འཕགས་པ་གློག་ཐོབ་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ།
འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་ཉི་ཤུ་པ་སྟེ་གློག་ཐོབ་ཀྱིས་ཞུས་པ། བམ་པོ་དང་པོ། རྒྱ་གར་སྐད་དུ། ཨཱ་ཪྻ་བི་དྱུ་ཏ་པྲཱ་པྟ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་གློག་ཐོབ་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ། དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་ཡོན་ཏན་ཁྱད་པར་དུ་འཕགས་པ་ཕུན་སུམ་ཚོགས་ཤིང་སེང་གེའི་སྒྲ་སྒྲོགས་པ་སྟོང་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལྔ་བརྒྱ་དང་ཐབས་གཅིག་ཏུ་བཞུགས་ཏེ། དེ་དག་ཐམས་ཅད་ཀྱང་གཟུངས་རབ་ཏུ་ཐོབ་པ། སྤོབས་པ་ཐོགས་པ་མེད་པར་གྱུར་པ། མི་སྐྱེ་བའི་ཆོས་ལ་བཟོད་པ་མངོན་སུམ་དུ་བྱས་པ། ཕྱིར་མི་ལྡོག་པ་ལ་གནས་པ། ཏིང་ངེ་འཛིན་རྣམས་དང་ལྡན་པ། མངོན་པར་ཤེས་པས་རྣམ་པར་རྩེན་པ། སེམས་ཅན་གྱི་སེམས་ཀྱི་སྤྱོད་པའི་ཚུལ་རབ་ཏུ་རྟོགས་པ་ཤ་སྟག་ལ་
འདི་ལྟ་སྟེ། བྱང་ཆུབ་སེམས་དཔའ་ཉི་མའི་རྒྱལ་མཚན་དང་། བྱང་ཆུབ་སེམས་དཔའ་ཟླ་བའི་རྒྱལ་མཚན་དང་། བྱང་ཆུབ་སེམས་དཔའ་ཀུན་དུ་འོད་དང་། བྱང་ཆུབ་སེམས་དཔའ་ཟླ་བའི་རྒྱལ་པོ་དང་། བྱང་ཆུབ་སེམས་དཔའ་ཤིན་ཏུ་མ་ཐོགས་ལ་དང་། བྱང་ཆུབ་སེམས་དཔའ་རྣམ་པར་སྣང་བྱེད་དང་། བྱང་ཆུབ་སེམས་དཔའ་སེང་གེའི་བློ་གྲོས་དང་། བྱང་ཆུབ་སེམས་དཔའ་རིན་པོ་ཆེའི་ཡོན་ཏན་འོད་དང་། བྱང་ཆུབ་སེམས་དཔའ་དོན་ཐམས་ཅད་གྲུབ་པ་དང་བྱང་ཆུབ་སེམས་དཔའ་སྔོན་གྱི་རྐྱེན་དང་ལྡན་པ་དང་། བྱང་ཆུབ་སེམས་དཔའ་སྨོན་ལམ་དང་སྤྱོད་པ་ཕུན་སུམ་ཚོགས་པ་དང་། བྱང་ཆུབ་སེམས་དཔའ་སྟོང་པའི་བློ་གྲོས་དང་། བྱང་ཆུབ་སེམས་དཔའ་མཉམ་པའི་སེམས་དང་། བྱང་ཆུབ་སེམས་དཔའ་དགའ་སྲེད་དང་། བྱང་ཆུབ་སེམས་དཔའ་འཁོར་ལོ་མོས་པ་དང་། བྱང་ཆུབ་སེམས་དཔའ་གཡུལ་ལས་རྣམ་པར་རྒྱལ་བ་དང་། བྱང་ཆུབ་སེམས་དཔའ་བློ་གྲོས་སྤྱོད་པ་དང་། བྱང་ཆུབ་སེམས་དཔའ་གློག་ཐོབ་དང་། བྱང་ཆུབ་སེམས་དཔའ་རྣམ་པར་རྒྱལ་བའི་སྤོབས་པ་དང་། བྱང་ཆུབ་སེམས་དཔའ་སེང་གེའི་ང་རོ་དང་། བྱང་ཆུབ་སེམས་དཔའ་རབ་དབྱངས་དང་། བྱང་ཆུབ་སེམས་དཔའ་སད་བྱེད་དང་། བྱང་ཆུབ་སེམས་དཔའ་སྤྱོད་པ་སྒྱུར་བ་ལ་མཁས་པ་དང་། བྱང་ཆུབ་སེམས་དཔའ་རབ་ཏུ་ཞི་བའི་སྤྱོད་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི་གཙོ་བོར་གྱུར་ཏོ། །གཞན་ཡང་བརྒྱ་བྱིན་ལྷའི་དབང་པོ་དང་། རྒྱལ་པོ་ཆེན་པོ་བཞི་དང་། འཇིག་རྟེན་གྱི་ཁམས་མི་མཇེད་ཀྱི་བདག་པོ་ཚངས་པའི་རྒྱལ་པོ་དང་། མཐུ་ཆེན་པོ་དང་ལྡན་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནང་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པའི་འཁོར་ཚད་མེད་པ་རྣམས་དང་ཡང་ཐབས་གཅིག་
ཏུ་བཞུགས་སོ། །དེ་ནས་དེའི་ཚེ་བྱང་ཆུབ་སེམས་དཔའ་གློག་ཐོབ་ཅེས་བྱ་བས་འཁོར་མང་མོ་རབ་ཏུ་ཞི་ཞིང་ཡོངས་སུ་དག་པ་དག་འདུས་པར་གྱུར་པ་མཐོང་བ་དང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐེ་ཚོམ་ཅུང་ཟད་ཅིག་མཆིས་ཏེ་དེང་ཞུ་བར་འཚལ་ན། དེ་བཞིན་གཤེགས་པས་ཐུགས་རྗེས་གསན་པར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་གློག་ཐོབ་ལ་བཀའ་སྩལ་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཁྱོད་ལ་སྐབས་ཕྱེས། ཁྱོད་ཅི་དང་ཅི་འདོད་པ་དྲིས་ཤིག་དང་ཁྱོད་ལ་ཡང་དག་པར་བསྟན་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་གློག་ཐོབ་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཆོས་ཇི་ལྟ་བུ་ཞིག་དང་ལྡན་པར་གྱུར་ན་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བགྱིད་ཅིང་སྐྱོན་རྣམས་ཀྱིས་གོས་པར་མི་འགྱུར་བ་དང་། དབང་པོ་དང་རང་བཞིན་ཇི་ལྟ་བ་བཞིན་དུ་ཐབས་མཁས་པས་སེམས་ཅན་དེ་དག་དྲངས་ཏེ་ལུས་ཞིག་པའི་འོག་ཏུ་ངན་འགྲོ་རྣམས་སུ་ལྟུང་བར་མི་འགྱུར་ཞིང་གདོན་མི་འཚལ་བར་མཉམ་པ་ཉིད་རྟོགས་པར་འགྱུར་བ་དང་། འཇིག་རྟེན་ན་གནས་ཀྱང་པད་མ་བཞིན་སྐྱོན་གྱིས་གོས་པར་མི་འགྱུར་བ་དང་། ཆོས་ཀྱི་དབྱིངས་ལས་མ་གཡོས་པར་ཡང་སངས་རྒྱས་ཀྱི་ཞིང་ཀུན་དུ་རྒྱུ་ཞིང་རྟག་པར་དེ་བཞིན་གཤེགས་པའི་གཟུགས་ཀྱི་སྐུ་མཐོང་བ་དང་འབྲལ་བར་མི་འགྱུར་བ་དང་། རྣམ་པར་ཐར་པ་གསུམ་ལ་རབ་ཏུ་གནས་ཀྱང་སྙོམས་པར་མི་འཇུག་པར་སེམས་ཅན་གྱི་མོས་པ་ཇི་ལྟ་བ་བཞིན་དུ་སངས་རྒྱས་ཀྱི་ཞིང་གི་བཀོད་པ་ཡོངས་སུ་སྦྱངས་ནས་སྐད་ཅིག་མ་གཅིག་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ལགས། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གློག་ཐོབ་ཀྱིས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་ཞུ་བ་ཞུས་པ། བླ་
ན་མ་མཆིས་མི་ཡི་གཙོ། །མཁྱེན་དང་གཟིགས་པ་ཚད་མ་མཆིས། །མ་འདྲེས་ཆོས་ལ་བཞུགས་ནས་ནི། །འཇིག་རྟེན་རྣམས་ལ་ཕན་འདོགས་མཛད། །སེམས་ཅན་ཀུན་ལ་སྙོམས་པར་གཟིགས། །འཇིག་རྟེན་ཀུན་གྱི་མགོན་སྐྱབས་མཛད། །ལོག་དང་ཡང་དག་ལམ་བསྟན་ནས། །མཐར་ཐུག་བདེ་ལ་འགོད་པར་མཛད། །ཡོན་ཏན་མཆོག་ནི་རབ་བསགས་པས། །རིན་ཆེན་སྣ་ཚོགས་ཕུང་པོ་འདྲ། །འཇིག་རྟེན་ཤེས་རབ་ཉི་མ་ཁྱོད། །ཁམས་གསུམ་མཆོད་འོས་གཙོ་བོ་ལགས། །ཐེག་པ་ཆེན་པོ་བཀས་བཤད་ནས། །བྱང་ཆུབ་ལམ་ནི་རྫོགས་པར་མཛོད། །ཞལ་མཚན་ཟླ་བ་ཉ་བ་འདྲ། །ཞི་གནས་དག་ནི་ཕུན་སུམ་ཚོགས། །ཉེར་ཞི་ཆོས་ནི་རབ་བསྟན་ནས། །ཉོན་མོངས་རྣམས་ནི་ཞི་བར་མཛད། །བྱང་ཆུབ་སྤྱོད་པ་བཀས་བཤད་ནས། །སེམས་ཅན་རྣམས་ལ་ཕན་མཛད་གསོལ། །སངས་རྒྱས་ཞིང་དང་སྐུ་ཚེ་དང་། །གཟུགས་སྐུ་དང་ནི་འཁོར་རྣམས་དང་། །ཕྲིན་ལས་གསུམ་དང་ཆོས་རྣམས་ཀྱང་། །ཐམས་ཅད་ཀུན་ནི་རྣམ་པར་དྲག །བཅོམ་ལྡན་བྱང་ཆུབ་སེམས་དཔའ་ཡི། །རྣམ་དག་སྤྱོད་པ་བཀས་བཤད་གསོལ། །ཇི་ལྟར་བདུད་ནི་གདུལ་བར་བགྱི། །ཇི་ལྟར་ཆོས་ནི་བསྟན་པར་བགྱི། །ཇི་ལྟར་དྲན་པ་ཉམས་མི་འགྱུར། །ཁྱོད་ཀྱི་བཀས་ནི་བཤད་དུ་གསོལ། །ཇི་ལྟར་དཔའ་བོ་དག་གིས་ནི། །འཁོར་བ་ཀུན་དུ་ཞུགས་གྱུར་ཀྱང་། ། མཚན་ཉིད་གཅིག་ལ་གནས་བགྱིད་ཅིང་། །ཆོས་ལ་རྟག་ཏུ་གཡོ་མི་འགྱུར། །ཇི་ལྟར་སངས་རྒྱས་རྣམས་ལ་ནི། །བསྟེན་ཅིང་མཆོད་པ་བགྱིས་ནས་ནི། །རྟག་པར་སངས་རྒྱས་སྐུ་བལྟས་ཀྱང་། །མཐར་ནི་མཚན་མ་སྤོང་འགྱུར་ལགས། །རྣམ་ཐར་གསུམ་པོ་མངོན་བགྱིས་ཀྱང་། །མཁའ་ལ་བྱ་ནི་འཕུར་བ་བཞིན། །ཡོན་ཏན་ཕུན་ཚོགས་མ་གྱུར་བར། །ནམ་ཡང་མྱ་ངན་མི་འདའ་ལགས། །དབང་པོ་རང་བཞིན་ཡོངས་རྟོགས་ནས། །འཇིགས་པ་མ་མཆིས་རྗེས་འབྲང་ཞིང་། །མངོན་པར་ཞེན་པ་མ་མཆིས་བར། །སེམས་ཅན་དེ་དག་སྨིན་བགྱིད་ལགས། །སྔར་ནི་འཇིག་རྟེན་བདེ་བཏང་ནས། །སླད་ཀྱིས་དང་བའི་སེམས་བསྐྱེད་དེ། །ཡེ་ཤེས་གྱ་ནོམ་ཕུན་ཚོགས་པས། །བླ་མེད་བྱང་ཆུབ་འཐོབ་པར་འགྱུར། །
འདི་འདྲའི་ཟབ་མོ་གྱ་ནོམ་དོན། །དེ་བཞིན་གཤེགས་པས་བཀས་བཤད་གསོལ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་གློག་ཐོབ་ལ་བཀའ་སྩལ་པ། རིགས་ཀྱི་བུ་ཁྱོད་ཀྱིས་སེམས་ཅན་ཚད་མེད་པ་རྣམས་ལ་ཕན་ཞིང་བདེ་བར་བྱ་བ་དང་། ད་ལྟར་གྱི་ལྷ་དང་བཅས་པའི་འཇིག་རྟེན་དང་། མ་འོངས་པའི་བྱང་ཆུབ་སེམས་དཔའ་རྣམས་ཡོངས་སུ་བཟུང་བའི་ཕྱིར་དེ་བཞིན་གཤེགས་པ་ལ་དོན་འདི་ལྟ་བུ་ཞུས་པ་ལེགས་སོ་ལེགས་སོ། །དེའི་ཕྱིར་གློག་ཐོབ་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཞིག་དང་ཁྱོད་ལ་ཡང་དག་པར་བསྟན་པར་བྱའོ། །བྱང་ཆུབ་སེམས་དཔའ་གློག་ཐོབ་ཀྱིས་བཅོམ་ལྡན་འདས་དེ་བཞིན་དུ་ཐོས་པར་འཚལ་ལོ་ཞེས་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གཏེར་ཆེན་པོ་དང་། ཟད་མི་ཤེས་པའི་གཏེར་དང་། ཀུན་དུ་ཟད་མི་ཤེས་པའི་གཏེར་དང་། མཐའ་མེད་པའི་གཏེར་རྣམ་པ་ལྔ་དང་ལྡན་པ་སྟེ། བྱང་ཆུབ་སེམས་དཔའ་དེ་ལྟ་བུའི་གཏེར་ཕུན་སུམ་ཚོགས་པར་གྱུར་པས་རྒུད་པ་རྣམས་གཏན། སྤོང་ཞིང་གོང་དུ་བསྟན་པ་ལྟ་བུའི་ཡོན་ཏན་ཁྱད་པར་དུ་འཕགས་པ་ཡང་ཡོངས་སུ་རྫོགས་པར་བྱེད་ལ་ཚེགས་ཆུང་ངུས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་འཐོབ་པར་འགྱུར་རོ། །ལྔ་གང་ཞེ་ན། འདི་ལྟ་སྟེ། འདོད་ཆགས་སྤྱོད་པའི་གཏེར་དང་། ཞེ་སྡང་སྤྱོད་པའི་གཏེར་དང་། གཏི་མུག་སྤྱོད་པའི་གཏེར་དང་། ཆ་མཉམ་པ་སྤྱོད་པའི་གཏེར་དང་། ཆོས་ཐམས་ཅད་ཀྱི་གཏེར་གང་ཡིན་པའོ། །གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་འདོད་ཆགས་སྤྱོད་པའི་གཏེར་ཞེས་བྱ་བ་ཇི་ལྟ་བུ་ཡིན་ཞེ་ན། འདི་ལྟ་སྟེ། སེམས་ཅན་རྣམས་ནི་འདོད་ཆགས་ཀྱི་སྤྱོད་པའི་རྗེས་སུ་འཐུན་ཞིང་ཕྱིན་ཅི་ལོག་གིས་བཅིངས་པས་མཚན་མ་རྣམས་ཀྱི་རྗེས་སུ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་ལ་སོགས་པའི་ཡུན་དག་ལ་རྣམ་པ་སྣ་ཚོགས་སུ་རྣམ་པར་བརྟགས་ནས་བརྟན་པ་ཉིད་དུ་མངོན་པར་ཞེན་པ་དང་། བདེ་བ་ལ་ཆགས་ཤིང་མྱོས་པར་གྱུར་པ་ཡིན་ལ། བྱང་ཆུབ་སེམས་དཔའ་ནི་སེམས་ཅན་དེ་དག་
གི་སེམས་ཀྱི་སྤྱོད་པ་རྣམ་པ་སྣ་ཚོགས་གང་ཡིན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པས་སེམས་ཅན་དེ་དག་གང་ལ་མོས་ཤིང་འདུན་པ་དང་། སྤྱོད་ཡུལ་གང་ལ་ཆགས་ཤིང་གོམས་པས་མཐུ་ཅན་དུ་གྱུར་པ་དང་། དད་པ་ཇི་ལྟ་བུ་དང་ལྡན་ཞིང་ཕུན་སུམ་ཚོགས་པར་གྱུར་པ་དང་། སྔོན་དགེ་བའི་རྩ་བ་ཇི་ལྟ་བུ་བསྐྱེད་པ་དང་། ཐེག་པ་གང་ལ་གཞོལ་བར་བྱེད་པ་དང་། དགེ་བའི་རྩ་བ་ཇི་སྙེད་ཡོད་པ་དག་ནམ་ཞིག་ན་ཡོངས་སུ་སྨིན་པར་གྱུར་པ་ཡང་རབ་ཏུ་ཤེས་ཏེ། བྱང་ཆུབ་སེམས་དཔའ་ནི་སེམས་ཅན་དེ་དག་གི་འདོད་པ་ཐམས་ཅད་ཡོངས་སུ་སྤང་བའི་ཕྱིར་དང་། དེ་དག་གི་དགེ་བའི་སེམས་རྟག་པར་རྒྱུན་མི་འཆད་པར་བྱ་བའི་ཕྱིར་ཤིན་དུ་ལེགས་པར་བརྟགས་ནས་ཡོངས་སུ་གསོ་བར་བྱེད་དེ། གློག་ཐོབ་སེམས་ཅན་རྣམས་ཀྱི་དབང་པོ་དང་། སྤྱོད་པའི་བྱེ་བྲག་ནི་ཤིན་ཏུ་ཤེས་པར་དཀའ་བར་རིག་པར་བྱ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱིས་ཀྱང་རིག་པར་མི་ནུས་ན་སོ་སོའི་སྐྱེ་བོ་དང་། མུ་སྟེགས་ཅན་རྣམས་ཀྱིས་ལྟ་སྨོས་ཀྱང་ཅི་དགོས། གློག་ཐོབ་སེམས་ཅན་ཁ་ཅིག་ནི་འདོད་པ་རྣམས་ལ་མངོན་པར་ཞེན་པར་གྱུར་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པ་ཡང་ཡོད་དོ། །སེམས་ཅན་ཁ་ཅིག་ནི་འདོད་པའི་ཡུལ་ལ་རེག་པ་ཙམ་མམ། འདོད་པའི་སེམས་ཀྱིས་ཚིག་སྨྲས་པ་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པ་ཡང་ཡོད་དོ། །སེམས་ཅན་ཁ་ཅིག་ནི་གཟུགས་སྡུག་མཐོང་ནས་འདོད་ཆགས་ཀྱི་སེམས་སྐྱེས་པ་ལས་གཟུགས་དེ་རྣམ་པར་འགྱུར་ཞིང་ཞིག་པར་མཐོང་བ་ཉིད་ཀྱིས་གཟུགས་མི་རྟག་པར་ཁོང་དུ་ཆུད་པར་གྱུར་ནས་འདོད་པའི་གདུང་བ་ཉེ་བར་ཞི་སྟེ། མི་རྟག་པ་ཉིད་ཤིན་དུ་ཡིད་ལ་བྱེད་པ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པ་ཡང་ཡོད་དོ། །སེམས་ཅན་ཁ་
ཅིག་ནི་བུད་མེད་མཐོང་བ་ན་མངོན་པར་ཞེན་པ་སྐྱེས་བ་མེད་ཀྱང་ཕྱིས་ཡིད་ལ་དྲན་པའི་དབང་གིས་འདོད་ཆགས་ཀྱི་སེམས་སྐྱེས་ནས་དེའི་ཁ་དོག་དང་དབྱིབས་ཡིད་ལ་བྱས་ནས་རྗེས་སུ་ཆགས་པ་སྐྱེ་བར་འགྱུར་བ་ཡང་ཡོད་དོ། །སེམས་ཅན་ཁ་ཅིག་ནི་རྨི་ལམ་ན་གཟུགས་ཡིད་དུ་འོང་བ་རྣམས་མཐོང་བའི་དབང་གིས་འདོད་ཆགས་ཀྱི་མངོན་པར་ཞེན་པ་སྐྱེས་ནས་ཡིད་ལ་བྱེད་ཅིང་ཡོངས་སུ་གཉེར་བར་བྱེད་པ་ཡང་ཡོད་དོ། །སེམས་ཅན་ཁ་ཅིག་ནི་བུད་མེད་ཀྱི་སྒྲ་ཐོས་པ་ཙམ་གྱིས་འདོད་ཆགས་ཀྱི་སྲེད་པ་སྐྱེད་པར་བྱེད་ལ། རེས་འགའ་ནི་མཐོང་བ་ཙམ་གྱིས་འདོད་ཆགས་ཀྱི་སེམས་དང་བྲལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པ་ཡང་ཡོད་པས་དེའི་ཕྱིར་གློག་ཐོབ་བྱང་ཆུབ་སེམས་དཔའ་ནི་འདོད་ཆགས་ཀྱི་ནད་རྣམ་པ་སྣ་ཚོགས་གང་ཡིན་པ་དང་། འདོད་ཆགས་ཀྱི་སྨན་གང་ཡིན་པ་དེ་དག་ཐབས་མཁས་པས་ལེགས་པར་ཁོང་དུ་ཆུད་ཀྱང་ཆོས་ཀྱི་དབྱིངས་ལ་གཉིས་སུ་འཛིན་པའི་མཚན་མ་ཡང་མེད་ལ། ཆོས་ཀྱི་དབྱིངས་ལ་རྨོངས་པར་གྱུར་པའི་སེམས་ཅན་དེ་དག་ལ་ཡང་སྙིང་རྗེ་ཆེན་པོ་སྐྱེད་པར་བྱེད་དོ། །གློག་ཐོབ་འདོད་ཆགས་དང་། ཞེ་སྡང་དང་། གཏི་མུག་ཅེས་བྱ་བ་དང་། ཆོས་ཀྱི་དབྱིངས་ཀྱི་ཡེ་ཤེས་ཞེས་བྱ་བའི་ཆོས་ཅུང་ཟད་ཙམ་ཡང་དམིགས་སུ་མེད་པས་བྱང་ཆུབ་སེམས་དཔའ་འདི་སྙམ་དུ་བདག་གིས་མཐོང་བ་ལྟར་ན་སེམས་ཅན་རྣམས་ནི་མཚན་མ་མེད་པ། རང་བཞིན་གྱིས་སྟོང་ཞིང་དབེན་པ། བཏགས་པ་ཙམ་དུ་རྣམ་པར་གཞག་པ་ཚོགས་ཤིང་འདུས་པའི་ཆོས་འདི་ལ་འདོད་ཆགས་དང་། ཞེ་སྡང་དང་། གཏི་མུག་སྐྱེད་པར་བྱེད་པས་བདག་གིས་འདི་དག་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་ནས་འདོད་ཆགས་ཀྱིས་རྨོངས་པར་གྱུར་པའི་སེམས་ཅན་དེ་དག་གི་ཆེད་དུ་སྙིང་རྗེ་ཆེན་པོ་ལ་གནས་ནས་སྔོན་གྱི་སྨོན་ལམ་ཡོངས་སུ་རྫོགས་པར་བྱེད་དོ། །ཆོས་ཀྱི་དབྱིངས་ལས་མ་གཡོས་པར་རྩོལ་བ་མེད་པའི་ཡེ་ཤེས་ཀྱིས་ཡོངས་སུ་སྨིན་པར་བྱའོ་སྙམ་དུ་སེམས་སོ། །སྐྱེས་པ་གང་ཞིག་བུད་མེད་དག་ལ་ཡང་དག་པ་མ་ཡིན་པས་སྡུག་པའི་འདུ་ཤེས་བསྐྱེད་ནས་འདོད་ཆགས་ལྕི་བ་སྐྱེས་པར་གྱུར་ན། བྱང་ཆུབ་སེམས་དཔས་བུད་མེད་ཤིན་ཏུ་སྡུག་ཅིང་མཛེས་པ། གཟུགས་ཀྱི་མཚན་ཁྱད་པར་དུ་འཕགས་པ། རིན་པོ་ཆེའི་རྒྱན་ཕྲེང་དང་ལྡན་པ། རྒྱན་རྣམ་པ་སྣ་ཚོགས་ཀྱིས་རབ་ཏུ་བརྒྱན་པས་ལྷའི་བུ་མོ་དང་འདྲ་བར་གྱུར་པ་སྔོན་མ་མཐོང་བ་དག་ཏུ་བསྒྱུར་ནས་
སེམས་ཅན་དེ་དག་གིས་ཇི་ལྟར་སྲེད་ཅིང་རྗེས་སུ་ཆགས་པ་དང་། ཤིན་ཏུ་མངོན་པར་ཞེན་པར་གྱུར་པ་སྟོན་པར་བྱེད་དེ། དེ་དག་གི་ནུས་པ་དང་སྦྱར་ནས་ཐབས་ཀྱིས་འདོད་ཆགས་ཀྱི་དུག་མངའ་དབྱུང་བའི་ཆེད་དུ་རང་དབང་དུ་གྱུར་བའི་མཐུས་བུད་མེད་ཀྱི་གཟུགས་སུ་བསྒྱུར་ནས་དེའི་མདུན་དུ་སྣང་བར་བྱས་ནས་ཆོས་བསྟན་པ་ཉིད་ཀྱིས་སེམས་ཅན་དེ་དག་ཆོས་ཀྱི་དབྱིངས་རྟོགས་པར་བྱས་ཏེ་མི་སྣང་བར་འགྱུར་རོ། །བུད་མེད་གང་ཞིག་སྐྱེས་པ་དག་ལ་འདོད་ཆགས་ཀྱི་སེམས་སྐྱེས་པར་གྱུར་ན་བྱང་ཆུབ་སེམས་དཔས་སྐྱེས་པའི་ལུས་བསྟན་ནས་འདོད་ཆགས་ཀྱི་དུག་མངའ་དབྱུང་བའི་ཆེད་དུ་ཆོས་བསྟན་པ་ཉིད་ཀྱིས་ཆོས་ཀྱི་དབྱིངས་ལ་ཞུགས་པར་བྱས་ནས་མི་སྣང་བར་བྱེད་དེ། གློག་ཐོབ་འདོད་ཆགས་ཀྱི་སྤྱོད་པ་ཉི་ཁྲི་ཆིག་སྟོང་དང་། སྤྱོད་པ་གཞན་དེ་དག་ཀྱང་གཏོགས་པར་བརྒྱད་ཁྲི་བཞི་སྟོང་དུ་གྱུར་པ་དེ་དག་བྱང་ཆུབ་སེམས་དཔས་རྩོལ་བ་མེད་པའི་ཡེ་ཤེས་ཀྱིས་ཆོས་ཀྱི་སྒོ་མོ་བྱེ་བ་སྟོང་ཕྲག་ཚད་མེད་པ་བསྐྱེད་དོ། །སེམས་ཅན་རྣམས་ཀྱི་སེམས་ཁོང་དུ་ཆུད་པར་བྱས་ནས་ཐམས་ཅད་རྣམ་པར་གྲོལ་བར་གྱུར་ཀྱང་བདག་གིས་སེམས་ཅན་དག་ལ་འདི་ལྟ་བུའི་ཆོས་བསྟན་ཏོ་སྙམ་དུ་སེམས་པ་ཡང་མེད་ལ། སེམས་ཅན་རྣམ་པར་གྲོལ་བར་གྱུར་པ་ཡང་མི་དམིགས་སོ། །གློག་ཐོབ་འདི་ལྟ་སྟེ་དཔེར་ན་མཚོ་མ་དྲོས་པའི་ཀླུའི་རྒྱལ་པོ་ནི་ལས་ཀྱི་མཐུའི་དབང་གིས་དེའི་ཕོ་བྲང་གི་ནང་ནས་ཆུ་ཀླུང་ཆེན་པོ་བཞི་བྱུང་ནས་སེམས་ཅན་ཆུ་དང་སྐམ་ལ་གནས་པ་དག་དབྱར་ཚ་བའི་དུས་ཀྱི་ཚེ་བསིལ་བ་དང་། རླན་གྱིས་མེ་ཏོག་དང་། འབྲས་བུ་དག་རྒྱས་ཤིང་འབྲུ་རྣམས་འཕེལ་བར་གྱུར་ནས་སེམས་ཅན་མང་པོ་ཤིན་ཏུ་བདེ་བར་བྱེད་ཀྱང་། ཀླུའི་རྒྱལ་པོ་དེ་བདག་གིས་ཆུ་བོ་འདི་དག་ཕྱུང་ངོ་། །དབྱུང་བར་བྱའོ་སྙམ་དུ་མི་སེམས་མོད་ཀྱི། འོན་ཀྱང་ཆུ་ཀླུང་བཞི་པོ་དག་རྟག་ཏུ་འབབ་ཅིང་སེམས་ཅན་རྣམས་ཉེ་བར་སྤྱོད་པར་བྱེད་དོ། །བྱང་ཆུབ་སེམས་དཔའ་ཡང་དེ་བཞིན་དུ་སྔོན་གྱི་སྨོན་ལམ་ཡོངས་སུ་རྫོགས་པར་གྱུར་པའི་དབང་གིས་རྩོལ་བ་མེད་པའི་ཡེ་ཤེས་ཀྱིས་འཕགས་པའི་བདེན་པ་བཞི་བསྟན་ནས་འཁོར་བའི་ཡོངས་སུ་གདུང་བ་ཐམས་ཅད་བསལ་ཏེ་ལྷ་དང་མི་རྣམས་ལ་འཕགས་
པའི་རྣམ་པར་གྲོལ་བའི་བདེ་བ་སྦྱིན་པར་བྱེད་ཀྱང་བྱང་ཆུབ་སེམས་དཔའ་དེ་བདག་གིས་ཆོས་བསྟན་ཏོ། །བསྟན་པར་བྱའོ་སྙམ་དུ་མི་སེམས་མོད་ཀྱི། འོན་ཀྱང་རང་གི་ངང་གིས་སྙིང་རྗེ་ཆེན་པོའི་བསམ་པ་ལ་གནས་ནས་སེམས་ཅན་རྣམས་ལ་སོ་སོར་བརྟགས་ཏེ་ཅི་རིགས་པར་ཆོས་སྟོན་པར་བྱེད་དོ། །གཞན་ཡང་གློག་ཐོབ་འདི་ལྟ་སྟེ་དཔེར་ན་བརྒྱ་བྱིན་ལྷའི་དབང་པོ་ལ་ལྷའི་བུ་མོ་ཁྲག་ཁྲིག་ཕྲག་བཅུ་གཉིས་ཡོད་པ་དེ་དག་བརྒྱ་བྱིན་ལྷའི་དབང་པོའི་རང་དབང་གི་མཐུའི་དབང་གིས་ལུས་མང་པོ་བསྟན་ནས་ལྷའི་བུ་མོ་དེ་དག་དེ་དང་ལྷན་ཅིག་འདོད་པའི་བདེ་བ་ཡོངས་སུ་རྫོགས་པར་མྱོང་བས་དེ་དག་སོ་སོ་ནས་འདི་སྙམ་དུ་བདག་གཅིག་པུ་ནི། དེང་ལྷའི་དབང་པོ་དང་ལྷན་ཅིག་རྩེས་སོ་སྙམ་དུ་སེམས་ཀྱང་ཡང་དག་པར་ལྷའི་དབང་པོ་དེ་ལ་མངོན་པར་ཞེན་པར་གྱུར་པ་ཅི་ཡང་མེད་དོ། །བྱང་ཆུབ་སེམས་དཔའ་ཡང་དེ་བཞིན་དུ་སེམས་ཅན་གང་ཡོངས་སུ་བཟླ་བའི་འོས་སུ་གྱུར་པ་དེ་དག་གི་བསམ་པ་ཇི་ལྟ་བ་བཞིན་དུ་ཡོངས་སུ་སྨིན་པར་བྱེད་ཀྱང་། བྱང་ཆུབ་སེམས་དཔའ་ལ་མངོན་པར་ཞེན་པར་གྱུར་པ་མེད་དོ། །གཞན་ཡང་གློག་ཐོབ་འདི་ལྟ་སྟེ་དཔེར་ན་ཉི་མའི་དཀྱིལ་འཁོར་རི་མཐོན་པོའི་རྩེ་མོ་ལ་ཤར་བའི་ཚེ་འོད་ཀྱིས་འཛམ་བུའི་གླིང་ཀུན་དུ་སྣང་བར་བྱེད་པས་གང་དུ་སྣང་བར་བྱས་པའི་གནས་དེ་དག་ཏུ་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་པ་སྣ་ཚོགས་རབ་ཏུ་སྟོན་པར་བྱེད་ཀྱང་ཉི་མའི་དཀྱིལ་འཁོར་དེ་ནི་ཁ་དོག་གཅིག་པ། འོད་གཅིག་པ་ཉིད་དེ་ཐ་དད་པའི་མཚན་མ་མེད་དོ། །བྱང་ཆུབ་སེམས་དཔའ་ཡང་དེ་བཞིན་དུ་ཤེས་རབ་ཀྱི་ཉི་མའི་དཀྱིལ་འཁོར་གྱིས་ཆོས་ཀྱི་དབྱིངས་སྣང་བར་བྱས་ནས་སེམས་ཅན་གྱི་མངོན་པར་ཞེན་པའི་རིའི་རྩེ་མོ་དེ་དག་ཏུ་ཤར་པ་ན་དམིགས་པའི་མཚན་ཉིད་གཅིག་ཏུ་གྱུར་ཅིང་དེ་དག་གི་མོས་པ་ཇི་ལྟ་བ་བཞིན་དུ་ཆོས་སྟོན་པར་བྱེད་ཀྱང་། ཆོས་ཀྱི་དབྱིངས་ལ་གཉིས་སུ་གྱུར་པའི་མཚན་ཉིད་མེད་དེ། གློག་ཐོབ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་འདོད་ཆགས་ཀྱི་སྤྱོད་པའི་གཏེར་ཞེས་བྱའོ། །བྱང་སེམས་དཔའ་གང་གིས་གཏེར་འདི་ཐོབ་པར་གྱུར་ན་བསྐལ་པའམ། བསྐལ་པ་ལས་ལྷག་པར་སེམས་ཅན་
རྣམས་ཀྱི་མོས་པ་སྣ་ཚོགས་ཇི་ལྟ་བ་བཞིན་དུ་ལུས་ཚད་མེད་པ་བསྟན་ནས་ཚིག་རྣམ་པ་སྣ་ཚོགས་ཀྱིས་ཆོས་སྟོན་པར་བྱེད་ཀྱང་ཆོས་ཀྱི་དབྱིངས་ལ་གཉིས་སུ་གྱུར་པའི་མཚན་ཉིད་མེད་དོ། །གཞན་ཡང་གློག་ཐོབ་འདི་ལྟ་སྟེ་དཔེར་ན་གསེར་ཡང་དག་པ་ནི་མགར་བའི་ཐབས་མཁས་པའི་མཐུའི་དབང་གིས་མོས་པ་ཇི་ལྟ་བ་བཞིན་དུ་རྒྱན་རྣམ་པ་སྣ་ཚོགས་སུ་བྱས་ཏེ་མཚན་ཉིད་ཐ་དད་པར་གྱུར་ཀྱང་གསེར་གྱི་རང་བཞིན་ལ་ནི་ཐ་དད་དུ་གྱུར་པ་ཅི་ཡང་མེད་དོ། །བྱང་ཆུབ་སེམས་དཔའ་ཡང་དེ་བཞིན་དུ་ཆོས་ཀྱི་དབྱིངས་ཤིན་ཏུ་ལེགས་པར་བརྟགས་ནས་སེམས་ཅན་མོས་པ་སྣ་ཚོགས་པ་ཇི་ལྟ་བ་བཞིན་དུ་ལུས་ཚད་མེད་པ་དག་བསྟན་ནས་ཚིག་རྣམ་པ་སྣ་ཚོགས་ཀྱིས་ཆོས་སྟོན་པར་བྱེད་ཀྱང་ཆོས་ཀྱི་དབྱིངས་ལ་ནི་གཉིས་སུ་གྱུར་པའི་མཚན་ཉིད་མེད་དེ། འདི་ནི་རྟག་པར་ཆོས་ཀྱི་དབྱིངས་ལ་ཞུགས་པས་མཚན་ཉིད་གཅིག་ཏུ་གྱུར་པ་ཞེས་བྱའོ། །བྱང་ཆུབ་སེམས་དཔའ་གང་གིས་གཏེར་འདི་ལྟ་བུ་ཐོབ་པར་གྱུར་ན་སེམས་ཅན་གྱི་ཆེད་དུ་རྣམ་པ་སྣ་ཚོགས་ཀྱི་སྒོ་ནས་ཆོས་སྟོན་པར་བྱེད་པས་དེ་དག་གིས་ཆོས་ཐོས་པའི་དབང་གིས་འཕགས་པའི་ནོར་ཕུན་སུམ་ཚོགས་པའི་དབང་ཕྱུག་དང་ལྡན་པར་གྱུར་པས་འཁོར་བའི་པ་དག་གཏན་དུ་ཡོངས་སུ་སྤོང་བར་བྱེད་དོ། །གཞན་ཡང་གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཞེ་སྡང་སྤྱོད་པའི་གཏེར་ཞེས་བྱ་བ་ཇི་ལྟ་བུ་ཞེ་ན། འདི་ལྟ་སྟེ། སེམས་ཅན་རྣམས་ནི་ང་རྒྱལ་དང་མཚུངས་པར་ལྡན་པ། བདག་དང་བདག་གིར་འཛིན་པ་དང་བཅས་པ། བདག་དང་བདག་གི་མཚན་མ་ལ་གནས་པས་ཡུན་རིང་པོ་ནས་བྱམས་པ་དང་། བཟོད་པ་མ་བསྒོམས་པ་ཞེ་སྡང་གི་གདུང་བས་རང་གི་སེམས་བཤིག་པར་གྱུར་པ། སངས་རྒྱས་དང་། ཆོས་དང་། དགེ་འདུན་རྗེས་སུ་དྲན་པར་མ་གྱུར་པ། ཞེ་སྡང་གི་གདུག་པས་གཡོགས་པས་ཆོས་ཉིད་ལ་རྨོངས་པར་གྱུར་པ་ཡིན་ཡང་བྱང་ཆུབ་སེམས་དཔའ་ནི་ཞེ་སྡང་མང་བའི་སེམས་ཅན་དེ་དག་ལ་ནམ་ཡང་གནོད་སེམས་དང་རྣམ་པར་འཚེ་བ་སྐྱེད་པར་མི་བྱེད་ཀྱི། འདི་སྙམ་དུ་ཀྱེ་མ་སེམས་ཅན་འདི་དག་ནི་གཏི་མུག་གིས་རྨོངས་པས་ཆོས་རྣམས་གཟོད་མ་ཉིད་ནས་
རབ་ཏུ་དབེན་ཞིང་ཞི་བ། དྲི་མ་དང་རྙོགས་པ་མེད་པ། འདུམ་པ་མེད་པ། རྩོད་པ་མེད་པ། རབ་ཏུ་དབེན་པའི་ཆོས་ཉིད་ལ་ཕྱིན་ཅི་ལོག་དང་མཚུངས་པར་ལྡན་པར་གྱུར་པའི་དབང་གིས་ཡང་དག་པ་མ་ཡིན་པའི་ཞེ་སྡང་དང་། འཁོན་དུ་འཛིན་པ་རྒྱས་པར་གྱུར་ཏོ་སྙམ་དུ་སེམས་པ་ཁོ་ནར་ཟད་དོ། །དེ་སྙམ་དུ་བསམས་ནས་ཀྱང་སྙིང་རྗེ་ཆེན་པོ་ལ་གནས་ཏེ་རྟག་པར་བདག་ཉིད་འགྱོད་ཅིང་བཤགས་པར་ཡང་བྱེད་ལ། གལ་ཏེ་ལུས་ཀྱི་ཡན་ལག་དང་ཉིང་ལག་གཅོད་པ་ཞིག་ཡོང་ན་ཡང་ཞེ་སྡང་སྤྱོད་པའི་སེམས་ཅན་དེ་དག་འདུལ་བར་འདོད་པའི་ཕྱིར་བཟོད་པ་ལ་རབ་ཏུ་གནས་པར་བྱེད་དོ། །གལ་ཏེ་ཞེ་སྡང་སྤྱོད་པའི་སེམས་ཅན་ཚད་མེད་པ་དེ་དག་ཕན་ཚུན་གཅིག་ལ་གཅིག་རྒྱབ་ཀྱིས་ཕྱོགས་ཤིང་ཞེ་སྡང་དང་། འཁོན་དུ་འཛིན་པའི་ལས་ཡོངས་སུ་རྫོགས་པའི་དབང་གིས་སྦྲུལ་གདུག་པ་ངན་འགྲོའི་ལུས་སུ་ལྟུང་བར་གྱུར་པ་དག་ལ་ནི་བྱང་ཆུབ་སེམས་དཔའ་བཟོད་པ་ལ་རབ་ཏུ་གནས་པ་དེས་འདི་ལྟར་བྱམས་པ་དང་། དྲན་པའི་སྟོབས་ཀྱིས་སེམས་ཅན་དེ་དག་བཏུལ་ནས་ངན་འགྲོའི་རྣམ་པར་སྨིན་པ་ལེན་པར་མི་འགྱུར་ཞིང་། གདོན་མི་ཟ་བར་མཉམ་པ་ཉིད་རྟོགས་པར་བྱེད་པ་གང་ཡིན་པ་འདི་ནི་བྱང་ཆུབ་སེམས་དཔའ་ཐབས་མཁས་པས་སེམས་ཅན་གྱི་ཞེ་སྡང་གི་སྤྱོད་པ་ཡོངས་སུ་བསལ་བར་བྱེད་པ་ཞེས་བྱའོ། །གཞན་ཡང་གློག་ཐོབ་བྱང་ཆུབ་སེམས་དཔའ་ནི་གལ་ཏེ་སེམས་ཅན་ཞེ་སྡང་ཅན་དག་མཐོང་བར་གྱུར་ན། འདི་སྙམ་དུ་ཆོས་ཐམས་ཅད་ནི་རང་བཞིན་གྱིས་རྣམ་པར་དག་པ་ཡིན་ན། ཀྱེ་མ་སེམས་ཅན་འདི་དག་ནི་ཞེ་སྡང་གི་རྗེས་སུ་འབྲངས་ནས་ཡང་དག་པ་མ་ཡིན་པས་རྣམ་པར་རྟོག་པ་བསྐྱེད་ནས་མཉམ་ཞིང་རྩོད་པ་མེད་པའི་ཆོས་ཉིད་འདི་ལ་ཞེ་སྡང་གི་བསམ་པ་བསྐྱེད་པས་སེམས་ཅན་འདི་དག་ཆོས་ཀྱི་དབྱིངས་ཉིད་མ་རྟོགས་པར་གྱུར་ཏོ། །གལ་ཏེ་སེམས་ཅན་འདི་དག་ཆོས་ཉིད་མཐོང་བར་གྱུར་ན་ནི་གཞན་དག་ལ་གནོད་སེམས་བསྐྱེད་པར་མི་འགྱུར་བ་ཞིག་ན། ཆོས་ཀྱི་དབྱིངས་ཀྱི་ངོ་བོ་ཉིད་མ་རྟོགས་པས་དེའི་ཕྱིར་ཞེ་སྡང་སྐྱེས་པར་གྱུར་ཏོ་ཞེས་བྱང་ཆུབ་སེམས་དཔའ་དེས་ཞེ་སྡང་མང་བའི་སེམས་ཅན་དེ་དག་ལ་ལྷག་པར་སྙིང་བརྩེ་བ་བསྐྱེད་ནས་སྙིང་རྗེ་ཆེན་
པོ་ལ་གནས་ཏེ། སྔོན་གྱི་སྨོན་ལམ་ཡང་ཡོངས་སུ་རྫོགས་པར་བྱེད་ལ། རྩོལ་བ་མེད་པའི་ཡེ་ཤེས་ཀྱིས་སེམས་ཅན་གྱི་ཞེ་སྡང་གི་སྤྱོད་པ་རྣམ་པར་གཞིག་པའི་ཕྱིར་ཆོས་ཀྱི་སྒོ་མོ་རྣམ་པ་སྣ་ཚོགས་ཡང་དག་པར་སྟོན་པར་བྱེད་ཀྱང་བདག་གིས་སེམས་ཅན་གྱི་ཞེ་སྡང་བསལ་བའི་ཕྱིར་ཆོས་བསྟན་ཏོ་སྙམ་དུ་མི་སེམས་སོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔས་ཆོས་ཀྱི་དབྱིངས་ཀྱི་མཚན་ཉིད་ཤིན་དུ་ལེགས་པར་རྟོགས་པའི་ཕྱིར་རོ། །འདི་ནི་བྱང་ཆུབ་སེམས་དཔའ་ཆོས་ཀྱི་དབྱིངས་དབྱེར་མེད་པའི་མཚན་ཉིད་ལ་གནས་ནས་ཉོན་མོངས་པའི་སྤྱོད་པ་རབ་ཏུ་བསལ་བ་ཞེས་བྱའོ། །གློག་ཐོབ་འདི་ལྟ་སྟེ། དཔེར་ན་མུན་པ་བསལ་ནས་སྣང་བ་འཐོབ་པར་འགྱུར་ཡང་མུན་པ་སེལ་བར་བྱེད་པ་མེད་དེ། འདི་ལྟར་མུན་པ་དང་སྣང་བ་ངོ་བོ་ཉིད་ནམ་མཁའ་དང་མཚུངས་ཤིང་དབྱེར་མེད་པ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་དབྱེར་མེད་པའི་ཡེ་ཤེས་དེ་ལ་བརྟེན་ནས་ཐབས་མཁས་པས་ཆོས་བསྟན་ཏེ། ཞེ་སྡང་སྤྱོད་པའི་སེམས་ཅན་རྣམ་པ་སྣ་ཚོགས་འདུལ་ཞིང་ཞི་བར་བྱེད་ཀྱང་ཆོས་ཀྱི་དབྱིངས་ལ་ཐ་དད་དུ་གྱུར་པ་མེད་དོ། །གློག་ཐོབ་འདི་ལྟ་སྟེ་དཔེར་ན་ཉི་མའི་དཀྱིལ་འཁོར་ཤར་ནས་འོད་ཀྱིས་གང་དང་གང་དུ་སྣང་བར་བྱས་པ་དེ་དག་ཐམས་ཅད་ནི་ཉི་མའི་དཀྱིལ་འཁོར་གྱིས་བསྡུས་པ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་ཡང་ཞེ་སྡང་གི་སྤྱོད་པ་གདུལ་ཞིང་བསལ་བའི་ཕྱིར་ཇི་ཙམ་དུ་ཚིག་ཏུ་བརྗོད་པ་ཐམས་ཅད་ཆོས་ཀྱི་འཁོར་ལོ་ཡིན་ཡང་ཆོས་ཀྱི་དབྱིངས་ལ་ནི་ཐ་དད་དུ་གྱུར་པ་མེད་དོ། །འདི་ལྟར་ཞེ་སྡང་གི་སྤྱོད་པ་ཉི་ཁྲི་ཚིག་སྟོང་དང་། སྤྱོད་པ་གཞན་གཏོགས་པ་བརྒྱད་ཁྲི་བཞི་སྟོང་དུ་གྱུར་པ་དེ་དག་བྱང་ཆུབ་སེམས་དཔའ་རྩོལ་བ་མེད་པའི་ཡེ་ཤེས་ཡོངས་སུ་གྲུབ་པས་སེམས་ཅན་དེ་དག་གི་ཞེ་སྡང་གི་སྤྱོད་པ་རྣམ་པ་སྣ་ཚོགས་ཀྱི་རྗེས་སུ་ཆོས་སྟོན་པར་བྱེད་ཀྱང་བདག་གིས་སེམས་ཅན་ལ་ཆོས་བསྟན་ཏོ། །སྟོན་ཏོ། །སྟོན་པར་འགྱུར་རོ་སྙམ་དུ་སེམས་པ་མེད་དོ། །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཞེ་སྡང་སྤྱོད་པའི་གཏེར་ཞེས་བྱའོ། །བྱང་ཆུབ་སེམས་དཔའ་གང་གིས་
གཏེར་འདི་ཐོབ་པར་གྱུར་ན་བསྐལ་པའམ། བསྐལ་པ་ལས་ལྷག་པར་སེམས་ཅན་གྱི་མོས་པ་རྣམ་པ་སྣ་ཚོགས་ཀྱི་རྗེས་སུ་ཚིག་འབྲུ་དང་། ཡི་གེ་དང་། བརྗོད་པ་རྣམ་པ་སྣ་ཚོགས་ཀྱི་ཐབས་མཁས་པས་ཆོས་སྟོན་པར་བྱེད་ཀྱང་ཞེ་སྡང་སྤྱོད་པའི་མཐའ་རྙེད་པར་མི་འགྱུར་ལ། བྱང་ཆུབ་སེམས་དཔའ་དེའི་ཤེས་རབ་དང་། སྤོབས་པ་ཡང་གཏུགས་པར་མི་འགྱུར་ཏེ། འདི་ནི་བྱང་ཆུབ་སེམས་དཔའ་ཆོས་ཀྱི་དབྱིངས་དབྱེར་མེད་པའི་མཚན་ཉིད་ལེགས་པར་བཤད་པས་ཐོབ་པའི་ཞེ་སྡང་སྤྱོད་པའི་གཏེར་ཞེས་བྱའོ། །གཞན་ཡང་གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཏི་མུག་སྤྱོད་པའི་གཏེར་ཞེས་བྱ་བ་ཇི་ལྟ་བུ་ཞེ་ན། གློག་ཐོབ་བྱང་ཆུབ་སེམས་དཔའ་རྣམས་ཀྱི་སྤྱོད་པ་འདི་ལྟ་བུ་འདི་ནི་ཤིན་དུ་དཀའ་བའི་དངོས་པོ་ཡིན་ཏེ། འདི་ལྟར་སེམས་ཅན་རྣམས་ནི་ཉོན་མོངས་པའི་རྗེས་སུ་འབྲང་བ། གཞན་ལ་གནོད་པ་བྱེད་པ། མ་རིག་པའི་མངལ་གྱི་སྒོ་ངས་ཀུན་དུ་དཀྲིགས་པ་དར་གྱི་སྲིན་བུ་བཞིན་དུ་བདག་ཉིད་བཅིངས་པས་ཆོས་ཀྱི་དབྱིངས་རྟོགས་པའི་ཐབས་མེད་པ། བྱ་བ་དག་ལ་ལེགས་པར་སོ་སོར་མི་རྟོག་པ་བདག་ཏུ་ལྟ་བ་ལ་མངོན་པར་ཞེན་པ། ལམ་ལོག་པར་ཞུགས་པ། བྱིས་པའི་སྤྱོད་པ་ལ་གནས་པ། ངེས་པར་འབྱུང་བ་དཀའ་བ་ཡིན་པས་འདི་ལྟ་བུ་ལ་སོགས་པས་རྨོངས་པར་གྱུར་བའི་སེམས་ཅན་དག་གི་ཆེད་དུ་དང་པོ་སེམས་བསྐྱེད་པ་ནས་སྦྱོར་བ་ཆེན་པོ་བསྐྱེད་དེ། ངལ་ཞིང་སྡུག་བསྔལ་བ་ཡང་མེད། ལེ་ལོ་ཡང་མེད་པར་རྐྱེན་གང་དང་། མོས་པ་གང་དང་། ཆོས་བསྟན་པ་ཇི་ལྟ་བུ་ཞིག་གིས་སེམས་ཅན་འདི་དག་བྱང་ཆུབ་སེམས་དཔའི་སྤྱོད་པ་ལ་བཙུད་དེ་རྣམ་པར་གྲོལ་པ་ཐོབ་པར་འགྱུར་སྙམ་དུ་སེམས་ཏེ། བྱང་ཆུབ་སེམས་དཔའ་སྔོན་ཆོས་ཀྱི་དབྱིངས་ལེགས་པར་སོ་སོར་བརྟགས་པར་རྩོལ་བ་མེད་པའི་ཡེ་ཤེས་ཀྱིས་སྙིང་རྗེ་ཆེན་པོ་ལ་གནས་ཏེ། སེམས་ཅན་དེ་དག་ཆོས་ཀྱི་དབྱིངས་ལ་རྨོངས་པར་གྱུར་པར་རིག་ནས་ཅི་ནུས་ཅི་ལྕོགས་ཀྱིས་ཆོས་བསྟན་ནས་རབ་ཏུ་དུལ་བར་བྱེད་ཀྱང་བདག་གིས་ཆོས་བསྟན་ཏོ། སྟོན་ཏོ། །སྟོན་པར་འགྱུར་རོ་སྙམ་དུ་སེམས་པ་མེད་དེ། འོན་ཀྱང་དེའི་སྔོན་གྱི་སྨོན་ལམ་གྱི་མཐུས་རྟེན་ཅིང་འབྲེལ་བར་འབྱུང་བ་ལེགས་
པར་སོ་སོར་བརྟགས་ནས་རང་གི་ངང་གིས་ཆོས་ཀྱི་སྒོ་མོ་བརྒྱ་སྟོང་དུ་མ་བསྟན་ཏེ། སེམས་ཅན་དེ་དག་གི་མ་རིག་པའི་ལས་ཀྱི་འདུ་བྱེད་བསལ་ནས་རྣམ་པར་གྲོལ་བ་འཐོབ་པར་བྱེད་དོ། །གློག་ཐོབ་འདི་ལྟ་སྟེ་དཔེར་ན་སྨན་པ་བཟང་པོ་ནད་མང་པོ་གསོ་བ་ལ་མཁས་པ། སྔར་སྨན་དཔྱད་རྣམས་ལ་ཤིན་ཏུ་གོམས་པར་གྱུར་པ་ནི་ནད་ཀྱི་མཚན་མ་མཐོང་མ་ཐག་ཏུ་སྔགས་དང་སྨན་བཏང་བ་ཐམས་ཅད་རབ་ཏུ་རྟོགས་པར་གྱུར་པས་དེས་གསོས་པ་གང་ཡང་མི་སོས་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་འདི་ལྟར་ཆོས་ཀྱི་དབྱིངས་ཤིན་དུ་ལེགས་པར་རྟོགས་པས་རྩོལ་བ་མེད་པའི་ཡེ་ཤེས་ཀྱིས་གཏི་མུག་གི་སྤྱོད་པ་བསགས་པའི་སེམས་ཅན་དེ་དག་གི་དབང་པོ་དང་། རང་བཞིན་ཇི་ལྟ་བ་བཞིན་དུ་ཆོས་ཀྱི་སྒོ་མོ་བརྒྱ་སྟོང་དུ་མ་བསྟན་ནས་ཐམས་ཅད་རབ་ཏུ་གསལ་བར་རྟོགས་པར་བྱེད་དེ། གློག་ཐོབ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཏི་མུག་སྤྱོད་པའི་གཏེར་ཞེས་བྱའོ། །བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན་རྟེན་ཅིང་འབྲེལ་བར་འབྱུང་བ་ཤིན་དུ་ལེགས་པར་སོ་སོར་བརྟགས་ནས་གཏི་མུག་སྤྱོད་པའི་སེམས་ཅན་དེ་དག་གི་ཆེད་དུ་བསྐལ་པའམ། བསྐལ་པ་ལས་ལྷག་པར་དེ་དག་གི་རང་བཞིན་དང་། འདུན་པ་ཇི་ལྟ་བ་བཞིན་དུ་ཚིག་འབྲུ་དང་། ཡི་གེ་དང་། རྗོད་པ་སྣ་ཚོགས་ཀྱི་ཐབས་མཁས་པས་ཆོས་སྟོན་པར་བྱེད་ཀྱང་གཏི་མུག་སྤྱོད་པའི་མཐའ་ཡང་རྙེད་པར་མི་འགྱུར་ལ། བྱང་ཆུབ་སེམས་དཔའ་དེའི་ཤེས་རབ་དང་སྤོབས་པ་ཡང་གཏུགས་པར་མི་འགྱུར་ཏེ། འདི་ནི་བྱང་ཆུབ་སེམས་དཔའ་ཆོས་ཐམས་ཅད་དབྱེར་མེད་པའི་མཚན་ཉིད་ལེགས་པར་བཤད་པས་ཐོབ་པའི་གཏི་མུག་སྤྱོད་པའི་གཏེར་ཞེས་བྱའོ། །འདི་ལྟར་གཏི་མུག་གི་སྤྱོད་པ་ཉི་ཁྲི་ཚིག་སྟོང་དང་། སྤྱོད་པ་གཞན་གཏོགས་པར་བརྒྱད་ཁྲི་བཞི་སྟོང་དུ་གྱུར་པ་དེ་དག་བྱང་ཆུབ་སེམས་དཔས་ཡོངས་སུ་སྤང་བའི་ཕྱིར་ཆོས་ཀྱི་སྒོ་མོ་བརྒྱ་སྟོང་དུ་མ་རབ་ཏུ་ཕྱེ་ནས་ཡང་དག་པར་སྟོན་པ་གང་ཡིན་པ་འདི་ནི་བྱང་ཆུབ་སེམས་དཔའི་གཏི་མུག་སྤྱོད་པའི་གཏེར་ཅེས་བྱའོ། །གཞན་ཡང་གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆ་མཉམ་པའི་སྤྱོད་པའི་གཏེར་ཞེས་བྱ་
བ་ཇི་ལྟ་བུ་ཡིན་ཞེ་ན། འདི་ལྟ་སྟེ་དཔེར་ན་མེ་ལོང་གི་དཀྱིལ་འཁོར་ཤིན་དུ་དག་ཅིང་ཡོངས་སུ་གསལ་བ་དྲི་མ་མེད་པ་ལམ་གྱི་བཞི་མདོར་བཞག་ན་གཟུགས་བརྙན་རྣམས་དེར་སྣང་ཞིང་འཕེལ་བ་དང་འགྲིབ་པ་མེད་ཀྱང་མེ་ལོང་གི་དཀྱིལ་འཁོར་དེ་བདག་གིས་གཟུགས་བརྙན་རྣམ་པ་སྣ་ཚོགས་འདི་དག་སྟོན་པར་བྱེད་དོ་ཞེས་མི་སེམས་མོད་ཀྱི། འོན་ཀྱང་མེ་ལོང་གི་དཀྱིལ་འཁོར་དེ་ཤིན་དུ་ལེགས་པར་བྱི་དོར་བྱས་ན་གཟུགས་བརྙན་གྱི་རྣམ་པ་ཐམས་ཅད་རང་གི་ངང་གིས་རབ་ཏུ་སྣང་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་ཀྱི་མེ་ལོང་གི་དཀྱིལ་འཁོར་ཤིན་དུ་ལེགས་པར་བྱི་དོར་བྱས་པས་རྩོལ་བ་མེད་པའི་ཏིང་ངེ་འཛིན་ལ་གནས་ནས་སེམས་ཅན་རྣམས་ཀྱི་སྤྱོད་པའི་བྱེ་བྲག་ཇི་ལྟ་བ་བཞིན་དུ་ཆོས་ཀྱི་སྒོ་མོ་བརྒྱ་སྟོང་དུ་མ་རྣམ་པར་ཕྱེ་སྟེ་བསྟན་ནས་དེ་དག་ཐམས་ཅད་རབ་ཏུ་རྟོགས་ཤིང་རྣམ་པར་གྲོལ་བ་ཐོབ་པར་བྱས་ཀྱང་ཆོས་ཀྱི་མཚན་མ་དང་སེམས་ཅན་གྱི་མཚན་མ་སྐྱེད་པར་མི་བྱེད་དོ། །དེ་ཅིའི་ཕྱིར་ཞེ་ན་བྱང་ཆུབ་སེམས་དཔའ་དེས་ཆོས་ཀྱི་དབྱིངས་ཀྱི་མཚན་ཉིད་ཤིན་དུ་ལེགས་པར་རྟོགས་པའི་ཕྱིར་དང་། སྤྱོད་པ་བཞི་པོ་འདི་དག་དང་མཚུངས་པར་ལྡན་པའི་སེམས་ཅན་གང་ཡིན་པ་དེ་དག་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་པས་དེ་དག་གི་དབང་པོ་དང་། རང་བཞིན་ཇི་ལྟ་བ་བཞིན་དུ་ཆོས་སྟོན་པར་བྱེད་ཀྱང་ཆོས་ཀྱི་དབྱིངས་དང་། སེམས་ཅན་གྱི་ཁམས་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་པས་གཉིས་སུ་འགྱུར་བའི་མཚན་ཉིད་ཀྱང་མེད་དེ། ཆོས་ཀྱི་དབྱིངས་དང་། སེམས་ཅན་གྱི་ཁམས་ཇི་སྙེད་པ་དེ་དག་གཉིས་སུ་མེད་ཅིང་ཐ་དད་པ་མེད་པར་གསལ་བར་མཐོང་བའི་ཕྱིར་རོ། །གློག་ཐོབ་འདི་ལྟ་སྟེ་དཔེར་ན་ནམ་མཁའ་ལ་ནི་ཐ་དད་པ་རྣམ་པ་སྣ་ཚོགས་ཀྱི་མཚན་མ་ཡང་མེད་ལ་རྣམ་པར་གཞག་པ་ཡང་མེད་དོ། །དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་ཤིན་དུ་ལེགས་པར་སོ་སོར་བརྟགས་ནས་ཆོས་ཐམས་ཅད་མཚན་ཉིད་གཅིག་ཏུ་འཇུག་པར་རྟོགས་པ་དང་། སྔོན་གྱི་སྨོན་ལམ་གྱི་མཐུས་སེམས་ཅན་གྱི་སྤྱོད་པ་ཇི་ལྟ་བ་བཞིན་དུ་ཆོས་རྣམ་པ་སྣ་ཚོགས་སྟོན་པར་བྱེད་ཀྱང་ཆོས་ཀྱི་དབྱིངས་ལ་ནི་ཐ་དད་དུ་གྱུར་པ་མེད་དོ། །གློག་ཐོབ་ཆ་མཉམ་པའི་སྤྱོད་པ་
འདི་ལ་ཉི་ཁྲི་ཚིག་སྟོང་ཡོད་པ་དང་། སྤྱོད་པ་གཞན་གཏོགས་པ་བརྒྱད་ཁྲི་བཞི་སྟོང་དུ་གྱུར་པ་དེ་དག་ཀྱང་བྱང་ཆུབ་སེམས་དཔས་སོ་སོར་བརྟགས་ནས་ཐམས་ཅད་གསལ་བར་རྟོགས་པར་འགྱུར་ཏེ། འདི་ལྟ་སྟེ་དཔེར་ན་སྨན་པ་མཁས་པ་ནད་དང་སྨན་གཏོང་བ་རབ་ཏུ་ཤེས་པ་བཞིན་དུ་རྩོལ་བ་མེད་པའི་ཡེ་ཤེས་ཀྱིས་ཆོས་རྣམ་པ་སྣ་ཚོགས་སྟོན་པར་བྱེད་པ་གང་ཡིན་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆ་མཉམ་པ་སྤྱོད་པའི་གཏེར་ཞེས་བྱའོ། །བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན་སེམས་ཅན་རྣམས་ཀྱི་ཆེད་དུ་བསྐལ་པའམ། བསྐལ་པ་ལས་ལྷག་པར་དེ་དག་མོས་པ་ཇི་ལྟ་བ་བཞིན་དུ་བརྗོད་པ་རྣམ་པ་སྣ་ཚོགས་ཀྱི་ཐབས་མཁས་པས་ཆོས་སྟོན་པར་བྱེད་ཀྱང་སྤྱོད་པ་དེ་དག་གི་མཐའ་ཡང་རྙེད་པར་མི་འགྱུར་ལ། བྱང་ཆུབ་སེམས་དཔའ་དེའི་ཤེས་རབ་དང་སྤོབས་པ་ཡང་གཏུགས་པར་མི་འགྱུར་ཏེ། འདི་ནི་བྱང་ཆུབ་སེམས་དཔའི་ཆོས་ཀྱི་དབྱིངས་དབྱེར་མེད་པའི་མཚན་ཉིད་ལེགས་པར་བཤད་པས་ཐོབ་པའི་ཆ་མཉམ་པའི་སྤྱོད་པའི་གཏེར་ཞེས་བྱའོ།། །།བམ་པོ་གཉིས་པ་སྟེ་ཐ་མ། གཞན་ཡང་གློག་ཐོབ་བྱང་ཆུབ་སེམས་དཔའ་དེས་དེ་ལྟ་བུའི་ཡེ་ཤེས་ཡོངས་སུ་རྫོགས་པར་གྱུར་པས་སེམས་ཅན་རྣམས་ཀྱི་དབང་པོ་དང་། སྤྱོད་པ་དང་། བསམ་པ་ཡང་ཐབས་མཁས་པས་རབ་ཏུ་རྟོགས་པས་གལ་ཏེ་འདོད་ཆགས་མང་བའི་སེམས་ཅན་མཐོང་བར་གྱུར་ན་དེ་དག་རབ་ཏུ་གདུལ་ཞིང་དེ་དག་གི་ནད་གསོ་བའི་ཕྱིར་སོ་སོའི་སྐྱེ་བོ་དང་འཐུན་པར་འདོད་པ་རྣམས་ལ་ཡོངས་སུ་སྤྱོད་པ་དང་། བུ་དང་། ཆུང་མ་དང་། ཁྱིམ་གྱི་སོ་ཆིས་ཕུན་སུམ་ཚོགས་པ་སྟོན་པར་བྱེད་ཀྱང་པད་མ་བཞིན་དུ་དེས་གོས་ཞིང་མངོན་པར་ཞེན་པར་གྱུར་པ་མེད་དོ། །སེམས་ཅན་གང་གཏི་མུག་ཅིང་བློ་དང་མི་ལྡན་པ་དེ་དག་ནི་བྱང་ཆུབ་སེམས་དཔའ་ཐབས་མཁས་པ་མི་ཤེས་པས་འདི་སྙམ་དུ་བློ་དང་ལྡན་པ་སུ་ཞིག་སོ་སོའི་སྐྱེ་བོ་དང་ཐ་མི་དད་པར་འདོད་པ་རྣམས་ཉམས་སུ་ལེན་པར་བྱེད་ཅེས་བྱང་ཆུབ་སེམས་དཔའ་དེ་ལ་འདི་ནི་བྱང་ཆུབ་སྤངས་པ་ཡིན་ནོ་སྙམ་དུ་སེམས་པར་བྱེད་དོ། །སེམས་ཅན་དེ་ལྟ་བུ་དེ་དག་ནི་སེམས་ཡོངས་སུ་མི་གཙང་བའི་ཕྱིར་ཞེ་སྡང་ཆེན་པོ་སྐྱེས་ནས་གུས་
པར་མི་འགྱུར་བས་ལས་དེའི་དབང་གིས་ལུས་ཞིག་སྟེ་ཤི་བའི་འོག་ཏུ་སེམས་ཅན་དམྱལ་བ་ཆེན་པོར་ལྷུང་བར་གྱུར་ཀྱང་འདི་ལྟར་བྱང་ཆུབ་སེམས་དཔའ་ཤིན་དུ་གསང་བས་གདུལ་བའི་རྒྱུ་དང་རྐྱེན་གྱིས་ཁ་ན་མ་ཐོ་བའི་རྣམ་པ་ཡོངས་སུ་ཟད་ནས་གདོན་མི་ཟ་བར་མཉམ་པ་ཉིད་འཐོབ་པ་ལ་རབ་ཏུ་འགོད་པར་བྱེད་དོ། །གློག་ཐོབ་འདི་ལྟ་སྟེ་དཔེར་ན་མེ་རབ་ཏུ་འབར་བ་ནི་རྩྭ་དང་ཤིང་དང་ཕྲད་པར་གྱུར་པ་ན་ཐམས་ཅད་རབ་ཏུ་འབར་ཞིང་མེའི་ཕུང་པོ་ཉིད་དུ་མངོན་པར་འགྲུབ་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་ཡེ་ཤེས་ཀྱི་མེ་འབར་བར་གྱུར་པ་ན་སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་དང་། དགེ་བ་དང་། མི་དགེ་བ་ཇི་སྙེད་པ་དེ་དག་ཀྱང་བྱང་ཆུབ་སེམས་དཔའ་དང་ལྷན་ཅིག་འགྲོགས་ཤིང་ཐམས་ཅད་རབ་ཏུ་འབར་ནས་ཤེས་རབ་ཉིད་དུ་མངོན་པར་འགྲུབ་པར་འགྱུར་ཏེ། འདི་ནི་བྱང་ཆུབ་སེམས་དཔའི་མ་འདྲེས་པའི་ཆོས་ཤེས་བྱའོ། །གཞན་ཡང་འདི་ལྟ་སྟེ། དཔེར་ན་རིའི་རྒྱལ་པོ་རི་རབ་ཀྱི་མ་འདྲེས་པའི་མཚན་ཉིད་ནི་འདི་ལྟ་སྟེ། རིན་པོ་ཆེ་སྣ་བཞི་ལས་མངོན་པར་གྲུབ་པ་ཡིན་ཏེ། སེམས་ཅན་རྣམས་ཀྱང་དེའི་རྗེས་སུ་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམ་པ་སྣ་ཚོགས་ཀྱི་མཚན་ཉིད་དུ་གྱུར་པར་བྱེད་དེ། གལ་ཏེ་བཻདཱུཪྻའི་ངོས་སུ་ཕྱིན་ན་ནི་ཐམས་ཅད་ཀྱང་བཻདཱུཪྻའི་ཁ་དོག་གཅིག་པ་ཉིད་དུ་འགྱུར་བར་བྱེད་དོ། །གསེར་གྱི་ཁ་དོག་གི་ངོས་སུ་ཕྱིན་ན་ནི་ཐམས་ཅད་གསེར་གྱི་ཁ་དོག་ཉིད་དུ་འགྱུར་བར་བྱེད་དོ། །དངུལ་དང་། ཆུ་ཤེལ་གྱི་ཁ་དོག་ཏུ་འགྱུར་བ་ཡང་དེ་བཞིན་ནོ། །དེ་བཞིན་དུ་བྱང་ཆུབ་སེམས་དཔའ་ཡང་མ་འདྲེས་པའི་ཆོས་ཐོབ་པས་སེམས་ཅན་རྣམས་ཀྱི་འདོད་ཆགས་དང་། ཞེ་སྡང་དང་། གཏི་མུག་དང་། དགེ་བ་དང་། མི་དགེ་བ་ཇི་སྙེད་པ་དེ་དག་བྱང་ཆུབ་སེམས་དཔའི་དུ་ཕྱིན་ཅིང་ལྷན་ཅིག་འགྲོགས་པར་གྱུར་ན་ཐམས་ཅད་བྱང་ཆུབ་སེམས་དཔའི་ཡེ་ཤེས་ལ་འཇུག་པ་ཉིད་དུ་འགྱུར་བར་བྱེད་ཀྱང་། དེའི་སེམས་མི་གཙང་ཞིང་རང་གི་སྡིག་པའི་ལས་ཀྱི་དབང་གིས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་ལྷུང་བར་གྱུར་པས་འདི་ལྟར་བྱང་ཆུབ་སེམས་
དཔའི་མ་འདྲེས་པའི་ཡོན་ཏན་དང་སྨོན་ལམ་གྱི་སྟོབས་ཀྱིས་ཁ་ན་མ་ཐོ་བའི་རྣམ་པར་སྨིན་པ་ཟད་པའི་འོག་ཏུ་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བ་ལ་འགོད་པར་བྱེད་དོ། །གློག་ཐོབ་སྔོན་བྱུང་བ་འདས་པའི་བསྐལ་པ་ཚད་མེད། དཔག་ཏུ་མེད། གྲངས་མེད་པ་ན་སྙིགས་མ་ལྔའི་དུས་ཀྱི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་པོ་ཆེའི་ཕུང་པོ་ཡོན་ཏན་གྱི་སྒྲ་ཞེས་བྱ་བ་བྱུང་སྟེ། དེའི་ཚེ་སྐྱེ་དགུ་རྣམས་ཚེ་ལོ་བརྒྱ་ཉི་ཤུ་ཐམ་པར་གྱུར་ཏེ། ད་ལྟར་ང་ཇི་ལྟ་བ་བཞིན་ནོ། །དེའི་ཚེ་སེམས་ཅན་རྣམས་འདོད་ཆགས་དང་། ཞེ་སྡང་དང་། གཏི་མུག་ཤིན་དུ་ཆེ་སྟེ། ཉོན་མོངས་པ་རྣམས་ཀྱིས་ཁྲིལ་གྱིས་ནོན་པས་ཕ་མ་དང་། ཕུ་ནུ་དང་། གྲོགས་པོའི་ཡིད་དང་འགལ་བར་བྱེད་པ། མཁན་པོའང་། སློབ་དཔོན་གྱི་རྗེས་སུ་མི་འབྲང་བ། བྱས་པ་དྲིན་དུ་མི་གཟོ་བ། རྟག་པར་གནོད་སེམས་དང་བཅས་པ། གཡོ་སྒྱུ་དང་རྐུན་བུའི་སེམས་དང་ལྡན་པ། ཕན་ཚུན་གཅིག་ལ་གཅིག་གནོད་པ་བྱེད་པ། ཚུལ་བཞིན་མ་ཡིན་པར་སྤྱོད་པ། སངས་རྒྱས་དང་། ཆོས་དང་། དགེ་འདུན་ལ་གུས་པ་མེད་པ། སེར་སྣས་ཟིལ་གྱིས་ནོན་པས་ཡི་དྭགས་ཀྱི་ཆོས་སྤྱོད་པའི་སེམས་ཅན་དེ་ལྟ་བུ་ཤ་སྟག་སངས་རྒྱས་ཀྱི་ཞིང་དེ་ན་གནས་པར་གྱུར་པས་ནི་ཤིན་དུ་གདུལ་དཀའ་བར་གྱུར་ཏོ། །དེའི་ཚེ་བཅོམ་ལྡན་འདས་དེ་ཡང་སྔོན་གྱི་སྨོན་ལམ་གྱི་མཐུས་དུས་ངན་པ་དེའི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཏེ། བཅོམ་ལྡན་འདས་དེ་ལ་ཉན་ཐོས་ཆེན་པོའི་ཚོགས་ནི་ཉི་ཁྲི་ཉིས་སྟོང་མངའ་བར་གྱུར་ཏོ། །དེའི་ཚེ་དེའི་དུས་ན་རྒྱལ་པོ་རྒྱ་ཆེར་བྱིན་པ་ཞེས་བྱ་བ་འཛམ་བུའི་གླིང་ལ་དབང་བའི་དབང་ཕྱུག་དང་ལྡན་པ། སངས་རྒྱས་ཀྱི་བསྟན་པ་ལ་སེམས་ཤིན་དུ་དང་བར་གྱུར་པ་ཞིག་ཡོད་པ་དེས་དེ་བཞིན་གཤེགས་པ་དེ་ཉན་ཐོས་ཀྱི་དགེ་འདུན་དང་བཅས་པར་དབྱར་
ཟླ་བ་གསུམ་སྤྱན་དྲངས་ཏེ་མཆོད་པ་རྒྱ་ཆེར་བཤམས་ནས་མཆོད་ཅིང་རིམ་གྲོ་བྱས་སོ། །དེའི་ཚེ་དགེ་སློང་དྲི་མ་མེད་པ་ཞེས་བྱ་བ་སྤོབས་པ་ཕུན་སུམ་ཚོགས་པ། ཆོས་སྟོན་པའི་ཐབས་ལ་མཁས་པས་འཁོར་མང་པོ་རྣམས་ཉན་པར་སྤྲོ་བ། སེམས་ཅན་ཡོངས་སུ་སྨིན་པར་བྱེད་པ་ལ་རྟག་པར་ངལ་བ་མེད་པ། རེ་བ་མེད་པར་ཆོས་སྟོན་པ། མདོག་གསལ་ཞིང་གསོང་པོར་སྨྲས། གཟུགས་དང་སྟོབས་ཕུན་སུམ་ཚོགས་པ། བྱང་བཞིན་སྡུག་ཅིང་མཛེས་པ། སེམས་ཅན་རྣམས་ཀྱིས་མཐོང་བར་མོས་ཤིང་རིམ་གྲོ་དང་། བཀུར་སྟི་དང་། བླ་མར་བྱེད་ཅིང་བསྔགས་པ་བརྗོད་པ་ཞིག་ཡོད་དེ། དགེ་སློང་གསར་བུ་དག་ཀྱང་རྟག་པར་དྲི་མ་མེད་པའི་རྗེས་སུ་འབྲང་ཞིང་རྒྱལ་པོའི་ཕོ་བྲང་འཁོར་དུ་འབྱུང་ཞིང་འཇུག་པ་དག་ལ་ཐོགས་པ་མེད་པར་གྱུར་པས་གོས་དང་། བཟའ་བ་དང་། བཏུང་བ་དང་། མལ་སྟན་དང་། ན་བའི་གསོས་སྨན་རྣམ་པ་སྣ་ཚོགས་ཀྱིས་ཀྱང་རིམ་གྲོ་བྱས་པར་གྱུར་ཏོ། །དེའི་ཚེ་འཁོར་མང་པོ་དེ་ལས་དགེ་སློང་ཕལ་ཆེར་ལུས་ཀྱི་སྡོམ་པ་དང་། སེམས་ཀྱི་ཤེས་རབ་བསྒོམ་པ་མི་ཤེས་པ། སངས་རྒྱས་དང་། ཆོས་དང་། དགེ་འདུན་ལ་གུས་པ་མེད་པ། རྟག་པར་ལྟ་བ་དང་། ཆད་པར་ལྟ་བ་དང་། བདག་ཏུ་ལྟ་བ་ལ་སོགས་པ་དང་ལྡན་པ། སངས་རྒྱས་ཀྱི་ཆོས་ལ་སྐུར་བ་འདེབས་པ། རྣམ་པར་གཡེང་ཞིང་གདུལ་དཀའ་བ། དབང་པོ་རྣམས་མི་སྡོམ་པ། ཆོས་བཞིན་མ་ཡིན་པ་ལ་གནས་པ། དགེ་སྦྱོང་གི་ཚུལ་མེད་པར་བདག་ཉིད་དགེ་སྦྱོང་དུ་ཁས་འཆེ་བ། ལུས་དང་ངག་དང་ཡིད་ཀྱི་ལས་ཐམས་ཅད་ལོག་པར་ཞུགས་པར་ཤ་སྟག་གནས་པར་གྱུར་ཏོ། །དེའི་ཚེ་བཅོམ་ལྡན་འདས་དེ་དབྱར་འདས་ནས་ཡོངས་སུ་མྱ་ངན་ལས་འདས་པ་དང་། རྒྱལ་པོ་རྒྱ་ཆེར་བྱིན་པས་ཙན་དན་དམར་པོས་སྐུ་ཞུགས་ལ་གཞེན་ནས་མཆོད་པ་བྱས་ཏེ་རིང་གྱི་མཆོད་རྟེན་ངོས་བཞི་ཀུན་དུ་ཙན་དན་དམར་པོའི་མུ་ཁྱུད་ཀྱིས་བསྐོར་བ། པད་མ་གསེར་གྱི་ཁ་དོག་དང་ལྡན་པ་བྱེ་བ་ཕྲག་བརྒྱད་བཅུ་བརྩིགས་སོ། །དེའི་ཚེ་དགེ་སློང་དྲི་མ་མེད་པ་ནི་བཅོམ་ལྡན་འདས་དེས་མང་དུ་ཐོས་པའི་མཆོག་ཏུ་ལུང་བསྟན་པས་དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་པའི་འོག་ཏུ་
དམ་པའི་ཆོས་རྒྱ་ཆེར་སྤེལ་ཏེ། གྲོང་དང་། གྲོང་ཁྱེར་དང་། གྲོང་རྡལ་གང་དང་གང་དུ་སོང་བ་དེར་སེམས་ཅན་བརྒྱ་སྟོང་ཚད་མེད་པ་སྙེད་ཡོངས་སུ་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་པར་གྱུར་ཏོ། །དེའི་ཚེ་དགེ་སློང་སྡིག་ཅན་མང་པོ་རྣམས་རྣལ་འབྱོར་ཁོང་དུ་མ་ཆུད་པ། རྟག་པར་ཕྲག་དོག་དང་བཅས་པ། བདུད་ཀྱིས་བསླུས་པ་རྣམས་རྒྱལ་པོ་དེ་ག་ལ་བ་དེར་དོང་སྟེ་འདི་སྐད་དུ་རྒྱལ་པོས་བཀུར་བའི་དགེ་སློང་དྲི་མ་མེད་པ་ནི་རྒྱལ་པོའི་ཕོ་བྲང་དུ་འབྱུང་ཞིང་འཇུག་པ་ལ་ཐགས་ཐོགས་མ་མཆིས་ཏེ། དགེ་སློང་འདི་འདོད་ཆགས་དང་བྲལ་བ་ཡང་མ་ལགས་ལ། དུས་མ་ལགས་པར་ཡང་ཟས་འཚལ་ཏེ། སྤོས་དང་ཕྲེང་བ་དག་གིས་ཀྱང་ལུས་བརྒྱན་པར་བགྱིད་པས་ཡང་དག་པར་ཚངས་པར་སྤྱོད་པ་མ་ལགས་པས་མཆོད་པ་མཛད་པའི་མི་རིགས་སོ། །བདག་ཅག་ནི་དོན་འདིའི་སླད་དུ་འདིར་མཆིས་ནས་རྒྱལ་པོ་ལ་གསོལ་བ་ལགས་ཀྱིས། སླད་ཀྱིས་འགྱོད་པར་ཡང་མ་མཛད་ཅིག །སངས་རྒྱས་ཀྱི་ཡང་དག་པའི་བསྟན་པ་ལ་ཐུགས་མི་ཆེས་པ་ཡང་མི་བསྐྱེད་དུ་གསོལ་ཞེས་སྨྲས་སོ། །དེའི་ཚེ་བདུད་སྡིག་ཅན་ཞེས་བྱ་བ་ཞིག་ཀྱང་བདག་ཉིད་དགེ་སློང་གི་གཟུགས་སུ་བསྒྱུར་ནས་རྒྱལ་པོ་དེ་ག་ལ་བ་དེར་སོང་སྟེ་སྔ་མ་བཞིན་དུ་སྨྲས་སོ། །དེའི་ཚེ་རྒྱལ་པོ་རྒྱ་ཆེར་བྱིན་པས་ཡང་དང་ཡང་དུ་དེ་སྐད་སྨྲས་པ་ཐོས་ཀྱང་འདི་སྙམ་དུ་དགེ་སློང་དྲི་མ་མེད་པ་ནི་རབ་ཏུ་བརྩོན་ཞིང་བློ་དང་ལྡན་པས་བདག་གིས་བླ་མར་བཀུར་བ་ཡིན་ཏེ། དངོས་པོ་འདི་ལྟ་བུ་བྱེད་པ་ནི་གནས་མེད་དོ་སྙམ་མོ། །དེ་ནས་དེའི་ཚེ་བདུད་ཀྱི་འཁོར་རྣམས་པར་སྣང་ལས་ལུས་ཕྱེད་བསྟན་ནས་རྒྱལ་པོ་དེ་ལ་ཚིགས་སུ་བཅད་དེ་སྨྲས་པ། རྒྱལ་པོ་བཟོ་ཡི་སྒྱུ་རྩལ་སློབས། །དུས་ཚོད་དག་ལ་མཁས་པར་གྱིས། །རྒྱལ་པོས་དེ་ནི་མ་ཤེས་ན། །མི་རྒྱལ་རྟགས་དང་ལྡན་མ་ཡིན། །སངས་རྒྱས་ཉན་ཐོས་དགྲ་བཅོམ་པ། །ཡེ་ཤེས་ཆེན་པོ་ལྡན་པ་ཡི། །ཚིག་དག་ལ་ནི་མི་རྟེན་པར། །ཅི་ཡི་ཕྱིར་ན་ཆད་པར་ལྟ། །དགེ་སློང་རྣམས་ནི་ཕན་གདགས་ཕྱིར། །ཁྱོད་ལ་བདེན་ཚིག་སྨྲ་བ་ཡིན། །ཆད་སྨྲ་ངན་འགྲོར་འགྲོ་བའི་མི། །ཡང་དག་ཚངས་སྤྱོད་མ་ཡིན་པས། །དེ་ནི་རྒྱལ་པོའི་ཕོ་
བྲང་དུ། །བཙུན་མོ་དག་དང་ལྷན་ཅིག་རྩེ། །རྒྱལ་པོ་འཁོར་དང་བཅས་པ་ཡིས། །ལེགས་པར་རྟོགས་ལ་ཐེ་ཚོམ་སོལ། །རྒྱལ་པོས་དངོས་པོ་འདི་ཐོས་པས། །སེམས་ལ་སྐྲག་ཅིང་མྱ་ངན་སྐྱེས། །འཁོར་རྣམས་དང་ནི་ལྷན་ཅིག་ཏུ། །མྱུར་ཞིང་རིངས་པར་ཕོ་བྲང་དོང་། །དེ་ཚེ་དྲི་མེད་ཕོ་བྲང་ནང་། །ཆོས་རྣམས་རང་བཞིན་སྟོང་པ་དང་། །བདག་དང་སེམས་ཅན་མེད་པ་ཡི། །དམ་པའི་དོན་ནི་སྟོན་པར་བྱེད། །རྒྱལ་པོ་དམག་འཁོར་བཅས་པ་རྣམས། །ཐམས་ཅད་བདུད་ཀྱིས་བསླུས་པས་ན། །ཕོ་བྲང་ནང་གི་བཙུན་མོ་རྣམས། །དགེ་སློང་ཡོངས་བསྐོར་མཐོང་བ་དང་། །ཞེ་སྡང་གླང་ཆེན་མྱོས་འདྲ་བས། །གཤེད་མ་དག་ལ་རབ་བསྒོ་བ། །དགེ་སློང་ང་ཡི་བཙུན་མོ་བསླུས། །སྡུག་བསྔལ་ཆོས་ཀྱིས་ཆད་པས་ཆོད། །བློན་པོ་འཁོར་དང་བཅས་པ་རྣམས། །ཐམས་ཅད་བདུད་ཀྱིས་ཟིན་པས་ན། །དགེ་སློང་ཉེས་པ་མེད་པ་ལ། །སེམས་ཀྱིས་གནོད་པ་བྱ་བར་བསམས། །གཤེད་མ་མཚོན་ཐོགས་འོངས་པ་དང་། །དྲི་མེད་སྙིང་བརྩེ་མཆི་མ་བྱུང་། །རྒྱལ་པོས་ཁྱོད་ནི་ཆོས་མིན་ན། །ཅི་ཡི་ཕྱིར་ན་མཆི་མ་བྱུང་། །དྲི་མེད་རྒྱལ་པོ་ལ་སྨྲས་པ། །དངོས་པོ་འདི་ནི་ཡིད་ཆེས་དཀའ། །རེ་ཤིག་སྐད་ཅིག་སྡོད་ཅིག་དང་། །བདག་གསང་བ་ཡི་ལོང་ཡོད་དོ། །རྒྱལ་པོས་དགེ་སློང་ཚིག་ཐོས་ནས། །གཤེད་མ་དག་ལ་སྡོད་ཅིག་བསྒོ། །བདེན་པའི་དངོས་པོ་ཅི་ཞིག་ཡོད། །ཁྱོད་ཀྱིས་མྱུར་དུ་སྨྲ་བའི་རིགས། །ལྷག་པའི་བསམ་པ་ལྡན་གྱུར་ཅིང་། །སྙིང་རྗེས་འཇིག་རྟེན་ཕན་འདོགས་པས། །སོར་མོ་བཅུ་ཡི་ཐལ་སྦྱར་ཏེ། །བདེན་པའི་ཚིག་ནི་འདི་སྐད་སྨྲས། །རྒྱལ་པོ་ཆེན་པོས་མཁྱེན་པར་མཛོད། །གལ་ཏེ་ཡང་དག་ཉེས་མེད་ན། །ས་འདི་རྣམ་པ་དྲུག་ཏུ་གཡོས། །མཁའ་ལས་མེ་ཏོག་ཆར་ཕོབ་ཤིག །དེ་སྐད་ཚིག་ནི་སྨྲས་མ་ཐག །ས་ཆེན་རྣམ་པ་དྲུག་དུ་གཡོས། །མཁའ་ལས་ལྷ་ཡི་མེ་ཏོག་བབ། །བདུད་འཁོར་མྱ་ངན་སྐྱེས་པར་གྱུར། །དེ་ཚེ་རྒྱལ་པོ་དང་བ་སྐྱེས། །རྐང་ལ་ཕྱག་བྱས་བཟོད་པ་གསོལ། །བདག་ནི་དམྱལ་བར་ལྟུང་འགྱུར་ན། །མགོན་མེད་བདག་ལ་སྐྱབས་མཛོད་ཅིག །ཀྱེ་ཧུད་སྡིག་པའི་གྲོགས་ཕྲད་པས། །གདུག་པའི་སེམས་
ནི་སྐྱེས་པར་གྱུར། །སྡིག་པའི་གྲོགས་པོ་རྗེས་འབྲངས་པས། །མགོན་དང་སྐྱབས་བྱེད་སུ་ཡང་མེད། །སྟོན་པ་ཆེན་པོ་མ་གཏོགས་པར། །ཕྱོགས་བཅུ་བདག་གི་མགོན་བྱེད་མེད། །བདག་གིས་རྒྱལ་སྲིད་སྤངས་ནས་ནི། །ནམ་འཚོའི་བར་དུ་སྐྱབས་སུ་མཆིས། །དགེ་སློང་དེས་ནི་རྒྱལ་པོ་དང་། །གཡོག་འཁོར་བསམ་པ་རིག་གྱུར་ནས། །དམ་པའི་དོན་ནི་རབ་ཏུ་བཤད། །རྒྱལ་པོས་ཐོས་ནས་དང་བ་ཐོབ། །འཁོར་ནི་བྱེ་བ་བརྒྱ་སྟོང་དང་། །རྒྱལ་སྲིད་སྤངས་ནས་རབ་ཏུ་བྱུང་། །སྦྱངས་པའི་སྡོམ་པ་བླངས་པས་ན། །གཞན་གྱིས་འགྲོན་གཉེར་ཡོང་མི་ལེན། །དེ་ཚེ་རྒྱལ་པོའི་ཕོ་བྲང་ནང་། །བཙུན་མོ་འཁོར་བཅས་བརྒྱད་ཁྲི་རྣམས། །དམ་པའི་དོན་ནི་ཐོས་པས་ན། །ཕྱིར་མི་ལྡོག་ལ་གནས་པར་གྱུར། །རྒྱལ་པོས་སངས་རྒྱས་གསུངས་པ་བཞིན། །ལོ་ནི་ཉི་ཤུ་རྩ་བཞིའི་བར། །ཉིན་མཚན་རྟག་པར་སྡིག་བཤགས་ཀྱང་། །འོན་ཀྱང་སྡིག་པའི་ལས་མ་ཟད། །ལོ་ནི་བྱེ་མང་སྡུག་བསྔལ་མྱོང་། །སྡིག་ཟད་དེ་བཞིན་གཤེགས་དང་ཕྲད། །སྔོན་ནི་སྐྲག་པར་བྱས་པའི་རྒྱུས། །རྣམ་སྨིན་ལྷག་མ་རྟག་པར་དམན། །མཐར་གྱིས་རྣལ་འབྱོར་རབ་བསྒོམས་ཏེ། །སངས་རྒྱས་བྱེ་བ་སྟོང་མཆོད་ནས། །སོ་སོར་ཞིང་ཁམས་གཞན་དག་ཏུ། །ཐམས་ཅད་མངོན་པར་རྫོགས་སངས་རྒྱས། །ཐམས་ཅད་ཀུན་ཀྱང་མཚན་འཐུན་པར། །ཡོན་ཏན་གྲགས་པ་ཞེས་བྱར་གྱུར། །དེ་ཚེ་རྒྱལ་པོ་རྒྱ་ཆེར་བྱིན། །དགེ་སྦྱོང་བྱམས་བཟོད་དེ་ལ་ནི། །གདུག་པའི་སེམས་ནི་བསྐྱེད་པས་ན། །ལོ་ནི་བྱེ་བ་མང་པོར་ཡང་། །སྔོན་གྱི་སྡིག་ལས་མངོན་གྱུར་པས། །ངུ་འབོད་ཆེན་པོར་ལྷུང་བར་གྱུར། །རྣམ་སྨིན་དེ་ནི་ཟད་ནས་ཀྱང་། །སླར་ཡང་མི་ལུས་ཐོབ་གྱུར་ཏེ། །དེ་བཞིན་གཤེགས་པ་ཀུན་སྤྱན། །རྟག་ཏུ་བསྙེན་བཀུར་རིམ་གྲོ་བྱས། །གཞན་ཡང་སངས་རྒྱས་བྱེ་བ་ཕྲག །བརྒྱད་བཅུ་དག་ལ་རིམ་གྲོ་བྱས། །དེ་ཡི་འོག་ཏུ་སངས་རྒྱས་པ། །དེ་ནི་བདག་ཉིད་ཡིན་ནོ། །ཆོས་སྨྲ་ཉེས་པ་མེད་པ་ལ། གནོད་པ་བྱས་པའི་དགེ་སློང་ནི། །མ་འོངས་མངོན་པར་འཚང་རྒྱ་བ། །བྱང་ཆུབ་སེམས་དཔའ་བྱམས་པ་ཡིན། །
དེ་ཚེ་རྒྱལ་པོ་ཕོ་བྲང་ནང་། །བཙན་མོའི་འཁོར་ནི་བརྒྱད་ཁྲི་རྣམས། །ཤིན་དུ་དང་བས་དགེ་རྩ་བསྐྱེད། །སངས་རྒྱས་ཚད་མེད་རིམ་གྲོ་བྱས། །དེ་ལྟར་སྤྱོད་པ་རབ་བསྐྱེད་ནས། །སེམས་ཅན་ཕན་གདགས་སྨོན་ལམ་བཏབ། །སངས་རྒྱས་བྱེ་བ་སྟོང་མཆོད་ནས། །སོ་སོར་མངོན་པར་འཚང་རྒྱ་ཡང་། ། ཐམས་ཅད་གནོད་སེམས་མ་སྐྱེད་ཅིག །གང་ཞིག་བྱམས་བསྒོམས་སངས་རྒྱས་བསྔགས། །མྱུར་དུ་བྱང་ཆུབ་ཆེན་པོ་འཐོབ། །དེ་ལྟ་བས་ན་གློག་ཐོབ་སེམས་ཅན་རྣམས་ཀྱི་དབང་པོ་དང་། རང་བཞིན་དང་། བསམ་པ་དག་ལ་མི་མཁས་པ་དག་གིས་དུས་ཐམས་ཅད་དུ་གནོད་སེམས་བསྐྱེད་པར་མི་བྱའོ། །གློག་ཐོབ་འདི་ལྟ་སྟེ་དཔེར་ན་རི་རྣམས་ཀྱི་ནང་ན་རི་རབ་མཆོག་ཏུ་གྱུར་པ་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱང་ཡེ་ཤེས་རྣམས་ཀྱི་ནང་ན་མཆོག་དང་གཙོ་བོ་དང་། བླ་ན་མེད་པར་གྱུར་པ་ཡིན་ནོ། །འདི་ལྟ་སྟེ་དཔེར་ན་ཆུ་བོ་ཐམས་ཅད་ཀྱི་ནང་ན་རྒྱ་མཚོ་མཆོག་ཏུ་གྱུར་པ་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱང་ཡེ་ཤེས་རྣམས་ཀྱི་ནང་ན་མཆོག་ཏུ་ཟབ་ཅིང་རྒྱ་ཆེ་བར་གྱུར་པ་ཡིན་ནོ། །གཞན་ཡང་འདི་ལྟ་སྟེ་དཔེར་ན་རྒྱལ་པོ་རྣམས་ཀྱི་ནང་ན་འཁོར་ལོས་སྒྱུར་བའི་རྒྱལ་པོ་མཆོག་དང་། གཙོ་བོ་དང་། བླ་མར་གྱུར་པ་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱང་ཡེ་ཤེས་རྣམས་ཀྱི་ནང་ན་གོང་ན་མེད་པར་གྱུར་པ་ཡིན་ནོ། །གློག་ཐོབ་དེ་བཞིན་གཤེགས་པ་ནི་དེ་ལྟ་བུའི་མཁྱེན་པ་དང་ལྡན་པའི་ཕྱིར་སེམས་ཅན་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་སྤྱོད་པའི་སེམས་དང་སེམས་ལས་བྱུང་བ་འཇུག་ཅིང་འགྱུར་བ་ཇི་སྙེད་པ་དེ་དག་ཐམས་ཅད་དེ་བཞིན་གཤེགས་པས་རབ་ཏུ་མཁྱེན་ཅིང་སེ་གོལ་གཏོགས་པ་གཅིག་ལ་ཐམས་ཅད་ཡོངས་སུ་སྡུད་པར་མཛད་དོ། །གློག་ཐོབ་དེ་བཞིན་གཤེགས་པ་ནི་རྣམ་པ་ཐམས་ཅད་མཁྱེན་པ་ཉིད་དང་ལྡན་པས་འདི་ལྟ་སྟེ་དཔེར་ན་སྐྱེས་བུ་མིག་དང་ལྡན་པས་རྩོལ་བ་ལ་མི་ལྟོས་པར་རང་གི་ལག་མཐིལ་ན་སྐྱུ་རུ་རའི་འབྲས་བུ་གསལ་བར་མཐོང་ཞིང་ཐེ་ཚོམ་མེད་པ་དེ་བཞིན་དུ་དེ་བཞིན་གཤེགས་པ་ཡང་སེམས་ཅན་ཐམས་ཅད་ཀྱི་སེམས་ཅན་གྱི་སྤྱོད་པ་ཇི་སྙེད་པ་དེ་དག་
ཐམས་ཅད་རབ་ཏུ་མཁྱེན་པས་འཁོར་མང་པོའི་ནང་དུ་ཆོས་རྣམ་པ་སྣ་ཚོགས་ཡང་དག་པར་སྟོན་པར་མཛད་དོ། །སངས་རྒྱས་ཀྱི་ཞིང་འཇིག་རྟེན་གྱི་ཁམས་ཚད་མེད་གྲངས་མེད་པ་དག་ན་འདོད་ཆགས་ཀྱི་སྤྱོད་པ་དང་མཚུངས་པར་ལྡན་པའི་སེམས་ཅན་རྣམས་འདོད་ཆགས་ཀྱིས་ཡོངས་སུ་གདུངས་ནས་ཉིན་མཚན་དུ་ཡིད་ལ་བྱེད་ཅིང་དོན་མེད་པར་དུས་ལས་འདའ་བར་བྱེད་པ་ཡང་ངས་རབ་ཏུ་མཁྱེན་ཅིང་གཟིགས་སོ། །འདོད་ཆགས་ཀྱིས་གདུང་བས་ལུས་དང་ངག་གི་ལས་རྣམ་པ་སྣ་ཚོགས་སློང་བར་བྱེད་པ་དག་ཀྱང་ངས་རབ་ཏུ་མཁྱེན་ཅིང་གཟིགས་སོ། །ཞེ་སྡང་སྤྱོད་པའི་སེམས་ཅན་དེ་དག་ཞེ་སྡང་གིས་ཟིལ་གྱིས་ནོན་ནས་གཅིག་ལ་གཅིག་ཞེ་སྡང་གིས་ཕྲག་དོག་བྱེད་པ་དང་། གནོད་པ་བྱས་པའི་ཕྱིར་མནར་མེད་པའི་གནས་སུ་ལྟུང་བར་འགྱུར་བ་དག་ཀྱང་རབ་ཏུ་མཁྱེན་ཅིང་གཟིགས་སོ། །གཏི་མུག་སྤྱོད་པ་དང་མཚུངས་པར་ལྡན་པའི་སེམས་ཅན་རྣམས་མ་རིག་པའི་མུན་ནག་གིས་བསྒྲིབས་ཤིང་རྨོངས་པས་མངོན་པར་ཞེན་པ་དང་། ལོག་པར་ལྟ་བའི་རྗེས་སུ་འབྲང་བ་ལ་མོས་པར་འགྱུར་བ་དག་ཀྱང་རབ་ཏུ་མཁྱེན་ཏོ། །འོས་སུ་འགྱུར་བ་དང་། འོས་སུ་མི་འགྱུར་བ་དང་། འཕེལ་ཞིང་རྩོལ་བ་དང་བཅས་པ་དང་། ལྡོག་ཅིང་ཉམས་པར་གྱུར་པ་དང་། དེ་བཞིན་གཤེགས་པའི་ཐེག་པར་དགེ་བའི་རྩ་བ་བསྐྱེད་པ་དང་། རང་སངས་རྒྱས་ཀྱི་ཐེག་པར་དགེ་བའི་རྩ་བ་བསྐྱེད་པ་དང་། ཉན་ཐོས་ཀྱི་ཐེག་པར་དགེ་བའི་རྩ་བ་བསྐྱེད་པ་དག་ཀྱང་ངས་རབ་ཏུ་མཁྱེན་ཏོ། །དེ་བཞིན་གཤེགས་པ་ནི་དེ་ལྟ་བུའི་མཁྱེན་པ་དང་ལྡན་པས་འཁོར་མང་པོའི་ནང་དུ་བཞུགས་ནས་སེམས་ཅན་གྱི་སེམས་ཀྱི་སྤྱོད་པའི་བྱེ་བྲག་ཀྱང་རབ་ཏུ་མཁྱེན་པས་གལ་ཏེ་དུས་ལ་མ་བབ་པར་རིག་པར་གྱུར་ན་ནི་ཅང་མི་གསུང་ཞིང་བཏང་སྙོམས་སུ་བཞག་ནས་སེམས་ཅན་འདི་དག་ནི་ཆོས་ལ་རྨོངས་པར་གྱུར་པས། ཁོང་དུ་ཆུད་པར་མི་འགྱུར་རོ་སྙམ་དུ་དགོངས་སོ། །དེ་བཞིན་གཤེགས་པ་ནི་དབང་པོ་དང་སྟོབས་ཁྱད་པར་དུ་འཕགས་པ་ཕུན་སུམ་ཚོགས་ཤིང་དུས་རབ་ཏུ་མཁྱེན་པའི་ཕྱིར་གདུལ་བའི་འོས་སུ་གྱུར་པ་དང་། བསམ་པ་མཆོག་ཏུ་གྱུར་པ་དང་།
བཟོད་པར་ནུས་པའི་འོས་སུ་གྱུར་པ་དང་། ཚིག་ལེགས་པར་ཉན་པར་གྱུར་པ་དག་ཀྱང་ངས་རབ་ཏུ་མཁྱེན་ཏེ། དེ་ལྟར་མཁྱེན་པར་གྱུར་ནས་ཀྱང་སེམས་ཅན་དེ་དག་ཡོངས་སུ་སྡུད་ཅིང་ཕན་འདོགས་པར་བྱེད་དོ། །དེ་ལྟ་བས་ན་གློག་ཐོབ་བྱང་ཆུབ་སེམས་དཔའ་ལས་དང་པོ་པ་ཡང་དག་པའི་གནས་སྐབས་སུ་མ་ཞུགས་པ་སེམས་ཅན་རྣམས་ཀྱི་ལྷག་པའི་བསམ་པ་ལེགས་པར་ཁོང་དུ་ཆུད་པ་དག་གིས་ཁྱིམ་ན་གནས་པའམ། རབ་ཏུ་བྱུང་བ་ཡང་རུང་སྟེ། ཐམས་ཅད་ཀུན་ལ་སྨོད་ཅིང་གནོད་སེམས་བསྐྱེད་ནས་ཡུན་རིང་པོར་བདག་ཉིད་ལ་གནོད་པར་འགྱུར་བ་མི་བྱའོ། །དེའི་ཕྱིར་བྱང་ཆུབ་སེམས་དཔའ་སེམས་དང་པོ་བསྐྱེད་པ་ནས་ཐེག་པ་ཆེན་པོ་ལ་གནས་པ་ཐམས་ཅད་ལ་སངས་རྒྱས་ཀྱི་འདུ་ཤེས་བསྐྱེད་པར་བྱའོ། །སེམས་ཅན་གཞན་དག་སྡིག་པ་མི་དགེ་བའི་ལས་བྱེད་པ་མཐོང་ན་ཡང་གནོད་སེམས་བསྐྱེད་པར་མི་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་རྟག་ཏུ་སེམས་ཅན་གང་རྣམ་པར་དཀར་ཞིང་ཡོངས་སུ་དག་པའི་ཆོས་ལས་ཅུང་ཟད་ཅིག་ཉན་པར་གྱུར་ན་ནམ་ཡང་ཡོངས་སུ་མྱ་ངན་ལས་མི་འདའ་བར་མི་འགྱུར་རོ་ཞེས་གསུངས་པས་སོ། །བྱང་ཆུབ་སེམས་དཔའ་ནི་གལ་ཏེ་འདོད་ཆགས་སྤྱོད་པའི་སེམས་ཅན་མཐོང་བར་གྱུར་ན་སེམས་ཅན་འདི་དག་འདོད་ཆགས་ཀྱི་གདུང་བས་བསྲེགས་པར་གྱུར་པ་ཡང་བདག་གིས་ཉེས་པ་ཡིན་ནོ་སྙམ་དུ་སེམས་སོ། །ཞེ་སྡང་དང་། གཏི་མུག་གིས་གདུང་བས་བསྲེགས་པར་གྱུར་པ་དེ་དག་མཐོང་ན་ཡང་འདི་དག་ཐམས་ཅད་ནི་བདག་གིས་ཉེས་པ་ཡིན་ནོ་སྙམ་དུ་སེམས་སོ། །དེ་ཅིའི་ཕྱིར་ཞེ་ན། བདག་གིས་སེམས་ཅན་ཐམས་ཅད་ན་བའི་སྡུག་བསྔལ་དང་ལྡན་པར་གྱུར་པ་དག་མཐོང་བར་གྱུར་ན་སྨན་ཡོངས་སུ་བཙལ་ཏེ་ཐབས་མཁས་པས་ཡོངས་སུ་གསོ་བའི་རིག་པ་ལས། བདག་སྔོན་སེམས་ཅན་གྱི་ནད་བསལ་བར་ཡིད་དམ་བཅས་ནས་དེང་ཡལ་བར་བོར་བ་འདི་ཉིད་བདག་གི་ཉེས་པ་ཡིན་ནོ་སྙམ་དུ་སེམས་པས་སོ། ། བྱང་ཆུབ་སེམས་དཔའ་ནི་དེ་ལྟ་བུའི་བསམ་པ་དང་ལྡན་པས་བདག་ཉིད་ཀྱི་ཉེས་པ་ལ་ལྟ་ཞིང་སེམས་ཅན་རྣམས་ལ་བྱམས་པའི་སེམས་སྐྱེད་པར་བྱེད་དོ། །གལ་ཏེ་གསོད་
པའམ། ལུས་ཀྱི་ཡན་ལག་དང་ཉིང་ལག་གཅོད་ཅིང་གཏུབ་པ་ཞིག་དང་ཕྲད་པར་གྱུར་ན་ཡང་ཕ་རོལ་གནོད་པ་བྱེད་པ་དེ་དག་ལ་ལན་བྱའོ་སྙམ་པའི་བསམ་པ་མེད་དོ། །གློག་ཐོབ་བྱང་ཆུབ་སེམས་དཔའ་དེ་ལྟར་ཡང་དག་པར་སྒོམ་པ་ན་འདས་པའི་མི་དགེ་བའི་ལས་ཇི་སྙེད་པ་དག་ཀྱང་གཏན་དུ་ཟད་ཅིང་མ་ལུས་པར་འབྱང་བར་འགྱུར་ལ། མ་འོངས་པའི་མི་དགེ་བ་རྣམས་ནི་ཡང་ལྡང་བར་མི་འགྱུར་རོ། །གློག་ཐོབ་སྔོན་བྱུང་བ་འདས་པའི་བསྐལ་པ་ཚད་མེད་གྲངས་མེད་པ་དེ་བཞིན་གཤེགས་པ་མར་མེ་མཛད་ཀྱི་ཡང་ཆེས་སྔ་རོལ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་མཆོག་ཏུ་སྐྱེས་པ་ཞེས་བྱ་བ་འཇིག་རྟེན་དུ་བྱུང་ངོ་། །འཇིག་རྟེན་གྱི་ཁམས་དེ་ནི་འོད་ཟེར་ཅན་ཞེས་བྱ་སྟེ། རྒྱལ་པོའི་གྲོང་ཁྱེར་རབ་ཏུ་བདེ་བ་ཞེས་བྱ་བའི་ཚལ་ན་བཞུགས་སོ། །དེའི་ཚེ་ཤན་པ་འཇིགས་སུ་རུང་བ་ཞེས་བྱ་བ་ཁྲོ་གཏུམ་ཆེ་ཞིང་གསོད་པ་ལ་དགའ་བ། བཟོད་པ་དང་བྱམས་པའི་སེམས་མེད་པ། ལག་པ་ཁྲག་གིས་བསྐུས་པ། མཐོང་བ་ཐམས་ཅད་སྐྲག་པར་འགྱུར་བ་ཞིག་ཡོད་དེ། དེའི་ཚེ་ཤན་པ་དེས་གླང་ཞིག་ཁང་པའི་ནང་དུ་བཅིངས་ཏེ་ནང་དུ་ཞུགས་ནས་བསད་པར་བྱས་པ་ལས་གླང་དེས་དེ་མཐོང་ནས་ཤིན་དུ་སྐྲག་པས་ཐག་པ་བཅད་དེ་བྲོས་ནས་དེ་བཞིན་གཤེགས་པ་མཆོག་ཏུ་སྐྱེས་པ་བཞུགས་པའི་ཚལ་ག་ལ་བ་དེར་སོང་ངོ་། །དེའི་ཚེ་ཤན་པ་དེ་ཡང་མཚོན་ཐོགས་ནས་ཕྱི་བཞིན་དུ་བསྙགས་པས་གླང་དེ་སྐྲག་ནས་གཡང་ས་ཟབ་མོ་ཞིག་ཏུ་ལྷུང་བས་སྲོག་ཆད་ལ་ཐུག་པ་ཙམ་དུ་ན་ཞིང་སྡུག་བསྔལ་བས་སྒྲ་ཕྱུང་ངོ་། །དེའི་ཚེ་ཤན་པས་གླང་དེ་མཐོང་ནས་ཞེ་སྡང་ཆེར་སྐྱེས་ཏེ། གཡང་ས་ཟབ་མོ་དེ་ཉིད་དུ་ཞུགས་ནས་མཚོན་ཐོགས་ཏེ་བསད་པར་བྱས་པ་ལས་མཚོན་མ་བཏབ་པའི་བར་སྐབས་སུ། དེའི་ཚེ་དེ་བཞིན་གཤེགས་པ་མཆོག་ཏུ་སྐྱེས་པ་ཚལ་དེར་འཁོར་མང་པོ་བརྒྱ་སྟོང་ཚད་མེད་པས་ཡོངས་སུ་བསྐོར་བ་དག་ལ་རྟེན་ཅིང་འབྲེལ་བར་འབྱུང་བའི་ཆོས་ཀྱི་རྣམ་གྲངས་འདི་
ལྟ་སྟེ། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱི་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་རྟེན་ཅིང་འབྲེལ་བར་འབྱུང་བ་འདི་དག་ཐམས་ཅད་ནི་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་གོ་ཞེས་རྒྱ་ཆེར་རྣམ་པར་ཕྱེ་སྟེ་སྟོན་པར་མཛད་པས། གློག་ཐོབ་རྟེན་ཅིང་འབྲེལ་བར་འབྱུང་བ་འདི་ལ་མ་རིག་པ་ཡང་འདུ་བྱེད་ལ་མི་སེམས་མི་རྟོག་ལ། འདུ་བྱེད་ཀྱང་མ་རིག་པ་ལ་མི་སེམས་མི་རྟོག་གོ །དེ་བཞིན་དུ་སྐྱེ་བ་ཡང་རྒ་ཤི་ལ་མི་སེམས་མི་རྟོག་ལ། རྒ་ཤི་ཡང་སྐྱེ་བ་ལ་མི་སེམས་མི་རྟོག་པས་དེ་ལྟར་ན་ཆོས་ཐམས་ཅད་ནི་རང་བཞིན་དམིགས་སུ་མེད་པས་མངོན་པར་འདུ་བྱ་བ་མེད་པ། དྲན་པ་མེད་པ། བདག་དང་བདག་གི་བ་མེད་པ། རང་བཞིན་གྱིས་རྣམ་པར་དག་པ། ཕན་ཚུན་གཅིག་གིས་གཅིག་མི་རིག་པ་ཡིན་ནོ། །སོ་སོའི་སྐྱེ་བོ་རྣམས་འདི་ལྟ་བུའི་ཆོས་མ་ཐོས་པའི་ཕྱིར་གཟུགས་ནི་བདག་ཡིན་ནོ། །བདག་ནི་གཟུགས་རྣམས་དང་ལྡན་ནོ། །གཟུགས་ནི་བདག་གི་ཡིན་ནོ་ཞེས་འཛིན་པར་བྱེད་དེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་བར་ལ་ཡང་དེ་བཞིན་ནོ། །བདག་དང་བདག་གིར་འཛིན་པ་ལ་མངོན་པར་ཞེན་པའི་དབང་གིས་མི་རྟག་པ་ལ་རྟག་པར་འཛིན་པར་བྱེད། སྡུག་བསྔལ་བ་ལ་བདེ་བར་འཛིན་པར་བྱེད། མི་སྡུག་པ་ལ་སྡུག་པ་ཉིད་དུ་འཛིན་པར་བྱེད། བདག་མེད་པ་ལ་བདག་ཏུ་འཛིན་ཅིང་ཕྱིན་ཅི་ལོག་བཞི་སྐྱེད་པར་བྱེད་དོ། །ཕྱིན་ཅི་ལོག་ཏུ་ལྟ་བའི་ཕྱིར་མ་རིག་པས་རྨོངས་ནས་ཡང་དག་པར་ཚུལ་བཞིན་དུ་ཡིད་ལ་མི་བྱེད་ཅིང་སེམས་ཀྱི་རྗེས་སུ་མངོན་པར་ཞེན་པར་གྱུར་པས་སྲིད་པའི་སྲེད་པ་འཆིང་བ་གཅོད་པར་མི་ནུས་ཤིང་འཁོར་བའི་འཁོར་བར་རྒྱུན་མི་འཆད་པར་
འཁོར་བར་འགྱུར་བ་ཡིན་ནོ། །མཁས་པ་དག་ནི་ཆོས་ཀྱི་དབྱིངས་ཀྱི་མཚན་ཉིད་ལ་ཤིན་དུ་ལེགས་པར་རྟོག་པར་བྱེད་པའི་ཕྱིར་བདག་དང་། གང་ཟག་དང་། སེམས་ཅན་ཞེས་བྱ་བ་ནས་སྲོག་ཅེས་བྱ་བའི་བར་དུ་ཅུང་ཟད་ཙམ་ཡོད་པར་ཡང་དག་པར་རྗེས་སུ་མི་མཐོང་ལ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། གསོད་པ་དང་། གནོད་པ་བྱེད་པ་དག་ཀྱང་མི་དམིགས་སོ་ཞེས་གསུངས་པ་དང་། གློག་ཐོབ་དེའི་ཚེ་ཤན་པ་འཇིགས་སུ་རུངས་བས་རྒྱང་ནས་དེ་བཞིན་གཤེགས་པས་ཆོས་བཤད་པའི་སྒྲ་ཐོས་ནས་གོ་བར་གྱུར་བས་དེ་མ་ཐག་ཏུ་གསོད་པའི་སེམས་ཉེ་བར་ཞི་བར་གྱུར་ནས་མཚོན་ཆ་སྤངས་ཏེ་གཡང་ས་ནས་བྱུང་ནས་བཅོམ་ལྡན་འདས་དེ་ག་ལ་བ་དེར་སོང་སྟེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་གཏུགས་ནས་ཕྱག་བྱས་ཏེ་ཕྱོགས་གཅིག་ཏུ་འདུག་ནས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་དེང་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་ནས་ལམ་བསྒྲུབ་པར་འཚལ་ལོ་ཞེས་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ་དེ་རིགས་སོ། །དགེ་སློང་ལེགས་པར་འོངས་སོ་ཞེས་གསུངས་མ་ཐག་ཏུ་དགེ་སློང་གི་དངོས་པོར་གྱུར་ནས་རྫོགས་པར་བསྙེན་པར་གྱུར་ཏོ། །དེ་ནས་དེ་བཞིན་གཤེགས་པ་མཆོག་ཏུ་སྐྱེས་པས་དེའི་ལྷག་པའི་བསམ་པ་ཐུགས་ཀྱིས་མཁྱེན་ནས་མཐར་གྱིས་ཡོངས་སུ་སྨིན་པར་མཛད་ཅིང་། བྱང་ཆུབ་སེམས་དཔའི་སྤྱོད་པ་རྣམས་རྒྱ་ཆེར་ཡང་དག་པར་བསྟན་པ་འཇིགས་སུ་རུང་བ་ཐོས་པས་མི་སྐྱེ་བའི་ཆོས་ལ་བཟོད་པ་ཐོབ་ནས་སངས་རྒྱས་ཀྱི་བསྟན་པ་ལ་ཕྱིར་མི་ལྡོག་པ་ཐོབ་པར་གྱུར་ཏོ། །སླར་དེ་ཡང་དེ་བཞིན་གཤེགས་པ་དེས་རྟེན་ཅིང་འབྲེལ་བར་འབྱུང་བའི་ཆོས་ཀྱི་ཚིག་སྟོན་པའི་གསུང་སྒྲ་ཤིན་དུ་གྱ་ནོམ་པ་ཐོས་ནས་སེམས་ལ་རབ་ཏུ་དགའ་བ་སྐྱེས་པས་ཤི་འཕོས་པའི་འོག་ཏུ་དགའ་ལྡན་ལྷའི་གནས་སུ་སྐྱེས་ནས་ཐ་མར་བྱམས་པ་དང་ཕྲད་དེ་ཡང་དག་པའི་དད་པ་དང་ལྡན་པར་གྱུར་ཏོ། །གློག་ཐོབ་དེ་ལྟར་ན་སེམས་ཅན་རྣམས་ཀྱི་སྤྱོད་པ་ནི་ཤིན་དུ་ཟབ་པ་དང་། རྣམ་པར་རིག་པར་དཀའ་ཞིང་ཤེས་པར་དཀའ་བ་ཡིན་ཏེ། དེའི་ཕྱིར་གློག་ཐོབ་བྱང་ཆུབ་སེམས་དཔའ་གང་གིས་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་གཉེར་བར་འདོད་པས་སེམས་ཅན་གྱི་དབང་པོ་དང་། སྤྱོད་པ་དག་ལ་ཤིན་དུ་མཁས་པར་བྱས་ནས་སེམས་ཅན་ཐམས་ཅད་ལ་མཉམ་པའི་སེམས་དང་། ཐོགས་པ་མེད་པའི་སེམས་ལ་རབ་ཏུ་གནས་ཏེ་ཆོས་ཐམས་ཅད་ལ་རྟག་ཏུ་མངོན་པར་ཞེན་པ་མེད་པར་བྱའོ། །ཅི་བདོག་པ་རྣམས་ཡོངས་སུ་སྤངས་ཏེ་ཚུལ་ཁྲིམས་རྣམ་པར་དག་པ་བསྒྲུབ་པར་བྱའོ། །བཟོད་པ་ལ་གནས་པར་བྱའོ། །བརྩོན་འགྲུས་བསྐྱེད་པར་བྱའོ། །བསམ་གཏན་དང་། ཏིང་ངེ་འཛིན་མཉམ་པར་བཞག་པར་བྱའོ། །ཡང་དག་པ་ཇི་ལྟ་བ་བཞིན་དུ་ཆོས་ཐམས་ཅད་ཀྱི་ངོ་བོ་ཉིད་ལ་སོ་སོར་བརྟག་པར་བྱའོ། །གློག་ཐོབ་བྱང་ཆུབ་སེམས་དཔའ་གང་ཆོས་དྲུག་པོ་འདི་དག་ཡོངས་སུ་རྫོགས་པར་གྱུར་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཇི་ལྟར་ཡོངས་སུ་རྫོགས་པར་བྱེད་ཅེ་ན། འདི་ལྟ་སྟེ། ཐམས་ཅད་མཁྱེན་པའི་ཡེ་ཤེས་ལ་བརྟེན་ནས་མངོན་པར་སྒྲུབ་པར་བྱེད་པའི་ཕྱིར་རོ། །གློག་ཐོབ་བྱང་ཆུབ་སེམས་དཔའ་རྣམས་ཀྱི་གཏེར་གང་ཞེ་ན། འདི་ལྟ་སྟེ། བྱང་ཆུབ་སེམས་དཔས་གཟུགས་ཐམས་ཅད་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་ཤིང་། གཟོད་མ་ཉིད་ནས་སྐྱེ་བ་མེད་པ་དང་། རང་བཞིན་གྱིས་རྣམ་པར་དག་པར་མཐོང་བ་གང་ཡིན་པའོ། །བྱང་ཆུབ་སེམས་དཔའ་ནི་གཟུགས་ལ་མཁས་པ་ཐོབ་པའི་ཕྱིར་སོ་སོ་ཡང་དག་པར་རིག་པ་བཞི་དང་ལྡན་པར་འགྱུར་རོ། །བཞི་གང་ཞེ་ན། འདི་ལྟ་སྟེ། དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་རིག་པའོ། །དེ་ལ་དོན་སོ་སོ་ཡང་དག་པར་རིག་པ་ནི་གཟུགས་ཀྱི་དོན་རྣམས་ལ་ཐོགས་པ་མེད་པར་གྱུར་བའི་ཕྱིར་རོ། །གཟུགས་ཀྱི་དོན་གང་ཞེ་ན། འདི་ལྟ་སྟེ། དོན་དམ་པ་གང་ཡིན་པའོ། །དོན་དམ་པ་གང་ཞེ་ན། འདི་ལྟ་སྟེ། གཟུགས་དམིགས་སུ་མེད་པ་གང་ཡིན་པ་སྟེ། དོན་དམ་པའི་ཡེ་ཤེས་འདི་ལྟ་བུ་དང་ལྡན་པ་གང་ཡིན་པ་དེ་ནི་དོན་སོ་སོ་ཡང་དག་པར་རིག་པ་ཞེས་བྱའོ། །ཆོས་སོ་སོ་ཡང་དག་པར་
རིག་པ་ནི་གཟུགས་ཀྱི་ཆོས་རྣམས་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་ནས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་གང་ཡིན་པ་དེ་ནི་ཆོས་སོ་སོ་ཡང་དག་པར་རིག་པ་ཞེས་བྱའོ། །ངེས་པའི་ཚིག་སོ་སོ་ཡང་དག་པར་རིག་པ་ནི་འདི་ལྟ་སྟེ། གཟུགས་རྣམས་ལ་ཐོགས་པ་མེད་པའི་ཡེ་ཤེས་ཀྱི་ཐབས་ལ་མཁས་པས་ངེས་པའི་ཚིག་རྣམ་པ་སྣ་ཚོགས་ཀྱིས་རྣམ་པར་འབྱེད་པ་གང་ཡིན་པ་དེ་ནི་ངེས་པའི་ཚིག་སོ་སོ་ཡང་དག་པར་རིག་པ་ཞེས་བྱའོ། །སྤོབས་པ་སོ་སོ་ཡང་དག་པར་རིག་པ་ནི་འདི་ལྟ་སྟེ། གཟུགས་ཀྱི་ཆོས་རྣམས་སེམས་ཅན་གྱི་དབང་པོ་ཇི་ལྟ་བ་བཞིན་དུ་རྣམ་པར་ཕྱེ་སྟེ་སྟོན་པར་བྱེད་ཀྱང་ཀུན་ནས་ཉོན་མོངས་པ་མེད་ཅིང་མངོན་པར་ཞེན་པ་མེད་པ་གང་ཡིན་པ་དེ་ནི་སྤོབས་པ་སོ་སོ་ཡང་དག་པར་རིག་པ་ཞེས་བྱའོ། །བྱང་ཆུབ་སེམས་དཔའ་ནི་འདི་ལྟ་བུའི་ཡེ་ཤེས་དང་ལྡན་པས་གཟུགས་ཀྱི་ཆོས་ལ་རྨོངས་ཤིང་མངོན་པར་ཞེན་པར་གྱུར་བའི་སེམས་ཅན་ཐམས་ཅད་ཀྱི་རང་བཞིན་དང་། འདུན་པ་ཇི་ལྟ་བ་བཞིན་དུ་རྩོལ་བ་མེད་པའི་ཡེ་ཤེས་ཀྱིས་ཅི་རིགས་པར་ཆོས་སྟོན་པར་བྱེད་ཀྱང་ཆོས་ཀྱི་དབྱིངས་ལ་མཚན་ཉིད་གཉིས་སུ་གྱུར་བ་མེད་དེ། སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱི་བར་ལ་ཡང་དེ་བཞིན་དུ་རྒྱས་པར་སྦྱར་ཏེ། གློག་ཐོབ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་གཏེར་ཞེས་བྱའོ། །བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན་སྤྱོད་ཡུལ་རྣམས་ལ་རྨོངས་པར་གྱུར་བའི་སེམས་ཅན་དེ་ལྟ་བུ་དག་ཡོངས་སུ་གདུལ་བར་འདོད་པའི་ཕྱིར་དེ་དག་གི་མོས་པ་ཇི་ལྟ་བུ་བཞིན་དུ་དེ་དག་རེ་རེ་ལ་ཡང་བསྐལ་པའམ། བསྐལ་པ་ལས་ལྷག་པར་ཚིག་རྣམ་པ་སྣ་ཚོགས་ཀྱིས་ཐབས་ལ་མཁས་པས་ཆོས་སྟོན་པར་བྱེད་ཀྱང་དེ་དག་གི་མཐའ་ཡང་རྙེད་པར་མི་འགྱུར་ལ། བྱང་ཆུབ་སེམས་དཔའ་དེའི་ཤེས་རབ་ལ་ཡང་འགྲིབ་པ་མེད་ཅིང་ཆོས་ཀྱི་དབྱིངས་དང་མི་འགལ་བར་གཉིས་སུ་མེད་ཅིང་དབྱེར་མེད་པའི་རྗེས་སུ་འབྲང་བ་གང་ཡིན་པ་འདི་ནི་བྱང་ཆུབ་སེམས་དཔའ་ཐབས་ལ་མཁས་པས་ཆོས་ཐམས་ཅད་དབྱེར་མེད་པའི་མཚན་ཉིད་བསྟན་པས་འཐོབ་པའི་ཆོས་ཀྱི་གཏེར་ཞེས་བྱའོ། །ཆོས་ཀྱི་གཏེར་འདིས་སེམས་ཅན་
དག་ལ་ཅི་རིགས་པར་ཆོས་བསྟན་ནས་ཟད་མི་ཤེས་པའི་ཆོས་ཀྱི་གཏེར་ཕུན་སུམ་ཚོགས་པར་གྱུར་ཏེ། འཁོར་བའི་རྒུད་པ་གཏན་དུ་སྤོང་བ་གང་ཡིན་པ་འདི་ནི་གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཏེར་ཆེན་པོ་དང་། ཟད་མི་ཤེས་པའི་གཏེར་དང་། ཀུན་དུ་ཟད་མི་ཤེས་པའི་གཏེར་དང་། མཐའ་མེད་པའི་གཏེར་རྣམ་པ་ལྔ་ཞེས་བྱའོ། །བྱང་ཆུབ་སེམས་དཔའ་གང་གཏེར་འདི་ལྟ་བུ་དང་ལྡན་པར་གྱུར་ན་ཡོན་ཏན་ཁྱད་པར་དུ་འཕགས་པ་རྣམས་ཡོངས་སུ་རྫོགས་པར་འགྱུར་བའི་ཕྱིར་ཚེགས་ཆུང་ངུས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཆོས་ཀྱི་གཏེར་བསྟན་པའི་ཆོས་ཀྱི་རྣམ་གྲངས་འདི་བསྟན་པའི་ཚེ་བྱང་ཆུབ་སེམས་དཔའ་གློག་ཐོབ་ནི་གཟུངས་རབ་ཏུ་ཐོབ་པར་གྱུར་ཏོ། །བྱང་ཆུབ་སེམས་དཔའ་ལྔ་བརྒྱ་ནི་གློག་གི་འོད་ཟེར་ཞེས་བྱ་བའི་ཏིང་ངེ་འཛིན་ཐོབ་པར་གྱུར་ཏོ། །ལྷའི་བུ་སུམ་ཁྲི་དྲུག་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཟླ་བའི་རྒྱལ་མཚན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་འདི་སྐད་དུ་རྩོལ་བ་མ་མཆིས་པའི་ཡེ་ཤེས་ཞེས་གང་གསུངས་པ་དེའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་གང་གིས་དགེ་བའི་ཆོས་རྣམས་ལ་ལུས་དང་སེམས་ཀྱི་རྗེས་སུ་འཐུན་པས་དམིགས་ཤིང་མངོན་པར་འདུ་བྱེད་པ་གང་ཡིན་པ་དེ་ནི་རྩོལ་བ་དང་བཅས་པ་ཞེས་བྱའོ། །བྱང་ཆུབ་སེམས་དཔའ་གང་ལུས་དང་སེམས་རབ་ཏུ་དུལ་བར་གྱུར་ནས་དྲན་པ་མེད་པ། གནས་པ་མེད་པ། རྣལ་འབྱོར་བསྒོམ་པའི་མཚན་མ་དང་བྲལ་བར་གྱུར་པ་དང་། དེ་སྔོན་གྱི་སྨོན་ལམ་དང་། ཡེ་ཤེས་ཡོངས་སུ་རྫོགས་པར་གྱུར་པས་སངས་རྒྱས་ཀྱི་ཞིང་བྱེ་བ་སྟོང་ཕྲག་མང་པོ་རྣམས་སུ་རྣམ་པ་སྣ་ཚོགས་སུ་སྟོན་པར་བྱེད་ཀྱང་ཆོས་ཀྱི་དབྱིངས་ལས་གཡོ་བ་མེད་པ་དང་། རྟག་ཏུ་ཆོས་སྟོན་པར་བྱེད་ཀྱང་ཆོས་ཀྱི་མཚན་མ་ཅུང་ཟད་ཙམ་ཡང་མེད་པ་དང་། བསྡུ་བའི་དངོས་པོ་བཞིས་སེམས་ཅན་ཡོངས་སུ་སྨིན་པར་བྱས་ཀྱང་སེམས་ཅན་གང་ཡང་ཡོངས་སུ་བཟླས་པ་མེད་པ་
དང་། སངས་རྒྱས་ཀྱི་ཞིང་ཡོངས་སུ་སྦྱངས་ཀྱང་སངས་རྒྱས་ཀྱི་ཞིང་ཡོངས་སུ་དག་པ་ཡང་དག་པར་རྗེས་སུ་མི་མཐོང་བ་དང་། རྟག་པར་སངས་རྒྱས་རྣམས་རྗེས་སུ་དྲན་པར་བྱེད་ཀྱང་གཟུགས་ཀྱི་མཚན་ཉིད་དུ་མི་ལྟ་བ་དང་། སངས་རྒྱས་ཀྱི་ཞིང་ཀུན་དུ་རྒྱུ་བར་བྱེད་ཀྱང་ཆོས་ཀྱི་དབྱིངས་དང་མི་འབྲལ་བ་གང་ཡིན་པ་འདི་ནི་བྱང་ཆུབ་སེམས་དཔའི་རྩོལ་བ་མེད་པའི་ཡེ་ཤེས་ཤེས་བྱའོ། །བྱང་ཆུབ་སེམས་དཔའ་རྣམས་ནི་འདི་ལྟ་བུའི་ཡེ་ཤེས་དང་ལྡན་པའི་ཕྱིར་སེམས་ཅན་ཐམས་ཅད་ཀྱི་རེ་བ་ཡོངས་སུ་རྫོགས་པར་བྱས་ཀྱང་གང་བྱས་པ་དེ་དག་ལ་མངོན་པར་ཞེན་པ་ཡང་མེད་དོ། །དེའི་ཚེ་བཅོམ་ལྡན་འདས་ཀྱིས་རྩོལ་བ་མེད་པའི་ཡེ་ཤེས་འདི་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་པར་གྱུར་ཏོ། །བརྒྱ་བྱིན་ལྷའི་དབང་པོ་ཡང་སུམ་ཅུ་རྩ་གསུམ་གྱི་ལྷ་རྣམས་དང་བཅས་པར་སྟེང་གི་བར་སྣང་ལས་མེ་ཏོག་མན་དཱ་ར་བ་དང་། ཨུད་པ་ལ་དང་། ཀུ་མུ་ད་དང་། པད་མ་དང་། པུན་ད་རི་ཀ་དང་། ཙན་དན་གྱི་ཕྱེ་མའི་ཆར་མངོན་པར་ཕབ་སྟེ། བཅོམ་ལྡན་འདས་ལ་མངོན་པར་གཏོར་ཏོ། །ལྷའི་རྔ་རྣམས་ཀྱང་རང་སྒྲ་བྱུང་བར་འགྱུར་ཏོ། །ངོ་མཚར་རྨད་དུ་བྱང་བའི་སྣང་བ་ཆེན་པོས་ཀྱང་ཀུན་དུ་སྣང་བར་བྱས་ཏེ། སེམས་ཅན་གང་ལ་རེག་པར་གྱུར་པ་དེའི་ལུས་ཀྱང་ཤིན་དུ་བསིལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་གློག་ཐོབ་ལ་བཀའ་སྩལ་པ། གློག་ཐོབ་འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་གནས་འདིར་ཆོས་ཀྱི་རྣམ་གྲངས་འདི་ལྟ་བུ་གསུངས་སོ། །མ་བྱོན་པའི་དེ་བཞིན་གཤེགས་པ་རྣམས་འཇིག་རྟེན་དུ་འབྱུང་བའི་ཚེ་ཡང་གནས་འདིར་ཆོས་ཀྱི་རྣམ་གྲངས་འདི་ལྟ་བུ་གསུང་བར་འགྱུར་རོ། །འཇིག་རྟེན་གྱི་ཁམས་ཚད་མེད་གྲངས་མེད་པ་དག་ན་ད་ལྟར་བཞུགས་པའི་དེ་བཞིན་གཤེགས་པ་རྣམས་ཀྱང་ཆོས་ཀྱི་རྣམ་གྲངས་འདི་རྒྱུན་མི་འཆད་པར་མཛད་པའི་ཕྱིར་འོད་ཟེར་ཆེན་པོ་འགྱེད་པར་མཛད་དོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་
ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། བདག་གིས་ཇི་ལྟར་ཡོངས་སུ་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ནི་མི་ཟད་པའི་གཏེར་བསྟན་པ་ཞེས་བྱའོ། །ཆོས་ཐམས་ཅད་དབྱེར་མེད་པའི་མཚན་ཉིད་བསྟན་པ་ཞེས་ཀྱང་བྱ་སྟེ། ཁྱོད་ཀྱིས་དེ་ལྟར་མིང་ཡོངས་སུ་གཟུང་བར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་གློག་ཐོབ་དང་། ཚེ་དང་ལྡན་པ་ཀུན་དགའ་བོ་དང་། འཁོར་བཞི་པོ་རྣམས་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་མི་ཟད་པའི་གཏེར་བསྟན་པའི་ལེའུ་ཞེས་བྱ་བ་སྟེ་འདུས་པ་ཉི་ཤུ་པ་རྫོགས་སོ།། །།