བཅུ་བཞི་པ། རྨི་ལམ་གྱི་ལེའུ།
དགེ་སློང་དག་དེ་ལྟར་ལྷའི་བུ་དེས་བྱང་ཆུབ་སེམས་དཔའ་བསྐུལ་མ་ཐག་ཏུ་རྒྱལ་པོ་ཟས་གཙང་མ་ལ་རྨི་ལམ་འདི་བསྟན་ཏོ། །རྒྱལ་པོ་ཟས་གཙང་མ་གཉིད་ཀྱིས་ལོག་པའི་རྨི་ལམ་དུ་རྨིས་པ། བྱང་ཆུབ་སེམས་དཔའ་མཚན་མོ་མི་ཉལ་ཙམ་ན། ལྷའི་ཚོགས་ཀྱིས་བསྐོར་ཏེ་མངོན་པར་འབྱུང་ཞིང་མངོན་པར་བྱུང་ནས་ཀྱང་རབ་ཏུ་བྱུང་སྟེ། གོས་ངུར་སྨྲིག་གྱོན་པ་རྨིས་སོ། །དེ་ནས་དེ་སད་པ་དང་། རིངས་པ་རིངས་པར་ཉུང་རུམ་ལ་དྲིས་པ། གཞོན་ནུ་བཙུན་མོའི་འཁོར་གྱི་ནང་ན་འདུག་གམ། དེས་སྨྲས་པ་ལྷ་བཞུགས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ། གཞོན་ནུ་ནི་གདོན་མི་ཟ་བར་མངོན་པར་འབྱུང་བར་འགྱུར་ཏེ། སྔ་ལྟས་སུ་སྣང་བ་ནི་འདི་དག་ཡིན་སྙམ་ནས། ཁོང་པའི་སྙིང་ལ་མྱ་ངན་གྱི་ཟུག་རྔུས་ཟུག་པར་གྱུར་ཏོ། །དེ་ཡང་འདི་སྙམ་དུ་སེམས་ཏེ། བདག་གི་གཞོན་ནུ་ནི་སྐྱེད་མོས་ཚལ་གྱི་སར་ཡང་ནམ་ཡང་འགྲོ་བར་མི་འགྱུར་ཏེ། བུད་མེད་ཀྱི་ཚོགས་ཀྱི་ནང་ན་མངོན་པར་དགའ་བས་འདི་ཉིད་དུ་ཆགས་པར་འགྱུར་ཏེ། མངོན་པར་འབྱུང་བར་ནི་མི་འགྱུར་རོ་སྙམ་མོ། །དེ་ནས་རྒྱལ་པོ་ཟས་གཙང་མ་གཞོན་ནུའི་ལོངས་སྤྱོད་ཀྱི་ཕྱིར། དཔྱིད་དང་། དབྱར་དང་། སྟོན་གྱི་དུས་ཇི་ལྟ་བ་བཞིན་དུ་ཁང་བཟངས་གསུམ་བྱེད་དུ་བཅུག་གོ །དེ་ལ་དཔྱིད་ས་གང་ཡིན་པ་དེ་ནི་ཤིན་ཏུ་
བསིལ་བའོ། །དབྱར་ས་གང་ཡིན་པ་དེ་ནི་གྲང་དྲོ་རན་པའོ། །དགུན་ས་གང་ཡིན་པ་དེ་ནི་རང་བཞིན་གྱིས་དྲོ་བའོ། །ཁང་བཟངས་རེ་རེའི་གྲུ་སྐས་རྣམས་ཀྱང་མི་ལྔ་བརྒྱ་ལྔ་བརྒྱས་འཛུགས་ཤིང་འབེབས་སོ། །དེ་དག་དེ་ལྟར་འཛུགས་ཤིང་འབེབས་པ་ན་གཞོན་ནུ་སུས་ཀྱང་མ་ཚོར་བར་མངོན་པར་བྱུང་བར་འགྱུར་དུ་འོང་ངོ་ཞེས་སྒྲ་དཔག་ཚད་ཕྱེད་དུ་གྲག་པ་བྱུང་ངོ་། །ལྟས་པ་དང་མཚན་མཁན་ཀུན་གྱིས་ཀྱང་། གཞོན་ནུ་ནི་ཆབ་སྒོ་བཀྲ་ཤིས་པ་ནས་མངོན་པར་འབྱུང་བར་འགྱུར་རོ། །ཞེས་ལུང་བསྟན་ཏོ། །དེ་ནས་རྒྱལ་པོས་བཀྲ་ཤིས་ཀྱི་སྒོའི་སྒོ་འཕར་ཆེན་པོ་བྱེད་དུ་བཅུག་སྟེ། སྒོ་འཕར་རེ་རེ་ཡང་མི་ལྔ་བརྒྱ་ལྔ་བརྒྱས་འབྱེད་ཅིང་གཅོད་དོ། །དེ་དག་གི་སྒྲ་ཡང་དཔག་ཚད་ཕྱེད་དུ་གྲག་གོ །དེ་ལ་འདོད་པའི་ཡོན་ཏན་མཚུངས་པ་མེད་པ་ཡང་སྦྱོར་རོ། །གླུ་དང་རོལ་མོའི་སྒྲ་དབྱངས་ལེན་པ་དང་། གར་བྱེད་པའི་ན་ཆུང་དག་ཀྱང་རྟག་ཏུ་བཞག་པར་གྱུར་ཏོ། །དགེ་སློང་དག་དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་སྨྲས་པ། དེང་སྐྱེད་མོས་ཚལ་གྱི་སར་འགྲོས་ཤིང་རྟ་མྱུར་དུ་སྦྱོར་ཅིག །དེ་ནས་ཁ་ལོ་སྒྱུར་བ་རྒྱལ་པོ་ཟས་གཙང་མའི་གན་དུ་སོང་སྟེ་འདི་སྐད་ཅེས་སྨྲས་སོ། །ལྷ་གཞོན་ནུ་སྐྱེད་མོས་ཚལ་གྱི་སར་འབྱུང་ངོ་ཞེས་གསུང་ངོ་། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། བདག་གིས་གཞོན་ནུ་སྐྱེད་མོས་ཚལ་གྱི་སར་ནམ་ཡང་མ་ཕྱུང་བས་ས་བཟང་པོ་བལྟ་བར་བྱ་བའི་ཕྱིར་བདག་གིས་གཞོན་ནུ་སྐྱེད་མོས་ཚལ་གྱི་སར་ཕྱུང་ན་འོན་ཏང་གཞོན་ནུ་བུད་མེད་ཀྱི་ཚོགས་ཀྱིས་བསྐོར་ཏེ་དགའ་བ་མྱོང་བར་འགྱུར་བས། མངོན་པར་མི་འབྱུང་ངོ་སྙམ་མོ། །དེ་ནས་རྒྱལ་པོ་ཟས་གཙང་མ་བྱང་ཆུབ་སེམས་དཔའ་ལ་བྱམས་པ་དང་། རིམ་གྲོ་བྱེད་པས་ད་སྟེ་ཞག་བདུན་ན་གཞོན་ནུ་ས་བཟང་པོ་བལྟ་བའི་ཕྱིར་སྐྱེད་མོས་ཚལ་གྱི་སར་འབྱུང་གིས། དེར་ཁྱེད་ཀྱིས་གཞོན་ནུའི་མིག་ཏུ་མི་འོང་བ་མཐོང་བར་མི་འགྱུར་བར་ཡིད་དུ་མི་འོང་བ་ཐམས་ཅད་ནི་སོལ་ཅིག །ཡིད་དུ་འོང་བ་དང་། ཡུལ་ཉམས་དགའ་བ་ཐམས་ཅད་ནི་སྦྱོར་ཅིག་ཅེས་གྲོང་ཁྱེར་དུ་དྲིལ་བསྒྲགས་སོ། །དེ་ནས་ཞག་བདུན་གྱི་ཉིན་པར་གྲོང་ཁྱེར་ཐམས་ཅད་བརྒྱན་ཏོ། །སྐྱེད་མོས་ཚལ་ཡང་མཛེས་པར་བྱས་ཏེ། རས་བཅོས་བུ་ཁ་དོག་ཐ་དད་པའི་བླ་རེ་ནི་བྲེས། གདུགས་དང་རྒྱལ་
མཚན་དང་། བ་དན་གྱིས་ནི་ལེགས་པར་བརྒྱན་ཏོ། །བྱང་ཆུབ་སེམས་དཔའ་ལམ་གང་ནས་འགྲོ་བའི་ལམ་དེ་ཡང་ཆག་ཆག་བཏབ་སྟེ་ཕྱགས་ནས། སྤོས་ཆུའི་ཆག་ཆག་བཏབ་སྟེ། མེ་ཏོག་སིལ་མ་ནི་ཆལ་པར་བཀྲམ། པོག་ཕོར་ནས་ནི་བདུགས། བུམ་པ་གང་བས་ནི་མཛེས་པར་བྱས། ཆུ་ཤིང་ལྗོན་པ་ནི་བསྒྲེང་། དར་ཐ་དད་པ་སྣ་ཚོགས་ཀྱི་བླ་རེ་ནི་བྲེས། རིན་པོ་ཆེའི་དྲིལ་བུ་གཡེར་ཀའི་དྲ་བ་དང་། རྒྱན་ཕྲེང་དང་ཆུན་པོ་ནི་སྤྱངས། དཔུང་བཞིའི་བཀོད་པ་ནི་བྱས་སོ། །གཡོག་འཁོར་ཀྱང་གཞོན་ནུའི་བཙུན་མོའི་འཁོར་བརྒྱན་པའི་ཕྱིར་བརྩོན་པར་གྱུར་ཏོ། །དེ་ནས་བྱང་ཆུབ་སེམས་དཔའ་བཀོད་པ་ཆེན་པོས་གྲོང་ཁྱེར་གྱི་ཤར་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་བྱུང་ངོ་། །དེ་ནས་བྱང་ཆུབ་སེམས་དཔའ་ཉིད་ཀྱི་མཐུས་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་མི་རྒན་པོ་གཏུགས་པ། འཁོགས་པ། ལུས་ལས་རྩ་རྒྱུས་འཐོན་པ། སོ་རྒལ་བ། ལུས་གཉེར་མས་གང་བ། སྐྲ་བྱི་བ། སྒུར་བ་གདུང་རྟེན་ལྟར་དགུ་བ། ཞོམ་པ། འཁར་བ་ལ་རྟེན་པ། མཐུ་ཟད་པ། དར་ཡལ་བ། མིད་པ་ནས་སྒྲ་ངར་ངར་པོ་འབྱུང་བ། ལུས་སྒུ་བས་འཁར་བ་ལ་བརྟེན་ནས་ཡན་ལག་དང་ཉིང་ལག་ཐམས་ཅད་འདར་བ་ཞིག་ལམ་ཀར་བསྟན་པར་གྱུར་ཏོ། །དེ་ནས་བྱང་ཆུབ་སེམས་དཔས་ཤེས་བཞིན་དུ་ཁ་ལོ་སྒྱུར་བ་ལ་འདི་སྐད་ཅེས་སྨྲས་སོ། །ཁ་ལོ་སྒྱུར་བ་མི་རིད་ཉམ་ཆུང་ཞིང་། །ཤ་ཁྲག་སྐམས་ལ་རྒྱུས་ལྤགས་ཉི་ཚེས་དཀྲིས། །མགོ་དཀར་སོ་རྒལ་ལུས་ནི་རབ་སྐེམ་ལ། །འཁར་བ་བརྟེན་ཅིང་མི་བདེར་འཁྱོར་འགྲོས་སུ། །ཁ་ལོ་སྒྱུར་བས་སྨྲས་པ། ལྷ་ཅིག་མི་འདི་རྒ་བས་ཟིལ་གྱིས་ནོན། །དབང་པོ་ཉམས་ཤིང་སྡུག་བསྔལ་བརྩོན་སྟོབས་ཉམས། །གཉེན་གྱི་སྐྱེ་བོས་བརྙས་ཤིང་མགོན་མེད་གྱུར། །དོན་བགྱིད་མི་ནུས་ནགས་ཁྲོད་ཤིང་ལྟར་བོར། །བྱང་ཆུབ་སེམས་དཔས་སྨྲས་པ། འདི་ཡི་ཆོས་འདི་རིགས་ཀྱི་ཡིན་ནམ་འོན་ཏམ་ནི། །འགྲོ་བ་འདི་ཀུན་ལ་ཡང་འདི་སྲིད་དེ་སྨྲོས་ཤིག །ཚིག་འདི་ཡང་དག་ཇི་བཞིན་མྱུར་དུ་སྨྲོས་ཤིག་དང་། །ཐོས་ནས་དེ་བཞིན་དོན་ལ་འདིར་ནི་ཚུལ་བཞིན་བསམ། །ཁ་ལོ་སྒྱུར་བས་སྨྲས་པ། ལྷ་འདི་རིགས་ཆོས་མ་ལགས་ཡུལ་འཁོར་ཆོས་མ་ལགས། །སྐྱེ་བོ་ཀུན་གྱི་དར་ལ་བབ་པ་རྒ་བས་འཇོམས། །ཁྱོད་ཀྱི་ཡབ་དང་ཡུམ་
དང་ཉེ་དུ་གཉེན་ཚོགས་ཀྱང་། །རྒ་ལས་མཐར་འགྲོ་བ་ཡི་ཐབས་ནི་གཞན་མ་མཆིས། །བྱང་ཆུབ་སེམས་དཔས་སྨྲས་པ། ཁ་ལོ་སྒྱུར་བ་བྱིས་པའི་སྐྱེ་བོ་མི་མཁས་པའི། །བློ་ངན་གཞོན་པས་རྒྱགས་ཤིང་མྱོས་པས་རྒ་མ་མཐོང་། །ང་ནི་སླར་འགྲོ་ང་ཡི་ཤིང་རྟ་མྱུར་དུ་སྒྱུར། །ང་ཡང་རྒ་ལ་གནས་པས་རྩེ་དགའས་ཅི་ཞིག་བྱ། །དེ་ནས་བྱང་ཆུབ་སེམས་དཔའ་ཤིང་རྟའི་མཆོག་དེ་སླར་བསྒྱུར་ཏེ་ཕྱིར་གྲོང་ཁྱེར་དུ་ཞུགས་སོ། །དགེ་སློང་དག་དེ་ལྟར་བྱང་ཆུབ་སེམས་དཔའ་དུས་གཞན་ཞིག་ན། བཀོད་པ་ཆེན་པོས་གྲོང་ཁྱེར་གྱི་ལྷོ་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་ཞུགས་པ་དང་། དེས་ལམ་ཀ་ན་མི་ནད་ཀྱིས་ཉེན་པ། དམུ་རྫིང་ཅན་ལུས་ཉམ་ཆུང་བ། རང་གི་གཅིན་རྐྱག་ཏུ་བྱིང་བ། མགོན་མེད་པ། སྐྱབས་མེད་པ། ཤིན་ཏུ་ཤ་ཐང་བར་དབུགས་དབྱུང་ཞིང་བརྔུབ་དགོས་པ་ཞིག་མཐོང་ངོ་། །མཐོང་ནས་ཀྱང་ཡང་བྱང་ཆུབ་སེམས་དཔས་ཤེས་བཞིན་དུ་ཁ་ལོ་སྒྱུར་བ་ལ་འདི་སྐད་ཅེས་སྨྲས་སོ། །ཁ་ལོ་སྒྱུར་བ་མི་རྩུབ་ལུས་ཀྱི་མདོག་ངན་ལ། །དབང་པོ་ཐམས་ཅད་ཉམས་ཤིང་དབུགས་དབྱུང་རབ་ཏུ་དཀའ། །ཡན་ལག་ཀུན་སྐམས་ལྟོ་བས་དཀྲུགས་ཤིང་ཉམ་ཐག་གྱུར། །རང་གི་གཅིན་རྟུག་སྨད་པའི་གནས་ན་འདུག་འདི་སུ། །ཁ་ལོ་སྒྱུར་བས་སྨྲས་པ། ལྷ་ཅིག་མི་འདི་ཤིན་ཏུ་ནད་ཀྱིས་བཏབ་པ་སྟེ། །ནད་ཀྱི་འཇིགས་པ་ཉེ་བར་མཆིས་པས་འགུམ་ལ་ཐུག །ནད་མེད་གཟི་བརྗིད་མ་མཆིས་སྟོབས་ཀྱང་རྣམ་པར་ཉམས། །མགོན་དང་སྐྱབས་དང་གླིང་དང་དཔུང་གཉེན་མ་མཆིས་ལགས། །བྱང་ཆུབ་སེམས་དཔས་སྨྲས་པ། ནད་མེད་པ་ཡང་རྨི་ལམ་ན་ནི་རྩེ་དང་མཚུངས། །ནད་ཀྱི་འཇིགས་པ་འདི་ལྟར་ཤིན་ཏུ་མི་བཟད་པ། །སྐྱེས་བུ་མཁས་པས་གནས་འདི་མཐོང་ནས་ཇི་ལྟ་བུར། །རྩེ་ལ་དགའ་དང་སྡུག་པའི་འདུ་ཤེས་བསྐྱེད་པར་འགྱུར། །དགེ་སློང་དག་དེ་ནས་བྱང་ཆུབ་སེམས་དཔའ་ཤིང་རྟའི་མཆོག་དེ་སླར་བསྒྱུར་ཏེ་ཕྱིར་ཡང་གྲོང་ཁྱེར་དུ་ཞུགས་སོ། །དགེ་སློང་དག་དེ་ལྟར་བྱང་ཆུབ་སེམས་དཔའ་དུས་གཞན་ཞིག་ན་བཀོད་པ་ཆེན་པོས་གྲོང་ཁྱེར་གྱི་ནུབ་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་ཞུགས་པ་དང་། དེས་ལམ་ཀ་ན་མི་ཤི་བར་གྱུར་པ། ཁྱོགས་ལ་བཞག་པ། རས་ཀྱི་བླ་རེ་ཕུབ་པ། ཉེ་དུའི་ཚོགས་ཀྱིས་བསྐོར་ཏེ། ཀུན་ཀྱང་ངུ་ཞིང་སྐད་ཕྱུང་སྟེ། ངུ་ལ་སྨྲེ་
སྔགས་འདོན་ཅིང་སྐྲ་བཤིག་ལ་མགོ་ལས་ས་འཐོར་ཞིང་བྲང་རྡུང་ལ་ཆོ་ངེ་འདོན་ཅིང་ཕྱི་བཞིན་འབྲང་བར་གྱུར་པ་མཐོང་ངོ་། །མཐོང་ནས་ཀྱང་ཡང་བྱང་ཆུབ་སེམས་དཔས་ཤེས་བཞིན་དུ་ཁ་ལོ་སྒྱུར་བ་ལ་འདི་སྐད་ཅེས་སྨྲས་སོ། །ཁ་ལོ་སྒྱུར་བ་མི་འདི་ཁྱོགས་ལ་བཞག་ནས་ནི། །མི་དག་སྐྲ་བཤིག་མགོ་ལ་ས་ཡིས་འཐོར་བྱེད་ཅིང་། །སྣ་ཚོགས་དག་གི་ཚིག་ནི་བརྗོད་ལ་བྲང་རྡུང་བས། །ཀུན་ནས་བསྐོར་བ་བྱས་ཏེ་ཁྱེར་བ་སུ་ཞིག་ཡིན། །ཁ་ལོ་སྒྱུར་བས་སྨྲས་པ། ལྷ་ཅིག་མི་འདི་འཛམ་བུའི་གླིང་དུ་གུམ་པ་སྟེ། །སླན་ཆད་ཕ་མ་མཆིས་བྲང་བུ་རྣམས་མཐོང་མི་འགྱུར། ། ལོངས་སྤྱོད་ཁྱིམ་དང་མཛའ་གཉེན་ཚོགས་རྣམས་སྤངས་ནས་ནི། །འཇིག་རྟེན་ཕ་རོལ་མཆིས་ཏེ་སླན་ཆད་གཉེན་མི་མཐོང་། །བྱང་ཆུབ་སེམས་དཔས་སྨྲས་པ། རྒ་བས་གནོད་པར་འགྱུར་བའི་གཞོན་པ་ཅིར་མི་རུང་། །སྣ་ཚོགས་ནད་ཀྱིས་གནོད་འགྱུར་ནད་མེད་ཅིར་མི་རུང་། །རིང་དུ་མི་གསོན་གསོན་པ་མཁས་ལ་ཅིར་མི་རུང་། །རྒ་ལ་ཆགས་པ་སྐྱེས་བུ་མཁས་ལ་ཅིར་མི་རུང་། །གལ་ཏེ་རྒ་མེད་ནད་མེད་འཆི་བ་མེད་གྱུར་ཀྱང་། །འོན་ཀྱང་ཕུང་པོ་ལྔ་འཛིན་སྡུག་བསྔལ་ཆེ་ཡིན་ན། །རྒ་ན་འཆི་བ་རྟག་ཏུ་འབྲང་བ་སྨོས་ཅི་དགོས། །ལེགས་པར་སླར་ཟློག་རབ་ཏུ་ཐར་བར་བྱ་བ་བསམ། །དགེ་སློང་དག་དེ་ནས་བྱང་ཆུབ་སེམས་དཔའ་ཤིང་རྟ་མཆོག་དེ་སླར་བཟློག་སྟེ། ཕྱིར་ཡང་གྲོང་ཁྱེར་དུ་ཞུགས་སོ། །དགེ་སློང་དག་དེ་ལྟར་བྱང་ཆུབ་སེམས་དཔའ་དུས་གཞན་ཞིག་ན་གྲོང་ཁྱེར་གྱི་བྱང་ཕྱོགས་ཀྱི་སྒོ་ནས་སྐྱེད་མོས་ཚལ་གྱི་སར་ཞུགས་པ་དང་། བྱང་ཆུབ་སེམས་དཔའི་མཐུས་ལྷའི་བུ་དེ་དག་ཉིད་ཀྱིས་ལམ་ཀ་དེར་དགེ་སློང་ཞིག་མངོན་པར་སྤྲུལ་པ་དང་། བྱང་ཆུབ་སེམས་དཔས་དགེ་སློང་ཞི་བ། དུལ་བ་ཡང་དག་པར་བསྡམས་པ། ཚངས་པར་སྤྱོད་པ། མིག་ཕབ་པ། གཉའ་ཤིང་གང་ཙམ་དུ་ལྟ་བ། སྤྱོད་ལམ་མཛེས་པ་ཕུན་སུམ་ཚོགས་པ། འགྲོ་བ་དང་ལྡོག་པ་མཛེས་པ་ཕུན་སུམ་ཚོགས་པ། མདུན་དུ་ལྟ་བ་དང་། གཡས་གཡོས་སུ་ལྟ་བ་མཛེས་པ། བསྐུམ་པ་དང་སྨྱང་བ་མཛེས་པ། ཆོས་གོས་སྣམ་སྦྱར་དང་ལྷུང་བཟེད་དང་ཆོས་གོས་ཐོགས་པ་མཛེས་པ་ཞིག་ལམ་ཀ་ན་འདུག་པ་དེ་མཐོང་ངོ་། །མཐོང་ནས་ཀྱང་བྱང་ཆུབ་སེམས་དཔས་ཤེས་བཞིན་དུ་ཁ་ལོ་སྒྱུར་བ་ལ་འདི་སྐད་ཅེས་སྨྲས་སོ། །
ཁ་ལོ་སྒྱུར་བ་སྐྱེས་བུ་སེམས་ཞི་རབ་ཞི་ཞིང་། །མིག་ཕབ་འགྲོ་ལ་གཉའ་ཤིང་གང་ཙམ་ལྟ་བྱེད་ཅིང་། །་ངུར་སྨྲིག་གོས་གྱོན་ཤིན་ཏུ་རབ་ཏུ་ཞི་བར་སྤྱོད། །ལྷུང་བཟེད་ཐོགས་ནས་མི་རྒོད་མ་ཁེངས་སུ་ཞིག་ཡིན། །ཁ་ལོ་སྒྱུར་བས་སྨྲས་པ། ལྷ་ཅིག་མི་འདི་དགེ་སློང་ཞེས་ནི་བགྱི་བ་ལགས། །འདོད་པའི་དགའ་བ་སྤངས་ཤིང་ཤིན་ཏུ་དུལ་བར་སྤྱོད། །བདག་ཉིད་ཞི་བ་ཚོལ་ཞིང་རབ་ཏུ་བྱུང་བར་གྱུར། །འདོད་ཆགས་ཞེ་སྡང་བྲལ་བར་བསོད་སྙོམས་སྤྱོད་ཅིང་རྒྱུ། །བྱང་ཆུབ་སེམས་དཔས་སྨྲས་པ། འདི་ནི་དགེ་བར་ལེགས་སྨྲས་ང་ཡང་འདོད་པ་སྟེ། །རབ་ཏུ་བྱུང་བ་མཁས་པ་རྣམས་ཀྱིས་རྟག་ཏུ་བསྔགས། །དེ་ནི་བདག་ལ་ཕན་ཞིང་སེམས་ཅན་གཞན་ལའང་ཕན། །འཚོ་བ་བདེ་ཞིང་ཉམས་འཐུན་འཆི་མེད་འབྲས་བུར་འགྱུར། །དགེ་སློང་དག་དེ་ནས་བྱང་ཆུབ་སེམས་དཔས་ཤིང་རྟ་མཆོག་དེ་སླར་བསྒྱུར་ཏེ་ཕྱིར་ཡང་གྲོང་ཁྱེར་དུ་ཞུགས་སོ། །དགེ་སློང་དག་དེ་ལྟར་བྱང་ཆུབ་སེམས་དཔའ་ལ་བསྐུལ་བ་རྣམ་པ་འདི་ལྟ་བུ་འདི་དག་རྒྱལ་པོ་ཟས་གཙང་མས་མཐོང་ཞིང་ཐོས་ནས། བྱང་ཆུབ་སེམས་དཔའ་ཡོངས་སུ་བསྲུང་བའི་ཕྱིར་ར་བ་རྒྱ་ཆེན་པོ་བྱེད་དུ་བཅུག་སྟེ། འོབས་ཀྱང་རྐོར་བཅུག །སྒོ་གཏན་དམ་པོ་ཡང་འཛུགས་སུ་བཅུག །སྲུངས་མ་ཡང་བཀོད། དཔའ་བོ་རྣམས་ཀྱང་སྦྲན། བཞོན་པ་ཡང་སྟ་གོན་བྱས། གོ་ཆ་ཡང་གྱོན་དུ་བཅུག་གོ །བྱང་ཆུབ་སེམས་དཔའ་བསྲུང་བའི་ཕྱིར། གྲོང་ཁྱེར་ཆེན་པོའི་སྒོ་བཞིའི་ལམ་གྱི་སུམ་མདོ་རྣམས་སུ་དཔུང་ཆེན་པོའི་བཀོད་པ་བཞག་སྟེ། བྱང་ཆུབ་སེམས་དཔའ་མངོན་པར་བྱུང་ང་རེ་ཞེས་དེ་དག་དེ་སྲུང་དུ་བཅུག་གོ །བཙུན་མོའི་འཁོར་ལ་ཡང་རེས་འགའ་ཙམ་ཡང་གླུ་དབྱངས་ཀྱི་རྒྱུན་ཆད་ད་རེ། དགའ་བ་དང་རྩེ་བ་ཐམས་ཅད་ཀྱང་སྦྱོར་ཅིག །ཅི་ནས་ཀྱང་གཞོན་ནུ་ཆགས་ནས་རབ་ཏུ་འབྱུང་བར་མི་འགྱུར་བ་དང་། མགུ་བར་འགྱུར་བར་བུད་མེད་ཀྱི་སྒྱུ་ཡང་སྟོན་ཅིག་ཅེས་བསྒོའོ། །དེ་ལ་འདི་སྐད་ཅེས་བྱ་སྟེ།ཐབ་མོ་མོས་པའི་སྐྱེས་བུ་ལག་ན་རལ་གྲི་མཚོན་ཐོགས་སྒོ་གར་བཀོད། །གོ་བགོས་མི་རྟ་གླང་པོ་ཤིང་རྟ་མི་བསྐྱོན་གླང་པོའི་ཕྲེང་བའང་བཀོད། །འོབས་དང་ཤིང་ཐགས་དག་དང་རྟ་བབས་ཕྱིར་མཐོན་པོ་འང་བྱེད་དུ་བཅུག །སྒོ་མོ་རྒྱང་གྲགས་གྲག་པའི་སྒྲ་འབྱུང་བ་ཡང་
གཏན་པ་དམ་པོ་བཅུག །ཤཱཀྱའི་ཚོགས་རྣམས་ཐམས་ཅད་ཡིད་མི་དགའ་ཞིང་ཉིན་མཚན་སྲུང་བར་བྱེད། །དཔུང་ཆེན་དེ་དག་རྣམས་ཀྱང་སྒྲ་སྐད་ཆེན་པོ་ཤིན་ཏུ་གྲག་པར་བྱེད། །དེས་པ་འདི་ནས་འབྱུང་དུ་འོང་ཞེས་གྲོང་ཁྱེར་འཁྲུགས་ཤིང་ཡིད་སྔངས་སྐྲག །ཤཱཀྱའི་རིགས་སྐྱེས་སོང་ན་རིགས་འདི་ཆད་པར་མི་འགྱུར་གྲང་སྙམ་བྱེད། །སྐྱེ་བོ་བུད་མེད་དག་ལ་བསྒོ་བ་རྟག་ཏུ་གླུ་དབྱངས་རྒྱུན་མ་བཅད། །རྩེ་བས་དགའ་བ་རྣམས་ཀྱི་བསྙེན་བཀུར་གྱིས་ཤིང་ཡིད་ཀྱང་མགུ་བར་གྱིས། །བུད་མེད་སྒྱུ་ཐབས་སྤྱོད་པ་གང་ཡིན་རྣམ་པ་དུ་མ་མང་པོ་སྟོན། །དེས་པ་འགྲོར་མི་འགྱུར་བར་བསྲུང་བར་བྱོས་ཤིང་བགེགས་ཀྱང་རབ་ཏུ་བྱོས། །ཁ་ལོ་སྒྱུར་བ་མཆོག་དེ་མངོན་པར་འབྱུང་བའི་སྔ་ལྟས་འདི་དག་སྟེ། །ངང་པ་ཁྲུང་ཁྲུང་དག་དང་རྨ་བྱ་རི་སྐེགས་དག་དང་ནེ་ཚོ་རྣམས། །ཁང་བཟངས་སྐར་ཁུང་རྟ་བབས་མཆོག་དང་ཡང་ཐོག་ཁྲི་ལ་འཁོད་ནས་ནི། །དམན་ཞིང་དམན་ལ་མི་དགའ་མི་བདེ་མགོ་སྨད་སེམས་ཤིང་སྒྲ་མི་འབྱིན། །རྫིང་དང་རྫིང་ཆེན་དག་གི་པད་མ་དག་ཀྱང་རྙིས་ཤིང་རྙིས་པར་གྱུར། །ཤིང་ལྗོན་སྐམས་ཤིང་ཡལ་ག་མེ་ཏོག་ལྷགས་ལ་མེ་ཏོག་སླར་མི་འཆགས། །པི་བང་གླིང་བུ་རྒྱུད་གསུམ་རྒྱུད་ཀྱིས་བརྒྱན་པ་དེ་ཚེ་གློ་བུར་ཆད། །རྔ་དང་རྫ་རྔ་དག་ཀྱང་ལག་པས་བརྡུངས་ན་འཆགས་ཅིང་སྒྲ་མི་འབྱུང་། །གྲོང་ཁྱེར་དེ་དག་ཐམས་ཅད་འཁྲུགས་པར་གྱུར་ཅིང་ཤིན་ཏུ་གཉིད་ཀྱིས་ནོན། །གང་གི་ཡིད་ཀྱང་གར་བྱེད་པ་དང་གླུ་ལེན་པ་ལ་དགའ་བ་མེད། །རྒྱལ་པོའང་མཆོག་ཏུ་རབ་ཏུ་ཡིད་དམན་གྱུར་ཏེ་སེམས་ཁོངས་ཆུད་ཅིང་འདུག །ཨེ་མ་མ་རུང་ཤཱཀ་རིགས་རྫུ་འཕྲུལ་རྒྱ་ཆེན་མི་ཚིག་གྲང་སྙམ་བྱེད། །ས་འཚོ་མ་དང་རྒྱལ་བུ་མལ་གཅིག་ན་ནི་ཉལ་ཞིང་འཁོད་པའི་ཚེ། །ནམ་ཕྱེད་ཙམ་ན་ས་འཚོ་མ་ཡི་རྨི་ལམ་དུ་ནི་འདི་དག་རྨིས། །ས་འདི་ཐམས་ཅད་རྩེ་མོར་ལྡན་པའི་རི་དང་བཅས་ཏེ་གཡོས་པར་གྱུར། །ཤིང་ལྗོན་རྣམས་ཀྱང་རླུང་གིས་བསྐྱོད་ནས་རྩ་ནས་འཐོན་ཏེ་ས་ལ་སྒྱེལ། །ཉི་མ་ཟླ་བ་སྐར་མའི་རྒྱན་དང་བཅས་ཏེ་མཁའ་ལས་ས་ལ་ལྷུང་། །ལག་པ་གཡོན་པས་སྐྲ་ཡང་རབ་ཏུ་འབལ་ཞིང་ཅོད་པན་ལྷུང་བ་མཐོང་། །ལག་པ་ཆད་ལ་དེ་བཞིན་རྐང་པའང་ཆད་ཅིང་བདག་ནི་སྒྲེན་མོར་མཐོང་། །བདག་གི་མུ་ཏིག་དོ་ཤལ་ནོར་བུ་གསེར་གྱི་འོག་པག་ཆད་པར་མཐོང་། །
ཉལ་ཁྲི་དེ་ཡི་རྐང་པ་བཞི་ཆག་ས་ཡི་སྟེང་ན་ཉལ་བ་མཐོང་། །རྒྱལ་པོའི་གདུགས་ཀྱི་ཡུ་བ་སྤྲས་པ་དཔལ་ལྡན་མཛེས་པ་ཆག་པར་མཐོང་། །རྒྱན་རྣམས་ཀུན་ཀྱང་རྣམ་པར་འཐོར་ཅིང་ཆུ་ཡིས་ཁྱེར་བར་གྱུར་པ་དང་། །ཁྱིམ་ཐབ་རྒྱན་ཡང་གོས་དང་ཅོད་པན་བཅས་ཏེ་མལ་སྟེང་འཐོར་བར་མཐོང་། །གྲོང་ཁྱེར་དག་ནས་མེ་སྒྲོན་ཕྱིར་བྱུང་གྲོང་ཁྱེར་མུན་པས་ནོན་པ་དང་། །རིན་པོ་ཆེ་ལས་བྱས་པའི་དྲ་བ་མཛེས་པའང་ཆད་པར་གྱུར་པ་རྨིས། །མུ་ཏིག་དོ་ཤལ་འཕྱང་བ་ལྷུང་ནས་རྒྱ་མཚོ་ཆེན་པོས་དཀྲུགས་པ་དང་། །དེ་ཡི་ཚེ་ན་རི་ཡི་རྒྱལ་པོ་རི་རབ་གནས་ནས་གཡོས་པ་རྨིས། །ཤཱཀྱའི་བུ་མོའི་རྨི་ལམ་དུ་ནི་འདི་འདྲ་འདི་དག་རྨིས་གྱུར་ནས། །དེ་སད་མིག་ནས་མཆི་མ་ཟག་ཅིང་རང་གི་ཁྱོ་ལ་འདི་སྐད་སྨྲས། །ལྷ་ཅིག་རྨི་ལམ་འདི་འདྲ་རྨིས་པ་ཅིར་འགྱུར་བ་ནི་བཀའ་སྩོལ་ཅིག །བདག་ནི་དྲན་པ་འཁྲུལ་ཅིང་མིག་ཀྱང་འཁྲུལ་ལ་ཡིད་ནི་མྱ་ངན་ནོན། །དེ་ཡིས་དེ་ཐོས་ཀ་ལ་པིང་ཀ་རྔ་སྒྲ་ཚངས་དབྱངས་སྒྲ་སྙན་པས། །ས་འཚོ་མ་ལ་སྨྲས་པ་ཁྱོད་ནི་རབ་ཏུ་དགར་འགྱུར་སྡིག་པ་མེད། །སེམས་ཅན་གང་དག་བསོད་ནམས་སྔོན་སྤྱད་དེ་དག་རྨི་ལམ་འདི་འདྲ་རྨི། །སྡུག་བསྔལ་དུ་མས་ཉེན་པ་རྨི་ལམ་འདི་འདྲ་རྨི་བ་ག་ལ་ཡོད། །ཁྱོད་ཀྱིས་ས་ནི་རབ་ཏུ་གཡོས་པ་དང་། །རི་རྩེར་བཅས་ཏེ་ས་ལ་ལྷུང་རྨིས་པ། །ལྷ་དང་ཀླུ་དང་སྲིན་པོ་འབྱུང་པོའི་ཚོགས། །ཀུན་གྱིས་ཁྱོད་མཆོད་གཙོ་མོར་བྱེད་པར་འགྱུར། །ཁྱོད་ཀྱིས་ཤིང་རྣམས་རྩ་ནས་འཐོན་རྨིས་ཤིང་། །ལག་པ་གཡོན་པས་སྐྲ་འབལ་རྨིས་པ་ནི། །ས་འཚོ་མྱུར་དུ་ཉོན་མོངས་དྲ་བ་བཅད། །འདུས་བྱས་དག་ལས་ལྟ་བའི་དྲ་བ་འབྱིན། །ཁྱོད་ཀྱིས་ཉི་ཟླ་ས་ལ་ལྷུང་རྨིས་ཤིང་། །སྐར་མ་རྣམས་ཀྱང་ལྷུང་བར་རྨིས་པ་ནི། །ས་འཚོ་མྱུར་དུ་ཉོན་མོངས་དགྲ་བཅོམ་སྟེ། །ཁྱོད་ནི་འཇིག་རྟེན་མཆོད་པ་བསྔགས་པར་འགྱུར། །ཁྱོད་ཀྱིས་མུ་ཏིག་དོ་ཤལ་འཐོར་རྨིས་ཤིང་། །ལུས་ཀུན་ཆད་དང་སྒྲེན་མོ་རྨིས་པ་ནི། །ས་འཚོ་མྱུར་དུ་བུད་མེད་ལུས་སྤངས་ཏེ། །རིང་པོར་མི་ཐོགས་སྐྱེས་པའི་ལུས་སུ་འགྱུར། །ཁྱོད་ཀྱིས་ཁྲི་རྐང་ཆག་པར་རྨིས་པ་དང་། །གདུགས་ཡུ་རིན་ཆེན་སྤྲས་པ་ཆག་རྨིས་པ། །ས་འཚོ་མྱུར་དུ་ཆུ་བོ་བཞི་རྒལ་ཅིང་། །ང་ནི་འཇིག་རྟེན་གདུགས་གཅིག་འགྱུར་བ་མཐོང་། །ཁྱོད་ཀྱིས་རྒྱན་
རྣམས་ཆུས་ཁྱེར་རྨིས་པ་དང་། །ང་ཡི་གོས་དང་ཅོད་པན་ཁྲི་སྟེང་རྨིས། །ས་མཚོ་མྱུར་དུ་མཚན་གྱིས་བརྒྱན་ནས་ནི། །འཇིག་རྟེན་ཀུན་གྱིས་ང་ལ་བསྟོད་པ་མཐོང་། །ཁྱོད་ཀྱིས་མར་མེ་བརྒྱ་ཕྲག་བྱེ་བ་དག །གྲོང་ཁྱེར་བྱུང་ནས་མུན་གནག་གྱུར་རྨིས་པ། །ས་འཚོ་མྱུར་དུ་མ་རིག་རྨོངས་པའི་མུན། །འཇིག་རྟེན་ཀུན་ལ་ཤེས་རབ་སྣང་བྱེད་འགྱུར། །ཁྱོད་ཀྱིས་མུ་ཏིག་དོ་ཤལ་ཆད་པ་དང་། །གསེར་གྱི་ཙོང་ཙོང་སྤྲས་པ་ཆད་རྨིས་པ། །ས་འཚོ་མྱུར་དུ་ཉོན་མོངས་དྲ་བཅད་དེ། །འདུས་བྱས་དག་ལས་འདུ་ཤེས་སྐུད་པ་འབྱིན། །ས་འཚོ་གང་ཕྱིར་ང་ལ་གུས་པར་ནི། །རྟག་ཏུ་རིམ་གྲོ་མཆོག་གིས་མཆོད་བྱེད་ན། །ཁྱོད་ལ་ངན་འགྲོ་མེད་ཅིང་མྱ་ངན་མེད། །མྱུར་དུ་དགའ་ཞིང་མཆོག་ཏུ་དགའ་བ་འཐོབ། །ངས་ནི་སྔོན་ཆད་སྦྱིན་པ་གྱ་ནོམ་བྱིན། །ཚུལ་ཁྲིམས་བསྲུངས་དང་རྟག་ཏུ་བཟོད་པ་བསྒོམས། །དེ་བས་ང་ལ་དད་པ་གང་རྙེད་པ། །དེ་དག་ཐམས་ཅད་དགའ་ཞིང་རབ་དགའ་རྙེད། །འཁོར་བར་བསྐལ་པ་བྱེ་བ་མཐའ་ཡས་སུ། །ངས་ནི་བྱང་ཆུབ་ལམ་མཆོག་རྣམ་པར་སྦྱངས། །དེ་བས་ང་ལ་དད་པ་གང་བྱེད་པ། །དེ་དག་ཐམས་ཅད་ངན་སོང་གསུམ་པོ་ཆད། །དགའ་བ་འཐོབ་ཀྱིས་མི་དགའ་མ་སྐྱེད་ཅིག །ཚིམ་པ་ཐོབ་པར་གྱིས་ལ་མགུ་སྐྱེད་ཅིག །དགའ་དང་མཆོག་ཏུ་དགའ་བ་མྱུར་འཐོབ་སྟེ། །ཁྱོད་ཀྱི་རྨི་ལྟས་བཟང་གིས་ས་འཚོ་ཉོལ། །སྔོན་ཆད་དགེ་བའི་ལས་ནི་གང་དག་བསགས་གྱུར་པ། །མི་མཆོག་རྣམས་ནི་མངོན་པར་འབྱུང་བའི་དུས་བབ་ཚེ། །མཚན་མ་འདི་དག་བསོད་ནམས་གཟི་བརྗིད་བསགས་པ་དང་། །དཔལ་གྱི་གཟི་བརྗིད་སྙིང་པོ་ཅན་དེས་རྨི་བར་འགྱུར། །དེ་ནི་རྐང་པ་དག་དང་ལག་པ་ཆེན་པོ་ཡིས། །རྒྱ་མཚོ་ཆེན་པོ་བཞི་པོ་དག་གི་ཆུ་དཀྲུག་དང་། །ས་འདི་ཐམས་ཅད་སྣ་ཚོགས་མལ་ཆར་གྱུར་པ་དང་། །རི་བོ་ལྷུན་པོ་མཆོག་ཀྱང་སྔས་སུ་གྱུར་པ་རྨི། །རྨི་ལམ་ན་ནི་འོད་རབ་བཀྱེ་བས་འཇིག་རྟེན་ན། །མུན་པ་མུན་ནག་ཆེན་པོ་རྣམ་པར་བསལ་བ་དང་། །ས་ལས་གདུགས་ཤིག་བྱུང་བས་འཇིག་རྟེན་གསུམ་ཁྱབ་དང་། །འོད་ཀྱིས་རེག་པས་ལོག་ལྷུང་སྡུག་བསྔལ་རབ་ཞི་རྨི། །དཀར་ནག་སྲོག་ཆགས་བཞི་ཞིག་རྐང་པ་ལྡག་པ་དང་། །ཁ་དོག་བཞི་པའི་བྱ་འོངས་ཁ་དོག་གཅིག་སྒྱུར་
དང་། །མཆོག་ཏུ་ངན་པ་སྨད་པ་ངན་སྐྱུགས་རི་ལ་ཡང་། །འཛེགས་ནས་འགྲོ་ཡང་དེ་ན་གོས་པ་མེད་པ་རྨི། །རྨི་ལམ་ན་ནི་ཆུ་བོ་ཆུ་ཡིས་རབ་གང་ནས། །སྲོག་ཆགས་བྱེ་བ་ཁྲག་ཁྲིག་མང་པོ་ཁྱེར་བ་ལས། །དེར་ནི་གྲུར་བྱས་བསྒྲལ་ཏེ་གཞན་དག་བསྒྲལ་ནས་ནི། །དེ་ཡིས་འཇིགས་མེད་མྱ་ངན་མེད་མཆོག་ཐང་བཀོད་རྨི། །རྨི་ལམ་ན་ནི་ནད་པ་མང་པོ་ནད་བཏབ་པ། །ནད་མེད་གཟི་བརྗིད་བྲལ་ཞིང་སྟོབས་ཀྱང་ཉམས་རྣམས་ལ། །དེ་ནི་སྨན་པར་གྱུར་ནས་རྩི་སྨན་མང་བྱིན་པས། །ནད་བཏབ་སེམས་ཅན་ཁྲག་ཁྲིག་མང་པོ་ཐར་བྱེད་རྨི། །རི་རབ་ངོས་ལ་སེང་གེའི་ཁྲི་ལ་འདུག་ནས་ནི། །སློབ་མ་ཐལ་མོ་སྦྱར་ཅིང་ལྷ་རྣམས་ཕྱག་འཚལ་ལ། །བདག་ནི་གཡུལ་ལས་རྒྱལ་ཞིང་ལྷ་རྣམས་ནམ་མཁའ་ལས། །ཀུན་ཏུ་དགའ་བའི་སྒྲ་སྒྲོག་པར་ནི་རྨི་ལམ་རྨི། །བཀྲ་ཤིས་བརྟུལ་ཞུགས་བཟང་པོ་ཡོངས་སུ་རྫོགས་པར་ཡང་། །བྱང་ཆུབ་སེམས་དཔའ་རྨི་ལམ་རྣམ་པ་དེ་དག་རྨི། །དེ་ཐོས་ནས་ནི་འདི་ནི་རིང་པོར་མི་ཐོགས་པར། །མི་དང་ལྷ་ཡི་ལྷར་འགྱུར་སྙམ་སྟེ་ལྷ་མི་དགའ། །རྨི་ལམ་གྱི་ལེའུ་སྟེ། བཅུ་བཞི་པའོ།། །།