དགུ་པ། ཐབས་ལ་འཇུག་པ་དང་། དམ་པའི་ཆོས་སྤོང་བ་དང་། བྱང་ཆུབ་སེམས་དཔའ་ཡང་དག་པར་འཛིན་དུ་གཞུག་པའི་ལེའུ།
དེའི་ཚེ་སློངས་མོ་པ་རྣམ་པར་རྒྱལ་བ་སྲུང་ཞེས་བྱ་བ་འདུས་ཏེ་འདུག་པར་གྱུར་ཏོ། །དེ་ནས་སློངས་མོ་པ་རྣམ་པར་རྒྱལ་བ་སྲུང་བ་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་གཡང་སར་ལྟུང་བར་འཚལ་བ་མ་ལགས་ཤིང་བདག་ནི་དེ་བཞིན་གཤེགས་པ་དང་ལྷན་ཅིག་ཏུ་རྩོད་པར་འཚལ་བ་ཡང་མ་ལགས་ཏེ། བཅོམ་ལྡན་འདས་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འཚལ་བ་ལགས་ན། བཅོམ་ལྡན་འདས་བདག་ནི་འདི་སྙམ་དུ་སེམས་ལགས་ཏེ། ཇི་ལྟར་ན་བདག་དབུལ་ཞིང་མཆོག་ཏུ་དབུལ་ལ་སྤྱོད་པ་ངན་པས་ཚེགས་ཀྱིས་ཁྱིམ་གྱི་ཕུན་སུམ་ཚོགས་པ་སྒྲུབ་ཅིང་། གཞན་གྱི་ནོར་གྱིས་འཚོ་བས་བྱང་ཆུབ་མངོན་པར་རྫོགས་པར་འཚང་རྒྱ་སྟེ། རྒྱལ་རིགས་ཤིང་སཱ་ལ་ཆེན་པོ་ལྟ་བུ་དང་། བྲམ་ཟེ་དང་། ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུས་ནི་བྱང་ཆུབ་ཡང་དག་པར་སྒྲུབ་བོ་སྙམ་བགྱིད་ལགས་སོ། །བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ང་ནི་བྲམ་ཟེ་དང་། རྒྱལ་རིགས་དང་། ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུ་དག་ཡོངས་སུ་མི་སྟོན་ཅིང་རྒྱ་ཆེན་པོ་དང་། འབྱོར་པ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མི་མ་ཡིན་པ་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དག་ཡོངས་སུ་མི་སྟོན་གྱི། གང་གིས་སེམས་བསྐྱེད་པ་དེ་བསྐྱེད་ན་ལྷ་དང་བཅས་པའི་འཇིག་རྟེན་གྱིས་ཕྱག་བྱ་བར་འོས་པ་ཡིན་ནོ། །གསོལ་པ། བཅོམ་ལྡན་འདས་བདག་དེང་སླན་ཆད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་སློངས་མོ་པ་རྣམ་པར་རྒྱལ་བ་སྲུང་བ་ལ་འདི་སྐད་ཅེས་བཀའ་སྩལ་ཏོ། །རྣམ་པར་རྒྱལ་བ་སྲུང་བ་ཁྱོད་དེ་བཞིན་གཤེགས་པའི་རྗེས་སུ་སློབ་པ་ནི་ལེགས་སོ་ལེགས་སོ།། །།
བམ་པོ་བཅུ་བཞི་པ། དེ་ནས་བཅོམ་ལྡན་འདས་ལ་སློངས་མོ་པ་རྣམ་པར་རྒྱལ་བ་སྲུང་བས་ཚིགས་སུ་བཅད་པ་དག་གིས་གསོལ་པ། ལེགས་སོ་ཞེས་བགྱི་མི་འཚལ་ཏེ། །ཚོང་དཔོན་གྱིས་བཀུར་བདག་མི་འཚལ། །སངས་རྒྱས་ཡེ་ཤེས་བླ་ན་མེད། །ཡེ་ཤེས་དམ་པ་འཚལ་ལགས་སོ། །ཁྱོད་ནི་འཇིག་རྟེན་བླ་ན་མེད། །ཁྱོད་ནི་རྟག་ཏུ་འཇིག་རྟེན་མཆོག །ཁྱོད་ནི་གང་དག་སྡུག་བསྔལ་གཟིར། །སེམས་ཅན་རྣམས་ཀྱི་གླིང་སྐྱབས་གཅིག །མིག་ལྡན་ཟག་པ་མེད་པའི་ཆོས། །ཁྱོད་ཀྱིས་མངོན་དུ་མཛད་ནས་སུ། །འཁོར་བ་ལས་ནི་རབ་འབྱིན་ཅིང་། །སྨན་པའི་སླད་དུ་ཆོས་སྟོན་ལགས། །ཁྱོད་ཀྱི་རྫུ་འཕྲུལ་མཐའ་ཡས་ཏེ། །ཁྱོད་ཀྱི་འོད་ཀྱང་མཐའ་ཡས་ལགས། །ཁྱོད་ཀྱི་ཤེས་རབ་མཆོག་ལགས་ཏེ། །ཡོན་ཏན་ཀུན་གྱིས་མངོན་དུ་འཕགས། །འདི་འདྲ་བར་ནི་བདག་གྱུར་ཅེས། །དེ་ལ་བདག་ནི་འདུན་གྱུར་ན། །དབུལ་ལ་སུ་ཞིག་སྦྱིན་སྙམ་དུ། །དེ་ལ་བདག་སེམས་ཞུམ་པར་གྱུར། །རྒྱལ་པོ་ཁྱིམ་བདག་བྲམ་ཟེ་དང་། །ལྷ་དང་མི་འམ་ཅི་དག་དང་། །རྫུ་འཕྲུལ་ལྡན་དང་གཟི་ཆེན་མཆིས། །དེ་ཡི་སྐྱེས་བུ་ཁྱུ་མཆོག་འདི། །དབུལ་གྱུར་གཞན་གྱི་ནོར་གྱིས་སུ། །ཉེ་བར་འཚོ་བ་དག་ལ་ནི། །གང་དུ་འཇིག་རྟེན་མི་འཇུག་པའི། །བྱང་ཆུབ་ག་ལ་སུ་ཞིག་སྟེར། །བདག་གི་སེམས་ནི་མཁྱེན་ནས་སུ། །ཤཱ་རིའི་བུ་ལ་བཀའ་སྩལ་པ། །སེམས་བསྐྱེད་པ་ནི་ང་ཡིས་བསྟན། །རྒྱལ་རིགས་དེ་དག་བསྟན་མ་ཡིན། །བྲམ་ཟེ་དང་ནི་རྗེའུ་དང་དམངས་ཀྱང་མིན། །དམན་པ་དང་ནི་མཆོག་དང་ལྷ་དང་ཀླུ། །གནོད་སྦྱིན་མི་འམ་ཅི་ནི་ངས་མ་བསྟན། །གཞན་དུ་སེམས་དག་པ་ནི་ངས་བསྟན་ཏོ། །དེ་ལྟ་དེ་བཞིན་གཤེགས་པའི་དེ་ཐོས་ནས། །སྟོབས་དང་ལྡན་པར་གྱུར་ཏེ་ཚིག་འདི་སྨྲས། །འཇིག་རྟེན་མགོན་པོ་མཆོག་ཏུ་བདག་གྱུར་ཏེ། །འདི་ལྟར་བྱང་ཆུབ་དོན་དུ་བདག་སེམས་སྐྱེས། །ནམ་མཁའ་ལྟུང་འགྱུར་ས་ནི་འཇིག་འགྱུར་ལ། །རི་ཡི་རྒྱལ་པོ་རི་རབ་རྣམ་འཇིག་འགྱུར། །ནམ་མཁའི་ཁམས་ནི་གཞན་དུ་འགྱུར་སྲིད་ཀྱི། །བདག་གི་སེམས་ནི་གཞན་དུ་འགྱུར་མི་སྲིད། །སེམས་ཅན་འདི་དག་ཐམས་ཅད་བདུད་གྱུར་ལ། །སེམས་དེ་རྣམ་པར་བཟློག་པར་བགྱི་
སླད་དུ། །དེ་ཀུན་བདག་ལ་བར་ཆད་བགྱིད་གྱུར་ནའང་། །བདག་གིས་སེམས་ནི་རྣམ་པར་བཟློག་མི་བགྱི། །གལ་ཏེ་འདིར་ནི་སེམས་ཅན་འགའ་མཆིས་ཤིང་། །འདི་ཡི་མདུན་དུ་མཆིས་ནས་ཚིག་སྨྲ་ན། །སངས་རྒྱས་ཡེ་ཤེས་དམ་པ་འདི་མཆོག་དཀོན། །དབུལ་ལ་བྱང་ཆུབ་སུ་ཞིག་སྦྱིན་པར་བྱེད། །དེ་སྐད་ཅེས་སྨྲས་ནས་ནི་བདག་གིས་བརྗོད། །ང་བས་ཁྱོད་དབུལ་ང་ནི་དབུལ་མ་ཡིན། །ཁྱོད་ལ་དད་པ་ནམ་ཡང་ཡོད་མ་ཡིན། །ང་ལ་དད་པ་ཡོད་པས་བདག་འཚང་རྒྱ། །སངས་རྒྱས་རིགས་ནི་གང་ཡང་ཡོད་མ་ཡིན། །འབྲས་བུའམ་སྲོག་ནི་འགའ་ཡང་ཡོད་མ་ཡིན། །གཞན་དུ་གང་དག་སེམས་ནི་འདུད་བྱེད་པ། །དེ་ཚེ་ཐེག་པ་བླ་མེད་འདི་ལ་འདུད། །དྲང་སྲོང་མཆོག་གི་སེམས་འདི་རིགས་ཡིན་ཏེ། །འདི་ནི་ས་བོན་འདི་ནི་འབྲས་བུ་ཡིན། །ཐེག་མཆོག་དམ་པ་ལ་ནི་ཞུགས་ནས་སུ། །སངས་རྒྱས་རྣམས་ཀྱིས་བསླབས་ནས་འཚང་རྒྱར་འགྱུར། །བདག་གིས་ལུས་དང་དེ་བཞིན་སྲོག་དང་ནི། །འཇིག་རྟེན་རྩེད་མོ་དགའ་བ་གང་ཅིའང་བཏང་། །གཞན་དུ་བདག་གིས་སངས་རྒྱས་ཡེ་ཤེས་མཆོག །རྫོགས་པར་སངས་རྒྱས་སེམས་ཅན་བདག་གིས་དགྲོལ། །སངས་རྒྱས་ཆོས་རྗེ་བདག་མདུན་བཞུགས་པ་ལ། །བདག་འདིར་སེང་གེའི་སྒྲ་ནི་སྒྲོགས་བགྱིད་པ། །གལ་ཏེ་བདག་ལ་ནོངས་པ་འགའ་མཆིས་ན། །བྱམས་ལ་གནས་པས་རྒྱལ་བས་བསྐུལ་ལགས་གྲང་། །དེ་ནས་བཅོམ་ལྡན་འདས་ཀྱིས་དེའི་ཚེ་སློངས་མོ་པ་རྣམ་པར་རྒྱལ་བ་སྲུང་བ་ལ་ཚིགས་སུ་བཅད་པ་དག་གིས་ཕྱིར་བཀའ་སྩལ་པ། འདི་ན་སངས་རྒྱས་ལ་ནི་སྐྱོན་ཅིའང་མེད། །སེམས་འདི་བླ་ན་ཡོད་པ་མ་ཡིན་པའི། །སེམས་དེ་དེ་རིང་འདིར་ནི་ཁྱོད་འདོར་ཏེ། །ཁྱོད་ཀྱང་རྒྱལ་བ་ཆོས་ཀྱི་རྗེར་འགྱུར་རོ། །དེ་བཞིན་གཤེགས་པའི་བཀའ་ནི་ཐོས་ནས་སུ། །གཞལ་དུ་མེད་པའི་དགའ་བས་དགའ་མགུ་སྟེ། །དེ་ལ་རྣམ་པར་རྒྱལ་སྲུང་སེམས་དང་ཞིང་། །ནམ་མཁའ་ལ་ནི་ཏ་ལ་བདུན་སྲིད་འཕགས། །དེ་ཚེ་སེམས་ཅན་མཆོག་གིས་འཛུམ་པ་བསྟན། །སྔོན་པོ་སེར་པོ་ཡིད་དགའ་སྣ་ཚོགས་པ། །ཁ་དོག་དེ་དག་རྒྱལ་བའི་ཞལ་ལས་བྱུང་། །དེ་དག་རྒྱལ་བའི་གཙུག་ཏུ་ནུབ་པར་གྱུར། །དེ་ཚེ་ཕྲག་པ་གཅིག་གཟར་ཐལ་སྦྱར་ཏེ། །ཀུན་དགའ་བོ་ཡིས་
རྐང་གཉིས་མཆོག་ལ་ཞུས། །མགོན་པོ་རྒྱུ་གང་བདེ་གཤེགས་རྐྱེན་ཅི་ལགས། །ཡེ་ཤེས་ཐོགས་མེད་རྒྱལ་ལ་བདག་ཞུའོ། །མགོན་པོ་རྣམ་པར་རྒྱལ་སྲུང་ཟིལ་གནོན་ཚུལ། །མགོན་གྱི་ཁྱིམ་དུ་སློངས་མོ་པ་ཞིག་བྱུང་། །དེ་རིང་དེ་ནི་ཏ་ལ་བདུན་སྲིད་གནས། །མཁའ་ལ་གནས་ནས་རྒྱལ་ལ་ཕྱག་འཚལ་ལགས། །ལྷ་དང་ཀླུ་དང་ལྟོ་འཕྱེ་ཆེན་པོ་དང་། །གནོད་སྦྱིན་དེ་ལ་མི་མིན་མི་འམ་ཅི། །མིར་གྱུར་པ་ཡིས་ཐལ་མོ་སྦྱར་བགྱིས་ཏེ། །མགོན་པོ་རྒྱལ་བ་སྲུང་ལ་ཕྱག་འཚལ་ལོ། །འཇིག་རྟེན་མགོན་ལ་དེ་ཡི་དོན་ཞུ་ལགས། །ཐུབ་པའི་འཛུམ་པ་བསྟན་འདི་སུ་ཡི་དོན། །བྱང་ཆུབ་དམ་པ་མཆོག་ཏུ་གང་ཞུགས་པའི། །ལུང་བསྟན་དེ་ནི་སུ་ཡི་ལགས་པར་འགྱུར། །སངས་རྒྱས་ཡེ་ཤེས་ལ་ནི་སུ་དམ་གནས། །བླ་མེད་སེམས་དེ་གནས་པ་སུ་ཡི་ལགས། །སུ་ཞིག་ཡེ་ཤེས་མཆོག་དམ་རེག་པར་འགྱུར། །འཁོར་བའི་སེམས་ཅན་རྣམས་ཀྱང་འབྱིན་པར་འགྱུར། །དེ་ཚེ་བྱང་ཆུབ་སྙིང་པོར་ད་སུ་མཆིས། །བདུད་སྡེ་དཔུང་དང་བཅས་པ་འཇོམས་པར་འགྱུར། །བདུད་དཔུང་བཅས་པ་བཅོམ་ནས་ཉོན་མོངས་སྤོང་། །འཁོར་ལོ་དམ་པ་ཞི་བ་སྐོར་བར་འགྱུར། །ཡེ་ཤེས་མཉམ་མེད་དེ་ནི་སུ་ཡིར་འགྱུར། །དོན་རྒྱ་ཆེན་པོ་དེ་ནི་སུ་ཡིར་འགྱུར། །དེ་ཚེ་ཕྱིར་ཞིང་འཁོར་ལོ་བསྐོར་བར་འགྱུར། །ཀུན་ནས་ཡེ་ཤེས་ཆགས་པ་མེད་པར་འགྱུར། །ཁྱུ་མཆོག་ཚིག་དེ་འདིར་ནི་འབྱིན་པར་འགྱུར། །དེ་ཚེ་ཚིག་བདེན་དེ་ནི་སུ་ཡིར་འགྱུར། །ཡེ་ཤེས་བདེན་པའི་ཐེ་ཚོམ་ཉིད་གྱུར་པའི། །སེམས་ཅན་ད་ལྟར་དེ་རིང་འབྱུང་མི་འགྱུར། །རྟག་ཏུ་མཉམ་བཞག་སེམས་དེ་སུ་ཡིར་འགྱུར། །བྱང་ཆུབ་ཞི་བ་ལ་ནི་རེག་གྱུར་ཅིང་། །འདི་ལ་དུས་གསུམ་སེམས་ཅན་སེམས་མཁྱེན་ནས། །ཆོས་མཆོག་གྱ་ནོམ་པ་ནི་བཤད་དུ་གསོལ། །དེ་ཚེ་སུ་ཡི་ཆོས་དེ་བསྟན་པས་ན། །ལྷ་དང་བཅས་པའི་འཇིག་རྟེན་དེ་ཚིམ་འགྱུར། །མ་རྨོངས་རྣམ་པར་གནོན་པ་སུ་ཡིར་འགྱུར། །གླང་ཆེན་ལྟ་སྟངས་ལྟ་བར་འགྱུར་བ་ལགས། །དགེ་འདུན་ཕལ་ཆེན་དེ་ནི་སུ་ཡིར་འགྱུར། །སུ་ཡིས་ཞིང་འདི་རྣམ་པར་སྦྱངས་པ་ལགས། །སུ་ཡིས་མི་ཁོམ་ཐམས་ཅད་སྤངས་ནས་སུ། །ཁོམ་ལྡན་མྱ་ངན་འདའ་ཞིང་འཚལ་བར་འགྱུར། །མཐུ་ཆེན་དོན་དེ་དག་ནི་ཞུ་ལགས་ན། །
འཇིག་རྟེན་མགོན་པོས་དེ་ཚེ་འཛུམ་བསྟན་ཅིང་། །འཇིག་རྟེན་འདྲེན་པ་བདག་ལ་དེ་ལུང་སྟོན། །ཐོས་ན་སྐྱེ་དགུ་དགའ་བར་འགྱུར་བ་ལགས། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་འཛུམ་པ་འདི་བསྟན་པ་ན་སློངས་མོ་པ་རྣམ་པར་རྒྱལ་བ་སྲུང་བ་དང་། དེ་བཞིན་དུ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་བྱེ་བ་ཁྲག་ཁྲིག་ཕྲག་བརྒྱད་ཅུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། ངས་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །དམིགས་པར་བྱ་བ་འདི་ནི་བཤད་པ་ན། །གང་དག་ཐེག་པ་མཆོག་ལ་རབ་ཞུགས་པ། །བྱེ་བ་ཁྲག་ཁྲིག་ཕྲག་ནི་བརྒྱད་ཅུར་ཚང་། །དེ་དག་རྣམས་ཀྱང་མི་མཆོག་རྒྱལ་བར་འགྱུར། །སློང་བ་རྣམ་པར་རྒྱལ་བ་སྲུང་འདི་ཡང་། །ང་ཡི་མདུན་དུ་འདུག་ནས་མཆོད་པར་བྱེད། །མཆོག་ཏུ་དགའ་བ་སྐྱེས་ཤིང་བར་སྣང་གནས། །བདག་ཀྱང་འདི་འདྲར་ང་ལ་ཕྱག་འཚལ་ལོ། །དེས་ནི་ལས་འདི་བྱས་པར་གྱུར་པས་ན། །ཕྱིན་ཆད་ནམ་ཡང་ལོག་པར་ལྟུང་མི་འགྲོ། །དེ་དང་དེར་ནི་རྟག་ཏུ་དལ་བ་ཐོབ། །སངས་རྒྱས་ཀྱང་ནི་དེ་ཡིས་རྟག་པར་མཐོང་། །དེ་དག་སེམས་ཅན་དམ་པ་མཆོག་མཐོང་ནས། །བྱང་ཆུབ་རྒྱུ་ཡི་ཕྱིར་ནི་མཆོད་པ་བྱེད། །དེ་ཚེ་མེ་ཏོག་སྤོས་དང་བྱུག་པ་དང་། །གདུགས་དང་རྒྱལ་མཚན་དག་གིས་མཆོད་པ་བྱེད། །དེ་བཞིན་ན་བཟའ་བསོད་སྙོམས་མཆོག་རྣམས་དང་། །གཟིམས་ཆ་དག་དང་དེ་ཚེ་རྐྱེན་རྣམས་ཀྱིས། །རྒྱལ་བ་རྣམས་ལ་དེ་ནི་མཆོད་པ་བྱེད། །མཐར་གྱིས་དེར་ནི་སྤྱད་པ་སྤྱོད་བྱེད་ཅིང་། །བྱམས་པ་སེམས་ཅན་མཆོག་ལ་མཉེས་བྱས་ནས། །དེར་ནི་རྒྱལ་བ་རྣམས་ལ་མཆོད་བྱེད་ཅིང་། །ནོར་བུ་བྱེ་བ་ཁྲག་ཁྲིག་ཕྲག་བདུན་ཅུ། །བླ་མེད་བྱམས་པ་ལ་ནི་འབུལ་བར་བྱེད། །དེ་ཚེ་ནོར་བུ་དག་གི་འོད་ཉིད་འབྱུང་། །དེ་ཡིས་དཔག་ཚད་བརྒྱད་ཅུ་ཁོ་ན་ཁྱབ། །དེ་ཚེ་ནོར་བུ་རྣམས་ཀྱི་འོད་འབྱུང་བ། །ནོར་བུ་དག་གི་འོད་དུ་ཁྱབ་པར་འགྱུར། །དེ་ཚེ་རིམ་གྲོ་པ་དག་བྱེ་བ་འབུམ། །དེ་སྙེད་ཀྱི་ནི་ཁྲི་ཡང་འབུལ་བར་བྱེད། །དེ་སྙེད་ཀྱི་ནི་ཁྲིའུ་འང་འབུལ་བར་འགྱུར། །གཙུག་
ལག་ཁང་ཡང་དེ་སྙེད་བྱེད་པར་འགྱུར། །རིན་ཆེན་སྣ་བདུན་གྱི་ནི་བཀྲ་བ་བརྩིགས། །གཙུག་ལག་ཁང་རེ་རྒྱང་གྲགས་ཚད་དང་ལྡན། །རྟག་ཏུ་བྱམས་པ་ཉན་ཐོས་བཅས་པ་ལ། །རྒྱན་གྱིས་བརྒྱན་ཏེ་ངེས་པར་འབུལ་བར་བྱེད། །ཟླ་གསུམ་དེར་ནི་རྒྱལ་བ་བསྙེན་བཀུར་བྱེད། །དགག་དབྱེ་བྱས་ནས་ལོ་བརྒྱར་འགྱུར་བ་ཡིན། །དེ་ཡང་དེ་ཚེ་རབ་ཏུ་བྱུང་བའི་ཚེ། །ཚངས་པར་སྤྱོད་པ་དམ་པ་སྤྱོད་པར་འགྱུར། །དགའ་བ་དང་ནི་གུས་པ་དེ་ཡིས་སུ། །དེར་ནི་རྒྱལ་བ་རྣམས་ལ་མཆོད་པ་བྱེད། །མཐར་གྱིས་བྱང་ཆུབ་སྤྱད་པ་སྤྱོད་པ་ན། །དུས་བཟང་བ་ཡི་རྒྱལ་བ་ཐམས་ཅད་མཐོང་། །ཇི་ལྟར་གང་གཱའི་ཀླུང་གི་བྱེ་མ་སྙེད། །དེ་བས་ལྷག་པའི་སངས་རྒྱས་དེ་ཡིས་མཐོང་། །སངས་རྒྱས་དེ་དག་མཐོང་ནས་དད་པར་བྱེད། །འཕགས་པའི་ཡེ་ཤེས་དེ་ནི་སུ་མི་འདོད། །སེམས་དེའི་དད་པ་དེ་ནི་དེ་འདྲ་བ། །ཕྱོགས་ཙམ་ང་ཡིས་ད་ལྟ་བསྟན་པ་ཡིན། །དེ་ཚེ་དེ་ཡི་ཡོན་ཏན་ཇི་འདྲ་བ། །ང་ཡིས་དཔེ་བསྟན་པར་ནི་ནུས་མ་ཡིན། །ཇི་ལྟར་གང་གཱའི་ཀླུང་གི་བྱེ་མ་སྙེད། །བསྐལ་པ་མང་པོར་དེ་ཚེ་འཁོར་ནས་སུ། །ཕྱིན་ཆད་དེ་ཡིས་ཐེག་པ་མཆོག་རེག་ཅིང་། །སྙིང་པོའི་ཚོགས་ཞེས་བྱ་བའི་རྒྱལ་བར་འགྱུར། །དེ་ཚེ་ཚེ་ནི་བསྐལ་པ་སྟོང་ཐུབ་འགྱུར། །དེ་ཚེ་དེ་ཡི་ཞིང་གི་བཀོད་འབྱུང་བ། །དཔེར་ན་ལྷ་གནས་རི་རབ་རྩེ་མོ་བཞིན། །འཛམ་བུའི་གླིང་དེ་ཡང་ནི་དེ་འདྲར་འགྱུར། །རྒྱལ་བའི་སྙིང་པོའི་ཚོགས་ནི་དེ་སྙེད་ཀྱི། །ཉན་ཐོས་དེ་ཚེ་འདུས་པ་གང་ཡིན་པ། །ཇི་ལྟར་གང་གཱའི་ཀླུང་གི་བྱེ་མ་སྙེད། །བྱེ་བ་ཁྲག་ཁྲིག་ཕྲག་ནི་མང་པོ་འབྱུང་། །དེ་བཞིན་དེ་ཚེ་འདུས་པ་འབྱུང་འགྱུར་བ། །ཇི་ལྟར་གང་གཱའི་ཀླུང་གི་བྱེ་མ་སྙེད། །དགྲ་བཅོམ་ཟག་པ་ཟད་ཅིང་ཉོན་མོངས་མེད། །དེ་ཚེ་དབང་གྱུར་རྫུ་འཕྲུལ་ཕ་རོལ་ཕྱིན། །ཤེས་རབ་འབྱུང་གནས་ཤཱ་རིའི་བུ་ཇི་བཞིན། །དྲི་བ་གཏན་ལ་འབེབས་པར་ཡེ་ཤེས་འཕགས། །ཆོས་མངོན་མདོ་སྡེ་འདུལ་བ་རྣམས་ལ་མཁས། །ང་ཡིས་ཉན་ཐོས་མཆོག་ནི་ལུང་བསྟན་བཞིན། །དེ་བཞིན་གཤེགས་པ་སྙིང་པོའི་ཚོགས་ཉིད་ཀྱི། །འདུས་པ་དེ་ཚེ་ཉིས་གྱུར་འབྱུང་བར་འགྱུར། །དེ་དག་བྱང་ཆུབ་དམ་པ་མཆོག་ལ་ཞུགས། །
མ་ཕམ་ཞེས་བྱའི་བྱམས་པ་ཇི་བཞིན་ནོ། །དེ་དག་སྐྱེ་བ་གཅིག་གིས་ཐོགས་པའང་ཡིན། །བླ་མེད་བྱང་ཆུབ་ཏུ་ནི་དེ་ཚེ་འགྱུར། །དེ་ནས་ཤི་འཕོས་ཤི་བའི་དུས་བྱས་ནས། །ཞིང་གཞན་གཞན་དུ་དེ་དག་བྱང་ཆུབ་རྟོགས། །དཔའ་བ་དཔའ་བོ་བློ་གྲོས་བརྟན་རྣམས་ཀྱི། །འདུས་པ་དེ་བས་ཀྱང་ནི་ལྷག་པར་འགྱུར། །དེ་ཚེ་ཐེག་མཆོག་བླ་ན་མེད་པར་ནི། །སྙིང་པོའི་ཚོགས་ཀྱི་སངས་རྒྱས་ལུང་སྟོན་འགྱུར། །དེ་བཞིན་གཤེགས་པ་མྱ་ངན་འདས་ནས་ཀྱང་། །དེ་ཚེ་ཆོས་ཚུལ་བསྐལ་པར་གནས་པར་འགྱུར། །དེ་ཡི་སྐུ་གདུང་རྒྱས་པར་འགྱུར་བ་ཡིན། །ང་ཡི་མྱ་ངན་འདས་པའི་ཇི་བཞིན་ཏེ། །དེ་བཞིན་གཤེགས་པ་སྙིང་པོའི་ཚོགས་ཉིད་ཀྱི། །རིང་བསྲེལ་དེ་དག་དེ་ལྟར་འགྱུར་བ་ཡིན། །ཇི་ལྟར་སེམས་ཅན་མོས་པར་འགྱུར་བ་བཞིན། །དེ་ལྟ་དེ་ལྟར་སངས་རྒྱས་རིང་བསྲེལ་གནས། །དེ་ལ་རིན་ཆེན་ཞེས་བྱའི་མཆོད་རྟེན་དང་། །རྒྱལ་མཚན་ཀ་བ་དག་དང་སྟེགས་བུ་དང་། །དྲིལ་བུ་དྲི་མ་མེད་པས་བརྒྱན་རྣམས་ཀྱིས། །འཛམ་བུའི་གླིང་ནི་བརྒྱན་པར་འགྱུར་བ་ཡིན། །སེམས་ཅན་གང་དག་མཆོད་རྟེན་དེར་འགྲོ་བ། །དེ་དག་མཆོད་རྟེན་ལ་ནི་མེ་ཏོག་འཐོར། །ནམ་མཁའ་ལ་ནི་མེ་ཏོག་གདུགས་སུ་འགྱུར། །དེ་ཚེ་རྫུ་འཕྲུལ་དེ་འདྲ་འབྱུང་བར་འགྱུར། །དེར་ནི་ཇི་ལྟར་མོས་པའི་མི་རྣམས་ལ། །དེ་ཚེ་སངས་རྒྱས་སྐུ་ཡིས་འཛུམ་མཛད་འགྱུར། །མཆོད་རྟེན་ནང་ནས་སྟོན་པར་མཛད་འགྱུར་ཞིང་། །འཛུམ་པ་བསྟན་ནས་ནུབ་པར་མཛད་པར་འགྱུར། །གང་དག་སྤྱི་གཙུག་འོད་ནི་ནུབ་གྱུར་ན། །བདག་ཅག་བྱང་ཆུབ་ཕྱིར་ནི་ལུང་བསྟན་ཤེས། །གང་དག་རྒྱལ་བའི་ཞལ་དུ་ཞུགས་གྱུར་ན། །བདག་ཅག་རང་རྒྱལ་བར་ནི་ལུང་བསྟན་ཤེས། །མཆོད་རྟེན་གྱི་ནི་ནང་གི་འདྲེན་པ་ཡི། །ལྟེ་བར་གང་ཚེ་འོད་ནི་ཞུགས་གྱུར་ན། །ལུང་བསྟན་དེ་དག་ཉིད་ཀྱིས་མྱ་ངན་འདས། །རྫུ་འཕྲུལ་དེ་འདྲར་འགྱུར་བར་བདག་གིས་ཤེས། །རྒྱལ་བའི་བྱིན་གྱིས་རླབས་ནི་བསྐལ་པར་འབྱུང་། །དེ་ཡི་འོག་ཏུ་ཐམས་ཅད་རྒྱུན་ཆད་འགྱུར། །འཁོར་བར་གཏོགས་ལ་རྟག་པ་ཡོད་མ་ཡིན། །སངས་རྒྱས་བསྟན་པ་འདི་ལ་མི་རྟག་སྟོང་། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་
འདས་སློངས་མོ་པ་རྣམ་པར་རྒྱལ་བ་སྲུང་བ་བརྙས་པའི་ཚུལ་དུ་ཡང་གདའ་ལ། བརྙས་པ་མ་ལགས་པའི་ཆོས་དང་ལྡན་པ་ནི་ངོ་མཚར་ལགས་སོ། །བཅོམ་ལྡན་འདས་དེ་ལྟ་བུའི་སེམས་ཅན་ལ་སུ་ཞིག་བརྙས་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་དེ་དེ་བཞིན་ཏེ། བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་མ་གཏོགས་པར་སེམས་ཅན་དེ་ལྟ་བུ་ལ་སུ་ཞིག་བརྙས་པར་འགྱུར། ཤ་ར་དྭ་ཏིའི་བུས་ངས་ཀྱང་དེ་ལ་དགོངས་ནས། དེ་བཞིན་གཤེགས་པ་མ་གཏོགས་པར་གང་ཟག་གིས་གང་ཟག་གི་ཚད་གཟུང་བར་མི་ནུས་སོ། །ཞེས་བྱ་བའི་ཚིག་གསུངས་པ་ཡིན་ནོ། །ཤ་ར་དྭ་ཏིའི་བུ་འདི་ཇི་སྙམ་དུ་སེམས། འོ་ན་སྔོན་སློངས་མོ་པ་རྣམ་པར་རྒྱལ་བ་སྲུང་བ་ལྷ་རྣམས་དང་། ཀླུ་རྣམས་དང་། གནོད་སྦྱིན་རྣམས་དང་། དྲི་ཟ་རྣམས་དང་། མི་འམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། མི་རྣམས་དང་། མི་མ་ཡིན་པ་རྣམས་ཀྱིས་ཕྱག་བྱ་བའི་འོས་སུ་གྱུར་པ་ཡིན་ནམ། གསོལ་པ། བཅོམ་ལྡན་འདས་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་རེ་ཞིག་གང་གི་ཚེ་སློངས་མོ་པ་རྣམ་པར་རྒྱལ་བ་སྲུང་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེའི་ཚེ། དེ་ཕྱག་བགྱི་བའི་འོས་དང་། མཆོད་པ་བགྱི་བའི་འོས་དང་། འདུད་པར་བགྱི་བའི་འོས་སུ་གྱུར་པའི་སླད་དུ་སྟེ། བཅོམ་ལྡན་འདས་ད་ལྟར་ནི་ལྷ་དང་བཅས་པའི་འཇིག་རྟེན་གྱིས་ཕྱག་བགྱི་བའི་འོས་སུ་གྱུར་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་དེ་བཞིན་གཤེགས་པའི་ཐོགས་པ་མེད་པའི་ཡེ་ཤེས་དེ་ནི་ཉན་ཐོས་དང་། རང་སངས་རྒྱས་རྣམས་དང་ཐུན་མོང་མ་ཡིན་པའོ། །ཤ་ར་དྭ་ཏིའི་བུ་དེ་ལྟ་བས་ན། ངའི་ཉན་ཐོས་དེ་ལྟ་བུའི་རྗེས་སུ་བསྟན་པ་གུས་པར་ཉན་འདོད་པ། སེམས་ཅན་རྣམས་ལ་ཆོས་སྟོན་པ་རྣམས་ཀྱིས་ནི་ཐོག་མ་ཉིད་དུ་ངའི་ཡེ་ཤེས་ཀྱི་ཡོན་ཏན་ཉིད་ཡོངས་སུ་བསྒྲགས་པར་བྱའོ། །དེ་ཅིའི་ཕྱིར་ཞེ་ན། ཅི་ནས་ཀྱང་སེམས་ཅན་དེ་དག་དེ་བཞིན་གཤེགས་པའི་ཡེ་ཤེས་ཀྱི་ཡོན་ཏན་ཡོངས་སུ་བསྒྲགས་པ་ཐོས་ནས། སངས་རྒྱས་
ཀྱི་ཡེ་ཤེས་དེ་ཉིད་ལ་སེམས་གཏོད་པར་བྱེད་དེ། དེ་ལྟར་ན་སངས་རྒྱས་ཀྱི་ཚུལ་རྒྱུན་མི་འཆད་པར་འགྱུར་བའི་ཕྱིར་རོ། །ཤ་ར་དྭ་ཏིའི་བུ་སེམས་ཅན་གང་དག་གཞན་ལ་ཕན་པའི་ཕྱིར་ཞུགས་པ་དེ་དག་ཉུང་ངོ་། །ཤ་ར་དྭ་ཏིའི་བུ་སེམས་ཅན་གང་དག་གཞན་ལ་ཕན་པ་དང་། བདག་ལ་ཕན་པའི་ཕྱིར་ཞུགས་པ་དེ་དག་ནི་རབ་ཏུ་དཀོན་ནོ། །མཆོག་ཏུ་རབ་ཏུ་དཀོན་ནོ། །ཤ་ར་དྭ་ཏིའི་བུ་ཡང་གང་དག་གཞན་ལ་ཕན་པའི་ཕྱིར་དང་བདག་ལ་ཕན་པའི་ཕྱིར་ཞུགས་པ་དག་ལྟ་ཞོག་གི། ཤ་ར་དྭ་ཏིའི་བུ་སེམས་ཅན་གང་དག་བདག་དང་གཞན་ལ་ཕན་པའི་ཕྱིར་ཞུགས་པ་དེ་དག་ནི་དཀོན་ནོ། །མཆོག་ཏུ་རབ་ཏུ་དཀོན་ནོ། །ཤ་ར་དྭ་ཏིའི་བུ་བྱིས་པ་ལོག་པར་འཛིན་པ་དག་ནི་བདག་ལ་ཕན་པར་བྱའོ་སྙམ་ན་ཡང་མི་ཕན་པ་ཁོ་ན་སྟེན་པར་བྱེད་དོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་གང་གཞན་ལ་མི་ཕན་པའམ། ཉེས་དམིགས་སམ། རྣམ་པར་ཐོ་འཚམ་པ་བྱས་ཤིང་། རྣམ་པར་འཚེ་བ་ཡང་བྱས་པས་ནི་དེ་ལ་ཕན་པ་དང་ཉེས་དམིགས་མེད་པ་དང་། རྣམ་པར་མི་འཚེ་བ་དང་། རྣམ་པར་ཐོ་མི་འཚམ་པར་འགྱུར་བ་ངས་མ་མཐོང་མ་ཐོས་པའི་ཕྱིར་ཏེ། དེ་ནི་གནས་མེད་དོ། །ཤ་ར་དྭ་ཏིའི་བུ་དེ་ལྟ་བས་ན། གང་དག་བདག་ལ་ཕན་པའི་ཕྱིར་ཞུགས་པའི་སེམས་ཅན་དེ་དག་ནི་དཀོན་ནོ། །སེམས་ཅན་དེ་དག་ནི་མཆོག་ཏུ་རབ་ཏུ་དཀོན་ནོ། །གང་དག་བདག་ལ་ཕན་པའི་ཕྱིར་དང་། གཞན་ལ་ཕན་པའི་ཕྱིར་ཞུགས་པའི་སེམས་ཅན་དེ་དག་ཀྱང་མཆོག་ཏུ་རབ་ཏུ་དཀོན་ནོ། །ཤ་ར་དྭ་ཏིའི་བུ་དེ་ལྟ་བས་ན། སེམས་ཅན་གང་ལ་ལས་བསྟིང་བ་བྱས་ཤིང་བཤུང་བ་བྱེད་ན། ཤ་ར་དྭ་ཏིའི་བུ་སེམས་ཅན་དེ་ལྟ་བུ་དེ་དག་ནི་བདག་ལ་ཕན་པ་དང་། གཞན་ལ་ཕན་པའི་ཕྱིར་ཞུགས་པ་མ་ཡིན་ཏེ། ཤ་ར་དྭ་ཏིའི་བུ་གང་ཟག་དེ་ལྟ་བུ་དེ་དག་ནི་མི་རིགས་པ་ཡིན་ནོ། །ཤ་ར་དྭ་ཏིའི་བུ་ཡང་མི་བླུན་པོ་དེ་དག་ནི་ལམ་ངན་པར་ཞུགས་པ་ཡིན་གྱི། དེ་དག་བདག་ལ་ཕན་པའི་ཕྱིར་དང་། གཞན་ལ་ཕན་པའི་ཕྱིར་ཞུགས་པ་ནི་མ་ཡིན་ནོ། །མི་རིགས་པ་དང་ལྡན་པ་དེ་ལྟ་བུ་དེ་དག་ནི་རབ་ཏུ་རྣམ་པར་འཇིག་པ་བརྒྱད་རྗེས་སུ་འཐོབ་སྟེ། བརྒྱད་གང་ཞེ་ན། ཉེ་དུ་རབ་ཏུ་རྣམ་པར་འཇིག་པ་དང་། ཡུལ་རབ་ཏུ་རྣམ་པར་འཇིག་པ་དང་། ལོངས་སྤྱོད་རབ་ཏུ་རྣམ་པར་འཇིག་པ་དང་། མེའི་རབ་ཏུ་རྣམ་པར་འཇིག་པ་དང་། རྒྱལ་པོའི་རབ་ཏུ་རྣམ་པར་འཇིག་པ་དང་། སྐྱེ་མཆེད་
ཀྱི་རབ་ཏུ་རྣམ་པར་འཇིག་པ་དང་། སེམས་ཅན་དམྱལ་བའི་རབ་ཏུ་རྣམ་པར་འཇིག་པ་རྗེས་སུ་འཐོབ་པ་དང་། སེམས་ཅན་དམྱལ་བའི་སྲུང་མའི་རབ་ཏུ་རྣམ་པར་འཇིག་པ་རྗེས་སུ་འཐོབ་པ་སྟེ། རབ་ཏུ་རྣམ་པར་འཇིག་པ་ཆེན་པོ་བརྒྱད་པོ་དེ་དག་རྗེས་སུ་འཐོབ་བོ། །ཡང་མི་བདེ་བ་ཆེན་པོ་བརྒྱད་རྗེས་སུ་འཐོབ་སྟེ། བརྒྱད་གང་ཞེ་ན། སེམས་ཅན་དམྱལ་བར་སྐྱེ་བའི་མི་བདེ་བ་ཉིད་རྗེས་སུ་འཐོབ་པ་ཡིན། དུད་འགྲོའི་སྐྱེ་གནས་ཀྱི་མི་བདེ་བ་ཉིད་རྗེས་སུ་འཐོབ་པ་ཡིན། གཤིན་རྗེའི་འཇིག་རྟེན་དུ་སྐྱེ་བའི་མི་བདེ་བ་ཉིད་རྗེས་སུ་འཐོབ་པ་ཡིན། གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་དེ་དག་ཡུལ་མཐའ་འཁོབ་ཏུ་སྐྱེ་བ་ཡོངས་སུ་འཛིན་ཅིང་དེར་ཡང་ལོང་བ་དང་། འོན་པ་དང་། ཞར་བ་དང་། ལག་སོར་རྡུམ་པོ་དང་། གཞོགས་ཕྱེད་ཉམས་པར་འགྱུར་ཞིང་ནད་ཀྱི་རྣམ་པ་དྲག་པོ་གང་ཡང་རུང་བ་དག་གིས་བཏབ་པར་འགྱུར་ཏེ། མི་བདེ་བ་དེ་རྗེས་སུ་འཐོབ་པ་ཡིན། གལ་ཏེ་འཚམ་པའི་ཡུལ་དུ་སྐྱེ་བར་མི་རྣམས་དང་སྐལ་བ་མཉམ་པར་སྐྱེས་ན་ཡང་དེ་དག་མི་ཡོན་པོ་དང་། མི་སུན་འབྱིན་པ་དང་། མི་དམུ་རྒོད་དང་། བུད་མེད་དང་། གནས་པ་དང་། གཅེར་བུ་པའི་སྤྱོད་ཡུལ་པ་དང་། མུ་སྟེགས་ཅན་གཞན་གྱི་སྨྲ་བ་དང་འདྲེས་པ་དང་། ལོག་པར་ལྟ་བ་དང་། སྡིག་པ་ཀུན་ཏུ་སྤྱོད་པ་དང་། མི་གཙང་བའི་ལུས་ཀྱི་ལས་དང་ལྡན་པ་དང་། མི་གཙང་བའི་ངག་གི་ལས་དང་། མི་གཙང་བའི་ཡིད་ཀྱི་ལས་དང་ལྡན་པ་དག་ཏུ་འགྱུར་ཞིང་། འཕགས་པ་རྣམས་ཀྱི་ཕྱིར་བསྒྱུར་དུ་མི་རུང་བར་འགྱུར་ཏེ་མི་བདེ་བ་དེ་ཡང་རྗེས་སུ་འཐོབ་པ་ཡིན། གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་དེར་དེ་བཞིན་གཤེགས་པ་འབྱུང་བར་མི་འགྱུར་ཞིང་། གང་གི་ནུབ་མོ་དེ་བཞིན་གཤེགས་པ་འབྱུང་བ་དེ་ཉིད་ཀྱི་ནུབ་མོ་དེ་འཆི་བའི་དུས་བྱེད་ཅིང་མངོན་སུམ་དུ་གནས་པ་མི་འཐོབ་སྟེ། མི་བདེ་བ་ཆེན་པོ་དེ་ཡང་རྗེས་སུ་འཐོབ་པ་ཡིན་ཏེ། མི་བདེ་བ་ཆེན་པོ་བརྒྱད་པོ་དེ་དག་རྗེས་སུ་འཐོབ་བོ། །གལ་ཏེ་སེམས་ཅན་དམྱལ་བ་ཆེན་པོ་དག་ཏུ་སྐྱེས་ན་དེར་དེ་དག་ལུས་ཆེན་པོ་དང་། ལུས་རྒྱ་ཆེན་པོར་འགྱུར་ཏེ། དེར་གནོད་པ་ཆེན་པོ་དག་ཉམས་སུ་མྱོང་བར་འགྱུར་བ་ཡིན། གལ་ཏེ་དུད་འགྲོ་དག་ཏུ་སྐྱེས་ན་ཡང་དེ་དག་ལུས་ཆེན་པོ་དང་། ལུས་རྒྱ་ཆེན་པོ་དང་། ཁམ་ཆེན་པོ་དང་། གསོ་དཀའ་བར་འགྱུར་
ཏེ། གང་དུ་སྐྱེས་པ་དེར་ཡང་སྡིག་པའི་ལས་ཆེས་མང་པོ་དག་མངོན་པར་འདུ་བྱེད་པར་འགྱུར་བ་ཡིན། དེར་སྐྱེས་པ་དག་ཀྱང་ཉའམ། ཆུ་སྲིན་ནམ། སྲམ་མམ། ཆུ་སྲིན་བྱིས་པ་གསོད་དམ། ཉ་མིད་ཀྱི་ཉ་ཞེས་བྱ་བར་འགྱུར་ཏེ། སེམས་ཅན་རྣམས་ཀྱིས་དེ་དག་མཆིལ་པས་བཟུང་ལ་མངོན་དུ་བཏེག་ནས། ལུས་ཀྱི་སྲོག་གཅོད་པར་བྱེད་ལ་བཅད་ཅིང་བརྡུངས་ཏེ་རྣམ་པར་གཙེ་བར་བྱེད་ཀྱང་། དེ་ཙམ་གྱིས་ཀྱང་འཆི་བའི་དུས་ནི་མི་བྱེད་ལ། དེ་དག་གི་ལུས་དེ་འཕེལ་བར་འགྱུར་ཞིང་སྡུག་བསྔལ་གྱི་ཚོར་བ་རྣམ་པ་སྣ་ཚོགས་དུ་མ་ཉམས་སུ་མྱོང་ཡང་དེ་ཙམ་གྱིས་ཀྱང་འཆི་བའི་དུས་མི་བྱེད་པ་ཡིན། དེ་ལས་གཞན་པའི་སྐྱེ་གནས་སུ་སྐྱེས་ན་ཡང་དེར་དེ་དག་རྔ་མོའམ། གླང་ངམ། བོང་བུའམ། བྱ་གག་གམ། ཕག་ཏུ་འགྱུར་ཏེ། གལ་ཏེ་དེ་དག་རྔ་མོའམ། གླང་དུ་གྱུར་ན་དེ་དག་སྣ་ཕུག་ནས་ཁལ་གྱིས་གཟིར་ཅིང་དབྱུག་པ་བརྒྱས་བརྒྱབ་ནས་ལམ་དུ་ཁྲིད་པར་འགྱུར་ལ། དེ་དག་འཁང་ཞིང་ཤིན་ཏུ་སྐྱོ་བས་ཁལ་དེ་ཁྱེར་བར་བྱེད་དེ། དེ་དག་ལ་སྐྱབས་གང་ཡང་མེད་དོ། །གང་གི་ཚེ་ཁལ་གྱིས་གཟིར་ཅིང་ལུས་ཉམ་ཆུང་བར་གྱུར་པ་དེའི་ཚེ་ཡང་སྲོག་དང་བྲལ་བར་བྱེད་ཅིང་། སྲོག་དང་ཕྲལ་ནས་ཀྱང་དེ་ཉིད་ཀྱི་ཤ་ཟ་ཞིང་འདི་སྐད་དུ་ལུས་རྒྱ་ཆེན་པོ་དང་། ལེ་ལོ་ཅན་དང་། གསོ་དཀའ་བ་དང་། ཁམ་ཆེན་པོ་དང་། བྱ་བ་མི་ནུས་པ་ཡིན་ནོ་ཞེས་ཟེར་རོ། །ཤ་ར་དྭ་ཏིའི་བུ་སྡིག་པའི་ལས་བྱས་ཤིང་བསགས་པའི་འབྲས་བུ་མི་འདོད་ཅིང་ཡིད་དུ་མི་འོང་བ་ཇི་སྙེད་ཅིག་མངོན་པར་འགྲུབ་པར་འགྱུར་བ་ལ་ལྟོས། ཤ་ར་དྭ་ཏིའི་བུ་དེ་བཞིན་གཤེགས་པས་མི་དགེ་བ་ལས་དེའི་རྣམ་པར་སྨིན་པ་ནི་བསྐལ་པའམ། བསྐལ་པ་ལས་ལྷག་པར་གསུངས་ཀྱང་ཟད་པར་ནི་མི་འགྱུར་རོ། །ཤ་ར་དྭ་ཏིའི་བུ་མདོར་ན་གང་བྱང་ཆུབ་སེམས་དཔའི་སེམས་བསྐྱེད་པ་ལ་བར་ཆད་བྱ་བའི་ཕྱིར་འཇུག་པ་དེ་ལ་ནི། ཤ་ར་དྭ་ཏིའི་བུ་མྱ་ངན་ལས་འདས་པར་འགྲོ་བ་མེད་ཅིང་དལ་བ་ཕུན་སུམ་ཚོགས་པ་མེད་དོ། །ཤ་ར་དྭ་ཏིའི་བུ་དེ་ལྟ་བས་ན་ཁྱེད་ཅག་གིས་བདག་ཉིད་སྐྱབས་ཤིང་དལ་བ་ཕུན་སུམ་ཚོགས་པ་ཐོབ་བོ། །ཤ་ར་དྭ་ཏིའི་བུ་བཞི་པོ་འདི་དག་ནི་སྐྱབས་ཡིན་ཏེ། བཞི་གང་ཞེ་ན། ཤ་ར་དྭ་ཏིའི་བུ་དེ་བཞིན་གཤེགས་པ་ནི་སེམས་ཅན་འཇིགས་པས་གཟིར་བ་རྣམས་ཀྱི་སྐྱབས་ཡིན། ཤ་ར་དྭ་ཏིའི་བུ་འཕགས་པའི་ལམ་ནི་སེམས་ཅན་ལམ་ངན་པར་ཞུགས་པ་རྣམས་ཀྱི་སྐྱབས་ཡིན། ཤ་ར་དྭ་ཏིའི་བུ་དྲན་པ་ཉེ་བར་གཞག་པ་
རྣམས་ནི་སྡིག་པའི་ལས་མངོན་པར་འདུ་མི་བྱ་བའི་སྐྱབས་ཡིན། ཤ་ར་དྭ་ཏིའི་བུ་བྱང་ཆུབ་ཀྱི་སེམས་ནི་མི་ཁོམ་པ་ཐམས་ཅད་རྣམ་པར་སྤོང་བ་ཉིད་ཀྱི་སྐྱབས་ཡིན་ཏེ། ཤ་ར་དྭ་ཏིའི་བུ་བཞི་པོ་དེ་དག་ནི་སྐྱབས་ཡིན་ནོ། །ཤ་ར་དྭ་ཏིའི་བུ་བཞི་པོ་འདི་དག་ནི་བདེ་བ་ཡིན་ཏེ། བཞི་གང་ཞེ་ན། དེ་བཞིན་གཤེགས་པ་མཐོང་བ་ཡིན། དལ་བ་ཕུན་སུམ་ཚོགས་པ་ཡིན། དེ་བཞིན་གཤེགས་པས་རབ་ཏུ་བསྟན་པའི་ཆོས་འདུལ་བ་ལ་དད་པ་རྙེད་པ་ཡིན། ལྟ་བ་དྲང་པོ་དང་ཕུན་སུམ་ཚོགས་པ་ཡིན་ཏེ། ཤ་ར་དྭ་ཏིའི་བུ་བཞི་པོ་དེ་དག་ནི་བདེ་བ་ཆེན་པོ་ཡིན་ནོ། །ཤ་ར་དྭ་ཏིའི་བུ་བཞི་པོ་འདི་དག་ནི་ནད་མེད་པ་ཡིན་ཏེ། བཞི་གང་ཞེ་ན། འབྱུང་བ་ཆེན་པོ་རྣམས་ཀྱི་ཁམས་སྙོམས་པ་ཉིད་ནད་མེད་པ་ཡིན། ཡང་དག་པའི་ལྟ་བར་སེམས་དྲང་པོ་ཉིད་ནད་མེད་པ་ཡིན། དེ་བཞིན་གཤེགས་པའི་བསྟན་པ་ལ་དད་པ་རྙེད་ཅིང་ཕུན་སུམ་ཚོགས་པའི་བདེ་བ་ཐམས་ཅད་རྙེད་པ་ཉིད་ནད་མེད་པ་ཡིན། སེམས་ཅན་གྲངས་མེད་དཔག་ཏུ་མེད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་རྙེད་ཅིང་ཉོན་མོངས་པ་རྣམ་པར་འཇོམས་པ་ཉིད་ནད་མེད་པ་ཆེན་པོ་ཡིན་ཏེ། ཤ་ར་དྭ་ཏིའི་བུ་བཞི་པོ་དེ་དག་ནི་ནད་མེད་པ་ཡིན་ནོ། །ཤ་ར་དྭ་ཏིའི་བུ་བཞི་པོ་འདི་དག་ནི་རེ་བ་ཡིན་ཏེ། བཞི་གང་ཞེ་ན། ནད་པ་འཚོ་བར་རེ་བ་དང་། བཀྲེས་པ་ཟས་རེ་བ་དང་། སྡུག་བསྔལ་ཞིང་སྡུག་བསྔལ་གྱིས་གཟིར་བ་བདེ་བ་ལ་མངོན་པར་དགའ་བའི་རེ་བ་དང་། དགོན་པ་ཆེན་པོའི་ལམ་དུ་ཞུགས་པ་བདེ་བར་རེ་བ་ཡིན་ཏེ། ཤ་ར་དྭ་ཏིའི་བུ་བཞི་པོ་དེ་དག་ནི་རེ་བ་ཡིན་ནོ། །ཤ་ར་དྭ་ཏིའི་བུ་བཞི་པོ་འདི་དག་ནི་གང་ལ་ལྷག་པར་ཞེན་པའི་སེམས་ཅན་རྣམས་ངན་སོང་དུ་འགྲོ་བར་འགྱུར་བའི་ལྷག་པར་ཞེན་པ་ཡིན་ཏེ། བཞི་གང་ཞེ་ན། ལུས་ལ་ལྷག་པར་ཞེན་པ་དང་། སྲོག་ལ་ལྷག་པར་ཞེན་པ་དང་། ལོངས་སྤྱོད་ལ་ལྷག་པར་ཞེན་པ་དང་། འདོད་པ་ལ་ལྷག་པར་ཞེན་པ་ཡིན་ཏེ། ཤ་ར་དྭ་ཏིའི་བུ་བཞི་པོ་དེ་དག་ནི་གང་ལ་ལྷག་པར་ཞེན་པའི་སེམས་ཅན་རྣམས་ངན་སོང་དུ་འགྲོ་བར་འགྱུར་བ་ལྷག་པར་ཞེན་པ་ཡིན་ནོ། །ཤ་ར་དྭ་ཏིའི་བུ་བདུན་པོ་འདི་དག་ནི་གནས་ཡིན་ཏེ། བདུན་གང་ཞེ་ན། མ་ཞུ་བའི་གནས་དང་། ཞུ་བའི་གནས་དང་། བད་ཀན་གྱི་གནས་དང་། མཁྲིས་པའི་གནས་དང་། རླུང་གི་གནས་དང་། ལྟ་བའི་གནས་དང་། ཤ་ར་དྭ་ཏིའི་བུ་འདི་ལྟ་སྟེ། འདོད་པ་ལ་ལྷག་པར་ཞེན་པ་འདི་
ཡང་གནས་ཆེན་པོ་ཡིན་ཏེ། ཤ་ར་དྭ་ཏིའི་བུ་གང་འདོད་པ་ལ་ལྷག་པར་ཞེན་པ་དེ་ནི་མཁྲིས་པ་དང་། བད་ཀན་དང་། སྣབས་དང་། རྣག་ཁྲག་དང་། གཅིན་དང་། ཕྱི་ས་དང་། ཤ་དང་། རྒྱུས་པ་དང་། རུས་པ་དང་། ཁྲག་དང་། གཞུངས་པ་ལ་རྟེན་པ་ཡིན་ནོ། །ཡང་དེའི་ཚེ་ཁྱིམ་བདག་རྣམ་པར་རྒྱལ་བ་སྲུང་བ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ །དེའི་སྐྱེ་དགུའི་བདག་མོ་ནི་གཟུགས་དང་ལྡན་མ་ཞེས་བྱ་སྟེ། གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པའོ། །དེ་ནས་ཁྱིམ་བདག་རྣམ་པར་རྒྱལ་བ་སྲུང་བ་དེ་ལ་ཡིད་ལྷག་པར་ཆགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདོད་པའི་གནས་གང་ལགས་པ་དེ་ནི་བཤང་གཅིའི་གནས་སོ་ཞེས་དེ་སྐད་བཀའ་མི་སྩལ་དུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས་བདག་གི་སྐྱེ་དགུའི་བདག་མོ་ནི་གཟུགས་ལྡན་མ་ཞེས་བགྱི་སྟེ། བཅོམ་ལྡན་འདས་དེ་ལ་ནི་བཤང་བའང་མ་མཆིས། གཅི་བའང་མ་མཆིས་པའི་སླད་དུའོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་དེའི་ལྷག་པའི་བསམ་པ་ཐུགས་སུ་ཆུད་ནས། ཁྱིམ་བདག་དེའི་ཆུང་མ་བུད་མེད་གཟུགས་ལྡན་མ་ཇི་འདྲ་བ་དེ་འདྲ་བ་ཞིག་མངོན་པར་སྤྲུལ་ཏོ། །ཁྱིམ་བདག་དེས་མཐོང་སྟེ་མཐོང་ནས་ཀྱང་དེ་འདི་སྙམ་དུ་སེམས་ཏེ། བདག་གི་ཆུང་མ་བྱ་བ་ཅི་ལ་འདིར་ཕྱིན་ཅིག་གུ་སྙམ་ནས། དེ་རང་གི་སྐྱེ་དགུའི་བདག་མོ་ག་ལ་བ་དེར་སོང་སྟེ་ཕྱིན་ནས་། རང་གི་སྐྱེ་དགུའི་བདག་མོ་ལ་འདི་སྐད་ཅེས་སྨྲས་སོ། །ཁྱོད་ཅིའི་ཕྱིར་འཁོར་འདིར་འོངས། དེས་སྨྲས་པ། ཁྱིམ་བདག་བདག་དེ་བཞིན་གཤེགས་པ་ལ་ཆོས་ཉན་དུ་འོངས་སོ། །དེ་ནས་ཁྱིམ་བདག་རྣམ་པར་རྒྱལ་བ་སྲུང་བས། རང་གི་ཆུང་མའི་ལག་པ་ནས་བཟུང་ནས། རང་གི་གོས་ཀྱི་གྲྭར་འདུག་ཏུ་བཅུག་སྟེ། ཁྱིམ་བདག་རྣམ་པར་རྒྱལ་བ་སྲུང་བ་དང་། ཆུང་མ་གཟུགས་ལྡན་མ་གཉི་ག་འདུག་གོ །དེ་ནས་བཅོམ་ལྡན་འདས་ཀྱིས་རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་མངོན་པར་འདུ་མཛད་པས་གོས་ཀྱི་གྲྭ་དེ་ལ་བུད་མེད་དེས་བཤང་བ་བྱས་པ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དོ། །དེ་ནས་ཁྱིམ་བདག་རྣམ་པར་རྒྱལ་བ་སྲུང་བ་
བཤང་བའི་དྲི་དེ་མི་བཟོད་ནས་སོར་མོ་དག་གིས་སྣ་བཀག་སྟེ། ཁ་ཕྱིར་ཕྱོགས་ཤིང་རྣམ་པར་བལྟས་སོ། །དེའི་ཚེ་ཁྱིམ་བདག་རྣམ་པར་རྒྱལ་བ་སྲུང་བའི་གཡས་ལོགས་ན་ཤཱཀྱའི་བུ་དགའ་བོ་ཞེས་བྱ་བ་འདུག་པར་གྱུར་ཏོ། །དེ་ནས་ཤཱཀྱའི་བུ་དགའ་བོས་ཁྱིམ་བདག་རྣམ་པར་རྒྱལ་བ་སྲུང་བ་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ཅིའི་ཕྱིར་སྣ་བཀག་ནས་ཁ་ཕྱིར་ཕྱོགས་ཏེ་འདུག །དེ་ནས་ཁྱིམ་བདག་རྣམ་པར་རྒྱལ་བ་སྲུང་བས་ཤཱཀྱའི་བུ་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་གནས་འདི་ན་བཤང་བའི་དྲི་ཆེན་པོ་ཡོད་དེ། ཁྱོད་ཀྱང་ཐག་མི་རིང་བ་ན་གནས་ན་མ་མཐོང་ངམ། དེ་ནས་བཅོམ་ལྡན་འདས་ཀྱིས་རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་མངོན་པར་འདུ་མཛད་པས། ཅི་ནས་ཤཱཀྱའི་བུ་དགའ་བོ་དང་འཁོར་བཞི་པོས་སྐྱེ་དགུའི་བདག་མོ་གཟུགས་ལྡན་མས་གོས་ཀྱི་གྲྭ་དེ་ལ་བཤང་བ་བྱས་པ་མཐོང་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དོ། །དེ་ནས་ཤཱཀྱའི་བུ་དགའ་བོས་ཁྱིམ་བདག་རྣམ་པར་རྒྱལ་བ་སྲུང་བ་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ཉིད་ཀྱི་སྐྱེ་དགུའི་བདག་མོས་གོས་ཀྱི་གྲྭ་ལ་བཤང་བ་བྱས་པ་ལ་ལྟོས། དེ་ནས་ཁྱིམ་བདག་རྣམ་པར་རྒྱལ་བ་སྲུང་བས་ཤཱཀྱའི་བུ་ནགས་སྦྱིན་ལ་འདི་སྐད་ཅེས་སྨྲས་སོ། །ནགས་སྦྱིན་གང་ཁོ་བོའི་ཆུང་མས་བཤང་བའམ། གཅི་བ་བྱས་པ་དེ་སྙམ་དུ་སེམས་པ་དེ་ནི་ཐེ་ཙོམ་ཟོས་ནས་རྣམ་པར་ལྟ་བར་བྱེད་ཀྱི་ཁོ་བོ་ནི་དེ་སྙམ་དུ་མི་སེམས་ན། དེ་ཇི་ལྟར་ཁོ་བོས་རྣམ་པར་བལྟ་བར་བྱ། བཙུན་པ་བདག་སེམས་པ་ལྟར་ན་ཁྱོད་ཀྱིས་བཤང་བ་ཁྱེར་ཏེ་འོངས་པ་སྙམ་བྱེད་དོ། །དེ་ནས་ཤཱཀྱའི་བུ་དགའ་བོ་ཤས་ཆེར་ཁྲོས་འཁྲུགས་རྔམ་སྟེ། སྟན་ལས་ལངས་ནས་ཁྱིམ་བདག་རྣམ་པར་རྒྱལ་བ་སྲུང་བ་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ནི་ལྷགས་པར་ཆགས་པ་ཡིན་ཏེ། ཁྱོད་ཀྱི་མིང་ཁྱིམ་བདག་བཤང་བ་ཞེས་བྱ་བར་གདགས་སོ། །ཁྱིམ་བདག་ཁྱོད་ཀྱིས་རང་གི་ཆུང་མ་ལ་ལག་པ་གཉི་གས་བཟུང་ནས་རང་གི་གོས་ཀྱི་གྲྭ་ལ་འདུག་ཏུ་མ་བཅུག་གམ། ཁྱིམ་བདག་དེ་ཉིད་ཀྱིས་ད་ལྟར་གནས་སྐབས་དེ་བྱས་པར་མ་གྱུར་ཏམ། དྲི་འབྱུང་བ་འདི་ཁྱོད་ཀྱིས་མངོན་སུམ་དུ་གྱིས་ཤིག །དེ་ལྟ་བས་ན་ཁྱིམ་བདག་ཁྱོད་ནི་ལྷག་པར་
ཆགས་པ་ཡིན། ལྷག་པར་ཁ་དྲག་པ་ཡིན་ཏེ། ཁྱོད་ཀྱི་མིང་ཁྱིམ་བདག་བཤང་བ་ཞེས་བྱ་བར་གདགས་སོ། །གང་ཁྱོད་བཤང་བའི་ནང་ན་གནས་ཤིང་། གཞན་དག་ལ་སྐུར་པ་འདེབས་པར་བྱེད་པ་ནི་རྣམ་པར་རྒྱལ་བ་སྲུང་བ་མ་ཡིན་ནོ། །ཁྱིམ་བདག་འཁོར་འདི་ནས་སོང་ཤིག་ཁྱིམ་བདག་སླར་སོང་ཤིག །ཁྱིམ་བདག་འཁོར་འདི་ནས་མི་སྣང་བར་གྱིས་ཤིག །ཁྱིམ་བདག་རྣམ་པར་མི་སྣང་བར་གྱིས་ཤིག །དེ་ནས་ཁྱིམ་བདག་དེས་ཆུང་མ་དེ་ལ་ལག་པ་ནས་བཟུང་ནས་འདི་སྐད་ཅེས་སྨྲས་སོ། །གཡོ་སྦེད་མ་ཁྱོད་ཇི་ལྟར་ན་ངའི་གོས་ཀྱི་གྲྭར་བཤང་བ་བྱ་བར་སེམས། དེས་སྨྲས་པ། ཁྱིམ་བདག་གང་གིས་བཤང་བའི་སྣོད་བླངས་ནས་རང་གི་གོས་ཀྱི་གྲྭ་ལ་འདུག་ཏུ་བཅུག་པ་དེ་ནི་དེ་ལྟར་འགྱུར་རོ། །དེ་ནས་ཁྱིམ་བདག་རྣམ་པར་རྒྱལ་བ་སྲུང་བ་སྐྱོ་བར་གྱུར་ནས། བཤང་བའི་གོང་བུ་དེ་ས་ལ་དོར་བར་བྱའོ་སྙམ་ན་ཡང་མ་ནུས་ལ། ཕྱིར་ཞིང་ཡན་ལག་དང་ཉིང་ལག་དག་བསྐུས་པར་ཡང་གྱུར་ཏེ། དེས་ཤཱཀྱའི་གཞོན་ནུ་ནགས་སྦྱིན་ལ་སྨྲས་པ། བཙུན་པ་གང་གིས་བདག་བཤང་བའི་དྲི་འདི་ལས་ཡོངས་སུ་ཐར་བར་འགྱུར་བའི་རིགས་པ་འདི་ན་ཅི་ཡོད། ནགས་སྦྱིན་གྱིས་སྨྲས་པ། ཁྱིམ་བདག་ཁྱོད་འདི་དང་གཞན་ལས་ཀྱང་ཡོངས་སུ་ཐར་བར་འགྱུར་མོད་ཀྱི་འོན་ཀྱང་གང་ཁྱོད་གནས་འདི་ནས་ཕྱིར་སོང་ན་འདི་ན་འདིར་རིགས་པའི་མཆོག་ཏུ་འགྱུར་རོ། །དེ་ཅིའི་ཕྱིར་ཞེ་ན། ཁྱིམ་བདག་ཁྱོད་ཆུང་མ་དང་ལྷན་ཅིག་ཏུ་བཤང་བའི་དྲི་དེས་འཆི་བར་འགྱུར་བའི་ཕྱིར་རོ། །དེ་ནས་ཁྱིམ་བདག་རྣམ་པར་རྒྱལ་བ་སྲུང་བས་ཤཱཀྱའི་བུ་ནགས་སྦྱིན་ལ་འདི་སྐད་ཅེས་སྨྲས་སོ། །བཙུན་པ་དགེ་སྦྱོང་དག་ནི་སྙིང་རྗེ་ཅན་ཞེས་བྱ་བ་ཡིན། དགེ་སྦྱོང་དག་ནི་སྙིང་བརྩེ་བ་ཅན་ཞེས་བྱ་བ་ཡིན། ཤཱཀྱའི་བུ་ཞེས་བྱ་བ་ཡིན་ན། ཇི་ཙམ་དུ་ཁྱོད་ལྷག་པའི་སྐྱེས་བུ་ཡིན་པ་ནི་ངོ་མཚར་ཏོ། །དེ་ནས་ཤཱཀྱའི་བུ་ནགས་སྦྱིན་གྱིས་ཁྱིམ་བདག་རྣམ་པར་རྒྱལ་བ་སྲུང་བ་ལ་འདི་སྐད་ཅེས་སྨྲས་སོ། །ཁྱིམ་བདག་ཁོ་བོས་ཁྱོད་ལ་ཇི་ལྟར་སྙིང་རྗེར་བྱ། ཇི་ལྟར་ཡང་སྙིང་བརྩེ་བར་བྱ། དེ་བཞིན་གཤེགས་པ་ཆོས་སྟོན་པ་ན་ཁྱོད་ཀྱིས་བདག་གི་སྐྱེ་དགུའི་བདག་མོ་ལ་བཤང་བའམ་གཅི་བ་མ་མཆིས་སོ་ཞེས་སྨྲས་ན། ཁྱོད་བཅོམ་ལྡན་འདས་དང་མི་འཐུན་པར་བྱེད་ཅིང་ཁོ་བོ་ལ་ཡང་སྐུར་པ་འདེབས་པར་བྱེད་དམ། ཁྱིམ་བདག་ཁྱོད་ཀྱི་སྐྱེ་དགུའི་བདག་མོ་ལ་བཤང་
བའམ་གཅི་བ་ཡོད་དམ་མེད་ཁྱོད་མངོན་སུམ་གྱིས་ལྟོས་ཤིག །དེ་ནས་ཁྱིམ་བདག་རྣམ་པར་རྒྱལ་བ་སྲུང་བས་སྐྱེ་དགུའི་བདག་མོ་ལ་སྨྲས་པ། སྐྱེ་དགུའི་བདག་མོ་ཁྱོད་རང་གི་ཁྱིམ་དུ་སོང་ཤིག །དེ་ནས་ཁྱིམ་བདག་རྣམ་པར་རྒྱལ་བ་སྲུང་བས་རང་གི་ཆུང་མ་བཏང་ནས། ཤཱཀྱའི་གཞོན་ནུ་ནགས་སྦྱིན་ལ་སྨྲས་པ། བཙུན་པ་ཁོ་བོས་ནི་བུད་མེད་རྣམས་ཀྱི་སྐྱོན་དང་། བུད་མེད་རྣམས་ཀྱི་སྒྱུ་དག་མཐོང་སྟེ། ནགས་སྦྱིན་ཁོ་བོ་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འདོད་དོ། །དེ་སྐད་ཅེས་སྨྲས་པ་དང་། ཤཱཀྱའི་བུ་ནགས་སྦྱིན་གྱིས་ཁྱིམ་བདག་རྣམ་པར་རྒྱལ་བ་སྲུང་བ་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་གལ་ཏེ་ལོ་བརྒྱར་ལུས་སྤོས་ཐམས་ཅད་ཀྱིས་བདུགས་ཤིང་སྒོས་ཤིག་དང་ཁྱིམ་བདག་ཁྱོད་དེ་ལྟར་ན་བཅོམ་ལྡན་འདས་ལས་རབ་ཏུ་འབྱུང་བ་ཕྱིས་འཐོབ་བོ། །དེ་ཅིའི་ཕྱིར་ཞེ་ན། ཁྱིམ་བདག་ཁྱོད་ཀྱི་ལུས་དེ་ནི་བཤང་བའི་དྲི་དེས་དྲི་མི་ཞིམ་པར་གྱུར་པའི་ཕྱིར་རོ། །དེ་ནས་ཁྱིམ་བདག་རྣམ་པར་རྒྱལ་བ་སྲུང་བས་ཤཱཀྱའི་བུ་ནགས་སྦྱིན་ལ་འདི་སྐད་ཅེས་སྨྲས་སོ། །བཙུན་པ་གལ་ཏེ་ཁོ་བོས་ལོ་གཅིག་གམ། ལོ་བརྒྱར་བདུགས་ན་དེ་ཉིད་དུ་བྲེལ་བའི་བདག་འཆི་བའི་དུས་བྱེད་པར་འགྱུར་ཞིང་། བཅོམ་ལྡན་འདས་ཀྱང་ཡོངས་སུ་མྱ་ངན་ལས་འདས་པ་ཆེན་པོར་མི་འགྱུར་རམ་སུས་ཤེས། བཙུན་པ་ཡང་གལ་ཏེ་ཁོ་བོ་བཅོམ་ལྡན་འདས་ལས་རབ་ཏུ་བྱུང་བ་ཐོབ་ན། ཁོ་བོས་གྲོང་དང་། གྲོང་ཁྱེར་དང་། ཡུལ་འཁོར་དང་། རྒྱལ་པོའི་ཕོ་བྲང་དག་ཏུ་མི་འཇུག་ཅིང་། དགོན་པ་དང་། བསོད་སྙོམས་དང་། ཆོས་གོས་ངན་པ་འཆང་བར་བྱའོ། །དེའི་ཕྱིར་བདག་དེ་ལྟ་བུའི་ངན་པ་དགོན་པ་པ་ལ་སུ་ཞིག་དྲི་མི་ཞིམ་པ་མནོམ་པར་འགྱུར། དེ་ནས་བཅོམ་ལྡན་འདས་ཀྱིས་ཁྱིམ་བདག་དེ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཁྱོད་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འདོད་དམ། གསོལ་པ། བཅོམ་ལྡན་འདས་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཚུར་ཤོག་ཚངས་པར་སྤྱད་པ་སྤྱོད་ཅིག །དེ་ནས་དེ་ཙམ་གྱིས་ཁྱིམ་བདག་དེ་རབ་ཏུ་བྱུང་ནས་ཞག་བདུན་ལོན་པ་བཞིན་དུ་གོས་ངུར་སྨྲིག་དང་ལྡན་ཞིང་མགོ་བྲེགས་ཏེ། ལག་མཐིལ་ན་ལྷུང་བཟེད་ཐོགས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེ་ལ་ཆོས་བསྟན་ཏེ། སྡུག་བསྔལ་འཕགས་པའི་
བདེན་པ་ཡང་དག་པར་རབ་ཏུ་བསྟན་ཅིང་། དེ་བཞིན་དུ་ཀུན་འབྱུང་བ་དང་། འགོག་པ་དང་། ལམ་འཕགས་པའི་བདེན་པ་ཡང་དག་པར་རབ་ཏུ་བསྟན་ཏོ། །དེ་ནས་དགེ་སློང་དེ་དེ་ཉིད་ཀྱི་ཚེ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །དེ་ནས་དེ་བྱ་བ་ཐོབ་སྟེ། དེའི་མཚན་མོ་འདས་ནས་སྔ་དྲོའི་ཚེ་ཆོས་གོས་བགོས། ལྷུང་བཟེད་ཐོགས་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་ཞུགས་སོ། །དེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་བསོད་སྙོམས་ཀྱི་ཕྱིར་མཐར་ཆགས་སུ་རྒྱུ་བས་རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས། ཕྱོགས་གཅིག་ཏུ་ཅང་མི་སྨྲ་བར་བསོད་སྙོམས་ཀྱི་ཕྱིར་འདུག་གོ །བུད་མེད་གཟུགས་ལྡན་མས་ཁྱིམ་བདག་རྒྱལ་བ་སྲུང་བ་རབ་ཏུ་བྱུང་སྟེ། ཆོས་གོས་བགོས། ལྷུང་བཟེད་ཐོགས་ཤིང་བསོད་སྙོམས་ཀྱི་ཕྱིར་འོངས་པ་མཐོང་སྟེ། མཐོང་ནས་ཀྱང་སྨྲས་པ། ཁྱིམ་བདག་ཁྱོད་ཀྱིས་ནི་མི་འཚམ་པར་བྱས་སོ། །དེ་ནས་དགེ་སློང་རྣམ་པར་རྒྱལ་བ་སྲུང་བས་དེ་ལ་སྨྲས་པ། སྲུ་ཁྱོད་ཀྱིས་ཁོ་བོའི་གོས་ཀྱི་གྲྭར་བཤང་གཅི་བྱས་ཤིང་དེས་ཀྱང་ཁོ་བོའི་ལུས་ཐམས་ཅད་དྲི་མི་ཞིམ་པར་བྱས་ན་ཁྱོད་ཁོང་དུ་ཆུད་དམ། དེས་སྨྲས་པ། ཁྱིམ་བདག་ཁྱོད་ཁོ་མོ་ལ་སྐུར་པ་གདབ་པར་སེམས་པ་འདི་ནི་ཁྱོད་ཀྱི་ཆ་མ་ཡིན་ཏེ། ཁྱིམ་བདག་འདི་ལྟར་ཁོ་མོ་ཕས་རང་གི་ཁྱིམ་ནས་རང་གི་ཁྱིམ་དུ་རྗེས་སུ་འཇུག་ཏུ་བཅུག་ནས། སྒོ་གང་གི་ཕྱི་རོལ་ཏུ་བཞིན་ཉེ་བར་བསྟན་པར་ཡང་མི་དྲན་ན། འོད་མའི་ཚལ་བྱ་ཀ་ལན་ད་ཀ་གནས་པར་བཅོམ་ལྡན་འདས་ཀྱི་ཐད་དུ་སོང་བ་ལྟ་ཅི་སྨོས། རྣམ་པར་རྒྱལ་བ་སྲུང་བས་སྨྲས་པ། སྲུ་ཁོ་བོ་ལ་དཔང་པོ་བཅོམ་ལྡན་འདས་དང་ཤཱཀྱའི་བུ་ནགས་སྦྱིན་དང་། འཁོར་བཞི་པོ་ཡོད་དེ། འདི་ལྟར་ཁོ་བོ་དང་ཁྱོད་ཤཱཀྱའི་བུ་ནགས་སྦྱིན་གྱིས་བཟུང་ནས་འཁོར་དེ་ནས་བསྐྲད་པའང་ཁྱོད་མི་དྲན་ནམ། དེ་ནས་བདུད་སྡིག་ཅན་ཁྱིམ་བདག་རྣམ་པར་རྒྱལ་བ་སྲུང་བའི་རྒྱབ་ཏུ་འདུག་ནས་སྨྲས་པ། ཁྱིམ་བདག་གང་གི་ཕྱིར་འཁྱམ་དུ་བཅུག་ཅིང་བསྐྲད་པ་དེ་ནི་འདི་མ་ཡིན་ཏེ། དེ་ནི་སྤྲུལ་པ་ཡིན་པར་གྱུར་ཏོ། དགེ་སློང་ཁྱོད་འདོད་པའི་ཡོན་ཏན་ལྔ་པོ་དག་གིས་མངོན་པར་དགའ་བར་གྱིས་ཤིག །ཁྱིམ་བདག་ཁྱོད་ནི་དགེ་སྦྱོང་གཽ་ཏ་མས་བསླུས་ཏེ། དེས་ནི་དགེ་སློང་མང་དུ་དེ་ལྟ་བུར་འཁྱམ་དུ་བཅུག་
ནས་རབ་ཏུ་ཕྱུང་ངོ་། །དགེ་སློང་རྣམ་པར་རྒྱལ་བ་སྲུང་བས་སྨྲས་པ། སྐྱེས་བུ་གང་གི་ཕྱིར་ཁོ་བོ་དྲི་མི་ཞིམ་པར་བྱས་པ་དེ་ནི་སྤྲུལ་པ་ཡིན་པར་གྱུར་ཏོ། །སྨྲས་པ་དེ་དེ་བཞིན་ནོ། །སྨྲས་པ། དེའི་ཕྱིར་ཁྱོད་ཀྱང་སྤྲུལ་པ་ཡིན། ཁོ་བོ་ཡང་སྤྲུལ་པ་ཡིན། བཅོམ་ལྡན་འདས་ཀྱིས་ཆོས་བསྟན་པ་ཐམས་ཅད་ཀྱང་སྤྲུལ་པ་ལྟ་བུ་ཡིན་ནོ། །དེ་ནས་བུད་མེད་དེ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །དེ་ནས་དེ་དད་པ་རྙེད་ཅིང་ཡིད་ཆེས་པ་ཐོབ་ནས་སྨྲས་པ། དགེ་སློང་མངོན་པར་དགའ་བར་གྱིས་ཤིག །ཚངས་པར་སྤྱད་པ་སྤྱོད་ཅིག །ཁོ་མོ་ཡང་བཅོམ་ལྡན་འདས་ཀྱི་བསྟན་པ་ལ་དེ་བཞིན་དུ་རབ་ཏུ་འབྱུང་ངོ་། །དེ་ནས་བཅོམ་ལྡན་འདས་ཀྱིས་ཆོས་རྣམས་ཀྱི་དོན་གྱི་དབང་དེ་ཉིད་ལ་རྟེན་ནས། ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་བཞི་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཡོངས་སུ་སྤང་བར་བྱ་བ་ཡིན་ཏེ། བཞི་གང་ཞེ་ན། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་སྡིག་པའི་གྲོགས་པོ་ཡོངས་སུ་སྤང་བར་བྱ་བ་ཡིན། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་དང་འདྲེ་བ་ཡོངས་སུ་སྤང་བར་བྱ་བ་ཡིན། བྱང་ཆུབ་སེམས་དཔའ་སེམས་དཔའ་ཆེན་པོས་གཅེར་བུ་པའི་སྨྲ་བ་དང་འཇིག་རྟེན་རྒྱང་ཕན་པའི་གསང་ཚིག་ཡོངས་སུ་སྤང་བར་བྱ་བ་ཡིན། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ལོག་པར་ལྟ་བའི་རྒུད་པ་ཡོངས་སུ་སྤང་བར་བྱ་བ་ཡིན་ཏེ། ཤ་ར་དྭ་ཏིའི་བུ་ཆོས་བཞི་པོ་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་སྤང་བར་བྱ་བ་ཡིན་ནོ། །ཤ་ར་དྭ་ཏིའི་བུ་ཆོས་བཞི་པོ་དེ་དག་ཇི་ལྟ་བ་བཞིན་དུ་དེ་ལྟར་བར་ཆད་བྱེད་པའི་ཆོས་གཞན་ནི་ངས་ཡང་དག་པར་རྗེས་སུ་མ་མཐོང་ངོ་། །ཤ་ར་དྭ་ཏིའི་བུ་དེ་ལྟ་བས་ན། ཐེག་པ་ཆེན་པོ་ལ་ཡང་དག་པར་ཞུགས་པས་ཆོས་བཞི་པོ་དེ་དག་ཡོངས་སུ་སྤང་བར་བྱ་ཞིང་ཡོངས་སུ་སྤངས་ནས་ཀྱང་། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཆོས་
གཞི་ཀུན་ཏུ་བསྟེན་པར་བྱ་བསྒོམ་པར་བྱ། ལན་མང་དུ་བྱ་བ་ཡིན་ཏེ། བཞི་གང་ཞེ་ན། ཤ་ར་དྭ་ཏིའི་བུ་སངས་རྒྱས་སམ་བྱང་ཆུབ་སེམས་དཔའ་འམ་ཉན་ཐོས་གང་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདོམས་པར་བྱེད། རྗེས་སུ་སྟོན་པར་བྱེད་པའི་དགེ་བའི་བཤེས་གཉེན་ཀུན་ཏུ་བསྟེན་པར་བྱ་ཞིང་བསྒོམ་པར་བྱ་ལ་ལན་མང་དུ་བྱ་བ་ཡིན། ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔས་བུད་མེད་དང་འདྲེ་བ་རྣམ་པར་བཟློག་པའི་ཕྱིར་མངོན་པར་འབྱུང་བ་དང་། རབ་ཏུ་འབྱུང་བ་དང་། དགོན་པར་གནས་པ་ཀུན་ཏུ་བསྟེན་པར་བྱ་ཞིང་། བསྙེན་པར་བྱ་ལ། བསྙེན་བཀུར་བྱ་བ་ཡིན། ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔས་གཅེར་བུའི་སྨྲ་བ་དང་འཇིག་རྟེན་རྒྱང་ཕན་པ་བཟློག་པའི་ཕྱིར་ཆོས་དེ་དག་གཟུང་བ་དང་། ཀུན་ཆུབ་པ་དང་། མི་བརྗེད་པར་བྱ་བར་རྣལ་འབྱོར་དུ་བྱ་བ་ཡིན། ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔས་ལོག་པར་ལྟ་བ་རྣམ་པར་བཟློག་པའི་ཕྱིར་ཆེན་པོ་སྟོང་པ་ཉིད་ཀྱི་ཡང་དག་པའི་ལྟ་བ་ཀུན་ཏུ་བསྟེན་པར་བྱ་ཞིང་བསྙེན་པར་བྱ་བ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། དེ་ནས་སྟོན་པས་གཞན་ཡང་བཀའ་སྩལ་པ། བུད་མེད་འདྲེ་བ་རྣམ་པར་སྤང་། །སྡིག་པའི་གྲོགས་པོའང་སྤང་བར་བྱ། །ལོག་པར་ལྟ་བ་བཟློག་པའི་ཕྱིར། །འཇིག་རྟེན་རྒྱང་ཕན་རྣམ་པར་སྤང་། །གང་ཞིག་བུད་མེད་སྟེན་བྱེད་ཅིང་། །དེ་བཞིན་སྡིག་པའི་གྲོགས་པོ་དང་། །དེ་བཞིན་འཇིག་རྟེན་རྒྱང་ཕན་དང་། །ལོག་པར་ལྟ་བ་སྟེན་བྱེད་པ། །ལྟ་ངན་ལ་སོགས་བསྟེན་པས་ན། །མི་ཁོམ་དག་ཏུ་མྱུར་བར་འགྲོ། ། སངས་རྒྱས་དད་པ་ཕུན་ཚོགས་དང་། །དལ་བ་ཤིན་ཏུ་རྙེད་དཀའ་ཡིན། །གང་ཞིག་སྡིག་པ་སྟེན་འདོད་པ། །དེ་ནི་སྡིག་པའི་སྤྱོད་ཡུལ་འགྱུར། །སྡིག་པའི་སྤྱོད་ཡུལ་སྤྱོད་པ་ནི། །སྡིག་པ་ཅན་གྱི་འགྲོ་བར་འགྲོ། །གང་ཞིག་བྱང་ཆུབ་ཞུགས་གྱུར་པ། །དེ་ཕྱིར་བུད་མེད་བསྟེན་མི་བྱ། །མི་གཙང་བསྐུས་པའི་ཕག་བཞིན་དུ། །རྒྱང་བསྲིང་རྣམ་པར་སྤང་བར་བྱ། །ཆོས་མ་ཡིན་པ་གང་སྟོན་པའི། །སྡིག་པའི་གྲོགས་པོ་བསྟེན་མི་བྱ། །ཆོས་མ་ཡིན་པའི་སྤྱོད་སྟེན་ན། །སེམས་གྲལ་མུན་པར་འགྱུར་བ་ཡིན། །གཅེར་བུ་རྣམས་ཀྱིས་གང་འཛིན་པ། །
འཇིག་རྟེན་རྒྱང་པན་བསྟེན་མི་བྱ། །ཀུན་ཏུ་འཇམ་པོ་ཇི་བསྟེན་ཀྱང་། །དེ་ཚེ་དམིགས་པ་འཐོབ་པ་ཡིན། །དེ་དག་ཐམས་ཅད་རྣམ་སྤངས་ནས། །ལོག་པར་ལྟ་བ་རྣམ་པར་སྤང་། །འཁོར་བའི་རྩ་བ་དེ་ཡིན་པར། །འདིར་ནི་ང་ཡིས་བསྟན་པ་ཡིན། །ཆོས་ངན་པ་དག་རྣམ་སྤངས་ནས། །བྱང་ཆུབ་སྤྱད་པ་སྤྱོད་པ་ན། །ང་ཡིས་སྔོན་ཆད་གང་བསྟན་པའི། །ཆོས་མཆོག་དག་ནི་ཀུན་ཏུ་སྤྱད། །ལམ་དེར་གང་ཞིག་སྦྱོར་བྱེད་པའི། །མངོན་པར་འབྱུང་དང་ཚངས་སྤྱོད་དང་། །དགེ་བའི་བཤེས་གཉེན་བཟང་པོ་དང་། །སངས་རྒྱས་དང་ནི་ཉན་ཐོས་སོ། །དེ་ལ་སྟོང་པ་བསྟེན་པར་བྱ། །ཆེན་པོ་སྟོང་པའི་སྟོང་པ་མེད། །སྟོང་པའི་ཆོས་ལ་དམིགས་པ་ནི། །ཀུན་ཏུ་སྤྱད་པར་བྱ་མ་ཡིན། །ཆོས་དང་དེ་བཞིན་དམིགས་པ་ནི། །སྟོང་ལ་དམིགས་པར་མི་འགྱུར་རོ། །གང་ལ་འཇིག་རྟེན་མི་འཇུག་པ། །དེ་ནི་སྟོང་པ་དེ་ཡིན་གསུངས། །བྱང་ཆུབ་སྤྱད་པ་སྤྱོད་པ་ན། །གང་ལ་ང་ཡིས་སྔོན་བསླབས་པ། །དེ་ལ་བྱིས་པ་བློ་ཅན་གྱིས། །ཤེས་པ་ཅིས་ཀྱང་འགྲོ་མི་འགྱུར། །བྱང་ཆུབ་སྤྱད་པ་སྤྱོད་པ་ན། །གང་དག་ང་ཡི་ཆོས་ཐོས་པ། །དེ་ལ་བྱང་ཆུབ་སྤྱད་པ་ནི། །གཞན་གྱི་དྲིང་ཕྱིར་སོང་མ་ཡིན། །དེ་དག་ང་ཡིས་རང་གིས་རྟོགས། །ཆོས་ཀྱི་དམ་པ་བསྟན་པ་ཡིན། །གང་དུ་སྟོང་ཉིད་ཆགས་མེད་པ། །དེ་ནི་དྲང་པོའི་ལམ་ཡིན་ནོ། ། བྱང་ཆུབ་སྙིང་པོར་འདུག་ནས་སུ། །བློ་གྲོས་ངན་པའི་བདུད་བཅོམ་ནས། །བསམ་མི་ཁྱབ་པར་ངས་གང་རྟོགས། །དེ་ནི་ཆོས་ཉིད་དེ་ཡིན་གསུངས། །དེ་ནི་ང་ཡིས་མངོན་སངས་རྒྱས། །དེ་ཉིད་ང་ཡིས་བསྟན་པ་ཡིན། །གང་ཕྱིར་འཁོར་ལོ་བསྐོར་བ་ཡིས། །མཐའ་མཆོག་ང་ཡིས་སངས་རྒྱས་སོ། །གང་ཞིག་བློ་ངན་བདུད་བཅོམ་ནས། །བྱང་ཆུབ་འཚང་རྒྱར་འགྱུར་བ་དང་། །བྱང་ཆུབ་སྙིང་པོར་འདུག་འདོད་པ། །དེ་ཡིས་སྟོང་ཉིད་དེ་བསྟེན་བྱ། །གང་ཞིག་འཁོར་ལོ་བླ་མེད་པའི། །ཆོས་ཀྱི་འཁོར་ལོ་བསྐོར་བ་དང་། །དེ་ལ་དགེ་འདུན་གདམས་འདོད་པ། །དེ་ཡིས་སྟོང་ཉིད་དེ་བསྟེན་བྱ། །གང་ཞིག་སྟོབས་རྣམས་བཅུ་པོ་ཡིས། །གནས་པར་གྱུར་ནས་འཇིགས་མེད་པར། །སེང་གེའི་སྒྲ་ནི་སྒྲོགས་འདོད་པ། །དེ་ཡིས་སྟོང་ཉིད་དེ་བསྟེན་བྱ། །རྟག་པར་
འཇིག་རྟེན་ཐམས་ཅད་དུ། །གང་གི་སྙན་དང་གྲགས་འབྱུང་བའི། །སྟོང་ཉིད་དེ་ནི་བསྟེན་པ་ཡིས། །ང་ནི་ཕ་རོལ་ཕྱིན་པ་ཡིན། །ང་ཡི་རྗེས་སུ་སློབ་པ་ན། །བྱང་ཆུབ་སེམས་དཔའ་རབ་མཁས་པས། །ཡེ་ཤེས་བླ་ན་མེད་པ་དེའི། །བྱང་ཆུབ་དམ་པ་འཚང་རྒྱར་བྱ། །གང་ཞིག་ང་ཡི་རྗེས་སློབ་པ། །དགེ་སློང་འོན་ཏེ་དགེ་སློང་མས། །ཇི་ལྟར་ད་ལྟར་ངས་འཐོབ་བཞིན། །བྱང་ཆུབ་དམ་པ་ཐོབ་པར་འགྱུར། །འདི་ལ་དགེ་སློང་དགེ་སློང་མ། །འབའ་ཞིག་གིས་ནི་བསྟེན་བྱ་མིན། །སེམས་ཅན་ཀུན་གྱིས་བསླབས་ན་ཡང་། །དེ་དག་བྱང་ཆུབ་རྙེད་པར་སླ། །དམ་པ་དེ་ལ་བསྟེན་པ་ན། །ང་ནི་ཆགས་པ་མེད་པར་བྱུང་། །མ་འདྲེས་པ་ཡི་ཆོས་རྣམས་ཀྱིས། །ཆགས་མེད་བྱང་ཆུབ་སངས་རྒྱས་སོ། །ཆོས་དེ་དག་ནི་སྟེན་བྱེད་ན། །ཡེ་ཤེས་ཆགས་མེད་དམན་མ་ཡིན། །བྱང་ཆུབ་ཕྱིར་ནི་ལམ་དེ་ཡིན། །རྟག་པར་སྟོང་ཉིད་བསྟེན་པར་བྱ། །དེ་ཕྱིར་བྱང་ཆུབ་སེམས་དཔའ་ཡིས། །སྲོག་ཆགས་རྣམས་ལ་ཕན་པའི་ཕྱིར། །ཆོས་རྣམས་ཐམས་ཅད་སྟོང་པ་ཡི། །ཆོས་དེ་དག་ལ་བསླབ་པར་བྱ། །ཐབས་ལ་འཇུག་པ་དང་། དམ་པའི་ཆོས་སྤོང་བ་དང་། བྱང་ཆུབ་སེམས་དཔའ་ཡང་དག་པར་འཛིན་དུ་གཞུག་པའི་ལེའུ་སྟེ་དགུ་པའོ།། །།