བཅུ་པ། བྱང་ཆུབ་སེམས་དཔའི་སྤྱོད་པའི་ལེའུ།
ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན། ཇི་ལྟ་བ་བཞིན་རྣམ་པར་གཏན་ལ་དབབ་པ་ལ་མཁས་པ་ཡིན། ཆོས་ཐམས་ཅད་ལ་སྤོབས་པ་ཐོགས་པ་མེད་པ་ཡིན། སྤོབས་པ་རྣོ་བ་དང་། སྤོབས་པ་མཐའ་ཡས་པ་དང་། སྤོབས་པ་ཟབ་པ་ཡིན་ཏེ། དེའི་ཚེ་དེ་བཞིན་གཤེགས་པས་ཇི་ལྟ་བ་བཞིན་རྣམ་པར་གཏན་ལ་དབབ་པ་ལ་མཁས་པ་དང་། སྤོབས་པ་རྣོ་བ་དང་། སྤོབས་པ་རངས་པར་ཐུགས་སུ་ཆུད་ནས་ཕྱི་མའི་ཆོས་ཀྱི་གྲོང་ཁྱེར་སྲུང་བར་བྱིན་གྱིས་རློབ་པར་མཛད་དོ། །ཤ་ར་དྭ་ཏིའི་བུ་བཞི་གང་ཞེ་ན། འདི་ལ་བྱང་ཆུབ་སེམས་དཔའ་རྒྱུན་མི་ཆད་པར་རབ་ཏུ་འབྱུང་བ་སྟེན་པའི་སེམས་དང་ལྡན་པས་མངོན་པར་དགའ་སྟེ། མངོན་པར་འབྱུང་བ་ལ་གཞོལ་བ་ཡིན་ཞིང་། ཆོས་ཡོངས་སུ་ཚོལ་བས་ཆོག་མི་ཤེས་པ་ཡིན། ཆོས་དེ་ཐོས་ཤིང་ཡོངས་སུ་བཙལ་ནས་ཀྱང་སེམས་ཅན་
རྣམས་ལ་ཀུན་བགེད་པ་ཡིན། ཆོས་བསྟན་པའི་ཕྱིར་སྙོམ་ལས་མེད་པ་ཡིན་ཞིང་། ཆོས་ཐམས་ཅད་རྣམ་པར་འཇིག་པའི་བློས་མི་གནས་པའི་བསམ་གཏན་པ་ཡང་ཡིན་ལ། སེམས་ཅན་ཐམས་ཅད་ལས་བླ་ན་མེད་པའི་སེམས་ཀྱིས་བྱང་ཆུབ་ཀྱི་ཕྱིར་སངས་རྒྱས་རྗེས་སུ་དྲན་པ་ཡང་སྒོམ་པར་བྱེད་པ་ཡིན། ཆོས་གང་ལ་ཡང་ལུས་ཀྱི་དམིགས་པས་མཚན་མར་མི་འཛིན་པ་ཡིན་ཏེ། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན་ཆོས་ཐམས་ཅད་སྤོབས་པ་ཆགས་པ་མེད་པ་ཡིན་ཞིང་། ཕྱི་མའི་དུས་ཕྱི་མའི་ཚེ་ན་དེ་དེ་བཞིན་གཤེགས་པས་ཆོས་ཀྱི་གྲོང་ཁྱེར་སྲུང་བར་བྱིན་གྱིས་རློབ་པར་མཛད་དོ། །ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན། ཚེ་རྗེས་ཀྱང་དྲན་པ་བརྗེད་པར་མི་འགྱུར་རོ། །བཞི་གང་ཞེ་ན། ཆོས་ཡོངས་སུ་ཚོལ་བ་དང་། ཆོས་ཀྱི་སྦྱིན་པས་ཆོག་མི་ཤེས་པ་ཡིན་ཏེ། ཤ་ར་དྭ་ཏིའི་བུ་རིགས་ཀྱི་བུའམ། རིགས་ཀྱི་བུ་མོ་ཆོས་དང་པོ་དེ་དང་ལྡན་པ་ནི་ཚེ་རྗེས་ན་ཡང་དྲན་པ་བརྗེད་པར་མི་འགྱུར་རོ། །ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་ཅན་མང་པོ་གཞན་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་ཅིང་། ཡང་དང་ཡང་དུ་དེ་བཞིན་གཤེགས་པའི་ཡོན་ཏན་ཡོངས་སུ་སྒྲོགས་པར་ཡང་བྱེད་པ་ཡིན་ཏེ། ཤ་ར་དྭ་ཏིའི་བུ་བྱང་ཆུབ་སེམས་དཔའ་ཆོས་གཉིས་པ་དེ་དང་ལྡན་པ་ནི་ཚེ་རྗེས་ན་ཡང་དྲན་པ་བརྗེད་པར་མི་འགྱུར་རོ། །ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་ཟབ་མོ་ལ་བཟོད་པ་ཡིན་ཏེ། ཤ་ར་དྭ་ཏིའི་བུ་བྱང་ཆུབ་སེམས་དཔའ་ཆོས་གསུམ་པ་དེ་དང་ལྡན་པ་ནི་ཚེ་རྗེས་ན་ཡང་དྲན་པ་བརྗེད་པར་མི་འགྱུར་རོ། །ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་མཉེས་པར་བྱ་བའི་ཕྱིར་ཡིད་རྣམ་པར་མི་གཡེང་བ་ཡིན་ཞིང་། དེ་བཞིན་གཤེགས་པའི་ཆོས་ཡིད་ལ་བྱ་བའི་ཕྱིར་ཤེས་བཞིན་དང་དྲན་པ་ཅན་ཡིན་ལ། ཟབ་མོ་ལ་བཟོད་ཅིང་འཆི་བའི་དུས་བྱེད་པ་ཡིན་ཏེ། ཤ་ར་དྭ་ཏིའི་བུ་བྱང་ཆུབ་སེམས་དཔའ་ཆོས་བཞི་པ་དེ་དང་ལྡན་པ་ནི་ཚེ་རྗེས་ན་ཡང་དྲན་པ་བརྗེད་པར་མི་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། དེ་སྐད་གསུངས་ནས་སྟོན་
པས་གཞན་ཡང་བཀའ་སྩལ་པ། དེ་དག་ཆོས་ནི་ཡོངས་སུ་ཚོལ། །ཆོས་ཀྱི་སྦྱིན་པའང་སྦྱིན་པར་བྱེད། །དེ་ཕྱིར་ནམ་ཡང་ནམ་དུ་ཡང་། །ཆོས་དྲན་བརྗེད་པར་མི་འགྱུར་རོ། །བྱང་ཆུབ་ཡང་དག་འཛིན་དུ་འཇུག །སེམས་ཅན་མང་པོ་འགོད་པར་བྱེད། །དེ་ཕྱིར་དེ་ཡིས་ཚེ་རབས་སུ། །དེ་ཡི་དྲན་པ་ཉམས་མི་འགྱུར། །སངས་རྒྱས་བསྟན་པའི་སྟོང་ཉིད་དང་། །ཟབ་མོའི་ཆོས་རྣམས་སྟེན་པར་བྱེད། །མ་སྐྱེས་པ་ཡི་ཆོས་རྣམས་ལས། །དེ་ཡི་བཟོད་པ་ཉམས་མི་འགྱུར། །སྐྱེ་བ་ཡང་ནི་སྐྱེ་བ་མེད། །གང་དག་སྐྱེས་པའང་དེ་དེ་བཞིན། །དེ་འདྲ་བ་ཡི་བཟོད་པ་ཡིས། །དེ་ཡི་དྲན་པ་ཉམས་མི་འགྱུར། །རྣམ་པར་གཡེངས་པའི་སེམས་ཀྱིས་ནི། །མཁས་པ་འཆི་བའི་དུས་མི་བྱེད། །རྟག་པར་སངས་རྒྱས་ཆོས་རྣམས་ལ། །དེ་ཡི་དཀའ་དང་སངས་རྒྱས་དམིགས། །མཁས་པ་འཆི་བའི་དུས་བྱེད་ན། །དེ་ཡི་སེམས་ནི་ཞུམ་པ་མེད། །དེ་ཕྱིར་དེ་ནི་ཚེ་རབས་སུ། །དྲན་པ་ཉམས་པར་མི་འགྱུར་རོ། །གང་ཞིག་ཡེ་ཤེས་མཆོག་འདོད་པ། །བྱང་ཆུབ་དམ་པ་ཁྱད་པར་འཕགས། །བྱང་ཆུབ་དེ་ནི་ཚོལ་བ་ན། །ཆོས་བཞི་པོ་དག་སྟེན་པར་བྱེད། །སངས་རྒྱས་རྣམས་ཀྱིས་རྟག་ཏུ་བསྔགས། །དེ་དག་མཆོག་དང་གཙོ་བོ་ཡིན། །དེ་ཕྱིར་ཁྱོད་ལ་ངས་བསྟན་གྱིས། །ཆོས་དེ་དག་ནི་བསྟེན་པར་བྱོས། །གང་ཕྱིར་ང་ལའང་ཕན་བྱེད་པ། །ཁྱོད་ལ་ཕན་ཕྱིར་བསྟན་པར་བྱ། །རྫོགས་པའི་སངས་རྒྱས་འདིར་ཕན་བཞེད། །གང་ལའང་ཆད་པ་གཅོད་མི་མཛད། །ངེས་པ་གང་ཞིག་བྱང་ཆུབ་ཕྱིར། །འདི་ལ་ཡེ་ཤེས་འདོད་བྱེད་པས། །དེ་ཕྱིར་ལམ་ལ་བསྟེན་པར་བྱོས། །དེ་ལས་བྱང་ཆུབ་འཐོབ་པ་ཡིན། །ལེ་ལོའི་སེམས་དང་ལྡན་པ་དང་། །ཞུམ་པའི་སེམས་དང་ལྡན་པ་ཡིས། །བྱང་ཆུབ་མཆོག་རེག་ནུས་མ་ཡིན། །དེ་ཕྱིར་དེ་ནི་རྣམ་པར་སྤང་། །བདག་ཏུ་འདུ་ཤེས་བྱེད་པ་དང་། །སེམས་ཅན་འདུ་ཤེས་བྱེད་པ་འམ། །དངོས་འདུ་ཤེས་པས་སངས་རྒྱས་ཀྱི། །བྱང་ཆུབ་འཚང་རྒྱར་ནུས་མ་ཡིན། །དེ་ཕྱིར་དེ་ནི་རྣམ་སྤངས་ནས། །རྟག་པར་སྟོང་པ་ཉིད་ལ་བསྟེན། །དངོས་པོ་ཐམས་ཅད་འདིར་བཤིག་པས། །དེ་ལས་ཡེ་ཤེས་རྣམ་དག་འགྱུར། །ཁྱེད་ཅག་གནས་པར་མ་བྱེད་ཅིག །གནས་ལས་ཀྱང་ནི་བསྐྱོད་པར་
བྱོས། །འོང་བ་དང་ནི་འགྲོ་བ་ལས། །བསྐྱོད་པ་དག་པ་དགའ་བར་གྱིས། །ཤ་ར་དྭ་ཏིའི་བུ་ཆོས་བཞི་པོ་འདི་དག་ནི་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཀྱིས་ཐམས་ཅད་ཀྱི་མཆོག་སྒྲུབ་པར་འགྱུར་བ་ཡིན་ཏེ། བཞི་གང་ཞེ་ན། ཤ་ར་དྭ་ཏིའི་བུ་འདི་ལ་བྱང་ཆུབ་སེམས་དཔའ་སངས་རྒྱས་ཀྱི་བྱང་ཆུབ་རྣམ་པར་འཇིག་ཅིང་། དམ་པའི་ཆོས་ནུབ་པར་འགྱུར་བ་ན། དམ་པའི་ཆོས་ཡོངས་སུ་ཚོལ་བ་ལ་མངོན་པར་བརྩོན་པ་ཡིན། དེ་བཞིན་གཤེགས་པའི་མཆོད་རྟེན་རྣམ་པར་འཇིག་པ་ན་ཕྱིར་འཆོས་པར་བྱེད་ཅིང་ལུས་དང་སྲོག་ཡོངས་སུ་གཏོང་བར་བྱེད་ཀྱང་། ཆོས་ནི་ཡོངས་སུ་གཏོང་བར་མི་བྱེད་པ་ཡིན། སེམས་ཅན་སྡུག་བསྔལ་བ་དག་མཐོང་ན་ཡང་སྙིང་རྗེ་སྐྱེད་པར་བྱེད་པ་ཡིན། དེ་སྙིང་རྗེ་ཐོབ་ནས་ཇེ་ཆེར་བརྩོན་འགྲུས་རྩོམ་པར་བྱེད་ཅིང་། ནམ་ཞིག་ན་བདག་གིས་སངས་རྒྱས་ཀྱི་ཡེ་ཤེས་ཡང་དག་པར་བསྒྲུབས་ནས། སེམས་ཅན་དེ་དག་གི་སྡུག་བསྔལ་ཐམས་ཅད་རྣམ་པར་ཞི་བར་བྱ་བའི་ཕྱིར་ཆོས་བསྟན་པར་བྱ་ཞེས་དེ་སྙམ་སེམས་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་ནི་ཆོས་ཡོངས་སུ་བཙལ་བའི་ཕྱིར་ཆོག་མི་ཤེས་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཡོངས་སུ་བཙལ་བའི་ཕྱིར་ཆོས་ལ་འདུན་པ་ཆེ་བ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཐེག་པ་ཆེན་པོ་ལ་ལྷག་པར་དམིགས་པ་ཉིད་ཀྱི་ཕྱིར་བསྙེན་པར་དཀའ་བ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་རྣམས་ལ་ཕན་པར་འདོད་པ་ཉིད་ཀྱི་ཕྱིར་དེ་དག་ལ་སྐྱོབ་པ་གཞན་གང་ཡང་མེད་དེ། གཞན་དུ་ན་བདག་འབའ་ཞིག་ཏུ་ཟད་དོ་སྙམ་པས་བྱམས་པའི་སེམས་དང་ལྡན་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྙིང་རྗེ་ཆེན་པོ་བསྟེན་པའི་སེམས་དང་ལྡན་པས་ཁྲོས་པ་མེད་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ལ་ཡེ་ཤེས་ཉེ་བར་སྒྲུབ་པ་ཉིད་ཀྱི་ཕྱིར་ཕྲག་དོག་མེད་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་ཆོས་ཀྱི་སྦྱིན་པས་སེམས་ཅན་རྣམས་ལ་ཕན་འདོགས་པ་ཉིད་ཀྱི་ཕྱིར་སེར་སྣ་མེད་པ་
ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་ལྷག་པའི་བསམ་པ་ཉེ་བར་སྟོན་པ་ཉིད་ཀྱི་ཕྱིར་བདོག་པ་ཐམས་ཅད་ཡོངས་སུ་གཏོང་བ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་ཆོས་ཐམས་ཅད་ལ་ཡོངས་སུ་འཛིན་པ་མེད་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་ཚུར་ཤོག་ལེགས་པར་འོངས་སོ། །ཞེས་སྨྲ་བ་ཡིན་ཞིང་ཁྲོ་གཉེར་མེད་པར་བཞིན་འཛུམ་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་རྒོད་པ་མེད་ལ། སེམས་ཅན་སྡུག་བསྔལ་བ་དག་མཐོང་ན་སྙིང་བླས་སུ་བྱེད་ཅིང་བརྩོན་འགྲུས་བརྟན་པོར་རྩོམ་པར་བྱེད་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་སངས་རྒྱས་ཀྱི་ཆོས་རྣམས་ལ་དགའ་བ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་སེང་གེའི་སྒྲ་མངོན་པར་སྒྲོགས་པ་ཉིད་ཀྱི་ཕྱིར་མི་འཇིགས་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སངས་རྒྱས་ཀྱི་ཆོས་རྣམས་ལ་ལེགས་པར་གནས་པས་བག་ཚ་བ་མེད་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་སངས་རྒྱས་ཀྱི་ཆོས་ཡོངས་སུ་བཙལ་བའི་ཕྱིར་བརྩོན་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་རྟག་ཏུ་བརྩོན་པ་ཡིན་ཞིང་ཆོས་བསྟན་པའི་ཕྱིར་སྟོང་གསུམ་གྱི་སྟོང་ཆེན་པོར་རྒྱུ་བ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་ཆོས་རྣམས་ལ་རྟོགས་པར་ཁོང་དུ་ཆུད་པས་རྣམ་པར་རྒྱལ་བ་སྲུང་བ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་ཡང་དག་པ་ཇི་ལྟ་བ་བཞིན་སོ་སོར་རྟོག་པ་ཉིད་ཀྱི་ཕྱིར་སྙིང་པོ་འཛིན་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་ཆོས་ཐམས་ཅད་ལ་རང་གིས་མངོན་པར་རྫོགས་པར་བྱང་ཆུབ་པ་ཉིད་ཀྱི་ཕྱིར་སྙིང་པོ་བླངས་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་དུས་དང་དུས་མ་ཡིན་པར་ཡོངས་སུ་སྨིན་པར་བྱེད་པ་ཉིད་ཀྱི་ཕྱིར་སྐུལ་བར་བྱེད་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་ཆོས་དང་འཐུན་པས་ཕ་རོལ་སྨྲ་བ་རྣམས་ཚར་གཅོད་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་ཀྱི་དོན་རྣམ་པར་ངེས་པ་ཡིན་ནོ། །
ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སངས་རྒྱས་ཀྱི་ཆོས་རྣམས་ཀྱི་རིགས་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ནི་ཆོས་དཀོན་མཆོག་ཆེན་པོའི་གཏེར་ཆེན་པོ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་ཀྱི་ཕྱག་རྒྱ་རྗེས་སུ་རྟོགས་པར་རྣམ་པར་འགྲེལ་པའི་ཆོས་རྒྱ་མཚོ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་འཁྲུག་པ་ཆེན་པོ་གྲངས་མེད་དཔག་ཏུ་མེད་པ་ཕྱིར་བཟློག་པ་ཉིད་ཀྱི་ཕྱིར། ཁོར་ཡུག་དང་ཁོར་ཡུག་ཆེན་པོ་ལྟ་བུ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་མི་ཟད་པ་ཡང་དག་པར་རབ་ཏུ་སྟོན་པས་ཡོངས་སུ་མ་གཏུགས་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ནམ་མཁའ་དང་མཉམ་པ་ཉིད་ཀྱི་ཕྱིར་རྙོག་པ་མེད་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ནམ་མཁའ་མི་ཟད་པ་ཉིད་ཀྱི་ཕྱིར་ཟད་མི་ཤེས་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དགེ་བའི་ཆོས་ཀྱིས་མངོན་དུ་འཕགས་པ་ཉིད་ཀྱི་ཕྱིར་ལྷུན་པོ་ལྟ་བུ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་འདོད་པ་དང་མི་འདོད་པ་དང་བྲལ་བས་ས་ལྟ་བུ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དགེ་བའི་རྩ་བ་ཆུད་མི་གཟོན་པ་ཉིད་ཀྱི་ཕྱིར་ཞིང་ལྟ་བུ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཀྱི་སྣང་བ་ཀུན་ཏུ་སྟོན་པས་ཉི་མ་ལྟ་བུ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་མུན་ནག་རྣམ་པར་སེལ་བ་ཉིད་ཀྱི་ཕྱིར་ཟླ་བ་ལྟ་བུ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་འདོད་ཆགས་དང་། ཞེ་སྡང་དང་། གཏི་མུག་གི་གདུང་བ་རབ་ཏུ་ཞི་བར་བྱེད་པ་ཉིད་ཀྱི་ཕྱིར་གདུགས་ལྟ་བུ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་རྣམས་ཀྱི་གནས་དང་། སྐྱབས་དང་། སྟོན་པར་གྱུར་པས་ཤིང་ལྗོན་པ་ཆེན་པོའི་གྲིབ་མ་ལྟ་བུ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ནི་བཟོའི་གནས་ཐམས་ཅད་ལ་རྟོགས་པར་ཁོང་དུ་ཆུད་པས་སློབ་དཔོན་ལྟ་བུ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་ཐམས་ཅད་ཀྱི་བསམ་པ་ཡོངས་སུ་སྐོང་བས་ཉེ་བར་འཚོ་བར་བྱ་བ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་ཐམས་ཅད་ཀྱི་སྟོན་པར་གྱུར་པ་ཡིན་ནོ། །ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཅན་ཐམས་ཅད་ཀྱི་རྟེན་དུ་གྱུར་པ་ཡིན་ནོ།། །།བམ་པོ་བཅོ་ལྔ་པ། ཤ་ར་དྭ་ཏིའི་བུ་གལ་ཏེ་ངས་ཇི་ལྟར་མཁྱེན་པ་བཞིན་དུ་སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའ་ནི་བདག་ཅག་ལ་བྱ་བ་དེ་ལྟ་བུས་ཉེ་བར་གནས་པ་ཡིན་ནོ། །ཞེས་དེ་ལྟར་ཤེས་པར་གྱུར་ན། ཤ་ར་དྭ་ཏིའི་བུ་སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའ་དང་པོ་སེམས་བསྐྱེད་པ་ནས་བྱང་ཆུབ་ཀྱི་སྙིང་པོ་ལ་འདུག་པ་དེའི་བར་སྲིད་དུ་ཕྲག་པའམ་མགོ་བོས་ཁྱེར་བར་འགྱུར་ཞིང་། གང་སེམས་ཅན་རྣམས་ཀྱི་བདེ་བ་དང་། རྩེ་བ་དང་། དགའ་བ་ཐམས་ཅད་ཀྱང་བྱང་ཆུབ་སེམས་དཔའ་ལ་སྦྱིན་པར་བྱེད་པར་གྱུར་ལ། བྱང་ཆུབ་ཀྱི་སྙིང་པོར་སོང་ན་ཡང་ས་ལས་བརྩམས་ནས་སྲིད་པའི་རྩེ་མོའི་བར་དུ་གོས་རིན་པོ་ཆེ་གཅིག་པའི་གདིང་བ་འདིང་བར་བྱེད་པར་གྱུར་ཅིང་། བྱང་ཆུབ་སེམས་དཔའི་ལུས་གདུང་བར་གྱུར་ན་མི་རུང་ངོ་སྙམ་ནས། སྟེང་དུ་ཡང་ལྷ་རྫས་ཀྱི་གདུགས་དགབ་པ་ཀུན་ཏུ་འཛིན་པར་བྱེད་པར་འགྱུར་ལ། མེ་ཏོག་དང་། སྤོས་དང་། ཕྲེང་བ་དང་། བྱུག་པ་ཐམས་ཅད་ཀྱིས་ཀྱང་མཆོད་པ་བྱེད་ཅིང་། རིམ་གྲོ་དང་། བསྙེན་བཀུར་བྱེད་པར་འགྱུར་ཏེ། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་དེ་ལྟར་མངོན་པར་འདུ་བྱས་ཤིང་། གུས་པར་བྱས། བརྗེད་པ་བྱས། མཆོད་པ་བྱས་ཀྱང་ལན་བྱ་བར་ནི་མི་ནུས་སོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་ཅན་རྣམས་ཀྱི་དོན་དུ་ཡོངས་སུ་གདུང་བ་མེད་པའི་བདེ་བའི་ཡོ་བྱད་མངོན་པར་འདུ་བྱེད་པ་ཇི་ལྟ་བུས་ཉེ་བར་གནས་པའི་ཡོ་བྱད་དེ་ལ་ནི་བདེ་བའི་ཡོ་བྱད་མངོན་པར་འདུ་བྱེད་པ་འདིས་བརྒྱའི་ཆར་ཡང་ཉེ་བར་མི་འགྲོ་བ་ནས། རྒྱུའི་བར་དུ་ཡང་མི་བཟོད་པའི་ཕྱིར་རོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་ཉེ་བར་སྒྲུབ་པ་དེ་ཐམས་ཅད་ནི་མི་རྟག་པ་ཡིན། འཇིག་རྟེན་པ་ཡིན། ཕུང་པོ་
དང་བཅས་པ་ཡིན། ཟག་པ་དང་བཅས་པ་ཡིན། ཡོངས་སུ་འགྱུར་བའི་ཆོས་ཅན་ཡིན་ཞིང་། ཤ་ར་དྭ་ཏིའི་བུ་བྱང་ཆུབ་སེམས་དཔའི་བདེ་བ་ཉེ་བར་སྒྲུབ་པ་ནི། ཟག་པ་མེད་པ་དང་། འཇིག་རྟེན་ལས་འདས་པ་དང་། ངེས་པར་བྱེད་པ་དང་ལྡན་པ་དང་། ངོ་བོ་ཉིད་མེད་པ་དང་། སྟོང་པ་ཉིད་ཡིན་པའི་ཕྱིར་ཏེ། ཤ་ར་དྭ་ཏིའི་བུ་དེ་ལྟ་བས་ན་བྱང་ཆུབ་སེམས་དཔའ་ལ་སེམས་ཅན་ཐམས་ཅད་ཀྱི་བདེ་བའི་ཡོ་བྱད་ཕུན་སུམ་ཚོགས་པ་ཐམས་ཅད་ཀྱིས་ཕན་གདགས་པར་བྱ་མི་ནུས་སོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་བྱང་ཆུབ་སེམས་དཔའ་ནི་སེམས་ཅན་གཉིད་ལོག་པ་ཐམས་ཅད་ཀྱི་མི་ཉལ་བར་བྱེད་པ་ཡིན། བག་མེད་པ་རྣམས་ཀྱི་བག་ཡོད་པ་ཡིན། སྨྱོན་པ་རྣམས་ཀྱི་མ་སྨྱོས་པ་ཡིན་ཞིང་། ཤ་ར་དྭ་ཏིའི་བུ་བྱང་ཆུབ་སེམས་དཔའ་ནི་སེམས་ཅན་དམུས་ལོང་རྣམས་ཀྱི་མིག་ཏུ་གྱུར་པ་ཡིན། ཡོངས་སུ་འདྲེན་པ་ཡིན་ལ། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ནད་ཀྱིས་ཐེབས་པ་རྣམས་ཀྱི་སྨན་དུ་གྱུར་པ་ཡིན། ལམ་ངན་པར་ཞུགས་པ་རྣམས་ཀྱི་ལམ་སྟོན་པ་ཡིན། ལམ་གོལ་བ་ལ་གནས་པ་རྣམས་ཀྱི་ཡང་དག་པའི་ལམ་སྟོན་པར་བྱེད་པ་ཡིན་ཞིང་། བྱང་ཆུབ་སེམས་དཔའ་ནི་དགེ་བའི་རྩ་བ་མ་བསྐྱེད་པ་རྣམས་སྐྱེད་པར་བྱེད་པ་ཡིན། བྱང་ཆུབ་སེམས་དཔའ་ནི་ཆོས་དཀར་པོ་རྣམས་ཀྱིས་རྣམ་པར་མ་བསྐྱེད་པ་རྣམས་རྣམ་པར་སྐྱེད་པར་བྱེད་པ་ཡིན་པའི་ཕྱིར་ཏེ། ཤ་ར་དྭ་ཏིའི་བུ་མདོར་ན་དེ་བཞིན་གཤེགས་པ་དང་། བྱང་ཆུབ་སེམས་དཔའ་མ་གཏོགས་པར་སེམས་ཅན་རྣམས་ལ་སྐྱོབ་པ་དང་། སྐྱབས་དང་། དཔུང་གཉེན་གཞན་མེད་དེ། ཤ་ར་དྭ་ཏིའི་བུ་སངས་རྒྱས་དེ་ཡང་བྱང་ཆུབ་སེམས་དཔའ་ལས་བྱུང་བ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐེག་པ་དེ་དེ་ལྟ་བུ་དང་ཐེག་པ་དེ་རྨད་དུ་བྱུང་བ་ལགས་ཀྱང་། བདག་ཉིད་ཀྱང་མཛེས་པར་བགྱིད་ཅིང་། གཞན་དག་ཀྱང་མཛེས་པར་བགྱིད་པ་ནི་ངོ་མཚར་ལགས་སོ། །བཅོམ་ལྡན་འདས་དཔེར་བགྱི་ན་ཞུགས་ཤིང་ཡོངས་འདུ་ས་བརྟོལ་ཡན་ལག་ཐམས་ཅད་མེ་ཏོག་ཡོངས་སུ་རྒྱས་པ་ནི་བདག་ཉིད་ཀྱང་མཛེས་པར་བགྱིད་ལ།
གཞན་དག་ཀྱང་མཛེས་པར་བགྱིད་ལགས་སོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའ་སངས་རྒྱས་ཀྱི་ཆོས་རྣམས་ཡོངས་སུ་རྫོགས་པ་ནི་བདག་ཉིད་ཀྱང་མཛེས་པར་བགྱིད་ཅིང་། སེམས་ཅན་དཔག་ཏུ་མ་མཆིས་པ་ཡང་མཛེས་པར་བགྱིད་ལགས་སོ། །བཅོམ་ལྡན་འདས་དཔེར་བགྱི་ན་ཞུགས་ཤིང་ཡོངས་འདུ་ས་བརྟོལ་ནི་སུམ་ཅུ་རྩ་གསུམ་པའི་ལྷ་རྣམས་གར་བགྱིད་དུ་སྩོལ་ཅིང་། རྩེ་བར་བགྱིད། དགའ་མགུར་སྤྱོད་པར་བགྱིད་ལགས་སོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་སངས་རྒྱས་ཀྱི་ཆོས་ཡོངས་སུ་རྫོགས་ཤིང་བདག་ཉིད་ཀྱིས་ཀྱང་མཛེས་ལ། སེམས་ཅན་གྲངས་མ་མཆིས། དཔག་ཏུ་མ་མཆིས་པས་ཀྱང་མངོན་དུ་བགྲོད་པར་བགྱིད་པ་ལགས་ཏེ། དེར་སེམས་ཅན་ཕྱིན་པ་རྣམས་ཀྱང་དབང་པོ་དང་། སྟོབས་དང་བྱང་ཆུབ་ཀྱི་ཡན་ལག་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་ཀྱིས་རྩེ་བར་བགྱིད། དགའ་མགུར་སྤྱོད་པར་བགྱིད། དགའ་བར་བགྱིད་པ་ལགས་ན། བཅོམ་ལྡན་འདས་བདག་ཅག་ལྟ་བུ་ལེ་ལོ་ཅན་གཞན་གྱི་དྲིང་ལ་འཇོག་པ་དག་མ་གཏོགས་པར་ཐེག་པ་དེ་ལ་སུ་ཞིག་གནས་པར་མི་བགྱིད། མངོན་པར་འཚལ་བར་མི་བགྱིད་ལགས། བཅོམ་ལྡན་འདས་བདག་ཅག་ནི་ཆོས་གཞན་གྱིས་སྩལ་ཅིང་། གཞན་གྱིས་བསྟན་པས་དབུགས་ཕྱིན་པ་དང་། བདེ་བར་གྱུར་པ་ལགས་ཏེ། བཅོམ་ལྡན་འདས་སླད་ཀྱིས་ནི་བཅོམ་ལྡན་འདས་ལས་ཐོས་ནས་རེ་ཞིག་གང་གིས་སེམས་ཅན་འགའ་ཡང་བགྱིད་པ་དེ་ལ་འཇོག་པའི་མཐུ་བདག་ཅག་ལ་མ་མཆིས་སོ། །བཅོམ་ལྡན་འདས་བདག་ཅག་གིས་ནི་དེང་སླན་ཆད་གང་ལ་ལར་ཆོས་བསྟན་ན། ཆེས་ཐོག་མར་བྱང་ཆུབ་སེམས་དཔའི་ཐེག་པ་ལས་བརྩམས་ནས་བསྟན་པར་བགྱི་ཞིང་ཉན་ཐོས་ཀྱི་ཐེག་པ་ནི་སླད་ཀྱིས་བསྟན་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གང་གིས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་ལྟར་བགྱིས་པས་སེམས་ཅན་འགའ་ཞིག་བྱང་ཆུབ་ཏུ་བཞག་ན་ཡང་། དེ་བཞིན་གཤེགས་པ་ལ་བདག་ཅག་གིས་བགྱིས་པ་གཟོ་བ་ལགས་པའི་སླད་
དུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་ཁྱོད་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དགའ་བར་བྱ་བའི་ཕྱིར་གོ་ཆ་ཆེན་པོ་གྱོན་པ་ནི་ལེགས་སོ་ལེགས་སོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་ཐེག་པ་དེ་ལྟ་བུ་དེའི་མིང་ཡང་མི་འབྱུང་བའི་དུས་དེ་དང་ཚོད་དེ་འབྱུང་བར་འགྱུར་ཞིང་། ཤ་ར་དྭ་ཏིའི་བུ་ཐེག་པ་དེ་ལྟ་བུ་དེ་ལ་འཕྱ་བར་བྱེད་པར་འགྱུར། བསྟིང་བར་བྱེད་པར་འགྱུར་ལ། མདོ་སྡེ་དེ་ལྟ་བུ་དེ་དག་ལེན་པ་པོ་མ་ཡིན་པ་དང་། སྤོང་བར་བྱེད་པ་འབྱུང་བར་འགྱུར་བའི་ཕྱིར་རོ། ། ཤ་ར་དྭ་ཏིའི་བུ་དེ་ལ་རིགས་ཀྱི་བུའམ། རིགས་ཀྱི་བུ་མོ་དོན་འདོད་པས་ནི་དོན་ལ་རྟོན་པ་དང་། ཆོས་ལ་རྟོན་པར་བྱའི། འདུ་འཛིའི་གནས་སུ་ནི་གནས་པར་མི་བྱའོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་དེའི་ཚེ་འདུས་པ་ནི་མི་རིགས་པར་འགྱུར་ཏེ། ཤ་ར་དྭ་ཏིའི་བུ་ངའི་ཉན་ཐོས་རིགས་པ་དང་ལྡན་པ་ནི་མདོ་སྡེ་དེ་ལྟ་བུ་དེ་དག་ལ་སྤོང་བའམ་བསྟིང་བའམ་རྣམ་པར་གཡེང་བར་མི་བྱེད་དོ། །དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་ལས་དེ་དག་ནི་རིགས་པ་མ་ཡིན་ཞིང་། ཤ་ར་དྭ་ཏིའི་བུ་བྱིས་པའི་ལས་དེ་དག་ནི་རིགས་པའི་ལས་མ་ཡིན། མཁས་པའི་ལས་མ་ཡིན་ལ། ཤ་ར་དྭ་ཏིའི་བུ་ང་ནི་མཁས་པའི་ལས་བྱེད་ཀྱི་བྱིས་པའི་ལས་མི་བྱེད་པའི་ཕྱིར་རོ། །ཤ་ར་དྭ་ཏིའི་བུ་ངའི་ཉན་ཐོས་ཀྱིས་ནི་འདི་ལྟར་བསླབ་པར་བྱ་སྟེ། ཤ་ར་དྭ་ཏིའི་བུ་དེ་ལ་ཕྱི་མའི་དུས་ཕྱི་མའི་ཚེ་ན་དད་པ་ཅན་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། དྲན་པ་དང་ལྡན་པ་དང་། ཁྲེལ་ཡོད་པ་དང་། དགེ་བ་ཅི་ཡིན་ཞེས་ཚོལ་བ་དང་། ཆོས་དོན་དུ་གཉེར་བ་དང་། ཆོས་ཡོངས་སུ་ཚོལ་བ་ལ་མངོན་པར་བརྩོན་པ་གང་དག་འབྱུང་བར་འགྱུར་བ་དེ་དག་ཀྱང་དེའི་ཚེ་འཕྱ་བར་བྱེད་པར་འགྱུར་བ་ཡིན་ཞིང་། བརྙས་པར་འགྱུར་བ་ཡིན། དེ་དག་ནི་ལེ་ལོ་ཅན་ཡིན། དེ་དག་ནི་འབྲས་བུ་ཐོབ་པར་མི་ནུས་པ་ཡིན། དེ་དག་ནི་འདོད་པ་ལ་སྟེན་པ་ཡིན། འདོད་པ་སྟེན་པར་འདོད་པ་ཡིན། དེ་དག་ནི་བྱང་ཆུབ་སེམས་དཔའ་ཞེས་བྱ་བས་དད་པས་སྦྱིན་པར་བྱ་བ་ལོངས་སྤྱོད་པར་བྱེད་པ་ཡིན་ལ། ཐེག་པ་དེ་ཀུན་ཏུ་རྗོད་པར་བྱེད་ཀྱང་། དེ་དག་དེ་བཞིན་གཤེགས་པས་རིགས་པ་དང་གྲོལ་བར་གསུངས་པ་ནི་མ་ཡིན་ནོ། །ཤ་ར་
དྭ་ཏིའི་བུ་ང་ལ་མི་བླུན་པོ་དེ་དག་ཚིག་ཕྲ་མོ་ཇི་སྙེད་ཀྱིས་སྐུར་པ་འདེབས་པར་འགྱུར་བ་དང་། གང་དག་དེ་བཞིན་གཤེགས་པས་མཆོག་ཏུ་རིགས་པར་གསུངས་ཤིང་། མཆོག་ཏུ་གྲོལ་བར་གསུངས་པ་དེ་དག་ལ་འདི་སྐད་དུ་དེ་དག་ནི་རིགས་པ་མ་ཡིན་ཞིང་། དེ་དག་ནི་གྲོལ་བ་མ་ཡིན་ནོ་ཞེས་ཟེར་བར་འགྱུར་བ་དང་། ཤ་ར་དྭ་ཏིའི་བུ་དེ་ལ་གང་དག་ཁྱིམ་ན་གནས་པ་འབྱུང་བར་འགྱུར་བ་དེ་དག་ཀྱང་ཀུན་ཏུ་གདུངས་ནས་མི་བླུན་པོ་དེ་དག་ལ་དད་པར་བྱ་བ་ཡིན་པར་སེམས་པར་འགྱུར་ཞིང་། དེ་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་མདོ་སྡེ་དེ་ལྟ་བུ་འཛིན་པ་མཐོང་ན་ཡང་བརྙས་པ་སྐྱེད་པར་འགྱུར་བ་ལ་ལྟོས། ཤ་ར་དྭ་ཏིའི་བུ་འདི་ལྟར་དེ་བཞིན་གཤེགས་པས་ནི་གང་ལ་ཡང་ཡང་དག་པའམ། ཡང་དག་པ་མ་ཡིན་པས་གནོད་པར་མི་བྱ་ཞིང་། རྣམ་པར་གཙེ་བར་མི་བྱ་ལ་སྐུར་པ་གདབ་པར་མི་བྱའོ་ཞེས་གསུངས་ན། དེ་དག་ནི་གཞན་དག་ལ་ཡང་སྨྲ་བར་བྱེད་ཅིང་། བདག་ཉིད་ཀྱིས་ཀྱང་ཀུན་ཏུ་བྱེད་པར་འགྱུར་བའི་མི་བླུན་པོ་དེ་དག་གིས་ཚུལ་ཁྲིམས་ཀྱི་ཕུང་པོ་ཇི་འདྲ་བར་འགྱུར་བ་ལ་ལྟོས། ཤ་ར་དྭ་ཏིའི་བུ་ཆོས་ལ་ཆོས་མ་ཡིན་པར་འདུ་ཤེས་པ་དང་། ཆོས་མ་ཡིན་པ་ལ་ཆོས་སུ་འདུ་ཤེས་པར་འགྱུར་བར་གྱུར་ཅིང་། འདུལ་བ་མ་ཡིན་པ་ལ་འདུལ་བར་འདུ་ཤེས་པ་དང་། འདུལ་བ་ལ་འདུལ་བ་མ་ཡིན་པར་འདུ་ཤེས་པར་འགྱུར་བ་དང་། རིགས་པ་ལ་རིགས་པ་མ་ཡིན་པར་འདུ་ཤེས་པ་དང་། རིགས་པ་མ་ཡིན་པ་ལ་རིགས་པར་འདུ་ཤེས་པ་དང་། གྲོལ་བ་ལ་གྲོལ་བ་མ་ཡིན་པར་འདུ་ཤེས་པ་དང་། གྲོལ་བ་མ་ཡིན་པ་ལ་གྲོལ་བར་འདུ་ཤེས་པར་འགྱུར་བར་གྱུར་ནས་ཀྱང་། ཤ་ར་དྭ་ཏིའི་བུ་དེ་དག་འདུལ་བ་ཡང་མི་ཤེས་ཤིང་། སྟོན་པའི་བསྟན་པ་ཡང་གཏིང་མི་དཔོགས་པའི་དུས་དེ་ཇི་སྲིད་དུ་ཕྱིན་ཅི་ལོག་ཏུ་འགྱུར་བ་ལ་ལྟོས། ཤ་ར་དྭ་ཏིའི་བུ་སེམས་ཅན་དེ་དག་ནི་ཁྲོ་བ་དང་། ཞེ་སྡང་དང་། ཕྲག་དོག་གིས་ཟིལ་གྱིས་ནོན་པ་ཡིན་ཞིང་། ང་རྒྱལ་གྱིས་ཟིལ་གྱིས་ནོན་པ་ཡིན། བདག་ལ་སྟོད་པ་ཡིན། གཞན་ལ་སྨོད་པ་ཡིན་ན། ཕྲག་དོག་དང་། སེར་སྣ་ཡོངས་སུ་རྫོགས་པ་ཡིན། མི་དགེ་བའི་ཆོས་ཀྱིས་གང་བ་ཡིན། དགེ་བའི་ཆོས་ཐམས་ཅད་ལས་ཡོངས་སུ་ཉམས་པ་ཡིན་ཏེ། གསོར་མི་རུང་བ་ཡིན་ནོ། །ཤ་ར་དྭ་ཏིའི་བུ་སེམས་ཅན་དེ་དག་ནི་ཡོངས་སུ་སྤང་བར་བྱ་བ་
ཡིན་ནོ། །ཤ་ར་དྭ་ཏིའི་བུ་ང་ནི་ངོ་ཚ་ཤེས་པ་རྣམས་ཀྱི་སྟོན་པ་ཡིན་གྱི་ང་ནི་ངོ་ཚ་མི་ཤེས་པ་རྣམས་ཀྱི་ནི་མ་ཡིན་ནོ། །ཤ་ར་དྭ་ཏིའི་བུ་ང་ནི་དྲན་པ་དང་ལྡན་པ་རྣམས་ཀྱི་སྟོན་པ་ཡིན་གྱི་བརྗེད་ངས་པ་རྣམས་ཀྱི་ནི་མ་ཡིན་ནོ། །ཤ་ར་དྭ་ཏིའི་བུ་ང་ནི་ཤེས་རབ་དང་ལྡན་པ་རྣམས་ཀྱི་སྟོན་པ་ཡིན་གྱི་ཤེས་རབ་འཆལ་པ་རྣམས་ཀྱི་ནི་མ་ཡིན་ནོ། །ཤ་ར་དྭ་ཏིའི་བུ་གང་དག་གང་ལ་དེ་བཞིན་གཤེགས་པས་ཡུན་རིང་པོ་ནས་བསླབས་པ་དང་། གང་ལ་དེ་བཞིན་གཤེགས་པས་བསླབས་པས་བདག་ཉིད་ཆེན་པོའི་ཆོས་ཉིད་དེ་རྗེས་སུ་ཐོབ་པ་དང་། ཅི་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཉིད་དེ་ཡང་དག་པར་བསྒྲུབས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། འགྲོ་བ་དཔག་ཏུ་མེད་པ་ཉོན་མོངས་པའི་དྲ་བ་ལས་ཐར་བར་བྱེད་པར་འགྱུར་བའི་བྱང་ཆུབ་སེམས་དཔའ་ལ་འདེམས་པར་མཛད་པའི་ཡེ་ཤེས་དེ་ལྟ་བུ་དེ་དང་དེ་དག་ཀྱང་ཆོས་གང་ལ་དེ་བཞིན་གཤེགས་པ་གུས་པ་དང་བཅས་པའི་ཆོས་ཉིད་དེ་ལ་འགལ་བར་བྱེད་པར་འགྱུར་ཞིང་། གནོད་པར་བྱེད་པར་འགྱུར་བ་དེ་དག་ནི་ངའི་ཉན་ཐོས་ཀྱང་མ་ཡིན་ལ། ང་ཡང་དེ་དག་གི་སྟོན་པ་མ་ཡིན་ཏེ། ཤ་ར་དྭ་ཏིའི་བུ་མ་ལེགས་སོ་མ་ལེགས་སོ། །ཤ་ར་དྭ་ཏིའི་བུ་ངས་ནི་དེ་ཙམ་ཞིག་བརྗོད་པར་ནུས་སོ། །ཤ་ར་དྭ་ཏིའི་བུ་དེ་ལྟ་བས་ན་ཆོས་གླིང་ཡིན་པར་གནས་པར་བྱོས་ཤིག །གཞན་གླིང་དུ་ནི་མ་བྱེད་ཅིག །བདག་སྐྱབས་སུ་གནས་པར་བྱོས་ཤིག །གཞན་སྐྱབས་སུ་ནི་མ་བྱེད་ཅིག །ཆོས་སྐྱབས་སུ་གནས་པར་བྱོས་ཤིག །གཞན་སྐྱབས་སུ་ནི་མ་ཡིན་ཏེ། ཁྱེད་ཅག་ལ་རྗེས་སུ་བསྟན་པ་ནི་དེ་ཡིན་ནོ། །ཤ་ར་དྭ་ཏིའི་བུ་ཇི་ལྟར་ན་དགེ་སློང་ཆོས་གླིང་ཡིན་པར་གནས་ཤིང་། གཞན་གླིང་མ་ཡིན། བདག་སྐྱབས་ཡིན་གྱི། གཞན་སྐྱབས་མ་ཡིན། བདག་གླིང་ཡིན་གྱི། གཞན་གླིང་མ་ཡིན་ཞེ་ན། ཤ་ར་དྭ་ཏིའི་བུ་འདི་ལ་དགེ་སློང་དྲན་པ་ཉེ་བར་གཞག་པ་རྣམས་སྒོམ་པར་བྱེད་པ་ཡིན་ཞིང་། འདོད་ཆགས་དང་བྲལ་བ་ལ་གནས་པ་ཡིན། རྣམ་པར་སྤོང་བས་ཡོངས་སུ་བསྒྱུར་བ་ཡིན་ནོ། །ཤ་ར་དྭ་ཏིའི་བུ་དྲན་པ་ཉེ་བར་གཞག་པ་ཡང་གང་ཞེ་ན། འདི་ལྟ་སྟེ། དངོས་པོ་མེད་པ་དང་། རང་བཞིན་མེད་པ་དང་། མཚན་ཉིད་མེད་པའི་དྲན་པ་ཉེ་བར་གཞག་པ་ཆོས་
ཇི་ལྟ་བ་བཞིན་དུ་མཐོང་བ་སྟེ། ཤ་ར་དྭ་ཏིའི་བུ་དེ་ལྟར་ན་དངོས་པོ་མེད་པ་དང་། རང་བཞིན་མེད་པའི་སྒོ་ནས་དྲན་པ་ཉེ་བར་གཞག་པ་ཡིན་ནོ། །ཤ་ར་དྭ་ཏིའི་བུ་འདི་ལ་གང་མི་སླུ་བར་འདི་ནི་ཆོས་གླིང་ཡིན་པ་དང་། ཆོས་སྐྱབས་དང་། བདག་གླིང་དང་། བདག་སྐྱབས་ཞེས་བྱའོ། །ཤ་ར་དྭ་ཏིའི་བུ་གང་དག་དྲན་པ་ཉེ་བར་གཞག་པ་དེ་ལྟ་བུ་སྒོམ་པར་བྱེད་པ་དེ་དག་ནི་དགྲ་བཅོམ་པ་མངོན་པར་བརྗོད་པ་ཐམས་ཅད་སྤངས་པ་ཞེས་བྱའོ། །ཟག་པ་ཟད་པ་ཞེས་བྱའོ། །ཉོན་མོངས་པ་མེད་པ་ཞེས་བྱའོ། །སྦྱིན་པའི་གནས་ཞེས་བྱའོ། །ཞི་བ་ཞེས་བྱའོ། །དུལ་བ་ཞེས་བྱའོ། །སྐྱོན་བསལ་བ་ཞེས་བྱའོ། །བྲམ་ཟེ་ཚངས་པར་སྤྱོད་པ་ཕ་རོལ་ཏུ་སོན་པ། སྐམ་ལ་སོན་པ་ཞེས་བྱའོ། །ཤ་ར་དྭ་ཏིའི་བུ་ཅིའི་ཕྱིར་དགྲ་བཅོམ་པ་ཞེས་བྱ་ཞེ་ན། ཤ་ར་དྭ་ཏིའི་བུ་དེ་དག་ནི་དགེ་བ་ཐམས་ཅད་ལ་འོས་པ་ཡིན། དགེ་བའི་ལས་དག་གིས་འདུ་བྱེད་པ་ཐམས་ཅད་དང་བྲལ་བ་ཡིན་ཏེ། དེ་དག་ནི་འདུ་བྱེད་པ་ཐམས་ཅད་རྒྱུན་བཅད་པ་ཡིན། འདུ་བྱེད་པ་ཐམས་ཅད་སྤངས་པ་ཡིན་ཏེ། ཤ་ར་དྭ་ཏིའི་བུ་གང་དགྲ་བཅོམ་པ་ཟག་པ་ཟད་པས་བསོད་ནམས་འདུ་བྱ་བ་ཡང་མངོན་པར་འདུ་བྱེད་པའི་གནས་མེད་ཅིང་། སྐབས་མེད་པ་ཡིན་ན་བསོད་ནམས་མ་ཡིན་པ་ལྟ་ཅི་སྨོས། དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ནི་སྲེད་པ་རྒྱུན་བཅད་པ་ཡིན། ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ནི་ཀུན་ཏུ་སྦྱོར་བ་རྣམས་ལས་ཕྱིར་ལོག་པ་ཡིན། ཆོས་ཐམས་ཅད་དང་བྲལ་བ་ཡིན། ཆོས་ཐམས་ཅད་ཀྱིས་མ་གོས་པ་ཡིན། ཡིད་ཆགས་པ་མེད་པ་ཡིན། འདོད་པའི་ཁམས་ལ་ཆགས་པར་མི་བྱེད་པ་ཡིན། གཟུགས་ཀྱི་ཁམས་ལ་ཆགས་པར་མི་བྱེད་པ་ཡིན། གཟུགས་མེད་པའི་ཁམས་ལ་ཆགས་པར་མི་བྱེད་པ་ཡིན། འདུན་པ་དང་བྲལ་བ་ཡིན། སྲེད་པ་དང་བྲལ་བ་ཡིན། ཁོང་ཁྲོ་བ་དང་བྲལ་བ་ཡིན་པའི་ཕྱིར་རོ། །ཅིའི་ཕྱིར་དགྲ་བཅོམ་པ་ཟག་པ་ཟད་པ་ཞེས་བྱ་ཞེ་ན། ཤ་ར་དྭ་ཏིའི་བུ་དེའི་ཟག་པ་རྣམས་ཟད་ཅིང་། ཆོས་ཐམས་ཅད་ལ་ཟད་པ་ཉིད་ཐོབ་ལ། ཟད་པ་ཉེ་བར་ཐོབ་པས་དེའི་ཕྱིར་ཟག་པ་ཟད་པ་ཞེས་བྱའོ། །ཅིའི་ཕྱིར་ཉོན་མོངས་པ་མེད་པ་ཞེས་བྱ་ཞེ་ན། དངོས་པོ་ཐམས་ཅད་སྟོང་པ་ཉིད་ཀྱི་ཕྱིར་ཀུན་ནས་ཉོན་མོངས་པར་ཡང་མི་འགྱུར། རྣམ་པར་བྱང་བར་
ཡང་མི་འགྱུར་ཏེ། རྣམ་པར་དག་པ་ཡིན་ཞིང་། འདོད་པའམ། མི་འདོད་པའམ། ཡིད་དུ་འོང་བའམ། ཡིད་དུ་མི་འོང་བའམ། འདུས་བྱས་སམ། འདུས་མ་བྱས་གང་གིས་ཀྱང་ཉེ་བར་མ་གོས་པས་ཉེ་བར་གོས་པ་མེད་པ་ཡིན་ལ། ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ནི་སྤྲོས་པ་ཐམས་ཅད་སྤངས་པས་དེའི་ཕྱིར་ཉོན་མོངས་པ་མེད་པ་ཞེས་བྱའོ། །ཅིའི་ཕྱིར་དགྲ་བཅོམ་པ་ཟག་པ་ཟད་པ་ཞེས་བྱ་ཞེ་ན། གདུང་བ་སྤངས་པ་ཡིན་ཞིང་། ཡོངས་སུ་གདུང་བ་སྤངས་པ་ཡིན། གདུང་བར་ཉེ་བར་ཞི་བ་ཡིན་ལ། དེ་ནི་ཟང་ཟིང་མེད་པ་ཆོས་ཀྱི་མཆོག་སྦྱིན་པའི་སྦྱིན་པ་པོ་ཡིན་པས་དེའི་ཕྱིར་སྦྱིན་གནས་ཞེས་བྱའོ། །ཅིའི་ཕྱིར་དབང་དུ་གྱུར་པ་དག་ཅེས་བྱ་ཞེ་ན། ཤ་ར་དྭ་ཏིའི་བུ་དེ་དག་གིས་ཆོས་ཐམས་ཅད་ཡ་མ་བརླར་མཐོང་ཞིང་མངོན་དུ་བྱས་པ་ཡིན། རྣམ་པར་བསྒོམས་པ་ཡིན། ཡ་མ་བརླའི་ཆོས་དེ་དག་ཐམས་ཅད་ལ་ཡང་དམ་པའི་ཕ་རོལ་ཏུ་སོན་པ་ཡིན་ལ། དེ་དག་གིས་ཡང་དག་པ་མ་ཡིན་པའི་སྨྲ་བ་རྣམས་བསྩལ་བ་ཡིན་པས། དེའི་ཕྱིར་དབང་དུ་གྱུར་པ་དག་ཅེས་བྱའོ། །ཅིའི་ཕྱིར་བྲམ་ཟེ་དག་ཅེས་བྱ་ཞེ་ན། ཆོས་ཐམས་ཅད་བསལ་བ་ཡིན་ཞིང་བོར་བ་ཡིན། ཕྱུང་བ་ཡིན་ལ། ཉེ་བར་མ་གོས་པ་ཡིན་པས། སྡིག་པ་བསལ་བའི་ཕྱིར་རོ། །ཅིའི་ཕྱིར་ཞི་བར་བྱེད་པ་དག་ཅེས་བྱ་ཞེ་ན། ཤ་ར་དྭ་ཏིའི་བུ་སྡིག་པ་ཐམས་ཅད་དང་། སྡིག་པའི་ཆོས་ཐམས་ཅད་ལས་བྱུང་བའི་ཕྱིར་རོ། །ཅིའི་ཕྱིར་ཚོར་བ་པོ་དག་ཅེས་བྱ་ཞེ་ན། ཤ་ར་དྭ་ཏིའི་བུ་དེ་དག་གིས་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་དང་། རྣམ་པར་སྨིན་པ་དང་། ཡང་དག་པ་མ་ཡིན་པ་དང་། བདེན་པ་མ་ཡིན་པ་ཐུལ་ཅིང་ལས་དང་། རྣམ་པར་སྨིན་པ་ཡང་ཐུལ་ལ། ཤ་ར་དྭ་ཏིའི་བུ་དེ་དག་ཀུན་ཏུ་རྟོག་པ་མེད་པ་ཉིད་ཀྱི་ཕྱིར། ཀུན་ཏུ་རྟོག་པ་ལས་བྱུང་བའི་ཆོས་ཐམས་ཅད་ཐུལ་ཅིང་རྣམ་པར་གྲོལ་བ་ཡིན་པས་དེའི་ཕྱིར་ཚོར་བ་པོ་དག་ཅེས་བྱའོ། །ཅིའི་ཕྱིར་ཕ་རོལ་ཏུ་སོན་པ་དག་ཅེས་བྱ་ཞེ་ན། ཤ་ར་དྭ་ཏིའི་བུ་དེ་དག་གིས་བདུད་ཕམ་པར་བྱས་ཤིང་བདུད་ཀྱི་ཕྱོགས་ཀྱི་ཉོན་མོངས་པ་ཐམས་ཅད་ཕམ་པར་བྱས་ལ། ཆོས་ཐམས་ཅད་ཀྱི་ཕ་རོལ་ཏུ་སོན་ཅིང་རྒལ་ལ་སྐམ་ལ་སོན་པས། དེའི་ཕྱིར་ཕ་རོལ་ཏུ་
སོན་པ་དག་ཅེས་བྱའོ། །ཤ་ར་དྭ་ཏིའི་བུ་ངས་དགྲ་བཅོམ་པ་ཟག་པ་ཟད་པའི་ཡོན་ཏན་དག་ཇི་ཙམ་ཅི་བརྗོད་ཀྱང་། ཤ་ར་དྭ་ཏིའི་བུ་དེ་ལ་བྲི་བར་ཡང་མི་འགྱུར་རོ། །ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ནི་ཤིན་ཏུ་ཡོངས་སུ་སྦྱངས་པ། རྡོ་བ་དང་། ཚེར་མ་མེད་པ། ཤིན་ཏུ་རྣམ་པར་དག་པའི་ཞིང་ཆེན་པོ་ཡིན་ནོ། །ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ལ་ནི་གཤེ་བར་བྱེད་ཅིང་བརྒྱད་བཀག་བྱེད་ཀྱང་། འདི་སྙམ་དུ་བདག་ལ་འདི་གཤེ་བར་བྱེད་ཅིང་བརྒྱད་བཀག་བྱེད་དོ་སྙམ་དུ་ཡང་མི་སེམས་ལ། བསྔགས་པའམ། བསྔགས་པ་མ་ཡིན་པ་བརྗོད་པ་ན་ཡང་འདི་སྙམ་དུ་བདག་ལ་འདི་བསྔགས་པའམ། བསྔགས་པ་མ་ཡིན་པ་བརྗོད་དོ་སྙམ་དུ་མི་སེམས་སོ། །ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ནི་རློམ་སེམས་ཐམས་ཅད་རྒྱུན་བཅད་པ་ཡིན་ནོ། །ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ནི་བསྲུང་བ་མེད་པ་ཡིན་ནོ། །ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ལ་ནི་ཆོས་གང་ཡང་བསྲུང་བ་མེད་དེ་དབང་པོ་ཤིན་ཏུ་བསྲུངས་པ་ཡིན་ཞིང་། ངེས་པའི་ས་ཐོབ་པ་ཡིན། ཆོས་ཀྱི་སྒྲོན་མ་ཡིན། ཆོས་ཀྱི་སྐྱབས་ཡིན། བདག་གི་སྒྲོན་མ་ཡིན། བདག་གི་སྐྱབས་ཡིན་པའི་ཕྱིར་རོ། །ཤ་ར་དྭ་ཏིའི་བུ་དེ་ལྟ་བས་ན་དགེ་སློང་དེ་ལྟར་གནས་པས་ནི་འདི་ལྟར་གལ་ཏེ་དེ་བཞིན་གཤེགས་པའི་བྱང་ཆུབ་སྤོང་བར་མི་བྱེད་ཅིང་མི་རིགས་པའི་ལས་ཀྱང་མི་བྱེད་ལ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱི་ཁ་ན་མ་ཐོ་བ་དང་བཅས་པ་ཡང་མ་ཡིན་ཞིང་། ཕྱིས་ཀྱང་བྱང་ཆུབ་ཀུན་ཏུ་བསྲུང་བ་དང་། རྣམ་པར་མི་གཙེ་བ་དང་། མི་སྤང་བའི་ཕྱིར་དང་། ཡུན་རིང་དུ་གནས་པར་བྱ་བའི་དོན་དུ་ཞུགས་པར་འགྱུར་བ་དེ་ནི་དགྲ་བཅོམ་པ་ཡིན་པར་ཤེས་པར་བྱའོ། །ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ལ་ནི་ཆོས་རྣམས་ལ་ཆོས་ཀྱི་ཐེ་ཚོམ་མེད་དོ། །ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ནི་སོམ་ཉི་མེད་པ་ཡིན་ཞིང་ཡིད་གཉིས་དང་བྲལ་བ་ཡིན་ནོ། །ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་ནི་རྒལ་བ་ཡིན་ཞིང་ལམ་ཁ་བྲག་ལས་ངེས་པར་རྒལ་བ་ཡིན། དྲང་པོའི་གནས་ན་གནས་པ་ཡིན། དྲང་པོ་ཡིན། དྲང་པོར་གྱུར་པ་ཡིན། ལམ་དྲང་པོ་ནས་འོངས་པ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་
ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་དགྲ་བཅོམ་པ་ཟག་པ་ཟད་པ་ནི་ཆོས་སྤོང་བ་མ་ལགས་པར་འཚལ་བར་བགྱི་བ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་དག་ནི་བྱིས་པའི་ལས་ལགས་ཀྱི་དེ་དག་ནི་དགྲ་བཅོམ་པའི་ལས་མ་ལགས་ཏེ། འདི་ལྟ་སྟེ། ཆོས་སྤོང་བ་ལགས་པའི་སླད་དུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་དེ་དེ་བཞིན་ནོ། །དེ་དེ་བཞིན་ཏེ། ཤ་ར་དྭ་ཏིའི་བུ་དེ་དག་ནི་བྱིས་པའི་ལས་ཡིན་གྱི་དགྲ་བཅོམ་པའི་ལས་མ་ཡིན་མོད་ཀྱི་འོན་ཀྱང་། ཤ་ར་དྭ་ཏིའི་བུ་ཕྱི་མའི་ཚེ་ཕྱི་མའི་དུས་ན་མི་འཇིགས་པས་ཟིལ་གྱིས་ནོན་པའི་དགེ་སློང་དག་འབྱུང་བར་འགྱུར་ཏེ། དེ་དག་ནི་བསམ་གཏན་ཙམ་དང་། ངེས་པར་གནས་པ་ཙམ་དང་། དགོན་པ་ན་གནས་པ་ཙམ་གྱིས་བདག་ཉིད་ཉོན་མོངས་པ་མེད་པའོ། །སྙམ་དུ་ཀུན་ཏུ་ཤེས་པར་འགྱུར་ཞིང་བདག་ཉིད་ལ་རློམ་སེམས་སྐྱེད་པར་བྱེད་པར་འགྱུར་ཏེ། དེའི་ཕྱིར་དེའི་ཚེ་བྲམ་ཟེ་དང་། ཁྱིམ་བདག་དད་པ་ཅན་མོས་པ་མང་བ་དང་། ངེས་པར་རྟོག་པ་མང་བ་དག་གིས་དགྲ་བཅོམ་པ་འདི་ནི་སྦྱིན་པའི་གནས་སོ། །ཟག་པ་ཟད་པའོ་སྙམ་དུ་ཀུན་ཏུ་ཤེས་པར་འགྱུར་ལ། དེ་ལ་ཡང་ལྷག་པར་བྱེད་པ་བྱ་བར་སེམས་པར་འགྱུར་ཞིང་། མི་བླུན་པོ་དེ་དག་ཀྱང་བསྙེན་བཀུར་གྱིས་ཟིལ་གྱིས་གནོན་ཅིང་། རྙེད་པས་ཟིལ་གྱིས་ནོན་ལ། བསྔགས་པ་དང་། གྲགས་པ་དང་། སྙན་པས་ཟིལ་གྱིས་ནོན་ནས། བདག་ཅག་ནི་ཆོས་དེ་དག་ལ་གནས་སོ། །བདག་ཅག་ནི་ཆོས་དེ་དག་དང་ལྡན་ནོ། །བདག་ཅག་ནི་འདི་ན་ཟག་པ་ཟད་པའོ། །བདག་ཅག་ནི་འདི་ན་ཉོན་མོངས་པ་མེད་པའོ་སྙམ་ནས། བདག་ཉིད་ལ་ཡེ་ཤེས་ཅན་དུ་ཀུན་ཏུ་ཤེས་པར་འགྱུར་བ་ཡིན་ཞིང་། དེ་དག་ནི་བྱིས་པར་འགྱུར་བ་ཡིན། བརྟགས་པའི་སྤྱོད་ལམ་ཅན་དུ་འགྱུར་བ་ཡིན། གྲོང་ན་འཁོད་པ་དེ་དག་གི་སྤྱོད་ལམ་ཡང་གཞན་དུ་འགྱུར་བ་ཡིན། གཙུག་ལག་ཁང་ན་འཁོད་པའི་སྤྱོད་ལམ་ཡང་གཞན་དུ་འགྱུར་བ་ཡིན། དགོན་པ་ན་འཁོད་པ་རྣམས་ཀྱི་ཡང་གཞན་དུ་ལ། འཁོར་གྱི་ནང་ན་འཁོད་པ་རྣམས་ཀྱི་ཡང་གཞན་དུ་ཡིན། ལུས་ཀྱི་ལས་དང་ངག་གི་ལས་ཀུན་ཏུ་སྤྱོད་པ་
དག་ཀྱང་མ་བསྲུངས་པར་འགྱུར་བ་ཡིན། འཁོར་བ་ན་སྤྱོད་པར་ཡང་འགྱུར་བ་ཡིན། བདག་ཉིད་ཀྱི་ཉོན་མོངས་པ་མེད་པའི་འདུ་ཤེས་ཀྱང་སྐྱེད་པར་འགྱུར་བ་ཡིན། ད་ལྟར་གང་དག་ཉན་ཐོས་རྣམས་ཀྱིས་བཤད་པའི་ཆོས་ཀྱི་རྣམ་གྲངས་ཟབ་མོ་དང་ལྡན་པ། དབེན་པ་དང་ལྡན་པ། སྟོང་པ་ཉིད་དང་། ལྡན་པ་དེ་ལྟ་བུ་དེ་དག་ཐོས་ནས་ཀྱང་། ཆོས་དེ་ལ་ཞེ་ས་དང་བཅས་ཤིང་གུས་པ་དང་བཅས་པས་གུས་པར་ཉན་ཅིང་། རྣ་གཏོད་པར་བྱེད་ལ། སེམས་གཞན་དུ་མ་ཡིན་པར་ཉེ་བར་འཇོག་པར་བྱེད་པ་ཡིན་ཏེ། དེའི་ཚེ་མི་བླུན་པོ་དེ་ལྟ་བུའི་སྤྱོད་ཡུལ་པ་དེ་དག་ཀྱང་སྟིང་བར་བྱེད་པར་འགྱུར་ཞིང་། འཕྱ་བར་བྱེད་པར་ཡང་འགྱུར་ལ། གཤེ་བར་བྱེད་པར་ཡང་འགྱུར་ཞིང་། འདི་སྐད་དུ་འདི་ནི་སངས་རྒྱས་ཀྱི་བཀའ་མ་ཡིན། སྟོན་པའི་བསྟན་པ་མ་ཡིན་ནོ་ཞེས་གཅིག་ལ་གཅིག་འདེམས་པར་བྱེད་པར་ཡང་འགྱུར་རོ། །དེ་ཅིའི་ཕྱིར་ཞེ་ན། འདི་ནི་ཆོས་དང་ཆོས་སུ་འདུལ་བ་དང་འདུལ་བར་མཚུངས་པར་མི་འགྱུར་ཞིང་། ཆོས་མ་ཡིན་པ་སེམས་པར་བྱེད་པ་དེ་དག་ནི་ཆོས་ལ་ཆོས་མ་ཡིན་ནོ་ཞེས་སྨྲ་བར་འགྱུར་བ་ཡིན། ཆོས་མ་ཡིན་པ་ལ་ཆོས་སོ་ཞེས་སྨྲ་བར་འགྱུར་བ་ཡིན། འདུལ་བ་མ་ཡིན་པ་ལ་འདུལ་བའོ་ཞེས་སྨྲ་བར་འགྱུར་བ་ཡིན་པའི་ཕྱིར་ཏེ། ཤ་ར་དྭ་ཏིའི་བུ་དེ་ལྟར་ན་དེ་དག་ནི་ཆོས་གང་འཐོབ་པར་འགྱུར་བ་དེ་ཉིད་ཀྱི་བསྔགས་པ་མ་ཡིན་པ་སྨྲ་བར་འགྱུར་བ་ཡིན་ལ། དེ་དག་ནི་བདག་ལ་བསྟོད་ཅིང་གཞན་ལ་སྨོད་པར་འགྱུར་བ་ཡིན། ཚུལ་ཁྲིམས་ཙམ་དང་། དགོན་པ་ན་གནས་པ་ཙམ་དང་། བསམ་གཏན་ཙམ་དང་། ངེས་པར་གནས་པ་ཙམ་དང་། ཐོས་པ་ཙམ་དང་། མང་དུ་ཐོས་པ་ཙམ་དང་། འཁོར་ཙམ་དང་། བསྔགས་པ་ཙམ་དང་། ཚིགས་སུ་བཅད་པ་ཙམ་དང་། རྙེད་པ་དང་བཀུར་སྟི་ཙམ་དང་། གྲགས་པ་དང་། སྙན་པ་ཙམ་གྱི་ང་རྒྱལ་གྱི་དབང་གིས་ངའོ་སྙམ་པའི་ང་རྒྱལ་གྱིས་བཅོམ་པ་ཡིན་ཏེ། ཡང་དག་པ་ཇི་ལྟ་བ་བཞིན་དུ་གླེང་བ་པོ་དེ་དག་གིས་ཡང་དག་པར་གླེངས་པ་ན། ཇི་ལྟ་ཇི་ལྟར་ཆོས་ཀྱི་རྣམ་གྲངས་དེ་དག་ཉན་པ་དེ་ལྟ་དེ་ལྟར་ལས་ཆེས་དམ་པ་དག་མངོན་པར་འདུ་བྱེད་པར་འགྱུར་བ་ཡིན་གྱི། མི་བླུན་པོ་དེ་དག་ནི་འདི་སྙམ་དུ་མི་དགེ་བའི་ལས་ཡང་དག་པ་དེ་དག་བདག་ཅག་ལ་ཀུན་དུ་ཡོད་དོ་སྙམ་དུ་མི་སེམས་ཏེ། དེ་དག་ནི་ཤས་ཆེར་ང་རྒྱལ་
གྱིས་བརྟན་ཅིང་། མི་ཤེས་པས་བརྟན་ནས་ཆོས་ཀྱི་རྣམ་གྲངས་དེ་དག་སྤངས་ཏེ། ལས་ཆེས་དམ་པོ་བྱས་ནས། མནར་མེད་པར་འགྲོ་བར་འགྱུར་བ་ཡིན། ངན་འགྲོར་འགྲོ་བར་འགྱུར་བ་ཡིན་ནོ། །ཤ་ར་དྭ་ཏིའི་བུ་ད་ལྟར་ང་ཁྱེད་ཅག་གི་ཐེ་ཚོམ་གཅོད་པར་བྱེད་པ་དང་། དེའི་ཚེ་ཆོས་སྨྲ་བ་ཆོས་ཡོངས་སུ་འཛིན་པ། ཆོས་སྟོན་པ། དོན་དུ་གཉེར་བ། མདོ་སྡེ་དེ་ལྟ་བུ་འཛིན་པ་གང་དག་འབྱུང་བར་འགྱུར་བ་དེ་དག་ལ་ཡང་དེའི་ཚེ་ང་ཆོས་ཀྱི་ཐེ་ཚོམ་དེ་ལྟ་བུ་གཅོད་པར་བྱེད་པ་དེ་ལ་ལྟོས་ཤིག །ཤ་ར་དྭ་ཏིའི་བུ་དེ་བཞིན་གཤེགས་པ་ནི་ཐམས་ཅད་མཁྱེན་པ་ཡིན་ཞིང་། ཐམས་ཅད་ཤེས་པ་ཅན་ཡིན། ཐམས་ཅད་གཟིགས་པ་ཡིན། ཐམས་ཅད་སྟོན་པ་ཡིན་ནོ། །ཤ་ར་དྭ་ཏིའི་བུ་གང་དེ་བཞིན་གཤེགས་པས་མ་མཁྱེན་མ་གཟིགས་མ་གསན་པའི་ཆོས་དེ་ནི་མེད་དོ། །ཤ་ར་དྭ་ཏིའི་བུ་དེ་བཞིན་གཤེགས་པ་ནི་དུས་གསུམ་ལ་མ་ཐོགས་པའི་ཡེ་ཤེས་བརྙེས་པ་ཡིན་ཞིང་། མ་ཆགས་པ་དང་གྲོལ་བ་ཡིན། དབང་དུ་གྱུར་པ་དང་། ཉོན་མོངས་པ་མེད་པ་ཡིན། རང་འབྱུང་ཡིན། སློབ་དཔོན་མི་མངའ་བ་ཡིན། བདེ་བླག་ཏུ་སེང་གེའི་སྒྲ་སྒྲོགས་པ་ཡིན་ནོ། །ཤ་ར་དྭ་ཏིའི་བུ་ཡང་མི་བླུན་པོ་དེ་དག་གི་སྤྱོད་པ་དང་། སྤྱོད་ཡུལ་དང་། ལམ་གྱིས་ནི་མཆོག་གོ །དེ་དག་ནི་མ་བསླབས་པ་ཡིན། མི་བླུན་པོ་དེ་དག་ནི་ལམ་ངན་པར་ཞུགས་པར་འགྱུར་བ་ཡིན་ནོ། །ཤ་ར་དྭ་ཏིའི་བུ་དེ་ལྟ་བས་ན། རིགས་ཀྱི་བུའམ། རིགས་ཀྱི་བུ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་མངོན་པར་ཡང་དག་པར་ཞུགས་པས་ནི་བདག་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ལ་མངོན་པར་མ་དད་ཅིང་། ཉེས་པར་མ་བརྟགས་ལ་མངོན་པར་རྫོགས་པར་སངས་མ་རྒྱས་ན་མི་རུང་ངོ་སྙམ་ནས་ཆོས་དེ་ལྟ་བུ་དེ་དག་ལ་འདུན་པར་བྱ། རྣལ་འབྱོར་དུ་བྱ། སྤྲོ་བར་བྱའོ། །ཤ་ར་དྭ་ཏིའི་བུ་རིགས་ཀྱི་བུའམ། རིགས་ཀྱི་བུ་མོ་ཆོས་བཞི་དང་ལྡན་ན། སངས་རྒྱས་ཀྱི་བྱང་ཆུབ་སྤོང་བར་བྱེད་པ་ཡིན་ཏེ། བཞི་གང་ཞེ་ན། ཤ་ར་དྭ་ཏིའི་བུ་འདི་ལ་རིགས་ཀྱི་བུའམ། རིགས་ཀྱི་བུ་མོ་སྡིག་པའི་གྲོགས་པོའི་ལག་ཏུ་སོང་བ་ཡིན་ཞིང་དགེ་བའི་བཤེས་གཉེན་གྱི་ལག་ཏུ་སོང་བ་མ་ཡིན་ལ། སྡིག་པའི་གྲོགས་པོ་དེ་དག་ལ་ཡང་སྟེན་པར་བྱེད།
སྙེན་པར་བྱེད། བསྙེན་བཀུར་བྱེད་དེ། དེ་སྡིག་པའི་གྲོགས་པོ་དེ་དག་ལ་བསྟེན་ཅིང་བསྙེན་ལ་བསྙེན་བཀུར་བྱས་པས་དེ་དག་ཉིད་ཀྱི་རྗེས་སུ་བསླབས་ནས་སྤོང་བར་བྱེད་པ་ཡིན་ནོ། །ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་བདག་ཏུ་མངོན་པར་ཞེན་པས་དམིགས་པ་ཅན་ཡིན་ཏེ། དེ་ཆོས་ཀྱི་རྣམ་གྲངས་ཟབ་མོ་དེ་ལྟ་བུ་དེ་དག་ཐོས་ནས། སྐྲག་ཅིང་དངང་ལ་དངང་བར་འགྱུར་ཞིང་གཡང་ས་ཆེན་པོར་ཡང་རབ་ཏུ་ལྟུང་བ་ཡིན་ཏེ། ཤ་ར་དྭ་ཏིའི་བུ་རིགས་ཀྱི་བུའམ། རིགས་ཀྱི་བུ་མོ་ཆོས་གཉིས་པ་དེ་དང་ལྡན་ན། བྱང་ཆུབ་སྤོང་བར་བྱེད་པ་ཡིན་ནོ། །ཤ་ར་དྭ་ཏིའི་བུ་གཞན་ཡང་རིགས་ཀྱི་བུ་གཅེར་བུ་པའི་སྨྲ་བ་ལ་ཞུགས་པ་ཡིན་ཞིང་། འཇིག་རྟེན་རྒྱང་ཕན་པའི་གསང་ཚིག་ཡོངས་སུ་ཚོལ་བ་ལ་མངོན་པར་བརྩོན་པ་དང་། སྐྱེ་བོ་མང་པོས་བཀུར་བ་ཡིན་ཏེ། དེའི་ཆོས་དེ་དག་མི་སེམས་པར་སྤོང་བར་བྱེད་པ་ཡིན་ནོ། །ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་ཚུལ་ཁྲིམས་འཆལ་པ་དང་། ཚུལ་ཁྲིམས་རྒུད་པ་ཡིན་ཞིང་། ཇི་ལྟར་བསླབ་པ་བཅས་པ་ལ་ཡང་མི་སློབ་པ་ཡིན་ཏེ། དེ་ཡོ་བྱད་བསྙུངས་པའི་གཏམ་དང་ལྡན་པ་དེ་ལྟ་བུ་དེ་དག་སྤོང་བར་བྱེད་པ་ཡིན་ཞིང་། གཤེ་བར་བྱེད་ལ་མོས་པར་མི་བྱེད་དེ། ཤ་ར་དྭ་ཏིའི་བུ་རིགས་ཀྱི་བུའམ། རིགས་ཀྱི་བུ་མོ་ཆོས་བཞི་པོ་དེ་དང་ལྡན་ན་བྱང་ཆུབ་སྤོང་བར་བྱེད་པ་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སྡིག་པའི་གྲོགས་རྣམས་སྟེན་བྱེད་ཅིང་། །དེ་དག་གི་ནི་རྗེས་ཕྱོགས་འགྱུར། །དེ་ཕྱིར་ཆོས་ནི་སྤོང་བྱེད་ཅིང་། །སངས་རྒྱས་བྱང་ཆུབ་འདོད་མི་བྱེད། །གཅེར་བུའི་སྨྲ་དང་འདྲེས་པ་དང་། །འཇིག་རྟེན་རྒྱང་ཕན་སེམས་པ་ཡིན། །བསྟན་པ་འདི་ནི་བརྗོད་བྱས་ཏེ། །བློ་ངན་དུས་ནི་དྲང་པོ་ཡིན། །བྱིས་པ་མཁས་པའི་ང་རྒྱལ་ཅན། །ཀྱེ་མ་མཁས་པར་རློམ་སེམས་བྱེད། །དེ་ཕྱིར་དེ་ནི་ཆོས་སྤངས་ཤིང་། །སངས་རྒྱས་བྱང་ཆུབ་འཚང་མི་རྒྱ། །བདག་ཏུ་སྨྲ་བ་གང་ཡིན་པ། །དམིགས་པ་ལ་ནི་གནས་ནས་སུ། །ཟབ་མོའི་ཆོས་རྣམས་ཐོས་གྱུར་ནས། །བློ་ངན་ཆོས་ནི་སྤོང་བར་བྱེད། །མཐའ་འདས་སྟོང་ཉིད་ཇི་བཞིན་དང་། །དོན་ནི་དེ་ཡིས་མི་ཤེས་ཏེ། །དེ་ཕྱིར་བྱང་ཆུབ་སྤོང་བར་བྱེད། །དེ་ཡི་གཏིང་ནི་ཤེས་མ་
ཡིན། །ཚུལ་ཁྲིམས་འཆལ་དང་སྡིག་ཆོས་ཅན། །མི་གཙང་ཀུན་རྟོག་སྤྱོད་ཡུལ་བ། །ཇི་ལྟར་བསླབ་པ་བཅས་པ་ལ། །བློ་ངན་དེ་དག་སློབ་མི་བྱེད། །དམུ་རྒོད་བཀའ་བློ་མི་བདེ་བ། །རྨ་འབེབས་པོ་དང་ལྕེ་ངན་པོ། །དེ་ལྟའི་ཆོས་ཅན་དེ་ལ་ནི། །སྡིག་པ་མི་བྱེད་ཅི་ཡང་མེད། །དེ་ཕྱིར་དེ་ནི་རྣམ་པར་སྤང་། །རྟག་པར་སངས་རྒྱས་རྣམས་ཀྱིས་སྨད། །གང་དག་ང་ཡིས་རྟག་བསྔགས་པའི། །ཆོས་ལའང་རྟག་ཏུ་བསྟེན་པར་བྱ། །གང་ཞིག་སངས་རྒྱས་མཐོང་འདོད་དང་། །དེ་འདྲའི་ཆོས་ནི་ཉན་འདོད་དེས། །ཚུལ་ཁྲིམས་ཕུང་པོ་ལེགས་པར་བརྟག །དེ་ལ་ཆོས་ནི་འཐོབ་པར་འགྱུར། །ཚུལ་ཁྲིམས་ཕུང་པོར་གང་དག་གནས། །དེ་ལ་འཇུག་པར་འདོད་པ་དང་། །དེ་ལ་ཀུན་ཏུ་རྟོག་འདོད་པས། །དེ་ཕྱིར་ཚུལ་ཁྲིམས་བསྟེན་པར་བྱ། །ཡེ་ཤེས་དེ་འདྲ་འཇུག་འདོད་ན། །ཡིད་གཞུངས་པ་ཡིས་ཚུལ་ཁྲིམས་བསྟན། །བྱང་ཆུབ་རྣམས་ཀྱི་ཕུལ་དང་མཆོག །དེས་ནི་རྙེད་པར་དཀའ་མ་ཡིན། །ཤ་ར་དྭ་ཏིའི་བུ་ཐེག་པ་ཆེན་པོ་ལ་ཡང་དག་པར་ཞུགས་པ་ཆོས་བཞི་དང་ལྡན་ན་བྱང་ཆུབ་ཀུན་ཏུ་བསྲུང་བའི་ཕྱིར་ཞུགས་པ་ཡིན་ཏེ། བཞི་གང་ཞེ་ན། ཤ་ར་དྭ་ཏིའི་བུ་འདི་ལ་ཐེག་པ་ཆེན་པོ་ལ་ཡང་དག་པར་ཞུགས་པ་ནི་བདག་ཉིད་ཀྱང་ཚུལ་ཁྲིམས་ཕུན་སུམ་ཚོགས་པ་ཡིན། དགེ་བའི་ཆོས་ཅན་དང་། ཚུལ་ཁྲིམས་ཀྱི་ཕུང་པོ་ལ་ལེགས་པར་རབ་ཏུ་གནས་པ་དང་མང་དུ་ཐོས་པ་ཡིན། དོན་དམ་པ་ལ་མཁས་ཤིང་འཇིག་རྟེན་རྒྱང་ཕན་པ་དང་ཡང་མ་འདྲེས་པ་ཡིན། སངས་རྒྱས་ཀྱི་བྱང་ཆུབ་དག་པ་ཡོངས་སུ་འཐོབ་ཅིང་དབེན་པ་ལ་གཞོལ་བས་དགོན་པ་དང་། རབ་ཏུ་དགོན་པ་ལ་མངོན་པར་དགའ་བ་ཡིན་ཏེ། ཤ་ར་དྭ་ཏིའི་བུ་ཐེག་པ་ཆེན་པོ་ལ་ཡང་དག་པར་ཞུགས་པ་ཆོས་བཞི་པོ་དེ་དག་དང་ལྡན་པ་ནི་བྱང་ཆུབ་ཀུན་ཏུ་བསྲུང་བའི་ཕྱིར་ཞུགས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཚུལ་ཁྲིམས་ཕུང་པོར་དེ་གནས་ཀྱང་། །ཚུལ་ཁྲིམས་ཀྱིས་ནི་རློམ་སེམས་མེད། །ངེས་པའི་དོན་དང་ཟབ་མོ་ཡི། །ཆོས་ནི་ཕྱིས་ཀྱང་ཚོལ་བར་བྱེད། །སངས་རྒྱས་བྱང་ཆུབ་དག་པ་དང་། །རྣམ་དག་ཡོངས་སུ་དག་པའང་ཚོལ། །གཅེར་བུ་རྣམས་
ཀྱིས་གང་འཛིན་པའི། །གསང་ཚིག་དག་ནི་དེ་མི་ཚོལ། །འཐབ་མེད་གསང་ཚིག་དེ་འདོད་པས། །འཇིག་རྟེན་རྒྱང་ཕན་འདྲེས་མ་ཡིན། །སངས་རྒྱས་ཆོས་ལ་ངེས་ཡིན་ཞིང་། །རྟག་ཏུ་བསྟན་པ་སྲུང་བར་བྱེད། །གང་དག་གིས་ནི་སེམས་འཁྲུག་པའི། །བུད་མེད་རྣམས་ནི་དེར་མི་འགྲོ། །དབེན་པ་ཞི་བ་སྟོང་པ་ཡི། །བས་མཐའི་དགོན་པ་རྣམས་སྟེན་བྱེད། །ང་ཡིས་མཆོག་དང་ཕུལ་བསྔགས་པའི། །ཆོས་བཞི་པོ་ནི་དེ་དག་དང་། །བྱང་ཆུབ་རྣམས་ཀྱི་དོན་གང་བསྟན། །ཆོས་དེ་དག་ལ་བསྟེན་པར་བྱོས། །དེ་དང་དེར་ནི་དེ་བཞིན་དུ། །སྔོན་ཆད་དེ་དག་བསྟེན་པ་ཡིན། །ཡེ་ཤེས་ཀུན་ཏུ་སྲུང་བར་བྱེད། །དེས་ནི་ང་ཡི་ཡེ་ཤེས་བསྒྲུབས། །ཆོས་ནི་ཀུན་ཏུ་བསྲུང་བྱས་པས། །འགྲོ་བ་ངན་པར་འགྲོ་མི་འགྱུར། །རྟག་པར་དེ་ཞི་ཀུན་ཏུ་དག །གཟུགས་ཀྱིས་ཀྱང་ནི་འཕགས་པར་འགྱུར། །ལོངས་སྤྱོད་ལྡན་པར་དེ་རྟག་འགྱུར། །ཐོབ་ནས་ཀྱང་ནི་བག་ཡོད་འགྱུར། །དེ་ལ་སྙིང་པོ་སྟོན་པར་འགྱུར། །ལོངས་སྤྱོད་རྣམས་ནི་མི་རྟག་ཅེས། །གང་བྱིན་དེ་ནི་ང་ཡི་ཡིན། །གང་མ་བྱིན་དེ་ང་ཡི་མིན། །ང་དང་ལོངས་སྤྱོད་ཕུང་པོའང་རུང་། །ཐམས་ཅད་སྤངས་ནས་སོང་བ་ཡིན། །གཡོག་འཁོར་བཟང་པོར་འགྱུར་བ་ཡིན། །དེ་ཡི་བཤེས་གཉེན་བཟང་པོར་འགྱུར། །སངས་རྒྱས་ཀྱིས་ནི་བསྔགས་ཆོས་ལ། །མ་ཡེང་ངེས་པར་སྦྱོར་བར་འགྱུར། །བདག་ཉིད་ཀྱིས་ཀྱང་འདུན་པ་ཡིན། །གཞན་ཡང་དེ་ལ་ངེས་སྦྱོར་བྱེད། །དེ་ཕྱིར་དེ་ནི་དགའ་བ་འཐོབ། །དམ་པའི་ཆོས་ཀྱང་སྤྱོད་པར་འགྱུར། །གང་དག་འཇིག་རྟེན་མཆོག་བཀུར་བའི། །རིགས་མཐོ་བར་ཡང་རྟག་པར་སྐྱེ། །དེ་ནི་བག་མེད་མི་བྱེད་ཅིང་། །རྟག་ཏུ་ཆོས་ལ་སྟེན་པར་བྱེད། །རྫོགས་སངས་རྒྱས་ལ་མཉེས་བྱེད་འགྱུར། །མཐོང་ནས་ཀྱང་ནི་དད་པར་བྱེད། །སེམས་དད་ཅིང་ནི་ཡིད་དགའ་ནས། །མཆོད་པ་དམ་པ་བྱེད་པར་འགྱུར། །ལུས་དང་སྲོག་དང་ལོངས་སྤྱོད་ནི། །དེ་དག་ཐམས་ཅད་སྙིང་པོ་མེད། སྐྱེས་བུ་དམ་པ་མཐོང་ནས་ཀྱང་། །མྱུར་དུ་སྙིང་པོ་སྟོན་པར་འགྱུར། །དེ་ཡི་ལུས་དང་ལོངས་སྤྱོད་ལའང་། །སྙིང་པོའི་འདུ་ཤེས་འཇུག་མི་འགྱུར། །སངས་རྒྱས་
རྣམས་ནི་འབྱུང་བ་དཀོན། །དལ་བ་དེ་འདྲའང་རྙེད་པར་དཀའ། །དེར་ནི་དལ་བའང་འཐོབ་འགྱུར་ཞིང་། །ཐོབ་ནས་ཀྱང་ནི་ཡིད་མི་འབྱུང་། ། གང་ལས་ཡེ་ཤེས་འཐོབ་འགྱུར་བའི། །མངོན་འབྱུང་དེ་ལ་སྟེན་པར་བྱེད། །རངས་དང་མཆོག་ཏུ་དགའ་བསྐྱེད་ནས། །ཡེ་ཤེས་དམ་པ་ཚོལ་བར་བྱེད། །གང་ལས་བྱང་ཆུབ་འཐོབ་འགྱུར་བའི། །ཆོས་ལའང་རྟག་པར་གནས་པར་བྱེད། །ཤ་ར་དྭ་ཏིའི་བུ་ཐེག་པ་ཆེན་པོ་ལ་ཡང་དག་པར་ཞུགས་པ་ཆོས་བཞི་དང་ལྡན་ན་བདག་ཉིད་ཀྱིས་བདག་ཉིད་དབུགས་འབྱིན་ཅིང་མཆོག་ཏུ་དགའ་བ་སྐྱེས་ནས་ཀྱང་གནས་པར་བྱེད་དོ། །བཞི་གང་ཞེ་ན། ཤ་ར་དྭ་ཏིའི་བུ་འདི་ལ་ཐེག་པ་ཆེན་པོ་ལ་ཡང་དག་པར་ཞུགས་ནས་ལོངས་སྤྱོད་ཀྱི་ཕུང་པོའི་བདོག་པ་ཐམས་ཅད་ཡོངས་སུ་གཏོང་བ་ཡིན། ཚུལ་ཁྲིམས་ཀྱི་ཕུང་པོའི་ཡོན་ཏན་ཐམས་ཅད་ལ་རབ་ཏུ་གནས་པ་ཡིན། ཆོས་ཟབ་མོ་རྣམས་ཀྱིས་ཡེ་ཤེས་ཐམས་ཅད་མངོན་དུ་འཕགས་པ་ཡིན་ཞིང་མངོན་དུ་འཕགས་ནས་ལུས་དང་སྲོག་གཏོང་བར་བྱེད་ཀྱང་ཆོས་གཏོང་བར་མི་བྱེད་པ་ཡིན། དགེ་སློང་ཆོས་སྨྲ་བ་དམ་པའི་ཆོས་ཡོངས་སུ་འཛིན་པ་མདོ་སྡེ་དེ་ལྟ་བུ་འཛིན་པ་རྣམས་ལ་ཡང་བདེ་བའི་ཡོ་བྱད་ཐམས་ཅད་ཀྱིས་སྤྲོ་བར་བྱ་བ་ལ་ཞུགས་པ་ཡིན་ཏེ། ཤ་ར་དྭ་ཏིའི་བུ་ཐེག་པ་ཆེན་པོ་ལ་ཡང་དག་པར་ཞུགས་པ་ཆོས་བཞི་པོ་དེ་དག་དང་ལྡན་ན་བདག་ཉིད་ཀྱིས་བདག་ཉིད་ལུང་སྟོན་པ་དང་། དབུགས་འབྱིན་པ་མང་བ་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ལོངས་སྤྱོད་རྣམས་ནི་ཀུན་བགེད་བྱེད། །ཚུལ་ཁྲིམས་ཕུང་པོར་ཤིན་ཏུ་གནས། །ཆོས་རྣམས་ལ་ནི་མངོན་དུ་འཕགས། །སྟོང་པའི་ཆོས་ལ་ཐེ་ཚོམ་མེད། །གང་དག་ཆོས་ནི་སྟོན་པ་ཡི། །ཆོས་དེ་ཡང་ནི་ཡོངས་སུ་འཛིན། །གང་དག་ཆོས་ནི་སྟོན་པ་ལའང་། །བདེ་བར་སྒྲུབ་པས་ཞུགས་པ་ཡིན། །དེ་ཕྱིར་དེ་ནི་དགའ་བ་འཐོབ། །མཆོག་ཏུ་དགའ་བའང་དེ་ཡིས་འཐོབ། །མི་མཆོག་སངས་རྒྱས་འགྱུར་བར་ནི། །བདག་ཉིད་ལ་ཡང་ལུང་སྟོན་ཏོ། །དེ་ལ་སངས་རྒྱས་ལུང་སྟོན་མཛད། །གང་དག་འདས་དང་མ་བྱོན་དང་། །གང་དག་བྱུང་བའི་རྫོགས་སངས་རྒྱས། །དེ་དག་རྒྱལ་བར་ལུང་ཡང་སྟོན། །སངས་རྒྱས་ཐེག་པ་
བླ་མེད་ཀྱི། །བྱང་ཆུབ་ལམ་ལ་དེ་གནས་ཤིང་། །སངས་རྒྱས་རྣམས་ཀྱིས་གང་བསྟེན་པའི། །ཆོས་དེ་དག་ལའང་སྟེན་པར་བྱེད། །སངས་རྒྱས་རྣམས་ཀྱིས་དེ་དག་བསྔགས། །བྱང་ཆུབ་སེམས་དཔའ་རྣམས་ཀྱིས་བསྟེན། །སངས་རྒྱས་ལམ་ནི་བླ་མེད་ཀྱི། །ལམ་དེ་ལ་ནི་དེ་གནས་འགྱུར། །ཇི་ལྟར་ནམ་མཁའི་ལམ་དུ་ནི། །སྣོད་གཅིག་བོར་བར་གྱུར་པ་དང་། །ཇི་ལྟར་ཆགས་པར་བལྟ་བྱ་དང་། །དེ་ཡི་གནས་པ་ཡོད་མིན་བཞིན། །དེ་ལྟར་བྱང་ཆུབ་སེམས་དཔའ་ཡིས། །གང་བསླབས་བྱང་ཆུབ་ལམ་ལ་ཡང་། །བྱང་ཆུབ་མ་ཐོབ་བར་དུ་ནི། །དེ་ཡི་ལྡོག་པ་ཡོད་མ་ཡིན། །ཇི་ལྟར་ཀུན་ཏུ་འདྲེས་པ་དེར། །གདམས་པ་སྐྱེད་པར་བྱེད་པ་ཡང་། །དེ་ཡི་རྒྱུན་ཆད་ཡོད་མ་ཡིན། །མྱུར་དུ་དེ་ནི་འཛུད་པར་བྱེད། །དེ་བཞིན་བྱང་ཆུབ་སེམས་དཔའ་གང་། །རྟག་ཏུ་ཆོས་རྣམས་སྟེན་བྱེད་ཀྱང་། །བྱང་ཆུབ་སངས་མ་རྒྱས་ཀྱི་བར། །བརྩོན་འགྲུས་སྤོང་བར་བྱེད་མ་ཡིན། །ཇི་ལྟར་ལྗོན་ཤིང་རྩ་བ་ཡང་། །མི་ཡིས་རྟག་པར་སྦེད་བྱེད་ཅིང་། །དུས་སུ་སྲེད་པར་བྱེད་པ་ཡི། །ཤིང་ནི་འཕེལ་བར་འགྱུར་བ་ཡིན། །རླུང་དང་ཉི་མ་དག་གིས་ནི། །དུས་སུ་གྲང་དང་དྲོ་གྱུར་པར། །མཐར་གྱིས་སྦ་བ་བྱས་ནས་སུ། །མེ་ཏོག་འབྲས་བུ་དེ་དེས་འབྱིན། །སེམས་ཅན་མང་ལ་བདེ་བྱེད་པ། །ཤིང་གི་གྲིབ་མ་ཡིད་དགའ་འབྱུང་། །བདེ་བའི་བདེ་དང་ལྡན་པ་དག །མེ་ཏོག་འབྲས་བུ་ལོངས་ཀྱང་སྤྱོད། །དེ་བཞིན་བྱང་ཆུབ་སེམས་དཔའ་ཡང་། །བྱང་ཆུབ་ཕྱིར་ནི་སེམས་བསྐྱེད་ནས། །དུས་སུ་ཆོས་རྣམས་སྟེན་བྱེད་ཅིང་། །དུས་སུ་ཡོངས་སུ་འདྲི་བར་བྱེད། །དུས་དང་དུས་མིན་སྟེན་བྱེད་ཅིང་། །དུས་དང་དུས་མིན་འདྲི་བར་བྱེད། །དུས་སུ་བརྩོན་འགྲུས་རྩོམ་བྱེད་ཅིང་། །དེས་པས་དུས་སུ་སྦྱིན་པ་སྦྱིན། །དུས་སུ་བྱང་ཆུབ་སྙིང་པོ་ཡི། །ཤིང་གི་དྲུང་དུ་འདུག་ནས་སུ། །བློ་གྲོས་ངན་པའི་བདུད་བཅོམ་སྟེ། །དུས་སུ་བྱང་ཆུབ་འཚང་ཡང་རྒྱ། །འཇིག་རྟེན་དུ་ནི་མ་བསྐོར་བའི། །འཁོར་ལོ་དུས་སུ་སྐོར་བར་བྱེད། །དུས་སུ་སེམས་ཅན་འདུལ་བྱེད་ཅིང་། །འབེལ་བའི་གཏམ་ཡང་ཡོངས་སུ་འདྲེན། །བྱང་ཆུབ་ཞུགས་པའི་མཁས་རྣམས་ནི། །མཐུ་དང་ལྡན་སེམས་དེ་ལྟ་བུས། །
བྱང་ཆུབ་དམ་པ་འཚང་རྒྱ་ཞིང་། །དེ་ན་ནམ་ཡང་ལྡོག་མི་འགྱུར། །དེ་ལྟ་བས་ན་དུས་དུས་སུ། །ཡང་དང་ཡང་དུ་ཆོས་བསྟེན་བྱ། །དུས་སུ་བྱང་ཆུབ་འཚང་རྒྱ་ཞིང་། །དུས་སུ་འཁོར་ལོའང་བསྐོར་བར་འགྱུར། །ཤ་ར་དྭ་ཏིའི་བུ་བྱང་ཆུབ་སེམས་དཔའ་ཆོས་བཞི་དང་ལྡན་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཉམས་པར་མི་འགྱུར་ཞིང་། །ཡོངས་སུ་ཉམས་པར་མི་འགྱུར་ལ། ཚེ་རྗེས་ནས་ཀྱང་འཁོར་ལོས་སྒྱུར་བའི་རྒྱལ་སྲིད་བྱེད་ཅིང་། ཇི་ལྟར་སྨོན་པས་ཀྱང་དགེ་བའི་རྩ་བ་ཐམས་ཅད་རྗེས་སུ་འཇུག་པར་བྱེད་པ་ཡིན། སྟོབས་ཆེ་བ་དང་ལུས་ཆེ་བ་ཡིན། སྲེད་མེད་ཀྱི་བུ་ལྟར་མཁྲེགས་པའི་ལུས་དང་ལྡན་པ་ཡིན། དེ་འཁོར་ལོས་སྒྱུར་བའི་རྒྱལ་སྲིད་ཐོབ་ནས་ཀྱང་མྱུར་དུ་གླིང་བཞི་སྤངས་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བ་ཡིན། རབ་ཏུ་བྱུང་ནས་ཀྱང་དེ་ཚངས་པའི་གནས་པ་བཞི་ཐོབ་པ་དང་། སྐྱོན་མེད་པ་ཐོབ་པ་དང་། རྩེ་བ་མེད་པ་ཐོབ་པ་དང་། ཚེགས་མེད་པ་ཐོབ་པ་ཡིན། དེ་ནས་ཤི་འཕོས་ནས་ཀྱང་ཚངས་པའི་འཇིག་རྟེན་དུ་སྐལ་བ་མཉམ་པར་སྐྱེ་བར་འགྱུར་བ་ཡིན། སྐྱེས་ནས་ཀྱང་ཚངས་པའི་དབང་པོ་ཉིད་འཐོབ་པ་ཡིན་ཏེ། བཞི་གང་ཞེ་ན། ཤ་ར་དྭ་ཏིའི་བུ་འདི་ལ་བྱང་ཆུབ་སེམས་དཔའ་དེ་བཞིན་གཤེགས་པའི་མཆོད་རྟེན་ཞིག་པ་མཐོང་ནས་བཅོས་པའི་ཕྱིར་སྤྲོ་བར་བྱེད་ཅིང་ཐ་ན་འཇིམ་པའི་གོང་བུ་གཅིག་ཙམ་ཡང་རྩིག་པར་བྱེད་པ་ཡིན། ཤ་ར་དྭ་ཏིའི་བུ་གཞན་ཡང་མ་བརྩིགས་པའི་ས་ཕྱོགས་ལམ་པོ་ཆེའི་བཞི་མདོ་སྐྱེ་བོ་མང་པོ་འདུ་བའི་སར་མཆོད་རྟེན་དང་ཁང་པ་བརྩེགས་པའམ། རྡོ་བའི་ཀ་བ་དང་། དེ་བཞིན་གཤེགས་པའི་སྐུའམ། དེ་བཞིན་གཤེགས་པའི་ཡོན་ཏན་རྗེས་སུ་དྲན་པ་གང་ཡང་རུང་བ་བྱེད་དེ། འདི་ལྟ་སྟེ། དཔེར་ན་ཆོས་ཀྱི་འཁོར་ལོ་བསྐོར་བའམ། མངོན་པར་འབྱུང་བའམ། བྱང་ཆུབ་ཀྱི་ཤིང་དྲུང་དུ་བདུད་འཇོམས་པའམ། དེ་བཞིན་གཤེགས་པའི་ཆོ་འཕྲུལ་ཆེན་པོའམ། དེ་བཞིན་གཤེགས་པའི་ཡོངས་སུ་མྱ་ངན་ལས་འདས་པ་ཆེན་པོ་ཡང་དག་པར་བསྟན་པའམ། ལྷ་ལས་བབས་པའམ། ལྷ་ཡུལ་དུ་མངོན་པར་འཛེག་པར་བྱེད་པའི་དེ་བཞིན་གཤེགས་པའི་མཆོད་རྟེན་རྩིག་པར་བྱེད་པ་ཡིན། ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་
སེམས་དཔའ་ཆེན་པོ་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་ཞིང་འཐབ་པ་དང་། རྩོད་པ་འབྱུང་བ་མཐོང་ནས་མི་དབྱེ་བ་དང་། འཐུན་པར་བསྡུམ་པའི་ཕྱིར་བརྩོན་པ་ཡིན། ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་བསྟན་པ་རབ་ཏུ་འཇིག་ཅིང་། ཆོས་རབ་ཏུ་རྣམ་པར་འཇིག་པར་འགྱུར་བ་ན་ཐ་ན་ཚིགས་སུ་བཅད་པ་གཅིག་བསྲུང་བ་དང་མི་ཉམས་པར་བྱ་བའི་ཕྱིར་བརྩོན་པ་ཡིན། ཆོས་སམ་ཆོས་སྨྲ་བ་ཡོངས་སུ་འཛིན་པར་བྱེད་ཅིང་ལུས་དང་སྲོག་གཏོང་བར་བྱེད་ཀྱི་ཆོས་གཏོང་བར་མི་བྱེད་པ་ཡིན་ཏེ། ཤ་ར་དྭ་ཏིའི་བུ་བྱང་ཆུབ་སེམས་དཔའ་ཐེག་པ་ཆེན་པོ་ལ་ཡང་དག་པར་ཞུགས་པ་ཆོས་བཞི་པོ་དེ་དག་དང་ལྡན་ན་ཡོན་ཏན་གྱི་བྱེ་བྲག་སྔར་བསྟན་པ་དེ་དག་རྗེས་སུ་འཐོབ་བོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་མཆོད་རྟེན་མཐོང་ནས་སུ། །ཞིག་པ་ཕྱིར་ནི་བཅོས་པར་བྱ། །དེ་ཕྱིར་སྟོབས་ནི་ཆེ་བ་དང་། །ལུས་ཆེ་བ་དང་མི་འཇིགས་འགྱུར། །གང་དུ་དད་པ་སྐྱེ་འགྱུར་བའི། །ལམ་ཆེན་བཞི་མདོ་ཕྱོགས་སུ་ནི། །རིང་བསྲེལ་གྱི་ནི་སྐུ་བྱེད་ཅིང་། །སངས་རྒྱས་ཡོན་ཏན་རྣམས་སྟོན་པ། །བསོད་ནམས་མང་པོ་སྐྱེད་པར་བྱེད། །གང་ཞིག་ལམ་གྱི་བཞི་མདོར་ནི། །འཇིག་རྟེན་མཆོད་པའི་མཆོད་རྟེན་བྱེད། །དེ་ཡི་གྲགས་པ་འཕེལ་བར་འགྱུར། །ཕན་ཚུན་དུ་ནི་རྩོད་པ་ཡི། །ཉན་ཐོས་བྱེ་བ་རྣམས་མཐོང་ནས། །གཅིག་ལ་གཅིག་ནི་བཟོད་གསོལ་ཏེ། །དེ་དག་རྣམས་ནི་འཐུན་བྱེད་པ། །དགེ་བའི་རྩ་བ་དེ་ཡིས་སུ། །མི་འཇིགས་དཔའ་བོར་འགྱུར་བ་ཡིན། །སྲེད་མེད་བུ་ལྟར་མཁྲེགས་པ་ཡི། །ལུས་ནི་མངོན་པར་འགྲུབ་པ་ཡིན། །བསྟན་པ་རབ་ཏུ་རྣམ་འཇིག་པའི། །ཆོས་ལ་མི་བདེ་ཉེར་གནས་ཚེ། །གུས་པར་བྱས་ཏེ་ཆོས་སྲུང་ཞིང་། །ལུས་དང་སྲོག་དག་བོར་གྱུར་པ། །དེ་བཞིན་ཆོས་ནི་འཛིན་བྱེད་པ། །དེ་དག་སྲུང་བར་བྱེད་པ་དག །ལྷ་རྣམས་ཀྱིས་ནི་བསྲུང་བར་འགྱུར། །སངས་རྒྱས་རྣམས་ཀྱིས་བྱིན་གྱིས་བརླབས། །ཆོས་ནི་ཀུན་ཏུ་བསྲུང་བྱས་པས། །དེ་དག་
འཁོར་ལོས་སྒྱུར་བར་འགྱུར། །གླིང་བཞི་པོ་དག་རྣམ་བསྐོར་ཅིང་། །ཆོས་ཀྱིས་ཀྱང་ནི་རྒྱལ་སྲིད་བྱེད། །བསྐོར་ཅིང་རབ་ཏུ་བསྟན་པས་ན། །བག་མེད་པར་ནི་འགྱུར་མ་ཡིན། །བག་ཡོད་པར་ནི་རྟག་པར་འགྱུར། །རྒྱལ་སྲིད་བོར་ནས་རབ་ཏུ་འབྱུང་། །དྲང་སྲོང་རྒྱལ་པོ་རྫུ་འཕྲུལ་ཅན། །བསམ་གཏན་བཞི་པོ་སྒོམ་པར་བྱེད། །ཚངས་པའི་གནས་པ་རྣམས་བསྒོམས་ནས། །རྟག་པར་ཡོན་ཏན་གནས་པ་ཡིན། །ཤི་འཕོས་ཚངས་པའི་འཇིག་རྟེན་དུའང་། །དེ་ནི་སྐྱེ་བ་སྒྲུབ་པར་བྱེད། །དེར་ཡང་ཆེན་པོར་འགྱུར་བ་ཡིན། །དེ་ནི་ཚངས་པའི་དབང་ཕྱུག་ཡིན། །ཆོས་ཀྱི་མཆོག་ནི་བཞི་པོ་དག །འཇིག་རྟེན་གྱི་ནི་མགོན་པོས་བསྔགས། །བྱང་ཆུབ་སྤྱད་པ་སྤྱོད་པ་ན། །སྔོན་ཆད་ངས་ཀྱང་བསྟེན་པ་ཡིན། །ཆོས་གང་ལ་ནི་ངས་བསླབས་ཤིང་། །ཇི་ལྟར་སྔོན་ཆད་སྤྱད་པ་བཞིན། །དེ་ལ་ཕ་རོལ་ཕྱིན་གྱུར་ནས། །བླ་མེད་བྱང་ཆུབ་སངས་རྒྱས་ཡིན། །ཇི་ལྟར་སྔོན་ཆད་ངས་བསྟེན་པའི། །ཆོས་དེ་དག་ལ་གང་བསྟེན་པ། །ཐམས་ཅད་དུ་ནི་ཆེན་པོར་འགྱུར། །བསྙེན་དཀའ་རིགས་པ་ཅན་དུ་འགྱུར། །མི་ཡི་བདག་པོར་འགྱུར་བ་ཡིན། །སུམ་ཅུ་རྩ་གསུམ་དབང་ཕྱུག་འགྱུར། །འདོད་པའི་ཁམས་ནི་ཐམས་ཅད་དུའང་། །དབང་ཕྱུག་དམ་པར་འགྱུར་བ་ཡིན། །གཟུགས་ཀྱི་ཁམས་སུ་སོང་ནས་ཀྱང་། །དེར་ནི་དབང་ཕྱུག་འགྱུར་བ་ཡིན། །ཐམས་ཅད་དུ་ཡང་མཆོག་ཏུ་འགྱུར། །ཡོན་ཏན་དག་ལ་སུ་མི་སློབ། །ཚུལ་ཁྲིམས་སྤྱོད་པ་ཕུན་སུམ་ཚོགས། །ངོ་ཚ་ལྡན་ཞིང་ཁྲེལ་ཡོད་འཕགས། །དེ་ཡི་མངོན་འབྱུང་ཕུན་སུམ་ཚོགས། །ཀུན་ཏུ་ཕུན་སུམ་ཚོགས་པ་འཐོབ། །བརྩོན་འགྲུས་ཀྱིས་ནི་ཕུན་ཚོགས་འགྱུར། །བཟོད་པ་ཏིང་འཛིན་ཕུན་སུམ་ཚོགས། །དེ་ཡི་ཤེས་རབ་བླ་ན་མེད། །ཆོས་རྣམས་ཀུན་ལ་མཁས་པ་ཡིན། །ནམ་ཞིག་རྟག་པར་དོན་བསམ་པ། །བྱེ་བ་ཕྲག་ནི་སྟོང་པོ་དག །དེར་ནི་ཐམས་ཅད་རབ་ཏུ་ཤེས། །དོན་བསམ་པ་ལ་མཁས་པ་ཡིན། །སྐད་ཅིག་གཅིག་གིས་སྒྲུབ་པ་དེའི། །ཚིག་རབ་དབྱེ་བ་ཤེས་པར་འགྱུར། །གང་དག་ཆེན་པོར་འགྱུར་བ་ཡི། །མང་ཐོས་རྣམས་ཀྱི་སློབ་དཔོན་ཆེ། །ཇི་ལྟར་མཛངས་པ་ཤེས་རབ་དང་། །
སྤོབས་པ་ཡིས་ནི་འཕགས་པ་བཞིན། །རྟག་པར་བྱང་ཆུབ་ཕྱིར་ངེས་ཤིང་། །ཕྱི་རོལ་ཤེས་པ་འདོར་བར་འགྱུར། །རྟག་པར་དེ་ཡི་ལྟ་བ་དྲང་། །ཡང་དག་ལྟ་བ་ཤིན་ཏུ་སྒོམ། །རྫོགས་སངས་རྒྱས་ཀྱང་མཉེས་པར་བྱེད། །རྟག་ཏུ་མི་ཁོམ་སྤོང་བར་འགྱུར། །ཨ་ལ་ཐེག་པ་ཐེག་ཆེན་པོ། །སངས་རྒྱས་དག་ནི་ཀུན་གྱིས་བསྔགས། །དེ་ལ་དམན་པའི་ཆོས་རྣམས་ནི། །གང་ཡང་བསྒྲགས་པར་བྱེད་པ་མེད། །དེ་ལ་ལོང་བ་བསྒྲགས་པ་མེད། །འོན་པ་དག་ཀྱང་བསྒྲགས་པ་མེད། །ཞར་དང་ལག་རྡུམ་འཕྱེ་བོ་དང་། །མདོག་མི་སྡུག་དག་བསྒྲགས་པ་མེད། །དབུལ་པོ་དག་ནི་བསྒྲགས་མི་བྱ། །དམན་པའི་ཡོན་ཏན་བསྒྲགས་པ་མེད། །གང་གིས་སྡིག་ཅན་འགྲོ་འགྱུར་བའི། །སྡིག་པའི་ཆོས་ཅན་བསྒྲགས་མི་བྱ། །འདི་ལ་ཡེ་ཤེས་དེ་འདྲ་དང་། །བསྔགས་པ་དེ་འདྲ་ཐོས་ནས་སུ། །སྤྱོད་ཡུལ་གང་མིན་མ་གཏོགས་པར། །ཡེ་ཤེས་དེ་འདྲ་སུ་མི་ཚོལ། །དེ་ཕྱིར་ཡེ་ཤེས་གང་ཚོལ་བ། །སངས་རྒྱས་ཡེ་ཤེས་རྨོངས་པས་ཚོལ། །ཡེ་ཤེས་དེ་ལ་བསླབས་པས་ན། །ཆོས་རྣམས་ཀྱི་ནི་ཕ་རོལ་འགྲོ། །ང་ཡིས་རིགས་རྣམས་བཞག་མ་ཡིན། །སྐྱེ་བའང་གླེངས་པ་མ་ཡིན་ཞིང་། །དེ་ཡི་ཁ་དོག་ཕྱེ་བའང་མིན། །གཟུགས་ཀྱི་སྐུ་ལ་དམན་པ་མེད། །ང་ནི་ལེ་ལོ་ཅན་མ་ཡིན། །བརྩོན་འགྲུས་ཀྱིས་ནི་རྟག་ཏུ་འཕགས། །རྟག་ཏུའང་ཚུལ་ཁྲིམས་ཕུན་སུམ་ཚོགས། །ཤེས་རབ་ལྡན་ཞིང་རབ་མཉམ་བཞག །འདི་ལྟར་ང་ཡིས་སྔོན་ཆད་ཆོས། །མཆོག་དང་ཕུལ་དག་བསྟེན་པ་ཡིན། །དེ་ཡི་འབྲས་བུའང་ལོངས་སྤྱོད་ཀྱིས། །རྣམ་པར་སྨིན་པ་ཇི་འདྲ་ལྟོས། །འཇིག་རྟེན་ཁམས་ནི་སྟོང་དག་དང་། །བྱེ་བ་ཁྲག་ཁྲིག་དག་དང་ནི། །དེ་བས་ལྷག་པའི་ཞིང་རྣམས་སུ། །དེ་ལ་ང་ཡི་ཡེ་ཤེས་འཇུག །སེམས་ཅན་གང་དག་དེར་སྐྱེས་པ། །དེ་དག་གི་ནི་སེམས་ཀྱང་ཤེས། །དེ་དག་རྣམས་ཀྱི་སྤྱོད་པའང་ཤེས། །བསམ་པ་ཡང་ནི་རྣམ་པར་ཤེས། །མི་སྙན་སྨྲ་བ་གང་འབྱུང་བ། །དེ་དག་གི་ནི་དེ་ཡང་ཤེས། །ཆད་པས་གཅད་པའང་ཤེས་པ་ཡིན། །རབ་ཏུ་བཟུང་བའང་དེ་བཞིན་ནོ། །སངས་རྒྱས་སྤྱན་གྱིས་ངས་དེ་དག །ཐམས་ཅད་ལ་ནི་རྣམ་བལྟས་ཏེ། །སེམས་
ཅན་ཡོངས་སུ་སྨིན་ཤེས་ནས། །སྲིད་པའི་བཅིངས་ལས་དགྲོལ་བར་བྱ། །དུས་སུ་སོང་ནས་བསྐུལ་བར་བྱ། །དུས་སུ་ཡང་ནི་གདམས་པར་བྱ། །གང་གིས་དེ་དག་སྐྱེ་འགྱུར་བའི། །ཆོ་འཕྲུལ་རྣམས་ནི་བསྟན་པར་བྱ། །གང་དག་གཟུགས་ལ་ཆགས་འགྱུར་དང་། །ལོངས་སྤྱོད་ལ་ཡང་གནས་འགྱུར་བ། །དེ་དག་ལ་ནི་ཉེས་དམིགས་བསྟན། །དེ་ཕྱིར་དེ་ནི་མྱ་ངན་འདའ། །སྲིད་པའི་འདོད་ཆགས་བཅིང་བས་བཅིངས། །ལྟ་བ་ལ་ནི་གནས་འགྱུར་བ། །དེ་དག་རྣམས་ལ་ཉེས་དམིགས་བསྟན། །དེ་ཕྱིར་དེ་ནི་མྱ་ངན་འདའ། །སྲིད་ལྟ་དེ་འདྲ་གང་དུ་འབྱུང་། །གང་ལ་དེ་དག་གནས་འགྱུར་དང་། །དེ་དག་གིས་ནི་གང་མཆོག་བཀུར། །དེ་འདྲའི་ལུས་སུ་བསྒྱུར་ནས་སུ། །དྲང་པོའི་ལམ་ནི་བསྟན་པར་བྱ། །དེ་དག་གིས་ཀྱང་ཆོས་ཤེས་ནས། །གང་འདིར་ངེས་པར་བདག་ཅག་གིས། །བྱང་ཆུབ་དམ་པ་འཚང་རྒྱ་ཞེས། །དེ་ཚེ་ང་ལ་ཕྱག་འཚལ་ལོ། །དེ་དག་གི་ནི་རྩ་རྟོགས་ནས། །དེ་དག་ལ་ནི་ཆོས་ཀྱང་བསྟན། །སྡུག་བསྔལ་ཀུན་ལས་ཕྱུང་བ་ཡིན། །ང་ནི་རྒྱལ་བ་ཟུག་རྔུ་འབྱིན། །མྱ་ངན་འདས་ཞི་ཐོབ་བྱའི་ཕྱིར། །དེ་དག་ལ་ནི་ངས་ཆོས་བསྟན། །དེ་དག་ང་ལས་ཆོས་ཐོས་ནས། །མྱ་ངན་འདས་པ་རྗེས་སུ་འཐོབ། །ང་ཡི་ཤེས་པ་དེ་ལྟར་ལ། །ཆོས་རྣམས་ཀུན་ལ་འཇུག་པ་ལྟར། །འདས་པའི་དུས་དང་གང་དག་ཡང་། །མ་འོངས་ཆོས་རྣམས་དེ་བཞིན་ནོ། །ང་ཡི་ལུས་ནི་མཆོག་ཏུ་འཕགས། །དེ་ཡི་ཚད་ནི་དམིགས་མ་ཡིན། །རྒྱལ་བའི་སྤྱི་གཙུག་བལྟ་བར་ནི། །རྫུ་འཕྲུལ་ཅན་གྱིས་ནུས་མ་ཡིན། །སངས་རྒྱས་ལག་པ་མཐའ་ཡས་ཏེ། །ང་ཡི་ལག་པ་དཔག་ཏུ་མེད། །ཇི་ལྟར་གང་གཱའི་བྱེ་སྙེད་ཀྱི། །འཇིག་རྟེན་ཁམས་དག་ཁྱབ་པ་ཡིན། །ཁ་དོག་བཅས་པ་ཅི་འདྲ་བས། །སངས་རྒྱས་སྐུ་ནི་འབྱུང་འགྱུར་ཞེས། །སངས་རྒྱས་སྐུ་ཡི་ཁ་དོག་དང་། །དབྱིབས་ནི་ཤེས་པར་ནུས་མ་ཡིན། །ཁ་དོག་དབྱིབས་ནི་ཅི་འདྲ་ཞེས། །ང་ཡི་ཐད་ལྷགས་གང་དག་ལྟ། །ཁ་དོག་སྣ་ཚོགས་ལྟ་བྱེད་ཀྱང་། །མཚན་མ་ཤེས་པ་མ་ཡིན་ནོ། །སངས་རྒྱས་ཀྱི་ནི་སྐུ་མཐོང་ནས། །ཀུན་བརྗོད་པ་ཡི་ཆོ་འཕྲུལ་གྱིས། །སེམས་ཅན་དེ་དག་རབ་དགའ་ཞིང་། །ང་ཡི་
ལུས་ལའང་སྟོད་པར་བྱེད། །སེམས་ཅན་དག་ནི་ཐམས་ཅད་ཀྱིས། །སངས་རྒྱས་སྐུ་ནི་བལྟ་མི་ནུས། །ལྷ་ཡི་མིག་ཅན་གང་ལ་ཡང་། །སྣང་བར་འགྱུར་བ་མ་ཡིན་ནོ། །འདི་ལྟར་སངས་རྒྱས་བྱིན་བརླབས་དེ། །ཁྱེད་ཅག་གིས་ནི་འདིར་ལྟོས་ཤིག །སྐུ་དེ་བསམ་མི་ཁྱབ་ཡིན་པར། །སངས་རྒྱས་སྐུ་ནི་ཤེས་པར་བྱོས། །སྤུ་ཡི་ཁུང་བུ་གཅིག་ནས་སུ། །ཆོ་འཕྲུལ་དག་ནི་དེ་འདྲ་དང་། །འཇིག་རྟེན་ཁམས་སུ་སེམས་ཅན་གྱི། །དོན་དེ་འདྲ་བ་བྱེད་པར་འགྱུར། །འོད་ཟེར་བྱེ་བ་མང་པོ་ནི། །སྤུ་ཡི་ཁུང་ནས་ཕྱུང་ནས་སུ། །ཞིང་རྣམས་མང་པོ་སྣང་བར་བྱེད། །སངས་རྒྱས་ཞིང་ཡང་དེ་སྙེད་དོ། །སྟན་འདི་ལ་ནི་འདུག་ནས་སུ། །ཇི་ལྟར་སེམས་ཅན་ངས་ཤེས་ལྟར། །དེ་ཚེ་ཕྱོགས་བཅུའི་འཇིག་རྟེན་གྱི། །སེམས་ཅན་དེ་དག་ཉིད་ཀྱིས་ཤེས། །སངས་རྒྱས་ཀྱི་ནི་ཡེ་ཤེས་མཐའ། །ང་ཡིས་གཞག་པར་ནུས་མ་ཡིན། །ཀུན་མཁྱེན་ཡེ་ཤེས་ངས་ཀྱང་ནི། །ཉན་ཐོས་རྣམས་ཀྱིས་འདིར་ཅི་སྨོས། །སངས་རྒྱས་ཐམས་ཅད་བསམ་མི་ཁྱབ། །སངས་རྒྱས་ཆོས་རྣམས་བསམ་མི་ཁྱབ། །བསམ་མི་ཁྱབ་ལ་དད་བྱས་པས། །དེ་དག་བསམ་མི་ཁྱབ་ཏུའང་འགྱུར། །བྱང་ཆུབ་སེམས་དཔའི་སྤྱོད་པའི་ལེའུ་སྟེ་བཅུ་པའོ།། །།