འཕགས་པ་ལང་ཀར་གཤེགས་པའི་མདོ་ལས་སངས་རྒྱས་ཐམས་ཅད་ཀྱི་གསུང་གི་སྙིང་པོ་ཞེས་བྱ་བའི་ལེའུ།
དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བློ་གྲོས་ཆེན་པོ་ལ་བཀའ་སྩལ་པ། གང་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་བཤད་པ་དང་། འཆད་པ་དང་། འཆད་པར་འགྱུར་བ་དང་། ད་ངས་ཀྱང་ཆོས་སྨྲ་བ་རྣམས་ཡོངས་སུ་གཟུང་བའི་ཕྱིར་བཤད་ཀྱིས། ལང་ཀར་གཤེགས་པའི་སྔགས་ཀྱི་ཚིག་ཁྱོད་ཀྱིས་ཟུང་ཤིག །འདི་ལྟ་སྟེ། ཏུད་ཊེ་ཏུད་ཊེ། བུད་ཊེ་བུད་ཊེ། པད་ཊེ་པད་ཊེ། ཀད་ཊེ་ཀད་ཊེ། ཨ་མ་ལེ། ཨ་མ་ལེ། བི་མ་ལེ། བི་མ་ལེ། ནི་མེ་ནི་མེ། ཧི་མེ་ཧི་མེ། བ་མེ་བ་མེ། ཀ་ལེ་ཀ་ལེ། ཀ་ལ་ཀ་ལེ། ཨད་ཊེ། མད་ཊེ། བད་ཊེ། ཏུད་ཊེ། རྙད་ཊེ། སྤུད་ཊེ། ཀད་ཊེ། ལད་ཊེ། པད་ཊེ། ཧི་མེ་ཧི་མེ། དི་མེ་དི་མེ། ཙ་ལེ་ཙ་ལེ། པ་ཙེ་པ་ཙེ། བྷན་དེ་བྷན་དེ། ཨན་ཚེ་མན་ཙེ། ཊུ་ཌཱ་རེ། དྷུ་ཌཱ་རེ། པ་ཌཱ་རེ། ཨག་ཀེ ། ཨག་ཀེ ། མག་ཀེ ། མག་ཀེ ། ཙག་ཀྲེ། ཙག་ཀྲེ། དི་མེ་དི་མེ། ཧི་མེ་ཧི་མེ། ཊུ་ཊུ་ཊུ་ཊུ། ཋུ་ཋུ་ཋུ་ཋུ། ཌུ་ཌུ་ཌུ་ཌུ། ། སྭཱ་ཧཱ། བློ་གྲོས་ཆེན་པོ་ལང་ཀར་གཤེགས་པའི་མདོའི་སྔགས་ཀྱི་ཚིག་ནི་འདི་དག་ཡིན་ནོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་སྔགས་ཀྱི་ཚིག་འདི་དག་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་པར་འགྱུར་བ་དེ་ལས་སུས་ཀྱང་སྐབས་མི་རྙེད་དེ། ལྷའམ། ལྷ་མོའམ། ཀླུའམ། ཀླུ་མོའམ། གནོད་སྦྱིན་ནམ། གནོད་སྦྱིན་མོའམ། ལྷ་མ་ཡིན་ནམ། ལྷ་མ་ཡིན་མོའམ། ནམ་མཁའ་ལྡིང་ངམ། ནམ་མཁའ་ལྡིང་མོའམ། མི་འམ་ཅིའམ། མི་འམ་ཅི་མོའམ། ལྟོ་འཕྱེ་ཆེན་པོའམ། ལྟོ་འཕྱེ་ཆེན་པོ་མོའམ། དྲི་ཟའམ། དྲི་
ཟ་མོའམ། འབྱུང་པོའམ། འབྱུང་པོ་མོའམ། གྲུལ་བུམ་མམ། གྲུལ་བུམ་མོའམ། ཤ་ཟའམ། ཤ་ཟ་མོའམ། གནོན་པོའམ། གནོན་མོའམ། བརྗེད་བྱེད་དམ། བརྗེད་བྱེད་མོའམ། སྲིན་པོའམ། སྲིན་མོའམ། ཕྲ་མེན་ཕའམ། ཕྲ་མེན་མའམ། མདངས་འཕྲོག་ཕོའམ། མདངས་འཕྲོག་མོའམ། ལུས་སྲུལ་པོའམ། ལུས་སྲུལ་མོའམ། མིའམ། མི་མ་ཡིན་པ་དེ་དག་ཐམས་ཅད་ཀྱིས་ཀྱང་དེ་ལ་གླགས་མི་རྙེད་དེ། གལ་ཏེ་གདོན་དྲག་པོ་ཞིག་བྱུང་ན་དེ་ལ་བརྒྱ་རྩ་བརྒྱད་དུ་བསྔགས་པས་ངུ་འབོད་ཅིང་ཕྱོགས་གཅིག་ཏུ་བལྟ་སྟེ་འགྲོ་བར་འགྱུར་རོ། །བློ་གྲོས་ཆེན་པོ་ཡང་སྔགས་ཀྱི་ཚིག་གཞན་དག་ཀྱང་བཤད་པར་བྱའོ། །འདི་ལྟ་སྟེ། པད་མེ། པད་མ། དེ་བེ། ཧེ་ནེ་ཧི་ན་ཧི་ནེ། ཙུ་ལེ་ཙུ་ལཱ་ཙུ་ལེ། ཧུ་ལེ་ཧུ་ལ་ཧུ་ལེ། ཡུ་ལེ་ཡུ་ལ་ཡུ་ལེ། པ་ལེ་པ་ལ་པ་ལེ། མུན་ཙེ། ཚིན་དྷེ། བྷིན་དྷེ། བྷན་ཚེ། མརྡེ་པྲ་མརྡེ་དི་ན་ཀ་རེ་སྭཱ་ཧཱ། བློ་གྲོས་ཆེན་པོ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་སྔགས་ཀྱི་ཚིག་འདི་དག་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱེད་ན། ལྷའམ། ལྷ་མོའམ། ཀླུའམ། ཀླུ་མོའམ། གནོད་སྦྱིན་ནམ། གནོད་སྦྱིན་མོའམ། ལྷ་མ་ཡིན་ནམ། ལྷ་མ་ཡིན་མོའམ། ནམ་མཁའ་ལྡིང་ངམ། ནམ་མཁའ་ལྡིང་མོའམ། མི་འམ་ཅིའམ། མི་འམ་ཅི་མོའམ། ལྟོ་འཕྱེ་ཆེན་པོའམ། ལྟོ་འཕྱེ་ཆེན་མོའམ། དྲི་ཟའམ། དྲི་ཟ་མོའམ། འབྱུང་པོའམ། འབྱུང་མོ་འམ། གྲུལ་བུམ་མམ། གྲུལ་བུམ་མོའམ། ཤ་ཟའམ། ཤ་ཟ་མོའམ། གནོན་པོའམ། གནོན་མོའམ། བརྗེད་བྱེད་དམ། བརྗེད་བྱེད་མོའམ། སྲིན་པོའམ། སྲིན་མོའམ། ཕྲ་མེན་ཕའམ། ཕྲ་མེན་མའམ། མདངས་འཕྲོག་ཕའམ། མདངས་འཕྲོག་མའམ། ལུས་སྲུལ་པོའམ། ལུས་སྲུལ་མོའམ། མི་འམ་མི་མ་ཡིན་པ་དེ་དག་ཐམས་ཅད་ཀྱིས་ཀྱང་གླགས་མི་རྙེད་དོ། །གང་སྔགས་ཀྱི་ཚིག་འདི་དག་ཀློག་པར་བྱེད་པ་དེས་ལང་ཀར་གཤེགས་པའི་མདོ་ཐམས་ཅད་བཀླགས་པར་འགྱུར་རོ། །སྔགས་ཀྱི་ཚིག་འདི་དག་ནི་བཅོམ་ལྡན་འདས་ཀྱིས་སྲིན་པོ་རྣམས་བཟློག་པའི་ཕྱིར་གསུངས་སོ།། །།
འཕགས་པ་ལང་ཀར་གཤེགས་པ་བམ་པོ་བརྒྱད་པ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་འདི་སྐད་ཅེས་གསོལ་ཏོ། །འཇིག་རྟེན་འདི་ནི་སྐྱེ་འཇིག་བྲལ། །ནམ་མཁའི་མེ་ཏོག་རབ་ཏུ་འདྲ། །ཁྱོད་ཀྱི་ཤེས་རབ་ཐུགས་རྗེ་ཡིས། །ཡོད་དང་མེད་པར་མ་དམིགས་སོ། །འཇིག་རྟེན་རྟག་དང་ཆད་སྤངས་པ། །ཁོར་ཟུག་རྨི་ལམ་འདྲ་བ་སྟེ། །ཁྱོད་ཀྱི་ཤེས་རབ་ཐུགས་རྗེ་ཡིས། །ཡོད་དང་མེད་པར་མ་དམིགས་སོ། །ཆོས་རྣམས་ཐམས་ཅད་སྒྱུ་མ་བཞིན། །སེམས་དང་རྣམ་པར་ཤེས་པ་སྤངས། །ཁྱོད་ཀྱི་ཤེས་རབ་ཐུགས་རྗེ་ཡིས། །ཁྱོད་ཀྱིས་ཡོད་དང་མེད་མ་དམིགས། །ཆོས་དང་གང་ཟག་བདག་མེད་དང་། །ཁྱོད་ཀྱི་ཉོན་མོངས་ཤེས་བྱའི་རྣམས། །ཁྱོད་ཀྱི་ཤེས་རབ་ཐུགས་རྗེ་དང་། །མཚན་མ་མེད་པས་རྟག་ཏུ་དག །མྱ་ངན་མི་འདའ་འདའ་ལ་མིན། །ཁྱོད་ལ་མྱ་ངན་འདའ་མི་གནས། །བློ་དང་རིག་པར་བགྱི་དང་བྲལ། །ཡོད་དང་མེད་པའི་ཕྱོགས་ཀྱང་སྤངས། །དེ་ལྟར་སྐྱེ་འཇིག་སྤངས་པ་ཡི། །ཐུབ་པ་ཞི་བ་སུས་མཐོང་བ། །དེ་དག་འདི་དང་སླད་མར་ཡང་། །ཆགས་མེད་ཉེར་ལེན་མེད་པར་འགྱུར། །སེམས་སླུ་བ་ཡི་སྨིག་རྒྱུ་བ། །ཇི་ལྟར་དཔྱིད་ཀ་གཡོ་བ་ན། །རི་དགས་རྣམས་ནི་ཆུར་འཛིན་ཏེ། །དེ་ལ་དངོས་པོ་ཡོད་པ་མིན། །དེ་བཞིན་རྣམ་ཤེས་ས་བོན་ཡང་། །ལྟ་བའི་ཡུལ་ལ་རབ་ཏུ་གཡོ། །བྱིས་པ་རྣམས་ནི་སྐྱེ་བར་འཛིན། །རབ་རིབ་ཅན་གྱི་རབ་རིབ་བཞིན། །བསམ་གཏན་བསམ་བྱ་བསམ་གཏན་པ། །སྤོང་དང་བདེན་པ་མཐོང་བ་དང་། །དེ་དག་རྟོག་པ་ཙམ་ཡིན་པར། །གང་གིས་རྟོགས་པ་དེ་འགྲོལ་ལོ། །ཆོས་འདི་དག་ནི་སྙིང་པོ་མེད། །རློམ་སེམས་ལས་ནི་བྱུང་བ་ཡིན། །གང་གིས་སྟོང་ཞེས་སྙེམས་པ་ཡི། །སྙེམས་པ་དེ་ཡང་སྟོང་པའོ། །ཕུང་པོ་རྣམ་པར་ཤེས་དང་ལྔ། །ཆུ་ལ་ཤིང་གི་གྲིབ་མ་བཞིན། །སྣང་བ་སྒྱུ་མ་རྨི་ལམ་འདྲ། །རྣམ་པར་རིག་པར་མ་རྟོག་ཤིག །སྒྱུ་མ་རོ་ལངས་འཁྲུལ་འཁོར་དང་། །རྨི་ལམ་གློག་དང་སྤྲིན་ལྟ་བུར། །ནམ་ཡང་རྒྱུད་གསུམ་རྣམ་འཆད་པར། །སྐྱེ་བོས་མཐོང་ན་རྣམ་
པར་འཐར། །ཚུལ་བཞིན་མ་ཡིན་རྣམ་རྟོག་པས། །སྣ་ཚོགས་རྣམ་པ་བརྒྱད་དམ་དགུར། །རྣམ་པར་ཤེས་པ་འཇུག་འགྱུར་ཏེ། །ཇི་ལྟར་རྒྱ་མཚོའི་རླབས་བཞིན་ནོ། །རྟག་ཏུ་བག་ཆགས་དག་གིས་བསྐྱེད། །རྩ་བ་ཟུག་ཅིང་གནས་ཀྱང་བརྟན། །སྤྱོད་ཡུལ་དག་ཏུ་སེམས་འཁྱམ་སྟེ། །ཁབ་ལོང་གིས་ནི་ལྕགས་བཞིན་ནོ། །སེམས་ཅན་ཀུན་ལ་གནས་པ་སྟེ། །རིགས་ཀྱི་ས་ནི་རྟོག་པ་སྤངས། །ཤེས་རབ་ཤེས་བྱ་རྣམ་སྤངས་ཤིང་། །བྱེད་ལས་གྲོལ་ན་རྣམ་པར་ལྡོག །ས་བཅུ་ལས་ནི་རྣམ་བྱུང་བ། །སྒྱུ་མ་ལྟ་བུའི་ཏིང་འཛིན་དང་། །འདུ་ཤེས་རྣམ་ཤེས་སྤངས་པ་ཡི། །སེམས་ཀྱི་རྒྱལ་པོ་བལྟ་བར་བྱ། །སེམས་ནི་ནམ་ཞིག་གྱུར་པ་ན། །པད་མོ་འདྲ་བའི་གཞལ་མེད་ཁང་། །སྒྱུ་མའི་སྤྱོད་ཡུལ་འབྱུང་བ་ན། །དེ་ཡི་ཚེ་ན་ཐེར་ཟུག་གནས། །དེ་ན་གནས་པར་གྱུར་ནས་ནི། །ལྷུན་གྱིས་གྲུབ་པའི་སྤྱོད་རིག་པས། །སྣ་ཚོགས་གཟུགས་ཀྱི་ནོར་བུ་བཞིན། །སེམས་ཅན་ཀུན་གྱི་དོན་བྱེད་དོ། །རྣམ་པར་རྟོག་ལས་གུད་ན་ནི། །འདུས་བྱས་འདུས་མ་བྱས་མེད་ན། །མོ་ཤམ་རྨི་ལམ་བུ་བཞིན་ནོ། །བྱིས་པ་ཕྱོགས་བསླད་འཛིན་པར་བྱེད། །རང་བཞིན་མེད་དང་མི་སྐྱེ་དང་། །གང་ཟག་དང་ནི་ཕུང་པོའི་རྒྱུད། །རྐྱེན་དང་ཁམས་དང་ཤེས་བྱ་དང་། །སྟོང་པ་སྲིད་དང་མི་སྲིད་རྣམས། །ངས་ནི་ཐབས་སུ་བཤད་པ་སྟེ། །ང་ནི་མཚན་ཉིད་མི་འཆད་ན། །མཚན་གྱི་གཞི་དང་མཚན་ཉིད་དུ། །བྱིས་པ་རྣམས་ནི་དངོས་པོར་འཛིན། །ཐམས་ཅད་མཁྱེན་ཀྱང་ཐམས་ཅད་མཁྱེན་པ་མིན། །ཐམས་ཅད་ཀྱི་ཡང་དབུས་ལ་ཐམས་ཅད་མེད། །བྱིས་པ་འཇིག་རྟེན་སངས་རྒྱས་འདི་ཞེས་རྟོག །ཤེས་པར་མི་བྱེད་སྟོན་པར་ཡང་མི་བྱེད། །བཏགས་པ་འདི་ནི་མིང་ཙམ་སྟེ། །མཚན་ཉིད་ཀྱིས་ནི་མེད་པའོ། །གང་ལ་དེ་ནི་རྣམ་བརྟག་པའི། །ཕུང་པོ་སྐྲ་ཤད་འཛིངས་པ་འདྲ། །མེད་ལས་འབྱུང་བ་ཆུང་ཟད་མེད། །རྐྱེན་རྣམས་ཀྱིས་ནི་འཇིག་མི་འགྱུར། །ནམ་མཁའི་མེ་ཏོག་མོ་ཤམ་བུ། །དེ་ལྟར་འདུས་བྱས་ནམ་མཐོང་བ། །དེ་ཚེ་གཟུང་དང་འཛིན་པ་ནི། །ནོར་བར་མཐོང་ནས་ལྡོག་པར་འགྱུར། །
མཚན་ཉིད་དང་ནི་བྱ་བ་དང་། །དངོས་པོར་མྱ་ངན་ང་མི་འདས། །རྣམ་རྟོག་རྣམ་ཤེས་བཟློག་པ་ན། །ང་ནི་མྱ་ངན་འདས་པའོ། །ཇི་ལྟར་ཆུ་ཆེན་ཟད་པའི་ཚེ། །རླབས་རྣམས་འབྱུང་བར་མི་འགྱུར་བ། །དེ་བཞིན་འགགས་པར་གྱུར་ན་ནི། །རྣམ་ཤེས་སྣ་ཚོགས་མི་འབྱུང་ངོ་། །སྟོང་པ་ངོ་བོ་ཉིད་མེད་པ། །སྒྱུ་མ་བཞིན་དུ་མ་སྐྱེས་རྣམས། །ཡོད་དང་མེད་པ་མ་ཡིན་ཏེ། །དངོས་པོ་འདི་དག་རྨི་ལམ་བཞིན། །ང་ནི་རང་བཞིན་གཅིག་འཆད་པ། །རྟོག་གེ་མཚན་མ་རིགས་སྤངས་པ། །འཕགས་པའི་ལྷ་ཡི་སྤྱོད་ཡུལ་ཏེ། །རང་བཞིན་རྣམ་གཉིས་སྤངས་པའོ། །འཛིན་པ་མེད་ཅིང་གཟུང་བ་མེད། །ཐར་པ་མེད་ཅིང་འཆིང་བ་མེད། །སྒྱུ་མ་དང་ནི་སྨིག་རྒྱུ་འདྲ། །རྨི་ལམ་རབ་རིབ་ཇི་བཞིན་དུ། །གང་ཚེ་ཡང་དག་དོན་འདོད་པ། །རྣམ་པར་མི་རྟོག་ཆགས་མེད་པས། །མཐོང་བ་དེ་ལ་རྣལ་འབྱོར་ཞུགས། །ཐེ་ཙོམ་མེད་པར་ང་ཡང་མཐོང་། །དེ་ལ་རྣམ་རིག་གང་ཡང་མེད། །ཇི་ལྟར་ནམ་མཁའི་སྨིག་རྒྱུ་བཞིན། །ཆོས་རྣམས་དེ་ལྟར་ཤེས་ན་ནི། །ཅི་ཡང་ཤེས་པ་མེད་པའོ། །ཁམས་རྣམས་རབ་ཏུ་འཁྲུགས་པའི་ཕྱིར། །སྲིན་བུ་མེ་ཁྱེར་ལྟ་བུ་དག །མེད་ཀྱང་མྱོས་ལ་སྣ་ཚོགས་སྣང་། །དེ་བཞིན་འཇིག་རྟེན་རང་བཞིན་ནི། །རྩྭ་དང་ཤིང་དང་གྱོ་མོ་ལས། །སྒྱུ་མ་རྣམ་པར་མཛེས་གྱུར་ཀྱང་། །སྒྱུ་མ་དེ་ནི་མེད་པ་སྟེ། །ཆོས་ཀྱི་རང་བཞིན་དེ་བཞིན་ནོ། །རྐྱེན་རྣམས་ཡོད་དང་མེད་པ་ལས། །ཆོས་རྣམས་འབྱུང་བ་མེད་པ་སྟེ། །ཁམས་གསུམ་ན་ནི་ནོར་བ་ཡི། །དེ་ཕྱིར་སྣ་ཚོགས་སྣང་བར་འགྱུར། །འཇིག་རྟེན་རྨི་ལམ་ངོ་བོ་ཉིད་མཚུངས་ཏེ། །དེ་ན་སྣ་ཚོགས་ཀྱི་ཡང་གཟུགས་རྣམས་སྣང་། །རེག་དང་ལོངས་སྤྱོད་ལུས་ཀྱི་མཐར་འགྲོ་དང་། །འཇིག་རྟེན་གཙོ་དང་བྱེད་པ་རྣམས་མཚུངས་སོ། །སེམས་འདི་ཁམས་གསུམ་སྐྱེ་གནས་གྱུར་པ་ཡིན། །སེམས་འཁྲུལ་འདི་དང་ཕ་རོལ་སྣང་བའོ། །འཇིག་རྟེན་མེད་ཕྱིར་དེ་ལ་བརྟག་མི་བྱ། །འཇིག་རྟེན་དེ་འདྲའི་རང་བཞིན་རྟོགས་ནས་ནི། །མི་གཙང་གནས་ཀྱི་ཐ་མར་ཕྱིན་པར་འགྱུར། །བྱིས་པ་རྣམས་ནི་གཏི་མུག་ཕྱིར། །འབྱུང་བ་དང་ནི་འཇིག་པ་མཐོང་། །ཤེས་རབ་ལྡན་པ་རྣམས་དག་ནི། །
འབྱུང་བ་འཇིག་པ་མཐོང་བ་མེད། །ལྷ་ཡི་ཕོ་བྲང་འོག་མིན་ནོ། །སྡིག་པ་ཐམས་ཅད་རྣམ་སྤངས་པར། །རྟག་ཏུ་རྣམ་པར་མི་རྟོག་ལྡན། །སེམས་དང་སེམས་ལས་བྱུང་བ་སྤངས། །སྟོབས་དང་མངོན་ཤེས་དབང་ཐོབ་པ། །དེ་དག་ཏིང་འཛིན་དབང་རྙེད་ནས། །རྫོགས་པའི་སངས་རྒྱས་དེར་འཚང་རྒྱ། །སྤྲུལ་པ་རྣམས་ནི་འདིར་འཚང་རྒྱ། །སངས་རྒྱས་རྣམས་ཀྱི་སྤྲུལ་པ་དག །བྱེ་བ་དཔག་མེད་འབྱུང་བར་འགྱུར། །བྱིས་པ་ཀུན་ནི་དེ་དག་ལས། །བྲག་ཅ་འདྲ་ཆོས་བསམ་ཡས་ཉོན། །ཐོག་མ་དབུས་དང་མཐའ་ལས་གྲོལ། །དངོས་པོ་དང་ནི་དངོས་མེད་སྤངས། །ཁྱབ་པ་མི་གཡོ་དག་པ་སྟེ། །སྣ་ཚོགས་མེད་ལ་སྣ་ཚོགས་འབྱུང་། །རྣམ་པར་རིག་པའི་རིགས་ཀྱིས་གཡོགས། །ལུས་ཅན་ཀུན་ལ་གནས་པ་སྟེ། །སྒྱུ་མ་ནོར་བ་ཡོད་མོད་ཀྱི། །སྒྱུ་མ་ནོར་བའི་རྒྱུ་མ་ཡིན། །འཇིག་རྟེན་དག་ན་སེམས་སླུ་བ། །ཅུང་ཟད་ཙམ་ནི་གང་ཡོད་པ། །རང་བཞིན་གཉིས་དང་འབྲེལ་བ་སྟེ། །ཀུན་གཞི་རྣམ་པར་ཤེས་པས་སྤྲུལ། །རྣམ་རིག་ཙམ་གྱི་ལྟ་ཤྭ་དང་། །གང་ཟག་ཆོས་སུ་སྤྱོད་པར་ཡང་། །འཇིག་རྟེན་དེ་ལྟར་རྣམ་བསྒོམས་ནས། །ནམ་ཞིག་ཤིན་ཏུ་གྱུར་པ་ན། །དེ་ཚེ་ང་ཡི་བུ་ཡིན་ཏེ། །རྫོགས་པའི་ཆོས་རྣམས་རབ་སྟོན་པ། །དྲོད་དང་གཤེར་དང་སྲ་གཡོ་བར། །ཆོས་རྣམས་བྱིས་པས་རྣམ་པར་བརྟགས། །ཡང་དག་མ་ཡིན་སྒྲོ་བཏགས་ཏེ། །མཚན་ཉིད་མེད་ཅིང་མཚན་གཞི་མེད། །རྒྱུན་རྣམས་ཀྱི་ནི་ལུས་འདི་ལ། །འདི་ནི་རྫས་བརྒྱད་གཟུགས་ཡིན་ཏེ། །ལུས་ཀྱི་དབྱིབས་དང་དབང་པོར་ནི། །བྱིས་པ་ནོར་བ་རྣམས་རྟོག་གོ །རྒྱུ་དང་རྐྱེན་རྣམས་ཚོགས་པ་ལས། །བྱིས་པ་འབྱུང་བར་རྟོག་པར་བྱེད། །ཚུལ་འདི་དག་ནི་མི་ཤེས་པས། །སྲིད་པ་གསུམ་གྱི་གནས་ན་འཁྱམ། །དངོས་པོ་ཐམས་ཅད་རང་བཞིན་མེད་པ་སྟེ། །རྟོག་པ་མེ་ཡི་ཚིག་ཡིན་དེ་ཡང་མེད། །སྲིད་པ་རྨི་ལམ་སྤྲུལ་བཞིན་བརྟགས་བྱས་ནས། །འཁོར་བར་མི་བྱ་མྱ་ངན་འདས་མི་བྱ། །སྣ་ཚོགས་ས་བོན་ཞེས་བྱའི་སེམས། །སེམས་ཀྱི་སྤྱོད་ཡུལ་ལ་སྣང་སྟེ། །སྣང་ནས་རྟོག་པ་གཉིས་དག་གི། །བྱིས་པ་རྣམས་ནི་སྐྱེ་བར་རྟོག །མི་ཤེས་པ་དང་སྲེད་དང་ལས། །སེམས་དང་སེམས་ལས་བྱང་གནས་ཏེ། །
གང་ཕྱིར་དེ་ལས་འབྱུང་བས་ན། །དེ་ནི་གཞན་གྱི་དབང་དུ་འདོད། །དེ་དག་གང་དངོས་རྟོག་པ་ནི། །སེམས་ཀྱི་སྤྱོད་ཡུལ་ནོར་བ་སྟེ། །རྟོག་པས་གྲུབ་པ་མ་ཡིན་ནོ། །ལོག་པར་ནོར་བ་རྣམ་པར་བརྟགས། །རྐྱེན་རྣམས་དང་ནི་འབྲེལ་པ་ལས། །ལུས་ཅན་རྣམས་ཀྱི་སེམས་འབྱུང་ངོ་། །རྐྱེན་རྣམས་ལས་ནི་རྣམ་གྲོལ་ཞིང་། །རང་གི་མཚན་ཉིད་རྣམ་སྤངས་ཏེ། །ནམ་ཞིག་ལུས་ལ་མི་གནས་ན། །དེ་ཕྱིར་ང་ཡི་སྤྱོད་ཡུལ་མིན། །ཇི་ལྟར་རྒྱལ་པོ་ཚོང་དཔོན་དག །རི་དགས་འདྲ་བ་སྣ་ཚོགས་ཀྱིས། །བུ་བྲིད་ཁྱིམ་ན་རྩེར་བཅུག་ནས། །ནགས་ཀྱི་རི་དགས་ཕྲད་པ་བསྟན། །དེ་ལྟར་ངས་ནི་ཆོས་རྣམས་ཀྱི། །གཟུགས་བརྙན་ཙམ་ཉིད་སྣ་ཚོགས་ཀྱིས། །སོ་སོ་རང་རིག་ཡང་དག་མཐའ། །བུ་རྣམས་ལ་ནི་ང་འཆད་དོ། །ཇི་ལྟར་རྒྱ་མཚོའི་རླབས་རྣམས་ནི། །རླུང་གི་རྐྱེན་གྱིས་བྱུང་བ་དག །གར་བྱེད་རབ་ཏུ་འཇུག་པར་འགྱུར། །རྒྱུན་ཀྱང་ཆད་པར་མི་འགྱུར་རོ། །དེ་བཞིན་ཀུན་གཞི་ཆུ་བོ་ཡང་། །རྟག་ཏུ་ཡུལ་གྱི་རྐྱེན་གྱིས་བྱུང་། །རྣམ་ཤེས་དབའ་རླབས་སྣ་ཚོགས་ཀྱིས། །གར་བྱེད་རབ་ཏུ་འདུད་པར་འགྱུར། །གཟུང་དང་འཛིན་པའི་དངོས་པོར་ནི། །ལུས་ཅན་རྣམས་ཀྱི་སེམས་འཇུག་གོ །ཇི་ལྟར་བྱིས་པས་བརྟགས་པ་ལྟར། །སྣང་བ་ཡི་ནི་མཚན་ཉིད་མེད། །ཀུན་གཞི་རྣམ་ཤེས་དམ་པ་ནི། །རྣམ་པར་རིག་སྟེ་ཀུན་གཞི་ཡང་། །གཟུང་དང་འཛིན་པ་སྤངས་པའི་ཕྱིར། །དེ་བཞིན་ཉིད་དུ་ངས་བཤད་དོ། །ཕུང་པོ་རྣམས་ལ་བདག་མེད་དེ། །སྲོག་ཀྱང་མེད་ཅིང་གང་ཟག་མེད། །རྣམ་པར་ཤེས་པ་སྐྱེ་བར་འགྱུར། །རྣམ་པར་ཤེས་ནི་འགགས་པར་འགྱུར། །ཇི་ལྟར་རི་མོ་མཐོན་དམན་དུ། །སྣང་ཡང་ཡོད་པ་མ་ཡིན་པ། །དེ་བཞིན་དངོས་པོ་རྣམས་ལ་ཡང་། །དངོས་ཉིད་སྣང་ཡང་ཡོད་པ་མིན། །ཇི་ལྟར་དྲི་ཟའི་གྲོང་ཁྱེར་དང་། །ཇི་ལྟ་བུར་ནི་སྨིག་རྒྱུ་དག །དེ་ལྟར་སྣང་བ་རྟག་མཐོང་ཡང་། །ཤེས་རབ་ཀྱིས་ནི་ཡོད་མ་ཡིན། །ཚད་མ་དབང་པོ་རྣམ་པར་ལོག །འབྲས་བུ་མེད་ཅིང་རྒྱུ་ཡང་མེད། །བློ་དང་རིག་པར་བྱ་དང་བྲལ། །མཚན་དང་མཚན་གྱི་གཞི་ཡང་སྤངས། །ཕུང་པོར་རྟེན་ཅིང་སངས་རྒྱས་པ། །
གང་ནའང་སུས་ཀྱང་མ་མཐོང་སྟེ། །གང་ན་སུས་གང་མ་མཐོང་བ། །དེ་ལ་ཇི་ལྟར་རྣམ་པར་བསྒོམ། །རྐྱེན་དང་གཏན་ཚིགས་དཔེ་རྣམས་དང་། །དམ་འཆའ་བ་དང་རྒྱུ་རྣམས་ཀྱིས། །རྨི་ལམ་དྲི་ཟའི་འཁོར་ལོ་དང་། །སྨིག་རྒྱུ་ཉི་མ་ཟླ་བ་དང་། །མྱི་གུ་འོད་སོགས་དཔེ་རྣམས་ཀྱིས། །སྐྱེ་བ་དེ་དག་ངས་བཟློག་གོ །འགྲོ་བ་རྨི་ལམ་སྒྱུ་མ་འདྲ། །སྟོང་པ་དང་ནི་བརྟགས་པ་སྟེ། །འཇིག་རྟེན་གསུམ་ལ་མི་གནས་ཤིང་། །ཕྱི་ནང་དུ་ཡང་དེ་བཞིན་ཏེ། །སྲིད་པ་མ་སྐྱེས་མཐོང་བས་ན། །མི་སྐྱེ་བཟོད་པ་འབྱུང་བར་འགྱུར། །སྒྱུ་མ་ལྟ་བུའི་ཏིང་ངེ་འཛིན། །ལུས་ཀྱང་སྒྱུ་མ་ལྟ་བུ་སྟེ། །མངོན་ཤེས་དབང་དང་སྟོབས་རྣམས་ཀྱང་། །དེ་ཡི་སེམས་ལ་སྣ་ཚོགས་འགྱུར། །གང་གི་དངོས་པོ་མ་སྐྱེས་པ། །སྟོང་པ་ཤིན་ཏུ་རང་བཞིན་མེད། །དེ་དག་ལ་ནི་རྐྱེན་རྣམས་ཀྱིས། །ནོར་བ་སྐྱེ་ཞིང་འགག་པར་འགྱུར། །ཕྱི་རོལ་སྣང་བའི་གཟུགས་ཅན་གྱིས། །སེམས་དང་སེམས་ནི་སྣང་བར་འགྱུར། །ཇི་ལྟར་བྱིས་པས་བརྟགས་པ་ལྟར། །མཐོང་བར་བྱ་བ་གཞན་མེད་དོ། །འབྲེལ་བ་རྣམས་དང་སངས་རྒྱས་གཟུགས། །འབྱུང་བ་རྣམས་ནི་འཇིག་པ་དང་། །ཤིན་ཏུ་བསླབས་པས་རྣམ་རིག་གིས། །འགྲོ་བ་སྣ་ཚོགས་བྱིན་གྱིས་རློབ། །ལུས་དང་གནས་དང་ལོངས་སྤྱོད་རྣམས། །གཟུང་བ་རྣམ་རིག་གསུམ་པོ་སྟེ། །ཡིད་དང་འཛིན་པའི་རྣམ་རིག་དང་། །རྣམ་པར་རྟོག་ནི་འཛིན་པ་གསུམ། །རྣམ་པར་རྟོག་དང་རྣམ་བརྟག་པ། །ཇི་སྲིད་ཡི་གེའི་སྤྱོད་ཡུལ་བ། །རྟོག་ཅན་རྟོག་གེས་ནོར་པའི་ཕྱིར། །དེ་སྲིད་ཡང་དག་མི་མཐོང་ངོ་། །གང་གི་ཚེ་ན་ཤེས་རབ་ཀྱིས། །དངོས་པོ་རང་བཞིན་མེད་པར་ཤེས། །དེ་ཡི་ཚེ་ན་རྣལ་འབྱོར་ཅན། །མཚན་མེད་གནས་ཤིང་ངལ་ཡང་བསོ། །བྱ་གག་སྣག་ཙས་བསྐུས་པ་ལ། །དེ་ཉིད་ཐི་བར་མི་ཤེས་འཛིན། །མི་ཤེས་པ་ཡི་བྱིས་པ་དག །ཐེག་པ་གསུམ་ལའང་དེ་བཞིན་ནོ། །འདི་ལ་ཉན་ཐོས་གང་ཡང་མེད། །རང་རྒྱལ་བ་དག་དེ་བཞིན་ཏེ། །ཉན་ཐོས་དང་ནི་རང་རྒྱལ་བའི། །གང་གཟུགས་འདི་དག་སྣང་བ་ནི། །བྱང་ཆུབ་སེམས་དཔའ་སྙིང་བརྩེ་ཅན། །དེ་དག་སྤྲུལ་པ་སྟོན་པའོ། །སྲིད་པ་གསུམ་ནི་རྣམ་རིག་ཙམ། །རང་བཞིན་གཉིས་ནི་བརྟགས་པ་སྟེ། །ཆོས་
དང་གང་ཟག་འཕོས་པའི་ཕྱིར། །དེ་གྱུར་པ་ནི་དེ་བཞིན་ཉིད། །ཉི་མ་ཟླ་བ་མར་མེའི་འོད། །དེ་བཞིན་འབྱུང་བ་ནོར་བུ་རྣམས། །རྣམ་པར་མི་རྟོག་ཤིན་ཏུ་འབྱུང་། །དེ་བཞིན་སངས་རྒྱས་སངས་རྒྱས་ཉིད། །ཇི་ལྟར་རབ་རིབ་ཅན་དག་གིས། །སྐྲ་ཤད་ལོག་པར་འཛིངས་པ་ལྟར། །དེ་བཞིན་དངོས་པོར་རྟོག་པ་འདི། །བྱིས་པས་ལོག་པ་རྣམ་པར་བརྟགས། །ཉོན་མོངས་རྣམ་བྱང་དངོས་པོ་རྣམས། །སྐྲ་ཤད་འཛིངས་པ་ལྟ་བུ་སྟེ། །གནས་དང་འཇིག་དང་སྐྱེ་དང་བྲལ། །རྟག་དང་མི་རྟག་སྤངས་པའོ། །ཇི་ལྟར་ལ་ལས་དྷ་ཏུར་ཟོས། །གསེར་ལྟ་བུར་ནི་འགྲོ་བ་མཐོང་། །དེ་ན་གསེར་ཡོད་མ་ཡིན་ཡང་། །ས་དག་ཀྱང་ནི་གསེར་དུ་སྣང་། །ཐོག་མ་མེད་སེམས་སེམས་བྱུང་བས། །དེ་ལྟར་བྱིས་པ་ཉམས་པར་བྱས། །སྲིད་པ་སྒྱུ་མ་སྨིག་རྒྱུ་སྐྱེས། །ཡང་དག་ཉིད་དུ་འཛིན་པར་བྱེད། །ས་བོན་གཅིག་དང་ས་བོན་མེད། །མཉམ་དང་ཤས་ཆེ་ས་བོན་ཅན། །ས་བོན་ཀུན་ཀྱང་དེ་བཞིན་ནོ། །སྣ་ཚོགས་གྱུར་གྱི་སེམས་ལ་ལྟོས། །ནམ་དག་པ་ན་ས་བོན་གཅིག །ཤིན་ཏུ་གྱུར་པ་ས་བོན་མེད། །མི་རྟོག་པས་ན་མཉམ་པའོ། །ཤས་ཆེ་བས་ན་ཚེ་རབས་འདྲེས། །ས་བོན་སྣ་ཚོགས་འདེབས་པས་ན། །དེ་ནི་ས་བོན་ཀུན་ཅེས་བྱ། །འདི་ལ་རྐྱེན་གྱིས་མི་སྐྱེ་སྟེ། །གང་ཡང་འགག་པར་མི་འགྱུར་རོ། །བརྟགས་པ་ཡི་ནི་རྐྱེན་རྣམས་ཉིད། །སྐྱེ་བ་དང་ནི་འགག་པར་འགྱུར། །སྲིད་པ་གསུམ་ནི་བཏགས་ཙམ་སྟེ། །ངོ་བོ་ཉིད་ཀྱིས་དངོས་པོ་མེད། །བཏགས་པ་དངོས་པོའི་ངོ་བོར་ནི། །རྟོག་གེ་པ་དག་རྟོག་པར་འགྱུར། །དངོས་པོའི་རང་བཞིན་ཤེས་འདོད་ལ། །ནོར་པ་དག་ནི་མི་རྟོགས་སོ། །དངོས་པོའི་རང་བཞིན་མི་སྐྱེ་བ། །དེ་ལྟར་མཐོང་ནས་རྣམ་པར་འགྲོལ། །སྒྱུ་མ་མེད་དང་ཆོས་མཚུངས་པས། །དངོས་པོ་རྣམས་ནི་ཡོད་བརྗོད་བཞིན། །ལོག་པ་གློག་ལྟར་མགྱོགས་པས་ན། །དེ་ཕྱིར་སྒྱུ་མ་ལྟ་བུར་རིག །བསྐྱེད་པ་མེད་ཅིང་སྐྱེས་པ་མེད། །རྐྱེན་རྣམས་ཀྱང་ནི་གང་ན་ཡང་། །གང་ཡང་ཡོད་པ་མ་ཡིན་ཏེ། །ཁ་ཅིག་གིས་ནི་སྤྱོད་པར་བརྗོད། །རྐྱེན་གྱི་སྐྱེ་འཇིག་འབྲེལ་བ་ནི། །བཟློག་པར་བྱ་བ་མ་ཡིན་ཏེ། །རང་བཞིན་མེད་ཅིང་རྣམ་རིག་མེད། །རྐྱེན་རྣམས་
ཀྱིས་ནི་བྱིས་པ་དག །གང་ལ་རྟོག་པ་དེ་བཟློག་གོ །རང་བཞིན་མེད་ཅིང་རྣམ་རིག་མེད། །ཀུན་གཞི་མེད་ཅིང་དངོས་མེད་ན། །བྱིས་པ་ངན་པའི་རྟོག་གེ་པ། །རོ་དང་འདྲ་བས་འདི་དག་བརྟགས། །ནམ་ཞིག་འཇིག་རྟེན་སེམས་ཙམ་དུ། །རྒྱལ་བའི་སྲས་ཀྱིས་མཐོང་བ་ན། །དེ་ཚེ་རིས་སུ་གཏོགས་པའི་ལུས། །བྱིས་པའི་འདུ་བྱེད་སྤངས་པ་སྟེ། །སྟོབས་དང་མངོན་པར་ཤེས་པ་དང་། །དབང་དང་ལྡན་པ་རབ་ཏུ་འཐོབ། །ཐམས་ཅད་གཟུགས་སུ་སྣང་བ་ཡི། །སེམས་དེ་ནམ་ཞིག་བྱུང་བ་ན། །འདི་ལ་སེམས་མེད་གཟུགས་མེད་ཀྱི། །ནོར་སེམས་ཐོག་མ་མེད་ཅེས་པ། །དེ་ཚེ་རྣལ་འབྱོར་ཅན་གྱི་རྣམས། །ཤེས་པས་འགྲོ་བ་སྣང་མེད་མཐོང་། །མཚན་མ་དངོས་པོ་རྣམ་རིག་དང་། །གང་རིག་རྣམ་པར་གཡོས་པ་ལས། །ང་ཡི་བུ་རྣམས་འདས་ནས་ནི། །དེ་དག་རྣམ་པར་མི་རྟོག་སྤྱོད། །སྒྱུ་མ་དྲི་ཟའི་གྲོང་ཁྱེར་དང་། །སྐྲ་ཤད་འཛིངས་པའི་སྨིག་རྒྱུ་དག །མེད་བཞིན་དུ་ནི་ཡོད་པར་སྣང་། །དེ་བཞིན་དངོས་པོ་དངོས་ཉིད་དོ། །དངོས་པོ་ཐམས་ཅད་མ་སྐྱེས་ཏེ། །ནོར་བ་ཙམ་ནི་སྣང་བར་འགྱུར། །བྱིས་པ་རྟོག་གཉིས་དགའ་བ་དང་། །ནོར་པ་ལས་ནི་སྐྱེས་པར་རྟོག །སྣ་ཚོགས་བག་ཆགས་ལས་བྱུང་བའི། །སྐྱེ་བའི་ཆར་ནི་གཏོགས་པའི་སེམས། །ཆུ་བོའི་རླབས་བཞིན་ཤིན་ཏུ་འབྱུང་། །དེ་ཆད་ནས་ནི་མི་འབྱུང་ངོ་། །རྣམ་པ་སྣ་ཚོགས་དམིགས་པའི་སེམས། །སྣ་ཚོགས་ལ་ནི་འཇུག་པ་བཞིན། །དེ་བཞིན་ནམ་མཁའ་རྩིག་པ་ལ། །ཅི་ཡི་ཕྱིར་ན་འཇུག་མི་འགྱུར། །མཚན་མ་ཞིག་ལ་དམིགས་ནས་ནི། །གལ་ཏེ་སེམས་ནི་འཇུག་འགྱུར་ན། །སེམས་ཀྱང་རྐྱེན་གྱིས་བསྐྱེད་འགྱུར་ཏེ། །སེམས་ཙམ་དུ་ནི་མི་རུང་ངོ་། །སེམས་ཀྱིས་སུ་ནི་སེམས་ལ་གཟུང་། །རྒྱུ་དང་བཅས་པ་གང་ཡང་མེད། །སེམས་ཀྱི་ཆོས་ཉིད་དག་པ་སྟེ། །ནམ་མཁའ་ལ་ནི་བག་ཆགས་མེད། །རང་གི་སེམས་ལ་མངོན་ཆགས་པས། །སེམས་ནི་ཤིན་ཏུ་འབྱུང་བར་འགྱུར། །ཕྱི་རོལ་སྣང་བ་ཡོད་མེད་དེ། །དེ་ཡི་ཕྱིར་ན་སེམས་ཙམ་མོ། །སེམས་ནི་ཀུན་གཞི་རྣམ་ཤེས་ཏེ། །ངར་སེམས་ཉིད་ནི་ཡིད་ཡིན་ནོ། །གང་གིས་ཡུལ་རྣམས་འཛིན་པ་ནི། །དེ་ནི་རྣམ་པར་ཤེས་ཞེས་བྱ། །སེམས་ནི་རྟག་ཏུ་ལུང་མ་བསྟན། །
ཡིད་ནི་གཉི་གར་རྒྱུ་བ་སྟེ། །རྣམ་པར་ཤེས་པ་འབྱུང་བ་ཡང་། །དེ་ནི་དགེ་དང་མི་དགེའོ། །ལུས་དང་གནས་དང་ལོངས་སྤྱོད་ནི། །གཟུང་བའི་རྣམ་རིག་གསུམ་པའོ། །ཡིད་དང་འཛིན་པའི་རྣམ་རིག་དང་། །རྣམ་པར་རྟོག་པ་འཛིན་པ་གསུམ། །རྣམ་རིག་གཉིས་པོ་སྤངས་པ་ནི། །དམ་པའི་དོན་གྱི་སྒོ་ཡིན་ཏེ། །སྣང་བ་མེད་ལ་འདུག་ན་ནི། །ཐེག་པ་གསུམ་གཞག་ག་ལ་ཡོད། །སེམས་ཙམ་དང་ནི་སྣང་མེད་དང་། །སངས་རྒྱས་ས་དང་གནས་རྣམས་ནི། །དེ་དག་སངས་རྒྱས་རྣམས་ཀྱིས་བཤད། །འཆད་ཅིང་འཆང་བར་འགྱུར་བའོ། །ས་བདུན་དག་ནི་སེམས་ཡིན་ཏེ། །སྣང་བ་མེད་པ་བརྒྱད་པའོ། །འདིར་ནི་ས་གཉིས་གནས་ཡིན་ཏེ། །ས་གཞན་ང་ཡི་རང་བཞིན་ནོ། །ངག་དང་སོ་སོ་རང་རིག་པ། །ས་འདི་ང་ཡི་རང་བཞིན་ཏེ། །དབང་ཕྱུག་ཆེན་པོའི་གནས་ཀྱི་མཆོག །འོག་མིན་ཤིན་ཏུ་རྣམ་པར་མཛེས། །མེ་ཡི་ཇི་ལྟ་དེ་བཞིན་དུ། །དེ་ཡི་འོད་ཟེར་སྣ་ཚོགས་པ། །ཡིད་འོང་ཞི་བ་རབ་ཏུ་འབྱུང་། །དེ་དག་སྲིད་གསུམ་སྤྲུལ་པར་བྱེད། །སྲིད་པ་གསུམ་པོ་ཁ་ཅིག་སྤྲུལ། །ཁ་ཅིག་སྔ་ནས་སྤྲུལ་པ་སྟེ། །དེར་ནི་ཐེག་པ་རྣམས་སྟོན་པ། །དེ་ནི་ང་ཡི་རང་བཞིན་ས། །ཞིང་དུ་འཕོ་དང་རྟོགས་པ་ལ། །ས་རྣམས་ཀྱི་ནི་དུས་མེད་དེ། །སེམས་ཙམ་ལས་ཀྱང་འདས་ནས་ནི། །སྣང་མེད་གནས་པའི་འབྲས་བུའོ། །རྣམ་པ་སྣ་ཚོགས་ཡོད་པ་དང་། །མེད་པ་དག་ཀྱང་སྣང་བར་འགྱུར། །བྱིས་པ་འཛིན་པས་རྣམ་བསླད་དེ། །སྣ་ཚོགས་པ་ནི་ཕྱིན་ཅི་ལོག །ནམ་ཞིག་མི་རྟོག་ཡེ་ཤེས་ནི། །དངོས་པོ་ཡོད་པར་མི་རུང་ངོ་། །གང་ཕྱིར་སེམས་ནི་གཟུགས་མིན་པས། །དེ་ཕྱིར་དེ་ནི་རྣམ་མི་རྟོག །དབང་པོ་རྣམས་ནི་སྒྱུ་མ་བཞིན། །ཡུལ་རྣམས་ཀྱང་ནི་རྨི་ལམ་འདྲ། །བྱེད་དང་ལས་དང་བྱ་བ་འདི། །རྣམ་པ་ཀུན་ཏུ་ཡོད་པ་མིན། །བསམ་གཏན་རྣམས་དང་ཚད་མེད་དང་། །གཟུགས་མེད་པ་དང་ཏིང་འཛིན་དང་། །འདུ་ཤེས་འགོག་པ་མ་ལུས་པར། །སེམས་ཙམ་ལ་ནི་ཡོད་པ་མིན། །རྒྱུན་དུ་ཞུགས་པའི་འབྲས་བུ་དང་། །ལན་ཅིག་ཕྱིར་འོང་འབྲས་བུ་དང་། །ཕྱིར་མི་འོང་བའི་འབྲས་བུ་དང་། །དགྲ་བཅོམ་ཉིད་ནི་སེམས་ནོར་པའོ། །བྱིས་པ་རྣམས་ནི་འདུས་བྱས་ལ། །མི་རྟག་སྐད་ཅིག་
སྟོང་པར་རྟོག །ས་བོན་འབབ་ཆུ་མར་མེ་དཔེས། །སྐད་ཅིག་པ་ཡི་དོན་དུ་རྟོག །བྱེད་པ་མེད་ཅིང་སྐད་ཅིག་པ། །དབེན་པར་བྱ་བ་སྤངས་པ་དང་། །ཆོས་རྣམས་ཀྱིས་ནི་མི་སྐྱེ་བ། །སྐད་ཅིག་དོན་དུ་ངས་བཤད་དོ། །ཡོད་དང་མེད་ལས་སྐྱེས་པར་ནི། །ཁྱད་པར་པ་དང་གྲངས་ཅན་ཤེས། །ལུང་དུ་མ་བསྟན་ཐམས་ཅད་ཀྱང་། །དེ་དག་ཉིད་ཀྱིས་བཤད་པའོ། །ལུང་བསྟན་པ་ནི་རྣམ་བཞི་སྟེ། །མགོ་གཅིག་དང་ནི་དྲི་བ་དང་། །རྣམ་པར་དབྱེ་དང་གཞག་པ་རྣམས། །མུ་སྟེགས་སྨྲ་བ་བཟློག་པའོ། །ཀུན་རྫོབ་ཏུ་ནི་ཐམས་ཅད་ཡོད། །དམ་པའི་དོན་དུ་ཡོད་མ་ཡིན། །ཆོས་རྣམས་རང་བཞིན་མེད་པ་ལ། །དམ་པའི་དོན་དུ་འདོད་ན་ནི། །དམིགས་པ་རང་བཞིན་མེད་པ་ལ། །དེ་ཕྱིར་ཀུན་རྫོབ་བསྟན་པ་ཡིན། །དངོས་པོ་བརྗོད་པའི་རྒྱུས་བྱུང་བ། །གལ་ཏེ་རང་བཞིན་ཡོད་ན་ནི། །བརྗོད་པ་དག་ལས་བྱུང་བ་ཡི། །དངོས་པོ་མེད་ཅེས་བྱ་བ་མེད། །བརྗོད་པ་འདི་ན་དངོས་མེད་དེ། །ཀུན་རྫོབ་ཏུ་ཡང་ཡོད་མ་ཡིན། །ཕྱིན་ཅི་ལོག་ནི་ཡོད་མིན་པས། །དམིགས་པ་ཡོད་པ་མ་ཡིན་ནོ། །གལ་ཏེ་ཕྱིན་ཅི་ལོག་ཡོད་ན། །ངོ་བོ་ཉིད་མེད་མེད་པར་འགྱུར། །ཕྱིན་ཅི་ལོག་ནི་བཞི་ཡི་ཕྱིར། །གང་དང་གང་དག་དམིགས་གྱུར་པ། །དེ་ནི་རང་བཞིན་མེད་པར་འགྱུར། །ཐམས་ཅད་དུ་ཡང་མེད་པ་ཡིན། །གང་འདི་སྣ་ཚོགས་སྣང་བ་ནི། །གནས་ངན་ལེན་གྱིས་བསྒོས་པའི་སེམས། །གཟུགས་སུ་སྣང་བ་འཛིན་པ་སྟེ། །ཕྱི་རོལ་དག་ནི་སེམས་འཁྲུལ་བ། །རྟོག་པ་དང་ནི་མི་རྟོག་པས། །རྣམ་རྟོག་རབ་ཏུ་སྤོང་འགྱུར་ཏེ། །མི་རྟོག་རྣམ་པར་རྟོག་པའི་ས། །སྟོང་པ་ཉིད་ནི་ཡང་དག་མཐོང་། །སྒྱུ་མ་གླང་པོ་སྣ་ཚོགས་ལྟར། །ལོ་མ་རྣམས་དང་གསེར་བཞིན་དུ། །མི་ཤེས་པས་ནི་སེམས་བསྒོས་པས། །དེ་བཞིན་མི་ལ་སྣང་བ་མངོན། །འཕགས་པས་ནོར་བ་མི་མཐོང་སྟེ། །ཡང་དག་ཉིད་ཀྱང་སྐབས་དེར་མིན། །གང་ཕྱིར་སྐབས་དེར་ཡང་དག་ན། །ནོར་པ་ཡང་དག་ཉིད་དུ་འགྱུར། །ནོར་བ་ཐམས་ཅད་སྤངས་ནས་ཀྱང་། །གལ་ཏེ་མཚན་མ་སྐྱེར་ཟིན་ན། །དེ་ཉིད་དེ་ཡི་ནོར་བ་སྟེ། །རབ་རིབ་ཡོངས་སུ་མ་དག་བཞིན། །རབ་རིབ་ཅན་རྣམས་བསླད་པ་ཡིས། །སྐྲ་ཤད་མཐོང་བ་ཇི་བཞིན་དུ། །དེ་བཞིན་བྱིས་པ་རྣམས་ཀྱི་ཡང་། །འཛིན་པ་ཡུལ་ལ་ཤིན་ཏུ་འཇུག །
སྲིད་གསུམ་འདི་ནི་སྐྲ་ཤད་འདྲ། །སྨིག་རྒྱུ་ཆུ་ལྟར་ནོར་བ་སྟེ། །རྨི་ལམ་སྒྱུ་མ་ལྟ་བུར་ནི། །རྣམ་པར་བསྒོམས་ན་གྲོལ་བར་འགྱུར། །རྣམ་པར་རྟོག་དང་རྣམ་བརྟག་དང་། །རྣམ་པར་རྟོག་པ་འཇུག་པ་དང་། །འཆིང་དང་བཅིང་བྱ་བཅིངས་པ་དང་། །དྲུག་པོ་འདི་དག་ཐར་པའི་རྒྱུ། །ས་རྣམས་མེད་ཅིང་བདེན་པ་མེད། །ཞིང་རྣམས་མེད་ཅིང་སྤྲུལ་པ་མེད། །སངས་རྒྱས་རྣམས་དང་རང་སངས་རྒྱས། །ཉན་ཐོས་རྣམས་ཀྱང་བརྟགས་པའོ། །གང་ཟག་རྒྱུ་དང་ཕུང་པོའི་རྣམས། །དེ་བཞིན་རྐྱེན་དང་རྡུལ་ཕྲན་དང་། །གཙོ་བོ་དབང་ཕྱུག་བྱེད་པོ་རྣམས། །སེམས་ཙམ་ལ་ནི་རྣམ་པར་རྟོག །སེམས་ནི་ཐམས་ཅད་ཐམས་ཅད་དུ། །ཐམས་ཅད་ལུས་ལ་འཇུག་པ་སྟེ། །རྣམ་པ་དྲུག་གིས་སྣ་ཚོགས་འཛིན། །སེམས་ཀྱི་རིགས་ནི་མཚན་ཉིད་མེད། །ཕུང་པོ་རྣམས་ལ་བདག་མེད་དེ། །བདག་ཀྱང་ཕུང་པོ་རྣམས་ལ་མེད། །དེ་དག་བརྟགས་པ་བཞིན་དུ་མེད། །དེ་དག་མེད་པའང་མ་ཡིན་ནོ། །ཇི་ལྟར་བྱིས་པས་བརྟགས་པ་བཞིན། །དངོས་པོ་ཐམས་ཅད་ཡོད་པ་སྟེ། །དེ་དག་མཐོང་བཞིན་ཡོད་ན་ནི། །ཐམས་ཅད་ཡང་དག་མཐོང་བར་འགྱུར། །དངོས་པོ་ཐམས་ཅད་མེད་པའི་ཕྱིར། །ཀུན་ནས་ཉོན་མོངས་དག་པ་མེད། །ཇི་ལྟར་མཐོང་བཞིན་དེ་མེད་དེ། །དེ་དག་མེད་པའང་མ་ཡིན་ནོ། །ཀུན་རྟོག་ནོར་བའི་མཚན་མ་སྟེ། །གཞན་གྱི་དབང་གི་མཚན་ཉིད་དོ། །མཚན་ཉིད་དེ་ལ་མིང་བཏགས་པ། །དེ་ནི་རྣམ་བརྟགས་མཚན་ཉིད་དོ། །རྐྱེན་དང་མིང་གི་བརྡ་དག་ལས། །ཀུན་རྟོག་ནོར་བའི་མཚན་མ་དག །ནམ་ཞིག་དེ་ལ་མི་འབྱུང་ན། །ཡོངས་སུ་གྲུབ་པའི་མཚན་ཉིད་དོ། །རྣམ་པར་སྨིན་པའི་སངས་རྒྱས་དང་། །སྤྲུལ་པ་ཡི་ནི་རྒྱལ་བ་དང་། །བྱང་ཆུབ་སེམས་དཔའ་སེམས་ཅན་དང་། །ཕྱོགས་ཕྱོགས་ཀྱི་ནི་ཞིང་རྣམས་དང་། །སྒྱུ་འདྲའི་ཆོས་དང་འཕྲུལ་པ་དང་། །རྒྱལ་བ་གང་རྣམས་སྤྲུལ་པ་དག །དེ་ཀུན་སྣང་བ་མཐའ་ཡས་ཀྱི། །བདེ་བ་ཅན་ནས་བྱུང་བའོ། །གང་ཡང་སྤྲུལ་པས་བཤད་པ་དང་། །རྣམ་སྨིན་སྐྱེས་པས་གང་བཤད་པ། །མདོ་སྡེ་ཤིན་ཏུ་རྒྱས་པའི་ཚུལ། །དེ་ཡི་དགོངས་པ་ཤེས་པར་གྱིས། །གང་ཡང་རྒྱལ་བའི་བུས་བཤད་
དང་། །གང་ཡང་འདྲེན་པ་རྣམས་ཀྱིས་བཤད། །སྤྲུལ་པ་དག་གིས་གང་བཤད་པ། །རྣམ་སྨིན་རྒྱལ་བས་མ་ཡིན་ནོ། །ཆོས་འདི་རྣམས་ནི་མ་སྐྱེས་པ། །དེ་དག་པ་ཡང་མ་ཡིན་ཏེ། །དྲི་ཟའི་གྲོང་ཁྱེར་སྒྱུ་མ་དང་། །རྨི་ལམ་སྤྲུལ་པ་རྣམས་དང་འདྲ། །སྣ་ཚོགས་སེམས་ནི་འཇུག་པ་སྟེ། །སེམས་ནི་རྣམ་པར་གྲོལ་བར་འགྱུར། །འགོག་པར་འགྱུར་བའང་སེམས་ཉིད་དེ། །སེམས་ཉིད་སྐྱེ་ཡི་གཞན་མ་ཡིན། །མི་ཡི་སྣ་ཚོགས་བརྟགས་པའི་སེམས། །དོན་དུ་སྣང་བ་མངོན་པ་སྟེ། །འདི་ནི་སེམས་ཙམ་དོན་ཀྱང་མེད། །རྣམ་པར་མི་རྟོག་གྲོལ་བར་འགྱུར། །ཐོག་མ་མེད་དུས་སྤྲོས་པ་ཡིས། །གནས་ངན་ལེན་རྣམས་རབ་ཏུ་བསྡུས། །རྣམ་པར་རྟོག་པ་བསྒོས་པས་ན། །དེ་ཕྱིར་ལོག་པར་སྣང་བ་འབྱུང་། །དོན་དུ་སྣང་ལ་རྣམ་ཤེས་ཏེ། །ཡེ་ཤེས་ཡང་དག་སྤྱོད་ཡུལ་ཅན། །ཤིན་ཏུ་གྱུར་པ་སྣང་མེད་དེ། །དེ་ནི་འཕགས་པའི་སྤྱོད་ཡུལ་ལོ། །དོན་རབ་འབྱེད་པའི་བསམ་གཏན་དང་། །བྱིས་པ་ཉེར་སྤྱོད་བསམ་གཏན་དང་། །དེ་བཞིན་ཉིད་དམིགས་བསམ་གཏན་པས། །དེ་བཞིན་གཤེགས་པའི་བསམ་གཏན་དགེ། །ཀུན་བརྟགས་པ་ཡི་རང་བཞིན་གྱིས། །ཐམས་ཅད་ཆོས་ནི་མ་སྐྱེས་པ། །གཞན་གྱི་དབང་ལ་གནས་ནས་ནི། །མི་ཡི་རྣམ་རྟོག་འཁྱམ་པ་ཡིན། །ནམ་ཞིག་གཞན་གྱི་དབང་དག་ནས། །རྣམ་པར་རྟོག་དང་བྲལ་བ་ན། །ཤིན་ཏུ་གྱུར་པ་དེ་བཞིན་ཉིད། །རྟོག་པ་སྤངས་པར་གནས་པའོ། །རྣམ་རྟོག་བདེན་པར་ཡོད་མིན་གྱིས། །རྣམ་པར་རྟོག་པས་མ་རྟོག་ཅིག །གཟུང་དང་འཛིན་པའི་མཚན་ཉིད་དུ། །ནོར་པ་དེ་དག་རྣམ་རྟོག་ན། །ཕྱི་རོལ་དོན་མཐོང་བརྟགས་པ་ནི། །ཀུན་ཏུ་བརྟགས་པའི་རང་བཞིན་ནོ། །དེ་དག་ཐམས་ཅད་སྤངས་ནས་ནི། །ནམ་ཞིག་སྣང་བ་མེད་གྱུར་ན། །དེ་ཚེ་སངས་རྒྱས་ལྷ་ཡི་ཕྱག །ཞིང་རྣམས་ཀུན་ནས་བྱུང་བའི་ས། །དེ་ཡི་མགོ་ལ་ཉུག་མཛད་དེ། །དེ་བཞིན་ཉིད་ཀྱི་རྗེས་འགྲོ་ལྟས། །གང་ཕྱིར་བློ་ཡིས་རབ་གཞིགས་ན། །རང་བཞིན་དག་ནི་མི་དམིགས་ཏེ། །དེ་ཕྱིར་དེ་དག་བརྗོད་དུ་མེད། །ངོ་བོ་ཉིད་ཀྱང་མེད་པར་བཤད། །རྐྱེན་གྱིས་བསྐྱེད་པའི་དོན་ལ་ནི། །ཡོད་དང་མེད་པ་ཡོད་མ་ཡིན། །རྐྱེན་དུ་གཏོགས་པའི་དངོས་པོ་ལ། །
ཡོད་དང་མེད་པ་གང་རྟོག་པར། །མུ་སྟེགས་ལྟ་བ་ཅན་དག་ནི། །བསྟན་ལས་རིང་དུ་གྱུར་པར་ཤེས། །དངོས་པོ་ཀུན་གྱི་སྨྲ་བ་ལ། །རྟག་ཏུ་ཚེ་རབས་གཞན་སོང་ཚེ། །ཕན་ཚུན་རྣམ་པར་རྟོག་པ་ཡིས། །གོམས་ཤིང་གོམས་པར་བྱེད་པའོ། །མིང་ནི་བརྗོད་པར་མ་བྱས་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་རྨོངས་པ་བསལ་བའི་ཕྱིར། །མིང་དུ་གདགས་པར་བྱ་བ་ཡིན། །མིང་དང་ནོར་བའི་རྣམ་རྟོག་དང་། །རྐྱེན་རྣམས་ཀྱིས་ནི་བསྐྱེད་པ་ཡི། །རྣམ་པར་རྟོག་པ་གསུམ་དག་གིས། །བྱིས་པ་རྣམས་ནི་དངོས་པོར་རྟོག །འགགས་པ་མེད་ཅིང་མ་སྐྱེས་ཏེ། །རང་བཞིན་གྱིས་ནི་ནམ་མཁའ་འདྲ། །དངོས་པོ་མེད་པའི་རང་བཞིན་གང་། །དེ་དག་རྣམ་བརྟགས་མཚན་ཉིད་དོ། །མིག་ཡོར་འདྲ་ཞིང་སྒྱུ་མ་བཞིན། །སྨིག་རྒྱུ་རྨི་ལམ་མགལ་མེ་བསྐོར། །དྲི་ཟའི་གྲོང་ཁྱེར་བྲག་ཅ་འདྲ། །ཆོས་དེ་རྐྱེན་ལས་བྱུང་མ་ཡིན། །དེ་བཞིན་ཉིད་དང་གཉིས་སུ་མེད། །སྟོང་པ་ཆོས་ཉིད་ཡང་དག་མཐའ། །རྣམ་པར་མི་རྟོག་བཤད་པ་ནི། །གང་དེ་གྲུབ་པའི་མཚན་ཉིད་དོ། །ལུས་དང་ངག་གི་སྤྱོད་ཡུལ་བརྫུན། །ཤེས་རབ་མི་རྟོག་བདེན་པ་སྟེ། །སེམས་ནི་གཉིས་ཀྱི་མཐར་ལྷུང་བས། །དེ་ཕྱིར་ཤེས་རབ་རྣམ་མི་རྟོག །ཇི་སྲིད་སེམས་ཀྱི་སྤྱོད་ཡུལ་བ། །ཡོད་དང་མེད་པའི་མཐའ་གཉིས་ཡིན། །སྤྱོད་ཡུལ་སྤངས་པར་གྱུར་ན་ནི། །དེ་ཚེ་སེམས་ཀྱང་ཡང་དག་འགག །རྐྱེན་ལས་སྐྱེས་པའི་རང་བཞིན་ལ། རྟོག་པ་གང་གིས་རྟོག་བྱེད་པ། །ཕྱི་རོལ་དོན་མཐོང་ལོག་པ་སྟེ། །དོན་མེད་སེམས་ནི་འབའ་ཞིག་གོ །རིགས་པས་རྣམ་པར་གཞིགས་ན་ནི། །གཟུང་བ་དང་ནི་འཛིན་པ་འགག །ཇི་ལྟར་བྱིས་པས་བརྟགས་པ་ལྟར། །ཕྱི་རོལ་གྱི་ནི་དོན་མེད་དོ། །བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་ཤིན་ཏུ་འབྱུང་། །རྟོག་པའི་རྣམ་པ་གཉིས་འགགས་ན། །ཡང་དག་སྤྱོད་ཡུལ་ཡེ་ཤེས་ཏེ། །འཕགས་པའི་སྤྱོད་ཡུལ་བསམ་མི་ཁྱབ། །སྣང་བ་མེད་པར་འབྱུང་བར་འགྱུར། །མིང་དང་མཚན་མ་ཀུན་རྟོག་ནི། །རང་བཞིན་གཉིས་ཀྱི་མཚན་ཉིད་དོ། །ཡང་དག་ཡེ་ཤེས་དེ་
བཞིན་ཉིད། །ཡོངས་སུ་གྲུབ་པའི་མཚན་ཉིད་དོ། །ཕ་མ་ཕྲད་པར་གྱུར་པའི་ཕྱིར། །ཀུན་གཞི་ཡིད་དང་ལྡན་པ་ནི། །མར་གྱི་བུམ་པའི་བྱི་བ་བཞིན། །ཁུ་ཆུ་དང་ནི་ལྷན་ཅིག་སྐྱེས། །སླ་གར་རྨན་བུ་འབྲས་མི་སྡུག །ལས་ཀྱིས་རྣམ་པ་སྣ་ཚོགས་བྱས། །ལས་རླུང་འབྱུང་བ་ཆེན་པོ་ཡིས། །ཤིང་ཏོག་བཞིན་དུ་འབྱུང་བར་འགྱུར། །ལྔ་དང་ལྔ་དང་ལྔ་ཉིད་དང་། །རྨ་ཡང་དགུ་པོ་ཉིད་རྣམས་དང་། །སོ་དང་སེན་མོ་སྤུས་གཡོགས་ནས། །འགུལ་ཞིང་རབ་ཏུ་སྐྱེས་པར་འགྱུར། །མི་གཙང་སྲིན་བུ་སྐྱེས་མ་ཐག །མི་དག་ཉལ་ལས་སད་པ་བཞིན། །མིག་ནི་གཟུགས་ལས་མཆེད་པར་བྱེད། །རྟོག་པ་དག་ཀྱང་རྣམ་པར་འཕེལ། །མཆུ་གཉིས་དང་ནི་རྐན་ཚོགས་ལས། །རྣམ་པར་རྟོག་པས་རིག་ནས་ཀྱང་། །མི་ཡི་ཚིག་གི་རྣམ་བརྟག་པ། །ནེ་ཅོ་བཞིན་དུ་འཇུག་པར་འགྱུར། །མུ་སྟེགས་སྨྲ་བ་བསྟེན་པ་སྟེ། །ཐེག་པ་ཆེན་པོ་མི་གནས་པ། །དེ་ནི་སེམས་ཅན་བསམ་བཞིན་ཞུགས། །ངན་པར་ལྟ་བའི་གནས་མེད་དེ། །སོ་སོ་རང་རིག་ཐེག་པ་ནི། །རྟོག་གེ་པ་ཡི་སྤྱོད་ཡུལ་མིན། །མགོན་པོ་འདས་པའི་འོག་ཏུ་ནི། །འཛིན་པར་སུ་འགྱུར་བཤད་དུ་གསོལ། །བདེ་གཤེགས་མྱ་ངན་འདས་པའི་འོག །ཚུལ་རྣམས་འཛིན་པར་འགྱུར་བ་སྟེ། །དུས་དག་འདས་ནས་འབྱུང་བ་ནི། །བློ་གྲོས་ཆེན་པོ་ཁྱོད་ཤེས་བྱོས། །ལྷོ་ཕྱོགས་བེ་དའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་བོད་པ་སྟེ། །ཡོད་དང་མེད་པའི་ཕྱོགས་འཇིག་པ། །ང་ཡི་ཐེག་པ་འཇིག་རྟེན་དུ། །བླ་མེད་ཐེག་ཆེན་རབ་བཤད་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །འགྲོ་བ་ཀུན་ཏུ་རབ་འཁོར་བས། །སྲིད་པ་ལས་ནི་སྐྱོ་བའི་ཡིད། །ཞི་བ་ཞི་ལམ་སོང་ནས་ཀྱང་། །རྣལ་འབྱོར་སྣ་ཚོགས་དག་ལ་བརྩོན། །རྣལ་འབྱོར་ཅན་གྱིས་བརྩོན་བྱས་ན། །ཉི་མ་ཟླ་བའི་དབྱིབས་དང་འདྲ། །འོད་དང་པད་མོ་ལྟ་བུ་དང་། །རི་མོ་ནམ་མཁའི་མེ་འདྲ་
མཐོང་། །མཚན་མ་སྣ་ཚོགས་དེ་དག་ནི། །མུ་སྟེགས་ཅན་ལམ་ཁྲིད་པར་བྱེད། །ཉན་ཐོས་དག་དང་རང་རྒྱལ་གྱི། །སྤྱོད་ཡུལ་དུ་ཡང་ལྟུང་བར་བྱེད། །ཡུལ་ལ་འཛིན་པ་མེད་པའི་ཕྱིར། །འགོག་པ་མེད་པ་མ་ཡིན་ཏེ། །འཕགས་པ་རྣམས་ཀྱི་སྤྱོད་ཡུལ་ལྟར། །དེ་བཞིན་ཉིད་ཀྱི་དངོས་པོ་ཡོད། །མཁས་པ་རྣམས་ལ་སྣང་བ་ལྟར། །བྱིས་པ་རྣམས་ལ་མི་སྣང་སྟེ། །ཇི་ལྟར་ཆོས་ཀུན་མ་སྐྱེས་ཤིང་། །མཚན་ཉིད་མེད་པར་སྣང་བའོ། །གསེར་མིན་གསེར་ལྟར་སྣང་བ་ཡི། །ར་གན་སྤུངས་ལ་བྱིས་པ་རྣམས། །གསེར་དུ་ཇི་ལྟར་རྟོག་པ་བཞིན། །ངན་པའི་རྟོག་གེས་ཆོས་དེ་བཞིན། །རྐྱེན་གྱིས་ཡོད་དང་མེད་པ་ལས། །གང་གི་མ་བྱུང་སྐྱེ་བ་དང་། །བྱུང་ནས་ཀྱང་ནི་འཇིག་ཅེས་པ། །ང་ཡི་བསྟན་ལ་དེ་མི་གནས། །ཡོངས་སུ་གྱུར་དང་དུས་དང་དབྱིབས། །འབྱུང་བའི་དངོས་དང་དབང་པོ་དང་། །བར་མ་དོ་དག་བསྡུ་བ་ནི། །གང་རྟོག་དེ་དག་མཁས་མ་ཡིན། །འཇིག་རྟེན་རྟེན་ཅིང་འབྲེལ་འབྱུང་བར། །རྒྱལ་བ་དག་ནི་མི་གསུང་གི། །འཇིག་རྟེན་འདི་ན་རྐྱེན་ཉིད་དེ། །དྲི་ཟ་ཡི་ནི་གྲོང་ཁྱེར་འདྲ། །འདི་ཡོད་ན་ནི་འདི་ཞེས་བྱ། །འདི་ནི་ཆོས་ཀྱི་བརྡ་ཡིན་ཏེ། །བརྡ་ལས་ཐ་དད་གྱུར་པ་ནི། །མ་སྐྱེས་འགག་པར་མི་འགྱུར་རོ། །མིག་དང་ཆུ་དང་མེ་ལོང་དང་། །སྣོད་རྣམས་དང་ནི་ནོར་བུ་ལ། །དེ་དག་ལ་ནི་གཟུགས་བརྙན་སྣང་། །གཟུགས་བརྙན་གང་ནའང་ཡོད་པ་མིན། །ཇི་ལྟར་ནམ་མཁར་སྨིག་རྒྱུ་བ། །དངོས་པོར་སྣང་སེམས་དེ་བཞིན་ཏེ། །རྨི་ལམ་མོ་ཤམ་བུ་བཞིན་ཏེ། །རྣམ་པ་སྣ་ཚོགས་གཟུགས་སུ་སྣང་། །ཐེག་ཆེན་ང་ཡི་ཐེག་པ་མིན། །ཡི་གེ་མེད་ཅིང་སྒྲ་ཡང་མེད། །བདེན་པ་མ་ཡིན་ཐར་པ་མིན། །སྣང་མེད་སྤྱོད་ཡུལ་མ་ཡིན་ནོ། །འོན་ཀྱང་ཐེག་ཆེན་ཐེག་པ་སྟེ། །ཏིང་ངེ་འཛིན་ལ་དབང་བྱེད་པ། །ཡིད་ཀྱི་ལུས་ནི་སྣ་ཚོགས་པ། །དབང་གི་མེ་ཏོག་རྣམས་ཀྱིས་བརྒྱན། །དངོས་པོ་དག་ནི་རྐྱེན་རྣམས་དང་། །གཅིག་དང་ཐ་དད་མ་ཡིན་ཏེ། །སྐྱེ་བ་དག་ནི་མདོར་བཤད་དེ། །འགོག་པ་དག་ནི་རྒྱས་པར་རོ། །མ་སྐྱེས་སྟོང་པ་གཅིག་ཡིན་ཏེ། །སྐྱེས་པའི་སྟོང་པ་ཉིད་ཀྱང་གཅིག །མ་སྐྱེས་སྟོང་པ་མཆོག་ཡིན་ཏེ། །སྐྱེས་པའི་སྟོང་པ་འཇིག་པར་འགྱུར། །སྟོང་པ་དེ་བཞིན་ཉིད་དང་མཐའ། །མྱ་ངན་འདས་དང་ཆོས་ཀྱི་དབྱིངས། །ཡིད་ཀྱི་
ལུས་ནི་སྣ་ཚོགས་པ། །རྣམ་གྲངས་དག་གིས་ངས་བཤད་དོ། །མདོ་སྡེ་འདུལ་བ་ཆོས་མངོན་པས། །དོན་གྱིས་མ་ཡིན་ཚིག་རྣམས་ཀྱིས། །རྣམ་པར་དག་པ་གང་རྟོག་པ། །བདག་མེད་པ་ལ་དེ་མི་གནས། །ང་དང་སངས་རྒྱས་རྣམས་དང་ནི། །མུ་སྟེགས་ཅན་དག་གང་གིས་ཀྱང་། །རྐྱེན་གྱིས་ཡོད་པ་ནམ་བསྒྲུབས་ན། །ཇི་ལྟ་བུར་ནི་ཡོད་པར་འགྱུར། །རྐྱེན་རྣམས་ཀྱིས་ནི་ཡོད་པར་ཡང་། །སུ་ཡིས་བསྒྲུབས་ན་གང་མེད་བསྒྲུབས། །སྐྱེ་བར་སྨྲ་བ་ངན་ལྟ་བས། །ཡོད་དང་མེད་པར་རྣམ་པར་རྟོག །གང་གི་ཅི་ཡང་མི་སྐྱེ་ལ། །ཅི་ཡང་འགག་པར་མི་འགྱུར་བ། །འགྲོ་བ་དབེན་པར་མཐོང་བས་ན། །དེ་ལ་ཡོད་མེད་ཉེར་མི་འགྲོ། །སྣང་བ་རི་བོང་རྭ་བཞིན་ཏེ། །མི་རྣམས་ཀྱི་ནི་རྣམ་རྟོག་ཡོད། །སྨིག་རྒྱུ་ལ་ནི་རི་དགས་བཞིན། །གང་རྣམས་རྟོག་པ་དེ་དག་ནོར་། །རྣམ་རྟོག་མངོན་པར་ཆགས་པ་ཡིས། །རྣམ་པར་རྟོག་པ་ཤིན་ཏུ་འབྱུང་། །སྐྱེ་བ་དང་ནི་འཇིག་ལས་གྲོལ། །སྣང་བ་མེད་ལ་རབ་ཏུ་སྤྱོད། །ཟབ་ཡངས་རྒྱ་ཆེ་ཡེ་ཤེས་དང་། །ཕུན་སུམ་ཚོགས་པའི་ཞིང་རྣམས་ནི། །རྒྱལ་བའི་སྲས་པོ་རྣམས་ལ་བཤད། །ཉན་ཐོས་རྣམས་ལ་མི་རྟོག་པ། །སྲིད་གསུམ་མི་རྟག་སྟོང་པ་སྟེ། །བདག་དང་བདག་གི་རྣམ་སྤངས་དང་། །རྒྱུ་མེད་པ་ཡི་རྣམ་རྟོག་ནི། །རྣམ་པར་རྟོག་ཅེས་བྱར་མི་རུང་། །ཇི་ལྟ་བུ་ནི་སྨིག་རྒྱུ་ལ། །ཆུ་མེད་པར་ནི་ཆུར་འཛིན་འགྱུར། །དེ་བཞིན་སྣང་ལ་བྱིས་པ་རྣམས། །འཕགས་པ་རྣམས་ནི་བྱེ་བྲག་ཏུ། །འཕགས་པའི་ལྟ་བ་དག་པ་སྟེ། །རྣམ་པར་ཐར་པ་གསུམ་ལས་བྱུང་། །རང་དང་སྤྱི་ཡི་མཚན་ཉིད་རྣམས། །ཉན་ཐོས་རྣམས་ལ་རབ་ཏུ་བཤད། །ཐམས་ཅད་ཆོས་ལ་མ་ཆགས་དང་། །གཅིག་པུ་དབེན་པར་སྤྱོད་པ་དང་། །མ་བརྟགས་པ་ཡི་འབྲས་བུ་ནི། །རང་རྒྱལ་སྲས་པོ་དག་ལ་བཤད། །ཕྱི་རོལ་བརྟགས་པའི་རང་བཞིན་ཏེ། །གཞན་དབང་རང་གི་གཞི་ལས་སྐྱེས། །བདག་ལས་སྐྱེས་པའི་འཁྲུལ་མ་མཐོང་། །དེ་ཕྱིར་སེམས་རྣམས་རབ་ཏུ་འཇུག །བཅུ་པོ་པ་ནི་དང་པོ་ཡིན། །དང་པོ་པ་ནི་བརྒྱད་པོ་ཡིན། །དགུ་པོ་ཡང་ནི་བདུན་པ་སྟེ། །བདུན་པོ་པ་ཡང་བརྒྱད་པོ་ཡིན། །གཉིས་པོ་པ་ནི་གསུམ་པ་ཡིན། །བཞི་པོ་ཡང་ནི་ལྔ་པོ་ཡིན། །གསུམ་པོ་ཡང་ནི་དྲུག་ཡིན་ཏེ། །སྣང་མེད་པ་ལ་རིམ་ཅི་ཡོད། །དངོས་པོ་རྣམས་ནི་སྣང་མེད་ཚེ། །རྣལ་འབྱོར་ཅན་ལ་
དངོས་མེད་མེད། །དངོས་དང་དངོས་མེད་མཉམ་པས་ནི། །འཕགས་པ་རྣམས་ནི་འབྲས་བུ་སྐྱེ། །ཇི་ལྟར་དངོས་རྣམས་དངོས་པོ་མེད། །ཇི་ལྟར་མཉམ་པ་ཉིད་དུ་བྱེད། །གང་གི་ཚེ་ན་ཕྱི་ནང་གི། །གཡོ་བ་ཡི་ནི་སེམས་མི་ཤེས། །དེ་ཚེ་འཇིག་པར་བྱེད་པ་སྟེ། །སེམས་ཀྱི་མཉམ་པ་ཉིད་ཀྱང་མཉམ། །ཐོག་མ་མེད་ལྡན་འཁོར་བ་ན། །བྱིས་པ་དངོས་འཛིན་གྱིས་གཡོགས་པ། །གཟེར་གྱིས་གཟེར་ལ་ཇི་བཞིན་དུ། །བྲིད་ནས་འཛིན་པ་རྣམ་པར་བཟློག །དེ་ཡི་རྒྱུ་ཅན་དེ་ལ་དམིགས། །ཡིད་ཀྱི་འཇུག་པའི་གནས་ཡིན་ཏེ། །སེམས་ཀྱི་རྒྱུ་ཡང་འབྱིན་པར་བྱེད། །རྣམ་པར་ཤེས་ཀྱང་དེ་ལ་གནས། །རྣམ་པར་སྨིན་སྐྱེས་བྱིན་རླབས་དང་། །རིས་དང་འགྲོ་བ་རྣམས་ཀྱང་འབྱུང་། །རྨི་ལམ་དུ་ནི་གང་རྙེད་དང་། །མངོན་པར་ཤེས་པ་རྣམ་བཞི་སྟེ། །གང་ཡང་རྨི་ལམ་རྙེད་པ་དང་། །གང་ཡང་སངས་རྒྱས་གནང་བ་དང་། །གང་རིས་འགྲོ་དང་རིགས་ཀྱི་རྣམས། །མངོན་ཤེས་རྣམ་སྨིན་སྐྱེས་དེ་མིན། །བག་ཆགས་ཀྱིས་ནི་བསྒོས་པའི་སེམས། །དངོས་པོར་སྣང་བ་ཤིན་ཏུ་འཇུག །བྱིས་པས་གང་ཚེ་མི་ཤེས་པ། །དེ་ཚེ་སྐྱེ་བར་བཤད་པར་བྱ། །དངོས་པོ་མཚན་ཉིད་ལྡན་པར་ནི། །ཕྱི་རོལ་ཇི་སྲིད་རྣམ་རྟོག་ཅིང་། །རང་གི་ནོར་པ་མ་མཐོང་ན། །དེ་སྲིད་དུ་ནི་སེམས་རྒྱས་བྱེད། །ཅི་ཡི་ཕྱིར་ནི་སྐྱེ་བརྗོད་ལ། །དེ་ཡི་ཕྱིར་ནི་སྣང་བ་བརྗོད། །སྣང་བ་དག་ནི་སྣང་བ་མིན། །གང་གི་ཅི་ལ་ཅི་ཞིག་བརྗོད། །སེམས་ནི་རང་བཞིན་དང་བ་སྟེ། །རྙོག་པར་བྱེད་པ་ཡིད་ཡིན་ནོ། །རྣམ་པར་ཤེས་དང་བཅས་པའི་ཡིད། །རྟག་ཏུ་བག་ཆགས་འདེབས་པར་བྱེད། །ཀུན་གཞི་ཡིས་ནི་འདོར་བར་བྱེད། །ཡིད་ནི་འགྲོ་ལ་སྨོན་པར་བྱེད། །རྣམ་ཤེས་ཡུལ་དུ་སྣང་བ་ཡི། །ནོར་པ་མཐོང་ནས་རབ་ཏུ་ཆགས། །ང་ཡི་སེམས་ནི་སྣང་བ་སྟེ། །ཕྱི་རོལ་གྱི་ནི་དོན་མེད་པར། །ནོར་པ་ལ་ནི་དེ་ལྟར་བསྒོམས། །དེ་བཞིན་ཉིད་ཀྱང་དྲན་པར་གྱིས། །བསམ་གཏན་པ་ཡི་ཡུལ་དང་ལས། །སངས་རྒྱས་རྣམས་ཀྱི་ཆེ་བ་ཉིད། །དེ་གསུམ་བསམ་གྱིས་མི་ཁྱབ་སྟེ། །རྣམ་ཤེས་སྤྱོད་ཡུལ་བསམ་མི་ཁྱབ། །མ་འོངས་པ་དང་འདས་པ་དང་། །ནམ་མཁའ་གང་ཟག་མྱ་ངན་འདས། །ཀུན་རྫོབ་ཏུ་ནི་དེ་དག་བཤད། །དམ་པའི་
དོན་དུ་ཡི་གེ་མེད། །རིས་སུ་གཏོགས་དང་མུ་སྟེགས་ཅན། །ལྟ་བ་གཅིག་ལ་གནས་པ་སྟེ། །སེམས་ཙམ་ལ་ནི་རྨོངས་པས་ན། །ཕྱི་རོལ་གྱི་ནི་དངོས་ལ་རྟོག། རྨི་ལམ་ན་ནི་དབང་བསྐུར་དང་། །རང་རྒྱལ་དང་ནི་སངས་རྒྱས་དང་། །དགྲ་བཅོམ་སངས་རྒྱས་མཐོང་ན་ནི། །བྱང་ཆུབ་ས་བོན་འཕེལ་བ་ཡིན། །གང་ན་དེ་དག་ཇི་ལྟ་བུར། །གང་ལས་ཅི་ཡི་ཕྱིར་བ་དང་། །སྒྱུ་མའི་སེམས་ཀྱི་རྣམ་པ་ཞི། །ཡོད་མེད་ཕྱོགས་བཤད་བདག་ལ་གསུངས། །སེམས་ཙམ་ལ་ནི་རྨོངས་པ་ལ། །སྒྱུ་མ་བཞིན་དུ་ཡོད་མེད་བཤད། །སྐྱེ་བ་དང་ནི་འཇིག་པར་ལྡན། །མཚན་དང་མཚན་གྱི་གཞིར་ཡང་ཤེས། །ཡིད་ཅེས་བྱ་བ་རྣམ་རྟོག་པ། །རྣམ་ཤེས་ལྔ་དང་ལྷན་ཅིག་ཏུ། །གཟུགས་བརྙན་ཆུ་བོའི་ཆུ་འདྲ་བ། །སེམས་ཀྱི་ས་བོན་དག་ལས་འབྱུང་། །གང་གི་ཚེ་ན་སེམས་དང་ཡིད། །རྣམ་པར་ཤེས་པ་མི་འཇུག་པ། །དེ་ཡི་ཚེ་ན་ཡིད་ལུས་དང་། །སངས་རྒྱས་ས་ཡང་ཐོབ་པར་འགྱུར། །རྐྱེན་དང་ཁམས་དང་ཕུང་པོ་དང་། །ཆོས་རྣམས་ཀྱི་ནི་རང་བཞིན་ཉིད། །བཏགས་དང་སེམས་དང་གང་ཟག་རྣམས། །རྨི་ལམ་སྐྲ་ཤད་འཛིངས་པ་འདྲ། །འཇིག་རྟེན་རྨི་ལམ་སྒྱུ་མ་ལྟར། །མཐོང་ནས་ཡང་དག་གནས་པར་གྱིས། །དེ་བཞིན་ཉིད་ནི་མཚན་ཉིད་བྲལ། །རིག་པ་དང་ནི་གཏན་ཚིགས་སྤངས། །འཕགས་པའི་སོ་སོ་རང་རིག་པ། །སྤྱོད་པ་རྟག་ཏུ་དྲན་པར་གྱིས། །རིགས་པ་དང་ནི་རྒྱུ་རྨོངས་པའི། །འཇིག་རྟེན་དེ་བཞིན་ཉིད་ལ་ཁོད། །སྤྲོས་པ་ཐམས་ཅད་ཞི་བའི་ཕྱིར། །ཤེས་རབ་ནོར་པར་མི་འཇུག་སྟེ། །ཇི་སྲིད་ནོར་པར་རྣམ་རྟོག་པ། །དེ་སྲིད་རྨོངས་པས་སེམས་འཇུག་གོ །རང་བཞིན་མེད་དང་དངོས་པོ་དང་། །སྟོང་པ་རྟག་དང་མི་རྟག་རྣམས། །སྐྱེ་བར་སྨྲ་བའི་ལྟ་བ་སྟེ། །མི་སྐྱེ་སྨྲ་བའི་མ་ཡིན་ནོ། །འགྲོ་གཅིག་ཐ་དད་གཉིས་ཀར་ཡང་། །དབང་ཕྱུག་དང་ནི་འདོད་རྒྱལ་དང་། །དུས་དང་གཙོ་དང་རྡུལ་ཕྲན་དང་། །རྐྱེན་རྣམས་ཀྱིས་ནི་བརྟག་པ་ཡིན། །འཁོར་བའི་ས་བོན་རྣམ་པར་ཤེས། །ས་བོན་ཡོད་ན་འབྱུང་བར་འགྱུར། །རྩིག་པ་ཡོད་ན་རི་མོ་བཞིན། །ཡོངས་སུ་ཤེས་ནས་འགག་པར་འགྱུར། །ཇི་ལྟར་སྒྱུ་མའི་སྐྱེས་བུ་བཞིན། །མི་དག་འཆི་དང་སྐྱེ་བར་འགྱུར། །དེ་བཞིན་བྱིས་པ་
རྨོངས་པའི་ཕྱིར། །བཅིངས་དང་ཐར་པ་ཤིན་ཏུ་འབྱུང་། །ཕྱི་དང་ནང་གི་རྣམ་གཉིས་ཏེ། །ཆོས་རྣམས་དང་ནི་རྐྱེན་རྣམས་སོ། །རྣལ་འབྱོར་དེ་ལ་རབ་བསྒོམ་ཞིང་། །སྣང་བ་མེད་ལ་གནས་པར་བྱ། །བག་ཆགས་དག་གིས་སེམས་དབྱེ་སྟེ། །སེམས་དང་བག་ཆགས་ཐ་མི་དད། །སེམས་ནི་ཐ་དད་མ་ཡིན་མཚན། །བག་ཆགས་རྣམས་ཀྱིས་ཡོངས་སུ་དཀྲིས། །ཡིད་ཀྱི་ཤེས་ལས་བྱུང་བ་ཡི། །བག་ཆགས་དྲི་མ་བཞིན་དུ་ལྟོས། །སེམས་ནི་རས་ཡུག་དཀར་པོ་འདྲ། །བག་ཆགས་རྣམས་ཀྱིས་མི་མཛེས་སོ། །ཇི་ལྟར་ངས་ནི་ནམ་མཁའ་ལ། །དངོས་དང་དངོས་མེད་མ་ཡིན་བཤད། །དེ་བཞིན་ལུས་ལ་ཀུན་གཞི་ནི། །དངོས་དང་དངོས་པོ་མེད་པས་སྤངས། །རྙོག་པ་སྤངས་པའི་སེམས་ཉིད་ནི། །ཡིད་ཀྱི་རྣམ་ཤེས་བཟློག་པ་སྟེ། །ཆོས་རྣམས་ཐམས་ཅད་ཤེས་པའི་ཕྱིར། །སེམས་ནི་སངས་རྒྱས་ཤེས་ང་འཆད། །རྒྱུད་གསུམ་རྣམ་པར་འཆད་པ་སྟེ། །ཡོད་པ་དང་ནི་མེད་པ་སྤངས། །མཐའ་བཞི་དག་ལས་རྣམ་པར་གྲོལ། །སྲིད་པ་རྟག་ཏུ་སྒྱུ་མ་བཞིན། །སེམས་ལས་བྱུང་བའི་ས་བདུན་རྣམས། །ངོ་བོ་ཉིད་ནི་གཉིས་སུ་འགྱུར། །ས་གཞན་དང་ནི་སངས་རྒྱས་ས། །དེ་དག་ཤིན་ཏུ་རྫོགས་པ་ཡིན། །གཟུགས་ཅན་དང་ནི་གཟུགས་མེད་ཁམས། །འདོད་པའི་ཁམས་དང་མྱ་ངན་འདས། །སེམས་ཀྱི་སྤྱོད་ཡུལ་ཐམས་ཅད་ཀྱང་། །ལུས་འདི་ཉིད་དུ་བཤད་པ་ཡིན། །གང་ཚེ་ཇི་སྲིད་དམིགས་གྱུར་པ། །དེ་སྲིད་ནོར་པ་འཇུག་པར་འགྱུར། །ནོར་པ་རང་གི་སེམས་རྟོགས་ན། །འཇུག་པ་མེད་ཅིང་ལྡོག་པ་མེད། །སྐྱེ་བ་མེད་ལ་རྒྱུ་ཡང་མེད། །དངོས་པོས་འཁོར་བ་ཀུན་འཛིན་ཏེ། །རྒྱུ་ལ་སོགས་དང་འདྲར་མཐོང་ན། །མཚན་ཉིད་ལ་ནི་མི་བརྟག་གོ །བྱིས་པ་ཞན་པའི་བློ་ཅན་ལ། །ཐེག་པ་གཅིག་དང་ཐེག་གསུམ་དང་། །ཐེག་པ་མེད་པ་རང་འཆད་དོ། །འཕགས་པ་རྣམས་ལ་དབེན་པ་ཉིད། །མཚན་ཉིད་དང་ནི་རྟོག་པ་དེ། །ང་ཡི་སྐྱེ་བ་རྣམ་གཉིས་སོ། །ཚུལ་བསྟན་པ་ནི་རྣམ་བཞི་སྟེ། །རིགས་པ་བསྟན་དང་གྲུབ་པའི་མཐའ། །དབྱིབས་དང་བྱད་ཀྱི་ཁྱད་པར་གྱིས། །ནོར་བ་མཐོང་ནས་རྣམ་པར་རྟོག །མིང་དང་དབྱིབས་དང་བྲལ་གྱུར་ནས། །རང་བཞིན་འཕགས་པའི་སྤྱོད་ཡུལ་གཙང་། །ཇི་སྲིད་རྣམ་པར་རྟོག་པས་རྟོག །དེ་
སྲིད་བརྟགས་པའི་མཚན་ཉིད་དེ། །བརྟག་བྱ་རྟོག་པ་མེད་པའི་ཕྱིར། །རང་བཞིན་འཕགས་པའི་སྤྱོད་ཡུལ་ལོ། །རྟག་པ་ཐེར་ཟུག་ཡང་དག་ཉིད། །རིགས་དང་དངོས་པོའི་ངོ་བོ་ཉིད། །དེ་བཞིན་ཉིད་ནི་སེམས་ལས་གྲོལ། །རྟོག་པ་རྣམས་ཀྱང་སྤངས་པའོ། །དངོས་པོ་མེད་ན་དག་མི་འགྱུར། །ཉོན་མོངས་པ་ཡང་སུ་ལའང་མེད། །གང་ཕྱིར་སེམས་ནི་དག་གྱུར་པས། །ཀུན་ནས་ཉོན་མོངས་སྣང་བར་འགྱུར། །དེ་ཕྱིར་རྣམ་དག་འཕགས་པའི་ཡུལ། །ཡང་དག་ཉིད་ནི་དངོས་པོར་འགྱུར། །སེམས་ནི་རྐྱེན་གྱིས་བསྐྱེད་པ་སྟེ། །རྟོག་པ་དག་གིས་རྣམ་པར་སྤེལ། །རྨི་ལམ་སྒྱུ་མ་ལ་སོགས་ལྟར། །མཐོང་ན་རྣམ་པར་འཚང་རྒྱ་འགྱུར། །བག་ཆགས་སྣ་ཚོགས་གནས་ངན་ལེན། །སེམས་དང་ལྷན་ཅིག་རབ་ཏུ་ལྡན། །མི་ལ་ཕྱི་རོལ་རྣམས་སྣང་སྟེ། །སེམས་ཀྱི་ཆོས་ཉིད་མ་ཡིན་ནོ། །སེམས་ཀྱི་ཆོས་ཉིད་དག་པ་སྟེ། །སེམས་ནི་ནོར་ལས་བྱུང་བ་ཡིན། །ནོར་པ་གནས་ངན་ལེན་པ་སྟེ། །དེ་ཡི་ཕྱིར་ན་སེམས་མི་མཐོང་། །དེ་བཞིན་ཉིད་ནི་ནོར་པ་ཙམ། །དེ་བཞིན་ཉིད་ནི་གུད་ན་མེད། །འདུ་བྱེད་ལ་མིན་གུད་ནའང་མིན། །འོན་ཀྱང་འདུ་བྱེད་མཐོང་བས་སོ། །ནམ་ཞིག་འདུས་བྱས་རྣམས་ལ་ནི། །མཚན་དང་མཚན་གཞི་བྲལ་མཐོང་ན། །འགྲོ་བ་རང་གི་སེམས་མཐོང་བས། །དེ་ཡི་ཕྱིར་ནི་སྤངས་པར་འགྱུར། །སེམས་ཙམ་ལ་ནི་གནས་ནས་ནི། །ཕྱི་རོལ་དོན་ལ་མི་བརྟག་གོ །ཡང་དག་དམིགས་ལ་གནས་ནས་ནི། །སེམས་ཙམ་ལས་ནི་འདའ་བར་བྱ། །སེམས་ཙམ་ལས་ནི་འདས་ནས་ནི། །སྣང་བ་མེད་ལས་འདའ་བར་བྱ། །རྣལ་འབྱོར་སྣང་བ་མེད་གནས་ན། །ཐེག་པ་ཆེན་པོ་མི་མཐོང་ངོ་། །ལྷུན་གྱིས་གྲུབ་རྟོགས་ཞི་བ་སྟེ། །སྨོན་ལམ་དག་གིས་རྣམ་པར་སྦྱངས། །བདག་མེད་ཡེ་ཤེས་མཆོག་ཡིན་ཏེ། །སྣང་བ་མེད་ཚེ་མི་མཐོང་ངོ་། །སེམས་ཀྱི་སྤྱོད་ཡུལ་བལྟ་བར་བྱ། །ཡེ་ཤེས་ཀྱི་ཡང་སྤྱོད་ཡུལ་བལྟ། །ཤེས་རབ་སྤྱོད་ཡུལ་མཐོང་ན་ནི། །མཚན་ཉིད་ལ་ནི་རྨོངས་མི་འགྱུར། །སྡུག་བསྔལ་བདེན་པ་སེམས་ཀྱི་སྟེ། །ཀུན་འབྱུང་ཡེ་ཤེས་སྤྱོད་ཡུལ་ལོ། །བདེན་པ་གཉིས་དང་སངས་རྒྱས་ས། །དེ་ལ་ཤེས་རབ་ཤིན་ཏུ་འཇུག །འབྲས་བུ་ཐོབ་དང་མྱ་ངན་འདས། །དེ་བཞིན་ཡན་ལག་བརྒྱད་པའི་ལམ། །
ཆོས་རྣམས་ཐམས་ཅད་རྟོགས་པའི་ཕྱིར། །སངས་རྒྱས་ཡེ་ཤེས་རྣམ་དག་འགྱུར། །མིག་དང་གཟུགས་དང་སྣང་བ་དང་། །ཡིད་དང་ནམ་མཁའ་དེ་བཞིན་ཏེ། །དེ་དག་གིས་ནི་མི་རྣམས་ཀྱི། །ཀུན་གཞི་ལས་བྱུང་རྣམ་ཤེས་ཏེ། །གཟུང་དང་འཛིན་དང་འཛིན་བྱེད་པ། །མིང་དང་དངོས་མིན་མེད་པ་དང་། །རྣམ་པར་རྟོག་པ་རྒྱུ་མེད་པར། །གང་སེམས་དེ་དག་མཁས་མ་ཡིན། །དོན་ལས་མིང་ནི་མ་བྱུང་སྟེ། །མིང་ལས་དོན་ཀྱང་དེ་བཞིན་ནོ། །རྒྱུ་དང་རྒྱུ་མེད་ལས་བྱུང་བའི། །རྣམ་པར་རྟོག་པ་མ་རྟོག་ཅིག །དངོས་པོ་ཐམས་ཅད་རང་བཞིན་མེད། །ཚིག་ཀྱང་དེ་བཞིན་མེད་པ་ཡིན། །སྟོང་པ་དང་ནི་སྟོང་པའི་དོན། །བྱིས་པ་མ་མཐོང་རྣམ་པར་རྒྱུག །རློམ་སེམས་བདེན་དགོད་མཐོང་བས་ནི། །བཏགས་པ་ཡི་ནི་བཤད་པའོ། །གཅིག་པོ་རྣམ་པ་ལྔར་གྲུབ་པས། །བདེན་པ་པོ་འདི་སྤོང་བར་འགྱུར། །སྤྲོས་པ་བདུད་ཀྱིས་བཟུང་བ་ཡིན། །ཡོད་དང་མེད་ལས་འདའ་བར་བྱ། །ལོག་པའི་འདུ་ཤེས་བདག་མེད་པར། །མཐོང་བས་སྲིད་ལ་འདུན་མི་བྱ། །བརྟག་པ་བྱེད་དང་བཅས་པ་ནི། །རྩོད་པ་ཙམ་ཞིག་འཇུག་པ་སྟེ། །བདེན་པའི་མཆོག་ནི་སྨྲར་མེད་པ། །འགགས་ན་ཆོས་ནི་མཐོང་བ་ཡིན། །ཀུན་གཞི་ལ་ནི་རྟེན་བཅས་ནས། །ཡིད་ཀྱང་ཤིན་ཏུ་འཇུག་པར་འགྱུར། །སེམས་དང་ཡིད་ལ་རྟེན་བཅས་ནས། །རྣམ་པར་ཤེས་པ་འཇུག་པར་འགྱུར། །སྒྲོ་བཏགས་པ་དང་སྒྲོ་འདོགས་པ། །སེམས་ཀྱི་ཆོས་ཉིད་དེ་བཞིན་ཉིད། །རྣལ་འབྱོར་པས་ནི་དེ་བསྒོམས་ན། །སེམས་ཙམ་ཤེས་པ་ཐོབ་པར་འགྱུར། །ཡིད་དང་མཚན་ཉིད་དངོས་པོ་ལ། །རྟག་དང་མི་རྟག་རློམ་སེམས་མེད། །སྐྱེ་དང་མི་སྐྱེར་རྣལ་འབྱོར་ལ། །རྣལ་འབྱོར་པ་ནི་རློམ་སེམས་མེད། །ཀུན་གཞི་ལས་བྱུང་རྣམ་ཤེས་ནི། །དོན་གཉིས་ལ་ནི་རྟོག་པར་བྱེད། །དེ་ལས་བྱུང་བའི་དོན་གཅིག་ལ། །སེམས་གཉིས་ཀྱིས་ནི་མི་ཤེས་འགྱུར། །སྨྲ་བ་མེད་ཅིང་ཚིག་མེད་དེ། །སེམས་མཐོང་ཕྱིར་ནི་སྟོང་མ་ཡིན། །རང་གི་སེམས་ནི་མ་མཐོང་ཕྱིར། །ལྟ་བའི་དྲ་བ་འཇུག་པར་འགྱུར། །རྐྱེན་རྣམས་འོང་བ་མེད་པ་སྟེ། །དངོས་པོ་དག་ནི་གང་ཡང་མེད། །ཁམས་རྣམས་མེད་ཅིང་ཕུང་པོ་མེད། །འདོད་ཆགས་མེད་ཅིང་འདུས་བྱས་མེད། །ལས་དང་
མེ་མེད་སྔོན་ཡང་མེད། །བྱས་པ་མེད་ཅིང་འདུས་བྱས་མེད། །མཐའ་ཡང་མེད་ཅིང་ཆགས་པ་མེད། །ཐར་པ་མེད་ཅིང་བཅིངས་པ་མེད། །ལུང་མ་བསྟན་ལ་དངོས་པོ་མེད། །ཆོས་དང་ཆོས་མ་ཡིན་པ་མེད། །དུས་མེད་མྱ་ངན་འདས་པ་མེད། །ཆོས་ཉིད་དག་ཀྱང་མེད་པ་ཡིན། །སངས་རྒྱས་མེད་ཅིང་བདེན་རྣམས་མེད། །འབྲས་བུ་མེད་ཅིང་རྒྱུ་རྣམས་མེད། །ལོག་དང་མྱ་ངན་འདས་པ་མེད། །འབྱུང་བ་དང་ནི་འཇིག་པ་མེད། །ཡན་ལག་བཅུ་གཉིས་ཡོད་མ་ཡིན། །མཐའ་དང་མཐའ་མེད་པ་ཡང་མེད། །ལྟ་བ་ཐམས་ཅད་སྤང་བའི་ཕྱིར། །སེམས་ཙམ་དུ་ནི་ངས་བཤད་དོ། །ལུས་དང་ཉོན་མོངས་ལས་ལམ་དང་། །བྱེད་པ་པོ་དང་འབྲས་བུ་རྣམས། །རྨི་ལམ་དང་ནི་སྨིག་རྒྱུ་འདྲ། །དྲི་ཟ་ཡི་ནི་གྲོང་ཁྱེར་བཞིན། །སེམས་ཙམ་དུ་ནི་རྣམ་བཞག་པས། །དངོས་པོའི་མཚན་ལས་རྣམ་པར་ལྡོག །སེམས་ཙམ་ལ་ནི་གནས་པའི་ཕྱིར། །རྟག་དང་ཆད་པ་མཐོང་བར་འགྱུར། །མྱ་ངན་འདས་ལ་ཕུང་པོ་མེད། །བདག་ཀྱང་མེད་ཅིང་མཚན་ཉིད་མེད། །སེམས་ཙམ་ལ་ནི་འཇུག་པ་ཡིས། །ཐར་པ་འཛིན་ལས་ལོག་པར་འགྱུར། །ས་སྣང་རྒྱུས་བྱུང་ངེས་པ་ནི། །མི་རྣམས་ལ་ནི་ཕྱི་རོལ་སྣང་། །སེམས་ནི་སྣང་བ་མེད་ལས་བྱུང་། །དེ་ཡི་ཕྱིར་ན་སེམས་མི་སྣང་། །མི་རྣམས་ཀྱིས་ནི་བག་ཆགས་རྣམས། །ལུས་དང་ལོངས་སྤྱོད་གནས་ལྟར་སྣང་། །སེམས་ནི་དངོས་མིན་དངོས་མེད་མིན། །བག་ཆགས་དག་གིས་མི་མཛེས་སོ། །དཀར་པོ་ལ་ནི་དྲི་མ་སྣང་། །དྲི་མ་ལ་ནི་དཀར་མི་སྣང་། །ནམ་མཁའ་ལ་ནི་སྤྲིན་བཞིན་དུ། །དེ་བཞིན་སེམས་ཀྱང་མི་སྣང་ངོ་། །སེམས་ནི་ལས་ཀྱང་སོགས་པར་བྱེད། །ཡེ་ཤེས་ཀྱིས་ནི་རྣམ་པར་སེལ། །ཤེས་རབ་ཀྱིས་ནི་སྣང་མེད་དང་། །མཐུ་ཡང་རབ་ཏུ་ཐོབ་པར་བྱེད། །སེམས་ནི་ཡུལ་དང་འབྲེལ་པ་སྟེ། །ཤེས་པ་རྟོག་གེ་དག་ལ་འཇུག །སྣང་བ་མེད་དང་ཁྱད་པར་ལ། །ཤེས་རབ་དག་ལ་ཤིན་ཏུ་འཇུག །སེམས་དང་ཡིད་དང་རྣམ་ཤེས་དང་། །འདུ་ཤེས་རྟོག་པ་སྤངས་པ་སྟེ། །རྣམ་པར་མི་རྟོག་ཆོས་ཐོབ་པས། །ཉན་ཐོས་དག་ནི་རྒྱལ་སྲས་མིན། །ཞི་བ་བཟོད་པའི་ཁྱད་པར་ལ། །དེ་བཞིན་གཤེགས་ཀྱི་ཡེ་ཤེས་དགེ། །ཀུན་ཏུ་སྤྱོད་པ་སྤངས་པ་ནི། །ཁྱད་པར་ཕྱིར་ནི་སྐྱེ་བར་འགྱུར། །ཀུན་ཏུ་བརྟགས་པའི་རང་བཞིན་ཡོད། །གཞན་གྱི་དབང་ནི་མེད་པ་སྟེ། །ནོར་པ་དག་
གིས་བརྟགས་པ་འཛིན། །གཞན་གྱི་དབང་ནི་མི་རྟག་གོ །ཐམས་ཅད་འབྱུང་འགྱུར་གཟུགས་མེད་དེ། །འབྱུང་ལས་མ་གྱུར་གཟུགས་ཡོད་དོ། །དྲི་ཟའི་གྲོང་ཁྱེར་རྨི་ལམ་དང་། །སྒྱུ་མ་སྨིག་རྒྱུ་འབྱུང་འགྱུར་མིན། །ང་ཡི་ཤེས་རབ་རྣམ་གསུམ་སྟེ། །གང་གིས་འཕགས་པ་རབ་ཕྱེ་བ། །གང་གིས་ཡང་དག་མཚན་ཉིད་རྟོག །གང་གིས་དངོས་པོ་འབྱེད་པའོ། །ཉན་ཐོས་ཤེས་རབ་སྣང་སྤངས་པ། །ཐེག་པ་གཉིས་དང་བྲལ་བ་ནི། །དངོས་པོ་ཡོད་པར་ཆགས་པས་ན། །ཤིན་ཏུ་འཇུག་པར་འགྱུར་བ་ཡིན། །སེམས་ཙམ་ལ་ནི་འཇུག་པ་ཡིན། །བདེ་གཤེགས་ཤེས་རབ་དྲི་མ་མེད། །ཡོད་པ་དང་ནི་མེད་པ་ལས། །རྐྱེན་གྱིས་གལ་ཏེ་སྐྱེར་ཟིན་ན། །གཅིག་དང་ཐ་དད་ལྟ་བ་ལ། །གདོན་མི་ཟ་བར་དེ་དག་གནས། །ཡན་ལག་མང་པོས་བསྒྲུབས་པ་ཡི། །སྒྱུ་མ་བསྒྲུབ་པར་མི་འགྱུར་བར། །དེ་བཞིན་མཚན་མ་སྣ་ཚོགས་ཀྱང་། །བརྟགས་ན་འགྲུབ་པར་མི་འགྱུར་རོ། །མཚན་མ་གནས་ངན་ལེན་པ་ཡི། །འཆིང་བ་སེམས་ལས་བྱུང་བ་སྟེ། །ཀུན་ཏུ་བརྟགས་པ་མི་ཤེས་པས། །གཞན་གྱི་དབང་ཞེས་རྟོག་པར་འགྱུར། །གང་བརྟགས་པ་ཡི་དངོས་པོ་འདི། །གཞན་གྱི་དབང་ཡང་དེ་ཉིད་དོ། །བརྟགས་པ་སྣ་ཚོགས་སྣང་བ་ཡང་། །གཞན་གྱི་དབང་གིས་རྟོག་པར་བྱེད། །ཀུན་རྫོབ་དང་ནི་དམ་པའི་དོན། །རྒྱུ་ལས་སྐྱེས་པ་གསུམ་དུ་མེད། །བརྟགས་པ་ཀུན་རྫོབ་ཅེས་བྱ་སྟེ། །དེ་ཆད་འཕགས་པའི་སྤྱོད་ཡུལ་ལོ། །རྣལ་འབྱོར་ཅན་གྱི་དངོས་པོ་ལྟར། །སྣ་ཚོགས་གཅིག་ཏུ་རྣམ་པར་མཛེས། །དེ་ལ་རྣམ་པ་སྣ་ཚོགས་མེད། །བརྟགས་པའི་མཚན་ཀྱང་དེ་བཞིན་ནོ། །ཇི་ལྟར་རབ་རིབ་ཅན་དག་གིས། །གཟུགས་མཐོང་བ་ལ་སྣ་ཚོགས་རྟོག །རབ་རིབ་གཟུགས་མིན་གཟུགས་མེད་མིན། །མཁས་པས་གཞན་དབང་དེ་བཞིན་ནོ། །ཇི་ལྟར་གསེར་ནི་དག་པ་དང་། །ཆུ་ཡང་རྙོག་པ་སྤངས་པ་དང་། །ནམ་མཁའ་ལ་ནི་སྤྲིན་མེད་ལྟར། །རྣམ་རྟོག་དག་པ་དེ་བཞིན་ནོ། །ང་ཡི་ཉན་ཐོས་རྣམ་གསུམ་སྟེ། །སྤྲུལ་དང་སྨོན་ལམ་ལས་སྐྱེས་པ། །འདོད་ཆགས་ཞེ་སྡང་སྤངས་པ་ཡི། །ཆོས་ལས་བྱུང་བའི་ཉན་ཐོས་སོ། །བྱང་ཆུབ་སེམས་དཔའའང་རྣམ་གསུམ་སྟེ། །སངས་རྒྱས་ལ་ནི་མཚན་ཉིད་མེད། །སེམས་ཅན་དག་གི་སེམས་སེམས་ལ། །སངས་རྒྱས་གཟུགས་ནི་རབ་ཏུ་སྣང་། །བརྟགས་པ་ཡི་ནི་དངོས་པོ་མེད། །གཞན་གྱི་དབང་ནི་ཡོད་པ་སྟེ། །སྒྲོ་འདོགས་པ་དང་སྐུར་པ་ནི། །རྣམ་པར་
བརྟགས་ན་འཇིག་པར་འགྱུར། །གལ་ཏེ་བརྟགས་པའི་དངོས་མེད་ལ། །གཞན་གྱི་དབང་གི་དངོས་ཡོད་ན། །དངོས་པོ་མེད་པར་དངོས་པོར་འགྱུར། །དངོས་པོ་དངོས་མེད་ལས་བྱུང་འགྱུར། །ཀུན་ཏུ་བརྟགས་ལ་གནས་བཅས་ཏེ། །གཞན་གྱི་དབང་ནི་དམིགས་པར་འགྱུར། །མིང་དང་མཚན་མ་འབྲེལ་པ་ལས། །ཀུན་ཏུ་བརྟགས་པ་འབྱུང་བར་འགྱུར། །བརྟགས་པ་ཤིན་ཏུ་མ་གྲུབ་ན། །གཞན་ལས་བྱུང་བ་མ་ཡིན་ནོ། །དམ་པའི་དོན་གྱི་ངོ་བོ་ཉིད། །དག་པ་དེ་ཚེ་ཤེས་པར་འགྱུར། །ཀུན་ཏུ་རྟོག་པ་རྣམ་པ་བཅུ། །གཞན་གྱི་དབང་ནི་རྣམ་པ་དྲུག །སོ་སོ་རང་རིག་དེ་བཞིན་ཉིད། །དེ་ཡི་ཕྱིར་ན་ཁྱད་མེད་དོ། །ཆོས་ལྔ་དེ་བཞིན་ཉིད་ཡིན་ཏེ། །རང་བཞིན་གསུམ་ཡང་དེ་བཞིན་ནོ། །རྣལ་འབྱོར་ཅན་གྱིས་དེ་བསྒོམས་ན། །དེ་བཞིན་ཉིད་ལས་མི་འདའོ། །སྐར་མ་དང་ནི་སྤྲིན་ལྟ་བུར། །ཉི་མ་ཟླ་བ་འདྲ་བ་དང་། །བག་ཆགས་ལས་བྱུང་སྣང་འདྲ་བ། །མི་རྣམས་ཀྱི་ནི་སེམས་སྣང་ངོ་། །འབྱུང་བ་འདི་དག་ལུས་མ་རེད། །མཚན་ཉིད་མེད་ཅིང་མཚན་གཞི་མེད། །ཇི་སྟེ་འབྱུང་བའི་འབྱུང་ཡིན་ལ། །གཟུགས་ནི་འབྱུང་ལས་གྱུར་ཡིན་ན། །འབྱུང་བ་ཆེན་པོ་ཡང་དག་མིན། །འབྱུང་བ་འབྱུང་ལས་གྱུར་པ་མེད། །འབྱུང་བ་ཆེན་པོ་རྒྱུ་ཡིན་ཏེ། །འབྲས་བུ་ས་དང་ཆུ་ལ་སོགས། །རྫས་དང་བཏགས་དང་གཟུགས་རྣམས་དང་། །སྒྱུ་མའི་རྣམ་བྱས་དེ་བཞིན་ཏེ། །རྨི་ལམ་དྲི་ཟའི་གྲོང་གི་གཟུགས། །སྨིག་རྒྱུ་བ་དང་ལྔ་ཡིན་ནོ། །འདོད་པ་ཅན་ནི་རྣམ་ལྔ་དང་། །རིགས་ཀྱང་དེ་བཞིན་ལྔ་ཡིན་ཏེ། །ཐེག་པ་ལྔ་དང་ཐེག་པ་མེད། །མྱ་ངན་འདས་པ་རྣམ་དྲུག་ཡིན། །ཕུང་པོ་ཐ་དད་ཉི་ཤུ་བཞི། །གཟུགས་ཀྱང་རྣམ་པ་བརྒྱད་དུ་འགྱུར། །སངས་རྒྱས་ཉི་ཤུ་རྩ་བཞི་ཡིན། །རྒྱལ་བའི་སྲས་ནི་རྣམ་པ་གཉིས། །ཚུལ་ཡང་བརྒྱ་པོ་རྩ་བརྒྱད་དེ། །དེ་བཞིན་ཉན་ཐོས་རྣམ་གསུམ་མོ། །སངས་རྒྱས་རྣམས་ཀྱི་ཞིང་གཅིག་སྟེ། །དེ་བཞིན་སངས་རྒྱས་གཅིག་ཏུ་འགྱུར། །རྣམ་པར་གྲོལ་བ་དེ་བཞིན་གསུམ། །སེམས་ཀྱི་རྒྱུད་ནི་རྣམ་པ་བཞི། །ང་ཡི་བདག་མེད་རྣམ་པ་དྲུག །ཤེས་པར་བྱ་བའང་རྣམ་པ་བཞི། །རྒྱུ་རྣམས་དང་ནི་བྲལ་གྱུར་པ། །ལྟ་བའི་ཉེས་པ་རྣམ་པར་སྤངས། །སོ་སོ་རང་རིག་མི་གཡོ་བ། །ཐེག་པ་ཆེན་པོ་བླ་ན་མེད། །སྐྱེ་བ་དང་ནི་མི་སྐྱེ་བ། །རྣམ་པ་བརྒྱད་དང་རྣམ་དགུར་འགྱུར། །གཅིག་དང་རིམ་གྱིས་རྟོགས་པ་སྟེ། །གྲུབ་པའི་མཐའ་ཡང་གཅིག་ཉིད་དོ། །གཟུགས་མེད་ཁམས་ནི་རྣམ་པ་བརྒྱད། །བསམ་
གཏན་ཐ་དད་རྣམ་པ་དྲུག །རང་རྒྱལ་སྲས་པོ་རྣམས་ཀྱིས་ནི། །འབྱུང་བ་རྣམ་པ་བདུན་དུ་འགྱུར། །དུས་གསུམ་པོ་ཡང་ཡོད་མ་ཡིན། །རྟག་པ་དང་ནི་མི་རྟག་མེད། །བྱེད་དང་ལས་དང་འབྲས་བུ་རྣམས། །རྨི་ལམ་གྱི་ནི་བྱ་བ་བཞིན། །སངས་རྒྱས་ཉན་ཐོས་རྒྱལ་བའི་སྲས། །ཐོག་མ་ཐ་མར་འབྱུང་བ་མེད། །སེམས་ཀྱི་སྣང་དང་བྲལ་བ་སྟེ། །རྟག་ཏུ་སྒྱུ་མའི་ཆོས་དང་འདྲ། །རུམ་དང་འཁོར་ལོ་སྐྱེ་དེ་བཞིན། །འབྱུང་དང་དགའ་ལྡན་གྱི་གནས་དང་། །ཞིང་ཀུན་ཏུ་ནི་གཤེགས་པར་ཡང་། །སྣང་ཡང་མངལ་ནས་སྐྱེ་བ་མིན། །འཕོ་དང་རྒྱུ་དང་སེམས་ཅན་དང་། །དེ་བཞིན་སྟོན་དང་མྱ་ངན་འདས། །བདེན་པ་དང་ནི་ཞིང་རྟོགས་པ། །རྐྱེན་རྣམས་ཀྱིས་ནི་འཕངས་པ་ཡིན། །འཇིག་རྟེན་དང་ནི་ནགས་ཚལ་གླིང་། །མུ་སྟེགས་འཕོ་དང་བདག་མེད་དང་། །བསམ་གཏན་ཐེག་གནས་ཐོབ་པ་དང་། །འབྲས་བུའི་སྤྱོད་ཡུལ་བསམ་མི་ཁྱབ། །ཟླ་བ་སྐར་མའི་རིགས་རྣམས་དང་། །རྒྱལ་པོའི་རིགས་དང་ལྷ་ཡི་རྣམས། །གནོད་སྦྱིན་དྲི་ཟའི་རིགས་རྣམས་ནི། །ལས་ལས་སྐྱེས་ཤིང་སྲིད་ལས་བྱུང་། །བསམ་གྱིས་མི་ཁྱབ་འགྱུར་བ་ན། །ཤི་འཕོ་བག་ཆགས་ལྡན་པ་སྟེ། །ཤི་འཕོར་སྣང་བ་ཆད་ན་ནི། །ཉོན་མོངས་དྲ་བ་འགག་པར་འགྱུར། །བ་ལང་ལུག་དང་བྲན་རྣམས་དང་། །དེ་བཞིན་གླང་པོ་རྟ་ལ་སོགས། །ནོར་དང་འབྲུ་དང་གསེར་རྣམས་དང་། །ཞིང་གི་དངོས་པོར་རྣམ་པར་རྟོག །ཁྲི་དག་ལ་ཡང་ཉལ་མི་བྱ། །ས་ལ་ཡང་ནི་མི་བསྐུའོ། །གསེར་དང་དངུལ་དང་ཁར་བ་དང་། །ཟངས་ཀྱི་ལྷུང་བཟེད་མི་བཅང་ངོ་། །སྣམ་བུ་སྔོན་པོར་བཙོས་པ་དང་། །བ་ལང་ལྕི་བ་ངུར་སྨྲིག་དང་། །ས་དང་འབྲས་བུ་ལོ་མ་ཡིས། །རྣལ་འབྱོར་རྟག་ཏུ་དཀར་པོ་བསྒྱུར། །ལྕགས་དང་རྡོ་དང་ཁམ་པ་དང་། །དུང་དང་ཤེལ་ལས་བྱས་པ་ཡི། །མ་ག་དྷཱ་ཡི་བྲེ་གང་ཚད། །ལྷུང་བཟེད་རྣལ་འབྱོར་ཅན་གྱིས་བཅང་། །དགུ་པོ་གོས་དྲའི་གྲི་ཡང་ནི། །སོར་བཞི་པ་ཡི་ཚད་དུ་བྱ། །རྣལ་འབྱོར་གཞོལ་བའི་རྣལ་འབྱོར་པས། །བཟོ་ཡི་རིག་པ་མི་བསླབ་བོ། །རྣལ་འབྱོར་ཞུགས་པའི་རྣལ་འབྱོར་པས། །ཉོ་དང་བཙོང་བར་མི་བྱའོ། །ཀུན་དགའི་ཁྱིམ་པས་དེ་བྱས་ཏེ། །དེ་ནི་ཆོས་སུ་ངས་བཤད་དོ། །དབང་པོ་བསྡམས་ཤིང་དོན་ཤེས་པས། །མདོ་དང་འདུལ་ལ་དེ་བཞིན་ཏེ། །ཁྱིམ་པ་དང་ནི་མ་འདྲེས་པར། །རྣལ་འབྱོར་ཅན་ལ་དེ་ངས་བཤད། །སྟོང་པའི་ཁྱིམ་འམ་
དུར་ཁྲོད་དམ། །ཤིང་གི་དྲུང་དང་ཕུག་རྣམས་དང་། །བླ་གབ་མེད་པའམ་སོག་ཁྲོད་དུ། །རྣལ་འབྱོར་ཅན་གྱིས་གནས་བཅའོ། །དུར་ཁྲོད་དུ་འམ་གཞན་གང་དུའང་། །རྟག་པར་གོས་གསུམ་བགོ་བར་བྱ། །གང་ཡང་བདེ་བར་བྱིན་པ་དག །གོས་ཀྱི་ཕྱིར་ནི་སྦྱར་བར་བྱ། །སློངས་མོའི་ཟས་ལ་གཞོལ་བྱས་ཏེ། །གཉའ་ཤིང་གང་དུ་བལྟ་བར་བྱ། །མེ་ཏོག་ལ་ནི་བུང་བ་ལྟར། །དེ་ལྟར་བསོད་སྙོམས་སྤྱད་པར་བྱ། །མང་པོའི་ཚོགས་དང་འདྲེས་པ་དང་། །དགེ་སློང་མ་དང་གང་འདྲེས་པ། །འདྲེས་པར་གྱུར་པའི་འཚོ་བ་དེ། །རྣལ་འབྱོར་ཅན་ལ་རུང་མ་ཡིན། །རྣལ་འབྱོར་གཞོལ་བའི་རྣལ་འབྱོར་པས། །རྒྱལ་པོ་དང་ནི་རྒྱལ་པོའི་བུ། །དེ་བཞིན་བློན་པོ་ཚོང་དཔོན་ལ། །ཟས་ཀྱི་ཕྱིར་ནི་བསྟེན་མི་བྱ། །ཤིང་དང་བཙས་པའི་ཁྱིམ་ཟས་དང་། །དགའ་དང་མཛའ་དང་ལྡན་པ་དང་། །དགེ་སློང་དགེ་སློང་མ་དང་འདྲེས། །རྣལ་འབྱོར་ཅན་ལ་དེ་མི་རུང་། །དུ་བ་གར་འཐུལ་གཙུག་ལག་ཁང་། །ཆོ་ག་བཞིན་དུ་རྟག་འཚེད་དང་། །བདག་གི་ཕྱིར་ནི་གང་བྱས་པ། །རྣལ་འབྱོར་ཅན་ལ་དེ་མི་རུང་། །འཇིག་རྟེན་མཚན་གཞི་མཚན་ལྡན་ལ། །སྐྱེ་དང་འཇིག་ལས་གྲོལ་བ་དང་། །ཡོད་དང་མེད་ཀྱི་ཕྱོགས་སྤངས་པ། །རྣལ་འབྱོར་ཅན་གྱིས་རྣལ་འབྱོར་བསྒོམས། །གལ་ཏེ་སྐྱེ་བར་མི་རྟོག་ན། །ཏིང་ངེ་འཛིན་དང་སྟོབས་རྣམས་དང་། །མངོན་པར་ཤེས་དང་དབང་ལྡན་གྱིས། །རྣལ་འབྱོར་པར་ནི་མྱུར་དུ་འགྱུར། །རྡུལ་ཕྲན་དུས་དང་གཙོ་བོ་དང་། །བྱེད་པ་ལས་ཀྱང་མི་བརྟག་གོ །འཇིག་རྟེན་རྒྱུ་རྐྱེན་ལས་བྱུང་བར། །རྣལ་འབྱོར་པས་ནི་མི་བརྟག་གོ །འཇིག་རྟེན་རང་གི་རྟོག་པས་བརྟགས། །སྣ་ཚོགས་བག་ཆགས་དག་ལས་བྱུང་། །སྲིད་པ་སྒྱུ་མ་རྨི་འདྲ་བར། །རྣལ་འབྱོར་ཅན་གྱིས་རྟག་ཏུ་ལྟོས། །སྒྲོ་འདོགས་པ་དང་སྐུར་པ་ཡིས། །སྤངས་པར་ལྟ་བ་རྟག་ཏུ་སྟེ། །ཞི་བའི་ལམ་ནི་དགེར་སོང་ནས། །རྣལ་འབྱོར་སྣ་ཚོགས་རྩོམ་པར་བྱེད། །ལུས་དང་ལོངས་སྤྱོད་གནས་འདྲ་བར། །སྲིད་པ་གསུམ་ལ་མ་རྟོགས་ཤིག །ཟས་ཀྱི་བྱ་བ་བྱས་པ་དང་། །བསམ་པ་མེད་པར་ལུས་བསྲང་ནས། །སངས་རྒྱས་དང་ནི་བྱང་ཆུབ་ལ། །ཡང་དང་ཡང་དུ་ཕྱག་འཚལ་ཏེ། །རྣལ་འབྱོར་ཤེས་པས་མདོ་འདུལ་དང་། །འཐད་པས་ཡང་དག་བསྡུས་ནས་ནི། །ཆོས་ལྔ་དང་ནི་རང་སེམས་དང་། །བདག་མེད་པ་ལ་རྣམ་པར་སྒོམས། །སོ་སོ་རང་རིག་ཆོས་ཉིད་གཙང་། །ས་རྣམས་དང་ནི་སངས་རྒྱས་ས། །རྣལ་
འབྱོར་ཅན་གྱིས་དེ་བསྒོམས་ན། །པད་མོ་ཆེ་ལ་དབང་བསྐུར་འགྱུར། །འགྲོ་བ་ཀུན་ཏུ་རབ་འཁྱམས་པས། །སྲིད་པ་ལ་ནི་སྐྱོ་བའི་ཡིད། །རྣལ་འབྱོར་ཅན་གྱིས་བརྩོན་བྱས་ན། །ཉི་མ་ཟླ་བའི་དབྱིབས་འདྲ་དང་། །འོད་དང་པད་མོ་ལྟ་བུ་དང་། །རི་མོ་ནམ་མཁའི་མེ་འདྲ་མཐོང་། །མཚན་མ་སྣ་ཚོགས་དེ་དག་ནི། །མུ་སྟེགས་ཅན་ལམ་ཁྲིད་པར་བྱེད། །ཉན་ཐོས་དག་དང་རང་རྒྱལ་གྱི། །སྤྱོད་ཡུལ་དུ་ཡང་ལྟུང་བར་བྱེད། །འདི་དག་ཐམས་ཅད་རྣམ་སྤངས་ཤིང་། །སྣང་བ་མེད་པར་ནམ་གྱུར་པ། །དེ་ཚེ་སངས་རྒྱས་ལྷ་ཡི་ཕྱག །ཐམས་ཅད་ཞིང་ནས་བྱུང་བ་ཡིས། །དེ་ཡི་མགོ་ལ་ཉུག་མཛད་དེ། །ཡང་དག་རྗེས་སུ་འགྲོ་བའི་ལྟས། །རྒྱུ་མེད་པ་ལས་དངོས་པོ་ནི། །རྟག་དང་ཆད་པ་སྤངས་པ་ཡི། །ཡོད་མེད་ཕྱོགས་བྲལ་ཡོད་དོ་ཞེས། །དབུ་མར་རྣམ་པར་རྟོག་པར་འགྱུར། །རྒྱུ་མེད་པར་ནི་སྨྲ་བས་ནི། །རྒྱུ་མེད་ཆད་པར་ལྟ་བར་རྟོག །ཕྱི་རོལ་དངོས་པོ་མ་རྟོགས་ཕྱིར། །དབུ་མ་འཇིག་པར་བྱེད་པར་འགྱུར། །ཆད་པའི་ལྟ་བར་འགྱུར་སྙམ་པས། །དངོས་པོ་འཛིན་པ་མི་གཏོང་སྟེ། །སྐུར་པ་དང་ནི་སྒྲོ་འདོགས་པས། །དབུ་མ་དག་ནི་སྟོན་པར་འགྱུར། །སེམས་ཙམ་དུ་ནི་རྟོགས་པ་དང་། །ཕྱི་རོལ་དངོས་པོ་རྣམ་བསལ་བས། །རྣམ་པར་རྟོག་པ་རྣམ་ལྡོག་སྟེ། །ལམ་དེ་ཉིད་ནི་དབུ་མའོ། །སེམས་ཙམ་ཡིན་ཏེ་སྣང་བ་མེད། །སྣང་བ་མེད་པས་མི་སྐྱེ་སྟེ། །དབུ་མ་ཡི་ནི་ལམ་འདི་ཡང་། །ང་དང་གཞན་དག་གིས་ཀྱང་བཤད། །སྐྱེ་བ་དང་ནི་མི་སྐྱེ་དང་། །དངོས་དང་དངོས་མེད་སྟོང་པ་དང་། །དངོས་པོ་རང་བཞིན་མེད་པ་ནི། །གཉིས་པོ་དེ་དག་རྣམ་མི་བརྟག །རྣམ་པར་རྟོག་པ་འཇུག་མེད་པས། །བྱིས་པ་རྣམས་ནི་ཐར་པར་རྟོག །སེམས་འཇུག་པ་ནི་མ་རྟོགས་པས། །འཛིན་པ་གཉིས་ནི་སྤོང་མི་འགྱུར། །རང་གི་སེམས་སྣང་རྟོགས་པའི་ཕྱིར། །འཛིན་པ་རྣམ་གཉིས་སྤོང་བར་འགྱུར། །སྤོང་དང་ཡོངས་སུ་འཛིན་པ་ནི། །རྣམ་རྟོག་འཇིག་པར་བྱེད་མ་ཡིན། །སེམས་སྣང་ཡོངས་སུ་ཤེས་པའི་ཕྱིར། །རྣམ་པར་རྟོག་པ་མི་འཇུག་གོ །རྣམ་པར་རྟོག་པ་མི་འཇུག་པ། །དེ་བཞིན་ཉིད་ནི་སེམས་སྤངས་པའོ། །མུ་སྟེགས་ཅན་གྱི་ཉེས་སྤངས་པ། །འཇུག་པ་གལ་ཏེ་སྣང་གྱུར་ན། །ལྡོག་པ་འཇུག་པར་མི་བྱེད་པས། །མཁས་པ་དག་གིས་དེ་བཟུང་ངོ་། །དེ་རྟོགས་ཕྱིར་ནི་སངས་རྒྱས་སུ། །ང་དང་སངས་རྒྱས་གཞན་གྱིས་བཤད། །རྣམ་པ་གཞན་དུ་རྟོག་ན་ནི། །
མུ་སྟེགས་ཅན་གྱི་སྨྲ་བར་འགྱུར། །མི་སྐྱེ་བ་ལ་སྐྱེ་བ་མང་། །ཤི་འཕོས་མེད་ཅིང་འཆི་འཕོར་འགྱུར། །ཞིང་རྣམས་བྱེ་བར་ཅིག་ཅར་ཡང་། །ཆུ་ཡི་ཟླ་བ་བཞིན་དུ་སྣང་། །གཅིག་དང་མང་པོར་གྱུར་ནས་ནི། །མེ་ཡང་འབར་ཞིང་ཆར་ཡང་འབེབས། །སེམས་ལ་སེམས་ཀྱིར་གྱུར་ནས་ནི། །དེ་དག་སེམས་ཙམ་དུ་ཡང་སྨྲ། །སེམས་རྣམས་ལ་ནི་སེམས་ཙམ་དང་། །སེམས་མེད་པར་ནི་སེམས་ལས་བྱུང་། །རྣམ་པ་སྣ་ཚོགས་གཟུགས་དང་དབྱིབས། །སེམས་ཙམ་དུ་ནི་རྟོགས་པར་རིག །ཐུབ་དབང་དང་ནི་ཉན་ཐོས་གཟུགས། །རང་རྒྱལ་དང་ཡང་འདྲ་བ་དང་། །རྣམ་པ་མང་པོའི་གཟུགས་གཞན་གྱིས། །སེམས་ཙམ་དུ་ནི་དེ་དག་སྨྲ། །གཟུགས་མེད་པས་ནི་གཟུགས་མེད་གཟུགས། །དམྱལ་བ་པ་ལ་དམྱལ་བའི་གཟུགས། །སེམས་ཙམ་གྱི་ནི་རྒྱུ་དག་ཀྱང་། །སེམས་ཅན་རྣམས་ལ་སྟོན་པར་བྱེད། །དེ་དག་ཤིན་ཏུ་གྱུར་ནས་ནི། །སྒྱུ་མ་འདྲ་བའི་ཏིང་འཛིན་དང་། །ཡིད་ཀྱི་ལུས་ཀྱང་དེ་བཞིན་ཏེ། །དབང་དང་ས་བཅུ་རྣམས་ཀྱང་འཐོབ། །རང་གི་རྣམ་རྟོག་ཕྱིན་ཅི་ལོག །སྤྲོས་པ་དང་ནི་གཡོ་བ་དང་། །ཐོས་མཐོང་ཤེས་དང་རྟོགས་པ་དང་། །འདུ་ཤེས་དག་གིས་བུས་པ་བཅིངས། །གཞན་གྱི་དབང་ནི་མཚན་མ་སྟེ། །གང་མིང་དེ་ནི་ཀུན་བརྟགས་པས། །ཀུན་རྟོག་པ་དང་མཚན་མ་ནི། །གཞན་གྱི་དབང་ལས་ཤིན་ཏུ་འབྱུང་། །བློ་ཡིས་རབ་ཏུ་གཞིག་ནས་ནི། །བརྟག་པ་མེད་ཅིང་དབང་ཡང་མེད། །གྲུབ་པའི་དངོས་པོ་ཡོད་མེད་ན། །ཇི་ལྟར་བློ་ཡིས་རྣམ་པར་བརྟག །ཡོད་དང་མེད་པ་སྤངས་པ་ཡི། །གྲུབ་པ་ཡི་ནི་དངོས་པོ་ཡོད། །དངོས་པོ་ཡོད་མེད་རྣམ་གྲོལ་བའི། །རང་བཞིན་གཉིས་སུ་ཇི་ལྟར་འགྱུར། །ཀུན་ཏུ་བརྟགས་པའི་རང་བཞིན་ལ། །རང་བཞིན་དག་ནི་གཉིས་གནས་ཏེ། །བརྟགས་པ་རྣམ་པ་སྣ་ཚོགས་སྣང་། །རྣམ་དག་འཕགས་པའི་སྤྱོད་ཡུལ་ལོ། །བརྟགས་པ་སྣ་ཚོགས་སྣང་བ་ལ། །གཞན་གྱི་དབང་ཞེས་རྟོག་བྱེད་དེ། །རྣམ་པ་གཞན་དུ་རྟོག་ན་ནི། །མུ་སྟེགས་སྨྲ་ལ་གནས་པར་འགྱུར། །རྟོག་པས་བརྟགས་ཤེས་བཤད་པ་སྟེ། །མཐོང་ཕྱིར་རྒྱུ་ལས་བྱུང་བ་ཡིན། །རྣམ་རྟོག་གཉིས་ལས་གྲོལ་བ་ནི། །རྫོགས་པ་ཉིད་ཀྱང་དེ་ཡིན་ནོ།། །།
འཕགས་པ་ལང་ཀར་གཤེགས་པ། བམ་པོ་དགུ་པ་སྟེ་ཐ་མ། ཞིང་དང་སངས་རྒྱས་སྤྲུལ་པ་དང་། །ཐེག་པ་གཅིག་དང་དེ་བཞིན་གསུམ། །མྱ་ངན་འདས་དང་ང་མེད་དེ། །ཐམས་ཅད་སྟོང་པ་སྐྱེ་སྤངས་པའོ། །སངས་རྒྱས་བྱེ་བྲག་སུམ་ཅུ་དྲུག །བྱེ་བྲག་དག་ནི་བཅུ་པོ་དང་། །སེམས་ཅན་སོ་སོའི་སེམས་རྒྱུད་རྣམས། །དེ་དག་ཞིང་གི་སྣོད་ཡིན་ནོ། །ཇི་ལྟར་བརྟགས་པའི་དངོས་པོ་ནི། །སྣ་ཚོགས་བལྟ་བར་སྣང་མོད་ཀྱི། །སྣ་ཚོགས་ཉིད་ནི་དེ་ལ་མེད། །འགྲོ་བ་དེ་བཞིན་ཆོས་སངས་རྒྱས། །ཆོས་ཀྱི་སངས་རྒྱས་སངས་རྒྱས་ཡིན། །ལྷག་མ་དེ་ཡི་སྤྲུལ་པའོ། །སེམས་ཅན་རང་གི་ས་བོན་རྒྱུད། །སངས་རྒྱས་སྣང་བར་མཐོང་བའོ། །མཚན་མ་འབྲེལ་ལས་ནོར་བ་ཡི། །རྣམ་པར་རྟོག་པ་རབ་ཏུ་འཇུག །རྟོག་ལས་དེ་བཞིན་ཉིད་གཞན་མིན། །མཚན་མ་ལས་ཀྱང་རྣམ་རྟོག་མིན། །རང་བཞིན་གྱི་དང་རྫོགས་ལོངས་སྤྱོད། །འཕྲུལ་པ་དང་ནི་སྤྲུལ་པ་གང་། སངས་རྒྱས་མང་པོ་སུམ་ཅུ་དྲུག །རང་བཞིན་གྱི་ནི་སངས་རྒྱས་ཡིན། །སྔོན་པོ་དམར་པོ་ལན་ཚྭ་དང་། །དུང་དང་འོ་མ་ཁ་ར་དང་། །བསྐ་བའི་འབྲས་བུ་མེ་ཏོག་སོགས། །ཇི་ལྟར་ཉི་ལས་འོད་ཟེར་དང་། །རྒྱ་མཚོ་རླབས་དང་ལྡན་པ་ནི། །མི་གཅིག་ཐ་དད་མ་ཡིན་ཏེ། །སེམས་དང་ལྷན་ཅིག་ལྡན་པ་ཡི། །རྣམ་ཤེས་བདུན་པོ་དེ་བཞིན་ནོ། །རྒྱ་མཚོ་ཡོངས་སུ་གྱུར་པ་ནི། །དབའ་རླབས་སྣ་ཚོགས་དེ་དག་སྟེ། །རྣམ་པར་ཤེས་ཞེས་བྱ་བ་སྟེ། །ཀུན་གཞི་དེ་བཞིན་སྣ་ཚོགས་འབྱུང་། །སེམས་དང་ཡིད་དང་རྣམ་ཤེས་པ། །མཚན་ཉིད་དོན་དུ་རབ་ཏུ་བརྟག །བརྒྱད་པོ་ཐ་དད་མ་ཡིན་མཚན། །མཚན་གྱི་གཞི་མེད་མཚན་ཉིད་མེད། །རྒྱ་མཚོ་དང་ནི་དབའ་རླབས་རྣམས། །ཇི་ལྟར་ཁྱད་པར་མེད་པ་ལྟར། །དེ་བཞིན་སེམས་ལ་རྣམ་ཤེས་དག །ཡོངས་སུ་གྱུར་པ་མི་རྙེད་དོ། །སེམས་ཀྱིས་ལས་རྣམས་སོགས་པར་བྱེད། །ཡིད་ཀྱིས་ཀྱང་ནི་རྣམ་པར་སོགས། །རྣམ་པར་ཤེས་པས་རྣམ་པར་རིག །ལྔ་པ་སྣང་ལ་རྟག་པར་བྱེད། །སྔོན་པོ་དམར་པོའི་རྣམ་པར་ནི། །མི་ཡི་རྣམ་པར་ཤེས་པར་གདའ། །དབའ་རླབས་སེམས་དང་ཆོས་འཐུན་པ། །ཇི་སྲིད་ཐུབ་ཆེན་བཤད་དུ་གསོལ། །སྔོན་པོ་དམར་པོའི་རྣམ་པ་རྣམས། །དབའ་རླབས་དག་ལ་མ་མཆིས་ལ། །མཚན་ཉིད་དོན་དུ་བྱིས་པ་ལ། །
སེམས་ཀྱི་འཇུག་པ་དག་ཀྱང་བཤད། །དེ་ལ་འཇུག་པ་མེད་པ་སྟེ། །རང་གི་སེམས་ནི་གཟུང་བ་སྤངས། །གཟུང་བ་ཡོད་ན་འཛིན་པ་ཡང་། །དབའ་རླབས་འཐུན་པར་བསྒྲུབ་པར་འགྱུར། །ལུས་དང་ལོངས་སྤྱོད་གནས་ལྟ་བུར། །མི་ཡི་རྣམ་པར་ཤེས་པ་སྣང་། །དེ་ཕྱིར་དེ་ཡི་འཇུག་པ་ནི། །དབའ་རླབས་དག་དང་འདྲ་བར་སྣང་། །དབའ་རླབས་དངོས་པོར་རྒྱ་མཚོ་ནི། །གར་བྱེད་རྣམ་པར་རིག་འགྱུར་ན། །ཀུན་གཞི་འཇུག་པ་དེ་བཞིན་དུ། །ཅི་ཡི་ཕྱིར་ནི་བློས་མི་རིག །བྱིས་པ་བློ་དང་མི་ལྡན་པས། །ཀུན་གཞི་རྒྱ་མཚོ་ཇི་བཞིན་དུ། །དབའ་རླབས་འབྱུང་བའི་ཆོས་འཐུན་ཕྱིར། །དཔེ་ཡིས་ཉེ་བར་སྦྱར་བ་ཡིན། །བཟང་ངན་བར་མའི་སྐྱེ་བོ་ལ། །གདུགས་འཆར་འགྱུར་བ་ཇི་བཞིན་དུ། །དེ་བཞིན་འཇིག་རྟེན་སྒྲོན་མ་ཁྱོད། །བྱིས་པ་རྣམས་ལ་ཡང་དག་སྟོན། །ཆོས་ལ་རབ་ཏུ་ཞུགས་མཛད་ཅིང་། །ཇི་སླད་དེ་བཞིན་ཉིད་མི་གསུང་། །དེ་སྟེ་དེ་བཞིན་ཉིད་གསུང་ན། །སེམས་ལ་དེ་བཞིན་ཉིད་མ་མཆིས། །ཇི་ལྟར་རྒྱ་མཚོའི་དབའ་རླབས་དང་། །མེ་ལོང་རྨི་ལམ་ཇི་བཞིན་དུ། །ཅིག་ཆའི་དུས་སུ་སྣང་བ་ལྟར། །དེ་བཞིན་སེམས་ཀྱང་རང་ཡུལ་ལ། །ཡུལ་རྣམས་དང་ནི་མི་ལྡན་པས། །རིམ་གྱིས་འཇུག་པས་རབ་ཏུ་འབྱུང་། །རྣམ་པར་ཤེས་པས་རྣམ་པར་རིག །ཡིད་ཀྱིས་ཀྱང་ནི་རློམ་སེམས་བྱེད། །ལྔ་པོ་རྣམས་ལ་སྣང་བར་མངོན། །མཉམ་པར་བཞག་ལ་རིམ་པ་མེད། །རི་མོའི་མཁན་པོ་ལ་ལ་འམ། །རི་མོའི་སློབ་མ་ཇི་ལྟ་བུར། །རི་མོའི་དོན་དུ་ཚོན་འགྱེད་པ། །ང་ཡི་བཤད་པ་དེ་དང་འདྲ། །ཚོན་ལ་རི་མོ་ཡོད་པ་མིན། །པིར་ལ་མེད་ཅིང་སྣོད་ལ་མེད། །སེམས་ཅན་རྣམས་ནི་དྲང་བའི་ཕྱིར། །ཚོན་གྱི་རི་མོ་རྣམ་པར་བརྟག །ཡང་དག་ཡི་གེ་སྤངས་པ་སྟེ། །བཤད་པ་དག་ནི་འཁྲུལ་པའོ། །ཆོས་རྣམས་ལ་ནི་གནས་བཅས་ཤིང་། །རྣལ་འབྱོར་ཅན་ལ་ཡང་དག་བསྟན། །སོ་སོ་རང་རིག་ཡང་དག་ཉིད། །རྟོག་དང་བརྟག་བྱ་སྤངས་པ་ནི། །རྒྱལ་སྲས་རྣམས་ལ་བསྟན་པ་ཡི། །བྱིས་པ་རྣམས་ལ་རྣམ་གཞན་བཤད། །ཇི་ལྟར་སྒྱུ་མ་སྣ་ཚོགས་དག །སྣང་ཡང་ཡོད་པ་མ་ཡིན་པ། །བཤད་པ་སྣ་ཚོགས་འཁྲུལ་པ་ཡང་། །དེ་བཞིན་དུ་ན་བཤད་པ་ཡིན། །གཞན་ལ་གང་ཞིག་བསྟན་པ་དེ། །གཞན་ལ་བཤད་པ་
མ་ཡིན་ཏེ། །ཇི་ལྟར་ནད་པ་ནད་པ་ལ། །སྨན་པས་སྨན་རྣམས་གཏོང་བ་ལྟར། །སངས་རྒྱས་དེ་བཞིན་སེམས་ཅན་ལ། །སེམས་ཙམ་དུ་ཡང་རབ་ཏུ་གསུང་། །ཕྱི་རོལ་བག་ཆགས་ས་བོན་གྱིས། །རྣམ་པར་རྟོག་པ་རབ་ཏུ་འབྱུང་། །གང་གིས་འཛིན་པ་དབང་ཡིན་ཏེ། །གང་བཟུང་དེ་ནི་བརྟགས་པ་ཡིན། །ཕྱི་རོལ་དམིགས་པ་བཟུང་བྱས་ཤིང་། །སེམས་ལའང་བརྟེན་ཏེ་སྐྱེ་བར་འགྱུར། །ནོར་པ་རྣམ་པ་གཉིས་འབྱུང་སྟེ། །གསུམ་པ་ཡི་ནི་རྒྱུ་མེད་དོ། །གང་ལས་ནོར་པ་འབྱུང་བ་དང་། །གང་ལ་བརྟེན་ཏེ་འབྱུང་བ་ནི། །སེམས་ལ་བཅུ་གཉིས་བཅྭ་བརྒྱད་དྲུག །དེ་ཡི་ཕྱིར་ནི་ངས་བཤད་དོ། །བདག་གི་ས་བོན་གཟུང་འབྲེལ་ལས། །བདག་ཏུ་འཛིན་པ་རབ་ཏུ་འབྱུང་། །སེམས་ནི་བརྟག་བྱར་འཇུག་པ་ཡིས། །ཆོས་སུ་འཛིན་པ་སྤོང་བར་འགྱུར། །ཀུན་གཞི་རྣམ་པར་ཤེས་པ་ལས། །རྣམ་པར་ཤེས་པ་གང་འབྱུང་བ། །ནང་གི་སྐྱེ་མཆེད་རྣམས་ཡིན་ཏེ། །སྣང་བ་གང་ཡིན་ཕྱི་རོལ་ཏེ། །ཇི་ལྟར་མི་མཁས་པ་རྣམས་ཀྱིས། །སྐ་དང་སྐྲར་གཟུང་རྨི་ལམ་གཟུགས། །འདུས་བྱས་པ་དང་འདུས་མ་བྱས། །རྟག་པར་རྟོག་སྟེ་དེ་མེད་དོ། །ཇི་ལྟར་དྲི་ཟའི་གྲོང་ཁྱེར་དང་། །སྒྱུ་མ་དང་ནི་སྨིག་རྒྱུའི་ཆུ། །མེད་བཞིན་དུ་ནི་སྣང་བ་ལྟར། །དེ་བཞིན་གཞན་གྱི་དབང་ཡིན་ནོ། །བདག་དང་དབང་པོར་གདགས་པ་ནི། །ངས་ནི་སེམས་ལ་མི་བཤད་དེ། །སེམས་དང་ཡིད་དང་རྣམ་ཤེས་པ། །རང་གི་མཚན་ཉིད་བྲལ་བའོ། །སེམས་དང་ཡིད་དང་རྣམ་ཤེས་དང་། །དེ་བཞིན་བདག་མེད་རྣམ་གཉིས་དང་། །ཆོས་ལྔ་དག་དང་རང་བཞིན་རྣམས། །དེ་ནི་སངས་རྒྱས་སྤྱོད་ཡུལ་ཡིན། །མཚན་ཉིད་ཀྱིས་ནི་གསུམ་དུ་འགྱུར། །བག་ཆགས་གཅིག་གི་རྒྱུ་ལས་བྱུང་། །ཇི་ལྟར་ཚོན་རྩི་གཅིག་པུ་ཡང་། །རྩིག་པ་ལ་ནི་སྣ་ཚོགས་སྣང་། །སེམས་དང་བདག་མེད་གཉིས་པོ་དང་། །ཡིད་དང་རྣམ་པར་ཤེས་པ་དང་། །རང་བཞིན་རྣམས་དང་ཆོས་ལྔ་པོ། །དེ་དག་ང་ཡི་རིགས་ལ་མེད། །སེམས་ཀྱི་མཚན་ཉིད་བྲལ་བ་དང་། །རྣམ་པར་ཤེས་དང་ཡིད་སྤངས་ཤིང་། །ཆོས་ཀྱི་རང་བཞིན་མེད་པ་ནི། །དེ་བཞིན་གཤེགས་པའི་རིགས་ཡིན་ནོ། །ལུས་དང་ངག་དང་ཡིད་རྣམས་ཀྱིས། །དེ་ལ་དགེ་བར་བྱ་བ་ཡིན། །དེ་བཞིན་
གཤེགས་རིགས་དག་པ་སྟེ། །ཀུན་ཏུ་རྒྱུ་བ་སྤངས་པའོ། །མངོན་པར་ཤེས་དང་དབང་གིས་དག །ཏིང་ངེ་འཛིན་དང་སྟོབས་ཀྱིས་བརྒྱན། །ཡིད་ཀྱི་ལུས་ནི་སྣ་ཚོགས་པ། །དེ་བཞིན་གཤེགས་པའི་དགེ་བའི་རིགས། །སོ་སོ་རང་རིག་དྲི་མ་མེད། །རྒྱུ་ཡི་མཚན་ཉིད་སྤངས་པ་སྟེ། །ས་བརྒྱད་པ་དང་སངས་རྒྱས་ས། །དེ་བཞིན་གཤེགས་པའི་རིགས་ཡིན་ནོ། །ལེགས་པའི་བློ་གྲོས་རིང་དུ་སོང་། །ཆོས་སྤྲིན་དེ་བཞིན་གཤེགས་པ་ཡང་། །དེ་དག་སངས་རྒྱས་རྣམས་ཀྱི་རིགས། །ལྷག་མ་ཐེག་པ་གཉིས་འཐོབ་བྱེད། །སེམས་ཅན་རྒྱུད་ཀྱི་བྱེ་བྲག་དང་། །མཚན་ཉིད་ཕྱིར་ཡང་བྱིས་པ་ལ། །སེམས་ཀྱི་དབང་དུ་འགྲོ་བའི་ས། །བདུན་པོ་སངས་རྒྱས་རྣམས་ཀྱིས་བཤད། །ངག་ལུས་སེམས་ཀྱི་གནས་ངན་ལེན། །ས་བདུན་ལ་ནི་མི་འཇུག་སྟེ། །ས་བརྒྱད་ལ་ནི་དེ་ཡི་གནས། །རྨི་ལམ་ཆུ་བོ་མཚུངས་ཤིང་འདྲ། །ས་བརྒྱད་དང་ནི་ལྔ་པ་ལ། །བཟོ་དང་རིག་དང་སྒྱུ་རྩལ་རྣམས། །རྒྱལ་སྲས་རྣམས་ནི་ཤེས་བྱེད་ཅིང་། །སྲིད་པའི་གནས་ན་རྒྱལ་པོའང་བྱེད། །སྐྱེ་དང་མི་སྐྱེ་སྟོང་མི་སྟོང་། །བློ་ལྡན་གྱིས་ནི་བརྟག་མི་བྱ། །རང་བཞིན་ཉིད་དང་རང་བཞིན་མེད། །སེམས་ཙམ་ལ་ནི་ཡོད་པ་མིན། །ཡང་དག་འདི་འོ་ཡང་དག་འདི། །འདི་ནི་ལོག་ཅེས་བརྟག་བྱ་བ། །རང་རྒྱལ་ཉན་ཐོས་རྣམས་ལ་བཤད། །རྒྱལ་བའི་སྲས་ལ་མ་ཡིན་ནོ། །སེམས་ཙམ་ལ་ནི་ཡོད་མིན་ཏེ། །ཡོད་དང་མེད་པ་ཡོད་ལས་མིན། །སྐད་ཅིག་པ་དང་མཚན་ཉིད་མེད། །བརྟགས་པ་དང་ནི་རྫས་ཀྱང་མེད། །ཀུན་རྫོབ་ཏུ་ནི་དངོས་རྣམས་ཡོད། །དོན་དམ་དུ་ནི་རང་བཞིན་མེད། །རང་བཞིན་མེད་ལ་གང་ནོར་བ། །དེ་ནི་ཀུན་རྫོབ་བདེན་པ་ཡིན། །ཆོས་རྣམས་ཐམས་ཅད་མེད་པ་ལ། །ང་ཡིས་རབ་ཏུ་གདགས་པ་བྱས། །བྱིས་པ་རྣམས་ཀྱི་བརྗོད་སྤྱོད་ནི། །ཡང་དག་རྣམ་པར་སྤངས་པ་ཡིན། །བརྗོད་པ་ལས་བྱུང་དངོས་པོ་ཡི། །དོན་གྱི་སྤྱོད་ཡུལ་ཡོད་པའོ། །བརྗོད་པ་ལས་བྱུང་དངོས་པོ་དག །ལྟ་བས་ཡོད་པ་མ་ཡིན་ནོ། །རྩིག་པ་མེད་པར་རི་མོ་དང་། །སྡོང་དུམ་ལ་སོགས་སྤངས་གྲིབ་ལྟར། །དེ་བཞིན་ཀུན་གཞི་དག་པ་ནི། །རླབས་ཀྱིས་རྣམ་པར་མི་མཛེས་སོ། །སེམས་ནི་གར་མཁན་བཞིན་དུ་གནས། །ཡིད་ནི་བཞད་གད་པ་འདྲ་སྟེ། །
ལྔ་དང་བཅས་པའི་རྣམ་པར་ཤེས། །སྣང་བ་ཚོན་དང་འདྲ་བར་རྟོག །ཆོས་བསྟན་རྒྱུ་དང་འདྲ་བ་དང་། །རྒྱུ་དང་འདྲ་བས་གང་སྤྲུལ་པ། །དེ་དག་ངོ་བོའི་སངས་རྒྱས་ཡིན། །ལྷག་མ་སྤྲུལ་པའི་སྐུ་ཡིན་ནོ། །སྣང་བ་རྣམ་པ་སྣ་ཚོགས་མེད། །སེམས་ནི་སྣང་བས་རབ་ཏུ་རྨོངས། །ལུས་དང་ལོངས་སྤྱོད་གནས་འདྲ་བར། །མི་རྣམས་ལ་ནི་ཀུན་གཞི་སྣང་། །སེམས་དང་ཡིད་དང་རྣམ་ཤེས་དང་། །རང་བཞིན་དང་ནི་ཆོས་ལྔ་དང་། །བདག་མེད་གཉིས་པོ་དག་པ་ནི། །རྣམ་པར་འདྲེན་པ་རབ་ཏུ་འཆད། །རྫོགས་པའི་སངས་རྒྱས་གང་འཆད་པ། །སོ་སོ་རང་རིག་སྤྱོད་ཡུལ་ནི། །རྟོག་གེ་ཅན་གྱི་ཡུལ་མ་ཡིན། །ཉན་ཐོས་རྣམས་ཀྱིའང་མ་ཡིན་ནོ། །རིང་དང་ཐུང་ལས་སོགས་འབྲེལ་པ། །གཅིག་གིས་གཅིག་ནི་རབ་ཏུ་འཇུག །ཡོད་པར་སྒྲུབ་པ་མེད་པ་སྟེ། །མེད་པར་སྒྲུབ་པ་ཡོད་པ་ཡིན། །རྡུལ་ཕྲན་དུ་ནི་རྫས་གཞིགས་ཤིང་། །གཟུགས་ལ་རྣམ་པར་མི་རྟོག་གོ །སེམས་ཙམ་དུ་ནི་རྣམ་གཞག་པ། །ལྟ་བ་ངན་པས་མི་དད་དོ། །སྟོང་པ་རྣམ་པར་རྟོག་ཙམ་འམ། །སྟོང་པ་མ་ཡིན་ཞེས་པ་ནི། །དེ་ཉིད་ཡོད་དང་མེད་རྟོག་པ། །བརྟག་པར་བྱ་བའི་དོན་མེད་དོ། །ཡོན་ཏན་རྡུལ་ཕྲན་རྫས་འདུས་པས། །བྱིས་པ་རྣམས་ནི་གཟུགས་ལ་རྟོག །རྡུལ་ཕྲན་རེ་རེ་ཡོད་པ་མིན། །དེ་ཡི་ཕྱིར་ཡང་དོན་མེད་དོ། །རང་གི་སེམས་ནི་སྣང་བའི་དབྱིབས། །མི་རྣམས་ལ་ནི་ཕྱི་རོལ་སྣང་། །ཕྱི་རོལ་གྱི་ནི་སྣང་བ་མེད། །དེ་ཡི་ཕྱིར་ཡང་དོན་མེད་དོ། །སྣ་ཚོགས་སྐྲ་ཤད་འཛིངས་དང་སྒྱུ། །རྨི་ལམ་དྲི་ཟའི་གྲོང་ཁྱེར་དང་། །མགལ་མེ་དང་ནི་སྨིག་རྒྱུ་རྣམས། །མེད་ཀྱང་མིག་ལ་རབ་ཏུ་སྣང་། །རྟག་དང་མི་རྟག་དེ་བཞིན་གཅིག །གཉིས་དང་གཉིས་མིན་དེ་བཞིན་ཏེ། །ཐོག་མ་མེད་ཀྱི་ཉེས་འབྲེལ་བ། །བྱིས་པ་གཏི་མུག་རྟོག་པར་བྱེད། །ཐེག་པ་རྣམ་པར་གཞག་མེད་དེ། །ཐེག་པ་གཅིག་ཏུ་ངས་བཤད་དོ། །བྱིས་པ་རྣམས་ནི་དྲང་བའི་ཕྱིར། །ཐེག་པ་ཐ་དད་ངས་བཤད་དོ། །དེ་བཞིན་རྣམ་པར་གྲོལ་གསུམ་དང་། །ཆོས་ལ་བདག་མེད་པ་ཉིད་དང་། །མཉམ་ཉིད་ཡེ་ཤེས་ཉོན་མོངས་མིན། །དེ་དག་རྣམ་པར་གྲོལ་བས་སྤངས། །ཇི་ལྟར་ཤིང་ནི་རྒྱ་མཚོ་ལ། །རླབས་ཀྱིས་རྣམ་པར་གཡེང་བ་ལྟར། །དེ་བཞིན་ཉན་ཐོས་རྨོངས་པ་ཡང་། །མཚན་ཉིད་ཀྱིས་ཀྱང་རྣམ་པར་
གཡེངས། །མཐར་ཕྱིན་པ་ནི་དེ་ལ་མེད། །ཕྱིར་ཡང་ལྡོག་པར་མི་འགྱུར་ཏེ། །ཏིང་ངེ་འཛིན་གྱི་ལུས་ཐོབ་ནས། །བསྐལ་པའི་བར་དུ་མི་སད་དོ། །བག་ཆགས་ཉོན་མོངས་པ་དང་འབྲེལ། །ཀུན་ནས་ལྡང་དང་རྣམ་པར་བྲལ། །དེ་དག་ཏིང་འཛིན་མྱོས་པས་མྱོས། །ཟག་མེད་པ་ཡི་དབྱིངས་ན་འཁོད། །ཇི་ལྟར་སྐྱེས་བུ་ར་རོ་བ། །ཆང་མེད་ནས་ནི་སངས་འགྱུར་ལྟར། །ང་ཡི་སངས་རྒྱས་ཆོས་ཀྱི་སྐུ། །དེ་དག་དེ་ཚེ་འཐོབ་པར་འགྱུར། །ཇི་ལྟར་གླང་པོ་འདམ་བྱིང་བ། །ཕན་ཚུན་དུ་ནི་མི་རྒྱུག་ལྟར། །ཏིང་ངེ་འཛིན་གྱི་འདམ་བྱིང་བའི། །ཉན་ཐོས་རྣམས་ནི་དེ་བཞིན་འཁོད། །མི་ཡི་དབང་པོ་བྱིན་རླབས་ལས། །དབང་བསྐུར་ཏིང་འཛིན་དག་ལ་སོགས། །སྨོན་ལམ་དག་གིས་རྣམ་སྦྱངས་པ། །དང་པོ་དང་ནི་བཅུ་པོར་འབྱུང་། །རི་བོང་རྭ་དང་ནམ་མཁའ་དང་། །མོ་ཤམ་བུ་ཡང་དེ་བཞིན་ཏེ། །མེད་བཞིན་ཚིག་ཏུ་བརྗོད་པ་ལྟར། །དངོས་ལ་རྟོག་པའང་དེ་བཞིན་ནོ། །འཇིག་རྟེན་བག་ཆགས་རྒྱུ་ལས་བྱུང་། །གང་ནའང་མེད་མིན་ཡོད་མེད་མིན། །བདག་མེད་ཆོས་མཁས་གང་དག་གིས། །མཐོང་ན་རྣམ་པར་གྲོལ་བར་འགྱུར། །མིང་ནི་བཏགས་པའི་རང་བཞིན་ཏེ། །གཞན་ལས་བྱུང་བ་དབང་ལས་སྐྱེས། །དེ་བཞིན་ཉིད་ནི་གྲུབ་པར་ངས། །མདོ་དང་མདོ་ལས་རྟག་ཏུ་བཤད། །ཚིག་དང་ཡི་གེ་མང་པོ་དང་། །མིང་དག་ལ་ཡང་བྱེ་བྲག་ཏུ། །བྱིས་པ་བློ་ངན་ཆགས་པ་ནི། །ཇི་ལྟར་འདམ་ལ་གླང་ཆེན་བཞིན། །ལྷ་ཡི་ཐེག་པ་ཚངས་ཐེག་དང་། །ཉན་ཐོས་ཀྱི་ཡང་དེ་བཞིན་དུ། །རང་རྒྱལ་དེ་བཞིན་གཤེགས་པའི་སྟེ། །ཐེག་པ་དེ་རྣམས་ངས་བཤད་དོ། །ཇི་སྲིད་སེམས་འཇུག་བར་དུ་ནི། །ཐེག་པ་རྣམས་ལ་ཐུག་པ་མེད། །སེམས་ནི་རབ་ཏུ་གྱུར་པ་ནི། །ཐེག་པ་མེད་ཅིང་འགྲོ་བའང་མེད། །སེམས་དང་རྣམ་རྟོག་རྣམ་རིག་དང་། །ཡིད་དང་རྣམ་ཤེས་ཉིད་ཀྱང་སྟེ། །ཀུན་གཞི་སྲིད་གསུམ་གཡོ་བ་རྣམས། །དེ་དག་སེམས་ཀྱི་རྣམ་གྲངས་ཡིན། །ཚེ་དང་དྲོད་དང་རྣམ་ཤེས་དང་། །ཀུན་གཞི་སྲོག་གི་དབང་པོ་དང་། །ཡིད་དང་ཡིད་ཀྱི་རྣམ་ཤེས་པ། །རྣམ་པར་རྟོག་པའི་བྱེ་བྲག་གོ །སེམས་ཀྱིས་སུ་ནི་ལུས་འཛིན་ཏེ། །ཡིད་ནི་རྟག་ཏུ་རློམ་སེམས་བྱེད། །རྣམ་པར་ཤེས་པ་སེམས་ཡུལ་ལ། །རྣམ་ཤེས་བཅས་པས་བྱེ་བྲག་འབྱེད། །སྲེད་
པ་དག་ནི་མར་བཤད་དེ། །མ་རིག་པ་ཡང་ཕར་ཤེས་སོ། །རྣམ་ཤེས་ཡུལ་རྣམས་རིག་པས་ན། །སངས་རྒྱས་སུ་ནི་དེ་ངས་བསྟན། །བག་ལ་ཉལ་ནི་དགྲ་བཅོམ་སྟེ། །ཕུང་པོ་ལྔ་འདུས་དགེ་འདུན་ནོ། །མཚམས་མེད་པར་ནི་མཚམས་བཅད་པས། །དེ་ནི་མཚམས་མེད་ལས་ཡིན་ནོ། །བདག་མེད་གཉིས་དང་ཉོན་མོངས་རྣམས། །དེ་བཞིན་སྒྲིབ་པ་གཉིས་པོ་དང་། །ཤི་འཕོ་བསམ་གྱིས་མི་ཁྱབ་པ། །ཐོབ་པས་དེ་བཞིན་གཤེགས་པ་ཡིན། །གྲུབ་པའི་མཐའ་དང་ཚུལ་རྣམས་དང་། །སོ་སོ་རང་རིག་བསྟན་པ་ཡང་། །བྱེ་བྲག་ཤེས་པ་སུས་མཐོང་བ། །དེ་དག་རྟོག་པའི་དབང་མི་འགྲོ། །ཇི་ལྟར་བྱིས་པས་བརྟགས་པ་ལྟར། །དངོས་པོ་ལ་ནི་བདེན་མེད་ན། །དངོས་པོ་མེད་པར་མཐར་མིན་པར། །རྟོག་གེ་ཅན་དག་ཅིས་མི་འདོད། །སྐྱེ་དང་འཇིག་པར་འབྲེལ་པ་ཡི། །འདུས་བྱས་རབ་ཏུ་མཐོང་བ་ནི། །ལྟ་བ་གཉིས་པོ་རྒྱས་པར་བྱེད། །རྐྱེན་རྣམས་ཤེས་པ་མ་ཡིན་ནོ། །མྱ་ངན་འདས་པ་ཡིད་སྤངས་པ། །གཅིག་པུ་དེ་ནི་བདེན་པ་ཡིན། །འཇིག་རྟེན་བརྟགས་པ་སྒྱུ་མ་དང་། །ཆུ་སྐྱེས་ཕུང་ལྟར་བལྟ་བར་བྱ། །འདོད་ཆགས་དང་ནི་ཞེ་སྡང་དང་། །གཏི་མུག་ཡོད་དེ་གང་ཟག་མེད། །ཕུང་པོ་རྣམས་ནི་སྲིད་ལས་བྱུང་། །རྨི་ལམ་དག་དང་འདྲ་བ་ཡོད། །གང་གི་ནུབ་མོ་ཐུགས་སུ་ཆུད། །གང་ལ་ཡོངས་སུ་མྱ་ངན་འདས། །ངས་ནི་དེ་ཡི་བར་དུ་ཡང་། །ཅུང་ཟད་བསྟན་པའང་མ་ཡོད་དོ། །སོ་སོ་རང་ཆོས་ལུགས་རྣམས་ལ། །དགོངས་ནས་རབ་ཏུ་ངས་བཤད་དེ། །ང་དང་སངས་རྒྱས་དེ་དག་གིས། །ཅུང་ཟད་བྱེ་བྲག་བྱས་པ་མེད། །བདག་ནི་རྫས་དང་འདྲ་བར་ཡོད། །ཕུང་པོ་རྣམས་ནི་མཚན་ཉིད་སྤངས། །དངོས་པོར་ཕུང་པོ་ཡོད་པ་སྟེ། །དེ་དག་ལ་ནི་བདག་མེད་དོ། །ཉོན་མོངས་བག་ལ་ཉལ་བཅས་པས། །སོ་སོར་རྣམ་པར་སྒོམ་པ་དང་། །འགྲོ་བ་རང་གི་སེམས་མཐོང་ན། །སྡུག་བསྔལ་ཀུན་ལས་ཐར་པར་འགྱུར། །གང་གི་རྒྱུ་དང་རྐྱེན་རྣམས་དང་། །མཐའ་བཞི་ཡི་ནི་རིགས་པ་ཡིས། །འཇིག་རྟེན་རབ་དུ་འབྱུང་ཞེས་པ། །དེ་དག་ང་ཡི་ཚུལ་མི་མཁས། །འཇིག་རྟེན་ཡོད་དང་མེད་མི་སྐྱེ། །མེད་མིན་ཡོད་མིན་གང་ནའང་མེད། །རྒྱུ་དང་རྐྱེན་རྣམས་དག་གིས་ཀྱང་། །བྱིས་པ་རྣམས་ནི་ཇི་ལྟར་རྟོག །གང་གི་ཚེ་ན་འཇིག་རྟེན་རྣམས། །ཡོད་མིན་མེད་མིན་ཡོད་མེད་མིན། །མཐོང་ན་དེ་ཚེ་
སེམས་ལྡོག་སྟེ། །བདག་མེད་པ་ཡང་རྟོགས་པར་འགྱུར། །གང་ཕྱིར་རྐྱེན་ལས་བྱུང་བས་ན། །དངོས་པོ་ཐམས་ཅད་མ་སྐྱེས་པས། །རྐྱེན་རྣམས་ཐམས་ཅད་འབྲས་བུ་སྟེ། །འབྲས་བུ་ལ་ནི་སྲེད་མི་འབྱུང་། །འབྲས་བུ་ལས་ནི་གཉིས་འགྱུར་ཕྱིར། །འབྲས་བུ་ལས་ནི་འབྲས་མི་འབྱུང་། །གཉིས་སུ་འགྱུར་བའི་སྐྱོན་གྱི་ཕྱིར། །འབྲས་བུ་ལས་ནི་དངོས་མི་དམིགས། །གང་གི་ཚེ་ན་འདུས་བྱས་རྣམས། །དམིགས་དང་དམིགས་པར་བྱེ་བྲལ་ཞིང་། །སེམས་མེད་སེམས་ཙམ་མཐོང་བ་ལ། །སེམས་ཙམ་དུ་ནི་ངས་བཤད་དོ། །སེམས་ནི་ངོ་བོ་ཉིད་ཀྱི་དབྱིབས། །རྐྱེན་དང་དངོས་པོ་སྤངས་པ་སྟེ། །མཐར་ཕྱིན་ངོ་བོ་ཚངས་པའི་མཆོག །དེ་ལ་ངས་ནི་ཙམ་ཞེས་བཤད། །བདག་ནི་བརྟགས་པའི་བདེན་པ་སྟེ། །རྫས་སུ་ཡོད་པ་མ་ཡིན་ནོ། །ཕུང་པོ་ཕུང་པོ་ཉིད་དེ་བཞིན། །བརྟགས་པས་ཡིན་གྱི་རྫས་སུ་མེད། །མཉམ་པ་ཉིད་ནི་རྣམ་བཞི་སྟེ། །མཚན་ཉིད་རྒྱུ་དང་དངོས་ལས་སྐྱེས། །བདག་མེད་པ་ཡི་མཉམ་ཉིད་དེ། །རྣལ་འབྱོར་ཞུགས་པའི་བཞི་པའོ། །ལྟ་བ་ཐམས་ཅད་རྣམ་བཟློག་པ། །བརྟག་པར་བྱ་དང་རྟོག་པ་སྤངས། །དམིགས་པ་མེད་ཅིང་སྐྱེ་མེད་ལ། །སེམས་ཙམ་དུ་ནི་ངས་བཤད་དོ། །དངོས་མིན་དངོས་པོ་མེད་པའང་མིན། །དངོས་དང་དངོས་མེད་སྤངས་པ་ཡི། །དེ་བཞིན་ཉིད་ནི་སེམས་བྲལ་བ། །སེམས་ཙམ་དུ་ནི་ངས་བཤད་དོ། །སྟོང་པ་མཐའ་དང་དེ་བཞིན་ཉིད། །མྱ་ངན་འདས་དང་ཆོས་ཀྱི་དབྱིངས། །ཡིད་ཀྱི་ལུས་ནི་སྣ་ཚོགས་པ། །སེམས་ཙམ་དུ་ནི་ངས་བཤད་དོ། །རྣམ་པར་རྟོག་པའི་བག་ཆགས་འབྲེལ། །སེམས་ལས་བྱུང་བ་སྣ་ཚོགས་པ། །མི་ལ་ཕྱི་རོལ་སྣང་བ་ནི། །འཇིག་རྟེན་པ་ཡི་སེམས་ཙམ་མོ། །ཕྱི་རོལ་གྱི་ནི་སྣང་བ་མེད། །ལུས་དང་ལོངས་སྤྱོད་གནས་ལྟ་བུར། །སེམས་ནི་སྣ་ཚོགས་པར་སྣང་བ། །སེམས་ཙམ་དུ་ནི་ངས་བཤད་དོ། །ཉན་ཐོས་ཟད་པའི་ཡེ་ཤེས་དང་། །སངས་རྒྱས་རྣམས་ཀྱི་སྐྱེ་འབྱུང་དང་། །རང་རྒྱལ་སངས་རྒྱས་རྣམས་ཀྱི་ནི། །ཉོན་མོངས་མེད་པས་ཤིན་ཏུ་འབྱུང་། །ཕྱི་རོལ་གྱི་ནི་གཟུགས་མེད་དེ། །རང་གི་སེམས་ནི་ཕྱི་རོལ་སྣང་། །སེམས་ནི་ཁོང་དུ་མི་ཆུད་ཕྱིར། །བྱིས་པ་རྣམས་ནི་འདུས་བྱས་རྟོག །རང་སེམས་སྣ་ཚོགས་སྣང་བ་ཡི། །ཕྱི་རོལ་དོན་རྣམས་མི་
ཤེས་པས། །མཐའ་བཞིན་སྦྱར་བའི་གཏན་ཚིགས་ཀྱིས། །བླུན་པོ་དག་གིས་ཟློག་པར་བྱེད། །གཏན་ཚིགས་མེད་དེ་མཐའ་ཡང་མེད། །དཔེ་དང་ཡན་ལག་རྣམས་ཀྱང་མེད། །རང་གི་སེམས་ནི་དོན་རྒྱུད་དེ། །གལ་ཏེ་ཤེས་ན་མཁས་པ་ཡིན། །གང་ཞིག་རྟོག་པས་བརྟག་བྱ་བ། །དེ་ནི་བརྟགས་པའི་མཚན་ཉིད་དེ། །བརྟག་པ་ལ་ནི་རྟེན་བཅས་ཏེ། །རྣམ་པར་རྟོག་པ་རབ་ཏུ་འཇུག །ཕན་ཚུན་མ་གྱེས་འབྲེལ་པ་ཡི། །བག་ཆགས་གཅིག་གི་རྒྱུ་ལས་བྱུང་། །གཉིས་པོ་བློ་བུར་བྱུང་བའི་ཕྱིར། །མི་རྣམས་ཀྱི་ནི་སེམས་མི་སྐྱེ། །སྲིད་པ་གསུམ་ན་གནས་པ་ཡི། །སེམས་དང་སེམས་བྱུང་རྣམ་རྟོག་ཡིན། །གང་ཞིག་དོན་སྣང་འཇུག་པ་ནི། །བརྟགས་པའི་རང་བཞིན་དེ་ཡིན་ཏེ། །སྣང་བའི་ས་བོན་ལྡན་པའི་ཕྱིར། །སྐྱེ་མཆེད་རྣམས་ནི་བཅུ་གཉིས་སོ། །གནས་དང་དམིགས་བྱ་ལྡན་པའི་ཕྱིར། །ལོ་རྒྱུས་སུ་ནི་ངས་བཤད་དོ། །ཇི་ལྟར་མེ་ལོང་གཟུགས་བརྙན་དང་། །རབ་རིབ་ཅན་ལ་སྐྲ་འཛིངས་པ། །དེ་བཞིན་བག་ཆགས་ཀྱིས་གཡོགས་སེམས། །བྱིས་པ་རྣམས་ཀྱིས་མཐོང་བ་ཡིན། །བདག་གིས་རྟོག་པས་བརྟགས་དོན་ལ། །རྣམ་པར་རྟོག་པ་རབ་ཏུ་འཇུག །མུ་སྟེགས་ཅན་གྱིས་བརྟགས་པ་ལྟར། །ཕྱི་རོལ་གྱི་ནི་དོན་མེད་དེ། །ཇི་ལྟར་ཐག་པར་མ་ཤེས་ནས། །བྱིས་པ་སྦྲུལ་དུ་འཛིན་པ་བཞིན། །རང་གི་སེམས་དོན་མ་ཤེས་པས། །ཕྱི་རོལ་གྱི་ནི་དོན་དུ་རྟོག །དེ་ལྟར་ཐག་པ་ཐག་ཉིད་དུ། །གཅིག་དང་ཐ་དད་སྤངས་མོད་ཀྱི། །གང་གིས་ཐག་པར་རྣམ་རྟོག་པ། །དེ་ནི་རང་སེམས་ཉེས་པ་ཡིན། །གང་ལ་གང་གི་དངོས་པོར་ཡང་། །བརྟགས་ན་མི་དམིགས་མ་ཡིན་པ། །དེ་ནི་མེད་པར་ཤེས་མི་བྱ། །ཆོས་ཀྱི་ཆོས་ཉིད་དེ་ཡིན་ནོ། །ཡོད་པའི་ཟླ་དྲངས་མེད་པ་སྟེ། །མེད་པའི་ཟླ་དྲངས་ཡོད་པ་ཡིན། །དེ་ཕྱིར་མེད་པར་ཤེས་མི་བྱ། །ཡོད་པ་ཉིད་དུའང་མི་བརྟག་གོ །གང་འདི་ཀུན་ཏུ་བརྟགས་པ་ལ། །བརྟགས་ན་དེ་ཡི་བདག་ཉིད་མིན། །དེ་ཡི་བདག་ཉིད་མིན་མཐོང་ཞིང་། །ཇི་ལྟར་རྣམ་པར་རྟོག་པ་འཇུག །གཟུགས་ནི་གཟུགས་ཀྱི་བདག་ཉིད་མེད། །དེ་བཞིན་བུམ་པ་རས་ལ་སོགས། །སྣང་བ་ཡོད་པ་མ་ཡིན་པས། །ཁྱོད་ཀྱི་རྣམ་རྟོག་མི་འབྱུང་ངོ་། །ཐོག་མ་མེད་ལྡན་འདུས་བྱས་ལ། །གལ་ཏེ་ཁྱོད་ཀྱི་རྟོག་ནོར་ན། །
དངོས་པོ་དངོས་ཉིད་སུ་ཞིག་གིས། །འཁོར་བྱས་ཐུབ་ཆེན་བདག་ལ་གསུངས། །དངོས་པོ་དངོས་ཉིད་མེད་པ་སྟེ། །སེམས་ཙམ་པོ་ནི་སྣང་བ་ཡིན། །རང་གི་སེམས་ནི་མ་མཐོང་བས། །རྣམ་པར་རྟོག་པ་རབ་ཏུ་འཇུག །ཇི་ལྟར་བྱིས་པས་བརྟགས་པ་ཡི། །བརྟགས་པ་གལ་ཏེ་ཡོད་མེད་ཅིང་། །དེ་ལས་རྣམ་པ་གཞན་ཡོད་ན། །བློས་ཀྱང་རྟོག་པར་མི་རུང་ངོ་། །འཕགས་ལ་གལ་ཏེ་དེ་ཡོད་ན། །དེ་ནི་བྱིས་པས་བརྟགས་མ་ཡིན། །གལ་ཏེ་འཕགས་ལས་དེ་ལོག་ན། །འཕགས་དང་བྱིས་པ་མཉམ་པར་གྱུར། །གང་ཕྱིར་སེམས་ནི་རྣམ་སྦྱངས་པས། །འཕགས་པ་རྣམས་ལ་ནོར་པ་མེད། །སེམས་ཀྱི་རྒྱུད་ནི་མ་དག་པའི། །བྱིས་པ་བརྟགས་ལ་རྟོག་པར་བྱེད། །ཇི་ལྟར་བུ་ལ་མ་ཞིག་ནི། །མཁའ་ལ་ཤིང་ཐོག་ལེན་བྱེད་ཅིང་། །འདི་རེ་བུ་གཅིག་མ་ངུ་བར། །ཤིང་ཐོག་སྣ་ཚོགས་འདི་ཡང་ལོང་། །དེ་བཞིན་སེམས་ཅན་ཀུན་ལ་ངས། །བརྟགས་པའི་འབྲས་བུ་སྣ་ཚོགས་ཀྱིས། །བྲིས་ནས་ཡོད་དང་མེད་པ་ཡི། །ཕྱོགས་སྤངས་ཚུལ་ནི་རབ་ཏུ་བཤད། །གང་གི་མ་བྱུང་རྐྱེན་རྣམས་ཀྱིས། །འབྱུང་སྟེ་འབྲེལ་ལས་མ་ཡིན་ན། །སྔོན་མ་སྐྱེས་པ་ད་སྐྱེས་ཏེ། །བདག་ཉིད་དུ་ཡང་རེད་པ་མེད། །བདག་ཉིད་མ་རེད་སྐྱེས་པ་མེད། །རྐྱེན་མེད་པར་ཡང་གང་ནའང་མེད། །སྐྱེས་པའི་དངོས་པོ་དེ་དག་ཀྱང་། །རྐྱེན་མེད་པར་ཡང་གང་ནའང་མེད། །དེ་ལྟ་བུ་ཡི་མདོར་མཐོང་ན། །གང་ནའང་མེད་མིན་ཡོད་མིན་མིན། །དངོས་པོ་རྐྱེན་ལས་སྐྱེ་བར་ནི། །མཁས་པ་རྣམས་ཀྱིས་མི་བརྟག་གོ །མུ་སྟེགས་ཅན་རྣམས་བྱིས་པ་ལ། །རྐྱེན་གྱིས་གཅིག་དང་ཐ་དད་གཏམ། །ཟེར་ཡང་འགྲོ་བ་རྨི་ལམ་དང་། །སྒྱུ་མ་འདྲ་བར་མི་ཤེས་སོ། །བརྗོད་པའི་ཡུལ་གྱི་ཐེག་པ་ནི། །ཐེག་པ་ཆེན་པོ་བླ་ན་མེད། །ངས་ནི་དོན་ཀྱང་ལེགས་པར་བསྟན། །བྱིས་པ་རྣམས་ཀྱིས་མི་ཤེས་སོ། །གང་དག་འཇུངས་པའི་ཉན་ཐོས་དང་། །མུ་སྟེགས་ཅན་གྱིས་བྱས་པ་ནི། །གང་ཕྱིར་རྟོག་གིས་བཤད་པས་ན། །དེ་དག་དོན་ལ་འཁྲུལ་པའོ། །མཚན་ཉིད་དང་ནི་དངོས་དབྱིབས་དང་། །མིང་ནི་རྣམ་པ་བཞི་པོ་ཡང་། །དེ་དག་ལ་ནི་དམིགས་བྱས་ཤིང་། །རྣམ་པར་རྟོག་པ་རབ་ཏུ་འཇུག །གང་རྣམས་གཅིག་དང་དུ་མ་དང་། །ཚངས་པའི་རིས་ལ་དབང་སྒྱུར་ཞིང་། །ཉི་མ་ཟླ་བའི་འོད་དག་ཀྱང་། །
གང་འཇིག་བྱེད་པ་སྲས་མ་ཡིན། །འཕགས་པའི་མཐོང་བ་ཕུན་སུམ་ཚོགས། །ཡང་དག་ཇི་བཞིན་རྟོགས་རིག་ཅིང་། །འདུ་ཤེས་ཟློག་ལ་མཁས་པ་རྣམས། །རྣམ་པར་རྟོག་པའི་མཆོག་ཕྱིན་ཅིང་། །དེ་ནི་ང་ཡི་བསྟན་པ་ལ། །སྲས་པོ་གྲོལ་བའི་ཕྱག་རྒྱ་སྟེ། །དངོས་དང་དངོས་མེད་རྣམ་གྲོལ་ཞིང་། །འོང་དང་འགྲོ་བ་རྣམ་སྤངས་པའོ། །གཟུགས་ཀྱི་རྣམ་ཤེས་ཕྱིར་ལྡོག་ནས། །གལ་ཏེ་ལས་ནི་འཇིག་འགྱུར་ན། །རྟག་དང་མི་རྟག་པར་མི་འགྱུར། །འཁོར་བ་དག་ཀྱང་མེད་འགྱུར་རོ། །ལྡོག་པའི་ཚེ་ནི་ཞིག་གྱུར་པ། །གཟུགས་ཀྱི་ཡུལ་ལས་ཕྱིར་ལྡོག་སྟེ། །ཡོད་མེད་ཉེས་དང་བྲལ་བའི་ལས། །ཀུན་གཞི་ལ་ནི་རབ་ཏུ་གནས། །སྲིད་པའི་གནས་སུ་རྣམ་ཤེས་དང་། །གཟུགས་ལྷུང་རབ་ཏུ་འཇིག་པ་སྟེ། །གཟུགས་དང་རྣམ་ཤེས་འབྲེལ་པ་ཡི། །ལས་ནི་འཇིག་པར་མི་འགྱུར་རོ། །གལ་ཏེ་དེ་དག་དང་འབྲེལ་པའི། །མི་ཡི་ལས་ནི་འཇིག་འགྱུར་ན། །ལས་ཀྱི་འབྲེལ་པ་ཞིག་པའི་ཕྱིར། །འཁོར་མེད་མྱ་ངན་འདའ་བའང་མེད། །ཞིག་ཀྱང་དེ་དང་ལྷན་ཅིག་ཏུ། །གལ་ཏེ་འཁོར་བར་སྐྱེ་འགྱུར་ན། །གཟུགས་ནི་དེ་དང་འབྲེལ་པའི་ཕྱིར། །ཐ་མི་དད་པས་འབྱུང་བར་འགྱུར། །སེམས་ནི་གཟུགས་སུ་རྣམ་རྟོག་ལས། །གཅིག་པ་མ་ཡིན་ཐ་དད་མིན། །ཡོད་དང་མེད་པའི་ཕྱོགས་སྤངས་ཕྱིར། །དངོས་པོ་རྣམས་ལ་འཇིག་པ་མེད། །ཀུན་ཏུ་བརྟགས་དང་གཞན་གྱི་དབང་། །ཕན་ཚུན་མཚན་ཉིད་ཐ་མི་དད། །གཟུགས་ཀྱི་མི་རྟག་ཉིད་བཞིན་ཏེ། །གཅིག་ལ་གཅིག་ཀྱང་སྐྱེད་བྱེད་པའོ། །གཅིག་དང་ཐ་དད་རྣམ་གྲོལ་བའི། །བརྟགས་པ་ཁོང་དུ་མི་ཆུད་ན། །ཡོད་དང་མེད་པར་ཇི་ལྟར་འགྱུར། །གཟུགས་ཀྱི་མི་རྟག་ཉིད་བཞིན་ནོ། །བརྟགས་པ་ཤིན་ཏུ་མཐོང་འགྱུར་ན། །གཞན་གྱི་དབང་ནི་མི་སྐྱེའོ། །གཞན་གྱི་དབང་ནི་རབ་མཐོང་ན། །བརྟགས་པ་དེ་བཞིན་ཉིད་དུ་འགྱུར། །རྟོག་པ་རྣམ་པར་འཇིག་པ་ན། །ང་ཡི་ཚུལ་ཀྱང་རྣམ་འཇིག་བྱེད། །ང་ཡི་བསྟན་པ་འདི་ལ་ནི། །སྒྲོ་འདོགས་སྐུར་པ་འདེབས་པ་ཡིན། །གང་ན་གང་ཚེ་དེ་འདྲ་བ། །ཆོས་ལ་སུན་འབྱིན་ཡོད་པའི་རྣམས། །ང་ཡི་ཚུལ་ནི་འཇིག་པར་བྱེད། །དེ་དག་ཀུན་དང་འགྲོགས་མི་བྱ། །གང་ཞིག་སྒྲོ་འདོགས་སྐུར་པ་འདེབས། །བརྟགས་པ་རྣམ་པར་འཇིག་བྱེད་དང་། །མཁས་པ་དག་ཏུ་གཏམ་མི་བྱ། །
དགེ་སློང་དོན་ལ་སྤང་བར་བྱ། །སྐྲ་ཤད་འཛིངས་དང་སྒྱུ་འདྲ་དང་། །རྨི་ལམ་འདྲ་ཞིང་དྲི་ཟ་འདྲ། །རྟོག་པ་སྨིག་རྒྱུ་སྣང་འདྲ་ལ། །གང་དག་ཡོད་དང་མེད་ལྟ་བ། །དེ་དག་སྡུད་པར་སུ་སྤྱོད་པ། །སངས་རྒྱས་ཀྱི་ལ་དེ་མི་སློབ། །དེ་དག་མཐའ་གཉིས་ལྷུང་བ་སྟེ། །གཞན་ཡང་རྣམ་པར་འཇིག་པར་བྱེད། །བརྟགས་པའི་དངོས་པོ་རབ་དབེན་ཞིང་། །དངོས་དང་དངོས་མེད་རྣམ་གྲོལ་བ། །རྣལ་འབྱོར་ཅན་ནི་སུས་མཐོང་བ། །དེ་དག་བསྡུ་བར་སྤྱད་པར་གྱིས། །མུ་ཏིག་ནོར་བུ་གསེར་འབྱུང་བའི། །འབྱུང་ཁུངས་འཇིག་རྟེན་ན་ཡོད་པ། །སྣ་ཚོགས་ལས་ཀྱི་རྒྱུས་མ་བྱུང་། །བུས་པ་རྣམས་ཀྱི་འཚོ་བ་ལྟར། །དེ་བཞིན་སེམས་ཅན་རིགས་རྣམས་ནི། །རྣམ་པ་སྣ་ཚོགས་ལས་ཀྱིས་སྤངས། །སྣང་བ་མེད་ཕྱིར་ལས་མེད་དོ། །ལས་ལས་བྱུང་བའི་འགྲོ་བའང་མེད། །ཇི་ལྟར་འཕགས་པས་རྣམ་སྒོམ་ལྟར། །དངོས་པོའི་དངོས་ཉིད་མེད་མོད་ཀྱི། །ཇི་ལྟར་བྱིས་པས་བརྟགས་པ་ལྟར། །དངོས་པོ་དག་ནི་ཡོད་པའོ། །ཇི་ལྟར་བྱིས་པས་བརྟགས་པ་ལྟར། །གལ་ཏེ་དངོས་པོ་མེད་ན་ནི། །དངོས་པོ་ཐམས་ཅད་མེད་པས་ན། །སུ་ལའང་ཉོན་མོངས་པར་འགྱུར་ཏེ། །དངོས་པོ་སྣ་ཚོགས་ཉོན་མོངས་ལས། །འཁོར་བ་དབང་པོ་ཉེར་འགྲོ་བ། །མི་ཤེས་པ་དང་སྲིད་འབྲེལ་ནི། །ལུས་ཅན་རྣམས་ཀྱི་འབྱུང་བར་འགྱུར། །ཇི་ལྟར་བྱིས་པས་བརྟགས་པ་ལྟར། །གང་གི་དངོས་པོ་ཡོད་མིན་པ། །དེ་དག་དབང་པོ་འཇུག་པ་མེད། །རྣལ་འབྱོར་ཉིད་ཀྱང་འཇུག་པ་ཡིན། །བཅོམ་ལྡན་གལ་ཏེ་འཁོར་བ་ཡི། །རྒྱུ་ཡི་དངོས་པོ་མ་མཆིས་ན། །བྱིས་པ་ནན་ཏན་མ་བགྱིས་པར། །བྱེད་པ་སྤངས་པའི་ཐར་པར་འགྱུར། །ཁྱོད་ཀྱི་འཕགས་པ་བྱིས་པའི་ཁྱད། །དངོས་པོ་མེད་ན་ཇི་ལྟར་མཆིས། །རྣམ་པར་ཐར་པ་གསུམ་སྤྱོད་པའི། །འཕགས་པ་དག་ལ་དངོས་པོ་མེད། །ཕུང་པོ་གང་ཟག་ཆོས་རྣམས་དང་། །རང་དང་སྤྱི་ཡི་མཚན་ཉིད་མེད། །དབང་པོ་རྣམས་དང་རྐྱེན་གྱི་རྣམས། །ཉན་ཐོས་དག་ལ་ངས་བཤད་དོ། །རྒྱུ་མེད་པ་དང་སེམས་ཙམ་དང་། །འབྱོར་པ་རྣམས་དང་ས་རྣམས་དང་། །སོ་སོ་རང་གི་དེ་བཞིན་ཉིད། །དག་པ་རྒྱལ་བའི་སྲས་ལ་བཤད། །ང་ཡི་བསྟན་ལ་སུན་འབྱིན་པ། །ངུར་སྨྲིག་གི་ནི་གོས་བགོས་ཤིང་། །འབྲས་བུ་ཡོད་དང་
མེད་སྨྲ་བ། །མ་འོངས་པ་ཡི་དུས་ན་འབྱུང་། །དངོས་པོ་མེད་དེ་རྐྱེན་རྣམས་ཀྱིས། །ཡོད་པ་འཕགས་པའི་སྤྱོད་ཡུལ་ལོ། །བརྟགས་པའི་དངོས་པོ་ཤིན་ཏུ་མེད། །རྟོག་གེ་པ་རྣམས་རྟོག་པར་བྱེད། །མ་འོངས་པ་ཡི་དུས་ན་ནི། །བྱིས་པའི་རང་བཞིན་གཟེགས་ཟན་འབྱུང་། །འབྲས་བུ་མེད་སྨྲའི་ལྟ་ངན་པས། །སྐྱེ་བོ་མང་པོ་རླག་པར་བྱེད། །རྡུལ་ཕྲན་ལས་ནི་འགྲོ་བ་འབྱུང་། །རྡུལ་ཕྲན་རྣམས་ནི་རྒྱུ་མེད་དེ། །རྫས་དགུ་རྣམས་ཀྱང་རྟག་པའོ་ཞེས། །ལྟ་བ་ངན་པས་སྟོན་པར་འགྱུར། །རྫས་རྣམས་ཀྱིས་ནི་རྫས་བརྩམས་ཏེ། །ཡོན་ཏན་གྱིས་ཀྱང་ཡོན་ཏན་ནོ། །དངོས་པོ་དག་གི་དངོས་ཉིད་གཞན། །ཡོད་པ་དག་ནི་འཇིག་པར་བྱེད། །གལ་ཏེ་མ་བྱུང་འབྱུང་འགྱུར་ན། །འཇིག་རྟེན་ཐོག་མ་ཡོད་པར་འགྱུར། །འཁོར་བ་སྔོན་གྱི་མཐའ་མ་ནི། །ངས་ནི་མེད་པར་བཤད་པ་ཡིན། །སྲིད་གསུམ་ཐམས་ཅད་བགྲང་བ་དག །དེ་སྟེ་མ་བྱུང་འབྱུང་ན་ནི། །ཁྱི་དང་རྔ་མོ་བོང་བུ་ལའང་། །རྭ་སྐྱེར་འགྱུར་བ་ཐེ་ཙོམ་མེད། །གལ་ཏེ་གཟུགས་དང་རྣམ་ཤེས་དང་། །མིག་ནི་མ་སྐྱེས་སྐྱེ་འགྱུར་ན། །ཅོད་པན་རེ་ལྡེ་རས་ལ་སོགས། །འཇིམ་པ་བསྒོངས་ལས་འབྱུང་བར་འགྱུར། །རས་ལ་རེ་ལྡེ་ཡོད་པ་མིན། །རྩི་སྐྱང་ལ་ཡང་རས་མེད་དོ། །གཅིག་པོ་ལས་ནི་གཅིག་འབྱུང་ན། །རྐྱེན་རྣམས་ཀྱིས་ཀྱང་ཅིར་མི་འབྱུང་། །འཚོ་བ་དེ་དང་ལུས་དེ་དང་། །གང་ཡང་མ་བྱུང་སྐྱེ་བ་ནི། །དེ་དག་ཐམས་ཅད་གཞན་སྨྲ་བ། །ངས་ཀྱང་དེ་དག་ཤིན་ཏུ་བཤད། །སྔ་མའི་ཕྱོགས་ནི་བརྗོད་བྱ་སྟེ། །དེ་དག་བློ་ནི་བཟློག་པར་བྱ། །དེ་དག་བློ་ནི་བཟློག་བྱས་ནས། །བདག་གི་ཕྱོགས་ནི་ངས་བཤད་དོ། །ང་ཡི་སློབ་མ་རྨོངས་པའི་སྡེ། །ཡོད་མེད་ཕྱོགས་ལ་གནས་འོང་ཞེས། །དེ་ཕྱིར་མུ་སྟེགས་སྨྲ་བ་དག །ངས་ནི་བརྗོད་པར་བྱས་པ་ཡིན། །ཡན་ལག་སེར་སྐྱ་བློ་ངན་པའང་། །འགྲོ་བ་གཙོ་ལས་སྐྱེས་པ་དང་། །ཡོན་ཏན་རྣམ་པར་འགྱུར་བ་ཡང་། །སློབ་མ་རྣམས་ལ་རབ་ཏུ་སྟོན། །རྐྱེན་གྱིས་བྱུང་དང་མ་བྱུང་མིན། །རྐྱེན་རྣམས་ཡོད་པ་མ་ཡིན་ཏེ། །རྐྱེན་རྣམས་དངོས་པོ་མེད་པའི་ཕྱིར། །མ་བྱུང་བ་ནི་མི་འབྱུང་ངོ་། །ཡོད་དང་མེད་པའི་ཕྱོགས་བྲལ་ཞིང་། །རྒྱུ་དང་རྐྱེན་རྣམས་སྤངས་པ་དང་། །སྐྱེ་དང་འཇིག་པ་མེད་པ་དང་། །རང་གི་ཕྱོགས་ཏེ་མཚན་གཞི་
སྤངས། །སྒྱུ་མ་རྨི་ལམ་འདྲ་བ་ཡི། །འཇིག་རྟེན་རྒྱུ་དང་རྐྱེན་སྤངས་པ། །རྟག་ཏུ་རྒྱུ་མེད་པར་མཐོང་ན། །རྣམ་པར་རྟོག་པ་མི་འཇུག་གོ །དྲི་ཟའི་གྲོང་ཁྱེར་སྨིག་རྒྱུ་འདྲ། །རྟག་པར་སྐྲ་ཤད་འཛིངས་པ་བཞིན། །ཡོད་དང་མེད་པའི་ཕྱོགས་བྲལ་ཞིང་། །རྒྱུ་དང་རྐྱེན་གྱིས་སྤངས་པ་ཡི། །སྲིད་པ་རྒྱུ་མེད་པར་མཐོང་ན། །སེམས་ཀྱི་རྒྱུ་ནི་རྣམ་པར་འདག །གང་གི་དངོས་པོ་མེད་པ་དང་། །སེམས་ཙམ་པོ་ཡང་མེད་འགྱུར་ན། །དངོས་པོ་མེད་པར་ཇི་ལྟར་སེམས། །སེམས་ཙམ་དུ་ཡང་མི་རུང་ངོ་། །དངོས་པོ་ལ་ནི་དམིགས་བྱས་ཤིང་། །མི་རྣམས་སེམས་ཀྱང་སྐྱེ་བར་འགྱུར། །རྒྱུ་མེད་པར་ནི་ཇི་ལྟར་སེམས། །སེམས་ཙམ་དུ་ནི་མི་རུང་ངོ་། །འཕགས་པའི་དངོས་པོའི་ཚུལ་ལ་ནི། །དེ་བཞིན་ཉིད་དང་སེམས་ཙམ་ཡོད། །ཡོད་པའང་མིན་པ་དེ་དག་ནི། །ང་ཡི་ཚུལ་ལ་མི་མཁས་པའོ། །གཟུང་དང་འཛིན་པའི་དངོས་པོར་ནི། །གལ་ཏེ་སེམས་ནི་འཇུག་འགྱུར་ན། །དེ་ནི་འཇིག་རྟེན་པ་ཡི་སེམས། །སེམས་ཙམ་དུ་ཡང་མི་རུང་ངོ་། །ལུས་དང་ལོངས་སྤྱོད་གནས་འདྲ་དང་། །གལ་ཏེ་རྨི་ལམ་འདྲ་སྐྱེ་ན། །སེམས་ནི་རྣམ་པ་གཉིས་སུ་འགྱུར། །སེམས་ལ་གཉིས་ཀྱི་མཚན་ཉིད་མེད། །ཇི་ལྟར་རལ་གྲི་རང་སོ་དང་། །ཇི་ལྟར་མཛུབ་མོ་རང་རྩེ་ལ། །མི་གཅོད་རེག་པར་མི་འགྱུར་བ། །དེ་བཞིན་སེམས་ཀྱིས་རང་བལྟའོ། །གཞན་དག་མེད་ཅིང་དབང་ཡང་མེད། །བརྟགས་པ་ཡི་ནི་དངོས་པོ་མེད། །ཆོས་ལྔ་རྣམས་དང་སེམས་གཉིས་ཀྱང་། །སྣང་བ་མེད་ལ་མེད་པའོ། །སྐྱེ་བར་བྱ་དང་སྐྱེ་བྱེད་དང་། །དངོས་པོའི་མཚན་ཉིད་རྣམ་གཉིས་ཏེ། །སྐྱེ་བར་བྱེད་ལས་དགོངས་བྱས་ནས། །རང་བཞིན་མེད་པར་ངས་བཤད་དོ། །རྣམ་པ་སྣ་ཚོགས་དོན་དབྱིབས་སུ། །གལ་ཏེ་རྣམ་པར་རྟོག་སྐྱེ་ན། །རི་བོང་རྭ་དང་ནམ་མཁའ་ཡང་། །དོན་དུ་སྣང་བ་འབྱུང་བར་འགྱུར། །གལ་ཏེ་མ་བརྟགས་དོན་ཡོད་ན། །སེམས་ཀྱང་དོན་དུ་སྣང་བར་འགྱུར། །སེམས་དང་ཐ་དད་བརྟགས་པ་ཡི། །དོན་ནི་ཤིན་ཏུ་མི་དམིགས་སོ། །ཐོག་མ་མེད་ལྡན་འཁོར་བ་ན། །དོན་ནི་གང་ནའང་མེད་པ་སྟེ། །སེམས་ནི་རྒྱས་པར་མ་གྱུར་ན། །ཇི་ལྟར་དོན་དུ་སྣང་བར་འཇུག །གལ་ཏེ་མེད་པས་རྒྱས་འགྱུར་ན། །རི་བོང་རྭ་ཡང་དེར་འགྱུར་རོ། །དངོས་པོ་མེད་པས་རྒྱས་གྱུར་པའི། །རྣམ་
པར་རྟོག་པ་མི་འབྱུང་ངོ་། །ཇི་ལྟར་དེ་ལྟར་མེད་པ་བཞིན། །སྔོན་ཀྱང་དེ་ནི་ཡོད་པ་མིན། །དོན་མེད་པར་ནི་དོན་འབྲེལ་སེམས། །ཇི་ལྟ་བུར་ན་འཇུག་པར་འགྱུར། །དེ་བཞིན་ཉིད་དང་སྟོང་ཉིད་མཐའ། །མྱ་ངན་འདས་དང་ཆོས་ཀྱི་དབྱིངས། །ཆོས་རྣམས་སྐྱེ་བ་མེད་པ་ནི། །དོན་དམ་གྱི་ནི་རང་བཞིན་ནོ། །རྒྱུ་དང་རྐྱེན་ལ་རྟོག་པ་ཡིས། །སྲིད་པ་རྒྱུ་མེད་མ་བྱུང་བར། །རབ་ཏུ་ཤེས་པར་མ་གྱུར་པས། །བྱིས་པ་ཡོད་དང་མེད་པར་ལྷུང་། །སྣང་བ་མེད་པར་སེམས་མངོན་ཏེ། །བྱེ་བྲག་ཐོག་མ་མེད་རྒྱུས་འབྱུང་། །ཐོག་མ་མེད་ནས་དོན་མེད་ན། །བྱེ་བྲག་ཅི་ཡིས་སྐྱེ་བར་འགྱུར། །གལ་ཏེ་མེད་པས་རྒྱས་འགྱུར་ན། །དབུལ་པོ་དག་ཀྱང་ནོར་ལྡན་འགྱུར། །དོན་མེད་ཇི་ལྟར་སེམས་སྐྱེ་བ། །ཐུབ་པས་བདག་ལ་བཤད་དུ་གསོལ། །འདི་དག་ཐམས་ཅད་རྒྱུ་མེད་དེ། །སེམས་ཀྱང་མེད་ཅིང་སྤྱོད་ཡུལ་མེད། །སེམས་ཀྱང་རྒྱས་པར་མི་འགྱུར་ཏེ། །སྲིད་པ་གསུམ་ནི་བྱེད་སྤངས་པའོ། །སྐྱེ་བ་རྣམ་པར་བཟློག་པའི་ཕྱིར། །མི་སྐྱེ་བ་ནི་རབ་ཏུ་བསྒྲུབ། །རྒྱུ་མེད་སྨྲ་བ་བཤད་པ་ནི། །བྱིས་པ་རྣམས་ཀྱིས་མི་རིག་གོ །འདི་དག་ཐམས་ཅད་མ་སྐྱེས་པ། །དངོས་པོ་མེད་པའང་མ་ཡིན་ཏེ། །རྨི་ལམ་སྒྱུ་འདྲ་དྲི་ཟའི་གྲོང་། །རྒྱུ་མེད་པ་ཡི་དངོས་པོ་ཡོད། །མ་སྐྱེས་རང་བཞིན་མེད་པ་དང་། །ཅི་ཕྱིར་སྟོང་པའང་བདག་ལ་གསུངས། །འདུས་པ་དག་ནི་མ་གཏོགས་པར། །ནམ་ཞིག་དངོས་པོ་མི་སྣང་བ། །དེ་ཚེ་མ་སྐྱེས་སྟོང་པ་སྟེ། །རང་བཞིན་མེད་པར་ངས་བཤད་དོ། །རྨི་ལམ་སྐྲ་ཤད་སྒྱུ་མ་དང་། །དྲི་ཟའི་གྲོང་ཁྱེར་སྨིག་རྒྱུ་རྣམས། །རྒྱུ་མེད་པར་ཡང་སྣང་གྱུར་པ། །འཇིག་རྟེན་སྣ་ཚོགས་དེ་བཞིན་ནོ། །དེ་བཞིན་འདུས་པ་རེ་རེར་ཡང་། །སྣང་བ་མེད་པས་ཡོད་མ་ཡིན། །འདུས་པ་མུ་སྟེགས་ལྟ་བ་ལྟར། །འཇིག་པས་རྣམ་པར་འགྱུར་བ་མིན། །རྒྱུ་མེད་སྨྲ་བས་བརྩད་བྱས་ཏེ། །མ་སྐྱེས་པ་ཡང་རབ་ཏུ་བསྒྲུབ། །སྐྱེ་བ་མེད་པ་རབ་བསྒྲུབས་ན། །ང་ཡི་ཚུལ་ནི་མི་འཇིག་གོ །རྒྱུ་མེད་སྨྲ་བ་བསྟན་ན་ནི། །ཇི་ལྟར་ཅི་ལས་ཅི་དག་གིས། །གང་དུ་རྒྱུ་མེད་སྐྱེར་འགྱུར་ཞེས། །མུ་སྟེགས་ཅན་རྣམས་འཇིགས་པ་སྐྱེ། །རྒྱུ་ལས་མ་ཡིན་རྒྱུ་མེད་པར། །ནམ་ཞིག་འདུས་བྱས་མཐོང་བ་ན། །དེ་ཡི་སྐྱེ་འཇིག་སྨྲ་བ་ཡི། །ལྟ་བ་རྣམ་པར་ལྡོག་པར་འགྱུར། །དངོས་པོ་མེད་པ་སྐྱེ་
མེད་དམ། །དེ་སྟེ་རྐྱེན་ལ་བརྟགས་པའམ། །འོན་ཏེ་དངོས་པོའི་མིང་ལགས་སམ། །དོན་མེད་པ་ཡང་བདག་ལ་གསུངས། །དངོས་མེད་མི་སྐྱེ་མ་ཡིན་ཏེ། །རྐྱེན་ལ་བརྟག་པའང་མ་ཡིན་ནོ། །དངོས་པོའི་མིང་ཡང་དེ་མིན་ཏེ། །དོན་མེད་པ་ཡང་མིང་མ་ཡིན། །ཉན་ཐོས་དང་ནི་རང་རྒྱལ་དང་། །ས་བདུན་དུ་ནི་ཕྱིན་རྣམས་དང་། །མུ་སྟེགས་སྤྱོད་ཡུལ་མ་ཡིན་པ། །དེ་ནི་མི་སྐྱེ་མཚན་ཉིད་དོ། །རྒྱུ་དང་རྐྱེན་རྣམས་བཟློག་པ་དང་། །བྱེད་པ་དག་ནི་དགག་པ་དང་། །སེམས་ཙམ་དུ་ནི་རྣམ་གཞག་པ། །སྐྱེ་བ་མེད་པར་ངས་བཤད་དོ། །དངོས་པོ་རྒྱུ་ལས་འབྱུང་མེད་པ། །རྟོག་དང་བརྟག་པ་སྤངས་པ་སྟེ། །ཡོད་མེད་ཕྱོགས་ལས་གྲོལ་བ་ནི། །སྐྱེ་བ་མེད་པར་ངས་བཤད་དོ། །སེམས་ནི་སྣང་དང་རྣམ་བྲལ་བ། །རང་བཞིན་གཉིས་ཀྱང་སྤངས་པ་སྟེ། །གནས་རྣམས་རབ་ཏུ་གྱུར་པ་ནི། །སྐྱེ་བ་མེད་པར་ངས་བཤད་དོ། །ཕྱི་རོལ་དངོས་པོ་དངོས་མེད་མིན། །སེམས་ཀྱང་ཡོངས་སུ་གཟུང་བ་མེད། །ལྟ་བ་ཐམས་ཅད་རབ་སྤངས་པ། །དེ་ནི་སྐྱེ་མེད་མཚན་ཉིད་དོ། །དེ་བཞིན་སྟོང་པ་རང་བཞིན་མེད། །དེ་ལས་བསགས་པའི་ཚིག་ཀུན་བརྟག །ནམ་ཡང་སྟོང་པས་སྟོང་མ་ཡིན། །སྐྱེ་བ་མེད་པའི་སྟོང་པའོ། །རྐྱེན་གྱི་རྣམ་པ་འདུས་པ་ལས། །རབ་ཏུ་འཇུག་ཅིང་ལྡོག་པར་འགྱུར། །འདུས་པ་ལས་ནི་ལོགས་ཤིག་ན། །སྐྱེས་པ་མེད་ཅིང་འགགས་པའང་མེད། །གཅིག་པ་དང་ནི་ཐ་དད་དུ། །ཇི་ལྟར་མུ་སྟེགས་ཅན་རྟོག་བཞིན། །དངོས་པོ་ཐ་དད་མ་ཡིན་དང་། །འདུས་ལས་གུད་ན་གང་ནའང་མེད། །ཡོད་མེད་དངོས་པོ་མི་སྐྱེ་སྟེ། །མེད་མིན་ཡོད་མིན་གང་ནའང་མེད། །དེ་ཕྱིར་གཞན་དུ་འདུས་པ་ནི། །རབ་ཏུ་འཇུག་ཅིང་ལྡོག་པར་འགྱུར། །འདི་ནི་བརྡ་ཙམ་ཉིད་ཡིན་ཏེ། །ཕན་ཚུན་ལྟོས་པ་འབྲེལ་བ་ཡིན། །རྐྱེན་རྣམས་འབྲེལ་ལས་ལོགས་ཤིག་ན། །བསྐྱེད་པར་བྱ་བའི་དོན་མེད་དོ། །བསྐྱེད་པ་མེད་པས་སྐྱེ་བ་མེད། །མུ་སྟེགས་ཅན་གྱི་སྐྱོན་གྱིས་སྤངས། །འབྲེལ་པ་ཙམ་དུ་ངས་བཤད་དེ། །བྱིས་པ་རྣམས་ཀྱིས་མི་རིག་གོ །གང་ན་འབྲེལ་ལས་ལོགས་ཤིག་ན། །དངོས་པོ་བསྐྱེད་པ་ཡོད་ཅེས་པ། །འབྲེལ་པ་རྣམ་པར་འཇིག་པ་སྟེ། །རྒྱུ་མེད་སྨྲ་བར་ཤེས་པར་བྱ། །གང་ན་འབྲེལ་ལས་ལོགས་ཤིག་ན། །དངོས་པོ་སུ་ལ་ཡོད་ན་ནི། །མར་མེ་བཞིན་དུ་རྫས་རིགས་རྣམས། །འབྲེལ་
པ་སྣང་བར་བྱེད་པར་འགྱུར། །འབྲེལ་བ་དག་ལས་ལོགས་ཤིག་ཏུ། །ཆོས་གང་མི་མཁས་རྟོག་པ་ནི། །མ་སྐྱེས་ངོ་བོ་ཉིད་མེད་དེ། །རང་བཞིན་ནམ་མཁའ་ལྟ་བུའོ། །འཕགས་པས་ཐོབ་པའི་ཆོས་ཉིད་ནི། །སྐྱེ་བ་མེད་པ་གཞན་ཡིན་ཏེ། །གང་དེའི་སྐྱེ་བ་མེད་པ་ནི། །དེ་ནི་མི་སྐྱེ་བཟོད་པ་ཡིན། །ནམ་ཞིག་འཇིག་རྟེན་འདི་དག་ཀུན། །འདི་ནི་འབྲེལ་པ་ཙམ་མོ་ཞེས། །འབྲེལ་པ་ཉིད་དུ་མཐོང་བ་ན། །དེ་ན་སེམས་ཀྱང་མཉམ་པར་འཇོག །མི་ཤེས་སྲེད་པ་ལས་ལ་སོགས། །འབྲེལ་པ་དག་ནི་ནང་གི་ཡིན། །འཁོར་ལོ་འཇིམ་ཤིང་སྲུབ་ལ་སོགས། །ས་བོན་འབྱུང་སོགས་ཕྱི་རོལ་ལོ། །འདི་ནི་འབྲེལ་བ་ཙམ་ཡིན་ཏེ། །གང་གི་དངོས་པོ་རྐྱེན་གཞན་ལས། །གང་ཡང་སྐྱེ་བར་འདོད་པ་ནི། །འཐད་དང་ལུང་ལ་དེ་མི་གནས། །གལ་ཏེ་བསྐྱེད་བྱའི་དངོས་མེད་ན། །བློ་ཡང་གང་གི་རྐྱེན་ལས་བྱུང་། །འདི་དག་ཕན་ཚུན་རྐྱེན་གྱུར་པས། །དེ་ཕྱིར་དེ་དག་རྐྱེན་དུ་ཤེས། །དྲོད་གཤེར་སྲ་དང་གཡོ་བ་ཡི། །ཆོས་རྣམས་བྱིས་པས་རྣམ་བརྟགས་ཏེ། །དེ་ནི་འདུས་པ་ཆོས་མ་ཡིན། །དེ་ཕྱིར་ངོ་བོ་ཉིད་མེད་དོ། །ནད་པའི་དབང་དུ་སྨན་པ་དག །བྱ་བ་ཐ་དད་སྟོན་མོད་ཀྱི། །དེ་ལ་གཙུག་ལག་ཐ་དད་མེད། །ནད་ཀྱིས་ཕྱེ་བས་ཐ་དད་དོ། །དེ་བཞིན་ངས་ཀྱང་སེམས་ཅན་རྒྱུད། །ཉོན་མོངས་ཉེས་པའི་སྐྱོན་ཆགས་པ། །དབང་པོ་དག་གི་སྟོབས་ཤེས་ནས། །བྱིས་པ་དག་ལ་ཚུལ་བཤད་དོ། །ཉོན་མོངས་དབང་པོ་ཐ་དད་པས། །ང་ཡི་བསྟན་པ་དབྱེར་མི་ཕྱེད། །ཡན་ལག་བརྒྱད་ལྡན་ཞི་བ་ཡི། །ལམ་ནི་ཐེག་པ་གཅིག་ཡིན་ནོ། །རྫ་དང་སྣམ་བུ་ཅོད་པན་རྭ། །རི་བོང་རྭ་ནི་མེད་པའི་རྒྱུ། །གང་རྒྱུ་ཚོགས་ལས་བྱུང་བ་དེ། །ཁྱོད་ཀྱིས་མེད་པར་ཤེས་མི་བྱ། །ཡོད་པའི་རྒྱུས་ནི་མེད་པ་སྟེ། །མེད་པ་མེད་པར་མི་རུང་ངོ་། །ཡོད་པ་མེད་པའི་ཟླ་ལས་བྱུང་། །ཕན་ཚུན་ཟླ་ཡི་རྒྱུ་ཡིན་ནོ། །ཅི་ཞིག་ལ་ནི་གནས་བཅས་ཤིང་། །ཅི་ཞིག་སྣང་བར་སུས་བསམས་པ། །གང་ལ་རྟེན་པ་ཅི་ཞིག་ནི། །རྒྱུ་མེད་པ་སྟེ་རྒྱུ་མེད་མིན། །གལ་ཏེ་གཞན་ལ་དེ་རྟེན་ཅིང་། །དེ་ཡང་གཞན་ལ་སྣང་གྱུར་ན། །ཐུག་པ་མེད་པར་རབ་འགྱུར་ཏེ། །ཅི་ཞིག་ཅི་ཡང་མེད་པར་འགྱུར། །ཇི་ལྟར་ལོ་མ་ཤིང་སོགས་ལ། །རྟེན་ཅིང་སྒྱུ་མ་སྣང་བ་ལྟར། །དེ་བཞིན་
དངོས་ལ་བརྟེན་བྱས་ཤིང་། །མི་རྣམས་ལ་ནི་སྣ་ཚོགས་སྣང་། །སྒྱུ་མའི་དྲ་བ་ལོ་མ་མིན། །གྱོ་མོ་མ་ཡིན་ཤིང་མ་ཡིན། །བྱིས་པ་རྣམས་ཀྱིས་སྒྱུ་མར་མཐོང་། །སྒྱུ་མ་བྱེད་པས་གནས་མཐོང་ངོ་། །དེ་བཞིན་དངོས་ལ་བརྟེན་བཅས་ཏེ། །ཅི་ཞིག་བྱེ་བྲག་ཏུ་འགྱུར་ན། །སྣང་བའི་ཚེ་ན་གཉིས་མེད་པར། །ཅི་ཞིག་ཏུ་ནི་ཇི་ལྟར་བརྟག །རྣམ་པར་རྟོག་ལ་རྣམ་བརྟགས་མེད། །རྣམ་པར་རྟོག་པའང་མེད་པ་སྟེ། །རྣམ་པར་རྟོག་ལ་མེད་པས་ན། །མྱ་ངན་འདས་མེད་འཁོར་བ་མེད། །རྣམ་པར་རྟོག་པ་མེད་པས་ན། །རྣམ་པར་རྟོག་པ་མི་འཇུག་གོ །མ་ཞུགས་ན་ནི་ཇི་ལྟར་སེམས། །སེམས་ཙམ་དུ་ནི་མི་རུང་ངོ་། །བསམ་པ་དུ་མ་ཐ་དད་ཕྱིར། །བསྟན་པ་ལ་ནི་སྙིང་པོ་མེད། །སྙིང་པོ་མེད་ཕྱིར་ཐར་པ་མེད། །འཇིག་རྟེན་རྣམ་པ་སྣ་ཚོགས་མེད། །ཇི་ལྟར་བྱིས་པས་བརྟགས་པ་ཡི། །ཕྱི་རོལ་གྱི་ནི་སྣང་བ་མེད། །སེམས་ནི་གཟུགས་བརྙན་བཞིན་དུ་སྣང་། །བག་ཆགས་ཀྱིས་ནི་མགོ་ཡུང་བསླང་། །ཡོད་མེད་མ་བྱུང་མེད་པས་ན། །དངོས་པོ་ཐམས་ཅད་མ་སྐྱེས་ཏེ། །འདི་དག་ཐམས་ཅད་སེམས་ཙམ་མོ། །རྟོག་པ་རྣམས་ཀྱིས་རྣམ་པར་སྤངས། །བྱིས་པ་རྐྱེན་གྱིས་དངོས་པོར་འཆད། །མཁས་པ་དག་ནི་མ་ཡིན་ནོ། །རང་བཞིན་སེམས་དང་བྲལ་བ་སྟེ། །སེམས་ནི་འཕགས་པར་ཉེར་འགྲོ་ཞིང་། །གྲངས་ཅན་གཅེར་བུ་ཁྱད་པར་ཅན། །དེ་བཞིན་བྲམ་ཟེ་ཕྱུགས་བདག་རྣམས། །ཡོད་དང་མེད་པའི་ལྟ་བར་ལྷུང་། །རྣམ་པར་དབེན་པའི་དོན་གྱིས་སྤངས། །རང་བཞིན་མེད་དང་མ་སྐྱེས་དང་། །སྟོང་པ་སྒྱུ་མ་དྲི་མེད་རྣམས། །སངས་རྒྱས་རྣམས་དང་ཁྱོད་ཀྱིས་ཀྱང་། །སུ་ཡི་ཕྱིར་ནི་དེ་དག་བཤད། །རྣལ་འབྱོར་ཅན་ནི་སེམས་བཙལ་ལ། །ལྟ་བ་རྟོག་གེ་རྣམ་སྤངས་པའི། །སངས་རྒྱས་རྣམས་ཀྱིས་རྣལ་འབྱོར་བཤད། །ངས་ཀྱང་རབ་ཏུ་བཤད་པ་ཡིན། །གལ་ཏེ་འདི་ཀུན་སེམས་ཡིན་ན། །འཇིག་རྟེན་ཅི་ལ་རབ་ཏུ་གནས། །ཅི་ཕྱིར་མི་རྣམས་འོང་འགྲོ་བར། །ས་ལ་རབ་ཏུ་སྣང་བར་གྱུར། །ཇི་ལྟར་བྱ་རྣམས་ནམ་མཁའ་ལ། །རྟོག་པས་ཀུན་ཏུ་བསྐྱོད་པས་ན། །གནས་མེད་རྟེན་པ་མེད་བཞིན་དུ། །ས་ཡི་སྟེང་བཞིན་དེ་དག་སྤྱོད། །དེ་བཞིན་ལུས་ཅན་ཐམས་ཅད་ཀྱང་། །རྣམ་པར་རྟོག་པས་བསྐྱོད་པས་ན། །དེ་དག་བདག་གི་སེམས་ལ་རྒྱུ། །ནམ་མཁའ་
ལ་ནི་བྱ་བཞིན་ནོ། །ལུས་དང་ལོངས་སྤྱོད་གནས་སྣང་བའི། །སེམས་ནི་རབ་ཏུ་འཇུག་བཤད་པ། །སྣང་དང་འཇུག་པ་ཇི་ལྟར་ཅིས། །སེམས་ཙམ་པོ་ནི་བདག་ལ་གསུངས། །ལུས་དང་ལོངས་སྤྱོད་གནས་རྣམས་དང་། །སྣང་དང་འཇུག་པ་བག་ཆགས་དང་། །སྣང་དང་འཇུག་པར་རྣམ་རྟོག་པས། །མི་བརྩོན་རྣམས་ལ་སྐྱེ་བར་འགྱུར། །དངོས་པོ་རྣམ་པར་བརྟགས་པ་ཡུལ། །སེམས་ནི་ཡུལ་ལས་བྱུང་བ་སྟེ། །སྣང་བའི་སེམས་ནི་ཡོངས་ཤེས་པས། །རྣམ་པར་རྟོག་པ་མི་འཇུག་གོ །བཏགས་པའི་མིང་ནི་མིང་བྲལ་དང་། །བློ་དང་རིག་བྱ་སྤངས་པར་ནི། །འདུས་བྱས་ནམ་ཞིག་མཐོང་གྱུར་པ། །དེ་ཡི་ཚེ་ན་གྲོལ་བར་འགྱུར། །མིང་ལ་མིང་ནི་རྣམ་སྒོམ་པར། །ཤེས་པར་བྱ་བ་དེ་ཙམ་སྟེ། །གང་དག་གཞན་དུ་ཤེས་བྱེད་པ། །དེ་དག་མི་ཤེས་ཤེས་བྱེད་མིན། །ཆོས་ལྔ་རྣམས་དང་རང་བཞིན་དང་། །རྣམ་པར་ཤེས་པ་བརྒྱད་རྣམས་དང་། །བདག་མེད་གཉིས་ཀྱི་ནང་དུ་ནི། །ཐེག་པ་ཆེན་པོ་ཐམས་ཅད་འདུས། །གང་གི་ཚེ་ན་འགྲོ་བ་དག །བློ་དང་རིག་བྱས་དབེན་མཐོང་བ། །དེ་ཚེ་མིང་ལ་མིང་རྟོག་པ། །མངོན་པར་འཇུག་པར་མི་འགྱུར་རོ། །སེམས་མཐོང་ཕྱིར་ནི་བྱ་བ་དང་། །ཡི་གེ་རྟོག་པ་ཕྱིར་ལྡོག་གོ །རང་གི་སེམས་ནི་མ་མཐོང་ཕྱིར། །རྣམ་པར་རྟོག་པ་རབ་ཏུ་འཇུག །གཟུགས་མེད་པ་ཡི་ཕུང་པོ་བཞིན། །དེ་དག་ལས་ནི་བགྲང་བ་མེད། །འབྱུང་བ་ཐ་དད་མཚན་གྱི་གཟུགས། །ཇི་ལྟར་གཟུགས་རྣམས་མང་པོར་འགྱུར། །མཚན་ཉིད་ཡོངས་སུ་བཏང་བའི་ཕྱིར། །འབྱུང་ལས་གྱུར་མིན་འབྱུང་བ་མིན། །འོན་ཏེ་མཚན་ཉིད་གཞན་གཟུགས་ན། །ཕུང་པོ་རྣམས་ཀྱིས་ཅིར་མི་སྐྱེ། །ཕུང་པོ་སྐྱེ་མཆེད་རྣམ་གྲོལ་བ། །གང་ཚེ་མཚན་ཉིད་མེད་མཐོང་ཞིང་། །ཆོས་ལ་བདག་མེད་མཐོང་བའི་ཕྱིར། །དེ་ཚེ་སེམས་ནི་ལྡོག་པར་འགྱུར། །ཡུལ་དང་དབང་པོ་ཐ་དད་ཕྱིར། །རྣམ་པར་ཤེས་པ་བརྒྱད་དུ་སྐྱེ། །མཚན་ཉིད་ཀྱིས་ནི་གསུམ་ཡིན་ཏེ། །སྣང་བ་མེད་ལ་ལྡོག་པར་འགྱུར། །ཀུན་གཞི་ཡིད་ཀྱི་བདག་ཡིན་ཏེ། །ཤེས་པ་ཉིད་ནི་བདག་གི་ཡིན། །གཉིས་སུ་འཛིན་པས་རབ་ཏུ་འཇུག །ཡོངས་སུ་རྟོག་ན་ལྡོག་པར་འགྱུར། །གཅིག་དང་ཐ་དད་རྣམ་གྲོལ་
ཞིང་། །རྒྱུ་བ་མེད་པར་ནམ་མཐོང་བ། །དེ་ཚེ་བདག་དང་བདག་གིར་ཡང་། །གཉིས་སུ་རྟོག་པར་མི་འགྱུར་རོ། །མ་ཞུགས་པར་ནི་རྒྱས་མི་འགྱུར། །རྣམ་པར་ཤེས་པའི་རྒྱུ་ཡང་མིན། །རྒྱུ་དང་འབྲས་བུ་སྤངས་པ་ཡི། །འགགས་པ་འཇུག་པར་མི་འགྱུར་རོ། །ཅི་ཡི་ཕྱིར་ན་འཇིག་རྟེན་རྣམས། །རྣམ་རྟོག་སེམས་ཙམ་བདག་ལ་གསུངས། །རྒྱུ་དང་རྣམ་པར་འབྲེལ་པ་ཡི། །མཚན་དང་མཚན་གཞི་རྣམ་སྤངས་པ། །རང་གི་སེམས་ནི་སྣ་ཚོགས་སྣང་། །མཐོང་བ་ལྟ་བུར་རྣམ་པར་བརྟགས། །སེམས་ཀྱི་སྣང་བ་ཤེས་པ་དང་། །སེམས་ཀྱི་དོན་གཞན་གཟུང་བའི་ཕྱིར། །བློ་ཡིས་གང་ཚེ་མ་མཐོང་ན། །མེད་པའི་ལྟ་བར་འགྱུར་བ་ནི། །སེམས་སུ་འཛིན་པར་གྱུར་པའི་ཕྱིར། །ཇི་ལྟར་དེ་ཡི་ཡོད་མི་འབྱུང་། །རྣམ་རྟོག་དངོས་མིན་དངོས་མེད་མིན། །དེ་ཕྱིར་ཡོད་པ་མི་སྐྱེ་སྟེ། །སེམས་སྣང་ཡོངས་སུ་ཤེས་པའི་ཕྱིར། །རྣམ་རྟོག་འཇུག་པར་མི་འགྱུར་རོ། །རྣམ་པར་རྟོག་པ་མི་འཇུག་པ། །རབ་ཏུ་གྱུར་པ་གནས་མེད་པའོ། །བཞི་ཡི་ཕྱོགས་རྣམས་ཕྱིར་བཟློག་ཅིང་། །གལ་ཏེ་དངོས་པོ་རྒྱུ་ཅན་ན། །མིང་གི་བྱེ་བྲག་གཞན་དེ་བྱས། །དེ་ནི་བསྒྲུབས་པ་མ་ཡིན་ནོ། །རྒྱུ་དང་རྐྱེན་རྣམས་འདུས་པ་དང་། །རྒྱུ་ནི་བཀག་པར་གྱུར་པའི་ཕྱིར། །དེ་དག་དོན་གྱིས་དཔོག་པར་འགྱུར། །ཡང་ན་རྒྱུ་ལས་བྱུང་བར་འགྱུར། །གལ་ཏེ་རྐྱེན་རྣམས་མི་རྟག་ན། །རྟག་པའི་ཉེས་པ་བཟློག་པར་འགྱུར། །བྱིས་པ་རྣམས་ནི་མི་རྟག་ཕྱིར། །འབྱུང་བ་མེད་ཅིང་འཇིག་པ་མེད། །གང་ཡང་འཇིག་པར་འགྱུར་བཞིན་དུ། །རྒྱུར་གྱུར་པ་ནི་མི་སྣང་ངོ་། །མི་མཐོང་བ་ནི་ཇི་ལྟར་ཅིས། །མི་རྟག་པ་ལས་སྲིད་མི་འབྱུང་། །བསྡུ་བ་དག་གིས་སེམས་ཅན་གདུལ། །ཚུལ་ཁྲིམས་ཀྱིས་ནི་དབང་དུ་བྱ། །ཤེས་རབ་དག་གིས་ལྟ་བ་གཞིག །རྣམ་པར་ཐར་པས་ཤིན་ཏུ་སྤེལ། །འདི་ཀུན་འཇིག་རྟེན་རྒྱང་པན་ཏེ། །མུ་སྟེགས་ཅན་གྱིས་གང་བཤད་བརྫུན། །རྒྱུ་དང་འབྲས་བུ་ཡོད་ལྟ་བས། །རང་གི་གྲུབ་པའི་མཐའ་ཡང་མེད། །ང་འདྲ་གཅིག་པུ་རང་གྲུབ་མཐའ། །རྒྱུ་དང་འབྲས་བུ་རྣམ་པར་སྤངས། །འཇིག་རྟེན་རྒྱང་པན་རྣམ་བྲལ་བ། །སློབ་མའི་སྡེ་ལ་བཤད་པར་བྱ། །སེམས་ཙམ་སྟེ་ནི་སྣང་བ་མེད། །རྟག་དང་
ཆད་པ་སྤངས་པ་ཡི། །གཟུང་དང་འཛིན་པའི་དངོས་པོ་རུ། །སེམས་ནི་རྣམ་པ་གཉིས་སུ་སྣང་། །ཇི་སྲིད་སེམས་ནི་འཇུག་པའི་བར། །དེ་སྲིད་འཇིག་རྟེན་རྒྱང་པན་ཡིན། །འཇིག་རྟེན་རང་གི་སེམས་མཐོང་ན། །རྣམ་པར་རྟོག་པ་མི་འཇུག་གོ །འདུ་བ་འབྲས་བུ་དོན་གྲུབ་པ། །ཟད་པ་འབྲས་བུ་མ་མཐོང་བ། །འདུ་དང་ཟད་པ་ཡོངས་ཤེས་ན། །རྣམ་པར་རྟོག་པ་མི་འཇུག་གོ །རྟག་དང་མི་རྟག་བྱས་པ་དང་། །མ་བྱས་པ་དང་གཞན་མིན་གཞན། །དེ་ལ་སོགས་པ་ཐམས་ཅད་ནི། །འཇིག་རྟེན་རྒྱང་པན་ཚུལ་ཡིན་ནོ། །ལྷ་དང་ལྷ་མ་ཡིན་དང་མི། །བྱོལ་སོང་ཡི་དགས་གཤིན་རྗེའི་གནས། །གང་དུ་ལུས་ཅན་སྐྱེ་བ་ཡི། །འགྲོ་བ་རྣམ་པ་དྲུག་ཏུ་བཤད། །རབ་འབྲིང་ཐ་མའི་ལས་རྣམས་ཀྱིས། །དེ་དག་ཏུ་ནི་སྐྱེ་བར་འགྱུར། །དགེ་བ་ཐམས་ཅད་བསྲུངས་ན་ནི། །ཁྱད་པར་དུ་ཡང་ཐར་པར་འགྱུར། །ཁྱོད་ཀྱིས་དགེ་སློང་སྡེ་རྣམས་ལ། །སྐད་ཅིག་སྐད་ཅིག་དག་ལ་ཡང་། །ཚེ་དང་སྐྱེ་དང་འཆི་བཤད་པ། །དགོངས་པ་བདག་ལ་བཤད་དུ་གསོལ། །ཇི་ལྟར་གཟུགས་ལས་གཟུགས་གཞན་བཞིན། །སེམས་ཀྱང་འདུས་ནས་འཇིག་པར་འགྱུར། །དེའི་ཕྱིར་སློབ་མ་རྣམས་ལ་ནི། །སྐད་ཅིག་གཅིག་ནས་གཅིག་སྐྱེ་བཤད། །གཟུགས་དང་གཟུགས་ལ་རྣམ་རྟོག་པ། །འབྱུང་དང་འཇུག་པ་དེ་བཞིན་ནོ། །རྣམ་པར་རྟོག་པ་སྐྱེ་བ་ཡིན། །རྣམ་པར་རྟོག་པ་གཞན་མེད་དོ། །སྐད་ཅིག་སྐད་ཅིག་གང་ངས་བཤད། །འདི་ནི་རྐྱེན་དུ་བཤད་པ་ཡིན། །གཟུགས་སུ་འཛིན་པ་རྣམ་སྤངས་པ། །སྐྱེ་བ་མེད་ཅིང་འཇིག་པ་མེད། །རྐྱེན་དང་རྐྱེན་ལས་སྐྱེས་པ་རྣམས། །མ་རིག་དེ་བཞིན་ཉིད་ལ་སོགས། །ཆོས་གཉིས་ཀྱིས་ནི་འཇུག་པར་འགྱུར། །མི་གཉིས་དེ་བཞིན་ཡིད་གཉིས་སོ། །རྐྱེན་དང་རྐྱེན་ལས་སྐྱེས་པ་ཡི། །ཆོས་རྣམས་གལ་ཏེ་ཁྱད་མེད་ན། །རྟག་ལ་སོགས་པ་འབྲས་བུར་འགྱུར། །རྐྱེན་རྣམས་ཀྱང་ནི་རྒྱུར་འགྱུར་རོ། །རྒྱུ་དང་འབྲས་བུ་བཟང་བའི་ཕྱིར། །ཁྱོད་དང་སངས་རྒྱས་རྣམས་ཀྱི་གསུང་། །མུ་སྟེགས་ཅན་དང་ཁྱད་མེད་འགྱུར། །དེ་ཕྱིར་ཐུབ་ཆེན་འཕགས་མ་ཡིན། །འདོམ་གང་ཙམ་གྱི་ལུས་ལ་ནི། །འཇིག་རྟེན་ཀུན་འབྱུང་འཇིག་རྟེན་དང་། །འགོག་པར་འགྲོ་བའི་
ལམ་གྱི་རྣམས། །རྒྱལ་སྲས་རྣམས་ལ་རབ་ཏུ་བཤད། །རང་བཞིན་གསུམ་ལ་འཛིན་པ་ཡིས། །སོ་སོའི་སྐྱེ་བོའི་གཟུང་འཛིན་ལྟ། །འཇིག་རྟེན་འདས་དང་འཇིག་རྟེན་པའི། །ཆོས་རྣམས་རྣམ་པར་རྟོག་པར་བྱེད། །དེ་ཕྱིར་སྔོན་ལ་བལྟ་བྱ་སྟེ། །རང་བཞིན་རྣམས་ནི་སྨོས་པར་བྱ། །ལྟ་བ་རྣམས་ནི་བཟློག་པའི་ཕྱིར། །རང་བཞིན་རྣམ་པར་མི་བརྟག་གོ །ཉམས་པའི་ཉེས་ཕྱིར་སྡོམ་པ་མེད། །སེམས་ཀྱང་འཇུག་པར་མི་འགྱུར་རོ། །གཉིས་སུ་འཛིན་ཕྱིར་འཇུག་པར་འགྱུར། །དེ་བཞིན་ཉིད་ནི་གཉིས་མེད་ཡིན། །མི་ཤེས་པ་དང་སྲེད་པ་ལས། །རྣམ་ཤེས་ལ་སོགས་ཚུལ་མ་སྐྱེས། །མཐར་ཐུག་མེད་དང་བྱས་པ་དང་། །སྲིད་པ་བྱས་ལས་མི་སྐྱེའོ། །དངོས་པོ་རྣམས་ཀྱི་འཇིག་པ་ནི། །མི་མཁས་རྣམས་ཀྱིས་རྣམ་བཞིར་བཤད། །རྣམ་པར་རྟོག་པ་གཉིས་འཇུག་ཕྱིར། །དངོས་པོ་ཡོད་དང་དངོས་མེད་མེད། །མཐའ་བཞི་དག་ལས་གྲོལ་བ་ཡི། །ལྟ་བ་གཉིས་པོ་རྣམ་སྤངས་པ། །མཐོང་ནས་རྣམ་རྟོག་གཉིས་འཇུག་ནི། །མངོན་པར་འཇུག་པར་མི་འགྱུར་རོ། །མ་སྐྱེས་པ་ཡི་དངོས་པོ་རྣམས། །བློ་ནི་རྣམ་པར་ལྡང་བའི་ཕྱིར། །སྐྱེས་པའི་དངོས་པོ་དག་ལ་ཡང་། །དེ་དང་འདྲ་ཕྱིར་མི་བརྟག་གོ །ཇི་ལྟར་བདག་དང་གཞན་རྣམས་ནི། །རྟག་ཏུ་ཡོད་མེད་མ་འདྲེས་པར། །ལྟ་བ་རྣམ་གཉིས་བཟློག་པ་ཡི། །རིགས་པ་མགོན་པོ་བདག་ལ་གསུངས། །མུ་སྟེགས་སྨྲ་དང་མ་འདྲེས་ཤིང་། །རང་རྒྱལ་ཉན་ཐོས་རྣམས་སྤངས་པ། །རྒྱལ་སྲས་རྣམས་ནི་མི་འཇིག་ཕྱིར། །རྒྱལ་བས་མངོན་རྟོགས་སྤྱོད་པ་དག །རྣམ་ཐར་རྒྱུ་དང་རྒྱུ་མེད་ཀྱང་། །སྐྱེ་བ་མེད་པར་མཚན་ཉིད་གཅིག །རྣམ་གྲངས་གཞན་གྱིས་དེ་དག་སླུ། །མཁས་པ་རྣམས་ཀྱིས་རྟག་ཏུ་སྤང་། །སྤྲིན་དང་སྤྲིན་གྱི་ཕུང་པོ་འཇའ་འདྲ་བ། །སྨིག་རྒྱུ་སྐྲ་ཤད་འཛིངས་པ་སྒྱུ་མ་འདྲ། །དངོས་པོ་ཐམས་ཅད་རང་གི་རྟོག་བྱུང་བ། །མུ་སྟེགས་འགྲོ་བ་རང་གི་རྒྱུ་ཡིས་རྟོག །སྐྱེ་བ་མེད་དང་དེ་བཞིན་ཏེ། །ཡང་དག་མཐའ་དང་སྟོང་པ་ཉིད། །དེ་དག་གཟུགས་ཀྱི་མིང་ཡིན་ཏེ། །དངོས་པོ་མེད་པར་མི་རྟོག་གོ །ལག་དང་བྱེད་པ་འཇིག་རྟེན་ན། །དབང་པོ་བརྒྱ་བྱིན་གྲོང་འཇིག་ལྟར། །དེ་བཞིན་དངོས་པོ་ཐམས་ཅད་
ཀྱི། །རང་བཞིན་བརྟག་པར་མི་བྱའོ། །གཟུགས་ལས་སྟོང་པ་གཞན་མ་ཡིན། །མི་སྐྱེ་བ་ཡང་དེ་བཞིན་ཏེ། །གཞན་མ་ཡིན་ཕྱིར་མི་བརྟག་གོ །ལྟ་བའི་ཉེས་པར་རབ་ཏུ་འགྱུར། །དངོས་པོའི་མཚན་ཉིད་གཟུང་བའི་ཕྱིར། །ཀུན་རྟོག་རྣམ་པར་རྟོག་པའོ། །ཡོངས་སུ་རྟོག་པ་བཟུང་བས་ན། །རིང་ཐུང་ཟླུམ་ལ་སོགས་པའོ། །སེམས་ནི་ཀུན་ཏུ་རྟོག་པ་ཡིན། །ཡིད་ནི་ཡོངས་སུ་རྟོག་པ་སྟེ། །ཡིད་ཀྱི་རྣམ་ཤེས་རྣམ་རྟོག་ནི། །མཚན་དང་མཚན་གྱི་གཞི་སྤངས་པ། །གང་ཡང་མུ་སྟེགས་མི་སྐྱེ་དང་། །གང་ཡང་ང་ཡི་ཚུལ་བལྟ་བས། །རྟོག་པ་དེ་ནི་ཁྱད་པར་མེད། །ལྟ་བའི་ཉེས་པར་རབ་ཏུ་འགྱུར། །དགོངས་དང་སྐྱེ་བ་མེད་པ་དང་། །སྐྱེ་བ་མེད་པའི་དོན་ཉིད་དེ། །རིགས་པ་ཤེས་པ་སུས་ཤེས་པ། །དེ་དག་ང་ཡི་ཚུལ་ཤེས་སོ། །དགོས་པ་ལྟ་བ་དགོངས་པ་དང་། །མི་སྐྱེ་བ་ནི་གནས་མེད་པ། །དོན་གཉིས་ཡོངས་སུ་ཤེས་པ་ནི། །སྐྱེ་བ་མེད་པར་ངས་བཤད་དོ། །དངོས་པོ་མ་སྐྱེ་རྣམས་མཆིས་སམ། །འོན་ཏམ་ལགས་སམ་ཐུབ་ཆེན་གསུངས། །རྒྱུ་མེད་སྨྲ་དང་མི་མཉམ་དང་། །མེད་དང་ཆོས་རྣམས་འདྲེས་པར་འགྱུར། །རྒྱུ་མེད་སྨྲ་དང་མི་སྐྱེ་དང་། །མི་མཉམ་མུ་སྟེགས་ལྟ་བ་སྟེ། །ཡོད་དང་མེད་ལས་རྣམ་གྲོལ་བས། །སེམས་ཙམ་དུ་ནི་ངས་བཤད་དོ། །ལྟ་བའི་རྒྱུ་ལས་བྱུང་བ་ཡི། །སྐྱེ་དང་མི་སྐྱེ་སྤང་བར་བྱོས། །རྒྱུ་མེད་སྨྲ་བས་མི་སྐྱེ་དང་། །སྐྱེ་བས་རྒྱུ་ཡི་གནས་སུ་འགྱུར། །ལྷུན་གྱིས་གྲུབ་ལ་བྱ་བ་མེད། །གལ་ཏེ་བྱ་ཡོད་ལྟ་འདྲེས་འགྱུར། །ཐབས་དང་སྨོན་ལམ་ལ་སོགས་པས། །ལྟ་བ་ཉིད་ནི་བདག་ལ་གསུངས། །ཆོས་རྣམས་ཐམས་ཅད་མེད་པའི་ཕྱིར། །ཇི་ལྟ་བུར་ན་དཀྱིལ་འཁོར་སྐྱེ། །གཟུང་དང་འཛིན་དང་བྲལ་བའི་ཕྱིར། །འཇུག་པ་མེད་ཅིང་ལྡོག་པ་མེད། །དངོས་པོ་ལས་ནི་དངོས་གཞན་མཐོང་། །སེམས་ཀྱང་དེ་ལས་བྱུང་བ་སྟེ། །ཆོས་རྣམས་ཀྱི་ནི་སྐྱེ་མེད་པ། །དེ་ནི་ཇི་ལྟར་བདག་ལ་གསུངས། །གལ་ཏེ་སེམས་ཙམ་མི་ཤེས་ན། །དེ་ཡི་ཕྱིར་ནི་དེ་བཤད་དོ། །ཐུབ་ཆེན་བཤད་པ་ཐམས་ཅད་ལ། །སྔ་མ་དང་ནི་ཕྱི་མར་འགལ། །མུ་སྟེགས་ལྟ་བས་རྣམ་གྲོལ་བ། །མི་མཉམ་རྒྱུ་མེད་སྤངས་པ་ཡི། །འཇུག་པ་དང་
ནི་ལྡོག་པ་རྣམས། །སྨྲ་བའི་མཆོག་གིས་བདག་ལ་གསུངས། །ཡོད་དང་མེད་ལས་རྣམ་གྲོལ་ཞིང་། །རྒྱུ་དང་འབྲས་བུ་མི་འཇིག་པའི། །ས་ཡི་རིམ་པའི་མཚམས་སྦྱོར་བ། །པད་མོའི་སྤྱན་གྱིས་བདག་ལ་གསུངས། །འཇིག་རྟེན་མཐའ་གཉིས་ལྷུང་བ་ནི། །ལྟ་བས་རྣམ་པར་དཀྲུགས་གྱུར་པས། །སྐྱེ་དང་མི་སྐྱེ་ལ་སོགས་ཕྱིར། །ཞི་བ་ཡི་ནི་རྒྱུ་མི་རྟོགས། །ང་ལ་དཀྱིལ་འཁོར་གང་ཡང་མེད། །ང་ནི་ཆོས་ཉིད་མི་འཆད་དེ། །གཉིས་ཡོད་ན་ནི་ཉེས་པར་འགྱུར། །གཉིས་ནི་སངས་རྒྱས་རྣམས་ཀྱིས་སྦྱངས། །སྟོང་པ་སྐད་ཅིག་དངོས་པོ་རྣམས། །རང་བཞིན་མེད་ཅིང་སྐྱེ་མེད་པ། །ལྟ་ངན་སྨྲ་བས་གཡོགས་པ་རྟོག །དེ་བཞིན་གཤེགས་པ་རྣམས་ཀྱིས་མིན། །ཇི་ལྟར་རྣམ་པ་གང་དག་གིས། །ཡུལ་ལ་མངོན་སུམ་འགྱུར་བ་དང་། །རྣམ་པར་རྟོག་པ་རབ་འཇུག་དང་། །ལྡོག་པ་བདག་ལ་བཤད་དུ་གསོལ། །ཁ་དོག་རྒྱས་དང་ལྡན་པའི་ཕྱིར། །སྤྲོས་པ་རྣམས་ཀྱིས་བསྡུས་པའི་གཟུགས། །མཐོང་ནས་ཕྱི་རོལ་དག་ཏུ་ཡང་། །རྣམ་པར་རྟོག་པ་རབ་ཏུ་འཇུག །དེ་ཉིད་ཡོངས་སུ་ཤེས་པ་དང་། །ཡང་དག་ཇི་བཞིན་དོན་མཐོང་ཕྱིར། །འཕགས་པའི་རིགས་དང་འཐུན་པ་ཡི། །སེམས་ནི་མངོན་པར་མི་འཇུག་གོ །འབྱུང་བ་རྣམས་ནི་མ་གཏོགས་པར། །དངོས་པོ་སྐྱེ་བ་མེད་པ་སྟེ། །རྟག་པར་འབྱུང་བ་འདྲ་བའི་སེམས། །མ་སྐྱེས་པར་ནི་རྣམ་པར་བསྒོམ། །རྣམ་པར་རྟོག་ལ་མ་རྟོག་ཤིག །རྣམ་པར་རྟོག་མེད་མཁས་པའོ། །རྣམ་པར་རྟོག་ལ་བརྟགས་གྱུར་ན། །གཉིས་མིན་མྱ་ངན་འདས་མ་ཡིན། །མི་སྐྱེ་བར་ནི་དམ་བཅས་པའི། །ཚུལ་ནི་སྒྱུ་མ་བཞིན་དུ་སྣང་། །སྒྱུ་མ་རྒྱུ་མེད་བྱུང་བ་སྟེ། །གྲུབ་མཐའ་འདས་ཤིང་ཉམས་པར་འགྱུར། །ཐོག་མ་མེད་ནས་བསྒོམས་པ་ཡི། །སེམས་ནི་གཟུགས་བརྙན་བཞིན་དུ་སྣང་། །དོན་ལྟ་བུ་སྟེ་དོན་མེད་མིན། །ཡང་དག་ཇི་བཞིན་རྣམ་པར་བསྒོམ། །མེ་ལོང་ལ་ནི་ཇི་ལྟར་གཟུགས། །གཅིག་དང་ཐ་དད་ཉིད་སྤངས་པ། །སྣང་སྟེ་དེ་ནི་མེད་པའང་མིན། །སྐྱེ་བའི་མཚན་ཉིད་དེ་བཞིན་ནོ། །དྲི་ཟ་སྒྱུ་མ་ལ་སོགས་དག །རྒྱུ་དང་རྐྱེན་ལ་ལྟོས་པ་ལྟར། །དེ་བཞིན་དངོས་པོ་ཐམས་ཅད་ཀྱི། །འབྱུང་བ་
ཡིན་ཏེ་མི་འབྱུང་མེད། །བདག་དང་ཆོས་སུ་བརྟགས་པ་ཡིས། །རྣམ་པར་རྟོག་པ་སྐྱེས་བུ་ལྟར། །འཇུག་པ་རྣམ་པ་གཉིས་ཀྱིས་འཇུག །བྱིས་པ་རྣམས་ཀྱིས་མི་རྟོགས་སོ། །མ་ཚང་བ་དང་རྐྱེན་གྱི་དབང་། །དེ་བཞིན་ཉན་ཐོས་དགྲ་བཅོམ་པ། །བདག་མཐུ་རག་ལས་རྒྱལ་བ་ཡང་། །རག་ལུས་ཉན་ཐོས་ལྔ་པོར་བཤད། །དུས་གཞན་དུ་ནི་ཞིག་པ་དང་། །དོན་དམ་དུ་དང་ཕན་ཚུན་དང་། །མི་རྟག་པ་ནི་རྣམ་པ་བཞི། །བྱིས་པ་མི་མཁས་རྟོག་པར་བྱེད། །ཡོན་ཏན་རྡུལ་ཕྲན་རང་བཞིན་རྒྱུས། །བྱིས་པ་མཐའ་གཉིས་ལྷུང་བ་དག །ཡོད་དང་མེད་པའི་ཕྱོགས་འཛིན་ཕྱིར། །ཐར་པ་ཡི་ནི་ཐབས་མི་ཤེས། །ཇི་ལྟར་བྱིས་པ་སོར་མོའི་རྩེར། །ཟླ་བར་འཛིན་ཏེ་གཞན་དུ་མིན། །ཇི་ལྟར་ཡི་གེར་ཆགས་པའི་རྣམས། །ང་ཡི་དེ་བཞིན་ཉིད་མི་རྟོགས། །འབྱུང་བ་མཚན་ཉིད་མི་འཐུན་པ། །གཟུགས་ཀྱི་དངོས་པོ་བསྐྱེད་པ་སྟེ། །དེ་ནི་འབྱུང་བ་གནས་པ་ཡིན། །འབྱུང་འགྱུར་འབྱུང་བས་མ་བྱས་སོ། །མེ་ནི་གཟུགས་ལ་སྲེག་པར་བྱེད། །སྤྲུལ་པའི་རང་བཞིན་ཆུ་ཡི་ཁམས། །རླུང་ནི་གཟུགས་ལ་འདོར་བྱེད་པ། །འབྱུང་བས་ཇི་ལྟར་སྐྱེ་བར་འགྱུར། །རྣམ་པར་ཤེས་དང་གཟུགས་ཕུང་པོ། །དེ་ནི་གཉིས་ཏེ་ལྔ་མ་ཡིན། །ཕུང་པོའི་རྣམ་གྲངས་ཐ་དད་པ། །ངས་ནི་རྣམ་པ་བརྒྱར་ཡང་བཤད། །སེམས་དང་སེམས་བྱུང་བྱེ་བྲག་ནི། །འཇུག་པ་རབ་ཏུ་འཇུག་པ་ཡིན། །གཟུགས་ཀྱི་རྣམ་པར་འདྲེས་པ་སྟེ། །འབྱུང་ལས་གྱུར་མིན་སེམས་གཟུགས་སོ། །སྔོ་ལ་སོགས་པ་ཟླ་ཡིས་དཀར། །དཀར་ལ་སོགས་པའི་ཟླ་ཡིས་སྔོ། །རྒྱུ་དང་འབྲས་བུ་བསྐྱེད་པ་དང་། །ཡོད་དང་མེད་པ་སྟོང་པ་ཉིད། །གྲུབ་བྱེད་གྲུབ་དང་བསྒྲུབ་བྱ་དང་། །གྲང་དྲོ་མཚན་དང་མཚན་གཞི་དང་། །དེ་ལ་སོགས་པ་ཐམས་ཅད་ནི། །རྟོག་གེ་ཅན་གྱིས་མ་བསྒྲུབས་སོ། །སེམས་དང་ཡིད་དང་རྣམ་ཤེས་དྲུག །དེ་དག་བདག་དང་ལྡན་པ་སྟེ། །གཅིག་དང་ཐ་དད་བྲལ་བ་ཡི། །ཀུན་གཞི་དེ་ནི་རབ་ཏུ་འཇུག །གྲངས་ཅན་གཅེར་བུ་ཁྱད་པར་ཅན། །དབང་ཕྱུག་སྨྲས་
པའི་རྟོག་གེ་བ། །ཡོད་དང་མེད་པའི་ཕྱོགས་སུ་ལྷུང་། །དབེན་པའི་དོན་གྱིས་རྣམ་པར་སྤངས། །དབྱིབས་དང་བྱད་ཀྱི་བྱེ་བྲག་དག །འབྱུང་ལས་སྐྱེས་ཏེ་འབྱུང་བ་མིན། །མུ་སྟེགས་ཅན་ནི་འབྱུང་འགྱུར་དང་། །འབྱུང་བ་རྣམས་ཀྱང་སྐྱེ་བར་སྨྲ། །དེ་ལས་གང་གཞན་མུ་སྟེགས་ཅན། །རྒྱུ་ལས་མ་སྐྱེས་རྟོག་པར་བྱེད། །ཡོད་མེད་ཕྱོགས་ལས་རྟེན་པའི་རྣམས། །རྨོངས་པས་ཁོང་དུ་མི་ཆུད་དོ། །སེམས་དང་ལྷན་ཅིག་ལྡན་པ་སྟེ། །ཡིད་ལ་སོགས་དང་བྲལ་བ་ཡིན། །རྣམ་དག་མཚན་ཉིད་སེམས་ཅན་ནི། །ཡེ་ཤེས་དང་ནི་ལྷན་ཅིག་གནས། །གཟུགས་དང་ལས་ནི་གང་ཡོད་དང་། །ཕུང་པོ་ཡུལ་གྱི་རྒྱུས་བྱུང་དང་། །སེམས་ཅན་རྣམས་ཀྱང་ཉེར་ལེན་མེད། །གཟུགས་མེད་པ་ན་མི་གནས་སོ། །སེམས་ཅན་མེད་པར་གྱུར་པའི་ཕྱིར། །སེམས་ཅན་སྨྲ་ལ་བདག་མེད་གྱུར། །རྣམ་པར་ཤེས་པའང་མི་འབྱུང་ཕྱིར། །བདག་མེད་སྨྲ་བ་ཆད་པར་གྱུར། །དེ་ཡི་གནས་པ་བཞི་པོ་རྣམས། །གཟུགས་མེད་པར་ནི་ཇི་ལྟར་ཡོད། །ཕྱི་ནང་དངོས་པོ་མེད་པའི་ཕྱིར། །རྣམ་པར་ཤེས་པ་མི་འཇུག་གོ །སྲིད་པ་བར་མའི་ཕུང་པོ་རྣམས། །རྟོག་གེ་ཅན་རྣམས་འདོད་པ་ལྟར། །དེ་བཞིན་གཟུགས་མེད་པར་སྐྱེས་པའི། །སྲིད་པའི་གཟུགས་ནི་མེད་དམ་ཅི། །སེམས་ཅན་རྣམ་ཤེས་མེད་ན་ནི། །ནན་ཏན་མ་བྱས་ཐར་པར་འགྱུར། །མུ་སྟེགས་སྨྲ་བ་ཐེ་ཙོམ་མེད། །རྟོག་གེ་ཅན་གྱིས་མི་ཤེས་སོ། །དེ་ན་གཟུགས་ཀྱང་ཡོད་པ་སྟེ། །གཟུགས་མེད་པ་ལ་ལྟ་བ་མེད། །དེ་མེད་པས་ན་གྲུབ་མཐའ་མེད། །ཐེག་པ་མེད་ཅིང་འགྲོ་བ་མེད། །དབང་པོ་རྣམས་དང་ལྡན་པ་ཡི། །བག་ཆགས་ལས་བྱུང་རྣམ་ཤེས་པ། །རྣམ་པ་བརྒྱད་ལས་ཕྱོགས་གཅིག་ནི། །སྐད་ཅིག་དུས་སུ་མི་འཛིན་ཏོ། །ཇི་ལྟར་གཟུགས་ནི་མི་འཇུག་ལྟར། །དབང་པོ་རྣམས་དང་དབང་མི་འཇུག །དེ་ཕྱིར་བཅོམ་ལྡན་འདས་ཀྱིས་ཀྱང་། །དབང་པོ་ལ་སོགས་སྐད་ཅིག་བཤད། །གཟུགས་ནི་རྟོག་པར་མ་གྱུར་པར། །རྣམ་པར་ཤེས་པར་ཇི་ལྟར་འཇུག །རྣམ་པར་ཤེས་པར་མ་ཞུགས་
ན། །ཇི་ལྟར་འཁོར་བ་སྐྱེས་པར་འགྱུར། །སྐྱེས་མ་ཐག་ཏུ་འཇུག་པར་ནི། །རྣམ་པར་འདྲེན་པ་མི་འཆད་དོ། །དངོས་པོ་རྣམས་ཀྱི་རྣམ་རྟོག་པ། །འགྲོ་བར་བར་ཆད་མེད་པར་གཡོ། །དབང་པོ་རྣམས་དང་དབང་པོའི་དོན། །མཁས་ལ་མ་ཡིན་བླུན་པོ་ལ། །བྱིས་པ་རྣམས་ནི་མིང་གིས་འཛིན། །འཕགས་པ་མིང་གིས་དོན་ལ་མཁས། །དྲུག་པོ་ལ་ནི་ཉེར་ལེན་མེད། །ཉེར་ལེན་བཅས་པ་མི་ཟིན་ཏོ། །ཡོད་པའི་ཉེས་དང་རྣམ་བྲལ་བ། །བྱེ་བྲག་མི་འབྱེད་འཕགས་པ་སྨྲ། །ཤེས་པ་སྤངས་པའི་རྟོག་གེ་པ། །རྟག་དང་ཆད་པས་འཇིགས་པ་དག །འདུས་བྱས་འདུས་མ་བྱས་ལ་བདག །བྱིས་པ་བྱེ་བྲག་མི་བྱེད་དོ། །གཅིག་པ་ལ་ཡང་སྦྱིན་པ་ཡོད། །ཐ་དད་པ་ལའང་ཡོད་པ་མིན། །སེམས་དང་ལྷན་ཅིག་གཅིག་པ་སྟེ། །ཡིད་ལ་སོགས་དང་ཐ་དད་དོ། །སེམས་དང་སེམས་ལས་བྱུང་བསྒྲགས་པའི། །སྦྱིན་པ་གང་ཚེ་ཉེར་ལེན་ལས། །དབྱེ་ན་དེ་ལ་ཇི་ལྟར་ན། །གཅིག་པར་ཁོང་དུ་ཆུད་པར་བྱ། །ཉེར་ལེན་བཅས་པའི་དམིགས་པ་ནི། །ལས་དང་ཚེ་དང་བྱེད་སོགས་པས། །འདྲ་དང་མི་འདྲ་ཚུལ་རྣམས་ཀྱིས། །མེད་བཞིན་དུ་ནི་སྒྲུབ་པར་བྱེད། །ཇི་ལྟར་བསྲེག་བྱ་སྲེག་བྱེད་ལ། །མེ་ནི་ཅིག་ཅར་སྲེག་པ་བཞིན། །དེ་བཞིན་ཉེར་ལེན་བཅས་པའི་བདག །ཅི་ཕྱིར་རྟོག་གེ་ཅན་མི་སྟོན། །རྟག་ཏུ་སྐྱེས་དང་མ་སྐྱེས་ཀྱང་། །སེམས་ནི་ཤིན་ཏུ་འོད་གསལ་ན། །བདག་བསྒྲུབས་པ་ཡི་དཔེ་དག་དང་། །ཅི་ཕྱིར་རྟོག་གེ་ཅན་མི་བྱེད། །རྟོག་གེ་ཅན་ནི་ཚུལ་སྤངས་པ། །རྣམ་ཤེས་ཐིབས་པོར་རྨོངས་པ་དག །བདག་ཏུ་སྨྲ་བར་བྱེད་འདོད་པས། །ཕན་ཚུན་དག་ཏུ་རབ་ཏུ་རྒྱུག །སོ་སོ་རང་རིག་རྟོགས་བྱ་བ། །བདག་ནི་རྣམ་དག་མཚན་ཉིད་དེ། །དེ་བཞིན་གཤེགས་པའི་སྙིང་པོ་དེ། །རྟོག་གེ་ཅན་གྱི་སྤྱོད་ཡུལ་མིན། །ཉེར་ལེན་ཉེར་བར་ལེན་བྱེད་ཀྱི། །བྱེ་བྲག་དང་ནི་ཕུང་པོ་ཡི། །མཚན་ཉིད་གལ་ཏེ་ཤེས་གྱུར་ན། །ཚུལ་གྱི་ཡེ་ཤེས་སྐྱེ་བར་འགྱུར། །མུ་སྟེགས་ཅན་གྱིས་བརྗོད་པ་ནི། །ཀུན་གཞི་སྙིང་པོ་ལྟ་བུ་བསམ། །བདག་
དང་ལྷན་ཅིག་ལྡན་པའི་ཆོས། །རབ་ཏུ་བརྗོད་པ་མ་བྱས་སོ། །དེ་དག་རབ་ཏུ་ཕྱེ་བས་ན། །རྣམ་པར་ཐར་དང་བདེན་མཐོང་ན། །སྒོམ་དང་མཐོང་བས་སྤང་བ་ཡི། །ཉོན་མོངས་རྣམས་ཀྱང་སྦྱང་བ་ཡི། །སེམས་ནི་རང་བཞིན་འོད་གསལ་ཏེ། །དེ་བཞིན་གཤེགས་པའི་སྙིང་པོ་དགེ། །སེམས་ཅན་རྣམས་ཀྱི་ཉེར་ལེན་ནི། །མཐའ་དང་མཐའ་མེད་སྤངས་པའོ། །བྱི་དོར་བྱས་པས་གསེར་མདོག་དང་། །ས་ལེ་སྦྲམ་དང་ཁ་ར་དག །ཇི་ལྟར་མཐོང་བ་དེ་བཞིན་དུ། །ཕུང་པོ་རྣམས་ལ་སེམས་ཅན་ནོ། །གང་ཟག་མེད་ཅིང་ཕུང་པོ་མེད། །སངས་རྒྱས་ཡེ་ཤེས་ཟག་མེད་པ། །རྟག་ཏུ་ཞི་བ་རྣམས་བསྒོམས་ཏེ། །དེ་ལ་བདག་ནི་སྐྱབས་སུ་མཆི། །སེམས་ཀྱི་རང་བཞིན་འོད་གསལ་བ། །ཡིད་ལ་སོགས་པའི་ཉོན་མོངས་དང་། །བདག་དང་ལྷན་ཅིག་ལྡན་པར་ནི། །སྨྲ་བའི་མཆོག་གིས་རབ་ཏུ་བསྟན། །སེམས་ནི་རང་བཞིན་འོད་གསལ་བ། །དེ་ལས་གཞན་པ་ཐོག་མ་མེད། །དེ་དག་གིས་ནི་བསགས་པའི་ལས། །དེས་ནི་དེ་གཉིས་ཉོན་མོངས་འགྱུར། །ཐོག་མ་མེད་པའི་བློ་བུར་གྱི། །ཉོན་མོངས་རྣམས་དང་ལྡན་པས་ན། །རང་བཞིན་འོད་གསལ་བདག་ཉོན་མོངས། །རས་དང་འདྲ་བར་དག་པར་འགྱུར། །ཇི་ལྟར་གོས་སམ་གསེར་ཡང་རུང་། །དྲི་མ་མེད་ཕྱིར་ཉེས་སྤངས་བཞིན། །གནས་ཤིང་འཇིག་པར་མི་འགྱུར་ཏེ། །ཉེས་མེད་བདག་ཉིད་དེ་བཞིན་ནོ། །རྔ་འམ་དུང་ངམ་པི་ཝང་ལ། །སྒྲ་སྙན་ཕུན་སུམ་ཚོགས་པ་དག །མི་མཁས་ལ་ལ་ཚོལ་བར་བྱེད། །དེ་བཞིན་གང་ཟག་ཕུང་པོ་ལའོ། །ས་ལ་གཏེར་དང་ནོར་བུ་དང་། །དེ་བཞིན་དུ་ནི་ཆུ་རྣམས་ཀྱང་། །ཡོད་བཞིན་དུ་ཡང་མི་སྣང་བ། །དེ་བཞིན་གང་ཟག་ཕུང་པོ་ལའོ། །སེམས་དང་སེམས་ལས་བྱུང་ཚོགས་དང་། །བདག་གི་ཡོན་ཏན་ཕུང་པོ་ལྡན། །མི་མཁས་པས་ནི་མི་ཤེས་ཏེ། །དེ་བཞིན་གང་ཟག་ཕུང་པོ་ལའོ། །ཇི་ལྟར་སྦྲུམ་པར་གྱུར་པའི་བུ། །ཡོད་བཞིན་དུ་ཡང་མི་སྣང་བ། །དེ་བཞིན་བདག་ཉིད་ཕུང་པོ་ལ། །རིག་པ་མི་ཤེས་པས་མི་མཐོང་། །ཇི་ལྟར་སྨན་གྱི་གསོད་པ་དང་། །ཇི་ལྟར་མེ་
ནི་ཤིང་རྣམས་ལ། །རིགས་པ་མི་ཤེས་པས་མི་མཐོང་། །དེ་བཞིན་གང་ཟག་ཕུང་པོ་ལའོ། །དངོས་པོ་རྣམས་ལ་མི་རྟག་དང་། །སྟོང་པ་ཉིད་ཀྱང་ཡོད་བཞིན་དུ། །མི་མཁས་རྣམས་ཀྱིས་མི་མཐོང་བ། །དེ་བཞིན་གང་ཟག་ཕུང་པོ་ལའོ། །ས་དང་དབང་དང་མངོན་ཤེས་དང་། །བླ་མ་ཡི་ནི་དབང་བསྐུར་དང་། །ཏིང་ངེ་འཛིན་གྱི་ཁྱད་པར་རྣམས། །བདག་མེད་ན་ནི་མེད་པ་ཡིན། །གང་ཚེ་འཇིག་བྱེད་སོང་ནས་ནི། །གལ་ཏེ་ཡོད་ན་སྟོན་ཅེས་ཟེར། །རང་གི་རྣམ་རྟོག་སྟོན་ཅིག་ཅེས། །དེ་ལ་མཁས་པས་བསྒོ་བར་བྱ། །སངས་རྒྱས་ཆོས་ལ་གནོད་བྱེད་པ། །ཡོད་མེད་ཕྱོགས་ལ་ལྟ་བ་ཡི། །བདག་མེད་སྨྲ་དང་སྨྲ་མི་བྱ། །དགེ་སློང་ལས་ལ་སྤང་བར་བྱ། །བདག་མེད་ནགས་ཚལ་སྲེག་བྱེད་ཅིང་། །མུ་སྟེགས་ཉེས་ལས་རྣམ་གྲོལ་བ། །དུས་མཐའི་མེ་ནི་འབར་བ་བཞིན། །བདག་ཏུ་སྨྲ་འདི་རབ་ཏུ་འབར། །ཁ་འདའ་སྦྲང་རྩི་ཁ་ར་དང་། །མར་དང་ཏིལ་ལ་སོགས་པ་དང་། །དེ་དག་རང་གི་རོ་ཡོད་ཀྱང་། །མ་མྱངས་རབ་ཏུ་རྟོགས་མི་འགྱུར། །ཕུང་པོ་མཐོང་བ་རྣམས་ལ་བདག །རྣམ་པ་ལྔར་ནི་གཟུང་བྱས་ཀྱང་། །མི་མཁས་རྣམས་ཀྱིས་མི་མཐོང་སྟེ། །མཁས་པས་མཐོང་ནས་རྣམ་པར་འགྲོལ། །རིག་སྔགས་ལ་སོགས་དཔེ་རྣམས་ཀྱིས། །སེམས་ནི་རྟོགས་པར་མི་ནུས་ཏེ། །གང་ལ་གང་ཕྱིར་གང་དོན་དུ། །འདུས་པ་རྣམས་ནི་མི་རྟོགས་སོ། །ཆོས་རྣམས་མཚན་ཉིད་མི་འདྲ་སྟེ། །སེམས་གཅིག་པོ་ནི་མི་གཟུང་ངོ་། །རྒྱུ་མེད་པ་དང་མི་འཇུག་པར། །རྟོག་གེ་པ་ལ་ཉེས་པར་འགྱུར། །སེམས་ཀྱི་རྗེས་ལྟ་རྣལ་འབྱོར་པ། །སེམས་རྣམས་ཀྱིས་ནི་སེམས་མི་མཐོང་། །མཐོང་བྱེད་སྣང་ལས་བྱུང་བ་ན། །སྣང་བ་ཅི་ཡི་རྒྱུ་ལས་འབྱུང་། །ང་ནི་ཀཱ་ཏྱཱ་ཡ་ནའི་རིགས། །གཙང་མའི་གནས་ནས་བྱུང་བ་སྟེ། །མྱ་ངན་འདས་པའི་གྲོང་འགྲོ་བའི། །ཆོས་ནི་སེམས་ཅན་རྣམས་ལ་སྟོན། །འདི་ནི་སྔོན་གྱི་ལམ་ཡིན་ཏེ། །ང་དང་དེ་བཞིན་གཤེགས་རྣམས་ཀྱིས། །སྟོང་ཕྲག་གསུམ་
གྱི་མདོ་རྣམས་ཀྱིས། །མྱ་ངན་འདས་པ་ཤིན་ཏུ་བཤད། །འདོད་པའི་ཁམས་དང་གཟུགས་མེད་དུ། །སངས་རྒྱས་རྣམ་པར་འཚང་མི་རྒྱ། །གཟུགས་ཀྱི་ཁམས་ཀྱི་འོག་མིན་དུ། །འདོད་ཆགས་བྲལ་ཁྱོད་འཚང་རྒྱའོ། །འཆི་བའི་རྒྱུ་ནི་ཡུལ་མ་ཡིན། །རྒྱུ་ནི་ཡུལ་ལ་འཆིང་བ་སྟེ། །ཡེ་ཤེས་ཀྱིས་ནི་ཉོན་མོངས་བསད། །འདི་ནི་བརྟུལ་ཞུགས་རལ་གྲིའི་སོ། །བདག་མེད་སྒྱུ་མ་ལ་སོགས་པའི། །ཆོས་རྣམས་ཇི་ལྟར་ཡོད་མེད་འགྱུར། །བྱིས་པ་རྣམས་ལ་ཡང་དག་སྣང་། །བདག་མེད་ཉིད་ནི་ཇི་ལྟར་མེད། །བྱས་པ་དང་ནི་མ་བྱས་ཕྱིར། །རྒྱུ་ནི་འཇུག་པར་བྱེད་པ་མེད། །འདི་དག་ཐམས་ཅད་མ་སྐྱེས་ཏེ། །བྱིས་པ་རྣམས་ཀྱིས་མི་ཤེས་སོ། །རྒྱུ་ཡི་རྣམས་ནི་མ་སྐྱེས་ཏེ། །རྐྱེན་རྣམས་དེ་དག་བྱས་པའོ། །དེ་གཉིས་བསྐྱེད་པ་མ་ཡིན་ན། །རྒྱུ་རྣམས་ཀྱིས་ན་ཇི་ལྟར་བརྟག །སྔ་ཕྱི་དང་ནི་ཅིག་ཅར་ཡང་། །རྟོག་གེ་རྣམས་ཀྱང་རྒྱུར་སྟོན་ཏོ། །སྣང་དང་སློབ་མ་རྫས་སོགས་ཀྱིས། །དངོས་པོ་རྣམས་ཀྱི་སྐྱེ་བ་འཆད། །མངོན་པར་འདུ་བྱེད་མཚན་རྣམས་ཀྱིས། །སངས་རྒྱས་མཚན་ལྡན་མ་ཡིན་ཏེ། །དེ་དག་འཁོར་ལོས་སྒྱུར་ཡོན་ཏན། །དེས་ནི་སངས་རྒྱས་མི་བརྗོད་དོ། །སངས་རྒྱས་མཚན་ནི་ཡེ་ཤེས་ཏེ། །ལྟ་བའི་ཉེས་པས་རྣམ་སྤངས་པ། །སོ་སོ་རང་རིག་ལྟ་བས་རྟོགས། །ཉེས་པ་ཐམས་ཅད་རྣམ་འཇོམས་པའོ། །འོན་ལྐུགས་ལོང་བ་ཞར་བ་དང་། །རྒན་པ་དག་ནི་ཤར་གཉེར་དང་། །བྱིས་པ་རྣམས་ལ་བྱེ་བྲག་ཏུ། །ཚངས་པར་སྤྱོད་པ་མེད་པའོ། །བསྒྲིབས་དང་གསལ་དང་ལྷ་ཡི་ནི། །མཚན་རྣམས་ཀྱིས་ནི་འཁོར་ལོས་སྒྱུར། །གསལ་བ་ལ་ལ་རབ་ཏུ་འབྱུང་། །གཉིས་པོ་གཞན་ནི་བག་མེད་པའོ། །རྒྱས་དང་གཟེགས་ཟན་ཁྱུ་མཆོག་དང་། །སེར་སྐྱ་ཤཱཀྱའི་གཙོ་བོ་རྣམས། །ང་ནི་མྱ་ངན་འདས་འོག་ཏུ། །དེ་ལ་སོགས་པ་འབྱུང་བར་འགྱུར། །མྱ་ངན་ང་འདས་ལོ་བརྒྱ་ན། །རྒྱས་དང་ཁུར་འཕེལ་དེ་བཞིན་དུ། །པན་ཌ་བ་དང་ཀོའུ་ར་བ། །དགའ་བོའི་འོག་ཏུ་མོའུ་རི་འབྱུང་། །མོའུ་ཪྱ་དགའ་བོ་སྐྱབས་འོག་ཏུ། །ཀླ་ཀློ་
རྒྱལ་པོའི་ཐ་ཤལ་རྣམས། །ཀླ་ཀློའི་རྗེས་ལ་མཚོན་གྱིས་འཁྲུག །མཚོན་གྱི་རྗེས་ལ་རྩོད་དུས་སོ། །རྩོད་པའི་དུས་ཀྱི་ཐ་མ་ལ། །འཇིག་རྟེན་དམ་ཆོས་མི་སྒོམ་མོ། །དེ་ལ་སོགས་པ་འདས་པ་དག །འགྲོ་བ་འཁོར་ལོ་བཞིན་དུ་འཁོར། །མེ་དང་ཉི་མར་ཕྲད་པའི་ཕྱིར། །འདོད་པའི་ཁམས་ནི་བསྲེགས་ནས་ཀྱང་། །གང་ལ་འཇིག་རྟེན་གནས་གྱུར་པར། །ཕྱི་ནས་ལྷ་རྫས་གནས་སུ་འགྱུར། །རིགས་བཞི་མི་མགོན་དབང་པོ་དང་། །དྲང་སྲོང་རྣམས་དང་ཆོས་ཀྱང་སྟེ། །རིག་བྱེད་ཆོས་སྦྱིན་མཆོད་སྦྱིན་དང་། །ཆོས་ཀྱི་རྣམས་ནི་འབྱུང་བར་འགྱུར། །གཏམ་དང་སྲུང་ལ་སོགས་པ་དང་། །རྐྱང་བ་རྟོགས་བྱེད་འགྲེལ་པ་དང་། །འདི་སྐད་བདག་གིས་ཐོས་སོགས་པས། །འཇིག་རྟེན་ཤིན་ཏུ་རྨོངས་པར་འགྱུར། །ཤིན་ཏུ་བཅོས་ཤིང་བཅག་བྱས་ནས། །སྟེང་ནས་ཁ་དོག་སྦྱར་བར་བྱ། །སྔོ་དང་ལྕི་བ་འདམ་སོགས་པས། །སྣམ་བུ་ཤིན་ཏུ་བྲི་བར་བྱ། །ལུས་ནི་གོས་རྣམས་ཀྱིས་བཀྲ་བ། །མུ་སྟེགས་མཚན་མ་སྤངས་པ་ཡི། །རྣལ་འབྱོར་ཅན་གྱིས་བསྟན་པ་བཤད། །དེ་ནི་སངས་རྒྱས་རྒྱལ་མཚན་ནོ། །ཚགས་ཀྱིས་བཙགས་པའི་ཆུ་ཡང་བཏུང་། །རྐེད་པའི་སྲད་བུ་བཅིང་བར་བྱ། །དུས་སུ་འོས་པར་གྱུར་པ་དང་། །དམའ་བ་སྤངས་པའི་སློངས་མོ་ཟས། །མཐོ་རིས་ནས་ནི་ལྷ་རྫས་འབྱུང་། །གཉིས་པོ་གཞན་ནི་མི་ལས་འབྱུང་། །རིན་ཆེན་མཚན་རྣམས་ཕུན་སུམ་ཚོགས། །ལྷར་སྐྱེས་པ་ཡི་འགྲོ་བའི་དབང་། །མཐོ་རིས་ཕན་བྱེད་ཆོས་སྟོན་པ། །གླིང་བཞི་རྣམས་ལ་རབ་ཏུ་སྤྱོད། །ཤིན་ཏུ་ཡུན་རིང་གླིང་སྤྱད་ནས། །སྲེད་པས་རྣམ་པར་འཇིག་པར་འགྱུར། །བྱིས་པའི་དུས་དང་སྐྱབས་བྱུང་དུས། །གཉིས་པོ་བཞིན་དང་རྩོད་པ་སྟེ། །ང་དང་གཞན་ནི་བྱས་དུས་ལ། །ཤཱཀྱ་སེང་གེ་རྩོད་པའི་དུས། །དོན་གྲུབ་པ་དང་ཤཱཀྱའི་སྲས། །འཇུག་སེལ་རྒྱས་དང་དབང་ཕྱུག་དང་། །དེ་ལ་སོགས་པའི་མུ་སྟེགས་ཅན། །མྱ་ངན་ང་འདས་འབྱུང་བར་འགྱུར། །འདི་སྐད་
བདག་གིས་ཐོས་ལ་སོགས། །ཤཱཀྱ་སེང་གེའི་བཤད་པ་ཡིན། །སྒྲུང་དང་སྔན་ཆད་བྱུང་བ་དག །དེ་དག་རྒྱས་པའི་ཡིན་པར་འགྱུར། །འཇུག་སེལ་དང་ནི་དབང་ཕྱུག་ཀྱང་། །འབྱིན་པར་བྱེད་པ་འཆད་པར་འགྱུར། །མྱ་ངན་ང་འདས་ཕྱིན་ཆད་ནི། །དེ་ལྟ་བུ་ལ་སོགས་པར་འབྱུང་། །ང་ཡི་མ་ནི་ནོར་ལྡན་ཏེ། །ཕ་ནི་བྲམ་ཟེ་སྐྱེ་དགུའི་བདག །ང་ནི་ཀཱ་ཏྱཱ་ཡ་ནའི་རིགས། །མིང་ནི་རྡུལ་མེད་རྒྱལ་བའོ། །ཡབ་དང་མེས་དང་ང་བདག་ཀྱང་། །ཡུལ་ནི་ཙམ་པར་སྐྱེས་པ་སྟེ། །མཚན་ནི་ཟླ་བ་སྐྱབས་ཞེས་བྱ། །ཟླ་བའི་རིགས་ལས་དེ་སྐྱེས་སོ། །ཐར་པར་ཞུགས་ཤིང་བརྟུལ་ཞུགས་སྤྱད། །ཚུལ་ཡང་རྣམ་པ་སྟོང་བཤད་ནས། །བློ་གྲོས་ཆེན་པོ་དབང་བསྐུར་ཏེ། །ལུང་བསྟན་བྱས་ནས་མྱ་ངན་འདའ། །ཆོས་ལ་བློ་ནི་སྦྱིན་པར་བྱ། །ཆོས་ཀྱིས་མེ་ཁལ་ལ་ལ་སྦྱིན། །མེ་ཁལ་སློབ་མ་ཞན་པས་ན། །བསྐལ་པའི་མཐར་ནི་འཇིག་པར་འགྱུར། །འོད་སྲུང་དང་ནི་ལོག་དད་སེལ། །འདྲེན་པ་གསེར་ཐུབ་རྣམ་དག་དང་། །རྡུལ་མེད་ང་དང་གཞན་དག་དང་། །དེ་དག་ཐམས་ཅད་བྱས་དུས་རྒྱལ། །དེ་ཡི་འོག་ཏུ་བྱས་དུས་ལ། །འདྲེན་པ་བློ་གྲོས་ཞེས་བྱ་བ། །ཤེས་བྱ་ལྔ་རྣམས་སྟོན་པའོ། །དཔའ་བོ་ཆེན་པོ་འབྱུང་བར་འགྱུར། །གཉིས་གཞན་ལ་མིན་སྐྱོབ་བྱུང་མིན། །རྩོད་དུས་ཕྱི་མའི་ཚེ་ལ་ཡང་། །འཇིག་རྟེན་མགོན་པོ་འབྱུང་མི་འགྱུར། །བྱས་དུས་ལ་ནི་རྫོགས་འཚང་རྒྱ། །མི་ཕྲོག་པ་དང་ངོ་ཤེས་བྱ། །མ་དྲས་ཁ་ཚར་བཅས་པ་སྟེ། །རྨ་བྱའི་མདོངས་སུ་འདྲ་བ་ཡིས། །སྟེང་ཡོག་རི་མོ་བྲི་བར་བྱ། །མདོངས་དང་མདོངས་ཀྱི་བར་དུ་ནི། །སོར་གཉིས་སོར་གསུམ་ཚད་དུ་བྱ། །དེ་ལས་གཞན་དུ་བྲིས་ན་ནི། །བྱིས་པ་རྣམས་ཀྱང་ཆགས་པར་འགྱུར། །རྟག་པར་འདོད་ཆགས་མེ་ཞི་བྱ། །ཡེ་ཤེས་ཆུས་ནི་ཁྲུས་ཀྱང་བྱ། །རྣལ་འབྱོར་གྱིས་ནི་ནན་ཏན་དུ། །དུས་མཚམས་གསུམ་དང་སྡོམ་གསུམ་བྱས། །མདའ་དང་རྡོ་དང་ཤིང་ལ་སོགས། །འཕེན་ལ་སོགས་པས་བསྐྱོད་པ་དང་། །གཅིག་འཕགས་ན་ནི་གཅིག་ལྷུང་འགྱུར། །དགེ་དང་མི་དགེ་དེ་བཞིན་ནོ། །
གཅིག་པུ་མང་པོ་མ་ཡིན་ཏེ། །མི་འདྲའི་མཚན་ཕྱིར་གང་ནའང་མེད། །ལེན་པ་ཀུན་ནི་རླུང་དང་འདྲ། །སྦྱིན་པ་བྱེད་པ་ཞིང་བཞིན་ནོ། །གལ་ཏེ་གཅིག་པོ་མང་འགྱུར་ན། །ཐམས་ཅད་མ་བྱས་པར་འགྱུར་རོ། །བྱས་ན་རྣམ་པར་འཇིག་པར་འགྱུར། །འདི་ནི་རྟོག་གེ་ཅན་གྱི་ཚུལ། །དེ་ནི་མར་མེ་ས་བོན་འདྲ། །འདྲ་ཕྱིར་མང་དུ་ག་ལ་འགྱུར། །དེ་ལྟ་བུར་ན་མང་དུ་འགྱུར། །དེ་ནི་རྟོག་གེ་པ་ཡི་ཚུལ། །ཏིལ་ལས་བལ་སྲན་སྐྱེ་མི་འགྱུར། །འབྲས་ནི་ནས་ཀྱི་རྒྱུ་ལས་མིན། །གྲོ་དང་འབྲུ་ཡི་རྣམ་པ་དག །གཅིག་ནི་ཇི་ལྟར་མང་པོར་འགྱུར། །སྒྲ་བྱེད་པ་ནི་པ་ཎི་ནི། །རྐང་པའི་མིག་དང་ཆེ་དབང་དང་། །ཚངས་པ་དང་ནི་གར་ག་དང་། །འཇིག་རྟེན་རྒྱང་ཕན་བྱེད་པ་འབྱུང་། །ཀཱ་ཏྱཱ་ཡ་ན་མདོ་བྱེད་པ། །མཆོད་སྦྱིན་བལ་ཀ་དེ་བཞིན་ཏེ། །བྷུ་དྷུ་ཀ་དང་སྐར་མཁན་དག །རྩོད་པའི་དུས་ན་འབྱུང་བར་འགྱུར། །བསོད་ནམས་བྱས་པའི་འཇིག་རྟེན་གྱི། །སྐྱེ་དགུའི་དཔལ་གྱི་སྟོབས་ཅན་འབྱུང་། །ཆོས་ཀུན་ལ་ནི་སྲུང་བྱེད་པ། །རྒྱལ་པོ་སྟོབས་ཅན་ས་གཏོང་བའོ། །གྲོག་མའི་མཁར་དང་སྲན་ཆུང་མིག །གྱ་གྱུ་ཅན་དང་རྟ་འཛིན་བུ། །ཁྱུ་མཆོག་དཔལ་ཆེན་རྣམ་དག་ཀྱང་། །མ་འོངས་དུས་ན་འབྱུང་བར་འགྱུར། །དོན་གྲུབ་པ་དང་ཤཱཀྱའི་བུ། །ཡང་དག་མཐའ་དང་ཕུད་བུ་ལྔ། །ཚིག་སྟོབས་ཅན་དང་ཡིད་གཞུངས་པ། །ཕྱི་མའི་དུས་ན་འབྱུང་བར་འགྱུར། །ནགས་ཀྱི་གནས་ན་འདུག་པའི་ཚེ། །དབྱུ་གུ་ཤིང་དང་པགས་པ་དང་། །རྐེད་ཆིངས་དང་ནི་རིལ་བ་རྣམས། །ང་ལ་ཚངས་པ་སྦྱིན་པར་བྱེད། །རྣལ་འབྱོར་ལྡན་པ་ཆེན་པོ་སྟེ། །ཐུབ་པ་རྡུལ་མེད་ཅེས་བྱ་བའི། །ཐར་པ་འཆད་པའི་སྟོན་པར་འགྱུར། །འདི་ནི་ཐུབ་པའི་རྒྱལ་མཚན་ཞེས། །ཚངས་པ་ཚངས་པ་བརྒྱ་རྣམས་དང་། །ལྷ་རྣམས་མང་པོར་བཅས་པ་ཡིས། །ང་ལ་མཁའ་ལས་འཕགས་བོར་ནས། །དབང་ལྡན་དེ་ཉིད་མི་སྣང་འགྱུར། །དབང་པོ་ལྷ་དང་བཅས་པ་དང་། །འཕགས་སྐྱེས་པོ་ལ་སོགས་པ་ཡི། །སྣ་ཚོགས་གོས་དང་སློང་སྣོད་ཀུན། །ནགས་ཀྱི་གནས་སུ་
ང་ལ་འབུལ། །མི་སྐྱེ་སྨྲ་བའི་རྒྱུར་འདོད་པ། །སྐྱེས་སམ་སྐྱེས་པར་འགྱུར་ཡང་རུང་། །མ་སྐྱེས་པ་ནི་སྒྲུབ་པར་འགྱུར། །ཚིག་ཙམ་དུ་ནི་བརྗོད་པ་ཡིན། །སེམས་དེ་འབྱུང་བར་བྱེད་པ་ཡི། །རྒྱུ་ནི་མ་རིག་དེ་ཡིན་ཏེ། །ཇི་སྲིད་གཟུགས་དག་མི་ཤེས་པ། །དེ་སྲིད་བར་དུ་དེ་གནས་ཅི། །ཞིག་པར་གྱུར་མ་ཐག་ཏུ་ནི། །སེམས་ནི་གཞན་རྣམས་རབ་འབྱུང་སྟེ། །གཟུགས་ནི་དུས་སུ་མི་གནས་ན། །ཅི་ལ་དམིགས་ཏེ་འབྱུང་བར་འགྱུར། །གང་ལས་གང་དུ་འཇུག་པ་ཡི། །སེམས་ནི་ལོག་པའི་རྒྱུ་ལས་བྱུང་། །དེ་ནི་རབ་ཏུ་མ་གྲུབ་ན། །ཇི་ལྟར་སྐད་ཅིག་འཇིག་པར་རིག །རྣལ་འབྱོར་ཅན་གྱི་སྙོམས་འཇུག་དང་། །གསེར་དང་རྒྱལ་བའི་རིང་བསྲེལ་དང་། །འོད་སྣང་གནས་ཀྱི་གཞལ་མེད་ཁང་། །འཇིག་རྟེན་རྒྱུ་ཡིས་འཇིག་པར་མེད། །གནས་པ་རྣམས་དང་ཐོབ་པའི་ཆོས། །སངས་རྒྱས་ཡེ་ཤེས་ཕུན་སུམ་ཚོགས། །དགེ་སློང་ཉིད་དང་ཤེས་ཐོབ་རྣམས། །སྐད་ཅིག་མར་ནི་ཇི་ལྟར་མཐོང་། །སྒྱུ་མ་དྲི་ཟའི་གྲོང་སོགས་ཀྱི། །གཟུགས་རྣམས་ཇི་ལྟར་སྐད་ཅིག་པ། །འབྱུང་བ་རྣམས་ནི་འབྱུང་འགྱུར་མིན། །འགྲོ་བར་འབྱུང་བ་ཅང་མི་བྱེད། །སེམས་ནི་མ་རིག་རྒྱུ་ལས་བྱུང་། །ཐོག་མ་མེད་ནས་བསགས་པ་ཡིན། །སྐྱེ་བར་འཇིག་དང་ཀུན་འབྲེལ་བར། །རྟོག་གེ་པ་དག་རབ་ཏུ་རྟོག །གྲངས་ཅན་སྨྲ་བ་རྣམ་གཉིས་ཏེ། །གཙོ་བོ་ལས་ནི་འགྱུར་བ་དག །གཙོ་བོ་ཡོད་ན་འབྲས་བུ་ཡོད། །འབྲས་བུ་བདག་ཉིད་རབ་ཏུ་སྒྲུབ། །གཙོ་བོ་དང་ནི་དངོས་འཇུག་པར། །ཡོན་ཏན་བྱེ་བྲག་རབ་ཏུ་བསྒྲགས། །རྒྱུ་དང་འབྲས་བུ་སྣ་ཚོགས་པ། །འགྱུར་བ་ལ་ནི་མེད་པ་ཡིན། །ཇི་ལྟར་དངུལ་ཆུ་དག་པ་ལ། །དྲི་མ་རྣམས་ཀྱིས་མི་ཆགས་པ། །དེ་བཞིན་ལུས་ཅན་ཐམས་ཅད་ཀྱི། །ཀུན་གཞི་གནས་ཀྱང་དག་པའོ། །ཤིང་ཀུན་དྲི་དང་སྒོག་པ་དང་། །སྦྲུམ་མའི་བུར་ནི་མཐོང་བ་དང་། །ལན་ཚྭ་ལ་སོགས་རོ་ཡོད་དང་། །ཅི་ཕྱིར་ས་བོན་བཞིན་མི་འགྱུར། །དེ་ཉིད་དང་ནི་ཐ་དད་དང་། །དེ་བཞིན་གཉིས་ཀ་གཉིས་མ་ཡིན། །ཡོད་པ་ཡི་ནི་རྒྱུ་མེད་དེ། །འདུས་བྱས་ལ་མེད་མེད་པ་མིན། །
བདག་ནི་རྟ་དང་འདྲ་བར་ཡོད། །ཕུང་པོ་བ་ལང་ངོ་བོ་སྤངས། །འདུས་བྱས་འདུས་མ་བྱས་པ་ལ། །སྨྲར་མེད་བརྗོད་མེད་རང་བཞིན་ནོ། །ལུང་དང་རིགས་པས་ངན་པར་མཐོང་། །རྟོག་གེའི་ལྟ་བས་དྲི་མར་བྱས། །ཕྱེ་བ་མེད་པར་བདག་ཏུ་སྨྲ། །རྒྱུ་མེད་མ་ཡིན་གཞན་ན་མེད། །དེ་དག་གི་ནི་ཉེས་བསགས་པ། །ཕུང་པོ་བདག་ཏུ་མི་བསྒོམ་སྟེ། །གཅིག་པ་དང་ནི་དེ་ལས་གཞན། །རྟོག་གེ་ཅན་གྱིས་མི་ཤེས་སོ། །མེ་ལོང་ཆུ་དང་མིག་རྣམས་ལ། །ཇི་ལྟར་གཟུགས་བརྙན་སྣང་འགྱུར་བ། །གཅིག་དང་ཐ་དད་བྲལ་བ་བཞིན། །དེ་བཞིན་གང་ཟག་ཕུང་པོ་ལའོ། །བསྒོམ་དང་རྣམ་བསྒོམ་བསམ་གཏན་པ། །ལམ་དང་བདེན་དང་མཐོང་བ་སྟེ། །དེ་རྣམས་གསུམ་ནི་རྣམ་བསྒོམས་ན། །ལྟ་བ་ངན་ལས་གྲོལ་བར་འགྱུར། །ཇི་ལྟར་མཐོང་ན་ཞིག་པའི་གློག །ཁྱིམ་གྱི་བུ་གའི་འཁོར་ལོ་ལྟར། །དེ་བཞིན་ཆོས་ཀུན་འགྱུར་བ་ལ། །བྱིས་པ་བཞིན་དུ་མ་རྟོག་ཤིག །དངོས་པོ་མེད་པས་མྱ་ངན་འདས། །བྱིས་པའི་སེམས་ནི་རྨོངས་པར་བྱེད། །ཇི་ལྟར་འདུག་བཞིན་མཐོང་བ་དང་། །འཕགས་པས་མཐོང་བ་ཡོད་པའི་ཕྱིར། །སྐྱེ་བ་དང་ནི་འཇིག་བྲལ་ཞིང་། །དངོས་པོ་ཡོད་དང་མེད་སྤངས་པ། །མཚན་ཉིད་མཚན་གཞི་བྲལ་བ་ཡི། །འགྱུར་བ་རྣམ་པར་བསྒོམ་པར་བྱ། །མུ་སྟེགས་ཅན་གྱི་སྨྲ་དང་བྲལ། །མིང་དང་དབྱིབས་ནི་སྤངས་གྱུར་པ། །ནང་གི་ལྟ་བའི་གནས་རྣམས་ཀྱི། །འགྱུར་བ་རྣམ་པར་བསྒོམ་པར་གྱིས། །རེག་པ་དང་ནི་གཟིར་བ་ཡིས། །ལྷ་དང་སེམས་ཅན་དམྱལ་བའི་ལུས། །བར་མ་དོ་ཡི་སྲིད་མེད་དེ། །རྣམ་པར་ཤེས་པས་བསྐྱེད་པ་ཡིན། །མངལ་སྒོང་དྲོད་གཤེར་ལ་སོགས་པའི། །སྲིད་པ་བར་མར་འབྱུང་བ་དག །སེམས་ཅན་མང་པོ་སྣ་ཚོགས་བཞིན། །འགྲོ་དང་འགྲོ་བར་རྣམ་པར་བསྒོམས། །ལུང་དང་རིགས་པར་བྲལ་གྱུར་པ། །ཉོན་མོངས་ཕྱོགས་དང་ཟད་འཐོབ་བྱེད། །མུ་སྟེགས་ལྟ་བའི་སྨྲ་བ་ལ། །བློ་གྲོས་ཅན་གྱིས་མི་སྤྱད་དོ། །ཐོག་མར་ཉེ་བར་ལེན་པ་ལས། །བདག་ནི་ཕྱེ་བས་བྱེ་བྲག་དབྱེ། །མ་ཕྱེ་བྱེ་བྲག་འབྱེད་
པ་ནི། །མོ་ཤམ་བུ་ལ་བྱེ་བྲག་འབྱེད། །འཕྲུལ་གྱིས་མཐོང་བ་སེམས་ཅན་རྣམས། །ཤའི་དང་ཤེས་རབ་རྣམ་པར་སྤངས། །ལུས་ཅན་ཀུན་གྱི་གཟུགས་ཡོད་པ། །འདུ་བྱེད་ཕུང་པོར་སྤངས་གྱུར་པའོ། །ཁ་དོག་བཟང་དང་ངན་གྱུར་ཅིང་། །གྲོལ་དང་མ་གྲོལ་ཁྱད་གྱུར་པ། །ལྷ་རྫས་འདུ་བྱེད་གཏོགས་པ་ཡི། །འདུ་བྱེད་གནས་པ་རབ་ཏུ་མཐོང་། །འགྲོ་བའི་མཚམས་སུ་གཟུགས་ལྡན་རྣམས། །རྟོག་གེ་ཅན་གྱི་སྤྱོད་ཡུལ་མིན། །མི་ཡི་ཡུལ་ལས་ང་འདས་ཏེ། །ངན་པའི་རྟོག་གེ་ཅན་གཞན་མིན། །བདག་མེད་ཡིན་ལ་སེམས་འབྱུང་ན། །ཅི་ལས་དེ་ནི་འབྱུང་བར་འགྱུར། །འབབ་ཆུ་མེ་མར་ས་བོན་བཞིན། །ཅི་ཕྱིར་དེ་ཡི་འབྱུང་མི་བཤད། །རྣམ་པར་ཤེས་པ་མ་སྐྱེས་ལ། །མི་ཤེས་ལ་སོགས་མེད་པ་སྟེ། །དེ་མེད་པར་ནི་རྣམ་ཤེས་པ། །རྒྱུད་ཀྱི་སྐྱེ་བར་ཇི་ལྟར་འགྱུར། །དུས་གསུམ་དང་ནི་དུས་མེད་དང་། །བརྗོད་པ་མེད་དང་རྣམ་པ་ལྔ། །དེ་ནི་སངས་རྒྱས་ཞེས་བྱ་བར། །རྟོག་གེ་ཅན་རྣམས་རབ་ཏུ་བརྗོད། །ཤེས་པ་འདུ་བྱེད་རྒྱུས་འབྱུང་བ། །འདུ་བྱེད་རྣམས་ཀྱིས་མི་བརྗོད་དེ། །འདུ་བྱེད་བསྒྲུབས་པའི་ཤེས་པ་ནི། །འདུ་བྱེད་དུ་ནི་གཏོགས་པར་འཛིན། །འདི་ཡོད་པས་ནི་འདི་འབྱུང་སྟེ། །རྐྱེན་རྣམས་ལ་ནི་རྒྱུ་མེད་པ། །གསལ་བར་བྱེད་པར་རབ་ཏུ་སྟོན། །དེ་མེད་པས་ན་བྱེད་པ་མེད། །རླུང་ནི་མེ་དང་སྤྲིན་དག་ལ། །སྐྱོད་པ་ཡིན་ཏེ་འབྱིན་པ་མིན། །བསྐྱོད་ནས་དེས་ནི་ཞིར་འགྱུར་ན། །ཇི་ལྟར་སེམས་ཅན་རབ་ཏུ་བསྒྲུབས། །འདུས་བྱས་འདུས་མ་བྱས་པ་ནི། །ཉེར་ལེན་རྣམ་པར་སྤངས་པར་བརྗོད། །མེ་ནི་དེ་ལ་བསྒྲུབས་པར་ཡང་། །ཇི་ལྟར་བྱིས་པ་རྟོག་པར་བྱེད། །ཕན་ཚུན་སྟོབས་དང་མཐུ་ཡི་ཕྱིར། །མི་རྣམས་ཀྱི་ནི་མེ་འབྱུང་ན། །གང་ཕྱིར་མེ་བཞིན་བརྟག་བྱ་བའི། །སེམས་ཅན་གང་གིས་རབ་ཏུ་ཕྱུང་། །ཕུང་པོ་སྐྱེ་མཆེད་ཚོགས་རྣམས་ཀྱི། །རྒྱུ་ནི་ཡིད་ལ་སོགས་པ་སྟེ། །བདག་མེད་རྟག་ཏུ་འདྲོན་མང་བཞིན། །སེམས་དང་བཅས་ཏེ་རབ་ཏུ་འཇུག །འདི་གཉིས་རྟག་ཏུ་འོད་གསལ་བ། །རྒྱུ་དང་འབྲས་བུ་སྤངས་པའོ། །དེ་དག་སྒྲུབ་པ་མེ་མ་ཡིན། །རྟོག་གེ་
ཅན་གྱིས་མི་ཤེས་སོ། །སེམས་དང་སེམས་ཅན་མྱ་ངན་འདས། །རང་བཞིན་གྱིས་ནི་འོད་གསལ་ཏེ། །ཡིད་ལ་སོགས་པའི་ཉེས་པ་ཡིས། །ཉོན་མོངས་མཁའ་བཞིན་ཐ་དད་མིན། །གླང་པོའི་མལ་སོགས་བཞིན་སྔོན་ཡོད། །མུ་སྟེགས་ལྟ་བས་དྲི་མར་བྱས། །ཡིད་ཀྱི་རྣམ་པར་ཤེས་པས་གཡོགས། །མེ་ལ་སོགས་པས་རྣམ་པར་སྦྱངས། །དེ་ཡིས་ཡང་དག་ཇི་བཞིན་མཐོང་། །མཐོང་ནས་ཉོན་མོངས་རྣམས་ཀྱང་བཤིག །ཐིབས་པོའི་དཔེ་རྣམས་རབ་སྤངས་ཏེ། །དེ་དག་འཕགས་པའི་སྤྱོད་ཡུལ་དོང་། །ཤེས་དང་ཤེས་བྱའི་བྱེ་བྲག་གིས། །དེ་གཉིས་གཞན་དུ་མི་བརྟག་པ། །བློ་ངན་རྣམས་ཀྱིས་མི་རྟོགས་ཏེ། །བརྗོད་དུ་མེད་པ་སྨྲ་བར་བྱེད། །ཇི་ལྟར་ཙན་དན་བྱས་པའི་རྔ། །བྱིས་པ་དག་ནི་གཞན་དུ་བྱེད། །དེ་བཞིན་ཙན་དན་ཨ་གར་འདྲའི། །ཤེས་པ་རྟོག་གེ་ངན་པས་སོ། །ལངས་ནས་ཁ་ཟས་ཕྱིས་མི་ལེན། །ལྷུང་བཟེད་གནས་དང་ཕྱིང་པ་ཅན། །གདོང་འགྱུར་ལ་སོགས་ཉེས་པ་ཅན། །དག་པས་ཟས་ལ་སྤྱད་པར་བྱ། །སུ་ཞིག་ཚུལ་འདི་རིགས་པས་དཔོག་བྱེད་པ། །དད་ལྡན་རྣལ་འབྱོར་བརྩོན་ཞིང་མི་རྟོག་པ། །མི་གནས་དོན་ལ་རྟེན་པར་གྱུར་པ་དེ། །ཆོས་ཀྱི་རྣམ་པར་གསེར་བཞིན་སྤྱད་པར་བྱ། །བླུན་པས་སྲིད་དང་མི་སྲིད་རྐྱེན་རྟོག་པ། །དེ་ནི་ལྟ་ངན་དྲ་བ་དྲི་མར་བཅས། །འདོད་ཆགས་ཞེ་སྡང་གཏི་མུག་བཅས་པ་ལྡོག །ཆགས་མེད་སངས་རྒྱས་ཕྱག་གིས་དབང་བསྐུར་འགྱུར། །མུ་སྟེགས་རྒྱུ་ཡི་ཕྱོགས་ཀྱིས་བསླད། །གཞན་ཡང་རྐྱེན་གྱིས་རྣམ་པར་རྨོངས། །གཞན་དག་རྒྱུ་མེད་དེ་འབྱུང་བས། །དོན་མེད་པ་ནི་ཆད་པའོ། །ཡིད་དང་རྣམ་པར་ཤེས་པ་དང་། །རྣམ་པར་སྨིན་པ་གྱུར་པ་སྟེ། །ཡིད་ནི་ཀུན་གཞི་ལས་བྱུང་བ། །རྣམ་པར་ཤེས་པ་ཡིད་ལས་བྱུང་། །ཀུན་གཞི་ལས་ནི་སེམས་ཀུན་ཀྱང་། །དབའ་རླབས་བཞིན་དུ་འབྱུང་བར་འགྱུར། །ཐམས་ཅད་བག་ཆགས་རྒྱུ་ལས་བྱུང་། །རྐྱེན་བཞིན་དུ་ནི་འབྱུང་བའོ། །སྐད་ཅིག་ཐ་དད་འབྲེལ་བས་སྦྲེལ། །རང་གི་སེམས་ནི་དོན་ལ་འཛིན། །དབྱིབས་ཀྱི་མཚན་ཉིད་རྣམ་པར་དག །ཡིད་དང་
མིག་ལ་སོགས་ལས་བྱུང་། །ཐོག་མ་མེད་ནས་རྣམ་པར་འབྲེལ། །དོན་སྣང་བག་ཆགས་རྣམས་ལས་བྱུང་། །ཇི་ལྟར་སྣང་བ་སེམས་སྣང་སྟེ། །མུ་སྟེགས་ལྟ་བ་བཟློག་པ་ཡི། །དེ་ཡི་རྒྱུས་བྱུང་གཞན་ཉིད་ཀྱང་། །དེ་ལ་དམིགས་ནས་འཇུག་པར་འགྱུར། །དེ་ལས་ལྟ་བ་ཤེས་པ་དག །འཁོར་བར་རབ་ཏུ་འཇུག་པར་འགྱུར། །དངོས་པོ་རྨི་ལམ་སྒྱུ་མ་འདྲ། །དྲི་ཟའི་གྲོང་ཁྱེར་རྣམས་བཞིན་ཏེ། །སྨིག་རྒྱུ་བ་དང་ཆུ་ཟླ་ལྟར། །རང་གི་རྣམ་རྟོག་རྣམ་པར་སྒོམས། །འཇུག་པའི་རྣམ་པས་དེ་བཞིན་ཉིད། །ཡང་དག་ཡེ་ཤེས་དེ་ཡི་གནས། །སྒྱུ་མ་དཔའ་བར་འགྲོ་ལ་སོགས། །ཏིང་ངེ་འཛིན་ནི་གཞན་རྣམས་དང་། །མངོན་པར་ཤེས་དང་དབང་རྣམས་དང་། །ཡེ་ཤེས་སྒྱུ་མ་ལྟ་བུ་དང་། །དེ་བཞིན་གཤེགས་པས་དབང་བསྐུར་བ། །ས་ལ་ཞུགས་ནས་ཐོབ་པར་འགྱུར། །གང་ཚེ་འགྲོ་བ་རྣམ་རྟོག་མཐོང་། །དེ་ཚེ་སེམས་ནི་ལྡོག་པར་འགྱུར། །ས་ནི་རབ་ཏུ་དགའ་བ་དང་། །སངས་རྒྱས་ས་དང་ས་རྣམས་འཐོབ། །གནས་ནི་རབ་ཏུ་གྱུར་པའི་ཕྱིར། །ཇི་ལྟར་སྣ་ཚོགས་ནོར་བུ་བཞིན། །སེམས་ཅན་རྣམས་ཀྱི་དོན་བྱེད་དེ། །ཆུ་ལ་གཟུགས་བརྙན་ཇི་བཞིན་ནོ། །ཡོད་དང་མེད་པའི་ཕྱོགས་རྣམས་དང་། །གཉིས་དང་གཉིས་མེད་པ་དང་བྲལ། །ཉན་ཐོས་རང་རྒྱལ་འདས་གྱུར་ན། །ས་བདུན་པོར་ནི་འགྱུར་བ་ཡིན། །སོ་སོ་རང་ཆོས་མཐོང་བས་ནི། །ཡང་དག་པ་ཡི་ས་སྦྱངས་ཏེ། །ཕྱི་རོལ་མུ་སྟེགས་རྣམས་སྤངས་པའི། །ཐེག་པ་ཆེན་པོ་བཤད་པར་བྱ། །རྣམ་པར་རྟོག་པར་རབ་གྱུར་ན། །ཤི་འཕོས་འཇིག་པ་རྣམས་སྤངས་པ། །རི་བོང་སྤུ་ཡི་ནོར་བུ་བཞིན། །གྲོལ་བ་རྣམས་ལ་ཚུལ་ཡང་བཤད། །ཇི་ལྟར་ཚིག་ལ་ཚིག་གནས་པ། །གལ་ཏེ་རིགས་ལ་རིགས་དེ་བཞིན། །དེ་ཕྱིར་རིགས་པའི་རིགས་པ་ཡིན། །དེ་ལས་གཞན་དུ་མ་རྟོག་ཅིག །མིག་དང་ལས་དང་སྲེད་པ་དང་། །མ་རིག་དེ་བཞིན་ཚུལ་བཞིན་མིན། །མིང་དང་གཟུགས་དང་ཡིད་རྣམས་དང་། །རྙོག་པའི་ཡིད་ཀྱང་དེ་བཞིན་ནོ། །འཕགས་པ་ལང་ཀར་གཤེགས་པ་ཞེས་བྱ་བ་ཐེག་པ་ཆེན་པོའི་མདོ་ཇི་སྙེད་པ་རྫོགས་སོ། །བཅོམ་ལྡན་འདས་ཀྱིས་རིང་ལུགས་པ་འགོས་ཆོས་གྲུབ་ཀྱིས་རྒྱའི་དཔེ་ལས་བསྒྱུར་ཏེ་གཏན་ལ་ཕབ་པའོ།། །།
འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས་སངས་རྒྱས་ཐམས་ཅད་ཀྱི་གསུང་གི་སྙིང་པོ་ཞེས་བྱ་བའི་ལེའུ། བམ་པོ་དང་པོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྷོ་ཕྱོགས་ཀྱི་རྒྱ་མཚོའི་འགྲམ་ལང་ཀའི་རིའི་རྩེ་མོ་རིན་པོ་ཆེའི་མེ་ཏོག་སྣ་ཚོགས་ཀྱིས་བཀོད་པ་ན། དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོའི་ཚོགས་སངས་རྒྱས་ཀྱི་ཞིང་སྣ་ཚོགས་ཐ་དད་པ་ནས་འདུས་པ་དག་དང་ཐབས་ཅིག་ཏུ་བཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་ཚད་མེད་པའི་ཏིང་ངེ་འཛིན་དང་། དབང་པོ་དང་། སྟོབས་དང་། མངོན་པར་ཤེས་པས་རྣམ་པར་རྩེན་པ་ཤ་སྟག་ལ། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་ནི་གཙོ་བོར་གྱུར་ཏེ། སངས་རྒྱས་ཐམས་ཅད་ཀྱི་ཕྱག་གིས་སྤྱི་བོ་ནས་དབང་བསྐུར་བས་དབང་བསྐུར་བ། རང་གི་སེམས་སྣང་བའི་སྤྱོད་ཡུལ་གྱི་དོན་ལ་རབ་ཏུ་མཁས་པ། སེམས་ཅན་སྣ་ཚོགས་ཀྱི་སེམས་དང་། གཟུགས་སྣ་ཚོགས་དང་། འདུལ་བའི་སྒོ་ཚད་མེད་པ་རྣམས་ཇི་ལྟ་བ་བཞིན་དུ་ཀུན་དུ་སྟོན་པ། ཆོས་ལྔ་དང་། རང་བཞིན་དང་། རྣམ་པར་ཤེས་པ་དང་། བདག་མེད་པ་གཉིས་རྟོགས་པར་ཁོང་དུ་ཆུད་པའོ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོ། བྱང་ཆུབ་སེམས་དཔའ་བློ་གྲོས་དང་། སངས་རྒྱས་ཀྱི་ཞིང་ཐམས་ཅད་དུ་རྒྱུ་བ་དག་དང་ལྷན་ཅིག་ཏུ། སངས་རྒྱས་ཀྱི་མཐུས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འཇིག་རྟེན་སྐྱེ་འཇིག་ཡོངས་བྲལ་ཏེ། །ནམ་མཁའི་མེ་ཏོག་རབ་ཏུ་འདྲ། །ཡེ་ཤེས་ཡོད་མེད་མི་དམིགས་ཀྱང་། །ཐུགས་རྗེ་ཆེན་པོ་རབ་ཏུ་སྐྱེ། །ཆོས་རྣམས་ཐམས་ཅད་སྒྱུ་མ་
བཞིན། །སེམས་དང་རྣམ་ཤེས་ཡོངས་སུ་སྤངས། །ཡེ་ཤེས་ཡོད་མེད་མི་དམིགས་ཀྱང་། །ཐུགས་རྗེ་ཆེན་པོ་རབ་ཏུ་སྐྱེ། །རྟག་དང་ཆད་པ་ཡོངས་སྤངས་པ། །འཇིག་རྟེན་ཁོར་ཟུག་རྨི་ལམ་འདྲ། །ཡེ་ཤེས་ཡོད་མེད་མི་དམིགས་ཀྱང་། །ཐུགས་རྗེ་ཆེན་པོ་རབ་ཏུ་སྐྱེ། །གང་ཟག་ཆོས་ལ་བདག་མེད་དང་། །ཉོན་མོངས་ཤེས་བྱ་རབ་མཁྱེན་ཅིང་། །རྟག་ཏུ་དག་ཅིང་མཚན་མེད་ཀྱང་། །ཐུགས་རྗེ་ཆེན་པོ་རབ་ཏུ་སྐྱེ། །ཀུན་ལས་མྱ་ངན་མི་འདའ་སྟེ། །མྱ་ངན་འདས་སངས་རྒྱས་མི་དམིགས། །སངས་རྒྱས་མྱ་ངན་འདའ་མི་དམིགས། །བློ་དང་རིག་པར་བགྱི་དང་བྲལ། །ཡོད་པ་དང་ནི་མེད་པའི་ཕྱོགས། །གཉིས་པོ་དེ་དག་ཤིན་ཏུ་སྤངས། །ཐུབ་པ་ཞི་བའི་རྣལ་འབྱོར་པ། །སྐྱེ་བ་དག་ནི་རབ་སྤངས་པས། །དེ་ནི་ལེན་མི་མངའ་ཞེས་བགྱི། །འདི་དང་གཞན་དུ་རྣམ་པར་དག །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས་རང་གི་རིགས་དང་མིང་བརྗོད་དེ་གསོལ་པ། བདག་མིང་བློ་གྲོས་ཆེན་པོ་སྟེ། །ཐོས་ཆེན་ཁོང་དུ་ཆུད་པར་རྟོགས། །དེང་འདིར་བརྒྱ་རྩ་བརྒྱད་ཀྱི་དོན། །བླ་མའི་མཆོག་ལ་ཞུ་བར་བགྱི། །འཇིག་རྟེན་མཁྱེན་པའི་སྐྱེས་མཆོག་གིས། །ཚིགས་བཅད་དེ་ནི་གསན་པ་དང་། །འཁོར་རྣམས་ལ་ནི་རྣམ་གཟིགས་ནས། །རྒྱལ་སྲས་རྣམས་ལ་བཀའ་སྩལ་པ། །ཁྱོད་ལ་སོགས་པ་རྒྱལ་སྲས་རྣམས། །ཅི་དང་ཅི་འདོད་དྲིས་ཤིག་དང་། །སོ་སོ་རང་གི་སྤྱོད་ཡུལ་ནི། །ངས་ནི་ཁྱེད་ལ་བཤད་པར་བྱ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ་ཕྱག་བྱས་ནས་ཐལ་མོ་སྦྱར་ཏེ་ཚིགས་སུ་བཅད་པས་ཞུ་བ་ཞུས་པ། ཇི་ལྟར་དྲན་པ་རྣམ་དག་འགྱུར། །ཇི་ལྟར་དྲན་པ་འཕེལ་བར་འགྱུར། །ལྟ་རྨོངས་ནོར་པ་ཇི་ལྟ་བུ། །ནོར་པ་ཇི་ལྟར་འཕེལ་བར་འགྱུར། །ཞིང་དུ་སྤྲུལ་རྣམས་ཅི་སླད་དུ། །མཚན་ཉིད་དང་ནི་མུ་སྟེགས་ཀྱང་། །མཚན་མེད་རིམ་པ་ཇི་ལྟ་བུ། །ཅི་སླད་མཚན་མ་མེད་པས་བགྱི། །ཅི་སླད་རྒྱལ་བའི་སྲས་
ཞེས་བགྱི། །རྣམ་གྲོལ་གང་དུ་མཆི་བར་འགྱུར། །གང་ལ་འཆིང་ཞིང་གང་དག་དགྲོལ། །བསམ་གཏན་སྤྱོད་ཡུལ་ཇི་ལྟ་བུ། །ཇི་སླད་ཐེག་པ་གསུམ་པོ་མཆིས། །བདག་ལ་བསྟན་ཅིང་བཤད་དུ་གསོལ། །རྐྱེན་རྣམས་གང་ལས་སྐྱེ་བ་ལགས། །བྱེད་དང་བྱས་པ་ཇི་ལྟ་བུ། །གཉི་ག་ཐ་དད་ཅི་སླད་བཤད། །ཇི་ལྟ་བུར་ན་འཕེལ་བ་ལགས། །གཟུགས་མེད་སྙོམས་པར་འཇུག་པ་དང་། །འགོག་པའི་སྙོམས་འཇུག་ཇི་ལྟ་བུ། །འདུ་ཤེས་འགོག་པ་ཇི་ལྟ་བུ། །ཏིང་ངེ་འཛིན་ལས་ཇི་ལྟར་སད། །ཅི་ཡི་སླད་དུ་བྱས་པ་འབྱུང་། །འགྲོ་བ་དང་ནི་ལུས་འཛིན་ཅི། །ཇི་ལྟར་རྣམ་རྟོག་སྣང་བར་འགྱུར། །ས་རྣམས་ཇི་ལྟར་སྐྱེ་བར་འགྱུར། །སྲིད་གསུམ་འཇིག་པ་དེ་སུ་ཞིག །གནས་ནི་གང་ལགས་ལུས་ནི་ཅི། །སྐྱེ་གནས་གང་དུ་བགྲོད་པར་འགྱུར། །རྒྱལ་བའི་སྲས་སུ་ཇི་ལྟར་འགྱུར། །མངོན་པར་ཤེས་དང་དབང་རྣམས་དང་། །ཏིང་འཛིན་རྣམས་ནི་ཇི་ལྟར་འཐོབ། །ཏིང་འཛིན་སེམས་ནི་ཇི་ལྟ་བུ། །རྒྱལ་བས་བདག་ལ་བཤད་དུ་གསོལ། །ཅི་སླད་ཀུན་གཞི་ཞེས་བགྱི་ལགས། །ཡིད་དང་རྣམ་ཤེས་ཇི་ལྟ་བུ། །སྐྱེ་དང་འཇིག་པ་ཇི་ལྟ་བུ། །ཇི་ལྟར་མཐོང་ནས་སླར་ཡང་ལྡོག །ཇི་ལྟ་བུར་ན་རིགས་སུ་འགྱུར། །རིགས་མ་མཆིས་དང་སེམས་ཙམ་དང་། །སྒྲོ་འདོགས་མཚན་ཉིད་ཇི་ལྟ་བུ། །བདག་མེད་དོན་དུ་ཇི་ལྟར་འགྱུར། །སེམས་ཅན་མ་མཆིས་ཇི་ལྟ་བུ། །ཀུན་རྫོབ་བཤད་པ་ཇི་ལྟ་བུ། །ཇི་ལྟར་རྟག་དང་ཆད་པ་ཡི། །ལྟ་བ་རབ་ཏུ་འབྱུང་མི་འགྱུར། །ཇི་ལྟར་སངས་རྒྱས་མུ་སྟེགས་དག །མཚན་ཉིད་རྣམས་ཀྱིས་འགལ་མི་འགྱུར། །ཇི་ལྟར་མ་འོངས་དུས་དག་ན། །སྡེ་པ་ཐ་དད་འབྱུང་བར་འགྱུར། །ཇི་ལྟར་སྟོང་ཉིད་རྒྱུ་ཅི་ཡིས། །ཇི་ལྟར་སྐད་ཅིག་འཇིག་པར་འགྱུར། །མངལ་གྱི་སྙིང་པོར་ཇི་ལྟར་སྐྱེ། །ཇི་ལྟར་འཇིག་རྟེན་གྱིས་མི་གཡོས། །ཇི་ལྟར་སྒྱུ་མ་རྨི་ལམ་འདྲ། །དེ་བཞིན་དྲི་ཟའི་གྲོང་ཁྱེར་དང་། །འཇིག་རྟེན་སྨིག་རྒྱུ་ལྟ་བུ་དང་། །ཆུ་ཟླ་དང་ནི་འོད་དག་དང་། །བྱང་ཆུབ་ཡན་ལག་ཅི་སླད་གསུངས། །དེ་བཞིན་བྱང་ཆུབ་ཕྱོགས་
རྣམས་ཀྱང་། །ཡུལ་རྣམས་ཅི་སླད་འཁྲུག་པར་འགྱུར། །ཅི་སླད་སྲིད་པར་ལྟ་བར་བགྱིད། །ཇི་ལྟར་སྐྱེ་འགག་མ་མཆིས་ཤིང་། །འཇིག་རྟེན་ནམ་མཁའ་མེ་ཏོག་འདྲ། །འཇིག་རྟེན་ཇི་ལྟར་ཐུགས་སུ་ཆུད། །ཅི་སླད་ཡི་གེ་བྲལ་བར་གསུང་། །རྣམ་རྟོག་སྤངས་པ་དེ་སུ་ལགས། །ཇི་ལྟར་ནམ་མཁའ་འདྲ་བ་ལགས། །དེ་ཁོ་ན་ལ་དུ་ཞིག་མཆིས། །ཕ་རོལ་ཕྱིན་སེམས་རྣམ་པ་དུ། །རྒྱུ་གང་གིས་ནི་ས་རྣམས་སྒྲོལ། །ལེན་མ་མཆིས་པར་སུ་ཞིག་མཆི། །བདག་མེད་རྣམ་གཉིས་གང་ཞིག་ལགས། །ཤེས་བྱ་ཇི་ལྟར་རྣམ་པར་འདག །ཡེ་ཤེས་དག་ནི་རྣམ་པ་དུ། །ཚུལ་ཁྲིམས་སེམས་ཅན་ཉིད་ནི་དུ། །ནོར་བུ་མུ་ཏིག་ལ་སོགས་པའི། །རིགས་རྣམས་སུ་ཡིས་རབ་ཏུ་བསྐྱེད། །སེམས་ཅན་རྣམ་པ་སྣ་ཚོགས་དང་། །བརྗོད་པ་དག་ནི་སུ་ཡིས་བསྐྱེད། །རིག་པའི་གནས་དང་བཟོ་ཡི་རྣམས། །སུ་ཡིས་ཇི་ལྟར་རབ་ཏུ་བསྟན། །ཚིགས་སུ་བཅད་པ་རྣམ་པ་དུ། །ཚིགས་བཅད་རིང་ཐུང་ཇི་ལྟ་བུ། །རིགས་པ་རྣམ་པ་དུ་ཞིག་མཆིས། །ཅི་ཡི་སླད་དུ་སྨྲ་ཞེས་བགྱི། །སྐོམ་དང་ཟས་རྣམས་ཇི་ལྟར་འབྱུང་། །ཇི་ལྟར་སྲེད་པའི་འདོད་པ་འབྱུང་། །ཅི་སླད་རྒྱལ་པོ་ཞེས་བགྱི་ལགས། །འཁོར་ལོས་སྒྱུར་དང་རྒྱལ་ཕྲན་ཅི། །ཡུལ་ནི་ཇི་ལྟར་བསྲུང་བར་བགྱི། །ལྷ་ཡི་རིས་ལ་རྣམ་པ་དུ། །ཅི་ཡི་སླད་དུ་ས་ཞེས་བགྱི། །གཟའ་སྐར་ཉི་ཟླ་ཇི་ལྟ་བུ། །ཐར་པ་དང་ནི་རྣལ་འབྱོར་པ། །དེ་དག་རྣམ་པ་དུ་ཞིག་མཆིས། །སློབ་མ་རྣམ་པ་དུ་ཞིག་མཆིས། །སློབ་དཔོན་དུ་ཡང་ཇི་ལྟར་འགྱུར། །སངས་རྒྱས་རྣམ་པ་དུ་ཞིག་ལགས། །སྐྱེས་པའི་རབས་ལ་རྣམ་པ་དུ། །བདུད་དང་སློབ་པའི་བྱེ་བྲག་རྣམས། །དེ་དག་ལ་ནི་རྣམ་པ་དུ། །རང་བཞིན་དང་ནི་སེམས་རྣམས་ཀྱང་། །དེ་དག་ལ་ནི་དུ་ཞིག་མཆིས། །བཏགས་པ་ཙམ་ཡང་ཇི་ལྟ་བུ། །རྒྱལ་བས་བདག་ལ་བཤད་དུ་གསོལ། །ནམ་མཁའ་སྤྲིན་རླུང་ཇི་ལྟ་བུ། །དྲན་དང་ཡིད་གཞུངས་གསལ་བ་ཅི། །ནགས་ཚལ་ཤིང་ནི་ཇི་ལྟ་བུ། །འཁྲི་ཤིང་དག་ནི་ཅི་ལས་གྱུར། །གླང་པོ་རྟ་དང་རི་དགས་རྣམས། །ཇི་ལྟར་གཟུང་དུ་རུང་བར་འགྱུར། །
ངན་པའི་མི་རྣམས་ཇི་ལྟ་བུ། །རྒྱུ་གང་གིས་ནི་ངན་པར་འགྱུར། །ཚིག་དྲུག་གིས་ནི་ཇི་ལྟར་བསྡུས། །འདོད་ཆེན་པར་ཡང་ཇི་ལྟར་འགྱུར། །སྐྱེས་པ་བུད་མེད་མ་ནིང་རྣམས། །དེ་དག་ཐམས་ཅད་ཅི་སླད་འབྱུང་། །རྣལ་འབྱོར་ལས་ནི་ཇི་ལྟར་ལྡོག །རྣལ་འབྱོར་ཇི་ལྟར་སྐྱེ་བར་འགྱུར། །རྣལ་འབྱོར་པས་ནི་ཆོས་གང་གིས། །ཅི་འདྲའི་གང་ཟག་རྣམ་པར་འཇོག །སེམས་ཅན་འགྲོ་བར་སྐྱེ་བ་རྣམས། །མཚན་ཉིད་མཚན་མའི་རྣམ་པ་ཅི། །ཕྱུག་པོར་གྱུར་པ་ཇི་ལྟ་བུ། །རྒྱུ་གང་གིས་ནི་ཕྱུག་པོར་འགྱུར། །ཤཱཀྱའི་རིགས་ནི་ཇི་ལྟ་བུ། །ཅི་ཡི་རྒྱུ་ཡིས་ཤཱཀྱ་བྱུང་། །བུ་རམ་ཤིང་པ་ཇི་ལྟར་བྱུང་། །བླ་མེད་གཙོ་བོས་བཤད་དུ་གསོལ། །ཡུན་རིང་དཀའ་ཐུབ་དྲང་སྲོང་གང་། །དེས་ནི་ཇི་ལྟར་རྗེས་སུ་སྟོན། །དེ་བཞིན་གཤེགས་པ་ཞིང་རྣམས་སུ། །མཚན་དང་དེ་བཞིན་གཟུགས་སྣ་ཚོགས། །རྒྱལ་བའི་སྲས་ཀྱིས་བསྐོར་བ་ཡང་། །ཅི་ཡི་སླད་དུ་ཀུན་ན་གདའ། །ཅི་སླད་ཤ་རྣམས་གསོལ་མི་མཛད། །ཅི་སླད་ཤ་ནི་རབ་ཏུ་བཀག །ཤ་ཟའི་རིགས་སུ་སྐྱེས་པ་རྣམས། །རྒྱུ་གང་གིས་ནི་ཤ་འཚལ་ལགས། །ཉི་ཟླའི་དབྱིབས་ཤིང་ཇི་ལྟ་བུ། །རི་རབ་པདྨ་འདྲ་བ་དང་། །སེང་གེ་མཚན་མཆོག་ཞིང་དག་དང་། །འཇིག་རྟེན་གཟུར་གནས་སྤྱིའུ་ཚུགས་དང་། །དབང་པོའི་དྲ་བ་འདྲ་བ་དང་། །ཁ་ཅིག་རིན་ཆེན་ཀུན་གྱི་ཞིང་། །དགུ་པོ་རྒྱུད་མངས་རྔ་འདྲ་དང་། །མེ་ཏོག་སྣ་ཚོགས་དབྱིབས་འདྲ་དང་། །ཁ་ཅིག་ཉི་ཟླའི་འོད་དང་བྲལ། །འདྲི་ལ་སོགས་པ་ཚད་མ་མཆིས། །སྤྲུལ་པའི་སངས་རྒྱས་ཇི་ལྟ་བུ། །རྣམ་སྨིན་ལས་བྱུང་སངས་རྒྱས་དང་། །དེ་བཞིན་ཉིད་ཀྱི་སངས་རྒྱས་ཅི། །ཡེ་ཤེས་སངས་རྒྱས་ཇི་ལྟ་བུ། །ཅི་སླད་འདོད་པའི་ཁམས་རྣམས་སུ། །མངོན་པར་རྫོགས་པར་འཚང་མི་རྒྱ། །ཅི་ཡི་སླད་དུ་འོག་མིན་པ། །ཆགས་བྲལ་ཁྲོད་དུ་བྱང་ཆུབ་བརྙེས། །བདེ་གཤེགས་མྱ་ངན་འདས་ནས་ནི། །ཡང་དག་བསྟན་པ་སུ་ཞིག་འཛིན། །ལྷ་ཡི་སྟོན་པ་ཇི་སྲིད་བཞུགས། །ཡང་དག་ཆོས་ནི་ཇི་སྲིད་གནས། །གྲུབ་མཐའ་དང་ནི་ལྟ་བ་ཡང་། །དེ་དག་ལ་ནི་རྣམ་པ་དུ། །འདུལ་བ་དང་ནི་དགེ་སློང་རིས། །ཅི་སླད་རྒྱུ་དང་རྐྱེན་
ནི་གང་། །རྒྱལ་བའི་སྲས་ནི་དེ་དག་དང་། །རང་རྒྱལ་དང་ནི་ཉན་ཐོས་དག །རྒྱུ་གང་གིས་ན་འགྱུར་བརྒྱར་འགྱུར། །རྒྱུ་གང་གིས་ནི་སྣང་མེད་བརྒྱ། །འཇིག་རྟེན་མངོན་ཤེས་ཇི་ལྟ་བུ། །འཇིག་རྟེན་འདས་ཀྱིའང་ཇི་ལྟ་བུ། །སེམས་ནི་ས་རྣམས་བདུན་པོར་ཡང་། །ཅི་ལྟར་ཅི་སླད་བདག་ལ་གསུངས། །དགེ་འདུན་ལ་ནི་རྣམ་པ་དུ། །ཇི་ལྟར་དགེ་འདུན་དབེན་དུ་འགྱུར། །སེམས་ཅན་གསོ་བའི་བསྟན་བཅོས་རྣམས། །དེ་དག་རྒྱུ་རྐྱེན་གང་གིས་ལགས། །ཅི་སླད་ཐུབ་པ་ཆེན་པོ་ཡིས། །འོད་སྲུང་འཁོར་བ་འཇིག་དང་ནི། །གསེར་ཐུབ་ཀྱང་ནི་ང་ཡིན་ཞེས། །དེ་སྐད་དུ་ནི་བཀའ་ཡང་སྩལ། །ཅི་སླད་རྟག་དང་ཆད་པ་དང་། །དེ་བཞིན་བདག་དང་བདག་མེད་གསུངས། །ཅི་སླད་དུ་ནི་ཐམས་ཅད་དུ། །ཡང་དག་དོན་ནི་གསུང་མི་མཛད། །སེམས་ཅན་དག་གི་སླད་དུ་ཡང་། །སེམས་ཙམ་དུ་ནི་དབྱེ་བ་མཛད། །ཅི་སླད་སྐྱེས་བུ་ན་ཆུང་ཚལ། །ཨ་རུ་ར་དང་སྐྱུ་རུ་ར། །ཀེ་ལ་ས་དང་ཁོར་ཡུག་རི། །རྡོ་རྗེ་ལ་སོགས་རི་བོ་རྣམས། །རིན་ཆེན་སྣ་ཚོགས་རབ་བརྒྱན་ཅིང་། །དྲང་སྲོང་དྲི་ཟས་ཀུན་གང་བ། །ཇི་ལྟར་ཅི་སླད་བདག་ལ་གསུངས། །བླ་མེད་འཇིག་རྟེན་མཁྱེན་པ་ཡིས། །ཐེག་ཆེན་སྒྲོལ་བའི་སྒོ་རྣམས་དང་། །སངས་རྒྱས་ཀུན་གྱི་སྙིང་པོ་མཆོག །དེ་ཡི་ཚིགས་བཅད་གསན་པ་དང་། །ལེགས་སོ་དྲིས་པ་རབ་ཏུ་ལེགས། །བློ་གྲོས་ཆེན་པོ་ལེགས་པར་ཉོན། །ངས་ནི་དེང་འདིར་རིམ་བཞིན་དུ། །ཁྱོད་ཀྱིས་གང་དྲིས་བཤད་པར་བྱ། །སྐྱེ་དང་སྐྱེ་བ་མེད་པ་དང་། །མྱ་ངན་འདས་སྟོང་སྐད་ཅིག་མ། །རང་བཞིན་མེད་ལ་འཇུག་པར་འགྱུར། །སངས་རྒྱས་ཕ་རོལ་ཕྱིན་རྣམས་དང་། །རྒྱལ་སྲས་དང་ནི་ཉན་ཐོས་དང་། །རང་རྒྱལ་མུ་སྟེགས་ཅན་རྣམས་དང་། །གཟུགས་མེད་པ་ཡི་སྤྱོད་རྣམས་དང་། །དེ་བཞིན་དངོས་པོ་སྣ་ཚོགས་རྣམས། །རི་རབ་མཚོ་བྲན་རི་རྣམས་དང་། །གླིང་དང་ཞིང་དང་ས་རྣམས་དང་། །གཟའ་སྐར་ཉི་མ་ཟླ་བ་དང་། །མུ་སྟེགས་ལྷ་དང་ལྷ་མ་ཡིན། །རྣམ་ཐར་དབང་དང་མངོན་ཤེས་དང་། །སྟོབས་དང་བསམ་གཏན་ཏིང་ངེ་འཛིན། །འགོག་དང་རྫུ་འཕྲུལ་རྐང་པ་དང་། །བྱང་ཆུབ་ཡན་ལག་ལམ་གྱི་ཕྱོགས། །
བསམ་གཏན་རྣམས་དང་ཚད་མེད་དང་། །ཕུང་པོ་ལུས་རྣམས་འགྲོ་འོང་དང་། །སྙོམས་པར་འཇུག་དང་འགོག་པ་དང་། །ཏིང་འཛིན་ལྡང་སེམས་བཤད་པ་དང་། །སེམས་དང་ཡིད་དང་རྣམ་ཤེས་དང་། །བདག་མེད་པ་དང་ཆོས་ལྔ་དང་། །རང་བཞིན་རྟོག་དང་བརྟག་པ་དང་། །སྣང་དང་ལྟ་བ་གཉིས་པོ་དང་། །ཐེག་པ་དང་ནི་རིགས་རྣམས་དང་། །གསེར་དངུལ་ནོར་བུ་ལ་སོགས་དང་། །འདོད་ཆེན་པ་དང་འབྱུང་ཆེན་དང་། །དཀྲུགས་མ་དག་དང་སངས་རྒྱས་གཅིག །ཤེས་དང་ཤེས་བྱ་འཇུག་ཐོབ་དང་། །སེམས་ཅན་སྲིད་དང་མི་སྲིད་དང་། །གླང་པོ་རྟ་དང་རི་དགས་རྣམས། །ཅི་ཡི་ཕྱིར་ན་གཟུང་དུ་རུང་། །དཔེ་དང་རྒྱུ་དང་གྲུབ་མཐའ་དང་། །བྱེད་པ་དང་ནི་བྱས་པ་རྣམས། །ནགས་ཚལ་ནོར་པ་མངོན་ཤེས་དང་། །སེམས་ཅན་དེ་ནི་སྣང་བ་མེད། །ས་རྣམས་རིམ་གྱིས་འཕོ་བ་མེད། །འགྱུར་བ་བརྒྱ་པོ་སྣང་མེད་བརྒྱ། །གསོ་བའི་བསྟན་བཅོས་བཟོ་རྣམས་དང་། །སྒྱུ་རྩལ་དང་ནི་རིག་པའི་གནས། །རི་བོ་རི་རབ་ས་དག་དང་། །རྒྱ་མཚོ་ཉི་མ་ཟླ་བའི་ཚད། །སེམས་ཅན་རབ་འབྲིང་ཐ་མ་ཡི། །ལུས་ལ་རྡུལ་ནི་དུ་ཞིག་ཡོད། །ཞིང་དང་ཞིང་ལ་རྡུལ་དུ་ཞིག །གཞུ་དང་གཞུ་ལ་ཇི་སྙེད་ཡོད། །ཁྲུ་དང་གོམ་པ་རྒྱང་གྲགས་དང་། །དཔག་ཚད་ཕྱེད་དང་དཔག་ཚད་ལ། །རི་བོང་ཉི་ཟེར་སྲོ་མ་དང་། །ལུག་གི་དང་ནི་ནས་ཀྱང་དུ། །བྲེ་གང་ལ་ནི་ནས་འབྲུ་དུ། །བྲེ་ཕྱེད་ལ་ཡང་ནས་འབྲུ་དུ། །བྲེ་བོ་གང་དང་བཅུ་དག་ལ། །གྲངས་འབུམ་དང་ནི་བྱེ་བ་དང་། །དེ་བཞིན་དུ་ནི་ཤུ་རྡོག་ལ། །དེ་དག་གྲངས་ནི་དུ་ཞིག་ཡོད། །རྡུལ་ཕྲན་དག་ནི་དུ་ཞིག་ཡོད། །རྡུལ་ཕྲན་དག་ནི་དུ་ཞིག་ལ། །ཡུངས་ཀར་འབྲུ་ནི་གཅིག་ཏུ་འགྱུར། །ཡུངས་ཀར་འབྲུ་ནི་དུ་ཞིག་གིས། །འོལ་མ་སེ་ནི་གཅིག་ཏུ་འགྱུར། །འོལ་མ་སེ་ནི་དུ་ཞིག་ལ། །མ་ཤ་འབྲུ་ནི་གཅིག་ཏུ་འགྱུར། །མ་ཤ་དུ་ལ་ནམ་ནི་གཅིག །ནམ་དུ་ལ་ནི་སྲང་དུ་འགྱུར། །སྲང་གཅིག་ལ་ཡང་ཞོ་དུ་ཡོད། །རྩིས་ཀྱི་རྩིས་མགོ་འདི་ལྟ་བུར། །རི་རབ་སྲང་ནི་དུ་ཡོད་ཅེས། །འདི་ལ་སོགས་པའི་དྲི་བའི་རིགས། །ཅི་ཡི་ཕྱིར་ན་དངོས་གཞན་འདྲི། །ཉན་ཐོས་དང་ནི་རང་རྒྱལ་དང་། །སངས་རྒྱས་རྣམས་དང་རྒྱལ་སྲས་
ཀྱི། །སྐུ་ལ་རྡུལ་ཕྲན་དུ་ཡོད་ཅེས། །དེ་སྐད་ཅིའི་ཕྱིར་འདྲི་མི་བྱེད། །མེ་ལྕེ་ལ་ནི་རྡུལ་ཕྲན་དུ། །རླུང་ལ་ཡང་ནི་རྡུལ་ཕྲན་དུ། །དབང་པོ་གཅིག་ཅིང་རྡུལ་ཕྲན་དུ། །སྨིན་མ་སྤུ་ཡི་བུ་ག་དུ། །ནོར་སྲུང་དབང་ཕྱུག་རྒྱལ་པོ་དང་། །འཁོར་ལོས་སྒྱུར་བའི་རྒྱལ་པོ་ཡང་། །རྒྱལ་སྲིད་དག་ནི་ཇི་ལྟར་བསྲུང་། །དེ་དག་ཇི་ལྟར་ཐར་པ་འགྱུར། །ཚིགས་བཅད་རྐྱང་པ་ཇི་ལྟར་སྨྲ། །ཁྱོད་ཀྱིས་ཇི་ལྟར་ཞུས་པ་བཞིན། །སེམས་ཅན་འཁྲིག་པ་སྣ་ཚོགས་དང་། །ཟས་སྐོམ་རྣམ་པ་མང་པོ་དང་། །ཇི་ལྟར་སྐྱེས་བུ་ན་ཆུང་ཚལ། །རྡོ་རྗེ་ལྟ་བུར་སྲ་བའི་རི། །ཇི་ལྟར་སྒྱུ་མ་རྨི་ལམ་འདྲ། །རི་དགས་སྐོམ་གྱིས་གདུངས་པ་ལྟར། །ཇི་ལྟར་རི་བོ་དྲང་སྲོང་ལྷ། །དྲི་ཟས་རབ་ཏུ་བརྒྱན་པ་དང་། །གྲོལ་བ་གང་དུ་འགྲོ་བར་འགྱུར། །བཅིངས་པ་སུ་ཞིག་གང་གིས་འགྲོལ། །བསམ་གཏན་པ་ཡི་ཡུལ་ནི་གང་། །སྤྲུལ་པ་དང་ནི་མུ་སྟེགས་ཀྱང་། །ཅི་ཕྱིར་མེད་པའི་རྒྱུ་ལས་བྱེད། །ཅིའི་ཕྱིར་ཡོད་པའི་རྒྱུ་ལས་བྱེད། །ཡོད་མེད་རྒྱུ་ལས་བྱེད་པ་དང་། །དེ་བཞིན་ཡོད་མེད་མིན་པའི་རྒྱུ། །སྣང་བ་ལས་ནི་ཇི་ལྟར་ལྡོག །རྟོག་གེ་ཇི་ལྟར་ཡོངས་སུ་འདག །རྟོག་གེ་ཇི་ལྟར་འཇུག་པར་འགྱུར། །བྱེད་པ་ཅི་ཡིས་འཇུག་པར་འགྱུར། །ཇི་ལྟར་འདུ་ཤེས་གཅད་པར་བྱ། །ཇི་ལྟར་ཏིང་ངེ་འཛིན་ལས་ལྡང་། །སྲིད་གསུམ་བཅོམ་པ་དེ་སུ་ཞིག །གནས་གང་དེ་ཡི་ལུས་ཀྱང་ཅི། །ཅི་ཕྱིར་སེམས་ཅན་མེད་བཞིན་དུ། །བདག་ཡོད་པར་ནི་རྗོད་པར་བྱེད། །ཀུན་རྫོབ་བསྟན་པ་ཇི་ལྟ་བུ། །རྒྱ་ཆེར་རབ་ཏུ་དབྱེར་གསོལ་ཞེས། །མཚན་ཉིད་འདྲི་བ་ཅི་ཡི་ཕྱིར། །བདག་མེད་འདྲི་བ་ཇི་ལྟ་བུ། །ཇི་ལྟར་མངལ་གྱི་སྙིང་པོར་སྐྱེ། །ལུས་ནི་ཐ་དད་སྣ་ཚོགས་དང་། །རྟག་ཆད་ལྟ་བ་ཇི་ལྟ་བུ། །ཇི་ལྟར་སེམས་ནི་མཉམ་པར་འཇོག །བརྗོད་དང་དེ་བཞིན་ཡེ་ཤེས་དང་། །ཚུལ་ཁྲིམས་རིགས་དང་རྒྱལ་བའི་སྲས། །རིགས་པ་དང་ནི་སྨྲ་བའང་ཅི། །སློབ་དཔོན་སློབ་མ་ཇི་ལྟ་བུ། །སེམས་ཅན་རྣམ་པ་སྣ་ཚོགས་དང་། །འདི་ལ་སོགས་པ་ཇི་ལྟ་བུ། །ཟས་དང་སྐོམ་ནི་ཇི་ལྟ་བུ། །ཡིད་གཞུངས་བདུད་དང་བཏགས་པ་ཙམ། །ཤིང་དང་འཁྲི་ཤིང་ཅི་ཕྱིར་ཞེས། །རྒྱལ་བའི་སྲས་ཀྱིས་དྲི་བའི་རིགས། །
ཞིང་རྣམས་སྣ་ཚོགས་ཅི་ཡི་ཕྱིར། །དྲང་སྲོང་ཡུན་རིང་དཀའ་ཐུབ་དང་། །རིགས་ཞེས་བྱ་བ་ཇི་ལྟ་བུ། །བླ་མ་གང་ལས་བསླབ་པ་བླང་། །ཅི་ཡི་ཕྱིར་ན་མི་དག་ངན། །ཅི་ཡི་ཕྱིར་ན་རྣལ་འབྱོར་པ། །འདོད་པའི་ཁམས་སུ་འཚང་མི་རྒྱ། །འོག་མིན་དུ་ནི་གྲུབ་པའི་མཐའ། །ཅི་ཕྱིར་མངོན་ཤེས་འཇིག་རྟེན་པ། །ཅི་ཕྱིར་དགེ་སློང་ཞེས་ནི་བརྗོད། །སྤྲུལ་པའི་སངས་རྒྱས་ཇི་ལྟ་བུ། །རྣམ་སྨིན་སངས་རྒྱས་ཇི་ལྟ་བུ། །དེ་བཞིན་ཉིད་ཀྱི་སངས་རྒྱས་གང་། །མཉམ་ཉིད་ཡེ་ཤེས་སངས་རྒྱས་དང་། །དགེ་འདུན་རྣམས་ཀྱང་ཇི་ལྟ་བུ། །རྒྱལ་སྲས་དེ་བཞིན་དྲི་བའི་རིགས། །དགུ་པོ་རྒྱུད་མངས་མེ་ཏོག་རྔ། །ཞིང་དང་སྣང་བ་སྤངས་པ་དང་། །སེམས་ཙམ་ས་ནི་བདུན་པོ་དག །དྲིས་པ་རྣམས་ནི་ཡང་དག་ཉིད། །འདི་དང་གཞན་ཡང་རབ་མང་བའི། །དྲི་བ་དག་ནི་རྒྱལ་སྲས་དྲིས། །རེ་རེ་མཚན་ཉིད་རབ་ལྡན་ཞིང་། །ལྟ་བའི་ཉེས་པ་རྣམ་སྤངས་པ། །གྲུབ་མཐའི་བརྗོད་དང་བྲལ་བ་སྟེ། །ངས་ནི་ད་འདིར་བསྟན་པར་བྱ། །གོ་རིམས་རྣམ་པར་གཞག་པའི་ཚིག །རྒྱལ་བའི་སྲས་ཀྱིས་ལེགས་པར་ཉོན། །ཚིག་བརྒྱ་རྩ་བརྒྱད་འདི་དག་ནི། །སངས་རྒྱས་རྣམས་ཀྱིས་གསུངས་བཞིན་བཤད། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚིག་བརྒྱ་པོ་དག་གང་ལགས། །བཅོམ་ལྡན་འདས་ཀྱིས་བཀའ་སྩལ་པ། སྐྱེ་བའི་ཚིག་དང་། མི་སྐྱེ་བའི་ཚིག་དང་། རྟག་པའི་ཚིག་དང་། མི་རྟག་པའི་ཚིག་དང་། མཚན་ཉིད་ཀྱི་ཚིག་དང་། མཚན་ཉིད་མེད་པའི་ཚིག་དང་། གནས་པ་གཞན་དུ་འགྱུར་བའི་ཚིག་དང་། གནས་པ་གཞན་དུ་འགྱུར་བ་མ་ཡིན་པའི་ཚིག་དང་། སྐད་ཅིག་པའི་ཚིག་དང་། སྐད་ཅིག་མ་ཡིན་པའི་ཚིག་དང་། རང་བཞིན་གྱི་ཚིག་དང་། རང་བཞིན་དང་བྲལ་བའི་ཚིག་དང་། སྟོང་པ་ཉིད་ཀྱི་ཚིག་དང་། སྟོང་པ་ཉིད་མ་ཡིན་པའི་ཚིག་དང་། ཆད་པའི་ཚིག་དང་། ཆད་པ་མ་ཡིན་པའི་ཚིག་དང་། སེམས་ཀྱི་ཚིག་དང་། སེམས་མ་ཡིན་པའི་ཚིག་དང་། མཐའི་ཚིག་དང་། མཐའ་མ་ཡིན་པའི་ཚིག་དང་། དབུ་མའི་ཚིག་དང་། དབུ་མ་མ་ཡིན་པའི་ཚིག་དང་། ཐེར་ཟུག་གི་ཚིག་དང་། ཐེར་
ཟུག་མ་ཡིན་པའི་ཚིག་དང་། རྐྱེན་གྱི་ཚིག་དང་། རྐྱེན་མ་ཡིན་པའི་ཚིག་དང་། རྒྱུའི་ཚིག་དང་། རྒྱུ་མ་ཡིན་པའི་ཚིག་དང་། ཉོན་མོངས་པའི་ཚིག་དང་། ཉོན་མོངས་པ་མ་ཡིན་པའི་ཚིག་དང་། སྲེད་པའི་ཚིག་དང་། སྲེད་པ་མ་ཡིན་པའི་ཚིག་དང་། ཐབས་ཀྱི་ཚིག་དང་། ཐབས་མ་ཡིན་པའི་ཚིག་དང་། མཁས་པའི་ཚིག་དང་། མཁས་པ་མ་ཡིན་པའི་ཚིག་དང་། དག་པའི་ཚིག་དང་། དག་པ་མ་ཡིན་པའི་ཚིག་དང་། རིགས་པའི་ཚིག་དང་། རིགས་པ་མ་ཡིན་པའི་ཚིག་དང་། དཔེའི་ཚིག་དང་། དཔེ་མ་ཡིན་པའི་ཚིག་དང་། སློབ་མའི་ཚིག་དང་། སློབ་མ་མ་ཡིན་པའི་ཚིག་དང་། བླ་མའི་ཚིག་དང་། བླ་མ་མ་ཡིན་པའི་ཚིག་དང་། རིགས་ཀྱི་ཚིག་དང་། རིགས་མ་ཡིན་པའི་ཚིག་དང་། ཐེག་པ་གསུམ་གྱི་ཚིག་དང་། ཐེག་པ་གསུམ་མ་ཡིན་པའི་ཚིག་དང་། སྲིད་པའི་ཚིག་དང་། སྲིད་པ་མ་ཡིན་པའི་ཚིག་དང་། སྨོན་པའི་ཚིག་དང་། སྨོན་པ་མ་ཡིན་པའི་ཚིག་དང་། འཁོར་ལོ་གསུམ་གྱི་ཚིག་དང་། འཁོར་ལོ་གསུམ་མ་ཡིན་པའི་ཚིག་དང་། མཚན་མའི་ཚིག་དང་། མཚན་མ་མ་ཡིན་པའི་ཚིག་དང་། ཡོད་པའི་ཕྱོགས་ཀྱི་ཚིག་དང་། ཡོད་པའི་ཕྱོགས་མ་ཡིན་པའི་ཚིག་དང་། གཉི་གའི་ཚིག་དང་། གཉི་ག་མ་ཡིན་པའི་ཚིག་དང་། སོ་སོ་རང་གི་འཕགས་པའི་ཡེ་ཤེས་ལ་དམིགས་པ་མཐོང་བའི་ཆོས་ལ་བདེ་བར་གནས་པའི་ཚིག་དང་། མཐོང་བའི་ཆོས་ལ་བདེ་བར་གནས་པ་མ་ཡིན་པའི་ཚིག་དང་། ཞིང་གི་ཚིག་དང་། ཞིང་མ་ཡིན་པའི་ཚིག་དང་། རྡུལ་གྱི་ཚིག་དང་། རྡུལ་མ་ཡིན་པའི་ཚིག་དང་། ཆུའི་ཚིག་དང་། ཆུ་མ་ཡིན་པའི་ཚིག་དང་། གཞུའི་ཚིག་དང་། གཞུ་མ་ཡིན་པའི་ཚིག་དང་། ཡང་དག་པའི་ཚིག་དང་། ཡང་དག་པ་མ་ཡིན་པའི་ཚིག་དང་། གྲངས་ཀྱི་ཚིག་དང་། གྲངས་མ་ཡིན་པའི་ཚིག་དང་། རྩིས་ཀྱི་ཚིག་དང་། རྩིས་མ་ཡིན་པའི་ཚིག་དང་། མངོན་པར་གསལ་བའི་ཚིག་དང་། མངོན་པར་གསལ་བ་མ་ཡིན་པའི་ཚིག་དང་། ནམ་མཁའི་ཚིག་དང་། ནམ་མཁའ་མ་ཡིན་པའི་ཚིག་དང་། སྤྲིན་གྱི་ཚིག་དང་། སྤྲིན་མ་ཡིན་པའི་ཚིག་དང་། བཟོ་དང་སྒྱུ་རྩལ་དང་རིག་པའི་གནས་ཀྱི་ཚིག་
དང་། བཟོ་དང་སྒྱུ་རྩལ་དང་རིག་པའི་གནས་མ་ཡིན་པའི་ཚིག་དང་། རླུང་གི་ཚིག་དང་། རླུང་མ་ཡིན་པའི་ཚིག་དང་། སའི་ཚིག་དང་། ས་མ་ཡིན་པའི་ཚིག་དང་། སེམས་ཀྱི་ཚིག་དང་། སེམས་མ་ཡིན་པའི་ཚིག་དང་། གདགས་པའི་ཚིག་དང་། གདགས་པ་མ་ཡིན་པའི་ཚིག་དང་། རང་བཞིན་གྱི་ཚིག་དང་། རང་བཞིན་མ་ཡིན་པའི་ཚིག་དང་། ཕུང་པོའི་ཚིག་དང་། ཕུང་པོ་མ་ཡིན་པའི་ཚིག་དང་། སེམས་ཅན་གྱི་ཚིག་དང་། སེམས་ཅན་མ་ཡིན་པའི་ཚིག་དང་། བློའི་ཚིག་དང་། བློ་མ་ཡིན་པའི་ཚིག་དང་། མྱ་ངན་ལས་འདས་པའི་ཚིག་དང་། མྱ་ངན་ལས་འདས་པ་མ་ཡིན་པའི་ཚིག་དང་། ཤེས་བྱའི་ཚིག་དང་། ཤེས་བྱ་མ་ཡིན་པའི་ཚིག་དང་། མུ་སྟེགས་ཅན་གྱི་ཚིག་དང་། མུ་སྟེགས་ཅན་མ་ཡིན་པའི་ཚིག་དང་། ཁྲག་ཁྲུག་གི་ཚིག་དང་། ཁྲག་ཁྲུག་མ་ཡིན་པའི་ཚིག་དང་། སྒྱུ་མའི་ཚིག་དང་། སྒྱུ་མ་མ་ཡིན་པའི་ཚིག་དང་། རྨི་ལམ་གྱི་ཚིག་དང་། རྨི་ལམ་མ་ཡིན་པའི་ཚིག་དང་། སྨིག་རྒྱུའི་ཚིག་དང་། སྨིག་རྒྱུ་མ་ཡིན་པའི་ཚིག་དང་། གཟུགས་བརྙན་གྱི་ཚིག་དང་། གཟུགས་བརྙན་མ་ཡིན་པའི་ཚིག་དང་། འཁོར་ལོའི་ཚིག་དང་། འཁོར་ལོ་མ་ཡིན་པའི་ཚིག་དང་། དྲི་ཟའི་ཚིག་དང་། དྲི་ཟ་མ་ཡིན་པའི་ཚིག་དང་། ལྷའི་ཚིག་དང་། ལྷ་མ་ཡིན་པའི་ཚིག་དང་། ཟས་སྐོམ་གྱི་ཚིག་དང་། ཟས་སྐོམ་མ་ཡིན་པའི་ཚིག་དང་། འཁྲིག་པའི་ཚིག་དང་། འཁྲིག་པ་མ་ཡིན་པའི་ཚིག་དང་། ལྟ་བའི་ཚིག་དང་། ལྟ་བ་མ་ཡིན་པའི་ཚིག་དང་། ཕ་རོལ་དུ་ཕྱིན་པའི་ཚིག་དང་། ཕ་རོལ་དུ་ཕྱིན་པ་མ་ཡིན་པའི་ཚིག་དང་། ཚུལ་ཁྲིམས་ཀྱི་ཚིག་དང་། ཚུལ་ཁྲིམས་མ་ཡིན་པའི་ཚིག་དང་། ཉི་ཟླ་སྐར་མའི་ཚིག་དང་། ཉི་ཟླ་སྐར་མ་མ་ཡིན་པའི་ཚིག་དང་། བདེན་པའི་ཚིག་དང་། བདེན་པ་མ་ཡིན་པའི་ཚིག་དང་། འབྲས་བུའི་ཚིག་དང་། འབྲས་བུ་མ་ཡིན་པའི་ཚིག་དང་། འགོག་པ་ལས་ལྡང་བའི་ཚིག་དང་། འགོག་པ་ལས་ལྡང་བ་མ་ཡིན་པའི་ཚིག་དང་། གསོ་བའི་ཚིག་དང་། གསོ་བ་མ་ཡིན་པའི་ཚིག་དང་། མཚན་ཉིད་ཀྱི་ཚིག་དང་། མཚན་ཉིད་མ་ཡིན་པའི་ཚིག་དང་། ཡན་ལག་གི་ཚིག་དང་།
ཡན་ལག་མ་ཡིན་པའི་ཚིག་དང་། རིག་པའི་གནས་ལ་མཁས་པའི་ཚིག་དང་། རིག་པའི་གནས་ལ་མཁས་པ་མ་ཡིན་པའི་ཚིག་དང་། བསམ་གཏན་གྱི་ཚིག་དང་། བསམ་གཏན་མ་ཡིན་པའི་ཚིག་དང་། ནོར་པའི་ཚིག་དང་། ནོར་པ་མ་ཡིན་པའི་ཚིག་དང་། སྣང་བའི་ཚིག་དང་། སྣང་བ་མ་ཡིན་པའི་ཚིག་དང་། བསྲུང་བའི་ཚིག་དང་། བསྲུང་བ་མ་ཡིན་པའི་ཚིག་དང་། རུས་ཀྱི་ཚིག་དང་། རུས་མ་ཡིན་པའི་ཚིག་དང་། དྲང་སྲོང་གི་ཚིག་དང་། དྲང་སྲོང་མ་ཡིན་པའི་ཚིག་དང་། རྒྱལ་པོའི་ཚིག་དང་། རྒྱལ་པོ་མ་ཡིན་པའི་ཚིག་དང་། ཡོངས་སུ་གཟུང་བའི་ཚིག་དང་། ཡོངས་སུ་གཟུང་བ་མ་ཡིན་པའི་ཚིག་དང་། རིན་པོ་ཆེའི་ཚིག་དང་། རིན་པོ་ཆེ་མ་ཡིན་པའི་ཚིག་དང་། ལུང་བསྟན་པའི་ཚིག་དང་། ལུང་བསྟན་པ་མ་ཡིན་པའི་ཚིག་དང་། འདོད་ཆེན་པའི་ཚིག་དང་། འདོད་ཆེན་པ་མ་ཡིན་པའི་ཚིག་དང་། ཕོ་མོ་དང་མ་ནིང་གི་ཚིག་དང་། ཕོ་མོ་དང་མ་ནིང་མ་ཡིན་པའི་ཚིག་དང་། བྲོ་བའི་ཚིག་དང་། བྲོ་བ་མ་ཡིན་པའི་ཚིག་དང་། དངོས་པོའི་ཚིག་དང་། དངོས་པོ་མ་ཡིན་པའི་ཚིག་དང་། ལུས་ཀྱི་ཚིག་དང་། ལུས་མ་ཡིན་པའི་ཚིག་དང་། རྟོག་གེའི་ཚིག་དང་། རྟོག་གེ་མ་ཡིན་པའི་ཚིག་དང་། གཡོ་བའི་ཚིག་དང་། གཡོ་བ་མ་ཡིན་པའི་ཚིག་དང་། དབང་པོའི་ཚིག་དང་། དབང་པོ་མ་ཡིན་པའི་ཚིག་དང་། འདུས་བྱས་ཀྱི་ཚིག་དང་། འདུས་བྱས་མ་ཡིན་པའི་ཚིག་དང་། འདུས་མ་བྱས་ཀྱི་ཚིག་དང་། འདུས་མ་བྱས་མ་ཡིན་པའི་ཚིག་དང་། རྒྱུ་དང་འབྲས་བུའི་ཚིག་དང་། རྒྱུ་དང་འབྲས་བུ་མ་ཡིན་པའི་ཚིག་དང་། འོག་མིན་གྱི་ཚིག་དང་། འོག་མིན་མ་ཡིན་པའི་ཚིག་དང་། དུས་ཚིགས་ཀྱི་ཚིག་དང་། དུས་ཚིགས་མ་ཡིན་པའི་ཚིག་དང་། ཤིང་དང་ཤིང་གེལ་པ་དང་འཁྲི་ཤིང་གི་ཚིག་དང་། ཤིང་དང་ཤིང་གེལ་པ་དང་འཁྲི་ཤིང་མ་ཡིན་པའི་ཚིག་དང་། སྣ་ཚོགས་ཀྱི་ཚིག་དང་། སྣ་ཚོགས་མ་ཡིན་པའི་ཚིག་དང་། བསྟན་པས་གཟུང་བའི་ཚིག་དང་། བསྟན་པས་གཟུང་བ་མ་ཡིན་པའི་ཚིག་དང་། འདུལ་བའི་ཚིག་དང་། འདུལ་བ་མ་ཡིན་པའི་ཚིག་དང་། དགེ་སློང་གི་ཚིག་དང་། དགེ་སློང་མ་ཡིན་པའི་ཚིག་དང་། གནས་
ཀྱི་ཚིག་དང་། གནས་མ་ཡིན་པའི་ཚིག་དང་། ཡི་གེའི་ཚིག་དང་། ཡི་གེ་མ་ཡིན་པའི་ཚིག་སྟེ། བློ་གྲོས་ཆེན་པོ་ཚིག་བརྒྱ་རྩ་བརྒྱད་པོ་འདི་དག་ནི་སྔོན་གྱི་སངས་རྒྱས་རྣམས་ཀྱིས་བརྗོད་པ་ཡིན་ཏེ། ཁྱོད་དང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བསླབ་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པར་ཤེས་པ་རྣམས་ཀྱི་སྐྱེ་བ་དང་། གནས་པ་དང་། འགག་པ་རྣམ་པ་དུ་མཆིས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་རྣམ་པར་ཤེས་པ་རྣམས་ཀྱི་སྐྱེ་བ་དང་། གནས་པ་དང་། འགག་པ་ལ་རྣམ་པ་གཉིས་གཉིས་ཡོད་དེ། རྟོག་གེ་པ་རྣམས་ཀྱིས་ཤེས་པར་བྱ་བ་མ་ཡིན་ནོ། །རྣམ་པར་ཤེས་པ་རྣམས་ཀྱི་སྐྱེ་བ་ཡང་རྣམ་པ་གཉིས་ཏེ། འདི་ལྟ་སྟེ། རྒྱུན་སྐྱེ་བ་དང་། མཚན་ཉིད་སྐྱེ་བའོ། །གནས་པ་ཡང་རྣམ་པ་གཉིས་ཏེ། འདི་ལྟ་སྟེ། རྒྱུན་གནས་པ་དང་། མཚན་ཉིད་གནས་པའོ། །འགག་པ་ཡང་རྣམ་པ་གཉིས་ཏེ། འདི་ལྟ་སྟེ། རྒྱུན་འགག་པ་དང་། མཚན་ཉིད་འགག་པའོ། །དེ་ལ་རྣམ་པར་ཤེས་པ་རྣམས་ཀྱི་མཚན་ཉིད་ནི་རྣམ་པ་གསུམ་སྟེ། འདི་ལྟ་སྟེ། འཇུག་པའི་མཚན་ཉིད་དང་། ལས་ཀྱི་མཚན་ཉིད་དང་། ཡང་དག་པའི་མཚན་ཉིད་དོ། །བློ་གྲོས་ཆེན་པོ་མདོར་བསྡུ་ན་ནི་རྣམ་པར་ཤེས་པ་གསུམ་ཡོད་དོ། །རྒྱས་པར་བཤད་ན་ནི་མཚན་ཉིད་རྣམ་པ་བརྒྱད་ཡོད་དེ། རྣམ་པ་གསུམ་པོ་དག་གང་ཞེ་ན། འདི་ལྟ་སྟེ། ཡང་དག་པའི་རྣམ་པར་ཤེས་པ་དང་། སྣང་བའི་རྣམ་པར་ཤེས་པ་དང་། དངོས་པོ་སོ་སོར་རྣམ་པར་རྟོག་པའི་རྣམ་པར་ཤེས་པའོ། །བློ་གྲོས་ཆེན་པོ་དཔེར་ན་མེ་ལོང་རབ་ཏུ་གསལ་བས་གཟུགས་བརྙན་རྣམས་འཛིན་པར་བྱེད་པ་དེ་བཞིན་དུ་སྣང་བའི་རྣམ་པར་ཤེས་པ་སྣང་བ་ཡང་དེ་བཞིན་ནོ། །བློ་གྲོས་ཆེན་པོ་སྣང་བའི་རྣམ་པར་ཤེས་པ་དང་། དངོས་པོ་སོ་སོར་རྣམ་པར་རྟོག་པའི་རྣམ་པར་ཤེས་པ་དེ་གཉིས་ནི་འཇིག་པ་དང་།
མི་འཇིག་པའི་མཚན་ཉིད་དེ་གཅིག་གི་རྒྱུ་གཅིག་གོ །བློ་གྲོས་ཆེན་པོ་བསམ་གྱིས་མི་ཁྱབ་པའི་བག་ཆགས་ཡོངས་སུ་བསྒོས་པ་དང་། བསམ་གྱིས་མི་ཁྱབ་པའི་ཡོངས་སུ་འགྱུར་བ་ནི་སྣང་བའི་རྣམ་པར་ཤེས་པའི་རྒྱུའོ། །བློ་གྲོས་ཆེན་པོ་ཡུལ་སྣ་ཚོགས་ལེན་པ་དང་། ཐོག་མ་མེད་པའི་དུས་ཀྱི་རྣམ་པར་རྟོག་པས་ཡོངས་སུ་བསྒོས་པ་ནི་དངོས་པོ་སོ་སོར་རྣམ་པར་རྟོག་པའི་རྣམ་པར་ཤེས་པའི་རྒྱུའོ། །བློ་གྲོས་ཆེན་པོ་ཡང་དག་པའི་རྣམ་པར་ཤེས་པ་དེ་ལ་སྒྲིབ་པར་བྱེད་པ་ཡང་དག་པ་མ་ཡིན་པ་སྣ་ཚོགས་དང་། སྤྲོས་པ་རྣམས་འགགས་པས་དབང་པོའི་རྣམ་པར་ཤེས་པ་ཐམས་ཅད་འགག་པར་འགྱུར་ཏེ། བློ་གྲོས་ཆེན་པོ་འདི་ནི་མཚན་ཉིད་འགག་པ་ཞེས་བྱའོ། །བློ་གྲོས་ཆེན་པོ་དེ་ལ་རྒྱུན་འགག་པ་ནི་མཚམས་སྦྱོར་བའི་རྒྱུ་འགག་པ་ན་རྒྱུན་འགག་པར་འགྱུར་ཏེ། གང་ལས་འབྱུང་བ་འགགས་པ་དང་། གང་ལ་དམིགས་པར་བྱ་བ་འགགས་ན་དེས་རྒྱུན་འགག་པར་འགྱུར་རོ། །བློ་གྲོས་ཆེན་པོ་དེ་ཅིའི་ཕྱིར་ཞེ་ན། དེའི་གནས་ཡིན་པའི་ཕྱིར་རོ། །དེ་ལ་གནས་ཞེས་བྱ་བ་ནི་ཐོག་མ་མེད་པའི་རྣམ་པར་རྟོག་པ་སྲིད་པ་གསུམ་གྱི་སྡུག་བསྔལ་འགགས་པ། མི་ཤེས་པ་དང་། སྲེད་པ་དང་། ལས་དང་། རྐྱེན་རྣམ་པར་ལོག་པ། རང་གི་སེམས་སྣང་བ་སྒྱུ་མའི་ཡུལ་དང་། རྗེས་སུ་ལྟ་བ་རྣམས་བཤད་པར་བྱའོ། །བློ་གྲོས་ཆེན་པོ་དགེ་སྦྱོང་ངམ། བྲམ་ཟེ་ལ་ལ་ནི་ས་བོན་མེད་པའམ། ས་བོན་ཡོད་པའི་རྒྱུ་ལས་འབྲས་བུ་སྣང་བ་དང་། དངོས་པོའི་དུས་དང་། གནས་པ་དང་། རྐྱེན་རྣམས་ལས་ཕུང་པོ་དང་། ཁམས་དང་། སྐྱེ་མཆེད་རྣམས་སྐྱེ་བ་དང་། གནས་པའམ། ཡང་ན་སྐྱེས་ནས་ཀྱང་འཇིག་པར་འགྱུར་བར་འདོད་དེ། བློ་གྲོས་ཆེན་པོ་དེ་དག་ནི་རྒྱུན་ནམ། བྱ་བའམ། སྐྱེ་བའམ། སྲིད་པའམ། མྱ་ངན་ལས་འདས་པའམ། ལམ་མམ། ལས་སམ། འབྲས་བུའམ། བདེན་པ་རྣམ་པར་འཇིག་པའམ། ཆད་པར་སྨྲ་བར་འགྱུར་རོ། །དེ་ཅིའི་ཕྱིར་ཞེ་ན། གང་འདི་མངོན་སུམ་དུ་མི་དམིགས་ཤིང་ཐོག་མ་མི་མཐོང་སྟེ། དེའི་ཆ་མ་ཡིན་པའི་ཕྱིར་རོ། །བློ་
གྲོས་ཆེན་པོ་དཔེར་ན་རྫ་མ་ཆག་ནས་གྱོ་མོར་གྱུར་པ་ནི་རྫ་མའི་བྱ་བ་མི་བྱེད་དོ། །ས་བོན་ཚིག་པ་ཡང་མྱུ་གུའི་བྱ་བ་མི་བྱེད་དེ། དེ་བཞིན་དུ་བློ་གྲོས་ཆེན་པོ་ཕུང་པོ་དང་། ཁམས་དང་། སྐྱེ་མཆེད་ཀྱི་དངོས་པོ་དག་འགགས་པ་དང་། འགག་པ་དང་། འགག་པར་འགྱུར་བ་ནི་རང་གི་སེམས་ཀྱི་རྣམ་པར་རྟོག་པས་མཐོང་སྟེ། རྒྱུ་མེད་པའི་ཕྱིར་དེ་དག་ནི་རིམ་གྱིས་སྐྱེ་བ་མེད་དོ། །བློ་གྲོས་ཆེན་པོ་གལ་ཏེ་ས་བོན་མེད་པའམ། ས་བོན་ཡོད་པ་ལས་རྣམ་པར་ཤེས་པ་རྣམས་རྐྱེན་གསུམ་དང་ཕྲད་པ་ལས་སྐྱེ་བ་ཞིག་ཡིན་ན་ནི་རུས་སྦལ་ལས་སྤུ་སྐྱེ་བ་དང་། བྱེ་མ་ལས་ཀྱང་འབྲུ་མར་འབྱུང་བར་འགྱུར་བའི་རིགས་ཏེ། འོ་ན་ནི་ཁྱོད་ཀྱི་དམ་བཅས་པ་ལས་ཉམས་ཤིང་ངེས་པའི་དོན་དང་ཡང་འགལ་བར་འགྱུར་རོ། །ས་བོན་ཡོད་པ་དང་། ས་བོན་མེད་པར་བཤད་པ་ལ་ཉེས་པ་དེ་ལྟ་བུ་ཡོད་པས་བྱ་བ་དང་ལས་བྱས་པ་རྣམས་དོན་མེད་པར་འགྱུར་རོ། །བློ་གྲོས་ཆེན་པོ་མུ་སྟེགས་ཅན་དེ་དག་རྐྱེན་གསུམ་ཕྲད་པ་ལས་སྐྱེ་ཞེས་བྱ་བ་ཡང་བྱ་བ་དང་། སྣང་བ་འདུས་པ་ལས་སྐྱེ་བ་མ་ཡིན་གྱི། གུད་ན་ཐ་དད་པའི་རྒྱུ་ཡོད་དོ་ཞེས་སྨྲའོ། །བློ་གྲོས་ཆེན་པོ་རྒྱུ་དེ་ནི་གཙོ་བོ་དང་། མཆོག་དང་། སྐྱེས་བུ་དང་། དབང་ཕྱུག་དང་། དུས་དང་། རྡུལ་ཕྲ་མོ་རྣམས་སོ། །གཞན་ཡང་བློ་གྲོས་ཆེན་པོ་རང་བཞིན་རྣམ་པ་བདུན་ཡོད་དེ། འདི་ལྟ་སྟེ། འདུ་བ་དངོས་པོའི་རང་བཞིན་དང་། མཚན་ཉིད་ཀྱི་རང་བཞིན་དང་། འབྱུང་བ་ཆེན་པོའི་དངོས་པོའི་རང་བཞིན་དང་། རྒྱུའི་རང་བཞིན་དང་། རྐྱེན་གྱི་རང་བཞིན་དང་། མངོན་པར་གྲུབ་པའི་རང་བཞིན་ནོ། །གཞན་ཡང་བློ་གྲོས་ཆེན་པོ་དོན་དམ་པ་རྣམ་པ་བདུན་ཡོད་དེ། འདི་ལྟ་སྟེ། སེམས་ཀྱི་སྤྱོད་ཡུལ་དང་། ཤེས་རབ་ཀྱི་སྤྱོད་ཡུལ་དང་། ཡེ་ཤེས་ཀྱི་སྤྱོད་ཡུལ་དང་། ལྟ་བའི་སྤྱོད་ཡུལ་དང་། ལྟ་བ་གཉིས་ལས་འདས་པའི་སྤྱོད་ཡུལ་དང་། སྲས་ཀྱི་ས་ལས་འདས་པའི་སྤྱོད་ཡུལ་དང་། དེ་བཞིན་གཤེགས་པ་ཉིད་བྱོན་པའི་སྤྱོད་ཡུལ་ཏེ། བློ་གྲོས་ཆེན་པོ་འདི་དག་འདས་པ་དང་། མ་འོངས་པ་དང་། ད་ལྟར་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཀྱི་དངོས་པོའི་རང་བཞིན་དོན་དམ་པའི་སྙིང་པོའོ། །དངོས་པོའི་རང་བཞིན་དོན་དམ་པའི་སྙིང་པོ་དེ་དང་ལྡན་པས་དེ་བཞིན་གཤེགས་པ་རྣམས་འཇིག་རྟེན་པ་དང་། འཇིག་རྟེན་ལས་འདས་པ་དང་། འཇིག་རྟེན་ལས་འདས་པ་མཆོག་གི་ཆོས་འཕགས་པའི་ཤེས་རབ་ཀྱི་སྤྱན་ཡོངས་སུ་རྫོགས་ནས་རང་དང་སྤྱིའི་མཚན་ཉིད་རྣམ་པར་དགོད་པ་ལ་འཇུག་ཅིང་ཇི་ལྟ་བ་བཞིན་དུ་རྣམ་པར་དགོད་པས་མུ་སྟེགས་ཅན་གྱི་སྨྲ་བ་དང་། ལྟ་བ་ངན་པ་དང་ཐུན་མོང་དུ་མི་འགྱུར་བ་ཡིན་ནོ། །བློ་གྲོས་ཆེན་པོ་ཇི་ལྟར་ན་མུ་སྟེགས་ཅན་གྱི་སྨྲ་བ་དང་། ལྟ་བ་ངན་པ་དང་། ཐུན་མོང་མ་ཡིན་ཞེ་ན། འདི་ལྟ་སྟེ། རང་གི་ཡུལ་ལ་རྣམ་པར་རྟོག་པའི་ལྟ་བར་ཁོང་དུ་མ་ཆུད་པ་དང་། རང་གི་རྣམ་པར་ཤེས་པའི་སེམས་སྣང་བ་ཙམ་དུ་མ་རྟོགས་པས། བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རྣམས་དངོས་པོ་དང་། དངོས་པོ་མེད་པའི་རང་བཞིན་དོན་དམ་པ་ལ་ལྟ་བ་གཉིས་སུ་སྨྲ་བར་གྱུར་ཏོ། །གཞན་ཡང་བློ་གྲོས་ཆེན་པོ་དུས་ཀྱི་རྣམ་པར་རྟོག་པས་ཡོངས་སུ་བསྒོས་པའོ། །དམིགས་པ་ཞེས་བྱ་བ་ནི་འདི་ལྟ་སྟེ། རང་གི་སེམས་སྣང་བ་ལ་རྣམ་པར་ཤེས་པའི་ཡུལ་དུ་རྣམ་པར་རྟོག་པའོ། །བློ་གྲོས་ཆེན་པོ་དཔེར་ན་འཇིམ་པའི་གོང་བུ་དང་། རྡུལ་ཕྲ་རབ་ནི་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །གསེར་དང་རྒྱན་ཡང་དེ་བཞིན་ཏེ། །བློ་གྲོས་ཆེན་པོ་གལ་ཏེ་འཇིམ་པའི་གོང་བུ་དང་། རྡུལ་ཕྲ་རབ་གཉིས་ཐ་དད་པ་ཞིག་ཡིན་ན་ནི་དེ་དག་ལས་བརྩམས་པ་མ་ཡིན་པར་འགྱུར་ན། དེ་ནི་ཡང་དག་པར་དེ་དག་ལས་བརྩམས་པས་ན་དེའི་ཕྱིར་ཐ་དད་པ་མ་ཡིན་ནོ། །ཅི་སྟེ་ཐ་མི་དད་ན་ནི་འཇིམ་པའི་གོང་བུ་དང་། རྡུལ་ཕྲ་རབ་བྱེ་བྲག་མེད་པར་འགྱུར་རོ། །དེ་བཞིན་དུ་བློ་གྲོས་ཆེན་པོ་འཇུག་པའི་རྣམ་པར་ཤེས་པ་རྣམས་ཀུན་གཞི་རྣམ་པར་ཤེས་པ་ཡང་དག་པའི་མཚན་ཉིད་དང་། གལ་ཏེ་ཐ་དད་པ་ཞིག་ཡིན་ན་ཀུན་གཞི་རྣམ་པར་ཤེས་པ་རྒྱུ་མ་ཡིན་པར་འགྱུར་རོ། །དེ་སྟེ་ཐ་དད་པ་མ་ཡིན་ན་ནི་འཇུག་པའི་རྣམ་པར་ཤེས་པ་འགགས་ན། ཀུན་གཞི་རྣམ་པར་ཤེས་པ་ཡང་འགག་པར་འགྱུར་བ་ཞིག་ན། འདི་ལྟར་རང་གི་ཡང་དག་པའི་མཚན་ཉིད་
ནི་ངེས་པར་འགག་པར་མི་འགྱུར་ཏེ། དེའི་བློ་གྲོས་ཆེན་པོ་རྣམ་པར་ཤེས་པ་རྣམས་ཀྱི་རང་གི་ཡང་དག་པའི་མཚན་ཉིད་འགག་པ་མ་ཡིན་གྱི། ལས་ཀྱི་མཚན་ཉིད་འགག་གོ །གལ་ཏེ་རང་གི་ཡང་དག་པའི་མཚན་ཉིད་ཀྱང་འགག་པ་ཡིན་ན་ནི། ཀུན་གཞི་རྣམ་པར་ཤེས་པ་ཡང་འགག་པར་འགྱུར་ཏེ། བློ་གྲོས་ཆེན་པོ་ཀུན་གཞི་རྣམ་པར་ཤེས་པ་འགག་པར་འགྱུར་བ་ཡིན་ན་ནི། མུ་སྟེགས་ཅན་ཆད་པར་སྨྲ་བ་དང་། ཐ་མི་དད་པར་འགྱུར་རོ། །བློ་གྲོས་ཆེན་པོ་མུ་སྟེགས་ཅན་དེ་དག་ནི་འདི་སྐད་དུ་སྨྲ་སྟེ། འདི་ལྟ་སྟེ། འདི་ལྟར་ཡུལ་རྣམས་ལ་འཛིན་པ་འགགས་པར་གྱུར་ན། རྣམ་པར་ཤེས་པའི་རྒྱུན་འགག་པར་འགྱུར་རོ་ཞེས་ཟེར་ཏེ། གལ་ཏེ་རྣམ་པར་ཤེས་པའི་རྒྱུན་འགགས་པ་ཡིན་ན་ནི། ཐོག་མ་མེད་པའི་དུས་ཀྱི་རྒྱུན་ཀྱང་ཆད་པར་འགྱུར་བའི་རིགས་སོ། །བློ་གྲོས་ཆེན་པོ་མུ་སྟེགས་ཅན་རྣམས་རྒྱུན་སྐྱེ་བའི་རྒྱུ་ནི་མིག་གི་རྣམ་པར་ཤེས་པ་གཟུགས་དང་། ཐབས་ནི་རྒྱུ་དང་འབྲས་བུའི་རང་གི་མཚན་ཉིད་དུ་ཡོད་ལ་འདས་པ་དང་། མ་འོངས་པ་དང་། ད་ལྟར་བྱུང་བ་ནི་ས་བོན་ཡོད་པ་དང་། ས་བོན་མེད་པའི་མཚན་ཉིད་དོ་ཞེས་ཟེར་ཏེ། དེ་ནི་སྔོན་གཅིག་ནས་གཅིག་ཏུ་རིགས་པའི་དངོས་པོ་བརྒྱུད་དེ་འོངས་པ་རྟོག་གེ་པའི་རྗེས་སུ་འཇུག་ཅིང་རང་གི་ལྟ་བའི་ཉེས་པའི་བག་ཆགས་ཀྱིས་བསྒོས་པས་དེ་སྐད་དུ་སྟོན་ཏེ། བློ་གྲོས་ཆེན་པོ་དེ་ལྟར་བྱིས་པ་སོ་སོའི་སྐྱེ་བོ་རྣམས་ལྟ་བ་ངན་པས་ཟིན་པ་ལོག་པའི་གྱ་གྱུས་རབ་ཏུ་རྨོངས་པ་དང་མྱོས་པའི་མི་ཤེས་པ་རྣམས་བརྫུན་དུ་འདི་ནི་ཐམས་ཅད་མཁྱེན་པས་བསྟན་ཏོ་ཞེས་ཟེར་རོ། །བློ་གྲོས་ཆེན་པོ་གལ་ཏེ་ཡང་དགེ་སྦྱོང་ངམ། བྲམ་ཟེ་གང་ལ་ལ་ཆོས་ཐམས་ཅད་རང་བཞིན་དང་བྲལ་བ་སྤྲིན་དང་མགལ་མེའི་འཁོར་ལོ་དང་། དྲི་ཟའི་གྲོང་ཁྱེར་དང་མཚུངས་པ་དང་། མ་སྐྱེས་པ་སྒྱུ་མ་དང་། སྨིག་རྒྱུ་དང་། ཆུའི་ཟླ་བ་དང་། རྨི་ལམ་ལྟ་བུ་དང་། ནང་དང་ཕྱི་རོལ་དུ་སེམས་སྣང་བ་རྣམ་པར་རྟོག་པ་དང་། ཐོག་མ་མེད་པའི་དུས་ཀྱི་རྣམ་པར་སྤྲོས་པ་རང་གི་སེམས་ཀྱི་རྣམ་པར་རྟོག་པ་ལས་ལོགས་ཤིག་ན་མེད་པ་དང་། རྒྱུ་དང་རྐྱེན་འགགས་ཤིང་ཟད་པར་གྱུར་ན། རྣམ་པར་རྟོག་པ་དང་བྲལ་བར་
མཐོང་བ་དང་། རྗོད་པ་དང་། བརྗོད་པར་བྱ་བ་དང་། བརྟག་པ་དང་། བརྟག་པར་བྱ་བ་དང་བྲལ་བ། ལོངས་སྤྱོད་དང་། ལུས་སུ་ཀུན་གཞི་རྣམ་པར་ཤེས་པ་རྣམ་པར་གཞག་པ་དང་། རྣམ་པར་ཤེས་པའི་ཡུལ་གཟུང་བ་དང་། འཛིན་པ་དང་། མི་འཐུན་པ་དང་། སྣང་བ་མེད་པའི་སྤྱོད་ཡུལ་སྐྱེ་བ་དང་། གནས་པ་དང་། འཇིག་པ་སྤོང་བ་དང་། རང་གི་སེམས་ལས་བྱུང་བ་ཙམ་དུ་རྗེས་སུ་འཇུག་ཅིང་རྣམ་པར་འབྱེད་ན། བློ་གྲོས་ཆེན་པོ་བྱང་ཆུབ་སེམས་དཔའ་དེ་དག་ནི་རིང་པོར་མི་ཐོགས་པར་འཁོར་བ་དང་། མྱ་ངན་ལས་འདས་པ་མཉམ་པ་ཉིད་དང་། སྙིང་རྗེ་ཆེན་པོ་དང་། ཐབས་ལ་མཁས་པ་དང་། རྩོལ་བ་མེད་པའི་སྦྱོར་བ་འཐོབ་པར་འགྱུར་རོ། །བློ་གྲོས་ཆེན་པོ་སེམས་ཅན་གྱི་ཁམས་དེ་དག་ཐམས་ཅད་སྒྱུ་མ་དང་མཚུངས་པ་དང་། རྒྱུ་དང་རྐྱེན་ལ་མི་བརྩོན་པ་དང་། ཕྱི་ནང་གི་ཡུལ་ལས་རྣམ་པར་དབེན་པ་དང་། སེམས་ལས་ཕྱི་རོལ་དུ་མི་མཐོང་བས་རིམ་གྱིས་མཚན་མ་མེད་པའི་གནས་སུ་འཇུག་པ་དང་། རིམ་གྱིས་ས་ནས་སར་ཏིང་ངེ་འཛིན་གྱི་སྤྱོད་ཡུལ་ལ་འཇུག་པ་དང་། ཁམས་གསུམ་སྒྱུ་མ་ལྟ་བུར་ཤིན་ཏུ་མོས་ཤིང་སོ་སོར་རབ་ཏུ་རྟོག་པས་སྒྱུ་མ་ལྟ་བུའི་ཏིང་ངེ་འཛིན་རབ་ཏུ་འཐོབ་པར་འགྱུར་རོ། །རང་གི་སེམས་སྣང་བ་ལས་འདས་ཤིང་སྣང་བ་མེད་པ་ལ་འཇུག་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་རྗེས་སུ་ཐོབ་པར་བྱེད་པ་དང་། དེ་དག་གི་སྦྱོར་བ་སྐྱེད་པ་རབ་ཏུ་སྤངས་པས་རྡོ་རྗེ་ལྟ་བུའི་ཏིང་ངེ་འཛིན་ཐོབ་ནས་དེ་བཞིན་གཤེགས་པའི་ས་ལ་འཇུག་པར་འགྱུར་རོ། །དེ་བཞིན་ཉིད་ཀྱི་རྗེས་སུ་འཇུག་པའི་སྤྲུལ་པ་མངོན་པར་ཤེས་པ་དང་། དབང་དང་། སྙིང་རྗེ་དང་། ཐབས་ཀྱིས་རབ་ཏུ་བརྒྱན་པ། སངས་རྒྱས་ཀྱི་ཞིང་ཐམས་ཅད་དུ་ཅིག་ཅར་འཇུག་པ། མུ་སྟེགས་ཅན་གྱི་གནས་སུ་ཉེ་བར་འགྲོ་བ། སེམས་དང་ཡིད་དང་། རྣམ་པར་ཤེས་པ་དང་བྲལ་བས་བྱང་ཆུབ་སེམས་དཔའ་དེ་གནས་གྱུར་པའི་རིམ་གྱིས་དེ་བཞིན་གཤེགས་པའི་སྐུ་འཐོབ་པར་འགྱུར་རོ། །བློ་གྲོས་ཆེན་པོ་དེ་བས་ན་དེ་བཞིན་གཤེགས་པའི་རྗེས་སུ་འཇུག་པའི་སྐུའང་འཐོབ་པར་འདོད་པ་རྣམས་ཀྱིས་ཕུང་པོ་དང་། ཁམས་དང་། སྐྱེ་མཆེད་དང་།
སེམས་དང་། རྒྱུ་དང་། རྐྱེན་དང་། བྱ་བ་དང་། སྦྱོར་བ་དང་། སྐྱེ་བ་དང་། གནས་པ་དང་། འཇིག་པ་དང་། རྣམ་པར་རྟོག་པའི་སྤྲོས་པ་རྣམས་ཡོངས་སུ་སྤང་བར་བྱའོ། །སེམས་ཙམ་གྱིས་དྲང་པོར་རྩོལ་བས་ཐོག་མ་མེད་པའི་དུས་ཀྱི་སྤྲོས་པའི་ཉེས་པ་ལ་སོ་སོར་རྟོག་ཅིང་། རྣམ་པར་རྟོག་པའི་བག་ཆགས་ཀྱི་རྒྱུ་དང་། སྲིད་པ་གསུམ་པོ་དག་སྣང་བ་མེད་པ་དང་། སངས་རྒྱས་ཀྱི་ས་སྐྱེ་བ་མེད་པར་མཇལ་བས་རང་གིས་རིག་པ་འཕགས་པའི་བགྲོད་པར་ཕྱིན་པ་དང་། རང་གི་སེམས་ལ་དབང་སྒྱུར་ཞིང་རྩོལ་བ་མེད་པའི་སྤྱོད་པ་རྟོགས་པར་ཁོང་དུ་ཆུད་པ། གཟུགས་སྣ་ཚོགས་ཀྱི་རྗེས་སུ་འཇུག་པའི་ནོར་བུ་དང་མཚུངས་པ་དང་། སེམས་ཅན་གྱི་སེམས་ཤིན་ཏུ་ཕྲ་བའི་རྗེས་སུ་འཇུག་ཅིང་སྤྲུལ་པའི་ལུས་ཀྱིས་སེམས་ཀྱི་མོས་པ་ཇི་ལྟ་བ་བཞིན་དུ་ཡོངས་སུ་དགྲོལ་བར་བྱེད་པས་ས་རྣམས་རིམ་གྱིས་མཚམས་སྦྱོར་བ་རྣམ་པར་གཞག་པར་འགྱུར་རོ། །དེ་ལྟ་བས་ན་བློ་གྲོས་ཆེན་པོ་རང་གི་གྲུབ་པའི་མཐའ་ལ་མཁས་པ་རབ་ཏུ་བསྒྲུབ་པར་བྱའོ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་དང་ཡིད་དང་། རྣམ་པར་ཤེས་པ་དང་། ཆོས་ལྔ་དང་། རང་བཞིན་གྱི་མཚན་ཉིད་བཤད་དུ་གསོལ། འདི་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བགྲོད་པར་བགྱི་བ། རང་གི་སེམས་ཀྱིས་མཐོང་བ་ལ་སོགས་པས་དམིགས་པར་བགྱི་བའི་སྤྱོད་ཡུལ་དང་འཕྲོད་པ་མ་ལགས་པ། བརྗོད་པའམ། རིགས་པ་དང་། དེ་ཁོ་ན་ཉིད་ཀྱི་མཚན་ཉིད་ཐམས་ཅད་རབ་ཏུ་སྟོན་པ། སངས་རྒྱས་ཐམས་ཅད་ཀྱི་གསུང་གི་སྙིང་པོའོ། །བཅོམ་ལྡན་འདས་ལང་ཀའི་གྲོང་རྡལ་དང་། མ་ལ་ཡའི་རི་དང་། རྒྱ་མཚོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སླད་དུ་དེ་བཞིན་གཤེགས་པ་རྣམས་ཀྱིས་རབ་ཏུ་བསྔགས་པ། རྒྱ་མཚོའི་དབའ་རླབས་ལྟ་བུའི་ཀུན་གཞི་རྣམ་པར་ཤེས་པའི་སྤྱོད་ཡུལ་དང་། ཆོས་ཀྱི་སྐུ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བློ་གྲོས་ཆེན་པོ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་
ཆེན་པོ་རྐྱེན་རྣམ་པ་བཞིའི་ཕྱིར་མིག་གི་རྣམ་པར་ཤེས་པ་འཇུག་སྟེ། བཞི་གང་ཞེ་ན། འདི་ལྟ་སྟེ། རང་གི་སེམས་སྣང་བ་འཛིན་པར་ཁོང་དུ་མ་ཆུད་པ་དང་། ཐོག་མ་མེད་པའི་དུས་ནས་སྤྲོས་པའི་གནས་ངན་ལེན་གྱི་གཟུགས་ཀྱི་བག་ཆགས་ལ་མངོན་པར་ཞེན་པ་དང་། རྣམ་པར་ཤེས་པའི་རང་བཞིན་གྱི་ངོ་བོ་ཉིད་དང་། གཟུགས་རྣམ་པ་སྣ་ཚོགས་ཀྱི་མཚན་ཉིད་མཐོང་བར་འདུན་པའོ། །བློ་གྲོས་ཆེན་པོ་འདི་ནི་རྒྱུ་རྐྱེན་བཞི་པོ་ཆུ་ཀླུང་གི་གནས་དང་། ཀུན་གཞི་རྣམ་པར་ཤེས་པ་ལས་འཇུག་པའི་རྣམ་པར་ཤེས་པའི་རླབས་འབྱུང་བ་ཞེས་བྱའོ། །བློ་གྲོས་ཆེན་པོ་མིག་གི་རྣམ་པར་ཤེས་པ་ཇི་ལྟ་བ་བཞིན་དུ་དབང་པོ་ཐམས་ཅད་ཀྱི་རྡུལ་ཕྲ་རབ་དང་། སྤུའི་ཁུང་བུ་ལྷན་ཅིག་སྐྱེ་བ་དང་། རིམ་གྱིས་ཡུལ་གྱི་རྗེས་སུ་སྐྱེ་བ་ཡང་དེ་བཞིན་ཏེ། ཇི་ལྟར་མེ་ལོང་རབ་ཏུ་གསལ་བའི་ནང་དུ་གཟུགས་བརྙན་སྣང་བ་བཞིན་ནོ། །བློ་གྲོས་ཆེན་པོ་དཔེར་ན། རླུང་རབ་ཏུ་དྲག་པོས་རྒྱ་མཚོ་ཆེན་པོའི་ཆུ་རབ་ཏུ་སྐྱོད་པར་བྱེད་པ་དེ་བཞིན་དུ། ཕྱི་རོལ་གྱི་ཡུལ་གྱི་རླུང་གིས་ཀྱང་སེམས་ཀྱི་རྒྱ་མཚོ་བསྒུལ་བས་རྣམ་པར་ཤེས་པའི་རླབས་རྣམས་རྒྱུན་མི་འཆད་དེ། རྒྱུ་དང་བྱ་བའི་མཚན་ཉིད་ཐ་དད་པ་དང་། ཐ་དད་མ་ཡིན་པ་གཅིག་ཏུ་འདྲེས་པ། ལས་དང་སྐྱེ་བའི་མཚན་ཉིད་ལ་ཤིན་ཏུ་མངོན་པར་ཞེན་པ་དང་། གཟུགས་ལ་སོགས་པའི་རང་གི་ངོ་བོ་ཉིད་མི་རྟོགས་པས་དེའི་ཕྱིར་རྣམ་པར་ཤེས་པའི་ཚོགས་ལྔ་འཇུག་གོ །བློ་གྲོས་ཆེན་པོ་རྣམ་པར་ཤེས་པའི་ཚོགས་ལྔ་པོ་དེ་དག་དང་ལྷན་ཅིག་པའི་རྒྱུ་ལ་བྱེ་བྲག་གིས་རྣམ་པའི་མཚན་ཉིད་ཁོང་དུ་ཆུད་པར་བྱེད་པས་ཡིད་ཀྱི་རྣམ་པར་ཤེས་པའི་རྒྱུ་ནི་དེའི་ལུས་ཀྱི་རྗེས་སུ་འཇུག་པ་ཡིན་པར་རིག་པར་བྱའོ། །དེ་དག་འདི་སྙམ་དུ་བདག་ཅག་ནི་ཕན་ཚུན་གཅིག་གི་རྒྱུ་གཅིག་བྱེད་དོ་སྙམ་དུ་མི་སེམས་ཏེ། འོན་ཀྱང་རང་གི་སེམས་སྣང་བ་ལ་རྣམ་པར་རྟོག་པས་མངོན་པར་ཞེན་པ་འཇུག་ཅིང་དེ་དག་སོ་སོ་ནས་འཇིག་པའི་མཚན་ཉིད་དང་ལྷན་ཅིག་ཏུ་འཇུག་གོ །ཡུལ་གྱི་རྣམ་པའི་བྱེ་བྲག་འབྱེད་པ་ནི་འདི་ལྟ་སྟེ། དེ་དག་འཇུག་པའོ། །བློ་གྲོས་ཆེན་པོ་ཇི་ལྟར་རྣལ་འབྱོར་པ་དག་
བསམ་གཏན་དང་ཏིང་ངེ་འཛིན་ལ་མཉམ་པར་བཞག་པ་བག་ཆགས་ཤིན་དུ་ཕྲ་རབ་འཇུག་པ་རྣམས་མི་ཤེས་པ་དེ་དག་འདི་སྙམ་དུ། བདག་ཅག་རྣམ་པར་ཤེས་པ་བཀག་ནས་སྙོམས་པར་ཞུགས་སོ་སྙམ་དུ་སེམས་ཀྱང་ཡང་དག་པར་རྣམ་པར་ཤེས་པ་བཀག་ནས་སྙོམས་པར་ཞུགས་པ་མ་ཡིན་ཏེ། འདི་ལྟར་བག་ཆགས་ཀྱི་ས་བོན་ཤིན་ཏུ་ཕྲ་བ་མ་འགགས་པའི་ཕྱིར་མ་འགགས་པའོ། །ཡུལ་ལ་འཇུག་ཅིང་འཛིན་པ་དང་མི་ལྡན་པའི་ཕྱིར་ནི་འགགས་པའོ། །བློ་གྲོས་ཆེན་པོ་དེ་ལྟར་ཤིན་ཏུ་ཕྲ་བའི་ཀུན་གཞི་རྣམ་པར་ཤེས་པ་དེ་མཐར་ཐུག་པར་རྟོགས་པ་ནི་དེ་བཞིན་གཤེགས་པ་དང་། ས་ལ་རབ་ཏུ་གནས་པའི་བྱང་ཆུབ་སེམས་དཔའ་རྣམས་མ་གཏོགས་པར་གཞན་ཉན་ཐོས་དང་། རང་སངས་རྒྱས་དང་། མུ་སྟེགས་ཅན་གྱི་རྣལ་འབྱོར་པ་རྣམས་ཀྱིས་ཐོབ་པའི་ཏིང་ངེ་འཛིན་དང་། ཤེས་རབ་ཀྱི་སྟོབས་ཀྱིས་ཀྱང་རྟོགས་པར་མི་ནུས་སོ། །གཞན་དུ་ན་སའི་མཚན་ཉིད་དང་། ཤེས་རབ་དང་། ཡེ་ཤེས་དང་། ཐབས་ལ་མཁས་པ་རྣམ་པར་འབྱེད་པ་དག་ཚིག་གི་དོན་རབ་ཏུ་དབྱེ་བ་ལ་རྣམ་པར་གདོན་མི་ཟ་བ་རྒྱལ་བ་མཐའ་ཡས་པ་རྣམས་ལས་དགེ་བའི་རྩ་བ་ཡོངས་སུ་བསགས་པ་དང་། རང་གི་སེམས་སྣང་བ་ལ་རྣམ་པར་རྟོག་པའི་སྤྲོས་པ་དང་བྲལ་བ་རི་དང་ནགས་ཚལ་སྟུག་པོ་དང་། ཤིང་ཁྲོད་ན་གནས་ཤིང་རྣལ་འབྱོར་ཐ་མ་དང་། འབྲིང་དང་། རབ་ཏུ་བསྒོམས་པ་རྣམས་ཀྱིས་རང་གི་སེམས་ཀྱི་རྣམ་པར་རྟོག་པའི་རྒྱུད་མཐོང་བ་དང་། ཞིང་ཚད་མེད་པའི་སངས་རྒྱས་རྣམས་ཀྱིས་དབང་བསྐུར་བ་དང་། དབང་དང་སྟོབས་དང་། མངོན་པར་ཤེས་པ་དང་། ཏིང་ངེ་འཛིན་དང་། དགེ་བའི་བཤེས་གཉེན་སངས་རྒྱས་ཀྱི་སྲས་ཀྱི་འཁོར་རྣམས་ཀྱང་འཐོབ་པར་འགྱུར་ཏེ། དེས་སེམས་དང་། ཡིད་དང་། རྣམ་པར་ཤེས་པ་དང་། རང་གི་སེམས་སྣང་བའི་རང་བཞིན་གྱི་སྤྱོད་ཡུལ་སྤྲོས་པའི་མཚན་ཉིད་རིག་ཅིང་འཁོར་བ་སྲིད་པའི་རྒྱ་མཚོ་དང་། ལས་དང་། སྲེད་པ་དང་། མི་ཤེས་པ་ལ་སོགས་པའི་རྒྱུ་ལས་རྒྱལ་བར་ནུས་སོ། །དེ་ལྟ་བས་ན། བློ་གྲོས་ཆེན་པོ་རྣལ་འབྱོར་པ་རྣམས་ཀྱིས་དགེ་བའི་བཤེས་གཉེན་རྒྱལ་བ་རྣམས་ལ་
བསྟེན་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར། ཚིགས་སུ་བཅད་པ་འདི་དག་གསུངས་སོ། །དཔེར་ན་རྒྱ་མཚོའི་དབའ་རླབས་རྣམས། །དེ་དག་རླུང་དྲག་དབང་གིས་བྱུང་། །རླབས་ཆེན་རྒྱ་མཚོ་རབ་བསྐྱོད་པས། །རྒྱུན་ནི་རྣམ་པར་ཆད་པ་མེད། །ཀུན་གཞི་རྒྱ་མཚོ་རྟག་གནས་པ། །ཡུལ་གྱི་རླུང་གིས་རབ་བསྐྱོད་ནས། །སྣ་ཚོགས་རྣམ་ཤེས་དབའ་རླབས་རྣམས། །གར་ཅིང་རབ་ཏུ་འཇུག་པར་འགྱུར། །སྔོན་པོ་དམར་པོ་སྣ་ཚོགས་གཟུགས། །དུང་དང་འོ་མ་ཁ་ར་དང་། །བསྐ་བ་མེ་ཏོག་འབྲས་བུ་དང་། །ཉི་ཟླ་དང་ནི་འོད་ཟེར་དང་། །གཅིག་པ་མ་ཡིན་ཐ་དད་མིན། །རྒྱ་མཚོ་རླབས་རྣམས་རབ་ཏུ་བསྐྱེད། །དེ་བཞིན་རྣམ་ཤེས་བདུན་པོ་ཡང་། །སེམས་དང་ལྷན་ཅིག་རབ་ཏུ་སྐྱེ། །ཇི་ལྟར་རྒྱ་མཚོ་ཡོངས་གྱུར་ནས། །དབའ་རླབས་སྣ་ཚོགས་འཇུག་པ་ལྟར། །རྣམ་ཤེས་བདུན་པོ་དེ་བཞིན་ཏེ། །སེམས་དང་ལྷན་ཅིག་རབ་ཏུ་སྐྱེ། །ཀུན་གཞི་རྣམ་ཤེས་གནས་ལས་ནི། །རྣམ་ཤེས་སྣ་ཚོགས་རབ་འཇུག་སྟེ། །འདི་ལྟར་ཡིད་དང་རྣམ་ཤེས་དེས། །མཚན་ཉིད་དོན་ལ་རབ་ཏུ་སེམས། །མི་འཇིགས་མཚན་ཉིད་བརྒྱད་ཡོད་དེ། །མཚན་མ་མེད་པའང་མཚན་མ་མེད། །རྒྱ་མཚོ་དང་ནི་དབའ་རླབས་རྣམས། །ཇི་ལྟར་བྱེ་བྲག་མེད་པ་བཞིན། །རྣམ་ཤེས་སེམས་དང་དེ་བཞིན་དུ། །ཐ་དད་པ་ཡང་མི་དམིགས་སོ། །སེམས་ནི་ལས་སོགས་བྱེད་ཅེས་བྱ། །ཡིད་ཀྱི་རྒྱ་ཆེར་སོགས་པ་སྟེ། །རྣམ་ཤེས་དག་ནི་རྣམ་པར་རིག། །སྣང་བའི་ཡུལ་ལྟོས་སྔར་བཤད་དོ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཚིགས་སུ་བཅད་པས་ཞུ་བ་ཞུས་པ། སྔོན་པོ་དམར་པོའི་གཟུགས་རྣམས་ནི། །སེམས་ཅན་རྣམ་ཤེས་སྐྱེད་པར་བགྱིད། །རླབས་དང་མཚུངས་པའི་སྣ་ཚོགས་ཆོས། །ཅི་སླད་བདག་ལ་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། སྔོན་པོ་དམར་པོ་སྣ་ཚོགས་གཟུགས། །དབའ་རླབས་དག་ནི་ཡོད་མ་ཡིན། །ལས་སོགས་སེམས་སུ་བཤད་པ་ཡང་། །སྐྱེ་བོ་རྟོགས་པར་བྱ་ཕྱིར་རོ། །ལས་དེ་ཡང་ནི་ཡོད་མ་ཡིན། །རང་གི་སེམས་ནི་གཟུང་དང་བྲལ། །གཟུང་བ་
མེད་པས་འཛིན་པའང་མེད། །དབའ་རླབས་དེ་དང་རབ་ཏུ་མཚུངས། །ལོངས་སྤྱོད་ལུས་དག་རྣམ་གཞག་པ། །སེམས་ཅན་སྣང་བའི་རྣམ་ཤེས་ཡིན། །དེ་ལས་ལས་རྣམས་སྣང་བར་བྱེད། །དཔེར་ན་རྒྱ་མཚོའི་རླབས་དང་མཚུངས། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཡང་ཚིགས་སུ་བཅད་དེ་གསོལ་པ། རྒྱ་མཚོའི་དབའ་རླབས་དངོས་པོ་ནི། །གར་བགྱིད་གཡོ་བས་རིག་འགྱུར་ལ། །ཀུན་གཞི་ལས་ཀྱང་དེ་ལྟར་ན། །ཅི་ཡི་སླད་དུ་བློས་མི་རིག །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། བྱིས་པ་བློ་དང་མི་ལྡན་པས། །ཀུན་གཞི་རྒྱ་མཚོ་འདྲ་བ་དང་། །ལས་ཀྱི་མཚན་ཉིད་རླབས་ལྟ་བུའི། །དཔེ་ལ་བརྟེན་ནས་རྟོགས་པར་འགྱུར། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཡང་ཚིགས་སུ་བཅད་དེ་གསོལ་པ། སྐྱེ་བོ་བཟང་ངན་བར་མ་ལ། །གདུགས་ནི་མཉམ་པར་ཤར་བ་བཞིན། །བདེ་གཤེགས་འཇིག་རྟེན་སྣང་མཛད་པའང་། །བྱིས་པ་རྣམས་ལ་ཡང་དག་ཆོས། །རབ་ཏུ་རྣམ་འབྱེད་གསུང་རིགས་ན། །ཅི་སླད་ཡང་དག་གསུང་མི་མཛད། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཅི་སྟེ་ཡང་དག་བཤད་དུ་ནི། །དེ་ཡི་སེམས་ལ་ཡང་དག་མེད། །ཇི་ལྟར་རྒྱ་མཚོའི་དབའ་རླབས་དང་། །མེ་ལོང་གཟུགས་བརྙན་རྨི་ལམ་དག །དེ་དག་ཐམས་ཅད་ཅིག་ཅར་སྣང་། །སེམས་ཀྱི་སྤྱོད་ཡུལ་དེ་བཞིན་ནོ། །ཡུལ་རྣམས་དང་ནི་མི་ལྡན་ཕྱིར། །རིམ་གྱིས་ལས་དག་འཇུག་ཅིང་སྐྱེ། །རྣམ་པར་ཤེས་པས་རྣམ་པར་རིག །ཡིད་ནི་དེ་བཞིན་སེམས་པར་བྱེད། །ལྔ་པོ་དག་ནི་སྣང་བར་འགྱུར། །དེ་ལ་གོ་རིམས་ངེས་པ་མེད། །ཇི་ལྟར་རི་མོའི་མཁན་པོ་དང་། །རི་མོ་མཁན་གྱི་སློབ་མ་དག །རི་མོའི་དོན་དུ་ཚོན་འགྱེད་ལྟར། །ང་ཡི་བཤད་པའང་དེ་བཞིན་ནོ། །ཚོན་ལ་རི་མོ་ཡོད་མ་ཡིན། །སྨྱིག་གུ་དང་ནི་གཞི་ལ་མེད། །སེམས་ཅན་དགའ་བ་བསྐྱེད་པའི་ཕྱིར། །ཚོན་གྱིས་རི་མོ་མངོན་པར་བསྒྲུབས། །བཤད་པ་དག་ནི་གཞན་ཕྱིར་སྤྱོད། །ཡང་དག་ཉིད་ནི་ཡི་གེ་སྤངས། །རྣམ་འབྱེད་ལས་ནི་དང་པོ་པ། །རྣལ་འབྱོར་པ་ལ་ཡང་དག་བསྟན། །སོ་སོ་རང་རིག་ཡང་དག་
ནི། །རྟོག་དང་བརྟག་པར་རབ་ཏུ་སྤངས། །རྒྱལ་བའི་སྲས་ལ་འདི་བསྟན་གྱི། །བྱིས་པ་ལ་ནི་གཞན་རབ་འབྱེད། །ཇི་ལྟར་སྒྱུ་མ་སྣ་ཚོགས་དག །སྣང་ཡང་ཡང་དག་མ་ཡིན་ཏེ། །དེ་བཞིན་བཤད་པ་སྣ་ཚོགས་ཀྱང་། །བྱ་བའི་རྗེས་སུ་གཞག་པ་ཡིན། །བཤད་པ་འཐུན་པར་མ་གྱུར་པ། །དེ་ལ་བཤད་པ་མ་ཡིན་འགྱུར། །ཇི་ལྟར་ནད་པ་སོ་སོ་ལ། །སྨན་མཁས་དཔྱད་རྣམས་བསྟན་པ་ལྟར། །དེ་བཞིན་གཤེགས་པས་སེམས་ཅན་ལ། །མོས་པ་ཇི་བཞིན་རབ་ཏུ་སྟོན། །བརྩེ་བས་རབ་ཏུ་གསུངས་པ་ཡི། །སོ་སོ་རང་གི་སྤྱོད་ཡུལ་ནི། །རྟོག་གེ་པ་ཡི་ཡུལ་མ་ཡིན། །ཉན་ཐོས་རྣམས་ཀྱང་སྐལ་ཡོད་མིན། །གཞན་ཡང་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་རང་གི་སེམས་སྣང་བའི་གཟུང་བ་དང་། འཛིན་པ་རྣམ་པར་རྟོག་པའི་སྤྱོད་ཡུལ་ཡོངས་སུ་ཤེས་པར་འདོད་པས་འདུ་བ་དང་། འདུ་འཛི་དང་། གཉིད་ཡོངས་སུ་སྤང་བར་བྱའོ། །སྲོད་དང་། ཐོ་རངས་དང་། ནམ་གྱི་གུང་ཐུན་ལ་བདག་ཉིད་རྟག་ཏུ་དྲན་པ་དང་ལྡན་ཞིང་མི་ཉལ་བར་སྦྱོར་བ་ལ་རབ་ཏུ་བརྩོན་པར་བྱའོ། །ལྟ་བ་ངན་པ་རྣམས་ཀྱི་བསྟན་བཅོས་དང་། གཏམ་དང་། ཉན་ཐོས་དང་། རང་སངས་རྒྱས་ཀྱི་ཐེག་པའི་མཚན་མ་ཡོངས་སུ་སྤང་བར་བྱའོ། །རང་གི་སེམས་སྣང་བའི་རྣམ་པར་རྟོགས་པའི་མཚན་ཉིད་ཁོང་དུ་ཆུད་པར་རྟོགས་པར་བྱའོ། །གཞན་ཡང་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོས་ཡེ་ཤེས་དང་། ཤེས་རབ་ཀྱི་མཚན་ཉིད་དགོད་པ་ལ་གནས་ནས། གོང་དུ་འཕགས་པའི་ཡེ་ཤེས་ཀྱི་མཚན་ཉིད་གསུམ་ལ་རབ་ཏུ་བརྩོན་པས་བསྒྲུབ་པར་བྱའོ། །གོང་དུ་བརྩོན་ཞིང་བསྒྲུབ་པར་བྱ་བའི་ཡེ་ཤེས་ཀྱི་མཚན་ཉིད་གསུམ་པོ་དེ་ཡང་གང་ཞེ་ན། འདི་ལྟ་སྟེ། སྣང་བ་མེད་པའི་མཚན་ཉིད་དང་། སངས་རྒྱས་ཐམས་ཅད་ཀྱི་རང་གི་སྨོན་ལམ་གྱི་གནས་ཀྱི་མཚན་ཉིད་དང་། འཕགས་པ་སོ་སོ་རང་གིས་རིག་པའི་ཡེ་ཤེས་མཐར་ཐུག་པའི་མཚན་ཉིད་དེ། རྣལ་འབྱོར་པས་དེ་དག་ཁོང་དུ་ཆུད་པས་བོང་བུ་ཐེང་པོ་ལྟ་བུའི་སེམས་དང་། ཤེས་རབ་དང་། ཡེ་ཤེས་ཀྱི་མཚན་ཉིད་སྤངས་ཏེ། རྒྱལ་བའི་སྲས་
ཀྱིས་ས་བརྒྱད་པ་ཐོབ་ནས། དེའི་གོང་དུ་མཚན་ཉིད་གསུམ་ལ་རབ་ཏུ་བརྩོན་པར་བྱེད་དོ། །དེ་ལ་བློ་གྲོས་ཆེན་པོ་སྣང་བ་མེད་པའི་མཚན་ཉིད་ནི་འདི་ལྟ་སྟེ། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་གྱི་མཚན་ཉིད་དེ་དག་ཡོངས་སུ་འདྲིས་པ་ལས་སྐྱེའོ། །བློ་གྲོས་ཆེན་པོ་རང་གི་སྨོན་ལམ་གྱི་གནས་ཀྱི་མཚན་ཉིད་ནི་འདི་ལྟ་སྟེ། སྔོན་གྱི་སངས་རྒྱས་རྣམས་ཀྱི་རང་གི་སྨོན་ལམ་གྱི་གནས་ལ་མངོན་པར་བརྩོན་པ་ལས་འབྱུང་ངོ་། །བློ་གྲོས་ཆེན་པོ་འཕགས་པ་སོ་སོ་རང་གིས་རིག་པའི་ཡེ་ཤེས་མཐར་ཐུག་པའི་མཚན་ཉིད་ནི་ཆོས་ཐམས་ཅད་ཀྱི་མཚན་ཉིད་ལ་མངོན་པར་ཞེན་པ་མེད་པ་དང་། སྒྱུ་མ་ལྟ་བུའི་ཏིང་ངེ་འཛིན་གྱི་ལུས་རབ་ཏུ་ཐོབ་པས། སངས་རྒྱས་རྣམས་ཀྱི་སའི་གནས་ལ་བརྩོན་ཞིང་འཇུག་པའི་སྤྱོད་པ་ལས་སྐྱེ་སྟེ། བློ་གྲོས་ཆེན་པོ་འདི་ནི་འཕགས་པའི་ཡེ་ཤེས་ཀྱི་མཚན་ཉིད་གསུམ་ཞེས་བྱའོ། །གལ་ཏེ་འཕགས་པའི་ཡེ་ཤེས་ཀྱི་མཚན་ཉིད་འདི་གསུམ་དང་ལྡན་ན་རང་གིས་རིག་པ་འཕགས་པའི་ཡེ་ཤེས་མཐར་ཐུག་པའི་སྤྱོད་ཡུལ་ཁོང་དུ་ཆུད་པར་འགྱུར་རོ། །དེ་ལྟ་བས་ན་བློ་གྲོས་ཆེན་པོ་འཕགས་པའི་ཡེ་ཤེས་ཀྱི་མཚན་ཉིད་གསུམ་པོ་དག་ལ་རབ་ཏུ་བརྩོན་པར་བྱའོ།། །།འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས། བམ་པོ་གཉིས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བྱང་ཆུབ་སེམས་དཔའི་འཁོར་དེ་དག་གི་སེམས་ཀྱི་བསམ་པ་རབ་ཏུ་ཤེས་པས་འཕགས་པའི་ཡེ་ཤེས་ཀྱི་དངོས་པོ་དང་། རང་བཞིན་རབ་ཏུ་འབྱེད་པ་ཞེས་བྱ་བའི་ཆོས་ཀྱི་རྣམ་གྲངས་འདི་སངས་རྒྱས་ཐམས་ཅད་ཀྱི་བྱིན་གྱིས་བརླབས་ཀྱི་མཐུས་བཅོམ་ལྡན་འདས་ལ་ཞུས་པ། བཅོམ་ལྡན་འདས་འཕགས་པའི་ཡེ་ཤེས་ཀྱི་དངོས་པོ་དང་། རང་བཞིན་རབ་ཏུ་འབྱེད་པ་ཞེས་བྱ་བའི་ཆོས་ཀྱི་རྣམ་གྲངས་བདག་ལ་བཤད་དུ་གསོལ། ཚིག་བརྒྱ་རྩ་བརྒྱད་ཤིན་ཏུ་རྣམ་པར་འབྱེད་པའི་གནས་གང་འདི་ལ་བརྟེན་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་རབ་ཏུ་ཕྱེ་སྟེ། བསྟན་པས་བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་རང་དང་སྤྱིའི་མཚན་ཉིད་དུ་གཏོགས་པའི་རྣམ་པར་རྟོག་པའི་རང་བཞིན་ལ་རབ་ཏུ་འཇུག་སྟེ། རབ་ཏུ་ཕྱེ་བའི་ཚུལ་གྱིས་རྣམ་པར་རྟོག་པའི་རང་བཞིན་སྟོན་པའི་ཕྱིར་སོ་སོར་རབ་ཏུ་རྟོག་པ་ལ་མཁས་ཤིང་གང་ཟག་དང་ཆོས་ལ་བདག་མེད་པར་རྟོག་པ་དང་། རྣམ་པར་རྟོག་པ་རབ་ཏུ་སེལ་ཅིང་ས་རྣམས་ལ་ཤིན་ཏུ་གསལ་བ་དང་། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་ཐམས་ཅད་ཀྱི་བསམ་གཏན་དང་། ཏིང་ངེ་འཛིན་གྱི་བདེ་བ་ལས་ཤིན་ཏུ་འདའ་བ་དང་། དེ་བཞིན་གཤེགས་པའི་བསམ་གྱིས་མི་ཁྱབ་པའི་སྤྱོད་ཡུལ་ལ་སོ་སོར་རབ་ཏུ་རྟོག་པ་དང་། གདོན་མི་ཟ་བའི་ཆོས་ལྔ་དང་། རང་བཞིན་ཡོངས་སུ་སྤོང་བར་འགྱུར་བ་དང་། དེ་བཞིན་གཤེགས་པ་རྣམས་ཀྱིས་ཆོས་ཀྱི་སྐུའི་ཡེ་ཤེས་ཀྱི་བདག་ཉིད་རབ་ཏུ་བརྒྱན་པ་དང་། སྒྱུ་མའི་སྤྱོད་ཡུལ་བསྐྱེད་ནས་སངས་རྒྱས་ཀྱི་ཞིང་ཐམས་ཅད་དང་། དགའ་ལྡན་གྱི་ཕོ་བྲང་དང་། འོག་མིན་གྱི་བར་དུ་འཇུག་པ་དང་། དེ་བཞིན་གཤེགས་པའི་ཆོས་ཀྱི་སྐུ་རྟག་ཏུ་གནས་པ་ཡང་འཐོབ་པར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་འདི་ལ་མུ་སྟེགས་ཅན་ཁ་ཅིག་མེད་པར་རྣམ་པར་རྟོག་པ་ལ་མངོན་པར་ཞེན་པ་དག་རྣམ་པར་རྟོག་པའི་བློ་རྒྱུ་ཟད་པས་རི་བོང་ལ་རྭ་མེད་དོ་སྙམ་དུ་རྣམ་པར་རྟོག་སྟེ། ཇི་ལྟར་རི་བོང་ལ་རྭ་མེད་པ་དེ་བཞིན་དུ། ཆོས་ཐམས་ཅད་ཀྱང་དེ་བཞིན་ནོ་ཞེས་ཟེར་རོ། །བློ་གྲོས་ཆེན་པོ་གཞན་ཡང་མུ་སྟེགས་ཅན་ཁ་ཅིག་འབྱུང་བ་དང་། ཡོན་ཏན་དང་། རྡུལ་དང་། རྫས་དང་། དབྱིབས་དང་། གནས་བརྟགས་པའི་ཆོས་སོ་སོ་ཐ་དད་པར་མཐོང་ནས་རི་བོང་ལ་རྭ་མེད་པར་མངོན་པར་ཞེན་ཅིང་ཀུན་དུ་རྟོག་པས་བ་ལང་གི་རྭ་ནི་ཡོད་དོ་ཞེས་རྣམ་པར་རྟོག་གོ །བློ་གྲོས་ཆེན་པོ་དེ་དག་ལྟ་བ་གཉིས་སུ་ལྷུང་ཞིང་སེམས་ཙམ་དུ་མ་ཤེས་པས། རང་གི་སེམས་ཀྱི་སྤྱོད་ཡུལ་དང་རྣམ་པར་རྟོག་པ་འཕེལ་བ་ནས་ལུས་དང་ལོངས་སྤྱོད་རྣམ་པར་གཞག་པའི་རྣམ་པར་རྟོག་པ་སྣང་ངོ་། །བློ་གྲོས་ཆེན་པོ་ཆོས་ཐམས་ཅད་ཀྱི་དངོས་པོ་ཡང་དེ་བཞིན་ཏེ། ཡོད་པ་དང་། མེད་པ་དང་བྲལ་བ་ཡིན་པས་རྣམ་པར་བརྟག་པར་མི་བྱའོ། །བློ་གྲོས་
ཆེན་པོ་གལ་ཏེ་ཡང་ཡོད་པ་དང་མེད་པ་དང་བྲལ་བས་རི་བོང་གི་རྭ་ལྟར་མེད་དོ་སྙམ་དུ་རྟོག་ན་ལོག་པར་རྟོག་པ་ཞེས་བྱ་སྟེ། དེ་དག་ཕན་ཚུན་དུ་ལྟོས་པའི་རྒྱུའི་ཕྱིར་རི་བོང་གི་རྭ་མེད་དོ་སྙམ་དུ་བརྟག་པར་མི་བྱའོ། །རྡུལ་ཕྲ་རབ་ཀྱི་བར་དུ་བརྟགས་ན་ཡང་དངོས་པོ་མི་དམིགས་པས། བློ་གྲོས་ཆེན་པོ་འཕགས་པའི་སྤྱོད་ཡུལ་དང་བྲལ་བ་བ་ལང་གི་རྭ་ཡོད་པར་བརྟག་པར་མི་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་རྣམ་པར་མི་རྟོག་པ་ཐོབ་པ་དེས། མི་སྐྱེ་བའི་མཚན་ཉིད་མཐོང་ནས། རྗེས་སུ་དཔག་པས་ཤིན་དུ་བསམས་ནས། རྣམ་པར་རྟོག་པ་མི་སྐྱེ་བ་སོ་སོར་རབ་ཏུ་རྟོག་པ་ལ་མ་མཆིས་པ་ཞེས་བགྱི་བ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་རྣམ་པར་རྟོག་པ་མི་སྐྱེ་བར་སོ་སོར་རབ་ཏུ་རྟོག་པ་ལ་མེད་པ་ཞེས་བྱ་བ་ནི་མ་ཡིན་ནོ། །དེ་ཅིའི་ཕྱིར་ཞེ་ན། རྣམ་པར་རྟོག་པ་ནི་རྒྱུ་དེས་སྐྱེ་བའི་ཕྱིར་དེ་ལ་བརྟེན་ནས་རྣམ་པར་རྟོག་པ་སྐྱེའོ། །འདི་ལྟར་རྭ་ལ་བརྟེན་ནས་རྣམ་པར་རྟོག་པ་སྐྱེ་བས་དེའི་ཕྱིར་བརྟེན་པའི་རྒྱུ་ཞེས་བྱ་བའི་ཕྱིར་དང་། ཐ་དད་པ་དང་། ཐ་དད་པ་མ་ཡིན་པ་རྣམ་པར་སྤངས་པའི་ཕྱིར་རྣམ་པར་རྟོག་པ་མི་སྐྱེ་བར་སོ་སོར་རབ་ཏུ་རྟོག་པ་ལ་རྭ་མེད་ཅེས་བྱ་བ་ནི་མ་ཡིན་ནོ། །བློ་གྲོས་ཆེན་པོ་གལ་ཏེ་རྣམ་པར་རྟོག་པ་དང་། ཐ་དད་ན་ནི་རྭའི་རྒྱུ་ལས་བྱུང་བ་མ་ཡིན་པར་འགྱུར་རོ། །ཅི་སྟེ་ཐ་དད་པ་ཡིན་ན་ནི་དེའི་རྒྱུ་ལས་བྱུང་བའི་ཕྱིར་རྡུལ་ཕྲ་རབ་ཀྱི་བར་དུ་བརྟགས་ན་མི་དམིགས་ཏེ། རྭ་དང་ཐ་དད་པ་མ་ཡིན་པའི་ཕྱིར་དེ་ཡང་དངོས་པོར་མ་ཡིན་ནོ། །དེ་གཉི་ག་ཡང་དངོས་པོ་མེད་ན་ཆོས་གང་གིས་ཅིའི་ཕྱིར་མེད་ཅེས་བརྗོད། བློ་གྲོས་ཆེན་པོ་གལ་ཏེ་མེད་པའི་ཕྱིར་རི་བོང་གི་རྭ་མེད་ན་ཡོད་པ་ལ་ལྟོས་པའི་ཕྱིར་རི་བོང་གི་རྭ་མེད་ཅེས་བརྟག་པར་མི་བྱའོ། །བློ་གྲོས་ཆེན་པོ་ཡང་དག་པའི་རྒྱུ་མ་ཡིན་པའི་ཕྱིར་ཡོད་པ་དང་། མེད་པར་སྨྲ་བ་གཉི་ག་འགྲུབ་པར་མི་འགྱུར་རོ། །བློ་གྲོས་ཆེན་པོ་གཞན་ཡང་མུ་སྟེགས་ཀྱི་ལྟ་བ་ཅན་གཟུགས་ཀྱི་དངོས་པོ་དང་། དབྱིབས་དང་། གནས་སུ་བརྟགས་པའི་ཆོས་ལ་
མངོན་པར་ཞེན་པ་ནམ་མཁའི་ཆ་རིས་ལེགས་པར་ཁོང་དུ་མ་ཆུད་པ་རྣམས་འདི་སྐད་དུ། ནམ་མཁའ་ནི་གཟུགས་དང་བྲལ་བའོ་ཞེས་ཆ་རིས་སུ་ལྟ་བའི་རྣམ་པར་རྟོག་པ་སྐྱེད་པར་བྱེད་དེ། བློ་གྲོས་ཆེན་པོ་ནམ་མཁའ་ནི་གཟུགས་པ་ཡིན་ཏེ། གཟུགས་ཀྱི་འབྱུང་བའི་རྗེས་སུ་ཞུགས་པའོ། །བློ་གྲོས་ཆེན་པོ་གཟུགས་ནི་ནམ་མཁའི་འཛིན་པ་དང་། འཛིན་པར་བྱ་བའི་གནས་ཀྱིས་རྣམ་པར་གཞག་པའི་དངོས་པོར་གཟུགས་དང་། ནམ་མཁའི་དངོས་པོ་རབ་ཏུ་འབྱེད་པར་ཤེས་པར་བྱའོ། །བློ་གྲོས་ཆེན་པོ་འབྱུང་བ་ཆེན་པོ་རྣམས་སྐྱེ་བ་ན་རང་གི་མཚན་ཉིད་སོ་སོ་ཐ་དད་དེ། ནམ་མཁའ་ལ་ཡང་མི་གནས་སོ། །དེ་དག་ལ་ཡང་ནམ་མཁའ་མེད་པ་ཡང་མ་ཡིན་ནོ། །དེ་བཞིན་དུ་བློ་གྲོས་ཆེན་པོ་བ་ལང་གི་རྭ་ཡོད་པ་ལ་ལྟོས་པའི་ཕྱིར་རི་བོང་གི་རྭ་མེད་པ་ཡིན་ཏེ། བློ་གྲོས་ཆེན་པོ་བ་ལང་གི་རྭ་ཡང་རྡུལ་ཕྲ་མོར་རྣམ་པར་འཕྱེ་སྟེ། རྡུལ་ཕྲ་མོ་ཡང་རབ་ཏུ་བཤིག་ན་སྐད་ཅིག་ཙམ་དུ་ཡང་མི་གནས་ན་དེ་ཅི་ལས་ལྟོས་ཏེ་མེད་ཅེས་བརྗོད། གལ་ཏེ་གཞན་ལས་ལྟོས་པའི་རྫས་ཤིག་གོ་ཞེ་ན། དེ་ཡང་དེ་ལྟ་བུའི་ཆོས་ཅན་ནོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་རི་བོང་གི་རྭ་དང་བ་ལང་གི་རྭ་དང་། ནམ་མཁའ་དང་། དབྱིབས་དང་། གཟུགས་ཐ་དད་པར་ལྟ་བའི་རྣམ་པར་རྟོག་པ་ཡོངས་སུ་སྤངས་ནས། ཁྱོད་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་རང་གི་སེམས་སྣང་བའི་རྣམ་པར་རྟོག་པ་ཡིད་ལ་སེམས་ཤིང་སངས་རྒྱས་ཀྱི་ཞིང་ཐམས་ཅད་དུ་འཇུག་པ་དང་། རྒྱལ་བའི་སྲས་རྣམས་ལ་རང་གི་སེམས་སྣང་བ་ལ་རབ་ཏུ་རྟོག་པའི་སྦྱོར་བ་བསྟན་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །གཟུགས་སོགས་སེམས་ནི་མེད་པ་དང་། །གཟུགས་སོགས་སེམས་ནི་རབ་འཕེལ་དང་། །ལུས་དང་ལོངས་སྤྱོད་རྣམ་གཞག་པ། །ཀུན་གཞི་སེམས་ཅན་སྣང་ཡིན་ཏེ། །སེམས་དང་ཡིད་
དང་རྣམ་པར་ཤེས། །རང་བཞིན་དང་ནི་ཆོས་ལྔ་དང་། །བདག་མེད་ཡོངས་སུ་དག་གཉིས་ནི། །རྣམ་པར་འདྲེན་པས་རབ་ཏུ་གསུངས། །རིང་ཐུང་ཡོད་མེད་ལ་སོགས་པ། །ཕན་ཚུན་ལྟོས་ནས་རབ་ཏུ་སྐྱེ། །མེད་པའི་ཕྱིར་ནི་ཡོད་པ་གྲུབ། །ཡོད་པའི་ཕྱིར་ནི་མེད་པ་གྲུབ། །དངོས་པོ་རྡུལ་དུ་རྣམ་ཕྱེ་སྟེ། །གཟུགས་ཀྱི་རྣམ་རྟོག་མི་སྐྱེད་དོ། །སེམས་ཙམ་རྣམ་པར་གཞག་པའི་གནས། །ལྟ་བ་ངན་པས་མོས་མི་འགྱུར། །འཇིག་རྟེན་མགོན་པོས་གསུངས་པ་ཡི། །རང་གི་སྤྱོད་ཡུལ་གང་ཡིན་པ། །རྟོག་པ་ཅན་གྱི་ཡུལ་མ་ཡིན། །དེ་བཞིན་ཉན་ཐོས་ཀྱི་ཡང་མིན། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་རང་གི་སེམས་སྣང་བའི་རྒྱུད་རྣམ་པར་དག་པར་བྱ་བའི་ཕྱིར་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རང་གི་སེམས་སྣང་བའི་རྒྱུད་ཇི་ལྟར་རྣམ་པར་དག་པར་བགྱི། ཅིག་ཅར་རམ་འོན་ཏེ་རིམ་གྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་རིམ་གྱིས་རྣམ་པར་འདག་གི། ཅིག་ཅར་ནི་མ་ཡིན་ཏེ། དཔེར་ན་ཤིང་ཨ་མྲའི་འབྲས་བུ་ནི་རིམ་གྱིས་སྨིན་པར་འགྱུར་གྱི་ཅིག་ཅར་མ་ཡིན་ནོ། །དེ་བཞིན་དུ་དེ་བཞིན་གཤེགས་པས་སེམས་ཅན་རྣམས་ཀྱི་རང་གི་སེམས་སྣང་བའི་རྒྱུད་ཡོངས་སུ་སྦྱོང་བ་ཡང་རིམ་གྱིས་རྣམ་པར་འདག་གི་ཅིག་ཅར་མ་ཡིན་ནོ། །དཔེར་ན་རྫ་མཁན་སྣོད་རྣམས་བྱེད་པ་ནི་རིམ་གྱིས་བྱེད་དེ། ཅིག་ཅར་མ་ཡིན་ནོ། །དེ་བཞིན་དུ་དེ་བཞིན་གཤེགས་པས་སེམས་ཅན་རྣམས་ཀྱི་རང་གི་སེམས་སྣང་བའི་རྒྱུད་ཡོངས་སུ་སྦྱོང་བ་ཡང་རིམ་གྱིས་རྣམ་པར་འདག་གི་ཅིག་ཅར་མ་ཡིན་ནོ། །དཔེར་ན་ས་ཆེན་པོ་ལས་རྫས་རྣམས་རིམ་གྱིས་སྐྱེའི་ཅིག་ཅར་སྐྱེ་བ་མ་ཡིན་ནོ། །དེ་བཞིན་དུ་དེ་བཞིན་གཤེགས་པས་སེམས་ཅན་རྣམས་ཀྱི་རང་གི་སེམས་སྣང་བའི་རྒྱུད་ཡོངས་སུ་སྦྱོང་བ་ཡང་རིམ་གྱིས་རྣམ་པར་འདག་གི་ཅིག་ཅར་མ་ཡིན་ནོ། །དཔེར་ན་མི་ལ་ལ་རོལ་མོ་དང་། ཡི་གེ་དང་། རི་མོ་དང་། བཟོ་སྣ་ཚོགས་སློབ་པ་རིམ་གྱིས་མངོན་པར་འགྲུབ་པར་འགྱུར་གྱིས་ཅིག་ཅར་མ་ཡིན་ནོ། །དེ་བཞིན་དུ་དེ་བཞིན་གཤེགས་པས་སེམས་ཅན་རྣམས་
ཀྱི་རང་གི་སེམས་སྣང་བའི་རྒྱུད་ཡོངས་སུ་སྦྱོང་བ་ཡང་རིམ་གྱིས་རྣམ་པར་འདག་གི་ཅིག་ཅར་མ་ཡིན་ནོ། །དཔེར་ན་མེ་ལོང་རབ་ཏུ་ཕྱིས་པ་ནི་མཚན་མ་མེད་པར་གཟུགས་བརྙན་ཐམས་ཅད་ཅིག་ཅར་སྣང་བར་བྱེད་དོ། །དེ་བཞིན་གཤེགས་པས་སེམས་ཅན་ཐམས་ཅད་ཀྱི་རང་གི་སེམས་སྣང་བའི་རྒྱུད་ཡོངས་སུ་སྣང་བ་ཡང་དེ་བཞིན་ཏེ། མཚན་མ་མེད་ཅིང་སྣང་བ་མེད་པ་རྣམ་པར་དག་པའི་སྤྱོད་ཡུལ་ཅིག་ཅར་སྟོན་ཏོ། །དཔེར་ན་ཉི་མ་དང་ཟླ་བའི་དཀྱིལ་འཁོར་ནི་འོད་ཟེར་གྱིས་གཟུགས་སུ་སྣང་བ་ཐམས་ཅད་ཅིག་ཅར་མངོན་པར་བྱེད་དོ། །དེ་བཞིན་གཤེགས་པ་ཡང་རང་གི་སེམས་སྣང་བ་དང་། གནས་ངན་ལེན་གྱི་བག་ཆགས་དང་བྲལ་བའི་སེམས་ཅན་རྣམས་ལ་དེ་བཞིན་དུ་བསམ་གྱིས་མི་ཁྱབ་པའི་ཡེ་ཤེས་རྒྱལ་བ་རྣམས་ཀྱི་སྤྱོད་ཡུལ་ཅིག་ཅར་སྟོན་ཏོ། །དཔེར་ན་ཀུན་གཞི་རྣམ་པར་ཤེས་པ་ནི་རང་གི་སེམས་སྣང་བའི་ལུས་དང་། གནས་དང་། ལོངས་སྤྱོད་རྣམ་པར་གཞག་པའི་ལུས་ཅིག་ཅར་རྣམ་པར་རིག་ཅིང་ཤེས་སོ། །རྟེན་གྱི་སངས་རྒྱས་དེ་དག་ཀྱང་དེ་བཞིན་ཏེ། ཅིག་ཅར་སེམས་ཅན་ཡོངས་སུ་སྨིན་པར་མཛད་ཅིང་གནས་པར་བྱ་བའི་སྤྱོད་ཡུལ་ལ་རྣལ་འབྱོར་པ་དེ་དག་འོག་མིན་དུ་གནས་པར་མཛད་དོ། །དཔེར་ན་ཆོས་ཉིད་ཀྱི་སངས་རྒྱས་ཀྱི་རྟེན་གྱི་སངས་རྒྱས་སྟོན་ཅིང་འོད་ཟེར་གྱིས་རྣམ་པར་མཛེས་སོ། །རང་གིས་རིག་པ་འཕགས་པའི་ཚུལ་ཡང་དེ་བཞིན་ཏེ། དེས་ཆོས་ཀྱི་མཚན་ཉིད་ལ་དངོས་པོ་ཡོད་པ་དང་། དངོས་པོ་མེད་པའི་ལྟ་བ་ངན་པའི་རྣམ་པར་རྟོག་པ་རབ་ཏུ་སེམས་པས་རྣམ་པར་མཛེས་སོ། །གཞན་ཡང་བློ་གྲོས་ཆེན་པོ་ཆོས་ཉིད་ལ་རྟེན་པའི་སངས་རྒྱས་ནི། ཆོས་ཐམས་ཅད་རང་དང་སྤྱིའི་མཚན་ཉིད་དུ་གཏོགས་ཤིང་རང་གི་སེམས་སྣང་བའི་བག་ཆགས་ཀྱི་རྒྱུ་དང་འབྲེལ་བ་ཀུན་ཏུ་བརྟགས་པའི་རང་བཞིན་ལ་མངོན་པར་ཞེན་པའི་རྒྱུ་ལས་བྱུང་བར་སྟོན་ཏོ། །ཡང་དག་པ་མ་ཡིན་པ་སྒྱུ་མ་སྣ་ཚོགས་ལ་སྣ་ཚོགས་སུ་མངོན་པར་ཞེན་པ་དག་མི་དམིགས་སོ། །གཞན་ཡང་བློ་གྲོས་ཆེན་པོ་གཞན་གྱི་དབང་གི་རང་བཞིན་ལ་མངོན་པར་ཞེན་པ་ལས་ཀུན་དུ་བརྟགས་པའི་རང་བཞིན་གྱི་མཚན་ཉིད་སྐྱེའོ། །བློ་གྲོས་ཆེན་པོ་དཔེར་ན་སྒྱུ་མ་
མཁན་གྱིས་རྩྭ་དང་ཤིང་དང་གྱོ་མོ་ལ་བརྟེན་ཏེ། སྒྱུ་མ་སྣ་ཚོགས་ཀྱིས་སེམས་ཅན་རྣམས་ཀྱི་དབྱིབས་དང་། གཟུགས་ཐ་དད་པ་བྱས་པ་ལ་རྣམ་པར་རྟོག་པ་སྣ་ཚོགས་སྐྱེད་པར་བྱེད་དེ། རྣམ་པར་རྟོག་པ་དེ་དག་ནི་ཡང་དག་པ་མ་ཡིན་ནོ། །དེ་བཞིན་དུ་བློ་གྲོས་ཆེན་པོ་གཞན་གྱི་དབང་གི་རང་བཞིན་ལ་བརྟེན་ནས་ཀུན་དུ་བརྟགས་པའི་རང་བཞིན་འབྱུང་ངོ་། །རྣམ་པར་རྟོག་པའི་སེམས་སྣ་ཚོགས་དང་། རྣམ་པ་མང་པོའི་མཚན་ཉིད་དང་། དངོས་པོར་རྣམ་པར་རྟོག་པས་མངོན་པར་ཞེན་པའི་བག་ཆགས་ལ་ཡོངས་སུ་རྟོག་པས་བློ་གྲོས་ཆེན་པོ་འདི་ནི་ཀུན་དུ་བརྟགས་པའི་རང་བཞིན་རྣམ་པར་རྟོག་པ་ལས་སྐྱེ་བ་ཞེས་བྱ་སྟེ། བློ་གྲོས་ཆེན་པོ་འདི་ནི་རྟེན་གྱི་སངས་རྒྱས་ཀྱིས་བཤད་པའོ། །བློ་གྲོས་ཆེན་པོ་ཆོས་ཉིད་ཀྱི་སངས་རྒྱས་ནི་སེམས་ཀྱི་རང་བཞིན་གྱི་མཚན་ཉིད་དང་བྲལ་བ་རང་གིས་རིག་པ་འཕགས་པས་དམིགས་པར་བྱ་བའི་སྤྱོད་ཡུལ་རྣམ་པར་གཞོག་གོ །བློ་གྲོས་ཆེན་པོ་སྤྲུལ་པས་སྤྲུལ་པའི་སངས་རྒྱས་ནི་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། སེམས་དང་། ཡེ་ཤེས་དང་། ཤེས་རབ་དང་། ཕུང་པོ་དང་། ཁམས་དང་། སྐྱེ་མཆེད་དང་བྲལ་བ་དང་། རྣམ་པར་ཐར་པ་དང་། རྣམ་པར་ཤེས་པའི་མཚན་ཉིད་དང་། རྣམ་པར་འབྱེད་ཅིང་སོ་སོར་རབ་ཏུ་རྟོག་པ་རྣམ་པར་གཞག་པ་དང་། མུ་སྟེགས་ཅན་གྱི་ལྟ་བ་དང་། གཟུགས་མེད་པའི་ལྟ་བ་ལས་ཤིན་ཏུ་འདས་པའི་མཚན་ཉིད་སྟོན་ཏོ། །བློ་གྲོས་ཆེན་པོ་གཞན་ཡང་ཆོས་ཉིད་ཀྱི་སངས་རྒྱས་ནི་དམིགས་པ་མེད་ཅིང་དམིགས་པ་དང་བྲལ་བ། བྱ་བ་དང་། དབང་པོ་དང་། ཚད་མའི་མཚན་ཉིད་ཐམས་ཅད་ལས་རྣམ་པར་ལྡོག་པ། བྱིས་པ་སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་དག་གིས་མཚན་ཉིད་ལ་མངོན་པར་ཞེན་པ་དང་། མངོན་པར་ཆགས་པ་རྣམས་ཀྱི་སྤྱོད་ཡུལ་མ་ཡིན་པ། འཕགས་པ་རང་གིས་རིག་པའི་སྤྱོད་ཡུལ་གྱི་མཚན་ཉིད་ཀྱིས་རྣམ་པར་གཞག་པ་སྟོན་ཏོ། །དེ་ལྟ་བས་ན་བློ་གྲོས་ཆེན་པོ་འཕགས་པ་སོ་སོ་རང་གིས་རིག་པའི་ཁྱད་པར་གྱི་མཚན་ཉིད་
རབ་ཏུ་བརྩོན་པར་བྱ་ཞིང་རང་གི་སེམས་སྣང་བའི་ལྟ་བ་ཡོངས་སུ་སྤང་བར་བྱའོ། །གཞན་ཡང་བློ་གྲོས་ཆེན་པོ་ཉན་ཐོས་ཀྱི་ཐེག་པའི་ཚུལ་རབ་ཏུ་དབྱེ་བའི་མཚན་ཉིད་ནི་རྣམ་པ་གཉིས་ཏེ། འདི་ལྟ་སྟེ། འཕགས་པ་སོ་སོ་རང་གིས་རིག་པའི་ཁྱད་པར་གྱི་མཚན་ཉིད་ཐོབ་པ་དང་། དངོས་པོར་རྣམ་པར་རྟོག་པའི་རང་བཞིན་ལ་མངོན་པར་ཞེན་པའི་མཚན་ཉིད་དོ། །དེ་ལ་འཕགས་པའི་སོ་སོ་རང་གིས་རིག་པའི་ཁྱད་པར་གྱི་མཚན་ཉིད་ཐོབ་པའི་ཉན་ཐོས་གང་ཞེ་ན། འདི་ལྟ་སྟེ། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པའི་ལུས་ཀྱི་ཡང་དག་པའི་བདེན་པ་དང་། འདོད་པ་སྤངས་ཤིང་རབ་ཏུ་དབེན་པ་དང་། ཕུང་པོ་དང་། ཁམས་དང་། སྐྱེ་མཆེད་རྣམས་གཏན་དུ་ཞི་བ་དང་། རང་དང་སྤྱིའི་མཚན་ཉིད་ལ་འཇུག་ཅིང་ཕྱི་རོལ་གྱིས་མི་འཇིགས་པའི་མཚན་ཉིད་དང་། ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་ནས། སེམས་རབ་ཏུ་ཞི་བ་འཐོབ་བོ། །སེམས་རབ་ཏུ་ཞི་བར་གྱུར་ནས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། ལམ་དང་། འབྲས་བུ་དང་། སྙོམས་པར་འཇུག་པ་དང་། རྣམ་པར་གྲོལ་བ་དང་། བག་ཆགས་དང་། བསམ་གྱིས་མི་ཁྱབ་པའི་རྣམ་པར་འགྱུར་བའི་ཤི་འཕོ་དང་མ་བྲལ་བ། འཕགས་པ་སོ་སོ་རང་གིས་རིག་པའི་བདེ་བ་ལ་གནས་པ་ཐོབ་པའི་ཉན་ཐོས་དེ་ནི་འཕགས་པ་སོ་སོ་རང་གིས་རིག་པའི་ཁྱད་པར་གྱི་མཚན་ཉིད་ཐོབ་པའི་ཉན་ཐོས་ཞེས་བྱའོ། །བློ་གྲོས་ཆེན་པོ་འཕགས་པ་སོ་སོ་རང་གིས་རིག་པའི་ཁྱད་པར་གྱི་བདེ་བ་ལ་གནས་པ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་འགོག་པའི་སྒོའི་བདེ་བ་དང་། མཉམ་པར་གཞག་པའི་བདེ་བ་ལ་གནས་པར་མི་བྱེད་དེ། སེམས་ཅན་ལ་སྙིང་བརྩེ་བར་བལྟ་བ་དང་། སྔོན་གྱི་སྨོན་ལམ་གྱིས་མངོན་དུ་མི་བྱེད་དོ། །བློ་གྲོས་ཆེན་པོ་འདི་ནི་ཉན་ཐོས་ཀྱི་འཕགས་པ་སོ་སོ་རང་གིས་རིག་པའི་ཁྱད་པར་གྱི་མཚན་ཉིད་ཀྱི་བདེ་བ་ཐོབ་པ་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས། དེ་དག་གིས་ཐོབ་པའི་འཕགས་པ་སོ་སོ་རང་གིས་རིག་པའི་ཁྱད་པར་གྱི་མཚན་ཉིད་ཀྱི་བདེ་
བ་ལ་བསླབ་པར་མི་བྱའོ། །བློ་གྲོས་ཆེན་པོ་དངོས་པོར་རྣམ་པར་རྟོག་པའི་རང་བཞིན་ལ་མངོན་པར་ཞེན་པའི་མཚན་ཉིད་ཀྱི་ཉན་ཐོས་གང་ཞེ་ན། འདི་ལྟ་སྟེ། འབྱུང་བ་ཆེན་པོ་དང་། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། སྲ་བ་དང་། གཤེར་བ་དང་། དྲོ་བ་དང་། གཡོ་བ་རྣམས་བྱེད་པ་མེད་པར་སྐྱེ་བ་དང་། རང་དང་སྤྱིའི་མཚན་ཉིད་ཀྱི་སྔོན་གྱི་རྒྱལ་བ་རྣམས་ཀྱིས་ལེགས་པར་གསུངས་པ་མཐོང་ནས་དེ་དག་ལ་རང་བཞིན་གྱི་རྣམ་པར་རྟོག་པ་འབྱུང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་དེ་དག་ཁོང་དུ་ཆུད་པར་བྱས་ནས་ཡོངས་སུ་སྤང་བར་བྱའོ། །ཆོས་ལ་བདག་མེད་པའི་མཚན་ཉིད་ཀྱི་རྗེས་སུ་ཞུགས་པས་གང་ཟག་ལ་བདག་མེད་པའི་མཚན་ཉིད་དུ་ལྟ་བ་བཟློག་ནས་ས་རྣམས་རིམ་གྱིས་མཚམས་སྦྱོར་བ་རྣམ་པར་གཞག་པ་ལ་གནས། བློ་གྲོས་ཆེན་པོ་འདི་ནི་ཉན་ཐོས་རྣམས་ཀྱི་དངོས་པོར་རྣམ་པར་རྟོག་པའི་རང་བཞིན་ལ་མངོན་པར་ཞེན་པའི་མཚན་ཉིད་ཅེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་རྟག་པ་དང་། བསམ་གྱིས་མི་ཁྱབ་པ། སོ་སོ་རང་གིས་རིག་པ་འཕགས་པའི་སྤྱོད་ཡུལ་དང་། དོན་དམ་པའི་སྤྱོད་ཡུལ་བཀའ་སྩལ་པ་དེ་བཅོམ་ལྡན་འདས་མུ་སྟེགས་ཅན་གྱིས་སྨྲ་བའི་རྟག་པ་དང་། བསམ་གྱིས་མི་ཁྱབ་པའི་རྒྱུ་དང་རྐྱེན་ཞིག་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་མུ་སྟེགས་ཅན་རྣམས་ཀྱི་རྒྱུ་དང་རྐྱེན་གྱིས་རྟག་པ་དང་། བསམ་གྱིས་མི་ཁྱབ་པ་འཐོབ་པར་མི་འགྱུར་རོ། །དེ་ཅིའི་ཕྱིར་ཞེ་ན། མུ་སྟེགས་ཅན་རྣམས་ཀྱིས་རྟག་པ་དང་། བསམ་གྱིས་མི་ཁྱབ་པ་ནི་རྒྱུའི་རང་གི་མཚན་ཉིད་ལས་གྲུབ་པ་མ་ཡིན་ཏེ། གལ་ཏེ་རྟག་པ་དང་བསམ་གྱིས་མི་ཁྱབ་པའི་རྒྱུ་རང་གི་མཚན་ཉིད་ལས་གྲུབ་པ་མ་ཡིན་ན། རྒྱུ་གང་གིས་རྟག་པ་དང་། བསམ་གྱིས་མི་ཁྱབ་པ་མངོན་པར་བྱེད། གཞན་ཡང་བློ་གྲོས་ཆེན་པོ་ཅི་སྟེ་རྟག་པ་དང་། བསམ་གྱིས་མི་ཁྱབ་པ་རྒྱུའི་རང་གི་མཚན་ཉིད་ལས་གྲུབ་
པ་ཞིག་ཡིན་ན་ནི་དེས་རྟག་པ་ཉིད་དུ་འགྱུར་བ་ཞིག་ན། འདི་ལྟར་བྱེད་པའི་རྒྱུའི་མཚན་ཉིད་ཀྱི་ཕྱིར་རྟག་པ་དང་། བསམ་གྱིས་མི་ཁྱབ་པར་མི་འགྲུབ་བོ། །བློ་གྲོས་ཆེན་པོ་ངའི་དོན་དམ་པ་རྟག་པ་དང་། བསམ་གྱིས་མི་ཁྱབ་པ་ནི་དོན་དམ་པའི་རྒྱུའི་མཚན་ཉིད་ལས་གྲུབ་པ་ཡིན་ཏེ། དངོས་པོ་དང་དངོས་པོ་མེད་པ་དང་བྲལ་བ་རང་གིས་རིག་པའི་མཚན་ཉིད་ཐོབ་པའི་ཕྱིར་མཚན་ཉིད་དང་ལྡན་པའོ། །དོན་དམ་པའི་ཡེ་ཤེས་ཀྱི་རྒྱུར་གྱུར་པའི་ཕྱིར་རྒྱུ་དང་ལྡན་པའོ། །དངོས་པོ་དང་དངོས་པོ་མེད་པ་དང་བྲལ་བའི་ཕྱིར། དཔེར་ན་མ་བྱས་པ་ནམ་མཁའ་དང་། མྱ་ངན་ལས་འདས་པ་དང་། འགོག་པ་དང་འདྲ་བའི་ཕྱིར་རྟག་པ་སྟེ། དེའི་ཕྱིར་བློ་གྲོས་ཆེན་པོ་འདི་ནི་མུ་སྟེགས་ཅན་གྱི་རྟག་པ་དང་། བསམ་གྱིས་མི་ཁྱབ་པར་སྨྲ་བ་དང་། མཚུངས་པ་མ་ཡིན་ནོ། །བློ་གྲོས་ཆེན་པོ་རྟག་པ་དང་། བསམ་གྱིས་མི་ཁྱབ་པ་འདི་ནི་དེ་བཞིན་གཤེགས་པ་རྣམས་ཀྱི་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱིས་ཐུགས་སུ་ཆུད་པར་བྱའོ། །དེ་བས་ན་རྟག་པ་དང་། བསམ་གྱིས་མི་ཁྱབ་པ་སོ་སོ་རང་གིས་རིག་པ་འཕགས་པའི་ཡེ་ཤེས་ཁོང་དུ་ཆུད་པར་བྱ་བ་ལ་རབ་ཏུ་བརྩོན་པར་བྱའོ། །གཞན་ཡང་བློ་གྲོས་ཆེན་པོ་མུ་སྟེགས་ཅན་གྱི་རྟག་པ་དང་། བསམ་གྱིས་མི་ཁྱབ་པ་ནི་མི་རྟག་པ་ཉིད་དེ། ཐ་དད་པའི་མཚན་ཉིད་ཀྱི་རྒྱུའི་ཕྱིར་དང་། བདག་གིས་བྱས་པའི་རྒྱུའི་མཚན་ཉིད་ཀྱི་སྟོབས་ཀྱི་ཕྱིར་རྟག་པ་མ་ཡིན་ནོ། །གཞན་ཡང་བློ་གྲོས་ཆེན་པོ་མུ་སྟེགས་ཅན་རྣམས་ཀྱི་རྟག་པ་དང་། བསམ་གྱིས་མི་ཁྱབ་པ་ནི་བྱས་པའི་དངོས་པོ་དངོས་པོ་མེད་པས་མི་རྟག་པ་ཉིད་དུ་མཐོང་ནས་རྟག་པ་ཡིན་ནོ་སྙམ་དུ་རྟོག་གོ །བློ་གྲོས་ཆེན་པོ་ང་ཡང་དེ་བཞིན་དུ་རྒྱུ་དང་རྐྱེན་གྱིས་བྱས་པའི་དངོས་པོ་དངོས་པོ་མེད་པས་མི་རྟག་པ་ཉིད་དུ་མཐོང་ནས་སོ་སོ་རང་གིས་རིག་པའི་འཕགས་པའི་ཡེ་ཤེས་ཀྱིས་དེ་ལ་རྟག་པའི་རྒྱུ་མེད་པར་སྟོན་ཏོ། །བློ་གྲོས་ཆེན་པོ་གལ་ཏེ་ཡང་མུ་སྟེགས་ཅན་རྣམས་ཀྱི་རྒྱུའི་མཚན་ཉིད་དུ་གྲུབ་པ་ཞིག་ཡིན་ན་ནི་རྟག་པ་དང་། བསམ་གྱིས་མི་ཁྱབ་པའི་རྒྱུའི་རང་གི་མཚན་ཉིད་ཀྱི་དངོས་པོ་དངོས་པོ་མེད་པས་རི་བོང་གི་
རྭ་དང་མཚུངས་ཤིང་རྟག་པ་དང་། བསམ་གྱིས་མི་ཁྱབ་པ་དེ་ནི་ཚིག་གི་རྣམ་པར་རྟོག་པ་ཙམ་དུ་འགྱུར་ཏེ། མུ་སྟེགས་ཅན་རྣམས་ལ་ཉེས་པ་དེ་ལྟ་བུ་དག་ཡོད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཚིག་རྣམ་པར་རྟོག་པ་ཡང་རི་བོང་གི་རྭ་དང་འདྲ་བས་རང་གི་རྒྱུའི་མཚན་ཉིད་ཀྱི་དངོས་པོ་ཡོད་པ་མ་ཡིན་ནོ། །བློ་གྲོས་ཆེན་པོ་ངའི་རྟག་པ་དང་། བསམ་གྱིས་མི་ཁྱབ་པའི་རྒྱུ་ནི་སོ་སོ་རང་གིས་རིག་པ་འཕགས་པའི་ཡེ་ཤེས་ཁོང་དུ་ཆུད་པའི་མཚན་ཉིད་ཀྱི་ཕྱིར་བྱས་པའི་དངོས་པོ་དང་། དངོས་པོ་མེད་པ་རྣམ་པར་སྤངས་པས་རྟག་པ་ཡིན་གྱིས་ཕྱི་རོལ་གྱི་དངོས་པོ་རྣམས་དངོས་པོ་མེད་ཅིང་མི་རྟག་པར་གྱུར་ནས་རྗེས་སུ་དཔག་པས་རྟག་པ་ཉིད་དུ་བརྟགས་པ་ནི་མ་ཡིན་ནོ། །བློ་གྲོས་ཆེན་པོ་གལ་ཏེ་ཡང་ཕྱི་རོལ་གྱི་དངོས་པོ་རྣམས་དངོས་པོ་མེད་ཅིང་མི་རྟག་པ་ལས་རྗེས་སུ་དཔག་པས་རྟག་པ་དང་བསམ་གྱིས་མི་ཁྱབ་པ་ཉིད་དུ་རྟོག་པར་བྱེད་ན། བསམ་གྱིས་མི་ཁྱབ་པའི་རང་གི་རྒྱུའི་མཚན་ཉིད་མི་ཤེས་སོ། །བློ་གྲོས་ཆེན་པོ་དེ་དག་ནི་སོ་སོ་རང་གིས་རིག་པ་འཕགས་པའི་ཡེ་ཤེས་ཁོང་དུ་ཆུད་པའི་སྤྱོད་ཡུལ་ལས་ཤིན་ཏུ་ཐག་རིང་པོར་གྱུར་པ་སྟེ། དེ་དག་ལ་བཤད་པར་མི་བྱའོ། །གཞན་ཡང་བློ་གྲོས་ཆེན་པོ་འཁོར་བའི་རྣམ་པར་རྟོག་པའི་སྡུག་བསྔལ་གྱིས་འཇིགས་པས་མྱ་ངན་ལས་འདས་པ་ཡོངས་སུ་ཚོལ་ཏེ། འཁོར་བ་དང་མྱ་ངན་ལས་འདས་པའི་ཁྱད་པར་མི་ཤེས་པས་དངོས་པོ་ཐམས་ཅད་ལས་རྣམ་པར་རྟོག་པ་དངོས་པོ་མེད་པ་དང་། མ་འོངས་པའི་དབང་པོ་རྣམས་ཀྱི་ཡུལ་ཆད་པ་ལ་མྱ་ངན་ལས་འདས་པར་འདུ་ཤེས་ཏེ། སོ་སོ་རང་གིས་རིག་པ་འཕགས་པའི་ཡེ་ཤེས་ཀུན་གཞི་གྱུར་པ་སྔོན་དུ་བཏང་བ་མ་ཡིན་ནོ། །དེའི་ཕྱིར་བླུན་པོ་དེ་དག་ཐེག་པ་གསུམ་དུ་སྨྲ་བ་ཡིན་ཏེ། སེམས་ཙམ་དུ་སྣང་བ་རྣམས་སྣང་བ་མེད་པར་ནི་མི་སྨྲའོ། །དེ་ལྟ་བས་ན་བློ་གྲོས་ཆེན་པོ་དེ་དག་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་རྣམས་ཀྱིས་གསུངས་པའི་རང་གི་སེམས་སྣང་བའི་སྤྱོད་ཡུལ་མངོན་པར་མི་ཤེས་ཤིང་། སེམས་ཉིད་ཀྱིས་ཕྱི་རོལ་གྱི་སྤྱོད་ཡུལ་དུ་སྣང་བ་ལ་མངོན་པར་ཞེན་པར། འཁོར་བའི་
འཁོར་ལོ་རྟག་ཏུ་འཁོར་རོ། །གཞན་ཡང་བློ་གྲོས་ཆེན་པོ་ཆོས་ཐམས་ཅད་མི་སྐྱེ་བར་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་རྣམས་ཀྱིས་བཤད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། རང་གི་སེམས་སྣང་བའི་དངོས་པོ་རྣམས་དངོས་པོ་མེད་པ་དང་། ཡོད་པ་དང་། ཡོད་པ་མ་ཡིན་པའི་སྐྱེ་བ་དང་བྲལ་བའི་ཕྱིར། བློ་གྲོས་ཆེན་པོ་ཆོས་ཐམས་ཅད་མ་སྐྱེས་པ་ཡིན་ཏེ། ཆོས་ཐམས་ཅད་ནི་རི་བོང་དང་། རྟ་ལ་སོགས་པའི་རྭ་དང་མཚུངས་པའོ། །བྱིས་པ་སོ་སོའི་སྐྱེ་བོ་རྣམས་ཡང་དག་པ་མ་ཡིན་པའི་ཡོངས་སུ་རྟོག་པའི་རང་བཞིན་ལ་རྣམ་པར་བརྟགས་པའི་ཕྱིར་བློ་གྲོས་ཆེན་པོ་ཆོས་ཐམས་ཅད་མ་སྐྱེས་པ་ཡིན་ཏེ། སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་སྤྱོད་ཡུལ་ལ་ནི་དངོས་པོ་ཐམས་ཅད་ཀྱི་རང་བཞིན་གྱི་མཚན་ཉིད་མི་སྐྱེ་བས་དེ་ནི་བྱིས་པ་སོ་སོའི་སྐྱེ་བོ་རྣམ་པར་རྟོག་པ་གཉིས་ཀྱི་སྤྱོད་ཡུལ་གྱི་རང་བཞིན་ལུས་དང་ལོངས་སྤྱོད་རྣམ་པར་གཞག་པའི་རང་བཞིན་གྱི་ཚུལ་གྱིས་མཚན་ཉིད་མ་ཡིན་ནོ། །བློ་གྲོས་ཆེན་པོ་ཀུན་གཞི་རྣམ་པར་ཤེས་པ་གཟུང་བ་དང་། འཛིན་པའི་མཚན་ཉིད་དུ་འཇུག་པ་ལ་བྱིས་པ་སོ་སོའི་སྐྱེ་བོ། སྐྱེ་བ་དང་། གནས་པ་དང་། འཇིག་པའི་ལྟ་བ་གཉིས་སུ་ལྷུང་བའི་བསམ་པ་ཅན་རྣམས་དངོས་པོ་ཐམས་ཅད་སྐྱེ་བ་ནི་ཡོད་པ་དང་། མེད་པ་ལས་སྐྱེ་བར་རྣམ་པར་རྟོག་གི། འཕགས་པ་རྣམས་ནི་མ་ཡིན་ཏེ། བློ་གྲོས་ཆེན་པོ་འདི་ལ་རབ་ཏུ་བརྩོན་པར་བྱའོ། །གཞན་ཡང་བློ་གྲོས་ཆེན་པོ་མངོན་པར་རྟོགས་པར་འགྱུར་བའི་རིགས་ནི་ལྔ་ཡོད་དེ། ལྔ་གང་ཞེ་ན། འདི་ལྟ་སྟེ། ཉན་ཐོས་ཀྱི་ཐེག་པ་མངོན་པར་རྟོགས་པར་འགྱུར་བའི་རིགས་དང་། རང་སངས་རྒྱས་ཀྱི་ཐེག་པ་མངོན་པར་རྟོགས་པར་འགྱུར་བའི་རིགས་དང་། དེ་བཞིན་གཤེགས་པའི་ཐེག་པ་མངོན་པར་རྟོགས་པར་འགྱུར་བའི་རིགས་དང་། གང་དུ་ཡང་མ་ངེས་པའི་རིགས་དང་། རིགས་སོ་སོ་ཐ་དད་པའོ། །དེ་ལ་ཉན་ཐོས་ཀྱི་ཐེག་པ་མངོན་པར་རྟོགས་པར་འགྱུར་བའི་རིགས་ཇི་ལྟར་ཁོང་དུ་ཆུད་པར་བྱ་ཞེ་ན། གང་གིས་ཕུང་པོ་དང་། ཁམས་དང་། སྐྱེ་མཆེད་ཀྱི་རང་དང་སྤྱིའི་
མཚན་ཉིད་དང་། ཡོངས་སུ་སྤང་བ་དང་། ཤེས་པར་འགྱུར་བ་བསྟན་པ་ཐོས་པ་ན། ལུས་ཀྱི་སྤུ་ལྡང་ཞིང་རབ་ཏུ་དགའ་བ་དང་། ཡོངས་སུ་འདྲིས་པར་བྱ་བའི་མཚན་ཉིད་ཀྱི་ཤེས་པ་ལ་མོས་ཤིང་། རྟེན་ཅིང་འབྲེལ་པར་འབྱུང་བ་ཁོང་དུ་ཆུད་པར་བྱ་བའི་མཚན་ཉིད་ལ་ཡོངས་སུ་འདྲིས་པར་མི་བྱེད་པ་འདི་ནི། ཉན་ཐོས་ཀྱི་ཐེག་པ་མངོན་པར་རྟོགས་པར་འགྱུར་བའི་རིགས་སོ། །ཉན་ཐོས་ཀྱི་མངོན་པར་རྟོགས་པས་ས་བརྒྱད་པ་མཐོང་བར་འགྱུར་ཏེ། ཀུན་ནས་ལྡང་བའི་ཉོན་མོངས་པ་རབ་ཏུ་སྤངས་ཤིང་། བག་ཆགས་ཀྱི་ཉོན་མོངས་པ་རབ་ཏུ་སྤངས་པ། བསམ་གྱིས་མི་ཁྱབ་པའི་རྣམ་པར་འགྱུར་བའི་ཤི་འཕོ་ལས་མ་འདས་ཤིང་། དངོས་པོའི་འཆི་འཕོ་ལས་ཤིན་ཏུ་འདས་པས། བདག་གི་སྐྱེ་བ་ནི་ཟད་དོ། །ཚངས་པར་སྤྱོད་པ་ལ་གནས་སོ། །ཡང་སྲིད་པ་ཕྱི་མ་མི་ལེན་ཏོ་ཞེས་ཡང་དག་པར་སེང་གེའི་སྒྲ་སྒྲོགས་ཏེ། ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཤིང་། གང་ཟག་ལ་བདག་མེད་པར་སྒོམ་པ་དང་། མྱ་ངན་ལས་འདས་པ་ཐོབ་པའི་བར་གྱི་བློར་འགྱུར་རོ། །བློ་གྲོས་ཆེན་པོ་སོ་སོ་ཐ་དད་པའི་མངོན་པར་རྟོགས་པ་ནི་འདི་ལྟ་སྟེ། བདག་དང་། གང་ཟག་དང་། སེམས་ཅན་དང་། འཚོ་བ་དང་། སྲོག་དང་། གསོ་བ་དང་། སྐྱེས་བུ་ཞེས་སེམས་ཅན་དེ་དག་དེ་ལྟ་བུའི་བློས་མྱ་ངན་ལས་འདས་པ་ཚོལ་ལོ། །གཞན་ཡང་མུ་སྟེགས་ཅན་ཐ་དད་པ་ཁ་ཅིག་ནི་དངོས་པོ་ཐམས་ཅད་བྱེད་པ་པོ་ལ་རག་ལས་པར་མཐོང་ནས་འདི་སྐད་དུ་འདི་ནི་མྱ་ངན་ལས་འདས་པའོ་ཞེས་དེ་ལྟ་བུའི་བློར་འགྱུར་ཏེ། ཆོས་བདག་མེད་པར་མཐོང་བའི་སྐལ་བ་མེད་པས་དེ་དག་ལ་ཐར་པ་མེད་དོ། །བློ་གྲོས་ཆེན་པོ་ཉན་ཐོས་ཀྱི་ཐེག་པ་མངོན་པར་རྟོགས་པར་འགྱུར་བ་དང་། མུ་སྟེགས་ཀྱི་རིགས་དེ་དག་ནི་ངེས་པར་འབྱུང་བ་མ་ཡིན་པ་ལ་ངེས་པར་འབྱུང་བའི་བློ་ཅན་དག་ཡིན་ཏེ། ལྟ་བ་ངན་པ་དེ་དག་རྣམ་པར་བཟློག་པའི་ཕྱིར་རབ་ཏུ་བརྩོན་པར་བྱའོ། །བློ་གྲོས་ཆེན་པོ་དེ་ལ་རང་སངས་རྒྱས་ཀྱི་ཐེག་པ་མངོན་པར་རྟོགས་པར་འགྱུར་བའི་རིགས་ནི་གང་གིས་རྐྱེན་ཐ་དད་པའི་མངོན་པར་རྟོགས་པ་ཐོས་ན། ལུས་ཀྱི་སྤུ་ལྡང་ཞིང་མཆི་མ་
འབྱུང་བ་དང་། འདུ་འཛིའི་རྐྱེན་ལ་མངོན་པར་ཞེན་པ་མེད་པ་དང་། རང་གི་ལུས་སྣ་ཚོགས་དང་། འདུ་བ་དང་འབྲལ་བའི་རྫུ་འཕྲུལ་སྣ་ཚོགས་ཀྱིས། སྣ་ཚོགས་སྤྲུལ་ཅིང་སྟོན་པ་རབ་ཏུ་བཤད་པ་ཐོས་པ་ན། དེའི་རྗེས་སུ་སེམས་འཇུག་པར་འགྱུར་བ་ཡིན་ཏེ། དེ་རང་སངས་རྒྱས་ཀྱི་ཐེག་པ་མངོན་པར་རྟོགས་པར་འགྱུར་བའི་རིགས་ཅན་དུ་ཤེས་པར་གྱུར་ནས། རང་སངས་རྒྱས་ཀྱི་ཐེག་པ་དང་རྗེས་སུ་འཐུན་པའི་གཏམ་བརྗོད་པར་བྱའོ། །བློ་གྲོས་ཆེན་པོ་འདི་ནི་རང་སངས་རྒྱས་ཀྱི་ཐེག་པ་མངོན་པར་རྟོགས་པར་འགྱུར་བའི་རིགས་ཅན་གྱི་མཚན་ཉིད་དོ། །བློ་གྲོས་ཆེན་པོ་དེ་ལ་དེ་བཞིན་གཤེགས་པའི་ཐེག་པ་མངོན་པར་རྟོགས་པར་འགྱུར་བའི་རིགས་དེ་ནི་རྣམ་པ་བཞི་ཡོད་དེ། འདི་ལྟ་སྟེ། རང་བཞིན་གྱི་ཆོས་མངོན་པར་རྟོགས་པར་འགྱུར་བའི་རིགས་དང་། རང་བཞིན་མེད་པའི་ཆོས་མངོན་པར་རྟོགས་པར་འགྱུར་བའི་རིགས་དང་། སོ་སོ་རང་གིས་རིག་པ་འཕགས་པའི་ཡེ་ཤེས་མངོན་པར་རྟོགས་པར་འགྱུར་བའི་རིགས་དང་། སངས་རྒྱས་ཀྱི་ཞིང་ཕྱི་རོལ་ཁྱད་པར་ཅན་མངོན་པར་རྟོགས་པར་འགྱུར་བའི་རིགས་སོ། །བློ་གྲོས་ཆེན་པོ་ནམ་དངོས་པོ་འདི་བཞི་ལས་གང་ཡང་རུང་བ་ཞིག་བསྟན་པ་དང་། རང་གི་སེམས་སྣང་བའི་ལུས་དང་། ལོངས་སྤྱོད་རྣམ་པར་གཞག་པ་དང་། བསམ་གྱིས་མི་ཁྱབ་པའི་ཡུལ་བཤད་པ་ཐོས་པ་ན། མི་སྐྲག་མི་འཇིགས་པ་དེ་ནི་དེ་བཞིན་གཤེགས་པའི་ཐེག་པ་མངོན་པར་རྟོགས་པར་འགྱུར་བའི་རིགས་ཅན་དུ་ཤེས་པར་བྱ་སྟེ། འདི་ནི་དེ་བཞིན་གཤེགས་པའི་ཐེག་པ་མངོན་པར་རྟོགས་པར་འགྱུར་བའི་རིགས་ཅན་གྱི་མཚན་ཉིད་དོ། །བློ་གྲོས་ཆེན་པོ་མ་ངེས་པའི་རིགས་ཅན་ནི་འདི་ལྟ་སྟེ། གསུམ་པོ་དེ་དག་ལས་གང་བཤད་པ་ན། གང་བཤད་པ་དེ་ལ་འཇུག་ཅིང་དེའི་རྗེས་སུ་སྒྲུབ་པའོ། །བློ་གྲོས་ཆེན་པོ་འདི་དག་ནི་དང་པོ་ས་ཡོངས་སུ་སྦྱང་བ་ཡིན་ཏེ། འདི་ལྟ་སྟེ། རིགས་རྣམ་པར་དགོད་པའོ། །སྣང་བ་མེད་པའི་ས་འཇུག་པར་བྱ་བའི་ཕྱིར། རྣམ་པར་དགོད་པ་བྱས་སོ། །སོ་སོ་རང་གིས་རིག་པ་ལ་གནས་པ་དེ་དག་ཀུན་གཞི་ལ་རང་གི་ཉོན་མོངས་པའི་བག་ཆགས་ཡོངས་སུ་དག་ནས། ཆོས་
བདག་མེད་པར་མཐོང་ཞིང་། ཏིང་ངེ་འཛིན་གྱི་བདེ་བ་ལ་གནས་པ་ཐོབ་པའི་ཉན་ཐོས་རྣམས་ཀྱང་། དེ་བཞིན་གཤེགས་པའི་སྐུ་མཆོག་ཏུ་གྱུར་པ་ཉིད་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར། ཚིགས་སུ་བཅད་པ་འདི་དག་གསུངས་སོ། །རྒྱུན་དུ་ཞུགས་པའི་འབྲས་བུ་དང་། །ལན་ཅིག་ཕྱིར་འོང་ཕྱིར་མི་འོང་། །དེ་བཞིན་དུ་ནི་དགྲ་བཅོམ་པ། །དེ་དག་སེམས་ནི་བསླད་པའོ། །ཐེག་པ་གསུམ་དང་ཐེག་པ་གཅིག །ཐེག་པ་མ་ཡིན་ངས་བཤད་དེ། །བྱིས་པ་བློ་གཞོན་རྣམས་དང་ནི། །འཕགས་པ་རབ་དབེན་མོས་ལ་བཤད། །དོན་དམ་ཆོས་ཀྱི་སྒོ་མོ་ནི། །བསྟན་པ་གཉིས་པོ་རྣམ་སྤངས་ཤིང་། །སྣང་བ་མེད་ལ་རབ་གནས་ནས། །ཐེག་པ་གསུམ་དུ་ཇི་ལྟར་དགོད། །བསམ་གཏན་རྣམས་དང་ཚད་མེད་དང་། །གཟུགས་མེད་པ་ཡི་ཏིང་འཛིན་དང་། །ཚོར་དང་འདུ་ཤེས་རབ་དབེན་པས། །སེམས་ཙམ་ཡང་ནི་ཡོད་མ་ཡིན། །བློ་གྲོས་ཆེན་པོ་འདོད་ཆེན་པ་འདི་དག་ནི་འདོད་ཆེན་པ་མ་ཡིན་ཏེ། འཇིག་རྟེན་ན་སུ་ཞིག་ཐར་པ་ལ་འཇུག་པར་འགྱུར། བློ་གྲོས་ཆེན་པོ་འདོད་ཆེན་པ་ནི་རྣམ་པ་གཉིས་ཡོད་དེ། དགེ་བའི་རྩ་བ་ཐམས་ཅད་སྤངས་པ་དང་། ཐོག་མ་མེད་པའི་དུས་ཀྱི་སེམས་ཅན་གྱི་ཕྱིར་སྨོན་ལམ་བཏབ་པའོ། །དེ་ལ་དགེ་བའི་རྩ་བ་ཐམས་ཅད་སྤངས་པ་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ལ་སྐུར་པ་འདེབས་ཤིང་ཚིག་ངན་པ་འདི་སྐད་དུ། འདི་ནི་མདོ་སྡེ་དང་། འདུལ་བ་དང་། ཐར་པ་དང་འཐུན་པར་སྨྲ་བ་མ་ཡིན་ནོ་ཞེས་ཟེར་བ་སྟེ། དགེ་བའི་རྩ་བ་ཐམས་ཅད་སྤངས་པའི་ཕྱིར་མྱ་ངན་ལས་མི་འདའོ། །གཉིས་པ་ནི་བྱང་ཆུབ་སེམས་དཔའ་རྣམས་སྔོན་གྱི་རང་གི་སྨོན་ལམ་དང་། ཐབས་སྔོན་དུ་བཏང་བའི་ཕྱིར་ཡོངས་སུ་མྱ་ངན་ལས་མི་འདའ་བ་ཡང་མ་ཡིན་ཏེ། སེམས་ཅན་ཐམས་ཅད་མྱ་ངན་ལས་བཟླ་བར་བྱེད་དོ། །བློ་གྲོས་ཆེན་པོ་དེའི་མྱ་ངན་ལས་འདའ་བ་འདི་ནི། མྱ་ངན་ལས་མི་འདའ་བའི་ཆོས་ཅན་གྱི་མཚན་ཉིད་དེ། འདི་ཡང་འདོད་ཆེན་པ་རྣམས་ཀྱི་ཚུལ་རབ་ཏུ་ཐོབ་པར་འགྱུར་རོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་
ལྡན་འདས་འདི་ལ་གཏན་དུ་མྱ་ངན་ལས་མི་འདའ་བ་ཡང་གང་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ་ལ་བྱང་ཆུབ་སེམས་དཔའ་འདོད་ཆེན་པ་ནི། ཆོས་ཐམས་ཅད་གཟོད་མ་ནས་མྱ་ངན་ལས་འདས་པར་ཤེས་ནས་གཏན་དུ་མྱ་ངན་ལས་མི་འདའ་སྟེ། དགེ་བའི་རྩ་བ་ཐམས་ཅད་སྤངས་པའི་འདོད་ཆེན་པ་ནི་མ་ཡིན་ནོ། །བློ་གྲོས་ཆེན་པོ་དགེ་བའི་རྩ་བ་ཐམས་ཅད་སྤངས་པའི་འདོད་ཆེན་པ་ཡང་དེ་བཞིན་གཤེགས་པའི་བྱིན་གྱི་རླབས་ཀྱིས་བརྒྱ་ལ་གལ་ཏེ་ན་དགེ་བའི་རྩ་བ་སྐྱེ་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་བཞིན་གཤེགས་པ་རྣམས་ནི་སེམས་ཅན་ཐམས་ཅད་ཡོངས་སུ་མི་གཏོང་བའི་ཕྱིར་རོ། །དེ་ལྟར་དེའི་ཕྱིར་བྱང་ཆུབ་སེམས་དཔའི་འདོད་ཆེན་པ་རྣམས་ཡོངས་སུ་མྱ་ངན་ལས་མི་འདའོ། །གཞན་ཡང་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོས་རང་བཞིན་གྱི་མཚན་ཉིད་གསུམ་ལ་མཁས་པར་བྱའོ། །རང་བཞིན་གསུམ་པོ་དེ་དག་གང་ཞེ་ན། འདི་ལྟ་སྟེ། ཀུན་བརྟགས་པའི་རང་བཞིན་དང་། གཞན་གྱི་དབང་གི་རང་བཞིན་དང་། ཡོངས་སུ་གྲུབ་པའི་རང་བཞིན་ནོ། །བློ་གྲོས་ཆེན་པོ་དེ་ལ་ཀུན་བརྟགས་པའི་རང་བཞིན་ནི་མཚན་མ་ལས་འབྱུང་ངོ་། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཇི་ལྟར་ཀུན་བརྟགས་པའི་རང་བཞིན་མཚན་མ་ལས་འབྱུང་བ་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་གཞན་གྱི་དབང་གི་རང་བཞིན་གྱི་དངོས་པོའི་མཚན་ཉིད་ནི་འདུ་བྱེད་ཀྱི་དངོས་པོའི་མཚན་མའི་མཚན་ཉིད་ལྟ་བུར་སྣང་སྟེ། མངོན་པར་ཞེན་པའི་ཀུན་བརྟགས་པའི་རང་བཞིན་ནི་རྣམ་པ་གཉིས་ཡོད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་རྣམ་པར་འཇོག་སྟེ། འདི་ལྟ་སྟེ། མིང་གི་མཚན་མ་ལ་མངོན་པར་ཞེན་པའི་མཚན་ཉིད་དང་། དངོས་པོའི་མཚན་མ་ལ་མངོན་པར་ཞེན་པའི་མཚན་ཉིད་དོ། །དེ་ལ་མིང་གི་མཚན་མ་ལ་མངོན་པར་ཞེན་པའི་མཚན་ཉིད་ནི་འདི་ལྟ་སྟེ། ནང་དང་ཕྱིའི་ཆོས་ལ་མངོན་པར་ཞེན་པའོ། །དངོས་པོའི་མཚན་མ་ལ་མངོན་པར་ཞེན་པའི་མཚན་ཉིད་ནི་འདི་ལྟ་སྟེ། ནང་དང་ཕྱི་རོལ་གྱི་ཆོས་དེ་
དག་ཉིད་ཀྱི་རང་དང་སྤྱིའི་མཚན་ཉིད་ལ་མངོན་པར་ཞེན་པའོ། །བློ་གྲོས་ཆེན་པོ་འདི་ནི་ཀུན་བརྟགས་པའི་རང་བཞིན་རྣམ་པ་གཉིས་ཀྱི་མཚན་ཉིད་ཅེས་བྱའོ། །གང་ལ་གནས་ཤིང་གང་ལ་དམིགས་པ་ལས་འབྱུང་བ་དེ་ནི་གཞན་གྱི་དབང་ཞེས་བྱའོ། །དེ་ལ་ཡོངས་སུ་གྲུབ་པའི་རང་བཞིན་ཇི་ལྟ་བུ་ཞེ་ན། འདི་ལྟ་སྟེ། མིང་དང་རྒྱུ་མཚན་གྱི་དངོས་པོའི་མཚན་ཉིད་ཀྱི་རྣམ་པར་རྟོག་པ་དང་བྲལ་བ། འཕགས་པའི་ཡེ་ཤེས་ཀྱིས་ཐོབ་པར་བྱ་བ། སོ་སོ་རང་གིས་རིག་པ་འཕགས་པའི་ཡེ་ཤེས་ཀྱིས་བགྲོད་པར་བྱ་བའི་སྤྱོད་ཡུལ་ཏེ། འདི་ནི་ཡོངས་སུ་གྲུབ་པའི་རང་བཞིན་དེ་བཞིན་གཤེགས་པ་རྣམས་ཀྱི་སྙིང་པོའི་ཐུགས་ཞེས་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་པ། མིང་དང་རྒྱུ་མཚན་ཀུན་རྟོག་པ། །རང་བཞིན་གཉིས་ཀྱི་མཚན་ཉིད་དེ། །ཡང་དག་ཤེས་དང་དེ་བཞིན་ཉིད། །ཡོངས་སུ་གྲུབ་པའི་མཚན་ཉིད་དོ། །བློ་གྲོས་ཆེན་པོ་འདི་ནི་ཆོས་ལྔ་དང་། རང་བཞིན་གྱི་མཚན་ཉིད་རབ་ཏུ་རྣམ་པར་འབྱེད་པ་ཞེས་བྱ་བའི་ཆོས་ཀྱི་རྣམ་གྲངས་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱིས་བགྲོད་པར་བྱ་བའི་སྤྱོད་ཡུལ་ཡིན་ཏེ། དེ་ལ་ཁྱོད་དང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བསླབ་པར་བྱའོ། །གཞན་ཡང་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོས་བདག་མེད་པ་གཉིས་ཀྱི་མཚན་ཉིད་རབ་ཏུ་དབྱེ་བ་ལ་མཁས་པར་བྱའོ། །དེ་ལ་བདག་མེད་པ་གཉིས་ཀྱི་མཚན་ཉིད་གང་ཞེ་ན། འདི་ལྟ་སྟེ། གང་ཟག་ལ་བདག་མེད་པ་དང་། ཆོས་ལ་བདག་མེད་པའོ། །གང་ཟག་ལ་བདག་མེད་པ་གང་ཞེ་ན། འདི་ལྟ་སྟེ། བདག་དང་བདག་གི་དང་བྲལ་བ། ཕུང་པོ་དང་། ཁམས་དང་། སྐྱེ་མཆེད་འདུས་པ་མི་ཤེས་པ་དང་། ལས་དང་སྲེད་པ་ལས་སྐྱེས་པ། མིང་དང་གཟུགས་ལ་སོགས་པར་འཛིན་པ་ལ་མངོན་པར་ཞེན་པ་ལས་རྣམ་པར་ཤེས་པ་སྐྱེ་བ། འདི་ལྟར་དབང་པོ་ཐམས་ཅད་དང་། རང་གི་སེམས་སྣང་བའི་སྣོད་དང་། ལུས་དང་གཞི་ནི་རང་གི་རྣམ་པར་རྟོག་པས་བརྟགས་པས་རབ་ཏུ་ཕྱེ་བ། འབབ་ཆུ་དང་། ས་བོན་དང་། མར་མེ་དང་། རླུང་དང་། སྤྲིན་དང་མཚུངས་པར་སྐད་ཅིག་མ་གཅིག་ནས་
གཅིག་ཏུ་འཇིག་པར་འགྱུར་བ། སྤྲེའུ་ལྟར་རབ་ཏུ་གཡོ་བ། སྦྲང་མ་ལྟར་མི་གཙང་བའི་གནས་ལ་རབ་ཏུ་མོས་པ། རབ་ཏུ་འབར་བའི་མེ་ལྟར་ཆོག་མི་ཤེས་པ། ཐོག་མ་མེད་པའི་དུས་ནས་སྤྲོས་པའི་གནས་ངན་ལེན་གྱི་བག་ཆགས་རྒྱུར་གྱུར་པ། ཟོ་ཆུན་གྱི་འཁོར་ལོ་ལྟར་འཁོར་བར་འགྲོ་བའི་སྲིད་པའི་འཁོར་ལོར་གྱུར་པ། ལུས་རྣམ་པ་སྣ་ཚོགས་ཀྱི་གཟུགས་འཆང་བ། སྒྱུ་མ་དང་། རིག་སྔགས་དང་། འཁྲུལ་འཁོར་ལྟ་བུར་འཇུག་ཅིང་འབྱུང་སྟེ། གང་མཚན་ཉིད་འདི་ལ་མཁས་པའི་ཤེས་པ་དེ་ནི་གང་ཟག་ལ་བདག་མེད་པར་ཤེས་པ་ཞེས་བྱའོ། །དེ་ལ་ཆོས་བདག་མེད་པར་ཤེས་པ་གང་ཞེ་ན། འདི་ལྟ་སྟེ། ཕུང་པོ་དང་། ཁམས་དང་། སྐྱེ་མཆེད་རྣམས་ཀྱི་ཀུན་བརྟགས་པའི་མཚན་ཉིད་ཀྱི་རང་བཞིན་ཚོགས་པ་སྟེ། ཇི་ལྟར་ཕུང་པོ་དང་། ཁམས་དང་། སྐྱེ་མཆེད་རྣམས་བདག་དང་། བདག་གི་དང་བྲལ་ཞིང་། ཕུང་པོ་དང་། ཁམས་དང་། སྐྱེ་མཆེད་འདུས་པ། རྒྱུད་དང་། ལས་དང་། སྲིད་པའི་སྲད་བུས་སྦྲེལ་བ། ཕན་ཚུན་ཀུན་དུ་གྱུར་པ་ལས་སྐྱེ་ཞིང་གཡོ་བ་མེད་པ། དེ་བཞིན་དུ་ཆོས་རྣམས་ཀྱང་དེ་བཞིན་ཏེ། རང་དང་སྤྱིའི་མཚན་ཉིད་དང་བྲལ་བ། ཡང་དག་པ་མ་ཡིན་པ། ཀུན་དུ་རྟོག་པའི་མཚན་ཉིད་དེ། ཀུན་དུ་རྟོག་པའི་སྟོབས་ཀྱང་བྱིས་པ་རྣམས་ཀྱིས་སྐྱེད་པར་བྱེད་ཀྱི། འཕགས་པ་རྣམས་ཀྱིས་ནི་མ་ཡིན་ཏེ། སེམས་དང་ཡིད་དང་། ཡིད་ཀྱི་རྣམ་པར་ཤེས་པ་དང་། ཆོས་ལྔ་དང་། རང་བཞིན་དང་བྲལ་བའི་ཕྱིར་རོ། །བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་བདག་མེད་པར་རབ་ཏུ་དབྱེ་བ་ལ་མཁས་པར་བྱའོ། །བློ་གྲོས་ཆེན་པོ་ཆོས་བདག་མེད་པ་ལ་མཁས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རིང་པོ་མི་ཐོགས་པར་བྱང་ཆུབ་སེམས་དཔའི་ས་དང་པོ་འཐོབ་སྟེ། སྣང་བ་མེད་པར་སྒོམ་པའི་སའི་མཚན་ཉིད་རབ་ཏུ་དབྱེ་བ་ཁོང་དུ་ཆུད་པས་རབ་ཏུ་དགའ་ཞིང་། རིམ་གྱིས་གོང་ནས་གོང་དུ་ཁྱད་པར་དུ་གྱུར་པས་ས་དགུའི་མཚན་ཉིད་ཀྱི་རིག་པ་ལས་འདས་ཏེ། ཆོས་ཀྱི་སྤྲིན་རབ་ཏུ་འཐོབ་བོ། །དེར་རིན་པོ་ཆེ་ཆེན་པོའི་པད་མའི་རྒྱལ་པོ་དང་། རིན་པོ་ཆེ་ཆེན་པོའི་གཞལ་མེད་ཁང་རིན་པོ་ཆེ་ཚད་
མེད་པས་རབ་ཏུ་བརྒྱན་པས་རྣམ་པར་བཀོད་པ། སྒྱུ་མའི་རང་བཞིན་གྱི་སྤྱོད་ཡུལ་ཡོངས་སུ་བསྒོམས་པ་ལས་བྱུང་བ་དེ་ལ་འཇུག་སྟེ། འཁོར་རྒྱལ་བའི་སྲས་སྐལ་བ་འཐུན་པ་རྣམས་ཀྱིས་ཡོངས་སུ་བསྐོར་ཅིང་། སངས་རྒྱས་ཀྱི་ཞིང་ཐམས་ཅད་ནས་བྱོན་པའི་སངས་རྒྱས་ཀྱི་ཕྱག་གིས་སྤྱི་བོ་ནས་དབང་བསྐུར་བས་འཁོར་ལོས་སྒྱུར་བའི་རྒྱལ་པོའི་བུ་བཞིན་དུ་མངོན་པར་དབང་བསྐུར་རོ། །སངས་རྒྱས་ཀྱི་སྲས་ཀྱི་ས་ལས་འདས་ནས་འཕགས་པ་སོ་སོ་རང་གིས་རིག་པའི་ཆོས་ཀྱི་ཚུལ་ཁོང་དུ་ཆུད་པའི་ཕྱིར། དེ་བཞིན་གཤེགས་པའི་མངའ་བརྙེས་པའི་ཆོས་ཀྱི་སྐུ་འཐོབ་པར་འགྱུར་ཏེ། ཆོས་བདག་མེད་པར་མཐོང་བའི་ཕྱིར་རོ། །འདི་ནི་ཆོས་བདག་མེད་པའི་མཚན་ཉིད་ཅེས་བྱ་སྟེ། དེ་ལ་ཁྱོད་དང་བྱང་ཆུབ་སེམས་དཔའ་རྣམས་ཀྱིས་བསླབ་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྒྲོ་འདོགས་པ་དང་། སྐུར་པ་འདེབས་པའི་མཚན་ཉིད་བཤད་དུ་གསོལ། བདག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སྒྲོ་འདོགས་པ་དང་། སྐུར་པ་འདེབས་པའི་མཐའ་གཉིས་ཀྱི་ལྟ་བ་ངན་པ་ཡོངས་སུ་སྤངས་ནས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་ཞིང་། མངོན་པར་རྫོགས་པར་སངས་རྒྱས་ནས་ཀྱང་རྟག་པར་སྒྲོ་འདོགས་པ་དང་། ཆད་པར་སྐུར་པ་འདེབས་པའི་ལྟ་བ་རྣམ་པར་སྤངས་ནས་ཡང་དག་པའི་ཆོས་ཀྱི་སྐུར་པ་འདེབས་པར་མི་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བློ་གྲོས་ཆེན་པོས་གསོལ་བ་བཏབ་པ་ཐུགས་སུ་ཆུད་ནས་ཚིགས་སུ་བཅད་པ་འདི་དག་གསུངས་སོ། །སྒྲོ་འདོགས་པ་དང་སྐུར་པ་དང་། །ཡོད་མིན་དེ་ནི་སེམས་ཙམ་མོ། །ལུས་དང་ལོངས་སྤྱོད་རྣམ་གཞག་དང་། །སེམས་ཀྱང་རབ་ཏུ་མི་ཤེས་པའི། །བྱིས་པ་བློ་དང་མི་ལྡན་པ། །སྒྲོ་འདོགས་སྐུར་པ་འདེབས་པར་བྱེད། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་དེ་ཉིད་ཀྱི་དོན་བསྟན་པའི་ཕྱིར་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་ཡོད་པ་མ་ཡིན་པ་ལ་སྒྲོ་
འདོགས་པ་ནི་རྣམ་པ་བཞི་ཡོད་དེ། རྣམ་པ་བཞི་གང་ཞེ་ན། འདི་ལྟ་སྟེ། ཡོད་པ་མ་ཡིན་པ་མཚན་ཉིད་དུ་སྒྲོ་འདོགས་པ་དང་། ཡོད་པ་མ་ཡིན་པ་མཐོང་བར་སྒྲོ་འདོགས་པ་དང་། ཡོད་པ་མ་ཡིན་པ་རྒྱུར་སྒྲོ་འདོགས་པ་དང་། ཡོད་པ་མ་ཡིན་པ་དངོས་པོར་སྒྲོ་འདོགས་པ་སྟེ། འདི་ནི་སྒྲོ་འདོགས་པ་རྣམ་པ་བཞི་ཞེས་བྱའོ། །སྐུར་པ་འདེབས་པ་ནི། འདི་ལྟ་སྟེ། སྒྲོ་འདོགས་པ་དེ་དག་ཉིད་མི་དམིགས་པར་རབ་ཏུ་འབྱེད་པའི་ཆ་མ་ཡིན་པས། སྐུར་པ་འདེབས་པ་སྐྱེད་པར་བྱེད་པ་སྟེ། འདི་ནི་སྒྲོ་འདོགས་པ་དང་། སྐུར་པའི་མཚན་ཉིད་དོ། །གཞན་ཡང་བློ་གྲོས་ཆེན་པོ་ཡོད་པ་མ་ཡིན་པ་ལ་མཚན་ཉིད་དུ་སྒྲོ་འདོགས་པའི་མཚན་ཉིད་གང་ཞེ་ན། འདི་ལྟ་སྟེ། ཕུང་པོ་དང་། ཁམས་དང་། སྐྱེ་མཆེད་རྣམས་ཀྱི་རང་དང་སྤྱིའི་མཚན་ཉིད་ཡོད་པ་མ་ཡིན་པ་ལ་མངོན་པར་ཞེན་པ་སྐྱེད་ཅིང་། འདི་ནི་དེ་བཞིན་དུ་ཡིན་གྱི་གཞན་དུ་མ་ཡིན་ནོ་ཞེས་ཟེར་བ་སྟེ། འདི་ནི་ཡོད་པ་མ་ཡིན་པ་ལ་མཚན་ཉིད་དུ་སྒྲོ་འདོགས་པའི་མཚན་ཉིད་དོ། །ཡོད་པ་མ་ཡིན་པ་ལ་མཚན་ཉིད་དུ་སྒྲོ་འདོགས་པའི་རྣམ་པར་རྟོག་པ་འདི་ནི་ཐོག་མ་མེད་པའི་དུས་ཀྱི་སྤྲོས་པའི་གནས་ངན་ལེན་གྱི་བག་ཆགས་སྣ་ཚོགས་ལ་མངོན་པར་ཞེན་པ་ལས་འབྱུང་ངོ་། །བློ་གྲོས་ཆེན་པོ་ཡོད་པ་མ་ཡིན་པ་མཐོང་བར། སྒྲོ་འདོགས་པའི་མཚན་ཉིད་ནི་གང་ཕུང་པོ་དང་། ཁམས་དང་། སྐྱེ་མཆེད་དེ་དག་ཉིད་ལ་བདག་དང་། གང་ཟག་དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུར་ལྟ་ཞིང་སྒྲོ་འདོགས་པ་ཡིན་ཏེ། འདི་ནི་ཡོད་པ་མ་ཡིན་པ་མཐོང་བར་སྒྲོ་འདོགས་པའི་མཚན་ཉིད་ཅེས་བྱའོ། །བློ་གྲོས་ཆེན་པོ་ཡོད་པ་མ་ཡིན་པ་རྒྱུར་སྒྲོ་འདོགས་པའི་མཚན་ཉིད་ནི་འདི་ལྟ་སྟེ། རྣམ་པར་ཤེས་པ་དང་པོ་རྒྱུ་མེད་པ་ལས་སྐྱེ་ལ། ཕྱིས་ཡང་དག་པ་མ་ཡིན་པ་སྒྱུ་མ་ལྟ་བུ་སྔོན་མ་བྱུང་ཞིང་མེད་པ་ལས་མིག་དང་། གཟུགས་དང་། སྣང་བ་དང་། ཁམས་དང་། དྲན་པ་སྔོན་དུ་འཇུག་པ་ལས་འབྱུང་ཞིང་བྱུང་ནས་ཀྱང་འཇིག་པར་འགྱུར་རོ་ཞེས་ཟེར་བ་སྟེ། འདི་ནི་ཡོད་པ་མ་ཡིན་པ་རྒྱུར་སྒྲོ་འདོགས་པའི་མཚན་ཉིད་དོ། །བློ་གྲོས་ཆེན་པོ་ཡོད་པ་མ་ཡིན་པ་དངོས་པོར་སྒྲོ་འདོགས་པའི་མཚན་ཉིད་ནི་འདི་ལྟ་སྟེ། ནམ་
མཁའ་དང་། འགོག་པ་དང་། མྱ་ངན་ལས་འདས་པ་བྱས་པ་མ་ཡིན་པའི་དངོས་པོར་མངོན་པར་ཞེན་ཅིང་སྒྲོ་འདོགས་པའོ། །འདི་དག་ནི་དངོས་པོ་དང་དངོས་པོ་མ་ཡིན་པ་དང་བྲལ་བ། ཆོས་ཐམས་ཅད་ནི་རི་བོང་དང་། རྟ་ལ་སོགས་པའི་རྭ་དང་། སྐྲ་ཤད་འཛིངས་པ་ལྟ་བུར་སྣང་བ། ཡོད་པ་དང་མེད་པ་དང་བྲལ་བ་ལ་བྱིས་པའི་རྣམ་པར་རྟོག་པས་རང་གི་སེམས་སྣང་བ་ཙམ་དུ་མ་རྟོགས་པའི་བློ་ཅན་རྣམས་སྒྲོ་འདོགས་ཤིང་སྐུར་པ་འདེབས་པར་བྱེད་ཀྱི། འཕགས་པ་རྣམས་ཀྱིས་ནི་མ་ཡིན་ཏེ། འདི་ནི་ཡོད་པ་མ་ཡིན་པ་དངོས་པོར་སྒྲོ་འདོགས་པའི་མཚན་ཉིད་དོ། །དེ་བས་ན་སྒྲོ་འདོགས་པ་དང་། སྐུར་པའི་ལྟ་བ་ངན་པ་ཡོངས་སུ་སྤང་བ་ལ་རབ་ཏུ་བརྩོན་པར་བྱའོ། །གཞན་ཡང་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་སེམས་དང་། ཡིད་དང་ཡིད་ཀྱི་རྣམ་པར་ཤེས་པ་དང་། ཆོས་ལྔ་དང་། རང་བཞིན་དང་། བདག་མེད་པ་གཉིས་ཀྱི་མཚན་ཉིད་ཀྱི་ཚུལ་ལ་མཁས་ཤིང་རྟོགས་པར་ཁོང་དུ་ཆུད་པས་སེམས་ཅན་ལ་ཕན་པར་བྱ་བའི་ཕྱིར་གཟུགས་སྣ་ཚོགས་སྟོན་པ་ནི་ཇི་ལྟར་ཀུན་བརྟགས་པའི་རང་བཞིན་གནས་གཞན་གྱི་དབང་ལ་རྟེན་པ་བཞིན་ཏེ། དཔེར་ན་གཟུགས་སྣ་ཚོགས་པའི་ཡིད་བཞིན་གྱི་ནོར་བུ་རིན་པོ་ཆེ་ལྟར་སངས་རྒྱས་ཀྱི་ཞིང་དུ་ཀུན་དུ་དེ་བཞིན་གཤེགས་པའི་འཁོར་འདུས་པ་ཐམས་ཅད་འགྲོ་ཞིང་དེ་དག་ཐམས་ཅད་དུ་ཡང་ཆོས་སྟོན་པ་དག་ཉན་པར་བྱེད་དེ། འདི་ལྟ་སྟེ། ཆོས་ཐམས་ཅད་སྒྱུ་མ་དང་། རྨི་ལམ་དང་། འོད་དང་། གཟུགས་བརྙན་དང་། ཆུའི་ཟླ་བ་ལྟ་བུ་དང་། ཆོས་ཐམས་ཅད་སྐྱེ་བ་དང་། འགག་པ་དང་། རྟག་པ་དང་། ཆད་པ་དང་། བྲལ་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་དང་བྲལ་བའི་ཆོས་སོ། །ཏིང་ངེ་འཛིན་བརྒྱ་སྟོང་རབ་ཏུ་འཐོབ་པ་ནས་ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་གི་བར་དག་ཀྱང་རབ་ཏུ་འཐོབ་སྟེ། ཏིང་ངེ་འཛིན་ཐོབ་ནས་ཀྱང་སངས་རྒྱས་ཀྱི་ཞིང་ཐམས་ཅད་དུ་འགྲོ་ཞིང་སངས་རྒྱས་རྣམས་ལ་མཆོད་པ་བྱེད་དོ། །ལྷའི་གནས་ཐམས་ཅད་དུ་སྐྱེ་ཞིང་དཀོན་མཆོག་གསུམ་གྱི་བསྔགས་པ་རྗོད་པ་དང་། སངས་རྒྱས་ཀྱི་སྐུ་རབ་ཏུ་སྟོན་ཅིང་ཉན་ཐོས་དང་། བྱང་ཆུབ་སེམས་དཔའི་
ཚོགས་ཀྱིས་ཡོངས་སུ་བསྐོར་བ་དང་། རང་གི་སེམས་རབ་ཏུ་སྣང་བ་ཙམ་གྱིས་སེམས་ཅན་ཡོངས་སུ་ཟློ་ཞིང་རྣམ་པར་གྲོལ་བར་བྱེད་ལ་ཕྱི་རོལ་གྱི་དངོས་པོ་དངོས་པོ་མེད་པར་རྣམ་པར་ཕྱེ་སྟེ་བསྟན་ནས་ཡོད་པ་དང་མེད་པའི་ལྟ་བ་ཡོངས་སུ་སྤོང་བར་བྱེད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་དག་ནི་སེམས་ཙམ་དུ། །རྒྱལ་བའི་སྲས་ཀྱིས་རབ་བརྟགས་ན། །རྣམ་པ་སྣ་ཚོགས་གཟུགས་སྤྲིན་ལ། །མངོན་པར་འདུ་བྱེད་པ་དང་བྲལ། །སྟོབས་དང་མངོན་པར་ཤེས་དང་དབང་། །དེ་དག་ཐམས་ཅད་འགྲུབ་པར་འགྱུར། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་ཡང་བཅོམ་ལྡན་འདས་ལ་གསོལ་བ་བཏབ་པ། བཅོམ་ལྡན་འདས་བདག་ལ་སོགས་པའི་སླད་དུ་ཆོས་ཐམས་ཅད་ཀྱི་སྟོང་པ་ཉིད་དང་། སྐྱེ་བ་མ་མཆིས་པ་དང་། གཉིས་སུ་མ་མཆིས་པ་དང་། རང་བཞིན་དང་བྲལ་བའི་མཚན་ཉིད་བཤད་དུ་གསོལ། དེས་བདག་དང་བྱང་ཆུབ་སེམས་དཔའ་གཞན་རྣམས་ཀྱང་སྟོང་པ་ཉིད་དང་། སྐྱེ་བ་མ་མཆིས་པ་དང་། གཉིས་སུ་མ་མཆིས་པ་དང་། རང་བཞིན་དང་བྲལ་བའི་མཚན་ཉིད་རྟོགས་པར་ཁོང་དུ་ཆུད་ཅིང་། མཆིས་པ་དང་མ་མཆིས་པའི་རྣམ་པར་རྟོག་པ་ཡོངས་སུ་སྤངས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ཁྱོད་ལ་རྒྱ་ཆེར་རབ་ཏུ་དབྱེ་ཞིང་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། ལེགས་སོ། །བཅོམ་ལྡན་འདས་དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་སྟོང་པ་ཉིད་སྟོང་པ་ཉིད་ཅེས་བྱ་བ་འདི་ནི་ཀུན་བརྟགས་པའི་རང་བཞིན་གྱི་གནས་ཏེ། བློ་གྲོས་ཆེན་པོ་ཀུན་བརྟགས་པའི་རང་བཞིན་ལ་མངོན་པར་ཞེན་པ་རྣམས་ལ་སྟོང་པ་ཉིད་དང་། སྐྱེ་བ་མེད་པ་དང་། གཉིས་སུ་མེད་པ་དང་། རང་བཞིན་དང་བྲལ་བའི་མཚན་ཉིད་
བཤད་དོ། །བློ་གྲོས་ཆེན་པོ་དེ་ལ་མདོར་བཤད་ན་སྟོང་པ་ཉིད་ནི་རྣམ་པ་བདུན་ཏེ། འདི་ལྟ་སྟེ། མཚན་ཉིད་སྟོང་པ་ཉིད་དང་། དངོས་པོའི་རང་བཞིན་སྟོང་པ་ཉིད་དང་། འདུ་བྱེད་སྟོང་པ་ཉིད་དང་། འདུ་བྱེད་མེད་པ་སྟོང་པ་ཉིད་དང་། ཆོས་ཐམས་ཅད་བརྗོད་པ་དང་བྲལ་བའི་སྟོང་པ་ཉིད་དང་། དོན་དམ་པ་འཕགས་པའི་ཡེ་ཤེས་ཆེན་པོ་སྟོང་པ་ཉིད་དང་། གཅིག་གིས་གཅིག་སྟོང་པའི་སྟོང་པ་ཉིད་དོ། །དེ་ལ་མཚན་ཉིད་སྟོང་པ་ཉིད་གང་ཞེ་ན། འདི་ལྟར་དངོས་པོ་ཐམས་ཅད་རང་དང་སྤྱིའི་མཚན་ཉིད་ཀྱིས་སྟོང་པ་སྟེ། ཕན་ཚུན་འདུས་པ་ལས་སོ་སོར་རབ་ཏུ་རྟོག་པའི་ཕྱིར་དངོས་པོ་མེད་པར་རབ་ཏུ་དབྱེ་བས་རང་དང་སྤྱིའི་མཚན་ཉིད་མི་སྐྱེ་བ་དང་། བདག་དང་གཞན་དང་གཉི་གའི་དངོས་པོ་མེད་པའི་ཕྱིར་མཚན་ཉིད་མི་གནས་ཏེ། དེའི་ཕྱིར་དངོས་པོ་ཐམས་ཅད་མཚན་ཉིད་སྟོང་པ་ཞེས་བཤད་དེ། འདི་ནི་མཚན་ཉིད་སྟོང་པ་ཉིད་ཅེས་བྱའོ། །དངོས་པོའི་རང་བཞིན་སྟོང་པ་ཉིད་གང་ཞེ་ན། འདི་ལྟ་སྟེ། བདག་ཉིད་ཀྱི་དངོས་པོའི་རང་བཞིན་མི་སྐྱེ་བས་ཆོས་ཐམས་ཅད་ཀྱི་དངོས་པོའི་རང་བཞིན་སྟོང་པ་ཉིད་ཅེས་བྱ་སྟེ། དེའི་ཕྱིར་དངོས་པོའི་རང་བཞིན་སྟོང་པ་ཉིད་ཅེས་བཤད་དོ། །འདུ་བྱེད་སྟོང་པ་ཉིད་གང་ཞེ་ན། འདི་ལྟ་སྟེ། ཕུང་པོ་རྣམས་བདག་དང་བདག་གི་དང་བྲལ་ཞིང་རྒྱུ་དང་འགྲུབ་པར་བྱེད་པ་དང་། བྱ་བ་དང་། ལས་དང་། སྦྱོར་བ་ལས་སྐྱེ་བ་སྟེ། འདི་ནི་འདུ་བྱེད་སྟོང་པ་ཉིད་ཅེས་བྱའོ། །བློ་གྲོས་ཆེན་པོ་འདི་ལྟར་འདུ་བྱེད་སྟོང་པ་ཉིད་དེས་ན་ཕན་ཚུན་གྱི་རྐྱེན་གྱིས་འབྱུང་གི་རང་བཞིན་གྱི་དངོས་པོ་མེད་པས་འདུ་བྱེད་མེད་པ་སྟོང་པ་ཉིད་ཅེས་བྱའོ། །ཆོས་ཐམས་ཅད་བརྗོད་པ་དང་བྲལ་བའི་སྟོང་པ་ཉིད་གང་ཞེ་ན། འདི་ལྟ་སྟེ། ཀུན་བརྟགས་པའི་རང་བཞིན་བརྗོད་དུ་མེད་པའི་ཕྱིར་ཆོས་ཐམས་ཅད་བརྗོད་པ་དང་བྲལ་བ་སྟེ། འདི་ནི་ཆོས་ཐམས་ཅད་བརྗོད་པ་དང་བྲལ་བའི་སྟོང་པ་ཉིད་ཅེས་བྱའོ། །ཆོས་ཐམས་ཅད་ཀྱི་དོན་དམ་པ་འཕགས་པའི་ཡེ་ཤེས་ཆེན་པོ་སྟོང་
པ་ཉིད་གང་ཞེ་ན། འདི་ལྟ་སྟེ། སོ་སོ་རང་གིས་རིག་པ་འཕགས་པའི་ཡེ་ཤེས་ཐོབ་པ་ནི་ལྟ་བ་དང་ཉེས་པ་ཐམས་ཅད་ཀྱི་བག་ཆགས་ཀྱིས་སྟོང་སྟེ། འདི་ནི་ཆོས་ཐམས་ཅད་ཀྱི་དོན་དམ་པ་འཕགས་པའི་ཡེ་ཤེས་ཆེན་པོ་སྟོང་པ་ཉིད་ཅེས་བྱའོ། །གཅིག་གིས་གཅིག་སྟོང་པ་ཉིད་གང་ཞེ་ན། འདི་ལྟ་སྟེ། གང་ལ་གང་མེད་པས་སྟོང་པ་ནི་གཅིག་གིས་གཅིག་སྟོང་པ་ཉིད་ཅེས་བྱའོ། །བློ་གྲོས་ཆེན་པོ་དཔེར་ན། མྲཱི་ག་ལའི་མའི་ཁང་པ་ན་གླང་པོ་ཆེ་དང་། རྟ་དང་། བ་ལང་དང་། ལུག་ལ་སོགས་པ་མེད་ཀྱང་དགེ་སློང་གི་དགེ་འདུན་མེད་པ་ནི་མ་ཡིན་ནོ། །དེ་ནི་དེ་དག་གིས་སྟོང་ངོ་ཞེས་བྱ་བ་ཡང་ཁང་པ་ཁང་པའི་དངོས་པོས་སྟོང་པ་མ་ཡིན། དགེ་སློང་དགེ་སློང་གི་དངོས་པོས་སྟོང་པ་མ་ཡིན་ལ། གནས་གཞན་ན་གླང་པོ་ཆེ་དང་རྟ་ལ་སོགས་པ་མེད་པ་ཡང་མ་ཡིན་ནོ། །དེ་ནི་ཆོས་ཐམས་ཅད་ཀྱི་རང་གི་མཚན་ཉིད་དེ། གང་ལ་གང་མེད་པ་དེ་ནི་གཅིག་གིས་གཅིག་སྟོང་པ་ཉིད་ཅེས་བྱའོ། །འདི་ནི་སྟོང་པ་ཉིད་རྣམ་པ་བདུན་ཏེ། གཅིག་གིས་གཅིག་སྟོང་པ་ཉིད་འདི་ནི་སྟོང་པ་ཉིད་ཀྱི་ནང་ན་དམན་པ་ཡིན་ཏེ། ཁྱོད་ཀྱིས་ཡོངས་སུ་སྤང་བར་བྱའོ། །བློ་གྲོས་ཆེན་པོ་རང་ཡང་མི་སྐྱེ་ལ་མི་སྐྱེ་བ་ཡང་མ་ཡིན་ཏེ། ཏིང་ངེ་འཛིན་ལ་གནས་པ་མ་གཏོགས་པ་ནི་སྐྱེ་བ་མེད་པ་ཞེས་བྱའོ། །རང་བཞིན་དང་བྲལ་བ་ཞེས་བྱ་བ་ཡང་སྐྱེ་བ་མེད་པ་དེ་ཉིད་རང་བཞིན་དང་བྲལ་བ་ཞེས་བྱའོ། །སྐད་ཅིག་མའི་རྒྱུད་ཀྱི་རྒྱུན་མེད་པ་དང་། ཐ་དད་པའི་དངོས་པོར་སྣང་བར་དངོས་པོ་ཐམས་ཅད་རང་བཞིན་དང་བྲལ་བ་སྟེ། དེའི་ཕྱིར་དངོས་པོ་ཐམས་ཅད་རང་བཞིན་དང་བྲལ་བ་ཞེས་བྱའོ། །གཉིས་སུ་མེད་པ་གང་ཞེ་ན། འདི་ལྟ་སྟེ། ཆོས་ཐམས་ཅད་ནི་གྲིབ་མ་དང་། ཚ་བ་དང་། རིང་པོ་དང་། ཐུང་ངུ་དང་། ནག་པོ་དང་། དཀར་པོ་ལྟ་བུ་དག་སྟེ། བློ་གྲོས་ཆེན་པོ་ཆོས་ཐམས་ཅད་ནི་གཉིས་སུ་མེད་པས་མྱ་ངན་ལས་འདས་པ་ལས་གཞན་མ་ཡིན་ལ། འཁོར་བ་ལས་ཀྱང་མྱ་ངན་ལས་འདས་པ་གཞན་མ་ཡིན་ན་ཐ་དད་པའི་མཚན་ཉིད་ཀྱི་རྒྱུས་དངོས་པོ་ཡོད་པའི་ཕྱིར་གཉིས་སུ་མེད་པ་ཞེས་བྱ་སྟེ། མྱ་ངན་ལས་འདས་པ་དང་། འཁོར་བ་ཇི་ལྟ་བར་ཆོས་ཐམས་ཅད་ཀྱང་དེ་བཞིན་ནོ། །དེ་བས་ན་སྟོང་པ་ཉིད་དང་། སྐྱེ་བ་མེད་པ་དང་། གཉིས་སུ་མེད་པ་དང་། རང་བཞིན་དང་བྲལ་བའི་མཚན་ཉིད་ལ་རབ་ཏུ་བརྩོན་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ངས་ནི་རྟག་ཏུ་སྟོང་ཉིད་ཆོས། །རྟག་ཆད་ཡོངས་
སྤངས་འཁོར་བ་ནི། །སྒྱུ་མ་རྨི་ལམ་འདྲར་བཤད་ཀྱང་། །ལས་ནི་འཇིག་པར་མི་འགྱུར་རོ། །ནམ་མཁའ་མྱ་ངན་འདས་པ་དང་། །འགོག་པ་གཉིས་ཀྱང་དེ་བཞིན་ཏེ། །བྱིས་པ་དག་གིས་རྣམ་པར་བརྟགས། །འཕགས་པ་རྣམས་ནི་ཡོད་མེད་སྤངས། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་ལ་བཀའ་སྩལ་པ། བློ་གྲོས་ཆེན་པོ་སྟོང་པ་ཉིད་དང་། སྐྱེ་བ་མེད་པ་དང་། གཉིས་སུ་མེད་པ་དང་། རང་བཞིན་དང་བྲལ་བའི་མཚན་ཉིད་ནི་སངས་རྒྱས་རྣམས་ཀྱི་མདོ་སྡེ་ཐམས་ཅད་ཀྱི་ནང་དུ་འཇུག་སྟེ། མདོ་སྡེ་གང་དུ་ཡང་དོན་འདི་དག་སྟོན་ཏོ། །མདོ་སྡེ་རྣམས་ནི་སེམས་ཅན་གྱི་བསམ་པ་བཞིན་དུ་རྣམ་པར་ཕྱེ་སྟེ། དོན་རབ་ཏུ་བསྟན་པའི་ཕྱིར་དེ་ཁོ་ན་ཉིད་ནི་བརྗོད་པ་ལ་ཡོད་པ་མ་ཡིན་ནོ། །དཔེར་ན་རི་དགས་སྐོམ་པའི་རྣམ་པར་རྟོག་པས་སྨིག་རྒྱུ་རི་དགས་སླུ་བར་བྱེད་པ་དེའི་མཚན་ཉིད་ལ་ཆུའི་དངོས་པོར་མངོན་པར་ཞེན་པར་བྱེད་ཀྱང་དེ་ལ་ཆུ་མེད་དོ། །དེ་བཞིན་དུ་མདོ་སྡེ་ཐམས་ཅད་ལས་ཆོས་རྣམས་བསྟན་པ་ཡང་བྱིས་པ་སོ་སོའི་སྐྱེ་བོ་རྣམས་མགུ་བ་རབ་ཏུ་བསྐྱེད་པར་བྱ་བ་ཡིན་པའི་ཕྱིར་དེ་ཁོ་ན་དང་། འཕགས་པའི་ཡེ་ཤེས་ནི་གཏམ་ལ་ཡོད་པ་མ་ཡིན་ནོ། །དེ་བས་ན་དོན་གྱི་རྗེས་སུ་འབྲང་བར་བྱའི། བརྗོད་པ་ལ་མངོན་པར་ཆགས་པར་མི་བྱའོ།། །།འཕགས་པ་ལང་ཀར་གཤེགས་པ་རིན་པོ་ཆེའི་མདོ། བམ་པོ་གསུམ་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པའི་མདོ་སྡེ་ལས་དེ་བཞིན་གཤེགས་པའི་སྙིང་པོ་ནི་རང་བཞིན་གྱིས་རྣམ་པར་དག་པ། མཚན་སུམ་ཅུ་རྩ་གཉིས་ཀྱི་རྗེས་སུ་འཇུག་པ། སེམས་ཅན་ཐམས་ཅད་ཀྱི་ལུས་ལ་མཆིས་པར་བརྗོད་དེ། དཔེར་ན་རིན་པོ་ཆེ་རིན་ཐང་ཆེན་པོ་གོས་དྲི་མ་ཅན་གྱིས་ཡོངས་སུ་དཀྲིས་པ་ལྟར་དེ་བཞིན་གཤེགས་པའི་སྙིང་པོ་རྟག་ཅིང་རྣམ་པར་འགྱུར་བ་མེད་པ་ཡང་དེ་བཞིན་དུ་ཕུང་པོ་དང་། ཁམས་དང་། སྐྱེ་མཆེད་རྣམས་ཀྱི་གོས་དྲི་མ་ཅན་གྱིས་ཡོངས་སུ་དཀྲིས་ཤིང་འདོད་ཆགས་དང་། ཞེ་སྡང་དང་། གཏི་མུག་དང་། ཡང་དག་པ་མ་ཡིན་
པ་ཡོངས་སུ་རྟོག་པའི་རྡུལ་གྱིས་གོས་པར་སངས་རྒྱས་ཐམས་ཅད་ཀྱིས་རབ་ཏུ་གསུངས་ཤིང་། ཅིའི་སླད་དུ་བཅོམ་ལྡན་འདས་ཀྱིས་མུ་སྟེགས་ཅན་གྱི་བདག་ཏུ་སྨྲ་བ་དང་མཚུངས་པར་དེ་བཞིན་གཤེགས་པའི་སྙིང་པོ་མཆིས་པར་བཀའ་སྩལ། བཅོམ་ལྡན་འདས་མུ་སྟེགས་ཅན་རྣམས་ཀྱང་རྟག་པ་དང་། བྱེད་པ་མཆིས་པར་སྨྲ་ཞིང་ཡོན་ཏན་དང་བྲལ་བ་དང་། ཀུན་དུ་ཁྱབ་པ་དང་མི་འཇིགས་པའོ་ཞེས་བཅོམ་ལྡན་འདས་དེ་དག་བདག་ཏུ་སྨྲ་བར་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ངས་བཤད་པའི་དེ་བཞིན་གཤེགས་པའི་སྙིང་པོ་ནི་མུ་སྟེགས་ཅན་དག་སྨྲ་བའི་བདག་དང་མཚུངས་པ་མ་ཡིན་ཏེ། བློ་གྲོས་ཆེན་པོ་ཆེད་འགའ་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། དེ་བཞིན་ཉིད་དང་། ཡང་དག་པའི་མཐའ་དང་། ཆོས་ཉིད་དང་། ཆོས་ཀྱི་སྐུ་དང་། མྱ་ངན་ལས་འདས་པ་དང་། རང་བཞིན་དང་བྲལ་བ་དང་། སྐྱེ་བ་མེད་པ་དང་། འགག་པ་མེད་པ་དང་། གཟོད་མ་ནས་རབ་ཏུ་དབེན་ཞིང་ཞི་བ་དང་། རང་བཞིན་གྱིས་མྱ་ངན་ལས་འདས་པ་ཞེས་བྱ་བ་ལ་སོགས་པའི་ཚིག་གིས་དེ་བཞིན་གཤེགས་པའི་སྙིང་པོ་སྟོན་པར་བྱེད་དེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་བྱིས་པ་གང་དག་བདག་མེད་པའི་ཚིག་གིས་འཇིགས་པར་འགྱུར་བ་ཡོངས་སུ་སྤང་བའི་ཕྱིར་རྣམ་པར་རྟོག་པ་དང་བྲལ་བ་སྣང་བ་མེད་པའི་སྤྱོད་ཡུལ་དེ་བཞིན་གཤེགས་པའི་སྙིང་པོའི་སྒོ་རབ་ཏུ་བསྟན་ཏོ། །བློ་གྲོས་ཆེན་པོ་མ་འོངས་པ་དང་། ད་ལྟར་བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བདག་ཏུ་ལྟ་བ་ལ་མངོན་པར་ཞེན་པར་མི་བྱའོ། །དཔེར་ན་རྫ་མཁན་ནི་འཇིམ་པའི་ཕུང་པོ་གཅིག་ལས་མིའི་བཟོ་དང་། ཆུ་དང་། ཐལ་ཞར་དང་། འཁོར་ལོ་དང་། སྲད་བུའི་སྦྱོར་བ་རྣམས་ཀྱིས་སྣོད་རྣམ་པ་སྣ་ཚོགས་བྱེད་དོ། །དེ་བཞིན་གཤེགས་པ་རྣམས་ཀྱང་དེ་བཞིན་དུ་ཆོས་བདག་མེད་པ། རྣམ་པར་རྟོག་པའི་མཚན་ཉིད་ཐམས་ཅད་དང་བྲལ་བ། ཤེས་རབ་དང་། ཐབས་ལ་མཁས་པ་རྣམ་པ་སྣ་ཚོགས་ཀྱིས་དེ་བཞིན་གཤེགས་པའི་སྙིང་པོ་བསྟན་པའམ། ཡང་ན་བདག་མེད་པར་སྟོན་པས་རྒྱུ་དང་
རྐྱེན་དེའི་ཕྱིར་དེ་བཞིན་གཤེགས་པའི་སྙིང་པོ་བསྟན་པས་ནི་མུ་སྟེགས་ཅན་གྱི་བདག་ཏུ་སྨྲ་བ་དང་མི་འདྲ་སྟེ། འདི་ནི་དེ་བཞིན་གཤེགས་པའི་སྙིང་པོ་བསྟན་པ་ཞེས་བྱའོ། །བདག་ཏུ་སྨྲ་བ་ལ་མངོན་པར་ཞེན་པའི་མུ་སྟེགས་ཅན་རྣམས་དྲང་བའི་ཕྱིར་དེ་བཞིན་གཤེགས་པའི་སྙིང་པོ་བསྟན་པས། ཡང་དག་པ་མ་ཡིན་པའི་བདག་ཏུ་ལྟ་བའི་རྣམ་པར་རྟོག་པ་དང་བྲལ་བ། རྣམ་པར་ཐར་པའི་སྒོ་གསུམ་གྱི་སྤྱོད་ཡུལ་ལ་འཇུག་པའི་བསམ་པ་དང་ལྡན་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱ་བ་དེའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དེ་བཞིན་གཤེགས་པའི་སྙིང་པོ་དེ་སྐད་དུ་སྟོན་པར་མཛད་དེ། དེ་ལྟ་མ་ཡིན་ན་ནི་མུ་སྟེགས་ཅན་དག་དང་མཚུངས་པར་འགྱུར་རོ། །དེ་ལྟ་བས་ན་བློ་གྲོས་ཆེན་པོ་མུ་སྟེགས་ཅན་གྱི་བདག་ཏུ་སྨྲ་བ་ཡོངས་སུ་སྤང་བའི་ཕྱིར་དེ་བཞིན་གཤེགས་པའི་སྙིང་པོ་བདག་མེད་པ་ལ་གནས་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །གང་ཟག་རྒྱུན་དང་ཕུང་པོ་དང་། །རྐྱེན་རྣམས་དང་ནི་རྡུལ་དག་དང་། །གཙོ་བོ་དབང་ཕྱུག་བྱེད་པ་དག །སེམས་ཙམ་ལ་ནི་རྣམ་པར་བརྟགས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་མ་འོངས་པའི་སྐྱེ་བོའི་ཚོགས་ལ་རྣམ་པར་བལྟས་ནས། ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྣལ་འབྱོར་གྱི་ཐབས་ཆེན་པོ་མངོན་པར་རྟོགས་པ་བདག་ལ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་རྣལ་འབྱོར་གྱི་ཐབས་ཆེན་པོ་འཐོབ་པར་འགྱུར་རོ། །བཞི་གང་ཞེ་ན། འདི་ལྟ་སྟེ། རང་གི་སེམས་སྣང་བའི་རྣམ་པར་འབྱེད་པ་ལ་མཁས་པ་དང་། ཕྱི་རོལ་གྱི་དངོས་པོ་དངོས་པོ་མེད་པར་རབ་ཏུ་རྟོག་པ་དང་། སྐྱེ་བ་དང་། གནས་པ་དང་། འཇིག་པའི་ལྟ་བ་རྣམ་པར་སྤོང་བ་དང་། སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་བདེ་བ་གྱ་ནོམ་པ་ཐོབ་སྟེ། འདི་ནི་
བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན། རྣལ་འབྱོར་གྱི་ཐབས་ཆེན་པོ་ཐོབ་པ་ཞེས་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རང་གི་སྣང་བ་རྣམ་པར་འབྱེད་པ་ལ་མཁས་པ་ཡིན་ཞེ་ན། འདི་ལྟ་སྟེ། དེས་འདི་ལྟར་ཁམས་གསུམ་པ་འདི་ནི་སེམས་ཙམ་གྱི་ཆ་སྟེ། བདག་དང་བདག་གི་དང་བྲལ་བ། གཡོ་བ་མེད་པ། འགྲོ་བ་དང་འོང་བ་དང་བྲལ་བ། ཐོག་མ་མེད་པའི་དུས་ཀྱི་སྤྲོས་པའི་བག་ཆགས་ཀྱིས་ཡོངས་སུ་བསྒོས་པ། ཁམས་གསུམ་གྱི་གཟུགས་རྣམ་པ་སྣ་ཚོགས་ལ་ཉེ་བར་སྤྱོད་པས་རབ་ཏུ་བཅིངས་པ། ལུས་དང་ལོངས་སྤྱོད་རྣམ་པར་གཞག་པའི་རྣམ་པར་རྟོག་པའི་རྗེས་སུ་འཇུག་པར་སྣང་ངོ་ཞེས་རབ་ཏུ་རྟོག་སྟེ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རང་གི་སེམས་སྣང་བ་རྣམ་པར་འབྱེད་པ་ལ་མཁས་པ་ཞེས་བྱའོ། །ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱི་རོལ་གྱི་དངོས་པོ་དངོས་པོ་མེད་པར་རབ་ཏུ་རྟོག་པ་ལ་མཁས་པ་ཡིན་ཞེ་ན། འདི་ལྟ་སྟེ། དངོས་པོ་ཐམས་ཅད་ནི་སྨིག་རྒྱུ་དང་། རྨི་ལམ་ལ་སོགས་པ་ལྟ་བུ་སྟེ། ཐོག་མ་མེད་པའི་དུས་ཀྱི་སྤྲོས་པའི་གནས་ངན་ལེན་རྣམ་པར་རྟོག་པའི་བག་ཆགས་ཀྱི་རྒྱུ་ལས་བྱུང་བའོ་ཞེས་དངོས་པོ་ཐམས་ཅད་ཀྱི་རང་བཞིན་ལ་རབ་ཏུ་རྟོག་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་ལྟར་ཕྱི་རོལ་གྱི་དངོས་པོ་ལ་དངོས་པོ་མེད་པར་རབ་ཏུ་རྟོག་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱི་རོལ་གྱི་དངོས་པོ་དངོས་པོ་མེད་པར་རབ་ཏུ་རྟོག་པ་ལ་མཁས་པ་ཞེས་བྱའོ། །ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བ་དང་། གནས་པ་དང་། འཇིག་པའི་ལྟ་བ་རྣམ་པར་སྤོང་བ་ལ་མཁས་པ་ཡིན་ཞེ་ན། འདི་ལྟ་སྟེ། དངོས་པོ་ཐམས་ཅད་ནི་སྒྱུ་མ་དང་། རྨི་ལམ་ལ་སོགས་པ་དང་མཚུངས་པས་བདག་དང་གཞན་དང་གཉིས་ཀ་ལས་དངོས་པོ་རྣམས་མི་སྐྱེ་སྟེ། རང་གི་སེམས་སྣང་བ་ཙམ་གྱི་རྗེས་སུ་འཇུག་པའི་ཕྱིར་ཕྱི་རོལ་གྱི་དངོས་པོ་དངོས་པོ་མེད་པར་མཐོང་བ་དང་། རྣམ་པར་ཤེས་པ་རྣམས་འཇུག་པ་མེད་པ་དང་། རྐྱེན་རྣམས་སྤུངས་པ་མེད་པར་མཐོང་བ་དང་། རྣམ་པར་རྟོག་པའི་རྐྱེན་ལས་ཁམས་གསུམ་བྱུང་བར་མཐོང་བས་ཕྱི་ནང་གི་ཆོས་ཐམས་ཅད་
མི་དམིགས་པ་དང་། རང་བཞིན་དང་བྲལ་བར་མཐོང་བས་སྐྱེ་བར་ལྟ་བ་རྣམ་པར་ལོག་པ་དང་། སྒྱུ་མ་ལ་སོགས་པའི་ཆོས་ཀྱི་རང་བཞིན་ཁོང་དུ་ཆུད་པས་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་ནས། སྐྱེ་བ་དང་། གནས་པ་དང་། འཇིག་པའི་ལྟ་བ་ཡོངས་སུ་སྤོང་བ་སྟེ། འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བ་དང་། གནས་པ་དང་། འཇིག་པའི་ལྟ་བ་རྣམ་པར་སྤོང་བ་ལ་མཁས་པ་ཞེས་བྱའོ། །ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་བདེ་བ་གྱ་ནོམ་པ་ཐོབ་པ་ཡིན་ཞེ་ན། འདི་ལྟ་སྟེ། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་ནས་བྱང་ཆུབ་སེམས་དཔའ་ས་བརྒྱད་པ་ལ་གནས་ཏེ། སེམས་དང་ཡིད་དང་ཡིད་ཀྱི་རྣམ་པར་ཤེས་པ་དང་བྲལ་བ་དང་། ཆོས་ལྔ་དང་། རང་བཞིན་དང་། བདག་མེད་པ་གཉིས་ཀྱི་མཚན་ཉིད་ཡིད་ལས་བྱུང་བའི་ལུས་ཀྱང་རབ་ཏུ་ཐོབ་པའོ། །བཅོམ་ལྡན་འདས་ཅིའི་སླད་དུ་ཡིད་ལས་བྱུང་བའི་ལུས་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཡིད་ལས་བྱུང་བའི་ལུས་ཞེས་བྱ་བ་ནི་ཡིད་ལྟར་མགྱོགས་ཤིང་ཐོགས་པ་མེད་པའི་ཕྱིར་ཡིད་ཀྱི་ལུས་ཞེས་བྱ་སྟེ། དཔེར་ན་ཡིད་ནི་རི་དང་། རྩིག་པ་ལ་སོགས་པ་ལ་ཐོགས་པ་མེད་པར་ཕྱོགས་ཐ་དད་པ་དཔག་ཚད་བརྒྱ་སྟོང་དུ་མ་དེ་དག་ཏུ་སྔོན་མཐོང་བ་རྗེས་སུ་དྲན་པའི་རྒྱུས་མི་བརྗེད་པའི་རང་གི་སེམས་ཀྱི་རྒྱུན་མ་ཆད་པའི་ལུས་ཐོགས་པ་མེད་པས་འཇུག་གོ །བློ་གྲོས་ཆེན་པོ་དེ་བཞིན་དུ་ཡིད་ལས་བྱུང་བའི་ལུས་ཀྱང་དུས་གཅིག་ཏུ་ལྷན་ཅིག་པ་ཐོབ་པ་སྟེ་། བྱང་ཆུབ་སེམས་དཔའ་སེམས་དཔའ་ཆེན་པོའི་ཡིད་ལས་བྱུང་བའི་ལུས་ནི་སྒྱུ་མ་ལྟ་བུའི་ཏིང་ངེ་འཛིན་གྱི་སྟོབས་དང་། དབང་དང་མངོན་པར་ཤེས་པ་དང་། མཚན་བཟང་པོས་བརྒྱན་པ། འཕགས་པའི་རིགས་ཀྱི་ལུས་དུས་གཅིག་ཏུ་ལྷན་ཅིག་སྐྱེས་པ། ཡིད་བཞིན་དུ་འཇུག་ཅིང་ཐོགས་པ་མེད་པ། སྔོན་གྱི་སྨོན་ལམ་གྱི་ཡུལ་རྗེས་སུ་དྲན་པས་སེམས་ཅན་ཡོངས་སུ་སྨིན་པར་བྱེད་པའི་ཕྱིར་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་བདེ་བ་གྱ་ནོམ་པ་འཐོབ་སྟེ། དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་ནས་བྱང་ཆུབ་སེམས་དཔའི་
ས་བརྒྱད་པ་ལ་གནས་ཏེ། སེམས་དང་ཡིད་དང་། ཡིད་ཀྱི་རྣམ་པར་ཤེས་པ་དང་བྲལ་བ་དང་། ཆོས་ལྔ་དང་རང་བཞིན་དང་། བདག་མེད་པ་གཉིས་ཀྱི་མཚན་ཉིད་ཀྱི་ལུས་དང་། ཡིད་ལས་བྱུང་བའི་ལུས་དང་། སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་བདེ་བ་གྱ་ནོམ་པ་ཐོབ་པ་ཡིན་ནོ། །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་བཞི་དང་ལྡན་པའི་རྣལ་འབྱོར་གྱི་ཐབས་ཆེན་པོ་ཡིན་ཏེ་དེ་ཁྱོད་ཀྱིས་བསླབ་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་རྣམས་ཀྱི་རྒྱུ་དང་རྐྱེན་གྱི་མཚན་ཉིད་བཤད་དུ་གསོལ། འདི་ལྟར་རྒྱུ་དང་རྐྱེན་གྱི་མཚན་ཉིད་རྟོགས་པས་བདག་དང་། བྱང་ཆུབ་སེམས་དཔའ་རྣམས་དངོས་པོ་ཐམས་ཅད་ལ་མཆིས་པ་དང་མ་མཆིས་པར་ལྟ་བའི་རྣམ་པར་རྟོག་པ་དང་བྲལ་ཞིང་རིམ་དང་ཅིག་ཅར་སྐྱེ་བར་རྣམ་པར་རྟོག་པའི་ལྟ་བ་མ་མཆིས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཆོས་ཐམས་ཅད་ཀྱི་རྐྱེན་གྱི་མཚན་ཉིད་ནི་རྣམ་པ་གཉིས་ཏེ། འདི་ལྟ་སྟེ། ཕྱིའི་དང་། ནང་གིའོ། །དེ་ལ་ཕྱི་རོལ་གྱི་རྐྱེན་ནི་འདི་ལྟ་སྟེ། འཇིམ་པའི་གོང་བུ་དང་། ཐལ་ཞར་དང་། འཁོར་ལོ་དང་། སྲད་བུ་དང་། ཆུ་དང་། མིའི་བཟོ་དང་། སྦྱོར་བའི་རྐྱེན་རྣམས་ལས་རྫ་མ་འབྱུང་བའོ། །ཇི་ལྟར་འཇིམ་པའི་གོང་བུ་ལས་རྫ་མ་འབྱུང་བ་དེ་བཞིན་དུ། སྐུད་པ་ལས་སྣམ་བུ་དང་། རྩྭ་ལས་སྟན་དང་། ས་བོན་ལས་མྱུ་གུ་དང་། ཞོ་ལས་མར་འབྱུང་བ་ལ་སོགས་པ་སྦྱོར་བའི་རྐྱེན་ལས་སྐྱེ་བ་རྣམས་ཀྱང་དེ་བཞིན་ཏེ། འདི་ནི་ཕྱི་རོལ་གྱི་རྐྱེན་སྔ་ཕྱི་འགྱུར་ཞིང་སྐྱེ་བ་ཞེས་བྱའོ། །དེ་ལ་ནང་གི་རྐྱེན་གང་ཞེ་ན། འདི་ལྟ་སྟེ། མ་རིག་པ་དང་། སྲེད་པ་དང་། ལས་ལ་སོགས་པའི་ཆོས་ནི་རྐྱེན་ཅེས་བྱ་བའི་མིང་ཐོབ་པས་འདི་དག་ལས་སྐྱེས་པའི་ཕུང་པོ་དང་། ཁམས་དང་། སྐྱེ་མཆེད་ཅེས་བྱ་བའི་ཆོས་དེ་དག་ཀྱང་རྟེན་ཅིང་འབྲེལ་པར་འབྱུང་བ་ཞེས་བྱ་བའི་མིང་འཐོབ་བོ། །དེ་དག་ནི་ཁྱད་པར་མེད་པ་ལས་བྱིས་པ་རྣམས་ཀྱིས་བརྟགས་པ་སྟེ། འདི་ནི་ནང་གི་རྐྱེན་གྱི་ཆོས་ཞེས་བྱའོ། །བློ་གྲོས་ཆེན་པོ་དེ་ལ་རྒྱུ་ནི་རྣམ་པ་དྲུག་སྟེ། འདི་ལྟ་སྟེ། འབྱུང་
བར་འགྱུར་བའི་རྒྱུ་དང་། འབྲེལ་བའི་རྒྱུ་དང་། མཚན་ཉིད་ཀྱི་རྒྱུ་དང་། བྱེད་པའི་རྒྱུ་དང་། སྣང་བར་བྱེད་པའི་རྒྱུ་དང་། ལྟོས་པའི་རྒྱུའོ། །དེ་ལ་འབྱུང་བར་འགྱུར་བའི་རྒྱུ་ནི་ཕྱི་ནང་གི་ཆོས་རྣམས་སྐྱེད་པར་རྒྱུའི་བྱ་བ་བྱེད་པའོ། །འབྲེལ་བའི་རྒྱུ་ནི་ཕྱི་ནང་གི་ཆོས་ཕུང་པོ་དང་། ས་བོན་ལ་སོགས་པ་སྐྱེད་པར་དམིགས་པའི་བྱ་བ་བྱེད་པའོ། །མཚན་ཉིད་ཀྱི་རྒྱུ་ནི་དེ་མ་ཐག་པའི་མཚན་ཉིད་བྱེད་པས་རྒྱུན་མི་འཆད་པར་སྐྱེད་པའོ། །བྱེད་པའི་རྒྱུ་ནི་དབང་གི་བྱ་བ་བྱེད་པ་སྟེ། འཁོར་ལོས་སྒྱུར་བའི་རྒྱལ་པོ་བཞིན་ནོ། །སྣང་བར་བྱེད་པའི་རྒྱུ་ནི་རྣམ་པར་རྟོག་པའི་དངོས་པོ་སྐྱེས་པས་མཚན་ཉིད་སྣང་བའི་བྱ་བ་བྱེད་པ་སྟེ། མར་མེས་གཟུགས་ལ་སོགས་པ་སྣང་བར་བྱེད་པ་བཞིན་ནོ། །ལྟོས་པའི་རྒྱུ་ནི་འགགས་པའི་དུས་ན་བྱ་བའི་རྒྱུན་ཆད་དེ་རྣམ་པར་མི་རྟོག་པའི་དངོས་པོར་སྐྱེ་བའོ། །བློ་གྲོས་ཆེན་པོ་འདི་དག་ནི་བྱིས་པ་སོ་སོའི་སྐྱེ་བོ་རྣམས་ཀྱི་རང་གི་རྣམ་པར་རྟོག་པའི་མཚན་ཉིད་པས་རིམ་གྱིས་ཀྱང་མི་སྐྱེ་ལ་ཅིག་ཅར་ཡང་མི་སྐྱེའོ། །དེ་ཅིའི་ཕྱིར་ཞེ་ན། གལ་ཏེ་ཅིག་ཅར་སྐྱེ་ན་ནི་བྱེད་པ་དང་། བྱ་བ་བྱེ་བྲག་མེད་པས་རྒྱུའི་མཚན་ཉིད་དུ་མི་འགྱུར་བའི་ཕྱིར་རོ། །ཅི་སྟེ་རིམ་གྱིས་སྐྱེ་ན་ནི་བདག་གི་མཚན་ཉིད་མ་ཐོབ་པའི་ཕྱིར་རིམ་གྱིས་སྐྱེ་བས་མི་སྐྱེ་སྟེ། ཇི་ལྟར་བུ་མ་སྐྱེས་པར་ཕ་ཞེས་བྱ་བའི་མིང་མེད་པ་བཞིན་ནོ། །བློ་གྲོས་ཆེན་པོ་རིམ་གྱིས་སྐྱེ་བས་འབྲལ་བའི་སྦྱོར་བ་ཡང་མི་རུང་སྟེ། དེ་ནི་རྣམ་པར་རྟོག་པའོ། །རྒྱུ་དང་། དམིགས་པ་དང་། མཚུངས་པ་མེད་པ་དེ་མ་ཐག་པ་དང་། བདག་པོའི་རྐྱེན་ལ་སོགས་པས་བསྐྱེད་པར་བྱ་བ་སྐྱེད་པའི་ཕྱིར། བློ་གྲོས་ཆེན་པོ་རིམ་གྱིས་སྐྱེ་བས་མི་སྐྱེ་སྟེ། ཀུན་བརྟགས་པའི་རང་བཞིན་ལ་མངོན་པར་ཞེན་པའི་མཚན་ཉིད་ཀྱི་ཕྱིར་རོ། །རིམ་གྱིས་སམ་ཅིག་ཅར་མི་སྐྱེ་སྟེ། རང་གི་སེམས་སྣང་བའི་ལུས་དང་ལོངས་སྤྱོད་ཡིན་པའི་ཕྱིར་རོ། །རང་དང་སྤྱིའི་མཚན་ཉིད་དང་། ཕྱི་རོལ་གྱི་དངོས་པོ་དངོས་པོ་མེད་པས་བློ་གྲོས་ཆེན་པོ་རིམ་གྱིས་སམ་ཅིག་ཅར་མི་སྐྱེ་སྟེ། གཞན་དུ་རང་གི་སེམས་སྣང་བ་ལ་རྣམ་པར་རྟོག་པ་ཙམ་དུ་ཁོང་དུ་མ་ཆུད་པའི་ཕྱིར་མཚན་མ་སྐྱེའོ། །དེ་ལྟ་བས་ན་རྒྱུ་དང་རྐྱེན་དང་། བྱ་བའི་དངོས་པོ་དང་། སྦྱོར་བའི་མཚན་ཉིད་རིམ་གྱིས་དང་། ཅིག་ཅར་གྱི་ལྟ་བ་ཡོངས་སུ་སྤང་བར་བྱའོ། །
དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཆོས་རྣམས་ཐམས་ཅད་མི་སྐྱེ་སྟེ། །རྒྱུ་རྐྱེན་འགག་པའང་ཡོད་མ་ཡིན། །སྐྱེ་དང་འགག་པ་དེ་དག་ལ། །རྒྱུ་དང་རྐྱེན་དུ་རྟོག་པ་སྐྱེད། །འགགས་པ་ལས་ནི་ཡང་སྐྱེ་དང་། །འབྲེལ་པའི་རྒྱུ་རྐྱེན་བཀག་མིན་ཏེ། །བྱིས་པ་ཤིན་ཏུ་རྨོངས་པ་ཡིས། །རྐྱེན་དུ་རྟོག་པ་རབ་སྤང་ཕྱིར། །ཡོད་དང་མེད་པ་རྟེན་འབྲེལ་ཆོས། །དེ་དག་སྐྱེ་བ་ཡོད་མ་ཡིན། །བག་ཆགས་རྨོངས་པས་རབ་ཏུ་འཇུག །དེ་ལས་སྲིད་གསུམ་སྣང་བ་ཡིན། །ཡང་དག་རྐྱེན་ལས་སྐྱེ་བ་མེད། །འགག་པའང་ཡོད་པར་མི་འགྱུར་ཏེ། །འདུས་བྱས་ཐམས་ཅད་རབ་བརྟགས་ན། །ནམ་མཁའི་མེ་ཏོག་ཇི་བཞིན་ནོ། །གཟུང་བ་དང་ནི་འཛིན་པ་ཡི། །ནོར་པར་མཐོང་བ་རབ་ཏུ་སྤོངས། །སྐྱེད་དང་སྐྱེ་བ་མ་ཡིན་ཏེ། །རྒྱུ་རྐྱེན་དག་ཀྱང་ཡོད་མ་ཡིན། །ཐམས་ཅད་སྣང་བ་མེད་པས་ན། །དེ་དག་ཀུན་ནི་བརྗོད་པ་ཡིན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚིག་གི་རྣམ་པར་རྟོག་པའི་མཚན་ཉིད་ཀྱི་སྙིང་པོ་ཞེས་བགྱི་བའི་ཆོས་ཀྱི་རྣམ་གྲངས་བཤད་དུ་གསོལ། བཅོམ་ལྡན་འདས་བདག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་ཚིག་རྣམ་པར་རྟོག་པའི་མཚན་ཉིད་ཀྱི་སྙིང་པོ་ཞེས་བགྱི་བའི་ཆོས་ཀྱི་རྣམ་གྲངས་ཤིན་ཏུ་རྟོགས་པ་དེས། བརྗོད་པ་དང་། བརྗོད་པ་རྣམ་པ་གཉིས་ཀྱི་དོན་རྟོགས་པར་ཁོང་དུ་ཆུད་དེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། བརྗོད་པ་རྣམ་པ་གཉིས་ཀྱི་ཚུལ་གྱིས་སེམས་ཅན་ཐམས་ཅད་ཡོངས་སུ་དག་པར་བགྱིད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། ལེགས་སོ། །བཅོམ་ལྡན་འདས་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་ཚིག་གི་རྣམ་པར་རྟོག་པའི་མཚན་ཉིད་ནི་རྣམ་པ་བཞི་ཡོད་དེ། འདི་ལྟ་སྟེ། མཚན་ཉིད་ཀྱི་ཚིག་
དང་། རྨི་ལམ་གྱི་ཚིག་དང་། གནས་ངན་ལེན་གྱི་རྣམ་པར་རྟོག་པ་ལ་མངོན་པར་ཞེན་པའི་ཚིག་དང་། ཐོག་མ་མེད་པའི་དུས་ཀྱི་རྣམ་པར་རྟོག་པའི་ཚིག་གོ །དེ་ལ་མཚན་ཉིད་ཀྱི་ཚིག་ནི་རང་གི་རྣམ་པར་རྟོག་པའི་གཟུགས་ཀྱི་མཚན་ཉིད་ལ་མངོན་པར་ཞེན་པ་ལས་འབྱུང་ངོ་། །རྨི་ལམ་གྱི་ཚིག་ནི་སྔོན་མྱོང་བའི་ཡུལ་རྗེས་སུ་དྲན་པ་དང་། སད་ནས་ཡུལ་དངོས་པོ་མེད་པ་ལས་འབྱུང་ངོ་། །གནས་ངན་ལེན་གྱི་རྣམ་པར་རྟོག་པ་ལས་མངོན་པར་ཞེན་པའི་ཚིག་ནི་སྔོན་དགྲས་བྱས་པའི་ལས་རྗེས་སུ་དྲན་པ་ལས་འབྱུང་ངོ་། །ཐོག་མ་མེད་པའི་དུས་ཀྱི་རྣམ་པར་རྟོག་པའི་ཚིག་ནི་ཐོག་མ་མེད་པའི་དུས་ཀྱི་རྣམ་པར་སྤྲོས་པ་ལ་མངོན་པར་ཞེན་པའི་གནས་ངན་ལེན་གྱི་རང་གི་ས་བོན་གྱི་བག་ཆགས་ལས་འབྱུང་སྟེ། འདི་ནི་ཚིག་གི་རྣམ་པར་རྟོག་པའི་མཚན་ཉིད་རྣམ་པ་བཞི་ཞེས་བྱའོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་དོན་དེ་ཉིད་ཀྱི་ཕྱིར་བཅོམ་ལྡན་འདས་ལ་གསོལ་བ་བཏབ་པ། བཅོམ་ལྡན་འདས་ད་དུང་ཡང་རྣམ་པར་རྟོག་པའི་མངོན་པའི་སྤྱོད་ཡུལ་བཤད་དུ་གསོལ། བཅོམ་ལྡན་འདས་གང་ནས་ཅི་སླད། ཇི་ལྟར་རྒྱུ་གང་གིས་སེམས་ཅན་རྣམས་ཀྱི་རྣམ་པར་རྟོག་པའི་ཚིག་འབྱུང་བ་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་མགོ་དང་། བྲང་དང་། མགུལ་པ་དང་། སྣ་དང་། མཆུ་དང་། ལྕེ་དང་། རྐན་དང་། སོ་རྣམས་འདུས་པ་ལས་སྒྲ་སྐད་འབྱུང་ངོ་། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཚིག་དང་། རྣམ་པར་རྟོག་པ་ཐ་དད་པའམ། འོན་ཏེ་གཅིག་པ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཚིག་དང་། རྣམ་པར་རྟོག་པ་ནི་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། དེའི་རྒྱུ་ལས་བྱུང་བའི་མཚན་ཉིད་ཀྱི་ཕྱིར་རོ། །བློ་གྲོས་ཆེན་པོ་གལ་ཏེ་ཚིག་དང་། རྣམ་པར་རྟོག་པ་ཐ་དད་པ་ཞིག་ཡིན་ན་ནི་རྣམ་པར་རྟོག་པ་རྒྱུ་ཡིན་པར་མི་འགྱུར་རོ། །ཅི་སྟེ་ཐ་མི་དད་པ་ཞིག་ཡིན་ན་ནི་ཚིག་གི་དོན་གསལ་བར་བྱེད་པར་ཡང་མི་འགྱུར་བ་ཞིག་ན། གསལ་བར་ཡང་བྱེད་དེ། དེ་བས་ན་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །བློ་གྲོས་ཆེན་པོས་ཡང་བཅོམ་
ལྡན་འདས་ལ་གསོལ་པ། བཅོམ་ལྡན་འདས་ཚིག་ཉིད་དོན་དམ་པ་ལགས་སམ། འོན་ཏེ་ཚིག་གིས་བརྗོད་པར་བགྱི་བ་དེ་དོན་དམ་པ་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཚིག་ཀྱང་དོན་དམ་པ་མ་ཡིན་ལ། ཚིག་གིས་གང་བརྗོད་པར་བྱ་བ་དེ་ཡང་དོན་དམ་པ་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་དོན་དམ་པ་ནི་འཕགས་པའི་བདེན་པ་ཡིན་ཏེ། ཚིག་གིས་དོན་དམ་པ་ལ་འཇུག་ཀྱང་ཚིག་འདི་ཉིད་ནི་དོན་དམ་པ་མ་ཡིན་ནོ། །དོན་དམ་པ་ནི་འཕགས་པ་སོ་སོ་རང་གིས་རིག་པའི་ཡེ་ཤེས་ཀྱིས་རྟོགས་པར་བྱ་བ་ཡིན་གྱི། ཚིག་གི་རྣམ་པར་རྟོག་པའི་བློའི་སྤྱོད་ཡུལ་ནི་མ་ཡིན་པས། དེའི་ཕྱིར་ཚིག་གི་རྣམ་པར་རྟོག་པས་དོན་དམ་པ་གསལ་བར་མི་བྱེད་དོ། །དེ་ལ་ཚིག་ནི་སྐྱེ་བ་དང་འཇིག་པ་དག་གིས་རབ་ཏུ་གཡོ་བ། ཕན་ཚུན་གྱི་རྒྱུ་དང་རྐྱེན་ལས་བྱུང་བའོ། །གལ་ཏེ་ཕན་ཚུན་གྱི་རྒྱུ་དང་རྐྱེན་ལས་བྱུང་བ་ཡིན་ན། དེས་ནི་དོན་དམ་པ་གསལ་བར་མི་བྱེད་དོ། །བློ་གྲོས་ཆེན་པོ་བདག་དང་གཞན་དང་། གཉི་གའི་དངོས་པོ་མེད་པའི་ཕྱིར། ཚིག་གི་མཚན་ཉིད་ཀྱིས་དོན་དམ་པ་གསལ་བར་མི་བྱེད་དོ། །གཞན་བློ་གྲོས་ཆེན་པོ་རང་གི་སེམས་སྣང་བ་ཙམ་གྱི་རྗེས་སུ་འཇུག་པའི་ཕྱིར་མཚན་མ་རྣམ་པ་སྣ་ཚོགས་དང་། ཕྱི་རོལ་གྱི་དངོས་པོ་དངོས་པོ་མེད་པས། ཚིག་གི་རྣམ་པར་རྟོག་པས་ནི་དོན་དམ་པ་གསལ་བར་མི་བྱེད་དོ། །དེ་ལྟ་བས་ན་བློ་གྲོས་ཆེན་པོ་ཚིག་གི་རྣམ་པར་རྟོག་པ་རྣམས་ཀྱི་མཚན་ཉིད་ཡོངས་སུ་སྤང་བར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །དངོས་པོ་ཀུན་གྱི་རང་བཞིན་མེད། །ཚིག་ཀྱང་ཡོད་པ་མ་ཡིན་ཏེ། །ཟབ་མོ་སྟོང་ཉིད་སྟོང་པའི་དོན། །བྱིས་པ་རྣམས་ཀྱིས་རྟོགས་མི་ནུས། །དངོས་པོ་ཐམས་ཅད་རང་བཞིན་དང་། །ཚིག་གི་ཆོས་ནི་མིག་ཡོར་འདྲ། །རང་རིག་ཡེ་ཤེས་ཡང་དག་མཐའ། །བུ་རྣམས་ལ་ནི་ངས་བཤད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མཆིས་པ་དང་། མ་མཆིས་པ་དང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ལགས་པ་དང་། མཆིས་པ་ཡང་མ་ལགས། མ་མཆིས་པ་ཡང་མ་ལགས་
པ་དང་། རྟག་པ་དང་། མི་རྟག་པ་སྤངས་པ། མུ་སྟེགས་ཅན་ཐམས་ཅད་ཀྱིས་བགྲོད་པར་བགྱི་བ་མ་ལགས་པ། སོ་སོ་རང་གིས་རིག་པ་འཕགས་པའི་ཡེ་ཤེས་ཀྱིས་བགྲོད་པར་བགྱི་བ། ཀུན་བརྟགས་པའི་རང་དང་སྤྱིའི་མཚན་ཉིད་དང་བྲལ་བ། དོན་དམ་པ་དེ་ཁོ་ནའི་དོན་ལ་འཇུག་པ། ས་རྣམས་ཀྱི་མཚམས་སྦྱོར་ཞིང་། རིམ་གྱིས་གོང་ནས་གོང་དུ་ཁྱད་པར་ཅན་དུ་འགྱུར་བ་རྣམ་པར་དག་པའི་མཚན་ཉིད་དང་། དེ་བཞིན་གཤེགས་པའི་ས་ལ་རྗེས་སུ་འཇུག་པའི་མཚན་ཉིད་ལ་རྩོལ་བ་མ་མཆིས་པར་སྔོན་གྱི་སྨོན་ལམ་གྱིས་གཟུགས་སྣ་ཚོགས་ཀྱི་ཡིད་བཞིན་གྱི་ནོར་བུ་ལྟར་སྤྱོད་ཡུལ་མཐའ་ཡས་པའི་མཚན་ཉིད་ཀྱི་རྣམ་པ། རང་གི་སེམས་སྣང་བའི་ཚུལ་བྱེ་བྲག་གི་མཚན་ཉིད་ཀྱི་ཆོས་ཐམས་ཅད་དང་། ཅི་ནས་ཀྱང་བདག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་འདི་ལྟ་བུ་ལ་སོགས་པ་ཀུན་བརྟགས་པའི་རང་བཞིན་དང་། རང་དང་སྤྱིའི་མཚན་ཉིད་ཀྱི་ལྟ་བ་རྣམས་སྤངས་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་ཐམས་ཅད་ཀྱི་བདེ་བ་ཕུན་སུམ་ཚོགས་པ་ཡོངས་སུ་རྫོགས་པར་བགྱི་བ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །ཁྱོད་ང་ལ་དོན་འདི་འདྲི་བ་ནི་སྐྱེ་བོ་མང་པོ་ལ་བདེ་བ་དང་། སྐྱེ་བོ་མང་པོ་ལ་ཕན་པ་དང་། ལྷ་དང་མིའི་འཇིག་རྟེན་ཐམས་ཅད་ལ་སྙིང་བརྩེ་བའི་ཕྱིར་ཞུགས་པ་སྟེ། བློ་གྲོས་ཆེན་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་རབ་ཏུ་དབྱེ་ཞིང་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ། བཅོམ་ལྡན་འདས་ལེགས་སོ་ཞེས་གསོལ་ནས། བཀའ་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རང་གི་སེམས་སྣང་བ་ཙམ་དུ་ཁོང་དུ་མ་ཆུད་པ་དང་། ནང་དང་ཕྱི་རོལ་གྱི་དངོས་པོར་འཛིན་པས། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་མི་རྟག་པའི་རང་བཞིན་གྱི་བག་ཆགས་ཀྱི་རྒྱུ་ལ་བརྟེན་ནས།
མངོན་པར་ཞེན་པས་རྣམ་པར་རྟོག་གོ །དཔེར་ན་རི་དགས་སྐོམ་པས་རབ་ཏུ་གདུངས་པ་རྣམས་དཔྱིད་ཀྱི་སྨིག་རྒྱུ་ལ་ཆུ་ཉིད་དུ་རྣམ་པར་རྟོག་པའི་ནོར་པས་རབ་ཏུ་རྒྱུག་སྟེ། ཆུ་མ་ཡིན་པར་ཡོངས་སུ་མི་ཤེས་སོ། །དེ་བཞིན་དུ་བྱིས་པ་སོ་སོའི་སྐྱེ་བོ་ཐོག་མ་མེད་པའི་དུས་ཀྱིས་སྤྲོས་པའི་རྣམ་པར་རྟོག་པས་ཡོངས་སུ་བསྒོས་པའི་དུག་གསུམ་གྱི་མེས་སེམས་རབ་ཏུ་གདུངས་པ། གཟུགས་ཀྱི་ཡུལ་ལ་ཤིན་ཏུ་མོས་པ། སྐྱེ་བ་དང་། གནས་པ་དང་། འཇིག་པར་ལྟ་བ། ཕྱི་ནང་གི་དངོས་པོར་ཡོངས་སུ་འཛིན་པ་དག་ཀྱང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་མི་རྟག་པ་ཉིད་དུ་འདུ་ཤེས་ཤིང་། རྣམ་པར་རྟོག་པའི་ལྟ་བ་འཛིན་པར་རབ་ཏུ་ལྟུང་བར་འགྱུར་རོ། །དཔེར་ན་དྲི་ཟའི་གྲོང་ཁྱེར་ལ་བྱིས་པ་སོ་སོའི་སྐྱེ་བོ་བློ་དང་མི་ལྡན་པ་རྣམས་གྲོང་ཁྱེར་གྱི་འདུ་ཤེས་འབྱུང་སྟེ། ཐོག་མ་མེད་པའི་དུས་ནས། བག་ཆགས་ལ་མངོན་པར་ཞེན་པའི་འདུ་ཤེས་ཀྱིས་སྣང་ཡང་། དེ་ནི་གྲོང་ཁྱེར་ཡང་མ་ཡིན། གྲོང་ཁྱེར་མ་ཡིན་པ་ཡང་མ་ཡིན་ནོ། །དེ་བཞིན་དུ་མུ་སྟེགས་ཅན་ཐོག་མ་མེད་པའི་དུས་ནས་སྤྲོས་པའི་བག་ཆགས་ལ་མངོན་པར་ཞེན་པ་རྣམས་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པའི་ལྟ་བ་ལ་གནས་པས། རང་གི་སེམས་སྣང་བ་ཙམ་དུ་མི་ཆུད་དོ། །དཔེར་ན་མི་ལ་ལ་ཞིག་རྨི་ལམ་ན། སྐྱེས་པ་དང་། བུད་མེད་དང་། གླང་པོ་ཆེ་དང་། རྟ་དང་། ཤིང་རྟ་དང་། རྐང་ཐང་དང་། གྲོང་དང་། གྲོང་ཁྱེར་དང་། སྐྱེད་མོས་ཚལ་དང་། ནགས་ཚལ་དང་། རི་དང་། འབབ་ཆུ་དང་། རྫིང་རྣམ་པ་སྣ་ཚོགས་ཀྱིས་མཛེས་པར་བྱས་པར་བདག་ཉིད་ཞུགས་པ་སྙམ་པ་ལས་སད་ནས། །དེ་ཉིད་རྗེས་སུ་དྲན་ན། བློ་གྲོས་ཆེན་པོ་ཇི་སྙམ་དུ་སེམས། སྐྱེས་བུ་དེས་སྔར་རྨིས་པ་རྣམས་རྗེས་སུ་དྲན་པར་བྱེད་ཅིང་། ཡོངས་སུ་གཏོང་བར་མི་བྱེད་ན། ཅི་མཁས་པའི་རང་བཞིན་ཅན་ཡིན་ནམ། བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་མ་ལགས་སོ། །བཅོམ་
ལྡན་འདས་ཀྱིས་བློ་གྲོས་ཆེན་པོ་ལ་བཀའ་སྩལ་པ། དེ་བཞིན་དུ་བྱིས་པ་སོ་སོའི་སྐྱེ་བོ་ལྟ་བ་ངན་པས་རབ་ཏུ་ཟིན་པ། མུ་སྟེགས་ཀྱི་བློ་ཅན་དག་རང་གི་སེམས་སྣང་བའི་དངོས་པོ་རྨི་ལམ་ལྟ་བུར་མ་ཤེས་པས། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པར་ལྟ་བ་ལ་རབ་ཏུ་བརྟེན་ཏོ། །དཔེར་ན་རི་མོ་བྲིས་པ་ལ་མཐོ་དམན་མེད་ཀྱང་། བྱིས་པ་དེ་དག་མཐོ་དམན་དུ་རྣམ་པར་རྟོག་གོ །དེ་བཞིན་དུ་མ་འོངས་པའི་དུས་ན་མུ་སྟེགས་ཅན་གྱི་ལྟ་བ་ངན་པའི་བག་ཆགས་ཤིན་ཏུ་རྒྱས་པས། དེ་དག་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པར་ལྟ་བ་ལ་བརྟེན་ནས། བདག་དང་གཞན་ཡང་བརླག་པར་བྱེད་ལ། ཡོད་པ་དང་། མེད་པ་སྤངས་པ། སྐྱེ་བ་མེད་པར་སྨྲ་བ་གཞན་དག་ལ་ཡང་མེད་པ་ཞེས་ཟེར་བ་དག་འབྱུང་སྟེ། འདི་དག་ནི་རྒྱུ་དང་འབྲས་བུར་ལྟ་བ་ལ་སྐུར་པ་འདེབས་ཤིང་། དགེ་བའི་རྩ་བ་འདོན་པར་བྱེད་ལ། རྣམ་པར་དག་པའི་རྒྱུ་འཇིག་པར་བྱེད་པ་ཡིན་པས། མཆོག་ཚོལ་བ་རྣམས་ཀྱིས་རིང་དུ་སྤང་བར་བྱའོ། །དེ་སྐད་དུ་སྨྲ་བ་དེ་དག་ནི་བདག་དང་གཞན་དང་། གཉི་གའི་ལྟ་བར་ལྟུང་བ། ཡོད་པ་དང་། མེད་པར་རྣམ་པར་བརྟགས་ནས། སྒྲོ་འདོགས་པ་དང་། སྐུར་པའི་ལྟ་བ་ངན་པར་ལྟུང་བ་ཡིན་པས། སེམས་ཅན་དམྱལ་བར་ལྟུང་བར་འགྱུར་རོ། །དཔེར་ན་མིག་ལ་རབ་རིབ་ཡོད་པ་དེ་དག་གིས་སྐྲ་ཤད་འཛིངས་པ་མཐོང་ནས། སྐྱེ་བོ་མང་པོའི་ཚོགས་རྣམས་ལ་འདི་སྐད་དུ། ཀྱེ་གྲོགས་པོ་དག་འདི་ལྟོས་ཤིག་ཅེས་ཟེར་ཡང་། སྐྲ་ཤད་འཛིངས་པ་དེ་ནི་མཐར་དངོས་པོ་ཡོད་པ་ཡང་མ་ཡིན། དངོས་པོ་མེད་པ་ཡང་མ་ཡིན་ཏེ། མཐོང་བ་དང་། མི་མཐོང་བའི་ཕྱིར་རོ། །དེ་བཞིན་དུ་མུ་སྟེགས་ཅན་ལྟ་བ་ངན་པའི་བསམ་པ་ཅན་དག་ཀྱང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པའི་ལྟ་བ་ལ་རབ་ཏུ་རྟེན་ཅིང་། དམ་པའི་ཆོས་ལ་སྐུར་པ་འདེབས་པས། བདག་ཀྱང་ལྟུང་བར་བྱེད་ལ་གཞན་
དག་ཀྱང་ལྷུང་བར་བྱེད་དོ། །དཔེར་ན་མགལ་མེའི་འཁོར་ལོ་ནི། འཁོར་ལོ་མ་ཡིན་ཡང་། བྱིས་པ་རྣམས་ཀྱིས་འཁོར་ལོ་ཉིད་དུ་ཡོངས་སུ་རྟོག་སྟེ། མཁས་པ་རྣམས་ནི་མ་ཡིན་ནོ། །དེ་བཞིན་དུ་མུ་སྟེགས་ཅན་ལྟ་བ་ངན་པའི་བསམ་པ་ཅན་དག་ཀྱང་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་མི་རྟག་པར་ཡོངས་སུ་རྟོག་པ་ལ་བརྟེན་ནས། དངོས་པོ་ཐམས་ཅད་སྐྱེད་དོ། །དཔེར་ན་ཆུ་བུར་ནོར་བུ་འདྲ་བ་ལ། བྱིས་པ་བློ་དང་མི་ལྡན་པ་རྣམས་ཀྱིས། ནོར་བུ་ཉིད་དུ་འདུ་ཤེས་ཤིང་། མངོན་པར་ཞེན་ནས་རབ་ཏུ་རྒྱུག་ཅིང་ལེན་ཀྱང་། ཆུ་བུར་དེ་དག་ནི་ནོར་བུ་ཡང་མ་ཡིན། ནོར་བུ་མ་ཡིན་པ་ཡང་མ་ཡིན་ཏེ། ལེན་པ་དང་། མི་ལེན་པའི་ཕྱིར་རོ། །དེ་བཞིན་དུ་མུ་སྟེགས་ཅན་ལྟ་བ་ངན་པའི་རྣམ་པར་རྟོག་པའི་བག་ཆགས་ཀྱིས་ཡོངས་སུ་བསྒོས་པ་རྣམས་ཀྱང་། ཡོད་པ་མ་ཡིན་པ་ལ་སྐྱེ་བ་ཡོད་པར་སྨྲ་བ་དང་། རྐྱེན་གྱིས་ཡོད་པ་ཡང་འཇིག་པར་སྨྲ་བར་འགྱུར་རོ། །གཞན་ཡང་བློ་གྲོས་ཆེན་པོ་ཚད་མ་རྣམ་པ་གསུམ་དང་། སྨྲ་བའི་ཡན་ལག་ལྔ་ཡོད་དོ། །དེ་དག་སོ་སོར་རྣམ་པར་གཞག་པ་བྱས་ནས། འཕགས་པའི་ཡེ་ཤེས་སོ་སོ་རང་གིས་རིག་པར་བྱ་བ། རང་བཞིན་གཉིས་ཀྱི་དངོས་པོ་དང་བྲལ་བ་རྟོགས་པར་འགྱུར་ཞེས། དངོས་པོ་ཡོད་པ་ཉིད་དུ་རྣམ་པར་རྟོག་ཅིང་མངོན་པར་ཞེན་པར་བྱེད་དེ། བློ་གྲོས་ཆེན་པོ་སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་དང་ལུས་དང་། སེམས་གནས་ཤིན་ཏུ་གྱུར་པ། རང་གི་སེམས་སྣང་བའི་གཟུང་བ་དང་། འཛིན་པའི་རྣམ་པར་རྟོག་པ་རབ་ཏུ་སྤངས་པ། དེ་བཞིན་གཤེགས་པའི་ས། སོ་སོ་རང་གིས་རིག་པ་འཕགས་པའི་ཡེ་ཤེས་ཐོབ་པའི་རྣལ་འབྱོར་པས་དེ་ལ་དངོས་པོ་དང་། དངོས་པོ་མེད་པའི་འདུ་ཤེས་སུ་མི་བྱའོ། །གལ་ཏེ་ཡང་རྣལ་འབྱོར་པས་དེ་ལྟ་བུའི་སྤྱོད་ཡུལ་རྣམས་ལ་དངོས་པོ་དང་དངོས་པོ་མེད་པ་འཛིན་པའི་མཚན་མ་སྐྱེད་པར་བྱེད་ན། དེ་ནི་གསོ་བར་འཛིན་པ་དང་། བདག་ཏུ་འཛིན་པ་དང་། གང་ཟག་ཏུ་འཛིན་པར་འགྱུར་རོ། །བློ་གྲོས་ཆེན་པོ་གང་འདི་ལྟར་དངོས་པོ་དེ་དག་གི་རང་བཞིན་དང་། རང་དང་སྤྱིའི་མཚན་ཉིད་བསྟན་པ་དེ་དག་ཐམས་ཅད་ནི་སྤྲུལ་པའི་སངས་རྒྱས་ཀྱིས་བསྟན་པ་ཡིན་གྱི། ཆོས་ཉིད་ཀྱི་སངས་རྒྱས་ཀྱིས་
བསྟན་པ་ནི་མ་ཡིན་ནོ། །གཞན་ཡང་བསྟན་པ་རྣམས་ནི་བྱིས་པ་སོ་སོའི་སྐྱེ་བོ་ལྟ་བའི་བསམ་པ་ཅན་གྱི་དབང་གིས་བྱུང་བ་ཡིན་གྱི། ལོགས་ཤིག་རྣམ་པར་འཇོག་པའི་ཚུལ་རང་བཞིན་གྱི་ཆོས། འཕགས་པའི་ཡེ་ཤེས་སོ་སོ་རང་གིས་རིག་པའི་ཏིང་ངེ་འཛིན་གྱི་བདེ་བ་ལ་གནས་པ་ཐོབ་པ་རབ་ཏུ་དབྱེ་ཞིང་སྟོན་པར་མི་བྱེད་དོ། །དཔེར་ན་ཆུའི་ནང་དུ་ཤིང་གི་གྲིབ་མ་སྣང་ཡང་དེ་ནི་གྲིབ་མ་ཡང་མ་ཡིན། གྲིབ་མ་མ་ཡིན་པ་ཡང་མ་ཡིན། ཤིང་གི་དབྱིབས་ཀྱང་མ་ཡིན། ཤིང་གི་དབྱིབས་མ་ཡིན་པ་ཡང་མ་ཡིན་ནོ། །དེ་བཞིན་དུ་མུ་སྟེགས་ཅན་གྱི་ལྟ་བའི་བག་ཆགས་ཀྱིས་ཡོངས་སུ་བསྒོས་པའི་རྣམ་པར་རྟོག་པ་ལ་མངོན་པར་ཞེན་པ་རྣམས་ཀྱང་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པར་འདུ་ཤེས་པ་ལ་བརྟེན་པས་རང་གི་སེམས་སྣང་བ་ཙམ་དུ་ཁོང་དུ་མི་ཆུད་དོ། །དཔེར་ན་མེ་ལོང་རབ་ཏུ་ཕྱིས་པའི་ནང་དུ་རྐྱེན་ཇི་ལྟ་བ་བཞིན་དུ་རྣམ་པར་རྟོག་པ་མེད་པར་གཟུགས་བརྙན་ཐམས་ཅད་སྣང་སྟེ། དེ་དག་ནི་གཟུགས་ཀྱང་མ་ཡིན། གཟུགས་མ་ཡིན་པ་ཡང་མ་ཡིན། ཡང་གཟུགས་དང་གཟུགས་མ་ཡིན་པར་མཐོང་བར་རྣམ་པར་རྟོག་པའི་བྱིས་པ་རྣམས་གཟུགས་ཀྱི་འདུ་ཤེས་སུ་བྱེད་དོ། །དེ་བཞིན་དུ་མུ་སྟེགས་ཅན་ལྟ་བ་ངན་པ་པ་རང་གི་སེམས་སྣང་བའི་གཟུགས་ལ་རྣམ་པར་རྟོག་པས་མངོན་པར་ཞེན་པ་རྣམས་ཀྱང་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན་མེད་པ་ཡང་མ་ཡིན། རྟག་པ་དང་། མི་རྟག་པར་ལྟ་བ་ལ་རབ་ཏུ་རྟེན་ཏོ། །དཔེར་ན་རླུང་དང་འབབ་ཆུ་ཕྲད་པ་ལས་སྒྲ་འབྱུང་ཡང་དེ་ནི་དངོས་པོ་ཡང་མ་ཡིན། དངོས་པོ་མ་ཡིན་པ་ཡང་མ་ཡིན་ནོ། །དེ་བཞིན་དུ་མུ་སྟེགས་ཅན་གྱི་ལྟ་བ་ངན་པའི་རྟོག་གེ་པ་རྣམས་ཀྱང་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པར་ལྟ་བ་ལ་རབ་ཏུ་རྟེན་ཏོ། །དཔེར་ན་རྩྭ་དང་། ཤིང་མེད་པའི་ས་ཕྱོགས་ཆེན་པོར་ཉི་མ་ཤིན་ཏུ་ཚ་བའི་འོད་ཀྱིས་སྨིག་རྒྱུའི་དབའ་རླབས་རབ་ཏུ་གཡོ་ཡང་དེ་ནི་དངོས་པོ་ཡང་མ་ཡིན། དངོས་པོ་མེད་པ་ཡང་མ་ཡིན་ཏེ། ཆགས་པ་དང་། ཆགས་པ་མེད་པའི་ཕྱིར་རོ། །དེ་བཞིན་དུ་བྱིས་པ་སོ་སོའི་སྐྱེ་
བོ་ཐོག་མ་མེད་པའི་དུས་ཀྱིས་རྣམ་པར་སྤྲོས་པའི་བག་ཆགས་ཀྱིས་བསྒོས་པ། རྣམ་པར་རྟོག་པས་སྐྱེ་བ་དང་། གནས་པ་དང་། འཇིག་པ་ལ་མངོན་པར་ཞེན་པ་རྣམས་ཀྱང་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པ་ལ་རབ་ཏུ་བརྟེན་པས་སོ་སོ་རང་གིས་རིག་པར་བྱ་བའི་དངོས་པོའི་སྒོ་ལ་དམིགས་པ་ཡང་སྨིག་རྒྱུའི་དབའ་རླབས་དེ་དག་ཇི་ལྟ་བ་བཞིན་ནོ། །དཔེར་ན་ལ་ལ་ཞིག་གིས་སྔགས་དང་། འཁྲུལ་འཁོར་གྱིས་སེམས་ཅན་དུ་བགྲང་བ་མ་ཡིན་པ་སྟོན་པ་འདྲེ་དང་སྦྱོར་བར་ལྡན་ན་གཡོ་བའི་ལས་བྱེད་དེ། བྱིས་པ་རྣམས་ཀྱིས་རྣམ་པར་རྟོག་པས་འགྲོ་བ་དང་། འོང་བ་ཉིད་དུ་མངོན་པར་ཞེན་ཏོ། །དེ་བཞིན་དུ་མུ་སྟེགས་བྱེད་ལྟ་བ་ངན་པའི་བསམ་པ་ཅན་དག་ཀྱང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པའི་ལྟ་བ་ལ་རྟེན་ཅིང་སྤྲོས་པ་ལ་མངོན་པར་ཞེན་པས་ཡང་དག་པ་མ་ཡིན་པར་སྒྲོ་འདོགས་སོ། །བློ་གྲོས་ཆེན་པོ་དེ་བས་ན་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་དངོས་པོ་འདོད་པ་དག་གིས་སྐྱེ་བ་དང་། གནས་པ་དང་། འཇིག་པ་དང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པ་ལ་སོགས་པའི་ལྟ་བ་ངན་པའི་རྣམ་པར་རྟོག་པ་རྣམས་ཡོངས་སུ་སྤང་བར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །སྒྱུ་མ་རྨི་ལམ་ཆུ་གྲིབ་ཤིང་། །སྐྲ་ཤད་འཛིངས་དང་སྨིག་རྒྱུ་ལྟར། །སྲིད་གསུམ་དག་ནི་རབ་རྟོགས་ན། །མཐར་ནི་རྣམ་པར་གྲོལ་བར་འགྱུར། །རི་དགས་སྐོམ་པའི་འདུ་ཤེས་ཀྱི། །གཡོ་བས་སེམས་ནི་བསླུས་པས་ན། །སྨིག་རྒྱུ་ལ་ནི་ཆུར་རྟོག་ཀྱང་། །ཆུ་ཡི་དངོས་པོ་ཡང་དག་མེད། །དེ་བཞིན་རྣམ་ཤེས་ས་བོན་པ། །གཡོ་ཞིང་གྱུར་པས་ཡུལ་དུ་སྣང་། །བྱིས་པ་རྣམ་རྟོག་གང་སྐྱེས་པ། །རབ་རིབ་ཅན་གྱི་རབ་རིབ་བཞིན། །ཐོག་མ་མེད་པའི་འཁོར་བ་ལ། །དངོས་པོར་འཛིན་ཅིང་མངོན་ཞེན་པ། །མི་འཐུན་ཁྱེའུས་ཁྱེའུ་དབྱུང་བཞིན། །འདོད་རྒྱུ་འཛིན་པ་རབ་ཏུ་སྤོངས། །སྒྱུ་མ་རོ་ལངས་འཁྲུལ་འཁོར་དང་། །
སྤྲིན་དང་རྨི་ལམ་གློག་ལྟ་བུར། །རབ་ཏུ་རྟོག་ན་རྣམ་གྲོལ་ཞིང་། །རྒྱུན་གསུམ་དག་ནི་གཏན་དུ་སྤོངས། །འདི་ལ་བྱེད་པ་གང་ཡང་མེད། །སྨིག་རྒྱུ་ནམ་མཁའ་ཇི་བཞིན་ཏེ། །དེ་ལྟར་ཆོས་རྣམས་རབ་ཤེས་ན། །ཤེས་པར་བྱ་བ་ཅི་ཡང་མེད། །བསྟན་པ་དག་ནི་མིང་ཙམ་སྟེ། །དེ་ལ་མཚན་ཉིད་ཡོད་མ་ཡིན། །གང་ལ་རྣམ་རྟོག་སྐྱེད་པ་ཡི། །ཕུང་པོའི་འདུ་བྱེད་སྐྲ་ཤད་འདྲ། །རི་མོ་སྐྲ་ཤད་འཛིངས་པ་དང་། །སྒྱུ་མ་རྨི་ལམ་དྲི་ཟའི་གྲོང་། །མགལ་མེའི་འཁོར་ལོའི་སྨིག་རྒྱུ་དག །མེད་ཀྱང་སེམས་ཅན་རྣམས་ལ་སྣང་། །རྟག་དང་མི་རྟག་གཅིག་ཐ་དད། །གཉི་ག་གཉིས་མིན་དེ་བཞིན་ཏེ། །ཐོག་མ་མེད་ཀྱི་ཉེས་འབྲེལ་བས། །བྱིས་པ་མོས་པས་རབ་ཏུ་རྟོག །མེ་ལོང་ཆུ་དང་མིག་རྣམས་དང་། །ཡིད་བཞིན་ནོར་བུ་རིན་པོ་ཆེ། །དེ་ན་གཟུགས་བརྙན་སྣང་མོད་ཀྱི། །དེ་ནི་ཡང་དག་ཡོད་པ་མིན། །དངོས་པོར་སྣང་བ་ཐམས་ཅད་ནི། །རི་མོ་དང་ནི་སྨིག་རྒྱུ་བཞིན། །རྣམ་པ་སྣ་ཚོགས་གཟུགས་སྣང་ཡང་། །རྨི་ལམ་འདྲ་སྟེ་ཡོད་མ་ཡིན། །གཞན་ཡང་བློ་གྲོས་ཆེན་པོ་དེ་བཞིན་གཤེགས་པ་རྣམས་ཀྱི་བསྟན་པའི་ཆོས་ནི་མུ་བཞི་དང་བྲལ་བ་ཡིན་ཏེ། འདི་ལྟ་སྟེ། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པ་སྤངས་པ། ཡོད་པ་དང་། མེད་པའི་སྒྲོ་འདོགས་པ་དང་། སྐུར་པ་ལས་རྣམ་པར་གྲོལ་བའོ། །དེ་བཞིན་གཤེགས་པའི་ཆོས་བསྟན་པ་ནི་ཡང་དག་པའི་བདེན་པ་དང་། རྟེན་ཅིང་འབྲེལ་པར་འབྱུང་བ་དང་། ལམ་དང་། འགོག་པ་དང་། རྣམ་པར་ཐར་པ་རབ་ཏུ་འབྱེད་ཅིང་སྡུད་པར་བྱེད་པས་དེ་དག་སྔོན་དུ་བཏང་བ་ཡིན་གྱི། ངོ་བོ་ཉིད་དང་། དབང་ཕྱུག་དང་། རྒྱུ་མེད་པ་དང་། རྡུལ་ཕྲ་མོ་དང་། དུས་དང་། རང་བཞིན་དང་འབྲེལ་བར་ཆོས་སྟོན་པ་ནི་མ་ཡིན་ནོ། །གཞན་ཡང་བློ་གྲོས་ཆེན་པོ་ཉོན་མོངས་པ་དང་། ཤེས་བྱའི་སྒྲིབ་པ་རྣམ་པར་དག་པར་བྱ་བའི་ཕྱིར་དེད་དཔོན་ལྟར་ཚིག་བརྒྱ་རྩ་བརྒྱད་དང་། སྣང་བ་མེད་པ་དང་། ཐེག་པ་དང་། ས་རྣམས་ཤིན་ཏུ་རྣམ་པར་འབྱེད་པའི་མཚན་ཉིད་ལ་མཐར་གྱིས་རབ་ཏུ་འཇུག་གོ །གཞན་ཡང་བློ་གྲོས་ཆེན་པོ་བསམ་གཏན་རྣམ་པ་བཞི་ཡོད་དེ་རྣམ་པ་བཞི་གང་ཞེ་ན། འདི་ལྟ་སྟེ། བྱིས་པ་ཉེ་བར་སྤྱོད་པའི་བསམ་གཏན་དང་། དོན་རབ་ཏུ་འབྱེད་པའི་བསམ་གཏན་དང་། དེ་བཞིན་ཉིད་དམིགས་པའི་བསམ་གཏན་དང་། དེ་བཞིན་གཤེགས་པའི་
བསམ་གཏན་ནོ། །དེ་ལ་བྱིས་པ་ཉེ་བར་སྤྱོད་པའི་བསམ་གཏན་གང་ཞེ་ན། འདི་ལྟ་སྟེ། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་གྱི་རྣལ་འབྱོར་པ་རྣམས་གང་ཟག་ལ་བདག་མེད་པ་དང་། དངོས་པོའི་རང་དང་སྤྱིའི་མཚན་ཉིད་ཀེང་རུས་དང་། མི་རྟག་པ་དང་། སྡུག་བསྔལ་བ་དང་། མི་སྡུག་པའི་མཚན་ཉིད་ལ་མངོན་པར་ཞེན་པ་སྔོན་དུ་བཏང་སྟེ། འདི་ནི་མཚན་ཉིད་འདི་ལྟ་བུ་ཡིན་ཏེ། གཞན་དུ་མ་ཡིན་ནོ་ཞེས་བརྟགས་ནས་སྔ་མ་ལས་གོང་ནས་གོང་དུ་ཁྱད་པར་ཅན་དུ་འགྱུར་ཏེ། འདུ་ཤེས་མི་འགོག་པ་གང་ཡིན་པ་དེ་ནི་བྱིས་པ་ཉེ་བར་སྤྱོད་པའི་བསམ་གཏན་ཞེས་བྱའོ། །དོན་རབ་ཏུ་འབྱེད་པའི་བསམ་གཏན་གང་ཞེ་ན། འདི་ལྟ་སྟེ། གང་ཟག་ལ་བདག་མེད་པ་དང་། རང་དང་སྤྱིའི་མཚན་ཉིད་དང་། མུ་སྟེགས་ཅན་གྱི་བདག་དང་། གཞན་དང་། གཉི་ག་དངོས་པོ་མེད་པར་གྱུར་པ་ལ་ཆོས་བདག་མེད་པར་བརྟགས་ནས། ས་དེ་དག་གི་མཚན་ཉིད་ཀྱི་དོན་གོང་ནས་གོང་དུ་ཁྱད་པར་ཅན་དུ་འགྱུར་བ་ནི་དོན་རབ་ཏུ་འབྱེད་པའི་བསམ་གཏན་ཞེས་བྱའོ། །དེ་བཞིན་ཉིད་ལ་དམིགས་པའི་བསམ་གཏན་གང་ཞེ་ན། འདི་ལྟ་སྟེ། རྣམ་པར་རྟོག་པས་བདག་མེད་པ་གཉིས་སུ་རྣམ་པར་རྟོག་པ་ཡང་དག་པ་ཇི་ལྟ་བ་བཞིན་གྱི་གནས་ལ་རྣམ་པར་རྟོག་པ་མི་སྐྱེད་པ་ནི་དེ་བཞིན་ཉིད་ལ་དམིགས་པའི་བསམ་གཏན་ཞེས་བྱའོ། །དེ་བཞིན་གཤེགས་པའི་བསམ་གཏན་གང་ཞེ་ན། འདི་ལྟ་སྟེ། དེ་བཞིན་གཤེགས་པའི་སའི་རྣམ་པ་ལ་འཇུག་པ་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་མཚན་ཉིད་གསུམ་གྱི་བདེ་བ་ལ་གནས་ནས། སེམས་ཅན་གྱི་དོན་བསམ་གྱིས་མི་ཁྱབ་པའི་བྱ་བ་བྱེད་པ་ནི་དེ་བཞིན་གཤེགས་པའི་བསམ་གཏན་ཞེས་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །བྱིས་པ་ཉེ་སྤྱོད་བསམ་གཏན་དང་། །དོན་གྱི་མཚན་ཉིད་འབྱེད་བསམ་གཏན། །དེ་བཞིན་ཉིད་དམིགས་བསམ་གཏན་དང་། །དེ་བཞིན་གཤེགས་པའི་དགེ་བསམ་གཏན། །རྣལ་འབྱོར་ཅན་གྱིས་བརྩོན་བྱས་ན། །ཉི་མ་ཟླ་བའི་དབྱིབས་འདྲ་དང་། །པད་མ་དང་ནི་གཡང་ས་དང་། །ནམ་མཁའ་དང་ནི་མེ་ཟད་ལྟར། །རྣལ་འབྱོར་པས་ནི་གང་རྟོག་པ། །མཚན་མ་སྣ་ཚོགས་དེ་དག་ནི། །མུ་སྟེགས་ལམ་འབྱེད་བསམ་གཏན་ཏེ། །ཉན་ཐོས་དང་ནི་རང་རྒྱལ་
གྱི། །སྤྱོད་ཡུལ་དུ་ཡང་ལྟུང་བར་བྱེད། །འདི་དག་ཐམས་ཅད་རབ་སྤངས་ན། །དེ་ནི་སྣང་བ་མེད་པ་ཡིན། །ཞིང་རྣམས་ཀུན་གྱི་སངས་རྒྱས་ཀྱི། །བསམ་གྱིས་མི་ཁྱབ་ཕྱག་གིས་ནི། །དེ་ཡི་མགོ་ལ་ཉུག་མཛད་དེ། །དེ་བཞིན་ཉིད་ཀྱི་རྗེས་ཞུགས་བརྟགས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མྱ་ངན་ལས་འདས་པ་ཞེས་བགྱི་བ་ཆོས་ཇི་ལྟ་བུ་ཞིག་ལ་མྱ་ངན་ལས་འདས་པ་ཞེས་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་རང་བཞིན་ཐམས་ཅད་ཀྱི་བག་ཆགས་ཀྱི་ཀུན་གཞི་དང་། ཡིད་དང་། ཡིད་ཀྱི་རྣམ་པར་ཤེས་པ་དང་། ལྟ་བའི་བག་ཆགས་རབ་ཏུ་གྱུར་པ་ནི་མྱ་ངན་ལས་འདས་པ་ཞེས་བྱ་སྟེ། སངས་རྒྱས་རྣམས་དང་། ངའི་མྱ་ངན་ལས་འདས་པ་རང་བཞིན་སྟོང་པ་ཉིད་ཀྱི་དངོས་པོའི་སྤྱོད་ཡུལ་ལོ། །གཞན་ཡང་བློ་གྲོས་ཆེན་པོ་མྱ་ངན་ལས་འདས་པ་ནི་འཕགས་པ་སོ་སོ་རང་གིས་རིག་པའི་ཡེ་ཤེས་ཀྱི་སྤྱོད་ཡུལ་ཏེ། རྟག་པ་དང་། ཆད་པར་རྣམ་པར་རྟོག་པ་དང་། དངོས་པོ་དང་། དངོས་པོ་མེད་པར་རྣམ་པར་སྤངས་པའོ། །ཇི་ལྟར་རྟག་པ་མ་ཡིན་ཞེ་ན། འདི་ལྟ་སྟེ། རང་དང་སྤྱིའི་མཚན་ཉིད་དུ་རྣམ་པར་རྟོག་པ་སྤངས་པའི་ཕྱིར། རྟག་པ་མ་ཡིན་ནོ། །ཇི་ལྟར་ཆད་པ་མ་ཡིན་ཞེ་ན། འདི་ལྟ་སྟེ། འདས་པ་དང་། མ་འོངས་པ་དང་། ད་ལྟར་བྱུང་བའི་འཕགས་པ་ཐམས་ཅད་ཀྱིས་སོ་སོ་རང་གིས་རིག་པ་ཐོབ་པའི་ཕྱིར་ཆད་པ་མ་ཡིན་ནོ། །བློ་གྲོས་ཆེན་པོ་མྱ་ངན་ལས་འདས་པ་ནི་མི་འཇིག་མི་འཆི་སྟེ། གལ་ཏེ་མྱ་ངན་ལས་འདས་པ་འཆི་བ་ཞིག་ཡིན་ན་ནི་ཡང་སྐྱེ་བའི་རྒྱུན་ལེན་པར་འགྱུར་རོ། །ཅི་སྟེ་འཇིག་པ་ཞིག་ཡིན་ན་ནི་འདུས་བྱས་ཀྱི་མཚན་ཉིད་དུ་ལྟུང་བར་འགྱུར་ཏེ། དེའི་ཕྱིར་མྱ་ངན་ལས་འདས་པ་ནི་འཇིག་པ་དང་། འཆི་བ་དང་། བྲལ་བས་ན་རྣལ་འབྱོར་པ་རྣམས་སྐབས་སུ་འགྲོ་བ་ཡིན་ནོ། །གཞན་ཡང་བློ་གྲོས་ཆེན་པོ་མྱ་ངན་ལས་འདས་པ་ནི་སྤངས་པ་མ་ཡིན་པ་དང་། ཐོབ་པ་མ་ཡིན་པ་དང་། ཆད་པ་མ་ཡིན་པ་དང་། རྟག་པ་མ་ཡིན་པ་དང་། དོན་གཅིག་པ་མ་ཡིན་པ་དང་། དོན་སྣ་ཚོགས་མ་ཡིན་པ་ནི་མྱ་ངན་ལས་འདས་པ་ཞེས་བྱའོ། །གཞན་ཡང་བློ་
གྲོས་ཆེན་པོ་ཉན་ཐོས་དང་། རང་སངས་རྒྱས་ཀྱི་མྱ་ངན་ལས་འདས་པ་ནི་རང་དང་སྤྱིའི་མཚན་ཉིད་ཁོང་དུ་ཆུད་པ་དང་། ཡུལ་གྱི་འདུ་འཛི་མེད་པ་དང་། ཕྱིན་ཅི་ལོག་པར་མཐོང་བས་རྣམ་པར་རྟོག་པ་མི་སྐྱེ་བ་སྟེ། དེ་དག་གིས་དེ་ལ་མྱ་ངན་ལས་འདས་པའི་བློར་འགྱུར་རོ། །གཞན་ཡང་བློ་གྲོས་ཆེན་པོ་རང་བཞིན་གྱི་མཚན་ཉིད་ནི་རྣམ་པ་གཉིས་ཏེ། གཉིས་གང་ཞེ་ན། འདི་ལྟ་སྟེ། བརྗོད་པའི་རང་བཞིན་གྱི་མཚན་ཉིད་ལ་མངོན་པར་ཞེན་པ་དང་། དངོས་པོའི་རང་བཞིན་གྱི་མཚན་ཉིད་ལ་མངོན་པར་ཞེན་པའོ། །དེ་ལ་བརྗོད་པའི་རང་བཞིན་གྱི་མཚན་ཉིད་ལ་མངོན་པར་ཞེན་པ་ནི་ཐོག་མ་མེད་པའི་དུས་ཀྱི་ཚིག་ཏུ་སྤྲོས་པའི་བག་ཆགས་ལ་མངོན་པར་ཞེན་པ་ལས་བྱུང་ངོ་། །དངོས་པོའི་རང་བཞིན་གྱི་མཚན་ཉིད་ལ་མངོན་པར་ཞེན་པ་ནི་རང་གི་སེམས་སྣང་བ་ཙམ་དུ་ཁོང་དུ་མ་ཆུད་པ་ལས་འབྱུང་ངོ་། །གཞན་ཡང་བློ་གྲོས་ཆེན་པོ་དེ་བཞིན་གཤེགས་པ་རྣམས་ནི་བྱིན་གྱི་རླབས་རྣམ་པ་གཉིས་རྣམ་པར་གཞག་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་རྣམས་ཀྱི་ཞབས་ལ་མགོ་བོས་གཏུག་ཅིང་དྲི་བ་ཡོངས་སུ་འདྲིའོ། །བྱིན་གྱི་རླབས་རྣམ་པ་གཉིས་རྣམ་པར་གཞག་པ་གང་ཞེ་ན། འདི་ལྟ་སྟེ། ཏིང་ངེ་འཛིན་ལ་སྙོམས་པར་འཇུག་པ་དང་། སྐུ་དང་། ཞལ་དང་། གསུང་ཐམས་ཅད་རབ་ཏུ་སྟོན་པའི་བྱིན་གྱི་རླབས་དང་། ཕྱག་གིས་དབང་བསྐུར་བའི་བྱིན་གྱི་རླབས་སོ། །དེ་ལ་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་བྱང་ཆུབ་སེམས་དཔའི་ས་དང་པོ་ལ་སངས་རྒྱས་ཀྱི་བྱིན་གྱི་རླབས་ལ་རབ་ཏུ་གནས་ཏེ། འདི་ལྟར་བྱང་ཆུབ་སེམས་དཔའ་ཐེག་པ་ཆེན་པོ་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་འཇུག་ཅིང་། ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་ཕྱོགས་བཅུའི་འཇིག་རྟེན་ན་བཞུགས་པའི་སངས་རྒྱས་རྣམས་ཀྱི་བྱིན་གྱི་རླབས་ཀྱི་མཐུས་ཀུན་དུ་སྐུ་དང་། ཞལ་དང་། གསུང་ཐམས་ཅད་རབ་ཏུ་སྟོན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང་། ཡོན་ཏན་དེ་ལྟ་བུའི་མཚན་ཉིད་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་ལ་ཇི་ལྟ་བ་བཞིན་ནོ། །བློ་གྲོས་ཆེན་པོ་འདི་ནི་བྱང་ཆུབ་སེམས་དཔའི་ས་དང་པོ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཏིང་ངེ་འཛིན་ལ་སྙོམས་པར་འཇུག་པར་
བྱིན་གྱིས་བརླབས་པ་རབ་ཏུ་ཐོབ་པ་ཞེས་བྱ་སྟེ། བསྐལ་པ་བརྒྱ་སྟོང་དུ་དགེ་བའི་རྩ་བ་བསགས་པ་ལས་མངོན་པར་གྲུབ་པའོ། །རིམ་གྱིས་ས་རྣམས་ཀྱི་གཉེན་པོ་དང་མི་འཐུན་པའི་ཕྱོགས་ཀྱི་མཚན་ཉིད་རྟོགས་པར་ཁོང་དུ་ཆུད་པས་ས་ཆོས་ཀྱི་སྤྲིན་ལ་འཇུག་སྟེ། པད་མ་ཆེན་པོའི་གཞལ་མེད་ཁང་ཁྱད་པར་ཅན་ན་གནས་ཤིང་པད་མ་ཆེན་པོ་རིན་པོ་ཆེའི་སེང་གེའི་སྟན་ལ་འདུག་ནས། སྐལ་བ་མཉམ་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་གྱིས་ཡོངས་སུ་བསྐོར་བ་ལ་རིན་པོ་ཆེ་སྣ་ཚོགས་ཀྱི་ཕྲེང་བས་ལུས་རབ་ཏུ་བརྒྱན་པས་གསེར་བཙོ་མ་དང་། མེ་ཏོག་ཙམ་པ་ཀ་དང་། ཉི་མ་དང་། ཟླ་བའི་འོད་ཟེར་ཇི་ལྟ་བ་བཞིན་ནོ། །ཕྱོགས་བཅུ་ནས་གཤེགས་པའི་རྒྱལ་བ་རྣམས་པད་མ་ཆེན་པོའི་གཞལ་མེད་ཁང་ན་སྟན་ལ་འདུག་པ་དེ་ལ་སྤྱི་བོ་ནས་དབང་བསྐུར་བར་མཛད་དེ། ཇི་ལྟར་དབང་ཕྱུག་དང་། འཁོར་ལོས་སྒྱུར་བའི་རྒྱལ་པོ་དང་། ལྷའི་དབང་པོའི་བུ་བཞིན་དུ་སྤྱི་བོར་དབང་བསྐུར་བ་མཛད་པས་འདི་ནི་བྱང་ཆུབ་སེམས་དཔའ་རྣམས་ཀྱི་ཕྱག་གིས་དབང་བསྐུར་བའི་བྱིན་གྱི་རླབས་ཞེས་བྱའོ། །བློ་གྲོས་ཆེན་པོ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱིན་གྱི་རླབས་རྣམ་པ་གཉིས་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་གལ་ཏེ་བྱིན་གྱི་རླབས་རྣམ་པ་གཉིས་ལ་གནས་ན་སངས་རྒྱས་ཐམས་ཅད་མཐོང་བར་ནུས་ཀྱི། དེ་ལྟ་མ་ཡིན་ན་ནི་མཐོང་བར་མི་ནུས་སོ། །གཞན་ཡང་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཇི་ཙམ་དུ་ཏིང་ངེ་འཛིན་དང་། རྫུ་འཕྲུལ་དང་། ཆོས་སྟོན་པའི་སྤྱོད་པ་རབ་ཏུ་དབྱེ་བ་ལ་སོགས་པ་དེ་དག་ཐམས་ཅད་ནི་དེ་བཞིན་གཤེགས་པའི་བྱིན་གྱི་རླབས་རྣམ་པ་གཉིས་ལ་གནས་པས་སོ། །བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གལ་ཏེ་སངས་རྒྱས་ཀྱི་བྱིན་གྱི་རླབས་དང་ཡོངས་སུ་བྲལ་བས་ཀྱང་སྤོབས་པས་ཆོས་སྟོན་པར་ནུས་ན་ནི་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་ཀྱང་ཆོས་སྟོན་ནུས་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་བྱིན་གྱི་རླབས་ལ་མི་གནས་པའི་ཕྱིར་རོ། །བློ་གྲོས་ཆེན་པོ་རི་དང་། རྡོ་དང་། ཤིང་ལྗོན་པ་དང་། ཤིང་དང་། རོལ་མོའི་ཆོས་ཆ་བྱད་རྣམ་པ་སྣ་ཚོགས་དང་། གྲོང་ཁྱེར་
དང་། གྲོང་རྡལ་དང་། ཁང་པ་དང་། གཞལ་མེད་ཁང་དག་ཀྱང་དེ་བཞིན་གཤེགས་པ་གྲོང་ཁྱེར་དུ་བྱོན་པའི་བྱིན་གྱི་རླབས་ཀྱིས་དེ་དག་ཐམས་ཅད་ལས་རོལ་མོའི་སྒྲ་རང་བྱུང་ན་སེམས་ཡོད་པ་དག་ལྟ་ཅི་སྨོས། འོན་པ་དང་། ལོང་བ་དང་། ལྐུགས་པ་དག་ཀྱང་སྡུག་བསྔལ་རྣམ་པ་སྣ་ཚོགས་ལས་རྣམ་པར་འགྲོལ་ཏེ། དེ་བཞིན་གཤེགས་པ་ནི་འདི་ལྟ་བུ་ལ་སོགས་པའི་བྱིན་གྱི་རླབས་ཚད་མེད་པས་སེམས་ཅན་རྣམས་ལ་ཕན་འདོགས་སོ། །བྱང་ཆུབ་སེམས་དཔའ་བློ་གྲོས་ཆེན་པོས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཅིའི་རྒྱུ་དང་རྐྱེན་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་ལ་སྙོམས་པར་འཇུག་པའི་དུས་དང་། ཁྱད་པར་གྱི་དབང་བསྐུར་བའི་དུས་ལ་གནས་པ་དག་ལ་བྱིན་གྱིས་རློབ་པར་མཛད། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་བདུད་ཀྱི་ལས་དང་ཉོན་མོངས་པ་སྤང་བའི་ཕྱིར་དང་། ཉན་ཐོས་ཀྱི་ས་དང་བསམ་གཏན་དུ་མི་ལྟུང་ཞིང་དེ་བཞིན་གཤེགས་པ་སོ་སོ་རང་གིས་རིག་པའི་ས་ཐོབ་པར་བྱ་བའི་ཕྱིར་དང་། ཐོབ་པར་བྱ་བའི་ཆོས་རྣམ་པར་འཕེལ་ཞིང་ཁྱད་པར་ཅན་དུ་བྱ་བའི་ཕྱིར་ཏེ། དེས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་བྱིན་གྱི་རླབས་རྣམ་པར་གཞག་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བྱིན་གྱིས་རློབ་པར་མཛད་དོ། །གལ་ཏེ་བྱིན་གྱི་རླབས་ཀྱིས་བྱིན་གྱིས་མ་བརླབས་ན་མུ་སྟེགས་ཅན་གྱི་ལྟ་བ་ངན་པའི་རྣམ་པར་རྟོག་པ་དང་། ཉན་ཐོས་དང་། བདུད་ཀྱི་བསམ་པར་ལྟུང་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་སྟེ། དེ་ལྟར་དེའི་ཕྱིར་དེ་བཞིན་གཤེགས་པ་རྣམས་བྱིན་གྱི་རླབས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྗེས་སུ་བཟུང་བ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །བྱིན་རླབས་ལྡན་པ་མི་ཡི་གཙོ། །སྨོན་ལམ་ཆེན་པོ་རྣམ་དག་པ། །ཏིང་ངེ་འཛིན་དང་དབང་བསྐུར་དག །དང་པོར་དང་ནི་ས་བཅུར་འབྱུང་།། །།
འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས། བམ་པོ་བཞི་པ། དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་རྟེན་ཅིང་འབྲེལ་པར་འབྱུང་བ་བཀའ་སྩལ་པས། རྒྱུ་དང་རྐྱེན་རྣམ་པར་བརྗོད་པ་ཉིད་མཛད་ཀྱི། རང་གི་ཚུལ་གྱི་གཏམ་ནི་མ་གསུངས་སོ། །བཅོམ་ལྡན་འདས་མུ་སྟེགས་ཅན་རྣམས་ཀྱང་རྟེན་ཅིང་འབྲེལ་པར་འབྱུང་བ་བཤད་དེ། འདི་ལྟ་སྟེ། གཙོ་བོ་དང་། དབང་ཕྱུག་དང་། དུས་དང་། རྡུལ་ཕྲ་མོ་ལས་དངོས་པོ་རྣམས་སྐྱེ་བར་བརྗོད་དོ། །བཅོམ་ལྡན་འདས་ཀྱིས་རྒྱུ་དང་རྐྱེན་ལས་དངོས་པོ་རྣམས་སྐྱེ་བར་གསུངས་ཤིང་བརྗོད་པ་ལ་ཡང་བར་དུ་ཆོད་པ་དང་བཅས་པའི་གྲུབ་པའི་མཐའ་དང་། བར་དུ་ཆོད་པ་མ་མཆིས་པའི་གྲུབ་པའི་མཐའ་མཆིས་སོ། །བཅོམ་ལྡན་འདས་མུ་སྟེགས་ཅན་དག་ཀྱང་མཆིས་པ་དང་མ་མཆིས་པ་ལས་སྐྱེ་བར་བརྗོད། བཅོམ་ལྡན་འདས་ཀྱིས་ཀྱང་མ་མཆིས་པ་ལས་འབྱུང་ལ་བྱུང་ནས་ཀྱང་འཇིག་པར་གསུངས་ཏེ། ཇི་ལྟར་བཅོམ་ལྡན་འདས་ཀྱིས་མ་རིག་པའི་རྐྱེན་གྱིས་འདུ་བྱེད་ནས་རྒ་ཤིའི་བར་དུ་གསུངས་པ་འདི་ཡང་བཅོམ་ལྡན་འདས་ཀྱིས་རྒྱུ་མ་མཆིས་པར་སྨྲ་བ་རྣམ་པར་བརྗོད་པ་གསུངས་ཀྱི་རྒྱུར་སྨྲ་བ་གསུངས་པ་མ་ལགས་སོ། །བཅོམ་ལྡན་འདས་ཀྱིས་འདི་ཡོད་པས་འདི་བྱུང་ངོ་ཞེས་རྣམ་པར་གཞག་པ་གསུམ་པ་འདི་ནི་རིམ་གྱིས་འབྱུང་བར་གཞག་པ་མ་ལགས་པར་མུ་སྟེགས་ཅན་གྱིས་རྣམ་པར་བརྗོད་པ་ཉིད་བཟུང་གི། དེ་བཞིན་གཤེགས་པའི་ནི་དེ་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་མུ་སྟེགས་ཅན་རྣམས་ཀྱིས་ནི་རྟེན་ཅིང་འབྲེལ་པར་འབྱུང་བ་མ་ལགས་པའི་རྒྱུས་འབྲས་བུ་མངོན་པར་སྒྲུབ་བོ། །བཅོམ་ལྡན་འདས་ཀྱིས་ནི་རྒྱུ་ཡང་དངོས་པོ་ལ་ལྟོས། དངོས་པོ་ཡང་རྒྱུ་ལ་ལྟོས་པས་རྒྱུ་དང་རྐྱེན་ཡང་འཆོལ་པར་འགྱུར་ཞིང་དེ་བཞིན་དུ་ཕན་ཚུན་དུ་ཐུག་པ་མ་མཆིས་པར་ཡང་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ང་ནི་རྒྱུ་མེད་པར་སྨྲ་བ་དང་། རྒྱུ་དང་རྐྱེན་ཆོལ་པོར་སྨྲ་བ་མ་ཡིན་ཏེ། འདི་ཡོད་པར་འདི་འབྱུང་ངོ་ཞེས་བརྗོད་པ་ནི་གཟུང་བ་དང་འཛིན་པ་ངོ་བོ་ཉིད་མེད་
པ་དང་། རང་གི་སེམས་སྣང་བ་ཙམ་དུ་ཁོང་དུ་ཆུད་པའི་ཕྱིར་རོ། །བློ་གྲོས་ཆེན་པོ་གང་གཟུང་བ་དང་འཛིན་པ་ལ་མངོན་པར་ཞེན་པ་དང་། ཕྱི་རོལ་གྱི་ཡུལ་གྱི་དངོས་པོ་དངོས་པོ་མེད་པ་དང་། རང་གི་སེམས་སྣང་བ་ཙམ་ཁོང་དུ་མ་ཆུད་པ་དེ་དག་ལ་ནི་འདི་ལྟ་བུའི་ཉེས་པར་འགྱུར་གྱི་ངའི་རྟེན་ཅིང་འབྲེལ་པར་འབྱུང་བ་ལ་ནི་མ་ཡིན་ནོ། །བློ་གྲོས་ཆེན་པོས་ཡང་གསོལ་པ། བཅོམ་ལྡན་འདས་བརྗོད་པ་དངོས་པོ་མ་མཆིས་པ་ལགས་ན་དངོས་པོ་ཐམས་ཅད་ཀྱང་མཆིས་པ་མ་ལགས་སམ། བཅོམ་ལྡན་འདས་དངོས་པོ་དག་མ་མཆིས་སུ་ལགས་ན་ནི་བརྗོད་པ་ཡང་འབྱུང་བར་མི་འགྱུར་ན། བཅོམ་ལྡན་འདས་དེའི་སླད་དུ་བརྗོད་པ་དངོས་པོ་མཆིས་པས་དངོས་པོ་ཐམས་ཅད་ཀྱང་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དངོས་པོ་མེད་པ་དག་ཀྱང་བརྗོད་པ་ཡོད་དེ། འདི་ལྟ་སྟེ། རི་བོང་གི་རྭ་དང་། རུས་སྦལ་གྱི་སྤུ་ལ་སོགས་པ་འཇིག་རྟེན་ན་བརྗོད་པར་སྣང་མོད་ཀྱི་བློ་གྲོས་ཆེན་པོ་དེ་དག་ནི་དངོས་པོ་ཡང་མ་ཡིན་དངོས་པོ་མེད་པ་མ་ཡིན་ཏེ་བརྗོད་པ་ཙམ་དུ་ཟད་དོ། །ཇི་ལྟར་ཁྱོད་ཀྱིས་སྨྲས་པ་ལྟར་བརྗོད་པ་རང་བཞིན་ཡོད་པས་དངོས་པོ་ཐམས་ཅད་ཀྱང་ཡོད་ན་ནི་དེ་ལྟ་ན་ཁྱོད་ཀྱི་སྨྲ་བ་དེ་ནི་ཉམས་པར་འགྱུར་རོ། །བློ་གྲོས་ཆེན་པོ་བརྗོད་པ་ནི་སངས་རྒྱས་རྣམས་ཀྱི་ཞིང་ཐམས་ཅད་ནི་ཡོད་པ་མ་ཡིན་ཏེ་བརྗོད་པ་ནི་བྱས་པའོ། །བློ་གྲོས་ཆེན་པོ་སངས་རྒྱས་ཀྱི་ཞིང་ལ་ལ་ན་མིག་མི་འཛུམས་པས། ལ་ལ་ན་མཚན་མ་བསྟན་པས། ལ་ལ་ན་སྨིན་མ་བསྐྱོད་པས། ལ་ལ་ན་མིག་རིག་རིག་བྱས་པས། ལ་ལ་ན་དགོད་པས། ལ་ལ་ན་གླལ་བས། ལ་ལ་ན་སེ་གོལ་གྱི་སྒྲས། ལ་ལ་ན་ཞིང་དྲན་པས། ལ་ལ་ན་བསྐྱོད་པས་ཆོས་སྟོན་ཏེ། བློ་གྲོས་ཆེན་པོ་དཔེར་ན། འཇིག་རྟེན་གྱི་ཁམས་མིག་མི་འཛུམས་པ་དང་། སྤོས་བརྩེགས་དང་། དེ་བཞིན་གཤེགས་པ་ཀུན་དུ་བཟང་པོའི་ཞིང་ཁམས་ན་སྤྱན་མི་འཛུམས་པར་གཟིགས་པ་ཙམ་གྱིས་བྱང་ཆུབ་སེམས་དཔའ་དག་མི་སྐྱེ་བའི་ཆོས་ལ་བཟོད་པ་དང་། ཁྱད་པར་གྱི་ཏིང་འཛིན་གཞན་དག་ཀྱང་རབ་ཏུ་འཐོབ་པར་མཛད་དོ། །བློ་གྲོས་ཆེན་པོ་དེའི་ཕྱིར་བརྗོད་པ་ཡོད་པས་དངོས་པོ་ཐམས་ཅད་
ཡོད་པ་ནི་མ་ཡིན་ནོ། །བློ་གྲོས་ཆེན་པོ་དེ་ནི་འཇིག་རྟེན་འདི་ན་ཡང་སྣང་སྟེ། སྲིན་བུ་དང་། སྦྲང་མ་ལ་སོགས་པའི་སེམས་ཅན་དག་ཀྱང་བརྗོད་པ་མེད་པར་རང་གི་བྱ་བ་བྱེད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ནམ་མཁའ་རི་བོང་རྭ་དག་དང་། །མོ་ཤམ་གྱི་ནི་བུ་དག་ཀྱང་། །མེད་ཀྱང་ཚིག་ཏུ་བརྗོད་པ་ལྟར། །དངོས་ལ་རྟོག་པའང་དེ་བཞིན་ནོ། །རྒྱུ་རྐྱེན་འདུས་པའི་ཆོས་དག་ལ། །སྐྱེ་བར་བྱིས་པ་རྣམ་རྟོག་སྟེ། །ཚུལ་འདི་རབ་ཏུ་མི་ཤེས་པས། །སྲིད་གསུམ་གནས་ན་རབ་ཏུ་འཁྱམ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གང་ལ་རྟག་པའི་སྒྲར་གསུངས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ནོར་བའི་ཕྱིར་ཏེ། ནོར་པ་འདི་ནི་འཕགས་པ་རྣམས་ལ་ཡང་སྣང་མོད་ཀྱི་ཕྱིན་ཅི་ལོག་ཏུ་ནི་མ་ཡིན་ནོ། །བློ་གྲོས་ཆེན་པོ་འདི་ལྟར་འཇིག་རྟེན་ན་མི་མཁས་པ་དག་གིས་སྨིག་རྒྱུ་དང་། མགལ་མེའི་འཁོར་ལོ་དང་། སྐྲ་ཤད་འཛིངས་པ་དང་། དྲི་ཟའི་གྲོང་ཁྱེར་དང་། སྒྱུ་མ་དང་། རྨི་ལམ་དང་། གཟུགས་བརྙན་དག་ལ་ཕྱིན་ཅི་ལོག་ཏུ་འཛིན་གྱི། མཁས་པ་རྣམས་ཀྱིས་ནི་མ་ཡིན་ཏེ་མི་སྣང་བ་ཡང་མ་ཡིན་ནོ། །བློ་གྲོས་ཆེན་པོ་ནོར་པ་དེ་དག་ནི་རྣམ་པ་དུ་མར་སྣང་ཡང་ནོར་པས་མི་རྟག་པར་བྱེད་པ་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། དངོས་པོ་དང་དངོས་པོ་མེད་པ་རྣམ་པར་སྤངས་པའི་ཕྱིར་རོ། །བློ་གྲོས་ཆེན་པོ་ཇི་ལྟར་ན་ནོར་པ་དངོས་པོ་དང་དངོས་པོ་མེད་པ་རྣམ་པར་སྤངས་ཤེ་ན། འདི་ལྟ་སྟེ། བྱིས་པ་ཐམས་ཅད་ཀྱི་སྤྱོད་ཡུལ་སྣ་ཚོགས་པའི་ཕྱིར་རོ། །ཇི་ལྟར་གང་གཱའི་ཀླུང་དེ་ཡི་དགས་རྣམས་ཀྱིས་མཐོང་བ་དང་མི་མཐོང་བའི་ཕྱིར་ནོར་པ་ནི་དངོས་པོ་ཡོད་པ་མ་ཡིན་ནོ། །གཞན་དག་ལ་སྣང་བས་ན་དེའི་ཕྱིར་དངོས་པོ་མེད་པ་ཡང་མ་ཡིན་ཏེ། དེ་ལྟར་ན་ནོར་པ་ནི་འཕགས་པ་རྣམས་ཕྱིན་ཅི་ལོག་དང་ཕྱིན་ཅི་ལོག་མ་ཡིན་པ་རྣམ་པར་སྤངས་པས་དེའི་ཕྱིར་ནོར་པ་ནི་རྟག་པ་སྟེ། འདི་ལྟ་སྟེ། མཚན་མའི་མཚན་ཉིད་མི་འཇིག་པའི་ཕྱིར་རོ། །བློ་གྲོས་ཆེན་པོ་ནོར་པ་ནི་མཚན་མ་སྣ་
ཚོགས་མ་ཡིན་ཏེ། རྣམ་པར་རྟོག་པའི་མཚན་མ་འཇིག་པས་དེའི་ཕྱིར་ནོར་པ་ནི་རྟག་པའོ། །བློ་གྲོས་ཆེན་པོ་ཇི་ལྟར་ན་ནོར་པ་དེ་ཁོ་ན་ཡིན་ཞེ་ན། གལ་ཏེ་ཡང་རྒྱུ་དང་རྐྱེན་གྱི་ནོར་པ་འདི་ལ་འཕགས་པ་རྣམས་ཕྱིན་ཅི་ལོག་གི་བློ་དང་ཕྱིན་ཅི་ལོག་མ་ཡིན་པའི་བློ་ཡང་མི་སྐྱེད་ནའོ། །བློ་གྲོས་ཆེན་པོ་འཕགས་པ་རྣམས་མ་གཏོགས་པར་ནོར་པ་འདི་ལ་ཆུང་ཟད་ཙམ་དུ་འདུ་ཤེས་ཡོད་པ་ནི་འཕགས་པའི་ཡེ་ཤེས་ཀྱི་དངོས་པོའི་མཚན་ཉིད་མ་ཡིན་ནོ། །བློ་གྲོས་ཆེན་པོ་ཆུང་ཟད་ཙམ་ཞེས་བྱ་བ་དེ་ནི་བྱིས་པ་རྣམས་ཀྱི་རྣམ་པར་བརྟགས་པས་བརྗོད་པ་ཡིན་ཏེ། འཕགས་པས་བརྗོད་པ་ནི་མ་ཡིན་ནོ། །ནོར་པ་དེ་ཡང་ཕྱིན་ཅི་ལོག་དང་ཕྱིན་ཅི་ལོག་མ་ཡིན་པར་རྣམ་པར་བརྟགས་པས་རིགས་རྣམ་པ་གཉིས་སྐྱེད་དེ། འདི་ལྟ་སྟེ། འཕགས་པའི་རིགས་དང་། བྱིས་པ་སོ་སོའི་སྐྱེ་བོའི་རིགས་སོ། །འཕགས་པའི་རིགས་ཀྱང་རྣམ་པ་གསུམ་དུ་དབྱེ་བས་འདི་ལྟ་སྟེ། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། སངས་རྒྱས་ཀྱི་ཐེག་པའོ། །ཇི་ལྟར་ན་བྱིས་པ་སོ་སོའི་སྐྱེ་བོ་རྣམས་རྣམ་པར་བརྟགས་པས་ཉན་ཐོས་ཀྱི་ཐེག་པའི་རིགས་སྐྱེད་ཅེ་ན། འདི་ལྟ་སྟེ། རང་དང་སྤྱིའི་མཚན་ཉིད་ལ་མངོན་པར་ཞེན་པས་ཉན་ཐོས་ཀྱི་རིགས་སུ་འགྱུར་ཏེ། དེ་ལྟར་ན་རྣམ་པར་དག་པས་ཉན་ཐོས་ཀྱི་ཐེག་པའི་རིགས་སྐྱེད་པར་བྱེད་པ་ཡིན་ནོ། །བློ་གྲོས་ཆེན་པོ་ནོར་པ་དེ་ཉིད་རྣམ་པར་བརྟགས་པས་རང་སངས་རྒྱས་ཀྱི་ཐེག་པའི་རིགས་སྐྱེད་པར་བྱེད་དེ། འདི་ལྟ་སྟེ། ནོར་པ་དེ་ཉིད་ཀྱི་རང་དང་སྤྱིའི་མཚན་ཉིད་དུ་སྒོམ་པ་ན་མངོན་པར་ཞེན་པ་མེད་པས་རང་སངས་རྒྱས་ཀྱི་ཐེག་པའི་རིགས་སྐྱེད་པར་བྱེད་པ་ཡིན་ནོ། །ཇི་ལྟར་ན་མཁས་པ་རྣམས་ཀྱིས་ནོར་པ་དེ་ཉིད་ལ་རྣམ་པར་བརྟགས་པས་སངས་རྒྱས་ཀྱི་ཐེག་པའི་རིགས་སྐྱེད་པར་བྱེད་པ་ཡིན་ཞེ་ན། འདི་ལྟ་སྟེ། རང་གི་སེམས་སྣང་བ་ཙམ་དུ་ཁོང་དུ་ཆུད་པས་ཕྱི་རོལ་གྱི་དངོས་པོ་དང་། དངོས་པོ་མེད་པར་རྣམ་པར་མི་རྟོག་ན་སངས་རྒྱས་ཀྱི་ཐེག་པའི་རིགས་སྐྱེད་པར་བྱེད་པ་ཡིན་ཏེ། འདི་ནི་ནོར་པ་དེ་ཉིད་ལས་སངས་རྒྱས་ཀྱི་ཐེག་པའི་རིགས་སྐྱེད་པར་བྱེད་པ་ཞེས་བྱའོ། །གཞན་ཡང་དངོས་པོ་སྣ་ཚོགས་ཀྱི་རང་བཞིན་དུ་ནོར་པ་ལ་བྱིས་པ་རྣམས་ཀྱིས་རྣམ་པར་བརྟགས་པས་ན་བྱིས་པ་སོ་སོའི་སྐྱེ་བོའི་རིགས་སྐྱེད་པར་བྱེད་དེ། དེ་ནི་དངོས་པོ་
ཡང་མ་ཡིན། དངོས་པོ་མེད་པ་ཡང་མ་ཡིན་པ་ནི་རིགས་ཀྱི་དོན་ཅེས་བྱའོ། །བློ་གྲོས་ཆེན་པོ་ནོར་པ་དེ་ཉིད་ལ་རྣམ་པར་མི་རྟོག་པས་འཕགས་པ་རྣམས་སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་ལས་འདས་པའི་ཕྱིར་བག་ཆགས་ཀྱི་རང་བཞིན་གྱི་ཆོས་ལས་གཞན་དུ་གྱུར་པའི་དངོས་པོ་ནི་དེ་བཞིན་ཉིད་ཅེས་བྱ་སྟེ། དེའི་ཕྱིར་དེ་བཞིན་ཉིད་ནི་སེམས་ལས་གྲོལ་བའོ་ཞེས་ཚིག་འདི་ངས་སྨྲས་ཏེ། མཚན་མ་རྣམ་པར་སྤངས་པ་བསྟན་པའི་ཕྱིར་མཚན་མ་ཐམས་ཅད་དང་བྲལ་བའོ་ཞེས་སྨྲས་པ་ཡིན་ནོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ནོར་པ་མཆིས་པའམ་མ་མཆིས་པ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཇི་ལྟར་སྒྱུ་མ་བཞིན་དུ་མངོན་པར་ཞེན་པའི་མཚན་ཉིད་མེད་དེ། གལ་ཏེ་ནོར་པ་ལ་མངོན་པར་ཞེན་པའི་མཚན་ཉིད་ཡོད་ན་ནི་མངོན་པར་ཞེན་པའི་དངོས་པོ་ཟློགས་པར་མི་འགྱུར་ལ། རྟེན་ཅིང་འབྲེལ་པར་འབྱུང་བ་འདི་ཡང་མུ་སྟེགས་ཅན་གྱི་རྒྱུ་ལས་སྐྱེ་བ་བཞིན་དུ་འགྱུར་རོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་གལ་ཏེ་ནོར་པ་དེ་སྒྱུ་མ་དང་མཚུངས་པ་ཞིག་ལགས་ན་ནི་དེ་ལྟར་ན་ཉོན་མོངས་པ་གཞན་གྱི་རྒྱུ་བགྱིད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་སྒྱུ་མ་ནི་ནོར་པའི་རྒྱུ་མ་ཡིན་ཏེ། གནས་ངན་ལེན་གྱི་ཉེས་པ་མི་སྐྱེད་པའི་ཕྱིར་རོ། །བློ་གྲོས་ཆེན་པོ་སྒྱུ་མ་ནི་གནས་ངན་ལེན་གྱི་ཉེས་པ་མི་སྐྱེད་དེ། རྣམ་པར་རྟོག་པ་མེད་པའི་ཕྱིར་རོ། །བློ་གྲོས་ཆེན་པོ་སྒྱུ་མ་ནི་གཞན་གྱི་རིག་སྔགས་ཀྱི་མཐུ་ལས་འབྱུང་གི་རང་གི་རྣམ་པར་རྟོག་པའི་གནས་ངན་ལེན་གྱི་བག་ཆགས་ལས་སྐྱེས་པ་མ་ཡིན་པས་དེའི་ཕྱིར་ཉེས་པ་སྐྱེད་པར་བྱེད་པ་མ་ཡིན་ནོ། །བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རྣམས་ཀྱི་ནོར་པའི་སེམས་ཀྱི་མངོན་པར་ཞེན་པ་ཡིན་གྱི་འཕགས་པ་རྣམས་ནི་མ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །འཕགས་པས་ནོར་པ་མི་མཐོང་སྟེ། །དབུས་ནའང་ཡང་དག་ཡོད་མ་ཡིན། །གལ་ཏེ་དབུས་དེ་ཡང་དག་ན། །ནོར་པའང་ཡང་དག་ཉིད་དུ་འགྱུར། །ནོར་པ་ཐམས་ཅད་སྤངས་ནས་ཀྱང་། །
གལ་ཏེ་མཚན་མ་ཡང་སྐྱེད་ན། །དེ་ཉིད་ཀྱང་ནི་ནོར་པ་སྟེ། །རབ་རིབ་ཡོངས་སུ་མ་དག་བཞིན། །གཞན་ཡང་བློ་གྲོས་ཆེན་པོ་སྒྱུ་མ་མ་ཡིན་པ་ཆོས་དང་མཚུངས་པ་ཡོད་པ་མ་ཡིན་པས་ཆོས་ཐམས་ཅད་སྒྱུ་མ་ལྟ་བུར་མཐོང་ངོ་། །བཅོམ་ལྡན་འདས་ལ་བློ་གྲོས་ཆེན་པོས་གསོལ་པ། བཅོམ་ལྡན་འདས་ནི་སྒྱུ་མ་སྣ་ཚོགས་ཀྱི་མཚན་ཉིད་ལ་མངོན་པར་ཞེན་པས་ཆོས་ཐམས་ཅད་སྒྱུ་མ་ལྟ་བུ་ལགས་སམ། འོན་ཏེ་ཐ་དད་པའི་མཚན་ཉིད་ལ་མངོན་པར་ཞེན་པས་ལགས། གལ་ཏེ་སྒྱུ་མ་རྣམ་པ་སྣ་ཚོགས་ཀྱི་མཚན་ཉིད་ལ་མངོན་པར་ཞེན་པས་དངོས་པོ་ཐམས་ཅད་སྒྱུ་མ་ལྟ་བུ་ལགས་ན་ནི། བཅོམ་ལྡན་འདས་དངོས་པོ་རྣམས་སྒྱུ་མ་ལྟ་བུ་ལགས་པར་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་གཟུགས་སྣ་ཚོགས་ཀྱི་མཚན་ཉིད་ནི་རྒྱུ་མ་མཆིས་པ་མ་ལགས་ལ། བཅོམ་ལྡན་འདས་རྒྱུ་གང་ཡང་གཟུགས་སྣ་ཚོགས་ཀྱི་མཚན་ཉིད་སྒྱུ་མ་ལྟ་བུར་སྣང་བར་བགྱིད་པ་མ་མཆིས་སོ། །བཅོམ་ལྡན་འདས་དེའི་སླད་དུ་སྒྱུ་མ་སྣ་ཚོགས་ཀྱི་མཚན་ཉིད་ལ་མངོན་པར་ཞེན་པ་དང་ཆོས་འཐུན་པ་མ་མཆིས་པས་དངོས་པོ་རྣམས་སྒྱུ་མ་ལྟ་བུ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་སྒྱུ་མ་སྣ་ཚོགས་ཀྱི་མཚན་ཉིད་ལ་མངོན་པར་ཞེན་པ་དང་། ཆོས་འཐུན་པས་ཆོས་ཐམས་ཅད་སྒྱུ་མ་ལྟ་བུ་་་་མ་ཡིན་མོད་ཀྱི། འོན་ཀྱང་བློ་གྲོས་ཆེན་པོ་ཆོས་ཐམས་ཅད་ནི་ཡང་དག་པ་མ་ཡིན་ཏེ། མྱུར་དུ་འཇིག་པ་གློག་དང་འདྲ་བས་ན་སྒྱུ་མ་ལྟ་བུ་ཞེས་བྱའོ། །བློ་གྲོས་ཆེན་པོ་དཔེར་ན་གློག་འགྱུ་བ་སྐད་ཅིག་ཏུ་འབྱུང་ལ། བྱུང་ནས་འཇིག་པ་ནི་བྱིས་པ་སོ་སོའི་སྐྱེ་བོ་རྣམས་ལ་མི་སྣང་སྟེ། དེ་བཞིན་དུ་ཆོས་ཐམས་ཅད་ཀྱང་རང་གི་རྣམ་པར་རྟོག་པའི་རང་དང་སྤྱིའི་མཚན་ཉིད་ལ་དངོས་པོ་མེད་པར་རབ་ཏུ་རྣམ་པར་འབྱེད་པ་མེད་པ་དང་། གཟུགས་ཀྱི་མཚན་ཉིད་ལ་མངོན་པར་མ་ཆགས་པ་མེད་པ་ལས་སྣང་ངོ་། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །སྒྱུ་མར་མེད་མིན་ཆོས་འཐུན་པས། །དངོས་པོ་རྣམས་ནི་སྒྱུ་མར་བརྗོད། །ཡང་དག་མ་ཡིན་གློག་འདྲ་བས། །དེ་ཕྱིར་སྒྱུ་མ་ལྟ་བུར་བཤད། །བློ་གྲོས་ཆེན་པོས་ཡང་བཅོམ་ལྡན་འདས་ལ་གསོལ་པ། འདི་ལྟར་བཅོམ་ལྡན་འདས་
ཀྱིས་དངོས་པོ་ཐམས་ཅད་ནི་མ་སྐྱེས་པ་དང་། སྒྱུ་མ་ལྟ་བུ་ཞེས་གསུངས་པས། བཅོམ་ལྡན་འདས་ཀྱིས་དེ་སྐད་དུ་བཀའ་སྩལ་པའི་ཚིག་སྔ་མ་དང་། སླད་མ་འགལ་བ་ནོངས་པར་མི་འགྱུར་རམ་ཅི་ན་དངོས་པོ་རྣམས་སྐྱེ་བ་མ་མཆིས་པ་དང་། སྒྱུ་མ་ལྟ་བུ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ངས་དངོས་པོ་རྣམས་སྐྱེ་བ་མེད་པ་དང་། སྒྱུ་མ་ལྟ་བུར་བརྗོད་ཀྱང་ཚིག་སྔ་ཕྱི་འགལ་བའི་ཉེས་པར་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟ་སྟེ། སྐྱེ་བ་རྣམས་སྐྱེ་བ་མེད་པ་དང་། རང་གི་སེམས་སྣང་བ་ཙམ་དུ་རྟོགས་པ་དང་། ཕྱི་རོལ་གྱི་དངོས་པོ་དང་དངོས་པོ་མེད་པ་ཡོད་པ་དང་མེད་པ་ལས་མི་སྐྱེ་བར་མཐོང་བས་ན། བློ་གྲོས་ཆེན་པོ་ངའི་ཚིག་སྔ་ཕྱི་འགལ་བའི་ཉེས་པར་མི་འགྱུར་ཏེ། འོན་ཀྱང་མུ་སྟེགས་ཅན་གྱི་རྒྱུ་ལས་སྐྱེ་བ་གཞིག་པའི་ཕྱིར་ངས་དངོས་པོ་ཐམས་ཅད་མ་སྐྱེས་པ་ཞེས་བཤད་དོ། །བློ་གྲོས་ཆེན་པོ་མུ་སྟེགས་ཅན་གླེན་པའི་ཚོགས་མང་པོ་རྣམས་ནི་དངོས་པོ་རྣམས་ཡོད་པ་དང་། མེད་པ་ལས་སྐྱེ་བར་འདོད་དེ། རང་གི་རྣམ་པར་རྟོག་པ་སྣ་ཚོགས་ལ་མངོན་པར་ཞེན་པའི་རྐྱེན་གྱིས་ནི་མ་ཡིན་ནོ། །བློ་གྲོས་ཆེན་པོ་ང་ནི་ཡོད་ན་ཡང་མ་ཡིན། མེད་ན་ཡང་མི་སྐྱེ་སྟེ། དེའི་ཕྱིར་ང་ནི་སྐྱེ་བ་མེད་པའི་ཚིག་ཉིད་དུ་བརྗོད་དེ། བློ་གྲོས་ཆེན་པོ་དངོས་པོར་བསྟན་པ་ནི་འཁོར་བར་ཡོངས་སུ་འཛིན་པའི་ཕྱིར་དང་། མེད་དོ་ཞེས་ཆད་པར་ལྟ་བ་རྣམ་པར་བཟློག་པའི་ཕྱིར་དང་། ངའི་སློབ་མ་རྣམས་ལས་སྣ་ཚོགས་ཀྱིས་སྐྱེ་བའི་གནས་ཡོངས་སུ་འཛིན་པར་བསྟན་པའི་ཕྱིར་དངོས་པོའི་སྒྲས་འཁོར་བ་ཡོངས་སུ་འཛིན་པར་བྱེད་དོ་ཞེས་བཤད་དོ། །བློ་གྲོས་ཆེན་པོ་སྒྱུ་མ་ལྟ་བུའི་རང་བཞིན་དང་མཚན་ཉིད་བསྟན་པ་ནི་དངོས་པོའི་རང་བཞིན་དང་མཚན་ཉིད་ཡོངས་སུ་སྤང་བའི་ཕྱིར་ཏེ། བྱིས་པ་སོ་སོའི་སྐྱེ་བོ་ལྟ་བ་ངན་པའི་མཚན་ཉིད་དུ་ལྷུང་བའི་བསམ་པ་ཅན་རང་གི་སེམས་སྣང་བ་ཙམ་དུ་མ་གཏོགས་པས། རྒྱུ་དང་རྐྱེན་དང་བྱེད་པའི་རང་གི་མཚན་ཉིད་དུ་མངོན་པར་ཞེན་པ་རྣམས་རྣམ་པར་གཞག་པའི་ཕྱིར་ཆོས་ཐམས་ཅད་སྒྱུ་མ་དང་རྨི་ལམ་གྱི་རང་བཞིན་དང་མཚན་ཉིད་དུ་བསྟན་ཏོ། །ཅི་ནས་ཀྱང་བྱིས་པ་སོ་སོའི་སྐྱེ་བོ་ལྟ་བ་ངན་པའི་བསམ་པ་ཅན། བདག་དང་གཞན་དང་། ཆོས་ཐམས་ཅད་ལ་མངོན་པར་ཞེན་པ། ཡང་དག་པ་ཇི་
ལྟ་བ་བཞིན་གྱི་གནས་སུ་མཐོང་བ་དག་ལོག་པར་སྨྲ་བར་མི་བྱ་བའི་ཕྱིར་ཏེ། བློ་གྲོས་ཆེན་པོ་ཆོས་ཐམས་ཅད་ཀྱི་ཡང་དག་པར་གནས་པ་ཇི་ལྟ་བ་བཞིན་དུ་མཐོང་བ་ནི་འདི་ལྟ་སྟེ། རང་གི་སེམས་སྣང་བ་ཙམ་ལས་འདས་པའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །སྐྱེ་མེད་བྱེད་པ་དངོས་མ་ཡིན། །དངོས་པོས་འཁོར་བ་ཀུན་སྡུད་དེ། །སྒྱུ་མ་ལ་སོགས་འདྲ་མཐོང་ན། །མཚན་ཉིད་ལ་ནི་རྣམ་མི་རྟོག །གཞན་ཡང་བློ་གྲོས་ཆེན་པོ་མིང་དང་། ཚིག་དང་། ཡི་གེའི་ཚོགས་ཀྱི་མཚན་ཉིད་དུ་རབ་ཏུ་བཤད་པར་བྱ་སྟེ། མིང་དང་། ཚིག་དང་། ཡི་གེའི་ཚོགས་རབ་ཏུ་རྟོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་དོན་དང་། ཚིག་དང་། ཡི་གེའི་ཚོགས་ཀྱི་རྗེས་སུ་ཞུགས་པ་ནི་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། མངོན་པར་རྫོགས་པར་སངས་རྒྱས་ནས་སེམས་ཅན་ཐམས་ཅད་ཀྱང་དེ་བཞིན་དུ་ཁོང་དུ་ཆུད་པར་བྱེད་དོ། །བློ་གྲོས་ཆེན་པོ་དེ་ལ་མིང་གི་ཚོགས་ཞེས་བྱ་བ་ནི་འདི་ལྟ་སྟེ། དངོས་པོ་གང་ལ་བརྟེན་ནས་མིང་དུ་གདགས་པ་ནི་མིང་གི་ཚོགས་ཞེས་བྱའོ། །བློ་གྲོས་ཆེན་པོ་ཚིག་གི་ཚོགས་ནི་འདི་ལྟ་སྟེ། ཚིག་གང་དོན་གྱི་ཚོགས་དང་ལྡན་པ་དང་། རང་གི་ངོ་བོ་ཉིད་གདོན་མི་ཟ་བ་དང་། མཐར་ཐུག་པ་དེ་ནི་ཚིག་གི་ཚོགས་ཞེས་བྱའོ། །བློ་གྲོས་ཆེན་པོ་ཡི་གེའི་ཚོགས་ནི་འདི་ལྟ་སྟེ། གང་གིས་མིང་དང་ཚིག་གསལ་བར་བྱེད་པ་དེ་ནི་ཡི་གེའི་ཚོགས་ཞེས་བྱའོ། །ཡང་ཡི་གེའི་ཚོགས་ནི་འདི་ལྟ་སྟེ། རིང་པོ་དང་། ཐུང་ངུ་དང་། མཐོ་བ་དང་། དམའ་བའོ། །ཡང་ཚིག་གི་ཚོགས་ནི་འགྲོ་བའི་རྗེས་ལྟ་བུ་སྟེ། འདི་ལྟར་གླང་པོ་ཆེ་དང་། རྟ་དང་། མི་དང་། རི་དགས་ལ་སོགས་པ་གང་ས་ལ་འགྲོ་བའི་རྗེས་རྣམས་ནི་ཚིག་གི་ཚོགས་ཞེས་བྱ་བའི་མིང་འཐོབ་བོ། །བློ་གྲོས་ཆེན་པོ་མིང་དང་ཡི་གེ་ནི་འདི་ལྟ་སྟེ། མིང་གིས་ཕུང་པོ་གཟུགས་མེད་པ་བཞི་བརྗོད་པའི་ཕྱིར་རོ། །རང་གི་མཚན་ཉིད་སྣང་བར་བྱེད་པས་ནི་ཡི་གེ་སྟེ། དེ་ནི་མིང་དང་། ཡི་གེའི་ཚོགས་ཞེས་བྱའོ། །འདི་ནི་མིང་དང་། ཚིག་དང་། ཡི་གེའི་ཚོགས་རྣམས་བརྗོད་པའི་མཚན་ཉིད་དེ། དེ་ལ་ཁྱོད་ཀྱིས་ནན་ཏན་དུ་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་
པ་འདི་གསུངས་སོ། །མིང་དང་ཚིག་གི་ཚོགས་རྣམས་དང་། །ཡི་གེའི་ཚོགས་ལ་བྱེ་བྲག་ཏུ། །མི་ཤེས་བྱིས་པ་ཆགས་པ་ནི། །ཇི་ལྟར་གླང་ཆེན་རྫབ་བྱིང་བཞིན། །གཞན་ཡང་བློ་གྲོས་ཆེན་པོ་མ་འོངས་པའི་དུས་ན་མཁས་པ་དག་གིས་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པར་ལྟ་བའི་མཚན་ཉིད་ལས་རྣམ་པར་གྲོལ་བ། ངས་རྟོགས་པའི་དོན་རྣམས་མི་མཁས་པ་དེ་དག་ལ་དྲིས་པ་ན་དེ་དག་འདི་སྐད་དུ་འདི་ནི་ཚུལ་བཞིན་འདྲི་བ་མ་ཡིན་ནོ་ཞེས་ཟེར་ཞིང་འདི་ལྟ་སྟེ། གཟུགས་ལ་སོགས་པ་དང་། མི་རྟག་པ་གཅིག་གམ་ཐ་དད་ཅེས་བྱ་བ་དང་། དེ་བཞིན་དུ་མྱ་ངན་ལས་འདས་པ་ལས་འདུ་བྱེད་དང་། མཚན་ཉིད་ལས་མཚན་ཉིད་ཀྱི་གཞི་དང་། ཡོན་ཏན་ལས་ཡོན་ཏན་ཅན་དང་། འབྱུང་བ་ལས་འབྱུང་བ་ལས་གྱུར་པ་དང་། མཐོང་བ་ལས་མཐོང་བར་བྱ་བ་དང་། རྡུལ་ལས་རྡུལ་ཕྲ་མོ་དང་། སྒྲུབ་པ་ལས་རྣལ་འབྱོར་པ་དང་། དེ་བཞིན་དུ་གཅིག་ལ་གཅིག་ཕན་ཚུན་དཔག་པའི་མཚན་ཉིད་ཀྱི་ཚུལ་གྱིས་དེ་དག་ལ་སོགས་པ་དྲིས་པ་རྣམས་བཅོམ་ལྡན་འདས་ཀྱིས་ལུང་བསྟན་ཏོ། །ཞེས་ཟེར་རོ། །དེ་ལ་གཞག་པའི་ལུང་བསྟན་པ་ནི་སྐྱེས་བུ་གཏི་མུག་ཅན་དེ་དག་གིས་ཤེས་པར་འགྱུར་བ་མ་ཡིན་ཏེ། འདི་ལྟར་ཉན་པའི་བློ་དང་མི་ལྡན་པའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དེ་དག་སྐྲག་པའི་གནས་སྤང་བའི་ཕྱིར་ལུང་མི་བསྟན་པ་རྣམས་ལུང་མི་སྟོན་ཏོ། །གཞན་ཡང་མུ་སྟེགས་ཅན་གྱི་ལྟ་བར་སྨྲ་བ་གཞིག་པའི་ཕྱིར་མ་བཤད་དོ། །བློ་གྲོས་ཆེན་པོ་མུ་སྟེགས་ཅན་ནི་འདི་སྐད་དུ་སྨྲ་སྟེ། འདི་ལྟར་སྲོག་དེ་ཉིད་ནི་ལུས་ཡིན་ནོ་ཞེས་བྱ་བ་ལ་སོགས་པ་ལུང་དུ་མི་སྟོན་པ་སྨྲ་བ། བློ་གྲོས་ཆེན་པོ་མུ་སྟེགས་ཅན་རྒྱུ་ལ་རྣམ་པར་རྨོངས་པ་རྣམས་ནི་ལུང་མི་སྟོན་པ་སྨྲའི། དེའི་གསུང་རབ་ལ་ནི་མ་ཡིན་ནོ། །བློ་གྲོས་ཆེན་པོ་ངའི་གསུང་རབ་ནི་གཟུང་བ་དང་། འཛིན་པ་རྣམ་པར་སྤངས་ཤིང་རྣམ་པར་རྟོག་པ་མི་སྐྱེ་བའོ། །ཇི་ལྟར་དེ་དག་བཟློག་ཅེ་ན། བློ་གྲོས་ཆེན་པོ་གང་གཟུང་བ་དང་། འཛིན་པ་ལ་མངོན་པར་ཞེན་ཅིང་རང་གི་སེམས་སྣང་བ་ཙམ་དུ་མི་ཤེས་པ་དེ་དག་ལ་ནི་རྣམ་པར་བཟློག་པ་ཡོད་དོ། །བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ལུང་བསྟན་པ་རྣམ་པ་བཞིས་སེམས་ཅན་རྣམས་
ལ་ཆོས་སྟོན་ཏོ། །བློ་གྲོས་ཆེན་པོ་གཞག་པའི་ལུང་བསྟན་པ་དེ་ནི་ངས་སྐབས་སྐབས་སུ་དབང་པོ་ཡོངས་སུ་མ་སྨིན་པ་རྣམས་ལ་བཤད་པ་ཡིན་གྱི། དབང་པོ་ཡོངས་སུ་སྨིན་པ་ལ་ནི་མ་ཡིན་ནོ། །གཞན་ཡང་བློ་གྲོས་ཆེན་པོ་ཆོས་ཐམས་ཅད་ནི་བྱ་བའི་རྒྱུ་རྐྱེན་དང་བྲལ་བའི་ཕྱིར་མི་སྐྱེ་ལ། བྱེད་པ་མེད་པའི་ཕྱིར་ཡང་ཆོས་ཐམས་ཅད་མི་སྐྱེའོ། །བློ་གྲོས་ཆེན་པོ་ཇི་ལྟར་ན་དངོས་པོ་ཐམས་ཅད་ངོ་བོ་ཉིད་མེད་པ་ཡིན་ཞེ་ན། འདི་ལྟར་རང་གི་བློས་རྣམ་པར་དཔྱད་པའི་ཚེ་རང་དང་སྤྱིའི་མཚན་ཉིད་ཀྱི་དངོས་པོ་མི་དམིགས་པས་ན། དེའི་ཕྱིར་ཆོས་ཐམས་ཅད་མི་སྐྱེ་བར་བཤད་དོ། །བློ་གྲོས་ཆེན་པོ་ཇི་ལྟར་ན་ཆོས་ཐམས་ཅད་འོང་བ་དང་། འགྲོ་བ་མེད་པ་ཡིན་ཞེ་ན། འདི་ལྟར་རང་དང་སྤྱིའི་མཚན་ཉིད་བླང་བར་འདོད་ན་ཡང་འོང་བའི་གནས་མེད་ལ། དོར་བར་འདོད་ན་ཡང་འགྲོ་བའི་གནས་མེད་པས། དེའི་ཕྱིར་ཆོས་ཐམས་ཅད་འོང་བ་དང་། འགྲོ་བ་དང་བྲལ་བ་ཡིན་ནོ། །བློ་གྲོས་ཆེན་པོ་ཅིའི་ཕྱིར་ཆོས་ཐམས་ཅད་མི་འགག་པ་ཡིན་ཞེ་ན། འདི་ལྟར་དངོས་པོའི་རང་བཞིན་གྱི་མཚན་ཉིད་མེད་པའི་ཕྱིར་དང་། ཆོས་ཐམས་ཅད་དམིགས་སུ་མེད་པའི་ཕྱིར། ཆོས་ཐམས་ཅད་མི་འགག་པ་ཡིན་ནོ། །བློ་གྲོས་ཆེན་པོ་ཇི་ལྟར་ན་ཆོས་ཐམས་ཅད་མི་རྟག་པ་ཡིན་ཞེ་ན། འདི་ལྟ་སྟེ། མཚན་ཉིད་སྐྱེ་བ་མི་རྟག་པ་ཡོད་པས། དེའི་ཕྱིར་ཆོས་ཐམས་ཅད་མི་རྟག་པ་ཞེས་བཤད་དོ། །བློ་གྲོས་ཆེན་པོ་ཇི་ལྟར་ཆོས་ཐམས་ཅད་རྟག་པ་ཡིན་ཞེ་ན། འདི་ལྟ་སྟེ། མཚན་ཉིད་སྐྱེ་བ་མི་སྐྱེ་བའི་དངོས་པོ་མི་རྟག་པས་རྟག་སྟེ། དེའི་ཕྱིར་ཆོས་ཐམས་ཅད་རྟག་པ་ཞེས་བཤད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ལུང་བསྟན་པ་ནི་རྣམ་བཞི་སྟེ། །མགོ་གཅིག་དང་ནི་དྲི་བ་དང་། །རྣམ་པར་དབྱེ་དང་གཞག་པ་རྣམས། །མུ་སྟེགས་སྨྲ་བ་བཟློག་པའོ། །ཡོད་དང་མེད་ལས་སྐྱེ་བར་ནི། །གྲངས་ཅན་དང་ནི་ཁྱད་པར་ཤེས། །ལུང་དུ་མི་སྟོན་ཐམས་ཅད་ཀྱང་། །དེ་དག་ཉིད་ཀྱིས་རབ་ཏུ་བསྟན། །བློ་ཡིས་རྣམ་པར་གཞིགས་ན་ཡང་། །རང་བཞིན་དག་ནི་མི་དམིགས་ཏེ། །བརྗོད་པ་དག་དང་བྲལ་བའི་ཕྱིར། །རང་བཞིན་བྲལ་བ་རབ་ཏུ་བསྟན། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བཅོམ་ལྡན་འདས་ལ་
འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུན་དུ་ཞུགས་པ་རྣམས་ཀྱི་རྒྱུན་དུ་ཞུགས་པའི་འགྲོ་བ་རབ་ཏུ་དབྱེ་བའི་ཚུལ་གྱི་མཚན་ཉིད་བཤད་དུ་གསོལ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་རྒྱུན་དུ་ཞུགས་པ་རྣམས་ཀྱི་འགྲོ་བ་རབ་ཏུ་དབྱེ་བའི་ཚུལ་གྱི་མཚན་ཉིད་ལ་མཁས་ན། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པར་འགྱུར་བའི་ཐབས་ཀྱི་མཚན་ཉིད་རྣམ་པར་དབྱེ་བ་རིག་ནས་སེམས་ཅན་རྣམས་ལ་དེ་ལྟ་དེ་ལྟ་བུར་ཆོས་བསྟན་པ་དང་། འདི་ལྟ་སྟེ། ཅི་ནས་བདག་མ་མཆིས་པ་གཉིས་ཀྱི་མཚན་ཉིད་དང་། སྒྲིབ་པ་གཉིས་ཡོངས་སུ་སྦྱངས་ཏེ། ས་རྣམས་ཀྱི་སའི་མཚན་ཉིད་ལས་འདའ་བ་རྟོགས་པར་ཁོང་དུ་ཆུད་དེ། དེ་བཞིན་གཤེགས་པའི་བསམ་གྱིས་མི་ཁྱབ་པ་མཐར་ཐུག་པའི་སྤྱོད་ཡུལ་རབ་ཏུ་རྙེད་ནས། ཇི་ལྟར་གཟུགས་སྣ་ཚོགས་ཀྱི་ནོར་བུ་དང་འདྲ་བར་སེམས་ཅན་ཐམས་ཅད་ལ་ཤིན་ཏུ་ཕན་འདོགས་ཤིང་། ཆོས་ཐམས་ཅད་ཀྱི་སྤྱོད་ཡུལ་དང་། བསམ་པ་འཚལ་བའི་ལུས་དང་། ལོངས་སྤྱོད་ཀྱིས་ཐམས་ཅད་ཉེ་བར་འཚོ་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ལ་བློ་གྲོས་ཆེན་པོས་གསོལ་པ། ལེགས་སོ་བཅོམ་ལྡན་འདས་དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་རྒྱུན་དུ་ཞུགས་པ་དག་གིས་རྒྱུན་དུ་ཞུགས་པའི་འབྲས་བུ་རབ་ཏུ་དབྱེ་བ་ནི་རྣམ་པ་གསུམ་ཡོད་དེ། གསུམ་གང་ཞེ་ན། འདི་ལྟ་སྟེ། ཐ་མ་དང་། བར་མ་དང་། མཆོག་གོ །དེ་ལ་ཐ་མ་ནི་དེ་ལྟར་ཐོག་མ་ན་ཚེའི་སྲིད་པ་བདུན་ནོ། །བར་མ་ནི་སྲིད་པ་གསུམ་དང་ལྔས་ཡོངས་སུ་མྱ་ངན་ལས་འདའ་བར་འགྱུར་བའོ། །མཆོག་ནི་ཚེ་དེ་ཉིད་ལ་ཡོངས་སུ་མྱ་ངན་ལས་འདའ་བར་འགྱུར་བའོ། །གསུམ་པོ་དེ་དག་ལ་ཀུན་དུ་སྦྱོར་བ་གསུམ་ཡོད་དེ། ཆུང་ངུ་དང་། འབྲིང་དང་། ཆེན་པོ་དག་ཡིན་ནོ། དེ་ལ་ཀུན་དུ་སྦྱོར་བ་གསུམ་གང་ཞེ་ན། འདི་ལྟ་སྟེ། འཇིག་ཚོགས་
ལ་ལྟ་བ་དང་། ཐེ་ཙོམ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་སྟེ། ཀུན་དུ་སྦྱོར་བ་དེ་གསུམ་གྱི་བྱེ་བྲག་གིས་གོང་ནས་གོང་དུ་ཁྱད་པར་ཅན་དུ་གྱུར་ནས་དགྲ་བཅོམ་པའི་འབྲས་བུ་འཐོབ་པར་འགྱུར་རོ། །བློ་གྲོས་ཆེན་པོ་འཇིག་ཚོགས་ལ་ལྟ་བ་ཡང་རྣམ་པ་གཉིས་ཡོད་དེ། འདི་ལྟ་སྟེ། ལྷན་ཅིག་སྐྱེས་པ་དང་། ཀུན་དུ་བརྟགས་པ་ལྟར་གཞན་གྱི་དབང་ལ་ཀུན་བརྟགས་པའི་རང་བཞིན་གྱི་རྣམ་པར་རྟོག་པ་བཞིན་ནོ། །དཔེར་ན་གཞན་གྱི་དབང་གི་རང་བཞིན་ལ་བརྟེན་ནས་ཀུན་ཏུ་བརྟགས་པའི་རང་བཞིན་ལ་མངོན་པར་ཞེན་པ་སྣ་ཚོགས་འབྱུང་སྟེ། དེ་ཡོད་པ་ཡང་མ་ཡིན། མེད་པ་ཡང་མ་ཡིན། །དེ་གཉི་ག་ཡང་མ་ཡིན་ཏེ། ཡང་དག་པ་མ་ཡིན་པ་ཀུན་བརྟགས་པའི་མཚན་ཉིད་ཀྱི་ཕྱིར་ཏེ། བྱིས་པ་སོ་སོའི་སྐྱེ་བོ་རྣམས་ཀྱི་རྣམ་པར་རྟོག་པས། སྣ་ཚོགས་ཀྱི་རང་བཞིན་གྱི་མཚན་ཉིད་ལ་མངོན་པར་ཞེན་པ་ནི། དཔེར་ན་སྨིག་རྒྱུ་ལ་རི་དགས་སྐོམ་པ་རྣམས་ཀྱི་ཆུའི་འདུ་ཤེས་འབྱུང་བ་ལྟ་བུ་སྟེ། དེ་ནི་རྒྱུན་དུ་ཞུགས་པའི་ཀུན་དུ་བརྟགས་པའི་འཇིག་ཚོགས་ལ་ལྟ་བའོ། །དེ་ཡང་གང་ཟག་ལ་བདག་མེད་པས་དངོས་པོ་མེད་པར་གཟུང་བའི་ཕྱིར་ཡུན་རིང་པོ་ནས་མི་ཤེས་པ་དང་། མངོན་པར་ཤེས་པ་རྣམས་སྤོང་བར་འགྱུར་རོ། བློ་གྲོས་ཆེན་པོ་ལྷན་ཅིག་སྐྱེས་པ་ནི་རྒྱུན་དུ་ཞུགས་པས་བདག་དང་། གཞན་གྱི་ལུས་མཉམ་པ་ཉིད་དུ་མཐོང་བ་དང་། ཕུང་པོ་བཞི་ལ་གཟུགས་ཀྱི་མཚན་ཉིད་མེད་པའི་ཕྱིར་དང་། གཟུགས་སྐྱེ་བ་འབྱུང་བ་དང་། འབྱུང་བ་ལས་གྱུར་པའི་ཕྱིར་དང་། ཕན་ཚུན་རྒྱུ་བའི་མཚན་ཉིད་ཀྱི་ཕྱིར་དང་། འབྱུང་བ་དང་། གཟུགས་རྣམས་བསགས་པ་མ་ཡིན་པའི་ཕྱིར་དང་། རྒྱུན་དུ་ཞུགས་པས་ཡོད་པ་དང་མེད་པའི་ཕྱོགས་བརྟགས་ན་མི་སྣང་བས་འཇིག་ཚོགས་ལ་ལྟ་བ་སྤངས་པར་འགྱུར་རོ། །དེ་ལྟར་འཇིག་ཚོགས་ལ་ལྟ་བ་སྤངས་པས་འདོད་ཆགས་མི་འབྱུང་སྟེ། འདི་ནི་འཇིག་ཚོགས་ལ་ལྟ་བའི་མཚན་ཉིད་དོ། །བློ་གྲོས་ཆེན་པོ་ཐེ་ཙོམ་གྱི་མཚན་ཉིད་ནི་འདི་ལྟ་སྟེ། ཆོས་ཐོབ་པ་ལེགས་པར་མཐོང་བའི་མཚན་ཉིད་ཀྱི་ཕྱིར་དང་། སྔ་མའི་འཇིག་ཚོགས་ལ་ལྟ་བ་རྣམ་པ་གཉིས་ཀྱི་རྣམ་
པར་རྟོག་པ་སྤངས་པའི་ཕྱིར་ཆོས་རྣམས་ལ་ཐེ་ཙོམ་མི་སྐྱེ་བས་གཞན་ལ་སྟོན་པའམ། དག་པའམ། མ་དག་པའི་ལྟ་བ་སྐྱེད་པར་མི་བྱེད་དེ། འདི་ནི་རྒྱུན་དུ་ཞུགས་པ་ཐེ་ཙོམ་སྤངས་པའི་མཚན་ཉིད་དོ། །བློ་གྲོས་ཆེན་པོ་ཅིའི་ཕྱིར་རྒྱུན་དུ་ཞུགས་པའི་ཚུལ་ཁྲིམས་མི་སྙེམས་ཤེ་ན། འདི་ལྟ་སྟེ། སྐྱེ་བའི་གནས་ཀྱི་སྡུག་བསྔལ་གྱི་མཚན་ཉིད་རབ་ཏུ་མཐོང་བས་ན་དེའི་ཕྱིར་མི་སྙེམས་སོ། །བློ་གྲོས་ཆེན་པོ་སྙེམས་པ་ནི་འདི་ལྟ་སྟེ། བྱིས་པ་སོ་སོའི་སྐྱེ་བོ་དག་མི་འགྱུར་བར་དཀའ་ཐུབ་ལེན་ཅིང་སྦྱོར་བ་དག་གིས་ལོངས་སྤྱོད་དང་། བདེ་བ་འདོད་པའི་ཕྱིར་སྐྱེ་བ་གཉེར་བར་བྱེད་དོ། །དེ་དེ་ལྟར་མི་སྙེམས་པ་ཡང་གཞན་དུ་ན་འདི་ལྟར་ཡོངས་སུ་སྔོ་བར་བྱེད་དེ། སོ་སོ་རང་གིས་རིག་པའི་ཁྱད་པར་རྣམ་པར་རྟོག་པ་དང་བྲལ་བ་ཟག་པ་མེད་པའི་ཆོས་ཀྱི་མཚན་ཉིད་ལ་རབ་ཏུ་སྦྱོར་བའི་ཕྱིར་ཚུལ་ཁྲིམས་ཀྱི་ཡན་ལག་ཡང་དག་པར་ལེན་ཅིང་སྲུང་བར་བྱེད་དེ། འདི་ནི་རྒྱུན་དུ་ཞུགས་པའི་ཚུལ་ཁྲིམས་དང་། བརྟུལ་ཞུགས་སྤངས་པའི་མཚན་ཉིད་ཡིན་ནོ། །རྒྱུན་དུ་ཞུགས་པས་ཀུན་ཏུ་སྦྱོར་བ་གསུམ་སྤངས་པ་ལ་ནི་འདོད་ཆགས་དང་། གཏི་མུག་མི་འབྱུང་སྟེ། གལ་ཏེ་རྒྱུན་དུ་ཞུགས་པ་འདི་སྙམ་དུ་ཀུན་དུ་སྦྱོར་བ་འདི་རྣམས་ནི་བདག་ལ་མངོན་པར་མ་གྲུབ་བོ་སྙམ་དུ་སེམས་པ་ནི་ཉེས་པ་རྣམས་གཉིས་ཡོད་པར་འགྱུར་ཏེ། འཇིག་ཚོགས་ལ་ལྟ་བར་སོང་བ་དང་། ཀུན་དུ་སྦྱོར་བ་རྣམས་མ་སྤངས་པའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་ནི་འདོད་ཆགས་ཀྱི་རྣམ་པ་མང་དུ་གསུངས་ན། དེས་འདོད་ཆགས་གང་ཞིག་སྤངས་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་བུད་མེད་ལ་སྲེད་ཅིང་འདོད་པ་དང་། མངོན་པར་ཆགས་ཤིང་ཞེན་པའི་ཐབས་རྣམ་པ་སྣ་ཚོགས་ལས་བྱུང་བ། ལུས་དང་ངག་གི་ལས་ཁ་ན་མ་ཐོ་བ་དང་བཅས་པ་དེས་ད་ལྟར་གྱི་བདེ་བ་ལ་སྲེད་ཅིང་མ་འོངས་པ་ན་སྡུག་བསྔལ་སྐྱེ་བར་འགྱུར་བ་དེ་དག་དེ་ལ་མི་འབྱུང་ངོ་། །དེ་ཅིའི་ཕྱིར་ཞེ་ན། ཏིང་ངེ་འཛིན་གྱི་བདེ་བ་ལ་གནས་པ་ཐོབ་པས་དེའི་ཕྱིར་དེ་སྤངས་པ་ཡིན་ཏེ། མྱ་ངན་ལས་འདས་པ་རྟོགས་པར་བྱ་བའི་འདོད་
ཆགས་སྤངས་པ་ནི་མ་ཡིན་ནོ། །བློ་གྲོས་ཆེན་པོ་ལན་ཅིག་ཕྱིར་འོང་བའི་མཚན་ཉིད་གང་ཞེ་ན། འདི་ལྟ་སྟེ། གཟུགས་ཀྱི་མཚན་ཉིད་ཅིག་སྣང་ཞིང་རྣམ་པར་རྟོག་པ་སྐྱེ་བའི་མཚན་ཉིད་དུ་མཐོང་བའི་མཚན་ཉིད་མི་སྐྱེ་བ་དང་། བསམ་གཏན་གྱི་མཚན་ཉིད་རབ་ཏུ་མཐོང་བའི་ཕྱིར་འཇིག་རྟེན་འདིར་འོངས་ནས་ཅིག་ཅར་སྡུག་བསྔལ་མཐར་བྱས་ཏེ་མྱ་ངན་ལས་འདས་པ་འཐོབ་པར་བྱེད་པས་དེའི་ཕྱིར་ལན་ཅིག་ཕྱིར་འོང་བ་ཞེས་བྱའོ། །བློ་གྲོས་ཆེན་པོ་ཇི་ལྟར་ན་ཕྱིར་མི་འོང་བ་ཡིན་ཞེ་ན། འདི་ལྟ་སྟེ། འདས་པ་དང་། མ་འོངས་པ་དང་། ད་ལྟར་བྱུང་བའི་གཟུགས་ཀྱི་མཚན་ཉིད་ཀྱི་དངོས་པོ་རྣམས་དངོས་པོ་མེད་པ་དང་། ལྟ་བའི་ཉེས་པ་སྐྱེས་པའི་ཉོན་མོངས་པའི་རྣམ་པར་རྟོག་པ་མི་སྐྱེ་བའི་ཕྱིར་དང་། ཀུན་དུ་སྦྱོར་བ་སྤངས་པའི་ཕྱིར་ཕྱིར་མི་འོང་བ་ཞེས་བྱའོ། །བློ་གྲོས་ཆེན་པོ་དགྲ་བཅོམ་པ་ནི་འདི་ལྟ་སྟེ། བསམ་གཏན་དང་། ཏིང་ངེ་འཛིན་དང་། རྣམ་པར་ཐར་པ་དང་། སྟོབས་དང་། རིག་པ་དང་། ཉོན་མོངས་པ་དང་། སྡུག་བསྔལ་རྣམ་པར་རྟོག་པའི་དངོས་པོ་མེད་པས་དེའི་ཕྱིར་དགྲ་བཅོམ་པ་ཞེས་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་དགྲ་བཅོམ་པ་རྣམ་པ་གསུམ་དུ་བཀའ་སྩལ་ན། འདིར་དགྲ་བཅོམ་པ་གང་དག་ལ་བགྱི་བར་བཀའ་སྩལ། ཅི་བཅོམ་ལྡན་འདས་ཞི་བ་ཕྱོགས་གཅིག་པ་ཐེག་པ་གཅིག་གིས་ལམ་རབ་ཏུ་ཐོབ་པའམ། འོན་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ཀྱིས་དེ་ལྟར་སྟོན་པའི་དགྲ་བཅོམ་པའམ། དེ་སྟེ་སངས་རྒྱས་ཀྱི་འཕྲུལ་པས་སྤྲུལ་པ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཞི་བ་ཕྱོགས་གཅིག་པ་ཐེག་པ་གཅིག་གི་ལམ་དུ་ཐོབ་པའི་ཉན་ཐོས་ཡིན་གྱི། གཞན་དག་ནི་མ་ཡིན་ནོ། །གཞན་ནི་བྱང་ཆུབ་སེམས་དཔའི་སྤྱད་པ་སྤྱོད་པ་དང་། སངས་རྒྱས་ཀྱི་འཕྲུལ་པས་སྤྲུལ་པ་རྣམས་ཏེ། ཐབས་ལ་མཁས་པ་དང་། སྔོན་གྱི་སྨོན་ལམ་གྱི་དབང་གིས་འཁོར་གྱི་དཀྱིལ་འཁོར་དུ་སྐྱེ་བ་སྟོན་ཏེ། སངས་རྒྱས་འཁོར་གྱི་དཀྱིལ་འཁོར་མཛེས་པར་བྱ་བའི་ཕྱིར་རོ། །བློ་གྲོས་ཆེན་པོ་རྣམ་པར་རྟོག་པ་འཇུག་པའི་གནས་སུ་རྣམ་པ་སྣ་ཚོགས་ཀྱི་ཆོས་
བསྟན་པ་ནི་འདི་ལྟ་སྟེ། འབྲས་བུ་འཐོབ་པར་བྱ་བ་དང་། བསམ་གཏན་འཐོབ་པར་བྱ་བའོ། །དེ་ལ་བསམ་གཏན་ནི་བསམ་གཏན་ལ་ཞུགས་པ་ན། རབ་ཏུ་དབེན་པའི་ཕྱིར་དང་། རང་གི་སེམས་སྣང་བར་སྟོན་པས་འབྲས་བུ་འཐོབ་པའི་མཚན་ཉིད་ནི་འབྲས་བུ་ཐོབ་པ་ཞེས་བྱའོ། །གཞན་ཡང་བློ་གྲོས་ཆེན་པོ་བསམ་གཏན་དང་། ཚད་མེད་པ་དང་། གཟུགས་མེད་པའི་ཁམས་ལས་ཤིན་ཏུ་བཟླ་བར་འདོད་ན། རང་གི་སེམས་སྣང་བའི་མཚན་ཉིད་ལས་ལྡོག་པར་བྱའོ། །བློ་གྲོས་ཆེན་པོ་འདུ་ཤེས་དང་ཚོར་བ་འགོག་པའི་སྙོམས་པར་འཇུག་པ་ནི་རང་གི་སེམས་སྣང་བ་ལས་འདས་ཞེས་བྱར་མི་རུང་སྟེ། དེ་ཅིའི་ཕྱིར་ཞེ་ན། སེམས་སྣང་བ་ཡོད་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །བསམ་གཏན་རྣམས་དང་ཚད་མེད་བཞི། །གཟུགས་མེད་པ་ཡི་ཏིང་འཛིན་དང་། །ཚོར་བ་འདུ་ཤེས་འགོག་པ་རྣམས། །སེམས་ཙམ་ལ་ནི་དེ་ཡོད་མིན། །རྒྱུན་དུ་ཞུགས་པའི་འབྲས་བུ་དང་། །ལན་ཅིག་ཕྱིར་འོང་ཕྱིར་མི་འོང་། །དགྲ་བཅོམ་པ་ཡི་འབྲས་བུ་རྣམས། །དེ་དག་ཐམས་ཅད་སེམས་འཁྲུལ་པ། །བསམ་གཏན་དང་ནི་བསམ་གཏན་རྐྱེན། །སྤོང་ཞེས་བདེན་པ་ཡང་དག་མཐོང་། །དེ་དག་རྟོག་པ་ཙམ་ཡིན་པར། །གང་གིས་རྟོགས་པ་དེ་འགྲོལ་ལོ། །གཞན་ཡང་བློ་གྲོས་ཆེན་པོ་བློ་རྣམ་པ་གཉིས་ཡོད་དེ། འདི་ལྟ་སྟེ། རབ་ཏུ་རྣམ་པར་འབྱེད་པའི་བློ་དང་། རྣམ་པར་རྟོག་པའི་མཚན་ཉིད་འཛིན་པ་ལ་མངོན་པར་ཞེན་པས་རྣམ་པར་གཞག་པའི་བློའོ། །དེ་ལ་བློ་གྲོས་ཆེན་པོ་རབ་ཏུ་རྣམ་པར་འབྱེད་པའི་བློ་ནི་འདི་ལྟ་སྟེ། བློ་གང་གིས་དངོས་པོའི་རང་བཞིན་གྱི་མཚན་ཉིད་རབ་ཏུ་གཞིག་ན་མཐའ་བཞི་དང་བྲལ་བས་མི་དམིགས་པ་འདི་ནི་རབ་ཏུ་རྣམ་པར་འབྱེད་པའི་བློ་ཞེས་བྱའོ། །དེ་ལ་བློ་གྲོས་ཆེན་པོ་མཐའ་བཞི་ནི་འདི་ལྟ་སྟེ། །གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པ་ནི་མཐའ་བཞི་ཞེས་
བཤད་དེ། བློ་གྲོས་ཆེན་པོ་མཐའ་བཞི་པོ་དེ་དག་དང་བྲལ་བ་ནི་ཆོས་ཐམས་ཅད་ཅེས་བྱའོ། །བློ་གྲོས་ཆེན་པོ་མཐའ་བཞི་པོ་འདིས་ཆོས་ཐམས་ཅད་ཡོངས་སུ་བརྟགས་པ་ལ་རབ་ཏུ་བསླབ་པར་བྱའོ། །དེ་ལ་བློ་གྲོས་ཆེན་པོ་རྣམ་པར་རྟོག་པའི་མཚན་ཉིད་འཛིན་པ་ལ་མངོན་པར་ཞེན་པས་རྣམ་པར་གཞག་པའི་བློ་གང་ཞེ་ན། འདི་ལྟ་སྟེ། རྣམ་པར་རྟོག་པའི་མཚན་ཉིད་འཛིན་པ་ལ་མངོན་པར་ཞེན་པ་གང་གིས་སྲ་བ་དང་། གཤེར་བ་དང་། ཚ་བ་དང་། གཡོ་བ་ཡང་དག་པ་མ་ཡིན་པ་རྣམ་པར་རྟོག་པའི་མཚན་ཉིད་འབྱུང་བ་ཆེན་པོ་རྣམས་སུ་དམ་འཆའ་བ་དང་། རྒྱུ་མཚན་དང་། དཔེ་ལ་མངོན་པར་ཞེན་པས་ཡང་དག་པ་མ་ཡིན་པ་རྣམ་པར་གཞག་པས་རྣམ་པར་བཞག་པ་སྟེ། དེ་ནི་རྣམ་པར་རྟོག་པའི་མཚན་ཉིད་འཛིན་པ་ལ་མངོན་པར་ཞེན་པས་རྣམ་པར་གཞག་པའི་བློ་ཞེས་བྱ་སྟེ། དེ་ནི་བློ་རྣམ་པ་གཉིས་ཀྱི་མཚན་ཉིད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་བློ་འདི་གཉིས་ཀྱི་མཚན་ཉིད་དང་ལྡན་ན་གང་ཟག་དང་ཆོས་བདག་མེད་པའི་མཚན་ཉིད་རྟོགས་པར་ཁོང་དུ་ཆུད་ཅིང་སྣང་བ་མེད་པའི་བློ་ལ་མཁས་པ་དང་། སྤྱོད་པའི་ས་ལ་སོ་སོར་རབ་ཏུ་རྟོག་པས་ས་དང་པོ་རབ་ཏུ་འཐོབ་སྟེ། ཏིང་ངེ་འཛིན་བརྒྱ་ལ་སྙོམས་པར་འཇུག །བྱེ་བྲག་མེད་པའི་ཏིང་ངེ་འཛིན་ཀྱང་རབ་ཏུ་འཐོབ། སངས་རྒྱས་དང་། བྱང་ཆུབ་སེམས་དཔའ་བརྒྱ་ཡང་མཐོང་། བསྐལ་པ་བརྒྱར་སྔོན་གྱི་མཐའ་དང་། ཕྱི་མའི་མཐའི་དངོས་པོ་ལ་འཇུག །འོད་ཀྱིས་ཞིང་བརྒྱ་ཡང་སྣང་བར་བྱེད་དོ། །གོང་ནས་གོང་དུ་སའི་མཚན་ཉིད་ཤེས་ཏེ། སྨོན་ལམ་ཆེན་པོ་ཁྱད་པར་ཅན་གྱིས་རྣམ་པར་འཕྲུལ་པ་ལ་དབང་ཞིང་ཆོས་ཀྱི་སྤྲིན་གྱི་དབང་བསྐུར་བས་དབང་བསྐུར་ཏེ། དེ་བཞིན་གཤེགས་པའི་སོ་སོ་རང་གིས་ཐུགས་སུ་ཆུད་པའི་ས་ཐོབ་ནས་མཐར་ཐུག་པའི་གནས་བཅུ་དང་རབ་ཏུ་ལྡན་པའི་ཆོས་སུ་འགྱུར་ཏེ། སེམས་ཅན་ཡོངས་སུ་སྨིན་པར་བྱ་བའི་ཕྱིར་སྤྲུལ་པའི་འོད་ཟེར་སྣ་ཚོགས་ཀྱིས་རྣམ་པར་མཛེས་ཤིང་སོ་སོ་རང་གིས་རིག་པའི་བདེ་བས་མཉམ་པར་གཞག་པ་ཡང་ཐོབ་བོ། །གཞན་ཡང་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོས་འབྱུང་
བ་ཆེན་པོ་དང་། འབྱུང་བ་ལས་གྱུར་པ་ལ་མཁས་པར་བྱའོ། །ཇི་ལྟར་ན་བྱང་ཆུབ་སེམས་དཔའ་འབྱུང་བ་ཆེན་པོ་དང་། འབྱུང་བ་ལས་གྱུར་པ་ལ་མཁས་པ་ཡིན་ཞེ་ན། བློ་གྲོས་ཆེན་པོ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལྟར་ཡང་དག་པར་རབ་ཏུ་རྟོག་སྟེ། དེ་དོན་དམ་པའི་བདེན་པར་ནི་འབྱུང་བ་ཆེན་པོ་དག་སྐྱེ་བ་མེད་དོ། །འབྱུང་བ་ཆེན་པོ་དག་ལ་སྐྱེ་བ་མེད་པར་དེ་ལྟར་རབ་ཏུ་རྟོག་པར་བྱེད་དེ། དེ་ལྟར་རབ་ཏུ་བརྟགས་ནས་མིང་དང་རྒྱུ་མཚན་རྣམས་ནི་རྣམ་པར་རྟོག་པ་ཙམ་དང་། རང་གི་སེམས་སྣང་བ་ཙམ་དང་། ཕྱི་རོལ་གྱི་དངོས་པོ་རྣམས་དངོས་པོ་མེད་པར་རྟོགས་པ་ནི་རང་གི་སེམས་སྣང་བ་རྣམ་པར་རྟོག་པ་ཙམ་ཞེས་བྱའོ། །འདི་ལྟ་སྟེ། ཁམས་གསུམ་པའི་འབྱུང་བ་དང་། འབྱུང་བ་ལས་གྱུར་པ་དེ་དག་ལ་རབ་ཏུ་བརྟགས་ན། ངོ་བོ་ཉིད་ཀྱིས་མཐའ་བཞི་དང་བྲལ་བས་ཚུལ་རྣམ་པར་དག་པ་བདག་དང་བདག་གི་དང་བྲལ་བ། ཡང་དག་པའི་མཚན་ཉིད་རང་གི་མཚན་ཉིད་ཀྱི་དབྱིབས་སུ་གནས་པ། མ་སྐྱེས་པའི་མཚན་ཉིད་དུ་འགྲུབ་པར་མཐོང་ངོ་། །བློ་གྲོས་ཆེན་པོའི་ཇི་ལྟར་ན་འབྱུང་བ་ཆེན་པོ་བཞི་པོ་དེ་དག་གིས་རྒྱུར་བྱས་པའི་གཟུགས་རྣམས་སྐྱེད་ཅེ་ན། འདི་ལྟ་སྟེ། གཤེར་བར་རྣམ་པར་རྟོག་པའི་འབྱུང་བ་ཆེན་པོས་ནི་ཕྱི་ནང་གི་ཆུའི་ཁམས་སྐྱེད་དོ། །བྱ་བ་ནུས་པའི་རྣམ་པར་རྟོག་པའི་འབྱུང་བ་ཆེན་པོས་ནི་ཕྱི་ནང་གི་མེའི་ཁམས་སྐྱེད་དོ། །གཡོ་བར་རྣམ་པར་རྟོག་པའི་འབྱུང་བ་ཆེན་པོས་ནི་ཕྱི་ནང་གི་རླུང་གི་ཁམས་སྐྱེད་དོ། །གཟུགས་གཅད་དུ་རུང་བར་རྣམ་པར་རྟོག་པའི་འབྱུང་བ་ཆེན་པོས་ནི་ཕྱི་ནང་གི་སའི་ཁམས་སྐྱེད་དོ། །གཟུགས་དང་ནམ་མཁའ་གཉི་ག་ཡང་ལོག་པའི་བདེན་པ་ལ་མངོན་པར་ཞེན་པས་ཕུང་པོ་ལྔ་འདུས་པ་དང་། འབྱུང་བ་ཆེན་པོ་དང་། འབྱུང་བ་ལས་གྱུར་པ་སྐྱེའོ། །བློ་གྲོས་ཆེན་པོ་རྣམ་པར་ཤེས་པ་ནི་གནས་རྣམ་པ་སྣ་ཚོགས་དང་། ཡུལ་ལ་མངོན་པར་ཆགས་པའི་རྒྱུས་འགྲོ་བ་གཞན་དུ་མཚམས་སྦྱོར་བར་འགྱུར་རོ། །བློ་གྲོས་ཆེན་པོ་ས་ལ་སོགས་པ་ཆེན་པོ་བཞི་དང་། འབྱུང་བ་ལས་གྱུར་པ་རྣམས་ལ་ནི་འབྱུང་བ་ཆེན་པོ་བཞིའི་རྟེན་ཡོད་ཀྱི། འབྱུང་བ་ཆེན་པོ་བཞི་པོ་དག་གི་རྐྱེན་ནི་མ་ཡིན་ནོ། །
དེ་ཅིའི་ཕྱིར་ཞེ་ན། འདི་ལྟ་སྟེ། དངོས་པོ་དང་། དབྱིབས་དང་། མཚན་ཉིད་དང་། གནས་དང་། བྱ་བ་དང་། སྦྱོར་བ་རྣམས་དངོས་པོ་མེད་པས་འབྱུང་བ་ཆེན་པོ་རྣམས་མི་སྐྱེའོ། །བློ་གྲོས་ཆེན་པོ་དངོས་པོ་དང་། དབྱིབས་དང་། མཚན་ཉིད་དང་། གནས་དང་། བྱ་བ་དང་། སྦྱོར་བ་རྣམས་འདུས་པ་ལས་སྐྱེ་བས། དབྱིབས་མེད་པ་མ་ཡིན་ནོ། །དེ་ལྟ་བས་ན་བློ་གྲོས་ཆེན་པོ་འབྱུང་བ་ཆེན་པོ་དང་། འབྱུང་བ་ལས་གྱུར་པའི་མཚན་ཉིད་ནི་མུ་སྟེགས་ཅན་རྣམས་ཀྱིས་རྣམ་པར་བརྟགས་པ་ཡིན་གྱི་ངས་ནི་མ་ཡིན་ནོ། །གཞན་ཡང་བློ་གྲོས་ཆེན་པོ་ཕུང་པོ་རྣམས་ཀྱི་རང་གི་ངོ་བོའི་མཚན་ཉིད་རབ་ཏུ་བསྟན་པར་བྱའོ། །ཕུང་པོ་རྣམས་ཀྱི་རང་གི་ངོ་བོའི་མཚན་ཉིད་ཇི་ལྟ་བུ་ཞེ་ན། འདི་ལྟ་སྟེ། ཕུང་པོ་ལྔ་རྣམས་སོ། །ཕུང་པོ་ལྔ་གང་ཞེ་ན་འདི་ལྟ་སྟེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་སོ། །དེ་ལ་ཕུང་པོ་བཞི་རྣམས་ནི་གཟུགས་མེད་དེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་སོ། །བློ་གྲོས་ཆེན་པོ་གཟུགས་ནི་འབྱུང་བ་ཆེན་པོ་བཞི་དང་། འབྱུང་བ་ལས་གྱུར་པ་ཕན་ཚུན་དུ་མི་འཐུན་པའི་མཚན་ཉིད་དོ། །བློ་གྲོས་ཆེན་པོ་གཟུགས་མེད་པ་ལ་བཞིར་བགྲང་དུ་མེད་དེ། ནམ་མཁའ་བཞིན་ནོ། །དཔེར་ན་ནམ་མཁའ་ནི་གྲངས་ཀྱི་མཚན་ཉིད་ལས་འདས་ཏེ། བགྲང་བ་དང་བྲལ་མོད་ཀྱི། རྣམ་པར་རྟོག་པས་ནམ་མཁའ་ཞེས་བརྗོད་དོ། །བློ་གྲོས་ཆེན་པོ་དེ་བཞིན་དུ་ཕུང་པོ་རྣམས་ཀྱང་གྲངས་ཀྱི་མཚན་ཉིད་ལས་འདས་ཏེ་བགྲང་བ་དང་བྲལ་བས་དངོས་པོ་དང་། དངོས་པོ་མེད་པ་རྣམ་པར་སྤངས་པ། མཐའ་བཞི་དང་བྲལ་བའོ། །གྲངས་དང་། བགྲང་བའི་མཚན་ཉིད་ནི་བྱིས་པས་རབ་ཏུ་བརྗོད་པ་ཡིན་གྱི། འཕགས་པ་རྣམས་ཀྱིས་ནི་མ་ཡིན་ནོ། །བློ་གྲོས་ཆེན་པོ་འཕགས་པ་རྣམས་ཀྱིས་ནི་སྒྱུ་མ་ལྟ་བུར་གཟུགས་རྣམ་པ་སྣ་ཚོགས་གཅིག་པ་དང་། ཐ་དད་པ་རྣམ་པར་སྤངས་པར་ཉེ་བར་འདོགས་སོ། །ཡང་རྨི་ལམ་དང་། གཟུགས་བརྙན་གྱི་སྐྱེས་བུ་ལྟར་གཅིག་པ་དང་། ཐ་དད་པ་རྣམ་པར་སྤངས་པའི་ཕྱིར་རོ། །བློ་གྲོས་ཆེན་པོ་འཕགས་པའི་ཡེ་ཤེས་ཀྱི་ཚུལ་ནི་ཕུང་པོ་དང་འདྲ་བར་
རྟོག་པས་སྣང་ངོ་། །དེ་ནི་ཕུང་པོ་རྣམས་ཀྱི་རང་བཞིན་གྱི་མཚན་ཉིད་དེ། ཁྱོད་ཀྱིས་བཟློག་པར་བྱའོ། །རྣམ་པར་བཟློག་ནས་རབ་ཏུ་དབེན་པའི་ཆོས་བསྟན་པས་སངས་རྒྱས་ཀྱི་ཞིང་ཐམས་ཅད་དུ་མུ་སྟེགས་ཅན་གྱི་ལྟ་བ་རྣམས་བཟློག་པར་བྱའོ། །བློ་གྲོས་ཆེན་པོ་རབ་ཏུ་དབེན་པའི་ཆོས་བསྟན་པའི་ཚེ་ཆོས་བདག་མེད་པ་མཐོང་བ་རྣམ་པར་དག་པར་འགྱུར། མི་གཡོ་བའི་ས་ལ་ཡང་རབ་ཏུ་འཇུག་པར་འགྱུར་རོ། །དེ་མི་གཡོ་བའི་སར་རབ་ཏུ་ཞུགས་ནས། ཏིང་ངེ་འཛིན་ཚད་མེད་པ་ལ་དབང་བྱེད་པར་འགྱུར་རོ། །ཡིད་ཀྱི་ལུས་ཐོབ་པས་སྒྱུ་མ་ལྟ་བུའི་ཏིང་ངེ་འཛིན་རབ་ཏུ་འཐོབ་བོ། །སྟོབས་དང་། མངོན་པར་ཤེས་པ་དང་། དབང་རྣམས་རྟོགས་པར་ཁོང་དུ་ཆུད་པས་སེམས་ཅན་ཐམས་ཅད་སྡུད་ཅིང་ཕན་འདོགས་པར་འགྱུར་རོ། །དཔེར་ན་ས་ཆེན་པོ་ནི་སེམས་ཅན་རྣམས་འདེག་ཅིང་ཕན་འདོགས་པར་བྱེད་པ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་སེམས་ཅན་ཐམས་ཅད་ལ་ཕན་འདོགས་པ་ཡིན་ནོ། །གཞན་ཡང་བློ་གྲོས་ཆེན་པོ་མུ་སྟེགས་ཅན་རྣམས་ལ་མྱ་ངན་ལས་འདས་པ་རྣམ་པ་བཞི་ཡོད་དེ་བཞི་གང་ཞེ་ན། འདི་ལྟ་སྟེ། དངོས་པོའི་རང་བཞིན་དངོས་པོ་མེད་པའི་མྱ་ངན་ལས་འདས་པ་དང་མཚན་ཉིད་སྣ་ཚོགས་ཀྱི་དངོས་པོ་དངོས་པོ་མེད་པའི་མྱ་ངན་ལས་འདས་པ་དང་། རང་གི་མཚན་ཉིད་ཀྱི་རང་བཞིན་དངོས་པོ་མེད་པར་རྟོགས་པའི་མྱ་ངན་ལས་འདས་པ་དང་། ཕུང་པོ་རྣམས་ཀྱི་རང་དང་སྤྱིའི་མཚན་ཉིད་ཀྱི་རྒྱུད་ཀྱི་རྒྱུན་ཆད་པའི་མྱ་ངན་ལས་འདས་པའོ། །དེ་དག་ནི་མུ་སྟེགས་ཅན་རྣམས་ཀྱི་མྱ་ངན་ལས་འདས་པ་ཡིན་ཏེ། ངའི་གསུང་རབ་ལ་མ་ཡིན་ནོ། །བློ་གྲོས་ཆེན་པོ་ངའི་གསུང་རབ་ལ་ནི་རྣམ་པར་རྟོག་པ་དང་བཅས་པའི་རྣམ་པར་ཤེས་པ་ལ་ཟློག་པ་ནི་མྱ་ངན་ལས་འདས་པ་ཞེས་བྱའོ། །བློ་གྲོས་ཆེན་པོས་གསོལ་པ། བཅོམ་ལྡན་འདས་ཀྱིས་རྣམ་པར་ཤེས་པ་བརྒྱད་དུ་རྣམ་པར་མ་གཞག་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྣམ་པར་གཞག་གོ །བློ་གྲོས་ཆེན་པོས་གསོལ་པ། བཅོམ་ལྡན་འདས་གལ་ཏེ་རྣམ་པར་བཞག་ན་ཇི་ལྟར་ཡིད་ཀྱི་རྣམ་པར་ཤེས་པ་ལོག་པས་བསལ། རྣམ་པར་ཤེས་པ་བདུན་རྣམས་ནི་མ་ལགས། བཅོམ་ལྡན་འདས་ཀྱིས་བློ་གྲོས་ཆེན་པོ་ལ་བཀའ་སྩལ་པ། དེ་དག་གི་རྒྱུ་དང་། དེ་དག་གིས་དམིགས་པ་རྐྱེན་ཡིན་པའི་ཕྱིར་
རྣམ་པར་ཤེས་པ་བདུན་རྣམས་འབྱུང་བར་མི་འགྱུར་རོ། །དེ་ལ་ཡིད་ཀྱི་རྣམ་པར་ཤེས་པ་ནི་ཡུལ་རྣམས་བྱེ་བྲག་འབྱེད་ཅིང་མངོན་པར་ཞེན་པས་བག་ཆགས་རྣམས་བསྐྱེད་ནས་ཀུན་གཞི་རྣམ་པར་ཤེས་པ་རྒྱས་པར་བྱེད་དེ། ཡིད་དང་ལྷན་ཅིག་ཏུ་བདག་དང་བདག་གིས་འཛིན་པ་ལ་མངོན་པར་ཞེན་ཅིང་། ངར་སེམས་པའི་རྐྱེན་གྱིས་སྐྱེ་བས་ལུས་ཀྱི་མཚན་ཉིད་རྣམ་པར་མི་འཇིག་གོ །ཀུན་གཞི་རྣམ་པར་ཤེས་པའི་རྒྱུར་གྱུར་ཅིང་དེ་ལ་དམིགས་པ་རང་གི་སེམས་སྣང་བའི་ཡུལ་ལ་མངོན་པར་ཞེན་པས་སེམས་འདུས་པ་གཅིག་གི་རྒྱུར་གཅིག་འབྱུང་སྟེ། དཔེར་ན་རྒྱ་མཚོའི་རླབས་ལྟ་བུར་རང་གི་སྣང་བའི་སྤྱོད་ཡུལ་གྱི་རླུང་གིས་བསྐྱོད་པས་འཇུག་ཅིང་ལྡོག་པ་ཡང་དེ་བཞིན་ཏེ། དེ་ལྟ་བས་ན་ཡིད་ཀྱི་རྣམ་པར་ཤེས་པ་བཟློག་པས་རྣམ་པར་ཤེས་པ་བདུན་རྣམས་ཀྱང་ལྡོག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །བྱ་བ་དང་ནི་མཚན་ཉིད་དང་། །དངོས་པོར་མྱ་ངན་ང་མི་འདའ། །རྣམ་རྟོག་ཤེས་བྱ་རྣམ་ཤེས་ཏེ། །བཟློག་པས་མྱ་ངན་ང་འདས་སོ། །དེ་རྒྱུ་དེ་ལ་དམིགས་པ་སྟེ། །ཡིད་ཀྱིས་འགྲོ་སོགས་ལུས་མངོན་འགྲུབ། །རྒྱུ་འབྱིན་དེ་ནི་སེམས་ཡིན་ཏེ། །རྣམ་ཤེས་གནས་ནི་རབ་ཏུ་བྱེད། །ཇི་ལྟར་ཆུ་ཆེན་ཟད་ནས་ནི། །རླབས་རྣམས་རྒྱུན་དུ་མི་འབྱུང་ལྟར། །དེ་བཞིན་ཡིད་ནི་འགག་པ་ན། །རྣམ་ཤེས་སྣ་ཚོགས་སྐྱེ་མི་འགྱུར། །གཞན་ཡང་བློ་གྲོས་ཆེན་པོ་ཀུན་བརྟགས་པའི་རང་བཞིན་རབ་ཏུ་དབྱེ་བ་དང་། རྟོགས་པའི་ཚུལ་གྱི་མཚན་ཉིད་བཤད་པར་བྱ་སྟེ། ཀུན་བརྟགས་པའི་རང་བཞིན་རབ་ཏུ་དབྱེ་བ་དང་། རྟོགས་པའི་ཚུལ་གྱིས་མཚན་ཉིད་ལ་མཁས་པ་གང་གིས་ཁྱོད་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་ཀུན་དུ་རྟོག་པ་སྤངས་ཤིང་འཕགས་པ་སོ་སོ་རང་གིས་རིག་པ་ལ་གནས་པ་དང་། མུ་སྟེགས་ཅན་གྱི་ཚུལ་རྟོགས་པ་དང་། ཤིན་ཏུ་མཐོང་བའི་བློས་གཟུང་བ་དང་། འཛིན་པའི་རྣམ་པར་རྟོག་པ་སྤངས་ནས་གཞན་གྱི་དབང་གི་མཚན་ཉིད་སྣ་ཚོགས་ལ་ཀུན་བརྟགས་པའི་རང་བཞིན་གྱི་འདུ་བྱེད་དུ་རྟོག་པར་མི་འགྱུར་རོ། །དེ་ལ་བློ་གྲོས་ཆེན་པོ་ཀུན་བརྟགས་པའི་རང་བཞིན་རབ་ཏུ་དབྱེ་བའི་ཚུལ་གྱི་མཚན་ཉིད་གང་ཞེ་ན། འདི་ལྟ་སྟེ། བརྗོད་པའི་རྣམ་པར་རྟོག་པ་དང་། སྨྲ་བར་
བྱ་བའི་རྣམ་པར་རྟོག་པ་དང་། མཚན་ཉིད་ཀྱི་རྣམ་པར་རྟོག་པ་དང་། ནོར་གྱི་རྣམ་པར་རྟོག་པ་དང་། རང་བཞིན་གྱི་རྣམ་པར་རྟོག་པ་དང་། རྒྱུའི་རྣམ་པར་རྟོག་པ་དང་། ལྟ་བའི་རྣམ་པར་རྟོག་པ་དང་། རིགས་པའི་རྣམ་པར་རྟོག་པ་དང་། སྐྱེ་བར་རྣམ་པར་རྟོག་པ་དང་། མི་སྐྱེ་བར་རྣམ་པར་རྟོག་པ་དང་། འབྲེལ་བར་རྣམ་པར་རྟོག་པ་དང་། བཅིངས་པ་དང་མ་བཅིངས་པར་རྣམ་པར་རྟོག་པ་ཡིན་ཏེ། འདི་ནི་ཀུན་བརྟགས་པའི་རང་བཞིན་རབ་ཏུ་དབྱེ་བའི་ཚུལ་གྱི་མཚན་ཉིད་དོ། །དེ་ལ་བློ་གྲོས་ཆེན་པོ་བརྗོད་པའི་རྣམ་པར་རྟོག་པ་གང་ཞེ་ན། འདི་ལྟ་སྟེ། དབྱངས་དང་། གླུ་སྙན་པ་སྣ་ཚོགས་ལ་མངོན་པར་ཞེན་པ་ཡིན་ཏེ། འདི་ནི་བརྗོད་པའི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་སྨྲ་བར་བྱ་བའི་རྣམ་པར་རྟོག་པ་གང་ཞེ་ན། འདི་ལྟ་སྟེ། གང་ཅི་ཡང་རུང་བ་སྨྲ་བར་བྱ་བའི་དངོས་པོའི་རང་བཞིན་འཕགས་པའི་ཡེ་ཤེས་ཀྱིས་ཤེས་པར་བྱ་བ་དེ་ལ་གནས་ནས་བརྗོད་པའི་རྣམ་པ་འབྱུང་བ་དེ་ནི་སྨྲ་བར་བྱ་བའི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་མཚན་ཉིད་ཀྱི་རྣམ་པར་རྟོག་པ་གང་ཞེ་ན། འདི་ལྟ་སྟེ། སྨྲ་བར་བྱ་བའི་དངོས་པོ་དེ་དག་ཉིད་སྨིག་རྒྱུ་ལྟ་བུ་ལ་མཚན་ཉིད་སྣ་ཚོགས་སུ་མངོན་པར་ཞེན་པས་མངོན་པར་ཞེན་ཏེ། འདི་ལྟ་སྟེ། སྲ་བ་དང་། གཤེར་བ་དང་། ཚ་བ་དང་། གཡོ་བའི་མཚན་ཉིད་དུ་དངོས་པོ་ཐམས་ཅད་ལ་རྣམ་པར་རྟོག་པ་དེ་ནི་མཚན་ཉིད་ཀྱི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་ནོར་གྱི་རྣམ་པར་རྟོག་པ་གང་ཞེ་ན། གསེར་དང་། དངུལ་དང་། ནོར་རིན་པོ་ཆེ་རྣམ་པ་སྣ་ཚོགས་ལ་མངོན་པར་ཆགས་པ་དེ་ནི་ནོར་གྱི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་རང་བཞིན་གྱི་རྣམ་པར་རྟོག་པ་གང་ཞེ་ན། འདི་ལྟ་སྟེ། དངོས་པོའི་ངོ་བོ་ཉིད་དུ་འཛིན་ཅིང་འདི་ནི་འདི་བཞིན་གྱི་གཞན་དུ་མ་ཡིན་ནོ་ཞེས་ལོག་པར་ལྟ་བའི་རྣམ་པར་རྟོག་པ་དང་། ཐ་མི་དད་པ་དེ་ནི་རང་བཞིན་གྱི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་རྒྱུའི་རྣམ་པར་རྟོག་པ་གང་ཞེ་ན། འདི་ལྟ་སྟེ། རྒྱུ་དང་རྐྱེན་གང་གིས་ཡོད་པ་དང་། མེད་པའི་རྣམ་པར་རྟོག་པའི་རྒྱུའི་མཚན་ཉིད་སྐྱེད་པ་དེ་ནི་རྒྱུའི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་ལྟ་བའི་རྣམ་པར་རྟོག་པ་གང་ཞེ་ན། འདི་ལྟ་སྟེ། ཡོད་པ་དང་། མེད་པ་དང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པར་ལོག་པར་ལྟ་བའི་མུ་སྟེགས་ཅན་གྱི་རྣམ་
པར་རྟོག་པ་ལ་མངོན་པར་ཞེན་པའི་རྣམ་པར་རྟོག་པ་དེ་ནི་ལྟ་བའི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་རིགས་པའི་རྣམ་པར་རྟོག་པ་གང་ཞེ་ན། འདི་ལྟ་སྟེ། བདག་དང་བདག་གི་མཚན་ཉིད་རིགས་པས་བརྩད་དེ་སྨྲ་བ་ནི་རིགས་པའི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་སྐྱེ་བར་རྣམ་པར་རྟོག་པ་གང་ཞེ་ན། འདི་ལྟ་སྟེ། རྐྱེན་རྣམས་ཀྱིས་ཡོད་པ་དང་། མེད་པའི་དངོས་པོ་སྐྱེ་བར་མངོན་པར་ཞེན་པ་དེ་ནི་སྐྱེ་བར་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་མི་སྐྱེ་བར་རྣམ་པར་རྟོག་པ་གང་ཞེ་ན། འདི་ལྟ་སྟེ། དངོས་པོ་ཐམས་ཅད་ནི་སྔ་ནས་སྐྱེ་བ་མེད་དེ། ས་བོན་མེད་པ་ལས་རྒྱུ་དང་རྐྱེན་གྱིས་རྒྱུ་མེད་པའི་ལུས་བསྐྱེད་པའོ། །ཞེས་འཛིན་པ་དེ་ནི་མི་སྐྱེ་བར་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་འབྲེལ་བའི་རྣམ་པར་རྟོག་པ་གང་ཞེ་ན། འདི་ལྟ་སྟེ། གསེར་དང་། སྐུད་པ་ཇི་ལྟ་བ་བཞིན་དུ་དེ་དང་ལྷན་ཅིག་པའི་མཚན་ཉིད་དུ་འབྲེལ་བ་དེ་ནི་འབྲེལ་བའི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་བཅིངས་པ་དང་། མ་བཅིངས་པའི་རྣམ་པར་རྟོག་པ་གང་ཞེ་ན། འདི་ལྟ་སྟེ། འཆིང་བའི་རྒྱུ་དང་། བཅིང་བར་བྱ་བ་ལ་མངོན་པར་ཞེན་པ་སྟེ། ཇི་ལྟར་སྐྱེས་བུ་ཐམས་ཅད་དང་ལྡན་པས་ལག་པ་ལ་མདུད་པ་འདོར་བ་དང་འགྲོལ་བ་ལྟ་བུ་ནི་བཅིངས་པ་དང་། མ་བཅིངས་པའི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་ཀུན་བརྟགས་པའི་རང་བཞིན་རབ་ཏུ་དབྱེ་བའི་ཚུལ་གྱི་མཚན་ཉིད་དེ་ལ་བྱིས་པ་སོ་སོའི་སྐྱེ་བོ་ཐམས་ཅད་ཡོད་པ་དང་མེད་པར་མངོན་པར་ཞེན་ཏོ། །བློ་གྲོས་ཆེན་པོ་གཞན་གྱི་དབང་ལ་མངོན་པར་ཞེན་པས་མངོན་པར་ཞེན་པར་གྱུར་པ་དག་ཡོངས་སུ་བརྟགས་པའི་རང་བཞིན་སྣ་ཚོགས་ལ་མངོན་པར་ཞེན་པས་སྒྱུ་མ་བཞིན་དུ་ལུས་སྣ་ཚོགས་སྟོན་པ་ལ་བྱིས་པ་རྣམས་ཀྱི་རྣམ་པར་རྟོག་པས་སྒྱུ་མ་ལས་གཞན་དུ་རྣམ་པ་སྣ་ཚོགས་སུ་མཐོང་སྟེ། བློ་གྲོས་ཆེན་པོ་སྒྱུ་མ་དང་སྣ་ཚོགས་ནི་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །གལ་ཏེ་ཐ་དད་ན་ནི་སྒྱུ་མ་ནི་སྣ་ཚོགས་ཀྱི་རྒྱུ་མ་ཡིན་པར་འགྱུར་རོ། །ཅི་སྟེ་ཐ་མི་དད་ན་ནི་སྒྱུ་མ་དང་སྣ་ཚོགས་བྱེ་བྲག་མེད་པར་འགྱུར་ཏེ། དེའི་བྱེ་བྲག་མཐོང་བས་ན་དེའི་ཕྱིར་གཅིག་པ་ཡང་མ་ཡིན། ཐ་དད་པ་ཡང་མ་ཡིན་ནོ། །དེ་ལྟ་བས་ན་བློ་གྲོས་ཆེན་པོ་ཁྱོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་གིས་སྒྱུ་མ་ལྟ་བུའི་གཞན་གྱི་དབང་དང་། ཀུན་བརྟགས་པའི་རང་བཞིན་ལ་ཐ་དད་པ་དང་། ཐ་དད་
པ་མ་ཡིན་པ་དང་། ཡོད་པ་དང་མེད་པར་མངོན་པར་ཞེན་པར་མི་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །སེམས་ནི་ཡུལ་གྱིས་ཀུན་དུ་བཅིངས། །རྟོག་པ་རིག་ལས་ཡེ་ཤེས་འཇུག །སྣང་བ་མེད་དང་ཁྱད་པར་ལས། །ཤེས་རབ་མཉམ་པར་རབ་ཏུ་བསྐྱེད། །བརྟགས་པའི་རང་བཞིན་གྱིས་ཡོད་དེ། །གཞན་དབང་ལ་ནི་དེ་མེད་དོ། །ཀུན་བརྟགས་དག་ནི་ནོར་པས་བསྡུས། །གཞན་དབང་དེ་ནི་ཀུན་བརྟགས་མིན། །ཡན་ལག་ཐ་དད་འབྱུང་བ་ཡང་། །སྒྱུ་མ་ཇི་བཞིན་མི་འགྲུབ་སྟེ། །དེ་ཡི་མཚན་མ་སྣ་ཚོགས་ཡོད། །ཀུན་བརྟགས་དེ་ནི་འགྲུབ་མི་འགྱུར། །དེ་ཡི་མཚན་མ་གནས་ངན་ལེན། །སེམས་ཀྱི་འཆིང་ལས་སྐྱེས་པ་སྟེ། །རྣམ་རྟོག་ཤེས་པ་མེད་པ་རྣམས། །གཞན་གྱི་དབང་ལས་རྣམ་པར་རྟོག །བརྟགས་པའི་དངོས་པོ་འདི་དག་ནི། །དེ་ཉིད་གཞན་གྱི་དབང་ཡིན་ཏེ། །བརྟགས་པ་དག་ནི་སྣ་ཚོགས་ཡོད། །གཞན་གྱི་དབང་ལ་རྟོག་པར་བྱེད། །ཀུན་རྫོབ་དང་ནི་དོན་དམ་སྟེ། །གསུམ་པ་རྒྱུ་ལས་སྐྱེ་བ་མེད། །བརྟགས་པ་དག་ནི་ཀུན་རྫོབ་བཤད། །དེ་འཆད་འཕགས་པའི་སྤྱོད་ཡུལ་ལོ། །རྣལ་འབྱོར་ཅན་གྱི་དངོས་པོ་ལྟར། །གཅིག་ལ་སྣ་ཚོགས་སྟོན་བྱེད་ཀྱང་། །དེ་ལ་སྣ་ཚོགས་ཡོད་མ་ཡིན། །ཀུན་བརྟགས་མཚན་ཉིད་དེ་བཞིན་ནོ། །ཇི་ལྟར་རབ་རིབ་ཅན་དག་གི། །རྣམ་རྟོག་སྣ་ཚོགས་གཟུགས་སུ་སྣང་། །རབ་རིབ་གཟུགས་དང་གཟུགས་མིན་མེད། །གཞན་དབང་མ་རྟོགས་དེ་བཞིན་ནོ། །ཇི་ལྟར་གསེར་ནི་རབ་སྦྱངས་པ། །དྲི་མ་དག་ནི་སྤངས་གྱུར་དང་། །ནམ་མཁའ་དག་ནི་སྤྲིན་མེད་ལྟར། །ཀུན་བརྟགས་པ་ཡང་དེ་བཞིན་ནོ། །ཀུན་བརྟགས་པ་ཡི་དངོས་པོ་དང་། །དེ་བཞིན་གཞན་དབང་ཡོད་མིན་ལ། །སྒྲོ་འདོགས་སྐུར་པ་འདེབས་བྱེད་དེ། །རྣམ་བརྟགས་དབང་གིས་འཇིག་པ་ཡིན། །གལ་ཏེ་བརྟགས་པ་དངོས་མེད་ལ། །གཞན་གྱི་དབང་ནི་ཡོད་གྱུར་ན། །དངོས་མེད་དངོས་པོ་ཡོད་པས་ན། །དངོས་ཡོད་དངོས་པོ་མེད་ལས་འབྱུང་། །ཀུན་བརྟགས་པ་ལ་བརྟེན་པའི་རྒྱུས། །གཞན་དབང་དེ་ནི་ཉེ་བར་དམིགས། །རྒྱུ་མཚན་མིང་དང་འབྲེལ་པ་ལས། །ཀུན་བརྟགས་རྣམས་ནི་སྐྱེ་བར་འགྱུར། །ཤིན་ཏུ་མ་གྲུབ་རྟོགས་པའི་ཚེ། །ཀུན་བརྟགས་ལས་ནི་འདའ་བར་འགྱུར། །དེ་ནས་
ཡོངས་སུ་དག་རིག་པ། །དེ་ནི་དོན་དམ་ཞེས་བྱའོ། །ཀུན་བརྟགས་རྣམ་པ་བཅུ་གཉིས་ཏེ། །གཞན་གྱི་དབང་ནི་རྣམ་པ་དྲུག །སོ་སོ་རང་རིག་ཡེ་ཤེས་ཀྱིས། །ཤེས་བྱ་དེ་ལ་བྱེ་བྲག་མེད། །ཆོས་ལྔ་ཡང་དག་ཉིད་ཡིན་ཏེ། །རང་བཞིན་ལ་ནི་རྣམ་གསུམ་ཡོད། །རྣལ་འབྱོར་ཅན་གྱིས་དེ་བསྒོམས་ན། །དེ་བཞིན་ཉིད་ལས་མི་འདའོ། །མཚན་མ་དག་དང་གཞན་གྱི་དབང་། །མིང་དེས་ཀུན་དུ་བརྟགས་པ་སྐྱེད། །ཀུན་བརྟགས་མཚན་མ་དེ་དག་ནི། །གཞན་དབང་དེ་ལས་བྱུང་བའོ། །བློ་ཡིས་སོ་སོར་རབ་བརྟགས་ན། །གཞན་དབང་མེད་ཅིང་བརྟགས་པའང་མེད། །ཡོངས་གྲུབ་ལ་ནི་དངོས་མེད་ན། །བློ་ཡིས་ཅི་ཞིག་རྣམ་པར་བརྟགས། །ཀུན་བརྟགས་རང་བཞིན་དེ་དག་ལ། །རང་བཞིན་གཉིས་ནི་རྣམ་པར་གཞག །བརྟགས་པ་དག་ནི་སྣ་ཚོགས་སྣང་། །རྣམ་དག་འཕགས་པའི་སྤྱོད་ཡུལ་ལོ། །ཀུན་བརྟགས་རི་མོའི་རྣམ་པ་བཞིན། །གཞན་གྱི་དབང་ལས་བརྟགས་པ་སྟེ། །རྣམ་པ་གཞན་དུ་བརྟགས་ན་ནི། །མུ་སྟེགས་སྨྲ་ལ་གནས་པར་འགྱུར། །རྟོགས་པས་བརྟགས་ཞེས་བརྗོད་པ་སྟེ། །འདུས་ལས་སྐྱེ་བར་མཐོང་བའི་རྒྱུས། །རྣམ་རྟོག་གཉིས་ལས་གྲོལ་བ་ནི། །དེ་ཉིད་ཡོངས་སུ་གྲུབ་པ་ཡིན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཕགས་པ་སོ་སོ་རང་གིས་རིག་པའི་ཡེ་ཤེས་དང་། ཐེག་པ་གཅིག་གི་མཚན་ཉིད་བཤད་དུ་གསོལ། འཕགས་པ་སོ་སོ་རང་གིས་རིག་པའི་ཡེ་ཤེས་ཀྱི་མཚན་ཉིད་དང་། ཐེག་པ་གཅིག་རྟོགས་པའི་མཚན་ཉིད་དེས་བདག་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་འཕགས་པ་སོ་སོ་རང་གིས་རིག་པའི་ཡེ་ཤེས་ཀྱི་མཚན་ཉིད་དང་། ཐེག་པ་གཅིག་ལ་མཁས་ཤིང་གཞན་གྱི་དྲིང་ལ་མི་འཇོག་པར་སངས་རྒྱས་ཀྱི་ཆོས་ཐམས་ཅད་རྟོགས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། །བློ་གྲོས་ཆེན་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་
བཀའ་སྩལ་ཏོ། །བློ་གྲོས་ཆེན་པོ་དེ་ལ་འཕགས་པ་སྔ་མ་རྣམས་ཀྱིས་ཁོང་དུ་ཆུད་ནས་གཅིག་ནས་གཅིག་ཏུ་བརྒྱུད་དེ། ཀུན་བརྟགས་པ་དངོས་པོ་མེད་པར་བསྟན་པ་ལ་བརྟེན་ནས། བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་གཅིག་པུ་དབེན་པར་སོང་ནས། རང་གི་བློས་རྣམ་པ་དཔྱོད་པ། གཞན་གྱི་དྲིང་ལ་མི་འཇོག་ཅིང་ལྟ་བ་དང་། རྣམ་པར་རྟོག་པ་སྤངས་ཏེ། གོང་ནས་གོང་དུ་ཁྱད་པར་ཅན་དུ་གྱུར་ནས། དེ་བཞིན་གཤེགས་པའི་ས་ལ་རབ་ཏུ་འཇུག་པ་ནི་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་མཚན་ཉིད་ཅེས་བྱའོ། །དེ་ལ་བློ་གྲོས་ཆེན་པོ་ཐེག་པ་གཅིག་གི་མཚན་ཉིད་གང་ཞེ་ན། འདི་ལྟ་སྟེ། ཐེག་པ་གཅིག་གི་ལམ་རིག་པ་ནི་ངས་ཐེག་པ་གཅིག་ཅེས་བཤད་དོ། །ཐེག་པ་གཅིག་གི་ལམ་ཁོང་དུ་ཆུད་པ་གང་ཞེ་ན། འདི་ལྟ་སྟེ། གཟུང་བ་དང་། འཛིན་པའི་རྣམ་པར་རྟོག་པ་ཡང་དག་པ་ཇི་ལྟ་བ་བཞིན་གྱི་གནས་ལ་རྣམ་པར་རྟོག་པ་མི་སྐྱེ་བ་ནི་ཐེག་པ་གཅིག་ཁོང་དུ་ཆུད་པ་ཞེས་བྱའོ། །བློ་གྲོས་ཆེན་པོ་ཐེག་པ་གཅིག་ཁོང་དུ་ཆུད་པ་འདི་ནི་དེ་བཞིན་གཤེགས་པ་མ་གཏོགས་པར་གཞན་མུ་སྟེགས་ཅན་དང་། ཉན་ཐོས་དང་། རང་སངས་རྒྱས་དང་། ཚངས་པ་ལ་སོགས་པས་ཐོབ་པ་མ་ཡིན་ནོ། །དེའི་ཕྱིར་ཐེག་པ་གཅིག་ཅེས་བྱའོ། །བཅོམ་ལྡན་འདས་ལ་བློ་གྲོས་ཆེན་པོས་གསོལ་པ། བཅོམ་ལྡན་འདས་ཀྱིས་ཅིའི་སླད་དུ་ཐེག་པ་གསུམ་དུ་བཀའ་སྩལ་ལ་ཐེག་པ་གཅིག་ཏུ་མ་གསུངས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་བདག་ཉིད་ཡོངས་སུ་མྱ་ངན་ལས་མི་འདའ་བའི་ཆོས་ཅན་ཡིན་པའི་ཕྱིར་ཉན་ཐོས་དང་། རང་སངས་རྒྱས་ཐམས་ཅད་ལ་ཐེག་པ་གཅིག་ཏུ་མ་བཤད་དེ། འདི་ལྟར་ཉན་ཐོས་དང་། རང་སངས་རྒྱས་ཐམས་ཅད་ནི་དེ་བཞིན་གཤེགས་པའི་འདུལ་བ་དང་། རབ་ཏུ་དབེན་པའི་སྦྱོར་བས་རྣམ་པར་གྲོལ་བ་འཐོབ་ཀྱི། བདག་ཉིད་ཀྱི་མཐུས་ནི་མ་ཡིན་པའི་ཕྱིར་ཐེག་པ་གཅིག་ཏུ་མ་བཤད་དོ། །གཞན་ཡང་བློ་གྲོས་ཆེན་པོ་ཉོན་མོངས་པའི་སྒྲིབ་པ་དང་། ལས་ཀྱི་བག་ཆགས་མ་སྤངས་པའི་ཕྱིར་ཉན་ཐོས་དང་། རང་སངས་རྒྱས་ཐམས་ཅད་ལ་ཐེག་པ་གཅིག་ཏུ་མ་བཤད་དོ། །ཆོས་
བདག་མེད་པར་མ་རྟོགས་ཤིང་དངོས་པོ་དང་བཅས་པའི་འཆི་འཕོ་མ་སྤངས་པའི་ཕྱིར་ཐེག་པ་གསུམ་དུ་བསྟན་ཏེ། བློ་གྲོས་ཆེན་པོ་དེ་དག་ནམ་ཉེས་པའི་བག་ཆགས་ཐམས་ཅད་སྤངས་ཤིང་ཆོས་བདག་མེད་པར་རྟོགས་པ་དེ་ན་དེ་དག་ཉོན་མོངས་པའི་ཉེས་པ་ཐམས་ཅད་སྐྱེད་པའི་བག་ཆགས་སྤངས་ཏེ། ཏིང་ངེ་འཛིན་གྱི་བདེ་བ་ལ་རོ་མྱོང་བའི་དངོས་པོ་མེད་པར་གྱུར་ནས་ཟག་པ་མེད་པའི་དབྱིངས་ལས་སད་དེ། སད་ནས་ཡང་འཇིག་རྟེན་ལས་འདས་པར་ཞུགས་ཏེ། གོང་ནས་གོང་དུ་ཟག་པ་མེད་པའི་དབྱིངས་སུ་ཚོགས་རྣམས་ཡོངས་སུ་བསྐངས་ནས། དེ་བཞིན་གཤེགས་པའི་ཆོས་ཀྱི་སྐུ་བསམ་གྱིས་མི་ཁྱབ་པ་ལ་དབང་བྱེད་པ་རབ་ཏུ་འཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ལྷ་རྣམས་དང་ནི་ཚངས་པའི་ཐེག །ཉན་ཐོས་རང་རྒྱལ་ཐེག་པ་དང་། །དེ་བཞིན་གཤེགས་པ་རྣམས་ཀྱི་ཐེག །ང་ཡིས་ཐེག་པ་དེ་དག་ནི། །ཇི་སྲིད་སེམས་རྣམས་འཇུག་པའི་བར། །དེ་དག་མཐར་ཕྱིན་མིན་པར་བཤད། །གལ་ཏེ་སེམས་དེ་ཟད་གྱུར་ན། །ཐེག་པ་མེད་ཅིང་གདེག་པ་མེད། །ཐེག་པ་རྣམ་པར་གཞག་མེད་པས། །ཐེག་པ་གཅིག་ཏུ་ངས་བསྟན་ཏོ། །སེམས་ཅན་རྣམས་ནི་དྲང་བའི་ཕྱིར། །ཐེག་པ་ཐ་དད་ངས་བཤད་དེ། །རྣམ་པར་གྲོལ་བ་རྣམ་གསུམ་ཡོད། །ཆོས་ལ་བདག་མེད་དེ་ཉིད་དང་། །ཉོན་མོངས་ཤེས་རབ་ལ་སོགས་པས། །རྣམ་པར་གྲོལ་ན་སྟོང་པར་འགྱུར། །རྒྱ་མཚོ་ལ་ནི་ཤིང་འཕྱོ་བ། །རྟག་ཏུ་རླབས་ཀྱིས་གཡེང་བ་ལྟར། །ཉན་ཐོས་རྨོངས་པའང་དེ་བཞིན་ཏེ། །མཚན་ཉིད་རླུང་གིས་རྣམ་པར་གཡེངས། །ཀུན་ནས་ལྡང་ལས་དེ་ལོག་ཀྱང་། །ཉོན་མོངས་བག་ཆགས་གཞན་གྱིས་རྨོངས། །ཏིང་ངེ་འཛིན་གྱི་བདེ་བས་མྱོས། །ཟག་པ་མེད་པའི་དབྱིངས་ལ་གནས། །མཐར་ཕྱིན་ཚུལ་ནི་དེ་ལ་མེད། །ཕྱིར་ཡང་དེ་ལས་མི་ལྡོག་སྟེ། །ཏིང་འཛིན་རྣམས་ཀྱི་ལུས་ཐོབ་ནས། །བསྐལ་པའི་བར་དུ་དེ་མི་སད། །ཆང་གིས་མྱོས་པའི་སྐྱེས་བུ་དག །མྱོས་བྱེད་ཟད་ནས་སངས་འགྱུར་ལྟར། །དེ་དག་ཆོས་རྟོགས་དེ་བཞིན་ཏེ། །བླ་མེད་སངས་རྒྱས་སྐུ་འཐོབ་འགྱུར།། །།
འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས། བམ་པོ་ལྔ་པ། དེ་ནས་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་ཡིད་ལས་བྱུང་བའི་ལུས་རབ་ཏུ་དབྱེ་བ་རྟོགས་པའི་མཚན་ཉིད་བསྟན་གྱིས་དེ་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། ལེགས་སོ་བཅོམ་ལྡན་འདས་དེ་བཞིན་དུ་འཚལ་ལོ་ཞེས་བཀའ་མཉན་པ་དང་། དེ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་ཡིད་ལས་བྱུང་བའི་ལུས་ནི་རྣམ་པ་གསུམ་སྟེ། གསུམ་གང་ཞེ་ན། འདི་ལྟ་སྟེ། ཏིང་ངེ་འཛིན་གྱི་བདེ་བ་ལ་སྙོམས་པར་ཞུགས་པའི་ཡིད་ལས་བྱུང་བའི་ལུས་དང་། ཆོས་ཀྱི་ངོ་བོ་ཉིད་རྟོགས་པའི་ཡིད་ལས་བྱུང་བའི་ལུས་དང་། རིས་སུ་ལྷན་ཅིག་སྐྱེས་པ་མངོན་པར་འདུ་བྱ་བ་མེད་པས་ཡིད་ལས་བྱུང་བའི་ལུས་ཏེ། རྣལ་འབྱོར་པ་རྣམས་ཀྱིས་ས་དང་པོ་ནས་གོང་ནས་གོང་དུ་སའི་མཚན་ཉིད་ཡོངས་སུ་ཤེས་པས་ལུས་རྣམ་པ་གསུམ་པོ་འཐོབ་པར་འགྱུར་རོ། །དེ་ལ་བློ་གྲོས་ཆེན་པོ་ཏིང་ངེ་འཛིན་གྱི་བདེ་བ་ལ་སྙོམས་པར་ཞུགས་པའི་ཡིད་ལས་བྱུང་བའི་ལུས་གང་ཞེ་ན། འདི་ལྟ་སྟེ། ས་གསུམ་པ་དང་། བཞི་པ་དང་། ལྔ་པ་ལ་ཏིང་ངེ་འཛིན་གྱི་བདེ་བ་ལ་སྙོམས་པར་ཞུགས་པའི་ཕྱིར་རང་གི་སེམས་རྣམ་པ་མང་པོ་དབེན་པར་སྤྱོད་པས་སེམས་ཀྱི་རྒྱ་མཚོ་ལ་གནས་ཏེ། རྣམ་པར་ཤེས་པའི་རླབས་ཀྱི་མཚན་ཉིད་མི་འབྱུང་བས་རང་གི་སེམས་སྣང་བའི་ཡུལ་དངོས་པོ་ཡོད་པ་དང་། དངོས་པོ་མེད་པ་ཡོངས་སུ་ཤེས་པ་ནི་ཏིང་ངེ་འཛིན་གྱི་བདེ་བ་ལ་སྙོམས་པར་ཞུགས་པའི་ཡིད་ལས་བྱུང་བའི་ལུས་ཞེས་བྱའོ། །བློ་གྲོས་ཆེན་པོ་ཆོས་ཀྱི་ངོ་བོ་ཉིད་རྟོགས་པའི་ཡིད་ལས་བྱུང་བའི་ལུས་གང་ཞེ་ན། འདི་ལྟ་སྟེ། ས་བརྒྱད་པ་ལ་སྒྱུ་མ་ལྟ་བུ་ལ་སོགས་པའི་ཆོས་ལ་སྣང་བ་མེད་པར་རྣམ་པར་ཁོང་དུ་ཆུད་པས་ལུས་དང་སེམས་གནས་ཤིན་ཏུ་གྱུར་ཏེ། སྒྱུ་མ་ལྟ་བུའི་ཏིང་ངེ་འཛིན་རབ་ཏུ་འཐོབ་
པ་དང་། གཞན་ཡང་ཏིང་ངེ་འཛིན་གྱི་སྒོ་དང་། མཚན་མ་དང་། སྟོབས་དང་། དབང་དང་། མངོན་པར་ཤེས་པ་དཔག་ཏུ་མེད་པ་འཐོབ་སྟེ། མེ་ཏོག་ལྟར་རྒྱས་ཤིང་ཡིད་བཞིན་དུ་མགྱོགས་པ་དང་། སྒྱུ་མ་དང་། རྨི་ལམ་དང་། ཆུ་ཟླ་དང་། གཟུགས་བརྙན་ལྟ་བུ་འབྱུང་བ་ལས་གྱུར་པ་མ་ཡིན་ཡང་འབྱུང་བ་ལས་གྱུར་པ་དང་འདྲ་བ། གཟུགས་རྣམ་པ་སྣ་ཚོགས་ཐམས་ཅད་ཀྱིས་ཡན་ལག་ཕུན་སུམ་ཚོགས་པར་བརྒྱན་པ། སངས་རྒྱས་ཀྱི་ཞིང་ཐམས་ཅད་དུ་འཁོར་གྱི་དཀྱིལ་འཁོར་གྱི་རྗེས་སུ་འཇུག་པ། ཆོས་ཀྱི་ངོ་བོ་ཉིད་རྟོགས་པར་ཁོང་དུ་ཆུད་པའི་ཕྱིར་དེ་ནི་ཆོས་ཀྱི་ངོ་བོ་ཉིད་རྟོགས་པ་ལས་བྱུང་བའི་ལུས་ཞེས་བྱའོ། །བློ་གྲོས་ཆེན་པོ་དེ་ལ་རིས་སུ་ལྷན་ཅིག་སྐྱེས་པ་མངོན་པར་འདུ་བྱ་བ་མེད་པའི་ཡིད་ལས་བྱུང་བའི་ལུས་གང་ཞེ་ན། འདི་ལྟ་སྟེ། སངས་རྒྱས་ཀྱི་ཆོས་ཐམས་ཅད་རྟོགས་ཤིང་རང་གིས་ཐོབ་པའི་བདེ་བའི་མཚན་ཉིད་ལ་དམིགས་པ་དེ་ནི་རིས་སུ་ལྷན་ཅིག་སྐྱེས་པ་མངོན་པར་འདུ་བྱ་བ་མེད་པའི་ཡིད་ལས་བྱུང་བའི་ལུས་ཞེས་བྱ་སྟེ། བློ་གྲོས་ཆེན་པོ་ལུས་གསུམ་པོ་དེ་དག་གི་མཚན་ཉིད་རབ་ཏུ་དབྱེ་བ་རྟོགས་པ་འདི་ལ་རབ་ཏུ་བརྩོན་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་དག་པར་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ང་ཡིས་ཐེག་པ་ཐེག་ཆེན་མིན། །བཤད་པ་མེད་ཅིང་ཡི་གེ་མེད། །བདེན་པ་མ་ཡིན་རྣམ་གྲོལ་མིན། །སྤྱོད་ཡུལ་མེད་པའང་མ་ཡིན་ཏེ། །འོན་ཀྱང་ཐེག་ཆེན་ཐེག་པ་ནི། །ཏིང་ངེ་འཛིན་ལ་དབང་བྱེད་ཅིང་། །ཡིད་ལས་བྱུང་ལུས་སྣ་ཚོགས་ལ། །དབང་གི་མེ་ཏོག་དག་གིས་བརྒྱན། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཇི་སྐད་དུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་མཚམས་མེད་པ་ལྔའི་ལས་སྤྱོད་ཀྱང་མནར་མེད་པའི་དམྱལ་བར་ལྷུང་བར་མི་འགྱུར་བའི་ཕྱིར་དང་། སྤྲོ་བ་རབ་ཏུ་བསྐྱེད་པའི་ཕྱིར་བྱིན་གྱི་རླབས་ཀྱིས་སྤྲུལ་པ་དག་མངོན་པར་རྟོགས་པར་རབ་ཏུ་སྟོན་ཏོ། །མཚམས་མེད་པའི་དངོས་པོ་
བྱས་པ་རྣམས་མངོན་པར་རྟོགས་པ་མི་འཐོབ་པར་གཅིག་ཏུ་ངེས་པ་ཡང་མེད་དེ། རང་གི་སེམས་སྣང་བ་ཙམ་དུ་ཁོང་དུ་ཆུད་པ་དང་། ལུས་དང་ལོངས་སྤྱོད་དུ་རྣམ་པར་རྟོག་པ་དང་། བདག་དང་བདག་གིར་འཛིན་པ་དང་བྲལ་བ་དང་། གལ་ཏེ་བརྒྱ་ལམ་ན་དགེ་བའི་བཤེས་གཉེན་དང་ཕྲད་ནས་འགྲོ་བ་གཞན་དུ་མཚམས་སྦྱོར་བའི་རྣམ་པར་རྟོག་པ་ལས་གྲོལ་བར་འགྱུར་བ་ནི་མ་གཏོགས་སོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །འདོད་པའི་སྲིད་པ་མ་ཞེས་བྱ། །མ་རིག་པ་ནི་ཕ་ཡིན་ནོ། །ཡུལ་རིག་རྣམ་ཤེས་སངས་རྒྱས་ཏེ། །བག་ལ་ཉལ་ནི་དགྲ་བཅོམ་པ། །ཕུང་པོ་འདུས་པ་དགེ་འདུན་ཡིན། །མཚམས་མེད་རིམ་གྱིས་བཅད་པས་ན། །དེ་ན་མཚམས་མེད་ལྔ་ཡིན་ཏེ། །མནར་མེད་དམྱལ་བར་ལྟུང་མི་འགྱུར། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་རྣམས་ཀྱི་སངས་རྒྱས་པ་ཉིད་བདག་ལ་བཀའ་སྩལ་དུ་གསོལ། །བཅོམ་ལྡན་འདས་ཇི་ལྟར་ན་སངས་རྒྱས་རྣམས་ཀྱི་སངས་རྒྱས་པ་ཉིད་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་གང་ཟག་དང་ཆོས་ལ་བདག་མེད་པར་རྟོགས་པ་དང་། སྒྲིབ་པ་གཉིས་ཡོངས་སུ་ཤེས་ཤིང་ཁོང་དུ་ཆུད་པ་དང་། ཤི་འཕོ་རྣམ་པ་གཉིས་དང་བྲལ་བ་དང་། ཉོན་མོངས་པ་རྣམ་པ་གཉི་ག་སྤངས་པ་དེ་ནི་སངས་རྒྱས་རྣམས་ཀྱི་སངས་རྒྱས་པ་ཉིད་ཅེས་བྱའོ། །བློ་གྲོས་ཆེན་པོ་ཉན་ཐོས་དང་། རང་སངས་རྒྱས་རྣམས་ཀྱིས་ཆོས་དེ་དག་ཉིད་ཁོང་དུ་ཆུད་ན་དེ་ཡང་སངས་རྒྱས་པ་ཉིད་ཅེས་བྱ་སྟེ། དེས་ན་དེའི་ཕྱིར་ངས་ཐེག་པ་གཅིག་ཏུ་བཤད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །བདག་མེད་རྣམ་གཉིས་མཁས་པ་དང་། །སྒྲིབ་གཉིས་ཉོན་མོངས་རབ་སྤངས་དང་། །ཤི་འཕོ་གཉིས་དང་གཏན་བྲལ་བ། །དེ་ནི་སངས་རྒྱས་ཉིད་ཅེས་བྱ། །དེ་ནས་ཡང་བྱང་ཆུབ་སེམས་དཔའ་བློ་
གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཅིའི་སླད་དུ་བཅོམ་ལྡན་འདས་ཀྱིས་འཁོར་གྱི་ནང་དུ་འདི་སྐད་ཅེས་ང་ནི་གང་འདས་པའི་སངས་རྒྱས་ཐམས་ཅད་ཉིད་དོ། །སྐྱེས་པའི་རབས་སྣ་ཚོགས་སུ་ཡང་ང་ཉིད་དེའི་ཚེ་འཁོར་ལོས་སྒྱུར་བའི་རྒྱལ་པོ་སྤྱི་བོ་སྐྱེས་དང་། གླང་པོ་ཆེ་སོ་དྲུག་པ་དང་། ནེ་ཙོ་དང་། དབང་པོ་དང་། དྲང་སྲོང་མིག་བཟངས་ལ་སོགས་པའོ་ཞེས་སྐྱེས་པའི་རབས་བརྒྱ་སྟོང་གསུངས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་མཚུངས་པ་རྣམ་པ་བཞིའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཁོར་གྱི་ནང་དུ་འདི་སྐད་ཅེས་ང་ཉིད་དེའི་ཚེ་དེའི་དུས་ན་སངས་རྒྱས་འཁོར་བ་འཇིག་དང་། གསེར་ཐུབ་དང་། འོད་སྲུང་དུ་གྱུར་ཏོ་ཞེས་གསུང་ངོ་། །མཚུངས་པ་རྣམ་པ་བཞི་གང་ཞེ་ན། འདི་ལྟ་སྟེ། ཡི་གེ་མཚུངས་པ་དང་། གསུང་མཚུངས་པ་དང་། ཆོས་མཚུངས་པ་དང་། སྐུ་མཚུངས་པ་ནི་མཚུངས་པ་རྣམ་པ་བཞི་ཞེས་བྱ་སྟེ། འདི་ལྟར་མཚུངས་པ་རྣམ་པ་འདི་བཞིའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་སྐད་དུ་གསུངས་ཏེ། དེ་ལ་ཡི་གེ་མཚུངས་པ་གང་ཞེ་ན། ཡི་གེ་གང་གིས་ངའི་མིང་སངས་རྒྱས་ཞེས་བརྗོད་པའི་ཡི་གེ་དེས་སངས་རྒྱས་ཐམས་ཅད་ཀྱང་བརྗོད་པས། ཡི་གེ་དེ་དག་གི་རང་བཞིན་བྱེ་བྲག་མེད་པས་ན་དེ་ནི་ཡི་གེ་མཚུངས་པ་ཞེས་བྱའོ། །དེ་ལ་གསུང་མཚུངས་པ་གང་ཞེ་ན་འདི་ལྟ་སྟེ། ངའི་གསུང་རྣམ་པ་དྲུག་ཅུ་རྩ་བཞི་ཚངས་པའི་སྒྲ་སྐད་ཀྱི་དབྱངས་ཀྱི་མཚན་ཉིད་དུ་འབྱུང་ངོ་། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་གསུང་ཡང་དེ་བཞིན་དུ་རྣམ་པ་དྲུག་ཅུ་རྩ་བཞི་ཚངས་པའི་སྒྲ་སྐད་ཀྱི་དབྱངས་ཀྱི་མཚན་ཉིད་དུ་འབྱུང་སྟེ། ཀ་ལ་པིང་ཀ་དང་། ཚངས་པའི་སྒྲ་སྐད་ཀྱི་དབྱངས་ཀྱི་རང་བཞིན་དུ་བྱེ་བྲག་མེད་ཅིང་ལྷག་ཆད་མེད་དོ། །དེ་ལ་སྐུ་མཚུངས་པ་གང་ཞེ་ན། འདི་ལྟ་སྟེ། ང་དང་སངས་རྒྱས་ཐམས་ཅད་ནི་ཆོས་ཀྱི་སྐུ་དང་། གཟུགས་དང་། མཚན་
དང་། དཔེ་བྱད་བཟང་པོའི་སྐུར་མཚུངས་ཤིང་བྱེ་བྲག་མེད་དེ། འགྲོ་བའི་བྱེ་བྲག་སེམས་ཅན་དེ་དང་དེ་དག་གདུལ་བའི་ཕྱིར་གཟུགས་ཐ་དད་པ་སྣ་ཚོགས་སྟོན་པ་ནི་མ་གཏོགས་ཏེ། དེ་ནི་སྐུ་མཚུངས་པ་ཞེས་བྱའོ། །དེ་ལ་ཆོས་མཚུངས་པ་གང་ཞེ་ན། འདི་ལྟ་སྟེ། ང་དང་སངས་རྒྱས་དེ་དག་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཐུགས་སུ་ཆུད་དེ། སངས་རྒྱས་ཀྱི་ཆོས་རྣམས་དང་། སྒྲིབ་པ་མེད་པའི་ཡེ་ཤེས་མདོར་བསྡུས་ཏེ་བསྟན་པ་དེ་ནི་མཚུངས་པ་རྣམ་པ་བཞི་ཞེས་བྱ་སྟེ། དེ་ལྟ་བས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཁོར་གྱི་ནང་དུ་དེ་སྐད་ཅེས་གསུང་ངོ་། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །འོད་སྲུང་དང་ནི་འཁོར་བ་འཇིག །གསེར་ཐུབ་ཀྱང་ནི་ང་ཡིན་ཞེས། །མཚུངས་པ་བཞི་ནི་མཉམ་གྱུར་པས། །རྒྱལ་བའི་སྲས་ལ་ངས་བཤད་དོ། །བློ་གྲོས་ཆེན་པོས་ཡང་བཅོམ་ལྡན་འདས་ལ་གསོལ་པ། ཇི་སྐད་དུ་བཅོམ་ལྡན་འདས་ཀྱིས་ང་ནི་གང་གི་ནུབ་མོ་མངོན་པར་རྫོགས་པར་སངས་རྒྱས་པ་ནས་གང་གི་ནུབ་མོ་ཡོངས་སུ་མྱ་ངན་ལས་འདའ་བར་འགྱུར་བ་དེའི་བར་དུ་ཡི་གེ་གཅིག་ཀྱང་མ་བཤད། མི་འཆད་འཆད་པར་མི་འགྱུར་ཏེ། བཤད་པ་མེད་པ་ནི་སངས་རྒྱས་ཀྱིས་བཤད་པའོ་ཞེས་གསུངས་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཅིའི་རྒྱུས་བཤད་པ་མེད་པ་ནི་སངས་རྒྱས་ཀྱིས་བཤད་པའོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ངས་ཆོས་རྣམ་པ་གཉིས་ལ་དགོངས་ནས་དེ་སྐད་ཅེས་སྨྲས་སོ། །ཆོས་གཉིས་གང་ཞེ་ན། འདི་ལྟ་སྟེ། རང་གིས་མངོན་པར་རྟོགས་པའི་ཆོས་དང་། ངོ་བོ་ཉིད་ཀྱིས་གནས་པའི་ཆོས་ཏེ། འདི་ནི་ཆོས་གཉིས་ཞེས་བྱའོ། །ཆོས་གཉིས་པོ་དེ་ལས་དགོངས་ནས་དེའི་ཕྱིར་ངས་དེ་སྐད་ཅེས་བཤད་དོ། །དེ་ལ་རང་གིས་མངོན་པར་རྟོགས་པའི་ཆོས་གང་ཞེ་ན། དེ་བཞིན་གཤེགས་
པ་དེ་དག་གི་གང་ཐུགས་སུ་ཆུད་པ་དེ་བཞིན་དུ་ངས་ཀྱང་རང་གིས་མངོན་པར་རྟོགས་པའི་ཆོས་མཐར་ཕྱིན་པའི་སྤྱོད་ཡུལ་ཚིག་གི་རྣམ་པར་རྟོག་པ་དང་བྲལ་བ། ཡི་གེའི་ཚུལ་རྣམ་པ་གཉིས་ལས་རྣམ་པར་གྲོལ་བ། ལྷག་ཆད་མེད་པར་ཐུགས་སུ་ཆུད་པའོ། །དེ་ལ་ངོ་བོ་ཉིད་ཀྱིས་གནས་པའི་ཆོས་གང་ཞེ་ན། འདི་ལྟ་སྟེ། སྔོན་གྱི་འཕགས་པའི་ལམ་རྙིང་པ་གསེར་དང་། དངུལ་ལ་སོགས་པའི་ངོ་བོ་ཉིད་བཞིན་དུ་ཆོས་ཀྱི་དབྱིངས་རྟག་པར་གནས་པ་ཡང་དེ་བཞིན་གཤེགས་པ་རྣམས་འཇིག་རྟེན་དུ་བྱུང་ཡང་རུང་། འཇིག་རྟེན་དུ་མ་བྱུང་ཡང་རུང་སྟེ། ཆོས་ཀྱི་དབྱིངས་རྟག་པར་གནས་པ་ནི་ཇི་ལྟར་གྲོང་ཁྱེར་དེ་དག་དུ་འགྲོ་བའི་ལམ་བཞིན་དུ་འདུག་པའོ། །བློ་གྲོས་ཆེན་པོ་དཔེར་ན། སྐྱེས་བུ་ལ་ལ་ཞིག་འབྲོག་དགོན་པ་ན་འཁྱམ་པ་ལས་གྲོང་ཁྱེར་རྙིང་པར་འགྲོ་བའི་ལམ་མཉམ་ཞིང་མ་གོལ་བ་ཞིག་མཐོང་ནས། གྲོང་ཁྱེར་དེར་ཞུགས་ཏེ་ཡིད་བཞིན་གྱི་བདེ་བ་རྗེས་སུ་མྱོང་ན་བློ་གྲོས་ཆེན་པོ་དེ་ཇི་སྙམ་དུ་སེམས། ལམ་དེ་དང་། གྲོང་ཁྱེར་ན་ཡོད་པའི་བདེ་བ་སྣ་ཚོགས་དེ་དག་དེས་བྱས་པ་ཡིན་ནམ། གསོལ་པ། དེ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ང་དང་འདས་པའི་དེ་བཞིན་གཤེགས་པ་དག་གིས་ཐུགས་སུ་ཆུད་པའི་ཆོས་ཀྱི་དབྱིངས་མི་འགྱུར་བར་གནས་པ་ཡང་དེ་བཞིན་ཏེ། དེས་ན་དེའི་ཕྱིར་ངས་འདི་སྐད་དུ་གང་གི་ནུབ་མོ་ངས་མངོན་པར་རྫོགས་པར་སངས་རྒྱས་པ་ནས་གང་གི་ནུབ་མོ་ཡོངས་སུ་མྱ་ངན་ལས་འདའ་བར་འགྱུར་བ་དེའི་བར་དུ་ཡི་གེ་གཅིག་ཀྱང་མ་བཤད། མི་འཆད་འཆད་པར་མི་འགྱུར་རོ། །ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །གང་གི་ནུབ་མོ་མངོན་སངས་རྒྱས། །གང་གི་ནུབ་མོ་མྱ་ངན་འདས། །དེ་དག་གཉིས་ཀྱི་བར་དུ་ཡང་། །ང་ཡིས་ཅུང་ཟད་བཤད་པ་མེད། །རང་གིས་མངོན་རྟོགས་ཆོས་གནས་པས། །དེ་ཕྱིར་ངས་ནི་འདི་སྐད་བཤད། །ང་དང་སངས་རྒྱས་དེ་དག་ལ། །བྱེ་བྲག་གྱུར་པ་ཅི་ཡང་མེད། །
དེ་ནས་ཡང་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་གསོལ་བ་བཏབ་པ། བཅོམ་ལྡན་འདས་ཆོས་ཐམས་ཅད་ཀྱི་མཆིས་པ་དང་། མ་མཆིས་པའི་མཚན་ཉིད་བཤད་དུ་གསོལ། །དེས་ན་བདག་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་མཆིས་པ་དང་མ་མཆིས་པ་སྤངས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་ལེགས་སོ་ཞེས་གསོལ་ནས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་འཇིག་རྟེན་འདི་དག་ནི་གཉིས་ལ་གནས་སོ། །འདི་ལྟ་སྟེ། ཡོད་པ་ལ་གནས་པ་དང་། དངོས་པོ་རྣམས་དངོས་པོ་མེད་པ་ལ་མོས་པའི་ལྟ་བར་ལྟུང་བ་སྟེ། འབྱུང་བ་མ་ཡིན་པ་ལ་འབྱུང་བར་འདུ་ཤེས་པའོ། །དེ་ལ་བློ་གྲོས་ཆེན་པོ་ཇི་ལྟར་ན་འཇིག་རྟེན་པ་དག་ཡོད་པ་ལ་གནས་པ་ཡིན་ཞེ་ན། འདི་ལྟ་སྟེ། འཇིག་རྟེན་ནི་རྒྱུ་དང་རྐྱེན་རྣམས་ཡོད་ན་སྐྱེའི་མེད་པ་ལས་མ་ཡིན་པས། ཡོད་པ་ལས་སྐྱེ་སྟེ། མེད་པ་ལས་སྐྱེ་བ་ནི་མ་ཡིན་ནོ་ཞེས་བློ་གྲོས་ཆེན་པོ་དེས་དེ་སྐད་དུ་སྨྲ་ན། འཇིག་རྟེན་རྒྱུ་མེད་པར་སྨྲ་བ་ཡིན་ནོ། །བློ་གྲོས་ཆེན་པོ་ཇི་ལྟར་ན་འཇིག་རྟེན་མེད་པ་ལས་གནས་པ་ཡིན་ཞེ་ན། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་གི་དངོས་པོར་ཁས་བླང་བ་བྱས་ལ། དེའི་འོག་ཏུ་འདོད་ཆགས་དང་། ཞེ་སྡང་དང་། གཏི་མུག་གི་དངོས་པོ་མེད་པར་རྣམ་པར་རྟོག་ཅིང་མངོན་པར་ཞེན་པའོ། །བློ་གྲོས་ཆེན་པོ་དངོས་པོ་ཡོད་པར་ཁས་མི་ལེན་པ་ནི་དངོས་པོའི་མཚན་ཉིད་རབ་ཏུ་དབེན་པའི་ཕྱིར་འདི་ལྟར་དེ་བཞིན་གཤེགས་པ་དང་། ཉན་ཐོས་དང་། རང་སངས་རྒྱས་རྣམས་འདོད་ཆགས་དང་། ཞེ་སྡང་དང་། གཏི་མུག་གི་དངོས་པོ་ལ་ཡོད་ཅེས་བྱ་བ་དང་། མེད་ཅེས་བྱ་བར་ཁས་ལེན་པར་མི་བྱེད་དོ། །བློ་གྲོས་ཆེན་པོ་དེ་ལ་ཇི་ལྟར་ན་རྣམ་པར་
འཇིག་པར་བྱེད་པ་ཡིན། བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་གང་དེས་འདོད་ཆགས་དང་། ཞེ་སྡང་དང་། གཏི་མུག་གི་དངོས་པོ་ཁས་བླངས་ལ་སླད་ཀྱིས་ནི་ཁས་མི་ལེན་པ་དག་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །གང་ཁྱོད་ཀྱིས་དེ་ལྟར་གོ་བ་ནི་ལེགས་སོ། །བློ་གྲོས་ཆེན་པོ་དེ་ནི་འདོད་ཆགས་དང་། ཞེ་སྡང་དང་། གཏི་མུག་གི་དངོས་པོ་དངོས་པོ་མེད་པ་འབའ་ཞིག་རྣམ་པར་འཇིག་པར་བྱེད་པ་མ་ཡིན་གྱི་ཉན་ཐོས་དང་རང་སངས་རྒྱས་རྣམས་ཀྱང་རྣམ་པར་འཇིག་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། ནང་དང་ཕྱི་རོལ་མི་དམིགས་པའི་ཕྱིར་དང་ཉོན་མོངས་པ་རྣམས་ཐ་དད་པ་དང་། ཐ་དད་པ་མ་ཡིན་པའི་ཕྱིར་རོ། །བློ་གྲོས་ཆེན་པོ་འདོད་ཆགས་དང་། ཞེ་སྡང་དང་། གཏི་མུག་རྣམས་ནི་ནང་དང་ཕྱི་རོལ་ན་ཡང་མི་དམིགས་ཏེ། འདོད་ཆགས་དང་། ཞེ་སྡང་དང་། གཏི་མུག་གི་དངོས་པོ་ལུས་མེད་པའི་ཕྱིར་དང་། ཁས་ལེན་པ་མེད་པའི་ཕྱིར་རོ། །སངས་རྒྱས་དང་། ཉན་ཐོས་དང་། རང་སངས་རྒྱས་རྣམས་ནི་རྣམ་པར་འཇིག་པར་བྱེད་པ་མ་ཡིན་ཏེ། སངས་རྒྱས་དང་། ཉན་ཐོས་དང་། རང་སངས་རྒྱས་དེ་དག་ནི་རང་བཞིན་གྱིས་རྣམ་པར་གྲོལ་བའི་ཕྱིར་དང་། འཆིང་བ་དང་བཅིང་བའི་རྒྱུ་དངོས་པོ་མེད་པའི་ཕྱིར་རོ། །བློ་གྲོས་ཆེན་པོ་བཅིང་བར་བྱ་བ་ཡོད་ན་བཅིང་བ་ཡང་ཡོད་དེ། བཅིང་བའི་རྒྱུ་ཡིན་པའི་ཕྱིར་རོ། །བློ་གྲོས་ཆེན་པོ་དེ་སྐད་དུ་རྣམ་པར་འཇིག་པར་བྱེད་པ་སྨྲ་བ་འདི་ཡང་མེད་པའི་མཚན་ཉིད་ཅེས་བྱའོ། །བློ་གྲོས་ཆེན་པོ་ངས་དེ་ལ་དགོངས་ནས་གང་ཟག་ཏུ་ལྟ་བ་རི་རབ་ཙམ་ཡོད་པ་ནི་བླའི། མངོན་པའི་ང་རྒྱལ་ཅན་གྱི་སྟོང་པ་ཉིད་དུ་ལྟ་བ་ནི་མ་ཡིན་ནོ་ཞེས་བཤད་དེ། བློ་གྲོས་ཆེན་པོ་མེད་པའི་མངོན་པའི་ང་རྒྱལ་ཅན་ནི་རྣམ་པར་འཇིག་པར་བྱེད་པ་ཡིན་ནོ། །རང་དང་སྤྱིའི་མཚན་ཉིད་དུ་ལྟུང་བའི་བསམ་པ་ཅན་དག་རང་གི་སེམས་སྣང་བ་ཙམ་དུ་མི་ཤེས་པས་ཕྱི་རོལ་གྱི་དངོས་པོ་རྣམས་མི་རྟག་ཅིང་སྐད་ཅིག་མ་གཅིག་ནས་གཅིག་ཏུ་རྣམ་པར་
འཇིག་པར་མཐོང་ནས། ཕུང་པོ་དང་། ཁམས་དང་། སྐྱེ་མཆེད་རྣམས་ནི་རྒྱུན་མི་འཆད་ཅིང་རྣམ་པར་འགྱུར་བ་དང་། ཡི་གེའི་མཚན་ཉིད་དང་བྲལ་བར་རྣམ་པར་རྟོག་ན་ཡང་རྣམ་པར་འཇིག་པར་བྱེད་པ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཡོད་དང་མེད་པ་མཐའ་གཉིས་ཏེ། །ཅི་ཙམ་སེམས་ཀྱི་སྤྱོད་ཡུལ་རྣམས། །སྤྱོད་ཡུལ་དེ་དག་རབ་སྤངས་ན། །སེམས་མཉམ་རབ་དབེན་ཞི་བར་འགྱུར། །ཡུལ་གྱི་དངོས་ལ་འཛིན་མེད་པས། །འགོག་པ་མེད་པ་མ་ཡིན་ཏེ། །ཡོད་པའི་དངོས་རྣམས་དེ་བཞིན་ཉིད། །འཕགས་པའི་སྤྱོད་ཡུལ་ཇི་བཞིན་ནོ། །རྒྱུ་མེད་པ་ལས་སྐྱེ་འགྱུར་ཞིང་། །བྱུང་ནས་དེ་ནི་འགག་པར་འགྱུར། །རྒྱུ་རྐྱེན་ཡོད་དང་མེད་ཅེས་པ། །ང་ཡི་བསྟན་ལ་དེ་མི་གནས། །མུ་སྟེགས་ཅན་དང་སངས་རྒྱས་དང་། །ང་དང་གཞན་གྱིས་བྱས་མིན་ཏེ། །རྒྱུ་རྐྱེན་འདུས་ལས་བྱུང་ཡིན་ན། །ཇི་ལྟ་བུར་ན་མེད་པར་འགྱུར། །རྒྱུ་རྐྱེན་ཡོད་པ་སུས་བསགས་ན། །མེད་པ་ཞེས་ནི་རྗོད་པར་བྱེད། །ལོག་ལྟ་སྨྲ་བ་ཆོས་སྐྱེ་བ། །རྣམ་པར་རྟོག་པས་ཡོད་མེད་བརྟགས། །གང་གིས་ཅུང་ཟད་སྐྱེ་མེད་དང་། །འགག་པ་མེད་པར་རབ་ཤེས་པ། །འཇིག་རྟེན་དབེན་པར་མཐོང་བས་ན། །ཡོད་མེད་གཉིས་ལས་རྣམ་པར་འགྲོལ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་དང་བྱང་ཆུབ་སེམས་དཔའ་གཞན་རྣམས་ལ་གྲུབ་པའི་མཐའི་ཚུལ་གྱི་མཚན་ཉིད་བཤད་དུ་གསོལ། གྲུབ་པའི་མཐའི་ཚུལ་གྱི་མཚན་ཉིད་རབ་ཏུ་དབྱེ་བ་ལ་མཁས་པར་གྱུར་ན་བདག་དང་བྱང་ཆུབ་སེམས་དཔའ་རྣམས་དེའི་མཚན་ཉིད་རྟོགས་པར་འགྱུར་ཏེ། དེའི་མཚན་ཉིད་རྟོགས་ནས་ཀྱང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ཞིང་རྟོག་པའི་མཚན་ཉིད་དང་། བདུད་དང་མུ་སྟེགས་ཅན་གྱི་རྗེས་སུ་འབྲང་བར་མི་འགྱུར་རོ། །བཅོམ་ལྡན་འདས་ཀྱིས་བཀའ་
སྩལ་པ། བློ་གྲོས་ཆེན་པོ་དེའི་ཕྱིར་ཤིན་དུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་དེ་བཞིན་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་གྲུབ་པའི་མཐའི་ཚུལ་གྱི་མཚན་ཉིད་ནི་རྣམ་པ་གཉིས་ཏེ་འདི་ལྟ་སྟེ། གྲུབ་པའི་མཐའི་ཚུལ་དང་། བཤད་པའི་ཚུལ་ལོ། །དེ་ལ་བློ་གྲོས་ཆེན་པོ་གྲུབ་པའི་མཐའི་ཚུལ་ནི་འདི་ལྟ་སྟེ། སོ་སོ་རང་གིས་རིག་པའི་བྱེ་བྲག་གི་མཚན་ཉིད་ཐོབ་པ་ལ་དམིགས་པ། ཚིག་དང་ཡི་གེའི་རྣམ་པར་རྟོག་པ་དང་བྲལ་བ་ཟག་པ་མེད་པའི་དབྱིངས་སུ་འཇུག་པ། རང་གིས་རྟོགས་པའི་སའི་རང་གི་མཚན་ཉིད་ཡང་དག་པ་མ་ཡིན་པ། རྟོག་པ་ཅན་གྱི་འདུ་ཤེས་ཐམས་ཅད་སྤངས་པ། མུ་སྟེགས་ཅན་དང་། བདུད་ཐམས་ཅད་བཏུལ་ནས་སོ་སོ་རང་གིས་རིག་པའི་ཚུལ་ལ་དམིགས་པའི་འོད་ཀྱིས་རྣམ་པར་མཛེས་པ་ནི། གྲུབ་པའི་མཐའི་ཚུལ་གྱི་མཚན་ཉིད་ཅེས་བྱའོ། །དེ་ལ་བཤད་པའི་ཚུལ་གྱི་མཚན་ཉིད་གང་ཞེ་ན་འདི་ལྟ་སྟེ། གསུང་རབ་ཡན་ལག་རྣམ་པ་དགུ་སྣ་ཚོགས་སུ་བཤད་པ་ཡིན་ཏེ། ཐ་དད་པ་དང་། ཐ་དད་པ་མ་ཡིན་པ་དང་། ཡོད་པ་དང་། མེད་པ་ལ་སོགས་པའི་མཚན་ཉིད་སྤངས་པ་ཐབས་མཁས་པས་སེམས་ཅན་གྱི་མོས་པ་ཇི་ལྟ་བ་བཞིན་དུ་ཆོས་བསྟན་ནས་རྣམ་པར་གྲོལ་བ་འཐོབ་པར་བྱེད་པ་དེ་ནི་བཤད་པའི་ཚུལ་གྱི་མཚན་ཉིད་ཅེས་བྱའོ། །བློ་གྲོས་ཆེན་པོ་དེ་ལྟ་བས་ན་ཁྱོད་དང་བྱང་ཆུབ་སེམས་དཔའ་གཞན་དག་གིས་དེ་ལ་བརྩོན་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །གྲུབ་པའི་མཐའ་དང་བཤད་ཚུལ་ནི། །སོ་སོ་རང་རིག་བསྟན་པ་སྟེ། །གང་གིས་མཐོང་ཞིང་རབ་འབྱེད་ན། །དེ་དག་རྟོག་པའི་དབང་མི་འགྲོ། །ཇི་ལྟར་བྱིས་པ་རྟོག་པ་བཞིན། །ཡང་དག་དངོས་པོ་ཡོད་མིན་ན། །ཅི་ཕྱིར་རྟོག་པ་ཅན་རྣམས་ཀྱིས། །དངོས་པོ་མེད་ལ་ཐར་པར་འདོད། །འདུས་བྱས་སོ་སོར་
རྟོག་པའི་ཚེ། །སྐྱེ་འཇིག་ལ་སོགས་འབྲེལ་མཐོང་བ། །ལྟ་བ་གཉིས་པོ་རྒྱས་པར་བྱེད། །ཕྱིན་ལོག་ཤེས་པ་མེད་པ་ཡིན། །གཅིག་པ་དེ་ནི་ཡང་དག་བདེན། །ཉེས་མེད་དེ་ནི་མྱ་ངན་འདས། །འཇིག་རྟེན་རྣམ་རྟོག་རབ་བརྟགས་ན། །སྒྱུ་མ་རྨི་ལམ་ཆུ་ཤིང་བཞིན། །འདོད་སྡང་གཏི་མུག་ཡོད་ཀྱང་ནི། །ཡང་དག་གང་ཟག་ཡོད་པ་མིན། །སྲེད་པ་ལས་ནི་ཕུང་པོ་འབྱུང་། །སྲིད་པ་སྒྱུ་མ་རྨི་ལམ་འདྲ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཡང་དག་པ་མ་ལགས་པ་ཡོངས་སུ་རྟོག་པའི་མཚན་ཉིད་བདག་ལ་བཤད་དུ་གསོལ། ཡང་དག་པ་མ་ལགས་པའི་ཡོངས་སུ་རྟོག་པ་རྣམས་ཇི་ལྟར་འབྱུང་བར་འགྱུར། ཇི་ལྟ་བུ་ལ་ཡང་དག་པ་མ་ལགས་པའི་ཡོངས་སུ་རྟོག་པ་ཞེས་བགྱི། ཆོས་གང་ཞིག་ལ་ཡང་དག་པ་མ་ལགས་པ་ཡོངས་སུ་རྟོག་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །དེ་བཞིན་གཤེགས་པ་ལ་དེ་ལྟ་བུའི་དོན་འདྲི་བར་སེམས་པ་ནི་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་། མི་ཕལ་པོ་ཆེའི་དོན་དང་། ཕན་པ་དང་བདེ་བའི་ཕྱིར་ཞུགས་པ་ཡིན་ཏེ། དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། ལེགས་སོ་ལེགས་སོ། །བཅོམ་ལྡན་འདས་དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དོན་རྣམ་པ་ཐ་དད་པ་སྣ་ཚོགས་དང་། ཡང་དག་པ་མ་ཡིན་པའི་རྣམ་པར་རྟོག་པ་སྣ་ཚོགས་ལས་མངོན་པར་ཞེན་པའི་རྣམ་པར་རྟོག་པ་འབྱུང་སྟེ། བློ་གྲོས་ཆེན་པོ་གཟུང་བ་དང་། འཛིན་པ་ལ་མངོན་པར་ཞེན་པ་དང་། རང་གི་སེམས་སྣང་བ་ཙམ་དུ་མ་རྟོགས་པ་དང་། ཡོད་པ་དང་མེད་པའི་ལྟ་བར་ལྟུང་བ། མུ་སྟེགས་ཅན་གྱི་ལྟ་བ་ཤིན་ཏུ་རྒྱས་པར་བྱེད་པ་དང་། རྣམ་པར་རྟོག་པའི་བག་ཆགས་ཀྱིས་ཕྱི་རོལ་
གྱི་དོན་སྣ་ཚོགས་ལ་མངོན་པར་ཞེན་པ་དང་། སེམས་དང་སེམས་ལས་བྱུང་བའི་རྣམ་པར་རྟོག་པ་ནི་བདག་དང་བདག་གིར་མངོན་པར་ཞེན་པ་ལས་འབྱུང་ངོ་། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་གལ་ཏེ་དོན་རྣམ་པ་ཐ་དད་པ་སྣ་ཚོགས་དང་། ཡང་དག་པ་མ་ལགས་པའི་རྣམ་པར་རྟོག་པ་སྣ་ཚོགས་ལས་མངོན་པར་ཞེན་པའི་རྣམ་པར་རྟོག་པ་འབྱུང་སྟེ། གཟུང་བ་དང་། འཛིན་པ་ལ་མངོན་པར་ཞེན་པ་དང་། རང་གི་སེམས་སྣང་བ་ཙམ་དུ་རྟོགས་པ་དང་། མཆིས་པ་དང་མ་མཆིས་པའི་ལྟ་བར་ལྷུང་བ། མུ་སྟེགས་ཅན་གྱི་ལྟ་བ་རྒྱས་པར་བགྱིད་པ་དང་། རྣམ་པར་རྟོག་པའི་བག་ཆགས་ཀྱིས་ཕྱི་རོལ་གྱི་དོན་སྣ་ཚོགས་ལ་མངོན་པར་ཞེན་པ་དང་། སེམས་དང་སེམས་ལས་བྱུང་བའི་རྣམ་པར་རྟོག་པ་དག །བདག་དང་བདག་གིར་མངོན་པར་ཞེན་པ་ལས་འབྱུང་བ་ཞིག་ལགས་ན། བཅོམ་ལྡན་འདས་དེ་ལྟ་ན་ནི་ཕྱི་རོལ་གྱི་དོན་སྣ་ཚོགས་ཀྱི་མཚན་ཉིད་དང་། མཆིས་པ་དང་མ་མཆིས་པར་ལྷུང་བའི་མཚན་ཉིད་དངོས་པོ་དང་། དངོས་པོ་མ་མཆིས་པ་དང་བྲལ་བ་དང་། ལྟ་བ་དང་བྲལ་བའི་མཚན་ཉིད་ལས་ཇི་ལྟར་བཟློག་པ་དེ་བཞིན་དུ་བཅོམ་ལྡན་འདས་དོན་དམ་པའི་གནས་སུ་ཡང་ཚད་མ་དང་། དབང་པོ་དང་། ཡན་ལག་དང་། དཔེ་དང་། རྒྱུའི་མཚན་ཉིད་ལས་ཀྱང་བཟློག་པར་འགྱུར་རོ། །བཅོམ་ལྡན་འདས་ཅིའི་སླད་དུ་གཅིག་ལ་ནི་ཡང་དག་པ་མ་ལགས་པའི་དོན་སྣ་ཚོགས་ཀྱི་དངོས་པོར་མངོན་པར་ཞེན་པའི་རྣམ་པར་རྟོག་པ་འབྱུང་ལ། དོན་དམ་པའི་མཚན་ཉིད་ལ་ནི་མངོན་པར་ཞེན་པའི་རྣམ་པར་རྟོག་པ་མི་འབྱུང་། ཅི་བཅོམ་ལྡན་འདས་མི་མཚུངས་པ་རྒྱུར་གསུང་བར་མི་འགྱུར་རམ་ཞེ་ན་གཅིག་ལས་ནི་འབྱུང་། གཅིག་ལས་ནི་མི་འབྱུང་ཞེས་བཀའ་སྩལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་རྣམ་པར་རྟོག་པ་ནི་གཅིག་ལས་འབྱུང་བའམ། གཅིག་ལས་མི་འབྱུང་བ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟ་སྟེ། ཡོད་པ་དང་མེད་པའི་རྣམ་པར་རྟོག་པ་མི་འབྱུང་བའི་ཕྱིར་དང་། ཕྱི་རོལ་ན་སྣང་བའི་དངོས་པོ་དངོས་པོ་
མེད་པའི་ཕྱིར་དང་། རང་གི་སེམས་སྣང་བ་ཙམ་དུ་རྟོགས་པའི་ཕྱིར་རྣམ་པར་རྟོག་པ་མི་སྐྱེའོ། །བློ་གྲོས་ཆེན་པོ་ངས་ནི་གཞན་བྱིས་པ་སོ་སོའི་སྐྱེ་བོ་རང་གི་སེམས་སྣ་ཚོགས་ཀྱི་རྣམ་པར་རྟོག་པའི་མཚན་ཉིད་ཀྱི་ཕྱིར་ལས་ཀྱི་དངོས་པོ་མངོན་དུ་གྱུར་པས་རྣམ་པར་རྟོག་པ་སྣ་ཚོགས་ཀྱི་དངོས་པོའི་མཚན་ཉིད་ལ་མངོན་པར་ཞེན་པ་འབྱུང་བར་བཤད་དེ། ཇི་ལྟར་ན་བྱིས་པ་སོ་སོའི་སྐྱེ་བོ་འདི་དག་བདག་དང་བདག་གིར་མངོན་པར་ཞེན་པར་ལྟ་བ་རྣམ་པར་སྤངས་ཏེ། བྱེད་པ་དང་། བྱ་བའི་རྒྱུ་རྐྱེན་དང་། འབྲས་བུ་ལས་བཟློག་ཅིང་རྣམ་པར་རྟོག་པ། རང་གི་སེམས་སྣང་བ་ཙམ་དུ་རྟོགས་པས་ལུས་དང་སེམས་ཤིན་ཏུ་གྱུར་ཏེ། ས་ཐམས་ཅད་ལ་མཐར་ཕྱིན་པར་མཁས་ཤིང་དེ་བཞིན་གཤེགས་པ་དག་གི་སོ་སོ་རང་གིས་རིག་པའི་སྤྱོད་ཡུལ་ལ་འཇུག་པ་དང་། ཆོས་ལྔ་དང་། རང་བཞིན་དང་། དངོས་པོར་ལྟ་བའི་རྣམ་པར་རྟོག་པ་ལས་ལྡོག་པ་འཐོབ་པར་འགྱུར་སྙམ་ནས། རྒྱུ་དེ་དང་། རྐྱེན་དེའི་ཕྱིར་ངས་རྣམ་པར་རྟོག་པ་རྣམས་ནི་ཡང་དག་པ་མ་ཡིན་པའི་དོན་སྣ་ཚོགས་ལ་མངོན་པར་ཞེན་པ་ལས་འབྱུང་ངོ་ཞེས་བཤད་པ་ཡིན་ཏེ། ཡང་དག་པའི་དོན་ཇི་ལྟ་བ་བཞིན་དུ་ཡོངས་སུ་ཤེས་པས་ན་རྣམ་པར་གྲོལ་བ་འཐོབ་སྟེ། རྣམ་པར་རྟོག་པ་སྣ་ཚོགས་འབྱུང་བར་མི་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །རྒྱུ་རྣམས་དང་ནི་རྐྱེན་རྣམས་ཀྱིས། །གང་རྣམས་འཇིག་རྟེན་འབྱུང་ཞེས་པ། །རྣམ་རྟོག་མཐའ་བཞིར་ཞེན་པ་སྟེ། །དེ་དག་ང་ཡི་ཚུལ་མི་ཤེས། །འཇིག་རྟེན་ཡོད་ལས་མི་སྐྱེ་སྟེ། །དེ་བཞིན་མེད་ལས་སྐྱེ་བའང་མིན། །ཡོད་མེད་ལས་ཀྱང་མི་སྐྱེ་ཞིང་། །ཡོད་མིན་མེད་མིན་ལས་མིན་ན། །རྒྱུ་དག་དང་ནི་རྐྱེན་རྣམས་སུ། །བྱིས་པ་རྣམས་ནི་ཅི་ཕྱིར་རྟོག །ཡོད་པ་མ་ཡིན་མེད་པའང་མིན། །དེ་བཞིན་ཡོད་མེད་གཉི་ག་མིན། །དེ་ལྟར་འཇིག་རྟེན་རབ་མཐོང་ན། །སེམས་གྱུར་བདག་མེད་པ་ཡང་འཐོབ། །དངོས་པོ་ཐམས་ཅད་མི་སྐྱེ་སྟེ། །རྐྱེན་རྣམས་ལས་ནི་བྱུང་བའི་ཕྱིར། །ཐམས་ཅད་རྐྱེན་གྱིས་
བྱས་པ་ཡིན། །བྱས་པ་རྣམས་ནི་བདག་ཡོད་མིན། །དངོས་པོས་དངོས་པོ་མི་སྐྱེད་དེ། །དངོས་པོ་གཉིས་ཡོད་སྐྱོན་ཕྱིར་དང་། །དངོས་པོ་གཉིས་མེད་སྐྱོན་གྱི་ཕྱིར། །དངོས་པོ་རྣམས་ནི་གཉིས་སུ་མེད། །འདུས་བྱས་ཆོས་རྣམས་རབ་བརྟགས་ཏེ། །དམིགས་བྱེད་དམིགས་བྱ་ཡོངས་སྤངས་ན། །དེ་ནི་སེམས་མེད་སེམས་ཙམ་སྟེ། །སེམས་ཙམ་དུ་ཡང་ངས་བཤད་དོ། །ཙམ་ནི་ངོ་བོ་ཉིད་ཀྱི་གནས། །རྐྱེན་དངོས་གཉི་ག་སྤངས་པ་སྟེ། །དངོས་པོ་མཐར་ཐུག་དག་གི་མཆོག །སེམས་ཙམ་ཞེས་ནི་ངས་བཤད་དོ། །ཀུན་རྫོབ་བདག་ཅེས་ཉེར་བརྟགས་པ། །དེ་ནི་རྫས་སུ་ཡོད་མ་ཡིན། །ཕུང་པོ་ཕུང་པོ་ཞེས་བཏགས་པ། །དངོས་མེད་པ་ཡང་དེ་བཞིན་ནོ། །མཉམ་པ་ཉིད་ནི་རྣམ་བཞི་སྟེ། །མཚན་ཉིད་དང་རྒྱུ་དངོས་ལས་བྱུང་། །གསུམ་པ་བདག་མེད་མཉམ་པ་སྟེ། །བཞི་པ་རྣལ་འབྱོར་རྣལ་འབྱོར་པ། །རྣམ་རྟོག་བག་ཆགས་གཡོས་པས་ན། །སེམས་ནི་རྣམ་པ་སྣ་ཚོགས་སྐྱེས། །ཡུལ་རྣམས་ཕྱི་རོལ་སྣང་བར་གྱུར། །དེ་ནི་འཇིག་རྟེན་སེམས་ཙམ་མོ། །ཕྱི་རོལ་སྣང་བ་ཡོད་མིན་ཏེ། །སེམས་ནི་སྣ་ཚོགས་རྣམས་སུ་སྣང་། །ལུས་དང་ལོངས་སྤྱོད་རྣམས་གཞག་པ། །སེམས་ཙམ་དུ་ནི་ངས་བཤད་དོ། །ལྟ་བ་ཐམས་ཅད་ཡོངས་སྤོངས་ཤིང་། །རྟོག་དང་བརྟག་བྱ་བྲལ་བ་སྟེ། །དམིགས་མེད་སྐྱེ་བ་མེད་པ་ནི། །སེམས་ཙམ་དུ་ཡང་ངས་བཤད་དོ། །དངོས་མེད་དངོས་མེད་མ་ཡིན་པ། །དངོས་དང་དངོས་མེད་སྤངས་པས་ན། །སེམས་དེ་རྣམ་པར་གྲོལ་ཞེས་པ། །སེམས་ཙམ་དུ་ཡང་ངས་བཤད་དོ། །དེ་བཞིན་ཉིད་དང་ཡང་དག་མཐའ། །མྱ་ངན་འདས་དང་ཆོས་ཀྱི་དབྱིངས། །སྣ་ཚོགས་ཡིད་ཀྱི་ལུས་རྣམས་ནི། །སེམས་ཙམ་དུ་ཡང་ངས་བཤད་དོ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འདི་ལྟར་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ངག་དང་དོན་ལ་མཁས་པར་བྱའོ། །ཞེས་གསུངས་ན། ཇི་ལྟར་ན་བྱང་ཆུབ་སེམས་དཔའ་ངག་དང་དོན་ལ་མཁས་པ་ལགས། དེ་
ལ་ངག་ནི་ཇི་ལྟ་བུ་དོན་ནི་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ་ལེགས་སོ། །བཅོམ་ལྡན་འདས་དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལ་བློ་གྲོས་ཆེན་པོ་ངག་གང་ཞེ་ན། འདི་ལྟ་སྟེ། ཚིག་དང་ཡི་གེའི་རྣམ་པར་རྟོག་པ་ཕྲད་པ་ཡིན་ཏེ། མགྲིན་པ་དང་། མིད་པ་དང་། མཆུ་དང་། ལྕེ་དང་། སོ་དང་། རྐན་དང་། འགྲམ་པ་ལ་བརྟེན་ནས་ངག་ཏུ་བརྗོད་པའི་རྣམ་པར་རྟོག་པའི་བག་ཆགས་ཀྱི་རྒྱུ་དེ་ལས་བྱུང་བ་དེ་ནི་ངག་ཅེས་བྱའོ། །བློ་གྲོས་ཆེན་པོ་དོན་གང་ཞེ་ན། འདི་ལྟ་སྟེ། རྣམ་པར་རྟོག་པའི་མཚན་ཉིད་ཐམས་ཅད་དང་། བརྗོད་པའི་མཚན་ཉིད་ཡོངས་སུ་སྤངས་པ་དེ་ནི་དོན་ཅེས་བྱའོ། །བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོས་དོན་འདི་ལྟ་བུའི་ཕྱིར་གཅིག་པུ་དབེན་པར་སོང་ནས་ཐོས་པ་དང་། བསམས་པ་དང་། བསྒོམས་པའི་ཤེས་རབ་ཀྱིས་རང་གིས་རིག་པ་ལ་དམིགས་ཤིང་མྱ་ངན་ལས་འདའ་པའི་གྲོང་ཁྱེར་དུ་འགྲོ་བ། བག་ཆགས་ཀྱི་ལུས་རབ་ཏུ་གྱུར་ནས་སོ་སོ་རང་གིས་རིག་པའི་སྤྱོད་ཡུལ་ས་དང་སའི་གནས་གཞན་གྱི་བྱེ་བྲག་གི་དོན་གྱི་མཚན་ཉིད་ལ་རབ་ཏུ་སྤྱོད་པ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དོན་ལ་མཁས་པ་ཡིན་ནོ། །གཞན་ཡང་བློ་གྲོས་ཆེན་པོ་ངག་གི་དོན་ལ་མཁས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ངག་དང་དོན་ཐ་དད་པ་ཡང་མ་ཡིན། ཐ་མི་དད་པར་ཡང་མ་ཡིན་པར་སོ་སོར་རབ་ཏུ་རྟོག་སྟེ། དོན་དང་ངག་ལ་སོ་སོར་རྟོག་པ་ཡང་དེ་བཞིན་ནོ། །གལ་ཏེ་ངག་དང་དོན་ཐ་དད་ན་ནི་དོན་གསལ་བར་བྱེད་པའི་རྒྱུ་དག་མ་ཡིན་པར་འགྱུར་བ་ཞིག་ན། ངག་གི་དོན་གྱི་རྗེས་སུ་འཇུག་སྟེ། ཇི་ལྟར་མར་མེས་གཟུགས་ལ་སོགས་པ་གསལ་བར་བྱེད་པ་བཞིན་ནོ། །གཞན་ཡང་བློ་གྲོས་ཆེན་པོ་མ་སྐྱེས་པ་དང་། མ་འགགས་པ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པ་དང་། ཐེག་པ་གསུམ་དང་། ཐེག་པ་གཅིག་དང་།
སེམས་དང་རང་བཞིན་ལ་སོགས་པ་ལ་སྒྲ་ཇི་བཞིན་དུ་མངོན་པར་ཞེན་པ་ལ་བརྟེན་ནས་མངོན་པར་ཞེན་པ་ནི་སྒྲོ་འདོགས་པ་དང་། སྐུར་པའི་མཐར་ལྷུང་བ་ཡིན་ནོ། །ལྟ་བ་རྣམ་པ་གཞན་དུ་གནས་ལ་རྣམ་པར་གཞག་པ་གཞན་དུ་རྣམ་པར་རྟོག་པ་ནི་སྒྱུ་མ་ལྟ་བུའི་རྣམ་པར་རྟོག་པ་སྣ་ཚོགས་སུ་སྣང་སྟེ། ཇི་ལྟར་སྒྱུ་མ་སྣ་ཚོགས་སུ་སྣང་བ་དེ་བཞིན་དུ་བྱིས་པ་སོ་སོའི་སྐྱེ་བོ་རྣམས་རྣམ་པ་གཞན་དུ་སོ་སོར་རྣམ་པར་རྟོག་གི་འཕགས་པ་རྣམས་ནི་མ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར། ཚིགས་སུ་བཅད་པ་འདི་དག་གསུངས་སོ། །སྒྲ་བཞིན་རྣམ་རྟོག་དེ་དག་གིས། །ཆོས་རྣམས་གང་དག་རྣམ་གཞག་པ། །དེ་ལྟར་དེ་དག་སྒྲོ་བཏགས་པས། །ཤི་འཕོས་དམྱལ་བའི་གནས་སུ་ལྷུང་། །ཕུང་པོ་རྣམས་ལ་བདག་མེད་དེ། །ཕུང་པོ་ཉིད་ཀྱང་བདག་མ་ཡིན། །དེ་དག་བཏགས་པ་བཞིན་དུ་མེད། །མེད་པ་ཉིད་ཀྱང་མ་ཡིན་ནོ། །དངོས་པོ་ཐམས་ཅད་ཡོད་གྱུར་ལ། །ཇི་ལྟར་བྱིས་པས་བརྟགས་པ་ལྟར། །དེ་སྟེ་མཐོང་བཞིན་དེ་ཡོད་ན། །ཐམས་ཅད་བདེན་པ་མཐོང་བར་འགྱུར། །ཆོས་རྣམས་དངོས་པོ་མེད་ན་ནི། །རྣམ་དག་མ་དག་ཡོད་མ་ཡིན། །ཇི་ལྟར་མཐོང་བ་བཞིན་མིན་ཏེ། །དེ་དག་མེད་པའང་མ་ཡིན་ནོ། །གཞན་ཡང་བློ་གྲོས་ཆེན་པོ་ཡེ་ཤེས་དང་རྣམ་པར་ཤེས་པའི་མཚན་ཉིད་བཤད་པར་བྱ་སྟེ། གལ་ཏེ་ཡེ་ཤེས་དང་རྣམ་པར་ཤེས་པའི་མཚན་ཉིད་རབ་ཏུ་དབྱེ་བ་ལ་མཁས་པར་གྱུར་ན། ཁྱོད་དང་བྱང་ཆུབ་སེམས་དཔའ་རྣམས་ཡེ་ཤེས་དང་། རྣམ་པར་ཤེས་པའི་མཚན་ཉིད་རྟོགས་པར་ཁོང་དུ་ཆུད་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ལ་བློ་གྲོས་ཆེན་པོ་ཡེ་ཤེས་དེ་ནི་རྣམ་པ་གསུམ་ཡོད་དེ། འདི་ལྟ་སྟེ། འཇིག་རྟེན་པ་དང་། འཇིག་རྟེན་ལས་འདས་པ་དང་། འཇིག་རྟེན་ལས་འདས་པའི་མཆོག་གོ །དེ་ལ་འཇིག་རྟེན་པའི་ཡེ་ཤེས་གང་ཞེ་ན། འདི་ལྟ་སྟེ། མུ་སྟེགས་ཅན་དང་། བྱིས་པ་སོ་སོའི་སྐྱེ་བོ་རྣམས་ཡོད་པ་དང་། མེད་པ་ལ་མངོན་པར་ཞེན་པའོ། །འཇིག་རྟེན་ལས་
འདས་པའི་ཡེ་ཤེས་གང་ཞེ་ན། འདི་ལྟ་སྟེ། ཉན་ཐོས་དང་། རང་སངས་རྒྱས་ཐམས་ཅད་རང་དང་སྤྱིའི་མཚན་ཉིད་དུ་ལྷུང་བའི་བསམས་པ་ལ་མངོན་པར་ཞེན་པའོ། །འཇིག་རྟེན་ལས་འདས་པ་མཆོག་གི་ཡེ་ཤེས་གང་ཞེ་ན། འདི་ལྟ་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྣང་བ་མེད་པའི་ཆོས་ལ་རབ་ཏུ་རྣམ་པར་འབྱེད་པ་དང་། སྐྱེ་བ་མེད་པ་དང་། འགག་པ་མེད་པར་མཐོང་བ་དང་། ཡོད་པ་དང་། མེད་པའི་ཕྱོགས་དང་བྲལ་བ། དེ་བཞིན་གཤེགས་པའི་ས། གང་ཟག་དང་། ཆོས་བདག་ཏུ་མེད་པ་སོ་སོ་རང་གིས་རིག་པ་ལས་བྱུང་བའོ། །གཞན་ཡང་ཡེ་ཤེས་ནི་རྣམ་པ་གསུམ་ཡོད་དེ། འདི་ལྟ་སྟེ། སྐྱེ་བ་དང་། འཇིག་པ་རྟོགས་པའི་ཡེ་ཤེས་དང་། རང་དང་སྤྱིའི་མཚན་ཉིད་རྟོགས་པའི་ཡེ་ཤེས་དང་། སྐྱེ་བ་མེད་པ་དང་འགག་པ་མེད་པ་རྟོགས་པའི་ཡེ་ཤེས་སོ། །བློ་གྲོས་ཆེན་པོ་དེ་ལ་སྐྱེ་ཞིང་འཇིག་པ་ནི་རྣམ་པར་ཤེས་པའོ། །མི་སྐྱེ་མི་འཇིག་པ་ནི་ཡེ་ཤེས་སོ། །མཚན་མ་དང་མཚན་མ་མེད་པར་ལྷུང་བ་དང་། ཡོད་པ་དང་མེད་པར་ལྷུང་བ་དང་། མཚན་ཉིད་སྣ་ཚོགས་ཀྱི་རྒྱུ་ལས་སྐྱེས་པ་ནི་རྣམ་པར་ཤེས་པའོ། །ཡོད་པ་དང་མེད་པའི་མཚན་ཉིད་ལས་ཤིན་དུ་འདས་པ་ནི་ཡེ་ཤེས་སོ། །གཞན་ཡང་སྐྱེ་བ་དང་ལྡན་པའི་མཚན་ཉིད་ནི་རྣམ་པར་ཤེས་པའོ། །སྐྱེ་བ་མེད་པ་དང་ལྡན་པའི་མཚན་ཉིད་ནི་ཡེ་ཤེས་སོ། །གཞན་ཡང་ཐོགས་པ་མེད་པའི་མཚན་ཉིད་ནི་ཡེ་ཤེས་སོ། །ཡུལ་སྣ་ཚོགས་ལ་ཐོགས་པ་དང་བཅས་པའི་མཚན་ཉིད་ནི་རྣམ་པར་ཤེས་པའོ། །གཞན་ཡང་དངོས་པོ་གསུམ་འདུས་པ་ལས་སྐྱེ་བའི་ཐབས་ཀྱི་མཚན་ཉིད་ནི་རྣམ་པར་ཤེས་པའོ། །དངོས་པོ་དང་ཐབས་མེད་པའི་རང་བཞིན་གྱི་མཚན་ཉིད་ནི་ཡེ་ཤེས་སོ། །གཞན་ཡང་ཐོབ་པའི་མཚན་ཉིད་ནི་རྣམ་པར་ཤེས་པའོ། །ཐོབ་པ་མེད་པའི་མཚན་ཉིད་ནི་ཡེ་ཤེས་ཏེ། རང་ཉིད་འཕགས་པའི་སོ་སོ་རང་གིས་རིག་པའི་ཡེ་ཤེས་ཀྱི་སྤྱོད་ཡུལ་རྟོགས་པས་ན་མི་འཇུག་མི་འབྱུང་བའི་ཕྱིར་ཆུའི་ཟླ་བ་བཞིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་
ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ལས་རྣམས་སོགས་པ་རྣམས་ཤེས་ཏེ། །མི་སོགས་དེ་ནི་ཡེ་ཤེས་སོ། །ཆོས་རྣམས་སོ་སོར་རབ་བརྟགས་ཏེ། །སྣང་བ་མེད་པར་རྟོགས་པ་དང་། །དབང་དང་སྟོབས་ཀྱང་ཐོབ་གྱུར་ན། །དེ་ནི་ཤེས་རབ་ཅེས་བྱའོ། །ཡུལ་དང་འབྲེལ་བ་སེམས་ཡིན་ཏེ། །རྣམ་རྟོགས་རིག་པ་ཡེ་ཤེས་ཡིན། །སྣང་བ་མེད་དང་ཁྱད་པར་ལས། །ཤེས་རབ་དག་ནི་སྐྱེ་བར་འགྱུར། །སེམས་དང་ཡིད་དང་རྣམ་ཤེས་དང་། །རྟོག་པའི་འདུ་ཤེས་སྤངས་པ་དང་། །རྣམ་རྟོག་མེད་པའི་ཆོས་ཐོབ་པ། །རྒྱལ་སྲས་ཡིན་ཏེ་ཉན་ཐོས་མིན། །རབ་ཞི་ཁྱད་པར་བཟོད་པ་དང་། །དེ་བཞིན་གཤེགས་པ་རྣམ་དག་གི། །ཡེ་ཤེས་ལས་ནི་དོན་དགེ་སྐྱེ། །ཀུན་དུ་སྤྱོད་པ་རྣམ་པར་སྤངས། །དེ་ཡི་ཡེ་ཤེས་རྣམ་གསུམ་སྟེ། །འཕགས་པས་ཡང་དག་རབ་ཏུ་ཕྱེ། །མཚན་ཉིད་དེ་ལ་རྟོག་པ་ནི། །དངོས་པོ་རྣམས་དང་འབྲེལ་པའོ། །ཐེག་པ་གཉིས་ནི་ལྡན་པ་མིན། །ཡེ་ཤེས་སྣང་བ་རྣམ་པར་སྤངས། །དངོས་པོ་ཡོད་པར་ཞེན་པ་ནི། །ཉན་ཐོས་རྣམས་ལས་བྱུང་བ་ཡིན། །སེམས་ཙམ་ལས་ནི་འདས་པ་ན། །བདེ་གཤེགས་ཡེ་ཤེས་དྲི་མ་མེད། །གཞན་ཡང་བློ་གྲོས་ཆེན་པོ་མུ་སྟེགས་ཅན་རྣམས་ལ་རྣམ་པར་འགྱུར་བར་སྨྲ་བ་རྣམ་པ་དགུ་ཡོད་པས་མུ་སྟེགས་ཅན་རྣམས་ཀྱི་འགྱུར་བར་ལྟ་བ་སྐྱེའོ། །འདི་ལྟ་སྟེ། དབྱིབས་འགྱུར་བ་དང་། མཚན་ཉིད་འགྱུར་བ་དང་། རྒྱུ་འགྱུར་བ་དང་། རིགས་འགྱུར་བ་དང་། ལྟ་བ་འགྱུར་བ་དང་། ངོ་བོ་ཉིད་འགྱུར་བ་དང་། རྐྱེན་སྣང་བར་བྱེད་པ་འགྱུར་བ་དང་། བྱ་བ་སྣང་བར་བྱེད་པ་འགྱུར་བ་དང་། དངོས་པོ་འགྱུར་བའོ། །བློ་གྲོས་ཆེན་པོ་འདི་ནི་རྣམ་པར་འགྱུར་བའི་ལྟ་བ་རྣམ་པ་དགུ་ཞེས་བྱ་སྟེ། དེའི་རྒྱུས་མུ་སྟེགས་ཅན་ཐམས་ཅད་ཡོད་པ་དང་མེད་པ་ལས་སྐྱེ་བའི་རྣམ་པར་འགྱུར་བ་སྨྲ་བར་འགྱུར་བ་ཡིན་ནོ། །དེ་ལ་དབྱིབས་འགྱུར་བ་གང་ཞེ་ན། འདི་ལྟར་དབྱིབས་གཞན་དུ་འགྱུར་བར་མཐོང་བ་སྟེ། དཔེར་ན་གསེར་ལས་སྣོད་དང་། རྒྱན་སྣ་ཚོགས་སུ་བྱས་པས་དབྱིབས་
སྣ་ཚོགས་སུ་གྱུར་པར་སྣང་ཡང་གསེར་གྱི་ངོ་བོ་ཉིད་ལ་འགྱུར་བ་མེད་པ་དེ་བཞིན་དུ་དངོས་པོ་ཐམས་ཅད་འགྱུར་བ་ཡང་དེ་བཞིན་ནོ་ཞེས་རྟོག་པའོ། །མུ་སྟེགས་ཅན་ཁ་ཅིག་ནི་འདི་ལྟར་རྟོག་སྟེ། དངོས་པོ་འགྱུར་གྱི་རྣམ་པར་རྟོག་པ་དེ་དག་ནི་དེ་བཞིན་དུ་ཡང་མ་ཡིན། གཞན་དུ་ཡང་མ་ཡིན་པར་རྣམ་པར་རྟོག་པའི་ཕྱིར་དེ་ལྟར་དངོས་པོ་ཐམས་ཅད་འགྱུར་བ་དང་། འོ་མ་དང་། ཞོ་དང་། ཆང་དང་། འབྲས་བུ་སྨིན་པ་ལྟ་བུར་ཤེས་པར་བྱ་སྟེ། མུ་སྟེགས་ཅན་དག་གིས་རྣམ་པར་འགྱུར་བར་བརྟགས་པའི་རྣམ་པར་འགྱུར་བ་དེ་དག་མེད་པས་ན་ཡོད་པའམ་མེད་པ་ནི་རང་གི་སེམས་སྣང་བ་ཙམ་དུ་ཟད་དེ། ཕྱི་རོལ་གྱི་དངོས་པོ་ནི་དངོས་པོ་མེད་པའོ། །བློ་གྲོས་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་རྣམས་རང་གི་རྣམ་པར་རྟོག་པ་ལ་གོམས་པས་ན། བློ་གྲོས་ཆེན་པོ་ཆོས་གང་ཡང་སྐྱེ་བའམ། འཇིག་པ་མེད་དེ། ཇི་ལྟར་སྒྱུ་མ་དང་། རྨི་ལམ་གྱི་གཟུགས་སྐྱེ་བར་མཐོང་བ་བཞིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །དབྱིབས་གནས་དུས་ནི་འགྱུར་བ་ལས། །འབྱུང་བ་ཆེན་པོའི་དབང་པོ་དང་། །སྲིད་པ་བར་མ་རིམ་སྐྱེ་བར། །རྟོག་པ་ཡིན་ཏེ་མཁས་པ་མིན། །རྒྱལ་བས་རྟེན་ཅིང་འབྲེལ་འབྱུང་ལ། །དེ་དག་ལྟར་ནི་རྟོག་མ་ཡིན། །འོན་ཀྱང་འཇིག་རྟེན་རྟེན་འབྲེལ་ནི། །དྲི་ཟའི་གྲོང་ཁྱེར་ཇི་བཞིན་ནོ། །བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཐམས་ཅད་ཀྱི་མཚམས་སྦྱོར་བའི་དོན་དང་། རྣམ་པར་གྲོལ་བའི་དོན་བཤད་དུ་གསོལ། གལ་ཏེ་མཚམས་སྦྱོར་བ་དང་། མཚམས་སྦྱོར་བ་མ་ལགས་པའི་མཚན་ཉིད་རབ་ཏུ་འབྱེད་པ་ལ་མཁས་པར་གྱུར་ན། བདག་དང་བྱང་ཆུབ་སེམས་དཔའ་རྣམས་མཚམས་སྦྱོར་བ་ཐམས་ཅད་ཀྱི་ཐབས་ལ་མཁས་པས་སྒྲ་ཇི་བཞིན་གྱི་དོན་ལ་མངོན་པར་ཞེན་པའི་མཚམས་སྦྱོར་བར་མི་ལྟུང་བ་དང་། ཆོས་ཐམས་ཅད་ཀྱི་མཚམས་སྦྱོར་བ་དང་། མཚམས་སྦྱོར་བ་མ་ལགས་པའི་མཚན་
ཉིད་ལ་མཁས་པས་ཚིག་དང་ཡི་གེ་ལ་རྣམ་པར་རྟོག་པའི་བློ་ཡོངས་སུ་སྤངས་ཏེ། སངས་རྒྱས་ཀྱི་ཞིང་ཐམས་ཅད་བགྲོད་ཅིང་འཁོར་གྱི་དཀྱིལ་འཁོར་དཔག་ཏུ་མ་མཆིས་པར་མཆི་བ་དང་། སྟོབས་དང་། དབང་བ་དང་། མངོན་པར་ཤེས་པ་དང་། གཟུངས་ཀྱི་ཕྱག་རྒྱ་དང་། སྤྲུལ་པ་སྣ་ཚོགས་དང་། འོད་ཟེར་གྱིས་ཀུན་དུ་གསལ་བར་བགྱིད་ཅིང་རིག་པའི་བློས་མཐར་ཐུག་པའི་གནས་བཅུ་ལ་རབ་ཏུ་འཇུག་པ་དང་། སྦྱོར་བ་མངོན་པར་འདུ་བགྱིད་པ་མ་མཆིས་པས་ཉི་མ་དང་། ཟླ་བ་དང་། ནོར་བུ་དང་། འབྱུང་བ་ཆེན་པོ་བཞི་དང་མཚུངས་པ་དང་། ས་ཐམས་ཅད་ལ་རང་གི་སེམས་རྣམ་པར་རྟོག་པའི་མཚན་ཉིད་དུ་ལྟ་བ་སྤངས་ཤིང་ཆོས་ཐམས་ཅད་སྒྱུ་མ་དང་། རྨི་ལམ་ལ་སོགས་པ་ལྟ་བུར་མཐོང་བས་སངས་རྒྱས་ཀྱི་ས་དང་སྐུ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་ལ་ཅི་རིགས་པར་ཆོས་སྟོན་པས་དྲངས་ཏེ། ཆོས་ཐམས་ཅད་སྒྱུ་མ་དང་། རྨི་ལམ་ལ་སོགས་པ་ལྟ་བུར་ཁོང་དུ་ཆུད་པར་བགྱི་བ་དང་། མཆིས་པ་དང་མ་མཆིས་པའི་ཕྱོགས་དང་། སྐྱེ་བ་དང་། འཇིག་པའི་རྣམ་པར་རྟོག་པ་སྤོང་བར་བརྗོད་པ་དང་། ཐ་དད་པའི་དོན་ལ་རབ་ཏུ་འགོད་པས་ལུས་ཁྱད་པར་ཅན་དུ་ཡང་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ཀྱིས་གསུངས་པ་དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཆོས་ཐམས་ཅད་ལ་སྒྲ་ཇི་བཞིན་དུ་མངོན་པར་ཞེན་པའི་མཚམས་སྦྱོར་བ་ནི་ཚད་མེད་དེ། འདི་ལྟ་སྟེ། མཚན་ཉིད་ལ་མངོན་པར་ཞེན་པའི་མཚམས་སྦྱོར་བ་དང་། རྐྱེན་ལ་མངོན་པར་ཞེན་པའི་མཚམས་སྦྱོར་བ་དང་། དངོས་པོ་དང་དངོས་པོ་མེད་པ་ལ་མངོན་པར་ཞེན་པའི་མཚམས་སྦྱོར་བ་དང་། སྐྱེ་བ་དང་མི་སྐྱེ་བར་རྣམ་པར་རྟོག་པ་ལ་མངོན་པར་ཞེན་པའི་མཚམས་སྦྱོར་བ་དང་། འགོག་པ་མ་ཡིན་པར་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བ་དང་།
ཐེག་པ་དང་། ཐེག་པ་མ་ཡིན་པར་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བ་དང་། འདུས་བྱས་དང་འདུས་མ་བྱས་སུ་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བ་དང་། ས་དང་སའི་རང་གི་མཚན་ཉིད་ལ་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བ་དང་། རང་གི་རྣམ་པར་རྟོག་པ་ལ་བར་ཆད་མེད་པ་ཡོད་པར་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བ་དང་། ཡོད་པ་དང་མེད་པའི་ཕྱོགས་མུ་སྟེགས་ཅན་གྱི་གནས་ལ་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བ་དང་། ཐེག་པ་གསུམ་དང་། ཐེག་པ་གཅིག་ལ་བར་ཆད་མེད་པ་ཡོད་པར་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བའོ། །བློ་གྲོས་ཆེན་པོ་དེ་དག་དང་གཞན་རྣམས་ཀྱང་བྱིས་པ་སོ་སོའི་སྐྱེ་བོ་རྣམས་ཀྱིས་རང་གི་རྣམ་པར་རྟོག་པས་མཚམས་སྦྱོར་བ་ཡིན་ཏེ། དེ་ལྟར་མཚམས་སྦྱོར་བའི་ཕྱིར་བྱིས་པ་སོ་སོའི་སྐྱེ་བོ་རྣམས་རྣམ་པར་རྟོག་པར་བྱེད་པས་ཇི་ལྟར་དར་གྱི་སྲིན་བུ་སྐོན་པ་བྱེད་པ་བཞིན་དུ་རྣམ་པར་རྟོག་པའི་དར་སྐུད་ཀྱིས་བདག་དང་གཞན་ལ་ཡོངས་སུ་དཀྲི་ཞིང་ཡོད་པ་དང་མེད་པར་མཚམས་སྦྱོར་བའི་མཚན་ཉིད་ལ་མངོན་པར་ཞེན་ཏོ། །བློ་གྲོས་ཆེན་པོ་འདི་ལ་མཚམས་སྦྱོར་བ་དང་། མཚམས་མི་སྦྱོར་བའི་མཚན་ཉིད་གང་ཡང་མེད་དེ། ཆོས་ཐམས་ཅད་རབ་ཏུ་དབེན་པར་མཐོང་བས་རྣམ་པར་རྟོག་པ་མི་འབྱུང་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་རབ་ཏུ་དབེན་པར་མཐོང་ངོ་། །གཞན་ཡང་བློ་གྲོས་ཆེན་པོ་ཕྱི་རོལ་གྱི་དངོས་པོ་རྣམས་དངོས་པོ་མེད་པ་དང་། རང་གི་སེམས་སྣང་བའི་མཚན་ཉིད་དུ་ཁོང་དུ་ཆུད་ཅིང་སྣང་བ་མེད་པ་དང་། རང་གི་སེམས་སྣང་བ་ཙམ་དུ་སོ་སོར་རྟོག་པའི་རྗེས་སུ་འབྲང་བ་དང་། ཡོད་པ་དང་མེད་པའི་དངོས་པོ་ཐམས་ཅད་ཀྱི་མཚན་མ་མེད་པ་དང་། རྣམ་པར་རྟོག་པའི་མཚམས་སྦྱོར་བ་རབ་ཏུ་དབེན་པར་མཐོང་བའི་ཕྱིར་ཆོས་ཐམས་ཅད་ལ་མཚམས་སྦྱོར་བ་ཡང་མེད། མཚམས་སྦྱོར་བ་མ་ཡིན་པའི་མཚན་ཉིད་ཀྱང་མེད་དོ། །བློ་གྲོས་ཆེན་པོ་འདི་ལ་གང་ཡང་འཆིང་བའམ་གྲོལ་བ་མེད་དེ། གཞན་དུ་ན་ཡང་དག་པ་མ་ཡིན་
པར་ལྷུང་བའི་བློ་ཅན་དག་གིས་བཅིངས་པ་དང་གྲོལ་བ་ཡོད་པར་ཤེས་སོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཆོས་ཐམས་ཅད་ལ་ཡོད་པ་དང་། མེད་པ་དང་། སེམས་ཅན་མི་དམིགས་པའི་ཕྱིར་རོ། །གཞན་ཡང་བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རྣམས་ཀྱི་མཚམས་སྦྱོར་བ་ནི་རྣམ་པ་གསུམ་ཡོད་དེ། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་ཡིན་ཏེ། མ་འོངས་པ་ལ་སྲེད་པ་ཡང་སྲིད་པ་ལ་དགའ་བའི་འདོད་ཆགས་དང་ལྡན་པ་དེས་མཚམས་སྦྱོར་བའི་ཕྱིར་སྲིད་པའི་འགྲོ་བ་རྣམས་སུ་མཚམས་སྦྱོར་བར་འགྱུར་རོ། །དེའི་མཚམས་སྦྱོར་བ་ནི་འགྲོ་བ་ལྔ་པོ་རྣམས་སུ་མཚམས་སྦྱོར་བ་ཡིན་ཏེ། བློ་གྲོས་ཆེན་པོ་མཚམས་སྦྱོར་བ་བཅད་པ་ལ་ནི་མཚམས་སྦྱོར་བ་དང་། མཚམས་སྦྱོར་བ་མ་ཡིན་པའི་མཚན་ཉིད་གང་ཡང་མེད་དོ། །གཞན་ཡང་བློ་གྲོས་ཆེན་པོ་གསུམ་འདུས་པའི་རྐྱེན་དང་། བྱ་བའི་སྦྱོར་བ་ལ་མངོན་པར་ཞེན་པ་རྣམ་པར་ཤེས་པ་རྣམས་ཀྱི་མཚམས་སྦྱོར་བ་བར་ཆད་མེད་པར་འབྱུང་ངོ་། །སྦྱོར་བ་ལ་མངོན་པར་ཞེན་པས་སྲིད་པའི་མཚམས་སྦྱོར་བར་འགྱུར་ཏེ། གསུམ་འདུས་པའི་རྐྱེན་གྱིས་རྣམ་པར་ཤེས་པ་སྤངས་ཤིང་རྣམ་པར་ཐར་པ་གསུམ་མཐོང་ན། མཚམས་སྦྱོར་བ་ཐམས་ཅད་མི་འབྱུང་ངོ་། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཡང་དག་མ་ཡིན་རྣམ་རྟོག་ནི། །མཚམས་སྦྱོར་མཚན་ཉིད་ཅེས་བྱ་སྟེ། །དེ་དག་ཡང་དག་ཡོངས་ཤེས་ན། མཚམས་སྦྱོར་དྲ་བ་ཆོད་པར་འགྱུར། །དངོས་པོ་རྣམས་ནི་མ་ཤེས་པས། །སྒྲ་ཡི་རྗེས་སུ་འཛིན་པར་བྱེད། །ཇི་ལྟར་དར་གྱི་སྲིན་བུ་བཞིན། །མཚམས་སྦྱོར་དྲ་བས་རང་ལ་འཆིང་། །བྱིས་པ་རྣམ་རྟོག་རབ་བཅིངས་པས། །མཚམས་སྦྱོར་སོ་སོར་རྟོག་མི་བྱེད།། །།འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས། བམ་པོ་དྲུག་པ། ཡང་བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་ཇི་སྐད་དུ་རྣམ་པར་རྟོག་པ་གང་དང་གང་གིས་
དངོས་པོ་གང་དང་གང་བརྟགས་པ་དེ་དང་དེ་དག་ནི་ཀུན་བརྟགས་པ་ཉིད་དེ། དེ་དག་ལ་རང་བཞིན་མེད་པས་ཀུན་བརྟགས་པའི་རང་བཞིན་ཁོ་ནའོ་ཞེས་གང་གསུངས་པ། བཅོམ་ལྡན་འདས་གལ་ཏེ་ཀུན་བརྟགས་པའི་རང་བཞིན་ཙམ་ཁོ་ན་སྟེ། དངོས་པོའི་རང་བཞིན་གྱི་མཚན་ཉིད་ལ་ལྟོས་པ་ཞིག་མ་ལགས་ན། བཅོམ་ལྡན་འདས་ཀུན་ནས་ཉོན་མོངས་པ་དང་། རྣམ་པར་བྱང་བ་དངོས་པོ་མ་མཆིས་པར་བཀའ་སྩལ་པའི་སྐྱོན་དུ་མི་འགྱུར་བ་ལགས་སམ། ཆོས་ཐམས་ཅད་ནི་ཀུན་བརྟགས་པའི་རང་བཞིན་ཉིད་དེ་དངོས་པོ་མ་མཆིས་པའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ་དེ་བཞིན་ཏེ། ཁྱོད་ཀྱིས་ཇི་སྐད་སྨྲས་པ་བཞིན་ནོ། །བློ་གྲོས་ཆེན་པོ་ཇི་ལྟར་བྱིས་པ་སོ་སོའི་སྐྱེ་བོ་རྣམས་ཀྱིས་དངོས་པོའི་རང་བཞིན་དུ་རྣམ་པར་བརྟགས་པ་ལྟར་ཡང་དག་པ་ཉིད་ནི་དེ་ལྟ་མ་ཡིན་པས་ཀུན་བརྟགས་པའི་རང་བཞིན་དེ་ནི་དངོས་པོའི་རང་བཞིན་གྱི་མཚན་ཉིད་དུ་ཡོད་པ་མ་ཡིན་ཏེ། འོན་ཀྱང་བློ་གྲོས་ཆེན་པོ་འཕགས་པ་རྣམས་ཀྱི་ཡེ་ཤེས་ཀྱིས་དངོས་པོ་ཡོད་པའི་རང་བཞིན་ཇི་ལྟ་བ་བཞིན་དུ་འཕགས་པའི་ཡེ་ཤེས་དང་། འཕགས་པའི་མཐོང་བ་དང་། འཕགས་པའི་ཤེས་རབ་ཀྱི་མིག་གིས་དངོས་པོའི་རང་བཞིན་དེ་བཞིན་དུ་རྟོགས་སོ། །བློ་གྲོས་ཆེན་པོས་གསོལ་པ། བཅོམ་ལྡན་འདས་གལ་ཏེ་འཕགས་པ་རྣམས་ཀྱི་འཕགས་པའི་ཡེ་ཤེས་དང་། འཕགས་པའི་མཐོང་བ་དང་། འཕགས་པའི་ཤེས་རབ་ཀྱི་མིག་གིས་ལགས་ཀྱི་ལྷའི་མིག་དང་། ཤའི་མིག་གིས་དངོས་པོའི་རང་བཞིན་དེ་བཞིན་དུ་རྟོགས་པར་མི་འགྱུར་ཏེ། བྱིས་པ་སོ་སོའི་སྐྱེ་བོ་དག་གིས་ཇི་ལྟར་བརྟགས་པ་དེ་ལྟར་མ་ལགས་ན། བཅོམ་ལྡན་འདས་ཇི་ལྟར་བྱིས་པ་སོ་སོའི་སྐྱེ་བོ་རྣམས་ཀྱི་རྣམ་པར་རྟོག་པ་ལྡོག་པར་འགྱུར་ཏེ། འཕགས་པའི་ངོ་བོ་ཉིད་ཀྱི་དངོས་པོ་ཁོང་དུ་མ་ཆུད་པའི་སླད་དུའོ། །བཅོམ་ལྡན་འདས་དེ་དག་ནི་ཕྱིན་ཅི་ལོག་ཀྱང་མ་ལགས། ཕྱིན་ཅི་མ་ལོག་པ་ཡང་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟ་སྟེ། འཕགས་པའི་དངོས་པོའི་ངོ་བོའི་རང་བཞིན་ཁོང་དུ་མ་ཆུད་
པ་དང་། མཆིས་པ་དང་། མ་མཆིས་པ་དང་བྲལ་བའི་མཚན་ཉིད་མ་མཐོང་བའི་སླད་དུའོ། །བཅོམ་ལྡན་འདས་འཕགས་པ་རྣམས་ནི་འདི་ལྟ་བུའི་མཐོང་བས་དེ་ལྟ་བུའི་དངོས་པོ་ལྟར་རྣམ་པར་བརྟགས་པ་བཞིན་དུ་མཐོང་བར་མི་འགྱུར་ཏེ། རང་གི་མཚན་ཉིད་ཀྱི་སྤྱོད་ཡུལ་ལ་སྤྱོད་ཡུལ་དུ་མི་བགྱིད་པའི་སླད་དུའོ། །བཅོམ་ལྡན་འདས་དེ་དག་ལ་ཡང་དངོས་པོའི་རང་བཞིན་གྱི་མཚན་ཉིད་རྣམས་ཀུན་བརྟགས་པའི་རང་བཞིན་ཉིད་བཞིན་དུ་སྣང་སྟེ། རྒྱུ་མ་བསྟན་པས་རྒྱུ་མ་མཆིས་པའི་སླད་དུ་འདི་ལྟ་སྟེ། དངོས་པོའི་མཚན་ཉིད་ཀྱི་ལྟ་བར་ལྷུང་བས་སྤྱོད་ཡུལ་ཐ་དད་པར་འགྱུར་ཏེ། དེ་དག་ཇི་ལྟ་བ་བཞིན་དུ་མ་ལགས་པས་འདི་ལྟར་ཐུག་པ་མ་མཆིས་པའི་ནོངས་པར་འགྱུར་ཏེ། བཅོམ་ལྡན་འདས་དངོས་པོའི་རང་བཞིན་གྱི་མཚན་ཉིད་ཁོང་དུ་མ་ཆུད་པའི་སླད་དུའོ། །བཅོམ་ལྡན་འདས་རྣམ་པར་རྟོག་པའི་རང་བཞིན་གྱི་རྒྱུས་དངོས་པོའི་རང་བཞིན་གྱི་མཚན་ཉིད་མ་ལགས་ན། ཇི་ལྟར་ཀུན་དུ་རྟོག་པ་དེ་དག་ཀུན་དུ་རྟོག་པར་མི་འགྱུར་ཞིང་། ཡང་དག་པ་ཇི་ལྟ་བ་བཞིན་དུ་ཀུན་བརྟགས་ལགས་པར་ཁོང་དུ་ཆུད་པར་འགྱུར། བཅོམ་ལྡན་འདས་སོ་སོར་རྣམ་པར་རྟོག་པའི་མཚན་ཉིད་ཀྱང་གཞན། རང་བཞིན་གྱི་མཚན་ཉིད་ཀྱང་གཞན་ཏེ། བཅོམ་ལྡན་འདས་རྒྱུ་མི་མཚུངས་ན་རྣམ་པར་རྟོག་པ་དང་། རང་བཞིན་གྱི་མཚན་ཉིད་ལ་དེ་དག་ཅིའི་སླད་དུ་སོ་སོར་རྣམ་པར་རྟོག་པར་མི་བགྱིད། གཞན་ཡང་ཅིའི་སླད་དུ་བྱིས་པ་སོ་སོའི་སྐྱེ་བོ་རྣམས་ནི་ཡང་དག་པ་ཇི་ལྟ་བ་བཞིན་དུ་མི་རིག་སྟེ། འོན་ཀྱང་སེམས་ཅན་རྣམས་ཀྱི་རྣམ་པར་རྟོག་པ་ཡོངས་སུ་སྤང་བའི་ཕྱིར་ཀུན་བརྟགས་པའི་མཚན་ཉིད་བཞིན་ནོ་ཞེས་བསྟན་ཀྱང་ཡང་དག་པ་ཡོད་པ་མ་ཡིན་ནོ་ཞེས་གསུངས། བཅོམ་ལྡན་འདས་ཅིའི་སླད་དུ་སེམས་ཅན་རྣམས་ཀྱིས་མཆིས་པ་དང་མ་མཆིས་པ་དང་མཆིས་པའི་ལྟ་བའི་དངོས་པོའི་རང་བཞིན་དང་། འཕགས་པའི་ཡེ་ཤེས་ཀྱི་སྤྱོད་ཡུལ་ལ་མངོན་པར་ཞེན་པ་དང་། མཆིས་པའི་ལྟ་བར་ལྷུང་བ་ལ་མངོན་པར་ཞེན་པ་བཟློག་ནས་སྟོང་པའི་ཆོས་ནི་དངོས་པོ་མེད་དོ་ཞེས་
གསུངས་ཤིང་འཕགས་པའི་རང་བཞིན་གྱི་དངོས་པོ་བཀའ་སྩལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ང་ནི་སྟོང་པའི་ཆོས་དངོས་པོ་མེད་པར་བཤད་པ་ཡང་མ་ཡིན། ཡོད་པའི་ལྟ་བར་ལྷུང་བས་འཕགས་པའི་ཡེ་ཤེས་ཀྱི་རང་བཞིན་གྱི་དངོས་པོ་བསྟན་པ་ཡང་མ་ཡིན་ཏེ། འོན་ཀྱང་སེམས་ཅན་རྣམས་ཀྱི་སྐྲག་པའི་གནས་ཡོངས་སུ་སྤང་བའི་ཕྱིར་སེམས་ཅན་གང་དག་ཐོག་མ་མེད་པའི་དུས་ནས་དངོས་པོའི་རང་བཞིན་གྱི་མཚན་ཉིད་ལ་མངོན་པར་ཞེན་པ། འཕགས་པའི་ཡེ་ཤེས་ཀྱི་དངོས་པོའི་རང་བཞིན་ལ་མཚན་ཉིད་དུ་ལྟ་ཞིང་མངོན་པར་ཞེན་པ་དག་ལ་སྟོང་པ་ཉིད་ཀྱི་ཆོས་བཤད་དོ། །བློ་གྲོས་ཆེན་པོ་ངས་དངོས་པོའི་རང་བཞིན་བསྟན་པ་ནི་མེད་མོད་ཀྱི། བློ་གྲོས་ཆེན་པོ་འོན་ཀྱང་ང་ནི་རང་ཉིད་ཀྱིས་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པ། སྟོང་པ་ཉིད་ཀྱི་ཆོས་ལ་རབ་ཏུ་གནས་ཤིང་ནོར་པའི་མཚན་ཉིད་དུ་ལྟ་བ་ཡོངས་སུ་སྤངས་པས་རང་གི་སེམས་སྣང་བ་དང་། དངོས་པོ་དང་། དངོས་པོ་མེད་པར་ལྟ་བ་དང་བྲལ་བ་རྣམ་པར་ཐར་པ་གསུམ་གྱི་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པའི་ཕྱག་རྒྱས་ཤིན་ཏུ་བཏབ་ཅིང་དངོས་པོའི་རང་བཞིན་རྣམས་ལ་སོ་སོ་རང་གིས་རིག་པའི་བློས་སོ་སོར་རབ་ཏུ་རྟོག་ཅིང་གནས་པས་ཡོད་པ་དང་། མེད་པའི་དངོས་པོར་ལྟ་བའི་མཚན་ཉིད་ཡོངས་སུ་སྤངས་པ་ཡིན་ནོ། །གཞན་ཡང་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་མ་སྐྱེས་པའོ་ཞེས་དམ་བཅའ་བར་མི་བྱའོ། །དེ་ཅིའི་ཕྱིར་ཞེ་ན། འདི་ལྟ་སྟེ། དམ་བཅའ་བའི་དངོས་པོ་ཐམས་ཅད་དངོས་པོ་མེད་པའི་ཕྱིར་དང་། དེའི་རྒྱུ་ལས་སྐྱེ་བའི་མཚན་ཉིད་ཀྱི་ཕྱིར་ཆོས་ཐམས་ཅད་མ་སྐྱེས་པའོ་ཞེས་དམ་བཅས་ཏེ་སྨྲས་ན། དམ་བཅས་པ་དེ་ཉམས་པར་འགྱུར་རོ། །གང་དམ་བཅས་པ་དེས་ཆོས་ཐམས་ཅད་མ་སྐྱེས་པའོ་ཞེས་དམ་བཅས་པ་དེ་ཉམས་པར་འགྱུར་བ་ནི་འདི་ལྟར་དམ་བཅའ་བ་ཡང་ལྟོས་པ་ཡོད་པ་ལས་སྐྱེས་པའི་ཕྱིར་རོ། །ཡང་མ་སྐྱེས་པ་ཞེས་དམ་བཅས་པ་དེ་ནི་ཆོས་ཐམས་ཅད་ཀྱི་ནང་དུ་
གཏོགས་པའི་ཕྱིར་རོ། །མ་ཉམས་པའི་མཚན་ཉིད་ནི་མི་སྐྱེ་བའི་ཕྱིར་ཆོས་ཐམས་ཅད་མ་སྐྱེས་པ་ཞེས་དམ་བཅས་ན་སྨྲ་བ་དེ་ཉམས་པར་འགྱུར་རོ། །བློ་གྲོས་ཆེན་པོ་ཡོད་པ་དང་། མེད་པ་མ་སྐྱེས་པར་དམ་བཅས་པའི་དམ་བཅས་པ་དེ་ནི་དངོས་པོ་ཐམས་ཅད་ཀྱི་ནང་དུ་གཏོགས་པས་ཡོད་པ་དང་མེད་པའི་མཚན་ཉིད་མི་དམིགས་སོ། །བློ་གྲོས་ཆེན་པོ་གལ་ཏེ་དམ་བཅས་པ་མ་སྐྱེས་པ་དེས་དངོས་པོ་ཐམས་ཅད་མ་སྐྱེས་པའོ་ཞེས་དམ་བཅའ་བར་བྱེད་ན། དེ་ལྟ་ན་ཡང་དམ་བཅས་པ་ལས་ཉམས་པར་འགྱུར་ཏེ། འདི་ལྟར་ཡོད་པ་དང་མེད་པའི་དངོས་པོའི་མཚན་ཉིད་ནི་མི་སྐྱེ་བའི་ཕྱིར་དམ་བཅའ་བར་མི་བྱའོ། །ཡན་ལག་ལྔ་དང་ལྡན་པའི་སྨྲ་བ་ནི་ཉེས་པ་མང་པོའི་ཕྱིར་དང་། ཕན་ཚུན་རྒྱུ་ཐ་དད་པའི་མཚན་ཉིད་ཀྱི་ཕྱིར་དང་། བྱས་པའི་ཕྱིར་ཡན་ལག་རྣམས་དམ་བཅའ་བར་མི་བྱའོ། །འདི་ལྟ་སྟེ། ཆོས་ཐམས་ཅད་མ་སྐྱེས་པ་དང་། དེ་བཞིན་དུ་ཆོས་ཐམས་ཅད་སྟོང་པ་དང་། རང་བཞིན་མེད་པའོ་ཞེས་དམ་བཅའ་བར་མི་བྱ་མོད་ཀྱི། བློ་གྲོས་ཆེན་པོ་འོན་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་སྒྱུ་མ་དང་། རྨི་ལམ་ལྟ་བུ་བསྟན་པར་བྱ་སྟེ། སྣང་བ་དང་། མི་སྣང་བའི་མཚན་ཉིད་ཀྱི་ཕྱིར་ལྟ་བ་དང་། བློ་སླུ་བར་བྱེད་པའི་ཕྱིར་ཆོས་ཐམས་ཅད་སྒྱུ་མ་དང་། རྨི་ལམ་ལྟ་བུའི་ངོ་བོ་ཉིད་དུ་བསྟན་པར་བྱའོ། །གཞན་དུ་ན་བྱིས་པ་སོ་སོའི་སྐྱེ་བོ་རྣམས་སྐྲག་པའི་གནས་སྤང་བར་བྱ་བའི་ཕྱིར་དང་། བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རྣམས་ཡོད་པ་དང་། མེད་པའི་ལྟ་བར་ལྷུང་བ་དེ་དག་སྐྲག་པར་མི་འགྱུར་ཞིང་ཐེག་པ་ཆེན་པོ་ལས་རིང་དུ་མི་འགྱུར་བར་བྱ་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །རང་བཞིན་མེད་པས་བརྗོད་དུ་མེད། །དངོས་པོ་མེད་ཅིང་མཚམས་སྦྱོར་མེད། །འདི་དག་རོ་བཞིན་བྱིས་པ་ཡི། །ལོག་པའི་བློ་ཡིས་རྣམ་པར་བརྟགས། །ཆོས་རྣམས་ཐམས་ཅད་མ་སྐྱེས་པ། །དེ་ནི་མུ་སྟེགས་གཞུང་མ་ཡིན། །མཐར་ནི་སྐྱེ་བ་གང་ཡང་མེད། །དངོས་པོ་རྐྱེན་གྱིས་བསྒྲུབས་པའོ། །
ཆོས་རྣམས་ཐམས་ཅད་མ་སྐྱེས་པས། །བློ་ལྡན་མཚན་མར་འཛིན་མི་བྱེད། །དམ་བཅས་རྒྱུ་ལས་སྐྱེས་པའི་ཕྱིར། །མཁས་པ་དག་གིས་ཡོངས་སུ་སྤོང་། །ཇི་ལྟར་རབ་རིབ་མིག་ཅན་གྱིས། །སྐྲ་ཤད་མཚན་ཉིད་ལོག་པར་མཐོང་། །དེ་བཞིན་དངོས་པོར་མངོན་ཞེན་པའང་། །བྱིས་པས་ལོག་པར་རྣམ་པར་བརྟགས། །ཇི་ཙམ་སྲིད་གསུམ་ཉེར་འདོགས་པ། །དངོས་པོའི་རང་བཞིན་ཡོད་མ་ཡིན། །དངོས་པོའི་རང་བཞིན་ཉེར་བཏགས་པས། །རྟོག་པ་ཅན་རྣམས་རྟོག་པར་བྱེད། །མཚན་དངོས་ཚིག་ནི་རྣམ་བཞག་པས། །ཡིད་འཁྲུག་རབ་ཏུ་གཡོས་པར་འགྱུར། །རྒྱལ་སྲས་རྣམ་རྟོག་དེ་དག་ལས། །ཤིན་དུ་འདས་ཤིང་ཡོངས་སུ་སྤངས། །ཆུ་མ་ཡིན་ལ་ཆུར་འཛིན་པ། །དེ་ནི་སྐོམ་གྱི་སྲེད་ལས་སྐྱེས། །བྱིས་པ་དེ་བཞིན་ནོར་བར་འགྱུར། །འཕགས་པས་མཐོང་བ་དེ་ལྟ་མིན། །འཕགས་པའི་མཐོང་བ་ཡོངས་དག་སྟེ། །རྣམ་ཐར་ཏིང་ངེ་འཛིན་ལས་སྐྱེས། །སྐྱེ་དང་འཇིག་པ་རབ་སྤངས་ཏེ། །སྣང་བ་མེད་ལ་རབ་ཏུ་སྤྱོད། །སྣང་བ་མེད་ལ་རྣལ་འབྱོར་པས། །དངོས་དང་དངོས་མེད་པ་ཡང་མེད། །དངོས་དང་དངོས་མེད་མཉམ་པ་ན། །དེ་ལ་འཕགས་པའི་འབྲས་བུ་སྐྱེ། །ཇི་ལྟར་དངོས་པོ་དངོས་མེད་དང་། །མཉམ་པ་ཉིད་དུ་ཇི་ལྟར་འགྱུར། །སེམས་ཀྱིས་དེ་ནི་མ་ཤེས་པས། །ཕྱི་དང་ནང་ནི་རབ་ཏུ་གཡོས། །ནམ་ཞིག་དེ་ནི་འཇིག་བྱེད་ན། །སེམས་ཀྱིས་མཉམ་པ་ཉིད་ཀྱང་མཐོང་། །དེ་ནས་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་ཇི་སྐད་དུ་ནམ་དམིགས་པར་བྱ་བའི་དངོས་པོ་ཤེས་པས་མི་དམིགས་པ་དེ་ན་བཏགས་པ་ཙམ་དུ་རྣམ་པར་གཞག་པ་ཡིན་ཏེ། རྣམ་པར་གཞག་པའི་གཟུང་བ་མེད་པས་འཛིན་པ་ཡང་མེད་པ་ཡིན་ནོ། །འཛིན་པ་མེད་པའི་ཕྱིར་ཤེས་པ་ཡང་མི་འཇུག་སྟེ། བཏགས་པའི་མིང་ཙམ་མོ་ཞེས་གསུངས་ན། བཅོམ་ལྡན་འདས་ཅི་དངོས་པོ་རྣམས་ཀྱི་རང་དང་སྤྱིའི་མཚན་ཉིད་ཐ་དད་པ་དང་ཐ་དད་པ་མ་ལགས་པར་ཁོང་དུ་མ་ཆུད་པའི་སླད་དུ་ཤེས་པས་མི་དམིགས་ལགས་སམ། འོན་ཏེ་རང་དང་སྤྱིའི་མཚན་
ཉིད་སྣ་ཚོགས་ཀྱིས་དངོས་པོའི་ངོ་བོ་ཉིད་ཟིལ་དུ་རླག་པའི་སླད་དུ་ཤེས་པས་མི་དམིགས་ལགས་སམ། དེ་སྟེ་རི་བྲག་དང་། རྩིག་པ་དང་། ས་དང་། ཆུ་དང་། མེ་དང་། རླུང་གིས་བར་དུ་ཆོད་པའི་སླད་དུ་ཤེས་པས་མི་དམིགས་ལགས་སམ། ཧ་ཅང་ཐག་རིང་བ་དང་། ཉེ་བ་ཉིད་དུ་ཤེས་པས་མི་དམིགས་ལགས་སམ། འོན་ཏེ་རྒན་པོ་དང་། བྱིས་པ་དང་། ལོང་བ་རྣམས་དབང་པོ་དང་མི་ལྡན་པའི་སླད་དུ་ཤེས་པས་མི་དམིགས་ལགས། བཅོམ་ལྡན་འདས་གལ་ཏེ་རང་དང་སྤྱིའི་མཚན་ཉིད་ཐ་དད་པ་དང་། ཐ་དད་པ་མ་ལགས་པ་ཁོང་དུ་ཆུད་པའི་སླད་དུ་ཤེས་པས་མི་དམིགས་པ་ཞིག་ལགས་ན་ནི་དེ་ཤེས་པས་ཞེས་མི་བརྗོད་ཀྱི། མི་ཤེས་པ་ཞེས་བགྱི་སྟེ། དོན་མཆིས་ཀྱང་མི་དམིགས་པའི་སླད་དུའོ། །དེ་སྟེ་རང་དང་སྤྱིའི་མཚན་ཉིད་སྣ་ཚོགས་ཀྱིས་དངོས་པོའི་ངོ་བོ་ཉིད་ཟིལ་དུ་རླག་པའི་སླད་དུ་ཤེས་པས་མི་དམིགས་པ་ཞིག་ལགས་ན་ནི་དེ་ཡང་མི་ཤེས་པ་སྟེ། ཤེས་པ་མ་ལགས་སོ། །བཅོམ་ལྡན་འདས་ཤེས་བྱ་མཆིས་པའི་སླད་དུ་ཤེས་པ་འབྱུང་གི། དངོས་པོ་མ་མཆིས་པ་ལས་ནི་མ་ལགས་ཏེ་ཤེས་བྱ་དང་ལྡན་པའི་སླད་དུ་ཤེས་པ་ཞེས་བགྱིའོ། །དེ་སྟེ་རི་བྲག་དང་། རྩིག་པ་དང་། ས་དང་། ཆུ་དང་། མེ་དང་། །རླུང་གིས་ཆོད་པ་རྣམས་དང་། རྒྱང་རིང་པོ་དང་། ཉེ་བ་དང་། རྒན་པོ་དང་། བྱིས་པ་དང་། ལོང་བར་གྱུར་པས་དབང་པོ་རྣམས་མ་ཚང་བར་གྱུར་པའི་སླད་དུ་ཤེས་པས་མི་དམིགས་པ་ལགས་ན་ནི། དེ་ཡང་ཤེས་པ་ཞེས་མི་བགྱི་བས་མི་ཤེས་པ་ལགས་ཏེ། དངོས་པོ་མཆིས་ཀྱང་མི་དམིགས་པའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ་ནི་དེ་ལྟར་མི་ཤེས་པ་མ་ཡིན་ཏེ། ཤེས་པ་ཡིན་པས་མི་ཤེས་པ་མ་ཡིན་ནོ། །ངས་དེ་ལ་ལྡེམ་པོར་དགོངས་ཏེ། ནམ་དམིགས་པའི་དངོས་པོ་ཤེས་པས་མི་དམིགས་པ་དེ་ན་བཏགས་པ་ཙམ་དུ་རྣམ་པར་གཞག་པ་ཡིན་ནོ་ཞེས་མ་བཤད་དེ། རང་གི་སེམས་སྣང་བ་ཙམ་དུ་ཁོང་དུ་མ་ཆུད་པས་ཡོད་པ་དང་མེད་པ་ལས་ཕྱི་རོལ་གྱི་དངོས་པོ་དང་དངོས་པོ་མེད་པ་སྲིད་པར་ཤེས་པས་དངོས་པོ་མི་དམིགས་པའི་ཕྱིར་ཤེས་པ་ཤེས་བྱ་ལ་མི་འཇུག་གོ །རྣམ་
པར་ཐར་པ་གསུམ་གྱི་རྗེས་སུ་ཤེས་པ་ཡང་མི་དམིགས་ཏེ། རྟོག་པ་ཅན་ཐོག་མ་མེད་པའི་དུས་ནས་དངོས་པོ་དང་དངོས་པོ་མེད་པར་སྤྲོས་པའི་བག་ཆགས་ཀྱིས་བསྒོས་པའི་བློ་ཅན་རྣམས་ཀྱིས་དེ་ལྟར་ཤེས་པ་མ་ཡིན་ནོ། །ཤེས་པ་དེས་དེ་དག་མ་ཤེས་པའི་ཕྱིར་ཕྱི་རོལ་གྱི་དངོས་པོ་རྣམས་ཀྱི་མཚན་ཉིད་ཀྱི་རང་བཞིན་ལ་དངོས་པོ་མེད་དོ་ཞེས་རྣམ་པར་རྟོག་པ་མི་སྤོང་གི། རང་གི་སེམས་སྣང་བ་ཙམ་རྣམ་པར་འཇོག་པས་བདག་དང་བདག་གི་མཚན་ཉིད་དུ་འཛིན་པ་ལ་མངོན་པར་ཞེན་ཏེ། རང་གི་སེམས་སྣང་བ་ཙམ་དུ་མ་ཆུད་པས་ཤེས་པ་དང་ཤེས་བྱ་ལ་སོ་སོར་རྣམ་པར་རྟོག་སྟེ། རྣམ་པར་རྟོག་པའི་ཕྱིར་ཕྱི་རོལ་གྱི་དངོས་པོ་དངོས་པོ་མེད་པར་སོ་སོར་རྣམ་པར་བརྟགས་ཀྱང་མི་དམིགས་པས་ཆད་པར་ལྟ་བ་རབ་ཏུ་རྟེན་ཏོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །དམིགས་བྱ་དག་ནི་ཡོད་བཞིན་དུ། །ཤེས་པ་སོ་སོར་མི་རྟོག་པ། །དེ་ནི་ཤེས་མིན་མི་ཤེས་པར། །རྟོག་གེ་པ་ཡིས་བཤད་པ་ཡིན། །ཐ་དད་མིན་པའི་མཚན་ཉིད་དང་། །ཆོད་པ་དང་ནི་ཉེ་རིང་དག །ཅི་སྟེ་ཤེས་པས་མི་རྟོགས་ན། །དེ་ནི་ལོག་པའི་ཤེས་པ་ཡིན། །རྒན་པོ་བྱིས་པ་ལྡོངས་གྱུར་དག །ཤེས་བྱ་ཡང་དག་ཡོད་བཞིན་དུ། །ཤེས་པ་རྣམས་ནི་མི་སྐྱེ་བ། །དེ་ཡང་ལོག་པའི་ཤེས་པ་ཡིན། །གཞན་ཡང་བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རྣམས་ཐོག་མ་མེད་པའི་དུས་ཀྱི་ཡང་དག་པ་མ་ཡིན་པའི་གནས་ངན་ལེན་གྱི་ལོག་པའི་རྣམ་པར་རྟོག་པས་ཡོངས་སུ་བསྒྱུར་ཞིང་། ཡོངས་སུ་བསྒྱུར་བའི་ཚེ་རང་གི་གྲུབ་པའི་མཐའི་ཚུལ་དང་། བཤད་པའི་ཚུལ་ལ་མི་མཁས་པས་རང་གི་སེམས་སྣང་བ་ལ་ཕྱི་རོལ་གྱི་དངོས་པོའི་མཚན་ཉིད་དུ་མངོན་པར་ཞེན་པའི་ཕྱིར་ཐབས་ཀྱིས་བརྗོད་པ་ལ་མངོན་པར་ཞེན་ཅིང་། རང་གི་གྲུབ་པའི་མཐའི་མཐའ་བཞི་རྣམ་པར་དག་པའི་ཚུལ་གྱི་མཚན་ཉིད་རྣམ་པར་འབྱེད་པ་ལ་མི་མཁས་སོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། ཇི་ལྟར་བཅོམ་ལྡན་འདས་ཀྱིས་བཀའ་སྩལ་པ་བཞིན་
ནོ། །བཅོམ་ལྡན་འདས་ཅི་ནས་ཀྱང་བདག་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་ཚུལ་རྣམ་པ་གཉིས་ལ་མཁས་པས་མ་འོངས་པའི་དུས་ན་སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་རྣམས་ཀྱིས་གླགས་རྙེད་པར་མི་འགྱུར་བའི་བཤད་པའི་ཚུལ་དང་། གྲུབ་པའི་ཚུལ་བདག་ལ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །དེའི་ཕྱིར་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བློ་གྲོས་ཆེན་པོ་ལ་འདི་སྐད་ཅེས་བཀའ་སྩལ་ཏོ། །དུས་གསུམ་གྱི་དེ་བཞིན་གཤེགས་པ་རྣམས་ཀྱི་ཆོས་ཀྱི་ཚུལ་རྣམ་པ་གཉིས་ཡོད་དེ། འདི་ལྟ་སྟེ། བསྟན་པའི་ཚུལ་དང་། རང་གི་གྲུབ་པའི་མཐའི་ཚུལ་ལོ། །དེ་ལ་བསྟན་པའི་ཚུལ་ནི་འདི་ལྟ་སྟེ། སེམས་ཅན་རྣམས་ཀྱི་སེམས་ཀྱི་མོས་པ་ཇི་ལྟ་བ་བཞིན་དུ་ཚོགས་སྣ་ཚོགས་ཀྱི་མདོ་སྡེ་བཤད་པ་སྟེ། དེ་ནི་བསྟན་པའི་ཚུལ་ཞེས་བྱའོ། །དེ་ལ་རང་གི་གྲུབ་པའི་མཐའི་ཚུལ་ནི་འདི་ལྟ་སྟེ། རྣལ་འབྱོར་པ་རྣམས་རང་གི་སེམས་སྣང་བའི་རྣམ་པར་རྟོག་པ་སྣ་ཚོགས་ཡོངས་སུ་སྤངས་ནས། འདི་ལྟ་སྟེ། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པའི་ཕྱོགས་སུ་མ་ལྷུང་བ། སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་ཐམས་ཅད་ལས་ཤིན་ཏུ་འདས་པ། སོ་སོ་རང་གིས་རིག་པ་འཕགས་པའི་སྤྱོད་ཡུལ། རྒྱུ་དང་། རིགས་པ་དང་། ལྟ་བའི་མཚན་ཉིད་དང་བྲལ་བ། མུ་སྟེགས་ཅན་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་མཐའ་གཉིས་སུ་ལྷུང་བ་ཐམས་ཅད་ཀྱིས་མི་ཤེས་པ་དེ་ནི་ངས་རང་གི་གྲུབ་པའི་མཐའི་ཚུལ་གྱི་ཆོས་སོ་ཞེས་བཤད་དོ། །བློ་གྲོས་ཆེན་པོ་དེ་ནི་རང་གི་གྲུབ་པའི་མཐའི་ཚུལ་དང་། བསྟན་པའི་ཚུལ་གྱི་མཚན་ཉིད་ཅེས་བྱ་སྟེ། དེ་ལ་ཁྱོད་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་གིས་བསྒྲུབ་ཅིང་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་
ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །ང་ཡི་ཚུལ་ནི་རྣམ་གཉིས་ཏེ། །གྲུབ་པའི་མཐའ་དང་བསྟན་པའོ། །བྱིས་པ་རྣམས་ལ་བརྗོད་པ་བཤད། །རྣལ་འབྱོར་པ་ལ་གྲུབ་མཐའོ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བཅོམ་ལྡན་འདས་ཀྱིས་དུས་གཅིག་གི་ཚེ་འདི་སྐད་དུ་འཇིག་རྟེན་རྒྱང་པན་པའི་སྨྲ་བ་དང་། སྤོབས་པ་ཅན་སྣ་ཚོགས་ལ་བསླབ་ཅིང་བསྙེན་པར་མི་བྱའོ། །དེ་ལ་སློབ་ཅིང་བསྙེན་ན་ཟང་ཟིང་སྡུད་དེ་ཆོས་སྡུད་པ་མ་ཡིན་ནོ། །ཞེས་གསུངས་ན། བཅོམ་ལྡན་འདས་ཅིའི་སླད་དུ་དེ་སྐད་ཅེས་བཀའ་སྩལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་འཇིག་རྟེན་རྒྱང་པན་པ་རྣམས་ནི་སྣ་ཚོགས་པའི་ཚིག་གི་ཚོགས་དང་། རྒྱུ་དང་རྐྱེན་དང་། དཔེ་རྣམས་སྡུད་ཅིང་འགོད་པ་དག་གིས་བྱིས་པ་སོ་སོའི་སྐྱེ་བོ་རྣམས་སླུ་ཞིང་རྣམ་པར་རྨོངས་པར་བྱེད་པས་ཡང་དག་པ་དེ་ཁོ་ནའི་རང་གི་ཚུལ་ལ་འཇུག་པར་མི་བྱེད་ལ་ཆོས་ཐམས་ཅད་ཁོང་དུ་མི་ཆུད་དེ། ཕྱིན་ཅི་ལོག་ཏུ་རྣམ་པར་རྟོག་པས་མཐའ་གཉིས་སུ་ལྷུང་བ་དང་། བྱིས་པ་དག་ཤིན་ཏུ་རྨོངས་པར་བྱེད་ཅིང་བདག་ཉིད་ཀྱིས་ཡང་རྣམ་པར་འཇིག་པས་འགྲོ་བ་རྣམས་སུ་མཚམས་སྦྱོར་གྱི། རྣམ་པར་གྲོལ་ན་མི་འཐོབ་སྟེ། རང་གི་སེམས་སྣང་བ་ཙམ་དུ་ཁོང་དུ་མ་ཆུད་ཅིང་ཕྱི་རོལ་གྱི་དངོས་པོའི་རང་བཞིན་མ་སྤངས་པ་དང་། རྣམ་པར་རྟོག་པ་ལ་མངོན་པར་ཞེན་པས་སོ། །དེ་ལྟ་བས་ན་འཇིག་རྟེན་རྒྱང་པན་པ་སྤོབས་པ་སྣ་ཚོགས་ཅན་ནི་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། འཁྲུགས་པ་ལས་ཡོངས་སུ་མི་འགྲོལ་ཏེ། ཡོངས་སུ་སླུ་ཞིང་ཤིན་ཏུ་རྨོངས་པར་བྱེད་པ་ཡིན་ནོ། །བློ་གྲོས་ཆེན་པོ་བརྒྱ་བྱིན་ལྷའི་དབང་པོ་བསྟན་བཅོས་མང་པོ་ལ་མཁས་པས་བདག་ཉིད་ཀྱིས་སྒྲའི་བསྟན་བཅོས་བྱས་པ་ལས་འཇིག་རྟེན་རྒྱང་པན་པ་དེའི་སློབ་མ་ཀླུའི་གཟུགས་དང་ཆ་བྱད་འཛིན་པ་ཞིག་བརྒྱ་བྱིན་ལྷའི་དབང་པོའི་གནས་སུ་སོང་ནས། འདི་སྐད་དུ་དམ་བཅས་སོ། །བདག་ཁྱོད་དང་
ཆོས་སྨྲ་བར་བྱ་སྟེ། གལ་ཏེ་ཁྱོད་ཀྱིས་བདག་མ་ཐུབ་པར་གྱུར་ན་ནི་ཁྱོད་ཀྱི་རྩིབས་སྟོང་དང་ལྡན་པའི་འཁོར་ལོ་གཞིག་པར་བྱའོ། །བདག་ཕམ་པར་གྱུར་ན་ནི་མགོ་རེ་རེ་ནས་བཅད་དེ་ཕམ་པའི་ཉེས་པ་ཁས་བླང་ངོ་ཞེས་དམ་བཅས་ནས་ཆོས་སྨྲས་པ་ལས་བརྒྱ་བྱིན་ལྷའི་དབང་པོ་ཕམ་པར་བྱས་ཏེ། འཁོར་ལོ་རྩིབས་སྟོང་དང་ལྡན་པ་བཤིག་ནས་སླར་མིའི་འཇིག་རྟེན་འདིར་འོངས་སོ། །དེ་ལྟར་བློ་གྲོས་ཆེན་པོ་འཇིག་རྟེན་རྒྱང་པན་པ་རྒྱུ་དང་དཔེ་སྣ་ཚོགས་བཀོད་པས་འདི་ལྟར་ཐ་ན་བྱོལ་སོང་དུ་གྱུར་པས་ཀྱང་ཚིག་གི་ཚོགས་རྣམ་པ་སྣ་ཚོགས་ཀྱིས་ལྷ་དང་ལྷ་མ་ཡིན་རྣམས་ཤིན་ཏུ་རྨོངས་པར་བྱེད་ཅིང་། སྐྱེ་བ་དང་། འཇིག་པའི་ལྟ་བ་ལ་རབ་ཏུ་འགོད་པར་བྱེད་ན། མི་རྣམས་ལྟ་སྨོས་ཀྱང་ཅི་དགོས། དེ་ལྟ་བས་ན་བློ་གྲོས་ཆེན་པོ་འཇིག་རྟེན་རྒྱང་པན་པ་རྣམས་ཡོངས་སུ་སྤང་བར་བྱ་སྟེ། སྡུག་བསྔལ་སྐྱེ་བའི་རྒྱུ་འཐོབ་པར་བྱེད་པས་བསླབ་ཅིང་བསྙེན་པར་མི་བྱའོ། །བློ་གྲོས་ཆེན་པོ་འཇིག་རྟེན་རྒྱང་པན་པ་རྣམས་ནི་ལུས་དང་བློས་ཡུལ་དམིགས་པ་ཙམ་དུ་སྟོན་ཏོ། །བློ་གྲོས་ཆེན་པོ་འཇིག་རྟེན་རྒྱང་པན་པ་དེ་དག་སྟོང་ཕྲག་བརྒྱ་ཡོད་དེ། ཕྱི་མའི་དུས་ལྔ་བརྒྱ་ཐ་མ་ལ་བསྟན་པ་བསྡུས་པ་རྣམས་འཇིག་པར་བྱེད་ཅིང་རྟོག་གེ་ངན་པའི་རྒྱུ་དང་། ལྟ་བ་རྣམས་རྒྱས་པར་འགྱུར་བ་ན་སློབ་མ་ངན་པ་རྣམས་ཡོངས་སུ་འཛིན་པར་བྱེད་དོ། །འདི་ལྟར་བློ་གྲོས་ཆེན་པོ་འཇིག་རྟེན་རྒྱང་པན་པ་བསྡུས་པ་འཇིག་པར་བྱེད་པ་རྣམས་ནི་ཚིག་གི་ཚོགས་དང་། རྒྱུ་དང་། དཔེ་སྣ་ཚོགས་བཀོད་པས་མུ་སྟེགས་ཀྱི་དངོས་པོ་རྗོད་ཅིང་རང་གི་རྐྱེན་ལ་མངོན་པར་ཞེན་པས་རང་གི་ཚུལ་ཡོད་པ་མ་ཡིན་ནོ། །བློ་གྲོས་ཆེན་པོ་མུ་སྟེགས་ཅན་དེ་དག་ལ་རང་གི་ཚུལ་གྱི་བསྟན་བཅོས་མེད་པས་གཞན་དག་ལ་འཇིག་རྟེན་རྒྱང་པན་པ་རྣམས་དངོས་པོའི་སྒོ་བརྒྱ་སྟོང་དུ་མ་ཚད་མེད་པ་རྣམས་རྒྱ་ཆེར་སྟོན་པར་བྱེད་དེ། རང་གི་ཚུལ་ཡོད་པ་མ་ཡིན་པ་དང་། བླུན་ཞིང་གཏི་མུག་པ་འཇིག་རྟེན་རྒྱང་པན་པ་ཡིན་པར་རང་གིས་མི་ཤེས་སོ། །དེ་ལ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་མུ་སྟེགས་ཅན་འཇིག་རྟེན་རྒྱང་པན་པ་རྣམས་ཚིག་གི་
ཚོགས་དང་། རྒྱུ་དང་། དཔེ་སྣ་ཚོགས་སུ་འབྲེལ་པས་རང་གི་ཚུལ་མ་མཆིས་ཏེ། རང་གི་དངོས་པོ་ལ་མངོན་པར་ཞེན་པ་ལགས་ན་ནི། བཅོམ་ལྡན་འདས་ཀྱང་འཇིག་རྟེན་རྒྱང་པན་པ་ཉིད་སྟོན་ཏེ། འདི་ལྟར་ཕྱོགས་ཐ་དད་པ་སྣ་ཚོགས་ནས་འདུས་པའི་འཁོར་ལྷ་དང་། མི་དང་ལྷ་མ་ཡིན་རྣམས་ལ་ཚིག་གི་ཚོགས་རྣམ་པ་སྣ་ཚོགས་ཚད་མ་མཆིས་པ་རྣམས་ཀྱིས་རྒྱ་ཆེར་གསུང་བས། དེ་ཡང་རང་གི་ཚུལ་མ་མཆིས་པ་མ་ལགས་སམ། མུ་སྟེགས་ཅན་གྱི་ཤེས་པ་དང་། ཐ་སྙད་བརྗོད་པའི་གྲངས་སུ་མཆི་བ་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ང་ནི་འཇིག་རྟེན་རྒྱང་པན་མི་འཆད་དེ་འོང་བ་དང་འགྲོ་བ་མེད་པས་འོང་བ་མེད་པ་དང་། འགྲོ་བ་མེད་པ་འབའ་ཞིག་ཏུ་སྟོན་ཏེ། བློ་གྲོས་ཆེན་པོ་འོང་བ་ཞེས་བྱ་བ་ནི་འགྲོ་བ་རྣམས་འདུས་པ་ལས་སྐྱེ་བའོ། །འགྲོ་བ་ཞེས་བྱ་བ་ནི་རྣམ་པར་འཇིག་པ་སྟེ། འགྲོ་བ་མེད་པ་དང་། འོང་བ་མེད་པ་ནི་མི་སྐྱེ་མི་འཇིག་པ་ཡིན་ནོ། །བློ་གྲོས་ཆེན་པོ་ངས་བཤད་པའི་ཆོས་རྣམས་ནི་འཇིག་རྟེན་རྒྱང་པན་པར་ལྷུང་བ་དང་། རྣམ་པར་རྟོག་པའི་གྲངས་སུ་གཏོགས་པ་མ་ཡིན་ཏེ། དེ་ཅིའི་ཕྱིར་ཞེ་ན། འདི་ལྟ་སྟེ། ཕྱི་རོལ་གྱི་དངོས་པོ་དང་། དངོས་པོ་མེད་པ་ལ་མངོན་པར་མ་ཞེན་ཅིང་རང་གི་སེམས་སྣང་བ་ཙམ་ལ་གནས་པས་མཐའ་གཉིས་ཀྱི་རྣམ་པར་རྟོག་པས་མི་གཡོས་ལ་མཚན་མའི་སྤྱོད་ཡུལ་དངོས་པོ་མེད་པ་དང་། རང་གི་སེམས་སྣང་བ་ཙམ་དུ་ཁོང་དུ་ཆུད་པས་རང་གི་སེམས་སྣང་བའི་རྣམ་པར་རྟོག་པ་མི་སྐྱེ་སྟེ། རྣམ་པར་རྟོག་པ་མི་སྐྱེ་བ་ནི་སྟོང་པ་དང་། མཚན་མ་མེད་པ་དང་། མངོན་པར་འདུ་བྱ་བ་མེད་པའི་རྣམ་པར་ཐར་པ་གསུམ་ལ་ཞུགས་པས་རྣམ་པར་གྲོལ་བ་ཞེས་བྱའོ། །བློ་གྲོས་ཆེན་པོ་ངས་མངོན་པར་དྲན་པ་དུས་གཅིག་གི་ཚེ་ས་ཕྱོགས་ཤིག་ན་འདུག་པ་ན་བྲམ་ཟེའི་འཇིག་རྟེན་རྒྱང་པན་པ་ཞིག་ང་ག་ལ་བ་དེར་འོངས་ནས་རབ་ཏུ་དབེན་པ་མི་འདྲི་བར་ང་ལ་འདི་སྐད་ཅེས་ཟེར་རོ། །ཀྱེ་གཽ་ཏ་མ་ཐམས་ཅད་བྱས་པ་ཡིན་ནམ། ངས་དེའི་ཚེ་འདི་སྐད་དུ་ཀྱེ་བྲམ་ཟེ་ཐམས་ཅད་བྱས་པ་ཞེས་ཟེར་བ་འདི་ནི་འཇིག་རྟེན་རྒྱང་པན་པ་དང་པོའོ། །
དེས་ཡང་དྲིས་པ། ཐམས་ཅད་མ་བྱས་པ་ཡིན་ནམ། ངས་ཡང་འདི་སྐད་དུ་ཐམས་ཅད་བྱས་པ་མ་ཡིན་པ་འདི་ནི་འཇིག་རྟེན་རྒྱང་པན་པ་གཉིས་པ་ཡིན་ནོ་ཞེས་སྨྲས་སོ། །དེས་ཡང་དྲིས་པ། ཐམས་ཅད་རྟག་པའམ། ཐམས་ཅད་མི་རྟག་པའམ། ཐམས་ཅད་སྐྱེ་བའམ། ཐམས་ཅད་མི་སྐྱེ་བའམ། ངས་དེའི་ཚེ་འདི་སྐད་དུ་དེ་དག་ནི་འཇིག་རྟེན་རྒྱང་པན་པ་དྲུག་པའོ་ཞེས་སྨྲས་སོ། །བློ་གྲོས་ཆེན་པོ་དེས་ཡང་འདི་སྐད་དུ་ཐམས་ཅད་གཅིག་པའམ་ཐམས་ཅད་ཐ་དད་པའམ། ཐམས་ཅད་གཉི་ག་འམ། ཐམས་ཅད་གཉི་ག་མ་ཡིན་པའམ། ཐམས་ཅད་རྒྱུ་སྣ་ཚོགས་ལས་སྐྱེ་བ་སྣང་བར་གྱུར་པ་འམ་ཞེས་དྲིས་པ་དང་། ངས་དེའི་ཚེ་འདི་སྐད་དུ་དེ་དག་ནི་འཇིག་རྟེན་རྒྱང་པན་པ་བཅུ་གཅིག་པའོ་ཞེས་སྨྲས་སོ། །བློ་གྲོས་ཆེན་པོ་དེས་ཡང་འདི་སྐད་དུ་ཀྱེ་ཐམས་ཅད་ལུང་དུ་མ་བསྟན་པ་ཞིག་ཡིན་ནམ། ཐམས་ཅད་ལུང་དུ་བསྟན་པ་ཞིག་ཡིན་ནམ། བདག་ཡོད་པ་ཞིག་གམ། བདག་མེད་པ་ཞིག་གམ། འཇིག་རྟེན་འདི་མེད་པ་ཞིག་གམ། འཇིག་རྟེན་ཕ་རོལ་ཡོད་པ་ཞིག་གམ། འཇིག་རྟེན་ཕ་རོལ་མེད་པ་ཞིག་གམ། རྣམ་པར་གྲོལ་བ་ཡོད་པ་ཞིག་གམ། རྣམ་པར་གྲོལ་བ་མེད་པ་ཞིག་གམ། ཐམས་ཅད་སྐད་ཅིག་པའམ། ཐམས་ཅད་སྐད་ཅིག་པ་མ་ཡིན་པའམ། ནམ་མཁའ་འམ། སོ་སོར་བརྟགས་པ་མ་ཡིན་པའི་འགོག་པའམ། མྱ་ངན་ལས་འདས་པའམ། ཀྱེ་གཽ་ཏ་མ་བྱས་པའམ། མ་བྱས་པའམ། བར་མ་དོའི་སྲིད་པ་ཡོད་པ་ཞིག་གམ། བར་མ་དོའི་སྲིད་པ་མེད་པ་ཞིག་གམ་དྲིས་པ་དང་། བློ་གྲོས་ཆེན་པོ་ངས་དེའི་ཚེ་འདི་སྐད་ཅེས། ཀྱེ་བྲམ་ཟེ་དེ་སྐད་དུ་སྨྲ་བ་དེ་དག་ཐམས་ཅད་ནི་འཇིག་རྟེན་རྒྱང་པན་པ་ཡིན་པས་ངས་བསྟན་པ་མ་ཡིན་གྱི། ཁྱོད་ཀྱི་འཇིག་རྟེན་རྒྱང་པན་པ་ཡིན་ནོ་ཞེས་སྨྲས་སོ། །བྲམ་ཟེ་ང་ནི་ཐོག་མ་མེད་པའི་དུས་ནས་ཡང་དག་པ་མ་ཡིན་པ་རྣམ་པར་རྟོག་པའི་བག་ཆགས་སྣ་ཚོགས་ཀྱི་གནས་ངན་ལེན་རྣམས་སྲིད་པ་གསུམ་གྱི་རྒྱུ་ཡིན་པ་དང་། རང་གི་སེམས་སྣང་བ་ཙམ་དུ་ཁོང་དུ་མ་ཆུད་པས་རྣམ་པར་རྟོག་པ་བྱུང་ནས་ཕྱི་རོལ་གྱི་དངོས་པོ་ལ་དམིགས་པར་བྱེད་པ་
འབའ་ཞིག་སྟོན་གྱི། ཇི་ལྟར་མུ་སྟེགས་ཅན་དག་བདག་དང་། དབང་པོ་རྣམས་དང་། དོན་གསུམ་འདུས་པ་ལས་ཤེས་པ་སྐྱེ་བ་ལྟ་བུར་ང་ནི་དེ་ལྟ་བུ་མ་ཡིན་ནོ། །བྲམ་ཟེ་ང་ནི་རྒྱུར་སྨྲ་བ་ཡང་མ་ཡིན། རྒྱུ་མེད་པར་སྨྲ་བ་ཡང་མ་ཡིན་གྱི། རྣམ་པར་རྟོག་པ་གཟུང་བ་དང་། འཛིན་པའི་དངོས་པོ་ཙམ་ལ་རྟེན་ཅིང་འབྲེལ་བར་འབྱུང་བ་ཞེས་ཉེ་བར་འདོགས་ཏེ། ཁྱོད་དང་གང་དག་བདག་ཏུ་འཛིན་པར་ལྷུང་བའི་རྒྱུན་ཆད་དག་གིས་ཤེས་པར་བྱ་བ་མ་ཡིན་ནོ། །བློ་གྲོས་ཆེན་པོ་མྱ་ངན་ལས་འདས་པ་དང་། ནམ་མཁའ་དང་། འགོག་པ་དག་རྣམ་པ་གསུམ་དུ་ཡོད་པ་མ་ཡིན་གྱི། གྲངས་ཙམ་དུ་གསུམ་ཡོད་པར་ཟད་དོ། །གཞན་ཡང་བློ་གྲོས་ཆེན་པོ་དེའི་ཚེ་བྲམ་ཟེ་འཇིག་རྟེན་རྒྱང་པན་པ་ང་ལ་འདི་སྐད་ཅེས་ཟེར་རོ། །ཀྱེ་མི་ཤེས་པ་དང་། སྲེད་པ་དང་། ལས་ཀྱི་རྒྱུའི་ཕྱིར་སྲིད་པ་གསུམ་ཡོད་པར་གྱུར་པའམ། འོན་ཀྱང་རྒྱུ་མེད་པ་ལས་ཡིན། ངས་དེའི་ཚེ་འདི་སྐད་ཅེས་འདི་གཉི་ག་ཡང་འཇིག་རྟེན་རྒྱང་པན་པའོ་ཞེས་སྨྲས་སོ། །དེས་ཡང་འདི་སྐད་དུ་ཀྱེ་དངོས་པོ་ཐམས་ཅད་རང་དང་སྤྱིའི་མཚན་ཉིད་དུ་གཏོགས་པ་ཞིག་ཡིན་ནམ། ཞེས་དྲིས་པ་དང་། ང་ཡང་འདི་སྐད་དུ་འདི་ཡང་འཇིག་རྟེན་རྒྱང་པན་པ་ཉིད་ཡིན་ཏེ། བྲམ་ཟེ་ཇི་ཙམ་དུ་ཡིད་རྣམ་པར་གཡོས་པ་དང་། ཕྱི་རོལ་གྱི་དོན་ལ་མངོན་པར་ཞེན་ཅིང་རྣམ་པར་རྟོག་པ་དེ་དག་ཐམས་ཅད་ཀྱང་འཇིག་རྟེན་རྒྱང་པན་པའོ་ཞེས་སྨྲས་སོ། །གཞན་ཡང་བློ་གྲོས་ཆེན་པོ་དེའི་ཚེ་བྲམ་ཟེ་འཇིག་རྟེན་རྒྱང་པན་པས་ང་ལ་ཡང་དྲིས་པ། ཀྱེ་འཇིག་རྟེན་རྒྱང་པན་པ་མ་ཡིན་པ་འགའ་ལྟ་ཡོད་དམ། བདག་ནི་མུ་སྟེགས་ཅན་ཐམས་ཅད་ཀྱི་གཙོ་བོ་ཡིན་ཏེ། ཚིག་གི་ཚོགས་དང་། རྒྱུ་དང་། དཔེ་སྣ་ཚོགས་ཀྱི་བཀོད་པ་དག་སྟོན་པའོ། །ངས་ཡང་འདི་སྐད་དུ། ཀྱེ་བྲམ་ཟེ་ཡོད་དེ། ཁྱོད་ལ་ཡོད་པ་ནི་མ་ཡིན་ནོ། །གྲུབ་པའི་མཐའ་མེད་པ་ཡང་མ་ཡིན། སྟོན་པ་ཡང་མ་ཡིན། སྣ་ཚོགས་ཀྱི་ཚིག་གི་ཚོགས་མི་སྟོན་པ་ཡང་མ་ཡིན། རྒྱུ་དང་དཔེ་མི་འགོད་པ་ཡང་མ་ཡིན་ནོ་ཞེས་སྨྲས་སོ། །བྲམ་ཟེས་སྨྲས་པ། འཇིག་རྟེན་རྒྱང་
པན་མ་ཡིན་པ་དང་། གྲུབ་པའི་མཐའ་མེད་པ་ཡང་མ་ཡིན་པ་དང་། མི་སྟོན་པ་ཡང་མ་ཡིན་པ་དེ་ལྟ་བུ་ཡིན། ངས་དེའི་ཚེ་འདི་སྐད་དུ་བྲམ་ཟེ་འཇིག་རྟེན་རྒྱང་པན་མ་ཡིན་པ་ཡོད་དེ། མུ་སྟེགས་ཅན་ཁྱེད་རྣམས་ཀྱིས་ཤེས་པར་མི་ནུས་ཏེ། འདི་ལྟར་ཕ་རོལ་གྱི་དངོས་པོ་ལ་ཡང་དག་པ་མ་ཡིན་པ་རྣམ་པར་རྟོག་པའི་སྤྲོས་པས་མངོན་པར་ཞེན་པའི་ཕྱིར་རོ། །འདི་ལྟ་སྟེ་རྣམ་པར་རྟོག་པ་མི་སྐྱེ་ཞིང་ཡོད་པ་དང་མེད་པ་རང་གི་སེམས་སྣང་བ་ཙམ་དུ་ཁོང་དུ་ཆུད་པས་རྣམ་པར་རྟོག་པ་མི་སྐྱེ་བ་དང་། ཕྱི་རོལ་གྱི་ཡུལ་ལ་འཛིན་པ་མེད་ཅིང་རྣམ་པར་རྟོག་པ་རབ་ཏུ་ཞི་བ་དེ་ནི་འཇིག་རྟེན་རྒྱང་པན་མ་ཡིན་པ་ཞེས་བྱ་སྟེ། འདི་ནི་ངའི་ཆོས་ཡིན་པས་ཁྱོད་ལ་ཡོད་པ་མ་ཡིན་ནོ། །ཀྱེ་བྲམ་ཟེ་མདོར་བསྡུས་ཏེ་བསྟན་ན་རྣམ་པར་ཤེས་པ་དེ་འོང་བ་དང་། འགྲོ་བ་དང་། ཤི་འཕོ་བ་དང་། སྐྱེ་བ་དང་། བདེ་བ་དང་། སྡུག་བསྔལ་བ་དང་། བྱ་བ་དང་། ལྟ་བ་དང་། རེག་པ་དང་། མཚན་ཉིད་སྣ་ཚོགས་ལ་མངོན་པར་ཞེན་པ་དང་། འདུས་ཏེ་མཚམས་སྦྱོར་བ་དང་། སྲེད་པ་དང་། རྒྱུ་ལ་མངོན་པར་ཞེན་པ་སྟེ། ཀྱེ་བྲམ་ཟེ་འདི་ལྟ་བུ་ལ་སོགས་པ་དེ་དག་ཐམས་ཅད་ནི་ཁྱོད་ལ་སོགས་པའི་འཇིག་རྟེན་རྒྱང་པན་ཡིན་ཏེ་ང་ལ་ཡོད་པ་ནི་མ་ཡིན་ནོ། །བློ་གྲོས་ཆེན་པོ་བྲམ་ཟེ་འཇིག་རྟེན་རྒྱང་པན་པས་དྲིས་པ་ལ་ངས་དེ་སྐད་དུ་ལན་བཏབ་པ་དང་། དེ་ཅང་མི་སྨྲ་བར་གྱུར་ཏེ། ལན་མེད་པས་སླར་སོང་ངོ་། །དེ་རང་གི་ཚུལ་གྱི་གནས་ལ་སེམས་ཤིང་འདི་སྐད་དུ་དགེ་སྦྱོང་ཤཱཀྱའི་བུ་ནི་ཚུལ་ལས་ཤིན་ཏུ་འདས་པས་ན་སྐྱེ་བ་མེད་པ་དང་། མཚན་མ་མེད་པ་དང་། རྒྱུ་མེད་པ་དང་། རང་གི་རྣམ་པར་རྟོག་པ་སྣང་བའི་མཚན་ཉིད་ཁོང་དུ་ཆུད་པས་རྣམ་པར་རྟོག་པ་མི་སྐྱེ་བར་སྨྲའོ་སྙམ་མོ། །བློ་གྲོས་ཆེན་པོ་འདི་ནི་ཁྱོད་ཀྱིས་སྔར་ང་ལ་ཅིའི་སླད་དུ་འཇིག་རྟེན་རྒྱང་པན་པ་སྤོབས་པ་སྣ་ཚོགས་ཅན་ལ་སློབ་ཅིང་བསྟེན་ལ་ཟང་ཟིང་སྡུད་དེ། ཆོས་སྡུད་པ་མ་ཡིན་ནོ་ཞེས་བཀའ་སྩལ་ཅེས་དྲིས་པའིའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཟང་ཟིང་སྡུད་པ་དང་། ཆོས་ཞེས་བགྱི་བའི་ཚིག་གི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་
བཀའ་སྩལ་པ། བློ་གྲོས་ཆེན་པོ་ཁྱོད་ཀྱིས་མ་འོངས་པའི་སེམས་ཅན་རྣམས་ཀྱི་ཕྱིར་ཚིག་གི་དོན་འདི་ལྟ་བུ་སེམས་ཤིང་འདྲི་བ་ལེགས་སོ་ལེགས་སོ། །དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་འདི་ལྟ་སྟེ། ཟང་ཟིང་ཞེས་བྱ་བ་ནི་ལེན་པ་དང་། གཏོང་བ་དང་། རེག་པ་དང་། མྱང་བ་དང་། ཕྱི་རོལ་གྱི་ཡུལ་ལ་མངོན་པར་ཞེན་པ་དང་། མཐའ་གཉིས་ཀྱི་ལྟ་བར་ལྷུང་བ་དང་། ཡང་སྡུག་བསྔལ་གྱི་ཕུང་པོ་སྐྱེད་པ་དང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། འཁྲུག་པ་རྣམས་ཏེ། དེ་ལྟ་བུའི་སྒྱུ་མ་རྣམས་ནི་སྲེད་པ་ལས་བྱུང་བས། དེའི་ཕྱིར་འཇིག་རྟེན་རྒྱང་པན་སློབ་ཅིང་སྟེན་པ་རྣམས་དང་། འཇིག་རྟེན་རྒྱང་པན་པ་རྣམས་ནི་ང་དང་སངས་རྒྱས་གཞན་དག་གིས་ཀྱང་ཟང་ཟིང་ཞེས་བརྗོད་དེ། འདི་ནི་ཟང་ཟིང་སྡུད་ཅིང་ཆོས་སྡུད་པ་མ་ཡིན་པ་ཞེས་བྱའོ། །བློ་གྲོས་ཆེན་པོ་ཆོས་སྡུད་པ་གང་ཞེ་ན། འདི་ལྟ་སྟེ། རང་གི་སེམས་སྣང་བ་ཙམ་དུ་ལེགས་པར་རྟོགས་ཤིང་ཁོང་དུ་ཆུད་པ་དང་། གང་ཟག་དང་ཆོས་བདག་མེད་པའི་མཚན་ཉིད་ཐོབ་པས་རྣམ་པར་རྟོག་པ་མི་སྐྱེ་བ་དང་། ས་རྣམས་ལ་གོང་ནས་གོང་དུ་ཤིན་ཏུ་མཁས་པས་སེམས་དང་ཡིད་དང་། ཡིད་ཀྱི་རྣམ་པར་ཤེས་པ་ལྡོག་པ་དང་། སངས་རྒྱས་ཐམས་ཅད་ཀྱི་ཡེ་ཤེས་དང་། དབང་བསྐུར་བ་ཕུན་སུམ་ཚོགས་པ་དང་། མཐར་ཐུག་པ་མེད་པའི་གནས་བཅུ་ཡོངས་སུ་གཟུང་བ་དང་། ཆོས་ཐམས་ཅད་ལ་རྩོལ་བ་མེད་པར་དབང་བྱེད་པ་ནི་ཆོས་ཞེས་བྱ་སྟེ། དེ་ནི་འདི་ལྟ་སྟེ། ལྟ་བ་ཐམས་ཅད་དང་། སྤྲོས་པ་ཐམས་ཅད་དང་། རྣམ་པར་རྟོག་པ་ཐམས་ཅད་དང་། དངོས་པོ་ཐམས་ཅད་དང་། མཐའ་གཉིས་ཐམས་ཅད་དུ་མི་ལྟུང་ངོ་། །བློ་གྲོས་ཆེན་པོ་མུ་སྟེགས་ཅན་བྱིས་པ་རྣམས་ནི་ཕལ་ཆེར་རྟག་པ་དང་། ཆད་པའི་མཐའ་གཉིས་སུ་ལྟུང་གི་མཁས་པ་རྣམས་ནི་མ་ཡིན་ནོ། །དེ་ལ་རྒྱུ་མེད་
པར་སྨྲ་བ་ཡོངས་སུ་བཟུང་བས་ནི་རྟག་པར་ལྟ་བ་འབྱུང་ངོ་། །ཕྱི་རོལ་གྱི་རྒྱུ་འཇིག་ཅིང་རྒྱུ་དང་རྐྱེན་དངོས་པོ་མེད་པར་མཐོང་བ་ལས་ནི་ཆད་པར་ལྟ་བ་འབྱུང་སྟེ། བློ་གྲོས་ཆེན་པོ་དེ་ནི་སྐྱེ་བ་དང་། གནས་པ་དང་། འཇིག་པ་མི་མཐོང་བའི་ཕྱིར་ཆོས་ཞེས་བྱའོ། །བློ་གྲོས་ཆེན་པོ་དེ་ནི་ཟང་ཟིང་དང་ཆོས་ཞེས་བྱ་སྟེ། དེ་ལ་ཁྱོད་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་གིས་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་རྒྱང་པན་ཐམས་ཅད་ནི། །མུ་སྟེགས་ཅན་གྱིས་བཤད་དེ་བརྫུན། །རྣམ་རྟོག་བྱེད་དང་བྱ་བར་མཐོང་། །དེ་ལ་རང་གི་གྲུབ་མཐའ་མེད། །ང་ཡི་གྲུབ་མཐའ་འདི་འབའ་ཞིག །བྱེད་དང་བྱ་བ་ཡོངས་སུ་སྤངས། །འཇིག་རྟེན་རྒྱང་པན་རྣམ་བྲལ་བ། །སློབ་མ་རྣམས་ལ་རབ་ཏུ་བཤད། །སེམས་ཙམ་དེ་ནི་མི་དམིགས་པས། །སེམས་གཉིས་སོ་སོར་རྟོག་མི་བྱེད། །གཟུང་དང་འཛིན་པ་དངོས་མེད་དེ། །རྟག་ཆད་གཉི་ག་ཡོངས་སུ་སྤངས། །ཇི་སྲིད་སེམས་ནི་འཇུག་པའི་བར། །དེ་སྲིད་འཇིག་རྟེན་རྒྱང་པན་ཡིན། །རྣམ་པར་རྟོག་པ་མི་འཇུག་ན། །དེས་ནི་རང་གི་སེམས་མཐོང་ངོ་། །འོང་ཚེ་དངོས་པོ་སྐྱེ་ཞེས་བྱ། །འགྲོ་ཚེ་དངོས་པོ་ཡོང་མི་སྣང་། །འགྲོ་འོང་ལེགས་པར་གསལ་རྟོགས་ན། །རྣམ་པར་རྟོག་པ་ཡང་མི་སྐྱེ། །རྟག་པ་དང་ནི་མི་རྟག་དང་། །བྱས་པ་དང་ནི་མ་བྱས་པ། །འཇིག་རྟེན་འདི་དང་འཇིག་རྟེན་གཞན། །ཐམས་ཅད་འཇིག་རྟེན་རྒྱང་པན་ཚུལ། །དེ་ནས་ཡང་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མྱ་ངན་ལས་འདས་པ་ཞེས་བགྱི་བ། ཆོས་ཇི་ལྟ་བུ་ཞིག་ལ་མྱ་ངན་ལས་འདས་པ་ཞེས་བགྱི་ན། མུ་སྟེགས་ཅན་རྣམས་སོ་སོ་ནས་རྣམ་པར་རྟོག་པ་སྐྱེད་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་ཇི་ལྟར་མུ་སྟེགས་ཅན་རྣམས་མྱ་ངན་ལས་འདས་པར་རྣམ་པར་རྟོག་པ་དང་། དེ་དག་གི་རྣམ་པར་རྟོག་པ་
མྱ་ངན་ལས་འདས་པའི་རྗེས་སུ་འཐུན་པར་འགྱུར་བ་མ་ཡིན་པ་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་མུ་སྟེགས་ཅན་ཁ་ཅིག་ནི་ཕུང་པོ་དང་། ཁམས་དང་། སྐྱེ་མཆེད་རྣམས་འགགས་པ་དང་། ཡུལ་འདོད་ཆགས་དང་བྲལ་བ་དང་། ཆོས་རྣམས་མི་རྟག་པར་མཐོང་བ་དང་། སེམས་དང་སེམས་ལས་བྱུང་བའི་ཆོས་ཀྱི་ཕྱོགས་མི་སྐྱེ་བ་དང་། འདས་པ་དང་། མ་འོངས་པ་དང་། ད་ལྟར་གྱི་ཡུལ་མི་དྲན་པ་དང་། ཉེ་བར་ལེན་པ་ཕུང་པོ་ཟད་པ་མར་མེ་བཞིན་འགགས་པ་དང་། ས་བོན་ལྟར་ཞིག་པས་རྣམ་པར་རྟོག་པ་མི་སྐྱེའོ་ཞེས་དེ་དག་གིས་འདི་དག་ལ་མྱ་ངན་ལས་འདས་པར་འདུ་ཤེས་ཏེ། བློ་གྲོས་ཆེན་པོ་འཇིག་པར་ལྟ་བ་ལ་མྱ་ངན་ལས་འདས་པ་ཞེས་བྱ་བ་ནི་མ་ཡིན་ནོ། །ཁ་ཅིག་ནི་ཕྱོགས་ནས་ཕྱོགས་སུ་སོང་ན་ཐར་པ་ཞེས་བརྗོད་དོ། །ཁ་ཅིག་ནི་ཡུལ་གྱི་རྟོག་པ་འགགས་ཏེ། ཇི་ལྟར་རླུང་ཞི་བ་བཞིན་དུ་གྱུར་ན་ཐར་པ་ཞེས་བརྗོད་དོ། །ཁ་ཅིག་ནི་བློ་དང་རིག་པར་བྱ་བ་མཐོང་བ་རྣམ་པར་ཞིག་པ་ལ་ཐར་པ་ཞེས་བརྗོད་དོ། །ཁ་ཅིག་ནི་རྟག་པ་དང་། མི་རྟག་པར་མཐོང་བ་ལ་ཐར་པའོ་ཞེས་འདུ་ཤེས་སོ། །ཁ་ཅིག་ནི་མཚན་མར་འདུ་ཤེས་པ་མང་པོ་ནི་སྡུག་བསྔལ་བསྐྱེད་པའི་རྒྱུ་འཐོབ་པར་འགྱུར་རོ་སྙམ་དུ་བསམས་ནས། རང་གི་སེམས་སྣང་བ་ཙམ་ལ་མི་མཁས་པས་མཚན་མ་རྣམས་ཀྱིས་འཇིགས་ཤིང་སྐྲག་སྟེ། མཚན་མ་མེད་པར་མཐོང་བ་ལ་རབ་ཏུ་མོས་ཤིང་འདོད་ནས་མྱ་ངན་ལས་འདས་པར་འདུ་ཤེས་སོ། །ཁ་ཅིག་ནི་ནང་དང་ཕྱིའི་ཆོས་ཐམས་ཅད་ཀྱི་རང་དང་སྤྱིའི་མཚན་ཉིད་ཁོང་དུ་ཆུད་པ་དང་། འདས་པ་དང་། མ་འོངས་པ་དང་། ད་ལྟར་བྱུང་བ་ནི་དངོས་པོར་ཡོད་དེ། མི་འཇིགས་པའོ་ཞེས་མྱ་ངན་ལས་འདས་པར་འདུ་ཤེས་སོ། །ཁ་ཅིག་ནི་བདག་དང་། གང་ཟག་དང་། སེམས་ཅན་དང་། སྲོག་དང་། ཆོས་ཐམས་ཅད་མི་འཇིག་པ་ལ་མྱ་ངན་ལས་འདས་པར་འདུ་ཤེས་སོ། །མུ་སྟེགས་ཅན་ཁ་ཅིག་ནི་ལོག་པའི་མེས་ཤེས་རབ་སྲེག་པ་དང་། རང་བཞིན་དང་། སྐྱེས་བུ་མཐོང་ཞིང་། དེ་གཉིས་ཀྱི་ཡོད་པ་ལས་སྐྱེས་བུས་
འབྱིན་པ་རྣམས་ནི་རང་བཞིན་ཞེས་བྱ་སྟེ། ཇི་ལྟར་དང་པོའི་མུན་པ་བཞིན་དུ་ཡོན་ཏན་རྣམ་པར་འགྱུར་བ་དང་། ཡོན་ཏན་གྱི་བྱེད་པ་པོ་ལ་མྱ་ངན་ལས་འདས་པར་འདུ་ཤེས་སོ། །ཁ་ཅིག་ནི་བསོད་ནམས་དང་། བསོད་ནམས་མ་ཡིན་པ་ཟད་པས། ཁ་ཅིག་ནི་ཉོན་མོངས་པ་ཟད་ཅིང་ཤེས་པས། ཁ་ཅིག་ནི་འཁོར་བ་རྣམས་དབང་ཕྱུག་གིས་ཡང་དག་པར་བྱས་པར་མཐོང་བ་ལ་མྱ་ངན་ལས་འདས་པར་འདུ་ཤེས་སོ། །ཁ་ཅིག་འཁོར་བ་རྣམས་ནི་གཅིག་གིས་གཅིག་བསྐྱེད་པས་རྒྱུ་གཞན་ཅི་ཡང་མེད་དེ། འདི་ལྟར་རྒྱུ་ལ་མངོན་པར་ཞེན་ཅིང་དེ་གཏི་མུག་པས་ཁོང་དུ་མི་ཆུད་དེ། ཁོང་དུ་མ་ཆུད་པའི་ཕྱིར་མྱ་ངན་ལས་འདས་པའོ་ཞེས་འདུ་ཤེས་སོ། །མུ་སྟེགས་ཅན་ཁ་ཅིག་ནི་ཡང་དག་པའི་བདེན་པའི་ལམ་ཐོབ་པ་ལ་མྱ་ངན་ལས་འདས་པར་འདུ་ཤེས་སོ། །ཁ་ཅིག་ནི་ཡོན་ཏན་ཅན་དང་། ཡོན་ཏན་གྱིས་བསྐྱེད་པ་ལ་ཚོགས་པ་དང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པར་མཐོང་བ་ལ་མྱ་ངན་ལས་འདས་པར་འདུ་ཤེས་སོ། །ཁ་ཅིག་ནི་རང་བཞིན་ལས་བྱུང་བས་རྨ་བྱའི་རྣམ་པར་བཀྲ་བ་དང་། རིན་པོ་ཆེ་སྣ་ཚོགས་ཀྱི་འབྱུང་གནས་དང་། ཚེར་མ་རྣོ་བ་ལ་སོགས་པ་ལྟ་བུར་དངོས་པོ་རྣམས་ཀྱི་རང་བཞིན་མཐོང་ནས་མྱ་ངན་ལས་འདས་པར་འདུ་ཤེས་སོ། །བློ་གྲོས་ཆེན་པོ་ཁ་ཅིག་ནི་སྲིད་པ་ཉི་ཤུ་རྩ་ལྔ་དེ་ཁོ་ན་ཉིད་ཡིན་པར་ཁོང་དུ་ཆུད་པས། ཁ་ཅིག་ནི་རྒྱལ་པོའི་ཡུལ་སྐྱོང་བ་དང་། ཡོན་ཏན་དྲུག་གི་བསྟན་པ་འཛིན་པས་མྱ་ངན་ལས་འདས་པར་འདུ་ཤེས་སོ། །ཁ་ཅིག་ནི་བྱེད་པ་པོ་དུས་ཡིན་པར་མཐོང་ནས། འཇིག་རྟེན་འབྱུང་བ་ནི་དུས་ལ་རག་ལས་སོ་ཞེས་དེ་ལྟར་ཁོང་དུ་ཆུད་པ་ལས་མྱ་ངན་ལས་འདས་པར་འདུ་ཤེས་སོ། །ཁ་ཅིག་ནི་དངོས་པོས་སོ། །ཁ་ཅིག་ནི་དངོས་པོ་མེད་པས་སོ། །ཁ་ཅིག་ནི་དངོས་པོ་དང་དངོས་པོ་མེད་པ་ཡོངས་སུ་ཤེས་པས་སོ། །ཁ་ཅིག་ནི་དངོས་པོའི་རྟོག་པ་དང་། མྱ་ངན་ལས་འདས་པ་བྱེ་བྲག་ཡོད་པར་མཐོང་བས་མྱ་ངན་ལས་འདས་པར་འདུ་ཤེས་ཏེ། དེ་ལྟར་དེ་ལྟ་བུའི་རྣམ་པར་རྟོག་པ་སྣ་ཚོགས་མུ་སྟེགས་ཅན་དག་གིས་བསྟན་པ་ཡོད་ཀྱང་རིག་པ་དང་མི་ལྡན་པས་མཁས་པ་རྣམས་ཀྱིས་སྤངས་པ་ཡིན་ནོ། །བློ་གྲོས་ཆེན་པོ་དེ་དག་ཐམས་ཅད་མཐའ་གཉིས་སུ་ལྟུང་
བའི་བསམ་པས་མྱ་ངན་ལས་འདས་པར་འདུ་ཤེས་ཏེ། དེ་ལྟ་བུ་ལ་སོགས་པའི་རྣམ་པར་རྟོག་པས་མུ་སྟེགས་ཅན་དག་མྱ་ངན་ལས་འདས་པར་ཡོངས་སུ་རྟོག་ཀྱང་། འདི་ལ་གང་ཡང་སྐྱེ་བ་འམ། འགག་པ་མེད་དོ། །བློ་གྲོས་ཆེན་པོ་མུ་སྟེགས་ཅན་སོ་སོའི་མྱ་ངན་ལས་འདས་པ་དེ་དག་ནི་དེ་དག་རང་གི་བསྟན་བཅོས་དང་ཤེས་པས་སོ་སོར་བརྟགས་པས་ན་རྣམ་པར་གཞག་པ་ཅི་ཡང་མེད་དེ། ཇི་ལྟར་དེ་དག་གི་རྣམ་པར་རྟོག་པའི་སེམས་དང་། ཡིད་བཞིན་དུ་འོང་བ་དང་། འགྲོ་བ་དང་། རབ་ཏུ་གཡོ་བས་ཐམས་ཅད་གང་ཡང་མྱ་ངན་ལས་འདས་པ་ཐོབ་པ་མེད་དོ། །བློ་གྲོས་ཆེན་པོ་ངས་ཇི་སྐད་དུ་བསྟན་པའི་མྱ་ངན་ལས་འདས་པ་ནི་འདི་ལྟ་སྟེ། རང་གི་སེམས་སྣང་བ་ཙམ་དུ་མཁས་ཤིང་ཁོང་དུ་ཆུད་པ་དང་། ཕྱི་རོལ་གྱི་དངོས་པོ་ལ་མངོན་པར་ཆགས་ཤིང་མཐའ་བཞི་ཡོངས་སུ་སྤངས་པ་དང་། ཡང་དག་པ་ཇི་ལྟར་གནས་པ་བཞིན་དུ་མཐོང་བས་རང་གི་སེམས་སྣང་བར་རྣམ་པར་རྟོག་པའི་མཐའ་གཉིས་སུ་མ་ལྷུང་བ་དང་། གཟུང་བ་དང་། འཛིན་པ་མི་དམིགས་པས་ཚད་མ་ཐམས་ཅད་ཀྱིས་གྲུབ་པར་མི་མཐོང་བ་དང་། དེ་ཁོ་ན་ཉིད་ལ་རྨོངས་པ་ཡིན་པས་ཡོངས་སུ་བསྡུ་བར་མི་བྱའོ་ཞེས་དེ་ཡོངས་སུ་སྤངས་ནས། བདག་གི་འཕགས་པའི་སོ་སོ་རང་གིས་རིག་པའི་ཆོས་ཐོབ་པ་དང་། བདག་མེད་པ་རྣམ་གཉིས་རྟོགས་པ་དང་། ཉོན་མོངས་པ་གཉིས་ཡོངས་སུ་སྤངས་པ་དང་། སྒྲིབ་པ་གཉིས་རྣམ་པར་དག་པ་དང་། འཆི་འཕོ་གཉིས་གཏན་ནས་སྤངས་པ་དང་། ས་རྣམས་གོང་ནས་གོང་དུ་སྦྱངས་པས་དེ་བཞིན་གཤེགས་པའི་ས་ལ་འཇུག་ཅིང་གཟུགས་བརྙན་དང་། སྒྱུ་མ་ལ་སོགས་པའི་ཏིང་ངེ་འཛིན་ཟབ་མོ་ཐོབ་པ་དང་། སེམས་དང་ཡིད་དང་། ཡིད་ཀྱི་རྣམ་པར་ཤེས་པ་ཡོངས་སུ་སྤངས་པ་ནི་མྱ་ངན་ལས་འདས་པ་ཞེས་བསྟན་ཏོ། །བློ་གྲོས་ཆེན་པོ་དེ་ལ་ཁྱོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་གིས་བསླབ་པར་བྱ་ཞིང་། མུ་སྟེགས་ཅན་ཐམས་ཅད་ཀྱི་མྱ་ངན་ལས་འདས་པར་ལྟ་བ་རྣམས་མྱུར་དུ་ཡོངས་སུ་སྤང་བར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །མུ་སྟེགས་མྱ་ངན་འདས་ལྟ་ཞིང་། །སོ་སོར་རྣམ་རྟོག་གང་བྱུང་བ། །
དེ་དག་སེམས་ཀྱི་རྟོག་ལས་སྐྱེས། །ཐར་པའི་ཐབས་ནི་ཡོད་མ་ཡིན། །འཆིང་དང་བཅིང་བྱ་ལ་རྨོངས་པ། །ཐབས་མཁས་ཡོངས་སུ་སྤངས་པས་ན། །མུ་སྟེགས་ཐར་པ་འདུ་ཤེས་པ། །ཐར་པ་ནམ་ཡང་སྐྱེ་མི་འགྱུར། །ཤེས་པ་མང་པོས་ཐ་དད་འཇུག །མུ་སྟེགས་ཅན་གྱིས་མཐོང་བའི་ཚུལ། །དེ་དག་ཐར་པ་ཡོད་མ་ཡིན། །བླུན་ཞིང་གཏི་མུག་རྣམ་རྟོག་ཕྱིར། །མུ་སྟེགས་བླུན་པོས་ཐམས་ཅད་ཀུན། །རྣམ་རྟོག་བྱེད་དང་བྱ་བར་མཐོང་། །ཡོད་མེད་ཕྱོགས་སུ་སྨྲ་བ་རྣམས། །དེ་དག་ལ་ནི་ཐར་པ་མེད། །བྱིས་པ་རྣམ་པར་རྟོག་ལ་མོས། །ཡང་དག་བློ་གྲོས་ཐོས་མི་འགྱུར། །སྨྲ་བ་སྡུག་བསྔལ་གསུམ་གྱི་གནས། །ཡང་དག་སྡུག་བསྔལ་འཇིག་པའི་རྒྱུ། །ཇི་ལྟར་མེ་ལོང་གཟུགས་བརྙན་དག །སྣང་བ་ཡོད་པ་མ་ཡིན་ལྟར། །རྣམ་རྟོག་སེམས་ཀྱི་མེ་ལོང་ལ། །བྱིས་པ་དག་གིས་གཉིས་ཡོད་མཐོང་། །སེམས་དང་དམིགས་པ་མ་ཤེས་པ། །རྣམ་པར་རྟོག་པ་གཉིས་སྐྱེ་སྟེ། །སེམས་དང་ཡུལ་ནི་ཡོངས་ཤེས་ན། །རྣམ་པར་རྟོག་པ་སྐྱེ་མི་འགྱུར། །སེམས་ནི་སྣ་ཚོགས་འགྱུར་བ་སྟེ། །མཚན་ཉིད་མཚན་གཞི་ཡོངས་སྤངས་པས། །བྱ་བ་སྣང་ཡང་སྣང་བ་མེད། །ཇི་ལྟར་བྱིས་པས་རྣམ་བརྟགས་བཞིན། །སྲིད་གསུམ་རྣམ་པར་རྟོག་ཙམ་པས། །ཕྱི་རོལ་གྱི་ནི་དོན་མེད་དེ། །རྣམ་པར་རྟོག་པ་སྣ་ཚོགས་སྣང་། །བྱིས་པ་དག་གིས་མི་རྟོགས་སོ། །མདོ་དང་མདོ་ལས་རྣམ་རྟོག་བཤད། །ནམ་ཡང་མིང་ལས་འདའ་མི་འགྱུར། །བརྗོད་པ་དག་ནི་མ་གཏོགས་པར། །བརྗོད་པར་བྱ་བ་ཅི་ཡང་མེད།། །།འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས། བམ་པོ་བདུན་པ། དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་པ་ཉིད་བཤད་དུ་གསོལ། དེ་ནས་བདག་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་དེ་བཞིན་གཤེགས་པའི་རང་བཞིན་ལ་མཁས་ཤིང་། བདག་དང་གཞན་རྣམས་ཁོང་དུ་ཆུད་པར་བགྱིད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཁྱོད་ཇི་ལྟར་འདོད་པ་བཞིན་དུ་དྲིས་ཤིག་དང་། ངས་ཇི་ལྟར་ཁྱོད་ཀྱིས་དྲིས་པ་དེ་བཞིན་
དུ་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བགྱིས་པའམ། མ་བགྱིས་པའམ། དངོས་པོའམ། རྒྱུ་འམ། མཚན་ཉིད་དམ། མཚན་ཉིད་ཀྱི་གཞི་འམ། བརྗོད་པའམ། བརྗོད་པར་བགྱི་བའམ། བློ་འམ། རིག་པར་བགྱི་བའམ། དེ་ལྟ་བུ་ལ་སོགས་པའི་ཚིག་རྣམས་དང་། ཐ་དད་པའམ། ཐ་དད་པ་མ་ལགས་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་དེ་ལྟ་བུ་ལ་སོགས་པའི་ཚིག་གི་དངོས་པོ་ཡང་མ་ཡིན། རྒྱུ་ཡང་མ་ཡིན་ཏེ། དེ་ཅིའི་ཕྱིར་ཞེ་ན། གཉི་ག་ཡང་ཉེས་པར་འགྱུར་བའི་ཕྱིར་རོ། །བློ་གྲོས་ཆེན་པོ་གལ་ཏེ་དེ་བཞིན་གཤེགས་པ་དངོས་པོ་ཡིན་མིན་བྱས་པའམ། མི་རྟག་པར་འགྱུར་ཏེ། མི་རྟག་པའི་ཕྱིར་དངོས་པོ་ཐམས་ཅད་ཀྱང་དེ་བཞིན་གཤེགས་པར་འགྱུར་བས་ན། དེ་ནི་ང་དང་དེ་བཞིན་གཤེགས་པ་ཐམས་ཅད་ཀྱང་མི་བཞེད་དོ། །ཅི་སྟེ་བྱས་པ་མ་ཡིན་ན་ནི་དམིགས་སུ་མེད་པའི་ཕྱིར་སྦྱོར་བ་རྣམས་དོན་མེད་པར་འགྱུར་ཏེ། རི་བོང་གི་རྭ་དང་། མོ་ཤམ་གྱི་བུ་ལྟར་ཡོད་པ་མ་ཡིན་པའི་ཕྱིར་རོ། །བློ་གྲོས་ཆེན་པོ་གང་དངོས་པོ་ཡང་མེད། རྒྱུ་ཡང་མེད་པ་ནི་ཡོད་པ་ཡང་མ་ཡིན་མེད་པ་ཡང་མ་ཡིན། གང་ཡོད་པ་ཡང་མ་ཡིན། མེད་པ་ཡང་མ་ཡིན་པ་དེ་ནི་མཐའ་བཞི་ལས་འདས་པའོ། །མཐའ་བཞི་གང་ཡིན་པ་དེ་ནི་འཇིག་རྟེན་གྱི་བརྗོད་པའོ། །གང་མཐའ་བཞི་ལས་འདས་པ་དེ་ནི་མཐའ་བཞིར་མ་ལྷུང་བའོ། །མ་ལྷུང་བའི་ཕྱིར་མཁས་པ་རྣམས་ཀྱིས་ལེན་པར་བྱེད་དེ། དེ་བཞིན་གཤེགས་པ་ཐམས་ཅད་ཀྱིས་ཚིག་གི་དོན་ཀྱང་དེ་བཞིན་དུ་རིག་པར་བྱའོ། །བློ་གྲོས་ཆེན་པོ་བློ་དང་ལྡན་པ་རྣམས་ཀྱིས་ཇི་ལྟར་ངས་ཆོས་ཐམས་ཅད་བདག་མེད་པའོ་ཞེས་བཤད་པ་དེའི་དོན་ཀྱང་ཁོང་དུ་ཆུད་པར་བྱའོ། །བདག་མེད་པའི་དངོས་པོ་ནི་བདག་མེད་པ་ཉིད་དེ་ཆོས་ཐམས་ཅད་ནི་རང་གི་དངོས་པོར་ཡོད་ཀྱི་གཞན་གྱི་དངོས་པོར་ནི་མེད་དོ། །ཇི་ལྟར་བ་ལང་དང་རྟ་བཞིན་ཏེ། བློ་གྲོས་ཆེན་པོ་དཔེར་ན་བ་ལང་དང་། རྟའི་དངོས་པོ་མ་ཡིན་པ་ལ་
བ་ལང་དང་རྟའི་དངོས་པོ་དེ་ཡང་དག་པར་ཡོད་པ་ཡང་མ་ཡིན། མེད་པ་ཡང་མ་ཡིན། ཡང་དེ་རང་གི་མཚན་ཉིད་མེད་པ་ནི་མ་ཡིན་ནོ། །དེ་བཞིན་དུ་བློ་གྲོས་ཆེན་པོ་ཆོས་ཐམས་ཅད་རང་གི་མཚན་ཉིད་མེད་པ་ཡང་མ་ཡིན་ཏེ། རང་གི་མཚན་ཉིད་ཡོད་ཀྱང་བྱིས་པ་སོ་སོའི་སྐྱེ་བོ་རྣམས་ཀྱིས་བདག་མེད་པ་ཁོང་དུ་ཆུད་པར་ནུས་པ་མ་ཡིན་ཏེ། འདི་ལྟར་རྣམ་པར་རྟོག་པའི་ཕྱིར་རོ། །དེ་བཞིན་དུ་ཆོས་ཐམས་ཅད་སྟོང་པ་དང་། སྐྱེ་བ་མེད་པ་དང་། རང་བཞིན་མེད་པ་ཡང་དེ་བཞིན་དུ་རིག་པར་བྱའོ། །དེ་བཞིན་དུ་དེ་བཞིན་གཤེགས་པ་ནི་ཕུང་པོ་རྣམས་དང་། ཐ་དད་པ་ཡང་མ་ཡིན། གཅིག་པ་ཡང་མ་ཡིན་ཏེ། གལ་ཏེ་ཕུང་པོ་རྣམས་དང་ཐ་དད་པ་མ་ཡིན་ན་ནི་མི་རྟག་པ་ཡིན་པར་འགྱུར་རོ། །ཅི་སྟེ་ཐ་དད་ན་ནི་སྦྱོར་བ་རྣམས་དོན་མེད་པར་འགྱུར་རོ། །གལ་ཏེ་གཉིས་སུ་གྱུར་ན་ནི་ཐ་དད་པར་འགྱུར་ཏེ། ཇི་ལྟར་བ་ལང་གི་རྭ་བཞིན་དུ་འདྲ་བའི་ཕྱིར་ཐ་དད་པ་ཡང་མ་ཡིན་ལ། རིང་ཐུང་བྱེ་བྲག་ཡོད་པའི་ཕྱིར་ཐ་དད་པ་ཡང་མ་ཡིན་ཏེ། ཆོས་ཐམས་ཅད་ཀྱང་དེ་བཞིན་ནོ། །བློ་གྲོས་ཆེན་པོ་ཇི་ལྟར་བ་ལང་གི་རྭ་གཡས་པ་ནི་རྭ་གཡོན་པ་ལས་ཐ་དད་ལ། རྭ་གཡོན་པ་ནི་རྭ་གཡས་པ་ལས་ཐ་དད་པས། དེའི་ཕྱིར་རྭ་གཉིས་ནི་གདོན་མི་ཟ་བར་ཐ་དད་པ་ཡིན་པར་རིག་པར་བྱ་སྟེ། དེ་བཞིན་དུ་རིང་པོ་དང་། ཐུང་ངུ་དང་། གཟུགས་སྣ་ཚོགས་རྣམས་ཀྱང་ཕན་ཚུན་ཐ་དད་དོ། །བློ་གྲོས་ཆེན་པོ་དེ་བཞིན་གཤེགས་པ་ཡང་ཕུང་པོ་དང་། ཁམས་དང་། སྐྱེ་མཆེད་རྣམས་དང་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །དེ་བཞིན་དུ་དེ་བཞིན་གཤེགས་པ་ཡང་ཐར་པ་དང་ཐ་དད་པ་ཡང་མ་ཡིན་ཐ་མི་དད་པ་ཡང་མ་ཡིན་པས། འདི་ལྟར་དེ་བཞིན་གཤེགས་པ་ནི་ཐར་པའི་མིང་གིས་བསྟན་ཏོ། །གལ་ཏེ་དེ་བཞིན་གཤེགས་པ་དང་ཐར་པ་ཐ་དད་ན་ནི་གཟུགས་ཀྱི་མཚན་ཉིད་ལས་མངོན་པར་འགྲུབ་པར་འགྱུར་ཏེ། གཟུགས་ཀྱི་མཚན་ཉིད་ལས་མངོན་པར་འགྲུབ་པའི་ཕྱིར་མི་རྟག་པར་འགྱུར་རོ། །ཅི་སྟེ་ཐ་མི་དད་ན་ནི་རྣལ་འབྱོར་པ་རྣམས་ཀྱིས་ཐོབ་པའི་མཚན་ཉིད་བྱེ་བྲག་མེད་པར་འགྱུར་ཏེ། རྣལ་འབྱོར་པ་རྣམས་ཀྱིས་བྱེ་བྲག་ཀྱང་མཐོང་བས་ན་དེའི་ཕྱིར་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །དེ་བཞིན་དུ་ཤེས་པ་
དང་། ཤེས་བྱ་ཡང་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །བློ་གྲོས་ཆེན་པོ་ཤེས་པ་དང་། ཤེས་བྱ་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་པ་ནི་རྟག་པ་ཡང་མ་ཡིན། མི་རྟག་པ་ཡང་མ་ཡིན། བྱེད་པ་ཡང་མ་ཡིན། བྱས་པ་ཡང་མ་ཡིན། འདུས་བྱས་ཀྱང་མ་ཡིན། འདུས་མ་བྱས་ཀྱང་མ་ཡིན། བློ་ཡང་མ་ཡིན། རིག་པར་བྱ་བ་ཡང་མ་ཡིན། མཚན་ཉིད་ཀྱང་མ་ཡིན། མཚན་ཉིད་ཀྱི་གཞི་ཡང་མ་ཡིན། ཕུང་པོ་རྣམས་ཀྱང་མ་ཡིན། ཕུང་པོ་རྣམས་ཐ་དད་པ་ཡང་མ་ཡིན། བཤད་པ་ཡང་མ་ཡིན། བཤད་པར་བྱ་བ་ཡང་མ་ཡིན། གཅིག་པ་ཡང་མ་ཡིན། ཐ་དད་པ་ཡང་མ་ཡིན། གཉི་ག་ཡང་མ་ཡིན། གཉི་ག་མ་ཡིན་པ་ཡང་མ་ཡིན་པའི་ཕྱིར་ཚད་མ་ཐམས་ཅད་དང་བྲལ་བའོ། །གང་ཚད་མ་ཐམས་ཅད་དང་བྲལ་བ་དེ་ནི་ཚིག་མེད་པའོ། །གང་ཚིག་མེད་པ་དེ་ནི་མ་སྐྱེས་པའོ། །གང་མ་སྐྱེས་པ་དེ་ནི་མ་འགགས་པའོ། །གང་མ་འགགས་པ་དེ་ནི་རབ་ཏུ་ཞི་བའོ། །གང་རབ་ཏུ་ཞི་བ་དེ་ནི་རང་བཞིན་གྱིས་མྱ་ངན་ལས་འདས་པའོ། །གང་རང་བཞིན་གྱིས་མྱ་ངན་ལས་འདས་པ་དེ་ནི་དངོས་པོ་དང་རྒྱུ་མེད་པའོ། །གང་དངོས་པོ་དང་རྒྱུ་མེད་པ་དེ་ནི་དམིགས་པ་མེད་པའོ། །གང་དམིགས་པ་མེད་པ་དེ་ནི་སྤྲོས་པ་ཐམས་ཅད་ལས་འདས་པའོ། །གང་སྤྲོས་པ་ཐམས་ཅད་ལས་འདས་པ་དེ་ནི་དེ་བཞིན་གཤེགས་པའོ། །དེ་བཞིན་གཤེགས་པ་གང་ཡིན་པ་དེ་ནི་ཡང་དག་པར་རྫོགས་པའི་སངས་རྒྱས་ཉིད་དོ། །བློ་གྲོས་ཆེན་པོ་དེ་ནི་ཡང་དག་པར་རྫོགས་པའི་སངས་རྒྱས་པ་ཉིད་ཅེས་བྱ་སྟེ། བློ་གྲོས་ཆེན་པོ་ཡང་དག་པར་རྫོགས་པའི་སངས་རྒྱས་པ་ནི་དབང་པོ་དང་། ཚད་མ་ཐམས་ཅད་དང་བྲལ་བའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །དབང་པོ་ཚད་མ་རབ་བྲལ་ཞིང་། །དངོས་པོ་མེད་ཅིང་རྒྱུ་ཡང་མེད། །བློ་དང་རིག་བྱ་ཡོངས་སྤངས་ཤིང་། །མཚན་ཉིད་མཚན་ཉིད་གཞི་ཡང་སྤངས། །ཕུང་པོ་རྐྱེན་སོགས་སངས་རྒྱས་པ། གཅིག་དང་ཐ་དད་མཐོང་མི་ནུས། །གལ་ཏེ་མཐོང་བ་ཡོད་མིན་ན། །ཅི་ཡི་ཕྱིར་ན་རྣམ་པར་རྟོག །བྱས་པ་མ་ཡིན་མ་བྱས་མིན། །དངོས་པོ་མ་ཡིན་རྒྱུ་ཡང་མིན། །ཕུང་
མིན་ཕུང་ལ་གནས་པ་མིན། །གཞན་ཡང་འདྲེས་པ་ཡོད་མ་ཡིན། །ཇི་ལྟར་དེ་ཡིས་བརྟགས་པ་ལྟར། །དངོས་པོ་རྣམས་ནི་ཡོད་མ་ཡིན། །མེད་པའང་མ་ཡིན་ཤེས་པར་བྱ། །དེ་ནི་ཆོས་ཀྱི་ཆོས་ཉིད་དོ། །ཡོད་པར་གྱུར་ཕྱིར་མེད་པ་ཡོད། །མེད་པར་གྱུར་ཕྱིར་ཡོད་པ་ཡོད། །མེད་པར་ཡང་ནི་འཛིན་མི་བྱ། །ཡོད་པར་ཡང་ནི་མི་བརྟག་གོ །བདག་དང་བདག་མེད་བསླད་པས་ན། །སྒྲ་ཙམ་ལ་ནི་འཇུག་པ་དག །མཐའ་གཉིས་སུ་ནི་བྱིང་བ་སྟེ། །བདག་དང་འཇིག་རྟེན་རླག་པར་བྱེད། །ཉེས་པ་ཀུན་ལས་རྣམ་གྲོལ་ཞིང་། །ང་ཡི་ཚུལ་ནི་རབ་རྟོག་ན། །དེ་ནི་ཡང་དག་རྟོགས་པ་སྟེ། །འདྲེན་པ་ཆེ་ལ་དེ་མི་སྨོད། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བཅོམ་ལྡན་འདས་ཀྱིས་མདོ་སྡེ་གསུངས་པ་ལས་སྐྱེ་བ་མ་མཆིས་པ་དང་། འགག་པ་མ་མཆིས་པ་ཞེས་སྨོས་པ་ཡང་མཛད་ལ། གཞན་ཡང་བཅོམ་ལྡན་འདས་ཀྱིས་སྐྱེ་བ་མ་མཆིས་པ་དང་། འགག་པ་མ་མཆིས་པ་དེ་ནི་དེ་བཞིན་གཤེགས་པའི་ཚིག་བླ་དགས་སོ་ཞེས་ཀྱང་གསུངས་ན། ཅི་བཅོམ་ལྡན་འདས་ཀྱིས་དངོས་པོ་མ་མཆིས་པའི་སླད་དུ་སྐྱེ་བ་མ་མཆིས་པ་དང་། འགག་པ་མ་མཆིས་པ་ཞེས་གསུངས་སམ། འོན་ཏེ་དེ་བཞིན་གཤེགས་པའི་རྣམ་གྲངས་གཞན་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ངས་ཆོས་ཐམས་ཅད་མི་སྐྱེ་བ་དང་། མི་འགག་པ་ཞེས་བཤད་ཀྱང་ཡོད་པ་དང་མེད་པའི་ཕྱོགས་ནི་མི་སྣང་ངོ་། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་གལ་ཏེ་ཆོས་ཐམས་ཅད་མ་སྐྱེས་པ་ཞིག་ལགས་ན་ནི་ཆོས་ཞེས་སྨོས་པ་ཡང་དམིགས་པར་མི་འགྱུར་ཏེ། ཆོས་ཐམས་ཅད་མ་སྐྱེས་པའི་སླད་དུའོ། །ཅི་སྟེ་མིང་ལ་ཆོས་མཆིས་པ་ཞིག་ལགས་ན་ནི་བཅོམ་ལྡན་འདས་ཀྱིས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་རབ་ཏུ་དབྱེ་ཞིང་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་འདི་
སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་ང་ནི་དེ་བཞིན་གཤེགས་པ་དངོས་པོ་མེད་པར་བཤད་པ་ཡང་མ་ཡིན། སྐྱེ་བ་མེད་པ་དང་། འགག་པ་མེད་པས་ཆོས་ཐམས་ཅད་སྨོས་པ་ཡང་མ་ཡིན། རྐྱེན་ལ་ལྟོས་པ་ཡང་མ་ཡིན་པའི་ཕྱིར། སྐྱེ་བ་མེད་པ་དང་། འགག་པ་མེད་ཀྱང་དོན་མེད་པ་ཡང་མ་ཡིན་ནོ། །བློ་གྲོས་ཆེན་པོ་ངས་ཡིད་ལས་བྱུང་བའི་ཆོས་ཀྱི་སྐུའི་དེ་བཞིན་གཤེགས་པའི་མིང་གི་ཚིག་བླ་དགས་སུ་མ་སྐྱེས་པ་ཞེས་བཤད་པ་དེ་ནི་མུ་སྟེགས་ཅན་དང་། ཉན་ཐོས་དང་། རང་སངས་རྒྱས་དང་། ས་བདུན་ལ་རབ་ཏུ་གནས་པའི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་མ་ཡིན་པས། བློ་གྲོས་ཆེན་པོ་མ་སྐྱེས་པ་དེ་ནི་དེ་བཞིན་གཤེགས་པའི་རྣམ་གྲངས་ཀྱི་ཚིག་ཡིན་ནོ། །བློ་གྲོས་ཆེན་པོ་དཔེར་ན། དབང་པོ་དང་། བརྒྱ་བྱིན་དང་། གྲོང་ཁྱེར་འཇིག་དང་། དེ་ལ་སོགས་པ་དངོས་པོ་རེ་རེ་ལ་ཡང་མིང་གི་རྣམ་གྲངས་མང་པོ་ཡོད་དེ། མིང་མང་བའི་ཕྱིར་དངོས་པོ་མང་པོ་ཡོད་པ་ཡང་མ་ཡིན་ལ། རང་བཞིན་མེད་པ་ཡང་མ་ཡིན་ནོ། །དེ་བཞིན་དུ་བློ་གྲོས་ཆེན་པོ་ང་ཡང་མི་མཇེད་ཀྱི་འཇིག་རྟེན་གྱི་ཁམས་འདི་ན་མིང་གྲངས་མེད་པ་བརྒྱ་སྟོང་ཕྲག་གསུམ་ཡོད་པར་བྱིས་པ་རྣམས་ཀྱི་རྣ་ལམ་དུ་གྲགས་ཏེ། སོ་སོ་ནས་ངའི་མིང་བརྗོད་ཀྱང་དེ་དག་གིས་ངའི་དེ་བཞིན་གཤེགས་པའི་མིང་གི་རྣམ་གྲངས་མི་ཤེས་སོ། །བློ་གྲོས་ཆེན་པོ་སེམས་ཅན་ཁ་ཅིག་ནི་ང་ལ་དེ་བཞིན་གཤེགས་པ་ཡིན་པར་ཤེས་སོ། །ཁ་ཅིག་ནི་ཐམས་ཅད་མཁྱེན་པར་ཤེས་པ་ཡང་ཡོད་དོ། །སངས་རྒྱས་སུ་ཤེས་པ་ཡང་ཡོད་དོ། །འཇིག་རྟེན་སྐྱོབ་པར་ཤེས་པ་ཡང་ཡོད་དོ། །བདག་ཉིད་རིག་པར་ཤེས་པ་ཡང་ཡོད་དོ། །འདྲེན་པར་ཤེས་པ་ཡང་ཡོད་དོ། །རྣམ་པར་འདྲེན་པར་ཤེས་པ་ཡང་ཡོད་དོ། །ཡོངས་སུ་འདྲེན་པར་ཤེས་པ་ཡང་ཡོད་དོ། །དྲང་སྲོང་དུ་ཤེས་པ་ཡང་ཡོད་དོ། །ཚངས་པར་ཤེས་པ་ཡང་ཡོད་དོ། །ཁྱབ་འཇུག་ཏུ་ཤེས་པ་ཡང་ཡོད་དོ། །དབང་ཕྱུག་ཏུ་ཤེས་པ་ཡང་ཡོད་དོ། །གཙོ་བོར་ཤེས་པ་ཡང་ཡོད་དོ། །སེར་སྐྱ་ཡིན་པར་ཤེས་པ་ཡང་ཡོད་དོ། །ཡང་དག་པའི་མཐའ་ཡིན་པར་ཤེས་པ་ཡང་ཡོད་དོ། །ཟླ་བར་ཤེས་པ་ཡང་ཡོད་དོ། །ཉི་མར་ཤེས་པ་ཡང་ཡོད་དོ། །བདག་པོར་ཤེས་པ་ཡང་ཡོད་དོ། །སྐྱེ་བ་མེད་པར་ཤེས་པ་ཡང་ཡོད་དོ། །འགག་པ་མེད་པར་ཤེས་པ་ཡང་
ཡོད་དོ། །སྟོང་པ་ཉིད་དུ་ཤེས་པ་ཡང་ཡོད་དོ། །དེ་བཞིན་ཉིད་དུ་ཤེས་པ་ཡང་ཡོད་དོ། །བདེན་པ་ཉིད་དུ་ཤེས་པ་ཡང་ཡོད་དོ། །དེ་ཁོ་ན་ཉིད་དུ་ཤེས་པ་ཡང་ཡོད་དོ། །ཆོས་ཀྱི་ངོ་བོ་ཉིད་དུ་ཤེས་པ་ཡང་ཡོད་དོ། །མྱ་ངན་ལས་འདས་པར་ཤེས་པ་ཡང་ཡོད་དོ། །རྟག་པར་ཤེས་པ་ཡང་ཡོད་དོ། །མཉམ་པ་ཉིད་དུ་ཤེས་པ་ཡང་ཡོད་དོ། །གཉིས་སུ་མེད་པར་ཤེས་པ་ཡང་ཡོད་དོ། །མཚན་མ་མེད་པར་ཤེས་པ་ཡང་ཡོད་དོ། །རྣམ་པར་ཐར་པར་ཤེས་པ་ཡང་ཡོད་དོ། །ལམ་ཡིན་པར་ཤེས་པ་ཡང་ཡོད་དོ། །ཡིད་ལ་བྱུང་བར་རབ་ཏུ་ཤེས་པ་ཡང་ཡོད་དོ། །བློ་གྲོས་ཆེན་པོ་དེ་ལ་སོགས་པ་མིང་གྲངས་མེད་པ་བརྒྱ་སྟོང་ཕྲག་གསུམ་ལྷག་ཆད་མེད་པར་འཇིག་རྟེན་གྱི་ཁམས་འདི་དང་། གཞན་ཀུན་གྱིས་ང་ལ་ཆུའི་ཟླ་བ་བཞིན་དུ་འབྱུང་བ་ཡང་མེད། འཇུག་པ་ཡང་མེད་པར་རབ་ཏུ་ཤེས་སོ། །བྱིས་པ་སོ་སོའི་སྐྱེ་བོ་དག་གིས་ནི་ང་རབ་ཏུ་མི་ཤེས་ཏེ། མཐའ་གཉིས་སུ་ལྷུང་བའི་ཕྱིར་རོ། །འོན་ཀྱང་ང་ལ་བཀུར་སྟི་བྱེད་མཆོད་པར་བྱེད་དེ། ཚིག་གི་དོན་གྱི་ཚུལ་ལ་མི་མཁས་པས་མིང་རྣམ་པར་འབྱེད་མི་ནུས་ཤིང་རང་གི་ཚུལ་མི་ཤེས་པས། བརྗོད་པའི་ཚིག་སྣ་ཚོགས་ལ་མངོན་པར་ཞེན་ནས། སྐྱེ་བ་མེད་པ་དང་། འགག་པ་མེད་པ་ལ་དངོས་པོ་མེད་པར་འདུ་ཤེས་སོ། །དེ་བཞིན་གཤེགས་པའི་མིང་གི་རྣམ་གྲངས་ཐ་དད་པ་དབང་པོ་དང་། བརྒྱ་བྱིན་དང་། གྲོང་ཁྱེར་འཇིག་པ་ལྟ་བུར་མ་ཤེས་ཤིང་། རང་གི་ཚུལ་མཐར་ཐུག་པ་ལ་རྨོངས་པས། ཆོས་ཐམས་ཅད་ལ་སྒྲ་ཇི་བཞིན་དུ་མངོན་པར་ཞེན་ཏོ། །བློ་གྲོས་ཆེན་པོ་སྐྱེས་བུ་བླུན་པོ་དེ་དག་འདི་སྐད་དུ་དོན་ནི་ཇི་བཞིན་པ་ཉིད་དེ། སྒྲ་ལས་དོན་གཞན་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། དོན་མ་ལུས་པ་མེད་པའི་ཕྱིར་སྒྲ་ལས་གཞན་ཅི་ཡང་མེད་དོ། །སྒྲ་འབའ་ཞིག་གོ་ཞེས་ཟེར་རོ། །བློ་གྲོས་ཆེན་པོ་ལོག་པས་བསྲེགས་པའི་བློ་ཅན་དེ་དག་སྒྲའི་རང་བཞིན་ཡོངས་སུ་མི་ཤེས་པས་སྒྲ་ལ་སྐྱེ་བ་དང་། འགག་པ་ཡོད་ཅིང་དོན་ལ་སྐྱེ་བ་དང་། འགག་པ་མེད་པར་མི་རིག་གོ །བློ་གྲོས་ཆེན་པོ་སྒྲ་ཐམས་ཅད་ནི་ཡི་གེར་ལྷུང་བའོ། །དོན་ནི་མ་ལྷུང་བ་སྟེ། དངོས་པོ་དང་དངོས་པོ་མེད་པ་སྤངས་པའི་ཕྱིར་དང་། སྐྱེ་བ་ལེན་པ་མེད་ཅིང་ལུས་མེད་པའི་ཕྱིར་རོ། །བློ་གྲོས་ཆེན་པོ་དེ་བཞིན་
གཤེགས་པ་ནི་ཡི་གེར་ལྷུང་བའི་ཆོས་མི་སྟོན་ཏེ། ཡི་གེ་རྣམས་ཀྱི་ཡོད་པ་དང་། མེད་པ་མི་དམིགས་པའི་ཕྱིར་གཞན་དུ་ན་ཡི་གེར་མ་ལྷུང་བས། ཆོས་སྟོན་ཏོ། །བློ་གྲོས་ཆེན་པོ་གལ་ཏེ་ཁ་ཅིག་འདི་སྐད་དུ་དེ་བཞིན་གཤེགས་པ་ནི་ཡི་གེར་ལྷུང་བའི་ཆོས་མི་སྟོན་ཏོ་ཞེས་ཟེར་བ། དེ་ནི་བརྫུན་དུ་སྨྲ་བ་སྟེ། ཆོས་ཉིད་ནི་ཡི་གེ་དང་བྲལ་བའི་ཕྱིར་རོ། །དེ་ལྟ་བས་ན་བློ་གྲོས་ཆེན་པོ་ང་ལ་སོགས་པ་སངས་རྒྱས་དང་། བྱང་ཆུབ་སེམས་དཔའ་རྣམས་ནི་ཡི་གེ་གཅིག་ཀྱང་མ་བཤད་འཆད་པར་མི་འགྱུར་རོ། །དེ་ཅིའི་ཕྱིར་ཞེ་ན། ཆོས་རྣམས་ཡི་གེ་དང་བྲལ་བའི་ཕྱིར་རོ། །དོན་དང་མི་ལྡན་པར་འཆད་པ་ཡང་མ་ཡིན་ཏེ། བརྗོད་པ་ནི་སེམས་ཅན་གྱི་རྣམ་པར་རྟོག་པ་ཡིན་པའི་ཕྱིར་རོ། །བློ་གྲོས་ཆེན་པོ་གལ་ཏེ་ཆོས་ཐམས་ཅད་མ་བཤད་ན་ནི་བསྟན་པའི་ཆོས་རྣམས་འཇིག་པར་འགྱུར་རོ། །བསྟན་པའི་ཆོས་ཞིག་ན་ནི་སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་རྣམས་ཀྱང་མེད་པར་འགྱུར་རོ། །དེ་དག་མེད་ན་ནི་གང་ཞིག་སུ་ལ་ཅི་ཞིག་བཤད་དེ། དེ་ལྟ་བས་ན་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོས་བཤད་པ་བརྗོད་པའི་སྒྲ་ལ་མངོན་པར་ཆགས་པར་མི་བྱ་ཞིང་། བསམ་པ་ཇི་ལྟ་བ་བཞིན་དུ་མདོ་སྡེའི་ཆོས་རྣམས་རྒྱ་ཆེར་བཤད་པར་བྱའོ། །འདི་ལྟར་སེམས་ཅན་རྣམས་ཀྱི་རེ་བ་དང་། ཉོན་མོངས་པ་ནི་གཅིག་པ་མ་ཡིན་པའི་ཕྱིར་ང་དང་སངས་རྒྱས་གཞན་རྣམས་ཀྱིས་མོས་པ་ཐ་དད་པ་སྣ་ཚོགས་ཀྱི་སེམས་ཅན་རྣམས་སེམས་དང་ཡིད་དང་། ཡིད་ཀྱི་རྣམ་པར་ཤེས་པ་བཟློག་པའི་ཕྱིར་ཆོས་བསྟན་པར་བྱ་བ་ཡིན་གྱི། སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་གནས་ཐོབ་པ་ལ་ནི་མ་ཡིན་ནོ། །བློ་གྲོས་ཆེན་པོ་ཆོས་ཐམས་ཅད་སྣང་བ་མེད་པ། རང་གི་སེམས་སྣང་བ་ཙམ་དུ་ཁོང་དུ་ཆུད་པ། རྣམ་པར་རྟོག་པ་གཉིས་སྤངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་དོན་ལ་རྟོན་པར་བྱའི་ཡི་གེ་ལ་རྟོན་པར་མི་བྱའོ། །བློ་གྲོས་ཆེན་པོ་གལ་ཏེ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཡི་གེ་ལ་རྟོན་པ་དེ་དག་ནི་བདག་ཀྱང་དོན་དམ་པ་ལས་ཉམས་པར་བྱེད་ལ། གཞན་ཡང་རྟོགས་པར་བྱེད་མི་ནུས་ཏེ། ལྟ་བ་ངན་པའི་རྒྱུད་དུ་ལྷུང་བར་འཁོར་རྣམས་ལ་
སྒྲོགས་པར་བྱེད་དེ། ཆོས་ཐམས་ཅད་དང་། ས་ཐམས་ཅད་དང་། མཚན་མ་ཐམས་ཅད་ལ་མི་མཁས་པས་ཚིག་གི་རྣམ་གྲངས་རྟོགས་པས་ཁོང་དུ་མི་ཆུད་དོ། །གལ་ཏེ་ཆོས་ཐམས་ཅད་དང་། ས་ཐམས་ཅད་དང་། མཚན་མ་ཐམས་ཅད་ལ་མཁས་པ་དང་། ཚིག་གི་རྣམ་གྲངས་རྟོགས་པར་ཁོང་དུ་ཆུད་ཅིང་དངོས་པོའི་དོན་དང་ལྡན་པར་གྱུར་ན། དེ་ཡང་དག་པ་མཚན་མ་མེད་པའི་བདེ་བས་བདག་ཉིད་ཚིམ་པར་བྱེད་ཅིང་སེམས་ཅན་རྣམས་ཀྱང་ཐེག་པ་ཆེན་པོ་མཉམ་པ་ཉིད་ལ་འགོད་པར་བྱེད་དོ། །བློ་གྲོས་ཆེན་པོ་ཐེག་པ་ཆེན་པོ་ཡོངས་སུ་བཟུང་ན། སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་རྣམས་ཡོངས་སུ་བཟུང་བར་འགྱུར་རོ། །སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་རྣམས་ཡོངས་སུ་བཟུང་བས་ནི་སེམས་ཅན་ཐམས་ཅད་ཡོངས་སུ་བཟུང་བར་འགྱུར་རོ། །སེམས་ཅན་ཐམས་ཅད་ཡོངས་སུ་བཟུང་བས་ནི་དམ་པའི་ཆོས་ཡོངས་སུ་བཟུང་བར་འགྱུར་རོ། །དམ་པའི་ཆོས་ཡོངས་སུ་བཟུང་བས་ནི་སངས་རྒྱས་ཀྱི་གདུང་རྒྱུན་མི་གཅོད་པ་ཡིན་ནོ། །སངས་རྒྱས་ཀྱི་གདུང་རྒྱུན་མི་གཅོད་པ་ནི་གནས་ཁྱད་པར་ཅན་དུ་འཇུག་པའི་ཤེས་པ་འཐོབ་པར་འགྱུར་རོ། །གནས་ཁྱད་པར་ཅན་དུ་འཇུག་པའི་ཤེས་པ་ཐོབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་རྟག་པར་རྫུས་ཏེ་སྐྱེ་ཞིང་ཐེག་པ་ཆེན་པོ་རབ་ཏུ་འཇོག་པས་དབང་བཅུའི་སྟོབས་ཀྱིས་གཟུགས་སྣ་ཚོགས་ཡོངས་སུ་སྟོན་པར་འགྱུར་ཏེ། སེམས་ཅན་གྱི་ཆ་བྱད་དང་། མོས་པ་དང་། ཉོན་མོངས་པའི་མཚན་ཉིད་རྣམས་རྟོགས་པར་ཁོང་དུ་ཆུད་པས་ཡང་དག་པ་ཇི་ལྟ་བ་བཞིན་དུ་ཆོས་སྟོན་ཏོ། །དེ་ལ་ཡང་དག་པ་ཇི་ལྟ་བ་བཞིན་དུ་སྟོན་པ་ཞེས་བྱ་བ་ནི་དེ་ཁོ་ན་ཉིད་ལས་གཞན་མ་ཡིན་པ་སྟེ། འོང་བ་དང་། འགྲོ་བ་མེད་པའི་མཚན་ཉིད་དང་། སྤྲོས་པ་ཐམས་ཅད་ཉེ་བར་ཞི་བ་ནི་དེ་ཁོ་ན་ཉིད་ཅེས་བྱའོ། །བློ་གྲོས་ཆེན་པོ་རིགས་ཀྱི་བུའམ། རིགས་ཀྱི་བུ་མོ་རྣམས་ཀྱིས་སྒྲ་ཇི་བཞིན་དུ་གཟུང་ཞིང་མངོན་པར་ཞེན་པར་མི་བྱ་སྟེ། དེ་ཁོ་ན་ཉིད་ནི་མིང་དང་། ཡི་གེ་དང་བྲལ་བའི་ཕྱིར་རོ། །བློ་གྲོས་ཆེན་པོ་ཇི་ལྟར་བླུན་པོ་ཁ་ཅིག་ལ་སོར་མོའི་རྩེ་མོས་དངོས་པོ་བསྟན་ན་བླུན་པོ་དེ་སོར་མོའི་རྩེ་མོ་ལ་ལྟ་བས་ཡང་དག་པའི་དོན་མི་འཐོབ་
བོ། །དེ་བཞིན་དུ་བྱིས་པ་སོ་སོའི་སྐྱེ་བོ་རྣམས་ཀྱང་སྒྲ་ཇི་བཞིན་གྱི་སོར་མོའི་རྩེ་མོ་འཛིན་ཅིང་མངོན་པར་ཞེན་ཏེ། འཆི་བ་ལ་ཐུག་གི་བར་དུ་ཡོངས་སུ་མི་གཏོང་བས་སྒྲ་ཇི་བཞིན་གྱི་སོར་མོའི་རྩེ་མོ་སྤངས་པ་དོན་དམ་པའི་དེ་ཁོ་ན་ཉིད་འཐོབ་པར་མི་ནུས་སོ། །བློ་གྲོས་ཆེན་པོ་དཔེར་ན་བྱིས་པ་ཆུང་ངུ་རྣམས་ནི་ཟས་གཡོས་སུ་བྱས་པ་རྣམས་བཟའ་བའི་རིགས་ཀྱི་གཡོས་སུ་མ་བྱས་པ་རྣམས་ནི་བཟའ་བའི་མི་རིགས་པ་ལས། གལ་ཏེ་གཡོས་སུ་མ་བྱས་པ་ཟོས་ན་སྨད་ནད་སློང་བར་འགྱུར་ཏེ། ཁ་ཟས་རིམ་གྱིས་གཡོས་སུ་བྱ་བ་མི་ཤེས་པའི་ཕྱིར་རོ། །བློ་གྲོས་ཆེན་པོ་དེ་བཞིན་དུ་སྐྱེ་བ་མེད་པ་དང་། འགག་པ་མེད་པ་ཡང་ཐབས་ཀྱིས་མངོན་པར་མ་བསྒྲུབས་ན་མཛེས་པར་མི་འགྱུར་རོ། །དེ་ལྟ་བས་ན་བློ་གྲོས་ཆེན་པོ་ཐབས་ཀྱིས་མངོན་པར་བསྒྲུབ་པ་ལ་བརྩོན་པར་བྱ་ཞིང་སོར་མོའི་རྩེ་མོ་ལ་ལྟ་བ་ལྟར་སྒྲའི་རྗེས་སུ་འབྲང་བར་མི་བྱའོ། །དེའི་ཕྱིར་བློ་གྲོས་ཆེན་པོ་དེ་ཁོ་ནའི་དོན་ལ་ཐབས་ཀྱིས་མངོན་པར་བརྩོན་པར་བྱའོ། །དེ་ལ་དེ་ཁོ་ནའི་དོན་ནི་རབ་ཏུ་དབེན་པ་སྟེ། མྱ་ངན་ལས་འདས་པའི་རྒྱུའོ། །སྒྲ་ནི་རྣམ་པར་རྟོག་པ་དང་རྗེས་སུ་འཐུན་པའོ། །རྣམ་པར་རྟོག་པ་ནི་འཁོར་བ་སྡུད་པའོ། །བློ་གྲོས་ཆེན་པོ་དེ་ལ་དེ་ཁོ་ན་ཉིད་ཀྱི་དོན་ནི་མང་དུ་ཐོས་པ་ལས་ཐོབ་པར་འགྱུར་རོ། །བློ་གྲོས་ཆེན་པོ་མང་དུ་ཐོས་པ་ནི་འདི་ལྟ་སྟེ། དོན་ལ་མཁས་པ་ཡིན་གྱི་སྒྲ་ལ་མཁས་པ་ནི་མ་ཡིན་ནོ། །དོན་ལ་མཁས་པ་ནི་མུ་སྟེགས་ཅན་གྱི་སྨྲ་བ་ཐམས་ཅད་ཀྱི་རྗེས་སུ་མི་འབྲང་བས་བདག་ཉིད་ཀྱང་རྗེས་སུ་འབྲང་བར་མི་བྱེད་ལ་གཞན་དག་ཀྱང་རྗེས་སུ་འབྲང་བར་བྱེད་དུ་མི་འཇུག་སྟེ། འདི་ནི་ཡོན་ཏན་ཆེན་པོ་མང་དུ་ཐོས་པ་དང་ལྡན་པ་ཞེས་བྱའོ། །དེ་བས་ན་དོན་འདོད་པ་རྣམས་ཀྱིས་མང་དུ་ཐོས་པ་ལ་བསྟེན་པར་བྱ་སྟེ། འདི་ལྟ་སྟེ། དོན་ལ་མཁས་པའོ། །འདི་ལས་བཟློག་པ་སྒྲ་ལ་མངོན་པར་ཞེན་པ་དེ་དག་ནི་ཡོངས་སུ་སྤང་བར་བྱའོ། །དེ་ནས་ཡང་བྱང་ཆུབ་སེམས་དཔའ་བློ་གྲོས་ཆེན་པོ་སངས་རྒྱས་ཀྱི་བྱིན་གྱི་རླབས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སྐྱེ་བ་མ་མཆིས་པ་དང་། འགག་པ་མ་མཆིས་པ་ཞེས་རབ་ཏུ་ཕྱེ་བ་དེ་ནི་ངོ་མཚར་དུ་གྱུར་པ་ཅི་ཡང་མ་མཆིས་སོ། །དེ་ཅིའི་སླད་དུ་ཞེ་ན། མུ་སྟེགས་རྣམས་ཀྱིས་རྒྱུ་ཡང་མ་སྐྱེས་མ་འགགས་
པའོ། །བཅོམ་ལྡན་འདས་ཀྱིས་ཀྱང་ནམ་མཁའ་དང་། སོ་སོར་བརྟགས་པ་མ་འགགས་པའི་འགོག་པ་དང་། མྱ་ངན་ལས་འདས་པའི་དབྱིངས་ནི་མ་སྐྱེས་པ་དང་། མ་འགགས་པའོ་ཞེས་གསུངས། བཅོམ་ལྡན་འདས་མུ་སྟེགས་ཅན་རྣམས་ཀྱང་རྒྱུ་ལས་འཇིག་རྟེན་རྣམས་སྐྱེའོ་ཞེས་མཆིའོ། །བཅོམ་ལྡན་འདས་ཀྱིས་ཀྱང་མ་རིག་པ་དང་། སྲེད་པ་དང་། ལས་དང་། རྣམ་པར་རྟོག་པ་རྣམས་ཀྱིས་རྐྱེན་བྱས་ནས་འཇིག་རྟེན་རྣམས་སྐྱེ་བར་བཀའ་སྩལ་ཏེ། རྒྱུ་དེ་དང་རྐྱེན་འདི་མིང་ལ་བྱེ་བྲག་མཆིས་པར་བས་སོ། །ཕྱི་རོལ་གྱི་དངོས་པོའི་རྒྱུ་དང་རྐྱེན་རྣམས་ཀྱང་དེ་བཞིན་ཏེ། དེ་ལྟ་བས་ན་བཅོམ་ལྡན་འདས་ཀྱིས་ཡང་མུ་སྟེགས་ཅན་གྱི་སྨྲ་བ་ཡང་བྱེ་བྲག་མ་མཆིས་པར་འགྱུར་རོ། །མུ་སྟེགས་ཅན་ཡང་འདི་སྐད་དུ་རྡུལ་ཕྲ་མོ་དང་། གཙོ་བོ་དང་། དབང་ཕྱུག་དང་། སྐྱེ་དགུའི་བདག་པོ་ལ་སོགས་པ་རྫས་དགུ་དང་བཅས་པ་མ་སྐྱེས་མ་འགགས་པའོ་ཞེས་མཆི་ལ། བཅོམ་ལྡན་འདས་ཀྱིས་ཀྱང་དངོས་པོ་ཐམས་ཅད་མ་སྐྱེས་པ་དང་། མ་འགགས་པས་ཡོད་པ་དང་། མེད་པ་མི་དམིགས་སོ་ཞེས་བཀའ་སྩལ། མུ་སྟེགས་ཅན་རྣམས་ཀྱང་འབྱུང་བ་ཆེན་པོ་བཞི་མི་འཇིགས་པས་རང་གི་མཚན་ཉིད་མི་སྐྱེ་མི་འགག་གོ །འབྱུང་བ་ཆེན་པོ་བཞི་པོ་རྣམས་ནི་རྟག་པར་འབྱུང་བ་ཆེན་པོ་ཉིད་དེ་འགྲོ་བ་ཀུན་ལ་ཁྱབ་པར་འཇུག་ཀྱང་རང་བཞིན་ནི་མི་འདོར་རོ་ཞེས་མཆིས་པས་ན། བཅོམ་ལྡན་འདས་ཀྱིས་བཀའ་སྩལ་པ་ཡང་དེ་བཞིན་ཏེ། དེའི་སླད་དུ་བདག་འདི་སྐད་དུ་ངོ་མཚར་ཆེ་བ་མ་ལགས་སོ་ཞེས་མཆིའོ། །བཅོམ་ལྡན་འདས་ངོ་མཚར་ཆེ་ཞིང་མུ་སྟེགས་ཅན་རྣམས་ལས་ཁྱད་པར་དུ་གྱུར་པའི་བྱེ་བྲག་བཤད་དུ་གསོལ། ཅི་སྟེ་བྱེ་བྲག་མ་མཆིས་ན་ནི་མུ་སྟེགས་ཅན་རྣམས་ཀྱང་སངས་རྒྱས་ལགས་པར་འགྱུར་ཏེ། འདི་ལྟར་སྐྱེ་བ་མ་མཆིས་པ་དང་། འགགས་པ་མ་མཆིས་པའི་སླད་དུའོ། །བཅོམ་ལྡན་འདས་ཀྱིས་ནི་འཇིག་རྟེན་གྱི་ཁམས་གཅིག་ཏུ་སངས་རྒྱས་མང་པོ་འབྱུང་བ་ནི་གནས་མེད་དོ་ཞེས་ཀྱང་གསུངས་ལ། འདི་ལྟར་ཇི་སྐད་བཀའ་སྩལ་པ་དང་སྦྱར་ན་ནི་འཇིག་རྟེན་གྱི་ཁམས་གཅིག་ཏུ་སངས་རྒྱས་མང་པོ་འབྱུང་བར་འགྱུར་ཏེ། བྱེ་བྲག་མ་མཆིས་པའི་སླད་དུའོ། །བཅོམ་ལྡན་འདས་ཀྱིས་བློ་གྲོས་ཆེན་པོ་ལ་བཀའ་སྩལ་པ། ངས་
བཤད་པའི་སྐྱེ་བ་མེད་པ་དང་། འགག་པ་མེད་པ་ནི་མུ་སྟེགས་ཅན་རྣམས་ཀྱི་སྐྱེ་བ་མེད་པ་དང་འགག་པ་མེད་པ་དང་མཚུངས་པ་མ་ཡིན་ཏེ། དེ་ཅིའི་ཕྱིར་ཞེ་ན། མུ་སྟེགས་ཅན་དེ་དག་ནི་དངོས་པོའི་རང་བཞིན་ཡོད་པས་མ་སྐྱེས་པ་དང་། མི་འགྱུར་བའི་མཚན་ཉིད་མི་འཐོབ་ཀྱི་ང་ནི་དེ་ལྟར་ཡོད་པ་དང་། མེད་པའི་ཕྱོགས་སུ་ལྷུང་བ་མ་ཡིན་ནོ། །བློ་གྲོས་ཆེན་པོ་ང་ནི་ཡོད་པ་དང་མེད་པའི་ཕྱོགས་དང་བྲལ་བ། སྐྱེ་བ་དང་འཇིག་པ་དང་བྲལ་བ། དངོས་པོ་ཡང་མ་ཡིན། དངོས་པོ་མེད་པ་ཡང་མ་ཡིན་ཏེ། སྒྱུ་མ་དང་། རྨི་ལམ་གྱི་གཟུགས་སྣ་ཚོགས་ལྟ་བུར་སྣང་བའི་ཕྱིར་དངོས་པོ་མེད་པ་ཡང་མ་ཡིན་ནོ། །ཇི་ལྟར་ན་དངོས་པོ་མེད་པ་ཡིན་ཞེ་ན། འདི་ལྟ་སྟེ། གཟུགས་ཀྱི་རང་བཞིན་གྱི་མཚན་ཉིད་མེད་ཅིང་གཟུང་བ་རྣམས་སྣང་བ་དང་མི་སྣང་བའི་ཕྱིར་དང་། འཛིན་པས་ཡོངས་སུ་མ་བཟུང་བའི་ཕྱིར་དེས་ན་དངོས་པོ་ཐམས་ཅད་ནི་དངོས་པོ་ཡང་མ་ཡིན། དངོས་པོ་མེད་པ་ཡང་མ་ཡིན་ནོ། །འདི་ལྟར་རང་གི་སེམས་སྣང་བ་ཙམ་དུ་ཁོང་དུ་ཆུད་པས་རྣམ་པར་རྟོག་པ་མི་སྐྱེ་ཞིང་ཤིན་ཏུ་བདེ་བས་འཇིག་རྟེན་གྱི་བྱ་བ་རྣམས་རབ་ཏུ་ཞི་བ་ཡིན་ན། བྱིས་པ་སོ་སོའི་སྐྱེ་བོ་མི་མཁས་པ་རྣམས་བྱ་བ་ཡོད་པར་རྣམ་པར་རྟོག་གི་འཕགས་པ་རྣམས་ནི་མ་ཡིན་ནོ། །ཡང་དག་པ་མ་ཡིན་པའི་རྣམ་པར་རྟོག་པ་ནི་དྲི་ཟའི་གྲོང་ཁྱེར་དང་། སྒྱུ་མ་དང་། སྤྲུལ་པའི་སྐྱེས་བུ་ལྟ་བུའོ། །བློ་གྲོས་ཆེན་པོ་དཔེར་ན་དྲི་ཟའི་གྲོང་ཁྱེར་གྱི་ནང་དུ་སྒྱུ་མ་དང་། སྤྲུལ་པའི་སྐྱེས་བུའི་འདྲེན་པ་མང་པོ་སྣ་ཚོགས་འབྱུང་ཞིང་འཇུག་པ་ལ། བྱིས་པ་མི་མཁས་པའི་རྣམ་པར་རྟོག་པས་བདེན་པར་འདི་དག་འབྱུང་ངོ་། །འཇུག་གོ་ཞེས་སྨྲ་ཡང་ཡང་དག་པར་འབྱུང་ཞེས་བྱ་བའམ། འཇུག་པ་ཞེས་བྱ་བ་མེད་དེ། དེ་ནི་རྣམ་པར་རྟོག་པ་ཙམ་དུ་ཟད་པའི་ཕྱིར་རོ། །དེ་བཞིན་དུ་བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་མི་མཁས་པ་རྣམས་སྐྱེ་བ་མེད་པ་དང་། འགག་པ་མེད་པའི་ནོར་པ་སྐྱེད་པར་བྱེད་དེ། དེ་དག་ལ་ནི་འདུས་བྱས་སམ། འདུས་མ་བྱས་གང་ཡང་མེད་དོ། །སྒྱུ་མའི་སྐྱེས་བུ་ལྟར་སྐྱེ་ཡང་ཡང་དག་པར་དེ་ལ་སྐྱེ་བའམ་འགག་པ་ཅི་ཡང་མེད་དེ། དངོས་པོ་དང་དངོས་པོ་མེད་པ་གང་ཡང་ཡོད་པ་མ་ཡིན་པའི་ཕྱིར་རོ། །ཆོས་ཐམས་ཅད་ཀྱང་དེ་བཞིན་ཏེ། སྐྱེ་བ་དང་འགག་པ་སྤངས་པ་ཡིན་ན། བྱིས་
པ་སོ་སོའི་སྐྱེ་བོ་མི་མཁས་པ་རྣམས་ནི་ཡང་དག་པ་མ་ཡིན་པར་ལྷུང་བས་སྐྱེ་བ་དང་འགག་པའི་རྣམ་པར་རྟོག་པ་འབྱུང་གི་འཕགས་པ་རྣམས་ནི་མ་ཡིན་ནོ། །དེ་ལ་ཡང་དག་པ་མ་ཡིན་པ་ཞེས་བྱ་བ་ནི་དངོས་པོའི་རང་བཞིན་བརྟགས་པ་དེ་བཞིན་དུ་ཡང་མ་ཡིན། གཞན་དུ་ཡང་མ་ཡིན་ནོ། །གལ་ཏེ་གཞན་དུ་བརྟགས་ན་ནི་དངོས་པོ་ཐམས་ཅད་ཀྱི་རང་བཞིན་ལ་མངོན་པར་ཞེན་པ་ཉིད་དུ་འབྱུང་བས་རབ་ཏུ་དབེན་པ་མི་མཐོང་ངོ་། །རབ་ཏུ་དབེན་པ་མི་མཐོང་ན་རྣམ་པར་རྟོག་པ་དང་བྲལ་བར་མི་འགྱུར་རོ། །དེའི་ཕྱིར་བློ་གྲོས་ཆེན་པོ་མཚན་མ་མེད་པས་ནི་མཆོག་མཐོང་གི་མཚན་མས་ནི་མ་ཡིན་ཏེ། མཚན་མར་མཐོང་བ་ནི་སྐྱེ་བ་ལེན་པའི་རྒྱུ་ཡིན་པའི་ཕྱིར་མཆོག་མ་ཡིན་ནོ། །བློ་གྲོས་ཆེན་པོ་མཚན་མ་མེད་པ་ནི་རྣམ་པར་རྟོག་པ་མི་སྐྱེ་སྟེ། མི་འབྱུང་མི་འགག་པས་ངས་མྱ་ངན་ལས་འདས་པ་ཞེས་བཤད་དེ། བློ་གྲོས་ཆེན་པོ་དེ་ལ་མྱ་ངན་ལས་འདས་པ་ནི་ཡང་དག་པའི་དོན་ཇི་ལྟ་བ་བཞིན་དུ་མཐོང་བས་སྔར་རྣམ་པར་རྟོག་པའི་སེམས་དང་སེམས་ལས་བྱུང་བའི་ཆོས་རྣམས་སྤངས་པ། དེ་བཞིན་གཤེགས་པའི་སོ་སོ་རང་གིས་རིག་པ་འཕགས་པའི་ཡེ་ཤེས་ཐོབ་པ་དེ་ནི་ངས་མྱ་ངན་ལས་འདས་པ་ཡིན་ནོ་ཞེས་བསྟན་ཏོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །སྐྱེ་བར་སྨྲ་བ་དེ་བཟློག་ཕྱིར། །མི་སྐྱེ་དོན་ནི་རྣམ་པར་གཞག །ང་ཡིས་དེ་ལྟར་བཤད་པའི་ཆོས། །བྱིས་པ་རྣམས་ཀྱིས་རིག་མི་ནུས། །ཆོས་རྣམས་ཐམས་ཅད་མི་སྐྱེ་བས། །དངོས་པོ་མེད་ཅིང་སྐྱེ་བ་མེད། །རྨི་ལམ་སྒྱུ་མ་དྲི་ཟའི་གྲོང་། །དངོས་པོ་ཡོད་ཀྱང་རྒྱུ་ནི་མེད། །མ་སྐྱེས་རང་བཞིན་མེད་པ་དང་། །ཅི་ཕྱིར་སྟོང་པའང་བཤད་པར་བྱ། །འདུས་པ་དག་ནི་ཡོངས་སྤངས་ཤིང་། །བློ་གྲོས་རིག་ན་དངོས་མི་སྣང་། །དེ་ཕྱིར་སྟོང་ཉིད་མ་སྐྱེས་པ། །རང་བཞིན་མེད་པར་ངས་བཤད་དོ། །འདི་ལྟར་རེ་རེ་འདུས་པས་ན། །དངོས་པོ་སྣང་ཡང་ཡོད་མ་ཡིན། །རྣམ་པར་གཞིག་ན་འདུས་པ་མེད། །མུ་སྟེགས་ལྟ་བ་ལྟར་ཡང་མིན། །རྨི་ལམ་སྒྱུ་མ་སྐྲ་ཤད་དང་། །སྨིག་རྒྱུ་དྲི་ཟའི་གྲོང་ཁྱེར་ལྟར། །འཇིག་རྟེན་དངོས་པོ་སྣ་ཚོགས་ཀུན། །རྒྱུ་མེད་མཚན་ཉིད་རབ་ཏུ་སྣང་། །རྒྱུ་ཡོད་སྨྲ་བ་གདུལ་བའི་ཕྱིར། །མ་སྐྱེས་དོན་ནི་རབ་ཏུ་བསྒྲགས། །སྐྱེ་མེད་རབ་ཏུ་བསྒྲགས་པས་
ན། །ཆོས་ཀྱི་ཚུལ་ནི་རྒྱུན་མི་འཆད། །རྒྱུ་མེད་རབ་ཏུ་སྨྲ་བ་ནི། །འཇིགས་པའི་མུ་སྟེགས་ཅན་རྣམས་ཏེ། །ཇི་ལྟར་ཅི་ཡི་ཕྱིར་ན་ནི། །དེ་ཡང་ཅི་ཕྱིར་སྐྱེ་བར་འགྱུར། །གང་དག་ཏུ་ནི་འདུས་གྱུར་ན། །རྒྱུ་མེད་པར་ནི་སྨྲ་བར་བྱེད། །འདུས་བྱས་ཆོས་རྣམས་རབ་བརྟགས་ན། །རྒྱུ་མེད་རྒྱུ་ཡོད་མ་ཡིན་ཏེ། །སྐྱེ་དང་འཇིག་པར་སྨྲ་བ་ཡི། །ལྟ་བ་དག་ནི་དེ་ནས་ལྡོག །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཚིགས་སུ་བཅད་དེ་ཞུ་བ་ཞུས་པ། ཅི་ཡི་སླད་དུ་སྐྱེ་མ་མཆིས། །འོན་ཏེ་དངོས་པོ་མ་མཆིས་སམ། །དེ་སྟེ་རྐྱེན་ལ་བརྟགས་པ་འམ། །ཆོས་མཆིས་མི་སྐྱེ་ཞེས་བགྱི་འམ། །མིང་ནི་དོན་མ་མཆིས་མི་རིགས། །རྣམ་པར་དབྱེ་ཞིང་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། དངོས་མེད་མི་སྐྱེ་མ་ཡིན་ཏེ། །རྐྱེན་ལ་བཏགས་པའང་མ་ཡིན་ནོ། །དངོས་པོ་ཡོད་པས་མིང་ཡོད་མིན། །མིང་ལ་དོན་མེད་པ་ཡང་མིན། །མུ་སྟེགས་ཅན་ནི་ཐམས་ཅད་དང་། །ཉན་ཐོས་དང་ནི་རང་རྒྱལ་དང་། །ས་བདུན་སྤྱོད་ཡུལ་མ་ཡིན་པ། །དེ་ནི་མི་སྐྱེ་མཚན་ཉིད་དོ། །རྒྱུ་དང་རྐྱེན་རྣམས་ཡོངས་སྤངས་ཤིང་། །བྱ་བ་ཐམས་ཅད་ཡོངས་བྲལ་ཏེ། །ཤིན་ཏུ་ཕྲ་བའི་སེམས་ཅན་གནས། །མཚན་ཉིད་མཚན་གཞི་ཉིད་སྤངས་ནས། །དེ་ལུས་རབ་ཏུ་གྱུར་པ་ནི། །སྐྱེ་བ་མེད་པར་ངས་བཤད་དོ། །ཕྱི་རོལ་དངོས་པོ་དངོས་མེད་མིན། །སེམས་ཅན་ཡོངས་སུ་གཟུང་བ་མེད། །ལྟ་བ་ཐམས་ཅད་རབ་སྤངས་པ། །སྐྱེ་བ་མེད་པར་ངས་བཤད་དོ། །འདི་ལྟར་རང་བཞིན་མེད་པ་དང་། །སྟོང་པ་ལ་སོགས་དབྱེ་བར་བྱ། །སྟོང་ཕྱིར་སྟོང་ཞེས་བཤད་པ་མིན། །སྐྱེ་བ་མེད་ཕྱིར་སྟོང་ཞེས་བཤད། །རྒྱུ་རྐྱེན་གྲངས་ནི་འདུས་པ་ལས། །སྐྱེ་དང་འཇིག་པ་ཡོད་པར་གྱུར། །རྒྱུ་རྐྱེན་གྲངས་ལས་ལོགས་ཤིག་ན། །སྐྱེ་བ་དང་ནི་འཇིག་པ་མེད། །རྒྱུ་རྐྱེན་གྲངས་ལས་ལོགས་ཤིག་ན། །དངོས་པོ་ཐ་དད་ཡོད་མ་ཡིན། །གཅིག་དང་ཐ་དད་ཅེས་བྱ་བ། །མུ་སྟེགས་རྣམ་པར་རྟོག་པ་ཡིན། །ཡོད་མེད་དངོས་པོ་མི་སྐྱེ་སྟེ། །ཡོད་པ་མ་ཡིན་མེད་པའང་མིན། །གྲངས་འགྱུར་བ་ནི་མ་གཏོགས་པར། །གང་ཡང་དམིགས་པར་མི་འགྱུར་རོ། །ཀུན་རྫོབ་ཙམ་དུ་གྲངས་ཡོད་པས། །ཕན་ཚུན་དུ་ནི་འབྲེལ་པར་བྱེད། །རྒྱུ་རྐྱེན་འབྲེལ་ལས་ལོགས་ཤིག་ན། །སྐྱེ་བའི་དོན་ནི་མི་
རིགས་སོ། །སྐྱེ་བ་མེད་པས་དངོས་མི་འགྱུར། །མུ་སྟེགས་ཅན་གྱི་སྐྱོན་རྣམས་སྤངས། །རྐྱེན་གྱི་འབྲེལ་པ་ཙམ་བཤད་དེ། །བྱིས་པ་རྣམས་ཀྱིས་མི་རིག་གོ །རྐྱེན་གྱི་འབྲེལ་ལས་ལོགས་ཤིག་ན། །དངོས་པོ་སྐྱེ་བ་ཡོད་ཅེས་པ། དེ་ནི་རྒྱུ་མེད་སྨྲ་བ་སྟེ། །འབྲེལ་པའི་དོན་ནི་འཇིག་པར་བྱེད། །མར་མེའི་གཟུགས་རྣམས་སྣང་བྱེད་ལྟར། །འབྲེལ་པ་སྣང་བའང་དེ་བཞིན་ན། །དེ་ནི་འབྲེལ་ལས་ལོགས་ཤིག་ན། །དངོས་པོ་རྣམས་ནི་ཡོད་པའི་རིགས། །དངོས་པོ་མེད་པ་སྐྱེ་མེད་པས། །ནམ་མཁའི་རང་བཞིན་ལྟ་བུའོ། །འབྲེལ་པ་དག་ལས་ལོག་གྱུར་ན། །བློ་ཡིས་རྟོག་པར་བྱ་བ་མེད། །གཞན་ཡང་སྐྱེ་བ་མེད་ཡོད་དེ། །འཕགས་པས་ཐོབ་པའི་ཆོས་ཉིད་དོ། །གང་དེའི་སྐྱེ་བ་མི་འབྱུང་བ། །དེ་ནི་མི་སྐྱེ་བཟོད་པ་ཡིན། །ནམ་ཞིག་འཇིག་རྟེན་འདི་དག་ཀུན། །འབྲེལ་པ་ཙམ་དུ་རབ་རྟོག་ན། །ཐམས་ཅད་འབྲེལ་པ་ཡོངས་སྤངས་ནས། །དེ་ནས་ཏིང་འཛིན་འཐོབ་པར་འགྱུར། །མི་ཤེས་སྲེད་པ་ལས་ལ་སོགས། །དེ་ནི་ནང་གི་འབྲེལ་པ་ཡིན། །མི་ཤེས་འཇིམ་གོང་འཁོར་ལོ་དང་། །ས་བོན་ལ་སོགས་ཕྱི་རོལ་ཡིན། །གལ་ཏེ་དངོས་པོ་གཞན་ཡོད་དེ། །རྒྱུ་དང་རྐྱེན་ལས་སྐྱེ་ཞེ་ན། །དེ་ནི་འབྲེལ་པའི་དོན་མིན་པས། །དེ་ཡང་འགྲུབ་པར་མི་འགྱུར་རོ། །གལ་ཏེ་སྐྱེ་བ་རང་བཞིན་མེད། །དེ་ནི་སུ་ཡི་འབྲེལ་པར་འགྱུར། །ཕན་ཚུན་དུ་ནི་བསྐྱེད་པའི་ཕྱིར། །རྒྱུ་རྐྱེན་དོན་དུ་ཤེས་པར་བྱ། །སྲ་གཤེར་དྲོད་དང་གཡོ་བའི་ཆོས། །བྱིས་པས་རྣམ་པར་བརྟགས་པ་སྟེ། །གྲངས་ལས་མ་གཏོགས་ཆོས་གཞན་མེད། །དེའི་ཕྱིར་དངོས་པོ་མེད་པར་བཤད། །སྨན་པས་ནད་རྣམས་གསོ་བ་དག །བསྟན་བཅོས་ཐ་དད་མེད་ཀྱང་ནི། །ནད་ནི་ཐ་དད་བྱེ་བྲག་གིས། །གཉེན་པོ་སྣ་ཚོགས་བཤད་པ་ལྟར། །ང་ཡང་སེམས་ཅན་དེ་དག་གི། །ཉོན་མོངས་ནད་རྣམས་གཞིག་པའི་ཕྱིར། །དབང་པོ་དག་ནི་རབ་ཤེས་ནས། །དེ་ལ་སྒྲོལ་བའི་སྒོ་བཤད་དོ། །ཉོན་མོངས་དབང་པོ་ཐ་དད་པས། །ཆོས་ནི་སྣ་ཚོགས་ཡོད་མ་ཡིན། །ཐེག་གཅིག་འབའ་ཞིག་ཆོས་སྟོན་པ། །དེ་ནི་ཐེག་པ་ཆེན་པོ་ཡིན། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མུ་སྟེགས་ཅན་ཐམས་ཅད་ཀྱང་མི་རྟག་པ་ཉིད་དོ་ཞེས་རྣམ་པར་རྟོག་པར་བགྱིད། བཅོམ་ལྡན་འདས་ཀྱིས་ཀྱང་
འདུ་བྱེད་ཐམས་ཅད་མི་རྟག་པས། །སྐྱེ་ཞིང་འཇིག་པའི་ཆོས་ཅན་ནོ་ཞེས་བཀའ་སྩལ་ན། འདིའི་དོན་ཇི་ལྟ་བུ་ལོག་པའམ། ཡང་དག་པ་ཞིག་ལགས། མི་རྟག་པ་ཉིད་ལ་ནི་རྣམ་པ་དུ་མཆིས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་མུ་སྟེགས་ཅན་རྣམས་ལ་ནི་མི་རྟག་པ་རྣམ་པ་བདུན་ཡོད་ཀྱི། ངའི་བསྟན་པ་ལ་ནི་མ་ཡིན་ནོ། །རྣམ་པ་བདུན་གང་ཞེ་ན། དེ་དག་ཁ་ཅིག་འདི་སྐད་དུ་མངོན་པར་འདུས་བྱས་ནས། ཡོངས་སུ་སྤངས་པ་ནི་མི་རྟག་པ་ཉིད་དོ་ཞེས་ཟེར་རོ། །ཁ་ཅིག་ནི་དབྱིབས་རྣམ་པར་འཇིག་པ་ནི་མི་རྟག་པ་ཉིད་དོ་ཞེས་ཟེར་རོ། །ཁ་ཅིག་ནི་གཟུགས་ཉིད་མི་རྟག་པ་ཉིད་དོ་ཞེས་ཟེར་རོ། །ཁ་ཅིག་ནི་གཟུགས་རྣམ་པར་འགྱུར་བའི་གནས་སྐབས་ནི་མི་རྟག་པ་ཉིད་ཅེས་བྱ་སྟེ། བར་ཆད་མེད་པར་རང་གི་ངང་གིས་འབྲེལ་ཞིང་འཇིག་པས། ཇི་ལྟར་འོ་མ་ལས་ཞོར་འགྱུར་བ་ལ་སོགས་པའི་བྱེ་བྲག་ཐ་དད་པ་མཐོང་བར་མི་ནུས་པ་དེ་བཞིན་དུ་དངོས་པོ་ཐམས་ཅད་ལ་ཡང་རྣམ་པར་འཇིག་པའི་མི་རྟག་པ་ཉིད་དུ་འཇུག་གོ་ཞེས་ཟེར་རོ། །ཁ་ཅིག་ནི་དངོས་པོ་མི་རྟག་པ་ཉིད་དོ་ཞེས་ཟེར་རོ། །ཁ་ཅིག་ནི་དངོས་པོའི་དངོས་པོ་མེད་པ་མི་རྟག་པ་ཉིད་དོ་ཞེས་ཟེར་རོ། །ཁ་ཅིག་ནི་ཆོས་ཐམས་ཅད་མི་སྐྱེ་བས་མི་རྟག་པ་ཉིད་དེ། ཆོས་ཐམས་ཅད་ཀྱི་ནང་དུ་འཇུག་པའོ་ཞེས་ཟེར་རོ། །དེ་ལ་བློ་གྲོས་ཆེན་པོ་དངོས་པོ་མེད་པ་མི་རྟག་པ་ཉིད་ཅེས་བྱ་བ་ནི་འདི་ལྟ་སྟེ། འབྱུང་བ་ཆེན་པོ་བཞི་དང་། འབྱུང་བ་ལས་གྱུར་པའི་རང་གི་མཚན་ཉིད་འཇིག་ཅིང་འབྱུང་བ་ཆེན་པོ་བཞིའི་རང་བཞིན་ནི་མི་དམིགས་པ་དང་མི་སྐྱེ་བའོ། །དེ་ལ་མི་སྐྱེ་བའི་མི་རྟག་པ་ཞེས་བྱ་བ་དེ་ནི་རྟག་པ་དང་། མི་རྟག་པ་ཡིན་པས་ཆོས་ཐམས་ཅད་ཡོད་པ་དང་མེད་པ་མི་སྐྱེ་བ་དང་། རྡུལ་ཕྲ་མོའི་བར་དུ་རབ་ཏུ་བཤིག་སྟེ། མི་མཐོང་བ་འདི་ནི་མི་སྐྱེ་བའི་དོན་ཡིན་གྱི་སྐྱེ་བ་ནི་མ་ཡིན་པས་འདི་ནི་མི་སྐྱེ་བའི་མི་རྟག་པ་ཉིད་ཀྱི་མཚན་ཉིད་ཡིན་ཏེ། འདི་ཁོང་དུ་མ་ཆུད་པ་ནི་མུ་སྟེགས་ཅན་རྣམས་ཀྱི་སྐྱེ་བ་མི་རྟག་པའི་དོན་དུ་ལྷུང་བར་འགྱུར་རོ། །བློ་གྲོས་ཆེན་པོ་དངོས་པོ་མི་རྟག་པ་ནི་རང་གིས་བློས་རྣམ་པར་བརྟགས་པ་སྟེ། རྟག་པ་དང་། མི་རྟག་པའི་དངོས་པོ་ནི་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། མི་རྟག་པ་ནི་རང་གི་ངོ་བོ་ཉིད་ཀྱིས་མི་འཇིག་
གོ །བློ་གྲོས་ཆེན་པོ་འདི་ནི་དངོས་པོ་ཐམས་ཅད་ཀྱི་དངོས་པོ་མེད་པའི་ཕྱིར་མི་རྟག་པའི་བྱ་བའོ། །མི་རྟག་པ་མ་གཏོགས་པར་གཞན་གང་ཡང་ཆོས་ཐམས་ཅད་ཀྱི་དངོས་པོ་དངོས་པོ་མེད་པར་བྱེད་པ་མི་དམིགས་ཏེ། ཇི་ལྟར་དབྱུག་པ་དང་། གྱོ་མོ་དང་། རྡོ་བས་དངོས་པོ་དག་བཅོམ་པར་བྱེད་པ་བཞིན་ནོ། །མངོན་སུམ་དུ་སོ་སོས་ཐ་མི་དད་པར་མཐོང་བས་མི་རྟག་པ་ཉིད་དངོས་པོའི་བྱ་བ་ཡིན་གྱི། བྱེད་པ་དང་བྱ་བ་བྱེ་བྲག་ཡོད་པ་ནི་མ་ཡིན་ཏེ། འདི་ནི་མི་རྟག་པ་ཉིད་དོ། །འདི་ནི་བྱ་བའོ་ཞེས་བྱ་བའི་བྱེ་བྲག་མེད་པའི་ཕྱིར་རོ། །བྱེད་པ་དང་བྱ་བ་ཐ་མི་དད་ན་ནི་དངོས་པོ་ཐམས་ཅད་རྟག་ཅིང་རྒྱུའི་ངོ་བོ་ཉིད་མེད་པར་འགྱུར་རོ། །བློ་གྲོས་ཆེན་པོ་དངོས་པོ་ཐམས་ཅད་ཀྱི་ངོ་བོ་ཉིད་མེད་པ་ནི་རྒྱུ་ཡོད་དེ། བྱིས་པ་སོ་སོའི་སྐྱེ་བོ་རྣམས་ཀྱིས་ཤེས་པར་བྱ་བ་མ་ཡིན་ནོ། །རྒྱུ་མ་ཡིན་ན་མི་འདྲ་བའི་དངོས་པོ་སྐྱེད་པར་འགྱུར་རོ། །ཅི་སྟེ་སྐྱེད་ན་ནི་དངོས་པོ་ཐམས་ཅད་མི་རྟག་པར་ཡང་འགྱུར་ཞིང་། །དངོས་པོ་མི་འདྲ་བ་ཡང་ཡིན་པས་བྱེད་པ་དང་བྱ་བ་ཡང་བྱེ་བྲག་མེད་པར་ཡང་འགྱུར་ལ། ཐམས་ཅད་ཀྱིས་བྱེ་བྲག་ཡོད་པར་ཡང་མཐོང་བར་འགྱུར་རོ། །གལ་ཏེ་ངོ་བོ་ཉིད་མི་རྟག་པ་ཉིད་ཡིན་ན་ནི་བྱ་བའི་རྒྱུའི་ངོ་བོ་ཉིད་ཀྱི་མཚན་ཉིད་དུ་ལྷུང་བར་གྱུར་ན་ནི་དངོས་པོ་ཐམས་ཅད་ཡོངས་སུ་རྫོགས་པར་མི་འགྱུར་རོ། །དངོས་པོ་ཐམས་ཅད་བྱེད་པའི་རྒྱུའི་མཚན་ཉིད་དུ་ལྷུང་ན་ནི་མི་རྟག་པ་བདག་ཉིད་མི་རྟག་པར་འགྱུར་རོ། །མི་རྟག་པ་ཉིད་མི་རྟག་པའི་ཕྱིར་དངོས་པོ་ཐམས་ཅད་མི་རྟག་པར་མི་འགྱུར་ཏེ་རྟག་པ་ཉིད་དུ་འགྱུར་རོ། །གལ་ཏེ་མི་རྟག་པ་དངོས་པོ་ཐམས་ཅད་ཀྱི་ནང་དུ་སོང་བ་ཡིན་ན་ནི་དུས་གསུམ་དུ་ལྷུང་བར་འགྱུར་ཏེ། གང་འདས་པའི་གཟུགས་དེ་ནི་ཞིག་པ་དང་ལྡན་པའོ། །གང་མ་འོངས་པ་ནི་མ་སྐྱེས་པ་སྟེ། གཟུགས་མ་སྐྱེས་པའི་ཕྱིར་རོ། །ད་ལྟར་གྱི་གཟུགས་ནི་འཇིག་པའི་མཚན་ཉིད་དང་ལྡན་པའོ། །དེ་ལ་གཟུགས་ནི་འབྱུང་བ་ཆེན་པོ་རྣམས་བསགས་པའི་བྱེ་བྲག་གོ །འབྱུང་བ་ཆེན་པོ་དག་དང་། འབྱུང་བ་ལས་གྱུར་པའི་གཟུགས་རྣམས་ཀྱི་རང་བཞིན་ནི་མི་འཇིག་སྟེ། ཐ་དད་པ་དང་། ཐ་དད་པ་མ་ཡིན་པ་སྤངས་པའི་ཕྱིར་རོ་ཞེས་མུ་སྟེགས་ཅན་ཐམས་ཅད་འབྱུང་བ་ཆེན་པོ་རྣམས་མི་འཇིག་པར་རྟོག་གོ །བློ་གྲོས་ཆེན་པོ་སྲིད་པ་གསུམ་པོ་ཐམས་ཅད་
འབྱུང་བ་དང་འབྱུང་བ་ལས་གྱུར་པའི་གཟུགས་གནས་པ་རྣམས་ནི་སྐྱེ་བ་དང་འཇིག་པ་ཡོད་པར་ཤེས་ན། འབྱུང་བ་ཆེན་པོ་དང་འབྱུང་བ་ལས་གྱུར་པའི་གཟུགས་ལས་ལོགས་ཤིག་ན། མུ་སྟེགས་ཅན་རྣམས་ཀྱིས་གང་ལ་བསམས་ནས་མི་རྟག་པ་ཞེས་རྟོག་སྟེ། འབྱུང་བ་ཆེན་པོ་བཞི་མི་སྐྱེ་བ་དང་། རང་བཞིན་གྱི་མཚན་ཉིད་མི་འཇིག་པའི་ཕྱིར་རོ། །དེ་ལ་དང་པོ་རྩོམ་པ་ཡོངས་སུ་སྤངས་པའི་མི་རྟག་པ་ཉིད་ཅེས་བྱ་བ་ནི་འབྱུང་བ་ཆེན་པོ་བཞི་ཡང་མ་ཡིན་པ་དང་། གཞན་ཡང་ཐ་དད་པའི་འབྱུང་བ་ཆེན་པོ་བཞི་དང་། སོ་སོ་ཐ་དད་པའི་མཚན་ཉིད་དང་། རང་གི་མཚན་ཉིད་ཀྱི་ཕྱིར་རོ། །བྱེ་བྲག་མི་དམིགས་པ་དང་། དེའི་བྱེ་བྲག་མེད་པ་དང་། དེ་ལ་སོགས་པས་ཡང་མི་རྩོམ་པ་དང་། སྦྱོར་བ་རྣམ་པ་གཉིས་པ་མི་རྩོམ་པ་ནི་མི་རྟག་པ་ཉིད་ཤེས་པར་བྱའོ། །དེ་ལ་དབྱིབས་རྣམ་པར་འཇིག་པའི་མི་རྟག་པ་ཞེས་བྱ་བ་ནི་འདི་ལྟ་སྟེ། འབྱུང་བ་ཆེན་པོ་བཞི་དང་། རྒྱུར་བྱས་པའི་གཟུགས་རྣམས་ཀྱི་མི་འཇིག་པ་ནི་མཐར་ཕྱིན་པའི་བར་དུ་མི་འཇིག་གོ་ཞེས་ཟེར་ལ། བློ་གྲོས་ཆེན་པོ་མཐར་ཕྱིན་པ་ནི་རྡུལ་ཕྲ་མོའི་བར་དུ་རབ་ཏུ་ཕྱེ་སྟེ། འཇིག་པ་ལས་སོ་སོར་བརྟགས་ན་འབྱུང་བ་ཆེན་པོ་བཞི་དང་། རྒྱུར་བྱས་པའི་གཟུགས་རྣམས་ཐ་དད་པར་མཐོང་བའི་དབྱིབས་དང་རིང་ཐུང་མི་དམིགས་ཏེ། འབྱུང་བ་ཆེན་པོ་བཞི་ནི་མ་ཡིན་པས་འབྱུང་བ་ཆེན་པོ་བཞི་མི་འཇིག་གི། དབྱིབས་རྣམ་པར་འཇིག་པར་ལྟ་བས་གྲངས་ཅན་གྱི་སྨྲ་བར་ལྟུང་བ་ཡིན་ནོ། །དེ་ལ་གཟུགས་ཉིད་མི་རྟག་པ་ཉིད་ཅེས་བྱ་བ་ནི་འདི་ལྟ་སྟེ། གཟུགས་ཉིད་མི་རྟག་པ་ཉིད་ཡིན་པས་དབྱིབས་དེ་དག་མི་རྟག་པ་ཉིད་དེ་འབྱུང་བ་ཆེན་པོ་རྣམས་ནི་མ་ཡིན་ནོ། །གལ་ཏེ་འབྱུང་བ་བཞི་པོ་རྣམས་མི་རྟག་པ་ཉིད་ཡིན་ན་ནི་འཇིག་རྟེན་གྱི་གྲངས་སུ་བརྗོད་པ་མ་ཡིན་ནོ། །འཇིག་རྟེན་གྱི་བརྗོད་པའི་དངོས་པོ་མེད་ན་ནི་འཇིག་རྟེན་རྒྱང་པན་པའི་ལྟ་བར་ལྟུང་བར་འགྱུར་ཏེ། དངོས་པོ་ཐམས་ཅད་བརྗོད་པའི་ཚིག་ཙམ་དུ་མཐོང་ཞིང་རང་གི་མཚན་ཉིད་སྐྱེ་བར་མི་མཐོང་བའི་ཕྱིར་རོ། །དེ་ལ་རྣམ་པར་འགྱུར་བའི་མི་རྟག་པ་ཞེས་བྱ་བ་ནི་འདི་ལྟར་གཟུགས་དངོས་པོ་གཞན་དུ་འགྱུར་བར་སྣང་བ་སྟེ། འབྱུང་བ་ཆེན་པོ་རྣམས་ནི་མ་ཡིན་ནོ། །ཇི་ལྟར་གསེར་ལས་རྒྱུན་དུ་བྱས་པ་རྣམས་འགྱུར་བར་སྣང་ཡང་
གསེར་གྱི་རང་བཞིན་འཇིག་པ་མ་ཡིན་གྱི། རྒྱན་གྱི་དབྱིབས་ལ་འཇིག་པ་ཡོད་པ་དེ་བཞིན་དུ་དངོས་པོ་གཞན་རྣམ་པར་འགྱུར་བ་ལ་སོགས་པ་ཡང་དེ་བཞིན་ནོ་ཞེས་དེ་ལ་སོགས་པའི་རྣམ་པས་མུ་སྟེགས་ཅན་རྣམས་མི་རྟག་པའི་ལྟ་བར་རྣམ་པར་རྟོག་གོ །འདི་ལྟར་མེས་འབྱུང་བ་ཆེན་པོ་རྣམས་སྲེགས་པའི་ཚེ་རང་གི་མཚན་ཉིད་ལ་ནི་མི་སྲེག་གོ །ཅི་སྟེ་སོ་སོ་ནས་རང་གི་མཚན་ཉིད་གཅིག་གིས་གཅིག་འཇིག་པར་བྱེད་ན་ནི་འབྱུང་བ་དག་རྒྱུར་བྱས་པའི་གཟུགས་རྣམས་འཆད་པར་འགྱུར་བའི་རིགས་སོ། །བློ་གྲོས་ཆེན་པོ་ངའི་ཆོས་ནི་བྱུང་བ་ཉིད་ན་རྟག་པ་ཡང་མ་ཡིན། མི་རྟག་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཕྱི་རོལ་གྱི་དངོས་པོ་མ་ངེས་པའི་ཕྱིར་སྲིད་པ་གསུམ་སེམས་ཙམ་དུ་བསྟན་གྱི། མཚན་ཉིད་སྣ་ཚོགས་དང་། སྐྱེ་བ་དང་། འཇིག་པ་ཡོད་པར་ནི་མ་བསྟན་ཏོ། །འབྱུང་བ་ཆེན་པོ་འདུས་པའི་བྱེ་བྲག་དང་། འབྱུང་བ་དང་འབྱུང་བ་ལས་གྱུར་པའི་ཕྱིར་རྣམ་པ་གཉིས་ཀྱི་དངོས་པོ་གཟུང་བ་དང་འཛིན་པར་རྣམ་པར་རྟོག་པར་འགྱུར་བ་དང་། རྣམ་པར་རྟོག་པ་གཉིས་ཡོངས་སུ་ཤེས་པ་དང་། ཕྱི་རོལ་གྱི་དངོས་པོ་དང་དངོས་པོ་མེད་པར་ལྟ་བ་གཉིས་དང་བྲལ་བ་དང་། རང་གི་སེམས་སྣང་བ་ཙམ་དུ་ཁོང་དུ་ཆུད་ཅིང་རྣམ་པར་རྟོག་པའི་བསམས་པའི་མངོན་པར་འདུ་བྱེད་པ་ལས་སྐྱེའི། མངོན་པར་འདུས་མ་བྱས་པ་ནི་མ་ཡིན་ནོ། །ཞེས་སེམས་དངོས་པོ་དང་དངོས་པོ་མེད་པའི་རྣམ་པར་རྟོག་པ་དང་བྲལ་བས་ན་འཇིག་རྟེན་པ་དང་། འཇིག་རྟེན་ལས་འདས་པ་དང་། འཇིག་རྟེན་ལས་འདས་པ་མཆོག་གི་ཆོས་ཐམས་ཅད་ནི་རྟག་པ་ཡང་མ་ཡིན། མི་རྟག་པ་ཉིད་ཀྱང་མ་ཡིན་ནོ། །རང་གི་སེམས་སྣང་བ་ཙམ་དུ་ཁོང་དུ་མ་ཆུད་པས་མཐའ་གཉིས་ཀྱི་ལྟ་བ་ངན་པའི་རྒྱུན་དུ་ལྷུང་བར་འགྱུར་ཏེ། མུ་སྟེགས་ཅན་ཐམས་ཅད་ཀྱིས་རང་གི་རྣམ་པར་རྟོག་པ་ཁོང་དུ་མི་ཆུད་དོ། །སོ་སོའི་སྐྱེ་བོ་དེ་དག་ལ་གཞི་ཅི་ཡང་མེད་པས་འདི་ལྟར་འཇིག་རྟེན་པ་དང་། འཇིག་རྟེན་ལས་འདས་པ་དང་། འཇིག་རྟེན་ལས་འདས་པ་མཆོག་གི་ཆོས་ཚིག་གི་རྣམ་པར་རྟོག་པ་ལས་སྐྱེ་བར་བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་དུ་ཆུད་པ་མ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །དང་པོ་
བརྩམས་ནས་རབ་སྤངས་ཤིང་། །དབྱིབས་དང་རྣམ་པ་གཞན་འགྱུར་དང་། །དངོས་པོ་གཟུགས་ནི་མི་རྟག་པ། །མུ་སྟེགས་བླུན་པོས་རྟོག་པར་བྱེད། །དངོས་པོ་རྣམས་ལ་འཇིག་པ་མེད། །འབྱུང་བ་འབྱུང་བའི་རང་བཞིན་གནས། །མུ་སྟེགས་མི་རྟག་འདུ་ཤེས་པ། །ལྟ་བ་སྣ་ཚོགས་བྱིང་བ་འགྱུར། །མུ་སྟེགས་ཅན་ནི་དེ་དག་ལ། །སྐྱེ་དང་འཇིག་པ་གང་ཡང་མེད། །འབྱུང་བ་འབྱུང་བའི་རང་བཞིན་རྟག །ཇི་སྐད་མི་རྟག་ཉིད་དུ་རྟོག །ཐམས་ཅད་སེམས་ཙམ་སྣང་བ་སྟེ། །རྣམ་པ་གཉིས་སུ་སེམས་ཀྱང་འཇུག །གཟུང་བ་དང་ནི་འཛིན་པའོ། །བདག་དང་བདག་གི་ཡོད་མ་ཡིན། །ཚངས་པ་སྡོང་པོ་རྩ་བ་ཡིན། །ཡལ་ག་ལོ་མ་ཀུན་དུ་ཁྱབ། །འདི་སྐད་དུ་ནི་ངས་བཤད་དེ། །དེ་དག་གི་ནི་སེམས་ཙམ་ཡིན། །དེ་ནས་ཡང་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱིས་འགོག་པའི་སྙོམས་པར་འཇུག་པའི་གོ་རིམས་ཀྱི་མཚམས་སྦྱོར་བའི་མཚན་ཉིད་བཤད་དུ་གསོལ། གལ་ཏེ་འགོག་པའི་སྙོམས་པར་འཇུག་པའི་གོ་རིམས་ཀྱི་མཚམས་སྦྱོར་བའི་མཚན་ཉིད་ལ་མཁས་པར་གྱུར་ན། བདག་དང་བྱང་ཆུབ་སེམས་དཔའ་གཞན་རྣམས་ཀྱང་འགོག་པའི་སྙོམས་པར་འཇུག་པའི་བདེ་བའི་སྒོ་སྤང་བར་མི་འགྱུར་ཞིང་། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་གྱི་རྨོངས་པར་ལྟུང་བར་མི་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་བཅོམ་ལྡན་འདས་བཤད་དུ་གསོལ། ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ས་དྲུག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དང་། ཉན་ཐོས་དང་། རང་སངས་རྒྱས་རྣམས་ཀྱིས་སྙོམས་པར་འཇུག་པ་སྐྱེད་པར་བྱེད་ལ། ས་བདུན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་ཀྱི་སྐད་ཅིག་རེ་རེ་ལ་སྙོམས་པར་འཇུག་སྟེ། དངོས་པོ་ཐམས་ཅད་ཀྱི་རང་བཞིན་གྱི་མཚན་ཉིད་ཡོངས་སུ་སྤངས་པས་
སྙོམས་པར་འཇུག་གི། ཉན་ཐོས་དང་། རང་སངས་རྒྱས་རྣམས་ནི་མ་ཡིན་ཏེ། ཉན་ཐོས་དང་། རང་སངས་རྒྱས་རྣམས་ནི་མངོན་པར་འདུ་བྱེད་པའི་བློ་ཅན་གཟུང་བ་དང་། འཛིན་པའི་མཚན་ཉིད་དུ་ལྷུང་བས་འགོག་པའི་སྙོམས་པར་འཇུག་གོ །དེ་བས་ན་ས་བདུན་པ་ནི་ཡིད་ལ་བྱེད་པས་སྙོམས་པར་འཇུག་པ་མ་ཡིན་ཏེ། ཆོས་ཐམས་ཅད་བྱེ་བྲག་མེད་པའི་མཚན་ཉིད་ཐོབ་པས་རིམ་གྱིས་མཚན་ཉིད་ཀྱི་དངོས་པོ་སྣ་ཚོགས་ཐོབ་པ་ནི་མ་ཡིན་ནོ། །དགེ་བ་དང་མི་དགེ་བའི་ཆོས་ཐམས་ཅད་ཀྱི་རང་གི་མཚན་ཉིད་ཁོང་དུ་ཆུད་དེ། སྙོམས་པར་འཇུག་པས་དེའི་ཕྱིར་ས་བདུན་པ་ལ་དགེ་བའི་སེམས་ཀྱིས་སྙོམས་པར་འཇུག་པ་མེད་དོ། །བློ་གྲོས་ཆེན་པོ་ས་བརྒྱད་པའི་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་རྣམས་ཀྱི་སེམས་དང་། ཡིད་དང་། ཡིད་ཀྱི་རྣམ་པར་ཤེས་པའི་རྣམ་པར་རྟོག་པ་དང་། འདུ་ཤེས་ལྡོག་པར་འགྱུར་རོ། །ས་དང་པོ་ནས་ས་བདུན་པའི་བར་གྱི་བྱང་ཆུབ་སེམས་དཔའ་དེ་དག་ཁམས་གསུམ་པ་འདི་ནི་སེམས་དང་ཡིད་དང་། ཡིད་ཀྱི་རྣམ་པར་ཤེས་པ་ཙམ་མོ་ཞེས་སོ་སོར་རབ་ཏུ་རྟོག་སྟེ། བདག་དང་བདག་གི་དང་བྲལ་བ། རང་གི་རྣམ་པར་རྟོག་པའི་སྤྱོད་པ་ཅན། ཕྱི་རོལ་གྱི་དངོས་པོ་སྣ་ཚོགས་ཀྱི་མཚན་ཉིད་དུ་ལྟུང་བ། བྱིས་པ་སོ་སོའི་སྐྱེ་བོ་རྣམས་ཀྱི་རང་གི་མཚན་ཉིད་གཟུང་བ་དང་། འཛིན་པའི་དངོས་པོ་རྣམ་པ་གཉིས་སུ་གྱུར་པས་མི་ཤེས་པའི་རྗེས་སུ་སོང་བ། ཐོག་མ་མེད་པའི་དུས་ནས་རྣམ་པར་སྤྲོས་པའི་གནས་ངན་ལེན་གྱི་བག་ཆགས་ཀྱིས་ཡོངས་སུ་བསྒོས་པ་རྣམས་ཁོང་དུ་མི་ཆུད་དོ། །བློ་གྲོས་ཆེན་པོ་ས་བརྒྱད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དང་། ཉན་ཐོས་དང་། རང་སངས་རྒྱས་རྣམས་ཀྱིས་མྱ་ངན་ལས་འདས་པ་མཚུངས་ཀྱང་བྱང་ཆུབ་སེམས་དཔའ་ནི་ཏིང་ངེ་འཛིན་བློས་ཡོངས་སུ་བཟུང་བས། དེའི་ཕྱིར་ཏིང་ངེ་འཛིན་གྱི་སྒོའི་བདེ་བས་ཡོངས་སུ་མྱ་ངན་ལས་མི་འདའོ། །གལ་ཏེ་ཡོངས་སུ་མ་བཟུང་དུ་ཟིན་ན་ནི་དེ་བཞིན་གཤེགས་པའི་ས་ཡོངས་སུ་རྫོགས་པར་མི་འགྱུར་ཞིང་སེམས་ཅན་གྱི་བྱ་བ་ཐམས་ཅད་ཡོངས་སུ་སྤང་བར་འགྱུར་ལ། དེ་བཞིན་གཤེགས་པའི་རིགས་ཀྱི་གདུང་ཡང་ཆད་པར་འགྱུར་བས་ན། སངས་རྒྱས་བཅོམ་ལྡན་འདས་རྣམས་དེ་བཞིན་གཤེགས་པའི་བསམ་གྱིས་མི་ཁྱབ་པའི་
ཡོན་ཏན་དཔག་ཏུ་མེད་པ་སྟོན་ཏོ། །ཉན་ཐོས་དང་། རང་སངས་རྒྱས་རྣམས་ཏིང་ངེ་འཛིན་གྱི་སྒོའི་བདེ་བས་ཕྲོགས་པར་གྱུར་པའི་ཕྱིར་མྱ་ངན་ལས་འདས་པར་འདུ་ཤེས་སོ། །བློ་གྲོས་ཆེན་པོ་ངས་ས་བདུན་པའི་སེམས་དང་། ཡིད་དང་། ཡིད་ཀྱི་རྣམ་པར་ཤེས་པའི་མཚན་ཉིད་ལ་མཁས་ཤིང་གོམས་པར་བྱ་བ་དང་། བདག་དང་བདག་གིར་འཛིན་པ་དང་། གང་ཟག་དང་། ཆོས་བདག་མེད་པ་བསྡུ་བ་དང་། སྐྱེ་བ་དང་། འཇིག་པ་དང་། རང་དང་སྤྱིའི་མཚན་ཉིད་ལ་མཁས་ཤིང་གོམས་པར་བྱ་བ་དང་། སོ་སོ་ཡང་དག་པར་རིག་པ་བཞི་རྣམ་པར་གདོན་མི་ཟ་བའི་སྟོབས་ལ་མཁས་པ་དང་། ཏིང་ངེ་འཛིན་གྱི་སྒོ་དང་། སའི་གོ་རིམས་ཀྱི་མཚམས་སྦྱར་བ་དང་། བྱང་ཆུབ་ཀྱི་ཕྱོགས་ཀྱི་ཆོས་རྣམ་པར་དབྱེ་བར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རང་དང་སྤྱིའི་མཚན་ཉིད་མི་ཤེས་ཤིང་ས་བདུན་ལ་མི་མཁས་པ་དང་། མུ་སྟེགས་ཅན་གྱི་ལོག་པའི་ལམ་དུ་ལྷུང་བར་མི་བྱ་བའི་ཕྱིར་སའི་གོ་རིམས་ཀྱིས་རྣམ་པར་གཞག་པ་ཡིན་ཏེ། བློ་གྲོས་ཆེན་པོ་འདི་ལ་ཡང་དག་པར་གང་ཡང་སྐྱེ་བའམ། འཇིག་པ་ཞེས་བྱ་བ་མེད་དོ། །གཞན་དུ་ན་འདི་ལྟ་སྟེ། སའི་གོ་རིམས་ཀྱི་མཚམས་སྦྱར་བ་དང་། ཁམས་གསུམ་སྣ་ཚོགས་ཀྱི་སྤྱོད་པ་འདི་ནི་སེམས་སྣང་བ་ཙམ་སྟེ། བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་དུ་མི་ཆུད་དོ། །བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་དུ་མི་ཆུད་པས་འདི་ལྟ་སྟེ། ང་དང་སངས་རྒྱས་དེ་དག་གིས་སའི་གོ་རིམས་ཀྱི་མཚམས་སྦྱར་བ་དང་། ཁམས་གསུམ་གྱི་སྤྱོད་པ་སྣ་ཚོགས་བསྟན་ཏོ། །གཞན་ཡང་བློ་གྲོས་ཆེན་པོ་ཉན་ཐོས་དང་། རང་སངས་རྒྱས་རྣམས་ནི་བྱང་ཆུབ་སེམས་དཔའི་ས་བརྒྱད་ལ་འགོག་པའི་སྙོམས་པར་འཇུག་པའི་བདེ་བའི་མྱོས་པས་མྱོས་ཏེ། རང་གི་སེམས་སྣང་བ་ཙམ་ལ་མི་མཁས་པས་རང་དང་སྤྱིའི་མཚན་ཉིད་དུ་ལྷུང་བ། བག་ཆགས་ཀྱིས་བསྒྲིབས་པ། གང་ཟག་དང་ཆོས་བདག་མེད་པར་ལྷུང་བ་ཆོས་སུ་འཛིན་པར་ལྟ་བ། རྣམ་པར་རྟོག་པས་མྱ་ངན་ལས་འདས་པར་རབ་ཏུ་ཤེས་པར་གྱུར་ཏེ། རབ་ཏུ་དབེན་པ་ལ་མོས་པའི་བློ་ནི་མ་ཡིན་ནོ། །བློ་གྲོས་ཆེན་པོ་བྱང་ཆུབ་སེམས་དཔའི་ནི་སྒོའི་བདེ་བ་མཐོང་ཡང་སྔོན་གྱི་སྨོན་ལམ་དང་། སྙིང་བརྩེ་བ་དང་། སྙིང་རྗེ་ཆེན་པོ་དང་ལྡན་ཞིང་མཐར་ཐུག་པའི་གནས་བཅུ་རྣམ་
པར་དབྱེ་བ་ཤེས་པས་རྣམ་པར་རྟོག་པས་མྱ་ངན་ལས་འདས་པར་འདུ་ཤེས་པར་མི་འགྱུར་ཏེ། དེ་ལྟར་མྱ་ངན་ལས་འདས་པའི་རྣམ་པར་རྟོག་པ་མི་སྐྱེ་བའི་ཕྱིར། གཟུང་བ་དང་། འཛིན་པའི་རྣམ་པར་རྟོག་པ་ཡོངས་སུ་སྤོང་ཞིང་། ཆོས་ཐམས་ཅད་རང་གི་སེམས་སྣང་བ་ཙམ་དུ་ཁོང་དུ་ཆུད་པས་རྣམ་པར་རྟོག་པ་མི་སྐྱེ་སྟེ། སེམས་དང་ཡིད་དང་། ཡིད་ཀྱི་རྣམ་པར་ཤེས་པ་དང་། ཕྱི་རོལ་གྱི་དངོས་པོའི་རང་གི་ངོ་བོའི་མཚན་ཉིད་ལ་མངོན་པར་ཞེན་པའི་རྣམ་པར་རྟོག་པར་ཡང་མི་ལྟུང་ལ། སངས་རྒྱས་ཀྱི་ཆོས་ཀྱི་རྒྱུ་མི་སྐྱེད་པ་ཡང་མ་ཡིན་ཏེ། ཡེ་ཤེས་ཀྱི་རྗེས་སུ་སྐྱེ་བས་དེ་བཞིན་གཤེགས་པའི་རང་གིས་རིག་པའི་ས་འཐོབ་པར་འགྱུར་ཏེ། ཇི་ལྟར་སྐྱེས་བུའི་རྨི་ལམ་ན་ཆུ་བོ་རྒལ་བར་རྩོམ་པ་ཕ་རོལ་ཏུ་མ་ཕྱིན་པར་སད་ལ། སད་ནས་འདི་སྙམ་དུ་ཅི་འདི་ཡང་དག་པའམ། འོན་ཏེ་ཡང་དག་པ་མ་ཡིན་པ་ཞེས་རྟོག་པར་བྱེད་པ་དེ་ནི་ཡང་དག་པ་ཡང་མ་ཡིན། ལོག་པ་ཡང་མ་ཡིན་གྱི། གཞན་དུ་ན་ཐོག་མ་མེད་པའི་མཐོང་བ་དང་། ཐོས་པ་དང་། བྱེ་བྲག་ཕྱེད་པ་དང་། རྣམ་པར་རིག་པ་རྒྱུའི་འདུ་ཤེས་སྣ་ཚོགས་ཀྱི་བག་ཆགས་དང་། དབྱིབས་དང་། གནས་སྣ་ཚོགས་དང་། ཡོད་པ་དང་། མེད་པའི་མཚན་ཉིད་དུ་ལྷུང་བ་དང་། སེམས་དང་ཡིད་དང་། ཡིད་ཀྱི་རྣམ་པར་ཤེས་པའི་རྨི་ལམ་ལས་སྣང་ངོ་། །བློ་གྲོས་ཆེན་པོ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་བྱང་ཆུབ་སེམས་དཔའི་ས་བརྒྱད་པ་ལ་རྣམ་པར་རྟོག་པའི་མཚན་ཉིད་སྐྱེ་བར་མཐོང་བ་དང་། ས་དང་པོ་ནས་བརྩལ་བས་ས་བདུན་དུ་འཕོ་བ་དང་། ཆོས་ཐམས་ཅད་སྒྱུ་མ་ལ་སོགས་པ་དང་། མཚུངས་པར་མཐོང་བའི་སྦྱོར་བས་གཟུང་བ་དང་། འཛིན་པའི་སེམས་རྣམ་པར་རྟོག་པའི་སྤྱོད་པ་ལས་བཟླས་ཏེ། སངས་རྒྱས་ཀྱི་ཆོས་ཀྱི་སྦྱོར་བ་བྱས་ནས་ད་དུང་མ་ཐོབ་པ་ནི་ཐོབ་པར་བྱེད་དོ། །བློ་གྲོས་ཆེན་པོ་འདི་ནི་བྱང་ཆུབ་སེམས་དཔའ་རྣམས་ཀྱི་མྱ་ངན་ལས་འདས་པའི་སྦྱོར་བ་རྣམ་པར་མི་འཇིག་པ་ཡིན་ཏེ། སེམས་དང་ཡིད་དང་། ཡིད་ཀྱི་རྣམ་པར་ཤེས་པ་ཡོངས་སུ་སྤངས་ནས་མི་སྐྱེ་བའི་ཆོས་ལ་བཟོད་པ་འཐོབ་པར་འགྱུར་བའོ། །བློ་གྲོས་ཆེན་པོ་དོན་དམ་པ་ལ་ནི་གོ་རིམས་དང་མཚམས་སྦྱར་བ་མེད་དེ། སྣང་བ་མེད་པ་རྣམ་པར་རྟོག་པ་ལས་དབེན་པའི་ཆོས་བསྟན་པའོ། །དེ་ནས་བཅོམ་
ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །སེམས་ཙམ་དང་ནི་སྣང་མེད་དང་། །གནས་འདི་དང་ནི་སངས་རྒྱས་ས། །འདས་དང་མ་འོངས་ད་ལྟར་གྱི། །དུས་གསུམ་སངས་རྒྱས་རྣམས་ཀྱིས་བཤད། །སེམས་ཙམ་ས་ནི་བདུན་པ་ཡིན། །སྣང་བ་མེད་ནི་ས་བརྒྱད་པ། །ས་གཉིས་དག་ནི་གནས་ཞེས་བྱ། །སངས་རྒྱས་ས་ནི་མཆོག་ཡིན་ནོ། །རང་རིག་ཡེ་ཤེས་རྣམ་པར་དག །དེ་ནི་ང་ཡི་ས་ཡིན་ནོ། །དབང་ཕྱུག་དང་ནི་མཆོག་གི་གནས། །རྣམ་པར་བརྟག་ཅིང་རབ་བཀོད་པ། །གསལ་བྱེད་འབར་བའི་མེ་ལྟ་བུར། །འོད་ཟེར་ཀུན་དུ་ཁྱབ་པར་སྣང་། །འོད་ཟེར་འབར་བས་མིག་མི་ཉམས། །སྲིད་གསུམ་ཀུན་དུ་འདུལ་བར་བྱེད། །སྤྲུལ་པས་སྲིད་གསུམ་གནས་པར་སྟོན། །ཁ་ཅིག་སྔ་ནས་སྤྲུལ་པ་སྟེ། །དེར་ནི་ཐེག་པ་རྣམས་སྟོན་པ། །ཐམས་ཅད་དེ་བཞིན་གཤེགས་ཀྱི་ས། །ས་བཅུ་དེ་ནི་དང་པོ་ཡིན། །དང་པོ་པ་ནི་བརྒྱད་པ་ཡིན། །དགུ་པ་ཡང་ནི་བདུན་པ་སྟེ། །བདུན་པ་དེ་ཡང་བརྒྱད་པ་ཡིན། །གཉིས་པ་དེ་ནི་གསུམ་པ་ཡིན། །བཞི་པ་ཡང་ནི་ལྔ་པ་ཡིན། །གསུམ་པ་ཡང་ནི་དྲུག་ཡིན་ཏེ། །སྣང་བ་མེད་ལ་རིམ་ཅི་ཡོད།། །།འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས། བམ་པོ་བརྒྱད་པ་སྟེ་ཐ་མ། དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རྟག་པ་ཞིག་གམ། འོན་ཏེ་མི་རྟག་པ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རྟག་པ་ཡང་མ་ཡིན། མི་རྟག་པ་ཡང་མ་ཡིན་ཏེ། འདི་ལྟར་གཉི་ག་ཡང་ཉེས་པ་ཡོད་པའི་ཕྱིར་རོ། །གལ་ཏེ་རྟག་པར་གྱུར་ན་ནི་བྱེད་པའི་བདག་པོ་ཡོད་པའི་ཉེས་པར་འགྱུར་རོ། །མུ་སྟེགས་ཅན་དག་རྟག་པ་ནི་བྱེད་པ་པོས་བྱས་པ་མ་ཡིན་པའོ་ཞེས་ཟེར་ཏེ། དེ་བས་ན་དེ་བཞིན་གཤེགས་པ་ནི་རྟག་ཀྱང་རྟག་པ་མ་ཡིན་ཏེ། བྱས་པ་མ་ཡིན་པ་རྟག་པའི་ཉེས་པར་འགྱུར་བའི་ཕྱིར་རོ། །ཅི་སྟེ་དེ་བཞིན་གཤེགས་པ་མི་རྟག་པ་ཡིན་ན་ནི་བྱས་པ་ཡོད་པའི་མི་རྟག་པའི་ཉེས་པར་འགྱུར་ཏེ།
ཕུང་པོའི་མཚན་ཉིད་དང་། མཚན་ཉིད་ཀྱི་གཞིའི་དངོས་པོ་མེད་པས་ཕུང་པོ་ཞིག་པ་ལྟར་ཆད་པར་འགྱུར་བའི་རིགས་ན། དེ་བཞིན་གཤེགས་པ་ནི་ཆད་པར་མི་འགྱུར་རོ། །བློ་གྲོས་ཆེན་པོ་བྱས་པ་ཐམས་ཅད་མི་རྟག་ན་ནི་བུམ་པ་དང་སྣམ་བུ་ལ་སོགས་པ་བཞིན་དུ་ཐམས་ཅད་ཀྱང་མི་རྟག་པའི་ཉེས་པར་འགྱུར་བས། ཐམས་ཅད་མཁྱེན་པའི་ཚོགས་དང་། སྦྱོར་བ་རྣམས་དོན་མེད་པར་འགྱུར་ཏེ། འདི་ལྟར་བྱས་པའི་ཕྱིར་རོ། །བྱས་པ་ཐམས་ཅད་ཀྱང་དེ་བཞིན་གཤེགས་པ་ཡིན་པར་འགྱུར་ཏེ། བྱེ་བྲག་གི་རྒྱུའི་དངོས་པོ་མེད་པའི་ཕྱིར་རོ། །དེ་ལྟ་བས་ན་དེ་བཞིན་གཤེགས་པ་ནི་རྟག་པ་ཡང་མ་ཡིན། མི་རྟག་པ་ཡང་མ་ཡིན་ནོ། །གཞན་ཡང་བློ་གྲོས་ཆེན་པོ་དེ་བཞིན་གཤེགས་པ་ནི་ནམ་མཁའ་ལྟར་རྟག་པ་མ་ཡིན་ཏེ། ནམ་མཁའ་ལྟར་རྟག་པ་ཡིན་ན་ནི་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་ཚོགས་རྣམས་དོན་མེད་པའི་ཉེས་པར་འགྱུར་རོ། །བློ་གྲོས་ཆེན་པོ་དཔེར་ན་ནམ་མཁའ་ནི་རྟག་པ་ཡང་མ་ཡིན། མི་རྟག་པ་ཡང་མ་ཡིན་ཞིང་། རྟག་པ་དང་། མི་རྟག་པ་དང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། རྟག་པ་དང་མི་རྟག་པའི་ཉེས་པ་སྤངས་པའི་ཕྱིར། བརྗོད་པར་བྱ་བ་མ་ཡིན་ནོ། །དེའི་ཕྱིར་དེ་བཞིན་གཤེགས་པ་ནི་རྟག་པ་མ་ཡིན་ནོ། །གཞན་ཡང་བློ་གྲོས་ཆེན་པོ་གལ་ཏེ་དེ་བཞིན་གཤེགས་པ་སྐྱེ་བ་མེད་པའི་རྟག་པ་ཡིན་ན་ནི་རི་བོང་དང་རྟ་ལ་སོགས་པའི་རྭ་དང་མཚུངས་ཤིང་སྐྱེ་བ་མེད་པའི་རྟག་པར་འགྱུར་བའི་ཕྱིར། བསྒྲུབས་པ་རྣམས་དོན་མེད་པར་འགྱུར་ཏེ། སྐྱེ་བ་མེད་པའི་རྟག་པའི་ཉེས་པར་འགྱུར་བས་ན། དེ་བཞིན་གཤེགས་པ་ནི་རྟག་པ་མ་ཡིན་ནོ། །གཞན་ཡང་བློ་གྲོས་ཆེན་པོ་དངོས་པོ་གཞན་གྱིས་དེ་བཞིན་གཤེགས་པ་རྟག་པ་ཡིན་པར་ཤེས་པར་འགྱུར་བ་ཡང་ཡོད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། བར་ཆད་མེད་པས་མངོན་པར་རྟོགས་པའི་ཡེ་ཤེས་རྟག་པའི་ཕྱིར་དེ་བཞིན་གཤེགས་པ་རྟག་པའོ། །བློ་གྲོས་ཆེན་པོ་དེ་བཞིན་གཤེགས་པ་འཇིག་རྟེན་དུ་བྱུང་ཡང་རུང་། འཇིག་རྟེན་དུ་མ་བྱུང་ཡང་རུང་། ཆོས་ཉིད་ནི་ངེས་པར་གནས་པ་ཉིད་དེ། ཉན་ཐོས་དང་། རང་སངས་རྒྱས་དང་། དེ་བཞིན་གཤེགས་པ་རྣམས་ཀྱི་བར་ཆད་མེད་པའི་གནས་པ་ནི་ནམ་མཁའ་ལ་མི་གནས་ཏེ། བྱིས་པ་སོ་སོའི་སྐྱེ་བོ་རྣམས་ཀྱིས་ཁོང་དུ་ཆུད་པར་བྱ་བ་ཡང་མ་ཡིན་ནོ། །བློ་གྲོས་
ཆེན་པོ་དེ་བཞིན་གཤེགས་པ་རྣམས་ཀྱི་ཐུགས་སུ་ཆུད་པའི་ཡེ་ཤེས་ནི་ཤེས་རབ་ཀྱིས་ཡོངས་སུ་བསྒོས་པ་ཡིན་གྱི། བློ་གྲོས་ཆེན་པོ་དེ་བཞིན་གཤེགས་པ་ནི་སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་དང་། ཕུང་པོ་དང་། ཁམས་དང་། སྐྱེ་མཆེད་དེ་དག་གིས་ཡོངས་སུ་བསྒོས་པ་མ་ཡིན་ནོ། །བློ་གྲོས་ཆེན་པོ་སྲིད་པ་གསུམ་པོ་ཐམས་ཅད་ནི་ཡང་དག་པ་མ་ཡིན་པ་རྣམ་པར་རྟོག་པ་ལས་བྱུང་བ་ཡིན་གྱི། དེ་བཞིན་གཤེགས་པ་རྣམས་ནི་ཡང་དག་པ་མ་ཡིན་པ་རྣམ་པར་རྟོག་པ་ལས་བྱུང་བ་མ་ཡིན་ནོ། །བློ་གྲོས་ཆེན་པོ་ཆོས་གཉིས་ཡོད་པར་གྱུར་པའི་ཕྱིར་རྟག་པ་དང་མི་རྟག་པ་ཡོད་པར་འགྱུར་གྱི་གཉིས་སུ་མེད་པ་ལ་ནི་མ་ཡིན་ནོ། །གཉིས་སུ་མེད་པ་ནི་རབ་ཏུ་དབེན་པའོ། །ཆོས་ཐམས་ཅད་ནི་གཉིས་སུ་མེད་པ་དང་། མ་སྐྱེས་པའི་མཚན་ཉིད་ཡིན་པའི་ཕྱིར། དེ་བས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྟག་པ་ཡང་མ་ཡིན། མི་རྟག་པ་ཡང་མ་ཡིན་ནོ། །བློ་གྲོས་ཆེན་པོ་ཇི་ཙམ་དུ་ཚིག་གི་རྣམ་པར་རྟོག་པ་འཇུག་པ་དེ་ཙམ་དུ་རྟག་པ་དང་མི་རྟག་པའི་ཉེས་པར་འགྱུར་གྱི། རྣམ་པར་རྟོག་པའི་བློ་ཟད་པར་གྱུར་ན་ནི་བྱིས་པ་སོ་སོའི་སྐྱེ་བོ་རྣམས་ཀྱིས་རྟག་པ་དང་མི་རྟག་པར་ལྟ་བ་རབ་ཏུ་མ་ཞི་བ་ཡོངས་སུ་སྤོང་བར་འགྱུར་བས་བློ་དང་ལྡན་པ་རྣམས་ཀྱིས་རྟག་པ་དང་མི་རྟག་པ་དང་། རྟག་པ་དང་། མི་རྟག་པ་ཡང་མ་ཡིན་པའི་ཡོངས་སུ་བསྒོས་པ་རྣམས་ཤིན་ཏུ་སྤང་བར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཚོགས་རྣམས་དོན་མེད་གྱུར་ན་ནི། །རྟག་དང་མི་རྟག་ཉེས་པ་སྐྱེ། །རྣམ་པར་རྟོག་པའི་བློ་མེད་ན། །རྟག་དང་མི་རྟག་རབ་ཏུ་སྤོང་། །དམ་ནི་རབ་ཏུ་འཆའ་བ་ལས། །གུད་ན་འདྲེས་པའི་དོན་ཡོད་གྱུར། །རང་སེམས་ཙམ་དུ་མཉམ་རྟོགས་ན། །ཚིག་གི་བརྗོད་པ་དམིགས་སུ་མེད། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་ཡང་བདག་ལ་ཕུང་པོ་དང་། ཁམས་དང་། སྐྱེ་མཆེད་རྣམས་ཀྱི་སྐྱེ་བ་དང་འཇིག་པ་བཤད་དུ་གསོལ། དེ་དག་ལ་ནི་བདག་མ་མཆིས་ན་སུ་ཞིག་སྐྱེ་ཞིང་སུ་ཞིག་ལྡོག་པར་འགྱུར་ཏེ། བྱིས་པ་སོ་སོའི་སྐྱེ་བོ་རྣམས་ནི་སྐྱེ་བ་དང་འཇིག་པ་ལ་གནས་པས་སྡུག་
བསྔལ་ཟད་པར་འགྱུར་བ་ཁོང་དུ་མི་ཆུད་ཅིང་མྱ་ངན་ལས་འདས་པ་རབ་ཏུ་མི་རྟོགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ། །དེའི་ཕྱིར་ལེགས་པར་ཉོན་ཅིག་དང་ཁྱོད་ལ་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བློ་གྲོས་ཆེན་པོ་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པའི་སྙིང་པོ་དགེ་བ་དང་། མི་དགེ་བའི་རྒྱུར་གྱུར་པ་ནི་འགྲོ་བའི་སྐྱེ་བ་ཐམས་ཅད་དུ་ཁྱབ་པར་བྱེད་པས་གར་མཁན་བཞིན་དུ་འགྲོ་བ་རྣམས་རྣམ་པར་འགྱུར་བ་སྟོན་པར་བྱེད་པ། བདག་དང་བདག་གི་སྤངས་པ་དེ་ཁོང་དུ་མ་ཆུད་པའི་ཕྱིར་གསུམ་འདུས་པའི་རྐྱེན་གྱི་སྦྱོར་བ་ལས་སྐྱེ་བ་དང་། མུ་སྟེགས་ཅན་རྣམས་ཀྱིས་ཁོང་དུ་མ་ཆུད་པས་བྱེད་པ་པོར་མངོན་པར་ཞེན་ཏོ། །ཐོག་མ་མེད་པའི་དུས་ནས་རྣམ་པར་སྤྲོས་པའི་གནས་ངན་ལེན་གྱི་བག་ཆགས་ཀྱིས་ཡོངས་སུ་བསྒོས་པ་ནི་ཀུན་གཞི་རྣམ་པར་ཤེས་པ་ཞེས་བྱ་སྟེ། མ་རིག་པ་གནས་པའི་ས་རྣམ་པར་ཤེས་པ་བདུན་དང་ལྷན་ཅིག་བསྐྱེད་པ། རྒྱ་མཚོའི་རླབས་བཞིན་དུ་ལུས་རྟག་ཏུ་སྐྱེད་ཅིང་རྒྱུན་མི་འཆད་པ། རྟག་པ་དང་མི་རྟག་པའི་ཉེས་པ་དང་བྲལ་བ། བདག་ཏུ་སྨྲ་བ་ཡོངས་སུ་སྤངས་པ། རང་བཞིན་གྱིས་དྲི་མ་མེད་པ། མཐར་ཡོངས་སུ་དག་པའོ། །དེ་མ་ཡིན་པའི་རྣམ་པར་ཤེས་པ་རྣམས་སྐྱེ་བ་དང་། འཇིག་པ་ཡོད་པ་སྟེ། ཡིད་དང་ཡིད་ཀྱི་རྣམ་པར་ཤེས་པ་ལ་སོགས་པ་སྐད་ཅིག་བདུན་དང་བཅས་པ་ཡང་དག་པ་མ་ཡིན་པ་ཡོངས་སུ་རྟོག་པའི་རྒྱུས་ཡུལ་རྣམས་ཀྱི་དབྱིབས་དང་གནས་སྣ་ཚོགས་ལེན་པ། མིང་དང་རྒྱུ་མཚན་ལ་མངོན་པར་ཞེན་པ། རང་གི་སེམས་སྣང་བའི་གཟུགས་ཀྱི་མཚན་ཉིད་ཁོང་དུ་མ་ཆུད་པ། སྡུག་བསྔལ་དང་བདེ་བ་མ་རྟོགས་པས་རྣམ་པར་གྲོལ་བའི་གནས་སུ་ཕྱིན་པར་མི་འགྱུར་བ། མིང་དང་རྒྱུ་མཚན་གྱིས་ཀུན་ནས་དཀྲིས་པའི་འདོད་ཆགས་སྐྱེ་ལ་འདོད་ཆགས་སྐྱེས་ནས་རྒྱུ་དང་དམིགས་པར་བྱེད་དེ། ཚོར་བའི་དབང་པོ་དེ་དག་འགགས་ན་རིམ་གྱིས་མི་སྐྱེའོ་ཞེས་གཞན་དུ་རང་གི་སེམས་ཀྱི་རྣམ་པར་རྟོག་པས་སྡུག་བསྔལ་དང་། བདེ་བ་མ་ཤེས་པས་ཚོར་བ་དང་། འདུ་ཤེས་འགོག་པའི་སྙོམས་པར་འཇུག་པ་ལ་སྙོམས་པར་ཞུགས་ནས་བསམ་གཏན་བཞི་པ་ཐོབ་པ། ཡང་དག་པའི་བདེན་པ་དང་། རྣམ་པར་གྲོལ་
བ་ལ་མཁས་པའི་རྣལ་འབྱོར་པ་རྣམས་རྣམ་པར་གྲོལ་བའི་འདུ་ཤེས་སུ་བྱེད་དེ། རབ་ཏུ་མ་སྤངས་ཤིང་ཡོངས་སུ་མ་གྱུར་པ་ནི་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་ཞེས་བྱའོ། །རྣམ་པར་ཤེས་པ་བདུན་ནི་འཁོར་བར་འཇུག་ཅིང་འགག་པ་མེད་དེ། དེ་ཅིའི་ཕྱིར་ཞེ་ན། དེའི་རྒྱུ་དང་དམིགས་པ་ལས་རྣམ་པར་ཤེས་པ་རྣམས་རབ་ཏུ་སྐྱེ་བའི་ཕྱིར་རོ། །ཉན་ཐོས་དང་། རང་སངས་རྒྱས་ཀྱི་རྣལ་འབྱོར་པ་རྣམས་ཀྱི་སྤྱོད་ཡུལ་མ་ཡིན་པ། བདག་མེད་པ་མ་རྟོགས་པས་རང་དང་སྤྱིའི་མཚན་ཉིད་ཀྱིས་བསྡུས་པའི་ཕུང་པོ་དང་། ཁམས་དང་། སྐྱེ་མཆེད་རྣམས་སྐྱེད་པ། དེ་བཞིན་གཤེགས་པའི་སྙིང་པོ་མཐོང་བར་གྱུར་པ་ན། ཆོས་ལྔ་དང་། རང་བཞིན་དང་། གང་ཟག་དང་། ཆོས་བདག་མེད་པ་རྣམས་ལྡོག་པར་གྱུར་ཏེ། སའི་རིམ་པའི་མཚམས་སྦྱོར་བ་ཁྱད་པར་དུ་གྱུར་པས་གཞན་མུ་སྟེགས་ཅན་གྱི་ལྟ་བ་རྣམས་ཀྱིས་བསྐྱོད་པར་མི་ནུས་པ་ནི་བྱང་ཆུབ་སེམས་དཔའི་ས་མི་གཡོ་བ་ལ་རབ་ཏུ་གནས་པ་ཞེས་བྱའོ། །ཏིང་ངེ་འཛིན་གྱི་བདེ་བའི་སྒོའི་ལམ་བཅུ་རབ་ཏུ་འཐོབ་པར་འགྱུར་ཏེ། ཏིང་ངེ་འཛིན་བློས་ཡོངས་སུ་བཟུང་བས་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ལ་སོ་སོར་རབ་ཏུ་རྟོག་པ་དང་། རང་གི་སྨོན་ལམ་གྱིས་ཏིང་ངེ་འཛིན་གྱི་སྒོའི་བདེ་བ་མི་ལེན་ཅིང་ཡང་དག་པའི་མཐའ་ལ་མི་གནས་པར་འཕགས་པའི་སོ་སོ་རང་གིས་རིག་པར་འགྲོ་བ་དང་། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་ཐམས་ཅད་དང་ཐུན་མོང་མ་ཡིན་པའི་རྣལ་འབྱོར་གྱི་ལམ་འཕགས་པའི་རིགས་ཀྱི་ལམ་བཅུ་དང་། སྐུ་དང་། ཡེ་ཤེས་དང་། ཡིད་ལས་སྐྱེས་པ་དང་། ཏིང་ངེ་འཛིན་མངོན་པར་འདུ་བྱེད་པ་མེད་པ་རབ་ཏུ་འཐོབ་པར་འགྱུར་རོ། །དེ་ལྟ་བས་ན་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱད་པར་འདོད་པ་རྣམས་ཀྱིས་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་ཞེས་བྱ་བ་ཡོངས་སུ་སྦྱང་བ་བྱའོ། །བློ་གྲོས་ཆེན་པོ་གལ་ཏེ་ཀུན་གཞི་རྣམ་པར་ཤེས་པ་མེད་པ་ལ་དེ་བཞིན་གཤེགས་པའི་སྙིང་པོ་ཞེས་བྱ་བ་ནི་སྐྱེ་བ་དང་། འཇིག་པ་ཡང་མེད་པར་འགྱུར་ཏེ། བློ་གྲོས་ཆེན་པོ་འོན་ཀྱང་བྱིས་པ་དང་འཕགས་པ་རྣམས་ལ་སྐྱེ་བ་དང་འཇིག་པ་ཡོད་པས་རྣལ་འབྱོར་པ་རྣམས་འཕགས་པའི་སོ་སོ་རང་གིས་རིག་པ་ལ་འཇུག་ཅིང་མཐོང་བའི་ཆོས་ལ་བདེ་བར་གནས་པའི་སྦྱོར་བ་མི་གཏོང་ངོ་། །
བློ་གྲོས་ཆེན་པོ་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་འདི་ནི་རང་བཞིན་གྱིས་ཡོངས་སུ་དག་པ་ཡིན་མོད་ཀྱི། ཉན་ཐོས་དང་། རང་སངས་རྒྱས་རྟོག་པའི་ལྟ་བ་ཅན་ཐམས་ཅད་བློ་བུར་གྱི་ཉོན་མོངས་པས་བསྒྲིབས་པའི་ཕྱིར་ཡོངས་སུ་མ་དག་པ་མཐོང་གི། དེ་བཞིན་གཤེགས་པ་རྣམས་ནི་མ་ཡིན་ནོ། །བློ་གྲོས་ཆེན་པོ་དེ་བཞིན་གཤེགས་པ་ནི་མངོན་སུམ་གྱི་སྤྱོད་ཡུལ་ཅན་ཡིན་པས། དཔེར་ན་ལག་མཐིལ་གྱི་སྐྱུ་་རུ་རའི་འབྲས་བུ་བཞིན་དུ་གཟིགས་སོ། །བློ་གྲོས་ཆེན་པོ་ངས་དོན་འདི་རྫུ་འཕྲུལ་གྱི་མཐུས་རྣམ་པར་གཞག་པས་བཙུན་མོ་ཕྲེང་ལྡན་མ་དང་། གཞན་ཡང་ཤེས་རབ་རྣོ་ཞིང་ཡོངས་སུ་རྫོགས་པའི་བྱང་ཆུབ་སེམས་དཔའ་རྣམས་ཀྱི་ཆེད་དུ་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་ཞེས་བྱ་བ་རྣམ་པར་ཤེས་པ་བདུན་དང་ལྷན་ཅིག་སྐྱེ་བར་བསྟན་ཅིང་བཤད་དེ། ཉན་ཐོས་རྣམས་གང་ཟག་ལ་བདག་མེད་པར་མཐོང་བ་ལ་མངོན་པར་ཞེན་པའི་ཕྱིར་བཙུན་མོ་ཕྲེང་ལྡན་མ་སངས་རྒྱས་ཀྱི་བྱིན་གྱི་རླབས་ཀྱི་མཐུས་དེ་བཞིན་གཤེགས་པའི་སྤྱོད་ཡུལ་བཤད་དེ། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་རྣམས་ཀྱི་སྤྱོད་ཡུལ་ནི་མ་ཡིན་ནོ། །བློ་གྲོས་ཆེན་པོ་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་ནི་དེ་བཞིན་གཤེགས་པ་ཉག་གཅིག་དང་། གཞན་ཡང་ཤེས་རབ་རྣོ་ཞིང་དོན་ལ་རྟོན་པའི་བྱང་ཆུབ་སེམས་དཔའ་ཤེས་རབ་ཅན་རྣམས་ཀྱི་སྤྱོད་ཡུལ་ཡིན་ཏེ། དེ་ལྟ་བས་ན་བློ་གྲོས་ཆེན་པོ་ཁྱོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་གིས་དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་འདི་ལ་རབ་ཏུ་བརྩོན་ཞིང་བསླབ་པར་བྱ་སྟེ། ཐོས་པ་དང་། ཤེས་པ་ཙམ་གྱིས་ཆོག་པའི་འདུ་ཤེས་སུ་མི་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཟབ་མོ་དེ་བཞིན་གཤེགས་པ་ཡི། །སྙིང་པོ་རྣམ་ཤེས་བདུན་དག་དང་། །ལྷན་ཅིག་འཛིན་གཉིས་རབ་ཏུ་འཇུག །མཁས་པ་དག་ནི་ཡོངས་སུ་སྤོང་། །མེ་ལོང་གཟུགས་བཞིན་སེམས་སྣང་སྟེ། །ཐོག་མ་མེད་ནས་བག་ཆགས་བསྒོས། །ཡང་དག་ཇི་བཞིན་རབ་རྟོགས་ན། །དངོས་པོ་རྣམས་ནི་དངོས་པོ་མེད། །ཇི་ལྟར་བྱིས་པ་སོར་མོའི་རྩེར། །འཛིན་ཅིང་ཟླ་བ་མི་ལྟ་བ། །དེ་བཞིན་ཡི་གེར་ཞེན་པ་རྣམས། །ང་ཡི་ཡང་དག་མཐོང་མི་འགྱུར། །
སེམས་ནི་གར་མཁན་བཞིན་དུ་གནས། །ཡིད་ནི་རམ་བུ་ཐོག་པ་འདྲ། །རྣམ་ཤེས་ལྔ་ནི་གྲོགས་ལྟ་བུ། །རྣམ་རྟོག་གར་རྣམས་རབ་ཏུ་ལྟ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཆོས་ལྔ་དང་། རང་བཞིན་དང་། རྣམ་པར་ཤེས་པ་དང་། བདག་མ་མཆིས་པ་གཉིས་ཡོངས་སུ་རྟོགས་པར་འགྱུར་བ་རྣམ་པར་དབྱེ་བའི་མཚན་ཉིད་བཤད་དུ་གསོལ། དེས་བདག་དང་བྱང་ཆུབ་སེམས་དཔའ་གཞན་རྣམས་ཀྱང་ས་ཐམས་ཅད་ཀྱི་གོ་རིམས་ཀྱི་མཚམས་སྦྱོར་ཞིང་ཆོས་འདི་དག་རྣམ་པར་དབྱེ་བ་དང་། སངས་རྒྱས་ཀྱི་ཆོས་ཐམས་ཅད་ཀྱི་རྗེས་སུ་འཇུག་པར་འགྱུར་ཏེ། སངས་རྒྱས་ཀྱི་ཆོས་ཐམས་ཅད་ཀྱི་རྗེས་སུ་ཞུགས་པ་ནི་དེ་བཞིན་གཤེགས་པའི་རང་གིས་རིག་པའི་སའི་བར་དུ་འཇུག་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་པར་ཉོན་ལ་ཡིད་ལ་ཟུང་ཤིག །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཆོས་ལྔ་དང་། རང་བཞིན་དང་། རྣམ་པར་ཤེས་པ་དང་། བདག་མེད་པ་གཉིས་རྣམ་པར་དབྱེ་བ་དང་རབ་ཏུ་འཇུག་པའི་མཚན་ཉིད་ནི་འདི་ལྟ་སྟེ། མིང་དང་། རྒྱུ་མཚན་དང་། རྣམ་པར་རྟོག་པ་དང་། ཡང་དག་པའི་ཡེ་ཤེས་དང་། དེ་བཞིན་ཉིད་དེ། རྣལ་འབྱོར་པ་རྣམས་ཀྱིས་བསྒོམས་ན། དེ་བཞིན་གཤེགས་པའི་རང་གིས་རིག་པ་འཕགས་པའི་ཚུལ་ལ་རབ་ཏུ་འཇུག་ཅིང་རྟག་པ་དང་། ཆད་པ་དང་། ཡོད་པ་དང་། མེད་པ་ལ་སོགས་པའི་ལྟ་བ་སྤངས་ནས་མཐོང་བའི་ཆོས་ལ་བདེ་བར་སྙོམས་པར་འཇུག་པ་ལ་གནས་པ་མངོན་སུམ་དུ་འགྱུར་རོ། །བློ་གྲོས་ཆེན་པོ་ཆོས་ལྔ་དང་། རང་བཞིན་དང་། རྣམ་པར་ཤེས་པ་དང་། བདག་མེད་པ་གཉིས་དང་། རང་གི་སེམས་སྣང་བ་དང་། ཕྱི་རོལ་གྱི་དངོས་པོ་དེ་དག་ཁོང་དུ་མ་ཆུད་པའི་ཕྱིར་སོ་སོའི་སྐྱེ་བོ་རྣམ་པར་རྟོག་པར་བྱེད་ཀྱི་འཕགས་པ་རྣམས་ནི་མ་ཡིན་ནོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཇི་ལྟར་ན་བྱིས་པ་སོ་སོའི་སྐྱེ་བོ་རྣམས་རྣམ་པར་རྟོག་པ་སྐྱེ་ལ་འཕགས་པ་རྣམས་ཀྱིས་མ་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་
པོ་བྱིས་པ་སོ་སོའི་སྐྱེ་བོ་རྣམས་ཀུན་རྫོབ་ཀྱི་བརྡའི་མིང་དང་རྒྱུ་མཚན་ལ་མངོན་པར་ཞེན་པས་སེམས་ཀྱི་རྗེས་སུ་འབྲང་ངོ་། །རྗེས་སུ་འབྲངས་ནས་མཚན་མའི་ཁ་དོག་སྣ་ཚོགས་འདོད་པས་བདག་དང་བདག་གིར་ལྟ་བར་ལྷུང་བའི་བསམ་པ་ཅན་རྣམས་གཟུགས་བཟང་པོ་ལ་མངོན་པར་ཞེན་པར་བྱེད་དེ། མངོན་པར་ཞེན་ནས་མི་ཤེས་པས་བསྒྲིབས་པའི་ཕྱིར་མངོན་པར་ཆགས་པ་སྐྱེད་དོ། །མངོན་པར་ཆགས་པར་གྱུར་ནས་ནི་འདོད་ཆགས་དང་། ཞེ་སྡང་དང་། གཏི་མུག་ལས་བྱུང་བའི་ལས་བསགས་སོ། །མངོན་པར་བསགས་ནས་ནི་རྣམ་པར་རྟོག་པས་རང་ལ་འཆིང་བར་བྱེད་དེ། ཇི་ལྟར་དར་གྱི་སྲིན་བུ་སྐོན་པ་བྱེད་པ་བཞིན་དུ་འཁོར་བའི་རྒྱ་མཚོར་འགྲོ་བ་རྣམས་ཀྱི་སྐོན་པར་ལྷུང་བ་ནི་ཟོ་ཆུན་གྱི་འཁྲུལ་འཁོར་བཞིན་ཏེ། འདི་ལྟར་གཏི་མུག་པའི་ཕྱིར་སྒྱུ་མ་དང་། སྨིག་རྒྱུ་དང་། ཆུའི་ཟླ་བ་དང་མཚུངས་པར་རང་བཞིན་གྱིས་བདག་དང་བདག་གི་དང་བྲལ་བར་མ་ཤེས་ནས་ཡང་དག་པ་མ་ཡིན་པའི་རྣམ་པར་རྟོག་པ་ཐམས་ཅད་སྐྱེད་པར་བྱེད་དོ། །མཚན་ཉིད་དང་། མཚན་ཉིད་ཀྱི་གཞི་དང་། སྐྱེ་བ་དང་། འཇིག་པ་དང་བྲལ་བ་རང་གི་སེམས་ཀྱི་རྣམ་པར་རྟོག་པ་ལས་སྐྱེས་པ། དབང་ཕྱུག་དང་། དུས་དང་། རྡུལ་ཕྲ་མོ་དང་། གཙོ་བོ་ལས་བྱུང་བ་མ་ཡིན་པར་མ་ཤེས་ནས་བྱིས་པ་སོ་སོའི་སྐྱེ་བོ་རྣམས་མིང་དང་། རྒྱུ་མཚན་གྱི་རྗེས་སུ་འབྲང་ངོ་། །དེ་ལ་བློ་གྲོས་ཆེན་པོ་རྒྱུ་མཚན་དེ་ཡང་མིག་གི་རྣམ་པར་ཤེས་པས་སྣང་བར་བྱ་བ་ནི་གཟུགས་ཞེས་བྱའོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པས་སྣང་བར་བྱ་བ་ནི་སྒྲ་དང་། དྲི་དང་། རོ་དང་། རེག་བྱ་དང་། ཆོས་ཞེས་བྱ་སྟེ། འདི་ནི་རྒྱུ་མཚན་ཞེས་བྱའོ། །བློ་གྲོས་ཆེན་པོ་རྣམ་པར་རྟོག་པ་དེ་ནི་གང་གིས་མིང་མང་པོར་བཏགས་ནས་མཚན་མ་རྣམས་གསལ་བར་བྱེད་པ་སྟེ། འདི་ནི་དེ་བཞིན་གྱི་གཞན་དུ་མ་ཡིན་ནོ་ཞེས་གླང་པོ་ཆེ་དང་། རྟ་དང་། ཤིང་རྟ་དང་། རྐང་ཐང་དང་། སྐྱེས་པ་དང་། བུད་མེད་ལ་སོགས་པའི་མིང་གང་ཡིན་པ་དེ་ནི་རྣམ་པར་རྟོག་པ་ཞེས་བྱའོ། །བློ་གྲོས་ཆེན་པོ་ཡང་དག་པའི་ཡེ་ཤེས་གང་གིས་མིང་དང་། རྒྱུ་མཚན་དེ་དག་མི་དམིགས་ཤིང་ཕན་ཚུན་འགྲོ་བའི་འགྲོན་པོ་དང་མཚུངས་ཏེ། རྣམ་པར་ཤེས་པ་རྣམས་མི་སྐྱེ་བས་རྟག་པ་མེད་པ། ཆད་པ་མེད་པས་མུ་སྟེགས་ཅན་དང་། ཉན་
ཐོས་དང་། རང་སངས་རྒྱས་ཐམས་ཅད་ཀྱི་སར་མི་ལྟུང་བའོ། །གཞན་ཡང་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཡང་དག་པའི་ཡེ་ཤེས་དེས་མིང་དང་། རྒྱུ་མཚན་རྣམ་པར་འཇོག་པར་ཡང་མི་བྱེད་ལ། མིང་དང་རྒྱུ་མཚན་རྣམ་པར་མི་གཞོག་པ་ཡང་མ་ཡིན་པས་ལྟ་བ་གཉིས་སུ་སྒྲོ་འདོགས་པ་དང་། སྐུར་པ་འདེབས་པ་ཡོངས་སུ་སྤོང་བར་བྱེད་དོ། །མིང་དང་རྒྱུ་མཚན་མི་སྐྱེ་བ་ནི་དེ་བཞིན་ཉིད་ཅེས་བྱའོ། །བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་ཉིད་ལ་གནས་པ་ནི་སྣང་བ་མེད་པའི་སྤྱོད་ཡུལ་ཐོབ་པའི་ཕྱིར་བྱང་ཆུབ་སེམས་དཔའི་ས་རབ་ཏུ་དགའ་བ་འཐོབ་སྟེ། བྱང་ཆུབ་སེམས་དཔའི་ས་རབ་ཏུ་དགའ་བ་ཐོབ་ནས་མུ་སྟེགས་ཅན་དང་ངན་སོང་གི་འགྲོ་བ་ཐམས་ཅད་ལས་ཤིན་ཏུ་འདས་ཤིང་འཇིག་རྟེན་ལས་འདས་པའི་ཚུལ་ལ་ཡང་དག་པར་གནས་པ། ཆོས་ཀྱི་མཚན་ཉིད་ལ་འདྲིས་པ། སྒྱུ་མ་ལྟ་བུ་ལ་སོགས་པའི་ཆོས་ཐམས་ཅད་རྣམ་པར་འབྱེད་པ། རང་གིས་རིག་པའི་ཆོས་ཀྱི་ཚུལ་གྱི་མཚན་ཉིད། རྟོག་གེ་པའི་ལྟ་བ་ཡ་མཚན་གྱི་མཚན་ཉིད་དང་བྲལ་བས་རིམ་གྱིས་ཆོས་ཀྱི་སྤྲིན་གྱི་བར་དུ་འཐོབ་པར་འགྱུར་ཏེ། བར་དེ་ཡང་ཏིང་ངེ་འཛིན་དང་། སྟོབས་དང་། དབང་དང་། མངོན་པར་ཤེས་པ་རྒྱས་ཤིང་དེ་བཞིན་གཤེགས་པའི་སའི་བར་དུ་འཐོབ་པར་འགྱུར་རོ། །དེ་ཐོབ་ནས་ཆུའི་ཟླ་བ་བཞིན་དུ་སྤྲུལ་པ་རྣམ་པ་སྣ་ཚོགས་ཀུན་དུ་སྟོན་ཅིང་སེམས་ཅན་ཡོངས་སུ་སྨིན་པར་བྱེད་པ་ནི་མཐར་ཐུག་པའི་གནས་བཅུ་ཡོངས་སུ་རྫོགས་ནས་མོས་པ་སྣ་ཚོགས་པའི་སེམས་ཅན་རྣམས་ལ་རབ་ཏུ་འབྱེད་ཅིང་ཆོས་སྟོན་ཀྱང་ཆོས་ཀྱི་སྐུ་ནི་ཡིད་ཀྱི་མངོན་པར་འདུ་བྱེད་པ་དང་བྲལ་བའོ། །འདི་ནི་བྱང་ཆུབ་སེམས་དཔའ་རྣམས་དེ་བཞིན་ཉིད་ལ་ཞུགས་ནས་ཐོབ་པ་ཞེས་བྱའོ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་རང་བཞིན་གསུམ་པོ་རྣམས་ཆོས་ལྔའི་ནང་དུ་འདུས་པ་ཞིག་ལགས་སམ། འོན་ཏེ་སོ་སོ་ནས་རང་གི་མཚན་ཉིད་དུ་གྲུབ་པ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་རང་བཞིན་གསུམ་དང་། རྣམ་པར་ཤེས་པ་བརྒྱད་དང་། བདག་མེད་པ་གཉིས་ཀྱང་ཆོས་ལྔའི་ནང་དུ་འདུས་སོ། །བློ་གྲོས་ཆེན་པོ་མིང་དང་རྒྱུ་མཚན་དེ་དག་ནི་ཀུན་
དུ་བརྟགས་པའི་རང་བཞིན་ཡིན་ནོ། །བློ་གྲོས་ཆེན་པོ་རྣམ་པར་རྟོག་པ་དེ་ལ་བརྟེན་ནས་སེམས་དང་སེམས་ལས་བྱུང་བའི་ཆོས་མིང་དང་ལྷན་ཅིག་སྐྱེ་སྟེ། ཇི་ལྟར་ཉི་མ་དང་འོད་ཟེར་ལྷན་ཅིག་འབྱུང་བ་བཞིན་དུ་སྣ་ཚོགས་ཀྱི་མཚན་ཉིད་སོ་སོར་རྣམ་པར་བརྟག་ཅིང་། འཛིན་པར་བྱེད་པ་དེ་ནི་གཞན་གྱི་དབང་གི་རང་བཞིན་ཞེས་བྱའོ། །བློ་གྲོས་ཆེན་པོ་ཡང་དག་པའི་ཡེ་ཤེས་དང་། དེ་བཞིན་ཉིད་ནི་མི་འཇིག་པའི་ཕྱིར་ཡོངས་སུ་གྲུབ་པའི་ངོ་བོ་ཉིད་ཅེས་བྱའོ། །གཞན་ཡང་བློ་གྲོས་ཆེན་པོ་རང་གི་སེམས་སྣང་བའི་རྣམ་པར་རྟོག་པ་ལ་རྣམ་པ་བརྒྱད་དུ་དབྱེ་སྟེ། འདི་ལྟ་སྟེ། ཀུན་གཞི་རྣམ་པར་ཤེས་པ་དང་། ཡིད་དང་ཡིད་ཀྱི་རྣམ་པར་ཤེས་པ་དང་། རྣམ་པར་ཤེས་པའི་ཚོགས་ལྔའོ། །དེ་ལ་རྒྱུ་མཚན་ནི་ཡང་དག་པ་མ་ཡིན་པའི་མཚན་ཉིད་ལ་ཀུན་དུ་བརྟགས་པའི་ཕྱིར་བདག་དང་བདག་གིར་འཛིན་པ་གཉིས་འགགས་ན་བདག་མེད་པ་གཉིས་སྐྱེའོ། །དེ་ལྟ་བས་ན་བློ་གྲོས་ཆེན་པོ་ཆོས་ལྔ་པོ་འདིའི་ནང་དུ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། དེ་བཞིན་གཤེགས་པ་རྣམས་ཀྱི་སོ་སོ་རང་གིས་རིག་པ་འཕགས་པའི་ཡེ་ཤེས་དང་། ས་རྣམས་ཀྱི་མཚམས་སྦྱར་བ་དང་། གོ་རིམས་དང་། སངས་རྒྱས་ཀྱི་ཆོས་ཐམས་ཅད་ཀྱང་འདུས་སོ། །གཞན་ཡང་བློ་གྲོས་ཆེན་པོ་ཆོས་ལྔ་ནི་རྒྱུ་མཚན་དང་། མིང་དང་། རྣམ་པར་རྟོག་པ་དང་། དེ་བཞིན་ཉིད་དང་། ཡང་དག་པའི་ཡེ་ཤེས་སོ། །བློ་གྲོས་ཆེན་པོ་དེ་ལ་རྒྱུ་མཚན་ནི་གནས་པ་དང་། དབྱིབས་ཀྱི་མཚན་ཉིད་དང་། གཟུགས་ལ་སོགས་པའི་མཚན་ཉིད་དུ་སྣང་བ་ནི་རྒྱུ་མཚན་ཞེས་བྱའོ། །གང་རྒྱུ་མཚན་དེ་ཉིད་ལ་བུམ་པ་ཞེས་བྱ་བ་ལ་སོགས་པའི་མིང་ཡོད་པས་འདི་ནི་དེ་བཞིན་གྱི་གཞན་དུ་མ་ཡིན་ནོ་ཞེས་བྱ་བ་དེ་ནི་མིང་ཞེས་བྱ་བ་སྟེ། མིང་མང་པོ་བཏགས་ནས་རྒྱུ་མཚན་རྣམས་གསལ་བར་བྱེད་པའོ། །བུམ་པ་ལ་སོགས་པའི་སེམས་དང་སེམས་ལས་བྱུང་བའི་ཆོས་དེ་ནི་རྣམ་པར་རྟོག་པ་ཞེས་བྱའོ། །མིང་དེ་དང་རྒྱུ་མཚན་དེ་དག་མཐར་དམིགས་སུ་མེད་པ་དང་། ཐོག་མ་དང་། ཐ་མར་རིག་པར་བྱ་བ་མེད་པ་དང་། ཆོས་རྣམས་ལ་ཕན་ཚུན་མེད་པ་དང་། ཡང་དག་པ་མ་ཡིན་པའི་རྣམ་པར་རྟོག་པ་དང་བྲལ་བ་ནི་དེ་བཞིན་ཉིད་ཅེས་བྱའོ། །དེ་ཁོ་ན་ཉིད་ཡང་དག་པར་ངེས་པ་མཐར་ཐུག་པར་ཡང་
རང་བཞིན་དམིགས་སུ་མེད་པ་དེ་ནི་དེ་བཞིན་ཉིད་ཀྱི་མཚན་ཉིད་དུ་ང་དང་དེ་བཞིན་གཤེགས་པ་རྣམས་ཀྱང་རྗེས་སུ་ཞུགས་ཤིང་སེམས་ཅན་ཐམས་ཅད་ལ་ཡང་དག་པ་ཇི་ལྟ་བ་བཞིན་དུ་བཤད་དོ། །བཏགས་སོ། །གསལ་བར་བྱས་སོ། །གང་དེའི་རྗེས་སུ་ཞུགས་ནས་ཡང་དག་པར་རྟོགས་ཤིང་ཆད་པ་དང་རྟག་པ་མེད་པ། རྣམ་པར་རྟོག་པ་མི་འབྱུང་བ་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་ཚུལ་དང་རྗེས་སུ་འཐུན་པ། མུ་སྟེགས་ཅན་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱིས་མི་དམིགས་པའི་མཚན་ཉིད་དེ་ནི་ཡང་དག་པའི་ཡེ་ཤེས་ཞེས་བྱའོ། །བློ་གྲོས་ཆེན་པོ་དེ་དག་ནི་ཆོས་ལྔ་ཞེས་བྱ་སྟེ། རང་བཞིན་རྣམ་པ་གསུམ་དང་། རྣམ་པར་ཤེས་པ་བརྒྱད་དང་། བདག་མེད་པ་གཉིས་དང་། སངས་རྒྱས་ཀྱི་ཆོས་ཐམས་ཅད་ཀྱང་དེར་འདུས་ཏེ། དེ་ལྟ་བས་ན་བློ་གྲོས་ཆེན་པོ་དེ་ལ་བདག་ཉིད་ཀྱིས་ནན་ཏན་དུ་བསླབ་པར་བྱ་ཞིང་གཞན་ལ་ཡང་བསླབ་པར་བྱ་སྟེ། གཞན་གྱི་རྗེས་སུ་འབྲང་བར་མི་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཆོས་ལྔ་དང་ནི་རང་བཞིན་གསུམ། །རྣམ་ཤེས་བརྒྱད་པོ་ཉིད་དག་དང་། །བདག་མེད་དོན་ནི་རྣམ་གཉིས་པོར། །ཐེག་ཆེན་ཐམས་ཅད་བསྡུས་པ་ཡིན། །མིང་དང་རྒྱུ་མཚན་རྣམ་པར་རྟོག །རང་བཞིན་གཉིས་ཀྱི་མཚན་ཉིད་དེ། །ཡང་དག་ཡེ་ཤེས་དེ་བཞིན་ཉིད། །ཡོངས་སུ་གྲུབ་པའི་མཚན་ཉིད་དོ། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཇི་ལྟར་བཅོམ་ལྡན་འདས་ཀྱིས་གསུངས་པ་ལྟར་ན་འདས་པའི་སངས་རྒྱས་རྣམས་ནི་གང་གཱའི་ཀླུང་གི་བྱེ་མ་སྙེད་དེ། མ་འོངས་པ་དང་། ད་ལྟར་གྱི་ཡང་དེ་བཞིན་ནོ་ཞེས་བཀའ་སྩལ་ན། བཅོམ་ལྡན་འདས་འདི་ལ་སྒྲ་ཇི་བཞིན་དུ་དོན་གཟུང་བར་བགྱིའམ། འོན་ཏེ་དོན་གཞན་ཞིག་མཆིས་ལགས། བཅོམ་ལྡན་འདས་ཐུགས་བརྩེ་བར་དགོངས་ཏེ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་སྒྲ་ཇི་བཞིན་དུ་དོན་གཟུང་བར་མི་བྱ་སྟེ། དུས་གསུམ་གྱི་དེ་བཞིན་གཤེགས་པ་རྣམས་ནི་ཡང་དག་པར་གང་གཱའི་ཀླུང་གི་བྱེ་མ་སྙེད་དུ་མ་ཡིན་ནོ། །དེ་ཅིའི་ཕྱིར་ཞེ་ན། འཇིག་རྟེན་པའི་བསམ་པ་
ལས་འདས་པས་དཔེ་རྣམས་ཀྱིས་དཔེར་བྱ་བ་མ་ཡིན་ནོ། །འདི་ལྟར་བྱིས་པ་སོ་སོའི་སྐྱེ་བོ་རྟག་པ་ལ་མངོན་པར་ཞེན་པ་དང་། མུ་སྟེགས་ཅན་གྱི་རྣམ་པར་བཏགས་པའི་ལྟ་བ་ངན་པ་འཕེལ་ནས་འཁོར་བ་ལ་ཐུག་པ་མེད་པར་འགྱུར་བ་དག་འཁོར་བར་འགྲོ་བའི་འཁོར་ལོ་ལ་ཡོངས་སུ་སྐྱོ་བར་བྱ་བ་དང་། བརྩོན་འགྲུས་ཁྱད་པར་ཅན་རྩོམ་དུ་གཞུག་པའི་ཕྱིར་དེ་དག་ལ་འདི་སྐད་དུ་དེ་བཞིན་གཤེགས་པ་རྣམས་ནི་མཐོང་བར་སླ་བས་ཨུ་དུམ་བཱ་རའི་མེ་ཏོག་ལྟ་བུ་མ་ཡིན་ནོ་ཞེས་བསྟན་ཏེ་མཐོང་བར་དཀའ་ཞེས་རྩོམ་པ་གཏོང་བར་འགྱུར་བའི་ཕྱིར་རོ། །རེས་འགའ་ནི་འདུལ་བའི་སྐྱེ་བོ་རྣམས་ལ་གཟིགས་ནས་འདི་སྐད་དུ་དེ་བཞིན་གཤེགས་པ་རྣམས་ནི་ཤིན་ཏུ་མཐོང་བར་དཀའ་བས་ཨུ་དུམ་བཱ་རའི་མེ་ཏོག་བཞིན་ནོ་ཞེས་བཤད་དེ། ཨུ་དུམ་བཱ་རའི་མེ་ཏོག་ནི་སུས་ཀྱང་མ་མཐོང་མི་མཐོང་མཐོང་བར་མི་འགྱུར་ན། དེ་བཞིན་གཤེགས་པ་ནི་འཇིག་རྟེན་ཐམས་ཅད་ཀྱིས་མཐོང་སྟེ། རང་གི་ཚུལ་རྣམ་པར་གཞག་པའི་ཕྱིར་འདི་སྐད་དུ་དེ་བཞིན་གཤེགས་པ་རྣམས་འབྱུང་བ་ཨུ་དུམ་བཱ་རའི་མེ་ཏོག་བཞིན་ནོ་ཞེས་བཤད་པ་ནི་མ་ཡིན་ནོ། །བློ་གྲོས་ཆེན་པོ་རང་གི་ཚུལ་རྣམ་པར་གཞག་པ་ནི་འཇིག་རྟེན་པའི་བསམ་པ་ལས་འདས་པས་བྱིས་པ་སོ་སོའི་སྐྱེ་བོ་དེ་དག་ཡིད་ཆེས་པར་མི་འགྱུར་ཏེ། སོ་སོ་རང་གིས་རིག་པའི་འཕགས་པའི་ཡེ་ཤེས་ཀྱི་སྤྱོད་ཡུལ་ལ་ནི་དཔེར་བྱ་བ་མེད་དོ། །དེ་ཁོ་ན་ཉིད་ཀྱི་དེ་བཞིན་གཤེགས་པ་ནི་སེམས་དང་ཡིད་དང་། ཡིད་ཀྱི་རྣམ་པར་ཤེས་པ་ལས་འདས་པས་མཐོང་བར་བྱ་བའི་མཚན་མ་རྣམས་ཀྱིས་དཔེ་བྱར་མི་རུང་ངོ་། །བློ་གྲོས་ཆེན་པོ་འོན་ཀྱང་ངས་དེ་བཞིན་གཤེགས་པ་རྣམས་གང་གཱའི་ཀླུང་གི་བྱེ་མ་དང་མཉམ་མོ་ཞེས་དཔེས་བསྟན་པ་ལ་ཉེས་པ་མེད་དེ། བློ་གྲོས་ཆེན་པོ་དཔེར་ན་གང་གཱའི་ཀླུང་གི་བྱེ་མ་ནི་ཉ་དང་། རུས་སྦལ་དང་། ཤི་ཤུ་མཱ་ར་དང་། སེང་གེ་དང་། གླང་པོ་ཆེ་དང་། རྟ་དང་། མི་དང་། རི་དགས་རྣམས་ཀྱིས་གཙེས་ཤིང་དཀྲུགས་ཀྱང་བྱེ་མ་དེ་འདི་སྙམ་དུ་འདི་དག་གིས་བདག་ལ་གཙེས་སོ་ཞེས་རྣམ་པར་རྟོག་པར་མི་བྱེད་དེ། རང་བཞིན་གྱིས་ཡོངས་སུ་དག་ཅིང་དྲི་མ་རྣམས་ཀྱིས་གོས་པ་མེད་པའི་ཕྱིར་རོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སོ་སོ་རང་གིས་རིག་པ་འཕགས་པའི་ཡེ་ཤེས་ཀྱི་གང་གཱའི་ཀླུང་ཆེན་པོ་ལ་ཡོད་
པའི་སྟོབས་དང་། མངོན་པར་ཤེས་པ་དང་། དབང་པོ་ལ་སོགས་པའི་བྱེ་མ་རྣམས་ལ་ཡང་མུ་སྟེགས་ཅན་ཐམས་ཅད་དང་། མི་རྣམས་དང་། རི་དགས་ལ་སོགས་པ་ཐམས་ཅད་ཀྱིས་གཙེས་ཤིང་དཀྲུགས་ཀྱང་དེ་བཞིན་གཤེགས་པ་ལ་དགོངས་པ་མི་མངའ་བས་རྣམ་པར་རྟོག་པ་མི་སྐྱེ་སྟེ། དེ་བཞིན་གཤེགས་པ་རབ་ཏུ་དབེན་ཞིང་དགོངས་པའི་འདུ་ཤེས་མེད་པ་དང་། དེ་བཞིན་གཤེགས་པའི་སྔོན་གྱི་སྨོན་ལམ་གྱི་དབང་གིས་ཏིང་ངེ་འཛིན་གྱི་བདེ་བ་ལ་སེམས་ཅན་རྣམས་དགོད་པའི་ཕྱིར་རྣམ་པར་གཙེས་སོ་སྙམ་དུ་མི་དགོངས་པས་གང་གཱའི་ཀླུང་གི་བྱེ་མ་དང་མཚུངས་ཤིང་བྱེ་བྲག་མེད་དོ། །གཞན་ཡང་འདོད་ཆགས་དང་། ཁོང་ཁྲོ་བ་དང་། གཏི་མུག་ཡོངས་སུ་སྤངས་པའི་ཕྱིར་རོ། །དཔེར་ན་གང་གཱའི་ཀླུང་གི་བྱེ་མ་རྣམས་ནི་སའི་མཚན་ཉིད་ཀྱི་རང་བཞིན་ཡིན་པས་བསྐལ་པས་ཚིག་པ་ནས་ཐམས་ཅད་བསྲེགས་ཀྱང་སའི་འབྱུང་བ་ཆེན་པོ་ནི་རང་བཞིན་མི་འདོར་ཏེ། འདི་ལྟར་མེའི་ཁམས་དང་ལྷན་ཅིག་སྐྱེ་བའི་ཕྱིར་རོ། །གཞན་དུ་ན་བྱིས་པ་སོ་སོའི་སྐྱེ་བོ་རྣམས་ཚིག་པར་རྟོག་མོད་ཀྱིས་དེ་ནི་མི་ཚིག་སྟེ། འདི་ལྟར་མེའི་ཁམས་ཀྱི་རྒྱུའི་ཕྱིར་རོ། །དེ་བཞིན་དུ་བློ་གྲོས་ཆེན་པོ་དེ་བཞིན་གཤེགས་པའི་ཆོས་ཀྱི་སྐུ་ཡང་གང་གཱའི་ཀླུང་གི་བྱེ་མ་ལྟར་མི་འཇིག་གོ །བློ་གྲོས་ཆེན་པོ་དཔེར་ན་གང་གཱའི་ཀླུང་གི་བྱེ་མ་རྣམས་ལ་ནི་ཚད་མེད་དོ། །དེ་བཞིན་གཤེགས་པ་རྣམས་ཀྱི་འོད་ཟེར་རྣམས་ཀྱང་དེ་བཞིན་དུ་ཚད་མེད་དེ། སེམས་ཅན་ཡོངས་སུ་སྨིན་པར་བྱ་བའི་ཕྱིར་སངས་རྒྱས་ཐམས་ཅད་ཀྱིས་འཁོར་གྱི་དཀྱིལ་འཁོར་ཐམས་ཅད་ཀུན་དུ་སྣང་བར་བྱེད་དོ། །བློ་གྲོས་ཆེན་པོ་དཔེར་ན་གང་གཱའི་ཀླུང་གི་བྱེ་མ་རྣམས་ལ་ནི་བྱེ་མ་ཐ་དད་པ་གཞན་བཙལ་ན་ནམ་ཡང་མི་རྙེད་དོ། །དེ་བཞིན་དུ་བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཡང་འཁོར་བ་ཡང་མེད། སྐྱེ་བ་དང་འགག་པ་མེད་དེ། སྲིད་པའི་རྒྱུ་དང་རྐྱེན་ཆད་པའི་ཕྱིར་རོ། །བློ་གྲོས་ཆེན་པོ་དཔེར་ན་གང་གཱའི་ཀླུང་གི་བྱེ་མ་རྣམས་ནི་འཕེལ་བ་དང་། འགྲིབ་པ་ཤེས་པར་མི་ནུས་སོ། །དེ་བཞིན་དུ་བློ་གྲོས་ཆེན་པོ་དེ་བཞིན་གཤེགས་པའི་ཡེ་ཤེས་ཀྱང་སེམས་ཅན་ཡོངས་སུ་སྨིན་པར་བྱ་བ་མི་འཕེལ་མི་འགྲིབ་སྟེ། ལུས་ཀྱི་ཆོས་ཅན་མ་ཡིན་པའི་ཕྱིར་རོ། །ལུས་ཀྱི་ཆོས་ཅན་ལ་ནི་འཇིག་པ་ཡོད་ཀྱི་དེ་བཞིན་གཤེགས་པའི་ཆོས་ཀྱི་སྐུ་ནི་ལུས་
ཀྱི་ཆོས་ཅན་མ་ཡིན་ནོ། །དཔེར་ན་གང་གཱའི་ཀླུང་གི་བྱེ་མ་རབ་ཏུ་བཙིར་ཀྱང་མར་མི་དམིགས་སོ། །དེ་བཞིན་དུ་སེམས་ཅན་གྱི་རབ་ཏུ་གནོད་པའི་སྡུག་བསྔལ་ཐམས་ཅད་ཀྱིས་དེ་བཞིན་གཤེགས་པ་ལ་གནོད་པ་བྱས་ཀྱང་། ཇི་སྲིད་དུ་སེམས་ཅན་རྣམས་ཡོངས་སུ་མྱ་ངན་ལས་མ་བཟླས་ཀྱི་བར་དུ་ཆོས་ཀྱི་དབྱིངས་མི་འདོར་ཏེ། རང་གི་ཏིང་ངེ་འཛིན་དང་། སྨོན་ལམ་གྱི་བདེ་བ་དང་། ཐུགས་རྗེ་ཆེན་པོའི་ཕྱིར་རོ། །བློ་གྲོས་ཆེན་པོ་དཔེར་ན་གང་གཱའི་ཀླུང་གི་བྱེ་མ་རྣམས་ནི་ཆུའི་རྒྱུན་གྱི་རྗེས་སུ་འབབ་སྟེ། ཆུ་མེད་པར་ནི་མ་ཡིན་ནོ། །དེ་བཞིན་དུ་བློ་གྲོས་ཆེན་པོ་དེ་བཞིན་གཤེགས་པ་རྣམས་ཀྱིས་བསྟན་པའི་ཆོས་ཐམས་ཅད་ཀྱང་མྱ་ངན་ལས་འདས་པའི་རྒྱུན་གྱི་རྗེས་སུ་འབབ་པས་དེའི་ཕྱིར་འདི་སྐད་དུ་གང་གཱའི་ཀླུང་གི་བྱེ་མ་དང་མཉམ་པ་ཞེས་བཤད་དོ། །དེ་བཞིན་གཤེགས་པ་ནི་འགྲོ་བ་རྣམས་ཀྱི་རྗེས་སུ་མི་འཇུག་སྟེ། རྗེས་སུ་འབབ་ཅིང་འགྲོ་བ་ནི་འཇིག་པའི་དོན་ཡིན་པའི་ཕྱིར་རོ། །བློ་གྲོས་ཆེན་པོ་འཁོར་བའི་ཐོག་མའི་མཐའ་ཤེས་པར་མི་ནུས་པའི་ཕྱིར། ཤེས་པ་མེད་ན་ཇི་ལྟར་འགྲོ་བ་ཞེས་བཤད། བློ་གྲོས་ཆེན་པོ་འགྲོ་བ་ཞེས་བྱ་བ་ནི་ཆད་པའི་དོན་ཡིན་ན་བྱིས་པ་སོ་སོའི་སྐྱེ་བོ་རྣམས་ཀྱིས་མི་ཤེས་སོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་གལ་ཏེ་སེམས་ཅན་རྣམས་འཁོར་བའི་ཐོག་མའི་མཐའ་འཚལ་བ་མ་མཆིས་ན་ཇི་ལྟར་རྣམ་པར་ཐར་པ་ཁོང་དུ་ཆུད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཐོག་མ་མེད་པའི་དུས་ཀྱི་རྣམ་པར་སྤྲོས་པའི་གནས་ངན་ལེན་རྣམ་པར་རྟོག་པའི་བག་ཆགས་ཀྱི་རྒྱུ་འགག་ཅིང་རང་གི་སེམས་སྣང་བ་ཙམ་དུ་མཐོང་བའི་ཚེ་ཤེས་སོ། །ཕྱི་རོལ་གྱི་དོན་དང་། རྣམ་པར་རྟོག་པའི་ལུས་གནས་གྱུར་པ་ལ་ཐར་པ་ཞེས་བྱའི། འཇིག་པ་ནི་མ་ཡིན་ནོ། །དེ་བས་ན་མཐའ་མེད་པ་ཞེས་བྱ་བ་ནི་ཅི་ཡང་མེད་པ་མ་ཡིན་ཏེ། དེ་དག་རྣམ་པར་རྟོག་པའི་ཕྱིར་མཐའ་མེད་པ་ཞེས་བྱ་བ་ལ་སོགས་པའི་མིང་གི་རྣམ་གྲངས་བྱས་པ་ཡིན་ནོ། །ཕྱི་དང་ནང་གཉིས་ཀ་རབ་ཏུ་བརྟགས་ན་རྣམ་པར་རྟོག་པ་ལས་ལོགས་ཤིག་ན་གཞན་ཐ་དད་པའི་སེམས་ཅན་གང་ཡང་མེད་པས་ཤེས་པ་དང་། ཤེས་བྱ་དང་། ཆོས་ཐམས་ཅད་ནི་རབ་ཏུ་དབེན་པ་ཡིན་ཏེ། རང་གི་སེམས་སྣང་བའི་རྣམ་པར་རྟོག་པ་ཡོངས་སུ་མ་ཤེས་པའི་ཕྱིར་རྣམ་
པར་རྟོག་པ་སྐྱེའི། གལ་ཏེ་ཡོངས་སུ་ཤེས་པར་གྱུར་ན་ནི་ལྡོག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །འདྲེན་པ་རྣམས་ནི་རབ་བརྟགས་ན། །གང་གཱའི་ཀླུང་གི་བྱེ་མ་བཞིན། །འཇིག་པ་མེད་ཅིང་འགྲོ་བ་མེད། །མཐར་ཐུག་མིན་པའང་མ་ཡིན་ཏེ། །དེ་ནི་མཉམ་པ་ཉིད་དག་གིས། །དེ་བཞིན་གཤེགས་རྣམས་བརྟགས་པ་ཡིན། །གང་གཱའི་བྱེ་མ་ལ་སོགས་ལྟར། །ཉེས་པ་ཐམས་ཅད་རབ་སྤངས་ཏེ། །རྒྱུན་ཕྱོགས་འཇུག་ཅིང་རང་བཞིན་རྟག །དེ་ནི་སངས་རྒྱས་སངས་རྒྱས་ཉིད། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཐམས་ཅད་སྐད་ཅིག་མར་འཇིག་པའི་མཚན་ཉིད་བཤད་དུ་གསོལ། བཅོམ་ལྡན་འདས་ཇི་ལྟར་ན་ཆོས་ཐམས་ཅད་སྐད་ཅིག་མ་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེའི་ཕྱིར་ལེགས་པར་ཉོན་ལ་ཡིད་ལ་ཟུང་ཤིག་དང་། ཁྱོད་ལ་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་བཞིན་དུ་འཚལ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ་ལ་ཆོས་ཐམས་ཅད་ཅེས་བྱ་བ་ནི་འདི་ལྟ་སྟེ། དགེ་བ་དང་། མི་དགེ་བ་དང་། ལུང་དུ་བསྟན་པ་དང་། ལུང་དུ་མ་བསྟན་པ་དང་། འདུས་བྱས་དང་། འདུས་མ་བྱས་པ་དང་། འཇིག་རྟེན་པ་དང་། འཇིག་རྟེན་ལས་འདས་པ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། ཟག་པ་དང་བཅས་པ་དང་། ཟག་པ་མེད་པ་དང་། ཟིན་པ་དང་། མ་ཟིན་པ་རྣམས་ཡིན་ཏེ། བློ་གྲོས་ཆེན་པོ་མདོར་ན་སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་དང་། བག་ཆགས་རྣམས་ནི་ཉེ་བར་ལེན་པའི་ཕུང་པོ་ལྔའི་རྒྱུ་དང་། སེམས་དང་། ཡིད་དང་། ཡིད་ཀྱི་རྣམ་པར་ཤེས་པའི་བག་ཆགས་རྒྱས་པར་བྱེད་པ་ཡིན་ཏེ། བྱིས་པ་སོ་སོའི་སྐྱེ་བོ་རྣམས་ཀྱིས་དགེ་བ་དང་། མི་དགེ་བར་ཡོངས་སུ་བརྟགས་སོ། །བློ་གྲོས་ཆེན་པོ་ཏིང་ངེ་འཛིན་གྱི་བདེ་བ་དང་། སྙོམས་པར་འཇུག་པས་མཐོང་བའི་ཆོས་ལ་བདེ་བར་གནས་པ་ནི་འཕགས་པ་རྣམས་ཀྱི་དགེ་བ་ཟག་པ་མེད་པ་ཞེས་བྱའོ། །བློ་གྲོས་ཆེན་པོ་དེ་ལ་དགེ་བ་དང་མི་དགེ་བ་ཞེས་བྱ་བ་ནི་འདི་ལྟ་སྟེ།
རྣམ་པར་ཤེས་པ་བརྒྱད་རྣམས་སོ། །བརྒྱད་གང་ཞེ་ན། འདི་ལྟ་སྟེ། དེ་བཞིན་གཤེགས་པའི་སྙིང་པོ་ཀུན་གཞི་རྣམ་པར་ཤེས་པ་ཞེས་བསྒྲགས་པ་དང་། སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་དང་། རྣམ་པར་ཤེས་པ་ལྔའི་ཚོགས་རྣམས་ཏེ། མུ་སྟེགས་ཅན་གྱིས་བརྗོད་པར་བྱ་བ་མ་ཡིན་ནོ། །བློ་གྲོས་ཆེན་པོ་རྣམ་པར་ཤེས་པའི་ཚོགས་ལྔ་ནི་སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་དང་ལྷན་ཅིག་པ། དགེ་བ་དང་། མི་དགེ་བའི་མཚན་ཉིད་ཕན་ཚུན་དུ་རྣམ་པར་འབྱུང་ཞིང་འཇིག་པ། རྒྱུད་ཀྱི་རྒྱུན་གྱིས་འཇུག་པས་རྣམ་པར་མི་འཇིག་པ། ལུས་བྱུང་ནས་སྐྱེ་ཞིང་འཇིག་པར་ཡང་འགྱུར་བའོ། །རང་གི་སེམས་སྣང་བ་ཙམ་དུ་མ་རྟོགས་པའི་ཕྱིར་འགགས་མ་ཐག་ཏུ་རྣམ་པར་ཤེས་པ་གཞན་འབྱུང་སྟེ། དབྱིངས་ཀྱི་བྱེ་བྲག་འཛིན་པའི་ཡིད་ཀྱི་རྣམ་པར་ཤེས་པ་རྣམ་པར་ཤེས་པའི་ཚོགས་ལྔ་དང་ལྡན་པར་འབྱུང་ཞིང་སྐད་ཅིག་གི་དུས་སུ་ཡང་མི་གནས་པ་དེ་ནི་སྐད་ཅིག་མ་ཞེས་བྱའོ། །བློ་གྲོས་ཆེན་པོ་དེ་ལ་སྐད་ཅིག་མ་ཞེས་བྱ་བ་ནི་ཀུན་གཞི་རྣམ་པར་ཤེས་པ་ཞེས་བསྒྲགས་པ་དེ་བཞིན་གཤེགས་པའི་སྙིང་པོ་ཡིད་དང་ལྷན་ཅིག་སྐྱེས་པའི་རྣམ་པར་ཤེས་པའི་བག་ཆགས་ཀྱིས་སྐད་ཅིག་པ་ཡིན་གྱི། ཟག་པ་མེད་པའི་བག་ཆགས་ཀྱིས་སྐད་ཅིག་པ་ནི་མ་ཡིན་ནོ། །བྱིས་པ་སོ་སོའི་སྐྱེ་བོ་རྣམས་ཀྱིས་རྟོགས་པར་མི་འགྱུར་ཏེ། འདི་ལྟར་སྐད་ཅིག་མར་སྨྲ་བ་ལ་མངོན་པར་ཞེན་པའི་ཕྱིར་ཆོས་ཐམས་ཅད་སྐད་ཅིག་པ་དང་། སྐད་ཅིག་པ་མ་ཡིན་པ་འདི་མི་རྟོགས་སོ། །དེ་ཆད་པར་ལྟ་བའི་ཕྱིར་འདུས་མ་བྱས་པའི་ཆོས་རྣམས་ཀྱང་འཇིག་པར་བྱེད་དོ། །བློ་གྲོས་ཆེན་པོ་རྣམ་པར་ཤེས་པ་བདུན་པོ་རྣམས་ནི་འཁོར་བར་འཇུག་པ་མ་ཡིན་ཏེ། སྡུག་བསྔལ་དང་བདེ་བ་ཡང་མི་མྱོང་ལ། མྱ་ངན་ལས་འདའ་བའི་རྒྱུ་ཡང་མ་ཡིན་ནོ། །བློ་གྲོས་ཆེན་པོ་དེ་བཞིན་གཤེགས་པའི་སྙིང་པོ་ནི་སྡུག་བསྔལ་དང་བདེ་བ་ཡང་མྱོང་སྟེ། རྒྱུ་དང་ལྷན་ཅིག་ཏུ་འཇུག་ཅིང་ལྡོག་གོ །གནས་པའི་ས་གཞི་དང་། མ་རིག་པའི་གནས་ཀྱིས་རབ་ཏུ་མྱོས་པས་བྱིས་པ་སོ་སོའི་སྐྱེ་བོ་དག་སྐད་ཅིག་མར་ལྟ་བ་མི་རྟོགས་ཤིང་། རྣམ་པར་རྟོག་པས་སེམས་ཡོངས་སུ་བསྒོས་པར་གྱུར་ཏོ། །གཞན་ཡང་བློ་གྲོས་ཆེན་པོ་དཔེར་ན་གསེར་དང་། རྡོ་རྗེ་དང་། དེ་བཞིན་གཤེགས་པའི་རིང་བསྲེལ་དང་། ཁྱད་པར་ཐོབ་པའི་ངོ་བོ་ཉིད་ནི་
ནམ་ཡང་འཇིག་པར་མི་འགྱུར་ཏེ། བློ་གྲོས་ཆེན་པོ་གལ་ཏེ་མངོན་པར་རྟོགས་པ་ཐོབ་པ་སྐད་ཅིག་པ་ཡིན་ན་ནི་འཕགས་པ་རྣམས་འཕགས་པ་མ་ཡིན་པར་འགྱུར་བ་ཞིག་ན། འཕགས་པ་རྣམས་ནི་འཕགས་པ་མ་ཡིན་པར་མི་འགྱུར་རོ། །དཔེར་ན་གསེར་དང་། རྡོ་རྗེ་ནི་བསྐལ་པ་སྲིད་དུ་མི་འབྲི་ན་ཅིའི་ཕྱིར་བྱིས་པ་སོ་སོའི་སྐྱེ་བོ་ངའི་ལྡེམ་པོར་དགོངས་ཏེ་བཤད་པ་ལ་མི་མཁས་པ་དག་གིས་ཕྱི་ནང་གི་ཆོས་ཐམས་ཅད་ལ་སྐད་ཅིག་པའི་དོན་དུ་རྟོག །བྱང་ཆུབ་སེམས་དཔའ་བློ་གྲོས་ཆེན་པོས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་ཇི་སྐད་དུ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་སྤྱད་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་འགྱུར་རོ་ཞེས་བཀའ་སྩལ་ན། དྲུག་པོ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཕ་རོལ་ཏུ་ཕྱིན་པའི་བྱེ་བྲག་ནི་རྣམ་པ་གསུམ་ཡོད་དེ། འདི་ལྟ་སྟེ། འཇིག་རྟེན་པ་དང་། འཇིག་རྟེན་ལས་འདས་པ་དང་། འཇིག་རྟེན་ལས་འདས་པའི་མཆོག་གོ །བློ་གྲོས་ཆེན་པོ་དེ་ལ་འཇིག་རྟེན་པའི་ཕ་རོལ་ཏུ་ཕྱིན་པ་ནི་བདག་དང་བདག་གིར་འཛིན་པ་ལ་མངོན་པར་ཞེན་ཅིང་མཐའ་གཉིས་སུ་འཛིན་པ། སྐྱེ་བའི་གནས་སྣ་ཚོགས་བླང་བ་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལ་རབ་ཏུ་མོས་པའི་ཕྱིར་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱང་དེ་བཞིན་ཏེ་བྱིས་པ་སོ་སོའི་སྐྱེ་བོའི་མངོན་པར་ཤེས་པ་ཡོངས་སུ་འགྲུབ་པ་དང་། ཚངས་པའི་འཇིག་རྟེན་དུ་སྐྱེ་བར་འགྱུར་རོ། །བློ་གྲོས་ཆེན་པོ་འཇིག་རྟེན་ལས་འདས་པའི་ཕ་རོལ་ཏུ་ཕྱིན་པ་ནི་ཉན་ཐོས་དང་། རང་སངས་རྒྱས་རྣམས་མྱ་ངན་ལས་འདས་པའི་འཛིན་པར་ལྷུང་བའི་ཕྱིར་ཕ་རོལ་ཏུ་ཕྱིན་པ་དྲུག་སྤྱོད་ཅིང་རང་གི་མྱ་ངན་ལས་འདས་པའི་བདེ་བ་ལ་མོས་པའོ། །འཇིག་རྟེན་ལས་འདས་པའི་མཆོག་ཕ་རོལ་ཏུ་ཕྱིན་པ་ནི་རང་གི་སེམས་སྣང་བ་རྣམས་རྟོག་པ་ཙམ་དུ་རྟོགས་པ་དང་། རང་གི་སེམས་གཉིས་སུ་འཛིན་པའི་ཕྱིར་རྣམ་པར་རྟོག་པ་མི་སྐྱེ་བ་དང་། འགྲོ་བ་རྣམས་ལེན་པ་དང་། སྐལ་བ་མཚུངས་པ་མ་ཡིན་པ་དང་། རང་གི་སེམས་དང་། གཟུགས་ཀྱི་མཚན་ཉིད་ལ་མངོན་པར་མ་ཆགས་པས་
སེམས་ཅན་ཐམས་ཅད་ལ་ཕན་པ་དང་། བདེ་བའི་ཕྱིར་སྦྱིན་པའི་ཕ་རོལ་ཏུ་ཕྱིན་པ་སྐྱེད་པར་བྱེད་དོ། །སྦྱོར་བ་མཆོག་བསྐྱེད་ནས་དམིགས་པ་དེ་ཉིད་ལ་རྣམ་པར་རྟོག་པ་མི་འཇུག་པ་ནི་ཚུལ་ཁྲིམས་ཏེ། དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །དེ་ཉིད་རྣམ་པར་རྟོག་པ་མི་སྐྱེ་བར་བཟོད་ཅིང་གཟུང་བ་དང་། འཛིན་པ་ཡོངས་སུ་ཤེས་པ་དེ་ནི་བཟོད་པའི་ཕ་རོལ་ཏུ་ཕྱིན་པ། གང་གིས་ནམ་གྱི་ཆ་སྟོད་དང་། ཆ་སྨད་ལ་སྦྱོར་བ་ལ་བརྩོན་པར་བྱེད་ཅིང་རྣལ་འབྱོར་དང་འཐུན་པར་རྣམ་པར་རྟོག་པ་མི་འཇུག་པ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །རྣམ་པར་རྟོག་པ་རབ་ཏུ་ལྡོག་ཅིང་ཉན་ཐོས་ཀྱི་མྱ་ངན་ལས་འདས་པའི་འཛིན་པར་མི་ལྟུང་བ་དེ་ནི་བསམ་གཏན་གྱི་ཕ་རོལ་ཏུ་ཕྱིན་པའོ། །དེ་ལ་རང་གི་སེམས་ཀྱི་རྣམ་པར་རྟོག་པ་དངོས་པོ་མེད་པར་ཤེས་རབ་ཀྱིས་སོ་སོར་བརྟགས་ནས་མཐའ་གཉིས་སུ་ལྟུང་བ་དང་། སྔོན་གྱི་ལུས་གནས་རབ་ཏུ་གྱུར་པས་རྣམ་པར་མི་འཇིག་པ་དང་། སོ་སོ་རང་གིས་རིག་པ་འཕགས་པའི་ཚུལ་ཐོབ་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །སྟོང་པ་མི་རྟག་སྐད་ཅིག་མར། །བྱིས་པ་རྣམས་ནི་རྣམ་པར་རྟོག །འབབ་ཆུ་མར་མེ་ས་བོན་ལྟར། །སྐད་ཅིག་པ་ཡི་དོན་དུ་རྟོག །སྐད་ཅིག་ཉོན་མོངས་འཁྲུག་པ་ཞི། །རབ་ཏུ་དབེན་པ་བྱེད་པ་སྤངས། །ཆོས་རྣམས་སྐྱེ་བ་མེད་པ་ནི། །སྐད་ཅིག་དོན་དུ་ངས་བཤད་དེ། །དངོས་པོ་སྐྱེས་ནས་འཇིག་པར་ནི། །བྱིས་པ་རྣམས་ལ་མི་འཆད་དོ། །བར་ཆད་མེད་པར་རྒྱུན་ཆགས་དངོས། །རྣམ་པར་རྟོག་པས་ཡོངས་སུ་བསྒོས། །མ་རིག་པ་ནི་རྒྱུ་བྱེད་དེ། །སེམས་ནི་དེ་ལས་རབ་ཏུ་འབྱུང་། །ཇི་སྲིད་གཟུགས་དག་མ་སྐྱེས་པ། །དེ་ཡི་བར་དུ་ཕྱོགས་ཅི་ཡོད། །ཞིག་པར་གྱུར་མ་ཐག་ཏུ་ནི། །སེམས་གཞན་དེ་ཡི་རྗེས་སུ་སྐྱེ། །གཟུགས་ནི་དུས་སུ་མི་གནས་ན། །ཅི་ལ་དམིགས་ཏེ་འབྱུང་བར་འགྱུར། །དེ་དག་ལས་ནི་རབ་འབྱུང་ཕྱིར། །ཡང་དག་མ་ཡིན་རྒྱུ་ལས་སྐྱེས། །ཇི་ལྟར་གྲུབ་པ་མེད་པ་དེས། །སྐད་ཅིག་འཇིག་པར་རབ་ཏུ་ཤེས། །རྣལ་འབྱོར་ཅན་གྱི་སྙོམས་འཇུག་དང་། །རྡོ་རྗེ་སངས་རྒྱས་རིང་བསྲེལ་དང་། །འོད་གསལ་གནས་ཀྱི་གཞལ་མེད་ཁང་། །འཇིག་རྟེན་མི་འཇིག་དངོས་པོའོ། །ཡང་དག་
ཆོས་ཐོབ་གནས་པ་དང་། །དེ་བཞིན་གཤེགས་མཁྱེན་ཕུན་སུམ་ཚོགས། །དགེ་སློང་མཉམ་པ་ཉིད་ཐོབ་རྣམས། །སྐད་ཅིག་མར་ནི་ཇི་ལྟར་མཐོང་། །དྲི་ཟ་སྒྱུ་མ་ལ་སོགས་པའི། །གཟུགས་རྣམས་སྐད་ཅིག་ཡོད་མ་ཡིན། །ཡང་དག་མ་ཡིན་གཟུགས་སོགས་ལ། །ཡང་དག་ཉིད་དུ་ལྟ་བར་བྱེད། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཇི་སྐད་དུ་དགྲ་བཅོམ་པ་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་ལུང་བསྟན་པས་བྱང་ཆུབ་སེམས་དཔའ་རྣམས་དང་མཚུངས་ཤིང་བྱེ་བྲག་མ་མཆིས་པར་འགྱུར་རོ། །གལ་ཏེ་སེམས་ཅན་རྣམས་མྱ་ངན་ལས་འདའ་བའི་ཆོས་ཅན་ལགས་ན་སུ་ཞིག་མངོན་པར་རྫོགས་པར་བྱང་ཆུབ་པར་འགྱུར། །གཞན་ཡང་ཇི་སྲིད་དུ་དེ་བཞིན་གཤེགས་པ་གང་གི་ནུབ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ནས་གང་གི་ནུབ་མོ་ཡོངས་སུ་མྱ་ངན་ལས་འདས་པ་དེའི་བར་དུ་ཡི་གེ་གཅིག་ཀྱང་མ་གསུངས། ལན་བཏབ་པ་ཡང་མེད་ཅེས་བཀའ་སྩལ། གཞན་ཡང་དེ་བཞིན་གཤེགས་པ་རྣམས་ནི་རྟག་ཏུ་མཉམ་པར་བཞག་པའི་ཕྱིར་རྟོག་པ་ཡང་མེད། དཔྱོད་པ་པ་ཡང་མེད་དོ། །སྤྲུལ་པའི་དེ་བཞིན་གཤེགས་པས་སངས་རྒྱས་ཀྱི་མཛད་པ་དག་སྤྲུལ་ཏོ། །གཞན་ཡང་ཅིའི་སླད་དུ་རྣམ་པར་ཤེས་པ་རྣམས་ནི་སྐད་ཅིག་མ་གཅིག་ནས་གཅིག་ཏུ་རྣམ་པར་འཇིག་པའི་མཚན་ཉིད་དོ་ཞེས་གསུངས། གཞན་ཡང་ལག་ན་རྡོ་རྗེ་མཐུ་བོ་ཆེ་ནི་རྟག་ཏུ་འབྲང་ཞིང་སྲུང་བར་བྱེད་དོ། །ཐོག་མའི་མཐར་མི་འདོགས་སོ་ཞེས་གསུངས། གཞན་ཡང་བདུད་དང་། བདུད་ཀྱི་ལས་དང་། ཁ་ན་མ་ཐོ་བ་རྣམས་ཀྱི་རྣམ་པར་སྨིན་པ་དང་། བྲམ་ཟེའི་བུ་མོ་ཙན་ཙ་དང་། མཛེས་མ་ཀུན་དུ་རྒྱུ་དང་། ལྷུང་བཟེད་སྟོང་པར་སླར་གཤེགས་པ་ལ་སོགས་པ་ལས་ཀྱི་སྒྲིབ་པ་དག་གདའ་ན། ཅིའི་སླད་དུ་བཅོམ་ལྡན་འདས་ཀྱིས་རྣམ་པ་ཐམས་ཅད་མཁྱེན་པའི་ཡེ་ཤེས་བརྙེས་ཀྱང་ནོངས་པ་རྣམས་མ་བྲལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེའི་ཕྱིར་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་
ལྡན་འདས་དེ་བཞིན་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལྷག་མ་མེད་པའི་མྱ་ངན་ལས་འདས་པར་བྱ་བའི་ཕྱིར་བཤད་དེ། བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་རབ་ཏུ་སྤྲོ་བར་བྱ་བའི་ཕྱིར་དང་། འཇིག་རྟེན་འདི་དང་གཞན་དག་ན་བྱང་ཆུབ་སེམས་དཔའི་སྤྱད་པ་སྤྱོད་པ་གང་དག་ཉན་ཐོས་ཀྱི་ཐེག་པས་ཡོངས་སུ་མྱ་ངན་ལས་འདའ་བར་མོས་པ་དེ་དག་ཉན་ཐོས་ཀྱི་ཐེག་པ་ལས་བཟློག་ནས་ཐེག་པ་ཆེན་པོ་ལ་རབ་ཏུ་བརྩོན་པར་བྱ་བའི་ཕྱིར་སྤྲུལ་པའི་སངས་རྒྱས་ཀྱིས་ཉན་ཐོས་རྣམས་ལ་ལུང་བསྟན་པ་ཡིན་གྱི། ཆོས་ཉིད་ཀྱི་སངས་རྒྱས་ཀྱིས་ནི་མ་ཡིན་ནོ། །བློ་གྲོས་ཆེན་པོ་རྒྱུ་དེས་ན་ཉན་ཐོས་རྣམས་བྱང་ཆུབ་སེམས་དཔའ་དག་དང་ཐ་མི་དད་པར་ལུང་བསྟན་ཏོ། །བློ་གྲོས་ཆེན་པོ་དེ་ལ་ཐ་མི་དད་པ་ཞེས་བྱ་བ་ནི་ཉན་ཐོས་དང་། རང་སངས་རྒྱས་དང་། སངས་རྒྱས་བཅོམ་ལྡན་འདས་རྣམས་ཉོན་མོངས་པའི་སྒྲིབ་པ་དང་། རྣམ་པར་གྲོལ་བ་རོ་གཅིག་པའི་ཕྱིར་ཡིན་གྱི། ཡེ་ཤེས་ཀྱི་སྒྲིབ་པ་སྤངས་པ་ནི་མ་ཡིན་ནོ། །བློ་གྲོས་ཆེན་པོ་ཡེ་ཤེས་ཀྱི་སྒྲིབ་པ་ནི་ཆོས་བདག་མེད་པར་མཐོང་བའི་ཁྱད་པར་གྱིས་རྣམ་པར་དག་པར་འགྱུར་ལ། ཉོན་མོངས་པའི་སྒྲིབ་པ་ནི་སྔར་གང་ཟག་ལ་བདག་མེད་པར་མཐོང་བ་ལ་གོམས་པས་སྤོང་བར་འགྱུར་རོ། །དེ་ལ་རྣམ་པར་ཤེས་པ་བདུན་འགགས་པ་དང་། ཆོས་ཀྱི་སྒྲིབ་པ་ལས་རྣམ་པར་གྲོལ་བ་དང་། ཀུན་གཞི་རྣམ་པར་ཤེས་པའི་བག་ཆགས་འགགས་པས་ནི་མཐར་ཐུག་པའི་རྣམ་པར་དག་པར་འགྱུར་རོ། །སྔོན་གྱི་ཆོས་གནས་པ་ཉིད་ལ་དགོངས་པའི་ཕྱིར་སྔ་མ་དང་ཕྱི་མ་དངོས་པོ་མེད་དོ། །མཐར་ཐུག་པའི་སྨོན་ལམ་གྱི་ཕྱིར་དེ་བཞིན་གཤེགས་པ་རྟོག་པ་ཡང་མེད། དཔྱོད་པ་ཡང་མེད་པར་ཆོས་འཆད་དེ། ཡང་དག་པའི་ཡེ་ཤེས་ཀྱིས་སྤྲུལ་པའི་ཕྱིར་དང་། དྲན་པ་ཉམས་པ་མེད་པའི་ཕྱིར་རྟོག་པ་ཡང་མེད། དཔྱོད་པ་ཡང་མེད་དོ། །གནས་པའི་ས་གཞི་དང་། མ་རིག་པའི་གནས་ཀྱི་སའི་བག་ཆགས་སྤངས་པའི་ཕྱིར་ཉོན་མོངས་པ་གཉིས་སྤངས་པ་དང་། འཆི་འཕོ་གཉིས་དང་བྲལ་བ་དང་། གང་ཟག་དང་ཆོས་བདག་མེད་པར་ཁོང་དུ་ཆུད་པ་དང་། སྒྲིབ་པ་གཉིས་སྤངས་པའོ། །བློ་གྲོས་ཆེན་པོ་ཡིད་དང་། ཡིད་ཀྱི་རྣམ་པར་ཤེས་པ་དང་། མིག་གི་རྣམ་པར་ཤེས་པ་ལ་སོགས་པ་བདུན་པོ་རྣམས་ནི་
སྐད་ཅིག་མ། བག་ཆགས་ཀྱི་རྒྱུ་དགེ་བ་ཟག་པ་མེད་པའི་ཕྱོགས་དང་བྲལ་བ། ཡང་འཁོར་བར་མི་འགྱུར་བ་དང་བྲལ་བ་ཡིན་ནོ། །བློ་གྲོས་ཆེན་པོ་དེ་བཞིན་གཤེགས་པའི་སྙིང་པོ་ནི་འཁོར་ཞིང་མྱ་ངན་ལས་འདས་པ་དང་། བདེ་བ་དང་། སྡུག་བསྔལ་བའི་རྒྱུ་ཡིན་ཏེ། སྟོང་པ་ཉིད་ཀྱིས་གཡེང་བའི་བློ་ཅན་དང་། བྱིས་པ་སོ་སོའི་སྐྱེ་བོ་དག་གིས་ཁོང་དུ་མི་ཆུད་དོ། །བློ་གྲོས་ཆེན་པོ་ལག་ན་རྡོ་རྗེ་མཐུ་བོ་ཆེ་རྗེས་སུ་འབྲང་ཞིང་སྲུང་བར་བྱེད་པ་ནི་སྤྲུལ་པའི་སངས་རྒྱས་ཡིན་གྱི། ཡང་དག་པའི་དེ་བཞིན་གཤེགས་པ་ནི་མ་ཡིན་ནོ། །བློ་གྲོས་ཆེན་པོ་ཡང་དག་པའི་དེ་བཞིན་གཤེགས་པ་ནི་དབང་པོ་དང་། ཚད་མ་ཐམས་ཅད་དང་བྲལ་བས་བྱིས་པ་སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་ཐམས་ཅད་ཀྱི་དབང་པོ་དང་། ཚད་མ་རྣམས་ལས་རྣམ་པར་ལོག་པ་ཡིན་ཏེ། མཐོང་བའི་ཆོས་ལ་བདེ་བར་གནས་པ་བར་ཆད་མེད་པའི་ཆོས་ཤེས་པའི་བཟོད་པ་ཐོབ་པའི་ཕྱིར་ལག་ན་རྡོ་རྗེས་བསྲུང་བར་བྱ་བ་མ་ཡིན་ནོ། །སྤྲུལ་པའི་སངས་རྒྱས་ཐམས་ཅད་ནི་ལས་ལས་སྐྱེས་པ་མ་ཡིན་ནོ། །འཕྲུལ་པས་སྤྲུལ་པའི་སངས་རྒྱས་ནི་སངས་རྒྱས་ཀྱང་མ་ཡིན། སངས་རྒྱས་ལས་གཞན་པ་ཡང་མ་ཡིན་ཏེ། །དཔེར་ན་རྫ་མཁན་གྱི་འཁོར་ལོ་ལ་སོགས་པའི་རྒྱུ་ལྟ་བུར་སེམས་ཅན་གྱི་བྱ་བ་བྱེད་ཅིང་མཚན་རྣམས་དང་ལྡན་པས་ཆོས་སྟོན་ཀྱང་རང་གི་ཚུལ་གྱི་གནས་སོ་སོ་རང་གིས་རིག་པའི་སྤྱོད་ཡུལ་བཤད་པ་ནི་མ་ཡིན་ནོ། །གཞན་ཡང་བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རྣམས་རྣམ་པར་ཤེས་པའི་ཚོགས་བདུན་འགགས་པའི་ཕྱིར་ནི་ཆད་པར་ལྟ་བ་སྐྱེད་དོ། །ཀུན་གཞི་རྣམ་པར་ཤེས་པ་མ་རྟོགས་པའི་ཕྱིར་ནི་རྟག་པར་ལྟ་བ་སྐྱེད་དོ། །བདག་ཉིད་རྣམ་པར་རྟོག་པའི་ཕྱིར་ནི་ཐོག་མའི་མཐའ་མི་ཤེས་སོ། །རང་གི་རྣམ་པར་རྟོག་པའི་བློ་འགགས་པའི་ཕྱིར་ནི་རྣམ་པར་གྲོལ་བར་འགྱུར་རོ། །གནས་པའི་ས་གཞི་དང་མ་རིག་པ་གནས་ཀྱི་སའི་བག་ཆགས་སྤངས་པའི་ཕྱིར་ཉེས་པ་ཐམས་ཅད་སྤངས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་དག་པར་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཐེག་པ་གསུམ་ནི་ཐེག་མ་ཡིན། །དེ་བཞིན་གཤེགས་པ་ཟད་མི་འགྱུར། །ཐམས་ཅད་སངས་རྒྱས་ལུང་བསྟན་ཅིང་། །
ཉེས་པ་རྣམས་དང་བྲལ་བར་བཤད། །མངོན་རྟོགས་ཡེ་ཤེས་ཐོབ་བྱ་དང་། །ལྷག་མེད་མྱ་ངན་འདའ་བ་དང་། །ཞུམ་པ་རྣམས་ཀྱང་སྤྲོ་བྱའི་ཕྱིར། །དེ་ཕྱིར་དགོངས་ཏེ་བཤད་པ་ཡིན། །སངས་རྒྱས་བསྐྱེད་པའི་ཡེ་ཤེས་དག །དེ་ཉིད་རྣམ་འབྱེད་ལམ་དུ་བཤད། །ཐེག་པ་རྣམས་ནི་ཐེག་མ་ཡིན། །དེ་ནི་མྱ་ངན་འདའ་བ་མིན། །འདོད་གཟུགས་སྲིད་དང་ལྟ་བ་རྣམས། །གནས་བཞིའི་སར་ནི་བཤད་པ་ཡིན། །ཡིད་ཀྱི་རྣམ་པར་ཤེས་ལས་འབྱུང་། །རྣམ་ཤེས་ཁྱིམ་དུ་ཡིད་ནི་གནས། །ཡིད་དང་མིག་སོགས་རྣམ་པར་ཤེས། །འགག་པ་ལ་ནི་མི་རྟག་བཤད། །ཡང་ན་མྱ་ངན་འདས་པར་ལྟ། །རྟག་པར་གནས་པ་ཉིད་དུ་འདོད། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཚིགས་སུ་བཅད་པས་ཞུ་བ་ཞུས་པ། བྱང་ཆུབ་སེམས་དཔའ་ལ་སོགས་པ། །བླ་མེད་བྱང་ཆུབ་ཚོལ་བ་དག །ཤ་དང་ཆང་དང་སྒོག་བཙོང་རྣམས། །འཚལ་ཞིང་བཏུང་བར་བགྱི་མི་བགྱི། །བླ་ན་མ་མཆིས་གཙོ་མཆོག་གིས། །ཐུགས་རྗེས་བདག་ལ་བཤད་དུ་གསོལ། །བྱིས་པ་དེ་ལ་བརྐམ་པར་བགྱིད། །དྲི་ང་གྲགས་པ་མ་མཆིས་འགྱུར། །ཤི་ན་གཅན་གཟན་རྣམས་ཀྱི་ཟས། །ཇི་ལྟར་དེ་ནི་འཚལ་བར་རུང་། །འཚལ་ནས་ནོངས་དམིགས་ཅི་མཆིས་དང་། །མ་འཚལ་ཡོན་ཏན་གང་ལགས་པ། །འཚལ་དང་མ་འཚལ་དགེ་སྡིག་རྣམས། །ཐུགས་རྗེས་བདག་ལ་བཤད་དུ་གསོལ། །བྱང་ཆུབ་སེམས་དཔའ་བློ་གྲོས་ཆེན་པོས་ཚིགས་སུ་བཅད་པ་རྣམས་ཀྱིས་ཞུ་བ་ཞུས་ནས། ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་ལ་སོགས་པའི་སླད་དུ་ཤ་འཚལ་བ་དང་མི་འཚལ་བའི་ནོངས་པ་དང་ཡོན་ཏན་རྣམས་བཤད་དུ་གསོལ། བདག་དང་བྱང་ཆུབ་སེམས་དཔའ་གཞན་རྣམས་ཀྱིས་ད་ལྟར་དང་མ་འོངས་པ་ན་ཤའི་ཟས་ལ་ཆགས་ཤིང་རེ་བའི་སེམས་ཅན་སྣ་ཚོགས་ལ་རྣམ་པར་ཕྱེ་སྟེ་ཆོས་བཤད་པས་སེམས་ཅན་དེ་དག་བྱམས་པའི་སེམས་ཀྱིས་ཕན་ཚུན་གཅིག་ལ་གཅིག་ལྟ་བ་དང་། བྱམས་པའི་སེམས་ཐོབ་ནས་ཀྱང་སོ་སོའི་ས་ལ་གནས་ཤིང་རྣམ་པར་དག་པ་གསལ་བར་རྟོག་སྟེ་མྱུར་དུ་མཐར་ཐུག་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བ་དང་། ཉན་ཐོས་དང་། རང་སངས་རྒྱས་དག་རང་གི་ས་ལ་བསྟི་ཞིང་། བསྟིས་ནས་ཀྱང་བླ་ན་
མེད་པའི་བྱང་ཆུབ་འཐོབ་པར་འགྱུར་རོ། །ཆོས་ངན་པ་ལོག་པར་སྨྲ་བའི་མུ་སྟེགས་ཅན་གང་དག་ལོག་པར་ལྟ་བ་དང་། རྟག་པ་དང་ཆད་པ་ལ་མངོན་པར་ཞེན་པ་རྣམས་ཀྱིས་ཀྱང་ཤ་འཚལ་བ་བཀག་སྟེ་ཤ་འཚལ་དུ་མི་གནང་བ་ལགས་ན། དེ་བཞིན་གཤེགས་པ་འཇིག་རྟེན་གྱི་མགོན་པོ་ཡང་དག་པའི་ཆོས་ཡོངས་སུ་གྲུབ་པས་ཤ་མི་གསོལ་བ་ལྟ་ཅི་སྨོས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་རྒྱུ་དང་རྐྱེན་ཚད་མེད་པའི་ཕྱིར་ཤ་རྣམས་བཟའ་བར་མི་བྱ་སྟེ། འོན་ཀྱང་འདིར་ཁྱོད་ལ་མདོ་ཙམ་ཞིག་བཤད་པར་བྱའོ། །འདི་ལྟ་སྟེ། སྲོག་ཆགས་རྣམས་ནི་ཡུན་རིང་པོ་ནས་ཕན་ཚུན་གྱི་རྒྱུ་རྐྱེན་གྱིས་རྟག་པར་གཉེན་དུ་གྱུར་ཏེ། འདི་ལྟར་གཉེན་དུ་གྱུར་པའི་འདུ་ཤེས་ཀྱི་ཕྱིར་ཤ་རྣམས་བཟའ་བར་མི་བྱའོ། །བོང་བུ་དང་། དྲེའུ་དང་། རྔ་མོ་དང་། ཝ་དང་། ཁྱི་དང་། གླང་དང་། རྟ་དང་། མི་དང་། གཅན་གཟན་གྱི་ཤ་ལ་སོགས་པ་ནི་ཤེན་པ་དག་འདྲེས་པར་འཚོང་བར་བྱེད་པས་དེའི་ཕྱིར་ཤ་བཟའ་བར་མི་བྱའོ། །ཤ་ནི་ཁུ་ཆུ་དང་ཁྲག་ལས་བྱུང་བའི་ཕྱིར་ཤ་བཟའ་བར་མི་བྱའོ། །སེམས་ཅན་གྱིས་དེའི་དྲི་ཚོར་ན་ཡང་ཐམས་ཅད་འཇིགས་ཤིང་སྐྲག་པར་འགྱུར་ཏེ། ཤེན་པ་དང་། གདོལ་པ་ལ་སོགས་པ་བཞིན་དུ་ཁྱི་རྣམས་ཀྱིས་མཐོང་ན་ཡང་དེ་ལ་སྔང་ཞིང་འཇིགས་པས་ཁྱིས་ཟུགས་པའི་ཕྱིར་ཤ་བཟའ་བར་མི་བྱའོ། །གཞན་ཡང་རྣལ་འབྱོར་པ་རྣམས་ཀྱི་བྱམས་པའི་སེམས་སྐྱེ་བར་མི་བྱེད་པའི་ཕྱིར་ཤ་བཟའ་བར་མི་རིགས་སོ། །འཕགས་པ་མ་ཡིན་པའི་སྐྱེ་བོ་དག་བརྐམ་ཞིང་དྲི་མི་ཞིམ་པར་འགྱུར་ལ་སྙན་པའི་གྲགས་པ་མེད་པའི་ཕྱིར་ཤ་བཟའ་བར་མི་བྱའོ། །རིག་སྔགས་རྣམས་སྒྲུབ་པ་འགྲུབ་པར་མི་འགྱུར་བའི་ཕྱིར་ཤ་བཟའ་བར་མི་བྱའོ། །འདི་ལྟར་སྲོག་གཅོད་པ་ནི་གཟུགས་མཐོང་མ་ཐག་ཏུ་མངོན་པར་ཆགས་པའི་སེམས་སྐྱེད་པར་བྱེད་པའི་ཕྱིར་ཤ་མི་ཟའོ། །གང་ཤ་ཟ་བ་དེ་དག་ལ་ནི་ལྷ་རྣམས་ཀྱིས་སྤོང་བར་བྱེད་པའི་ཕྱིར་ཤ་བཟའ་བར་མི་བྱའོ། །ཁའི་དྲི་མི་ཞིམ་པར་འགྱུར་བའི་ཕྱིར་ཡང་ཤ་བཟའ་བར་མི་བྱའོ། །རྨི་ལམ་ངན་པ་མང་
བའི་ཕྱིར་ཤ་བཟའ་བར་མི་བྱའོ། །དགོན་པའི་གནས་ནགས་ཚལ་དག་ན་གནས་པའི་ཚེ་སྟག་དང་སྤྱང་ཀི་ལ་སོགས་པས་དྲི་ཚོར་བར་འགྱུར་བའི་ཕྱིར་ཤ་བཟའ་བར་མི་བྱའོ། །ཟས་ཀྱི་ཚོད་མི་ཟིན་པར་བྱེད་པའི་ཕྱིར་ཤ་བཟའ་བར་མི་བྱའོ། །རྣལ་འབྱོར་པ་རྣམས་ཡོངས་སུ་སྐྱོ་བའི་སེམས་སྐྱེ་བར་མི་འགྱུར་བའི་ཕྱིར་ཤ་བཟའ་བར་མི་བྱའོ། །ངས་རྟག་ཏུ་ཇི་ཙམ་དུ་བཟའ་བ་དང་བཏུང་བ་རྣམས་ལ་བུའི་ཤའི་འདུ་ཤེས་དང་། སྨན་གྱི་འདུ་ཤེས་བྱའོ་ཞེས་བཤད་པའི་ཕྱིར་ཤ་བཟའ་བར་མི་བྱ་སྟེ། ངས་ཤ་བཟའ་བར་གནང་ངོ་ཞེས་ཟེར་ན་དེ་ནི་གནས་མེད་དོ། །གཞན་ཡང་བློ་གྲོས་ཆེན་པོ་སྔོན་འདས་པའི་དུས་ན་རྒྱལ་པོ་སེང་གེ་འབངས་བཟང་ཞེས་བྱ་བ་ཞིག་བྱུང་སྟེ། ཤ་སྣ་ཚོགས་ལ་ཟ་ཞིང་མི་ཤ་ཡང་ཟོས་པར་གྱུར་པས་བློན་པོ་དང་། གཉེན་དང་། གཉེན་འདབ་ཀྱི་སྐྱེ་བོའི་ཚོགས་རྣམས་ལོག་ནས་སྔོན་གྱི་དབང་ཐང་རྣམས་ཀྱང་བཅད་པས་ཉོན་མོངས་པར་གྱུར་ཏོ། །དེ་ལྟ་བས་ན་ཤ་ཟ་བ་ལ་ཉེས་དམིགས་འདི་ལྟ་བུ་ཡོད་པའི་ཕྱིར་ཤ་བཟའ་བར་མི་བྱའོ། །གཞན་ཡང་བློ་གྲོས་ཆེན་པོ་དེ་ལ་སྲོག་གཅོད་པ་དག་ནི་ཁེ་འདོད་པའི་ཕྱིར་སྲོག་བཅད་ནས་འཚོང་བར་བྱེད་དོ། །གང་བླུན་པོ་ཤ་ཟ་བ་དེ་དག་ནི་རིན་གྱིས་ཤ་རྣམས་ཉོ་བར་བྱེད་དོ། །སྲོག་གཅོད་པར་བྱེད་པ་དེ་དག་ཁེ་འདོད་པའི་ཕྱིར་ལྕགས་ཀྱུ་དང་རྒྱ་རྣམས་ཀྱིས་སྲོག་ཆགས་ནམ་མཁའ་ལ་རྒྱུ་བ་དང་། ཆུ་ལ་གནས་པ་དང་། ས་ལ་འགྲོ་བ་དག་རྣམ་པ་དུ་མས་གསོད་ཅིང་ཁེ་ཚོལ་བར་བྱེད་དོ། །བློ་གྲོས་ཆེན་པོ་བྱེད་དུ་མ་བཅུག་པ་དང་། མ་བཙལ་བ་དང་། འདུ་ཤེས་མེད་པ་ཞེས་བྱ་བའི་ཤ་གང་ཡང་མེད་པས་དེའི་ཕྱིར་ཤ་བཟའ་བར་མི་བྱའོ། །བློ་གྲོས་ཆེན་པོ་ངས་སྔར་ཤ་རྣམ་པ་ལྔ་དང་བཅུ་བཀག་ལ་མདོ་སྡེ་འདིར་ནི་རྣམ་པ་ཐམས་ཅད་དང་དུས་ཐམས་ཅད་དུ་ཐབས་ཀྱིས་གནང་བ་ཐམས་ཅད་ཀྱང་བཀག་གོ །བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ནི་བཟའ་བར་བྱ་བ་ཡང་མེད་ན་ཉའི་ཤ་ཟ་བ་ལྟ་ཅི་སྨོས་ཏེ། གཞན་ཡང་བྱེད་དུ་མི་འཇུག་གོ །ཐུགས་རྗེ་ཆེན་པོ་སྔོན་དུ་འགྲོ་བའི་ཕྱིར་
སེམས་ཅན་ཐམས་ཅད་བུ་གཅིག་པ་དང་འདྲ་བར་གཟིགས་ཏེ། དེའི་ཕྱིར་བུའི་ཤ་བཟའ་བར་མི་གནང་བ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །སྔོན་ཆད་གཉེན་བཤེས་བྱས་ཕྱིར་དང་། །ངན་པ་མི་གཙང་འདྲེས་པ་དང་། །ཁུ་ཆུ་ཁྲག་ལས་བྱུང་བ་དང་། །དྲི་ཚོར་ཐམས་ཅད་འཇིགས་སྐྲག་པས། །ཤ་རྣམས་དང་ནི་བཙོང་དག་དང་། །ཀིའུ་དང་བྱིས་ཀུ་ལ་སོགས་དང་། །བག་མེད་སྣ་ཚོགས་འགྱུར་བའི་ཆང་། །རྣལ་འབྱོར་པས་ནི་རྟག་ཏུ་སྤང་། །འབྲུ་མར་དག་ཀྱང་སྤང་བྱ་སྟེ། །བུག་ཕུག་པ་ཡི་ཁྲི་ཡང་སྤང་། །སྲོག་ཆགས་དག་ནི་ཕྲ་མོ་རྣམས། །དེ་ན་རབ་ཏུ་འཇིགས་ཕྱིར་རོ། །ཟས་ལས་བག་མེད་སྐྱེ་བར་འགྱུར། །བག་མེད་པ་ལས་རྟོག་པ་སྐྱེ། །རྟོག་པ་ལས་ནི་འདོད་ཆགས་སྐྱེ། །དེ་ཡི་ཕྱིར་ན་བཟའ་མི་བྱ། །ཟས་ཀྱི་དབང་གིས་འདོད་ཆགས་སྐྱེ། །འདོད་ཆགས་ཀྱིས་ནི་སེམས་རྨོངས་བྱེད། །རྨོངས་པས་སྲིད་པའི་འདོད་པ་སྐྱེད། །འཁོར་བ་ལས་ནི་གྲོལ་མི་འགྱུར། །ཁེ་ཡི་ཕྱིར་ནི་སེམས་ཅན་གསོད། །ཤ་ཡི་ཕྱིར་ནི་ནོར་སྦྱིན་བྱེད། །གཉི་ག་སྡིག་པའི་ལས་ཅན་པས། །ཤི་ནས་འོ་དོད་འབོད་པར་ལྟུང་། །བཅོལ་ཚོལ་འདུ་ཤེས་དེ་མེད་ན། །རྣམ་གསུམ་དག་པའི་ཤ་ཡང་མེད། །རྒྱུ་མེད་ལས་ནི་ཡོད་མིན་པས། །དེ་ཡི་ཕྱིར་ན་བཟའ་མི་བྱ། །རྣལ་འབྱོར་པ་ནི་དེ་དག་གིས། །དེས་ན་ཐམས་ཅད་སྤང་བྱར་བྱ། །ཕྱོགས་བཅུ་སངས་རྒྱས་བཅོམ་ལྡན་འདས། །ཐམས་ཅད་རབ་ཏུ་སྨོད་པར་འགྱུར། །གཅིག་ལ་གཅིག་ནི་ཟ་བར་བྱེད། །ཤི་ནས་གཅན་གཟན་རིགས་སུ་ལྟུང་། །དྲི་མི་ཞིམ་པ་སྨད་པ་དང་། །གླེན་པ་དག་ཏུ་སྐྱེ་བར་འགྱུར། །ཕལ་ཆེར་གདོལ་པའི་རིགས་སུ་སྐྱེ། །རྔོན་པ་སྨེ་ཤ་ཅན་རིགས་དང་། །ཡང་ན་འཕྲ་མེན་རིགས་སུ་སྐྱེ། །ཤ་ཟའི་རིགས་སུ་སྐྱེ་བར་འགྱུར། །སྲིན་པོ་བྱི་ལ་ལ་སོགས་པའི། །མངལ་ཀུན་དུ་ནི་སྐྱེ་བར་འགྱུར། །གླང་པོ་འཆིང་དང་སྤྲིན་ཆེན་དང་། །
སོར་མོའི་ཕྲེང་བའི་མདོ་དག་དང་། །ལང་ཀར་གཤེགས་པའི་མདོ་འདི་ལས། །ངས་ནི་ཤ་རྣམས་རབ་ཏུ་བཀག །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རྣམས་ཀྱིས་སྨད་པ་དང་། །ངོ་མི་ཚ་བར་ཟ་བ་ནི། །རྟག་ཏུ་གླེན་པར་སྐྱེ་བར་འགྱུར། །སྔར་ཡང་མཐོང་ཐོས་དོགས་པ་ཡི། །ཤ་རྣམས་ཐམས་ཅད་སྤང་བར་བཤད། །རྟོག་གེ་རྣམས་ཀྱིས་མ་རྟོགས་པས། །དེ་ཕྱིར་ཤ་ཟན་གནས་སུ་སྐྱེས། །ཇི་ལྟར་འདོད་ཆགས་ཉེས་པ་ཡིས། །འཕགས་པའི་རྣམ་གྲོལ་སྒྲིབ་འགྱུར་ཞིང་། །ཤ་ཆང་སྒོག་བཙོང་ལ་སོགས་པའང་། །འཕགས་པའི་ལམ་གྱི་བར་ཆད་བྱེད། །མ་འོངས་དུས་ཀྱི་སྐྱེ་བོ་དག །ཤ་ཟ་གཏི་མུག་སྨྲ་བ་རྣམས། །ཤ་ནི་སྡིག་མེད་རུང་བས་ན། །སངས་རྒྱས་ངེད་ལ་གནང་ཞེས་ཟེར། །ཟས་ལ་སྨན་སྟེན་འདུ་ཤེས་དང་། །དེ་བཞིན་བུ་ཤ་ལྟ་བུར་ཡང་། །ཆོས་ཤེས་སྐྱོ་བ་བསྐྱེད་ནས་ནི། །རྣལ་འབྱོར་ཅན་གྱིས་བསོད་སྙོམས་སྤྱད། །སྙིང་རྗེ་སེམས་ལ་གང་གནས་པ། །ཡོངས་སུ་སྐྱོ་བར་ང་ཡིས་བཤད། །སྟག་དང་སྤྱང་ཀི་གཅན་གཟན་རྣམས། །རྟག་ཏུ་ལྷན་ཅིག་འགྲོགས་ཤིང་གནས། །གལ་ཏེ་ཤ་རྣམས་ཟ་བྱེད་ན། །སེམས་ཅན་དག་ནི་སྐྲག་འགྱུར་བས། །དེ་ཕྱིར་རྣལ་འབྱོར་པ་དག་གིས། །སྙིང་རྗེའི་སེམས་ཀྱིས་ཤ་མི་བཟའ། །ཤ་ཟ་སྙིང་རྗེ་ཤེས་རབ་མེད། །རྣམ་པར་གྲོལ་ལ་རྒྱབ་ཀྱིས་ཕྱོགས། །འཕགས་པའི་རྒྱལ་མཚན་དག་དང་འགལ། །དེ་ཡི་ཕྱིར་ན་བཟའ་མི་རིགས། །བྲམ་ཟེའི་རིགས་སུ་སྐྱེ་བར་འགྱུར། །གཞན་ཡང་རྣལ་འབྱོར་པ་ཡི་གནས། །ཤེས་རབ་ཕྱུག་པོའི་ཁྱིམ་དུ་སྐྱེ། །འདི་ནི་ཤ་སྤངས་དབང་གིས་སོ། །འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས་སངས་རྒྱས་ཐམས་ཅད་ཀྱི་གསུང་གི་སྙིང་པོའི་ལེའུ་ཞེས་བྱ་བ་རྫོགས་སོ།། །།དཔལ་ལྷ་བཙན་པོའི་བཀའ་ལུང་གིས་རྒྱའི་སློབ་དཔོན་ཝེན་ཧྭི་ཡིས་མཛད་པའི་འགྲེལ་པ་དང་སྦྱར་ནས། ལོ་ཙྪ་བ་དགེ་སློང་འགོས་ཆོས་གྲུབ་ཀྱིས་བསྒྱུར་ཅིང་ཞུས།།