དང་པོ། གླེང་གཞིའི་ལེའུ།
རྒྱ་གར་སྐད་དུ། ཨཱཪྱ་ཀུ་ཤ་ལ་མཱུ་ལ་སཾ་པ་རི་གྲ་ཧ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དགེ་བའི་རྩ་བ་ཡོངས་སུ་འཛིན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀ་གནས་པ་ན་འདི་ལྟ་སྟེ། བསམ་གཏན་པ་རྣམས་ཀྱི་གནས། གནས་མེད་པ་རྣམས་ཀྱི་གནས། སྟོང་པ་ཉིད་ལ་གནས་པ་རྣམས་ཀྱི་གནས། མཚན་མ་མེད་པ་ལ་གནས་པ་དང་། སྨོན་པ་མེད་པ་ལ་གནས་པ་རྣམས་ཀྱི་གནས་ན་འདི་ལྟ་སྟེ། དགེ་སློང་འབུམ་གྱི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་སྒྲ་བསྐྱུངས་པ། དབེན་པ་ལ་གནས་པ། ནང་དུ་ཡང་དག་འཇོག་ལ་མངོན་པར་བརྩོན་པ་ཤ་སྟག་གོ །དེའི་ཚེ་ཚེ་དང་ལྡན་པ་ཤ་ར་དྭ་ཏིའི་བུ་ནང་དུ་ཡང་དག་འཇོག་
ལས་ལངས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཚེ་དང་ལྡན་པ་མཽང་གལ་གྱི་བུ་ཆེན་པོ་དང་། ཚེ་དང་ལྡན་པ་ཀཱ་ཏྱཱའི་བུ་ཆེན་པོ་དང་། ཚེ་དང་ལྡན་པ་གསུས་པོ་ཆེ་ཆེན་པོ་དང་། ཚེ་དང་ལྡན་པ་ཀ་པི་ན་དང་། ཚེ་དང་ལྡན་པ་སྐུལ་བྱེད་ཆེན་པོ་དང་། ཚེ་དང་ལྡན་པ་རབ་འབྱོར་དང་། ཚེ་དང་ལྡན་པ་དོན་ཡོད་རྒྱལ་པོ་དང་། ཚེ་དང་ལྡན་པ་རླངས་པ་དང་། ཚེ་དང་ལྡན་པ་དགའ་བོ་དང་། ཚེ་དང་ལྡན་པ་ཀུན་དགའ་བོ་དང་། ཚེ་དང་ལྡན་པ་དགའ་བྱེད་དང་། ཚེ་དང་ལྡན་པ་ཅི་འཇིགས་དང་། ཚེ་དང་ལྡན་པ་ཉེ་སྦས་དང་། ཚེ་དང་ལྡན་པ་མིས་བྱིན་གྱི་བུ་དང་། ཚེ་དང་ལྡན་པ་ཐང་ལ་གནས་པ་དང་། ཚེ་དང་ལྡན་པ་མོ་ཀི་ལ་དང་། ཚེ་དང་ལྡན་པ་ཉེ་བར་འཁོར་དང་། དེ་དག་དང་གཞན་ཡང་དབང་དང་ལྡན་པར་གྱུར་པ་ལྔ་བརྒྱ་ཐམ་པ་ཕྱེ་མ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཡང་དེའི་ཚེ་ཚེ་དང་ལྡན་པ་གྲགས་སྦྱིན་དང་། ཚེ་དང་ལྡན་པ་ཡུལ་འཁོར་སྐྱོང་དང་། ཚེ་དང་ལྡན་པ་ལས་མཆོད་དང་། ཚེ་དང་ལྡན་པ་གྲགས་འདོད་དང་། ཚེ་དང་ལྡན་པ་དགའ་སྡེ་དང་། ཚེ་དང་ལྡན་པ་དགའ་འདོད་དང་། དེ་དག་དང་གཞན་ཡང་དགེ་སློང་ལྔ་བརྒྱ་ཐམ་པ་ལམ་དུ་ཞུགས་པ་ལས་དབྱར་མཉན་ཡོད་ན་གནས་ནས། རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་
ཏེ་ཕྱོགས་གཅིག་ཏུ་འཁོད་དོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་དེ་དང་འདྲ་བའི་བྱང་ཆུབ་སེམས་དཔའ་སྟོང་དང་ལྷན་ཅིག་ཏུ་ཡུལ་ཙམ་པར་དབྱར་གནས་ནས་ལམ་དུ་ཞུགས་ཏེ། རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང་། དཀོན་མཆོག་འབྱུང་གནས་དང་། དེད་དཔོན་བཟང་པོ་དང་། ཕུག་སྦས་དང་། མིས་བྱིན་དང་། དབང་པོས་བྱིན་དང་། ཆུ་ལྷ་དང་། ཚངས་ལྷ་དང་། སྟོབས་བཟངས་དང་། བླ་མའི་བློ་གྲོས་དང་། ཁྱད་པར་བློ་གྲོས་དང་། འཕེལ་བའི་བློ་གྲོས་དང་། མཐོང་བ་དོན་ཡོད་དང་། ལེགས་པར་ཡང་དག་ཞུགས་དང་། རབ་ཀྱི་རྩལ་གྱིས་རྣམ་པར་གནོན་དང་། རྟག་ཏུ་བརྩོན་དང་། བརྩོན་པ་མི་གཏོང་དང་། ཉི་མའི་སྙིང་པོ་དང་། འགྲོ་བ་འཛིན་དང་། ས་འཛིན་དང་། བདུད་རྩི་འཛིན་དང་། བློ་གྲོས་རབ་གནས་དང་། བློ་གྲོས་མཐའ་ཡས་དང་། བརྟན་པའི་བློ་གྲོས་དང་། འཇིག་རྟེན་གསུམ་རྣམ་པར་གནོན་དང་། མཐའ་ཡས་རྣམ་པར་གནོན་དང་། དཔག་མེད་རྣམ་པར་གནོན་དང་། རྡོ་རྗེའི་གོམ་པས་རྣམ་པར་གནོན་དང་། དོན་ཡོད་པའི་གོམ་པས་རྣམ་པར་གནོན་དང་། མི་གཡོ་བའི་གོམ་པས་རྣམ་པར་གནོན་དང་། སྤོབས་པ་ཆེན་པོ་དང་སྤོབས་པ་རྣོན་པོ་དང་། སྤོབས་པ་ཟབ་པ་དང་། སྤོབས་པ་མཐའ་ཡས་དང་། སྤོབས་པ་དཔག་མེད་དང་། འཇམ་དཔལ་གཞོན་ནུར་གྱུར་པ་དང་། པད་མ་དཔལ་གྱི་སྙིང་པོ་དང་། ཆོས་འཕགས་དང་། ལག་ན་རིན་ཆེན་དང་། རིན་ཆེན་འཛིན་དང་། བསྐལ་པ་འགྱུར་བ་མཐའ་ཡས་པར་གོ་ཆ་བགོས་པ་དང་། བུད་མེད་འགྱུར་བའི་གོ་ཆ་བགོས་པ་དང་། སྐྱེས་པ་འགྱུར་བའི་གོ་ཆ་བགོས་པ་དང་། སེམས་ཅན་འགྱུར་བའི་གོ་ཆ་བགོས་པ་དང་། མཐའ་ཡས་ཁྱུ་མཆོག་དང་། དཔག་མེད་ཁྱུ་མཆོག་དང་། དམིགས་པ་ཐམས་ཅད་རྣམ་པར་འཇིག་པའི་ཁྱུ་མཆོག་དང་། བྱང་ཆུབ་སེམས་
དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་ཐ་མི་དད་པར་སྤྱོད་པའི་གོ་ཆ་བགོས་པ་ཤ་སྟག་སྟེ། ཡུལ་ཐ་དད་པ་རྣམས་སུ་དབྱར་གནས་པར་གནས་ནས་ཡུལ་རྒྱུ་ཞིང་གཅིག་ཏུ་འདུས་ཏེ། རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འདུས་པར་ཐུགས་སུ་ཆུད་ནས། རྫུ་འཕྲུལ་ཇི་ལྟ་བུའི་མངོན་པར་འདུ་བྱ་བ་མངོན་པར་འདུ་མཛད་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་འོད་མའི་ཚལ་བྱ་ཀ་ལན་ད་ཀ་གནས་པ་ན། དགེ་སློང་དང་། དགེ་སློང་མ་དང་། དགེ་བསྙེན་དང་དགེ་བསྙེན་མ་ཇི་སྙེད་གནས་པ་དེ་དག་ཐམས་ཅད་བཅོམ་ལྡན་འདས་ལ་བལྟ་བ་དང་ཕྱག་འཚལ་བ་དང་བསྙེན་བཀུར་བྱ་བའི་ཕྱིར་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་པར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དོ། །དེའི་ཚེ་ཚེ་དང་ལྡན་པ་འོད་སྲུང་ཆེན་པོ་ལུས་འཕགས་རི་ལ་དབང་པོའི་བྲག་ཕུག་ན་དགེ་སློང་ལྔ་བརྒྱ་ཐམ་པ་ཐམས་ཅད་ཀྱང་དགོན་པ་པ། བསོད་སྙོམས་པ། ཕྱག་དར་ཁྲོད་པ། ཆོས་གོས་གསུམ་པ། ཅོག་པུ་པ། རྩྭའི་གདིང་བ་པ། ཤིང་དྲུང་པ། འདོད་པ་ཉུང་བ། ཆོག་ཤེས་པ། རབ་ཏུ་དབེན་པ་པ། ཆོས་གོས་ངན་པ་འཆང་བ་ཤ་སྟག་དང་ལྷན་ཅིག་ཏུ་འདུག་གོ །དེ་ནས་བཅོམ་ལྡན་འདས་ཀྱིས་རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་མངོན་པར་འདུ་མཛད་པས། ཚེ་དང་ལྡན་པ་འོད་སྲུང་ཆེན་པོ་དགེ་སློང་ལྔ་བརྒྱ་ཐམ་པ་དེ་དག་དང་ལྷན་ཅིག་ཏུ་ལུས་འཕགས་རིའི་དབང་པོའི་བྲག་ཕུག་ནས་མི་སྣང་བར་གྱུར་ཏེ། རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་ད་ཀ་གནས་པ་ན་འདུག་པ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དེ། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་རྒྱང་རིང་པོ་ཉིད་ནས་འོང་བ་གཟིགས་ཏེ།
གཟིགས་ནས་ཀྱང་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གནས་བརྟན་འོད་སྲུང་ཆེན་པོ་འོང་བ་འདི་ནི་དགོན་པ་པ། བསོད་སྙོམས་པ། ཕྱག་དར་ཁྲོད་པ། ཆོས་གོས་གསུམ་པ། ཆོས་གོས་ངན་པ་འཆང་བ། བས་མཐའི་གནས་མལ་ལ་གནས་པ། འདོད་པ་ཆུང་བ། ཆོག་ཤེས་པ། རབ་ཏུ་དབེན་པར་གནས་པ། མ་འདྲེས་པ། ཆོས་ཐམས་ཅད་ཀྱི་དམ་པའི་ཕ་རོལ་དུ་སོན་པ་སྟེ། དགེ་སློང་དག་ངའི་ཉན་ཐོས་ཇི་སྙེད་པ་ནི་དགེ་སློང་དག་ད་ལྟར་དགེ་སློང་འོད་སྲུང་ཆེན་པོའི་སྦྱངས་པའི་ཡོན་ཏན་དག་དང་མཚུངས་པའམ་འདྲ་བ་ནི་ངས་ཡང་དག་པར་རྗེས་སུ་མ་མཐོང་ངོ་། །དགེ་སློང་དག་དགེ་སློང་འོད་སྲུང་ཆོས་གོས་གསུམ་པ་ནི་ལྷ་རྣམས་དང་ཡང་སྨྲ་བ་དང་ཀུན་དུ་སྨྲ་བར་མི་འདོད་ན་མི་རྣམས་དང་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་རྒྱང་རིང་པོ་ཉིད་ནས་འོང་བ་གཟིགས་ནས་བཀའ་སྩལ་པ། འོད་སྲུང་ཚུར་ཤོག་འོད་སྲུང་ཁྱོད་ལེགས་པར་འོངས་སོ། །ཀྱེ་མ་གནས་བརྟན་འོད་སྲུང་གིས་ནི་འདི་ལྟ་སྟེ། འདིར་འོང་བར་བྱ་བའི་ཕྱིར་ཡུན་རིང་པོ་ནས་རྣམ་གྲངས་བྱས་སོ། །འོད་སྲུང་ཁྱོད་གདན་འདིའི་ཕྱེད་ལ་འདུག་ཤིག་ཅེས་བཅོམ་ལྡན་འདས་ཀྱིས་གནས་བརྟན་འོད་སྲུང་ལ་གདན་གྱི་ཕྱེད་གནང་མ་ཐག་ཏུ་དེ་ནས་བཅོམ་ལྡན་འདས་གདན་དེ་ལས་བསྐྱོད་པ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འགུལ། རབ་ཏུ་འགུལ། ཀུན་དུ་རབ་ཏུ་འགུལ། གཡོས་རབ་ཏུ་གཡོས། ཀུན་དུ་རབ་ཏུ་གཡོས། ལྡེག་རབ་ཏུ་ལྡེག །ཀུན་དུ་རབ་ཏུ་ལྡེག་ཅིང་འཇིག་རྟེན་དུ་སྣང་བ་ཆེན་པོ་ཡང་བྱུང་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ནི་འདི་ལྟ་སྟེ། དཔེར་ན་ཡུལ་མ་ག་དྷཱའི་ཁར་བའི་སྣོད་ལ་ལྕགས་ཀྱི་ཐུ་ལུམ་གྱིས་བསྣུན་ན་འུར་འུར་ཟེར་བ་དེ་བཞིན་དུ་བཙུན་པ་འོད་སྲུང་ཆེན་པོ་ལ་གདན་གྱི་ཕྱེད་གནང་མ་ཐག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གདན་ལས་བསྐྱོད་ནས། དེ་ནས་དེ་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྒྲ་སྐད་ཆེན་པོ་འབྱིན་ཏོ། །དེ་ནས་
ཚེ་དང་ལྡན་པ་འོད་སྲུང་ཆེན་པོ་ཆོས་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ཀྱི་ཐད་དུ་ཕྱིན་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ནི་བདག་གི་སྟོན་པ་ལགས་ལ་བདག་ནི་ཉན་ཐོས་ལགས་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་གོས་སམ། ལྷུང་བཟེད་དམ། གདན་ནམ། དེ་ལས་གཞན་པའི་ལོངས་སྤྱོད་རྣམས་ཉན་ཐོས་རྣམས་ཀྱིས་ལོངས་སྤྱད་པར་རྔོ་མི་ཐོགས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་དག་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱི་མཆོད་རྟེན་དུ་གྱུར་པ་ལགས་ཤིང་། བཅོམ་ལྡན་འདས་བཅོམ་ལྡན་འདས་ལས་ཤ་ནའི་རས་ཕྱག་དར་ཁྲོད་པ་གང་དག་བླངས་པ་དེ་དག་ཀྱང་། བཅོམ་ལྡན་འདས་མཆོད་རྟེན་དུ་གྱུར་པ་ལགས་པའི་སླད་དུ་སྟེ། དེ་དག་བདག་གིས་མ་སྤྱད་ལགས་སོ། །བཅོམ་ལྡན་འདས་དེ་སླན་ཆད་འདོད་པའི་རྣམ་པར་རྟོག་པའི་རྣམ་པར་བརྟགས་པའམ། གནོད་སེམས་ཀྱི་རྣམ་པར་རྟོག་པ་དང་། རྣམ་པར་འཚེ་བའི་རྣམ་པར་རྟོག་པའི་རྣམ་པར་བརྟགས་པའམ། འདོད་ཆགས་ཀྱི་ཡོངས་སུ་གདུང་བས་གདུངས་པར་གྱུར་པའམ། ཞེ་སྡང་གི་ཡོངས་སུ་གདུང་བ་དང་། གཏི་མུག་གི་ཡོངས་སུ་གདུང་བས་ཡོངས་སུ་གདུངས་པར་གྱུར་པར་མ་དྲན་ལགས་སོ། །བཅོམ་ལྡན་འདས་མདོར་ན་སློབ་པར་གྱུར་པ་བདག་གིས་བཅོམ་ལྡན་འདས་ལས་ཤ་ནའི་རས་ཕྱག་དར་ཁྲོད་མནོས་པ་རྣམས་མི་སློབ་པའི་ས་ལ་ཐུག་གི་བར་དུ་སྤྱི་བོས་མནོས་ལགས་སོ། །བཅོམ་ལྡན་འདས་བདག་གིས་ལོངས་སྤྱད་པའི་སླད་དུ་བླངས་པ་ནི་མ་ལགས་ཀྱི་གདམས་པ་དང་། རྗེས་སུ་བསྟན་པ་ལས་བརྩམས་ནས་བླངས་ལགས་སོ། །བཅོམ་ལྡན་འདས་དེ་དག་བླངས་ནས་སེམས་མཐོ་བའམ་དམའ་བར་གྱུར་པར་མི་དྲན་ལགས་སོ། །བཅོམ་ལྡན་འདས་ཤ་ནའི་རས་ཕྱག་དར་ཁྲོད་དེ་དག་ཆོས་གོས་མ་མཆིས་པའི་ལུས་ལ་སྤྱད་པར་མི་དྲན་ལགས་སོ། །བཅོམ་ལྡན་འདས་ཕྱག་དར་ཁྲོད་དེ་དག་སུག་པ་མ་སེར་བས་རེག་པར་མི་དྲན་ལགས་སོ། །བཅོམ་ལྡན་འདས་གང་དང་གང་དུ་མཆི་བ་དེ་དང་དེར་ཤ་ནའི་རས་
ཕྱག་དར་ཁྲོད་དེ་དག་མགོས་འཚལ་ཅིང་མཆིས་ལགས་སོ། །བཅོམ་ལྡན་འདས་ཤ་ནའི་རས་ཕྱག་དར་ཁྲོད་དེ་དག་ཡན་ལག་མི་གཙང་བ་གང་གིས་ཀྱང་རེག་པར་མི་དྲན་ལགས་སོ། །བཅོམ་ལྡན་འདས་ཤ་ནའི་རས་ཕྱག་དར་ཁྲོད་མཆོད་རྟེན་དུ་གྱུར་པ་དེ་དག་བཅངས་ལགས་སོ། །བཅོམ་ལྡན་འདས་དེ་དག་ནི་བཅོམ་ལྡན་འདས་ཀྱིས་སྤངས་ཤིང་གནང་བ་ལགས་ཏེ། དེ་དག་ནི་བདག་གིས་བཅངས་ལགས་སོ། །སངས་རྒྱས་རྗེས་སུ་དྲན་པ་མ་ལགས་པར་དེ་ལས་གཞན་སྙོམས་པར་འཇུག་པ་དག་གིས་བདག་གཞན་དུ་གནས་པར་མི་དྲན་ལགས་སོ། །བདག་ཇི་ལྟར་གནས་པ་ན་ས་ལ་སའི་འདུ་ཤེས་སུ་མ་གྱུར་པ་དང་། ཆུ་ལ་ཆུའི་འདུ་ཤེས་དང་། མེ་ལ་མེའི་འདུ་ཤེས་དང་། རླུང་ལ་རླུང་གི་འདུ་ཤེས་སུ་མ་གྱུར་པ་དང་། འཇིག་རྟེན་འདིའི་འདུ་ཤེས་དང་། འཇིག་རྟེན་ཕ་རོལ་གྱི་འདུ་ཤེས་སུ་མ་གྱུར་པ་དང་། བཅོམ་ལྡན་འདས་གང་མཐོང་བ་དང་། ཐོས་པ་དང་། བྱེ་བྲག་ཕྱེད་པ་དང་། རྣམ་པར་ཤེས་པ་དང་། ཡིད་ཀྱི་རྗེས་སུ་བརྟགས་པ་དང་། རྗེས་སུ་བསམས་པ་དེ་ལ་ཡང་བདག་འདུ་ཤེས་སུ་མ་གྱུར་པ་དང་། བཅོམ་ལྡན་འདས་གང་འདུ་ཤེས་མེད་པའི་གནས་པ་དང་། འདུ་ཤེས་མེད་པའི་སྙོམས་པར་འཇུག་པའི་གནས་པ་དང་། གང་འདུ་ཤེས་ལས་ཡང་དག་པར་འདའ་བའི་གནས་པ་དང་། གང་འདུ་ཤེས་མེད་པ་ལས་ཡང་དག་པར་འདའ་བའི་གནས་པ་དང་། གང་འདུ་ཤེས་ཀྱི་གནས་པ་དང་། གང་འདུ་ཤེས་མེད་པའི་གནས་པ་དང་། གང་འདུ་ཤེས་ཐམས་ཅད་ལས་ཡང་དག་པར་འདའ་བའི་གནས་པ་དེ་ཡང་སློབ་པའི་གནས་པ་དང་། མི་སློབ་པའི་གནས་པར་བདག་གིས་ཡང་དག་པར་རྗེས་སུ་མ་མཐོང་ལགས་སོ། །བཅོམ་ལྡན་འདས་གནས་པ་དེ་ལ་དེ་བཞིན་གཤེགས་པ་ཡང་དག་པར་རྗེས་སུ་མ་མཐོང་། དེ་བཞིན་གཤེགས་པའི་ཆོས་རྣམས་དང་།
དེ་བཞིན་གཤེགས་པའི་གནས་པ་ཡང་དག་པར་རྗེས་སུ་མ་མཐོང་ལགས་ཏེ། བདག་ནི་དེ་ལྟར་གནས་ལགས་སོ། །བཅོམ་ལྡན་འདས་དཔེར་བགྱི་ན་ནམ་མཁའ་བླ་གབ་མ་མཆིས་པ་ལ་མིང་དང་བརྡ་དང་གདགས་པ་རྣམ་པ་སྣ་ཚོགས་བགྱིས་པ་དག །བཅོམ་ལྡན་འདས་མིང་དང་བརྡ་དང་གདགས་པ་གང་དག་གིས་ནམ་མཁའ་ཞེས་ཐ་སྙད་དུ་བཏགས་པ་དང་། ནམ་མཁའ་ཞེས་བརྡར་བཏགས་པ་དང་། ནམ་མཁའ་ཞེས་རྟེན་དུ་བགྱིས་པ་དང་། བཅོམ་ལྡན་འདས་ནམ་མཁའ་ཞེའམ། བླ་གབ་མ་མཆིས་པ་ཞེའམ། སྟོང་པ་ཞེའམ། གསོག་ཅེའམ། གསོབ་ཅེའམ། ཡ་མ་བརླ་ཞེའམ། གཟུང་བ་མ་མཆིས་པ་ཞེའམ། ཚད་མ་མཆིས་པ་ཞེའམ། རྟེན་པ་མ་མཆིས་པ་ཞེའམ། བླང་བ་མ་མཆིས་པ་ཞེའམ། དོར་བ་མ་མཆིས་པ་ཞེའམ། ལུས་མ་མཆིས་པ་ཞེའམ། ཇི་ལྟ་བ་བཞིན་ཞེའམ། ཡོངས་སུ་དག་པ་ཞེའམ། བར་སྣང་ཞེའམ། ཐོགས་པ་མ་མཆིས་པ་ཞེའམ། དངོས་པོ་མ་མཆིས་པ་ཞེའམ། བསྟན་དུ་མ་མཆིས་པ་ཞེས་དེ་དག་དང་། གཞན་ཡང་ཐ་སྙད་ཀྱི་བརྡ་ཐ་དད་པ་རྣམ་པ་སྣ་ཚོགས་ཀྱིས་བརྗོད་པ་ནི་བཅོམ་ལྡན་འདས་འདི་ལྟ་སྟེ། ཚད་འདི་ཙམ་འམ། ཡོངས་སུ་བཅད་པ་འདི་ཙམ་འམ། མཉམ་པའམ། མི་མཉམ་པ་ཞེས་མིང་ངམ། བརྡའམ། རྟེན་རྣམས་ཀྱིས་འཚལ་བར་མི་ནུས་ལགས་སོ། །བཅོམ་ལྡན་འདས་གང་དག་དེའི་ཕྱོགས་ཙམ་ཞིག་འཚལ་བ་དེ་དག་ཐམས་ཅད་ཀྱིས་ཀྱང་ཁ་དོག་གམ། དབྱིབས་སམ། དམིགས་པས་ནམ་མཁའ་དེ་ཚད་འདི་ཙམ་དང་། མཆོག་འདི་ཙམ་ཞེས་བགྱི་བ་མ་འཚལ་ལགས་སོ། །བཅོམ་ལྡན་འདས་དེ་བཞིན་དུ་གང་དེ་བཞིན་གཤེགས་པ་ཞེས་བགྱི་བའམ། སངས་རྒྱས་ཞེས་བགྱི་བའམ། སྟོན་པ་ཞེའམ། སྐྱབས་ཞེའམ། དཔུང་གཉེན་ཞེའམ། གནས་ཞེའམ། འདྲེན་པ་ཞེའམ། རྣམ་པར་འདྲེན་པ་ཞེའམ། ཡོངས་སུ་འདྲེན་པ་ཞེའམ། སྨན་པ་ཞེའམ། གསོ་བ་པ་ཞེའམ། ལམ་སྟོན་པ་ཞེའམ། ལམ་བརྗོད་པ་ཞེའམ། གཞན་ཡང་ཐ་སྙད་ཐ་དད་པའི་ཚིག་རྣམ་པ་སྣ་ཚོགས་
བརྗོད་པའི་ཐ་སྙད་ཀྱི་ཚིག་གང་དག་གིས་མཁས་པ་རྣམས་ཀྱིས་བཅོམ་ལྡན་འདས་བསྟོད་པ་དང་། བཀུར་བ་དང་། བསྔགས་པ་དང་རབ་ཏུ་བསྟོད་པ་དང་། རབ་ཏུ་བསྔགས་པ་དང་། བཅོམ་ལྡན་འདས་ཐ་སྙད་ཀྱི་ཚིག་གང་དག་གིས་འཇིག་རྟེན་མངོན་པར་བརྗོད་པའི་ཆོས་དེ་དག་ནི་བཅོམ་ལྡན་འདས་བདག་མ་འཚལ་མི་རྟེན་མ་མཐོང་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་ངོ་བོ་ཉིད་ཀྱིས་ཡ་མ་བརླ་དང་། ངོ་བོ་ཉིད་ཀྱིས་གསོབ་ལགས་པའི་སླད་དུའོ། །བཅོམ་ལྡན་འདས་དཔེར་བགྱི་ན་སྒྱུ་མ་མཁན་གྱིས་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ། དཔུང་གི་ཚོགས་ཡན་ལག་བཞི་པ་དང་ལྡན་པ། རིན་པོ་ཆེ་སྣ་བདུན་དང་ལྡན་པའི་འཁོར་ལོས་སྒྱུར་བ་ཞིག་སྤྲུལ་པར་གྱུར་ལ། བཅོམ་ལྡན་འདས་དེའི་ཐད་དུ་གླིང་བཞི་པའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམ་པར་རྒྱལ་བར་བགྱི་བ་ལ་གནས་པ། མཐའ་ཡས་པ་དེ་དག་ཐམས་ཅད་ལྷགས་ཤིང་བཅོམ་ལྡན་འདས་དེ་ལ་ལུས་ཐ་དད་པར་ཡང་གདའ་ལ། བཅོམ་ལྡན་འདས་དེ་ལ་སེམས་ཅན་ལུས་ཐ་དད་པར་ཡང་མཐོང་ལགས་མོད་ཀྱི། བཅོམ་ལྡན་འདས་སྒྱུ་མ་མཁན་གྱིས་སྤྲུལ་པའི་འཁོར་ལོས་སྒྱུར་བའི་རྒྱལ་པོ་དེ་འདི་སྙམ་དུ་བདག་གིས་ནི་དཔུང་གི་ཚོགས་འདིའི་བདག་པོ་བྱ་ཞིང་། གླིང་བཞི་པའི་འཇིག་རྟེན་གྱི་ཁམས་ཀྱི་རྗེས་སུ་འཇུག་པར་བྱའོ། །སྙམ་དུ་མི་སེམས་ལགས་ལ། དཔུང་གི་ཚོགས་ཡན་ལག་བཞི་པོ་དེ་ཡང་འདི་སྙམ་དུ་འཁོར་ལོས་སྒྱུར་བའི་རྒྱལ་པོ་འདི་ནི་བདག་ཅག་གི་གཙོ་བོ་ཡིན་པས་བདག་ཅག་ནི་འདིའི་རྗེས་སུ་འཇུག་པར་བྱའོ། །སྙམ་དུ་མི་སེམས་ལགས་མོད་ཀྱི། དེ་དག་དེའི་རྗེས་སུ་འཇུག་པར་བགྱིད་པར་ཡང་གདའ་ལགས་སོ། །བཅོམ་ལྡན་འདས་དེ་བཞིན་དུ་ཆོས་དེ་དག་གིས་ཆོས་ཉིད་གང་ལགས་པ་དེ་ལ། བཅོམ་ལྡན་འདས་དེ་བཞིན་གཤེགས་པའམ། ཉན་ཐོས་སམ། སློབ་པའམ། མི་སློབ་པའམ། རང་སངས་རྒྱས་སམ། སོ་སོའི་སྐྱེ་བོ་མ་མཆིས་ལགས་སོ། །བཅོམ་ལྡན་འདས་ཆོས་ཉིད་དེ་ལ་དེ་བཞིན་གཤེགས་
པའི་ཆོས་ཉིད་དམིགས་པའམ། དེ་བཞིན་གཤེགས་པའི་ཆོས་ཉིད་མངོན་པའམ། དེ་བཞིན་གཤེགས་པའི་ཆོས་ཉིད་རྟེན་པའམ། རང་སངས་རྒྱས་ཀྱི་ཆོས་ཉིད་དམིགས་པའམ། རང་སངས་རྒྱས་ཀྱི་ཆོས་ཉིད་མངོན་པའམ། རང་སངས་རྒྱས་ཀྱི་ཆོས་ཉིད་རྟེན་པའམ། ཉན་ཐོས་ཀྱི་ཆོས་ཉིད་དམིགས་པའམ། ཉན་ཐོས་ཀྱི་ཆོས་ཉིད་མངོན་པའམ། ཉན་ཐོས་ཀྱི་ཆོས་ཉིད་རྟེན་པའམ། སོ་སོའི་སྐྱེ་བོའི་ཆོས་ཉིད་དམིགས་པའམ། སོ་སོའི་སྐྱེ་བོའི་ཆོས་ཉིད་མངོན་པའམ། སོ་སོའི་སྐྱེ་བོའི་ཆོས་ཉིད་རྟེན་པའམ། གཟུགས་ཀྱི་ཆོས་ཉིད་དམིགས་པའམ། གཟུགས་ཀྱི་ཆོས་ཉིད་མངོན་པའམ། གཟུགས་ཀྱི་ཆོས་ཉིད་རྟེན་པའམ། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཆོས་ཉིད་དམིགས་པའམ། རྣམ་པར་ཤེས་པའི་ཆོས་ཉིད་མངོན་པའམ། རྣམ་པར་ཤེས་པའི་ཆོས་ཉིད་རྟེན་པར་མི་འགྱུར་ལགས་སོ། །བཅོམ་ལྡན་འདས་ཆོས་ཉིད་དེ་ལ་གཟུགས་སྟོང་པ་དང་། འདིས་གཟུགས་སྟོང་པ་དང་། འདི་ལ་གཟུགས་སྟོང་པ་དམིགས་པ་དང་། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་སྟོང་པ་དང་། འདིས་རྣམ་པར་ཤེས་པ་སྟོང་པ་དང་། འདི་ལ་རྣམ་པར་ཤེས་པ་སྟོང་པ་དམིགས་པ་དང་། དེ་བཞིན་དུ་དེ་བཞིན་གཤེགས་པ་སྟོང་པ་དང་། འདིས་དེ་བཞིན་གཤེགས་པ་སྟོང་པ་དང་། འདི་ལ་དེ་བཞིན་གཤེགས་པ་སྟོང་པ་དམིགས་པ་དང་། དེ་བཞིན་དུ་དེ་བཞིན་གཤེགས་པའི་ཆོས་ཉིད་སྟོང་པ་དང་། འདིས་དེ་བཞིན་གཤེགས་པའི་ཆོས་ཉིད་སྟོང་པ་དང་། འདི་ལ་དེ་བཞིན་གཤེགས་པའི་ཆོས་ཉིད་སྟོང་པ་དམིགས་པར་མི་འགྱུར་ལགས་སོ། །བཅོམ་ལྡན་འདས་དེ་བཞིན་དུ་དེ་ལ་ཉན་ཐོས་མ་མཆིས། ཉན་ཐོས་ཀྱི་ཆོས་ཉིད་མ་མཆིས། སོ་སོའི་སྐྱེ་བོ་མ་མཆིས། སོ་སོའི་སྐྱེ་བོའི་ཆོས་ཉིད་ཀྱི་བར་དུ་མ་མཆིས་ལགས་སོ། །བཅོམ་ལྡན་འདས་དཔེར་བགྱི་ན། སྒྱུ་མ་མཁན་གྱིས་འཁོར་ལོས་སྒྱུར་བའམ། དཔུང་གི་ཚོགས་སྤྲུལ་པ་དེ་ལ་འཁོར་ལོས་སྒྱུར་བ་མ་མཆིས། དཔུང་གི་ཚོགས་མ་མཆིས་ལགས་
སོ། །སྒྱུ་མ་ལ་མ་མཆིས། སྒྱུ་མའི་ཆོས་ཉིད་ལ་མ་མཆིས། སྒྱུ་མ་མཁན་རྣམས་ལ་མ་མཆིས་ལགས་སོ། །ས་ལ་མ་མཆིས། ཆུ་ལ་མ་མཆིས། མེ་ལ་མ་མཆིས། རླུང་ལ་མ་མཆིས། ནམ་མཁའ་ལ་མ་མཆིས། རྣམ་པར་ཤེས་པ་ལ་མ་མཆིས་ལགས་སོ། །ས་དང་། ཆུ་དང་། མེ་དང་། རླུང་དང་། ནམ་མཁའི་ཁམས་རྣམས་ལ་མ་མཆིས། རྣམ་པར་ཤེས་པའི་ཁམས་ལ་མ་མཆིས་ལགས་སོ། །བཅོམ་ལྡན་འདས་ཆོས་ཐམས་ཅད་ནི་དེ་དང་འདྲ་ལགས་ཏེ། བཅོམ་ལྡན་འདས་དེ་དག་ལ། བདག་ནི་རློམ་སེམས་སུ་མི་བགྱིད། དེ་དག་ལ་བདག་ནི་བྱུང་བར་མ་གྱུར། དེ་དག་བདག་གིས་ནི་མ་སྨྲས་ལགས་སོ། །བཅོམ་ལྡན་འདས་དེ་ལྟར་བདག་ནི་ཡོན་ཏན་གྱི་ཆོས་རྣམས་ཉིད་ལས་དབེན་པ་ལགས་པས་དེ་བཞིན་གཤེགས་པའི་ཆོས་རྣམས་རྗེས་སུ་དྲན་པར་བགྱིད་ལགས་སོ། །བཅོམ་ལྡན་འདས་དེ་ནི་ལམ་ལགས། དེ་ནི་ཚུལ་ལགས་ཏེ། ལམ་དེ་ལ་གནས་པའི་རིགས་ཀྱི་བུའམ་རིགས་ཀྱི་བུ་མོ་ལམ་དེ་རྗེས་སུ་ཐོབ་པ་རྣམས་ནི་འདི་སྙམ་དུ་གཞན་ཡང་དག་པར་བླངས་ལ་འཇུག་པར་བྱ་ཞིང་། སྟོན་པ་ཡང་གཞན་བཙལ་བར་བྱ་ལ། དགེ་སྦྱོང་ངམ། བྲམ་ཟེ་གཞན་སྨྲ་བའི་གདོང་དུ་གྱེན་དུ་བལྟ་བར་བྱ་ཞིང་། ཚེ་དང་ལྡན་པ་འདི་ནི་ཤེས་བཞིན་པས་ཤེས། མཐོང་བཞིན་པས་མཐོང་། ཡང་དག་པའི་ལྟ་བ་ཡང་འདོགས་བཞིན་པས་འདོགས་པར་བྱེད་དོ་སྙམ་དུ་མི་སེམས་ལགས་ཏེ། དེ་ནི་གནས་མ་མཆིས་ལགས་སོ། །བཅོམ་ལྡན་འདས་གནས་པ་འདི་ལ་ནི་བདག་སོམ་ཉི་མ་མཆིས་པ་ཐོབ་པས་གནས་ལགས་སོ། །ཆོས་ཀྱི་སྒོ་དེ་ཡང་རྗེས་སུ་ཐོབ་པས་གནས་ལགས་སོ། །ཆོས་ཐམས་ཅད་ནི་འདི་ལྟ་སྟེ། དབེན་པའི་ཚུལ་དང་། སྐྱེ་བ་མ་མཆིས་པའི་ཚུལ་དག་གིས་ཚུལ་གཅིག་པ་ལགས་སོ། །བཅོམ་ལྡན་འདས་བདག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཆོས་ཀྱི་ཐེ་ཚོམ་ཞུ་བར་འཚལ་བ་ལགས་ལ། དེ་བཞིན་གཤེགས་པས་ཀྱང་བདག་ལ་སྐབས་ཕྱེ་བ་ལགས་ཏེ། དབང་པོའི་བྲག་ཕུག་ནས་འོད་མའི་ཚལ་འདིར་ཕྱིན་པ་ལགས་སོ། །བཅོམ་ལྡན་འདས་
བདག་འདིར་མཆིས་པ་དང་། བཅོམ་ལྡན་འདས་ཀྱི་གདན་གྱི་ཕྱེད་གནང་སྟེ། བདག་ལ་གནང་བ་དང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རབ་ཏུ་འུར་འུར་ཞིང་རྣམ་པ་དྲུག་ཏུ་ཡང་གཡོས། རབ་ཏུ་གཡོས་ལགས་སོ། །བཅོམ་ལྡན་འདས་བདག་ནི་འདི་སྙམ་དུ་དེ་བཞིན་གཤེགས་པ་ནི་བདག་ཉིད་ཆེན་པོའི་ཆོས་དང་ལྡན་པ་དེ་ལྟ་བུ་དང་། རྒྱ་ཆེན་པོའི་ཆོས་དང་ལྡན་པ་དེ་ལྟ་བུ་དང་། སློབ་དཔོན་མ་མཆིས་ཤིང་རང་བྱུང་བ་ལགས་ཀྱང་ཐུགས་རྗེ་ཆེན་པོའི་ཚུལ་ལ་བཞུགས་ཤིང་། ལྷག་པའི་ང་རྒྱལ་མ་མཆིས་པ་དང་། ང་རྒྱལ་མ་མཆིས་པ་ལ་བཞུགས་ནས་བདག་ལ་གདན་གྱི་ཕྱེད་གནང་བ་ངོ་མཚར་ལགས་སོ་སྙམ་བགྱིད་དེ། བཅོམ་ལྡན་འདས་དཔེར་བགྱི་ན་མི་དབུལ་པོ་འཚོ་བ་ངན་པ་ཚེགས་ཀྱིས་འཚོ་བ་ཞིག་ཚེགས་ཀྱིས་ཁྱིམ་གྱི་ཕུན་སུམ་ཚོགས་པ་བསྒྲུབས་ནས། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ། དཔུང་གི་ཚོགས་ཡན་ལག་བཞི་དང་ལྡན་པའི་གན་དུ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། དྲི་བར་བགྱི་བའི་སླད་དུ་མཆིས་པར་གྱུར་ལ། མཆིས་པ་དེ་ལ་དེས་སྟན་གྱི་ཕྱེད་སྩལ་ན། དེ་ནས་དེ་འདི་སྙམ་དུ་སེམས་ལགས་ཏེ། རྒྱལ་པོ་ལ་བལྟ་བ་དང་། ཕྱག་བྱ་བའི་ཕྱིར་བདག་སོང་དུ་ཟིན་ཀྱང་བདག་གིས་བལྟ་བའམ། ཕྱག་བྱ་བ་ཡང་དཀའ་བར་འགྱུར་ན་གསོལ་བ་ལྟ་ཅི་སྨོས། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་བདག་ཕྱིན་མ་ཐག་པ་ལ་སྟན་གྱི་ཕྱེད་བྱིན་དུ་ཟིན་ཀྱང་འདི་ནི་ངོ་མཚར་རོ་སྙམ་བགྱིད་ལགས་སོ། །བཅོམ་ལྡན་འདས་དེ་བཞིན་དུ་ཆོས་ཀྱི་རྒྱལ་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རང་བྱུང་བ་སློབ་དཔོན་མ་མཆིས་པ། ཉན་ཐོས་དང་རང་སངས་རྒྱས་རྣམས་ཀྱིས་ཀྱང་བསྙེན་པར་དཀའ་ཞིང་རྟོགས་པར་དཀའ་བ་ལགས་ན། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱིས་ལྟ་སྨོས་ཀྱང་ཅི་འཚལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཆོས་ཀྱི་ཐེ་ཚོམ་ཞུ་བ་དང་། བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བའི་
སླད་དུ་བདག་ཇི་ལྟ་ཇི་ལྟར་མཆིས་པ་ན། བཅོམ་ལྡན་འདས་བདག་འདི་སྙམ་དུ་སེམས་ལགས་ཏེ། བདག་གིས་ནི་དེ་བཞིན་གཤེགས་པ་ལྟ་བ་རྙེད་ཅིང་ཕྱག་བགྱི་བ་རྙེད་ལ་བསྙེན་བཀུར་བགྱི་བ་དང་། ཞུ་བ་དང་། ཡོངས་སུ་ཞུ་བར་བགྱི་བ་རྙེད་དེ། བཅོམ་ལྡན་འདས་ཀྱི་ད་ལྟར་བདག་འདིར་ལྟ་མཆིས་པ་ལ་གདན་གྱི་ཕྱེད་གནང་བ་ནི་བདག་གིས་རྙེད་པ་ལེགས་པར་རྙེད་དོ་སྙམ་བགྱིད་ལགས་སོ། །བཅོམ་ལྡན་འདས་ཇི་ལྟར་ན་མི་དབུལ་པོ་དེས་འཁོར་ལོས་སྒྱུར་བའི་རྒྱལ་པོ་དེ་ལ་བལྟ་བ་ཉིད་དང་། ཕྱག་བགྱི་བ་ཉིད་ཡང་ངོ་མཚར་ལགས་པ་དེ་བཞིན་དུ། བཅོམ་ལྡན་འདས་བདག་ནི་འདི་སྙམ་དུ་སེམས་ཏེ། དེ་བཞིན་གཤེགས་པ་ནི་བྱམས་པ་ཆེན་པོ་དང་ལྡན་ཞིང་། ཐུགས་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་ལྡན་པ་ལགས་ཀྱང་། དེ་བཞིན་གཤེགས་པའི་ཡོན་ཏན་གང་དག་ལགས་པ་དེ་དག་སྟོན་པ་མ་གཏོགས་པར་དེ་བཞིན་གཤེགས་པ་འདི་སྙམ་དུ་བདག་ནི་ཕུལ་དང་། བདག་ནི་མཆོག་དང་། བདག་ནི་ཁྱད་པར་དུ་འཕགས་པའོ་སྙམ་དུ་མི་དགོངས་པ་ནི་ངོ་མཚར་ལགས་ཏེ། བདག་ནི་འདི་སྙམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སངས་རྒྱས་ཀྱི་ཡོན་ཏན་དེ་དག་ནི་ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་མ་ལགས་སོ། །སྙམ་བགྱིད་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་ལེགས་སོ་ལེགས་སོ། །འོད་སྲུང་ཁྱོད་ཡང་ལེགས་སོ། །འོད་སྲུང་དེ་བཞིན་གཤེགས་པ་ནི་དཔག་ཏུ་མེད་ཅིང་། དཔག་ཏུ་མེད་པའི་ཆོས་དང་ལྡན་ཏེ། དེ་ནི་སྦྱིན་པའི་ཚད་དེ་ལྟ་བུ་དང་། སྦྱིན་པའི་ཕ་རོལ་ཏུ་ཕྱིན་པའི་ཚད་དེ་ལྟ་བུ་དང་། ཤེས་རབ་ཀྱི་བར་གྱི་ཚད་དེ་ལྟ་བུ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་ཚད་དེ་ལྟ་བུ་དང་། སྨོན་ལམ་རྣམས་ཀྱི་ཚད་དེ་ལྟ་བུ་དང་། སྨོན་ལམ་གྱི་ཕ་རོལ་ཏུ་ཕྱིན་པའི་ཚད་དེ་ལྟ་བུ་དང་། ཐབས་ཀྱི་ཚད་དེ་ལྟ་བུ་དང་། ཐབས་ལ་མཁས་པའི་ཕ་རོལ་ཏུ་ཕྱིན་པའི་ཚད་དེ་ལྟ་བུ་དང་། སྤྱོད་པའི་ཚད་དེ་ལྟ་བུ་དང་། སྤྱོད་པའི་ཕ་རོལ་ཏུ་ཕྱིན་པའི་ཚད་དེ་ལྟ་བུ་
དང་། རྣམ་པར་གྲོལ་བའི་ཚད་དེ་ལྟ་བུ་དང་། རྣམ་པར་གྲོལ་བའི་ཕ་རོལ་ཏུ་ཕྱིན་པའི་ཚད་དེ་ལྟ་བུ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཚད་དེ་ལྟ་བུ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕ་རོལ་ཏུ་ཕྱིན་པའི་ཚད་དེ་ལྟ་བུས་དཔག་པར་མི་ནུས་སོ། །འོད་སྲུང་བཞི་པོ་འདི་དག་ནི་དེ་བཞིན་གཤེགས་པའི་མི་མཉམ་པའི་ཡེ་ཤེས་རྣམས་ཡིན་ཏེ། དེ་དག་དང་ལྡན་ན་དེ་བཞིན་གཤེགས་པ་འཁོར་གྱི་ནང་དུ་སེང་གེའི་སྒྲ་སྒྲོགས་པར་བྱེད་པའོ། །བཞི་གང་ཞེ་ན། ཚུལ་ཁྲིམས་མཉམ་པ་ཉིད་དང་། ཏིང་ངེ་འཛིན་མཉམ་པ་ཉིད་དང་། ཤེས་རབ་མཉམ་པ་ཉིད་དང་། སངས་རྒྱས་ཀྱི་ཆོས་མཉམ་པ་ཉིད་དེ། འོད་སྲུང་མཉམ་པའི་ཡེ་ཤེས་བཞི་པོ་དེ་དག་ནི་གང་དག་དང་ལྡན་ན་དེ་བཞིན་གཤེགས་པ་འཁོར་གྱི་ནང་ན་བཞུགས་ཤིང་སེང་གེའི་སྒྲ་ཡང་དག་པར་སྒྲོགས་པར་བྱེད་པའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་འཇིག་རྟེན་བསམ་ཡས་ན། །སངས་རྒྱས་ཡེ་ཤེས་མཐའ་ཡས་ཏེ། །སེམས་ཀྱི་ལས་ནི་སྦྱངས་པས་ན། །དེ་དག་སེང་གེའི་སྒྲ་སྒྲོགས་བྱེད། །སེང་གེའི་སྒྲ་སྒྲོགས་བྱེད་པ་ནི། །མུ་སྟེགས་གཞན་རྣམས་སྐྲག་པར་འགྱུར། །ཆོས་ཀྱི་ཆོས་ཉིད་ཐོས་ནས་སུ། །གཡང་སར་རབ་ཏུ་ལྟུང་བར་འགྱུར། །བདག་ཏུ་འདུ་ཤེས་གང་གནས་དང་། །སེམས་ཅན་འདུ་ཤེས་གང་གནས་པ། །འོད་སྲུང་དེ་དག་བསྟན་འདི་ལ། །མུ་སྟེགས་ཅན་ཞེས་ངས་བཤད་དོ། །དངོས་པོའི་འདུ་ཤེས་གང་གནས་དང་། །ང་ཡི་ང་ཞེས་རྟེན་པ་དང་། །འོད་སྲུང་དེ་དག་བསྟན་འདི་ལ། །མུ་སྟེགས་ཅན་ཞེས་ངས་བཤད་དོ། །གང་དག་ཚུལ་ཁྲིམས་ཕུང་པོ་དང་། །བསམ་གཏན་རྣམས་དང་ཐོས་མང་གིས། །རློམ་སེམས་རྣམ་རྨོངས་དེ་དག་ནི། །འོད་སྲུང་མུ་སྟེགས་ཅན་རྣམས་སོ། །བདག་ནི་ཆོག་ཤེས་འདོད་ཆུང་དང་། །རབ་ཏུ་དབེན་ལ་གནས་པ་དང་། །ཆོས་གོས་ངན་པ་འཆང་སྙམ་པ། །འོད་སྲུང་དེ་ནི་མུ་སྟེགས་སོ། །དཔེར་ན་ནམ་མཁའ་འདི་ལ་ནི། །ལག་པ་བསྐྱོད་ཀྱང་ཐོགས་མེད་ཅིང་། །དཔེར་ན་མཁའ་ལ་རྡུལ་གྱིས་ཀྱང་། །ནམ་ཡང་གོས་པར་
མི་འགྱུར་བ། །དེ་བཞིན་འོད་སྲུང་ངས་བསྟན་པའི། །ཆོས་འདིར་གང་དག་གནས་དེ་དག །ཉོན་མོངས་རྣམས་ཀྱིས་མི་གོས་ཏེ། །མཁའ་ལས་རྡུལ་དང་སྤྲིན་བཞིན་ནོ། །ཇི་ལྟར་མཁའ་ལ་མི་ཡིས་མེ་ཏོག་སྤོས་རྣམས་དང་། །དེ་བཞིན་ཕྲེང་བ་བྱུག་པ་རྣམས་ཀྱིས་འདིར་མཆོད་ཀྱང་། །བདག་མཆོད་ལ་ལ་སྐྱེ་འགྱུར་འཇིག་པར་འགྱུར་རོ་ཞེས། །དེ་ལ་བློ་གྲོས་ཀྱང་ནི་འབྱུང་བར་མི་འགྱུར་དང་། །ཇི་ལྟར་ནམ་མཁའ་དེ་ལ་གོས་པར་མི་འགྱུར་དང་། །ཇི་ལྟར་དེ་ཡི་རང་བཞིན་གོས་པར་མི་འགྱུར་དང་། །ཇི་ལྟར་དེ་ཡི་རང་བཞིན་ངོ་བོ་ཉིད་ཀྱིས་གསོབ། །དེ་བཞིན་དགེ་སྦྱོང་དག་ལ་སྟོང་པའི་ཆོས་རྣམས་སོ། །ཇི་ལྟར་གང་གིས་ནམ་མཁའ་བསྡིགས་པ་དང་། །ཇི་ལྟར་ནམ་དུ་ཡང་ནི་གཤེ་བར་མི་འགྱུར་བ། །དེ་བཞིན་དགེ་སྦྱོང་དག་ལ་ཆོས་རྣམས་གང་དག་ཡིན། །དེ་དག་ནམ་མཁའ་བཞིན་དུ་གོས་པ་མེད་ཆོས་རྣམས། །ཆོས་འདིར་དགེ་སྦྱོང་གང་དག་ལེགས་པར་བསླབས་རྣམས་དང་། །གཞན་དག་སློབ་པ་རྣམས་དང་སློབ་པར་འགྱུར་བ་རྣམས། །འདི་ལ་ནམ་དུའང་གང་དག་འཆགས་པར་མི་འགྱུར་བ། །ང་ཡིས་དེ་དག་དགེ་སྦྱོང་ལེགས་བསླབས་རྣམས་སུ་བསྟན། །ཇི་ལྟར་མཁའ་ལ་ནམ་ཡང་ལག་པ་མི་ཐོགས་དང་། །རྡུལ་དང་དུ་བ་རྣམས་ཀྱིས་གོས་པར་མི་འགྱུར་དང་། །ཇི་ལྟར་ལམ་ནི་ནམ་ཡང་བྱེད་པར་མི་འགྱུར་བ། །ཆོས་ལ་དེ་བཞིན་མོས་པ་རྣམས་ནི་དགེ་སྦྱོང་ཡིན། །ཇི་ལྟར་སྤྲིན་དང་བྲལ་བར་གྱུར་པའི་ནམ་མཁའ་ལ། །ཟླ་བ་ཐོགས་པ་མེད་པར་མཁའ་ལ་འགྲོ་བྱེད་ཀྱང་། །བདག་གིས་བར་སྣང་ལ་ནི་སྣང་བར་བྱ་སྙམ་དུ། །དེ་ལ་རྣམ་རྟོག་དེ་ནི་འབྱུང་བར་མི་འགྱུར་བཞིན། །རྒོད་མེད་བདག་ཉིད་དགེ་སློང་ཟླ་བ་ལྟ་བུ་ཡིས། །སྦྱིན་པའི་བདག་པོའི་ཁྱིམ་རྣམས་སུ་ནི་འགྲོ་བར་བྱ། །རྒོད་མེད་ང་རྒྱལ་རྣམ་གྲོལ་སེམས་དང་ལྡན་པ་དང་། །འཇིག་རྟེན་ཆོས་རྣམས་ཀྱིས་ནི་མ་གོས་སེམས་ལྡན་བྱ། །ཁྱིམ་རྣམས་ལ་ནི་ང་རྒྱལ་སྤངས་ནས་བསྟེན་པར་བྱ། །དེར་ཕྱིན་ནས་ཀྱང་ཆོས་ཉིད་རབ་ཏུ་བརྗོད་པར་བྱ། །བདེ་དང་རྙེད་པའི་ཕྱིར་ནི་འདོད་པའང་སྤངས་ནས་སུ། །འཇིག་རྟེན་
རྣམ་དག་ཚུལ་ཁྲིམས་ཅན་དུ་གནས་པར་བྱ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་ལོངས་ཤིག །ལོངས་ལ་རང་གི་སྟན་ལ་འདུག་ཤིག །འོད་སྲུང་ཁྱོད་ལ་ཆོས་ཀྱི་ཐེ་ཚོམ་ཇི་སྙེད་ཡོད་པ་དེ་དག་དེ་བཞིན་གཤེགས་པ་ལ་དྲིས་ཤིག་དང་། འོད་སྲུང་ངས་དྲིས་པ་ལན་བཏབ་པས་ཁྱོད་ཀྱི་སེམས་རངས་པར་བྱའོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་སའི་སྟེང་དེ་ནས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ །དེ་ནས་བཅོམ་ལྡན་འདས་ཀྱིས་ཡང་རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་མངོན་པར་འདུ་མཛད་པས་འཛམ་བུའི་གླིང་འདི་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ཇི་སྙེད་གནས་པ་དེ་དག་ཐམས་ཅད་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་ནས། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་གང་དག་ཡིན་པ་དེ་དག་ཀྱང་འོད་མའི་ཚལ་བྱ་ཀ་ལན་ད་ཀ་གནས་པར་ཞུགས་ཏེ། དེ་དག་ཞུགས་ནས་མཐའ་ཡས་ཤིང་དཔག་ཏུ་མེད་པར་ཤེས་པར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དོ། །དེ་ནས་བཅོམ་ལྡན་འདས་ཀྱིས་ཡང་རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་མངོན་པར་འདུ་མཛད་པས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རྒྱལ་པོ་ཆེན་པོ་བཞི་དང་། ལྷ་རྣམས་ཀྱི་དབང་པོ་བརྒྱ་བྱིན་དང་། ཚངས་པ་དང་། ཚངས་པ་ཆེན་པོ་དང་། འོད་གསལ་དང་། མི་ཆེ་བ་དང་། མི་གདུང་བ་དང་། ཤིན་ཏུ་མཐོང་བ་དང་། འོག་མིན་གྱི་ལྷའི་བུ་ཇི་སྙེད་པ་དེ་དག་ཐམས་ཅད་སངས་རྒྱས་ཀྱི་མཐུས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་
ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་ནས། བཅོམ་ལྡན་འདས་ལ་ཐལ་མོ་སྦྱར་ཏེ་ཕྱག་འཚལ་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དོ་དེ་ནས་བཅོམ་ལྡན་འདས་ཀྱིས་ཡང་རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་མངོན་པར་འདུ་མཛད་པས། ཀླུའི་རྒྱལ་པོ་རྒྱ་མཚོ་དང་། མ་དྲོས་པ་དང་། སྣམ་བུའི་དབང་ཕྱུག་དང་། གཽ་ཏ་མ་དང་། དགའ་བོ་དང་། ཉེ་དགའ་དང་། གཟི་ཅན་དང་། འཇོག་པོ་དང་། རབ་མཛེས་དང་། ཨེ་ལའི་འདབ་དང་། དེ་དག་དང་གཞན་ཡང་ཀླུ་བྱེ་བ་ཕྲག་སྟོང་སངས་རྒྱས་ཀྱི་མཐུས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་ཅིང་རྒྱ་ཆེན་པོའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་ཐམས་ཅད་ཀྱང་སངས་རྒྱས་ཀྱི་མཐུས་འོད་མའི་ཚལ་བྱ་ཀ་ལན་ད་ཀ་གནས་པར་ཞུགས་ནས་གཅིག་ལ་གཅིག་ཉམ་ང་བ་མེད་པས་འཁོད་པར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽང་གལ་གྱི་བུ་ཆེན་པོ་ལ་བཀའ་སྩལ་པ། མཽང་གལ་གྱི་བུ་ཁྱོད་ལོངས་ལ་དེ་བཞིན་གཤེགས་པའི་གདན་ཤོམས་ཤིག །དེ་བཞིན་གཤེགས་པ་དེ་ལ་བཞུགས་ནས་ཐེ་ཚོམ་ཐམས་ཅད་གཅོད་པ་ཞེས་བྱ་བའི་ཆོས་ཀྱི་རྣམ་གྲངས་ཡང་དག་པར་སྟོན་པར་འགྱུར། སེམས་ཅན་ཐམས་ཅད་ཀྱི་བསམ་པ་སྒྲུབ་པའི་སྤྱོད་པ་ཡང་དག་པར་སྟོན་པར་འགྱུར། སེམས་ཅན་ཐམས་ཅད་ཡང་དག་པར་ཚིམ་པའི་ཆོས་ཀྱི་རྣམ་གྲངས་ཡང་དག་པར་སྟོན་པར་འགྱུར། སེམས་ཅན་ཐམས་ཅད་ཆོས་ལ་ཡང་དག་པར་གཞོལ་བའི་ཚུལ་གྱི་སྒོ་རྒྱ་མཚོའི་ཕྱག་རྒྱ་ཡང་དག་པར་སྟོན་པར་འགྱུར། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྤྱོད་པ་བསྒྲུབ་པ་ཡང་དག་པར་སྟོན་པར་འགྱུར། སངས་རྒྱས་
ཀྱི་ཆོས་སྒྲུབ་པ་ཡང་དག་པར་སྟོན་པར་འགྱུར། སེམས་ཅན་ཡོངས་སུ་སྨིན་པར་བྱ་བ་སྒྲུབ་པ་ཡང་དག་པར་སྟོན་པར་འགྱུར། སྦྱིན་པའི་ཕ་རོལ་དུ་ཕྱིན་པ་སྒྲུབ་པ་ཡང་དག་པར་སྟོན་པར་འགྱུར་བ་ནས། ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པའི་བར་དུ་ཡང་དག་པར་སྟོན་པར་འགྱུར། ཆོས་ཐམས་ཅད་ཀྱི་ཚུལ་གྱི་སྒོ་སྒྲུབ་པ་ཡང་དག་པར་སྟོན་པར་འགྱུར། སེམས་ཅན་ཐམས་ཅད་ཀྱི་དབང་པོ་སྒྲུབ་པ་ཡང་དག་པར་སྟོན་པར་འགྱུར། སེམས་ཅན་ཐམས་ཅད་ཀྱི་གནས་པའི་སྤྱོད་པ་སྒྲུབ་པ་ཡང་དག་པར་སྟོན་པར་ཡང་འགྱུར། འཁོར་བཞི་ཡང་དག་པར་ཚིམ་པར་བྱེད་པར་འགྱུར། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོའི་འཁོར་ཡང་ཡང་དག་པར་ཚིམ་པར་བྱེད་པར་འགྱུར། འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་དང་། དེ་བཞིན་དུ་ད་ལྟར་དང་། མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་དང་། ལས་ཀྱི་རྣམ་པར་སྨིན་པ་དང་། སྤྱོད་པ་དང་། སྨོན་ལམ་རྣམས་དང་། ཡེ་ཤེས་ཀྱི་ཕྱོགས་ཙམ་ཞིག་ཡང་དག་པར་སྟོན་པར་འགྱུར་རོ། །དེ་ནས་ཚེ་དང་ལྡན་པ་མཽང་གལ་གྱི་བུ་ཆེན་པོ་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ཀྱི་གདན་འཕང་དུ་ཚངས་པའི་འཇིག་རྟེན་སྲིད་ཅིག་བཤམས་སོ། །སྟེང་གི་བར་སྣང་ལ་ཡང་བཅོམ་ལྡན་འདས་ཀྱི་འཆག་ས་རིན་པོ་ཆེ་སྣ་བདུན་ལས་བྱས་པ་ཀ་ཙ་ལིན་དའི་གོས་ལྟར་རེག་ན་བདེ་བ། སྲིད་ཀྱི་ཚད་ནི་སྟོང་གི་འཇིག་རྟེན་གྱི་ཁམས་དང་ལྡན་པ། རྒྱར་ནི་དཔག་ཚད་བདུན་བརྒྱ་དང་ལྡན་པ་ཞིག་བྱས་སོ་འཆག་ས་དེ་ལ་ཡང་རྩིག་པ་རིམ་པ་བདུན་དང་། རྟ་བབས་རིམ་པ་བདུན་དང་། སྟེགས་བུ་རིམ་པ་བདུན་དང་། དྲིལ་བུ་གཡེར་ཀའི་དྲ་བ་རིམ་པ་བདུན་གྱིས་ཀུན་ནས་བསྐོར་བ་སྤྲུལ་ཏོ། །འཆག་ས་དེའི་གཡས་གཡོན་དུ་ཡང་འདི་ལྟ་སྟེ། གསེར་དང་། དངུལ་དང་། ཤེལ་དང་། བཻ་དཱུཪྱ་རིན་པོ་ཆེ་སྣ་བཞིའི་ཤིང་ལྗོན་པ་དག་མངོན་པར་སྤྲུལ་ཏོ། །གསེར་ལས་བྱས་པའི་ཤིང་ལྗོན་པ་
རྣམས་ལ་དངུལ་གྱི་ལོ་མ་དག་དང་། ཤེལ་གྱི་མེ་ཏོག་དག་དང་། བཻ་དཱུཪྱ་ལས་བྱས་པའི་འབྲས་བུ་དག་དང་། དངུལ་ལས་བྱས་པའི་ཤིང་ལྗོན་པ་རྣམས་ལ་གསེར་གྱི་ལོ་མ་དག་དང་། བཻ་དཱུཪྱ་ལས་བྱས་པའི་མེ་ཏོག་དག་དང་། ཤེལ་ལས་བྱས་པའི་འབྲས་བུ་དག་དང་། བཻ་དཱུཪྱ་ལས་བྱས་པའི་ཤིང་ལྗོན་པ་རྣམས་ལ་གསེར་གྱི་ལོ་མ་དག་དང་། དངུལ་གྱི་མེ་ཏོག་དག་དང་། ཤེལ་གྱི་འབྲས་བུ་དག་དང་། ཤེལ་ལས་བྱས་པའི་ཤིང་ལྗོན་པ་རྣམས་ལ་གསེར་གྱི་ལོ་མ་དག་དང་། དངུལ་གྱི་མེ་ཏོག་དག་དང་། བཻ་དཱུཪྱ་ལས་བྱས་པའི་འབྲས་བུ་དག་མངོན་པར་སྤྲུལ་ཏོ། །ཤིང་ལྗོན་པ་ཐམས་ཅད་ཀྱི་བར་དག་ཏུ་ཡང་ཡན་ལག་བརྒྱད་དང་ལྡན་པའི་ཆུས་བཀང་བའི་རྫིང་ཐེམ་སྐས་བཞི་དང་ལྡན་པ། ཐེམ་སྐས་དེ་དག་ཀྱང་རིན་པོ་ཆེ་སྣ་བཞི་གསེར་དང་། དངུལ་དང་། བཻ་དཱུཪྱ་དང་། ཤེལ་ལས་བྱས་པ། གསེར་གྱི་ཕྱེ་མ་བདལ་བ། ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོས་ཁེབས་པ། སྟེང་གི་བར་སྣང་ལ་ཡང་རིན་པོ་ཆེ་སྣ་བདུན་ལས་བྱས་པའི་དྲ་བའི་བླ་རེ་བྲེས་པ་ཞིག་མངོན་པར་སྤྲུལ་ཏོ། །འཆག་ས་དེ་ཡང་དར་གྱི་ལྡ་ལྡི་མང་པོས་སྤྱངས་པ། བདུག་སྤོས་དྲི་ཞིམ་པོས་བདུགས་པ། མི་བདུན་གྱི་སྲིད་ཙམ་དུ་མེ་ཏོག་སྣ་ཚོགས་ཀྱིས་གཅལ་བཀྲམ་པ་ཞིག་མངོན་པར་སྤྲུལ་ཏོ། །ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དེ་དག་ལ་ཡང་མཽང་གལ་གྱི་བུ་དང་འདྲ་བའི་དགེ་སློང་དག་མངོན་པར་སྤྲུལ་ཏོ། །དེ་ནས་ཚེ་དང་ལྡན་པ་མཽང་གལ་གྱི་བུ་ཆེན་པོས་རྫུ་འཕྲུལ་གྱིས་བྱས་པའི་གདན་དེ་ལྟ་བུ་དེ་མངོན་པར་སྤྲུལ་ཏེ། བཅོམ་ལྡན་འདས་ཀྱི་ཐད་དུ་ཕྱིན་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་གདན་བཤམས་ལགས་ན། དེའི་དུས་ལ་དབབ་པར་མཁྱེན་པར་མཛད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་མཽང་གལ་གྱི་བུ་ཆེན་པོ་ལ་བཀའ་སྩལ་པ། མཽང་གལ་གྱི་བུ་ཁྱོད་ཀྱིས་གདན་བཤམས་ཟིན་ཏམ། བཅོམ་ལྡན་འདས་བདག་གིས་བཤམས་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་
པོ་ཡུལ་མཐའ་ཡས་པ་ལ་དམིགས་པ་སྒྲུབ་པ་ངེས་པར་སྟོན་པ་ལ་བཀའ་སྩལ་པ། རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པའི་སེང་གེའི་ཁྲི་ཤོམས་ཤིག །དེ་བཞིན་གཤེགས་པ་དེ་ལ་བཞུགས་ནས་སེམས་ཅན་ཐམས་ཅད་ཡང་དག་པར་ཚིམ་པར་བྱེད་པ་ཞེས་བྱ་བའི་ཆོས་ཀྱི་རྣམ་གྲངས་ཡང་དག་པར་རབ་ཏུ་སྟོན་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཡུལ་མཐའ་ཡས་པ་ལ་དམིགས་པ་སྒྲུབ་པ་ངེས་པར་སྟོན་པས། བཅོམ་ལྡན་འདས་ཀྱི་ལྟར་མཉན་ནས་གདན་བཤམས་སོ། །གདན་དེ་ཤོམ་པ་ན་བྱང་ཆུབ་སེམས་དཔའ་ཇི་སྙེད་འདུས་པ་དེ་དག་ཐམས་ཅད་ཀྱིས་སེང་གེའི་གདན་དེར་རང་རང་གིས་བླ་གོས་དག་བཏིང་ངོ་། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བདག་གིས་ནི་འདི་ལྟ་སྟེ། ཐེ་ཚོམ་དང་སོམ་ཉི་བསལ་བའི་ཕྱིར་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་པ་གང་གིས་བྱང་ཆུབ་སེམས་དཔའ་དེ་དག་གི་སྤྱད་པ་བསྒྲུབ་པ་དང་། འཇུག་པ་བསྒྲུབ་པ་དང་། སྨོན་ལམ་བསྒྲུབ་པ་དང་། ཞིང་བཀོད་པ་བསྒྲུབ་པ་དང་། སེམས་ཅན་ཡོངས་སུ་སྨིན་པར་བྱ་བ་བསྒྲུབ་པ་གང་དག་ཡིན་པ་དང་། བྱང་ཆུབ་སེམས་དཔའ་དེ་དག་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་རྣམས་སུ་སངས་རྒྱས་ཀྱི་ཞིང་གི་བཀོད་པ་འབྱུང་བ་དང་། ཉན་ཐོས་ཕུན་སུམ་ཚོགས་པ་འབྱུང་བ་དང་། བྱང་ཆུབ་སེམས་དཔའ་ཕུན་སུམ་ཚོགས་པ་འབྱུང་བ་དང་། ཆོས་བསྟན་པ་ཕུན་སུམ་ཚོགས་པ་འབྱུང་བ་དང་། ཚེ་ཕུན་སུམ་ཚོགས་པ་དང་། མདོག་ཕུན་སུམ་ཚོགས་པ་དང་། གཟུགས་ཕུན་སུམ་ཚོགས་པ་དང་། མཚན་ཕུན་སུམ་ཚོགས་པ་དང་། དཔེ་བྱད་ཕུན་སུམ་ཚོགས་པ་དང་། ཡང་དག་པའི་སྦྱོར་བ་ཕུན་སུམ་ཚོགས་པ་དང་། དམ་པའི་ཆོས་རབ་ཏུ་རྣམ་པར་མི་འཇིག་པ་ཕུན་སུམ་ཚོགས་པ་འབྱུང་བ་གང་དག་ཡིན་པ་དེ་དག་ཐམས་ཅད་རང་རང་གི་ཆོས་གོས་དག་ལས་མཐོང་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་དེས་ངེས་པར་མངོན་པར་འདུ་བྱའོ་སྙམ་མོ། །དེ་ནས་བཅོམ་ལྡན་འདས་དྲན་པ་དང་མཁྱེན་
བཞིན་དུ་གདན་དེ་ལ་བཞུགས་ཏེ། བཅོམ་ལྡན་འདས་གདན་དེ་ལ་བཞུགས་ནས་ཀྱང་ཡུལ་མཐའ་ཡས་པ་ལ་དམིགས་པ་བསྒྲུབ་པ་ངེས་པར་སྟོན་པ་ཞེས་བྱ་བ་སངས་རྒྱས་ཀྱི་ཏིང་ངེ་འཛིན་ལ་སྙོམས་པར་ཞུགས་སོ། །དེ་བཞིན་གཤེགས་པ་ཏིང་ངེ་འཛིན་ལ་སྙོམས་པར་ཞུགས་ནས། དེ་ནས་དེ་མ་ཐག་ཏུ་བྱང་ཆུབ་སེམས་དཔའ་དེ་དག་གིས་རང་རང་གི་བླ་གོས་ཇི་སྙེད་པ་དེ་དག་བཅོམ་ལྡན་འདས་ཀྱི་གདན་དུ་བཏིང་ངོ་། །དེ་དག་གིས་རང་རང་གི་ཆོས་གོས་དེ་དག་ལ་བདག་ཉིད་ཀྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ནས། རབ་ཏུ་རྣམ་པར་མི་འཇིག་པ་ཕུན་སུམ་ཚོགས་པའི་བར་དུ་ཡང་མཐོང་ངོ་། །དེ་ནས་བྱང་ཆུབ་སེམས་དཔའ་དེ་དག་ཡང་དག་པར་ཚིམ་ཞིང་ཡི་རངས་ཏེ། དགའ་བ་དང་དང་བ་ལ་གནས་ནས་བཅོམ་ལྡན་འདས་ལ་སྒྲ་སྐད་འཐུན་པར་ཚིགས་སུ་བཅད་དེ་བསྟོད་པ། ཆོ་ག་སྤྱོད་པ་ཡོན་ཏན་གནས་གྱུར་པ། །ཆོས་རྣམས་ཀུན་ལ་དབང་ལྡན་བསྙེངས་མི་མངའ། །ཡོན་ཏན་ཀུན་ལ་གནས་པས་ཁྱོད་མཛེས་ཏེ། །རྒྱལ་བ་དབང་ལྡན་ཏིང་འཛིན་ཡང་དག་གནས། །གཡོ་དང་སྒྱུ་ནི་ཁྱོད་ལ་ཡོངས་མི་མངའ། །ང་རྒྱལ་རྒོད་དང་ཚུལ་འཆོས་མི་མངའ་སྟེ། །རིག་དང་རྣམ་གྲོལ་དག་གི་སྤྱོད་པ་མཁྱེན། །ཏིང་འཛིན་དེ་ལ་གནས་པས་ཁྱོད་མཛེས་སོ། །དབང་ལྡན་བསྙེངས་བྲལ་ཏིང་འཛིན་གནས་ནས་སུ། །རྫུ་འཕྲུལ་མི་མཚུངས་བླ་ན་མེད་པ་བསྟན། །ཆགས་མེད་ཡེ་ཤེས་བསྟན་ཕྱིར་དབང་ལྡན་པ། །མ་འོངས་དུས་ནི་ཁྱོད་ཀྱིས་དེང་བསྟན་ཏོ། །མི་གཡོ་གོ་འཕང་ཞི་བ་ཐོབ་སྙམ་བགྱིད། །དེ་རིང་བྱང་ཆུབ་ལ་ནི་མཆིས་སྙམ་བགྱིད། །བདུད་དཔུང་བཅས་པ་རབ་ཏུ་བཅོམ་སྙམ་བགྱིད། །དེ་རིང་རིག་པ་རྗེས་སུ་ཐོབ་སྙམ་བགྱིད། །རྒྱལ་བས་གང་གིས་འདུས་བྱས་སྟོང་གཟིགས་པའི། །བླ་མེད་མིག་ནི་ཐོབ་པར་འགྱུར་སྙམ་བགྱིད། །ཆགས་མེད་ཡེ་ཤེས་ཁྱོད་ཀྱི་བཀའ་དྲིན་ལ། །མིག་ཀྱང་ཆགས་པ་མཆིས་པ་ཡོད་མ་ལགས། །རྣམ་པར་མཐོང་ཡང་ཅི་ཡང་མ་མཐོང་ཞིང་། ། ཆོས་ནི་གང་ལའང་ཞེ་འགྲས་མ་མཆིས་ཏེ། །གང་ལ་ཡིད་ནི་ཞེ་འགྲས་མ་
མཆིས་པ། །དེ་ནི་སངས་རྒྱས་སྤྱན་མཆོག་དེ་ལགས་སོ། །ཇི་ལྟར་རྒྱལ་བའི་སངས་རྒྱས་སྤྱན་མཆོག་གིས། །ཁམས་གསུམ་ཤེས་ལ་མ་ཆགས་འཇུག་པ་བཞིན། །དངོས་དང་དངོས་མེད་མཉམ་མཚུངས་ཡིད་དང་ལྡན། །ཡང་དག་བརྩོན་ཞིང་རང་གི་མིག་ལ་གནས། །གང་ཚེ་རྒྱལ་བ་ཏིང་འཛིན་དེར་གནས་ཏེ། །དེ་རིང་དེ་དག་ཀུན་གྱིས་ཐོབ་སྙམ་བགྱིད། །དེ་དག་གིས་ནི་གཟུངས་སྒོ་དེ་དག་དང་། །ཆོས་ལ་རྣམ་པར་གྲོལ་བའི་སྒོ་མཆོག་ཐོབ། །སྒོར་འཇུག་ཡོངས་སུ་སྦྱང་བྱས་རྣམ་དག་པ། །རྒྱལ་བའི་བློ་ནི་ཡོང་ཡེ་ཉམས་མི་འགྱུར། །སྦྱིན་པ་ཆེན་པོའི་རྣམ་སྨིན་དེ་འདྲ་སྟེ། །ཁྲིམས་ཆེན་ཡོན་ཏན་དེ་དག་དེ་འདྲ་ལགས། །ཤེས་རབ་ཆེན་པོའི་ཡོན་ཏན་དེ་འདྲ་སྟེ། །སྔོན་ཆད་ཆོས་དེ་དག་ནི་བསྟེན་པ་མཛད། །ཁྱོད་ནི་གདན་བཞུགས་བསམ་གཏན་མཛད་པ་ན། །མི་ཡི་དབང་པོ་ཕྱོགས་བཅུར་ལྷང་ངེར་གྱུར། །རྒྱལ་སྲས་ཐུགས་ཀྱི་སྲས་པོ་འདུས་དེ་དག །གང་ནས་ཤི་འཕོས་ལས་ནི་ཅི་མཆིས་པ། །ལྷ་དང་ཀླུ་དང་མི་མིན་མི་འམ་ཅི། །ཀུན་ལ་དེ་རིང་ཤེས་པ་དེ་འཇུག་གོ །ཀུན་དུ་སྣང་བར་གྱུར་པའི་ཏིང་འཛིན་ལ། །གང་གིས་བསྐལ་བྱེར་ཤེས་པ་དེ་བསྐྱེད་པ། །སོམ་ཉི་གཅོད་ཅིང་ཐེ་ཚོམ་སེལ་བ་ཡིས། །མི་མཆོག་སེང་གེ་བཞིན་དུ་སྒྲོགས་པར་འགྱུར། །བདག་དང་གཞན་ལ་ཕན་པ་ཚོལ་བ་ན། །འདི་ལྟར་སྔོན་ཆད་སྦྱིན་པ་སྩལ་ལགས་ཏེ། །འདི་ལ་སྦྱིན་པ་ཚུལ་ཁྲིམས་བཟོད་བརྩོན་གང་། །སེམས་ཅན་ཀུན་ལ་དེ་འདྲར་བསྐལ་པ་མཉམ། །སེམས་ཅན་དེ་དག་ཐམས་ཅད་མ་བཏུད་པར། །འདི་ལྟར་སྦྱིན་དང་ཚུལ་ཁྲིམས་བཟོད་བརྩོན་གང་། །སེམས་ཅན་ཀུན་ལ་ཀུན་ཏུ་མཁས་པས་ན། །འདི་ལ་ཏིང་འཛིན་འཇུག་དང་ཤེས་རབ་མཆོག །དེས་ན་ཁྱོད་ཀྱིས་ཏིང་འཛིན་རྣམ་པར་སྦྱངས། །དཔའ་བོ་དེ་རིང་གདན་ལ་བཞུགས་པ་ལ། །ཐལ་མོ་སྦྱར་ནས་ཁྱོད་ལ་ཞུ་ལགས་ན། །སོམ་ཉི་བཅད་ཅིང་ཐེ་ཚོམ་བསལ་དུ་གསོལ། །དེང་འདིར་ཆོས་ལ་ཀུན་ཏུ་སྣང་ཐོབ་ཅིང་། །ཐེ་ཚོམ་བྲལ་ཏེ་སྣང་བ་ཐོབ་གྱུར་པས། །སེམས་ཅན་གང་དག་འབྱུང་དང་བདག་ཅག་ལ། །ཆོས་ཀྱི་ཚུལ་ནི་ཡུན་རིང་གནས་པར་འགྱུར། །གླེང་གཞིའི་ལེའུ་ཞེས་བྱ་སྟེ་དང་པོའོ།། །།