ཉི་ཤུ་རྩ་གསུམ་པ། མངོན་པར་བསྟོད་པའི་ལེའུ།
དེ་ནས་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་བསྐོར་བ་བྱས་ཏེ། ལྷའི་ཙན་དན་གྱི་ཕྱེ་མའི་ཆར་མངོན་པར་ཕབ་ནས། ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་བསྟོད་དོ། །འཇིག་རྟེན་གསལ་བར་མཛད་པ་བྱུང་། །འཇིག་རྟེན་མགོན་པོ་འོད་མཛད་པ། །འཇིག་རྟེན་ལྡོངས་པར་གྱུར་པ་ལ། །ཉོན་མོངས་སྤངས་པ་མིག་སྦྱིན་པ། །ཁྱོད་ནི་གཡུལ་ལས་རྣམ་པར་རྒྱལ། །བསོད་ནམས་དག་གིས་དགོངས་པ་རྫོགས། །དཀར་པོའི་ཆོས་རྣམས་ཀུན་དུ་རྫོགས། །ཁྱོད་ནི་འགྲོ་བ་ཚིམ་མཛད་འགྱུར། །སྡིག་པ་མི་མངའ་འདམ་ལས་རྒལ། །གཽ་ཏ་མ་ནི་ཐང་ལ་བཞུགས། །སེམས་ཅན་གཞན་དག་རླུང་ཆེན་གྱིས། །ཁྱེར་བ་རྣམས་ཀྱང་སྒྲོལ་བར་འགྱུར། །ཤེས་རབ་ཆེན་པོ་ཁྱོད་འཕགས་ཏེ། །འཇིག་རྟེན་དག་ན་ཟླ་མ་མཆིས། །
འཇིག་རྟེན་ཆོས་ཀྱིས་ཁྱོད་མི་གོས། །ཆབ་ན་མཆིས་པའི་པད་མ་བཞིན། །འཇིག་རྟེན་རིང་ནས་གཉིད་ལོག་འདི། །མུན་པའི་ཕུང་པོས་གཏིབས་པ་ལ། །ཁྱོད་ནི་ཤེས་རབ་སྒྲོན་མེ་ཡིས། །རབ་ཏུ་སད་པར་མཛད་པ་སྤྱོད། །འཚོ་བའི་འཇིག་རྟེན་རིང་ནས་ནི། །ཉོན་མོངས་ནད་ཀྱིས་གཟིར་བ་ལ། །ནད་རྣམས་ཀུན་ལས་ཐར་མཛད་པ། །སྨན་པའི་རྒྱལ་པོ་ཡང་དག་བྱུང་། །འཇིག་རྟེན་མགོན་པོ་ཁྱོད་བྱུང་བས། །མི་ཁོམ་རྣམས་ནི་སྟོངས་པར་འགྱུར། །ལྷ་རྣམས་དང་ནི་མི་དག་ཀྱང་། །་བདེ་བ་རྣམས་དང་ལྡན་པར་འགྱུར། །སྐྱེས་བུ་ཁྱུ་མཆོག་དེས་པ་ཁྱོད། །ལྟ་བར་གང་དག་འདོང་བགྱིད་པ། །དེ་དག་བསྐལ་པ་སྟོང་རྣམས་སུ། །ནམ་ཡང་ངན་འགྲོར་མཆི་མི་འགྱུར། །གང་དག་ཆོས་ཉན་འགྱུར་བ་རྣམས། །དེ་དག་མཁས་ཤིང་ནད་མེད་དང་། །ཟག་དང་ཕུང་པོ་ཟད་པ་དང་། །འཇིགས་པ་མེད་པ་རྣམས་སུ་འགྱུར། །ཉོན་མོངས་བཅིངས་པ་བཅད་ནས་ནི། །ཀུན་ཀྱང་ལེན་པ་མ་མཆིས་པར། །མྱུར་དུ་རབ་ཏུ་གྲོལ་འགྱུར་ཏེ། །དགེ་བ་མཆོག་གི་འབྲས་བུ་འཐོབ། །དེ་དག་འཇིག་རྟེན་སྦྱིན་གནས་ཏེ། །སྦྱིན་པ་རྣམས་ནི་བླང་བའི་འོས། །དེ་དག་ཡོན་ཕུལ་མི་ཆུང་སྟེ། །ཀུན་ཀྱང་མྱ་ངན་འདས་རྒྱུ་ལགས། །དགེ་སློང་དག་དེ་ལྟར་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་འོད་གསལ་གྱི་ལྷའི་བུ་རྣམས་ཀྱིས་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་བཞུགས་པ་ལ་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་རྣམ་པ་སྣ་ཚོགས་རྣམས་ཀྱིས་ཆོ་ག་བཞིན་དུ་མཆོད་ནས་ལན་གསུམ་བསྐོར་བ་བྱས་ཏེ། ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཐུབ་པ་ཐུགས་ཟབ་གསུང་ནི་ཤིན་ཏུ་སྙན། །ཐུབ་མཆོག་ཚངས་དབྱངས་གླུ་ལྟར་གསུང་སྙན་མཆོག །བྱང་ཆུབ་རབ་མཆོག་ཤིན་ཏུ་དམ་པ་བརྙེས། །དབྱངས་ཀུན་མཐར་ཕྱིན་ཁྱོད་ལ་ཕྱག་འཚལ་ལོ། །ཁྱོད་སྐྱབས་ཁྱོད་གླིང་ཁྱོད་ནི་དཔུང་གཉེན་ཏེ། །ཁྱོད་ནི་འཇིག་རྟེན་མགོན་པོ་བྱམས་ཐུགས་མཛད། །ཁྱོད་ནི་སྨན་པའི་དམ་པ་ཟུག་རྔུ་འབྱིན། །གསོ་བ་ཕན་མཛད་ཁྱོད་ནི་དམ་པ་མཆོག །མར་མེ་མཛད་པ་གཟིགས་
མ་ཐག་ཏུ་ཁྱོད། །བྱམས་དང་ཐུགས་རྗེའི་སྤྲིན་གྱི་དྲ་བ་བསྒྲུབས། ། མགོན་པོ་བདུད་རྩིའི་རྒྱུན་གྱི་ཆར་ཕོབ་ལ། །ལྷ་མི་རྣམས་ཀྱི་གདུང་བ་ཞི་བར་མཛོད། །ཁྱོད་ནི་སྲིད་གསུམ་མི་གོས་པད་མ་འདྲ། །ཁྱོད་ནི་མི་གཡོ་མི་བསྐྱོད་ལྷུན་པོ་འདྲ། །ཁྱོད་ནི་ཐུགས་དམ་མི་གཡོ་རྡོ་རྗེ་བཞིན། །ཡོན་ཏན་མཆོག་ཀུན་མངའ་སྟེ་ཟླ་བ་འདྲ། །དགེ་སློང་དག་དེ་ལྟར་འོད་གསལ་བའི་ལྷ་རྣམས་ཀྱིས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་ལྷའི་བུ་རབ་ཚངས་པ་ལ་སོགས་པ་ཚངས་རིས་ཀྱི་ལྷ་རྣམས་ཀྱིས་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་བཞུགས་པ་ལ་ནོར་བུ་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མས་སྤྲས་པའི་རིན་པོ་ཆེའི་དྲ་བས་བཀབ་སྟེ་ལན་གསུམ་བསྐོར་བ་བྱས་ནས་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །དགེ་བ་དྲི་མེད་ཤེས་རབ་འོད་དང་གཟི་བརྗིད་ལྡན། །མཚན་གྱི་དམ་པ་སུམ་ཅུ་རྩ་གཉིས་མཆོག་མངའ་བ། །དྲན་དང་ལྡན་ཞིང་བློ་གྲོས་ལྡན་པ་ཡེ་ཤེས་མངའ། །མཉེལ་བ་མི་མངའ་ཁྱོད་ལ་མགོ་བོས་ཕྱག་འཚལ་ལོ། །དྲི་གསུམ་དྲི་མི་མངའ་བ་དྲི་མེད་དྲི་མ་བྲལ། །འཇིག་རྟེན་གསུམ་དུ་གྲགས་ཤིང་རིག་པ་གསུམ་བརྙེས་པ། །རྣམ་པར་ཐར་པ་དམ་པ་གསུམ་གྱི་མིག་སྦྱིན་པ། །སྤྱན་གསུམ་དྲི་མ་མི་མངའ་ཁྱོད་ལ་ཕྱག་འཚལ་ལོ། །དུས་ངན་རྙོག་པ་བསལ་ཞིང་རབ་ཏུ་ཞི་ཐུགས་ལྡན། །ཐུགས་བརྩེ་ཐུགས་རྗེས་འཕགས་པ་འགྲོ་བའི་དོན་མཛད་པ། །ཐུབ་པ་དགྱེས་པས་འཕགས་པ་ཐུགས་ནི་རབ་ཞི་བ། །ཁྱོད་ནི་ཡིད་གཉིས་གྲོལ་བར་མཛད་པ་བཏང་སྙོམས་དགྱེས། །བརྟུལ་ཞུགས་དཀའ་ཐུབ་འཕགས་པ་འགྲོ་བའི་དོན་མཛད་པ། །རང་སྤྱོད་རྣམ་པར་དག་ཅིང་སྤྱོད་པའི་ཕ་རོལ་བྱོན། །བདེན་པ་བཞི་པོ་སྟོན་པ་རྣམ་ཐར་དགྱེས་པ་པོ། །གྲོལ་བར་གྱུར་ནས་འགྲོ་བ་གཞན་ཡང་གྲོལ་མཛད་པ། །སྟོབས་དང་བརྩོན་འགྲུས་ལྡན་པའི་བདུད་པོ་འདིར་ལྷགས་པ། །ཤེས་རབ་བརྩོན་འགྲུས་དེ་བཞིན་བྱམས་པས་ཕམ་མཛད་ནས། །ཁྱོད་ཀྱིས་གོ་འཕང་དམ་པ་འཆི་བ་མེད་པ་བརྙེས། །གཡོན་ཅན་དཔུང་རྣམས་བཅོམ་པ་ཁྱོད་ལ་ཕྱག་འཚལ་ལོ། །དགེ་སློང་དག་དེ་ལྟར་ལྷའི་བུ་རབ་ཚངས་པ་ལ་སོགས་པ་ཚངས་རིས་ཀྱི་ལྷ་རྣམས་ཀྱིས་དེ་བཞིན་གཤེགས་
པ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་བདུད་ཀྱི་བུ་དཀར་པོའི་ཕྱོགས་པ་དེ་དག་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་པ་དང་། རིན་པོ་ཆེའི་གདུགས་དང་། བླ་རེ་ཆེན་པོ་རྣམས་ཀྱིས་དེ་བཞིན་གཤེགས་པ་མངོན་པར་བཀབ་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཁྱོད་སྟོབས་ཤིན་ཏུ་རྒྱ་ཆེ་བ་དང་བདུད་དཔུང་དྲག་པོ་བདག་ཅག་མངོན་སུམ་སྟེ། །བདུད་དཔུང་རབ་འཇིགས་ཆེན་པོ་དེ་ཡང་ཁྱོད་ཀྱིས་སྐད་ཅིག་གཅིག་ལ་ཕམ་པར་མཛད། །ཁྱོད་ནི་བཞེངས་པར་མ་གྱུར་སྐུ་ཡང་མི་གཡོ་གསུང་ཡང་བརྗོད་པ་མ་མཛད་དེ། །ཐུབ་པ་དོན་ཀུན་འགྲུབ་པ་འཇིག་རྟེན་གསུམ་གྱིས་མཆོད་པ་ཁྱོད་ལ་བདག་ཕྱག་འཚལ། །བདུད་ཀྱི་བུ་མོ་བྱེ་བ་ཁྲག་ཁྲིག་སྟོང་ཕྲག་དུ་མ་གང་གཱའི་བྱེ་མ་སྙེད། །དེ་དག་རྣམས་ཀྱིས་བྱང་ཆུབ་ཤིང་མཆོག་དྲུང་ནས་ཁྱོད་ནི་བསྐྱོད་ཅིང་གཡོ་མ་ནུས། །མཆོད་སྦྱིན་བྱེ་བ་ཁྲག་ཁྲིག་སྟོང་ཕྲག་དུ་མ་གང་གཱའི་བྱེ་མ་སྙེད་མཛད་དེ། །བྱང་ཆུབ་ཤིང་དྲུང་བཞུགས་པ་དེས་ན་དེ་རིང་ཁྱོད་ནི་རྣམ་པར་མཛེས་པ་ལགས། །བྱང་ཆུབ་སྤྱད་པ་དམ་པ་སྤྱོད་མཛད་ཚེ་ན་ཤིན་ཏུ་སྡུག་པའི་བཙུན་མོ་དང་། །ཕངས་པའི་སྲས་དང་བྲན་ཕོ་བྲན་མོ་དེ་བཞིན་སྐྱེད་མོས་ཚལ་དང་གྲོང་ཁྱེར་དང་། །ཡུལ་འཁོར་གྲོང་རྡལ་དག་དང་རྒྱལ་སྲིད་རྣམས་དང་བཙུན་མོའི་འཁོར་དང་གླང་པོ་དང་། །དབུ་དང་སྤྱན་དང་ལྗགས་དང་དེ་བཞིན་ཞབས་བཏང་དེས་ན་དེ་རིང་རྣམ་པར་མཛེས། །ང་ནི་སངས་རྒྱས་འགྱུར་ཏེ་བསམ་གཏན་རྫུ་འཕྲུལ་བློ་ཡི་གོ་བགོས་ནས། །སེམས་ཅན་བྱེ་བ་ཁྲག་ཁྲིག་མང་པོ་སྡུག་བསྔལ་རྒྱ་མཚོས་ཁྱེར་བར་གྱུར་པ་རྣམས། །དམ་ཆོས་གྲུ་ཡིས་ཉིད་ཀྱིས་བསྒྲལ་བར་བྱ་ཞེས་ཁྱོད་ཀྱིས་ལན་མང་གསུང་བརྗོད་པ། །ཁྱོད་ཀྱིས་སྨོན་ལམ་དེ་ནི་གྲུབ་ལགས་སྲོག་ཆགས་རྣམས་ཀྱང་སྒྲོལ་བར་མཛད་པར་འགྱུར། །སྨྲ་བའི་ཁྱུ་མཆོག་འཇིག་རྟེན་མིག་སྦྱིན་མཛད་པ་ཁྱོད་ལ་བསྟོད་པའི་བསོད་ནམས་དེ། །བདག་ཅག་ཐམས་ཅད་དགའ་མགུ་ཡིད་གྱུར་ཐམས་ཅད་མཁྱེན་པ་ཉིད་དུ་སྨོན་ལམ་འདེབས། །སངས་རྒྱས་རྣམས་ཀྱིས་རབ་བསྔགས་བྱང་ཆུབ་དམ་པ་མཚུངས་མེད་ཡང་དག་བསྒྲུབས་ནས་ནི། །དེ་ལྟར་བདུད་སྡེ་འཁོར་དེ་བཅོམ་
ནས་ཐམས་ཅད་མཁྱེན་ཉིད་འཚང་རྒྱར་འགྱུར་བར་ཤོག །དགེ་སློང་དག་དེ་ལྟར་བདུད་ཀྱི་བུ་རྣམས་ཀྱིས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་ལྷའི་བུ་གཞན་འཕྲུལ་དབང་བྱེད་ཀྱི་ལྷའི་བུ་བརྒྱ་སྟོང་དུ་མས་ཡོངས་སུ་བསྐོར་ཏེ། མདུན་དུ་བདར་ནས་དེ་བཞིན་གཤེགས་པ་ལ་འཛམ་བུ་ཀླུང་གི་གསེར་གྱི་པད་མ་དག་གིས་མངོན་པར་གཏོར་ཏེ། སྤྱན་སྔ་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །གསུང་ནི་དཔྱས་མ་མཆིས་ཤིང་མ་འཁྲུལ་རྣམ་པར་མ་འཁྲུགས་པ། །མུན་རྡུལ་བྲལ་ཞིང་འཆི་མེད་རྟོགས་པར་ཐུགས་སུ་ཆུད་པར་གྱུར། །ལྷ་ཡུལ་མི་ཡུལ་པ་ཡི་དཔལ་དང་བགྱི་བ་གཞལ་མེད་འོས། །རབ་ཏུ་འབར་བའི་བློ་གྲོས་ལྡན་ལ་མགོ་བོས་ཕྱག་འཚལ་ལོ། །དཀའ་བ་མཛད་པ་ཉོན་མོངས་སྤོང་བ་རྡུལ་དང་དྲི་མ་སེལ། །ཤིན་ཏུ་དགའ་བའི་གསུང་གིས་ལྷ་དང་མི་རྣམས་དགའ་བར་མཛོད། །སྐུ་མཆོག་འོད་ཟེར་རྒྱས་པ་དྲི་མ་ཤིན་ཏུ་མི་མངའ་བས། །ལྷ་དང་མི་ཡི་བདག་པོ་བཞིན་དུ་འགྲོ་བ་འདི་ལས་རྒྱལ། །ཕ་རོལ་ཚོགས་རྣམས་རབ་ཏུ་འཇོམས་པ་གཞན་གྱི་སྤྱོད་མཁས་པ། །ལྷ་དང་མི་ཡི་སྲིད་པར་དགའ་བ་གཞན་གྱི་བློ་སེལ་བ། །ཤིན་ཏུ་མཁས་པ་བློ་ལྡན་གཞན་གྱི་སྤྱོད་པ་རྣམ་པར་ཕྱེ། །སྟོབས་བཅུ་མངའ་བ་གཤེགས་པའི་ལམ་འདིར་རྣམ་པར་རྒྱུ་བ་མཛོད། །སྲིད་པ་འཛིན་དང་སྡུག་བསྔལ་ལོག་འཛིན་རྒྱ་ཆེན་འདོར་སེལ་ཏེ། །ལྷ་མི་བློ་གྲོས་འདུལ་བ་ཇི་ལྟ་བཞིན་དུ་འདུལ་བ་མཛོད། །ཟླ་བ་བཞིན་དུ་མཁའ་ལས་ཕྱོགས་བཞི་དག་ཏུ་རྣམ་རྒྱུ་བ། །སྲིད་པ་གསུམ་འདིར་རྨད་བྱུང་མིག་དང་དཔུང་གཉེན་གྱུར་པར་ཤོག །ལྷ་དང་མི་ཡི་སྲིད་པ་དགའ་ཡང་ཡུལ་ལ་འཁྲུལ་མི་མངའ། །འདོད་པའི་དགའ་དང་བྲལ་ཞིང་དགེ་བའི་དགའ་ལ་དགྱེས་པ་པོ། །འཁོར་ལ་སྒྲོགས་པ་འཇིག་རྟེན་གསུམ་ན་ཁྱོད་དང་མཚུངས་མ་མཆིས། །ཁྱོད་འདིར་འགྲོ་བ་རྣམས་ཀྱི་མགོན་དང་སྐྱབས་དང་དཔུང་གཉེན་ལགས། །དགེ་སློང་དག་དེ་ལྟར་ལྷའི་བུ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་ཀྱི་ལྷའི་བུ་རྣམས་ཀྱིས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་
ལྷའི་བུ་རབ་འཕྲུལ་རབ་འཕྲུལ་གྱི་ལྷའི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ། དེ་བཞིན་གཤེགས་པ་ལ་དར་གྱི་ལྡ་ལྡིས་གཡོགས་ནས་སྤྱན་སྔ་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །དྲི་མ་རྣམ་གསུམ་སྤངས་པས་ཁྱོད་ནི་ཆོས་ཀྱི་སྣང་བ་ཡང་དག་འཕགས། །གཏི་མུག་དང་ནི་ལྟ་དང་མ་རིག་འཇོམས་པ་མཛེས་དང་དཔལ་གྱིས་རྒྱས། །ལོག་པའི་ལམ་ལ་དགའ་བའི་སྐྱེ་བོ་འདི་དག་འཆི་མེད་འགོད་མཛད་པ། །འཇིག་རྟེན་འདིར་བྱུང་མཆོད་རྟེན་ལྷ་ཡུལ་བ་དང་མི་ཡུལ་བས་མཆོད་པ། །ཁྱོད་ནི་གསོ་བའི་སྨན་པ་མཁས་པ་བདུད་རྩི་བདེ་བ་སྦྱིན་པ་པོ། །ལྟ་དང་ཉོན་མོངས་པ་དང་མ་རིག་བསགས་པ་སྔོན་གྱི་བག་ལ་ཉལ། །ལུས་ཅན་རྣམས་ཀྱི་ནད་ཀུན་སྔོན་གྱི་རྒྱལ་བའི་ལམ་གྱིས་སེལ་བ་སྟེ། །དེ་བས་སྨན་པ་དམ་པ་འདྲེན་པ་ཁྱོད་ནི་ས་ལ་རྣམ་པར་རྒྱུ། །ཉི་ཟླའི་འོད་དང་སྐར་མ་རྣམས་དང་མེ་དང་དེ་བཞིན་ནོར་བུ་དང་། །བརྒྱ་བྱིན་ཚངས་པའི་འོད་རྣམས་དཔལ་སྟུག་སྤྱན་སྔར་ལམ་མེ་མ་ལགས་ཏེ། །ཤེས་རབ་སྣང་བ་མཛད་དང་འོད་མཛད་འོད་དང་དཔལ་གྱིས་རབ་ཏུ་རྒྱས། །ཁྱོད་ཀྱི་ཡེ་ཤེས་རྨད་བྱུང་མངོན་སུམ་གྱུར་པས་མགོ་བོས་ཕྱག་འཚལ་ལོ། །རྣམ་པར་འདྲེན་པ་སྙན་པའི་གསུང་ལྡན་བདེན་དང་བདེན་མིན་གསུང་བ་དང་། །དུལ་བ་ཐུགས་ཞི་དབང་པོ་ཐུལ་བ་རབ་ཏུ་ཞི་བའི་ཐུགས་ལྡན་པ། །སྟོན་པ་ལྷ་དང་མི་ཡི་འཁོར་ལ་བསྟན་པར་བགྱི་བ་སྟོན་མཛད་པ། །ཤཱཀྱ་ཐུབ་པ་མི་ཡི་ཁྱུ་མཆོག་ལྷ་མིས་མཆོད་ལ་ཕྱག་འཚལ་ལོ། །ཡེ་ཤེས་མངའ་བ་ཡེ་ཤེས་བཀའ་མཆིད་མཆོག་ཅན་སྲིད་གསུམ་གོ་མཛད་པ། །དྲི་མ་གསུམ་བསལ་རིག་པ་གསུམ་དང་རྣམ་པར་ཐར་གསུམ་སྟོན་པ་པོ། །ཐུབ་པ་བློ་གྲོས་ཇི་ལྟར་གདུལ་བ་སྐལ་དང་སྐལ་མེད་རབ་མཁྱེན་པ། །སྟོང་གསུམ་རྨད་དུ་བྱུང་བ་ལྷ་མིས་མཆོད་པ་ཁྱོད་ལ་ཕྱག་འཚལ་ལོ། །དགེ་སློང་དག་དེ་ལྟར་ལྷའི་བུ་རབ་འཕྲུལ་འཁོར་དང་བཅས་པས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འདུག་གོ །དེ་ནས་ལྷའི་བུ་ཡོངས་སུ་དགའ་ལྡན་དགའ་ལྡན་རིས་ཀྱི་ལྷའི་བུ་དང་ལྷན་ཅིག་ཏུ་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་ནས། ལྷའི་གོས་ཀྱི་དྲ་བ་ཆེན་པོས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་
མངོན་པར་བཀབ་སྟེ། སྤྱན་སྔ་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། ། ཁྱོད་ནི་དགའ་ལྡན་གནས་ན་བཞུགས་ཚེ་དེར་ནི་ཁྱོད་ཀྱིས་རྒྱ་ཆེན་ཆོས་ཀྱང་བཤད། །ཁྱོད་ཀྱིས་བསྟན་པ་དེ་ནི་ད་དུང་ལྷ་ཡི་བུ་རྣམས་ཆོས་སྤྱོད་རྒྱུན་མི་འཆད། །ཁྱོད་ལ་བལྟ་བས་ངོམས་པར་མི་འགྱུར་ཆོས་མཉན་པས་ཀྱང་ངོམས་པ་རྙེད་མི་འགྱུར། །ཡོན་ཏན་རྒྱ་མཚོ་འཇིག་རྟེན་སྒྲོན་མ་ཁྱོད་ལ་མགོ་དང་ཡིད་ཀྱིས་ཕྱག་འཚལ་ལོ། །ཁྱོད་ནི་དགའ་ལྡན་གནས་ནས་འཕོས་ཏེ་དེ་ཚེ་ཁྱོད་ཀྱིས་མི་ཁོམ་ཐམས་ཅད་སྦྱངས། །གང་ཚེ་བྱང་ཆུབ་ཤིང་དྲུང་བཞུགས་ཚེ་འགྲོ་བ་ཀུན་གྱི་ཉོན་མོངས་རབ་ཏུ་ཞི། །གང་གི་ཆེད་དུ་རྒྱ་ཆེན་བྱང་ཆུབ་བཙལ་བ་བརྙེས་ཏེ་བདུད་ཀྱང་ཕམ་པར་མཛད། །ཁྱོད་ཀྱི་སྨོན་ལམ་དེ་ནི་རབ་ཏུ་རྫོགས་ཀྱིས་འཁོར་ལོ་རྒྱ་ཆེན་མྱུར་དུ་སྐོར། །ཆོས་འཚལ་བ་དག་ཆོས་མཉན་བགྱི་ཞེས་ཏེ། །སྲོག་ཆགས་སྟོང་ཕྲག་མང་པོ་སྡོད་ཅིང་མཆིས། །འཁོར་ལོ་རྒྱ་ཆེན་མྱུར་དུ་བསྐོར་དུ་གསོལ། །སྲོག་ཆགས་སྟོང་རྣམས་སྲིད་ལས་བསྒྲལ་དུ་གསོལ། །དགེ་སློང་དག་དེ་ལྟར་ལྷའི་བུ་ཡོངས་སུ་དགའ་ལྡན་འཁོར་དང་བཅས་པས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འདུག་གོ །དེ་ནས་ལྷའི་བུ་རབ་འཐབ་བྲལ་ལ་སོགས་པ་འཐབ་བྲལ་གྱི་ལྷ་རྣམས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། མེ་ཏོག་དང་། སྤོས་དང་། ཕྲེང་བ་དང་། བྱུགས་པ་སྣ་ཚོགས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་མཆོད་དེ། སྤྱན་སྔ་ནས་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཚུལ་ཁྲིམས་ཏིང་འཛིན་དེ་བཞིན་ཤེས་རབ་ཀྱིས། །ཁྱོད་དང་མཚུངས་པ་མ་མཆིས་ག་ལ་ལྷག །མོས་དང་རྣམ་པར་གྲོལ་ལ་མཁས་པ་པོ། །དེ་བཞིན་གཤེགས་པ་ཁྱོད་ལ་མགོས་ཕྱག་འཚལ། །བྱང་ཆུབ་སྙིང་པོར་ལྷ་ཡིས་གང་བགྱིས་པ། །བཀོད་པ་མཛེས་པ་དེ་དག་མཐོང་ལགས་ཏེ། །ཇི་ལྟར་ཁྱོད་ལ་ལྷ་དང་མིས་མཆོད་པ། །དེ་ནི་གཞན་གང་ལ་ཡང་འོས་མ་ལགས། །ཁྱོད་བྱུང་དོན་མ་མཆིས་པ་མ་ལགས་ཏེ། །གང་གི་དོན་དུ་དཀའ་བ་མང་པོ་སྤྱད། །ཤིན་ཏུ་གཡོན་ཅན་སྡེ་དང་བཅས་ལས་རྒྱལ། །ཁྱོད་ཀྱིས་བླ་ན་མེད་པའི་བྱང་ཆུབ་
བརྙེས། །ཕྱོགས་བཅུ་དག་ཏུ་སྣང་བ་མཛད་པར་གྱུར། །ཤེས་རབ་སྒྲོན་མས་འཇིག་རྟེན་གསུམ་པོ་གསལ། །ཁྱོད་ནི་རབ་རིབ་སེལ་བར་འགྱུར་བ་སྟེ། །འགྲོ་ལ་བླ་ན་མེད་པའི་མིག་སྦྱིན་པ། །ཁྱོད་ལ་བསྟོད་པ་བསྐལ་པར་བརྗོད་ཀྱང་ནི། །ཁྱོད་ཀྱི་བ་སྤུའི་ཁུང་བུ་མཐའ་མ་མཆིས། །ཡོན་ཏན་རྒྱ་མཚོ་འཇིག་རྟེན་རྣམ་པར་གྲགས། །དེ་བཞིན་གཤེགས་པ་ཁྱོད་ལ་མགོས་ཕྱག་འཚལ། །དེ་ལྟར་ལྷའི་བུ་རབ་འཐབ་བྲལ་ལ་སོགས་པ་འཐབ་བྲལ་གྱི་ལྷའི་བུ་དེ་དག་གིས་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་ལྷའི་དབང་པོ་བརྒྱ་བྱིན་སུམ་ཅུ་རྩ་གསུམ་རིས་ཀྱི་ལྷ་རྣམས་དང་ལྷན་ཅིག་ཏུ་མེ་ཏོག་དང་། སྤོས་དང་། ཕྲེང་བ་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་བཀོད་པ་རྣམས་ཀྱིས་དེ་བཞིན་གཤེགས་པ་ལ་མཆོད་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཐུབ་པ་མ་འཁྲུལ་ཁ་ན་མ་ཐོ་མི་མངའ་རྟག་ཏུ་ལེགས་བཞུགས་ལྷུན་པོ་འདྲ། །ཕྱོགས་བཅུ་དག་ཏུ་ཡེ་ཤེས་འོད་གྲགས་བསོད་ནམས་དག་དང་གཟི་བརྗིད་ལྡན་པ་པོ། །ཐུབ་པ་ཁྱོད་ཀྱིས་སྔོན་ཆད་སངས་རྒྱས་བརྒྱ་ཕྲག་མཐའ་ཡས་ཡང་དག་མཆོད་པ་མཛད། །དེ་ཡི་ཡུལ་དེ་ཡིས་ནི་བྱང་ཆུབ་ཤིང་དྲུང་བདུད་ཀྱི་སྡེ་ལས་རྒྱལ་བར་གྱུར། །ཚུལ་ཁྲིམས་དང་ནི་ཐོས་དང་ཏིང་འཛིན་ཤེས་རབ་འབྱུང་གནས་ཡེ་ཤེས་རྒྱལ་མཚན་ཏོག །རྒ་ཤི་འཇོམས་པར་མཛད་པ་སྨན་པ་དམ་པ་འཇིག་རྟེན་དག་ལ་མིག་སྦྱིན་པ། །ཐུབ་པ་དྲི་མ་གསུམ་དང་ཐ་བ་སྤངས་ཤིང་དབང་པོ་ཞི་ལ་ཐུགས་ཞི་བ། །ཤཱཀྱ་ཁྱུ་མཆོག་འགྲོ་བ་དག་གི་ཆོས་ཀྱི་རྒྱལ་པོ་ཁྱོད་ལ་སྐྱབས་སུ་མཆི། །ཁྱོད་ཀྱིས་བརྩོན་འགྲུས་མཐུ་ཡིས་འཕགས་པའི་བྱང་ཆུབ་སྤྱོད་པ་མཐའ་ཡས་གྱུར་ལགས་ཏེ། །ཤེས་རབ་སྟོབས་དང་ཐབས་དང་བྱམས་པའི་སྟོབས་དང་བསོད་ནམས་སྟོབས་རྣམས་དང་། །སྟོབས་རྣམས་དེ་དག་བཅོམ་ལྡན་འདས་ཁྱོད་བྱང་ཆུབ་བཞུགས་པའི་ཚེ་ན་མཐའ་ཡས་ཏེ། །སྟོབས་དང་ལྡན་པ་དེ་རིང་བྱང་ཆུབ་སྙིང་པོར་བཞུགས་ནས་སྟོབས་བཅུ་མངའ་བར་གྱུར། །དཔུང་ཚོགས་མཐའ་ཡས་མཐོང་ནས་དགེ་སྦྱོང་རྒྱལ་པོ་བྱང་ཆུབ་སྙིང་པོར་བཞུགས་པ་
དེ། །ཉམས་པར་མི་འགྱུར་གྲང་ཞེས་ལྷ་རྣམས་ཐམས་ཅད་རབ་ཏུ་སྔངས་ཤིང་སྐྲག་པར་གྱུར། །ཁྱོད་ནི་འབྱུང་པོ་རྣམས་ཀྱིས་བསྙེངས་པར་མ་གྱུར་སྐུ་ཡང་གཡོ་བ་མི་མངའ་སྟེ། །ཁུར་ལྕི་ཕྱག་གིས་བརྡབས་ནས་ཀུན་ཏུ་གཡོས་ཏེ་བདུད་ཀྱི་སྡེ་ལས་རྒྱལ་བར་གྱུར། །ཇི་ལྟར་སྔ་མ་རྣམས་ཀྱིས་སེང་གེའི་ཁྲི་ལ་བྱང་ཆུབ་དམ་པ་བརྙེས་གྱུར་པ། །དེ་ལྟར་ཁྱོད་ཀྱིས་རྗེས་སུ་སངས་རྒྱས་མཚུངས་ཤིང་མཉམ་སྟེ་གཞན་དུ་གྱུར་མ་ལགས། །ཡིད་ཀྱང་མཉམ་ཞིང་སེམས་ཀྱང་མཉམ་སྟེ་ཁྱོད་བདག་ཉིད་ཀྱིས་ཐམས་ཅད་མཁྱེན་ཉིད་བརྙེས། །དེས་ན་ཁྱོད་ནི་འཇིག་རྟེན་དམ་པ་རང་བྱུང་འགྲོ་བ་རྣམས་ཀྱི་བསོད་ནམས་ཞིང་། །དགེ་སློང་དག་དེ་ལྟར་ལྷའི་དབང་པོ་བརྒྱ་བྱིན་སུམ་ཅུ་རྩ་གསུམ་པའི་ལྷ་རྣམས་དང་ལྷན་ཅིག་ཏུ་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འདུག་གོ །དེ་ནས་རྒྱལ་པོ་ཆེན་པོ་བཞི་པོ་དག་རྒྱལ་ཆེན་བཞིའི་རིས་ཀྱི་ལྷའི་བུ་རྣམས་དང་ལྷན་ཅིག་ཏུ་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་ནས། མེ་ཏོག་ཨ་ཏི་མུག་ཏ་ཀ་དང་། ཙམ་པ་ཀ་དང་། སྣ་མའི་མེ་ཏོག་དང་།བར་ཤི་ཀ་དང་། དྷ་ནུས་ཀ་རིའི་ཕྲེང་བ་དང་། ཆུན་པོ་ཐོགས་ཏེ། ལྷའི་བུ་མོ་བརྒྱ་སྟོང་གིས་བསྐོར་ནས་ལྷའི་གླུ་དབྱངས་ལེན་པས་དེ་བཞིན་གཤེགས་པ་ལ་མཆོད་པ་བྱས་ཏེ། ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཤིན་ཏུ་གསུང་སྙན་དབྱངས་ནི་ཡིད་དུ་མཆི། །ཟླ་ལྟར་རབ་ཏུ་ཞི་མཛད་ཐུགས་དང་བ། །འཛུམ་པའི་ཞལ་ལྡན་ལྗགས་ནི་རབ་ཡངས་པ། །ཐུབ་མཆོག་དགའ་མཛད་ཁྱོད་ལ་ཕྱག་འཚལ་ལོ། །ལྷ་མི་རྣམས་ཀྱི་སྙན་ཅིང་དགར་འགྱུར་བ། །སྒྲ་སྐད་གང་དག་འཇིག་རྟེན་མཆིས་པ་ཀུན། །ཁྱོད་ཀྱི་འཇམ་པའི་གསུང་ནི་ཕྱུང་བས་ན། །མི་ཡི་སྒྲ་སྐད་ཐམས་ཅད་ཟིལ་གྱིས་ནོན། །འདོད་ཆགས་ཞེ་སྡང་གཏི་མུག་ཉོན་མོངས་ཞི། །མི་མིན་དགའ་བ་རྣམ་པར་དག་པ་སྐྱེད། །་རྙོག་པ་མ་མཆིས་སྙིང་གིས་ཆོས་ཐོས་ནས། །དེ་ཀུན་འཕགས་པའི་རྣམ་པར་གྲོལ་བ་ཐོབ། །ཁྱོད་ནི་མི་མཁས་རྣམས་ལ་བརྙས་མི་མཛད། །མཁས་པའི་རྒྱགས་པས་ནམས་ཀྱང་རྒྱགས་མ་གྱུར། །
ཁྱོད་ནི་འགྱིང་བ་མི་མངའ་ཞུམ་མི་མངའ། །རྒྱ་མཚོའི་དབུས་ནས་རི་མཆོག་འཕགས་པ་བཞིན། །དེ་འདྲའི་སེམས་ཅན་འཇིག་རྟེན་བྱུང་བས་ན། །མི་རྣམས་འདིར་ནི་རྙེད་པ་ལེགས་པར་རྙེད། །པད་མ་དཔལ་ལྟར་ནོར་རྣམས་སྦྱིན་པ་པོ། །དེ་ལྟར་འཇིག་རྟེན་ཀུན་ལ་མཆོད་སྦྱིན་མཛད། །དེ་ལྟར་རྒྱལ་པོ་ཆེན་པོ་བཞི་ལ་སོགས་པ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་བར་སྣང་གི་ལྷ་རྣམས་དེ་བཞིན་གཤེགས་པའི་དྲུང་དུ་ལྷགས་ཏེ། མངོན་པར་རྫོགས་པར་བྱང་ཆུབ་པ་ལ་མཆོད་པའི་ལས་ཀྱི་ཕྱིར་བར་སྣང་ཐམས་ཅད་རིན་པོ་ཆེའི་དྲ་བ་དང་། དྲིལ་བུ་གཡེར་ཀའི་དྲ་བ་དང་། རིན་པོ་ཆེའི་གདུགས་རྣམས་དང་། རིན་པོ་ཆེའི་བ་དན་རྣམས་དང་། རིན་པོ་ཆེ་དང་དར་གྱི་ལྡ་ལྡི་དང་། རིན་པོ་ཆེའི་མེ་ཏོག་རྣ་རྒྱན་དང་། མུ་ཏིག་གི་ཆུན་ཁོར་དང་། མེ་ཏོག་གི་ལྡ་ལྡི་སྣ་ཚོགས་རྣམས་ལུས་ཕྱེད་ཕྱུང་བའི་ལྷ་རྣམས་ཀྱིས་བཟུང་བ་དང་། ཟླ་གམ་རྣམས་ཀྱིས་ལེགས་པར་བརྒྱན་ནས་དེ་བཞིན་གཤེགས་པ་ལ་ཕུལ་ལོ། །ཕུལ་ནས་ཀྱང་སྤྱན་སྔ་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཐུབ་པ་མཁས་ལ་བདག་ཅག་མཆིས་ནས་ནི། །འགྲོ་བའི་སྤྱོད་ཀུན་ཇི་བཞིན་གསལ་བལྟས་ཤིང་། །སེམས་ཅན་དག་པ་ཁྱོད་ཀྱི་སྤྱོད་བལྟས་ན། །དེ་ལྟར་ཁྱོད་ཀྱི་ཐུགས་གཅིག་འཁྲུལ་མ་མཐོང་། །མཆོད་ཕྱིར་བྱང་ཆུབ་སེམས་དཔའ་གང་ལྷགས་པ། །མི་ཡི་འདྲེན་པ་དེ་དག་ནམ་མཁའ་ཁྱབ། །འདི་ལྟར་དེ་དག་ནམ་མཁའི་ལུས་ལགས་པས། །གཞལ་མེད་ཁང་རྣམས་ལ་ཡང་གནོད་མ་མཆིས། །བར་སྣང་ནས་ནི་མེ་ཏོག་ཆར་བབ་པ། །སྟོང་ཆེན་བྱུར་བུར་རབ་ཏུ་གང་གྱུར་པ། །དེ་དག་མ་ལུས་ཁྱོད་ཀྱི་སྐུར་བབ་ཀྱང་། །འབབ་ཆུ་རྒྱ་མཚོར་བབ་པ་བཞིན་དུ་གྱུར། །གདུགས་དང་མེ་ཏོག་རྣ་རྒྱན་མེ་ཏོག་ཕྲེང་། །མེ་ཏོག་ཙམ་པ་ཀ་ཡི་ལྡ་ལྡི་དང་། །རྒྱན་ཕྲེང་ཟླ་བ་ཟླ་གམ་རྣམས་ཀྱང་འཐོར། །ལྷ་ཡིས་གཏོར་ཀྱང་འདྲེས་པར་གྱུར་མ་མཆིས། །བར་སྣང་ཐམས་ཅད་ལྷ་ཡིས་གང་གྱུར་ཏེ། །འདི་ལ་སྐྲ་ཙམ་གཞག་
པའི་གནས་མ་མཆིས། །རྐང་གཉིས་མཆོག་ལ་མཆོད་པ་བགྱིད་ཀྱང་ནི། །ཁྱོད་ལ་རྒྱགས་པའམ་ངོ་མཚར་འགྱུར་མི་མངའ། །དེ་ལྟར་བར་སྣང་གི་ལྷ་རྣམས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེ་ནས་ས་བླའི་ལྷ་རྣམས་ཀྱིས་དེ་བཞིན་གཤེགས་པ་ལ་མཆོད་པའི་ལས་ཀྱི་ཕྱིར་ས་གཞི་ཐམས་ཅད་ལེགས་པར་ཕྱགས་ཏེ་བྱུགས་ནས་སྤོས་ཆུས་ཆག་ཆག་བཏབ་སྟེ། མེ་ཏོག་གིས་ཆལ་བར་བཀང་ནས་རས་བཅོས་བུ་སྣ་ཚོགས་ཀྱི་བླ་རེ་བྲེས་ཏེ་དེ་བཞིན་གཤེགས་པ་ལ་ཕུལ་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སྟོང་གསུམ་རྡོ་རྗེ་ལྟ་བུར་མི་ཤིགས་གནས་པར་གྱུར། །ང་འདིར་པགས་པ་ཤ་དང་རུས་པ་རྐང་སྐམས་ཀྱང་། །བྱང་ཆུབ་མ་རེག་ང་ནི་འདི་ནས་མི་ལྡང་ཞེས། །རྡོ་རྗེའི་གནས་ཀྱིས་དེ་ནི་བྱང་ཆུབ་སྙིང་པོར་བཞུགས། །གལ་ཏེ་མི་ཡི་སེང་གེ་ཁྱོད་ཀྱིས་སྟོང་གསུམ་ཀུན། །བྱིན་གྱིས་མ་བརླབས་ན་ནི་གང་དག་རྐང་མཐིལ་གྱིས། །བྱེ་བའི་ཞིང་རྣམས་བསྐྱོད་པ་དེ་ལྟར་ཤུགས་ཆེ་བ། །བྱང་ཆུབ་སེམས་དཔའ་ལྷགས་ཚེ་མ་ལུས་ཞིག་པར་འགྱུར། །ས་ཕྱོགས་གང་དུ་སེམས་ཅན་དམ་པ་འཆག་པ་ནི། །ས་ཡི་ལྷ་ཡིས་རྙེད་པ་རྒྱ་ཆེན་ལེགས་པར་རྙེད། །འཇིག་རྟེན་རྡུལ་རྣམས་ཇི་སྙེད་ཁྱོད་ཀྱིས་སྣང་བར་མཛད། །སྟོང་གསུམ་མཆོད་རྟེན་གྱུར་ན་ཁྱོད་སྐུ་སྨོས་ཅི་འཚལ། །འོག་གི་ཆུ་ཡི་ཕུང་པོ་བརྒྱ་སྟོང་ཇི་སྙེད་དང་། །ས་ཡི་སྟེང་ན་འགྲོ་བའི་འཚོ་བ་ཇི་སྙེད་པ། །སྟོང་གསུམ་ས་རྣམས་ཐམས་ཅད་བདག་ཅག་གཟུང་བར་བགྱི། །ཁྱོད་ལ་ཀུན་འབུལ་ཇི་ལྟར་བཞེད་བཞིན་སྤྱད་དུ་གསོལ། །གང་དུ་ཁྱོད་ནི་བཞུགས་སམ་འཆག་གམ་མནལ་བ་དང་། །གཽ་ཏམ་བདེ་བར་གཤེགས་པའི་སྲས་པོ་ཉན་ཐོས་གང་། །ཆོས་གཏམ་སྨྲ་དང་གང་ཡང་དེ་དག་མཉན་པ་དང་། །དགེ་བའི་རྩ་བ་ཐམས་ཅད་བྱང་ཆུབ་ཕྱིར་བསྔོའོ། །དེ་ལྟར་ས་བླའི་ལྷ་རྣམས་ཀྱིས་བྱང་ཆུབ་ཀྱི་སྙིང་པོ་ལ་བཞུགས་པའི་དེ་བཞིན་གཤེགས་པ་ལ་མངོན་པར་བསྟོད་ནས་ཐལ་མོ་སྦྱར་ཏེ། དེ་བཞིན་གཤེགས་པ་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། ། མངོན་པར་བསྟོད་པའི་ལེའུ་ཞེས་བྱ་བ་སྟེ་ཉི་ཤུ་རྩ་
གསུམ་པའོ།། །།