དགུ་པ། རྒྱན་གྱི་ལེའུ།
དགེ་སློང་དག་དེ་ནས་བྲམ་ཟེ་མདུན་ན་འདོན་འཆར་པོ་ཞེས་བྱ་བ་འཆར་འགྲོའི་ཕ། བྲམ་ཟེ་ལྔ་བརྒྱ་ཙམ་གྱིས་བསྐོར་ཏེ། སྐར་མ་མེ་
བཞི་འདས་ནས་ནག་པ་ལ་བབ་པའི་ཚེ་རྒྱལ་པོ་ཟས་གཙང་མའི་དྲུང་དུ་ཕྱིན་ནས་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། ད་ནི་གཞོན་ནུའི་རྒྱན་མཛད་པའི་རིགས་སོ། །རྒྱལ་པོས་སྨྲས་པ། ལེགས་ཀྱིས་བྱེད་དུ་ཆུག་ཤིག །དེའི་ཚེ་རྒྱལ་པོ་ཟས་གཙང་མ་དང་། ཤཱཀྱ་ལྔ་བརྒྱ་ཙམ་གྱིས། རྒྱན་གྱི་རྣམ་པ་ལྔ་བརྒྱ་ཙམ་བྱེད་དུ་བཅུག་སྟེ། འདི་ལྟར་ལག་པའི་རྒྱན་དག་དང་། རྐང་པའི་རྒྱན་དག་དང་། མགོའི་རྒྱན་དག་དང་། མགུལ་གྱི་རྒྱན་དག་དང་། སོར་གདུབ་དག་དང་། རྣ་རྒྱན་དག་དང་། དཔུང་རྒྱན་དག་དང་། གསེར་གྱི་སྐ་རགས་དག་དང་གསེར་སྐུད་དག་དང་། དྲིལ་བུ་གཡེར་ཀའི་དྲ་བ་དག་དང་། རིན་པོ་ཆེའི་དྲ་བ་དག་དང་། ལྷམ་རིན་པོ་ཆེས་སྤྲས་པ་དག་དང་། དོ་ཤལ་རིན་པོ་ཆེ་སྣ་ཚོགས་ཀྱིས་བརྒྱན་པ་དག་དང་། གདུ་བུ་རྒྱན་ཅན་དག་དང་། མགུལ་གདུབ་དག་དང་། ཅོད་པན་དག་ཀྱང་བྱེད་དུ་བཅུག་སྟེ་ཟིན་ནས། སྐར་མ་རྒྱལ་དང་ལྡན་པའི་ཚེ། ཤཱཀྱ་དེ་དག་རྒྱལ་པོ་ཟས་གཙང་མའི་དྲུང་དུ་དོང་ནས་འདི་སྐད་ཅེས་སྨྲས་སོ། །ལྷ་གཞོན་ནུ་བརྒྱན་དུ་གསོལ། རྒྱལ་པོས་སྨྲས་པ། ཁྱེད་ཀྱིས་གཞོན་ནུ་ལ་བརྒྱན་པ་དང་། མཆོད་པ་བྱས་པས་ཆོག་གིས། ངས་གཞོན་ནུའི་རྒྱན་ཐམས་ཅད་བྱེད་དུ་བཅུག་གོ །སྨྲས་པ། བདག་ཅག་གི་རྒྱན་འདི་དག་གཞོན་ནུའི་སྐུ་ལ་གདུགས་མཚན་བདུན་ཞིག་གདགས་སུ་གསོལ། དེ་ལྟར་གནང་ན་བདག་ཅག་གིས་སུག་ལས་བགྱིས་པ་ཡང་དོན་མཆིས་པར་འགྱུར་རོ། །དེའི་ཚེ་ནམ་ལངས་ཏེ་ཉི་མ་ཤར་བ་དང་། བྱང་ཆུབ་སེམས་དཔའ་སྐྱེད་མོས་ཚལ་བཀོད་པ་དྲི་མ་མེད་པ་ཞེས་བྱ་བ་དེར་ཞུགས་སོ། །དེའི་ཚེ་སྐྱེ་དགུའི་བདག་མོ་ཆེན་མོ་གོའུ་ཏ་མཱིས་བྱང་ཆུབ་སེམས་དཔའ་པང་དུ་བླངས་སོ། །བུད་མེད་བརྒྱད་ཁྲིས་ཀྱང་བྱང་ཆུབ་སེམས་དཔའ་བསུ་སྟེ་གདོང་དུ་ལྟ་ཞིང་འཁོད་པར་གྱུར་ཏོ། །བུ་མོ་སྟོང་ཕྲག་བཅུས་བྱང་ཆུབ་སེམས་དཔའ་བསུ་སྟེ། གདོང་དུ་ལྟ་ཞིང་འཁོད་པར་གྱུར་ཏོ། །ཤཱཀྱ་སྟོང་ཕྲག་བཅུས་བྱང་ཆུབ་སེམས་དཔའ་བསུ་སྟེ་གདོང་དུ་ལྟ་ཞིང་འཁོད་པར་གྱུར་ཏོ། །བྲམ་ཟེ་ལྔ་སྟོང་ཡང་ལྷགས་ནས་བྱང་ཆུབ་སེམས་དཔའི་གདོང་དུ་ལྟ་ཞིང་འཁོད་པར་གྱུར་ཏོ། །དེ་ནས་ཤཱཀྱའི་རྒྱལ་པོ་
བཟང་པོ་ཞེས་བྱ་བས་རྒྱན་ཇི་སྙེད་ཅིག་བྱས་པ་དེ་དག་བྱང་ཆུབ་སེམས་དཔའི་ལུས་ལ་བཏགས་ཏེ། དེ་དག་ལུས་ལ་བཏགས་མ་ཐག་ཏུ་བྱང་ཆུབ་སེམས་དཔའི་ལུས་ཀྱི་འོད་ཀྱིས་མོག་མོག་པོར་གྱུར་ནས་ལམ་མེར་མ་གྱུར། ལྷན་ནེར་མ་གྱུར། ལྷང་ངེར་མ་གྱུར་ཏེ། འདི་ལྟ་སྟེ་དཔེར་ན། འཛམ་བུའི་ཆུ་བོའི་གསེར་གྱི་གན་དུ་སྣག་ཙའི་ཡུག་བཞག་ན་ལམ་མེར་མི་རུང་། ལྷན་ནེར་མི་རུང་། ལྷང་ངེར་མི་རུང་ངོ་། །དེ་བཞིན་དུ་རྒྱན་དེ་དག་ཀྱང་བྱང་ཆུབ་སེམས་དཔའི་ལུས་ཀྱི་འོད་ཀྱིས་ཕོག་ན་ལམ་མེར་མི་རུང་། ལྷན་ནེར་མི་རུང་། ལྷང་ངེར་མི་རུང་ངོ་། །དེ་བཞིན་དུ་རྒྱན་གྱི་རྣམ་པ་གང་དང་གང་བྱང་ཆུབ་སེམས་དཔའི་ལུས་ལ་བཏགས་པ་དེ་དང་དེ་དག་མོག་མོག་པོར་གྱུར་ཏེ། འདི་ལྟ་སྟེ་དཔེར་ན། འཛམ་བུའི་ཆུ་བོའི་གསེར་གྱི་གན་དུ་སྣག་ཙའི་ཡུག་བཞག་པ་བཞིན་ནོ། །དེའི་ཚེ་སྐྱེད་མོས་ཚལ་གྱི་ལྷ་མོ་དྲི་མ་མེད་པ་ཞེས་བྱ་བ་འདུག་པ་དེས་ལུས་ཆེན་པོ་བསྟན་ནས་མདུན་དུ་འདུག་སྟེ། རྒྱལ་པོ་ཟས་གཙང་མ་དང་ཤཱཀྱའི་ཚོགས་དེ་དག་ལ་ཚིགས་སུ་བཅད་དེ་སྨྲས་པ། སྟོང་གསུམ་ས་འདི་གྲོང་ཁྱེར་གྲོང་རྡལ་བཅས་པ་ཀུན། །གལ་ཏེ་གསེར་གྱིས་གང་ཁྱབ་དྲི་མེད་མཛེས་གྱུར་ཀྱང་། །འཛམ་བུའི་ཆུ་བོའི་གསེར་གཟེགས་གཅིག་གིས་ཟིལ་རླག་སྟེ། །གསེར་གཞན་དག་ནི་དཔལ་དང་བྲལ་ཞིང་གསལ་མི་འགྱུར། །ས་འདི་མཐའ་དག་འཛམ་བུའི་གླིང་གི་གསེར་ཁེབས་ཀྱང་། །འདྲེན་པ་དཔལ་རྒྱས་སྤུ་ཁུང་འོད་ཕྱུང་ཟིལ་གྱིས་ནོན། །མི་སྣང་མི་གསལ་མི་མཛེས་འོད་ཀྱང་ཉམས་གྱུར་ཅིང་། །བདེ་གཤེགས་སྐྱོབ་པའི་དྲུང་ན་སྣག་ཙ་བཞིན་དུ་འགྱུར། །ཡོན་ཏན་བརྒྱས་གང་འདི་ནི་རང་གི་གཟི་ཡིས་བརྒྱན། །དེ་ནི་རྒྱན་གྱིས་མཛེས་མིན་ཤིན་ཏུ་དྲི་མེད་སྐུ། །ཉི་ཟླའི་འོད་དང་སྐར་མ་ནོར་བུ་མེ་དག་དང་། །བརྒྱ་བྱིན་ཚངས་པའི་འོད་ཀྱང་དཔའ་སྟུག་མདུན་མི་གསལ། །གང་སྐུ་སྔོན་གྱི་དགེ་བའི་འབྲས་བུས་མཚན་སྤྲས་པ། །དེ་ལ་གཞན་གྱིས་བྱས་པའི་རྒྱན་ཕལ་ཅི་ཞིག་དགོས། །རྒྱན་རྣམས་ཕྲོལ་འོར་མི་མཁས་མཁས་མཛད་མ་གཙེ་ཤིག །བློ་གྲོས་མཆོག་མཛད་འདི་ནི་བཅོས་མའི་རྒྱན་མི་བཞེད། །འདུན་པ་དེ་ནི་རྒྱལ་ཁབ་སྲས་དང་ལྷན་ཅིག་བཙས། །དྲི་མེད་རབ་ཏུ་མཛེས་པའི་རྒྱན་རྣམས་
འབངས་དེ་སྩོལ། །ཤཱཀྱའི་རིགས་ནི་རྒྱ་ཆེན་མཆོག་ཏུ་འགྱུར་སྙམ་ནས། །ཤཱཀྱ་དག་ནི་ཡིད་དགའ་མགུ་ཞིང་ངོ་མཚར་གྱུར། །ལྷ་མོ་དེས་དེ་སྐད་ཅེས་སྨྲས་ནས། ལྷའི་མེ་ཏོག་དག་གིས་བྱང་ཆུབ་སེམས་དཔའ་དེ་ལ་མངོན་པར་གཏོར་ཏེ་དེ་ཉིད་དུ་མི་སྣང་བར་གྱུར་ཏོ། །རྒྱན་གྱི་ལེའུ་སྟེ་དགུ་པའོ།། །།