ཉི་ཤུ་རྩ་དྲུག་པ། ཆོས་ཀྱི་འཁོར་ལོ་བསྐོར་བའི་ལེའུ།
འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་བདུན་པ། དགེ་སློང་དག་དེ་ནས་དེ་བཞིན་གཤེགས་པ་བྱ་བ་མཛད་པ། བྱེད་པ་མཛད་པ།
བཅིངས་པ་ཐམས་ཅད་ཡང་དག་པར་ཆད་པ། ཉོན་མོངས་པ་ཐམས་ཅད་བསལ་བ། དྲི་མ་དང་ཉོན་མོངས་པ་སྦྱངས་པ། བདུད་ཕྱིར་རྒོལ་བ་བཅོམ་པ། སངས་རྒྱས་ཀྱི་ཆོས་ཐམས་ཅད་ཀྱི་ཚུལ་གྱི་རྗེས་སུ་ཞུགས་པ། ཐམས་ཅད་མཁྱེན་པ་ཐམས་ཅད་གཟིགས་པ། སྟོབས་བཅུ་དང་ལྡན་པ། མི་འཇིགས་པ་བཞི་བརྙེས་པ། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་རབ་ཏུ་རྫོགས་པ། སྤྱན་ལྔ་དང་ལྡན་པ། སངས་རྒྱས་ཀྱི་སྤྱན་སྒྲིབ་པ་མི་མངའ་བས་འཇིག་རྟེན་ཐམས་ཅད་ལ་གཟིགས་ནས་འདི་སྙམ་དུ་དགོངས་ཏེ། ངས་ཐམས་ཅད་ཀྱི་ཐོག་མར་གང་ལ་ཡང་ཆོས་བསྟན་པར་བྱ། སེམས་ཅན་དག་པ། རྣམ་པ་བཟང་བ། གདུལ་སླ་བ། གོ་སླ་བ། སྦྱང་སླ་བ། འདོད་ཆགས་དང་། ཞེ་སྡང་དང་། གཏི་མུག་ཆུང་བ། རྣམ་པར་ཤེས་པ་ལྐོག་ཏུ་མ་གྱུར་པ། གང་ཆོས་མ་ཐོས་ན་ཡོངས་སུ་ཉམས་པར་འགྱུར་བ། གང་དག་ལ་བདག་གིས་ཐོག་མར་ཆོས་བསྟན་པར་བྱ། གང་ལ་ཆོས་འདི་བསྟན་ནས་ཀྱང་ཤེས་པར་འགྱུར་ཞིང་ཐོ་འཚམ་པར་མི་འགྱུར་བ་ནི་གང་ཡིན་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། རངས་བྱེད་ཀྱི་བུ་ལྷག་སྤྱོད་ནི་དག་པ། རྣམ་པ་བཟང་བ།གདུལ་སླ་བ། གོ་སླ་བ། སྦྱང་སླ་བ། འདོད་ཆགས་དང་ཞེ་སྡང་དང་གཏི་མུག་ཆུང་བ། རྣམ་པར་ཤེས་པ་ལྐོག་ཏུ་མ་གྱུར་པ་སྟེ། དེ་ཆོས་མ་ཐོས་ན་ཡོངས་སུ་ཉམས་པར་འགྱུར་བའོ། །དེ་ནི་ཉན་ཐོས་རྣམས་ལ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བརྟུལ་ཞུགས་དང་འཐུན་པར་ཆོས་སྟོན་པ་ཡིན་ན། དེ་ད་ལྟར་ག་ལ་འདུག་སྙམ་དགོངས་པ་དང་། དེ་འཆི་བའི་དུས་བྱས་ནས་དེང་དུ་ཞག་བདུན་ལོན་པར་མཁྱེན་ཏོ། །ལྷ་རྣམས་ཀྱིས་དེ་བཞིན་གཤེགས་པའི་ཞབས་ལ་གཏུགས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། རངས་བྱེད་ཀྱི་བུ་ལྷག་སྤྱོད་གུམ་ནས་དེང་དུ་དགུང་བདུན་ལགས་སོ། །དགེ་སློང་དག་ངས་འདི་སྙམ་དུ་བསམས་ཏེ། ཨེ་མ་རངས་བྱེད་ཀྱི་བུ་ལྷག་སྤྱོད་དེ་ཆོས་ཤིན་ཏུ་བཟང་པོ་འདི་ལྟ་བུ་འདི་མ་ཐོས་པར་ཤི་བའི་དུས་བྱས་པ་ནི་ཆེར་ཉམས་སོ། །གལ་ཏེ་དེས་ཆོས་འདི་ཐོས་ན་ཤེས་པར་འགྱུར་ཏེ། དེ་ལ་
བདག་གིས་ཐོག་མར་ཆོས་བསྟན་པར་བྱ་ཞིང་དེ་ཡང་བདག་ལ་ཐོ་འཚམས་པར་མི་འགྱུར་རོ་སྙམ་མོ། །དགེ་སློང་དག་དེ་བཞིན་གཤེགས་པས་ཡང་འདི་སྙམ་དུ་དགོངས་ཏེ། སེམས་ཅན་དག་པ་གདུལ་སླ་བ་ཞེས་བྱ་བ་ནས། ངའི་ཆོས་བསྟན་པ་ཐོ་འཚམ་པར་མི་འགྱུར་བ་ཞེས་བྱ་བའི་བར་དུ་སྔ་མ་བཞིན་ཏེ། དེ་ལྟ་བུ་གཞན་སུ་ཡོད་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། སྒྱུ་རྩལ་ཤེས་ཀྱི་བུ་རིང་འཕུར་ནི་དག་པ་ཞེས་བྱ་བ་ནས། ངའི་ཆོས་བསྟན་པ་ཐོ་འཚམ་པར་མི་འགྱུར་ཞེས་བྱ་བའི་བར་དུ་སྟེ། དེ་ད་ལྟར་ག་ལ་འདུག་སྙམ་དགོངས་ན། དེ་ཡང་འཆི་བའི་དུས་བྱས་ནས་དེང་དུ་ཞག་གསུམ་ལོན་པར་མཁྱེན་ཏོ། །གནས་གཙང་མའི་རིས་ཀྱི་ལྷ་རྣམས་ཀྱིས་ཀྱང་དོན་དེ་དེ་བཞིན་གཤེགས་པ་ལ་གསོལ་ཏེ། བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། སྒྱུ་རྩལ་ཤེས་ཀྱི་བུ་རིང་འཕུར་གུམ་ནས་དེང་དུ་དགུང་གསུམ་ལགས་སོ། །དེ་ནས་དེ་བཞིན་གཤེགས་པ་འདི་སྙམ་དུ་དགོངས་ཏེ། ཨེ་མ་སྒྱུ་རྩལ་ཤེས་ཀྱི་བུ་རིང་འཕུར་དེ་ཆོས་ཤིན་ཏུ་བཟང་པོ་འདི་ལྟ་བུ་འདི་མ་ཐོས་པར་ཤི་བ་ནི་ཆེར་ཉམས་སོ་སྙམ་མོ། །དགེ་སློང་དག་དེ་བཞིན་གཤེགས་པས་ཡང་འདི་སྙམ་དུ་དགོངས་ཏེ། སེམས་ཅན་དག་པ་རྣམ་པ་བཟང་བ་ཞེས་བྱ་བ་ནས་ངའི་ཆོས་བསྟན་པ་ཐོ་འཚམ་པར་མི་འགྱུར་ཞེས་བྱ་བའི་བར་དུ་སྔ་མ་བཞིན་ཏེ། དེ་ལྟ་བུ་གཞན་སུ་ཡོད་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པས་འདི་སྙམ་དུ་དགོངས་ཏེ། ལྔ་སྡེ་བཟང་པོ་རྣམས་ནི་དག་པ། རྣམ་པ་བཟང་བ། གདུལ་སླ་བ། གོ་སླ་བ། རྣམ་པར་སྦྱང་སླ་བ། འདོད་ཆགས་དང་ཞེ་སྡང་དང་། གཏི་མུག་ཆུང་བ། རྣམ་པར་ཤེས་པ་ལྐོག་ཏུ་མ་གྱུར་པ་སྟེ། དེ་དག་ཆོས་མ་ཐོས་ན་ཡོངས་སུ་ཉམས་པར་འགྱུར་བའོ། །ང་དཀའ་བ་སྤྱད་པ་སྤྱོད་པ་ན་ཡང་དེ་དག་གིས་བསྙེན་བཀུར་བྱས་པར་གྱུར་ཏེ། དེ་དག་ངས་ཆོས་བསྟན་ན་ཤེས་པར་འགྱུར་ཞིང་།ང་ལ་ཐོ་འཚམ་པར་མི་འགྱུར་རོ་སྙམ་མོ། །དགེ་སློང་དག་དེ་ནས་དེ་བཞིན་གཤེགས་པ་འདི་
སྙམ་དུ་དགོངས་ཏེ། བདག་གིས་ལྔ་སྡེ་བཟང་པོ་རྣམས་ལ་ཐོག་མར་ཆོས་བསྟན་པར་བྱ་གོར་མ་ཆག་སྙམ་མོ། །དགེ་སློང་དག་དེ་ནས་ཡང་དེ་བཞིན་གཤེགས་པ་འདི་སྙམ་དུ་དགོངས་ཏེ། ལྔ་སྡེ་བཟང་པོ་དག་ད་ལྟར་གང་ན་འཁོད་སྙམ་མོ། །དེ་ནས་དེ་བཞིན་གཤེགས་པས་སངས་རྒྱས་ཀྱི་སྤྱན་གྱིས་ཐམས་ཅད་དང་ལྡན་པའི་འཇིག་རྟེན་ལ་རྣམ་པར་གཟིགས་ན་ལྔ་སྡེ་བཟང་པོ་དག་གྲོང་ཁྱེར་བཱ་རཱ་ཎ་སཱིའི་དྲང་སྲོང་ལྷུང་བ་རི་དགས་ཀྱི་ནགས་ན་འཁོད་པར་གཟིགས་སོ། །གཟིགས་ནས་ཀྱང་དེ་བཞིན་གཤེགས་པས་འདི་སྙམ་དུ་དགོངས་ཏེ། བདག་གིས་ལྔ་སྡེ་བཟང་པོ་རྣམས་ལ་ཐམས་ཅད་ཀྱི་ཐོག་མར་ཆོས་བསྟན་པར་བྱ་གོར་མ་ཆག་གོ །དེ་དག་གིས་ངས་ཐམས་ཅད་ཀྱི་ཐོག་མར་ཆོས་བསྟན་པ་ཀུན་ཤེས་པར་འགྱུར་རོ་སྙམ་མོ། །དགེ་སློང་དག་དེ་ཅིའི་ཕྱིར་ཞེ་ན། དེ་དག་ནི་སྤྱད་པ་དང་ལྡན་པ་ཆོས་དཀར་པོ་རྣམས་ཤིན་ཏུ་ཡོངས་སུ་བསྡུས་པ། ཐར་པའི་ལམ་ལ་མངོན་དུ་ཕྱོགས་པ། བགེགས་དང་བྲལ་བ་དག་གོ །དགེ་སློང་དག་དེ་ནས་དེ་བཞིན་གཤེགས་པས་དེ་སྙམ་དུ་དགོངས་ནས་བྱང་ཆུབ་ཀྱི་སྙིང་པོ་ལས་བཞེངས་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཤེགས་ནས། མཐར་གྱིས་ཡུལ་མ་ག་དྷཱར་རྒྱུ་ཞིང་ཡུལ་གསལ་ལྡན་དུ་གཤེགས་སོ། །དེ་ནས་རི་ག་ཡཱ་དང་། བྱང་ཆུབ་ཀྱི་སྙིང་པོའི་བར་དུ་ཀུན་དུ་འཚོ་བ་པ་གཞན་ཞིག་གིས་དེ་བཞིན་གཤེགས་པ་རྒྱང་རིང་པོ་ནས་གཤེགས་པ་མཐོང་ངོ་། །མཐོང་ནས་ཀྱང་དེ་བཞིན་གཤེགས་པ་ག་ལ་བ་དེར་སོང་སྟེ། ཕྱིན་ནས་ཕྱོགས་གཅིག་ཏུ་འདུག་གོ །དགེ་སློང་དག་ཕྱོགས་གཅིག་ཏུ་འདུག་ནས་ཀྱང་ཀུན་ཏུ་འཚོ་བ་པ་དེ་དེ་བཞིན་གཤེགས་པ་དང་ལྷན་ཅིག་ཏུ་ཡང་དག་པར་མགུ་བར་བྱ་བའི་གཏམ་རྣམ་པ་མང་པོ་བྱས་ནས་འདི་སྐད་ཅེས་གསོལ་ཏོ། །ཚེ་དང་ལྡན་པ་གཽ་ཏ་མ་ཁྱོད་ཀྱི་དབང་པོ་རྣམས་ནི་ཤིན་ཏུ་གསལ་ལོ། །ཁྱོད་ཀྱི་པགས་པའི་མདོག་ནི་སེར་པོར་གདའ་ཞིང་ཡོངས་སུ་དག་ལ་ཡོངས་སུ་བྱང་བ་སྟེ། འདི་ལྟ་སྟེ་དཔེར་ན། སྟོན་ཀ་རྒྱ་ཤུག་ཁ་དོག་རྩ་སེར་ཞིང་འོད་གསལ་ཏེ། སེར་པོར་གདའ་བ་དེ་བཞིན་དུ་གཽ་ཏ་མ་ཁྱོད་ཀྱི་དབང་པོ་རྣམས་ཡོངས་སུ་དག་ཅིང་། ཞལ་གྱི་དཀྱིལ་འཁོར་ཡང་ཡོངས་སུ་དག་ལ་ཡོངས་སུ་བྱང་བའོ། །འདི་ལྟ་སྟེ་དཔེར་ན། ཤིང་ཏ་ལའི་འབྲས་བུ་སྨིན་པ་རྩ་བ་ནས་ཆད་མ་ཐག་པའི་རྩ་བ་ལོགས་སེར་པོར་གདའ་བ་ལགས་ཏེ། ཡོངས་སུ་དག་ཅིང་ཡོངས་སུ་བྱང་བ་དེ་
བཞིན་དུ་གཽ་ཏ་མ་ཁྱོད་ཀྱི་དབང་པོ་རྣམས་ནི་ཡོངས་སུ་དག་ལ། ཞལ་གྱི་དཀྱིལ་འཁོར་ནི་ཡོངས་སུ་དག་ཅིང་ཡོངས་སུ་བྱང་བའོ། །འདི་ལྟ་སྟེ་དཔེར་ན། འཛམ་བུའི་ཆུ་བོའི་གསེར་གྱི་མགུལ་རྒྱན་ཐབ་ནས་ཕྱུང་སྟེ། མགར་བའི་བུ་མཁས་པས་ལེགས་པར་ཡོངས་སུ་སྦྱང་བ་བགྱིས་པ། ལ་བ་དུར་ཀའི་ནང་དུ་སྩལ་ན། ཁ་དོག་དང་ལྡན་པར་འགྱུར་ཏེ། ཡོངས་སུ་དག་ཅིང་ཡོངས་སུ་བྱང་ལ། སེར་པོར་གདའ་ཞིང་འོད་གསལ་བར་འགྱུར་རོ། །དེ་བཞིན་དུ་གཽ་ཏ་མ་ཁྱོད་ཀྱི་དབང་པོ་རྣམས་ནི་ཤིན་ཏུ་གསལ། པགས་པའི་མདོག་ནི་ཡོངས་སུ་དག་ཞལ་གྱི་དཀྱིལ་འཁོར་ནི་ཡོངས་སུ་བྱང་བ་ལགས་སོ། །ཚེ་དང་ལྡན་པ་གཽ་ཏ་མ་སུ་ལས་ཚངས་པར་སྤྱད་པ་སྤྱོད། དགེ་སློང་དག་དེ་སྐད་ཅེས་གསོལ་བ་དང་། དེ་བཞིན་གཤེགས་པས་ཀུན་ཏུ་འཚོ་བ་པ་དེ་ལ་ཚིགས་སུ་བཅད་པས་སླར་བཀའ་སྩལ་པ། ང་ལ་སློབ་དཔོན་གང་ཡང་མེད། །ང་དང་འདྲ་བ་ཡོད་མ་ཡིན། །ང་ནི་གཅིག་པུ་རྫོགས་སངས་རྒྱས། །བསིལ་གྱུར་ཟག་པ་མེད་པ་ཡིན། །དེས་སྨྲས་པ། གཽ་ཏ་མ་བདག་ཉིད་དགྲ་བཅོམ་པར་ཞལ་གྱིས་འཆེའམ། དེ་བཞིན་གཤེགས་པས་བཀའ་སྩལ་པ། ང་ཉིད་འཇིག་རྟེན་དགྲ་བཅོམ་པ། །ང་ནི་སྟོན་པ་བླ་ན་མེད། །ལྷ་དང་ལྷ་མིན་དྲི་ཟར་བཅས། །ང་ཡི་དོ་ཟླ་གང་ཟག་མེད། །དེས་སྨྲས་པ། གཽ་ཏ་མ་བདག་ཉིད་རྒྱལ་བ་ལགས་པར་ཞལ་གྱིས་འཆེའམ། དེ་བཞིན་གཤེགས་པས་བཀའ་སྩལ་པ། གང་དག་ཟག་པ་ཟད་བརྙེས་པ། །ང་འདྲ་རྒྱལ་བར་ཤེས་པར་བྱ། །ང་ནི་སྡིག་པའི་ཆོས་ལས་རྒྱལ། །དེ་བས་ཉེ་འགྲོ་ང་རྒྱལ་ཡིན། །དེས་སྨྲས་པ། ཚེ་དང་ལྡན་པ་གཽ་ཏ་མ་ད་གར་བཞུད། དེ་བཞིན་གཤེགས་པས་བཀའ་སྩལ་པ། ང་ནི་བཱ་རཱ་ཎ་སཱིར་འགྲོ། གྲོང་ཁྱེར་གསལ་ལྡན་སོང་ནས་ནི། །ལོང་བ་ལྟ་བུའི་འཇིག་རྟེན་ལ། །མཚུངས་པ་མེད་པའི་འོད་བྱའོ། །ང་ནི་བཱ་རཱ་ཎ་སཱིར་འགྲོ། །གྲོང་ཁྱེར་གསལ་ལྡན་སོང་ནས་ནི། །འོན་པ་ལྟ་བུའི་འཇིག་རྟེན་ལ། །བདུད་རྩིའི་རྔ་ཆེན་བརྡུང་བར་བྱ། །ང་ནི་བཱ་རཱ་ཎ་སཱིར་འགྲོ། །གྲོང་ཁྱེར་གསལ་ལྡན་སོང་ནས་ནི། །འཇིག་རྟེན་དུ་ནི་མ་བསྐོར་བའི། །ཆོས་ཀྱི་འཁོར་ལོ་བསྐོར་བར་བྱ། །ཀུན་དུ་འཚོ་བ་པ་དེས་གཽ་ཏ་མ་དེ་བཞིན་དུ་
འགྱུར་རོ། །དེ་བཞིན་དུ་འགྱུར་རོ་ཞེས་སྨྲས་ཏེ། ལྷོ་ཕྱོགས་ལོགས་སུ་སོང་ངོ་། ། དེ་བཞིན་གཤེགས་པ་ནི་བྱང་ཕྱོགས་ལོགས་སུ་བཞུད་དོ། །དགེ་སློང་དག་དེ་ལྟར་དེ་བཞིན་གཤེགས་པ་རི་ག་ཡཱའི་ཀླུའི་རྒྱལ་པོ་ཤིན་ཏུ་བལྟ་མཛེས་ཀྱིས་བཞུགས་སུ་གསོལ་བ་དང་། བཤོས་གསོལ་བར་སྤྱན་དྲངས་སོ། །དེ་ནས་དེ་བཞིན་གཤེགས་པ་ཉེ་གནས་སུ་གཤེགས་སོ། །དེ་ནས་ཀྱང་ལྟེང་རྒྱས་ལྟར་གཤེགས་སོ། །དེ་ནས་ཀྱང་ཙན་ད་ལྟར་གཤེགས་སོ། །དེ་ནས་གྲོང་ཁྱེར་ཁ་ལོ་སྒྱུར་དུ་གཤེགས་སོ། །དགེ་སློང་དག་དེ་དག་ཏུ་ཡང་ཁྱིམ་བདག་རྣམས་ཀྱིས་དེ་བཞིན་གཤེགས་པ་བཞུགས་སུ་གསོལ་བ་དང་། བཤོས་གསོལ་བར་སྤྱན་དྲངས་ཏེ། མཐར་གྱིས་ཀླུང་ཆེན་པོ་གང་གཱའི་འགྲམ་དུ་གཤེགས་སོ། །དགེ་སློང་དག་དེའི་ཚེ་ཀླུང་ཆེན་པོ་གང་གཱ་ཤིན་ཏུ་བྲུག་སྟེ། མུ་དང་མཉམ་པར་འབབ་བོ། །དགེ་སློང་དག་དེ་ནས་དེ་བཞིན་གཤེགས་པ་ཕ་རོལ་ཏུ་གཤེགས་པའི་ཕྱིར། མཉན་པའི་གན་དུ་གཤེགས་པ་དང་། དེས་གསོལ་པ། གཽ་ཏ་མ་གྲུ་བཙས་སྩལ་དུ་གསོལ། གྲོགས་པོ་ང་ལ་གྲུ་བཙས་མེད་དོ་ཞེས་བཀའ་སྩལ་ནས། དེ་བཞིན་གཤེགས་པ་ནམ་མཁའ་ལས་ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་གཤེགས་སོ། །དེ་ནས་མཉན་པ་དེས་དེ་མཐོང་ནས་སྦྱིན་གནས་རྣམ་པ་འདི་ལྟ་བུ་འདི་བདག་གིས་མ་བསྒྲལ་ཏོ་ཞེས་ཤིན་ཏུ་འགྱོད་དེ། ཀྱི་ཧུད་མཚར་བྱས་སོ་ཞེས་སྨྲས་ནས་བརྒྱལ་ཏེ་ས་ལ་འགྱེལ་ཏོ། །དེ་ནས་མཉན་པས་རྒྱལ་པོ་གཟུགས་ཅན་སྙིང་པོ་ལ་ཇོ་བོ་དགེ་སྦྱོང་གཽ་ཏ་མ་ལ་གྲུ་བཙས་སྩལ་བར་གསོལ་ན། གྲུ་བཙས་མེད་དོ་ཞེས་གསུངས་ཏེ། ནམ་མཁའ་ལས་ཚུ་རོལ་གྱི་འགྲམ་ནས་ཕ་རོལ་གྱི་འགྲམ་དུ་གཤེགས་སོ་ཞེས་དེའི་ལོ་རྒྱུས་བསྙད་དོ། །དེ་སྐད་ཐོས་ནས་རྒྱལ་པོ་གཟུགས་ཅན་སྙིང་པོས་དེ་ཕྱིན་ཆད་རབ་ཏུ་བྱུང་བ་ཐམས་ཅད་ལ་གྲུ་བཙས་མི་དབབ་པར་བྱས་སོ། །དགེ་སློང་དག་དེ་ལྟར་དེ་བཞིན་གཤེགས་པ་མཐར་གྱིས་ཡུལ་རྒྱུ་བ་རྒྱུ་ཞིང་གྲོང་ཁྱེར་ཆེན་པོ་བཱ་རཱ་ཎ་སཱི་ག་ལ་བ་དེར་གཤེགས་སོ། །གཤེགས་ནས་ནང་བར་ཤམ་ཐབས་དང་ཆོས་གོས་གསོལ་ཏེ། ལྷུང་བཟེད་བསྣམས་ནས། གྲོང་ཁྱེར་ཆེན་པོ་བཱ་རཱ་ཎ་སཱིར་བསོད་སྙོམས་ཀྱི་ཕྱིར་གཤེགས་ཏེ། དེར་བསོད་སྙོམས་ཀྱི་
ཕྱིར་གཤེགས་ནས། བསོད་སྙོམས་ཀྱི་ཞལ་ཟས་མཇུག་ཏུ་གསོལ་ཏེ། ཟས་ཀྱི་བྱ་བ་བྱས་ནས་དྲང་སྲོང་ལྷུང་བ་རི་དགས་ཀྱི་ནགས་ག་ལ་བ་དང་། ལྔ་སྡེ་བཟང་པོ་ག་ལ་བ་དེར་གཤེགས་པ་དང་། ལྔ་སྡེ་བཟང་པོ་དག་གིས་དེ་བཞིན་གཤེགས་པ་རྒྱང་རིང་པོ་ནས་གཤེགས་པ་མཐོང་ངོ་། །མཐོང་ནས་ཀྱང་འདི་སྐད་དུ་ཚེ་དང་ལྡན་པ་དག་དགེ་སྦྱོང་གཽ་ཏ་མ་ལྷོད་པ། མང་དུ་ཟ་བ། སྤོང་བ་ལས་ཉམས་པ་འདི་འོངས་ཏེ། འདིས་སྔོན་གྱི་དཀའ་བ་སྤྱད་པ་དེས་མིའི་ཆོས་བླ་མ་ལས་མཆོག་ཏུ་གྱུར་པ། འཕགས་པའི་ཡེ་ཤེས་མཐོང་བའི་ཁྱད་པར་ཅུང་ཟད་ཀྱང་མངོན་སུམ་དུ་བྱེད་མ་ནུས་ནས། ད་ལྟར་ཁ་ཟས་རགས་པ་ཟ་ཞིང་བསོད་སྙོམས་ལ་སྦྱོར་བ་དང་ལྡན་པར་གནས་པ་ལྟ་སྨོས་ཀྱང་ཅི་དགོས་ཏེ། ལྷོད་པ་མང་དུ་ཟ་བ། འདི་ལ་སྐལ་བ་མེད་ཀྱིས་གང་གིས་ཀྱང་འདི་བསུ་བར་མི་བྱའོ། །ལྡང་བར་མི་བྱའོ། །ཆོས་གོས་དང་ལྷུང་བཟེད་བླང་བར་མི་བྱའོ། །སྟན་དང་ཡོངས་སུ་སྤྱད་པར་འོས་པའི་བཏུང་བ་དང་། རྐང་པ་གཞག་པ་ཡང་སྦྱིན་པར་མི་བྱའོ། །སྟན་ལྷག་པ་གཞན་ནི་མ་གཏོགས་ཏེ། ཚེ་དང་ལྡན་པ་གཽ་ཏ་མ་སྟན་ལྷག་པ་གཞན་འདི་དག་ཡོད་ཀྱིས་ཇི་སྟེ་འདོད་ན་འདུག་ཤིག་པར་བརྗོད་དོ་ཞེས་འོག་ཁྲིམས་བཅས་སོ། །ཚེ་དང་ལྡན་པ་ཀུན་ཤེས་ཀཽཎྜི་ནྱས་སེམས་ཀྱིས་ནི་ཁས་མ་བླངས་ཏེ་ཚིག་གིས་ནི་མི་རུང་ཞེས་མ་བྱས་སོ། །དགེ་སློང་དག་དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་ག་ལ་བ་དེར་གཤེགས་པ་དེ་ལྟ་དེ་ལྟར་དེ་དག་རང་རང་གི་སྟན་ལ་མི་དགའ་ཞིང་ལྡང་འདོད་པར་གྱུར་ཏེ། འདི་ལྟ་སྟེ་དཔེར་ན་འདབ་ཆགས་བྱ་སྐོན་པར་བཅུག་པར་གྱུར་ལ། སྐོན་པ་དེའི་འོག་ནས་མེས་བདུགས་ན། དེ་མེས་གདུངས་པས་མྱུར་བ་མྱུར་བར་འཕར་བར་འདོད་ཅིང་འཕུར་འདོད་པ་དེ་བཞིན་དུ། དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་དག་གི་གན་དུ་གཤེགས་པ་དེ་ལྟ་དེ་ལྟར་ལྔ་སྡེ་བཟང་པོ་དག་རང་རང་གི་སྟན་ལ་མི་དགའ་ཞིང་ལྡང་འདོད་པར་གྱུར་ཏོ། །དེ་ཅིའི་ཕྱིར་ཞེ་ན། གང་དག་དེ་བཞིན་གཤེགས་པ་མཐོང་ནས་སྟན་ལས་མི་ལྡང་བའི་སེམས་ཅན་དེ་ནི་སེམས་ཅན་གྱི་རིས་ན་གང་ཡང་མེད་དོ། །དེ་བཞིན་གཤེགས་པ་ཇི་ལྟ་ཇི་ལྟར་ལྔ་སྡེ་བཟང་པོ་དག་གི་གན་དུ་གཤེགས་པ་དེ་ལྟ་དེ་ལྟར་ལྔ་སྡེ་
བཟང་པོ་དག་གིས་དེ་བཞིན་གཤེགས་པའི་དཔལ་དང་གཟི་བརྗིད་མ་བཟོད་ནས་སྟན་གྱི་སྟེང་ན་འདར་ཞིང་ཀུན་གྱི་ས་འོག་ཁྲིམས་ཞིག་སྟེ། སྟན་ལས་ལངས་ནས་ལ་ལ་ནི་རིམ་གྲོ་བྱེད། ལ་ལས་ནི་བསུ་སྟེ་ན་བཟའ་ཆོས་གོས་དང་ལྷུང་བཟེད་བླངས། ལ་ལས་ནི་གདན་བཏིང་། ལ་ལས་ནི་ཞབས་གཞག་པ་བཤམས། ལ་ལས་ནི་ཞབས་བཀྲུ་བའི་ཆུ་བཤམས་ཏེ། འདི་སྐད་ཅེས་ཀྱང་གསོལ་ཏོ། །ཚེ་དང་ལྡན་པ་གཽ་ཏ་མ་ཁྱོད་ལེགས་པར་བྱོན་ཏོ། །གདན་བཏིང་བ་འདི་ལ་བཞུགས་སུ་གསོལ། དགེ་སློང་དག་དེ་བཞིན་གཤེགས་པ་གདན་བཏིང་བ་ལ་བཞུགས་ནས། ལྔ་སྡེ་བཟང་པོ་དག་དེ་བཞིན་གཤེགས་པ་དང་ལྷན་ཅིག་ཏུ་ཡང་དག་པར་མགུ་བར་བྱ་བ་དང་ཡང་དག་པར་ཆགས་པར་བྱ་བའི་གཏམ་རྣམ་པ་མང་པོ་བྱས་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་དེ་བཞིན་གཤེགས་པ་ལ་ལྔ་སྡེ་བཟང་པོ་དག་གིས་འདི་སྐད་ཅེས་གསོལ་ཏོ། །ཚེ་དང་ལྡན་པ་གཽ་ཏ་མའི་དབང་པོ་རྣམས་ནི་རབ་ཏུ་གསལ་ལོ། །པགས་པའི་མདོག་ནི་ཡོངས་སུ་དག་གོ །ཞེས་བྱ་བ་ཐམས་ཅད་སྔ་མ་བཞིན་ནོ། །ཚེ་དང་ལྡན་པ་གཽ་ཏ་མ་ཁྱོད་ལ་མིའི་ཆོས་བླ་མ་ལས་མཆོག་ཏུ་གྱུར་པ་འཕགས་པའི་ཡེ་ཤེས་མཐོང་བའི་ཁྱད་པར་ཆུང་ཟད་མངོན་སུམ་དུ་མཛད་པ་ལྟ་མངའ་འམ། དགེ་སློང་དག་དེ་སྐད་ཅེས་གསོལ་བ་དང་། དེ་བཞིན་གཤེགས་པས་ལྔ་སྡེ་བཟང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་དེ་བཞིན་གཤེགས་པ་ལ་ཚེ་དང་ལྡན་པ་ཞེས་མ་རྗོད་ཅིག །ཁྱེད་ལ་ཡུན་རིང་པོར་གནོད་པ་དང་མི་ཕན་པ་དང་། མི་བདེ་བར་གྱུར་ཏ་རེ། དགེ་སློང་དག་ངས་ནི་བདུད་རྩི་དང་འཆི་བ་མེད་པར་འགྲོ་བའི་ལམ་མངོན་དུ་བྱས་སོ། །དགེ་སློང་དག་ང་ནི་སངས་རྒྱས་སོ། །ཐམས་ཅད་མཁྱེན་པའོ། །ཐམས་ཅད་གཟིགས་པའོ། །བསིལ་བར་གྱུར་པའོ། །ཟག་པ་ཟད་པའོ། །ཆོས་ཐམས་ཅད་ལ་དབང་བའོ། །དགེ་སློང་དག་ངས་ཁྱེད་ལ་ཆོས་བཤད་ཀྱིས་ཚུར་ཤོག །ཉོན་ཅིག །ནན་ཏན་གྱིས་ཤིག །རྣ་བ་ལྷོགས་ཤིག་དང་། ངས་གདམས་ཤིང་རྗེས་སུ་བསྟན་ཏོ། །ངས་ཇི་ནས་ཡང་དག་པར་བཤད་ཅིང་ཡང་དག་པར་རྗེས་སུ་བསྟན་ན། ཁྱེད་ཀྱང་
ཟག་པ་རྣམས་ཟད་ནས་ཟག་པ་ཟད་པའི་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་ཚེ་འདི་ཉིད་ལ་རང་གི་མངོན་པར་ཤེས་པས་མངོན་དུ་བྱས་ཏེ་ཉེ་བར་བསྒྲུབས་ནས། བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྙེན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ། །ཞེས་ཤེས་པར་འགྱུར་རོ། །དགེ་སློང་དག་ཁྱེད་ཚེ་དང་ལྡན་པ་དག་དགེ་སྦྱོང་གཽ་ཏ་མ་ལྷོད་པ། མང་དུ་ཟ་བ། སྤོང་བ་ལས་ཉམས་པ་འདི་འོངས་ཏེ་ཞེས་བྱ་བ་ནས་ཇི་སྟེ་འདོད་ན་འདུག་ཤིག་ཅེས་བྱ་བའི་བར་ཐམས་ཅད་སྔ་མ་བཞིན་ཏེ། དེ་སྙམ་དུ་མ་བསམས་སམ། དགེ་སློང་དག་དེ་སྐད་ཅེས་མ་ཟེར་ཅིག་ཅེས་བཀའ་སྩལ་པ་དང་། དེ་དག་མུ་སྟེགས་ཅན་གྱི་རྟགས་དང་། མུ་སྟེགས་ཅན་གྱི་རྒྱལ་མཚན་གང་ཅི་ཡོད་པ་དེ་ཐམས་ཅད་སྐད་ཅིག་དེ་ཉིད་ལ་མེད་པར་གྱུར་ཏེ། ཆོས་གོས་གསུམ་དང་ལྷུང་བཟེད་དང་ལྡན་པར་གྱུར་ཅིང་། སྐྲ་ཡང་བྲེགས་པར་གྱུར་ཏེ། འདི་ལྟ་སྟེ་དཔེར་ན། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་དང་འདྲ་བར་གྱུར་ཏོ། །དེ་ཉིད་ཀྱིས་དེ་དག་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་གི་དངོས་པོར་གྱུར་ཏོ། །དགེ་སློང་དག་དེ་ནས་དེའི་ཚེ་དགེ་སློང་ལྔ་པོས་དེ་བཞིན་གཤེགས་པའི་ཞབས་ལ་གཏུགས་ཏེ། ཉེས་པ་བཤགས་ནས་དེ་བཞིན་གཤེགས་པ་ལ་སྟོན་པའི་འདུ་ཤེས་དང་། ཕངས་པར་བསམས་པ་དང་། དད་པ་དང་། གུས་པ་སྐྱེད་དེ། གུས་པ་བསྐྱེད་ནས་ཀྱང་རྫིང་ཁེབས་པར་དེ་བཞིན་གཤེགས་པའི་སྐུ་བསིལ་ཞིང་ཡོངས་སུ་སྦྱང་བའི་ལས་བྱེད་དོ། །དགེ་སློང་དག་དེ་བཞིན་གཤེགས་པ་སྐུ་བསིལ་ཏེ་བྱུང་ནས་འདི་སྙམ་དུ་དགོངས་ཏེ། སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་གང་དུ་བཞུགས་ནས་ཆོས་ཀྱི་འཁོར་ལོ་བསྐོར། སྙམ་པ་དང་། དགེ་སློང་དག་ས་ཕྱོགས་གང་དུ་སྔོན་གྱི་དེ་བཞིན་གཤེགས་པ་རྣམས་ཀྱིས་ཆོས་ཀྱི་འཁོར་ལོ་བསྐོར་བར་གྱུར་པའི་ས་ཕྱོགས་དེར་རིན་པོ་ཆེ་སྣ་བདུན་གྱི་ཁྲི་སྟོང་བྱུང་བར་གྱུར་ཏོ། །དེ་ནས་དེ་བཞིན་གཤེགས་པས་སྔོན་གྱི་དེ་བཞིན་གཤེགས་པ་རྣམས་ལ་གུས་པར་མཛད་པའི་ཕྱིར། ཁྲི་གསུམ་ལ་བསྐོར་བ་མཛད་ནས་སེང་གེ་ལྟར་བག་ཚ་བ་མི་མངའ་བར་ཁྲི་བཞི་པ་ལ་སྐྱིལ་མོ་ཀྲུང་བཅས་ཏེ་བཞུགས་སོ། །དགེ་སློང་ལྔ་པོས་ཀྱང་དེ་
བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། དེ་བཞིན་གཤེགས་པའི་སྤྱན་སྔར་འཁོད་དོ། །དགེ་སློང་དག་དེ་ནས་དེའི་ཚེ་དེ་བཞིན་གཤེགས་པས་སྐུ་ལས་རྣམ་པ་འདི་ལྟ་བུའི་འོད་ཕྱུང་སྟེ། འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་ཆེན་པོས་ཁྱབ་པར་གྱུར་ནས། སྣང་བ་དེས་འཇིག་རྟེན་གྱི་ཁམས་ཀྱི་བར་སྡིག་པ་སྡིག་པས་ཁྱབ་པ་མུན་པ་མུན་ནག་ཏུ་གྱུར་པ། གང་དུ་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་དབང་ཆེ་བར་གྲགས་པ་འདི་གཉིས་ཀྱི་འོད་ཀྱིས་འོད་དང་ཁ་དོག་གིས་ཁ་དོག་དང་། གཟི་བརྗིད་ཀྱིས་གཟི་བརྗིད་ལམ་མེར་མ་གྱུར་པ། ལྷང་ངེར་མ་གྱུར་པ་གང་ཡིན་པ་དེ་ན་སེམས་ཅན་གང་དག་སྐྱེས་པ་རང་རང་གི་ལག་པ་བརྐྱང་བ་ཡང་མི་མཐོང་བ་དེར་ཡང་དེའི་ཚེ་སྣང་བ་ཆེན་པོ་རྒྱ་ཆེར་བྱུང་བར་གྱུར་ཏོ། །དེར་སེམས་ཅན་གང་དག་སྐྱེས་པ་དེ་དག་ཀྱང་སྣང་བ་དེས་གསལ་བར་གྱུར་མ་ཐག་ཏུ་གཅིག་གིས་གཅིག་མཐོང་ཞིང་གཅིག་གིས་གཅིག་ཤེས་ཏེ། འདི་སྐད་ཅེས་ཀྱེ་སེམས་ཅན་གཞན་དག་ཀྱང་འདིར་སྐྱེས་སོ། །ཀྱེ་སེམས་ཅན་གཞན་དག་ཀྱང་འདིར་སྐྱེས་སོ་ཞེས་འཛེར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་དང་ལྟས་ཆེན་པོ་བཅོ་བརྒྱད་དུ་གཡོས། །རབ་ཏུ་གཡོས། ཀུན་ཏུ་རབ་ཏུ་གཡོས་སོ། །འགུལ་རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག་གོ །འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་སོ། །འུར་འུར་རབ་ཏུ་འུར་འུར། ཀུན་ཏུ་རབ་ཏུ་འུར་འུར་རོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །མཐའ་དམའ་ན་དབུས་མཐོ་བར་གྱུར་ཏོ། །དབུས་དམའ་ན་མཐའ་མཐོ་བར་གྱུར་ཏོ། །ཤར་ཕྱོགས་དམའ་ན་ནུབ་ཕྱོགས་མཐོ་བར་གྱུར་ཏོ། །ནུབ་ཕྱོགས་དམའ་ན་ཤར་ཕྱོགས་མཐོ་བར་གྱུར་ཏོ། །བྱང་ཕྱོགས་དམའ་ན་ལྷོ་ཕྱོགས་མཐོ་བར་གྱུར་ཏོ། །ལྷོ་ཕྱོགས་དམའ་ན་བྱང་ཕྱོགས་མཐོ་བར་གྱུར་ཏོ། །དེའི་ཚེ་དགའ་བར་འགྱུར་བ་དང་། ཚིམ་པར་འགྱུར་བ་དང་། མགུ་བར་འགྱུར་བ་དང་། དང་བར་འགྱུར་བ་དང་། བརྟག་པར་བྱ་བ་དང་། རབ་ཏུ་སིམ་པར་འགྱུར་བ་དང་། བསྔགས་པར་བྱ་བ་དང་།
བསྔགས་པ་ཟླ་མེད་པ་དང་། ངོམས་པར་མི་འགྱུར་བ་དང་། མི་འཐུན་པ་མེད་པ་དང་། སྐྲག་པར་མི་འགྱུར་བའི་སྒྲ་དག་ཀྱང་གྲག་སྟེ། སྐད་ཅིག་དེ་ལ་སེམས་ཅན་གང་ལ་ཡང་རྣམ་པར་འཚེ་བའམ། འཇིགས་པའམ་སྡང་བའམ་བག་ཚ་བ་མེད་པར་གྱུར་ཏོ། །སྐད་ཅིག་དེ་ལ་ཉི་མ་དང་། ཟླ་བ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་ཀྱི་འོད་ཀྱང་མི་སྣང་ངོ་། །སེམས་ཅན་དམྱལ་བ་པ་དང་དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་ཐམས་ཅད་ཀྱང་སྐད་ཅིག་དེ་ལ་སྡུག་བསྔལ་རྣམས་དང་བྲལ་ཞིང་བདེ་བ་ཐམས་ཅད་དང་ལྡན་པར་གྱུར་ཏོ། །སེམས་ཅན་གང་ལ་ཡང་འདོད་ཆགས་དང་། ཞེ་སྡང་དང་། གཏི་མུག་དང་། ཕྲག་དོག་དང་། སེར་སྣ་དང་། ང་རྒྱལ་དང་། འཆབ་པ་དང་། རྒྱགས་པ་དང་། ཁྲོ་བ་དང་། གནོད་སེམས་དང་། ཡོངས་སུ་གདུང་བའི་གནོད་པ་མེད་དེ་སྐད་ཅིག་དེ་ལ་སེམས་ཅན་ཐམས་ཅད་གཅིག་ལ་གཅིག་བྱམས་པའི་སེམས་དང་། ཕན་པའི་སེམས་དང་། ཕ་མ་ཙམ་དུ་འདུ་ཤེས་པར་གྱུར་ཏོ། །འོད་བཀོད་པ་དེ་ལས་ཚིགས་སུ་བཅད་པ་འདི་དག་ཀྱང་བྱུང་ངོ་། །དགའ་ལྡན་རིས་ནས་ཤི་འཕོས་གང་། །ཡུམ་གྱི་ལྷུམས་སུ་ཞུགས་པར་གྱུར། །ལུམ་བི་ནི་ཡི་ཚལ་བལྟམ་ནས། །བདེ་བ་སོགས་པའི་ཁྱོ་ཡིས་བླངས། །གང་ཞིག་སེང་གེའི་རྩལ་སྟབས་ཀྱིས། །མ་རྨོངས་གོམ་པ་བདུན་བོར་ནས། །ང་ནི་འཇིག་རྟེན་གཙོ་བོ་ཞེས། །ཚངས་པའི་དབྱངས་ཀྱིས་གསུང་ཕྱུང་ངོ་། །སེམས་ཅན་ཀུན་ལ་ཕན་པའི་ཕྱིར། །གླིང་བཞི་བཏང་སྟེ་རབ་ཏུ་བྱུང་། །དཀའ་ཐུབ་དཀའ་བ་སྤྱད་ནས་ནི། །ས་ཡི་སྙིང་པོ་ག་ལར་གཤེགས། །དཔུང་དང་བཅས་པའི་བདུད་བཅོམ་ནས། །འཇིག་རྟེན་ཕན་ཕྱིར་བྱང་ཆུབ་བརྙེས། །་བཱ་རཱ་ཎ་སཱིར་གཤེགས་ནས་ནི། །ཆོས་ཀྱི་འཁོར་ལོ་བསྐོར་བར་མཛད། །དེ་ལ་ཚངས་པ་ལྷར་བཅས་པས། །མཉམ་པའི་འཁོར་ལོ་བསྐོར་ཞེས་བསྐུལ། །འཇིག་རྟེན་ཐུགས་རྗེས་བསྐྱེད་ནས་སུ། །ཐུབ་པ་ཡིས་ནི་སྣང་བ་མཛད། །དེ་ནི་ཐུགས་དམ་བརྟན་པ་སྟེ། །་བཱ་རཱ་ཎ་སཱིར་རི་དགས་ནགས། །གཤེགས་ཏེ་འཁོར་ལོ་བླ་མེད་པ། །ཤིན་ཏུ་རྨད་བྱུང་དཔལ་ལྡན་བསྐོར། །རྒྱལ་བས་བསྐལ་པ་ཁྲག་ཁྲིག་བསྒྲུབས། །ཆོས་དེ་ཉན་པ་རེ་
གང་འདོད་པ། །དེ་ནི་རིངས་པར་ལ་གོར་དུ། །ཆོས་མཉན་པ་ཡི་ཕྱིར་ཤོག་ཤིག །མི་དང་སངས་རྒྱས་འབྱུང་རྙེད་དཀའ། །དད་པའང་ཤིན་ཏུ་རྙེད་པར་དཀའ། །མི་ཁོམ་བརྒྱད་སྤངས་རྙེད་པར་དཀའ། །ཆོས་ཉན་པ་ནི་གཙོ་བོ་ཡིན། །སངས་རྒྱས་འབྱུང་དང་དལ་བ་དང་། དད་དང་ཆོས་མཉན་དམ་པ་དང་། །དེ་དག་ཐམས་ཅད་ད་རྙེད་ཀྱིས། །བག་མེད་མ་ལུས་རྣམ་པར་སྤོངས། །གལ་ཏེ་བསྐལ་པ་ཁྲག་ཁྲིག་ཏུ། །ཆོས་ཐོས་མི་འགྱུར་སྲིད་པ་དེ། །ཁྱོད་ཀྱིས་དེ་རིང་རྙེད་ཟིན་གྱིས། །བག་མེད་མ་ལུས་རྣམ་པར་སྤོངས། །འདྲེན་པ་བདུད་རྩིའི་འཁོར་ལོ་ནི། །སྐོར་བ་མཛད་ཀྱིས་ཀུན་མྱུར་ཤོག །ས་བླའི་ལྷ་ཚོགས་ཚངས་པའི་བར། །དེ་དག་རྣམས་ལ་དེ་སྐད་བསྐུལ། །སྒྲ་ཆེན་གྱིས་ནི་ལྷ་བསྐུལ་ནས། །སྐད་ཅིག་དེ་ལ་ཐམས་ཅད་ཀྱིས། །ལྷ་ཡི་འབྱོར་པ་བོར་ནས་ནི། །དེ་དག་སངས་རྒྱས་གན་དུ་ལྷགས། །དགེ་སློང་དག་དེ་ལྟར་ས་བླའི་ལྷ་རྣམས་ཀྱིས་གྲོང་ཁྱེར་བཱ་རཱ་ཎ་སཱིར་དྲང་སྲོང་ལྷུང་བ་རི་དགས་ཀྱི་ནགས་སུ་ཆོས་ཀྱི་འཁོར་ལོ་བསྐོར་བའི་ཕྱིར་དེ་བཞིན་གཤེགས་པའི་འཁོར་གྱི་ཁྱམས་ཆེན་པོ་བཀྲ་བ། བལྟ་ན་སྡུག་པ། ཡངས་པ་རྒྱ་ཆེ་བ། ཆུ་ཞེང་དུ་དཔག་ཚད་བདུན་བརྒྱ་ཡོད་པ་སྤྲུལ་ཏེ། ལྷ་རྣམས་ཀྱིས་སྟེང་གི་ནམ་མཁའི་དཀྱིལ་དུ་གདུགས་དང་། རྒྱལ་མཚན་དང་། བ་དན་དང་། བླ་རེས་ལེགས་པར་བརྒྱན་པར་གྱུར་ཏོ། །འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་རྣམས་ཀྱིས་སེང་གེའི་ཁྲི་བརྒྱད་ཁྲི་བཞི་སྟོང་དེ་བཞིན་གཤེགས་པ་ལ་ཕུལ་ཏེ། བདག་ཅག་ལ་ཐུགས་བརྩེ་བར་དགོངས་ཤིང་འདི་ལ་བཞུགས་ནས་དོ་མོད་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་དུ་གསོལ་ཞེས་གསོལ་ཏོ། །དགེ་སློང་དག་དེ་ནས་དེའི་ཚེ་ཤར་དང་། ལྷོ་དང་། ནུབ་དང་། བྱང་དང་། སྟེང་དང་། འོག་དང་། ཕྱོགས་བཅུ་ཀུན་ནས་བྱང་ཆུབ་སེམས་དཔའ་སྔོན་གྱི་སྨོན་ལམ་དང་ལྡན་པ་བྱེ་བ་ཕྲག་མང་པོ་ལྷགས་ཏེ། དེ་བཞིན་གཤེགས་པའི་ཞབས་ལ་གཏུགས་ནས། ཆོས་ཀྱི་འཁོར་ལོ་བསྐོར་བར་བསྐུལ་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གང་དག་ཡོད་པའི་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། དེ་དག་མ་ཡིན་པ་གཞན་དབང་ཆེ་བ། དབང་
ཆེ་བར་གྲགས་པའི་ལྷའི་བུ་དེ་དག་ཐམས་ཅད་ཀྱང་དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ནས། དེ་བཞིན་གཤེགས་པ་ལ་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། སྨན་པ་དང་། བདེ་བའི་སླད་དུ་བཅོམ་ལྡན་འདས་ཆོས་ཀྱི་འཁོར་ལོ་བསྐོར་དུ་གསོལ། བདེ་བར་གཤེགས་པ་ཆོས་ཀྱི་འཁོར་ལོ་བསྐོར་དུ་གསོལ། བཅོམ་ལྡན་འདས་ཆོས་ཀྱི་མཆོད་སྦྱིན་མཛད་དུ་གསོལ། ཆོས་ཀྱི་ཆར་ཆེན་པོ་དབབ་ཏུ་གསོལ། ཆོས་ཀྱི་རྒྱལ་མཚན་ཆེན་པོ་བསྒྲེང་དུ་གསོལ། ཆོས་ཀྱི་དུང་ཆེན་པོ་འབུད་དུ་གསོལ། ཆོས་ཀྱི་རྔ་ཆེན་པོ་བརྡུང་དུ་གསོལ། ཞེས་ཆོས་ཀྱི་འཁོར་ལོ་བསྐོར་བར་བསྐུལ་ཏོ། །དེ་ལ་འདི་སྐད་ཅེས་བྱ་སྟེ། སྟོང་གསུམ་འདི་ནས་ཚངས་པ་ལྷ་དབང་སྐྱོང་བ་མང་པོ་དག། དོང་ནས་རྒྱལ་བའི་ཞབས་ལ་གཏུགས་ཏེ་ཚིག་ཏུ་སྨྲས་པ་ནི། །ང་ནི་གཙོ་བོ་དམ་པ་སྐྱེ་དགུའི་སྡུག་བསྔལ་ཟད་བྱ་ཞེས། །ཐུབ་ཆེན་ཁྱོད་ཀྱིས་གསུང་བརྗོད་སྔོན་གྱི་ཐུགས་དམ་དགོངས་པར་མཛོད། །ཐུབ་ཁྱོད་ཤིང་དབང་དྲུང་དུ་བཞུགས་ནས་སྡེར་བཅས་བདུད་བཏུལ་ཏེ། །བྱང་ཆུབ་དམ་པ་ཞི་བ་སངས་རྒྱས་ཉོན་མོངས་སྡོང་པོ་བསྒྱེལ། །བསྐལ་པ་བརྒྱ་ནས་དགོངས་པའི་དགོངས་པ་མ་ལུས་རྫོགས་ལགས་ཀྱིས། །མགོན་མ་མཆིས་པའི་སྐྱེ་བོ་གཟིགས་ཏེ་འཁོར་ལོ་མཆོག་བསྐོར་གསོལ། །བདེ་བར་གཤེགས་པའི་འོད་ཀྱིས་ཞིང་སྟོང་ཕྲག་བརྒྱ་སྣང་བར་བགྱིས། །སངས་རྒྱས་སྲས་པོ་བརྒྱ་ཕྲག་མང་པོ་རྫུ་འཕྲུལ་སྟོབས་ཀྱིས་མཆིས། །བདེ་བར་གཤེགས་ལ་མཆོད་པ་ཆེན་པོ་རྣམ་པ་མང་བགྱིས་ནས། །ཡང་དག་ཡོན་ཏན་དེ་བཞིན་གཤེགས་བསྟོད་ཐུགས་རྗེ་ཅན་ལ་བསྐུལ། །ཐུགས་རྗེ་སྤྲིན་དང་ཤེས་རབ་གློག་དང་ལྷག་མཐོང་རླུང་དང་འདྲ། །བསྐལ་པ་སྟོང་དུ་འགྲོ་བ་ཐམས་ཅད་འགྲོན་གཉེར་འབྲུག་བསྒྲགས་ཏེ། །ཡན་ལག་བརྒྱད་ལམ་ཆར་གྱི་རྒྱུན་གྱིས་སྐོམ་པ་ཞི་བར་མཛོད། །དབང་པོ་སྟོབས་དང་བསམ་གཏན་རྣམ་ཐར་ལོ་ཏོག་ནགས་འཕེལ་མཛོད། །བསྐལ་པ་སྟོང་མང་སྟོང་པ་ལེགས་བསླབས་དེ་བཞིན་ཉིད་ལ་བཞུགས། །ཆོས་ལས་བྱུང་བའི་སྨན་བསྒྲུབས་སེམས་ཅན་རྣམས་ཀྱི་སྤྱོད་པ་མཁྱེན། །ཉོན་མོངས་ཚོགས་ཀྱི་ནད་བརྒྱས་
གཙེས་པའི་སྐྱེ་བོ་འདི་དག་ལ། །རྒྱལ་བ་སྨན་པ་འཁོར་ལོ་དམ་པ་བསྐོར་ཏེ་ཐར་མཛད་གསོལ། །ཁྱོད་ཀྱིས་རིང་ནས་ཕ་རོལ་ཕྱིན་པ་དྲུག་གི་མཛོད་འཕེལ་མཛད། །མཚུངས་མེད་མི་གཡོ་གྱ་ནོམ་ཆོས་ཀྱི་ནོར་ནི་ལེགས་པར་བསགས། །སྐྱེ་དགུ་མགོན་མེད་དབུལ་པོ་འདྲེན་མེད་འདི་དག་ཀུན་གཟིགས་ནས། །ནོར་བདུན་བགོ་བཤའ་མཛོད་ཅིག་འདྲེན་པ་འཁོར་ལོ་བསྐོར་བར་གསོལ། །རྒྱལ་བ་བྱང་ཆུབ་བཙལ་ཕྱིར་ནོར་འབྲུ་དབྱིག་དང་གསེར་རྣམས་དང་། །གོས་བཟང་མེ་ཏོག་བདུག་པ་བྱུག་པ་ཕྱེ་མ་དམ་པ་དང་། །ཕོ་བྲང་མཆོག་དང་བཙུན་མོའི་འཁོར་དང་རྒྱལ་སྲིད་ཕངས་པའི་སྲས། །དགྱེས་བཞིན་བཏང་བས་དེ་སངས་རྒྱས་ཀྱིས་འཁོར་ལོ་མཆོག་བསྐོར་གསོལ། །དེ་བཞིན་ཚུལ་ཁྲིམས་མ་ཉམས་མ་འདྲེས་བསྐལ་པ་བརྒྱར་ཡང་བསྲུངས། །རྟག་ཏུ་བཟོད་པ་ལེགས་བསྒོམས་ཁྱོད་ནི་བརྩོན་འགྲུས་མ་ཞུམ་གྱུར། །ཐུབ་པ་བསམ་གཏན་མཆོག་དང་མངོན་ཤེས་ཤེས་རབ་ལྷག་མཐོང་ལྡན། །དགོངས་པ་ཡོངས་རྫོགས་རིམས་ནད་མ་མཆིས་འཁོར་ལོ་མཆོག་བསྐོར་གསོལ། །དགེ་སློང་དག་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཞེས་བྱ་བས་དེའི་ཚེ་ཆོས་ཀྱི་འཁོར་ལོ་ལྷའི་འཛམ་བུ་ཆུ་བོའི་གསེར་ལས་བྱས་པ། རིན་པོ་ཆེ་ཐམས་ཅད་ཀྱིས་སྤྲས་པ། རིན་པོ་ཆེ་ཐམས་ཅད་ཀྱིས་མཛེས་པར་བྱས་པ་རྒྱན་སྣ་ཚོགས་ཀྱིས་བརྒྱན་པ། བཀོད་པ་རྩིབས་སྟོང་དང་ལྡན་པ། འོད་ཟེར་སྟོང་ཕྲག་དང་ལྡན་པ། ལྟེ་བ་དང་བཅས་པ། མུ་ཁྱུད་དང་བཅས་པ། མེ་ཏོག་གི་ལྡ་ལྡི་དང་བཅས་པ། གསེར་གྱི་དྲ་བ་དང་བཅས་པ། དྲིལ་བུ་གཡེར་ཀ་དང་བཅས་པ། སྤོས་ཀྱི་ལག་རིས་དང་བཅས་པ། བུམ་པ་གང་བ་དང་བཅས་པ། གཡུང་དྲུང་འཁྱིལ་བ་དང་བཅས་པ། བཀྲ་ཤིས་ཀྱི་བརྒྱན་པ་དང་བཅས་པ། ལྷའི་གོས་ཚོན་སྣ་ཚོགས་སུ་བཅོས་པས་མཛེས་པར་བྱས་པ། ལྷའི་མེ་ཏོག་དང་། སྤོས་དང་། ཕྲེང་བ་དང་། བྱུག་པས་བྱུགས་པ། རྣམ་པའི་མཆོག་ཐམས་ཅད་དང་ལྡན་པ། སྔོན་གྱི་སྨོན་ལམ་གྱིས་བསྒྲུབས་པ། བྱང་ཆུབ་སེམས་དཔའི་བསམ་པས་རྣམ་པར་སྦྱངས་པ། དེ་བཞིན་གཤེགས་པ་ལ་མཆོད་པའི་
འོས་སུ་གྱུར་པ། དེ་བཞིན་གཤེགས་པ་ཐམས་ཅད་ཀྱིས་དགོངས་པ། སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་མ་འཁྲུགས་པ། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གཞེས་ཤིང་སྔོན་ཡང་བསྐོར་བ་ཆོས་ཀྱི་འཁོར་ལོ་བསྐོར་བའི་ཕྱིར་དེ་བཞིན་གཤེགས་པ་ལ་ཕུལ་ལོ། །ཕུལ་ནས་ཀྱང་ཐལ་མོ་སྦྱར་ཏེ་ཚིགས་སུ་བཅད་པ་འདི་དག་གིས་དེ་བཞིན་གཤེགས་པ་ལ་མངོན་པར་བསྟོད་དོ། །མི་ཡི་སེང་གེ་སེང་གེ་ཁྱོད་ནི་སངས་རྒྱས་འགྱུར་རོ་ཞེས། །གང་ཚེ་མར་མེ་མཛད་ཀྱིས་སེམས་ཅན་དག་པ་ལུང་བསྟན་པ། །དེ་ཚེ་བདག་གིས་སྨོན་ལམ་རྣམ་པ་འདི་འདྲ་འདི་བཏབ་སྟེ། །རྫོགས་པའི་བྱང་ཆུབ་བརྙེས་ནས་བདག་གིས་ཆོས་བཤད་བསྐུལ་ཞེས་བགྱིས། །ཕྱོགས་བཅུ་དག་ནས་སེམས་ཅན་དམ་པ་གང་དག་འདིར་ལྷགས་པ། །དེ་དག་ཐམས་ཅད་འཇུག་པས་བགྲང་བར་ནུས་པ་མ་ལགས་ཏེ། །བཏུད་ཅིང་ཐལ་མོ་སྦྱར་ནས་ཞབས་གཉིས་ལ་ནི་གཏུགས་ནས་སུ། །ཆོས་ཀྱི་འཁོར་ལོ་བསྐོར་ཕྱིར་ཤཱཀྱའི་རིགས་ལ་དགྱེས་པ་བསྐུལ། །བྱང་ཆུབ་སྙིང་པོར་ལྷ་རྣམས་ཀྱིས་ནི་བཀོད་པ་གང་བགྱིས་དང་། །རྒྱལ་བའི་སྲས་པོ་ཀུན་གྱིས་བཀོད་པ་གང་དག་བགྱིས་པ་རྣམས། །འབྱོར་པ་དེ་ཀུན་ཆོས་ཀྱི་འཁོར་ལོ་བསྐོར་ཕྱིར་འདིར་བཤམས་ཏེ། །བསྐལ་པ་ཡོངས་སུ་རྫོགས་པར་བརྗོད་ཀྱང་བས་པར་འགྱུར་མ་ལགས། །སྟོང་གསུམ་འཇིག་རྟེན་དག་གི་ནམ་མཁའ་ལྷ་ཡི་ཚོགས་ཀྱིས་བལྟམས། །དོག་སའི་སྟེང་ཡང་ལྷ་མིན་མིའམ་ཅི་དང་མི་ཡིས་བལྟམས། །ཡུད་ཙམ་དེ་ལ་ལུད་པའི་སྒྲ་ཡང་གྲགས་པར་མ་གྱུར་ཏེ། །ཐམས་ཅད་རབ་ཏུ་དང་བའི་ཡིད་ཀྱིས་རྒྱལ་ལ་མངོན་དུ་བལྟ། །དགེ་སློང་དག་དེ་ལྟར་དེ་བཞིན་གཤེགས་པ་ནམ་གྱི་ཆ་སྟོད་ཀྱི་ཐུན་ལ་ནི་ཅང་མི་གསུང་བས་ཟད་པར་མཛད་དོ། །ནམ་གྱི་གུང་ཐུན་ལ་ནི་ཡང་དག་པར་ཆགས་པར་འགྱུར་བའི་གཏམ་གསུང་ངོ་། །ནམ་གྱི་ཆ་སྨད་ཀྱི་ཐུན་ལ་ནི་ལྔ་སྡེ་བཟང་པོ་རྣམས་ལ་བོས་ཏེ་འདི་སྐད་ཅེས་བཀའ་སྩལ་ཏོ། །དགེ་སློང་དག་མཐའ་གཉིས་པོ་འདི་དག་ནི་རབ་ཏུ་བྱུང་བའི་འཇུག་པར་བྱ་བ་མ་ཡིན་པ་སྟེ། གང་འདོད་པ་རྣམས་ལ་བསོད་ཉམས་སུ་སྦྱོར་བ། དམན་པ། གྲོང་བའི་ཆ། སོ་སོའི་སྐྱེ་བོ་
པ། འཕགས་པ་ལ་མི་མཁོ་བ། གནོད་པ་དང་ལྡན་པ། ཕྱི་མ་ལ་ཚངས་པར་སྤྱོད་པར་མི་འགྱུར་བ། ཡིད་འབྱུང་བར་མི་འགྱུར་བ། འདོད་ཆགས་དང་བྲལ་བར་མི་འགྱུར་བ། །འགོག་པར་མི་འགྱུར་བ། མངོན་པར་ཤེས་པར་མི་འགྱུར་བ། རྫོགས་པའི་བྱང་ཆུབ་ཏུ་མི་འགྱུར་བ། མྱ་ངན་ལས་འདའ་བར་མི་འགྱུར་བ་དང་། གང་ཡང་དབུ་མའི་ལམ་མ་ཡིན་པ། ལུས་ངལ་བར་སྦྱོར་བ། སྡུག་བསྔལ་བ། གནོད་པ་དང་ལྡན་པ། ཚེ་འདི་ལ་ཡང་སྡུག་བསྔལ་ལ། ཕྱི་མ་ལ་ཡང་སྡུག་བསྔལ་རྣམ་པར་སྨིན་པ་སྟེ། དགེ་སློང་དག་མཐའ་གཉིས་པོ་འདི་དག་སྤངས་ནས་དབུ་མའི་ལམ་ཉིད་ཀྱིས་དེ་བཞིན་གཤེགས་པ་ཆོས་སྟོན་ཏེ། འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །དགེ་སློང་དག་བཞི་པོ་འདི་དག་ནི་འཕགས་པའི་བདེན་པ་དག་སྟེ། བཞི་གང་ཞེ་ན། སྡུག་བསྔལ་བ་དང་། སྡུག་བསྔལ་ཀུན་འབྱུང་བ་དང་། སྡུག་བསྔལ་འགོག་པ་དང་། སྡུག་བསྔལ་འགོག་པར་འགྲོ་བའི་ལམ་མོ། །དེ་ལ་སྡུག་བསྔལ་གང་ཞེ་ན། སྐྱེ་བའི་སྡུག་བསྔལ་དང་། རྒ་བ་དང་། ན་བ་དང་། འཆི་བ་དང་། མི་སྡུག་པ་དང་ཕྲད་པ་དང་། སྡུག་པ་དང་བྲལ་བའི་སྡུག་བསྔལ་དང་། གང་ཡང་འདོད་པ་བཙལ་ཏེ་མ་རྙེད་པ་དེ་ཡང་སྡུག་བསྔལ་ལོ། །མདོར་ན་ཉེ་བར་ལེན་པའི་ཕུང་པོ་ལྔ་པོ་དག་ནི་སྡུག་བསྔལ་ཏེ། འདི་ནི་སྡུག་བསྔལ་ཞེས་བྱའོ། །དེ་ལ་སྡུག་བསྔལ་ཀུན་འབྱུང་བ་གང་ཞེ་ན། གང་འདི་ཡང་འབྱུང་བའི་སྲེད་པ་དང་། དགའ་བའི་འདོད་ཆགས་དང་ལྡན་པ་དང་། དེ་དང་དེར་མངོན་པར་དགའ་བ་སྟེ། འདི་ནི་སྡུག་བསྔལ་ཀུན་འབྱུང་བ་ཞེས་བྱའོ། །དེ་ལ་སྡུག་བསྔལ་འགོག་པ་གང་ཞེ་ན། གང་ཡང་འབྱུང་བ་དེའི་སྲེད་པ་དང་། དགའ་བའི་འདོད་ཆགས་དང་ལྡན་པ་དང་། དེ་དང་དེར་མངོན་པར་དགའ་བ་དང་། སྐྱེད་པ་དང་། སྒྲུབ་པ་འདི་ཉིད་ལ་འདོད་ཆགས་མ་ལུས་པ་དང་བྲལ་བ་དང་། འགོག་པ་འདི་ནི་སྡུག་བསྔལ་འགོག་པའོ། །་དེ་ལ་སྡུག་བསྔལ་འགོག་པར་འགྲོ་བའི་ལམ་གང་ཞེ་ན། འཕགས་པའི་ལམ་ཡན་
ལག་བརྒྱད་པ་འདི་ཉིད་དེ། འདི་ལྟ་སྟེ། ཡང་དག་པའི་ལྟ་བ་ནས། ཡང་དག་པའི་ཏིང་ངེ་འཛིན་གྱི་བར་དུ་སྟེ། འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཞེས་བྱའོ། །དགེ་སློང་དག་བཞི་པོ་འདི་དག་ནི་འཕགས་པའི་བདེན་པ་དག་ཅེས་བྱའོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་ལོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ་། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་ཀུན་འབྱུང་བའོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ་། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་འགོག་པའོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས་ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ་། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་བྱ་བ་ནས་སྣང་བ་བྱུང་ངོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དགེ་སློང་དག་སྡུག་བསྔལ་ཡོངས་སུ་ཤེས་པར་བྱའོ་ཞེས་བྱ་བ་ནས་སྣང་བ་བྱུང་ངོ་། །ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འདི་སྤང་བར་བྱའོ་ཞེས་བྱ་བ་ནས་སྣང་བའི་བར་དུ་ཐམས་ཅད་སྔ་མ་བཞིན་ནོ། །དགེ་སློང་དག་སྡུག་བསྔལ་འགོག་པ་འདི་མངོན་དུ་བྱའོ་ཞེས་བྱ་བ་ནས་སྣང་བའི་བར་དུ་སྔ་མ་བཞིན་ནོ། །དགེ་སློང་དག་སྡུག་བསྔལ་འགོག་པར་འགྲོ་བའི་ལམ་འདི་བསྒོམ་པར་བྱའོ་ཞེས་བྱ་བ་ནས་སྣང་བ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འདི་ཡོངས་སུ་ཤེས་སོ་ཞེས་བྱ་བ་ནས་དེ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འདི་སྤངས་སོ་ཞེས་བྱ་བ་ནས་དེ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པ་འདི་མངོན་དུ་བྱས་སོ་ཞེས་བྱ་བ་ནས་དེ་བཞིན་དུ་སྦྱར་རོ། །དགེ་སློང་དག་ངས་སྔོན་མ་ཐོས་པའི་ཆོས་རྣམས་ལ་སྡུག་
བསྔལ་འགོག་པར་འགྲོ་བའི་ལམ་འདི་བསྒོམས་སོ་ཞེས་ཚུལ་བཞིན་ཡིད་ལ་བྱས་ཤིང་མང་དུ་བྱས་པས། ཡེ་ཤེས་སྐྱེས། མིག་སྐྱེས། རིག་པ་སྐྱེས། མང་པོ་ཤེས་པ་སྐྱེས། ཡིད་གཞུངས་པ་སྐྱེས། ཤེས་རབ་སྐྱེས་སོ། །སྣང་བ་བྱུང་ངོ་། །དགེ་སློང་དག་དེ་ལྟར་ངས་འཕགས་པའི་བདེན་པ་བཞི་པོ་འདི་དག་ལ་འདི་ལྟར་ཚུལ་བཞིན་ཡིད་ལ་བྱེད་པ་ན་ཇི་སྲིད་དུ་ལན་གསུམ་དུ་བཟླས་ཏེ། རྣམ་པ་བཅུ་གཉིས་སུ་བསྐོར་བའི་ཡེ་ཤེས་མཐོང་བ་མ་སྐྱེས་པ་དེ་སྲིད་དུ་དགེ་སློང་དག་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་ཁས་མ་འཆེས་ཏེ་ང་ལ་ཡེ་ཤེས་མཐོང་བ་མ་སྐྱེས་སོ། །དགེ་སློང་དག་གང་ཚུན་ཆད་ངས་འཕགས་པའི་བདེན་པ་བཞི་པོ་འདི་དག་ལ་དེ་ལྟར་ལན་གསུམ་དུ་བཟླས་ཏེ། རྣམ་པ་བཅུ་གཉིས་སུ་བསྐོར་བའི་ཡེ་ཤེས་མཐོང་བ་སྐྱེས་ནས་ངས་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་མི་འཁྲུགས་པ་མངོན་དུ་བྱས་པ་དེ་ཚུན་ཆད་དགེ་སློང་དག་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་ཁས་འཆེས་ཏེ། ངའི་ཡེ་ཤེས་མཐོང་བ་ཡང་སྐྱེས་སོ། །ངའི་སྐྱེ་བ་ཟད་དོ། །ཚངས་པར་སྤྱད་པ་བསྙེན་ཏོ། །བྱ་བ་བྱས་སོ། །འདི་ལ་སྲིད་པ་གཞན་མི་ཤེས་སོ། །དེ་ལ་འདི་སྐད་ཅེས་བྱ་སྟེ། དེ་ནི་ཚངས་དབྱངས་མི་འམ་ཅི་ཡི་སྐད་ཀྱིས་གསུང་། །ཡན་ལག་ཁྲག་ཁྲིག་སྟོང་འཕགས་བསྐལ་པ་བྱེ་མང་དུ། །རྟག་ཏུ་བདེན་པ་ཤིན་ཏུ་བསྒོམས་པས་རང་བྱུང་བ། །ཤཱཀྱ་ཐུབ་པས་ཀཽཎྜི་ནྱ་ལ་བཀའ་སྩལ་པ། །མིག་དང་རྣ་བ་སྣ་ནི་མི་རྟག་མི་བརྟན་ཏེ། །ལྕེ་དང་ལུས་དང་ཡིད་ཀྱང་སྡུག་བསྔལ་བདག་མེད་སྟོང་། །བེམས་པོ་རང་བཞིན་རྩྭ་དང་རྩིག་པ་ལྟར་མི་གཡོ། །འདི་ལ་བདག་མེད་མིང་དང་སྲོག་ཀྱང་ཡོད་མ་ཡིན། །ཆོས་འདི་ཐམས་ཅད་རྒྱུ་ལ་བརྟེན་ནས་བྱུང་བ་སྟེ། །མཐའ་དང་མཐའ་མེད་ལྟ་དང་བྲལ་ཞིང་ནམ་མཁའ་འདྲ། །བྱེད་པ་པོ་མེད་དེ་བཞིན་ཚོར་བ་པོ་ཡང་མེད། །དགེ་དང་མི་དགེ་བྱས་པའི་ལས་ནི་ཆུད་མི་ཟ། །ཕུང་པོ་རྣམས་ལ་བརྟེན་ནས་འདི་ལྟར་སྡུག་བསྔལ་འབྱུང་། །སྲེད་པ་ཆུ་ཡིས་རྣམ་པར་འཕེལ་ནས་འབྱུང་བར་འགྱུར། །ལམ་གྱིས་ཆོས་རྣམས་
མཉམ་པ་ཉིད་དུ་རྣམ་མཐོང་ནས། །ཤིན་ཏུ་ཟད་ཅིང་བྱང་བའི་ཆོས་ཉིད་ཀྱིས་ནི་འགགས། །ཀུན་རྟོག་རྟོག་པས་བསྐྱེད་པའི་ཚུལ་བཞིན་མ་ཡིན་པས། །མ་རིག་བྱུང་སྟེ་འདི་ལ་འབྱུང་བྱེད་གང་ཡང་མེད། །འདུ་བྱེད་རྒྱུ་ཡང་འབྱིན་ཏེ་འཕོ་བ་ཡོད་མ་ཡིན། །འཕོ་བར་འགྱུར་ལ་བརྟེན་ཏེ་རྣམ་པར་ཤེས་པ་འབྱུང་། །རྣམ་པར་ཤེས་ལས་དེ་ལྟར་མིང་དང་གཟུགས་ཀྱང་འབྱུང་། །མིང་དང་གཟུགས་ལས་དབང་པོ་དྲུག་ནི་ཡང་དག་འབྱུང་། །དབང་པོ་དེ་དག་འདུས་པ་ལ་ནི་རེག་ཅེས་བརྗོད། །རེག་པ་ལས་ནི་ཚོར་བ་རྣམ་གསུམ་འབྱུང་བར་འགྱུར། །ཆུང་ཟད་ཚོར་བ་གང་ཡིན་དེ་ཀུན་སྲེད་པར་བཤད། །སྲེད་པས་ལས་ནི་སྡུག་བསྔལ་ཕུང་པོ་ཐམས་ཅད་འབྱུང་། །ཉེ་བར་ལེན་པ་ལས་ནི་སྲིད་པ་ཐམས་ཅད་འབྱུང་། །སྲིད་པའི་རྐྱེན་གྱིས་དེ་ཡི་སྐྱེ་བ་འབྱུང་བར་འགྱུར། །སྐྱེ་བའི་གཞི་ལས་རྒ་དང་ན་དང་སྡུག་བསྔལ་འགྱུར། །སྲིད་པའི་དྲ་བ་འདི་ནི་སྐྱེ་བའི་རྣམ་པ་མང་། །དེ་ལྟར་འགྲོ་བ་འདི་རྣམས་ཐམས་ཅད་རྐྱེན་བྱུང་ཉིད། །བདག་གམ་གང་ཟག་འཕོ་བ་པོ་ནི་གང་ཡང་མེད། །གང་ན་རྟོག་དང་རྣམ་རྟོག་མེད་དེ་ཚུལ་བཞིན་བརྗོད། །ཚུལ་བཞིན་གང་ན་ཡོད་དེར་མ་རིག་གང་ཡང་མེད། །གང་ན་མ་རིག་པ་ནི་འགགས་པར་གྱུར་དེ་ན། །སྲིད་པའི་ཡན་ལག་ཀུན་ཟད་བྱུང་ཞིང་ཟད་ནས་འགགས། དེ་ལྟར་རྐྱེན་འདི་དེ་བཞིན་གཤེགས་པས་ཐུགས་སུ་ཆུད། །དེས་ན་རང་བྱུང་བདག་ཉིད་བདག་ལ་ལུང་སྟོན་ཏོ། །རྒྱུ་རྣམས་རྟོགས་པ་སངས་རྒྱས་ཡིན་པ་མ་གཏོགས་པར། །ཕུང་པོ་སྐྱེ་མཆེད་ཁམས་རྣམས་སངས་རྒྱས་ཡིན་མི་སྨྲ། །འདི་ལ་ཕ་རོལ་མུ་སྟེགས་ཅན་རྟེན་གནས་མེད་དེ། །ཆོས་སྦྱོར་འདི་འདྲ་འདི་ལ་རབ་ཏུ་རྩོད་པ་སྟོང་། །ཡང་དག་མངོན་སངས་རྒྱས་ལས་སྤྱད་ཅིང་རབ་དག་པ། །སེམས་ཅན་དེ་དག་ཆོས་འདི་ཤེས་པའི་སྐལ་བ་ཡོད། །དེ་ལྟར་རྣམ་པ་བཅུ་གཉིས་ཀྱིས། །ཆོས་ཀྱི་འཁོར་ལོ་རབ་བསྐོར་བ། །ཀཽཎྜི་ནྱས་ནི་ཀུན་ཤེས་ཏེ། །དཀོན་མཆོག་གསུམ་ནི་མངོན་དུ་གྲུབ། །སངས་རྒྱས་ཆོས་དང་དགེ་འདུན་ནི། །དེ་དག་དཀོན་མཆོག་གསུམ་ཡིན་ཏེ། །ཚངས་པའི་གྲོང་ཁྱེར་གནས་ཀྱི་བར། །གཅིག་ནས་གཅིག་ཏུ་སྒྲ་སོང་བ། །འཇིག་རྟེན་མགོན་པོ་སྐྱོབ་པ་ཡིས། །རྡུལ་མེད་འཁོར་ལོ་རབ་ཏུ་བསྐོར། །གང་དག་འཇིག་རྟེན་རབ་དཀོན་པ། །
དཀོན་མཆོག་གསུམ་ནི་བྱུང་བར་གྱུར། །ཀཽཎྜི་ནྱ་ལ་སོགས་པ་དག །དགེ་སློང་དག་ནི་ལྔ་པོ་དང་། །ལྷ་ནི་བྱེ་བ་དྲུག་ཅུ་རྣམས། །ཆོས་ཀྱི་མིག་ནི་རྣམ་པར་སྦྱངས། །ཆོས་ཀྱི་འཁོར་ལོ་བསྐོར་བ་ན། །གཟུགས་ཀྱི་ཁམས་ན་འཁོད་པའི་ལྷ། །གཞན་ཡང་བྱེ་བ་བརྒྱད་ཅུ་པོ། །དེ་དག་མིག་ནི་རྣམ་པར་སྦྱངས། །བརྒྱད་ཁྲི་བཞི་སྟོང་མི་ཡི་རྣམས། །གང་དག་ལྷགས་པ་དེ་དག་ཀྱང་། །མིག་ནི་རྣམ་པར་སྦྱངས་གྱུར་ཏེ། །ཐམས་ཅད་ངན་པར་འགྲོ་ལས་གྲོལ། །སྐད་ཅིག་དེ་ལ་ཕྱོགས་བཅུ་མཐའ་ཡས་པར་ནི་སངས་རྒྱས་གསུང་སོང་སྟེ། །སྟོབས་བཅུ་ཤཱཀྱའི་ཁྱུ་མཆོག་འདི་ནི་དྲང་སྲོང་ལྷུང་བར་གཤེགས་ནས་སུ། །་བཱ་རཱ་ཎ་སཱིར་ཆོས་ཀྱི་འཁོར་ལོ་དམ་པ་གཞན་མིན་བསྐོར་ཏོ་ཞེས། །གསུང་སྙན་ཡིད་དུ་འོང་ཞིང་དགེ་བ་བར་སྣང་ཀུན་ཏུ་གྲགས་པར་གྱུར། །ཕྱོགས་བཅུ་དག་ན་སངས་རྒྱས་གང་དག་ཇི་སྙེད་ཐམས་ཅད་མི་གསུང་གྱུར། །ཐུབ་པ་དེ་དག་རྣམས་ཀྱི་རིམ་གྲོ་བ་དག་ཀུན་གྱིས་རྒྱལ་བ་ལ། །སྒྲ་གསན་ནས་ནི་ཅི་སླད་སྟོབས་བཅུས་ཆོས་ཀྱི་བཀའ་མཆིད་རྒྱུན་ཀྱང་བཀུམ། །ཅི་ཡི་སླད་དུ་མི་གསུང་བཞུགས་པར་གྱུར་པ་མྱུར་དུ་ལེགས་པར་གསུངས། །སྔོན་གྱི་སྲིད་པ་བརྒྱར་ནི་བརྩོན་འགྲུས་སྟོབས་ཀྱིས་བྱང་ཆུབ་བསྒྲུབས་ནས་སུ། །བྱང་ཆུབ་སེམས་དཔའ་བརྒྱ་སྟོང་ཕྲག་མང་རྣམས་ཀྱང་ཕྱིར་ནི་བསྙིལ་བ་མཛད། །དེས་ན་ཕན་པ་མཛད་པས་ཤིན་ཏུ་སྦྱངས་པས་བྱང་ཆུབ་ཤིས་པ་བརྙེས། །འཁོར་ལོ་གསུམ་དུ་བསྐོར་བ་རབ་ཏུ་བསྐོར་བས་དེས་ནི་མི་གསུང་གྱུར། །ཐུབ་པ་དེ་དག་རྣམས་ཀྱི་གསུང་འདི་ཐོས་ནས་སེམས་ཅན་བྱེ་བ་བརྒྱ། །བྱམས་པའི་སྟོབས་བསྐྱེད་ནས་ནི་བྱང་ཆུབ་དམ་པ་ཤིས་པར་ཡང་དག་ཞུགས། །བདག་ཅག་རྣམས་ཀྱང་ཐུབ་པ་དེ་ལས་བརྩོན་འགྲུས་མཐུས་འཕགས་རྗེས་བསླབས་ཏེ། །འཇིག་རྟེན་ལ་ནི་འཇིག་རྟེན་མཆོག་གི་ཆོས་མིག་སྦྱིན་པར་མྱུར་གྱུར་ཅིག །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི་བཅོམ་ལྡན་འདས་ལ་ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་བའི་ཕྱོགས་ཉན་པར་འཚལ་
བ་ལགས་ན། དེའི་སླད་དུ་བཅོམ་ལྡན་འདས་དེ་བཞིན་གཤེགས་པས་ཆོས་ཀྱི་འཁོར་ལོ་རྣམ་པ་ཇི་ལྟ་བུ་ཞིག་བསྐོར་བ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ལེགས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་ཆོས་ཀྱི་འཁོར་ལོ་དེ་ནི་གཏིང་མི་དམིགས་པའི་ཕྱིར་ཟབ་པའོ། །འཁོར་ལོ་དེ་ནི་གཉིས་དང་བྲལ་བའི་ཕྱིར་མཐོང་བར་དཀའ་བའོ། །འཁོར་ལོ་དེ་ནི་ཡིད་ལ་བྱེད་པས་ཡིད་ལ་བྱ་བ་མ་ཡིན་པའི་ཕྱིར། ཁོང་དུ་ཆུད་པར་དཀའ་བའོ། །འཁོར་ལོ་དེ་ནི་ཡེ་ཤེས་དང་རྣམ་པར་ཤེས་པ་མཉམ་པ་ཉིད་དུ་རྟོགས་པའི་ཕྱིར། རྣམ་པར་ཤེས་པར་དཀའ་བའོ། །འཁོར་ལོ་དེ་ནི་སྒྲིབ་པ་མེད་པའི་རྣམ་པར་ཐར་པ་ཐོབ་པའི་ཕྱིར། རྙོག་པ་མེད་པའོ། །འཁོར་ལོ་དེ་ནི་དཔེ་གཞག་པ་དང་བྲལ་བའི་ཕྱིར་ཕྲ་བའོ། །འཁོར་ལོ་དེ་ནི་རྡོ་རྗེ་ལྟ་བུའི་ཡེ་ཤེས་ཀྱིས་ཐོབ་པའི་ཕྱིར་སྙིང་པོའོ། །འཁོར་ལོ་དེ་ནི་སྔོན་གྱི་མཐར་མ་བྱུང་བའི་ཕྱིར་མི་ཕྱེད་པའོ། །འཁོར་ལོ་དེ་ནི་སྤྲོས་པའི་སྐྱོན་ཐམས་ཅད་དང་བྲལ་བའི་ཕྱིར་སྤྲོས་པ་མེད་པའོ། །འཁོར་ལོ་དེ་ནི་ཤིན་ཏུ་མཐར་ཐུག་པའི་ཕྱིར་མི་འཁྲུགས་པའོ། །འཁོར་ལོ་དེ་ནི་ནམ་མཁའ་དང་མཚུངས་པའི་ཕྱིར་ཐམས་ཅད་ཀྱི་རྗེས་སུ་སོང་བའོ། །བྱམས་པ་ཆོས་ཀྱི་འཁོར་ལོ་དེ་ནི་ཆོས་ཐམས་ཅད་ཀྱི་རང་བཞིན་དང་ངོ་བོ་ཉིད་ཀུན་ཏུ་བསྟན་པ་འཇིག་པའི་འཁོར་ལོའོ། །སྐྱེ་བ་མེད་པ་དང་། འགག་པ་མེད་པ་དང་། འབྱུང་བ་མེད་པའི་འཁོར་ལོའོ། །ཀུན་གཞི་མེད་པའི་འཁོར་ལོའོ། །རྟོག་པ་མེད་པ་དང་། རྣམ་པར་རྟོག་པ་མེད་པའི་ཆོས་ཀྱི་ཚུལ་ལ་རྟོགས་པའི་འཁོར་ལོའོ། །སྟོང་པ་ཉིད་ཀྱི་འཁོར་ལོའོ། །མཚན་མ་མེད་པའི་འཁོར་ལོའོ། །སྨོན་པ་མེད་པའི་འཁོར་ལོའོ། །མངོན་པར་འདུ་བྱ་བ་མེད་པའི་འཁོར་ལོའོ། །དབེན་པའི་འཁོར་ལོའོ། །འདོད་ཆགས་དང་བྲལ་བའི་འཁོར་ལོའོ། །འགོག་པའི་འཁོར་ལོའོ། །དེ་བཞིན་གཤེགས་པས་ཐུགས་སུ་ཆུད་པའི་འཁོར་ལོའོ། །ཆོས་ཀྱི་དབྱིངས་འདྲེས་པ་མེད་པའི་འཁོར་ལོའོ། །ཡང་དག་པའི་མཐའ་རྣམ་པར་མི་འཁྲུགས་པའི་འཁོར་ལོའོ། །ཆགས་པ་མེད་ཅིང་སྒྲིབས་པ་མེད་པའི་འཁོར་ལོའོ། །རྟེན་པ་ལ་འཇུག་ཅིང་གཉིས་སུ་ལྟ་བ་
ལས་ཡང་དག་པར་འདའ་བའི་འཁོར་ལོའོ། །ཆོས་ཀྱི་དབྱིངས་མཐའ་དང་དབུས་མེད་པར་རྣམ་པར་མི་འཁྲུགས་པའི་འཁོར་ལོའོ། །སངས་རྒྱས་ཀྱི་མཛད་པ་ལྷུན་གྱིས་གྲུབ་པར་རྒྱུན་མི་གཅོད་པའི་འཁོར་ལོའོ། །འཇུག་པ་མེད་ཅིང་མངོན་པར་གྲུབ་པ་མེད་པའི་འཁོར་ལོའོ། །ཤིན་ཏུ་དམིགས་སུ་མེད་པའི་འཁོར་ལོའོ། །བླང་བ་མེད་པ་དང་དོར་བ་མེད་པའི་འཁོར་ལོའོ། །བརྗོད་དུ་མེད་པའི་འཁོར་ལོའོ། །རང་བཞིན་གྱིས་ཇི་ལྟ་བ་བཞིན་གྱི་འཁོར་ལོའོ། །ཡུལ་གཅིག་ལ་ཆོས་ཐམས་ཅད་མཉམ་པ་ཉིད་དུ་འཇུག་པའི་འཁོར་ལོའོ། །སེམས་ཅན་འདུལ་བའི་ཕྱིར་ཕྱད་པར་བྱིན་གྱིས་རློབ་ཅིང་ལྡོག་པ་མེད་པའི་འཁོར་ལོའོ། །གཉིས་སུ་མེད་ཅིང་སྒྲོ་བཏགས་པ་མེད་པ་དོན་དམ་པའི་ཚུལ་ལ་འཇུག་པའི་འཁོར་ལོའོ། །ཆོས་ཀྱི་དབྱིངས་སུ་ཡང་དག་པར་འདུ་བའི་འཁོར་ལོའོ། །འཁོར་ལོ་དེ་ནི་ཚད་ཐམས་ཅད་ལས་ཤིན་ཏུ་འདས་པས་དཔག་ཏུ་མེད་པའོ། །འཁོར་ལོ་དེ་ནི་གྲངས་ཐམས་ཅད་དང་བྲལ་བས་གྲངས་མེད་པའོ། །འཁོར་ལོ་དེ་ནི་སེམས་ཀྱི་ལམ་ལས་ཡང་དག་པར་འདས་པས་བསམ་གྱིས་མི་ཁྱབ་པའོ། །འཁོར་ལོ་དེ་ནི་གཞལ་བ་དང་བྲལ་བས་མཚུངས་པ་མེད་པའོ། །འཁོར་ལོ་དེ་ནི་སྒྲ་སྐད་ཀྱི་ཚིག་གི་ལམ་ཐམས་ཅད་དང་བྲལ་བས་བརྗོད་དུ་མེད་པ་སྟེ། ཚད་མེད་པ། དཔེ་མེད་པ། དཔེ་དང་བྲལ་བ། ནམ་མཁའ་དང་མཚུངས་ཤིང་འདྲ་བ། ཆད་པ་མེད་པ། རྟག་པ་མེད་པ། རྟེན་པ་ལ་འཇུག་པ་དང་མི་འགལ་བ། ཞི་བ། ཤིན་ཏུ་ཉེ་བར་ཞི་བ། དེ་ཁོ་ན། དེ་བཞིན་ཉིད། མ་ནོར་བ་དེ་བཞིན་ཉིད། གཞན་མ་ཡིན་པ། གཞན་དུ་མི་འགྱུར་བ། སེམས་ཅན་ཐམས་ཅད་ཀྱི་སྒྲར་བརྗོད་པ། བདུད་རྣམས་ཚར་གཅོད་པ། མུ་སྟེགས་ཅན་རྣམས་ཕམ་པར་བྱེད་པ། འཁོར་བའི་ཡུལ་ལས་འདའ་བ། སངས་རྒྱས་ཀྱི་ཡུལ་ལ་འཇུག་པ། འཕགས་པའི་གང་ཟག་རྣམས་ཀྱིས་ཡོངས་སུ་ཤེས་པ། རང་སངས་རྒྱས་རྣམས་ཀྱིས་རྟོགས་པ། བྱང་ཆུབ་སེམས་དཔའ་རྣམས་ཀྱིས་ཡོངས་སུ་བཟུང་བ། དེ་བཞིན་གཤེགས་པ་ཐམས་ཅད་དང་དབྱེར་མེད་པའོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅོ་བརྒྱད་པ་སྟེ་ཐ་མ། བྱམས་པ་དེ་
བཞིན་གཤེགས་པས་ཆོས་ཀྱི་འཁོར་ལོ་རྣམ་པ་འདི་ལྟ་བུ་བསྐོར་ཏེ། དེ་བསྐོར་བས་དེ་བཞིན་གཤེགས་པ་ལ་དེ་བཞིན་གཤེགས་པའོ་ཞེས་བྱའོ། །ཡང་དག་པར་རྫོགས་པའི་སངས་རྒྱས་ཞེས་བྱའོ། །རང་བྱུང་ཞེས་བྱའོ། །ཆོས་ཀྱི་རྗེ་ཞེས་བྱའོ། །འདྲེན་པ་ཞེས་བྱའོ། །རྣམ་པར་འདྲེན་པ་ཞེས་བྱའོ། །ཡོངས་སུ་འདྲེན་པ་ཞེས་བྱའོ། །དེད་དཔོན་ཞེས་བྱའོ། །ཆོས་ཐམས་ཅད་ལ་དབང་སྒྱུར་བ་ཞེས་བྱའོ། །ཆོས་ཀྱི་དབང་ཕྱུག་ཅེས་བྱའོ། །ཆོས་ཀྱི་འཁོར་ལོ་བསྐོར་བ་ཞེས་བྱའོ། །ཆོས་ཀྱི་སྦྱིན་བདག་ཅེས་བྱའོ། །མཆོད་སྦྱིན་རྗེ་ཞེས་བྱའོ། །མཆོད་སྦྱིན་ལེགས་པར་མཛད་པ་ཞེས་བྱའོ། །བརྟུལ་ཞུགས་གྲུབ་པ་ཞེས་བྱའོ། །དགོངས་པ་རྫོགས་པ་ཞེས་བྱའོ། །འཆད་པ་པོ་ཞེས་བྱའོ། །དབུགས་འབྱིན་པ་ཞེས་བྱའོ། །བདེ་བ་མཛད་པ་ཞེས་བྱའོ། །དཔའ་བོ་ཞེས་བྱའོ། །ཉོན་མོངས་པ་སྤོང་བ་ཞེས་བྱའོ། །གཡུལ་ལས་རྣམ་པར་རྒྱལ་བ་ཞེས་བྱའོ། །གདུགས་དང་རྒྱལ་མཚན་དང་བ་དན་བསྒྲེང་བ་ཞེས་བྱའོ། །སྣང་བ་མཛད་པ་ཞེས་བྱའོ། །འོད་མཛད་པ་ཞེས་བྱའོ། །མུན་པ་སེལ་བ་ཞེས་བྱའོ། །སྒྲོན་མ་འཛིན་པ་ཞེས་བྱའོ། །སྨན་པའི་རྒྱལ་པོ་ཆེན་པོ་ཞེས་བྱའོ། །ཡང་དག་པའི་གསོ་བ་མཛད་པ་ཞེས་བྱའོ། །ཟུག་རྔུ་འབྱིན་པ་ཆེན་པོ་ཞེས་བྱའོ། །ཡེ་ཤེས་གཟིགས་པ་རབ་རིབ་མི་མངའ་བ་ཞེས་བྱའོ། །ཀུན་ཏུ་གཟིགས་པ་ཞེས་བྱའོ། །ཀུན་ཏུ་རྣམ་པར་གཟིགས་པ་ཞེས་བྱའོ། །ཀུན་ནས་སྤྱན་ཅེས་བྱའོ། །ཀུན་ནས་འོད་ཅེས་བྱའོ། །ཀུན་ཏུ་སྣང་བ་ཞེས་བྱའོ། །ཀུན་ནས་སྒོ་ཞེས་བྱའོ། །ཀུན་ཏུ་བཟང་པོ་ཞེས་བྱའོ། །ཀུན་ཏུ་མཛེས་པ་ཞེས་བྱའོ། །གནས་པ་མེད་ལ་བླང་བ་མེད་ཅིང་དོར་བ་མེད་པ་ཞེས་བྱའོ། །མཐོ་བར་སེམས་པ་དང་། དམའ་བར་སེམས་པ་མེད་པའི་ཕྱིར་ས་དང་མཚུངས་པ་ཞེས་བྱའོ། །རབ་ཏུ་མི་གཡོས་པའི་ཕྱིར་རིའི་དབང་པོ་དང་འདྲ་བ་ཞེས་བྱའོ། །ཡོན་ཏན་ཐམས་ཅད་དང་ལྡན་པའི་ཕྱིར། འཇིག་རྟེན་ཐམས་ཅད་ཀྱི་དཔལ་ཞེས་བྱའོ། །འཇིག་རྟེན་ཐམས་ཅད་ལས་མངོན་པར་འཕགས་པའི་ཕྱིར། སྤྱི་གཙུག་བལྟར་མི་མཐོང་བ་ཞེས་བྱའོ། །ཟབ་ཅིང་གཏིང་དཔག་དཀའ་བའི་ཕྱིར་རྒྱ་མཚོ་དང་མཚུངས་པ་ཞེས་བྱའོ། །བྱང་ཆུབ་ཀྱི་ཕྱོགས་ཀྱི་ཆོས་རིན་པོ་ཆེ་ཐམས་ཅད་རྫོགས་པའི་ཕྱིར་
ཆོས་རིན་པོ་ཆེའི་འབྱུང་གནས་ཞེས་བྱའོ། །གནས་པ་མེད་པའི་ཕྱིར་རླུང་དང་མཚུངས་པ་ཞེས་བྱའོ། །ཆགས་པ་མེད་ཅིང་བཅིངས་པ་མེད་ལ་གྲོལ་བ་མེད་པའི་སེམས་དང་ལྡན་པའི་ཕྱིར་བློ་ཆགས་པ་མེད་པ་ཞེས་བྱའོ། །ཆོས་ཐམས་ཅད་ངེས་པར་རྟོགས་པའི་ཕྱིར་ཕྱིར་མི་ལྡོག་པའི་ཆོས་ཞེས་བྱའོ། །བསྙེན་པར་དཀའ་ཞིང་རློམ་སེམས་ཐམས་ཅད་སྤངས་ཏེ་ཉོན་མོངས་པ་ཐམས་ཅད་སྲེག་པར་གནས་པའི་ཕྱིར་མེ་དང་མཚུངས་པ་ཞེས་བྱའོ། །ཀུན་ཏུ་རྟོག་པ་རྙོག་པ་མེད་ཅིང་སྐུ་དང་ཐུགས་དྲི་མ་མེད་ལ་སྡིག་པ་བསལ་བའི་ཕྱིར་ཆུ་དང་མཚུངས་པ་ཞེས་བྱའོ། །ཡེ་ཤེས་ཡུལ་ལ་ཆགས་པ་མེད་པ་དང་། ཆོས་ཀྱི་དབྱིངས་མཐའ་དང་དབུང་མེད་པའི་སྤྱོད་ཡུལ་གྱི་ཡེ་ཤེས་དང་། མངོན་པར་ཤེས་པ་བརྙེས་པའི་ཕྱིར་ནམ་མཁའ་དང་མཚུངས་པ་ཞེས་བྱའོ། །སྒྲིབ་པའི་ཆོས་ཐམས་ཅད་ཤིན་ཏུ་སྤངས་པའི་ཕྱིར་སྒྲིབ་པ་མེད་པའི་ཡེ་ཤེས་དང་རྣམ་པར་ཐར་པ་ལ་གནས་པ་ཞེས་བྱའོ། །ནམ་མཁའ་དང་མཚུངས་པར་མིག་གི་ལམ་ལས་ཡང་དག་པར་འདས་པའི་ཕྱིར་ཆོས་ཀྱི་དབྱིངས་ཐམས་ཅད་དུ་སོང་བའི་སྐུ་དང་ལྡན་པ་ཞེས་བྱའོ། །འཇིག་རྟེན་གྱི་ཡུལ་ཐམས་ཅད་ཀྱིས་ཉོན་མོངས་པ་མེད་པའི་ཕྱིར་སེམས་ཅན་གྱི་མཆོག་ཅེས་བྱའོ། །སེམས་ཅན་ཆགས་པ་མེད་པ་ཞེས་བྱའོ། །བློ་ཚད་མེད་པ་ཞེས་བྱའོ། །འཇིག་རྟེན་ལས་འདས་པའི་ཆོས་སྟོན་པ་ཞེས་བྱའོ། །འཇིག་རྟེན་གྱི་སློབ་དཔོན་ཞེས་བྱའོ། །འཇིག་རྟེན་གྱི་མཆོད་རྟེན་ཞེས་བྱའོ། །འཇིག་རྟེན་ན་མངོན་པར་འཕགས་པ་ཞེས་བྱའོ། །འཇིག་རྟེན་གྱི་ཆོས་ཀྱིས་མི་གོས་པ་ཞེས་བྱའོ། །འཇིག་རྟེན་གྱི་མགོན་པོ་ཞེས་བྱའོ། །འཇིག་རྟེན་གྱི་གཙོ་བོ་ཞེས་བྱའོ། །འཇིག་རྟེན་གྱི་ཕུལ་ཞེས་བྱའོ། །འཇིག་རྟེན་གྱི་དབང་ཕྱུག་ཅེས་བྱའོ། །འཇིག་རྟེན་གྱི་མཆོད་པ་ཞེས་བྱའོ། །འཇིག་རྟེན་གྱི་དཔུང་གཉེན་ཞེས་བྱའོ། །འཇིག་རྟེན་གྱི་ཕ་རོལ་ཏུ་བྱོན་པ་ཞེས་བྱའོ། །འཇིག་རྟེན་གྱི་སྒྲོན་མ་ཞེས་བྱའོ། །འཇིག་རྟེན་ལས་འདས་པ་ཞེས་བྱའོ། །འཇིག་རྟེན་གྱི་བླ་མ་ཞེས་བྱའོ། །འཇིག་རྟེན་གྱི་དོན་མཛད་པ་ཞེས་བྱའོ། །འཇིག་རྟེན་དང་འཐུན་པར་མཛད་པ་ཞེས་བྱའོ། །འཇིག་རྟེན་མཁྱེན་པ་ཞེས་བྱའོ། །འཇིག་རྟེན་གྱི་བདག་པོ་བརྙེས་པ་ཞེས་བྱའོ། །སྦྱིན་གནས་ཆེན་པོ་ཞེས་བྱའོ། །མཆོད་པའི་
འོས་ཞེས་བྱའོ། །བསོད་ནམས་ཀྱི་ཞིང་ཆེན་པོ་ཞེས་བྱའོ། །སེམས་ཅན་ཆེན་པོ་ཞེས་བྱའོ། །སེམས་ཅན་དམ་པ་ཞེས་བྱའོ། །སེམས་ཅན་མཆོག་ཅེས་བྱའོ། །སེམས་ཅན་རབ་མཆོག་ཅེས་བྱའོ། །སེམས་ཅན་བླ་མ་ཞེས་བྱའོ། །སེམས་ཅན་གོང་ན་མེད་པ་ཞེས་བྱའོ། །སེམས་ཅན་མཉམ་པ་མེད་པ་ཞེས་བྱའོ། །སེམས་ཅན་འདྲ་བ་མེད་པ་ཞེས་བྱའོ། །རྟག་ཏུ་མཉམ་པར་བཞག་པ་ཞེས་བྱའོ། །ཆོས་ཐམས་ཅད་ཀྱི་མཉམ་པ་ཉིད་ལ་གནས་པ་ཞེས་བྱའོ། །ལམ་བརྙེས་པ་ཞེས་བྱའོ། །ལམ་སྟོན་པ་ཞེས་བྱའོ། །ལམ་མཚོན་པ་ཞེས་བྱའོ། །ལམ་ལ་ཤིན་ཏུ་གནས་པ་ཞེས་བྱའོ། །བདུད་ཀྱི་ཡུལ་ལས་ཡང་དག་པར་འདས་པ་ཞེས་བྱའོ། །བདུད་ཀྱི་དཀྱིལ་འཁོར་འཇོམས་པར་མཛད་པ་ཞེས་བྱའོ། །རྒ་ཤི་མི་མངའ་བས་བསིལ་བའི་དངོས་པོ་བརྙེས་པ་ཞེས་བྱའོ། །མུན་པ་མུན་ནག་དང་བྲལ་བ་ཞེས་བྱའོ། །ཐེ་ཙོམ་དང་བྲལ་བ་ཞེས་བྱའོ། །དོགས་པ་དང་བྲལ་བ་ཞེས་བྱའོ། །ཉོན་མོངས་པ་དང་བྲལ་བ་ཞེས་བྱའོ། །སོམ་ཉི་བཏུལ་བ་ཞེས་བྱའོ། །ཡིད་གཉིས་ཡང་དག་པར་བཅོམ་པ་ཞེས་བྱའོ། །ཆགས་པ་དང་བྲལ་བ་ཞེས་བྱའོ། །རྣམ་པར་གྲོལ་བ་ཞེས་བྱའོ། །རྣམ་པར་དག་པ་ཞེས་བྱའོ། །འདོད་ཆགས་དང་བྲལ་བ་ཞེས་བྱའོ། །ཞེ་སྡང་དང་བྲལ་བ་ཞེས་བྱའོ། །གཏི་མུག་དང་བྲལ་བ་ཞེས་བྱའོ། །ཟག་པ་ཟད་པ་ཞེས་བྱའོ། །ཉོན་མོངས་པ་མི་མངའ་བ་ཞེས་བྱའོ། །དབང་དང་ལྡན་པར་གྱུར་པ་ཞེས་བྱའོ། །ཐུགས་ཤིན་ཏུ་རྣམ་པར་གྲོལ་བ་ཞེས་བྱའོ། །ཤེས་རབ་ཤིན་ཏུ་རྣམ་པར་གྲོལ་བ་ཞེས་བྱའོ། །ཅང་མཁྱེན་པ་ཞེས་བྱའོ། །གླང་པོ་ཆེན་པོ་ཞེས་བྱའོ། །བྱ་བ་མཛད་པ་ཞེས་བྱའོ། །བྱེད་པ་མཛད་པ་ཞེས་བྱའོ། །ཁུར་བོར་བ་ཞེས་བྱའོ། །རང་གི་དོན་རྗེས་སུ་བརྙེས་པ་ཞེས་བྱའོ། །སྲིད་པར་ཀུན་དུ་སྦྱོར་བ་ཡོངས་སུ་ཟད་པ་ཞེས་བྱའོ། །མཉམ་པ་ཉིད་ཀྱི་ཡེ་ཤེས་ཀྱིས་རྣམ་པར་གྲོལ་བ་ཞེས་བྱའོ། །སེམས་ཀྱི་དབང་དམ་པ་ཐམས་ཅད་ཀྱི་ཕ་རོལ་ཏུ་བྱོན་པ་ཞེས་བྱའོ། །སྦྱིན་པའི་ཕ་རོལ་ཏུ་བྱོན་པ་ཞེས་བྱའོ། །ཚུལ་ཁྲིམས་ཀྱིས་མངོན་པར་འཕགས་པ་ཞེས་བྱའོ། །བཟོད་པའི་ཕ་རོལ་ཏུ་བྱོན་པ་ཞེས་བྱའོ། །བརྩོན་འགྲུས་ཀྱིས་མངོན་པར་འཕགས་པ་ཞེས་བྱའོ། །བསམ་གཏན་དང་མངོན་པར་ཤེས་པ་
བརྙེས་པ་ཞེས་བྱའོ། །ཤེས་རབ་ཀྱི་ཕ་རོལ་ཏུ་བྱོན་པ་ཞེས་བྱའོ། །སྨོན་ལམ་གྲུབ་པ་ཞེས་བྱའོ། །བྱམས་པ་ཆེན་པོ་ལ་གནས་པ་ཞེས་བྱའོ། །སྙིང་རྗེ་ཆེན་པོ་ལ་གནས་པ་ཞེས་བྱའོ། །དགའ་བ་ཆེན་པོ་ལ་གནས་པ་ཞེས་བྱའོ། །བཏང་སྙོམས་ཆེན་པོ་ལ་གནས་པ་ཞེས་བྱའོ། །སེམས་ཅན་བསྡུ་བ་ལ་བརྩོན་པ་ཞེས་བྱའོ། །སྒྲིབ་པ་མེད་པའི་སོ་སོ་ཡང་དག་པར་རིག་པ་བརྙེས་པ་ཞེས་བྱའོ། །རྟོན་པར་གྱུར་པ་ཞེས་བྱའོ། །བསོད་ནམས་ཆེན་པོ་ཞེས་བྱའོ། །ཡེ་ཤེས་ཆེན་པོ་དང་ལྡན་པ་ཞེས་བྱའོ། །དྲན་པ་དང་བློ་གྲོས་དང་རྟོགས་པ་དང་བློ་ཕུན་སུམ་ཚོགས་པ་ཞེས་བྱའོ། །དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་དང་། ཞི་གནས་དང་། ལྷག་མཐོང་གིས་སྣང་བ་བརྙེས་པ་ཞེས་བྱའོ། །འཁོར་བའི་རྒྱ་མཚོ་ལས་རྒལ་བ་ཞེས་བྱའོ། །ཕ་རོལ་ཏུ་བྱོན་པ་ཞེས་བྱའོ། །ཐང་ལ་བྱོན་པ་ཞེས་བྱའོ། །བདེ་བ་བརྙེས་པ་ཞེས་བྱའོ། །མི་བསྙེངས་པ་བརྙེས་པ་ཞེས་བྱའོ། །ཉོན་མོངས་པའི་ཚེར་མ་དཀྲུགས་པ་ཞེས་བྱའོ། །་སྐྱེས་བུ་ཞེས་བྱའོ། །སྐྱེས་བུ་ཆེན་པོ་ཞེས་བྱའོ། །སྐྱེས་བུ་སེང་གེ་ཞེས་བྱའོ། །འཇིགས་པ་དང་སྤུ་ཟིང་ཞེས་བྱེད་པ་མི་མངའ་བ་ཞེས་བྱའོ། །གླང་པོ་ཞེས་བྱའོ། །དྲི་མ་མེད་པ་ཞེས་བྱའོ། །དྲི་མ་གསུམ་སྤངས་པ་ཞེས་བྱའོ། །རིག་པ་པོ་ཞེས་བྱའོ། །རིག་པ་གསུམ་བརྙེས་པ་ཞེས་བྱའོ། །ཆུ་བོ་བཞི་ལས་རྒལ་བ་ཞེས་བྱའོ། ། རིན་པོ་ཆེའི་གདུགས་འཛིན་པ་གཅིག་པུར་གྱུར་པའི་ཕྱིར་རྒྱལ་རིགས་ཞེས་བྱའོ། །སྡིག་པའི་ཆོས་སྤངས་པའི་ཕྱིར་བྲམ་ཟེ་ཞེས་བྱའོ། །མ་རིག་པའི་སྒོ་ངའི་སྦུབས་བཅོམ་པའི་ཕྱིར་དགེ་སློང་ཞེས་བྱའོ། །ཆགས་པ་ཐམས་ཅད་ལས་ཡང་དག་པར་འདས་པའི་ཕྱིར་དགེ་སྦྱོང་ཞེས་བྱའོ། །ཉོན་མོངས་པ་གཟིགས་པའི་ཕྱིར་གཙང་སྦྲ་ཅན་ཞེས་བྱའོ། །སྟོབས་དང་ལྡན་པ་ཞེས་བྱའོ། །སྟོབས་བཅུ་མངའ་བ་ཞེས་བྱའོ། །བཅོམ་ལྡན་འདས་ཞེས་བྱའོ། །སྐུ་བསྒོམས་པ་ཞེས་བྱའོ། །རྒྱལ་པོའི་ཡང་རྒྱལ་པོ་ཞེས་བྱའོ། །ཆོས་ཀྱི་རྒྱལ་པོ་ཞེས་བྱའོ། །ཆོས་ཀྱི་འཁོར་ལོ་མཆོག་དམ་པ་བསྐོར་ཞིང་རྗེས་སུ་སྟོན་པ་ཞེས་
བྱའོ། །མི་འཁྲུགས་པའི་ཆོས་སྟོན་པ་ཞེས་བྱའོ། །ཐམས་ཅད་མཁྱེན་པའི་ཡེ་ཤེས་ཀྱི་དབང་བསྐུར་བ་ཞེས་བྱའོ། །ཆགས་པ་མེད་པའི་ཡེ་ཤེས་ཆེན་པོ་དྲི་མ་མེད་ཅིང་རྣམ་པར་གྲོལ་བའི་གོ་འཕང་གི་ཐབས་བརྙེས་པ་ཞེས་བྱའོ། །བྱང་ཆུབ་ཀྱི་ཡན་ལག་བདུན་གྱི་རིན་པོ་ཆེ་དང་ལྡན་པ་ཞེས་བྱའོ། །ཆོས་རིན་པོ་ཆེ་ཐམས་ཅད་ཀྱི་ཁྱད་པར་བརྙེས་པ་ཞེས་བྱའོ། །བློན་པོ་འཕགས་པའི་ཉན་ཐོས་ཐམས་ཅད་ཀྱིས་ཞལ་གྱི་དཀྱིལ་འཁོར་དུ་བལྟས་པ་ཞེས་བྱའོ། །སྲས་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་ཅན་ཞེས་བྱའོ། །གདུལ་བ་ཤིན་ཏུ་བཏུལ་བ་ཞེས་བྱའོ། །བྱང་ཆུབ་སེམས་དཔའ་ལེགས་པར་ལུང་བསྟན་པ་ཞེས་བྱའོ། །རྣམ་ཐོས་ཀྱི་བུ་དང་འདྲ་བ་ཞེས་བྱའོ། །འཕགས་པའི་ནོར་བདུན་གྱི་མཛོད་བྱིན་པ་ཞེས་བྱའོ། །ལྷུག་པར་གཏོང་བ་ཞེས་བྱའོ། །བདེ་བ་ཕུན་སུམ་ཚོགས་པ་ཐམས་ཅད་དང་ལྡན་པ་ཞེས་བྱའོ། །རེ་བ་ཐམས་ཅད་སྦྱིན་པ་ཞེས་བྱའོ། །འཇིག་རྟེན་ཐམས་ཅད་ལ་ཕན་པ་དང་བདེ་བས་རྗེས་སུ་སྐྱོང་བ་ཞེས་བྱའོ། །དབང་པོ་དང་མཚུངས་པ་ཞེས་བྱའོ། །ཡེ་ཤེས་མཆོག་གི་རྡོ་རྗེ་འཆང་བ་ཞེས་བྱའོ། །ཀུན་ནས་སྤྱན་ཞེས་བྱའོ། །ཆོས་ཐམས་ཅད་ལ་སྒྲིབ་པ་མི་མངའ་བར་གཟིགས་པ་ཞེས་བྱའོ། །ཡེ་ཤེས་ཀྱིས་ཀུན་ཏུ་རྣམ་པར་འཕྲུལ་པ་ཞེས་བྱའོ། །ཆོས་ཀྱི་གར་གྱི་རྒྱུད་རྒྱ་ཆེན་པོ་སྟོན་པ་ལ་ཞུགས་པ་ཞེས་བྱའོ། །ཟླ་བ་དང་མཚུངས་པ་ཞེས་བྱའོ། །འགྲོ་བ་ཐམས་ཅད་ཀྱིས་བལྟ་བས་མི་ངོམས་པ་ཞེས་བྱའོ། །འོད་རྣམ་པར་དག་ཅིང་ཀུན་དུ་ཡངས་པ་ཞེས་བྱའོ། །དགའ་བ་དང་མཆོག་ཏུ་དགའ་བར་མཛད་པའི་འོད་ཅེས་བྱའོ། །སེམས་ཅན་ཐམས་ཅད་ལ་མངོན་དུ་ཕྱོགས་ཤིང་གཟིགས་པར་སྣང་བ་ཞེས་བྱའོ། །འགྲོ་བ་ཐམས་ཅད་ཀྱི་སེམས་དང་བསམ་པའི་སྣོད་ཇི་ལྟ་བ་བཞིན་དུ་སྣང་བ་བརྙེས་པ་ཞེས་བྱའོ། །བཀོད་པ་ཆེན་པོ་ཞེས་བྱའོ། །སློབ་པ་དང་མི་སློབ་པའི་སྐར་མའི་ཚོགས་ཀྱི་འཁོར་ཅན་ཞེས་བྱའོ། །ཉི་མའི་དཀྱིལ་འཁོར་དང་མཚུངས་པ་ཞེས་བྱའོ། །མུན་པ་མུན་ནག་བསལ་བ་ཞེས་བྱའོ། །ཏོག་ཆེན་པོ་དང་ལྡན་པའི་རྒྱལ་པོ་ཞེས་བྱའོ། །འོད་ཟེར་ཚད་མེད་ཅིང་མཐའ་ཡས་པ་ཞེས་བྱའོ། །སྣང་བ་ཆེན་པོ་ཀུན་ཏུ་སྟོན་པ་ཞེས་བྱའོ། །དྲིས་པ་ཐམས་ཅད་ལུང་བསྟན་པ་སྟོན་པ་ལ་རྨོངས་པ་མི་མངའ་
བ་ཞེས་བྱའོ། །མ་རིག་པའི་མུན་པ་ཆེན་པོ་འཇོམས་པར་མཛད་པ་ཞེས་བྱའོ། །ཡེ་ཤེས་ཀྱི་སྣང་བ་ཆེན་པོས་རྣམ་པར་གཟིགས་པའི་བློ་དང་ལྡན་པ་ཞེས་བྱའོ། །རྣམ་པར་མི་རྟོག་པ་ཞེས་བྱའོ། །བྱམས་པ་དང་སྙིང་བརྩེ་བ་དང་། སྙིང་རྗེ་ཆེན་པོས་འགྲོ་བ་ཐམས་ཅད་ལ་འོད་ཟེར་མཉམ་པར་གཏོང་ཞིང་ཡུལ་ཚད་མེད་པ་ཞེས་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་ཅིང་རྙེད་པར་དཀའ་ལ་བལྟ་དཀའ་བའི་དཀྱིལ་འཁོར་ཅན་ཞེས་བྱའོ། །ཚངས་པ་དང་མཚུངས་པ་ཞེས་བྱའོ། །རབ་ཏུ་ཞི་བའི་སྤྱོད་ལམ་དང་ལྡན་པ་ཞེས་བྱའོ། །སྤྱོད་ལམ་དང་སྤྱོད་པའི་ཁྱད་པར་ཐམས་ཅད་དང་ལྡན་པ་ཞེས་བྱའོ། །གཟུགས་དམ་པ་མངའ་བ་ཞེས་བྱའོ། །བལྟ་བས་མི་ངོམས་པ་ཞེས་བྱའོ། །དབང་པོ་ཞི་བ་ཞེས་བྱའོ། །ཡིད་ཞི་བ་ཞེས་བྱའོ། །ཞི་གནས་ཀྱི་ཚོགས་ཡོངས་སུ་རྫོགས་པ་ཞེས་བྱའོ། །ཞི་གནས་དམ་པ་བརྙེས་པ་ཞེས་བྱའོ། །དུལ་བ་དང་ཞི་གནས་མཆོག་བརྙེས་པ་ཞེས་བྱའོ། །ཞི་གནས་དང་ལྷག་མཐོང་གི་ཚོགས་ཡོངས་སུ་རྫོགས་པ་ཞེས་བྱའོ། །སྦས་པ་དང་། དབང་པོ་ཐུལ་བ་དང་། གླང་པོ་ལྟར་ཤིན་ཏུ་དུལ་བ་དང་། མཚོ་ལྟར་རྙོག་པ་མེད་ཅིང་དང་བ་ཞེས་བྱའོ། །ཉོན་མོངས་པའི་བག་ཆགས་ཀྱི་སྒྲིབ་པ་ཐམས་ཅད་ལེགས་པར་སྤངས་པ་ཞེས་བྱའོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ཞེས་བྱའོ། །སྐྱེས་བུ་མཆོག་ཅེས་བྱའོ། །དཔེ་བྱད་བཟང་པོ་བརྒྱད་ཅུའི་འཁོར་སྣ་ཚོགས་ཀྱིས་སྐུ་སྤྲས་པ་ཞེས་བྱའོ། །སྐྱེས་བུ་ཁྱུ་མཆོག་ཅེས་བྱའོ། །སྟོབས་བཅུ་དང་ལྡན་པ་ཞེས་བྱའོ། །མི་འཇིགས་པ་བཞི་བརྙེས་པ་ཞེས་བྱའོ། །སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ཞེས་བྱའོ། །སྟོན་པ་ཞེས་བྱའོ། །སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཡོངས་སུ་རྫོགས་པ་ཞེས་བྱའོ། །སྐུ་དང་གསུང་དང་ཐུགས་ཀྱི་འཕྲིན་ལས་ཀྱི་མཐའ་མ་སྨད་པ་ཞེས་བྱའོ། །རྣམ་པ་ཐམས་ཅད་ཀྱི་མཆོག་དང་ལྡན་པའི་ཕྱིར་ཤིན་ཏུ་ཡོངས་སུ་སྦྱངས་པའི་ཡེ་ཤེས་ཀྱི་དཀྱིལ་འཁོར་མངའ་བ་ཞེས་བྱའོ། །རྟེན་ཅིང་འབྲེལ་བར་འབྱུང་བ་མཉམ་པ་ཉིད་དུ་མངོན་པར་ཐུགས་སུ་ཆུད་པའི་ཕྱིར་སྟོང་པ་ཉིད་ལ་གནས་པ་ཞེས་བྱའོ། །དོན་དམ་པའི་བདེན་པའི་ཚུལ་རབ་ཏུ་རྟོགས་པའི་ཕྱིར་མཚན་མ་མེད་པ་ལ་གནས་པ་ཞེས་བྱའོ། །འཇུག་པ་ཐམས་ཅད་ཀྱིས་མི་གོས་པའི་ཕྱིར་སྨོན་པ་མེད་པ་
ལ་གནས་པ་ཞེས་བྱའོ། །འདུ་བྱེད་ཐམས་ཅད་ཀྱི་རྒྱུན་བཅད་པའི་ཕྱིར། མངོན་པར་འདུ་མཛད་པ་མི་མངའ་བ་ཞེས་བྱའོ། །ཡང་དག་པའི་མཐའི་ཡེ་ཤེས་ཀྱི་ཡུལ་རྣམ་པར་མི་འཁྲུགས་པའི་ཕྱིར། ཡང་དག་པར་གསུང་བ་ཞེས་བྱའོ། །དེ་བཞིན་ཉིད་དང་ཆོས་ཀྱི་དབྱིངས་དང་ནམ་མཁའི་མཚན་ཉིད་ཤེས་པའི་ཡུལ་ཡིན་པའི་ཕྱིར་མ་ནོར་བ་དེ་བཞིན་ཉིད་དང་། གཞན་མ་ཡིན་པ་གསུང་བ་ཞེས་བྱའོ། །ཆོས་ཐམས་ཅད་སྒྱུ་མ་དང་། སྨིག་རྒྱུ་དང་། རྨི་ལམ་དང་། ཆུ་ཟླ་དང་། བྲག་ཅ་དང་། མིག་ཡོར་དང་མཚུངས་པར་གནས་པའི་ཕྱིར་ཉོན་མོངས་པ་མེད་པའི་ཆོས་ཤིན་ཏུ་རྟོགས་པ་ཞེས་བྱའོ། །ཡོངས་སུ་མྱ་ངན་ལས་འདས་པའི་རྒྱུ་སྐྱེད་པའི་ཕྱིར་མཐོང་བ་དང་ཐོས་པ་དོན་ཡོད་པ་ཞེས་བྱའོ། །སེམས་ཅན་གདུལ་བར་བཏུལ་བའི་རྩལ་དང་ལྡན་པའི་ཕྱིར་གོམ་པ་འདོར་བ་དོན་ཡོད་པ་ཞེས་བྱའོ། །མ་རིག་པ་དང་སྲིད་པའི་སྲེད་པ་ཡང་དག་པར་བཅད་པའི་ཕྱིར་འོབས་ལས་རྒལ་བ་ཞེས་བྱའོ། །ངེས་པར་འབྱིན་པའི་ལམ་ལེགས་པར་བསྟན་པའི་ཕྱིར་ཟམ་པ་བཏགས་པ་ཞེས་བྱའོ། །བདུད་ཀྱི་ཡུལ་དང་སྤྱོད་པ་ཐམས་ཅད་ཀྱིས་མི་གོས་པའི་ཕྱིར་བདུད་དང་ཉོན་མོངས་པའི་ཕྱིར་རྒོལ་བ་ལས་རྒྱལ་བ་ཞེས་བྱའོ། །འདོད་པའི་ཁམས་ལས་ཡང་དག་པར་འདས་པའི་ཕྱིར་འདོད་པའི་འདམ་ལས་རྒལ་བ་ཞེས་བྱའོ། །གཟུགས་ཀྱི་ཁམས་ལས་ཡང་དག་པར་འདས་པའི་ཕྱིར་ང་རྒྱལ་གྱི་རྒྱལ་མཚན་བསྙལ་བ་ཞེས་བྱའོ། །གཟུགས་མེད་པའི་ཁམས་ལས་ཡང་དག་པར་འདས་པའི་ཕྱིར་ཤེས་རབ་ཀྱི་རྒྱལ་མཚན་བསྒྲེང་བ་ཞེས་བྱའོ། །ཆོས་ཀྱི་སྐུ་དང་ཡེ་ཤེས་ཀྱི་སྐུ་དང་ལྡན་པའི་ཕྱིར་འཇིག་རྟེན་གྱི་ཡུལ་ཐམས་ཅད་ལས་ཡང་དག་པར་འདས་པ་ཞེས་བྱའོ། །ཡོན་ཏན་རིན་པོ་ཆེའི་ཡེ་ཤེས་ཀྱི་མེ་ཏོག་མཐའ་ཡས་པ་ཤིན་ཏུ་རྒྱས་ཤིང་རྣམ་པར་གྲོལ་བའི་འབྲས་བུ་ཤིན་ཏུ་ཕུན་སུམ་ཚོགས་པའི་ཕྱིར་སྡོང་པོ་ཆེན་པོ་ཞེས་བྱའོ། །འབྱུང་བ་དང་མཐོང་བ་རྙེད་པར་དཀའ་བའི་ཕྱིར་ཨུ་དུམ་བཱ་རའི་མེ་ཏོག་དང་མཚུངས་པ་ཞེས་བྱའོ། །ཚུལ་ཇི་ལྟ་བ་བཞིན་དུ་ངེས་པར་འབྱུང་བའི་བསམ་པ་ཤིན་ཏུ་ཡོངས་སུ་རྫོགས་པར་མཛད་པའི་ཕྱིར་ཡིད་བཞིན་གྱི་ནོར་བུ་རིན་པོ་ཆེའི་རྒྱལ་པོ་དང་མཚུངས་པ་ཞེས་བྱའོ། །ཡུན་རིང་པོ་ནས་གཏོང་བ་དང་ཚུལ་ཁྲིམས་དང་དཀའ་ཐུབ་དང་བརྟུལ་ཞུགས་དང་། ཚངས་པར་སྤྱོད་པ་བརྟན་པོར་
ཡང་དག་པར་བླངས་པས་མི་གཡོ་ཞིང་མི་སྐྱོད་པའི་ཕྱིར། ཞབས་ཤིན་ཏུ་གནས་པ་ཞེས་བྱའོ། །ཡུན་རིང་པོ་ནས་ཕ་མ་དང་། དགེ་སྦྱོང་དང་། བྲམ་ཟེ་དང་། བླ་མ་དང་། སྦྱིན་གནས་རྣམས་དང་། ཆོས་དང་ལྡན་པ་ཡོངས་སུ་སྐྱོང་བ་དང་། སྐྱབས་སུ་ལྷགས་པ་རྣམས་ཡོངས་སུ་མི་གཏོང་བའི་ཕྱིར། ཞབས་ཀྱི་མཐིལ་བཀྲ་ཤིས་དང་གཡུང་དྲུང་འཁྱིལ་པ་དང་། འཁོར་ལོ་རྩིབས་སྟོང་དང་ལྡན་པ་སྣ་ཚོགས་ཀྱི་མཚན་དང་ལྡན་པ་ཞེས་བྱའོ། །ཡུན་རིང་པོ་ནས་སྲོག་གཅོད་པ་སྤངས་པའི་ཕྱིར་ཞབས་ཀྱི་རྟིང་པ་ཡངས་པ་ཞེས་བྱའོ། །ཡུན་རིང་པོ་ནས་སེམས་ཅན་གཞན་སྲོག་གཅོད་པ་སྤང་བ་ཡང་དག་པར་འཛིན་དུ་འཇུག་པའི་ཕྱིར་ཕྱག་གི་སོར་མོ་རིང་བ་ཞེས་བྱའོ། །ཡུན་རིང་པོ་ནས་སྲོག་གཅོད་པ་སྤང་བའི་ཡོན་ཏན་གྱི་བསྔགས་པ་བརྗོད་པ་མཛད་པ་དང་། སྐྱེ་བོ་མང་པོའི་སྐྱབས་མཛད་པའི་ཕྱིར། སྐུ་ཆེ་ཞིང་དྲང་བ་ཞེས་བྱའོ། །ཡུན་རིང་པོ་ནས་ཕ་མ་དང་། དགེ་སྦྱོང་དང་། བྲམ་ཟེ་དང་། བླ་མ་དང་། སྦྱིན་གནས་ལ་བསྙེན་བཀུར་དང་ཡོངས་སུ་སྤྱད་པ་བྱེད་ཅིང་བཀྲུ་བ་དང་། བྱུག་པ་དང་། མར་དང་། འབྲུ་མར་གྱིས་སྐུད་ཅིང་ལག་དར་ཏེ་ལུས་ལ་སྤྱད་པ་བྱེད་པས་ཡོངས་སུ་མི་སྐྱོ་བའི་ཕྱིར། ཕྱག་དང་ཞབས་འཇམ་ཞིང་མཉེན་པ་ཞེས་བྱའོ། །བསྡུ་བའི་དངོས་པོ་བཞི་པོ་སྦྱིན་པ་དང་། སྙན་པར་སྨྲ་བ་དང་། དོན་བྱེད་པ་དང་། དོན་འཐུན་པའི་དྲ་བས་སེམས་ཅན་བསྡུ་བ་ལ་མཁས་པ་ལེགས་པར་བསླབས་པའི་ཕྱིར་ཕྱག་དང་ཞབས་དྲ་བས་འབྲེལ་བ་ཞེས་བྱའོ། །ཡུན་རིང་པོ་ནས་གོང་ནས་གོང་དུ་དགེ་བའི་རྩ་བ་ཤིན་ཏུ་ཁྱད་པར་དུ་འཕགས་པ་ལ་ལྷག་པར་དམིགས་པའི་ཕྱིར་ཞབས་མཐོ་བ་ཞེས་བྱའོ། །ཡུན་རིང་པོ་ནས་ཕ་མ་དང་། དགེ་སྦྱོང་དང་། བྲམ་ཟེ་དང་། བླ་མ་དང་། སྦྱིན་གནས་དང་། དེ་བཞིན་གཤེགས་པའི་མཆོད་རྟེན་ལ་སྐོར་བ་བྱེད་པ་དང་། ལུས་ཀྱི་ལས་དང་། གུས་པར་ཆོས་ཉན་ཅིང་སྤུ་ཟིང་ཞེས་བྱེད་པ་དང་། སེམས་ཅན་གཞན་ཡང་དག་པར་དགའ་བར་བྱེད་པ་དང་། ཆོས་སྟོན་པ་ལ་སྦྱོར་བའི་ཕྱིར་ཡན་ལག་གི་སྤུ་གྱེན་དུ་གཡས་སུ་འཁྱིལ་བར་མངོན་པར་གྲུབ་པ་ཞེས་བྱའོ། །ཡུན་རིང་པོ་ནས་བསྟི་སྟང་དུ་བྱས་ཏེ། ཆོས་ཉན་པ་དང་། འཛིན་པ་དང་། ཀློག་པ་དང་། ཤེས་པར་བྱེད་པ་དང་། དོན་དང་ཚིག་རྣམ་པར་ངེས་པར་རྟོག་པ་ལ་མཁས་པས་རྒ་བ་དང་། ན་བ་དང་། འཆི་བ་
ལ་མངོན་དུ་ཕྱོགས་པའི་སེམས་ཅན་ཐམས་ཅད་ལ་སྐྱབས་སུ་འགྲོ་བ་སྦྱིན་པ་དང་། བསྟི་སྟང་དུ་བྱས་ཏེ་ཆོས་སྟོན་ཅིང་མི་བརྙས་པའི་བློ་དང་ལྡན་པའི་ཕྱིར་བྱིན་པ་རི་དགས་ཨེ་ན་ཡའི་ལྟ་བུ་ཞེས་བྱ་བའོ། །ཡུན་རིང་པོ་ནས་དགེ་སྦྱོང་དང་། བྲམ་ཟེ་རྣམས་དང་། དེ་ལས་གཞན་པ་ཚངས་པ་མཚུངས་པར་སྤྱོད་པ་རྣམས་ལ་ཚངས་པར་སྤྱོད་པའི་རྗེས་སུ་གཟུང་བའི་ཡོ་བྱད་ཐམས་ཅད་སྦྱིན་པ་དང་། སྒྲེན་མོ་རྣམས་ལ་གོས་སྦྱིན་པ་དང་། གཞན་གྱི་ཆུང་མ་ལ་མི་འཕྱོ་བ་དང་། ཚངས་པར་སྤྱོད་པའི་ཡོན་ཏན་གྱི་བསྔགས་པ་བརྗོད་པ་དང་། ངོ་ཚ་ཤེས་པ་དང་། ཁྲེལ་ཡོད་པ་རྗེས་སུ་བསྲུང་བ་བརྟན་པོར་ཡང་དག་པར་བླངས་པའི་ཕྱིར་མདོམས་ཀྱི་སྦ་བ་སྦུབས་སུ་ནུབ་པ་ཞེས་བྱའོ། །ཡུན་རིང་པོ་ནས་ལག་པ་དང་རྐང་པ་སྦོམ་པ་དང་། སེམས་ཅན་ལ་མི་འཚེ་བར་སྦྱོར་བ་དང་། ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་བྱམས་པ་དང་ལྡན་པའི་ཕྱིར་ཕྱག་རིང་བ་ཞེས་བྱའོ། །ཡུན་རིང་པོ་ནས་ཟས་ཀྱི་ཚོད་ཤེས་པ་དང་ཉུང་ངུ་ཟ་བ་དང་། ལྟོ་སྡོམ་པ་དང་། ནད་པ་ལ་སྨན་སྦྱིན་པ་དང་། སྐྱེ་བོ་དམན་པ་ལ་མི་བརྙས་པ་དང་། མགོན་མེད་པ་ཁྱད་དུ་མི་གསོད་པ་དང་། དེ་བཞིན་གཤེགས་པའི་མཆོད་རྟེན་ཞིག་པ་འཆོས་པ་དང་། མཆོད་རྟེན་རྩིག་པ་དང་། འཇིགས་པས་ཉེན་པའི་སེམས་ཅན་རྣམས་ལ་མི་འཇིགས་པ་སྦྱིན་པའི་ཕྱིར་ཤིང་ནྱ་གྲོ་དྷ་ལྟར་ཆུ་ཞེང་གབ་པ་ཞེས་བྱའོ། །ཡུན་རིང་པོ་ནས་ཕ་མ་དང་། བྲམ་ཟེ་དང་། དགེ་སྦྱོང་དང་། བླ་མ་དང་། སྦྱིན་གནས་རྣམས་ལ་བཀྲུ་བ་དང་། བསྐུ་བ་དང་། མར་དང་། འབྲུ་མར་གྱིས་སྐུད་པ་དང་། གྲང་བའི་དུས་ན་ནི་ཆུ་དྲོན་པོ་དང་ཚ་བའི་དུས་ན་ནི་ཆུ་གྲང་བ་དང་། བསིལ་གྲིབ་དང་དུས་ཀྱི་བདེ་བའི་ལོངས་སྤྱོད་སྦྱིན་པ་དང་། ཤིང་བལ་འཇམ་པོ་ལྟར་རེག་ན་བདེ་ཞིང་འཇམ་པའི་རས་ལེགས་པར་བཏིང་བའི་མལ་ཆ་སྦྱིན་པ་དང་། དེ་བཞིན་གཤེགས་པའི་མཆོད་རྟེན་ལ་སྤོས་ཀྱི་འབྲུ་མར་འཐོར་བ་དང་། དར་ཕྲ་མོའི་རྒྱལ་མཚན་དང་། བ་དན་དང་། སྲད་བུ་འབུལ་བའི་ཕྱིར་སྐུའི་པགས་པ་འཇམ་ཞིང་མཉེན་ལ་སྲབ་པ་ཞེས་བྱའོ། །ཡུན་རིང་པོ་ནས་སེམས་ཅན་ལ་ཁོང་ཁྲོ་བ་མེད་པ་དང་། བྱམས་པ་བསྒོམས་པ་ལ་སྦྱོར་བ་དང་། བཟོད་པ་དང་དེས་པ་ལ་སེམས་ཅན་གཞན་དག་འཛུད་པ་དང་། ཁོན་དུ་འཛིན་པ་མེད་ཅིང་གནོད་སེམས་མེད་པའི་ཡོན་ཏན་
གྱི་བསྔགས་པ་བརྗོད་པ་དང་། དེ་བཞིན་གཤེགས་པའི་མཆོད་རྟེན་དང་། དེ་བཞིན་གཤེགས་པའི་སྐུ་གཟུགས་རྣམས་ལ་གསེར་གྱི་རྒྱན་དང་། གསེར་གྱི་མེ་ཏོག་དང་། གསེར་གྱི་ཕྱེ་མ་འཐོར་བ་དང་། གསེར་གྱི་ཁ་དོག་ལྟ་བུའི་དར་གྱི་བ་དན་དང་། རྒྱལ་མཚན་དང་། རྒྱན་དང་། གསེར་གྱི་སྣོད་དང་། གསེར་གྱི་ཁ་དོག་ལྟ་བུའི་གོས་འབུལ་བའི་ཕྱིར། པགས་པའི་མདོག་གསེར་གྱི་ཁ་དོག་ལྟ་བུ་ཞེས་བྱའོ། །ཡུན་རིང་པོ་ནས་མཁས་པའི་གན་དུ་འགྲོ་ཞིང་དགེ་བ་དང་མི་དགེ་བ་གང་ཡིན་ཞེས་འདྲི་བ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། བསྟེན་པར་བྱ་བ་དང་། བསྟེན་པར་བྱ་བ་མ་ཡིན་པ་དང་། ངན་པ་དང་། འབྲིང་དང་། གྱ་ནོམ་པའི་ཆོས་ཡོངས་སུ་འདྲི་བ་དང་། དེའི་དོན་དཔྱད་པ་དང་། ཡོངས་སུ་འཇལ་བ་ལ་རྨོངས་པ་མེད་པ་དང་། དེ་བཞིན་གཤེགས་པའི་མཆོད་རྟེན་ལ་སྲིན་བུ་ཀི་ཏ་དང་། ལུ་ཏའི་ཚད་དང་། བ་རྒྱ་དང་། མེ་ཏོག་རྙིང་པ་དང་། རྩྭ་སྣ་ཚོགས་དང་། ཕྱག་དར་ཡོད་པ་སེལ་བར་སྦྱོར་བའི་ཕྱིར་སྤུ་རེ་རེ་ནས་སྐྱེས་པ་ཞེས་བྱའོ། །ཡུན་རིང་པོ་ནས་ཕ་མ་དང་། གཙོ་བོ་དང་། དམ་པ་དང་། མཆོད་པའི་འོས་དང་། དགེ་སྦྱོང་དང་། བྲམ་ཟེ་དང་། ཕོངས་པ་དང་། སློང་བ་ལ་སྩོགས་པ་འོངས་པ་དག་ལ་བསྟི་སྟང་དུ་བྱས་ཏེ། བསམ་པ་ཇི་ལྟ་བ་བཞིན་དུ་ཟས་དང་། སྐོམ་དང་། མལ་ཆ་དང་། སྨན་དང་། གོས་དང་། གནས་དང་། མར་མེ་དང་། འཚོ་བའི་ཡོ་བྱད་རུང་བ་སྦྱོར་བ་དང་། ཁྲོན་པ་དང་། རྫིང་ཆུ་བསིལ་བས་གང་བ་དག །སྐྱེ་བོ་མང་པོའི་ལོངས་སྤྱོད་དུ་སྦྱིན་པའི་ཕྱིར་བདུན་མཐོ་བ་ཞེས་བྱའོ། །ཡུན་རིང་པོ་ནས་ཕ་མ་དང་། དགེ་སྦྱོང་དང་། བྲམ་ཟེ་དང་། བླ་མ་དང་། སྦྱིན་གནས་ལ་འདུད་པ་དང་། རབ་ཏུ་འདུད་པ་དང་། གསོང་པོར་སྨྲ་བ་དང་། མི་འཇིགས་པ་སྦྱིན་པ་དང་། ཉམ་ཆུང་བ་ལ་མི་བརྙས་པ་དང་། སྐྱབས་སུ་སོང་བ་ཡོངས་སུ་མི་གཏོང་བ་བརྟན་པོར་ཡང་དག་པར་བླངས་པ་ཡོངས་སུ་མི་གཏོང་བའི་ཕྱིར། རོ་སྟོད་སེང་གེ་འདྲ་བ་ཞེས་བྱའོ། །ཡུན་རིང་པོ་ནས་རང་གི་ཉེས་པ་ལ་ཡོངས་སུ་འཇལ་བ་དང་། གཞན་གྱི་འཁྲུལ་པ་དང་། གཞན་གྱི་སྐྱོན་ལ་ཉེས་པར་མི་ལྟ་བ་དང་། རྩོད་པའི་རྩ་བ་དང་།
གཞན་འབྱེད་པར་བྱེད་པའི་བརྗོད་པ་ཡོངས་སུ་སྤོང་བ་དང་། གསང་ཚིག་ལེགས་པར་འདོར་བ་དང་། ངག་གི་ལས་ཀྱི་མཐའ་ལེགས་པར་བསྲུངས་པའི་ཕྱིར། ཐལ་གོང་རྒྱས་པ་ཞེས་བྱའོ། །ཡུན་རིང་པོ་ནས་ཕ་མ་དང་། དགེ་སྦྱོང་དང་། བྲམ་ཟེ་དང་། བླ་མ་དང་། སྦྱིན་གནས་རྣམས་ལ་ལྡང་བ་དང་། བསུ་བ་དང་། གསོང་པོར་སྨྲ་བ་དང་། བསྟན་བཅོས་ཐམས་ཅད་ལ་འཇིགས་པ་མེད་པས་རྩོད་པར་འདོད་པའི་སེམས་ཅན་ཚར་གཅོད་པ་དང་། རང་གི་ཆོས་འདུལ་བ་དང་འཐུན་པར་ཡང་དག་པར་འཇུག་པ་དང་། རྒྱལ་པོ་དང་བློན་པོ་ལ་སོགས་པ་དགེ་བའི་ལས་ཀྱི་ལམ་ལ་འགོད་པ་དང་། སྒོམ་དུ་འཇུག་པ་དང་། དེ་བཞིན་གཤེགས་པའི་བསྟན་པ་ཡོངས་སུ་འཛིན་པ་དང་། ཀུན་ཏུ་འཛིན་པ་དང་། དགེ་བའི་སྤྱོད་པ་ཐམས་ཅད་ཡང་དག་པར་འཛིན་དུ་འཇུག་པའི་སྔོན་དུ་འགྲོ་བའི་ཕྱིར། དཔུང་མགོ་ཤིན་ཏུ་ཟླུམ་པ་ཞེས་བྱའོ། །ཡུན་རིང་པོ་ནས་སློང་བའི་བསམ་པ་ཇི་ལྟ་བ་བཞིན་དུ་དངོས་པོ་ཐམས་ཅད་ཡོངས་སུ་གཏོང་བ་དང་། སྙན་པར་སྨྲ་བ་དང་། ལྷགས་པ་རྣམས་ལ་ཡང་མི་བརྙས་ཤིང་སྤ་གོང་བར་མི་བྱེད་པ་དང་། མི་སྐྱོ་བ་དང་། ཐམས་ཅད་ཀྱི་བསམ་པ་ཇི་ལྟ་བ་བཞིན་ཡོངས་སུ་རྫོགས་པར་བྱ་བའི་ཕྱིར། སྦྱིན་པ་ཡོངས་སུ་གཏོང་བ། བརྟན་པོར་ཡང་དག་པར་བླངས་པ་མི་འདོར་བའི་ཕྱིར། འགྲམ་པ་སེང་གེའི་འདྲ་བ་ཞེས་བྱའོ། །ཡུན་རིང་པོ་ནས་ཕྲ་མའི་ཚིག་ཡོངས་སུ་སྤོང་བ་དང་། དབྱེན་གྱི་གསང་ཚིག་མི་འཛིན་པ་དང་། འདུམ་པར་བསྡུམས་བྱེད་འདོད་པ་དང་། འདུམ་པ་རྣམས་དབྱེ་བར་མི་སེམས་པ་དང་། ཕྲ་མའི་ཚིག་ལ་སྨོད་པ་དང་། འདུམ་པ་བསྡུམས་པའི་ཡོན་ཏན་གྱི་བསྔགས་པ་བརྗོད་པར་སྦྱོར་བའི་ཕྱིར། ཚེམས་བཞི་བཅུ་མཉམ་པ་ཞེས་བྱའོ། །ཡུན་རིང་པོ་ནས་ནག་པོའི་ཕྱོགས་ཡོངས་སུ་སྤོང་བ་དང་། དཀར་པོའི་ཕྱོགས་དགེ་བའི་རྩ་བ་སོགས་པ་དང་། ལས་གནག་ཅིང་རྣམ་པར་སྨིན་པ་ཡང་གནག་པ་ཡོངས་སུ་སྤོང་བ་དང་། ལས་དཀར་ཞིང་རྣམ་པར་སྨིན་པ་ཡང་དཀར་བ་བསྔགས་པ་དང་། འོ་མ་དང་སྦྱར་བའི་ཟས་དང་། གོས་དཀར་པོ་སྦྱིན་པ་དང་། དེ་བཞིན་གཤེགས་པའི་རྟེན་རྣམས་ལ་རྡོ་ཐལ་འོ་མ་དང་བསྲེས་
པ་པིར་གྱིས་སྐུད་པ་དང་། མེ་ཏོག་སུ་མ་ན་དང་།བཱར་ཤི་ཀ་དང་། དྷ་ནུ་སྐ་རིའི་ཕྲེང་བ་བརྒྱུས་པའི་མེ་ཏོག་གི་ཆུན་པོ་དང་། མེ་ཏོག་ཁ་དོག་དཀར་པོ་སྦྱིན་པའི་ཕྱིར། ཚེམས་ཤིན་ཏུ་དཀར་བ་ཞེས་བྱའོ། །ཡུན་རིང་པོ་ནས་འཕྱ་བ་དང་། འཐིང་བ་རྣམ་པར་སྤོང་བ་དང་། ཀུན་དགའ་བར་བྱེད་པ་དང་། ཚིག་སྲུང་བ་དང་། ཀུན་དགའ་བར་བྱེད་པའི་ཚིག་བརྗོད་པ་དང་། གཞན་གྱི་འཁྲུལ་པ་དང་། གཞན་གྱི་སྐྱོན་མི་ཚོལ་བ་དང་སེམས་ཅན་ཐམས་ཅད་ལ་སེམས་འཐུན་པར་ཡང་དག་པར་འཛིན་དུ་འཇུག་པ་དང་། མཉམ་པར་སྦྱོར་བ་དང་། མཉམ་པར་ཆོས་སྟོན་པ་བརྟན་པོར་ཡང་དག་པར་བླངས་པ་ཡོངས་སུ་མི་འདོར་བའི་ཕྱིར། ཚེམས་ཐགས་བཟང་བ་ཞེས་བྱའོ། །ཡུན་རིང་པོ་ནས་སེམས་ཅན་ཐམས་ཅད་ལ་རྣམ་པར་མི་འཚེ་བ་དང་། རྣམ་པར་ཐོ་མི་འཚམ་པ་དང་། ནད་སྣ་ཚོགས་ཀྱིས་ཐེབས་པ་ལ་རིམ་གྲོ་བྱེད་པ་དང་། ནད་པ་ལ་སྨན་བྱིན་པ་དང་། འདྲོན་པ་རྣམས་ལ་རོ་བྲོ་བ་ཐམས་ཅད་སྦྱིན་པས་ཡོངས་སུ་མི་སྐྱོ་བའི་ཕྱིར། རོ་བྲོ་བ་མཆོག་དང་ལྡན་པ་ཞེས་བྱའོ། །ཡུན་རིང་པོ་ནས་བརྫུན་དང་། ཚིག་རྩུབ་པོ་དང་། བརླང་པོ་དང་། གཡོ་དང་། གཞན་ལ་གནོད་པ་དང་། གཞན་འཁྲུག་པར་བྱེད་པ་དང་། མི་སྙན་པ་དང་། གཞན་གྱི་མཚང་འདྲུ་བའི་ཚིག་ཡོངས་སུ་སྤོང་བ་དང་། བྱམས་པ་དང་སྙིང་རྗེ་ལ་སྦྱོར་བ་དང་། དགའ་བ་དང་། མཆོག་ཏུ་དགའ་བར་བྱེད་པ་དང་། འཇམ་པ་དང་། སྙན་པ་དང་། མཉེན་པ་དང་། སྙིང་དུ་འཐད་པ་དང་། སེམས་ཅན་གྱི་དབང་པོ་ཚིམ་པར་བྱེད་པ་དང་། ཡང་དག་པའི་ངག་ལ་ཡང་དག་པར་སྦྱོར་བའི་ཕྱིར། ཚངས་པའི་དབྱངས་ལྟ་བུ་ཞེས་བྱའོ། །ཡུན་རིང་པོ་ནས་ཕ་མ་ལ་བྱ་བ་དང་འདྲ་བར་སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་མིག་ཏུ་སྦྱོར་བ་དང་། བུ་གཅིག་པ་ལ་བྱ་བ་བཞིན་དུ་སློང་བ་ལ་བྱམས་པ་དང་། སྙིང་རྗེ་སྔོན་དུ་འགྲོ་བས་ལྟ་བ་དང་། སྤ་གོང་བར་མི་བྱེད་པ་དང་། དད་པའི་དབང་པོས་དེ་བཞིན་གཤེགས་པའི་མཆོད་རྟེན་ལ་མིག་མི་འཛུམས་པར་ལྟ་བ་དང་། སེམས་ཅན་གཞན་དེ་བཞིན་གཤེགས་པ་ལ་ལྟ་བ་ཡང་དག་པར་འཛིན་དུ་འཇུག་པ་བརྟན་པོར་ཡང་དག་པར་བླངས་པའི་ཕྱིར་སྤྱན་
མཐོན་ཏིང་དུ་འདུག་པ་ཞེས་བྱའོ། །ཡུན་རིང་པོ་ནས་བློ་གྲོས་དམན་པ་དང་། སེམས་པ་དམན་པ་རྣམ་པར་སྤོང་བ་དང་། རྒྱ་ཆེན་པོ་དང་། རླབས་པོ་ཆེ་ལ་མོས་པ་ཡོངས་སུ་རྫོགས་པར་བྱེད་པ་དང་། བླ་ན་མེད་པའི་ཆོས་ལ་མོས་པའི་སེམས་ཅན་ཡང་དག་པར་འཛུད་པ་དང་། ཁྲོ་གཉེར་གྱི་བཞིན་རྣམ་པར་སྤོང་བ་དང་། འཛུམ་པའི་བཞིན་དང་ལྡན་པ་དང་། དགེ་བའི་བཤེས་གཉེན་ཐམས་ཅད་ཀྱི་གན་དུ་འགྲོ་ཞིང་མངོན་དུ་ཕྱོགས་པའི་སྔོན་དུ་འགྲོ་བས་དགེ་བའི་རྩ་བ་ཐམས་ཅད་སོགས་པ་ལས་ཕྱིར་མི་ལྡོག་པའི་ཕྱིར་སྤྱན་གྱི་རྫི་མ་བའི་འདྲ་བ་ཞེས་བྱའོ། །ཡུན་རིང་པོ་ནས་ཚིག་གི་སྐྱོན་ཐམས་ཅད་རྣམ་པར་སྤོང་བ་དང་། ཉན་ཐོས་དང་། རང་སངས་རྒྱས་དང་། ཆོས་སྨྲ་བ་ཐམས་ཅད་ཀྱི་ཡོན་ཏན་གྱི་བསྔགས་པ་ཚད་མེད་པར་བརྗོད་པ་དང་། དེ་བཞིན་གཤེགས་པའི་མདོ་སྡེ་ཡི་གེར་འདྲི་བ་དང་། ཀློག་པ་དང་། འདོན་པ་དང་། རྣམ་པར་ཤེས་པར་བྱེད་པ་དང་། ཆོས་དེ་དག་གི་དོན་དང་། ཚིག་རབ་ཏུ་དབྱེ་བ་སེམས་ཅན་གཞན་ལ་གོ་བར་བྱེད་པ་ལ་མཁས་པའི་ཕྱིར། ལྗགས་ཡངས་པ་ཞེས་བྱའོ། །ཡུན་རིང་པོ་ནས་ཕ་མ་དང་། དགེ་སྦྱོང་དང་། བྲམ་ཟེ་དང་། བླ་མ་དང་། སྦྱིན་གནས་ཀྱི་རྐང་པ་ལ་མགོ་བོས་ཕྱག་འཚལ་བ་དང་། རབ་ཏུ་བྱུང་བ་ལ་ཕྱག་འཚལ་བ་དང་། གསོང་པོར་སྨྲ་བ་དང་། དབུ་སྐྲ་སྦེད་པ་དང་། སྟེང་དུ་སྤོས་ཀྱི་འབྲུ་མར་འཐོར་བ་དང་། སློང་བ་ཐམས་ཅད་ལ་ཕྱེ་མ་དང་། ཕྲེང་བ་བརྒྱུས་པ་དང་། མགོ་རྒྱན་སྦྱིན་པའི་ཕྱིར། དབུ་གཙུག་ཏོར་དང་ལྡན་ཞིང་སྤྱི་གཙུག་བལྟར་མི་མཐོང་བ་ཞེས་བྱའོ། །ཡུན་རིང་པོ་ནས་གཏན་པ་མེད་པའི་མཆོད་སྦྱིན་ཐམས་ཅད་བྱེད་པ་དང་། སེམས་ཅན་ཐམས་ཅད་དགེ་བ་ཡང་དག་པར་ལེན་དུ་འཛུད་པ་དང་། དགེ་བའི་བཤེས་གཉེན་གྱིས་རྗེས་སུ་བསྟན་པ་དང་འགལ་བར་མི་བྱེད་པ་དང་། ཆོས་སྨྲ་བ་རྣམས་ཀྱིས་མངགས་ཏེ་ཕྱོགས་རྣམས་སུ་འགྲོ་བ་དང་འོངས་པས་ཡོངས་སུ་མི་སྐྱོ་བ་དང་། སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། འཕགས་པ་ཉན་ཐོས་དང་། ཕ་མ་དང་། བླ་མ་དང་། སྦྱིན་གནས་ཐམས་ཅད་ལ་རིམ་གྲོ་བྱ་བར་སྤོས་སྣ་ཚོགས་ཀྱི་འབྲུ་མར་དང་། མར་དང་། སྒྲོན་མ་དང་། མར་མེ་རྣམས་ཀྱིས་
མུན་པ་མུན་ནག་སེལ་བ་དང་། དེ་བཞིན་གཤེགས་པའི་སྐུ་གཟུགས་རྣམ་པའི་མཆོག་ཐམས་ཅད་དང་ལྡན་པ་མཛེས་པར་བྱེད་དུ་འཇུག་པ་དང་། འོ་མ་ལྟ་བུའི་མཛོད་སྤུས་བརྒྱན་པ་བྱེད་པ་དང་། སེམས་ཅན་གཞན་བྱང་ཆུབ་ཀྱི་སེམས་མངོན་དུ་བྱེད་དུ་འཇུག་པས། དགེ་བའི་ཚོགས་ཁྱད་པར་དུ་གྱུར་པའི་ཕྱིར། སྨིན་མཚམས་ཀྱི་མཛོད་སྤུ་མཛེས་པར་སྐྱེས་ཤིང་། གཡས་སུ་འཁྱིལ་ལ་འབར་ཞིང་། ཁ་དོག་རྣམ་པར་དག་པ་སྣང་བ་དང་ལྡན་པ་ཞེས་བྱའོ། །སྲེད་མེད་ཀྱི་བུ་ཆེན་པོའི་སྟོབས་དང་ལྡན་པའི་ཕྱིར། མཐུ་ཆེན་པོ་བརྙེས་པ་ཞེས་བྱའོ། །བདུད་བྱེ་བ་ཕྲག་བརྒྱ་ཐུལ་བའི་སྟོབས་དང་ལྡན་པའི་ཕྱིར། སྲེད་མེད་ཀྱི་བུ་ཆེན་པོའི་སྟོབས་དང་ལྡན་པ་ཞེས་བྱའོ། །དེ་བཞིན་གཤེགས་པའི་སྟོབས་བཅུ་དང་ལྡན་པའི་ཕྱིར། ཕས་ཀྱི་རྒོལ་བ་ཐམས་ཅད་འདུལ་བ་ཞེས་བྱའོ། །གནས་དང་གནས་མ་ཡིན་པ་མཁྱེན་པ་ལ་མཁས་པ་དང་། དམན་པ་ཉི་ཚེ་བའི་ཐེག་པ་རྣམ་པར་སྤོང་བ་དང་། ཐེག་པ་ཆེན་པོའི་ཡོན་ཏན་ཡང་དག་པར་སྒྲུབ་པའི་སྟོབས་དང་ལྡན་པས། སྟོབས་དེ་ལ་སྦྱོར་བ་ཆོག་མི་ཤེས་པའི་ཕྱིར། དེ་བཞིན་གཤེགས་པའི་སྟོབས་བཅུ་དང་ལྡན་པ་ཞེས་བྱའོ། །འདས་པ་དང་། མ་འོངས་པ་དང་། ད་ལྟར་བྱུང་བའི་ལས་ཡང་དག་པར་བླངས་པའི་རྒྱུ་དང་། རྣམ་པར་སྨིན་པ་མཁྱེན་པའི་སྟོབས་དང་ལྡན་པའི་ཕྱིར། གནས་དང་གནས་མ་ཡིན་པ་མཁྱེན་པ་ལ་མཁས་པ་དང་། དམན་པ་ཉི་ཚེ་བའི་ཐེག་པ་རྣམ་པར་སྤོང་བ་དང་། ཐེག་པ་ཆེན་པོའི་ཡོན་ཏན་ཡང་དག་པར་སྒྲུབ་པའི་སྟོབས་དང་ལྡན་པས་སྟོབས་ལ་སྦྱོར་བས་ཆོག་མི་ཤེས་པ་ཞེས་བྱའོ། །སེམས་ཅན་ཐམས་ཅད་ཀྱི་དབང་པོ་དང་། བརྩོན་འགྲུས་ཀྱི་རིམ་པ་མཁྱེན་པའི་སྟོབས་དང་ལྡན་པའི་ཕྱིར། འདས་པ་དང་། མ་འོངས་པ་དང་། ད་ལྟར་བྱུང་བའི་ལས་ཡང་དག་པར་བླངས་པའི་རྒྱུ་དང་། རྣམ་པར་སྨིན་པ་མཁྱེན་པའི་སྟོབས་དང་ལྡན་པ་ཞེས་བྱའོ། །ཁམས་དུ་མ་དང་། ཁམས་སྣ་ཚོགས་པའི་འཇིག་རྟེན་ལ་འཇུག་པ་མཁྱེན་པའི་སྟོབས་དང་ལྡན་པའི་ཕྱིར། སེམས་ཅན་ཐམས་ཅད་ཀྱི་དབང་པོ་དང་བརྩོན་འགྲུས་ཀྱི་རིམ་པ་མཁྱེན་པའི་སྟོབས་དང་ལྡན་པ་ཞེས་བྱའོ། །མོས་པ་དུ་མ་དང་། མོས་པ་སྣ་ཚོགས་དང་། མོས་པ་མ་ལུས་པ་དང་། རྣམ་པར་གྲོལ་
བ་མཁྱེན་པའི་སྟོབས་དང་ལྡན་པའི་ཕྱིར། ཁམས་དུ་མ་དང་། ཁམས་སྣ་ཚོགས་པའི་འཇིག་རྟེན་ལ་འཇུག་པ་མཁྱེན་པའི་སྟོབས་དང་ལྡན་པ་ཞེས་བྱའོ། །ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང་ལྡན་པའི་ཕྱིར། མོས་པ་དུ་མ་དང་།མོས་པ་སྣ་ཚོགས་དང་། མོས་པ་མ་ལུས་པ་ཐམས་ཅད་དང་། རྣམ་པར་གྲོལ་བ་མཁྱེན་པའི་སྟོབས་དང་ལྡན་པ་ཞེས་བྱའོ། །བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་ཀུན་ནས་ཉོན་མོངས་པ་དང་། རྣམ་པར་བྱང་བ་དང་། རྣམ་པར་གཞག་པ་ཐམས་ཅད་མཁྱེན་པའི་སྟོབས་དང་ལྡན་པའི་ཕྱིར། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང་ལྡན་པ་ཞེས་བྱའོ། །སྔོན་གྱི་གནས་རྣམ་པ་དུ་མ་མཁྱེན་པ་ཆགས་པ་མི་མངའ་བའི་སྟོབས་དང་ལྡན་པའི་ཕྱིར། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་ཀུན་ནས་ཉོན་མོངས་པ་དང་། རྣམ་པར་བྱང་བ་དང་། རྣམ་པར་གཞག་པ་ཐམས་ཅད་མཁྱེན་པའི་སྟོབས་དང་ལྡན་པ་ཞེས་བྱའོ། །གཟུགས་མ་ལུས་པ་ཐམས་ཅད་སྒྲིབ་པ་མེད་པར་གཟིགས་པའི་ལྷའི་སྤྱན་གྱི་མཁྱེན་པའི་སྟོབས་དང་ལྡན་པའི་ཕྱིར། སྔོན་གྱི་གནས་རྣམ་པ་དུ་མ་དྲན་པ་མཁྱེན་པ་ཆགས་པ་མི་མངའ་བའི་སྟོབས་དང་ལྡན་པ་ཞེས་བྱའོ། །བག་ཆགས་ཀྱི་མཚམས་སྦྱོར་བར་གྱུར་པ་ཐམས་ཅད་དང་། ཟག་པ་ཐམས་ཅད་མ་ལུས་པར་ཟད་པ་མཁྱེན་པའི་སྟོབས་དང་ལྡན་པའི་ཕྱིར། གཟུགས་མ་ལུས་པ་ཐམས་ཅད་སྒྲིབ་པ་མེད་པར་གཟིགས་པའི་ལྷའི་སྤྱན་གྱིས་མཁྱེན་པའི་སྟོབས་དང་ལྡན་པ་ཞེས་བྱའོ། །ཆོས་ཐམས་ཅད་མ་ལུས་པར་མངོན་པར་རྫོགས་པར་སངས་རྒྱས་སོ་ཞེས་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱི་ཟིལ་གྱིས་མི་ནོན་པའི་དམ་བཅས་པའི་མི་འཇིགས་པ་བརྙེས་པའི་ཕྱིར། བག་ཆགས་ཀྱི་མཚམས་སྦྱོར་བར་གྱུར་པ་ཐམས་ཅད་དང་། ཟག་པ་ཐམས་ཅད་མ་ལུས་པར་ཟད་པ་མཁྱེན་པའི་སྟོབས་དང་ལྡན་པ་ཞེས་བྱའོ། །ཀུན་ནས་ཉོན་མོངས་པ་ཐམས་ཅད་མྱ་ངན་ལས་འདས་པའི་བར་དུ་གཅོད་པའི་ཆོས་སུ་བསྟན་ཏེ། དེར་དམ་བཅས་པ་ལ། ལྷ་དང་བཅས་པའི་འཇིག་རྟེན་གྱིས་མི་ཤིགས་པའི་དམ་བཅས་པ་མི་འཇིགས་པ་བརྙེས་པའི་ཕྱིར། ཆོས་ཐམས་ཅད་མ་ལུས་པར་མངོན་པར་རྫོགས་པར་སངས་རྒྱས་སོ་ཞེས་དམ་
བཅས་པ་ལ་ལྷ་དང་བཅས་པའི་འཇིག་རྟེན་གྱི་ཟིལ་གྱིས་མི་ནོན་པའི་དམ་བཅས་པའི་མི་འཇིགས་པ་བརྙེས་པ་ཞེས་བྱའོ། །ངེས་པར་འབྱུང་བའི་ལམ་བསྒྲུབས་ན་མྱ་ངན་ལས་འདས་པ་རྙེད་པར་འགྱུར་རོ་ཞེས་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱིས་བརྒལ་དུ་མེད་པའི་དམ་བཅས་པའི་མི་འཇིགས་པ་བརྙེས་པའི་ཕྱིར། ཀུན་ནས་ཉོན་མོངས་པ་ཐམས་ཅད་མྱ་ངན་ལས་འདས་པའི་བར་དུ་གཅོད་པའི་ཆོས་སུ་བསྟན་ཏེ། དེར་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱིས་མི་ཤིགས་པའི་དམ་བཅས་པའི་མི་འཇིགས་པ་བརྙེས་པ་ཞེས་བྱའོ། །ཟག་པ་ཐམས་ཅད་སྤངས་པར་མཁྱེན་པར་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱིས་མི་ཟློགས་པའི་དམ་བཅས་པའི་མི་འཇིགས་པ་བརྙེས་པའི་ཕྱིར། ངེས་པར་འབྱུང་བའི་ལམ་བསྒྲུབས་ན། མྱ་ངན་ལས་འདས་པ་བརྙེས་པར་འགྱུར་རོ་ཞེས་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱིས་བརྒལ་དུ་མེད་པའི་དམ་བཅས་པའི་མི་འཇིགས་པ་བརྙེས་པ་ཞེས་བྱའོ། །ཚིག་མ་འཁྲུལ་བས་ཆོས་སྟོན་པའི་ཕྱིར། ཟག་པ་ཐམས་ཅད་སྤངས་པ་མཁྱེན་པར་དམ་བཅས་པ་ལ་ལྷ་དང་བཅས་པའི་འཇིག་རྟེན་གྱིས་མི་ཟློགས་པའི་དམ་བཅས་པའི་མི་འཇིགས་པ་བརྙེས་པ་ཞེས་བྱའོ། །སྒྲ་མེད་པ་དང་། བརྗོད་དུ་མེད་པའི་ཆོས་ཀྱི་ངོ་བོ་ཉིད་ཐུགས་སུ་ཆུད་པའི་ཕྱིར། ཚིག་མ་འཁྲུལ་བའི་ཆོས་སྟོན་པ་ཞེས་བྱའོ། །བྲལ་བ་མེད་པའི་ཕྱིར་སྒྲ་མེད་པ་དང་། བརྗོད་དུ་མེད་པའི་ཆོས་ཀྱི་ངོ་བོ་ཉིད་ཐུགས་སུ་ཆུད་པ་ཞེས་བྱའོ། །སེམས་ཅན་ཐམས་ཅད་ཀྱི་སྒྲ་ཚད་མེད་པ་སངས་རྒྱས་ཀྱི་སྒྲ་སྐད་དུ་བྱིན་གྱིས་རློབ་ནུས་པའི་ཕྱིར། བྲལ་བ་མེད་པ་ཞེས་བྱའོ། །བསྙེལ་བ་མི་མངའ་བའི་ཕྱིར། སེམས་ཅན་ཐམས་ཅད་ཀྱི་སྒྲ་ཚད་མེད་པ་སངས་རྒྱས་ཀྱི་ཆོས་ཀྱི་སྒྲ་སྐད་དུ་བྱིན་གྱིས་རློབ་ནུས་པ་ཞེས་བྱའོ། །སྣ་ཚོགས་ཀྱི་འདུ་ཤེས་དང་བྲལ་བའི་ཕྱིར་བསྙེལ་བ་མི་མངའ་བ་ཞེས་བྱའོ། །སེམས་ཅན་ཐམས་ཅད་ཀྱི་སེམས་མཉམ་པར་བཞག་པ་བས་ཤིན་ཏུ་མཉམ་པར་བཞག་པའི་ཕྱིར། སྣ་ཚོགས་ཀྱི་འདུ་ཤེས་དང་བྲལ་བ་ཞེས་བྱའོ། །སོ་སོར་མ་བརྟགས་པའི་བཏང་སྙོམས་ཅན་གྱི་ཕྱིར། སེམས་ཅན་ཐམས་ཅད་ཀྱི་སེམས་མཉམ་པར་བཞག་པ་བས། ཤིན་ཏུ་མཉམ་པར་བཞག་པ་ཞེས་བྱའོ། །མོས་པའི་འདུ་བྱེད་ཀྱི་ཏིང་ངེ་འཛིན་ལས་ཡོངས་སུ་མ་ཉམས་
པའི་ཕྱིར། སོ་སོར་མ་བརྟགས་པའི་བཏང་སྙོམས་ཅན་ཞེས་བྱའོ། །བརྩོན་འགྲུས་ཀྱི་འདུ་བྱེད་ཀྱི་ཏིང་ངེ་འཛིན་གྱིས་རྒྱུན་མི་འཆད་ཅིང་བརྩོན་འགྲུས་ལས་ཡོངས་སུ་མ་ཉམས་པའི་ཕྱིར། མོས་པའི་འདུ་བྱེད་ཀྱི་ཏིང་ངེ་འཛིན་ལས་ཡོངས་སུ་མ་ཉམས་པ་ཞེས་བྱའོ། །དྲན་པ་ལས་ཡོངས་སུ་མ་ཉམས་པའི་ཕྱིར། བརྩོན་འགྲུས་ལས་ཡོངས་སུ་མ་ཉམས་པ་ཞེས་བྱའོ། །ཤེས་རབ་ལས་ཡོངས་སུ་མ་ཉམས་པའི་ཕྱིར། དྲན་པ་ལས་ཡོངས་སུ་མ་ཉམས་པ་ཞེས་བྱའོ། །རྣམ་པར་གྲོལ་བ་ལས་ཡོངས་སུ་མ་ཉམས་པའི་ཕྱིར། ཤེས་རབ་ལས་ཡོངས་སུ་མ་ཉམས་པ་ཞེས་བྱའོ། །རྣམ་པར་གྲོལ་བའི་ཡེ་ཤེས་མཐོང་བ་ལས་ཡོངས་སུ་མ་ཉམས་པའི་ཕྱིར། རྣམ་པར་གྲོལ་བ་ལས་ཡོངས་སུ་མ་ཉམས་པ་ཞེས་བྱའོ། །ལུས་ཀྱི་ལས་དང་ངག་གི་ལས་དང་ཡིད་ཀྱི་ལས་ཐམས་ཅད་ཀྱི་སྔོན་དུ་ཡེ་ཤེས་འགྲོ་ཞིང་། ཡེ་ཤེས་ཀྱི་རྗེས་སུ་འབྲང་བའི་ཡེ་ཤེས་དང་ལྡན་པའི་ཕྱིར། རྣམ་པར་གྲོལ་བའི་ཡེ་ཤེས་མཐོང་བ་ལས་ཡོངས་སུ་མ་ཉམས་པ་ཞེས་བྱའོ། །འདས་པ་དང་། མ་འོངས་པ་དང་། ད་ལྟར་བྱུང་བའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་དང་ལྡན་པའི་ཕྱིར། ལུས་ཀྱི་ལས་དང་ངག་གི་ལས་དང་ཡིད་ཀྱི་ལས་ཐམས་ཅད་ཀྱི་སྔོན་དུ་ཡེ་ཤེས་འགྲོ་ཞིང་། ཡེ་ཤེས་ཀྱི་རྗེས་སུ་འབྲང་བའི་ཡེ་ཤེས་དང་ལྡན་པ་ཞེས་བྱའོ། །སྒྲིབ་པ་མེད་པའི་རྣམ་པར་ཐར་པ་བརྙེས་པའི་ཕྱིར། དུས་གསུམ་ལ་མ་ཆགས་མ་ཐོགས་པའི་ཡེ་ཤེས་མཐོང་བ་དང་ལྡན་པ་ཞེས་བྱའོ། །སེམས་ཅན་ཐམས་ཅད་ཀྱི་སྤྱོད་པ་ལ་འཇུག་པ་ལ་མཁས་པ་རྒྱུན་མི་འཆད་པའི་ཕྱིར། སྒྲིབ་པ་མེད་པའི་རྣམ་པར་ཐར་པ་བརྙེས་པ་ཞེས་བྱའོ། །སོ་སོར་ཅི་རིགས་པར་ཆོས་སྟོན་པ་ལ་མཁས་པའི་ཕྱིར། སེམས་ཅན་ཐམས་ཅད་ཀྱི་སྤྱོད་པ་ལ་འཇུག་པ་ལ་མཁས་པ་རྒྱུན་མི་འཆད་པ་ཞེས་བྱའོ། །དབྱངས་ཀྱི་ཡན་ལག་ཐམས་ཅད་ཀྱི་དཀྱིལ་འཁོར་དམ་པ་ཕ་རོལ་ཏུ་ཕྱིན་པའི་ཕྱིར། སོ་སོར་ཅི་རིགས་པར་ཆོས་སྟོན་པ་ལ་མཁས་པ་ཞེས་བྱའོ། །སྒྲ་ཐམས་ཅད་ཀྱི་བྲག་ཅ་འབྱིན་པ་ལ་མཁས་པ་བརྙེས་པའི་ཕྱིར། དབྱངས་ཀྱི་ཡན་ལག་ཐམས་ཅད་ཀྱི་དཀྱིལ་འཁོར་དམ་པའི་ཕ་རོལ་ཏུ་ཕྱིན་པ་ཞེས་བྱའོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོའི་སྐད་དང་ལྡན་པ་ཞེས་བྱའོ། །ཚངས་པའི་སྒྲ་དབྱངས་བསྒྲགས་པའི་དབྱངས་ལྟ་བུ་
ཞེས་བྱའོ། །ཀ་ལ་པིང་ཀའི་སྒྲ་སྐད་ལྟ་བུ་ཞེས་བྱའོ། །རྔ་བོ་ཆེ་དང་། གླུ་དབྱངས་ཀྱི་སྒྲ་སྐད་ལྟ་བུ་ཞེས་བྱའོ། །་སའི་སྒྲའི་ང་རོའི་སྒྲ་ལྟ་བུ་ཞེས་བྱའོ། །ཀླུའི་རྒྱལ་པོ་རྒྱ་མཚོས་འབྲུག་སྒྲ་བསྒྲགས་པའི་སྒྲ་སྐད་ལྟ་བུ་ཞེས་བྱའོ། །སེང་གེ་དང་། ཁྱུ་མཆོག་ཏུ་གྱུར་པ་བསྒྱིངས་པའི་སྒྲ་སྐད་ལྟ་བུ་ཞེས་བྱའོ། །སེམས་ཅན་ཐམས་ཅད་ཀྱི་སྒྲ་སྐད་བསྒྲགས་པ་དང་འཐུན་པར་སྒྲོགས་པས་ཚིམ་པར་བྱེད་པའི་སྒྲ་དང་ལྡན་པ་ཞེས་བྱའོ། །ཆགས་པ་མེད་ཅིང་སྒྲིབ་པ་མེད་པར་འཁོར་གྱི་དཀྱིལ་འཁོར་དགའ་བར་བྱེད་པའི་སྒྲ་དང་ལྡན་པ་ཞེས་བྱའོ། །སྐད་ཅིག་ལས་སྐད་ཐམས་ཅད་གོ་བར་བྱེད་པའི་སྒྲ་དང་ལྡན་པ་ཞེས་བྱའོ། །ཚངས་པའི་དབང་པོས་མཆོད་པ་ཞེས་བྱའོ། །ལྷའི་དབང་པོས་བསྟི་སྟང་དུ་བྱས་པ་ཞེས་བྱའོ། །ཀླུའི་དབང་པོས་ཕྱག་བྱས་པ་ཞེས་བྱའོ། །གནོད་སྦྱིན་གྱི་དབང་པོས་ཞལ་དུ་བལྟས་པ་ཞེས་བྱའོ། །དྲི་ཟའི་དབང་པོས་ཉེ་བར་གླུ་བླངས་པ་ཞེས་བྱའོ། །སྲིན་པོའི་དབང་པོས་དབང་པོ་དང་བས་མིག་མི་འཛུམས་པར་བལྟས་པ་ཞེས་བྱའོ། །ལྷ་མ་ཡིན་གྱི་དབང་པོས་མངོན་པར་བཏུད་པ་ཞེས་བྱའོ། །ནམ་མཁའ་ལྡིང་གི་དབང་པོས་རྣམ་པར་མ་གཙེས་པར་བལྟས་པ་ཞེས་བྱའོ། །མི་འམ་ཅིའི་དབང་པོས་མངོན་པར་བསྟོད་པ་ཞེས་བྱའོ། །ལྟོ་འཕྱེ་ཆེན་པོའི་དབང་པོས་བལྟ་འདོད་པ་ཞེས་བྱའོ། །མིའི་དབང་པོས་མངོན་དུ་ཡང་དག་པར་མཆོད་པ་ཞེས་བྱའོ། །དགྲ་བཅོམ་པའི་ཚོགས་མང་པོས་བསྟེན་པ་ཞེས་བྱའོ། །བྱང་ཆུབ་སེམས་དཔའ་ཐམས་ཅད་ཡང་དག་པར་འཛིན་དུ་འཇུག་པ་དང་། ཡང་དག་པར་གཟེངས་སྟོད་པ་དང་། ཡང་དག་པར་དགའ་བར་མཛད་པ་ཞེས་བྱའོ། །ཟང་ཟིང་མེད་པར་ཆོས་སྟོན་པ་ཞེས་བྱའོ། །ཚིག་དང་། ཚིག་འབྲུ་ཉམས་པ་མེད་པར་འབྲས་བུ་ཡོད་པའི་ཆོས་སྟོན་པ་ཞེས་བྱའོ། །་དུས་ལས་མི་ཡོལ་བར་ཆོས་སྟོན་པ་ཞེས་བྱའོ། །བྱམས་པ་ཆོས་ཀྱི་འཁོར་ལོ་བསྐོར་བ་འདི་ནི་དེ་བཞིན་གཤེགས་པའི་ཡོན་ཏན་བསྔགས་པའི་ཕྱོགས་ལ་འཇུག་པ་ཅུང་ཟད་ཙམ་ཞིག་མདོར་བསྟན་དུ་ཟད་དེ། བྱམས་པ་རྒྱས་པར་བྱ་བ་ནི་དེ་བཞིན་གཤེགས་པས་བསྐལ་པའམ། བསྐལ་པ་ལས་ལྷག་པར་བསྟན་པ་འདིའི་མཐར་མི་ཕྱིན་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །ཟབ་ཅིང་བལྟ་དཀའ་ཕྲ་བ་ཡི། །ཆོས་ཀྱི་འཁོར་ལོ་རབ་བསྐོར་ཏེ། །དེ་ལ་ཕ་རོལ་མུ་སྟེགས་ཅན། །ཀུན་དང་བདུད་ཀྱིས་མི་ཆུད་དོ། །ཀུན་གཞི་མེད་ཅིང་སྤྲོས་མེད་པ། །སྐྱེ་བ་མེད་
ཅིང་འབྱུང་མེད་ལ། །དབེན་ཞིང་རང་བཞིན་སྟོང་པ་ཡི། །ཆོས་ཀྱི་འཁོར་ལོ་རབ་བསྐོར་ཏོ། །བླང་བ་མེད་ཅིང་དོར་མེད་ལ། །མཚན་མ་མེད་ཅིང་མཚན་ཉིད་མེད། །མཉམ་པ་ཉིད་ཀྱི་ཆོས་བསྟན་པའི། །འཁོར་ལོ་སངས་རྒྱས་ཀྱིས་བསྐོར་ཏོ། །ཇི་ལྟར་སྒྱུ་མ་སྨིག་རྒྱུ་དང་། །རྨི་ལམ་བྲག་ཅ་ཆུ་ཟླ་དང་། །དེ་དག་འདྲ་བའི་འཁོར་ལོ་ནི། །འཇིག་རྟེན་མགོན་པོས་རབ་བསྐོར་ཏོ། །རྟེན་པའི་ཆོས་ལ་འཇུག་བྱེད་པ། །ཆད་མིན་རྟག་པ་མ་ཡིན་པ། །ལྟ་བ་ཐམས་ཅད་ཆད་པ་ནི། །ཆོས་ཀྱི་འཁོར་ལོ་ཡིན་ཞེས་བརྗོད། །རྟག་ཏུ་ནམ་མཁའ་མཚུངས་འདྲ་ཞིང་། །རྣམ་པར་མི་རྟོག་འོད་གསལ་བ། །མཐའ་དང་དབུང་མེད་བསྟན་པ་ནི། །ཆོས་ཀྱི་འཁོར་ལོར་འདིར་བརྗོད་དོ། །ཡོད་དང་མེད་ལས་རྣམ་གྲོལ་ཞིང་། །བདག་དང་བདག་མེད་རྣམ་སྤངས་ལ། །རང་བཞིན་མ་སྐྱེས་བསྟན་པ་ནི། །ཆོས་ཀྱི་འཁོར་ལོར་འདིར་བརྗོད་དོ། །ཡང་དག་མཐའ་ནི་མཐའ་མིན་པ། །དེ་བཞིན་ཉིད་ལ་དེ་བཞིན་ཉིད། །གཉིས་སུ་མེད་པའི་ཆོས་བསྟན་པ། །ཆོས་ཀྱི་འཁོར་ལོར་བརྗོད་པ་ཡིན། །མིག་ནི་ངོ་བོ་ཉིད་ཀྱིས་སྟོང་། །དེ་བཞིན་སྣ་དང་རྣ་བ་དང་། །ལྕེ་དང་ལུས་དང་སེམས་ཀྱང་ནི། །སྟོང་པའི་བདག་ཉིད་གཡོ་བ་མེད། །འདི་ལྟ་བུ་ཡི་འཁོར་ལོ་འདི། །ཆོས་ཀྱི་འཁོར་ལོ་ཞེས་བརྗོད་དེ། །སེམས་ཅན་མི་མཁས་རྟོགས་བྱེད་པས། །་དེས་ན་སངས་རྒྱས་ཞེས་བརྗོད་དོ། །ཆོས་ཀྱི་མཚན་ཉིད་རང་བཞིན་འདི། །གཞན་གྱིས་བསྟན་པ་མེད་པར་ནི། །ང་བདག་ཉིད་ཀྱིས་སངས་རྒྱས་ཏེ། །དེས་ན་རང་བྱུང་མིག་དང་ལྡན། །ཆོས་རྣམས་ཀུན་ལ་དབང་བརྙེས་པས། །ཆོས་ཀྱི་རྗེ་ཞེས་བརྗོད་པ་ཡིན། །ཆོས་ལ་ཚུལ་དང་ཚུལ་མིན་མཁྱེན། །དེས་ན་འདྲེན་པར་བརྗོད་པ་ཡིན། །ཇི་ལྟར་འདུལ་བར་འགྱུར་བ་ལ། །སྐྱེ་བོ་དཔག་ཏུ་མེད་བཏུལ་ཏེ། །འདུལ་བའི་ཕ་རོལ་ཕྱིན་པར་གྱུར། །དེས་ན་རྣམ་པར་འདྲེན་ཅེས་བརྗོད། །སེམས་ཅན་གང་དག་ལམ་ལས་ཉམས། །དེ་དག་རྣམས་ལ་ལམ་མཆོག་བསྟན། །ཕ་རོལ་གྱི་ནི་འགྲམ་དུ་བཀྲི། །དེ་ཕྱིར་ང་ནི་རྣམ་པར་འདྲེན། །བསྡུ་བའི་དངོས་པོ་ཤེས་པ་ཡིས། །སྐྱེ་བོ་དག་ནི་ངས་བསྡུས་ཏེ། །འཁོར་བའི་འབྲོག་ལས་རྒལ་བས་ན། །དེས་ན་ང་ནི་དེད་དཔོན་ཡིན། །
ཆོས་རྣམས་ཀུན་ལ་དབང་སྒྱུར་ཏེ། །དེས་ན་རྒྱལ་བ་ཆོས་ལ་མངའ། །ཆོས་ཀྱི་འཁོར་ལོ་རབ་བསྐོར་བས། །ཆོས་ཀྱི་རྒྱལ་པོར་བརྗོད་པ་ཡིན། །ཆོས་ཀྱི་སྦྱིན་བདག་སྟོན་པ་ཡིན། །ཆོས་ཀྱི་བདག་པོ་བླ་ན་མེད། །མཆོད་སྦྱིན་ལེགས་མཛད་དོན་གྲུབ་པ། །དགོངས་པ་རྫོགས་པ་བཀྲ་ཤིས་གྲུབ། །དབུགས་འབྱིན་མཛད་པ་དེ་གཟིགས་པ། །་དཔའ་བོ་ཉོན་མོངས་ཆེན་པོ་སྤོང་། །གཡུལ་རྣམས་ཀུན་ལས་རྒྱལ་གྱུར་པ། །གྲོལ་བའི་སྐྱེས་བུ་ཐར་མཛད་པ། །འཇིག་རྟེན་གྱི་ནི་སྣང་གྱུར་པ། །ཤེས་རབ་ཡེ་ཤེས་འོད་མཛད་པ། །མི་ཤེས་མུན་པ་འཇོམས་པ་པོ། །སྒྲོན་མ་འཛིན་པ་འོད་ཆེན་ལྡན། །ཡེ་ཤེས་ཆེ་ལྡན་སྨན་པ་ཆེ། །ཉོན་མོངས་པ་ལས་གསོ་མཛད་པ། །སེམས་ཅན་ཉོན་མོངས་ཟུགས་རྣམས་ལ། །ཟུག་རྔུ་འབྱིན་པ་བླ་ན་མེད། །མཚན་རྣམས་ཐམས་ཅད་ཕུན་སུམ་ཚོགས། །དཔེ་བྱད་བཟང་པོ་ཀུན་གྱིས་མཛེས། །སྐུ་ཡིས་ཀུན་ཏུ་བཟང་བ་སྟེ། །དམན་པ་རྣམས་དང་འཐུན་པར་མཛད། །སྟོབས་བཅུའི་སྟོབས་དང་ཤིན་ཏུ་ལྡན། །བསྙེངས་པ་མི་མངའ་མི་བསྙེངས་པ། །མ་འདྲེས་རྣམ་པ་བཅྭ་བརྒྱད་ཀྱིས། །ཐུབ་པ་ཆེན་པོ་ཐེག་པ་མཆོག །ཆོས་ཀྱི་འཁོར་ལོ་རབ་བསྐོར་བ། །འདི་ནི་མདོ་ཙམ་བཤད་པ་ཡིན། །དེ་བཞིན་གཤེགས་པའི་ཡོན་ཏན་བསྔགས། །འདི་ནི་ཅུང་ཟད་བརྗོད་པར་ཟད། །སངས་རྒྱས་ཡེ་ཤེས་མཐའ་ཡས་ཏེ། །ནམ་མཁའ་རྒྱ་ཆེ་མཉམ་པ་བཞིན། །བསྐལ་པ་ཟད་པར་བརྗོད་ཀྱང་ནི། །སངས་རྒྱས་ཡོན་ཏན་མི་ཟད་དོ། །ཆོས་ཀྱི་འཁོར་ལོ་བསྐོར་བའི་ལེའུ་ཞེས་བྱ་སྟེ། ཉི་ཤུ་རྩ་དྲུག་པའོ། ། ། །