འཕགས་པ་ཡུལ་འཁོར་སྐྱོང་གིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ།
རྒྱ་གར་སྐད་དུ། ཨཱཪྻ་རཱཥཉ་པཱ་ལ་པ་རི་པྲྀ་ཙྪ་ནཱ་མ་ཧཱ་ཡཱ་ན་སཱུ་ཏྲ། བོད་སྐད་དུ་འཕགས་པ་ཡུལ་འཁོར་སྐྱོང་གིས་ཞུས་པ་ཞེས་བྱ་ཐེག་པ་ཆེན་པོའི་མདོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་
ལ་ཕྱག་འཚལ་ལོ། །འདི་སྐད་དུ་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་ལྔ་སྟོང་ཐམས་ཅད་ཀྱང་སྤོབས་པ་ཐོགས་པ་མེད་པ། བཟོད་པ་ཐོབ་པ། །བདུད་ཕྱིར་རྒོལ་བ་བཅོམ་པ། སངས་རྒྱས་ཀྱི་ཆོས་ཐམས་ཅད་ལ་ཤིན་དུ་ཉེ་བར་གྱུར་པ་སྐྱེ་བ་གཅིག་གིས་ཐོགས་པ། གཟུངས་ཐོབ་པ། ཏིང་ངེ་འཛིན་ཐོབ་པ། སྤོབས་པ་མཐའ་ཡས་པ་ཐོབ་པ། མི་འཇིགས་པ་ཐོགས་པ་མེད་པ་ཐོབ་པ། རྫུ་འཕྲུལ་གྱི་སྟོབས་དང་། དབང་དམ་པའི་ཕ་རོལ་དུ་སོང་པ་ནས། ཡོན་ཏན་གྱི་ཚོགས་ཐམས་ཅད་ཟད་མི་ཤེས་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང་། ཀུན་དུ་མིག་དང་། ཀུན་དུ་ལྟ་བ་དང་། ཀུན་དུ་འོད་ཟེར་དང་། ཀུན་དུ་འོད་དང་། བློ་གྲོས་མཆོག་དང་། བློ་གྲོས་འཕེལ་དང་། བློ་གྲོས་མཐའ་ཡས་པ་དང་། བློ་གྲོས་རྒྱ་ཆེན་དང་། བློ་གྲོས་མི་ཟད་པ་དང་། ས་འཛིན་དང་། འགྲོ་བ་འཛིན་དང་། རྒྱལ་བའི་བློ་གྲོས་དང་། ཁྱད་པར་བློ་གྲོས་དང་། བྱང་ཆུབ་སེམས་དཔའ་ཆེན་པོ་གཟུངས་ཀྱི་དབང་ཕྱུག་གི་རྒྱལ་པོ་དང་། འཇམ་དཔལ་ལ་སོགས་པ་སེམས་དཔའ་དཔེ་མེད་པ་དྲུག་བཅུ་དང་། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་དང་། མི་མཇེད་ཀྱི་བདག་པོ་ཚངས་པ་དང་། ལྷའི་དབང་པོ་བརྒྱ་བྱིན་དང་། འཇིག་རྟེན་སྐྱོང་བ་བཞི་དང་། ལྷའི་བུ་མཚན་བཟངས་དང་། ལྷའི་བུ་བློ་གྲོས་ལེགས་གནས་དང་། ལྷའི་དབང་པོ་ཐམས་ཅད་དང་། ཀླུའི་དབང་པོ་ཐམས་ཅད་དང་། མིའམ་ཅིའི་དབང་པོ་དང་། དྲི་ཟའི་དབང་པོ་དང་། གནོད་སྦྱིན་གྱི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་འཁོར་བརྒྱ་སྟོང་དུ་མ་ཡོད་པ་ཐམས་ཅད་དང་། འཁོར་དེ་ཉིད་
དུ་འདུས་ཏེ་འཁོད་པ་རྣམས་དང་ཐབས་གཅིག་ཏུ་བཞུགས་སོ། །དེ་ནས་བཅོམ་ལྡན་འདས་དཔལ་གྱི་སྙིང་པོའི་སེང་གེའི་ཁྲི་ལ་བཞུགས་ཏེ། ལྷུན་པོ་ལྟར་འཁོར་གྱི་དཀྱིལ་འཁོར་ཐམས་ཅད་དུ་འདུས་ཏེ་འཁོད་པ་རྣམས་དང་ཐབས་གཅིག་ཏུ་བཞུགས་སོ། །དེ་ནས་བཅོམ་ལྡན་འདས་དཔལ་གྱི་སྙིང་པོའི་སེང་གེའི་ཁྲི་ལ་བཞུགས་ཏེ། ལྷུན་པོ་ལྟར་འཁོར་གྱི་དཀྱིལ་འཁོར་ཐམས་ཅད་ལས་ནི་མངོན་པར་འཕགས། ཉི་མ་ལྟར་འཇིག་རྟེན་ཐམས་ཅད་ལ་ནི་སྣང་། ཟླ་བ་ལྟར་འགྲོ་བ་ཐམས་ཅད་ལ་སྣང་བ་ནི་མཛད། ཚངས་པ་ལྟར་རབ་ཏུ་ཞི་བར་ནི་བཞུགས། ། བརྒྱ་བྱིན་ལྟར་སྐུ་ནི་བསྙེན་པར་དཀའ། འཁོར་ལོས་སྒྱུར་བ་ལྟར་བྱང་ཆུབ་ཀྱི་ཡན་ལག་གི་རིན་པོ་ཆེ་བདུན་དང་ནི་ལྡན་སེང་གེ་ལྟར་ཆོས་ཐམས་ཅ་བདག་མེད་པ་དང་སྟོང་པར་ནི་སྒྲོགས། མེའི་ཕུང་པོ་ཆེན་པོ་ལྟར་འགྲོ་བ་ཐམས་ཅད་ལ་སྣང་བའི་སྐུ་དང་ནི་ལྡན། ལྷ་ཐམས་ཅད་སྣང་བའི་ནོར་བུ་རིན་པོ་ཆེ་ཀུན་ནས་བསྡུས་པའི་ནོར་བུ་རིན་པོ་ཆེའི་རྒྱལ་པོ་ལྟར་གཟི་བརྗིད་ཀྱིས་ནི་ཤིན་དུ་འབར་ཞིང་སྟོང་གསུམ་གྱི་སྟོང་ཆེན་པོའི་འཇིག་རྟེན་ཐམས་ཅད་སྣང་བས་ཁྱབ་པར་མཛད་ནས། དོན་ཤིན་དུ་རྣམ་པར་ངེས་པ། ཆོས་ཐམས་ཅད་ཀྱི་དམ་པའི་ཕ་རོལ་ཏུ་བྱོན་པ། འཁོར་གྱི་ནང་ན་བཞུགས་ཤིང་ཚངས་པའི་སྒྲ་དབྱངས་བསྒྲགས་པས་སེམས་ཅན་ཐམས་ཅད་གོ་བར་བྱེད་པ་དང་ལྡན་པའི་དབྱངས་ཀྱིས་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། དོན་བཟང་པོ། ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་དགའ་བའི་རྒྱལ་པོ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་བཅོམ་ལྡན་འདས་སེང་གེའི་ཁྲི་ལ་བཞུགས་པ་ཉིད་མ་སྟོང་བས་ལྷག་པའི་འོད་ཀྱིས་འཁོར་གྱི་དཀྱིལ་འཁོར་ཐམས་ཅད་ཟིལ་དུ་བརླག་པར་མནན་ནས་ཤིན་དུ་ལྷང་ངེར་བཞུགས་པ་མཐོང་སྟེ། དགའ་བ་དང་། མགུ་བ་དང་། དད་པས་འདུན་པའི་སེམས་ཀྱིས་སྟན་ལས་ལངས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ལྷ་ཚོགས་ལྷ་མ་ཡིན་པ་དང་མིའམ་ཅི། ཀླུ་དང་ཉན་ཐོས་དག་དང་སངས་
རྒྱས་སྲས། འགྲོ་བ་འདི་དག་རྒྱལ་བས་གཟི་ཡངས་ཀྱིས། ཟིལ་མནན་ཁྱོད་ནི་གསེར་གྱི་རི་ལྟར་གསལ། རྒྱ་མཚོའི་དབུས་ན་གནས་ཀྱང་རྣམ་མཛེས་པ། ལྷུན་པོ་ལྷའི་ཚོགས་ཀྱི་གནས་ལྟ་བུར། །ཐུགས་རྗེའི་རྒྱ་མཚོའི་དབུས་སུ་དེ་བཞུགས་ཏེ། །འོད་ཟེར་སྟོང་ཕྲག་བརྒྱ་དག་འགྱེད་པར་མཛད། །ཚངས་བའི་གནས་ལ་གནས་པའི་ཚངས་པ་དེ། །ཚངས་པའི་མདུན་ན་གནས་ཏེ་མངོན་མཇས་ལྟར། །བསམ་གཏན་རྣམ་ཐར་ཏིང་ངེ་འཛིན་བཞུགས་པ། །སེམས་ཅན་དམ་པ་འགྲོ་བ་ཀུན་ལ་གསལ། །བརྒྱ་བྱིན་སུམ་བཅུ་རྩ་གསུམ་ལྷ་ནང་དུ། །གནས་ནས་གཟི་བརྗིད་ཡངས་པས་མཛེས་པ་ལྟར། །མཚན་གྱིས་སྤྲས་པ་ཡེ་ཤེས་ཡོན་ཏན་ཕྱུག །ཐུབ་པའི་རྒྱལ་པོ་འགྲོ་བ་ཀུན་ལ་གསལ། །གླིང་གཞི་མི་ཡི་བདག་པོ་སྣང་ལྡན་པ། །འཇིག་རྟེན་འདི་ལ་སྟོན་པ་མཛེས་པ་ལྟར། །འཕགས་པའི་ལམ་དུ་འཛུད་པ་རབ་མཛད་ཅིང་། །ཐུགས་རྗེའི་དགོངས་པའི་ཐུགས་མངའ་འདི་ཡང་མཛེས། །མཁའ་ལ་ཉི་མ་ལམ་མེ་ཐལ་ལེ་བ། །ནོར་བུ་མེ་འོད་མོག་མོག་བྱེད་འདི་ལྟར། །ཉི་མ་སྟོད་པས་ཁྱབ་པར་འཕགས་པའི་འོད། །སངས་རྒྱས་ཉི་མ་འགྲོ་བ་འདི་ན་གསལ། །དྲི་མེད་ཟླ་བ་ནམ་གྱི་གུང་གསལ་ལྟར། །ཤིན་དུ་རྣམ་དག་འགྲོ་བ་ཀུན་ལ་གསལ། །རྒྱལ་བའི་ཞལ་རས་ཟླ་བ་ལྟར། །སེང་གེ་རི་སུལ་བརྟན་པའི་སྒྲ་སྒྲོག་ཅིང་། །ས་ལ་རི་དགས་ཚོགས་རྣམས་སྐྲག་བགྱིད་ལྟར། །མི་དབང་སྟོད་པ་བདག་མེད་གསུང་སྒྲོག་ཅིང་། །ཕ་རོལ་མུ་སྟེགས་ཅན་རྣམས་སྐྲག་བར་མཛད། །ནོར་བུའི་རྒྱལ་པོ་བཟང་པོ་གཟི་བརྗིད་འབར། །ནོར་བུ་ཐམས་ཅད་ཟིལ་མནན་ལམ་མེ་ལྟར། །རྒྱལ་བའི་སྐུ་ནི་གསེར་གྱི་མདོག་འདྲ་བ། །འགྲོ་ཀུན་ཟིལ་གྱིས་མནན་ནས་ལམ་མེར་བཞུགས། །འཇིག་རྟེན་གང་ནའང་ཁྱོད་དང་མཚུངས་མ་མཆིས། །ལྷག་པའི་སེམས་ཅན་མཆིས་པར་ག་ལ་འགྱུར། །བསོད་ནམས་ཡེ་ཤེས་བརྩོན་འགྲུས་ཐབས་རྣམས་དང་། ། ཡོན་ཏན་
ཀུན་གྱིས་ཁྱོད་དང་མཚུངས་མ་མཆིས། །མི་ཡི་དབང་པོ་འགྲོ་ལ་ལམ་མེ་བ། །མགོན་པོ་ཡོན་ཏན་རྒྱ་མཚོ་བདག་གིས་མཐོང་། །གུས་པ་སྐྱེས་ཤིང་དགའ་བ་རྣམ་པར་འཕེལ། །རྒྱལ་བའི་ཞབས་ཀྱི་༈༈༈༈བདག་གིས་གཏུགས། །ཡོན་ཏན་ཀུན་གྱི་འབྱུང་གནས་འཇིག་རྟེན་སྒྲོན། །གྲགས་པ་དམ་པ་རྒྱ་ཆེར་ཐུགས་མངའ་བ། །བདག་གིས་བསྟན་དེ་བསོད་ནམས་འདིར་ཐོབ་དེས། །འགྲོ་བ་ཐམས་ཅད་བྱང་ཆུབ་མཆོག་རེག་ཤོག །དེས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་དགའ་བའི་རྒྱལ་པོས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་ཐལ་མོ་སྦྱར་ཏེ། །མིག་གཉིས་མི་འཛུམས་པར་དེ་བཞིན་གཤེགས་པའི་སྐུ་ལ་ནི་ལྟ། ཆོས་ཀྱི་དབྱིངས་ཉིད་ལ་ནི་རྣམ་པར་དཔྱོད། །ཟབ་པ་དང་གཏིང་དཔག་དཀའ་བ་དང་། མཐོང་བར་དཀའ་བ་དང་། །ཁོང་དུ་ཆུད་པར་དཀའ་བ་དང་། བརྟག་པར་མི་ནུས་པ་དང་། རྟོག་གེའི་སྤྱོད་པ་མ་ཡིན་པ་དང་། ཞི་བ་དང་། ཕྲ་བ་ལ་ནི་འཇུག །སངས་རྒྱས་ཀྱི་སྤྱོད་ཡུལ་བསམ་གྱིས་མི་ཁྱབ་པ་ལ་ནི་རྗེས་སུ་རྣམ་པར་དཔྱོད། །དེ་བཞིན་གཤེགས་པའི་ཡེ་ཤེས་ཆོས་ཀྱི་དབྱིངས་ཐམས་ཅད་དུ་ཞུགས་པ་ལ་ནི་རྗེས་སུ་རྣམ་པར་སེམས། སངས་རྒྱས་ཀྱི་ཡུལ་མི་མཉམ་པ་དང་མཉམ་པ་ལ་ནི་ཡང་དག་པར་ལྟ། དེ་བཞིན་གཤེགས་པའི་ཐབས་ཀྱི་ཡུལ་གྱི་སྤྱོད་ཡུལ་བསམ་གྱིས་མི་ཁྱབ་པ་ལ་ནི་འཇུག །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་དབྱིངས་གཅིག་གི་ཚུལ་གྱི་ངོ་བོ་ཉིད་ལ་འཇུག་པ་ལ་ནི་རྟོག །སངས་རྒྱས་བཅོམ་ལྡན་འདས་རྣམས་ནི་གནས་མེད་པ་ནམ་མཁའ་སྤྱོད་ཡུལ་དུ་ནི་ཡང་དག་པར་ལྟ། ཆོས་ཐམས་ཅད་ཡང་དག་པའི་མཐའ་མཐའ་མ་ཡིན་པའི་རང་བཞིན་ལ་འཇུག་པ་ལ་ནི་མོས། སངས་རྒྱས་ཀྱི་རྣམ་པར་ཤར་བ་སྒྲིབ་པ་མེད་པ་ལ་ནི་མངོན་པར་འདོད། སངས་རྒྱས་བཅོམ་ལྡན་འདས་ཀྱི་སྐུ་རྟག་པ་དང་། ཞི་བ་དང་། ཐེར་ཟུག་པ་ལ་ནི་འཇུག །དེ་བཞིན་གཤེགས་པའི་སྐུ་རབ་འབྱམས་ཐམས་ཅད་ཀྱི་རྗེས་སུ་སོང་བ་དང་། སེམས་ཅན་ཐམས་ཅད་ལ་མངོན་དུ་ཕྱོགས་པ་ལ་ནི་འཇུག །སངས་རྒྱས་བཅོམ་ལྡན་འདས་རྣམས་ཀྱི་ཡོན་ཏན་ཕྱི་མའི་མཐའི་བསྐལ་བའི་མུར་ཐུག་པ་མེད་པ་ནི་རྗེས་སུ་དྲན་པར་
བྱེད། ཆོས་ཀྱི་དབྱིངས་ཉིད་ལ་ནི་རྣམ་པར་དཔྱོད་ཅིང་བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་དགའ་བའི་རྒྱལ་པོ་ཅང་མི་སྨྲ་བར་འདུག་པར་གྱུར་ཏོ། །དེའི་ཚེ་ཚེ་དང་ལྡན་པ་ཡུལ་འཁོར་སྐྱོང་མཉན་ཡོད་དུ་དབྱར་ཟླ་བ་གསུམ་གནས་པར་དམ་བཅས་ཏེ། དེ་ཟླ་བ་གསུམ་འདས་ནས་ཆོས་གོས་བྱས་ཏེ། ཆོས་གོས་ཟིན་ནས་དེ་ལྷུང་བཟེད་དང་ཆོས་གོས་ཐོགས་ཏེ། དགེ་སློང་གི་དགེ་འདུན་དང་། གསར་བུ་ལས་དང་པོ་བ་རབ་ཏུ་བྱུང་ནས་རིང་པོ་མ་ལོན་པར་དག་དང་ལྷན་ཅིག་ཏུ་མཐར་གྱིས་ཡུལ་རྒྱུ་བ་རྒྱུ་ཞིང་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་། བྱ་རྒོད་ཀྱི་ཕུང་པོའི་རི་ག་ལ་བ་དེར་སོང་ངོ་། །དེ་ནས་ཚེ་དང་ལྡན་པ་ཡུལ་འཁོར་སྐྱོང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཀྱང་ཚེ་དང་ལྡན་པ་ཡུལ་འཁོར་སྐྱོང་གིས་ཐལ་མོ་སྦྱར་ཏེ་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །མི་མཆོག་འོད་མཛད་པ་ལ་ཕྱག་འཚལ་ལོ། །ནམ་མཁའ་མཚུངས་པའི་ཐུགས་ལ་ཕྱག་འཚལ་ལོ། །རྒྱལ་བ་ཡིད་གཉིས་གཅོད་ལ་ཕྱག་འཚལ་ལོ། །སྲིད་གསུམ་མཐར་བྱོན་ཐུབ་ལ་ཕྱག་འཚལ་ལོ། །ཞིང་རྣམས་བྱེ་བ་རབ་འབྱམ་ཀུན་དུ་ཡང་། །འདྲེན་པ་དག་ནི་ཁྱོད་ཀྱི་བསྔགས་པ་གསུང་། །རྒྱལ་བའི་སྲས་ཀྱིས་ཐོས་ནས་རབ་དགའ་ཞིང་། །ཡོན་ཏན་རྒྱ་མཚོ་ཐུབ་པ་མཆོད་དུ་མཆི། །བདེ་གཤེགས་ཚུལ་དང་འཐུན་པས་མཆོད་བགྱིས་ཏེ། །ཐུབ་པ་ཆེ་ལས་རྡུལ་བྲལ་ཆོས་ཐོས་ནས། །དེ་དག་ཁྱོད་ཀྱིས་ཡོན་ཏན་ཕྲེང་རྗོད་ཅིང་། །ཡིད་རབ་དགའ་ནས་རང་གི་ཞིང་དུ་མཆི། །བྱང་ཆུབ་དམ་པ་མཆོག་ནི་ཚོལ་བ་ནས། །ཁྱོད་ཀྱི་ཐུགས་ནི་སྐྱོ་བ་མི་མངའ་བར། །བསྐལ་པ་བྱེ་བ་ཁྲག་ཁྲིག་བསམ་ཡས་སུ། །སེམས་ཅན་རྣམས་ཀྱི་ཆེད་དུ་སྤྱོད་པ་སྤྱད། །འདྲེན་པ་ཁྱོད་ཀྱིས་སྦྱིན་དང་ཚུལ་ཁྲིམས་སྤྱད། །བཟོད་དང་བརྩོན་འགྲུས་དང་ནི་བསམ་གཏན་བསླབས། །ཤེས་རབ་ཐབས་དང་དབང་གི་ཕ་རོལ་གཤེགས། །དེས་ན་རྣམ་འདྲེན་ཆེ་ལ་ཕྱག་འཚལ་ལོ། །རྫུ་འཕྲུལ་རྐང་དང་
མངོན་ཤེས་མཆོག་ལ་མཁས། །དབང་པོ་སྟོབས་དང་རྣམ་པར་ཐར་པ་བསླབས། །སེམས་ཅན་ཀུན་གྱི་སྤྱོད་པ་ཐུགས་ཆུད་རྟོགས། མཉམ་མེད་ཡེ་ཤེས་མཚོ་ལ་ཕྱག་འཚལ་ལོ། །འགྲོ་བ་རྣམས་ཀྱི་སེམས་རྒྱུར་རབ་ཏུ་མཁྱེན། །སྤྱོད་པ་གང་དང་ཇི་ལྟར་ལམ་འབྱུང་དང་། །ཚུལ་སྒོ་གང་གིས་རྣམ་པར་གྲོལ་འགྱུར་པ། །དེ་ནི་བཅོམ་ལྡན་མི་ཡི་མཆོག་གིས་མཁྱེན། །འདོད་ཆགས་ཞེ་སྡང་གཏི་མུག་འབྱུང་བ་སྤོང་། །གང་གིས་སེམས་ཅན་ངན་སོང་གསུམ་མ་མཆི་དང་། །གང་གིས་བདེ་འགྲོ་མཆི་བར་འགྱུར་བའི་ལས། །འགྲོ་བས་ལེགས་པར་བགྱིས་དང་ནོངས་བགྱིས་མཁྱེན། །འགྲོ་ལ་ཕན་མཛད་གང་དག་འདས་རྣམས་དང་། །ད་ལྟར་ལྷ་དང་མི་ཡིས་མཆོད་རྣམས་དང་། །གང་དག་མ་བྱོན་ཡོན་ཏན་མཆོག་མཐར་ཕྱིན། །བདེ་གཤེགས་དེ་དག་ཐམས་ཅད་རབ་ཏུ་མཁྱེན། །དག་པའི་ཞིང་དང་ཕུན་སུམ་ཚོགས་འཁོར་དང་། །བྱང་ཆུབ་སེམས་དཔའི་ཚོགས་དང་ཉན་ཐོས་དང་། །དྲང་སྲོང་ཆེན་པོ་རྣམས་ཀྱི་སྐུ་ཚེའི་ཚང་། །རྣམ་པ་ཀུན་ཏུ་མ་ལུས་རྣམ་པར་མཁྱེན། །མྱ་ངན་འདས་ནས་ཆོས་གནས་ཅི་འདྲ་དང་། །རྒྱལ་བའི་རིང་བསྲེལ་མཆོད་པ་ཅི་འདྲ་དང་། །དེར་ནི་ཆོས་མཛོད་འཛིན་ཅི་འདྲ་བ། །དེ་དག་མ་ལུས་མི་ཡི་དམ་པས་མཁྱེན། །དུས་གསུམ་རྣམས་སུ་རྟག་པར་སྟོབས་བཅུ་ཡི། །ཡེ་ཤེས་མཁྱེན་པ་སྒྲིབ་པ་མི་མངའ་འཇུག །ཆོས་རྣམས་ཀུན་ལ་ཐུགས་ནི་ཆགས་མི་མངའ། །ཕྱག་འཚལ་རྒྱལ་བ་ཡེ་ཤེས་མཚོ་ཁྱོད་ལ། །ཁྱོད་དང་མཚུངས་མཉམ་མ་མཆིས་ག་ལ་ལྷག །སྐར་མ་རྣམས་ཀྱིས་ནམ་མཁར་སྤྲས་པ་ལྟར། །མཚན་རྣམས་ཀྱིས་ཀྱང་སྐུ་ནི་རབ་སྤྲས་པ། །མི་མཆོག་ཐུབ་པ་མཆོག་ལ་ཕྱག་འཚལ་ལོ། །གཟུགས་ཀྱང་མཚུངས་པ་མ་མཆིས་ཡིད་དང་མཆི། །ལྷར་བཅས་འགྲོ་བ་ཟིལ་དུ་རླག་པར་བགྱིད། །ཚངས་པ་བརྒྱ་བྱིན་འོག་མིན་ལྷ་ཡི་རྣམས། །ཁྱོད་ཀྱི་སྤྱན་སྔ་དེ་དག་མཛེས་མ་ལགས། །ཁྱོད་ནི་གསེར་གྱི་རི་ལྟར་དྲི་མི་མངའ། །དབུ་སྣུམ་འཇམ་ཞིང་གཡས་སུ་འཁྱིལ་པར་གནས། །ལྷུན་པོའི་རྒྱལ་པོ་ལྟ་བུར་སྤྱི་གཙུག་འཕགས། །བསོད་ནམས་རྒྱ་ཆེན་བྱུང་བ་ལམ་མེར་བཞུགས། །འོད་ཟེར་བྱེ་བ་ཁྲག་ཁྲིག་རབ་འགྱེད་ཅིང་། །ཁྱོད་
ཀྱི་སྨིན་མའི་མཚམས་ཀྱི་མཛོད་སྤུ་མཛེས། །འགྲོ་ལ་ཐུགས་རྗེ་དགོངས་པས་གང་གཟིགས་པ། །སྤྱན་ནི་ཨུད་པ་ལ་འདྲ་ཞིང་ཡིད་དུ་མཆི། །ཟླ་ཉ་དྲི་མེད་མཁའ་ལ་ཇི་ལྟ་བ། །རྣམ་འདྲེན་ཁྱོད་ཀྱི་ཞལ་ནི་ལམ་མེ་སྟེ། །ལྟ་བའི་སྐྱེ་བོ་ངོམས་པར་མི་འགྱུར་བ། །ཞལ་བཟངས་མི་ཡི་མཆོག་ལ་ཕྱག་འཚལ་ལོ། །དད་པ་རྨ་བྱ་རི་དྭགས་རྒྱལ་གྱི་སྟབས། །གླང་པོ་དྲེགས་པ་ངལ་གྱིས་མཆི་སྟབས་ཀྱིས། །ས་རྣམས་གཡོ་བར་མཛད་ཅིང་རབ་གཤེགས་དང་། །སྟོབས་བཅུ་བརཏལ་ཞུགས་བརྟན་ལ་ཕྱག་འཚལ་ལོ། །ཕྱག་གི་སོར་མོ་རིང་ཞིང་རྡུམ་ལ་མཛེས། །སེན་མོ་ཟངས་མདོག་དག་ཅིང་དྲ་བས་སྤྲས། །བཞེངས་ཀྱང་པུས་མོའི་ལྷ་དང་རིག་ཅིང་སླེབ། །སྐུ་མདོག་གསེར་མདོག་འདྲ་ལ་ཕྱག་འཚལ་ལོ། །འཁོར་ལོ་དྲ་བས་ཁྱབ་པའི་ཞབས་འདོར་བས། །ས་སྟེང་རི་མོར་མཛད་ཅིང་རབ་ཏུ་གཤེགས། །ཞབས་ཀྱི་འོད་ཟེར་གྱིས་ནི་ཡོངས་སྨིན་པའི། །མི་རྣམས་གུམ་ནས་ལྷའི་འཇིག་རྟེན་མཆི། །ཆོས་ཀྱི་རྒྱལ་པོ་ནོར་བདུན་སྦྱིན་པ་པོ། །ཆོས་ཀྱི་སྦྱིན་པ་དག་དུལ་བའི་ཐུགས་མངའ་བ། །ཆོས་ཀྱི་སྤྱད་པས་འགྲོ་བ་རྗེས་སྟོན་པ། །འདྲེན་པ་ཆོས་ཀྱི་རྗེ་ལ་ཕྱག་འཚལ་ལོ། །བྱམས་པའི་གོ་ཆ་དྲན་པའི་རལ་གྲི་མཆོག །ཚུལ་ཁྲིམས་གཞུ་དང་ཤེས་རབ་ཐབས་ཀྱི་མངའ། །དེ་ཡིས་སྐྱེ་འཆི་སྲིད་སྲེད་འཕེལ་བགྱིད་པ། །ཉོན་མོངས་དགྲ་དག་རྣམ་པར་བཅོམ་པར་འགྱུར། །རྒལ་ནས་སེམས་ཅན་ཁྲག་ཁྲིག་རྣམས་ཀྱང་སྒྲོལ། །གྲོལ་ནས་འཆིང་བ་ལས་ནི་འགྲོ་བ་འགྲེལ། །བདེ་གཤེགས་གང་གིས་ཞི་བའི་གནས་མཆི་བ། །བདེ་བ་རིམས་ནད་མ་མཆིས་ལམ་ཡང་སྟོན། །གང་ན་སྐྱེ་དང་འཆི་བ་མ་མཆིས་ཤིང་། །འབྲལ་བའི་སྡུག་བསྔལ་འབྱུང་བར་མི་འགྱུར་བ། །གནས་མཆོག་ཞི་བ་འདུས་མ་བགྱིས་པ་དེ། །ཐུགས་རྗེས་བརྙེས་ནས་ཁྱོད་ཀྱིས་བསྟན་པ་མཛད། །ཆོས་ཀུན་དབང་གི་ཕ་རོལ་གཤེགས་པའི་རྒྱལ། །ཐུབ་པ་ཆེན་པོའི་འཇིག་རྟེན་མཆོག་བསྟོད་པས། །བདག་གིས་འདིར་ནི་བསོད་ནམ་གང་བསགས་དེས། །འགྲོ་བ་བྱང་ཆུབ་མངོན་པར་འཚང་རྒྱ་ཤོག །དེ་ནས་ཚེ་དང་ལྡན་པ་ཡུལ་འཁོར་ལ་སྐྱོང་གིས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་ཐལ་མོ་སྦྱར་ཏེ་
སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཅུགས་ནས། །བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །འདི་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང་ཁྱོད་ཅི་འདོད་པ་དྲི་མ་ཤིག་དང་། ངས་དྲིས་པ་དེ་དང་དེ་ཉིད་ཀྱི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཡུལ་འཁོར་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དུ་དང་ལྡན་ན་ཆོས་ཐམས་ཅད་ཀྱི་ཡོན་ཏན་གྱི་ཁྱད་པར་ཐོབ་པར་འགྱུར། །གཞན་ལ་རག་མ་ལས་པའི་ཤེས་པ་ཐོབ། མྱུར་བའི་ཤེས་རབ་འཐོབ། སྤོབས་པ་རྣམས་པར་ངེས་པ་ཐོབ། སྣང་བ་འཐོབ། ཐམས་ཅད་མཁྱེན་པ་ཉིད་ལ་འཇུག་པ་དང་། སེམས་ཅན་ཡོངས་སུ་སྨིན་པར་བགྱིད་པ་དང་། ཡིད་གཉིས་སྤོང་པ་དང་། སོམ་ཉི་སྤོང་པ་དང་། ཐམས་ཅད་མཁྱེན་པ་ཉིད་དུ་རྣམ་པར་ངེས་པ་འཐོབ། སེམས་ཅན་འཛུད་པ་ལ་མཁས་པ་དང་། ཇི་སྐད་སྨྲས་པ་དེ་བཞིན་དུ་བགྱིད་པ་དང་། ལྡེམ་པོ་དག་ཡང་དག་པ་དང་། སེམས་ཅན་གྱི་ཁམས་ལ་མཁས་པ་དང་། སངས་རྒྱས་རྗེས་སུ་དྲན་པ་འཐོབ་པ་དང་། ཞུ་བ་ཐམས་ཅད་ཞུ་བ་དང་། ཆོས་ཐམས་ཅད་འཛིན་པ་དང་། མྱུར་དུ་ཐམས་ཅད་མཁྱེན་པ་ཉིད་འཐོབ་པར་འགྱུར། །དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བྱང་ཆུབ་སེམས་དཔའ་སྤྱོད་པ་རབ་ངེས་པ། ཡང་དག་ཉིད་དུ་ཇི་ལྟར་དེ་བྱུང་དང་། ཡེ་ཤེས་རྒྱ་མཚོའི་བཀའ་མཆིང་རྣམས་ངེས་པ། མི་མཆོག་རྒྱལ་བས་བདག་ལ་བཤད་ཏུ་གསོལ། །ཤིན་ཏུ་སྦྱངས་པའི་གསེར་གྱི་གཟུགས་ལྟ་བུ། །
སེམས་ཅན་དམ་པ་བསོད་ནམས་མཆོག་བསགས་པ། ཁྱོད་ནི་སྐྱབས་དང་གནས་དང་དཔུང་གཉེན་ལགས། །བྱང་ཆུབ་སྤྱོད་མཆོག་དྲི་མེད་དེང་བདག་གསུངས། གཟུངས་དང་བདུད་རྩི་བྱང་ཆུབ་འབྱུང་བ་ཡི། ཡེ་ཤེས་མི་ཟད་ཇི་ལྟར་འཐོབ་པར་འགྱུར། །གང་གིས་སྐྱེ་བོའི་དོགས་པ་གཅོད་འགྱུར་བ། །ཤེས་རབ་རྒྱ་མཚོ་ཇི་ལྟར་རྣམ་པར་དག །འཁོར་བར་བསྐལ་བ་བྱེ་བ་མང་པོར་ནི། །འཇིག་རྟེན་སྡུག་བསྔལ་ཉེན་ལ་ལྟ་བགྱིད་ཀྱང་། །སྐྱེ་བོའི་བློ་ནི་ནམ་ཡང་མེ་སྐྱེད་ཅིང་། །དེ་དག་དོན་དགེ་སྟོན་པར་འགྱུར་བ་དང་། །དག་པའི་ཞིང་དང་ཕུན་སུམ་ཚོགས་འཁོར་དང་། །ཚེ་མཆོག་དང་ནི་ཕུན་སུམ་ཚོགས་ཞིང་དང་། །སེམས་ཅན་ཆད་ཀྱི་བཀའ་མཆིད་བླ་མེད་དང་། །བྱང་ཆུབ་སྤྱོད་པ་དྲི་མེད་བཤད་དུ་གསོལ། །བདུད་འཇོམས་མཛད་པ་ལྟར་ན་སྤྱོད་པ་པོ། །སྲེད་པ་སྐེམས་པ་རྣམ་གྲོལ་རིག་མཛད་པས། །ཆོས་ཀྱི་ཚུལ་ཡང་བསྐྱུད་པར་མི་འགྱུར་བར། །སེམས་ཅན་རིན་ཆེན་སྤྱོད་མཆོག་བསྟན་དུ་གསོལ། །གཟུགས་དང་ལོང་སྤྱོད་སྤོབས་པ་ཕུན་སུམ་ཚོགས། །སྣུམ་པའི་གསུང་གིས་འཁོར་རྣམས་ཚིམ་མཛད་པ། །བདེ་གཤེགས་སྤྲིན་ལྟར་འགྲོ་བ་ཚིམ་མཛད་པ། །སངས་རྒྱས་སྤྱོད་ཡུལ་ལེགས་པར་བསྟན་དུ་གསོལ། །ཀ་ལ་པིང་ཀའི་སྒྲ་སྙན་གསུང་འབྱིན་པ། །ཚངས་པའི་དབྱངས་ཀྱི་བློ་ངན་རབ་འཇིག་པ། །ཆོས་འཚལ་གྱུར་པའི་འཁོར་རྣམས་ལྷགས་ལགས་ཀྱིས། །གཙོ་བོ་བདུད་རྩིའི་རོ་ཡིས་ཚིམ་པར་མཛད། །བྱང་ཆུབ་དམ་པ་མཆོག་ལ་འདུན་པ་མཆིས། །ཆོས་ལ་འདུན་པ་བཟློག་པ་མི་རིགས་ཏེ། །འདྲེན་པ་བསྟན་པ་མཛད་པའི་དུས་འདི་ལགས། །རིན་ཆེན་དམ་པ་བསྒྲགས་པའི་དུས་ལ་བབ། །ཐུབ་པ་བདག་ནི་བྱང་ཆུབ་རེ་བ་མཆིས། །བདག་གི་བསམ་པ་རྒྱལ་བས་རབ་ཏུ་མཁྱེན། །རྒྱལ་བ་ཅོ་འདྲི་མ་ལགས་དོན་དུ་གཉེར། །སྤྱོད་པ་དམ་པ་ལེགས་པར་བཤད་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང་ཁྱོད་ལ་ལེགས་སོ། །ཡུལ་འཁོར་སྐྱོང་ཁྱོད་སྐྱེ་བོ་མང་པོ་ལ་ཕན་པའི་ཕྱིར་ཞུགས་པ་དང་། ཡུལ་འཁོར་སྐྱོང་
ཁྱོད་སྐྱེ་བོ་མང་པོ་ལ་བདེ་བ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་། ད་ལྟར་དང་། མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་གཟུང་བའི་ཕྱིར་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་ནི་ལེགས་སོ། །ཡུལ་འཁོར་སྐྱོང་ཁྱོད་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ལགས་སོ་ཞེས་གསོལ་ཏོ། ཚེ་དང་ལྡན་པ་ཡུལ་འཁོར་སྐྱོང་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ཡོངས་སུ་དག་པ་འདི་དག་འཐོབ་བོ། །བཞི་གང་ཞེ་ན། འདི་ལྟ་སྟེ། བསམ་པ་དང་ལྷག་པའི་བསམ་པས་ནན་ཏན་བྱེད་པ་དང་། སེམས་ཅན་ཐམས་ཅད་ལ་སེམས་མཉམ་པ་དང་། སྟོང་པ་ཉིད་སྒོམ་པ་དང་། ཇི་སྐད་སྨྲས་པ་དེ་བཞིན་བྱེད་པ་སྟེ། ཡུལ་འཁོར་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན་ཡོངས་སུ་དག་པ་འདི་དག་འཐོབ་བོ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །བསམ་པ་ཐག་པས་རྟག་ཏུ་མངོན་བརྩོན་པ། །བྱང་ཆུབ་ལམ་ལས་མི་ལྡོག་ཡིད་ལྡན་པ། གཡོ་མེད་ཉིད་ཐབ་མེད་ཅིང་སྒྱུ་མེད་པ། །ཡེ་ཤེས་མཐའ་ཡས་ལྡན་ལ་དེ་དག་ཡོད། །སྐྱེ་དང་ན་དང་རྒ་དང་འཆིས་གཟིར་བ། །སེམས་ཅན་མགོན་མེད་སྡུག་བསྔལ་མཐོང་ནས་ནི། །སྲིད་པའི་མཚོ་ལས་འགྲོ་བ་སྒྲོལ་བའི་ཕྱིར། །དེ་དག་ཆོས་ཀྱི་གྲུ་ནི་ཡང་དག་སྤྱོད། །ངེས་པ་སེམས་ཅན་ཀུན་ལ་སེམས་མཉམ་པ། །བུ་གཅིག་པ་བཞིན་འགྲོ་བ་རྣམས་ལ་ལྟ། །འདི་དག་ཐམས་ཅད་བདག་གིས་དགྲོལ་ལོ་ཞེས། །གང་ཟག་མཆོག་གི་བསམ་པ་དེ་འདྲའོ། ། སྟོང་ཉིད་རྟག་ཏུ་རྟོགས་པར་ཁོང་དུ་ཆུད། །བདག་ཡོད་མ་ཡིན་སེམས་ཅན་ཡོད་མ་ཡིན། །འདུས་བྱས་སྒྱུ་མ་རྨི་ལམ་འདྲ་བ་ལ། །བྱིས་པ་མི་མཁས་འདི་ལ་རྣམ་པར་རྨོངས། །མཁས་པ་དེ་དག་ཇི་སྐད་ཚིག་སྨྲས་པ། །དེ་ལ་ནན་ཏན་བྱེད་ཅིང་ཀུན་དུ་གནས། །དུལ་ཞིང་ཞི་ལ་རྟག་ཏུ་སྐྱོན་རྣམས་སྤངས། །རྒྱལ་བའི་སྲས་རྣམས་བྱང་ཆུབ་ལམ་ལ་དགའ། །
ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་འབྱིན་པ་འཐོབ་པ་སྟེ། བཞི་གང་ཞེ་ན། གཟུངས་ཐོབ་པ་དང་། དགེ་བའི་བཤེས་གཉེན་རྙེད་པ་དང་། །ཆོས་ཟབ་མོ་ལ་བཟོད་པ་ཐོབ་པ་དང་། །ཚུལ་ཁྲིམས་ཡོངས་སུ་དག་པ་ཡང་དག་པར་སྤྱོད་པ་སྟེ། །ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་འབྱིན་པ་འཐོབ་པའོ། །འདི་ལ་འདི་ནི་ཆོས་ཉིད་ཡིན་ཏེ། །དེ་ལ་འདི་སྐད་ཅེས་བྱའོ། །གང་གིས་སངས་རྒྱས་ཀུན་གྱིས་གསུངས་པའི་ཆོས་མཆོག་འཛིན་འགྱུར་བ། །གཟུངས་རྣམས་གྲགས་པ་ཆེན་པོ་དེ་དག་གིས་རྟག་ཏུ་ཐོབ། །ནམ་ཡང་ཆུད་ཟར་མི་འགྱུར་ཕྱིར་ཞིང་བློ་གྲོས་རབ་ཏུ་འཕེལ། །དེ་དག་ཡེ་ཤེས་ཆགས་པ་མེད་ཅིང་ཆོས་ཀུན་ཕ་རོལ་ཕྱིན། །བྱང་ཆུབ་ཡན་ལག་འཕེལ་བར་བྱེད་པའི་དགེ་བའི་བཤེས་གཉེན་རྙེད། །དེ་དག་འདྲེན་པ་རྣམས་ནི་གང་ནས་བཞུད་པའི་ལམ་མཆོག་སྟོན། །དེ་དག་སྡིག་པའི་གྲོགས་པོ་དག་ལ་སྟེན་པ་མ་ཡིན་ཏེ། ཚིག་བྱེད་བདག་ཉིད་མེ་ལྟར་དེ་དག་རིང་དུ་རྣམ་པར་སྤོང་། །དཔའ་བོ་སྟོང་པ་ཉིད་དང་ལྡན་པའི་ཟབ་མོའི་ཆོས་ཐོས་ནས། །དེ་དང་བདག་དང་སེམས་ཅན་སྲོག་ཏུ་ལྟ་བ་ཀུན་མི་འབྱུང་། །དེ་དག་ཚུལ་ཁྲིམས་སྐྱོན་མེད་དུལ་ཞིང་ཞི་བའི་ཡིད་དང་ལྡན། །སངས་རྒྱས་ཚུལ་ཁྲིམས་བླ་ན་མེད་ལ་སེམས་ཅན་རྣམས་ཀྱང་སྦྱོར། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང་སངས་རྒྱས་མཐོང་བ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་དང་། ཡུལ་འཁོར་སྐྱོང་རྗེས་སུ་འཐུན་པའི་ཆོས་ཐོས་པ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་དང་། ཡུལ་འཁོར་སྐྱོང་བ་དོག་པ་ཐམས་ཅད་ཡོངས་སུ་གཏོང་བ་བྱང་ཆུབ་སེམས་དཔའ་འཁོར་བ་ན་འཁོར་བ་རྣམས་དགའ་བར་
བྱེད་པའི་ཆོས་དང་། ཡུལ་འཁོར་སྐྱོང་དམིགས་སུ་མེད་པའི་ཆོས་ལ་བཟོད་པ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་ཏེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་སོ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །གཟི་བརྗིད་ཀྱིས་ནི་འཇིག་རྟེན་ཐམས་ཅད་ཀུན་ནས་སྣང་མཛད་པའི། རྫོགས་པའི་སངས་རྒྱས་མི་མཆོག་ཚེ་རབས་ཀུན་དུ་དེ་དག་མཐོང་། །བྱང་ཆུབ་དམ་པ་མཆོག་ཚོལ་ཚེ་ན་སེམས་ཅན་དགྲོལ་བའི་ཕྱིར། དགའ་ཞིང་གུས་པར་གནས་ནས་དེ་ལྟར་མི་དབང་རྒྱལ་པོ་མཆོད། །འདྲེན་པ་རྣམས་ལས་ཞི་བ་རྗེས་སུ་འཐུན་པའི་ཆོས་ཀྱང་ཉན། །ཐོས་ནས་བསམ་པ་ཐག་པས་བརྟན་པ་ཚུལ་བཞིན་རབ་ཏུ་སྦྱོར། །དམིགས་མེད་ཆོས་ཐོས་ཆོས་འདི་ཐམས་ཅད་སེམས་ཅན་མེད་པ་དང་། །འདི་ལ་བདག་མེད་པར་ནི་ཆོས་ལ་སོམ་ཉི་དེ་མི་སྐྱེད། །དེ་ནི་བདག་པོ་ཐམས་ཅད་ཡོངས་གཏོང་རྟག་ཏུ་ཀུན་འཛིན་མེད། །སློབ་གཉེར་བར་འོངས་པ་མཐོང་ན་སེམས་ནི་རབ་ཏ་དགའ། །གྲོད་དང་ཡུལ་འཁོར་ས་དང་སྲོག་དང་བུ་དང་ཆུང་མ་དང་། །ཐམས་ཅད་གཏོང་ཞིང་དེ་ཡི་སེམས་ནི་གང་དུའང་གཡོ་བ་མེད། ཡུལ་འཁོར་སྐྱོང་བྱང་ཆུབ་སེམས་དཔས་ཆོས་བཞི་ལ་བལྟ་བར་མི་བྱ་སྟེ། བཞི་གང་ཞེ་ན། ཡུལ་འཁོར་སྐྱོང་བྱང་ཆུབ་སེམས་དཔས་ཁྱིམ་གྱི་གནས་ལ་བལྟ་བར་མི་བྱ་བ་དང་། ཡུལ་འཁོར་སྐྱོང་བྱང་ཆུབ་སེམས་དཔས་རབ་ཏུ་བྱུང་ནས་རྙེད་པ་དང་བཀུར་སྟི་ལ་བལྟ་བར་མི་བྱ་བ་དང་། ཡུལ་འཁོར་སྐྱོང་བྱང་ཆུབ་སེམས་དཔས་ཁྱིམ་ལ་འདྲིས་པར་བྱ་བ་ལ་བལྟ་བར་མི་བྱ་བ་དང་། ཡུལ་འཁོར་སྐྱོང་བྱང་ཆུབ་སེམས་དཔས་ལུས་དང་སྲོག་ལ་བལྟ་བར་མི་བྱ་བ་སྟེ། ཡུལ་འཁོར་སྐྱོང་བྱང་ཆུབ་སེམས་དཔས་ཆོས་བཞི་པོ་དེ་དག་ལ་བལྟ་བར་མི་བྱའོ། །དེ་དག་གང་དུའང་བུད་མེད་རྣམས་དང་སྐྱེས་པ་དག་དང་འདྲིས་མི་བྱེད། བསེ་ལྟར་གཅིག་པུར་གནས་ཤིང་བསམ་པ་དྲི་མེད་དག་ལ་དྲི་མ་བྲལ། །དེ་དག་རྙེད་པ་རྣམས་ཀྱིས་དགའ་བར་མི་འགྱུར་ཐོབ་ཡིད་ཞུམ་མེད། །འདོད་པ་ཆུང་སྟེ་ངན་ངོན་ཙམ་ལ་དགའ་ཞིང་སྒྱུ་དང་ཚུལ་འཆོས་སྤངས། སེམས་ཅན་དོན་ཕྱིར་བརྩོན་འགྲུས་ཡིད་ལྡན་སྦྱིན་དང་དུལ་ལ་རབ་ཏུ་
གནས། །སངས་རྒྱས་ཡེ་ཤེས་དོན་གཉེར་བསམ་གཏན་བརྩོན་འགྲུས་ཡོན་ཏན་ཕ་རོལ་ཕྱིན། ལུས་དང་དེ་བཞིན་སྲོག་ལ་མི་ལྟ་སྡུག་བསྔལ་བའི་རྩ་ལག་རྣམ་སྤངས་ཏེ། །བསམ་པ་རྡོ་རྗེ་ལྟ་བུ་རབ་བརྟན་རྟག་ཏུ་བྱང་ཆུབ་ལམ་ལ་སྦྱོར། ལུས་ནི་དུམ་བུ་དུམ་བུར་བཅད་ཀྱང་དེ་དག་སེམས་ལ་གཡོ་བ་མེད། ཐམས་ཅད་མཁྱེན་ཉིད་རེ་བ་ཕྱིར་བརྩོན་འགྲུས་ཤིན་ཏུ་བརྟན་འདིར་རྩོམ། ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང་ཚུལ་ཁྲིམས་སྐྱོན་མེད་པ་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་དང་། ཡུལ་འཁོར་སྐྱོང་དགོན་པ་ལ་གནས་པ་མི་གཏོང་བ་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་དང་། ཡུལ་འཁོར་སྐྱོང་འཕགས་པའི་རིགས་བཞི་དང་འཐུན་པར་བྱེད་པ་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་དང་། ཡུལ་འཁོར་སྐྱོང་མང་དུ་ཐོས་པ་ཐོབ་པར་བྱེད་པ་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་ཏེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་སོ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །སངས་རྒྱས་ཚུལ་ཁྲིམས་དམ་པ་འདི་ལ་འདོད་བྱེད་ཅིང་། ཚུལ་ཁྲིམས་དྲི་མེད་ནོར་བུ་རིན་ཆེན་འདྲ་བ་སྲུང་། དེ་དག་ད་ནི་ཁྲིམས་ལྡན་ལེགས་སྡོམ་ཡིན་མི་སེམས། ཚུལ་ཁྲིམས་དེ་ཉིད་ལ་ནི་རྟག་ཏུ་སེམས་ཅན་སྦྱོར། །དེ་དག་སྟོང་པ་དགོན་པར་རྟག་ཏུ་གནས་པར་བྱེད། དེ་དག་བདག་གི་འདུ་ཤེས་སྲོག་གི་འདུ་ཤེས་མེད། །གཟུགས་ཀུན་རྩྭ་དང་ཤིང་དང་བརྩིག་པ་འདྲ་བར་མཐོང་། འདི་ལ་སྐྱེས་བུ་བུད་མེད་བདག་ནི་མེད་པར་མཐོང་། འཕགས་རིགས་བཞི་ལ་དགའ་ཞིང་གཡོ་མེད་ཚུལ་འཆོས་མེད། བག་ཡོད་དེ་དག་བསམ་པ་ཐག་པས་རབ་ཏུ་སྦྱོར། ཐོས་དང་ཡོན་ཏན་རྣམས་ལ་རྟག་ཏུ་བརྩོན་པར་བྱེད། བདེ་བར་གཤེགས་པའི་ཡོན་ཏན་མཐུ་ཆེན་དོན་དུ་གཉེར། །སྐྱེ་རྒ་འཆི་བས་བཅོམ་ཞིང་ནད་ཀྱིས་གཟིར་གྱུར་པ། འགྲོ་བ་མགོན་མེད་སྲིད་པའི་བཙོན་ར་འདིར་བལྟས་ནས། ཞི་བ་དམ་པ་མཆོག་གི་
ཆོས་ཀྱི་གྲུ་སྦྱར་ཏེ། སྲིད་པའི་རྒྱ་མཚོའི་ཆུ་ལས་སྐྱེ་བོ་སྒྲོལ་བར་བྱེད། འདུས་བྱས་གྱུར་པར་འཇིག་རྟེན་འཁྱམས པས་སྐྱབས་མགོན་དང་། །དཔུང་གཉེན་བྱེད་པ་གཞན་ནི་གང་ཡང་ཡོད་མིན་གྱིས། །བདག་གིས་སེམས་ཅན་འདི་དག་ཐམས་ཅད་ཡོངས་དགྲོལ་ཞེས། །དེ་ཕྱིར་བྱང་ཆུབ་མཆོག་ཏུ་བདག་གིས་སྨོན་ལམ་བཏབ། །ཡུལ་འཁོར་སྐྱོང་བྱང་ཆུབ་སེམས་དཔས་བཞི་པོ་འདི་དག་ནི་ཅང་ཤེས་ཀྱི་འགྲོས་སུ་ཤེས་པར་བྱ་སྟེ། བཞི་གང་ཞེ་ན། བདེ་འགྲོ་ཐོབ་སྟེ། དེ་ཡང་སངས་རྒྱས་འབྱུང་བ་དང་ཕྲད་པ་དང་། བླ་མ་ལ་སྲི་ཞུ་བྱེད་དེ། དེ་ཡང་ཟང་ཟིང་མེད་པའི་སེམས་ཀྱིས་བསྟེན་པ་དང་། བས་མཐའི་གནས་མལ་ལ་མངོན་པར་དགའ་སྟེ། དེ་ཡང་རྙེད་པ་དང་བཀུར་སྟི་ལ་མི་ལྟ་བ་དང་། སྤོབས་པ་ཐོབ་སྟེ། དེ་ཡང་ཟབ་མོ་ལ་བཟོད་པ་དང་ལྡན་པ་སྟེ། ཡུལ་འཁོར་སྐྱོང་བྱང་ཆུབ་སེམས་དཔས་བཞི་པོ་དེ་དག་ནི་ཅང་ཤེས་ཀྱི་འགྲོས་སུ་ཤེས་པར་བྱའོ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །བརྟན་པ་ནགས་དང་སུ་ལ་རྟག་ཏུ་གནས་པར་བྱེད། དེ་དག་རྟག་ཏུ་ཁོར་མོར་རྙེད་པ་དོན་གཉེར་མིན། །ཆགས་མེད་བློ་ཅན་རྟག་ཏུ་སྤོབས་དང་ལྡན་པ་ཡིན། ཟབ་མོའི་ཆོས་ལ་མཁས་ཤིང་སྤྲོས་པ་རྣམས་དང་བྲལ། །རྟག་ཏུ་འཁོར་མོར་བླ་མ་རྣམས་ལ་སྲི་ཞུ་བྱེད། །དེ་དག་ཇི་སྐད་སྨྲས་པ་དེ་བཞིན་དེ་དག་སྤྱོད། །བདེ་གཤེགས་དཔག་ཏུ་མེད་པ་མང་པོ་མཉེས་པར་བྱེད། །རྒྱལ་བའི་ཡེ་ཤེས་ཆེད་དུ་མཆོད་པ་རྒྱ་ཆེར་བྱེད། །གྲགས་པ་ཆེན་པོ་རྣམས་ཀྱི་འགྲོ་བ་གཙོ་བོར་འགྱུར། །ལྷ་མི་རྣམས་ཀྱི་ནང་ན་སྤྱི་བོར་ཕྱིན་པ་ཡིན། །རྫོགས་པའི་བྱང་ཆུབ་ལམ་ལ་རྟག་ཏུ་སེམས་ཅན་འཛུད། །དགེ་བ་བཅུ་པོ་དག་ལ་ཡང་དག་སྦྱོར་བར་བྱེད། །སངས་རྒྱས་ཡོན་ཏན་ཐོས་ནས་དེ་དག་དགར་འགྱུར་ཏེ། །དེ་དག་རིང་པོར་མི་ཐོགས་དེ་དང་ཉེ་བར་འགྱུར། ། དེ་དག་བྱང་ཆུབ་རྡུལ་བྲལ་དམ་པས་སངས་རྒྱས་ནས། །སེམས་ཅན་ཁྲག་ཁྲིག་སྡུག་བསྔལ་མཐའ་ཡས་རྣམས་ལས་འགྲོལ། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཡོངས་སུ་སྤྱོད་པའི་ཆོས་ཏེ། བཞི་གང་ཞེ་ན། ཁོང་ཁྲོ་
བ་མེད་པའི་སེམས་བྱང་ཆུབ་སེམས་དཔའི་སྤྱོད་པ་དང་། ཚུལ་འཆོས་དང་། ཁ་གསག་དང་། ཐོབ་ཀྱིས་འཇལ་བ་ཡོངས་སུ་སྤངས་ཏེ་དགོན་པར་གནས་པ་དང་། བདོག་པ་ཐམས་ཅད་ཡོངས་སུ་གཏོང་ཞིང་རྣམ་པར་སྨིན་པ་ལ་རེ་བ་མེད་པ་དང་། ཉིན་མཚན་དུ་ཆོས་འདོད་ཅིང་ཆོས་སྨྲ་བ་རྣམས་ལ་འཁྲུལ་པ་མི་ཚོལ་བ་སྟེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཡོངས་སུ་གཏོང་ཞིང་རྣམ་པར་སྨིན་པ་ལ་རེ་བ་མེད་པ་དང་། ཉིན་མཚན་དུ་ཆོས་འདོད་ཅིང་ཆོས་སྨྲ་བ་རྣམས་ལ་འཁྲུལ་པ་མི་ཚོལ་བ་སྟེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཡོངས་སུ་སྤྱོད་པའི་ཆོས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བླ་ན་མེད་པའི་བྱང་ཆུབ་འདོད་པ་ན། །ཐབ་དྲི་མ་མེད་ཅིང་ཁྲོ་སེམས་མེད། དེ་ནི་སུ་ལའང་སྐྱོན་ཚོལ་བྱེད་མ་ཡིན། །གཡོ་མེད་ཚུལ་འཆོས་མེད་ཅིང་སྤྲོས་སེམས་མེད། །ཁྱིམ་གྱི་བློ་གྲོས་ཡང་མྱ་ངན་རྩ། །སྐྱེ་བོ་ངན་འགྲོགས་ཚུལ་བཞིན་རིང་འགྱུར་བ། །སྤངས་ཏེ་དེ་ལ་མི་ལྟ་རབ་བྱུང་ནས། །ཐར་པ་འདོད་པ་རི་ཁྲོད་གནས་པར་བྱེད། །དགོན་པ་བས་མཐའི་རྣམས་པ་བསྟན་པས་ན། །ཤས་པ་འཐོབ་པ་ཀུན་ལ་མི་རྟོན་ཅིང་། །ལུས་དང་སྲོག་ལའང་ལྟ་བར་མི་བྱེད་ལ། །སེང་གེ་ལྟ་བུར་གནས་ཤིང་དགྲ་ལས་རྒྱལ། །བྱང་ཆུབ་ལམ་ཕྱིར་ཡེ་ཤེས་ཚོལ་བ་ན། །ངན་ངོན་ཙམ་གྱིས་ཚོགས་པར་འཛིན་བྱེད་ཅིང་། །རྟག་ཏུ་བྱ་ལྟར་སོགས་པ་སྤངས་ནས་ནི། །འཇིག་རྟེན་ཀུན་ལ་གནས་པ་མ་ཡིན་ནོ། །དཔེར་ན་བསེ་ལྟར་གཅིག་བུ་གནས་བྱེད་ཅིང་། །སེང་གེ་ལྟ་བུར་འཇིགས་པ་ཡོད་མ་ཡིན། །རི་དགས་ལྟ་བུར་སར་འཇིགས་ཡིད་མི་རྟོན། །དེ་ནི་མཆོད་པས་ཁེངས་པར་འགྱུར་བ་མེད། །གཡང་སར་ལྟུང་བའི་འགྲོ་བ་འདི་བལྟས་ནས། །རབ་ཏུ་ཐར་པར་བྱ་ཕྱིར་འབད་པར་བྱེད། །གལ་ཏེ་བག་ཡོད་དགེ་བའི་ཆོས་སྤྱོད་ན། །བདག་ཀྱང་འགྲོ་བ་འདི་ཡི་དཔུང་གཉེན་འགྱུར། །མི་མཆོག་སྤྱོད་པ་འདི་དག་འདོད་པ་ན། །འཛུམ་པའི་བཞིན་གྱིས་རབ་སྙན་ཚིག་སྨྲ་ཞིང་། །སྡུག་དང་མི་སྡུག་རྟག་ཏུ་རྙོག་སེམས་མེད། །རླུང་དང་འདྲ་བར་ཆགས་པ་མེད་པར་གནས། །སྟོང་པ་ཉིད་དང་མཚན་མ་མེད་ལ་མོས། །འདུས་བྱས་ཀུན་ལ་སྒྱུ་མ་ལྟ་བུར་རྟོག །ཡངས་པའི་བློ་ཅན་ཞི་དང་དུལ་ལ་དགའ། །དེ་ནི་རྟག་ཏུ་བདུད་རྩིའི་རོ་ཡིས་
མགུ། །ཅི་ནས་བྱང་ཆུབ་ལམ་ནི་སྒྲུབ་བྱེད་ཅིང་། །དེ་ནི་རྟག་ཏུ་བསམ་པ་ཡོངས་སུ་སྤྱོད། །གཟུངས་དང་སྤོབས་པ་ཚོལ་བར་བྱེད་པ་ན། །ཡོན་ཏན་འདོད་པ་སྡུག་བསྔལ་བརྒྱ་དག་བཟོད། །བྱང་ཆུབ་སེམས་དཔའི་སྤྱོད་པ་འདི་བལྟས་ནས་ནི། །གང་ཞིག་དོན་དུ་གཉེར་དེ་དགར་འགྱུར་རོ། །གང་ཞིག་བྱང་ཆུབ་འདི་ལ་མ་མོས་པ། །བློ་ཆུང་དེ་ནི་ཉེས་པ་བརྒྱ་ཡང་སྐྱེད། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའི་གཡང་ས་སྟེ། །བཞི་གང་ཞེ་ན། ཡུལ་འཁོར་སྐྱོང་མ་གུས་པ་བྱང་ཆུབ་སེམས་དཔའ་རྣམས་ཀྱི་གཡང་ས་དང་། ཡུལ་འཁོར་སྐྱོང་བྱས་པ་མི་གཟོ་ཞིང་གཡོ་ལ་སྟེན་པ་བྱང་ཆུབ་སེམས་དཔའ་རྣམས་ཀྱི་གཡང་ས་དང་། ཡུལ་འཁོར་སྐྱོང་རྙེད་པ་བཀུར་སྟི་ལ་ཆགས་པ་བྱང་ཆུབ་སེམས་དཔའ་རྣམས་ཀྱི་ཡན་ལག་ཀྱི་གཡང་ས་དང་། ཡུལ་འཁོར་སྐྱོང་ཚུལ་འཆོས་པ་དག་ཁ་གསག་གིས་རྙེད་པ་བཀུར་སྟི་སྒྲུབ་པ་བྱང་ཆུབ་སེམས་དཔའ་རྣམས་ཀྱི་གཡང་ས་སྟེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གཡང་སའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འཕགས་པ་བླ་མ་རྣམས་དང་ཕ་མ་ལ། །དེ་དག་རྟག་ཏུ་གུས་པ་མེད་པ་ཡི། །དེ་དག་བྱས་པ་མིག་གཟོ་གཡོན་ཅན་ཏེ། །རྟག་ཏུ་ཀུན་དུ་མ་བསྡམས་སྤྱོད་ཅིང་རྨོངས། །རྙེད་ལ་རྟག་ཏུ་ཆགས་ཤིང་ཞེན་པ་སྟེ། །དེ་དག་ཚུལ་འཆོས་པ་དང་གཡོས་སྤྱོད་དགའ། །ཁ་ཅིག་ཚུལ་ཁྲིམས་བརཏལ་ཞུགས་ཇི་ལྟས་ཀྱང་། །འདི་ནི་བདག་དང་མཚུངས་པ་མེད་ཅེས་སྨྲ། །དེ་དག་ཕན་ཚུན་སྡང་བར་སེམས་པ་སྟེ། །གླགས་ཚོལ་བ་ལ་རྟག་ཏུ་བརྩོན་པ་ཡིན། །དེ་དག་ཞིང་གི་ལས་དང་ཚོད་ལ་དགའ། །དེ་དག་དགེ་སྦྱོང་ཡོན་ཏན་ཤིན་དུ་རིང་། །ཕྱི་མའི་དུས་ན་འདི་ལྟར་མ་བསྡམས་པའི། །དགེ་སློང་ཚུལ་ཁྲིམས་ཡོན་ཏན་རབ་རིང་བ། །དེ་དག་མཚང་འདྲ་བ་དང་འཐབ་པ་དང་། །ཕྲག་དོག་དབང་གིས་ཆོས་འདི་ནུབ་པར་བྱེད། །བྱང་ཆུབ་ལམ་ལས་རྟག་པར་ཤིན་དུ་རིང་། །འཕགས་པའི་ནོར་ལས་དེ་དག་ཤིན་དུ་རིང་། །འཕགས་ལམ་གྱ་ནོམ་རྣམ་པར་སྤངས་ནས་ནི། །དེ་དག་འགྲོ་བ་ལྔར་ནི་འཁྱམ་པར་འགྱུར། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་
དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང་ལེ་ལོ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་དང་། ཡུལ་འཁོར་སྐྱོང་མ་དད་པ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་དང་། ཡུལ་འཁོར་སྐྱོང་དང་ང་རྒྱལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་དང་། ཡུལ་འཁོར་སྐྱོང་ཕ་རོལ་གྱི་མཆོད་པ་ལ་ཕྲག་དོག་དག་སེར་སྣའི་སེམས་དང་ལྡན་པ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་ཏེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མ་དང་ལེ་ལོ་རྟག་ཏུ་རྨོངས་པའི་སེམས། །དེ་དག་མངོན་པའི་ང་རྒྱལ་ཅན་རྟག་ཏུ་ཁྲོ། །བཟོད་ལྡན་རྟག་བརྩོན་དགེ་སློང་མཐོང་ནས་ནི། །གཙུག་ལག་ཁང་ནས་འགྲོ་ཚེ་དབྱུག་པ་རྡེག །ཕ་རོལ་མཆོད་ཕྱིར་འདི་ནི་ཕྲག་དོག་སྐྱེ། །དེ་དག་སེམས་ནི་གནས་པ་ཡོད་མ་ཡིན། །གླགས་ལྟ་བྱེད་ཅིང་འཁྲུལ་པ་ཅན། །སུ་ལ་འཁྲུལ་ཡོད་གང་ལ་གླེང་བྱ་སྙམ། །དེ་དག་ང་ཡི་བསྟན་པ་འདི་ལས་རིང་། །དེ་དག་ཡོན་ཏན་དང་ཞིང་ངན་སོང་གཞོལ། །དེ་དག་རྒྱལ་བའི་བསྟན་པ་བོར་ནས་ནི། །ངན་སོང་ཤིན་དུ་མི་བཟད་འབར་བར་འགྲོ། །དེ་དག་རྣམས་ཀྱི་སྡིག་པ་སྤྱོད་པ་དང་། ཆོས་མིན་ལྡན་འགྲོ་རབ་སྡིག་འདི་ཐོས་ནས། །རྟག་ཏུ་འཁོར་མོར་བྱང་ཆུབ་ལམ་ལ་སྦྱོར། །ངན་འགྲོར་སྐྱེས་ཤིང་གདུང་བར་གྱུར་ཏ་རེ། །སངས་རྒྱས་འཇིག་རྟེན་ཕན་པ་དྲང་སྲོང་ཆེ། །བསྐལ་པ་བྱེ་མང་བརྒྱ་ལམ་འབྱུང་བར་འགྱུར། །ད་ལྟར་ངལ་བ་དམ་པ་རྙེད་པ་ལ། །གལ་ཏེ་ཐར་འདོད་བདག་མེད་སྤོང་པར་གྱིས། །ཡུལ་འཁོར་སྐྱོང་གང་ཟག་བཞི་དག་ནི་བྱང་ཆུབ་སེམས་དཔས་བསྟེན་པར་མི་བྱ་བ་སྟེ། །བཞི་གང་ཞེ་ན། ཡུལ་འཁོར་སྐྱོང་བྱང་ཆུབ་སེམས་དཔས་སྡིག་པའི་བཤེས་གཉེན་གྱི་གང་ཟག་བསྟེན་པར་མི་བྱ་བ་དང་། ཡུལ་འཁོར་སྐྱོང་བྱང་ཆུབ་སེམས་དཔས་དམིགས་པར་ལྟ་བ་ཅན་གྱི་གང་ཟག་བསྟེན་པར་མི་བྱ་བ་དང་། ཡུལ་འཁོར་སྐྱོང་བྱུང་ཆུབ་སེམས་
དཔས་དམ་པའི་ཆོས་སྤོང་བའི་གང་ཟག་བསྟེན་པར་མི་བྱ་བ་དང་། ཡུལ་འཁོར་སྐྱོང་བྱུང་ཆུབ་སེམས་དཔས་ཟང་ཟིང་ལ་བརྐམ་པའི་གང་ཟག་བསྟེན་པར་མི་བྱ་བ་དང་། ཡུལ་འཁོར་སྐྱོང་གང་ཟག་བཞི་པོ་དེ་དག་ནི་བྱང་ཆུབ་སེམས་དཔས་བསྟེན་པར་མི་བྱ་བའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་དག་སྡིག་པའི་བཤེས་གཉེན་རྣམ་སྤོང་ཞིང་། །གང་དག་དགེ་བའི་བཤེས་གཉེན་བསྟེན་བྱེད་པ། དེ་དག་རྟག་ཏུ་བྱང་ཆུབ་ལམ་ལ་འཕེལ། ། དཔེར་ན་ནམ་མཁའ་ལ་ཟླ་བ་ཡར་ངོ་བཞིན། །དམིགས་པར་ལྟ་ལ་རྟག་ཏུ་ཞེན་པ་དང་། །བདག་དང་སྲོག་དང་གསོ་བར་ཞེན་པ་དག །དེ་དག་དུག་ཕྱིས་བཞིན་དུ་རྟག་ཏུ་སྤང་། །གང་དག་སངས་རྒྱས་ཡེ་ཤེས་དོན་མི་གཉེར། །གང་དག་མི་མཆོག་རྣམས་ཀྱི་ཞི་བའི་ཆོས། །འདོད་ཆགས་བྲལ་བ་བདུད་རྩི་འཐུན་སྤོང་བ། །དེ་དག་དཔེར་ན་ངན་སྐྱུགས་རྫབ་བཞིན་སྤང་། །གང་ཞིག་བྱང་ཆུབ་དམ་པ་འཚང་རྒྱར་འདོད། །ཟང་ཟིང་དག་དང་ཆོས་གོས་ལྷུང་བཟེད་ཆགས། །རྟག་ཏུ་ཁྱིམ་ལ་འདིས་བར་བྱེད་བརྩོན་པ། །དེ་དག་རྣམས་དང་འདྲིས་པར་མི་བྱ་སྟེ། །དེ་དག་མེ་ཡི་འོབས་བཞིན་སྤང་བར་བྱ། །གང་ཞིག་བདུད་ནི་གདུལ་བར་བྱ་བ་དང་། །འཁོར་ལོ་དམ་པ་བླ་ན་མེད་བསྐོར་བ་དང་། །དེ་ལྟར་སེམས་ཅན་དོན་ཡོངས་བྱེད་འདོད་པ། །དེས་ནི་སྡིག་པའི་བཤེས་གཉེན་སྤང་བར་བྱ། །གང་ཞིག་བྱང་ཆུབ་དམ་པ་འཚང་རྒྱར་འདོང་། །དེ་ཡིས་རྙེད་དང་སྡུག་དང་མི་སྡུག་དང་། །གྲགས་དང་མཚན་འདྲུ་ཕྲག་དོག་སྤངས་ཏེ། །སངས་རྒྱས་ཡེ་ཤེས་རྟག་ཏུ་བཙོལ་བར་བྱ། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང་ཤེས་པས་མངོན་པར་རློམ་སེམས་སུ་བྱེད་པ་བྱང་ཆུབ་སེམས་དཔའ་རྣམས་སྡུག་བསྔལ་རྣམ་པར་སྨིན་པའི་ཆོས་དང་། ཡུལ་འཁོར་སྐྱོང་ཕྲག་དོག་དང་སེར་སྣ་དང་ལྡན་པའི་སེམས་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་དང་། ཡུལ་འཁོར་སྐྱོང་མ་མོས་པ་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་དང་། ཡུལ་
འཁོར་སྐྱོང་ཡོངས་སུ་དག་པའི་ཤེས་པ་དང་། །བཟོད་པའི་ལོངས་སྤྱོད་ཡོངས་སུ་ཚོལ་བ་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་ཏེ། ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་དག་ས་ལ་ཆོས་ནི་འཛིན་གྱུར་ཞིང་། །འགྲོ་བ་ཐམས་ཅད་ཀྱིས་ཀྱང་མཆོད་འགྱུར་བ། །དེ་ལ་མི་ཤེས་པས་ནི་བརྙས་བྱེད་ན། །དེས་ན་དེ་ནི་སྡུག་བསྔལ་མཐའ་ཡས་རྙེད། །ཡང་བས་ནི་གང་ཞིག་ལོངས་སྤྱོད་ཚོལ། །ཤེས་པ་མ་དག་རྟག་ཏུ་འདུན་ཅིང་འདོད། །གང་ཞིག་རྟག་ཏུ་ང་རྒྱལ་ཁེངས་གྱུར་ལ། །བླ་མ་འཕགས་པའི་སྐྱེ་བོ་མི་འདུད་ཅིང་། །སངས་རྒྱས་ལ་ཡང་མོས་པ་ཡོད་མིན་ལ། །ཆོས་དང་ཚོགས་ལ་དེ་ནི་མོས་པ་མེད། །བསླབ་དང་སྦྱངས་པ་རྣམས་ལ་དེ་མི་མོས། །སྡིག་པའི་བློ་ཅན་ངན་སོང་གསུམ་ཕྱོགས་པ། །དེ་ནི་མི་ནང་འདི་ནས་ཤི་འཕོས་ནས། །ལས་ཀྱི་དབང་གིས་མི་མཁས་རྣམ་པར་རྨོངས། །དམྱལ་བའམ་འོན་ཏེ་དུད་འགྲོའི་འགྲོ་རྣམས་སམ། །ཡི་དགས་འགྲོ་བ་རྣམས་སུ་སྡུག་བསྔལ་རྙེད། །གང་ཞིག་འཇིག་རྟེན་སྒྲོན་འགྱུར་བློ་ལྡན་ཞིང་། །མི་ཡི་དཔའ་བོ་སྡུག་བསྔལ་མཐར་ཕྱིན་པ། །དེ་ཡིས་ངན་སོང་ལམ་རྣམས་རབ་སྤངས་ཏེ། །བྱང་ཆུབ་ལམ་ནི་རྟག་ཏུ་བསྟེན་པར་བྱ། །བམ་པོ་གཉིས་པ། ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་འཆིང་བ་སྟེ། བཞི་གང་ཞེ་ན། ཕ་རོལ་ལ་བརྙས་པ་བྱང་ཆུབ་སེམས་དཔའ་རྣམས་ཀྱི་འཆིང་བ་དང་། འཇིག་རྟེན་པའི་ཐབས་ཀྱིས་བསྒོམ་པ་ལ་སྦྱོར་བ་དང་། མཚན་མའི་འདུ་ཤེས་བྱང་ཆུབ་སེམས་དཔའ་རྣམས་ཀྱི་འཆིང་བ་དང་། ཀུན་འཛིན་པའི་སེམས་དང་ལྡན་པ་དང་། ཡེ་ཤེས་དང་བྲལ་བ་དང་། བག་མེད་པ་ལ་སྟེན་པར་བྱེད་པ་བྱང་ཆུབ་སེམས་དཔའ་རྣམས་ཀྱི་འཆིང་བ་དང་། ཕྱིར་འབྲང་བའི་སེམས་ཀྱིས་ཁྱིམ་ལ་འདྲིས་པར་བྱེད་པ་བྱང་ཆུབ་སེམས་དཔའ་རྣམས་ཀྱི་འཆིང་བ་སྟེ། ཡུལ་འཁོར་སྐྱོང་བཞི་པོ་དེ་དག་གི་བྱང་ཆུབ་སེམས་དཔའ་རྣམས་ཀྱི་འཆིང་བའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་
བཅད་པ་འདི་དག་བཀའ་སྩལ་ཏོ། །རྟག་ཏུ་གཞན་དག་ལ་ནི་བརྙས་བྱེད་ཅིང་། །རྟག་ཏུ་འཇིག་རྟེན་པ་ཡི་བསམ་གཏན་སྒོམ། །ལྟར་གྱུར་འདི་དག་གིས་ནི་དེ་བཅིངས་ཏེ། །གླང་པོ་ལུས་རིང་འདམ་དུ་སོང་བ་བཞིན། །ཁྱིམ་ལ་འདྲིས་བྱེད་འཆིང་དང་ལྡན་པ་དང་། །གང་ཞིག་བག་མེད་རྟག་ཏུ་ཀུན་འཛིན་སེམས། །ཡེ་ཤེས་སྤངས་ཤིང་བློ་གྲོས་རྨོངས་གྱུར་པ། །མི་རིགས་སྤྱོད་པ་འདི་དག་རྣམས་ཀྱིས་བཅིངས། །གང་ཞིག་སྡུག་བསྔལ་འཇིགས་པ་འདི་དག་དང་། །སྐྱ་རྒ་འཆི་ལ་སོགས་ལས་གྲོལ་འདོད་པ། །བརྙས་པར་བྱེད་དང་རློམ་སེམས་བོར་ནས་ནི། །བྱང་ཆུབ་ལམ་ལ་རྟག་ཏུ་བརྩོན་པར་འགྱུར། །སྡུག་བསྔལ་མཐའ་ཡས་མ་ལུས་བཟོད་བྱས་ཏེ། །བདེ་བ་ཀུན་ལ་ཆགས་པ་མེད་གྱུར་ནས། །སྡུག་དང་མི་སྡུག་གཉེན་པ་མ་ལུས་བཏང་། །བརྟན་པ་དག་ནི་སྡིག་བྲལ་སངས་རྒྱས་འགྱུར། །ཕ་རོལ་ཕྱིན་དྲུག་ས་དང་ཡོན་ཏན་དང་། །སྟོབས་དང་དབང་པོ་དག་དང་ཤེས་ལ་སྦྱོར། །ཡོན་ཏན་ཀུན་དང་རྟག་ཏུ་ལྡན་གྱུར་ནས། །རྒ་བའི་དྲ་བ་གྲོལ་བའི་སངས་རྒྱས་འགྱུར། །བསྐལ་བ་བསམ་གྱིས་མི་ཁྱབ་སྔོན་སྤྱད་ཚེ། །སེམས་ཅན་ཕན་ཕྱིར་བྱང་ཆུབ་མཆོག་དོན་དུ། །སྦྱིན་དང་དུལ་དང་ངེས་ལ་རྟག་ཏུ་སྤྱད། །གཉེན་པ་སྤངས་ནས་བདེ་བར་གནས་པར་གྱུར། །བས་མཐའ་ནགས་སུ་རྟག་པར་ང་དགའ་སྟེ། །བྱང་ཆུབ་ཆེད་དུ་བསམ་པ་རྣམ་པར་སྦྱངས། །བརྒྱ་ལམ་ན་ཡང་བརྩོན་འགྲུས་ཉམས་མ་གྱུར། །སྐྱེས་ཆེན་རྣམས་ཀྱི་ཡེ་ཤེས་དེ་འདྲའོ། །སྲིད་པའི་བརྩོན་རར་འགྲོ་བ་ལྔ་འཁྱམས་པས། །སེམས་ཅན་འཁྱམ་པའི་འགྲོ་བ་མཐོང་ནས་ནི། །སྔོན་ཆད་འདིར་ནི་སྙིང་རྗེ་རྒྱ་ཆེན་བསྐྱེད། །འགྲོ་བའི་དོན་དུ་བྱང་ཆུབ་དམ་པ་བསྒྲུབས། །བསྐལ་བ་མང་པོར་བྱང་ཆུབ་མཆོག་ཚོལ་ཞིང་། །རང་གི་བུ་ཕོ་བུ་མོ་ཆུང་མ་སྡུག །ཕངས་པའི་སྲོག་དང་ཤིན་ཏུ་འབྱོར་ས་དང་། །གྲོང་ཁྱེར་ནོར་དང་འབྲུ་རྣམས་མང་པོ་བཏང་། །མེ་ཏོག་འབྲས་བུ་ཆུ་འབྱོར་ཉམས་དགའ་བའི། །ནགས་སུ་ཐུབ་པ་ང་ནི་བཟོད་དགར་གྱུར། །ཀ་ལིང་རྒྱལ་པོས་ལག་པ་རྐང་པ་བཅད། །དེ་ཚེ་ང་ནི་སྡང་བའི་ཡིད་མ་གྱུར། །ནགས་དང་སུལ་ན་སྔོ་བསངས་ཞེས་བྱ་བའི། །ཐུབ་པས་བླ་མ་རྒས་པ་གསོ་བ་ན། །
མི་ཡི་དབང་པོས་སྲ་བའི་མདས་བསྣུན་ཀྱང་། །ཡིད་ནི་ཡོངས་སུ་གནོད་པར་སེམས་མ་གྱུར། །ལེགས་པར་གསུངས་པའི་ཆེད་དུ་གཡང་ས་ནས། །ལུས་ལ་མ་བལྟས་རབ་ཏུ་མཆོངས་པར་གྱུར། །ངས་ནི་བྱང་ཆུབ་མཆོག་གི་རྒྱུ་ཡི་ཕྱིར། །ལུས་དང་སྲོག་ལ་བལྟས་པར་མ་གྱུར་ཏོ། །སྟག་མོ་བུ་དང་བཅས་པའི་སྲོག་གི་ཕྱིར། །ལུས་བཏང་ནས་ནི་སྟག་མོ་ཚིམ་པར་བྱས། །ནམ་མཁའ་ལས་ནི་ལྷ་ཡི་ཚོགས་རྣམས་ཀྱིས། །སྐྱེས་ཆེན་བརྩོན་འགྲུས་བརྟན་པ་ལེགས་བཤེས་བསྒྲགས། །གང་ཚེ་སྔོན་ཆད་སྲིད་པར་སྤྱོད་པ་ན། །སྦྱིན་ལ་རབ་དགའ་བྲམ་ཟེ་ཁྱེའུ་གྱུར་ཚེ། །རིན་ཆེན་ཆེད་དུ་རྒྱ་མཚོ་སྐམས་ནས་ནི། །ནོར་བུ་རྙེད་ནས་སེམས་ཅན་བདེ་བར་བྱས། །རྒྱལ་པོ་ཟླ་བའི་བུ་ཞེས་བྱར་གྱུར་ཏེ། །རྗོད་པ་གྲགས་ཤིང་དུ་ནི་སྤྱོད་པའི་ཚེ། །ང་ཡིས་བདེན་པའི་ཚུལ་གྱིས་རྒྱལ་པོ་བརྒྱ། །བསད་པར་བྱས་པ་མྱུར་དུ་ཐར་བར་བྱས། །དབུལ་ཞིང་སྡུག་བསྔལ་བ་ཡི་མི་མཐོང་ནས། །ང་ཡིས་ཕངས་པའི་ལུས་ནི་བཏང་བྱས་ཏེ། །ང་ཡིས་ནོར་རྙེད་དེ་ནི་ཕྱུག་པོར་བྱས། །དེ་ཚེ་ང་ནི་ཀུན་སྦྱིན་རྒྱལ་པོར་གྱུར། །ང་འདིར་མི་ཡི་རྒྱལ་པོར་གྱུར་པའི་ཚེ། །སྐྱབས་སུ་འོངས་པའི་ཕུག་རོན་མཐོང་ནས་ནི། །རང་གི་ལུས་ལས་ཤ་ཡང་བཅད་བྱས་ཏེ། །རང་ལུས་ངས་བཏང་འཇིགས་པས་ཕོངས་མ་བཏང་། །རྒྱལ་པོ་རལ་པ་ཅན་ཞེས་སྔོན་གྱུར་ཚེ། །སྨན་པ་མཆོག་གིས་ང་ཡི་ཆེད་དུ་ནི། །མཚུངས་མེད་སྨན་རྣམས་མ་ལུས་སྦྱར་བ་ཡང་། །སྲོག་བཏང་ནས་ནི་དེ་དག་གཞལ་ན་བྱིན། །འགྲོ་བའི་དོན་ཕྱིར་སྔོན་ཚད་སྤྱོད་པ་ན། །རྒྱལ་བུ་མཆེ་བ་བཟང་ཞེས་བྱ་གྱུར་ཚེ། །ཆུང་མ་མ་དྲི་ཁྱོ་ལས་མི་འཕྱོ་བ། །བུར་བཅས་བུ་མོ་མ་ཆགས་མ་བལྟས་བཏང་། །གང་ཚེ་བརྩོན་འགྲུས་འབར་ཞེས་བྱར་གྱུར་ཚེ། །ང་སྔོན་ལོ་ནི་སྟོང་དུ་ཚང་བར་ཡང་། །བྱ་དཀའ་བརྒྱ་བཅུ་རྩ་བཞི་བཟོད་པར་བྱས། །ནོར་དང་དཔལ་ཡང་སྔན་ཆད་ངས་བཏང་ངོ་། །རྒྱལ་བུ་གཟི་བརྗིད་དྲི་མ་མེད་གྱུར་ཚེ། །ང་ཡིས་རྒྱལ་བའི་རིང་བསྲེལ་མཆོད་རྟེན་མདུན། །མཆོག་ཏུ་གུས་པས་ལུས་ལ་མེ་བཏང་སྟེ། །སྟོབས་བཅུ་མངའ་བ་རྣམས་ལ་མཆོད་པ་བྱས། །ང་ནི་རྒྱལ་པོ་ཟླ་འོད་གྱུར་པའི་ཚེ། །མི་བཟད་མིག་ཅན་ཁྲོས་པར་གྱུར་ནས་ནི། །དེ་ཡིས་ང་ཡི་མགོ་བོ་
བསླངས་པ་ན། །དེའི་ཚེ་ང་ཡི་མགོ་བོ་བཅད་དེ་བྱིན། །ད་ནི་བསོད་ནམས་མཉམ་ཞེས་བྱར་གྱུར་ཚེ། །གྲོང་དང་གྲོང་ཁྱེར་དག་དང་ལམ་སྲང་སྒོ། །ཐམས་ཅད་དུ་ཡང་རྒྱ་ཆེ་སྨན་གྱི་རྣམས། །དེ་དག་སེམས་ཅན་དོན་ཕྱིར་ངས་བཞག་གོ །སྲིད་པ་རྣམས་ན་སྤྱོད་པ་གང་གི་ཚེ། །ང་སྔོན་རྒྱལ་པོ་དགེ་བར་གྱུར་པ་ན། །བུད་མེད་གཟུགས་བཟང་གསེར་དང་མུ་ཏིག་གིས། །ལུས་བརྒྱན་སྟོང་དག་ངས་ནི་བཏང་བ་བྱས། །གང་ཚེ་སྔོན་མི་ཡི་རྒྱལ་པོ་ནི། །རིན་ཆེན་གཙུག་ཕུད་གྱུར་ཚེ་མེ་ཏོག་དང་། །སྤོས་མཆོག་རྣམས་དང་གསེར་གྱིས་བརྒྱན་པ་ཡི། །ཅོད་པན་དཔལ་ལྡན་དམ་པ་ངས་བཏང་ངོ་། །ང་སྔོན་རྒྱལ་པོ་མོས་ལྡན་གྱུར་པའི་ཚེ། །ཤིང་བ་ལ་འདའ་བ་འཇམ་པ་ལྟ་བུ་དང་། །པད་མའི་འདབ་མཉེན་ལྟ་བུར་འཇམ་གཞོན་པའི། །ལག་པ་རྐང་པ་དག་ཀྱང་ངས་བཏང་ངོ་། །དེད་དཔོན་སེང་གེ་འཛིན་དུ་གྱུར་པ་ན། །སྙིང་རྗེ་མེད་ཅིང་མི་བཟད་རབ་གཏུམ་པའི། །སྲིན་མོ་བརྒྱ་དག་ཤིན་དུ་ཚར་བཅད་ནས། །རྒྱ་ཤུག་གླིང་དུ་མི་རྣམས་བཀོད་པར་གྱུར། །གང་ཚེ་མིག་བཟང་ཤེས་བྱར་གྱུར་པ་ན། །བྱིས་པ་འདོད་དང་ལྡན་ཞིང་ཡིད་རྨོངས་པ། །སྲིན་མོ་དག་ལ་ན་ཆུང་འདུ་ཤེས་པ། །ཚོར་བ་ལྔ་བརྒྱ་དེ་དག་ཐར་པར་བྱས། །གང་ཚེ་བསོད་ནམས་འོད་ཟེར་གྱུར་པ་ན། །ལྷའི་བུ་མོ་ལྟ་བུའི་གཟུགས་ལྡན་པའི། །བུད་མེད་བྱེ་བ་ཕྲག་བཞི་སྤངས་ནས་སུ། །རྒྱལ་བའི་བསྟན་པ་ལ་ནི་རབ་ཏུ་བྱུང་། །སེམས་ཅན་དོན་ཕྱིར་ང་ནི་སྤྱོད་པ་ན། །དྲི་མེད་དག་པའི་གསེར་གྱི་མདོག་ཅན་གྱི། །རྒྱལ་པོར་གང་ཚེ་ང་ནི་གྱུར་པ་ན། །སོར་མོ་དྲ་བས་འབྲེལ་བ་རྒྱ་ཆེན་བཏང་། །རྒྱལ་པོ་ཨུད་པ་ལ་མིག་ཅེས་བྱར་གྱུར་ཚེ། །པད་མ་སྔོན་པོ་བཟང་པོའི་མདོག་འདྲའི་མིག །ཡིད་དུ་འོང་ཞིང་སྙིང་དུ་སྡུག་གྱུར་པ། །འགྲོ་བའི་དོན་དུ་ང་ཡིས་བཏང་བ་བྱས། །སྨན་པའི་རྒྱལ་པོ་སྐྲ་འདྲར་གྱུར་པའི་ཚེ། །སྡུག་དང་བྲལ་བས་ཉེན་བ་མཐོང་ནས་ནི། །བུད་མེད་ཆ་བྱད་གཟུགས་ལ་བློ་ཉམས་པ། །ངས་ནི་སྙིང་རྗེས་ཡོངས་སུ་ཐར་པར་བྱས། །སྔོན་གྱི་སྲིད་པར་ཀུན་མཐོང་གྱུར་པ་ནི། །ནད་ཀྱིས་བཏབ་པའི་ནད་པའི་མི་མཐོང་ནས། །ང་ཡིས་རང་གི་ཁྲག་ཀྱང་བྱིན་གྱུར་ཏེ། མི་
དེ་ངས་ནི་ནད་དང་བྲལ་བར་བྱས། །རྒྱལ་པོ་མེ་ཏོག་བཟང་ཞེས་བྱར་གྱུར་ཚེ། །ང་ཡིས་ལུས་ལས་རུས་པ་ཕྱུང་ནས་ནི། །ནད་ཀྱིས་རིང་པར་གྱུར་ལ་རྐང་བྱིན་ཏེ། །ངས་ནི་ནམ་ཡང་སེམས་ཅན་མ་བཏང་ངོ་། །རྒྱལ་པོ་དོན་གྲུབ་ཅེས་བྱར་སྒོར་གྱུར་ཚེ། །རང་གི་མཛོད་རྣམ་ཐམས་ཅད་ངས་བཏང་ཞིང་། །ཕངས་ཤིང་ཡིད་དུ་འོང་བའི་སྲོག་བཏང་སྟེ། །ཕོངས་པར་གྱུར་བའི་མི་ནི་ཐར་བར་བྱས། །རྒྱལ་པོ་ཕྱོགས་ཀྱི་ཏོག་ཏུ་གྱུར་པའི་ཚེ། །བྱང་ཆུབ་འདོད་ནས་འགྲོ་བའི་དོན་གྱི་ཕྱིར། །འཁོར་ལོའི་མཚན་ཅན་པད་མ་ལྟ་བུ་ཡི། །ལག་པ་ཕྲུགས་ཀྱང་མ་བལྟས་རབ་ཏུ་བྱིན། །རྒྱལ་པོ་ཐམས་ཅད་མཐོང་དུ་གྱུར་པའི་ཚེ། །སྙིང་རྗེ་ལྡན་ཞིང་འགྲོ་དོན་ཕན་འདོད་དོ། །སྐྱེས་པ་བུད་མེད་དག་གིས་རྒྱལ་བ་ཡི། །གླིང་བཞི་པ་ཡང་ངས་ནི་བཏང་བ་བྱས། །རྒྱལ་པོའི་བུ་མོ་ཡེ་ཤེས་ལྡན་གྱུར་ཚེ། །འཇམ་ཞིང་མཉེན་ལ་དྲི་མེད་དཀར་བའི་བརླ། །དགའ་ཞིང་མགུ་བའི་ཡིད་ཀྱིས་བཅད་ནས་ནི། །རང་གི་ཤ་ཁྲག་ཀྱང་ངས་བྱིན་ནོ། །བུད་མེད་གཟུགས་ལྡན་ཞེས་ནི་བྱར་གྱུར་ཚེ། །བུད་མེད་བཀྲེས་སྐོམ་ཉམ་ཐག་ངས་མཐོང་ནས། །གསེར་ལྟར་སེར་ཞིང་ཤིན་དུ་གཞོན་པ་ཡི། །ནུ་མ་སྙིང་དུ་སྡུག་པ་གཉིས་ག་བཏང་། །རྒྱལ་པོ་དཔལ་གྲགས་ཞེས་གྱར་གྱུར་པ་ན། །ཤིན་དུ་ཉམས་དགའ་བ་ཡི་རྒྱན་མཆོག་དང་། །རིན་ཆེན་དུ་མ་གོས་དང་ཤི་རྟ་བཞོན། །གཏད་པར་དཀའ་བ་རྣམ་པ་དུ་མ་གཏང་། །རྒྱལ་བུ་བྱས་པ་གཟོ་བར་གྱུར་པའི་ཚེ། །རྒྱ་མཚོ་ལས་ནི་བྱས་པ་མི་གཟོ་བསྒྲལ། །རིན་ཆེན་ཕྱིར་ནི་དེ་ཡིས་ང་མིག་ཕྱུང་། །འོན་ཀྱང་ང་ལ་ཁྲོས་པའི་སེམས་མེད་དོ། །སྲོག་ཆགས་གོ་དྷར་སྔོན་སྲིད་གྱུར་པའི་ཚེ། །སྲོག་སྦུར་དག་ནི་འཆི་བར་འགྱུར་དོགས་ནས། །ལུས་ཀྱི་དམ་པ་མ་བལྟས་བཏང་བ་བྱས། དེ་ཚེ་དེ་ཡི་སེམས་ནི་གཡོ་བ་མེད། །སྤྱད་པ་སྤྱོད་ཚེ་བྱ་སྲེག་གྱུར་པ་ན། །རྒན་ལ་བསྙེན་བཀུར་བྱ་བར་རྟག་དགའ་སྟེ། ང་ནི་རིམ་གྲོ་གུས་ལ་རབ་ཏུ་དགའ། །ང་རྒྱལ་ལྡན་པ་མ་ཡིན་ཁེངས་པ་མེད། །སྐྱབས་སུ་འོངས་པའི་དོན་ཕྱིར་ང་ཡིས་མི། །སྙིང་རྗེ་བསྐྱེད་པ་བྱས་ནས་ལུས་བཏང་སྟེ། གདོལ་བའི་མི་ཡིས་མངའ་རྣམས་བསྣུན་ཀྱང་ནི། །སྤྲེའུར་གྱུར་ངས་ནི་མི་དེ་མ་
བཏང་ངོ་། །རྒྱལ་པོ་དབང་དུ་གྱུར་ཚེ་ང་ཡིས་ནི། །གླང་པོ་བླ་མ་རྒན་དྲན་ལུས་བསྐམས་ཏེ། ཤིན་དུ་ཡིད་འོང་ཟས་ཀྱང་ངས་མ་ཟོས། །དེ་ཚེ་གླང་པོ་བདག་ཉིད་ཐར་པར་གྱུར། བགྲོད་དཀའ་གངས་ཅན་རི་ལ་དྲེད་དབང་གྱུར། །ང་ཡིས་ཞག་བདུན་བར་དུ་བསྲུངས་པའི་མི། །དེ་ཡིས་གསོད་པར་ང་ལ་བཏང་བྱས་ཀྱང་། །ངས་ནི་དེ་ཚེ་ཁོང་ཁྲོ་བྱས་པ་མེད། ཁ་བ་ཀུནད་འདྲ་བའི་གླང་པོ་གྱུར། བྱང་ཆུབ་མཆོད་རྟེན་སངས་རྒྱས་ཡོན་ཏན་ཚོལ། །དུག་དང་བཅས་པའི་མདའ་ཡིས་བསྣུན་ཀྱང་ནི། མཆོད་པ་དམ་པ་བྱིན་གྱི་ཁྲོས་པ་མེད། །དུམ་བུའི་གླིང་དུ་ནགས་ཚལ་སྤྱོད་ཡུལ་བ། སྲེག་པའི་ཕྲུག་གུ་བྱམས་ལ་གནས་གྱུར་ཚེ། མཐོང་བ་ཙམ་གྱིས་མེ་ནི་ཞི་གྱུར་ནས། ལྷ་ཚོགས་དག་གིས་མེ་ཏོག་རྣམས་ཀྱང་གཏོར། རི་དགས་གྱུར་ཚེ་གང་གཱའི་བརླབས་ཤུགས་ཀྱིས། ཁྱེར་བ་ཞིག་ནི་ང་ཡིས་བསྒྲལ་བྱས་པ། དེ་ཡིས་གསོད་པ་ང་གན་ཁྲིད་དེ་འོངས། འོན་ཀྱང་དེ་ལ་ང་ནི་ཡིད་མ་ཁྲོས། རྒྱ་མཚོའི་དབུས་སུ་སོན་ཏེ་མགོན་མེད་པ། །ཚོང་པ་ལྔ་བརྒྱ་དག་ནི་བསྒྲལ་བྱས་ནས། །བཀྲེས་པ་དེ་དག་རྣམས་ཀྱིས་བསད་གྱུར་ཚེ། རུ་སྦལ་སྐྱེ་གནས་ཀྱང་བྱམས་དང་ལྡན། ང་ནི་བྱང་ཆུབ་སྤྱད་པ་སྤྱོད་པ་ན། སྔོན་ཆད་ཆུ་ན་རྒྱུ་བའི་ཉར་གྱུར་ཚེ། །སེམས་ཅན་ཕན་ཕྱིར་ང་ཡིས་ལུས་བཏང་སྟེ། །སྲོག་ཆགས་བརྒྱ་སྟོང་དག་གིས་ཟོས་པར་གྱུར། །སྲོག་ཆགས་ངེས་པར་གང་ཚེ་གྱུར་པ་ན། །ནད་པ་རྒྱས་གཟིར་བའི་འགྲོ་བ་མཐོང་ནས་སུ། །ལུས་ནི་སྨན་ལྟ་བུར་ཡང་བསྒྱུར་བྱས་ཏེ། །སེམས་ཅན་བདེ་ཞིང་ནད་ཀྱང་མེད་པར་བྱས། །རི་དགས་རྒྱལ་པོ་སེང་གེར་གྱུར་པའི་ཚེ། །མཐུ་སྟོབས་ལྡན་པར་གྱུར་ཅིང་སྙིང་རྗེས་ལྡན། །མངའ་ཡིས་བསྣུན་ཀྱང་ཁྲོས་པའི་སེམས་མེད་དེ། །དེ་ཚེ་གསོད་ལ་ང་ཡིས་བྱམས་པ་བྱས། །དུང་དང་བ་མོ་ལྟ་བུའི་རྟ་རྒྱལ་དུ། །ང་སྔོན་རྒྱ་མཚོའི་ངོས་སུ་གྱུར་པའི་ཚེ། །སྲིན་མོའི་ནང་དུ་སོར་བའི་ཆོད་པ་རྣམས། །ང་ཡིས་སྙིང་བརྩེ་སྙིང་རྗེ་བསྐྱེད་ནས་བསྒྲལ། །འགྲོ་བའི་དོན་དུ་བྱང་ཆུབ་སྤྱད་སྤྱོད་ཚེ། །མདབ་ཆགས་ཀུན་ལར་ནི་ང་གྱུར་ཚེ། །འདོད་པའི་ཡོན་ཏན་ཉེས་པ་མང་སྤངས་ནས། །
བུད་མེད་དབང་དུ་ང་ནི་སོང་མ་གྱུར། །གེལ་བའི་ནགས་གནས་རི་བོང་གྱུར་པའི་ཚེ། །ལེགས་སྤྱོད་རི་བོང་ཚགས་གྱུར་དེ་ལ་བསྟན། །ཐུབ་པ་གནས་ལ་གནས་པ་བཀྲེས་ཕོངས་པ། །དེ་ཡི་ཆེད་དུ་ངས་ནི་ལུས་ཀྱང་བཏང་། །སྡོང་པོ་མེ་ཏོག་འབྲས་རྒྱས་ནེ་ཙོའི་ཚེ། །སྡོག་པོ་སྐམས་ཀྱང་ངས་ནི་དེ་མ་བཏང་། །དེ་ཚེ་བརྒྱ་བྱིན་བྱས་གཟོས་ང་མཐོང་ནས། །སྡོང་པོ་དེ་ནི་ལོ་འབྲས་རྒྱས་པར་བྱས། །ང་ནི་སྤྲ་ཡི་རྒྱལ་པོར་གྱུར་པའི་ཚེ། །མི་ཡི་རྒྱལ་པོ་ཀླུ་ཡིས་ཡུལ་བཅོམ་སྟེ། །སྤྲ་ཡི་ཚོགས་ལ་གནོད་པ་བྱུང་མཐོང་ནས། །རྒྱལ་པོའི་འཇིགས་ལ་དེ་དག་ངས་བཏོན་ཏོ། །ང་སྔོན་ནེ་ཙོར་གྱུར་ཏེ་ཕ་མའི་ཕྱིར། །སཱ་ལུ་བླངས་ཚེ་མི་ཡིས་བཟུང་ནས་ནི། །ནེ་ཙོ་ཅི་ཕྱིར་ང་ཡིས་སཱ་ལུ་ལེན། །ལོ་ཏོག་སྨིན་འདི་མ་རུང་བྱར་སེམས་སམ། །ནེ་ཙོ་དེས་སྨྲས་བཟང་པོ་གསན་དུ་གསོལ། །བདག་ནི་རྐུ་བས་ཁྱོད་ཀྱི་འབྲས་མི་ལེན། །ཕ་མ་རྒན་རྒོ་ན་གཉིས་གསོ་བའི་ཕྱིར། །དེ་ལ་སྙིང་རྗེ་བདག་གིས་སཱ་ལུ་བླངས། །གང་ཚེ་ཐོག་མས་ས་བོན་འདེབས་པའི་ཚེ། །འགྲོ་བ་ཀུན་ལ་ཆ་ཤས་སྦྱིན་ནོ་ཞེས། །དེ་སྐད་ཚིག་སྨྲས་དེ་ནི་བདག་ཐོས་ཏེ། །དེས་ན་བདག་ནི་རྐུ་བར་གཞད་མི་འགྱུར། །ནེ་ཙོ་ལེགས་སོ་སཱ་ལུ་ཅི་དགར་ཁྱེར། །སྲིད་ཞུ་ཞིག་ནི་ཡིན་ནའང་དཀོན། །ཁྱོད་ནི་མི་ཡི་ནང་འདིར་དུད་འགྲོ་ཡིན། །ལེགས་སོ་ཁྱོད་ནི་དུལ་ཞིང་ཡང་དག་བསྡམས། །བྱང་ཆུབ་རྡལ་བྲལ་དམ་པའི་ཚོལ་བ་ན། །སྔོན་ཆད་སྤྱོད་པ་དེ་ལ་སོགས་པ་རྣམས། །སྤྱད་པའི་ཚེ་ན་དཀའ་བ་བརྒྱ་ལ་ཡང་། །ང་ཡི་ཡིད་ནི་སྐྱོ་བར་གྱུར་པ་མེད། །ནང་གི་དག་གམ་འོན་ཏེ་ཕྱིར་ཡང་རུང་། །ང་ཡིས་དངོས་པོ་མ་བཏང་གང་ཡང་མེད། །ཚུལ་ཁྲིམས་བཟོད་དང་དེ་བཞིན་བརྩོན་འགྲུས་དང་། །བསམ་གཏན་ཐབས་དང་ཤེས་རབ་ངས་སྤྱད་དོ། །ཤ་དང་ལྤགས་པ་དེ་བཞིན་་རྐང་དང་ཁྲག །དེ་དག་རང་གི་ལུས་ལས་སྦྱིན་པ་བྱས། །བས་མཐའ་དག་དང་ཕུག་ན་རྒྱུ་བའི་ཚེ། །ངས་ནི་དེ་ཚེ་ལུས་ནི་སྐམས་པར་བྱས། །གང་ལ་སྦྱར་ན་རྒྱལ་བར་འགྱུར་བ་ཡི། །སྦྱངས་པ་གང་དག་རྒྱལ་བས་བསྟན་མཛད་པ། །སྦྱངས་པ་དེ་ལ་རྟག་ཏུ་རབ་བརྩོན་ཏེ། །སྔོན་སྤྱོད་ཚེ་ན་ང་ནི་རྟག་ཏུ་འཇུག །སྤྱོད་པའི་
ཚེ་ན་ང་ཡིས་གང་བསྟེན་པ། །བརཏལ་ཞུགས་རྒྱ་ཆེན་དེ་འདྲ་དེ་དག་དང་། །སྤྱོད་པ་འདི་ཐོས་ནས་ནི་དེ་དག་རྣམས། །ཚེ་གཅིག་ལ་ཡང་འདུན་པར་མི་འགྱུར་རོ། །འདི་ཐོས་གྱུར་ནས་དེ་ཡི་ཚེ་ན་ནི། །གསན་པ་འདི་ཉིད་ལ་ནི་འཕྱ་བར་འགྱུར། །དེ་དང་ཟས་དང་འཁྲིག་པ་ལྷུར་ལེན་ཅིང་། །རྟག་ཏུ་གཉིད་ནོན་ཁ་ལྟར་གཡོ་ངན་འགྱུར། །རྟག་ཏུ་འཕགས་པ་མ་ཡིན་ཆོས་ལ་སྡང་། །བསྟན་པ་སུན་འབྱིན་བྱེད་ཅིང་ཡོན་ཏན་ཉམས། །ཞི་བའི་ཆོས་ནི་ཐོས་པར་གྱུར་པ་ན། །འདི་ནི་རྒྱལ་བས་གསུངས་པ་མིན་ཞེས་ཟེར། །ང་ཡི་སློབ་དཔོན་ཐོས་པ་རྒྱ་མཚོར་གྱུར། །མང་དུ་ཐོས་པ་སྨྲ་བའི་གཙོ་བོ་ཡིན། །དེ་ཡིས་འདི་ནི་རྣམ་པ་ཇི་ལྟར་ཡང་། །སངས་རྒྱས་བཀའ་མ་ཡིན་ཞེས་དགག་པ་བྱས། ། ཕ་རོལ་ལས་ཀྱང་རྒན་བར་གྱུར་དེ་ཡི། །བླ་མེད་ནི་དཔག་མེད་ཡོན་ཏན་དུ། །ངེས་ཀྱང་འདི་ནི་བླང་བ་མ་བྱས་ཀྱི། །འདི་ལ་མ་འཇུག་འདི་ནི་ནོར་བ་ཡིན། །གང་ལ་བདག་ཡོད་མ་ཡིན་སྲོག་མེད་དང་། །རྣམ་པ་ཅིས་ཀྱང་གང་ཟག་མེད་བསྟན་པ། །ཚུལ་ཁྲིམས་སྦྱོར་དང་སྡོམ་པའི་བྱ་བ་ལ། །གང་འབད་དེ་ཡི་ངལ་བ་དོན་མེད་འགྱུར། །གལ་ཏེ་ཐེག་པ་ཆེན་པོ་ཡོད་ན་ནི། །འདི་ལ་བདག་དང་སེམས་ཅན་ཤིང་སྐྱེས་མེད། །གང་ལ་བདག་དང་སེམས་ཅན་མི་དམིགས་པ། །དེ་ལ་བདག་གིས་ངལ་བྱས་དོན་མེད་འགྱུར། །སྡིག་པའི་བློ་དང་མུ་སྟེག་གང་ན་མཚུངས་པས། །རང་གི་བློ་ཡིས་རང་བཟོད་བྱེད་པ་སྟེ། །དགེ་སློང་འཁོར་གྱི་ནང་དུ་རྒྱལ་བ་ནི། །ཚིག་འདི་གསུང་བར་ནམ་ཡང་མི་འགྱུར་རོ། །ངོ་ཚ་ཁྲེལ་དང་འཛེམ་དང་བྲལ་བ་དང་། །ཁྭ་ལྟར་སྤྱི་བོ་རྟོལ་ཆེ་ལ་རྒོད་གཏུམ་ཞིང་། །ཕྲག་དོག་ང་རྒྱལ་རྒྱགས་པས་ཚིག་པ་ཡི། །དགེ་སློང་དག་ནི་ང་ཡི་བསྟན་ལ་འབྱུང་། །ལག་པ་དང་ནི་རྐང་པ་རྡོབ་བྱེད་ཅིང་། །ཆོས་གོས་གྲྭ་རྣམས་ཀྱང་ནི་སྐྱོག་པར་བྱེད། །ཆོས་གོས་ཐོགས་ཤིང་ཆད་དང་རྒྱགས་མྱོས་ནས། །གྲོང་དང་ཁྱིམ་དག་ནི་རྣམ་པར་རྒྱུ། །དེ་དག་སངས་རྒྱས་རྒྱལ་མཚན་ཐོགས་ནས་ནི། །ཁྱིམ་ན་གནས་པའི་སྐྱོ་བོ་སྟེན་པར་བྱེད། །བསྟེན་པ་ཡོན་ཏན་ཕུང་པོ་འདི་སྤངས་ནས། །དེ་དག་རྟག་ཏུ་ཕྲིན་ཡིག་ཁྱེར་བར་བྱེད། །དེ་དག་བ་
ལང་རྟ་དང་བོང་བུ་དང་། །དེ་དག་ཕྱུགས་དང་བྲན་ཕོ་བྲན་མོ་སྲེལ། །ཞིང་གི་ལས་དང་ཚོང་གི་སྦྱོར་བ་ལ། །བརྩོན་ཡིད་ལྡན་ཞིང་རྟག་ཏུ་འཕགས་མ་ཡིན། །དེ་དག་འཕགས་མིན་ཚིག་ཀྱང་མི་སྨྲ་མེད། །བྱ་བ་མ་ཡིན་ལ་ཡང་གང་ཡང་མེད། །དེ་དག་རྣམས་ལ་མཆོད་རྟེན་ནོར་དང་ནི། །དགེ་འདུན་གྱི་ངང་གང་ཟག་ནོར་དེ་མཚུངས། །དགེ་སློང་ཡོན་ཏན་འབྱོར་བ་མཐོང་ནས་ནི། །དེ་དག་ལ་ཡང་མི་སྙན་རྗོད་བྱེད་དེ། །ཚུལ་ཁྲིམས་འཆལ་པ་སླུ་བ་ཞུགས་ནས་ནི། །བུད་མེད་འཇིགས་བྱེད་མི་བཟང་རབ་ཅེས་རྗོད། །རབ་ཏུ་བྱུང་བ་དེ་དག་བརྐམ་པ་ལྟར། །ཁྱིམ་པ་འདོད་པས་བརྐམ་པ་དེ་ལྟར་མིན། །ཁྱིམ་པ་མཚུངས་པར་དེ་དག་ཆུང་བ་དང་། །བུ་དང་མུ་བོ་དག་ཀྱང་ཡོད་པར་འགྱུར། །གང་གི་ཁྱིམ་དུ་དེ་དག་ཆོས་གོས་དང་། །ལས་དང་ལོངས་སྤྱོད་དག་གིས་བསྙེན་བཀུར་བ། །དེ་ཡི་ཆུང་མ་ལ་ནི་ཡོངས་ཆགས་ཤིང་། །ཉོན་མོངས་དབང་འགྲོ་རྟག་ཏུ་འཕགས་པ་མིན། །འདོད་པ་འདི་དག་བསྟེན་བྱ་མ་ཡིན་ཏེ། །དུད་འགྲོ་ཡི་དགས་དམྱལ་བར་ལྷུང་བྱེད་ཅིང་། །དེ་དག་ཁྱིམ་པ་རྣམས་ལ་རྟག་སྨྲ་ཞིང་། །དེ་དག་བདག་ཉིད་མ་དུལ་ཉེར་ཞི་མིན། །ཇི་ལྟར་དེ་དག་བདག་ཉིད་མ་དུལ་བ། །དེ་དག་སློབ་མ་ཚོགས་ཀྱང་རབ་མ་དུལ། །ཁ་ཟས་དག་དང་འཁྲིག་པའི་གཏམ་རྣམས་ལ། །དེ་དག་ཉིན་དང་མཚན་དུ་འགྲོ་བར་བྱེད། །བསྟེན་པའི་ཕྱིར་གྱི་ཡོན་ཏན་ཕྱིར་མིན་ཏེ། །དེ་དག་ལ་ནི་དེ་དག་བསྡུ་བ་སྦྱིན། །འགྲོ་ལས་རྟག་འདིར་མཆོད་པ་ཐོབ་སྙམ་ནས། །རང་གི་སློབ་མའི་ཚོགས་ཀྱིས་བདག་ཀྱང་བསྐོར། །དེ་དག་སྐྱེ་བོ་རྣམས་ལ་སྨྲ་བ་ནི། །བདག་གིས་སྙིང་རྗེས་འདི་དག་སྡུད་བྱེད་ཀྱི། །སློབ་མའི་ཚོགས་དེ་དག་ལས་ནམ་ཡང་ནི། །རིམ་གྲོ་དོན་དུ་གཉེར་བ་མེད་ཅེས་སྨྲ། །དེ་ལ་ནད་ཀྱིས་ནོན་དང་མཛོ་ཅན་མང་། །ལུས་ལ་ཤ་བཀྲ་ཅན་དག་གཟུགས་མི་སྡུག །རྟག་ཏུ་འཕགས་མིན་མི་དག་ལ་ཅིག་ཀྱང་། །འོངས་ཤིང་ལྷགས་པ་རབ་ཏུ་འབྱིན་པར་འགྱུར། །ལུང་ནོད་པ་དང་སྡོམ་པ་རྣམ་པར་ཉམས། །དེ་དག་དགེ་སློང་ཡོན་ཏན་རྟག་མི་བརྩོན། །དེ་དག་ཁྱིམ་པ་མ་ཡིན་དགེ་སློང་མིན། །དེ་དག་སྤངས་པ་དུར་ཁྲོད་ཤིང་དང་མཚུངས། །དེ་དག་སོ་
སོར་ཐར་དང་བསླབ་པ་དང་། །འདུལ་བ་ལ་ཡང་གུས་པར་བྱེད་མི་འགྱུར། །དེ་དག་རང་ཉམ་རང་དབང་འགྲོ་བ་སྟེ། །ལྕགས་ཀྱོ་བཏང་བའི་གླང་པོའི་དབང་པོ་འདྲ། །དེ་དག་ནགས་སུ་གནས་པར་འགྱུར་ཀྱང་ནི། །སེམས་ནི་གྲོང་དུ་འགྲོ་བར་འགྱུར་བ་སྟེ། །ཉོན་མོངས་མེ་ཡིས་རྟག་ཏུ་རབ་གདུངས་ལ། །དེ་དག་སེམས་ཀྱང་གནས་པ་མེད་པར་འགྱུར། །དེ་དག་སངས་རྒྱས་ཡོན་ཏན་ཐམས་ཅད་དང་། །བསླབ་དང་སྦྱངས་དང་ཐབས་ཀྱང་བརྗེད་ནས་ནི། །རྒྱགས་དང་ང་རྒྱལ་དྲེགས་པ་ཡོངས་རྒྱས་ཏེ། །དེ་དག་མི་བཟད་མནར་མེད་ལྷུང་བར་འགྱུར། །དེ་དག་རྒྱལ་པོའི་གཏམ་ལ་རྟག་དགའ་ཞིང་། །རྐུན་པོའི་གཏམ་བརྗོད་པ་ལའང་རབ་ཏུ་དགའ། །ཉེ་དུ་གཉེན་ལའང་རབ་ཏུ་དགའ་བ་སྟེ། །དེ་དག་ཉིན་མཚན་དུ་སེམས་པར་བྱེད། །བསམ་གཏན་དང་ནི་ཁ་ཏོན་བཏང་ནས་སུ། །རྟག་ཏུ་གཙུག་ལག་ཁང་གི་ལས་ལ་བརྩོན། །གནས་ལ་བརྐམ་ཞིང་ཁོ་གཉེར་འབྱིན་པར་བྱེད། །དེ་དག་སློབ་མ་འཁོར་ཀྱང་མ་དུལ་བ། །ང་ནི་གཙུག་ལག་ཁང་གི་ལག་གི་བླ། །བདག་གི་ཆེད་དུ་འདི་ནི་ངས་བྱས་ཏེ། །དགེ་སློང་གང་དག་ང་ཡི་རྗེས་སུ་འཐུན་པ། །གཙུག་ལག་ཁང་འདིར་དེ་དག་གནས་ཡོད་དོ། །གང་དག་ཚུལ་ཁྲིམས་ལྡན་ཞིང་ཡོན་ཏན་ལྡན། །ཆོས་འཛིན་སྐྱེ་བོའི་དོན་ལ་མངོན་བརྩོན་པ། །དུལ་ཞིང་ཡང་དག་སྡོམ་ལ་རྟག་བརྩོན་པ། །དེ་དག་རྣམས་ནི་སྡུད་པར་མི་བྱེད་དོ། །འདི་ནི་ང་ཡི་གནས་སུ་བསྐོས་པ་སྟེ། །འདི་ནི་ང་ཡི་ལྷན་ཅིག་གནས་པའི་ཡིན། །འདི་ནི་ང་ཡི་དགའ་བར་བྱེད་པའི་ཡིན། །ཁྱོད་ཀྱི་གནས་ནི་གང་ཡང་མེད་ཀྱིས་སོང་། །འདིར་ནི་དགེ་སློང་དག་ཀྱང་མང་བཀོད་དེ། །མལ་ཆ་རྣམས་ཀྱང་མ་ལུས་བགོས་ཟིན་ལ། །འདི་ན་རྙེད་པ་འབྱུང་བ་ཡོད་མ་ཡིན། །འདིར་ནི་ཅི་ཞིག་སྤྱད་ཀྱིས་དགེ་སློང་སོང་། །དེ་དག་ལ་ནི་མལ་སྟན་བགོ་བྱ་བ། །ནམ་དུའང་སྲིད་པར་འགྱུར་བ་མ་ཡིན་ཏེ། །དེ་དག་ཁྱིམ་པ་ལྟ་བུར་སྩོགས་འགྱུར་ཞིང་། །འཚོག་ཆས་རྣམས་དང་གཡོག་འཁོར་མང་བར་འགྱུར། །ཕྱི་མའི་དུས་ན་ང་ཡི་བུ་དེ་དག །ཀུན་དུ་སྨད་པར་གྱུར་ནས་ནི། །དེ་དག་ང་ཡི་ཆིག་ནི་དྲན་གྱུར་ཏེ། །བས་མཐའ་དག་དང་ནགས་སུ་དེ་ཚེ་གནས། །ཀྱི་
ཧུད་རྙེད་པས་ཟིལ་ནོན་ཡོན་ཏན་སྡང་། །དགེ་སློང་མང་པོ་གང་དུ་བྱང་གྱུར་པ། །རྒྱལ་བ་དམ་པ་ཡི་ནི་བསྟན་པ་དག །རིང་པོར་མི་ཐོགས་པར་ཡང་འཇིག་པར་འགྱུར། །ཕྱིས་དུས་ཚུལ་ཁྲིམས་ཡོན་ཏན་ལྡན་པ་དག །རྟག་པར་ཡོངས་སུ་བརྙས་པར་འགྱུར་བ་སྟེ། །དེ་དག་གྲོང་དང་ཡུལ་འཁོར་གྲོང་ཁྱེར་རྣམས། །སྤངས་ནས་དགོན་པ་ནགས་སུ་གནས་པར་འགྱུར། །འབྱེད་དང་ཟུར་ཟེར་ཐབ་མོ་དགའ་བ་དང་། །ཡོན་ཏན་ཉམས་ལ་རྟག་ཏུ་སྟི་སྟང་བྱེད། །དེ་དག་སྐྱེ་བོའི་སྟོང་པར་གྲགས་འགྱུར་ཏེ། །དེ་དག་ང་རྒྱལ་རྒྱགས་པས་ཚིག་པར་འགྱུར། །འདིར་ནི་ང་ཡི་བསྟན་པ་ཡོན་ཏན་གཏེར། །ཡོན་ཏན་ཀུན་གྱི་འབྱུང་གནས་མཆོག་དགའ་བ། །འདི་ནི་ཚུལ་ཁྲིམས་ཉམས་དང་ཕྲག་དོག་དང་། །རྒྱགས་པའི་སྐྱོན་རྣམས་ཀྱིས་ནི་འཇིག་པར་འགྱུར། །ཇི་ལྟར་རིན་ཆེན་འབྱུང་གནས་སུ་བས་པ་དང་། །པད་མའི་རྫིང་བུ་ཡོངས་སུ་བསྐམས་པ་དང་། །རིན་ཆེན་མཆོད་སྡོང་ཆག་པར་གནས་པ་ལྟར། །ཕྱི་མའི་དུས་ན་བསྟན་པ་འཇིག་པར་འགྱུར། །ཕྱི་མའི་དུས་ཀྱི་ཚེ་ན་དམ་པའི་ཆོས། །རྣམ་པར་འཇིག་འགྱུར་ཤིན་དུ་མི་བཟད་ཚེ། །དགེ་སློང་དུལ་བ་མ་ཡིན་དེ་འདྲ་བ། །དེ་དག་ང་ཡི་བསྟན་འདི་འཇིག་པ་ཡིན། །སྤྱོད་པ་འདི་ལ་བསྟེན་པར་དགའ་བ་རྣམས། །དེ་དག་བཟང་འགྲོག་ལ་ཡོད་དེ་རིང་། །འདི་ནས་ཤི་འཕོས་ཡི་དྭགས་འགྲོ་བ་དང་། །དུད་འགྲོའི་འགྲོ་དང་སེམས་ཅན་དམྱལ་བར་གནས། །ལོ་བརྒྱ་དུ་མར་སྡུག་བསྔལ་མཐའ་ཡས་པ། །མི་བཟད་དྲག་པོ་ཉམས་སུ་མྱོང་བར་འགྱུར། །ཅི་སྟེ་དེ་ཡིས་མི་ཡིས་ལུས་རྙེད་ཀྱང་། །རྟག་ཏུ་སྡུག་བསྔལ་མྱ་ངན་ལྡན་པར་འགྱུར། །སྡིག་པའི་སྤྱོད་པ་འདི་ལ་རྟག་སྟེན་པ། །ལོང་བའམ་འོན་པའམ་ཞར་པར་སྐྱེ་བ་འགྱུར། །ལུས་ལ་རྟག་ཏུ་ཤ་བཀྲ་འབྱུང་བར་འགྱུར། །འཇིགས་པའི་གཟུགས་ཅན་མཐོང་ན་འཇིགས་པར་འགྱུར། །གང་ཞིག་ཡ་ངའི་སྤྱོད་པ་སྟེན་པ་ནི། །དེ་ལ་སུ་ཡང་ཡིད་རྟོན་མི་འགྱུར་ཏེ། །དེ་ཡི་ཚིག་ལ་ཡིད་ཆེས་མི་འགྱུར་ཞིང་། །དེ་ནི་རྟག་ཏུ་སྨ་འབབ་པར་ཡང་འགྱུར། །དེ་དག་ནད་དང་སྡུག་བསྔལ་བརྒྱ་ཡིས་གསུངས། །མཚོན་དང་ཤིང་དང་བོང་བ་རྣམས་ཀྱིས་བསྣུན། །བཀྲེས་དང་སྐོམ་
པའི་འཇིགས་པས་ཡོངས་སུ་གདུངས། ། ཡང་ན་དེ་ནི་རྟག་པར་རབ་ཏུ་བརྙས། །སྡུག་བསྔལ་མཐའ་ཡས་པ་དག་ཐོས་ནས་ནི། །ངེས་པ་རྣམས་ཀྱི་སྡིག་པ་སྤྱོད་འོང་ལ། །ལེགས་པར་སྤྱོད་ལ་རྟག་ཏུ་བསྟན་པར་གྱིས། །འདི་ནས་ཕྱིན་ཆད་འགྱོད་པར་གྱུར་ཏ་རེ། །གང་ཞིག་སངས་རྒྱས་དང་ནི་འཕགས་ཚོགས་དང་། །བསླབ་དང་སྦྱངས་པའི་ཆོས་ལ་དགའ་གྱུར་བ། །གཉེན་དང་བརྙེད་གྲགས་རྗོད་སྤང་བྱོས་ལ། །དེ་ལྟར་རྟག་ཏུ་མངོན་པར་བརྩོན་པར་གྱིས། །འདུས་བྱས་འདི་ནི་སྒྱུ་མ་ལྟ་བུ་དང་། །འཇིག་པར་འགྱུར་དང་རྨི་ལམ་ལྟ་བུ་དང་། །སྡུག་པ་ཀུན་ཀྱང་མི་རང་འབྲལ་འགྱུར་ཞིང་། །འདི་ལ་རྟག་པར་གང་ཡང་མེད་རྟོགས་ལ། །ཕ་རོལ་ཕྱིནད་ངས་དང་སྟོབས་རྣམས་ལ། །རྟག་ཏུ་རབ་ཏུ་སྦྱོར་ཞིང་འབད་པར་གྱིས། །ཇི་སྲིད་བྱང་ཆུབ་མཆོག་སངས་མ་རྒྱས་པ། །དེ་སྲིད་བརྩོན་འགྲུས་ནམ་ཡང་ཉམས་མི་བྱ། །གླེང་གཞིའི་ལེའུ་ཞེས་བྱ་སྟེ་དང་པོའོ།། །།ཡུལ་འཁོར་སྐྱོང་བྱང་ཆུབ་སེམས་དཔའི་ཐེག་པ་པའི་གང་ཟག་ཕལ་ཆེར་སྐྱོན་དེ་དག་འབྱུང་བར་འགྱུར་ཏེ། །མི་བརྩོན་པ་དག་ནི་མི་བརྩོན་པ་དག་ལ་མཆོད་པར་འགྱུར། །གཡོ་དང་ལྡན་པ་དག་གཡོ་དང་ལྡན་པ་དག་ལ་མཆོད་པར་འགྱུར། །མི་ཤེས་པ་དག་ནི་མི་ཤེས་པ་དག་ལ་སྟི་སྟང་བྱེད་པར་སེམས་པར་འགྱུར་ལ། །ཟང་ཟིང་དགའ་བར་འགྱུར་ཞིང་ཆགས་པ་མང་བ་དང་། །ཁྱིམ་ལ་སེར་སྣ་བྱེད་པ་དང་། །གཡོ་དང་ལྡན་པ་དང་། བྱ་ཁྭ་ལྟང་མུ་ཅོར་སྨྲ་བ་དང་། ཚུལ་འཆོས་པ་དང་། ཉེ་དུ་ལྷུར་ལེན་པར་འགྱུར། །ཕན་ཚུན་བསྔགས་པ་སྨྲ་བས་རྙེད་པ་སྒྲུབ་པར་འགྱུར། །རྙེད་པ་ཡོངས་སུ་བཙལ་བའི་ཕྱིར་དེ་དག་གྲོང་དུ་འཇུག་གི་སེམས་ཅན་ཡོངས་སུ་སྨིན་པར་བྱ་བའི་ཕྱིར་མ་ཡིན། །སེམས་ཅན་ལ་སྙིང་བརྩེ་བའི་ཕྱིར་མ་ཡིན་པར་འགྱུར། དེ་དག་མི་ཤེས་བཞིན་དུ་ཇི་ལྟར་ན་བདག་ལ་ཕ་རོལ་གྱིས་མང་དུ་ཐོས་པ་དང་། དགེ་བའི་ཆོས་དང་ལྡན་པར་ཤེས་པར་འགྱུར་སྙམ་དུ་བདག་ཤེས་པ་དང་ལྡན་པར་ཁས་འཆེ་བར་འགྱུར་ཇི་ལྟར་འདིར་མི་བརྩོན་པ་དེ་བཞིན་དུ་ཞེས་མེད་པར་འགྱུར། །སྣོད་ཆག་པ་བཞིན་དུ་འགྱུར། །གཅིག་ལ་གཅིག་འཁྲུལ་པ་ཚོལ་བ་དང་། སྦྱོར་བ་ཉམས་པ་དང་། མི་ཤེས་པ་དང་། ལེ་ལོ་ཅན་དང་། ཕན་ཚུན་མི་མཐུན་པའི་
ཆོས་འགྲོ་བ་བྱེད་པ་དང་ཡེ་ཤེས་ལ་མི་རྟོག་པ་མང་བ་དང་། རང་དགར་བྱེད་པ་དང་། ཤར་གཉེར་བ་དམ་པ་དང་། གནོད་སེམས་ཀྱིས་རྒྱས་པ་དང་། རིགས་པ་མ་ཡིན་པའི་འཁོར་གྱི་སྐྱེ་བོ་དང་འགྲོ་བ་བྱེད་པས་བསྟན་པ་འདི་ལ་སྤྱོད་པར་འགྱུར། །ཡོངས་སུ་མི་འདྲི་བའི་ངང་ཚུལ་ཅན་དང་། ཆོས་མཉན་པ་དོན་དུ་གཉེར་བར་འགྱུར། མི་རིགས་པའི་སྤྱོད་པས་དབུལ་པོའི་ཁྱིམ་རྣམས་སུ་སྐྱེ་བ་ཡོངས་སུ་འཛིན་པར་འགྱུར། དེ་དག་དབུལ་པོའི་ཁྱིམ་ནས་རབ་ཏུ་བྱུང་ནས་རྙེད་པ་ཙམ་གྱིས་བསྟན་པ་འདི་ལ་དགའ་བ་སྐྱེད་པར་འགྱུར་རོ། །དེ་དག་ལ་ཉེས་པ་བཤགས་པ་ཡང་མེད་པར་འགྱུར་ན་ཡེ་ཤེས་མངོན་པར་རྟོགས་པ་ལྟ་སྨོས་ཀྱང་ཅི་དགོས། དེ་དག་ནི་སངས་རྒྱས་ཀྱི་ཡོན་ཏན་རྣམས་བོར་ནས་ཤེས་ཀྱི་ཁེ་དད་རྙེད་པ་ཙམ་གྱིས་བདག་དགེ་སྦྱོང་ངོ་ཞེས་བདག་ཉིད་ཁས་འཆེ་བ་འགྱུར་ཏེ། ཡུལ་འཁོར་སྐྱོང་བ་ནི་གང་ཟག་དེ་ལྟ་བུ་དེ་དག་ལ་རྗེས་སུ་འཐུན་པའི་བཟོད་པ་ཡང་མི་སྨྲ་ན་སངས་རྒྱས་ཀྱི་ཡེ་ཤེས་ལྟ་ག་ལ་ཞིག །དེ་དག་ལ་ནི་བདེ་འགྲོ་ཡང་རིང་ན་བྱང་ཆུབ་ལྟ་མོས་ཀྱང་ཅི་དགོས། ཡུལ་འཁོར་སྐྱོང་ང་ནི་གང་ཟག་དེ་ལྟ་བུ་དེ་དག་ལ་བྱང་ཆུབ་ཀྱི་བར་ཆད་བྱེད་པའི་ཆོས་བརྒྱད་ཡོད་པར་སྨྲ་སྟེ། བརྒྱད་གང་ཞེ་ན། ངན་སོང་གསུམ་དུ་སྐྱེ་བ་དང་། མཐའ་ཁོབ་པའི་ནང་དུ་སྐྱེ་བ་དང་དབུལ་བའི་ཁྱིམ་དུ་སྐྱེ་བ་དང་། རིགས་དམའ་བར་སྐྱེ་བ་དང་། མདོག་ངན་ཅིང་རྟོགས་པ་བཞད་པ་དང་། སྡིག་པའི་བཤེས་གཉེན་ཕྲད་པ་དང་། ནད་མང་བ་དང་། ཡང་བ་མ་སྤངས་པས་འཆི་བའི་དུས་བྱེད་པར་འགྱུར་བ་སྟེ། ཡུལ་འཁོར་སྐྱོང་ཆོས་བརྒྱད་པོ་དེ་དག་ནི་བྱང་ཆུབ་ཀྱི་བར་ཆད་བྱེད་པར་བརྗོད་དོ། །དེ་ཅིའི་ཕྱིར་ཞེ་ན། ཡུལ་འཁོར་སྐྱོང་ཚིག་གིས་ཁས་ལེན་པ་ལ་བྱང་ཆུབ་ཅེས་ང་མི་སྨྲའི། །ཚུལ་འཆོས་པ་ལ་སྤྱོད་པ་ཡོངས་སུ་དག་པ་ཞེས་ང་མི་སྨྲའོ། །གཡོ་བྱེད་པ་ལ་བྱང་ཆུབ་ཀྱི་སྤྱོད་པ་ང་མི་སྨྲའོ། །ཟང་ཟིང་ལྷུར་ལེན་པ་ལ་སངས་རྒྱས་ལ་མཆོད་པ་ཞེས་མི་སྨྲའོ། །མངོན་པའི་ང་རྒྱལ་ཅན་ལ་ཤེས་རབ་ཡོངས་སུ་དག་པ་ཞེས་ང་མི་སྨྲའོ། །ཤེས་རབ་འཚོལ་བ་ལ་ཐེ་ཚོམ་གཅོད་པ་ཞེས་ང་མི་སྨྲའོ། །སེར་སྣ་ཅན་ལ་བསམ་པ་ཡོངས་སུ་དག་པ་ཞེས་ང་མི་སྨྲའོ། །མི་བརྩོན་པ་ལ་མང་བ་ལག་ཟུངས་ཐོབ་པ་ཞེས་ང་མི་སྨྲའོ། །ཡང་དག་པའི་ཡོན་ཏན་མ་ཡིན་པ་ཡོངས་སུ་ཚོལ་བ་ལ་བདེ་འགྲོ་འཐོབ་ཅེས་ང་མི་སྨྲའོ། །
ཁྱིམ་ལ་སེར་སྣ་བྱེད་པ་ལ་ཡོངས་སུ་དག་པ་ཞེས་ང་མི་སྨྲའོ། །སྤྱོད་ལམ་བཅོས་མ་ཅན་ལ་སངས་རྒྱས་དང་ཕྲད་པ་ཞེས་ང་མི་སྨྲའོ། །ཁྱིམ་ལ་ཆགས་པ་ལ་དག་ཡོངས་སུ་དག་པ་ཞེས་ང་མི་སྨྲའོ། །མ་གུས་པ་ལ་སེམས་ཡོངས་སུ་དག་པ་ཞེས་ང་མི་སྨྲའོ། །ཚོད་མི་ཤེས་པ་ལ་ཆོས་འདོད་པ་ཞེས་ང་མི་སྨྲའོ། །ལུས་དང་སྲོག་ལ་ལྟ་བ་དང་བཅས་པ་ལ་ཆོས་ཡོངས་སུ་ཚོལ་བ་ཞེས་ང་མི་སྨྲའོ། །ཡུལ་འཁོར་ཇི་ལྟར་སྐྱེས་བུ་བླུན་པོ་དེ་དག་ལ་སྨད་པ་ལྟར་སྟོན་པ་དྲུག་ལ་དེ་ལྟར་ང་མི་སྨོད་དོ། །དེ་ཅིའི་ཕྱིར་ཞེ་ན། དེ་དག་ནི་གཞན་སྨྲ་ལ་གཞན་དུ་བྱེད་པའོ། །ལྷ་དང་བཅས་པའི་འཇིག་རྟེན་ལ་སླུ་བའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཡང་དག་མ་བསྡམས་རྒོད་ཅིང་ཁེངས་པ་ཅན། མ་གུས་ང་རྒྱལ་ལྡན་ཞིང་ཆགས་ཤས་ཆེ། ཉོན་མོངས་ཟིལ་ནོན་ཐ་བ་ཉོན་མོངས་བཅས། དེ་འདྲ་དག་ལ་བྱང་ཆུབ་མཆོག་རབ་རིང་། ཆགས་པས་ཟིལ་གྱིས་ནོན་ན་ལེ་ལོ་འཕེལ། ལེ་ལོས་ཟིན་གྱིས་ནོན་ན་ངང་པ་ཉམས། ངང་པ་ཉམས་ན་ཚུལ་ཁྲིམས་རབ་ཏུ་ཉམས། ཚུལ་ཁྲིམས་འཆལ་བར་གྱུར་ན་བཟང་འགྲོ་ཉམས། དབུལ་པོར་གྱུར་པས་རབ་ཏུ་བྱུང་གྱུར་ཏེ། །མཆོད་པ་རྙེད་ནས་དབུལ་ལས་གྲོལ་བར་གྱུར། དེ་དག་གསེར་གྱི་ཁུར་ནི་བོར་ནས་སུ། གསོ་མའི་ཁུར་ནི་ལེན་པར་བྱེད་དང་མཚུངས། རྙེད་པ་དོན་དུ་གཉེར་བས་དགོན་པར་འགྲོ །དེར་སོང་ནས་ཀྱང་གོས་དང་ཉེ་དུ་ཚོལ། མངོན་ཤེས་རིག་དང་སྤོབས་པ་ཕུན་སུམ་ཚོགས། བོར་ནས་དེ་ནི་ཕྱིར་ཡང་ཉེ་དུ་འཛིན། རྨོངས་ནས་ང་རྒྱལ་དབང་གིས་ངན་སོང་བ། མི་ཁོམ་འགྲོ་བ་རྣམས་དང་དབུལ་པོ་དང་། དམའ་བའི་རིགས་སུ་སྐྱེ་དང་ལོང་བ་དང་། མདོག་ངན་པ་དང་མཐུ་ཆུང་དེ་དག་འཛིན། དེ་དག་ཚུལ་དང་སྤྱོད་པ་ཡོངས་ཉམས་དངོས། བག་མེད་རྙེད་ནས་དྲན་པ་རབ་ཏུ་ཉམས། གཡང་ས་ཆེན་པོ་མི་བཟད་ལྟུང་བར་འགྱུར། དེ་ནས་བསྐལ་བ་བྱེ་བར་ཐར་པ་མེད། གལ་ཏེ་འདིར་ནི་འཐོབ་པས་བྱང་ཆུབ་ན། དེ་ཕྱིར་ལྷས་བྱིན་གྱིས་ཀྱང་ཆུབ་ཆུབ་འཐོབ། རྣམ་པར་འཐོར་རླུང་གིས་ནི་བྱ་ལྟུང་ལྟར། ཆགས་པས་ཀྱང་ནི་དེ་ལྟར་
མི་རིགས་སོ། །བསོད་ནམས་ཉམས་ཤིང་གཞན་གྱི་ཆུང་མ་ཆགས། ཚུལ་ཁྲིམས་མ་དག་དགེ་བའི་རྣམས་ལས་ཉམས། བྱང་ཆུབ་སེམས་ཀྱིས་ཡེ་ཤེས་གང་མ་ཐོབ། དེ་དག་བསྟན་ལ་མ་གོས་དུར་ཤིང་བཞིན། བྱང་ཆུབ་དོན་གཉེར་སངས་རྒྱས་ཆོས་ཚོལ་བ། དབེན་ན་ཐར་པ་དེ་བཞིན་མི་གནས་སོ། །དེ་ནི་རྙོང་གིས་སྤྲེའུ་ལ་དམ་བྱས་ལྟར། ང་རྒྱལ་ཟིན་ནོན་བྱང་ཆུབ་དེ་འདྲའོ། །བྱང་ཆུབ་དོན་གཉེར་བས་ཆོས་ཚིག་ཕྱིར། ང་ཡིས་རང་གི་ཕངས་པའི་སྲོག་ཀྱང་བཏང་། ཆོས་དེ་བཏང་ནས་བརྩོན་དང་མི་ལྡན་པ། དོན་མེད་གྱུར་ནས་བསྟན་ལས་ལྷུང་བར་འགྱུར། ངས་ནི་སྔོན་ཆད་ལེགས་པར་བཤད་དོན་ཕྱིར། གཡང་ས་ཆེན་པེ་མེ་ལྕེ་འབར་བར་མཆོངས། དེ་ཐོས་ནས་ནི་སྡུག་དང་མི་སྡུག་པ། ཐམས་ཅད་རྣམ་པར་སྤངས་ཏེ་ནན་ཏན་གནས། བསྟན་པ་སྣ་ཚོགས་ཡོན་ཏན་འབྱོར་ཐོས་ལ། དེ་དག་ནམ་ཡང་འདོད་པ་མི་སྐྱེད་ན། ཆོས་མིན་འདོད་ལ་བྱང་ཆུབ་ག་ལ་ཡོད། དཔེར་ན་ལོངས་བ་ལ་མ་གསལ་མོད་དང་མཚུངས། །ཡུལ་འཁོར་སྐྱོང་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ་རྒྱ་ཆེ་བ་བསམ་གྱིས་མི་ཁྱབ་པ། མཚུངས་པ་མེད་པ། དཔག་ཏུ་མེད་པ་ཚད་མེད་པར་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དོན་གྲུབ་བློ་ཞེས་བྱ་བ་འཇིག་རྟེན་དུ་བྱུང་ངོ་། །ཡུལ་འཁོར་སྐྱོང་དེའི་ཚེ་དེའི་དུས་ན་རྒྱལ་པོ་འོད་ཟེར་ལྡན་ཞེས་བྱ་བ་ཞིག་བྱུང་ངོ་། །ཡུལ་འཁོར་སྐྱོང་པོ་འོད་ཟེར་ལྡན་ནི་འཛམ་བུའི་གླིང་དཔག་ཚད་ཁྲིད་དུ་སྟོང་ལ་རྒྱལ་སྲིད་བྱེད་དོ། །ཡུལ་འཁོར་སྐྱོང་དེའི་ཚེ་དིའི་དུས་ན་འཛམ་བུའི་གླིང་དེ་ན་གྲོང་ཁྱེར་ཉི་ཁྲི་དང་། ཁྱིམ་བྱེ་བ་ཕྲག་སྟོང་ཡོད་དོ། །ཡུལ་འཁོར་སྐྱོང་རྒྱལ་པོ་འོད་ཟེར་ལྡན་དེ་རྒྱལ་པོའི་ཕོ་བྲང་གང་ན་གནས་པ་རྒྱལ་པོ་འོད་ཟེར་ལྡན་དེའི་གྲོང་ཁྱེར་རིན་པོ་ཆེ་སྣང་བ་ཞེས་བྱ་བ་ཤར་ནུབ་ཏུ་ཆུར་དཔག་ཚད་བཅུ་གཉིས་པ། ལྷོ་བྱང་དུ་རྒྱར་དཔག་ཚད་བདུན་ཡོད་པ་རིན་པོ་ཆེ་སྣ་བདུན་གྱི་ཕྱིར་རབ་
རིམ་པ་བདུན་དང་། མིག་མངས་རིས་སུ་བྲིས་པས་མཛེས་པར་བྱས་པ་ཡོད་དོ། །དེའི་ཚེ་སེམས་ཅན་རྣམས་ཀྱི་ཚེའི་ཚད་ནི་ལོ་བྱེ་བ་ཕྲག་བཅུ་ཐུབ་པར་གྱུར་ཏོ། །ཡུལ་འཁོར་སྐྱོང་རྒྱལ་པོ་འོད་ཟེར་ལྡན་གྱི་བུ་བསོད་ནམས་ཀྱི་འོད་ཟེར་ཞེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་ཡོད་དེ། དེ་བཅས་པ་མ་ཐག་ཏུ་རིན་པོ་ཆེ་སྣ་བདུན་གྱི་གཏེར་སྟོང་བྱུང་བར་གྱུར་ཏོ། །རྒྱལ་པོ་ཁང་བཟངས་ཀྱི་ནང་དུ་ཡང་རིན་པོ་ཆེ་སྣ་བདུན་གྱི་གཏེར་མི་བཅུའི་ཚད་ཙམ་བྱུང་བར་གྱུར་ཏེ། ཡུལ་འཁོར་སྐྱོང་རྒྱལ་བུ་གཞོན་ནུ་བསོད་ནམས་ཀྱང་འོད་ཟེར་དེ་བཙས་མ་ཐག་ཏུ་འཛམ་བུའི་གླིང་པའི་སེམས་ཅན་ཐམས་ཅད་ཡིད་རངས་པར་གྱུར་ཏོ། །སེམས་ཅན་གང་དག་བཙོན་ར་ན་འཁོད་པ་དེ་དག་ཀྱང་བཙོན་ར་ནས་ཐར་པར་གྱུར་ཏོ། ། ཡུལ་འཁོར་སྐྱོང་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ངེས་ཉི་མ་བདུན་གྱིས་འཇིག་རྟེན་པའི་སྒྱུ་རྩལ་ཇི་སྙེད་པ་དེ་དག་ཐམས་ཅད་རྟོགས་པར་གྱུར་ཏོ། །ཡུལ་འཁོར་སྐྱོང་དེ་ནས་གནས་གཙང་མ་འི་རིས་ཀྱི་ལྷ་རྣམས་ཀྱིས་ནམ་གྱི་གུང་གི་དུས་ལ་བབ་པ་དང་། རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་གཞོན་ནུ་ཁྱོད་བག་ཡོད་པར་གྱིས་ཤིག །མི་རྟག་པར་སོ་སོར་བརྟག་པ་ལ་མཁས་པར་གྱིས་ཤིག །གཞོན་ནུ་མི་རྣམས་ཀྱི་སྲོག་ནི་ཆེན་པོ་མེད་པ་སྟེ། ཆི་འཕོ་བར་འགྲོ་བ་ཡིན་གྱིས། །འཇིག་རྟེན་པའི་ཕ་རོལ་ལ་འཇིག་པར་བལྟ་བར་བྱ་ཞིང་ལས་དང་བྱ་བ་དང་མི་འགལ་བར་གྱིས་ཤིག་ཅེས་བསྐུར་ཏེ། དེའི་ཚེ་ལྷའི་བུ་དེ་དག་གིས་ཚིགས་སུ་བཅད་པ་འདི་དག་སྨྲས་སོ། །གཞོན་ནུ་བག་མེད་པར་ནི་གྱུར་ཏ་རེ། བག་མེད་དབང་དུ་སོང་བར་གྱུར་ཏ་རེ། བདེ་བར་གཤེགས་པས་བག་ཡོད་པར་བསྟོད་ཅིང་། །བདེ་གཤེགས་རྣམས་ཀྱིས་བག་མེད་རྣམས་ཀྱང་དམད། །ངེས་པ་གང་དག་འདི་ན་བག་ཡོད་ཅིང་། །ལེགས་སྡོམ་དག་ལ་སེར་སྣ་མེད་པ་དང་། །སེམས་ཅན་ཀུན་ལ་སྙིང་རྗེ་བྱམས་ཡིད་ལྡན། །དེ་དག་རིང་པོ་མི་ཐོགས་མི་མཆོག་འགྱུར། །བདེ་བར་གཤེགས་པ་གང་དག་འདས་པ་དང་། །འདི་ནི་ད་ལྟར་དག་དང་གང་མ་བྱོན། །དེ་དག་ཐམས་ཅད་
དགེ་བ་རྣམས་ཀྱིས་འཕགས། །བག་ཡོད་ལམ་ཉིད་ལ་ཡང་ཤིན་དུ་གནས། །བཟའ་དང་བཏུང་དང་གོས་དང་ཁ་ཟས་དང་། །གསེར་དང་དངུལ་དང་ནོར་བུ་མུ་ཏིག་རྒྱན། །བསྐལ་པ་བྱེ་བར་དེ་དག་རྣམས་ཀྱིས་བཏང་། །བྱང་ཆུབ་དམ་པ་འདི་ནི་དོན་དུ་གཉེར། །རྐང་པ་ལག་པ་དེ་བཞིན་རྣ་དང་སྣ། །སློང་བ་རྣམས་ལ་རབ་ཏུ་བགོས་བྱིན་ན། །བྱང་ཆུབ་ཡོན་ཏན་ཀུན་གྱིས་བསམ་རྫོགས་ནས། །དེ་དག་རིང་པོར་མི་ཐོགས་མི་མཆོག་འགྱུར། །རྒྱལ་སྲིད་བདེ་དང་སྡུག་པའི་བུད་མེད་དང་། །ནོར་རྣམས་ཐམས་ཅད་དུ་ཡང་རྣམ་སྤངས་ཏེ། །འདུས་བྱས་གང་ལ་ལྟ་དང་སྒྱུ་མ་འདྲས། །འདོད་པ་མེད་པར་གནས་པར་གྱིས། །སྲོག་ནི་བརྟན་པ་མེད་དེ་རྟག་ཏུ་གཡོ། །འཇིམ་པའི་བུམ་པ་ལྟ་བུར་འཇིག་པ་ཅན། །བདུན་པ་འདྲ་ཞིང་རྟག་ཏུ་ཐེར་ཟུག་མིན། །གཞོན་ནུ་འདི་ལ་རྟག་མང་དགེ་མ་ཡིན། །ངན་འགྲོར་ལྟུང་བའི་ཚེ་ན་འདི་ན་ནི། །ཕ་དང་མ་ཡང་འཛིན་པར་བྱེད་པ་མེད། །མི་ཡིས་དགེ་དང་མི་དགེ་གང་བྱས་པ། །དེ་ནི་རྟག་ཏུ་ཕྱི་བཞིན་འབྲང་བར་འགྱུར། །འདོད་པའི་རྒྱུ་ཡིས་བསྐལ་མང་རྒྱ་མཚོར་ནི། །དོན་མེད་པར་ཡང་གཅིག་གིས་གཅིག་པས་དེ། །ཁྱོད་ཀྱི་མི་ཕན་མ་བྱས་ཅི་ཡང་མེད། །དོན་མེད་ཉིད་དུ་ངལ་བ་བསྟེན་པར་གྱུར། །དེ་ལྟར་ཁྱོད་ཀྱིས་འགྲོ་ཕན་བྱང་ཆུབ་ཞི། །མཚུངས་མེད་གོ་འཕང་དམ་པ་བཙལ་བའི་ཕྱིར། །རྐང་དང་ཤ་དང་ལྤགས་པ་དེ་བསྐམས་ཀྱང་། །དེ་ལྟར་ན་ཡང་ཁྱོད་ནི་ངལ་མ་སེམས། །བདེ་བར་གཤེགས་པ་འབྱུང་བ་རྙེད་པར་དཀའ། །ཞི་བའི་ཆོས་ཐོས་པ་ཡང་ཤིན་དུ་དཀའ། །བསྒྲིམ་པར་བྱས་ཏེ་བདུད་ཀྱི་ཕྱོགས་བསལ་ནས། །སངས་རྒྱས་ཡེ་ཤེས་རིང་པོ་མི་ཐོགས་འཐོབ། །བཤེས་གཉེན་བཟང་ལ་རྟག་ཏུ་ཡོངས་བསྟེན་ཅིག །སྡིག་པའི་བཤེས་གཉེན་ཡོངས་སུ་སྤང་བར་གྱིས། །དེ་དག་རྟག་ཏུ་བཟང་ལམ་ཁྲིད་པར་བྱེད། །ལམ་གོལ་ལས་ཀྱང་རྟག་ཏུ་ཟློག་པར་བྱེད། །བརྩོན་འགྲུས་ཤིན་དུ་བརྟན་པ་ལེགས་བྱོས་ཏེ། །ལུས་དང་སྲོག་ལ་འདོད་པ་རྣམ་སྤངས་ནས། །རྡོ་རྗེ་ལྟ་བུའི་སྙིང་གི་བསམ་གཏན་པར། །སངས་རྒྱས་ལམ་འདི་ཉིད་ལ་གནས་པར་གྱིས། །སྔོན་གྱི་མི་མཆོག་དམ་པ་འོད་བྱེད་པ། །ཀུན་ཀྱང་གོ་
འཕང་དམ་པ་བླ་མེད་པ། །ཚོལ་བའི་ཚེ་ནི་སྤྱོད་ཡུལ་དགོན་པར་དགའ། །ཁྱོད་ཀྱང་དེ་དག་སྤྱོད་པའི་ལམ་དུ་ཕྱོགས། །དགོན་པར་གནས་ལ་རྟག་ཏུ་དགའ་བར་གྱིས། །ཕ་དང་མ་དང་བུ་དང་སྡུག་པའི་གཉེན། །སྐྱེ་བོ་སྙིང་དུ་སྡུག་པ་ཀུན་སྤོངས་ལ། །ལུས་དང་སྲོག་ལ་སྲེད་པར་མ་བྱེད་པར། །བདེ་གཤེགས་ཡེ་ཤེས་རྒྱ་ཆེན་བཙལ་བར་གྱིས། །ཡུལ་འཁོང་སྐྱོང་དེ་ན་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་དེ་ནི་བཟུང་སྟེ་ལོ་བཅུའི་བར་དུ་ནམ་ཡང་རྨུགས་པ་དང་གཉིད་ཀྱིས་ནོན་པར་མ་གྱུར། །ནམ་ཡང་རྒོད་པར་མ་གྱུར། །རྩེས་པར་མ་གྱུར། །དགའ་བ་བྱེད་པར་མ་གྱུར། །ཡོངས་སུ་སྤྱད་པར་མ་གྱུར། །ནམ་ཡང་བསྐྱེད་མོས་ཚལ་དུ་མ་སོང་། །ནམ་ཡང་གྲོགས་པོ་མཐོང་ནས་ངོ་མཚར་དུ་མི་འཛིན། །ནམ་ཡང་གླུ་ལ་དགའ་བར་མ་གྱུར། ། རྒྱལ་སྲིད་དང་། ནོར་དང་། ཁྱིམ་དང་། གྲོང་ཁྱེར་རྣམས་འདོད་པ་བསྐྱེད་པར་མ་གྱུར་ཏེ། དེ་ལྟར་དངོས་པོ་ཐམས་ཅད་ལ་མི་ལྟ་བར་གཅིག་པུར་སེམས་ཤིང་གནས་པར་གྱུར་ཏོ། །ནང་དུ་ཡང་དག་འཇོག་ལྷུར་ལེན་ཅིང་འཇིག་རྟེན་ལ་སྙིང་པོ་མེད་པ་དང་། འཇིག་པ་དང་། དབུགས་འབྱིན་པ་མེད་པ་དང་། མི་སྡུག་པ་དང་ཕྲད་པ་དང་། སྡུག་པ་དང་འབྲལ་བ་དང་། བྱིས་པ་འདྲིད་པ་དང་། འཁོར་བ་ལ་དགའ་བ་རི་བྲོ་བ་མེད་པ་དང་། རྒྱལ་སྲིད་བདེ་བ་སླུ་བའི་ཆོས་ཅན་དང་། སྲིད་པ་ལ་མངོན་པར་དགའ་བས་ཆོག་མི་ཤེས་པ་དང་། སོ་སོའི་སྐྱེ་བོ་ཉིད་རྟག་ཏུ་མི་མཐུན་པར་རྣམ་པར་སེམས་ཤིང་བདག་ནི་བྱིས་པའི་སྐྱེ་བོ་མི་བརྩོན་པའི་ནང་ན་གནས་ཀྱིས་བདག་གིས་ཅང་མི་སྨྲ་བར་འདའ་བར་བྱའོ་སྙམ་ནས་དེ་ཕྱོགས་གཅིག་ཏུ་ཅང་མི་སྨྲ་བར་གྱུར་ཏེ། བག་ཡོད་པ་ལ་སེམས་ཤིང་སྡུག་པ་དང་བྲལ་བར་གཅིག་པུ་གནས་པར་གྱུར་ཏོ། །ཡུལ་འཁོར་སྐྱོང་དེ་ནས་རྒྱལ་པོ་འོད་ཟེར་ལྡན་གྱིས་གཞོན་ནུའི་ལོངས་སྤྱོད་ཀྱི་ཕྱིར་ས་ཕྱོགས་ཤིན་ཏུ་གྲོང་ཁྱེར་དགའ་མཆོག་ཅེས་བྱ་བ་བྱས་ཏེ། ལྷོ་དང་བྱང་གི་ཡོངས་སུ་ལམ་སྲང་བདུན་པ་བརྒྱ་བདུན་བརྒྱ་བྱས་སོ། །རིན་པོ་ཆེ་སྣ་བདུན་གྱི་ཕྱིར་དྲིལ་བུ་གཡེར་ཀའི་དྲ་བས་བྲེས་པ། །མུ་ཏིག་གི་དྲ་བ་དང་། རིན་པོ་ཆེའི་སྲོག་ཤིང་དང་བླ་རེ་དང་ལྡན་པ་རིམ་བདུན་གྱིས་ཀུན་ནས་བསྐོར་ཏོ། །ལམ་སྲང་ཐམས་ཅད་ཀྱི་སྒོར་
ཡང་རིན་པོ་ཆེའི་སྲོག་ཤིང་སྡོང་བཙུགས་སོ། །རིན་པོ་ཆེའི་སྲོག་ཤིང་ཐམས་ཅད་ཀྱང་རིན་པོ་ཆེའི་སྐུད་པ་དྲུག་ཁྲིས་སྤྲེལ་ཏོ། །རིན་པོ་ཆེའི་སྐུད་པ་ཐམས་ཅད་ཀྱང་ཕྱོགས་བཞི་ནས་ཤིང་ཏ་ལའི་ཕྲེང་བ་བྱེ་བས་སྦྲེལ་ཏོ། །དེ་དག་རླུང་གིས་བསྐྱོད་དེ་བསྐུལ་ན་འདི་ལྟ་སྟེ་དཔེར་ན་རོལ་མོ་སིལ་སྙན་བརྒྱ་སྟོང་གི་སྒྲ་སྙན་པ་ལྟ་བུའི་སྒྲ་འབྱུང་ངོ་། །ལམ་སྲང་གི་སྒོ་ཐམས་ཅད་ན་བུ་མོ་གླུ་མཁས་པ། །གར་མཁས་པ། ལང་ཅོ་དར་ལ་བབ་པ། སྐྱེ་བོ་ཐམས་ཅད་ཀྱིས་སྤྱད་པའི་འོས་སུ་གྱུར་པ་ལྔ་བརྒྱ་ལྔ་བརྒྱ་བཀོང་ངོ་། །དེ་དག་ཐམས་ཅད་ལ་རྒྱལ་པོ་འོད་ཟེར་ལྡན་གྱིས་ཁྱེད་ཉིན་མཚན་དུ་གླུ་དང་། གར་དང་། རོལ་མོའི་སྒྲས་གང་དག་ཕྱོགས་བཞི་ནས་ལྷགས་པའི་སེམས་ཅན་རྣམས་ཡང་དག་པར་དགའ་བར་བྱ་ཞིང་ཅི་ནས་གཞོན་ནུ་དགའ་བར་བྱ་བའི་སེམས་བསྐྱེད་པ་མ་གཏོགས་པར་གཏམ་གཞན་མ་བྱེད་ཅིག །སེམས་ཅན་གང་ལ་ཡང་ཡིད་དུ་མི་འོང་བ་མ་སྨྲ་ཤིག་ཅེས་བསྒོའོ། །ལམ་སྲང་དེ་དག་ཐམས་ཅད་ཀྱི་སྒོ་ཡང་བཟའ་བ་འདོད་པ་རྣམས་ལ་ནི་བཟའ་བ། །བཏུང་བ་འདོད་པ་རྣམས་ལ་ནི་བཏུང་བ། བཞོན་པ་འདོད་པ་རྣམས་ལ་ནི་བཞོན་པ་ནས། །གོས་དང་། སྤོས་དང་། ཕྲེང་བ་དང་། བྱུག་པ་དང་། ལམ་དང་། རྒྱབ་རྟེན་དང་། འཚོ་བའི་ཡོ་བྱད་དང་། གསེར་དང་། དངུལ་དང་། ནོར་བུ་དང་། མུ་ཏིག་དང་། བཻ་དཱུ་ཪྻ་དང་། དུད་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་སིལ་མ་དང་། གླང་པོ་ཆེ་དང་། རྟ་དང་། ཤི་རྟ་དང་། བ་ལང་དང་། ནོར་དང་། རྒྱན་ཐམས་ཅད་ཕྱིན་ཞིང་སྐྱེ་བོ་ཐམས་ཅད་ཀྱིས་ཡོངས་སུ་སྤྱོད་པའི་ཕྱིར་རིན་པོ་ཆེའི་ཕུང་པོ་ཡང་བཞག་པར་གྱུར་ཏོ། །དེའི་ཚེ་གྲོང་ཁྱེར་གྱི་དབུས་སུ་གཞོན་ནུའི་ལོངས་སྤྱོད་ཀྱི་ཕྱིར་ཁྱིམ་ཁོར་ཡུག་ཏུ་དཔག་ཚད་ཙམ་ཡོད་པ་རིན་པོ་ཆེ་སྣ་བདུན་མིག་མངས་རིས་སུ་བྲིས་པ། རྟ་བབས་པ་རྒྱས་རབ་ཏུ་བརྒྱན་པ་བྱས་སོ། །དེའི་ནང་དུ་ཁང་བཟང་ཞིག་བྱས་ཏེ། དེར་གཞོན་ནུའི་ལོངས་སྤྱོད་ཀྱི་ཕྱིར་མལ་བྱེ་བ་ཕྲག་བཞི་བཤམས་སོ། །དེའི་དབུས་སུ་བསྐྱེད་མོས་ཚལ་བྱས་ཏེ། མེ་ཏོག་གི་ཤིང་ལྗོན་པ་ཐམས་ཅད་དང་། འབྲས་བུའི་ཤིང་ལྗོན་པ་ཐམས་ཅད་དང་། རིན་པོ་ཆེའི་ཤིང་ལྗོན་པ་ཐམས་ཅད་ཀྱིས་ཁྱབ་པར་བཀང་ངོ་། །
ཡུལ་འཁོར་སྐྱོང་བསྐྱེད་མོས་ཚལ་དེའི་དབུས་སུ་རིན་པོ་ཆེ་ཐམས་ཅད་ཀྱི་རྫིང་བུ་རིན་པོ་ཆེ་སྣ་བཞིའི་ཐེམ་སྐས་དད་ལྡན་པ་བྱས་པ་ལ་འདི་ལྟ་སྟེ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་ལོ། །གང་ནས་སྤོས་ཆུ་འབབ་པའི་སེང་གེའི་ཁ་བརྒྱ་རྩ་བརྒྱད་བཙུགས་སོ། །རྫིང་དེའི་སེང་གེའི་ཁ་བརྒྱ་རྩ་བརྒྱད་པོ་དེ་ནས་ཀྱང་ཆུ་འབབ་པོ། །མེ་ཏོག་ཨུད་པ་ལ་དང་། ཀུ་མུ་ད་དང་། པད་མ་དང་། པད་མ་དཀར་པོ་རྣམས་རྟག་པར་རྒྱན་དུ་རྒྱས་སོ། །ཁོར་ཡུག་ཏུ་རིན་པོ་ཆེའི་ཤིང་ལྗོན་པས་ཡོངས་སུ་བསྐོར་ཏོ། །དུས་ཐམས་ཅད་པའི་མེ་ཏོག་དང་། འབྲས་བུའི་ཤིང་ལྗོན་པ་རྣམས་ཀྱིས་ཀྱང་ཡོངས་སུ་རྒྱས་སོ། །རྫིང་དེའི་འགྲམ་དུ་རིན་པོ་ཆེའི་ཤིང་ལྗོན་པ་བརྒྱད་བརྒྱ་བསྐྱེད་དེ། རིན་པོ་ཆེའི་ཤིང་ལྗོན་པ་ཐམས་ཅད་ཀྱང་རིན་པོ་ཆེའི་སྐུད་པ་རྣམས་ཀྱིས་སྦྲེལ་ཅིང་ཐམས་ཅད་དུ་ཡང་ཤིང་ཏ་ལའི་ཕྲེང་བ་བྱེ་བ་སྦྲེལ་ཏོ། །དེ་དག་ཀྱང་རླུང་གིས་བསྐྱོད་ཅིང་རླུང་གིས་བསྒུལ་ན་འདི་ལྟ་སྟེ་དཔེར་ན་རོལ་མོ་སིལ་སྙན་བརྒྱ་སྟོང་བླངས་པ་ལྟ་བུའི་སྒྲ་འབྱུང་ངོ་། །གཞོན་ནུའི་ལུས་ལས་དང་རྡུལ་གྱིས་རེག་འོད་ཞེས་རྫིང་དེའི་སྟོང་རིན་པོ་ཆེའི་འདྲ་བས་བཀབ་པར་གྱུར་ཏོ། །དེའི་ཚེ་ཁང་བཟངས་དེར་རིན་པོ་ཆེ་སྣ་བདུན་གྱི་ཁྲི་བྱེ་བ་ཕྲག་བཞི་བཤམས་ཏེ། ཁྲི་ཐམས་ཅད་ཀྱི་སྟེང་དུ་ཡང་རས་བཅོས་བུ་ལྔ་བརྒྱ་ལྔ་བརྒྱ་བཏིང་བར་གྱུར་ཏོ། །གང་དུ་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་འདུག་པར་གྱུར་བའི་ཁྲི་རིན་པོ་ཆེ་སྣ་བདུན་ལས་བྱས་པ་འཕང་དུ་མི་བདུན་ཙམ་ཡོད་པ་བཤམས་པ་དབུས་མ་དེར་རས་བཅོས་བུ་བྱེ་བ་ཕྲག་བརྒྱད་ཅུ་རྩ་བདུན་བཏིང་བར་གྱུར་ཏོ། །ཁྲི་ཐམས་ཅད་ཀྱི་དྲུང་དུ་ཡང་བོག་བོར་ནས་ཨག་རུས་བདུགས་ཤིང་ཉིན་ལན་གསུམ་མཚན་ལན་གསུམ་དུ་མེ་ཏོག་འགྲེམས་པར་བྱེད་དོ། །གསེར་གྱི་ལྡ་ལྡི་བྲེས་སོ། །གསེར་གྱི་པད་མ་རབ་ཏུ་སྦྱངས་སོ། །མུ་ཏིག་དང་ནོར་བུའི་དྲ་བས་བྲེས་སོ། །ནོར་བུ་རིན་པོ་ཆེའི་འོད་ཀྱིས་སྣང་བར་བྱས་སོ། །རིན་པོ་ཆེའི་དྲ་བ་བརྒྱད་ཁྲི་རབ་ཏུ་སྦྱངས་སོ། །རིན་པོ་ཆེའི་ཤིང་ལྗོན་པ་ཐམས་ཅད་ལ་ཡང་བདུན་བརྒྱ་བརྒྱ་སྦྱངས་སོ། །བསྐྱེད་མོས་ཚལ་ཀུན་དུ་ཡང་ནོར་བུ་རིན་པོ་ཆེ་འོད་དཔག་ཚད་ཙམ་ཡོད་པ་འབུམ་ཕྲག་དགུ་བཅུ་རྩ་དགུ་བཞག་པར་གྱུར་ཏེ། དེ་དག་གི་འོད་
ཀྱིས་འཇིག་རྟེན་ཐམས་ཅད་སྣང་བར་འགྱུར་ཏོ། །ཡུལ་འཁོར་སྐྱོང་སྐྱེད་མོས་ཚལ་དེ་ན་བྱའི་ཚོགས་མིའི་སྐད་དུ་སྨྲ་བ་ནེ་ཙོ་དང་། རི་སྐེགས་དང་། ཁུ་བྱུག་དང་། རྨ་བྱ་དང་། ངང་པ་དང་། ངུར་བ་དང་། ཀུ་ནལ་དང་། ཀ་ལ་བདེ་ཀ་དང་། ཤང་ཤིང་ཏེའུ་རྣམས་འཁོད་དོ། །དེ་དག་སྐད་འབྱིན་ཅིང་སྒྲ་སྒྲོག་ན་དགའ་ཚལ་གྱི་ལྷ་རྣམས་རྒྱགས་པར་འགྱུར་བ་ལྟ་བུའི་སྒྲ་འབྱུང་ངོ་། །གཞོན་ནུའི་ལོངས་སྤྱོད་ཀྱི་ཕྱིར། །རོའི་རྣམ་པ་ཐམས་ཅད་ཕུན་སུམ་ཚོགས་པ་རོ་རྣམ་པ་ལྔ་བརྒྱ་པའི་ཁ་ཟས་རྣམས་རྟོག་པར་རྒྱུན་དུ་བཤམས་པར་གྱུར་ཏོ། །དེའི་ཚེ་གཞོན་ནུ་ལོ་བཅུ་བཅུ་དྲུག་ལོན་ན་ལོ་ཉི་ཤུ་ལོན་པའི་སྐྱེ་དང་ལྡན་པ་དག་གྲོང་ཁྱེར་ཐམས་ཅད་ནས་བསྡུས་ནས་གྲོང་ཁྱེར་དེར་བཙུད་དོ། །ཐམས་ཅད་བཟོའི་གནས་དང་། ལས་ཀྱི་གནས་ཀྱི་བྱ་བ་ཤེས་པ། ཐམས་ཅད་ཀྱང་འཇིག་རྟེན་པའི་དགའ་བ་དང་། འཚོག་ཆས་ཀྱི་བྱ་བ་ཤེས་པ་བྱ་བ་ཕྲག་བརྒྱད་བཅུ་གྲོང་ཁྱེར་དེར་བཙུད་པར་གྱུར་ཏོ། །ཕ་མ་གཉིས་ཀྱིས་དེ་ལ་བུ་མོ་བྱེ་བ་བྱིན་ནོ། །ཉེ་དུའི་ཚོགས་ཀྱིས་བྱེ་བ་དང་། གྲོང་རྡལ་བའི་མིག་བྱེ་བ་དང་། རྒྱལ་པོ་ཐམས་ཅད་ཀྱིས་བུ་མོ་བྱེ་བ་བྱིན་པར་གྱུར་ཏེ། དེ་དག་ཐམས་ཅད་ཀྱང་གཟུགས་བཟང་བ། མཛེས་པ། བལྟ་ན་སྡུག་པ་ཤ་སྟག་གོ། ཐམས་ཅད་ཀྱང་ན་ཚོད་ལོ་བཅུ་དྲུག་ལོན་པ། །གླ་མཁས་པ། རོལ་མོའི་སྒྲ་མཁས་པ། གར་མཁས་པ། གོང་མཁས་པ། སྐྱེས་པའི་གན་དུ་འགྲོ་མཁས་པ། དྲང་བ། གཞོན་པ། མཉེན་པ། ཡན་ལག་འཇམ་པ། གསོང་པོར་སྨྲ་བ། བཞིན་འཛུམ་པ། ཚུལ་མཁས་པ། སྒྱུ་རྩལ་ཐམས་ཅད་ཀྱི་བྱ་བ་ལ་མཁས་པ། ཧ་ཅང་ཡང་མི་རིང་བ། ཧ་ཅིང་ཡང་མི་ཐུང་བ། ཧ་ཅང་ཡང་མི་སྐེམ་། ཧ་ཅང་ཡང་མི་སྦོམ་པ། ཧ་ཅང་ཡང་མི་དཀར་བ། ཧ་ཅང་ཡང་མི་སྔོ་བ། ཁ་ནས་མེ་ཏོག་ཨུད་པ་ལའི་བསྲུང་འབྱུང་བ། ལུས་རྣམས་ལས་ཙན་དན་གྱི་དྲི་འབྱུང་བ། ལྷའི་བུ་མོ་ལྟར་གསལ་བ། ཤིན་དུ་ཡིད་ཏུ་འོང་བའི་ཚུལ་དང་ལྡན་པ་གླུ་དབྱངས་ལེན་པ་དེ་དག་གི་ནང་ན་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གནས་སོ། །གླུ་དབྱངས་དང་། རོལ་མོའི་སྒྲ་དེ་ལ་ཀྱེ་མའོ་
བདག་དང་མི་མཛའ་བའི་ཚོགས་ཆེན་པོ་དང་། བདག་གི་དགེ་བའི་ཆོས་ཡོངས་སུ་ཉམས་པར་བྱེད་པ་བྱུང་སྟེ་བལྟ་བར་མི་བྱའོ་སྙམ་པའི་སེམས་བསྐྱེད་དོ། །དེ་དེའི་ཚེ་འདི་ལྟ་སྟེ་དཔེར་ན་གསད་པར་བྱ་བའི་མི་མཐོང་ན་ངོ་མཚར་གྱི་སེམས་མི་སྐྱེད་པ་དེ་བཞིན་དུ་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཡང་བུད་མེད་དེ་དག་མཐོང་ན་ངོ་མཚར་དུ་མི་འཛིན་ཏོ། །གྲོང་ཁྱེར་དེ་ལ་ཡང་གྲོགས་དང་ལྷན་ཅིག་ངོ་མཚར་དུ་མི་འཛིན་ཏོ། །ལོ་བཅུ་པོ་དེ་དག་གི་བར་དུ་བདག་ནམ་ཞིག་ན་མི་མཛའ་བའི་ཚེ་གོས་རྣམ་པ་འདི་ལྟ་བུའི་ནང་ན་ཐར་པར་འབྱུང་སྙམ་པ་དང་། བདག་ནམ་ཞིག་ན་བག་ཡོད་པའི་སྤྱད་པ་སྤྱོད་ཅིང་ངེས་བདག་ཐར་པར་འགྱུར་ཞིག་གུ་སྙམ་བདེ་ལྟ་བུའི་སེམས་འཇུག་པ་མ་གཏོགས་པར་ནམ་ཡང་གཟུགས་ཀྱི་མཚན་མ་བཟུང་བར་མ་གྱུར་ཏེ། དེ་བཞིན་དུ་སྒྲའི་མཚན་མ་དང་། དྲིའི་མཚན་མ་དང་། རོའི་མཚན་མ་དང་། རེག་གི་མཚན་མ་བཟུང་བར་གྱུར་ཏོ། །དེ་ནས་བུ་མོ་དེ་དག་གི་རྒྱལ་པོ་འོད་ཟེར་ལྡན་ལ་ལྷ་གཞོན་ནུའི་མི་རོལ་ཏོ། །དགྱེས་པར་མི་མཛད་དོ། །དགྱེས་དགུར་མི་སྤྱོད་དོ་ཞེས་སྨྲས་སོ། །བམ་པོ་གསུམ་པ་སྟེ་ཐ་མ། །ཡུལ་འཁོར་སྐྱོང་དེ་ནས་རྒྱལ་པོ་འོད་ཟེར་ལྡན་རྒྱལ་པོ་བརྒྱད་ཁྲི་དང་ལྷན་ཅིག་ཏུ་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ག་ལ་བ་དེར་སོང་སྟེ་ཕྱིན་ནས་གདོང་ལས་མཆི་མ་འཛག་ཅིང་འདར་ཏེ་མྱ་ངན་གྱིས་ས་ལ་འགྱེལ་ཏོ། །དེས་ལས་ལངས་ནས་རྒྱལ་བུ་གཞོན་ནུའི་བསོད་ནམས་ཀྱི་འོད་ཟེར་ལ་ཚིགས་སུ་བཅད་དེ་སྨྲས་པ། བུ་ཅིག་རིན་ཆེན་དམ་པ་ང་ལ་ལྟོས་ཤིང་སྨྲོས། །ང་ནི་མྱ་ངན་གཟིར་ཏེ་ཁྱིམ་ནང་ས་ལ་འགྱེལ། །སུ་ཡིས་ཁྱོད་མི་དགའ་བྱས་དེ་མྱུར་ངལ་སྨྲོས། །དེ་འདིར་དེའུ་རེ་ཆང་པ་ཆེན་པོས་བཅད་པར་བྱ། །ཁྱོད་ཀྱི་ཆེད་དུ་ངས་འདིར་ཡིད་ཀྱིས་གང་སྨྲས་པ། །ལྷ་ཡི་ཁྱིམ་ལྟར་ཉམས་དགའ་གྲོང་ཁྱར་དེར་ལྟོས་ཤིག །འདི་ལ་ཡན་ལག་མ་ཚང་ཅི་ཡོད་དེ་མྱུར་སྨྲོས། །བརྒྱ་བྱིན་ལྟ་བུའི་འབྱོར་པ་དེ་རིང་ཁྱོད་ལ་བསྟན། །པད་མའི་མིག་ཅན་མཛེས་མྱ་ངན་ཉམ་ཐག་པ། །ལྷ་ཡི་བུ་མོ་ལྟ་བུའི་བུད་མེད་ཚོགས་སྨྲ་ལྟོས། །མྱ་ངན་ཐུལ་ཏེ་དེ་དག་རྣམས་དང་དེ་རིང་རྩེས། །ཅི་ཕྱིར་ཟུག་རྔུས་ཟུག་བཞིན་
ལུས་དམན་སེམས་ཤིང་འདུག །དེ་དག་རབ་དགའ་ཚུལ་མཁས་དབྱངས་ཀྱི་ཡན་ལག་སྙན། །གླུ་དབྱངས་ཕེག་རྡོབ་དུས་ཀྱི་རྣམ་པར་ངེས་པ་ཤེས། །ཁྱོད་དགའ་དུས་ལ་དེང་བབ་མྱ་ངན་མ་བྱེད་ཅིག །པད་མ་རྙིས་པ་ལྟ་བུར་ཅི་ཕྱིར་དེར་ལུས་དམན། །མེ་ཏོག་འབྲས་བུ་ཡལ་ག་འདབ་རྒྱས་བསྐྱེད་མོས་ཚལ། །སྣ་ཚོགས་སྟེང་བཞག་ལྷ་ཡི་སྣ་ཚོགས་ཤིང་རྟ་འདྲ། །སོམས་ཤིག་ཁྱོད་བྱིན་ཚོད་འདི་ནི་ཐོག་མ་ཡིན། །དགའ་བའི་དུས་ལ་བབ་ཀྱིས་དེང་འདིར་བུ་དགའ་གྱིས། །ཁྱོད་ཀྱི་ཁྲུས་ཆེད་རྫིང་འདི་ལྷ་རྣམས་ཀྱི་ཡང་འདྲ། །ཨུད་པ་ལ་དང་པད་མ་དག་གི་ཚལ་གྱིས་གང་། །པད་མ་རྣམས་ཀྱང་བུང་བ་རྒྱགས་པ་མཆོག་གིས་བརྒྱན། །དེ་ལ་བུ་སོམས་སུ་ཞིག་འདི་ལ་དགའ་མི་བྱེད། །དང་བ་རྨ་བྱ་ནེ་ཙོ་ཁུ་བྱུག་རི་སྐེགས་དང་། ཀ་ལ་པིང་ཀ་ཤང་ཤང་ཏེའུ་དང་ཀུན་ལ། །ཡིད་འོང་སྒྲ་ལྡན་གངས་ནི་སྤོས་ངད་ལྡན་འདྲ་བ། །ཐོས་ནས་མི་གང་འདི་ལ་དགའ་བ་འཐོབ་མི་འགྱུར། །གཞལ་མེད་ཁང་དང་མུ་ཏིག་དྲར་བཅས་ནོར་བུ་གཙུག །གསེར་དང་བཻ་དུ་ཪྻས་སྤྲས་རྣམས་རྒྱལ་ཁང་པ་འདྲ། རིན་ཆེན་ཁྲི་མཆོག་དམ་པ་རྣམས་ཀྱང་རབ་བཏིང་བ། །གསེར་དྲིལ་གཡེར་ཀ་ཏ་ལའི་ཕྲེང་བ་སྒྲ་སྙན་པ། །ཟབ་ཅིང་བརྟན་པ་མཆོག་གི་སིལ་སྙན་སྒྲ་སྒྲོགས་པ། །ཁྱོད་ཀྱི་ཆེད་དུ་སྲང་རྣམས་སུ་ཡང་སྦྱིན་རྒྱ་ཆེ། །བུ་མོ་སྟོང་དང་གླུ་མཆོག་སྙན་པའི་སྒྲ་འབྱིན་ལ། །དགའ་ཚལ་ལྷ་ཡི་བུ་མོ་རྣམས་ཀྱི་འདྲ་བ་སྒྲོག །མཐོ་རིས་འདྲ་བའི་གནས་ཡིད་འོང་ལ་ཅི་ཡི་ཕྱིར། །རྣམ་པར་གཡེང་བའི་སེམས་ཀྱིས་བུ་ཁྱོད་དགའ་མ་བྱེད། །གཞོན་ནུ་ཁྱོད་ཀྱི་རྩེར་གྲོགས་ལྷ་ཡི་བུ་འདྲ་བ། །བུ་མོ་དེ་དག་རྣམས་དང་ལྷན་ཅིང་རྩེད་མོ་གྱིས། །ཁྱོད་ཀྱི་ཕ་དང་མ་ཡང་མཆི་མས་བརྣངས་ཤིང་འདུག །སྐྱེ་བོ་འདི་ལ་སྡུག་བསྔལ་སྙིང་རྗེ་མེད་དམ་ཅི། །འདུས་བྱས་ཡིད་བྱུང་འདོད་པའི་ལོངས་སྤྱོད་དོན་མི་གཉེར། །ཡོན་ཏན་བསགས་པ་སྲིད་པའི་སྐྱོན་མཐོང་དེས་སྨྲས་པ། །འཁོར་བའི་དྲ་བར་ཆུང་པའི་འགྲོ་བ་འདི་བལྟས་ནས། །ཐར་པ་དོན་གཉེར་པ་ལ་སྨྲས་པ་ཡང་གསོན་ཅིག །ལྟ་ཅིག་སུས་ཀྱང་བདག་ལ་མི་དགའ་བགྱིས་མ་མཆིས། །
བདག་ནི་ད་ལྟར་འདོད་པའི་ཡོན་ཏན་མོས་མ་ལགས། །ཉོན་མོངས་གང་དག་ངན་འགྲོ་གཡང་སར་ལྟུང་བྱེད་པ། །སྡུག་པ་ཐམས་ཅད་དགྲ་དང་མཚུངས་ཏེ་རྗེས་མི་སྲུང་། །མི་མཁས་བྱིས་པ་སྐྱེ་བོ་དེ་དག་བུད་མེད་དགའ། །བདུད་ཀྱི་ཞགས་པ་ཡོན་ཏན་འཆིང་པ་གཡང་ས་ཆེ། །རྟག་ཏུ་འཕགས་པའི་སྐྱེ་བོས་དེ་དག་དེ་ལྟར་སྨད། །སེམས་དམྱལ་དེ་ན་འགྲོ་མྱ་ངན་རྩ་བ་ཅི་ཕྱིར་བསྟེན། །བུད་མེད་འདི་དག་ལྤགས་པའི་གཟུགས་ཀྱིས་དགའ་བ་ཙམ། །བདག་ནི་རུས་རྒྱུས་འཁྲུལ་འཁོར་མིག་གཙང་དོན་མི་གཉེར། །ཁྲག་དང་གཅིན་དང་གཙང་བ་དྲི་མ་འཇོག །གསལ་བ་དུར་ཁྲོད་འདྲ་ལ་ཇི་ལྟར་དགའ་བར་བགྱི། །གླུ་དང་གར་འདོད་རོལ་མོའི་དབྱངས་སྒྲ་གཟུང་མི་བགྱི། །དགའ་བ་རྨི་ལམ་འདྲ་བ་མི་མཁས་རྨོངས་པར་བགྱིད། །ཀུན་དུ་རྟོག་པ་སྲེད་གྱུར་མི་མཁས་འདིར་བརླག་གིས། །ཅི་ཕྱིར་བྱིས་པའི་སྐྱེ་བོ་ལྟ་བུར་ཉོན་མོངས་འཁོལ། །ཤིང་ལྷུག་འདི་དག་ཐམས་ཅད་དགུན་གྱི་དུས་བྱུང་ན། །དགོན་དུང་ཤིང་ལྟར་འགྱུར་ཏེ་དགའ་བར་འགྱུར་མ་ལགས། །མི་རྟག་འདི་ཡིས་དཔལ་རྣམས་ཐམས་ཅད་བཤིག་གྱུར་ཏེ། །སྲོག་གཡོར་གྱུར་ཀྱང་གཏི་མུག་གིས་ནི་བག་མེད་གྱུར། །སེམས་ནི་རྒྱ་མཚོ་ལྟ་བུར་ཚིམ་པར་བྱེད་མི་ནུས། །སྲིད་པ་རབ་ཏུ་འཕེལ་ལ་དགའ་བས་ཕྱིར་ཞིང་འདོད། །འདོད་རྒྱུས་ཕན་ཚུན་གསོད་པའི་འགྲོ་ལ་བལྟས་ནས་སུ། །འདི་ན་ཇི་ལྟར་ལྷུན་པོ་རླུང་གིས་མི་བསྐྱོད་པ་བཞིན། །རྒྱལ་པོ་ཁྱོད་དག་ཕ་དང་ལྷན་ཅིག་སྐྱེས་པ་དང་། གཉེན་གྱི་སྐྱེ་བོ་ཆུང་བ་ངན་སོང་བདག་སྐྱབས་མིན། །བདག་ཅག་ཐམས་ཅད་རྩྭ་རྩེའི་ཟིལ་པ་འདྲ་བ་སྟེ། །སེམས་ཀྱི་དབང་དུ་འགྲོ་བར་མ་གྱུར་བག་ཡོད་མཛོད། །མི་དབང་དར་ལ་བབ་པ་མི་རྟག་ཅིར་མི་རུང་། །སྲོག་ཀྱང་རིའི་ཆུ་ལྟར་མྱུར་འགྲོ་ཅིར་མི་རུང་། །འདུས་བྱས་འདི་ཟབ་གློག་སྤྲིན་འདྲ་སྟེ་ཅིར་མི་རུང་། །རྒྱལ་པོ་མཁས་ལ་སྲིད་གསུམ་འདོད་ལ་ཆགས་པ་མང་། །ལྷ་རྣམས་ཀྱང་ནི་བདག་ལ་བག་ཡོད་འགྱུར་གྱིས་ཤིག །བྱང་ཆུབ་སེམས་དཔའི་ཡུལ་ལ་ཆགས་པ་མིན་ཞེས་བསྐུལ། །འཇིག་རྟེན་ཕན་པ་སྙིང་བརྩེས་སངས་རྒྱས་འདིར་འགྱུར་བགྱི། །རྒྱལ་པོ་བག་མེད་སྤྱོད་
ལ་བྱང་ཆུབ་ཡོང་མ་ལགས། །རྒྱལ་པོ་གང་ཞིག་འདོད་པས་གཡེན་སྤྱོ་སེམས་འཁོལ་བ། །དེ་ནི་བསོད་ནམས་ཆུ་ཟ་དགའ་ཞིང་མཐོ་རིས་ལྡོག །འཚེ་བ་ཤིན་དུ་རྒྱགས་པ་ནམ་ཡང་སྤྱད་མི་བགྱི །སྐོན་པར་བཅུག་པའི་བྱ་ལྟར་ཇི་ལྟར་དབུགས་ཕྱིར་འགྱུར། །ཁམས་རྣམས་སྦྲུལ་དང་འདྲ་ཞིང་ཕུང་པོ་གཤེད་མ་འདྲ། །ཟག་དང་བཅས་པའི་སེམས་ནི་དོན་མེད་གྲོང་སྟོང་མཚུངས། །རྒྱལ་པོ་འདི་ན་དུག་སྡོང་མེ་ཏོག་རྒྱལ་འདྲའི་ལུས་། ཆུ་བོ་རྣམས་ཀྱིས་པད་མ་བདག་འདིར་ཇི་ལྟར་དགའ། །རབ་ཏུ་གསལ་གནས་འབར་བ་ནམ་མཁའ་ལྟ་བུ་དང་། །འགྲོ་བ་ངན་ཞུགས་འགྲོ་བ་འདི་ལ་བདག་བལྟས་ནས། །རྒྱལ་པོ་དེ་རིང་འདིར་ནི་དེ་དག་དགྲོལ་བ་དང་། །གཉིད་ལོག་སད་པར་བགྱི་དང་ནད་པ་གསོ་བ་དང་། །ཟུག་རྔུ་རྩད་ནས་གདོན་དང་ལམ་ལོག་བཟློག་པའི་ཕྱིར། །བདག་གིས་ཞི་བའི་ཆོས་ཀྱི་གྲུ་ནི་མྱུར་དུ་སྦྱར། །སྟོང་ཆེན་དུ་ནི་བཅིངས་པ་རྣམ་གྲོལ་རབ་བསྒྲགས་ནས། །ལེགས་པར་བཤད་པས་རིང་ནས་དབུལ་བ་ཚིམ་པར་བགྱི །ངན་འགྲོའི་ལམ་དུ་ལྷུང་བ་དག་ཀྱང་གདོན་པར་བགྱི །ལོང་བ་མིག་སྦྱིན་སྲིད་པའི་ཁྲི་ཤིང་བསྐམ་པར་བགྱི །རྣམ་གྲོལ་མཆོག་ཕྱིར་ཤེས་རབ་འོད་ཟེར་མར་མེ་བྱས། །དེ་ཡིས་སྲིད་གསུམ་གར་ལ་ལྟ་བ་འདྲར་མཐོང་འགྱུར། །བྱམས་དང་སྙིང་བརྩེ་སྙིང་རྗེ་ཕ་རོལ་ཕྱིན་པ་སྤྲིན། །སེམས་ཅན་དོན་འགྲུབ་ལྷག་མཐོང་གློག་གི་ཕྲེང་བ་དང་། བྱང་ཆུབ་ཡན་ལག་བདེ་བསིལ་ཆར་རྒྱུན་འདྲ་བ་ཡིས། །འགྲོ་བ་ཡིན་རིག་དུས་ནས་གདུངས་པ་བསིལ་བར་བགྱི། །རྒྱལ་པོ་བདག་ནི་དེ་དྲན་གྱུར་ནས་འདིར་མཆིས་ཏེ། །བདག་ནི་འདུས་བྱས་འདོད་པ་ཀུན་ལ་སྨོན་མ་མཆིས། །བྱང་ཆུབ་དོན་གཉེར་སེམས་ཅན་ཆེད་དུ་འདིར་སྦྱང་བགྱི །གཅིག་ཏུ་ངེས་ཏེ་བདག་ནི་སྲེད་ལ་དགའ་མ་མཆིས། །རྒྱལ་པོ་འདི་ན་ཤེས་བཞིན་སུ་ཞིག་དགྲ་ཁྲོད་གནས། །བློ་དང་ལྡན་པ་སུ་ཞིག་འཇིགས་བཅས་ལམ་དུ་འགྲོ། །མིག་དང་ལྡན་པ་སུ་ཞིག་འདི་ན་གཡང་སར་ལྷུང་། །བྱང་ཆུབ་ལམ་ཤེས་ནས་ནི་སུ་ཞིག་བག་མེད་འགྱུར། །འགྲོ་བ་ཐམས་ཅད་རྒྱུན་འགྲོ་བ་དག་ནི་རྒྱུན་ཟློག་པ། །རྒྱལ་པོ་ཚིག་ཙམ་གྱིས་ནི་བྱང་ཆུབ་ཐོབ་མི་ནུས། །ལྷུན་པོའི་རྩེ་ནས་
རྒྱ་མཚོའི་ནང་དུ་མཆོད་སྤྲོ་ཡི། །བདག་འདིར་འདོད་པ་རྣམས་ཀྱིས་ཡིད་དགའ་དེ་ལྟ་མིན། །རྒྱལ་པོ་དམ་པ་གཉེན་ཐབས་གཅིག་མྱུར་དུ་བཞུད། །ཡུལ་འཁོར་དགའ་བ་ཐམས་ཅད་འཇིག་རྟེན་ཀུན་ལ་སྩོལ། །གང་དག་བསམ་པ་ཇི་བཞིན་བླངས་ནས་མཆི་བར་འགྱུར། །ཡང་བདག་བག་མེད་རྒྱལ་སྲིད་བྱེ་བ་འཚལ་མ་འགས། །བུད་མེད་ཚོགས་ཀྱི་ནང་དུ་གནས་པས་བྱང་ཆུབ་དང་། །གྲུབ་བདེ་ཞི་བ་བླ་མེད་གནས་ནི་ཐོབ་མི་ནུས། །དགོན་པར་དགྱེས་པས་རྒྱལ་བས་བྱང་ཆུབ་བརྙེས་པས་ན། །བདག་ནི་རི་དང་ནགས་ཁྲོད་མཆིས་ཏེ་གནས་པར་བགྱི། །ཡུལ་འཁོར་སྐྱོང་དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཁང་བཟངས་ཀྱི་ནང་ན་འདུག་བཞིན་དུ་ཡིད་བྱུང་བ་དང་ལྡན་པའི་སེམས་ཀྱིས་བུད་མེད་དེ་དག་དང་ལྷན་ཅིག་འཆག་ཅིང་དེ་སྤྱོད་ལམ་གསུམ་གྱིས་གནས་སོ། །གསུམ་གང་ཞེ་ན། འདི་ལྟ་སྟེ། འགྲེང་བ་དང་། འགྲོ་བ་དང་། འདུག་པ་སྟེ། རྨུགས་པ་དང་གཉིད་ཡོངས་སུ་སྤངས་སོ། །ཁང་པའི་སྟེང་དུ་སོང་སྟེ་ས་བརྒྱད་ལ་གནས་ནས་དེ་ནམ་གྱི་གུང་ལ་བབ་པའི་དུས་ཀྱི་ཆེ་གནས་གཙང་མའི་རིས་ཀྱི་ལྷ་རྣམས་སངས་རྒྱས་ཀྱིས་བསྔགས་པ་རྒྱ་ཆེར་བརྗོད་ཅིང་བར་སྣང་ལ་འགྲོ་བ་དང་། ཆོས་དང་། དགེ་འདུན་གྱི་བསྔགས་པ་རྒྱ་ཆེར་བརྗོད་ཅིང་འགྲོ་བ་ཐོས་སོ། །ཐོས་ནས་ཀྱང་ཡུལ་འཁོར་སྐྱོང་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་སྤུ་ཟིང་ཞེས་བྱེད་པར་གྱུར་ནས་མཆི་མ་ཟག་ཅིང་སྐྱོ་བ་སྐྱེས་ཏེ་ཐལ་མོ་སྦྱར་ནས་ལྷ་རྣམས་ལ་ཚིགས་སུ་བཅད་དེ་སྨྲས་པ། །ལྷ་རྣམས་སྡུག་བསྔལ་བདག་ལ་ཐུགས་རྗེ་བསྐྱེད་ནས་ནི། །གལ་ཏེ་སྐྱོ་མི་མཛད་ན་ཅུང་ཞིག་ཞུ་བར་བགྱི །སུ་ཡི་ཡོན་ཏན་བརྗོད་ཅིང་བར་སྣང་འདི་ལས་བཞུད། །ཚིག་དེ་ཐོས་ནས་བདག་འདིར་ཡིད་ནི་བདེ་བར་གྱུར། །ཡུལ་འཁོར་སྐྱོང་དེ་ནས་ལྷ་དེ་དག་གིས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་ཚིགས་སུ་བཅད་པས་སླར་སྨྲས་པ། གཞོན་ནུ་ཁྱོད་ཀྱིས་སངས་རྒྱས་ཐོས་པར་མ་གྱུར་ཏམ་དོན་གྲུབ་བློ་ཞེས་བྱ་སྟེ་སྐྱབས་མེད་རྣམས་ཀྱིས་སྐྱབས། །དེ་བཞིན་སྤྱོད་མཁས་བསོད་ནམས་ཤེས་རབ་ཡོན་ཏན་མཆོག །
དེ་ཡི་དགེ་འདུན་ཁྲག་ཁྲིག་སྟོབས་བཅུ་བསམ་གཏན་པ། །བསོད་ནམས་ཀྱི་འོད་ཟེར་གྱིས་སྨྲས་པ། །བདག་ནི་རྒྱལ་བ་བལྟ་འཚལ་དེ་ཡི་གཟུགས་ཅི་འདྲ། །དེ་ཡི་ཁ་དོག་ཅི་འདྲ་ཐམས་ཅད་བཀའ་སྩོལ་ཅིག །ཇི་ལྟར་ན་སེམས་ཅན་ཀུན་ལ་མགོན་གཅིག་འགྱུར་བ། །བྱང་ཆུབ་སྤྱོད་པ་ཅི་འདྲ་བ་དག་ནི་ཡོངས་སུ་འདིར་དེ་ནས་ལྷ་དེ་དག་གིས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་ཚིགས་སུ་བཅད་པས་སླར་སྨྲས་པ། །དེ་ཡི་གཙུག་གཏོར་དེ་ཡི་རྩེ་ལ་གསེར་མཛེས་བཞིན། །དབུ་སྐྲ་འཇམ་ཞིག་མཛེས་ལ་གཡས་སུ་འཁྱིལ་བ་སྟེ། དེ་ཡི་མཛོད་སྤུ་མཁའ་ལ་ཉི་ལྟར་ལྷམ་མེ་བ། །ནོར་བུ་ཤེལ་ལྟར་རྣམ་པར་དག་ཅིང་གཡས་སུ་འཁྱིལ། །སྤྱན་དག་བུང་བའི་ཚོགས་དང་ཨུད་པ་ལ་སྔོན་པོ་འདྲ། །མི་དབང་སེང་གེའི་འགྲམ་པ་རང་བྱུང་བིམ་པའི་སྒྲོས། །སེམས་ཅན་ལྷན་ཅིག་འོད་ཟེར་བྱེ་བ་མཐའ་ཡས་འགྱེད། །སྟོང་གསུམ་རྒྱས་པར་འགེངས་ཤིང་ངན་འགྲོ་རྣམས་ཀྱང་སྐེམས། །དེ་ཡི་ཚེམས་ནི་རབ་དཀར་ཁབ་དངུལ་ལྟར་དག །བཞི་བཅུ་མཉམ་ཞིང་ཐགས་བཟང་རྨད་བྱུང་ལེགས་པར་གྲུབ། །རྒྱལ་བ་དམ་པ་མཆོག་དེའི་མཆེ་བ་བཞི། །དེ་ཡི་ལྗགས་ནི་རབ་ཡངས་རང་གི་ཞལ་གདོང་ཁེབས། །རྒྱལ་བ་དེ་ཡི་གསུང་ནི་རི་མཆོག་འདྲ་བའི་དོན། །ཤིན་དུ་ཚིམ་བྱེད་འབྲེལ་ཅིང་གྱ་གྱུ་མེད་པ་སྟེ། །ཚངས་དབྱངས་ཤིན་དུ་སྙན་པ་སིལ་སྙན་སྟོང་འདྲ་བ། །ཡིད་གཉིས་འཇོམ་པ་འདོད་པ་རྣམས་ནི་ཚིམ་བྱེད་པ། །རྒྱལ་བའི་གསུང་ནི་ལྷ་ཡི་སྒྲ་སྐད་ཚིམ་བྱེད་པ། །ཡོན་ཏན་སྣ་ཚོགས་ཚང་བ་བྱང་ཆུབ་ཡན་ལག་ལག་འཐུན། །ཆོས་ཀྱི་ཕྲེང་བ་ཡིད་འོང་བརྒྱ་སྟོང་རབ་རྒྱུས་པས། །སིལ་སྙན་དགའ་བ་བསྒྲགས་པ་ལྷ་ཀླུ་ཉམས་དགའ་བ། །མི་ཅི་ཀ་ལ་པིང་ཀ་ཁུ་བྱུག་གདུང་བ་དང་། །རྨ་བྱ་དང་བ་སྒྲ་སྙན་ཀུ་ན་ལ་ཡི་སྒྲ། །ཚངས་པའི་སྒྲ་དབྱངས་མི་ཅི་དབྱངས་ཀྱི་ཡན་ལག་འདྲ། །མ་འཁྲུལ་སྡིག་མེད་དོན་རྣམས་ཐམས་ཅད་རྟོགས་བྱེད་པ། །རྨད་བྱུང་ཤེལ་ལྟར་འཇམ་ཞིང་མཁས་པའི་ཡིད་འོང་བ། །སྐུལ་བ་འདུལ་བར་འགྱུར་བར་སྤྱོད་པ་དག་འགྱུར་བ། །གཞན་གྱི་སྤྱོད་
དང་འཐུན་པ་ཞུས་ན་ཚིམ་བྱེད་པ། །ཆོས་ཀྱི་དབང་ཕྱུག་དེ་ཡི་གསུང་གི་ཡོན་ཏན་འདི། །སྟོན་པའི་མགུལ་མཛེས་དུང་དང་འདྲ་ཞིང་དཔུང་མགོ་ཟླུམ། །དབྱུག་པ་ལྟ་བུར་ཕྱག་རིང་དེ་ཡི་བདུན་ཡང་མཐོ། །ཕྱག་མཛེས་སྣ་ཚོགས་སོར་མོ་རྣམས་ནི་རིང་ཞིང་ཟླུམ། །རྒྱལ་བ་དེ་ཡི་སྐུ་ནི་བཙོ་མའི་གསེར་གྱི་མདོག །བ་སྤུ་གཡས་སུ་འཁྱིལ་ཅིང་གྱེན་དུ་རེ་རེ་སྐྱེས། །ལྟེ་བ་མཐའ་དག་ཟབ་ཅིང་གསང་སྦུབས་རྟ་ཡི་འདྲ། །རང་བྱུང་ཨེ་ནྱའི་བྱིན་པ་གླང་པོའི་སྣ་འདྲའི་བརླ། །ཞབས་མཐིལ་མཛེས་པར་བྲིས་པ་བཀྲ་ཤིས་འཁོར་ལོའི་མཚན། གླང་པོའི་དབང་པོའི་འགྲོས་སྟོབས་སེང་གེའི་རྩལ་གྱི་སྟོབས། །ཁྲུ་མཆོག་བསྒྱིངས་པའི་སྟོབས་ཅན་དབང་པོའི་མཆོད་སྡོང་རྒྱས། །མཁའ་ལས་མེ་ཏོག་ཆར་བབ་མེ་ཏོག་གདུགས་སུ་གྱུར། །གཤེགས་པའི་རྗེས་འགྲོ་འདི་དག་དེ་ཡི་རྨད་བྱུང་ཆོས། །རྒྱལ་བ་རྙེད་དང་མ་རྙེད་བདེ་དང་སྡུག་བསྔལ་དང་། གྲགས་དང་མ་གྲགས་དེ་བཞིན་བསྟོད་དང་སྨད་པ་ཡིས། །པད་མ་ཆུ་ལྟར་ཐམས་དུ་ཡང་གོས་པ་ལྟར། །མི་ཡི་སེང་གེ་དེ་འདྲ་མཚུངས་པའི་སེམས་ཅན་མེད། །ཡུལ་འཁོར་སྐྱོང་དེ་ནས་རྒྱས་བུ་གཞོན་ནུ་བསོད་ནམས་ཀྱི་འོད་ཟེར་གྱིས་སངས་རྒྱས་ཀྱི་བསྔགས་པ་ཐོས་ཤིང་ཆོས་དང་དགེ་འདུན་གྱི་བསྔགས་པ་ཐོས་ནས་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ་དགའ་བ་དང་ཡིད་བདེ་བ་སྐྱེས་པར་གྱུར་ཏོ། །ཡུལ་འཁོར་སྐྱོང་དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་དེ་ཅི་འདྲ་བ་དང་། དེའི་དགེ་འདུན་ཕུན་སུམ་ཚོགས་པ་ཅི་འདྲ་བ་དང་། །དེས་མངོན་དུ་བྱས་པའི་ཆོས་ཅི་འདྲ་བ་དང་། དེའི་སློབ་མ་ཕུན་སུམ་ཚོགས་པ་ཅི་འདྲ་བ་དང་། ཇི་ལྟར་འཁོར་པ་ཡང་བ་དང་ཕྲད་པ་དང་། བྱས་པ་མི་གཟོ་བ་དང་། ཇི་ལྟར་འཁོར་བ་ན་བྱིས་པ་སོ་སོའི་སྐྱེ་བོ་དག་བྱས་པ་མི་གཟོ་བ་དང་། ཇི་ལྟར་འཇིག་ཚོགས་ལ་ལྟ་བ་ཡང་བ་དང་། ཇི་ལྟར་ཁྱིམ་གྱི་གནས་ཉེས་དམིགས་མང་བ་དང་། ཇི་ལྟར་འདོད་པ་དག་ཉེས་པ་མང་བ་དང་། ཇི་ལྟར་མཁས་པ་རྣམས་ཀྱིས་བག་མེད་པ་དམད་བ་དང་། ཇི་ལྟར་མ་རིག་པའི་མུན་ནག་རྨོངས་པ་
དང་། ཇི་ལྟར་འདུ་བྱེད་རྣམས་རྟོགས་པར་དཀའ་བ་དང་། ཇི་ལྟར་སེམས་གདུལ་དཀའ་བ་དང་། ཇི་ལྟར་མི་དང་གཟུགས་ཟབ་པ་དང་། ཇི་ལྟར་སྐྱེ་མཆེད་དྲུག་དབུགས་འབྱིན་པ་མེད་པ་དང་། ཇི་ལྟར་རེག་པ་ཡོངས་སུ་མ་ཤེས་ཏེ་སྡུག་བསྔལ་རྣམ་པར་སྨིན་པ་དང་། ཇི་ལྟར་ཚོར་བ་ཉེས་དམིགས་མང་བ་དང་། ཇི་ལྟར་སྲིད་པའི་འཆིང་བ་དམ་པ་དང་། ཇི་ལྟར་ཉེ་བར་ལེན་པ་ལས་འབྱུང་བར་དཀའ་བ་དང་། ཇི་ལྟར་སྲིད་པའི་སྲེད་པ་འཕགས་པ་མ་ཡིན་པ་དང་། ཇི་ལྟར་སྲེད་པ་ཡོད་ན་སྐྱེ་བ་རྒྱུན་གཅད་དཀའ་བ་དང་། ཇི་ལྟར་སྲིད་པའི་འཆིང་བ་དམ་པ་དང་། ཇི་ལྟར་ཉེ་བ་ལེན་པ་ལས་འབྱུང་བར་དཀའ་བ་དང་། ཇི་ལྟར་སྲིད་པའི་སྲེད་པ་འཕགས་པ་མ་ཡིན་པ་དང་། ཇི་ལྟར་སྲིད་པ་ཡོད་ན་སྐྱེ་བ་རྒྱུན་གཅད་དཀའ་བ་དང་། ཇི་ལྟར་རྒ་བ་རྣམ་པར་འགྱུར་བར་བྱེད་པ་དང་། ཇི་ལྟར་ནད་ཀྱིས་རྣམ་པར་འཇིག་པར་བྱེད་པ་དང་། ཇི་ལྟར་འཆི་བ་རྗེས་སུ་མི་སྲུང་བ་དང་། ཇི་ལྟར་འཇུག་པ་རོ་བྲོ་བ་ཆུང་བ་དང་། ཇི་ལྟར་སྲིད་པར་འགྲུབ་པ་ཉེས་དམིགས་མང་བ་དང་། ཇི་ལྟར་དེ་བཞིན་གཤེགས་པའི་བསྟན་པ་ཉམས་དགའ་བ་ལྟར་འདི་མི་ནུས་ཏེ། འདོད་པའི་ཁོལ་པོ་ཉོན་མོངས་པ། རྨོངས་པ། སེམས་ཐབ་ཅན། བག་མེད་པ་ལ་དགའ་བ། བྱིས་པའི་ནང་ན་འདུག་པ། ཚུལ་བཞིན་མ་ཡིན་པའི་སེམས་དང་ལྡན་པ། འཁོར་བ་ལ་ཆགས་པའི་སེམས་དང་ལྡན་པ། སྐྱེ་བོ་མ་རུངས་པའི་ནང་ན་འདུག་པས་ནི་བདེ་འགྲོའི་ལམ་ཡང་རྣམ་པར་སྦྱངས་བར་མི་ནུས་ན། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་ལྟ་ག་ལ་འགྱུར་སྙམ་མོ། །དེ་ཡང་འདི་སྙམ་དུ་སེམས་ཏེ། བདག་སྒོ་ནས་བྱུང་ན་ནི་ཉེ་དུའི་ཚོགས་ཀྱིས་བར་ཆད་བྱས་སུ་འོང་གིས་བདག་ཁང་སྟེང་འདི་ནས་མཐུར་དུ་མཆོད་དོ་སྙམ་མོ། །ཡུལ་འཁོར་སྐྱོང་དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་བཅོམ་ལྡན་འདས་དེ་བཞིན་གཤེགས་པ་དོན་གྲུབ་བློ་དེ་ག་ལ་བ་དེ་ལོགས་སུ་ཕྱོགས་ཏེ། ཁང་བ་དེ་ནས་མཆོད་ནས་མཆོངས་ནས་ཚིག་འདི་སྐད་དུ་གལ་ཏེ་དེ་བཞིན་གཤེགས་པ་དེ་ཐམས་ཅད་མཁྱེན་ཅིང་ཐམས་ཅད་གཟིགས་ཤེ་ན་དེ་བཞིན་གཤེགས་པ་དེས་བདག་ལ་དགོངས་སུ་གསོལ་ཞེས་ཀྱང་སྨྲས་སོ། །ཡུལ་འཁོར་སྐྱོང་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་དོན་གྲུབ་བློས་ཕྱག་གཡས་པ་བརྒྱད་སྟེ་འོད་ཕྱུང་ནས། འོད་དེས་རྒྱལ་བུ་གཞོན་ནུ་བསོད་ནམས་ཀྱིས་འོད་ཟེར་ལ་རེག་གོ། །འོད་དེ་ལས་ཀྱང་པད་མ་འདམ་མ་བརྒྱད་སྟོང་ཡོད་པ་ཤིང་རྟའི་འཕང་ལོ་ཙམ་བྱུང་བར་གྱུར་ཏོ། །པད་མ་དེ་ལས་ཀྱང་འོད་ཟར་བརྒྱ་སྟོང་བྱུང་སྟེ་སྣང་བ་ཆེན་པོར་གྱུར་ནས་སྣང་བ་དེས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཁྱབ་པར་གྱུར་ཏོ། །ཡུལ་འཁོར་སྐྱོང་དེ་ནས་རྒྱལ་བུ་གཞོན་བསོད་ནམས་ཀྱི་འོད་ཟེར་པད་མ་དེ་ལ་འདུག་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་གྲུབ་བློ་དག་ལ་བདེ་ལོགས་སུ་ཐལ་མོ་སྦྱར་བ་བཏུད་དེ་སངས་རྒྱས་ལ་ཕྱག་འཚལ་ལོ་ཞེས་ལན་གསུམ་ཆེད་དུ་རྗོད་པ་ཆེད་ཏུ་བརྗོད་དོ། །ཡུལ་འཁོར་སྐྱོང་དེ་ནས་དེ་བཞིན་གཤེགས་པ་དོན་གྲུབ་བློ་དེས་འོད་དེ་བརཏལ་བ་དང་གཞོན་ནུ་དེ་སྡོང་པོ་བཅད་པ་འགྱེལ་བ་བཞིན་དུ་དེ་བཞིན་གཤེགས་པའི་ཞབས་ཀྱི་དྲུང་དུ་བབས་ཏེ། །དེ་བཞིན་གཤེགས་པ་དེ་ལ་ལན་བརྒྱ་སྟོང་དུ་ཕྱག་འཚལ་ཏོ། །ཡུལ་འཁོར་སྐྱོང་དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་བཅོམ་ལྡན་འདས་དེ་བཞིན་གཤེགས་པ་དོན་གྲུབ་བློ་ལ་ཚིགས་སུ་བཅད་དེ་གསོལ་པ། །བདག་ནི་རིང་ནས་ན་སྟེ་རིང་ནས་ལྡོངས། །ཚིགས་ཆེས་སྨན་པའི་རྒྱལ་པོ་ཁྱོད་རྙེད་དོ། །ཇི་ལྟར་བདེ་གཤེགས་བསྟན་ལ་གནས་ནས་ནི། །བདག་གིས་འཐབ་འགྱུར་མགོན་པོ་བསྟན་དུ་གསོལ། །འདྲེན་པ་བདག་གིས་བག་མཆིས་ཐོས་པ་ནི། །མཚན་མོ་བར་སྣང་ལྷ་ལས་ཐོས་ལགས་ཏོ། །ཐོས་ནས་སྐྱོ་སྟེ་བདག་ནི་འདིར་མཆིས་ན། །མི་རྣམས་བག་མཆིས་འགྱུར་བ་ཇི་ལྟ་བུ། །ལམ་ཉམས་པ་ལ་དེ་རིང་སྟོན་གྱུར་ཅིག །ལྡོངས་པར་གྱུར་བའི་མིག་ཏུ་དེང་གྱུར་ཅིག། །དད་པའི་འབྱུང་གནས་གསོ་མཛད་ཐུགས་རྗེ་ལྡན། །གཡང་ས་ཆེན་པོ་འདི་ལས་བདག་ཕྱུང་ཤིག །དབུལ་པོར་གྱུར་པ་བདག་ནི་བསྡུ་བར་མཛོད། །མགོན་པོ་བཅིངས་པ་བདག་ནི་དེང་དགྲོལ་མཛད། །སོམ་ཉིར་བཅས་པའི་ཡིད་གཉིས་བཅད་དུ་གསོལ། །བྱང་ཆུབ་ལམ་ལ་སྤྱོད་པ་བདག་ལུང་
སྟོན། །ཆུས་ཁྱེར་བདག་ལ་འགྲམ་ནི་བསྟན་དུ་གསོལ། །མུན་པ་བདག་ལ་སྒྲོན་མ་མཛད་དུ་གསོལ། །རྨད་གྱུར་བདག་ལ་རྨ་མེད་མཛད་དུ་གསོལ། །སྨན་པའི་རྒྱལ་པོ་བདག་གི་ཟུག་རྔུ་ཕྱུང་། །ཁྱོད་ཀྱི་ངན་འགྲོ་དག་ལས་བདག་ཐར་མཛོད། །སྲིད་པར་དམིགས་པ་འཛིན་པ་གཅད་དུ་གསོལ། །ཡན་ལག་བརྒྱད་པའི་ལམ་གྱི་ལམ་ཆེན་གྱིས། །མྱ་ངན་ཆུ་ཆེན་ཕ་རོལ་བསྒྲལ་དུ་གསོལ། །སྲོག་ནི་ཟད་པའི་ཆོས་ཅན་ཚེ་ཡང་ཐུང་། །དགེ་བ་བར་ཆད་མང་པོ་འབྱུང་བ་སྟེ། །བསོད་ནམས་རྣམ་སྨིན་རིང་པོར་མི་ཐོགས་འགྲུབ། །བདག་གིས་ངལ་བ་དོན་རྙེད་གཅིག་དེས་གསུངས། །བྱང་ཆུབ་སེམས་དཔའ་ཇི་ལྟར་བག་མཆིས་འགྱུར། །ཇི་ལྟར་བྱང་ཆུབ་སྤྱོད་པ་མཆོག་སྤྱད་པ། །འགྲོ་བ་སྲིད་པའི་འཆིང་ལས་མཐར་འགྱུར་བ། །འཇིག་རྟེན་མགོན་པོ་དེ་དག་བདག་ལུང་སྟོན། །ཡུལ་འཁོར་སྐྱོང་དེ་ནས་དེ་བཞིན་གཤེགས་པ་དོན་གྲུབ་བློས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱི་ལྷག་པའི་བསམ་པ་མཁྱེན་ནས་བྱང་ཆུབ་སེམས་དཔའི་སྤྱོད་པ་རྒྱ་ཆེར་ཡང་དག་པར་བསྟན་ཏོ། །རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་དེ་ཐོས་ནས་རྣམ་པར་ཐར་པ་ཞེས་བྱ་བའི་གཟུངས་ཐོབ་བོ། །མངོན་པར་ཤེས་པ་ལྔ་ཡང་ཐོབ་སྟེ། དེ་ནམ་མཁའ་ལ་གནས་ནས་མེ་ཏོག་རྣམས་མངོན་པར་སྤྲུལ་ཏེ་དེ་བཞིན་གཤེགས་པ་དེ་ལ་གཏོར། །མངོན་པར་གཏོར་ཏོ། །ཡུལ་འཁོར་སྐྱོང་དེ་ནས་རྒྱལ་བུ་གཞོན་བསོད་ནམས་ཀྱི་འོད་ཟེར་བར་སྣང་དེ་ལས་བབས་ཏེ་བཅོམ་ལྡན་འདས་དེ་བཞིན་གཤེགས་པ་དོན་གྲུབ་བློ་དེ་ལ་ཚིགས་སུ་བཅད་པས་མངོན་པར་བསྟོད་པ། མཚན་མཆོག་ལྡན་པ་དྲི་མེད་ཟླ་བའི་ཞལ། གསེར་མདོག་འདྲ་བ་ཁྱོད་ལ་ཕྱག་འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཆེན་ཁྱོད་ལ་ཕྱག་འཚལ་ལོ། །རྒྱལ་བའི་དབུ་སྐྲ་འཇམ་མཛེས་སྣུམ་ཞིང་བཟང་། །ཁྱོད་ཀྱི་གཙུག་གཏོར་འདི་ན་རི་རྒྱལ་བཞིན། །གཙུག་གཏོར་མི་མཐོང་ཁྱོད་དང་མཚུངས་མ་མཆིས། །ཐུབ་པ་ཁྱོད་ཀྱི་སྨིན་མཚམས་མཛོད་སྤུ་མཛེས། །ཀུན་དུ་ཟླ་བ་ཁ་
བ་དུང་ལྟར་དཀར། །ཐུགས་རྗེ་གང་གིས་འགྲོ་བ་འདི་གཟིགས་པ། །སྤྱན་མཆོག་བཟང་པོ་ཨུད་པལ་སྔོན་པོ་འདྲ། །རྒྱལ་བ་དྲི་མེད་སྤྱན་ལ་ཕྱག་འཚལ་ལོ། །ལྗགས་ཡངས་སྲབ་ལ་ཟངས་ཀྱི་མདོག་འདྲ་བ། །དེ་ཡིས་རང་གི་ཞལ་གྱི་གདོང་ཡང་ཁེབས། །ཆོས་གསུང་བས་ནི་འགྲོ་བ་འདུལ་བར་མཛད། །འཛམ་སྣུམ་གསུང་ལྡན་ཁྱོད་ལ་ཕྱག་འཚལ་ལོ། །ཚེམས་བཟང་ཤིན་དུ་བརྟན་པ་རྡོ་རྗེ་འདྲ། །བཅུ་དང་སུམ་བཅུ་སྙོམས་ཤིག་ཐགས་བཟང་བ། །འཛུམ་པ་མཛད་ན་འགྲོ་ལ་འདུལ་བར་བགྱིད། །བདེན་གཏམ་སྙན་པ་ཁྱོད་ལ་ཕྱག་འཚལ་ལོ། །རྒྱལ་བ་ཁྱོད་ཀྱི་གཟུགས་དང་མཚུངས་མ་མཆིས། །འོད་ཀྱིས་ཞིང་བརྒྱ་དག་ཀྱང་སྣང་བར་བགྱིད། །འཇིག་རྟེན་ན་ནི་ཚངས་དབང་སྐྱོང་དེ་དག །བཅོམ་ལྡན་ཁྱོད་ཀྱི་འོད་ཀྱིས་ཟིལ་དུ་བརླག །ཨེ་ནྱའི་བྱིན་པ་མཉམ་མེད་བཅོམ་ལྡན་འདས། །གླང་པོའི་རྒྱལ་པོ་རྨ་བྱ་སེང་གེའི་སྟབས། །བཅོམ་ལྡན་གཉའ་ཤིང་དུ་གཟིགས་ཤིང་གཤེགས། །ས་དང་རི་དང་དམ་པ་གཡོ་བར་མཛད། །བཅོམ་ལྡན་ཁྱོད་སྐུ་མཚན་གྱིས་བརྒྱན་པ་སྟེ། །ཁྱོད་ཀྱི་ལྤགས་པ་འཇམ་ཞིང་གསེར་མདོག་འདྲ། །འགྲོ་བས་གཟིགས་འདི་ལྟ་བས་ངོམས་མི་འགྱུར། །ཁྱོད་ནི་མཚུངས་པ་མ་མཆིས་གཟུགས་དང་ལྡན། །ཁྱོད་སྔོན་བསྐལ་པ་བརྒྱར་ནི་དཀའ་ཐུབ་སྤྱད། །ཁྱོད་གཏོད་དུལ་དང་སྦྱིན་པ་ཀུན་ལ་དགྱེས། །སེམས་ཅན་ཀུན་ལ་ཐུགས་རྗེ་བྱམས་ཐུགས་ལྡན། །མཆོག་ཏུ་ཐུགས་རྗེ་ཅན་ལ་ཕྱག་འཚལ་ལོ། །ཁྱོད་ནི་སྦྱིན་དང་ཚུལ་ཁྲིམས་རྟག་ཏུ་དགྱེས། །ཁྱོད་ནི་བཟོད་དང་བརྩོན་འགྲུས་དགྱེས་རབ་བརྟན། །ཁྱོད་ནི་བསམ་གཏན་ཤེས་རབ་འོད་གཟི་མངའ། །མཚུངས་མེད་ཡེ་ཤེས་མངའ་བ་ཕྱག་འཚལ་ལོ། །ཁྱོད་ནི་སྨྲ་བ་ངན་པའི་ཚོགས་ཅན་འཇོམས། །ཁྱོད་ནི་སེང་གེ་ལྟ་བུར་འཁོར་དུ་སྒྲོགས། །ཁྱོད་ནི་སྨན་པའི་རྒྱལ་པོ་དྲི་གསུམ་སེལ། །མཆོག་ཏུ་དགའ་མཛད་ཁྱོད་ལ་ཕྱག་འཚལ་ལོ། །ཐུབ་པ་སྐུ་གསུང་ཐུགས་ནི་རྣམ་པར་དག །པད་མ་ཆུས་ལྟར་སྲིད་པ་གསུམ་མི་གོས། །
ཁྱོད་ནི་ཚངས་དབྱངས་ཀ་ལ་པིང་ཀའི་སྐད། །སྲིད་གསུམ་ཕ་རོལ་གཤེགས་ལ་ཕྱག་འཚལ་ལོ། །ཁྱོད་ཀྱིས་འགྲོ་འདི་སྒྱུ་མ་ལྟ་བུ་དང་། །གར་ལ་ལྟ་དང་རྨི་ལམ་འདྲ་བ་དང་། །བདག་མེད་སེམས་ཅན་མེད་ཅིང་སྲོག་འགྲོ་མེད། །ཆོས་རྣམས་སྨིག་རྒྱུ་ཆུ་ཟླ་འདྲ་བར་མཁྱེན། །སྟོང་པ་ཞི་བ་སྐྱེ་བ་མེད་པའི་ཚུལ། །མ་ཤེས་པས་ནི་འགྲོ་བ་འཁྱམས་གྱུར་ཏེ། །ཐུགས་རྗེ་ཐབས་ཚུལ་རིགས་པ་བརྒྱད་དག་གིས། །དེ་དག་རྣམས་འཛུད་པར་མཛད་པ་ལགས། །འདོད་ཆགས་ལ་སོགས་ནང་མང་བརྒྱད་དག་གིས། །སྐྲག་པར་གྱུར་པའི་འགྲོ་ལ་རྟག་གཟིགས་ཏེ། །བདེ་གཤེགས་སེམས་ཅན་བརྒྱད་དག་ཡོངས་འགྲེལ་ཅིང་། །ཟླ་མེད་སྨན་པ་ལྟ་བུར་རྣམ་པར་རྒྱུ། །སྐྱེ་དང་རྒ་དང་འཆི་དང་མྱ་ངན་ནོན། །སྤུག་དང་བྲལ་དག་སྨྲེ་སྔགས་འདོན་པ་བརྒྱས། །རྟག་ཏུ་ན་བའི་འགྲོ་རྣམས་གཟིགས་ནས་ནི། །ཐུབ་པ་ཐུགས་རྗེས་ཡོངས་སུ་འགྲེལ་ཅིང་རྒྱུ། །དུད་འགྲོ་ཡི་དགས་དམྱལ་བའི་འགྲོ་རྣམས་སུ། །འགྲོ་ཀུན་ཤིང་རྟའི་འཕང་ལོ་བཞིན་དུ་འཁོར། །གླེན་པ་དམིགས་བུ་མ་བཅིངས་མགོན་མ་མཆིས། །དེ་ལ་ལམ་གྱི་དམ་པ་སྟོན་པར་མཛད། །གཙོ་བོ་མཚུངས་པ་མེད་པས་གང་བསྟན་པ། །འཕགས་ལམ་དེ་ཉིད་གང་དག་སྔོན་ཆད་ཀྱི། །ཆོས་ཀྱི་དབང་ཕྱུག་འགྲོ་བའི་དོན་མཛད་པ། །རྒྱལ་བ་དེ་དག་རྣམས་ཀྱིས་རབ་ཏུ་གསུངས། །འཇམ་ཞིང་མཉེན་ལ་ཡིད་དུ་འོག་བའི་མཆོག། །ཚངས་ལས་ལྷག་པར་མཆོག་ཏུ་དགའ་བགྱིད་པ། །དྲི་ཟ་མི་ཅི་ལྷ་ཡི་བུ་མོ་མཆོག། །སྒྲ་དེ་ཟིལ་གྱིས་མནན་ནས་གསུང་པ་མཛད། །བདེན་དང་དྲང་བ་མི་ཟད་ཐབས་ཚུལ་གྱིས། །ཡོངས་སྦྱངས་ཡོན་ཏན་མཐའ་ཡས་ལྡན་པའི་གསུང་། །དེ་ཐོས་སེམས་ཅན་ཁྲག་ཁྲིག་ཕྲག་བརྒྱ་དག །ཐེག་པ་གསུམ་གྱིས་ཞི་བར་མཆི་བར་བགྱིད། །ཁྱོད་ལ་མཆོད་པས་ལྷ་ཡི་བདེ་བ་ནི། །རྣམ་པ་མང་དང་དེ་བཞིན་མི་ཡི་འཐོབ། །མི་ཡི་བདག་པོ་འགྲོ་ལ་ཕན་བགྱིད་པ། །ཕྱུག་ཅིང་ནོར་ཆེ་འབྱོར་བ་ཆེན་པོར་འགྱུར། །མཚུངས་མེད་ཁྱོད་ལ་དད་
པ་བསྐྱེད་པས་ནི། །གླིང་བཞིའི་བདག་པོ་འཁོར་ལོས་སྒྱུར་བ་མཆོག། །འགྲོ་ལ་དགེ་བ་བཅུ་པོ་ཀུན་འབྱེད་པ། །རིན་ཆེན་རབ་བཟང་བདུན་ལྡན་ཐོབ་པར་འགྱུར། །རྒྱལ་ཁྱོད་ལ་མཆོད་པ་བགྱིས་པས་ནི། །ཚངས་པ་བརྒྱ་བྱིན་འཇིག་རྟེན་བདག་པོ་དང་། །ཡོངས་སུ་དགའ་ལྡན་ལྷ་ཡི་བདག་པོ་དང་། །གཞན་འཕྲུལ་དབང་དང་འཐབ་བྲལ་རབ་དགར་འགྱུར། །འགྲོ་བའི་སྡུག་བསྔལ་རྣམ་མང་སེལ་མཛད་པ། །མཉམ་མེད་ཁྱོད་ལ་མཆོད་དང་མཐོང་བ་དང་། །ཐོས་པའང་དེ་ལྟར་འབྲས་བུ་མཆིས་ལགས་ཏེ། །གནས་མཆོག་རྒ་ཤི་མེད་པར་འཐོབ་པར་འགྱུར། །བཅོམ་ལྡན་ལམ་ལ་མཁས་ཤིང་ལམ་མཁྱེན་པ། །འཇིག་རྟེན་འདི་ནི་ངན་པའི་ལམ་ལས་བཟློག །བཅོམ་ལྡན་འགྲོ་བ་དག་ནི་འཕགས་པའི་ལམ། །བདེ་བ་ཞི་བ་རྡུལ་དང་བྲལ་འགོད་པ། །བསོད་ནམས་གཏེར་ཁྱོད་བསོད་ནམས་དོན་གཉེར་བའི། །བསོད་ནམས་བགྱི་བ་རྟག་ཏུ་མི་བས་ཏེ། །བྱང་ཆུབ་དམ་པ་མ་ཐོབ་བར་དུ་ནི། །བསྐལ་པ་བྱེ་བ་མང་པོར་བས་མི་འགྱུར། །གཞན་འཕྲུལ་འདྲ་བ་རྟག་ཏུ་དགའ་བགྱིད་པ། །ཡོངས་སུ་དག་ཅིང་མཛེས་པ་འཐོབ་པར་འགྱུར། །དམ་པའི་ཞིག་དུ་ལུས་དང་ངག་ཡིད་ཀྱིས། །སེམས་ཅན་དག་ནི་རྣམ་པར་དག་པར་འགྱུར། །རྒྱལ་བ་མཆོད་ཅིང་མི་ཡིས་འདི་ལ་སོགས། །ཡོན་ཏན་རྣམ་པ་དུ་མ་འཐོབ་པར་འགྱུར། །མཐོ་རིས་ཐར་པ་མི་ཡི་བདེ་བ་དང་། །འགྲོ་བ་ཀུན་གྱི་བསོད་ནམས་གཏེར་འཐོབ་འགྱུར། །ཁྱོད་ཀྱི་བརྗོད་དང་གྲགས་པ་རྒྱ་ཆེན་པོ། །ཕྱོགས་རྣམས་ཀུན་གྱི་ཞིང་མང་བརྒྱད་ཡང་མཆིས། །རྒྱལ་བ་ཁྱོད་ཀྱི་བསྔགས་པའི་ཕྲེང་བ་ནི། །བདེ་བར་གཤེགས་རྣམས་འཁོར་དུ་རྟག་པར་སྒྲོགས། །རིམས་ནད་བྲལ་ཞིང་འགྲོ་བ་ཐར་མཛད་པ། །མཐོང་ནད་དགའ་བ་ཐུགས་རྗེ་མཆོག་ལྡན་པ། །བཅོམ་ལྡན་དབང་པོ་ཞི་བ་ཞིང་དགྱེས་པ། །མི་མཆོག་དམ་པ་ཁྱོད་ལ་ཕྱག་འཚལ་ལོ། །བདག་གིས་རྒྱལ་བ་ཁྱོད་ཀྱི་གསུང་ཐོས་ནས། །མངོན་པར་ཤེས་པ་ལྔ་ཐོབ་མཁའ་ལ་གནས། །དཔའ་བོ་བདེ་གཤེགས་མཚུངས་པར་བདག་འགྱུར་ཏེ། །དྲི་མེད་ཆོས་ནི་འགྲོ་ལ་རྣམ་པར་དབྱེ། །
ལྷ་དང་མི་དང་ཀླུས་མཆོད་བདེ་བར་གཤེགས། །ཡོན་ཏན་ཀུན་གྱི་མཐར་ཕྱིན་དེང་བསྟོད་པས། །བསོད་ནམས་རྒྱ་ཆེན་གང་བསྒྲུབས་གྱུར་པ་དེས། །འགྲོ་བ་སངས་རྒྱས་གོ་འཕང་ཐོབ་པར་ཤོག །ཡུལ་འཁོར་སྐྱོང་དེ་ནས་མཚན་མོ་དེའི་ནམ་ནངས་པ་དང་། རྒྱལ་པོ་འོད་ཟེར་ལྡན་གྱིས་གཞོན་ནུའི་བུད་མེད་ཀྱི་འཁོར་དུ་ངུ་བའི་སྒྲ་ཐོས་སོ། །ཐོས་ནས་ཀྱང་མྱུར་དུ་མྱུར་བར་རིངས་པའི་གཟུགས་ཀྱིས་གྲོང་ཁྱེར་དགའ་མཆོག་ག་ལ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །ཁྱེད་ཅིའི་ཕྱིར་དུ། དེ་དག་གིས་སྨྲས་པ། རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་མི་གདའ་བའི་སླད་དུའོ། །ཡུལ་འཁོར་སྐྱོང་དེ་ནས་རྒྱལ་པོ་འོད་ཟེར་ལྡན་པ་གཞོན་ནུའི་ཕྱིར་ཤིང་བཅད་པ་བསྒྱེལ་བ་ལྟར་ས་ལ་འགྱེལ་ཏེ་ལངས་ནས་ངུ་ཞིང་གྲོང་ཁྱེར་དེར་ལན་སྟོང་དུ་ཡོངས་སུ་བཙལ་ཏོ། །ཡུལ་འཁོར་སྐྱོང་དེ་ནས་གྲོང་ཁྱེར་དེ་ན་གྲོང་ཁྱེར་གྱི་ལྷ་གང་ཡིན་དེས་རྒྱལ་པོ་འོད་ཟེར་ལྡན་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་གཞོན་ནུ་ནི་དེ་བཞིན་གཤེགས་པ་དོན་གྲུབ་བློ་ལ་བལྟ་བ་དང་། ཕྱག་བྱ་བ་དང་། མཆོད་པ་བྱ་བ་དང་། བསྙེན་བཀུར་བྱ་བའི་ཕྱིར་ཤར་ཕྱོགས་ལོགས་སུ་སོང་ངོ་། །ཡུལ་འཁོར་སྐྱོང་དེ་ནས་རྒྱལ་པོ་འོད་ཟེར་ལྡན་གཞོན་ནུ་བཙལ་བའི་ཕྱིར་བཙུན་མོའི་འཁོར་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་དང་ལྷན་ཅིག་ཏུ་ཤར་ཕྱོགས་ཀྱི་ཆ་ག་ལ་བ་དེར་སོང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་གྲུབ་བློ་ག་ལ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཀྱང་རྒྱལ་པོ་འོད་ཟེར་ལྡན་གྱིས་བཅོམ་ལྡན་འདས་ལ་ཚིགས་སུ་བཅད་པས་མངོན་པར་བསྟོད་པ། སྲིད་གསུམ་ཁྱོད་མཚུངས་མ་མཆིས་ལྷག་པ་ག་ལ་མཆིས། སེམས་ཅན་ངམ་པ་ལྷ་དབང་ལྷ་མིན་རྒྱལ་པོས་བཀུར། །སྐྱེ་བོ་ཁྱོད་ཀྱི་གཟུགས་ལ་ལྟ་བས་ངོམས་མི་འགྱུར། །ཡོན་ཏན་ཡེ་ཤེས་རྒྱ་མཚོ་དཔལ་ལ་ཕྱག་འཚལ་ལོ། །རྒྱལ་བ་ཁྱོད་སྐུ་སུམ་བཅུ་རྩ་གཉིས་མཚན་རབ་འདག །ལྷུན་པོ་རིན་ཆེན་མཆོག་གིས་སྤྲས་ལྟར་ཡོངས་སུ་དག །
རྒྱལ་བ་སྡུག་ཅིང་འཇམ་ལགས་གསེར་གྱི་ཁ་དོག་འདྲ། །བལྟ་སྡུག་གཟུགས་མངའ་ཐུབ་པའི་སྐུ་ལ་ཕྱག་འཚལ་ལོ། །བསྐལ་པ་བྱེ་བརྒྱ་བསམ་གྱིས་མི་ཁྱབ་བརཏལ་ཞུགས་སྤྱད། །བསྐལ་པ་བྱེ་བ་བརྒྱ་མང་སངས་རྒྱས་སྟི་སྟང་མཛད། །སྔོན་ཆད་མཆོད་སྦྱིན་བརྒྱ་ཕྲག་བསམ་གྱིས་མི་ཁྱབ་མཛད། །དེས་ན་ཁྱོད་སྐུ་བཟང་ཞིག་ཤིན་དུ་མཛེས་པ་ལགས། །སྦྱིན་དང་ཚུལ་ཁྲིམས་ཏིང་འཛིན་ཤེས་རབ་དང་། །བཟོད་དང་བརྩོན་འགྲུས་བསམ་གཏན་ཐབས་ཀྱིས་ཁྱོད་གཟུགས་སྦྱངས། །ཁྱོད་ཀྱི་སྤྱན་སྔར་བརྒྱ་བྱིན་ཚངས་འོད་གསལ་མ་ལགས། །ཆུ་ཤེས་ནོར་བུ་གློག་གི་འོད་ཀྱང་མཛེས་མ་ལགས། །འགྲོ་བའི་དོན་དུ་ཡིད་དུ་མཆི་བའི་གཟུགས་ཀྱང་སྟོན། །ཆུ་ཟླ་འདྲ་ཞིང་སྒྱུ་མ་འདྲ་བར་གདའ་བ་ལགས། །རང་གི་ཕྱོགས་རྣམས་ཀུན་དུ་རྒྱལ་བའི་སྐུ་ཡང་གདའ། །བདེ་གཤེགས་རྣམས་ཀྱི་སྐུ་ཡི་ཆད་ནི་གདའ་མ་ལགས། །ཁྱོད་ནི་དགའ་ལྡན་འགའ་ཞིག་ན་ཡང་བཞུགས་པར་གདའ། །འཆི་འཕོ་མཛད་ཅིང་རབ་དཀར་གླང་པོར་གྱུར་ནས་ནི། །དཔའ་བོ་ཡུལ་གྱི་ལྷུམས་སུ་གཤེགས་པར་གདའ་བ་མཛད། །ཐུབ་ཆེན་ནམ་མཁའ་ལྟ་བུར་ཐམས་ཅད་རྗེས་སུ་ཞུགས། །བཅོམ་ལྡན་ཕྱོགས་འགར་བལྟམ་པར་སྟོན་པའང་མཛད་པ་སྟེ། །ས་འགའ་འདག་ཏུ་གོམ་པ་བདུན་བོར་གདའ་བ་མཛད། །ང་ནི་ལྷ་མིར་བཅས་འགྲོ་ནང་གཙོ་ཤིན་དུ་ལྟ། །འགྲོ་བ་སྡུག་བསྔལ་མཚོ་ལས་གདོན་ཅེས་གསུང་ཡང་ཕྱུང་། །ཐུབ་ཁྱོད་ཆོས་གང་ལ་ཡང་ཐེ་ཚོམ་མི་མངའ་ཡང་། །ཡི་གེ་ཤེས་པ་སློབ་ལྟར་འཇིག་རྟེན་དག་ན་གདའ། །བསམ་གཏན་ཏིང་འཛིན་སྤྱོད་ཡུལ་ཞི་བ་བརྙེས་གྱུར་ཀྱང་། །ཁ་ཅིག་ཏུ་ནི་བུད་མེད་ནང་ན་བཞུགས་པར་གདའ། །ཡབ་དང་ཡུམ་དང་ས་དང་བུད་མེད་རྣམས་ཀྱང་བཏང་། །གཉེན་རྣམས་མྱ་ངན་ནོན་ཏེ་རྣམ་པར་རྒྱལ་ཞིང་དུ། །སེམས་ཅན་དམ་པ་བྱེ་བ་བརྒྱ་ལྷས་ཡོངས་བསྐོར་ནས། །ནགས་གནས་གནས་གཅིག་པོ་ནས་འབྱུང་བར་གདའ་བའང་མཛད། །ཁྱོད་ནི་བདུད་བཞི་ཕམ་པར་མདུད་ནས་ཡུན་རིང་ཡང་། །ཞིང་ན་བདུད་འདུལ་བར་ཡང་གདའ་བ་སྟོན་པར་མཛད། །སྔོན་ཆད་འཁོར་ལོ་བསམ་གྱིས་མི་ཁྱབ་བསྐོར་གྱུར་ཀྱང་། །ཁྱོད་ནི་ཐུགས་རྗེས་འཁོར་ལོ་བསྐོར་བར་གདའ་བར་མཛད། །རྟག་ཏུ་རྟག་ལྟ་འདུ་ཤེས་ལྡན་པའི་འགྲོ་གཟིགས་
ནས། །མྱ་ངན་འདའ་ཞེས་འཁོར་གྱི་ནང་དུ་ཚིག་ཏུ་གསུང་། །རྟག་ཏུ་འཁོར་བར་དགའ་བའི་འགྲོ་བ་གཟིགས་ནས་ནི། །ཁྱོད་ནི་ཞི་བ་སིལ་གྱུར་མྱ་ངན་འདས་པ་གསུང་། །ཁྱོད་ཀྱི་བསོད་ནམས་ཡེ་ཤེས་ཤེས་རབ་ཐབས་མཚུངས་མེད། །ཐུབ་པ་ཁྱོད་སྐུ་འོད་ཀྱིས་ཞིང་མང་རྒྱས་པར་འགེངས། །ཕྱོགས་རྣམས་དག་ན་འདྲེན་པ་ཁྱོད་ཀྱི་བསྔགས་པ་གསུང་། །ཀུན་དུ་སྤྱོད་ཡུལ་ཐུབ་པའི་རྒྱལ་ལ་ཕྱག་འཚལ་ལོ། །ཆོས་ཉིད་མ་ལུས་བརྙེས་པར་གྱུར་ལ་ཕྱག་འཚལ་ལོ། །སེམས་ཅན་ཀུན་གྱི་བགྱི་བ་སྒྱུ་མ་ལྟར་གདའ་བ་དང་། །ཐུབ་པ་ཁྱོད་ནི་གང་དུ་བཞུད་པའམ་བྱོན་མ་ལགས། །སྒྱུ་མའི་ཆོས་ཚུལ་གནས་ལ་མངོན་པར་ཕྱག་འཚལ་ལོ། །འགྲོ་བའི་དོན་དུ་གང་གིས་བྱང་ཆུབ་མཆོག་ཐོབ་པ། །ལམ་མཆོག་མི་ཡི་དཔའ་བོ་ཁྱོད་ནི་ལེགས་པར་གསུང་། །བདག་གིས་ཆོས་ཉིད་འདི་ནི་མྱུར་དུ་སངས་རྒྱས་ནས། །མི་དཔའ་འགྲོ་བའི་དོན་དུ་ཆོས་ཉིད་བཤད་པར་བགྱི། །མི་ཡི་དཔའ་བོ་ཐུབ་པ་ཀུན་མཁྱེན་རིམས་བྲལ་བ། །སྲིད་གསུམ་མཚུངས་པ་མ་མཆིས་ལྷག་པ་ག་ལ་ཞིག །བདག་གིས་འདིར་བསྟོད་བསོད་ནམས་དམ་པ་གང་སྒྲུབས་དེས། འཇིག་རྟེན་བྱང་ཆུབ་བླ་མེད་ཞི་མཆོག་ཐོབ་བར་ཤོག །ཡུལ་འཁོར་སྐྱོང་དེ་ནས་དེ་བཞིན་གཤེགས་པ་དོན་གྲུབ་བློ་དེས་རྒྱལ་པོ་འོད་ཟེར་དེའི་ལྷག་པའི་བསམ་པ་མཁྱེན་ནས་ཅི་ནས་ཐམས་ཅད་བླ་ན་མེད་པ་ཡང་དག་པར་རྫོགས་་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བའི་དེ་ལྟ་དེ་ལྟར་ཆོས་བསྟན་ཏོ། །ཡུལ་འཁོར་སྐྱོང་དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་བཅོམ་ལྡན་འདས་དེ་བཞིན་གཤེགས་པ་དོན་གྲུབ་བློ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་གྲོང་ཁྱེར་དུ་གདུགས་ཚོར་གསོལ་བར་གནང་བར་མཛད་དུ་གསོལ། །བཅོམ་ལྡན་འདས་ཀྱིས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ལ་ཐུགས་བརྩེ་བར་དགོངས་ཏེ་གསུང་བར་གྱུར་བས་གནང་ངོ་། །ཡུལ་འཁོར་སྐྱོང་དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་ཕ་མ་དེ་གཉིས་དང་། གྲོགས་དེ་དག་དང་བུད་མེད་དེ་དག་སྨྲས་པ། ཁྱེད་ཅག་ཐམས་ཅད་རྗེས་སུ་ཡི་རང་བར་གྱིས་ཤིག །ཅི་ནས་གྲོང་ཁྱེར་དགའ་མཆོག་བརྒྱན་ཏེ་མ་ཆགས་པར་དེ་བཞིན་གཤེགས་པ་ལ་དབུལ་དུ་རུང་བར་གྱིས་ཤིག །དེ་དག་གིས་སྒྲ་སྐད་གཅིག་ཏུ་རྗེས་སུ་ཡི་རང་ངོ་། །ཡུལ་འཁོར་སྐྱོང་
དེ་ནས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་གྱིས་ཅི་ནས་གྲོང་ཁྱེར་དགའ་མཆོག་བརྒྱན་ཏེ་མ་ཆགས་པར་དེ་བཞིན་གཤེགས་པ་ལ་ཕུལ་ལོ། །རོ་བྲོ་བ་བཀང་བ་ལྔ་བརྒྱ་བའི་ཞལ་ཟས་ཀྱང་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་དེ་ལ་གསོལ་ཏོ། །དགེ་སློང་དེ་དག་ཐམས་ཅད་ཀྱི་ཕྱིར་རིན་པོ་ཆེ་སྣ་བདུན་གྱིས་གཡོགས་པའི་གཙུག་ལག་ཁང་ནོར་བུའི་ཚོགས་བཤམས་པ་སྟེང་དུ་རིན་པོ་ཆེའི་དྲ་བའི་བླ་རེ་བྲེས་པ། གཡས་གཡོན་དུ་མེ་ཏོག་གི་ཤིང་ལྗོན་པ་ལེགས་པར་ཡོངས་སུ་གྲུང་པ། མེ་ཏོག་པད་མ་དཀར་པོའི་རྫིང་གིས་མཛེས་པར་བྱས་པ། རང་བཅོས་བུ་མུ་གཉིས་དྲི་མ་མེད་པ་བརྒྱ་སྟོང་བཏིང་བའི་ལམ་བཤམས་པ། དགེ་སློང་རེ་རེ་ལ་གོས་ཁ་ན་མ་ཐོ་བ་མེད་པ་གང་བྱིན་པ་དེ་ཕྱི་དེ་ཉིན་མི་སྦྱིན་གྱི། །ཉིན་གཅིག་བཞིན་གོས་གཞན་དང་གཞན་སྦྱིན་པར་འགྱུར་བ་བྱས་སོ། །དེ་ལོ་བྱེ་བ་ཕྲག་གསུམ་གྱི་བར་དུ་རྨུགས་པ་དང་། །གཉིད་ཀྱིས་ནོན་པར་མ་གྱུར། །བདག་ལ་དགའ་མ་བྱས་སངས་རྒྱས་ལ་མཆོད་པའི་ཕྱིར་གཞན་ཡིད་ལ་མ་བྱས་སོ། །བར་སྐབས་དེར་འདོད་པ་ལ་རྣམ་པར་རྟོག་པ་དང་། གནོད་སེམས་ཀྱི་རྣམ་པར་རྟོག་པ་དང་། འཚེ་བའི་རྣམ་པར་རྟོག་པས་རྣམ་པར་རྟོག་པར་མ་གྱུར། །རྒྱལ་སྲིད་ལ་སྲེད་པར་མ་གྱུར་ཏེ། ལུས་དང་སྲོག་ལ་ཡང་མི་ལྟ་ན་དངོས་པོ་གཞན་ལྟ་ལ་སྨོས་ཀྱང་ཅི་དགོས། །བར་སྐབས་དེར་བཅོམ་ལྡན་འདས་ཀྱིས་གསུངས་པ་དེ་ཐམས་ཅད་ཀུན་དུ་བཟང་སྟེ་དེ་བཞིན་གཤེགས་པ་དེ་ལ་ལན་གཉིས་སུ་མ་ཞུས་སོ། །བར་སྐབས་དེར་ཁྲུས་མ་བྱས། མར་དང་འབྲུ་མར་གྱིས་ལུས་མ་བསྐུས། །རྐང་མ་བཀྲུས། ངལ་བའི་འདུ་ཤེས་མ་བསྐྱེད་དོ། །ཟ་ན་ཟ་བ་དང་བཤད་གཅི་བྱེད་པ་མ་གཏོགས་པར་ནམ་ཡང་འདུག་པར་མ་འགྱུར་ཏོ། །གང་གི་ཚེ་དེ་བཞིན་གཤེགས་པ་དེ་ཡོངས་སུ་མྱ་ངན་དམ་ལས་འདས་པའི་ཚེ་ཅན་ངན་དམར་པོའི་ཞུགས་ལ་བཞིན་བ་བྱས་སོ། །གང་དུ་དེ་བཞིན་གཤེགས་པ་དེ་ཞུགས་ལ་བཞིན་པའི་ས་ཕྱོགས་དེ་ཉིད་དུ་འཛམ་བུའི་གླིང་ཐམས་ཅད་མེ་ཏོག་ཐམས་ཅད་དང་། ཕྲེང་བ་ཐམས་ཅད་དང་། སྤོས་ཐམས་ཅད་དང་། རོལ་མོའི་སྒྲ་ཐམས་ཅད་ཀྱིས་ལོ་བརྒྱ་སྟོང་དུ་རིང་བསྲེལ་ལ་མཆོད་པ་བྱས་པར་གྱུར་པ་ནས། །རྒྱུ་རྐྱེན་ཐམས་ཅད་བསོགས་ཏེ་ཕྱིས་མཆོད་རྟེན་བྱེ་བ་ཕྲག་བརྒྱད་ཅུ་རྩ་བཞིའི་
བར་དུ་བྱས་སོ། །མཆོད་རྟེན་དེ་དག་ལ་ཡང་རིན་པོ་སྣ་བདུན་གྱི་རིན་པོ་ཆེ་འདྲ་བ་གཡོགས་སོ། །མུ་ཏིག་གི་དྲ་བའི་བླ་རེ་དག་བྲེས་སོ། །མཆོད་རྟེན་རེ་རེ་ལ་ཡང་རིན་པོ་ཆེ་སྣ་བདུན་གྱི་གདུགས་ལྔ་བརྒྱ་ལྔ་བརྒྱ་ཕུལ་ལོ། །མཆོད་རྟེན་ཐམས་ཅད་ལ་ཡང་སིལ་སྙན་ཐམས་ཅད་ཕུལ་ལོ། །འཛམ་བུའི་གླིང་ཁོར་ཁོར་ཡུག་ཏུ་མེ་ཏོག་གི་ཤིང་ལྗོན་པ་བསྐྲུན་ཏོ། །མཆོད་རྟེན་རེ་རེ་ཡང་མར་མེའི་ཛ་བོ་བརྒྱ་སྟོང་ནས་མར་མེ་བུས་སོ། །མར་མེའི་ཛ་བོ་རེ་རེ་ནས་ཀྱང་སྤོས་ཀྱི་འབྲུ་མར་དྲུག་བཅུ་རྩ་བཞི་པ་སྟོང་གི་མར་མེ་བུས་སོ། །སྤོས་དང་། ཕྲེང་བ་དང་། བྱུག་པ་ཐམས་ཅད་ཀྱིས་ཀྱང་མཆོད་པ་བྱས་སོ། །ཚུལ་དེ་ལྟ་བུས་ལོ་བྱེ་བའི་བར་དུ་མཆོད་པ་བྱས་ཏེ་ཕྱིས་རབ་ཏུ་བྱུང་ངོ་། །དེ་རབ་ཏུ་བྱུང་ནས་ཀྱང་ཆོས་གོས་གསུམ་པར་གྱུར་ཅིང་རྟག་ཏུ་བསོད་སྙོམས་སྤྱོད་པ་དང་། རྟག་ཏུ་ཅོག་པུ་བ་སྟེ། ནམ་ཡང་གློས་མ་ཕབ་བོ། །ནམ་ཡང་རྨུགས་པ་དག་གཉིད་ཀྱིས་ནོན་བར་མ་གྱུར་ཏོ། །དེས་ཟང་ཟིང་མེད་པའི་སེམས་ཀྱིས་ལོ་བྱེ་བ་ཕྲག་བཞིའི་བར་དུ་ཆོས་ཀྱི་སྦྱིན་པ་བྱིན་ཏེ། དེས་གཞན་ལ་ཐ་ན་ལེགས་སོ་ཞེས་བྱ་བ་ཙམ་ཡང་རེ་བར་མ་གྱུར་ན་རྙེད་པ་དང་བཀུར་སྟི་ལྟ་སྨོས་ཀྱང་ཅི་དགོས། དེ་ཆོས་མཉན་པའམ། ཆོས་བཤད་པས་ཀྱང་ངལ་བར་མ་གྱུར་ཏོ། དེ་ལ་ལྷ་རྣམས་ཀྱང་བསྙེན་བཀུར་བྱེད་དོ། །ཡུལ་གྱི་མི་ཐམས་ཅད་དང་། བཙུན་མོའི་འཁོར་དང་། ནང་མི་ཐམས་ཅད་དང་། གྲོགས་པོ་ཐམས་ཅད་ཀྱང་དེའི་རྗེས་སུ་བསླབས་ཏེ་རབ་ཏུ་བྱུང་ངོ་། །ཡུལ་འཁོར་སྐྱོང་དེ་ནས་གནས་གཙང་མའི་རིས་ཀྱི་ལྷའི་བུ་རྣམས་འདི་སྙམ་དུ་སེམས་སོ། །བསོད་ནམས་ཀྱི་འོད་ཟེར་གྱི་རྗེས་སུ་སློབ་ཅིང་ཡུལ་གྱི་མི་ཐམས་ཅད་རབ་ཏུ་བྱུང་གིས། །བདག་ཅག་གིས་དེ་ལ་རིམ་གྲོ་དང་བསྙེན་བཀུར་བྱས་ན་དཀོན་མཆོག་གསུམ་ལ་རིམ་གྲོ་བྱས་པར་འགྱུར་རོ་སྙམ་མོ། །དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ལེ་བྱེ་བ་ཕྲག་དྲུག་བཅུ་བཞིའི་བར་དུ་གནས་ཏེ། དགེ་སློང་བསོད་ནམས་ཀྱི་འོད་ཟེར་གྱིས་ཐམས་ཅད་ཡོངས་སུ་བཟུང་ངོ་། །ཚུལ་འདི་ལྟ་བུས་སངས་རྒྱས་བྱེ་བ་ཕྲག་ཁྲིག་སྟོང་ཕྲག་དགུ་བཅུ་རྩ་བཞི་ལ་རྣམ་པ་དེ་ལྟ་བུའི་མཆོད་པ་བྱས་སོ། །ཡུལ་འཁོར་སྐྱོང་དེའི་ཚེ་དེའི་དུས་ན་རྒྱལ་པོ་འོད་ཟེར་ལྡན་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་དེ་ལྟ་དོགས་ཤིང་ཐེ་ཚོམ་ཟ་
འམ། ཡིད་གཉིས་སུ་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་འོད་དཔག་མེད་དེ་དེའི་ཚེ་དེའི་དུས་ན་རྒྱལ་པོ་འོད་ཟེར་ལྡན་ཞེས་བྱ་བར་གྱུར་ཏོ། །ཡུལ་འཁོར་སྐྱོང་དེའི་ཚེ་དེའི་དུས་ན་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་དེ་ལྟར་དོགས་ཤིང་ཐེ་ཚོམ་ཟའམ། ཡིད་གཉིས་སུ་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཞེས་བྱ་བར་གྱུར་ཏོ། །གྲོང་ཁྱེར་གྱི་ལྷ་གང་ཡིན་པ་དེ་ནི་དེ་བཞིན་གཤེགས་པ་མི་འཁྲུག་པར་གྱུར་ཏོ། །ཡུལ་འཁོར་སྐྱོང་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འདོད་པ་ལྷག་པའི་བསམ་པས་བསྒྲུབ་པ་དང་། སྡུག་པ་དང་མི་སྡུག་པ་ཡོངས་སུ་སྤངས་པ་དང་། བག་ཡོད་པའི་སྤྱོད་པས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་དེའི་རྗེས་སུ་བསླབ་པར་བྱའོ། །ངས་བྱ་དཀའ་བ་མངོན་པར་འདུ་བྱ་བ་དེ་ལྟ་བུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ། །དེ་ལྟ་བས་ན་དེ་དག་མི་བརྩོན་པ་དང་། རྙེད་པ་དང་། བཀུར་སྟི་དང་། ཚིགས་སུ་བཅད་པ་ལྷུར་ལེན་པ་དང་། ཤེས་ཀྱི་ཁེ་ལ་ཆགས་པ་དང་། ང་རྒྱལ་གྱིས་བཅོམ་པ་དང་། འདོད་པའི་རྒྱུས་ཉོན་མོངས་ཤིང་ཤ་ཐང་བ་དང་། འདོད་པའི་རྒྱུས་བསྟན་པ་ལས་རིང་དུ་གྱུར་པ་དང་། རབ་ཏུ་བྱུང་བ་དོན་མེད་པ་དང་། དགེ་སྦྱོང་སུན་པར་བྱེད་པ་དང་། བྱང་ཆུབ་སེམས་དཔའ་རྨུ་རྒོད་དང་། ལུས་དང་། ངག་དང་། སེམས་མི་དྲང་བ་དང་། ལྟས་ལྟ་བ་དང་། འཆེ་བ་ནོར་བ་དང་། རང་གི་དམ་བཅས་པ་ལས་ཉམས་པ་དང་། གོས་དང་། ཟས་དང་མལ་ཆ་དང་། ན་བའི་ཆེད་ཀྱི་སྨན་དང་། ཡོ་བྱད་ཀྱི་མཚན་མ་ལ་ཆགས་པ་དང་། ངོ་ཚ་མི་ཤེས་པ་དང་། ཁྲེལ་མེད་པ་དང་། ཆོ་ག་ཉམས་པ་དང་། དམ་པའི་ཆོས་མ་ཡིན་པ་ལ་འཇུག་པ་དང་། སྤྱོད་ཡུལ་དང་བྲལ་བ་དང་། སངས་རྒྱས་ཀྱི་སྤྱོད་ཡུལ་ལས་རིང་དུ་གྱུར་པ་དང་། སངས་རྒྱས་ཀྱི་ཐེག་པ་དང་བྲལ་བ་དང་། རྫོགས་པའི་བྱང་ཆུབ་ཀྱི་སེམས་དང་བྲལ་བར་གྱུར་ཏོ། །ཡུལ་འཁོར་སྐྱོང་དེ་ལྟ་བས་ན་རྣམ་པ་འདི་ལྟ་བུའི་ཆོས་འདི་ཐོས་ནས་སྡིག་པའི་བཤེས་གཉེན་རིགས་པ་མེད་པ། རྙེད་པ་དོན་དུ་གཉེར་བ་དང་། མི་བསྟེན་པ་ཤེས་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་
ཏོ། །སྟོབས་བཅུ་མངའ་བའི་སྤྱོད་པ་དཔག་མེད་ན། །སྙིང་ནི་ཐོབ་དང་ཤེས་ཀྱི་ཁེ་ལ་སོང་། །བྱང་ཆུབ་ཡོན་ཏན་རྒྱས་ཁེབས་བོར་ནས་ནི། །དེ་དག་འཐོབ་ཕྱིར་གཞན་གྱི་ཁྱིམ་ལ་དགའ། ཁྭ་འདྲ་སྡང་བ་ཁྲེལ་དང་མོས་བློ་བྲལ། །ཤེས་ཀྱི་ཁེ་ཕྱིར་བདུད་ཀྱི་དབང་དུ་སོང་། །ཉོན་མོངས་རག་ལུས་སྲིད་པའི་འགྲོ་བར་གཞོལ། །བདག་འདིར་ཡོན་ཏན་ལྡན་ཞེས་དེ་སྐད་སྨྲ། །ལུས་ནི་དགོན་པ་འདྲ་བའི་གྲོང་ཁྱེར་དུ། །འཐོབ་ཕྱིར་དེ་དག་རྣམ་པར་རྟོག་པས་སྤྱོད། །གནས་དང་ས་ལྟར་ཐར་ལས་རིང་བ་སྟེ། །དེ་འདུ་དེ་དག་སྦྲུལ་ལྟར་རིང་དུ་སྤང་། །དེ་དག་སངས་རྒྱས་ཆོས་དང་དེ་བཞིན་དུ། །དགེ་འདུན་ཡོན་ཏན་བརྒྱས་གང་དགའ་མ་ཡིན། །མཐོ་རིས་བོར་ནས་ངན་པའི་ལམ་དུ་སོང་། །སྡུག་པས་ཕོངས་ནས་སྲིད་པའི་འགྲོ་བར་འཁྱམས། །ང་ཡི་སྤྱོད་པ་ཉེ་བར་བསྟན་པ་འདི་ཐོས་ནས། །ཡང་དག་པ་ཡི་བསམ་པའི་སྒྲུབ་པས་འདི་ལ་སྦྱོར། །བསྐལ་པ་བྱེ་བ་མང་པོས་རྙེད་དཀའ་དལ་རྙེད་ཀྱིས། །དེ་ལྟ་ཇི་སྐད་བསྟན་པའི་ཆོས་ཉིད་འདིར་བརྩོན་གྱིས། །གང་ཞིག་ཐེག་མཆོག་བྱང་ཆུབ་དམ་པ་འཚང་རྒྱར་འདོད། །དེ་ཡིས་རྒྱལ་པོ་དེ་ཡི་ཡོན་ཏན་དྲན་པར་བྱ། །བསམས་ཏེ་ཡང་དག་ཇི་བཞིན་ཚུལ་བཞིན་གནས་པར་བྱ། །དེ་ལྟས་བདེ་གཤེགས་རྣམས་ཀྱི་བྱང་ཆུབ་ཆགས་མེད་འགྱུར། །ཡོན་ཏན་འདི་དག་རྟོགས་པས་འཕགས་པའི་རིགས་ལ་བསྟེན། །རང་གིས་འདིར་ནི་ཀུན་དུ་ཤེས་པ་བསྐྱེད་པར་བྱ། །བསྟན་པ་ཡོན་ཏན་སྙིང་པོ་འདི་འདྲ་མ་སྤང་ཤིག །བྱིས་པ་ལྟ་བུར་འགྲོ་བ་ལྔར་ནི་འཁྱམས་ས་རེ། །འདིར་ནི་རང་དང་དགོན་པ་ཕུག་ཏུ་གནས་པར་བྱ། །དེར་གནས་ནི་བདག་མི་སྙེམས་ཤིག་གཞན་མི་སྨད། །སྔོན་ཆད་སངས་རྒྱས་བྱེ་བ་ཕྲག་བརྒྱ་མཉེས་མ་བྱས། །རྗེས་སུ་དྲན་ནས་རྟག་པར་རྒྱུན་དུ་བདག་ལ་སྤྱོས། །ལུས་དང་སྲོག་ལ་སྲེད་པ་མ་ཆགས་སྤང་བར་བྱ། །གུས་པ་དྲག་པོ་བསྐྱེད་ནས་ཆོས་ལ་བརྩོན་པར་གྱིས། །ང་ཡིས་མདོ་འདིར་སྒྲུབ་པ་བསམ་པ་འདིར་གནས་ན། །དེ་དག་རྣམས་ཀྱིས་ཕྱི་ནས་བྱང་ཆུབ་རྙེད་དཀའ། །གང་དག་རྒྱལ་བའི་ཐེག་པ་འདི་ལ་དགའ་བརྩོན་པ། །ཐོས་ནས་ཕྱིར་ཞིང་ཡིད་ནི་འཇུག་པར་བྱ་བའི་རིགས། །དེ་ལྟ་བས་ན་བསྟན་ལ་མོས་པ་བསྐྱེད་པར་བྱ། །རྣམ་པར་རྒྱུ་བའི་ཚེ་ན་ཕྱིས་གྱུར་ཏ་རེ། །ཡུལ་འཁོར་སྐྱོང་བྱང་ཆུབ་སེམས་དཔའ་གང་ཞིག་ཕ་རོལ་དུ་ཕྱིན་པ་ལྔ་ལ་སྤྱོད་པ་ཡང་གང་ཞིག་བདག་འདི་ལ་བསླབ་བོ། །བདག་སྡོམ་པ་འདི་ལ་གནས་པར་བྱའོ་སྙམ་དུ་ཆོས་ཀྱི་རྣམ་གྲངས་འདི་ལ་ནན་ཏན་གྱིས་སྒྲུབ་ན་
བསོད་ནམས་ཀྱི་ཕུང་པོ་དེ་བསོད་ནམས་ཀྱི་ཕུང་པོ་འདིའི་གནན་བརྒྱའི་ཆར་ཡང་ཉེ་བར་མི་འགྲོ་སྟེ། སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་སྔོན་སེམས་མ་བསྐྱེད་པའི་ལྷ་དང་། མི་དང་། ལྷ་མ་ཡིན་དུ་བཅས་པའི་སྐྱེ་དགུ་ཁྲག་ཁྲིག་ཕྲག་སུམ་བཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དགེ་སློང་བདུན་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཡུལ་འཁོར་སྐྱོང་གི་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་རྣམ་གྲངས་འདིའི་མིང་ཅི་ལགས། །འདི་ཇི་ལྟར་གཟུང་བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང་དེ་ལྟ་བས་ནས་ཁྱོད་ཀྱིས་ཆོས་ཀྱི་རྣམ་གྲངས་འདི་དམ་བཅས་པ་དོན་ཡོད་པ་རྣམ་པར་དག་པ་ཞེས་བྱ་བར་ཟུང་ཤིག །སྐྱེས་བུ་དམ་པ་རྣམ་པར་གྲོལ་བ། བྱང་ཆུབ་སེམས་དཔའི་སྤྱོད་པ་རྣམ་པར་ངེས་པ་ཞེས་བྱ་བར་ཡང་ཟུང་ཤིག །དོན་ཡོངས་སུ་རྫོགས་པར་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཡུལ་འཁོར་སྐྱོང་དང་། ལྷ་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པར་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའི་སྟོང་ཕྲག་བརྒྱ་པ་ལས་ཡུལ་འཁོར་སྐྱོང་གིས་ཞུས་པའི་ལེའུ་ཞེས་བྱ་བ་སྟེ་བཅུ་བརྒྱད་པ་རྫོགས་སོ། །རྒྱ་གར་གྱི་མཁན་པོ་ཇི་ན་མི་ཏྲ་དང་དཱ་ན་ཤཱི་ལ་དང་། མུ་ནེ་ཝརྨ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ།