དྲུག་པ། རྣལ་འབྱོར་རྣམ་པར་ཕྱེ་བའི་སྤྱོད་པ་ཞེས་བྱ་བའི་ལེའུ།
བམ་པོ་གསུམ་པ། འཇིམ་པ་རྩྭ་སྨིག་ཐག་པ་ལས། །ཇི་ལྟར་གནས་པའི་ཁྱིམ་གྱི་རྣམས། །ཕན་ཚུན་ཀུན་ནས་འདུས་འབྱོར་ཅིང་། །ས་ཡི་དབུས་ན་སྣང་བ་ནི། །རེ་རེ་ལ་ཡང་ཁྱིམ་མེད་དེ། །རྫས་དང་དངོས་ལ་རྣམ་བརྟགས་ན། །རྫས་ཀྱི་རྣམ་པ་འདུས་པ་ལ། །ཁྱིམ་ཞེས་གདགས་ཤིང་བརྗོད་པ་སྟེ། །སོར་མོ་ཕན་ཚུན་ཀུན་འདུས་ན། །ཇི་ལྟར་ལག་པའི་ཕུག་རོན་དུ། །ལག་པ་གཉིས་ནི་བསྡུས་ལས་འགྱུར། །ཐ་དད་པ་ལས་མི་འབྱུང་ངོ་། །གཡུལ་དང་ཤིང་རྟ་བསྙེམས་བྲལ་ཁང་། །གྲོང་ཁྱེར་ནགས་ཚལ་དེ་བཞིན་ཏེ། །རི་དང་སྤྲིན་དང་དབའ་རླབས་ཀྱང་། །བྲག་ཅ་གློག་དང་འདྲ་བའོ། །སྨིག་སྒྱུ་ཆུ་ཟླ་སྒྱུ་འདྲ་བ། །སྣམ་བུ་རྫ་སོགས་གྲགས་པ་སྟེ། །མཁས་ལ་དངོས་པོ་ཐམས་ཅད་ཀྱང་། །རྨི་ལམ་འདྲ་བར་ཀུན་ཏུ་སྣང་། །དེ་བཞིན་ལུས་ཁྱིམ་སྣ་ཚོགས་པ། །བུས་པའི་ལམ་རྒྱུད་དོག་པ་ན། །ཁམས་ཀྱིས་རི་བཞིན་གྱུར་པ་སྟེ། །ཁྱིམ་
ལྟར་རྟག་ཏུ་མི་བརྟན་ལ། །འབྱུང་བ་མེད་ཅིང་འཇིག་པ་མེད། །བདག་ལས་མ་ཡིན་གཞན་ལས་མིན། །རྟག་དང་ཆད་ལས་རྣམ་པར་གྲོལ། །གཟུང་དང་འཛིན་པ་ཡོངས་སུ་སྤངས། །ཇི་ལྟར་དྲི་ཟའི་གྲོང་ཁྱེར་ནི། །མདོག་ཏུ་ཟད་ཀྱང་གྲོང་ལྟར་སྣང་། །དེ་བཞིན་རང་རྟོག་རྣམ་བརྟགས་པའི། །དངོས་པོ་རྣམས་ཀྱང་རབ་ཏུ་འབྱུང་། །ཆོས་རྣམས་སྨིག་རྒྱུ་ལྟ་བུ་སྟེ། །ཡོད་མེད་རྣམ་བྲལ་དགེ་བ་ཡིན། །རྨི་ལམ་སྤྲིན་ལྟར་སྣང་བ་སྟེ། །རྩིག་ངོས་རི་མོའི་ཕུག་ལྟ་བུའོ། །ཞ་བོ་ལོང་བ་འདྲ་བ་ནི། །དངོས་ཀུན་གཅིག་གིས་གཅིག་རྒྱུ་བ། །རང་བཞིན་རྟོགས་པར་མི་རུང་སྟེ། །རྣལ་འབྱོར་ཅན་གྱིས་ཡང་དག་མཐོང་། །རྡུལ་ཕྲན་རྣམ་པར་གཞིགས་པ་དང་། །རྡུལ་གྱི་དངོས་པོ་མི་གནས་ཏེ། །རང་བཞིན་ཀུན་གྱི་མཆོག་ཡིན་པས། །རྡུལ་ཕྲན་མཆོག་ཅེས་དེ་ཕྱིར་བརྗོད། །དེ་ཕྱིར་བློ་ནི་ཕྱིར་ལྡོག་སྟེ། །སྒྲ་ལ་སོགས་པའི་ཡོན་ཏན་སྤངས། །རྣལ་འབྱོར་མཁས་པའི་རྣལ་འབྱོར་ཅན། །དེ་ཚེ་ངལ་བསོའི་ཡིད་དུ་འགྱུར། །ངལ་བསོའི་ཡིད་ལྡན་རྣལ་འབྱོར་ཅན། །བཅིངས་པ་ཀུན་ལས་གྲོལ་བས་ན། །འདི་དང་ཕ་བིར་མི་སྐྱེ་སྟེ། །བསམ་གཏན་ཚུལ་ལ་མོས་པ་རྣམས། །སྣ་ཚོགས་རིན་ཆེན་སྙིང་པོ་ཡི། །གནས་ན་དབང་ཅན་དེ་དག་རྩེ། །ཡོན་ཏན་དབང་ཕྱུག་ཉེས་པ་མེད། །རིག་འཛིན་བུད་མེད་མང་པོ་དང་། །ཐུབ་པ་རྣམས་ཀྱིས་རབ་མཆོད་ཅིང་། །རྨི་ལམ་བཞིན་དུ་གནས་པ་ཡིན། །འདི་ན་གནས་ཀྱང་ཚངས་པ་དང་། །ཐུབ་དང་ཐུབ་པའི་བུ་རྣམས་དང་། །རིག་འཛིན་ཚོགས་ཀྱིས་དེ་བཞིན་ཏེ། །སྤྱི་གཙུག་བལྟ་བར་མི་ནུས་སོ། །འདི་ནི་ཐུབ་པའི་རྣལ་འབྱོར་ཡུལ། །དེ་བས་བསམ་གཏན་བརྩོན་པར་གྱིས། །འདི་ནི་ཀུན་གྱི་ཡུལ་མ་ཡིན། །དེ་ཕྱིར་གྲོགས་པོ་བསྟན་པར་གྱིས། །བརྟན་པ་ས་རྣམས་སྣ་ཚོགས་དང་། །འོད་ཅན་རྣམས་ཀྱི་གནས་སུ་ཡང་། །འདོད་ཆགས་ཕྱོགས་དང་བཅས་པ་དང་། །གཏི་མུག་ཞེ་སྡང་དེ་བཞིན་དུ། །བཅོམ་སྟེ་སྟུག་པོ་རབ་ཡངས་པ། །ཡིད་བཞིན་ཞི་བའི་གནས་སུ་འགྲོ། །དེ་ནི་འཆི་བདག་ཡུལ་མ་ཡིན། །རྣམ་ཤེས་སྤྱོད་ཡུལ་དེ་བཞིན་མིན། །མཚན་མ་མེད་པའི་གནས་
ཡིན་ཏེ། །རྟོག་པས་དེ་བསྒྲུབ་མ་ཡིན་ནོ། །འདི་ནི་ལྷ་རྫས་གནས་ཡིན་ཏེ། །ཐུབ་པ་རྣལ་འབྱོར་ལྡན་པ་ཡི། །དེ་བས་ཞིང་མཆོག་དེ་འདོད་ན། །ཐུབ་པས་བསམ་གཏན་དེ་ལ་གྱིས། །འདོད་ཆགས་ཞེ་སྡང་རྣམ་བཅོམ་སྟེ། །ང་མེད་ང་ཡི་འགྲོ་མེད་དུ། །འདོད་ཆགས་ཞེ་སྡང་མི་བསམ་པར། །བསམ་གཏན་མཆོག་ལ་བསྒོམ་པར་གྱིས། །ཕན་ཚུན་ཡུལ་ལ་འཛིན་པའི་ཕྱིར། །གཉིས་ཀྱི་བློ་ནི་རབ་ཏུ་འབྱུང་། །ཡོད་མེད་རྟོག་པས་དེ་བཞིན་དུ། །རྣམ་ཤེས་རྣམས་ལ་ཀུན་གཞིའོ། །བུད་མེད་རོ་སྨད་ཤས་རྒྱས་ཤིང་། །སྐྲ་བཟང་མིག་ཀྱང་མཛེས་པ་དང་། །སྣ་ལེགས་འཕྲལ་བའི་དབྱིབས་སྡུག་ལ། །སྨིན་མ་སྟུག་ཅིང་བལྟ་མཛེས་པ། །ཇི་ལྟར་ལ་ལ་དེར་ཆགས་པའི། །ཡིད་ཀྱིས་རྣམ་པར་མྱོས་པའི་སེམས། །ལྟ་ཞིང་རྣམ་པར་རྟོག་པའི་ཚེ། །མཁས་མིན་དེ་ལ་ཤིན་ཏུ་མྱོས། །འགྲོ་འདུག་འགྲེང་ཡང་དེ་བཞིན་ཏེ། །སྣོམ་ཟ་གཉིད་ཀྱིས་ལོག་པ་ནའང་། །འདོད་ཅན་གཞན་དུ་མི་སེམས་ཏེ། །འདོད་པ་ཅན་མོ་ཡིད་ལ་བྱེད། །དེ་བཞིན་ཁྱོད་བློ་རྙོག་པ་ཅན། །རྣམ་པ་ཀུན་ཏུ་ཡིད་ལ་གནས། །རྫབ་ཡུལ་རྙོག་དང་ལྡན་པ་ཡི། །བཅིངས་པའི་དབང་དུ་མ་འགྲོ་ཤིག །ཇི་ལྟར་ལ་ལ་རྟོག་པ་ཅན། །བློ་ཡི་སྤྱོད་ཡུལ་རྣམ་འཁྲུལ་བ། །མ་ཧེ་དག་དང་བ་གླང་དང་། །གླང་པོ་དག་དང་བསེ་རྣམས་དང་། །རང་ག་ཀྲཱིཥྞ་ས་ར་དང་། །ཤ་ར་བ་དང་སུ་ར་དང་། །སྨྱན་དང་གཡག་ཀྱང་དེ་བཞིན་ཏེ། །མགོ་དཀར་རྣ་དང་ཁྱུ་མཆོག་གི། །རུ་ཆེན་རྣམ་པར་མཐོང་བ་དང་། །འདི་བདེན་གཞན་དུ་མི་འགྱུར་ཞེས། །སེང་སྟག་བོང་བུ་སོགས་པ་ཡི། །རྭ་རྣམས་ལ་ནི་མེད་ཅེས་ཏེ། །ཡོད་དང་མེད་པའི་ལྟ་བ་ཡང་། །མི་མཁས་རྣམས་ལ་རབ་ཏུ་འབྱུང་། །དེ་ལྟར་གཞན་གྱི་རྭ་མཐོང་ཞིང་། །བོང་བུའི་མེད་ཅེས་རྣམ་རྟོག་འབྱུང་། །ཇི་སྟེ་གཞན་གྱིས་མ་མཐོང་ན། །བོང་རུ་མེད་སྙམ་དེ་མི་འབྱུང་། །ལོག་པར་དམིགས་པའི་རྒྱུ་ཡི་ཕྱིར། །འདི་ན་མེད་ཅེས་རྟོག་པ་འབྱུང་། །དེ་ལ་དམིགས་པ་མེད་པས་ཀྱང་། །གདོན་མི་ཟ་བར་མེད་ལ་རྟེན། །རྙོག་ཅན་ང་རྒྱལ་རྟོག་ཡུལ་ལ། །བློ་གྲོས་སྤྱོད་ཡུལ་མ་རྟོག་ཅིག །བ་ལང་བ་མན་མ་ཧེ་རྣམས། །རྟོག་པས་བརྟགས་པ་
ཇི་བཞིན་ཏེ། །དེ་ལྟར་ཁྱོད་ཀྱིས་སེམས་སྤྱོད་དང་། །ཕུང་པོ་སྐྱེ་མཆེད་སྤྱོད་ཡུལ་དག །མངོན་སུམ་ཚད་མ་དག་གིས་སམ། །ཤེས་རབ་ཀྱིས་ཀྱང་རྣམ་པར་ལྟོས། །རྣམ་གྲོལ་མཐོ་རིས་འགྲོ་བ་འམ། །ཇི་ལྟར་འདོད་པ་བཞིན་དུའང་འགྱུར། །ཚངས་པའི་གནས་སུ་ཚངས་པར་རམ། །མཚེ་མ་རབ་དང་གནས་དབེན་དང་། །རིན་ཆེན་སྣ་ཚོགས་གནས་སུ་ཡང་། །དབང་སྒྱུར་རྣམ་པར་མཛེས་པར་འགྱུར། །འོད་ཆུང་རྒྱས་པ་དག་ཏུ་འམ། །འདོད་ཁམས་བདག་པོ་དབང་ཅན་ནམ། །ཉི་ཟླ་བདག་བདག་གནས་སུ་འམ། །གཞན་ཡང་འོད་འབར་གཟར་ཡང་རུང་། །སུམ་ཅུ་རྩ་གསུམ་རྒྱལ་ཆེན་དང་། །འཕྲུལ་ལ་དགའ་བའི་གནས་སུ་ཡང་། །ཚངས་གནས་བཅུ་དང་ལྡན་པ་ཡི། །རྣལ་འབྱོར་ཅན་ནི་རྣམ་པར་མཛེས། །གྱ་ནོམ་སྣང་དང་ཤིན་ཏུ་མཐོང་། །འདོད་མེད་མི་དྲོས་དེ་བཞིན་ཏེ། །འོག་མིན་གནས་ཀྱི་ལྷ་རྫས་ན། །འོག་མིན་ཤིན་ཏུ་རྣམ་པར་མཛེས། །ཅུང་ཟད་མེད་མཁའ་རྣམ་ཤེས་དང་། །འདུ་ཤེས་ཡོད་མེད་མ་ཡིན་དང་། །དེ་བཞིན་འཕྲུལ་གྱི་བདེ་ཅན་དང་། །ཞིང་བཟང་གཞན་དུ་དེ་བཞིན་ཏེ། །མཁའ་ལ་འགྲོ་དང་སྤོབས་པ་བཞིན། །འཁོར་ལོ་འཁོར་བའི་རིགས་སུ་གནས། །གྲོལ་བ་རྣམས་ཀྱི་གྲོལ་ཡུལ་ལ། །སུ་གནས་དེ་དག་རྣལ་འབྱོར་ཅན། །འདོད་ཆགས་སྟོབས་ལས་སྔོན་རྒྱལ་བ། །དེ་དག་བཟང་པོའི་ས་ལ་གནས། །འདི་ལྟའི་རྣལ་འབྱོར་ལྡན་པས་ན། །རྣལ་འབྱོར་ལ་ནི་ཐུབ་པར་རྩེ། །རྫ་མ་འཇིག་པའི་གྱོ་མོ་ཡི། །ཇི་ལྟར་རྒྱུར་ཡང་འགྱུར་བ་དང་། །སྐད་ཅིག་འཇིག་ལ་སྐད་ཅིག་སྟེ། །མི་རྟག་ཉིད་ཀྱང་རྟག་པ་ཡི། །ས་བོན་ཇི་བཞིན་མྱུ་གུ་ལ། །རྒྱུ་རྣམས་དེ་དག་འདྲ་བ་ཡིན། །མྱུ་གུ་གཞན་མིན་ས་བོན་ལས། །ས་བོན་ཉིད་ཀྱང་མྱུ་གུ་མིན། །ས་སྣར་རྣམས་ལས་རྫ་སྣར་འབྱུང་། །ཚོས་ནས་དམར་རུར་མངོན་པར་འབྱུང་། །གནག་དང་སྣར་དང་འདྲེས་པ་དང་། །གྲོ་བོ་དམར་པོ་དག་ཀྱང་སྐྱེ། །འདམ་བུ་ལས་ནི་སྒོག་པར་འགྱུར། །རྭ་ལས་ལན་ཚྭར་དེ་བཞིན་ཏེ། །མི་གཙང་སྦྲང་བུ་དག་ལས་ཀྱང་། །སྲིན་བུར་འགྱུར་གཞན་མི་འདྲ་མང་། །རྒྱུ་དང་འདྲ་བའི་འབྲས་བུ་ནི། །ས་རྣམས་
གང་ནའང་ཡོད་པ་མིན། །གྱུར་པའི་རྒྱུ་ལས་འབྲས་བུ་འབྱུང་། །རྡུལ་ཕྲན་གང་དག་རྒྱུར་འགྱུར་ནི། །དངོས་པོ་འཇིག་པ་མེད་པར་ཏེ། །རྣམ་པར་རྟོག་ལ་མི་རྟོག་ཅིང་། །རྒྱུ་ཡི་བདག་དང་ནང་གི་བདག །བདག་གི་མཆོག་ཀྱང་མེད་པ་སྟེ། །བདག་དང་དབང་པོ་ཡིད་དང་དོན། །འདུས་པའི་རྒྱུ་ནི་མ་ཡིན་ཏེ། །ཕྲད་ལས་འབྱུང་དང་རྣམ་ཤེས་དང་། །རྐྱེན་རྣམས་ཡོད་པ་མ་ཡིན་ནོ། །ཤེས་ཅན་ཤེས་པས་ཡུལ་རྣམས་ལ། །མཁས་པའི་སྟོབས་དང་ལྡན་པས་ནི། །སྡེ་དཔུང་སྟོབས་དང་བཞོན་བཅས་པའི། །ཉོན་མོངས་བདུད་རྣམས་གདུལ་བར་བྱ། །སྲེད་པ་འཇིག་རྟེན་དམའ་བར་བྱེད། །སྦྲང་རྩིས་བད་ཀན་མང་པོ་བཞིན། །སྲེད་པ་བཅོམ་ཞིང་ཐུབ་པའི་རྣམས། །རྣམ་པ་མང་ལས་རྣམ་པར་གྲོལ། །སྲེད་པས་རྣམ་པར་དཀྲུགས་པ་ན། །འཁོར་ལས་རྣམ་པར་མི་འགྲོལ་ཏེ། །སྲེད་དང་རྣམ་བྲལ་འཐར་བར་འགྱུར། །དེ་བས་རྣལ་འབྱོར་སྦྱར་བར་གྱིས། །ཡུན་རིང་ཡོད་པའི་བག་ཆགས་ནི། །སྦྲུལ་གདུག་ཁྲོས་པ་ཇི་བཞིན་ཡང་། །འདི་དང་ཕ་བིར་འདྲིད་པ་ནི། །འཁོར་བའི་ལམ་རྒྱུད་དོག་པར་རོ། །འཕགས་པ་རྒྱན་སྟུག་པོ་ལས་རྣལ་འབྱོར་རྣམ་པར་ཕྱེ་བའི་སྤྱོད་པ་ཞེས་བྱ་བའི་ལེའུ་སྟེ་དྲུག་གོ།། །།