བཅོ་ལྔ་པ། མངོན་པར་འབྱུང་བའི་ལེའུ།
དགེ་སློང་དག་དེ་ནས་བྱང་ཆུབ་སེམས་དཔའ་འདི་སྙམ་དུ་སེམས་ཏེ། བདག་གིས་རྒྱལ་པོ་ཆེན་པོ་ཟས་གཙང་མ་ལ་ཡང་མ་བྱས་ཤིང་། ཕས་གནང་བ་མེད་པར་མངོན་པར་འབྱུང་བ་འདི་ནི་བདག་ལ་མི་རིགས་ཏེ། བྱས་པ་གཟོ་བ་མ་ཡིན་པར་འགྱུར་རོ་སྙམ་ནས། དེ་མཚན་མོ་མི་ཉལ་ཙམ་ན་རང་གི་གནས་ཀྱི་ཁང་བཟངས་ནས་བྱུང་སྟེ། རྒྱལ་པོ་ཟས་གཙང་མའི་ཁང་བཟངས་སུ་ཕྱིན་ནས་འདུག་གོ །བྱང་ཆུབ་སེམས་དཔའ་འདུག་མ་ཐག་ཏུ་ཁང་བཟངས་ཐམས་ཅད་ཀྱང་འོད་ཀྱིས་གསལ་བར་གྱུར་ཏོ། །དེ་ནས་རྒྱལ་པོ་སད་པ་དང་། འོད་དེ་མཐོང་སྟེ་མཐོང་ནས་ཀྱང་མྱུར་བ་མྱུར་བར་ཉུང་རུམ་ལ་སྨྲས་པ། ཀྱེ་ཉུང་རུམ་ཅི་ཉི་མ་ཤར་ཏམ། གང་གིས་ན་འདི་འོད་ཀྱིས་རྣམ་པར་མཛེས། ཉུང་རུམ་གྱིས་སྨྲས་པ། ལྷ་ད་དུང་དུ་དགུང་ཕྱེད་ཀྱང་མ་བས་སོ། །ལྷ་གཞན་ཡང་ཉི་མའི་འོད་ནི་ཤིང་དང་རྩིག་པ་ཐལ་མི་ཕྱིན། །ལུས་ལ་གདུང་བར་བགྱིད་ཅིང་ཚ་བར་རབ་ཏུ་བགྱིད། །ནང་པར་དུས་ན་ངང་པ་དག་དང་རྨ་བྱ་དང་། །ནེ་ཚོ་ཁུ་བྱུག་ངུར་པ་དག་ཀྱང་རང་སྒྲ་འབྱིན། །
འོད་འདི་ལྷ་མིའི་ཡིད་དུ་མཆི་ཞིང་བདེ་བ་སྟེ། །རབ་ཏུ་སིམ་བགྱིད་དགེ་བགྱིད་གདུང་བར་བགྱིད་མ་ལགས། །ཤིང་དང་རྩིག་པ་ཐལ་ཕྱུང་སྒྲིབ་པ་ཡོང་མ་མཆིས། །ཡོན་ཏན་ལྡན་པ་གཅིག་ཅིག་དེང་ནི་འདིར་བྱོན་ངེས། །རྒྱལ་པོ་དེ་ནི་མི་དགའ་ཕྱོགས་བཅུར་བལྟས་པ་དང་། །སེམས་ཅན་དག་པ་པད་མའི་མིག་ཅན་དེ་མཐོང་ནས། །དེ་ནི་མལ་ནས་ལྡང་བར་འདོད་ན་མ་ནུས་ཏེ། །རྣམ་དག་བློ་ཅན་དམ་པ་ཕ་ལ་གུས་པ་བསྐྱེད། །དེ་ནི་རྒྱལ་པོའི་མདུན་དུ་འདུག་ནས་འདི་སྐད་སྨྲས། །ལྷ་ཅིག་བདག་ནི་མངོན་པར་འབྱུང་བའི་དུས་བབ་རིགས། །བགེགས་ཀྱང་མ་མཛད་མི་དགྱེས་པ་ཡང་མ་མཛད་ཅིག །རྒྱལ་པོ་གཉེན་བཅས་ཡུལ་འཁོར་བཅས་ཏེ་བཟོད་པར་གསོལ། །རྒྱལ་པོ་དེ་ནི་མཆི་མས་མིག་གང་འདི་སྐད་སྨྲས། །ཁྱོད་ནི་ཕྱིར་ལྡོག་པ་ཡི་དགོས་པ་ཅི་ཞིག་ཡོད། །བདག་ལ་དམ་པ་ཅི་སློང་སྨྲོས་ཤིག་ཐམས་ཅད་སྦྱིན། །བདག་དང་ཕོ་བྲང་འཁོར་དང་ཡུལ་འཁོར་འདི་ཕན་ཐོགས། །དེའི་ཚེ་བྱང་ཆུབ་སེམས་དཔས་སྙན་པའི་ཚིག་སྨྲས་པ། ལྷ་ཅིག་དམ་པ་བཞི་འཚལ་དེ་ནི་བདག་ལ་སྩོལ། །གལ་ཏེ་སྩལ་བར་སྤྱོད་ན་མངའ་ནི་ཁྱོད་ལ་མཆིས། །འོན་ཏང་རྟག་ཏུ་ཁྱིམ་ན་གཟིམས་ཤིང་འབྱུང་མི་འགྱུར། །ལྷ་ཅིག་བདག་ནི་རྒ་བས་ཚུགས་པར་མི་འགྱུར་ཞིང་། །རྟག་ཏུ་མདོག་བཟང་དར་ལ་བབ་པར་གནས་པ་དང་། །ནད་མ་མཆིས་པ་ཐོབ་ཅིང་ནད་ཀྱིས་མི་བཏབ་དང་། །ཚེ་དཔག་མ་མཆིས་པ་དང་རྒུད་པར་མི་འགྱུར་འཚལ། །རྒྱལ་པོས་ཚིག་ཐོས་ཤིན་ཏུ་སྡུག་བསྔལ་ཉམ་ཐག་སྟེ། །གཞོན་ནུ་གནས་མིན་སློང་བས་བདག་ལ་མཐུ་མེད་དོ། ། བསྐལ་པར་གནས་པའི་དྲང་སྲོང་རྣམས་ཀྱང་ནམ་དུ་ཡང་། །རྒ་ན་འཆི་བའི་འཇིགས་དང་རྒུད་ལས་མ་ཐར་ཏོ། །རྒ་ན་འཆི་བའི་འཇིགས་དང་རྒུད་པར་མི་འགྱུར་བ། །ལྷ་ཅིག་གལ་ཏེ་མཆོག་བཞི་འདི་དག་མི་སྩོལ་ན། །གཞན་ཡང་མཆོག་ཅིག་གསོལ་གྱིས་རྒྱལ་པོ་གསན་དུ་གསོལ། །འདི་ནས་ཤི་འཕོས་ཉིང་མཚམས་སྦྱོར་བར་མི་འགྱུར་མཛོད། །མི་ཡི་དམ་པའི་ཚིག་ནི་དེ་སྐད་ཐོས་པ་དང་། །སྲེད་པ་བསྲབས་ཏེ་བུ་ལ་ཆགས་པ་ཡོངས་སུ་གཅོད། །ཕན་བྱེད་འགྲོ་བ་ཐར་བྱེད་རྗེས་སུ་ཡི་རང་ངོ་། །ཁྱོད་ཀྱི་བསམ་པ་རྣམས་
ནི་ཡོངས་སུ་རྫོགས་གྱུར་ཅིག །དགེ་སློང་དག་དེ་ནས་བྱང་ཆུབ་སེམས་དཔའ་སླར་སོང་སྟེ། རང་གི་ཁྱིམ་དུ་ཕྱིན་ནས་མལ་ན་འདུག་པ་དང་། དེ་སོང་བའམ་འོངས་པར་སུས་ཀྱང་མ་ཚོར་རོ། །དགེ་སློང་དག་དེའི་ནམ་ནངས་པ་དང་། རྒྱལ་པོ་ཟས་གཙང་མས་ཤཱཀྱའི་ཚོགས་ཐམས་ཅད་བསོགས་ཏེ་དེའི་ལོ་རྒྱུས་རྣམས་སྨོས་ནས། གཞོན་ནུ་ནི་མངོན་པར་འབྱུང་ན་ད་ཇི་ལྟར་བྱ་ཞེས་སྨྲས་སོ། །ཤཱཀྱ་རྣམས་ཀྱིས་སྨྲས་པ། ལྷ་བསྲུང་བར་བགྱིའོ། །དེ་ཅིའི་སླད་དུ་ཞེ་ན། ཤཱཀྱའི་ཚོགས་འདི་ནི་མང་ལ། དེ་ནི་གཅིག་པུར་གྱུར་པས་མཐུས་མངོན་པར་འབྱུང་བའི་ནུས་པ་དེ་ལ་མ་མཆིས་སོ། །དེ་ནས་ཤཱཀྱ་དེ་དག་དང་རྒྱལ་པོ་ཟས་གཙང་མས་ཤཱཀྱ་གཞོན་ནུ་འཐབ་ཆོས་སྦྱངས་པ། འོས་སུ་གྱུར་པ། འཕོང་བསླབས་པ། ཚན་པོ་ཆེ་ཆེན་པོའི་སྟོབས་དང་ལྡན་པ་ལྔ་བརྒྱ་བྱང་ཆུབ་སེམས་དཔའ་བསྲུང་བའི་ཕྱིར་གྲོང་ཁྱེར་གྱི་ཤར་སྒོར་བཀོད་དེ། བྱང་ཆུབ་སེམས་དཔའ་བསྲུང་བའི་ཕྱིར་ཤཱཀྱ་གཞོན་ནུ་རེ་རེ་ལ་ཡང་འཁོར་ཤིང་རྟ་ལྔ་བརྒྱ་ལྔ་བརྒྱ་དང་། ཤིང་རྟ་རེ་རེ་ལ་ཡང་འཁོར་དཔུང་བུ་ཆུང་ལྔ་བརྒྱ་ལྔ་བརྒྱ་བཀོད་དོ། །བྱང་ཆུབ་སེམས་དཔའ་བསྲུང་བའི་ཕྱིར། དེ་བཞིན་དུ་གྲོང་ཁྱེར་གྱི་ལྷོ་དང་ནུབ་དང་བྱང་གི་སྒོར་ཡང་ཤཱཀྱ་གཞོན་ནུ་འཐབ་ཆོས་སྦྱངས་པ་འོས་སུ་གྱུར་པ། འཕོང་བསླབས་པ་ཚན་པོ་ཆེ་ཆེན་པོའི་སྟོབས་དང་ལྡན་པ་ལྔ་བརྒྱ་ལྔ་བརྒྱ་དང་། ཤཱཀྱ་གཞོན་ནུ་རེ་རེ་ལ་ཡང་འཁོར་ཤིང་རྟ་ལྔ་བརྒྱ་ལྔ་བརྒྱ་དང་། ཤིང་རྟ་རེ་རེ་ལ་ཡང་འཁོར་དཔུང་བུ་ཆུང་ལྔ་བརྒྱ་ལྔ་བརྒྱ་བཀོད་དོ། །བྱང་ཆུབ་སེམས་དཔའ་བསྲུང་བའི་ཕྱིར་ཤཱཀྱ་རྒན་རབས་རྒན་རབས་རྣམས་ཀྱང་ལམ་གྱི་བཞི་མདོ་དང་།སུམ་མདོ་དང་། ལམ་པོ་ཆེ་མང་པོ་ཐམས་ཅད་ན་གདོད་ཅིང་འཁོད་དོ། །རྒྱལ་པོ་ཟས་གཙང་མ་ཡང་ཤཱཀྱ་གཞོན་ནུ་ལྔ་བརྒྱས་བསྐོར་ཅིང་མདུན་གྱིས་བལྟས་ཏེ། རྟ་དང་གླང་པོ་ཆེ་དག་ལ་ཞོན་ནས་རང་གི་ཁྱིམ་སྒོ་ན་མེལ་ཚེ་བྱེད་དོ། །སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཀྱང་རང་གི་བྲན་མོའི་ཚོགས་ལ་སྨྲས་པ། མར་མེ་དྲི་མ་མེད་པ་བུས་ལ་ནོར་བུ་ཐམས་ཅད་རྒྱལ་མཚན་རྩེ་མོར་ཐོགས། །མུ་ཏིག་རྒྱན་ཕྲེང་རྣམས་ཀྱང་སྤྱངས་ལ་ཁྱིམ་འདི་ཀུན་ཏུ་འོད་ཀྱིས་སྣང་བར་བྱོས། །གླུ་དབྱངས་དག་ཀྱང་སྦྱོར་ལ་དོ་མོད་གཡེལ་བ་མེད་པར་མེལ་ཚེ་དམ་དུ་གྱིས། །
གཞོན་ནུ་ཅི་ནས་མ་ཚོར་བར་ནི་འགྲོ་བར་མི་འགྱུར་ཚུལ་དུ་བསྲུང་བ་གྱིས། །གོ་བགོས་ལག་ན་ལག་ཆ་རལ་གྲི་དང་། །མདུང་ཐུང་མདའ་དང་མཚོན་ཆ་རྩེ་གཉིས་ཐོགས། །སྡུག་པའི་བུ་ནི་བསྲུང་བར་བྱ་བའི་ཕྱིར། །ཀུན་ཀྱང་རབ་ཏུ་བསྒྲིམ་པ་ཆེན་པོ་གྱིས། །སྒོ་ཀུན་ཆོད་ལ་གཏན་པར་དམ་དུ་ཆུད། །སྒོ་འཕར་སྲ་བ་རྐེད་པར་གཏན་ཆུག་ལ། །དུས་ལ་མ་བབ་པར་ནི་སྒོ་མ་དབྱེ། །སེམས་ཅན་དམ་པ་འདི་ནི་ཤོར་ཏ་རེ། །ནོར་བུ་དོ་ཤལ་མུ་ཏིག་དོ་ཤལ་ཐོགས། །མེ་ཏོག་ཟླ་གམ་སེང་གེ་ཤིང་ལོ་རིས། །སྐ་རགས་སོར་གདུབ་རྣ་རྒྱན་ཆིངས་ཤིང་ཐོགས། །རྐང་གདུབ་དག་ཀྱང་ཤིན་ཏུ་ལེགས་པར་ཐོགས། །ལྷ་མི་ཕན་པ་གླང་པོ་དྲེགས་བཞིན་འགྲོ། །གལ་ཏེ་བློ་བུར་མངོན་པར་བྱུང་ད་རེ། །ཅི་ནས་མི་བདེ་རྙེད་པར་མ་གྱུར་པར། །དེ་ལྟ་དེ་ལྟར་ནན་ཏན་ཆེར་གྱིས་ཤིག །བུད་མེད་གང་དག་མདུང་ཐུང་ཐོགས་པ་དག །དྲི་མ་མེད་པ་མལ་ན་འདུག་པ་བསྐོར། །ཅི་ནས་གཉིད་ཀྱིས་ལོག་པར་མ་གྱུར་པར། །ཕྱེ་མ་ལེབ་བཞིན་མིག་གིས་བསྲུང་བར་གྱིས། །རྒྱལ་བུ་འདི་ནི་བསྲུང་བར་བྱ་བའི་ཕྱིར། །ཁྱིམ་འདིར་རིན་པོ་ཆེ་ཡི་དྲ་བ་བྲེས། །གླིང་བུ་དག་ཀྱང་རབ་ཏུ་འབུད་ཅིང་ལོང་། །དོ་མོད་རྡུལ་དང་བྲལ་བ་བསྲུང་བ་གྱིས། །ཕན་ཚུན་གཅིག་ལ་གཅིག་ནི་སྦྲོན་བྱོས་ཏེ། །དོ་མོད་མ་ཉལ་ཤིན་ཏུ་བསྲུང་བ་གྱིས། །རྒྱལ་སྲིད་དང་ནི་ཡུལ་འཁོར་སྤངས་ནས་སུ། །ཁྱིམ་ནས་མངོན་དུ་འབྱུང་བར་གྱུར་ཏ་རེ། །འདི་ནི་མངོན་པར་བྱུང་བར་གྱུར་ན་གོ །རྒྱལ་པོའི་ཕོ་བྲང་འདི་ཀུན་ཉམས་མི་དགའ། །རྒྱལ་པོའི་རིགས་རྒྱུད་ཡུན་རིང་གནས་པ་ཡང་། །རྒྱལ་པོའི་རིགས་དང་རྒྱུད་ནི་ཆད་པར་འགྱུར། །དགེ་སློང་དག་དེ་ནས་གནོད་སྦྱིན་གྱི་སྡེ་དཔོན་ལྔ་རྩེན་ལ་སོགས་པ་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། འཕྲོག་མའི་བུ་ལྔ་བརྒྱ་རྣམས་གཅིག་ཏུ་འདུས་ནས་འདི་སྐད་ཅེས་སྨྲས་ཏེ། གྲོགས་པོ་དག་དོ་མོད་བྱང་ཆུབ་སེམས་དཔའ་མངོན་པར་འབྱུང་གིས་ཁྱེད་ཅག་དེ་ལ་མཆོད་པ་བྱེད་པའི་ལས་ལ་སྤྲོ་བ་གྱིས་ཤིག །རྒྱལ་པོ་ཆེན་པོ་བཞི་ཡང་ལྕང་ལོ་ཅན་གྱི་ཕོ་བྲང་དུ་ཞུགས་ནས་གནོད་སྦྱིན་གྱི་འཁོར་ཆེན་པོ་ལ་སྨྲས་པ། གྲོགས་པོ་དག་དོ་མོད་བྱང་ཆུབ་སེམས་དཔའ་མངོན་པར་འབྱུང་གིས་ཁྱེད་ཀྱིས་
བཅིབས་པའི་རྐང་ལག་ནས་ཐེག་ལ་འབྱུང་བར་གྱིས་ཤིག །གནོད་སྦྱིན་གྱི་འཁོར་གྱིས་སྨྲས་པ། སྐུ་ནི་སྲེད་མེད་བུ་ཡི་སྟོབས་ལྡན་རྡོ་རྗེ་ལྟ་བུར་མི་ཕྱེད་སྲ་ལ་ལྕི། །སེམས་ཅན་ཀུན་གྱི་དམ་པ་དེ་ནི་བརྩོན་འགྲུས་སྟོབས་ལྡན་གཡོ་བ་མི་མངའ་སྟེ། །རི་ཡི་དམ་པ་ལྷུན་པོ་ཆེན་པོ་རྨང་ནས་ཕྱུང་སྟེ་ནམ་མཁར་གཟུང་ནུས་ཀྱི། །རྒྱལ་པོའི་ཡོན་ཏན་ལྷུན་པོ་རི་ལྕི་བསོད་ནམས་ཡེ་ཤེས་གནས་པ་སུས་ཀྱང་གང་དུ་བཀུར་མི་ནུས། །རྣམ་ཐོས་ཀྱི་བུས་སྨྲས་པ། མི་གང་ང་རྒྱལ་འགྱིང་བ་དེ་ལ་སྟོན་པ་ལྕི། །གང་དག་དགའ་གུས་གནས་པ་དེ་དག་ཡང་བར་ཚོར། །བསམ་པ་ཐག་པས་བརྩོན་པར་བྱོས་ལ་གུས་པ་ཡིས། །བྱ་ཡིས་ཤ་ཁམ་བཞིན་དུ་ཡང་བར་ཤེས་པར་གྱིས། །ཁོ་བོ་མདུན་ནས་འགྲོ་ཡིས་ཁྱེད་ཅག་རྣམས་ཀྱིས་བཅིབས་པ་ཐེག །བྱང་ཆུབ་སེམས་དཔའ་མངོན་པར་འབྱུང་ཚེ་བསོད་ནམས་མང་པོ་སྩོགས། །དགེ་སློང་དག་དེ་ནས་ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་གྱི་ལྷ་རྣམས་ལ་སྨྲས་པ། ཀྱེ་གྲོགས་པོ་དག་དོ་མོད་བྱང་ཆུབ་སེམས་དཔའ་མངོན་པར་འབྱུང་གིས་དེ་ལ་ཁྱེད་ཐམས་ཅད་མཆོད་པའི་ལས་ལ་སྤྲོ་བར་གྱིས་ཤིག །དེ་ན་ལྷའི་བུ་ཞི་བའི་བློ་གྲོས་ཞེས་བྱ་བ་དེས་འདི་སྐད་ཅེས་སྨྲས་སོ། །བདག་གིས་ནི་སེར་སྐྱའི་གནས་ཀྱི་གྲོང་ཁྱེར་ཆེན་པོའི་སྐྱེས་པ་དང་། བུད་མེད་དང་ཁྱེའུ་དང་བུ་མོ་ཐམས་ཅད་གཉིད་ཀྱིས་ལོག་པར་བགྱིའོ། །ལྷའི་བུ་རྩེ་བ་བཀོད་པ་ཞེས་བྱ་བ་དེས་འདི་སྐད་ཅེས་སྨྲས་སོ། །བདག་གིས་ནི་རྟ་དང་གླང་པོ་ཆེ་དང་། བོང་བུ་དང་། རྔ་མོ་དང་། བ་ལང་དང་། མ་ཧེ་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་རྣམས་ཀྱི་སྒྲ་མི་གྲག་པར་བགྱིའོ། །ལྷའི་བུ་བཀོད་པའི་བློ་གྲོས་ཞེས་བྱ་བ་དེས་འདི་སྐད་ཅེས་སྨྲས་སོ། །བདག་གིས་ནི་ནམ་མཁའི་དཀྱིལ་དུ་ཤིང་རྟ་ཆེན་པོ་བདུན་རིན་པོ་ཆེའི་སྟེགས་བུས་འཁོར་བར་བསྐོར་བ་ནོར་བུ་རིན་པོ་ཆེ་མེ་ཤེལ་གྱི་འོད་འབར་བ། གདུགས་དང་། རྒྱལ་མཚན་དང་། བ་དན་བསྒྲེང་བ། མེ་ཏོག་སྣ་ཚོགས་ཆལ་པར་བཀྲམ་པ། པོག་ཕོར་ནས་བདུག་སྤོས་སྣ་ཚོགས་ཀྱིས་བདུགས་པ་དག་བྱང་ཆུབ་སེམས་དཔའ་ལམ་གང་ནས་འབྱུང་བའི་ལམ་དེར་བཀོད་པར་བགྱིའོ། །ཀླུའི་རྒྱལ་པོ་ས་སྲུང་གི་བུ་ཞེས་བྱ་བས་འདི་སྐད་
ཅེས་སྨྲས་སོ། །བདག་གིས་བདག་ཉིད་ཀྱི་སྣ་ལ་ཁང་པ་བརྩེགས་པ་དཔག་ཚད་སུམ་ཅུ་རྩ་གཉིས་པ་བགྱིས་ཏེ་དེར་ལྷའི་བུ་མོ་དག་བཀོད་ལ་སིལ་སྙན་དང་། གླུ་དབྱངས་ལེན་དུ་སྩལ་ཅིང་གླུ་དང་རོལ་མོའི་དབྱངས་སྒྲ་ཆེན་པོས་བྱང་ཆུབ་སེམས་དཔའ་ལ་རིམ་གྲོ་དང་བསྙེན་བཀུར་བགྱིད་ཅིང་མཆི་བར་བགྱིའོ། །ལྷའི་དབང་པོ་བརྒྱ་བྱིན་ཉིད་ཀྱིས་འདི་སྐད་ཅེས་སྨྲས་སོ། །ཁོ་བོས་ནི་སྒོ་དབྱེའོ། །ལམ་མཚོན་པར་བྱའོ། །ལྷའི་བུ་ཆོས་སྤྱོད་ཀྱིས་འདི་སྐད་ཅེས་སྨྲས་སོ། །བདག་གིས་ནི་བཙུན་མོའི་འཁོར་རྣམས་མི་སྡུག་པར་བསྟན་པར་བགྱིའོ། །ལྷའི་བུ་ཡང་དག་སྐུལ་པོས་སྨྲས་པ། བདག་གིས་ནི་བྱང་ཆུབ་སེམས་དཔའ་གཟིམས་མལ་ནས་བཞེངས་པར་གསོལ་བར་བགྱིའོ། །དེ་ན་ཀླུའི་རྒྱལ་པོ་ཆུ་ལྷ་དང་། ཀླུའི་རྒྱལ་པོ་གཟི་ཅན་དང་། ཀླུའི་རྒྱལ་པོ་རྒྱ་མཚོ་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་དགའ་བོ་དང་ཉེ་དགའ་བོས་འདི་སྐད་ཅེས་སྨྲས་སོ། །བདག་ཅག་གིས་ནི་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་དུས་ཀྱི་རྗེས་སུ་འབྲང་བའི་ཙན་དན་གྱི་སྤྲིན་མངོན་པར་སྤྲུལ་ཏེ། ཙན་དན་སྦྲུལ་གྱི་སྙིང་པོའི་ཕྱེ་མའི་ཆར་དབབ་བོ། །དགེ་སློང་དག་དེ་ལྟར་ལྷ་དང་། ཀླུ་དང་། གནོད་སྦྱིན་དང་། དྲི་ཟ་རྣམས་ཀྱིས་རྣམ་པ་འདི་ལྟ་བུའི་བསམ་པ་ངེས་པར་བསམས་ཏེ་བརྩམས་སོ། །བྱང་ཆུབ་སེམས་དཔའ་ཆོས་སེམས་པ་ལ་ཞུགས་པ། གླུ་དབྱངས་ལེན་པའི་ཁང་བཟངས་ན་མལ་བདེ་བ་ལ་འདུག་པ། བཙུན་མོའི་འཁོར་གྱི་ནང་ན་འདུག་པ་ནི་སྔོན་གྱི་སངས་རྒྱས་ཀྱི་སྤྱོད་པ་རྣམ་པར་སེམས་ཤིང་སེམས་ཅན་ལ་ཕན་པ་བྱ་བ་རྗེས་སུ་སེམས་ལ། སྔོན་གྱི་སྨོན་ལམ་གྱི་ཚིག་བཞི་མངོན་དུ་བྱེད་དོ། །བཞི་གང་ཞེ་ན། སྔོན་ང་རང་བྱུང་གི་བདག་པོ་འདོད་ཅིང་ཐམས་ཅད་མཁྱེན་པ་ཉིད་དོན་དུ་གཉེར་བ་ན། གོ་ཆ་འདི་ལྟ་བུ་བགོས་པར་གྱུར་ཏེ། སེམས་ཅན་སྡུག་བསྔལ་བ་དག་མཐོང་ནས་ཀྱེ་མའོ་བདག་གིས་འཇིག་རྟེན་གནས་པ་བཅིངས་ཏེ་འཁོར་བའི་བཙོན་ར་ཆེན་པོར་བཅུག་པ་ལ་འཁོར་བའི་བཙོན་ར་དྲལ་ཏེ། བཅིངས་པ་བཀྲོལ་བའི་སྒྲ་བསྒྲག་གོ །སྲེད་པའི་ཞགས་པ་དང་། སྒྲོག་དམ་པོས་བཅིངས་པའི་སེམས་ཅན་རྣམས་ཀྱང་རབ་ཏུ་དགྲོལ་ལོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་དང་པོ་འདི་མངོན་དུ་གྱུར་ཏོ། །ཀྱེ་མའོ་
བདག་གིས་འཇིག་རྟེན་མ་རིག་པའི་མུན་པ་མུན་གནག་ཐིབས་པོ་ཆེན་པོར་ཞུགས་པ་མི་ཤེས་པའི་ལིང་ཏོག་དང་རབ་རིབ་ཀྱིས་མིག་བསྒྲིབས་པ་ཤེས་རབ་ཀྱི་མིག་དང་བྲལ་བ། མ་རིག་པ་དང་གཏི་མུག་གིས་ལྡོངས་པ་ལ་ཆོས་ཀྱི་སྣང་བ་ཆེན་པོ་བྱ་ཞིང་ཡེ་ཤེས་ཀྱི་སྒྲོན་མ་ཡང་ཉེ་བར་བསྒྲུབས་ལ། རྣམ་པར་ཐར་པའི་སྒོ་གསུམ་ཤེས་པའི་མིག་སྨན་རི་ལུ་དང་སྨན་ཐབས་དང་ཤེས་རབ་དང་། ཡེ་ཤེས་དང་ལྡན་པ་བཏང་སྟེ། མ་རིག་པའི་མུན་པ་མུན་གནག་དང་། གཏི་མུག་གི་མུན་པ་དང་། རབ་རིབ་དང་། ལིང་ཏོག་དང་། རྙོག་པ་ཐམས་ཅད་བསལ་ནས་ཤེས་རབ་ཀྱི་མིག་རྣམ་པར་སྦྱང་ངོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་གཉིས་པ་འདི་མངོན་དུ་གྱུར་ཏོ། །ཀྱེ་མའོ་བདག་གིས་འཇིག་རྟེན་ང་རྒྱལ་གྱི་རྒྱལ་མཚན་བསྒྲེང་བ། ངར་འཛིན་པ་དང་། ང་ཡིར་འཛིན་པ་ལ་མངོན་པར་ཞེན་པ། བདག་དང་བདག་གིར་འཛིན་པ་དང་ལྡན་པའི་ཡིད་ཅན། འདུ་ཤེས་དང་། སེམས་དང་། ལྟ་བ་ཕྱིན་ཅི་ལོག་གིས་ཕྱིན་ཅི་ལོག་ཏུ་གྱུར་པ་བཟུང་བ་ངན་པས་ཟིན་པ་ལ་འཕགས་པའི་ལམ་བསྟན་ཏེ། ངའོ་སྙམ་པའི་ང་རྒྱལ་བསྙལ་བར་བྱའོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་གསུམ་པ་འདི་མངོན་དུ་གྱུར་ཏོ། །ཀྱེ་མའོ་བདག་གིས་འཇིག་རྟེན་རྣམ་པར་མ་ཞི་བ། ཐགས་འཁྲུགས་པ་ལྟ་བུར་གྱུར་པ། དྲུ་གུ་འཛིངས་པ་ལྟ་བུར་གྱུར་པ། འོང་བ་དང་འགྲོ་བར་གྱུར་པ། འཇིག་རྟེན་འདི་ནས་འཇིག་རྟེན་ཕ་རོལ་དང་། འཇིག་རྟེན་ཕ་རོལ་ནས་འཇིག་རྟེན་འདིར་ཀུན་ཏུ་རྒྱུག་ཅིང་འཁོར་ལ་འཁོར་བ་ལས་མི་ལྡོག་པ་མགལ་མེའི་འཁོར་ལོ་ལྟ་བུར་གྱུར་པ་ལ་ཉེ་བར་ཞི་བར་བྱེད་པའི་ཤེས་རབ་ཀྱིས་ཆོག་པར་བྱེད་པའི་ཆོས་ཀྱང་བསྟན་ཏོ་ཞེས་བྱ་བ་སྔོན་གྱི་སྨོན་ལམ་གྱི་ཚིག་བཞི་པོ་འདི་མངོན་དུ་གྱུར་ཏེ། སྔོན་གྱི་སྨོན་ལམ་གྱི་ཚིག་བཞི་པོ་དེ་དག་མངོན་དུ་གྱུར་ཏོ། །སྐད་ཅིག་དེ་ལ་ལྷའི་བུ་ཆོས་སྤྱོད་དང་། གནས་གཙང་མའི་རིས་ཀྱི་ལྷའི་བུ་རྣམས་ཀྱིས་བཙུན་མོའི་འཁོར་མི་སྡུག་པར་བསྒྱུར་ཏེ། མི་སྡུག་པར་གནས་པ་དང་། སྨད་པའི་གཟུགས་སུ་བསྟན་ནས་ནམ་མཁའ་ལ་འཁོད་དེ། བྱང་ཆུབ་སེམས་དཔའ་ལ་ཚིགས་སུ་བཅད་དེ་སྨྲས་པ། དེ་ནས་ལྷའི་བུ་རྫུ་འཕྲུལ་ཆེ་རྣམས་ཀྱིས། །པད་མ་རྒྱས་པ་ཡངས་པའི་སྤྱན་ལ་སྨྲས། །དུར་ཁྲོད་དབུས་
འདིར་བཞུགས་པར་གྱུར་ལགས་ན། །ཁྱོད་ནི་ཇི་ལྟར་དགྱེས་པ་སྐྱེ་བར་འགྱུར། །ལྷ་ཡི་དབང་ཕྱུག་རྣམས་ཀྱིས་དེ་བསྐུལ་ནས། །ཡུད་ཙམ་བཙུན་མོའི་འཁོར་ལ་ལྟ་ཞིང་རྟོག །བལྟས་ནས་སྨད་པར་གྱུར་པ་དེ་དག་མཐོང་། །དུར་ཁྲོད་གནས་པར་གྱུར་པ་བདེན་སྙམ་བྱེད། །བྱང་ཆུབ་སེམས་དཔས་ཐམས་ཅད་དང་ལྡན་པའི་བུད་མེད་ཀྱི་ཚོགས་ལ་རྣམ་པར་བལྟས་པ་དང་། ཁ་ཅིག་ནི་གོས་ལྷུང་བར་གྱུར། ཁ་ཅིག་ནི་སྐྲ་ཞིག །ཁ་ཅིག་ནི་རྒྱན་བྲུལ། ཁ་ཅིག་ནི་ཅོད་པན་ལྷུང་། ཁ་ཅིག་ནི་ཕྲག་པ་མི་སྡུག་པར་གྱུར། ཁ་ཅིག་ནི་ལུས་རྣམ་པར་འཁྲུགས། ཁ་ཅིག་ནི་བཞིན་མི་སྡུག་པར་གནས། ཁ་ཅིག་ནི་མིག་གྱུར། ཁ་ཅིག་ནི་ཁ་ཆུ་ཟག །ཁ་ཅིག་ནི་སྔུར། ཁ་ཅིག་ནི་ལུད་པ་ལུ། ཁ་ཅིག་ནི་རྒོད། ཁ་ཅིག་ནི་བརྡོལ། ཁ་ཅིག་ནི་སོ་འཁྲིག །ཁ་ཅིག་ནི་བཞིན་མདོག་གྱུར། ཁ་ཅིག་ནི་གཟུགས་མི་སྡུག་པར་གྱུར་ཏེ། ལག་པ་རིང་པོར་གྱུར། ཁ་ཅིག་ནི་རྐང་པ་ཕྲལ། ཁ་ཅིག་ནི་མགོ་ཕྱུང་། ཁ་ཅིག་ནི་མགོ་གཡོགས། ཁ་ཅིག་ནི་བཞིན་གྱི་དབྱིབས་གྱུར། ཁ་ཅིག་ནི་ལུས་མ་རུངས་པར་གྱུར། ཁ་ཅིག་ནི་ལུས་སྒྲེན་མོར་གྱུར། ཁ་ཅིག་ནི་ལུས་བསྐུམས་ཤིང་སྔུར། ཁ་ཅིག་ནི་རྫ་རྔ་ལ་འཁྱུད་ནས་ལུས་གན་རྐྱལ་དུ་འགྱེལ། ཁ་ཅིག་ནི་པི་བང་དང་རྒྱུད་གསུམ་པའི་སྟེང་དུ་ལག་པ་བརྐྱང་། ཁ་ཅིག་ནི་གླིང་བུ་ལ་སོས་འདེབས། ཁ་ཅིག་ནི་རོལ་མོའི་ཆ་བྱད་ཀིམ་པ་ལ་དང་། ན་ཀུ་ལ་དང་། ཁར་བའི་སིལ་ཁྲོལ་དང་། ཕེག་ལ་འཛིན། ཁ་ཅིག་ནི་མིག་འཛུམས་ཤིང་འབྱེད་ལ་འགྱུར། ཁ་ཅིག་ནི་ཁ་གདངས་པར་གྱུར་ཏེ། དེ་ལྟར་ས་ལ་མི་སྡུག་པར་གནས་པར་གྱུར་པའི་བཙུན་མོའི་འཁོར་ལ་ལྟ་ཞིང་བྱང་ཆུབ་སེམས་དཔའ་དུར་ཁྲོད་ཀྱི་འདུ་ཤེས་སྐྱེད་དོ། །དེ་ལ་འདི་སྐད་ཅེས་བྱ་སྟེ། འཇིག་རྟེན་མགོན་དེས་དེ་མཐོང་ཡིད་བྱུང་སྟེ། །སྙིང་རྗེས་ཤུགས་ཕྱུང་ནས་ནི་འདི་སྐད་སྨྲས། །ཨེ་མ་སྐྱེ་དགུ་དག་ནི་སྡུག་བསྔལ་གྱུར། །སྲིན་མོའི་ཚོགས་ལ་དགའ་བ་ཇི་ལྟར་རྙེད། །འདོད་པའི་ཡོན་ཏན་ཡོད་མིན་ཡོན་ཏན་འཛིན། །གཏི་མུག་མུན་པས་རབ་བསྒྲིབས་བློ་གྲོས་ངན། །དཔེར་ན་བྱ་ནི་བྱ་རྒྱར་ཆུད་པ་བཞིན། །ནམ་ཡང་འབྱུང་བ་རྙེད་པར་འགྱུར་མ་ཡིན།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་པ།
དེ་ནས་བྱང་ཆུབ་སེམས་དཔས་ཆོས་སྣང་བའི་སྒོ་འདིས་ཡང་བཙུན་མོའི་འཁོར་ལ་རྟོག་ཅིང་སྙིང་རྗེ་ཆེན་པོའི་སྨྲེ་བས་སེམས་ཅན་གྱི་ཕྱིར་སྨྲེ་སྟེ། འདི་ན་བྱིས་པ་དེ་དག་ནི་གསོད་པ་སྟེ། བསད་པའི་གནས་སུ་གསད་པར་བྱ་བ་གསོད་པ་དང་མཚུངས་སོ། །འདི་ན་བྱིས་པ་དེ་དག་ནི་ཆགས་པ་སྟེ། ངན་སྐྱུགས་ཀྱིས་གང་བའི་སྣོད་རི་མོ་ཅན་རྣམས་ལ་མི་མཁས་པ་ཆགས་པ་དང་མཚུངས་སོ། །འདི་ན་བྱིས་པ་དེ་དག་ནི་འབྱིང་བ་སྟེ། གླང་པོ་ཆེ་ཆུར་བྱིང་བ་དང་མཚུངས་སོ། །འདི་ན་བྱིས་པ་དེ་དག་ནི་བཙས་པ་སྟེ། བཙོན་རའི་ནང་གི་བཙོན་བཙས་པ་དང་མཚུངས་སོ། །འདི་ན་བྱིས་པ་དེ་དག་ནི་མངོན་པར་དགའ་བ་སྟེ། ཕག་མི་གཙང་བ་ལ་དགའ་བ་དང་མཚུངས་སོ། །འདི་ན་བྱིས་པ་དེ་དག་ནི་ཆགས་པ་སྟེ། ཁྱི་ཀེང་རུས་ལ་ཆགས་པ་དང་མཚུངས་སོ། །འདི་ན་བྱིས་པ་དེ་དག་ནི་རབ་ཏུ་ལྷུང་བ་སྟེ། ཕྱེ་མ་ལེབ་མར་མེའི་མེ་ལྕེར་ལྷུང་བ་དང་མཚུངས་སོ། །འདི་ན་བྱིས་པ་དེ་དག་ནི་ཐོགས་པ་སྟེ། སྤྲེའུ་རྙོང་ལ་ཐོགས་པ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་བཟུང་བ་སྟེ། ཉ་རྒྱས་ཟིན་པ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་གཏུབས་པ་སྟེ། ཤ་འཚོང་གི་གནས་ཀྱི་ལུག་དང་མཚུངས་སོ། །འདི་ན་བྱིས་པ་དེ་དག་ནི་བཙུགས་པ་སྟེ་སྡིག་པ་བྱེད་པ་གསལ་ཤིང་གི་རྩེ་མོ་ལ་བཙུགས་པ་དང་མཚུངས་སོ། །འདི་ན་བྱིས་པ་དེ་དག་ནི་འདམ་དུ་འབྱིང་ཞིང་ཐོགས་པ་སྟེ། གླང་པོ་ཆེ་རྒན་པོ་འདམ་དུ་སོང་བ་དང་མཚུངས་སོ། །འདི་ན་བྱིས་པ་དེ་དག་ནི་ཕོངས་པ་སྟེ། རྒྱ་མཚོ་ཆེན་པོར་གྲུའི་སྣམ་བུ་ཞིག་པ་དང་མཚུངས་སོ། །འདི་ན་བྱིས་པ་དེ་དག་ནི་རབ་ཏུ་ལྷུང་བ་སྟེ། དམུས་ལོང་གཡང་ས་ཆེན་པོར་ལྷུང་བ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་ཟད་པར་འགྱུར་བ་སྟེ། སའི་སྟེང་གི་མཚམས་སུ་སོང་བའི་ཆུ་དང་མཚུངས་སོ། །འདི་ན་བྱིས་པ་དེ་དག་ནི་དུ་བ་འཐུལ་བ་སྟེ། བསྐལ་པ་ཟད་པའི་ས་ཆེན་པོ་དང་མཚུངས་སོ། །འདི་ན་བྱིས་པ་དེ་དག་ནི་འཁོར་བ་སྟེ། རྫ་མཁན་གྱི་འཁོར་ལོའི་ཤུགས་དང་མཚུངས་སོ། །འདི་ན་བྱིས་པ་དེ་དག་ནི་འབྲོག་རྩོལ་བ་སྟེ། དམུས་ལོང་རི་ལ་ཕྱིན་པ་དང་མཚུངས་སོ། །འདི་ན་བྱིས་པ་དེ་དག་ནི་བཏགས་ཤིང་འཁོར་བ་སྟེ། ཁྱི་ལྟོང་གིས་བཏགས་པ་དང་མཚུངས་
སོ། །འདི་ན་བྱིས་པ་དེ་དག་ནི་རྙིས་པ་སྟེ། དཔྱིད་ཀྱི་རྩྭ་དང་ནགས་ཚལ་དང་མཚུངས་སོ། །འདི་ན་བྱིས་པ་དེ་དག་ནི་ཡོངས་སུ་ཉམས་པ་སྟེ།ཟླ་བ་མར་གྱི་ངོའི་ཟླ་བ་དང་མཚུངས་སོ། །འདི་དག་ནི་བྱིས་པ་རྣམས་ལ་ཟ་བ་སྟེ། ཀླུ་ལ་ནམ་མཁའ་ལྡིང་དང་མཚུངས་སོ། །འདི་དག་ནི་བྱིས་པ་རྣམས་ལ་འཆའ་བ་སྟེ། གྲུ་བོ་ཆེ་ལ་ཆུ་སྲིན་ཆེན་པོ་དང་མཚུངས་སོ། །འདི་དག་ནི་བྱིས་པ་རྣམས་ལ་འཇོམས་པ་སྟེ། འདྲོན་པོ་ལ་ཆོམ་པོ་མང་པོ་དང་མཚུངས་སོ། །འདི་དག་ནི་བྱིས་པ་རྣམས་ལ་འཇིག་པ་སྟེ། ཤིང་སཱ་ལ་ལ་རླུང་མར་ཆེན་པོ་དང་མཚུངས་སོ། །འདི་དག་ནི་བྱིས་པ་རྣམས་ལ་གསོད་པ་སྟེ། སྐྱེ་བོ་ལ་སྦྲུལ་མིག་གདུག་པ་དང་མཚུངས་སོ། །བྱིས་པ་རྣམས་ནི་རོ་མྱང་བའི་འདུ་ཤེས་ཀྱིས་ཆོད་པ་སྟེ། རལ་གྲིའི་སོ་སྦྲང་རྩིས་བསྐུས་པས་ཆོད་པ་བཞིན་ནོ། །འདི་དག་ནི་བྱིས་པ་རྣམས་ཁྱེར་བ་སྟེ། ཤིང་གི་ཕུང་པོ་ཆུ་བོའི་ཆུས་ཁྱེར་བ་དང་མཚུངས་སོ། །འདི་དག་ནི་བྱིས་པ་རྣམས་ལ་རྩེད་པ་སྟེ། བྱིས་པ་ཆུང་ངུ་རང་གི་གཅིན་རྟུག་ལ་རྩེ་བ་དང་མཚུངས་སོ། །འདི་དག་ནི་བྱིས་པ་རྣམས་ཀུན་ཏུ་སྒྱུར་བ་སྟེ། གླང་པོ་ཆེ་ལ་ལྕགས་ཀྱུ་དང་མཚུངས་སོ། །འདི་དག་ནི་བྱིས་པ་རྣམས་ལ་སླུ་བ་སྟེ། གཡོན་ཅན་གྱིས་བྱིས་པའི་རང་བཞིན་ཅན་དག་བྲིད་པ་བཞིན་ནོ། །འདི་དག་ནི་བྱིས་པ་དེ་དག་གི་དགེ་བའི་རྩ་བ་ཟད་པར་བྱེད་པ་སྟེ། རྒྱན་པོ་ལ་དགའ་བའི་ནོར་དང་མཚུངས་སོ། །འདི་དག་གིས་བྱིས་པ་རྣམས་འཆོས་པ་སྟེ། སྲིན་མོ་རྣམས་ཀྱིས་ཚོང་པ་འཆོས་པ་དང་མཚུངས་སོ། །བྱང་ཆུབ་སེམས་དཔས་རྣམ་པ་སུམ་ཅུ་རྩ་གཉིས་པོ་འདི་དག་གིས་བཙུན་མོའི་འཁོར་ལ་ཡོངས་སུ་བརྟག་པ་བྱས་ནས། ལུས་ལ་མི་གཙང་བའི་འདུ་ཤེས་རྣམ་པར་སྒོམ། མི་འཐུན་པའི་འདུ་ཤེས་ཉེ་བར་སྒྲུབ། སྨད་པའི་འདུ་ཤེས་སྐྱེད། རང་གི་ལུས་ལ་ཡང་དེ་དང་འདྲ་བར་རྣམ་པར་སྒོམ། ལུས་ཀྱི་ཉེས་དམིགས་ཡང་དག་པར་མཐོང་། ལུས་ལ་ལུས་སུ་མངོན་པར་ཞེན་པ་ལས་སྐྱོད། སྡུག་པའི་འདུ་ཤེས་རྣམ་པར་འཇིག །མི་སྡུག་པའི་འདུ་ཤེས་འཇུག་པར་བྱེད། འོག་གི་རྐང་པའི་མཐིལ་ནས་སྟེང་གི་ཀླད་པ་མན་ཆད་མི་གཙང་བ་ལས་བྱུང་བ་དང་། མི་གཙང་བ་ལས་གྱུར་པ་དང་། རྟག་ཏུ་མི་གཙང་བ་ཟག་པར་མཐོང་ངོ་། །དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ལུས་ཀྱི་ཞིང་ལས་
སྐྱེས་ཤིང་སྲེད་པའི་ཆུ་ལས་བྱུང་བ་འཇིག་ཚོགས་མིང་དུ་བཏགས། །མཆི་མ་རྔུལ་དང་མཆིལ་མས་བརླན་ལ་གཅིན་གྱིས་བསྒྱུར་ཅིང་ཁྲག་གི་ཐིགས་པས་གང་། །ཞག་དང་རྣག་དང་ལྒང་བ་དང་ནི་ཀླད་རྒྱས་དག་དང་སྡིག་པ་རྣམས་ཀྱིས་གང་། །རྟག་ཏུ་ངན་སྐྱུགས་ཟག་ཅིང་ཀུན་ཀྱང་དྲི་མ་རྣམ་པ་སྣ་ཚོགས་ཐ་དད་པ། །་པགས་པ་སོ་དང་སྐྲ་དང་སྤུ་ཡིས་བསྒྱུར་ཅིང་པགས་པས་གཡོགས་ལ་སྤུ་དང་ལྡན། །རྒྱུ་མ་མཆིན་པ་མཚེར་པ་ཆུ་སེར་ཁ་ཆུ་འདི་དག་བསགས་པ་ཉམ་ཆུང་བ། །རྐང་དང་ཆུ་རྒྱུས་དག་གིས་སྦྲེལ་ཏེ་འཁྲུལ་འཁོར་འདྲ་ཞིང་ཤ་ཡིས་མཛེས་པར་བྱས། །སྣ་ཚོགས་ནད་ཀྱིས་གང་ཞིང་མྱ་ངན་ཁྱབ་ལ་བཀྲེས་དང་སྐོམ་པས་ཀུན་ཏུ་ཉེན། །སྐྱེ་བ་པོ་དག་ལུས་ནི་བུ་ག་མང་ཞིང་འཆི་དང་རྒ་བའི་གནས་གྱུར་པ། །མཐོང་ནས་མཁས་པ་སུ་ཞིག་རང་གི་ལུས་ལ་དགྲ་དང་མཚུངས་པར་སེམས་མི་འགྱུར། །དེ་ལྟར་བྱང་ཆུབ་སེམས་དཔའ་ལུས་ལ་ལུས་སུ་སོང་བའི་དྲན་པས་གནས་པར་གྱུར་ཏོ། །ནམ་མཁའི་དཀྱིལ་ན་འཁོད་པའི་ལྷའི་བུ་རྣམས་ཀྱིས་ལྷའི་བུ་ཆོས་སྤྱོད་ལ་འདི་སྐད་ཅེས་སྨྲས་སོ། །གྲོགས་པོ་དོན་གྲུབ་འདི་ནི་བཙུན་མོའི་འཁོར་ལ་རྣམ་པར་ལྟ་ཞིང་འཛུམ་ཡང་སྟོན། །སེམས་ནི་མི་དགའ་མིག་ནི་ཕྱིར་ཞིང་ལྟ་ན་ཕྱི་ཤོལ་བྱེད་དམ་ཅི། །ཡང་ན་འདི་ནི་རྒྱ་མཚོའི་ཟབས་དང་མཚུངས་ཏེ་འདི་ཚད་གཟུང་བར་མི་ནུས་སོ། །ཡང་ན་ཆགས་པ་མེད་པ་འདི་ཡུལ་རྣམས་ལ་ཡིད་ཆགས་པར་ནི་མི་འགྱུར་གྲང་། །ལྷ་རྣམས་ཀྱིས་བསྐུལ་བ་ཡི་ཡི་དམ་བརྗེད་པར་མ་གྱུར་གྲང་། །ལྷའི་བུ་ཆོས་སྤྱོད་ཀྱིས་སྨྲས་པ། དེ་སྐད་སྨྲ་ཅི་དགོས། འདི་སྔོན་བྱང་ཆུབ་ཀྱི་ཕྱིར་སྤྱོད་པ་ན་ཡང་མངོན་པར་འབྱུང་བ་དང་། གཏོང་བ་ལ་རྣམ་པ་དེ་ལྟ་བུར་ཆགས་པ་མེད་པར་གྱུར་པ་དེ་ཁྱེད་ལ་མངོན་སུམ་དུ་གྱུར་པ་ཡིན་ན། ད་སྲིད་པ་ཐ་མ་པ་ལ་གནས་པ་ཆགས་པར་མི་འགྱུར་བ་ལྟ་སྨོས་ཀྱང་ཅི་དགོས། དགེ་སློང་དག་དེ་ནས་བྱང་ཆུབ་སེམས་དཔའ་ངེས་པར་བྱས་པ། ཡིད་བྱུང་བར་གྱུར་པ། བློ་བརྟུལ་བ། ཚུལ་དུ་ཤིས་ཤིང་རིངས་ཐབས་མེད་པར་སྐྱིལ་མོ་ཀྲུང་བཤིག་སྟེ། གླུ་དབྱངས་ལེན་པའི་ཁང་བཟངས་ན་ཤར་ཕྱོགས་སུ་ལྟ་ཞིང་འདུག་ནས་ལག་པ་གཡས་པས་རིན་པོ་ཆེའི་དྲ་བ་སྨད་དེ་ཁང་བཟངས་
ཀྱི་སྟེང་དུ་སོང་ནས་སོར་མོ་བཅུ་ཐལ་མོ་སྦྱར་ཏེ། སངས་རྒྱས་ཐམས་ཅད་བསམས་ནས་སངས་རྒྱས་ཐམས་ཅད་ལ་ཕྱག་འཚལ་ཏེ། ནམ་མཁའི་དཀྱིལ་དུ་བལྟས་པ་དང་དེས་མཐོང་བ། ནམ་མཁའི་དཀྱིལ་ན་ལྷའི་དབང་པོ་མིག་སྟོང་དང་ལྡན་པ་ལྷ་བརྒྱ་སྟོང་གིས་བསྐོར་ཅིང་། མེ་ཏོག་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་དང་། མེ་ཏོག་གི་རྣ་རྒྱན་དང་། རིན་པོ་ཆེའི་དོ་ཤལ་གྱི་ཆུན་པོ་ཐོགས་ཏེ། ལུས་བཏུད་ནས་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་པ་མཐོང་ངོ་། །འཇིག་རྟེན་སྐྱོང་བ་བཞི་ཡང་གནོད་སྦྱིན་དང་། སྲིན་པོ་དང་། དྲི་ཟ་དང་། ཀླུའི་ཚོགས་ཀྱིས་བསྐོར་ཅིང་གོ་ཆ་སྲ་བ་བགོས།ཡ་ལད་བགོས་ཏེ། རལ་གྲི་དང་། མདའ་གཞུ་དང་། མདུང་ཐུང་དང་། མཚོན་རྩེ་གཉིས་པ་དང་། རྩེ་གསུམ་པ་ལག་ན་ཐོགས་ཤིང་ཚུལ་དུ་ཤིས་པར་ནོར་བུའི་ཅོད་པན་དང་། གཙུག་ཕུད་འཕྱང་བར་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་པ་མཐོང་ངོ་། །ལྷའི་བུ་ཉི་མ་དང་ཟླ་བ་གཉིས་ཀྱང་གློ་གཡས་གཡོས་ན་འདུག་པར་མཐོང་ངོ་། །སྐར་མའི་བདག་པོ་རྒྱལ་ཡང་ནམ་ཕྱེད་ན་ཤར་བར་མཐོང་ངོ་། །མཐོང་ནས་ཀྱང་བྱང་ཆུབ་སེམས་དཔས་འདུན་པ་ལ་སྨྲས་པ། ང་ཡི་བཀྲ་ཤིས་འདི་ནི་དོན་ཀུན་གྲུབ། །དོ་མོད་གདོན་མི་ཟ་བར་དོན་གྲུབ་ཀྱིས། །འདུན་པ་ཕྱི་ཤོལ་མ་བྱེད་ལ་གོར་དུ། །རྟ་རྒྱལ་རྒྱན་གྱིས་བརྒྱན་པའང་ང་ལ་བྱིན། །དེ་ནས་འདུན་པས་ཚིག་དེ་ཐོས་ནས། ཡིད་མི་དགའ་ཞིང་འདི་སྐད་ཅེས་སྨྲས་སོ། །སྨིན་མ་རིང་ཞིང་པད་མའི་འདབ་མ་རྒྱས་འདྲའི་སྤྱན་མངའ་མི་ཡི་སེང་གེ་སྟོན་ཀའི་ཟླ་བ་ཉ་བ་ལྟ་བུ་དང་། །མེ་ཏོག་ཀུ་མུ་ད་དང་ཟླ་བ་དང་ནི་དགའ་བའི་པད་མའི་རྫིང་བུ་སར་པར་འཇམ་པའི་པད་མ་རྒྱས་འདྲའི་ཞལ། །སྦྱངས་པའི་གསེར་དང་ཉི་མ་ཤར་མ་ཐག་དང་ཟླ་བ་དྲི་མེད་གཟི་དང་མར་བླུགས་མེ་ཡི་འོད་འཕྲོ་ནོར་བུ་གློག་འོད་འབར་བའི་གཟི་བརྗིད་ཅན། །གླང་པོ་རྒྱགས་པ་འགྱིང་བའི་གླང་པོའི་སྟོབས་ཅན་བ་ལང་ཁྱུ་མཆོག་རི་དགས་རྒྱལ་དང་ངང་པའི་སྟབས་ཅན་སྟབས་མཛེས་ཤིན་ཏུ་ཞབས་ལེགས་གང་དུ་བཞུད། །བྱང་ཆུབ་སེམས་དཔས་སྨྲས་པ། འདུན་པ་གང་གི་དོན་དུ་ང་ཡིས་སྔོན་ཆད་ལག་པ་རྐང་པ་མིག་དང་
དེ་བཞིན་མགོ་དང་ལུས་བཏང་ཞིང་། །ཆུང་མ་དང་ནི་ཕངས་པའི་རྒྱལ་སྲིད་ནོར་གསེར་གོས་དང་རིན་ཆེན་གང་བའི་ཤིང་རྟ་གླང་པོ་རླུང་མགྱོགས་ཤུགས་ལྡན་རྟ་ཕོ་རྩལ་མཆོག་ལྡན་པ་བཏང་། །བསྐལ་པ་བྱེ་བ་ཁྲག་ཁྲིག་མང་ནས་ཚུལ་ཁྲིམས་ངས་བསྲུངས་བཟོད་པ་ཡོངས་བསྒོམས་བརྩོན་འགྲུས་སྟོབས་དང་བསམ་གཏན་ཤེས་རབ་དག །དེ་ལྟ་མོད་ཀྱི་བྱང་ཆུབ་ཞི་བ་ཤིས་པ་ཐོབ་ནས་རྒ་ཤིའི་རྒྱ་མོར་ཆུད་པའི་སེམས་ཅན་ང་ཡིས་ཡོངས་སུ་དགྲོལ་བའི་དུས་ལ་བབ། །འདུན་པས་སྨྲས་པ། ཇོ་ཇོ་ཁྱོད་བལྟམ་མ་ཐག་ཏུ་བལྟ་བའི་ཕྱིར་བྲམ་ཟེ་ལྟས་མཁན་རྣམས་ལ་བསྟན་ན། དེ་དག་གིས་ཁྱོད་རྒྱལ་པོ་ཟས་གཙང་མའི་སྤྱན་སྔར་ལྷ་ཁྱོད་ཀྱི་རྒྱལ་པོའི་ཕོ་བྲང་འཕེལ་བར་འགྱུར་རོ་ཞེས་ལུང་བསྟན་ཅེས་བདག་གིས་ཐོས་སོ། །སྨྲས་པ། ཇི་ལྟ་བུར་འགྱུར། སྨྲས་པ་གཞོན་ནུ་འདི་ནི་བསོད་ནམས་བརྒྱ་མཚན་ལྡན། །ཁྱོད་ཀྱི་བུ་བཙས་བསོད་ནམས་གཟི་བརྗིད་ཅན། །དེ་ནི་གླིང་བཞིའི་དབང་ཕྱུག་འཁོར་ལོས་སྒྱུར། །ནོར་བདུན་དང་ནི་རབ་ཏུ་ལྡན་པར་འགྱུར། །གལ་ཏེ་འཇིག་རྟེན་སྡུག་བསྔལ་བལྟས་ནས་ནི། །བཙུན་མོའི་འཁོར་སྤངས་མངོན་པར་བྱུང་འགྱུར་ན། །བྱང་ཆུབ་རྒ་ཤི་མེད་པའི་གནས་ཐོབ་སྟེ། །ཆོས་ཀྱི་ཆུ་ཡིས་སྐྱེ་དགུ་འདི་ཚིམ་བྱེད། །ཇོ་ཇོ་ལུང་བསྟན་པ་འདི་ནི་མཆིས་ཏེ། འདི་མ་མཆིས་པ་ནི་མ་ལགས་མོད་ཀྱི་འོན་ཀྱང་ཕན་པར་འཚལ་བ་བདག་གི་ཚིག་གསན་པར་གསོལ། སྨྲས་པ། ཅི་ཞིག །སྨྲས་པ། ལྷ་ཅིག་གང་གི་དོན་དུ་འདི་ན་ཁ་ཅིག་བརྟུལ་ཞུགས་དང་དཀའ་ཐུབ་རྣམ་པ་དུ་མ་རྩོམ་སྟེ། རི་དགས་ཀྱི་པགས་པ་དང་། རལ་པའི་ཐོར་ཚུགས་དང་། རྩྭ་དང་ཤིང་ཤུན་གྱོན་པ་དང་། སེན་མོ་དང་། སྐྲ་དང་། ཨག་ཙོམ་རིང་པོར་འཇོག་པ་དང་། ལུས་ལ་གདུང་བ་དང་། ཡོངས་སུ་གདུང་བ་རྣམ་པ་དུ་མ་སྤྲོ་བར་བགྱིད་དེ། བདག་ཅག་ཇི་ལྟར་ལྷ་དང་མིའི་ཕུན་སུམ་ཚོགས་པ་འཐོབ་པར་འགྱུར་ཞེས་བརྟུལ་ཞུགས་དང་དཀའ་ཐུབ་དྲག་པོ་རྩོམ་མོ། །ཇོ་ཇོ་ཕུན་སུམ་ཚོགས་པ་དེ་ནི་ཁྱོད་ཀྱིས་བརྙེས་ལགས་ཏེ། རྒྱལ་སྲིད་འབྱོར་ཅིང་རྒྱས་ལ་བདེ་ཞིང་ལོ་ལེགས་ཏེ། ཉམས་དགའ་ཞིང་མི་དང་སྐྱེ་བོ་མང་པོས་གང་བ་འདི་
དང་། སྐྱེད་མོས་ཚལ་དམ་པ་མཆོག་མེ་ཏོག་དང་འབྲས་བུ་རྣམ་པ་སྣ་ཚོགས་ཀྱིས་བརྒྱན་པ། བྱའི་ཚོགས་སྣ་ཚོགས་སྒྲ་སྐད་ཡིད་དུ་འོང་བ་འབྱིན་པ་འདི་དག་དང་། རྫིང་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོས་མཛེས་པར་གྱུར་པ། ངང་པ་དང་། རྨ་བྱ་དང་། ཁུ་བྱུག་དང་། ངུར་པ་དང་། ཁྲུང་ཁྲུང་དང་། ངང་སྐྱ་སྒྲ་སྐད་འབྱིན་པ། ཤིང་ཨ་མྲ་དང་། མྱ་ངན་འཚང་དང་། ཙམ་པ་ཀ་དང་། ཀུ་ར་བ་ཀ་དང་། ཀེ་ས་ར་ལ་སོགས་པ་ཤིང་མེ་ཏོག་ཆགས་པ་སྣ་ཚོགས་ཀྱིས་འགྲམ་འཁོར་བ། རིན་པོ་ཆེའི་ཤིང་སྣ་ཚོགས་ཀྱི་ཕྲེང་གིས་ལེགས་པར་བརྒྱན་པ། མིག་མངས་རིས་སུ་བཀོད་པ། རིན་པོ་ཆེ་སྣ་ཚོགས་ཀྱི་སྟེགས་བུས་བསྐོར་བ། རིན་པོ་ཆེའི་དྲ་བ་བྲེས་པ། དུས་ཇི་ལྟ་བ་བཞིན་དུ་ཡོངས་སུ་སྤྱད་པ། དགུན་དང་། དབྱར་དང་། སྟོན་དང་། དཔྱིད་གནས་བདེ་བ་རྣམས་དང་། ཁང་བཟངས་ཆེན་པོ་ཆོས་དང་ཆོས་བཟང་དང་། བདེ་བ་དང་། མྱ་ངན་བྲལ་བ་ལ་སོགས་པ་རྣམ་པར་རྒྱལ་བའི་ཁང་པ་ལྟ་བུ་སྟོན་ཀའི་སྤྲིན་འདྲ་བ། གངས་ཏི་སེ་ལྟ་བུ་སྟེགས་བུ་དང་། སྒོ་གང་དང་། རྟ་བབས་དང་། སྐར་ཁུང་དང་། བསིལ་ཁང་དང་། ཁང་པ་བརྩེགས་པ་དང་། ཁྱམས་ཀྱིས་ལེགས་པར་བརྒྱན་པ། རིན་པོ་ཆེའི་དྲིལ་བུ་གཡེར་ཀའི་དྲ་བ་སྒྲ་འབྱུང་བ་འདི་དག་དང་། བཙུན་མོའི་འཁོར་དང་རོལ་མོའི་ཆ་བྱད་རྒྱུད་གཅིག་པ་དང་། པི་བང་དང་། ཁར་རྔ་དང་། གླིང་བུ་དང་། ཁར་བའི་སིལ་ཁྲོལ་དང་། ཕེག་དང་། ཀིམ་པ་ལ་དང་། ན་ཀུ་ལ་དང་། སྒྲ་སྙན་དང་། རྫ་རྔ་དང་། པ་ཊ་ཧ་དང་། གླུ་དང་། གར་དང་། རོལ་མོའི་དབྱངས་སྒྲ་དང་། གླུ་དབྱངས་སྦྱར་བ་ལེགས་པར་བསླབས་པ་དགོད་པ་དང་། འཇོ་བ་དང་། རྩེ་བ་དང་། དགའ་བ་དང་། ཚུལ་དུ་ཤིས་པ་དང་། སྤྱོད་པ་མཛེས་པ་འདི་དང་ནི་ལྡན་ལ། ལྷ་ཁྱོད་ཀྱང་དར་ནི་མ་ཡོལ་ཏེ། གཞོན་པ་ཐོར་བུ་དར་ལ་བབ་པ། ལུས་འཇམ་པ། ལང་ཚོ་ལ་བབ་པ། དབུ་སྐྲ་གནག་པ། འདོད་པ་ལ་མ་རོལ་བ་ལགས་ཀྱིས། སུམ་ཅུ་རྩ་གསུམ་པའི་བདག་པོ་མིག་སྟོང་དང་ལྡན་པ་ལྷའི་བདག་པོ་ལྟ་བུར་རེ་ཤིག་དགྱེས་པར་རོལ་ལ། སླད་ཀྱིས་བགྲེས་ནས་མངོན་པར་འབྱུང་བར་མཛོད་
ཅིག །དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། །སུམ་ཅུ་རྩ་གསུམ་འཇིག་རྟེན་ལྷ་དབང་ལྟར། །དགྱེས་པའི་ཆོ་ག་མཁྱེན་པ་དགྱེས་པར་རོལ། །སླད་ཀྱིས་བགྲེས་པར་གྱུར་ནས་བརྟུལ་ཞུགས་དང་། །དཀའ་ཐུབ་དག་ནི་ཡང་དག་བརྩམ་པར་མཛོད། །བྱང་ཆུབ་སེམས་དཔས་སྨྲས་པ། འདུན་པ་མི་དགོས་ཏེ། འདོད་པ་འདི་དག་ནི་མི་རྟག་པ། མི་བརྟན་པ། ཐེར་ཟུག་མ་ཡིན་པ། འགྱུར་བའི་ཆོས་ཅན། མྱུར་དུ་འགྲོ་བ། གཡོ་བ། རི་གཟར་པོའི་ཆུའི་ཤུགས་དང་འདྲ་བ། ཟིལ་པའི་ཐིགས་པ་ལྟར་རིང་དུ་མི་གནས་པ། ལག་པ་བཅངས་པ་སྟོངས་པས་བྱིས་པ་བྲིད་པ་ལྟར་སྙིང་པོ་མེད་པ། ཆུ་ཤིང་གི་སྙིང་པོ་ལྟར་མཐུ་མེད་པ། སྣོད་སོ་མ་བཏང་བ་ལྟར་མཐར་འཇིག་པ། སྟོན་ཀའི་སྤྲིན་ལྟར་སྐད་ཅིག་བྱུང་ནས་མེད་པར་འགྱུར་བ། ནམ་མཁའི་གློག་ལྟར་རིང་དུ་མི་གནས་པ། དུག་དང་བཅས་པའི་སྣོད་ལྟར་འགྱུར་བའི་སྡུག་བསྔལ་ཅན། འཁྲི་ཤིང་མ་ལུ་ཏ་ལྟར་མི་བདེ་བ་འབྱིན་པ། བྱིས་པའི་བློ་ཅན་རྣམས་ཀྱིས་འདོད་པར་བྱ་བ། ཆུའི་ཆུ་བུར་ལྟ་བུར་མྱུར་དུ་འགྱུར་བའི་ཆོས་ཅན། སྨིག་རྒྱུ་ལྟར་འདུ་ཤེས་ཕྱིན་ཅི་ལོག་ལས་བྱུང་བ། སྒྱུ་མ་ལྟར་སེམས་ཕྱིན་ཅི་ལོག་གིས་རྣམ་པར་བསྒྲུབས་པ། རྨི་ལམ་ལྟར་ལྟ་བ་ཕྱིན་ཅི་ལོག་གིས་ཡོངས་སུ་ཟིན་པ། རྒྱ་མཚོ་དགང་དཀའ་བ་ལྟར་ངོམས་མི་ཤེས་པར་བྱེད་པ། ཚྭ་ཆུ་ལྟར་སྐོམ་པར་བྱེད་པ། སྦྲུལ་གྱི་མགོ་ལྟར་རེག་པར་བྱ་དཀའ་བ། གཡང་ས་ཆེན་པོ་ལྟར་མཁས་པ་རྣམས་ཀྱིས་ཡོངས་སུ་སྤངས་པ། ཤེས་རབ་ཅན་རྣམས་ཀྱིས་འཇིགས་པ་དང་བཅས་པ་དང་། རྩོད་པ་དང་བཅས་པ་དང་། ཉེས་པ་དང་བཅས་པ་དང་། སྐྱོན་དང་བཅས་པར་ཤེས་ནས་རྣམ་པར་སྤངས་པ། རིག་པ་རྣམས་ཀྱིས་སྨད་པ། འཕགས་པ་རྣམས་ཀྱིས་བཤུངས་པ། མཁས་པ་རྣམས་ཀྱིས་མ་བསྔགས་པ། མི་མཁས་པ་རྣམས་ཀྱིས་ཡོངས་སུ་བཟུང་བ། བྱིས་པ་རྣམས་ཀྱིས་བསྟེན་པ་ཡིན་ནོ། །དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། །མཁས་པ་རྣམས་ཀྱིས་སྦྲུལ་གྱི་མགོ་བཞིན་སྤངས། །ངན་སྐྱུགས་སྣོད་བཞིན་མི་གཙང་རྣམ་པར་སྤངས། །འདུན་པ་དགེ་བ་ཐམས་ཅད་
འཇིག་བྱེད་པར། །འདོད་པ་ཤེས་ནས་ང་ནི་དགའ་མི་སྐྱེ། །དེའི་ཚེ་འདུན་པ་ཟུག་རྔུས་ཟུག་པ་བཞིན་དུ་སྐད་ཕྱུང་སྟེ། ངུ་ཞིང་དེ་ནས་མིག་ནས་མཆི་མ་ཟག་ལ། སྡུག་བསྔལ་བཞིན་ཚིག་འདི་སྐད་ཅེས་སྨྲས་སོ། །ལྷ་ཅིག་གང་གི་དོན་དུ་འདི་ན་ཁ་ཅིག་བརྟུལ་ཞུགས་རྣམ་པ་མང་པོ་རྩོམ་སྟེ་རི་དགས་པགས་པ་འཆང་། །སྐྲ་དང་སེན་མོ་ཨག་ཙོམ་རིང་དུ་འཇོག་ཅིང་དེ་བཞིན་ཤིང་ཤུན་གྱོན་ལ་ཡན་ལག་སྐམས་ཤིང་བརྟུལ་ཞུགས་གནས། །སྲེ་ད་དང་ནི་ལྡམ་ལྡུམ་དག་དང་དྲུས་མ་འབྲས་ཟ་ཁ་ཅིག་སྤྱིའུ་ཚུགས་འདུག་དང་བ་ལང་བརྟུལ་ཞུགས་གནས། །ཇི་ལྟར་བདག་ཅག་འགྲོ་བའི་གཙོ་བོ་ཁྱད་འཕགས་འཁོར་ལོས་སྒྱུར་བ་མཆོག་དང་དེ་བཞིན་འཇིག་རྟེན་སྐྱོང་བ་དང་། །བརྒྱ་བྱིན་རྡོ་རྗེ་འཆང་དང་འཐབ་བྲལ་ལྷ་དབང་འཕྲུལ་བར་འགྱུར་སྙམ་ཚངས་པའི་འཇིག་རྟེན་བསམ་གཏན་བདེ་བ་འདོད། །མི་ཡི་དམ་པ་ཁྱོད་ཀྱི་རྒྱལ་སྲིད་འདི་ནི་ཤིན་ཏུ་འབྱོར་ཅིང་རབ་ཏུ་རྒྱས་ལ་ཤིན་ཏུ་ལོ་ལེགས་པ། །དེ་བཞིན་ཀུན་དགའི་ར་བ་དག་དང་སྐྱེད་མོས་ཚལ་དང་ཁང་བཟངས་མཐོན་པོ་རྣམ་པར་རྒྱལ་བའི་ཁང་པ་མཚུངས། །བུད་མེད་འདི་དག་རྣམས་ཀྱང་པི་བང་དང་ནི་གླིང་བུ་དག་དང་གླུ་དང་རོལ་མོའི་དབྱངས་སྒྲ་ལེན་ཅིང་མཆིས། །དགའ་བར་བགྱིད་དང་གར་དང་གླུ་དབྱངས་སྦྱར་བ་ཤིན་ཏུ་བསླབས་པ་འདི་དག་སྤྱོད་ཅིང་དེས་པ་མ་བཞུད་ཅིག །བྱང་ཆུབ་སེམས་དཔས་སྨྲས་པ། འདུན་པ་ཉོན་ཅིག་འདོད་པའི་རྒྱུས་ནི་སྔོན་གྱི་ཚེ་རབས་དག་ན་བཅིངས་དང་བཙས་དང་བརྡེགས་དང་བསྡིགས་པ་སྡུག་བསྔལ་བརྒྱ་དག་ངས་ནི་བཟོད་བྱས་འདུས་བྱས་རྣམས་ལ་ང་ཡིས་ཡིད་བྱུང་བྱས་མ་གྱུར། །སྔོན་ཆད་བག་མེད་དབང་དུ་སོང་ཞིང་གཏི་མུག་དཀྲུགས་ལ་ལྟ་བའི་དྲ་བས་དཀྲིགས་ཤིང་མུན་གྱུར་ཆོས་འདི་མི་ཤེས་པ་ལས་བྱུང་སྟེ་བདག་ཏུ་འདུ་ཤེས་འཛིན་དང་ཚོར་བ་པོ་ལས་འདས། །དངོས་པོ་འདི་དག་ཐམས་ཅད་གཡོ་ཞིང་འགྱུར་ལ་མི་རྟག་སྤྲིན་དང་མཚུངས་ཤིང་གློག་དང་འདྲ་སྟེ་ཟིལ་པའི་ཐིགས་པ་འདྲ་ཞིང་གསོབ་གསོག་སྙིང་པོ་མེད་ལ་བདག་ཡོད་མ་ཡིན་སྟོང་པར་གྱུར་པ་སྟེ། །ང་ཡི་ཡིད་ནི་ཡུལ་ལ་ཆགས་པ་མེད་ཀྱིས་འདུན་པ་རྟ་རྒྱལ་དམ་པ་བསྔགས་ལྡན་ང་བྱིན་ངས་སྔོན་བསམས་པའི་བཀྲ་ཤིས་རྫོགས་ཀྱིས་ཐམས་ཅད་ཟིལ་གནོན་ཆོས་ཀུན་
དབང་ཕྱུག་ཆོས་རྒྱལ་ཐུབ་པར་འགྱུར། །འདུན་པས་སྨྲས་པ། པད་མ་འདབ་མ་རྒྱས་པ་འདྲ་བའི་མིག་ལྡན་ཞིང་། །དོ་ཤལ་ནོར་བུ་རིན་ཆེན་སྣ་ཚོགས་རྣམས་ཀྱིས་བརྒྱན། །མཁའ་ལ་སྤྲིན་ཚོགས་དག་ལས་བྱུང་བའི་གློག་འདྲ་བ། །མལ་ན་རྣམ་པར་མཛེས་པ་འདི་ལ་མི་གཟིགས་སམ། ། པི་ལྡིར་དང་ནི་ཁར་རྔ་དག་དང་སྒྲ་སྙན་དང་། །རྫ་རྔ་དག་དང་གླིང་བུ་གླུ་དབྱངས་ལེན་པ་དང་། །བྱ་བང་རྨ་བྱ་ཀ་ལ་པིང་ཀ་སྒྲ་འབྱིན་པ། །མི་འམ་ཅི་ཡི་ཁྱིམ་འདྲ་འདི་ཡང་དོར་ལགས་སམ། །སུ་མ་ན་དང་ཨུད་པ་ལ་དང་པཱར་ཤི་ཀ །ཙམ་པ་ཀ་དང་དྲི་མཆོག་ཕྲེང་བ་མེ་ཏོག་བརྒྱུས། །དུས་ཀྱི་ཨ་ག་རུ་མཆོག་བདུག་པས་རབ་བདུགས་དང་། །བྱུག་པ་དམ་པ་དེ་དག་ལ་ཡང་མི་གཟིགས་སམ། །ཤིན་ཏུ་དྲི་བདའ་དྲི་ལྡན་རོ་བྲོ་གྱ་ནོམ་དང་། །སྐྱུ་རུམ་དག་དང་བཤོས་གཙང་ཤིན་ཏུ་ལེགས་སྦྱར་དང་། །སྐྱེམས་ཀྱི་རོ་ཡང་ཁ་ར་བཅས་པར་རབ་སྦྱར་བ། །འདི་ལའང་མི་གཟིགས་པར་ནི་ལྷ་ཁྱོད་གང་དུ་བཞུད། །གྲང་བའི་དུས་ན་བྱུག་པ་དྲོ་བ་དམ་པ་དང་། །ཚ་བའི་དུས་ན་ཙན་དན་སྦྲུལ་གྱི་སྙིང་པོ་དང་། །ཀ་ཤི་པ་ཡི་ན་བཟའ་བཟང་པོ་མང་པོ་དང་། །དེ་དག་ལ་ཡང་མི་གཟིགས་ལྷ་ཁྱོད་གང་དུ་བཞུད། །ལྷ་ཡུལ་དག་ན་ལྷ་རྣམས་དག་ནི་ཅི་འདྲ་བར། །འདོད་པའི་ཡོན་ཏན་ལྔ་པོ་འདི་དག་རབ་འབྱོར་པ། །དགའ་ཞིང་བདེ་དང་ལྡན་ལ་དགྱེས་པར་རོལ་མཛོད་དེ། །དེ་ནས་ཤཱཀྱའི་དམ་པ་ནགས་ཚལ་བཞུད་པར་མཛོད། །བྱང་ཆུབ་སེམས་དཔས་སྨྲས་པ། འདུན་པ་ངས་ནི་བསྐལ་པ་མཐའ་ཡས་དཔག་ཏུ་མེད་པར་གཟུགས་དང་སྒྲ་དང་དྲི་དང་རོ་དང་རེག་དང་མི་དང་ལྷ་ཡི་འདོད་པ་རྣམ་པ་སྣ་ཚོགས་སྤྱད་ཀྱང་ངོམས་པར་གྱུར་པ་མེད། །རྒྱལ་པོའི་སྲས་མཆོག་གྱུར་ཏེ་དབང་ཕྱུག་བྱས་ཤིང་གང་ཚེ་གླིང་བཞི་དག་ཏུ་འཁོར་ལོས་སྒྱུར་བའི་རྒྱལ་པོར་གྱུར་ནས་རིན་ཆེན་སྣ་བདུན་ལྡན་ཞིང་བུད་མེད་དག་གི་ནང་ན་འདུག་པ་དང་། །སུམ་ཅུ་རྩ་གསུམ་དབང་དང་འཐབ་བྲལ་རབ་ཀྱི་ལྷ་དབང་བྱས་ཤིང་དེ་དག་ནས་ནི་ཤི་འཕོས་འདིར་འོངས་སྤྲུལ་པའི་ལྷ་ཡི་ནང་ན་ཡིད་འོང་དཔལ་ལྡན་དམ་པ་ང་ཡིས་སྔོན་ཆད་སྤྱད། །ལྷ་ཡི་གནས་སུ་དབང་སྒྱུར་བདུད་ཀྱི་དབང་པོ་བྱས་ཤིང་འདོད་པ་འབྱོར་པ་མཆོག་ལ་སྤྱད་ཀྱང་ངོམས་
མ་གྱུར་ན་ད་ཅི་དམན་པ་འདི་ལ་བསྟེན་པས་ང་ངོམས་འགྱུར་རམ་དེ་ནི་གནས་མིན་ནོ། །གཞན་ཡང་འདུན་པ་ང་ནི་སྡུག་བསྔལ་མྱ་ངན་དགོན་པའི་འཁོར་བར་གནས་པ་ཉོན་མོངས་གདུག་པས་དཀྲུགས་ཤིང་ཉམ་ངས་རྟག་ཏུ་ཁྱེར་ཏེ་མགོན་མེད་སྐྱབས་མེད་ཅིང་། །གཏི་མུག་མ་རིག་མུན་པ་དག་ན་རྒ་དང་ན་དང་འཆི་བའི་འཇིགས་པ་དག་གིས་ཉེན་ལ་སྐྱེ་བའི་སྡུག་བསྔལ་དགྲ་ཡིས་ཀུན་ཏུ་གནོད་ཅིང་རྣམ་པར་གནོད་པའི་འགྲོ་བ་འདི་བལྟས་ནས། །ངས་འདིར་ཆོས་ཀྱི་གྲུ་བཟང་གཏོང་དང་ཚུལ་ཁྲིམས་བརྟུལ་ཞུགས་བཟོད་པ་བརྩོན་འགྲུས་སྟོབས་ཅན་དག་གི་ཤིང་ཚོགས་བསོགས་ཏེ་སྦྱར་ནས་ལྷག་པའི་བསམ་པ་སྙིང་པོ་ལྡན་པ་རྡོ་རྗེ་ལྟ་བུས་བརྟན་པོར་གཟུངས་བཏབ་སྦྱར། །གྲུ་དེར་ང་ཉིད་ཞུགས་ནས་བདག་ཉིད་རྒལ་ཏེ་བདག་གིས་འགྲོ་བ་མཐའ་ཡས་པ་དག་འཁོར་བའི་ཆུ་བོ་འདའ་བར་ཆེ་བ་ཁྲོ་བའི་དབའ་རླབས་ལྡན་པ་འདོད་ཆགས་འཛིན་ཁྲི་གློང་འཁྱིལ་དགྲ་ཡིས་རྣམ་པར་དཀྲུགས་པ་རྒལ་བར་དཀའ་ལས་བསྒྲལ་ལོ་སྙམ་སྟེ་ང་སེམས་དེ་འདྲའོ། །དེ་ཕྱིར་སྲིད་འཚོ་དགྲར་བཅས་ལྟ་བའི་འཛིན་ཁྲི་དང་། །ཉོན་མོངས་སྲིན་པོ་ཡོད་པ་འདི་ལས་བདག་རྒལ་ཏེ། །བདག་ཉིད་རྒལ་བར་གྱུར་ནས་འགྲོ་བ་མཐའ་ཡས་པ། །རྒ་མེད་ཤི་མེད་ཞི་བའི་ཐང་ལ་དགོད་པར་བྱ། །དེའི་ཚེ་འདུན་པ་དེ་བས་ཀྱང་རབ་ཏུ་ངུ་ཞིང་འདི་སྐད་ཅེས་སྨྲས་སོ། །ལྷ་དེ་ལྟར་ངེས་པར་མཛད་དམ། བྱང་ཆུབ་སེམས་དཔས་སྨྲས་པ། འདུན་པ་ང་ཡིས་ངེས་པར་བྱས་པ་ཉོན། །སེམས་ཅན་དགྲོལ་ཕྱིར་ཕན་པར་བྱ་ཕྱིར་བརྩོན། །མི་གཡོ་ལས་ཀྱང་མི་གཡོ་གནོད་པ་མེད། །རི་རྒྱལ་ལྷུན་པོ་ལྟ་བུར་བརྟན་མི་གཡོ། །འདུན་པས་སྨྲས་པ། ཇོ་ཇོའི་ངེས་པ་ཅི་འདྲ་བ་ཞིག་ལགས། བྱང་ཆུབ་སེམས་དཔས་སྨྲས་པ། རྡོ་རྗེའི་གནམ་ལྕགས་དགྲ་སྟ་མདུང་ཐུང་མདའ་ཆར་དང་། །ལྕགས་བསྐོལ་གློག་གི་ཚོགས་ལྟར་རབ་ཏུ་འབར་བ་དང་། །རི་རྩེ་ཀུན་ཏུ་འབར་བ་མགོ་སྟེང་རབ་འབབ་ཀྱང་། །ང་ནི་ཁྱིམ་ལ་འདོད་པའི་ཕྱིར་ཡང་མི་སྐྱེད་དོ། །དེའི་ཚེ་ལྷའི་བུ་ནམ་མཁའ་ལ་འཁོད་པ་དག་གིས་ཅ་ཅོ་དང་ག་ཞའི་སྒྲ་བརྒྱ་སྟོང་ཕྱུང་སྟེ། མེ་ཏོག་གི་ཆར་ཡང་ཕབ་ནས་ཚིགས་སུ་བཅད་པ་འདི་དག་སྨྲས་སོ། །ཡུལ་རྣམས་ལ་
ནི་ཡིད་ཀྱང་མ་ཆགས་ཤིང་། །སེམས་ཅན་དག་པ་སྙིང་རྗེ་སྙིང་བརྩེར་ལྡན། །བློ་གྲོས་མཆོག་ལྡན་རྒྱལ་གྱུར་རྒྱལ་གྱུར་ཅིག །མགོན་པོ་འགྲོ་ལ་མི་འཇིགས་སྦྱིན་མཛད་པ། །མཁའ་ལ་རྡུལ་གནག་དུ་བ་མཇུག་རིངས་དག །མི་ཆགས་བཞིན་དུ་སྐྱེས་མཆོག་ཐུགས་མི་ཆགས། །དྲི་མེད་ཡུལ་གྱི་བདེ་བས་མི་གོས་ཏེ། །ཆུ་ལས་པད་མ་ཇི་ལྟར་འཕགས་པ་བཞིན། །དགེ་སློང་དག་དེ་ནས་ལྷའི་བུ་ཞི་བའི་བློ་གྲོས་དང་། ལྷའི་བུ་རྩེ་བ་བཀོད་པས། བྱང་ཆུབ་སེམས་དཔའི་ངེས་པ་རིག་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་གཉིད་ཀྱིས་ལོག་པར་བྱས་སོ། །སྒྲ་ཐམས་ཅད་ཀྱང་མི་གྲག་པར་བྱས་སོ། །དགེ་སློང་དག་དེ་ནས་བྱང་ཆུབ་སེམས་དཔས་གྲོང་ཁྱེར་གྱི་སྐྱེ་བོ་ཐམས་ཅད་གཉིད་ཀྱིས་ལོག་པར་རིག །ནམ་གྱི་གུང་ལ་བབ་པར་རིག །སྐར་མའི་བདག་པོ་རྒྱལ་དང་ལྡན་པར་རིག །ད་ཁོ་ན་མངོན་པར་འབྱུང་བའི་དུས་ལ་བབ་པར་རིག་ནས་འདུན་པ་ལ་སྨྲས་པ། འདུན་པ་དང་སྐྱོ་བར་མ་བྱེད་པར་རྟ་བསྔགས་ལྡན་ལེགས་པར་བརྒྱན་ཏེ་མ་ཐོགས་པར་ང་ལ་བྱིན། བྱང་ཆུབ་སེམས་དཔས་ཚིག་དེ་སྐད་སྨྲས་མ་ཐག་ཏུ། དེ་ནས་སྐད་ཅིག་དེ་ཉིད་ལ་རྒྱལ་པོ་ཆེན་པོ་བཞིས། བྱང་ཆུབ་སེམས་དཔའི་ཚིག་ཐོས་ནས། རང་རང་གི་གནས་ནས་བྱུང་སྟེ། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་རང་རང་གི་བཀོད་པས་རིངས་པ་རིངས་པར་ཡང་སེར་སྐྱའི་གནས་ཀྱི་གྲོང་ཁྱེར་ཆེན་པོར་འོངས་སོ། །དེ་ན་དྲི་ཟའི་བདག་པོ་རྒྱལ་པོ་ཆེན་པོ་ཡུལ་འཁོར་སྲུང་ནི་དྲི་ཟ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་སིལ་སྙན་དང་གླུ་དབྱངས་སྣ་ཚོགས་ལེན་ཅིང་ཤར་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་ཤར་ཕྱོགས་ཉིད་དུ་གནས་ནས་བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ །རྒྱལ་པོ་ཆེན་པོ་འཕགས་སྐྱེས་པོ་ནི་གྲུལ་བུམ་མུ་ཏིག་གི་དོ་ཤལ་སྣ་ཚོགས་ལག་ན་འཕྱང་བ། ནོར་བུ་རིན་པོ་ཆེ་སྣ་ཚོགས་ཐོགས་པ། སྤོས་ཆུ་སྣ་ཚོགས་ཀྱིས་གང་བའི་བུམ་པ་ཐོགས་པ་བྱེ་བ་
ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་ལྷོ་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་ལྷོ་ཕྱོགས་ཉིད་དུ་གནས་ནས། བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ །རྒྱལ་པོ་ཆེན་པོ་མིག་མི་བཟང་ནི་ཀླུ་མུ་ཏིག་གི་དོ་ཤལ་སྣ་ཚོགས་ལག་ན་འཕྱང་བ། ནོར་བུ་རིན་པོ་ཆེ་སྣ་ཚོགས་ཐོགས་པ། སྤོས་ཀྱི་ཕྱེ་མ་དང་མེ་ཏོག་གི་ཆར་གྱི་སྤྲིན་ཀུན་ནས་སློང་བའི་རླུང་དལ་ཞིང་དྲི་ཞིམ་པ་སྣ་ཚོགས་གཏོང་བ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་ནུབ་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་ནུབ་ཕྱོགས་ཉིད་དུ་གནས་ནས། བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ །རྒྱལ་པོ་ཆེན་པོ་ལུས་ངན་ནི་གནོད་སྦྱིན་ནོར་བུ་རིན་པོ་ཆེ་སྐར་མའི་འོད་ཟེར་ཐོགས་པ། ལག་ན་མར་མེ་ཐོགས་པ། སྒྲོན་མ་འབར་བ་ལག་ན་ཐོགས་པ། མདའ་གཞུ་དང་། རལ་གྲི་དང་། མདུང་ཐུང་དང་། མཚོན་རྩེ་གཉིས་པ་དང་། རྩེ་གསུམ་པ་དང་། འཁོར་ལོ་དང་། མཚོན་རྩེ་གཅིག་པ་དང་། འཕང་མདུང་ལ་སོགས་པ་མཚོན་ཆ་སྣ་ཚོགས་ཐོགས་པ། གོ་ཆ་དང་ཡ་ལད་སྲ་བ་བགོས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དག་དང་ལྷན་ཅིག་ཏུ་བྱང་ཕྱོགས་ནས་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་བྱང་ཕྱོགས་ཉིད་དུ་གནས་ནས། བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ །ལྷའི་དབང་པོ་བརྒྱ་བྱིན་ཡང་སུམ་ཅུ་རྩ་གསུམ་པའི་ལྷ། ལྷའི་མེ་ཏོག་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་དང་། མེ་ཏོག་གི་རྣ་རྒྱན་དང་། རྒྱན་ཐོགས་པ་རྣམས་དང་། ལྷན་ཅིག་ཏུ་འོངས་པར་གྱུར་ཏེ། འོངས་ནས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་བསྐོར་བ་བྱས་ཏེ། ཇི་ལྟར་འོངས་པའི་སྟེང་གི་བར་སྣང་ལ་འཁོར་དང་བཅས་ཏེ། བྱང་ཆུབ་སེམས་དཔའ་ལ་ཕྱག་འཚལ་ཞིང་འདུག་གོ །དགེ་སློང་དག་དེ་ལྟར་
འདུན་པས་བྱང་ཆུབ་སེམས་དཔའི་ཚིག་ཐོས་ནས། མིག་མཆི་མས་གང་ཞིང་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །ཇོ་ཇོ་ཁྱོད་ནི་དུས་མཁྱེན་པ། ཚོད་མཁྱེན་པ། རན་པ་མཁྱེན་པ་ལགས་ན། ད་ལྟར་ནི་བཞུད་པའི་དུས་དང་ཚོད་མ་ལགས་ན། ཅིའི་སླད་དུ་བཀའ་དེ་སྐད་སྩལ། བྱང་ཆུབ་སེམས་དཔས་སྨྲས་པ། འདུན་པ་ད་ནི་དུས་ལ་བབ་པོ། །སྨྲས་པ། ཇོ་ཇོ་གང་གི་དུས་ལ་བབ། བྱང་ཆུབ་སེམས་དཔས་སྨྲས་པ། སེམས་ཅན་རྣམས་ཀྱི་དོན་ནི་ཚོལ་བ་ན། །བྱང་ཆུབ་རྒ་ཤི་མེད་པའི་གནས་ཐོབ་ནས། །འགྲོ་བ་དགྲོལ་ཞེས་ང་ཡིས་ཡུན་རིང་ནས། །སྨོན་ལམ་བཏབ་པ་དེ་ཡི་དུས་ལ་བབ། །འདི་ལ་འདི་ནི་ཆོས་ཉིད་དེ། དེ་ལ་འདི་སྐད་ཅེས་བྱའོ། །ས་བླ་བ་དང་བར་སྣང་དེ་བཞིན་སྐྱོང་། །ལྷ་དབང་བརྒྱ་བྱིན་རང་གི་ཕྱོགས་དང་བཅས། །འཐབ་བྲལ་ལྷ་དང་དགའ་ལྡན་འཕྲུལ་དགའ་དང་། །གཞན་འཕྲུལ་དབང་བྱེད་ལྷ་རྣམས་བརྩོན་པར་གྱུར། །ཀླུ་རྒྱལ་ཆུ་ལྷ་དང་ནི་གཟི་ཅན་དང་། །མ་དྲོས་པ་དང་དེ་བཞིན་རྒྱ་མཚོ་ཡང་། །མི་མཆོག་མངོན་པར་བྱུང་བའི་དུས་བབ་པས། །དེ་དག་རྣམས་ཀྱང་མཆོད་ཕྱིར་བརྩོན་པར་གྱུར། །གང་དག་གཟུགས་ན་སྤྱོད་པའི་ལྷ་རྣམས་དང་། །རྟག་ཏུ་བསམ་གཏན་སྤྱོད་ཡུལ་རབ་ཞི་སྤྱད། །དེ་དག་རྣམས་ཀྱང་འཇིག་རྟེན་གསུམ་མཆོད་པ། །མི་མཆོག་དེ་ལ་མཆོད་ཕྱིར་མངོན་པར་བརྩོན། །སྔོན་སྤྱད་སྤྱོད་ཚེ་གྲོགས་པོར་གྱུར་པ་ཡི། །བྱང་ཆུབ་སེམས་དཔའ་ཕྱོགས་བཅུར་ལྷགས་པ་ཡང་། །རྒྱལ་བ་མངོན་པར་འབྱུང་བ་ལྟ་བྱེད་ཅིང་། །རྗེས་སུ་འཐུན་པས་མཆོད་པ་བྱ་སྙམ་བྱེད། །གསང་བའི་བདག་པོ་བདག་ཉིད་ཆེན་པོ་དེ། །རྡོ་རྗེ་འབར་ཐོགས་ནམ་མཁའི་དཀྱིལ་ན་གནས། །ལུས་ལ་གོ་བགོས་སྟོབས་བརྩོན་རྩལ་དང་ལྡན། །གསང་བ་ལག་ན་རྡོ་རྗེ་འབར་བ་ཐོགས། །ལྷའི་བུ་ཉི་མ་ཟླ་བ་དེ་གཉིས་ཀྱང་། །གཡས་དང་གཡོན་ན་རབ་ཏུ་གནས་པར་གྱུར། །སོར་མོ་བཅུ་ཡི་ཐལ་མོ་སྦྱར་བྱས་ཏེ། །མངོན་པར་འབྱུང་ལ་རྗེས་སུ་རྟོག་པར་བྱེད། །སྐར་མ་རྒྱལ་དེ་འཁོར་དང་བཅས་པ་ཡང་། །རང་གི་ལུས་ནི་རྒྱ་ཆེན་སྤྲུལ་བྱས་ཏེ། །མི་ཡི་དམ་པ་དེ་ཡི་མདུན་འདུག་ནས། །ཡིད་དུ་འོང་
བའི་སྒྲ་ནི་རབ་འབྱིན་ཏེ། །སྐར་མ་རྒྱལ་ལྡན་བཞུད་པའི་དུས་ལ་བབ། །དོ་མོད་ཁྱོད་དགེ་བཀྲ་ཤིས་ཐམས་ཅད་གྲུབ། །བདག་ཀྱང་ཁྱོད་དང་ཐབས་ཅིག་མཆི་བར་བགྱི། །འདོད་ཆགས་སེལ་བ་བར་ཆད་འབྱུང་མི་འགྱུར། །ལྷའི་བུ་ཡང་དག་བསྐུལ་པོས་བསྐུལ་བྱས་པ། །སྟོབས་དང་བརྩོན་འགྲུས་འཕགས་པ་མྱུར་དུ་བཞེངས། །སྡུག་བསྔལ་ཉེན་པའི་སེམས་ཅན་ཐམས་ཅད་སྒྲོལ། །ད་ནི་མངོན་པར་འབྱུང་བའི་དུས་ལ་བབ། །ལྷ་རྣམས་བྱེ་བ་སྟོང་ཕྲག་མང་པོ་ཡང་། །ཡིད་འོང་མེ་ཏོག་ཆར་པ་འབེབས་ཤིང་ལྷགས། །དེ་ནི་སྐྱིལ་མོ་ཀྲུང་བཅས་མཆོག་ལ་འདུག །ལྷ་ཡིས་བསྐོར་ཅིང་མཛེས་ལ་གཟི་བརྗིད་འབར། །གྲོང་ཁྱེར་ན་ནི་སྐྱེས་པ་བུད་མེད་ཁྱེའུ་དང་བུ་མོ་གང་ཡོད་པ། །དེ་དག་ཐམས་ཅད་ཡིད་ངལ་གྱུར་ནས་ཉལ་ཏེ་སྤྱོད་ལམ་རྣམས་ལས་ཉམས། །རྟ་དང་གླང་པོ་བ་ལང་ནེ་ཚོ་ཁྲུང་ཁྲུང་རྨ་བྱ་རི་སྐེགས་རྣམས། །དེ་དག་རྣམས་ཀྱང་ཡིད་ངལ་མྱུར་དུ་ཉལ་ཏེ་དེ་དག་གཟུགས་མི་མཐོང་། །ཤཱཀྱའི་བུ་གང་རྡོ་རྗེ་སྲ་བ་མཚོན་ཆ་རྩེ་གཉིས་ཐོགས་བཀོད་དང་། །གླང་ཆེན་རྟ་དང་ཤིང་རྟ་རྟ་བབས་མཆོག་དྲུང་བཀོད་པ་དེ་དག་ཉལ། །རྒྱལ་པོ་རྒྱལ་བུ་རྒྱལ་པོའི་སྐྱེ་བོ་ཀུན་ཀྱང་གཉིད་ཀྱིས་ལོག་པར་གྱུར། །བུད་མེད་ཚོགས་རྣམས་གཉིད་ལོག་གོས་བྲལ་གཅེར་བུར་གྱུར་ཀྱང་ཡང་མ་ཚོར། །དེ་ནི་ཚངས་དབྱངས་ཡིད་དུ་འོང་ཚིག་ཀ་ལ་པིང་ཀའི་སྒྲ་དབྱངས་ཀྱིས། །ནམ་ཕྱེད་འདས་ཏེ་ནམ་གྱི་གུང་ལ་བབ་ནས་འདུན་པ་དེ་ལ་སྨྲས། །འདུན་པ་རྟ་ཕོ་བསྔགས་ལྡན་བཟང་པོ་ལེགས་བརྒྱན་ལེགས་པར་ང་ལ་བྱིན། །གལ་ཏེ་ང་ལ་བྱམས་པར་སེམས་ན་བགེགས་མ་བྱེད་པར་མྱུར་དུ་བྱིན། །འདུན་པས་ཚིག་ཐོས་མཆི་མས་མིག་གང་རང་གི་ཇོ་བོ་དེ་ལ་སྨྲས། །སེམས་ཅན་ཁ་ལོ་སྒྱུར་མཆོག་གར་བཞུད་བཅིབས་པས་ཅི་ཞིག་བགྱི། །དུས་མཁྱེན་ཅིང་ནི་ཚོད་མཁྱེན་ཆོས་སྤྱོད་གང་དུའང་གཤེགས་པའི་དུས་མ་ལགས། །ཁྱོད་ཀྱི་སྒོ་བཀུམ་གཏན་པ་དམ་སྩལ་སུ་ཡང་ཆབ་སྒོ་འབྱེད་མི་འགྱུར། །བརྒྱ་བྱིན་གྱི་ནི་ཡིད་ཀྱི་སེམས་པའི་དབང་གིས་སྒོ་ཡང་བྱེ་བར་གྱུར། །འདུན་པས་དེ་འདྲ་མཐོང་ནས་དགའ་ཞིང་སྡུག་བསྔལ་དེ་ནི་མཆི་མ་འཁོར། །ཀྱི་ཧུད་བདག་གྲོགས་སུ་ཡོད་ཇི་ལྟར་བྱ་ཞིང་ཕྱོགས་ནི་གར་བརྒྱུག་སྙམ། །གཟི་བརྗིད་
ལྡན་པས་དྲག་ཤུལ་ཅན་གྱི་ཚིག་སྨྲས་བརྒྱ་བྱིན་འབའ་ཞིག་ཐོས། །ཡན་ལག་བཞི་ལྡན་དཔུང་དང་བཅས་པ་འདི་ཡང་འདི་ན་ཅི་ཞིག་བྱེད། །རྒྱལ་པོ་རྒྱལ་བུ་རྒྱལ་པོའི་སྐྱེ་བོ་དེ་དག་རྣམས་ཀྱིས་འདི་མ་ཚོར། །བུད་མེད་ཚོགས་ཀྱང་གཉིད་ལོག་ལྷ་རྣམས་ཀྱིས་ནི་གྲགས་ལྡན་གཉིད་ལོག་བྱས། །ཀྱི་ཧུད་འདི་ཡིས་སྔོན་ཆད་བསམས་པའི་སྨོན་ལམ་ཐམས་ཅད་གྲུབ་གྱུར་ཅིག །ལྷ་སྟོང་བྱེ་བ་དེ་དག་དགའ་བའི་ཡིད་ཀྱིས་འདུན་པ་དེ་ལ་སྨྲས། །འདུན་པ་རྟ་མཆོག་བསྔགས་ལྡན་ལེགས་པར་ཕུལ་ཅིག་འདྲེན་པ་སྐྱོ་མི་བྱ། །ལྷ་དང་ལྷ་མིན་དག་གིས་རྔ་དུང་རྫ་རྔ་རོལ་མོ་ཁྲག་ཁྲིག་བྱས། །འོན་ཀྱང་ལྷས་བསྙལ་བ་ཡི་གྲོང་ཁྱེར་མཆོག་འདི་སད་པར་ཡོང་མ་གྱུར། །འདུན་པ་བར་སྣང་དྲི་མ་མེད་ལ་ལྷ་ཡི་འོད་རབ་མཛེས་ལ་ལྟོས། །ཁྱོད་ཀྱིས་བྱང་ཆུབ་སེམས་དཔའ་བྱེ་བ་མང་པོ་མཆོད་ཕྱིར་གང་ལྷགས་ལྟོས། །བདེ་སོགས་ཁྱིམ་ཐབ་བརྒྱ་བྱིན་དཔུང་བསྐོར་སྒོ་ན་མཛེས་པར་འདུག་པ་དང་། །ལྷ་དང་ལྷ་མིན་མི་འམ་ཅི་ཚོགས་གང་དག་མཆོད་ཕྱིར་ལྷགས་ལ་ལྟོས། །འདུན་པ་དེས་ཀྱང་ལྷ་ཚིག་དེ་ཐོས་བསྔགས་ལྡན་རྟ་ཕོ་དེ་ལ་སྨྲས། །སེམས་ཅན་ཁ་ལོ་སྒྱུར་མཆོག་འདི་བཞུད་ཁྱོད་ནི་རྟ་སྐད་སྒྲོགས་ཤིང་ཤོག །དེ་ཡིས་དབྱར་གྱི་ཁ་དོག་ཅན་དེ་རྨིག་པ་གསེར་གྱིས་བརྒྱན་བྱས་ནས། །ཡིད་མི་དགའ་བཞིན་ཡོན་ཏན་རྒྱ་མཚོ་མངའ་བའི་བཅིབས་པར་དབུལ་བ་བྱས། །མཚན་མཆོག་མངའ་ཞིང་ཕན་མཛད་ཁྱོད་ཀྱི་ཆིབས་འདི་རིགས་བཟང་དགེ་བ་ལགས། །ཁྱོད་ཀྱིས་སྔོན་ཆད་གང་བགོས་སྨོན་ལམ་དེ་གྲུབ་གྱུར་ཅིག་གཤེགས་སུ་གསོལ། །གང་དག་བགེགས་བགྱིད་ཞི་བར་གྱུར་ཅིག་དགོངས་པའི་བརྟུལ་ཞུགས་གྲུབ་གྱུར་ཅིག །འགྲོ་བ་ཀུན་ལ་བདེ་དང་མཐོ་རིས་པ་དང་ཞི་བ་སྦྱིན་གྱུར་ཅིག །དེ་ནི་གང་ཚེ་མལ་ནས་ལངས་ཚེ་ས་འདི་ཐམས་ཅད་རྣམ་དྲུག་གཡོས། །རྟ་རྒྱལ་དམ་པ་ཟླ་བ་ཉ་བའི་དཀྱིལ་འཁོར་འདྲ་བ་དེ་ལ་ཞོན། །སྐྱོང་བའི་ལག་པ་རྣམ་དག་པད་མ་དྲི་མེད་འདྲ་བས་རྟ་མཆོག་བཏེག །བརྒྱ་བྱིན་ཚངས་པ་དེ་གཉིས་དེ་ཡི་མདུན་ན་ལམ་ནི་འདི་ཞེས་སྟོན། །དེ་ཡིས་གསལ་བ་དྲི་མ་མེད་པའི་འོད་བཏང་ས་རྣམས་སྣང་བས་གསལ། །དེ་ཚེ་ངན་སོང་ཀུན་ཞི་སེམས་ཅན་བདེ་ལྡན་
ཉོན་མོངས་གནོད་པ་མེད། །མེ་ཏོག་ཆར་བབ་སིལ་སྙན་བྱེ་བ་སྒྲ་བྱུང་ལྷ་དང་ལྷ་མིན་བསྟོད། །ཐམས་ཅད་དགའ་དང་ལྡན་ནས་གྲོང་ཁྱེར་མཆོག་ལ་བསྐོར་བ་བྱས་ཏེ་དོང་། །སྐྱེས་བུ་ཆེན་པོ་སོང་བས་གྲོང་ཁྱེར་དམ་པའི་ལྷ་ཡང་ཡིད་ནི་དམན་པར་གྱུར་ནས་འོངས། །མདུན་དུ་འདུག་ནས་སྙིང་རྗེར་ངུ་བའི་ཡིད་ལྡན་དེ་ཡིས་པད་མ་འདྲ་བའི་བཞིན་ལ་སྨྲས། །ཁྱོད་བྲལ་སྒྲེན་མོར་མི་མཛེས་ས་འདི་གྲོང་ཁྱེར་ཐམས་ཅད་མུན་པས་ཀུན་ཏུ་དཀྲུགས་པར་གྱུར། །དོ་མོད་ཁྱོད་ཀྱིས་ཁབ་འདི་སྤངས་ན་བདག་ལ་དགའ་བདེ་བགྱིད་པ་འདི་ན་འགའ་མ་མཆིས། །སླན་ཆད་བྱ་ཚོགས་རྣམས་ཀྱིས་སྒྲ་དག་དང་། །གྲགས་པ་མཐའ་ཡས་ཁྱོད་ནི་སད་བགྱིད་པའི། །བཙུན་མོའི་འཁོར་གྱི་གླིང་བུ་སྙན་པ་དང་། །བཀྲ་ཤིས་སྒྲ་དང་གླུ་སྒྲ་ཐོས་མི་འགྱུར། །ཉོན་མོངས་བཅོམ་པ་ཁྱོད་ནི་གཤེགས་གྱུར་ན། །གདུགས་མཚན་ཁྱོད་ལ་མཆོད་པ་བགྱིད་པ་ཡི། །ལྷ་དང་གྲུབ་ཚོགས་སླན་ཆད་མཐོང་མི་འགྱུར། །ལྷ་ཡི་དྲི་ཡང་སླན་ཆད་སྣོམ་མི་འགྱུར། །ཕྲེང་བ་བཏགས་ནས་ཞག་ལོན་གྱུར་པ་ལྟར། །ཁྱོད་ཀྱིས་དོ་མོད་ཕོ་བྲང་དེ་བཞིན་སྤངས། །ཁྱོད་བཞུད་སླན་ཆད་གཟི་བརྗིད་དཔལ་མ་མཆིས། །གར་ལ་ལྟ་བ་བཞིན་དུ་བདག་ལ་གདའ། །གྲོང་ཁྱེར་ཀུན་གྱི་བྱིན་དང་སྟོབས་ཕྲོགས་ཏེ། །འདི་ནི་དགོན་པ་འདྲ་ཞིང་མཛེས་མ་ལགས། །གང་གིས་ས་འདིར་འཁོར་ལོ་སྟོབས་ཅན་དུ། །ལུང་བསྟན་དྲང་སྲོང་ཚིག་ནི་དེང་བརྫུན་གྱུར། །བསོད་ནམས་སྡོང་པོ་ཆེན་པོ་ཁྱོད་བྱུང་ན། །ས་འདིར་ཤཱཀྱའི་སྟོབས་ནི་སྟོབས་མ་མཆིས། །རྒྱལ་པོའི་ཕོ་བྲང་འཁོར་འདིར་གདུང་ཡང་འཆད། །ཤཱཀྱའི་ཚོགས་འདི་བསམ་པ་རབ་ཏུ་ཉམས། །དྲི་མེད་དྲི་བྲལ་ཁྱོད་ནི་གར་བཞུད་པར། །བདག་ཀྱང་ཁྱོད་དང་ལྷན་ཅིག་མཆི་བར་བགྱི། །འོན་ཀྱང་ཐུགས་བརྩེ་ཐུགས་རྗེ་བསྐྱེད་ནས་ནི། །ཁྱོད་ཀྱིས་ཕོ་བྲང་འདི་ལ་གཟིགས་སུ་གསོལ། །བློ་གྲོས་ལྡན་པ་ཁྱིམ་ལ་བལྟས་ནས་ནི། །སྙན་པའི་ང་རོས་འདི་སྐད་ཚིག་སྨྲས་ཏེ། །སྐྱེ་འཆི་མཐར་འབྱིན་མ་ཐོབ་བར་དུ་ནི། །ང་ཡིས་སེར་སྐྱའི་གྲོང་ཁྱེར་འཇུག་མི་བྱ། །རྒ་ཤི་མེད་པའི་གནས་མཆོག་འཆི་མེད་པ། །བྱང་ཆུབ་དམ་པ་ང་ཡིས་མ་ཐོབ་པར། །ང་ནི་སེར་སྐྱའི་གནས་སུ་མངོན་ཕྱོགས་ཏེ། །
འགྲེང་འདུག་ཉལ་དང་འཆག་པར་མི་བྱའོ། །གང་ཚེ་འགྲོ་བའི་གཙོ་བོ་པ། །བྱང་ཆུབ་སེམས་དཔའ་དེ་བྱུང་ཞིང་། །དེ་ནི་མཁའ་ལས་འགྲོ་བའི་ཚེ། །ལྷ་ཡི་བུ་མོ་རྣམས་ཀྱིས་བསྟོད། །འདི་ནི་སྦྱིན་པའི་གནས་ཆེན་ཡིན། །འདི་ནི་བསོད་ནམས་ཞིང་ཆེན་ཡིན། །འདི་ནི་བསོད་ནམས་འདོད་པའི་ཞིང་། །འཆི་མེད་འབྲས་བུ་སྦྱིན་མཛད་པ། །སེམས་ཅན་རྣམས་ལ་ཐུགས་རྗེ་བས། །འདི་ཡིས་བསྐལ་པ་བྱེ་མང་དུ། །སྦྱིན་དང་དུལ་དང་སྡོམ་པ་ཡིས། །འདིས་ནི་བྱང་ཆུབ་ཡང་དག་བསྒྲུབས། །འདི་ཡི་ཚུལ་ཁྲིམས་ཡོངས་སུ་དག །བརྟུལ་ཞུགས་བཟང་ཞིང་སྤྱོད ་མ་ཉམས། །འདོད་པ་དག་དང་ལོངས་སྤྱོད་རྣམས། །དོན་དུ་མི་གཉེར་ཚུལ་ཁྲིམས་སྲུང་། །སེམས་ཅན་ཡོངས་སུ་བསྐྱབ་པའི་ཕྱིར། །འདི་ནི་རྟག་ཏུ་བཟོད་པ་གསུང་། །ཡན་ལག་ཉིང་ལག་གཅད་གྱུར་ཀྱང་། །ཁྲོ་བ་མི་མངའ་སྡང་མི་མངའ། །འདི་ནི་རྟག་ཏུ་བརྩོན་འགྲུས་ལྡན། །བསྐལ་པ་བྱེ་བར་སྐྱོ་མི་མངའ། །འདི་ཡིས་བྱང་ཆུབ་ཡང་དག་བསྒྲུབས། །མཆོད་སྦྱིན་དག་ནི་བྱེ་བ་མཛད། །འདི་རྟག་བསམ་གཏན་བསམ་གཏན་པ། །ཐུགས་ནི་ཞི་ཞིང་རབ་ཏུ་ཞི། །ཉོན་མོངས་ཐམས་ཅད་བསྲེགས་ནས་ནི། །སེམས་ཅན་བྱེ་བ་འགྲོལ་བར་འགྱུར། །འདི་ནི་ཤེས་རབ་ཆགས་མི་མངའ། །རྟོག་དང་རྣམ་པར་རྟོག་ལྡན་ལས། །གྲོལ་ཞིང་ཐུགས་ནི་རྣམ་གྲོལ་ཏེ། །རང་བྱུང་བ་ཡི་རྒྱལ་བར་འགྱུར། །འདི་ནི་རྟག་ཏུ་བྱམས་ཐུགས་ལྡན། །ཐུགས་རྗེ་ཡི་ནི་ཕ་རོལ་བྱོན། །དགའ་དང་བཏང་སྙོམས་བསམ་གཏན་པ། །ཚངས་པའི་ལམ་གྱི་ཆོ་ག་མཁྱེན། །འདི་ནི་ཤིན་ཏུ་ལྷ་ཡི་ལྷ། །ལྷ་རྣམས་ཀྱིས་ནི་མཆོད་པའི་འོས། །ཐུགས་དགེ་དག་ཅིང་དྲི་མ་བྲལ། །ཡོན་ཏན་ཁྲག་ཁྲིག་ཕ་རོལ་བྱོན། །འཇིགས་པས་ཉེན་པ་རྣམས་ཀྱི་སྐྱབས། །མིག་མེད་རྣམས་ཀྱི་སྒྲོན་མ་སྟེ། །གནོད་པ་རྣམས་ཀྱི་སྐྱབས་ཀྱང་ལགས། །རིང་ནས་ན་བའི་སྨན་པ་ལགས། །རྒྱལ་པོ་དམ་པ་ཆོས་ཀྱི་རྒྱལ། །དབང་པོ་ལྟ་བུར་སྤྱན་སྟོང་མངའ། །ཚངས་པ་ལྟ་བུར་རང་བྱུང་གྱུར། །ལུས་དང་སེམས་ནི་རབ་སྦྱངས་པ། །བརྟན་ཞིང་ཤེས་རབ་རབ་ཏུ་མང་། །དཔའ་ཞིང་ཐུགས་ནི་འདོད་
ཆགས་བྲལ། །ཉོན་མོངས་འཇོམས་པས་དཔའ་བོ་སྟེ། །མ་རྒྱལ་དགྲ་ལས་རྒྱལ་བ་ལགས། །སེང་གེ་ལྟ་བུར་བསྙེངས་པ་སྤངས། །གླང་པོ་ལྟ་བུར་རབ་དུལ་ཐུགས། །ཁྱུ་མཆོག་ལྟ་བུར་ཚོགས་ཀྱི་གཙོ། །བཟོད་དེ་འཁྲུག་པ་རབ་ཏུ་སྤངས། །ཟླ་བ་ལྟ་བུར་རབ་ཏུ་གསལ། །ཉི་མ་ལྟ་བུར་སྣང་བ་མཛད། །སྒྲོན་མ་ལྟ་བུར་གསལ་མཛད་པ། །སྐར་མ་ལྟ་བུར་མུན་པ་བྲལ། ། པད་མ་ལྟ་བུར་ཆགས་མི་མངའ། །མེ་ཏོག་ལྟ་བུར་ཁྲིམས་དྲི་གདའ། །སྟོན་པ་ལྷུན་པོ་ལྟར་མི་གཡོ། །དོག་ས་ལྟ་བུར་གསོས་སུ་གྱུར། །རིན་ཆེན་འབྱུང་གནས་ལྟར་མི་འཁྲུགས། །འདི་ནི་ཕུང་པོའི་བདུད་ལས་རྒྱལ། །འདི་ནི་འཆི་བདག་བདུད་ལས་རྒྱལ། །འདི་ནི་ལྷ་ཡི་བདུད་ཀྱང་བཅོམ། །འདི་ནི་དེད་དཔོན་ཆེན་པོ་སྟེ། །ལམ་ངན་དག་ན་གནས་རྣམས་ལ། །ཡན་ལག་བརྒྱད་པ་ལམ་གྱི་མཆོག །རིང་པོར་མི་ཐོགས་སྟོན་པར་འགྱུར། །རྒ་ཤི་ཉོན་མོངས་འཇོམས་པ་པོ། །མུན་པ་རབ་རིབ་རྣམ་པར་གྲོལ། །ས་དང་ལྷ་ཡུལ་གྲགས་པ་ཡི། །རང་བྱུང་རྒྱལ་བར་བྱོན་པ་ལགས། །སྐྱེས་བུ་མཆོག་གི་གཟུགས་མངའ་བ། །དཔག་ཏུ་མེད་ལ་བསྟོད་པས་བསྟོད། །ཁྱོད་ལ་བསྟོད་པའི་བསོད་ནམས་དེས། །སྨྲ་བའི་སེང་གེ་འདྲ་བར་ཤོག །དགེ་སློང་དག་དེ་ལྟར་བྱང་ཆུབ་སེམས་དཔའ་མངོན་པར་བྱུང་ནས་ཤཱཀྱའི་ཡུལ་དང་། ཀཽ་ཏའི་ཡུལ་དང་། གྱད་ཡུལ་ལས་འདས་ཏེ་མེ་ནེ་ཡའི་ཡུལ་གྱི་གྲོང་རྡལ་རྗེས་སུ་དཔག་པ་ཞེས་བྱ་བ་ནས་དཔག་ཚད་དྲུག་ཏུ་བྱང་ཆུབ་སེམས་དཔའ་ཕྱིན་པ་དང་ནམ་ནངས་པར་གྱུར་ཏོ། །དེ་ནས་བྱང་ཆུབ་སེམས་དཔའ་རྟ་བསྔགས་ལྡན་ལས་བབས་ཏེ་ས་ལ་འདུག་ནས། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོའི་ཚོགས་ཆེན་པོ་སླར་བཀྱེའོ། །སླར་བཀྱེ་ནས་ཀྱང་དེ་འདི་སྙམ་དུ་སེམས་ཏེ། རྒྱན་འདི་དག་དང་རྟ་བསྔགས་ལྡན་ཡང་འདུན་པའི་ལག་ཏུ་གཏད་དེ་སླར་གཏང་ངོ་སྙམ་མོ། །དེ་ནས་བྱང་ཆུབ་སེམས་དཔས་འདུན་པ་ལ་བོས་ཏེ་འདི་སྐད་ཅེས་སྨྲས་སོ། །འདུན་པ་ཁྱོད་སོང་ལ་རྒྱན་འདི་དག་དང་རྟ་བསྔགས་ལྡན་ཁྱེར་ཏེ་སླར་ལོག་ཤིག །ས་ཕྱོགས་གང་ནས་འདུན་པ་སླར་ལོག་
པ་དེར་མཆོད་རྟེན་བརྩིགས་ཏེ། དེང་སང་དུ་ཡང་མཆོད་རྟེན་དེ་ལ་འདུན་པ་སླར་ལོག་པའི་མཆོད་རྟེན་ཞེས་གྲགས་པ་ཡིན་ནོ། །ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། ཇི་ལྟར་ན་གཙུག་ཕུད་ཀྱང་ཡོད་ལ་རབ་ཏུ་བྱུང་བ་ཞེས་བྱ་བར་ཡང་འགྱུར་སྙམ་ནས་དེས་རལ་གྲིས་གཙུག་ཕུད་བཅད་དེ་བར་སྣང་ལ་བོར་བ་དང་། དེ་སུམ་ཅུ་རྩ་གསུམ་པའི་ལྷ་རྣམས་ཀྱིས་མཆོད་པའི་ཕྱིར་བླངས་ཏེ། དེང་སང་དུ་ཡང་སུམ་ཅུ་རྩ་གསུམ་པའི་ལྷ་རྣམས་གཙུག་ཕུད་ཀྱི་དུས་སྟོན་བྱེད་དོ། །དེར་མཆོད་རྟེན་ཡང་བྱས་ཏེ། དེང་སང་མཆོད་རྟེན་དེ་གཙུག་ཕུད་བླངས་པའི་མཆོད་རྟེན་ཞེས་མིང་དུ་ཆགས་སོ། །ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། རབ་ཏུ་བྱུང་ཡང་གོས་ཀ་ཤི་པ་གྱོན་པ་ཇི་ལྟར་རུང་གིས་གལ་ཏེ་ནགས་ཚལ་གྱི་གནས་ནས་ཚུལ་དང་འཐུན་པའི་གོས་ཤིག་རྙེད་ན་ནི་ལེགས་སོ་སྙམ་དུ་བསམས་པ་དང་། དེ་ནས་གནས་གཙང་མའི་རིས་ཀྱི་ལྷ་རྣམས་འདི་སྙམ་དུ་སེམས་ཏེ། བྱང་ཆུབ་སེམས་དཔའ་ལ་ངུར་སྨྲིག་དགོས་པར་གྱུར་ཏོ་སྙམ་མོ། །དེ་ན་ལྷའི་བུ་གཅིག་ཅིག་ལྷའི་གཟུགས་མི་མངོན་པར་བྱས་ཏེ། རྔོན་པའི་གཟུགས་ལྟ་བུས་གོས་ངུར་སྨྲིག་བགོས་ནས་བྱང་ཆུབ་སེམས་དཔའི་མདུན་དུ་ཕྱིན་ཏོ། །དེ་ནས་བྱང་ཆུབ་སེམས་དཔས་དེ་ལ་འདི་སྐད་ཅེས་སྨྲས་སོ། །གལ་ཏེ་གྲོགས་པོ་ཁྱོད་ཀྱིས་གོས་ངུར་སྨྲིག་རྣམས་ཁོ་བོ་ལ་བྱིན་ན། ཁོ་བོའི་གོས་ཀ་ཤི་པ་འདི་རྣམས་ཀྱང་ཁྱོད་ལ་སྦྱིན་ནོ། །དེས་སྨྲས་པ། གོས་འདི་དག་ཀྱང་ཁྱོད་ལ་མཛེས་ལ། འོ་ནི་རྣམས་ཀྱང་ཁོ་བོ་ལ་མཛེས་སོ། །བྱང་ཆུབ་སེམས་དཔས་སྨྲས་པ། ཁོ་བོས་ཁྱོད་ལ་བསླང་ངོ་། །དེ་ནས་ལྷའི་བུ་རྔོན་པའི་གཟུགས་ལྟ་བུ་དེས་གོས་ངུར་སྨྲིག་རྣམས་བྱང་ཆུབ་སེམས་དཔའ་ལ་བྱིན་ཏེ། གོས་ཀ་ཤི་པ་རྣམས་ཀྱང་བླངས་སོ། །དེ་ནས་ལྷའི་བུ་དེས་མོས་པ་བསྐྱེད་དེ་ལག་པ་གཉི་གས་གོས་དེ་དག་བླངས་ནས་སྤྱི་བོ་ལ་བཞག་སྟེ། དེ་དག་ལ་མཆོད་པ་དང་བཀུར་སྟི་བྱ་བའི་ཕྱིར་དེ་ཉིད་ནས་ལྷའི་འཇིག་རྟེན་དུ་སོང་ངོ་། །དེ་ཡང་འདུན་པས་མཐོང་བར་གྱུར་ནས་དེས་མཆོད་རྟེན་བརྩིགས་ཏེ། དེང་སང་དུ་ཡང་མཆོད་རྟེན་དེ་ངུར་སྨྲིག་བླངས་པ་ཞེས་མིང་དུ་ཆགས་སོ། །གང་གི་ཚེ་
བྱང་ཆུབ་སེམས་དཔས་གཙུག་ཕུད་བཅད་ནས། གོས་ངུར་སྨྲིག་རྣམས་བགོས་པ་དེའི་ཚེ། ལྷའི་བུ་བརྒྱ་སྟོང་དག་དགའ་ཞིང་མགུ་ལ་ཚིམ་ཞིང་ཡི་རངས་ཏེ།མཆོག་ཏུ་རབ་ཏུ་དགའ་ནས། དགའ་བ་དང་ཡིད་བདེ་བ་སྐྱེས་ཏེ། ཀྱེ་གྲོགས་པོ་དག་གཞོན་ནུ་དོན་གྲུབ་རབ་ཏུ་བྱུང་ངོ་། །་ཀྱེ་གྲོགས་པོ་དག་གཞོན་ནུ་དོན་གྲུབ་རབ་ཏུ་བྱུང་ངོ་། །དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་བར་འགྱུར་ཏེ། སེམས་ཅན་སྐྱེ་བའི་ཆོས་ཅན་གྲངས་མེད་པ་དག་སྐྱེ་བ་ལས་ཡོངས་སུ་འགྲོལ་བར་འགྱུར་བ་ནས། རྒ་བ་དང་། འཆི་བ་དང་། ན་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་ལས་སེམས་ཅན་རྣམས་ཡོངས་སུ་བཀྲོལ་ཏེ། འཁོར་བའི་རྒྱ་མཚོའི་ཕ་རོལ་ཏུ་བསྒྲལ་ནས། བདེ་བ་འཇིགས་པ་མེད་པ། མྱ་ངན་མེད་པ། གནོད་པ་མེད་པ། ཞི་བ། རྡུལ་དང་བྲལ་བ། །འཆི་བ་མེད་པའི་ཆོས་ཀྱི་དབྱིངས་ལ་འགོད་པར་འགྱུར་རོ་ཞེས་ནས། ཨ་ལ་ལ་ཞེས་བྱ་བ་དང་། ཅ་ཅོ་དང་ག་ཞའི་སྒྲ་སྐད་ཕྱུང་བར་གྱུར་ཏོ། །སྒྲ་དེ་ཡང་གཅིག་ནས་གཅིག་ཏུ་བརྒྱུད་ནས་འོག་མིན་གྱི་གནས་ཀྱི་བར་དུ་གྲག་པར་གྱུར་ཏོ། །དེ་ནས་བཙུན་མོའི་འཁོར་རྣམས་ཀྱིས་གཞོན་ནུ་མ་མཐོང་ནས། དཔྱིད་དང་དགུན་དང་དབྱར་གནས་པའི་ཁང་བཟངས་རྣམས་དང་། ཁྲི་རྣམས་དང་། ཁྱིམ་རྣམས་སུ་ཚོལ་ཞིང་གང་གི་ཚེ་མ་རྙེད་པ་དེའི་ཚེ་གཅིག་ཏུ་འདུས་ནས། བྱ་ཀུ་ར་ར་མོ་བཞིན་དུ་ངུད་མོ་འཐོན་པར་གྱུར་ཏོ། །དེ་ན་བུད་མེད་ཁ་ཅིག་ནི་ཤིན་ཏུ་མྱ་ངན་གྱིས་ཉམ་ཐག་ནས།ཁ་ཅིག་ནི་ཀྱི་ཧུད་བུ་ཞེས་འཛེར་ཅིང་ངུའོ། །ཁ་ཅིག་ནི་ཀྱི་ཧུད་མིང་པོ་ཞེས་འཛེར་ཅིང་ངུའོ། །ཁ་ཅིག་ནི་ཀྱི་ཧུད་ཁྱིམ་ཐབ་ཅེས་འཛེར་ཏོ། །ཁ་ཅིག་ནི་རྗེ་བོ་ཞེས་འཛེར་ཏོ། །ཁ་ཅིག་ནི་སྡུག་པའི་ཚིག་སྣ་ཚོགས་སྨྲའོ། །ཁ་ཅིག་ནི་ལུས་རྡེབ་ཅིང་ངུའོ། །ཁ་ཅིག་ནི་མགོ་འབལ་ལོ། །ཁ་ཅིག་ནི་གཅིག་གི་གདོང་དུ་གཅིག་ལྟ་ཞིང་ངུའོ། །ཁ་ཅིག་ནི་མིག་བསྒྱུར་ཅིང་ངུའོ། །ཁ་ཅིག་ནི་ལག་པ་བརླ་ལ་རྡེབ་ཅིང་ངུའོ། །ཁ་ཅིག་ནི་བྲང་རྡུང་ཞིང་ངུའོ། །ཁ་ཅིག་ནི་ལག་པ་དཔུང་པར་རྡེབ་ཅིང་ངུའོ། །ཁ་ཅིག་ནི་མགོར་རྡུང་ཞིང་ངུའོ། །
ཁ་ཅིག་ནི་མགོ་ལ་ས་འཐོར་ཞིང་ངུའོ། །ཁ་ཅིག་ནི་སྐྲ་འཇིག་ཅིང་ངུའོ། །ཁ་ཅིག་ནི་སྐྲ་འབལ་ཞིང་ངུའོ། །ཁ་ཅིག་ནི་ལག་པ་བསྟོད་དེ་བསྒྲེང་ནས་ཆོ་ངེ་འདོན་ཏོ། །ཁ་ཅིག་ནི་རི་དགས་མོ་དུག་མདས་ཕོག་པ་བཞིན་དུ་གློ་བུར་དུ་རྒྱུག་ཅིང་ངུའོ། །ཁ་ཅིག་ནི་གདོང་གོས་ཀྱིས་གཡོགས་ཤིང་ངུའོ། །ཁ་ཅིག་ནི་ཆུ་ཤིང་རླུང་མར་གྱིས་བསྐྱོད་པ་བཞིན་དུ་ལུས་འཁྱོར་ཞིང་ངུའོ། །ཁ་ཅིག་ནི་ས་ལ་སྒྱེལ་ཏེ་མ་ཤི་ཙམ་དུ་གྱུར་ཏོ། །ཁ་ཅིག་ནི་ཉ་ཆུ་ནས་བཏོན་པ་བཞིན་དུ་ས་ལ་འགྲེ་ལྡོག་ཅིང་ངུའོ། །ཁ་ཅིག་ནི་ཤིང་རྩ་ནས་ཕྱུང་བ་བཞིན་དུ་བློ་བུར་དུ་ས་ལ་སྒྱེལ་ནས་ངུའོ། །སྒྲ་དེ་ཡང་རྒྱལ་པོས་ཐོས་ནས་ཤཱཀྱ་རྣམས་ལ་སྨྲས་པ། ཅིའི་ཕྱིར་བཙུན་མོའི་འཁོར་ན་སྒྲ་ཆེན་པོ་འདི་གྲག །ཤཱཀྱ་རྣམས་ཀྱིས་ཤེས་ནས་སྨྲས་པ། རྒྱལ་པོ་ཆེན་པོ་གཞོན་ནུ་བཙུན་མོའི་འཁོར་ན་མི་གདའ་ཞེས་གདའོ། །རྒྱལ་པོས་སྨྲས་པ། མྱུར་དུ་གྲོང་ཁྱེར་གྱི་སྒོ་རྣམས་ཆོད་ལ་ནང་དུ་གཞོན་ནུ་ཚོལ་ཅིག །དེ་དག་གིས་ཕྱི་ནང་དུ་བཙལ་ཀྱང་མ་རྙེད་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་སྨྲེ་སྔགས་འདོན་ཏེ། ས་ལ་འགྲེ་ལྡོག་ཅིང་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བདག་བུ་དང་མྱུར་དུ་སྤྲད་དུ་གསོལ། དེ་ནས་རྒྱལ་པོས་ཕྱོགས་བཞིར་ཕོ་ཉ་རྟ་པ་བཀྱེ་སྟེ། ཁྱེད་དེང་ལ་གཞོན་ནུ་མ་རྙེད་ཀྱི་བར་དུ་སླར་མ་ལྡོག་ཤིག །མཚན་མཁན་དང་ལྟས་མཁན་རྣམས་ཀྱིས་ཀྱང་བྱང་ཆུབ་སེམས་དཔའ་ནི་བཀྲ་ཤིས་ཀྱི་ཆབ་སྒོ་ནས་མངོན་པར་འབྱུང་ངོ་། །ཞེས་ལུང་བསྟན་ནས་དེ་དག་བཀྲ་ཤིས་ཀྱི་སྒོར་དོང་བ་དང་། ལམ་གྱི་བར་ཞིག་ན་མེ་ཏོག་གི་ཆར་འབབ་པར་མཐོང་ངོ་། །དེ་ནས་དེ་དག་འདི་སྙམ་དུ་སེམས་ཏེ། གཞོན་ནུ་ནི་ལམ་འདི་ནས་བྱུང་ངོ་སྙམ་ནས་དེ་དག་ཅུང་ཟད་ཅིག་ཕ་ཟད་དུ་སོང་བ་དང་། ལྷའི་བུ་བྱང་ཆུབ་སེམས་དཔའི་གོས་ཀ་ཤི་པ་རྣམས་མགོ་ལ་ཐོགས་ཏེ་འགྲོ་བ་དེ་མཐོང་ནས་དེ་དག་འདི་སྙམ་དུ་སེམས་ཏེ། འདི་དག་ནི་གཞོན་ནུའི་གོས་ཀ་ཤི་པ་རྣམས་ཡིན་ན། གོས་འདི་དག་གི་ཕྱིར་འདིས་གཞོན་ནུ་བསད་དེ་འདི་དག་ཁྱེར་བར་མ་གྱུར་ཏམ་སྙམ་མོ། །དེ་ནས་ཡང་དེ་དག་གིས་དེའི་ཕྱི་བཞིན་དུ་འདུན་པ་རྟ་བསྔགས་ལྡན་དང་རྒྱན་རྣམས་ཐོགས་ཏེ་འོང་བ་མཐོང་ངོ་། །དེ་ནས་དེ་དག་ཕན་ཚུན་དུ་སྨྲས་པ། ཀྱེ་
འདུན་པ་རྟ་བསྔགས་ལྡན་ཁྲིད་དེ་འོང་གིས་དེ་ལ་མ་དྲིས་ཀྱི་བར་དུ་ཧུར་འདུམས་མ་བྱེད་ཅིག་ཅེས་སྨྲས་ནས། དེ་དག་གིས་འདུན་པ་ལ་དྲིས་པ། ཀྱེ་འདུན་པ་གོས་ཀ་ཤི་པ་འདི་དག་གི་ཕྱིར་མི་འདིས་གཞོན་ནུ་བཀྲོངས་པར་མ་གྱུར་གྲང་། འདུན་པས་སྨྲས་པ། དེ་ལྟ་ནི་མ་ཡིན་ཏེ་འདིས་ཀྱང་གཞོན་ནུ་ལ་གོས་ངུར་སྨྲིག་རྣམས་ཕུལ་ལོ། །གཞོན་ནུས་ཀྱང་ན་བཟའ་ཀ་ཤི་པ་འདི་རྣམས་འདི་ལ་བྱིན་ནོ། །དེ་ནས་ལྷའི་བུ་དེས་དེ་དག་མཆོད་པའི་ཕྱིར་གོས་དེ་རྣམས་ལག་པ་གཉི་གས་སྤྱི་བོ་ལ་ཐོགས་ཏེ། དེ་ཉིད་ནས་ལྷའི་འཇིག་རྟེན་དུ་སོང་ངོ་། །དེ་དག་གིས་ཡང་འདུན་པ་ལ་དྲིས་པ། འདི་ལ་ཇི་སྙམ་དུ་སེམས། ཁོ་བོ་ཅག་ཤཱཀྱ་གཞོན་ནུ་ཟློག་ཏུ་དོང་ན་ནུས་སམ། དེས་སྨྲས་པ་མི་ནུས་སོ། །གཞོན་ནུ་ནི་བརྩོན་འགྲུས་དང་བརྟུལ་བ་བརྟན་པ་ཡིན་ཏེ། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་ང་སེར་སྐྱའི་གནས་ཀྱི་གྲོང་ཁྱེར་ཆེན་པོར་མི་འཇུག་གོ་ཞེས་དེ་སྐད་གསུང་བས་ཕྱིར་མི་ལྡོག་སྟེ། གཞོན་ནུས་ཇི་སྐད་གསུངས་པ་དེ་དེ་བཞིན་དུ་འགྱུར་རོ། །དེ་ཅིའི་ཕྱིར་ཞེ་ན། གཞོན་ནུ་ནི་བརྩོན་འགྲུས་དང་བརྟུལ་བ་བརྟན་པས་སླར་མི་ལྡོག་གོ །དེ་ནས་འདུན་པ་རྟ་བསྔགས་ལྡན་དང་རྒྱན་རྣམས་ཁྱེར་ཏེ་བཙུན་མོའི་འཁོར་གྱི་ནང་དུ་ཕྱིན་ཏོ། །དེ་ནས་རིང་བ་ཞིག་ལོན་པ་དང་། རྒྱན་དེ་དག་ཤཱཀྱ་གཞོན་ནུ་བཟང་པོ་དང་། མིང་ཆེན་དང་། མ་འགགས་པས་བཏེག་པ་དང་། སྲེད་མེད་ཀྱི་བུ་ཆེན་པོ་ལྟར་མཁྲེགས་པ་དང་། སྲེད་མེད་ཀྱི་བུ་ཕྱེད་ལྟར་མཁྲེགས་པའི་རྒྱན་དེ་རྣམས་དེ་དག་གིས་མ་ཐེག་གོ །གང་གི་ཚེ་དེ་དག་གང་གིས་ཀྱང་ཐེག་པར་མ་ནུས་པ་དེའི་ཚེ། སྐྱེ་དགུའི་བདག་མོ་ཆེན་མོ་གཽ་ཏ་མཱི་འདི་སྙམ་དུ་སེམས་ཏེ། བདག་གིས་ཇི་སྲིད་དུ་རྒྱན་འདི་དག་མཐོང་བ་དེ་སྲིད་དུ་བདག་གི་སྙིང་ལ་མྱ་ངན་དུ་འགྱུར་གྱིས། བདག་གིས་རྒྱན་འདི་དག་རྫིང་དུ་དོར་རོ་སྙམ་མོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་རྒྱན་དེ་དག་རྫིང་དུ་བོར་ཏེ། དེང་སང་དུ་ཡང་རྒྱན་གྱི་རྫིང་ཞེས་མིང་དུ་ཆགས་སོ། །དེ་ལ་འདི་སྐད་ཅེས་བྱ་སྟེ། གང་ཚེ་བྱང་ཆུབ་སེམས་དཔའ་མཁས་པ་དཔའ་བོ་བྱུང་། །དེ་ཚེ་སེར་སྐྱའི་གྲོང་ཁྱེར་བ་དག་མཐའ་དག་སད། །ཀུན་གྱི་སྙིང་ལ་གཞོན་ནུ་མལ་ན་ཉལ་སྙམ་
སེམས། །མགུ་ཞིང་རབ་ཏུ་དགའ་ནས་ཕན་ཚུན་ཚིག་ཀྱང་སྨྲ། །ས་འཚོ་མ་དང་དེ་བཞིན་བཙུན་མོའི་འཁོར་རྣམས་སད། །མལ་དུ་ལྟས་ན་བྱང་ཆུབ་སེམས་དཔའ་མ་མཐོང་ནས། །ཀྱི་ཧུད་བདག་བསླུས་བྱང་ཆུབ་སེམས་དཔའ་གར་བཞུད་ཅེས། །རྒྱལ་པོའི་ཁྱིམ་དུ་ངུད་མོའི་སྒྲ་ཡང་བྱུང་བར་གྱུར། །རྒྱལ་པོས་སྒྲ་དེ་ཐོས་ནས་ས་ལ་སྒྱེལ་གྱུར་ཏེ། །ཨེ་མ་ང་ཡི་བུ་གཅིག་པ་ཞེས་ངུད་མོ་ཕྱུང་། །དེ་ནས་དེ་ལ་བུམ་པའི་ཆུ་བླུགས་ཁྲུས་བྱས་ནས། །ཤཱཀྱ་མང་པོ་དག་གིས་དེ་ནི་དབུགས་ཀྱང་ཕྱུང་། །ས་འཚོ་མ་ཡང་མལ་ནས་ས་ལ་ལྷུང་བར་གྱུར། །སྐྲ་རྣམས་འབལ་ཞིང་རྒྱན་རྣམས་དག་ཀྱང་བཀྲོལ་བར་གྱུར། །སྡུག་པ་ཀུན་དང་བྲལ་བ་རིང་པོར་མི་ཐོགས་ཤེས། །འདྲེན་པས་བདག་ལ་སྔོན་གསུངས་ཀྱེ་མ་ལེགས་པར་གསུངས། །གཟུགས་ནི་གཟུགས་བཟང་ཤིན་ཏུ་དྲི་མེད་ཡན་ལག་སྤྲས། །གསལ་ཞིང་རྣམ་དག་འགྲོ་བ་རྣམས་ཀྱི་ཡིད་འོང་སྡུག །དཔལ་ཡོན་ལྡན་པ་བསྔགས་པ་ལྷ་མིས་མཆོད་པའི་འོས། །བདག་ནི་མལ་དུ་བོར་ཏེ་ཁྱོད་ནི་གང་དུ་བཞུད། །ཡོན་ཏན་མངའ་བའི་བྱང་ཆུབ་སེམས་དཔའ་མ་མཐོང་བར། །སྐོམ་ཡང་མི་འཚལ་རྒྱགས་པ་རྣམས་ཀྱིས་རྒྱགས་མི་བགྱི། །ས་ལ་ཉལ་ཞིང་རལ་པ་རྣམས་ཀྱང་ཐོགས་པར་བགྱི། །ཁྲུས་བགྱི་སྤངས་ཏེ་བརྟུལ་ཞུགས་དཀའ་ཐུབ་སྤྱད་པར་བགྱི། །སྐྱེད་མོས་ཚལ་ཀུན་ལོ་མ་མེ་ཏོག་འབྲས་མ་མཆིས། །རྣམ་དག་སེ་མོ་དོ་ཡང་མུན་རྡུལ་ཕྱག་དར་འདྲ། །མི་མཆོག་དམ་པ་ཁྱོད་ཀྱིས་སྤངས་པར་གང་གྱུར་པའི། །གྲོང་ཁྱེར་ཁྱིམ་རྣམས་མཛེས་པ་མ་ལགས་འབྲོག་དང་མཚུངས། །ཀྱི་ཧུད་གླུ་དབྱངས་རབ་ཏུ་སྙན་པའི་སྒྲ་སྐད་ཅན། །ཀྱི་ཧུད་ལྷུག་ལྷུག་པ་ཡི་རྒྱན་ཐོགས་བཙུན་མོའི་འཁོར། །ཀྱི་ཧུད་གསེར་གྱི་དྲ་བས་ཁྱབ་པའི་བར་སྣང་ཡང་། །ཡོན་ཏན་ལྡན་དང་བྲལ་བས་ཕྱིན་ཆད་མི་བལྟའོ། །སྲུ་མོ་དེ་ཡང་ཤིན་ཏུ་སྡུག་བསྔལ་ཐོབ་གྱུར་ཅིང་། །ཤཱཀྱའི་བུ་མོ་མ་ངུ་ཤིག་ཅེས་དབུགས་ཀྱང་འབྱིན། །ང་ནི་འཇིག་རྟེན་དག་ན་རྒ་ཤི་མཐར་བྱེད་ཅེས། །མི་མཆོག་དམ་པ་དེས་ནི་སྔོན་ཡང་སྨྲས་པ་ཡིན། །དྲང་སྲོང་ཆེན་པོ་དགེ་བ་སྟོང་དག་སྤྱད་པ་དེ། །ནམ་ཕྱེད་ནས་ནི་དཔག་ཚད་དྲུག་ཏུ་སོང་གྱུར་ནས། །འདུན་པ་དེ་ལ་རྟ་མཆོག་དང་
ནི་རྒྱན་རྣམས་གཏད། །འདུན་པ་འདི་དག་ཁྱེར་ལ་སེར་སྐྱའི་གྲོང་སོང་ཤིག །ཡབ་དང་ཡུམ་དག་ལ་ཡང་ང་ཡི་ཚིག་གིས་ནི། །གཞོན་ནུ་སོང་གིས་སླར་ཞིང་ཐུགས་ངན་མ་མཛད་ཅིག །བྱང་ཆུབ་སངས་རྒྱས་ནས་ནི་སླར་འདིར་མཆི་བར་བགྱི། །ཆོས་རྣམས་གསན་ནས་ཐུགས་ཀྱང་ཞི་བར་འགྱུར་ཞེས་སྨྲོས། །འདུན་པ་ངུ་བཞིན་འདྲེན་པ་ལ་ནི་སླར་སྨྲས་པ། །འདུན་པ་ལེགས་ལྡན་བྱང་ཆུབ་སེམས་དཔའ་གར་ཁྲིད་ཅེས། །མི་མཆོག་གཉེན་གྱི་ཚོགས་རྣམས་བདག་ལ་རྡེག་འགྱུར་གྱིས། །བདག་ལ་ནུས་པ་མ་མཆིས་སྟོབས་དང་མཐུ་མ་མཆིས། །བྱང་ཆུབ་སེམས་དཔས་སླར་སྨྲས་འདུན་པ་མ་འཇིགས་ཤིག །ང་ཡི་གཉེན་གྱི་ཚོགས་རྣམས་དགའ་བར་གྱུར་ནས་ནི། །ཁྱོད་ལ་སྟོན་པའི་འདུ་ཤེས་རྟག་ཏུ་བསྒོམ་གྱུར་ཏེ། །ང་ལ་བྱམས་པ་བཞིན་དུ་ཁྱོད་ལའང་བྱམས་པར་འགྱུར། །འདུན་པ་རྟ་མཆོག་དང་ནི་རྒྱན་རྣམས་ཁྱེར་ནས་སུ། །མི་མཆོག་དམ་པ་དེ་ཡི་སྐྱེད་མོས་ཚལ་དུ་ཕྱིན། །སྐྱེད་མོས་ཚལ་གྱི་སྲུངས་མ་དགའ་བའི་ཤུགས་སྐྱེས་ནས། །ཀུན་ཏུ་དགའ་བའི་སྒྲ་ནི་ཤཱཀྱ་རྣམས་ལ་སྨྲས། །གཞོན་ནུ་འདི་ཡི་རྟ་མཆོག་དང་ནི་འདུན་པ་ཡང་། །སྐྱེད་མོས་ཚལ་དུ་ཕྱིན་གྱིས་ཐུགས་ངན་མ་མཛད་ཅིག །རྒྱལ་པོས་དེ་སྐད་ཐོས་ནས་ཤཱཀྱས་བསྐོར་ནས་ནི། །རབ་ཏུ་དགའ་བའི་ཤུགས་སྐྱེས་སྐྱེད་མོས་ཚལ་དུ་ཕྱིན། །ས་འཚོས་བྱང་ཆུབ་སེམས་དཔའ་བློ་གྲོས་བརྟན་རིག་ནས། །ཚིག་དེ་ལ་ནི་ཡིད་མ་ཆེས་ཏེ་དགར་མ་གྱུར། །གཞོན་ནུ་བྱང་ཆུབ་མ་ཐོབ་བར་དུ་ཕྱིར་འདིར་ཡང་། །བྱོན་ཅིང་ལྡོག་པར་འགྱུར་བ་དེ་ནི་གནས་མ་ཡིན། །རྒྱལ་པོས་རྟ་མཆོག་དང་ནི་འདུན་པ་དེ་མཐོང་ནས། །ངུད་མོ་བཏབ་སྟེ་ས་ཡི་སྟེང་དུ་འགྱེལ་བར་གྱུར། །ཀྱི་ཧུད་ངའི་བུ་གླུ་དང་རོལ་མོ་སྒྲ་དབྱངས་མཁས། །རྒྱལ་སྲིད་ཐམས་ཅད་བོར་ཏེ་ཁྱོད་ནི་གང་དུ་སོང་། །འདུན་པ་ཁྱོད་ཀྱིས་ང་ལ་འདིར་ནི་ལེགས་པར་སྨྲོས། །བྱང་ཆུབ་སེམས་དཔའ་གར་སོང་སྦྱོར་བ་ཅི་འདྲ་ཞིག །སྒོ་ནི་སུ་ཡིས་ཕྱེ་ཞིང་གང་གིས་ཁྲིད་པར་གྱུར། །ལྷ་ཚོགས་རྣམས་ཀྱིས་དེ་ལ་མཆོད་པ་ཇི་ལྟར་བྱས། །འདུན་པས་སྨྲས་པ་རྒྱལ་པོའི་དབང་པོ་བདག་ལ་གསོན། །དགུང་ཕྱེད་གྲོང་ཁྱེར་བྱིས་པ་རྒན་པོ་གཉིད་ལོག་ནས། །བྱང་ཆུབ་སེམས་དཔའ་
འཇམ་དབྱངས་བདག་ལ་འདི་སྐད་དུ། །འདུན་པ་རྟ་རྒྱལ་ང་ལ་མྱུར་དུ་བྱིན་ཞེས་གསུང་། །བདག་གིས་སྐྱེས་པའི་ཚོགས་དང་བུད་མེད་ཚོགས་ཀྱང་བསླང་། །དེ་དག་ལོག་ཅིང་རབ་ཏུ་ལོག་པས་ཚིག་མ་ཐོས། །བདག་ནི་ངུ་ཞིང་བདག་གིས་ཆིབས་ཀྱི་རྒྱལ་པོ་ཕུལ། །ཕན་པ་མཛད་པ་གང་དུ་དགྱེས་པར་གཤེགས་ཞེས ཤེས་བགྱིས། །བརྒྱ་བྱིན་གྱིས་ནི་འཁྲུལ་འཁོར་ལྡན་པའི་ཆབ་སྒོ་ཕྱེ། །འཇིག་རྟེན་སྐྱོང་བ་བཞིས་ནི་ཆིབས་ཀྱི་རྐང་ལག་བཏེག །དཔའ་བོ་བཅིབས་ནས་སྟོང་གསུམ་ལམ་རྣམས་རབ་ཏུ་གཡོས། །ནམ་མཁའ་ཤིན་ཏུ་ཡངས་པ་འདི་ལས་གཤེགས་གྱུར་ཏེ། །འོད་ནི་རབ་ཏུ་བཏང་བས་མུན་པ་མུན་ནག་བསལ། །མེ་ཏོག་བབ་ཅིང་སིལ་སྙན་བརྒྱ་དག་སྒྲ་ཡང་བྱུང་། །ལྷ་དང་དེ་བཞིན་ལྷ་ཡི་བུ་མོ་རྣམས་ཀྱིས་བསྟོད། །ནམ་མཁའ་ལས་ནི་ལྷ་ཚོགས་རྣམས་ཀྱིས་བསྐོར་ཏེ་གཤེགས། །འདུན་པ་རྟ་མཆོག་དང་ནི་རྒྱན་རྣམས་ཁྱེར་ནས་སུ། །དེ་ནི་ངུ་ཞིང་བཙུན་མོའི་འཁོར་དུ་ཕྱིན་པ་དང་། །ས་འཚོས་འདུན་པ་དེ་དང་རྟ་མཆོག་མཐོང་གྱུར་ནས། །རབ་ཏུ་བརྒྱལ་བར་གྱུར་ཏེ་ས་ཡི་སྟེང་དུ་སྒྱེལ། །བུད་མེད་ཚོགས་མང་ཐམས་ཅད་རབ་ཏུ་བརྩོན་པར་ནི། །ཆུ་དག་བླངས་ཤིང་ཤཱཀྱའི་བུ་མོ་འཁྲུ་བར་བྱེད། །མྱ་ངན་རྙེད་པས་འཆི་བའི་དུས་བྱེད་གྱུར་དུ་འོང་། །ཕངས་པ་གཉིས་དང་བྲལ་བར་འགྱུར་དུ་འོང་སྙམ་བྱེད། །ཤཱཀྱའི་བུ་མོ་སྡུག་བསྔལ་གྱུར་པ་མཐུ་བསྐྱེད་ནས། །རྟ་ཡི་རྒྱལ་པོ་རྟ་མཆོག་དེ་ཡི་མགུལ་ནས་འཇུས། །སྔོན་ཆད་དགའ་བས་རྩེ་བ་དག་ཀྱང་དྲན་བྱས་ནས། །མྱ་ངན་གྱུར་ཅིང་སྣ་ཚོགས་ཚིག་ཀྱང་རབ་ཏུ་སྨྲ། །ཀྱི་ཧུད་བདག་གི་དགའ་སྐྱེད་ཀྱི་ཧུད་བདག་གི་མི་མཆོག་དྲི་མེད་ཟླ་བའི་ཞལ་མངའ་བ། །ཀྱི་ཧུད་བདག་གི་གཟུགས་མཆོག་གཟུགས་ཅན་ཀྱི་ཧུད་བདག་གི་མཚན་མཆོག་དྲི་མེད་གཟི་བརྗིད་ལྡན། །ཀྱི་ཧུད་བདག་གི་ཡན་ལག་མ་སྨད་ལེགས་པར་འཁྲུངས་པ་རིམ་གྱིས་འཕགས་པ་མཉམ་མེད་པ། །ཀྱི་ཧུད་བདག་གི་ཡོན་ཏན་མཆོག་ལྡན་ལྷ་མིས་མཆོད་པ་ཐུགས་རྗེ་ཆེན་པོ་མཆོག་ལྡན་པ། །ཀྱི་ཧུད་བདག་གི་སྟོབས་ལྡན་སྲེད་མེད་བུ་ཡི་མཐུ་དང་ལྡན་པ་དགྲ་ཡི་ཚོགས་བཅོམ་པ། །ཀྱི་ཧུད་བདག་གི་ཤིན་ཏུ་འཇམ་དབྱངས་ཀ་ལ་པིང་ཀའི་སྒྲ་སྐད་ཚངས་
དབྱངས་སྙན་ལྡན་པ། །ཀྱི་ཧུད་བདག་གི་གྲགས་པ་མཐའ་ཡས་བསོད་ནམས་བརྒྱས་འཕགས་བསོད་ནམས་རྒྱ་ཆེན་མངའ་བ་པོ། །ཀྱི་ཧུད་བདག་གི་བསྔགས་པ་མཐའ་ཡས་ཡོན་ཏན་ཚོགས་བརྒྱན་དྲང་སྲོང་ཚོགས་རྣམས་དགའ་མཛད་པ། །ཀྱི་ཧུད་བདག་གི་ནགས་མཆོག་བུང་བ་སྒྲ་འབྱིན་ལུམ་བི་ནི་དེར་བལྟམ་པ་ལེགས་བལྟམ་པ། །ཀྱི་ཧུད་བདག་གི་སྒྲ་གྲགས་ལྷ་མི་རྣམས་ཀྱིས་མངོན་པར་མཆོད་པའི་ཡེ་ཤེས་སྡོང་པོ་ཆེ། །ཀྱི་ཧུད་བདག་གི་རོ་བྲོ་དམ་པ་བིམ་པའི་སྒྲོས་ཅན་པད་མའི་སྤྱན་མངའ་གསེར་མདོག་འདྲ། །ཀྱི་ཧུད་བདག་གི་ཤིན་ཏུ་རྣམ་དག་ཚེམས་ལྡན་བ་ཞོ་བ་མོ་ལྟ་བུའི་ཚེམས་ལྡན་པ། །ཀྱི་ཧུད་བདག་གི་ཤངས་ལེགས་སྨིན་ལེགས་སྨིན་མཚམས་བར་ན་དྲི་མེད་མཛོད་སྤུ་གནས་པ་པོ། །ཀྱི་ཧུད་བདག་གི་དཔུང་མགོ་རབ་ཟླུམ་གཞུ་འདྲའི་རྐེད་པ་ཨེ་ནེའི་བྱིན་པ་རྐེད་པ་ཟླུམ། །ཀྱི་ཧུད་བདག་གི་གླང་པོའི་སྣ་འདྲ་བརླ་ལྡན་ཕྱག་ཞབས་རྣམ་དག་མཛེས་པའི་སེན་མོ་ཅན། །དེ་ཡི་རྒྱན་རྣམས་འདི་དག་བསོད་ནམས་དག་གིས་བྱས་པ་རྒྱལ་པོ་རབ་ཏུ་དགའ་བྱེད་པ། །ཀྱི་ཧུད་བདག་གི་གླུ་དང་དབྱངས་སྒྲ་དམ་པ་མེ་ཏོག་བྱུག་པ་བཟང་པོའི་དུས་བཟང་བ། །ཀྱི་ཧུད་བདག་གི་མེ་ཏོག་སྤོས་རྣམས་གླུ་ལེན་དག་དང་བཙུན་མོའི་འཁོར་ནི་དགའ་བྱེད་པ། །ཀྱི་ཧུད་བསྔགས་ལྡན་ལེགས་སྐྱེས་ང་ཡི་ཁྱིམ་ཐབ་གྲོགས་པོ་ཡིན་ན་ཁྱོད་ཀྱིས་གང་དུ་ཁྲིད། །ཀྱི་ཧུད་འདུན་པ་སྙིང་རྗེ་མེད་པ་མི་ཡི་དམ་པ་བཞུད་ཚེ་སྒྲོན་ཅིང་སློང་མ་ཕོད། །དོ་མོད་གྲོང་ཁྱེར་དམ་པ་འདི་ནས་མི་ཡི་ཁ་ལོ་སྒྱུར་བ་ཐུགས་རྗེ་ལྡན་གཤེགས་ཏེ། །ཕན་པ་མཛད་པ་འདི་ནི་གཤེགས་ཞེས་སྐབས་དེར་ཚིག་གཅིག་ཙམ་ཞིག་ཅི་ཡི་ཕྱིར་མ་སྨྲས། །ཕན་པ་མཛད་པ་ཇི་ལྟར་གཤེགས་ཤིང་རྒྱལ་པོའི་ཕོ་བྲང་འདི་ནས་སུ་ཡི་ཕྱུང་བ་བྱས། །གང་གི་ཕྱོགས་གཤེགས་ནགས་ཚལ་གེལ་བའི་ལྷ་མོ་དེ་ཡི་གྲོགས་སུ་གྱུར་པ་དཔལ་ཡོན་ལྡན། །འདུན་པ་ཁོ་མོ་ཤིན་ཏུ་སྡུག་བསྔལ་གཏེར་བསྟན་ནས་ནི་མིག་ཕྱུང་འདྲ་བས་མིག་བྱིན་ཅིག །འདུན་པ་རྒྱལ་བ་ཀུན་གྱིས་ཕ་དང་མ་དག་མཆོད་པའི་འོས་ཞེས་རྟག་ཏུ་བསྔགས་མཛད་ན། །དེ་དག་རྣམས་ཀྱང་སྤངས་ཏེ་བྱུང་ན་བུད་མེད་འདོད་པའི་དགའ་བ་འདི་ལྟ་སྨོས་ཅི་དགོས། །ཀྱི་ཧུད་སྡུག་པ་རྣམས་དང་བྲལ་བ་གར་ལ་
ལྟ་བའི་རང་བཞིན་འདྲ་སྟེ་རྟག་མ་ཡིན། །བྱིས་པ་འདུ་ཤེས་ཀྱིས་བཟུང་ལྟ་བ་ཕྱིན་ཅི་ལོག་པས་སྐྱེ་དང་འཆི་འཕོ་གནས་པར་གྱུར། །དེ་ཡིས་སྔོན་ཆད་རྒ་ཤི་ལྡན་པའི་འདུས་བྱས་དག་ལ་གྲོགས་པོ་འགའ་ཡང་མེད་ཅེས་བསྟན། །ཁྱོད་ཀྱི་དགོངས་པ་ཡོངས་སུ་རྫོགས་ནས་ཤིང་མཆོག་དྲུང་དུ་བྱང་ཆུབ་དམ་པ་མཆོག་ཐོབ་གྱུར། །རྡུལ་མེད་བྱང་ཆུབ་སངས་རྒྱས་ནས་ནི་གྲོང་ཁྱེར་དམ་པ་འདིར་ནི་སླར་ཡང་གཤེགས་སུ་གསོལ། །འདུན་པ་དེ་ཡང་མཆོག་ཏུ་ཡིད་མི་དགའ་ཞིང་ས་འཚོ་མ་ཡི་ཚིག་ནི་ཐོས་གྱུར་ནས། །དེ་ནི་ང་རོ་འཐོན་ཅིང་ཚིག་ཏུ་སྨྲས་པ་ས་འཚོ་མ་ཁྱོད་བདག་ཚིག་ལེགས་པར་གསོན། །ནམ་གྱི་གུང་ཐུན་བུད་མེད་ཚོགས་རྣམས་ཐམས་ཅད་རབ་ཏུ་གཉིད་ཀྱིས་ལོག་སྟེ་དབེན་གྱུར་པ། །དེ་ཡི་ཚེ་ན་བསོད་ནམས་བརྒྱས་འཕགས་དེ་ཡིས་བདག་ལ་བསྔགས་ལྡན་ང་ལ་བྱིན་ཞེས་གསུང་། །དེ་སྐད་ཚིག་ཐོས་ནས་ནི་དེ་མ་ཐག་ཏུ་བདག་གིས་ཁྱོད་ནི་གཟིམས་མལ་གཟིམས་ལ་བལྟས། །དེ་ཚེ་ཁྱོད་ཀྱི་སྡུག་པ་འདི་ནི་གཤེགས་ཀྱིས་ས་འཚོ་བཞེངས་ཞེས་སྒྲ་སྐད་ཆེན་པོ་ཕྱུང་། །ལྷ་ཡིས་ཚིག་དེ་བཀག་པར་གྱུར་པས་བུད་མེད་རྣམས་ལས་འགའ་ཙམ་ཞིག་ཀྱང་སད་མ་གྱུར། །བདག་ནི་རབ་ཏུ་ངུ་ཞིང་རྟ་ཡི་རྒྱལ་པོ་བརྒྱན་པ་བགྱིས་ནས་མི་མཆོག་དེ་ལ་ཕུལ། །བསྔགས་ལྡན་དྲག་ཤུལ་ཅན་གྱི་གཟི་ལྡན་སྒྲ་བྱུང་དེ་ཡི་སྒྲ་ནི་རྒྱང་གྲགས་ཙམ་ཏུ་གྲགས། །འོན་ཀྱང་ལྷ་ཡིས་གཉིད་ཀྱིས་ལོག་པར་བགྱིས་པས་གྲོང་ཁྱེར་པ་ལས་འགའ་ཡང་སད་མ་གྱུར། །གསེར་དང་དངུལ་དང་ནོར་བུ་རྣམས་ཀྱིས་གཡོགས་པའི་ས་ལ་བསྔགས་ལྡན་རྐང་ལག་རབ་ཏུ་བརྡབས། །དེ་ལས་སྙན་དང་འཇིགས་དང་མཛེས་པའི་སྒྲ་བྱུང་འོན་ཀྱང་མི་ལས་འགའ་ཙམ་སད་མ་གྱུར། །དེ་ཡི་བར་སྐབས་སྐར་མ་རྒྱལ་དང་ལྡན་གྱུར་ཟླ་བ་སྐར་མ་དག་ཀྱང་མཁའ་ལ་གནས། །མཁའ་ལས་ལྷ་རྣམས་བྱེ་བ་ཐལ་མོ་སྦྱར་ཏེ་བཏུད་ནས་ཕྱག་ཀྱང་རབ་ཏུ་འཚལ། །གནོད་སྦྱིན་སྲིན་པོ་ཚོགས་རྣམས་ཉེ་བར་གནས་ཤིང་འཇིག་རྟེན་སྐྱོང་བ་རྫུ་འཕྲུལ་ཆེ་ལྡན་བཞིས། །པད་མའི་ཟེ་བ་ལྟ་བུར་རྣམ་དག་དྲི་མེད་ལག་པས་བསྔགས་ལྡན་གྱི་ནི་རྐང་ལག་བཏེག །བསོད་ནམས་གཟི་བརྗིད་བརྒྱས་འཕགས་དེ་ཡང་
ཀུ་མུ་ད་དང་པར་ཤ་ལྟ་བུ་དེ་ལ་བཅིབས། །ས་ནི་རྣམ་པ་དྲུག་ཏུ་རབ་ཏུ་གཡོས་ཤིང་སངས་རྒྱས་ཞིང་རྣམས་དྲི་མེད་འོད་ཀྱིས་ཁྱབ། །བདེ་སོགས་ཁྱིམ་ཐབ་བརྒྱ་བྱིན་ལྷ་ཡི་གཙོ་བོ་ཉིད་ཀྱིས་དེ་ཚེ་ཆབ་སྒོ་དབྱེ་བ་བགྱིས། །དེ་ནི་བྱེ་བ་ཁྲག་ཁྲིག་ལྷ་ཡིས་མདུན་དུ་བདར་ཏེ་ལྷ་དང་ཀླུ་ཡིས་མཆོད་ནས་གཤེགས། །བསྔགས་ལྡན་གྱིས་ནི་འདུ་ཤེས་ཙམ་གྱིས་དེ་ན་འཇིག་རྟེན་མགོན་པོ་མཁའ་ལས་བཀུར་བར་ཤེས། །ལྷ་དང་ལྷ་མ་ཡིན་ཚོགས་དབང་པོར་བཅས་པ་དེ་དག་བཅིབས་ཏེ་བདེ་བར་གཤེགས་པ་གཤེགས། །ལྷ་ཡི་བུ་མོ་གླུ་དབྱངས་མཁས་པ་རྣམས་ཀྱང་བྱང་ཆུབ་སེམས་དཔའི་ཡོན་ཏན་རབ་བརྗོད་ཅིང་། །དེ་དག་བསྔགས་ལྡན་ལ་ཡང་སྟོབས་འཐུད་བྱེད་ཅིང་སྙན་ལ་ཡིད་དུ་འོང་བའི་སྒྲ་ཡང་འབྱིན། །བསྔགས་ལྡན་འཇིག་རྟེན་འདྲེན་པ་མྱུར་བ་མྱུར་བར་ཁྱེར་ལ་སྐྱོ་བ་མི་དགའ་མ་སྐྱེད་ཅིག །འཇིག་རྟེན་མགོན་པོ་མཉེས་པར་བྱས་ན་ཁྱོད་ལ་འཇིགས་དང་ངན་སོང་ངན་འགྲོ་མེད་པར་འགྱུར། །ལྷ་རྣམས་རེ་རེ་ཞིང་ཡང་བདག་ལ་འཇིག་རྟེན་མགོན་པོ་བཅིབས་པར་མངོན་དུ་དགའ་བར་གྱུར། །ཡུལ་ས་འདི་ན་བྱེ་བ་ལྷ་ཡི་རྐང་པ་དག་གིས་ནོན་པར་མ་གྱུར་ཅུང་ཟད་མེད། །བསྔགས་ལྡན་ནམ་མཁའི་སྐབས་ན་སྣ་ཚོགས་སྤྲས་ཤིང་མཛེས་པའི་ལམ་གནས་རིན་ཆེན་སྟེགས་བུ་ནི། །རྣམ་པ་སྣ་ཚོགས་དག་གིས་བརྒྱན་ཅིང་ལྷ་ཡི་བདུག་པ་སྙིང་པོ་མཆོག་བདུགས་འདི་ལ་ལྟོས། །བསྔགས་ལྡན་དགེ་བའི་ལས་འདིས་སུམ་ཅུ་རྩ་གསུམ་ལྷ་གནས་ཤིན་ཏུ་ལེགས་པར་སྤྲུལ་པ་དེར། །ལྷ་ཡི་བུ་མོས་བསྐོར་ཅིང་མདུན་གྱིས་བལྟས་ལ་ལྷ་ཡི་འདོད་པའི་དགའ་བས་དགའ་བར་གྱིས། །ལེགས་པ་ས་འཚོ་མ་ཁྱོད་ཕྱིར་ཞིང་མ་བཤུམས་དགྱེས་པར་མཛོད་ཅིང་མཆོག་ཏུ་དགྱེས་པར་མཛོད། །མི་མཆོག་བྱང་ཆུབ་བརྙེས་ནས་ལྷ་ཡིས་མདུན་དུ་བདར་བ་རིང་པོར་མི་ཐོགས་གཟིགས་པར་འགྱུར། །ས་འཚོ་མི་རྣམས་གང་དག་ལེགས་པའི་ལས་བགྱིས་དེ་དག་རྟག་ཏུ་བཤུམས་པར་བགྱི་མ་ལགས། །དེ་ནི་བསོད་ནམས་གཟི་བརྗིད་བརྒྱས་འཕགས་ལགས་ཀྱིས་དགྱེས་པར་མཛོད་ལ་བཤུམ་མོ་མ་མཛད་ཅིག །རྒྱལ་པོ་མངོན་པར་བྱུང་བ་དེ་ན་ལྷ་དང་མིས་མཆོད་པ་ཡི་བཀོད་པ་གང་ལགས་པ། །བཀོད་པ་དེ་ནི་ས་འཚོ་བདག་
གིས་དགུང་བདུན་བར་དུ་བརྗོད་ཀྱང་རྫོགས་པར་བརྗོད་མི་ནུས། །ཁྱོད་ཀྱིས་འགྲོ་ལ་ཕན་མཛད་པ་ལ་བསྙེན་བཀུར་མཛད་པས་བརྙེས་མཆོག་བསམ་གྱིས་མི་ཁྱབ་བརྙེས། །བདག་གིས་བསམས་ན་ཁྱོད་ཀྱང་མི་ཡི་དམ་པ་དེ་ནི་ཅི་འདྲ་དེ་འདྲར་འགྱུར་སྙམ་བགྱིད། །མངོན་པར་འབྱུང་བའི་ལེའུ་སྟེ་བཅྭ་ལྔ་པའོ།། །།