བཅུ་གཅིག་པ། ཞིང་པའི་གྲོང་གི་ལེའུ།
དགེ་སློང་དག་གཞོན་ནུ་དེ་དེ་བས་ཀྱང་ཡ་ཟད་སྐྱེས་ནས་དུས་གཞན་ཞིག་ན་གཞོན་ནུ་དེ་གཞོན་ནུ་གཞན་དག་དང་ཞང་བློན་གྱི་བུ་དག་དང་ལྷན་ཅིག་ཏུ་ཞིང་པའི་གྲོང་ལྟ་ཞིང་དོང་སྟེ། གྲོང་བལྟས་ནས་ཞིང་བླས་ཀྱི་མཐའི་སྐྱེད་མོས་ཚལ་ཞིག་ཏུ་ཕྱིན་ཏོ། །དེ་ན་བྱང་ཆུབ་སེམས་དཔའ་གཅིག་པུ་གཉིས་སུ་མེད་པར་ཕ་ཟད་འཁྱམ་ཞིང་སོང་སོང་བ་དང་། འཛམ་བུའི་ཤིང་ལྗོན་པ་མཛེས་པ་བལྟ་ན་སྡུག་པ་ཞིག་མཐོང་ནས། བྱང་ཆུབ་སེམས་དཔའ་དེའི་གྲིབ་མ་ལ་སྐྱིལ་མོ་ཀྲུང་བཅས་ཏེ་འདུག་གོ །འདུག་ནས་བྱང་ཆུབ་སེམས་དཔའ་སེམས་རྩེ་གཅིག་པ་རྙེད་དེ་རྙེད་ནས་ཀྱང་སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་བསྒྲུབས་ཏེ་གནས་སོ། །དེ་རྟོག་པ་
དང་དཔྱོད་པ་དང་བྲལ་ཞིང་ནང་ཡོངས་སུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང་། བདེ་བ་ཅན་བསམ་གཏན་གཉིས་པ་བསྒྲུབས་ཏེ་གནས་སོ། །དེ་དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་ལ། འཕགས་པ་རྣམས་ཀྱིས་གང་དེ་དྲན་པ་དང་ལྡན་པ། བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ། དགའ་བ་མེད་པའི་བསམ་གཏན་གསུམ་པ་བསྒྲུབས་ཏེ་གནས་སོ། །དེ་བདེ་བ་ཡང་སྤངས་ཏེ་སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་། ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན། སྡུག་བསྔལ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་བསྒྲུབས་ཏེ་གནས་སོ། །དེའི་ཚེ་ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་ཡོད་པ་རྫུ་འཕྲུལ་དང་ལྡན་པ་ནམ་མཁའ་ལས་དོང་བ་ལྔ་ཞིག་ལྷོ་ཕྱོགས་ནས་བྱང་ཕྱོགས་ལོགས་སུ་དོང་དོང་བ་ལས་དེ་དག་ཚལ་སྟུག་པོ་དེའི་སྟེང་དུ་ཕྱིན་པ་དང་། ཕྱིར་ཕུལ་བ་ལྟར་འདོང་མ་ནུས་ནས། དེ་དག་མི་དགའ་ཞིང་བ་སྤུ་གཡོས་ཏེ། ཚིགས་སུ་བཅད་པ་འདི་སྨྲས་སོ། །བདག་ཅག་འདི་ན་རི་རབ་ནོར་བུ་རྡོ་རྗེ་བརྩེགས་རི་ཤིན་ཏུ་རྔམས་སྟུག་པ་ཡང་ཐལ་ཕྱུང་སྟེ། །གླང་པོ་ཨ་མྲའི་ཤིང་རློན་ཡལ་གས་གཟིངས་པ་མང་པོ་བཅོམ་ནས་འགྲོ་བཞིན་དོང་དོང་ལ། །བདག་ཅག་འདི་ན་ལྷ་ཡི་ཁྱིམ་ནའང་ཐོགས་མེད་གནོད་སྦྱིན་དྲི་ཟའི་ཁྱིམ་སྟེང་ནམ་མཁར་གནས་གནས་ན། །ཚལ་སྟུག་འདིར་ཕྱིན་ནས་ནི་སྒྱིད་ལུག་གྱུར་པ་སུ་ཡི་མཐུ་ཞིག་གིས་ན་རྫུ་འཕྲུལ་སྟོབས་བཟློག་གྱུར། །དེ་ནས་ཚལ་སྟུག་པོ་དེ་ན་ལྷ་མོ་ཞིག་གནས་པ་དེས་དྲང་སྲོང་དེ་དག་ལ་ཚིགས་སུ་བཅད་དེ་སྨྲས་པ། རྒྱལ་པོའི་གཙོ་བོའི་རིགས་བྱུང་ཤཱཀྱའི་རྒྱལ་སྲས་ཉི་མ་ཤར་བ་ལྟ་བུར་རབ་ཏུ་སྣང་བའི་འོད། །འཇིག་རྟེན་གཙོ་བོ་མཁས་པ་ཟླ་ཞལ་པད་མ་རྒྱས་པའི་སྙིང་པོའི་ཁ་དོག་ལྟ་བུར་རབ་མཛེས་པ། །ལྷ་དང་ཀླུ་དབང་གནོད་སྦྱིན་དྲི་ཟས་མཆོད་པ་དེ་ནི་བསམ་གཏན་དགོངས་ཤིང་ཚལ་སྟུག་འདི་ན་བཞུགས། །སྲིད་པ་བྱེ་བ་བརྒྱ་དག་ཏུ་ནི་བསོད་ནམས་སྤེལ་བ་དེ་ཡི་མཐུ་ཡིས་རྫུ་འཕྲུལ་སྟོབས་བཟློག་གོ །དེ་ནས་དེ་དག་གིས་འོག་ལོགས་སུ་
བལྟས་པ་དང་། གཞོན་ནུ་ཞིག་དཔལ་དང་གཟི་བརྗིད་ཀྱིས་འབར་བ་མཐོང་ནས་འདི་དག་འདི་སྙམ་དུ་སུ་ཞིག་འདི་ལྟར་གནས། ནོར་གྱི་བདག་པོ་རྣམ་ཐོས་ཀྱི་བུའམ་ཅིག་མ་ཡིན་ནམ། འོན་ཏེ་འདོད་པའི་དབང་པོ་བདུད་ལྟའམ། ཡང་ན་ལྟོ་འཕྱེ་ཆེན་པོའི་དབང་པོའམ། འོན་ཏེ་དབང་པོ་རྡོ་རྗེ་འཆང་བའམ། ཡང་ན་གུ་ལང་ངམ། གྲུལ་བུམ་གྱི་བདག་པོའམ། འོན་ཏེ་སྤྲོ་བ་ཆེན་པོ་དང་ལྡན་པ་ནག་པོའམ། འོན་ཏེ་ལྷའི་བུ་ཟླ་བའམ། འོན་ཏེ་འོད་ཟེར་སྟོང་དང་ལྡན་པའི་ཉི་མའམ། འོན་ཏེ་འཁོར་ལོས་སྒྱུར་བའི་རྒྱལ་པོ་ཞིག་ཡིན་ནམ། སུ་ཞིག་སྙམ་མོ། །དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། །གཞོན་ནུ་འདི་ནི་རྣམ་ཐོས་བུ་ཡི་གཟུགས་ལས་འཕགས་པར་གསལ་བར་སྣང་བས་ན། །འདི་ནི་སྒྲ་གཅན་ཡིན་ནམ་འོན་ཏེ་རྡོ་རྗེ་འཆང་གི་གཟུགས་སམ་ཉི་ཟླའི་གཟུགས། །འདོད་མཆོག་དབང་པོའི་གཟུགས་སམ་གུ་ལང་གཟུགས་སམ་འོན་ཏེ་ནག་པོའི་གཟུགས་ཡིན་ནམ། །ཡང་ན་འདི་ནི་དཔལ་ལྡན་ཡན་ལག་མཚན་སྤྲས་སྡིག་མེད་སངས་རྒྱས་འགྱུར་བ་ཞིག །དེ་ནས་ཚལ་གྱི་ལྷ་མོ་དེས་དྲང་སྲོང་དེ་དག་ལ་ཚིགས་སུ་བཅད་དེ་སྨྲས་པ། རྣམ་ཐོས་བུ་དང་མིག་སྟོང་བདོག་ལ་དཔལ་ནི་གང་ཡོད་གྱུར་པ་དང་། །འཇིག་རྟེན་སྐྱོང་བ་བཞི་དང་ལྷ་མིན་དབང་ལ་དཔལ་ནི་གང་ཡོད་དང་། །མི་མཇེད་བདག་པོ་ཚངས་དང་གཟའ་རྣམས་ལ་ཡང་དཔལ་ནི་གང་ཡོད་པ། །དཔལ་དེ་ཤཱཀྱའི་སྲས་པོ་འདི་དྲུང་ཕྱིན་ན་གང་གི་ཆར་མི་ཕོད། །དེ་ནས་དྲང་སྲོང་དེ་དག་གིས་ལྷ་མོ་དེའི་ཚིག་ཐོས་ནས་ས་ལ་བབས་པ་དང་། དེ་དག་གིས་བྱང་ཆུབ་སེམས་དཔའ་མི་གཡོ་བའི་ལུས་ཀྱིས་བསམ་གཏན་བྱེད་ཅིང་། མེའི་ཕུང་པོ་ལྟར་འབར་བ་མཐོང་ནས། དེ་དག་བྱང་ཆུབ་སེམས་དཔའ་ལ་སེམས་ཤིང་ཚིགས་སུ་བཅད་པས་བསྟོད་དེ། དེ་ལ་གཅིག་གིས་སྨྲས་པ། འཇིག་རྟེན་ཉོན་མོངས་མེས་གདུངས་པ། །མཚོ་འདི་རབ་ཏུ་བྱུང་གྱུར་ཏེ། །གང་གིས་འཇིག་རྟེན་སིམ་འགྱུར་བའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་པ། མི་ཤེས་རབ་རིབ་འཇིག་རྟེན་དུ། །སྒྲོན་མ་འདི་ནི་རབ་ཏུ་བྱུང་། །གང་གིས་འགྲོ་བ་སྣང་འགྱུར་བའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་
པ། མྱ་ངན་རྒྱ་མཚོ་འདལ་བ་ལ། །གྲུ་ཡི་དམ་པ་འདི་བྱུང་སྟེ། །གང་གིས་འགྲོ་བ་སྒྲོལ་འགྱུར་བའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་པ། ཉོན་མོངས་འཆིང་བས་བཅིངས་པ་ལ། །འགྲོལ་བར་མཛད་པ་འདི་བྱུང་སྟེ། །གང་གིས་འགྲོ་བ་འགྲོལ་འགྱུར་བའི། །ཆོས་དེ་འདི་ཡིས་བརྙེས་པར་འགྱུར། །ཡང་གཅིག་གིས་སྨྲས་པ། རྒ་དང་ནད་ཀྱིས་གཟིར་བ་ལ། །སྨན་པ་དམ་པ་འདི་བྱུང་སྟེ། །གང་གིས་རྒ་ཤི་ཐར་བྱ་བའི། །ཆོས་དེ་འདི་ཡིས་བརྙེས་པར་འགྱུར། །དེ་ནས་དྲང་སྲོང་དེ་དག་གིས་བྱང་ཆུབ་སེམས་དཔའ་ལ་ཚིགས་སུ་བཅད་པ་དེ་དག་གིས་བསྟོད་དེ། ལན་གསུམ་བསྐོར་བ་བྱས་ནས་ནམ་མཁའ་ལས་དོང་ངོ་། །རྒྱལ་པོ་ཟས་གཙང་མ་ཡང་བྱང་ཆུབ་སེམས་དཔའ་མི་མཐོང་ཞིང་བྱང་ཆུབ་སེམས་དཔའ་མེད་པས་མི་དགའ་སྟེ། དེས་སྨྲས་པ། གཞོན་ནུ་དེ་མི་སྣང་ན་གར་སོང་། དེའི་ཚེ་སྐྱེ་བོ་ཕལ་པོ་ཆེ་གཞོན་ནུ་ཚོལ་དུ་དོང་དོང་བ་དང་། དེའི་ཚེ་བློན་པོ་གཅིག་ཅིག་གིས་བྱང་ཆུབ་སེམས་དཔའ་འཛམ་བུའི་ཤིང་གི་གྲིབ་མ་ལ་སྐྱིལ་མོ་ཀྲུང་བཅས་ཏེ་བསམ་གཏན་བྱེད་ཅིང་འདུག་པ་མཐོང་ངོ་། །དེས་དེའི་ཚེ་ཤིང་ཐམས་ཅད་ཀྱི་གྲིབ་མ་ནི་ཡོལ་ན། འཛམ་བུའི་ཤིང་གི་གྲིབ་མ་ནི་བྱང་ཆུབ་སེམས་དཔའི་ལུས་མི་གཏོང་བར་འདུག་པར་མཐོང་ནས་ངོ་མཚར་དུ་གྱུར་ཏེ། ཚིམ་ཞིང་མགུ་ལ་ཡི་རངས་ནས་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་རིངས་ཤིང་མྱུར་བ་མྱུར་བའི་གཟུགས་ཀྱིས། རྒྱལ་པོ་ཟས་གཙང་མའི་ཐད་དུ་ཕྱིན་ཏེ་ཚིགས་སུ་བཅད་པ་འདི་དག་སྨྲས་སོ། །རྒྱལ་པོ་གཞོན་ནུ་དེ་ལ་གཟིགས། །འཛམ་བུའི་ཤིང་གྲིབ་བསམ་གཏན་མཛད། །བརྒྱ་བྱིན་ཚངས་པ་ཇི་བཞིན་དུ། །གཟི་བརྗིད་དཔལ་གྱིས་རབ་ཏུ་མཛེས། །ཞུགས་ཤིང་གང་གི་གྲིབ་མ་ལ། །མཚན་རབ་མངའ་བ་དེ་བཞུགས་པའི། །གྲིབ་མ་དེས་ནི་དེ་མ་བཏང་། །སྐྱེས་མཆོག་བསམ་གཏན་མཛད་ལ་སྒྲིབ། །དེ་ནས་རྒྱལ་པོ་ཟས་གཙང་མ་འཛམ་བུའི་ཤིང་ལྗོན་པ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་དཔལ་དང་གཟི་བརྗིད་ཀྱིས་འབར་བ་དེ་མཐོང་བ་དང་། ཚིགས་སུ་བཅད་པ་འདི་སྨྲས་སོ། །རི་ཡི་སྤོ་ལ་མེ་འབར་འདྲ་བ་སྟེ། །ཟླ་བ་སྐར་མའི་ཚོགས་ནང་འདུག་འདྲ་ཞིང་། །
གཟི་བརྗིད་སྒྲོན་འདྲ་བསམ་གཏན་བྱེད་མཐོང་ན། །ང་ཡི་ལུས་འདི་ཤིན་ཏུ་འདར་བར་གྱུར། །དེ་སྐད་ཅེས་སྨྲས་ནས། དེས་བྱང་ཆུབ་སེམས་དཔའི་རྐང་པ་ལ་ཕྱག་བྱས་ཏེ། ཚིགས་སུ་བཅད་པ་འདི་སྨྲས་སོ། །ཐུབ་པ་གང་ཚེ་བལྟམ་པ་དང་། །གང་ཚེ་འོད་ལྡན་བསམ་གཏན་མཛད། །འདྲེན་པ་འདི་ལྟར་ལན་གཉིས་སུ། །མགོན་པོ་ཁྱོད་ཞབས་ཕྱག་འཚལ་ལོ། །དེའི་ཚེ་བྱིས་པ་ཁྲེའུ་ཐོགས་པ་དག་ཅ་ཅོའི་སྒྲ་འབྱིན་པར་གྱུར་ནས། དེ་དག་ལ་བློན་པོ་དག་གིས་སྒྲ་མ་ཆེ་སྒྲ་མ་ཆེ་ཞེས་བྱས་པ་དང་། དེ་དག་ཅི་ཞིག་ནོངས་ཞེས་ཟེར་རོ། །བློན་པོ་དག་གིས་སྨྲས་པ། རྒྱལ་པོའི་སྲས་དོན་ཐམས་ཅད་གྲུབ་པ་དགེ་བའི་མཚན་བཟང་པོ་མཆོག་དམ་པ་དང་ལྡན་ཞིང་འོད་འདོམ་གང་བ་མངའ་བ་འདི་རི་ལྟར་མི་གཡོ་ཞིང་བསམ་གཏན་མཛད་པའི་ཚེ། ཉི་མའི་དཀྱིལ་འཁོར་ཡོལ་ཏེ་སོང་ཡང་། ཤིང་གི་གྲིབ་མ་དེ་མ་ཡོལ་ཞིང་སྒྲིབ་པར་གནས་སོ། །དེ་ལ་འདི་སྐད་ཅེས་བྱ་སྟེ། དཔྱིད་འདས་དབྱར་གྱི་དུས་བབ་དབྱར་ཟླ་ར་བ་ལ། མེ་ཏོག་རྒྱས་ཤིང་མེ་ཏོག་ཡལ་གས་ཁེབས་གྱུར་ཏེ། །ཁྲུང་ཁྲུང་རྨ་བྱ་ནེ་ཙོ་རི་སྐེགས་སྐད་འབྱིན་པ། །ཤཱཀྱའི་བུ་དག་ཕལ་ཆེར་མངོན་དུ་འདོང་བར་གྱུར། །འདུན་པ་ཅན་གྱིས་སྨྲས་པ། གཞོན་ནུ་ནགས་ཚལ་དག་ནི་གཟིགས་པ་མཛད་སླད་དུ། །བྱིས་པ་རྣམས་ཀྱིས་ཡོངས་སུ་བསྐོར་ཏེ་གཤེགས་པའི་རིགས། །བྲམ་ཟེ་ལྟ་བུར་ཁྱིམ་ན་བཞུགས་པས་ཅི་ཞིག་བགྱི། །བདག་ཅག་རྣམས་ནི་བུ་མོའི་ཚོགས་རྣམས་སྦྲོན་དུ་མཆི། །ཉི་མའི་གུང་ལ་སེམས་ཅན་རྣམ་པར་དག་པ་དེ། །བྱིས་པ་ལྔ་བརྒྱ་དག་གིས་བསྐོར་ནས་ལྷན་ཅིག་ཏུ། །ཡབ་ལ་མ་གསོལ་ཡུམ་ལ་མ་གསོལ་མ་ཚོར་བར། །དེ་ནི་བྱུང་ནས་ཞིང་པ་རྣམས་ཀྱི་གྲོང་དུ་སོང་། །རྒྱལ་པོ་དམ་པའི་ཞིང་པ་དག་གི་གྲོང་དེ་ན། །འཛམ་བུའི་སྡོང་ཆེན་ཡལ་ག་མང་པོ་རྒྱས་ཡོད་པ། །གཞོན་ནུས་མཐོང་ན་ཉམ་ཐག་སྡུག་བསྔལ་ཕོག་གྱུར་ཏེ། །འདུས་བྱས་ཅི་རུང་སྡུག་བསྔལ་མང་ཞེས་སྙིང་རྗེ་བྱེད། །དུལ་བའི་སེམས་དང་ལྡན་པ་འཛམ་བུའི་གྲིབ་མར་སོང་། །རྩྭ་དག་བསྡུས་ཏེ་བདག་གིས་གདིང་བ་བཏིང་ནས་ནི། །སྐྱིལ་མོ་ཀྲུང་འདུག་དྲང་པོར་ལུས་བསྲང་བསམ་གཏན་བཞི། །དགེ་བ་དག་ལ་བྱང་ཆུབ་སེམས་དཔའ་
བསམ་གཏན་བྱེད། །དྲང་སྲོང་ལྔ་ཞིག་ནམ་མཁའི་དཀྱིལ་ནས་དོང་དོང་ན། །འཛམ་བུའི་ཤིང་གི་སྟེང་དུ་ཕྱིན་ནས་འདོང་མ་ནུས། །དེ་དག་ཐོགས་ནས་ང་རྒྱལ་དྲེགས་པ་སྤང་བྱ་ཞིང་། །དེ་དག་ཐམས་ཅད་འཐུན་པར་ལྷན་ཅིག་ལྟ་བར་བྱེད། །བདག་ཅག་རི་མཆོག་རི་རབ་དེ་བཞིན་འཁོར་ཡུག་དག །ཐལ་ཕྱུང་ཐགས་ཐོགས་མེད་པར་ཤུགས་ཀྱིས་དོང་དོང་ན། །བདག་ཅག་དེ་རིང་འཛམ་བུའི་ཤིང་ལྗོན་འདི་ལས་ནི། །འདའ་བར་མ་ནུས་འདི་ལ་རྒྱུ་རྐྱེན་ཅི་ཞིག་ཡོད། །བབས་ཏེ་ས་སྟེང་འདུག་ནས་འཛམ་བུའི་ཤིང་དྲུང་ན། །ཤཱཀྱའི་བུ་ཕོ་བྱང་ཆུབ་སེམས་དཔའ་གཟི་བརྗིད་ཅན། །འཛམ་གླིང་གསེར་གྱི་འོད་འཕྲོ་འདྲ་བ་འོད་ཟེར་ལྡན། །་སྐྱིལ་མོ་ཀྲུང་བཅས་བསམ་གཏན་བྱེད་པ་དེ་ཚེ་མཐོང་། །དེ་དག་རྨད་གྱུར་སྤྱི་བོར་སོར་བཅུ་ཐལ་སྦྱར་ཏེ། །ཐལ་མོ་སྦྱར་བ་རྐང་པར་གཏུགས་ནས་ཕྱག་འཚལ་ལོ། །འགྲོ་བ་ཤིན་ཏུ་བདེ་མཛད་ལེགས་པར་བལྟམ་པ་ལེགས། །མྱུར་དུ་རྣམ་སངས་རྒྱས་ཏེ་བདུད་རྩིར་སེམས་ཅན་ཐུལ། །སྡོང་པོ་མཆོག་ནི་པད་མ་འདྲ་བའི་སྤྱན་ལ་འདུད། །གདུགས་ཡོལ་གྱུར་ཀྱང་གྲིབ་མས་བདེ་བར་གཤེགས་མི་གཏོང་། །ལྷ་རྣམས་སྟོང་ཕྲག་མང་པོ་གནས་པ་ཐལ་སྦྱར་ནས། །དེས་པར་བྱས་པ་དེ་ཡི་རྐང་པར་ཕྱག་ཀྱང་འཚལ། །ཟས་གཙང་རྒྱལ་པོ་བདག་གི་ཁྱིམ་ན་ཡོངས་ཚོལ་ཞིང་། །ངའི་བུ་གཞོན་ནུ་དེ་ནི་གང་དུ་སོང་ཞེས་རྨེད། །སྲུ་མོས་སྨྲས་པ་བདག་གིས་བཙལ་ཀྱང་མ་རྙེད་ན། །གཞོན་ནུ་དེ་ནི་གར་བཞུད་རྒྱལ་པོས་རྨ་བར་གསོལ། །ཟས་གཙང་རྒྱལ་པོས་ཉུང་རུམ་དག་ལ་རིངས་པར་རྨས། །ང་ཡི་གཞོན་ནུ་འདི་ནས་བྱུང་བར་ལ་ལས་མཐོང་ངམ་ཞེས། །སྒོ་བ་རྣམས་དང་དེ་བཞིན་ནང་མི་ཀུན་ལའང་རྨས། །ལྷ་ཅིག་ཁྱོད་གསོན་མཆོག་དེ་ཞིང་པའི་གྲོང་དུ་བཞུད། །དེ་ནི་རིངས་པར་ཤཱཀྱ་རྣམས་དང་ལྷན་ཅིག་ཏུ། །བྱུང་ནས་དཔལ་ཞུགས་གྱུར་པའི་ཞིང་པའི་གྲོང་དུ་བལྟས། །ཇི་ལྟར་ཉི་མ་བྱེ་བ་ཁྲག་ཁྲིག་ཤར་བ་ལྟར། །དེ་ལྟར་དཔལ་གྱིས་འབར་ཞིང་ཕན་བྱེད་འདུག་པ་མཐོང་། །ཅོད་པན་རལ་གྲི་ལྷམ་དག་ཕ་ཟད་ཕོག་ཕུད་དེ། །མགོ་བོར་སོར་བཅུ་ཐལ་མོ་སྦྱར་ནས་ཕྱག་ཀྱང་འཚལ། །དྲང་སྲོང་བདག་ཉིད་ཆེན་པོ་ལེགས་པར་ཡང་དག་སྨྲ། །གཞོན་ནུ་བྱང་ཆུབ་དོན་དུ་མངོན་པར་འབྱུང་དུ་
ངེས། །རབ་ཏུ་དད་ལྷ་བརྒྱ་ཕྲག་བཅུ་གཉིས་ཚང་བ་དང་། །དེ་བཞིན་ཤཱཀྱ་ལྔ་བརྒྱ་ཉེ་བར་འོངས་པ་དང་། །བདེ་གཤེགས་ཡོན་ཏན་རྒྱ་མཚོ་ལྡན་པའི་རྫུ་འཕྲུལ་མཐོང་། །བསམ་པ་བརྟན་པས་རྫོགས་པའི་བྱང་ཆུབ་སེམས་ཀྱང་སྐྱེད། །དེས་ནི་སྟོང་གསུམ་མ་ལུས་ས་རྣམས་རབ་བསྐྱོད་ནས། །དྲན་དང་ཤེས་བཞིན་ཏིང་ངེ་འཛིན་ལས་ལངས་གྱུར་ཏེ། །མདོག་བཟང་ལྡན་པས་ཡབ་ལ་ཚངས་པའི་ཚིག་བརྗོད་པ། །ཡབ་ཅིག་ཞིང་བླས་ཐོང་ལ་གཞན་ལས་ཚོལ་མ་མཛད། །གལ་ཏེ་གསེར་ཞིག་འཚལ་ནའང་བདག་གིས་གསེར་ཆར་དབབ། །དེ་སྟེ་ན་བཟའ་འཚལ་ནའང་བདག་གིས་ན་བཟའ་དབུལ། །འོན་ཏེ་འབྲུ་ཞིག་འཚལ་ནའང་བདག་གིས་འབྲུ་ཆར་དབབ། །མི་དབང་ཁྱོད་ཀྱིས་འགྲོ་བ་ཀུན་ལ་ཡང་དག་སྦྱོར། །ཡབ་དང་དེ་བཞིན་སྐྱེ་བོ་འཁོར་ལ་བསྟན་བྱས་ནས། །སྐད་ཅིག་དེ་ལ་དེ་སླར་གྲོང་ཁྱེར་མཆོག་ཏུ་ཞུགས། །འགྲོ་དང་འཐུན་པ་ཙམ་དུ་གྲོང་ཁྱེར་དེར་གནས་ཀྱི། །སེམས་ཅན་རྣམ་དག་མངོན་པར་འབྱུང་བའི་ཡིད་དང་ལྡན། །ཞིང་བའི་གྲོང་གི་ལེའུ་སྟེ་བཅུ་གཅིག་པའོ།། །།