མེད་པ་དེ་ནི་གཟུངས་ཀྱི་སྒོ་སྟེ། དེ་ཅིའི་ཕྱིར་ཞེ་ན། དེ་ལ་ནི་ཆོས་ཐམས་ཅད་མི་གཡོ་མི་འགུལ་ཞིང་རློམ་སེམས་མེད་པས་དེའི་ཕྱིར་དེ་ནི་གཟུངས་ཀྱི་སྒོའོ། །དེ་བཞིན་ཆོས་ཐམས་ཅད་མཚན་ཉིད་མེད་པ་དང་། མཚན་མ་མེད་པ་དང་། མ་སྐྱེས་པ་དང་། རང་བཞིན་མེད་པ་དང་། རྣམ་པར་རིག་པ་མེད་པ་དང་། མ་བྱས་པ་དང་། མངོན་པར་འདུས་མ་བྱས་པ་དང་། འོང་བ་མེད་པ་དང་། འགྲོ་བ་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་། གང་ཟག་མེད་པ་དང་། སྤྲོས་པ་མེད་པ་དང་། མཚན་མ་མེད་པ་དང་། བཏགས་པ་མེད་པ་དང་། ཀུ་ནས་དཀྲིས་པ་མེད་པ་དང་། བག་ལ་ཉལ་མེད་པ་དང་། ཀུན་ནས་ཉོན་མོངས་པར་གྱུར་པ་མེད་པ་དང་། རྣམ་པར་བྱང་བ་མེད་པ་དང་། རྗེས་སུ་ཆགས་པ་མེད་པ་དང་། ཁོང་ཁྲོ་བ་མེད་པ་དང་། བཅིངས་པ་མེད་པ་དང་། གྲོལ་བ་མེད་པ་དང་། འགྲོ་བ་མེད་པ་དང་། རྒྱུག་པ་མེད་པ་དང་། ལྡོག་པ་མེད་པ་དང་། དམའ་བ་མེད་པ་དང་། གནས་པ་མེད་པ་དང་། འདུག་པ་མེད་པ་དང་། མཉམ་པར་བཞག་པ་མེད་པ་དང་། ནོར་བ་མེད་པ་དང་། ཤེས་པ་པོ་མེད་པ་དང་། རྣམ་པར་ཤེས་པ་པོ་མེད་པ་དང་། མཐོང་བ་པོ་མེད་པ་དང་། མི་མཐོང་བ་མེད་པ་དང་། ཚུལ་ཁྲིམས་
མེད་པ་དང་། ཚུལ་ཁྲིམས་མ་ཡིན་པ་མེད་པ་དང་། འགྱོད་པ་མེད་པ་དང་། མི་འགྱོད་པ་མེད་པ་དང་། མཆོག་ཏུ་དགའ་བ་མེད་པ་དང་། མཆོག་ཏུ་མི་དགའ་བ་མེད་པ་དང་། དགའ་བ་མེད་པ་དང་། མི་དགའ་བ་མེད་པ་དང་། ཤིན་དུ་སྦྱངས་པ་མེད་པ་དང་། ཤིན་དུ་མ་སྦྱངས་པ་མེད་པ་དང་། བདེ་བ་མེད་པ་དང་། མི་བདེ་བ་མེད་པ་དང་། ཏིང་ངེ་འཛིན་མེད་པ་དང་། ཏིང་ངེ་འཛིན་མ་ཡིན་པ་མེད་པ་དང་། ཡང་དག་པ་ཇི་ལྟ་བ་བཞིན་མེད་པ་དང་། ལོག་པ་མེད་པ་དང་། ཡིད་བྱུང་བ་མེད་པ་དང་། ཡིད་མ་བྱུང་བ་མེད་པ་དང་། འདོད་ཆགས་དང་བྲལ་བ་མེད་པ་དང་། འདོད་ཆགས་དང་མ་བྲལ་བ་མེད་པ་དང་། ལྟ་བ་མེད་པ་དང་། ལྟ་བ་མ་ཡིན་པ་མེད་པ་དང་། རྣམ་པར་གྲོལ་བ་མེད་པ་དང་། རྣམ་པར་གྲོལ་བ་མེད་པ་དང་། ཤེས་པ་མེད་པ་དང་། མི་ཤེས་པ་མེད་པ་དང་། མཐོང་བ་མེད་པ་དང་། མ་མཐོང་བ་མེད་པ་དང་། ལས་མེད་པ་དང་། རྣམ་པར་སྨིན་པ་མེད་པ་དང་། ཚུལ་བཞིན་མེད་པ་དང་། ཚུལ་བཞིན་མ་ཡིན་པ་མེད་པ་དང་། རྣམ་པའི་སྒོ་བདུན་བཅུ་པོ་དེ་དག་གིས་རྒྱལ་པོ་ཆེན་པོ་ཆོས་ཐམས་ཅད་ལ་འཇུག་པར་བྱའོ། །རྒྱལ་པོ་ཆེན་པོ་གཟུགས་ཀྱི་རང་བཞིན་ནི་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་རང་བཞིན་ནི་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་གཟུགས་བརྙེན་གྱི་གཟུགས་ཀྱི་རང་བཞིན་ནི་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་དེ་བཞིན་དུ་གཟུགས་ཀྱི་རང་བཞིན་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་རང་བཞིན་མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་རང་བཞིན་ཡང་མ་བྱུང་མི་འབྱུང་དངལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་སྨིག་རྒྱུའི་ཆུའི་རང་བཞིན་ནི་མ་བྱུང་མི་འབྱུང་ད་ལྟར་ཡང་མེད་དོ། དེ་བཞིན་དུ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་རང་བཞིན་ཡང་མ་བྱུང་མི་འབྱུང་ད་
ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་དབུ་བ་རྔོས་པ་ནི་སྙིང་པོ་མེད་དེ། མ་བྱུང་མི་འབྱུང་ད་ལྟར་ཡང་མེད་དོ། ། དེ་བཞིན་དུ་གཟུགས་ཀྱི་རང་བཞིན་ནས་རྣམ་པར་ཤེས་པའི་རང་བཞིན་གྱི་བར་དུ་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་རྨི་ལམ་གྱི་ཡུལ་གྱི་བཟང་མོ་ནི་མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་ཀྱི་རང་བཞིན་ནས་རྣམ་པར་ཤེས་པའི་རང་བཞིན་གྱི་བར་དུ་མ་བྱུང་མི་བྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་རྨི་ལམ་གྱི་མོ་ཤམ་གྱི་བུའི་སྐྱེ་བ་ནི་མ་བྱུང་མི་བྱུང་ད་ལྟར་ཡང་མེད་དོ། །དེ་བཞིན་དུ་གཟུགས་ཀྱི་རང་བཞིན་ནས་རྣམ་པར་ཤེས་པའི་རང་བཞིན་གྱི་བར་དུ་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་ནམ་མཁའ་ལ་གནས་མེད་དོ། །དེ་བཞིན་དུ་གཟུགས་ནས་རྣམ་པར་ཤེས་པའི་བར་དུ་གནས་མེད་དོ། །རྒྱལ་པོ་ཆེན་པོ་གཟུགས་ལ་ནི་སྐྱེ་བ་མེད་དོ། །དེ་བཞིན་དུ་རྣམ་པར་ཤེས་པའི་བར་དུ་སྐྱེ་བ་མེད་དོ། །རྒྱལ་པོ་ཆེན་པོ་གཟུགས་ནས་རྣམ་པར་ཤེས་པའི་བར་ལ་སྐྱེ་བའམ་འགག་པ་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་ཆོས་ཀྱི་དབྱིངས་ལ་སྐྱེ་བའམ་འགག་པ་མེད་དེ། དེ་བཞིན་དུ་གཟུགས་ནས་རྣམ་པར་ཤེས་པའི་བར་ལ་སྐྱེ་བའམ་འགག་པ་མེད་དོ། །རྒྱལ་པོ་ཆེན་པོ་འདི་དག་ནི་དེ་བཞིན་གཤེགས་པའི་སྤྱོད་ཡུལ་ཏེ། བསམ་གྱིས་མི་ཁྱབ་པའི་སྤྱོད་ཡུལ་ལོ། །བྱིས་པ་སོ་སོའི་སྐྱེ་བོ་ཐམས་ཅད་དང་ཐུན་མོང་མ་ཡིན་པའི་སྤྱོད་ཡུལ་ཏེ། ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་མ་ཡིན། ཕྲི་བ་མ་ཡིན། བསྣན་པ་མ་ཡིན། ཐོབ་པ་མ་ཡིན། སྟོར་བ་མ་ཡིན། མངོན་པར་རྫོགས་པར་སངས་རྒྱས་པ་མ་ཡིན། མངོན་པར་རྫོགས་པར་སངས་རྒྱས་མ་རྒྱས་པ་མ་ཡིན། མངོན་པར་ཤེས་པ་མ་ཡིན། མངོན་པར་མ་ཤེས་པ་མ་ཡིན། ཡོངས་སུ་མ་ཤེས་པ་མ་ཡིན། སྤངས་པ་མ་ཡིན། མ་སྤངས་པ་མ་ཡིན། བསྒོམས་པ་མ་ཡིན། མ་བསྒོམས་པ་མ་ཡིན། མངོན་དུ་བྱས་པ་མ་ཡིན། མངོན་དུ་མ་བྱས་པ་མ་ཡིན། བསྟན་པ་མ་ཡིན།
མ་བསྟན་པ་མ་ཡིན། རབ་ཏུ་བསྟན་པ་མ་ཡིན། རབ་ཏུ་མ་བསྟན་པ་མ་ཡིན། བསྒྲགས་པ་མ་ཡིན། མ་བསྒྲགས་པ་མ་ཡིན། ཐོས་པ་བྱས་པ་མ་ཡིན། ཐོས་པར་མ་བྱས་པ་མ་ཡིན། ཐོས་པ་མ་ཡིན། མ་ཐོས་པ་མ་ཡིན། དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་གང་བསྣན་པར་བྱ་བའམ། དབྲི་བར་བྱ་བའི་ཆོས་དེ་མི་དམིགས་ཏེ། རྒྱལ་པོ་ཆེན་པོ་ཆོས་ཐམས་ཅད་ནི་རང་བཞིན་གྱིས་མེད་པ་ཡིན་གྱིས། རྒྱལ་པོ་ཆེན་པོ་འདི་ལ་ཡིད་ཡོངས་སུ་དགའ་བར་བྱ་ཞིང་གཞན་གྱི་དྲིང་མི་འཇོག་པར་བྱའོ། །དེ་ནས་རྒྱལ་པོ་ཟས་གཙང་མའམ་འདི་སྙམ་དུ་སེམས་ཏེ། འདི་ལ་ནི་རྟོགས་པས་སངས་རྒྱས་ཤེས་བྱ་བའི་ཆོས་དེ་གང་ཡང་མི་དམིགས་མོད་ཀྱི། འོན་ཀྱང་དམིགས་སུ་མེད་པའི་ཆོས་རྣམས་ལ་དེ་བཞིན་གཤེགས་པས་གདགས་པ་བསྟན་ཏོ་སྙམ་ནས་དེའི་ཚེ་རྒྱལ་པོ་ཟས་གཙང་མ་ལ་སོགས་པ་ལ་སོགས་པ་ཤཱཀྱ་བདུན་ཁྲི་མི་སྐྱེ་བའི་ཆོས་རྣམས་ལ་བཟོད་པ་སྐྱེས་སོ། །དེ་ནས་བཅོམ་ལྡན་འདས་ཀྱིས་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་མཛད་པ་དེའི་ཚེ་འོད་ཟེར་ཁ་དོག་སྣ་ཚོགས་ཅན། ཁ་དོག་དུ་མ་དང་ལྡན་པ་དག་བཅོམ་ལྡན་འདས་ཀྱི་ཞལ་གྱི་སྒོ་ནས་བྱུང་སྟེ། འཇིག་རྟེན་གྱི་ཁམས་མཐའ་ཡས་མུ་མེད་པ་དག་སྣང་བས་རྒྱས་པར་བཀང་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ། ཕྱིར་ལོག་ནས་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་རྟ་ཐུལ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་ལ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་སུ་བཅད་དེ་ཞུས་པ། འཇིག་རྟེན་རྣམ་པར་འདྲེན་པ་པོ། །དཔའ་ཆེན་ཁྱོད་ཀྱིས་འཛུམ་མཛད་པ། འཇིག་རྟེན་སྣང་བ་མཛད་པ་པོ། །འཛུམ་པའི་འཛུམ་རྒྱུ་བཀའ་སྩལ་གསོལ། །ཐམས་ཅད་མཁྱེན་པ་འདྲེན་པ་པོ། །རྒྱུ་གང་གིས་འཛུམ་བསྟན་པ། །ཁྱོད་ཀྱིས་འགྲོ་བ་རྣམས་ལ་སྟོན། །བདག་གི་ཐེ་ཚོམ་མྱུར་དུ་ཁུམ། །ཤཱཀྱའི་ཚོགས་ཀྱི་དོན་སླད་དུ། །གོའུ་ཏ་མས་ནི་འཛུམ་པ་མཛད། །དཔའ་བོ་འགྲོ་བ་དགའ་མཛད་པ། །འགྲོ་བའི་ཐེ་ཚོམ་བསལ་དུ་སོལ། བསམ་གཏན་ཆེན་པོ་ཁྱོད་ཀྱི་གསུང་། །ཐོས་ན་འགྲོ་བའི་ཐེ་ཚོམ་འཆད། །མཆོག་ཏུ་དགའ་བའི་ཡིད་གྱུར་ཏེ། །ཀུན་ཀྱང་ཁྱོད་ཀྱི་བསྟན་
པ་འཐོབ། །རྒྱལ་བའི་འཛུམ་གྱི་ཕྲིན་ལས་འདི། །ཁྱོད་ཀྱི་སྲས་རྣམས་འཚལ་གྱུར་ན། །ནན་ཏན་གྱིས་ནི་རབ་ཤེས་ཤིང་། །ཤེས་པས་རྗེས་སུ་མཆི་བར་འགྱུར། །རྒྱལ་བའི་ཁྱུ་མཆོག་ཁྱོད་ཀྱིས་ནི། །འགྲོ་བའི་ཐེ་ཚོམ་འདི་བསལ་དུ་གསོལ། །འཇིག་རྟེན་ཐེ་ཚོམ་ཆད་གྱུར་ན། །བདེ་བ་རྒྱ་ཆེན་ཐོབ་པར་འགྱུར། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །ངས་ནི་འཛུམ་ཞིང་གང་མཛད་པ། །རྟ་ཐུལ་དེ་ནི་ང་ལས་ཉོན། །ཤཱཀྱ་རྣམས་ནི་བློ་ངེས་པ། །ཡང་དག་ཇི་བཞིན་ལུང་བསྟན་ཏོ། །ཆོས་རྣམས་དམིགས་སུ་མེད་པར་ནི། །ཤཱཀྱ་རྣམས་ཀྱིས་ཡང་དག་ཤེས། །དེ་ཕྱིར་སངས་རྒྱས་ཆོས་རྣམས་ལ། །འདི་དག་ཡིད་ནི་ངེས་པར་བཞག །དམིགས་སུ་མེད་ལ་བརྟེན་ནས་ནི། །ཤཱཀྱ་གྲགས་པ་ཆེན་པོ་པ། །ཆོས་རྣམས་ཀུན་ལ་ངེས་གྱུར་ནས། །བླ་མེད་བྱང་ཆུབ་ཐོབ་པར་འགྱུར། །ཤཱཀྱ་ངེས་པ་འདི་དག་ནི། །ཡང་དག་ཇི་བཞིན་ལུང་བསྟན་ཏོ། །ཆོས་རྣམས་དམིགས་སུ་མེད་པར་ནི། །ཤཱཀྱ་རྣམས་ཀྱིས་ཡང་དག་ཤེས། །དེ་ཕྱིར་སངས་རྒྱས་ཆོས་རྣམས་ལ། །འདི་དག་ཡིད་ནི་ངེས་པར་བཞག །དམིགས་སུ་མེད་ལ་བརྟེན་ནས་ནི། །ཤཱཀྱ་གྲགས་པ་ཆེན་པོ་པ། ཆོས་རྣམས་ཀུན་ལ་ངེས་གྱུར་ནས། །བླ་མེད་བྱང་ཆུབ་ཐོབ་པར་འགྱུར། །ཤཱཀྱ་ངེས་པ་འདི་དག་ནི། །མི་ཡི་ནང་ནས་ཤི་འཕོས་ནས། །བདེ་བ་ཅན་གྱི་འཇིག་རྟེན་དུ། །འོད་དཔག་མེད་ཀྱི་དྲུང་དུ་འགྲོ། །བྱང་ཆུབ་སེམས་དཔའ་འཇིགས་མེད་པ། །བདེ་བ་ཅན་ན་གནས་པའི་ཚེ། །སངས་རྒྱས་བྱེ་བ་གྲངས་མེད་ལ། །ཕྱོགས་བཅུ་དག་ཏུ་མཆོད་བྱེད་འགྱུར། །མཁས་པ་རྣམས་ནི་ཁམས་གཅིག་ན། །སངས་རྒྱས་བཞུགས་རྣམས་བསྙེན་བཀུར་བྱེད། །སེམས་ཅན་ཀུན་ལ་ཕན་ཚོལ་ཞིང་། །བྱང་ཆུབ་མཆོག་ཏུ་སྨོན་ལམ་འདེབས། །དེ་བཞིན་གཤེགས་རྣམས་མཆོད་བྱེད་ཅིང་། །ཞིང་ནས་ཞིང་དུ་རྣམ་པར་འགྱུར། །གང་དུ་སངས་རྒྱས་འབྱུང་བར་ཡང་། །རྫུ་འཕྲུལ་སྟོབས་ཀྱིས་འདོད་པར་འགྱུར། །བསྐལ་པ་བྱེ་བ་གྲངས་མེད་དུ། །མེ་ཏོག་རྣམ་པ་སྣ་ཚོགས་ཀྱིས། །དེ་བཞིན་གཤེགས་པ་རྣམས་མཆོད་ནས། །དེ་ཡི་འོག་ཏུ་འདྲེན་པར་འགྱུར། །དེ་ཚེ་སངས་རྒྱས་རེ་རེ་ཞིང་། །སེམས་ཅན་ཁྲག་ཁྲིག་མང་པོ་དག །བྱང་ཆུབ་ཕྱིར་ནི་སངས་རྒྱས་ཀྱིས། །སངས་རྒྱས་དགོངས་ལ་འགྲོ་བ་འདུལ། །སངས་རྒྱས་ཀུན་གྱི་ཞིང་རྣམས་ན། །བྱང་ཆུབ་སེམས་དཔའ་རྣམས་ལ་སྟོན། །དེ་ན་སངས་རྒྱས་གང་ཡང་ནི། །ཉན་ཐོས་འདུལ་བར་ཡོང་མི་འགྱུར། །སངས་རྒྱས་དེ་དག་རེ་རེ་ཞིང་། །དེ་ནི་ཚེ་ཚད་འགྱུར་བ་ནི། །བྱེ་བ་གྲངས་མེད་ལོ་རྣམས་སུ། །ཆོས་སྟོན་པ་དག་གནས་པར་འགྱུར། །དེ་དག་མྱ་ངན་ཡོངས་
འདས་ནས། །བྱང་ཆུབ་སེམས་དཔའ་འཇིགས་མེད་པ། །རྒྱལ་བའི་སྲས་དག་ལོ་གྲངས་ནི། །བྱེ་བ་སྟོང་དུ་དམ་ཆོས་འཛིན། །མི་དབང་སྲས་པོ་དེ་དག་ཀྱང་། །སྟོང་པ་ཉིད་ཀྱི་ཆོས་བསྟན་པས། །སེམས་ཅན་བྱེ་བ་བསམ་ཡས་དག །བྱང་ཆུབ་ལ་ནི་འདུལ་བར་འགྱུར། །བག་ཡོད་པ་ཡི་མི་རྣམས་ནི། །བག་ཡོད་པ་ལ་གནས་བཅས་ཏེ། །སྟོང་པ་ཉིད་ཀྱི་ཆོས་བསྟེན་ནས། །ཐམས་ཅད་མཁྱེན་དུ་ངེས་པར་འབྱུང་། །རྫོགས་པའི་སངས་རྒྱས་ཀྱིས་ཤཱཀྱ་ཡི། །བུ་ཡི་འགྲོ་བསྟན་འདི་ཐོས་ནས། །ལྷར་བཅས་འཇིག་རྟེན་གར་གྱུར་ཏེ། །བྱང་ཆུབ་ཕྱིར་ནི་ཡིད་ཀྱང་བཏང་། །ཤཱཀྱ་ལུང་བསྟན་པའི་ལེའུ་སྟེ་ཉི་ཤུ་རྩ་དྲུག་པའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། །ཤཱ་རིའི་བུ་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་བྱང་ཆུབ་སེམས་དཔའ་མཐར་ཕྱིན་པ་རྣམས་ལ་བསྒྲགས་པར་བྱའོ། །དེ་ཅིའི་ཕྱིར་ཞེ་ན། ཤ་རིའི་བུ་ཏིང་ངེ་འཛིན་འདི་ནི་གང་ཟག་མེད་པ་སྟེ། དེ་ལ་དེ་བཞིན་གཤེགས་པས་ཆོས་གང་ཡང་མ་དམིགས་སོ། །གང་མ་དམིགས་པ་དེ་ནི་མངོན་པར་རྫོགས་པར་སངས་མ་རྒྱས་སོ། །གང་མངོན་པར་རྫོགས་པར་སངས་རྒྱས་པ་དེ་ནི་མ་བསྟན་པའོ། །གང་མ་བསྟན་པ་དེ་ནི་མ་ཤེས་སོ། །གང་མ་ཤེས་པ་དེ་ནི་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་རྣམས་ཀྱི་བསྟན་པ་སྟེ། དེ་ནི་དེ་བཞིན་གཤེགས་པ་རྣམས་ཀྱི་ཆོས་ཀྱི་རྔ་ཆེན་པོ་ཡིན་གྱིས། ཅི་ནས་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་གཟུང་བ་དང་བཀླག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་བསྟན་པར་བྱ་བ་དེ་ཤ་རིའི་བུ་ཁྱོད་ལ་ཡོངས་སུ་གཏོད་དོ། །ཤ་རིའི་བུ་བྱང་ཆུབ་སེམས་དཔའ་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ། རིགས་ཀྱི་བུ་མོ་གང་གིས་བསྐལ་པ་བཅུའི་བར་དུ་ཕ་རོལ་དུ་ཕྱིན་པ་ལྔ་ཤེས་རབ་ཀྱི་ཕ་རོལ་དུ་ཕྱིན་པ་དང་བྲལ་བར་སྦྱངས་པས། ཤ་རིའི་བུ་གང་གིས་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་
འདི་ཐ་ན་ཐོས་པར་གྱུར་ཀྱང་དེ་ཉིད་དེ་བས་བསོད་ནམས་ཆེས་མང་དུ་འཕེལ་ལོ། །ཤ་རིའི་བུ་གང་གིས་བསྐལ་པ་བཅུའི་བར་དུ་མཉན་པས་གང་གིས་སེམས་ཅན་གཅིག་ལ་འདི་བསྟན་ན་དེ་ཉིད་ངེས་པས་བསོད་ནམས་ཆེས་མང་དུ་འཕེལ་ལོ། །གང་གིས་བསྐལ་པ་བཅུའི་བར་དུ་མཉན་ཏེ་གཞན་ལ་བསྙད་པས་གང་གིས་སེ་གོལ་གཏོགས་པ་ཙམ་དུ་འདི་བསྒོམས་ན་དེ་ཉིད་བས་ཆེས་བསོད་ནམས་མང་དུ་འཕེལ་ལོ། །ཤཱ་རིའི་བུ་དེ་བས་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་ཉིད་ལ་བྱང་ཆུབ་སེམས་དཔའ་རྣམས་ནན་ཏན་ཐམས་ཅད་ཀྱིས་གདམས་པར་བྱའོ། །དེ་ཅིའི་ཕྱིར་ཞེ་ན། ཤ་རིའི་བུ་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་བསྒོམས་པས་ནི་མྱུར་དུ་མི་སྐྱེ་བའི་ཆོས་ལ་བཟོད་པ་འཐོབ་པར་འགྱུར་ཏེ། ཤཱ་རིའི་བུ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངས་ལུང་བསྟན་པའི་བྱང་ཆུབ་སེམས་དཔའི་ཚོགས་འདི་དག་ཐམས་ཅད་ཀྱང་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་ལ་རབ་ཏུ་གནས་པ་ཤ་སྟག་གོ ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུ་དང་། དགེ་སློང་དེ་དག་དང་། རྒྱལ་པོ་ཟས་གཙང་མ་དང་། ཚངས་པ་དང་། འཇིག་རྟེན་སྐྱོང་བ་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའི་སྟོང་ཕྲག་བརྒྱ་པ་ལས་དེ་ཁོ་ན་ངེས་པར་བསྟན་པ་ཡབ་དང་སྲས་མཇལ་བ་ཞེས་བྱ་བའི་ལེའུ་སྟེ་བཅུ་དྲུག་པ་རྫོགས་སོ། །རྒྱ་གར་གྱི་མཁན་པོ་ཤྲཱི་ལེན་དྲ་བོ་དྷི་དང་། ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་སྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།