དྲུག་པ། ལྷུམས་སུ་འཇུག་པའི་ལེའུ།
དགེ་སློང་དག་དེ་ལྟར་དགུན་འདས་ཏེ། དཔྱིད་ཀྱི་དུས་ལ་དཔྱིད་ཟླ་ཐ་ཆུངས་ཀྱི་ཚེ། སྐར་མ་ས་ག་ལ་བབ་པ་དུས་ཀྱི་དམ་པ་ལ་ཤིང་རྣམས་ཀྱི་ལོ་མ་རྒྱས་ཤིང་། མེ་ཏོག་མཆོག་ཏུ་རྒྱས་ནས་གྲང་དྲོ་དང་། མུན་པ་དང་། རྡུལ་མེད་ཅིང་སའི་གཞི་སྔོ་གཞོན་ནུ་སྐྱེས་པས་ཁེབས་པར་གནས་པའི་ཚེ། འཇིག་རྟེན་གསུམ་གྱི་གཙོ་བོ་འཇིག་རྟེན་གྱིས་མཆོད་པས་དུས་ལ་བབ་པའི་ཚོད་ལ་རྣམ་པར་གཟིགས་ནས། ཚེས་བཅོ་ལྔའི་ཟླ་བ་ཉ་ལ་སྐར་མ་རྒྱལ་གྱི་དུས་སུ། ཡུམ་གསོ་སྦྱོང་བླངས་པའི་རུམ་དུ། བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ནས་འཕོས་ཏེ། དྲན་ཞིང་ཤེས་བཞིན་དུ།
གླང་པོའི་ཕྲུ་གུ་ཐལ་ཀར་མཆེ་བ་དྲུག་དང་ལྡན་པ། མགོའི་ཁ་དོག་སྲིན་བུ་ལྷམ་བུ་ཆུ་གཤེར་གྱི་མདོག་ལྟ་བུ། མཆེ་བ་ལ་གསེར་འཚིག་པ། ཡན་ལག་དང་ཉིང་ལག་ཐམས་ཅད་དང་ལྡན་པ། དབང་པོ་ཉམས་པ་མེད་པར་བྱས་ཏེ། མའི་གློ་གཡས་པ་ནས་ཞུགས་སོ། །ཞུགས་ནས་ཀྱང་གློ་གཡས་པ་ལོགས་སུ་བརྟེན་ཏེ་གནས་ཀྱི། གློ་གཡོན་པ་ལོགས་སུ་ནམ་ཡང་མ་བརྟེན་ཏོ། །ལྷ་མོ་སྒྱུ་འཕྲུལ་མལ་བདེ་བ་ན་ཉལ་བ་དེས་ཀྱང་རྨི་ལམ་འདི་ལྟ་བུ་མཐོང་ངོ་། །གླང་པོ་ཁ་བ་དངུལ་མདོག་མཆེ་བ་དྲུག །རྐང་ལག་རབ་མཛེས་མགོ་བོ་དམར་སྡུག་པ། །འགྲོས་བཟང་ལུས་ཚིགས་རྡོ་རྗེ་བཞིན་བརྟན་པ། །གླང་པོ་མཆོག་གཅིག་ཁོང་དུ་སོང་སྙམ་བྱེད། །དེས་ནི་དེ་འདྲའི་བདེ་བ་བརྒྱ་ལམ་ནའང་། །མ་མཐོང་མ་ཐོས་མྱོང་བར་མ་གྱུར་ཏེ། །ལུས་ཀྱང་བདེ་ཞིང་སེམས་ཀྱང་བདེར་གྱུར་ནས། །བསམ་གཏན་མཉམ་པར་བཞག་པ་བཞིན་དུ་གྱུར། །དེ་ནས་ལྷ་མོ་སྒྱུ་འཕྲུལ་རྒྱན་དང་གོས་ལྷུག་ལྷུག་པོར་གྱོན་ཅིང་། ཐོགས་པ་ལས་ལུས་དང་སེམས་བདེ་བར་གྱུར་ཏེ། དགའ་བ་དང་། རངས་པ་དང་། ཉམས་བདེ་བ་ཐོབ་ནས། མལ་དམ་པ་དེ་ལས་ལངས་ཏེ་བུད་མེད་ཀྱི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་ཁང་བཟངས་དེའི་སྟེང་ནས་བབས་ཏེ། ཤིང་མྱ་ངན་འཚང་གི་ནགས་ཚལ་ག་ལ་བ་དེར་སོང་ནས། དེ་མྱ་ངན་འཚང་གི་ནགས་ཚལ་དུ་བདེ་བར་འདུག་སྟེ། རྒྱལ་པོ་ཟས་གཙང་མའི་དྲུང་དུ་ཕོ་ཉ་བཏང་ནས། རྒྱལ་པོ་གཤེགས་སུ་གསོལ། ལྷ་མོ་དེ་ཁྱོད་ཀྱི་ཞལ་མཐོང་བར་བཞེད་དོ། །ཞེས་བྱས་པ་དང་། རྒྱལ་པོ་ཟས་གཙང་མས་ཚིག་དེ་ཐོས་ནས། རབ་ཏུ་དགའ་བར་གྱུར་ཏེ། ལུས་གཡོས་ནས་ཁྲི་བཟང་པོ་ལས་ལངས་ཏེ། བློན་པོ་དང་། གྲོང་རྡལ་པ་དང་། འཁོར་དང་། གཉེན་པའི་སྐྱེ་བོ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། མྱ་ངན་འཚང་གི་ནགས་ཚལ་ག་ལ་བ་དེར་སོང་ངོ་། །སོང་ནས་ཀྱང་བདག་གི་ལུས་ཤིན་ཏུ་ལྕི་བ་སྙམ་བྱེད་ནས། མྱ་ངན་འཚང་གི་ནགས་ཚལ་དུ་འགྲོ་མ་ནུས་ཏེ། མྱ་ངན་འཚང་གི་ནགས་ཚལ་གྱི་སྒོར་འདུག་ནས། ཅུང་ཟད་ཅིག་བསམས་ཏེ། དེའི་ཚེ་ཚིགས་སུ་བཅད་པ་འདི་སྨྲས་སོ། །བདག་ནི་གཡུལ་དུ་དཔའ་
བའི་ཕུལ་ཕྱིན་པ། །དེང་ལྟར་ལུས་ལྕི་བདག་གིས་མྱོང་མི་དྲན། །བདག་གི་ཁྱིམ་དུའང་འགྲོ་བར་དེང་མ་ནུས། །ཀྱེ་མ་འདི་ཅི་སུ་ལ་དྲི་བར་བྱ། །གནས་གཙང་མའི་རིས་ཀྱི་ལྷ་དག་ནམ་མཁའི་དཀྱིལ་ན་འཁོད་ནས་ལུས་ཕྱེད་མངོན་པར་སྤྲུལ་ཏེ། རྒྱལ་པོ་ཟས་གཙང་མ་ལ་ཚིགས་སུ་བཅད་དེ་སྨྲས་པ། དཀའ་ཐུབ་བརྟུལ་ཞུགས་ཡོན་ཏན་ལྡན་པ་འཇིག་རྟེན་གསུམ་གྱིས་མཆོད། །བྱམས་དང་སྙིང་རྗེ་ཐོབ་པས་བསོད་ནམས་ཡེ་ཤེས་དབང་བསྐུར་བའི། །བྱང་ཆུབ་སེམས་དཔའ་ཆེ་བ་དགའ་ལྡན་གནས་ནས་འཕོས་གྱུར་ཏེ། །རྒྱལ་པོ་ཁྱོད་ཀྱི་སྲས་གྱུར་ལྷ་མོ་སྒྱུ་འཕྲུལ་མངལ་དུ་ཞུགས། །དེ་ཚེ་རང་གི་མགོ་ཅོགས་སོར་བཅུ་ཐལ་མོ་སྦྱར་བྱས་ཏེ། །རྒྱལ་པོ་རིམ་གྲོ་བྱ་བར་ལྡན་གྱུར་དེ་ཡི་ནང་དུ་ཞུགས། །ང་རྒྱལ་དྲེགས་པ་མེད་པས་ལྷ་མོ་སྒྱུ་འཕྲུལ་ངོར་བལྟས་ཏེ། །ངས་ནི་ཁྱོད་ལ་ཅི་བྱ་ཅི་སྦྱར་ཁྱོད་ཀྱིས་ང་ལ་སྨྲོས། །ལྷ་མོས་སྨྲས་པ། ཁ་བ་དངུལ་གྱི་མདོག་འདྲ་ཉི་ཟླའི་འོད་ལས་འཕགས་པ་སྟེ། །རྐང་ལག་ལེགས་ཤིང་རབ་འབྱེས་མཆེ་བ་དྲུག་ལྡན་ཆེ་བ་ཉིད། །གླང་པོའི་དམ་པ་རྡོ་རྗེ་བཞིན་དུ་ཚིགས་བརྟན་གཟུགས་བཟང་བ། །བདག་གི་རུམ་དུ་ཞུགས་ཀྱིས་དེ་ཡི་ལོ་རྒྱུས་གསན་པར་གསོལ། །སྟོང་གསུམ་ཁམས་འདི་མཛེས་པར་རབ་རིབ་མ་མཆིས་བདག་གིས་མཐོང་། །བདག་ནི་ཉལ་ཞིང་མཆིས་ན་ལྷ་རྣམས་བྱེ་བས་རབ་ཏུ་བསྟོད། །འོན་ཀྱང་བདག་ལ་ཁྲོ་ཞིང་འཚིག་དང་ཞེ་སྡང་རྨོངས་མ་མཆིས། །ཞི་བའི་སེམས་སུ་གྱུར་ཅིང་བསམ་གཏན་བདེ་དང་ལྡན་སྙམ་བགྱིད། །བདག་གི་རྨི་ལམ་འདི་ནི་རིགས་ལ་དགེའམ་དངོའམ་ཅི། །བདག་གི་རྨི་ལམ་འདི་ནི་ཡང་དག་ལྡན་པར་ལུང་སྟོན་པ། །རིག་བྱེད་རྨི་ལམ་གཞུང་ལ་མཁས་ཤིང་གཟའ་ཡི་ཆོ་ག་མཁན། །རྒྱལ་པོ་མྱུར་དུ་བྲམ་ཟེ་འདིར་ནི་ལེགས་པར་དགུག་ཏུ་གསོལ། །དེ་སྐད་ཚིག་ཐོས་རྒྱལ་པོས་དེ་ཡི་དུས་ཀྱི་སྐད་ཅིག་ལ། །བྲམ་ཟེ་རིག་བྱེད་བསྟན་བཅོས་གཞུང་ལ་ཤིན་ཏུ་མཁས་པ་གཉེར། །སྒྱུ་འཕྲུལ་བྲམ་ཟེ་རྣམས་ཀྱི་མདུན་དུ་འདུག་ནས་འདི་སྐད་སྨྲས། །ཁོ་མོས་རྨི་ལམ་འདི་འདྲ་མཐོང་ན་དེ་ཡི་ལོ་རྒྱུས་གསོན། །བྲམ་ཟེ་རྣམས་ཀྱིས་སྨྲས་པ། ལྷ་མོ་བཀའ་སྩལ་དུ་གསོལ། ཁྱོད་ཀྱིས་རྨི་ལམ་ཅི་འདྲ་བ་ཞིག་གཟིགས། ཐོས་ནས་ཀྱང་དཔྱད་པར་བགྱིའོ། །
ལྷ་མོས་སྨྲས་པ། ཁ་བ་དངུལ་གྱི་མདོག་འདྲ་ཉི་ཟླའི་འོད་ལས་འཕགས་པ་སྟེ། །རྐང་ལག་ལེགས་ཤིང་རབ་འབྱེས་མཆེ་བ་དྲུག་ལྡན་ཆེ་བ་ཉིད། །གླང་པོའི་དམ་པ་རྡོ་རྗེ་བཞིན་དུ་ཚིགས་བརྟན་གཟུགས་བཟང་བ། །བདག་གི་རུམ་དུ་ཞུགས་ན་དེ་ཡི་ལོ་རྒྱུས་མཉན་པར་གྱིས། །དེ་སྐད་ཚིག་ཐོས་ནས་ནི་བྲམ་ཟེ་རྣམས་ཀྱིས་འདི་སྐད་སྨྲས། །རིགས་ལ་དངོ་བ་མ་མཆིས་དགྱེས་པ་རྒྱ་ཆེན་བརྙེས་པར་འགྱུར། །ཁྱོད་ལ་སྲས་མངའ་མཚན་གྱིས་ཡན་ལག་བརྒྱན་པ་སྐྱེ་བར་འགྱུར། །རྒྱལ་པོའི་རིགས་སུ་རིགས་ལྡན་འཁོར་ལོས་སྒྱུར་བ་ཆེ་བ་ཉིད། །གལ་ཏེ་འདོད་པ་དག་དང་རྒྱལ་སྲིད་ཕོ་བྲང་སྤངས་གྱུར་ཏེ། །འཇིག་རྟེན་ཀུན་ལ་ཐུགས་བརྩེ་ཆགས་མེད་རབ་ཏུ་བྱུང་གྱུར་ན། །དེ་ནི་འཇིག་རྟེན་གསུམ་ན་སྦྱིན་གནས་སངས་རྒྱས་འགྱུར་བ་སྟེ། །བདུད་རྩི་མཆོག་གི་རོ་ཡིས་འཇིག་རྟེན་ཐམས་ཅད་ཚིམ་མཛད་འགྱུར། །དེ་སྐད་ཚིག་སྙན་ལུང་བསྟན་ཏེ། །རྒྱལ་པོའི་ཕོ་བྲང་ཟན་ཟོས་ནས། །བྱ་དགའ་བྱིན་པ་བླངས་ནས་སུ། །བྲམ་ཟེ་དེ་དག་ཕྱིར་དོང་ངོ་། །དགེ་སློང་དག་དེ་ལྟར་རྒྱལ་པོ་ཟས་གཙང་མས་བྲམ་ཟེ་མཚན་དང་ལྟས་ཤེས་ཤིང་རྣམ་པར་འབྱེད་པ་དང་། རྨི་ལམ་གྱི་གཞུང་ཤེས་པ་དག་ལས་དེ་སྐད་ཀྱི་ཚིག་དེ་ཐོས་ནས། ཚིམ་ཞིང་མགུ་སྟེ། ཡི་རངས་ལ། རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་ནས། བྲམ་ཟེ་དེ་དག་བཟའ་བ་དང་བཏུང་བ་དང་། མྱང་བ་མང་པོ་ཉམས་སུ་བསོད་པས་ཚིམ་ཞིང་ངོམས་པར་བྱས་ནས། བྱ་དགའ་བྱིན་ཏེ་བཀྱེའོ། །དེ་ཉིད་ཀྱི་ཚེ་གྲོང་ཁྱེར་ཆེན་པོ་སེར་སྐྱའི་གནས་ཀྱི་གྲོང་ཁྱེར་ཆེན་པོ་དེའི་སྒོ་བཞི་ན། གྲོང་ཁྱེར་གྱི་བཞི་མདོ་དང་སུམ་མདོ་ཐམས་ཅད་དུ་སྦྱིན་པ་བྱིན་ཏེ། ཇི་ཙམ་དུ་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། ཟས་འདོད་པ་རྣམས་ལ་ནི་ཟས། སྐོམ་འདོད་པ་རྣམས་ལ་ནི་སྐོམ། གོས་འདོད་པ་རྣམས་ལ་ནི་གོས། བཞོན་པ་འདོད་པ་རྣམས་ལ་ནི་བཞོན་པ། སྤོས་འདོད་པ་རྣམས་ལ་ནི་སྤོས། ཕྲེང་བ་འདོད་པ་རྣམས་ལ་ནི་ཕྲེང་བ། བྱུག་པ་འདོད་པ་རྣམས་ལ་ནི་བྱུག་པ། མལ་ཆ་འདོད་པ་རྣམས་ལ་ནི་མལ་ཆ། གནས་འདོད་པ་རྣམས་ལ་ནི་གནས། འཚོ་བ་འདོད་པ་རྣམས་ལ་ནི་འཚོ་བ་བྱིན་ནོ། །དགེ་སློང་དག་དེ་ནས་
རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། ལྷ་མོ་སྒྱུ་འཕྲུལ་འདི་ཁྱིམ་གང་ན་འདུག་ན་བདེ་ཞིང་ཉོན་མོངས་པ་མེད་པར་འདུག་པར་འགྱུར་སྙམ་པ་དང་། དེ་ནས་སྐད་ཅིག་དེ་ཉིད་ལ་རྒྱལ་པོ་ཆེན་པོ་བཞི་རྒྱལ་པོ་ཟས་གཙང་མའི་དྲུང་དུ་འོངས་ཏེ་འདི་སྐད་ཅེས་སྨྲས་སོ། །ལྷ་ཐུགས་ལས་སུ་མ་མཛད་པར་བཏང་སྙོམས་སུ་བདེ་བར་བཞུགས་ཤིག །བདག་ཅག་གིས་བྱང་ཆུབ་སེམས་དཔའི་ཕོ་བྲང་བཤམ་མོ། །དེ་ནས་ལྷའི་དབང་པོ་བརྒྱ་བྱིན་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །སྐྱོང་བའི་གཞལ་མེད་ཁང་རྣམས་ངན། །སུམ་ཅུ་རྩ་གསུམ་པ་ཡི་བཟང་། །བྱང་ཆུབ་སེམས་དཔའི་ཕོ་བྲང་ནི། །རྣམ་པར་རྒྱལ་ཙམ་བདག་གིས་དབུལ། །དེ་ནས་ལྷའི་བུ་རབ་འཐབ་བྲལ་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །ཁོ་བོའི་ཁང་ཁྱིམ་མཐོང་གྱུར་ནས། །བརྒྱ་བྱིན་བྱེ་བ་ངོ་མཚར་གྱུར། །འཐབ་བྲལ་རབ་ཀྱི་དཔལ་ལྡན་ཁང་། །རྒྱལ་བའི་སྲས་ལ་བདག་འབུལ་ལོ། །དེ་ནས་ལྷའི་བུ་ཡོངས་སུ་དགའ་ལྡན་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །གྲགས་པ་ཆེ་མངའ་སྔོན་ཆད་ནི། །དགའ་ལྡན་གང་དུ་བཞུགས་གྱུར་པ། །ཕོ་བྲང་དམ་པ་དགྱེས་པ་དེ། །རྒྱལ་བའི་སྲས་ལ་བདག་འབུལ་ལོ། ། དེ་ནས་ལྷའི་བུ་རབ་འཕྲུལ་དགའ་རྒྱལ་པོ་ཟས་གཙང་མའི་གན་དུ་འོངས་ཏེ། འདི་སྐད་ཅེས་སྨྲས་སོ། །དཔལ་ལྡན་ཡིད་ལས་གྲུབ་པའི་ཁང་། །དེ་ནི་རིན་ཆེན་རང་བཞིན་ཏེ། །བྱང་ཆུབ་སེམས་དཔའ་མཆོག་དོན་དུ། །རྒྱལ་པོ་བདག་གིས་དབུལ་བར་བགྱིས། །དེ་ནས་ལྷའི་བུ་གཞན་འཕྲུལ་དབང་བྱེད་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །འདོད་པའི་ཁམས་གནས་ཇི་སྙེད་པ། །གཞལ་མེད་ཁང་མཛེས་གང་ཡོད་པ། །བདག་གི་གཞལ་མེད་ཁང་དྲུང་ན། །་འོད་དང་མདོག་ཀྱང་སྟོར་བར་སྣང་། །དེ་བས་དཔལ་ལྡན་བདག་གིས་དབུལ། །བྱང་ཆུབ་སེམས་དཔའ་མཆོད་པའི་ཕྱིར། །རིན་ཆེན་རང་བཞིན་ཕོ་བྲང་བཟང་། །དེ་ནི་རྒྱལ་པོ་བླང་བར་གྱིས། །ལྷ་ཡི་མེ་ཏོག་རབ་བཀང་སྟེ། །ལྷ་ཡི་སྤོས་ཀྱི་ངད་ལྡང་བའི། །ཕོ་བྲང་ཡངས་པ་བདག་གིས་དབུལ། །དེར་ནི་ལྷ་མོ་བཞུགས་པར་གྱིས། །དགེ་སློང་དག་དེ་ལྟར་འདོད་པ་ན་སྤྱོད་པའི་ལྷའི་
དབང་པོ་ཐམས་ཅད་ཀྱིས་བྱང་ཆུབ་སེམས་དཔའ་ལ་མཆོད་པའི་ཕྱིར་སེར་སྐྱའི་གནས་ཀྱི་གྲོང་ཁྱེར་ཆེན་པོ་དམ་པ་དེར་རང་རང་གི་ཁྱིམ་ཕུལ་བར་གྱུར་ཏོ། །རྒྱལ་པོ་ཟས་གཙང་མས་ཀྱང་མིའི་ལས་ནི་འདས་ཀྱི་ལྷ་ཡིར་ནི་མ་གྱུར་པ་བཤམས་པར་གྱུར་ཏེ། དེ་ལ་བྱང་ཆུབ་སེམས་དཔའ་བཀོད་པ་ཆེན་པོའི་ཏིང་ངེ་འཛིན་གྱི་མཐུས་ཁྱིམ་དེ་དག་ཐམས་ཅད་དུ་ལྷ་མོ་སྒྱུ་འཕྲུལ་མངོན་པར་བསྟན་ཏོ། །བྱང་ཆུབ་སེམས་དཔའ་ལྷ་མོ་སྒྱུ་འཕྲུལ་གྱི་རུམ་ན་འདུག་པའི་ཚེ། གློ་གཡས་ཕྱོགས་ལོགས་སུ་སྐྱིལ་མོ་ཀྲུང་བཅས་ཏེ་གནས་པར་གྱུར་ཏོ། །ལྷའི་དབང་པོ་དེ་དག་ཐམས་ཅད་ཀྱང་སོ་སོ་ནས་བདག་ཉིད་ཀྱི་ཁྱིམ་ན་བྱང་ཆུབ་སེམས་དཔའི་མ་འདུག་གི་གཞན་མ་ཡིན་ནོ་ཞེས་དེ་ལྟར་ཤེས་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། ཏིང་འཛིན་བཀོད་པ་ཆེ་ལ་གནས་གྱུར་ཏེ། །སྤྲུལ་པ་བསམ་གྱིས་མི་ཁྱབ་སྤྲུལ་བྱས་ནས། །ལྷ་རྣམས་ཐམས་ཅད་བསམ་པ་རྫོགས་པར་བྱས། །རྒྱལ་པོའང་དེ་ལྟར་ཡིད་བཞིན་བསམ་པ་གྲུབ། །དེ་ནས་འཁོར་དེའི་ནང་ནས་ལྷའི་བུ་ཁ་ཅིག་འདི་སྙམ་དུ་སེམས་ཏེ། རྒྱལ་ཆེན་བཞིའི་རིས་ཀྱི་ལྷ་གང་ཡིན་པ་དེ་དག་ཀྱང་མིའི་ལུས་ཀྱི་དྲི་བྲོ་ན་སྐྱོ་ཞིང་འབྱོལ་ན། དེ་མ་ཡིན་པའི་ལྷ་གཞན་སུམ་ཅུ་རྩ་གསུམ་མམ། འཐབ་བྲལ་ལམ། དགའ་ལྡན་གྱི་ལྷའི་བུ་དག་ལྟ་སྨོས་ཀྱང་ཅི་དགོས་ན། ཇི་ལྟར་བྱང་ཆུབ་སེམས་དཔའ་གཙང་ཞིང་དྲི་ང་བ་དང་བྲལ་བ། འཇིག་རྟེན་ཐམས་ཅད་ལས་མངོན་པར་འཕགས་པ། སེམས་ཅན་རིན་པོ་ཆེ་དགའ་ལྡན་གྱི་ལྷའི་རིས་ནས་འཕོས་ཏེ། ཡུམ་གྱི་ལྷུམས་མིའི་ལུས་དྲི་མི་ཞིམ་པར་བཞུགས་པར་གྱུར་སྙམ་པ་དང་། དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཀུན་དགའ་བོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་བུད་མེད་ཀྱི་ལུས་ནི་སྨད་པ་ལགས་པ་དང་། འདོད་ཆགས་ལ་སྤྱོད་ཅེས་བགྱི་བའི་བར་དུ་དེ་བཞིན་གཤེགས་པས་གསུངས་པ་ངོ་མཚར་ཆེ་ན། བཅོམ་ལྡན་འདས་དེ་བས་ཀྱང་འཇིག་རྟེན་ཐམས་ཅད་ལས་མངོན་པར་འཕགས་པ། སྔོན་བྱང་ཆུབ་སེམས་དཔར་གྱུར་པ། འདི་ལྟར་དགའ་ལྡན་གྱི་ལྷའི་རིས་ནས་འཕོས་ཏེ། ཡུམ་གྱི་ལྷུམས་མིའི་ལུས་སུ་གློ་གཡས་ཕྱོགས་སུ་
བརྟེན་ཏེ་བཞུགས་སོ། །ཞེས་བགྱི་བ་འདི་ནི་རབ་ཏུའང་ངོ་མཚར་ཆེ་སྟེ། བཅོམ་ལྡན་འདས། སྔོན་བཅོམ་ལྡན་འདས་ཀྱིས་དེ་ལྟར་མཛད་དོ་ཞེས་དེ་སྐད་དུ་སྨྲ་བར་ནི་བདག་ལ་སྤྲོ་བ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་ཞེས་བྱ་བ་གང་བྱང་ཆུབ་སེམས་དཔའ་མའི་རུམ་ན་གནས་པའི་ཡོངས་སུ་སྤྱད་པར་གྱུར་པ་མཐོང་བར་འདོད་དམ། གསོལ་པ། བཅོམ་ལྡན་འདས་དེའི་དུས་ནི་ད་ལགས་སོ། །བདེ་བར་གཤེགས་པ་དེའི་དུས་ནི་ད་ལགས་ཏེ། དེ་བཞིན་གཤེགས་པས་བྱང་ཆུབ་སེམས་དཔའི་ཡོངས་སུ་སྤྱད་པ་དེ་བསྟན་ཏེ་མཐོང་ན་གློ་བ་དགའོ། །དེ་ནས་བཅོམ་ལྡན་འདས་ཀྱིས་རྣམ་པ་དེ་ལྟ་བུའི་མཚན་མ་མཛད་དེ། དེས་མི་མཇེད་ཀྱི་བདག་པོ་ཚངས་པ། ཚངས་པ་འབུམ་ཕྲག་དྲུག་ཅུ་རྩ་བརྒྱད་དང་ལྷན་ཅིག་ཚངས་པའི་འཇིག་རྟེན་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་ཕྱིན་ནས། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདུད་ཅིང་ཕྱོགས་གཅིག་ཏུ་འདུག་གོ །དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་མི་མཇེད་ཀྱི་བདག་པོ་ཚངས་པ་ལ་བཀའ་སྩལ་པ། ཚངས་པ་ཁྱོད་ཀྱིས་སྔོན་ང་བྱང་ཆུབ་སེམས་དཔའར་གྱུར་ཅིང་མའི་རུམ་ན་ཟླ་བ་བཅུར་འདུག་འདུག་པའི་བྱང་ཆུབ་སེམས་དཔའི་ཡོངས་སུ་སྤྱད་པ་བླངས་སམ། གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་སོ། །བཀའ་སྩལ་པ། ཚངས་པ་ད་དེ་ག་ལ་ཡོད་སྟོན་ཅིག །གསོལ་པ། བཅོམ་ལྡན་འདས་དེ་ནི་ཚངས་པའི་འཇིག་རྟེན་ན་མཆིས་སོ། །བཀའ་སྩལ་པ། ཚངས་པ་དེའི་ཕྱིར་ཟླ་བ་བཅུ་པའི་བྱང་ཆུབ་སེམས་དཔའི་ཡོངས་སུ་སྤྱད་པ་དེ་འདིར་ཁྱོད་ཀྱིས་སྟོན་ཅིག་དང་། ཇི་ཙམ་དུ་འདུས་བྱས་པ་ཤེས་པར་འགྱུར་རོ། །དེ་ནས་མི་མཇེད་ཀྱི་བདག་པོ་ཚངས་པས། ཚངས་པ་དག་ལ་འདི་སྐད་ཅེས་སྨྲས་སོ། །ཁོ་བོས་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་བླང་གིས་དེའི་བར་དུ་ཁྱེད་འཁོད་ཅིག །དེ་ནས་མི་མཇེད་ཀྱི་བདག་པོ་ཚངས་པ་
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་མི་སྣང་བར་གྱུར་ནས་སྐད་ཅིག་དེ་ཉིད་ལ་ཚངས་པའི་འཇིག་རྟེན་དུ་ཕྱིན་ཏོ། །དེ་ནས་མི་མཇེད་ཀྱི་བདག་པོ་ཚངས་པས་ལྷའི་བུ་ཚངས་པ་བཟང་པོ་ལ་འདི་སྐད་ཅེས་སྨྲས་སོ། །གྲོགས་པོ་ཁྱོད་སོང་ལ་ཚངས་པའི་འཇིག་རྟེན་འདི་མན་ཆད་སུམ་ཅུ་རྩ་གསུམ་གྱི་གནས་ཡན་ཆད་དུ་སྒྲ་སྒྲོགས་ཏེ། བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་བདག་ཅག་གིས་དེ་བཞིན་གཤེགས་པའི་སྤྱན་སྔར་བཀུར་ན་ཁྱེད་ཀྱི་ནང་ནས་མཐོང་བར་སུ་དགའ་བ་མྱུར་དུ་ཤོག་ཤིག་ཅེས་སྒྲས་གོ་བར་གྱིས་ཤིག །དེ་ནས་མི་མཇེད་ཀྱི་བདག་པོ་ཚངས་པས། ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་དང་ལྷན་ཅིག་ཏུ་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་བླངས་ཏེ། ཚངས་པའི་གཞལ་མེད་ཁང་ཆེན་པོ་དཔག་ཚད་སུམ་བརྒྱ་པའི་སྟེང་དུ་བཞག་ནས། ལྷ་བྱེ་བ་ཁྲག་ཁྲིག་བརྒྱ་སྟོང་དུ་མས་ཀུན་ནས་བསྐོར་ཏེ། འཛམ་བུའི་གླིང་དུ་ཕབ་བོ། །དེའི་ཚེ་བཅོམ་ལྡན་འདས་ཀྱི་ཞབས་འབྲིང་དུ་འདོད་པ་ན་སྤྱོད་པའི་ལྷའི་བུ་འདུས་པ་ཆེན་པོར་གྱུར་ཏེ། བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་ཡང་ལྷའི་གོས་དང་། ལྷའི་ཕྲེང་བ་དང་། ལྷའི་སྤོས་དང་། ལྷའི་མེ་ཏོག་དང་། ལྷའི་རོལ་མོའི་དབྱངས་སྒྲ་དང་། ལྷའི་ལོངས་སྤྱོད་རྣམས་ཀྱིས་མངོན་པར་འདུས་བྱས་པར་གྱུར་ཅིང་ལྷ་དབང་ཆེ་བར་གྲགས་པ་དག་གིས་ཡོངས་སུ་བསྐོར་བར་གྱུར་པ་ནི་འདི་ཙམ་སྟེ། ལྷའི་དབང་པོ་བརྒྱ་བྱིན་རྒྱ་མཚོ་ཆེན་པོའི་དབུས་སུ་འདུག་ནས་རྒྱང་རིང་པོ་ནས་གདོང་ཐལ་མོས་བསྐྱབས་ཏེ་མགོ་བྱོལ་ནས་བལྟས་ཀྱང་མཐོང་བར་མི་ནུས་སོ། །དེ་ཅིའི་ཕྱིར་ཞེ་ན། ལྷའི་ནང་ན་ཚངས་པ་དག་ནི་མཐུ་ཆེ་བ་སྟེ། སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་དག་ཀྱང་དེ་དག་གི་དྲུང་ན་དམའ་བ་ཡིན་ན། ལྷའི་དབང་པོ་བརྒྱ་བྱིན་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཀྱིས་དེའི་ཚེ། ལྷའི་རོལ་མོ་དབྱངས་སྒྲའི་སྒྲ་དེ་དག་ཞི་བར་མཛད་དོ། །དེ་ཅིའི་ཕྱིར་ཞེ་ན། དེ་ཐོས་པ་ཙམ་གྱིས་འཛམ་བུའི་གླིང་གི་མི་རྣམས་མྱོ་མྱོ་པོར་འགྱུར་
དུ་འོང་བའི་ཕྱིར་རོ། །དེ་ནས་རྒྱལ་པོ་ཆེན་པོ་བཞི་ལྷའི་དབང་པོ་བརྒྱ་བྱིན་གྱི་དྲུང་དུ་ལྷགས་ནས་འདི་སྐད་ཅེས་སྨྲས་སོ། །ལྷའི་དབང་པོ་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་འདི་བདག་ཅག་གིས་མཐོང་བར་མི་ནུས་ན་ཇི་ལྟར་བགྱི། དེས་དེ་དག་ལ་སྨྲས་པ། གྲོགས་པོ་དག་ཁོ་བོས་ཀྱང་ཇི་ལྟར་བྱ། ཁོ་བོ་ཉིད་ཀྱིས་ཀྱང་མཐོང་བར་མི་ནུས་སོ། །གྲོགས་པོ་དག་འོན་ཀྱང་དེ་ནི་ནམ་བཅོམ་ལྡན་འདས་ཀྱི་སྤྱན་སྔར་ཕུལ་བ་དེའི་ཚེ་མཐོང་གྲང་ངོ་། །དེ་དག་གིས་སྨྲས་པ། ལྷའི་དབང་པོ་དེ་བས་ན་ཅི་ནས་ཀྱང་མྱུར་དུ་མཐོང་བར་འགྱུར་བ་དེ་ལྟར་མཛད་དུ་གསོལ། སྨྲས་པ། གྲོགས་པོ་དག་ལྷའི་བུ་མངོན་པར་འཕགས་པ་མངོན་པར་འཕགས་པ་དེ་དག་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ། དགའ་བར་བྱ་བའི་ཚིག་བརྗོད་པར་གྱུར་གྱི་བར་དུ་སྡོད་ཅིག །དེ་ནས་དེ་དག་ཕྱོགས་གཅིག་ཏུ་འཁོད་དེ་མགོ་བྱོལ་ནས་བཅོམ་ལྡན་འདས་ལོགས་སུ་ལྟ་ཞིང་འཁོད་པར་གྱུར་ཏོ། །དེ་ནས་མི་མཇེད་ཀྱི་བདག་པོ་ཚངས་པ་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པོ་དེ་དག་དང་ལྷན་ཅིག་ཏུ་བྱང་ཆུབ་སེམས་དཔའི་ཡོངས་སུ་སྤྱད་པར་བྱ་བ་རིན་པོ་ཆེ་བཀོད་པ་དེ་ཁྱེར་ཏེ། དེ་བཞིན་གཤེགས་པ་ག་ལ་བ་དེར་ཕུལ་ལོ། །བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་ནི་གཟུགས་བཟང་བ་མཛེས་པ་བལྟ་ན་སྡུག་པ་གྲུ་བཞི་ལྷམ་པ། ཀ་བ་བཞི་ཟུག་པ། སྟེང་ཁང་པ་བརྩེགས་པས་ལེགས་པར་བརྒྱན་པ་སྟེ། དེའི་ཚད་ནི་འཕང་དུ་འདི་ལྟ་སྟེ། དཔེར་ན་བྱིས་པ་བཙས་ནས་ཟླ་བ་དྲུག་ལོན་པ་ཙམ་མོ། །ཁང་པ་བརྩེགས་པ། དེའི་ནང་དུ་ཁྲི་བཤམས་པ་ནི་འདི་ལྟ་སྟེ་དཔེར་ན་བྱིས་པ་བཙས་ནས་ཟླ་བ་དྲུག་ལོན་པ་འདུག་པའི་སྟེགས་བུ་ཙམ་མོ། །བྱང་ཆུབ་སེམས་དཔའི་ཡོངས་སུ་སྤྱད་པར་བྱ་བ་རིན་པོ་ཆེ་བཀོད་པ་དེའི་ཁ་དོག་དང་དབྱིབས་ནི་འདི་ལྟ་བུ་སྟེ། ལྷ་དང་བཅས་པའི་འཇིག་རྟེན་ན་དེའི་དབྱིབས་དང་ཁ་དོག་འདྲ་བ་གང་ཡང་མེད་དོ། །ལྷ་རྣམས་ཀྱིས་དེ་མཐོང་ན་ཡང་མིག་འཁྲུགས་ཤིང་ངོ་མཚར་དུ་འགྱུར་རོ། །དེ་དེ་བཞིན་གཤེགས་པའི་སྤྱན་སྔར་བཞག་ན་ལྷམ་མེ། ལྷན་ནེ། ལྷང་ངེ་སྟེ། དཔེར་ན་མགར་བ་མཁས་པས་ཤིན་ཏུ་བཞུ་སྟེ། ལེགས་པར་སྦྱངས་ནས། དྲི་
མའི་སྐྱོན་མེད་པར་བྱས་པའི་གསེར་བཞིན་དུ་ཁང་པ་བརྩེགས་པ་དེ་རྣམ་པར་མཛེས་སོ། །བྱང་ཆུབ་སེམས་དཔའི་ཡོངས་སུ་སྤྱད་པ་དེའི་ནང་དུ་ཁྲི་བཤམས་པ་ནི། བྱང་ཆུབ་སེམས་དཔའི་དུང་མགྲིན་མ་གཏོགས་པ་ལྷ་དང་བཅས་པའི་འཇིག་རྟེན་ན་དེའི་དབྱིབས་དང་། ཁ་དོག་འདྲ་བ་གང་ཡང་མེད་དོ། །ཚངས་པ་ཆེན་པོས་གོས་བགོས་པ་དེ་ཡང་བྱང་ཆུབ་སེམས་དཔའི་ཁྲི་དེའི་དྲུང་ན་མཛེས་པར་མི་སྣང་སྟེ། འདི་ལྟ་སྟེ་དཔེར་ན། རླུང་དང་ཆར་གྱིས་བཏབ་པའི་ལ་བ་ནག་པོ་བཞིན་ནོ། །ཁང་པ་བརྩེགས་པ་དེ་ནི་ཙན་དན་སྦྲུལ་གྱི་སྙིང་པོ་ལས་བྱས་པ་སྟེ། དེའི་ཕྱེ་མ་ཞོ་གཅིག་ལའང་སྟོང་གི་འཇིག་རྟེན་གྱི་ཁམས་ཀྱིས་རིན་དུ་མི་ཆོག་གོ །ཁང་པ་བརྩེགས་པ་དེ་ནི་ཙན་དན་སྦྲུལ་གྱི་སྙིང་པོ་དེ་ལྟ་བུས་ཀུན་ནས་བསྐོར་བ་སྟེ། ཁང་པ་བརྩེགས་པ་དེ་དང་འདྲ་བ་གཉིས་པ་གཅིག་ཀྱང་ཁང་པ་བརྩེགས་པ་དང་པོ་དེའི་ནང་ན་མ་ཆགས་མ་རེག་པར་འདུག་གོ །ཁང་པ་བརྩེགས་པ་དེ་ཁོ་ན་དང་འདྲ་བ་གསུམ་པ་གཅིག་ཀྱང་ཁང་པ་བརྩེགས་པ་གཉིས་པ་དེའི་ནང་ན་མ་རེག་མ་ཆགས་པར་འདུག་གོ །སྤོས་ཀྱི་ཁང་པ་བརྩེགས་པ་གསུམ་པ་དེའི་ནང་དུ་ཁྲི་དེ་བཞག་སྟེ་གདན་བཏིང་ངོ་། །ཙན་དན་སྦྲུལ་གྱི་སྙིང་པོ་དེའི་ཁ་དོག་ནི་རྣམ་པ་འདི་ལྟ་བུ་སྟེ། དཔེར་ན་བཻ་དཱུཪྱ་སྔོན་པོ་རིགས་དམ་པ་དང་ལྡན་པ་བཞིན་ནོ། །སྤོས་ཀྱི་ཁང་པ་བརྩེགས་པ་དེའི་འཁོར་ན་མེ་ཏོག་ལྷའི་ལས་འདས་པ་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་མ་བསྐྱེད་པར་བྱང་ཆུབ་སེམས་དཔའི་སྔོན་གྱི་དགེ་བའི་རྩ་བའི་རྣམ་པར་སྨིན་པས་ཁང་པ་བརྩེགས་པ་དེར་སྐྱེའོ། །བྱང་ཆུབ་སེམས་དཔའི་ཡོངས་སུ་སྤྱད་པ། རིན་པོ་ཆེ་བཀོད་པ་དེ་ནི་རྡོ་རྗེའི་རང་བཞིན་ཏེ། སྲ་ཞིང་བརྟན་ལ་མི་ཤིགས་པ་སྟེ། ཀ་ཙ་ལིན་དའི་གོས་ལྟར་རེག་ན་བདེ་བའོ། །འདོད་པ་ན་སྤྱོད་པའི་ལྷ་རྣམས་ཀྱི་གནས་བཀོད་པ་གང་ཇི་སྙེད་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེར་ཀུན་ཏུ་སྣང་ངོ་། །གང་གི་ནུབ་མོ་བྱང་ཆུབ་སེམས་དཔའ་མའི་རུམ་དུ་འཇུག་པ་དེ་ཡི་ནུབ་མོ་འོག་གི་ཆུའི་ཕུང་པོ་ནས་བཟུང་སྟེ། ས་ཆེན་པོའི་རྔམས་དཔག་ཚད་འབུམ་ཕྲག་དྲུག་ཅུ་རྩ་བརྒྱད་བརྟོལ་ཏེ་པད་མ་བྱུང་བས་ཚངས་པའི་འཇིག་རྟེན་གྱི་བར་དུ་མངོན་
པར་འཕགས་སོ། །པད་མ་དེ་ནི་ཁ་ལོ་སྒྱུར་བ་སྐྱེས་བུའི་དམ་པ་དང་། ཚངས་པ་ཆེན་པོ་བརྒྱ་ཕྲག་བཅུའི་སྟོབས་ལ་དབང་བས་མཐོང་དུ་ཟད་ཀྱི་གཞན་སུས་ཀྱང་མཐོང་བ་མེད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སྙིང་ཁུ་དང་། སྙིང་པོ་དང་། བཅུད་ཇི་སྙེད་ཡོད་པ་དེ་དག་ཐམས་ཅད་པད་མ་ཆེན་པོ་དེ་ལ་ཟིལ་དངར་གྱི་ཐིགས་པར་ཆགས་ཏེ། འདུག་ནས་དེ་ཚངས་པ་ཆེན་པོས་བཻ་དཱུཪྱའི་སྣོད་བཟང་པོས་བླངས་ཤིང་བྱང་ཆུབ་སེམས་དཔའ་ལ་ཕུལ་ནས་བྱང་ཆུབ་སེམས་དཔས་ཀྱང་དེ་བླངས་ཏེ་ཚངས་པ་ཆེན་པོ་ལ་སྙིང་བརྩེ་བའི་ཕྱིར་འཐུངས་པར་གྱུར་ཏོ། །སྙིང་ཁུའི་ཐིགས་པ་དེ་འཐུངས་ན་བྱང་ཆུབ་སེམས་དཔའ་སྲིད་པ་ཐ་མ་པ་བྱང་ཆུབ་སེམས་དཔའི་ས་ཐམས་ཅད་ཡོངས་སུ་རྫོགས་པ་མ་གཏོགས་པར་དེ་ཡང་དག་པར་བདེ་བར་ཞུ་བར་ནུས་པ་སེམས་ཅན་གྱི་ཁམས་ན་སེམས་ཅན་དེ་ལྟ་བུ་དེ་གང་ཡང་མེད་དོ། །ལས་གང་གི་རྣམ་པར་སྨིན་པས་སྙིང་ཁུའི་ཐིགས་པ་དེ་ལྟ་བུ་བྱང་ཆུབ་སེམས་དཔའ་ལ་ཡོད་པར་གྱུར་ཅེ་ན། བྱང་ཆུབ་སེམས་དཔས་སྔོན་ཡུན་རིང་པོར་བྱང་ཆུབ་སེམས་དཔའི་སྤྱོད་པ་སྤྱད་པའི་ཚེ། སེམས་ཅན་ནད་པ་དག་ལ་སྨན་བྱིན་པ་དང་། སེམས་ཅན་བསམ་པ་ལ་རྟེན་པ་རྣམས་ཀྱི་བསམ་པ་ཡོངས་སུ་བསྐང་བ་དང་། སྐྱབས་སུ་འོངས་པ་རྣམས་ཡོངས་སུ་མ་བཏང་བ་དང་། རྟག་པར་མེ་ཏོག་གི་ཕུད་དང་། འབྲས་བུའི་ཕུད་དང་། རོའི་ཕུད་དེ་བཞིན་གཤེགས་པ་རྣམས་དང་། དེ་བཞིན་གཤེགས་པའི་མཆོད་རྟེན་རྣམས་དང་། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་རྣམས་དང་། ཕ་དང་མ་ལ་ཕུལ་ཞིང་ཕྱིས་བདག་ཉིད་ཡོངས་སུ་སྤྱོད་སྤྱོད་པས་ལས་དེའི་རྣམ་པར་སྨིན་པས་ཚངས་པ་ཆེན་པོ་ཟིལ་དངར་གྱི་ཐིགས་པ་དེ་བྱང་ཆུབ་སེམས་དཔའ་ལ་འབུལ་ལོ། །ཁང་པ་བརྩེགས་པ་དེར་གནས་ཀྱི་ཁྱད་པར་དགའ་བ་དང་། རྩེད་མོ་དང་། ཕྲེང་བ་བརྒྱུས་པ་དང་ལྡན་པ་འཕགས་པ་འཕགས་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་སྔོན་གྱི་ལས་ཀྱི་རྣམ་པར་སྨིན་པས་དེར་བྱུང་བར་སྣང་ངོ་། །བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེར་གོས་སྟོང་ཕྲག་བརྒྱའི་རྒྱན་ཅེས་བྱ་བ་ཕྲུགས་ཅིག་བྱུང་སྟེ། དེའི་བྱུང་བ་ནི་བྱང་ཆུབ་སེམས་དཔའ་སྲིད་པ་ཐ་མ་པ་
མ་གཏོགས་པར་སེམས་ཅན་གྱི་རིས་ན་སེམས་ཅན་དེ་ལྟ་བུ་དེ་གང་ཡང་མེད་དོ། །གཟུགས་དང་། སྒྲ་དང་། དྲི་དང་། རོ་དང་། རེག་མཆོག་ཏུ་བྱ་བ་དམ་པ་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཁང་པ་བརྩེགས་པ་དེ་ནི་མེད་པ་གང་ཡང་མེད་དོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཞི་པ། ཡོངས་སུ་སྤྱད་པར་བྱ་བ་ཁང་པ་བརྩེགས་པ་དེ་ནི་འདི་ལྟར་ཕྱི་ནང་ཤིན་ཏུ་ཡོངས་སུ་གྲུབ་པ།འདི་ལྟར་ཤིན་ཏུ་ཡོངས་སུ་རྫོགས་པ་སྟེ། འདི་ལྟ་སྟེ་དཔེར་ན། ཡུལ་ཀ་ལིང་ཀ་ནས་བྱུང་བའི་དར་ལྟར་རེག་ན་བདེ་བའོ། །དེ་ཡང་འོལ་བྱིར་བསྟན་པར་ཟད་ཀྱི། དེ་ལ་དཔེ་མེད་དོ། །བྱང་ཆུབ་སེམས་དཔའི་སྔོན་གྱི་སྨོན་ལམ་གྱིས་འདི་ནི་བསམས་པས་འགྲུབ་སྟེ། གདོན་མི་ཟ་བར་བྱང་ཆུབ་སེམས་དཔའ་སེམས་དཔའ་ཆེན་པོ་མིའི་འཇིག་རྟེན་དུ་སྐྱེ་བ་དང་། མངོན་པར་བྱུང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཆོས་ཀྱི་འཁོར་ལོ་བསྐོར་བ་དང་། མ་གང་གི་རུམ་དུ་སྐྱེ་བར་འགྱུར་བ་དེའི་རུམ་གཡས་པར་ཁང་པ་བརྩེགས་པ་རིན་པོ་ཆེ་བཀོད་པ་དམ་པ་སྔར་མངོན་པར་འགྲུབ་ཅིང་། ཕྱིས་བྱང་ཆུབ་སེམས་དཔའ་དགའ་ལྡན་གྱི་གནས་ནས་འཕོས་ཏེ་ཁང་པ་བརྩེགས་པ་དེར་སྐྱིལ་ཀྲུང་བཅས་ནས་འདུག་པར་འབྱུང་བ་དང་། བྱང་ཆུབ་སེམས་དཔའ་སྲིད་པ་ཐ་མ་པའི་ལུས་ནུར་ནུར་པོ་དང་། མེར་མེར་པོ་དང་། ལྟར་ལྟར་པོ་དང་། རེང་རེང་པོར་འགྱུར་བ་མེད་ཅིང་། ཡན་ལག་དང་། ཉིང་ལག་དང་། མཚན་ཐམས་ཅད་ཕུན་སུམ་ཚོགས་པར་འདུག་བཞིན་དུ་འབྱུང་ལ། ལྷ་མོ་སྒྱུ་འཕྲུལ་གྱི་རྨི་ལམ་དུ་གླང་པོ་ཆེན་པོ་འོངས་པར་མཐོང་བ་འདི་ནི་ཆོས་ཉིད་དོ། །དེ་དེ་ལྟར་འདུག་པ་ལ་ལྷའི་དབང་པོ་བརྒྱ་བྱིན་དང་། རྒྱལ་པོ་ཆེན་པོ་བཞི་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། གང་ལས་ལག་ན་རྡོ་རྗེ་སྐྱེས་པའི་གནོད་སྦྱིན་གྱི་རིགས་གསང་བ་པ་ཞེས་བྱ་བ་དེ་དག་བྱང་ཆུབ་སེམས་དཔའ་མའི་རུམ་དུ་ཞུགས་པར་ཤེས་ནས་རྟག་ཏུ་རྒྱུན་མི་འཆད་པར་ཕྱི་བཞིན་འབྲང་བར་གྱུར་ཏོ། །བྱང་ཆུབ་སེམས་དཔའ་ལ་རིམ་གྲོ་བྱེད་པའི་ལྷ་མོ་བཞི་ཡོད་དེ། ཨུ་ཁུ་ལི་ཞེས་བྱ་བ་དང་། མུ་ཁུ་ལི་ཞེས་བྱ་བ་དང་།
རྒྱལ་མཚན་ལྡན་པ་ཞེས་བྱ་བ་དང་། འོད་དང་ལྡན་པ་ཞེས་བྱ་བ་སྟེ། བཞི་པོ་དེ་དག་ཀྱང་བྱང་ཆུབ་སེམས་དཔའ་མའི་རུམ་དུ་ཞུགས་པར་ཤེས་ནས་རྟག་ཏུ་རྒྱུན་མི་འཆད་པར་སྲུང་ངོ་། །ལྷའི་དབང་པོ་བརྒྱ་བྱིན་ཡང་ལྷའི་བུ་ལྔ་བརྒྱ་ཙམ་དང་ལྷན་ཅིག་བྱང་ཆུབ་སེམས་དཔའ་མའི་རུམ་དུ་ཞུགས་པ་ཤེས་ནས། རྟག་ཏུ་རྒྱུན་མི་འཆད་པར་ཕྱི་བཞིན་འབྲང་བར་གྱུར་ཏོ། །བྱང་ཆུབ་སེམས་དཔའ་མའི་རུམ་དུ་ཞུགས་པའི་ལུས་ནི་རྣམ་པ་འདི་ལྟ་བུར་གྱུར་ཏེ། དཔེར་ན་མཚན་མོ་མུན་པ་ཤིན་ཏུ་གནག་པའི་ནང་ན་རིའི་སྤོ་ལ་མེའི་ཕུང་པོ་ཆེན་པོ་འདུག་པ་ནི་དཔག་ཚད་གཅིག་ནས་ཀྱང་སྣང་ངོ་། །དཔག་ཚད་ལྔའི་བར་ནས་ཀྱང་སྣང་ངོ་། །དེ་བཞིན་དུ་བྱང་ཆུབ་སེམས་དཔའ་མའི་རུམ་དུ་ཞུགས་པའི་ལུས་མངོན་པར་གྲུབ་པ་ཡང་དེ་ལྟ་བུར་གྱུར་ཏེ། འོད་གསལ་ཞིང་གཟུགས་བཟང་ལ་མཛེས་ཤིང་བལྟ་ན་སྡུག་པར་གྱུར་པ་དེ། ཁང་པ་བརྩེགས་པ་དེའི་ནང་དུ་སྐྱིལ་མོ་ཀྲུང་དུ་འདུག་ན་གསེར་གྱི་ས་ལེ་སྦྲམ་རིགས་དང་ལྡན་པ་རིན་པོ་ཆེ་བཻ་དཱུཪྱས་བརྒྱན་པ་ལྟར་ཤིན་ཏུ་མཛེས་པར་གྱུར་ཏོ། །བྱང་ཆུབ་སེམས་དཔའི་མས་ཀྱང་བྱང་ཆུབ་སེམས་དཔའ་རུམ་ན་འདུག་པ་མཐོང་བར་གྱུར་ཏོ། །འདི་ལྟ་སྟེ་དཔེར་ན་སྤྲིན་གྱི་ཚོགས་ཆེན་པོའི་ནང་ནས་གློག་བྱུང་བ་ནི་སྣང་བ་ཆེན་པོ་སྐྱེད་དོ། །དེ་བཞིན་དུ་བྱང་ཆུབ་སེམས་དཔའ་མའི་རུམ་ན་འདུག་པ་ཡང་དཔལ་དང་། གཟི་བརྗིད་དང་། ཁ་དོག་གིས་ཉེ་བར་རིན་པོ་ཆེའི་ཁང་པ་བརྩེགས་པ་དང་པོ་དེ་སྣང་བར་བྱེད་དོ། །སྣང་བར་བྱས་ནས་སྤོས་ཀྱི་ཁང་པ་བརྩེགས་པ་གཉིས་པ་སྣང་བར་བྱེད་དོ། །སྤོས་ཀྱི་ཁང་པ་བརྩེགས་པ་གཉིས་པ་སྣང་བར་བྱས་ནས། སྤོས་ཀྱི་ཁང་པ་བརྩེགས་པ་གསུམ་པ་སྣང་བར་བྱེད་དོ། །སྤོས་ཀྱི་ཁང་པ་བརྩེགས་པ་གསུམ་པ་སྣང་བར་བྱས་ནས་མའི་ལུས་ཐམས་ཅད་སྣང་བར་བྱེད་དོ། །དེ་སྣང་བར་བྱས་ནས་དེ་སྟན་གང་ལ་འདུག་པ་དེ་སྣང་བར་བྱེད་དོ། །དེ་སྣང་བར་བྱས་ནས་ཁྱིམ་ཐམས་ཅད་སྣང་བར་བྱེད་དོ། །ཁྱིམ་ཐམས་ཅད་སྣང་བར་བྱས་ནས་འོད་འཕྲོ་བ་ཁྱིམ་གྱི་སྟེང་དུ་བྱུང་སྟེ། ཤར་ཕྱོགས་སྣང་བར་བྱེད་དོ། །དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་དང་། ཕྱོགས་བཅུ་ཀུན་ཏུ་རྒྱང་གྲགས་ཙམ་དུ་ཕྱོགས་
རེ་རེར་ཡང་བྱང་ཆུབ་སེམས་དཔའ་མའི་རུམ་ན་འདུག་པའི་དཔལ་དང་གཟི་བརྗིད་དང་ཁ་དོག་གིས་སྣང་བར་བྱས་པར་གྱུར་ཏོ། །དགེ་སློང་དག་དེ་ལྟར་བྱང་ཆུབ་སེམས་དཔའ་དེ་བལྟ་བ་དང་། དེ་ལ་ཕྱག་བྱ་བ་དང་། བསྙེན་བཀུར་བྱ་བ་དང་ཆོས་མཉན་པའི་ཕྱིར་རྒྱལ་པོ་ཆེན་པོ་བཞི་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་གནོད་སྦྱིན་ལྔ་བརྒྱ་ཙམ་དག་དང་ལྷན་ཅིག་ཏུ་སྔ་དྲོའི་དུས་ཀྱི་ཚེ་འོངས་ཏེ། དེའི་ཚེ་བྱང་ཆུབ་སེམས་དཔས་དེ་དག་འོངས་པར་རིག་ནས་ལག་པ་གཡས་པ་བརྐྱང་སྟེ་མཛུབ་མོ་བསྒྲེང་ནས་སྟན་སྟོན་ཏོ། །འཇིག་རྟེན་སྐྱོང་བ་ལ་སོགས་པ་དེ་དག་ཀྱང་ཇི་ལྟར་བཏིང་བའི་སྟན་ལ་འཁོད་པར་གྱུར་ཏེ། དེ་དག་གིས་བྱང་ཆུབ་སེམས་དཔའ་མའི་རུམ་ན་འདུག་བཞིན་དུ། སྐྱེས་ཟིན་པའི་གཟུགས་དང་འདྲ་བར་ལག་པ་བསྐྱོད་ཅིང་འདེག་ལ། རྣམ་པར་བསྐྱོད་ཅིང་གཞོག་པ་མཐོང་ནས། དེ་དག་དགའ་མགུ་ཞིང་ཉམས་བདེ་བ་ཐོབ་སྟེ། བྱང་ཆུབ་སེམས་དཔའ་ལ་ཕྱག་འཚལ་བར་གྱུར་ཏོ། །བྱང་ཆུབ་སེམས་དཔས་ཀྱང་དེ་དག་དེ་ལྟར་འཁོད་པ་མཐོང་ནས། ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག །ཡང་དག་པར་གཟེངས་སྟོད། ཡང་དག་པར་དགའ་བར་བྱེད་དོ། །གང་གི་ཚེ་དེ་དག་འདོང་བར་འདོད་པར་གྱུར་པ་དེའི་ཚེའང་། བྱང་ཆུབ་སེམས་དཔས་དེ་དག་གི་སེམས་སེམས་ཀྱིས་རྣམ་པར་ཤེས་ནས་ལག་པ་གཡས་པ་བརྐྱང་སྟེ་དེ་དག་འདོང་བའི་བརྡ་སྟོན་ཏོ། །དེ་ལྟར་ལག་པ་བརྐྱང་སྟེ། འདོང་བའི་བརྡ་བསྟན་ནས། ཕྱིར་སྐུམ་པར་བྱེད་དེ། མ་ལ་གནོད་པ་མེད་དོ། །དེའི་ཚེ་རྒྱལ་པོ་ཆེན་པོ་བཞི་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང་འདོང་བར་གནང་ངོ་སྙམ་སེམས་ཤིང་། དེ་དག་བྱང་ཆུབ་སེམས་དཔའ་དང་། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་འདོང་བར་གྱུར་ཏོ། །དེ་ལྟར་བྱང་ཆུབ་སེམས་དཔའ་ནུབ་མོ་མི་ཉལ་ནས་ལག་པ་གཡས་པ་བརྐྱང་ཞིང་བརྐྱངས་ནས་ཀྱང་བསྐུམ་པ་དང་། བསྐུམས་ནས་ཀྱང་དྲན་ཞིང་ཤེས་བཞིན་དུ་ལག་པ་དེ་འཇོག་པའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །གཞན་ཡང་གང་གི་ཚེ་སྐྱེས་པའམ། བུད་མེད་དམ། ཁྱེའུ་
འམ། བུ་མོ་སུ་ཡང་རུང་སྟེ། བྱང་ཆུབ་སེམས་དཔའ་བལྟ་བའི་ཕྱིར་འོངས་པ་དེའི་ཚེ། ཐོག་མར་ནི་བྱང་ཆུབ་སེམས་དཔའ་དགའ་བར་བྱ་བ་སྨྲའོ། །དེའི་འོག་ཏུ་བྱང་ཆུབ་སེམས་དཔའི་མ་དགའ་བར་བྱ་བ་སྨྲའོ། །དགེ་སློང་དག་དེ་ལྟར་བྱང་ཆུབ་སེམས་དཔའ་མའི་རུམ་ན་འདུག་པའི་ཚེ། སྔར་དགའ་བར་བྱ་བ་སྨྲ་བ་ལ་མཁས་པར་གྱུར་ཏེ། ལྷའམ། ཀླུའམ། གནོད་སྦྱིན་ནམ། མིའམ། མི་མ་ཡིན་པ་སུ་ཡང་རུང་བྱང་ཆུབ་སེམས་དཔའ་ལ་སྔོན་དུ་དགའ་བར་བྱ་བའི་ཚིག་སྨྲ་བར་ནུས་པ་མེད་དོ། །བྱང་ཆུབ་སེམས་དཔའ་ཉིད་ཐོག་མར་དགའ་བར་བྱ་བ་སྨྲ་ཞིང་དེའི་འོག་ཏུ་བྱང་ཆུབ་སེམས་དཔའི་མ་དགའ་བར་བྱ་བ་སྨྲའོ། །དེ་ནས་སྔ་དྲོའི་དུས་ཟད་དེ། ཉི་མ་གུང་ལ་བབ་ནས་ལྷའི་དབང་པོ་བརྒྱ་བྱིན་དང་། སུམ་ཅུ་རྩ་གསུམ་པའི་ལྷའི་བུ་མངོན་པར་འཕགས་པ། མངོན་པར་འཕགས་པ་དག་བྱང་ཆུབ་སེམས་དཔའ་བལྟ་བ་དང་། དེ་ལ་བསྙེན་བཀུར་བྱ་བ་དང་། ཆོས་མཉན་པའི་ཕྱིར་འོང་བ་དང་། བྱང་ཆུབ་སེམས་དཔས་དེ་དག་རྒྱང་རིང་པོ་ནས་འོངས་པ་མཐོང་ནས། གསེར་གྱི་མདོག་ཏུ་འདུག་པའི་ལག་པ་གཡས་པ་བརྐྱང་སྟེ། ལྷའི་དབང་པོ་བརྒྱ་བྱིན་དང་། སུམ་ཅུ་རྩ་གསུམ་པའི་ལྷ་དག་དགའ་བར་བྱེད་ཅིང་མཛུབ་མོ་བརྐྱང་སྟེ། སྟན་སྟོན་ཏོ། །དགེ་སློང་དག་དེའི་ཚེའང་ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་ལ་ཕྱིར་བཟློག་མ་ནུས་ནས་ཇི་ལྟར་བཏིང་བའི་སྟན་དེ་དག་ལ་ལྷའི་དབང་པོ་བརྒྱ་བྱིན་དང་། དེ་མ་ཡིན་པའི་ལྷའི་བུ་གཞན་དག་ཀྱང་འཁོད་པར་གྱུར་ཏོ། །བྱང་ཆུབ་སེམས་དཔས་དེ་ལྟར་འཁོད་པར་རིག་ནས་ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག །ཡང་དག་པར་གཟེངས་སྟོད། ཡང་དག་པར་དགའ་བར་བྱེད་དོ། །བྱང་ཆུབ་སེམས་དཔས་ལག་པ་གང་དུ་བརྐྱང་བ་དེ་ལོགས་སུ་བྱང་ཆུབ་སེམས་དཔའི་མ་ཡང་ལྟ་བར་གྱུར་ཏོ། །དེས་ན་ལྷ་དེ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔའ་དང་དགའ་བར་བྱ་བ་སྨྲའོ་སྙམ་མོ། །དེ་དག་རེ་རེ་ཞིང་ཡང་འདི་སྙམ་དུ་བྱང་ཆུབ་སེམས་དཔའ་ནི་བདག་འབའ་ཞིག་ལ་སྨྲ་སྟེ། བདག་འབའ་ཞིག་ལ་དགའ་བར་བྱ་བ་སྨྲའོ་སྙམ་མོ། །ཁང་པ་བརྩེགས་པ་དེར་ལྷའི་དབང་པོ་བརྒྱ་བྱིན་
དང་། སུམ་ཅུ་རྩ་གསུམ་པའི་ལྷ་དེ་དག་གི་གཟུགས་བརྙན་སྣང་བར་གྱུར་ཏོ། །ཇི་ལྟར་བྱང་ཆུབ་སེམས་དཔའ་མའི་རུམ་ན་གནས་པའི་ལོངས་སྤྱོད་ཡོངས་སུ་དག་པར་གྱུར་པ་དེ་ལྟ་བུ་ནི་གཞན་དག་ན་མེད་དོ། །དགེ་སློང་དག་གང་གི་ཚེ་ལྷའི་དབང་པོ་བརྒྱ་བྱིན་དང་། དེ་མ་ཡིན་པའི་ལྷའི་བུ་གཞན་དག་འདོང་བར་འདོད་པར་གྱུར་པ་དེའི་ཚེའང་བྱང་ཆུབ་སེམས་དཔས་དེ་དག་གི་སེམས་ཀྱི་རྟོག་པ་སེམས་ཀྱིས་ཡོངས་སུ་ཤེས་ནས། ལག་པ་གཡས་པ་བརྐྱང་སྟེ་དེ་དག་འདོང་བའི་བརྡ་སྟོན་ཏོ། །བརྡ་བསྟན་ནས་ཕྱིར་བསྐུམ་པ་བྱས་ཏེ། དྲན་ཞིང་ཤེས་བཞིན་དུ་ལག་པ་བཞག་ཀྱང་མ་ལ་གནོད་པ་མེད་དོ། །དེའི་ཚེ་ལྷའི་དབང་པོ་བརྒྱ་བྱིན་དང་། དེ་མ་ཡིན་པའི་ལྷའི་བུ་སུམ་ཅུ་རྩ་གསུམ་པ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང་འདོད་པར་གནང་ངོ་སྙམ་དུ་སེམས་ཤིང་། དེ་དག་ཀྱང་བྱང་ཆུབ་སེམས་དཔའ་དང་། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་དོང་བར་གྱུར་ཏོ། །དགེ་སློང་དག་ཉི་མ་ཕྱེད་ཀྱི་དུས་འདས་ནས་ཕྱི་དྲོའི་དུས་ལ་བབ་པ་དང་། མི་མཇེད་ཀྱི་བདག་པོ་ཚངས་པ་ལྷའི་བུ་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། ལྷ་ཡུལ་བའི་སྙིང་ཁུའི་ཐིགས་པ་དེ་ཁྱེར་ནས་བྱང་ཆུབ་སེམས་དཔའ་ག་ལ་བ་དེར། བྱང་ཆུབ་སེམས་དཔའ་དེ་བལྟ་བ་དང་། དེ་ལ་ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་འོང་བར་གྱུར་ཏོ། །དགེ་སློང་དག་བྱང་ཆུབ་སེམས་དཔས་མི་མཇེད་ཀྱི་བདག་པོ་ཚངས་པ་འཁོར་དང་བཅས་ཏེ་འོངས་པར་ཤེས་ནས། བྱང་ཆུབ་སེམས་དཔས་ཡང་གསེར་གྱི་མདོག་ཏུ་འདུག་པའི་ལག་པ་གཡས་པ་བརྐྱང་སྟེ། མི་མཇེད་ཀྱི་བདག་པོ་ཚངས་པ་དང་། ཚངས་རིས་ཀྱི་ལྷའི་བུ་དེ་དག་ལ་དགའ་བར་བྱ་བ་སྨྲས་ཏེ། མཛུབ་མོ་བརྐྱང་ནས་སྟན་སྟོན་ཏོ། །དགེ་སློང་དག་མི་མཇེད་ཀྱི་བདག་པོ་ཚངས་པ་དེས་ཀྱང་བྱང་ཆུབ་སེམས་དཔའི་བཀའ་ལས་བཟློག་པར་མ་ནུས་ནས། ཇི་ལྟར་བཏིང་བའི་སྟན་དེ་དག་ལ་མི་མཇེད་ཀྱི་བདག་པོ་ཚངས་པ་དང་ཚངས་རིས་ཀྱི་ལྷའི་བུ་གཞན་དག་ཀྱང་འཁོད་པར་གྱུར་ཏོ། །བྱང་ཆུབ་སེམས་དཔས་དེ་ལྟར་འཁོད་པར་རིག་ནས་ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་
པར་འཛིན་དུ་འཇུག །ཡང་དག་པར་གཟེངས་སྟོད་། ཡང་དག་པར་དགའ་བར་བྱེད་དོ། །བྱང་ཆུབ་སེམས་དཔས་ལག་པ་གང་དུ་བརྐྱང་བ་དེ་ལོགས་སུ་ལྷ་མོ་སྒྱུ་འཕྲུལ་ཡང་ལྟ་བར་གྱུར་ཏོ། །དེ་ལྟར་ན་ལྷ་དེ་དག་ཀྱང་བདག་ཅག་ནི་བྱང་ཆུབ་སེམས་དཔའ་དང་དགའ་བར་བྱ་བའི་གཏམ་བྱེད་དོ་སྙམ་སྟེ་ལྷའི་བུ་དེ་དག་རེ་རེ་ཞིང་ཡང་འདི་སྙམ་དུ་བྱང་ཆུབ་སེམས་དཔའ་ནི་བདག་འབའ་ཞིག་ལ་སྨྲས་ཏེ། བདག་འབའ་ཞིག་ལ་དགའ་བའི་གཏམ་བྱེད་དོ་སྙམ་མོ། །དགེ་སློང་དག་གང་གི་ཚེ་མི་མཇེད་ཀྱི་བདག་པོ་ཚངས་པ་དང་། ཚངས་རིས་ཀྱི་ལྷའི་བུ་དེ་དག་འདོང་བར་འདོད་པར་གྱུར་པ་དེའི་ཚེ་ཡང་བྱང་ཆུབ་སེམས་དཔས་དེ་དག་གི་སེམས་ཀྱི་རྟོག་པ་སེམས་ཀྱིས་ཡོངས་སུ་ཤེས་ནས་ལག་པ་གཡས་པ་བརྐྱང་སྟེ། དེ་དག་འདོང་བའི་བརྡ་སྟོན་ཏོ། །དེ་ལྟར་འདོང་བའི་བརྡ་བསྟན་ནས་ཕྱིར་བསྐུམ་པ་བྱས་ཏེ། དྲན་ཞིང་ཤེས་བཞིན་དུ་ལག་པ་བཞག་ཀྱང་མ་ལ་གནོད་པ་མེད་དོ། །དེའི་ཚེ་མི་མཇེད་ཀྱི་བདག་པོ་ཚངས་པ་དང་། ཚངས་རིས་ཀྱི་ལྷ་དེ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང་འདོང་བར་གནང་ངོ་སྙམ་དུ་སེམས་ཤིང་དེ་དག་བྱང་ཆུབ་སེམས་དཔའ་དང་། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་འདོང་བར་གྱུར་ཏོ། །བྱང་ཆུབ་སེམས་དཔའ་ཡང་དྲན་ཞིང་ཤེས་བཞིན་དུ་ལག་པ་འཇོག་པར་གྱུར་ཏེ། དགེ་སློང་དག་ཤར་ཕྱོགས་དང་། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་དང་། ཕྱོགས་བཅུ་ཀུན་ནས་ཀྱང་བྱང་ཆུབ་སེམས་དཔའ་བརྒྱ་སྟོང་མང་པོ་བྱང་ཆུབ་སེམས་དཔའ་དེ་བལྟ་བ་དང་། དེ་ལ་ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པ་དང་། ཆོས་ཡང་དག་པར་བརྗོད་པར་བྱ་བའི་ཕྱིར་འོང་བར་གྱུར་ཏོ། །དེ་དག་དེ་ལྟར་འོངས་པ་དང་། བྱང་ཆུབ་སེམས་དཔས་ལུས་ལས་འོད་བཀྱེ་སྟེ། འོད་ཀྱི་བཀོད་པ་དེ་དག་སེང་གེའི་ཁྲིར་སྤྲུལ་ནས། དེ་ལྟར་སྤྲུལ་པའི་ཁྲི་དེ་དག་ལ་བྱང་ཆུབ་སེམས་དཔའ་དེ་དག་འཁོད་དུ་བཅུག་སྟེ། དེ་དག་དེ་ལྟར་འཁོད་པར་ཤེས་ནས་འདི་ལྟ་སྟེ་ཐེག་པ་ཆེན་པོ་འདི་ཉིད་རྒྱ་ཆེར་རྣམ་པར་དབྱེ་བའི་དོན་དུ་དྲིས་ཏེ་བརྟགས་ཀྱང་སྐལ་བ་མཉམ་པའི་ལྷ་རྣམས་མ་གཏོགས་པར་གཞན་སུས་ཀྱང་དེ་དག་མ་མཐོང་
སྟེ། དགེ་སློང་དག་དེ་ལྟར་བྱང་ཆུབ་སེམས་དཔས་ནུབ་མོ་མི་ཉལ་ནས་ལུས་ལས་འོད་བཀྱེ་བའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །དགེ་སློང་དག་ལྷ་མོ་སྒྱུ་འཕྲུལ་གྱིས་ཀྱང་བྱང་ཆུབ་སེམས་དཔའ་མའི་རུམ་ན་འདུག་པའི་ཚེ། ལུས་ལྕི་བར་མ་ཚོར་ཏེ། གཞན་དུ་ན་ཡང་བ་དང་། འཇམ་པ་དང་། བདེ་བར་ཚོར་ཞིང་ལྟོ་མི་བདེ་བའི་སྡུག་བསྔལ་གང་ཡང་མྱོང་བར་མ་གྱུར་ཏོ། །འདོད་ཆགས་ཀྱིས་ཡོངས་སུ་གདུང་བའམ། ཞེ་སྡང་གིས་ཡོངས་སུ་གདུང་བའམ། གཏི་མུག་གིས་ཡོངས་སུ་གདུང་བས་ཀྱང་ཡོངས་སུ་གདུང་བར་མ་གྱུར། འདོད་པའི་རྣམ་པར་རྟོག་པའམ། གནོད་སེམས་ཀྱི་རྣམ་པར་རྟོག་པའམ། གཙེ་བའི་རྣམ་པར་རྟོག་པ་དག་ལ་ཡང་རྣམ་པར་རྟོག་པར་མ་གྱུར་ཏེ། གྲང་བའམ། ཚ་བའམ། བཀྲེས་པའམ། སྐོམ་པའམ། མུན་པའམ། རྡུལ་ལམ། ངལ་བ་ཚོར་བའམ། མཐོང་བར་མ་གྱུར་ཏེ། དེ་ལ་གཟུགས་དང་། སྒྲ་དང་། དྲི་དང་། རོ་དང་། རེག་ཡིད་དུ་མི་འོང་བ་སྣང་བར་མ་གྱུར་ཏོ། །རྨི་ལམ་ངན་པ་ཡང་མཐོང་བར་མ་གྱུར་ཏོ། །དེ་ལ་བུད་མེད་ཀྱི་སྒྱུའམ། གཡོའམ། ཕྲག་དོག་གམ། བུད་མེད་ཀྱི་ཉོན་མོངས་པ་དག་ཀྱང་ཉམས་སུ་གནོད་པར་བྱེད་པར་མ་གྱུར་ཏོ། །དེའི་ཚེ་བྱང་ཆུབ་སེམས་དཔའི་མ་ནི་བསླབ་པའི་གཞི་ལྔ་ཡང་དག་པར་བླངས་ཏེ། ཚུལ་ཁྲིམས་དང་ལྡན་ཞིང་དགེ་བ་བཅུའི་ལས་ཀྱི་ལམ་ལ་གནས་པར་གྱུར་ཏོ། །བྱང་ཆུབ་སེམས་དཔའི་མ་ཡང་སྐྱེས་པ་གང་ལ་ཡང་འདོད་ཆགས་ཀྱི་སེམས་སྐྱེ་བར་མ་གྱུར་ལ། སྐྱེས་པ་གང་ཡང་བྱང་ཆུབ་སེམས་དཔའི་མ་ལ་འདོད་ཆགས་ཀྱི་སེམས་མི་སྐྱེའོ། །སེར་སྐྱའི་གྲོང་ཁྱེར་ཆེན་པོ་དེ་དང་། ཡུལ་གཞན་དག་ན་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་སུ་གང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། འབྱུང་པོས་ནོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་མ་མཐོང་མ་ཐག་ཏུ་སོས་ཤིང་དྲན་པ་ཐོབ་པར་གྱུར་ཏོ། །མི་མ་ཡིན་པ་དེ་དག་ཀྱང་མྱུར་དུ་གནས་གཞན་དུ་འདོང་བར་གྱུར་ཏོ། །སེམས་ཅན་གང་ལ་ལ་ཞིག་ནད་སྣ་ཚོགས་ཀྱིས་ཐེབས་པར་གྱུར་ཏེ། རླུང་དང་། མཁྲིས་པ་དང་། བད་ཀན་དང་། འདུས་པ་ལས་བྱུང་བའི་
ནད་ཀྱིས་གནོད་པར་གྱུར་པ་དང་། མིག་གི་ནད་དམ། རྣ་བའི་ནད་དམ། སྣའི་ནད་དམ། ལྕེའི་ནད་དམ། མཆུའི་ནད་དམ། སོའི་ནད་དམ། ལྐོག་མའི་ནད་དམ། ཤུ་བའམ། འབྲས་སམ། མཛེའམ། ཤ་བཀྲའམ། སྐེམ་པའམ། བརྗེད་བྱེད་དམ། རིམས་སམ། ལྦ་བའམ། ཕོལ་མིག་གམ། མེ་དབལ་ལམ། རྐང་ཤུ་ལ་སོགས་པའི་ནད་ཀྱིས་བཏབ་པར་གྱུར་པ་དེ་དག་ལ་བྱང་ཆུབ་སེམས་དཔའི་མས། ལག་པ་གཡས་པ་སྤྱི་བོར་བཞག་པ་ཙམ་གྱིས་ནད་དང་བྲལ་བར་གྱུར་ཅིང་། རང་རང་གི་གནས་སུ་འདོང་བར་གྱུར་ཏོ། །ཐ་ན་ལྷ་མོ་སྒྱུ་འཕྲུལ་གྱིས་རྩྭ་ཉག་མ་འགའ་ཞིག་ས་ལས་བླངས་ཏེ་སེམས་ཅན་ནད་པ་དག་ལ་བྱིན་ཡང་དེ་དག་དེ་བླངས་མ་ཐག་ཏུ་ནད་མེད་ཅིང་ཉམས་པ་མེད་པར་གྱུར་ཏོ། །གང་གི་ཚེ་ལྷ་མོ་སྒྱུ་འཕྲུལ་དེས་བདག་གི་ལྟོ་གཡས་པར་བལྟས་པ་དེའི་ཚེ། བྱང་ཆུབ་སེམས་དཔའ་མའི་རུམ་ན་འདུག་པ་དེ་འདི་ལྟ་སྟེ་དཔེར་ན་མེ་ལོང་གི་དཀྱིལ་འཁོར་ཤིན་ཏུ་དག་པ་ལ་གདོང་གི་དཀྱིལ་འཁོར་སྣང་བ་བཞིན་ཏེ། དེ་ལྟར་དེ་མཐོང་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་པར་གྱུར་ཏོ། །དགེ་སློང་དག་བྱང་ཆུབ་སེམས་དཔའ་མའི་རུམ་ན་གནས་པའི་བྱིན་གྱི་རླབས་ཀྱིས། ཉིན་མཚན་རྟག་ཏུ་རྒྱུན་མི་འཆད་པར་ལྷའི་རོལ་མོ་སིལ་སྙན་གྱི་སྒྲ་འབྱུང་ཞིང་ལྷའི་མེ་ཏོག་གི་ཆར་འབབ་པར་གྱུར་ཏོ། །ཆར་ནི་དུས་བཞིན་དུ་འབབ། རླུང་ནི་དུས་བཞིན་དུ་ལྡང་། དུས་དང་སྐར་མ་དག་ཀྱང་དུས་བཞིན་དུ་འགྱུར་ཞིང་འཕོ་བར་གྱུར་ཏོ། །རྒྱལ་སྲིད་ཀྱང་བདེ་ཞིང་ལོ་ལེགས་ལ་འཁྲུག་པ་མེད་ཅིང་དགྲ་མེད་པར་གྱུར་ཏོ། །སེར་སྐྱའི་གྲོང་ཁྱེར་ཆེན་པོ་དེ་ན་ཤཱཀྱའི་རིགས་དང་། སེམས་ཅན་གཞན་དག་འཁོད་པ་ཐམས་ཅད་ཀྱང་ཟ་ཞིང་འཐུང་། དགའ་ཞིང་རྩེ་ལ་དགའ་མགུར་སྤྱོད་དོ། །སྦྱིན་པ་དག་ཀྱང་གཏོང་། བསོད་ནམས་དག་ཀྱང་བྱེད་དེ། ཟླ་བ་བཞི་འདས་པའི་དུས་སྟོན་བཞིན་དུ་ཐམས་ཅད་ཀྱང་དགའ་བའི་མཆོག་གིས་རྩེ་ཞིང་བདེ་བར་གནས་པས་གནས་པར་གྱུར་ཏོ། །རྒྱལ་པོ་ཟས་གཙང་མ་ཡང་ཚངས་པའི་སྤྱོད་པ་ཡང་དག་པར་བླངས་ཏེ། རྒྱལ་པོའི་ལས་བཏང་ནས་དཀའ་ཐུབ་ཀྱི་ནགས་ཚལ་ཡོངས་སུ་དག་པ་ན་གནས་པ་བཞིན་
དུ་ཐམས་ཅད་ཀྱང་དགའ་བའི་མཆོག་གིས་ཆོས་ཀྱི་རྗེས་སུ་འབྲང་བར་གྱུར་ཏོ། །དགེ་སློང་དག་བྱང་ཆུབ་སེམས་དཔའ་མའི་རུམ་ན་གནས་པ་ནི་རྣམ་པ་དེ་ལྟ་བུའི་རྫུ་འཕྲུལ་གྱི་ཆོ་འཕྲུལ་དང་ལྡན་པས་གནས་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་སྔོན་བྱང་ཆུབ་སེམས་དཔའ་མའི་རུམ་ན་གནས་པའི་ཚེ་གནས་གནས་པ་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །དེ་བཞིན་གཤེགས་པས་ཚེ་དང་ལྡན་པ་ཀུན་དགའ་བོ་དང་། ལྷའི་དབང་པོ་བརྒྱ་བྱིན་དང་། འཇིག་རྟེན་སྐྱོང་བ་བཞི་དང་། དེ་མ་ཡིན་པའི་ལྷ་དང་། མི་གཞན་དག་ཀྱང་བསྟན་ཏེ་མཐོང་ནས། དེ་དག་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་སོ། །མི་མཇེད་ཀྱི་བདག་པོ་ཚངས་པས་དེའི་ཕྱིར་ཡང་ཚངས་པའི་འཇིག་རྟེན་དུ་མཆོད་པར་བྱ་བའི་ཕྱིར་བཏེག་སྟེ་ཁྱེར་ནས་བཞག་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་ཡང་དགེ་སློང་དག་ལ་བཀའ་སྩལ་པ། དགེ་སློང་དག་དེ་ལྟར་བྱང་ཆུབ་སེམས་དཔའ་མའི་རུམ་ན་འདུག་པས་ལྷ་དང་མི་ཁྲག་ཁྲིག་ཕྲག་སུམ་ཅུ་རྩ་དྲུག་ཐེག་པ་གསུམ་ལ་ཡོངས་སུ་སྨིན་པར་བྱས་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། གང་ཚེ་རྒྱལ་སྲས་སེམས་ཅན་དམ་པ་མ་ཡི་རུམ་གནས་པ། །དེ་ཚེ་ས་འདི་ཚལ་དང་བཅས་པར་རྣམ་པ་དྲུག་ཏུ་གཡོས། །གསེར་མདོག་འོད་བཀྱེ་ངན་སོང་ཐམས་ཅད་རྣམ་པར་སྦྱངས་པར་གྱུར། །ཆོས་ཀྱི་རྒྱལ་པོར་འགྱུར་ཞེས་ལྷ་ཡི་ཚོགས་རྣམས་རབ་ཏུ་དགའ། །གཞལ་མེད་ཁང་ཆེན་དབྱིབས་ལེགས་རིན་ཆེན་དུ་མས་རྣམ་པར་སྤྲས། །དེར་ནི་དཔའ་བོ་རྣམ་པར་འདྲེན་པ་ཞུགས་པར་གྱུར་ནས་འདུག །ཙན་དན་དྲི་ཞིམ་མཆོག་གིས་རབ་ཏུ་གང་ཞིང་རྣམ་པར་མཛེས། །སྟོང་གསུམ་རིན་ཆེན་ཡོངས་བཀང་དེ་ཡི་སྲང་ཕྱེད་རིན་མི་ཆོག །སྟོང་ཆེན་འཇིག་རྟེན་ཁམས་ཀྱང་འོག་ནས་བརྟོལ་བ་བྱས་ནས་ནི། །ཡོན་ཏན་འབྱུང་བའི་གནས་ཀྱི་པད་མའི་སྙིང་ཁུའི་ཐིགས་པ་བྱུང་། །དེ་བཞིན་
ཞག་བདུན་བསོད་ནམས་གཟི་བརྗིད་ཚངས་པའི་འཇིག་རྟེན་འཕགས། །དེ་ལས་སྙིང་ཁུའི་ཐིགས་བླངས་ཚངས་པ་རྒྱལ་བའི་སྲས་ལ་འབུལ། །བྱང་ཆུབ་སེམས་དཔའ་དཔའ་བོ་ཚངས་པ་འདྲ་བ་མ་གཏོགས་པར། །སེམས་ཅན་གང་གིས་དེ་ཟོས་འཇུར་འགྱུར་སེམས་ཅན་རིས་ན་མེད། །བསྐལ་པ་དུ་མའི་བསོད་ནམས་གཟི་བརྗིད་སྙིང་ཁུའི་ཐིགས་གནས་པ། །དེ་ཟོས་ལུས་དང་སེམས་དང་ཤེས་པ་རྣམ་པར་དག་པར་གྱུར། །འདྲེན་པ་མཆོད་ཕྱིར་བརྒྱ་བྱིན་ཚངས་པ་འཇིག་རྟེན་སྐྱོང་བ་རྣམས། །བྱང་ཆུབ་སེམས་དཔའི་དྲུང་དུ་རྟག་པར་དུས་གསུམ་རྒྱུན་ཏུ་འོང་། །ཕྱག་བྱས་མཆོད་བྱས་ཆོས་ཀྱི་དམ་པ་དེ་དག་ཐོས་གྱུར་ནས། །བསྐོར་བ་བྱས་ཏེ་ཀུན་ཀྱང་གང་ནས་འོངས་པའི་གནས་སུ་འདོང་། །འཇིག་རྟེན་ཁམས་རྣམས་ཀུན་ནས་ཆོས་འདོད་བྱང་ཆུབ་སེམས་དཔའ་འོང་། །འོད་བཀོད་ཁྲིར་གྱུར་རྣམས་ལ་དེ་དག་གནས་པར་ཕན་ཚུན་སྣང་། །མཆོག་ཏུ་བྱ་བའི་ཐེག་པ་དམ་པའི་ཆོས་ནི་ཐོས་གྱུར་ནས། །ཀུན་ཀྱང་དགའ་བའི་སེམས་གྱུར་བསྟོད་པའི་ཕྲེང་བ་བརྗོད་ཅིང་འདོང་། །བུད་མེད་བྱིས་པ་གང་དག་སྡུག་བསྔལ་ལྡན་པར་གྱུར་པ་དང་། །འབྱུང་པོས་ནོན་དང་སེམས་འཁྲུགས་གོས་མེད་རྡུལ་གྱིས་ཡོག་པ་རྣམས། །དེ་ཀུན་ལྷ་མོ་སྒྱུ་འཕྲུལ་མཐོང་ནས་སེམས་ནི་རྙེད་གྱུར་ཏེ། །བློ་གྲོས་རྟོགས་དང་དྲན་དང་ལྡན་ཞིང་སོ་སོའི་ཁྱིམ་ཁྱིམ་འདོང་། །རླུང་དང་བད་ཀན་མཁྲིས་པའི་ནད་དང་འདུས་པའི་ནད་ཐེབས་དང་། །མིག་ནད་རྣ་ནད་དག་གིས་ལུས་སེམས་མི་བདེར་གྱུར་པ་དག །རྣམ་མང་ཐ་དད་ནད་ཀྱི་རྣམ་པས་གང་དག་གནོད་གྱུར་པ། །དེ་དག་སྒྱུ་འཕྲུལ་ལག་པ་མགོ་ལ་བཞག་པས་ནད་མེད་གྱུར། །ཡང་ན་རྩྭ་ཡི་ཉག་མ་འགའ་ཞིག་ས་ལས་བླངས་བྱས་ཏེ། །སྒྱུ་འཕྲུལ་ནད་པ་བྱིན་ན་ཐམས་ཅད་རིམས་ནད་མེད་པར་གྱུར། །བདེ་བ་ཐོབ་ཅིང་ད་རོད་མ་ཉམས་སོ་སོའི་ཁྱིམ་དུ་འདོང་། །དེ་ནི་སྨན་གྱུར་སྨན་པའི་རྒྱལ་པོ་རུམ་ན་འདུག་ཕྱིར་རོ། །གང་ཚེ་ལྷ་མོ་སྒྱུ་འཕྲུལ་བདག་གི་ལུས་ལ་བརྟག་བྱས་པ། །དེ་ཚེ་བྱང་ཆུབ་སེམས་དཔའ་རུམ་ན་འདུག་པ་མཐོང་བ་ནི། །ཇི་ལྟར་བར་སྣང་གནས་ཀྱི་ཟླ་བ་སྐར་མས་བསྐོར་གནས་པ། །དེ་བཞིན་བྱང་ཆུབ་སེམས་དཔའ་མཚན་གྱིས་ཀུན་ནས་
བརྒྱན་པ་སྣང་། །དེ་ལ་འདོད་ཆགས་ཞེ་སྡང་གཏི་མུག་གནོད་པར་འགྱུར་བ་མེད། །འདོད་ལ་འདོད་པ་དེ་མེད་དེ་ལ་ཕྲག་དོག་འཚེ་བ་མེད། །དགའ་བའི་སེམས་དང་མགུ་བའི་སེམས་དང་དགའ་དང་ཡིད་བདེར་གནས། །དེ་ལ་བཀྲེས་དང་སྐོམ་དང་ཚ་དང་གྲང་བའི་གནོད་པ་མེད། །ལྷ་ཡི་རོལ་མོ་སིལ་སྙན་དབྱངས་སྒྲ་མ་བྱས་རྟག་ཏུ་འབྱུང་། །ལྷ་ཡི་སྤོས་དྲི་མེ་ཏོག་དམ་པ་མཆོག་མཛེས་ཆར་ཡང་འབབ། །ལྷ་དང་མི་རྣམས་དེ་ལ་ལྟ་ཞིང་ལྷ་མི་ཐམས་ཅད་ཀྱང་། །དེ་དག་ཕན་ཚུན་གནོད་པ་མེད་ཅིང་འཚེ་བ་གང་ཡང་མེད། །སེམས་ཅན་དགའ་བདེར་རྩེ་ཞིང་ཟས་དང་སྐོམ་གྱི་སྦྱིན་པ་བྱེད། །དགའ་བའི་སྒྲ་སྒྲོག་དེ་དག་དགའ་ཞིང་མགུ་བའི་ཡིད་དང་ལྡན། །རྒྱལ་པོའི་སྲིད་བདེ་འཁྲུག་པ་མེད་ཅིང་ཆར་པ་དུས་བཞིན་འབབ། །རྩྭ་དང་སྨན་དང་མེ་ཏོག་རྣམས་ཀྱང་དེ་ཡི་དུས་སུ་སྐྱེ། །རྒྱལ་པོའི་ཁབ་ཏུ་ཞག་བདུན་རིན་ཆེན་ཆར་པ་བབ་གྱུར་པས། །སེམས་ཅན་དབུལ་པོ་དེ་ལས་ལེན་ཅིང་སྦྱིན་བྱེད་བདེ་བར་སྤྱོད། །སེམས་ཅན་དབུལ་ཞིང་སྡུག་བསྔལ་གྱུར་པ་དེ་ཚེ་གང་ཡང་མེད། །རི་རབ་ཟོམ་གྱི་དགའ་ཚལ་སེམས་ཅན་བཞིན་དུ་དགའ་དང་ལྡན། །ཤཱཀྱའི་རྒྱལ་པོ་དེ་ཡང་གསོ་སྦྱོང་རབ་ལ་ཉེར་གནས་ཤིང་། །དེ་ནི་རྒྱལ་པོའི་བྱ་བ་མི་བྱེད་ཆོས་ལ་རྟག་པར་སྤྱོད། །དེ་ནི་དཀའ་ཐུབ་ནགས་ཚལ་སོང་ནས་ལྷ་མོ་སྒྱུ་འཕྲུལ་ལ། །སེམས་ཅན་མཆོག་སྲེལ་ཁྱོད་ཀྱི་ལུས་ལ་བདེ་བ་ཅི་འདྲ་རྨེད། །ལྷུམས་སུ་འཇུག་པའི་ལེའུ་སྟེ་དྲུག་པའོ།། །།དགེ་སློང་དག་དེ་ལྟར་ཟླ་བ་བཅུ་འདས་ཏེ། བྱང་ཆུབ་སེམས་དཔའ་བཙའ་བའི་དུས་ལ་བབ་པ་དང་། རྒྱལ་པོ་ཟས་གཙང་མའི་སྐྱེད་མོས་ཚལ་དུ་སྔ་ལྟས་སུམ་ཅུ་རྩ་གཉིས་བྱུང་ངོ་། །སུམ་ཅུ་རྩ་གཉིས་གང་ཞེ་ན། མེ་ཏོག་ཐམས་ཅད་ཁ་འབུས་ནས་རྒྱས་པར་གྱུར་པ་དང་། རྫིང་དག་ན་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་ཡོད་པ་དག་ཀྱང་ཁ་འབུས་ནས་རྒྱས་པར་གྱུར་པ་དང་། མེ་ཏོག་དང་འབྲས་བུའི་ཤིང་ལྗོན་པ་གསར་པ་དག་ཀྱང་ས་ལས་འཐོན་ཏེ་ཁ་འབུས་ནས་རྒྱས་པར་གྱུར་པ་དང་། རིན་པོ་ཆེའི་ཤིང་ལྗོན་པ་བརྒྱད་བྱུང་བ་དང་། གཏེར་ཆེན་པོ་ཉི་ཁྲི་འབུས་ཏེ་བྱུང་ནས་གནས་
པར་སྣང་བ་དང་། ཁྱིམ་གྱི་ནང་དུ་ཡང་རིན་པོ་ཆེའི་མྱུ་གུ་འཐོན་པ་དང་སྤོས་ཆུའི་དཔལ་གྱི་ཝ་འབྲུ་མར་དྲི་ཞིམ་པོས་སྦགས་པ་རྣམས་ཀྱང་ཟག་པར་གྱུར་པ་དང་། གངས་ཀྱི་རིའི་ངོས་ལས་སེང་གེའི་ཕྲུ་གུ་དག་འོངས་ཏེ། དགའ་བར་རྩེ་ཞིང་སེར་སྐྱའི་གྲོང་ཁྱེར་དམ་པ་ལ་བསྐོར་བ་བྱས་ནས་སྒོ་ན་གནས་པར་གྱུར་ཀྱང་སེམས་ཅན་གང་ལ་ཡང་འཚེ་བ་མེད་པར་གྱུར་པ་དང་། གླང་པོའི་ཕྲུ་གུ་ཐལ་ཀར་ལྔ་བརྒྱ་ལྷགས་ཏེ། རྒྱལ་པོ་ཟས་གཙང་མའི་རྐང་པ་ལ་སྣའི་རྩེ་མོས་ཉུག་ཅིང་གནས་པར་གྱུར་པ་དང་། ལྷའི་བྱིས་པ་རོགས་པ་སྐ་རགས་བཅིངས་པ་དག་ཀྱང་རྒྱལ་པོ་ཟས་གཙང་མའི་བཙུན་མོའི་འཁོར་གྱི་པང་པ་ནས་པང་པ་དག་ཏུ་འགྲེ་ལྡོག་པར་སྣང་བར་གྱུར་པ་དང་། ཀླུའི་བུ་མོ་མཆོད་པ་སྣ་ཚོགས་ཀྱི་ཡོ་བྱད་ཐོགས་པ་དག་ཀྱང་ལུས་ཕྱེད་ཕྱུང་ཞིང་ནམ་མཁའ་ལ་རྒྱུ་བར་སྣང་བ་དང་། ལྷའི་བུ་མོ་ཁྲི་ཡང་རྨ་བྱའི་མདོངས་ལག་ན་ཐོགས་ཤིང་ནམ་མཁའ་ལ་འཁོད་པར་སྣང་བ་དང་། བུམ་པ་གང་བ་ཁྲི་ཡང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་སྐོར་བ་བྱེད་པར་སྣང་བ་དང་། ལྷའི་བུ་མོ་ཁྲི་ཡང་སྤོས་ཆུའི་རིལ་བ་བྲིང་ག་ར་གླད་ལ་ཐོགས་ཤིང་འཁོད་པར་སྣང་བ་དང་། ལྷའི་བུ་མོ་ཁྲི་ཡང་གདུགས་དང་། རྒྱལ་མཚན་དང་། བ་དན་ཐོགས་ཤིང་འཁོད་པར་སྣང་བ་དང་། ལྷའི་བུ་མོ་བརྒྱ་སྟོང་མང་པོ་དག་ཀྱང་དུང་དང་། རྔ་དང་། རྫ་རྔ་དང་། ཁར་རྔ་མགུལ་ནས་སྤྱངས་ཏེ་སྡོད་ཅིང་འཁོད་པར་སྣང་བ་དང་། རླུང་ཐམས་ཅད་ཀྱང་མི་ལྡང་པར་གནས་པར་གྱུར་པ་དང་། ཆུ་ཀླུང་དང་ཆུ་བྲན་ཐམས་ཅད་ཀྱང་མི་འགུལ་ཞིང་མི་འབབ་པར་གྱུར་པ་དང་། ཉི་ཟླ་དང་། གཞལ་མེད་ཁང་དང་།རྒྱུ་སྐར་དང་། སྐར་མའི་ཚོགས་རྣམས་ཀྱང་མི་རྒྱུ་བར་གྱུར་པ་དང་། སྐར་མ་རྒྱལ་དང་ཡང་ལྡན་པར་གྱུར་པ་དང་། རྒྱལ་པོ་ཟས་གཙང་མའི་ཁྱིམ་ཡང་རིན་པོ་ཆེའི་དྲ་བས་ཡོག་པར་གྱུར་པ་དང་། མེ་ཡང་མི་འབར་བར་གྱུར་པ་དང་། ཁང་པ་བརྩེགས་པ་དང་། ཁང་བཟངས་དང་། ཡང་ཐོག་དང་། རྟ་བབས་དག་ལའང་ནོར་བུ་དང་། རིན་པོ་ཆེ་དག་འཕྱང་བར་སྣང་བར་གྱུར་པ་དང་། རས་བཅོས་བུའི་མཛོད་དང་། རིན་པོ་ཆེ་སྣ་ཚོགས་ཀྱི་མཛོད་རྣམས་ཀྱང་སྒོ་བྱེ་བར་སྣང་བ་དང་། བྱ་
རོག་དང་། འུག་པ་དང་། བྱ་རྒོད་དང་། སྤྱང་ཀི་དང་། ཝའི་སྒྲ་དག་ཀྱང་མེད་པར་གྱུར་པ་དང་། སྒྲ་སྐད་སྙན་པའི་སྒྲ་དག་ཀྱང་འབྱུང་བར་གྱུར་པ་དང་། སྐྱེ་བོ་ཐམས་ཅད་ཀྱི་ལས་ཀྱི་མཐའ་འང་རྒྱུན་ཆད་པར་གྱུར་པ་དང་། སའི་ཕྱོགས་མཐོན་དམན་དུ་འདུག་པ་རྣམས་ཀྱང་མཉམ་པར་གནས་པར་གྱུར་པ་དང་། ལམ་གྱི་བཞི་མདོ་དང་། སུམ་མདོ་དང་། སྲང་དང་། ཚོང་འདུས་ཀྱི་འཁོར་ཀྱང་ལག་མཐིལ་ལྟར་གཞི་མཉམ་ཞིང་འཇམ་ལ་མེ་ཏོག་སིལ་མས་གང་སྟེ་མཛེས་པར་སྣང་བ་དང་། སྦྲུམ་པ་ཐམས་ཅད་ཀྱང་བདེ་བ་དང་།ལེགས་པར་བཙའ་བར་གྱུར་པ་དང་། ཤིང་སཱ་ལའི་ནགས་ཚལ་གྱི་ལྷ་ཐམས་ཅད་ཀྱང་ཤིང་གི་ལོ་མའི་ནང་ནས་ལུས་ཕྱེད་ཕྱུང་སྟེ། ཕྱག་འཚལ་ཞིང་གནས་པར་སྣང་བ་སྟེ། སྔ་ལྟས་སུམ་ཅུ་རྩ་གཉིས་པོ་དེ་དག་བྱུང་བར་གྱུར་ཏོ། །དེ་ནས་ལྷ་མོ་སྒྱུ་འཕྲུལ་བྱང་ཆུབ་སེམས་དཔའ་ཉིད་ཀྱི་གཟི་བརྗིད་དང་མཐུས་བྱང་ཆུབ་སེམས་དཔའ་བཙའ་བའི་དུས་ལ་བབ་པར་ཤེས་ཏེ། ནམ་གྱི་སྲོད་ལ་རྒྱལ་པོ་ཟས་གཙང་མའི་དྲུང་དུ་འོངས་ནས་ཚིགས་སུ་བཅད་དེ་སྨྲས་པ། བདག་གི་བསམ་པ་གང་ལགས་གསོལ་གྱིས་ལྷ་ནི་གསན་དུ་གསོལ། །ཡུན་རིང་རིང་པོ་འདས་ནས་སྐྱེད་མོས་ཚལ་གྱི་བློ་སྐྱེས་ཏེ། །གལ་ཏེ་ཁྱོད་མི་བཀྱོན་ཅིང་ཞེ་སྡང་ཕྲག་དོག་མི་མངའ་ན། །བདག་ནི་རྩེ་ནས་སྐྱེད་མོས་ཚལ་དུ་མྱུར་དུ་མཆི་བར་བགྱི། །ཆོས་དགོངས་བརྩོན་པ་དཀའ་ཐུབ་སྤྱོད་པས་ཁྱོད་ཀྱང་སྐྱོན་མཁྱེན་གྲང་། །བདག་ཀྱང་སེམས་ཅན་དག་པ་བསྲེལ་ནས་ཡུན་ནི་རིང་ལགས་ལ། །སཱ་ལའི་ཤིང་ལྗོན་སྡོང་པོ་མཆོག་ཀྱང་མེ་ཏོག་ཁ་འབུས་ཏེ། །སྐྱེད་མོས་ཚལ་གྱི་དོག་སར་ད་ནི་མཆི་བའི་རིགས་སོ་ལྷ། །སོས་ཀའི་དུས་མཆོག་བུད་མེད་རྣམས་ཀྱི་རྒྱན་དུ་གྱུར་ལགས་ཏེ། །ནགས་རྒྱུ་ཁུ་བྱུག་དང་ནི་རྨ་བྱ་སྒྲ་རབ་སྙན་པ་འབྱིན། །གཙང་ཞིང་མཛེས་ལ་སྣ་ཚོགས་མེ་ཏོག་རྡུལ་གྱི་ངད་ཀྱང་ལྡང་། །ད་ནི་མཆི་ན་མ་ཐོགས་ལེགས་པར་བཀའ་ལུང་སྩལ་དུ་གསོལ། །རྒྱལ་པོའི་དབང་པོས་ལྷ་མོ་ལས་ནི་དེ་སྐད་ཚིག་ཐོས་ནས། །དགའ་ཞིང་རབ་ཏུ་མགུ་བའི་སེམས་ཀྱིས་འཁོར་ལ་སྨྲས་པ་ནི། །བཞོན་པ་བཞོན་ཆེ་
མགྱོགས་པའི་ཤུགས་ལྡན་དག་ཀྱང་བསྟད་པར་གྱིས། །ཡོན་ཏན་ཕུན་སུམ་ཚོགས་ལྡན་ལུམ་བི་ནི་ཚལ་བརྒྱན་པར་གྱིས། །རི་སྔོའི་མདོག་ལྡན་སྤྲིན་གྱི་ཁ་དོག་འཐུན་པར་གྱུར་པ་ཡི། །གླང་པོ་སྟོང་ཕྲག་ཉི་ཤུ་སྙེད་ཅིག་མྱུར་དུ་བསྟད་པར་གྱིས། །གླང་པོའི་དབང་པོ་མཆེ་བ་དྲུག་ལྡན་དྲིལ་མཛེས་གློ་ལ་བརྒྱུས། །གསེར་དང་ནོར་བུས་རྣམ་པར་སྤྲས་ཤིང་གསེར་གྱི་དྲ་བས་སྤུད། །རྒྱལ་པོའི་བཅིབས་པ་རླུང་ལྟར་མགྱོགས་པའི་ཤུགས་དང་ལྡན་པ་སྟེ། །དངུལ་དང་ཁ་བའི་མདོག་འདྲ་རྔ་རྔོག་ལྕང་ལོ་བཟང་འཁྲིལ་བའི། །རྟ་མཆོག་སྟོང་ཕྲག་ཉི་ཤུ་བགྲངས་པ་མྱུར་དུ་སྟོང་གྱིས་ཏེ། །གསེར་དྲིལ་གཡེར་ཀའི་དྲ་བ་གློ་ནས་སྤྱང་བ་གྱིས། །སྐྱེས་བུ་རྟུལ་ཕོད་གཡུལ་ལ་མོས་ཤིང་འཐབ་འདོད་དཔའ་བོ་དག །མདའ་གཞུ་རལ་གྲི་མདུང་ཐུང་ཞགས་པ་མཚོན་ཆ་རྣོ་ཐོགས་པ། །སྟོང་ཕྲག་ཉི་ཤུ་བགྲངས་པ་མྱུར་དུ་ཆོས་ཏེ་བཤམ་གྱིས་ལ། །སྒྱུ་འཕྲུལ་འཁོར་དང་བཅས་པ་བག་ཡོད་པར་ནི་བསྲུང་བར་གྱིས། །ལུམ་བི་ནི་དེར་གསེར་དང་ནོར་བུའི་རྒྱན་ཁྲོམ་བརྒྱན་པར་གྱིས། །གོས་དམར་རྣམ་པ་མང་པོས་ཤིང་རྣམས་ཐམས་ཅད་བརྒྱན་པར་གྱིས། །ལྷ་ཡི་དགའ་ཚལ་བཞིན་དུ་མེ་ཏོག་སྣ་ཚོགས་ཆལ་པར་ཁྲོམ། །དེ་ལྟར་ཐམས་ཅད་བཤམས་ཟིན་མྱུར་དུ་ང་ལ་སྦྲན་པར་གྱིས། །འཁོར་རྣམས་ཀྱིས་ནི་དེ་སྐད་ཚིག་ཐོས་སྐད་ཅིག་ཏུ། །བཞོན་པ་ཀུན་བཤམས་དེ་བཞིན་ལུམ་བི་ནི་ཡང་བརྒྱན་བྱས་ཏེ། །རྒྱལ་གྱུར་རྒྱལ་གྱུར་སྐུ་ཚེ་རིང་སྐྱོངས་རྒྱལ་པོ་གཤེགས་སུ་གསོལ། །ཇི་སྐད་བཀའ་སྩལ་དེ་བཞིན་ཀུན་བགྱིས་དུས་བབ་ལྷ་གཟིགས་ཤིག །མི་ཡི་བདག་པོ་དམ་པ་དེ་ཡང་དགའ་བའི་སེམས་གྱུར་ནམ། །ཁྱིམ་གྱི་དམ་པར་ཞུགས་ཏེ་བུད་མེད་རྣམས་ལ་འདི་སྐད་སྨྲས། །གང་ཞིག་ང་ལ་སྙིང་ཉེ་ང་ལ་དགའ་བར་འདོད་པ་དག །ང་ཡི་བཀའ་བཞིན་གྱིས་ཏེ་བདག་གི་ལུས་ཀུན་བརྒྱན་པར་གྱིས། །སྤོས་མཆོག་ངད་ཀྱི་དྲི་ཞིམ་ཁ་དོག་སྣ་ཚོགས་སྡུག་པའི་གོས། །འཇམ་ཞིང་ཡིད་འོང་དགའ་བའི་སེམས་ཀྱིས་ལེགས་པར་བགོ་བར་གྱིས། །བྲང་ན་འཕྱང་བའི་མུ་ཏིག་སེ་མོ་དོ་ཡིས་བརྒྱན་པར་གྱིས། །རྒྱན་གྱི་ཁྱད་པར་ཐམས་ཅད་དེ་རིང་
ཀུན་གྱིས་བསྟན་པར་གྱིས། །ཁར་རྔ་རྒྱུད་གཅིག་གླིང་བུ་པི་ཝང་རྫ་རྔ་དུམ་དུམ་ཕེག །སིལ་སྙན་ཡིད་དུ་འོང་བ་བརྒྱ་སྟོང་དག་ཀྱང་བཤམ་པར་གྱིས། །སྒྲ་སྙན་ཐོས་ནས་ལྷ་རྣམས་རབ་ཏུ་དགའ་བ་སྐྱེ་འགྱུར་ཞིང་། །ལྷ་མོ་རྣམས་ཀྱང་དེ་བཞིན་དགའ་བར་འགྱུར་བ་ཁྱེད་ཀྱིས་གྱིས། །ཤིང་རྟའི་མཆོག་འདིར་ལྷ་མོ་སྒྱུ་འཕྲུལ་གཅིག་པུ་འདུག་པར་གྱིས། །བུད་མེད་སྐྱེས་པ་གཞན་དག་སུ་ཡང་ཤིང་རྟ་དེར་མ་འཁོད། །ན་ཆུང་སྣ་ཚོགས་གོ་ཅན་རྣམས་ཀྱིས་ཤིང་རྟ་དེ་དྲོངས་ཏེ། །གང་དུའང་ཡིད་དུ་མི་འོང་མི་འཐུན་སྒྲ་རྣམས་མི་གྲག་ཀྱིས། །ལྷ་མོ་སྒྱུ་འཕྲུལ་ཁྱིམ་ནས་བྱུང་སྟེ་སྒོ་དྲུང་ཕྱིན་པའི་ཚེ། །རྟ་དང་གླང་པོ་ཤིང་རྟ་རྐང་ཏང་དཔལ་ལྡན་སྣ་ཚོགས་དཔུང་། །རྒྱལ་པོའི་སྒོ་དྲུང་ལྷགས་ཚེ་སྒྲ་ཆེན་མང་པོ་གྲག་པར་གྱུར། །རྒྱ་མཚོ་ཆེན་པོ་འཁྲུགས་པའི་སྒྲ་ལྟར་དེ་དག་ཡོངས་སུ་གྲག །དེ་ཚེ་བཀྲ་ཤིས་དོན་དུ་དྲིལ་བུ་བརྒྱ་སྟོང་དཀྲོལ་བར་བྱས། །ཤིང་རྟ་དེ་ཡང་དེ་ལྟར་རྒྱལ་པོས་སྣ་ཚོགས་བརྒྱན་པ་ལ། །ལྷ་རྣམས་སྟོང་གིས་ལྷ་ཡི་ཁྲི་ཡང་ལེགས་པར་བཤམ་པ་བྱས། །རིན་ཆེན་ཤིང་ལྗོན་མེ་ཏོག་ལོ་མ་ལྡན་བཞིན་ལྡན་པར་བྱས། །རྨ་བྱ་ཁྲུང་ཁྲུང་ངང་པ་ཡིད་དུ་འོང་བའི་སྒྲ་ཡང་འབྱིན། །གདུགས་དང་རྒྱལ་མཚན་བ་དན་ཆེ་ཕྲ་ཀུན་ནས་འཁོར་བར་བསྒྲེང་། །ལྷ་ཡི་གོས་དང་དྲིལ་བུ་གཡེར་ཀའི་དྲ་བ་མཆོག་གིས་བཀབ། །ལྷ་ཡི་བུ་མོ་ནམ་མཁའ་ལས་ནི་ཤིང་རྟ་དེ་ལ་ལྟ། །ལྷ་ཡི་སྒྲ་དབྱངས་སྙན་པ་སྒྲོག་ཅིང་བསྟོད་པའི་ཚིག་བརྗོད་དེ། །གང་ཚེ་ལྷ་མོ་སྒྱུ་འཕྲུལ་སེང་གེའི་ཁྲི་ལ་འདུག་གྱུར་པ། །དེ་ཚེ་སྟོང་གསུམ་ས་འདི་རྣམ་པ་དྲུག་ཏུ་རབ་ཏུ་གཡོས། །ལྷ་རྣམས་གོས་ཀྱི་གཡབ་མོ་འབྱིན་ཅིང་མེ་ཏོག་སྣ་ཚོགས་འཐོར། །དེ་རིང་ལུམ་བི་ནི་འདིར་འགྲོ་བའི་དམ་པ་བལྟམ་གྱུར་ཏེ། །འཇིག་རྟེན་སྐྱོང་བ་བཞི་ནི་ཤིང་རྟའི་མཆོག་དེ་འདྲེན་པར་བྱེད། །སུམ་ཅུ་རྩ་གསུམ་བདག་པོ་དབང་པོའང་ལམ་གྱི་བྱི་དོར་བྱེད། །ཚངས་པ་སྐྱེ་བོ་མི་སྲུན་སེལ་ཅིང་སྔོན་དུ་འགྲོ་བར་གྱུར། ། ལྷ་རྣམས་བརྒྱ་ཕྲག་སྟོང་ཡང་ཐལ་མོ་སྦྱར་བས་ཕྱག་འཚལ་འདུད། །རྒྱལ་པོ་རབ་ཏུ་དགའ་བའི་སེམས་ཀྱིས་བཀོད་པ་དེ་ལ་ལྟ། །
དེ་ནི་འདི་སྙམ་འདི་ནི་ལྷ་ཡི་ལྷ་ཞིག་ཡིན་སྙམ་བྱེད། །གང་ལ་སྐྱོང་བ་བཞི་དང་ཚངས་པ་དབང་པོར་བཅས་པའི་ལྷ། །མཆོད་པ་རྒྱ་ཆེན་བྱེད་པ་འདི་ནི་ངེས་པར་སངས་རྒྱས་འགྱུར། །སྲིད་པ་གསུམ་ན་ལྷ་ཀླུ་བརྒྱ་བྱིན་ཚངས་པ་འཇིག་རྟེན་སྐྱོང་། །གང་ཡང་མཆོད་པ་འདི་འདྲ་བཟོད་པའི་སེམས་ཅན་དེ་མེད་དེ། །ཡང་ན་མགོ་འགས་ཡང་ན་དེ་དག་སྲོག་དང་བྲལ་བར་འགྱུར། །འདི་ནི་ལྷ་ཡི་དམ་པ་ཡིན་པས་མཆོད་པ་ཐམས་ཅད་བཟོད། །དགེ་སློང་དག་དེ་ནས་ལྷ་མོ་སྒྱུ་འཕྲུལ་རྟའི་ཤིང་རྟ་རྒྱན་ཐམས་ཅད་ཀྱིས་བརྒྱན་པ་བརྒྱད་ཁྲི་བཞི་སྟོང་གིས་ནི་ཀུན་ནས་བསྐོར། གླང་པོ་ཆེའི་ཤིང་རྟ་རྒྱན་ཐམས་ཅད་ཀྱིས་བརྒྱན་པ་བརྒྱད་ཁྲི་བཞི་སྟོང་དང་། རྐང་ཏང་དཔའ་ཞིང་རྟུལ་ཕོད་པ་ཡན་ལག་དམ་པ་དང་ལྡན་པ། གོ་ཆ་ལེགས་པར་བགོས་པ་སྲ་བའི་གོ་གྱོན་པ་བརྒྱད་ཁྲི་བཞི་སྟོང་གིས་ནི་ཡོངས་སུ་བསྲུངས། ཤཱཀྱའི་བུ་མོ་སྟོང་ཕྲག་དྲུག་ཁྲིས་ནི་མདུན་དུ་བདར། རྒྱལ་པོ་ཟས་གཙང་མའི་ཕུ་ནུའི་རིགས་སུ་སྐྱེས་པའི་ཤཱཀྱ་རྒན་པ་དང་། གཞོན་པ་དང་། བར་མ་བཞི་ཁྲིས་ནི་ཡོངས་སུ་བསྲུངས། རྒྱལ་པོ་ཟས་གཙང་མའི་སླས་གླུ་དང་རོལ་མོའི་དབྱངས་སྒྲ་ནི་བྱེད། ཁར་བའི་སིལ་ཁྲོལ་དང་། ཕེག་རྡོབ་སིལ་སྙན་དང་། གླུ་དབྱངས་ལེན་པ་དྲུག་ཁྲིས་ནི་ཀུན་ནས་བསྐོར། ལྷའི་བུ་མོ་བརྒྱད་ཁྲི་བཞི་སྟོང་དང་། ཀླུའི་བུ་མོ་བརྒྱད་ཁྲི་བཞི་སྟོང་དང་། དྲི་ཟའི་བུ་མོ་བརྒྱད་ཁྲི་བཞི་སྟོང་དང་། མི་འམ་ཅིའི་བུ་མོ་བརྒྱད་ཁྲི་བཞི་སྟོང་དང་། ལྷ་མ་ཡིན་གྱི་བུ་མོ་བརྒྱད་ཁྲི་བཞི་སྟོང་བཀོད་པའི་རྒྱན་སྣ་ཚོགས་ཀྱིས་བརྒྱན་པ་ཤ་སྟག་གླུ་དང་རོལ་མོའི་དབྱངས་སྒྲ་སྣ་ཚོགས་ཀྱིས་བསྔགས་པ་བརྗོད་པ། རྗེས་སུ་འབྲང་བས་འགྲོའོ། ། ལུམ་བི་ནིའི་ནགས་ཚལ་དེ་ཐམས་ཅད་ཀྱང་སྤོས་ཆུའི་ཆག་ཆག་གིས་བཏབ་ཅིང་ལྷའི་མེ་ཏོག་གིས་གཏོར་བར་གྱུར་ཏོ། །ནགས་ཚལ་དམ་པ་དེའི་ནང་ན་ཤིང་ལྗོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་དུས་ལ་མ་བབ་པར་ལོ་མ་དང་མེ་ཏོག་དང་འབྲས་བུ་སྐྱེད་པར་གྱུར་ཏོ། །ནགས་ཚལ་དེ་ནི་ལྷ་རྣམས་ཀྱིས་ཀྱང་ལེགས་པར་བརྒྱན་པར་གྱུར་ཏེ། འདི་ལྟ་སྟེ་དཔེར་ན། འདྲེས་པའི་ཚལ་ལྷ་རྣམས་ཀྱིས་ལེགས་པར་བརྒྱན་པ་བཞིན་ནོ། །
དེ་ནས་ལྷ་མོ་སྒྱུ་འཕྲུལ་ལུམ་བི་ནིའི་ནགས་ཚལ་དུ་ཕྱིན་ནས་ཤིང་རྟ་དམ་པ་དེ་ལས་བབས་ཏེ། མི་དང་ལྷའི་བུ་མོ་དག་གིས་ཡོངས་སུ་བསྐོར་ཅིང་། ཤིང་དྲུང་ནས་ནི་ཤིང་དྲུང་དག་ཏུ་འགྲོ། ནགས་ཚལ་ནས་ནི་ནགས་ཚལ་དག་ཏུ་འཆག །ལྗོན་པ་ནས་ནི་ལྗོན་པ་དག་ལ་ལྟ་ཞིང་དེ་རིམ་གྱིས་ཤིང་རིན་པོ་ཆེ་ཆེན་པོ་མཆོག་དང་ཕུལ་དུ་བྱ་བ། ཡལ་ག་ཤིན་ཏུ་རྣམ་པར་འབྱེས་པ། ལོ་མ་དང་དོག་པ་བཟང་པོ་དང་ལྡན་པ། མི་དང་ལྷའི་མེ་ཏོག་སྣ་ཚོགས་རབ་ཏུ་རྒྱས་པ། སྤོས་མཆོག་དང་ཕུལ་དུ་བྱ་བའི་དྲིའི་ངད་དང་ལྡན་པའི་གོས་ཁ་དོག་སྣ་ཚོགས་སྤྱངས་པ། ནོར་བུ་དང་རིན་པོ་ཆེ་སྣ་ཚོགས་ལྟ་བུའི་འོད་རྣམ་པ་ཐ་དད་པ་འབར་བ། རྩ་བ་དང་། སྡོང་པོ་དང་། ཡལ་ག་དང་། ལོ་མ་རྣམས་རིན་པོ་ཆེ་ཐམས་ཅད་ཀྱིས་ལེགས་པར་བརྒྱན་པ། ཡལ་ག་རིང་ཞིང་ཤིན་ཏུ་རྣམ་པར་འབྱེས་པ། བླག་ཤ་ཞེས་བྱ་བ་སའི་ཕྱོགས་ལག་མཐིལ་ལྟར་མཉམ་ཞིང་ཤིན་ཏུ་བཟང་ལ་ཡངས་པ། རྩྭ་སྔོན་པོ་རྨ་བྱའི་མགྲིན་པ་ལྟ་བུ་སྐྱེས་པ། ཀ་ཙ་ལིན་དིའི་གོས་ལྟར་རེག་ན་བདེ་བའི་ས་ལ་འདུག་པ། སྔོན་གྱི་རྒྱལ་བའི་ཡུམ་གྱིས་བརྟེན་པ། ལྷའི་གླུ་དབྱངས་བླངས་པ། གནས་གཙང་མའི་ལྷ་བཟང་ཞིང་དྲི་མ་མེད་ལ་རྣམ་པར་དག་པ་རབ་ཏུ་ཞི་བའི་སེམས་དང་ལྡན་པ་རྣམས་ཀྱིས་ཐོར་ཚུགས་དང་ཅོད་པན་མངོན་པར་བཏུད་པའི་སྤྱི་བོས་མངོན་པར་ཕྱག་བྱ་བའི་ཤིང་ལྗོན་པ་བླག་ཤ་དེའི་དྲུང་དུ་ཕྱིན་ཏོ། །དེ་ནས་བྱང་ཆུབ་སེམས་དཔའི་གཟི་བརྗིད་དང་མཐུས་ཤིང་བླག་ཤ་དེས་མངོན་པར་བཏུད་དེ་ཕྱག་བྱས་སོ། །དེ་ནས་ལྷ་མོ་སྒྱུ་འཕྲུལ་ནམ་མཁའི་དཀྱིལ་དུ་སྣང་བའི་གློག་གི་ཕྲེང་བ་ལྟ་བུའི་ལག་པ་གཡས་པ་བརྐྱང་ནས། བླག་ཤའི་ཡལ་ག་ལས་བཟུང་སྟེ། ཚུལ་དུ་ཤིས་པར་ནམ་མཁའི་དཀྱིལ་དུ་བལྟས་ནས་བྱ་སྨྱངས་བྱེད་ཅིང་འདུག་པར་གྱུར་ཏོ། །དེ་ནས་དེའི་ཚེ་འདོད་པ་ན་སྤྱོད་པའི་ལྷའི་ནང་ནས་ལྷའི་བུ་མོ་དྲུག་ཁྲི་ལྷགས་ཏེ། ལྷ་མོ་སྒྱུ་འཕྲུལ་ལ་རིམ་གྲོ་དང་བཀུར་སྟི་བྱེད་པར་གྱུར་ཏོ། །བྱང་ཆུབ་སེམས་དཔའ་མའི་རུམ་ན་འདུག་པའི་ཚེ། རྣམ་པ་དེ་ལྟ་བུའི་རྫུ་འཕྲུལ་གྱི་ཆོ་འཕྲུལ་དང་ལྡན་པར་གནས་སོ། །དེ་ཟླ་བ་བཅུ་ཚང་
ནས་མའི་གློ་གཡས་པ་ནས་དྲན་ཞིང་ཤེས་བཞིན་དུ་མངལ་གྱི་དྲི་མས་མ་གོས་པར་བྱུང་སྟེ། གཞན་ལྟར་མ་ཡིན་ཞིང་གཞན་དག་ལ་མངལ་གྱི་དྲི་མ་ཞེས་བྱ་བ་བརྗོད་པ་དེ་ལྟ་བུ་མེད་པར་གྱུར་ཏོ། །དགེ་སློང་དག་དེའི་ཚེ་ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་གཉིས་མདུན་ན་འཁོད་དེ། དེ་གཉིས་ཀྱིས་རིམ་གྲོ་དམ་པ་ཆེན་པོས་ལྷའི་གོས་ཀ་ཤི་པའི་སླེབ་མོས་ལུས་དང་ཡན་ལག་ཐམས་ཅད་ཀྱིས་དྲན་ཞིང་ཤེས་བཞིན་དུ་བྱང་ཆུབ་སེམས་དཔའ་བླངས་སོ། །བྱང་ཆུབ་སེམས་དཔའ་ཁང་པ་བརྩེགས་པ་གང་གི་ནང་ན་འདུག་ཅིང་མའི་རུམ་ན་གནས་གནས་པ་དེ་ཡང་མི་མཇེད་ཀྱི་བདག་པོ་ཚངས་པ་དང་། ཚངས་རིས་ཀྱི་ལྷ་རྣམས་ཀྱིས་ཚངས་པའི་འཇིག་རྟེན་དུ་གྱེན་དུ་བཏེག་སྟེ། མཆོད་རྟེན་དུ་བྱ་བ་དང་། མཆོད་པ་བྱ་བའི་ཕྱིར་ཁྱེར་རོ། །དེ་ལྟར་བྱང་ཆུབ་སེམས་དཔའ་དེ་ནི་མིར་གྱུར་པ་གང་གིས་ཀྱང་མ་བླངས་ཀྱི། བྱང་ཆུབ་སེམས་དཔའ་དེ་ནི་ལྷ་རྣམས་ཀྱིས་བླངས་སོ། །དེ་ནས་བྱང་ཆུབ་སེམས་དཔའ་བཙས་མ་ཐག་ཏུ་ས་ལ་འབབ་སྟེ། བྱང་ཆུབ་སེམས་དཔའ་དེ་ས་ལ་བབས་པར་གྱུར་མ་ཐག་ཏུ་པད་མ་ཆེན་པོ་ཞིག་གིས་ས་འདི་ཡང་བརྟོལ་ཏེ་བྱུང་ངོ་། །ཀླུའི་རྒྱལ་པོ་ཆེན་པོ་དགའ་བོ་དང་། ཉེ་དགའ་བོ་གཉིས་ཀྱང་ནམ་མཁའི་དཀྱིལ་ན་ལུས་ཕྱེད་ཕྱུང་སྟེ་འཁོད་ནས་བསིལ་བ་དང་། དྲོ་བའི་ཆུའི་རྒྱུན་གཉིས་མངོན་པར་སྤྲུལ་ནས་བྱང་ཆུབ་སེམས་དཔའི་ལུས་བཀྲུས་སོ། །བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ལ་སོགས་པ་གཞན་ཡང་ལྷའི་བུ་བརྒྱ་སྟོང་མང་པོ་དག་བྱང་ཆུབ་སེམས་དཔའ་བཙས་མ་ཐག་ཏུ་སྤོས་ཆུ་སྣ་ཚོགས་དང་། མེ་ཏོག་སིལ་མས་ལུས་འཁྲུ་ཞིང་མངོན་པར་འཐོར་རོ། །བར་སྣང་ལས་ཀྱང་རྡུལ་ཡབ་ཀྱི་རྔ་མ་གཉིས་དང་། རིན་པོ་ཆེའི་གདུགས་བྱུང་བར་གྱུར་ཏོ། །དེ་པད་མ་ཆེན་པོ་དེ་ལ་འདུག་ནས་ཕྱོགས་བཞིར་རྣམ་པར་ལྟ་སྟེ། སེང་གེའི་ལྟ་སྟངས་དང་། སྐྱེས་བུ་ཆེན་པོའི་ལྟ་སྟངས་ཀྱིས་རྣམ་པར་ལྟའོ། །དེའི་ཚེ་བྱང་ཆུབ་སེམས་དཔས་སྔོན་གྱི་དགེ་བའི་རྩ་བའི་རྣམ་པར་སྨིན་པ་ལས་བྱུང་བ་ལྷའི་མིག་ཐོགས་པ་མེད་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་གྲོང་ཁྱེར་དང་། གྲོང་རྡལ་དང་།
ཡུལ་འཁོར་དང་། ཕོ་བྲང་འཁོར་དང་། ལྗོངས་སུ་བཅས། ཡུལ་དུ་བཅས། མི་དང་ལྷར་བཅས་པ་རྣམས་མཐོང་བར་གྱུར་ཏོ། །སེམས་ཅན་ཐམས་ཅད་ཀྱི་སེམས་ཀྱི་སྤྱོད་པའང་རབ་ཏུ་ཤེས་ཏེ། ཤེས་ནས་ཀྱང་སེམས་ཅན་གང་ཚུལ་ཁྲིམས་སམ། ཏིང་ངེ་འཛིན་ཏམ། ཤེས་རབ་བམ། དགེ་བའི་སྤྱོད་པས་བདག་དང་འདྲ་བ་དེ་ལྟ་བུ་གང་ལ་ལ་ཞིག་ཡོད་དམ་ཞེས་རྣམ་པར་ལྟའོ། །དེའི་ཚེ་བྱང་ཆུབ་སེམས་དཔས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བདག་དང་མཚུངས་པའི་སེམས་ཅན་གང་ཡང་མ་མཐོང་ནས། དེའི་ཚེ་བྱང་ཆུབ་སེམས་དཔའ་སེང་གེ་ལྟར་འཇིགས་པ་མེད་ཅིང་བག་ཚ་བ་མེད་དེ། ཞུམ་པ་དང་བག་འཆུམས་པ་མེད་པས་ལེགས་པར་བསམ་པ་དྲན་པར་བྱས་ཏེ། བསམས་བརྟགས་ནས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ཤེས་པར་བྱ་སྟེ། སུས་ཀྱང་བསྟན་པ་མེད་པར་བྱང་ཆུབ་སེམས་དཔའ་དགེ་བའི་རྩ་བའི་ཆོས་ཐམས་ཅད་ཀྱི་སྔོན་དུ་འགྲོ་བར་བྱའོ་ཞེས་ཤར་ཕྱོགས་ལོགས་སུ་གོམ་པ་བདུན་བོར་རོ། །དེ་ལྟར་བྱང་ཆུབ་སེམས་དཔའ་གང་དང་གང་དུ་གོམ་པ་བོར་བ་དེ་དང་དེ་དག་ཏུ་པད་མ་དག་ཀྱང་སྐྱེས་པར་གྱུར་ཏོ། །ལྷ་དང་མི་རྣམས་ཀྱི་སྦྱིན་པའི་གནས་སུ་འགྱུར་བར་བྱའོ་ཞེས་ལྷོ་ཕྱོགས་ལོགས་སུ་གོམ་པ་བདུན་བོར་རོ། །ནུབ་ཕྱོགས་ལོགས་སུ་གོམ་པ་བདུན་བོར་ནས་གོམ་པ་བདུན་པ་ལ་གནས་ཏེ་ང་ནི་འཇིག་རྟེན་ན་ཕུལ་དུ་ཕྱིན་པའོ། །འདི་ནི་ངའི་སྐྱེ་བ་ཐ་མ་སྟེ། སྐྱེ་བ་དང་། རྒ་བ་དང་། ན་བ་དང་། འཆི་བ་མཐར་དབྱུང་ངོ་ཞེས་སེང་གེ་ལྟར་ཚིམ་པར་གྱུར་པའི་སྒྲ་བསྒྲགས་སོ། །སེམས་ཅན་ཐམས་ཅད་ཀྱི་ནང་ན་བླ་ན་མེད་པར་བྱའོ་ཞེས་བྱང་ཕྱོགས་ལོགས་སུ་གོམ་པ་བདུན་བོར་རོ། །བདུད་དང་བདུད་ཀྱི་སྡེ་ནི་གཞོམ་པར་བྱའོ། །སེམས་ཅན་དམྱལ་བ་པ་ཐམས་ཅད་ཀྱི་སེམས་ཅན་དམྱལ་བའི་མེ་གསད་པའི་ཕྱིར་ཆོས་ཀྱི་ཆར་སྤྲིན་ཆེན་པོའི་ཆར་ཕབ་སྟེ། དེ་དག་བདེ་བས་ཚིམ་པར་བྱའོ་ཞེས་འོག་གི་ཕྱོགས་ལོགས་སུ་གོམ་པ་བདུན་བོར་རོ། །སེམས་ཅན་ཐམས་ཅད་ཀྱི་གྱེན་དུ་བལྟ་བར་འགྱུར་བར་བྱའོ་ཞེས་སྟེང་གི་ཕྱོགས་ལོགས་སུ་གོམ་པ་བདུན་བོར་ནས་སྟེང་དུ་ལྟའོ། །བྱང་ཆུབ་སེམས་
དཔས་ཚིག་དེ་བརྗོད་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སྒྲས་མངོན་པར་གོ་བར་གྱུར་ཏེ། དེ་ནི་བྱང་ཆུབ་སེམས་དཔའི་ལས་ཀྱི་རྣམ་པར་སྨིན་པ་ལས་བྱུང་བའི་མངོན་པར་ཤེས་པའི་ཆོས་ཉིད་དོ། །གང་གི་ཚེ་བྱང་ཆུབ་སེམས་དཔའ་སྲིད་པ་ཐ་མ་པ་བཙའ་བར་འགྱུར་བ་དང་། གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ། རྫུ་འཕྲུལ་གྱི་ཆོ་འཕྲུལ་གྱི་རྣམ་པ་དེ་ལྟ་བུ་དེ་དག་བྱུང་ངོ་། །དགེ་སློང་དག་དེའི་ཚེ་སེམས་ཅན་ཐམས་ཅད་ཀྱང་རབ་ཏུ་དགའ་ཞིང་སྤུ་གཡོས་པར་གྱུར་ཏོ། །འཇིག་རྟེན་དུ་ས་གཡོ་བ་ཆེན་པོ་ཤིན་ཏུ་འཇིགས་ཤིང་སྤུ་གཡོ་བར་འགྱུར་བ་ཡང་བྱུང་བར་གྱུར་ཏོ། །མི་དང་ལྷའི་སིལ་སྙན་དང་། རོལ་མོའི་དབྱངས་སྒྲར་བྱ་བ་ཐམས་ཅད་ཀྱང་མ་བླངས་པར་སྒྲ་འབྱིན་པར་གྱུར་ཏོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་དུས་དང་དུས་མཚམས་སོ་སོའི་ཤིང་ཐམས་ཅད་ཀྱང་མེ་ཏོག་རྒྱས་ཤིང་འབྲས་བུ་ཆགས་པ་དང་རྣམ་པར་དག་པར་གྱུར་ཏོ། །ནམ་མཁའི་དཀྱིལ་ནས་ཀྱང་སྤྲིན་གྱི་སྒྲ་གྲགས་ཏེ། སྤྲིན་མེད་པའི་ནམ་མཁའ་ལས་ཀྱང་དལ་བུས་དལ་བུས་ཕྲ་བ་ཕྲ་བའི་ཆར་ལྷ་ཡུལ་བའི་ཁ་དོག་དང་ལྡན་པའི་མེ་ཏོག་དང་། གོས་དང་། རྒྱན་དང་། སྤོས་ཀྱི་ཕྱེ་མ་དང་འདྲེས་པ་འབབ་པར་གྱུར་ཏོ། །རླུང་རེག་ན་མཆོག་ཏུ་བདེ་བ་འཇམ་པ་དྲི་ཞིམ་པོ་དག་ཀྱང་ལྡང་བར་གྱུར་ཏོ། །ཕྱོགས་ཐམས་ཅད་ཀྱང་མུན་པ་དང་། རྡུལ་དང་། དུ་བ་དང་། ཁུག་རྣ་མེད་ཅིང་རབ་ཏུ་དང་བས་རྣམ་པར་མཛེས་པར་གྱུར་ཏོ། །སྟེང་གི་བར་སྣང་ལས་ཀྱང་ཚངས་པའི་སྒྲ་ཆེན་པོ་སྙན་ཅིང་ཟབ་པ་གྲག་པར་གྱུར་ཏོ། །ཉི་ཟླ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བའི་འོད་ཐམས་ཅད་ཀྱང་ཟིལ་གྱིས་མནན་ཏེ། འོད་ཁ་དོག་བརྒྱ་སྟོང་དང་ལྡན་པ། རེག་ན་མཆོག་ཏུ་བདེ་བ། སེམས་ཅན་ཐམས་ཅད་ཀྱི་ལུས་དང་སེམས་ལ་བདེ་བ་སྐྱེད་པ། འཇིག་རྟེན་ལས་འདས་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་གང་བར་གྱུར་ཏོ། །བྱང་ཆུབ་སེམས་དཔའ་བཙས་མ་ཐག་ཏུ་སེམས་ཅན་ཐམས་ཅད་ཀྱང་བདེ་བས་ཤིན་ཏུ་ཚིམ་པར་གྱུར་ཏེ། འདོད་ཆགས་དང་། ཞེ་སྡང་དང་། གཏི་མུག་དང་། དྲེགས་པ་དང་།
མི་དགའ་བ་དང་། ཞུམ་པ་དང་། འཇིགས་པ་དང་། ཆགས་པ་དང་། ཕྲག་དོག་དང་། སེར་སྣ་ཐམས་ཅད་དང་བྲལ་ཞིང་མི་དགེ་བའི་བྱ་བ་ཐམས་ཅད་སྤངས་པར་གྱུར་ཏོ། །སེམས་ཅན་ནད་པ་རྣམས་ཀྱི་ནད་ཀྱང་ཞི་བར་གྱུར་ཏོ། །བཀྲེས་ཤིང་སྐོམ་པའི་སེམས་ཅན་རྣམས་ཀྱང་བཀྲེས་པ་དང་སྐོམ་པ་མེད་པར་གྱུར་ཏོ། །ཆང་གིས་ར་རོ་ཞིང་མྱོས་པ་རྣམས་ཀྱང་མྱོས་པ་མེད་པར་གྱུར་ཏོ། །སྨྱོས་པ་རྣམས་ཀྱང་དྲན་པ་ཐོབ་པར་གྱུར་ཏོ། །མིག་མེད་པ་རྣམས་ཀྱིས་ཀྱང་མིག་ཐོབ་པར་གྱུར་ཏོ། །རྣ་བ་འོན་པ་རྣམས་ཀྱིས་ཀྱང་སྒྲ་ཐོས་པར་གྱུར་ཏོ། །ཡན་ལག་དང་ཉིང་ལག་ཉམས་པ་རྣམས་ཀྱང་དབང་པོ་ཉམས་པ་མེད་པར་གྱུར་ཏོ། །དབུལ་པོ་རྣམས་ཀྱིས་ཀྱང་ནོར་ཐོབ་པར་གྱུར་ཏོ། །བཙོན་ར་ན་འཁོད་པ་རྣམས་ཀྱང་བཙོན་ར་ནས་ཐར་བར་གྱུར་ཏོ། །མནར་མེད་པ་ལ་སོགས་པའི་སེམས་ཅན་དམྱལ་བ་པའི་སེམས་ཅན་ཐམས་ཅད་ཀྱི་ནད་དུ་བྱ་བ་དང་སྡུག་བསྔལ་ཐམས་ཅད་དེའི་ཚེ་རྒྱུན་ཆད་པར་གྱུར་ཏོ། །དུད་འགྲོའི་སྐྱེ་གནས་པ་རྣམས་ཀྱིས་གཅིག་ལ་གཅིག་ཟ་བ་ལ་སོགས་པའི་སྡུག་བསྔལ་ཡང་ཞི་བར་གྱུར་ཏོ། །གཤིན་རྗེའི་འཇིག་རྟེན་པའི་སེམས་ཅན་རྣམས་ཀྱི་བཀྲེས་པ་དང་སྐོམ་པ་ལ་སོགས་པའི་སྡུག་བསྔལ་ཡང་ཞི་བར་གྱུར་ཏོ། །གང་གི་ཚེ་བྱང་ཆུབ་སེམས་དཔའ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་སྤྱད་པ་ཤིན་ཏུ་སྤྱད་པ། བརྩོན་འགྲུས་ཆེན་པོ་དང་ལྡན་པ། མཐུ་ཆེན་པོ་དང་ལྡན་པ། བཙས་མ་ཐག་ཏུ་གོམ་པ་བདུན་འདོར་བའི་ཚེ་ཆོས་ཉིད་ཐོབ་པས་དེའི་ཚེ། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་སའི་ཕྱོགས་དེ་དེའི་ཚེ་ཞིག་པར་མི་འགྱུར་བར་བྱ་བའི་ཕྱིར་རྡོ་རྗེའི་རང་བཞིན་དུ་བྱིན་གྱིས་རློབ་པ་མཛད་དེ། དགེ་སློང་དག་དེ་ཙམ་དུ་སྟོབས་ཀྱི་ཤུགས་དྲག་པོ་དང་ལྡན་པར་བྱང་ཆུབ་སེམས་དཔའ་བཙས་མ་ཐག་པ་གོམ་པ་བདུན་འདོར་བར་གྱུར་ཏོ། །འཇིག་རྟེན་གྱི་བར་ཐམས་ཅད་ཀྱང་དེའི་ཚེ་སྣང་བ་ཆེན་པོས་རྒྱས་པར་གང་བར་གྱུར་ཏོ། །དེའི་ཚེ་གླུའི་སྒྲ་ཆེན་པོ་ཡང་བྱུང་བར་གྱུར་ཏེ། གར་གྱི་སྒྲ་ཆེན་པོ་ཡང་བྱུང་བར་གྱུར་ཏོ། །དེའི་ཚེ་མེ་ཏོག་དང་། ཕྱེ་མ་དང་། སྤོས་དང་། ཕྲེང་བ་དང་། རིན་པོ་ཆེ་དང་། རྒྱན་དང་། གོས་ཀྱི་
སྤྲིན་དཔག་ཏུ་མེད་པ་དག་ཀྱང་ཆར་དུ་མངོན་པར་བབ་པར་གྱུར་ཏོ། །སེམས་ཅན་ཐམས་ཅད་ཀྱང་བདེ་བའི་མཆོག་དང་ལྡན་པར་གྱུར་ཏེ། མདོར་ན་བྱང་ཆུབ་སེམས་དཔའ་འཇིག་རྟེན་ཐམས་ཅད་ལས་མངོན་པར་འཕགས་པ་འཇིག་རྟེན་དུ་བྱུང་བའི་ཚེ། བྱ་བ་བསམ་གྱིས་མི་ཁྱབ་པ་བྱུང་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི་སེམས་ཅན་ཐམས་ཅད་ལས་ངོ་མཚར་དུ་གྱུར་པ་སྟེ། བྱང་ཆུབ་སེམས་དཔའ་ཉིད་ཀྱང་རྨད་དུ་བྱུང་བའི་ཆོས་དང་ལྡན་པར་གྱུར་ན། ད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས་འདི་ལྟར་བདག་ནི་ལན་བཞིའམ་ལན་ལྔར་ཡང་། ལན་བཅུར་ཡང་། ལན་ལྔ་བཅུའི་བར་དུ་ཡང་། ལན་བརྒྱའི་བར་དུ་ཡང་། ལན་བརྒྱ་སྟོང་དུ་མའི་བར་དུ་ཡང་སངས་རྒྱས་བཅོམ་ལྡན་འདས་ལ་སྐྱབས་སུ་མཆིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་མ་འོངས་པའི་དུས་ན་དགེ་སློང་ལ་ལ་ལུས་མ་བསྒོམས་པ། སེམས་མ་བསྒོམས་པ། ཚུལ་ཁྲིམས་མ་བསྒོམས་པ། ཤེས་རབ་མ་བསྒོམས་པ། བྱིས་པ་མི་མཁས་པ། ལྷག་པའི་ང་རྒྱལ་ཅན། རྒོད་པ། ཁེངས་པ། མ་བསྡམས་པ། སེམས་གཡེངས་པ། ནེམ་ནུར་གྱིས་འཁོར་བ། ཐེ་ཚོམ་མང་བ། དད་པ་མེད་པ། དགེ་སྦྱོང་གི་དྲི་མར་གྱུར་པ། དགེ་སྦྱོང་གི་ཚུལ་དང་མི་འདྲ་བ་དག་འབྱུང་སྟེ། དེ་དག་ནི་བྱང་ཆུབ་སེམས་དཔའ་མའི་རུམ་དུ་འགྲོ་བ་ཡོངས་སུ་དག་པ་འདི་ལྟ་བུ་ཐོས་ནས་ཡིད་མི་ཆེས་ཤིང་དེ་དག་ཕྱོགས་གཅིག་ཏུ་ཚོགས་ནས་གཅིག་ལ་གཅིག་འདི་སྐད་དུ། ཀྱེ་ཁྱེད་ཅག་འདི་ལྟ་བུའི་མི་རིགས་པ་ལ་ལྟོས། བྱང་ཆུབ་སེམས་དཔའ་མའི་མངལ་ན་འདུག་པ་བཙོག་པའི་ཁུ་ཤུགས་དང་འདྲེས་པ་ལ་ཡང་འདི་ལྟ་བུའི་ལོངས་སྤྱོད་ཡོད་ཅེས་བྱ་བ་དང་། དེ་འབྱུང་བའི་ཚེ་མའི་གློ་གཡས་པ་ནས་མངལ་གྱི་དྲི་མས་མ་གོས་
པར་བྱུང་ཞེས་བྱ་བ་འདི་རིགས་པར་ཇི་ལྟར་འགྱུར་ཞེས་ཟེར་བར་འགྱུར་ཏེ། སྐྱེས་བུ་གླེན་པ་དེ་དག་ནི་སེམས་ཅན་ལེགས་པར་བྱས་པའི་ལས་དང་ལྡན་པ་རྣམས་ཀྱི་ལུས་མི་གཙང་བའི་ཁུ་བའི་ནང་དུ་མི་འབྱུང་ངོ་ཞེས་བྱ་བར་མི་ཤེས་སོ། །དགེ་སློང་དག་སེམས་ཅན་དམ་པ་དེ་ལྟ་བུ་དག་གི་མངལ་དུ་འགྲོ་བ་དང་མངལ་ན་གནས་པ་ནི་ཤིན་ཏུ་ཡང་བཟང་བ་ཡིན་ནོ། །བྱང་ཆུབ་སེམས་དཔའ་རྣམས་ནི་སེམས་ཅན་རྣམས་ལ་སྙིང་བརྩེ་བས་མིའི་འཇིག་རྟེན་དུ་སྐྱེ་སྟེ། ལྷར་གྱུར་པ་ཉིད་ཀྱིས་ཆོས་ཀྱི་འཁོར་ལོ་མི་སྐོར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་སེམས་ཅན་རྣམས་ཞུམ་པར་འགྱུར་ཞིང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ནི་ལྷར་གྱུར་པ་ཡིན་གྱི། བདག་ཅག་ནི་མི་ཙམ་དུ་ཟད་པས་ན། བདག་ཅག་གིས་གནས་དེ་ལྟ་བུ་ཡོངས་སུ་རྫོགས་པར་བྱ་བར་མི་ནུས་སོ། །ཞེས་ཞུམ་པར་འགྱུར་དུ་འོང་བའི་ཕྱིར་ཏེ། སྐྱེས་བུ་གླེན་པ་ཆོས་ཀྱི་རྐུན་པོར་གྱུར་པ་དེ་དག་འདི་སྙམ་དུ་སེམས་ཅན་དེ་ནི་བསམ་གྱིས་མི་ཁྱབ་པ་སྟེ། དེ་ནི་བདག་ཅག་གིས་ཚོད་གཟུང་བར་བྱ་བ་མ་ཡིན་ནོ་སྙམ་དུ་མི་སེམས་སོ། །ཀུན་དགའ་བོ་དེ་དག་ནི་དེའི་ཚེ་སངས་རྒྱས་ཀྱི་ཆོ་འཕྲུལ་ལའང་ཡིད་མི་ཆེས་པར་འགྱུར་ན། དེ་བཞིན་གཤེགས་པ་བྱང་ཆུབ་སེམས་དཔར་གྱུར་པའི་བྱང་ཆུབ་སེམས་དཔའི་ཆོ་འཕྲུལ་ལྟ་སྨོས་ཀྱང་ཅི་དགོས་ཏེ། ཀུན་དགའ་བོ་ད་ལྟར་སྐྱེས་བུ་གླེན་པ་རྙེད་པ་དང་། བཀུར་སྟི་དང་ཚིགས་སུ་བཅད་པའི་ཟིལ་གྱིས་ནོན་པ། མི་གཙང་བར་བྱིང་བ། རིམ་གྲོའི་ཟིལ་གྱིས་ནོན་པ། མ་རབས་ཀྱི་ངང་ཚུལ་ཅན་དེ་དག་སངས་རྒྱས་ཀྱི་ཆོས་སྤོང་ཞིང་བསོད་ནམས་མ་ཡིན་པའི་མངོན་པར་འདུ་བྱ་བ་མང་པོ་ཇི་སྙེད་ཅིག་མངོན་པར་འདུ་བྱེད་པ་ལ་ལྟོས།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་ལྔ་པ། ཀུན་དགའ་བོས་གསོལ་བ། བཅོམ་ལྡན་འདས་མ་བྱུང་བའི་དུས་ན། འདི་ལྟ་བུའི་མདོ་སྡེ་བཟང་པོ་ལ་ཡང་སྤོང་ཞིང་མི་སྙན་པར་བརྗོད་པ་དེ་ལྟ་བུའི་དགེ་སློང་དག་ཀྱང་འབྱུང་བ་ལགས་པ་ལྟ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དག་ནི་མདོ་སྡེ་འདི་ལྟ་བུ་སྤོང་ཞིང་མི་སྙན་པ་བརྗོད་པར་ཡང་མ་ཟད་དེ། སྡིག་པ་རྣམ་པ་དུ་
མ་མངོན་པར་འདུ་བྱ་བ་མངོན་པར་འདུ་བྱེད་ཅིང་དགེ་སྦྱོང་གི་དངོས་པོ་དོན་དུ་མི་གཉེར་བ་དག་ཀྱང་འབྱུང་བར་འགྱུར་རོ། །གསོལ་པ་བཅོམ་ལྡན་འདས་འོ་ན་སྐྱེས་བུ་དམ་པ་མ་ལགས་པ་དེ་འདྲ་བ་དེ་དག་གི་འགྲོ་བ་ནི་ཅི་འདྲ་བ་ཞིག་ཏུ་འགྱུར། ཚེ་རབས་འཕོས་ནས་ནི་ཇི་ལྟ་བུ་ཞིག་ཏུ་མཆི། བཅོམ་ལྡན་འདས་ཀྱིས་བཀའ་སྩལ་པ། དེ་དག་ནི་སངས་རྒྱས་ཀྱི་བྱང་ཆུབ་མེད་པར་བྱས་ཏེ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་མི་སྙན་པས་སྐུར་པ་བཏབ་པའི་འགྲོ་བ་གང་ཡིན་པའི་འགྲོ་བ་དེར་འགྲོ་བར་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོ་སྤུ་གཡོས་ནས་སངས་རྒྱས་ལ་ཕྱག་འཚལ་ལོ་ཞེས་བརྗོད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྐྱེས་བུ་དམ་པ་མ་ལགས་པ་དེ་དག་གི་སྤྱོད་པ་འདི་དག་ཐོས་ནས་བདག་ནི་བརྒྱལ་བ་དང་འདྲ་བར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དག་གི་སྤྱོད་པ་ནི་མཉམ་པར་མི་འགྱུར་ཞིང་། སེམས་ཅན་དེ་དག་ནི་མི་མཉམ་པའི་སྤྱོད་པ་ཅན་དུ་འགྱུར་རོ། །ཀུན་དགའ་བོ་དེ་དག་ཚུལ་དང་མི་འདྲ་བའི་སྤྱོད་པ་དེས་མནར་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་མདོ་སྡེ་འདི་ལྟ་བུ་འདི་དག་ཐོས་ནས་མ་མོས་ཤིང་ཡིད་མི་ཆེས་པ་དང་། སྤོང་བ་དེ་དག་ནི་ཤི་འཕོས་མ་ཐག་ཏུ་མནར་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། ཀུན་དགའ་བོ་དེ་བཞིན་གཤེགས་པ་ལ་ནི་ཚད་དུ་མ་བྱེད་ཅིག །དེ་ཅིའི་ཕྱིར་ཞེ་ན། །ཀུན་དགའ་བོ་དེ་བཞིན་གཤེགས་པ་ནི་ཚད་མེད་ཅིང་ཟབ་ལ་རྒྱ་ཆེ་ཞིང་གཏིང་དཔག་དཀའ་བའོ། །ཀུན་དགའ་བོ་ལ་ལ་ཞིག་གིས་མདོ་སྡེ་འདི་ལྟ་བུ་འདི་དག་ཐོས་ནས་དགའ་བ་དང་། མཆོག་ཏུ་དགའ་བ་དང་། དད་པ་སྐྱེ་བའི་སེམས་ཅན་དེ་དག་གིས་ནི་ཐོབ་པ་ལེགས་པར་ཐོབ་པ་ཡིན་ཏེ། དེ་དག་གི་འཚོ་བ་ནི་དོན་ཡོད་པའོ། །དེ་དག་གི་མིའི་དངོས་པོ་ནི་དོན་ཡོད་པའོ། །དེ་དག་གི་སྤྱོད་པ་ལེགས་པར་སྤྱད་པའོ། །དེ་དག་གིས་ནི་སྙིང་པོ་བླངས་སོ། །དེ་དག་ནི་ངན་སོང་གསུམ་ལས་གྲོལ་བའོ། །དེ་དག་ནི་དེ་
བཞིན་གཤེགས་པའི་སྲས་སུ་འགྱུར་རོ། །དེ་དག་གིས་ནི་དགོས་པ་ཐམས་ཅད་ཡོངས་སུ་ཐོབ་བོ། །དེ་དག་གིས་དད་པ་ཐོབ་པ་ནི་དོན་ཡོད་དོ། །དེ་དག་གིས་ནི་ཡུལ་འཁོར་གྱི་ཟས་ལེགས་པར་ཟོས་སོ། །དེ་དག་གིས་ནི་སེམས་ཅན་དམ་པ་རྣམས་ལ་ལེགས་པར་མོས་པ་ཡིན་ནོ། །དེ་དག་ནི་བདུད་ཀྱི་ཞགས་པ་གཏུབས་པ་ཡིན་ནོ། །དེ་དག་ནི་འཁོར་བའི་འབྲོག་དགོན་པ་ལས་རྒལ་ཏོ། །དེ་དག་གིས་ནི་མྱ་ངན་གྱི་ཟུག་རྔུ་ཕྱུང་ངོ་། །དེ་དག་གིས་ནི་མཆོག་ཏུ་དགའ་བའི་དངོས་པོ་རྗེས་སུ་ཐོབ་བོ། །དེ་དག་གིས་ནི་སྐྱབས་སུ་འགྲོ་བ་ལེགས་པར་བླངས་སོ། དེ་དག་ནི་སྦྱིན་པའི་གནས་ཡིན་ཏེ་མཆོད་པར་འོས་པའོ། །དེ་དག་ནི་འཇིག་རྟེན་ན་འབྱུང་བར་དཀོན་པའོ། །དེ་དག་ནི་འཇིག་རྟེན་ན་སྦྱིན་པའི་གནས་སུ་གཟུང་བའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་ཆོས་འཇིག་རྟེན་ཐམས་ཅད་དང་མི་འཐུན་པ་རྣམ་པ་འདི་ལྟ་བུ་འདི་ལ་དད་པའི་ཕྱིར་རོ། །ཀུན་དགའ་བོ་སེམས་ཅན་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ཡིན་ཏེ། ཀུན་དགའ་བོ་སེམས་ཅན་དེ་དག་ནི་ང་དང་ཚེ་རབས་འགའ་ཞིག་ཏུ་འགྲོགས་པར་གྱུར་པའི་གྲོགས་པོ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་ལ་ལ་ནི་ཐོས་པ་ཙམ་གྱིས་དགའ་ཞིང་ཡིད་དུ་འོང་བ་ཡོད་ཀྱི་མཐོང་ན་མ་ཡིན་ནོ། །ཀུན་དགའ་བོ་ལ་ལ་ནི་མཐོང་བས་དགའ་ཞིང་ཡིད་དུ་འོང་བ་ཡོད་ཀྱི་ཐོས་པས་ནི་མ་ཡིན་ནོ། །ཀུན་དགའ་བོ་ལ་ལ་ནི་མཐོང་ན་ཡང་དགའ་ཞིང་ཡིད་དུ་འོང་ལ་ཐོས་ན་ཡང་དགའ་ཞིང་ཡིད་དུ་འོང་བ་ཡོད་དོ། །ཀུན་དགའ་བོ་གང་ཡང་རུང་སྟེ། ལ་ལ་ཞིག་མཐོང་ངམ། ཐོས་ནས་དགའ་ཞིང་ཡིད་དུ་འོང་བར་གྱུར་ན། ཁྱོད་ཀྱིས་དེ་ལ་འདི་ལྟར་དེ་དག་ནི་ང་དང་ཚེ་རབས་འགའ་ཞིག་ཏུ་འགྲོགས་པའི་གྲོགས་པོ་ཡིན་པར་ངེས་པར་རྟོགས་པར་བྱ་སྟེ། དེ་དག་ནི་དེ་བཞིན་གཤེགས་པས་གཟིགས་སོ། །དེ་དག་ནི་དེ་བཞིན་གཤེགས་པས་དགྲོལ་བར་བྱ་བའོ། །དེ་དག་ནི་དེ་བཞིན་གཤེགས་པ་དང་ཡོན་ཏན་གྱི་ཆ་མཉམ་པའོ། །དེ་དག་ནི་དེ་བཞིན་གཤེགས་པ་ལ་སྐྱབས་སུ་དོང་བའོ། །དེ་དག་ནི་དེ་བཞིན་གཤེགས་པས་བཟུང་བའོ། །ཀུན་དགའ་བོ་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ཉིད་ཀྱི་ཚེ་ཡང་སེམས་ཅན་སུ་ཡང་རུང་སྟེ།
འཇིགས་པས་ཉམ་ཐག་ཅིང་འོངས་ནས་མི་འཇིགས་པ་སློང་ན་སེམས་ཅན་དེ་དག་ལ་ངས་མི་འཇིགས་པ་བྱིན་པར་གྱུར་ན། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་ལྟ་སྨོས་ཀྱང་ཅི་དགོས། ཀུན་དགའ་བོ་དད་པ་ལ་བརྩོན་པར་གྱིས་ཤིག །འདི་ནི་དེ་བཞིན་གཤེགས་པས་བཅོལ་བའོ། །ཀུན་དགའ་བོ་ཁྱོད་ཀྱིས་བྱ་བ་ཅི་ཡོད་པ་དེ་དག་ནི་དེ་བཞིན་གཤེགས་པས་བྱས་སོ། །ང་རྒྱལ་གྱི་ཟུག་རྔུ་ནི་དེ་བཞིན་གཤེགས་པས་བསལ་ཏོ། །ཀུན་དགའ་བོ་གྲོགས་པོའི་གཏམ་ཐོས་པ་ཙམ་གྱིས་ཀྱང་དཔག་ཚད་བརྒྱའི་ལམ་དུ་ཡང་འགྲོ་སྟེ། ཐོས་པས་ཀྱང་དགའ་བར་འགྱུར་བ་ཡིན་ན། སྔར་མ་མཐོང་བ་ལས་མཛའ་བོ་མཐོང་བར་གྱུར་ན་སྨོས་ཀྱང་ཅི་དགོས་ཏེ། གང་ང་ལ་རྟེན་ཅིང་དགེ་བའི་རྩ་བ་སྐྱེད་པར་བྱེད་པ་དེ་དག་ནི་མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་མཁྱེན་ཅིང་སེམས་ཅན་དེ་དག་ནི་དེ་བཞིན་གཤེགས་པ་རྣམས་ཀྱི་སྔོན་གྱི་མཛའ་བོ་སྟེ། དེ་དག་ནི་བདག་ཅག་གི་ཡང་མཛའ་བོ་ཡིན་ནོ་སྙམ་དུ་དགོངས་སོ། །དེ་ཅིའི་ཕྱིར་ཞེ་ན། ཀུན་དགའ་བོ་མཛའ་བོ་གང་ཡིན་པ་དེ་ནི་མཛའ་བོ་ལ་སྡུག་ཅིང་ཡིད་དུ་འོང་བ་ཡིན་ནོ། །མཛའ་བོ་དེའི་གང་སྡུག་པའི་གྲོགས་པོ་དེ་ཡང་དེ་ལ་སྡུག་ཅིང་ཡིད་དུ་འོང་བ་ཡིན་ནོ། །ཀུན་དགའ་བོ་དེ་ལྟ་བས་ན་ཁྱོད་མོས་པར་བྱ་ཞིང་ཁོང་དུ་ཆུད་པར་བྱས། །དད་པ་ཙམ་ཡང་སྐྱེད་པར་གྱིས་ཤིག །ངས་མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་ཡང་གཏད་དེ། །དེ་དག་ཀྱང་འདི་དག་ནི་བདག་ཅག་གི་ཡང་མཛའ་བོ་ཡིན་ནོ་ཞེས་བྱ་བར་མཁྱེན་ཅིང་། །བསམ་པ་རྫོགས་པར་མཛད་པར་འགྱུར་རོ། །ཀུན་དགའ་བོ་འདི་ལྟ་སྟེ། དཔེར་ན་སྐྱེས་བུ་ལ་ལ་ཞིག་ལ་བུ་དག་ཉན་ཅིང་། འཐུན་པར་འཛིན་པ་གཅིག་པུ་ཞིག་བདོག་པར་གྱུར་ལ། སྐྱེས་བུ་དེ་ཡང་མཛའ་བོ་མང་བ་ཞིག་ཡིན་ན། ཕ་དེ་ཤིར་ཟིན་ཀྱང་ཕའི་མཛའ་བོས་ཡོངས་སུ་བཟུང་བའི་བུ་དེ་ནི་ཕོངས་པར་མི་འགྱུར་རོ། །ཀུན་དགའ་བོ་དེ་བཞིན་དུ་གང་སུ་ཡང་རུང་སྟེ་ང་ལ་དད་ན་དེ་དག་ངས་བཟུང་བ་ཡིན་ཏེ། །དེ་དག་ནི་ངའི་མཛའ་བོའོ། །དེ་དག་ནི་ང་ལ་སྐྱབས་སུ་དོང་བའོ། །དེ་བཞིན་གཤེགས་པ་ནི་མཛའ་བོ་མང་པོ་མངའ་བ་སྟེ། དེ་
བཞིན་གཤེགས་པའི་མཛའ་བོ་དེ་དག་ཀྱང་ཡང་དག་པར་གསུང་ཞིང་བརྫུན་དུ་མི་གསུང་བས་དེ་བཞིན་གཤེགས་པའི་མཛའ་བོ་དེ་དག་ཀྱང་ཡང་དག་པར་གསུང་བ་མ་འོངས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དེ་དག་རྗེས་སུ་གཏད་ཀྱིས། ཀུན་དགའ་བོ་དད་པ་ལ་བརྩོན་པར་གྱིས་ཤིག །འདི་ནི་ངས་ཁྱོད་ལ་བཅོལ་བའོ། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་པའི་ཚེ། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་མང་པོ་དག་ནམ་མཁའི་དཀྱིལ་ན་གནས་ཤིང་ལྷ་མོ་སྒྱུ་འཕྲུལ་ལ་ལྷའི་མེ་ཏོག་དང་། སྤོས་དང་། ཕྲེང་བ་དང་། བྱུག་པ་དང་། གོས་དང་། རྒྱན་གྱིས་མངོན་པར་འཐོར་བར་གྱུར་ཏོ། །དེ་ལ་འདི་སྐད་ཅེས་བྱ་སྟེ། དགེ་བ་དྲི་མེད་རྣམ་དག་གསེར་གྱི་འོད་ལྡན་ཉི་ཟླའི་འོད་ལྡན་པ། །ལྷ་ཡི་བུ་མོ་སྒྲ་དབྱངས་སྙན་བརྗོད་སྟོང་ཕྲག་དྲུག་ཅུ་དེ་ཡི་ཚེ། །སྐད་ཅིག་དེ་ལ་ལུམ་བི་ནིར་ལྷགས་ལྷ་མོ་སྒྱུ་འཕྲུལ་དེ་ལ་སྨྲ། །མི་དགྱེས་མ་མཛད་རབ་ཏུ་དགྱེས་མཛད་བདག་ཅག་ཁྱོད་ཀྱི་ཕྱག་རྗེད་ལགས། །བདག་ཅག་རྣམས་ཀྱིས་བགྱི་བ་ཅི་མཆིས་ཅི་བགྱི་ཅི་འཚལ་བཀའ་སྩོལ་ཅིག །བདག་ཅག་ཁྱོད་ཀྱི་ཕྱག་རྗེད་ནུས་ལྡན་ཉེ་བའི་སེམས་དང་ལྡན་པ་ལགས། །ཁྱོད་ཀྱིས་དགྱེས་ཤིང་བདེ་བའི་ཉམས་བསྐྱེད་མི་དགྱེས་ཐམས་ཅད་སྤང་བར་གསོལ། །རྒ་ཤི་སེལ་བའི་སྨན་པ་དམ་པ་དེ་རིང་ལྷ་མོ་མྱུར་སྐྱེད་འགྱུར། །ཇི་ལྟར་ཞུགས་ཤིང་འདི་རྣམས་ཁ་འབུས་ས་ལ་མེ་ཏོག་རྒྱས་གྱུར་ཅིང་། །སྟོང་ཕྲག་བགྲངས་པའི་ལྷ་རྣམས་དྲུང་ན་གནས་ཤིང་ལག་པ་འདུད་པ་དང་། །ཇི་ལྟར་དོག་ས་རྒྱ་མཚོར་བཅས་ཏེ་རྣམ་པ་དྲུག་ཏུ་གཡོས་ལགས་ན། །ཁྱོད་ལས་ལྷ་ཡུལ་མི་ཡུལ་སྒྲ་གྲགས་འཇིག་རྟེན་འདས་པའི་སྲས་བལྟམ་འགྱུར། །ཇི་ལྟར་རྣམ་དག་འོད་ཀྱིས་རྣམ་པར་མཛེས་ཤིང་གསེར་གྱི་ཁ་དོག་བཟང་། །ནམ་མཁའི་དཀྱིལ་ལས་ཡིད་འོང་སིལ་སྙན་བརྒྱ་དག་མ་དཀྲོལ་སྒྲ་འབྱིན་དང་། །ཇི་ལྟར་དག་ཅིང་གཙང་ལ་འདོད་ཆགས་བྲལ་བའི་ལྷ་རྣམས་བརྒྱ་སྟོང་ཡང་། །དགའ་སེམས་ཕྱག་འཚལ་བ་ལས་དེ་རིང་འཇིག་རྟེན་ཀུན་ཕན་བལྟམ་པར་གྱུར། །བརྒྱ་བྱིན་ཚངས་པ་འཇིག་རྟེན་སྐྱོང་དང་དེ་བཞིན་ལྷ་རྣམས་གཞན་དག་ཀྱང་། །དགའ་ཞིང་བྲོད་པའི་སེམས་ཀྱིས་དྲུང་དུ་གནས་ནས་ལག་པ་འདུད་པ་བགྱིད། །སྐྱེས་བུ་
སེང་གེ་བརྟུལ་ཞུགས་གྲུབ་པ་དེ་ཡང་རྩིབ་ལོགས་གཡས་ནས་བྱུང་། །གསེར་གྱི་རི་དང་འདྲ་ཞིང་དག་པའི་འོད་དང་ལྡན་པའི་འདྲེན་པ་བལྟམ། །བརྒྱ་བྱིན་ཚངས་པ་གཉིས་ཀྱིས་ལག་པ་དར་ཏེ་ཐུབ་པ་དེ་ཡང་བླངས། །ཞིང་རྣམས་བརྒྱ་སྟོང་འོད་བཟངས་བཀྱེ་བས་ཐམས་ཅད་རབ་ཏུ་གཡོས་པར་གྱུར། །ངན་སོང་གསུམ་གྱི་སེམས་ཅན་རྣམས་ཀྱང་བདེ་ཞིང་སྡུག་བསྔལ་མེད་གྱུར་ཏེ། །ལྷ་རྣམས་བརྒྱ་ཕྲག་སྟོང་གིས་མེ་ཏོག་གཏོར་ཏེ་གོས་ཀྱི་གཡབ་མོ་ཕྱུང་། །དེ་ཚེ་ས་འདི་སྟོབས་མཐུ་ལྡན་ཞིང་རྡོ་རྗེའི་དངོས་གནས་པད་མ་མཛེས། །སྣ་ཚོགས་མངོན་མཐོན་དགེ་ལ་འདྲེན་པ་འཁོར་ལོའི་མཚན་རིས་ཞབས་བཞག་སྟེ། །གོམ་པ་བདུན་དུ་བཞུད་ནས་ཚངས་པའི་སྒྲ་དབྱངས་དམ་པ་གསུངས་པ་ནི། །རྒ་ཤི་སེལ་བའི་སྨན་པ་དམ་པ་སེམས་ཅན་མཆོག་ཏུ་བདག་འགྱུར་རོ། །ཚངས་པའི་མཆོག་དང་བརྒྱ་བྱིན་ལྷ་མཆོག་ནམ་མཁའི་དཀྱིལ་ན་འཁོད་གྱུར་ཏེ། །གཙང་ཞིང་དང་ལ་མཛེས་པའི་སྤོས་ཆུ་དག་གིས་འདྲེན་པའི་སྐུ་ཡང་བསིལ། །ཀླུ་ཡི་རྒྱལ་གཉིས་བར་སྣང་གནས་ནས་གྲང་དྲོའི་ཆུ་ཡི་རྒྱུན་ཀྱང་གཏོར། །ལྷ་རྣམས་བརྒྱ་སྟོང་དག་ཀྱང་སྤོས་ཆུ་དག་གིས་འདྲེན་པའི་སྐུ་བསིལ་བྱེད། །འཇིག་རྟེན་སྐྱོང་བ་རྣམས་ཀྱང་རིམ་གྲོ་དམ་པར་ལག་པ་བཟང་པོས་ལེན། །སྟོང་གསུམ་འདི་ཡང་རྒྱུ་དང་མི་རྒྱུ་བཅས་པར་རབ་ཏུ་གཡོས་པར་གྱུར། །མཛེས་པའི་འོད་རྣམས་བཀྱེ་བས་ངན་སོང་རྣམས་ཀྱང་རབ་ཏུ་ཞི་བར་འགྱུར། །འཇིག་རྟེན་རྣམ་པར་འདྲེན་པ་བལྟམ་པས་ཉོན་མོངས་སྡུག་བསྔལ་དེ་དག་ཞི། །མི་ཡི་འདྲེན་པ་རྒྱལ་བ་ལ། ལྷ་རྣམས་མེ་ཏོག་སིལ་མ་འཐོར། །སྟོབས་དང་བརྩོན་འགྲུས་ལྡན་པ་ཡི། །བརྟན་པ་གོམ་པ་བདུན་དུ་བཞུད། །ས་ཕྱོགས་གང་དུ་ཞབས་བཞག་པ། །དེར་ནི་པད་མ་བཟང་པོའི་མཆོག །རིན་ཆེན་ཀུན་གྱིས་བརྒྱན་པ་དག །ས་ལས་མངོན་དུ་འཐོན་པར་གྱུར། །དེ་ལྟར་གོམ་པ་བདུན་བཞུད་ནས། །རྒ་དང་འཆི་བ་སེལ་བ་ཡི། །སྨན་པ་དམ་པ་འདིར་བྱུང་ཞེས། །ཚངས་པའི་དབྱངས་ཀྱིས་གསུང་བརྗོད་དོ། །འཇིགས་མེད་ཕྱོགས་སུ་རྣམ་གཟིགས་ཏེ། །དེ་ནས་དོན་ལྡན་གསུང་ཕྱུང་བ། །ང་ནི་འཇིག་རྟེན་ཀུན་གྱི་གཙོ། །འཇིག་རྟེན་ཕུལ་ཕྱིན་རྣམ་པར་འདྲེན། །ང་ཡི་སྐྱེ་མཐའ་འདི་ཡིན་ཞེས། །མི་ཡི་འདྲེན་པས་
འཛུམ་པ་མཛད། །ལྷ་དབང་བཅས་དང་འཇིག་རྟེན་སྐྱོང་དག་རབ་ཏུ་དད་སེམས་སྐྱེས། །སྤོས་ཆུ་མཆོག་གིས་འཇིག་རྟེན་ཕན་པའི་དོན་མཛད་སྐུ་ཡང་བསིལ། །ཀླུ་ཡི་དབང་པོ་རྣམས་ཀྱང་ལྷན་ཅིག་འཐུན་པར་བྱས་ནས་ནི། །དྲི་ཞིམ་སྤོས་ཆུ་དག་གི་རྒྱུན་གྱིས་སྐུ་ཡང་བསིལ་བ་བྱས། །ལྷ་གཞན་ཁྲག་ཁྲིག་དག་ཀྱང་བར་སྣང་ལ་ནི་གནས་ནས་སུ། །དྲི་ཞིམ་སྤོས་ཆུ་མཆོག་གི་རྒྱུན་གྱིས་རང་བྱུང་སྐུ་ཡང་བསིལ། །གདུགས་དཀར་ཡངས་དང་རྔ་ཡབ་བཟང་པོ་དམ་པ་ཐོགས་ནས་ནི། །བར་སྣང་འཁོད་དེ་ལྷ་རྣམས་མི་ཡི་ཁྱུ་མཆོག་སྐུ་བསིལ་བྱེད། །སྐྱེས་བུ་གཅིག་ཅིག་རིངས་པར་འོངས་ནས་ཟས་གཙང་དེ་ལ་དགར་སྨྲས་པ། །ལྷ་ཅིག་འབྱོར་པ་རྒྱས་གྱུར་ཁྱོད་ཀྱི་སྲས་ནི་མཚན་གྱིས་བརྒྱན་པ་བལྟམ། །དེ་ནི་ངེས་པར་འཁོར་ལོས་སྒྱུར་བའི་དབང་ཕྱུག་གདུང་རབས་རིན་ཆེན་འཚོབ། །འཛམ་བུའི་གླིང་འདི་གདུགས་མང་གཅིག་འགྱུར་ཕས་ཀྱི་དགྲ་ཡང་མ་མཆིས་འགྱུར། །དེ་ནས་སྐྱེས་བུ་གཉིས་འོངས་ཟས་གཙང་རྒྱལ་པོའི་མདུན་དུ་དེ་སོང་སྟེ། །ལྷ་ཅིག་འབྱོར་པ་རྒྱས་གྱུར་ཤཱཀྱའི་རིགས་སུ་རྒྱལ་བུ་སྐྱེས་གྱུར་ན། །ཤཱཀྱ་རྣམས་ཀྱི་གྲོང་དུ་རོགས་པ་འབུམ་ཕྲག་ལྔ་ནི་བཙས་པ་སྐྱེས་པར་གྱུར། །ཀུན་ཀྱང་གཞན་གྱིས་མི་ཐུབ་སྟོབས་དང་ལྡན་ཞིང་ཚན་པོ་ཆེ་དང་འདྲ། །སྐྱེས་བུ་གཞན་འོངས་སྨྲས་པ་བདག་ལས་དགྱེས་པའི་སྒྲ་གསོན་ལྷ། །འདུན་པ་ཅན་ལ་སོགས་པ་འབངས་ཀྱི་བྱིས་པ་བརྒྱད་བརྒྱ་བཙས་པར་གྱུར། །བསྔགས་ལྡན་གྱི་ནི་ཟླ་བོ་ཆིབས་རྟ་སྟོང་ཕྲག་བཅུ་དག་འབྲངས་གྱུར་ཏེ། །ཆིབས་མཆོག་དམ་པ་གསེར་གྱི་འོད་ལྡན་རྔ་རྔོག་ལྕང་ལོར་འཁྲིལ་བ་ལགས། །མཐའ་འཁོབ་ཁམས་ཀྱི་རྒྱལ་པོ་སྟོང་ཕྲག་ཉི་ཤུ་དག་ཀྱང་དེ་བཞིན་དུ། །རྒྱལ་པོ་ཁྱོད་ཀྱི་ཞབས་ཀྱི་དྲུང་དུ་མཆིས་ཀྱིས་ལེགས་པར་རྒྱལ་གྱུར་ལྷ། །ད་ནི་བདག་མཆིས་སུག་ལས་ཅི་བགྱི་རྒྱལ་པོས་བདག་ལ་བཀའ་སྩལ་གསོལ། རྒྱལ་པོ་ཁྱོད་འདིར་མངའ་བརྙེས་བདག་འབངས་ཇོ་བོ་ལྷ་ཅིག་རྒྱལ་བར་སྤྱོན། །གསེར་གྱི་དྲ་བས་མཛེས་པའི་གླང་པོ་དམ་པ་སྟོང་ཕྲག་ཉི་ཤུ་དག །ནམ་མཁའ་ལས་ནི་སྒྲ་དག་འབྱིན་ཅིང་རྒྱལ་པོའི་ཁབ་ཏུ་མགྱོགས་སུ་མཆིས། །་སྦྲུམ་མ་ལ་སོགས་ནག་གུ་ཟལ་ལུ་དག་དང་བེའུ་ནི་དྲུག་སྟོང་
འབྲངས། །ལྷ་ཅིག་ལྷ་མཆོག་བལྟམ་ཞིང་དེ་དག་བཙས་པས་རྒྱལ་ཁབ་ཕུན་སུམ་ཚོགས། །རྗེ་ཅིག་རྒྱལ་པོར་གཤེགས་ཏེ་བསོད་ནམས་གཟི་འོད་ལྡན་པ་བལྟམ་པ་ཡི། །ཡོན་ཏན་དག་ནི་མཐོང་བར་གྱུར་ནས་ལྷ་དང་མི་རྣམས་སྟོང་བགྲངས་པ། །རབ་ཏུ་དགའ་བར་གྱུར་དང་ཀུན་ལ་ཉིད་ཀྱིས་ལེགས་པར་གཟིགས་སུ་གསོལ། །མྱུར་དུ་རྒྱལ་གྱུར་ཅིག་ཅེས་བྱང་ཆུབ་དམ་པ་མྱ་ངན་མེད་པར་ཞུགས། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་པ་དང་སྐད་ཅིག་དེ་ལ་སྦྱིན་པ་གཏོང་བ་ཡང་དེ་བས་རྒྱ་ཆེར་གྱུར་ཏོ། །ཡ་རབས་ཀྱི་རིགས་ལྔ་བརྒྱ་ཡང་བཙས་པར་གྱུར་ཏོ། །གྲགས་ལྡན་ལ་སོགས་པ་བུ་མོ་ཁྲི་དང་། བྲན་མོ་བརྒྱད་བརྒྱ་དང་། འདུན་པ་ལ་སོགས་པ་བྲན་ལྔ་བརྒྱ་དང་། རྟེའུ་མོ་ཁྲི་དང་། བསྔགས་ལྡན་ལ་སོགས་པ་རྟེའུ་ཕོ་ཁྲི་དང་། བ་ལང་གི་ཕྲུག་གུ་མོ་ལྔ་བརྒྱ་དང་། བ་ལང་གི་ཕྲུག་གུ་ཕོ་ལྔ་བརྒྱ་པོ་དག་ཀྱང་བཙས་ཤིང་འབྲངས་པར་གྱུར་ནས་དེ་དག་ཐམས་ཅད་རྒྱལ་པོ་ཟས་གཙང་མས་སྣ་གྲངས་ཡི་གེར་བྲིས་ཏེ་སྲས་བུ་གཞོན་ནུ་རྩེན་པའི་ཕྱིར་བྱིན་པར་གྱུར་ཏོ། །བྱང་ཆུབ་སེམས་དཔའི་ལོངས་སྤྱོད་ཀྱི་དོན་དུ་བྱང་ཆུབ་སེམས་དཔའ་ཉིད་ཀྱི་མཐུས་གླིང་བྱེ་བ་བརྒྱ་ཕྲག་བཞིའི་དབུས་ཀྱི་ས་ཕྱོགས་ནས་ཨ་ཤྭད་ཐའི་སྡོང་པོ་སྐྱེས་པར་གྱུར་ཏོ། །གླིང་ཕྲ་མོ་རྣམས་སུ་ཡང་ཙན་དན་གྱི་ནགས་ཚལ་སྐྱེས་པར་གྱུར་ཏོ། །བྱང་ཆུབ་སེམས་དཔའི་ལོངས་སྤྱོད་ཀྱི་དོན་དུ་གྲོང་ཁྱེར་གྱི་ཁོ་ར་ཡུག་ཏུ་ཡང་སྐྱེད་མོས་ཚལ་ལྔ་བརྒྱ་དག་བྱུང་བར་གྱུར་ཏོ། །གཏེར་ལྔ་སྟོང་ཡང་སའི་འོག་ནས་གྱེན་དུ་འབུས་ཏེ་སྒོ་སྟོན་པར་གྱུར་ཏོ། །དེ་ལྟར་རྒྱལ་པོ་ཟས་གཙང་མ་དེའི་དོན་བསམ་པ་གང་ཡིན་པ་དེ་དག་ཐམས་ཅད་ཕུན་སུམ་ཚོགས་པར་གྱུར་ནས་རྒྱལ་པོ་ཟས་གཙང་མ་འདི་སྙམ་དུ་བདག་གི་བུ་གཞོན་ནུ་དེའི་མིང་ཇི་སྐད་ཅིག་གདགས་པར་བྱ་སྙམ་པ་དང་། དེ་འདི་སྙམ་དུ་སེམས་ཏེ། བུ་འདི་སྐྱེས་མ་ཐག་ཏུ་བདག་གི་དོན་ཐམས་ཅད་ཡང་དག་པར་གྲུབ་པར་གྱུར་གྱིས། འདིའི་མིང་ནི་དོན་ཐམས་ཅད་གྲུབ་པར་གདགས་སོ་སྙམ་སྟེ། དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་རིམ་གྲོ་ཆེར་བྱས་ནས་བུ་འདིའི་མིང་དོན་ཐམས་ཅད་གྲུབ་པ་ཞེས་བྱའོ་ཞེས་མིང་དུ་བཏགས་སོ། །དགེ་
སློང་དག་དེ་ལྟར་བྱང་ཆུབ་སེམས་དཔའ་བཙས་ནས་མའི་གློ་གཡས་པ་ཡང་མ་རལ་མ་ཉམས་ཤིང་སྔོན་བཞིན་དུ་གྱུར་ཏོ། །དེར་ཁྲོན་པ་ལན་གསུམ་ལྡུད་པ་དག་ཀྱང་བྱུང་བར་གྱུར། སྤོས་ཀྱི་འབྲུ་མར་གྱི་རྫིང་བུ་དག་ཀྱང་བྱུང་བར་གྱུར་ཏོ། །དེ་ནས་ལྷའི་བུ་མོ་ལྔ་སྟོང་དག་ལྷའི་སྤོས་ཀྱིས་བསྒོས་པའི་འབྲུ་མར་དྲི་ཞིམ་པོ་ཁྱེར་ཏེ་བྱང་ཆུབ་སེམས་དཔའི་མའི་དྲུང་དུ་ལྷག་ནས། བལྟམས་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ། ཞེས་འདྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་བྱུག་པ་དང་། རྣམ་པར་བྱུག་པ་ཐོགས་ཏེ། བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ། ཞེས་འདྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་སྤོས་ཆུས་བཀང་བའི་བུམ་པ་ཐོགས་ཏེ། བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ་ཞེས་འདྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་བྱིས་པའི་གོས་ཐོགས་ཏེ་བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ་ཞེས་འདྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་ལྷའི་བྱིས་པའི་རྒྱན་ཐོགས་ཏེ། བྱང་ཆུབ་སེམས་དཔའི་མའི་དྲུང་དུ་ལྷགས་ནས་བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ་ཞེས་འདྲི་བར་གྱུར་ཏོ། །ལྷའི་བུ་མོ་ལྔ་སྟོང་དག་ཀྱང་གླུ་དབྱངས་ལེན་ཅིང་བྱང་ཆུབ་སེམས་དཔའི་མའི་དྲུང་དུ་ལྷགས་ཏེ་བལྟམ་པ་ལེགས་པར་བལྟམ་མམ། སྐུ་ལ་མི་བདེ་བ་མ་མཆིས་སམ་ཞེས་འདྲི་བར་གྱུར་ཏོ། །འཛམ་བུའི་གླིང་འདི་ན་ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་དང་ལྡན་པ་ཇི་སྙེད་ཅིག་འཁོད་པ་དེ་དག་ཐམས་ཅད་ནམ་མཁའ་ལས་འོངས་ཏེ། རྒྱལ་པོ་ཟས་གཙང་མའི་མདུན་དུ་འཁོད་ནས། རྒྱལ་པོ་འཕེལ་བར་གྱུར་ཅིག་ཅེས་བྱ་བའི་སྒྲ་སྒྲོག་པར་གྱུར་ཏོ། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་ནས་ཞག་བདུན་དུ་ལུམ་བི་ནིའི་ནགས་ཚལ་དུ་ལྷ་དང་མིའི་སིལ་སྙན་དང་། ཕེག་རྡོབ་པས་རིམ་གྲོར་བྱས་སོ། །བཀུར་སྟིར་
བྱས་སོ། །བསྟི་སྟང་དུ་བྱས་སོ། །མཆོད་པར་བྱས་སོ། །བཟའ་བ་དང་། བཅའ་བ་དང་། མྱང་བ་དག་ཀྱང་དྲངས་པར་གྱུར་ཏོ། །ཤཱཀྱའི་ཚོགས་ཐམས་ཅད་ཀྱང་འདུས་ནས་ཀུན་དགའ་བའི་སྒྲ་བརྗོད་པར་གྱུར་ཏོ། །སྦྱིན་པ་དག་ཀྱང་བྱིན་ནོ། །བསོད་ནམས་དག་ཀྱང་བྱེད་དོ། །བྲམ་ཟེ་སུམ་ཁྲི་ཉིས་སྟོང་ཡང་ཉིན་གཅིག་བཞིན་དུ་ཚིམ་པར་བྱས་སོ། །སུ་དག་ཅི་འདོད་པ་དེ་དག་ལ་ཡང་དེ་བྱིན་པར་གྱུར་ཏོ། །བརྒྱ་བྱིན་དང་ཚངས་པ་ཡང་བྲམ་ཟེའི་འཁོར་དེར་བྲམ་ཟེའི་ཁྱེའུའི་གཟུགས་སུ་སྤྲུལ་ཏེ་གྲལ་གྱི་ཐོག་མ་ལ་འཁོད་ནས་བཀྲ་ཤིས་ཀྱི་ཚིགས་སུ་བཅད་པ་འདི་དག་བརྗོད་པར་གྱུར་ཏོ། །ཇི་ལྟར་ངན་སོང་རྣམས་ཞི་ཞིང་། །ཇི་ལྟར་འགྲོ་ཀུན་བདེ་ལས་ན། །འགྲོ་ལ་བདེ་བ་འགོད་པ་ཡི། །བདེ་བ་མཛད་ཅིག་བལྟམ་པར་མངོན། །ཇི་ལྟར་རབ་རིབ་མེད་འོད་ཀྱིས། །ལྷ་དང་ཉི་ཟླའི་འོད་རྣམས་ཀྱང་། ། མི་སྣང་ཟིལ་དུ་རླག་པ་ལས། །བསོད་ནམས་འོད་ཅིག་བྱུང་བར་མངོན། །མིག་མེད་རྣམས་ཀྱང་མཐོང་གྱུར་ཅིང་། །རྣ་བ་འོན་པས་སྒྲ་ཐོས་ལ། །སྨྱོན་པ་རྣམས་ཀྱང་དྲན་ལྡན་ལས། །འཇིག་རྟེན་མཆོད་རྟེན་འགྱུར་བར་མངོན། །ཇི་ལྟར་ཉོན་མོངས་མི་གནོད་ཅིང་། །འགྲོ་བ་བྱམས་པའི་ཡིད་གྱུར་ལས། །ཚངས་པ་བྱེ་བས་མཆོད་འོས་སུ། །གདོན་མི་ཟ་བར་འགྱུར་བར་མངོན། །ས་ལ་མེ་ཏོག་རྒྱས་གྱུར་ཅིང་། །ས་ཡང་མཉམ་པར་གནས་པ་ལས། །འགྲོ་བ་ཀུན་གྱིས་མཆོད་པ་ཡི། །ཐམས་ཅད་མཁྱེན་དུ་འགྱུར་བར་མངོན། །ཇི་ལྟར་འཇིག་རྟེན་འཁྲུག་མེད་ཅིང་། །པད་མ་ཆེན་པོ་འཐོན་པ་ལས། །ངེས་པར་གཟི་བརྗིད་ཆེན་པོ་འདི། །འཇིག་རྟེན་མགོན་དུ་བྱོན་པར་འགྱུར། །ལྷ་ཡི་སྤོས་ཀྱིས་སྤགས་གྱུར་པ། །འཇམ་པའི་རླུང་གི་ངད་ལྡང་ཞིང་། །སེམས་ཅན་ནད་རྣམས་ཞི་གྱུར་ལས། །འདི་ནི་སྨན་པའི་རྒྱལ་པོར་བྱོན། །གཟུགས་ཁམས་གནས་པའི་ལྷ་བརྒྱ་པོ། །འདོད་ཆགས་བྲལ་བ་འདི་དག་ཀྱང་། །ཐལ་མོ་སྦྱར་ཞིང་འདུད་པ་ལས། །འདི་ནི་སྦྱིན་པའི་གནས་སུ་བྱོན། །མི་རྣམས་ཀྱིས་ནི་ལྷ་མཐོང་ཞིང་། །ལྷ་རྣམས་ཀྱིས་ནི་མི་མཐོང་ཡང་། །ཕན་ཚུན་འཚེ་བ་མེད་པ་ལས། །འདི་ནི་དེད་དཔོན་ཆེན་པོར་བྱོན། །མེ་རྣམས་ཞི་བར་གནས་གྱུར་ཅིང་། །ཆུ་ཀླུང་ཐམས་ཅད་མི་གཡོ་
ལ། །ས་ཡང་དལ་བུས་གཡོ་བ་ལས། །འདི་ནི་ཡང་དག་གཟིགས་པར་འགྱུར། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་ནས་ཞག་བདུན་ལོན་པ་དང་། ལྷ་མོ་སྒྱུ་འཕྲུལ་ཤི་བའི་དུས་བྱས་པར་གྱུར་ཏེ། དེ་ཤི་བའི་དུས་བྱས་ནས་སུམ་ཅུ་རྩ་གསུམ་གྱི་ལྷའི་ནང་དུ་སྐྱེས་སོ། །དགེ་སློང་དག་ཁྱེད་འདི་སྙམ་དུ་བྱང་ཆུབ་སེམས་དཔའི་ལན་བོན་གྱིས་ལྷ་མོ་སྒྱུ་འཕྲུལ་འཆི་བའི་དུས་བྱས་སོ། །སྙམ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེའི་ཚེའི་ཚད་ནི་མཐར་ཐུག་པའི་ཕྱིར་རོ། །དགེ་སློང་དག་འདས་པའི་བྱང་ཆུབ་སེམས་དཔའ་རྣམས་ཀྱང་བཙས་ནས་ཞག་བདུན་ལོན་ན་མ་འཆི་བའི་དུས་བྱས་པར་གྱུར་ཏོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སྐྱེས་ཏེ་དབང་པོ་ཡོངས་སུ་རྫོགས་ནས་མངོན་པར་བྱུང་ན་མ་སྙིང་འགས་སུ་འོང་བའི་ཕྱིར་རོ། །དགེ་སློང་དག་དེ་ལྟར་ཞག་བདུན་ལོན་ནས་ཐོག་མ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་ལྷ་མོ་སྒྱུ་འཕྲུལ་བཀོད་པ་ཇི་ལྟ་བུས་སྐྱེད་མོས་ཚལ་གྱི་སར་ཞུགས་པར་གྱུར་པ་དེ་དག་ལས་བྱེ་བ་བརྒྱ་སྟོང་གྱུར་པས་ཀྱང་ལྷག་པའི་བཀོད་པ་ཆེན་པོས་བྱང་ཆུབ་སེམས་དཔའ་གྲོང་ཁྱེར་ཆེན་པོ་སེར་སྐྱའི་གནས་སུ་ཞུགས་སོ། །དེ་ཞུགས་པ་དང་། བུམ་པ་སྤོས་ཆུས་གང་བ་ལྔ་སྟོང་གིས་མདུན་དུ་དྲངས་པར་གྱུར་ཏོ། །དེ་བཞིན་དུ་བུ་མོ་ལྔ་སྟོང་ནི་རྨ་བྱའི་མདོངས་ལག་ན་ཐོགས་ཏེ་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་ཤིང་ཏ་ལའི་ཡལ་ག་ཐོགས་ཤིང་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་སྤོས་ཆུའི་རིལ་བ་བྷྲིང་ག་ར་ཐོགས་ཏེ་ལམ་ཆག་ཆག་གིས་འདེབས་ཤིང་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་ནགས་ཚལ་གྱི་མེ་ཏོག་གི་ཕྲེང་བ་འཕྱང་བ་ཁྱེའུ་ཚང་སྣ་ཚོགས་ཐོགས་ཏེ་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་བཟང་པོར་སྒྱུར་བའི་རིན་པོ་ཆེ་ཐོགས་ཏེ། ལམ་གྱི་བྱི་དོར་བྱེད་ཅིང་མདུན་དུ་འདོང་བར་གྱུར་ཏོ། །བུ་མོ་ལྔ་སྟོང་ནི་སྟན་བཟང་པོ་ཐོགས་ཤིང་མདུན་དུ་འདོང་བར་གྱུར་ཏོ། །བྲམ་ཟེ་ལྔ་སྟོང་ནི་དྲིལ་བུ་ཐོགས་ཏེ་བཀྲ་ཤིས་ཀྱི་སྒྲ་འབྱིན་ཅིང་མདུན་དུ་འདོང་བར་གྱུར་ཏོ། །གླང་པོ་ལྔ་སྟོང་ནི་རྒྱན་ཐམས་ཅད་ཀྱིས་བརྒྱན་ཏེ་མདུན་དུ་འདོང་བར་གྱུར་ཏོ། །རྟ་ཉིས་ཁྲི་ནི་གསེར་གྱི་བརྒྱན་གྱིས་བཀབ་ཅིང་རྒྱན་ཐམས་ཅད་ཀྱིས་བརྒྱན་
ཏེ་མདུན་དུ་འདོང་བར་གྱུར་ཏོ། །ཤིང་རྟ་བརྒྱད་ཁྲི་ནི་གདུགས་དང་། རྒྱལ་མཚན་དང་། བ་དན་བསྒྲེང་ཞིང་དྲིལ་བུ་གཡེར་ཀའི་དྲ་བས་ལེགས་པར་བརྒྱན་ཏེ། བྱང་ཆུབ་སེམས་དཔའི་ཕྱི་བཞིན་འདོང་བར་གྱུར་ཏོ། །རྐང་ཏང་དཔའ་ཞིང་རྟུལ་ཕོད་པ། ཡན་ལག་དམ་པའི་གཟུགས་དང་ལྡན་པ། གོ་ཆ་སྲ་བ་བགོས་པ་བཞི་ཁྲི་ནི་བྱང་ཆུབ་སེམས་དཔའ་འགྲོ་བའི་ཕྱི་བཞིན་འདོང་བར་གྱུར་ཏོ། །འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷ་གྲགས་པ་གྲགས་པ་ཆེ་བ་བྱེ་བ་ཁྲག་ཁྲིག་བརྒྱ་སྟོང་ཚད་མེད་གྲངས་མེད་པ་དག་ནི་ནམ་མཁའི་དཀྱིལ་ནས་བཀོད་པ་རྣམ་པ་སྣ་ཚོགས་དུ་མ་བྱང་ཆུབ་སེམས་དཔའ་ལ་མཆོད་པ་བྱེད་ཅིང་ཕྱི་བཞིན་འདོང་བར་གྱུར་ཏོ། །ཤིང་རྟ་གང་ལ་བྱང་ཆུབ་སེམས་དཔའ་འདུག་པར་གྱུར་པ་དེ་ཡང་འདོད་པ་ན་སྤྱོད་པའི་ལྷ་རྣམས་ཀྱིས་བཀོད་པ་ཆེན་པོ་དུ་མས་ལེགས་པར་བརྒྱན་པར་གྱུར་ཏོ། །ལྷའི་བུ་མོ་རྒྱན་ཐམས་ཅད་ཀྱིས་ཆས་པ་རིན་པོ་ཆེའི་ཕྲེང་བ་ཐོགས་པ་ཉིས་ཁྲི་ཤིང་རྟ་དེ་དྲངས་ཏེ་ལྷའི་བུ་མོ་གཉིས་ཀྱི་བར་དུ་ནི་མིའི་བུ་མོ་གཅིག་འདུག །མིའི་བུ་མོ་གཉིས་ཀྱི་བར་དུ་ནི་ལྷའི་བུ་མོ་གཅིག་འདུག་ཀྱང་བྱང་ཆུབ་སེམས་དཔའི་མཐུས་ལྷའི་བུ་མོས་ཀྱང་མིའི་བུ་མོའི་དྲི་མི་ཞིམ་པ་མི་ཚོར། མིའི་བུ་མོས་ཀྱང་ལྷའི་བུ་མོའི་གཟུགས་མཐོང་ན་བག་མེད་པར་མ་གྱུར་ཏོ། །དགེ་སློང་དག་སེར་སྐྱའི་གནས་ཀྱི་གྲོང་ཁྱེར་ཆེན་པོར་ཤཱཀྱ་ལྔ་བརྒྱ་ཙམ་གྱིས་བྱང་ཆུབ་སེམས་དཔའི་ཆེད་དུ་ཁྱིམ་ལྔ་བརྒྱ་ཕུབ་སྟེ། དེ་དག་བྱང་ཆུབ་སེམས་དཔའ་གྲོང་ཁྱེར་དེར་འཇུག་པའི་ཚེ། རང་རང་གིས་བྱས་པའི་ཁྱིམ་གྱི་སྒོར་འཁོད་དེ། ཐལ་མོ་སྦྱར་ནས་ལུས་གུས་པར་བཏུད་དེ་རིམ་གྲོ་དང་བཅས་པས་འདི་སྐད་དུ། ཀྱེ་དོན་ཐམས་ཅད་གྲུབ་པ་འདིར་གཤེགས་སུ་གསོལ། ཀྱེ་ལྷའི་ལྷ་འདིར་གཤེགས་སུ་གསོལ། ཀྱེ་སེམས་ཅན་དག་པ་འདིར་གཤེགས་སུ་གསོལ། ཀྱེ་ཁ་ལོ་སྒྱུར་བ་དམ་པ་འདིར་གཤེགས་སུ་གསོལ། ཀྱེ་དགའ་ཞིང་བདེ་བ་དང་མཆོག་ཏུ་དགའ་བ་མཛད་པ་འདིར་གཤེགས་སུ་གསོལ། ཀྱེ་སྨད་པ་མེད་པའི་གྲགས་པ་མངའ་བ་འདིར་གཤེགས་སུ་གསོལ། ཀྱེ་ཀུན་ནས་སྤྱན་མངའ་བ་འདིར་གཤེགས་སུ་གསོལ། ཀྱེ་མི་མཉམ་པ་དང་མཉམ་ཞིང་འདྲ་བ་མེད་པའི་ཡོན་ཏན་དང་གཟི་བརྗིད་མངའ་བ། མཚན་
དང་དཔེ་བྱད་བཟང་པོས་ཡང་དག་པར་བརྒྱན་པའི་སྐུ་མངའ་བ་འདིར་གཤེགས་སུ་གསོལ་ཞེས་དེ་སྐད་འཛེར་ཏོ། །དེ་ནས་རྒྱལ་པོ་ཟས་གཙང་མས་དེ་དག་ཐམས་ཅད་དང་འཐུན་པར་བྱ་བའི་ཕྱིར། བྱང་ཆུབ་སེམས་དཔའ་ཁྱིམ་དེ་ཀུན་ཏུ་ཡང་ཞུགས་པར་བྱས་ཏེ། ཟླ་བ་བཞི་ལོན་པ་ནས་བྱང་ཆུབ་སེམས་དཔའ་ཉིད་ཀྱི་ཁྱིམ་དུ་ཞུགས་ཏེ་རིན་པོ་ཆེ་སྣ་ཚོགས་བཀོད་པ་ཞེས་བྱ་བའི་ཁང་བཟངས་ཆེན་པོ་དེར་བྱང་ཆུབ་སེམས་དཔའ་ཞུགས་པར་གྱུར་ཏོ། །དེ་ན་ཤཱཀྱ་རྒན་རབས་རྒན་རབས་རྣམས་འདུས་ཏེ་བགྲོས་པ། ཕན་པའི་སེམས་དང་། བྱམས་པའི་སེམས་ཀྱིས་ཡོན་ཏན་དང་ལྡན་པ་དང་། འཇམ་པ་དང་ལྡན་པར་བྱང་ཆུབ་སེམས་དཔའ་བཙའ་བ་དང་། བྱི་དོར་བྱ་བ་དང་། ཉམས་སུ་བླང་བར་སུས་ནུས་ཞེས་བྱས་པ་དང་། དེ་ན་ཤཱཀྱའི་བུ་མོ་ལྔ་བརྒྱ་ཙམ་སོ་སོ་ནས་འདི་སྐད་དུ་བདག་གིས་གཞོན་ནུའི་རིམ་གྲོ་བགྱིའོ། །བདག་གིས་གཞོན་ནུའི་རིམ་གྲོ་བགྱིའོ་ཞེས་ཟེར་རོ། །དེ་ན་ཤཱཀྱ་ཆེས་འགྲས་ཆེས་འགྲས་པ་དེ་དག་ན་རེ་བུ་མོ་འདི་དག་ཐམས་ཅད་ནི་བྱིས་པ་གཞོན་ནུ་ཐོར་བུ་གཞོན་ནུ་ལ་གཟུགས་དང་དར་ལ་བབ་པས་རྒྱགས་ཤིང་དྲེགས་པ་ཡིན་པས་འདི་དག་གིས་བྱང་ཆུབ་སེམས་དཔའ་ལ་དུས་དུས་སུ་རིམ་གྲོ་བྱ་བ་མི་ནུས་སོ། །སྐྱེ་དགུའི་བདག་མོ་ཆེན་མོ་གཽ་ཏ་མཱི་གཞོན་ནུའི་སྲུ་མོ་སྟེ། འདིས་ནི་གཞོན་ནུ་བདེ་བ་དང་ལེགས་པར་སྐྱེད་པར་ནུས་སོ། །རྒྱལ་པོ་ཟས་གཙང་མ་ཡང་མཉེས་པར་ནུས་སོ། །ཞེས་ཐམས་ཅད་གྲོས་གཅིག་ཏུ་འདུས་ཏེ། སྐྱེ་དགུའི་བདག་མོ་ཆེན་མོ་གཽ་ཏ་མཱི་དད་པར་བྱས་ནས། སྐྱེ་དགུའི་བདག་མོ་ཆེན་མོ་གཽ་ཏ་མཱིས་གཞོན་ནུ་དེ་ལེགས་པར་བསྐྱེད་དོ། །དེའི་ཚེ་བྱང་ཆུབ་སེམས་དཔའི་རིམ་གྲོར་མ་མ་སུམ་ཅུ་རྩ་གཉིས་བསྐོས་པར་གྱུར་ཏེ། དེ་ལ་བརྒྱད་ནི་པང་ན་འཚོ་བའི་མ་མའོ། །བརྒྱད་ནི་ནུ་མ་སྣུན་པའི་མ་མའོ། །བརྒྱད་ནི་རྩེན་གྲོགས་ཀྱི་མ་མའོ། །བརྒྱད་ནི་དྲི་མ་འཕྱི་བའི་མ་མའོ། །དེ་ནས་རྒྱལ་པོ་ཟས་གཙང་མས་ཤཱཀྱའི་ཚོགས་ཐམས་ཅད་བསོགས་ཏེ་དཔྱད་པ། ཇི་ལྟ་གཞོན་ནུ་འདི་འཁོར་ལོས་སྒྱུར་བའི་རྒྱལ་པོ་ཞིག་ཏུ་འགྱུར་རམ་འོན་ཏེ་མ་ཡིན་གྱིས་རབ་ཏུ་འབྱུང་བའི་ཕྱིར་མངོན་པར་འབྱུང་ཞེས་དཔྱད་པ་དང་། དེའི་ཚེ་རིའི་རྒྱལ་པོ་གངས་རིའི་ངོས་ལ་དྲང་སྲོང་ཆེན་པོ་
ནག་པོ་ཞེས་བྱ་བ་མངོན་པར་ཤེས་པ་ལྔ་དང་ལྡན་པ་ཞིག་སྣག་གི་ཚ་བོ་མིས་བྱིན་ཞེས་བྱ་བ་དང་ལྷན་ཅིག་ཏུ་འདུག་འདུག་པ་ལས་དེས་བྱང་ཆུབ་སེམས་དཔའ་བཙས་པའི་ཚེ། ངོ་མཚར་རྨད་དུ་བྱུང་བའི་ཆོ་འཕྲུལ་མང་དུ་མཐོང་སྟེ། ནམ་མཁའི་དཀྱིལ་ན་ཡང་ལྷའི་བུ་མང་པོ་སངས་རྒྱས་ཀྱི་སྒྲ་སྒྲོག་ཅིང་གོས་ཀྱི་གཡབ་མོ་གཡོབ་པ་དང་། དགའ་ཞིང་ཕན་ཚུན་འདོང་བ་མཐོང་ནས། དེས་བསམས་པ། མ་ལ་བདག་གིས་རྣམ་པར་བལྟ་བ་ཞིག་ཏུ་བྱའམ་སྙམ་ནས། དེས་ལྷའི་མིག་གིས་འཛམ་བུའི་གླིང་ཐམས་ཅད་དུ་བལྟས་ན་སེར་སྐྱའི་གྲོང་ཁྱེར་ཆེན་པོ་དེ་ན་རྒྱལ་པོ་ཟས་གཙང་མའི་ཁྱིམ་དུ་གཞོན་ནུ་བསོད་ནམས་ཀྱི་གཟི་བརྗིད་ཀྱིས་གཟི་དང་ལྡན་པར་བྱས་པ། འཇིག་རྟེན་ཐམས་ཅད་ཀྱིས་མཆོད་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལུས་ལེགས་པར་བརྒྱན་པ་ཞིག་བཙས་པར་མཐོང་ནས། བྲམ་ཟེའི་ཁྱེའུ་མིས་བྱིན་ལ་སྨྲས་པ། བྲམ་ཟེའི་ཁྱེའུ་ཤེས་པར་གྱིས་ཤིག །འཛམ་བུའི་གླིང་དུ་ནི་རིན་པོ་ཆེ་ཆེན་པོ་བྱུང་སྟེ། སེར་སྐྱའི་གནས་ཀྱི་གྲོང་ཁྱེར་ཆེན་པོ་ན་རྒྱལ་པོ་ཟས་གཙང་མའི་ཁྱིམ་དུ་གཞོན་ནུ་བསོད་ནམས་ཀྱི་གཟི་བརྗིད་ཀྱིས་གཟི་དང་ལྡན་པར་བྱས་པ་འཇིག་རྟེན་ཐམས་ཅད་ཀྱིས་མཆོད་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་བཙས་སོ། །དེ་གལ་ཏེ་ཁྱིམ་ན་གནས་ན་ནི་མཐའ་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོར་འགྱུར་ཏེ། རྣམ་པར་རྒྱལ་བ་དང་ལྡན་པ། ཆོས་དང་ལྡན་པ། ཆོས་ཀྱི་རྒྱལ་པོ་སྲིད་ཀྱི་མཐུ་སྟོབས་ཐོབ་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་དང་བདུན་འབྱུང་བར་འགྱུར་རོ། །དེ་ལ་བུ་སྟོང་ཡོད་པར་འགྱུར་ཏེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་འཇོམས་པ་ཤ་སྟག་འབྱུང་བར་འགྱུར་རོ། །དེ་ནི་ས་ཆེན་པོའི་དཀྱིལ་འཁོར་འདི་རྒྱ་མཚོའི་མཐའ་སྐོར་དང་བཅས་པ་ཆད་པ་མེད་ཅིང་མཚོན་གྱིས་བདའ་བ་མེད་པ་དང་། ཆོས་དང་འཐུན་པར་རང་གི་མཐུས་ཟིལ་གྱིས་མནན་ཅིང་མངོན་པར་ཕབ་སྟེ། དབང་
ཕྱུག་གི་དབང་གིས་རྒྱལ་སྲིད་བྱེད་པར་འགྱུར་རོ། །དེ་གལ་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་ཏེ། སྟོན་པ་འདྲེན་པ་གཞན་གྱི་དྲིང་མི་འཇོག་པ། འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ། །དེ་ལྟ་བས་ན་ཚུར་ཤོག་དེ་ལྟར་འདོང་ངོ་། །དེ་ནས་དྲང་སྲོང་ཆེན་པོ་ནག་པོ་སྣག་གི་ཚ་བོ་མིས་བྱིན་དང་འགྲོགས་ཏེ། ངང་པའི་རྒྱལ་པོ་ལྟར་ནམ་མཁའི་དཀྱིལ་ནས་ལྡིངས་ཏེ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ག་ལ་བ་དེར་སོང་ནས་ཕྱིན་པ་དང་། རྫུ་འཕྲུལ་བརྟུལ་ནས་རྐང་གིས་སེར་སྐྱའི་གནས་ཀྱི་གྲོང་ཁྱེར་ཆེན་པོར་དོང་སྟེ། རྒྱལ་པོ་ཟས་གཙང་མའི་ཁྱིམ་ག་ལ་བ་དེར་ཕྱིན་ནས། རྒྱལ་པོ་ཟས་གཙང་མའི་ཁྱིམ་གྱི་སྒོར་བསྡད་དོ། །དགེ་སློང་དག་དེ་ལྟར་དྲང་སྲོང་ནག་པོ་དེས་རྒྱལ་པོ་ཟས་གཙང་མའི་ཁྱིམ་གྱི་སྒོ་དྲུང་དུ་སྲོག་ཆགས་བརྒྱ་སྟོང་མང་པོ་འདུས་པ་མཐོང་ངོ་། །དེ་ནས་དྲང་སྲོང་ནག་པོ་སྒོ་བའི་དྲུང་དུ་སོང་སྟེ་འདི་སྐད་ཅེས་སྨྲས་སོ། །ཀྱེ་མི་ཁྱོད་སོང་ལ་རྒྱལ་པོ་ཟས་གཙང་མ་ལ་ཆབ་སྒོ་ན་དྲང་སྲོང་ཞིག་མཆིས་སོ་ཞེས་གསོལ་ཅིག །དེ་ནས་སྒོ་བ་དེས་དེ་ལྟར་བགྱིའོ་ཞེས་དྲང་སྲོང་ནག་པོའི་ལྟར་མཉན་ཏེ། རྒྱལ་པོ་ཟས་གཙང་མ་ག་ལ་བ་དེར་སོང་ནས་ཕྱིན་པ་དང་ཐལ་མོ་སྦྱར་ཏེ། རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། ཆབ་སྒོ་ན་དྲང་སྲོང་རྒན་པོ་འཁོགས་པ་ནས་གཟེར་བ་ཞིག་མཆིས་ཏེ། འདི་སྐད་དུ་བདག་ནི་རྒྱལ་པོའི་ཞལ་མཐོང་བར་འཚལ་ལོ་ཞེས་མཆིའོ། །དེ་ནས་རྒྱལ་པོ་ཟས་གཙང་མས་དྲང་སྲོང་ནག་པོའི་སྟན་འདིང་དུ་བཅུག་སྟེ། མི་དེ་ལ་འདི་སྐད་ཅེས་སྨྲས་སོ། །དྲང་སྲོང་དེ་ནང་དུ་འོང་བར་གྱིས་ཤིག །དེ་ནས་མི་དེ་རྒྱལ་པོའི་ཕོ་བྲང་ནས་བྱུང་ནས། དྲང་སྲོང་ནག་པོ་ལ་འདི་སྐད་ཅེས་སྨྲས་ཏེ། ནང་དུ་བཞུད་ཅིག །དེ་ནས་དྲང་སྲོང་ནག་པོ་རྒྱལ་པོ་ཟས་གཙང་མ་ག་ལ་བ་དེར་སོང་སྟེ་ཕྱིན་པ་དང་། མདུན་དུ་འདུག་སྟེ་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་རྒྱལ་བར་སྤྱོན་ཅིག །རྒྱལ་བར་སྤྱོན་ཅིག །སྐུ་ཚེ་རིང་བར་སྲུངས་ཤིག །ཆོས་བཞིན་དུ་རྒྱལ་པོ་མཛོད་ཅིག །དེ་ནས་རྒྱལ་པོ་ཟས་གཙང་མས་
དྲང་སྲོང་ནག་པོ་ལ་ཡོན་ཆུ་དང་རྐང་པ་ལ་གཏོར་བའི་ཆུས་མཆོད་པ་བྱས་ཏེ་ཤིན་ཏུ་ལེགས་པར་ཡོངས་སུ་བཀུར་ནས་སྟན་ལ་བདར་ཏེ། དེ་སྟན་ལ་བདེ་བར་འདུག་པར་ཤེས་ནས་ཞེ་ས་དང་བཅས། གུས་དང་བཅས་པར་འདི་སྐད་ཅེས་སྨྲས་སོ། །དྲང་སྲོང་སྔོན་མཐོང་བར་མི་དྲན་ན་འདིར་ཅི་ལ་བྱོན་ཅི་ཞིག་བཞེད། དེ་སྐད་ཅེས་སྨྲས་པ་དང་། དྲང་སྲོང་ནག་པོས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ཀྱི་སྲས་ཤིག་བལྟམ་པར་གྱུར་པ་དེ་ལྟ་ཞིང་བདག་འདིར་མཆིས་སོ། །རྒྱལ་པོས་སྨྲས་པ། དྲང་སྲོང་ཆེན་པོ་གཞོན་ནུ་ཉལ་ཞིང་མཆིས་ཀྱིས་ལངས་ཀྱི་བར་དུ་ཆུང་ཟད་ཅིག་གཞེས་ཤིག །དྲང་སྲོང་གིས་སྨྲས་པ། རྒྱལ་པོ་ཆེན་པོ་སྐྱེས་བུ་ཆེན་པོ་དེ་ལྟ་བུ་ནི་རིང་པོར་མི་ཉལ་ཏེ། སྐྱེས་བུ་དམ་པ་དེ་ལྟ་བུ་དག་ནི་སད་པར་གནས་པའི་ངང་ཚུལ་ཅན་ནོ། །དགེ་སློང་དག་དེ་ནས་བྱང་ཆུབ་སེམས་དཔས་དྲང་སྲོང་ནག་པོ་དེ་ལ་སྙིང་བརྩེ་བ་ཉེ་བར་བཟུང་སྟེ་སད་པའི་བརྡ་བྱས་སོ། །དེ་ནས་རྒྱལ་པོ་ཟས་གཙང་མས་གཞོན་ནུ་དོན་ཐམས་ཅད་གྲུབ་པ་ལག་པ་གཉིས་ཀྱིས་ཤིན་ཏུ་ལེགས་པར་བླངས་ཏེ། དྲང་སྲོང་ནག་པོའི་དྲུང་དུ་ཁྱེར་རོ། །དེ་ནས་དྲང་སྲོང་ནག་པོས་བྱང་ཆུབ་སེམས་དཔའ་བལྟས་ན། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ཞིང་དཔེ་བྱད་བཟང་པོ་བརྒྱད་ཅུས་ལེགས་པར་རྣམ་པར་སྤྲས་པའི་ལུས་དང་ལྡན་པ། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ལས་འཕགས་པའི་ལུས་ཅན་ཉི་མ་བརྒྱ་ཕྲག་སྟོང་ལས་ཀྱང་ལྷག་པའི་གཟི་བརྗིད་དང་ལྡན་པ། ཡན་ལག་ཐམས་ཅད་དུ་མཛེས་པ་མཐོང་ནས། ཀྱེ་མ་འཇིག་རྟེན་དུ་ངོ་མཚར་གྱི་གང་ཟག་འདི་བྱུང་ངོ་། །ཀྱེ་མ་འཇིག་རྟེན་དུ་ངོ་མཚར་ཆེན་པོ་དང་ལྡན་པའི་གང་ཟག་འདི་བྱུང་ངོ་ཞེས་ཆེད་དུ་བརྗོད་པ་ཆེད་དུ་བརྗོད་ནས། སྟན་ལས་ལངས་ཏེ་ཐལ་མོ་སྦྱར་ནས། བྱང་ཆུབ་སེམས་དཔའི་རྐང་པ་གཉིས་ལ་ཕྱག་འཚལ་ཏེ། བསྐོར་བ་བྱས་ནས་བྱང་ཆུབ་སེམས་དཔའ་པང་དུ་བླངས་ཏེ། སེམས་ཞིང་འདུག་པར་གྱུར་ཏོ། །དེ་ནས་དེས་བྱང་ཆུབ་སེམས་དཔའི་ལུས་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཡོད་པ་མཐོང་སྟེ། དེ་དག་དང་ལྡན་པའི་སྐྱེས་བུ་གང་ཟག་དེ་རྣམ་པ་གཉིས་སུ་འགྱུར་གྱི།
གཞན་དུ་མི་འགྱུར་རོ། །གལ་ཏེ་ཁྱིམ་ན་གནས་ན་ནི་མཐའ་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོར་འགྱུར་ཏེ་ཞེས་བྱ་བ་ནས་སྔ་མ་བཞིན་དུ་དབང་ཕྱུག་གི་དབང་གིས་རྒྱལ་སྲིད་བྱེད་དོ་ཞེས་བྱ་བའི་བར་དུ་འགྱུར་བ་དང་། གལ་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པར་འགྱུར་ཏེ། ཡང་དག་པར་རྫོགས་པའི་སངས་རྒྱས་སུ་གྲགས་པ་འདྲེན་པ་གཞན་གྱི་དྲིང་མི་འཇོག་པར་འགྱུར་བ་མཐོང་ནས། དེས་དེ་ལྟ་བུ་མཐོང་བ་དང་། མཆི་མ་བླགས་ཏེ་ངུས་ནས་ཤུགས་རིང་དུ་ཕྱུང་བ་དང་། རྒྱལ་པོ་ཟས་གཙང་མས་དྲང་སྲོང་དེ་མཆི་མ་བླགས་ཏེ་ངུས་ནས་ཤུགས་རིང་དུ་འབྱིན་པར་མཐོང་ནས། སྔངས་ཏེ་མི་དགའ་ཞིང་རིངས་པར་རིངས་པར་དྲང་སྲོང་ཆེན་པོ་དེ་ལ་སྨྲས་པ། དྲང་སྲོང་དེ་ལྟར་བཤུམ་མོ་བླགས་ཏེ་བཤུམས་པ་དང་། ཤུགས་རིང་དུ་འབྱིན་པ་ཅི་ཞིག་ནོངས། གཞོན་ནུ་འདི་ལ་མི་དགེ་བའམ་ཅིག་མི་གདའ་འམ། དེ་སྐད་ཅེས་སྨྲས་པ་དང་། དྲང་སྲོང་ཆེན་པོ་ནག་པོས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བདག་ནི་གཞོན་ནུའི་སླད་དུ་ངུ་བ་ཡང་མ་ལགས། འདི་ལ་མི་དགེ་བ་ཡང་གང་ཡང་མ་མཆིས་ཏེ། བདག་ཉིད་ངུ་བར་བས་སོ། །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་བདག་ནི་རྒས་ཤིང་འཁོགས་ཏེ་ནས་གཟེར་ལ་གཞོན་ནུ་དོན་ཐམས་ཅད་གྲུབ་པ་འདི་ནི་གདོན་མི་འཚལ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། བླ་ན་མེད་པའི་ཆོས་ཀྱི་འཁོར་ལོ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། གཞན་སུས་ཀྱང་རུང་སྟེ། འཇིག་རྟེན་དུ་ཆོས་དང་འཐུན་པར་བསྐོར་བར་མི་ནུས་བསྐོར་བར་འགྱུར་རོ། །ལྷ་དང་བཅས་པའི་འཇིག་རྟེན་ལ་སྨན་པ་དང་བདེ་བའི་སླད་དུ་ཆོས་སྟོན་པར་འགྱུར་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བའི་ཆོས། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ་ཡོངས་སུ་དག་པ། ཡོངས་སུ་བྱང་བའི་མཐར་ཕྱིན་པའི་ཆོས་ཡང་དག་པར་སྟོན་པར་འགྱུར་རོ། །སེམས་ཅན་སྐྱེ་བའི་ཆོས་ཅན་དག་འདི་ལས་
ཆོས་དེ་ཐོས་ནས། སྐྱེ་བ་ལས་ཡོངས་སུ་མ་གྲོལ་བ་རྣམས་གྲོལ་བར་འགྱུར་རོ། །དེ་བཞིན་དུ་སེམས་ཅན་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པའི་ཆོས་ཅན་རྣམས་ནི་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་འགྲོལ་བར་འགྱུར། སེམས་ཅན་འདོད་ཆགས་དང་། ཞེ་སྡང་དང་། གཏི་མུག་གི་མེས་གདུངས་པ་རྣམས་ལ་ནི་དམ་པའི་ཆོས་ཀྱི་ཆར་པས་སིམ་པར་མཛད་པར་འགྱུར། སེམས་ཅན་ལྟ་བ་ངན་པ་སྣ་ཚོགས་ཐིབས་པོས་ཁེབས་པ་ལམ་གོལ་བར་ཞུགས་པ་རྣམས་ནི་ལམ་དྲང་པོར་མྱ་ངན་ལས་འདས་པར་འདྲེན་པར་འགྱུར། སེམས་ཅན་འཁོར་བའི་དྲ་བ་དང་བཙོན་རར་འཁོར་ཞིང་ཉོན་མོངས་པའི་འཆིང་བས་བཅིངས་པ་རྣམས་ནི་བཅིངས་པ་ལས་ཡོངས་སུ་གྲོལ་བར་མཛད་པར་འགྱུར། སེམས་ཅན་མི་ཤེས་པའི་མུན་པ་དང་། རབ་རིབ་དང་། ལིང་ཏོག་གིས་མིག་ལྡོངས་པ་རྣམས་ལ་ནི་ཤེས་རབ་ཀྱི་མིག་སྐྱེད་པར་འགྱུར། སེམས་ཅན་ཉོན་མོངས་པའི་ཟུག་རྔུས་ཟུག་པ་རྣམས་ལ་ནི་ཟུག་རྔུ་འབྱིན་པར་འགྱུར་ཏེ། རྒྱལ་པོ་ཆེན་པོ་འདི་ལྟ་སྟེ་དཔེར་ན་ཨུ་དུམ་བཱ་རའི་མེ་ཏོག་ནི་བརྒྱ་ལ་བརྒྱ་ལམ་ན་འཇིག་རྟེན་དུ་འབྱུང་ངོ་། །རྒྱལ་པོ་ཆེན་པོ་དེ་བཞིན་དུ་བསྐལ་པ་བྱེ་བ་ཁྲག་ཁྲིག་མང་པོར་བརྒྱ་ལ་བརྒྱ་ལམ་ན། སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་སྟེ། དེ་ལྟར་གཞོན་ནུ་འདི་ནི་ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། མངོན་པར་རྫོགས་པར་སངས་རྒྱས་ནས་ཀྱང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་འཁོར་བའི་རྒྱ་མཚོའི་ཕ་རོལ་ཏུ་སྒྲོལ་བར་འགྱུར་ཞིང་འཆི་བ་མེད་པ་ལ་རབ་ཏུ་གཞོག་པར་འགྱུར་ལ། བདག་གིས་ནི་སངས་རྒྱས་དཀོན་མཆོག་དེ་མི་མཐོང་བ་དང་། བདག་གི་ནད་མ་མཆིས་པ་འདི་ལ་ཡང་འདོད་ཆགས་དང་བྲལ་བར་གྱུར་ཏེ། རྒྱལ་པོ་ཆེན་པོ་བདག་ནི་དེའི་སླད་དུ་ངུ་ཞིང་མི་དགའ་བས་ཤུགས་རིང་དུ་འབྱིན་པ་ལགས་སོ། །རྒྱལ་པོ་
ཆེན་པོ་བདག་ཅག་གི་བསྟན་བཅོས་ལས་འབྱུང་བ་ལྟ་ན་ནི་གཞོན་ནུ་དོན་ཐམས་ཅད་གྲུབ་པ་ཡང་ཁབ་ན་བཞུགས་པར་མི་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་འདི་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་སྟེ། སུམ་ཅུ་རྩ་གཉིས་གང་ཞེ་ན། རྒྱལ་པོ་ཆེན་པོ་འདི་ལྟ་སྟེ་གཞོན་ནུ་དོན་ཐམས་ཅད་གྲུབ་པ་ནི་དབུ་གཙུག་ཏོར་དང་ལྡན་པ་སྟེ། རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སྐྱེས་བུ་ཆེན་པོའི་མཚན་དང་པོ་འདི་དང་ལྡན་ནོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་དབུ་སྟང་ཟིལ་བཅག་པའི་འཕྲོ་དང་རྨ་བྱའི་མགྲིན་པ་ལྟར་མཐོན་མཐིང་དུ་གྲུབ་ཅིང་ལྕང་ལོར་འཁྲིལ་ལ་གཡས་སུ་འཁྱིལ་བ་དང་། འཕྲལ་བའི་དབྱེས་མཉམ་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པའི་སྨིན་མཚམས་སུ་མཛོད་སྤུ་སྐྱེས་པ་ནི་ཁ་བ་དང་དངུལ་གྱི་མདོག་ལྟར་མཆིས་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སྤྱན་གྱི་རྫི་མ་བའི་རྫི་མ་ལྟ་བུ་དང་། སྤྱན་དཀར་ནག་འབྱེས་པ་དང་། ཚེམས་བཞི་བཅུ་མཉམ་པ་དང་། ཚེམས་ཐགས་བཟང་བ་དང་། ཚེམས་ཤིན་ཏུ་དཀར་བ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་ཚངས་པའི་དབྱངས་དང་། རོ་བྲོ་བའི་མཆོག་དང་ལྡན་པ་དང་། ལྗགས་ཤིན་ཏུ་རིང་ཞིང་སྲབ་པ་དང་། འགྲམ་པ་སེང་གེའི་འདྲ་བ་དང་། དཔུང་མགོ་ཤིན་ཏུ་ཟླུམ་པ་དང་། བདུན་མཐོ་བ་དང་། ཐལ་གོང་རྒྱས་པ་དང་། པགས་པ་སྲབ་ཅིང་མདོག་གསེར་འདྲ་བ་དང་། བཞེངས་བཞིན་དུ་མ་བཏུད་པར་ཕྱག་པུས་མོར་སླེབས་པ་དང་། རོ་སྟོད་སེང་གེའི་ལྟ་བུ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་ཤིང་ནྱ་གྲོ་དྷ་ལྟར་ཆུ་ཞེང་གབ་པ་དང་། སྤུ་རེ་རེ་ནས་སྐྱེས་པ་དང་། ཡན་ལག་གི་སྤུ་གཡས་ཕྱོགས་ནས་གྱེན་དུ་འཁྱིལ་བ་དང་། མདོམས་ཀྱི་སྦ་བ་སྦུབས་སུ་ནུབ་པ་དང་། བརླ་ལེགས་པར་ཟླུམ་པ་དང་། བྱིན་པ་རི་དགས་ཀྱི་རྒྱལ་པོ་ཨེ་ན་ཡའི་ལྟ་བུ་དང་། སོར་མོ་རིང་བ་དང་། ཞབས་ཀྱི་རྟིང་པ་ཡངས་པ་དང་། ཞབས་ཀྱི་གོང་མཐོ་
བ་དང་། ཕྱག་དང་ཞབས་ཀྱི་མཐིལ་འཇམ་པ་དང་། ཕྱག་དང་ཞབས་ཀྱི་སོར་མོ་དྲ་བས་འབྲེལ་བ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པའི་ཞབས་ཀྱི་འོག་གི་མཐིལ་གཉིས་ལ་འཁོར་ལོ་རེ་རེ་སྐྱེས་པ་ནི་བཟང་ཞིང་རྩིབས་སྟོང་དང་ལྡན་ལ། མུ་ཁྱུད་དང་བཅས། ལྟེ་བ་དང་བཅས་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་ཞབས་མཉམ་ཞིང་ཤིན་ཏུ་གནས་པ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་འདི་དག་དང་ལྡན་ནོ། །རྒྱལ་པོ་ཆེན་པོ་མཚན་གྱི་རྣམ་པ་དེ་ལྟ་བུ་དག་ནི་འཁོར་ལོས་སྒྱུར་བའི་རྒྱལ་པོ་ལ་མི་འབྱུང་སྟེ། མཚན་དེ་ལྟ་བུ་དག་ནི་བྱང་ཆུབ་སེམས་དཔའ་རྣམས་ལ་འབྱུང་ངོ་། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པའི་སྐུ་ལ་དཔེ་བྱད་བཟང་པོ་བརྒྱད་ཅུ་མཆིས་ཏེ། དེ་དག་དང་ལྡན་པས་གཞོན་ནུ་དོན་ཐམས་ཅད་གྲུབ་པ་ནི་ཁབ་ན་བཞུགས་པར་མི་འགྱུར་གྱི། གདོན་མི་འཚལ་བར་རབ་ཏུ་འབྱུང་བའི་དོན་དུ་མངོན་པར་འབྱུང་བར་འགྱུར་རོ། །རྒྱལ་པོ་ཆེན་པོ་དཔེ་བྱད་བཟང་པོ་བརྒྱད་ཅུ་པོ་དེ་དག་གང་ཞེ་ན། འདི་ལྟ་སྟེ་རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སེན་མོ་མཐོ་བ་དང་། སེན་མོ་ཟངས་ཀྱི་མདོག་ལྟ་བུ་དང་། སེན་མོ་མདོག་སྣུམ་པ་དང་། སོར་མོ་རྣམས་ཟླུམ་པ་དང་། སོར་མོ་རྣམས་རྒྱས་པ་དང་། སོར་མོ་བྱིན་གྱིས་ཕྲ་བ་དང་། རྩ་མི་མངོན་པ་དང་། ལོང་བུ་མི་མངོན་པ་དང་། ཚིགས་མི་མངོན་པ་དང་། ཞབས་མཉམ་ཞིང་མི་མཉམ་པ་མ་མཆིས་པ་དང་། ཞབས་ཀྱི་རྟིང་པ་ཡངས་པ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་ཕྱག་གི་རི་མོ་མཚུངས་པ་དང་ལྡན་ཞིང་ཕྱག་གི་རི་མོ་མདངས་ཡོད་པ་དང་། ཕྱག་གི་རི་མོ་ཟབ་པ་དང་། ཕྱག་གི་རི་མོ་ཡ་ཡོར་མ་གྱུར་པ་དང་། ཕྱག་གི་རི་མོ་རིམ་པར་འཚམ་པ་དང་། སྒྲོས་བིམ་པ་ལྟར་དམར་བ་དང་། སྒྲ་མི་གྲག་པའི་ཚིག་དང་། ལྗགས་མཉེན་ཞིང་འཇམ་ལ་ཟངས་ཀྱི་མདོག་ལྟར་འདུག་པ་དང་། གླང་པོ་ཆེའི་ང་རོ་དང་། འབྲུག་གི་སྒྲ་དང་ལྡན་པ་དང་། སྙན་ཅིང་འཇམ་པ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་
ནི་དཔེ་བྱད་བཟང་པོ་ཡོངས་སུ་རྫོགས་པ་སྟེ། ཕྱག་རིང་བ་དང་། སྐུའི་ན་བཟའ་གཙང་མ་ཕུན་སུམ་ཚོགས་པ་དང་། སྐུ་འཇམ་པ་དང་། བསྙེངས་པ་མི་མངའ་བའི་སྐུ་དང་། ཞུམ་པ་མི་མངའ་བའི་སྐུ་དང་། རིམ་པར་འཚམ་པའི་སྐུ་དང་། ཤིན་ཏུ་དཔའ་བར་མཛེས་པའི་སྐུ་དང་། རྣམ་པར་ལེགས་པར་གྲུབ་པའི་སྐུ་དང་། པུས་མོའི་ལྷ་ང་ཡངས་ཤིང་རྒྱ་ཆེ་ལ་ཤིན་ཏུ་གང་བ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སྐུ་ཟླུམ་པ་དང་ལྡན་པ་སྟེ། སྐུ་ཤིན་ཏུ་འཇམ་པ་དང་། སྐུ་ཡ་ཡོ་མ་མཆིས་པ་དང་། སྐུ་རིམ་གྱིས་ལེགས་པར་གྲུབ་པ་དང་། ལྟེ་བ་ཟབ་པ་དང་། ལྟེ་བ་མ་ཡོ་བ་དང་། ལྟེ་བ་རིམ་གྱིས་གཞོལ་བ་དང་། དྲང་སྲོང་ལྟར་གཙང་སྦྲས་སྤྱོད་པ་དང་། ཀུན་ནས་མཛེས་པ་དང་། སྣང་བ་དམ་པ་ཤིན་ཏུ་རྣམ་པར་དག་ཅིང་། རབ་རིབ་མ་མཆིས་པའི་འོད་ཀུན་ནས་འབྱུང་བ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་གླང་པོ་ལྟར་དལ་བའི་འགྲོས་དང་། སེང་གེའི་སྟབས་ལྟ་བུའི་འགྲོས་དང་། ཁྱུ་མཆོག་གི་སྟབས་ལྟ་བུའི་འགྲོས་དང་། ངང་པའི་སྟབས་ལྟ་བུའི་འགྲོས་དང་། གཡས་ཕྱོགས་སུ་མཛེས་པར་འཁོར་བའི་འགྲོས་དང་། དཀུ་ཟླུམ་པ་དང་། དཀུ་སྐབས་ཕྱིན་པ་དང་། དཀུ་མ་རྙོངས་པ་དང་། རྐེད་པ་གཞུའི་ཆང་ཟུངས་ལྟར་ཕྲ་བ་དང་། མདོག་གི་ཉེས་པ་སྔོ་བའམ། གནག་པའི་སྐྱོན་དང་བྲལ་བའི་སྐུ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་མཆེ་བ་ཟླུམ་པ་དང་། མཆེ་བ་རྣོ་བ་དང་། མཆེ་བ་བྱིན་གྱིས་ཕྲ་བ་དང་། ཤངས་ལེགས་པར་མཐོ་བ་དང་། སྤྱན་གསལ་བ་དང་། སྤྱན་དྲི་མ་མེད་པ་དང་། འཛུམ་པའི་སྤྱན་དང་ལྡན་པ་དང་། སྤྱན་རིང་བ་དང་། སྤྱན་ཡངས་པ་དང་། ཨུད་པ་ལ་སྔོན་པོ་ལྟ་བུའི་སྤྱན་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་ནི་སྨིན་མའི་སྤུ་མཉམ་པ་དང་། སྨིན་མ་སྟུག་པ་དང་། སྨིན་མ་གནག་པ་དང་། སྨིན་མ་རྒྱུན་ཆགས་པ་དང་། སྨིན་མ་རིམ་གྱིས་གཞོལ་བ་དང་། མཁུར་བ་རྒྱས་པ་དང་། མཁུར་བ་མི་མཉམ་པ་མེད་པ་དང་།
མཁུར་བ་སྐྱོན་དང་བྲལ་བ་དང་། སྡང་བ་དང་། ཁྲོ་བའི་མདོག་མེད་པ་དང་། ཤིན་ཏུ་རིག་པའི་དབང་པོ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་དེ་ནི་མཛོད་སྤུ་ཡོངས་སུ་རྫོགས་པ་དང་ལྡན་པ་དང་། གདོང་དང་དཔྲལ་བ་རྐྱེན་དུ་འབབ་པ་དང་། དབུ་ཡོངས་སུ་རྒྱས་པ་དང་། དབུ་སྐྲ་གནག་པ་དང་། དབུ་སྐྲ་མཉམ་པ་དང་། དབུ་སྐྲ་དྲི་ཞིམ་པ་དང་། དབུ་སྐྲ་མི་བཤོར་བ་དང་། དབུ་སྐྲ་མི་འཛིངས་པ་དང་། དབུ་སྐྲ་བྱིན་གྱིས་ཕྲ་བ་དང་། དབུ་སྐྲ་ལྕང་ལོར་འཁྲིལ་བ་དང་ལྡན་པ་ལགས་སོ། །རྒྱལ་པོ་ཆེན་པོ་གཞོན་ནུ་དོན་ཐམས་ཅད་གྲུབ་པ་དེ་ནི་དབུ་སྐྲ་དཔལ་གྱི་བེའུ་དང་། བཀྲ་ཤིས་དང་། གཡུང་དྲུང་འཁྱིལ་བ་དང་། སྡོང་རིས་ཀྱི་དབྱིབས་ལྟ་བུའི་དབུ་སྐྲ་དང་ལྡན་པའོ། །རྒྱལ་པོ་ཆེན་པོ་འདི་དག་ནི་གཞོན་ནུ་དོན་ཐམས་ཅད་གྲུབ་པའི་དཔེ་བྱད་བཟང་པོ་བརྒྱད་ཅུ་སྟེ། དེ་དག་དང་ལྡན་པས་གཞོན་ནུ་དོན་ཐམས་ཅད་གྲུབ་པ་ནི་ཁབ་ན་བཞུགས་པར་མི་འགྱུར་གྱིས། གདོན་མི་འཚལ་བར་རབ་ཏུ་འབྱུང་བའི་སླད་དུ་མངོན་པར་འབྱུང་བར་འགྱུར་རོ། །དེ་ནས་རྒྱལ་པོ་ཟས་གཙང་མས་དྲང་སྲོང་ཆེན་པོ་ནག་པོ་ལས་གཞོན་ནུའི་ལུང་བསྟན་པ་དེ་ཐོས་ནས་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་ནས་སྟན་ལས་ལངས་ཏེ། བྱང་ཆུབ་སེམས་དཔའི་རྐང་པ་གཉིས་ལ་ཕྱག་འཚལ་ནས་ཚིགས་སུ་བཅད་པ་འདི་སྨྲས་སོ། །ཁྱོད་ལ་ལྷ་ཀུན་ཕྱག་འཚལ་ཞིང་། །དྲང་སྲོང་རྣམས་ཀྱིས་མཆོད་གྱུར་ཏེ། །འཇིག་རྟེན་ཀུན་གྱི་མཆོད་རྟེན་པས། །བདག་ཀྱང་ཁྱོད་ལ་ཕྱག་འཚལ་ལོ། །དགེ་སློང་དག་དེ་ལྟར་རྒྱལ་པོ་ཟས་གཙང་མས་དྲང་སྲོང་ཆེན་པོ་ནག་པོ་དང་། སྣག་གི་ཚ་བོ་མིས་བྱིན་དང་བཅས་ཏེ། ཁ་ཟས་ཚུལ་དང་འདྲ་བས་ཚིམ་པར་བྱས་ནས། གོས་བསྐོན་ཏེ་བསྐོར་བ་བྱས་སོ། །དེ་ནས་དྲང་སྲོང་ཆེན་པོ་ནག་པོ་གནས་དེ་ཉིད་ནས་རྫུ་འཕྲུལ་གྱིས་ནམ་མཁའ་ལས་རང་གི་གནས་ག་ལ་བ་དེར་སོང་ངོ་། །དེ་ནས་དྲང་སྲོང་ཆེན་པོ་ནག་པོས་བྲམ་ཟེའི་ཁྱེའུ་མིས་བྱིན་ལ་འདི་སྐད་ཅེས་སྨྲས་སོ། །མིས་བྱིན་ཁྱོད་ཀྱིས་ནམ་སངས་རྒྱས་འཇིག་རྟེན་དུ་བྱུང་ངོ་ཞེས་ཐོས་པ་དེའི་ཚེ། ཁྱོད་སོང་སྟེ་དེའི་
བསྟན་པ་ལ་རབ་ཏུ་བྱུང་ཤིག་དང་། དེ་ནི་ཁྱོད་ཀྱི་ཡུན་རིང་པོའི་དོན་དང་། ཕན་པ་དང་བདེ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། ལྷ་ཡི་ཚོགས་རྣམས་ནམ་མཁའི་ངོས་ལ་གནས་ཏེ་སངས་རྒྱས་སྒྲ་སྒྲོག་པ། །ལྷ་ཡི་དྲང་སྲོང་ནག་པོ་རི་སུལ་གནས་པས་མཐོང་ནས་དགའ་མཆོག་ཐོབ། །འདི་ན་སྲོག་ཆགས་རྣམས་ཀྱི་དགའ་སྐྱེད་སངས་རྒྱས་ཞེས་བྱའི་ཚིག་འདི་ཅི། །བདག་གི་ལུས་ཀྱང་རབ་སིམ་གྱུར་ཅིང་སེམས་བདེ་མཆོག་ཏུ་ཞི་བར་གྱུར། །ལྷ་འམ་འོན་ཏེ་ལྷ་མིན་ཡང་ན་ནམ་མཁའ་ལྡིང་ངམ་མི་འམ་ཅི། །སངས་རྒྱས་ཞེས་བྱ་དགའ་དང་མོས་བྱེད་ཚིག་འདི་སྔོན་ཆད་མ་ཐོས་ཅི། །ལྷ་ཡི་མིག་གིས་ཕྱོགས་བཅུར་རི་དང་ས་དང་རྒྱ་མཚོ་རྣམས་ལ་བལྟས། །ཕྱིས་ཡང་ས་རི་མཚོ་ལ་རྨད་དུ་བྱུང་བ་རྣམ་པ་སྣ་ཚོགས་མཐོང་། །འོད་གསལ་མཛེས་པ་ལུས་ལ་སིམ་བྱེད་འདི་ནི་རབ་ཏུ་བཟང་སྣང་ཞིང་། །ཇི་ལྟར་རི་ཡི་རྩེ་མོ་རྣམས་སུ་བྱི་རུའི་མྱུ་གུ་འཐོན་གྱུར་ལ། །ཤིང་ལྗོན་རྣམས་ཀྱང་མེ་ཏོག་བཟང་རྒྱས་སྣ་ཚོགས་འབྲས་བུས་བརྒྱན་གྱུར་ལས། །སྲིད་པ་གསུམ་དུ་དཀོན་མཆོག་དམ་པ་མྱུར་དུ་འབྱུང་བར་ཤིན་ཏུ་གསལ། །ས་འདི་ཐམས་ཅད་མཉམ་ཞིང་དྲི་མེད་ལག་མཐིལ་བཞིན་དུ་སྣང་བ་དང་། །ལྷ་རྣམས་དགའ་ཞིང་ནམ་མཁའི་དཀྱིལ་ན་གོས་ཀྱི་གཡབ་མོ་འབྱིན་གྱུར་ལ། །ཀླུ་རྒྱལ་རྒྱ་མཚོའི་གནས་ཀྱི་སྟེང་ན་རིན་ཆེན་རྨད་འབྱུང་འཕྱོ་བ་ལས། །འཛམ་བུའི་གླིང་དུ་རྒྱལ་བའི་དཀོན་མཆོག་ཆོས་ཀྱི་འབྱུང་གནས་ངེས་པར་འབྱུང་། །ངན་སོང་ཞི་ཞིང་སྡུག་བསྔལ་བྲལ་ཏེ་སེམས་ཅན་རྣམས་ནི་བདེར་ལྡན་ལ། །ལྷ་ཡི་ཚོགས་རྣམས་ནམ་མཁའི་དཀྱིལ་ལ་དགའ་དང་ལྡན་པར་རྒྱུ་བ་དང་། །ཇི་ལྟར་ལྷ་ཡི་གླུ་དབྱངས་སྒྲ་སྙན་ཡིད་དུ་འོང་བ་གྲག་པ་ལས། །སྲིད་པ་གསུམ་འདིར་དཀོན་མཆོག་འབྱུང་འགྱུར་དེ་ཡི་ལྟས་སུ་གདོན་མི་ཟ། །འཛམ་བུའི་གླིང་འདིར་དྲང་སྲོང་ནག་པོས་ལྷ་ཡི་མིག་གིས་རྣམ་བལྟས་ན། །སེར་སྐྱའི་གྲོང་ན་རྒྱལ་པོ་ཟས་གཙང་གྲོང་ཁྱེར་དམ་པ་ཡོད་པ་དེར། །་མཐུ་ཆེན་མཐུ་ལྡན་མཚན་དང་བསོད་ནམས་གཟི་བརྗིད་རྒྱས་པ་བཙས་པ་མཐོང་། །མཐོང་ནས་དགའ་མགུ་རངས་ཤིང་བདེ་བའི་ཡིད་སྐྱེས་མཐུ་ཡང་སྐྱེས་པར་གྱུར། །དེ་ནས་ངོ་མཚར་རྙེད་དེ་རང་གི་སློབ་
མ་ལྷན་ཅིག་རིངས་སུ་དོང་། །ཕྱིན་ནས་སེར་སྐྱར་བརྗོད་པའི་རྒྱལ་པོའི་གྲོང་ཁྱེར་མཆོག་གི་སྒོར་འདུག་སྟེ། །ཞབས་འབྲིང་སྲོག་ཆགས་བྱེ་བ་ཁྲག་ཁྲིག་མང་པོ་དྲང་སྲོང་དེས་མཐོང་ནས། །སྒོ་བ་དེ་ལ་སྨྲས་པ་ཆབ་སྒོར་དྲང་སྲོང་ཕྱིན་ཅེས་མྱུར་དུ་གསོལ། །དེ་མཉན་མྱུར་དུ་ཕོ་བྲང་ནང་ཕྱིན་རྒྱལ་པོ་ལ་ནི་དེ་བསྙད་པ། །ལྷ་ཅིག་དྲང་སྲོང་རྒན་འཁོགས་དཀའ་ཐུབ་ཆེན་པོ་ཅན་ཞིག་ཆབ་སྒོར་མཆིས། །དྲང་སྲོང་མཆོག་དེ་རྒྱལ་པོའི་ཕོ་བྲང་ནང་དུ་མཆི་བར་དགའ་ཞེས་མཆི། །རྒྱལ་པོ་ཆེན་པོ་ནང་དུ་བཏང་ངམ་མི་བཏང་བདག་ལ་བཀའ་སྩལ་གསོལ། །དེ་ནས་དེ་ཡི་སྟན་བཏིང་རྒྱལ་པོས་ཁྱོད་སོང་ནང་དུ་བོས་ཞེས་བསྒོ། །དྲང་སྲོང་ནག་པོས་བསྒོ་བའི་ཚིག་ཐོས་དགའ་མགུ་བདེ་དང་ལྡན་པར་གྱུར། །སྐོམ་པ་བསིལ་བའི་ཆུ་འདོད་བཀྲེས་པས་གདུངས་པ་ཟས་ལ་མོས་པ་ལྟར། །དྲང་སྲོང་དམ་པ་དེ་ཡང་སེམས་ཅན་མཆོག་དེ་མཐོང་དུ་མངོན་པར་དགའ། །རྒྱལ་པོ་རྒྱལ་གྱུར་སྐུ་ཚེ་རིང་བསྲུང་གསོལ་ཞེས་དགའ་བས་དེ་སྐད་སྨྲས། །སྙན་པར་བརྗོད་ནས་ཡིད་དུལ་དབང་པོ་ཞི་ཞིང་དེས་པ་སྟན་ལ་འདུག །རྒྱལ་པོས་གུས་པར་སྨྲ་བྱས་དྲང་སྲོང་ཐུབ་པ་དེ་ལ་ཚིག་བརྗོད་པ། །རྒྱལ་པོའི་ཕོ་བྲང་འདིར་བྱོན་རྒྱུ་ཅི་ཐུབ་པས་བདག་ལ་མྱུར་དུ་གསུངས། །ཁྱོད་ཀྱི་སྲས་བལྟམ་གཟུགས་མཆོག་ཕ་རོལ་ཕྱིན་ཅིང་གཟི་བརྗིད་ཆེ་དང་ལྡན། །མཐུ་ཆེན་མཚན་རབ་སུམ་ཅུ་གཉིས་ཀྱིས་ཀུན་ནས་རྒྱན་མངའ་བ། །རྒྱལ་པོ་ཁྱོད་སྲས་ཐམས་ཅད་དོན་གྲུབ་དེ་ནི་མཐོང་བར་བདག་དགའ་སྟེ། །དེ་སླད་འདིར་མཆིས་རྒྱལ་པོ་བདག་ལ་འཚལ་བ་གཞན་ནི་ཡོད་མ་མཆིས། །ལེགས་སོ་ལེགས་པར་བྱོན་ཏེ་མཉེལ་ཏམ་མ་མཉེལ་ཁྱོད་མཐོང་བདག་དགའོ། །མཆོག་སྦྱིན་གཞོན་ནུ་དེ་ཉལ་ད་ལྟར་བལྟ་བའི་སྐབས་ནི་མ་མཆིས་ཀྱིས། །རེ་ཞིག་ཡུད་ཙམ་གཞེས་དང་འདིར་ནི་ཟླ་བ་ཉ་བ་དྲི་མེད་པ། །་སྐར་མའི་ཚོགས་ཀྱིས་བརྒྱན་པ་འདྲ་བའི་དྲི་མེད་གཟིགས་པར་འགྱུར། །གང་ཚེ་ཁ་ལོ་སྒྱུར་མཆོག་ཟླ་བ་རྒྱས་པའི་འོད་མངའ་དེ་སད་པ། །དེ་ཚེ་རྒྱལ་པོས་འོད་འབར་གཟུགས་འཆང་ཉི་ལས་འཕགས་འོད་པང་བླངས་ཏེ། །འདི་ལྟར་དྲང་སྲོང་ལྷ་མིས་མཆོད་པ་གསེར་མཆོག་གཟུགས་ལྡན་ད་གཟིགས་ཤིག །དྲང་སྲོང་ནག་པོས་དེ་ཡི་རྐང་པ་མཛེས་པ་འཁོར་
ལོའི་མཚན་ཅན་མཐོང་། །དེ་ནས་ལངས་ཏེ་ཐལ་མོ་སྦྱར་ནས་རྐང་པ་གཉིས་ལ་ཕྱག་འཚལ་ཏེ། །བདག་ཉིད་ཆེན་པོ་བསྟན་བཅོས་མཁས་པས་པང་དུ་བླངས་ནས་བསམས་ཤིང་བལྟས། །དེས་ནི་མཐུ་ཆེན་མཐུ་ལྡན་མཚན་གྱི་མཆོག་གིས་བརྒྱན་པ་མཐོང་གྱུར་ནས། །མགོ་ལྕོགས་རིག་བྱེད་བསྟན་བཅོས་མཁས་པ་དེས་ནི་དེ་ལ་རྣམ་གཉིས་མཐོང་། །སྟོབས་ལྡན་འཁོར་ལོས་སྒྱུར་བའི་རྒྱལ་པོའམ་སངས་རྒྱས་འཇིག་རྟེན་གཙོ་བོར་འགྱུར། །ཤིན་ཏུ་མི་དགའ་ལུས་དང་སེམས་ཀྱིས་མཆི་མ་བླགས་ཏེ་ཤུགས་རིང་ཕྱུང་། །རྒྱལ་པོ་མཆོག་ཀྱང་སྔངས་པར་གྱུར་ནས་བྲམ་ཟེ་ཅི་སླད་བཤུམས་ཞེས་སྨྲ། །དྲང་སྲོང་ནག་པོས་བདག་གི་དོན་གྲུབ་བགེགས་ཞིག་མ་གཟིགས་སམ། དྲང་སྲོང་ཅི་སླད་བཤུམས་མཛད་དགེ་སྡིག་གང་གཟིགས་བདག་ལ་མང་བར་གསུངས། །ཁྱོད་སྲས་དོན་ཀུན་གྲུབ་ལ་བར་ཆད་སྡིག་ཏུ་འགྱུར་བ་མ་མཆིས་ཏེ། །བདག་ལ་བདག་ཉིད་རྒས་ཤིང་འདི་ལྟར་འཁོགས་པར་གྱུར་ཅེས་མྱ་ངན་བགྱིད། །འདི་ནི་སངས་རྒྱས་འཇིག་རྟེན་མཆོག་འགྱུར་ཆོས་ཀྱང་ཡང་དག་སྟོན་པར་འགྱུར། །བདག་གིས་དགའ་བ་ཐོབ་པའི་ཡིད་ཀྱིས་མི་མཐོང་ངོ་ཞེས་དེ་སླད་དུ། །འདི་ཡི་སྐུ་ལ་མཚན་རབ་སུམ་ཅུ་རྩ་གཉིས་དྲི་མེད་མངའ་བ་ལས། །རྣམ་པ་གཉིས་སུ་འགྱུར་ཏེ་གསུམ་དུ་མ་མཆིས་རྒྱལ་པོ་མཁྱེན་པར་མཛོད། །འཁོར་ལོས་སྒྱུར་བའི་རྒྱལ་འགྱུར་ཡང་ན་སངས་རྒྱས་འཇིག་རྟེན་གཙོ་བོར་བྱོན། །འདི་ནི་འདོད་པའི་ཡོན་ཏན་བཞེད་པར་མི་འགྱུར་ངེས་པར་སངས་རྒྱས་འགྱུར། །དྲང་སྲོང་ལུང་བསྟན་དེ་ཐོས་རྒྱལ་པོ་དགའ་ཞིང་བདེ་བ་ཐོབ་པར་གྱུར། །དེ་ནས་ལངས་ཏེ་ཐལ་མོ་སྦྱར་ནས་རྐང་པ་གཉིས་ལ་ཕྱག་ཀྱང་བྱས། །སྟོབས་མཆོག་ལྡན་པ་ཁྱོད་ནི་ལྷས་མཆོད་དྲང་སྲོང་རྣམས་ཀྱིས་བསྔགས་པ་སྟེ། །སྲིད་གསུམ་ཀུན་གྱི་འགྲོ་བའི་དེད་དཔོན་མཆོག་གྱུར་ཁྱོད་ལ་ཕྱག་འཚལ་ལོ། །དྲང་སྲོང་དགའ་བས་ཚ་བོ་དེ་ལ་སྨྲས་པ་ང་ཡི་གདམས་ངག་ཉོན། །གང་ཚེ་འདི་ནི་བྱང་ཆུབ་སངས་རྒྱས་འགྲོ་ལ་འཁོར་ལོ་སྐོར་ཐོས་པ། །དེ་ཚེ་མྱུར་དུ་ཐུབ་པའི་བསྟན་ལ་རབ་བྱུང་མྱ་ངན་འདས་པ་འཐོབ། །དྲང་སྲོང་དམ་པ་དེ་ཡིས་རྐང་ལ་ཕྱག་འཚལ་བསྐོར་བ་བྱས་ནས་ནི། །འདི་འདྲའི་སྲས་
མངའ་ཁྱོད་ཀྱི་ཐོབ་པ་རྒྱ་ཆེན་ལེགས་པར་ཐོབ་ཅེས་སྨྲས། །འདི་ནི་འཇིག་རྟེན་ལྷ་དང་མིར་བཅས་ཆོས་ཀྱིས་ཚིམ་པར་མཛད་པར་འགྱུར། །དྲང་སྲོང་མཆོག་དེ་སེར་སྐྱའི་གནས་ནས་བྱུང་ནས་བདག་གནས་དགོན་པར་ཕྱིན།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དྲུག་པ། དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་མ་ཐག་ཏུ་ལྷའི་བུ་དབང་ཕྱུག་ཆེན་པོས། གནས་གཙང་མའི་རིས་ཀྱི་ལྷའི་བུ་རྣམས་ལ་བོས་ཏེ། འདི་སྐད་ཅེས་སྨྲས་སོ། །གྲོགས་པོ་དག་བྱང་ཆུབ་སེམས་དཔའ་སེམས་དཔའ་ཆེན་པོ་གང་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་ཡོངས་སུ་སྦྱང་བ་བྱས་པ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། ཐོས་པ་དང་། སྤྱོད་པ་དང་། བརྟུལ་ཞུགས་དང་། དཀའ་ཐུབ་ཅན་སྤྱད་པ་ལེགས་པར་སྤྱད་པ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་ལྡན་པ་བཏང་སྙོམས་ཀྱིས་ཡང་དག་པར་འཕགས་པའི་བློ་ཅན། སེམས་ཅན་ཐམས་ཅད་ལ་ཕན་པར་བརྩོན་པ། བརྩོན་འགྲུས་བརྟན་པའི་གོ་ཆ་ལེགས་པར་བགོས་པ། སྔོན་གྱི་རྒྱལ་བ་ལ་དགེ་བའི་རྩ་བ་བསྐྱེད་པས་བྱུང་བ། བསོད་ནམས་བརྒྱ་པའི་མཚན་གྱིས་ཡང་དག་པར་བརྒྱན་པ། རྟུལ་བ་ངེས་པར་བྱས་པ་དང་ལྡན་པ། ཕ་རོལ་གྱི་དམག་ཚོགས་རབ་ཏུ་འཇོམས་པ། དགའ་བའི་བསམ་པ་ཤིན་ཏུ་དྲི་མ་མེད་པ་ཕུན་སུམ་ཚོགས་པ། ཡེ་ཤེས་ཆེན་པོའི་ཏོག་གི་རྒྱལ་མཚན་ཅན། བདུད་ཀྱི་སྟོབས་མཐར་འབྱིན་པ། སྟོང་གསུམ་གྱི་དེད་དཔོན་ཆེན་པོ། ལྷ་དང་མིས་མཆོད་པ། མཆོད་སྦྱིན་ཆེན་པོའི་མཆོད་སྦྱིན་བྱས་པ། བསོད་ནམས་ཀྱི་ཚོགས་ཤིན་ཏུ་ཕུན་སུམ་ཚོགས་པ་དང་ལྡན་པ། འབྱུང་བའི་བསམ་པ་ཅན། སྐྱེ་བ་དང་། རྒ་བ་དང་། འཆི་བ་མཐར་འབྱིན་པ། ལེགས་པར་སྐྱེ་བས་སྐྱེས་པ། འགྲོ་བ་རྣམ་པར་བྱང་ཆུབ་པར་བྱེད་པ་དེ། བུ་རམ་ཤིང་པའི་རྒྱལ་པོའི་རིགས་སུ་སྐྱེས་ནས་མིའི་འཇིག་རྟེན་དུ་བྱུང་སྟེ། དེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་འཚང་རྒྱས་ཚུར་ཤོག །བདག་ཅག་དེ་ལ་ཕྱག་འཚལ་ཞིང་རིམ་གྲོར་བྱ་བ་དང་། བཀུར་སྟིར་བྱ་བ་དང་། མངོན་པར་བསྟོད་པར་བྱ་བའི་ཕྱིར་འདོང་ངོ་། །ལྷའི་བུ་ང་རྒྱལ་གྱི་ཟིལ་གྱིས་ནོན་པ་གཞན་དག་ཀྱང་བདག་ཅག་བྱང་ཆུབ་སེམས་དཔའ་ལ་ཕྱག་འཚལ་བ་མཐོང་བ་དང་། དེ་དག་ཀྱང་ང་རྒྱལ་དང་། དྲེགས་པ་དང་། རྒྱགས་པ་གཏོང་བར་འགྱུར་ཏེ། བྱང་ཆུབ་སེམས་དཔའ་ལ་ཕྱག་འཚལ་ཞིང་རིམ་གྲོ་དང་བཀུར་སྟི་བྱེད་པར་བྱ་བའི་ཕྱིར་འདོང་ངོ་། །དེ་ནི་ལྷའི་བུ་དེ་དག་ལ་ཡུན་རིང་པོའི་དོན་དང་། ཕན་པ་དང་། བདེ་བ་དང་། འཆི་བ་མེད་པ་འཐོབ་པའི་བར་དུ་འགྱུར་རོ། །རྒྱལ་པོ་ཟས་གཙང་མ་རྒྱལ་བ་འཕེལ་བ་ཡང་རྗེས་སུ་བསྒྲགས་པར་འགྱུར་རོ། །བྱང་ཆུབ་སེམས་དཔའ་ཡང་དེ་ཁོ་ནའི་ལུང་བསྟན་པས་ལུང་བསྟན་ཏེ་བདག་ཅག་ཕྱིར་འོང་བར་བྱའོ། །དེ་སྐད་ཅེས་བསྒོ་ནས་ལྷའི་བུ་དབང་ཕྱུག་ཆེན་པོ། ལྷའི་བུ་བརྒྱ་སྟོང་ཕྲག་བཅུ་གཉིས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་འོད་ཀྱིས་རྒྱས་པར་བཀང་སྟེ། རྒྱལ་པོ་ཟས་གཙང་མའི་ཕོ་བྲང་ག་ལ་བ་དེར་སོང་ནས་ཕྱིན་པ་དང་། སྒོ་བས་རྒྱལ་པོ་ལ་གསོལ་ཏེ། རྒྱལ་པོས་གནང་ནས་རྒྱལ་པོའི་ཕོ་བྲང་དུ་ཕྱིན་ཏེ། བྱང་ཆུབ་སེམས་དཔའི་རྐང་པ་ལ་མགོ་བོས་ཕྱག་འཚལ་ནས། བླ་གོས་ཕྲག་པ་གཅིག་ཏུ་གཟར་ཏེ། ལན་བརྒྱ་སྟོང་ཕྲག་དུ་མར་བསྐོར་བ་བྱས་ནས་བྱང་ཆུབ་སེམས་དཔའ་པང་དུ་བླངས་ཏེ་རྒྱལ་པོ་ཟས་གཙང་མ་ལ་དགའ་བར་བྱ་བའི་ཕྱིར་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་དགྱེས་པའི་དམ་པས་དགྱེས་པར་མཛོད་ཅིག །དེ་ཅིའི་སླད་དུ་ཞེ་ན། རྒྱལ་པོ་ཆེན་པོ་བྱང་ཆུབ་སེམས་དཔའི་སྐུ་མཚན་དང་དཔེ་བྱད་བཟང་པོས་ལེགས་པར་བརྒྱན་པ་དང་། གཞོན་ནུས་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ཁ་དོག་དང་། གཟི་བརྗིད་དང་། གྲགས་པ་དང་། དཔལ་གྱི་ཟིལ་གྱིས་ནོན་པ་ལས་ན། རྒྱལ་པོ་ཆེན་པོ་བྱང་ཆུབ་སེམས་དཔའ་ནི་གདོན་མི་འཚལ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དགེ་སློང་དག་དེ་ལྟར་ལྷའི་བུ་དབང་ཕྱུག་ཆེན་པོ་གནས་གཙང་མའི་རིས་
ཀྱི་ལྷའི་བུ་མང་པོ་དང་ལྷན་ཅིག་ཏུ་བྱང་ཆུབ་སེམས་དཔའ་ལ་མཆོད་པ་དང་། རིམ་གྲོ་ཆེན་པོ་བྱས་ཏེ། དེ་ཁོ་ནའི་ལུང་བསྟན་པས་བྱང་ཆུབ་སེམས་དཔའ་ལུང་བསྟན་ནས་ཕྱིར་བདག་གི་གནས་སུ་སོང་ངོ་། །དེ་ལ་འདི་སྐད་ཅེས་བྱ་སྟེ། ཡོན་ཏན་རྒྱ་མཚོའི་ཕ་རོལ་ཕྱིན་པ་དེ་བལྟམ་པ། །ལྷ་ཡི་དབང་པོས་ཤེས་ནས་དགའ་སྟེ་ལྷ་ལ་སྨྲས། །དེ་ཐོས་འགྱུར་བའང་བསྐལ་པ་བྱེ་མང་ཤིན་ཏུ་དཀའ། །ཚུར་ཤོག་མི་ཡི་དབང་པོ་དེ་ལ་མཆོད་དུ་འདེང་། །རིན་ཆེན་ནོར་བུས་གཙུག་ནི་ལེགས་བརྒྱན་སྤྱོད་ལམ་ལྡན། །གཙུག་པུད་མཛེས་པ་འཕྱང་བ་རྣམ་པར་དག་པའི་ལྷ། །སྟོང་ཕྲག་བཅུ་གཉིས་ཚང་བ་སེར་སྐྱའི་གནས་མཆོག་ཏུ། །མྱུར་དུ་ལྷགས་ནས་རྒྱལ་པོའི་སྒོ་ཡི་དྲུང་ན་སྡོད། །དེ་དག་རྣམས་ཀྱིས་སྒོ་བ་ལ་ནི་ཡིད་འོང་སྨྲས། །རྒྱལ་པོའི་ཕོ་བྲང་སོང་སྟེ་ཐུགས་སུ་ཆུད་པར་གསོལ། །ཆབ་སྒོ་བས་ཀྱང་ཚིག་དེ་མཉན་ནས་ནང་དུ་སོང་། །ཐལ་མོ་སྦྱར་ནས་རྒྱལ་པོ་དེ་ལ་འདི་སྐད་སྨྲས། །་ལྷན་ཅིག་རྟག་ཏུ་རྒྱལ་གྱུར་སྐུ་ཚེ་རིང་དུ་སྲུངས། །བསོད་ནམས་ཡངས་པ་རྣམ་དག་འོད་ཅན་ཆབ་སྒོར་མཆིས། །རིན་ཆེན་ནོར་བུས་གཙུག་ནི་ལེགས་བརྒྱན་སྤྱོད་ལམ་ལྡན། །ཟླ་བ་ཉ་ལྟར་བཞིན་བཟང་ཟླ་ལྟར་དྲི་མེད་འོད། །རྒྱལ་པོ་དེ་དག་གང་དུ་མཆི་ཡང་གྲིབ་མི་གདའ། །སུག་པ་འདོར་ཡང་གོམ་པའི་སྒྲ་དག་ཐོས་མི་འགྱུར། །དོག་སར་རྒྱུ་བ་བགྱིད་ཀྱང་རྡུལ་ནི་ཡོང་མི་ལྡང་། །སྐྱེ་བོ་རྣམས་ཀྱང་དེ་དག་མཐོང་ན་ངོམས་མི་འགྱུར། །དེ་དག་ལུས་ཀྱི་འོད་ནི་ཤིན་ཏུ་རྒྱ་ཆེན་གསལ། །ཚིག་ཀྱང་ཡིད་དུ་མཆིས་ཏེ་མི་ལ་དཔེ་མ་མཆིས། །ཟབ་ཅིང་འཇམ་མཉེན་སྙན་པ་འབྱུང་བའི་གནས། །དེ་དག་མི་མ་ལགས་ཀྱི་ལྷ་ཚོགས་ལགས་སྙམ་བགྱིད། །མེ་ཏོག་མཆོག་ཕྲེང་བྱུག་པ་དར་གྱི་ལྡ་ལྡི་དག །ཀུན་གྱི་ལག་ན་ཐོགས་ནས་གུས་དང་བཅས་པར་སྡོད། །རྒྱལ་པོ་ལྷ་རྣམས་དེ་དག་གཞོན་ནུ་ལྷ་ཡི་ལྷ། །བལྟ་བར་འཚལ་ཞིང་མཆོད་པའི་སླད་དུ་མཆིས་སུ་ངེས། །རྒྱལ་པོས་དེ་སྐད་ཚིག་ཐོས་རབ་ཏུ་དགར་གྱུར་ནས། །སོང་སྟེ་ཀུན་ཀྱང་ཕོ་བྲང་ནང་དུ་གཤེགས་ཞེས་གྱིས། །དེ་དག་ཡོན་ཏན་སྤྱོད་ལམ་ཁྱོད་ཀྱིས་སྨྲས་ལྟར་ན། །རྫུ་འཕྲུལ་དེ་འདྲ་བ་ནི་མི་ལ་གང་ཡང་མེད། །སྒོ་བས་ཐལ་མོ་སྦྱར་ཏེ་ལྷ་ལ་འདི་སྐད་སྨྲས། །
རྒྱལ་པོས་གནང་གིས་ཁྱེད་ཅག་ནང་དུ་བཞུད་དུ་གསོལ། །ལག་ན་ཕྲེང་ཐོགས་དེ་དག་དགའ་མགུ་ཡི་རངས་ཏེ། །ལྷ་ཡི་གནས་དང་འདྲ་བའི་རྒྱལ་པོའི་ཁྱིམ་དུ་ཞུགས། །ལྷ་མཆོག་དེ་དག་ཁྱིམ་དུ་ཕྱིན་པར་མཐོང་ནས་ནི། །རྒྱལ་པོ་སྟན་ལས་ལངས་ཏེ་ཐལ་མོ་སྦྱར་བྱས་ནས། །རིན་ཆེན་རྩ་བ་ཅན་གྱི་ཁྲི་གདན་བཤམས་པ་འདིར། །ཐུགས་བརྩེ་མཛད་པའི་ཐུགས་ཀྱིས་ཁྱེད་ཅག་བཞུགས་སུ་གསོལ། །ང་རྒྱལ་དྲེགས་མེད་དེ་དག་སྟན་ལ་འཁོད་པར་གྱུར། །བདག་ཅག་ཅི་སླད་འདིར་མཆིས་རྒྱལ་པོ་གསན་དུ་གསོལ། །ཁྱོད་སྲས་རྣམ་དག་སྐུ་མངའ་བསོད་ནམས་ཆེན་པོ་བལྟམ། །ཤིན་ཏུ་ལེགས་པའི་ཞབས་ལྡན་བདག་ཅག་མཐོང་བར་འཚལ། །གང་གི་འགྲོ་བ་གང་དང་སྦྱོར་བ་གང་ཅིར་འགྱུར། །མཚན་བཟང་མཚན་གྱི་ཆོ་ག་དག་ནི་བདག་ཅག་འཚལ། །དེ་བས་རྒྱལ་པོའི་དམ་པ་མི་དགྱེས་སྤང་བར་མཛོད། །སྣ་ཚོགས་མཚན་གྱིས་ཡན་ལག་བརྒྱན་པ་བལྟ་བར་འཚལ། །རྒྱལ་པོ་བུད་མེད་ཚོགས་ཀྱིས་བསྐོར་བ་དེ་རབ་དགའ། །གཞོན་ནུ་མེ་ཡི་འོད་ལྟར་འབར་བ་པང་དུ་བླངས། །ལྷ་མཆོག་གཙུག་ཕུད་འཕྱང་བ་དག་ནི་ཉེ་བར་བསྙེན། །ཐོག་མ་སྒོར་བྱུང་སྟོང་གསུམ་འདི་དག་ཀུན་ཏུ་གཡོས། །ལྷ་མཆོག་དེ་དག་འདྲེན་པའི་ཞབས་དང་སེན་མོ་ནི། །ཟངས་མདོག་དྲི་མེད་རྣམ་དག་གཟི་བརྗིད་ལྡན་མཐོང་ནས། །གཙུག་པུད་འཕྱང་བ་དེ་དག་མྱུར་དུ་ལངས་པར་གྱུར། །དྲི་མ་མེད་པའི་འོད་ཀྱིས་ཞབས་ལ་མགོས་ཕྱག་འཚལ། །འདི་འདྲའི་མཚན་དང་འདི་འདྲར་ལྟ་བ་དཔལ་ཅན་དང་། །འདི་འདྲའི་བསོད་ནམས་གཟི་བརྗིད་སྤྱི་གཙུག་མི་མཐོང་དང་། །མཛོད་སྤུ་ནས་ནི་རྒྱ་ཆེན་འོད་འབྱུང་འདི་འདྲ་ལས། །བདུད་རྣམས་ཕམ་མཛད་བྱང་ཆུབ་བརྙེས་འགྱུར་གདོན་མི་འཚལ། །མུན་སེལ་ཉོན་མོངས་བྲལ་བའི་ཡོན་ཏན་བརྟགས་ནས་སུ། །ཡང་དག་ཡོན་ཏན་ཇི་ལྟར་དོན་མཐོང་དེ་ལ་བསྟོད། །སྐྱེ་དང་རྒ་དང་འཆི་དང་ཉོན་མོངས་དགྲ་བསལ་བའི། །སེམས་ཅན་རིན་ཆེན་འདི་ནི་རིང་པོར་མི་ཐོགས་འབྱུང་། །ཡོངས་རྟོག་འདོད་ཆགས་ཡུལ་གྱི་གཙུབ་མས་བསྐྱེད་པ་ཡི། །རྣམ་གསུམ་མེས་ནི་སྲིད་གསུམ་ཀུན་འབར་ཡོངས་གདུངས་པར། །དཔལ་ཁྱོད་ཆོས་ཀྱི་སྤྲིན་
གྱིས་སྟོང་གསུམ་བཀང་ནས་ནི། །འཆི་མེད་ཆར་གྱིས་ཉོན་མོངས་གདུང་བ་ཞི་མཛད་འགྱུར། །བྱམས་པའི་གསུང་མངའ་ཐུགས་རྗེ་ལྡན་པ་འཇམ་པའི་གསུང་། །ཚངས་པའི་སྒྲ་དབྱངས་ཡིད་འོང་གསུང་དུ་སྒྲོག་མཛད་པ། །སྟོང་གསུམ་ཀུན་ཏུ་གོ་ཞིང་འགྲོ་བ་གོར་འགྱུར་བ། །བཅོམ་ལྡན་ཁྱོད་ཀྱིས་སངས་རྒྱས་གསུང་ཆེན་མྱུར་དུ་སྒྲོགས། །སྲིད་པའི་འདོད་ཆགས་བཅིངས་བྱིང་སྲིད་པའི་རྩེར་གནས་པ། །མུ་སྟེགས་ཅན་གྱི་ཚོགས་ངན་ལོག་པར་ལྟ་བ་བཅོམ། །ཁྱོད་ཀྱི་རྒྱུ་ལ་བརྟེན་དང་སྟོང་བའི་ཆོས་ཐོས་ནས། །སེང་གེས་ཝ་ཚོགས་བཞིན་དུ་དེ་དག་འབྱེར་བར་འགྱུར། །ཉོན་མོངས་ཆེན་པོའི་དུ་བ་མ་རིག་བསྒྲིབས་བསལ་ཏེ། །ཀུན་ཏུ་བྱུང་བ་སྐྱེ་བོ་ངེས་པར་སྣང་བྱེད་པའི། །ཡེ་ཤེས་འོད་འཕྲོ་ཤེས་རབ་འོད་རིག་གཟིགས་པ་ཡིས། །འགྲོ་བ་ཀུན་གྱི་མུན་པ་ཆེན་པོ་བསལ་བར་གསོལ། །གང་དུ་སེམས་ཅན་དག་པ་རྨད་བྱུང་འདི་འདྲ་བྱུང་། །ལྷ་དང་མི་རྣམས་ཀྱིས་ནི་རྙེད་པ་རྒྱ་ཆེན་ཐོབ། །རྣམ་པར་རྟོགས་པར་མཛད་པའི་སེམས་ཅན་རིན་ཆེན་འདིས། །ངན་སོང་ལམ་བཅད་ལྷ་ཡི་ལམ་ནི་གཏོད་པར་འགྱུར། །སེར་སྐྱའི་གནས་སུ་ལྷ་ཡི་མེ་ཏོག་ཆར་ཕབ་ནས། །བསྐོར་བ་བྱས་ཏེ་གུས་པར་བསྟོད་པ་བྱས་ནས་ནི། སངས་རྒྱས་སངས་རྒྱས་ལེགས་ཞེས་དེ་དག་ཚིག་རྗོད་ཅིང་། །ལྷ་ཚོགས་དེ་དག་ཚུལ་དུ་ཤིས་པར་མཁའ་ལས་དོང་། །བལྟམ་པའི་ལེའུ་སྟེ་བདུན་པའོ།། །།