ཉི་ཤུ་རྩ་བཞི་པ། ག་གོན་དང་བཟང་པོའི་ལེའུ།
དགེ་སློང་དག་དེ་ལྟར་མངོན་པར་རྫོགས་པར་སངས་རྒྱས་པའི་དེ་བཞིན་གཤེགས་པ་ལྷ་རྣམས་ཀྱིས་བསྟོད་ཅིང་སྐྱིལ་མོ་ཀྲུང་མ་བཤིག །སྤྱན་མི་འཛུམས་པར་ཤིང་གི་རྒྱལ་པོ་ལ་གཟིགས་ཤིང་བསམ་གཏན་དང་དགའ་བའི་ཟས་ཀྱི་བདེ་བ་མྱོང་བར་བྱང་ཆུབ་ཀྱི་ཤིང་དྲུང་དུ་ཞག་བདུན་འདས་པར་གྱུར་ཏོ། །དེ་ནས་ཞག་བདུན་འདས་པ་དང་། འདོད་པ་ན་སྤྱོད་པའི་ལྷའི་བུ་རྣམས་སྤོས་ཆུའི་བུམ་པ་ཁྲི་ཐོགས་ཏེ། དེ་བཞིན་གཤེགས་པ་ག་ལ་བ་དེར་ལྷགས་སོ། །གཟུགས་ན་སྤྱོད་པའི་ལྷའི་བུ་རྣམས་ཀྱང་སྤོས་ཆུའི་བུམ་པ་ཁྲི་ཐོགས་ཏེ། དེ་བཞིན་གཤེགས་པ་ག་ལ་བ་དེར་དོང་སྟེ་ལྷགས་ནས། བྱང་ཆུབ་ཀྱི་ཤིང་དང་། དེ་བཞིན་གཤེགས་པ་ལ་སྤོས་ཆུས་བཀྲུས་སོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་བགྲང་བ་ལས་འདས་པ་དག་གིས་དེ་བཞིན་གཤེགས་པའི་སྐུ་ལ་ཕོག་པའི་སྤོས་ཆུ་དེས་རང་རང་གི་ལུས་ལ་བསྐུས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་སེམས་བསྐྱེད་དོ། །ལྷའི་བུ་ལ་སོགས་པ་དེ་དག་རང་རང་གི་གནས་སུ་ཕྱིན་ཀྱང་སྤོས་ཆུ་དེ་དང་མ་བྲལ་བར་གྱུར་ཏེ། སྤོས་གཞན་ལ་འདོད་པ་མི་སྐྱེད་དོ། །དེ་དག་དེ་བཞིན་གཤེགས་པ་ལ་གུས་པར་ཡིད་ལ་བྱ་བ་ལས་སྐྱེས་པའི་དགའ་བ་དང་། མཆོག་ཏུ་དགའ་བ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དགེ་སློང་དག་དེ་ནས་ལྷའི་བུ་ཀུན་ནས་མེ་ཏོག་ཅེས་བྱ་བ་འཁོར་དེ་ཉིད་དུ་འདུས་པར་གྱུར་པ་དེས་དེ་བཞིན་གཤེགས་པའི་ཞབས་གཉིས་ལ་གཏུགས་ཏེ། ཐལ་མོ་སྦྱར་ནས་དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཏིང་ངེ་འཛིན་གང་དང་ལྡན་པས་དེ་བཞིན་གཤེགས་པ་ལ་དགུང་བདུན་དུ་སྐྱིལ་མོ་ཀྲུང་མ་བཤིག་པར་བཞུགས་པའི་ཏིང་ངེ་འཛིན་དེའི་མིང་ཅི་ཞེས་བགྱི། དགེ་སློང་དག་དེ་སྐད་ཅེས་གསོལ་པ་དང་། དེ་བཞིན་གཤེགས་པ་དེས་ལྷའི་བུ་དེ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ་ཏིང་ངེ་འཛིན་འདིའི་མིང་ནི་དགའ་བའི་ཟས་བཀོད་པ་ཞེས་བྱ་སྟེ། ཏིང་ངེ་འཛིན་འདི་དང་ལྡན་པས་དེ་བཞིན་གཤེགས་
པ་ཞག་བདུན་དུ་སྐྱིལ་མོ་ཀྲུང་མ་བཤིག་པར་བཞུགས་སོ། །དགེ་སློང་དག་དེ་ནས་ལྷའི་བུ་ཀུན་ནས་མེ་ཏོག་གིས་དེ་བཞིན་གཤེགས་པ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཞབས་ནི་འཁོར་ལོས་ཁྱབ་པ་པོ། །པད་འདབ་རྡུལ་མེད་སྟོང་གཟི་ལྡན། །ལྷ་ཡི་ཅོད་པན་ཞབས་གཏུགས་པ། །དཔལ་སྟུག་ཞབས་ལ་ཕྱག་འཚལ་ལོ། །བདེ་གཤེགས་ཞབས་ལ་ཕྱག་འཚལ་ནས། །དེ་ཚེ་ལྷ་བུ་དེ་སེམས་དགའ། །ལྷ་མིན་རབ་ཏུ་ཞི་བྱེད་པ། །ཡིད་གཉིས་སེལ་བའི་ཚིག་འདི་སྨྲས། །ཤཱཀྱའི་རིགས་ལ་དགྱེས་སྐྱེད་པ། །ཆགས་སྡང་གཏི་མུག་མཐར་འབྱིན་པ། །ཞུས་པ་རྣམས་ཀྱང་མཐར་འབྱིན་པ། །ལྷ་མིའི་དོགས་པ་བསལ་དུ་གསོལ། །དཔག་མེད་ཐམས་ཅད་མཁྱེན་པ་ཉིད། །སངས་རྒྱས་སྟོབས་བཅུ་ཅི་སླད་དུ། །རྒྱལ་བ་དོག་སའི་སྙིང་པོར་ནི། །དགུང་བདུན་སྐྱིལ་མོ་ཀྲུང་མ་བཤིག །འདབ་བརྒྱ་རྒྱས་པའི་སྤྱན་མངའ་བ། །ཅི་ཞིག་གཟིགས་ན་དགུང་བདུན་དུ། །མི་ཡི་སེང་གེ་རྣམ་དག་སྤྱན། །སྤྱན་མི་འཛུམས་པར་གཟིགས་པ་མཛད། །གང་གིས་ཤིང་རྒྱལ་དྲུང་དུ་ནི། །སྐྱིལ་ཀྲུང་མ་བཤིག་དགུང་བདུན་བཞུགས། །སྨོན་ལམ་འདི་ནི་ཁྱོད་ཀྱི་འམ། །སྨྲ་བའི་སེང་གེ་ཀུན་གྱི་ལགས། །ཚེམས་ནི་མཉམ་ཞིང་རྣམ་དག་པ། །སྟོབས་བཅུའི་ཞལ་ནི་དྲི་རབ་གདའ། །མ་ནོར་ལེགས་པར་བཀའ་སྩོལ་ཏེ། །ལྷ་དང་མི་རྣམས་དགའ་བར་མཛོད། ། ཟླ་འདྲའི་ཞལ་གྱིས་བཀའ་སྩལ་པ། །ངས་བཤད་ལྷ་ཡི་བུ་ཉོན་ཅིག །ངས་ནི་དྲིས་པ་དེ་ཡི་ལན། །ཅུང་ཟད་ཙམ་ཞིག་བཤད་པར་བྱ། །དཔེར་ན་རྒྱལ་པོ་ཕྱོགས་གང་དུ། །གཉེན་གྱི་ཚོགས་ཀྱིས་དབང་བསྐུར་བ། །ཞག་བདུན་བར་དུ་ས་ཕྱོགས་དེ། །མི་འདོར་རྒྱལ་པོའི་ཆོས་ཉིད་དོ། །དེ་བཞིན་སྟོབས་བཅུ་མངའ་བ་ཡང་། །གང་ཚེ་སྨོན་རྫོགས་དབང་བསྐུར་བ། །ས་ཡི་སྙིང་པོར་ཞག་བདུན་དུ། །རྒྱལ་བ་སྐྱིལ་མོ་ཀྲུང་མི་འཇིག །དཔེར་ན་དཔའ་བོ་དགྲ་ཚོགས་རྣམས། །མ་ལུས་ཕམ་བྱས་ལྟ་བ་ལྟར། །བྱང་ཆུབ་སྙིང་པོར་སངས་རྒྱས་ཀྱང་། །ཉོན་མོངས་བཅོམ་ནས་གཟིགས་པ་མཛད། །གཏི་མུག་བྱུང་བའི་འདོད་དང་ཁྲོ། །དེ་དག་འགྲོ་བའི་དགྲ་འདྲ་སྟེ། །ཆོམ་པོ་ཆས་ནི་བཟང་འདྲ་བ། །དེ་དག་མ་ལུས་ངས་འདིར་
བཤིག །ངས་འདིར་ང་རྒྱལ་རྣམ་དགུ་དང་། །གནས་མེད་རློམ་སེམས་རབ་ཏུ་བཅོམ། །ཟག་པ་ཐམས་ཅད་རབ་ཏུ་སྤངས། །ང་ཡི་ཡེ་ཤེས་དམ་པ་སྐྱེས། །ངས་འདིར་སྲེད་པའི་སྲིད་རྒྱུ་དང་། །མ་རིག་བྱ་མིན་བྱེད་པ་དེ། །བག་ཉལ་བཅས་རྩ་དྲ་བ་རྣམས། །ཡེ་ཤེས་གསལ་བའི་མེ་ཡིས་བསྲེགས། །ངས་འདིར་ང་དང་ང་ཡི་དང་། །ཉེས་ཞགས་རིང་འགྲོ་རྩ་ཟུག་པ། །སྒྲིབ་པའི་མདུད་པ་དམ་པོ་དེ། །ཡེ་ཤེས་མཚོན་གྱིས་བཅད་པར་གྱུར། །ངས་འདིར་རིང་ནས་ངའི་ལྡན་པ། །སླུ་བ་ཐ་མ་རྣམ་འཇིག་པ། །ལེན་པར་བཅས་པའི་ཕུང་པོ་དེ། །་ཡེ་ཤེས་ཀྱིས་ནི་ཡོངས་སུ་ཤེས། །གཉིས་སུ་རྨོངས་པ་ལོག་འཛིན་པ། །་ཐ་མར་དམྱལ་འགྱུར་དེ་དག་རྣམས། །ངས་འདིར་མ་ལུས་བསལ་བྱས་ཏེ། །ཕྱིན་ཆད་ནམ་ཡང་སྐྱེར་མི་འགྱུར། །ངས་འདིར་དགེ་བའི་རྩ་བ་ཡི། །མེ་ཡིས་སྒྲིབ་པའི་ནགས་ཚལ་བསྲེགས། །ཕྱིན་ཅི་ལོག་ནི་རྣམ་བཞི་ཡང་། །ང་ཡིས་མ་ལུས་ངེས་པར་བསྲེགས། །འདུ་ཤེས་སྐུད་པས་བརྒྱུས་པ་ཡི། །རྣམ་རྟོག་ཕྲེང་བ་གནོད་བྱེད་པ། །ངས་འདིར་བྱང་ཆུབ་ཡན་ལག་གི། ། ། ཕྲེང་བ་སྣ་ཚོགས་རྣམས་ཀྱིས་བཟློག །བགྲོད་དཀའ་དྲུག་ཅུ་རྩ་ལྔ་དང་། །གཏི་མུག་སུམ་ཅུ་དྲི་མ་ཅན། །སྡིག་པ་དག་ནི་བཞི་བཅུ་ངས། །ས་ཡི་སྙིང་པོ་འདིར་བསལ་ཏེ། །ས་ཡི་སྙིང་པོར་འདུག་ནས་ངས། །སྡོམ་པ་མ་ཡིན་བཅུ་དྲུག་དང་། །ཁམས་ནི་རྣམ་པ་བཅྭ་བརྒྱད་དང་། །ཁྱབ་པ་ཉི་ཤུ་རྩ་ལྔ་བསལ། །ཉོན་མོངས་ཆུ་བོ་ཉི་ཤུ་དང་། །འགྲོ་བ་འཇིགས་པ་ཉི་ཤུ་བརྒྱད། །བརྩོན་འགྲུས་མཐུ་དང་བརྟུལ་བ་ཡིས། །ང་འདིར་དེ་དག་ཤིན་ཏུ་འདས། །དེ་བཞིན་སངས་རྒྱས་བསྒྱིངས་སྒྲོག་པ། །ལྔ་བརྒྱ་ངས་འདིར་ཡང་དག་རྟོགས། །བརྒྱ་ཕྲག་སྟོང་དུ་ཚང་བ་ཡི། །ཆོས་རྣམས་ང་ཡིས་ཡང་དག་རྟོགས། །ངས་འདིར་བག་ཉལ་མ་ལུས་པ། །དགུ་བཅུ་རྩ་བརྒྱད་རྩར་བཅས་མཐའ། །ཀུན་ནས་ལྡང་བའི་ལོ་མ་རྣམས། །ཡེ་ཤེས་མེ་ཡིས་ངེས་པར་བསྲེགས། །དོགས་དང་ཡིད་གཉིས་ཀུན་འབྱུང་བ། །ལྟ་བའི་ཆུ་ཡིས་གང་གྱུར་པ། །མི་དགེ་ངོགས་ཅན་སྲེད་པའི་ཀླུང་། །ཤུགས་དྲག་ཡེ་ཤེས་ཉི་མས་བསྐམས། །ཚུལ་འཆོས་པ་དང་ཁ་གསག་སྤངས། །སྒྱུ་དང་སེར་སྣ་ཕྲག་དོག་
སྡང་། །ཉོན་མོངས་དགོན་པ་དིང་འདིར་བཅད། །འདུལ་བའི་མེ་ཡིས་རབ་ཏུ་བསྲེགས། །འདིར་ནི་རྩོད་པའི་རྩ་བ་དེ། །ངན་འགྲོ་ཉམ་ངར་འདྲེན་བྱེད་པ། །འཕགས་ལ་སྐུར་པ་འདེབས་པའི་ཚིག །ཡེ་ཤེས་མཆོག་གི་སྨན་གྱིས་བསྐྱུགས། །ངས་འདིར་ཡེ་ཤེས་ཡོན་ཏན་དང་། །ཏིང་འཛིན་ཐོབ་ནས་ངུ་བ་དང་། །ཆོ་ངེ་འདོན་དང་མྱ་ངན་དང་། །སྨྲེ་བ་མ་ལུས་མཐའ་མར་ཕྱིན། །ངས་འདིར་བདེན་ཚུལ་ཏིང་ངེ་འཛིན། །ཐོབ་ནས་ཆུ་བོ་སྦྱོར་བ་དང་། །མདུད་པ་མྱ་ངན་ཟུག་རྔུ་དང་། །རྒྱགས་དང་བག་མེད་ཀུན་ལས་རྒྱལ། །ངས་འདིར་ཉོན་མོངས་གཟིངས་པ་ཡི། །སྲིད་པའི་ལྗོན་ཤིང་རྟོག་རྩ་བརྟན། །དྲན་པའི་སྟ་རེས་མ་ལུས་པར། །བཅད་ནས་ཡེ་ཤེས་མེ་ཡིས་བསྲེགས། །ངས་འདིར་ང་སྙམ་ང་རྒྱལ་ཏེ། །ཁམས་གསུམ་དབང་བྱེད་སྟོབས་ཆེ་བ། །གཡོན་ཅན་ཡེ་ཤེས་རལ་གྲིས་བཅོམ། །ལྷ་མིན་དབང་ལ་དབང་པོ་བཞིན། །དྲ་བ་མ་ལུས་སུམ་ཅུ་དྲུག །འཇུག་པ་ས་ཡི་སྙིང་པོ་འདིར། །ཤེས་རབ་རལ་གྲི་སྟོབས་ལྡན་པས། །བཅད་ནས་ཡེ་ཤེས་མེ་ཡིས་བསྲེགས། །ཉོན་མོངས་རྩ་བ་བག་ཉལ་བཅས། །སྡུག་བསྔལ་མྱ་ངན་འབྱུང་དེ་དག །ངས་འདིར་ཤེས་རབ་དམ་པ་ཡི། །ཐོང་ལྕགས་ཀྱིས་ནི་མ་ལུས་བཏོན། །རང་བཞིན་གྱིས་དག་སེམས་ཅན་གྱི། །ཤེས་རབ་མིག་འདིར་ང་ཡིས་སྦྱངས། །ཡེ་ཤེས་མིག་སྨན་ཆེན་པོ་ཡིས། །གཏི་མུག་ལིང་ཏོག་རྒྱ་ཆེན་བསལ། །འབྱུང་ཁམས་བཞི་པོ་རྒྱགས་པ་ཡི། །ཆུ་སྲིན་གྱིས་དཀྲུགས་སྲེད་ཡངས་པ། །སྲིད་པའི་རྒྱ་མཚོ་དྲན་པ་དང་། །ཞི་གནས་ཉི་མའི་འོད་ཀྱིས་བསྐམས། །ངས་འདིར་ཡུལ་གྱི་ཤིང་གི་ཚོགས། །རྣམ་རྟོག་དུད་འཐུལ་ཆགས་ཆེན་མེ། །རབ་ཏུ་འབར་བ་རྣམ་ཐར་ཆུ། །བསིལ་བའི་ཁུ་བས་བསད་པར་གྱུར། །ངས་འདིར་བག་ལ་ཉལ་བའི་སྤྲིན། །རོ་མྱང་གློག་འདྲ་རྣམ་རྟོག་འབྲུག །བརྩོན་འགྲུས་སྟོབས་ཀྱི་རླུང་ཤུགས་ཀྱིས། །འདས་ཏེ་ཀུན་དུ་གཏོར་བར་གྱུར། །ངས་འདིར་དྲན་པ་དྲི་མེད་པའི། །ཏིང་འཛིན་ཐོབ་ནས་སེམས་སྤྱོད་དགྲ། །སྲིད་པའི་ཁོན་རྒྱུད་མ་ལུས་པར། །ཤེས་རབ་རལ་གྲིའི་སྟོབས་ཀྱིས་བཅད། །ངས་འདིར་རྒྱལ་མཚན་མཆོག་འཆང་
བ། །ཤིང་རྟ་གླང་པོ་རྟས་མཐོ་བ། །གཟུགས་བསྒྱུར་བདུད་དཔུང་བརྩོན་པའི་སྡེ། །བྱམས་པ་ཐོབ་ནས་རྣམ་པར་བཅོམ། །མི་སྡུག་ཏིང་ངེ་འཛིན་ཐོབ་ནས། །ངས་འདིར་དབང་པོ་དྲུག་གི་རྟ། །འདོད་པའི་ཡོན་ཏན་ལྔས་རྟས་པ། །རྟག་ཏུ་རྒྱགས་ཡན་མ་ལུས་བཏགས། །སྨོན་མེད་ཏིང་ངེ་འཛིན་ཐོབ་ནས། །ངས་འདིར་རྗེས་སུ་ཆགས་པ་དང་། །ཁོང་ཁྲོ་བ་དང་འཐབ་པ་དང་། །རྩོད་སྤང་མ་ལུས་མཐའ་མར་ཕྱིན། །སྟོང་པའི་ཏིང་ངེ་འཛིན་ཐོབ་ནས། །ངས་འདིར་ཕྱི་དང་ནང་དག་གི། །རློམ་སེམས་ཀུན་དང་རྟོག་པ་དང་། །རྣམ་པར་རྟོག་པ་ཡོངས་སུ་ཟད། །མཚན་མེད་ཏིང་ངེ་འཛིན་ཐོབ་ནས། །ལྷ་མི་སྲིད་པའི་རྩེར་ཐུག་པའི། །བདེ་བ་ཐམས་ཅད་མ་ལུས་པར། །ང་ཡིས་འདིར་ནི་ཡོངས་སུ་བཏང་། །ངས་འདིར་རྣམ་ཐར་གསུམ་ཐོབ་ནས། །ངས་འདིར་ཤེས་རབ་སྟོབས་ཀྱིས་ནི། །སྲིད་པ་དག་གི་འཆིང་བ་ཀུན། །མ་ལུས་ཀུན་ལས་གྲོལ་བར་གྱུར། །ངས་འདིར་རྒྱུ་མཐོང་གྱུར་ནས་ནི། །རྟག་དང་མི་རྟག་འདུ་ཤེས་དང་། །བདག་དང་བདག་མེད་བདེ་སྡུག་བསྔལ། །རྒྱུ་ཡི་འདུ་ཤེས་གསུམ་ལས་རྒྱལ། །ངས་འདིར་ལས་ཀྱི་རྣམ་པ་དང་། །སྐྱེ་མཆེད་དྲུག་རྩ་ཀུན་འབྱུང་ལས། །བྱུང་བ་ཐམས་ཅད་ཤིང་དབང་དྲུང་། །མི་རྟག་པ་ཡིས་བསྣུན་ཏེ་བཅད། །ངས་འདིར་ཡེ་ཤེས་ཉི་མ་ཡིས། །གཏི་མུག་མུན་པའི་རྙོག་པ་དང་། །ལྟ་གྱུར་རྒྱགས་དང་ཁྲོས་གང་བ། །ཡུན་རིང་མུན་པ་བསལ་སྣང་བྱས། །ངས་འདིར་བརྩོན་འགྲུས་སྟོབས་ཀྱི་གྲུས། །འདོད་དང་ཆགས་པའི་ཆུ་སྲིན་ཅན། །ངར་འཛིན་ལྟ་ངན་སྲེད་རླབས་ཆུ། །འཁོར་བའི་རྒྱ་མཚོ་ཆེ་ལས་རྒལ། །གང་རྟོགས་ཆགས་དང་གཏི་མུག་དང་། །སེམས་ཀྱི་རྣམ་པར་རྟོག་བསྲེགས་ཏེ། །ཕྱེ་ལེབ་ནགས་མེར་ལྷུང་འདྲ་བ། །ངས་འདིར་དེ་ནི་རྗེས་སུ་རྟོགས། །ང་འདིར་རིང་ནས་སོང་བ་ཡི། །བསྐལ་པ་དཔག་མེད་བྱེ་ཁྲག་ཁྲིག །འཁོར་བའི་ལམ་གྱིས་ཉོན་མོངས་པ། །གདུང་བ་མེད་ནས་ངལ་ཡང་སོས། །འཇིག་རྟེན་ཕན་ཕྱིར་རྒ་ཤི་དང་། །མྱ་ངན་སྡུག་བསྔལ་མཐར་ཕྱིན་པ། །ཕས་རྒོལ་ཀུན་གྱིས་མ་ཐོབ་པ། །བདུད་རྩི་དེ་ནི་ངས་འདིར་རྟོགས། །སྲེད་ལས་བྱུང་བའི་སྐྱེ་མཆེད་ཀྱིས། །
སྡུག་བསྔལ་ཕུང་པོས་སྡུག་བསྔལ་བ། །ཕྱིས་མི་འབྱུང་བ་འཇིགས་མེད་ཀྱི། །གྲོང་ཁྱེར་འདིར་ནི་ངས་ཕྱིན་ཏོ། ། ངས་འདིར་ནང་གི་དགྲ་ཆེན་པོ། །ཁྱབ་པ་དེ་དག་རྗེས་སུ་རྟོགས། །རྟོགས་ནས་རབ་ཏུ་བསྲེགས་ཏེ་ངས། །དེ་དག་ཡང་བྱུང་གནས་མེད་བྱས། །བདུད་རྩིའི་དོན་དུ་བསྐལ་པ་ནི། །བྱེ་བ་ཁྲག་ཁྲིག་རང་གི་ཤ། །མིག་དང་རིན་ཆེན་མང་བཏང་བ། །དེ་འདིར་ང་ཡིས་རྗེས་སུ་རྟོགས། །སྔོན་གྱི་རྒྱལ་བ་དཔག་མེད་པས། །གང་སངས་རྒྱས་དེ་ངས་འདིར་རྟོགས། །གང་གི་སྙན་པ་ཉམས་དགའ་བ། །སྒྲ་ནི་འཇིག་རྟེན་རྣམས་སུ་གྲགས། །རྟེན་ནས་བྱུང་བའི་འགྲོ་བ་སྟོང་། །སེམས་ཀྱི་སྐད་ཅིག་གཅིག་ལ་འཇིག །སྨིག་རྒྱུ་དྲི་ཟའི་གྲོང་ཁྱེར་འདྲ། །དེ་འདིར་ང་ཡིས་རྗེས་སུ་རྟོགས། །གང་གིས་ལག་པའི་མཐིལ་དུ་ནི། །ཤིང་ཏོག་བཞག་བཞིན་འཇིག་རྟེན་ཁམས། །ཐམས་ཅད་མཐོང་བའི་མིག་མཆོག་དེ། །ང་ཡིས་འདིར་ནི་དག་པར་བྱས། །སྔོན་གྱི་གནས་ནི་ངས་འདིར་དྲན། །རིག་པ་གསུམ་ཡང་ཐོབ་པར་གྱུར། །བསྐལ་པ་ཁྲག་ཁྲིག་དཔག་མེད་པ། །གཉིད་ཀྱིས་ལོག་ལས་སད་བཞིན་དྲན། །ལྷ་མི་ནོར་ཞིང་འདུ་ཤེས་ལོག །ཕྱིན་ཅི་ལོག་གྱུར་གང་འབར་བ། །དེ་ཡང་དེ་བཞིན་མ་ནོར་བར། །ངས་འདིར་བདུད་རྩིའི་སྙིང་ཁུ་འཐུངས། །གང་གི་དོན་དུ་སྟོབས་བཅུ་པོ། །སེམས་ཅན་ཀུན་ལ་བྱམས་པ་བསྒོམས། །བྱམས་པའི་སྟོབས་ཀྱིས་རྒྱལ་གྱུར་ནས། །ངས་འདིར་བདུད་རྩིའི་སྙིང་ཁུ་འཐུངས། །གང་གི་དོན་དུ་སྟོབས་བཅུ་པོ། །སེམས་ཅན་ཀུན་ལ་སྙིང་རྗེ་བསྒོམས། །སྙིང་རྗེའི་སྟོབས་ཀྱིས་རྒྱལ་གྱུར་ནས། །ངས་འདིར་བདུད་རྩིའི་སྙིང་ཁུ་འཐུངས། །གང་གི་དོན་དུ་སྟོབས་བཅུ་པོ། །སེམས་ཅན་ཀུན་ལ་དགའ་བ་བསྒོམས། །དགའ་བའི་སྟོབས་ཀྱིས་རྒྱལ་གྱུར་ནས། །ངས་འདིར་བདུད་རྩིའི་སྙིང་ཁུ་འཐུངས། །གང་གི་དོན་དུ་སྟོབས་བཅུ་པོ། །བསྐལ་པ་ཁྲག་ཁྲིག་བཏང་སྙོམས་བསྒོམས། །བཏང་སྙོམས་འདི་ཡི་སྟོབས་ཀྱིས་རྒྱལ། །ངས་འདིར་བདུད་རྩིའི་སྙིང་ཁུ་འཐུངས། །སྟོབས་བཅུ་གང་གཱའི་བྱེ་མ་བས། །རབ་ཏུ་མང་བས་གང་གསོལ་པ། །སྔོན་རྒྱལ་སེང་གེས་སྔོན་གསོལ་པ། །བདུད་རྩིའི་སྙིང་ཁུ་ངས་འདིར་འཐུངས། །རྒ་ཤི་མཐའ་
མར་མ་ཕྱིན་པར། །སྐྱིལ་མོ་ཀྲུང་ནི་མི་གཞིག་ཅེས། །སྡེར་བཅས་པ་ཡི་བདུད་མདུན་འདིར། །ང་ཡིས་ཚིག་ནི་གང་སྨྲས་པ། །ཡེ་ཤེས་རྡོ་རྗེ་བརྟན་འབར་བས། །ང་ཡིས་མ་རིག་པ་ཡང་བཅོམ། །སྟོབས་བཅུ་ཉིད་ནི་ཐོབ་པར་གྱུར། །དེ་ལྟ་བས་ན་སྐྱིལ་ཀྲུང་གཞིག །ང་ཡིས་དགྲ་བཅོམ་ཉིད་ཐོབ་སྟེ། །ང་ཡི་ཟག་པ་མ་ལུས་ཟད། །བདུད་ཀྱི་སྡེ་ཡང་བཅོམ་པར་གྱུར། །དེ་ལྟ་བས་ན་སྐྱིལ་ཀྲུང་གཞིག །སྒྲིབ་པ་ལྔ་ཡི་སྒོ་གླེགས་རྣམས། །ང་ཡིས་འདིར་ནི་ཐམས་ཅད་བཅག །སྲིད་པའི་ཁྲི་ཤིང་རྣམས་ཀྱང་བཅད། །ང་འདིར་སྐྱིལ་མོ་ཀྲུང་གཞིག་གོ །དེ་ནས་མི་ཡི་ཟླ་བ་དེ། །དལ་གྱིས་གདན་ལས་བཞེངས་ནས་སུ། །དབང་བསྐུར་ཆེན་པོ་བཞེས་ནས་ནི། །སེང་གེའི་གདན་ལ་བཞུགས་པར་གྱུར། །ལྷ་ཚོགས་རྣམས་ཀྱིས་རིན་ཆེན་སྣོད། །སྟེང་ནས་སྤོས་ཆུ་སྣ་ཚོགས་ཀྱིས། །སྟོབས་བཅུ་ཡོན་ཏན་མཐར་ཕྱིན་པ། །འཇིག་རྟེན་རྩ་ལག་སྐུ་ཡང་བསིལ། །བྱེ་བ་ཁྲག་ཁྲིག་ལྷ་རྣམས་དག །ལྷ་མོ་ཁྲག་ཁྲིག་ལྷན་ཅིག་ཏུ། །ཀུན་ནས་རོལ་མོ་སྟོང་དག་གིས། །མཆོད་པ་གཞལ་དུ་མེད་པ་བྱེད། །དེ་ལྟར་ལྷ་ཡི་བུ་དག་ནི། །ས་ཡི་སྙིང་པོ་ཞག་བདུན་དུ། །རྒྱལ་བའི་སྐྱིལ་ཀྲུང་མ་བཤིག་པ། །རྒྱུར་བཅས་རྐྱེན་བཅས་གཞི་དང་བཅས། །དགེ་སློང་དག་དེ་ལྟར་བྱང་ཆུབ་མངོན་པར་རྫོགས་པར་སངས་རྒྱས་པའི་དེ་བཞིན་གཤེགས་པ་ངས་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ངས་འདིར་ཐོག་མ་མེད་པའི་སྐྱེ་བ་དང་། རྒ་བ་དང་། འཆི་བའི་སྡུག་བསྔལ་མཐར་ཕྱུང་ངོ་ཞེས་ཞག་བདུན་པ་དང་པོ་ལ་གདན་དེ་ཉིད་ལ་བཞུགས་སོ། །ཞག་བདུན་པ་གཉིས་པའི་ཚེ་ནི་དེ་བཞིན་གཤེགས་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བར་དུ་རྒྱང་རིང་དུ་འཆགས་པས་འཆག་གོ །ཞག་བདུན་པ་གསུམ་པའི་ཚེ་ནི་དེ་བཞིན་གཤེགས་པ་ངས་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཐོག་མ་མེད་པའི་སྐྱེ་བ་དང་། རྒ་བ་དང་། འཆི་བའི་སྡུག་བསྔལ་མཐར་ཕྱུང་ངོ་ཞེས་བྱང་ཆུབ་ཀྱི་སྙིང་པོ་ལ་སྤྱན་མི་འཛུམས་པར་གཟིགས་སོ། །ཞག་བདུན་པ་བཞི་པའི་ཚེ་ནི་
དེ་བཞིན་གཤེགས་པ་ཤར་གྱི་རྒྱ་མཚོ་ནས་ནུབ་ཀྱི་རྒྱ་མཚོའི་བར་དུ་མི་རིང་བའི་འཆགས་པས་འཆག་གོ །འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་དྲུག་པ། དེ་ནས་བདུད་སྡིག་ཅན་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་ནས། དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ད་ཡོངས་སུ་མྱ་ངན་ལས་འདའ་བའི་དུས་ལ་བབ་ལགས་ཀྱིས། བཅོམ་ལྡན་འདས་ཡོངས་སུ་མྱ་ངན་ལས་འདའ་བར་གསོལ། བདེ་བར་གཤེགས་པ་ཡོངས་སུ་མྱ་ངན་ལས་འདའ་བར་གསོལ། དགེ་སློང་དག་དེ་སྐད་ཅེས་གསོལ་པ་དང་། དེ་བཞིན་གཤེགས་པས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན་ངའི་དགེ་སློང་གནས་བརྟན་གནས་བརྟན། དུལ་བ། གསལ་བ། བྱང་བ། བག་ཚ་བ་མེད་པ། མང་དུ་ཐོས་པ། ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ། བདག་ཉིད་སློབ་དཔོན་དུ་སྒྲོགས་པ་དང་། ཕས་ཀྱི་རྒོལ་བ་བྱུང་བ་རྣམས་ཆོས་དང་འཐུན་པས་ཚར་བཅད་དེ་དད་པར་བྱས་ནས་ཆོ་འཕྲུལ་དང་བཅས་པའི་ཆོས་སྟོན་པར་ནུས་པ་དག་མ་བྱུང་གི་བར་དེ་སྲིད་དུ་ང་ཡོངས་སུ་མྱ་ངན་ལས་མི་འདའོ། །སྡིག་ཅན་ངས་འཇིག་རྟེན་དུ་སངས་རྒྱས་དང་། ཆོས་དང་། དགེ་འདུན་གྱི་སྒྲ་བཞག་པར་མ་གྱུར་པ་དང་། བྱང་ཆུབ་སེམས་དཔའ་དཔག་ཏུ་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་མ་གྱུར་གྱི་བར་དེ་སྲིད་དུ་ང་ཡོངས་སུ་མྱ་ངན་ལས་མི་འདའོ། །སྡིག་ཅན་ངའི་འཁོར་བཞི་པོ་དུལ་བ། གསལ་བ། བྱང་བ། བག་ཚ་བ་མེད་པ་ནས་ཆོ་འཕྲུལ་དང་བཅས་པའི་ཆོས་སྟོན་པའི་བར་དུ་ནུས་པ་དག་བྱུང་བ་མ་གྱུར་གྱི་བར་དེ་སྲིད་དུ་ང་ཡོངས་སུ་མྱ་ངན་ལས་མི་འདའོ། །དེ་ནས་བདུད་སྡིག་ཅན་གྱིས་ཚིག་དེ་སྐད་ཐོས་ནས་སྡུག་བསྔལ་ཞིང་ཡིད་མི་བདེ་སྟེ། ཕྱོགས་གཅིག་ཏུ་སོང་ནས་འདུག་སྟེ་མགོ་སྨད་ནས་མདས་ས་ལ་རི་མོ་འདྲི་ཞིང་བདག་གི་ཡུལ་ལས་འདས་སོ་སྙམ་དུ་སེམས་པར་གྱུར་ཏོ། །དེ་ནས་བདུད་ཀྱི་བུ་མོ་དགའ་མ་དང་། མི་དགའ་མ་དང་། སྲེད་མ་གསུམ་གྱིས་བདུད་སྡིག་ཅན་ལ་ཚིགས་སུ་བཅད་དེ་སྨྲས་པ། ཡབ་ཅིག་ཇི་ལྟར་ཐུགས་
མི་དགྱེས། །མི་གང་ལགས་པ་བཀའ་སྩོལ་དང་། །འདོད་ཆགས་ཞགས་པས་དེ་བཅིངས་ནས། །གླང་པོ་བཞིན་དུ་དགུག་པར་བགྱི། །བཀུག་ནས་དེ་ནི་མྱུར་དུ་ཡང་། །ཁྱོད་ཀྱི་དབང་དུ་འགྱུར་བར་བགྱི། །དེ་ལ་ཐུགས་ངན་འོ་བརྒྱལ་འོར། །དགྱེས་པ་རྒྱ་ཆེན་བརྙེས་པར་འགྱུར། །བདུད་ཀྱིས་སྨྲས་པ། འཇིག་རྟེན་དགྲ་བཅོམ་བདེ་བར་གཤེགས། །འདོད་ཆགས་དབང་དུ་དེ་མི་འགྲོ། །ང་ཡི་ཡུལ་ལས་ཤིན་ཏུ་འདས། །དེ་བས་ང་ནི་མྱ་ངན་ཆེ། །དེ་ནས་དེ་དག་གིས་དེ་བཞིན་གཤེགས་པའི་མཐུ་བྱང་ཆུབ་སེམས་དཔའི་མཛད་པ་སྔ་ནས་ཀྱང་ཤེས་མོད་ཀྱི། བུད་མེད་ཀྱིས་མི་བརྟན་པས་ཕའི་ཚིག་མ་མཉན་ཏེ། བུ་ཅིག་བཙས་ཙམ་གྱི་ན་ཚོད་ཀྱིས་དར་ལ་བབ་པར་སྒྱུར་ནས། མིག་གིས་མི་རྩོལ་བར་བྱ་བའི་ལས་ཀྱི་ཕྱིར། དེ་བཞིན་གཤེགས་པའི་གན་དུ་དོང་བ་དང་། དེ་བཞིན་གཤེགས་པས་དེ་དག་ཡིད་ལ་མ་མཛད་པར་དེ་དག་རྒ་བས་འཁོགས་པར་བྱིན་གྱིས་བརླབས་སོ། །དེ་ནས་དེ་དག་ཕའི་གན་དུ་སོང་སྟེ། འདི་སྐད་ཅེས་སྨྲས་སོ། །དེ་ནི་ཆགས་པས་མི་བཀྲི་སྟེ། །ང་ཡི་ཡུལ་ལས་ཤིན་ཏུ་འདས། །དེ་བས་མྱ་ངན་ང་ཆེ་ཞེས། །ཡབ་ཀྱིས་བདག་ཅག་གསུངས་པ་མད། །གཽ་ཏ་མ་ནི་བརླག་པའི་ཕྱིར། །བདག་ཅག་རྣམས་ཀྱིས་གང་སྤྲུལ་པ། །གཟུགས་ལ་གལ་ཏེ་དེ་ལྟ་ན། །དེ་ཡི་དེ་སྙིང་འགས་པར་འགྱུར། །ཡབ་བདག་ཅག་གི་ལུས་རྒ་བས་འཁོགས་པ་འདི་མ་མཆིས་པར་མཛད་དུ་གསོལ། །བདུད་ཀྱིས་སྨྲས་པ། གང་ཞིག་སངས་རྒྱས་བྱིན་གྱིས་བརླབས་ནི་གཞན་དུ་སྒྱུར་བར་བྱེད་ནུས་པ། །རྒྱུ་དང་མི་རྒྱུ་དག་གི་འཇིག་རྟེན་དག་ན་མི་དེ་ངས་མ་མཐོང་། །མྱུར་དུ་སོང་སྟེ་ཐུབ་པ་དེ་ལས་རང་བྱས་ཉེས་པ་ཤོགས་ཤིག་དང་། །དེ་ནི་ཁྱོད་ཀྱིས་བསམ་པ་བཞིན་དུ་སྔོན་གྱི་ལུས་སུ་སྒྱུར་བར་འགྱུར། །དེ་ནས་དེ་དག་དོང་སྟེ་བདག་ཅག་གིས་བཅོམ་ལྡན་འདས་ལ་སྐུ་བརྙས་བགྱི་བར་བསམས་པས། བཅོམ་ལྡན་འདས་ཇི་ལྟར་བྱིས་པ་རྣམས་དང་། ཇི་ལྟར་གླེན་པ་རྣམས་དང་། ཇི་ལྟར་མི་གསལ་བ་མི་མཁས་ཤིང་མ་འཚལ་བ་རྣམས་ལྟར་བདག་ཅག་ནོངས་པ་ཅན་དུ་གཟུང་དུ་གསོལ། བདེ་བར་གཤེགས་པ་བདག་ཅག་ནོངས་པ་ཅན་དུ་གཟུང་དུ་གསོལ། ཞེས་དེ་བཞིན་གཤེགས་པ་ལ་བཟོད་པར་གསོལ་
ཏོ། །དེ་ནས་དེ་བཞིན་གཤེགས་པས་དེ་དག་ལ་ཚིགས་སུ་བཅད་པས་བཀའ་སྩལ་པ། །སེན་མོས་རི་ལ་བྲུ་བ་དང་། །སོ་ཡིས་ལྕགས་ནི་བཅའ་བ་དང་། །མགོ་ཡིས་རི་ནི་དབུག་པ་དང་། །གཏིང་མི་དཔོགས་ལ་དཔོག་པར་འདོད། །དེ་ལྟ་བས་ན་བུ་མོ་ཁྱེད། །ཉེས་པ་ཅན་དུ་ངས་གཟུང་ངོ་། །དེ་ཅིའི་ཕྱིར་ཞེ་ན། གང་ཉེས་པ་ལ་ཉེས་པར་མཐོང་ནས་འཆགས་ཤིང་ཕྱིན་ཆད་ཀྱང་སྡོམ་པར་བྱེད་པ་དེ་ནི་འཕགས་པའི་ཆོས་འདུལ་བ་ལ་འཕེལ་བར་འགྱུར་རོ། །དགེ་སློང་དག་ཞག་བདུན་པ་ལྔ་པ་ལ་ཞག་བདུན་ཡུལ་ངན་ཆེན་པོ་བྱུང་བའི་ཚེ་ན། དེ་བཞིན་གཤེགས་པ་ཀླུའི་རྒྱལ་པོ་བཏང་བཟུང་གི་གནས་ན་བཞུགས་སོ། །དེ་ནས་ཀླུའི་རྒྱལ་པོ་བཏང་བཟུང་བཅོམ་ལྡན་འདས་ཀྱི་སྐུ་ལ་གྲང་བ་དང་རླུང་གིས་ཕོག་ཏུ་འོང་ཞེས་རང་གི་གནས་ནས་བྱུང་སྟེ། ལུས་ཀྱིས་དེ་བཞིན་གཤེགས་པའི་སྐུ་ལ་ལན་བདུན་དུ་དཀྲིས་ནས་མགོའི་གདེངས་ཀ་རྣམས་ཀྱིས་བཀབ་བོ། །བཅོམ་ལྡན་འདས་ཀྱི་སྐུ་ལ་གྲང་བ་དང་རླུང་གིས་ཕོག་ཏུ་འོང་ངོ་ཞེས་ཤར་ཕྱོགས་ནས་ཀྱང་ཀླུའི་རྒྱལ་པོ་གཞན་མང་དུ་ལྷགས་ཏེ། དེ་བཞིན་གཤེགས་པའི་སྐུ་ལ་ལུས་རྣམས་ཀྱིས་ལན་བདུན་དུ་དཀྲིས་ནས་མགོའི་གདེངས་ཀ་རྣམས་ཀྱིས་བཀབ་བོ། །ཤར་ཕྱོགས་ནས་ཇི་ལྟ་བ་བཞིན་དུ་བཅོམ་ལྡན་འདས་ཀྱི་སྐུ་ལ་གྲང་བ་དང་རླུང་གིས་ཕོག་ཏུ་འོང་ངོ་ཞེས་ལྷོ་དང་ནུབ་དང་བྱང་ཕྱོགས་ནས་ཀྱང་ཀླུའི་རྒྱལ་པོ་རྣམས་ལྷགས་ནས་དེ་བཞིན་གཤེགས་པའི་སྐུ་ལ་ལུས་རྣམས་ཀྱིས་ལན་བདུན་དུ་དཀྲིས་ཏེ་མགོའི་གདེངས་ཀ་རྣམས་ཀྱིས་བཀབ་བོ། །ཀླུའི་རྒྱལ་པོའི་ཕུང་པོ་དེ་ནི་རིའི་དབང་པོ་ལྷུན་པོ་ལྟར་མཐོན་པོར་གནས་པར་གྱུར་ཏོ། །ཀླུའི་རྒྱལ་པོ་དེ་དག་གིས་ཀྱང་ཇི་ལྟར་ཉིན་བདུན་མཚན་བདུན་དུ་དེ་བཞིན་གཤེགས་པའི་སྐུ་དེ་ལ་རེག་པར་གྱུར་པ་དེ་ལྟ་བུའི་བདེ་བ་དེ་དག་གིས་སྔོན་ནམ་ཡང་མ་རྙེད་དོ། །དེ་ནས་ཞག་བདུན་འདས་ནས་ཀླུའི་རྒྱལ་པོ་དེ་དག་གིས་ཡུལ་ངན་མེད་པར་ཤེས་ཏེ། དེ་བཞིན་གཤེགས་པའི་སྐུ་ལས་ལུས་བཀྲོལ་ནས། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས། རང་རང་གི་གནས་སུ་དོང་ངོ་། །ཀླུའི་རྒྱལ་པོ་བཏང་བཟུང་ཡང་དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་
བ་བྱས་ནས་རང་གི་གནས་སུ་ཞུགས་སོ། །ཞག་བདུན་པ་དྲུག་པའི་ཚེ་ནི་དེ་བཞིན་གཤེགས་པ་ཀླུའི་རྒྱལ་པོ་བཏང་བཟུང་གི་གནས་ནས་ཤིང་ནྱ་གྲོ་དྷ་ར་སྐྱོང་གི་དྲུང་དུ་བཞུད་དོ། །ཀླུའི་རྒྱལ་པོ་བཏང་བཟུང་གི་གནས་དང་ཤིང་ནྱ་གྲོ་དྷ་ར་སྐྱོང་གི་བར་དུ་རླུང་ནཻ་རན་ཛ་ནའི་ངོགས་སུ་སྤྱོད་པ་པ་དང་། ཀུན་ཏུ་རྒྱུ་དང་། ཉན་ཐོས་རྒན་པོ་དང་། གཽ་ཏ་མ་དང་། གཅེར་བུ་པ་དང་། ཀུན་དུ་འཚོ་བ་པ་ལ་སོགས་པས་དེ་བཞིན་གཤེགས་པ་མཐོང་ནས། བཅོམ་ལྡན་འདས་གཽ་ཏ་མས་ཞག་བདུན་པ་ཡུལ་ངན་ཆེན་པོའི་དུས་འདི་བདེ་བས་བདེ་བར་འདས་པར་བྱས་སམ་ཞེས་འཛེར་ཏོ། །དགེ་སློང་དག་དེ་ནས་དེ་བཞིན་གཤེགས་པས་དེའི་ཚེ་ཆེད་དུ་རྗོད་པ་འདི་ཆེད་དུ་བརྗོད་དོ། །ཆོས་ཐོས་པ་དང་མཐོང་བ་དང་། །དབེན་པར་དགའ་བ་བདེ་བ་ཡིན། །སྲོག་ཆགས་འབྱུང་པོ་རྣམས་ལ་བསྡམས། །གནོད་པ་མི་བྱེད་འཇིག་རྟེན་བདེ། །སྡིག་པ་རྣམས་ལས་རབ་འདས་པ། །འདོད་ཆགས་བྲལ་བ་འཇིག་རྟེན་བདེ། །ང་སྙམ་ང་རྒྱལ་གང་འདུལ་བ། །དེ་ནི་མཆོག་ཏུ་བདེ་བ་ཡིན། །དགེ་སློང་དག་དེ་བཞིན་གཤེགས་པས་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ཀྱི་འཇིག་རྟེན་ཀུན་དུ་འབར་ཞིང་རབ་ཏུ་འབར་བར་གཟིགས་ནས་དེའི་ཚེ་བཅོམ་ལྡན་འདས་ཀྱིས་ཆེད་དུ་རྗོད་པ་འདི་ཆེད་དུ་བརྗོད་དོ། །སྒྲ་རེག་རོ་དང་གཟུགས་དང་དྲི་རྣམས་ཀྱིས། །འཇིག་རྟེན་འདི་ནི་ཀུན་དུ་གདུངས་པར་གྱུར། །སྲིད་པས་འཇིགས་ཀྱང་སྲིད་པའི་སྲེད་པ་ཡིས། །ཕྱིར་ཞིང་སྲེད་པ་ཚོལ་བར་བྱེད་པ་ཡིན། །ཞག་བདུན་པ་བདུན་པའི་ཚེ་ནི་དེ་བཞིན་གཤེགས་པ་ཤིང་སྒྲོལ་རྒྱུའི་དྲུང་དུ་བཞུགས་སོ། །དེའི་ཚེ་བྱང་ཕྱོགས་པའི་ཚོང་པ་ག་གོན་དང་བཟང་པོ་ཞེས་བྱ་བ་མཁས་པ་གསལ་བ་སྤུན་གཉིས་རྙེད་པ་ཆེན་པོ་རྙེད་ནས། ཟོང་རྣམ་པ་མང་པོ་ཐོགས་ཏེ།འགྲོན་པ་ཕལ་པོ་ཆེ་དང་། ཤིང་རྟ་ཤིན་ཏུ་གང་བ་ལྔ་བརྒྱ་དང་ལྷན་ཅིག་ཏུ་ལྷོ་ཕྱོགས་ནས་བྱང་ཕྱོགས་སུ་དོང་ངོ་། །དེ་གཉིས་ལ་གླང་བུ་ཅང་ཤེས་ལེགས་སྐྱེས་དང་གྲགས་པ་ཞེས་བྱ་བ་གཉིས་ཡོད་དོ། །དེ་གཉིས་ལ་ཐོགས་པའི་འཇིགས་པ་མེད་དེ་གང་དུ་གླང་བུ་གཞན་མི་ཐར་བ་དེར་དེ་གཉིས་གཏོང་ངོ་། །གང་དུ་མདུན་རོལ་ན་འཇིགས་པ་ཡོད་
པ་དེར་དེ་གཉིས་ཕུར་པ་ལ་བཏགས་པ་བཞིན་དུ་འདུག་གོ །དེ་གཉིས་ལ་ལྕག་གིས་མི་འཇུའི་མེ་ཏོག་ཨུད་པ་ལ་སྤར་གང་ངམ། སྣ་མའི་མེ་ཏོག་གི་ཕྲེང་བས་དེ་གཉིས་དེད་དོ། །ཤིང་སྒྲོལ་རྒྱུ་དང་ཉེ་བ་ཞིག་ཏུ་ཤིང་འོ་མ་ཅན་གྱི་ནགས་ན་གནས་པའི་ལྷ་མོས་བྱིན་གྱི་རླབས་ཀྱིས་བྱིན་གྱིས་བརླབས་པས། དེ་དག་གི་ཤིང་རྟ་དེ་དག་ཐམས་ཅད་མི་འགྲོ་སྟེ། འབྲེང་པ་ལ་སོགས་པ་ཤིང་རྟའི་ཆ་རྐྱེན་ཐམས་ཅད་ཀྱང་ཆད་གྲུགས་སོ། །ཤིང་རྟའི་འཕང་ལོ་རྣམས་ཀྱང་ལྟེ་བ་ལ་ཐུག་པར་སའི་ནང་དུ་ནུབ་སྟེ། ཐམས་ཅད་ཀྱིས་རབ་ཏུ་བསྒྲིམས་ཀྱང་ཤིང་རྟ་དེ་དག་འགྲོ་བར་མ་གྱུར་ནས། ཁ་ཅིག་ངོ་མཚར་དང་སྐྲག་པར་གྱུར་ཏེ། ཤིང་རྟ་འདི་དག་ཐང་ལ་ཡང་ཐོགས་པར་གྱུར་པ་འདི་ལ་རྒྱུ་ནི་ཅི་ཞིག་ཡོད། འདིའི་འགྱུར་བ་ནི་ཅི་ཞིག་ཡིན་སྙམ་ནས། དེ་དག་གིས་གླང་བུ་ལེགས་སྐྱེས་དང་གྲགས་པ་དེ་གཉིས་འདྲེན་དུ་བཅུག་སྟེ། མེ་ཏོག་ཨུད་པ་ལ་སྤར་གང་དང་། སྣ་མའི་མེ་ཏོག་གི་ཕྲེང་བས་བདས་ཀྱང་འགྲོ་བར་མ་གྱུར་ནས་དེ་དག་འདི་སྙམ་དུ་སེམས་ཏེ། གང་གི་ཕྱིར་འདི་གཉིས་ཀྱང་མི་འགྲོ་བ་ལས་མདུན་ན་འཇིགས་པ་འགའ་ཞིག་འབྱུང་དུ་གདོན་མི་ཟའོ་སྙམ་ནས། དེ་དག་གིས་ས་འཁྲུ་བ་རྟ་པ་དག་སྔར་བཏང་ངོ་། །ས་འཁྲུ་བ་རྟ་པ་རྣམས་སླར་ལོག་ནས་འཇིགས་པ་ཅི་ཡང་མེད་ཅེས་སྨྲས་སོ། །ལྷ་མོ་དེས་ཀྱང་རང་གི་གཟུགས་བསྟན་ནས་མ་འཇིགས་ཤིག་ཅེས་དབུགས་ཕྱུང་ངོ་། །གླང་བུ་དེ་གཉིས་ཀྱིས་དེ་བཞིན་གཤེགས་པ་ག་ལ་བ་དེ་ལོགས་སུ་ཤིང་རྟ་དྲངས་པ་དང་། དེ་དག་གིས་དེ་བཞིན་གཤེགས་པ་མེ་ལྟར་རབ་ཏུ་འབར་བ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱི་མཚན་གྱིས་ལེགས་པར་བརྒྱན་པ། ཉི་མ་ཤར་ནས་རིང་པོར་མ་ལོན་པ་ལྟ་བུ་དཔལ་གྱིས་འབར་བ་མཐོང་ངོ་། །མཐོང་ནས་ཀྱང་དེ་དག་ངོ་མཚར་དུ་གྱུར་ཏེ། འདི་ནི་ཅི་ཞིག་ཚངས་པ་འདིར་ཕྱིན་ཏམ། འོན་ཏེ་ལྷའི་དབང་པོ་བརྒྱ་བྱིན་ནམ། འོན་ཏེ་རྣམ་ཐོས་ཀྱི་བུའམ། འོན་ཏེ་ཉི་མ་དང་ཟླ་བའམ། འོན་ཏེ་རིའི་ལྷ་འགའ་ཞིག་གམ། རླུང་གི་ལྷ་འགའ་ཞིག་སྙམ་མོ། །དེ་ནས་དེ་བཞིན་གཤེགས་པས་ན་བཟའ་ངུར་སྨྲིག་རྣམས་བསྟན་ཏོ། །དེ་ནས་དེ་དག་གིས་ངུར་སྨྲིག་བགོས་པ་འདི་ནི་རབ་ཏུ་བྱུང་བ་ཡིན་གྱིས་བདག་ཅག་འཇིགས་པ་མེད་དོ་ཞེས་སྨྲས་ཏེ། དེ་དག་
དད་པ་ཐོབ་ནས་ཡང་ཕན་ཚུན་དུ་སྨྲས་པ། རབ་ཏུ་བྱུང་བ་འདི་ནི་དུས་སུ་ཟ་བ་ཡིན་ན། ཅུང་ཟད་ཅི་ཡོད། སྨྲས་པ། སྦྲང་རྩི་དང་། སྐྱོ་མ་དང་། བུ་རམ་ཤིང་བཤུས་པ་ཡོད་དོ། །དེ་དག་གིས་སྦྲང་རྩི་དང་། སྐྱོ་མ་དང་། བུ་རམ་ཤིང་བཤུས་པ་ཁྱེར་ནས། དེ་བཞིན་གཤེགས་པ་ག་ལ་བ་དེར་དོང་སྟེ་ཕྱིན་པ་དང་། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་དེ་དག་གིས་དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བར་དགོངས་ཏེ་སྤྱན་གཟིགས་འདི་བཞེས་སུ་གསོལ། དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། བདག་གིས་ལག་པས་འདི་བླངས་ན་ནི་མ་ལེགས་ན་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་སྣོད་ཇི་ལྟ་བུས་བཞེས་སྙམ་ནས་མཁྱེན་པ་འཇུག་པར་གྱུར་ཏོ། །དགེ་སློང་དག་དེ་ལྟར་དེ་བཞིན་གཤེགས་པའི་སྐབས་ཀྱི་དུས་ལ་བབ་པར་རིག་ནས་སྐད་ཅིག་དེ་ཉིད་ལ་ཕྱོགས་བཞི་ནས་རྒྱལ་པོ་ཆེན་པོ་བཞི་གསེར་གྱི་ལྷུང་བཟེད་བཞི་ཐོགས་ཏེ། ལྷགས་ནས་དེ་བཞིན་གཤེགས་པ་ལ་བཅོམ་ལྡན་འདས་བདག་ཅག་ལ་ཐུགས་བརྩེ་བར་དགོངས་ཏེ། གསེར་གྱི་ལྷུང་བཟེད་བཞི་པོ་འདི་དག་བཞེས་སུ་གསོལ་ཞེས་ཕུལ་ལོ། །དེ་དག་དགེ་སྦྱོང་གི་ཆ་མ་ཡིན་པར་དགོངས་ནས། དེ་བཞིན་གཤེགས་པས་མ་བཞེས་སོ། །དེ་བཞིན་དུ་དངུལ་གྱི་བཞི་དང་། བཻ་དཱུཪྱའི་དང་། ཤེལ་དང་། སྤུག་དང་། རྡོའི་སྙིང་པོ་ལས་བྱས་པ་བཞི་བཞི་དང་། རིན་པོ་ཆེ་ཐམས་ཅད་ལས་བྱས་པའི་ལྷུང་བཟེད་བཞི་ཐོགས་ཏེ། དེ་བཞིན་གཤེགས་པ་ལ་ཕུལ་ན་ཡང་དགེ་སྦྱོང་གི་ཆ་མ་ཡིན་པར་དགོངས་ཏེ། དེ་བཞིན་གཤེགས་པས་མ་བཞེས་སོ། །དགེ་སློང་དག་དེ་ནས་དེ་བཞིན་གཤེགས་པས་ཡང་འདི་སྙམ་དུ་དགོངས་ཏེ། སྔོན་གྱི་དེ་བཞིན་གཤེགས་པ་རྣམས་ཀྱིས་ལྷུང་བཟེད་རྣམ་པ་ཅི་འདྲ་བ་དག་གིས་བཞེས་སྙམ་དགོངས་ན། རྡོའི་ལྷུང་བཟེད་རྣམས་ཀྱིས་བཞེས་པར་མཁྱེན་ནས། དེ་བཞིན་གཤེགས་པས་དེ་ལྟ་བུའི་ཐུགས་བསྐྱེད་པ་དང་། དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས་རྒྱལ་པོ་ཆེན་པོ་གཞན་གསུམ་ལ་
སྨྲས་པ། གྲོགས་པོ་དག་སྔོན་པོའི་རིས་ཀྱི་ལྷའི་བུ་རྣམས་ཀྱིས་བདག་ལ་རྡོའི་ལྷུང་བཟེད་བཞི་བྱིན་པ་དང་། དེ་ལ་བདག་གིས་འདི་སྙམ་དུ་བསམས་ཏེ། འདི་སྤྱད་པར་བྱའོ་སྙམ་པ་དང་། དེ་ནས་སྔོན་པོའི་རིས་ཀྱི་ལྷའི་བུ་རྣམ་པར་སྣང་བྱེད་ཅེས་བྱ་བ་དེས་བདག་ལ་འདི་སྐད་ཅེས་སྨྲས་སོ། །ཀྱེ་སྣོད་འདི་དག་སྤྱད་པར་མ་བྱ་བར། །འདི་དག་ཆོངས་ཤིག་མཆོད་རྟེན་གྲགས་པར་འགྱུར། །ཤཱཀྱ་ཐུབ་ཅེས་བྱ་བའི་རྒྱལ་བ་འབྱུང་། །དེ་ལ་ལྷུང་བཟེད་འདི་དག་དབུལ་བ་གྱིས། །གྲོགས་པོ་དག་གིས་ཤཱཀྱ་ཐུབ་པ་ལ། །སྣོད་དབུལ་བ་ཡི་དུས་དང་ཚོད་ལ་བབ། །གླུ་དབྱངས་དག་དང་སིལ་སྙན་སྒྲ་ཕྱུང་སྟེ། །མཆོད་པ་བྱས་ནས་ལྷུང་བཟེད་དབུལ་བར་བྱ། །སྣོད་དེ་ཆོས་ཀྱི་རང་བཞིན་མི་ཤིགས་པ། །སྣོད་འདི་རྡོ་བའི་རང་བཞིན་བཞེས་སུ་རུང་། །གཞན་གྱིས་བླང་བར་བཟོད་པ་མ་ཡིན་གྱིས། །ད་ནི་བདག་ཅག་དེ་དག་ལེན་དུ་འདོང་། །དེ་ནས་རྒྱལ་པོ་ཆེན་པོ་བཞིས་རང་གི་གཉེན་དང་འཁོར་དུ་བཅས་ཏེ་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། སིལ་སྙན་དང་། ཕེག་རྡོབ་པ་དང་། གླུ་དབྱངས་ལེན་ཅིང་རང་རང་གི་ལག་ཏུ་ལྷུང་བཟེད་དེ་དག་ཐོགས་ནས། དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་ནས། དེ་བཞིན་གཤེགས་པ་ལ་མཆོད་པ་བྱས་ཏེ། ལྷུང་བཟེད་དེ་དག་ལྷའི་མེ་ཏོག་གིས་བཀང་ནས་དེ་བཞིན་གཤེགས་པ་ལ་ཕུལ་ལོ། །དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། རྒྱལ་པོ་ཆེན་པོ་དད་པ་དང་ལྡན་པ་བཞི་པོ་འདི་དག་གིས་བདག་ལ་རྡོའི་ལྷུང་བཟེད་བཞི་ཕུལ་ན། བདག་ལ་ནི་བཞིར་མི་རུང་ལ། ཇི་སྟེ་གཅིག་གི་བླངས་ན་ནི་གསུམ་ཡང་མི་དགའ་བར་འགྱུར་ན། བདག་གིས་ལྷུང་བཟེད་བཞི་པོ་འདི་དག་བླངས་ཏེ་ལྷུང་བཟེད་གཅིག་ཏུ་བྱིན་གྱིས་བརླབ་བོ་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པས་ཕྱག་གཡས་པ་བརྐྱང་སྟེ། རྒྱལ་པོ་ཆེན་པོ་རྣམ་ཐོས་ཀྱི་བུ་ལ་ཚིགས་སུ་བཅད་པས་བཀའ་སྩལ་པ། བདེ་བར་གཤེགས་ལ་ལྷུང་བཟེད་ཕུལ་ཅིག་དང་། །ཁྱོད་ནི་ཐེག་པ་མཆོག་གི་སྣོད་དུ་འགྱུར། །ང་འདྲ་དག་ལ་ལྷུང་བཟེད་ཕུལ་བ་ནི། །དྲན་དང་བློ་གྲོས་ནམས་ཀྱང་ཉམས་མི་འགྱུར། །དགེ་སློང་དག་དེ་ནས་དེ་བཞིན་གཤེགས་པས་
ཐུགས་བརྩེ་བར་དགོངས་ཏེ། རྒྱལ་པོ་ཆེན་པོ་རྣམ་ཐོས་ཀྱི་བུ་ལས་ལྷུང་བཟེད་བཞེས་སོ། །བཞེས་ནས་ཀྱང་རྒྱལ་པོ་ཆེན་པོ་ཡུལ་འཁོར་སྲུང་ལ་ཚིགས་སུ་བཅད་པས་བཀའ་སྩལ་པ། གང་ཞིག་དེ་བཞིན་གཤེགས་ལ་ལྷུང་བཟེད་ཕུལ། །་ནམས་ཀྱང་དྲན་དང་ཤེས་རབ་ཉམས་མི་འགྱུར། །བསིལ་དངོས་གོ་འཕང་སངས་རྒྱས་ཐོབ་བར་དུ། །བདེ་བས་བདེ་བར་དུས་རྣམས་ཟད་པར་བྱེད། །དགེ་སློང་དག་དེ་ནས་དེ་བཞིན་གཤེགས་པས་ཐུགས་བརྩེ་བར་དགོངས་ཏེ། རྒྱལ་པོ་ཆེན་པོ་ཡུལ་འཁོར་སྲུང་ལས་ལྷུང་བཟེད་བཞེས་སོ། །བཞེས་ནས་ཀྱང་རྒྱལ་པོ་ཆེན་པོ་འཕགས་སྐྱེས་པོ་ལ་ཚིགས་སུ་བཅད་པས་བཀའ་སྩལ་པ། རྣམ་པར་དག་སེམས་དེ་བཞིན་གཤེགས་པ་ལ། །ཁྱོད་ཀྱིས་ཡོངས་དག་ལྷུང་བཟེད་ཕུལ་ཅིག་དང་། །ཁྱོད་ཀྱི་སེམས་ནི་མྱུར་དུ་དག་པར་འགྱུར། །ལྷ་མི་འཇིག་རྟེན་དག་ན་བསྔགས་པར་འོས། །དགེ་སློང་དག་དེ་ནས་དེ་བཞིན་གཤེགས་པས་ཐུགས་བརྩེ་བར་དགོངས་ཏེ། རྒྱལ་པོ་ཆེན་པོ་འཕགས་སྐྱེས་པོ་ལས་ལྷུང་བཟེད་བཞེས་སོ། །བཞེས་ནས་ཀྱང་རྒྱལ་པོ་ཆེན་པོ་མིག་མི་བཟང་ལ་ཚིགས་སུ་བཅད་པས་བཀའ་སྩལ་པ། །སྐྱོན་མེད་སེམས་དང་དད་པས་སྐྱོན་མེད་སྣོད། །དེ་བཞིན་གཤེགས་པ་ཚུལ་ཁྲིམས་སྐྱོན་མེད་ཅིང་། །ཚུལ་སྐྱོན་མེད་ལ་རབ་ཏུ་ཕུལ་ཅིག་དང་། །ཁྱོད་ཀྱི་སྦྱིན་པ་བསོད་ནམས་སྐྱོན་མེད་འགྱུར། །དགེ་སློང་དག་དེ་བཞིན་གཤེགས་པས་ཐུགས་བརྩེ་བར་དགོངས་ཏེ། །རྒྱལ་པོ་ཆེན་པོ་མིག་མི་བཟང་ལས་ལྷུང་བཟེད་བཞེས་སོ། །བཞེས་ནས་ཀྱང་མོས་པའི་སྟོབས་ཀྱི་ལྷུང་བཟེད་གཅིག་ཏུ་བྱིན་གྱིས་བརླབས་ཏེ། དེའི་ཚེ་ཆེད་དུ་བརྗོད་པ་འདི་ཆེད་དུ་བརྗོད་དོ། །ང་ཡིས་སྔོན་གྱི་སྲིད་པར་སྣོད་ཀྱི་རྣམས། །བཟང་བྱས་འབྲས་བུས་རབ་ཏུ་བཀང་སྟེ་བྱིན། །་དེ་ནས་ལྷུང་བཟེད་དབྱིབས་ལེགས་བཞི་པོ་འདི། །རྫུ་འཕྲུལ་ཆེན་པོའི་ལྷ་བཞི་རྣམས་ཀྱིས་བྱིན། །དེ་ལ་འདི་སྐད་ཅེས་བྱ་སྟེ། །བརྟན་པ་དམ་པའི་དོན་དེ་དགོངས་པ་དེ། །ཞག་བདུན་བྱང་ཆུབ་ཤིང་མཆོག་གཟིགས་ནས་ནི། །སེང་གེའི་སྟབས་འདྲ་མི་ཡི་སེང་གེ་དེ། །ས་ནི་རྣམ་པ་དྲུག་ཏུ་བསྐྱོད་ནས་བཞེངས། །གླང་པོའི་དབང་ལྟར་ཀུན་ཏུ་དལ་གྱིས་
གཤེགས། །རིམ་གྱིས་སྒྲོལ་རྒྱུའི་ཤིང་གི་དྲུང་བྱོན་ནས། །ལྷུན་པོ་ལྟ་བུར་གཡོ་བ་མི་མངའ་བཞུགས། །ཐུབ་པ་བསམ་གཏན་ཏིང་ངེ་འཛིན་རྣམས་དགོངས། །དེ་ཡི་ཚེ་ན་ག་གོན་བཟང་པོ་སྤུན། །གཉིས་དང་ཚོང་པའི་ཚོགས་དང་ཤིང་རྟ་ནི། །ནོར་གྱིས་གང་བ་དག་དང་ལྷན་ཅིག་ཏུ། །སཱ་ལའི་མེ་ཏོག་ནགས་ཚལ་རྒྱས་པར་ཞུགས། །དྲང་སྲོང་ཆེན་པོའི་གཟི་ཡིས་སྐད་ཅིག་ཏུ། །སྲོག་ཤིང་ཐུག་པར་འཕང་ལོ་ས་ནང་ནུབ། །དེ་དག་དེ་འདྲ་བ་ཡི་གནས་མཐོང་ནས། །ཚོང་པའི་ཚོགས་ནི་འཇིགས་པ་ཆེན་པོ་སྐྱེས། །དེ་དག་རལ་གྲི་མདའ་དང་མདུང་ཐུང་ཐོགས། །ནགས་ན་རི་དགས་བཞིན་དུ་སུ་ཞེས་ཚོལ། །སྤྲིན་མེད་འོད་ཟེར་སྟོང་ལྡན་འདྲ་བའི་རྒྱལ། །ཞལ་རས་སྟོན་གྱི་ཟླ་བ་འདྲ་བ་མཐོང་། །ཁྲོ་བ་སྤངས་ཤིང་རྒྱགས་པ་བསལ་ནས་སུ། །མགོ་བོས་ཕྱག་འཚལ་འདི་ནི་སུ་ཞེས་དཔྱོད། །མཁའ་ལས་ལྷ་ཡིས་འདི་སྐད་ཚིག་སྨྲས་ཏེ། །འདི་ནི་སངས་རྒྱས་འཇིག་རྟེན་ཕན་དོན་མཛད། །ཉིན་བདུན་མཚན་བདུན་བཟའ་དང་བཏུང་བ་དག །ཐུགས་རྗེའི་བདག་ཉིད་འདི་ནི་མ་གསོལ་ཏོ། །གལ་ཏེ་བདག་གི་ཉོན་མོངས་ཞི་འདོད་ན། །སྐུ་དང་ཐུགས་བསྒོམས་འདི་ལ་བཤོས་གསོལ་ཅིག །དེ་དག་གིས་ནི་སྒྲ་སྙན་དེ་ཐོས་ནས། །རྒྱལ་ལ་ཕྱག་འཚལ་བསྐོར་བ་བྱས་ནས་ནི། །དགའ་ནས་དེ་དག་གྲོགས་དང་ལྷན་ཅིག་ཏུ། །རྒྱལ་བ་བཤོས་གསོལ་བར་ནི་གྲོས་བཅད་དོ། །དགེ་སློང་དག་དེའི་ཚེ་ཚོང་པ་ག་གོན་དང་བཟང་པོ་གཉིས་ཀྱི་བའི་ཁྱུ་མཐའ་འཁོབ་ཀྱི་འོར་ཞིག་ན་གནས་སོ། །དེ་ནས་དེའི་ཚེ་བདེ་དག་བཞོས་ནས་མར་གྱི་སྙིང་ཁུ་བྱུང་བར་གྱུར་ཏོ། །དེ་ནས་བ་ལང་རྫི་དེ་དག་གིས་མར་གྱི་སྙིང་ཁུ་དེ་ཁྱེར་ནས། ཚོང་པ་ག་གོན་དང་བཟང་པོ་ག་ལ་བ་དེར་སོང་སྟེ་ཕྱིན་ནས། དེ་དག་གིས་ཚུལ་སྨོས་ཏེ། བཙུན་པ་དག་མཁྱེན་པར་མཛད་དུ་གསོལ། ཁྱེད་ཀྱི་བ་ཐམས་ཅད་ནི་བཞོས་ན། མར་གྱི་སྙིང་ཁུ་བྱུང་ན་འདི་ཅི་དགེ་བ་ཞིག་ལགས་སམ། འོན་ཏེ་མ་ལགས། དེ་ན་བྲམ་ཟེ་ཟས་ལ་བརྐམ་པའི་རང་བཞིན་ཅན་དག་འདི་སྐད་ཅེས་འདི་ནི་དགེ་བ་མ་ཡིན་ཏེ། བྲམ་ཟེ་རྣམས་ལ་མཆོད་སྦྱིན་ཆེན་པོ་བྱ་དགོས་སོ་ཞེས་འཛེར་ཏོ། །དགེ་སློང་དག་དེའི་ཚེ་ཚོང་པ་ག་
གོན་དང་བཟང་པོ་དག་གི་ཚེ་རབས་སྔ་མའི་སྣག་གི་གཉེན་མཚམས་བྲམ་ཟེ་རྨ་བྱ་ཞེས་བྱ་བ་ཚངས་པའི་འཇིག་རྟེན་དུ་སྐྱེས་པར་གྱུར་པ་དེས་བྲམ་ཟེའི་གཟུགས་སུ་སྤྲུལ་ནས། ཚོང་པ་དེ་དག་ལ་ཚིགས་སུ་བཅད་དེ་སྨྲས་པ། ཁྱོད་ཀྱིས་སྔོན་ནི་སྨོན་བཏབ་པ། །བྱང་ཆུབ་བརྙེས་ནས་དེ་བཞིན་གཤེགས། །བདག་ཅག་རྣམས་ཀྱི་བཤོས་གསོལ་ཏེ། །ཆོས་ཀྱི་འཁོར་ལོ་བསྐོར་བར་ཤོག །སྨོན་ལམ་དེ་ནི་རྫོགས་ཟིན་གྱིས། །བྱང་ཆུབ་བརྙེས་པ་དེ་བཞིན་གཤེགས། །དེ་ལ་ཞལ་ཟས་ཕུལ་ཅིག་དང་། །གསོལ་ནས་འཁོར་ལོ་བསྐོར་བར་འགྱུར། །ཁྱེད་ཀྱི་བ་མར་སྙིང་ཁུ་བྱུང་། །ཤིན་ཏུ་བཀྲ་ཤིས་སྐར་མ་བཟང་། །དྲང་སྲོང་ཆེན་པོ་དེ་ཡི་ནི། །བསོད་ནམས་ལས་ཀྱི་མཐུ་འདིའོ། །དེ་ལྟར་ཚོང་པ་བསྐུལ་ནས་ནི། །རྨ་བྱ་རང་གི་གནས་སུ་སོང་། །ག་གོན་ཞེས་ནི་བྱ་ལ་སོགས། །ཐམས་ཅད་ཡིད་ནི་མགུ་བར་གྱུར། །བ་སྟོང་འོ་མ་ཇི་སྙེད་ཡོད་པ་དག །དེ་ཀུན་མ་ལུས་པར་ནི་བསྡུས་ནས་སུ། །དེ་ཡི་སྟེང་ནས་པྲིས་མ་བཞམ་བྱས་ཏེ། །དེ་དག་རབ་ཏུ་གུས་པར་ཞལ་ཟས་སྦྱོར། །རིན་ཆེན་གཞོང་པ་ཚིམ་བྱེད་ཅེས་བྱ་བ། །སྲང་གཅིག་ལ་ཡང་འབུམ་ཕྲག་གཅིག་རི་བ། །གཙང་མར་རབ་བཀྲུས་དྲི་མ་མེད་བྱས་ནས། །ཞལ་ཟས་ཀྱིས་ནི་ཁ་ད་ཆད་དུ་བཀང་། །སྦྲང་རྩི་དང་ནི་རིན་ཆེན་གཞོང་ཐོགས་ཏེ། །སྒྲོལ་རྒྱུའི་ཤིང་གི་དྲུང་སོང་སྟོན་པ་ལ། །བཙུན་པ་བཞེས་ཏེ་བདག་ཅག་སྨན་ཡང་ཐོགས། །ཞལ་ཟས་གྱ་ནོམ་པ་འདི་མནབས་སུ་གསོལ། །སྤུན་གཉིས་པོ་ལ་ཐུགས་བརྩེ་མཛད་པ་དང་། །བྱང་ཆུབ་ཞུགས་པའི་སྔོན་གྱི་བསམ་མཁྱེན་ནས། །སྟོན་པ་བཞེས་པ་མཛད་དེ་ཞལ་ཟས་གསོལ། །གསོལ་ནས་གཞོང་པ་ནམ་མཁའི་དཀྱིལ་དུ་བོར། །ལྷ་ཡི་བུ་ཕོ་རབ་ཚངས་ཞེས་བྱ་བ། །དེ་ཡིས་རིན་ཆེན་གཞོང་པ་མཆོག་དེ་བླངས། །དེས་དེ་ད་དུང་ཚངས་པའི་འཇིག་རྟེན་ན། །ལྷ་གཞན་གྲོགས་དང་ལྷན་ཅིག་མཆོད་པ་བྱེད། །དེ་ནས་དེའི་ཚེ་དེ་བཞིན་གཤེགས་པས་ཚོང་པ་ག་གོན་དང་བཟང་པོ་དེ་དག་ལ་འདི་དག་གིས་རབ་ཏུ་དགའ་བར་མཛད་དོ། །ལྷ་ཡི་བཀྲ་ཤིས་དོན་སྒྲུབ་ཅིང་། །ཕྱོགས་རྣམས་བཀྲ་ཤིས་བྱེད་པ་དེས། །ཁྱེད་ཀྱི་དོན་རྣམས་གྲུབ་གྱུར་ཅིག །
ཐམས་ཅད་མྱུར་དུ་འཐུན་པར་ཤོག །ཕྲེང་བ་མགོ་ལ་འདུག་པ་ལྟར། །ལག་པ་གཡས་ན་དཔལ་ཡོད་ཤོག །གཡོན་ནའང་དཔལ་ནི་གནས་གྱུར་ཅིག །ཡན་ལག་ཀུན་ནའང་དཔལ་ཡོད་ཤོག །ཚོང་པ་དག་ནི་ནོར་ཚོལ་ཞིང་། །ཕྱོགས་བཅུ་དག་ཏུ་འགྲོ་བ་རྣམས། །རྙེད་པ་ཆེན་པོ་རྙེད་གྱུར་ཅིང་། །དེ་དག་བདེ་བ་སྐྱིད་པར་ཤོག །དགོས་པ་ལ་ལ་གང་གི་ཕྱིར། །ཤར་ཕྱོགས་སུ་ནི་འགྲོ་བ་ན། །གང་དག་ཕྱོགས་དེར་གནས་པ་ཡི། །རྒྱུ་སྐར་ཁྱེད་ལ་སྐྱོང་གྱུར་ཅིག །སྨིན་དྲུག་དང་ནི་སྣར་མ་དང་། །མགོ་དང་ལག་དང་ནབ་སོ་དང་། །རྒྱལ་དང་སྐག་ཅེས་བྱ་བ་སྟེ། །དེ་དག་རྣམས་ནི་ཤར་ཕྱོགས་པ། །རྒྱུ་སྐར་བདུན་པོ་དེ་དག་ནི། །འཇིག་རྟེན་སྐྱོང་བ་གྲགས་ལྡན་པ། །ཤར་ཕྱོགས་ལོགས་ན་ཡོད་ཅེས་བསྟན། །དེ་དག་ཁྱེད་ལ་ཀུན་ཏུ་སྲུངས། །དེ་དག་བདག་པོ་རྒྱལ་པོ་ནི། །ཡུལ་འཁོར་སྲུང་ཞེས་གྲགས་པ་སྟེ། །དེ་ནི་དྲི་ཟ་ཀུན་གྱི་བདག །ཉི་མ་ལྷན་ཅིག་སྲུང་བར་ཤོག །དེ་ལ་བུ་ནི་མང་ཡོད་ལ། །མཁས་ཤིང་མིང་ཡང་འཐུན་པ་སྟེ། །དགུ་བཅུ་རྩ་གཅིག་ཟད་པར་ཡང་། །དབང་པོ་ཞེས་བྱ་སྟོབས་པོ་ཆེ། །དེ་རྣམས་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་གྱུར་ཅིག །ཤར་ཕྱོགས་ལོགས་ཀྱི་ཕྱོགས་ཆ་ན། །ལྷ་མོ་གཞོན་ནུ་བརྒྱད་ཡོད་དེ། །རྒྱལ་དང་རྣམ་པར་རྒྱལ་མ་དང་། །དོན་གྲུབ་མ་དང་མི་འཕམ་དང་། །དགའ་མཆོག་མ་དང་དགའ་སྡེ་དང་། །དགའ་ཅན་མ་དང་དགའ་འཕེལ་མ། །དེ་དག་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་བར་ཤོག །ཤར་ཕྱོགས་ལོགས་ཀྱི་ཕྱོགས་ཆ་ན། །གཞི་འཛིན་ཞེས་བྱའི་མཆོད་རྟེན་ཡོད། །རྒྱལ་བ་སྐྱོབ་པ་དགྲ་བཅོམ་པ། །དེ་རྣམས་ཀྱིས་ནི་བཞུགས་ཤིང་མཁྱེན། །དེ་ཡང་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་གྱུར་ཅིག །ཕྱོགས་ན་ཁྱེད་ཅག་བདེ་བར་ཤོག །ཁྱེད་ཅག་སྡིག་པར་མ་གྱུར་ཅིག །ལྷ་རྣམས་ཀུན་གྱིས་རབ་བསྲུངས་ནས། །ནོར་རྣམས་རྙེད་དེ་ལྡོག་པར་ཤོག །དགོས་པ་ལ་ལ་གང་གི་ཕྱིར། །ལྷོ་ཕྱོགས་སུ་ནི་འགྲོ་བ་ན། །གང་དག་ཕྱོགས་དེར་གནས་པ་ཡི། །རྒྱུ་སྐར་ཁྱེད་ལ་སྐྱོང་གྱུར་ཅིག །མཆུ་དང་གྲེ་དང་དབོ་དང་ནི། །མེ་བཞི་ནག་པ་ལྔ་པ་
ཡིན། །ས་རི་དང་ནི་ས་ག་སྟེ། །དེ་དག་རྣམས་ནི་ལྷོ་ཕྱོགས་པ། །རྒྱུ་སྐར་བདུན་པོ་དེ་དག་ནི། །འཇིག་རྟེན་སྐྱོང་བ་གྲགས་ལྡན་པ། །ལྷོ་ཕྱོགས་ལོགས་ན་ཡོད་ཅེས་བསྟན། །དེ་དག་ཁྱེད་ལ་ཀུན་ཏུ་སྲུངས། །དེ་དག་བདག་པོ་རྒྱལ་པོ་ནི། །འཕགས་སྐྱེས་པོ་ཞེས་བྱ་བར་བརྗོད། །དེ་ནི་གྲུལ་བུམ་ཀུན་གྱི་བདག །གཤིན་རྗེ་ལྷན་ཅིག་སྲུང་བར་ཤོག །དེ་ལ་བུ་ནི་མང་ཡོད་ལ། །མཁས་ཤིང་མིང་ཡང་འཐུན་པ་སྟེ། །དགུ་བཅུ་རྩ་གཅིག་ཟད་པར་ཡང་། །དབང་པོ་ཞེས་བྱ་སྟོབས་པོ་ཆེ། །དེ་རྣམས་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་གྱུར་ཅིག །ལྷོ་ཕྱོགས་ལོགས་ཀྱི་ཕྱོགས་ཆ་ན། །ལྷ་མོ་གཞོན་ནུ་བརྒྱད་ཡོད་དེ། །དཔལ་ལྡན་མ་དང་གྲགས་ལྡན་མ། །གྲགས་པ་འཐོབ་དང་གྲགས་འཛིན་དང་། །ལེགས་པར་ལངས་དང་རབ་སྔ་དང་། །ལེགས་པར་སད་དང་བདེ་སྒྲུབ་མ། །དེ་དག་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་བར་ཤོག །ལྷོ་ཕྱོགས་ལོགས་ཀྱི་ཕྱོགས་ཆ་ན། །པད་མ་ཞེས་བྱའི་མཆོད་རྟེན་ཡོད། །རྟག་ཏུ་གཟི་བརྗིད་ཀྱིས་ཀྱང་འབར། །རྟག་ཏུ་ཐམས་ཅད་གསལ་བྱེད་པ། །དེ་ཡང་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་གྱུར་ཅིག །ཕྱོགས་ན་ཁྱེད་ཅག་བདེ་བར་ཤོག །ཁྱེད་ཅག་སྡིག་པར་མ་གྱུར་ཅིག །ལྷ་རྣམས་ཀུན་གྱིས་རབ་བསྲུངས་ནས། །ནོར་རྣམས་རྙེད་དེ་ལྡོག་པར་ཤོག །དགོས་པ་ལ་ལ་གང་གི་ཕྱིར། །ནུབ་ཕྱོགས་སུ་ནི་འགྲོ་བ་ན། །གང་དག་ཕྱོགས་དེར་གནས་པ་ཡི། །རྒྱུ་སྐར་ཁྱེད་ལ་སྐྱོང་གྱུར་ཅིག །ལྷ་མཚམས་དང་ནི་ན་དང་ཡང་། །བརྩོན་འགྲུས་བརྟན་ལྡན་སྣྲུམས་དང་ནི། །ཆུ་སྟོད་ཆུ་སྨད་བྱི་བཞིན་དང་། །གྲོ་བཞིན་དེ་ནི་བདུན་པ་ཡིན། །་དེ་དག་རྣམས་ནི་ནུབ་ཕྱོགས་པ། །རྒྱུ་སྐར་བདུན་པོ་དེ་དག་ནི། །འཇིག་རྟེན་སྐྱོང་བ་གྲགས་ལྡན་པ། །ནུབ་ཕྱོགས་ལོགས་ན་ཡོད་ཅེས་བསྟན། །དེ་དག་ཁྱེད་ལ་ཀུན་ཏུ་སྲུངས། །དེ་དག་བདག་པོ་རྒྱལ་པོ་ནི། །མིག་མི་བཟང་ཞེས་བྱ་བར་ཤེས། །དེ་ནི་ཀླུ་རྣམས་ཀུན་གྱི་བདག །ཆུ་ལྷ་ལྷན་ཅིག་སྲུང་བར་ཤོག །དེ་ལ་བུ་ནི་མང་ཡོད་ལ། །མཁས་ཤིང་མིང་ཡང་འཐུན་པ་སྟེ། །
དགུ་བཅུ་རྩ་གཅིག་ཟད་པར་ཡང་། །དབང་པོ་ཞེས་བྱ་སྟོབས་པོ་ཆེ། །དེ་དག་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་གྱུར་ཅིག །ནུབ་ཕྱོགས་ལོགས་ཀྱི་ཕྱོགས་ཆ་ན། །ལྷ་མོ་གཞོན་ནུ་བརྒྱད་ཡོད་དེ། །རྣ་ཆ་སྐྲ་འདྲེས་མ་དང་ནི། །པད་མ་དཀར་དང་སྐྱ་རེང་དང་། །ཆ་མེད་གཅིག་དང་དགུ་པ་དང་། །རོལ་དང་གནག་དང་སྟབས་མྱུར་སྲིད། །དེ་དག་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་བར་ཤོག །ནུབ་ཕྱོགས་ལོགས་ཀྱི་ཕྱོགས་ཆ་ན། །ནུབ་ཅེས་བྱ་བའི་རི་བོ་ཡོད། །ཉི་མ་ཟླ་བ་རྣམས་ཀྱང་གནས། །ནུབ་པའང་ཁྱེད་ལ་ནོར་སྦྱིན་གྱུར། །དེ་ཡང་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་གྱུར་ཅིག །ཕྱོགས་ན་ཁྱེད་ཅག་བདེ་བར་ཤོག །ཁྱེད་ཅག་སྡིག་པར་མ་གྱུར་ཅིག །ལྷ་རྣམས་ཀུན་གྱིས་རབ་བསྲུངས་ནས། །ནོར་རྣམས་རྙེད་དེ་ལྡོག་པར་ཤོག །དགོས་པ་ལ་ལ་གང་གི་ཕྱིར། །བྱང་ཕྱོགས་སུ་ནི་འགྲོ་བ་ན། །གང་དག་ཕྱོགས་དེར་གནས་པ་ཡི། །རྒྱུ་སྐར་ཁྱེད་ལ་སྐྱོང་གྱུར་ཅིག །མོན་གྲུ་དང་ནི་མོན་གྲེ་དང་། །ཁྲུམས་སྟོད་དང་ཡང་ཁྲུམས་སྨད་དང་། །ནམ་གྲུ་དང་ནི་ཐ་སྐར་དང་། །བྲ་ཉེ་སྟེ་ནི་བདུན་པ་ཡིན། །རྒྱུ་སྐར་བདུན་པོ་དེ་དག་ནི། །འཇིག་རྟེན་སྐྱོང་བ་གྲགས་ལྡན་པ། །བྱང་ཕྱོགས་ལོགས་ན་ཡོད་ཅེས་བསྟན། །དེ་དག་ཁྱེད་ལ་ཀུན་ཏུ་སྲུངས། །དེ་དག་བདག་པོ་རྒྱལ་པོ་ནི། །མི་ལ་ཞོན་པ་ལུས་ངན་པོ། །གནོད་སྦྱིན་ཀུན་གྱི་བདག་པོ་སྟེ། །ནོར་བཟངས་ལྷན་ཅིག་སྲུང་བར་ཤོག །དེ་ལ་བུ་ནི་མང་ཡོད་ལ། །མཁས་ཤིང་མིང་ཡང་འཐུན་པ་སྟེ། །དགུ་བཅུ་རྩ་གཅིག་ཟད་པར་ཡང་། །དབང་པོ་ཞེས་བྱ་སྟོབས་པོ་ཆེ། །དེ་དག་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་གྱུར་ཅིག །བྱང་ཕྱོགས་ལོགས་ཀྱི་ཕྱོགས་ཆ་ན། །ལྷ་མོ་གཞོན་ནུ་བརྒྱད་ཡོད་དེ། །རབ་ཆགས་ལྷ་མོ་སྟོང་ལྷ་མོ། །ས་དང་དེ་བཞིན་པད་མ་ཅན། །རྒྱལ་པོ་ཆེ་ལ་ཉེར་གནས་དང་། །རེ་དང་ཁྲེལ་ཡོད་དཔལ་ལྡན་མ། །དེ་དག་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་བར་ཤོག །བྱང་ཕྱོགས་ལོགས་ཀྱི་ཕྱོགས་ཆ་ན། །སྤོས་ངད་ལྡང་བའི་རི་བོ་ཡོད། །གནོད་སྦྱིན་
འབྱུང་པོ་རྣམས་ཀྱི་གནས། །རྩེ་མོ་སྣ་ཚོགས་བལྟ་ན་སྡུག །དེ་ཡང་ཁྱེད་ལ་ནད་མེད་ཅིང་། །ཤིས་པར་ལྷག་པར་སྐྱོང་གྱུར་ཅིག །ཕྱོགས་ན་ཁྱེད་ཅག་བདེ་བར་ཤོག །ཁྱེད་ཅག་སྡིག་པར་མ་གྱུར་ཅིག །ལྷ་རྣམས་ཀུན་གྱིས་རབ་བསྲུངས་ནས། །ནོར་རྣམས་རྙེད་དེ་ལྡོག་པར་ཤོག །རྒྱུ་སྐར་ཉི་ཤུ་རྩ་བརྒྱད་པོ། །ཕྱོགས་བཞི་དག་ན་བདུན་བདུན་གནས། །ལྷ་ཡི་བུ་མོ་སུམ་ཅུ་གཉིས། །ཕྱོགས་བཞི་དག་ན་བརྒྱད་བརྒྱད་གནས། །དགེ་སྦྱོང་བརྒྱད་དང་བྲམ་ཟེ་བརྒྱད། །ཡུལ་རྣམས་ན་ནི་གྲོང་རྡལ་བརྒྱད། །དབང་པོར་བཅས་པའི་ལྷ་བརྒྱད་རྣམས། །དེ་དག་ཁྱེད་ལ་ཀུན་ཏུ་སྲུངས། །ཁྱེད་ཅག་འགྲོ་ནའང་བཀྲ་ཤིས་གྱུར། །ལྡོག་པ་ན་ཡང་བཀྲ་ཤིས་ཤོག །གཉེན་ལ་ལྟ་བ་བཀྲ་ཤིས་གྱུར། །གཉེན་གྱིས་བལྟ་བའང་བཀྲ་ཤིས་ཤོག །དབང་བཅས་གནོད་སྦྱིན་རྒྱ་ཆེན་དང་། །དགྲ་བཅོམ་པ་དག་སྙིང་བརྩེ་བས། །ཐམས་ཅད་དུ་ནི་བཀྲ་ཤིས་དང་། །བདུད་རྩི་ཤིས་པ་ཐོབ་པར་ཤོག །ཚངས་པ་དང་ནི་དེ་བཞིན་ནོར་རྒྱས་དང་། །ཟག་པ་མེད་པ་རྣམ་པར་གྲོལ་རྣམས་དང་། །ཀླུ་དང་གནོད་སྦྱིན་རྟག་ཏུ་སྙིང་བརྩེས་བསྲུང་། །སྟོན་བརྒྱར་མཚུངས་པར་ཚེ་ནི་སྐྱོང་བར་ཤོག །རྣམ་འདྲེན་ཟླ་མེད་འཇིག་རྟེན་མགོན་པོ་ཡིས། །དེ་དག་འཐུན་པར་སྦྱིན་པའི་བསྔགས་པ་གསུངས། །ཁྱེད་རྣམས་ཀྱི་ནི་དགེ་བའི་ལས་འདི་ཡིས། །སྦྲང་རྩི་འབྱུང་ཞེས་བྱ་བའི་རྒྱལ་བར་འགྱུར། །འཇིག་རྟེན་རྣམ་པར་འདྲེན་པ་རྒྱལ་བ་ཡིས། །ལུང་བསྟན་ཆགས་མེད་འདི་ནི་དང་པོ་ཡིན། །ཕྱིན་ཆད་བྱང་ཆུབ་སེམས་དཔའ་མཐའ་ཡས་མང་། །གང་དག་ལུང་བསྟན་དེ་དག་ཕྱིར་མི་ལྡོག །རྒྱལ་བས་ལུང་བསྟན་པ་ནི་འདི་ཐོས་ནས། །སེམས་ནི་མགུ་ཞིང་མཆོག་ཏུ་དགའ་གྱུར་ཏེ། །དེ་དག་སྤུན་དང་གྲོགས་དང་ལྷན་ཅིག་ཏུ། །དེ་དག་སངས་རྒྱས་ཆོས་ལ་སྐྱབས་སུ་དོང་། །ག་གོན་དང་བཟང་པོའི་ལེའུ་ཞེས་བྱ་བ་སྟེ། ཉི་ཤུ་རྩ་བཞི་པའོ།། །།