བརྒྱད་པ། བྱང་ཆུབ་ཀྱི་སེམས་ཡང་དག་པར་འཛིན་དུ་གཞུག་པ་དང་རྣམ་པར་བརྗོད་པ་དང་བསྐྱེད་པ་བསླབ་པའི་ལེའུ།
ཤ་ར་དྭ་ཏིའི་བུ་དེ་ལྟར་བྱང་ཆུབ་སེམས་དཔའ་ལྷག་པའི་བསམ་པ་དང་ལྡན་པས། མཉམ་པ་ཉིད་ཀྱི་ཡང་དག་པའི་ལྟ་བ་ལ་མངོན་པར་བརྩོན་པར་བྱ་དགོས་ཏེ། ཡང་དག་པའི་ལྟ་བ་ཞེས་བྱ་བ་ནི་མི་མཉམ་པ་མེད་པའོ། །ཤ་ར་དྭ་ཏིའི་བུ་ཡང་ཡང་དག་པ་ཉིད་མཐོང་བས་ན་ཡང་དག་པའི་ལྟ་བ་ཞེས་བྱའོ། །ཤ་ར་དྭ་ཏིའི་བུ་ཡང་མཉམ་པ་ཉིད་ཀྱིས་ཡང་དག་པའི་ལྟ་བ་ཞེས་བྱའོ། །ཅིའི་ཕྱིར་
མཉམ་པ་ཉིད་ཀྱིས་ཡང་དག་པའི་ལྟ་བ་ཞེས་བྱ་ཞེ་ན། ཤ་ར་དྭ་ཏིའི་བུ་མིག་ནི་མྱ་ངན་ལས་འདས་པ་སྟེ། མིག་ལས་མྱ་ངན་ལས་འདས་པ་གཞན་མ་ཡིན་ནོ། །དེ་ལྟར་མིག་དང་མྱ་ངན་ལས་འདས་པ་འདི་ནི་གཉིས་སུ་མེད་དེ་གཉིས་སུ་དབྱེར་མེད་དོ། །འདི་ནི་མཚུངས་པ་སྟེ། མཚུངས་པ་གང་གིས་མཚུངས་ཞེ་ན། མིག་མཚུངས་པ་དང་། མྱ་ངན་ལས་འདས་པ་མཚུངས་པས་མཚུངས་སོ། །མིག་ལ་མིག་མེད་དོ། །མྱ་ངན་ལས་འདས་པ་ལ་མྱ་ངན་ལས་འདས་པ་མེད་དོ། །མིག་ལ་མྱ་ངན་ལས་འདས་པ་མེད་དོ། །མྱ་ངན་ལས་འདས་པ་ལ་མིག་མེད་དོ། །དེ་ལྟར་མིག་དང་མྱ་ངན་ལས་འདས་པ་དེ་དག་གཉི་ག་ཡང་བརྟག་ཏུ་མེད་པ་ཉིད་ཀྱིས་མཉམ་མོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་དག་ལའང་སྦྱར་བར་བྱའོ། །དེ་ལྟར་ཡིད་དང་མྱ་ངན་ལས་འདས་པ་འདི་ནི་མཚུངས་པ་སྟེ། ཅིས་མཚུངས་ཤེ་ན། ཡིད་མཚུངས་པས་མཚུངས་སོ། །མྱ་ངན་ལས་འདས་པ་མཚུངས་པས་མཚུངས་སོ། །ཡིད་ལ་ཡིད་མེད་དོ། །མྱ་ངན་ལས་འདས་པ་ལ་མྱ་ངན་ལས་འདས་པ་མེད་དོ། །ཡིད་ལ་མྱ་ངན་ལས་འདས་པ་མེད་དོ། །མྱ་ངན་ལས་འདས་པ་ལ་ཡིད་མེད་དོ། །གང་ཡང་ཡིད་དང་མྱ་ངན་ལས་འདས་པ་འདི་ནི་གཉིས་སུ་མེད་དེ་གཉིས་སུ་དབྱེར་མེད་དོ། །བརྟག་ཏུ་མེད་པ་ཉིད་ཀྱིས་རྟོག་པ་མེད་པའོ། །སྟོང་པ་ཉིད་ཀྱིས་སྟོང་པ་སྟེ། ཤ་ར་དྭ་ཏིའི་བུ་འདི་ནི་ཡང་དག་པའི་ལྟ་བ་ཞེས་བྱའོ། །ལྟ་བ་དེ་མཉམ་པས་ན་དེའི་ཕྱིར་ཡང་དག་པའི་ལྟ་བ་ཞེས་བྱའོ། །དེ་དག་མཉམ་པར་ཕྱིན་པས་ན་དེའི་ཕྱིར་ཡང་དག་པའི་ལྟ་བ་ཞེས་བྱའོ། །དེའི་སྒྲུབ་པ་གང་ཞེ་ན། གང་སྒྲུབ་པ་མེད་པའོ། །ཤ་ར་དྭ་ཏིའི་བུ་ཡང་ལོག་པར་སྒྲུབ་པ་ཞེས་བྱ་བ་ནི་གང་ཆོས་དེ་དག་འགྲོ་བར་མི་བྱེད་པ་ཉིད་དང་། སྤོང་བ་དང་། གཏིང་མི་དཔོག་པ་ཉིད་དེ། ཤ་ར་དྭ་ཏིའི་བུ་འདི་ནི་ལོག་པར་སྒྲུབ་པ་ཞེས་བྱའོ། །ཤ་ར་དྭ་ཏིའི་བུ་ཡང་འདི་ལ་ལོག་པར་སྒྲུབ་པའི་མཆོག་དེ་ནི་གང་ཆོས་དེ་ལྟ་བུ་དེ་དག་གིས་རློམ་སེམས་སུ་བྱེད་པའོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་ཡང་དག་པའི་ལྟ་བ་ནི་རློམ་སེམས་མེད་པའི་ཕྱིར་ཏེ། ཤ་ར་དྭ་ཏིའི་བུ་དེ་བཞིན་གཤེགས་པ་འཕགས་
པ་ཉན་ཐོས་ཐོས་པ་དང་ལྡན་པ་ནི་ས་ལ་རློམ་སེམས་སུ་མི་བྱེད་དོ། །སས་རློམ་སེམས་སུ་མི་བྱེད་དོ། །ས་ངའི་ཞེས་རློམ་སེམས་སུ་མི་བྱེད་དོ། །སའི་ང་ཞེས་རློམ་སེམས་སུ་མི་བྱེད་དོ། །དེ་བཞིན་དུ་ཆུ་དང་། མེ་དང་། རླུང་གི་ཁམས་དག་ལ་ཡང་སྦྱར་བར་བྱའོ། །མྱ་ངན་ལས་འདས་པའི་བར་ལ་རློམ་སེམས་སུ་མི་བྱེད་དོ། །མྱ་ངན་ལས་འདས་པས་རློམ་སེམས་སུ་མི་བྱེད་དོ། །མྱ་ངན་ལས་འདས་པ་ངའི་ཞེས་རློམ་སེམས་སུ་མི་བྱེད་དོ། །མྱ་ངན་ལས་འདས་པའི་ང་ཞེས་རློམ་སེམས་སུ་མི་བྱེད། མངོན་པར་ཞེན་པར་མི་བྱེད་དོ་ཞེས་ཀྱང་གསུངས་སོ། །ཤ་ར་དྭ་ཏིའི་བུ་ཡང་ཡང་དག་པའི་ལྟ་བ་ཞེས་བྱ་བ་ནི་གང་ལ་ལྟ་བ་མེད་པའོ། །ཤ་ར་དྭ་ཏིའི་བུ་ལྟ་བ་ཐམས་ཅད་ནི་ལོག་པར་ལྟ་བའོ། །ཤ་ར་དྭ་ཏིའི་བུ་ལྟ་བ་མེད་པ་ནི་ཡང་དག་པའི་ལྟ་བ་སྟེ། ཤ་ར་དྭ་ཏིའི་བུ་འདི་ནི་ཡང་དག་པའི་ལྟ་བ་ཞེས་བྱའོ། །ཤ་ར་དྭ་ཏིའི་བུ་ཡང་ཡང་དག་པའི་ལྟ་བ་ནི་ཚིག་གིས་བསྟན་པར་མི་ནུས་སོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་ངག་གི་ལས་ཐམས་ཅད་ནི་ཚིག་ཙམ་དུ་ཟད་དེ། དེ་ལ་ཡང་དག་པའི་ལྟ་བ་མེད་པའི་ཕྱིར་རོ། །ཤ་ར་དྭ་ཏིའི་བུ་ཡང་ཡང་དག་པའི་ལྟ་བ་ནི་ཇི་ལྟར་དེ་བཞིན་གཤེགས་པས་རབ་ཏུ་མཁྱེན་པ་བཞིན་ཏེ། དེ་ལ་ལོག་པར་ལྟ་བ་ནི་འགའ་ཡང་མེད་དོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་ངག་གི་དེ་བཞིན་ཉིད་ཐམས་ཅད་ནི་ངག་གི་དེ་བཞིན་ཉིད་དེ། ངག་དེ་ནི་ཇི་ལྟར་དེ་བཞིན་ཉིད་བཞིན་པའི་ཕྱིར་རོ། །ཤ་ར་དྭ་ཏིའི་བུ་ངག་དེ་ནི་བརྗོད་དུ་མེད་པའོ། །ངག་དེ་ནི་ཐ་མི་དད་པའོ། །ཆོས་ཉིད་ཇི་ལྟ་བ་བཞིན་ཏེ། ངག་དེ་ནི་དེ་བཞིན་ནོ། །ཤ་ར་དྭ་ཏིའི་བུ་ལུས་དེ་ནི་དེ་བཞིན་ཉིད་ཀྱི་ལུས་སོ། །ཤ་ར་དྭ་ཏིའི་བུ་དེ་བཞིན་ཉིད་ཀྱི་ལུས་ཞེས་བྱ་བ་ནི་ལུས་དེ་ཕྱིན་ཅི་མ་ལོག་པ་དེ་བཞིན་ཞིང་། ལུས་དེ་ཐ་མི་དད་པ་སྟེ། ལུས་དེ་ཇི་ལྟ་བར་ངག་དེ་ནི་དེ་བཞིན་ནོ། །ཤ་ར་དྭ་ཏིའི་བུ་ལུས་དེ་ནི་དེ་བཞིན་ཉིད་ཀྱི་ལས་སོ། །ཤ་ར་དྭ་ཏིའི་བུ་དེ་བཞིན་ཉིད་ཀྱི་ལས་ཞེས་བྱ་བ་ནི་ལས་དེ་ཕྱིན་ཅི་མི་ལོག་པ་དེ་བཞིན་ཞིང་། ལས་དེ་གཞན་མ་ཡིན་པ་དེ་བཞིན་ལ་ལས་དེ་ཐ་མི་དད་པ་སྟེ། ཤ་ར་དྭ་ཏིའི་བུ་ལས་དེ་ནི་དེ་བཞིན་ཉིད་ཀྱི་འབྲས་བུའོ། །དེ་བཞིན་དུ་འབྲས་བུ་
དེ་ནི་ལས་ཇི་ལྟ་བ་བཞིན་ནོ། །དེས་ན་དེ་བཞིན་གཤེགས་པ་བདེན་པ་གསུང་བ། ཡང་དག་པར་གསུང་བ་ནི་འདི་སྐད་དུ་ལས་ཡོད་ན་རྣམ་པར་སྨིན་པ་འབྱུང་ངོ་། །དེ་ལྟར་ལས་ཇི་ལྟ་ཇི་ལྟ་བར་དེ་ལྟ་དེ་ལྟར་རྣམ་པར་སྨིན་པའོ་ཞེས་གསུང་ངོ་། །ཤ་ར་དྭ་ཏིའི་བུ་དེ་བཞིན་དུ་ཡེ་ཤེས་ཀྱི་འགྲོ་བ་ནི་ཡེ་ཤེས་ཡིན་གྱི་ཤ་ར་དྭ་ཏིའི་བུ་འདི་ནི་ཡེ་ཤེས་མེད་པ་ནི་མ་ཡིན་ནོ། །ཤ་ར་དྭ་ཏིའི་བུ་དེ་ལས་བྱང་ཆུབ་སེམས་དཔའ་ནི་དེ་སྐད་བསྟན་པ་ན་མི་སྐྲག །མི་དངང་དངང་བར་མི་འགྱུར་ཏེ། མི་རྨོངས་ཀུན་དུ་མི་རྨོངས་སོ། །ཤ་ར་དྭ་ཏིའི་བུ་ཆོས་བཞི་པོ་འདི་དག་ནི་སླུ་བར་འགྱུར་བ་སྟེ། བཞི་གང་ཞེ་ན། ཤ་ར་དྭ་ཏིའི་བུ། གཅེར་བུ་པའི་སྨྲ་བ་དང་། འཇིག་རྟེན་རྒྱང་ཕན་པ་ཀུན་ཏུ་བསྟེན་ཅིང་བསྒོམས་ལ་ལན་མང་དུ་བྱས་པ་སླུ་བར་འགྱུར་བ་ཡིན། ཤ་ར་དྭ་ཏིའི་བུ་ལོག་པར་ལྟ་བ་ཀུན་དུ་བསྟེན་ཅིང་བསྒོམས་ལ་ལན་མང་དུ་བྱས་པ་སླུ་བར་འགྱུར་བ་ཡིན། ཤ་ར་དྭ་ཏིའི་བུ་རྩོད་པ་དང་ཕྲད་པ་ཡོངས་སུ་འཛིན་པ་ཀུན་ཏུ་བསྟེན་ཅིང་བསྒོམས་ལ་ལན་མང་དུ་བྱས་པ་སླུ་བར་འགྱུར་བ་ཡིན། མདོ་སྡེ་ཟབ་མོ་ཟབ་པའི་གཏམ་དང་ལྡན་པ། སྟོང་པ་ཉིད་དང་ལྡན་པ། འདི་ལྟ་བུ་དག་ལ་མ་དད་ཅིང་མི་མཁས་ལ་བསྙེན་བཀུར་མི་བྱེད་ཅིང་། ངེས་པར་མི་སེམས་པ་སླུ་བར་འགྱུར་བ་ཡིན་ཏེ། ཤ་ར་དྭ་ཏིའི་བུ་བཞི་པོ་དེ་དག་ནི་སླུ་བར་བྱེད་པའི་ཆོས་དག་ཡིན་གྱི་སླུ་བར་མི་བྱེད་པ་དག་ནི་མ་ཡིན་ནོ། ཤ་ར་དྭ་ཏིའི་བུ་སླུ་བར་བྱེད་པའི་ཆོས་བཞི་པོ་དེ་དག་ཀྱང་སྤོང་བའི་ཕྱིར་སླུ་བར་མི་བྱེད་པའི་ཆོས་བཞི་པོ་དག་བསྒོམ་པར་བྱ་བསྟེན་པར་བྱའོ། །བཞི་གང་ཞེ་ན། ལོག་པར་ལྟ་བ་སྤང་བའི་ཕྱིར་ཡང་དག་པའི་ལྟ་བ་བསྒོམ་པར་བྱ་བ་ཡིན། ཤ་ར་དྭ་ཏིའི་བུ་གང་ལ་འཇིག་རྟེན་རྒྱང་ཕན་པ་དང་ལྡན་པའི་གཏམ་ཡོད་པ་དེ་ལ་དགེ་སློང་ངོ་ཚ་ཤེས་པ་དེས་གནས་པར་མི་བྱ་ཞིང་མྱུར་བ་ཁོ་ནར་འགྲོ་བར་བྱ་བ་འདི་ནི་སླུ་བ་སྤོང་བར་འགྱུར་བའི་ཆོས་གཉིས་པ་ཡིན་ནོ། །ཤ་ར་དྭ་ཏིའི་བུ་གཞན་ཡང་གནས་གང་དུ་རྩོད་པ་དང་ཕྲད་པར་འགྱུར་བ་དེར་དགེ་སློང་གིས་འགྲོ་བར་མི་བྱ་ཞིང་། གཞན་དུ་ན་རྩོད་པ་དེ་ཉེ་བར་ཞི་བར་བྱ་བའི་ཕྱིར་དེར་སོང་བས་ཀྱང་ཆོས་མ་ཡིན་པ་སྨྲ་བ་རྣམས་ཚར་གཅོད་པ་དང་། ཆོས་སྨྲ་བ་རྣམས་བསྡུ་བའི་ཕྱིར་ཆོས་ཉིད་སྨྲ་བར་བྱའི་
ཆོས་མ་ཡིན་པ་ནི་མ་ཡིན་ཏེ། ཤ་ར་དྭ་ཏིའི་བུ་དགེ་འདུན་འཐུན་པར་ཡང་བྱས་པར་འགྱུར་བ་འདི་ནི་སླུ་བ་སྤོང་བར་འགྱུར་གྱི་མི་སླུ་བར་བྱེད་པའི་ཆོས་གསུམ་པ་ཡིན་ནོ། །ཤ་ར་དྭ་ཏིའི་བུ་གཞན་ཡང་ཆོས་ཀྱི་རྣམ་གྲངས་འདི་ལྟ་བུ་དེ་དག་དགེ་སློང་གིས་ལེགས་པར་རབ་ཏུ་བཟུང་ཞིང་། བཟུང་ནས་སྒྲུབ་པ་ལ་གནས་ཏེ། ལུང་ནོད་པ་དང་། ཁ་ཏོན་ལ་མངོན་པར་བརྩོན་པ་ཡིན། ཚུལ་བཞིན་ཡིད་ལ་བྱ་བའི་ཕྱིར་ཡང་མངོན་པར་བརྩོན་པ་ཡིན་ཏེ། ཤ་ར་དྭ་ཏིའི་བུ་སླུ་བར་མི་བྱེད་པའི་ཆོས་བཞི་པོ་དེ་དག་ནི་སླུ་བ་སྤོང་བར་འགྱུར་བ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་ངོ་ཚ་ཤེས་པས་ནི་ལས་མངོན་པར་འདུ་མི་བྱེད་པ་ལ་མངོན་པར་བརྩོན་པར་བྱའོ། །ཤ་ར་དྭ་ཏིའི་བུ་བྱང་ཆུབ་སེམས་དཔས་ནི་ལེགས་པར་གོ་ཆ་བགོས་པ་ཉིད་ཀྱིས་མི་འཇིགས་པར་བྱའོ། །ཤ་ར་དྭ་ཏིའི་བུ་བྱང་ཆུབ་སེམས་དཔས་ནི་བརྩོན་འགྲུས་ཆེན་པོ་མི་འདོར་བ་ཉིད་ཀྱིས་མི་དོར་བར་བྱའོ། །ཤ་ར་དྭ་ཏིའི་བུ་གང་གི་ཚེ་བྱང་ཆུབ་སེམས་དཔའ་དམ་པའི་ཆོས་ཡོངས་སུ་འཛིན་པ་དང་། དོན་ཡོངས་སུ་འཛིན་པ་དང་། སྤྱོད་པ་ཡོངས་སུ་འཛིན་པ་དང་། ཡེ་ཤེས་ཡོངས་སུ་འཛིན་པ་ལ་མངོན་པར་བརྩོན་པ་ཡིན་ཞིང་། ངའི་ཉན་ཐོས་དག་ལ་ཡོངས་སུ་འདྲི་བར་བྱེད་པ་དེའི་ཚེ། ཤ་ར་དྭ་ཏིའི་བུ་དེ་བཞིན་གཤེགས་པ་བདེ་བར་གྱུར་ཅིང་བདེ་བའི་མཆོག་དང་ལྡན་ནོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་སངས་རྒྱས་ཀྱི་རིགས་དེ་རྒྱུན་མི་འཆད་པར་འགྱུར་བའི་ཕྱིར་རོ། །ཤ་ར་དྭ་ཏིའི་བུ། ཉན་ཐོས་རྣམས་ཀྱིས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་དག་རངས་པར་བྱ་བ་ཡིན་ནོ། །ཤ་ར་དྭ་ཏིའི་བུ་ཉན་ཐོས་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལས་དེ་བཞིན་གཤེགས་པའམ། དེ་བཞིན་གཤེགས་པའི་ཆོས་ཉིད་རྗེས་སུ་དྲན་པར་བྱས་ཤིང་ཐོག་མ་མེད་པའི་དུས་ཅན་གྱི་སྡུག་བསྔལ་གྱི་ཕུང་པོ་དེ་ཡང་རྗེས་སུ་དྲན་པར་བྱས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ལ་རངས་པར་བྱེད་ལ། རངས་པར་བྱས་ཤིང་ཡང་དག་པར་འཛིན་དུ་བཅུག་ལ། ཡང་དག་པར་གཟེངས་སྟོད་པའི་རིགས་ཀྱི་བུ་
དེས་ཀྱང་། རང་གི་དགེ་བའི་རྩ་བ་ཡོངས་སུ་སྨིན་པར་བྱས་ཏེ། སངས་རྒྱས་ཀྱི་ཡེ་ཤེས་ཡང་དག་པར་བསྒྲུབས་ནས་སངས་རྒྱས་སུ་འགྱུར་ཞིང་། སངས་རྒྱས་སུ་གྱུར་ནས་སྡུག་བསྔལ་གྱི་ཕུང་པོ་གྲངས་མེད་དཔག་ཏུ་མེད་པ་བསལ་བར་བྱ་བའི་ཕྱིར་ཆོས་སྟོན་པར་འགྱུར་རོ་སྙམ་དུ་སེམས་ན་ཤ་ར་དྭ་ཏིའི་བུ་བསོད་ནམས་ཀྱི་ཕུང་པོ་དཔག་ཏུ་མེད་པར་འགྱུར་རོ། །ཚིགས་སུ་བཅད་པ་གཅིག་ཁོ་ན་ཡང་དག་པར་འཛིན་དུ་བཅུག་པའི་བྱང་ཆུབ་སེམས་དཔའ་ཡང་བསོད་ནམས་ཀྱི་ཕུང་པོ་དེ་སྙེད་སྐྱེད་དོ། །ཤ་ར་དྭ་ཏིའི་བུ་གལ་ཏེ་བསོད་ནམས་ཀྱི་ཕུང་པོ་དེ་གཟུགས་ཅན་དུ་གྱུར་ན་ཤ་ར་དྭ་ཏིའི་བུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་གླིང་བཞི་པའི་སེམས་ཅན་ཇི་སྙེད་ཡོད་པ་དེ་དག་ཐམས་ཅད་སྔ་ཕྱི་རིམ་གྱིས་མིའི་ལུས་ཐོབ་པར་གྱུར་ཅིང་དེ་དག་གིས་མིའི་ལུས་ཐོབ་ནས་བསོད་ནམས་ཀྱི་ཕུང་པོ་དེ་ལས་རི་རབ་ཙམ་གྱི་སྣོད་དག་གིས་བླངས་ཏེ་འདོང་བར་གྱུར་ལ། ཤ་ར་དྭ་ཏིའི་བུ་རྣམ་གྲངས་དེས་སེམས་ཅན་དེ་དག་རེ་རེས་ཀྱང་སྣོད་དེས་བསོད་ནམས་ཀྱི་ཕུང་པོ་དེ་བླངས་ཏེ་འདོང་བར་གྱུར་ཅིང་དེ་ལྟར་རི་རབ་ཙམ་གྱིས་བྱེད་ན་ཡང་བསོད་ནམས་ཀྱི་ཕུང་པོ་དེ་ཟད་པའམ། ཡོངས་སུ་གཏུགས་པར་ང་མི་སྨྲའོ། །ཤ་ར་དྭ་ཏིའི་བུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ལྟ་ཞོག་གི། ཤ་ར་དྭ་ཏིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གཟུགས་ཅན་ནམ། གཟུགས་ཅན་མ་ཡིན་པའམ། འདུ་ཤེས་ཅན་ནམ། འདུ་ཤེས་ཅན་མ་ཡིན་པའམ། འདུ་ཤེས་མེད་འདུ་ཤེས་མེད་མིན་ཡང་རུང་སྟེ། ཇི་སྙེད་ཡོད་པ་དེ་དག་ཐམས་ཅད་ཀྱིས་སྔ་ཕྱི་རིམ་གྱིས་མིའི་ལུས་ཐོབ་ནས་རི་རབ་ཙམ་གྱི་སྣོད་དག་གིས་བསོད་ནམས་ཀྱི་ཕུང་པོ་དེ་བླངས་ཏེ་དོང་བར་གྱུར་ཅིང་རྣམ་གྲངས་དེས་ན་སེམས་ཅན་རེ་རེས་ཀྱང་རི་རབ་ཙམ་གྱི་སྣོད་དག་གིས་བསོད་ནམས་ཀྱི་ཕུང་པོ་དེ་བླངས་ཏེ་སོང་ཡང་བསོད་ནམས་ཀྱི་ཕུང་པོ་དེ་ད་དུང་ཟད་པའམ། ཡོངས་སུ་གཏུགས་པར་ང་མི་སྨྲའོ། །ཤ་ར་དྭ་ཏིའི་བུ་དེ་ལྟར་གང་ངའི་ཉན་ཐོས་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའང་རུང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་མངོན་པར་ཡང་དག་པར་ཞུགས་པ་རངས་པར་བྱེད་ཅིང་ཡང་དག་པར་འཛིན་དུ་འཇུག་ལ། ཡང་དག་པར་གཟེངས་སྟོད་ཅིང་ཐ་ན་ཚིག་བཞི་པའི་ཚིགས་སུ་བཅད་པ་ཙམ་ཡང་དག་པར་རབ་ཏུ་སྟོན་པ་དེ་ནི་བསོད་ནམས་ཀྱི་ཕུང་པོ་དཔག་ཏུ་མེད་པ་དང་ལྡན་པ་ཡིན་ནོ། །ཤ་ར་དྭ་ཏིའི་བུ་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོས་མིང་འདི་ཞེས་བྱ་བ་བྱང་ཆུབ་ཀྱི་ཕྱོགས་ཀྱི་ཆོས་ཡོངས་སུ་སྨིན་པར་བྱ་བའི་ཕྱིར་ཆོས་ཀྱི་སྦྱིན་པས་རངས་པར་བྱས་ཤིང་། སངས་རྒྱས་ཀྱི་ཆོས་དེ་སྙེད་ཉེ་བར་སྟོན་པར་བྱེད་པ་དེ་ལྟ་བུར་ཤེས་པར་བྱེད་ན། ཤ་ར་དྭ་ཏིའི་བུ་དེས་ཇི་ཙམ་དུ་སངས་རྒྱས་ཀྱི་ཡེ་ཤེས་ཉེ་བར་སྟོན་པར་བྱེད་པའི་བྱང་ཆུབ་སེམས་དཔའ་དེ་ཉེ་བར་བསྒྲུབ་པ་ཐམས་ཅད་ཀྱིས་མགོས་འཛིན་ཏམ། ཕྲག་པས་འཛིན་ཅིང་རྣམ་གྲངས་དེས་བྱང་ཆུབ་སེམས་དཔའ་གང་གི་ཚེ་ནུབ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ཞིང་། སེམས་ཅན་དེ་ཡོངས་སུ་སྨིན་པར་བྱེད་ན་སེམས་ཅན་དེ་ལ་ཆོས་བསྟན་ཅིང་དེ་ལ་བཞག་ན་ཡང་རེ་ཞིག་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་བྱས་པས་ལན་དུ་བྱ་བ་བྱས་པར་མི་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་སངས་རྒྱས་ཀྱི་ཆོས་དཔག་ཏུ་མེད་པ་དེ་སྙེད་དང་ལྡན་པ་ཡིན་ནོ། །ཤ་ར་དྭ་ཏིའི་བུ་དེ་ལྟ་བས་ན་རྣམ་གྲངས་དེས་ཁྱོད་ཀྱིས་ཇི་ལྟར་བྱང་ཆུབ་སེམས་དཔའ་དེས་སེམས་ཅན་དེ་ལ་ལན་དུ་བྱ་བ་བྱས་པ་མ་ཡིན་པ་དེ་ལྟར་རིག་པར་བྱའོ།། །།བམ་པོ་བཅུ་གསུམ་པ། ཤ་ར་དྭ་ཏིའི་བུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ། ཡངས་པ། ཚད་མེད་པ། བསམ་གྱིས་མི་ཁྱབ་པ། དཔག་ཏུ་མེད་པར་གྱུར་པ་བྱུང་བ་དེའི་ཚེ་དེའི་དུས་ན་དེ་བཞིན་གཤེགས་པ་ཀུན་ནས་སྦས་ཞེས་བྱ་བ་བྱུང་སྟེ། བཅོམ་ལྡན་འདས་དེའི་ཚེ་ཚད་ནི་ལོ་བདུན་ཁྲི་ཐུབ་པར་གྱུར་ཏོ། །དེའི་ཉན་ཐོས་འདུས་པ་ནི་གསུམ་བྱུང་སྟེ། གཅིག་ནི་དགེ་སློང་ཁྲག་ཁྲིག་བརྒྱད་ཅུ་བྱུང་ངོ་། །གཉིས་པ་ནི་དགེ་སློང་ཁྲག་ཁྲིག་ཕྲག་དྲུག་ཅུ་བྱུང་ངོ་། ། ཉན་ཐོས་འདུས་པ་གསུམ་པ་ནི་དགེ་སློང་ཁྲག་ཁྲིག་ཕྲག་བཞི་བཅུ་བྱུང་ངོ་། །ཤ་ར་དྭ་ཏིའི་བུ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ནས་སྦས་ཡོངས་སུ་མྱ་ངན་ལས་འདས་ནས་དམ་པའི་ཆོས་ནི་ལོ་བཞི་ཁྲི་གནས་པར་གྱུར་ཏོ། །བཅོམ་ལྡན་འདས་དེ་ཡོངས་སུ་མྱ་ངན་ལས་འདས་ནས་ལྔ་བརྒྱ་པ་ཐ་མ་ལ་དམ་པའི་ཆོས་ནུབ་པའི་དུས་ཀྱི་ཚེ་ན་དགེ་སློང་ཡེ་ཤེས་མཆོག་ཅེས་བྱ་བ་མང་དུ་ཐོས་པ། ཡིད་གཞུངས་པ། གསལ་བ་དུལ་བ་ཞིག་བྱུང་ངོ་། །ཤ་ར་དྭ་ཏིའི་བུ་དེའི་ཚེ་འཛམ་བུའི་གླིང་འདིར་རྒྱལ་པོ་མཐའ་ཡས་ཞེས་བྱ་བ་བྱུང་སྟེ། རྒྱལ་པོ་དེའི་ཕོ་བྲང་འཁོར་ནི་གྲོང་ཁྱེར་མཐའ་ཡས་ཞེས་བྱ་བ་ཆུ་ཞེང་དུ་དཔག་ཚད་བཅུ་གཉིས་ཡོད་པ། འབྱོར་པ། རྒྱས་པ། བདེ་བ། ལོ་ལེགས་པ། ཉམས་དགའ་བ། སྐྱེ་བོ་དང་མི་མང་པོས་གང་བ་ཞིག་བྱུང་ངོ་། །དེའི་ཚེ་ཡང་གྲོང་ཁྱེར་མཐའ་ཡས་སུ་ཁྱིམ་བདག་ཁྲོ་བ་མེད་ཅེས་བྱ་བ་བྱུང་སྟེ། ཤ་ར་དྭ་ཏིའི་བུ་ཁྱིམ་བདག་ཁྲོ་བ་མེད་དེའི་བུ་ནི་དོན་གྱི་བློ་གྲོས་ཞེས་བྱ་བ་ཞིག་བྱུང་ངོ་། །དེ་ནས་ཚོང་དཔོན་གྱི་བུ་དོན་གྱི་བློ་གྲོས་དགེ་སློང་ཡེ་ཤེས་མཆོག་ག་ལ་བ་དེར་སོང་སྟེ་ཕྱིན་ནས་དགེ་སློང་ཡེ་ཤེས་མཆོག་གིས་བྱང་ཆུབ་སེམས་དཔའ་དང་ལྡན་པའི་གཏམ་བྱས་སོ། །དེ་ནས་ཚོང་དཔོན་གྱི་བུ་དོན་གྱི་བློ་གྲོས་ཀྱིས་དགེ་སློང་ཡེ་ཤེས་མཆོག་ལས་གཏམ་ཐོས་ནས་ཡི་རངས་ཏེ་སོ་སོ་ཡང་དག་པར་རིག་པར་གྱུར་ཏོ། །དེས་དེའི་ཚེ་ཆོས་གོས་རིན་ཐང་བྱེ་བ་རི་བས་དགེ་སློང་ཡེ་ཤེས་མཆོག་ལ་མངོན་པར་བཀབ་བོ། །མངོན་པར་བཀབ་ནས་དགེ་སློང་ཡེ་ཤེས་མཆོག་ལ་སྨྲས་པ། འཕགས་པ་ཁྱོད་ཀྱིས་ལེགས་པར་སྨྲས་པ་ལེགས་སོ་ལེགས་སོ། །བདག་གི་ཁྱིམ་དུ་ཡང་དང་ཡང་སྤྱོན་ཅིག །བྱོན་ནས་ཀྱང་ཆོས་ཀྱི་གཏམ་དེ་ལྟ་བུ་མཛོད་ཅིག་དང་། བདག་ལ་ཡང་ཕན་པར་འགྱུར། ཚེ་དང་ལྡན་པའི་ཆོས་ཀྱི་སྦྱིན་པ་ཡང་འབྲས་བུ་ཆེན་པོར་འགྱུར་རོ། །དེང་ཕྱིན་ཆད་ཇི་སྲིད་འཚོའི་བར་དུ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་གྱི་གསོས་སྨན་དང་། ཡོ་བྱད་དག་དང་། ཡོ་བྱད་གཞན་དང་། གཞན་དག་ལ་སྤྱན་འདྲེན་ཏོ། །དགེ་སློང་གང་དག་ཚེ་དང་ལྡན་པའི་རྗེས་སུ་འབྲང་བ་དེ་དག་ཀྱང་མགྲོན་དུ་གཉེར་རོ། །དེ་ནས་དགེ་སློང་ཡེ་ཤེས་མཆོག་གིས་ཚོང་དཔོན་གྱི་བུ་དོན་གྱི་བློ་གྲོས་ལ་འདི་སྐད་ཅེས་སྨྲས་
སོ། །ཁྱིམ་བདག་ཁྱོད་ཀྱིས་སྨྲས་པ་དེ་དག་དགེའོ། །དེ་ནས་ཚོང་དཔོན་གྱི་བུ་དོན་གྱི་བློ་གྲོས་དགེ་སློང་ཡེ་ཤེས་མཆོག་གི་རྐང་པ་ལ་ཕྱག་འཚལ་ཏེ་བསྐོར་བ་བྱས་ནས། དགེ་སློང་ཡེ་ཤེས་མཆོག་གི་ཐད་ནས་སོང་ངོ་། །ཤ་ར་དྭ་ཏིའི་བུ་དེའི་འོག་ཏུ་དགེ་སློང་ཡེ་ཤེས་མཆོག་ཚོང་དཔོན་གྱི་བུ་གཞོན་ནུ་དོན་གྱི་བློ་གྲོས་ཀྱི་ཁྱིམ་དུ་སོང་ངོ་། །ཤ་ར་དྭ་ཏིའི་བུ་དེ་ནས་དགེ་སློང་ཡེ་ཤེས་མཆོག་གིས་ཚོང་དཔོན་གྱི་བུ་གཞོན་ནུ་དོན་གྱི་བློ་གྲོས་ཀྱི་ཕ་མ་དག་དང་། བུ་དང་། ཆུང་མ་དང་། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་དོ། །ཤ་ར་དྭ་ཏིའི་བུ་དེ་ཡང་དགེ་བའི་རྩ་བ་དེས་བསྐལ་པ་གྲངས་མེད་པར་ནམ་ཡང་སངས་རྒྱས་དང་བྲལ་བར་མ་གྱུར། ཆོས་དང་བྲལ་བར་མ་གྱུར། དགེ་འདུན་དང་བྲལ་བར་མ་གྱུར། དགེ་བའི་བཤེས་གཉེན་དང་བྲལ་བར་མ་གྱུར་ཏོ། །ཤ་ར་དྭ་ཏིའི་བུ་དེའི་ཚེ་དེའི་དུས་ན་ཚོང་དཔོན་གྱི་བུ་དོན་གྱི་བློ་གྲོས་ཞེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་ཁྱོད་སེམས་ན་དེ་ལྟར་བལྟ་བར་མི་བྱའོ། །དེ་ཅིའི་ཕྱིར་ཞེ་ན། དེའི་ཚེ་དེའི་དུས་ན་ང་ནི་ཚོང་དཔོན་གྱི་བུ་དོན་གྱི་བློ་གྲོས་ཞེས་བྱ་བར་གྱུར་ཏོ། །ཤ་ར་དྭ་ཏིའི་བུ་དེའི་ཚེ་དེའི་དུས་ན་ཚོང་དཔོན་གྱི་བུ་གཞོན་ནུ་དེའི་ཕ་བྱུང་བ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ། ཡིད་གཉིས་ཟ་བར་གྱུར་ན་དེ་ལྟར་བལྟ་བར་མི་བྱའོ། །དེ་ཅིའི་ཕྱིར་ཞེ་ན། དེའི་ཚེ་དེའི་དུས་ན་དེ་བཞིན་གཤེགས་པ་འོད་སྲུང་དེ་ནི་ངའི་ཕར་གྱུར་ཏོ། །ཤ་ར་དྭ་ཏིའི་བུ་དེའི་ཚེ་དེའི་དུས་ན་སྲོག་ཆགས་བྱེ་བ་ཁྲག་ཁྲིག་བྱུང་བ་དེ་གཞན་ཡིན་པ་སྙམ་དུ་སེམས་ན། ཤ་ར་དྭ་ཏིའི་བུ་ཁྱོད་ཀྱིས་དེ་ལྟར་བལྟ་བར་མི་བྱའོ། །དེ་ཅིའི་ཕྱིར་ཞེ་ན། དེ་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པ་ཤ་སྟག་གོ །ཤ་ར་དྭ་ཏིའི་བུ་དེ་དག་ནི་འཁོར་འདི་ཉིད་དུ་ཡང་དག་པར་འདུས་པར་གྱུར་ཏེ། དེ་དག་ཀྱང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །ཤ་ར་དྭ་ཏིའི་བུ་དགེ་སློང་ཡེ་ཤེས་མཆོག་ནི་དེ་ཉིད་ཀྱི་ཚེ་ལེན་པའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་
འདས་སོ། །ཤ་ར་དྭ་ཏིའི་བུ་གལ་ཏེ་དགེ་སློང་ཡེ་ཤེས་མཆོག་ཉན་ཐོས་ཀྱི་ཐེག་པས་ཡོངས་སུ་མྱ་ངན་ལས་འདས་པར་མ་གྱུར་ན། དེས་ཚོང་དཔོན་གྱི་བུ་དོན་གྱི་བློ་གྲོས་ལ་ཆོས་བསྟན་པས། བསོད་ནམས་ཀྱི་ཕུང་པོ་ཇི་སྙེད་ཡོད་པ་དེ་སྙེད་ཀྱིས་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་འགྱུར་ཏེ། གང་དེའི་ཕ་མ་དག་དང་། གཡོག་འཁོར་ཐམས་ཅད་ལ་ཆོས་བསྟན་པར་བྱས་པ་ལྟ་ཅི་སྨོས། ཤ་ར་དྭ་ཏིའི་བུ། གལ་ཏེ་དགེ་སློང་ཡེ་ཤེས་མཆོག་ཡོངས་སུ་མྱ་ངན་ལས་འདས་པར་མ་གྱུར་ན། ཤ་ར་དྭ་ཏིའི་བུ་ངས་དགེ་སློང་དེ་ལ་ལན་དུ་བྱ་བ་བྱེད་མི་ནུས་པར་འགྱུར་རོ། །ཤ་ར་དྭ་ཏིའི་བུ་རྗེད་པའམ། མཆོད་པ་བྱས་ཀྱང་ང་ལ་ཆོས་བསྟན་པ་དེས་དོན་ཇི་ལྟ་བུ་བྱས་པ་དེའི་ལན་དུ་བྱ་བ་བྱེད་མི་ནུས་པར་འགྱུར་རོ། །ཤ་ར་དྭ་ཏིའི་བུ། དེ་ལྟ་བས་ན་གང་གིས་བྱང་ཆུབ་སེམས་དཔའ་ཆོས་དང་ལྡན་པའི་གཏམ་གྱིས་རངས་པར་བྱས་ཤིང་། ཡང་དག་པར་འཛིན་དུ་བཅུག་ལ། ཡང་དག་པར་གཟེངས་སྟོད་པ་དེ་ནི་བསོད་ནམས་ཀྱི་ཕུང་པོ་དཔག་ཏུ་མེད་པ་དང་ལྡན་པ་ཡིན་ནོ། །ཤ་ར་དྭ་ཏིའི་བུ། བྱང་ཆུབ་སེམས་དཔའ་དེ་ནི་བྱ་བ་དཔག་ཏུ་མེད་པས་སེམས་དེ་སྐྱེད་པར་བྱེད་ཅིང་། སེམས་སྐྱེད་པ་མངོན་པར་སྒྲུབ་པར་བྱེད་ལ། སེམས་བསྐྱེད་པ་དེ་རབ་ཏུ་གནས་པར་བྱེད་དོ། །ཤ་ར་དྭ་ཏིའི་བུ། འདི་ལྟ་སྟེ་དཔེར་ན། རྒྱ་མཚོ་ཆེན་པོ་རབ་ཏུ་གནས་པ་ན་ནོར་བུ་རིན་པོ་ཆེ་དེ་དག་ནི་རིན་ཐང་གདབ་ཏུ་ཡོད་པའམ། རིན་ཐང་གདབ་ཏུ་མེད་པ་ཡིན་པ་དེ་ལྟ་བུར་ཤེས་པར་བྱ་བ་ཡིན་ཞིང་། དེ་དག་ཐམས་ཅད་ཀྱང་རྒྱ་མཚོ་ཆེན་པོ་ན། རབ་ཏུ་གནས་པར་རིག་པར་བྱ་བ་ཡིན་ལ། དེ་དག་ཐམས་ཅད་རྒྱ་མཚོ་ཆེན་པོ་ནས། རེ་བར་བྱ་བ་ཡིན་ནོ། །ཤ་ར་དྭ་ཏིའི་བུ། དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བྱང་ཆུབ་སེམས་དཔའི་སེམས་བསྐྱེད་པ། རབ་ཏུ་གནས་པ་ན་འཇིག་རྟེན་པ་དང་། འཇིག་རྟེན་ལས་འདས་པ་དང་། ཟག་པ་དང་བཅས་པ་དང་། ཟག་པ་མེད་པ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། འདུས་བྱས་དང་།
འདུས་མ་བྱས་ཀྱི་ཡེ་ཤེས་ཇི་སྙེད་ཡོད་པ་ཐམས་ཅད་ཀྱི་སྣོད་དེ་ཡིན་པར་འགྱུར་བ་དང་། ཡེ་ཤེས་ཡོངས་སུ་གནས་པར་བྱེད་པར་འགྱུར་བ་དང་། དེར་ཡེ་ཤེས་ཐམས་ཅད་རབ་ཏུ་དབྱེ་བ་ཐོབ་པར་འགྱུར་བ་དང་། ཡེ་ཤེས་ཐམས་ཅད་ཀྱང་དེ་ལས་རབ་ཏུ་སྐྱེ་བར་འགྱུར་རོ། །སྙམ་དུ་ཤེས་པར་བྱ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ་དཔེར་ན། རྒྱ་མཚོ་ཆེན་པོ་དེ་ཉིད་རབ་ཏུ་གནས་པ་ན། ཤ་ར་དྭ་ཏིའི་བུ། གང་དུ་ལུས་ཆེན་པོ་རྒྱས་པར་འགྱུར་བ་དེ་ནི་འབྱུང་པོ་ཆེན་པོ་རྣམས་ཀྱི་གནས་སུ་འགྱུར་བ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ། དེ་བཞིན་དུ་བྱང་ཆུབ་ཀྱི་སེམས་རབ་ཏུ་གནས་པ་ན། ཤ་ར་དྭ་ཏིའི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་གང་དུ་ཡེ་ཤེས་ཀྱི་ལུས་ཆེན་པོ་རྒྱས་པར་འགྱུར་བ་དང་། དགེ་བའི་རྩ་བའི་ཚོགས་ཆེན་པོ་མངོན་པར་འཕེལ་བར་འགྱུར་བ་དེ་ནི་འབྱུང་པོ་ཆེན་པོ་མང་པོ་གྲངས་མེད་པའི་གནས་སུ་འགྱུར་བ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ་དཔེར་ན། རྒྱ་མཚོ་ཆེན་པོ་དེ་ཉིད་རབ་ཏུ་གནས་པ་ན། ཤ་ར་དྭ་ཏིའི་བུ། གང་དུ་ཀླུའི་རྒྱལ་པོ་ཆེན་པོ་གནས་པ་དེ་དག་བྱའི་རྒྱལ་པོ་ནམ་མཁའ་ལྡིང་དག་གིས་ཐུལ་བར་དཀའ་བར་འགྱུར་བ་དང་། དེ་དག་རྒྱ་མཚོ་ཆེན་པོ་ནས་བྱུང་ནས་ཀྱང་། གླིང་བཞི་པའི་འཇིག་རྟེན་གྱི་ཁམས་ཆར་པའི་རྒྱུན་ཆེན་པོས་ཚིམ་པར་བྱེད་པ་དེ་ནི། ཀླུ་ཆེན་པོ་དག་གིས་གནས་སུ་འགྱུར་བ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ། དེ་བཞིན་དུ་བྱང་ཆུབ་སེམས་དཔའི་སེམས་བསྐྱེད་པ་ཡོངས་སུ་གནས་པ་ན། དེ་ལས་གཞན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་དེ་སངས་རྒྱས་སུ་གྱུར་ནས། སེམས་ཅན་དཔག་ཏུ་མེད་པའི་གནས་ཆེན་པོར་གྱུར་པར་འགྱུར་བ་དང་། ཆོས་དེ་དག་གི་གནས་ཀྱང་བྱེད་པར་འགྱུར་བ་དང་། སངས་རྒྱས་ཀྱི་ཡུལ་དེའི་གནས་ཀྱང་བྱེད་པར་འགྱུར་བ་དང་། དེ་ལས་བདུད་སྡིག་ཅན་དག་གིས་ཕྱིར་མི་བསྒྱུར་བར་འགྱུར་བ་དང་། ཐུལ་བར་དཀའ་བར་འགྱུར་བ་དང་། མི་ནོན་པར་འགྱུར་བ་དང་།
གལ་ཏེ་བདུད་རྣམས་ཀྱིས་བདུད་ཀྱི་ལས་བྱའོ། །སྙམ་ནས་གནོད་པའི་སེམས་བསྐྱེད་པར་གྱུར་ན། དེ་དག་གིས་སེམས་བསྐྱེད་མ་ཐག་ཁོ་ནར་བདུད་ཀྱིས་བཅིང་བ་ཐམས་ཅད་ཐལ་བར་རློག་པར་བྱེད་པར་འགྱུར་བ་དང་། བདུད་ཀྱི་སེམས་ཐམས་ཅད་ཐལ་བར་རློག་པར་བྱེད་པར་འགྱུར་བར་རིག་པར་བྱ་བ་ཡིན་ནོ། །འདི་ལྟ་སྟེ། དཔེར་ན་ཀླུ་ཆེན་པོ་དེ་དག་ནི་རྒྱ་མཚོ་ཆེན་པོ་ལས་ཕྱིར་བསྒྱུར་བར་དཀའ་བ་ཡིན་ཞིང་། དེ་དག་རྒྱ་མཚོ་ཆེན་པོ་ནས་མངོན་དུ་བྱུང་ནས། གླིང་བཞི་པའི་འཇིག་རྟེན་གྱི་ཁམས་ཆར་པའི་རྒྱུན་ཆེན་པོས་ཀུན་དུ་ཚིམ་པར་བྱེད་ཅིང་། དེར་སྨན་དང་། ནགས་ཚལ་དག་འཕེལ་བ་དང་། རྒྱས་པ་དང་། ཡངས་པ་ཉིད་དུ་འགྱུར་བ་དང་། རྐང་གཉིས་པ་དང་། རྐང་བཞི་པ་དག་སྐོམ་པ་རྒྱུན་གཅོད་པར་འགྱུར་བ་དང་། དེའི་འོག་ཏུ་ཡང་རྒྱ་མཚོ་ཆེན་པོར་འབབ་པར་འགྱུར་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ་བྱང་ཆུབ་སེམས་དཔའི་སེམས་བསྐྱེད་པ་དེ་རབ་ཏུ་གནས་པ་ན། ཤ་ར་དྭ་ཏིའི་བུ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཀླུ་ཆེན་པོ་རྣམས་ཀྱི་གནས་ཡིན་པར་འགྱུར་བ་དང་། དེ་ནས་མངོན་དུ་བྱུང་ནས་ཀྱང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ཏུ་འདོད་ཆགས་དང་བྲལ་བའི་མཐའ་ལས་བྱུང་བའི་ཆོས་ཀྱི་ཆར་པ་མངོན་དུ་འབེབས་པར་བྱེད་པ་དང་། ཆོས་ཀྱི་ཆར་པ་ཆེན་པོ་འབེབས་པར་འགྱུར་བ་དང་། སེམས་ཅན་གྲངས་མེད་དཔག་ཏུ་མེད་པའི་སྲེད་པ། འདོད་པའི་སྲེད་པ་དང་། གཟུགས་ཀྱི་སྲེད་པ་དང་། གཟུགས་མེད་པའི་སྲེད་པ་རབ་ཏུ་ཞི་བར་བྱེད་པར་འགྱུར་བ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་རྒྱ་མཚོ་ཆེན་པོ་དེ་ཉིད་ཡོངས་སུ་གནས་པ་ན། གླིང་བཞི་པ་ན་ཆུ་ཀླུང་ཆེན་པོ་གང་དག་ཇི་སྙེད་ཡོད་པ་དེ་དག་ཐམས་ཅད་འདིར་འབབ་པར་འགྱུར་བ་དང་། རྒྱ་མཚོ་ཆེན་པོ་ནི་རིམ་གྱིས་
གཞོལ་བའི་ཕྱིར། རྒྱ་མཚོ་ཆེན་པོ་མ་གཏོགས་པར་དེ་དག་གི་གནས་གཞན་མེད་དེ་དེ་དག་ཐམས་ཅད་རྒྱ་མཚོ་ཆེན་པོ་ག་ལ་བ་དེར་འབབ་ཀྱང་། རྒྱ་མཚོ་ཆེན་པོ་གང་བའམ། བྲི་བར་ཡང་མི་འགྱུར་བ་དང་། རྒྱ་མཚོ་ཆེན་པོའི་ཆོས་ཉིད་གནས་པ་ཉིད་ནི་འདི་ཡིན་ཏེ། འདི་ལྟ་སྟེ། རྒྱ་མཚོ་ཆེན་པོའི་ཆུ་ནི་ཆུ་ཐ་དད་པ་འབབ་པ་ཡང་ཡིན་ལ། ཆུ་གཅིག་པ་ཡིན་པར་ཡང་འགྱུར་བ་དང་། འདི་ལྟ་སྟེ། ལན་ཚྭའི་རོར་རོ་གཅིག་པར་འགྱུར་བར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ། དེ་བཞིན་དུ་བྱང་ཆུབ་སེམས་དཔའི་སེམས་བསྐྱེད་པ་རབ་ཏུ་གནས་པ་ན། དེ་སངས་རྒྱས་ཉིད་དང་། དེ་བཞིན་གཤེགས་པ་ཉིད་དང་། མངོན་པར་རྫོགས་པར་སངས་རྒྱས་ནས། སངས་རྒྱས་ཀྱི་ཆོས་རྣམས་ཡོངས་སུ་རྫོགས་པ་དང་། སེམས་ཅན་ཐམས་ཅད་ཀྱི་ཤེས་རབ་རྒྱུན་མི་འཆད་པའི་སྣོད་དུ་གྱུར་པར་འགྱུར་བ་དང་། སེམས་ཅན་གང་དག་ཆོས་ཀྱི་ཐེ་ཚོམ་སྣ་ཚོགས་སྐྱེས་པ། དེ་དག་གིས་ཀྱང་དེ་མཐོང་མ་ཐག་ཁོ་ནར་ཐེ་ཚོམ་དང་བྲལ་བར་འགྱུར་བ་དང་། མིང་སྔ་མ་དེ་དག་ཀྱང་། འདི་ལྟ་སྟེ། དེ་བཞིན་གཤེགས་པའི་ཉན་ཐོས་ཞེས་བྱ་བར་མིང་གཅིག་པར་འབྱུང་བ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་ལན་ཚྭའི་རོར་རོ་གཅིག་པ་ཡིན་ནོ། །དེ་བཞིན་དུ་དེའི་ཉན་ཐོས་ལེགས་པ་ཁོ་ནར་རྣམ་པར་གྲོལ་བས། རྣམ་པར་གྲོལ་བ་དེ་དག་ཐམས་ཅད་ནི་འདི་ལྟ་སྟེ། རྣམ་པར་གྲོལ་བའི་རོར་རོ་གཅིག་པར་འགྱུར་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་རྒྱ་མཚོ་ཆེན་པོ་དེ་ཉིད་རབ་ཏུ་གནས་པ་ན། གཟོད་མ་ཉིད་ནས་རིམ་གྱིས་གཞོལ་བར་གནས་སོ། །ཤ་ར་དྭ་ཏིའི་བུ་གལ་ཏེ་རྒྱ་མཚོ་ཆེན་པོ་གཟོད་མ་ཉིད་ནས་བྱ་སྐྱིབས་སུ་ཆགས་པར་གྱུར་ན། རིན་པོ་ཆེ་འདོད་པའི་མི་རྣམས་འཇུག་པར་མི་འགྱུར་རོ། །ཤ་ར་དྭ་ཏིའི་བུ་རྒྱ་མཚོ་ཆེན་པོ་ནི་ཟབ་པ་ཉིད་དང་། ཆུ་མཐའ་ཡས་པར་རབ་ཏུ་གནས་སོ། །ཤ་ར་དྭ་ཏིའི་བུ་དེ་བཞིན་དུ། བྱང་ཆུབ་སེམས་དཔའི་སེམས་བསྐྱེད་པ་གནས་པ་
ན། གཟོད་མ་ཉིད་ནས་རིམ་གྱིས་གཞོལ་བར་རབ་ཏུ་གནས་ཤིང་། མཐའ་ཡས་པ་ཉིད་ཀྱིས་རིམ་གྱིས་འབབ་པ་དང་། རིམ་གྱིས་བབ་པར་ཀུན་ནས་གནས་ལ་ཟབ་པ་ཉིད་དུ་རབ་ཏུ་གནས་སོ། །ཤ་ར་དྭ་ཏིའི་བུ་དེ་ལ་རིམ་གྱིས་གཞོལ་བ་ཉིད་ནི་འདི་ཡིན་ཏེ། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པའོ། །ཤ་ར་དྭ་ཏིའི་བུ་དེ་ལ། བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཟབ་པ་ཉིད་དུ་རིག་པར་བྱའོ། །ཤ་ར་དྭ་ཏིའི་བུ་དེ་ལ་བྱང་ཆུབ་སེམས་དཔའི་སངས་རྒྱས་ཀྱི་ཆོས་ཀྱི་ཐབས་ལ་མཁས་པ་མངོན་པར་སྒྲུབ་པ་ནི་མཐའ་ཡས་པ་ཉིད་དུ་བལྟ་བར་བྱ་སྟེ། གཟོད་མ་ཉིད་ནས། ཡང་དག་པའི་མཐའ་མངོན་དུ་བྱས་པས། མི་གནོན་པར་གྱུར་པ་དང་། སེམས་ཅན་གྲངས་མེད་དཔག་ཏུ་མེད་པ་མི་འཇུག་པར་གྱུར་པ་དང་། ཆོས་དཀོན་མཆོག་འདོད་པ་རྣམས་མི་འཇུག་པར་གྱུར་ན། མི་རུང་ངོ་སྙམ་ནས་རིམ་གྱིས་གཞོལ་ཞིང་། བབ་པར་འཇུག་པ་དེ་ཉིད་ཀྱིས་ཀྱང་། དམིགས་པ་ཐམས་ཅད་སྒྱུར་བར་བྱེད་དོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་རྒྱ་མཚོ་ཆེན་པོ་དེ་ཉིད་རབ་ཏུ་གནས་པ་ན། གཟོད་མ་ཉིད་ནས་འགྲོ་བ་ཐམས་ཅད་ཀྱི་རྒྱ་ཉིད་དུ་རབ་ཏུ་གནས་སོ། །ཤ་ར་དྭ་ཏིའི་བུ། དེ་བཞིན་དུ་བྱང་ཆུབ་ཀྱི་སེམས་བསྐྱེད་པ་རབ་ཏུ་གནས་པ་ན། གཟོད་མ་ཉིད་ནས་འགྲོ་བ་ཐམས་ཅད་ཀྱི་རྒྱ་ཉིད་དུ་རབ་ཏུ་གནས་སོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་རྒྱ་མཚོ་ཆེན་པོ་དེ་ཉིད་རབ་ཏུ་གནས་པ་ན། གཟོད་མ་ཉིད་ནས་རིན་པོ་ཆེའི་གླིང་རྒྱུན་མི་འཆད་པ་ཉིད་དུ་རབ་ཏུ་གནས་སོ། །ཤ་ར་དྭ་ཏིའི་བུ། དེ་བཞིན་དུ་བྱང་ཆུབ་སེམས་དཔའི་སེམས་བསྐྱེད་པ་རབ་ཏུ་གནས་པ་ན། གཟོད་མ་ཉིད་ནས་དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། བསམ་
གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རིན་པོ་ཆེ་དག་རབ་ཏུ་གནས་པར་བྱེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་རྒྱ་མཚོ་ཆེན་པོའི་དཔེ་རབ་ཏུ་བཞག་པ་དང། སྤོབས་པ་དཔག་ཏུ་མ་མཆིས་པ་མངོན་པར་སྒྲུབ་པའི་ཚུལ་གྱིས་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་སེམས་རབ་ཏུ་བཞག་པ་ནི་ངོ་མཚར་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ། འདི་ནི་དེ་བཞིན་གཤེགས་པས་དཔེ་ཙམ་ཞིག་མཛད་པའོ། །ཤ་ར་དྭ་ཏིའི་བུ། བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་ནི། རྒྱ་མཚོ་ཆེན་པོའི་དཔེའི་ཚད་མ་ཡིན་ནོ། །ཤ་ར་དྭ་ཏིའི་བུ། བྱང་ཆུབ་སེམས་དཔའི་སེམས་བསྐྱེད་པ་ནི། དམིགས་པའི་སྤོབས་པ་དཔག་ཏུ་མེད་པའོ། །ཤ་ར་དྭ་ཏིའི་བུ། དེ་བཞིན་གཤེགས་པ་ནི་དམིགས་པའི་སྤོབས་པ་གཅིག་པ་མ་ཡིན་གྱི། དམིགས་པའི་སྤོབས་པ་དཔག་ཏུ་མེད་པའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སེམས་བསྐྱེད་པ་ནི། ངས་སྤོབས་པ་དཔག་ཏུ་མེད་པ་ཉིད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་གནས་པའི་དམིགས་པས་ཡོངས་སུ་བཞག་པའི་ཕྱིར་རོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ། བྱང་ཆུབ་ཀྱི་སེམས་བསྐྱེད་པ་ཡོངས་སུ་གནས་པ་དེ་དེ་དང་འདྲ་བའི་ཕྱིར་ཏེ། འདི་ལྟར་དེ་ལས་བརྩམས་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བསྐལ་པའམ། བསྐལ་པ་ལས་ལྷག་པའམ། དེ་བས་ཀྱང་ལྷག་པར་བསྟན་ཀྱང་། བྱང་ཆུབ་སེམས་དཔའི་སེམས་བསྐྱེད་པ་དེ་ནི་ཟད་པའམ། ཡོངས་སུ་ཉམས་པར་མི་འགྱུར་རོ། །
དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་བྱང་ཆུབ་སེམས་དཔའི་སེམས་བསྐྱེད་པ་དེ་ནི་ཐུལ་བར་དཀའ་བའི་བྱ་བ་དང་། བསྙེན་པར་དཀའ་བའི་བྱ་བ་དང་། མངོན་དུ་འཕགས་པའི་བྱ་བ་དང་། སེམས་ཅན་བདེ་བར་བྱེད་པའི་བྱ་བ་དང་། ཉམས་དགའ་བར་བྱེད་པའི་བྱ་བ་དང་། དགའ་བའི་བྱ་བ་དང་། ཁམས་གསུམ་འགྱུར་བའི་བྱ་བ་དང་། ཡེ་ཤེས་ཆེན་པོ་འགྱུར་བའི་བྱ་བ་དང་། གཏིང་དཔག་དཀའ་བའི་བྱ་བ་དང་། མ་ཆགས་པའི་བྱ་བ་དང་། སྣང་བ་ཆེན་པོའི་བྱ་བ་དེ་འདྲ་བའི་བྱ་བས་ཡོངས་སུ་གནས་པའི་ཕྱིར་ཏེ། ཤ་ར་དྭ་ཏིའི་བུ། མདོར་ན་བྱང་ཆུབ་སེམས་དཔའི་སེམས་བསྐྱེད་པ་ནི་བྱ་བ་དེ་འདྲ་བས་བགྲང་བའི་མཐའ་བྱ་བར་མི་ནུས་སོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་གནས་པ་ན། འཇིག་རྟེན་གྱི་ཁམས་དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་གིས་ཉེ་བར་སྤྱད་པར་བྱ་བའི་ཕྱིར་རབ་ཏུ་གནས་པ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ་བྱང་ཆུབ་སེམས་དཔའི་སེམས་བསྐྱེད་པ་རབ་ཏུ་གནས་པ་ན། དེ་ནི་སེམས་ཅན་གྲངས་མེད་དཔག་ཏུ་མེད་པའི་ཡེ་ཤེས་ཉེ་བར་སྤྱོད་པའི་གནས་སུ་གྱུར་པ་ཡིན་པར་གནས་པ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་རིའི་རྒྱལ་པོ་རི་རབ་རབ་ཏུ་གནས་པ་ན། ཤ་ར་དྭ་ཏིའི་བུ་ལྷའི་བུ་སྟོང་ཕྲག་མང་པོའི་གནས་ཡིན་པར་འགྱུར་བ་དང་། དེ་ལ་གནས་ནས་སུམ་ཅུ་རྩ་གསུམ་པའི་ལྷ་རྣམས་ཀྱིས་ལྷ་མ་ཡིན་གྱི་དམག་མང་པོ་ཕམ་པར་བྱེད་པར་འགྱུར་བ་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ་བྱང་ཆུབ་སེམས་དཔའི་སེམས་བསྐྱེད་པ་རབ་ཏུ་གནས་པ་ན། དེ་ནི་ཉན་ཐོས་གྲངས་མེད་དཔག་ཏུ་མེད་པའི་གནས་ཡིན་པར་འགྱུར་རོ། །དེ་ལ་གནས་ནས་ལྷ་རྣམས་ཀྱིས་ལྷ་མ་ཡིན་གྱི་དམག་དག་ཕམ་པར་བྱེད་པར་འགྱུར་བ་ཇི་ལྟ་བ་དེ་བཞིན་དུ། ཤ་ར་དྭ་ཏིའི་བུ་དེ་ལ་གནས་ནས་སེམས་ཅན་དཔག་ཏུ་མེད་པ་གཞན་དག་གིས་ཀྱང་བློ་གྲོས་སྦྱང་དཀའ་བའི་བདུད་ཀྱི་དཔུང་དག་ཀྱང་ཕམ་པར་བྱེད་པར་
འགྱུར་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་རིའི་རྒྱལ་པོ་ཁོར་ཡུག་ཆེན་པོ་དག་རབ་ཏུ་གནས་པ་ན། སེམས་ཅན་གང་དག་ཁོངས་སུ་གཏོགས་པ་དེ་དག་ཐམས་ཅད་ནི་ཐོགས་པ་མེད་པར་འགྲོ་བའི་རླུང་གི་དཀྱིལ་འཁོར་དག་གིས་ཐུལ་བར་དཀའ་བར་འགྱུར་བ་ཡིན་པར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བྱང་ཆུབ་སེམས་དཔའི་སེམས་བསྐྱེད་པར་རབ་ཏུ་གནས་པ་ན། གནས་ཀྱི་འདུ་ཤེས་ཅན་སེམས་ཅན་གང་དག་བྱང་ཆུབ་སེམས་དཔའི་ཁོངས་སུ་གཏོགས་པ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་དེ་དག་ནི་ཉོན་མོངས་པའི་རླུང་གི་དཀྱིལ་འཁོར་ཐམས་ཅད་ཀྱིས་ཐུལ་བར་དཀའ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་རིའི་རྒྱལ་པོ་གངས་རི་རབ་ཏུ་གནས་པ་ན། དེ་ནི་སྨན་ཐམས་ཅད་ཀྱི་གནས་སུ་གྱུར་པར་རབ་ཏུ་གནས་པ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ་བྱང་ཆུབ་སེམས་དཔའི་སེམས་བསྐྱེད་པར་རབ་ཏུ་གནས་པ་ན། ཤ་ར་དྭ་ཏིའི་བུ་སེམས་ཅན་གྲངས་མེད་དཔག་ཏུ་མེད་པའི་ཉོན་མོངས་པའི་ནད་ཡང་དག་པར་གཞོམ་པར་བྱ་བའི་ཕྱིར། ཡེ་ཤེས་ཆེན་པོའི་སྨན་དེ་རབ་ཏུ་གནས་པ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་རིན་པོ་ཆེའི་འབྱུང་གནས་ཆེན་པོ་རབ་ཏུ་གནས་པ་ན། དེ་ནི་སེམས་ཅན་འབུམ་ཕྲག་མང་པོ་ལ་ཕན་འདོགས་པར་གྱུར་པ་ཡིན་པར་འགྱུར་བ་དང་། ཀུན་བགེད་པ་ཡིན་པར་འགྱུར་བ་དང་། འདུ་བ་ཡིན་པར་འགྱུར་བ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ། བྱང་ཆུབ་སེམས་དཔའི་སེམས་བསྐྱེད་པ་རབ་ཏུ་གནས་པ་ན། དེ་ནི་སེམས་ཅན་གྲངས་མེད་དཔག་ཏུ་མེད་པ་ལ་ཕན་འདོགས་པ་ཡིན་པར་འགྱུར་བ་དང་། དེ་ནི་འདི་ལྟ་སྟེ། ཆོས་དཀོན་མཆོག་གི་རྗེས་སུ་སྤྱོད་པ་ཉིད་ཀྱིས་ཀུན་བགེད་པ་ཡིན་པར་འགྱུར་བ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་ཉི་མའི་གཞལ་མེད་ཁང་དང་། དེ་ལ་ལྷའི་བུ་ཉི་མ་གནས་
པར་བྱེད་པ་རབ་ཏུ་གནས་པ་ན། ཤ་ར་དྭ་ཏིའི་བུ་དེ་ནི་གླིང་བཞི་པ་ཐམས་ཅད་དུ་སྣང་བ་ཡིན་པར་འགྱུར་བ་དང་། འོད་དུ་འགྱུར་བ་ཡིན་པ་དང་། ཚ་བ་ཡིན་པར་འགྱུར་བ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ། དེ་བཞིན་དུ་བྱང་ཆུབ་སེམས་དཔའི་སེམས་བསྐྱེད་པ་དང་། བྱང་ཆུབ་སེམས་དཔའི་ཡེ་ཤེས་ཆེན་པོའི་གནས་ཐེག་པ་ཆེན་པོ་ལ་མངོན་པར་ཞོན་ཞིང་། གནས་པར་བྱེད་པ་རབ་ཏུ་གནས་པ་ན། དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སྣང་བ་བྱེད་པ་ཡིན་པར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་ཀླུའི་རྒྱལ་པོ་མ་དྲོས་པའི་གནས་རབ་ཏུ་གནས་པ་ན། ཤ་ར་དྭ་ཏིའི་བུ་ཀླུའི་རྒྱལ་པོ་ཆེན་པོ་དེ་དེར་གནས་པར་བྱེད་པར་འགྱུར་བ་དང་། ཕྱོགས་བཞིར་ཆུ་ཀླུང་ཆེན་པོ་བཞི་ཡང་གཏོང་བར་འགྱུར་བ་དང་། དེ་དག་གིས་རྐང་གཉིས་པ་དང་། རྐང་བཞི་པ་དག་གི་སྐོམ་པས་འཇིགས་པའི་དོན་བྱེད་པར་འགྱུར་བ་དང་། འབྲུ་དང་། སྨན་དང་། ཤིང་ལྗོན་པ་དང་། ནགས་ཚལ་དག་མངོན་པར་སྐྱེད་པར་འགྱུར་བ་དང་། རིན་པོ་ཆེའི་འབྱུང་གནས་རྒྱ་མཚོ་ཆེན་པོ་ཡང་ཀུན་དུ་ཚིམ་པར་བྱེད་པར་འགྱུར་བ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ། བྱང་ཆུབ་སེམས་དཔའི་སེམས་བསྐྱེད་པ་དེ་རབ་ཏུ་གནས་པ་ན། བྱང་ཆུབ་སེམས་དཔའ་དེ་དེ་ལ་གནས་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཆོས་ཀྱི་ཆུ་ཀླུང་རྣམ་པ་བཞི་པོ་འདི་ལྟ་སྟེ། དོན་སོ་སོ་ཡང་དག་པར་རིག་པའི་ཆུ་ཀླུང་དང་། ཆོས་སོ་སོ་ཡང་དག་པར་རིག་པའི་ཆུ་ཀླུང་དང་། ངེས་པའི་ཚིག་སོ་སོ་ཡང་དག་པར་རིག་པའི་ཆུ་ཀླུང་དང་། སྤོབས་པ་སོ་སོ་ཡང་དག་པར་རིག་པའི་ཆུ་ཀླུང་དག་གཏོང་བར་བྱེད་པར་འགྱུར་བ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། འཕགས་པའི་ལམ་ཡན་ལག་བརྒྱད་པའི་སྒྲ་དབྱངས་ཀྱི་ང་རོ་ཅན་གྱི་ཆོས་དཀོན་མཆོག་གི་ཆུ་དེ་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་གྱི་ཆུས་སེམས་ཅན་གྲངས་མེད་
དཔག་ཏུ་མེད་པ་དུ་མའི་ཉོན་མོངས་པའི་སྲེད་པ་རྒྱུན་བཅད་ནས། རྒྱ་མཚོ་ཆེན་པོའི་ཆུ་ཀླུང་ཆེན་པོ་བཞིན་དུ། འདོད་ཆགས་དང་བྲལ་བའི་མཐའི་རྒྱ་མཚོ་ཆེན་པོ་ཚིམ་པར་བྱེད་པར་འགྱུར་བ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ། བྱང་ཆུབ་སེམས་དཔའི་སེམས་བསྐྱེད་པ་དེ་ཇི་སྲིད་དུ་རབ་ཏུ་གནས་པ་ནི་ཆེན་པོའི་བྱ་བ་དང་། བསྙེན་པར་དཀའ་བའི་བྱ་བ་དང་། མི་མཉམ་པ་དང་མཉམ་པའི་བྱ་བས་རབ་ཏུ་གནས་ཏེ། ཤ་ར་དྭ་ཏིའི་བུ་དེ་ནི་དེ་བཞིན་གཤེགས་པས་ཀྱང་ཚིག་གིས་བསྟན་པར་མི་སྤྱོད་དོ། །ཤ་ར་དྭ་ཏིའི་བུ་དེ་ལྟ་བས་ན། གང་སེམས་ཅན་དེ་ལྟ་བུའི་ཆོས་དང་ལྡན་པའི་གཏམ་གྱིས་རངས་པར་བྱེད་ཅིང་ཡང་དག་པར་འཛིན་དུ་འཇུག་ལ་ཡང་དག་པར་གཟེངས་སྟོད་པའི་རིགས་ཀྱི་བུའམ་རིགས་ཀྱི་བུ་མོ་དེ་ནི་ཤ་ར་དྭ་ཏིའི་བུ་བསོད་ནམས་ཀྱི་ཕུང་པོ་ཆེན་པོ་དཔག་ཏུ་མེད་པ་བསྐྱེད་པ་ཡིན་ནོ། །ཤ་ར་དྭ་ཏིའི་བུ་བསོད་ནམས་ཀྱི་ཕུང་པོ་དེའི་བསོད་ནམས་ཀྱི་མཐའ་ནི་ཡོངས་སུ་མྱ་ངན་ལས་མ་འདས་ཀྱི་བར་དུ་དེ་བཞིན་གཤེགས་པས་ཀྱང་བསྟན་པར་མི་སྤྱོད་དེ། ཐེག་པ་གང་དང་གང་དུ་ཡོངས་སུ་བསྔོས་པ་དེ་དང་དེར་ཡང་འགྲུབ་པར་འགྱུར་རོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན། དེ་བཞིན་གཤེགས་པ་ལ་ཕུལ་བའི་སྦྱིན་པ་དང་། དེ་བཞིན་གཤེགས་པ་ལ་བསྐྱེད་པའི་དགེ་བའི་རྩ་བ་དག་ནི་ཡོངས་སུ་མྱ་ངན་ལས་མ་འདས་ཀྱི་བར་དུ། བར་མ་དོར་ཡོངས་སུ་ཟད་པར་ཡང་དག་པར་རྗེས་སུ་མ་མཐོང་ངོ་། །ཤ་ར་དྭ་ཏིའི་བུ་དེ་བཞིན་དུ། ཆོས་དང་ལྡན་པའི་གཏམ་གྱིས་བྱང་ཆུབ་སེམས་དཔའ་རངས་པར་བྱས་ཤིང་། ཡང་དག་པར་འཛིན་དུ་བཅུག་པས། ཡོངས་སུ་མྱ་ངན་ལས་འདས་པ་ཆེན་པོ་མ་ཡིན་གྱི་བར་དུ་བར་མ་དོར་ཡོངས་སུ་ཟད་པའམ། ཡོངས་སུ་གཏུགས་པར་ཡང་དག་པར་རྗེས་སུ་མ་མཐོང་སྟེ། ཤ་ར་དྭ་ཏིའི་བུ། རྣམ་གྲངས་དེས་ན་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ། སྔོན་བྱུང་བ་འདས་པའི་དུས་ན། གང་བྱུང་བ་དེའི་ཚེ་དེའི་དུས་ན། བྱང་ཆུབ་སེམས་དཔའ་རྒྱལ་པོའི་གཞོན་ནུ་ཆོས་ཡོངས་སུ་ཚོལ་འདོད་པ་ཞེས་བྱ་བ་བྱུང་བར་གྱུར་
ཏོ། །ཤ་ར་དྭ་ཏིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཡོངས་སུ་ཚོལ་འདོད་པ་དེས། ལེགས་པར་སྨྲས་པ་ཇི་སྙེད་ཐོས་པ་དེ་དག་ཐམས་ཅད་བྲིས་ཤིང་། བླངས་ལ། བརྗོད་དེ། ཐམས་ཅད་ཀུན་དུ་བཟུང་ངོ་། །དེས་ཀྱང་དེའི་ཚེ། བྱང་ཆུབ་སེམས་དཔའ་ཆོས་ཡོངས་སུ་ཚོལ་འདོད་པ། ཆོས་ཡོངས་སུ་ཚོལ་བ་ལ་མངོན་པར་བརྩོན་པས། གྲོང་ནས་གྲོང་དང་། གྲོང་ཁྱེར་ནས་གྲོང་ཁྱེར་དང་། གྲོང་རྡལ་ནས་གྲོང་རྡལ་དང་། ལྗོངས་ནས་ལྗོངས་སུ། ཆོས་ཡོངས་སུ་ཚོལ་བ་ལ་མངོན་པར་བརྩོན་ཞིང་། ཡོངས་སུ་བཙལ་ཏོ། །དེའི་ཚེ། མི་གཅིག་ཅིག་རིའི་བྱ་སྐྱིབས་ན་འདུག་པར་གྱུར་ཏེ། དེས་བྱང་ཆུབ་སེམས་དཔའ་ཆོས་ཡོངས་སུ་ཚོལ་འདོད་པ་ལ་སྨྲས་པ། གཞོན་ནུ་ཚུར་ཤོག་དང་། ཁོ་བོས་ཁྱོད་ལ་དེ་བཞིན་གཤེགས་པའི་མཚན་དང་ལྡན་པའི་གཏམ་བྱའོ། །དེ་ནས་ཆོས་ཡོངས་སུ་ཚོལ་འདོད་པས། རིའི་བྱ་སྐྱིབས་ན་འདུག་པའི་མི་ག་ལ་བ་དེར་སོང་སྟེ་ཕྱིན་ནས་སྨྲས་པ། དེ་བཞིན་གཤེགས་པའི་མཚན་དང་ལྡན་པའི་གཏམ་རབ་ཏུ་སྟོན་ཅིག །དེས་སྨྲས་པ། གཞོན་ནུ་ཚིགས་སུ་བཅད་པ་དེ་ནི་རིན་མེད་པར་ཁོ་བོ་ཡང་དག་པར་རབ་ཏུ་མི་སྟོན་ཏོ། །ཤ་ར་དྭ་ཏིའི་བུ་དེའི་ཚེ་རྒྱལ་པོའི་གཞོན་ནུ་དེས། གོས་རིན་ཐང་བྱེ་བ་ཕྲག་ཉི་ཤུ་རི་བ་ལུས་ལ་གྱོན་པར་གྱུར་ཅིང་། ནོར་བུ་རིན་པོ་ཆེ་རིན་ཐང་བྱེ་བ་ཕྲག་བཞི་བཅུ་རི་བ་ཡང་ལུས་ལ་བཏགས་པར་གྱུར་ཏོ། །དེ་ནས་འདོད་པས་ཟིལ་གྱིས་ནོན་པའི་མི་བརྐམ་ཆགས་པ་དེ་འདི་སྙམ་དུ་སེམས་ཏེ། གལ་ཏེ་བདག་ལ་རྒྱལ་པོའི་གཞོན་ནུ་དེས་གོས་དེ་དང་། ནོར་བུ་རིན་པོ་ཆེ་དེ་བྱིན་པར་གྱུར་ན། དེ་ལྟ་ན་བདག་གིས་དེ་ལ་ཚིགས་སུ་བཅད་པ་དེ། ཡང་དག་པར་རབ་ཏུ་བསྟན་པར་བྱའོ། །སྙམ་མོ། །དེ་ནས་ཆོས་ཡོངས་སུ་ཚོལ་འདོད་པའི་མིས་མི་དེ་ལ་སྨྲས་པ། ཀྱེ་མི་ཁྱོད་ལ་ཅི་དགོས། དེ་སྨྲོས་ཤིག་དང་། ཁོ་བོས་ཁྱོད་ལ་སྦྱིན་པར་བྱའོ། །ཁྱོད་ཀྱིས་ཀྱང་ཁོ་བོ་ལ་སངས་རྒྱས་དང་ལྡན་པའི་ཚིགས་སུ་བཅད་པ་དེ་ཡང་དག་པར་རབ་ཏུ་སྟོན་ཅིག །
དེ་ནས་མི་དེས་སྨྲས་པ། གཞོན་ནུ་གལ་ཏེ། ཁྱོད་ཀྱིས་ཇི་ལྟར་བགོས་པའི་གོས་དང་ནོར་བུ་རིན་པོ་ཆེ་དེ་བྱིན་ཞིང་བྱིན་ནས་ཀྱང་བྱ་སྐྱིབས་འདི་ནས་བདག་ཉིད་བོར་ན། དེ་ལྟ་ན་ཁོ་བོས་ཁྱོད་ལ་ཚིགས་སུ་བཅད་པ་དེ་ཡང་དག་པར་རབ་ཏུ་བསྟན་པར་བྱའོ། །ཤ་ར་དྭ་ཏིའི་བུ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཡོངས་སུ་ཚོལ་འདོད་པས། མི་དེ་ལ་སྨྲས་པ། ཀྱེ་མི་ཁྱོད་ལ་དོན་དུ་འགྱུར་ན། བདག་གིས་རིའི་བྱ་སྐྱིབས་འདི་ནས་བདག་ཉིད་དོར་བར་བྱའོ། །དེས་སྨྲས་པ། གཞོན་ནུ་བདག་ལ་དོན་དུ་གང་ཡང་མི་འགྱུར་མོད་ཀྱི། འོན་ཀྱང་གང་གི་ཚེ། ཁྱོད་ཀྱིས་ཁོ་བོ་ལ་གོས་དེ་དང་། ནོར་བུ་རིན་པོ་ཆེ་དེ་བྱིན་པར་གྱུར་ལ། དེའི་ཚེ་ཁྱོད་ཀྱིས་ཚིགས་སུ་བཅད་པ་དེ་ཐོས་ནས་འགྱོད་པར་གྱུར་ཏེ། དབང་གི་ཡང་འཕྲོག་པར་འགྱུར་རོ། །དེ་ནས་བྱང་ཆུབ་སེམས་དཔའ་ཆོས་ཡོངས་སུ་ཚོལ་འདོད་པས། མི་དེ་ལ་སྨྲས་པ། ཀྱེ་མི་ཁྱོད་ཚིགས་སུ་བཅད་པ་དེ་ཁོ་བོ་ལ་སྟོན་ཅིག་དང་། ཁོ་བོས་ཁྱོད་ལ་བྱིན་ནས་འགྱོད་པར་མི་བྱའོ། །མི་དེས་སྨྲས་པ། གཞོན་ནུ་ཁྱོད་དམ་བཅས་པ་ལ་མི་གནས་པ་དེ་ཉིད་ཀྱི་ཚེ། ཁྱོད་འགྱོད་པར་བྱེད་པ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཡོངས་སུ་ཚོལ་འདོད་པས། མི་དེ་ལ་སྨྲས་པ། ཀྱེ་མི་དེའི་ཕྱིར། གལ་ཏེ་ཁྱོད་དེ་ལྟར་སེམས་ན་དེ་ཡོངས་སུ་རྫོགས་པར་བྱས། སངས་རྒྱས་དང་ལྡན་པའི་ཚིགས་སུ་བཅད་པ་དེ་ཁོ་བོ་ལ་སྟོན་ཅིག་དང་། ཁོ་བོས་ཁྱོད་ལ་གོས་རིན་པོ་ཆེ་དེ་དང་། ནོར་བུ་རིན་པོ་ཆེ་དེ་སྦྱིན་པར་བྱའོ། །ཚིགས་སུ་བཅད་པ་དེ་ཐོས་ནས་ཀྱང་། རིའི་བྱ་སྐྱིབས་འདི་ནས་བདག་ཉིད་དོར་བར་བྱའོ། །ཤ་ར་དྭ་ཏིའི་བུ་མི་དེས་བྱང་ཆུབ་སེམས་དཔའ་དེ་ལ་སངས་རྒྱས་ཀྱི་མཚན་དང་ལྡན་པའི་ཚིགས་སུ་བཅད་པ་དེ་བསྟན་ཏོ། །ཤ་ར་དྭ་ཏིའི་བུ་ཐོས་མ་ཐག་ཏུ་ཡང་གཞོན་ནུ་ཆོས་ཡོངས་སུ་ཚོལ་འདོད་པས། མི་དེ་ལ་གོས་དེ་དང་ནོར་བུ་རིན་པོ་ཆེ་དེ་བྱིན་ཏེ། བདེན་པ་དང་བདེན་པའི་ཚིག་གང་གིས་འགྱོད་པ་མེད་ཅིང་། གདུང་
བ་མེད་པར་གོས་རིན་པོ་ཆེ་དེ་དང་། ནོར་བུ་རིན་པོ་ཆེ་དེ་བྱིན་པའི་བདེན་པ་དང་། བདེན་པའི་ཚིག་དེས་མ་སྣད་པ་ཉིད་དང་། མ་སྨས་པ་ཉིད་དུ་ས་ལ་འདུག་པར་གྱུར་ཅིག་ཅེས་བདེན་པའི་བྱིན་གྱིས་རླབས་ཀྱང་བྱས་སོ། །དེས་བདེན་པའི་བྱིན་གྱི་རླབས་དེ་ལྟ་བུ་དེ་བྱས་ནས། བྱ་སྐྱིབས་དེ་ནས་བདག་ཉིད་བོར་རོ། །དེས་ལུས་དེ་བོར་མ་ཐག་ཏུ་དེ་ནས་དེ་ཉིད་ཀྱི་ཚེ། རྒྱལ་པོ་ཆེན་པོ་བཞིས་ཡོངས་སུ་བཟུང་སྟེ། བདེ་བར་མྱུར་བ་ཁོ་ནར་ས་ལ་བཞག་གོ །དེ་ནས་བྱང་ཆུབ་སེམས་དཔའ་ཆོས་ཡོངས་སུ་ཚོལ་འདོད་པས་མི་དེ་ལ་སྨྲས་པ། ཀྱེ་མི་དེ་ཙམ་དུ་ལེགས་པར་སྨྲས་པའི་ཚིག་དེ་དང་། དེ་ཙམ་དུ་དོན་བཟང་པོ་དང་། ཚིག་འབྲུ་བཟང་པོ་ནི་ངོ་མཚར་ཏོ། །ཤ་ར་དྭ་ཏིའི་བུ་དེ་ནས་མི་དེ་མྱུར་བ་མྱུར་བར་བྱ་སྐྱིབས་དེ་ནས་བབས་ནས། བྱང་ཆུབ་སེམས་དཔའ་ཆོས་ཡོངས་སུ་ཚོལ་འདོད་པ། དེ་ག་ལ་བ་དེར་སོང་ནས་འདི་སྐད་ཅེས་སྨྲས་སོ། །རྒྱལ་པོའི་གཞོན་ནུ་ཁྱོད་ཀྱིས་ཇི་ཙམ་དུ་གྱ་ཚོམ་དུ་བྱས་པ་ནི་ངོ་མཚར་ཏོ། །རྒྱལ་པོའི་གཞོན་ནུ་ཁྱོད་ཆོས་ཇི་ལྟ་བུ་ཞིག་འདོད། དེས་སྨྲས་པ། ཀྱེ་མི་ཁོ་བོས་ནི་སེམས་ཅན་མ་རྒལ་བ་རྣམས་བསྒྲལ་བར་བྱ་ཞིང་། མ་གྲོལ་བ་རྣམས་གྲོལ་བར་བྱ། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བྱའོ། །ཤ་ར་དྭ་ཏིའི་བུ་མི་དེ་བྱང་ཆུབ་སེམས་དཔའི་ཚིག་དེ་ལ། མངོན་པར་ཡིད་ཆེས་ནས་དེ་དགའ་སྟེ། བྱང་ཆུབ་སེམས་དཔའ་དམ་པའི་ཆོས་ཡོངས་སུ་ཚོལ་འདོད་པ་ལ་སྨྲས་པ། གཞོན་ནུ་དེའི་ཕྱིར་ཁོ་བོས་ཁྱོད་ལ། གོས་རིན་པོ་ཆེ་དེ་དང་། ནོར་བུ་རིན་པོ་ཆེ་དེ་ཕྱིར་སྦྱིན་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་གོས་དེ་དང་། ནོར་བུ་རིན་པོ་ཆེ་དེ་ནི་ཁྱོད་དང་འཚམ་པའི་ཕྱིར་རོ། །དེས་སྨྲས་པ། ཀྱེ་མི་བྱིན་ནས། ཕྱིར་ལེན་པ་དེ་ནི་ཁོ་བོའི་ཆ་མ་ཡིན་ནོ། །མི་དེས་སྨྲས་པ། རྒྱལ་པོའི་གཞོན་ནུ་ཁྱོད་དེའི་ཕྱིར་དེའི་ཚེ། ཁྱོད་ཁོ་བོའི་སྐྱབས་བྱེད་པར་འགྱུར་རོ། །ཤ་ར་དྭ་ཏིའི་བུ་དེའི་ཚེ་དེའི་དུས་ན། བྱང་ཆུབ་སེམས་དཔའ་ཆོས་ཡོངས་སུ་ཚོལ་འདོད་པ་དེ་གཞན་
ཞིག་ཡིན་པ་སྙམ་དུ་སོམ་ཉིའམ། ཡིད་གཉིས་ཟ་བར་གྱུར་ན། ཁྱོད་ཀྱིས་དེ་ལྟར་བལྟ་བར་མི་བྱའོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་དེའི་ཚེ་དེའི་དུས་ན། ང་ནི་རྒྱལ་པོའི་གཞོན་ནུ་ཆོས་ཡོངས་སུ་ཚོལ་འདོད་པ་ཞེས་བྱ་བར་གྱུར་ཏོ། །ཤ་ར་དྭ་ཏིའི་བུ། དེའི་ཚེ་དེའི་དུས་ན་མི་ཞིག་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ན། ཁྱོད་ཀྱིས་དེ་ལྟར་བལྟ་བར་མི་བྱའོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་དེའི་ཚེ་དེའི་དུས་ན། དེ་ང་ལས་དད་པ་རྙེད་ཅིང་འདི་སྐད་དུ་སྐྱབས་བྱེད་པར་འགྱུར་རོ། །ཞེས་ཚིག་སྨྲ་བའི་མི་བྱུང་བ་དེ་ནི་བག་ཀ་ལི་ཡིན་ནོ། །ཤ་ར་དྭ་ཏིའི་བུ། དགེ་སློང་བག་ཀ་ལི་ནི་ད་ལྟར་ཡང་། ང་དགེ་སློང་གི་དགེ་འདུན་དང་ཐབས་ཅིག་ཏུ་ནམ་མཁའ་ལས་འགྲོ་བའི་ལམ་ནས་གཤེགས་པ་ན། རིའི་བྱ་སྐྱིབས་ན་འཆག་པར་གྱུར་ཏེ། ངས་ཀྱང་བག་ཀ་ལི་ཚུར་ཤོག་ཅེས་བརྗོད་པ་དང་། དེས་ཏིང་ངེ་འཛིན་གྱི་གྲོལ་བ་བསྐྱེད་དེ། བྱ་སྐྱིབས་དེ་ནས་བདག་ཉིད་བོར་ནས། ནམ་མཁའ་ལ་འདུག་བཞིན་དུ་མངོན་པར་ཤེས་པ་དྲུག་མངོན་དུ་བྱས་སོ། །ཤ་ར་དྭ་ཏིའི་བུ་བསོད་ནམས་ཀྱི་ཕུང་པོ་དེ་ཡུན་ཇི་སྲིད་ནས་རྗེས་སུ་འབྲངས་ཤིང་། ང་ལ་ཚིག་བཞི་པའི་ཚིགས་སུ་བཅད་པ་གཅིག་ཡང་དག་པར་བསྟན་པས་དགེ་བའི་རྩ་བ་དེ་དང་། ལས་ཀྱི་རྣམ་པར་སྨིན་པ་དེས་ང་ལས་དད་པ་རྙེད་ཅིང་། ང་ལ་མོས་པས་མྱུར་བ་དེ་ལྟ་བུར་རྣམ་པར་གྲོལ་ལ། ང་ཉིད་ཀྱིས་དེའི་སྐྱབས་བྱས་པ་ལ་ལྟོས། ཤ་ར་དྭ་ཏིའི་བུ། མི་དེའི་འདོད་པ་སྔོན་དུ་འགྲོ་བའི་སེམས་ཀྱིས་དགེ་བའི་རྩ་བ་དེ་མངོན་པར་འདུས་བྱས་ཤིང་། འབྲས་བུ་དེ་སྙེད་མངོན་པར་འགྲུབ་པར་བྱ་བའི་ཕྱིར་བྱུང་བ་ལ་ལྟོས། གང་དག་ཏིང་ངེ་འཛིན་གྱི་གྲོལ་བ་བསྐྱེད་ཅིང་ངེས་པར་བརྟགས་ནས། སངས་རྒྱས་ཀྱི་ཡེ་ཤེས་དེ་གཏིང་དཔོག་པར་བྱེད་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རངས་པར་བྱེད་ཅིང་། ཡང་དག་པར་འཛིན་དུ་འཇུག་ལ། ཡང་དག་པར་གཟེངས་སྟོད་པ་དང་། ཐ་ན་ཚིག་བཞི་པའི་ཚིགས་སུ་བཅད་པ་ཙམ་སྟོན་པ་ལྟ་ཅི་སྨོས།
ཤ་ར་དྭ་ཏིའི་བུ། བསོད་ནམས་ཀྱི་ཕུང་པོ་དེ་ནི། མྱ་ངན་ལས་འདས་པ་ཆེན་པོ་མ་གཏོགས་པར་བར་མ་དོར་ཟད་པའམ། ཡོངས་སུ་གཏུགས་པར་ང་མི་སྨྲའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཆོས་དང་ལྡན་པའི་གཏམ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རངས་པར་བགྱིད་ཅིང་། ཡང་དག་པར་འཛིན་དུ་སྩོལ་ལ། ཡང་དག་པར་གཟེངས་སྟོད་པའི་རིགས་ཀྱི་བུའམ། རིགས་ཀྱི་བུ་མོ་དེ་བཅོམ་ལྡན་འདས་བསོད་ནམས་ཀྱི་ཕུང་པོ་དེ་ལྟ་བུ་བསྐྱེད་ལགས་ན། བཅོམ་ལྡན་འདས་གང་ཞིག་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སེམས་དང་ལྡན་པ། སངས་རྒྱས་ཀྱི་ཆོས་ཀྱི་གྲོང་ཁྱེར་དུ་རྗེས་སུ་འཇུག་པར་འཚལ་བ། མོས་པ་ཟློག་པར་བགྱིད་ཅིང་། རྣམ་པར་གཡེང་བར་བགྱིད་ལ། བར་ཆད་བགྱིད་ན། བཅོམ་ལྡན་འདས་དེ་ཇི་ལྟ་བུར་འགྱུར་ལགས། བཅོམ་ལྡན་འདས་ཀྱིས་གནས་དེ་བསྟན་དུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས་སེམས་ཅན་གང་དག་བྱང་ཆུབ་སེམས་དཔའ་རྣམས་ལ་བར་ཆད་བགྱི་བའི་སླད་དུ་ཞུགས་པ་དེ་དག་གིས་ཐོས་ནས། ནོངས་པ་ལ་ནོངས་པར་འཆགས་པར་འགྱུར་བ་དང་། གང་དག་འཇུག་པར་འགྱུར་བ་དང་། གང་དག་འཇུག་པ་དེ་དག་ཐམས་ཅད་ཀྱིས་ཐོས་ནས། བཅོམ་ལྡན་འདས་ལས་ནོངས་པ་ནོད་པའི་སླད་དུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་གང་བྱང་ཆུབ་སེམས་དཔའ་ལ་བར་ཆད་བྱ་བའི་ཕྱིར་འཇུག་ཅིང་། མོས་པ་ཟློག་པར་བྱེད། རྣམ་པར་གཡེང་བར་བྱེད་ལ། བར་ཆད་བྱེད་པ་དེ་ནི་བསོད་ནམས་མ་ཡིན་པའི་ཕུང་པོ་དང་ལྡན་པར་འགྱུར་རོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་གང་རིན་ཐང་མེད་པའི་ནོར་བུ་རིན་པོ་ཆེ་ཆེན་པོ་ལ་བར་ཆད་བྱེད་པ་དེ་ནི་ནོར་གྱི་ཕུང་པོ་ཆེན་པོ་ལ་བར་ཆད་བྱེད་པ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ་གང་བྱང་ཆུབ་སེམས་དཔའི་བྱང་ཆུབ་ཀྱི་སེམས་
བསྐྱེད་པ་གཅིག་གི་བར་ཆད་བྱེད་པ་དེ་ནི་ཆོས་དཀོན་མཆོག་གི་ཕུང་པོ་འབུམ་ཕྲག་མང་པོ་དཔག་ཏུ་མེད་གྲངས་མེད་པ་དག་གི་བར་ཆད་བྱེད་པ་ཡིན་ནོ། །ཤ་ར་དྭ་ཏིའི་བུ། འདི་ལྟ་སྟེ། དཔེར་ན་གང་སྨན་གྱི་ཤིང་ལྗོན་པ་བསྐྱེད་པ་ལ་བར་ཆད་བྱེད་ཅིང་། ཆུད་གཟན་པར་བྱ་བའི་ཕྱིར་འཇུག་པ་དེ་ནི། ཤ་ར་དྭ་ཏིའི་བུ། སེམས་ཅན་ནད་ཀྱིས་གཟིར་བ་མང་པོ་དཔག་ཏུ་མེད་པ་ལ་བར་ཆད་བྱེད་པ་ཡིན་ཏེ། དེ་ནི་སེམས་ཅན་དེ་དག་ནད་ཆེན་པོ་དེ་ལས་མ་ཐར་བར་འཆི་བའི་དུས་བྱེད་པར་འགྱུར་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ་གང་བྱང་ཆུབ་ཀྱི་སེམས་བསྐྱེད་པ། མཉམ་པ་མེད་པའི་སེམས་བསྐྱེད་པ། ཕན་པ་དང་བདེ་བའི་སེམས་བསྐྱེད་པ། སེམས་ཅན་གྱི་ཉོན་མོངས་པའི་ནད་ཐམས་ཅད་སེལ་བའི་སེམས་བསྐྱེད་པའི་སྨན་ལ་བར་ཆད་བྱེད་པ་དེ་ནི། ཤ་ར་དྭ་ཏིའི་བུ་སེམས་ཅན་གྲངས་མེད་དཔག་ཏུ་མེད་པ། འདོད་ཆགས་དང་། ཞེ་སྡང་དང་། གཏི་མུག་གི་ནད་ཀྱིས་ཡོངས་སུ་གཟིར་བ། ཕྲག་དོག་དང་། སེར་སྣ་དང་། ཁྲོ་བ་དང་། གཡོ་དང་། སྒྱུ་དང་། རྩོད་པ་དང་། ཁྲེལ་མེད་པ་དང་། ཁེངས་པ་དང་། ཉེས་རྩོམ་དང་། རྒྱགས་པ་དང་། བག་མེད་པ་དང་། ང་རྒྱལ་དང་། ལྷག་པའི་ང་རྒྱལ་གྱི་ནད་ཆེན་པོས་གང་བ་རྣམས་མྱ་ངན་ལས་འདས་པ་ཆེན་པོ་དང་། ཉེ་བར་ཞི་བ་དང་། ནད་མེད་པ་དང་། བསིལ་བར་གྱུར་པར་ཉེ་བར་འགྲོ་བ་ནད་ཆེན་པོ་རབ་ཏུ་ཞི་བར་བྱེད་པ་དེ་ལ་བར་ཆད་བྱེད་པ་ཡིན་ནོ ། ཤ་ར་དྭ་ཏིའི་བུ་འདི་ལྟ་སྟེ། དཔེར་ན་གང་མ་དྲོས་པའི་གནས་ལ་བར་ཆད་བྱ་བའི་ཕྱིར་འཇུག་ཅིང་། ཀླུའི་རྒྱལ་པོ་ཆེན་པོ་དེ་ལ་ཡང་བར་ཆད་བྱ་བའི་ཕྱིར་འཇུག་པ་དེ་ནི། ཤ་ར་དྭ་ཏིའི་བུ་རྐང་གཉིས་པ་དང་། རྐང་བཞི་པ་མང་པོའི་སྲེད་པའི་གདུང་བ་ཉེ་བར་ཞི་བར་བྱེད་པ། ཡན་ལག་བརྒྱད་དང་ལྡན་པའི་ཆུ་ལ་བར་ཆད་བྱ་བའི་ཕྱིར་ཞུགས་པ་ཡིན་པར་རིག་པར་བྱའོ། །ཤ་ར་དྭ་ཏིའི་བུ་དེ་བཞིན་དུ། གང་ལ་ལ་བྱང་ཆུབ་སེམས་དཔའི་བྱང་ཆུབ་ཀྱི་སེམས་བསྐྱེད་པ་ལ་བར་ཆད་བྱེད་པ་
དེ་ནི། ཤ་ར་དྭ་ཏིའི་བུ། སེམས་ཅན་གྲངས་མེད། དཔག་ཏུ་མེད་པའི་སྲེད་པ་ཐམས་ཅད་རབ་ཏུ་གཅོད་པར་བྱེད་པ། ཡན་ལག་བརྒྱད་དང་ལྡན་པའི་ཆོས་ཀྱི་རྒྱུན་ལ་བར་ཆད་བྱེད་པ་ཡིན་པར་རིག་པར་བྱའོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་གང་ཉི་མའི་དཀྱིལ་འཁོར་ལ་བར་ཆད་བྱ་བའི་ཕྱིར་འཇུག་པ་དེ་ནི། ཤ་ར་དྭ་ཏིའི་བུ་སེམས་ཅན་གང་དག་གླིང་བཞི་ན་གནས་པ་དེ་དག་གི་སྣང་བ་ཆེན་པོ་མི་སྣང་བར་བྱ་བའི་ཕྱིར་འཇུག་པ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ་གང་བྱང་ཆུབ་ཀྱི་སེམས་བསྐྱེད་པ་ཆོས་ཀྱི་སྣང་བ་ཉེ་བར་གནས་པ་ལ་བར་ཆད་བྱེད་ཅིང་མོས་པ་ཟློག་པ་དང་། མི་ཟློག་པར་བྱེད་པའི་སེམས་ཅན་དེ་ནི། ཤ་ར་དྭ་ཏིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། སེམས་ཅན་གང་དག་ཡོད་པ་དེ་དག་གི་ཆོས་ཀྱི་སྣང་བ་ཆེན་པོ་དང་། ཆོས་ཀྱི་གསལ་བ་ཆེན་པོ་ལ་བར་ཆད་བྱེད་པ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན། མི་ལ་ལས་རིན་པོ་ཆེ་ཐམས་ཅད་ཀྱི་འབྱུང་གནས་ཆུད་གཟོན་པར་བྱེད་ན། ཤ་ར་དྭ་ཏིའི་བུ་དེ་ནི་སེམས་ཅན་གྲངས་མེད་དཔག་ཏུ་མེད་པས་རིན་པོ་ཆེ་རྙེད་པ་ཆུད་གཟན་པར་བྱ་བའི་ཕྱིར་ཉེ་བར་གནས་པ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ་གང་བྱང་ཆུབ་སེམས་དཔའི་སེམས་བསྐྱེད་པ་སེམས་བསྐྱེད་པ་ཆེན་པོ་སངས་རྒྱས་ཀྱི་ཡེ་ཤེས་ཀྱི་སེམས་བསྐྱེད་པ་ནུབ་པར་བྱ་བའི་ཕྱིར་འཇུག་པ་དེ་ནི། ཤ་ར་དྭ་ཏིའི་བུ། སེམས་ཅན་གྲངས་མེད་དཔག་ཏུ་མེད་པའི་ཆོས་དཀོན་མཆོག་འདུ་བ་ཆུད་གཟན་པར་བྱ་བའི་ཕྱིར་ཞུགས་པ་དེ་ལྟ་བུར་རིག་པར་བྱ་བ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ། དཔེར་ན་རིན་པོ་ཆེ་ཐམས་ཅད་ཀྱི་འབྱུང་གནས་དེ་ནས་ནི་རིན་པོ་ཆེ་དེ་དག་ཐམས་ཅད་རབ་ཏུ་འབྱུང་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ། བྱང་ཆུབ་སེམས་དཔའི་སེམས་བསྐྱེད་པ་རིན་པོ་ཆེ་ཐམས་ཅད་ཀྱི་འབྱུང་གནས་དེ་ནི་དེ་ལས་སངས་རྒྱས་ཀྱི་ཆོས་དཀོན་མཆོག་དེ་ལྟ་བུ་དེ་དག་འབྱུང་བ་ཡིན་ནོ། །ཤ་ར་དྭ་ཏིའི་བུ་དེ་ལྟ་
བས་ན་གང་བྱང་ཆུབ་སེམས་དཔའི་སེམས་བསྐྱེད་པ་ནུབ་པར་བྱ་བའི་ཕྱིར་འཇུག་པ་དེ་ནི་བསོད་ནམས་མ་ཡིན་པའི་ཕུང་པོ་ཆེན་པོ་དང་ལྡན་པ་ཡིན་ནོ། ཤ་ར་དྭ་ཏིའི་བུ་འདི་ལྟ་སྟེ་དཔེར་ན་གང་ད་ལྟར་ང་ལ་ངན་སེམས་ཀྱིས་ཁྲག་དབྱུང་བའི་སེམས་སྐྱེད་པར་བྱེད་པ་དང་། གང་ལ་ལ་བྱང་ཆུབ་སེམས་དཔའ་བྱང་ཆུབ་ཀྱི་སེམས་ལས་མོས་པ་ཟློག་པར་བྱེད་ཅིང་བར་ཆད་བྱེད་པ་འདི་ནི་མཚུངས་པ་ཡིན་ནོ། །ཤ་ར་དྭ་ཏིའི་བུ་ཡང་ང་ལ་ཁྲག་དབྱུང་བའི་སེམས་བསྐྱེད་པ་ལྟ་ཞོག་གི། ཤ་ར་དྭ་ཏིའི་བུ་ངས་མཚམས་མེད་པ་ལྔ་པོ་ཤིན་ཏུ་བཟོད་པར་དཀའ་བ། ཐར་བར་དཀའ་བ། ངེས་པར་འབྱུང་བར་དཀའ་བ་བཤད་པ་དེ་བས་ཀྱང་། རིགས་ཀྱི་བུའམ། རིགས་ཀྱི་བུ་མོ་དེ་བསོད་ནམས་མ་ཡིན་པའི་ཕུང་པོ་ཆེས་མང་དུ་བསྐྱེད་དོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་མཚམས་མེད་པ་ལྔ་བྱས་པས་ནི་སངས་རྒྱས་ཀྱི་ཆོས་འགའ་ལ་ཡང་བར་ཆད་བྱས་པ་མ་ཡིན་ལ། བྱང་ཆུབ་སེམས་དཔའི་སེམས་བསྐྱེད་པ་ཆུད་གཟན་པས་ནི་སངས་རྒྱས་ཀྱི་ཆོས་ཐམས་ཅད་ཆུད་གཟན་པར་བྱས་པ་ཡིན་པའི་ཕྱིར་རོ། །ཤ་ར་དྭ་ཏིའི་བུ་འདི་ལྟ་སྟེ་དཔེར་ན་བ་བསད་པས་ནི་འོ་མ་མེད་པར་འགྱུར་བ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ། བྱང་ཆུབ་ཀྱི་སེམས་དང་བ་མེད་པར་བྱས་ཤིང་། ཆུད་གཟན་པས་ནི་སངས་རྒྱས་ཀྱི་ཆོས་ཐམས་ཅད་ཆུད་གཟན་པ་ཡིན་ནོ། །ཤ་ར་དྭ་ཏིའི་བུ། དེ་ལྟ་བས་ན་མཚམས་མེད་པ་ལྔ་པོས་ནི། འདི་ལྟ་སྟེ། བྱང་ཆུབ་ཀྱི་སེམས་ཆུད་གཟོན་པ་འདི་ཉིད་ཆེས་མ་རུངས་པ་ཡིན་ནོ། །ཤ་ར་དྭ་ཏིའི་བུ། མཚམས་མེད་པ་ལྔ་པོ་ལྟ་ཞོག་གི། ཤ་ར་དྭ་ཏིའི་བུ། གླིང་བཞི་པ་ཆེན་པོའི་འཇིག་རྟེན་གྱི་ཁམས་ཇི་སྙེད་ཡོད་པ་དེ་ཐམས་ཅད་དགྲ་བཅོམ་པ་རྣམས་ཀྱིས་གང་བར་གྱུར་ལ། དེ་ནས་མི་ལ་ལ་ཞིག་གིས་དགྲ་བཅོམ་པའི་ཚོགས་དེ་ཐམས་ཅད་སྲོག་དང་ཕྲལ་བར་གྱུར་ན། ཤ་ར་དྭ་ཏིའི་བུ་འདི་ཇི་སྙམ་དུ་སེམས། འོ་ན་མི་དེ་གཞི་དེ་ལས་བསོད་ནམས་མ་ཡིན་པ་མང་དུ་བསྐྱེད་པར་འགྱུར་བ་ཡིན་ནམ། གསོལ་པ། བཅོམ་ལྡན་འདས་མང་
ལགས་སོ། །བཅོམ་ལྡན་འདས་མི་དེས་བསོད་ནམས་མ་ལགས་པའི་ཕུང་པོ་ཤིན་ཏུ་ཆེན་པོ་བསྐྱེད་པར་འགྱུར་ལགས་སོ། །བཀའ་སྩལ་པ། ཤ་ར་དྭ་ཏིའི་བུ་ཁྱོད་མོས་པར་བྱ། ཁོང་དུ་ཆུད་པར་བྱ་སྟེ། ཤ་ར་དྭ་ཏིའི་བུ་མི་དེས་དགྲ་བཅོམ་པའི་ཚོགས་དེ་སྙེད་སྲོག་དང་ཕྲལ་བར་གྱུར་ལ། གང་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་མཁྱེན་པའི་ཐེག་པས་འགྲོ་བ། རྫོགས་པའི་སངས་རྒྱས་ཀྱི་ཆོས་ཀྱི་གྲོང་ཁྱེར་ཆེན་པོར་འཇུག་པར་འདོད་པ། བྱང་ཆུབ་ཀྱི་སེམས་དེ་ལས་མོས་པ་ཟློག་པར་བྱེད་ཅིང་། བྱང་ཆུབ་ཀྱི་སེམས་དེ་ཡང་རྐྱེན་དེས་མོས་པ་བཟློག་པར་དམིགས་ནས་བྱང་ཆུབ་ཀྱི་སེམས་འདོར་བར་བྱེད་ན། ཤ་ར་དྭ་ཏིའི་བུ་བསོད་ནམས་མ་ཡིན་པའི་ཕུང་པོ་སྔ་མ་དེས་ནི་བསོད་ནམས་མ་ཡིན་པའི་ཕུང་པོ་དེ་ལ་བརྒྱའི་ཆར་ཡང་ཉེ་བར་མི་འགྲོ་བ་ནས། རྒྱུའི་བར་དུ་ཡང་མི་བཟོད་དོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་དགྲ་བཅོམ་པའི་ཚོགས་དེ་སྙེད་རབ་ཏུ་རྣམ་པར་བཤིག་པས་ནི་དེ་བཞིན་གཤེགས་པའི་སྟོབས་བཅུ་ཉམས་པར་བྱས་པ་མ་ཡིན། དེ་བཞིན་གཤེགས་པའི་མི་འཇིགས་པ་བཞི་ཉམས་པར་བྱས་པ་མ་ཡིན། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཉམས་པར་བྱས་པ་མ་ཡིན། བྱམས་པ་ཆེན་པོ་ཉམས་པར་བྱས་པ་མ་ཡིན། སྙིང་རྗེ་ཆེན་པོ་ཉམས་པར་བྱས་པ་མ་ཡིན། དེ་བཞིན་གཤེགས་པའི་གླང་པོ་ཆེའི་གཟིགས་སྟངས་ཉམས་པར་བྱས་པ་མ་ཡིན། དེ་བཞིན་གཤེགས་པའི་སེང་གེ་ལྟར་བསྒྱིངས་པ་ཉམས་པར་བྱས་པ་མ་ཡིན། སྤྱི་གཙུག་བལྟར་མི་མཐོང་བ་ཉམས་པར་བྱས་པ་མ་ཡིན། ཆོས་ཀྱི་མུར་འགྲམ་འབུམ་ཕྲག་དུ་མས་ཀུན་ནས་ཡོངས་སུ་གང་བ་ཉམས་པར་བྱས་པ་མ་ཡིན། ཆོས་ཀྱི་འཁོར་ལོ་བསྐོར་བ་བླ་ན་མེད་པ་ཉམས་པར་བྱས་པ་མ་ཡིན། དེ་བཞིན་གཤེགས་པའི་ཁྱུ་མཆོག་ཏུ་གྱུར་པ་ཉམས་པར་བྱས་པ་མ་ཡིན། སེམས་ཅན་གྱི་དབང་པོ་མཆོག་དང་། མཆོག་མ་ཡིན་པ། མཁྱེན་པ། ཉམས་པར་བྱས་པ་མ་ཡིན། མོས་པ་སྣ་ཚོགས་མཁྱེན་པ་ཉམས་པར་བྱས་པ་མ་ཡིན་
པའི་ཕྱིར་ཏེ། ཤ་ར་དྭ་ཏིའི་བུ། བྱང་ཆུབ་སེམས་དཔའི་མོས་པ་ཟློག་པས་ནི། ཆོས་དེ་དག་ཐམས་ཅད་ཉམས་པར་བྱས་པ་ཡིན་པའི་ཕྱིར་རོ། །ཤ་ར་དྭ་ཏིའི་བུ། གླིང་ཆེན་པོ་བཞི་པའི་འཇིག་རྟེན་གྱི་ཁམས་ལྟ་ཞོག་གི། ཤ་ར་དྭ་ཏིའི་བུ། འདི་ལྟ་སྟེ། དཔེར་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དགྲ་བཅོམ་པ་རྣམས་ཀྱིས་གང་བར་གྱུར་ལ། ལ་ལ་ཞིག་གིས་དགྲ་བཅོམ་པ་དེ་དག་སྲོག་དང་བྲལ་བར་བྱས་ཤིང་། ཤ་ར་དྭ་ཏིའི་བུ། གང་དགྲ་བཅོམ་པ་དེ་སྙེད་སྲོག་དང་ཕྲལ་བ་བས། བསོད་ནམས་མ་ཡིན་པའི་ཕུང་པོ་དང་། གང་བྱང་ཆུབ་སེམས་དཔའ་བྱང་ཆུབ་ཀྱི་སེམས་ལས་མོས་པ་བཟློག་ན། ཤ་ར་དྭ་ཏིའི་བུ། དེ་ནི་བསོད་ནམས་མ་ཡིན་པའི་ཕུང་པོ་ཆེས་ཆེ་བར་ང་སྨྲའོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ། བྱང་ཆུབ་ཀྱི་སེམས་བསྐྱེད་པ་དེ་དང་། རྣམ་པར་ཕྲལ་བས་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་ཉམས་པར་འགྱུར་བའི་ཕྱིར་ཏེ། དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ། གལ་ཏེ་སེམས་བསྐྱེད་པ་དེ་མེད་པར་གྱུར་ན་ནི། ད་ལྟར་སངས་རྒྱས་ཀྱི་ཡེ་ཤེས་འབྱུང་བར་མི་འགྱུར་བའི་ཕྱིར་དང་། ཤ་ར་དྭ་ཏིའི་བུ། གལ་ཏེ་སེམས་བསྐྱེད་པ་དེ་མེད་པར་གྱུར་ན་ནི། ད་ལྟར་འཇིག་རྟེན་དུ་སངས་རྒྱས་ཁྱུ་མཆོག་ཏུ་གྱུར་པ་དེ་ལྟ་བུར་འབྱུང་བར་མི་འགྱུར་བའི་ཕྱིར་དང་། ཤ་ར་དྭ་ཏིའི་བུ་གལ་ཏེ་སེམས་བསྐྱེད་པ་དེ་མེད་པར་གྱུར་ན་ནི་འོ་ན། ད་ལྟར་སངས་རྒྱས་བཅོམ་ལྡན་འདས་རྣམས་འབྱུང་བར་མི་འགྱུར་བའི་ཕྱིར་རོ། །གསོལ་པ་བཅོམ་ལྡན་འདས་དེ་ལྟ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་དེ་ལྟ་བས་ན་རིགས་ཀྱི་བུ་དང་རིགས་ཀྱི་བུ་མོ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་གང་སུ་དག་ལ་སེམས་བསྐྱེད་པ་ཡོད་པ་དེ་དག་ནི་ལྷ་དང་
བཅས་པའི་འཇིག་རྟེན་གྱི་ཕྱག་བྱ་བར་འོས་པ་ཡིན་ནོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ། གང་དག་ལ་ལྷག་པའི་བསམ་པའི་སེམས་བསྐྱེད་པ་ཡོད་པ་དེ་དག་ལ་ནི། ཤ་ར་དྭ་ཏིའི་བུ་དེ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བས། མཐར་ཐུག་པ་ཡིན་པར་ཁོང་དུ་ཆུད་པར་བྱ་བ་ཡིན་པའི་ཕྱིར་རོ། །ཤ་ར་དྭ་ཏིའི་བུ་འདི་ཇི་སྙམ་དུ་སེམས། གང་དེ་བཞིན་གཤེགས་པས་བྱང་ཆུབ་སེམས་དཔའི་སེམས་བསྐྱེད་པ་དེ་ལྟ་བུ་ཡང་དག་པར་རབ་ཏུ་བསྟན་ན། འོ་ན་དེ་བཞིན་གཤེགས་པས་སེམས་བསྐྱེད་པ་དེ་ལྟ་བུ་དེ་ལ། རྒྱལ་རིགས་ཤིང་སཱ་ལ་ཆེན་པོ་ལྟ་བུ་དག་ཡོངས་སུ་བསྟན་པའམ། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དག་ཡོངས་སུ་བསྟན་པའམ། ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུ་དག་ཡོངས་སུ་བསྟན་པའམ། འཁོར་ལོས་སྒྱུར་བའི་རྒྱལ་པོ་དག་ཡོངས་སུ་བསྟན་པའམ། རྒྱལ་ཆེན་བཞིའི་རིས་ཀྱི་ལྷ་རྣམས་ཡོངས་སུ་བསྟན་པའམ། རྒྱལ་པོ་ཆེན་པོ་བཞི་ཡོངས་སུ་བསྟན་པའམ། ལྷ་རྣམས་ཀྱི་དབང་པོ་བརྒྱ་བྱིན་ནམ། སུམ་ཅུ་རྩ་གསུམ་པའི་རིས་ཀྱི་ལྷ་རྣམས་ཡོངས་སུ་བསྟན་པའམ། དེ་བཞིན་དུ་འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་རིས་ཀྱི་ལྷ་རྣམས་ཡོངས་སུ་བསྟན་ནམ། འོག་མིན་གྱི་ལྷའི་བར་དུ་ཡོངས་སུ་བསྟན་པ་ཡིན་ནམ། གསོལ་པ། བཅོམ་ལྡན་འདས་དེ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་སེམས་བསྐྱེད་པ་དག་པ་ཉིད་དང་། བཅོམ་ལྡན་འདས་ཀྱིས་སེམས་བསྐྱེད་པ་ཆེན་པོ་ཉིད་ཡང་དག་པར་རབ་ཏུ་བསྟན་པའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་འདི་ཇི་སྙམ་དུ་སེམས། དེ་བཞིན་གཤེགས་པས་བྱང་ཆུབ་ཀྱི་སེམས་བསྐྱེད་པ་མངོན་པར་ཡང་དག་པར་རབ་ཏུ་བསྟན་པས། འདི་ལྟ་སྟེ། ཚན་པོ་ཆེའི་སྟོབས་སམ། ཚན་པོ་ཆེ་ཆེན་པོའི་སྟོབས་སམ། སྲེད་མེད་ཀྱི་བུའི་
སྟོབས་ཕྱེད་ཡང་དག་པར་རབ་ཏུ་བསྟན་པའི་སྟོབས་པོ་ཆེ་དང་ལྡན་པར་ཡང་དག་པར་རབ་ཏུ་བསྟན་པའམ། དམན་པའམ། དབུལ་བའམ། རྒྱ་ཆེན་པོ་ཡང་དག་པར་རབ་ཏུ་བསྟན་པ་ཡིན་ནམ། གསོལ་པ། བཅོམ་ལྡན་འདས་དེ་མ་ལགས་སོ། །བཀའ་སྩལ་པ། ཤ་ར་དྭ་ཏིའི་བུ། དེ་ལྟ་བས་ན་ཁྱེད་ཅག་གིས་སྟོབས་དང་ལྡན་པའམ། སྟོབས་ཆུང་བའམ། དམན་པའམ། རྒྱ་ཆེན་པོ་གང་ལ་སེམས་བསྐྱེད་པ་དེ་མཐོང་ན། ཤ་ར་དྭ་ཏིའི་བུ་ཁྱེད་ཅག་གིས་སེམས་བསྐྱེད་པ་དེ་བསྲུང་བར་བྱའོ། །ཤ་ར་དྭ་ཏིའི་བུ་ཁྱེད་ཅག་གིས་བྱང་ཆུབ་སེམས་དཔའ་དེ་ཡང་དག་པར་འཛིན་དུ་གཞུག་པར་བྱ། རངས་པར་བྱ། ཡང་དག་པར་གཟེངས་བསྟོད་པར་བྱའོ། །ཤ་ར་དྭ་ཏིའི་བུ། གང་བྱང་ཆུབ་སེམས་དཔའ་ཡང་དག་པར་འཛིན་དུ་འཇུག་ཅིང་རངས་པར་བྱེད་ལ། ཡང་དག་པར་གཟེངས་སྟོད་པ་འདི་ནི་ཉན་ཐོས་ཀྱི་བསྙེན་བཀུར་མཆོག་ཡིན་ནོ། །ཤ་ར་དྭ་ཏིའི་བུ་དེ་ལྟ་བས་ན་ང་ལ་བསྙེན་བཀུར་མཆོག་བྱེད་པར་འདོད་པའི་ཉན་ཐོས་ཀྱིས་ནི་ཅི་ནས་བྱང་ཆུབ་སེམས་དཔའི་སྤྱོད་པ་རྣམ་པར་འཕེལ་བར་འགྱུར་བར་བྱང་ཆུབ་སེམས་དཔའ་ཡང་དག་པར་འཛིན་དུ་གཞུག་པར་བྱ། ཡང་དག་པར་གཟེངས་བསྟོད་པར་བྱ། རངས་པར་བྱའོ། །ཤ་ར་དྭ་ཏིའི་བུ་ངས་ཉན་ཐོས་རྣམས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཅི་ནས། རྣམ་པར་འཕེལ་བར་འགྱུར་བ་དང་། ཡོངས་སུ་ཉམས་པར་མི་འགྱུར་བར་ཡོངས་སུ་གཏད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་བསྐྱེད་པ་ནི་གསུམ་པོ་འདི་དག་ལགས་ཏེ། གསུམ་གང་ཞེ་ན། འདི་ལྟ་སྟེ། དང་པོ་སེམས་བསྐྱེད་པ་དང་། མི་ལྡོག་པའི་སེམས་བསྐྱེད་པ་དང་། སྒྲུབ་པའི་སེམས་བསྐྱེད་པ་ལགས་ན། བཅོམ་ལྡན་འདས་ཀྱིས་སེམས་བསྐྱེད་པ་གང་གི་ཡོན་ཏན་གྱི་ཁྱད་པར་དེ་དག་བསྟན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་ཇི་སྐད་སྨྲས་པ་དེ་དེ་བཞིན་
ཏེ། སེམས་བསྐྱེད་པ་གསུམ་པོ་དེ་དག་ནི་འདི་ལྟ་སྟེ། དང་པོ་སེམས་བསྐྱེད་པ་དང་། མི་ལྡོག་པ་དང་། སྒྲུབ་པའི་སེམས་བསྐྱེད་པའོ། །ཤ་ར་དྭ་ཏིའི་བུ། དེ་ལ་གང་དང་པོ་སེམས་བསྐྱེད་པ་དེ་ནི་དེ་ལས་བྱང་ཆུབ་སེམས་དཔའ་ལྡོག་ཅིང་ལྡོག་ནས་ཀྱང་། ཉན་ཐོས་ཀྱི་ཐེག་པར་ལྟུང་བའམ། རང་སངས་རྒྱས་ཀྱི་ཐེག་པར་ལྟུང་བ་ཡིན་ཏེ། ཤ་ར་དྭ་ཏིའི་བུ་སེམས་བསྐྱེད་པ་དེ་ལ་དེ་བཞིན་གཤེགས་པས་རངས་པར་མཛད་ཅིང་། ཡང་དག་པར་འཛིན་དུ་འཇུག་པར་མཛད་ལ། ཡང་དག་པར་གཟེངས་སྟོད་པར་མཛད་དོ། །དེ་ཅིའི་ཕྱིར་ཞེ་ན། ཅི་ནས་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གནས་པར་འགྱུར་ཞིང་། ཉན་ཐོས་དང་རང་སངས་རྒྱས་ཀྱི་སེམས་ལས་ཀྱང་ལྡོག་པར་འགྱུར་ལ་ཐེག་པ་གཉིས་པོ་དེ་དག་ལ་དམིགས་པར་ནི་མི་འགྱུར་ཞིང་། མི་དམིགས་པས་སངས་རྒྱས་ཀྱི་ཆོས་རྣམས་ལ་གནས་པར་འགྱུར་ཞིང་། སངས་རྒྱས་ཀྱི་ཡུལ་ལ་ངེས་པར་འབྱུང་བར་འགྱུར་ཞིག་གུ་སྙམ་པའི་ཕྱིར་རོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་མངོན་པར་བསྒྲུབ་པའི་ཕྱིར་རྣལ་འབྱོར་དུ་བྱའོ། །ཤ་ར་དྭ་ཏིའི་བུ་སེམས་སྟོང་པ་ཉིད་དུ་རྣམ་པར་བལྟ་བར་བྱའོ། །ཤ་ར་དྭ་ཏིའི་བུ་སེམས་སྟོང་པ་ཉིད་ནི་གང་ཡིན། ཇི་ལྟར་ན་སེམས་སྟོང་པ་ཉིད་དུ་རྣམ་པར་བལྟ་བར་བྱ་བ་ཡིན་ཞེ་ན། ཤ་ར་དྭ་ཏིའི་བུ་སེམས་ཞེས་བྱ་བ་ནི་སེམས་དང་། ཡིད་ཀྱི་རྣམ་པར་ཤེས་པ་དང་། ཡིད་དང་། ཡིད་ཀྱི་ལུས་དང་། ཡིད་ཀྱི་དབང་པོ་དང་། ཡིད་ཀྱི་ཁམས་ཏེ། འདི་ནི་སེམས་ཞེས་བྱའོ། །དེའི་སྟོང་པ་ཉིད་གང་ཞེ་ན། ཤ་ར་དྭ་ཏིའི་བུ་སེམས་ནི་སེམས་ཀྱིས་སྟོང་སྟེ། དེ་ལ་བྱེད་པ་པོ་གང་ཡང་མེད་དོ། །གལ་ཏེ་དེའི་བྱེད་པ་པོ་འགའ་ཞིག་ཡོད་ན་ནི་དེས་བྱས་ན་གཞན་གྱིས་མྱོང་བ་དེ་ལྟ་བུར་འགྱུར་རོ། །སེམས་ཀྱིས་ཀྱང་སེམས་མངོན་པར་འདུ་མི་བྱེད་དོ། །གལ་ཏེ་སེམས་ཀྱིས་སེམས་མངོན་པར་འདུ་བྱེད་ན་ནི་དེ་ཉིད་
བྱེད་པ་པོ་ཡིན་ཞིང་། དེ་ཉིད་མྱོང་བ་པོ་ཡིན་པར་འགྱུར་རོ། །གལ་ཏེ་སེམས་གཞན་གྱིས་སེམས་མངོན་པར་འདུ་བྱེད་ན་ནི་གང་གིས་བྱས་པ་དེ་ནི་དེའི་ཡིན་པར་འགྱུར་ལ། གཞན་གྱིས་བྱས་ན་ཡང་གཞན་གྱིས་མྱོང་བར་འགྱུར་རོ། །ཤ་ར་དྭ་ཏིའི་བུ་དེ་ལྟ་བས་ན་སེམས་ནི་སེམས་ཀྱིས་སྟོང་སྟེ། དེ་ལ་བྱེད་པ་པོ་གང་ཡང་མེད་དོ། །གང་ལ་བྱེད་པ་པོ་མེད་པ་དེས་ནི་ཅུང་ཟད་ཀྱང་བྱས་པ་མེད་དོ། །གང་གིས་ཅུང་ཟད་ཀྱང་བྱས་པ་མེད་པ་དེ་ལ་ནི་བྱེད་པ་དམིགས་སུ་མེད་དོ། །གང་ལ་བྱེད་པ་པོ་མི་དམིགས་པ་དེ་ལ་ནི་རྩོད་པའི་གནས་མེད་དོ། །གང་དག་དེ་ལ་རྩོད་པར་བྱེད་པ་དེ་དག་ནི་མེད་པ་ལ་རྩོད་པར་བྱེད་པའོ། །གང་དག་མེད་པ་ལ་རྩོད་པར་བྱེད་པ་དེ་དག་ནི་སྟོང་པ་ལ་རྩོད་པར་བྱེད་པའོ། །མཚན་མ་མེད་པ་དང་། སྨོན་པ་མེད་པ་ལ་རྩོད་པར་བྱེད་པའོ། །གང་དག་སྟོང་པ་ལ་རྩོད་པར་བྱེད་པ་དེ་དག་ནི་གསོབ་དང་གསོག་ལ་རྩོད་པར་བྱེད་པའོ། །གང་དག་གསོབ་དང་གསོག་ལ་རྩོད་པར་བྱེད་པ་དེ་དག་ནི་དེ་བཞིན་གཤེགས་པ་དང་ལྷན་ཅིག་དུ་རྩོད་པར་བྱེད་པའོ། །གང་དག་དེ་བཞིན་གཤེགས་པ་དང་ལྷན་ཅིག་ཏུ་རྩོད་པར་བྱེད་པ་དེ་དག་ནི་གཡང་ས་ཆེན་པོར་ལྟུང་བར་བྱེད་པ་ཡིན་ནོ། །ཤ་ར་དྭ་ཏིའི་བུ་གཡང་ས་ཆེན་པོ་ཡང་གང་ཞེ་ན། འདི་ལྟ་སྟེ་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ནོ། །ཤ་ར་དྭ་ཏིའི་བུ་གཡང་སའི་ཕུལ་ནི་འདི་ཡིན་ཏེ། འདི་ལྟ་སྟེ་དམིགས་པར་ལྟ་བ་དང་། ཕུང་པོར་ལྟ་བ་དང་། ཁམས་སུ་ལྟ་བ་དང་། སྐྱེ་མཆེད་དུ་ལྟ་བ་དང་། སྲོག་ཏུ་ལྟ་བ་དང་། འབྱུང་བར་ལྟ་བ་དང་། འཇིག་པར་ལྟ་བ་དང་། སེམས་ཅན་དུ་ལྟ་བ་དང་། གང་ཟག་ཏུ་ལྟ་བའོ། །ཤ་ར་དྭ་ཏིའི་བུ་མདོར་ན་མྱ་ངན་ལས་འདས་པར་ལྟ་བ་ཡང་དམིགས་པ་ཡིན། སངས་རྒྱས་སུ་ལྟ་བ་དང་། ཆོས་སུ་ལྟ་བ་དང་། དགེ་འདུན་དུ་ལྟ་བ་ཡང་དམིགས་པ་ཡིན་ཏེ། ལྟ་བ་དེ་དག་ལ་ཆགས་པའི་བྱིས་པ་སོ་སོའི་སྐྱེ་བོ་རྣམས་ནི་གཡང་ས་ཆེན་པོར་ལྟུང་བར་འགྱུར་ཏེ། གཡང་ས་ཆེན་པོ་ནི་འདི་ལྟ་སྟེ། འཁོར་བ་དེ་ཡིན་པར་ཟད་དོ། །བྱང་ཆུབ་ཀྱི་སེམས་ཡང་དག་པར་འཛིན་དུ་གཞུག་པ་དང་རྣམ་པར་བརྗོད་པ་དང་། བསྐྱེད་པ་བསླབ་པའི་ལེའུ་སྟེ་བརྒྱད་པའོ།། །།